၁ ဘုရားသခင်က လူ့ဇာတိဖြစ်လာသောအခါ၌၊ လူသားမျိုးနွယ်ကြားမှာ အသက်ရှင်နေထိုင်ရင်းနှင့် လူတို့နှင့် ဘေးချင်းယှဉ်ပြီး သာမန်၊ ပုံမှန်လူသားတစ်ယောက်ဖြစ်လာသောအခါတွင် လူတို့၏ စားဝတ်နေရေးအတွက် နည်းလမ်းများ၊ ဥပဒေများ၊ အတွေးအခေါ်များကို သူ မမြင်ရ၊ မခံစားရသလော။ လူသားမျိုးနွယ်၏ စားဝတ်နေရေးအတွက် နည်းလမ်းများ၊ ဥပဒေများစသဖြင့်၊ ၎င်းတို့အားလုံးသည် စာတန်၏ စဉ်းစားပုံ၊ အသိပညာနှင့် အတွေးအခေါ်တို့ကို အခြေခံထားပြီး ဖန်တီးခဲ့သည်။ ဤဥပဒေတို့အောက်တွင် အသက်ရှင်နေထိုင်သော လူသားတို့သည် လူ့သဘာဝမရှိပေ။ သမ္မာတရားမရှိပေ။ သူတို့အားလုံးက သမ္မတရားကို ဖီဆန်သည်။ ဘုရားသခင်၏ အနှစ်သာရကို ကြည့်ကြည့်လျှင် သူ၏အနှစ်သာရသည် စာတန်၏ စဉ်းစားပုံ၊ အသိပညာနှင့် အတွေးအခေါ်တို့နှင့် လုံးဝ ဆန့်ကျင်ဘက်ဖြစ်နေသည်ကို တွေ့ရသည်။ သူ့အနှစ်သာရသည် ဖြောင့်မတ်ခြင်း၊ သမ္မာတရား၊ သန့်ရှင်းမြင့်မြတ်ခြင်းနှင့် အပြုသဘောဆောင်သောအရာတို့အားလုံး၏ တကယ့်အစစ်အမှန်တို့နှင့် ပြည့်နေသည်။ ဤအနှစ်သာရကို ပိုင်ဆိုင်ပြီး ဤကဲ့သို့ လူသားမျိုးနွယ်ကြားမှာ အသက်ရှင်နေထိုင်နေသော ဘုရားသခင်သည် သူ့နှလုံးသားမှာ သူ မည်ကဲ့သို့ခံစားရမည်နည်း။ နာကျင်မှုတို့နှင့် ပြည့်နေသလော။ သူ့နှလုံးသားက နာကျင်နေပြီး ဤနာကျင်မှုက မည်သူကမျှနားလည်နိုင် သို့မဟုတ် သိမြင်နိုင်သော အရာတစ်ခုမဟုတ်ပေ။

၂ အဘယ့်ကြောင့်ဆိုသော် သူရင်ဆိုင်ရသော၊ ကြုံတွေ့ရသော၊ ကြားရ၊ မြင်ရသောအရာရာတိုင်းက လူသားမျိုးနွယ်၏ ဖောက်ပြန်ပျက်စီးခြင်း၊ ဆိုးယုတ်ခြင်း၊ သမ္မာတရားအပေါ် သူတို့၏ ပုန်ကန်ခြင်း၊ ခုခံခြင်းတို့ပင် ဖြစ်သောကြောင့်ဖြစ်သည်။ လူသားဆီမှ လာသောအရာအားလုံးက သူ၏ ဒုက္ခခံစားရခြင်း အရင်းအမြစ်ပင်ဖြစ်သည်။ ဆိုလိုသည်မှာ သူ၏ အနှစ်သာရက ဖောက်ပြန်ပျက်စီးသော လူသားတို့နှင့် မတူညီသည့်အတွက်ကြောင့် ဖောက်ပြန်ပျက်စီးသောလူသားတို့သည် သူ၏ကြီးမားသော ဒုက္ခခံစားရခြင်း၏ အရင်းအမြစ်ဖြစ်လာပါသည်။ ဘုရားသခင်က လူ့ဇာတိဖြစ်လာသောအခါမှာ သူနှင့် ဘာသာစကားတူညီသော လူတစ်ယောက်ကို သူရှာတွေ့နိုင်ပါသလော။ လူသားမျိုးနွယ်ကြားမှာ သူရှာ၍မရနိုင်ပေ။ ဘုရားသခင်နှင့် ဆက်သွယ်ပြောဆိုနိုင်သော၊ ဘုရားသခင်နှင့် ခွန်းတုံ့ဖလှယ်နိုင်သောသူ တစ်ယောက်မျှ မတွေ့ပေ။ ဘုရားသခင်မှာ မည်ကဲ့သို့ခံစားချက်မျိုးရှိမည်ဟု သင်ဆိုမည်နည်း။ လူတို့ ဆွေးနွေးသော အကြောင်းအရာများ၊ သူတို့ချစ်သောအရာများ၊ သူတို့ အားထုတ်ကြိုးပမ်းသောအရာတို့နှင့် တောင့်တမှုတို့အားလုံးက အပြစ်နှင့် မကောင်းမှုဘက်ကို ယိုင်နေသောအရာတို့နှင့်ပင် ပတ်သက်နေပါသည်။ ဘုရားသခင်က ၎င်းတို့အားလုံးကို ရင်ဆိုင်ရသောအခါ၌ သူ့နှလုံးသားကို ဓါးတစ်ချောင်းထိုးထားသကဲ့သို့မဖြစ်ဘူးလော။ ဤအရာတို့ကို ရင်ဆိုင်ပြီးသောနောက် သူ့နှလုံးသားမှာ ဝမ်းမြောက်ခြင်း ရှိနိုင်ပါမည်လား။ ဖြေသိမ့်စရာကို သူရှာနိုင်ပါမည်လား။ သူနှင့် နေထိုင်နေသောသူတို့သည် ပုန်ကန်ခြင်းနှင့် ဆိုးယုတ်ခြင်းတို့နှင့် ပြည့်နေပါသည်။ သူ့နှလုံးသားက မည်ကဲ့သို့ ဒုက္ခမခံစားဘဲ နေနိုင်မည်နည်း။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဘုရားသခင်၏ အမှုတော်၊ ဘုရားသခင်၏ စိတ်သဘောထားနှင့် ဘုရားသခင် ကိုယ်တော်တိုင် (၃)” ကို ကောက်နုတ်၍ ဆီလျော်စွာ ပြုပြင်ထားသည်။