၁ လူအများအပြားသည် ယနေ့ထက်ထိတိုင် ငါ့နောက်သို့ မဆိုင်းမတွ လိုက်ခဲ့ကြသည်။ ထို့ကြောင့် ယခင်နှစ်များတစ်လျှောက်၌ သင်တို့သည် အလွန်ပင်ပန်းနွမ်းလျမှုကိုလည်း ခံစားခဲ့ကြရ၏။ ငါသည် သင်တို့ အယောက်စီတိုင်း၏ ပင်ကိုစရိုက်နှင့် အလေ့အထများကို စေ့စေ့စပ်စပ် နားလည်ပြီးဖြစ်သည်၊ သင်တို့တစ်ယောက်စီတိုင်းနှင့် ဆက်ဆံရသည်မှာ အလွန့်အလွန်ပင် ခဲယဉ်းလှသည်။ ဝမ်းနည်းစရာကောင်းသည်မှာ ငါသည် သင်တို့အကြောင်း များစွာသိထားသော်လည်း သင်တို့သည် ငါ့အကြောင်းကို နည်းနည်းလေးမျှပင် နားမလည်ကြခြင်းဖြစ်သည်။ သင်တို့သည် ငါ၏စိတ်ထဲ၌ ရှိသည့်အရာကို နားလည်ရန်ဝေးစွ၊ ငါ၏စိတ်သဘောထားကိုပင် လုံးဝနားမလည်ကြချေ။ ယခုခေတ်တွင် သင်တို့၌ရှိသည့် ငါနှင့်ပတ်သက်သော လွဲမှားသည့် အမြင်များသည် တစ်မုဟုတ်ချင်း ကြီးထွားလာနေပြီး ငါ့အပေါ်၌ထားသော သင်တို့၏ ယုံကြည်ခြင်းသည်လည်း ဇဝေဇဝါဖြစ်နေသော ယုံကြည်ခြင်းဖြစ်နေသေးသည်။

၂ သင်တို့သည် ငါ့ကိုယုံကြည်ကြသည်ဟု ပြောသည်ထက် သင်တို့သည် ငါ့ကို မျက်နှာလို မျက်နှာရလုပ်ရန် ကြိုးစားနေကြပြီး ငါ့ကို ကြိုးစားဖားနေကြသည်ဟု ပြောခြင်းက ပို၍သင့်တော်လိမ့်မည်။ ငါ့အား ဆုချနိုင်သူ မည်သူမဆို၏နောက်သို့ ငါလိုက်မည်ဖြစ်ပြီး၊ ဘုရားသခင်ဖြစ်စေ၊ မည်သည့်ဘုရားတစ်ပါးပါးဖြစ်စေ ငါ့အား ကြီးစွာသော ဘေးအန္တရာယ်ဆိုးများမှ လွတ်မြောက်စေနိုင်သူကို ငါယုံကြည်မည်ဟူသော သင်တို့၏ ရည်ရွယ်ချက်များသည် အလွန်ပင် ရိုးရှင်းလှသည်။ ယင်းတို့တွင် ငါအမှုထားစရာကိစ္စ တစ်ခုမျှမရှိပေ။ သင်တို့အထဲတွင် ထိုသို့သောသူများစွာရှိကာ ဤအခြေအနေသည် အလွန်စိုးရိမ်ဖွယ်ကောင်း၏။ အကယ်၍ တစ်နေ့တွင် သင်တို့အထဲမှ မည်ရွေ့မည်မျှတို့သည် ခရစ်တော်၏အနှစ်သာရကို ထိုးထွင်းမြင် သောကြောင့် ခရစ်တော်ကို ယုံကြည်ကြသည်ကို သိရန် စမ်းသပ်မှု တစ်ရပ်ပြုမည်ဆိုပါက သင်တို့အထဲမှ တစ်ယောက်တလေကမျှ ငါ့အတွက် စိတ်ကျေနပ်ဖွယ်မဖြစ်မည်ကို ငါစိုးရိမ်သည်။

၃ သင်တို့၏ ဘုရားသခင်၌ ယုံကြည်ခြင်းသည် စိတ်ကူးစိတ်သန်းများနှင့် ပြည့်နေပြီး သင်တို့ယုံကြည်သော ဘုရားသခင်သည် လက်တွေ့ကျသော ဘုရားသခင်နှင့် လုံးဝ ကွာခြားသည်။ ထိုသို့ဖြစ်သောကြောင့် ဘုရားသခင်အပေါ်၌ထားသော သင်တို့ ယုံကြည်ခြင်း၏ အနှစ်သာရမှာ အဘယ်နည်းဟူသည့် မေးခွန်းကို သင်တို့အယောက်စီတိုင်း သုံးသပ်ဆင်ခြင်ကြည့်ပါက အကျိုးယုတ်မည် မဟုတ်ပေ။ သင်တို့၏ ဘုရားသခင်ဟုဆိုသောအရာကို သင်တို့ ယုံကြည်လေလေ၊ သင်တို့သည် ငါနှင့်ဝေးရာသို့ လမ်းလွဲလေလေဖြစ်သည်။ သို့ဖြစ်လျှင် ဤပြဿနာ၏ အဓိကအချက်မှာ အဘယ်နည်း။ ဤမေးခွန်းမျိုးကို သင်တို့အနေဖြင့် မသုံးသပ်မဆင်ခြင်ဖူးသည်မှာ သေချာသည်၊ သို့သော် ဤမေးခွန်း၏ လေးနက်မှုကို သင်တို့ စဉ်းစားမိဖူးသလော။ ဤပုံစံမျိုးနှင့် ဆက်လက်ယုံကြည်နေခြင်း၏ အကျိုးဆက်များကို သင်တို့စဉ်းစားဖူးသလော။

“နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ မြေကြီးပေါ်ရှိ ဘုရားသခင်ကို သိရှိနိုင်ပုံ” ကို ကောက်နုတ်၍ ဆီလျော်စွာ ပြုပြင်ထားသည်