ကျွန်မက မြန်မာကပါ။ ၂၀၁၉ခုနှစ် မှာ အနန္တတန်ခိုးရှင် ဘုရားသခင်ရဲ့ နောက်ဆုံးသော ကာလ အမှုတော်ကို ကျွန်မ လက်ခံခဲ့တယ်။ ဘုရားက ကျွန်မတို့ကို လှပတဲ့ ခရီးပန်းတိုင်တစ်ခုဆီ ခေါ်ဆောင်ရင်းနဲ့ လူသားကို စာတန်ရဲ့ စွမ်းအားကနေ အပြည့်အဝ ကယ်တင်ဖို့ နောက်ဆုံးသော ကာလမှာ သူ့ရဲ့ တရားစီရင်ခြင်း အမှုကို ဆောင်ရွက်တယ်လို့ ဘုရားနှုတ်ကပတ်တော်ကနေ သိရတယ်။ ဘုရားရဲ့ ကယ်တင်ခြင်းအတွက် အရမ်းကျေးဇူးတင်မိတယ်။ အဲဒီကတည်းက အသင်းတော်မှာ ဧဝံဂေလိကို ကျွန်မ ဖြန့်နေခဲ့တာပါ။ စုဝေးပွဲမှာ ဘုရားနှုတ်ကပတ်တော်တစ်ပိုဒ်ကို ကျွန်မ ဖတ်တယ်။ “ငါ၏နောက်ဆုံးအလုပ်သည် လူသားကို အပြစ်ပေးရန်အတွက်သာ မဟုတ်ဘဲ၊ လူသား၏ ပန်းတိုင်ကို စီစဉ်ရန် အတွက်လည်းဖြစ်၏။ ထိုထက်မက ယင်းသည် ငါ၏ ပြုမူလုပ်ဆောင်ချက်များကို လူအားလုံး အသိအမှတ်ပြုရန်အလို့ငှာ ဖြစ်သည်။ ငါပြုလုပ်ခဲ့သည့် အမှုအရာအားလုံးသည် မှန်ကန်ကြောင်းနှင့် ငါပြုလုပ်ခဲ့သည့် အမှုအရာ အားလုံးသည် ငါ၏ စိတ်သဘောထားကို ဖော်ပြခြင်းဖြစ်ကြောင်း လူခပ်သိမ်းတို့အား ငါသိစေလို၏။ လူသားမျိုးနွယ်ကို မွေးဖွားခဲ့သည့်အရာသည် လူသား၏လုပ်ဆောင်ချက် မဟုတ်၊ သဘာဝကြောင့် သာ၍ပင်မဟုတ်ဘဲ ဖန်ဆင်းခြင်းတွင် သက်ရှိအရာတိုင်းကို အာဟာရပေးသည်မှာ ငါ ဖြစ်သည်။ ငါမရှိလျှင် လူသားမျိုးနွယ်သည် ပျက်စီးခြင်းသို့သာ ရောက်ပြီး ကပ်ဘေးများစွာ၏ဒုက္ခကို ခံစားရလိမ့်မည်။ လှပသည့်နေနှင့်လ သို့မဟုတ် စိမ်းလန်းစိုပြေသည့် ကမ္ဘာမြေကို မည်သည့်လူသားမျှ နောက်ထပ် မြင်တွေ့ရလိမ့်မည် မဟုတ်ပေ။ လူသားမျိုးနွယ်သည် အလွန်အေးစက်သော ညများနှင့် ရှောင်လွှဲမရသည့် သေမင်း၏အရိပ်လွှမ်းမိုးသော ချိုင့်ဝှမ်းနှင့်သာ ကြုံတွေ့ရလိမ့်မည်။ ငါသာလျှင် လူသားမျိုးနွယ်၏ တစ်ခုတည်းသော ကယ်တင်ရာဖြစ်၏။ ငါသာလျှင် လူသားမျိုးနွယ်၏ တစ်ခုတည်းသော မျှော်လင့်ရာ ဖြစ်သည်သာမက၊ ငါသည် လူသားမျိုးနွယ်တစ်ရပ်လုံး၏ တည်ရှိခြင်းအတွက် တည်မှီရာဖြစ်သည်။ ငါမရှိလျှင် လူသားမျိုးနွယ်သည် ချက်ချင်း လုံးဝဥဿုံရပ်တန့်သွားမည်။ ငါ့ကို မည်သူမျှ အလေးမစိုက်သော်လည်း၊ ငါမရှိလျှင် လူသားမျိုးနွယ်သည် ရုတ်တရက် ဖြစ်ပွားသည့် ကပ်ဘေးဒဏ်ခံရပြီး တစ္ဆေအမျိုးမျိုးတို့၏ ဖဝါးအောက် နင်းချေခြင်းခံရလိမ့်မည်။ အခြားမည်သူမျှ မပြုနိုင်သည့်အမှုကို ငါပြုခဲ့ပြီဖြစ်ပြီး လူသားသည် ငါ့ကို အချို့သော ကောင်းမှုများဖြင့် ကျေးဇူးပြန်ဆပ်ရန်သာ ငါမျှော်လင့်သည်။ ငါ့ကို ကျေးဇူးဆပ်နိုင်သူတို့မှာ အလွန်နည်းပါးသော်လည်း၊ ငါသည် ဤလူ့လောကတွင် ငါ၏ခရီးကို အဆုံးသတ်ပြီး ငါ၏ဖွင့်လှစ်ပြခြင်းအမှု၏ နောက်တစ်ဆင့်ကို စတင်ဦးမည် ဖြစ်သည်၊ အကြောင်းမူကား ဤနှစ်ပေါင်းများစွာ လူသားအကြား ငါ၏ခေါက်တုံ့ခေါက်ပြန် အပူတပြင်း လုပ်ဆောင်မှုသည် အကျိုးဖြစ်ထွန်းပြီးဖြစ်၍ ငါသည် အလွန်ကျေနပ်၏။ ငါအရေးစိုက်သည်မှာ လူအရေအတွက် မဟုတ်ဘဲ၊ သူတို့၏ ကောင်းမှုများသာ ဖြစ်၏။ မည်သို့ပင်ဖြစ်စေကာမူ သင်တို့ကိုယ်တိုင်၏ ပန်းတိုင်အတွက် ကောင်းမှုများအလုံအလောက် သင်တို့ပြင်ဆင်မည်ဟု ငါမျှော်လင့်၏။ ထိုအခါ ငါကျေနပ်လိမ့်မည်။ သို့မဟုတ်ပါက သင်တို့ အပေါ်ကျရောက်လာမည့် ဘေးအန္တရာယ်ကို သင်တို့တစ်ဦးမျှ ရှောင်နိုင်မည် မဟုတ်။ ဤဘေးဒုက္ခသည် ငါ့ထံမှစတင်၍ ငါစီစဉ်ညွှန်ကြားခြင်း ဖြစ်သည်မှာ မှန်ပေသည်။ ငါ၏အမြင်၌ သင်တို့သည် ကောင်းမွန်ပုံ မပေါက်လျှင် သင်တို့သည် ဘေးဒုက္ခခံစားရခြင်းမှ လွတ်မြောက်နိုင်လိမ့်မည် မဟုတ်ပေ။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ သင်၏ ပန်းတိုင်အတွက် လုံလောက်သော ကောင်းမှုများကို ပြင်ဆင်လော့) ဘုရားနှုတ်ကပတ်တော် ဖတ်ရာကတစ်ဆင့် ကျွန်မ အရမ်း ခွန်အားရတယ်။ ကပ်ဘေးတွေက ကြီးသထက်ကြီးနေပြီး ဘုရားရဲ့ ပေါ်ထွန်ခြင်းကို တောင့်တကြသူ အတော်များများက သူ့အသံကို မကြားရသေးတော့၊ သူ့ရဲ့ နောက်ဆုံးသော ကာလ ကယ်တင်ခြင်းကို လက်မခံရသေးတော့ ကျွန်မ ပူပန်ပြီး စိတ်စောနေမိတယ်။ ဒါကြောင့် ပိုများတဲ့ လူတွေဆီ သူ့ရဲ့ နောက်ဆုံးသော ကာလ ဧဝံဂေလိ ဖြန့်ရာမှာ လမ်းပြဖို့ ဘုရားဆီ တောင်းလျှောက်ရင်း ဆုတောင်းခဲ့တယ်။

၂၀၂၂ ခုနှစ် ဇူလိုင်လ အစောပိုင်းမှာ ရွာတစ်ရွာကို ဧဝံဂေလိ ဖြန့်ဖို့ ညီအစ်ကို မောင်နှမတချို့နဲ့ သွားခဲ့ကြတယ်။ အဲဒီနေရာမှာ တရားဟောတဲ့အတွက် ညီအစ်ကိုတစ်ယောက် အတိုင်ခံရပြီး အဖမ်းခံခဲ့ရပြီးပြီ။ ဒါကြောင့် ရွာသူကြီးက စီရင်စု အစိုးရအစည်းအဝေးကနေ ပြန်လာတိုင်း ရွာသားတွေကို ဘာသာရေးမလုပ်ဖို့ ပြောတယ်။ ယုံကြည်သူတစ်ယောက်ယောက် မိသွားရင် ဒဏ်ငွေအများကြီး ဆောင်ရမယ်၊ မဟုတ်ရင် အဖမ်းတောင်ခံရမှာ။ ဒါကြောင့် ကျွန်မတို့ ဟောတာကို ဘယ်သူမှ နားမထောင်ရဲကြဘူး။ သူတို့ နားမထောင်ခင် ရွာသူကြီးနဲ့ ကျွန်မတို့ စကားပြောသင့်တယ်လို့ ပြောကြတယ်။ ကျွန်မက အပြင်လူလေ။ ကျွန်မနဲ့ ဧဝံဂေလိ ဖြန့်သူတွေ အားလုံးက အနီးအနား ရွာတွေကဖြစ်ပြီး ရွာသူကြီးကို ကျွန်မတို့ မသိကြဘူး။ ဒေသခံတွေကလည်း သူ့ကို တွေ့ဖို့ ကျွန်မတို့ကို ခေါ်သွားမှာ မဟုတ်ဘူး။ ဒီအခက်အခဲတွေကို ဘယ်လိုဖြေရှင်းရမှန်း မသိခဲ့ကြဘူး။ ပြီးတော့ အချိန်မရွေး အတိုင်ခံရပြီး အဖမ်းခံရမဲ့ အန္တရာယ်ကလည်း ရှိနေတယ်။ လမ်းပြဖို့ ဘုရားဆီ တောင်းလျှောက်ရင်းနဲ့ ကျွန်မ ဆုတောင်းခဲ့တယ်။ စုဝေးပွဲမှာ ဘုရားနှုတ်ကပတ်တော် တစ်ပိုဒ်ကို ကျွန်မတို့ ဖတ်ကြတယ်။ “အရာရာသည် ဘုရားသခင်၏ လက်၌ရှိပြီး လူသားများသည် သူနှင့်အတူ ပူးပေါင်းလုပ်ဆောင်ရုံမျှ လုပ်ဆောင်နေကြခြင်း ဖြစ်သည်ကို သင် ယုံကြည်ခြင်း ရှိရမည်။ သင်၏ စိတ်နှလုံး စစ်မှန်ရိုးသားပါက၊ ဘုရားသခင်သည် မြင်လိမ့်မည်ဖြစ်ပြီး အခက်အခဲများကို မခက်ခဲစေတော့ဘဲလျက်၊ သင့်အတွက် လမ်းကြောင်းများအားလုံး ဖွင့်ပေးလိမ့်မည်။ ဤသည်မှာ သင် ရှိရမည့် ယုံကြည်ခြင်း ဖြစ်သည်။ ထို့ကြောင့် သင်၏ အစွမ်းအစအားလုံးကို သင် အသုံးပြုပြီး အင်တိုက်အားတိုက် ကြိုးစားဆောင်ရွက်သရွေ့ သင်တို့၏ တာဝန်ကို ထမ်းဆောင်နေစဉ်တွင် သင်တို့သည် မည်သည့်အရာနှင့် ပတ်သက်၍မျှ စိုးရိမ်ဖို့ မလိုအပ်ပေ။ ဘုရားသခင်သည် အမှုအရာများကို သင့်အတွက် ခက်ခဲစေလိမ့်မည် မဟုတ် သို့မဟုတ် သင် မတတ်စွမ်းနိုင်သည့်အရာကို သင့်အား အတင်းအကျပ် လုပ်ဆောင်စေလိမ့်မည် မဟုတ်ပေ။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောချက်များ၊ ဘုရားသခင်ကို ယုံကြည်ခြင်း၌ အရေးအကြီးဆုံးသောအရာမှာ လက်တွေ့လုပ်ဆောင်ခြင်းနှင့် သူ၏နှုတ်ကပတ်တော်များကို တွေ့ကြုံခြင်းဖြစ်သည်) ဘုရားနှုတ်ကပတ်တော်တွေက ယုံကြည်ခြင်းနဲ့ ခွန်အားပေးတယ်လေ။ ဧဝံဂေလိဖြန့်တာ ဘယ်လိုပဲ ခက်ခဲပါစေ၊ အစိုးရက ကျွန်မတို့ကို ဘယ်လိုပဲ ဖိနှိပ်ပါစေ ရွာသူကြီးကို ကျွန်မ တွေ့လို့ရရ မရရ၊ အတိုင်ခံရပြီး အဖမ်းခံရခြင်း ရှိမရှိဆိုတာ ဘုရားလက်ထဲမှာ လုံးလုံးလျားလျား ရှိတယ်။ ဧဝံဂေလိ ဖြန့်ဝေတာက ဘုရားညွှန်ကြားချက်၊ ဘုရား ပြီးစီးစေချင်တဲ့ အရာတစ်ခုပဲ။ အဲဒါကို အစိုးရက ဖိနှိပ်ပြီး ရွာသူကြီးက ဟန့်တားရင်တောင် ဘုရားနိုင်ငံတော် ဧဝံဂေလိတရား ကျယ်ပြန့်တာကို သူတို့ တားဆီးနိုင်မှာ မဟုတ်ဘူး။ ဘုရားရဲ့သိုးတွေ သူ့ဆီ ပြန်သွားကြတာကို သူတို့ တားနိုင်မှာ မဟုတ်ဘူး။ အလုပ်မှာ ကျွန်မတို့အစွမ်းကုန် ကြိုးစားသရွေ့ ဘုရားက လမ်းပြပြီး ကျွန်မတို့အတွက် လမ်းကြောင်းတစ်ခု ဖွင့်ပေးမယ်ဆိုတာ သိခဲ့တယ်။ ဘုရားအလိုတော်ကို နားလည်လိုက်တာနဲ့ အားလုံးက ဧဝံဂေလိ ဖြန့်ဖို့ ယုံကြည်ချက် ရှိသွားကြတာပေါ့။ အနီးအနားရွာက ညီအစ်ကိုတစ်ယောက်က ရွာသူကြီးနဲ့ အမျိုးတော်နေခဲ့တယ်။ နောက်နေ့မှာ ရွာသူကြီးနဲ့ တွေ့ဖို့ ကျွန်မတို့ကို သူ ခေါ်သွားမယ်တဲ့။ အဲဒီညနေမှာ ကျွန်မတို့ ရွာကိုပြန်ရောက်ပြီး လူ့သဘာဝကောင်းရှိကြတဲ့ ဒေသခံတချို့ကို တရားသွားဟောကြတယ်။ ကျွန်မတို့ မိတ်သဟာယပြုနေရင်းနဲ့ မမျှော်လင့်ဘဲ လက်ထောက်ရွာသူကြီးနဲ့ ဘဏ္ဍာရေးမှူးက ပေါ်လာကြပြီး နည်းနည်း နားထောင်ပြီးတော့ ထွက်သွားကြတယ်။ ရွာသားတစ်ယောက်က ပြောတယ်၊ “ခင်ဗျားတို့ ဧဝံဂေလိ ဟောနေကြလား သူတို့ လာကြည့်ကြတာ။ ကျွန်တော်တို့ ထပ်ပြီး နားမထောင်သင့်တော့ဘူး။ အရင်ဆုံး ရွာသူကြီးနဲ့ သွားစကားပြောပါ။ သူ သဘောတူရင်း ထပ်နားထောင်မယ်”တဲ့။ ထွက်သွားဖို့ကလွဲလို့ ကျွန်မတို့မှာ ရွေးစရာမရှိခဲ့ဘူး။ အိမ်ပြန်ရောက်တော့ ကျွန်မ တော်တော် စိတ်ဓာတ်ကျမိတယ်။ ကျွန်မတို့ ဧဝံဂေလိ ဝေမျှနေတာကို လက်ထောက်ရွာသူကြီးက သိတယ်။ သူသာ တားဆီးရင် ရွာသားတွေက စစ်မှန်တဲ့ လမ်းခရီးကို တကယ် စုံစမ်းတော့မှာမဟုတ်ဘူး။ ပြီးတော့ အရင်က အဲဒီညီအစ်ကို အဖမ်းခံရတုန်းက ဘဏ္ဍာရေးမှူး တိုင်းကြားရာကနေ ဖြစ်ခဲ့တာလေ။ ကိုယ်တိုင် အဖမ်းခံရမှာကိုလည်း စိုးရိမ်ရင်းနဲ့ ရွာသူကြီးဆီ သွားစကားမပြောချင်ခဲ့ဘူး။ ကျွန်မရဲ့ အခြေအနေကို ကြီးကြပ်ရေးမှူးက သိသွားပြီး ကျွန်မကို မိတ်သဟာယပြုတယ်။ “အဲဒီအခြေအနေမျိုးနဲ့ ရင်ဆိုင်ရတော့ ငါတို့ နောက်ပြန်ဆုတ်လို့မရဘူး။ အဲဒီအခွင့်အရေးကို သူတို့နဲ့ ဧဝံဂေလိ ဝေမျှဖို့ ငါတို့ သုံးရမယ်။ ငါတို့တာဝန်တွေကို ဖြည့်ဆည်းသရွေ့ ဧဝံဂေလိကို သူတို့ လက်ခံသည်ဖြစ်စေ၊ လက်မခံသည်ဖြစ်စေ ကျွန်မတို့ လိပ်ပြာသန့်မှာပဲ”တဲ့။ အဲဒီအချိန်မှာပဲ အရင်က ဖတ်ခဲ့တဲ့ ဘုရားနှုတ်ကပတ်တော်တစ်ပိုဒ်ကို တွေးမိတယ်။ “ဧဝံဂေလိ ဖြန့်ဝေရာတွင် သင်၏တာဝန်ကို ဖြည့်ဆည်းပြီး သင် ဧဝံဂေလိဖြန့်ဝေသည့်သူတိုင်းကို စိတ်ပါလက်ပါ ကိုင်တွယ်ဖြေရှင်းရမည်။ ဘုရားသခင်သည် လူများကို ဖြစ်နိုင်သမျှ အကြီးမားဆုံး အတိုင်းအတာအထိ ကယ်တင်ပြီး၊ သင်သည် ဘုရားသခင်၏ အလိုတော်ကို အလေးဂရုပြုမည်။ စစ်မှန်သော လမ်းခရီးကို ရှာဖွေပြီး ဆင်ခြင်စဉ်းစားနေသည့် မည်သူ့ကိုမျှ ပေါ့ပေါ့တန်တန် လျစ်လျူမရှုရပေ။...မှန်သောလမ်းကို ၎င်းတို့သုံးသပ်ဆင်ခြင်နိုင်ပြီး သမ္မာတရားကို ရှာဖွေနိုင်သရွေ့ ၎င်းတို့ကို ဘုရားနှုတ်ကပတ်တော်များ ပို၍ ဖတ်ပြကာ သမ္မာတရားကို ပို၍ မိတ်သဟာယဖွဲ့ပေးရန်၊ ဘုရားသခင်၏ အမှုတော်ကို သက်သေခံပြီး ၎င်းတို့၏ အယူအဆများနှင့် မေးခွန်းများကို ဖြေရှင်းပေးရန် တတ်နိုင်သမျှ လုပ်ဆောင်သင့်သည်။ ဤနည်းအားဖြင့် ၎င်းတို့ကို ရရှိနိုင်ပြီး ဘုရားသခင်ရှေ့သို့ ခေါ်ဆောင်လာနိုင်ရန်အတွက်ဖြစ်သည်။ ဤသည်မှာ ဧဝံဂေလိဖြန့်ဝေခြင်း စည်းမျဉ်းများနှင့် ညီသောအရာဖြစ်၏။ သို့ဖြစ်လျှင် ၎င်းတို့ကို မည်သို့ရရှိနိုင်သနည်း။ ၎င်းတို့နှင့် ထိတွေ့ဆက်ဆံခြင်း ဖြစ်စဉ်တွင်၊ ဤပုဂ္ဂိုလ်သည် အစွမ်းအစကောင်းမွန်ပြီး လူ့သဘာဝကောင်းမွန်ကြောင်း သင် သေချာအောင် လေ့လာစိစစ်ပါက၊ သင့်တာဝန်ကို ဖြည့်ဆည်းရန် တတ်နိုင်သမျှ လုပ်ဆောင်ရမည်။ သင်သည် အဖိုးအခအချို့ ပေးဆပ်ရမည်ဖြစ်ပြီး အချို့သောနည်းလမ်းများနှင့် နည်းစနစ်များကို အသုံးပြုရမည်။ ၎င်းတို့ကို ရရှိဖို့ဖြစ်သရွေ့၊ မည်သည့်နည်းလမ်းများနှင့် နည်းစနစ်များကို သင် အသုံးပြုပါစေ အရေးမကြီးပေ။ အချုပ်အားဖြင့်ဆိုရသော် ၎င်းတို့ကို ရရှိရန်အလို့ငှာ သင့်တာဝန်ကို ဖြည့်ဆည်းရမည်၊ ချစ်ခြင်းမေတ္တာကို အသုံးပြုကာ အရာရာကို အစွမ်းကုန် လုပ်ဆောင်ရမည်ဖြစ်သည်။ သင်နားလည်သဘောပေါက်သည့် သမ္မာတရားအားလုံးကို မိတ်သဟာယပြုပြီး သင်လုပ်ဆောင်သင့်သည့် အရာအားလုံးကို လုပ်ဆောင်ရမည်ဖြစ်သည်။ ဤလူကို မရရှိခဲ့လျှင်ပင် သင်သည် လိပ်ပြာလုံသောစိတ်ဖြင့် ကျန်ရစ်လိမ့်မည်ဖြစ်သည်။ ဤသည်မှာ သင်လုပ်ဆောင်နိုင်သည့်အရာနှင့် လုပ်သင့်သည့်အရာအားလုံးကို လုပ်ဆောင်ခြင်း ဖြစ်သည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောချက်များ၊ ဧဝံဂေလိတရား ဖြန့်ဝေခြင်းသည် ကျင့်ဝတ်သိက္ခာအရ ယုံကြည်သူများအားလုံး မဖြစ်မနေလုပ်ရမည့် တာဝန်တစ်ခုဖြစ်သည်) တရားဟောနေချိန်မှာ လိပ်ပြာသန့်ဖို့ ကျွန်မတို့တာဝန်တွေကို ဖြည့်ဆည်းရမယ်လို့ ဘုရားနှုတ်ကပတ်တော်တွေက ပြောတယ်။ အဟောခံရတဲ့သူက စည်းမျဉ်းတွေနဲ့ ကိုက်ညီသရွေ့ ဖြစ်နိုင်တဲ့ ဘယ်နည်းနဲ့ဆို သူတို့ကို ဧဝံဂေလိ ဝေမျှသင့်တယ်။ ရွာသားတွေက စစ်မှန်တဲ့ လမ်းခရီးကို စုံစမ်းစစ်ဆေးဖို့ စိတ်ဝင်စားကြတယ်။ ဒဏ်ငွေဆောင်ရမှာ၊ အဖမ်းခံရမှာ ကြောက်ပြီး သူတို့ နားမထောင်ကြတာက အစိုးရရဲ့ ဖိနှိပ်မှုကြောင့်ပဲ ဖြစ်တယ်။ ကျွန်မတာဝန်ကို ကျွန်မ ဖြည့်ဆည်းပြီး သူတို့ရဲ့ ပြဿနာ၊ အခက်အခဲတွေကို ဖြေရှင်းပေးရင်းနဲ့ ဘုရားနှုတ်ကပတ်တော်တွေကို ပိုမိတ်သဟာယပြုသင့်တယ်။ ရွာသူကြီးက ဘုရားနှုတ်ကပတ်တော်ကို နားထောင်ဖို့ အသင့်ရှိပြီး သဘောကောင်းတယ်ဆိုရင် သူ့ကို တရားဟောဖို့ အစွမ်းကုန် ကြိုးစားသင့်တယ်။ အဲဒါက ကျွန်မတာဝန်ကို တကယ် ဖြည့်ဆည်းနေတာ ဖြစ်မှာပဲ။ ဒါပေမဲ့ အတိုင်ခံရပြီး အဖမ်းခံရမှာ ကြောက်လို့ ဧဝံဂေလိ မဝေမျှခဲ့ရင် ဘုရားကို ကျွန်မ အကြွေးတင်မှာ။ ဘုရားအလိုတော်ကို နားလည်လိုက်တာနဲ့ ရွာသူကြီးကို စကားပြောပြီး ရွာသားတွေကို တရားဟောဖို့ ယုံကြည်စိတ်ချမှု ရှိသွားတယ်။

နောက်နေ့မှာ အဲဒီညီအစ်ကိုက ကျွန်မတို့ကို သူကြီးအိမ်ကို ခေါ်သွားတယ်။ လက်ထောက်ရွာသူကြီးနဲ့ ဘဏ္ဍာရေးမှူးတွေလည်း အဲဒီမှာ ရှိနေကြတယ်။ လူသားမျိုးနွယ်ကို ကယ်တင်ဖို့ဖြစ်တဲ့ ဘုရားရဲ့ အမှုတော် အဆင့်သုံးဆင့်နဲ့ ပတ်သက်လို့ အခု ကျွန်မတို့က နောက်ဆုံးသော ကာလမှာ ရှိပြီး အနန္တတန်ခိုးရှင် ဘုရားသခင်က ကြွလာတဲ့ ကယ်တင်ရှင် ဖြစ်တဲ့အကြောင်း ကျွန်မတို့ မိတ်သဟာယပြုခဲ့ကြတယ်။ သူက လူကို သန့်စင်၊ ကယ်တင်ဖို့ သမ္မာတရား ဖော်ပြပြီး တရားစီရင်ခြင်း အမှု ပြုနေတယ်။ ကပ်ဘေးတွေတစ်လျှောက် ဘုရားရဲ့ ကွယ်ကာခြင်းခံရပြီး သူ့နိုင်ငံတော်ထဲ ဝင်ရောက်ဖို့ သူ့ရဲ့ တရားစီရင်ခြင်းနဲ့ သန့်စင်ခြင်းကို ကျွန်မတို့ လက်ခံရမယ်ပေါ့။ ရွာသူကြီးက စိတ်ဝင်စားသွားပြီး စုံစမ်းစစ်ဆေးချင်ခဲ့တယ်။ ဒါပေမဲ့ လက်ထောက် ရွာသူကြီးရော၊ ဘဏ္ဍာရေးမှူးကပါ အပေါက်ဆိုးတယ်။ သူတို့က ပြောတယ်။ “အစိုးရစကားကို ငါတို့ နားထောင်နေရတာ။ သူတို့က ဘာသာရေး ယုံကြည်မှုတွေကို ခွင့်မပြုလို့ ငါတို့ ယုံကြည်လို့မရဘူး။ မဟုတ်ရင် ငါတို့ အဖမ်းခံရမှာ”တဲ့။ သူတို့ရပ်တည်ချက်မှာ တကယ် ခိုင်မာနေတာ တွေ့တော့ သူတို့ကို ဘုရားဆီ အပ်နှံပြီး ဘုရားကို ဦးဆောင်ပေးဖို့ တောင်းလျှောက်ရင်း ကျွန်မ ဆုတောင်းတယ်။ အဲဒီနောက် အနန္တတန်ခိုးရှင် ဘုရားသခင်ရဲ့ နှုတ်ကပတ်တော် တစ်ပိုဒ်ကို ဖတ်တယ်။ “သင်၏နိုင်ငံသည် လတ်တလောတွင် ချမ်းသာကြွယ်ဝကောင်း ကြွယ်ဝနေနိုင်သည်၊ သို့သော် သင်၏ပြည်သူများကို ဘုရားသခင်ထံမှ လမ်းလွဲသွားရန် သင်ခွင့်ပြုပါက၊ သင်၏နိုင်ငံသည် ဘုရားသခင်၏ ကောင်းချီးမင်္ဂလာများကို တိုး၍တိုး၍ ဆုံးရှုံးသည်ကို မိမိဘာသာ တွေ့ရလိမ့်မည်။ သင့်နိုင်ငံ၏ လူ့ယဉ်ကျေးမှုအဖွဲ့အစည်းသည်လည်း ခြေဖဝါးအောက်တွင် တိုး၍တိုး၍ ချနင်းခံရလိမ့်မည်ဖြစ်ပြီး မကြာမီတွင် လူတို့သည် ဘုရားသခင်ကို ထကြွဆန့်ကျင်ပြီး ကောင်းကင်ဘုံကို ကျိန်ဆဲလာကြလိမ့်မည်။ ထိုသို့ဖြင့် လူသားမသိလိုက်ဘဲနှင့်၊ နိုင်ငံတစ်ခု၏ ကံကြမ္မာသည် ပျက်စီးဆုံးရှုံးသွားလိမ့်မည်။ ဘုရားသခင်သည် ဘုရားသခင်၏ကျိန်ခြင်းခံထားရသော ထိုနိုင်ငံများကို ကိုင်တွယ်ဖြေရှင်းရန် အင်အားကြီးနိုင်ငံများကို ပေါ်ထွန်းစေလိမ့်မည် ဖြစ်ပြီး ယင်းတို့ကို ကမ္ဘာမြေမျက်နှာပြင်ပေါ်မှ ဖယ်ရှားခြင်းပင် ပြုနိုင်သည်။ နိုင်ငံတစ်ခု သို့မဟုတ် လူမျိုးတစ်မျိုး၏ ပေါ်ထွန်းခြင်းနှင့် ကျဆုံးခြင်းသည် ထိုနိုင်ငံ၏ အုပ်ချုပ်သူများက ဘုရားသခင်ကို ကိုးကွယ်ခြင်း ရှိမရှိဆိုသည်နှင့် ၎င်းတို့၏ ပြည်သူများကို ဘုရားသခင်နှင့် သာ၍နီးကပ်စေပြီး ဘုရားသခင်ကို ကိုးကွယ်စေခြင်း ရှိမရှိ ဆိုသည့်အပေါ် အခြေခံသည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ နောက်ဆက်တွဲ (၂)- လူသားမျိုးနွယ်တစ်ရပ်လုံး၏ ကံကြမ္မာအပေါ် ဘုရားသခင် တာဝန်ယူဦးဆောင်သည်) ပြီးတော့ ကျွန်မ မိတ်သဟာယပြုတယ်။ “အခု အစိုးရက ယုံကြည်ခြင်းကို ခွင့်မပြုသလို ဘုရားကိုတောင် ဆန့်ကျင်တယ်။ ရှင်တို့က သူတို့စကား နားထောင်ပြီး မယုံကြည်ရဲကြဘူး။ ဘယ်သူက လူတွေကို တကယ် ကယ်တင်နိုင်တာလဲ။ ဘုရားလား၊ အစိုးရလား။ ကပ်ရောဂါက ဒီခေတ်မှာ ဆိုးသထက်ဆိုးလာနေတယ်။ ဆင်းရဲ၊ ချမ်းသာ၊ အင်အားကြီးပါစေ၊ အင်အားနည်းပါစေ လူသားတွေက ကပ်ဘေးနဲ့ ရင်ဆိုင်ရတဲ့အခါ အရေးမပါကြဘူး။ ဘယ်သူကမှ ကျွန်မတို့ကို စာတန်ရဲ့ တန်ခိုးကနေ မကယ်နိုင်ဘူး၊ ကပ်ဘေးတစ်လျှောက် မကာကွယ်ပေးနိုင်ဘူး။ ဘုရားကပဲ ကယ်တင်နိုင်တာ။ ဘုရားက လူကို ကယ်တင်ဖို့ သမ္မာတရား ဖော်ပြပြီး အမှုပြုရင်းနဲ့ နောက်ဆုံးသော ကာလမှာ လူ့ဇာတိခံပြီ။ ဒါက တစ်သက်မှာ တစ်ခါပဲရတဲ့ အခွင့်အရေးပဲ။ ရှင်တို့အားလုံးက ဒီရွာမှာ လူကြီးတွေချည်းပဲ။ ရွာသားတွေရဲ့ ကံကြမ္မာက သူတို့ကို ရှင်တို့ ဦးဆောင်ပုံပေါ် မူတည်တယ်။ သူတို့ကို ဘုရားကို ကိုးကွယ်ဖို့ မဦးဆောင်ဘဲ ဆန့်ကျင်ဖို့ ဦးဆောင်ရင် ဒီရွာက ပျက်စီးကိန်းကြုံမှာပဲ။ လူတိုင်းရဲ့ ကံကြမ္မာက ရှင်တို့အားလုံးကြောင့် ပျက်စီးသွားမှာပဲ”လို့ပေါ့။ အဲဒီအခါ ရွာသူကြီးက ပြောတယ်။ “လူတွေရဲ့ ကံကြမ္မာတွေက ဘုရားလက်ထဲမှာဆိုတာ ကျွန်တော် ယုံသလို ရွာသားတွေကို ဘုရားကို ယုံကြည်ဖို့ ဦးဆောင်လမ်းပြချင်ပါတယ်”တဲ့။ ဘဏ္ဍာရေးမှူးက ပြောတယ်။ “ယုံကြည်ခြင်းရှိတာ ကောင်းမှန်း သိပါတယ်။ ဒါပေမဲ့ အစိုးရကို မလိုက်နာရင် အဖမ်း ခံရမှာ။ ငါတို့ ဘာမှမတတ်နိုင်ဘူး”တဲ့။ နောက်ထပ် ဘုရားနှုတ်ကပတ်တော်တစ်ပိုဒ်ကို ကျွန်မတို့ ဖတ်ပြလိုက်တယ်။ “ဘုရားသခင် ရယူရန် အလိုရှိသည့်အရာကို မည်သည့်နိုင်ငံ သို့မဟုတ် မည်သည့် တန်ခိုးအာဏာကမျှ မတားဆီးနိုင်သည်ကို ငါတို့ယုံကြည်သည်။ ဘုရားသခင်၏ အမှုကို နှောင့်ယှက်သူများ၊ ဘုရားသခင်၏ နှုတ်ကပတ်တော်ကို ဆန့်ကျင်ကာ ဘုရားသခင်၏ အကြံအစည်ကို နှောင့်ယှက်ပြီး ထိခိုက်စေသူများသည် နောက်ဆုံးတွင် ဘုရားသခင်၏ အပြစ်ဒဏ်ပေးခြင်းကို ခံရကြလိမ့်မည်။ ဘုရားသခင်၏ အမှုကို အာခံဖီဆန်သူသည် ငရဲသို့ ပို့ခံရလိမ့်မည်။ ဘုရားသခင်၏ အမှုကို အာခံဖီဆန်သော မည်သည့်နိုင်ငံမဆိုသည် ဖျက်ဆီးခြင်းကိုခံရလိမ့်မည်။ ဘုရားသခင်၏ အမှုကို ဆန့်ကျင်ရန် ထကြွသည့် မည်သည့် လူမျိုးမဆိုသည် ဤကမ္ဘာမြေမှ ဖယ်ရှားခံရလိမ့်မည်ဖြစ်ပြီး အပြီးတိုင် ကွယ်ပျောက်သွားလိမ့်မည်။ လူမျိုးအားလုံး၊ နိုင်ငံအားလုံးနှင့် စက်မှုလုပ်ငန်း အားလုံး၏ လူများကို ဘုရားသခင်၏ အသံအား နားထောင်ရန်၊ ဘုရားသခင်၏ အမှုကို ရှုစားရန်နှင့် လူသားမျိုးနွယ်၏ ကံကြမ္မာကို အာရုံစိုက်ရန်၊ ဘုရားသခင်ကို အသန့်ရှင်းဆုံး၊ ဂုဏ်အသရေ အရှိဆုံး၊ အမြင့်မားဆုံးနှင့် လူသားမျိုးနွယ်အလယ် တစ်ခုတည်းသော ကိုးကွယ်ဆည်းကပ်ရာ ဖြစ်စေဖို့အလို့ငှာနှင့် အာဗြဟံ၏ သားစဉ်မြေးဆက်များက ယေဟောဝါ၏ ကတိတော်များအောက်၌ အသက်ရှင်ခဲ့ကြသကဲ့သို့ပင်၊ ပြီးလျှင် ပထမဦးစွာ ဘုရားသခင် ဖန်ဆင်းခဲ့သော အာဒံနှင့်ဧဝတို့က ဧဒင်ဥယျာဉ်ထဲတွင် အသက်ရှင် ခဲ့သကဲ့သို့ပင်၊ လူသားမျိုးနွယ် တစ်ရပ်လုံးအား ဘုရားသခင်၏ ကောင်းချီးမင်္ဂလာအောက်၌ အသက်ရှင်ခွင့်ပေးရန် ငါ တိုက်တွန်း၏။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ နောက်ဆက်တွဲ (၂)- လူသားမျိုးနွယ်တစ်ရပ်လုံး၏ ကံကြမ္မာအပေါ် ဘုရားသခင် တာဝန်ယူဦးဆောင်သည်) ကျွန်မ မိတ်သဟာယပြုတယ်။ “ဘုရားရဲ့ စိတ်သဘောထားက ဘယ်လူသားရဲ့ ပုန်ကန်ပြစ်မှားမှုကိုမှ သည်းမခံဘူး။ သူ့အမှုတော်ကို ဆန့်ကျင်သူအားလုံးကို သူ အပြစ်ပေးမှာ။ အဲဒါ ဘုရားရဲ့ ဖြောင့်မတ်တဲ့ စိတ်သဘောထားဖြစ်ပြီး ဘယ်သူမှ မလွတ်နိုင်ဘူး။ ကပ်ဘေးတွေက ဆက်တိုးပွားနေတယ်။ အဲဒါက လူသားမျိုးနွယ်အတွက် ဘုရားရဲ့ သတိပေးချက်အပြင် အပြစ်ပေးမှုပဲ။ တရုတ်နိုင်ငံက ဝင်ချွမ်ငလျင်လိုပေါ့။ အဲဒီက လူတွေက ဘုရားကို မကိုးကွယ်ကြဘူးလေ။ သူတို့ကို ညီအစ်ကို မောင်နှမတွေက ဧဝံဂေလိ ဝေမျှခဲ့ကြတယ်။ ဒါပေမဲ့ သူတို့က လက်မခံခဲ့ကြဘူး။ ညီအစ်ကို မောင်နှမတွေကိုတောင် စော်ကားပြီး ဘုရားကို ပြစ်မှားခဲ့ကြတယ်။ ငလျင်လှုပ်တော့ သူတို့အားလုံး ငိုကြွေးပြီး အံသွားခဲကြိတ်ကြပေမဲ့ နောင်တရတာ အရမ်းနောက်ကျသွားခဲ့တယ်။ မြန်မာက ဝပြည်နယ် တောင်ပိုင်းလည်း ဘုရားရဲ့ အမှုတော်ကို ဆန့်ကျင်တယ်။ ယုံကြည်သူတွေကို အစိုးရက မကြာခဏ ဖမ်းပြီး အနန္တတန်ခိုးရှင် ဘုရားသခင်ရဲ့ အမှုတော်ကို လက်ခံတာ ခွင့်မပြုဘူး။ ဒီဇွန်လမှာ အဲဒီမှာ ရေကြီးပြီး အိမ်အတော်များများ ပါသွားတယ်။ ကပ်ဘေးကြီးတွေက ကျွန်မတို့ပေါ် ရောက်မလာသေးလို့ ဒါဟာ နောင်တရဖို့ ဘုရားက ကျွန်မတို့ကို အခွင့်အရေးတွေ ပေးနေတာပဲ။ ကပ်ဘေးတွေ ရောက်လာရင် နောင်တတွေ အရမ်းနောက်ကျသွားမယ်။ တခြားလူတွေကို စော်ကားတာ လုံးဝ ကိစ္စမရှိပေမဲ့ ဘုရားကို ခုခံတဲ့ အကျိုးဆက်တွေက ဆိုးရွားလိမ့်မယ်။ အရင်က ဘုရားကို ဆန့်ကျင်တာတွေ ကျွန်မတို့အားလုံး လုပ်ခဲ့ကြပေမဲ့ ဘုရားဆီမှာ နောင်တရလို့ စစ်မှန်တဲ့ လမ်းခရီးကို စုံစမ်းပြီး ဘုရားဘက်လှည့်အောင် ရွာသားတွေကို ဦးဆောင်လမ်းပြသရွေ့ ဘုရားက ကရုဏာထားပြီး ခွင့်လွှတ်မှာပဲ”လို့ပေါ့။ ကျွန်မ မိတ်သဟာယပြီးသွားတော့ ဘဏ္ဍာရေးမှူးရဲ့ သဘောထားက နည်းနည်း ပျော့လာသလို ထင်ရတယ်။ သူကြီးနဲ့ တခြားလူတွေအားလုံးက ရွာသားတွေကို ဧဝံဂေလိ ဝေမျှခွင့်ပေးဖို့ ကျွန်မတို့ကို သဘောတူကြတယ်။ နောက်နေ့မနက်မှာ ရွာသားတွေအားလုံးကို ကျွန်မတို့ ခေါ်ပြီး ဘုရားရဲ့ နောက်ဆုံးသော ကာလ အမှုတော်နဲ့ ပတ်သက်တဲ့ သက်သေခံချက်ကို ပေးတယ်။ ၁၀ ရက်ကျော် မိတ်သဟာယပြုပြီးတဲ့နောက်မှာ သူကြီးနဲ့ လက်ထောက်သူကြီးအပါအဝင် ရွာထဲက လူ ၄၀ ကျော်က အနန္တတန်ခိုးရှင် ဘုရားသခင်ရဲ့ အမှုတော်ကို လက်ခံခဲ့ကြတယ်။ စုဝေးပွဲတွေမှာ ထက်ထက်သန်သန် ပါဝင်ပြီး တခြားလူတွေကို တရားဒေသနာတွေ လာနားထောင်ခိုင်းပြီးတော့ ဘုရားနှုတ်ကပတ်တော်ကို သူတို့ တောင့်တကြတယ်။ နောက်ပိုင်းမှာ ညီအစ်ကို မောင်နှမတွေ အတူ ပူးပေါင်းပြီး ကြိုးစားအလုပ်လုပ်လိုက်တော့ မြန်မာရွာသားတော်တော်များများ အနန္တတန်ခိုးရှင် ဘုရားသခင်ရဲ့ အမှုတော်ကို လက်ခံခဲ့ကြတယ်။

ဧဝံဂေလိ ဖြန့်လို့ ကျွန်မ သုံးလေးကြိမ် အတိုင်ခံခဲ့ရတယ်။ အနန္တတန်ခိုးရှင် ဘုရားသခင်ကို ကျွန်မ ယုံကြည်တာကို ဇာတိမြို့က လူအများစုက သိကြပြီး ရဲတွေက ကျွန်မကို နေရာတိုင်းမှာ လိုက်ရှာနေကြတယ်။ ကျွန်မက အိမ်မှာမရှိတော့ ကျွန်မမိဘအိမ်ကို သူတို့သွားပြီး မယုံကြည်သူဖြစ်တဲ့ ကျွန်မအမေကို ဖမ်းပြီး ချုပ်ထားလိုက်ကြတယ်။ ကျွန်မ ဒေါသထွက်မိတယ်။ ကျွန်မရဲ့ ယုံကြည်ခြင်းက မှန်ကန်ပြီး သင့်တော်သလို ဧဝံဂေလိ ဝေမျှတာကလည်း လုပ်သင့်တဲ့အရာပဲလေ။ ကျွန်မရဲ့ ယုံကြည်ခြင်းကြောင့် အစိုးရက ကျွန်မကို နေရာတကာ လိုက်ရှာနေခဲ့သလို ကျွန်မကို မမိမချင်း ကျွန်မအမေကို လွှတ်မှာမဟုတ်ဘူးတဲ့။ တရားမျှတမှုက ဘယ်မှာလဲ။ ကျွန်မအမေ အဖမ်းခံရတာ ကျွန်မရဲ့ ယုံကြည်ချက်ကြောင့်လို့ပြောပြီး မိသားစုက ကျွန်မကို နားမလည်ခဲ့ကြဘူး။ ကျွန်မကို ဖုန်းဆက်ပြီး အကြင်နာမဲ့တယ်လို့ စွပ်စွဲကြတယ်။ ကျွန်မကိုယ်ကျွန်မ ရဲလက်အပ်သင့်တယ်လို့တောင် အစ်ကိုနဲ့အစ်မက ပြောကြတယ်။ ကျွန်မ စိတ်ဆင်းရဲပြီး ကျွန်မအမေ ဒုက္ခခံရမှာကို စိုးရိမ်ခဲ့တယ်။ ဧဝံဂေလိကို ဆက်ဝေမျှနေခဲ့ပေမဲ့ အရင်လောက် မတက်ကြွတော့ဘူး။ နာကျင်မှုနဲ့ ဘုရားဆီ ဆုတောင်းခဲ့တယ်။ “အို ဘုရားသခင်၊ ကျွန်မရဲ့ ဝိညာဉ်ရင့်ကျက်မှုက အရမ်းနည်းပါတယ်။ ကျွန်မအမေ အဖမ်းခံရပြီး မိသားစုက နာလည်မှုမရှိပါဘူး။ ကျွန်မတကယ် စိတ်ဆင်းရဲပါတယ်။ ကျေးဇူးပြုပြီး ခိုင်ခိုင်မာမာ ရပ်တည်နိုင်အောင် ကျွန်မကို ယုံကြည်ခြင်း ပေးပါ”ပေါ့။ ဆုတောင်းပြီးတဲ့နောက်မှာ ဘုရားနှုတ်ကပတ်တော်တွေ ဖတ်ခဲ့တယ်။ “သင်တို့အကြားတွင် ဥပဒေ၏ အကာအကွယ်ပေးခြင်းခံရသည့် လူတစ်ဦးမျှမရှိပေ- ယင်းအစား၊ သင်တို့သည် ဥပဒေ၏ ဒဏ်ခတ်အရေးယူခြင်းကို ခံကြရ၏။ သာ၍ ခက်ခဲသည်မှာ လူတို့သည် သင်တို့ကို နားမလည်ကြပေ- သင်တို့၏ ဆွေမျိုးများ၊ သင်တို့၏ မိဘများ၊ သင်တို့၏ မိတ်ဆွေများ သို့မဟုတ် သင်တို့၏ လုပ်ဖော်ကိုင်ဖက်များ ဖြစ်စေ၊ ၎င်းတို့ထဲမှ မည်သူမျှ သင်တို့ကို နားမလည်ကြပေ။ ဘုရားသခင်က သင်တို့ကို ‘စွန့်ပစ်’ သည့်အခါတွင်၊ ကမ္ဘာမြေပေါ်တွင် ဆက်လက် အသက်ရှင်ရန် သင်တို့အတွက် မဖြစ်နိုင်ပေ၊ သို့သော်ငြားလည်း လူတို့သည် ဘုရားသခင်နှင့် ဝေးကွာ၍မနေနိုင်ကြပေ၊ ယင်းမှာ လူတို့ကို ဘုရားသခင် သိမ်းပိုက်ခြင်းနှင့်ဆိုင်သော အရေးပါမှုဖြစ်ပြီး၊ ဘုရားသခင်၏ ဘုန်းအသရေ ဖြစ်သည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ ဘုရားသခင်၏အမှုသည် လူသားထင်သကဲ့သို့ ရိုးရှင်းပါသလော) ဘုရားနှုတ်ကပတ်တော်တွေက ကျွန်မရဲ့ အရှိုက်ကို တကယ် ထိတယ်။ ယုံကြည်သူတွေအနနဲ့ ဧဝံဂေလိ ဝေမျှပြီး ဘဝမှာ မှန်တဲ့ လမ်းကြောင်းလျှောက်တာက ဒီလောကမှာ အဖြောင့်မတ်ဆုံးအရာပဲ။ ဒါပေမဲ့ ဘုရားကိုဆန့်ကျင်တဲ့ နိုင်ငံတွေမှာ ယုံကြည်သူတွေက ဥပဒေရေးရာ ကာကွယ်မှု မရတဲ့အပြင် ရှုတ်ချပြီး အဖမ်းခံရသလို သူတို့ရဲ့ မိသားစုဝင်တွေတောင် အမှုပတ်ကြရတယ်။ အစိုးရပြောတာက ဆေးမှောင်ခိုတွေနဲ့ လူသတ်သမားတွေကို လွတ်ငြိမ်းချမ်းသာပေးလို့ရတယ်။ ယုံကြည်သူတွေကိုပဲ လွတ်ငြိမ်းချမ်းသာပေးလို့မရတာတဲ့။ ပြီးတော့ ယုံကြည်သူတစ်ယောက် အမိခံလိုက်ရတာနဲ့ ဒဏ်ငွေပေးရတယ်၊ ထောင်ချခံရတယ်၊ ဒါမှမဟုတ် အလုပ်သမားအနေနဲ့ အရာရှိတစ်ယောက်ဆီ အပို့ခံရတယ်။ ယုံကြည်သူတွေက လူလို လုံးဝ မဆက်ဆံခံရဘူး။ ဒါက အင်မတန် မှောင်မိုက်၊ ဆိုးယုတ်တဲ့ နိုင်ငံပဲ။ ဘုရားကို ဆန့်ကျင်တဲ့ ခေတ်သစ် သောဒုံမြို့ပဲ။ ဒီခေတ်မှာ ယုံကြည်သူဖြစ်တာ၊ ဘုရားနောက်လိုက်တာက နှိပ်စက်ခံရမဲ့သဘောပဲ။ ဒါပေမဲ့ ဘုရားအလိုတော်ကို ကျွန်မ နားလည်ခဲ့တယ်။ ကျွန်မအနေနဲ့ စာတန်ကို ငြင်းပယ်၊ စွန့်လွှတ်‌ပြီး ဘုရားဘက်ကို တကယ်လှည့်နိုင်အောင်လို့ ဘုရားကို ဆန့်ကျင်တဲ့ အစိုးရရဲ့ ဆိုးယုတ်တဲ့ အနှစ်သာရအပေါ် ချင့်ချိန်နိုင်စွမ်း ရရှိခွင့်ပေးနေရင်းနဲ့ ဘုရားက ကျွန်မရဲ့ ယုံကြည်ခြင်းကို စုံလင်စေဖို့ အဲဒီအခက်အခဲတွေကို သုံးနေခဲ့တာပဲ။ ဘုရားအလိုတော်ကို နားလည်တာနဲ့ အဲဒီလောက် ဆိုးဆိုးရွားရွား မခံစားမိတော့ဘူး။ ဘုရားပေါ် မှီခိုပြီး ဧဝံဂေလိ ဆက်ဝေမျှဖို့ အသင့်ဖြစ်ခဲ့တယ်။

နောက်ပိုင်းမှာ ယုံကြည်သူအသစ်တွေကို ခေါ်ပြီး ဘုရားအမှုတော်ကို သိပြီး သူ့အလိုတော်ကို နားလည်အောင် ကူညီပေးဖို့ ဘုရားနှုတ်ကပတ်တော်တွေနဲ့ ပတ်သက်လို့ မိတ်သဟာယပေးခဲ့တယ်။ ဘုရားနှုတ်ကပတ်တော် ဓမ္မသီချင်းတစ်ပုဒ်ကို ကျွန်မတို့ အတူနားထောင်ခဲ့တယ်။ “ဆုံးရှုံးတဲ့အချိန်ကို ဘယ်တော့မှပြန်မရ။” “နိုးထလော့၊ ညီအစ်ကိုတို့။ နိုးထလော့၊ ညီအစ်မတို့။ ငါ၏နေ့ရက်သည် ကြန့်ကြာလိမ့်မည်မဟုတ်။ အချိန်သည် အသက်ဖြစ်ပြီး၊ အချိန်ကို ပြန်လည် မလွှတ်တမ်း အသုံးချဖို့ဆိုသည်မှာ အသက်ကို ကယ်တင်ဖို့ဖြစ်၏။ အချိန်သည် အလှမ်းမဝေးလှပေ။ အကယ်၍ သင်တို့သည် ကောလိပ် ဝင်ခွင့်စာမေးပွဲ ကျရှုံး ပါက၊ သင်တို့ ကြိုက်နှစ်သက်သလောက် အကြိမ်များစွာ လေ့လာပြီး ပြန်ဖြေနိုင်သည်။ သို့သော် ငါ၏နေ့ရက်သည် နောက်ထပ် ကြန့်ကြာခြင်းကို သည်းခံလိမ့်မည်မဟုတ်။ အမှတ်ရကြလော့။ အမှတ်ရကြလော့။ ငါသည် သင်တို့ကို ဤကောင်းမြတ်သော နှုတ်ကပတ်တော်များဖြင့် တိုက်တွန်း၏။ ကမ္ဘာကြီး၏ နိဂုံးသည် သင်တို့၏မျက်စိရှေ့တွင် ဖွင့်ဟကာ ကြီးမားသော ဘေးဒုက္ခတို့သည် ရုတ်ခြည်းနီးကပ် လာကြ၏။ မည်သည့်အရာ သာ၍ အရေးကြီးသနည်း- သင်တို့၏ အသက်တာလော သို့မဟုတ် သင်တို့၏အိပ်စက်ခြင်း၊ သင်တို့၏အစားအသောက်နှင့် အဝတ်အစားတို့လော။ ဤအရာများကို ချိန်ဆရန် သင့်အတွက် အချိန်ကျရောက်လာလေပြီ။”(သိုးသငယ်နောက်လိုက်ပြီး သီချင်းအသစ်များကိုသီဆိုပါ) ဓမ္မသီချင်းကို နားထောင်ပြီးတဲ့နောက်မှာ ကျွန်မ မိတ်သဟာယပြုခဲ့တယ်။ “စာတန်ရဲ့ အင်အားစုတွေ ပြိုလဲပြီး နောက်ထပ် ဖိနှိပ်မှု မရှိတော့တာနဲ့ ယုံကြည်မယ်လို့ တချို့က ပြောပေမဲ့ အဲဒီအခါ လူသားမျိုးနွယ်ကို ကယ်တင်ဖို့ဖြစ်တဲ့ ဘုရားအမှုတော် ပြီးသွားတော့မှာဖြစ်ပြီး ဘုရားရဲ့ ကယ်တင်ခြင်းရဖို့ ကျွန်မတို့ရဲ့ အခွင့်အရေး လုံးလုံး ဆုံးရှုံးသွားကြမှာ။ အစိုးရရဲ့ ကန့်သတ်မှုကို ကျွန်မတို့ ခံရပြီး သူတို့က မယုံကြည်ခိုင်းလို့ ကျွန်မတို့က မယုံကြည်ရဲဘူးဆိုရင် အဲဒီအစား အစိုးရက ကျွန်မတို့ကို ကယ်တင်နိုင်လို့လား။ ဘယ်ကယ်တင်နိုင်ပါ့မလဲ။ ဘုရားပဲ ကယ်နိုင်တာ။ သူတို့ပြောတာ နားထောင်ပြီး မယုံကြည်ရင် နောက်ဆုံးသောကာလမှာ ဘုရားရဲ့ ကယ်တင်ခြင်းကို ကျွန်မတို့ ဆုံးရှုံးသွားမှာ။ ဘုရားအမှုတော် အဆုံးသတ်တဲ့အခါ အစိုးရနဲ့အတူ ကျွန်မတို့ ပျက်စီးသွားကြရမှာပဲ။ ကျွန်မတို့ရဲ့ ယုံကြည်ခြင်းကြောင့် အစိုးရရဲ့ ဖိနှိပ်မှုနဲ့ အဖမ်းအဆီးတွေကနေ ကျွန်မတို့ ဒုက္ခခံရပေမဲ့ ဒီဆင်းရဲဒုက္ခက တန်ဖိုးရှိတယ်။ ဘုရားရဲ့ ကယ်တင်ခြင်း ရချင်ရင် ကျွန်မတို့ အဖိုးအခပေးရမယ်။ ပြီးတော့ ဘုရားက အရာရာအပေါ် အုပ်စိုးလို့ ကျွန်မတို့ အဖမ်းခံရခြင်း ရှိမရှိက သူ့လက်ထဲမှာ လုံးလုံး ရှိတယ်။ ကျွန်မတို့ အဖမ်းခံရရင် အဲဒါ ဘုရားရဲ့ ခွင့်ပြုချက်နဲ့ပဲ။ သူ့ကို ကျွန်မတို့ ကျိုးနွံနာခံပြီး သင်ခန်းစာယူသင့်တယ်”လို့ပေါ့။ ပြီးတော့ နောက်ထပ် အနန္တတန်ခိုးရှင် ဘုရားသခင်ရဲ့ နှုတ်ကပတ်တော်တွေ ကျွန်မ ဖတ်ခဲ့ကြတယ်။ “‘အောင်မြင်သောသူများ’ အဖြစ် ဘုရားသခင် ရည်ညွှန်းသောသူများမှာ စာတန်၏ လွှမ်းမိုးမှုအောက်နှင့် စာတန်၏ ဝိုင်းထားခြင်းခံရချိန်၊ ဆိုလိုသည်မှာ အမှောင်အင်အားများ အလယ်တွင် မိမိတို့ကိုယ်ကိုယ် တွေ့ရချိန်တွင် သက်သေရပ်တည်နိုင်ကြဆဲ ဖြစ်ပြီး ဘုရားသခင်၌ မိမိတို့၏ယုံကြည်စိတ်ချမှုနှင့် ကိုးကွယ် ဆက်ကပ်မှုတို့ကို ထိန်းသိမ်းနိုင်ကြဆဲ ဖြစ်သောသူများ ဖြစ်သည်။ သင်သည် မည်သို့ပင်ဖြစ်စေ ဘုရားသခင်၏ ရှေ့မှောက်တွင် ဖြူစင်သော စိတ်နှလုံးကို ထိန်းသိမ်းနိုင်ဆဲဖြစ်ပြီး ဘုရားသခင်အတွက် သင်၏ ရိုးသားစစ်မှန်သော ချစ်ခြင်းမေတ္တာကို ထိန်းသိမ်းနိုင်ဆဲဖြစ်ပါက၊ သင်သည် ဘုရားသခင်၏ ရှေ့တွင် သက်သေရပ်တည်နေခြင်း ဖြစ်ပြီး ဤသည်မှာ ဘုရားသခင်က ‘အောင်မြင်သောသူ’ တစ်ဦး ဖြစ်ခြင်းအဖြစ် ရည်ညွှန်းသော အရာဖြစ်သည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ သင်သည် ဘုရားသခင်ထံ သင်၏ကိုးကွယ်ဆည်းကပ်ခြင်းကို ထိန်းသိမ်းသင့်သည်) “ဘုရားသခင်သည် လူသားကို သူကယ်တင်သည့်အချိန်တွင် စာတန်ကို မဖျက်ဆီးရသည့်အကြောင်းအရင်းမှာ လူသားများကို စာတန်က မည်သို့ ဖျက်ဆီးခဲ့ကြောင်း၊ လူသားများကို ဖျက်ဆီးခဲ့သည့် အတိုင်းအတာနှင့် ဘုရားသခင်က လူသားတို့ကို မည်သို့ သန့်စင်ပြီး ကယ်တင်ကြောင်းတို့ကို လူသားများ ရှင်းလင်းစွာ မြင်နိုင်ဖို့ဖြစ်သည်ကို သင်သည် ယခုအခါ သိမြင်သင့်ပေသည်။ အဆုံးတွင် လူတို့သည် သမ္မာတရားကို နားလည်ပြီး စာတန်၏ စက်ဆုပ်ဖွယ် အမူအရာကို ရှင်းရှင်းလင်းလင်းမြင်ပြီး၊ ၎င်းတို့ကို စာတန်၏ ဖောက်ပြန်ပျက်စီးစေခြင်းနှင့်သက်ဆိုင်သော ကြောက်စရာကောင်းသော အပြစ်တရားကို ရှုမြင်ပြီးသည့်အခါတွင် ဘုရားသခင်သည် စာတန်ကို ဖျက်ဆီးကာ လူတို့အား သူ၏ ဖြောင့်မတ်ခြင်းကို ပြလိမ့်မည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောချက်များ၊ အပိုင်း သုံး) ကျွန်မ မိတ်သဟာယပြုတယ်။ “ဘုရားက အစိုးရရဲ့ ဖိနှိပ်မှုနဲ့ အဖမ်းအဆီးတွေကို ခွင့်ပြုတာဖြစ်တယ်။ ဒါက ကျွန်မတို့ ဘုရားကို တကယ် ယုံကြည်လား၊ ယုံကြည်ချက် ရှိမရှိဆိုတာကို စစ်ဆေးနေတာ။ ဒီဖိနှိပ်မှုနဲ့ အခက်အခဲကတစ်ဆင့် ကျွန်မတို့ ယုံကြည်ခြင်းကို ထိန်းသိမ်းနိုင်ပြီး၊ အပျက်သဘောဆောင်ပြီးနောက်မတွန့်ဘဲ၊ ဘုရားကို သစ္စာမဖောက်ဘဲ အဲဒီအစား ဘုရားနောက် ဆက်လိုက်၊ စုဝေးပြီး ဧဝံဂေလိ ဝေမျှရင် အဲဒါက သက်သေခံချက်ရှိတာဖြစ်ပြီး စာတန်က အရှက်ရ၊ ရှုံးနှိမ့်မှာပဲ။ အဲဒီဆင်းရဲဒုက္ခက တန်ဖိုးရှိတယ်။ ဘာလို့ ဘုရားက စာတန်ကို ခုပဲ မဖျက်ဆီးလိုက်တာလဲ။ အဲဒါက ကျွန်မတို့ကို အကောင်းနဲ့ အဆိုးလည်း သိစေရင်းနဲ့ အောင်မြင်သူတစ်စုကို စုံလင်စေဖို့ နည်းလမ်းတစ်ခုအနေနဲ့ စာတန်ကို သုံးဖို့ဖြစ်တယ်။ လူတွေကို ကယ်တင်ဖို့ ဘုရားအမှုပြုပုံနဲ့ စာတန်က လူတွေကို ဖောက်ပြန်ပျက်စီးစေပြီး ထိခိုက်စေပုံကိုလည်း မြင်နိုင်တယ်။ အဲဒီလိုနဲ့ တစ်နေ့ စာတန်ကို ဘုရားက ဖျက်ဆီးတဲ့အခါ ဘုရားဖြောင့်မတ်ပုံကို ကျွန်မတို့ မြင်မယ်။ ဘုရားက စာတန်ကို ဒီအတိုင်း တိုက်ရိုက် ချေမှုန်းလိုက်ရင် စာတန်အပေါ် ကျွန်မတို့ ချင့်ချိန်နိုင်စွမ်းရှိမှာ မဟုတ်သလို မုန်းပြီး စွန့်လွှတ်မှာ မဟုတ်ဘူး။ ဘုရားကိုဆန့်ကျင်တဲ့ စာတန်ရဲ့ အစိုးရတွေလိုပေါ့။ သူတို့က ဟန်ဆောင်ပြီး လှည့်ဖြားရာမှာ တကယ် တော်ကြတယ်။ ကောင်းမှုတချို့ သူတို့ လုပ်ပုံရတဲ့အခါ လူတွေ သူတို့ကို ကြည်ညိုကြဖို့သက်သက်ပါပဲ။ အနန္တတန်ခိုးရှင် ဘုရားသခင်က လူသားမျိုးနွယ်ကို ကယ်တင်ဖို့ နောက်ဆုံးသောကာလမှာ ပေါ်ထွန်းပြီး အမှုပြုနေတယ်။ အဲဒီအစိုးရတွေရဲ့ မကောင်းဆိုးဝါးဆန်တဲ့ ဘုရားကိုဆန့်ကျင်တဲ့ အနှစ်သာရကို သူ ဖော်ထုတ်ပြီးပြီ။ သူတို့က အနန္တတန်ခိုးရှင် ဘုရားသခင်ကို ငြင်းပယ်ပြီး ရှုတ်ချကြတယ်။ ပြီးတော့ သူ့ရဲ့ ယုံကြည်သူတွေကို ဖမ်းတယ်၊ ဒဏ်ငွေရိုက်ပြီး စီရင်ချက်ချလို့ ထောင်ချတယ်။ သူတို့က လူတွေ သူ့ကို ကိုးကွယ်အောင်လုပ်ပြီး ဘုရားကို ယုံကြည်ခွင့်နဲ့ နောက်လိုက်ခွင့်မပေးတဲ့ နတ်ဆိုး စာတန်လိုပါပဲ။ နောက်ဆုံးမှာ ငရဲထဲကို အားလုံး ကျဆင်းမှာဖြစ်ပြီး စာတန်နဲ့အတူ အပြစ်ပေးခံရမှာ”လို့ပေါ့။ မိတ်သဟာယပြီးတဲ့နောက်မှာ လူသစ်တွေက ချင့်ချိန်နိုင်စွမ်းနဲ့ ယုံကြည်ခြင်း ရှိသွားကြပြီး အားလုံးက စုဝေးပွဲမှာ တက်တက်ကြွကြွ ပါဝင်ကြတယ်။ ကျွန်မ တကယ် ဝမ်းသာသွားတယ်။

အဲဒီနောက်မှာ အဲဒီ ယုံကြည်သူသစ်တွေက သူတို့ရဲ့ ချစ်ရသူတွေကို တရားဒေသနာတွေ နားထောင်ဖို့ ခေါ်လာကြတယ်။ ရက်နည်းနည်းအကြာမှာ အဲဒီရွာကနေ လူ ၈၀ ကျော်က အနန္တတန်ခိုးရှင် ဘုရားသခင်ရဲ့ နောက်ဆုံးသော ကာလအမှုတော်ကို လက်ခံခဲ့ကြတယ်။ ဘုရားရဲ့ ဉာဏ်ပညာကို စာတန်ရဲ့ လှည့်ကွက်တွေပေါ် အခြေခံပြီး ကျင့်သုံးသွားတာကို ကျွန်မ မြင်ခဲ့ရတယ်။ ဧဝံဂေလိအလုပ်ကို တားဆီးဖို့ ကျွန်မတို့ စိတ်ပျက်ပြီး စိတ်မချမ်းမသာဖြစ်အောင် စာတန်က လှည့်ကွက်မျိုးစုံ သုံးပေမဲ့ ဘုရားနှုတ်ကပတ်တော်က ယုံကြည်ခြင်းနဲ့ ခွန်အားပေးတယ်။ ဧဝံဂေလိ ဝေမျှရာမှာ ကျွန်မတို့ အစွမ်းကုန်လုပ်ပြီး ဘုရားရဲ့ လမ်းပြမှုနဲ့ ကောင်းချီးတွေကို မြင်ခဲ့တယ်။ ဘုရားကို ကျွန်မ တကယ် ကျေးဇူးတင်မိတယ်။ ဘယ်လူသားကမှ ဘုရား ပြည့်စုံစေချင်တဲ့အရာကို တားဆီးလို့မရတာကို ကျွန်မ မြင်ခဲ့ပြီး၊ ဧဝံဂေလိ ဝေမျှဖို့အတွက် ပိုလို့တောင် ယုံကြည်ခြင်း ရရှိခဲ့တယ်။

၂၀၂၂ခုနှစ်၊ စက်တင်ဘာလမှာ ယုံကြည်သူသစ်တစ်ယောက်က ကျွန်မတို့ကို သူ့မိဘတွေရဲ့ ရွာဆီ ဧဝံဂေလိဟောဖို့ ခေါ်သွားတယ်။ အဲဒီမှာ လူ ၄၀ ကျော်က စစ်မှန်တဲ့ လမ်းခရီးကို စိတ်ဝင်စားကြတယ်။ ကျွန်မ အရမ်း ဝမ်းသာပြီး ဘုရားရဲ့ နောက်ဆုံးသော ကာလအမှုတော်နဲ့ ပတ်သက်လို့ သူတို့ကို သက်သေခံချက် စပြီး ဝေမျှခဲ့တယ်။ အဲဒီနောက် ဒေသအစိုးရက သူတို့ အစည်းအဝေးမှာ ကျွန်မက ရဲက အလိုရှိနေတဲ့သူဖြစ်တယ်လို့ ပြောပြီးတော့ ကျွန်မဓာတ်ပုံကိုပြပြီး ကျွန်မ ဧဝံဂေလိ ဟောနေတာတွေ့ရင် အကြောင်းကြားဖို့ လူတွေကို ပြောတယ်ဆိုတဲ့ သတင်းရတယ်။ ရဲတွေကလည်း စစ်ဆေးရေးဂိတ်တွေနဲ့ ကားတွေကို တားပြီး ကျွန်မကို ရှာနေကြတယ်။ ကျွန်မတွေးနေမိတယ်၊ ကျွန်မကို နေရာတကာမှာ ရဲတွေက ရှာနေတော့ တစ်နေ့နေ့ ကျွန်မကို သူတို့မိသွားရင် သတ်နိုင်တယ်လို့ပေါ့။ ကျွန်မ ဧဝံဂေလိ ဆက်ဝေမျှသင့်လား။ ရပ်လိုက်ရင် ဘုရားအမှုတော်ကို စုံစမ်းနေရင်းတန်းလန်းနဲ့ ရွာသားတွေ ဘယ်လိုလုပ်မလဲ။ ဘုရားအသံကို သူတို့ကြားပြီး သူ့ရဲ့အမှုတော်သစ်ကို လက်ခံနိုင်ကြတော့မှာ မဟုတ်ဘူး။ ကျွန်မက ကိုယ့်တာဝန်ကို ဖြည့်ဆည်းဖြစ်မှာ မဟုတ်ဘူး။ ညီအစ်ကို မောင်နှမတွေက ကျွန်မရဲ့ လုံခြုရေးအတွက် စဉ်းစားပြီးတော့ ကျွန်မကို အဝေးပို့ချင်ကြတယ်။ ကျွန်မလည်းကြောက်နေလို့ ကောက်ကာငင်ကာ ထွက်လာလိုက်တယ်။ အဲဒီနောက်တော့ တော်တော် အပြစ်ရှိတဲ့စိတ်ခံစားရတယ်။ ကျွန်မ ပြန်သွားပြီး အဲဒီရွာသားတွေကို ဧဝံဂေလိ ဆက်ဟောချင်တယ်။ အဲဒါနဲ့ ဘုရားဆီ ဆုတောင်းတယ်။ “ဘုရားသခင်၊ ရဲတွေက နေရာတကာ ကျွန်မကို ရှာနေသလိုပြီး ကျွန်မ ကြောက်နေပါတယ်။ ဒါပေမဲ့ ကျွန်မ အဖမ်းခံရခြင်း ရှိမရှိက လုံးဝ ကိုယ်တော့်လက်ထဲမှာရှိမှန်း သိပါတယ်။ အရာရာကို ကိုယ်တော့်ဆီ ကျွန်မ အပ်နှံချင်ပါတယ်။ ကျွန်မ ဆက်တရားဟောပြီး ကိုယ်တော့်ကို သက်သေခံဖို့ ယုံကြည်ခြင်းရှိအောင် လမ်းပြတော်မူပါ”လို့ပေါ့။ နောက်ပိုင်းမှာ ဘုရားနှုတ်ကပတ်တော်တွေမှာ တစ်ခုကို ကျွန်မ ဖတ်ရတယ်။ “သင် ထမ်းထားရသည့် ဝန်ထုပ်ဝန်ပိုးများ၊ သင်၏ စေခိုင်းချက်တာဝန်နှင့် သင်၏ တာဝန်ဝတ္တရားများကို သင်သိရှိသလော။ သမိုင်းတွင်သည့် တာဝန်နှင့်သက်ဆိုင်သော သင်၏အသိစိတ် ဘယ်မှာနည်း။ နောင်လာမည့်ခေတ်တွင် သခင်အဖြစ် သင် မည်သို့ ပြည့်ပြည့်ဝဝ အစေခံမည်နည်း။ သခင်ဖြစ်ခြင်း၏ ခိုင်မာသောအသိစိတ်တစ်ခု သင်၌ ရှိသလော။ အရာခပ်သိမ်းတို့၏ သခင်ကို သင် မည်သို့ ရှင်းပြမည်နည်း။ ယင်းသည် အသက်ရှင်သော သတ္တဝါအားလုံးနှင့် ကမ္ဘာလောကထဲရှိ ရုပ်ဝတ္ထုအရာအားလုံး၏ သခင် အမှန်တကယ် ဟုတ်သလော။ အမှု၏ နောက်တစ်ဆင့် တိုးတက်မှုအတွက် သင်၌ မည်သည့်အစီအစဉ်များ ရှိသနည်း။ သင့်ကို ၎င်းတို့၏ သိုးထိန်းအဖြစ် လူမည်မျှက စောင့်မျှော်နေကြပါသနည်း။ သင်၏အလုပ်တာဝန်သည် ကြီးလေးသောအရာတစ်ခုလော။ ၎င်းတို့သည်- လမ်း အဘယ်မှာ ရှိသနည်းဟု အမှောင်ထဲတွင် မြည်တမ်းလျက်- ဆင်းရဲ မွဲတေကြသည်၊ သနားဖွယ် ဖြစ်ကြသည်၊ မျက်စိကန်းကြပြီး ဘာလုပ်ရမှန်းမသိ ဖြစ်နေကြပေသည်။ ဥက္ကာပျံကဲ့သို့ ရုတ်တရက် သက်ဆင်းပြီး လူကို နှစ်ပေါင်းများစွာ ဖိနှိပ်ထားသည့် အမှောင်ထု၏အင်အားများကို ဖြိုခွင်းဖို့ အလင်းကို ၎င်းတို့ တမ်းတလေစွ။ ၎င်းတို့ စိုးရိမ်တကြီး မျှော်လင့်သည့် အရာနှင့် ဤအရာအတွက် နေ့ရောညပါ ၎င်းတို့ အောက်မေ့တမ်းတကြပုံ အဆုံးစွန်အတိုင်းအတာကို မည်သူသိနိုင်သနည်း။ အလင်းရောင် ဖြတ်သန်းလင်းလက်သည့် နေ့တွင်ပင်၊ အလွန်အမင်း ဆင်းရဲဒုက္ခ ခံစားနေရသော ဤလူတို့သည် လွတ်မြောက်ရန် မျှော်လင့်ချက်မရှိဘဲ၊ မှောင်မိုက်သော အကျဉ်းတိုက်တစ်ခုထဲတွင် အကျဉ်းကျခံရလျက် ရှိနေကြ၏။ မည်သည့်အခါတွင် ၎င်းတို့ မငိုတော့ဘဲနေမည်နည်း။ မည်သည့်အခါတွင်မျှ အနားပေးခြင်းမခံခဲ့ရသော ဤနုနယ်သော ဝိညာဉ်များ၏ ကံအကြောင်းမလှသည့်ဖြစ်ရပ်မှာ ဆိုးရွားလှပြီး ရက်စက်သော အနှောင်အဖွဲ့များနှင့် အေးစက်သော သမိုင်းတို့ဖြင့် ဤအခြေအနေတွင် ၎င်းတို့ ချည်နှောင်ခံထားရသည်မှာ ကြာမြင့်ပြီဖြစ်သည်။ ၎င်းတို့၏ မြည်တမ်းခြင်းအသံကို မည်သူ ကြားဖူးသနည်း။ ၎င်းတို့၏ စိတ်မချမ်းမြေ့သော အခြေအနေကို မည်သူ မျက်မြင်တွေ့ဖူးသနည်း။ ဘုရားသခင်၏ စိတ်နှလုံးသည် မည်မျှ ဝမ်းနည်းကြေကွဲပြီး စိုးရိမ်ပူပန်သည်ကို သင်တွေးမိဖူးသလော။ သူကိုယ်တိုင်၏ လက်ဖြင့် ဖန်ဆင်းခဲ့သော အပြစ်မဲ့လူသားမျိုးနွယ်သည် ထိုသို့သော ညှဉ်းဆဲမှု ခံစားနေရသည်ကို သူ မည်သို့ မြင်ရက်နိုင်မည်နည်း။ တကယ်တမ်းမူ၊ လူသားများသည် အဆိပ်ခတ်ခံထားရသည့် သားကောင်များ ဖြစ်ကြပေသည်။ လူသားသည် ဤနေ့အထိ ရှင်ကျန်ခဲ့သော်လည်း၊ လူသားမျိုးနွယ်သည် အချိန်ကြာမြင့်စွာ ဆိုးယုတ်သူတစ်ဦး၏ အဆိပ်ခတ်ခံထားရသည်ကို မည်သူ သိခဲ့လိမ့်မည်နည်း။ သင်သည် သားကောင်များထဲမှ တစ်ဦးဖြစ်သည်ကို သင် မေ့လျော့ပြီလော။ သင်သည် ဤအသက်ရှင်ကျန်ရစ်သူများကို ကယ်တင်ဖို့ သင်၏ဘုရားသခင်ကို ချစ်ခြင်းကြောင့် ကြိုးပမ်းရန် လိုလားလျက် မရှိသလော။ လူသားမျိုးနွယ်ကို သူကိုယ်တိုင်၏ သွေးသားသဖွယ် ချစ်ခင်သည့် ဘုရားသခင်ကို ပြန်လည်ပေးဆပ်ရန် သင်၏ အားအင်ဟူသမျှကို ဆက်ကပ်ဖို့ သင် လိုလားခြင်း မရှိသလော။ နောက်ဆုံး စာရင်းချုပ်လိုက်ပါက၊ သင်၏ ထူးခြားသော အသက်တာကို အသက်ရှင်ရန် ဘုရားသခင်၏အသုံးပြုခံရခြင်းကို သင်မည်သို့ အဓိပ္ပာယ် ကောက်မည်နည်း။ သင်သည် ဘုရားတရားကိုင်းရှိုင်းသော ဘုရားသခင်ကို အစေခံသည့် လူတစ်ဦး၏ အဓိပ္ပာယ်ရှိသော အသက်တာကို အသက်ရှင်ဖို့ သန္နိဋ္ဌာန်နှင့် ယုံကြည်စိတ်ချမှုတို့ အမှန်တကယ် ရှိသလော။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ သင်၏အနာဂတ်တာဝန်ကို မည်သို့ အာရုံစိုက်၍ လုပ်ဆောင်သင့်သနည်း) ဘုရားနှုတ်ကပတ်တော်တွေက တကယ် ခွန်အားရပေမဲ့ အပြစ်ရှိတဲ့စိတ်လည်း ခံစားမိစေတယ်။ လူအတော်များများက ဘုရားရဲ့ နောက်ဆုံးသောကာလ ကယ်တင်ခြင်းကို လက်မခံသေးသလို စာတန်ရဲ့ တန်ခိုးအာဏာအောက်မှာ အသက်ရှင်နေတုန်းပဲ။ သူတို့က ကူကယ်ရာမဲ့ပြီး နာကျင်နေကြတယ်။ သူတို့အတွက် ဘုရားက ဝမ်းနည်းပြီး စိတ်စောနေတယ်။ သူတို့ထဲကတချို့က ငွေရှာဖို့ တစ်ရက်တစ်ရက်ကို နာရီအများကြီး ခြေကုန်လက်ပမ်းကျအောင် အလုပ် လုပ်ရတယ်၊ ခက်ခက်ခဲခဲ အသက်ရှင်ရတယ်၊ ဘဝတွေက ပင်ပန်းပြီး ငွေနည်းနည်း ရပြီးတဲ့နောက်မှာတောင် တချို့က စိတ်ထဲမှာ ဟာတာတာနဲ့ စိတ်ဆင်းရဲနေကြတုန်းပဲ။ လူ့ဘဝရဲ့ တန်ဖိုးကို သူတို့ မသိကြသလို ဘာဦးတည်ချက်မှ ရှာမတွေ့နိုင်ကြဘူး။ လူတချို့က စစ်မှန်တဲ့ လမ်းခရီးကို ရှာချင်ကြပေမဲ့ အစိုးရရဲ့ ဖိနှိပ်မှုနဲ့ အဖမ်းအဆီးတွေကြောင့် အရမ်းကြောက်ကြတယ်။ ဆိုလိုတာက ကျွန်မတို့က သူတို့ကို ဘုရားနှုတ်ကပတ်တော်တွေနဲ့ မိတ်သဟာယပြုဖို့၊ ဘုရားအမှုတော်ကို သက်သေခံဖို့နဲ့ သူတို့ ပြဿနာတွေကို ဖြေရှင်းဖို့ ဘုရားနှုတ်ကပတ်တော်တွေကို အသုံးပြုဖို့လိုတယ်။ အဲဒါမှ ဘုရားနှုတ်ကပတ်တော်တွေမှာ သမ္မာတရား၊ အလင်းနဲ့ မျှော်လင့်ချက်ကို သူတို့ မြင်နိုင်ပြီး ဘုရားရဲ့ ကယ်တင်ခြင်းကို လက်ခံနိုင်ကြမှာလေ။ ပြီးတော့ ဒီခေတ်မှာ ကပ်ဘေးတွေက ဆိုးသထက်ဆိုးနေသလို လူတော်တော်များများက ဘုရားအသံကို မကြားကြသေးဘူး။ ကပ်ဘေးမှာ သူတို့ အားကိုးစရာ မရှိဘူး။ ဒီလူတွေကို ဧဝံဂေလိတရား ဝေမျှတာက ကျွန်မရဲ့ တာဝန်ပဲ။ ဘုရားက သူကယ်တင်ချင်တဲ့ ဘယ်သူကိုမဆို ကပ်ဘေးတွေကို မလွန်ဆန်နိုင်တာ မဖြစ်စေချင်ဘူး။ ကိုယ်ဘေးကင်းဖို့အတွက် ဧဝံဂေလိ ဖြန့်တာကို ရပ်လိုက်ရင် ကိုယ့်တာဝန်ကို ကျွန်မ စွန့်လွှတ်တာပဲဖြစ်မှာ။ အဲဒါဆိုရင် ဘုရားအပေါ် ကျွန်မ အရမ်းအကြွေးတင်ပြီး သူ့မိသားစုဝင်လို့ အခေါ်ခံထိုက်မှာ မဟုတ်ဘူး။ ကျွန်မလည်း ဘာရည်မှန်းချက်၊ မျှော်လင့်ချက်မှမရှိဘဲ စာတန်ရဲ့ ထိန်းချုပ်မှုအောက် အသက်ရှင်ရင်းနဲ့ အဲဒီရွာသားတွေလိုပဲ ဖြစ်ခဲ့ဖူးတာကို တွေးမိတယ်။ ကျွန်မနဲ့ ဧဝံဂေလိ မျှဝေဖို့ ဘုရားက ညီအစ်ကို မောင်နှမတွေကို အကြိမ်ကြိမ် လှုံ့ဆော်ခဲ့တာဟာဆိုရင် နောက်ဆုံးမှာ ဘုရားအသံကို ကျွန်မကြားပြီး သူ့ရဲ့ နောက်ဆုံးသော ကာလ ကယ်တင်ခြင်းကို ရခဲ့တဲ့အထိပဲလေ။ အဲဒါ ကျွန်မအတွက် ဘုရားရဲ့ မေတ္တာနဲ့ သနားကရုဏာပဲ။ ဘုရားအလိုတော်ကို ကျွန်မ စဉ်းစားရမယ်၊ ပြီးတော့ ဘုရားအမှုတော်ကို သက်သေခံပြီး သူ့မေတ္တာကို ပြန်ပေးဆပ်ဖို့ တတ်စွမ်းသမျှ လုပ်ရမယ်။ နောက်နေ့မှာ ဧဝံဂေလိ ဆက်ဝေမျှဖို့ အဲဒီရွာကို ကျွန်မ ပြန်သွားခဲ့တယ်။ ဒါပေမဲ့ ရက်နည်းနည်းအကြာမှာပဲ ကျွန်မတို့ကို အဲဒီနေရာ ခေါ်သွားတဲ့ လူသစ်က အရေးပေါ်ကိစ္စနဲ့ ပြန်သွားတယ်။ ကျွန်မ နည်းနည်း စိုးရိမ်သွားတယ်။ ဒေသခံရဲ့ ကာကွယ်ပေးမှုမရှိဘဲနဲ့ နောက်ဆုံးမှာ ကျွန်မ အဖမ်းခံလိုက်ရတော့မှာလားပေါ့။ ဒါပေမဲ့ ဧဝံဂေလိ ဝေမျှတာကို ရပ်လိုက်ရင် စစ်မှန်တဲ့ လမ်းခရီးကို စုံစမ်းကြသူတွေက အနန္တတန်ခိုးရှင် ဘုရားသခင်ရဲ့ အမှုတော်ကို လက်ခံရာမှာ နှောင့်နှေးသွားမှာ။ ပြီးခဲ့တဲ့ နှစ်ရက်သုံးရက်အတွင်းမှာ သူတို့က ရှာဖွေ၊ စုံစမ်းဖို့ အားထုတ်တဲ့အနေနဲ့ ကျွန်မတို့ ဟောတာကို နားထောင်ရအောင် တောင်ကုန်းတွေဆီ ခိုးထွက်နေခဲ့ကြတာလေ။ အဲဒါကို သူတို့ အရမ်းတောင့်တနေခဲ့ကြတာ။ ကျွန်မက ဆက်ပြီး တရားဟောချင်စိတ်မရှိဘဲ အဖမ်းခံရမှာ ကြောက်လို့ ထွက်ပြေးသွားရင် သူတို့ကို အကြွေးတင်မှာဖြစ်ပြီး ဘုရားကို လည်းနာကျင်စေမှာပဲ။ ဒါကြောင့် အဲဒီစစ်မှန်တဲ့ လမ်းခရီးရှာချင်သူတွေကို ကျွန်မ တစ်ယောက်ချင်းတွေ့ပြီး သူတို့ကို အနန္တတန်ခိုးရှင် ဘုရားသခင်ရဲ့ နှုတ်ကပတ်တော်တွေကို ဖတ်ပြတယ်။ နောက်ဆုံးမှာ သူတို့အယောက်တိုင်းက အနန္တတန်ခိုးရှင် ဘုရားသခင်ရဲ့ အမှုတော်ကို လက်ခံခဲ့ကြတယ်။ အဲဒီနောက်မှာ ကျွန်မတို့ တရားဒေသနာတွေ နားထောင်ဖို့ တခြားလူတွေကို သူတို့ ခေါ်လာကြတယ်။ အနန္တတန်ခိုးရှင် ဘုရားသခင်ရဲ့ နှုတ်ကပတ်တော်တွေကို ကြားပြီးတဲ့နောက်မှာ ဘုရားအမှုတော်သစ်ကို လက်ခတဲ့လူတွေ ပိုပိုများလာတယ်။ ဘုရားရဲ့လမ်းပြမှုကိုမြင်တော့ ကျွန်မ သကို အရမ်းကျေးဇူးတင်မိတယ်။ ရွာက လက်နက်ကိုင်တွေက ညနေပိုင်ကင်းလှည့်တာတွေကို ခဏခဏလုပ်တော့ ကျွန်မတို့ စုဝေးပွဲတွေက အကန့်အသတ်ရှိလာတယ်။ ဒါကြောင့် ယုံကြည်သူအသစ်တွေကို စာတန်ရဲ့ လှည့်ကွက်တွေ ရိပ်စားမိပြီး တိတ်တဆိတ် စုဝေးတတ်အောင် ကူညီဖို့ ဘုရားနှုတ်ကပတ်တော်တွေကို မိတ်သဟာယပြုပေးတယ်။ အဲဒါကိုသိတော့ သူတို့က အစိုးရရဲ့ ကန့်သတ်ချုပ်ချယ်မှုကို ဘယ်လိုမှ မခံစားရတော့ဘူး။ ညမှာ စုဝေးဖို့ တောင်ကုန်းတွေ၊ ဟင်းသီးဟင်းရွက် ခင်းတွေထဲ အားလုံး တိတ်တိတ်လေး ထွက်လာကြတယ်။ အဲဒါကိုတွေ့တဲ့အခါ တရားဟောဖို့အတွက် ကျွန်မမှာ ပိုလို့တောင် အားရှိသွားတယ်။

တစ်ခါ သတိရသေးတယ်၊ ကျွန်မ တရားဟောခဲ့တဲ့ လူတချို့က ကျွန်မတို့တရားတွေကို နားထောင်လို့ အစိုးရ ဖမ်းတာကို ခံခဲ့ရတယ်လို့ ပြောတဲ့ ညီအစ်မတစ်ယောက်ရှိတယ်။ သူတို့ရဲ့ မယုံကြည်သူ မိသားစုက ကျွန်မကို သတ်မယ်ပြောပြီး ကျွန်မကို အိမ်မှာ သွားရှာကြတယ်တဲ့။ ကျွန်မကို ဂရုစိုက်ဖို့ ကျွန်မအစ်မက ပြောတယ်။ ကျွန်မအတွက်တော့ လန့်စရာပဲလေ။ အဲဒီအချိန်မှာ အိမ်မှာ ကျွန်မရှိနေခဲ့ရင် သူတို့ ကျွန်မကို ဘာလုပ်မယ်ဆိုတာ ဘယ်သူသိမှာလဲ။ အဲဒီမှာ ဧဝံဂေလိကို ကျွန်မ ဆက်ဖြန့်နေခဲ့ပြီး သူတို့ ကျွန်မကို မိသွားရင် ကျွန်မကို လွယ်လွယ် လွတ်ပေးမှာ မဟုတ်ဘူး။ အဲဒီနေရာကနေ ကျွန်မထွက်သွားချင်ခဲ့ပြီး ဧဝံဂေလိ မဝေမျှချင်တော့ဘူး။ ဒါပေမဲ့ ထွက်သွားဖို့ စဉ်းစားတာက တကယ် ကျွန်မအတွက် စိတ်မကောင်းစရာပဲလေ။ အဲဒီအချိန်မှာ ဘုရားဆီက ဒီနှုတ်ကပတ်တော်တွေကို သတိရမိတယ်။ “သင့်ကို ဝန်းရံသည့် ပတ်ဝန်းကျင်ရှိ အရာအားလုံးသည် ငါ၏အခွင့်အားဖြင့်ဖြစ်သည်၊ ငါ စီစဉ်ထားခြင်းသာ ဖြစ်သည်ကို သင်သိထား၏။ ရှင်းရှင်းလင်းလင်း မြင်ကာ သင့်ကို ငါပေးထားသော ပတ်ဝန်းကျင်တွင် ငါ၏စိတ်နှလုံးကို ဖြည့်ဆည်းလော့။ မကြောက်နှင့်၊ ကောင်းကင်ဗိုလ်ခြေတို့၏ အနန္တတန်ခိုးရှင် ဘုရားသခင်သည် သင်နှင့်အတူ ဧကန်အမှန် ရှိလိမ့်မည်။ သူသည် သင့်ကို ထောက်မပေးပြီး သူသည် သင်၏ ဒိုင်းလွှားဖြစ်သည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အစအဦး၌ ခရစ်တော်၏ မိန့်မြွက်ချက်များ၊ အခန်း (၂၆)) ကျွန်မ ဒီအခြေအနေကို ဘုရားရဲ့ခွင့်ပြုချက်နဲ့ ရင်ဆိုင်နေရမှန်း ဘုရားနှုတ်ကပတ်တော်တွေကနေ မြင်နိုင်ခဲ့တယ်။ ကျွန်မက ဘုရားအမှုတော်အကြောင်း သက်သေခံရင်းနဲ့ ဧဝံဂေလိ ဝေမျှနေတဲ့အတွက် ဧဝံဂေလိ ဆက်ဖြန့်ဖို့ အရမ်းကြောက်သွားအောင်လို့ စာတန်က ကျွန်မကို တားဆီးဖို့ ကျွန်မရဲ့ စိတ်အခြေအနေကို နှောင့်ယှက်ဖို့ ဘာမဆိုလုပ်မှာပဲ။ အဲဒါ စာတန်ရဲ့ ဆိုးယုတ်တဲ့ ရည်ရွယ်ချက်ပဲ။ အသက်အန္တရာယ်ကို ဖက်တွယ်ရင်းနဲ့ ကြောက်လို့ ဧဝံဂေလိတရား မဖြန့်ဝေရင် ကျွန်မက စာတန်ရဲ့လှည့်ကွက်တွေထဲ ရောက်သွားမှာမဟုတ်လား။ ကျွန်မ အဖမ်းခံရခြင်းရှိမရှိနဲ့ သေမယ်၊ မသေဘူးဆိုတာ အားလုံး ဘုရားလက်ထဲမှာရှိတယ်။ စာတန်က ယောဘကို စစ်ဆေးနေချိန်မှာ ယောဘက အများကြီး ဆင်းရဲဒုက္ခခံခဲ့ရတယ်။ သူ့သားသမီးအားလုံးနဲ့ချမ်းသာမှုအားလုံးကို ဆုံးရှုံးပြီး တစ်ကိုယ်လုံး အနာစိမ်းတွေ ပေါက်တယ်။ ဒါပေမဲ့ ဘုရားက စာတန်ကို ယောဘရဲ့အသက်ကို နုတ်ယူခွင့်မပေးခဲ့ဘူး။ ဘုရားပြောတာကို စာတန်က မဆန့်ကျင်ရဲဘူး။ ယောဘရဲ့ အသက်ကို အန္တရာယ်မပေးရဲဘူး။ အခု ဘုရားက လူတွေကို ကျွန်မအပေါ် အန္တရာယ်ပြုခွင့် မပေးရင် သူတို့ ဘာမှလုပ်နိုင်မှာ မဟုတ်ဘူး။ ကျွန်မရဲ့အသက်က ဘုရားလက်ထဲမှာရှိတယ်။ ကျွန်မ ရှင်မလား၊ သေမလားဆိုတာ သူတို့ ဆုံးဖြတ်လို့မရဘူး။ ကျွန်မ အဖမ်းခံရရင် နောက်ကွယ်မှာ ဘုရားရဲ့ ကောင်းတဲ့ အလိုတော်ရှိမှာဖြစ်ပြီး ကျွန်မ ကျိုးနွံနာခံသင့်တယ်။ ကျွန်မဘာသာကျွန်မ တွေးမိတယ်။ ဒီရွာမှာ ကိစ္စတွေက ဆိုးနေတော့ နောက်တစ်ရွာကို ကျွန်မ တရားသွားဟောလို့ရတာပဲ။ ကျွန်မအနေနဲ့ ဉာဏ်သုံးပြီး သတိထားရင် အဆင်ပြေမှာပါပေါ့။ သခင်ယေရှု ပြောခဲ့သည်မှာ- “တမြို့၌ သင်တို့ကို ညှဉ်းဆဲ တမြို့သို့ပြေးကြလော့။” (ရှင်မဿဲခရစ်ဝင် ၁၀:၂၃) အဲဒီနောက် နောက်ထပ် အနန္တတန်ခိုးရှင် ဘုရားသခင်ရဲ့ နှုတ်ကပတ်တော်တွေကို ကျွန်မ ဖတ်တယ်။ “ဘုရားသခင်သည် သူ၏ နောက်လိုက်တိုင်းအတွက် အစီအစဉ်တစ်ခုရှိသည်။ တစ်ဦးချင်းစီတွင် ဘုရားသခင်က လူသားအတွက် ပံ့ပိုးပေးသော၊ ၎င်းတို့၏ တာဝန်ကို ထမ်းဆောင်ရမည့် ပတ်ဝန်းကျင်တစ်ခုရှိသည်။ ၎င်းတို့တွင် လူသားအတွက် ပျော်မွေ့ခံစားဖို့ဖြစ်သည့် ဘုရားသခင်၏ ကျေးဇူးတော်နှင့် ထောက်ခံမှုတို့ရှိသည်။ ၎င်းတို့တွင် အထူးအခြေအနေများလည်းရှိသည်။ ထိုအရာများကို ဘုရားသခင်က လူသားအတွက် ချပေးသည်။ ၎င်းတို့ ကြုံတွေ့ရမည့် ဒုက္ခများစွာရှိသည်မှာ လူက စိတ်ကူးထင်မြင်သည့် အဆင်ပြေချောမွေ့မှုနှင့် လုံးဝ မတူပေ။ ဤအရာအပြင် သင်သည် ဖန်ဆင်းခံသတ္တဝါတစ်ဦးဖြစ်သည်ကို အသိအမှတ်ပြုပါက၊ ဧဝံဂေလိတရား ဖြန့်ဝေဖို့နှင့် သင်၏ တာဝန်ကို လျော်ကန်စွာ လုပ်ဆောင်ဖို့ သင်၏ တာဝန်ကို ဖြည့်ဆည်းခြင်းအတွက် ဒုက္ခခံပြီး အဖိုးအခ ပေးဆပ်ရန် သင့်ကိုယ်သင် ပြင်ဆင်ရမည်။ အဖိုးအခသည် ကိုယ်ခန္ဓာ အပယိကဖျားနာမှုအချို့ သို့မဟုတ် အခက်အခဲအချို့ကို ခံစားရခြင်း ဖြစ်နိုင်သည် သို့မဟုတ် အဆင်းနီသော နဂါးကြီး၏ ညှဉ်းပန်းနှိပ်စက်မှုများ သို့မဟုတ် လောကီလူများ၏ အထင်လွဲမှုများအပြင်၊ ဧဝံဂေလိ ဖြန့်ဝေနေချိန်တွင် ကြုံရသည့် ဒုက္ခများ၊ သစ္စာဖောက်ခံရခြင်း၊ အရိုက်ခံရကာ အဆူခံရခြင်း၊ ရှုတ်ချခံရခြင်း- အပြင်းထန်ဆုံးသော လူအုပ်ဝိုင်းခံရခြင်းနှင့် သေစေနိုင်လောက်သော အန္တရာယ်ဖြစ်ခြင်းတို့ ဖြစ်နိုင်သည်။ ဧဝံဂေလိတရား ဖြန့်ဝေခြင်းကာလတစ်လျှောက်တွင်၊ ဘုရားသခင်၏ အမှုတော် မပြီးဆုံးမီ သင် သေဆုံးမည်ဖြစ်ခြင်းနှင့်၊ ဘုရားသခင်၏ ဘုန်းအသရေ နေ့ရက်ကို တွေ့ဖို့ သင်အသက်ရှင်မည် မဟုတ်ခြင်းတို့က ဖြစ်နိုင်ပေသည်။ သင်သည် ဤအရာအတွက် ပြင်ဆင်ထားရမည်။ ဤသည်က သင်တို့ကို ကြောက်လန့်စေဖို့ ရည်ရွယ်ခြင်း မဟုတ်ပေ။ ယင်းမှာ အမှန်တရား ဖြစ်ပေသည်။...သခင်ယေရှု၏ ထိုတပည့်တော်များသည် မည်သို့ သေဆုံးကြသနည်း။ တပည့်တော်များ ကြားတွင်၊ မသေမချင်း ကျောက်တုံးဖြင့် ထုသတ် ခံခဲ့ရသူများ၊ မြင်းနောက်မှ ကြိုးဖြင့် ဆွဲခံရသူများ၊ ဇောက်ထိုးမိုးမျှော် ကားစင်တင်ခံရသူများ၊ မြင်းငါးကောင်ဖြင့် ကိုယ်လက်အင်္ဂါများကို တစ်စစီ ဆွဲဖျက်ခံရသူများရှိကြသည်- သေခြင်းတရား မျိုးစုံသည် ၎င်းတို့ပေါ် ကျရောက်ခဲ့သည်။ ၎င်းတို့၏ သေခြင်းတရားများအတွက် အကြောင်းအရင်းမှာ အဘယ်နည်း။ ၎င်းတို့သည် ၎င်းတို့၏ ပြစ်မှုများအတွက် ဥပဒေနှင့်လျော်ညီစွာ ကွပ်မျက်ခံရခြင်းလော။ မဟုတ်ပေ၊ ၎င်းတို့သည် သခင်၏ ဧဝံဂေလိတရားကို ဖြန့်ဝေပြီး ကမ္ဘာသူ ကမ္ဘာသားများ၏ ငြင်းပယ်ခြင်းကို ခံခဲ့ကြရသောကြောင့်၊ စီရင်ခြင်းခံခဲ့ရသည်၊ ရိုက်နှက်ခြင်းခံခဲ့ရသည်၊ ဆူပူခြင်းခံခဲ့ရပြီး အသတ်ခံခဲ့ရသည်— ယင်းမှာ ၎င်းတို့ ညှဉ်းဆဲသတ်ဖြတ်ခံရသည့် ပုံစံဖြစ်သည်။...၎င်းတို့၏သေခြင်းတရားနှင့် ထွက်ခွာခြင်းတို့၏ နည်းလမ်းများမှာ မည်သို့ဖြစ်ပါစေ၊ ယင်းတို့က မည်သို့ဖြစ်ပျက်ခဲ့ပါစေ၊ ဘုရားသခင်က ထိုအသက်တာများ၏၊ ထိုဖန်ဆင်းခံသတ္တဝါများ၏ နောက်ဆုံး အဆုံးသတ်များကို သတ်မှတ်ခဲ့သည့်ပုံစံ မဟုတ်ပေ။ ဤသည်မှာ သင် ရှင်းလင်းစွာ တွေ့ရမည့်အရာ တစ်စုံတစ်ခုဖြစ်သည်။ ဆန့်ကျင်ဘက်အားဖြင့် ၎င်းတို့က ဤလောကကို ပြစ်တင်ရှုတ်ချဖို့နှင့် ဘုရားသခင်၏ လုပ်ဆောင်ချက်များကို သက်သေခံဖို့ ဤနည်းလမ်းများကို အတိအကျအားဖြင့် အသုံးပြုခဲ့ခြင်း ဖြစ်သည်။ ဤဖန်ဆင်းခံ သတ္တဝါများက ၎င်းတို့၏ အဖိုးအတန်ဆုံးသော အသက်တာများကို အသုံးပြုခဲ့သည်- ၎င်းတို့က ဘုရားသခင်၏လုပ်ဆောင်ချက်များကို သက်သေခံဖို့၊ ဘုရားသခင်၏ကြီးမြတ်သော တန်ခိုးကို သက်သေခံဖို့နှင့် ဘုရားသခင်၏ လုပ်ဆောင်ချက်များသည် မှန်ကန်ကြောင်း၊ သခင်ယေရှုသည် ဘုရားသခင်ဖြစ်ကြောင်း၊ သူသည် သခင်ဖြစ်ကြောင်းနှင့် သူသည် ဘုရားသခင်၏ လူ့ဇာတိခံ ဇာတိပကတိဖြစ်ကြောင်းတို့ကို စာတန်နှင့် လောကတို့အားကြေညာဖို့ နောက်ဆုံး အခိုက်အတန့်ကို အသုံးပြုခဲ့ကြသည်။ ၎င်းတို့ အသက်တာများ၏ နောက်ဆုံး အခိုက်အတန့်အထိတွင်ပင် ၎င်းတို့သည် သခင်ယေရှု၏ နာမတော်ကို မည်သည့်အခါမျှ မငြင်းပယ်ခဲ့ပေ၊ ဤသည်မှာ ဤလောကအပေါ် တရားစီရင်ခြင်းပုံစံတစ်မျိုး မဟုတ်သလော။ ၎င်းတို့က လောကကြီးကို ကြေညာဖို့၊ သခင်ယေရှုသည် သခင်ဖြစ်သည်၊ သခင်ယေရှုသည် ခရစ်တော် ဖြစ်သည်၊ သူသည် ဘုရားသခင်၏ လူ့ဇာတိခံ ဇာတိပကတိဖြစ်သည်၊ လူသားမျိုးနွယ် တစ်ရပ်လုံးအတွက် သူဆောင်ကြဉ်းပေးလာသည့် ရွေးနုတ်ခြင်း အမှုတော်သည် လူသားမျိုးနွယ်တစ်ရပ်လုံးကို ဆက်လက် ရှင်သန်ခွင့်ပြုကြောင်းကို လူသားတို့အား အတည်ပြုဖို့ ၎င်းတို့၏အသက်တာများကို အသုံးပြုခဲ့သည်- ဤအမှန်တရားသည် ထာဝရ မပြောင်းလဲပေ။ သခင်ယေရှု၏ ဧဝံဂေလိတရားကို ဖြန့်ဝေခြင်းအတွက် မာတုရဖြစ်ခဲ့သောသူတို့သည် ၎င်းတို့၏တာဝန်ကို မည်သည့်အတိုင်းအတာအထိ ထမ်းဆောင်ခဲ့သနည်း။ ယင်းက အန္တိမ အတိုင်းအတာအထိ ဖြစ်ခဲ့သလော။ အန္တိမ အတိုင်းအတာကို မည်သို့ထင်ရှားစေခဲ့သနည်း။ (၎င်းတို့က ၎င်းတို့၏အသက်တာများကို ပေးအပ်ကြသည်။) မှန်ပေသည်၊ ၎င်းတို့သည် ၎င်းတို့၏အသက်တာများဖြင့် အဖိုးအခကို ပေးဆပ်ခဲ့သည်။ မိသားစု၊ ကြွယ်ဝခြင်းနှင့် ဤအသက်တာ၏ ရုပ်ပိုင်းဆိုင်ရာ အရာဝတ္ထုများသည် အပြင်ပန်းအရာများသာ ဖြစ်သည်။ ကိုယ်အတွက် အတွင်းကျသည့် တစ်ခုတည်းသော အရာမှာ အသက်ဖြစ်သည်။ အသက်ရှင်သည့်လူတိုင်းအတွက် အသက်သည် တန်ဖိုးအထားထိုက်ဆုံးသော အရာ၊ အဖိုးအတန်ဆုံးသော အရာဖြစ်ပြီး၊ အမှန်တော့ ဤလူများသည် လူသားမျိုးနွယ်အတွက် ဘုရားသခင်၏ ချစ်ခြင်းနှင့်ပတ်သက်၍ အတည်ပြုချက်အနေဖြင့်လည်းကောင်း၊ သက်သေခံချက်အနေဖြင့်လည်းကောင်း ၎င်းတို့၏ အဖိုးအတန်ဆုံး ပိုင်ဆိုင်မှု- အသက်- ကို ပူဇော်ဆက်ကပ် နိုင်ခဲ့ကြသည်။ ၎င်းတို့ သေဆုံးသည့် နေ့ရက်အထိ ၎င်းတို့သည် ဘုရားသခင်၏နာမတော်ကို မငြင်းပယ်ခဲ့ကြသကဲ့သို့၊ ဘုရားသခင်၏ အမှုတော်ကိုလည်း မငြင်းပယ်ခဲ့ကြဘဲ၊ ဤအမှန်တရား တည်ရှိမှုအတွက် သက်သေခံဖို့ ၎င်းတို့၏ နောက်ဆုံးအခိုက်အတန့်ကို အသုံးပြုခဲ့ကြသည်- ဤသည်မှာ အမြင့်မားဆုံး သက်သေခံသည့် ပုံစံမဟုတ်လော။ ဤသည်မှာ တစ်စုံတစ်ဦး၏တာဝန်ကို ထမ်းဆောင်ဖို့ အကောင်းဆုံး နည်းလမ်းဖြစ်သည်။ ဤသည်မှာ တစ်စုံတစ်ဦး၏တာဝန်ကို ဖြည့်ဆည်းခြင်း ဆိုသည့်အရာဖြစ်သည်။ စာတန်က ၎င်းတို့ကို ခြိမ်းခြောက်ပြီး အကြမ်းဖက်ကာ၊ အဆုံး၌ ၎င်းက သူတို့၏အသက်တာများကို အဖိုးအခ ပေးစေသည့်အခါတွင်ပင်၊ ၎င်းတို့သည် ၎င်းတို့၏ တာဝန်ကို မပယ်ဖျက်ခဲ့ပေ။ ဤသည်မှာ တစ်စုံတစ်ဦး၏ တာဝန်ကို အဆုံးစွန်သော အတိုင်းအတာအထိ ဖြည့်ဆည်းခြင်းဖြစ်ပေသည်။ ဤသည်နှင့်ပတ်သက်၍ ငါမည်သည့်အရာကို ဆိုလိုသနည်း။ ဘုရားသခင်ကို သက်သေခံဖို့နှင့် ဧဝံဂေလိတရား ဖြန့်ဝေဖို့ တစ်ထေရာတည်းသော နည်းစနစ်ကို သင်တို့ အသုံးပြုဖို့အား ငါရည်ရွယ်သလော။ ထိုသို့ ပြုလုပ်ရန် မလိုအပ်သော်လည်း၊ ဤသည်မှာ သင်၏တာဝန် ဖြစ်ကြောင်း၊ ဘုရားသခင်က သင့်အား လိုအပ်ပါက၊ ယင်းကို သမစိတ္တဖြစ်သောဝတ္တရားတစ်ခု အနေဖြင့် လက်ခံသင့်ကြောင်းတို့ကို သင်နားလည်ရမည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောချက်များ၊ ဧဝံဂေလိတရား ဖြန့်ဝေခြင်းသည် ကျင့်ဝတ်သိက္ခာအရ ယုံကြည်သူများအားလုံး မဖြစ်မနေလုပ်ရမည့် တာဝန်တစ်ခုဖြစ်သည်) သခင်ယေရှု တပည့်တော်တွေက ဧဝံဂေလိ ဖြန့်ဝေဖို့ အားထုတ်တဲ့အခါ လောကရဲ့ ရှုတ်ချမှုကို ခံခဲ့ရတယ်၊ ထောင်ချခံရပြီး နှိပ်စက်ညှဉ်းပန်းမှုမျိုးစုံ ခံစားခဲ့ရတယ်ဆိုတာကို ဘုရားနှုတ်ကပတ်တော်တွေကြောင့် ကျွန်မ သဘောပေါက်သွေားတယ်။ သူတို့အတော်များများက အသတ်ခံကြရတယ်။ ဒါပေမဲ့ ဘယ်လိုအဆုံးသတ်မှုမျိုး တွေ့ရပါစေ ဘုရားကို သေတဲ့အထိ လုံးဝ ငြင်းပယ်ခြင်းမရှိဘဲ သူတို့ရဲ့ တန်ဖိုးရှိတဲ့ အသက်တွေကို စွန့်လွှတ်နိုင်ခဲ့ကြတယ်။ ဘုရားအတွက် သက်သေခံချက်ပေးပြီး သူတို့ကိုယ်ပိုင် ဘဝတွေနဲ့ ဘုရားကို ဘုန်းထင်ရှားစေခဲ့ကြတယ်။ အဲဒါက အမြင့်မြတ်ဆုံး သက်သေခံချက်တွေဖြစ်သလို တာဝန်တစ်ခု လုပ်ဆောင်ဖို့ အကောင်းဆုံးနည်းလမ်းပဲ။ ဒါပေမဲ့ ကျွန်မကကျတော့ အစိုးရက လိုက်ဖမ်းတာခံရပြီး မကောင်းတဲ့ လူတွေရဲ့ ခြိမ်းခြောက်တာခံရတော့ အသက်ကို မက်မက်မောမော ဖက်တွယ်ပြီး ရွာကထွက်ပြေးချင်တယ်၊ ဆက်တရားမဟောချင်သလို လူသစ်တွေကို ရေမလောင်းချင်ခဲ့ဘူး။ ကျွန်မရဲ့ သက်သေခံချက် ဘယ်မှာရှိလဲ။ ကျွန်မ ဆင်ခြင်မိတယ်။ သေရေး ရှင်ရေး အခြေအနေနဲ့ ရင်ဆိုင်ရတော့ ဘာလို့ ကျွန်မ ကြောက်လာတာလဲပေါ့။ ဘာလို့လဲဆိုတော့ အသက်ကို ကျွန်မ အရမ်းတန်ဖိုးထားလို့၊ သေရေးနဲ့ ရှင်ရေးတွေကို နားမလည်လို့ပဲ။ တကယ်တော့ ဘုရားက ကျွန်မတို့ရဲ့ သေရေးရှင်ရေးတွေကို သတ်မှတ်ထားပြီးသား။ ဘုရားအတွက်အသတ်ခံရတာက ခန္ဓာသေသွားပေမဲ့ တကယ် သေတာ လုံးဝ မဟုတ်ဘူး။ အဲဒါက ကောင်းမွန်တဲ့ အဆုံးသတ်နဲ့ ခရီးပန်းတိုင် ရှိမှမဟုတ်ဘူးဆိုတဲ့ သဘောမဟုတ်ဘူး။ သခင်ယေရှု ပြောခဲ့သည်မှာ- “အကြင်သူသည် မိမိအသက်ကို ကယ်ဆယ်ခြင်းငှာအလိုရှိ၏။ ထိုသူသည် အသက်ရှုံးလိမ့်မည်။ အကြင်သူသည် ငါ့ကြောင့်အသက်ရှုံး၏၊ ထိုသူသည် အသက်ကို တွေ့လိမ့်မည်။” (ရှင်မဿဲခရစ်ဝင် ၁၆:၂၅) အသက်ကို ဖက်တွယ်လို့ ကိုယ့်တာဝန်ကို ကျွန်မ မလုပ်ဘူး။ ဘုရားကို သစ္စာဖောက်တယ်ဆိုရင် ကျွန်မရဲ့ခန္ဓာက ဆင်းရဲဒုက္ခခံရမှာမဟုတ်ပေမဲ့ ဘုရားက ကျွန်မကို စက်ဆုပ်ပြီးတော့ ဖယ်ရှားမှာဖြစ်ပြီး ကျွန်မရဲ့ ဝိညာဉ်က အပြစ်ပေးခံရမှာပဲ။ ဘုရားအတွက် သက်သေခံဖို့ ကိုယ့်အသက်ကို စတေးနိုင်ပြီး သူ့ကို သစ္စာဖောက်မယ့်အစား အသေခံလိုက်ရင် အဲဒါက စာတန်ကို အရှက်ရစေမှာဖြစ်ပြီး အဓိပ္ပာယ်အရှိဆုံး ဖြစ်မှာပဲ။ ဒီအသိတရားရလိုက်တော့ ကိုယ့်အသက်အတွက် မကြောက်တော့ဘဲနဲ့ စိတ်ဆုံးဖြတ်လိုက်တယ်။ ကျွန်မက အချုပ်ခန်းထဲမှာ မရှိသရွေ့၊ အသက်ရှူနေသရွေ့ ဧဝံဂေလိ ဆက်ဖြန့်ပြီး စာတန်ကို အရှက်ရစေဖို့ ဘုရားအတွက် သက်သေခံမယ်ပေါ့။ အဲဒီနောက်မှာ ကျွန်မ ဧဝံဂေလိ ဆက်ဟောခဲ့တယ်။ မကြာခင်မှာ ရွာမှာရှိတဲ့ လူအများစုက အနန္တတန်ခိုးရှင် ဘုရားသခင်ရဲ့ အမှုတော်ကို လက်ခံခဲ့ကြတယ်။

အဲဒီနောက်မှာ ဧဝံဂေလိ ဖြန့်ဖို့ နောက်တစ်ရွာကို ကျွန်မ သွားခဲ့တယ်။ ပထမတော့ လူဆယ်ယောက်ကျော် လာကြပေမဲ့ နောက်တော့ လင်မယားနှစ်ယောက်ကို ကျွန်မတို့ တရားဟောနေတုန်း မြို့နယ်အစိုးရက သိသွားတယ်။ မြို့နယ်ဌာနအကြီးအကဲ၊ လက်ထောက် ဌာနအကြီးအကဲ၊ ဘဏ္ဍာရေးမှူး၊ လက်နက်ကိုင်အဖွဲ့ဝင်တချို့ပါတဲ့ လူဆယ်ယောက်ကျော် ဗြုန်းခနဲဝင်လာပြီး သူတို့နဲ့ လိုက်ခဲ့ရမယ်လို့ပြောတယ်။ အဲဒီတုန်းက ကျွန်မ အတော်ကြောက်သွားတယ်။ သူတို့ ကျွန်မကို ဖမ်းပြီး ထောင်ကို ပို့ကြတော့မှာလားပေါ့။ အစိုးရက ကျွန်မကို လိုက်ဖမ်းနေခဲ့တာလေ။ ကျွန်မဧဝံဂေလိ ဟောနေတာတွေ့ရင် အကြောင်းကြားဖို့ ပြောပြီး အိမ်တိုင်းကို ကျွန်မနာမည် ပြောထားကြတာလေ။ ကျွန်မအကြောင်း သိသွားရင် အသာလေး သက်ညှာပေးကြမှာ မဟုတ်ဘူး။ ပြီးတော့ အဲဒီ ယုံကြည်သူသစ်တွေလည်း အမှုပတ်မှာ။ အဲဒါဆိုဘယ်လိုလုပ်မလဲပေါ့။ ကိုယ့်သက်သေခံချက်မှာ ခိုင်ခိုင်မာမာ ရပ်တည်နိုင်အောင် ယုံကြည်ချက်ပေးဖို့ ဘုရားဆီ တောင်းလျှောက်ရင်းနဲ့ မရပ်မနား ဆုတောင်းမိတယ်။ သိပ်မကြာခင်မှာ အဲဒီရွာကို ဧဝံဂေလိ ဟောဖို့ ကျွန်မတို့နဲ့ သွားခဲ့ကြတဲ့ နောက်ထပ် ညီအစ်ကို မောင်နှမတွေလည်း အဖမ်းခံလိုက်ရတယ်။ ကျွန်မတို့အားလုံးကို မြို့နယ်အစိုးရဆီ ခေါ်သွားပြီး ဖုန်းအားလုံး ယူသွားကြတယ်။ အဲဒီနောက် မြို့နယ်ဌာနအကြီးအကဲက ကျွန်မတို့ကို စစစ်ဆေးတယ်။ “မင်းတို့ ဘယ်သူတွေလဲ။ ဧဝံဂေလိ ဟောဖို့ ဒီကို ရောက်လာကြတာလား”တဲ့။ ကျွန်မတို့ ပြန်မဖြေကြဘူး။ အဲဒါနဲ့အမှောင်ခန်းတစ်ခုမှာ ကျွန်မတို့ကို သူတို့ ပိတ်ထားလိုက်ပြီး ်လက်နက်ကိုင်အဖွဲ့ဝင် ငါးယောက်၊ ခြောက်ယောက်ကို စောင့်ကြည့်ခိုင်းထားတယ်။ ကျွန်မကို သူတို့မှတ်မိမှာ အရမ်းစိုးရိမ်ခဲ့ရတယ်။ ကျွန်မသာ ကိုယ့်ဇာတိမြို့ကို အပို့ခံလိုက်ရရင် သူတို့ ညှဉ်းဆဲပြီး ဖျက်ဆီးရမ်းကားတာခံရဖို့ ထောင်ဒဏ်ပေးခံရမှာ သေချာတယ်။ ဒေသအစိုးရခေါင်းဆောင်က ပြောတယ်၊ ကျွန်မတို့ မိတဲ့အခါ ကျွန်မ ဆံပင်ကိုဖြတ်မယ်၊ လည်ပင်းမှာ ဆိုင်းဘုတ်တစ်ခုချိတ်ပြီး အနီးအနားကို လှည့်ပြခိုင်းမယ်တဲ့။ အဲဒီအချိန်မှာ ကျွန်မ ဘုရားဆီ ဆက်တိုက်ဆုတောင်းနေမိတယ်။ “အို ဘုရားသခင်၊ အဖမ်းခံရတာကို ကျွန်မ ကျိုးနွံနာခံဖို့ အသင့်ပါ။ ဒါပေမဲ့ ကျွန်မရဲ့ ဝိညာဉ်ရင့်ကျက်မှုက နည်းပါတယ်။ ခိုင်ခိုင်မာမာ ရပ်တည်နိုင်အောင် ယုံကြည်ခြင်းပေးပြီး စောင့်ရှောက်ပါ”လို့ပေါ့။ ဆုတောင်းပြီးတော့ အရင်က ကြည့်ခဲ့ရတဲ့ သက်သေခံချက် ဗီဒီယိုတစ်ခုကို တွေးမိတယ်။ ထောင်ထဲမှာ တရုတ်ရဲတေက သေအောင် အရိုက်ခံခဲ့ရတဲ့ ညီအစ်ကို မောင်နှမတချို့က သေခြင်းနဲ့ ရင်ဆိုင်ရင်းတောင် ဘုရားကို မငြင်းပယ်ဘူး၊ သစ္စာမဖောက်ခဲ့ကြဘူး။ အတော်များများက ရက်ရက်စက်စက် ညှဉ်းပန်းခံရတယ်၊ ပြစ်ဒဏ်ချမှတ်ပြီး ထောင်ချခံရတယ်။ ဒါပေမဲ့ ဘုရားပေါ် ဆုတောင်းမှီခိုရင်းနဲ့ ဘုရားနှုတ်ကပတ်တော်ကတစ်ဆင့် စစ်မှန်တဲ့ ယုံကြည်ခြင်း ဖြစ်ပေါ်ခဲ့ကြတယ်။ တစ်သက်တစ်ကျွန်း ထောင်ချခံရရင်တောင် ဘုရားကို သစ္စာမဖောက်ဖို့ အသက်နဲ့ရင်းပြီး သစ္စာဆိုခဲ့ကြတယ်။ ခိုင်မာ၊ ထူးကဲတဲ့ သက်သေတွေ ခံကြတယ်။ ကျွန်မ တကယ်ခွန်အားရတယ်။ ဘုရားနှုတ်ကပတ်တော်တွေကို သတိရမိတယ်။ “အမှု၏ ဤအဆင့်တွင် ငါတို့ထံမှ အဆုံးစွန် ယုံကြည်ခြင်းနှင့် ချစ်ခြင်းတို့ လိုအပ်ပေသည်။ အမှု၏ ဤအဆင့်သည် ယခင်အဆင့်များအားလုံးမှ ကွဲပြားခြားနားသည့်အတွက်၊ အနည်းငယ်မျှ ပေါ့ဆလိုက်ရုံနှင့် ငါတို့ ခလုတ်တိုက်မိကောင်း တိုက်မိနိုင်သည်။ ဘုရားသခင် စုံလင်နေစေသည့် အရာမှာ မြင်၍မရနိုင်သကဲ့သို့၊ လက်ဆုပ်လက်ကိုင်ပြ၍လည်း မရသည့် လူသားမျိုးနွယ်၏ ယုံကြည်ခြင်း ဖြစ်သည်။ ဘုရားသခင် လုပ်ဆောင်သည့်အရာမှာ နှုတ်ကပတ်တော်များကို ယုံကြည်ခြင်း၊ ချစ်ခြင်းနှင့် အသက်တို့အဖြစ်သို့ ပြောင်းလဲခြင်းဖြစ်သည်။ လူတို့သည် ယောဘ၏ယုံကြည်ခြင်းထက် သာ၍ ကြီးမားသော ယုံကြည်ခြင်းကို ပိုင်ဆိုင်သည့်အဆင့်သို့ ရောက်ရှိကြသည်အထိ ရာပေါင်းများစွာသော စစ်ဆေးခြင်းများကို ကြံ့ကြံ့ခံရမည်။ ၎င်းတို့သည် ဘုရားသခင်ကို မည်သည့်အခါမျှ စွန့်ခွာခြင်းမရှိဘဲ၊ မယုံကြည်နိုင်လောက်သော ဆင်းရဲဒုက္ခနှင့် ညှဉ်းဆဲမှုအမျိုးမျိုးကို သည်းခံကြရမည်။ သေသည်အထိ ၎င်းတို့ နာခံမှုရှိပြီး၊ ဘုရားသခင်၌ ကြီးမားသည့်ယုံကြည်ခြင်း ရှိသောအခါတွင်၊ အမှု၏ ဤအဆင့်သည် ပြီးစီးပေသည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ လမ်းကြောင်း... (၈)) ဘုရားသခင်ရဲ့ နောက်ဆုံးသောကာလ အမှုတော်က ကျွန်မတို့ရဲ့ယုံကြည်ခြင်းနဲ့ ချစ်ခြင်းကို စုံလင်စေဖို့အတွက် နှုတ်ကပတ်တော်တွေကို အသုံးပြုဖို့ဖြစ်တယ်၊ ဒီလိုဆိုရင် ကျွန်မတို့က ဖိနှိပ်ခြင်းနဲ့ ဆင်းရဲဒုက္ခတွေကတစ်ဆင့် ဘုရားရဲ့ နှုတ်ကပတ်တော်တွေကို လက်တွေ့လုပ်ပြီး တွေ့ကြုံခံစားနိုင်တယ်၊ ဒါဆိုရင် ဘုရားနှုတ်ကပတ်တော်တွေက ကျွန်မတို့ရဲ့ အသက်တာတွေဖြစ်လာတယ်ဆိုတာကို ဘုရားနှုတ်ကပတ်တော်က ကျွန်မကို ပြခဲ့တယ်။ အစိုးရရဲ့ ဖိနှိပ်ပြီး လိုက်ဖမ်းတာ ခံခဲ့ရတာကို ပြန်တွေးမိတယ်။ ကျွန်မ တွန့်ဆုတ်ပြီး ကြောက်နေချိန်မှာ ကျွန်မကို ဆက်တရားဟောဖို့ ယုံကြည်ချက်ပေးရင်းနဲ့ လမ်းပြခဲ့တာ လုံးဝကို ဘုရားနှုတ်ကပတ်တော်တွေပဲ။ အခု ကျွန်မ အဖမ်းခံလိုက်ရတဲ့အတွက် ခိုင်ခိုင်မာမာ ရပ်တည်ဖို့ ယုံကြည်ချက်ရှိရမယ်။ ကျွန်မ ထောင်ကျပြီး ဖျက်ဆီးရမ်းကားခံခဲ့ရရင်တောင်၊ သေရင်တောင် ကျိုးနွံနာခံဖို့ အသင့်ဖြစ်နေခဲ့တယ်။ အဲဒီနောက် “ဘဝ၏သက်သေ”လို့ခေါ်တဲ့ ဓမ္မသီချင်းက စိတ်ထဲမှာပေါ်လာတယ်။ “ဘုရားအဖို့ ကျွန်ုပ်သက်သေခံတဲ့အတွက် တစ်နေ့မှာ ဖမ်းဆီးခံရပြီး နှိပ်စက်ညှဉ်းပန်းခံရနိုင်တယ်။ ဒီဆင်းရဲဒုက္ခက ဖြောင့်မတ်ခြင်းအတွက်မှန်း ကျွန်ုပ်စိတ်နှလုံးထဲ သိနေ။ ကျွန်ုပ်အသက်ဟာ မီးပွားလို မျက်စိတစ်မှိတ်တွင်း ပျောက်ခဲ့လည်း ဒီဘဝမှာ ခရစ်တော် နောက်လိုက်ကာ သူ့အတွက် သက်သေခံနိုင်လို့ ကျွန်ုပ်ဂုဏ်ယူလျက်နေဦးမယ်။ နိုင်ငံတော်ဧဝံဂေလိ ပျံ့နှံ့သည့် ကြီးမားသော ဖြစ်ရပ်ကို မမြင်တွေ့နိုင်လျှင်ပင် အလှပဆုံး ဆုတောင်းမေတ္တာဖြင့် ဆက်ကပ်ပူဇော်နေမယ်။ နိုင်ငံတော် တည်တဲ့နေ့ ကျွန်ုပ်မမြင်တွေ့နိုင်ဘဲ ယနေ့ကျွန်ုပ် စာတန်ကိုအရှက်ရစေ နိုင်လျှင်ပင် ကျွန်ုပ်နှလုံးသား ပျော်ရွှင်၊ ငြိမ်သက်ခြင်း ပြည့်လို့နေမယ်။ နှုတ်ကပတ်တော်သည် ကမ္ဘာတစ်ဝှမ်းသို့ ပျံ့နှံ့ကာ လူတို့ကြား အလင်းပေါ်ထွက်လို့လာပြီ။ ခရစ်တော်ရဲ့နိုင်ငံတော် နိုးထလာပြီး ခက်ခဲမှုတွေအထဲမှာ တည်လေပြီ။ အမှောင်ထုသည် ပြီးဆုံးဖို့ နီးလို့လာသည် ဖြောင့်မတ်ခြင်း အရုဏ်တက်လို့လာပြီ။ အချိန်နှင့် အမှန်တရားတို့သည် ဘုရားအတွက် သက်သေခံခဲ့ကြပြီ။” (သိုးသငယ်နောက်လိုက်ပြီး သီချင်းအသစ်များကိုသီဆိုပါ) ဒီဓမ္မတေးသီချင်းက ကျွန်မအတွက် တကယ်ကို ခွန်အားရတယ်။ ဧဝံဂေလိ ဖြန့်လို့ ကျွန်မ အဖမ်းခံခဲ့ရရင် ဖြောင့်မတ်ခြင်းတရားအတွက် ညှဉ်းပန်းခံရတာ ဖြစ်မှာပဲဆိုတာ ကျွန်မ နားလည်ခဲ့တယ်။ အခု ကျွန်မ အဖမ်းခံလိုက်ရပြီ။ ထောင်ချခံရနိုင်တယ်၊ နောက်ထပ် တရားမဟောနိုင်ဘဲ ဖြစ်နိုင်တယ်။ ဒါပေမဲ့ ကျွန်မ အဖမ်းခံရပြီး နှိပ်စက်ခံရပေမဲ့ ဘုရားအတွက် သိပ်ကောင်းတဲ့ သက်သေခံချက်ပေးပြီး စာတန်ကို အရှက်ရစေဖို့ အခွင့်အရေးရှိတယ်။ ကျွန်မ တကယ် ဂုဏ်ယူမိတယ်။ ဒီအတွေးက ကျွန်မကို ယုံကြည်ချက်ပေးတယ်။ မနက်အရုဏ်လင်းပြီးတော့ ကျွန်မတို့ကို ထပ်ပြီး စစ်မေးတယ်။ ကျွန်မတို့ဆီက ဘာမှမရမှာကို မြင်‌တော့ ငွေ ၃၀၀၀ ကျပ် ဒဏ်ရိုက်ပြီး လွတ်ပေးလိုက်ကြတယ်။ ဆက်တရားမဟောဖို့လည်း သတိပေးပြီး ဘုရားကို ပြစ်မှားစော်ကားတာတွေ အများကြီး ပြောကြတယ်။ အဲဒီနတ်ဆိုးတွေကို ကျွန်မ ပိုလို့တောင် မုန်းမိတယ်။

လွတ်လာပြီးတဲ့နောက်မှာ ကျွန်မ ဧဝံဂေလိ ဆက်ဟောခဲ့တယ်။ တစ်နေ့ ညီအစ်ကိုတစ်ယောက်က ဖုန်းခေါ်ပြီး ပြောတယ်။ “မြို့နယ်အရာရှိတွေက အစ်မက ဧဝံဂေလိ ဟောဖို့လာတဲ့ အပြင်လူဖြစ်မှန်း သိကြတယ်။ သူတို့က အစ်မအကြောင်းကို ဖော်ခိုင်းဖို့ ကျွန်တော်နဲ့ ယုံကြည်သူသစ်နှစ်ယောက်ကို ဖမ်းတယ်။ ဒါပေမဲ့ ကျွန်တော်တို့ထဲက ဘယ်သူကမှ စကားမပြောလို့ ဒဏ်ရိုက်ပြီး လွှတ်ပေးလိုက်ကြတယ်။ အစ်မ တရားဟောနေတာကို သူတို့ ထပ်ကြုံရင် တွေ့တဲ့နေရာမှာတင် အစ်မကို မုဒိမ်းကျင့်မယ်လို့လည်း ပြောကြတယ်။ အစ်မကို သူတို့ နေရာတကာ ရှာနေကြတယ်၊ အမြန် ပြေးပါ...”တဲ့။ ဒီအစ်ကိုက ဒီလိုပြောတာကြားတော့ ကျွန်မ ကိုယ့်နားကို မယုံနိုင်ခဲ့ဘူး။ ကျွန်မ တရားဟောတာကို သူတို့တွေ့ရင် မုဒိမ်းကျင့်မယ်ဆိုတာကို ကြားတော့ ကျွန်မ ဒေါသထွက်သွားတယ်။ ဒီလူတွေက တကယ်ကို မကောင်းဆိုးဝါးတွေဖြစ်ပြီး လူ့သဘာဝမရှိကြဘူးပဲ။ ကျွန်မက ဧဝံဂေလိ ဝေမျှတဲ့ ယုံကြည်သူ သက်သက်ဖြစ်ပေမဲ့ သူတို့က အရမ်းမုန်းကြတယ်။ ကျွန်မတို့ကို ဖမ်းဆီး၊ နှိပ်စက်၊ ဒဏ်ရိုက်ချင်နေပြီး ယုံကြည်ခြင်းရှိခွင့်မပေးကြဘူး။ မုဒိမ်းတောင်ကျင့်ပြီး စော်ကားချင်နေကြတယ်။ တကယ်ကို ဘုရားကိုဆန့်ကျင်တဲ့ မကောင်းဆိုးဝါးတွေပဲ။ သူတို့ကို ကျွန်မ စိတ်နှလုံးကနေ မုန်းပြီး ပစ်ပယ်မိတယ်။ ကျွန်မကို သူတို့ ဖိနှိပ်လေ၊ တရားဟောပြီး သက်သေခံချင်လေပဲ။

ဒီလိုနဲ့ အောက်တိုဘာမှာ ဧဝံဂေလိ ဖြန့်ဖို့ နောက်တစ်ရွာကို ကျွန်မ သွားခဲ့တယ်။ အရင်တုန်းက ညီအစ်ကို မောင်နှမတွေက အဲဒီနေရာမှာ တရားဟောခဲ့ပြီးပြီ။ ဒါပေမဲ့ သူတို့ရဲ့ သင်းအုပ်က စစ်မှန်တဲ့ လမ်းခရီးကို ယုံကြည်သူတွေ စုံစမ်းတာကို တားဖို့ ကောလာဟလတွေ ဖြန့်ပြီး အစိုးရက ယုံကြည်သူတွေကို စဖမ်းဆီးခဲ့တယ်။ ကောလာဟလတွေရဲ့ လှည့်စားတာအပြင် အဖမ်းခံရမှာကြောက်တဲ့ ရွာသားတွေက စစ်မှန်တဲ့ လမ်းခရီးကို မစုံစမ်းရဲခဲ့ကြဘူး။ ဧဝံဂေလိ ဖြန့်တာက ကျွန်မတို့အတွက် ခက်ခဲမှာပဲ။ လမ်းပြပေးဖို့အတွက် ဘုရားဆီ ကျွန်မ ဆုတောင်းခဲ့တယ်။ အဲဒီနောက် သမ္မာတရားကို အတော်လေး သိနားလည်မှုရှိတဲ့ လူလေးယောက်ကို ရှာပြီး စစ်မှန်တဲ့ လမ်းခရီးက ဘာဖြစ်တယ်၊ မှားတဲ့လမ်းတွေက ဘာဖြစ်တယ်ဆိုတာနဲ့ လူတွေကို ထုတ်ဖော်ပြီး စုံလင်စေဖို့၊ တောပင်တွေနဲ့ ဂျုံစပါးတွေ၊ မိုက်မဲတဲ့ သတို့သမီးတွေနဲ့ ပညာရှိသတို့သမီးတွေကို အမျိုးအစားခွဲဖို့ နောက်ဆုံးသော ကာလမှာ စာတန်ရဲ့ ဖိနှိပ်မှုနဲ့ နှောင့်ယှက်မှုတွေကို ဘုရားက ဘယ်လို အသုံးချတယ်ဆိုတာတွေကို သူတို့နဲ့ မိတ်သဟာယပြုတယ်။ မိုက်မဲသူတွေက လူသားတွေရဲ့စကား၊ စတန်ရဲ့ စကားကိုပဲ နားထောင်တယ်။ သခင် ကြွလာပြီး နှုတ်ကပတ်တော်တွေကို မိန့်မြွက်တယ်ဆိုတဲ့ သတင်းကြားတော့ သူတို့ မရှာဖွေ၊ မစုံစမ်းကြဘူး။ ဒါကြောင့် မင်္ဂလာဆောင်လုလင်ကို သူတို့ မကြိုဆိုနိုင်ကြဘူး။ ဘုရားအသံကို နားထောင်ဖို့ ကြိုးစားသူတွေ၊ ဘုရားနောက်လိုက်ဖို့ ကိုယ့်ယုံကြည်ခြင်းမှာ ခိုင်မာသူတွေပဲ ပညာရှိသူတွေဖြစ်တယ်။ သူတို့သာ သခင့်ကို ကြိုဆိုနိုင်ပြီး သူနဲ့အတူ မင်္ဂလာစားပွဲတော်ကို တက်နိုင်ကြတယ်။ မိတ်သဟာယပြီးတဲ့နောက်မှာ သူတို့လေးယောက်လုံး ဆက်စုံစမ်းချင်ကြတယ်။ နောကသုံးလေးရက်မှာ ဘုရားနှုတ်ကပတ်တော်တွေကို မိတ်သဟာယပြုရင်းနဲ့ သူတို့အတွက် စုဝေးပွဲတွေ ကျွန်မစလုပ်ပေးတယ်။ သူတို့ထဲက တစ်ယောက်က ပြောတယ်။ “အရင်က သင်းအုပ်နဲ့ ရွာသူကြီးစကားကို နားထောင်ခဲ့တယ်။ သူတို့က အနန္တတန်ခိုးရှင် ဘုရားသခင်ရဲ့ နှုတ်ကပတ်တော်တွေကို နားမထောင်ဖို့ ပြောလို့ နားမထောင်ခဲ့ဘူး။ သခင့်ရဲ့ ကြွလာခြင်းကို ကြိုဆိုဖို့ ကျွန်တော့် အခွင့်အရေးကို လွဲခါနီးလေးပဲ။ လူတွေပြောတာ ကျွန်တော် နားမထောင်တော့ဘူး။ ဘုရားပြောတာကိုပဲ နားထောင်မယ်”တဲ့။ နောက်တစ်ယောက်က ပြောတယ်။ “အနန္တတန်ခိုးရှင် ဘုရားသခင်ရဲ့ နှုတ်ကပတ်တော်တွေကို ဖတ်ရတော့ သူက ပြန်ကြွလာတဲ့ သခင်ယေရှုဖြစ်တယ်ဆိုတာ ယုံကြည်လက်ခံလာတယ်။ တခြားလူတွေ ဘယ်လိုပဲ တားကောင်းတားနိုင်ပါစေ၊ အနန္တတန်ခိုးရှင် ဘုရားသခင်ကို လက်ခံမယ်”တဲ့။ အဲဒီလိုတွေ သူတို့ပြောတာ ကြားတော့ ကျွန်မ အရမ်းဝမ်းသာမိတယ်။ အဲဒီနောက်မှာ တရားဒေသနာနားထောင်ဖို့ သူတို့ရဲ့ အမျိုးတချို့ကို ခေါ်လာကြတယ်။ မကြာခင်မှာပဲ လူ ၂၀ ကျော်က အနန္တတန်ခိုးရှင် ဘုရားသခင်ရဲ့ နောက်ဆုံးသော ကာလ အမှုတော်ကို လက်ခံခဲ့ကြတယ်။ ဒီယုံကြည်သူအသစ်တွေက ကောလာဟလတွေကြားမှာ စစ်မှန်တဲ့ လမ်းခရီးကို ရှာပြီး ခိုင်ခိုင်မာမာ ရပ်တည်နိုင်တာက ကျွန်မအတွက် တကယ်ကို တို့ထိစရာဖြစ်ခဲ့တယ်။ အားလုံးက ဘုရားနှုတ်ကပတ်တော်တွေရဲ့လမ်းပြမှုပါ။ နောက်ဆုံးတော့ ဒီဇင်ဘာလမှာ ကျွန်မအမေ လွတ်လာတယ်။ သူက အချုပ်ခံရတဲ့ လတွေမှာ နေ့တိုင်း အလုပ်ကြမ်းလုပ်ခဲ့ရတာလေ။ အစိုးရဝန်ထမ်းတွေက ပြောတယ်၊ ကျွန်မကို သူတို့ သေချာပေါက်ဖမ်းပြီး ထောင်ချမှာတဲ့။ ကျွန်မအမေ မလွတ်ခင်ကအကြောင်းကို ပြန်တွေးမိတယ်။ ရဲတွေက သူတို့သေနတ်တွေ၊ နံပါတ်တုတ်တွေနဲ့ ကျွန်မကို ဖမ်းဖို့ ကျွန်မအိမ်ကို ခဏခဏသွားကြတယ်။ ကျွန်မ အိမ်မပြန်လာမချင်း သူ့ကို မလွှတ်ဘူးလို့ ပြောခဲ့ကြတာလေ။ ဒါပေမဲ့ ခုတော့ ကျွန်မကို မမိလိုက်ဘဲ ကျွန်မအမေကို သူတို့ လွှတ်ပေးလိုက်ကြတယ်။ အရာရာကို ဘုရားအုပ်စိုးပြီး ကျွန်မ အဖမ်းခံရခြင်း ရှိမရှိက သူ့လက်ထဲမှာ လုံးလုံးလျားလျား ရှိမှန်း ကျွန်မ တကယ် တွေ့ကြုံခဲ့ရတယ်။ ကျွန်မ စိတ်မကျဉ်းကျပ်တော့ဘူး။ ဆက်တရားဟောပြီး ဘုရားကို သက်သေခံခဲ့တယ်။

ဒီလမ်းကြောင်းတစ်လျှောက်လုံးမှာ ဧဝံဂေလိဟောနေတုန်း အခက်အခဲတွေအများကြီး ကျွန်မ ကြုံခဲ့ရတယ်။ စိတ်ဓာတ်ကျပြီး အားနည်းတာတွေ အပါအဝင်ပေါ့။ ဒါပေမဲ့ အကြိမ်တိုင်းမှာ ဘုရားနှုတ်ကပတ်တော်က ဖိနှိပ်မှုနဲ့ အားနည်းမှုတွေမှာ ခိုင်ခိုင်မာမာ ရပ်တည်ခွင့်ပေးရင်း ဆက်တရားဟောပြီး ဘုရားကို သက်သေခံဖို့ ယုံကြည်ချက်ပေးရင်းနဲ့ ကျွန်မကို လမ်းပြခဲ့တယ်။ ဘုရားက ကျွန်မရဲ့ ယုံကြည်ခြင်းကို စုံလင်စေဖို့ ဒီအခက်အခဲတွေကို အသုံးပြုနေမှန်း ကျွန်မ တကယ် တွေ့ကြုံခဲ့ရတယ်။ ဘုရားကို ကျေးဇူးတင်ပါတယ်။ ကျွန်မတာဝန်ကို ကျွန်မ ဖြည့်ဆည်းမယ်။ ပိုများတဲ့ လူတွေကို ဘုရားရဲ့ နောက်ဆုံးသော ကာလ ဧဝံဂေလိကို ဝေမျှပြီး ဘုရားမေတ္တာကို ပြန်ပေးဆပ်ပါမယ်။