အနန္တတန်ခိုးရှင် ဘုရားသခင် အသင်းတော် အကြောင်းအရာ

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နောက်ဆုံးသောကာလ ခရစ်တော်၏ မြွက်ဆိုချက်များ လက်ရွေးစင်များ

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

ဘုရားသခင်၏ အမှုအဆင့် သုံးဆင့်ကို သိခြင်းသည် ဘုရားသခင်ကို သိခြင်း၏ လမ်းကြောင်းဖြစ်သည်

လူသားမျိုးနွယ်အား စီမံခန့်ခွဲခြင်းအမှုကို အဆင့်သုံးဆင့်ခွဲထား၏။ ဆိုလိုသည်မှာ လူသားမျိုးနွယ် အား ကယ်တင်ခြင်းအမှုကို အဆင့်သုံးဆင့် ခွဲထားခြင်းဖြစ်သည်။ ဤအဆင့်သုံးဆင့်တွင် ကမ္ဘာမြေကြီးကို ဖန်ဆင်းခြင်းအမှု မပါသော်လည်း ၎င်းအဆင့်တို့မှာ ပညတ်တော်ခေတ်၊ ကျေးဇူးတော်ခေတ်နှင့် နိုင်ငံတော် ခေတ်အမှု၏ အဆင့်သုံးဆင့်တို့ဖြစ်ကြ၏။ ကမ္ဘာမြေကြီးကို ဖန်ဆင်းခြင်းအမှုသည် လူသားမျိုးနွယ် တစ်ရပ်လုံးကို ထုတ်လုပ်ခြင်းအမှုဖြစ်၏။ ထိုအမှုမှာ လူသားမျိုးနွယ်ကို ကယ်တင်ခြင်းအမှု မဟုတ်ဘဲ လူသားမျိုးနွယ်ကို ကယ်တင်ခြင်းအမှုနှင့် လုံးဝဆက်စပ်ခြင်း မရှိပေ။ အဘယ်ကြောင့်ဆိုသော် ကမ္ဘာ မြေကြီးကို ဖန်ဆင်းချိန်၌ လူသားသည် စာတန်၏ ဖျက်ဆီးခြင်းကို မခံရသေးသဖြင့် လူသားမျိုးနွယ်ကို ကယ်တင်ခြင်းအမှု ဆောင်ရွက်ရန် မလိုအပ်ခဲ့ပေ။ လူသားမျိုးနွယ် ဖျက်ဆီးခံရသည့်အခါတွင်မှ လူသား မျိုးနွယ်ကို ကယ်တင်ခြင်းအမှု စတင်ခဲ့သည်။ ထို့ကြောင့် လူသားမျိုးနွယ်ကို စီမံခန့်ခွဲခြင်း အမှုသည်လည်း လူသားမျိုးနွယ် ဖျက်ဆီးခံရသည့်အခါတွင်မှ စတင်ခဲ့သည်။ တစ်နည်းအားဖြင့်ဆိုလျှင် ဘုရားသခင်၏ လူသားအပေါ်စီမံခန့်ခွဲခြင်းသည် လူသားမျိုးနွယ်ကို ကယ်တင်ခြင်းအမှု၏ ရလဒ်အဖြစ် စတင်ခဲ့ခြင်းဖြစ်၍ ကမ္ဘာမြေကြီးကို ဖန်ဆင်းခြင်းအမှုမှ ပေါ်ပေါက်လာခြင်းမဟုတ်ပေ။ လူသားမျိုးနွယ်မှ ပျက်စီးသည့် စိတ်နေ သဘောထား ရရှိခဲ့ပြီးနောက်မှသာ စီမံခန့်ခွဲသည့်အမှု ဖြစ်ပေါ်လာသည်။ ထို့ကြောင့် လူသားမျိုးနွယ်ကို စီမံခန့်ခွဲခြင်းအမှုတွင် အဆင့်လေးဆင့် သို့မဟုတ် ခေတ်လေးခေတ်အစား အပိုင်းသုံးပိုင်း ပါရှိသည်။ ဤသည်သာလျှင် ဘုရားသခင်၏ လူသားအပေါ် စီမံခန့်ခွဲခြင်းအမှုကို မှန်ကန်စွာ ရည်ညွှန်းသည့်နည်း ဖြစ်သည်။ နောက်ဆုံးခေတ်ပြီးဆုံးချိန်တွင် လူသားမျိုးနွယ်အပေါ်စီမံခန့်ခွဲခြင်းအမှုသည် ပြည့်စုံစွာ ပြီးဆုံးခဲ့ ပြီး ဖြစ်လိမ့်မည်။ စီမံခန့်ခွဲခြင်းအမှု ပြီးဆုံးခြင်းသည် လူသားမျိုးနွယ်အားလုံးကို ကယ်တင်သည့်အမှု လုံးဝ ပြီးဆုံးသွား၍ လူသားမျိုးနွယ်သည် ၎င်း၏ခရီးလမ်းဆုံးသို့ ရောက်ခဲ့ပြီးဖြစ်သည်ဟု ဆိုလို၏။ လူသား မျိုးနွယ်အားလုံးကို ကယ်တင်သည့်အမှုမရှိပါက လူသားမျိုးနွယ်ကို စီမံခန့်ခွဲသည့်အမှု ရှိမည်မဟုတ်ပါ။ အမှု၏ အဆင့်သုံးဆင့်သည်လည်း ရှိမည်မဟုတ်ပါ။ အတိအကျအားဖြင့် ဤသည်မှာ လူသားမျိုးနွယ်၏ စာရိတ္တပျက်ပြားမှုကြောင့်နှင့် လူသားမျိုးနွယ်သည် ကယ်တင်ခြင်းကို အရေးတကြီး လိုအပ်နေသဖြင့် ယေဟောဝါသည် ကမ္ဘာမြေကြီးအား ဖန်ဆင်းခြင်းကို အဆုံးသတ်ခဲ့ကာ ပညတ်တော်ခေတ် အမှုကို စတင်ခဲ့၏။ ထိုအခါတွင်မှ လူသားမျိုးနွယ်အား စီမံခန့်ခွဲသည့်အမှု စတင်ခဲ့၏။ ထိုအခါတွင်မှ လူသားမျိုးနွယ်ကို ကယ်တင်ခြင်းအမှု စတင်ခဲ့၏ဟု ဆိုလိုခြင်းဖြစ်သည်။ “လူသားမျိုးနွယ်ကို စီမံခန့်ခွဲခြင်း” ဟူသည် ကမ္ဘာမြေကြီးပေါ်တွင် အသစ်ဖန်ဆင်းထားသည့် လူသားမျိုးနွယ် (ဆိုလိုသည်မှာ ဖျက်ဆီးမခံရသေးသည့် လူသားမျိုးနွယ်) ၏အသက်တာကို လမ်းပြခြင်းဟု မဆိုလိုပါ။ ထိုသို့မဟုတ်ဘဲ စာတန်၏ ဖျက်ဆီးခြင်းကို ခံခဲ့ရသော လူသားမျိုးနွယ်ကို ကယ်တင်ခြင်းဖြစ်၏။ ဆိုလိုသည်မှာ ဤပျက်စီးနေသော လူသားမျိုးနွယ်ကို ပြောင်းလဲရန်ဖြစ်၏။ ဤသည်မှာ လူသားမျိုးနွယ်ကို စီမံခန့်ခွဲခြင်း၏ အဓိပ္ပါယ်ဖြစ်၏။ လူသား မျိုးနွယ်ကို ကယ်တင်ခြင်းအမှုတွင် ကမ္ဘာမြေကြီးကို ဖန်ဆင်းသည့်အမှုမပါပေ။ ထို့ကြောင့် လူသား မျိုးနွယ်ကို စီမံခန့်ခွဲသည့်အမှုတွင် ကမ္ဘာမြေကြီးကို ဖန်ဆင်းသည့်အမှု မပါဝင်ဘဲ ကမ္ဘာမြေကြီးကို ဖန်ဆင်းခြင်းအမှုမှ သီးခြားဖြစ်သော အမှုအဆင့်သုံးဆင့်သာ ပါဝင်၏။ လူသားမျိုးနွယ်အား စီမံခန့်ခွဲခြင်း အမှုကို နားလည်ရန် အမှု၏အဆင့်သုံးဆင့် နောက်ခံသမိုင်းကို သိရှိရန်လိုအပ်သည် - ဤသည်မှာ ကယ်တင်ခံရရန် လူတိုင်းသိရမည့်အရာဖြစ်၏။ ဘုရားသခင်၏ ဖန်ဆင်းထားသော သတ္တဝါများအနေဖြင့် လူသားသည် ဘုရားသခင်၏ ဖန်ဆင်းခြင်းကို ခံရသည်ကို သင်တို့သိသင့်၍ လူသားမျိုးနွယ်၏ ပျက်စီးခြင်း အရင်းအမြစ်ကို သိသင့်သည့်အပြင် လူသား၏ ကယ်တင်ခြင်း လုပ်ငန်းစဉ်ကို သိသင့်သည်။ ဘုရားသခင်ထံမှ မျက်နှာသာရရှိရေးအတွက် အယူဝါဒနှင့်အညီ မည်သို့ပြုမူရမည်ကိုသာ သင်တို့သိ၍ လူသားမျိုးနွယ်ကို ဘုရားသခင်မှ မည်သို့ကယ်တင်သည်ကို ဖြစ်စေ၊ လူသားမျိုးနွယ် ပျက်စီးခြင်း၏ အရင်းအမြစ်ကိုဖြစ်စေ၊ အရိပ်အမြွက်မျှပင် မသိပါက ဤသည်မှာ ဘုရားသခင်ဖန်ဆင်းသော သတ္တဝါအဖြစ် သင်တို့တွင် ကင်းမဲ့နေသည့်အရာဖြစ်၏။ သင်သည် ဘုရားသခင် စီမံခန့်ခွဲခြင်းအမှု၏ ပိုမိုကျယ်ပြန့်သော နယ်ပယ် အကြောင်း မသိဘဲနေလျက် လက်တွေ့ကျင့်သုံးနိုင်သည့် သမ္မာတရားများကို နားလည်ခြင်းဖြင့် ကျေနပ်၍သာ မနေသင့်ပါ - ဤသို့ဖြစ်ပါက သင်သည် တယူသန်ဆန်လွန်း၏။ အမှုအဆင့်သုံးဆင့်သည် လူသားအပေါ် ဘုရားသခင်စီမံခန့်ခွဲမှု၏ အတွင်းဇာတ်လမ်း၊ စကြဝဠာတစ်ခုလုံး၏ ဧဝံဂေလိတရားစတင်ခြင်း၊ လူသား မျိုးနွယ် အားလုံးအကြား အကြီးမားဆုံးသော နက်နဲမှုနှင့် ဧဝံဂေလိတရား ဖြန့်ဝေခြင်း၏ အခြေခံလည်း ဖြစ်၏။ သင်သည် သင့်အသက်တာနှင့် သက်ဆိုင်သည့် လွယ်ကူရိုးရှင်းသော သမ္မာတရားများ နားလည်ရေးကိုသာ အဓိကထား၍ နက်နဲမှုများနှင့် အမြင်များအနက် အကြီးမြတ်ဆုံး ဤအကြောင်းကို ဘာမျှမသိပါက သင်၏အသက်တာသည် ကြည့်ရုံမှလွဲ၍ မည်သည့်အတွက်မျှ မကောင်းသော ချွတ်ယွင်းနေသည့် ထုတ်ကုန်ပစ္စည်းတစ်ခုနှင့် တူနေမည်မဟုတ်ပါလော။

လူသားသည် အလေ့အကျင့်ကိုသာ အာရုံစိုက်၍ ဘုရားသခင်၏အမှုနှင့် လူသား၏ အသိဉာဏ် တို့အား ဒုတိယအဖြစ်မြင်ပါက ငွေတစ်ပြားနှင့်ပတ်သက်၍ အမျှော်အမြင်ရှိသော်လည်း ပေါင်ငွေနှင့် ပတ်သက်၍ မိုက်မဲခြင်းနှင့် တူနေမည် မဟုတ်ပါလော။ သင်သိရမည့်အရာကို သင်သိရမည်ဖြစ်၍ သင် လက်တွေ့ ကျင့်သုံးရမည့်အရာကို သင်လက်တွေ့ကျင့်သုံးရမည် ဖြစ်သည်။ သို့မှသာ သင်သည် သမ္မာတရား နောက်လိုက်ရန် သိသူတစ်ဦးဖြစ်လိမ့်မည်။ ဧဝံဂေလိတရားကို သင်ဖြန့်ဝေရမည့်နေ့ ရောက်သည့်အခါ ဘုရားသခင်သည် ကြီးမြတ်၍ ဖြောင့်မတ်သည့် ဘုရားသခင်ဖြစ်ကြောင်း၊ သူသည် အထွတ်အမြတ်ဆုံး ဘုရားသခင်ဖြစ်ကြောင်း၊ ကြီးမြတ်သော မည်သည့်လူသားမျှ နှိုင်းယှဉ်၍မရသော ဘုရားသခင်နှင့် မည်သူမျှ သာ၍မြင့်မားခြင်း မရှိသော ဘုရားသခင်ဟုသာ ပြောနိုင်၍ . . .၊ သက်ဆိုင်ခြင်းမရှိ၍ အပေါ်ယံသာဖြစ်သော ဤစကားများကိုသာ ပြောနိုင်၍ အရေးပါသောစကားများ၊ အနှစ်သာရရှိသော စကားများကို မပြောနိုင်ပါက၊ သင်သည် ဘုရားသခင်ကို သိကြောင်း သို့မဟုတ် ဘုရားသခင်၏ အမှုအကြောင်း ဘာမျှပြောစရာ မရှိသည့် အပြင် သမ္မာတရားကို ရှင်းပြနိုင်ခြင်းမရှိပါက၊ သို့မဟုတ် လူသားချို့တဲ့နေသည့် အရာကို မပေးနိုင်ပါက သင်ကဲ့သို့သော သူတစ်ဦးသည် မိမိ၏တာဝန်ကို ကောင်းစွာထမ်းဆောင်ရန် တတ်စွမ်းနိုင်ခြင်းမရှိပါ။ ဘုရားသခင်အတွက် သက်သေခံခြင်းနှင့် နိုင်ငံတော်၏ ဧဝံဂေလိတရားကို ဖြန့်ဝေခြင်းသည် လွယ်ကူ ရိုးရှင်းသည့် ကိစ္စမဟုတ်ပါ။ ရှေးဦးစွာ သင့်တွင် သမ္မာတရားနှင့် နားလည်ရန် လိုသည့် အမြင်များ ရှိရပါမည်။ ဘုရားသခင်၏အမှု၏ ကွဲပြားသော ရှုထောင့်များ၏ အမြင်များနှင့် သမ္မာတရား အကြောင်းကို သင်ရှင်းလင်းစွာ သဘောပေါက်သည့်အခါ၊ သင့်နှလုံးသားတွင် ဘုရားသခင်၏အမှုကို သင်သိလာသည့်အခါ၊ ထို့အပြင် ဘုရားသခင်မှ မည်သည့်အမှုကို ပြုသည်ဖြစ်စေ- ဖြောင့်မတ်သည့် စီရင်ခြင်း ဖြစ်စေ၊ လူသားကို သန့်စင်ခြင်းဖြစ်စေ- သင်သည် သင်၏ အခြေခံအုတ်မြစ်အဖြစ် အကြီးမားဆုံးသော အမြင်ကို ပိုင်ဆိုင်၍ လက်တွေ့ကျင့်သုံးရန် မှန်ကန်သည့် သမ္မာတရားကို ပိုင်ဆိုင်ပါက သင်သည် အဆုံးတိုင်အောင် ဘုရားသခင် နောက်သို့ လိုက်နိုင်မည် ဖြစ်သည်။ သူမည်သည့်အမှုကို ပြုသည်ဖြစ်စေ ဘုရားသခင်အမှု၏ ရည်မှန်းချက် သည် ပြောင်းလဲခြင်းမရှိ၊ သူ့အမှု၏ အချက်အချာသည် ပြောင်းလဲခြင်းမရှိ၊ ထို့အပြင် လူသားအပေါ် သူ၏ဆန္ဒသည် ပြောင်းလဲခြင်း မရှိကြောင်းကို သင်သိရမည်။ သူ၏စကားလုံးများ မည်မျှပြင်းထန်သည် ဖြစ်စေ၊ ပတ်ဝန်းကျင် မည်မျှဆိုးရွားသည်ဖြစ်စေ၊ သူ့အမှု၏ အခြေခံ သဘောတရားများ ပြောင်းလဲမည် မဟုတ်။ ထို့အပြင် လူသားကို ကယ်တင်ရန် သူ၏ ရည်ရွယ်ချက်သည်လည်း ပြောင်းလဲမည်မဟုတ်ပေ။ သူ၏အမှုသည် လူသား၏အဆုံး သို့မဟုတ် လူသား၏ ခရီးလမ်းဆုံးကိုဖော်ပြရန် မဟုတ်ပါက၊ ထို့အပြင် နောက်ဆုံးအဆင့်၏ အမှုလည်း မဟုတ်ပါက၊ သို့မဟုတ် ဘုရားသခင်၏ စီမံခန့်ခွဲခြင်း အမှုတစ်ရပ်လုံးကို အဆုံးသတ်ရန် မဟုတ်ပါက၊ ထို့အပြင် ၎င်းအချိန်သည် သူမှ လူသားအပေါ် အမှုဆောင်ရွက်သည့် အချိန် ဖြစ်ပါက၊ သူ့အမှု၏ အချက်အချာသည်လည်း ပြောင်းလဲမည်မဟုတ်ပေ- လူသားမျိုးနွယ်ကို ကယ်တင်ခြင်း သာ အစဉ်ဖြစ်လိမ့်မည်။ ဤသည်မှာ ဘုရားသခင်အပေါ် သင်တို့၏ ယုံကြည်ခြင်း အခြေခံအုတ်မြစ် ဖြစ်ရမည်။ ၎င်းအမှုအဆင့်သုံးဆင့်၏ ရည်မှန်းချက်မှာ လူသားမျိုးနွယ်အားလုံးကို ကယ်တင်ခြင်း ဖြစ်သည်- ဆိုလိုသည်မှာ စာတန်၏ပိုင်နက်မှ လူသားကို လုံးဝကယ်တင်ခြင်းဖြစ်သည်။ အမှုအဆင့်သုံးဆင့်၏ အဆင့်တိုင်းတွင် ရည်မှန်းချက်နှင့် အရေးပါပုံတို့ ကွဲပြားသော်လည်း တစ်ဆင့်စီသည် လူသားကို ကယ်တင်ခြင်း အမှု၏ အစိတ်အပိုင်းတစ်ရပ်ဖြစ်၍ လူသား၏ လိုအပ်ချက်များနှင့်အညီ အကောင်အထည် ဖော်သည့် ကွဲပြားသော ကယ်တင်ခြင်းအမှု ဖြစ်သည်။ ဤအမှုအဆင့် သုံးဆင့်၏ ရည်ရွယ်ချက်ကို သင်သိသည်နှင့် တစ်ပြိုင်နက် သင်သည် အမှုအဆင့်တစ်ဆင့်စီ၏ အရေးပါမှုကို နားလည်သဘောပေါက်ပုံကို သိလိမ့်မည်ဖြစ်၍ ဘုရားသခင်၏ဆန္ဒကို မည်သို့ဖြည့်ဆည်း ရမည်ကို သင်သိလိမ့်မည်။ ဤအဆင့်ကို သင်ရောက်နိုင်ပါက အမြင်အားလုံးအနက် အကြီးမားဆုံးဖြစ်သော ဤအရာသည် သင်၏အခြေခံအုတ်မြစ် ဖြစ်လိမ့်မည်။ လက်တွေ့ကျင့်သုံးနိုင်သည့် သမ္မာတရားများရော ရူပါရုံများအပေါ် အခြေခံသည့် အသိဉာဏ်ပါ နှစ်ခုစလုံးရှိရေးအတွက် သင်သည် လွယ်ကူသော ကျင့်စဉ်များ သို့မဟုတ် လေးနက်သည့် သမ္မာတရားများ ကိုသာ ရှာဖွေရန်မသင့်ဘဲ အမြင်များကို ကျင့်သုံးမှုဖြင့် ပေါင်းစပ်ရမည်။ သို့မှသာ သင်သည် သမ္မာတရားနှင့် လုံးဝလျှောက်လှမ်း သူတစ်ဦး ဖြစ်လိမ့်မည်။

အမှုအဆင့်သုံးဆင့်သည် ဘုရားသခင်၏ စီမံခန့်ခွဲမှုတစ်ရပ်လုံး၏ အချက်အချာတွင်ရှိ၍ ဘုရား သခင်၏ စိတ်နေသဘောထားနှင့် သူ၏ဖြစ်ခြင်းကို ၎င်းတို့တွင် ဖော်ပြထား၏။ ဘုရားသခင်၏ အမှုအဆင့် သုံးဆင့်ကို မသိသူတို့သည် ဘုရားသခင်သည် သူ၏စိတ်နေသဘောထားကို မည်သို့ဖော်ပြသည်ကို သိရှိနိုင်စွမ်း မရှိပါ။ ဘုရားသခင်၏ အမှု၏ အသိဉာဏ် အမြော်အမြင်ကိုလည်း မသိကြပါ။ ထို့အပြင် ထိုသူတို့သည် လူသားမျိုးနွယ်ကို သူကယ်တင်သည့် နည်းများစွာနှင့် လူသားမျိုးနွယ် တစ်ရပ်လုံးအတွက် သူ၏ဆန္ဒကိုလည်း မသိဘဲရှိနေကြ၏။ အမှုအဆင့်သုံးဆင့်သည် လူသားမျိုးနွယ်အား ကယ်တင်သည့်အမှုကို အပြည့်အဝ ဖော်ပြချက်ဖြစ်၏။ အမှုအဆင့်သုံးဆင့်ကို မသိသူတို့သည် သန့်ရှင်းသော ဝိညာဉ်တော် အမှု၏ နည်းမျိုးစုံနှင့် အခြေခံသဘောတရားမျိုးစုံကို မသိဘဲရှိလိမ့်မည်။ အမှုအဆင့်တစ်ရပ်မှ ကျန်ရှိနေသော အယူဝါဒကိုသာ တင်းကျပ်စွာ လိုက်နာသူများသည် ဘုရားသခင်ကို အယူဝါဒတွင် ကန့်သတ်ထားသူများ ဖြစ်ကြ၍ ထိုသူတို့၏ ဘုရားသခင်အပေါ် ယုံကြည်ခြင်းသည် ဝိုးတဝါးနှင့် မသေချာ မရေရာဖြစ်သည်။ ထိုကဲ့သို့သော သူများသည် ဘုရားသခင်၏ ကယ်တင်ခြင်းကို မည်သည့်အခါမျှ ရလိမ့်မည် မဟုတ်ပေ။ ဘုရားသခင်၏ အမှုအဆင့် သုံးဆင့်သာလျှင် ဘုရားသခင်၏ စိတ်နေသဘောထား တစ်ရပ်လုံးကို အပြည့်အဝဖော်ပြနိုင်၍ လူသားမျိုးနွယ် တစ်ရပ်လုံးကို ကယ်တင်ရန် ဘုရားသခင်၏ ရည်ရွယ်ချက်နှင့် လူသားမျိုးနွယ်ကို ကယ်တင်ခြင်း လုပ်ငန်းစဉ်တစ်ရပ်လုံးကို လုံးဝ ဖော်ပြနိုင်မည် ဖြစ်သည်။ ဤသည်မှာ သူသည် စာတန်အပေါ် အောင်နိုင်၍ လူသားမျိုးနွယ်ကို ရရှိခဲ့ပြီးဖြစ်ကြောင်း သက်သေ အထောက်အထား ဖြစ်၏။ ဤသည်မှာ ဘုရားသခင်၏ အောင်မြင်ခြင်း အထောက်အထားဖြစ်၍ ဘုရားသခင်၏ စိတ်နေ သဘောထား တစ်ရပ်လုံး၏ ဖော်ပြချက်ဖြစ်သည်။ ဘုရားသခင်အမှု အဆင့်သုံးဆင့်၏ တစ်ဆင့်ကိုသာ နားလည်သူတို့သည် ဘုရားသခင်၏ စိတ်နေသဘောထား တစ်စိတ်တစ်ဒေသကိုသာ သိကြ၏။ လူသား၏ အတွေးအခေါ်အယူအဆတွင် ဤအဆင့်တစ်ဆင့်တည်းသာ အယူဝါဒဖြစ်သွားရန် လွယ်ကူ၏။ လူသားမှ ဘုရားသခင်အကြောင်း စည်းမျဉ်းစည်းကမ်းများ ချမှတ်မည့် အလားအလာများရှိလာ၍ လူသားသည် ဘုရားသခင်၏ စိတ်နေသဘောထားမှ ဤအစိတ်အပိုင်း တစ်ရပ်ကိုသာ ဘုရားသခင်၏ စိတ်နေသဘောထား တစ်ရပ်လုံး၏ ကိုယ်စားပြုမှုအဖြစ် အသုံးပြု၏။ ထို့အပြင် လူသား၏ စိတ်ကူးယဉ်အများစုမှာ အတွင်းတွင် ရောယှက်နေ၏။ ထို့ကြောင့် သူသည် ဘုရားသခင်သည် ဤသို့ တစ်ချိန်တစ်ခါက ဖြစ်ခဲ့ပါက သူသည် အစဉ် ဤသို့ရှိနေပြီး မည်သည့်အခါမျှ ပြောင်းလဲမည်မဟုတ်ဟု ယုံကြည်လျှက် ဘုရားသခင်၏ စိတ်နေ သဘောထား၊ ဖြစ်တည်မှုနှင့် ဉာဏ်အမြော်အမြင်တို့အပြင် ဘုရားသခင်အမှု၏ အခြေခံ သဘောတရားများ ကိုလည်း ကန့်သတ်ချက်ဘောင်များအတွင်း ကန့်သတ်ထား၏။ အမှုအဆင့်သုံးဆင့်ကို သိ၍ နားလည်သူများ သာလျှင် ဘုရားသခင်ကို အပြည့်အဝနှင့် အတိအကျ သိနိုင်လိမ့်မည်။ အနည်းဆုံးအနေဖြင့် ထိုသူတို့သည် ဘုရားသခင်ကို ဣသရေလအမျိုးတို့၏ ဘုရားသခင်၊ သို့မဟုတ် ယုဒလူတို့၏ ဘုရားသခင်ဟု သတ်မှတ်ခြင်း မရှိဘဲ သူ့ကို လူသားအတွက် လက်ဝါးကပ်တိုင်တွင် အစဉ်အမြဲ သံမှိုစွဲ ရိုက်နှက်ခံထား ရမည့် ဘုရားဟု မြင်လိမ့်မည် မဟုတ်ပါ။ သင်သည် ဘုရားသခင်ကို သူ၏အမှုတစ်ဆင့်မှသာ သိလာသူ ဖြစ်ပါက သင်၏ အသိဉာဏ်သည် အလွန့်အလွန် နည်း၏။ သင်၏အသိဉာဏ်သည် သမုဒ္ဒရာအတွင်း တစ်စက်သာလျှင်ဖြစ်၏။ ထိုသို့မဟုတ်ပါက ရှေးရိုးစွဲ ဘာသာရေးကိုင်းရှိုင်းသူ အများအပြားသည် အဘယ်ကြောင့် ဘုရားသခင်ကို လက်ဝါးကပ်တိုင်တွင် အရှင်လတ်လတ် သံနှင့်ရိုက်မည်နည်း။ ဤသည်မှာ လူသားသည် ဘုရားသခင်ကို ကန့်သတ်ချက်အချို့အတွင်း ကန့်သတ်ထားသဖြင့် မဟုတ်ပါသလား။ လူအများအပြားသည် ဘုရားသခင်အမှုအမျိုးမျိုးနှင့် ကွဲပြားမှုများကို မသိသောကြောင့်နှင့် သန့်ရှင်းသော ဝိညာဉ်တော်၏အမှုကို တိုင်းတာရန် အသိဉာဏ်နှင့် အယူဝါဒ အနည်းငယ်ရှိသဖြင့် ဘုရားသခင်ကို ဆန့်ကျင်၍ သန့်ရှင်းသော ဝိညာဉ်၏အမှုကို ပိတ်ဆို့ဟန့်တားကြသည် မဟုတ်ပါလော။ ထိုကဲ့သို့သော သူများ၏ အတွေ့အကြုံများသည် အပေါ်ယံသာဖြစ်သော်လည်း ထိုသူတို့သည် သဘောသဘာဝအားဖြင့် ဝင့်ဝါလျှက် စိတ်အလိုလိုက်ကာ သန့်ရှင်းသော ဝိညာဉ်တော်၏ အမှုကို ရွံရှာစက်ဆုပ်စရာအဖြစ် သဘောထား၍ သန့်ရှင်းသောဝိညာဉ်တော်၏ စည်းကမ်းများကို လစ်လျူရှုသည့်အပြင် သန့်ရှင်းသော ဝိညာဉ်တော်၏ အမှုကို အတည်ပြုရန် ၎င်းတို့၏ ဟောင်းနွမ်းသော ပေါ့တန်သည့် လျှောက်လဲချက်များကို အသုံးပြုကြ၏။ ထိုသူတို့သည် ဟန်ဆောင်ခြင်းလည်းပြု၍ ၎င်းတို့၏ ကိုယ်ပိုင်အတတ်ပညာနှင့် စာပေကျမ်းဂန်နှံ့စပ်မှု အပေါ်နှင့် ၎င်းတို့ ကမ္ဘာတစ်ဝှမ်း ခရီးသွားနိုင်စွမ်းအပေါ် လုံးဝယုံကြည်နေကြ၏။ ထိုကဲ့သို့သောသူများသည် သန့်ရှင်းသော ဝိညာဉ်တော်မှ စက်ဆုပ်မုန်းတီး၍ ငြင်းပယ်သူများ မဟုတ်ပါလော။ ထိုသူများကို ခေတ်သစ်မှ ဖယ်ရှားလိမ့်မည် မဟုတ်ပါလော။ ဘုရားသခင် ရှေ့မှောက်လာ၍ သူ့ကို ပွင့်လင်းစွာ ဆန့်ကျင်သူများသည် အမြင်တိုသူ လူကလေးများ၊ ၎င်းတို့မည်မျှတော်ကြောင်း ပြရန်သာ ကြိုးစားနေသူများ မဟုတ်ပါလော။ ကျမ်းစာအနည်းအကျဉ်း တတ်ရုံဖြင့် ထိုသူတို့သည် ကမ္ဘာ့ “ပညာရေး လောက”ကို ခွရန်ကြိုးစားကြ၏။ လူတို့ကို သင်ကြားရန် အပေါ်ယံအယူဝါဒဖြင့် ထိုသူတို့သည် သန့်ရှင်းသော ဝိညာဉ်တော်၏အမှုကို ပြောင်းပြန်လှန်ရန် ကြိုးစားကြသည့်အပြင် ၎င်းတို့အတွေးအခေါ်၏ လုပ်ငန်းစဉ်တစ်ဝိုက်တွင်သာ လည်ပတ်စေရန် ကြိုးစားကြ၏။ ထို့အပြင် ၎င်းတို့သည် အမြော်အမြင် တိုတောင်းသည့်အတွက် ဘုရားသခင်၏အနှစ် ၆၀ဝ၀ အမှုကို တစ်ချက်ကလေးကြည့်ရန် ကြိုးစားကြ၏။ ထိုသူတို့တွင် စကားပြောစရာ အကြောင်းရင်း တစ်စုံတစ်ရာ ရှိပါ၏လော။ အကယ်စဉ်စစ်မူ လူတို့သည် ဘုရားသခင်အကြောင်း အသိဉာဏ်များလေလေ၊ သူ၏အမှုကို စီရင်ရန် နှေးလေလေဖြစ်သည်။ ထို့အပြင် ထိုသူတို့သည် ဘုရားသခင်၏ ယနေ့အမှုအကြောင်း သူတို့၏ အသိဉာဏ် အနည်းငယ်ကိုသာ ပြောဆို၏။ သို့သော် ထိုသူတို့သည် စီရင်ရာတွင် အလျင်လိုခြင်း မရှိပေ။ လူတို့သည် ဘုရားသခင်အပေါ် သိကျွမ်းမှု နည်းလေလေ၊ ဝင့်ဝါမှုနှင့် မိမိကိုယ်ကိုယ် ယုံကြည်ခြင်း လွန်ကဲမှုတို့ များလေလေဖြစ်၍ ဘုရားသခင်၏ ဖြစ်တည်မှုအကြောင်း ဖျက်လိုဖျက်ဆီး ပိုမိုပြောလေလေဖြစ်၏- သို့ရာတွင် ထိုသူတို့သည် သဘော တရားများကိုသာ ပြောဆို၍ စစ်မှန်သည့် အထောက်အထားများ လုံးဝမပေးပေ။ ထိုသူတို့တွင် တန်ဖိုးလုံးဝ မရှိပေ။ သန့်ရှင်းသော ဝိညာဉ်တော်၏အမှုကို ကစားပွဲတစ်ရပ်အဖြစ်သာ ရှာဖွေသူတို့သည် ပေါ့တန်သော သူများဖြစ်ကြ၏။ သန့်ရှင်းသော ဝိညာဉ်တော်၏ အမှုအသစ်နှင့် ကြုံတွေ့သည့်အခါ သတိမထားသူတို့၊ ပါးစပ်စည်းမရှိသူတို့၊ အလျင်အမြန် စီရင်သူတို့၊ သန့်ရှင်းသော ဝိညာဉ်တော်အမှု၏ မှန်ကန်ခြင်းကို ငြင်းပယ်လိုသည့် ၎င်းတို့၏ သဘာဝဗီဇကို လွတ်လပ်ခွင့် ပေးထားသူတို့နှင့် စော်ကားပုတ်ခတ် ပြောဆိုမှုများ လည်း ပြုလုပ်သူတို့- ထိုသို့ လေးစားမှုမရှိသူတို့သည် သန့်ရှင်းသော ဝိညာဉ်တော်၏ အမှုအကြောင်း အသိဉာဏ်ကင်းမဲ့သူများ မဟုတ်ပါလော။ ထို့အပြင် ထိုသူတို့သည် ဝင့်ဝါသူများ၊ နဂိုစိတ်သဘောအရ မာနကြီး၍ ထိန်းမရသူများ မဟုတ်ပါလော။ သန့်ရှင်းသော ဝိညာဉ်တော်၏ အမှုအသစ်ကို ထိုသို့သောသူများ လက်ခံသည့်နေ့ရက် ရောက်လာလျှင်သော်မှ ဘုရားသခင်သည် ထိုသူတို့ကို သည်းခံလိမ့်မည် မဟုတ်ပေ။ ထိုသူတို့သည် ဘုရားသခင်အတွက် အမှုဆောင်သူများအပေါ် အထင်သေးရုံမက ဘုရားသခင်ကိုယ်တိုင်ကိုပင် ပုတ်ခတ်ပြောဆိုကြ၏။ ထိုကဲ့သို့ မိုက်ရူးရဲ ပြုမူသူများသည် ဤကာလသော်၎င်း၊ နောက်ကာလသော်၎င်း ခွင့်လွှတ်ခြင်းခံရမည် မဟုတ်ပေ။ ထို့အပြင် ငရဲတွင် ထာဝရပျက်စီးခြင်းသို့ ရောက်ကြလိမ့်မည်။ ထိုသို့သော လေးစားမှုကင်းမဲ့သူများ၊ စိတ်အလိုလိုက်သူများသည် ဘုရားသခင်ကို ယုံကြည်ဟန်ဆောင် နေကြ၍ ၎င်းတို့ ဟန်ဆောင်လေလေ၊ ၎င်းတို့သည် ဘုရားသခင်၏ အုပ်ချုပ်မှုအမိန့်များကို စော်ကားရန် အလားအလာ များလေလေ ဖြစ်သည်။ ပင်ကိုယ်အရင်းခံ စိတ်သဘောအရ ထိန်းချုပ်ထားခြင်း မရှိသော၊ တစ်ခါမျှ မည်သူ့ကိုမျှ နာခံခဲ့ဖူးခြင်းမရှိသော ထိုဝင့်ဝါသူ အားလုံးတို့သည် ဤလမ်းကြောင်းပေါ်တွင် လျှောက်ကြသည် မဟုတ်ပါလော။ ထိုသူတို့သည် တစ်နေ့ပြီးတစ်နေ့ အစဉ်အသစ်ဖြစ်၍ မည်သည့်အခါမျှ အိုမင်းခြင်းမရှိသည့် ဘုရားသခင်ကို ဆန့်ကျင်ကြသည် မဟုတ်ပါလော။ ယနေ့ သင်တို့သည် ဘုရားသခင်အမှုတော် အဆင့် သုံးဆင့်ကိုသိရန် မည်သည့်အတွက်ကြောင့် အရေးပါသည်ကို နားလည်ရမည်။ ငါပြောသည့် စကားများသည် သင်တို့အတွက်အကျိုးရှိကာ အလဟဿပြောဆိုနေခြင်းသာ မဟုတ်ပါ။ အကယ်၍ သင်တို့သည် မြင်းကျောပေါ် ဒုန်းစိုင်းစီးနေစဉ် ပန်းများကို အားကျရှုစားသကဲ့သို့ ထိုအရာများကို ဖတ်ရှုမည်ဆိုပါက ငါ၏ကြိုးစားအားထုတ်မှုသည် အချည်းအနှီးဖြစ်မည် မဟုတ်ပါလော။ သင်တို့တစ်ဦးစီသည် သင်တို့ကိုယ်တိုင်၏ သဘောသဘာဝကို သိသင့်သည်။ သင်တို့အများစုသည် ငြင်းခုံရာတွင် ကျွမ်းကျင်ကြ၏။ အယူအဆဆိုင်ရာ မေးခွန်းများ၏ အဖြေများသည် သင်တို့၏လျှာမှ လိမ့်ဆင်းကြသော်လည်း အနှစ်သာရနှင့် သက်ဆိုင်သည့် မေးခွန်းများအပေါ် ပြောစရာ သင်တို့တွင် ဘာမျှမရှိကြပါ။ ယနေ့တွင်ပင် သင်တို့သည် ပေါ့တန်သည့် စကားများ ပြောဆိုနေဆဲဖြစ်၏။ သင်တို့၏ သဘာဝဟောင်းများကို ပြောင်းလဲနိုင်စွမ်း မရှိကြပေ။ ထို့အပြင် သင်တို့အများစုတွင် ပို၍မြင့်မားသော သမ္မာတရားကို ရရှိရေးအတွက် သင်တို့လုပ်ဆောင်သည့် နည်းများကို ပြောင်းလဲရန် ရည်ရွယ်ချက် လုံးဝမရှိပါ။ သင်တို့၏ဘဝများကို စိတ်မပါ့တပါဖြင့် အသက်ရှင်နေကြ၏။ ထိုသို့သောသူများသည် ဘုရားသခင်နောက်သို့ အဆုံးတိုင်အောင် လိုက်နိုင်စွမ်း မည်သို့ရှိနိုင်ပါမည်နည်း။ သင်တို့သည် လမ်းကြောင်း အဆုံးသို့ ရောက်ခဲ့သော်မှ သင်တို့အတွက် မည်သို့အကျိုးရှိမည်နည်း။ စစ်မှန်စွာ ကြိုးစားလုပ်ဆောင်၍ ဖြစ်စေ၊ သို့မဟုတ် စောစီးစွာ အရှုံးပေးလိုက်ခြင်းဖြင့်ဖြစ်စေ၊ နောက်မကျလွန်းမီ သင်တို့၏ အတွေး အခေါ်များကို ပြောင်းလဲလျှင် ပိုကောင်းသည်။ အချိန်ကြာလာသည်နှင့်အမျှ သင်တို့သည် ကပ်စားနေသော ကပ်ပါးပိုးတစ်ကောင် ဖြစ်သွားလိမ့်မည်- ဤသို့နိမ့်ကျ၍ ယုတ်ညံ့သော အခန်းကဏ္ဍမှ သင်တို့ပါဝင်ရန် လိုလားသလော။

အမှု၏အဆင့်သုံးဆင့်သည် ဘုရားသခင်၏ အမှုတစ်ရပ်လုံး၏ မှတ်တမ်းတစ်ခုဖြစ်၏။ ၎င်းတို့သည် လူသားမျိုးနွယ်အပေါ် ဘုရားသခင်၏ ကယ်တင်ခြင်း မှတ်တမ်းဖြစ်၍ ၎င်းတို့သည် စိတ်ကူးယဉ်မဟုတ်ပေ။ ဘုရားသခင်၏ စိတ်နေသဘောထား တစ်ရပ်လုံးကို သိရှိရန် ကြိုးစားလိုသည့်ဆန္ဒ သင်တို့တွင် အမှန်တကယ် ရှိပါက ဘုရားသခင် အကောင်အထည်ဖော်သည့် အမှုအဆင့်သုံးဆင့်ကို သင်တို့သိရမည် ဖြစ်သည့်အပြင် သင်တို့သည် မည်သည့်အဆင့်ကိုမျှ ချန်မထားရပါ။ ဤသည်မှာ ဘုရားသခင်ကို သိရန်ကြိုးစားသူတို့ ရရှိရမည့် အနည်းဆုံးအရာ ဖြစ်သည်။ လူသားကိုယ်တိုင် ဘုရားသခင်ကို စစ်မှန်စွာသိခြင်းကို မရရှိနိုင်ပေ။ ဤသည်မှာ လူသားကိုယ်တိုင် စိတ်ကူးယဉ်၍ရသောအရာ မဟုတ်သကဲ့သို့ သန့်ရှင်းသော ဝိညာဉ်တော်၏ လူတစ်ဦးအပေါ် အထူးမျက်နှာပေးခြင်းကြောင့် ပေါ်ပေါက်သည့် အကျိုးကျေးဇူးလည်း မဟုတ်ပေ။ ထိုသို့ မဟုတ်ဘဲ ဤသည်မှာ လူသားသည် ဘုရားသခင်၏အမှုနှင့် ကြုံတွေ့ပြီးနောက် ပေါ်ပေါက်လာသည့် အသိဉာဏ်ဖြစ်၍ ဘုရားသခင်အမှု၏ အမှန်တရားများကို ကြုံတွေ့ပြီးနောက်မှသာလျှင် ပေါ်ပေါက်လာသည့် အသိဉာဏ်ဖြစ်၏။ ထိုကဲ့သို့သော အသိဉာဏ်သည် စိတ်ကူးပေါက်သည်အတိုင်း ရရှိနိုင်သည့်အရာ မဟုတ် သကဲ့သို့ သင်ကြားပေးနိုင်သော အရာလည်းမဟုတ်ပါ။ ဤသည်မှာ ကိုယ်ပိုင် အတွေ့အကြုံနှင့်သာ လုံးဝ သက်ဆိုင်ပါသည်။ လူသားအပေါ် ဘုရားသခင်၏ ကယ်တင်ခြင်းသည် ဤအမှုအဆင့်သုံးဆင့်၏ ဗဟို အချက်အချာတွင်ရှိသော်လည်း ကယ်တင်ခြင်းအမှုအတွင်းတွင် အမှုဆောင်သည့်နည်းများနှင့် ဘုရားသခင်၏ စိတ်နေသဘောထားကို ဖော်ပြသောနည်းများ ပါဝင်ပါသည်။ ဤသည်မှာ လူသားအတွက် ဖော်ထုတ်ရန် အခက်ခဲဆုံးဖြစ်၍ လူသားအတွက် နားလည်ရန်လည်း ခက်ခဲပါသည်။ ခေတ်ကာလများ ပိုင်းခြားခြင်း၊ ဘုရားသခင်၏ အမှုတွင် ပြောင်းလဲခြင်းများ၊ အမှုဆောင်သည့်နေရာ ပြောင်းလဲခြင်းများ၊ ဤအမှုကို လက်ခံရရှိသူများ ပြောင်းလဲခြင်းများ စသည်ဖြင့်- ၎င်းအရာအားလုံးသည် အမှုအဆင့်သုံးဆင့်တွင် ပါဝင် ပါသည်။ အထူးသဖြင့် သန့်ရှင်းသော ဝိညာဉ်တော် အမှုဆောင်နည်း၏ ကွဲပြားချက်နှင့် ဘုရားသခင်၏ စိတ်နေသဘောထား၊ ရုပ်သွင်၊ အမည်၊ မည်သူမည်ဝါဖြစ်ခြင်းတို့ ပြောင်းလဲခြင်း သို့မဟုတ် အခြား ပြောင်းလဲခြင်းများ အားလုံးတို့သည် အမှုအဆင့်သုံးဆင့်၏ တစ်စိတ်တစ်ဒေသဖြစ်၏။ အမှုအဆင့် တစ်ဆင့်သည် အစိတ်အပိုင်းတစ်ရပ်ကိုသာ ကိုယ်စားပြုနိုင်၍ နယ်ပယ်တစ်ရပ်အတွင်း ကန့်သတ်ထား၏။ ၎င်းတွင် အခြားကဏ္ဍများမဆိုထားနှင့် ကာလများ ပိုင်းခြားထားခြင်း သို့မဟုတ် ဘုရားသခင်၏အမှုတော် အပြောင်းအလဲများ မပါဝင်ပါ။ ဤသည်မှာ ရှင်းလင်းစွာ ထင်ရှားသည့် အချက်တစ်ချက် ဖြစ်၏။ အမှုအဆင့် သုံးဆင့်သည် လူသားမျိုးနွယ်ကို ဘုရားသခင်ကယ်တင်ခြင်းအမှု တစ်ရပ်လုံးဖြစ်၏။ လူသားသည် ဘုရားသခင်၏ အမှုနှင့် ကယ်တင်ခြင်းအမှုတွင် ဘုရားသခင်၏ စိတ်သဘောထားကို သိရမည်ဖြစ်၍ ဤအချက်မပါဘဲ ဘုရားသခင်အကြောင်း သင်သိရှိမှုသည် အနှစ်သာရ ကင်းမဲ့သော စကားလုံးများသာ ဖြစ်ကာ လက်တင်ကုလားထိုင်မှ လူတတ်လုပ်နေခြင်းထက် မပိုပေ။ ထိုသို့သော အသိဉာဏ်သည် လူသား အား သိမ်းသွင်းနိုင်ခြင်း မရှိသကဲ့သို့ လူသားအပေါ် အောင်နိုင်ခြင်းလည်း မရှိပေ။ ထိုသို့သောအသိဉာဏ်သည် အမှန်တရားနှင့် ကွဲလွဲနေ၍ သမ္မာတရားမဟုတ်ပေ။ ၎င်းသည် များစွာဖြစ်နိုင်၍ နားဝင်ချိုနိုင်သော်လည်း ဘုရားသခင်၏ အရင်းခံစိတ်နေသဘောထားနှင့် မကိုက်ညီပါက ဘုရားသခင်သည် သင့်ကိုသက်ညှာမည် မဟုတ်ပါ။ သူသည် သင်၏အသိဉာဏ်ကို ချီးကျူးခြင်း မပြုရုံသာမက သူ့ကို ပုတ်ခတ်ပြောဆိုသည့် အပြစ်သားတစ်ဦး ဖြစ်နေခြင်းအတွက် သင့်အပေါ်လက်စားချေခြင်းလည်း ပြုလိမ့်မည်။ ဘုရားသခင်ကို သိခြင်းအကြောင်း စကားလုံးများကို ပေါ့ပေါ့တန်တန် ပြောဆိုကြခြင်း မဟုတ်ပါ။ သင်သည် စကားကို ပေါ့ပေါ့တန်တန် ရွှန်းရွှန်းဝေအောင်ပြောဆို၍ စကားကြွယ်ကာ သေသူကို ရှင်စေနိုင်ပြီး ရှင်သူကို သေစေနိုင်သော်လည်း ဘုရားသခင်ကို သိခြင်းအကြောင်းကိုမူ ပြောနိုင်စွမ်းမရှိသေးပါ။ ဘုရားသခင်သည် သင်မဆင်မခြင် စီရင်နိုင်သူတစ်ဦး၊ သို့မဟုတ် သာမန်ကာလျှံကာ ချီမွမ်းနိုင်သူတစ်ဦး၊ သို့မဟုတ် အေးဆေးစွာ ဂုဏ်အသရေ ဖျက်နိုင်သူတစ်ဦး မဟုတ်ပါ။ သင်သည် မည်သူ့ကိုမဆိုနှင့် လူတိုင်းကို ချီးမွမ်းသော်လည်း ဘုရားသခင်၏ ကြီးမားသော စာရိတ္တကောင်းမြတ်ခြင်းနှင့် ချစ်ခင်နှစ်သက်ဖွယ် ကောင်းခြင်းတို့ကို ဖော်ပြရန် သင့်တော်သည့် စကားလုံးများအတွက်မူ ရုန်းကန်ရ၏- ဤသည်မှာ အရှုံးသမား တိုင်း သင်ခန်းစာရသည့် အရာဖြစ်၏။ ဘုရားသခင်ကို ဖော်ပြနိုင်သော ဘာသာစကား အထူးပြုပညာရှင် မြောက်များစွာရှိသော်လည်း ထိုသူတို့ ဖော်ပြချက်၏ တိကျမှုသည် ဘုရားသခင်နှင့်သက်ဆိုင်၍ ဝေါဟာရ အနည်းအကျဉ်းသာ ရှိသော်လည်း ကြွယ်ဝသော အတွေ့အကြုံရှိသူတို့ ပြောဆိုသော သမ္မာတရား၏ တစ်ရာပုံတစ်ပုံသာရှိ၏။ ထို့ကြောင့် ဘုရားသခင်ကို သိခြင်းသည် တိကျမှုနှင့် အဖြစ်မှန်တို့တွင် ရှိကြောင်းနှင့် ပါးနပ်သည့်စကားလုံးများ အသုံးပြုခြင်း သို့မဟုတ် ကြွယ်ဝသည့် ဝေါဟာရများတွင် မရှိကြောင်းကို တွေ့နိုင်ပါသည်။ လူသား၏ အသိဉာဏ်နှင့် ဘုရားသခင်၏ အသိဉာဏ်တို့သည် လုံးဝ သက်ဆိုင်ခြင်း မရှိပါ။ ဘုရားသခင်ကို သိခြင်း သင်္ခန်းစာသည် လူသားမျိုးနွယ်၏ သဘာဝသိပ္ပံပညာရပ် အားလုံးထက်ပို၍ မြင့်မား၏။ ဤသည်မှာ ဘုရားသခင်ကို သိရန်ကြိုးစားသည့် အလွန်နည်းပါးသော လူဦးရေသာ သင်ယူနိုင်သည့် သင်ခန်းစာ တစ်ရပ်ဖြစ်၍ ပါရမီရှင် မည်သူမဆို ရယူနိုင်သည့်အရာ မဟုတ်ပါ။ ထို့ကြောင့် သင်တို့သည် ဘုရားသခင်ကို သိခြင်းနှင့် သမ္မာတရားနောက် လိုက်ခြင်းတို့ကို သာမန် ကလေးတစ်ဦးက ရယူနိုင်သော အရာများကဲ့သို့ မမြင်ရပါ။ သင်သည် သင်၏မိသားစုဘဝ၊ သို့မဟုတ် သင်၏အိမ်ထောင်ရေးတို့တွင် လုံးဝ အောင်မြင်သူတစ်ဦး ဖြစ်ချင်ဖြစ်ခဲ့မည်။ သို့ရာတွင် သမ္မာတရားနှင့် ပတ်သက်ပါက၊ ထို့အပြင် ဘုရားသခင်ကိုသိခြင်း သင်ခန်းစာနှင့်ပတ်သက်ပါက သင့်တွင် ပြစရာဘာမျှမရှိပါ။ သင်သည် ဘာမျှ အောင်မြင်ပြီးဆုံးထားခြင်း မရှိပါ။ သမ္မာတရားကို လက်တွေ့ကျင့်သုံးခြင်းသည် သင်တို့ အတွက် လွန်စွာခက်ခဲသည်ဟု ဆိုနိုင်၍ ဘုရားသခင်ကို သိခြင်းသည် သာ၍ကြီးမားသော ပြဿနာ ဖြစ်သည်ဟု ဆိုနိုင်ပါသည်။ ဤသည်မှာ သင်တို့၏ အခက်အခဲဖြစ်၍ လူသားမျိုးနွယ် တစ်ရပ်လုံးမှ ရင်ဆိုင်ရသည့် အခက်အခဲလည်း ဖြစ်ပါသည်။ ဘုရားသခင်အား သိခြင်းအရေးတွင် အောင်မြင်မှုအချို့ ရရှိခဲ့ပြီးသူ အချို့အကြား အဆင့်အတန်းမီသူ လုံးဝမရှိလုနီးပါးဖြစ်သည်။ ဘုရားသခင်ကို သိခြင်းမှာ မည်သည့်အဓိပ္ပါယ်ရှိကြောင်း၊ သို့မဟုတ် ဘုရားသခင်ကိုသိရန် အဘယ်ကြောင့် လိုအပ်ကြောင်း၊ သို့မဟုတ် မည်သည့်အတိုင်းအတာသည် ဘုရားသခင်ကို သိခြင်းဖြစ်ကြောင်းကို လူသားသည် မသိပါ။ ဤသည်မှာ လူသားအတွက် လွန်စွာ စိတ်ရှုပ်ထွေးစေ၍ အတော်လေး ရိုးရှင်းစွာပြောရလျှင် လူသားမျိုးနွယ် ရင်ဆိုင် ရသည့် အကြီးမားဆုံးသော ပဟေဠိဖြစ်၏--ထို့အပြင် မည်သူမျှ ဤမေးခွန်းကို မဖြေနိုင်ပါ။ မည်သူမျှလည်း ဤမေးခွန်းကို ဖြေလိုသည့်ဆန္ဒမရှိပါ။ အဘယ်ကြောင့်ဆိုသော် ယနေ့အထိ လူသားများအကြား မည်သူမျှ ဤအမှုကို လေ့လာရာတွင် အောင်မြင်ခဲ့ခြင်း မရှိပါ။ လူသားကို အမှုအဆင့်သုံးဆင့် ပဟေဠိ အသိပေး သည့်အခါ ဘုရားသခင်ကိုသိသူ ပါရမီရှင်အုပ်စု တစ်စုပြီးတစ်စု ပေါ်ကောင်းပေါ်လာပါလိမ့်မည်။ ဤသို့ ဖြစ်ရန် ငါမျှော်လင့်သည်မှာ အမှန်ပင်ဖြစ်ကာ ထို့ထက်ပို၍ ငါသည် ဤအမှု အကောင်အထည်ဖော်ခြင်းကို လုပ်ဆောင်လျှက်ရှိကာ မကြာမီအနာဂတ်တွင် ပိုမိုများပြားသည့် ထိုကဲ့သို့သော ပါရမီရှင်များ ပေါ်ထွက်လာ သည်ကို တွေ့ရန် မျှော်လင့်သည်။ ထိုသူတို့သည် ဤအမှုအဆင့်သုံးဆင့်၏ အဖြစ်မှန်များအတွက် သက်သေခံ သူများ ဖြစ်လာကြမည်ဖြစ်၍ ဤအမှုအဆင့်သုံးဆင့်အတွက် ပထမဆုံး သက်သေခံသူများလည်း ဖြစ်မည်မှာ အမှန်ပင်ဖြစ်သည်။ ဘုရားသခင်၏အမှု အဆုံးသတ်သည့် နေ့တွင် ဤကဲ့သို့သော ပါရမီရှင်များ မရှိပါက၊ သို့မဟုတ် တစ်ဦးနှစ်ဦးသာရှိပါက၊ ထို့အပြင် ထိုသူတို့သည် လူ့ဇာတိခံယူသော ဘုရားသခင်၏ စုံလင်စေ တော်မူခြင်းကို ကိုယ်တိုင်လက်ခံပြီးပါက၊ ဤအရာထက်သာ၍ စိတ်သောကရောက်စရာ၊ သာ၍နောင်တ ရစရာ မရှိပါ--သို့သော် ဤသည်မှာ အဆိုးဆုံး ဖြစ်နိုင်ခြေသာ ဖြစ်သည်။ မည်သို့ပင် ဖြစ်စေကာမူ အမှန်တကယ် လိုက်လျှောက်သူများသည် ဤကောင်းချီးမင်္ဂလာကို ရနိုင်မည်ဟု ငါမျှော်လင့်နေဆဲဖြစ်၏။ အချိန်ဟူသည် စတင်ကတည်းက ဤကဲ့သို့သောအမှုတစ်ခါမျှ မရှိခဲ့ဖူးပါ။ လူသား၏ ဖွံ့ဖြိုးတိုးတက်မှု သမိုင်းတွင် ဤသို့တာဝန်ယူမှု တစ်ခါမျှ မရှိခဲ့ဖူးပါ။ သင်သည် ဘုရားသခင်ကို အရင်ဆုံးသိသူတစ်ဦး အမှန်တကယ် ဖြစ်လာနိုင်ပါက ဤသည်မှာ သတ္တဝါများအကြားတွင် အမြင့်မြတ်ဆုံးသော ဂုဏ်ပုဒ်တစ်ရပ် မဖြစ်ပေဘူးလော။ လူသားမျိုးနွယ်အကြား ဘုရားသခင်မှ သာ၍ချီးမွမ်းမည့်သတ္တဝါ ရှိဦးမည်လော။ ထိုကဲ့သို့သောအမှုသည် ရယူရန် မလွယ်သော်လည်း အဆုံး၌ ဆုလာဘ်များ ရရှိဦးမည်ဖြစ်သည်။ အမျိုးသား အမျိုးသမီးဖြစ်မှု သို့မဟုတ် နိုင်ငံသားနှင့် သက်ဆိုင်ခြင်းမရှိဘဲ ဘုရားသခင်ကို သိနိုင်စွမ်းရှိသူ အားလုံးသည် အဆုံးတွင် ဘုရားသခင်၏ အကြီးမားဆုံးသော ဂုဏ်ပြုခြင်းကို ရရှိ၍ ၎င်းတို့သာလျှင် ဘုရားသခင်၏ အခွင့်အာဏာကို ပိုင်ဆိုင်လိမ့်မည်။ ဤသည်မှာ ယနေ့၏ အမှုဖြစ်၍ အနာဂတ်၏ အမှုလည်းဖြစ်၏။ ဤသည်မှာ အနှစ် ၆၀ဝ၀ အမှုတွင် အောင်မြင်ပြီးဆုံးရမည့် နောက်ဆုံးသောအမှုနှင့် အမြင့်မားဆုံးသော အမှုဖြစ်ကာ လူသား၏ အမျိုးအစား တစ်ရပ်စီကို ဖော်ထုတ်သည့် အမှုဆောင်နည်းဖြစ်၏။ လူသားအား ဘုရားသခင်ကိုသိစေသည့် အမှုမှတစ်ဆင့် လူသား၏ကွဲပြားသည့်အဆင့်များကို ဖော်ထုတ်၏- ဘုရားသခင် ကို သိသူများသည် ဘုရားသခင်၏ ကောင်းချီးမင်္ဂလာများကို ရရှိရန်နှင့် သူ၏ကတိများကို လက်ခံရန် အရည်အချင်းမီ၍ ဘုရားသခင်ကို မသိသူများသည် ဘုရားသခင်၏ ကောင်းချီးမင်္ဂလာများကို ရရှိရန်နှင့် သူ၏ကတိများကို လက်ခံရန် အရည်အချင်းမမီကြပေ။ ဘုရားသခင်ကို သိသူများသည် ဘုရားသခင်နှင့် ရင်းနှီးသူများဖြစ်၍ ဘုရားသခင်ကို မသိသူများကို ဘုရားသခင်နှင့် ရင်းနှီးသူများဟု ခေါ်၍မရပေ။ ဘုရားသခင်နှင့် ရင်းနှီးသူများသည် ဘုရားသခင်၏ မည်သည့်ကောင်းချီးမင်္ဂလာကိုမဆို လက်ခံရရှိနိုင် သော်လည်း သူနှင့်မရင်းနှီးသူများသည် သူ၏မည်သည့်အမှုနှင့်မျှ မထိုက်တန်ပေ။ ဆင်းရဲဒုက္ခများဖြစ်စေ၊ စစ်ဆေးပြုပြင်ခြင်းဖြစ်စေ၊ တရားစီရင်ခြင်းဖြစ်စေ၊ အားလုံးသည် အဆုံးတွင် လူသား ဘုရားသခင်ကို သိခွင့်ပေးရန်နှင့် လူသား ဘုရားသခင်ကို နာခံနိုင်ရန်ဖြစ်၏။ ဤသည်မှာ အဆုံးတွင်ရရှိမည့် တစ်ခု တည်းသော သက်ရောက်မှုဖြစ်လိမ့်မည်။ အမှုအဆင့်သုံးဆင့်၏ မည်သည့်အရာကိုမျှ ကွယ်ဝှက်ထားခြင်း မရှိဘဲ ဤသည်မှာ ဘုရားသခင်ကို လူသား၏ သိရှိမှုအတွက် အကျိုးရှိ၍ လူသားမှ ဘုရားသခင်အပေါ် ပိုမိုပြည့်စုံ၍ မခြွင်းမချန်သိစေရန် အထောက်အကူပြုပါသည်။ ဤအမှုအားလုံးသည် လူသားအတွက် အကျိုးရှိ၏။

ဘုရားသခင်ကိုယ်တိုင်၏ အမှုသည် လူသားမှသိရမည့် အမြင်ဖြစ်၏။ အဘယ်ကြောင့်ဆိုသော် ဘုရားသခင်၏အမှုကို လူသားမှ ရယူနိုင်ခြင်းမရှိဘဲ လူသားမှ ပိုင်ဆိုင်ခြင်း မရှိသောကြောင့် ဖြစ်၏။ ဤအမှုအဆင့်သုံးဆင့်သည် ဘုရားသခင်၏ စီမံခန့်ခွဲခြင်း တစ်ရပ်လုံးဖြစ်၍ လူသားမှသိသင့်သည့် ဤထက် ကြီးမြတ်သော အမြင်မရှိပါ။ လူသားသည် ဤဘုန်းတန်ခိုးကြီးမားသော အမြင်ကို မသိပါက ဘုရားသခင်ကို သိရန်မလွယ်ပေ။ ဘုရားသခင်၏ အလိုဆန္ဒကို နားလည်ရန်လည်း မလွယ်ကူသည့်အပြင် လူသား လျှောက်လှမ်းသည့် လမ်းကြောင်းသည် ပို၍ခက်ခဲ ကြမ်းတမ်းလာလိမ့်မည်။ အမြင်များမရှိဘဲ လူသားသည် ဤမျှအထိ ရောက်လာနိုင်ခဲ့မည် မဟုတ်ပေ။ လူသားကို ယနေ့တိုင် ကာကွယ်ထားခဲ့၍ အကြီးမားဆုံးသော အကာအကွယ်ပေးခဲ့သည်မှာ ဤအမြင်များဖြစ်၏။ အနာဂတ်တွင် သင်တို့၏ အသိဉာဏ်သည် ပိုမိုနက်နဲ လာရမည်ဖြစ်ကာ သင်တို့သည် သူ၏အလိုဆန္ဒ တစ်ရပ်လုံးနှင့် အမှုအဆင့်သုံးဆင့်ရှိ သူ၏အမြော်အမြင် ရှိသော အနှစ်သာရကို သိလာရမည်ဖြစ်သည်။ ဤသည်သာလျှင် သင်တို့၏ စစ်မှန်သော ဝိညာဉ်အသက်တာ ဖြစ်၏။ အမှု၏ နောက်ဆုံးအဆင့်သည် သီးခြားရပ်တည်နေခြင်း မဟုတ်ဘဲ ယခင်အဆင့် နှစ်ဆင့်နှင့်အတူ ဖွဲ့စည်းထားချက် တစ်ရပ်လုံး၏ တစ်စိတ်တစ်ဒေသဖြစ်၏။ အမှုအဆင့်သုံးဆင့်မှ တစ်ဆင့်ကိုသာ ဆောင်ရွက်ခြင်းဖြင့် ကယ်တင်ခြင်း အမှုတစ်ရပ်လုံးကို ပြီးဆုံးစေရန် မဖြစ်နိုင်ဟု ဆိုလိုခြင်းဖြစ်သည်။ အမှု၏ နောက်ဆုံးအဆင့်သည် လူသားကို အပြည့်အဝ ကယ်တင်နိုင်မည် ဖြစ်သော်လည်း ဤအဆင့် တစ်ရပ်တည်းကိုသာ သီးခြားအကောင်အထည်ဖော်ရန်သာ လိုအပ်၍ စာတန်၏ လွှမ်းမိုးမှုမှ လူသားကို ကယ်တင်ရန် ယခင်အမှုအဆင့်နှစ်ဆင့်ကို မလိုအပ်ဟု မဆိုလိုပါ။ ဤအဆင့်သုံးဆင့်မှ မည်သည့်အဆင့် တစ်ဆင့်တည်းကိုမျှ လူသားမျိုးနွယ်အားလုံးသိရမည့် တစ်ခုတည်းသော အမြင်ဟု စွဲကိုင်ထား၍မရပါ။ အဘယ်ကြောင့်ဆိုသော် ကယ်တင်ခြင်း အမှုတစ်ရပ်လုံးသည် ဤအမှုအဆင့်သုံးရပ်ဖြစ်၏။ ၎င်းတို့အနက် အဆင့်တစ်ဆင့်တည်း မဟုတ်ပေ။ ကယ်တင်ခြင်းအမှု အောင်မြင်ပြီးဆုံးခြင်း မရှိသေးသမျှ ဘုရားသခင်၏ စီမံခန့်ခွဲမှုသည် လုံးဝအဆုံးသတ်ခြင်းသို့ ရောက်နိုင်မည် မဟုတ်ပေ။ ဘုရားသခင်၏ ဖြစ်တည်မှု၊ စိတ်နေ သဘောထားနှင့် ဉာဏ်ပညာအမြော်အမြင်တို့ကို ကယ်တင်ခြင်းအမှု တစ်ရပ်လုံးတွင် ဖော်ပြထား၏။ လူသားကို အစဦးဆုံးတွင် ဖော်ပြထားခြင်း မဟုတ်သော်လည်း ကယ်တင်ခြင်းအမှုတွင် တဖြည်းဖြည်း ဖော်ပြထားခဲ့သည်။ ကယ်တင်ခြင်းအမှု၏ အဆင့်တစ်ဆင့်စီသည် ဘုရားသခင်၏ စိတ်နေသဘောထား တစ်စိတ်တစ်ဒေသနှင့် သူ၏ဖြစ်တည်ခြင်း တစ်စိတ်တစ်ဒေသကို ဖော်ပြ၏။ အမှုအဆင့်တိုင်းမှ ဘုရား သခင်၏ ဖြစ်တည်မှု တစ်ရပ်လုံးကို တိုက်ရိုက်နှင့် လုံးဝအပြည့်အစုံ ဖော်ပြနိုင်သည် မဟုတ်ပေ။ ထို့ကြောင့် ကယ်တင်ခြင်းအမှုသည် အမှုအဆင့်သုံးဆင့် ပြီးဆုံးမှသာလျှင် လုံးဝအဆုံးသတ်နိုင်မည် ဖြစ်သည်။ ထို့ကြောင့် ဘုရားသခင် တစ်ရပ်လုံးအပေါ် လူသား၏သိရှိမှုကို ဘုရားသခင်အမှု၏ အဆင့်သုံးဆင့်မှ သီးခြားခွဲ၍မရပေ။ အမှုအဆင့်တစ်ရပ်မှ လူသားရရှိသည့် အရာသည် သူ၏အမှု အစိတ်အပိုင်း တစ်ရပ်တွင် ဖော်ပြထားသော ဘုရားသခင်၏ စိတ်နေသဘောထားသာဖြစ်၏။ ဤသည်မှာ ယခင် သို့မဟုတ် နောက်ပိုင်း အဆင့်များတွင် ဖော်ပြသော စိတ်နေသဘောထားနှင့် ဖြစ်တည်မှုကို ကိုယ်စားမပြုနိုင်ပေ။ ဤသည်မှာ လူသားမျိုးနွယ်အား ကယ်တင်ခြင်းအမှုကို ကာလတစ်ရပ်အတွင်း သို့မဟုတ် တည်နေရာတစ်ခုတွင် ချက်ချင်း ပြီးဆုံးနိုင်ခြင်း မရှိဘဲ မတူညီသော အချိန်များနှင့် မတူညီသော နေရာများတွင် လူသား၏ ဖွံ့ဖြိုးတိုးတက်မှု အဆင့်နှင့်အညီ တဖြည်းဖြည်း နက်ရှိုင်းလာသောကြောင့် ဖြစ်၏။ ဤသည်မှာ အဆင့်များဖြင့် အကောင်အထည်ဖော်ရသော အမှုဖြစ်၍ အဆင့်တစ်ဆင့်တည်းတွင် ပြီးဆုံးခြင်း မရှိပေ။ ထို့ကြောင့် ဘုရားသခင်၏ အသိဉာဏ် အမြော်အမြင်တစ်ရပ်လုံးကို သီးခြားအဆင့် တစ်ဆင့်တည်းတွင် မဟုတ်ဘဲ အဆင့်သုံးဆင့်တွင် ပုံဖော်ထား၏။ သူ၏ဖြစ်တည်မှုတစ်ရပ်လုံးနှင့် အသိဉာဏ်အမြော်အမြင် တစ်ရပ်လုံးကို ဤအဆင့်သုံးဆင့်တွင် ချမှတ်ထား၍ အဆင့်တစ်ဆင့်စီတွင် သူ၏ဖြစ်တည်မှု ပါရှိကာ သူ့အမှု၏ အသိဉာဏ် အမြော်အမြင် မှတ်တမ်းဖြစ်၏။ လူသားသည် ဤအဆင့်သုံးဆင့်တွင် ဖော်ပြ ထားသော ဘုရားသခင်၏ စိတ်နေသဘောထား တစ်ရပ်လုံးကို သိသင့်သည်။ ဘုရားသခင်၏ ဤဖြစ်တည်မှု အားလုံးသည် လူသားမျိုးနွယ် တစ်ရပ်လုံးအတွက် အရေးကြီးဆုံးဖြစ်၍ လူတို့သည် ဘုရားသခင်ကို ကိုးကွယ်သည့်အခါ ဤအသိဉာဏ် အမြော်အမြင်မရှိပါက ထိုသူတို့သည် ဗုဒ္ဓကို ကိုးကွယ်သူများနှင့် မခြား ဖြစ်သည်။ လူသားတို့အကြား ဘုရားသခင်၏အမှုကို လူသားထံမှ ကွယ်ဝှက်ထားသည် မဟုတ်ပေ။ ထို့အပြင် ဘုရားသခင်ကို ကိုးကွယ်သူအားလုံးမှ သိသင့်သည်။ ဘုရားသခင်သည် လူသားတို့အကြား ကယ်တင်ခြင်း အမှု အဆင့်သုံးဆင့်ကို အကောင်အထည် ဖော်ခဲ့ပြီးဖြစ်သဖြင့် လူသားသည် ဤအမှုအဆင့်သုံးဆင့် ကာလအတွင်း သူ့တွင်ရှိသည့်အရာနှင့် သူမည်သည်ဖြစ်ကြောင်းကို သိသင့်သည်။ ဤသည်မှာ လူသား လုပ်ဆောင်ရမည့် အရာဖြစ်သည်။ လူသားထံမှ ဘုရားသခင် ကွယ်ဝှက်ထားသောအရာမှာ လူသားမှ ရရှိနိုင်စွမ်းမရှိသော အရာဖြစ်၍ လူသားမသိသင့်သော အရာဖြစ်၏။ သို့ရာတွင် ဘုရားသခင်မှ လူသားအား ပြသည့်အရာမှာ လူသားသိသင့်သည့် အရာဖြစ်၍ လူသား ပိုင်ဆိုင်သင့်သည့် အရာဖြစ်၏။ ဤအမှုအဆင့် သုံးဆင့်၏ တစ်ဆင့်စီကို ယခင်အဆင့်၏ အခြေခံအုတ်မြစ်အပေါ်တွင် အကောင်အထည်ဖော်ခြင်း ဖြစ်သည်။ ကယ်တင်ခြင်းအမှုမှ သီးခြား လွတ်လပ်စွာ အကောင်အထည်ဖော်ခြင်း မဟုတ်ပေ။ အကောင်အထည် ဖော်သည့်ခေတ်နှင့် အမှုအမျိုးအစား ကြီးမားစွာ ကွဲပြားသော်လည်း လူသားမျိုးနွယ်၏ ကယ်တင်ခြင်းသည် ၎င်း၏ ဗဟိုအချက်အခြာတွင် ရှိနေဆဲဖြစ်၍၊ ကယ်တင်ခြင်းအမှု၏ အဆင့်တိုင်းသည် ပြီးခဲ့သည်အဆင့်ထက် ပို၍နက်ရှိုင်း၏။ အမှု၏အဆင့်တစ်ဆင့်စီသည် ဖျက်သိမ်းခြင်းမရှိသည့် ပြီးခဲ့သည့်အဆင့်၏ အခြေခံ အုတ်မြစ်မှ ဆက်လက်လုပ်ဆောင်ခြင်းဖြစ်၏။ ဤနည်းအားဖြင့် အစဉ်သစ်လွင်လျက် မည်သည့်အခါမျှ ဟောင်းနွမ်းခြင်းမရှိသော သူ၏အမှုတွင် ဘုရားသခင်သည် လူသားတို့ကို ယခင်က ဖော်ပြခဲ့ခြင်းမရှိသော သူ၏စိတ်နေသဘောထားကို စဉ်ဆက်မပြတ် ဖော်ထုတ်နေကာ လူသားအား သူ၏အမှုနှင့် သူ၏ဖြစ်တည်မှု အသစ်ကို အစဉ်ဖော်ထုတ် ပြသနေ၍ ရှေးရိုးစွဲ ဘာသာရေးကိုင်းရှိုင်းသူသည် ဤသည်ကို ခုခံရန် အစွမ်းကုန် ကြိုးစားကာ ထင်ထင်ပေါ်ပေါ် ဆန့်ကျင်သော်လည်း ဘုရားသခင်သည် သူရည်ရွယ်သည့် အမှုအသစ်ကို အစဉ် လုပ်ဆောင်၏။ သူ၏အမှုသည် အစဉ်ပြောင်းလဲနေလျက်၊ ဤသည်အတွက်ကြောင့် လူသား၏ ဆန့်ကျင်မှုနှင့် အစဉ်တွေ့ကြုံနေ၏။ သူ၏ စိတ်နေသဘောထားသည်လည်း အစဉ်ပြောင်းလဲနေကာ၊ သူ့အမှု၏ခေတ်နှင့် လက်ခံရရှိသူတို့သည်လည်း အစဉ်ပြောင်းလဲနေ၏။ ထို့အပြင် သူသည် ယခင်က ပြုလုပ်ခဲ့ဖူးခြင်း မရှိသောအမှုကို အစဉ်ဆောင်ရွက်လျက်ရှိကာ ၎င်းနှင့်ဆန့်ကျင်ရန်အတွက် ယခင်တစ်ခါ ကမျှ မလုပ်ခဲ့ဖူးသောအမှုနှင့် လူသား၏အမြင်တွင် ဆန့်ကျင်ပုံပေါက်သည့် အမှုကိုပင် အကောင်အထည် ဖော်၏။ လူသားသည် အမှုတစ်မျိုးကိုသာ သို့မဟုတ် ကျင့်နည်းတစ်မျိုးကိုသာ လက်ခံနိုင်၏။ လူသား အတွက် ၎င်းတို့နှင့် မကိုက်ညီသော သို့မဟုတ် ၎င်းတို့ထက်အဆင့်မြင့်သော အမှု သို့မဟုတ် ကျင့်နည်းများကို လက်ခံရန် ခက်ခဲသော်လည်း--သန့်ရှင်းသော ဝိညာဉ်တော်သည် အမှုအသစ်ကို အစဉ် ဆောင်ရွက်နေသဖြင့် ဘုရားသခင်၏ အမှုအသစ်ကို ဆန့်ကျင်သည့် ဘာသာရေး ကျွမ်းကျင်သူများအုပ်စု တစ်စုပြီးတစ်စု ပေါ်ပေါက်၏။ ထိုသူတို့သည် ကျွမ်းကျင်သူများ ဖြစ်လာရခြင်းမှာ အတိအကျအားဖြင့် ဘုရားသခင်သည် အစဉ်အမြဲအသစ်ဖြစ်လျက် မည်သည့်အခါမျှ ဟောင်းနွမ်းခြင်းမရှိသည်ကို လူသားသည် လုံးဝမသိရှိ သောကြောင့်နှင့် ဘုရားသခင်၏အမှု၏ အခြေခံသဘောတရားများကို လုံးဝမသိသည့်အပြင် ဘုရားသခင်မှ လူသားကို ကယ်တင်သည့် နည်းများစွာကိုလည်း လုံးဝမသိသောကြောင့် ဖြစ်၏။ ထိုသို့ဖြစ်သောကြာင့် အမှုမှာ သန့်ရှင်းသော ဝိညာဉ်တော်မှလာသည့်အမှု သို့မဟုတ် ဘုရားသခင် ကိုယ်တိုင်ထံမှ လာသည့်အမှု ဟူသည်ကို လူသားမှ လုံးဝဥဿုံ ပြောနိုင်စွမ်းမရှိပါ။ ၎င်းသည် ယခင်က နှုတ်ကပတ်တော်များနှင့် ကိုက်ညီပါက လက်ခံ၍ ယခင်ကအမှုနှင့် ကွဲပြားချက်များရှိပါက ဆန့်ကျင်၍ ငြင်းပယ်သော သဘောထားကို လူအများအပြား ဖက်တွယ်ကြ၏။ ယနေ့ သင်တို့အားလုံးသည် ဤကဲ့သို့သော အခြေခံသဘောတရားများကို လိုက်နာကြသည် မဟုတ်လော။ ကယ်တင်ခြင်းအမှု၏ အဆင့်သုံးဆင့်သည် သင်တို့အပေါ်တွင် ကြီးမားသည့် သက်ရောက်မှု မရှိခဲ့ဘဲ ယခင်အမှုအဆင့်နှစ်ဆင့်သည် သိရန်မလိုသော ဝန်ထုပ်ဝန်ပိုးမျှသာ ဖြစ်သည်ဟု ယူဆသူများရှိ၏။ လူတို့သည် အမှုအဆင့်သုံးဆင့်၏ ယခင်အဆင့်နှစ်ဆင့်ကြောင့် ဝန်ပိမသွားစေရန် ဤအဆင့်များကို လူအုပ်စုကြီးများအား မကြေညာသင့်ဘဲ တတ်နိုင်သရွေ့ အမြန်ဆုံး ပြန်လည်ရုပ်သိမ်း သင့်သည်ဟု ထိုသူများက ယူဆကြသည်။ အမှု၏ ယခင်အဆင့်နှစ်ဆင့်ကို အသိပေးခြင်းသည် လွန်ကဲ လွန်း၍ ဘုရားသခင်ကို သိရေးတွင် လုံးဝအထောက်အကူမဖြစ်ဟု အများစုက ယုံကြည်ကြ၏—ဤသည်မှာ သင်တို့၏ ထင်မြင်ချက်သာဖြစ်၏။ ယနေ့ ဤသို့ပြုမူခြင်းသည် မှန်သည်ဟု သင်တို့အားလုံး ယုံကြည်ကြသော်လည်း၊ ငါ့အမှု၏ အရေးပါပုံကို သင်တို့သိလာကြမည့်နေ့ ရောက်လာလိမ့်မည်-ငါသည် အရေးမပါသော မည်သည့်အမှုကိုမျှ မလုပ်ကြောင်းကို သိထားပါ။ ငါသည် အမှုအဆင့်သုံးဆင့်ကို သင့်အား ကြေညာနေသည် ဖြစ်သဖြင့် ၎င်းတို့သည် သင့်အတွက် အကျိုးရှိရပေမည်။ ဤအမှုအဆင့်သုံးဆင့်သည် ဘုရားသခင်၏ စီမံခန့်ခွဲမှု တစ်ရပ်လုံး၏ ဗဟိုအချက်အခြာတွင် ရှိသဖြင့် ၎င်းတို့သည် စကြဝဠာတစ်ခုလုံးရှိ လူတိုင်း၏ အာရုံပြုရာ ဖြစ်လာရမည်။ တစ်နေ့တွင် သင်တို့အားလုံးသည် ဤအမှု၏ အရေးပါပုံကို သိလာလိမ့်မည်။ သင်တို့သည် ဘုရားသခင်၏အမှုကို ဆန့်ကျင်ခြင်း၊ သို့မဟုတ် ယနေ့အမှုကို တိုင်းတာရန် သင်တို့၏ကိုယ်ပိုင် အတွေးအခေါ်များကို အသုံးပြုခြင်းမှာ သင်တို့သည် ဘုရားသခင်၏ အခြေခံသဘောတရားများကို မသိသောကြောင့်နှင့် သန့်ရှင်းသော ဝိညာဉ်တော်၏ အမှုကို လုံလောက်စွာ အလေးအနက် သဘောမထား သောကြောင့်ဟူသည်ကို သိထားပါ။ ဘုရားသခင်အပေါ် သင်တို့၏ဆန့်ကျင်ခြင်းနှင့် သန့်ရှင်းသော ဝိညာဉ်တော်၏ အမှုအပေါ် သင်တို့၏ ဟန့်တားပိတ်ဆို့ခြင်းသည် သင်တို့၏ အတွေးအခေါ်များနှင့် နဂိုဗီဇအရ ဝင့်ဝါမှုကြောင့်ဟူသည်ကို သိထားပါ။ ဤသည်မှာ ဘုရားသခင်၏ အမှုသည် မှားယွင်းသောကြောင့် မဟုတ်ဘဲ သင်တို့သည် သဘာဝအားဖြင့် နာခံမှုမရှိလွန်းသဖြင့် ဖြစ်သည်။ ဘုရားသခင်အပေါ် ၎င်းတို့၏ ယုံကြည်မှုကို တွေ့ရှိပြီးနောက် အချို့သူများသည် လူသားမည်သည့်နေရာမှ လာသည်ကိုပင် သေချာစွာ ပြောဆိုနိုင်ခြင်း မရှိသော်လည်း ထိုသူတို့သည် သန့်ရှင်းသော ဝိညာဉ်တော်၏ အမှု၏ အမှန်များနှင့် အမှားများကို သုံးသပ်သည့် လူသိရှင်ကြား ဟောပြောမှုများကို လုပ်ဝံ့ကြသည်။ ထို့အပြင် ၎င်းတို့သည် သန့်ရှင်းသော ဝိညာဉ်တော်၏ အမှုအသစ်ရှိသော တမန်တော်များကို ဆုံးမခြင်းပင် ပြုကြလျက် ဝေဖန်ခြင်းများ၊ မိမိအလှည့်မရောက်မီ ပြောဆိုခြင်းများ ပြုကြ၏။ ၎င်းတို့၏ လူ့သဘောသဘာဝသည် နိမ့်ကျလွန်း၍ ထိုသူတို့တွင် အသိဉာဏ်အနည်းငယ်မျှပင် မရှိပေ။ ထိုကဲ့သို့သောသူတို့ကို သန့်ရှင်းသော ဝိညာဉ်တော်၏ အမှုမှ ငြင်းပယ်၍ ငရဲ၏မီးများနှင့် လောင်ကျွမ်းခံရမည့်နေ့ ရောက်လာလိမ့်မည် မဟုတ်လော။ ထိုသူတို့သည် ဘုရားသခင်၏အမှုကို မသိသော်လည်း သူ၏အမှုကို ဝေဖန်ကာ ဘုရားသခင် ကို မည်သို့ အမှုဆောင်ရမည်ကို ညွှန်ကြားရန်လည်း ကြိုးပမ်းကြ၏။ ထိုသို့သော ဆင်ခြင်တုံတရား မရှိသောလူတို့သည် ဘုရားသခင်ကို မည်သို့သိနိုင်မည်နည်း။ လူသားသည် ဘုရားသခင်ကို ရှာဖွေ၍ တွေ့ကြုံခံစားသည့် လုပ်ငန်းစဉ်အတွင်း သူ့ကိုသိလာခြင်းဖြစ်၏။ စိတ်ကူးပေါက်သည့်အတိုင်း သူ့ကို ဝေဖန်ခြင်းအားဖြင့် သန့်ရှင်းသော ဝိညာဉ်တော်၏ ဉာဏ်အလင်းပေးမှုမှတစ်ဆင့် ဘုရားသခင်ကို သိလာခြင်း မဟုတ်ပေ။ ဘုရားသခင်အပေါ် လူတို့၏သိခြင်းသည် တိကျလေလေ၊ သူ့အပေါ်ဆန့်ကျင်မှု နည်းလေလေ ဖြစ်၏။ ၎င်းနှင့်ဆန့်ကျင်ဘက်မှာ ဘုရားသခင်အပေါ် လူတို့အသိနည်းလေလေ၊ သူ့ကိုဆန့်ကျင်ရန် အလား အလာ များလေလေဖြစ်၏။ သင့်အတွေးအခေါ်များ၊ သင်၏သဘာဝဟောင်းနှင့် သင်၏ လူ့သဘောသဘာဝ၊ စရိုက်လက္ခဏာနှင့် ကိုယ်ကျင့်တရားဆိုင်ရာ သဘောထားအမြင်တို့သည် သင်ဘုရားသခင်အပေါ် ခုခံရာတွင် အသုံးပြုသည့် “ငွေလုံးငွေရင်း” ဖြစ်၍ သင်သည် အကျင့်ပျက်၊ သိက္ခာကျ၍ အောက်တန်းကျလေလေ၊ ဘုရားသခင်၏ ရန်သူဖြစ်လေလေ ဖြစ်၏။ အလွန်ဆိုးရွားသော အတွေးအခေါ်များရှိ၍ မိမိကိုယ်ကိုယ် သူတစ်ပါးထက် သာ၍ဖြောင့်မတ်သည်ဟူသော စိတ်နေသဘောထား ရှိသူများသည် လူ့ဇာတိခံယူသော ဘုရားသခင်၏ ရန်လိုမှု ပိုခံရလေဖြစ်၍၊ ထိုကဲ့သို့သော သူများသည် အန္တိခရစ်များဖြစ်ကြ၏။ သင်၏ အတွေးအခေါ်များကို ပြုပြင်ပြောင်းလဲခြင်း မရှိပါက ၎င်းတို့သည် ဘုရားသခင်ကို အစဉ်ဆန့်ကျင်နေလိမ့် မည်။ သင်သည် ဘုရားသခင်နှင့် မည်သည့်အခါမျှ သဟဇာတရှိလိမ့်မည် မဟုတ်။ ထို့အပြင် သင်သည် သူ့ထံမှ အစဉ်အမြဲ ဝေးကွာလျက်ရှိလိမ့်မည်။

သင်၏ အတွေးအခေါ်အဟောင်းတို့ကို ဘေးဖယ်ထားမှသာလျှင် သင်သည် အသိဉာဏ်အသစ်ကို ရရှိမည်ဖြစ်၏။ သို့သော် အသိဉာဏ်အဟောင်းဟူသည် အတွေးအခေါ်အဟောင်းများ ဖြစ်စရာမလိုပါ။ “အတွေးအခေါ်များ” ဟူသည် လူသားမှစိတ်ကူးသည့် အမှန်တရားနှင့် မကိုက်ညီသော အရာများကို ရည်ညွှန်း ပါသည်။ အသိဉာဏ်အဟောင်းသည် ခေတ်ဟောင်းတွင် ခေတ်နောက်ကျပြီးသား ဖြစ်၍ လူသားအား အမှုသစ်အတွင်း ဝင်ရောက်ရာတွင် တားဆီးခဲ့ပါက ထိုသို့သော အသိဉာဏ်သည်လည်း အတွေးအခေါ် တစ်ရပ်ဖြစ်၏။ ဤသို့သော အသိဉာဏ်အပေါ် လူသားမှ မှန်ကန်သည့်ချဉ်းကပ်မှု ပြုလုပ်နိုင်၍၊ အဟောင်းနှင့် အသစ်ပေါင်းကာ ဘုရားသခင်ကို ကွဲပြားသောရှုထောင့်များမှ သိလာနိုင်ပါက အသိဉာဏ် အဟောင်းသည် လူသားအတွက် အထောက်အကူတစ်ရပ်ဖြစ်လာ၍ ခေတ်သစ်အတွင်း လူသား ဝင်ရောက် သည့် အခြေခံဖြစ်လာ၏။ ဘုရားသခင်ကိုသိခြင်း သင်ခန်းစာအတွက် သင်သည် ဘုရားသခင်ကိုသိသည့် လမ်းကြောင်းပေါ်သို့ မည်သို့ဝင်ရောက်ပုံ၊ ဘုရားသခင်ကိုသိရန် မည်သည့် သမ္မာတရားများကို နားလည် ရမည်နှင့် သင်၏ အတွေးအခေါ်များနှင့် သဘာဝအဟောင်းကို ဘုရားသခင်၏ အမှုအသစ်၏ စီမံမှုအားလုံးကို နာခံရန် မည်သို့လုပ်ဆောင်ရမည်ဟူသည့် အခြေခံ သဘောတရားများစွာတို့ကို ပိုင်နိုင်ရန်လိုအပ်၏။ သင်သည် ဤအခြေခံ သဘောတရားများကို ဘုရားသခင်ကိုသိခြင်း သင်ခန်းစာအတွင်းသို့ ဝင်ရောက်ရန် အခြေခံအုတ်မြစ်အဖြစ် အသုံးပြုပါက သင်၏အသိဉာဏ်သည် သာ၍သာ၍ နက်ရှိုင်းလာလိမ့်မည် ဖြစ်သည်။ သင်သည် အမှုအဆင့်သုံးဆင့်ကို (ဆိုလိုသည်မှာ ဘုရားသခင်၏ စီမံခန့်ခွဲမှု အစီအစဉ် တစ်ရပ်လုံးကို) ရှင်းလင်းစွာ သိသည့်အပြင်၊ သင်သည် ဘုရားသခင်အမှု၏ ယခင်အဆင့်နှစ်ဆင့်ကို လက်ရှိအဆင့်နှင့် အပြည့်အဝ အပြန်အလှန် ဆက်စပ်နိုင်သည့်အပြင်၊ ဤသည်မှာ ဘုရားသခင် တစ်ပါး တည်းမှ ဆောင်ရွက်သည့် အမှုဖြစ်ကြောင်းကို မြင်နိုင်ပါက ဤထက်သာ၍ခိုင်မာသော အခြေခံအုတ်မြစ် သင့်တွင်ရှိမည်မဟုတ်ပါ။ အမှုအဆင့်သုံးဆင့်ကို ဘုရားသခင် တစ်ပါးတည်းကသာ ဆောင်ရွက်ခဲ့၏။ ဤသည်မှာ အကြီးမားဆုံးသော အမြင်ဖြစ်၍ ဘုရားသခင်ကို သိရှိခြင်းအတွက် တစ်ခုတည်းသော လမ်းကြောင်းဖြစ်၏။ အမှုအဆင့်သုံးဆင့်ကို ဘုရားသခင် ကိုယ်တိုင်သာလျှင် ဆောင်ရွက်နိုင်ခဲ့သည်ဖြစ်၍ မည်သည့်လူသားမျှ သူ့ကိုယ်စား ဆောင်ရွက်နိုင်မည် မဟုတ်ပေ--ဆိုလိုသည်မှာ ဘုရားသခင် ကိုယ်တိုင် သာလျှင် သူ၏အမှုကို အစမှ ယနေ့တိုင် ဆောင်ရွက်နိုင်ခဲ့သည်ဟု ဆိုလိုသည်။ ဘုရားသခင်၏ အမှု၏ အဆင့်သုံးဆင့်ကို ကွဲပြားသည့်ခေတ်များ၊ ကွဲပြားသည့် တည်နေရာများတွင် လုပ်ဆောင်ခဲ့သော်လည်း၊ ထို့အပြင် တစ်ခုစီ၏အမှုသည် ကွဲပြားသော်လည်း၊ ဤသည်မှာ တစ်ပါးတည်းသော ဘုရားသခင်မှ ဆောင်ရွက်ခဲ့သည့် အမှုအားလုံးဖြစ်၏။ အမြင်အားလုံးတွင်၊ ဤသည်မှာ လူသားအနေဖြင့် သိသင့်သည့် အကြီးမားဆုံးသော အမြင်ဖြစ်ကာ၊ လူသားမှ ဤသည်ကို လုံးဝနားလည်နိုင်ပါက သူသည် ခိုင်မြဲစွာ ရပ်တည် နိုင်မည်ဖြစ်၏။ ယနေ့ ဂိုဏ်းဂဏအားလုံးနှင့် ဂိုဏ်းခွဲအားလုံး ရင်ဆိုင်နေရသည့် အကြီးဆုံးပြဿနာမှာ ထိုသူတို့သည် သန့်ရှင်းသော ဝိညာဉ်တော်၏အမှုကို မသိခြင်းဖြစ်၍ သန့်ရှင်းသော ဝိညာဉ်တော်၏အမှုနှင့် သန့်ရှင်းသော ဝိညာဉ်တော်၏ အမှုမဟုတ်သည့် အရာတို့အကြား မခွဲခြားနိုင်ခြင်းဖြစ်၏--ထို့ကြောင့် အမှု၏ လွန်ခဲ့သော အဆင့်နှစ်ဆင့်ကဲ့သို့ အမှု၏ ဤအဆင့်သည်လည်း ယေဟောဝါဘုရားမှ ဆောင်ရွက်ခဲ့သည်ကို ထိုသူတို့မပြောနိုင်ပေ။ လူတို့သည် ဘုရားသခင်နောက် လိုက်သော်လည်း ဤသည်မှာ လမ်းမှန်ဟုတ်၊ မဟုတ်ကို အများစုမှ မပြောနိုင်ဘဲ ရှိနေကြသေးသည်။ ဤလမ်းသည် ဘုရားသခင်ကိုယ်တိုင်မှ လမ်းပြသည့် လမ်း ဟုတ်၊ မဟုတ်နှင့် ဘုရားသခင်၏ လူ့ဇာတိခံယူခြင်းသည် ဖြစ်ရပ်မှန် ဟုတ်၊ မဟုတ်ကို လူသားမှ စိုးရိမ်၍၊ လူအများစုသည် ဤကဲ့သို့သော အရာများနှင့် ပတ်သက်လာပါက မည်သို့ မြင်ရမည်ဟူသည့်အပေါ် လုံးဝမသိသေးပေ။ ဘုရားသခင်၏နောက် လိုက်သောသူတို့သည် လမ်းကို မဆုံးဖြတ်နိုင်ကြသောကြောင့် ပြောဆိုလိုက်သည့် သတင်းစကားများသည် ထိုသူတို့အကြားတွင် တစ်စိတ်တစ်ပိုင်းသာ သက်ရောက်မှု ရှိကာ၊ အပြည့်အဝ သက်ရောက်နိုင်စွမ်း မရှိသောကြောင့် ဤသည်မှာ ထိုကဲ့သို့သောသူတို့၏ ဘဝအပေါ် သက်ရောက်လေသည်။ အမှုအဆင့်သုံးဆင့်သည် ဘုရားသခင်ကိုယ်တိုင်မှ ကွဲပြားသောအချိန်များ၊ ကွဲပြားသောနေရာများနှင့် ကွဲပြားသောလူများတွင် အကောင်အထည်ဖော်သည့်အမှုဟု လူသားမှမြင်နိုင်ပါက အမှုသည် ကွဲပြားသော်လည်း တစ်ပါးတည်းသော ဘုရားသခင်မှ ဆောင်ရွက်သည့် အမှုအားလုံးဖြစ်သည်ကို လူသားမှ မြင်လိမ့်မည်။[က] ဤသည်မှာ တစ်ပါးတည်းသော ဘုရားသခင်မှ ဆောင်ရွက်သည့်အမှု ဖြစ်သည့် အတွက် မှန်ကန်ရမည်ဖြစ်၍ အမှားကင်းစင်ကာ၊ လူသား၏ အတွေးအခေါ်များနှင့် မကိုက်ညီသော်လည်း တစ်ပါးတည်းသော ဘုရားသခင်၏ အမှုဖြစ်သည်ကို လုံးဝမငြင်းဆိုနိုင်ပေ။ ဤသည်မှာ တစ်ပါးတည်းသော ဘုရားသခင်၏ အမှုဖြစ်ကြောင်းကို လူသားမှာ အသေအချာပြောနိုင်ပါက လူသား၏ အတွေးအခေါ်များသည် အသေးအဖွဲများ၊ ပြောဆိုရန် ထိုက်သင့်ခြင်းမရှိသော အရာများမျှသာ ဖြစ်သွားလိမ့်မည်။ လူသား၏ အမြင်များ မရှင်းသောကြောင့်နှင့် လူသားသည် ယေဟောဝါကိုသာ ဘုရားအဖြစ်၊ ယေရှုကို သခင်အဖြစ်သိ၍ ယနေ့ လူ့ဇာတိခံယူသော ဘုရားသခင်အကြောင်း စိတ်နှစ်မျိုးဖြစ်နေသဖြင့် များစွာသော လူတို့သည် ယေဟောဝါနှင့် ယေရှုတို့၏အမှုအပေါ် ဆက်လက်ဆက်ကပ်လျက်ရှိ၍၊ ယနေ့အမှုအကြောင်း အတွေး အခေါ်များနှင့် အဘက်ဘက်မှ ဝန်းရံတိုက်ခိုက်ခံရကာ၊ လူအများစုမှာ အစဉ် သံသယရှိလျက် ယနေ့၏အမှုကို အလေးအနက်ခံယူခြင်းမရှိပေ။ မြင်နိုင်ခြင်းမရှိသည့် နောက်ဆုံးအဆင့် နှစ်ဆင့်အပေါ် လူသားသည် အတွေးအခေါ် လုံးဝမရှိပေ။ ဤသည်မှာ လူသားသည် နောက်ဆုံးအဆင့် နှစ်ဆင့်၏ အမှန်တရားကို နားမလည်ခြင်းကြောင့်နှင့် ၎င်းတို့ကို ကိုယ်တိုင်မြင်တွေ့ခြင်း မရှိခဲ့သောကြောင့် ဖြစ်သည်။ ဤသည်မှာ လူသားသည် သူသဘောကျသည့်အတိုင်း စိတ်ကူးယဉ်သဖြင့် ၎င်းတို့ကို မမြင်နိုင်ခြင်းဖြစ်၏။ သူသည် မည်သည့်စိတ်ကူး ပေါ်လာသည်ဖြစ်စေ၊ ၎င်းကို သက်သေပြရန် အချက်များ မရှိဘဲ ပြုပြင်မည့်သူလည်း မရှိပေ။ ၎င်းကို အတည်ပြုရန် အချက်အလက်များ မရှိသဖြင့် လူသားသည် သူ၏သဘာဝ ပင်ကိုစရိုက်ကို အထိန်းအကွပ်မဲ့ လွှတ်ထားပေး၍၊ မည်သည့်အရာကိုမျှ သတိမမူတော့ဘဲ၊ စိတ်ကူးယဉ်ချင်တိုင်း ယဉ်စေ တော့သည်။ ထို့ကြောင့် လူ၏စိတ်ကူးယဉ်များသည် သက်သေပြချက် ရှိသည်ဖြစ်စေ၊ မရှိသည်ဖြစ်စေ၊ “အမှန်တရား” ဖြစ်သွား၏။ ထို့ကြောင့် လူသားသည် သူ့စိတ်ထဲရှိ သူကိုယ်တိုင် စိတ်ကူးယဉ်ထားသည့် ဘုရားသခင်ကို ယုံကြည်၍ အမှန်တရား၏ ဘုရားသခင်ကို မရှာဖွေပါ။ လူတစ်ဦးတွင် ယုံကြည်ခြင်းတစ်မျိုး ရှိပါက လူတစ်ရာအကြားတွင် ယုံကြည်ခြင်း အမျိုးတစ်ရာရှိ၏။ လူသားသည် ဤသို့သော ယုံကြည်ချက်များ ရှိခြင်းမှာ သူသည် ဘုရားသခင်အမှု၏ အမှန်တရားကို မတွေ့ရသေးသောကြောင့်၊ သူ၏နားများဖြင့်သာ ကြားရသေး၍ သူ၏မျက်စိများဖြင့် မမြင်ရသေးသောကြောင့် ဖြစ်၏။ လူသားသည် ဒဏ္ဍာရီများနှင့် ပုံပြင်များကြားခဲ့ရသော်လည်း ဘုရားသခင်အမှု၏ အချက်အလက်များ သိခြင်းကို ကြားရခဲ၏။ ယုံကြည်သူများအဖြစ် တစ်နှစ်သာရှိသေးသော လူတို့သည် ၎င်းတို့၏ ကိုယ်ပိုင်အတွေးအခေါ်များမှ တစ်ဆင့်သာ ဘုရားသခင်ကို ယုံကြည်ခြင်းဖြစ်၍၊ ၎င်းတို့၏ ဘဝတစ်လျှောက်လုံး ဘုရားသခင်ကို ယုံကြည်ခဲ့သူများ အတွက်လည်း ထိုသို့ပင်ဖြစ်သည်။ အချက်အလက်များကို မမြင်နိုင်သူများသည် ဘုရားသခင်အပေါ် အတွေးအခေါ်များရှိသည့် ယုံကြည်ခြင်းမှ မည်သည့်အခါမျှ လွတ်မြောက်နိုင်ခြင်း ရှိမည် မဟုတ်ပေ။ လူသားသည် သူ၏အတွေးအခေါ် အဟောင်းများ၏ အချုပ်အနှောင်များမှ သူ့ကိုယ်သူ လွတ်မြောက်အောင် လုပ်ခဲ့ပြီး၍ နယ်မြေသစ်အတွင်း ဝင်ရောက်ခဲ့ပြီးဖြစ်သည်ဟု ယုံကြည်သည်။ ဘုရားသခင်၏ စစ်မှန်သောမျက်နှာကို မမြင်နိုင်သူများ၏ အသိဉာဏ်သည် အတွေးအခေါ်များနှင့် တစ်ဆင့် စကားများသာ ဖြစ်သည်ကို လူသားမသိသလော။ လူသားသည် သူ၏အတွေးအခေါ်များသည် မှန်ကန်၍ အမှားကင်းသည်ဟု ထင်ကာ ဤအတွေးအခေါ်များသည် ဘုရားသခင်ထံမှ လာသည်ဟုထင်၏။ ယနေ့၊ လူသားသည် ဘုရားသခင်၏အမှုကို မြင်သည့်အခါ နှစ်ပေါင်းများစွာ စုစည်းလာသော အတွေးအခေါ်များကို လွှတ်ပေးလိုက်၏။ အတိတ်မှ စိတ်ကူးယဉ်များနှင့် အကြံများသည် ဤအဆင့်၏အမှုတွင် အတားအဆီး ဖြစ်လာခဲ့၍ လူသားအတွက် ထိုသို့သော အတွေးအခေါ်များကို လက်လွှတ်ရန်နှင့် ထိုကဲ့သို့သော အကြံများကို ချေပရန် ခက်ခဲလာသည်။ ယနေ့အထိ ဘုရားသခင်နောက်သို့ လိုက်ခဲ့သူအများအပြား၏ ဤတစ်ဆင့်ပြီး တစ်ဆင့် အမှုအပေါ် အတွေးအခေါ်များသည် ပို၍ဆိုးရွားလာကာ ဤလူတို့သည် လူ့ဇာတိခံယူသော ဘုရားသခင်၏ ခေါင်းမာသော ရန်လိုမှုအဖြစ် ဖွဲ့စည်းလာခဲ့ကာ ဤမုန်းတီးမှု၏ အရင်းအမြစ်မှာ လူသား၏ အတွေးအခေါ်များနှင့် စိတ်ကူးယဉ်မှုများဖြစ်သည်။ ဤသည်မှာ အတိအကျအားဖြင့် အမှန်တရားသည် လူသားကို အထိန်းအချုပ်မရှိ စိတ်ကူးယဉ်ခွင့် မပေးသောကြောင့် ဖြစ်သည့်အပြင် လူသားမှ အလွယ်တကူ ချေပနိုင်ခြင်း မရှိသောကြောင့်အပြင် လူသား၏ အတွေးအခေါ်များနှင့် စိတ်ကူးယဉ်မှုများသည် အမှန် တရား၏ အချက်အလက်များ တည်ရှိခြင်းကို ခွင့်မပြုသည့်အပြင် လူသားသည် အချက်အလက်များ၏ မှန်ကန်မှုအပေါ် စဉ်းစားခြင်းမရှိဘဲ သူ့အတွေးအခေါ်များကို တဇောက်ထိုး လွှတ်ပေးရုံသာ လွှတ်ပေး၍ သူ၏ကိုယ်ပိုင် စိတ်ကူးကို အသုံးပြုသဖြင့် လူသား၏ အတွေးအခေါ်များနှင့် စိတ်ကူးယဉ်မှုများသည် လူသား၏အတွေးအခေါ်များနှင့် မကိုက်ညီသော ယနေ့အမှု၏ ရန်သူဖြစ်သွားခဲ့သည်။ ဤသည်မှာ လူသား၏ အတွေးအခေါ်များ၏ အပြစ်ဟုသာပြောနိုင်၍ ဘုရားသခင်အမှု၏ အပြစ်ဟု မပြောနိုင်ပေ။ လူသားသည် သူဆန္ဒရှိသည်အတိုင်း စိတ်ကူးယဉ်နိုင်သော်လည်း ဘုရားသခင်အမှု၏ မည်သည့်အဆင့် သို့မဟုတ် မည်သည့်အစိတ်အပိုင်းကိုမျှ လွတ်လပ်စွာ အငြင်းပွားနိုင်ခြင်း မရှိပေ။ ဘုရားသခင်အမှု၏ အမှန်တရားကို လူသားမှ ချိုးဖောက်နိုင်ခြင်း မရှိပေ။ သင်သည် သင်၏စိတ်ကူးကို အထိန်းအချုပ်မရှိ လွတ်လပ်ခွင့် ပေးချင်ပေး၍ ယေဟောဝါနှင့် ယေရှုတို့အကြောင်း ပုံပြင်ကောင်းများကိုပင် စုဆောင်းချင်စုဆောင်းမည် ဖြစ်သော်လည်း ယေဟောဝါနှင့် ယေရှုတို့၏အမှု အဆင့်တစ်ဆင့်စီ၏ အမှန်တရားကိုမူ သင်ချေပနိုင်ခြင်း မရှိပေ။ ဤသည်မှာ အခြေခံသဘောတရား တစ်ရပ်ဖြစ်၍ စီမံခန့်ခွဲမှုဆိုင်ရာ အမိန့်တစ်ရပ်လည်းဖြစ်ကာ သင်တို့သည် ဤကိစ္စတို့၏ အရေးပါပုံကို နားလည်သင့်သည်။ အမှု၏ ဤအဆင့်သည် လူသား၏ အတွေး အခေါ်များနှင့် မကိုက်ညီဟု လူသားမှယုံကြည်၍ အမှု၏ယခင်အဆင့် နှစ်ဆင့်အတွက် ဤသို့မဟုတ်ဟု ယုံကြည်သည်။ သူ၏စိတ်ကူးတွင် ယခင်အဆင့်နှစ်ဆင့်၏ အမှုသည် ယနေ့အမှုနှင့် မတူကြောင်း သေချာသည်ဟု လူသားယုံကြည်သည်--သို့သော် ဘုရားသခင်အမှု၏ အခြေခံ သဘောတရားများသည် အားလုံးအတူတူပင် ဖြစ်ကြောင်း၊ သူ၏အမှုသည် အစဉ်လက်တွေ့ကျကြောင်း၊ ထို့နောက် မည်သည့် ခေတ်ပင်ဖြစ်စေ သူ၏အမှုကို ခုခံ၍ဆန့်ကျင်သူ မြောက်များစွာ အစဉ်ရှိမည်ဆိုကြောင်းကို သင်စဉ်းစားဖူး ပါသလော။ ဤအမှုအဆင့်ကို ယနေ့ခုခံ၍ဆန့်ကျင်သူ အားလုံးတို့သည် အတိတ်ကာလများကလည်း ဘုရားသခင်ကို ဆန့်ကျင်ခဲ့သည်မှာ သံသယမရှိပေ။ အဘယ်ကြောင့်ဆိုသော် ထိုကဲ့သို့သော သူများသည် ဘုရားသခင်၏ ရန်သူများ အစဉ်ဖြစ်လိမ့်မည်ဖြစ်၍ ဖြစ်သည်။ ဘုရားသခင်အမှု၏ အမှန်တရားကို သိသူများသည် ဤအမှု၏အဆင့် သုံးဆင့်ကို တစ်ပါးတည်းသော ဘုရားသခင်၏ အမှုဟုမြင်၍ ၎င်းတို့၏ အတွေးအခေါ်များကို လက်လွှတ်ကြလိမ့်မည်။ ဤသူတို့သည် ဘုရားသခင်ကို သိသူများဖြစ်၍ ထိုကဲ့သို့သော သူများသည် ဘုရားသခင်နောက်ကို စစ်မှန်စွာ လိုက်သူများဖြစ်ကြ၏။ ဘုရားသခင်၏ စီမံခန့်ခွဲမှုတစ်ရပ်လုံး ပြီးဆုံးခါနီးချိန်၌ ဘုရားသခင်သည် အရာခပ်သိမ်းကို အမျိုးအစားအလိုက် အတန်းစားခွဲခြားမည်။ လူသားကို ဖန်ဆင်းရှင်၏ လက်များနှင့် ပြုလုပ်ခဲ့ကာ အဆုံးတွင် သူသည် လူသားကို သူ၏ စိုးမိုးမှုအောက် လုံးဝ ပြန်ပို့ရမည်ဖြစ်သည်။ ဤသည်မှာ အမှုအဆင့်သုံးဆင့်၏ အဆုံးဖြစ်သည်။ နောက်ဆုံးသောကာလအမှု၏ အဆင့်နှင့် ဣသရေလနှင့် ယုဒနယ်တို့ရှိ ယခင်အမှုအဆင့် နှစ်ဆင့်တို့သည် စကြဝဠာတစ်ခုလုံးတွင် ဘုရားသခင်၏ စီမံခန့်ခွဲမှု အစီအစဉ်ပင်ဖြစ်သည်။ ဤသည်ကို မည်သူမျှ မငြင်းဆိုနိုင်ပေ။ ထို့အပြင် ဤသည်မှာ ဘုရားသခင်အမှု၏ အမှန်တရားဖြစ်သည်။ လူတို့သည် ဤအမှုကို အတော်များများ တွေ့ကြုံခြင်း သို့မဟုတ် မြင်ခြင်း မရှိသော်လည်း၊ အမှန်တရားတို့သည် အမှန်တရားများသာ ဖြစ်ဆဲဖြစ်ကာ ဤသည်ကို မည်သည့်လူသားမျှ ငြင်းဆိုနိုင်ခြင်းမရှိပေ။ စကြဝဠာ၏ တိုင်းပြည်တိုင်းရှိ ဘုရားသခင်ကို ယုံကြည်သူ အားလုံးတို့သည် အမှု၏အဆင့်သုံးဆင့်ကို လက်ခံကြလိမ့်မည်။ သင်သည် အမှု၏သီးခြားအဆင့် တစ်ဆင့်ကိုသာသိ၍ အမှု၏အခြားအဆင့်နှစ်ဆင့်ကို နားမလည်ပါက၊ အတိတ်အချိန်များက ဘုရားသခင်၏ အမှုကို နားမလည်ပါက၊ သင်သည် ဘုရားသခင်၏ စီမံခန့်ခွဲမှု၏ အစီအစဉ်တစ်ရပ်လုံး၏ သမ္မာတရား တစ်ရပ်လုံးကို ပြောနိုင်ခြင်းမရှိပါ။ ထို့အပြင် ဘုရားသခင်အပေါ် သင်၏သိခြင်းသည်လည်း တစ်ဖက်သတ် သာဖြစ်၏။ အဘယ်ကြောင့်ဆိုသော် ဘုရားသခင်ကို သင်ယုံကြည်ရာတွင် သင်သည် သူ့ကိုမသိ၊ သို့မဟုတ် သူ့ကို နားမလည်ပေ။ ထို့ကြောင့် သင်သည် ဘုရားသခင်အတွက် သက်သေခံရန် မသင့်တော်ပေ။ ဤအရာများအပေါ် သင်လက်ရှိ သိရှိခြင်းသည် လေးနက်သည်ဖြစ်စေ၊ အပေါ်ယံသာဖြစ်စေ၊ အဆုံးတွင် သင်တို့တွင် အသိဉာဏ်ရှိရမည်ဖြစ်၍ မခြွင်းမချန် အခိုင်အမာ ယုံကြည်ရမည်ဖြစ်ကာ လူအားလုံးတို့သည် ဘုရားသခင်အမှုတစ်ရပ်လုံးကို မြင်တွေ့၍ ဘုရားသခင်၏ စိုးမိုးမှုအောက်တွင် နာခံလိမ့်မည်။ ဤအမှု အဆုံးတွင် ဂိုဏ်းဂဏအားလုံးသည် တစ်ခုတည်းဖြစ်လာ၍ သတ္တဝါအားလုံးသည် ဖန်ဆင်းရှင်၏ စိုးမိုးမှု အောက်သို့ ပြန်လာကြလိမ့်မည်။ သတ္တဝါအားလုံးသည် စစ်မှန်သည့် တစ်ဆူတည်းသော ဘုရားသခင်ကို ကိုးကွယ်၍ ခေတ်စားနေသော ယုံကြည်ကိုးကွယ်မှုဆိုင်ရာ ကျင့်စဉ်အားလုံး ဘာမျှမဟုတ်တော့ဘဲ မည်သည့် အခါမျှ တစ်ဖန်ပြန်ပေါ်လာတော့မည် မဟုတ်ပေ။

အမှု၏ ဤအဆင့်သုံးဆင့်ကို မည်သည့်အတွက်ကြောင့် အဆက်မပြတ် ရည်ညွှန်းနေရသနည်း။ ခေတ်များကျော်လွန်ခြင်း၊ လူမှုရေး ဖွံ့ဖြိုးတိုးတက်မှုနှင့် သဘာဝ၏ သွင်ပြင်အပြောင်းအလဲ အားလုံးတို့သည် အမှု၏ အဆင့်သုံးဆင့်ရှိ အပြောင်းအလဲများအတိုင်း လိုက်၍ဖြစ်ကြသည်။ လူသားမျိုးနွယ်သည် ကာလ အလျောက် ဘုရားသခင်၏ အမှုနှင့်အညီ ပြောင်းလဲ၍ မိမိကိုယ်တိုင်အလျောက် ဖွံ့ဖြိုးတိုးတက်သည် မဟုတ်ပေ။ ဘုရားသခင်အမှု၏ အဆင့်သုံးဆင့်ကို ဖော်ပြခြင်းသည် သတ္တဝါအားလုံးနှင့် ကိုးကွယ်သည့် ဘာသာတစ်ရပ်စီလုံးရှိ လူတို့ကို တစ်ဆူတည်းသော ဘုရားသခင်၏ အုပ်စိုးမှုအောက်သို့ ခေါ်ဆောင်လာရန် ဖြစ်၏။ သင်သည် မည်သည့်ဘာသာနှင့် သက်ဆိုင်သည်ဖြစ်စေ၊ အဆုံးတွင် သင်တို့အားလုံးသည် ဘုရားသခင်၏ အုပ်စိုးမှုအောက်တွင် နာခံရလိမ့်မည်။ ဘုရားသခင် ကိုယ်တိုင်သာလျှင် ဤအမှုကို အကောင် အထည် ဖော်နိုင်လိမ့်မည်။ မည်သည့် ဘာသာရေးဆိုင်ရာ ခေါင်းဆောင်ကမျှ ဆောင်ရွက်နိုင်သည့်အရာ မဟုတ်ပေ။ ကမ္ဘာတွင် အဓိကဘာသာ များစွာရှိ၍ တစ်ရပ်စီတွင် ၎င်း၏ ကိုယ်ပိုင်ခေါင်းဆောင်၊ သို့မဟုတ် ဦးဆောင်လမ်းပြသူရှိ၍ နောက်လိုက်များသည် ကမ္ဘာတစ်ဝှမ်းရှိ ကွဲပြားသည့် နိုင်ငံများနှင့် ဒေသများသို့ ပျံ့နှံ့နေကြ၏။ ကြီးသည်ဖြစ်စေ၊ ငယ်သည်ဖြစ်စေ၊ နိုင်ငံတိုင်း၏ အထဲတွင် ကွဲပြားသည့် ဘာသာများရှိ၏။ သို့ရာတွင်၊ ကမ္ဘာတစ်ဝှမ်း ကိုးကွယ်သည့်ဘာသာ မည်မျှပင်ရှိသည်ဖြစ်စေ၊ စကြဝဠာအတွင်းရှိ လူအားလုံး တို့သည် အဆုံးတွင် တစ်ဆူတည်းသော ဘုရားသခင်၏ လမ်းညွှန်မှုအောက်တွင် ဖြစ်တည်နေ၍ ၎င်းတို့၏ ဖြစ်တည်မှုကို ဘာသာရေးခေါင်းဆောင်များ သို့မဟုတ် ဦးဆောင်သူများမှ လမ်းညွှန်နေသည်မဟုတ်ပေ။ ဆိုလိုသည်မှာ လူသားမျိုးနွယ်ကို သီးခြားဘာသာရေးခေါင်းဆောင် သို့မဟုတ် ဦးဆောင်လမ်းပြသူမှ လမ်းညွှန်နေသည် မဟုတ်ပေ။ ထိုသို့ဖြစ်မည့်အစား လူသားမျိုးနွယ်တစ်ရပ်လုံးကို ကောင်းကင်နှင့် မြေကြီး၊ အရာခပ်သိမ်းနှင့် လူသားမျိုးနွယ်ကိုလည်း ဖန်ဆင်းခဲ့သည့် ဖန်ဆင်းရှင်မှ ဦးဆောင်လမ်းပြနေခြင်း ဖြစ်၏-- ထို့အပြင် ဤသည်မှာ အမှန်တရားဖြစ်၏။ ကမ္ဘာတွင် အဓိကကိုးကွယ်သည့် ဘာသာအမျိုးမျိုး ရှိသော်လည်း ၎င်းတို့သည် မည်မျှပင်ကြီးမြတ်စေကာမူ ၎င်းတို့အားလုံးသည် ဖန်ဆင်းရှင်၏ အုပ်စိုးမှုအောက်တွင် တည်ရှိ နေ၍ ၎င်းတို့တစ်ခုမျှ ဤအုပ်စိုးမှု အတိုင်းအတာထက် ကျော်လွန်နိုင်ခြင်း မရှိပေ။ လူသားမျိုးနွယ်၏ ဖွံ့ဖြိုးတိုးတက်မှု၊ လူမှုရေးတိုးတက်မှု၊ သဘာဝသိပ္ပံများ၏ တိုးတက်မှု တစ်ခုစီသည် ဖန်ဆင်းရှင်၏ အစီအမံများမှ ကင်းကွာ၍မရပေ။ ထို့အပြင် ဤအမှုသည် သီးခြားဘာသာရေး ခေါင်းဆောင်တစ်ဦးမှ ပြုလုပ်၍ရသော အရာတစ်ခုမဟုတ်ပေ။ ဘာသာရေး ခေါင်းဆောင်များသည် သီးခြားဘာသာတစ်ရပ်၏ ဦးဆောင်သူများသာ ဖြစ်၍ ဘုရားသခင် သို့မဟုတ် ကောင်းကင်နှင့် မြေကြီးနှင့် အရာခပ်သိမ်းကို ဖန်ဆင်းသူအား ကိုယ်စားမပြုနိုင်ပေ။ ဘာသာရေးခေါင်းဆောင်များသည် ဘာသာတရား တစ်ရပ်လုံးတွင် ရှိသူအားလုံးကို ဦးဆောင်လမ်းပြနိုင်သော်လည်း ကောင်းကင်အောက်ရှိ သတ္တဝါအားလုံးကို ကွပ်ကဲ အုပ်ချုပ်နိုင်ခြင်း မရှိပေ—ဤသည်မှာ စကြဝဠာတစ်ရပ်လုံးမှ အသိအမှတ်ပြုထားသည့် အချက်ဖြစ်၏။ ဘာသာရေး ခေါင်းဆောင်များသည် ဦးဆောင်လမ်းပြသူများသာ ဖြစ်၍၊ (ဖန်ဆင်းရှင်) ဘုရားသခင်နှင့် တန်းတူ ရပ်တည်နိုင်ခြင်း မရှိပေ။ အရာအားလုံးသည် ဖန်ဆင်းရှင်၏ လက်ထဲတွင် ရှိကြ၍၊ အဆုံးတွင် ထိုသူတို့သည် ဖန်ဆင်းရှင်၏ လက်ထဲသို့ အားလုံးတစ်ဖန် ပြန်လာကြလိမ့်မည်။ လူသားကို နဂိုမူလက ဘုရားသခင်မှ ပြုလုပ်ခဲ့၍၊ မည်သည့်ဘာသာပင်ဖြစ်စေ၊ လူတိုင်း ဘုရားသခင်၏ အုပ်စိုးမှုအောက်သို့ တစ်ဖန် ပြန်လာကြလိမ့်မည်--ဤသည်ကို ရှောင်လွှဲ၍မရပါ။ ဘုရားသခင်သည်သာ အရာခပ်သိမ်းအကြား အမြင့်မားဆုံးဖြစ်၍၊ သတ္တဝါအားလုံးအကြား အမြင့်မားဆုံးသော အုပ်စိုးသူသည်လည်း သူ၏ အုပ်စိုးမှု အောက်သို့ တစ်ဖန်ပြန်လာ ရလိမ့်မည်။ လူသား၏အနေအထား မည်မျှပင် မြင့်မားသည်ဖြစ်စေ၊ သူသည် လူသားမျိုးနွယ်ကို သင့်တော်သည့် ခရီးလမ်းဆုံးသို့ ခေါ်ဆောင်သွားနိုင်ခြင်း မရှိသည့်အပြင် မည်သူမျှ အရာခပ်သိမ်းကို အမျိုးအစားအလိုက် အတန်းစားခွဲခြားနိုင်ခြင်း မရှိပေ။ ယေဟောဝါ ကိုယ်တိုင်မှ လူသား မျိုးနွယ်ကို ဖန်ဆင်းခဲ့၍ တစ်ခုစီကို အမျိုးအစားအလိုက် အတန်းစားခွဲခြားခဲ့ကာ၊ ပြီးဆုံးချိန်ရောက်သည့်အခါ သူသည် အရာခပ်သိမ်းကို အမျိုးအစားအလိုက် အတန်းအစားခွဲခြားလျက် သူ၏ကိုယ်ပိုင်အလုပ်ကို ကိုယ်တိုင် လုပ်ဆောင်လိမ့်ဦးမည်--ထို့အပြင် ဤသည်ကို ဘုရားသခင်မှလွဲ၍ မည်သူကမျှ ဆောင်ရွက် နိုင်မည် မဟုတ်ပေ။ အစအဦးမှ ယနေ့တိုင် အကောင်အထည်ဖော်ခဲ့သည့် အမှု၏အဆင့်သုံးဆင့် စလုံးကို ဘုရားသခင်ကိုယ်တိုင်မှ အကောင်အထည် ဖော်ခဲ့ခြင်းဖြစ်ကာ တစ်ဆူတည်းသော ဘုရားသခင်မှ အကောင်အထည် ဖော်ခဲ့ခြင်း ဖြစ်၏။ အမှုအဆင့်သုံးဆင့်၏ အဖြစ်မှန်သည် လူသားမျိုးနွယ် အားလုံးကို ဘုရားသခင်၏ ဦးဆောင်လမ်းပြခြင်း အဖြစ်မှန်ဖြစ်၍၊ မည်သူမျှ ငြင်းဆိုနိုင်ခြင်းမရှိသော အဖြစ်မှန်ဖြစ်၏။ အမှုအဆင့်သုံးဆင့်၏အဆုံးတွင် အရာခပ်သိမ်းကို အမျိုးအစားအလိုက် အတန်းစားခွဲခြား၍ ဘုရားသခင်၏ အုပ်စိုးမှုအောက် ပြန်လာကြလိမ့်မည်။ အဘယ်ကြောင့်ဆိုသော် စကြဝဠာတစ်ခုလုံးတွင် ဤတစ်ဆူတည်း သော ဘုရားသခင်သာရှိ၍၊ အခြားကိုးကွယ်သည့် ဘာသာများ မရှိပေ။ ကမ္ဘာကို ဖန်ဆင်းနိုင်စွမ်းမရှိသူသည် ၎င်းကိုအဆုံးသတ်နိုင်စွမ်းလည်း ရှိလိမ့်မည်မဟုတ်ပေ။ သို့ရာတွင် ကမ္ဘာကို ဖန်ဆင်းသူသည် ၎င်းကို အဆုံးသတ်နိုင်မည်မှာ သေချာ၏။ ထို့ကြောင့် တစ်စုံတစ်ဦးသည် ခေတ်ကို အဆုံးသတ်နိုင်ခြင်း မရှိပါက၊ ထို့အပြင် လူသားကို သူ၏စိတ်ပျိုးထောင်ရာတွင် အထောက်အကူပြုရုံသာ တတ်နိုင်ပါက သူသည် ဘုရားသခင်မဟုတ်မည်မှာ သေချာ၍ လူသားမျိုးနွယ်၏သခင် မဟုတ်မည်မှာ သေချာ၏။ သူသည် ဤကဲ့သို့သော ကြီးမားသည့်အမှုကို ဆောင်ရွက်နိုင်စွမ်း ရှိမည်မဟုတ်ပေ။ ဤကဲ့သို့သောအမှုကို အကောင် အထည် ဖော်နိုင်သူ တစ်ဦးတည်းသာရှိ၍ ဤအမှုကို ဆောင်ရွက်နိုင်စွမ်း မရှိသူအားလုံးသည် ဘုရားသခင်မှ လွဲ၍ ရန်သူများဖြစ်သည်မှာ သေချာ၏။ အကယ်၍ ၎င်းတို့သည် ခေတ်စားနေသော ကိုးကွယ်မှုဆိုင်ရာ ကျင့်စဉ်များဖြစ်ပါက၊ ဘုရားသခင်နှင့် သဟဇာတ မဖြစ်ပေ။ ထို့အပြင် ၎င်းတို့သည် ဘုရားသခင်နှင့် သဟဇာတမဖြစ်ပါက၊ ၎င်းတို့သည် ဘုရားသခင်၏ရန်သူများ ဖြစ်ကြ၏။ အမှုအားလုံးကို ဤစစ်မှန်သော ဘုရားသခင်တစ်ပါးတည်းက ဆောင်ရွက်ကာ စကြဝဠာတစ်ခုလုံးကို ဤစစ်မှန်သော ဘုရားသခင် တစ်ပါး တည်းက ကွပ်ကဲ၏။ သူမှ ဣသရေလ သို့မဟုတ် တရုတ်နိုင်ငံတွင် အမှုထမ်းဆောင်နေသည် ဖြစ်စေ၊ အမှုကို ဝိညာဉ် သို့မဟုတ် ဇာတိပကတိမှ ထမ်းဆောင်နေသည်ဖြစ်စေ၊ အရာခပ်သိမ်းကို ဘုရားသခင်ကိုယ်တိုင်က ပြုလုပ်ခြင်းဖြစ်ကာ အခြားမည်သူကမျှ ပြုလုပ်နိုင်ခြင်း မရှိပေ။ အတိအကျအားဖြင့် သူသည် လူသားမျိုးနွယ် တစ်ရပ်လုံး၏ ဘုရားသခင်ဖြစ်သောကြောင့် မည်သည့်သတ်မှတ်ချက်များ၏ အချုပ်အချယ်မျှမရှိဘဲ လွတ်လပ်စွာ လုပ်ကိုင်၏—ထို့အပြင် ဤသည်မှာ အမြင်အားလုံးအနက် အကြီးမားဆုံးဖြစ်၏။ ဘုရား သခင်၏ သတ္တဝါတစ်ဦးအနေဖြင့် သင်သည် ဘုရားသခင်၏ သတ္တဝါတစ်ဦး၏ တာဝန်ကို ထမ်းဆောင်၍ ဘုရားသခင်၏အလိုကို နားလည်လိုပါက သင်သည် ဘုရားသခင်၏အမှုကို နားလည်ရမည်။ သတ္တဝါများ အတွက် ဘုရားသခင်၏အလိုကို နားလည်ရမည်။ သူ၏စီမံခန့်ခွဲမှု အစီအစဉ်ကို နားလည်ရမည်။ ထို့နောက် သူဆောင်ရွက်သည့်အမှု၏ အရေးပါပုံအားလုံးကို နားလည်ရမည်။ ဤသည်ကို နားမလည်သူများသည် ဘုရားသခင်၏ သတ္တဝါများဖြစ်ရန် အရည်အချင်းမမီပေ။ ဘုရားသခင်၏ သတ္တဝါတစ်ဦးအနေဖြင့် သင်သည် မည်သည့်နေရာမှ လာသည်ကို နားမလည်ပါက၊ လူသားမျိုးနွယ်၏သမိုင်းနှင့် ဘုရားသခင် ဆောင်ရွက်ခဲ့သည့် အမှုအားလုံးကို နားမလည်ပါက၊ ထို့အပြင် လူသားမျိုးနွယ်သည် ယနေ့တိုင် မည်သို့တိုးတက်ဖွံ့ဖြိုး လာသည်ကို နားမလည်ပါက၊ လူသားတစ်ရပ်လုံးကို မည်သူက ကွပ်ကဲသည်ကို နားမလည်ပါက သင်သည် သင်၏တာဝန်ကို ထမ်းဆောင်နိုင်စွမ်း မရှိပေ။ ဘုရားသခင်သည် လူသားမျိုးနွယ်ကို ယနေ့အထိ ဦးဆောင် လမ်းပြခဲ့၍၊ သူသည် ကမ္ဘာမြေကြီးပေါ်တွင် လူသားကို ဖန်ဆင်းချိန်ကတည်းက သူ့ကို ချန်ရစ်ထားခဲ့ခြင်း မရှိပါ။ သန့်ရှင်းသော ဝိညာဉ်တော်သည် အမှုထမ်းဆောင်ခြင်းကို မည်သည့်အခါမျှ မရပ်ခဲ့ပါ။ လူသား မျိုးနွယ်အား ဦးဆောင်ခြင်းကို မည်သည့်အခါမျှ မရပ်ခဲ့ပါ။ ထို့အပြင် လူသားမျိုးနွယ်အားလည်း မည်သည့် အခါမျှ ချန်ရစ်ထားခဲ့ခြင်း မရှိပါ။ သို့သော် ဘုရားသခင် ရှိကြောင်းကို လူသားမျိုးနွယ်မသိပါ။ ဘုရားသခင်ကို သာ၍ပင် မသိပါ။ ထို့ကြောင့် ဘုရားသခင်၏ သတ္တဝါအားလုံးအတွက် ဤသည်ထက်သာ၍ အရှက်ရစရာ အကြောင်း ရှိပါသလော။ လူသားကို ဘုရားသခင်ကိုယ်တိုင် ဦးဆောင်လမ်းပြသော်လည်း လူသားသည် ဘုရားသခင်၏အမှုကို နားမလည်ပါ။ သင်သည် ဘုရားသခင်၏ သတ္တဝါတစ်ဦး ဖြစ်သော်လည်း သင်၏ ကိုယ်ပိုင်သမိုင်းကို သင်နားမလည်ပါ။ ထို့အပြင် သင်၏လမ်းခရီးတွင် မည်သူကသင့်ကို ဦးဆောင်လမ်းပြ ခဲ့သည်ကို သင်မသိပါ။ သင်သည် ဘုရားသခင် ဆောင်ရွက်သည့်အမှုကို မသိသဖြင့် ဘုရားသခင်ကို မသိနိုင်ပါ။ သင်ယခုမသိပါက သင်သည် ဘုရားသခင်အတွက် သက်သေခံရန် မည်သည့်အခါမျှ အရည်အချင်း မီလိမ့်မည် မဟုတ်ပါ။ ယနေ့ ဖန်ဆင်းရှင် ကိုယ်တိုင် လူအားလုံးကို တစ်ဖန်ပြန်လည် ဦးဆောင်လမ်းပြ၍ လူအားလုံးကို သူ၏ဉာဏ်အမြော်အမြင်၊ အနန္တတန်ခိုးနှင့် ပြည့်စုံတော်မူခြင်း၊ ကယ်တင်ခြင်းနှင့် အံ့သြဖွယ်ကောင်းခြင်းတို့ကို မြင်စေ၏။ သို့ရာတွင် သင်သည် သိလည်းမသိ၊ နားလည်း မလည်သေးပါ—ထို့ကြောင့် သင်သည် ကယ်တင်ခြင်းမရရှိမည့်သူ မဟုတ်သလော။ စာတန်နှင့် သက်ဆိုင်သူ တို့သည် ဘုရားသခင်၏ နှုတ်ကပတ်တော်များကို နားမလည်ပါ။ ထို့အပြင် ဘုရားသခင်နှင့် သက်ဆိုင်သူများ သည် ဘုရားသခင်၏ အသံကို ကြားနိုင်ကြ၏။ ငါပြောသည့် နှုတ်ကပတ်တော်အားလုံးကို သိ၍နားလည်သူ အားလုံးသည် ကယ်တင်ခံရမည့်သူများနှင့် ဘုရားသခင်အတွက် သက်သေခံမည့်သူများ ဖြစ်ကြ၏။ ငါပြောသည့် နှုတ်ကပတ်တော်များကို နားမလည်သူ အားလုံးတို့သည် ဘုရားသခင်အတွက် သက်သေမခံနိုင် ကြပေ။ ထို့အပြင် ထိုသူတို့သည် ဖယ်ရှားခံရမည့် သူများဖြစ်ကြ၏။ ဘုရားသခင်၏အလိုကို နားမလည် သူများနှင့် ဘုရားသခင်၏အမှုကို မသိသူများသည် ဘုရားသခင်ကိုသိမှု ရနိုင်စွမ်း မရှိသူများဖြစ်၍ ထိုကဲ့သို့ သော သူများသည် ဘုရားသခင်အတွက် သက်သေခံမည် မဟုတ်ပေ။ သင်သည် ဘုရားသခင်အတွက် သက်သေခံလိုပါက ဘုရားသခင်ကို သိရမည်ဖြစ်၍ ဘုရားသခင်ကိုသိခြင်းမှာ ဘုရားသခင်၏အမှုကို ထမ်းဆောင်ခြင်းမှတစ်ဆင့် ရရှိလိမ့်မည်။ အားလုံးကို ခြုံငုံကြည့်ပါက၊ သင်သည် ဘုရားသခင်ကို သိလိုလျှင် ဘုရားသခင်၏အမှုကို သိရမည်- ဘုရားသခင်၏ အမှုကိုသိခြင်းသည် အရေးကြီးဆုံးဖြစ်သည်။ အမှုအဆင့် သုံးဆင့် အဆုံးသတ်သည့်အခါ ဘုရားသခင်အတွက် သက်သေခံသူများ၊ ဘုရားသခင်ကို သိသူများ အုပ်စုတစ်စု ဖွဲ့လိမ့်မည်။ ထိုသူတို့အားလုံးသည် ဘုရားသခင်ကို သိ၍ သမ္မာတရားကို လက်တွေ့ကျင့်သုံးနိုင် ကြပေလိမ့်မည်။ ထိုသူတို့တွင် လူ့သဘောသဘာဝနှင့် အသိဉာဏ်တို့ ရှိမည်ဖြစ်ကာ အားလုံးသည် ဘုရား သခင်၏ ကယ်တင်ခြင်းအမှု အဆင့်သုံးဆင့်ကို သိကြလိမ့်မည်။ ဤသည်မှာ အဆုံးတွင်ရရှိမည့် အမှုဖြစ်ကာ ထိုသူတို့သည် အနှစ် ၆၀ဝ၀ စီမံခန့်ခွဲခြင်းအမှု၏ ပုံဖော်ချက်ဖြစ်သည့်အပြင် စာတန်ကို အဆုံးတွင် အောင်နိုင်ခြင်းအတွက် အားအကောင်းဆုံးသော သက်သေခံချက်ဖြစ်၏။ ဘုရားသခင်အတွက် သက်သေခံ နိုင်သူများသည် ဘုရားသခင်၏ကတိနှင့် ကောင်းချီး မင်္ဂလာတို့ကို ရရှိနိုင်မည်ဖြစ်၍ အဆုံးတွင် ကျန်ရှိသည့်၊ ဘုရားသခင်၏ အခွင့်အာဏာကို ပိုင်ဆိုင်၍ ဘုရားသခင်အတွက် သက်သေခံသည့် အုပ်စုဖြစ်လိမ့်မည်။ သင်တို့အကြားတွင် ရှိသူတို့အားလုံး သို့မဟုတ် တစ်ဝက်သည်သာလျှင် သို့မဟုတ် အနည်းငယ်သာလျှင် ဤအုပ်စုတွင် အဖွဲ့ဝင်ဖြစ်ကောင်း ဖြစ်နိုင်လိမ့်မည်—သင်တို့၏အလိုဆန္ဒနှင့် သင်တို့ လိုက်လျှောက်ရာတို့ အပေါ်တွင် မူတည်၏။

အောက်ခြေမှတ်စုများ-

(က) မူရင်းစာသားတွင် “လူသားမှ မြင်လိမ့်မည်” ကို ချန်လှပ်ထားသည်။

ယခင်က:ဘုရားသခင်၏ အလုပ်နှင့် လူသား၏အလုပ်

နောက်တစ်ခုသို့:ဖောက်ပြန်ပျက်စီးနေသော လူသားမျိုးနွယ်သည် လူ့ဇာတိခံယူသည့် ဘုရားသခင်၏ကယ်တင်မှုကို ပို၍လိုအပ်သည်

သင်နှစ်သက်နိုင်သည့် အရာများ