ယနေ့မိတ်သဟာယသည် လူတိုင်း ရင်းနှီးအကျွမ်းဝင်သည့် အကြောင်းအရာတစ်ခုနှင့် ပတ်သက်သည်။ ဘုရားသခင်ကို လူသား၏ ယုံကြည်မှု၊ ၎င်း၏ လိုက်စားမှုတို့နှင့် နီးကပ်စွာ ဆက်နွှယ်ပြီး လူတို့ နေ့တိုင်း ကြုံရ၊ ကြားရသည့် အကြောင်းအရာတစ်ခု ဖြစ်သည်။ ကောင်းပြီ။ သို့ဆိုလျှင် ယင်းမှာ အဘယ်နည်း။ အကြောင်းအရာမှာ သမ္မာတရားကို လိုက်စားခြင်းဆိုသည်မှာ ဟူ၍ ဖြစ်သည်။ ဤအကြောင်းအရာအပေါ် သင်တို့ မည်သို့ တွေးထင်ကြသနည်း။ သင်တို့အတွက် ကျေနပ်လောက်အောင် ဆန်းသစ်သလော။ ဆွဲဆောင်မှုရှိသလော။ ဤအကြောင်းအရာသည် မည်မျှပင် ဆွဲဆောင်မှုရှိစေကာမူ ယင်းသည် သင်တို့တစ်ဦးစီတိုင်းနှင့် သက်ဆိုင်ကြောင်း ငါသိ၏။ ယင်းသည် လူတို့၏ကယ်တင်ခြင်း၊ ဘုရားနှုတ်ကပတ်တော်များ၏ လက်တွေ့အရှိတရားထဲသို့ ၎င်းတို့၏ ဝင်ရောက်မှုနှင့် ၎င်းတို့၏ စိတ်သဘောထား ပြောင်းလဲမှု၊ ပြီးလျှင် ၎င်းတို့၏ အနာဂတ် ရလဒ်၊ ခရီးပန်းတိုင်တို့နှင့် သက်ဆိုင်သည်။ ယခုတွင် သင်တို့အများစုသည် သမ္မာတရားကို လိုက်စားလိုစိတ်ရှိပြီး စတင် နိုးကြားလာနေကြသော်လည်း သမ္မာတရားကို လိုက်စားခြင်းဆိုသည်မှာ အဘယ်ဖြစ်ကြောင်း၊ သို့မဟုတ် သမ္မာတရားကို မည်သို့လိုက်စားသင့်ကြောင်းကို သေချာမသိကြသေး။ ထို့ကြောင့် ယနေ့ ဤအကြောင်းအရာနှင့် ပတ်သက်၍ မိတ်သဟာယဖွဲ့ရန် လိုအပ်၏။ သမ္မာတရား လိုက်စားခြင်းသည် လူတို့က ၎င်းတို့၏ နေ့စဉ်ဘဝများတွင် မကြာခဏ ကြုံတွေ့ရသည့် အကြောင်းအရာတစ်ခုဖြစ်သည်။ မိမိတို့၏ နေ့စဉ်ဘဝများအတောအတွင်း လူတို့သည် မိမိတို့၏ တာဝန်များ၊ အစရှိသည်တို့ကို ထမ်းဆောင်နေစဉ် ၎င်းတို့အပေါ် အမှုအရာများ ကျရောက်သည့်အခါ ကြုံရသည့် လက်တွေ့ကျသော ပြဿနာတစ်ခု ဖြစ်သည်။ လူအများစုအပေါ် တစ်စုံတစ်ခု ကျရောက်သည့်အခါ ၎င်းတို့သည် ဘုရားသခင်၏ နှုတ်ကပတ်တော်များကို ဖတ်ရှုရန် မိမိတို့ကိုယ်ကို လှုံ့ဆော်အားထုတ်မှုများ ပြုလုပ်ကြပြီး ၎င်းတို့၏ အတွေးအမြင်များကို အပျက်သဘောဆောင်ခြင်းမှ ကင်းဝေးစေကာ ထိုသို့ဖြင့် အပျက်သဘောဆောင်ခြင်း၊ သို့မဟုတ် ဘုရားသခင်အား အထင်လွဲခြင်းအဖြစ်သို့ ကျရောက်ခြင်းမှ မိမိတို့ကိုယ်ကိုယ် တားဆီးပြီး ဘုရားသခင်၏ အမှုတော်အဖို့ မိမိတို့ကိုယ်ကိုယ် အပ်နှံနိုင်ရန် မျှော်လင့်ကြသည်။ သာ၍ကောင်းမွန်သည့် အစွမ်းအစရှိသော လူများသည် ဘုရားနှုတ်ကပတ်တော်များအတွင်းရှိ သမ္မာတရား သွင်ပြင်လက္ခဏာအားလုံးကို အသေအချာ တက်ကြွစွာ ရှာဖွေနိုင်စွမ်းရှိကြသည်။ ၎င်းတို့သည် စည်းမျဉ်းများ၊ ဘုရားသခင်၏ သတ်မှတ်ချက်များနှင့် လက်တွေ့လုပ်ဆောင်မှု လမ်းကြောင်းများကို ရှာဖွေကြသည်။ သို့မဟုတ် ၎င်းတို့သည် မိမိတို့အပေါ် ကျရောက်သော အရာများမှတစ်ဆင့် မိမိတို့ကိုယ်ကိုယ် ဆန်းစစ်နိုင်ကြသည်၊ ချင့်ချိန်စဉ်းစားပြီး အသိပညာရရှိနိုင်ကာ ထိုသို့ဖြင့် သမ္မာတရား စည်းမျဉ်းများကို နားလည်လာကြပြီး သမ္မာတရား စစ်မှန်မှုထဲသို့ ဝင်ရောက်နိုင်ကြသည်။ သို့သော် ဤအရာသည် လူအများစုအတွက် ကြီးမားသော အတားအဆီးတစ်ခု ဖြစ်နေဆဲဖြစ်ပြီး ၎င်းတို့သည် ဤအရာများကို စွမ်းဆောင်ရရှိနိုင်ခြင်း ရှိမရှိက မသေချာပေ။ လူအများစုသည် ဤလက်တွေ့အရှိတရား၏ သွင်ပြင်လက္ခဏာထဲသို့ မဝင်ရောက်ကြသေးချေ။ ထို့ကြောင့် သင်တို့ကို ချင့်ချိန်စဉ်းစားဖို့ အချိန်ပေးလျှင်ပင် ဤသာမန်ဖြစ်ကာ သာမညောင်ညဖြစ်ပြီး တိကျသော အကြောင်းအရာအပေါ် လက်တွေ့ကျသော၊ ဓမ္မဓိဋ္ဌာန်ကျပြီး စစ်မှန်သော သိနားလည်မှုကို ရရှိဖို့ သင်တို့အတွက် လွယ်ကူလိမ့်မည် မဟုတ်။ ထို့ကြောင့် ငါတို့၏ အဓိကအကြောင်းအရာဆီသို့ ပြန်သွားဖို့ရန် သမ္မာတရားကို လိုက်စားခြင်းဆိုသည်မှာ အဘယ်ဖြစ်ကြောင်းနှင့်ပတ်သက်၍ မိတ်သဟာယပြုကြစို့။ သင်တို့သည် ချင့်ချိန်စဉ်းစားရာတွင် မကျွမ်းကျင်သော်လည်း သင်တို့၏နားဖြင့်သာမက စိတ်နှလုံးဖြင့်ပါ နားထောင်ရာတွင် တော်ကြမည်ဟု ငါမျှော်လင့်သည်။ ဤအရာကို နားလည်သဘောပေါက်ရန် သင် စိတ်နှစ်ထားမည်ဟုလည်းကောင်း၊ သင်နားလည်နိုင်သမျှ အရာအားလုံးနှင့် သင်၏ အခြေအနေ၊ သင်၏ စိတ်သဘောထား၊ သင့်အနေအထား၏ ရှုထောင့်တစ်ခုချင်းစီနှင့် ဆီလျော်သမျှ အရာအားလုံးကို အရေးပါသည့်အရာတစ်ခုအဖြစ် သင် နှလုံးသွင်းမည်ဟုလည်းကောင်း ငါ မျှော်လင့်သည်။ ထို့နောက်တွင် သင်တို့၏ ဖောက်ပြန်ပျက်စီးသော စိတ်သဘောထားများကို သင်တို့ စတင်ဖြေရှင်းလိမ့်မည်ဖြစ်ပြီး နှီးနွှယ်သည့် ပြဿနာများ ပေါ်ပေါက်သည့်အခါ သင်တို့ လိုက်လျှောက်ရမည့် လမ်းကြောင်း ရှိကာ ဘုရားနှုတ်ကပတ်တော်များကို လက်တွေ့လုပ်ဆောင်မှု လမ်းကြောင်းတစ်ခုအဖြစ် သဘောထား၍ ယင်းတို့ကို ထိုသို့ ဆောင်ရွက်၊ နာခံနိုင်ကြဖို့အလို့ငှာ လက်တွေ့လုပ်ဆောင်မှု စည်းမျဉ်းများအားလုံးကို နှလုံးသွင်းဖို့ ကြိုးပမ်းကြလိမ့်မည်ဟု ငါမျှော်လင့်သည်။ ယင်းက အကောင်းဆုံးဖြစ်ပေမည်။

သမ္မာတရားကို လိုက်စားခြင်းဆိုသည်မှာ အဘယ်နည်း။ ဤသည်မှာ အယူအဆအပေါ် အခြေတည်သော မေးခွန်းတစ်ခု ဖြစ်နိုင်သော်လည်း ဘုရားသခင်ကို ယုံကြည်ခြင်းနှင့် ပတ်သက်၍ လက်တွေ့အကျဆုံး မေးခွန်းလည်း ဖြစ်သည်။ သမ္မာတရားကို လူတို့ လိုက်စားနိုင်ခြင်း ရှိမရှိဆိုသည်မှာ ၎င်းတို့၏ နှစ်သက်မှုများ၊ အစွမ်းအစ၊ လိုက်စားမှုတို့နှင့် တိုက်ရိုက် ဆက်နွှယ်သည်။ သမ္မာတရားကို လိုက်စားခြင်းသည် လက်တွေ့ကျသည့် လိုအပ်ချက်များစွာကို ခြုံငုံသည်။ သင်တို့အနေဖြင့် သမ္မာတရားကို မြန်နိုင်သမျှ အမြန်ဆုံး သိနားလည်နိုင်ပြီး ယင်းကို လိုက်စားခြင်းဆိုသည်မှာ အဘယ်ဖြစ်ကြောင်းနှင့် ထိုလိုက်စားခြင်းနှင့် မည်သည့် ကိစ္စရပ်များ ဆက်နွှယ်ကြောင်းတို့ကို အတိအကျ သိရှိနိုင်ဖို့အလို့ငှာ ယင်းတို့ကို တစ်ခုပြီးတစ်ခု ငါတို့ မိတ်သဟာယပြုသင့်သည်။ ထိုသို့ဖြင့် နောက်ဆုံးတွင် သမ္မာတရားကို လိုက်စားခြင်းဆိုသည်မှာ အဘယ်ဖြစ်သည်ကို သင်တို့ နားလည်နိုင်ကြလိမ့်မည်။ ဦးစွာပထမ ဤအရာကို ဆွေးနွေးကြစို့။ ဤတရားဒေသနာကို နားထောင်ခြင်းအားဖြင့် သင်တို့သည် သမ္မာတရားကို လိုက်စားနေကြသလော။ (မလိုက်စားပါ။) တရားဒေသနာကို နားထောင်ခြင်းသည် သမ္မာတရား လိုက်စားဖို့ မရှိမဖြစ်ရှိထားရမည့် လိုအပ်ချက်နှင့် လုပ်ရပ်တစ်ခုမျှသာ ဖြစ်သည်။ သမ္မာတရားကို လိုက်စားခြင်းတွင် မည်သည့် လက္ခဏာရပ်များ ပါဝင်သနည်း။ သမ္မာတရား လိုက်စားခြင်းနှင့် ပတ်သက်သည့် အကြောင်းအရာများစွာရှိပြီး ဤနေရာတွင် လူတို့တွင်ရှိသော ငါတို့ဆွေးနွေးဖို့လိုအပ်သည့် ပြဿနာများစွာလည်း ရှိသည်။ ဥပမာ လူအချို့က “လူတစ်ဦးက နေ့တိုင်း ဘုရားနှုတ်ကပတ်တော်များကို စားသောက်ပြီး သမ္မာတရားအကြောင်း မိတ်သဟာယပြုပါက၊ ၎င်း၏ တာဝန်ကို ပုံမှန် လုပ်ဆောင်နိုင်ပါက၊ အသင်းတော် စီစဉ်ပေးသည့် မည်သည့်အရာကိုမဆို လုပ်ဆောင်ပြီး အတားအဆီး၊ သို့မဟုတ် အနှောင့်အယှက် လုံးဝ မဖြစ်စေပါက၊ ပြီးလျှင် သမ္မာတရား စည်းမျဉ်းများကို ချိုးဖောက်သည့်အချိန်များ ရှိကောင်း ရှိနိုင်သော်လည်း သတိရှိရှိဖြစ်စေ၊ ရည်ရွယ်ချက်ဖြင့်ဖြစ်စေ ထိုသို့ မလုပ်ဆောင်ကြပါက ဤအရာက ၎င်းသည် သမ္မာတရား လိုက်စားနေသည်ကို ထင်ရှားစေသည် မဟုတ်လော” ဟု ပြောကြ၏။ ဤသည်မှာ မေးခွန်းကောင်းဖြစ်သည်။ လူများစွာတွင် ဤအတွေးအခေါ် ရှိ၏။ ရှေးဦးစွာ လူတစ်ယောက်သည် ဤသို့ တစ်သမတ်တည်း လက်တွေ့လုပ်ဆောင်ခြင်းအားဖြင့် သမ္မာတရားကို နားလည်ပြီး ရသွားနိုင်ခြင်း ရှိမရှိကို သင်သဘောပေါက်ရမည်။ သင်တို့၏ အတွေးကို ဝေမျှပြောပြလော့။ (ဤသို့သော လက်တွေ့လုပ်ဆောင်မှုသည် အားလုံး မှန်ကန်သော်ငြားလည်း ဘာသာရေး ထုံးတမ်းဓလေ့နှင့် ပို၍ ဆင်တူပုံရ၏။ ယင်းက စည်းကမ်းလိုက်နာခြင်း ဖြစ်ပါသည်။ သမ္မာတရားကို နားလည်အောင်ဖြစ်စေ၊ ရရှိအောင်ဖြစ်စေ မလုပ်ပေးနိုင်ပါ။) ဤသို့ဆိုလျှင် ဤအပြုအမူများသည် စင်စစ်အားဖြင့် မည်သည့်အမျိုးအစားဖြစ်သနည်း။ (ယင်းတို့သည် အပေါ်ယံဆန်သည့် အပြုအမူကောင်းများ ဖြစ်ပါသည်။) ဤအဖြေကို ငါနှစ်သက်၏။ ထိုအရာများသည် လူတစ်ဦးက ဘုရားသခင်ကို ယုံကြည်လာပြီးသည့်နောက်တွင် ကောင်းမွန်ပြီး အပြုသဘောဆောင်သော သွန်သင်မှုများ၏ ဩဇာလွှမ်းမိုးခြင်းကို ခံရပြီးသည်နှင့်တစ်ပြိုင်နက် ထိုလူ၏ အသိစိတ်နှင့် ဆင်ခြင်တုံတရားတို့၏ အခြေခံအုတ်မြစ်မှ ထွက်ပေါ်လာသော အပြုအမူကောင်းများမျှသာ ဖြစ်သည်။ သို့သော် ထိုအရာများသည် သမ္မာတရားကို လိုက်စားခြင်း ဖြစ်ဖို့ ဝေးစွ၊ အပြုအမူကောင်းများဆိုသည်ထက် မပိုပေ။ ဤသို့ဆိုလျှင် ဤအပြုအမူကောင်းများ၏ ဇာစ်မြစ်မှာ အဘယ်နည်း။ မည်သည့်အရာက ဤအပြုအမူများကို ဖြစ်ပေါ်စေသနည်း။ ဤအပြုအမူများသည် လူတစ်ဦး၏ အသိစိတ်နှင့် ဆင်ခြင်တုံတရား၊ ၎င်းတို့၏ ကိုယ်ကျင့်တရား၊ ဘုရားသခင်အား ယုံကြည်ခြင်းအပေါ် ၎င်းတို့၏ နှစ်သက်လက်ခံသော ခံစားချက်များ၊ ၎င်းတို့၏ မိမိကိုယ်ကို ချုပ်တည်းမှုများမှ ထွက်ပေါ်လာသည်။ ယင်းတို့သည် အပြုအမူကောင်းများဖြစ်သည့်တိုင် သမ္မာတရားနှင့် ဆက်စပ်မှုမရှိသလို ယင်းတို့က တူညီသောအရာ သေချာပေါက် မဟုတ်ချေ။ အပြုအမူကောင်းရှိခြင်းသည် သမ္မာတရားကို လက်တွေ့လုပ်ဆောင်ခြင်းနှင့် မတူပေ။ လူတစ်ဦးသည် ကောင်းစွာ ပြုမူလျှင် သူသည် ဘုရားသခင်၏ ထောက်ခံမှုကို ရရှိသည်ဟု မဆိုလိုချေ။ အပြုအမူကောင်းများနှင့် သမ္မာတရားကို လက်တွေ့လုပ်ဆောင်ခြင်းသည် မတူညီသောအရာနှစ်ခု ဖြစ်သည်။ အချင်းချင်း ဆက်စပ်မှုမရှိ။ သမ္မာတရားကို လက်တွေ့လုပ်ဆောင်ခြင်းသည် ဘုရားသခင်၏ သတ်မှတ်ချက်ဖြစ်ပြီး ဘုရား၏ ရည်ရွယ်ချက်များနှင့် အလုံးစုံ ကိုက်ညီသည်။ အပြုအမူကောင်းကမူ လူ့စိတ်ဆန္ဒမှလာပြီး ယင်းနှင့်အတူ လူ့ရည်ရွယ်ချက်များနှင့် အရင်းခံအကြောင်းများ ပါဝင်သည်။ ယင်းသည် လူသားက ကောင်းသည်ဟု မှတ်ယူသောအရာတစ်ခု ဖြစ်၏။ အပြုအမူကောင်းများသည် မကောင်းသောလုပ်ရပ်များ မဟုတ်သော်လည်း သမ္မာတရား စည်းမျဉ်းများကို ဆန့်ကျင်ပြီး သမ္မာတရားနှင့် လုံးဝမသက်ဆိုင်ပေ။ ဤအပြုအမူများသည် မည်မျှကောင်းမွန်သည်ဖြစ်စေ၊ လူ့အယူအဆများ၊ စိတ်ကူးများနှင့် မည်မျှကိုက်ညီသည်ဖြစ်စေ သမ္မာတရားနှင့် ဆက်စပ်မှုမရှိ။ ထို့ကြောင့် မည်သည့်အပြုအမူကောင်းပမာဏကမျှ ဘုရားသခင်၏ ထောက်ခံမှုကို မရနိုင်ပေ။ အပြုအမူကောင်းကို ဤသို့ သတ်မှတ်ထားသည် ဖြစ်၍ အပြုအမူကောင်းများက သမ္မာတရားကို လက်တွေ့လုပ်ဆောင်ခြင်းနှင့် သိသိသာသာကို ဆက်နွှယ်မှု မရှိပေ။ လူတို့သည် မိမိတို့၏ အပြုအမူအတိုင်း အမျိုးအစားများ ခွဲခြားခံရမည်ဆိုပါက အလွန်ဆုံးအနေဖြင့် အပြုအမူကောင်းများသည် သစ္စာစောင့်သိသည့် အလုပ်လုပ်ပေးသူများ၏ လုပ်ရပ်များထက် ဘာမျှ ပိုမည်မဟုတ်ပေ။ ယင်းတို့သည် သမ္မာတရားကို လက်တွေ့လုပ်ဆောင်ခြင်း၊ သို့မဟုတ် ဘုရားသခင်ကို စစ်မှန်သော ကျိုးနွံနာခံမှုနှင့် လုံးဝ ဆက်နွှယ်မှု မရှိပေ။ ယင်းတို့သည် အပြုအမူအမျိုးအစားတစ်ခုမျှသာဖြစ်ပြီး လူတို့၏ စိတ်သဘောထားဆိုင်ရာ ပြောင်းလဲမှု၊ သမ္မာတရားကို ၎င်းတို့၏ ကျိုးနွံနာခံခြင်းနှင့် လက်ခံခြင်း၊ ဘုရားသခင်အပေါ် ကြောက်ရွံ့ခြင်းနှင့် မကောင်းမှု ရှောင်ကြဉ်ခြင်း၊ သို့မဟုတ် သမ္မာတရား အမှန်တကယ် ပါဝင်သည့် အခြားလက်တွေ့ကျသော လက္ခဏာရပ်တစ်ခုခုနှင့် လုံးဝ ဆက်စပ်မှုမရှိပေ။ ထို့ကြောင့် ထိုသို့ဖြစ်လျှင် ယင်းတို့ကို အဘယ်ကြောင့် အပြုအမူကောင်းများဟု ခေါ်ရသနည်း။ ရှင်းပြချက်မှာ အောက်ပါအတိုင်းဖြစ်ပြီး ပင်ကိုအားဖြင့် ယင်းမှာ ဤမေးခွန်း၏ အနှစ်သာရနှင့် သက်ဆိုင်သော ရှင်းပြချက်တစ်ခုလည်း ဖြစ်သည်။ ယင်းမှာ ဤအပြုအမူများသည် လူတို့၏ အယူအဆများ၊ နှစ်သက်မှုများ၊ သဘောဆန္ဒနှင့် မိမိတို့ကိုယ်ပိုင် လှုံ့ဆော်အားထုတ်မှုများမှသာ အရင်းခံသောကြောင့် ဖြစ်သည်။ ယင်းတို့သည် သမ္မာတရား၊ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်ခံခြင်းအားဖြင့် မိမိကိုယ်ကိုယ် အစစ်အမှန် သိမြင်ခြင်းကို ရရှိခြင်းနှင့်အတူ ဖြစ်ပေါ်လာသော နောင်တရခြင်း သရုပ်သကန်များမဟုတ်သကဲ့သို့ ဘုရားသခင်ကို နာခံရန် လူတို့ကြိုးစားသည့်အခါ ဖြစ်ပေါ်လာသော သမ္မာတရားကို လက်တွေ့လုပ်ဆောင်သည့် အပြုအမူများ၊ သို့မဟုတ် လုပ်ရပ်များလည်း မဟုတ်ပေ။ ဤအရာကို သင်နားလည်သလော။ ဆိုလိုသည်မှာ ဤအပြုအမူကောင်းများသည် မည်သည့်ပုံစံဖြင့်မဆို လူတစ်ဦး၏ စိတ်သဘောထား ပြောင်းလဲခြင်းနှင့် မပတ်သက်ချေ၊ သို့မဟုတ် ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းကို ကြုံတွေ့ခြင်းမှ ရလာသောအရာနှင့် မပတ်သက်ချေ၊ သို့မဟုတ် မိမိ၏ ဖောက်ပြန်ပျက်စီးသော စိတ်သဘောထားကို သိလာခြင်းမှ ဖြစ်ပေါ်သော စစ်မှန်သည့် နောင်တနှင့် မပတ်သက်ချေ။ ယင်းတို့သည် ဘုရားသခင်နှင့် သမ္မာတရားအပေါ် လူသား၏ စစ်မှန်သော နာခံခြင်းနှင့် သေချာပေါက် မဆက်နွှယ်ပေ။ ဘုရားသခင်အပေါ် ကြောက်ရွံ့ပြီး ချစ်သော စိတ်နှလုံး ရှိခြင်းနှင့် ပို၍ပင် မပတ်သက်သေးချေ။ အပြုအမူကောင်းများသည် ဤအရာများနှင့် လုံးဝ မသက်ဆိုင်ပေ။ ယင်းတို့သည် လူသားထံမှ လာသောအရာမျှသာ ဖြစ်သည်။ လူသားက ကောင်းသည်ဟု မြင်သောအရာသာ ဖြစ်သည်။ သို့တိုင်အောင် ဤအပြုအမူကောင်းများကို လူတစ်ဦးက သမ္မာတရားအား လက်တွေ့လုပ်ဆောင်သည့် လက္ခဏာအဖြစ် မြင်သော လူများစွာ ရှိကြသည်။ ဤသည်မှာ ကြီးလေးသော အမှားတစ်ခုဖြစ်၏။ အဓိပ္ပာယ်မရှိသော အမြင်နှင့် နားလည်မှုဖြစ်သည်။ ဤအပြုအမူကောင်းများသည် ဘာသာရေး ဟိတ်ဟန်ပြခြင်းသာ ဖြစ်ပြီး ဝတ်ကျေတမ်းကျေပြုခြင်းသာ ဖြစ်သည်။ သမ္မာတရားအား လက်တွေ့လုပ်ဆောင်ခြင်းနှင့် လုံးဝ ဆက်နွှယ်မှု မရှိပေ။ ဘုရားသခင်က ထိုအရာတို့ကို ချက်ချင်း ရှုတ်ချချင်မှ ရှုတ်ချမည်ဖြစ်သော်လည်း လုံးဝ လက်ခံခြင်း မရှိပေ။ ယင်းမှာ သေချာ၏။ လူသား၏ အယူအဆများနှင့် ကိုက်ညီသည့် ဤအပြင်ပန်း လုပ်ရပ်များနှင့် ဤအပြုအမူကောင်းများသည် သမ္မာတရား လက်တွေ့လုပ်ဆောင်ခြင်း မဟုတ်သကဲ့သို့ သမ္မာတရား လိုက်စားခြင်း၏ သရုပ်သကန်လည်း မဟုတ်သည်ကို သင်တို့ သိသင့်သည်။ ဤမိတ်သဟာယကို ကြားပြီးသည့်နောက်တွင် သမ္မာတရား လိုက်စားခြင်းဆိုသည်မှာ အဘယ်ဖြစ်ကြောင်းနှင့်ပတ်သက်သည့် အယူအဆပေါ် အခြေတည်သည့် အသိပညာအနည်းငယ်၊ သမ္မာတရား လိုက်စားခြင်းနှင့်ဆိုင်သည့် ရိုးရှင်းသော အယူအဆတစ်ခုအပေါ် ကနဦး သိနားလည်မှုတစ်ခုမျှသာ သင်တို့ ရရှိကြသည်။ သမ္မာတရား လိုက်စားခြင်းဆိုသည်မှာ အဘယ်ဖြစ်ကြောင်းကို သင်တို့ အမှန်တကယ် နားလည်လိုပါက ငါတို့ နောက်ထပ် ဆက်လက် မိတ်သဟာယပြုရမည့်အရာရှိ၏။

သမ္မာတရားကို လိုက်စားဖို့ရန်၊ အကြင်သူသည် ထိုသမ္မာတရားကို နားလည်ရမည်။ သမ္မာတရားကို နားလည်ခြင်းအားဖြင့်သာ ထိုသမ္မာတရားကို လက်တွေ့လုပ်ဆောင်နိုင်သည်။ လူတို့၏ အပြုအမူကောင်းသည် သမ္မာတရားကို လက်တွေ့လုပ်ဆောင်ခြင်းနှင့် ဆက်နွှယ်သလော။ အပြုအမူကောင်းသည် သမ္မာတရား လိုက်စားခြင်းမှ ပေါက်ဖွားသလော။ မည်သည့် သရုပ်သကန်များနှင့် လုပ်ရပ်များသည် သမ္မာတရားကို လက်တွေ့လုပ်ဆောင်ခြင်းနှင့် သက်ဆိုင်သနည်း။ သမ္မာတရားလိုက်စားသူများက မည်သည့် သရုပ်သကန်များကို ပိုင်ဆိုင်သနည်း။ ဤမေးခွန်းများကို သင်နားလည်ဖို့ လိုအပ်သည်။ သမ္မာတရား လိုက်စားခြင်းနှင့် ပတ်သက်၍ မိတ်သဟာယပြုရန်အလို့ငှာ ထိုအရာအပေါ် လူတို့ ရှိကြသည့် အခက်အခဲများနှင့် မှားယွင်းသော အမြင်များအကြောင်းကို ပထမဦးစွာ ငါတို့ ပြောရမည်။ ဤအရာများကို ပထမဦးစွာ ဖြေရှင်းရန် မုချလိုအပ်သည်။ သမ္မာတရားက မည်သည့်အရာဖြစ်သည်ဆိုသည်နှင့် ပတ်သက်၍ အတော်အတန် ရှင်းလင်းသော ရှုထောင့်အမြင်ရှိပြီး သိနားလည်မှု စစ်စစ်ရှိသည့် လူအချို့ရှိသည်။ ၎င်းတို့သည် သမ္မာတရား လိုက်စားဖို့ လမ်းကြောင်းတစ်ခု ရှိကြသည်။ သမ္မာတရားက မည်သည့်အရာဖြစ်သည်ဆိုသည်ကို နားမလည်သည့် အခြားသူများရှိပြီး ထိုသမ္မာတရားကို ၎င်းတို့ စိတ်ဝင်စားသော်လည်း မည်သို့ လက်တွေ့လုပ်ဆောင်ရမည်ကို မသိကြချေ။ ကောင်းမှုများပြုခြင်းနှင့် ကောင်းကောင်းမွန်မွန် ပြုမူခြင်းတို့သည် သမ္မာတရားကို လက်တွေ့လုပ်ဆောင်ခြင်းနှင့် တူသည်၊ သမ္မာတရားကို လက်တွေ့လုပ်ဆောင်ခြင်းမှာ ကောင်းမှုများ ပြုခြင်းဖြစ်သည်ဟု ၎င်းတို့ ယုံကြည်ကြသည်။ ကောင်းမှုများ ပြုခြင်းနှင့် ကောင်းမွန်စွာ ပြုမူခြင်းတို့သည် သမ္မာတရားကို လက်တွေ့လုပ်ဆောင်ခြင်းနှင့် လုံးဝ ကွာခြားသည်ကို ဘုရားနှုတ်ကပတ်တော်များစွာ ဖတ်ရှုပြီးသည့်အခါတွင်သာ ၎င်းတို့ သဘောပေါက်ကြသည်။ လူတို့၏ အယူအဆများနှင့် စိတ်ကူးများက မည်မျှ အဓိပ္ပာယ်မဲ့သည်ကို သင်တို့ မြင်နိုင်သည်။ သမ္မာတရားကို နားမလည်သောသူတို့သည် မည်သည့်အရာကိုမျှ ရှင်းလင်းစွာ မမြင်နိုင်။ များစွာသောလူတို့သည် မိမိတို့တာဝန်ကို နှစ်ချီ ထမ်းဆောင်ပြီးဖြစ်သည်၊ နေ့စဉ် မိမိတို့ကိုယ်ကိုယ် အလုပ်များစေကြပြီး အနည်းငယ်ထက် ပိုသည့် အခက်အခဲများကို ကြုံကြရပြီးဖြစ်သည်။ ထို့ကြောင့် ၎င်းတို့သည် မိမိတို့ကိုယ်ကိုယ် သမ္မာတရားကို လက်တွေ့လုပ်ဆောင်ပြီး သမ္မာတရား စစ်မှန်မှုကို ပိုင်ဆိုင်သည့် လူများအဖြစ် တွေးထင်ကြ၏။ သို့ရာတွင် ၎င်းတို့သည် အတွေ့အကြုံဆိုင်ရာ သက်သေခံချက် တစ်ခုတလေမျှ မပေးနိုင်ကြချေ။ ဤနေရာတွင် ပါဝင်သည့် ပြဿနာမှာ အဘယ်နည်း။ သမ္မာတရားကို ၎င်းတို့ နားလည်ပါက ၎င်းတို့၏ တကယ့် အတွေ့အကြုံများအကြောင်းကို အဘယ်ကြောင့် ၎င်းတို့ မပြောဆိုနိုင်ကြသနည်း။ ဤသည်မှာ ဆန့်ကျင်ကွဲလွဲနေသည့်အရာတစ်ခု မဟုတ်လော။ လူအချို့က “ယခင်က ကျွန်ုပ်တာဝန်ကို ထမ်းဆောင်နေခဲ့ချိန်တွင် သမ္မာတရားကို မလိုက်စားခဲ့သကဲ့သို့ ဘုရားနှုတ်ကပတ်တော်များကို စေ့စေ့စပ်စပ် ဆုတောင်းဖတ်ရှုခြင်း မရှိခဲ့ပါ။ အချိန်အတော်များများကို ကျွန်ုပ် ဖြုန်းတီးခဲ့သည်။ ကျွန်ုပ်၏ တာဝန်နှင့်ပတ်သက်၍ အလုပ်များအောင် နေခြင်းသည် သမ္မာတရားကို လက်တွေ့လုပ်ဆောင်ခြင်း၊ ဘုရားအမှုတော်ကို ကျိုးနွံနာခံခြင်းတို့နှင့် တူသည်ဟု တွေးထင်လျက် ကျွန်ုပ်၏ အလုပ်တွင် ကျွန်ုပ် အလွန် ဈာန်ဝင်နေခဲ့သည်။ သို့ရာတွင် ကျွန်ုပ်သည် ကျွန်ုပ်၏ အချိန်ကို ဖြုန်းတီးနေခဲ့ခြင်းသာ ဖြစ်သည်” ဟု ဆိုကြသည်။ ဤနေရာတွင် မည်သည့်အရာကို သွယ်ဝိုက်ညွှန်းဆိုထားသနည်း။ ၎င်းတို့သည် မိမိတို့တာဝန်ကို ထမ်းဆောင်ရင်း အလွန်အလုပ်များခဲ့ကြသောကြောင့် သမ္မာတရားလိုက်စားခြင်းအား ရွှေ့ဆိုင်းကြခြင်း ဖြစ်၏။ ယင်းမှာ အမှန်တကယ် မှန်ပါ၏လော။ အဓိပ္ပာယ်မဲ့သော လူအချို့က ၎င်းတို့၏ တာဝန်နှင့်ပတ်သက်၍ ၎င်းတို့ အလုပ်များသရွေ့ ၎င်းတို့၏ ဖောက်ပြန်ပျက်စီးသော စိတ်သဘောထားက သူ့ဘာသာ ပေါ်လွင်လာဖို့ အချိန်ရှိလိမ့်မည်မဟုတ်၊ ၎င်းတို့အနေဖြင့် ဖောက်ပြန်ပျက်စီးသော စိတ်သဘောထားကို ထုတ်ဖော်ပြတော့မည် မဟုတ်သောကြောင့်၊ သို့မဟုတ် ဖောက်ပြန်ပျက်စီးသော အခြေအနေတွင် အသက်ရှင်တော့မည် မဟုတ်သောကြောင့် မိမိတို့၏ ဖောက်ပြန်ပျက်စီးသော စိတ်သဘောထားကို ဖြေရှင်းဖို့အတွက် ဘုရားနှုတ်ကပတ်တော်များကို စားသောက်ရန် မလိုအပ်ဟု ယုံကြည်ကြသည်။ ဤစိတ်ကူးသည် မှန်ကန်ပါသလော။ လူတို့သည် မိမိတို့၏ တာဝန်များဖြင့် အလုပ်များသည့်အခါ ဖောက်ပြန်ပျက်စီးသော စိတ်သဘောထားများကို အမှန်တကယ်ကို ထုတ်ဖော်မပြကြသလော။ ယင်းသည် အဓိပ္ပာယ်မဲ့သော စိတ်ကူးတစ်ခု ဖြစ်သည်။ ပြောင်ပြောင်တင်းတင်း လိမ်ညာမှုတစ်ခု ဖြစ်သည်။ ၎င်းတို့သည် မိမိတို့တာဝန်ဖြင့် အလုပ်များကြသောကြောင့် သမ္မာတရား လိုက်စားဖို့ အချိန်မရှိဟု ဆိုကြသည်။ ဤသည်မှာ အတွေးမှားစစ်စစ် ဖြစ်သည်။ အလုပ်များခြင်းကို ဆင်ခြေတစ်ခုအဖြစ် ၎င်းတို့ သုံးနေကြခြင်း ဖြစ်သည်။ အသက်ဝင်ရောက်မှုနှင့် တာဝန်တစ်ခု ထမ်းဆောင်ခြင်းတို့နှင့် ပတ်သက်၍ သမ္မာတရားများအပေါ် ငါတို့ မိတ်သဟာယပြုပြီး ဖြစ်သည်။ လူတို့သည် တာဝန်တစ်ခု ထမ်းဆောင်စဉ်တွင် ပြဿနာများကို ဖြေရှင်းဖို့ သမ္မာတရားကို ရှာဖွေခြင်းအားဖြင့်သာ ဘဝတွင် တိုးတက်နိုင်သည်။ ထို့ကြောင့် အကြင်သူသည် မိမိတာဝန်ကို ထမ်းဆောင်စဉ် လုပ်သမျှမှာ အလုပ်တာဝန်များဖြင့် မိမိကိုယ်ကိုယ် အလုပ်များစေခြင်းသာ ဖြစ်လျှင်၊ ပြဿနာများကို ဖြေရှင်းဖို့ သမ္မာတရား ရှာဖွေရန် ပျက်ကွက်လျှင် သမ္မာတရားကို ၎င်းတို့ မည်သည့်အခါတွင်မျှ နားလည်လိမ့်မည် မဟုတ်။ သမ္မာတရား မချစ်သော လူအချို့သည် အလုပ်လုပ်ပေးဖို့ရန်မျှ ကျေနပ်တင်းတိမ်ကြပြီး ယင်းကို ကောင်းကင်နိုင်ငံတော်၏ ကောင်းချီးမင်္ဂလာများအတွက် ဖလှယ်ဖို့ မျှော်လင့်ကြသည်။ ၎င်းတို့၏တာဝန်ကို ထမ်းဆောင်ရင်း အလွန်အလုပ်များသဖြင့် သမ္မာတရား လိုက်စားဖို့ အချိန်မရှိဟု ဆင်ခြေပေးရင်း နိဂုံးချုပ်ကြသည်။ မိမိတို့တာဝန်ကို ထမ်းဆောင်ရင်း ၎င်းတို့ အလွန်အလုပ်များသဖြင့် ဖောက်ပြန်ပျက်စီးသော စိတ်သဘောထားကို ထုတ်ဖော်ပြခြင်း မရှိဟုပင် ၎င်းတို့ ဆိုကြသည်။ ဤအရာက ၎င်းတို့အနေဖြင့် မိမိတို့တာဝန်နှင့် အလုပ်များသောကြောင့် ၎င်းတို့၏ ဖောက်ပြန်ပျက်စီးသော စိတ်သဘောထား ပျောက်ကွယ်သွားကြောင်း၊ မတည်ရှိတော့ကြောင်း သွယ်ဝိုက်ညွှန်းဆို၏။ ဤသည်မှာ အလိမ်အညာတစ်ခု ဖြစ်သည် မဟုတ်လော။ ၎င်းတို့၏ ပြောဆိုချက်သည် အမှန်တရားများနှင့် ကိုက်ညီပါသလော။ လုံးဝ မကိုက်ညီပေ။ အားလုံးထဲမှ အကြီးမားဆုံးသော အလိမ်အညာဟုပင် ခေါ်ဆိုနိုင်သည်။ လူတစ်ဦးသည် မိမိတာဝန်နှင့် အလုပ်များနေရုံဖြင့် အဘယ်သို့ ဖောက်ပြန်ပျက်စီးသော စိတ်သဘောထားက သူ့ဘာသာ မပေါ်လွင်တော့ဘဲ ရှိနိုင်မည်နည်း။ ထိုသို့သော လူများ တည်ရှိပါ၏လော။ ထိုသို့သော အတွေ့အကြုံဆိုင်ရာ သက်သေခံချက်သည် တည်ရှိပါ၏လော။ သေချာပေါက် မရှိပေ။ လူတို့သည် စာတန်အားဖြင့် အလွန်အမင်း ဖောက်ပြန်ပျက်စီးကြပြီး ဖြစ်သည်။ ၎င်းတို့အားလုံးသည် ဆိုးယုတ်သော သဘာဝရှိကြပြီး အားလုံးက ဆိုးယုတ်သော စိတ်သဘောထားများဖြင့် အသက်ရှင်ကြသည်။ လူသားအထဲတွင် ဖောက်ပြန်ပျက်စီးခြင်းအပြင် အပြုသဘောဆောင်သောအရာ တစ်ခုတလေ ရှိသလော။ ဖောက်ပြန်ပျက်စီးသော စိတ်သဘောထားမရှိဘဲ မွေးဖွားခဲ့သူတစ်ဦးတလေ ရှိသလော။ မွေးကတည်းက တာဝန်တစ်ခုကို သစ္စာစောင့်သိမှုဖြင့် ထမ်းဆောင်နိုင်သူတစ်ဦးတလေ ရှိသလော။ မွေးကတည်းက ဘုရားသခင်ကို ကျိုးနွံနာခံနိုင်ပြီး ချစ်နိုင်သူ တစ်ဦးတလေ ရှိသလော။ လုံးဝ မရှိပေ။ လူအပေါင်းတို့သည် ဆိုးယုတ်သော သဘာဝများရှိကြပြီး ဖောက်ပြန်ပျက်စီးသော စိတ်သဘောထားများဖြင့် ပြည့်ကြသောကြောင့် သမ္မာတရားကို ၎င်းတို့ နားလည်ပြီး လက်တွေ့မလုပ်ဆောင်နိုင်ပါက ၎င်းတို့၏ ဖောက်ပြန်ပျက်စီးသော စိတ်သဘောထားများဖြင့်သာ အသက်ရှင်နိုင်ကြသည်။ ထို့ကြောင့် လူတစ်ဦးသည် မိမိတာဝန်တွင် အလုပ်များအောင်နေလျှင် ဖောက်ပြန်ပျက်စီးသော စိတ်သဘောထားကို ထုတ်ဖော်ပြလိမ့်မည်မဟုတ်ဟု ဆိုရန်မှာ ရယ်ဖွယ်ကောင်းပြီး အတွေးမှားတစ်ခု ဖြစ်သည်။ လူတို့ကို လှည့်စားဖို့ ရည်ရွယ်သည့် မျက်နှာပြောင်တိုက်သော အလိမ်အညာတစ်ခု ဖြစ်သည်။ ၎င်းတို့သည် မိမိတို့တာဝန်ကို ထမ်းဆောင်ရင်း အလုပ်များသည်ဖြစ်စေ၊ မများသည်ဖြစ်စေ၊ ဘုရားနှုတ်ကပတ်တော်များကို ဖတ်ရှုဖို့ အချိန်ရှိသည်ဖြစ်စေ၊ မရှိသည်ဖြစ်စေ သမ္မာတရားကို မချစ်သောလူတို့သည် ထိုသမ္မာတရားကို မလိုက်စားဖို့ရန် အကြောင်းပြချက်များနှင့် ဆင်ခြေများ ရှာကြလိမ့်မည်။ ဤလူများသည် အလုပ်လုပ်ပေးသူများ သက်သက် ဖြစ်သည်။ အလုပ်လုပ်ပေးသူတစ်ဦးသည် ဘုရားနှုတ်ကပတ်တော်များကို မစားသောက်သကဲ့သို့ သမ္မာတရားကို လက်မခံပါက ၎င်းတို့သည် ကောင်းမွန်စွာ အလုပ်လုပ် ပေးနိုင်လိမ့်မည်လော။ သေချာပေါက် မပေးနိုင်ပေ။ သမ္မာတရားကို လက်မခံသောသူတို့သည် အသိစိတ်နှင့် ဆင်ခြင်တုံတရား ကင်းမဲ့ကြ၏။ ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားများဖြင့် အသက်ရှင်ပြီး မကောင်းမှု အမြောက်အမြား ကျူးလွန်ကြမည့်လူများ ဖြစ်သည်။ ၎င်းတို့သည် မည်သည့်နည်းနှင့်မျှ သစ္စာစောင့်သိသော အလုပ်လုပ်ပေးသူများ မဟုတ်ကြသကဲ့သို့ အလုပ်လုပ်ပေးသော်ငြားလည်း ၎င်းတို့နှင့် ပတ်သက်၍ ကြီးမြတ်သည့်အရာ တစ်ခုမျှမရှိပေ။ ဤအရာနှင့် ပတ်သက်၍ သင် သေချာနိုင်သည်။

အချို့သောလူတို့သည် မိမိတို့မိသားစုနှင့် အလွန် စကားများကြပြီး သောကနွံနစ်နေကြ၏။ ဘုရားသခင် နောက်လိုက်ပြီး မိမိတို့တာဝန်များကို ထမ်းဆောင်ရန် မိမိတို့၏ မိသားစုများနှင့် အလုပ်အကိုင်များကို စွန့်လွှတ်ခဲ့ကြသည့် ပိုမိုငယ်ရွယ်သော ညီအစ်ကို မောင်နှမများကို ၎င်းတို့ မြင်ကြသည့်အခါ အားကျကာ “ဘုရားသခင်သည် ဤလူငယ်များအပေါ် သဘောကောင်းသည်။ အိမ်ထောင်ပြုပြီး ကလေးများမရမီ ငယ်သည့်အရွယ်တွင် ဘုရားသခင်ကို သူတို့ စတင်ယုံကြည်ကြသည်။ သူတို့တွင် မိသားစု သံယောဇဉ်များ မရှိသကဲ့သို့ ၎င်းတို့ မည်သို့ ဖူလုံအောင် နေရမည်ကို စိုးရိမ်စရာမရှိ။ ဘုရားနောက်လိုက်ခြင်းနှင့် မိမိတို့တာဝန်များကို ထမ်းဆောင်ခြင်းမှ တားဆီးသည့် ပူပန်မှုများ မရှိကြ။ ဘုရားအမှုတော်နှင့် နောက်ဆုံးသော ကာလတွင် သူ၏ ဧဝံဂေလိ ပြန့်ပွားမှုအတွက် အချိန်မီလေး ရောက်လာကြသည်။ ဘုရားသခင်က သူတို့ကို ထိုသို့ ကောင်းသော အခြေအနေများ ပေးထားသည်။ သူတို့က မိမိတို့၏ တာဝန်များ ထမ်းဆောင်ဖို့ မိမိတို့ကိုယ်ကိုယ်၊ ခန္ဓာနှင့် စိတ်ဝိညာဉ် ဆက်ကပ်နိုင်သည်။ သမ္မာတရားကို လိုက်စားနိုင်ကြသည်၊ သို့သော် ကျွန်ုပ်အတွက်တော့ ထိုသို့ မဟုတ်ပါ။ ဘုရားသခင်က ကျွန်ုပ်အတွက် သင့်လျော်သော ပတ်ဝန်းကျင်တစ်ခုကို စီစဉ်မပေးခဲ့ပါ။ ကျွန်ုပ်တွင် မိသားစု နှောင်ကြိုးများလွန်းပြီး သူတို့ကို ထောက်ပံ့ဖို့ ငွေရှာရမည်။ ယင်းမှာ ကျွန်ုပ်၏ တကယ့် ပြဿနာ တည်ရှိသည့်နေရာ ဖြစ်သည်။ ထို့ကြောင့် သမ္မာတရား လိုက်စားဖို့ ကျွန်ုပ်အချိန်မရှိခြင်း ဖြစ်သည်။ သမ္မာတရား လိုက်စားခြင်းသည် မိမိတို့တာဝန်များကို အချိန်ပြည့် ထမ်းဆောင်ပြီး ဤအနှောင်အဖွဲ့များ မရှိသူတို့အတွက် ဖြစ်သည်။ ကျွန်ုပ်သည် မိသားစု နှောင်ကြိုးများဖြင့် တာဝန်ပိနေပြီး ကျွန်ုပ်၏ စိတ်နှလုံးသည် စားဝတ်နေရေးဖူလုံရန် အသေးအဖွဲ့ကိစ္စလေးများနှင့် ပြည့်နေသောကြောင့် ဘုရားနှုတ်ကပတ်တော်များကို စားသောက်ဖို့၊ မိမိတာဝန်ကို ထမ်းဆောင်ဖို့ အချိန်၊ သို့မဟုတ် အားအင် မကျန်ပါ။ ကျွန်ုပ်၏ အခြေအနေများ၏ မည်သည့် ရှုထောင့်ကို သင် ကြည့်သည်ဖြစ်စေ ကျွန်ုပ်အတွက် သမ္မာတရား လိုက်စားဖို့ နည်းလမ်းမရှိပါ။ ယင်းအတွက် ကျွန်ုပ်ကို သင် အပြစ်တင်၍ မရပါ။ သမ္မာတရားကို လိုက်စားဖို့က ကျွန်ုပ်၏ ကံကြမ္မာကို မဟုတ်သကဲ့သို့ ကျွန်ုပ်၏ အခြေအနေများက တာဝန်တစ်ခု ထမ်းဆောင်ဖို့ ကျွန်ုပ်ကို အခွင့်မပေးပါ။ ကျွန်ုပ်လုပ်နိုင်သမျှမှာ ကျွန်ုပ်၏ မိသားစု နှောင်ကြိုးများ လျော့ဖို့၊ ကျွန်ုပ်၏ သားသမီးများ အမှီအခိုကင်းလာကြဖို့နှင့် ကျွန်ုပ် အငြိမ်းစားယူပြီး ကျွန်ုပ်၏ ငွေကြေးဆိုင်ရာ စိုးရိမ်သောကများ ကင်းရှင်းဖို့အတွက်သာ စောင့်ဆိုင်းရန် ဖြစ်သည်။ ထို့နောက်တွင်မှ သမ္မာတရားကို ကျွန်ုပ်လိုက်စားမည်”ဟု ဆိုကြသည်။ ဤသို့သော လူများသည် မိမိတို့၏ နေ့စဉ်ဘဝများတွင် အခက်အခဲ တွေ့ကြုံကြပြီး ၎င်းတို့ နေ့စဉ်အသက်တာများ၏ အသေးအဖွဲကိစ္စများတွင် ၎င်းတို့၏ ဖောက်ပြန်ပျက်စီးသော စိတ်သဘောထား ပွင့်အံထွက်လာသည်ကို ရံဖန်ရံခါ ခံစားရနိုင်သည်။ ဤအရာများကို ၎င်းတို့ သတိပြုမိနိုင်ကြသော်လည်း လောကီထောင်ချောက်များတွင် အမိခံရကြသောကြောင့် ဤသို့ အသက်ရှင်ခြင်း၊ ဘုရားသခင်ကို ယုံကြည်ခြင်း၊ တရားဒေသနာများကို နားထောင်ခြင်းနှင့် သက်သောင့်သက်သာ နေလို့ရခြင်းအားဖြင့် အဆင်ပြေနေသည်ဟု ၎င်းတို့ ယုံကြည်ကြ၏။ သမ္မာတရား လိုက်စားခြင်းက စောင့်ဆိုင်း၍ရပြီး ၎င်းတို့တွင် ရှိသည့် ဖောက်ပြန်ပျက်စီးသော မည်သည့် စိတ်သဘောထားများကိုမဆို နှစ်အနည်းငယ်အကြာမှ ဖြေရှင်းခြင်းသည် သိပ်နောက်ကျလိမ့်မည်မဟုတ်ဟု ယုံကြည်ကြသည်။ ယင်းမှာ သမ္မာတရား လိုက်စားခြင်းတည်းဟူသော ကြီးမားသည့် အရေးကိစ္စကို ၎င်းတို့ အကြိမ်ကြိမ် နေ့ရွှေ့လရွှေ့ ရွှေ့ကြပုံ ဖြစ်သည်။ ၎င်းတို့ မည်သည့်အရာကို အမြဲ ပြောကြသနည်း။ “သမ္မာတရားကို လိုက်စားဖို့ မည်သည့်အခါတွင်မျှ နောက်မကျပါ။ ကျွန်ုပ် နှစ်နှစ်သုံးနှစ်လောက် နေလိုက်ဦးမည်။ ဘုရားအမှုတော် မပြီးသရွေ့ ကျွန်ုပ်မှာ အချိန်ရှိသေးသည်။ အခွင့်အရေး ရှိနေဆဲဖြစ်သည်”ဟူ၍ ဖြစ်၏။ ဤအမြင်ကို သင်တို့ အဘယ်သို့ တွေးထင်ကြသနည်း။ (မှားပါသည်။) သမ္မာတရား လိုက်စားခြင်း ဝန်ထုပ်ကို ၎င်းတို့ ယူကြပြီလော။ (မယူကြပါ။) ကောင်းပေပြီ။ သို့ဆိုလျှင် မည်သည့် ဝန်ထုပ်ကို ၎င်းတို့ ယူကြပြီနည်း။ စားဝတ်နေရေး ဖူလုံခြင်း၊ မိမိတို့ မိသားစုများအတွက် ထောက်ပံ့ပေးခြင်း၊ မိမိတို့ သားသမီးများကို ပျိုးထောင်ပေးခြင်း ဝန်ထုပ်ဖြစ်သည် မဟုတ်လော။ ၎င်းတို့သည် မိမိတို့၏ သားသမီးများ၊ မိသားစုများ၊ မိမိတို့ကိုယ်ပိုင် နေ့ရက်များနှင့် ဘဝများအတွက် မိမိတို့၏ စွမ်းအားများကို ပေးအပ်မြှုပ်နှံထားကြပြီး ဤအရာများကို တာဝန်ယူပြီးသည့်နောက်တွင်သာ သမ္မာတရား လိုက်စားခြင်းကို စတင်ဖို့ အစီအစဉ်များ ပြုလုပ်ကြလိမ့်မည်။ ထို့ကြောင့် ၎င်းတို့၏ ဤဆင်ခြေများသည် ခိုင်လုံပါ၏လော။ ယင်းတို့သည် ၎င်းတို့၏ သမ္မာတရား လိုက်စားခြင်းအဖို့ ခလုတ်တံသင်းများ ဖြစ်သည် မဟုတ်လော။ (ဟုတ်ပါသည်။) ဤလူများသည် ဘုရားသခင်၏ အချုပ်အခြာအာဏာနှင့် အစီအစဉ်များကို ယုံကြည်ကြသည့်တိုင် ၎င်းတို့အတွက် ဘုရားသခင် စီစဉ်ပေးသည့် ပတ်ဝန်းကျင်နှင့်ပတ်သက်၍လည်း စောဒကတက်ကြဆဲဖြစ်သည်။ ဘုရားသခင်၏ သတ်မှတ်ချက်များကို ၎င်းတို့ အလေးမထားကြသကဲ့သို့ ထိုသတ်မှတ်ချက်များအတိုင်း တက်တက်ကြွကြွ လုပ်ဆောင်ခြင်း လုံးဝ မရှိကြချေ။ ထိုအစား မိမိတို့၏ ဇာတိပကတိ၊ မိသားစုနှင့် ဆွေမျိုးများကို ကျေနပ်စေခြင်းအကြောင်းသာ အရေးစိုက်ကြသည်။ သမ္မာတရား မလိုက်စားခြင်းအတွက် မည်သည့် အကြောင်းပြချက်ကို ၎င်းတို့ ပေးကြသနည်း။ “အသက်ရှင်ဖို့သက်သက်ကို ကြိုးစားရင်း ကျွန်ုပ်တို့ အလုပ်များလွန်းပြီး ပင်ပန်းနွမ်းနယ်လှသည်။ သမ္မာတရား လိုက်စားဖို့ အချိန်မရှိကြပါ။ သမ္မာတရား လိုက်စားဖို့ သင့်တော်သည့် ပတ်ဝန်းကျင် မရှိကြပါ” ဟူ၍ ဖြစ်သည်။ မည်သည့်အမြင်ကို ၎င်းတို့ စွဲကိုင်ကြသနည်း။ (သမ္မာတရားလိုက်စားဖို့ မည်သည့်အခါမျှ နောက်မကျလွန်းပါဟူ၍ ဖြစ်သည်။) “သမ္မာတရား လိုက်စားဖို့ မည်သည့်အခါတွင်မျှ နောက်မကျလွန်းပါ။ နှစ်နှစ်သုံးနှစ်အကြာတွင် ထိုအရာကို ကျွန်ုပ် လုပ်ပါမည်”ဟူ၍ ဖြစ်သည်။ ဤသည်မှာ မိုက်မဲသည် မဟုတ်လော။ (မိုက်မဲပါသည်။) မိုက်မဲ၏။ ၎င်းတို့သည် မိမိတို့၏ ဆင်ခြေများဖြင့် မိမိတို့ကိုယ်ကိုယ် လှည့်စားနေခြင်း ဖြစ်သည်။ ဘုရားသခင်၏ အမှုတော်သည် သင့်ကို စောင့်ဆိုင်းလိမ့်မည်လော။ (စောင့်ဆိုင်းမည်မဟုတ်ပါ။) “နှစ်နှစ်သုံးနှစ်အကြာတွင် ထိုအရာကို ကျွန်ုပ် လုပ်ပါမည်”၊ ထို“နှစ်နှစ်သုံးနှစ်”က မည်သည့်အရာကို ဆိုလိုသနည်း။ ယင်းမှာ သင်သည် ကယ်တင်ခံရမည့် မျှော်လင့်ချက်လျော့နည်းသွားပြီး ဘုရားသခင်၏ အမှုတော်ကို တွေ့ကြုံဖို့ နှစ်ကာလများ ပိုမိုနည်းပါးလိမ့်မည်ဟု ဆိုလိုသည်။ နှစ်နှစ်သုံးနှစ်က နေရင်းထိုင်ရင်း ကုန်လွန်သွားလိမ့်မည်ဖြစ်ပြီး ထို့နောက် နောက်ထပ် နှစ်နှစ်သုံးနှစ်ကုန်လွန်သွားမည်ဖြစ်ကာ သင် မသိလိုက်မီတွင် ဆယ်နှစ်ကုန်သွားပြီးဖြစ်လိမ့်မည်ဖြစ်ပြီး သင်သည် သမ္မာတရားကို နားလည်ပြီး ဖြစ်လိမ့်မည်မဟုတ်၊ သို့မဟုတ် သမ္မာတရား စစ်မှန်မှုထဲသို့ လုံးဝ ဝင်ရောက်ပြီးဖြစ်လိမ့်မည်မဟုတ်သကဲ့သို့ သင်၏ ဖောက်ပြန်ပျက်စီးသော စိတ်သဘောထား တစ်စက်မျှ ပြေလည်ပြီးဖြစ်လိမ့်မည် မဟုတ်ပေ။ ရိုးသားသော စကားတစ်ခွန်း ပြောဖို့ရန်ပင် သင့်အတွက် ကြီးစွာသော အခက်အခဲဖြစ်၏။ ဤသည်မှာ အန္တရာယ် မများပါသလော။ သနားစဖွယ်ဖြစ်သည် မဟုတ်လော။ (ဟုတ်ပါသည်။) သမ္မာတရား မလိုက်စားဖို့အတွက် လူတို့က ဤဆင်ခြေများနှင့် အကြောင်းပြချက်များအားလုံး ပေးသည့်အခါ အဆုံးတွင် ၎င်းတို့က မည်သူကို ထိခိုက်နစ်နာစေသနည်း။ (မိမိတို့ကိုယ်ကိုယ် ဖြစ်သည်။) မှန်ပေ၏။ အဆုံးတွင် ၎င်းတို့ ထိခိုက်နစ်နာစေကြသည်မှာ မိမိတို့ကိုယ်တိုင် ဖြစ်သည်။ ပြီးလျှင် ၎င်းတို့ သေအံ့မူးမူးဖြစ်ချိန်တွင် ဘုရားသခင်ကို ၎င်းတို့ ယုံကြည်သည့် နှစ်များ၌ သမ္မာတရား မရရှိခဲ့ခြင်းအတွက် မိမိတို့ကိုယ်ကိုယ် မုန်းတီးကြလိမ့်မည် ဖြစ်ပြီး၊ ၎င်းတို့ ဘဝတစ်ခုလုံး နောင်တရကြလိမ့်မည် ဖြစ်သည်။

အချို့သော လူများသည် အတော်အတန် ပညာကောင်းကောင်း တတ်သော်လည်း ၎င်းတို့၏ အစွမ်းအစက ညံ့ဖျင်းပြီး ဝိညာဉ်ရေးရာ နားလည်သဘောပေါက်ခြင်း မရှိပေ။ တရားဒေသနာ မည်မျှ ၎င်းတို့ နားထောင်ကြသည်ဖြစ်စေ သမ္မာတရားကို နားမလည်နိုင်ကြ။ ၎င်းတို့တွင် မိမိတို့ကိုယ်ပိုင် ရည်မှန်းချက်များနှင့် ဆန္ဒများ အမြဲရှိကြပြီး အဆင့်အတန်းအတွက် အမြဲ ပြိုင်ဆိုင်နေကြသည်။ အဆင့်အတန်းကို ၎င်းတို့ မပိုင်ဆိုင်ပါက သမ္မာတရားကို လိုက်စားကြလိမ့်မည် မဟုတ်။ ၎င်းတို့က “ဘုရားအိမ်တော်သည် စာသားအခြေပြု အလုပ်၊ ရုပ်သံနည်းပညာ အလုပ်၊ အသင်းတော် ခေါင်းဆောင်ဖြစ်ခြင်း၊ သို့မဟုတ် အဖွဲ့တစ်ခု၏ ကြီးကြပ်ရေးမှူး ဖြစ်ခြင်းကဲ့သို့သော ကျွန်ုပ်၏ တန်ဖိုးကို ထင်ဟပ်သည့် တာဝန်တစ်ခုကို ကျွန်ုပ် ထမ်းဆောင်ဖို့အတွက် မည်သည့်အခါမျှ မစီစဉ်ပေးပါ။ သူတို့က ထိုသို့အရေးပါသည့် အလုပ်တစ်ခုမျှ လုပ်ဖို့ ကျွန်ုပ်ကို မပေးပါ။ ဘုရားအိမ်တော်က ကျွန်ုပ်ကို မမြှင့်တင်ပေးပေ၊ သို့မဟုတ် မပျိုးထောင်ပေးပေ၊ ပြီးလျှင် အသင်းတော်က ရွေးကောက်ပွဲတစ်ခု ကျင်းပသည့်အကြိမ်တိုင်းတွင် မည်သူကမျှ ကျွန်ုပ်အတွက် မဲမပေးသကဲ့သို့ မည်သူကမျှ ကျွန်ုပ်ကို မနှစ်သက်ပါ။ ကျွန်ုပ်တွင် လိုချင်ဖွယ်ရာ အရည်အသွေးများ တကယ် မရှိလေသလား။ ကျွန်ုပ်သည် ဉာဏ်ကောင်းသည်၊ ပညာကောင်းကောင်းတတ်သည်၊ သို့သော် ဘုရားအိမ်တော်က ကျွန်ုပ်ကို လုံးဝ မမြှင့်တင်ပေးပါ၊ သို့မဟုတ် မပျိုးထောင်ပေးပါ။ ထို့ကြောင့် ကျွန်ုပ်သည် သမ္မာတရားလိုက်စားဖို့ စိတ်ပါဝင်စားမှု မရှိပါ။ ကျွန်ုပ်ကဲ့သို့ တစ်ချိန်တည်း ဘုရားသခင်ကို စတင် ယုံကြည်ခဲ့သည့် ညီအစ်ကို မောင်နှမများအားလုံးက အရေးပါသည့် တာဝန်များကို ထမ်းဆောင်နေကြပြီး ခေါင်းဆောင်များနှင့် အမှုဆောင်များအဖြစ် အစေခံနေကြသည်။ ကျွန်ုပ်သည် အဘယ်ကြောင့် မည်သည့်အရာမျှ မလုပ်ရဘဲ ကျန်နေခဲ့ရသနည်း။ တစ်ခါတစ်ရံ ဧဝံဂေလိ ဖြန့်ဝေခြင်းအားဖြင့် ကူညီပံ့ပိုးပေးသည့် အခန်းကဏ္ဍကိုသာ ကျွန်ုပ် ဆောင်ရွက်ရပြီး ကျွန်ုပ်ကို သက်သေခံခွင့်လည်း မပေးကြပါ။ ဘုရားအိမ်တော်က လူတို့ကို အရေးပါသည့် တာဝန်များအတွက် ရာထူးတိုးပေးသည့်အခါ ကျွန်ုပ်အတွက် မပါပါ။ ကျွန်ုပ်သည် စုဝေးပွဲများကိုပင် ဦးဆောင်ခွင့်မရခဲ့သကဲ့သို့ မည်သည့်တာဝန်မျှ ကျွန်ုပ်ကို မပေးကြပါ။ ကျွန်ုပ် အလွန်မတရားခံရသည်ဟု ခံစားရသည်။ ဤသည်မှာ ဘုရားသခင်က ကျွန်ုပ်အတွက် စီစဉ်ပေးသည့် ပတ်ဝန်းကျင်ဖြစ်သည်။ ကျွန်ုပ်၏ အသက်ရှင်ရခြင်း တန်ဖိုးကို အဘယ်ကြောင့် ကျွန်ုပ် မခံစားနိုင်ရသနည်း။ ဘုရားက အခြားသူများကို ချစ်သော်လည်း ကျွန်ုပ်ကို အဘယ်ကြောင့် မချစ်သနည်း။ အခြားသူများကို သူက ပျိုးထောင်ပေးသော်လည်း အဘယ်ကြောင့် ကျွန်ုပ်ကို မပျိုးထောင်ပေးသနည်း။ ဘုရားအိမ်တော်က ကျွန်ုပ်ကို ဝန်ထုပ်ပိုပေးသင့်ပြီး ကြီးကြပ်ရေးမှူးနေရာ သို့မဟုတ် တစ်စုံတစ်ခု ပေးသင့်သည်။ ထိုသို့ဖြင့် ကျွန်ုပ်သည် သမ္မာတရား လိုက်စားဖို့ စိတ်ပါဝင်စားမှု အနည်းငယ် ရှိမည် ဖြစ်သည်။ စိတ်ပါဝင်စားမှုမရှိဘဲနှင့် သမ္မာတရားကို ကျွန်ုပ် မည်သို့ လိုက်စားနိုင်မည်နည်း။ လူတို့သည် သမ္မာတရား လိုက်စားဖို့ စိတ်ပါဝင်စားမှု အနည်းငယ် အမြဲ လိုအပ်ကြသည်။ ယင်းကို လိုက်စားခြင်း၏ အကျိုးကျေးဇူးများကို ကျွန်ုပ်တို့ မြင်နိုင်ဖို့လိုသည်။ လူတို့တွင် ပြောင်းလဲဖို့လိုသည့် ဖောက်ပြန်ပျက်စီးသော စိတ်သဘောထားများရှိသည်ကို ကျွန်ုပ် သိပါသည်။ ပြီးလျှင် သမ္မာတရား လိုက်စားခြင်းက ကောင်းမွန်သည့် အရာတစ်ခုဖြစ်ကြောင်း၊ ယင်းက ကယ်တင်ခံရပြီး စုံလင်စေခြင်းခံရခွင့်ပေးကြောင်းကို ကျွန်ုပ်သိသည်။ သို့သော် အရေးပါသည့် မည်သည့်အရာအတွက်မျှ ကျွန်ုပ် အသုံးပြုမခံရသကဲ့သို့ သမ္မာတရားလိုက်စားဖို့ လှုံ့ဆော်မှု ကျွန်ုပ် မခံစားရပါ။ ညီအစ်ကို မောင်နှမများက ကျွန်ုပ်ကို လေးစားပြီး အားပေးကြသည့်အခါ သမ္မာတရားကို ကျွန်ုပ် စတင်လိုက်စားမည်။ ထိုအခါ အလွန်နောက်ကျမည်မဟုတ်ပါ” ဟု ဆိုကြသည်။ ဤလူစားမျိုး ရှိသည် မဟုတ်လော။ (ရှိပါသည်။) ၎င်းတို့နှင့် ပတ်သက်၍ ပြဿနာမှာ အဘယ်နည်း။ ပြဿနာမှာ ၎င်းတို့က အဆင့်အတန်းနှင့် နာမည် လိုချင်ကြပေသည်။ ၎င်းတို့သည် သမ္မာတရားကို ချစ်သောသူများ မဟုတ်သည့်တိုင် ဘုရားအိမ်တော်တွင်နာမည်နှင့် ရာထူးတစ်ခု လိုချင်ကြသည်မှာ သိသာထင်ရှားပေသည်။ ဤသည်မှာ အရှက်မဲ့သည် မဟုတ်လော။ ယင်းမှာ အလုပ်လုပ်ပေးသူတစ်ဦးဖြစ်ဖို့ သင့်အတွက် အတော်လုံလောက်သော အရာတစ်ခု ဖြစ်၏။ သင်သည် သစ္စာရှိသော အလုပ်လုပ်ပေးသူတစ်ဦးဖြစ်လာနိုင်ခြင်း ရှိမရှိမှာမူ မသေချာပေ။ ယင်းမှာ သင့်အဖို့ အဘယ်ကြောင့် မရှင်းသနည်း။ သင်သည် အဆင့်အတန်းနှင့် နာမည်ရှိပါက ကယ်တင်ခံရလိမ့်မည်၊ သမ္မာတရား လိုက်စားသူတစ်ဦး ဖြစ်လိမ့်မည်ဟု သင်ထင်သလော။ သင်၏ ဤခံယူချက်များသည် ခိုင်လုံသလော။ (မခိုင်လုံပါ။) ဤလူများသည် ထင်ပေါ်ချင်ကြသည်၊ အရေးပါချင်ကြပြီး ၎င်းတို့ ဆန္ဒများ မပြည့်သည့်အခါ ဘုရားသခင်က တရားမျှတခြင်းမရှိကြောင်း၊ လူတို့ကို ဆက်ဆံရာတွင် ဘက်လိုက်ကြောင်း၊ သူ၏အိမ်တော်သည် ၎င်းတို့ကို မြှင့်တင်ပေးခြင်းမရှိကြောင်း၊ ညီအစ်ကို မောင်နှမများက ၎င်းတို့ကို ရွေးကောက်ခြင်းမရှိကြောင်း စောဒကတက်ကြသည်။ ဤအရာများသည် လူတစ်ဦး သမ္မာတရား လိုက်စားဖို့အလို့ငှာ လိုအပ်သည့် အခြေခံအုတ်မြစ် သေချာပေါက်ကို မဟုတ်လောက်ပေ။ သမ္မာတရား လိုက်စားသူတစ်ဦးကို အားလုံးက လက်ခံယုံကြည်ရမည်ဖြစ်ပြီး ညီအစ်ကို မောင်နှမများက လေးစားရမည်ဟု ဘုရားနှုတ်ကပတ်တော်များထဲမှ တစ်နေရာရာတွင် ဆိုထားသလော။ သို့မဟုတ် အရေးပါသည့် တာဝန်တစ်ခုကို ၎င်းတို့ ယူနိုင်မည်ဖြစ်ပြီး အရေးပါသည့် အလုပ်လုပ်နိုင်ရမည်ဖြစ်ကာ ဘုရားအိမ်တော်အဖို့ ကြီးမားသည့် အထောက်အပံ့လည်း ပြုလုပ်နိုင်ရမည်ဟု ဆိုထားသလော။ ထိုသို့သော လူများကသာ သမ္မာတရားကို လိုက်စားနိုင်ကြောင်း၊ ၎င်းတို့သာ သမ္မာတရားကို လိုက်စားဖို့ သင့်တော်ကြောင်း ဘုရားနှုတ်ကပတ်တော်များက ဆိုသလော။ ထိုလူများသာ သမ္မာတရား လိုက်စားခြင်းအတွက် စံများကို ပြည့်မီကြောင်း၊ ၎င်းတို့သာ သမ္မာတရား စစ်မှန်မှုထဲသို့ ဝင်ရောက်နိုင်ကြောင်း၊ သို့မဟုတ် အဆုံးတွင် ၎င်းတို့သာ ကယ်တင်ခံရနိုင်ကြောင်း ဘုရားနှုတ်ကပတ်တော်များက ဆိုသလော။ ဘုရားနှုတ်ကပတ်တော်များရှိ တစ်နေရာရာတွင် ဤအရာကို ရေးသားထားသလော။ (မရေးထားပါ။) ဤလူစားမျိုး ပြုလုပ်သော ပြောဆိုချက်သည် မခိုင်လုံသည်မှာ သိသာထင်ရှား၏။ သို့ဆိုလျှင် ၎င်းတို့သည် အဘယ်ကြောင့် ဤအရာများကို ပြောဆိုကြသနည်း။ သမ္မာတရား မလိုက်စားခြင်းအတွက် ဆင်ခြေများ ပေးနေကြခြင်း မဟုတ်လော။ (ဟုတ်ပါသည်။) ၎င်းတို့သည် အဆင့်အတန်းနှင့် ဂုဏ်ကို ချစ်မြတ်နိုးကြသည်။ ၎င်းတို့သည် ဘုရားသခင်၌ မိမိတို့၏ ယုံကြည်မှုတွင် နာမည်ဂုဏ်သတင်း၊ ကိုယ်ရေးကိုယ်တာ အကျိုးအမြတ်နောက်လိုက်ပြီး အဆင့်အတန်း လိုက်စားခြင်းအကြောင်းကိုသာ အရေးစိုက်ကြသည်။ ဤအရာကို ထုတ်ဖော်ပြောဆိုဖို့က ရှက်စရာဖြစ်မည်ဟု ၎င်းတို့ ခံစားရသောကြောင့် သမ္မာတရား မလိုက်စားခြင်းအတွက် မိမိတို့ကိုယ်ကိုယ် ခုခံကာကွယ်ပြောဆိုကာ အသင်းတော်အပေါ်၊ ညီအစ်ကို မောင်နှမများနှင့် ဘုရားသခင်အပေါ် အပြစ်ဖို့လျက် ကျိုး‌ကြောင်းပြချက် တစ်ပုံတစ်ခေါင်းကို စိတ်ကူးရကြသည်။ ဤသည်မှာ ရက်စက်ယုတ်မာသည် မဟုတ်လော။ ၎င်းတို့သည် အပြစ်မဲ့သူများကို စွပ်စွဲကာ အပြစ်ဖို့သည့် ဆိုးယုတ်သောလူများ ဖြစ်သည် မဟုတ်လော။ (ဟုတ်ပါသည်။) ၎င်းတို့သည် မလျော်ကန်သော ပြဿနာများ ဖန်တီးနေပြီး ယုတ္တိမရှိသည့် တောင်းဆိုချက်များဖြင့် အခြားသူများကို အနှောင့်အယှက်ပေးနေ၏။ ၎င်းတို့သည် အသိတရား၊ သို့မဟုတ် ဆင်ခြင်တုံတရား လုံးလုံးလျားလျား မရှိပေ။ သမ္မာတရား မလိုက်စားခြင်းသည် သူ့ကိုယ်၌က အတော်အတန် ဆိုးရွားနေပြီးသားဖြစ်သည့်တိုင် ၎င်းတို့ကပါ အချေအတင် ဆွေးနွေးပြီး အကျပ်တွေ့စေရန် ကြိုးစားကြလေသည်။ ယင်းမှာ အမှန်တကယ်ကို ယုတ္တိမတန်သည် မဟုတ်လော။ သမ္မာတရားကို လိုက်စားခြင်းသည် မိမိစိတ်ဆန္ဒအလျောက်ဖြစ်သည်။ သင်သည် သမ္မာတရားကို ချစ်လျှင် သန့်ရှင်းသောဝိညာဉ်တော်က သင့်ထံတွင် အလုပ်လုပ်လိမ့်မည်။ သင်သည် သမ္မာတရားကို ချစ်သောအခါ၊ သင့်အပေါ်သို့ မည်သည့်ညှဉ်းပန်းနှိပ်စက်မှု၊ သို့မဟုတ် အတိဒုက္ခကျရောက်ပါစေ သင်သည် ဘုရားသခင်ထံ ဆုတောင်းပြီး ဘုရားသခင်ကို အမှီပြုသောအခါ၊ သင့်ကိုယ်သင် ဆင်ခြင်သုံးသပ်ပြီး သင့်ကိုယ်သင် သိမြင်ဖို့ ကြိုးစားသောအခါ၊ ပြီးလျှင် သင့်ထံတွင် သင်တွေ့ရှိသည့် ပြဿနာများကို ဖြေရှင်းဖို့ သမ္မာတရားကို သင် တက်ကြွစွာ ရှာဖွေပြီး သင်၏ တာဝန်ကို ပြည့်ပြည့်ဝဝ ထမ်းဆောင်နိုင်သောအခါ သင်သည် သင်၏ သက်သေခံချက်တွင် ခိုင်မာစွာ ရပ်တည်နိုင်စွမ်းရှိလိမ့်မည်။ လူတို့သည် သမ္မာတရားကို ချစ်မြတ်နိုးသောအခါ ဤသရုပ်သကန်အားလုံးသည် ၎င်းတို့ထံ၌ အလိုအလျောက် ဖြစ်ပေါ်လာသည်။ ယင်းတို့အားလုံးသည် မိမိဆန္ဒအလျောက်၊ ဝမ်းမြောက်စွာဖြင့် အကျပ်ကိုင်ခံရခြင်းမရှိဘဲ၊ မည်သည့် အပိုဆောင်းအခြေအနေတစ်ခုမျှ မပါဘဲ ဖြစ်ပေါ်သည်။ လူများသည် ဘုရားသခင်နောက်သို့ ဤနည်းဖြင့် လိုက်လျှောက်နိုင်လျှင် အဆုံးတွင် ၎င်းတို့သည် သမ္မာတရားနှင့် အသက်တို့ ရရှိမည်ဖြစ်သည်။ ၎င်းတို့သည် သမ္မာတရား စစ်မှန်မှုထဲသို့ ဝင်ရောက်လိမ့်မည်ဖြစ်ပြီး လူသားပုံသဏ္ဌာန်ကို အသက်ရှင်နေထိုင်ကြမည် ဖြစ်သည်။ သမ္မာတရား လိုက်စားရန်အလို့ငှာ နောက်ထပ် သတ်မှတ်ချက်များကို ဖြည့်ဆည်းဖို့ သင် လိုအပ်သလော။ မလိုအပ်ပါ။ ဘုရားသခင်ကို ယုံကြည်မှုသည် ဆန္ဒအလျောက်ဖြစ်သည်၊ အကြင်သူက မိမိအတွက် ရွေးချယ်သောအရာတစ်ခု ဖြစ်သည်။ သမ္မာတရားကို လိုက်စားခြင်းသည် လုံးဝ သဘာဝကျပြီး ကျိုးကြောင်းခိုင်လုံမျှတသည်။ ဘုရားသခင်က လက်ခံသည်။ သမ္မာတရား မလိုက်စားသောသူတို့သည် ဇာတိပကတိ၏ အပျော်အပါးများကို စွန့်လွှတ်ရန် မလိုမလားရှိနေကြပြီး ဘုရားသခင်၏ ကောင်းချီးများကို ရရှိလိုကြဆဲ ဖြစ်သော်လည်း အချို့သော ဘေးဒုက္ခများနှင့် ညှဉ်းပန်းနှိပ်စက်မှုကို ရင်ဆိုင်ရသည့်အခါ၊ သို့မဟုတ် လှောင်ပြောင်သရော်မှုနှင့် အသရေဖျက်ခြင်း အနည်းငယ်ကို ရင်ဆိုင်ရသည့်အခါ ၎င်းတို့သည် အပျက်သဘောဆောင်ကာ အားနည်းလာကြပြီး ဘုရားသခင်ကို ယုံကြည်ရန်၊ သို့မဟုတ် သူ့နောက်လိုက်ရန် ဆန္ဒမရှိကြတော့ချေ။ သူ့ကို အပြစ်တင်ပြီး ငြင်းပင်ငြင်းပယ်နိုင်သည်။ ဤသည်မှာ မလျော်မကန် ဖြစ်သည် မဟုတ်လော။ ၎င်းတို့သည် ကောင်းချီးခံစားရန် ဆန္ဒရှိကြသည့်တိုင် ဇာတိပကတိ၏ အပျော်အပါးများကို လိုက်စားကြဆဲ ဖြစ်ပြီး ဘေးဒုက္ခများ၊ သို့မဟုတ် ညှဉ်းပန်းနှိပ်စက်မှု တစ်ခုခုနှင့် တွေ့ရသည့်အခါ ဘုရားသခင်ကို အပြစ်တင်ကြသည်။ ယင်းမှာ သမ္မာတရား မလိုက်စားသည့် ဤလူများ ယုတ္တိမတန်ပုံ ဖြစ်သည်။ ၎င်းတို့အတွက် ဘုရားသခင်နောက်သို့ အဆုံးထိတိုင် လိုက်ဖို့ ခက်ခဲလိမ့်မည်။ ဘေးဒုက္ခများ သို့မဟုတ် ညှဉ်းပန်းနှိပ်စက်မှုအချို့ကို တွေ့ရသည်နှင့်တစ်ပြိုင်နက် ၎င်းတို့ ဖော်ထုတ်ခံရကာ ဖယ်ရှားရှင်းလင်းခံရလိမ့်မည် ဖြစ်သည်။ ဤသို့သော လူများစွာရှိသည်။...ဘုရားသခင်ကို ယုံကြည်ခြင်းတွင် သင်၏ အကြောင်းပြချက်က မည်သို့ဖြစ်စေ ဘုရားသခင်သည် နောက်ဆုံးတွင် သင်၏ အဆုံးသတ်ကို သမ္မာတရားကို သင်ရရှိပြီးခြင်း ရှိမရှိအပေါ်တွင် အခြေခံပြီး ဆုံးဖြတ်လိမ့်မည်ဖြစ်သည်။ သမ္မာတရားကို သင်မရရှိသေးလျှင် သင်ပြောသော ကျိုးကြောင်းပြချက်များ၊ သို့မဟုတ် ဆင်ခြေများက တစ်ခုမျှ ခိုင်လုံမည်မဟုတ်ပေ။ သင်ကြိုက်သလို အကြောင်းပြဖို့ ကြိုးစားလော့။ သင်ကျေနပ်သလို သင့်ဘာသာ ပြဿနာရှာလော့။ ဘုရားသခင်က ဂရုစိုက်မည်လော။ ဘုရားသခင်က သင့်ကို စကားပြောမည်လော။ သူသည် သင်နှင့် ငြင်းခုံပြီး ဆွေးနွေးမည်လော။ သင်နှင့် တိုင်ပင်မည်လော။ အဖြေက အဘယ်နည်း။ မဟုတ်ပေ။ ဘုရားသခင်က ထိုသို့ လုံးဝ လုပ်မည် မဟုတ်ပေ။ သင်၏ အကြောင်းပြချက်က မည်မျှခိုင်မာသည်ဖြစ်စေ ခြေခြေမြစ်မြစ် ရှိမည်မဟုတ်ပေ။ သင်သည် ဘုရားသခင်၏ ရည်ရွယ်ချက်များကို အထင်လွဲကာ မျိုးစုံသော အကြောင်းပြချက်များနှင့် ဆင်ခြင်များကို ပေးလျှင် သမ္မာတရားကို သင်လိုက်စားဖို့ မလိုအပ်ဟု မထင်ရပေ။ သင့်ထံတွင် ဖြစ်ပျက်သော အခြေအနေများအားလုံးနှင့် ကိစ္စရပ်တိုင်းတွင် သင်သည် သမ္မာတရားကို ရှာဖွေနိုင်ပြီး နောက်ဆုံးတွင် သမ္မာတရား စစ်မှန်မှုအတွင်းသို့ ဝင်ရောက်မှုကိုရရှိနိုင်ကာ သမ္မာတရားကို ရရှိနိုင်ဖို့ ဘုရားသခင် အလိုတော်ရှိသည်။ သင့်အတွက် ဘုရားသခင်က မည်သည့်အခြေအနေကို စီစဉ်ပေးပြီးဖြစ်စေ၊ မည်သည့်လူများနှင့် ဖြစ်ရပ်များကို သင်တွေ့ကြုံရသည်ဖြစ်စေ၊ ပြီးလျှင် မည်သည့်အခြေအနေတွင် သင်ရောက်ရှိနေပါစေ၊ ယင်းတို့ကို ရင်ဆိုင်ရန် ဘုရားသခင်ထံ ဆုတောင်းပြီး သမ္မာတရားကို ရှာဖွေသင့်သည်။ ယင်းတို့သည် သမ္မာတရားကို လိုက်စားရာတွင် သင်ယူသင့်သည့် သင်ခန်းစာများ အတိအကျဖြစ်သည်။ သင်သည် ဤအခြေအနေများကို ရုန်းထွက်ရန်၊ ရှောင်ရန်၊ ငြင်းဆန်ရန်၊ ခုခံရန် ဆင်ခြေများ အစဉ်သဖြင့် ရှာဖွေလျှင် ဘုရားသခင်က သင့်ကို လက်လျှော့လိမ့်မည်။ ဘုရားသခင်က သင့်ကို အရေးမစိုက်လျှင် သင်သည် ကယ်တင်ခြင်းရဖို့ အခွင့်အရေး ဆုံးရှုံးရလိမ့်မည်ဖြစ်သဖြင့် ကျိုးကြောင်းပြပြောခြင်း၊ သို့မဟုတ် ပေကတ်ခြင်း၊ သို့မဟုတ် ပြောရဆိုရခက်ခြင်းတို့သည် လုံးဝ အကျိုးမရှိချေ။ ဘုရားသခင်အတွက် ဖြေရှင်း၍မရနိုင်သည့် ပြဿနာမရှိပေ။ ဘုရားသခင်သည် လူတစ်ယောက်ချင်းစီတိုင်းအတွက် အစီအစဉ်များ ပြုလုပ်ပြီးဖြစ်ကာ ယင်းတို့ကို ကိုင်တွယ်ရန် နည်းလမ်းရှိသည်။ သင်၏ အကြောင်းပြချက်များနှင့် ဆင်ခြေများက အကြောင်းခိုင်လုံခြင်း ရှိမရှိကို ဘုရားသခင်က ဆွေးနွေးမည်မဟုတ်။ သင့်ကိုယ်သင် ခုခံကာကွယ်ရာတွင် သင်ပြောဆိုသည့် သင်၏ ချေပချက်က ယုတ္တိရှိမရှိကို နားထောင်မည်မဟုတ်ပေ။ “ဘုရားနှုတ်ကပတ်တော်များသည် သမ္မာတရားဖြစ်သလော။ သင့်တွင် ဖောက်ပြန်ပျက်စီးသော စိတ်သဘောထားရှိသလော။ သမ္မာတရားကို သင်လိုက်စားသင့်သလော”ဟူ၍သာ သူက သင့်ကို မေးလိမ့်မည်ဖြစ်သည်။ သင်သည် အချက်အလက်တစ်ခုကို ရှင်းရှင်းလင်းလင်း သိဖို့သာလိုသည်။ ဘုရားသခင်သည် သမ္မာတရားဖြစ်သည်။ သင်သည် ဖောက်ပြန်ပျက်စီးသော လူသားတစ်ယောက်ဖြစ်၏။ ထို့ကြောင့် သမ္မာတရားကို ရှာဖွေရန် သင့်ဘာသာ လုပ်ဆောင်သင့်သည်။ မည်သည့်ပြဿနာ၊ သို့မဟုတ် အခက်အခဲ၊ မည်သည့်အကြောင်းပြချက်၊ သို့မဟုတ် မည်သည့်ဆင်ခြေမျှ အကြောင်းခိုင်လုံခြင်းမရှိပေ။ သမ္မာတရားကို သင်လက်မခံလျှင် သင် ပျက်စီးလိမ့်မည်ဖြစ်သည်။ သမ္မာတရား လိုက်စားကာ ထိုသမ္မာတရား၏ စစ်မှန်မှုထဲသို့ ဝင်ရောက်ဖို့ လူတစ်ဦး ပေးဆပ်သည့် မည်သည့် အဖိုးအခမဆိုသည် ထိုက်တန်၏။ ဘုရားနှုတ်ကပတ်တော်များနှင့် သမ္မာတရားသည် ၎င်းတို့ ရယူသင့်သည့် အသက်ဖြစ်ပြီး မည်သည့်အရာနှင့်မျှ လဲလှယ်၍ မရနိုင်သည့် အသက်ဖြစ်သောကြောင့် လူတို့သည် သမ္မာတရားကို လက်ခံပြီး အသက်ကို ရရှိဖို့အတွက် မိမိတို့၏ ဆင်ခြေများ၊ ကျိုးကြောင်းပြချက်များနှင့် ပြဿနာများအားလုံးကို လက်လွှတ်သင့်သည်။ ဤအခွင့်အရေးနှင့် သင် လွဲချော်ပါက သင်၏ တစ်သက်လုံး ထိုအရာကို သင် နောင်တရရုံသာ ရှိလိမ့်မည်မဟုတ်ချေ။ ယင်းသည် နောင်တရရုံမျှ ကိစ္စ မဟုတ်၊ သင်သည် မိမိကိုယ်ကိုယ် တကယ်ကို လုံးဝ ပျက်စီးသွားစေပြီး ဖြစ်လိမ့်မည်။ သင့်အတွက် အဆုံးသတ်၊ သို့မဟုတ် ခရီးပန်းတိုင် ရှိတော့မည်မဟုတ်သကဲ့သို့ သင်သည် အဖန်ဆင်းခံတစ်ဦးအနေဖြင့် လမ်းဆုံးသွားပြီးဖြစ်လိမ့်မည်။ သင်သည် ကယ်တင်ခံရမည့် အခွင့်အရေးကို နောက်တစ်ကြိမ် လုံးဝ ရလိမ့်မည် မဟုတ်ပေ။ သင် နားလည်သလော။ (နားလည်ပါသည်။) သမ္မာတရား မလိုက်စားခြင်းအတွက် ဆင်ခြေများ၊ သို့မဟုတ် အကြောင်းပြချက်များကို သင် မရှာလေနှင့်။ ယင်းတို့သည် အသုံးမဝင်ပေ။ သင်သည် မိမိကိုယ်ကိုယ် လှည့်စားနေခြင်းသာ ဖြစ်သည်။

အချို့ခေါင်းဆောင်များသည် မည်သည့်အခါမျှ စည်းမျဉ်းနှင့်အညီ အလုပ်မလုပ်ကြဘဲ ၎င်းတို့က ထင်ရာစိုင်းကြကာ တစ်ဖက်သတ်ပြုမူပြီး အလျင်စလို လုပ်ဆောင်ကြသည်။ ညီအစ်ကို မောင်နှမများက ဤအရာကို ထောက်ပြကောင်း ထောက်ပြနိုင်ပြီး “ခင်ဗျားက မလုပ်ခင်မှာ ဘယ်သူ့ကိုမှ တိုင်ပင်တယ်ဆိုတာ သိပ်မရှိဘူး။ ခင်ဗျားရဲ့ အကဲဖြတ်ချက်တွေ၊ ဆုံးဖြတ်ချက်တွေကို ချပြီးတော့မှပဲ ကျွန်တော်တို့က အဲဒါတွေကို သိရတယ်။ ခင်ဗျား ဘာလို့ အဲဒါတွေကို တစ်ယောက်ယောက်နဲ့ မတိုင်ပင်တာလဲ။ ဆုံးဖြတ်ချက် ချတဲ့အခါမှာ ဘာလို့ ကျွန်တော်တို့ကို ကြိုပြီး အသိမပေးတာလဲ။ ခင်ဗျားလုပ်တာက မှန်တယ်ဆိုရင်တောင် ခင်ဗျားရဲ့ အစွမ်းအစက ကျွန်တော်တို့ထက် ပိုပြီး ကောင်းရင်တောင် ကျွန်တော်တို့ကို အရင်အသိပေးသင့်ပါတယ်။ အနည်းဆုံးတော့ ဘာတွေဖြစ်နေတယ်ဆိုတာ ကျွန်တော်တို့မှာ သိပိုင်ခွင့်ရှိပါတယ်။ ခင်ဗျား ကိုယ့်ဘာသာ အမြဲ ထင်ရာစိုင်းနေတာက အန္တိခရစ်တစ်ယောက်ရဲ့ လမ်းကြောင်းကို ခင်ဗျား လျှောက်နေတာပဲ” ဟူ၍ ပြောနိုင်သည်။ သင်သည် ဤအရာကို ခေါင်းဆောင်က အဘယ်သို့ပြန်ပြောသည်ကို ကြားရမည်နည်း။ “ကျွန်တော့်အိမ်မှာ ကျွန်တော်က သူဋ္ဌေးပဲ။ ကိစ္စအကြီးအငယ်အားလုံးကို ကျွန်တော်ပဲ ဆုံးဖြတ်တယ်။ အဲဒါက ကျွန်တော်က အကျင့်ဖြစ်နေပြီးသားပဲ။ ကျွန်တော့် ဆွေမျိုးသားချင်းတွေထဲက တစ်ယောက်ယောက်က ပြဿနာရှိတဲ့အခါ သူတို့က ကျွန်တော့်ဆီလာပြီး လုပ်ရမယ့်ဟာကို ဆုံးဖြတ်ခိုင်းကြတယ်။ ကျွန်တော်က ပြဿနာတွေ ဖြေရှင်းရာမှာ တော်တယ်ဆိုတာ သူတို့သိကြတယ်လေ။ ဒါကြောင့် ကျွန်တော့်မိသားစုရဲ့ ကိစ္စတွေမှာ ကျွန်တော်က ဦးဆောင်ရတာပေါ့။ အသင်းတော်ကို ကျွန်တော်ပါဝင်တုန်းက ကျွန်တော်က ကိစ္စတွေအတွက် စိတ်ပူစရာလိုမှာ မဟုတ်ဘူးလို့ ထင်ခဲ့တာ။ ဒါပေမဲ့လည်း ကျွန်တော်က ခေါင်းဆောင်အဖြစ် အရွေးခံခဲ့ရတယ်။ ကျွန်တော်က ဒီကံကို ပါလာတာတော့ မတတ်နိုင်ဘူးလေ။ ဘုရားက ကျွန်တော့်ကို ဒီကျွမ်းကျင်မှုပေးခဲ့တယ်။ တခြားလူတွေအတွက် ဆုံးဖြတ်ချက်တွေချဖို့နဲ့ ဦးဆောင်ကြီးကြပ်ပေးဖို့ ကျွန်တော် မွေးလာတာပါ” ဟူ၍ဖြစ်သည်။ ဤနေရာတွင် ဆိုလိုသည်မှာ သူသည် အရာရှိတစ်ယောက်ဖြစ်ဖို့ ကံပါလာပြီး အခြားလူများက ခြေလျင်တပ်သားများနှင့် အစေခံများဖြစ်ရန် မွေးဖွားလာကြသည်ဟုဖြစ်သည်။ သူသည် အဆုံးသတ် ဆုံးဖြတ်ပိုင်ခွင့်ရသင့်သည်ဟုလည်းကောင်း၊ အခြားလူများက သူ့ကို နားထောင်သင့်သည်ဟုလည်းကောင်း သူက ထင်၏။ ညီအစ်ကိုမောင်နှမများက ဤခေါင်းဆောင်၏ ပြဿနာကို မြင်ပြီး ထောက်ပြသည့်တိုင်အောင် သူက လက်ခံမည် မဟုတ်သကဲ့သို့ ပြုပြင်ခြင်းကိုလည်း လက်ခံမည်မဟုတ်ချေ။ သူ့ကို ထုတ်ပယ်ပစ်ရန်အတွက် ညီအစ်ကိုမောင်နှမများက ပွက်ပွက်ညံအောင် မတောင်းဆိုကြမချင်း သူက ယှဉ်ပြိုင်တိုက်ခိုက်ပြီး အာခံမည်ဖြစ်သည်။ ထိုအချိန်တစ်လျှောက်လုံးတွင်လည်း ထိုခေါင်းဆောင်သည် “ငါ့လို အစွမ်းအစမျိုးနဲ့ဆို ငါဘယ်သွားသွား ကြီးကြပ်ဖို့ ကံပါလာတာပဲ။ မင်းတို့လို အစွမ်းအစတွေနဲ့ဆိုရင် မင်းတို့ဟာ ကျွန်တွေ၊ အစေခံတွေပဲ အမြဲတမ်း ဖြစ်နေမှာပဲ။ သူများတွေရဲ့ အမိန့်ပေးတာခံရဖို့က မင်းတို့ရဲ့ ကံကြမ္မာပဲ” ဟူ၍ စဉ်းစားနေလိမ့်မည်ဖြစ်၏။ ဤသို့သောအရာများကို မကြာခဏ ပြောခြင်းအားဖြင့် သူသည် မည်သို့သောစိတ်သဘောထားမျိုးကို ထုတ်ဖော်ပြသနည်း။ ဤသည်မှာ ဖောက်ပြန်ပျက်စီးသည့် စိတ်သဘောထားဖြစ်သည်၊ မာနထောင်လွှားခြင်း၊ စိတ်ကြီးဝင်ခြင်း၊ အလွန်အကျူး အတ္တကြီးခြင်းဖြစ်သည်မှာ ရှင်းသည်။ သို့တိုင်အောင် သူသည် ဤအရာကို ခွန်အားတစ်ခု၊ အဖိုးတန် အရည်အချင်းတစ်ခုကဲ့သို့ အရှက်မရှိ ကြွားဝါပြီး ဟန်ထုတ်သည်။ လူတစ်ယောက်သည် ဖောက်ပြန်ပျက်စီးသည့် စိတ်သဘောထားတစ်ခုကို ဖွင့်ပြသောအခါ သူသည် မိမိကိုယ်ကို ဆင်ခြင်သုံးသပ်သင့်သည်။ မိမိ၏ ဖောက်ပြန်ပျက်စီးသော စိတ်သဘောထားကို သိပြီး နောင်တရသင့်သည်။ ပြီးလျှင် ယင်းကို ပုန်ကန်သင့်သည်။ ပြီးလျှင် သူသည် စည်းမျဉ်းများနှင့်အညီ လုပ်ဆောင်နိုင်သည်အထိ သမ္မာတရားကို လိုက်စားသင့်သည်။ သို့သော် ဤသည်မှာ ဤခေါင်းဆောင်က လက်တွေ့လုပ်ဆောင်သည့်ပုံ မဟုတ်ပေ။ ထိုအစား သူသည် မိမိ၏ ကိုယ်ပိုင်အမြင်နှင့် နည်းလမ်းများကို ဖက်တွယ်ထားကာ ပြုပြင်ပြောင်းလဲ၍ မရဘဲရှိနေသည်။ ထိုအပြုအမူများမှတစ်ဆင့် သူသည် သမ္မာတရားကို လုံးဝ လက်မခံဘဲ သမ္မာတရားကို လိုက်စားသောသူတစ်ဦးလုံးဝ မဟုတ်သည်ကို သင် မြင်နိုင်သည်။ သူသည် သူ့အား ဖော်ထုတ်ပြီး ပြုပြင်သူ မည်သူကိုမဆို နားမထောင်ဘဲ ထိုအစား မိမိအတွက် မှန်ကန်ကြောင်း ပြောဆိုမှုများစွာ ရှိနေဆဲဖြစ်၏။ “ဪ။ ကျွန်တော်က ဒီလိုပဲလေ။ ဒါက အရည်အချင်းနဲ့ ပါရမီလို့ခေါ်တယ်။ ခင်ဗျားတို့ထဲမှာ ဘယ်သူက ဒါတွေရှိလဲ။ ကျွန်တော်က ကြီးကြပ်ဖို့အတွက် ကံပါလာတာ။ ဘယ်ကိုသွားသွား ကျွန်တော်က ခေါင်းဆောင်ပဲ။ ကျွန်တော်က သူများတွေနဲ့ မတိုင်ပင်ဘဲ အရာရာကို ဆုံးဖြတ်ပိုင်ခွင့်ရထားပြီး ဆုံးဖြတ်ရတာကို အသားကျနေပြီ။ ဒါက ကျွန်တော့်စရိုက်လက္ခဏာပဲ။ ကျွန်တော့်ရဲ့ စန်းပေါ့” ဟူ၍ ဖြစ်သည်။ ဤသည်မှာ လက်လွတ်စပယ် အရှက်ကင်းမဲ့ခြင်း မဟုတ်သလော။ သူသည် ဖောက်ပြန်ပျက်စီးသည့် စိတ်သဘောထားရှိသည်ကို မဝန်ခံသလို လူသားကို တရားစီရင်ပြီး ဖော်ထုတ်သော ဘုရားနှုတ်ကပတ်တော်များကို သိသိသာသာကို အသိအမှတ်မပြုချေ။ ထိုသို့ဖြစ်မည့်အစား သူ၏ ကိုယ်ပိုင် မိစ္ဆာဒိဋ္ဌိအယူများနှင့် အတွေးမှားများကို သမ္မာတရားအဖြစ် မှတ်ယူသည်။ အခြားလူတိုင်းက ယင်းတို့အား လက်ခံပြီး ရိုသေလေးမြတ်အောင် သူ ကြိုးစား၏။ ဘုရားအိမ်တော်တွင် သမ္မာတရားက မအုပ်စိုးသင့်ဘဲ သူက အုပ်စိုးသင့်ကြောင်း၊ ဘုရားအိမ်တော်တွင် သူက ကြီးကြပ်စီမံသင့်ကြောင်း သူ၏ စိတ်ထဲတွင် ယုံကြည်သည်။ ဤသည်မှာ ပြောင်ပြောင်တင်းတင်း အရှက်ကင်းမဲ့ခြင်း မဟုတ်သလော။ သူသည် သမ္မာတရားကို လိုက်စားလိုသည်ဟု ပြောသော်လည်း သူ၏ အပြုအမူမှာမူ လုံးဝ ဆန့်ကျင်ဘက်ဖြစ်သည်။ သူသည် ဘုရားသခင်နှင့် သမ္မာတရားကို ကျိုးနွံနာခံသည်ဟုဆိုသော်လည်း အစဉ်သဖြင့် အာဏာကိုင်စွဲလိုသည်။ အဆုံးအဖြတ်ပေးပိုင်ခွင့်ရှိလိုသည်။ ညီအစ်ကိုမောင်နှမများအားလုံးကို သူ့ကို နာခံပြီး လိုက်နာစေလိုသည်။ သူလုပ်ဆောင်သည့်အရာက သင့်လျော်သည်ဖြစ်စေ၊ မသင့်လျော်သည်ဖြစ်စေ၊ သို့မဟုတ် စည်းမျဉ်းများနှင့် ညီသည်ဖြစ်စေ၊ မညီသည်ဖြစ်စေ ဂရုမထားဘဲ အခြားလူများက သူ့အား ကြီးကြပ်ခြင်းကို၊ သို့မဟုတ် အကြံပေးခြင်းကို ခွင့်ပြုမည်မဟုတ်ပေ။ ထိုအစား အခြားလူတိုင်းက သူ၏ စကားများနှင့် ဆုံးဖြတ်ချက်များကို အရေးစိုက်ပြီး နာခံရမည်ဟု ယုံကြည်သည်။ သူ၏ လုပ်ရပ်များကို လုံးဝ ဆင်ခြင်သုံးသပ်ခြင်းမရှိပေ။ ညီအစ်ကိုမောင်နှမများက သူ့ကို မည်သို့ အကြံပေးပြီး ကူညီသည်ဖြစ်စေ၊ ဘုရားအိမ်တော်က သူ့ကို မည်သို့ ပြုပြင်သည်ဖြစ်စေ၊ သို့မဟုတ် သူသည် သုံးလေးကြိမ် အထုတ်ခံရလျှင်ပင် သူ၏ ပြဿနာများကို ဆင်ခြင်သုံးသပ်ခြင်းမရှိပေ။ ဖြစ်ရပ်တိုင်းတွင် သူသည် သူ၏ ဤစကားကို ကိုင်စွဲထားသည်။ “ငါ့အိမ်မှာ ငါက အကြီးဆုံးပဲ။ ငါပဲ ဆုံးဖြတ်ချက်တွေအကုန်လုံးကို ချတယ်။ ကိစ္စအားလုံးမှာ ငါပဲ ဆုံးဖြတ်ခွင့်ရှိတယ်။ ဒါ ငါနဲ့ အသားကျနေတဲ့အရာပဲ။ တခြားနည်းလမ်းမရှိဘူး” ဟူ၍ ဖြစ်သည်။ သူသည် အမှန်ပင် အကျိုးသင့်အကြောင်းသင့် မရှိသလို ကယ်၍ မရနိုင်တော့ပေ။ သူသည် ဤအပျက်သဘောဆောင်သော ကျင့်သုံးမှုများကို အပြုသဘောဆောင်သောအရာများကဲ့သို့ ဝါဒဖြန့်နေရင်း မိမိကိုယ်ကို အလွန်အထင်ကြီးလျက်ရှိသည်။ သူသည် အလွန်ပင် အရှက်မဲ့သည်။ သူသည် သမ္မာတရားကို လုံးဝ လက်မခံသလို ပြုပြင်၍မရနိုင်ပေ။ ထို့ကြောင့် သူသည် သမ္မာတရားကို ချစ်ခြင်း၊ သို့မဟုတ် လိုက်စားခြင်းမရှိသည်ကို သေချာနိုင်သည်။ သူ၏ စိတ်နှလုံးတွင် သူသည် သမ္မာတရားကို အလွန်အမင်း မနှစ်မြို့သည့်အပြင် ရန်လိုသည်။ သူ၏ ဆန္ဒများကို ဖြည့်ဆည်းရန်၊ အဆင့်အတန်းရရှိရန် သူပေးဆပ်သည့် အဖိုးအခများနှင့် သူကြုံတွေ့ရသည့် ဆင်းရဲဒုက္ခများအားလုံးက အချည်းနှီးဖြစ်သည်။ ဘုရားသခင်က မည်သည့်အရာကိုမျှ လက်မခံပေ။ သူသည် ဤအရာကို ရွံမုန်းသည်။ ဤသည်မှာ သမ္မာတရားအပေါ် သူ၏ ဆန့်ကျင်မှုနှင့် ဘုရားသခင်အပေါ် အာခံခြင်းကို ဖော်ပြခြင်းဖြစ်သည်။ အကြင်သူသည် ဤအရာကို လုံးဝ သေချာနိုင်သလို သမ္မာတရားကို နားလည်သူအားလုံးကလည်း ဤအရာကို ပိုင်းခြားသိမြင်နိုင်သည်။

ဘုရားသခင်ကို နှစ်ချီယုံကြည်ခဲ့သော်လည်း သမ္မာတရား စစ်မှန်မှု မပိုင်ဆိုင်ကြသော လူအချို့လည်း ရှိသည်။ ၎င်းတို့သည် တရားဒေသနာများကို နှစ်ချီ နားထောင်ခဲ့ကြသော်လည်း သမ္မာတရားကို နားမလည်ကြချေ။ ၎င်းတို့သည် ညံ့ဖျင်းသော အစွမ်းအစရှိကြသော်လည်း ပြိုင်ဘက်ကင်းကြသည့် “ပါရမီများ” ကိုမူ ပိုင်ဆိုင်ကြလေသည်။ အလိမ်အညာများ ပြောခြင်းနှင့် ထိုအလိမ်အညာများကို ဖုံးဖိခြင်း၊ ပြီးလျှင် အခြားသူများကို အမွှမ်းတင်လွန်းသော စကားများဖြင့် ညာခိုင်းပြီး လှည့်စားခြင်းတို့ ဖြစ်သည်။ ၎င်းတို့သည် စကားဆယ်ခွန်းကျော် ပြောလျှင် ထိုစကားဆယ်ခွန်းကျော်လုံးက ဖောက်ပြန်မှုများ ရှိနေလိမ့်မည်။ စကားတစ်ခွန်းချင်းစီတွင် အတိုင်းအတာတစ်ခုထိ မသန့်စင်မှုများ ပါရှိလိမ့်မည်။ တိတိကျကျ ပြောရလျှင် ၎င်းတို့ ပြောသည့် မည်သည့်အရာမျှ မမှန်ပေ။ သို့ရာတွင် ၎င်းတို့တွင် ညံ့ဖျင်းသော အစွမ်းအစရှိပြီး အတော် လိမ္မာပုံရကြသောကြောင့် ၎င်းတို့က “ကျွန်ုပ်သည် သဘာဝအရ ကြောက်တတ်ကာ မာယာကင်းသော လူတစ်ဦး ဖြစ်ပြီး ကျွန်ုပ်၏ အစွမ်းအစ ညံ့ဖျင်းပါသည်။ ကျွန်ုပ် သွားသည့်နေရာတိုင်းတွင် အနိုင်ကျင့်ခံရပြီး လူတို့က ကျွန်ုပ်ကို အနိုင်ကျင့်ကြသည့်အခါ ထိုအရာကို ကျွန်ုပ် တောင့်ခံပြီး ဒုက္ခခံရုံသာရှိသည်။ ၎င်းတို့ကို ပြန်မပြောဝံ့ပါ၊ သို့မဟုတ် မတိုက်ခိုက်ဝံ့ပါ။ ကျွန်ုပ် လုပ်နိုင်သမျှမှာ ပုန်းကွယ်ကာ အရှုံးပေးပြီး သည်းညည်းခံလိုက်ဖို့သာ ရှိသည်။ ကျွန်ုပ်သ‌ည် ဘုရားနှုတ်ကပတ်တော်များက ပြောသည့် ‘ရိုးသားသော်လည်း မသိနားမလည်သော လူသား’ ဖြစ်သည်။ ကျွန်ုပ်သည် ဘုရားသခင်၏ လူများထဲမှ တစ်ဦး ဖြစ်သည်”ဟု တွေးကြသည်။ တစ်စုံတစ်ဦးက “သို့ဆိုလျှင် သင် အဘယ်ကြောင့် လိမ်ညာရသနည်း”ဟု ၎င်းတို့ကို မေးလျှင် ၎င်းတို့က “ကျွန်ုပ် မည်သည့်အချိန်တွင် လိမ်ညာသနည်း။ မည်သူ့ကို လှည့်စားခဲ့သနည်း။ ကျွန်ုပ် မလိမ်ညာခဲ့ပါ။ ကျွန်ုပ်ကဲ့သို့ မာယာကင်းသော လူတစ်ဦးသည် အဘယ်သို့ အလိမ်အညာတစ်ခု ပြောနိုင်မည်နည်း။ ကျွန်ုပ်၏ စိတ်သည် အမှုအရာများကို တုံ့ပြန်ဖို့ နှေးကွေးပြီး ကျွန်ုပ်လည်း ပညာတတ်ကြီး တစ်ဦး မဟုတ်ပါ။ မည်သို့ လိမ်ညာရမည်ကို မသိပါ။ အခြားနေရာမှ လှည့်ဖြားတတ်သော လူများသည် မျက်တောင်တစ်ချက်အခတ်တွင် ဆိုးယုတ်သော စိတ်ကူးနှင့် အကြံများ ထုတ်နိုင်ကြသည်။ ကျွန်ုပ်သည် ထိုသို့ ဉာဏ်မများသကဲ့သို့ အမြဲ အနိုင်ကျင့်ခံနေရသည်။ ထို့ကြောင့် ကျွန်ုပ်သည် ဘုရားသခင် ပြောသည့် ရိုးသားသောလူဖြစ်ပြီး သင်တို့အနေဖြင့် ကျွန်ုပ်ကို လူလိမ်၊ သို့မဟုတ် ကလိမ်ကကျစ်ကောင်ဟု ခေါ်ဆိုစရာ အကြောင်းရင်း မရှိပါ။ သင်တို့သည် ကျွန်ုပ်ကို အပုပ်ချရန် ကြိုးစားနေခြင်းသာ ဖြစ်သည်မှာ အလွန်ပင် ရိုးရှင်းလှသည်။ သင်တို့အားလုံးက ကျွန်ုပ်ကို အထင်သေးကြောင်း ကျွန်ုပ်သိသည်။ ကျွန်ုပ် နုံအပြီး ကျွန်ုပ်၏ အစွမ်းအစ ညံ့ဖျင်းသည်ဟု တွေးထင်သောကြောင့် သင်တို့ အားလုံးက ကျွန်ုပ်ကို အနိုင်ကျင့်ချင်ကြသည်။ ကျွန်ုပ်ကို အနိုင်မကျင့်သည့် တစ်ဦးတည်းသောသူမှာ ဘုရားသခင်ဖြစ်သည်၊ သူသည် ကျွန်ုပ်ကို ကျေးဇူးတော်ဖြင့် ဆက်ဆံသည်”ဟု ဆိုကြလိမ့်မည်။ ဤလူစားမျိုးသည် လိမ်ညာခြင်းကို ဝန်ခံလိမ့်မည် မဟုတ်ဘဲ ၎င်းတို့သည် ဘုရားသခင် ပြောသည့် ရိုးသားသောလူများဖြစ်သည်ဟု ပြောရန်ပင် ရဲတင်းမှုရှိကြပြီး ထိုပြောဆိုချက်နှင့်အတူ မိမိတို့ကိုယ်ကိုယ် ပလ္လင်ထက်သို့ ချက်ချင်း တင်ကြသည်။ ၎င်းတို့သည် သဘာဝအရ ရိုးသားသော်လည်း မသိနားမလည်သည့် လူများဖြစ်ကာ ဘုရားသခင်၏ ချစ်ခြင်းခံရသည်ဟု ယုံကြည်ကြသည်။ သမ္မာတရားကို ၎င်းတို့ လိုက်စားရန်၊ သို့မဟုတ် မိမိတို့ကိုယ်ကိုယ် သုံးသပ်ရန် မလိုဟု တွေးထင်ကြသည်။ ၎င်းတို့ မွေးဖွားကတည်းက ၎င်းတို့နှုတ်တွင် အလိမ်အညာ ရှာတွေ့နိုင်မည်မဟုတ်ဟု တွေးထင်ကြသည်။ မည်သူက မည်သည့်အရာကို ပြောသည်ဖြစ်စေ ၎င်းတို့သည် လိမ်ညာမှုကို မဝန်ခံကြဘဲ ထိုအစား ငြင်းခုံပြီး မိမိတို့ကိုယ်ကိုယ် ကာကွယ်ပြောဆိုရန် မပြောင်းလဲသည့် ဆင်ခြေဟောင်းများဖြင့် ရှင်းချက်ထုတ်တတ်သည်။ ၎င်းတို့သည် မိမိတို့ကိုယ်ကိုယ် သုံးသပ်ကြပြီလော။ သဘောတရားတစ်ခုအနေဖြင့် သုံးသပ်ကြပြီးဖြစ်သည်။ ထို “မိမိကိုယ်ကိုယ် သုံးသပ်ခြင်း”တွင် ၎င်းတို့ မည်သည့်အရာ တွေးလာမိကြသနည်း။ “ကျွန်ုပ်သည် ဘုရားသခင် ပြောသည့် ရိုးသားသော်လည်း မသိနားမလည်သော လူဖြစ်သည်။ ကျွန်ုပ်သည် အနည်းငယ် မသိနားမလည် ဖြစ်နိုင်သော်လည်း ရိုးသားသော လူတစ်ဦးဖြစ်သည်”ဟူ၍ ဖြစ်သည်။ ၎င်းတို့သည် ဂုဏ်ယူဝံ့ကြွားနေခြင်း မဟုတ်လော။ ၎င်းတို့အနေဖြင့် မသိနားမလည်သူတစ်ဦးဖြစ်သည်၊ သို့မဟုတ် ရိုးသားသောလူတစ်ဦးဖြစ်သည်ကို မသေချာကြသော်လည်း မိမိတို့ကိုယ်ကိုယ် ရိုးသားသောလူတစ်ဦးအဖြစ် ယူဆကြသည်။ ၎င်းတို့သည် မိမိတို့ကိုယ်ကိုယ် သိစိတ်ရှိကြပါသလော။ တစ်စုံတစ်ဦးသည် အနိုင်ကျင့်ခံရပြီး သူရဲဘောကြောင်သော ဘဝတစ်ခုကို အသက်ရှင်သည့် မိုက်မဲသောလူတစ်ဦးဖြစ်ပါက ယင်းမှာ ၎င်းအနေဖြင့် လူကောင်းတစ်ဦး သေချာပေါက် ဖြစ်သည်ဟု ဆိုလိုသလော။ ပြီးလျှင် အခြားလူများက လူတစ်ဦးကို လူကောင်းတစ်ဦးအဖြစ် ရှုမြင်ပါက ယင်းမှာ ထိုသူသည် သမ္မာတရားကို လိုက်စားဖို့ မလိုအပ်ဟု ဆိုလိုသလော။ ထိုသို့သော လူသည် တစ်နည်းနည်းဖြင့် သမ္မာတရားကို အလိုအလျောက် ပိုင်ဆိုင်ကြသလော။ လူအချို့က “ကျွန်ုပ်သည် အတော်လေး မာယာကင်းသောလူတစ်ဦး ဖြစ်သည်။ အမှန်တရားကို ပြောဖို့ ကျွန်ုပ် အမြဲကြိုးစားသည်။ ကျွန်ုပ်သည် အနည်းငယ် မသိနားမလည်ခြင်းသာ ဖြစ်သည်။ သမ္မာတရားကို လိုက်စားရန် မလိုပါ။ ကျွန်ုပ်သည် နဂိုကတည်းက သဘောကောင်းပြီး ရိုးသားသော လူတစ်ဦး ဖြစ်သည်”ဟု ဆိုကြသည်။ ဤအရာကို ပြောခြင်းအားဖြင့် ၎င်းတို့သည် သမ္မာတရားကို ပိုင်ဆိုင်ပြီး ဖောက်ပြန်ပျက်စီးသော စိတ်သဘောထားမရှိဟု သွယ်ဝိုက်ညွှန်းဆိုနေကြခြင်း မဟုတ်လော။ လူသားမျိုးနွယ်အားလုံးသည် စာတန်၏ ဖောက်ပြန်ပျက်စီးစေခြင်းကို နက်နက်ရှိုင်းရှိုင်း ခံကြရပြီး ဖြစ်သည်။ လူခပ်သိမ်းတို့သည် ဖောက်ပြန်ပျက်စီးသော စိတ်သဘောထားများ ရှိကြပြီး အကြင်သူသည် ဖောက်ပြန်ပျက်စီးသော စိတ်သဘောထား ပိုင်ဆိုင်သည့်အခါ လိမ်ညာ၊ လှည့်စားနိုင်ပြီး၊ ၎င်းတို့ ကြိုက်သည့် မည်သည့်အချိန်တွင်မဆို လှည့်ဖြားနိုင်သည်။ ၎င်းတို့သည် မာနထောင်လွှားသော စိတ်သဘောထားကို ပွင့်အံထုတ်လျက် မိမိတို့၏ မပြောပလောက်သည့် အောင်မြင်မှု၊ သို့မဟုတ် အထောက်အကူပြုသော ဆောင်ရွက်မှုအချို့ကိုပင် ကြွားလုံးထုတ်နိုင်သည်။ ၎င်းတို့သည် ဘုရားသခင်နှင့် ပတ်သက်သော အယူအဆများ၊ သူ့အပေါ် လွန်ကဲသော တောင်းဆိုချက်များဖြင့် တစ်ချိန်လုံး ပြည့်နေကြပြီး သူ့ကို အကျိုးသင့်အကြောင်းသင့်ပြောရန် ကြိုးစားနေကြသည်။ ဤသည်တို့မှာ ပြဿနာများ မဟုတ်လော။ ဤသည်မှာ ဖောက်ပြန်ပျက်စီးသော စိတ်သဘောထား မဟုတ်လော။ ဤအရာသည် ဆန်းစစ်ခြင်း လိုအပ်သည် မဟုတ်လော။ လိုအပ်ပေ၏။ သို့တိုင် ဤလူများသည် အခြားသူများကို မည်သည့်အခါတွင်မျှ မလိမ်ညာသည့်၊ သို့မဟုတ် မလှည့်စားသည့် ရိုးသားသော လူများအဖြစ် မိမိကိုယ်ကို ဘိသိက်ပေးနှင့်ကြပြီးသား ဖြစ်သည်။ ၎င်းတို့တွင် လှည့်ဖြားတတ်သော စိတ်သဘောထားများ မရှိကြသောကြောင့် သမ္မာတရား လိုက်စားရန် မလိုအပ်ကြောင်း ထုတ်ဖော်ပြောကြသည်။ ထို့ကြောင့် ဤသို့ ပြုမူနေထိုင်သူ မည်သူမျှသည် သမ္မာတရားကို လိုက်စားနေခြင်းမရှိသကဲ့သို့ သူတို့တစ်ဦးမျှ သမ္မာတရား စစ်မှန်မှုထဲသို့ မဝင်ရောက်ကြလေပြီ။ ဘုရားသခင်ထံ ၎င်းတို့ ဆုတောင်းသောအခါ ၎င်းတို့၏ မိုက်မဲမှုအကြောင်း၊ ၎င်းတို့ အမြဲ အနိုင်ကျင့်ခံနေရသည့်အကြောင်း၊ ၎င်းတို့၏ အထူးသဖြင့် ညံ့ဖျင်းသည့် အစွမ်းအစအကြောင်း မကြာခဏ ခါးခါးသီးသီး ငိုကြွေးမြည်တမ်းကြသည်။ “ဘုရားသခင်၊ ကိုယ်တော်တစ်ပါးတည်းသာ ကျွန်ုပ်ကို ချစ်ပါသည်။ ကိုယ်တော်တစ်ပါးတည်းသာ ကျွန်ုပ်အပေါ် သနားခြင်းရှိပြီး သဘောထားကြီးစွာ ကျွန်ုပ်ကို ဆက်ဆံပါသည်။ လူအားလုံးက ကျွန်ုပ်ကို အနိုင်ကျင့်ပြီး ကျွန်ုပ် လူလိမ်ဖြစ်သည်ဟု ဆိုကြသော်လည်း ကျွန်ုပ် လူလိမ်မဟုတ်ပါ” ဟူ၍ဖြစ်သည်။ ထို့နောက်တွင် မျက်ရည်သုတ်ကာ ထရပ်လိုက်ပြီး အခြားသူများကို ၎င်းတို့ မြင်သည့်အခါ “သင်တို့တစ်ဦးမျှ ဘုရားသခင်၏ ချစ်ခြင်း မခံရပါ။ ငါတစ်ဦးတည်းသာ ခံရသည်”ဟု တွေးကြသည်။ ဤလူများသည် မိမိတို့ကိုယ်ကိုယ် အထင်ကြီးကြပြီး ဘုရားသခင် ပြောသည့် အပြုအမူအမျိုးမျိုးနှင့် ဖောက်ပြန်ပျက်စီးသော စိတ်သဘောထားများ ပွင့်အံထွက်ခြင်း တစ်ခုတလေကို ၎င်းတို့ ပြကြသည်ဟု လက်မခံကြချေ။ တိကျသည့် ပြဿနာတစ်ခု ၎င်းတို့ပေါ် ကျရောက်ပြီး ဖောက်ပြန်ပျက်စီးသော အခြေအနေ၊ သို့မဟုတ် ၎င်းတို့အတွင်း ပွင့်အံထွက်ခြင်းကို ဖြစ်စေသည့်အချိန်တွင်ပင် ခဏမျှ စဉ်းစားပြီးသည့်နောက်တွင် ထိုအရာကို နှုတ်ဖြင့်သာ ဝန်ခံလိုက်ကြကာ ထိုကိစ္စနှင့်ပတ်သက်၍ ပစ်ထားလိုက်ကြသည်။ သမ္မာတရားကို ၎င်းတို့ လုံးဝ မရှာဖွေကြသကဲ့သို့ ၎င်းတို့သည် ဖောက်ပြန်ပျက်စီးခြင်းရှိပြီး ဖောက်ပြန်ပျက်စီးသော လူသားများဖြစ်သည်ဆိုသည့် အချက်ကို လက်မခံကြချေ။ အထူးဖြစ်စဉ်တစ်ခုခုတွင် ဖောက်ပြန်ပျက်စီးသော စိတ်သဘောထားတစ်ခုကို ၎င်းတို့ ဖွင့်ထုတ်ကြခြင်းကို သာ၍ ဝန်ခံဦးမည်မဟုတ်သည်မှာ အမှန်ဖြစ်၏။ ၎င်းတို့က ပြဿနာမည်မျှ ဖြစ်ပေါ်စေသည်ဖြစ်စေ၊ ဖောက်ပြန်ပျက်စီးသော စိတ်သဘောထားများ မည်မျှ ဖွင့်ထုတ်ကြသည်ဖြစ်စေ မပြောင်းလဲသည့်အရာကို အမြဲပြောလျက် နိဂုံးချုပ်ကြသည်။ “ကျွန်ုပ်သည် ဘုရားသခင်ပြောသည့် ရိုးသားသော်လည်း မသိနားမလည်သောလူဖြစ်သည်။ ကျွန်ုပ်သည် သူ၏ သနားခြင်းခံရသူဖြစ်ပြီး သူသည် ကျွန်ုပ်ကို ကြီးမားစွာ ကောင်းချီးပေးလိမ့်မည်”ဟူ၍ ဖြစ်သည်။ ထို့ကြောင့် ဤစကားလုံးများဖြင့် ၎င်းတို့သည် သမ္မာတရား လိုက်စားရန် မလိုအပ်ဟု ခံစားကြသည်။ ဤစကားလုံးများသည် သမ္မာတရား မလိုက်စားခြင်းအတွက် ၎င်းတို့ပေးသည့် ဆင်ခြေများဖြစ်သည်။ ထိုသို့သော လူများသည် အဓိပ္ပာယ်မဲ့ကြသည် မဟုတ်လော။ (ဟုတ်ပါသည်။) ၎င်းတို့သည် အဓိပ္ပာယ်မဲ့ပြီး မသိနားမလည်ကြချေ။ ၎င်းတို့ မည်မျှ အဓိပ္ပာယ်မဲ့ကြသနည်း။ အလွန်အဓိပ္ပာယ်မဲ့ကြသည်မှာ ၎င်းတို့သည် လူကို ဖော်ထုတ်ပြီး တရားစီရင်သည့် ဘုရားနှုတ်ကပတ်တော်များကို ၎င်းတို့နှင့် မည်သည့်ပတ်သက်မှုမျှ မရှိသကဲ့သို့ သဘောထားသော်ငြားလည်း မိမိတို့ကို အကျိုးပြုသည့် ဘုရားနှုတ်ကပတ်တော် စကားတစ်ခုကိုမူ မလွတ်တမ်း အသုံးချပြီး ဘုရားသခင်ကို အကျပ်ကိုင်ရန်နှင့် သမ္မာတရား မလိုက်စားခြင်းအတွက် မိမိတို့ကိုယ်ကိုယ် အပြစ်မရှိကြောင်း ထုတ်ဖော်ကြေညာရန် ယင်းကို သင်္ကေတတစ်ခုအဖြစ် အသုံးပြုကြသည်။ ၎င်းတို့သည် ရိုးသားသောလူဖြစ်သောကြောင့် ထိုစကားများကို နားထောင်ရန် မလိုအပ်ဟု ၎င်းတို့က ခံစားကြရသည်။ ဂဃဏနပြောရလျှင် ထိုသို့သော လူများသည် သနားဖွယ်ကောင်းလောက်အောင် စိတ်ပျက်စရာကောင်းသောသူများ ဖြစ်၏။ ၎င်းတို့တွင် ညံ့ဖျင်းသော အစွမ်းအစရှိသည်၊ အသိစိတ်မရှိသကဲ့သို့ အရှက်တရား အလွန်နည်းကြသည့်တိုင် ကောင်းချီးမင်္ဂလာများ ရလိုစိတ်ရှိကြဆဲ ဖြစ်သည်။ ၎င်းတို့တွင် ညံ့ဖျင်းသော အစွမ်းအစရှိပြီး အသိစိတ်မရှိသလို အရှက်တရားမရှိသော်လည်း အလွန် မာနကြီးပြီး သာမန်လူများကို အထင်သေးကြသည်။ သမ္မာတရား လိုက်စားနိုင်ပြီး သမ္မာတရား စစ်မှန်မှုအပေါ် မိတ်သဟာယပြုနိုင်သည့် အစွမ်းအစကောင်းရှိသော လူများကို ၎င်းတို့ လေးစားမှုမရှိကြချေ။ ၎င်းတို့က “မည်သို့ဖြစ်စေ သင်တို့၏ ဤအစွမ်းအစများက ဘာအသုံးဝင်ပါသနည်း။ သင်တို့၏ သမ္မာတရား လိုက်စားခြင်း၊ မိမိတို့ကိုယ်ကိုယ် သိရှိခြင်းတို့နှင့် ပတ်သက်သောကိစ္စများကို ကျွန်ုပ် လုပ်ဆောင်ရန် မလိုအပ်ပါ။ ကျွန်ုပ်သည် ရိုးသားသောလူတစ်ဦးဖြစ်သည်။ အနည်းငယ် မသိနားမလည်ဖြစ်နိုင်သော်လည်း ယင်းက တကယ့် ပြဿနာတစ်ခု မဟုတ်ပါ။ ပြီးလျှင် ကျွန်ုပ် ဖွင့်ထုတ်သည့် ဖောက်ပြန်ပျက်စီးသော စိတ်သဘောထားများကိုလည်း ဘာမျှ စိုးရိမ်စရာမရှိပါ။ မိမိကိုယ်ကိုယ် အပြုအမူကောင်းအချို့ဖြင့် ပြင်ဆင်သရွေ့ ကျွန်ုပ် အဆင်ပြေလိမ့်မည်”ဟု တွေးကြသည်။ ၎င်းတို့သည် မိမိတို့ကိုယ်ကိုယ် မည်သည့်အရာ သတ်မှတ်ကြသနည်း။ “မည်သို့ဖြစ်စေကာမူ ဘုရားသခင်သည် ကျွန်ုပ်၏ စိတ်နှလုံးကို သိပြီး သူ၌ ကျွန်ုပ်၏ ယုံကြည်ခြင်း စစ်မှန်သည်။ ယင်းမှာ လုံလောက်ပြီဖြစ်သည်။ အတွေ့အကြုံဆိုင်ရာ သက်သေခံချက်နှင့် ဘုရားနှုတ်ကပတ်တော်များကို သိရှိခြင်းအကြောင်း နေ့စဉ်နေ့တိုင်း ပြောနေကြသည်။ ဤပြောဆိုမှုအားလုံးသည် အဘယ်အသုံးဝင်ပါသနည်း။ အဆုံးသတ်အနှစ်ချုပ်လိုက်သည့်အခါ ဘုရားသခင်ကို ရိုးသားစစ်မှန်စွာ ယုံကြည်ခြင်းက လုံလောက်သည်”ဟူ၍ ဖြစ်သည်။ ယင်းမှာ ကမ်းကုန်အောင် မိုက်မဲခြင်း မဟုတ်လော။ ပထမဦးစွာ ထိုသို့သော လူများသည် သမ္မာတရားကို လုံးဝ စိတ်မဝင်စားကြချေ။ ဒုတိယအနေဖြင့် ၎င်းတို့သည် သမ္မာတရား၊ သို့မဟုတ် ဘုရားနှုတ်ကပတ်တော်များကို သဘောပေါက်နားလည်နိုင်စွမ်း မရှိကြဟုဆိုလျှင် မှန်ကောင်းမှန်နိုင်သည်။ သို့တိုင် ၎င်းတို့သည် မိမိတို့ကိုယ်ကိုယ် များစွာ အထင်ကြီးကြပြီး အလွန် ကြီးကျယ်စွာ ပြုမူကြသည်။ ၎င်းတို့သည် သမ္မာတရား မလိုက်စားရသည့် အကြောင်းရင်းအတွက် ကျိုးကြောင်းပြချက်တစ်ခု ရှာကြသည်၊ သို့မဟုတ် သမ္မာတရား လိုက်စားခြင်းအား အစားထိုးရန် အားသာချက်တစ်ခုအဖြစ် ၎င်းတို့ တွေးဆမိသည့် လိုက်စားမှုနည်းလမ်းတစ်ခု၊ သို့မဟုတ် တစ်စုံတစ်ရာကို ရှာဖွေကြသည်။ ဤသည်မှာ မိုက်မဲသည် မဟုတ်လော။ (မိုက်မဲပါသည်။)

သမ္မာတရား မလိုက်စားသည့် အချို့သော လူများသည် ၎င်းတို့၏ လူ့သဘာဝအရ မည်သည့် ကြီးမားသော ပြဿနာမျှမရှိကြချေ။ ၎င်းတို့သည် စည်းမျဉ်းများကို စွဲမြဲစွာ လိုက်နာပြီး ဣန္ဒြေရရနေကြသည်။ ထိုသို့သော အမျိုးသမီးများသည် နူးညံ့သိမ်မွေ့ပြီး ကောင်းမြတ်ကြသည်၊ သိက္ခာရှိပြီး ရည်မွန်ကာ ကရော်ကမည် မနိုင်ကြချေ။ ၎င်းတို့သည် မိမိတို့ မိဘများရှေ့တွင် ကောင်းမွန်သော မိန်းကလေးများဖြစ်ကာ မိမိတို့မိသားစုဘဝများတွင် ဇနီးကောင်းများနှင့် မိခင်ကောင်းများဖြစ်ကြပြီး မိမိတို့နေအိမ်များကို တာဝန်ကျေစွာ ထိန်းသိမ်းစောင့်ရှောက်ရင်း အချိန်ကုန်ဆုံးကြသည်။ ထိုသို့သော အမျိုးသားများသည် မာယာကင်းပြီး တာဝန်သိတတ်ကာ ဣန္ဒြေရရနေကြသည်။ ၎င်းတို့သည် သားသမီးဝတ်ကျေသော သားများဖြစ်သည်၊ အရက်မသောက်၊ သို့မဟုတ် ဆေးလိပ်မသောက်တတ်သကဲ့သို့ ခိုးယူခြင်း၊ သို့မဟုတ် လုယက်ခြင်း မရှိ၊ အလောင်းကစားမလုပ်၊ သို့မဟုတ် ပြည့်တန်ဆာများဖြင့် မစပ်ယှက်ကြချေ။ ၎င်းတို့သည် စံပြခင်ပွန်းများဖြစ်ပြီး အိမ်ပြင်ပတွင် မည်သူ မှန်သည်၊ မှားသည်နှင့် ပတ်သက်၍ အခြားသူများနှင့် စကားများခြင်း၊ သို့မဟုတ် ငြင်းခုံခြင်း ဖြစ်လေ့ဖြစ်ထမရှိပေ။ ဘုရားသခင်၌ ယုံကြည်သူများအနေဖြင့် ဤအရာများကို စွမ်းဆောင်ရရှိခြင်းက လုံလောက်ကြောင်းနှင့် ထိုသို့စွမ်းဆောင်ရရှိသောသူတို့သည် အဆင့်ရှိသည့်၊ လက်ခံနိုင်စရာ လူကောင်းများဖြစ်သည်ဟု လူအချို့က တွေးထင်ကြသည်။ ဘုရားသခင်ကို ယုံကြည်ပြီးသည့်နောက်တွင် ၎င်းတို့အနေဖြင့် ရက်ရောပြီး ကူညီတတ်ပါက၊ နှိမ့်ချပြီး စိတ်ရှည်ကာ သည်းခံတတ်ပါက၊ ပြီးလျှင် ၎င်းတို့အတွက် အသင်းတော်က စီစဉ်ပေးသည့် မည်သည့်အလုပ်ကိုမဆို ဝတ်ကျေတမ်းကျေဖြစ်ခြင်း မရှိဘဲ လုံ့လဝီရိယရှိရှိနှင့် ကောင်းမွန်စွာ လုပ်ဆောင်ပါက ၎င်းတို့သည် သမ္မာတရား စစ်မှန်မှုကို ရရှိပြီးဖြစ်ကာ ဘုရားသခင်၏ သတ်မှတ်ချက်များကို ဖြည့်ဆည်းဖို့ နီးစပ်သည်ဟု ယုံကြည်ကြသည်။ ၎င်းတို့အနေဖြင့် သန္နိဋ္ဌာန်ချ၍ စတင်လုပ်ဆောင်ပြီး အနည်းငယ် ပိုမိုအားထုတ်ပါက၊ ဘုရားနှုတ်ကပတ်တော်ကို ပိုမိုဖတ်ရှုပါက၊ ထိုဘုရားနှုတ်ကပတ်တော် စကားရပ်များကို ပိုမိုမှတ်မိပြီး ယင်းတို့ကို အခြားသူများထံ ပိုမိုဟောပြောပါက သမ္မာတရားကို ၎င်းတို့ လိုက်စားခြင်းဖြစ်လိမ့်မည်ဟု တွေးကြသည်။ သို့ရာတွင် ဖောက်ပြန်ပျက်စီးခြင်းကို ၎င်းတို့ ဖွင့်ထုတ်ခြင်းများအား ၎င်းတို့ သိမှတ်ခြင်းမရှိကြ။ ၎င်းတို့သည် မည်သည့် ဖောက်ပြန်ပျက်စီးသော စိတ်သဘောထားများ ရှိကြသည်ကို မသိကြသကဲ့သို့ ဖောက်ပြန်ပျက်စီးသော စိတ်သဘောထား မည်သို့ပေါ်ထွက်ပုံ၊ သို့မဟုတ် ယင်းကို မည်သို့ သိရှိပြီး ဖြေရှင်းသင့်ပုံတို့ကို သာ၍ပင် မသိကြသေးချေ။ ဤအရာများတစ်ခုမျှ ၎င်းတို့ မသိကြ။ ဤသို့သော လူများရှိပါသလော။ (ရှိပါသည်။) ၎င်းတို့သည် ၎င်းတို့၏ သဘာဝ “ကောင်းမြတ်ခြင်း”ကို သမ္မာတရား လိုက်စားသူတို့ စွမ်းဆောင်ရရှိရမည့် စံနှုန်းတစ်ခုအဖြစ် မှတ်ယူကြသည်။ တစ်စုံတစ်ဦးက ၎င်းတို့ကို မာနထောင်လွှားကာ လှည့်စားတတ်ပြီး ကောက်ကျစ်ဆိုးယုတ်သည်ဟု သတ်မှတ်မည်ဆိုပါက ယင်းကို ပွင့်ပွင့်လင်းလင်း အငြင်းပွားကြမည်မဟုတ်သကဲ့သို့ နှိမ့်ချမှု၊ သည်းခံခြင်းနှင့် လက်သင့်ခံခြင်းရှိသည့် သဘောထားတစ်ခုကို ပြကြလိမ့်မည်။ သို့ရာတွင် စိတ်ထဲတွင်မူ ယင်းကို အလေးအနက် ယူရမည့်အစား အတိုက်အခံပြုကြပေမည်။ “ကျွန်ုပ်က မာနထောင်လွှားသလား။ ကျွန်ုပ် မာနထောင်လွှားသည်ဆိုပါက ကမ္ဘာပေါ်တွင် လူကောင်းတစ်ဦးမျှ မရှိတော့ပါ။ ကျွန်ုပ် လှည့်စားတတ်သည်ဆိုပါက လောကရှိ မည်သူမျှ မရိုးသားပါ။ ကျွန်ုပ် ကောက်ကျစ်ဆိုးယုတ်သည်ဆိုပါက လောကရှိ မည်သူမျှ မရည်မွန်ပါ။ ယခုခေတ်တွင် ကျွန်ုပ်လောက် ကောင်းသောသူတစ်ဦးကို တွေ့ဖို့ လွယ်ကူပါသလား။ ဟင့်အင်း၊ မဖြစ်နိုင်ပါ”ဟူ၍ ဖြစ်သည်။ ၎င်းတို့ကို လှည့်စားတတ်သည်၊ မာနထောင်လွှားသည်ဟု သတ်မှတ်ဖို့၊ သို့မဟုတ် သမ္မာတရားကို ၎င်းတို့ မချစ်ဟု ပြောဆိုဖို့ရန် ဖြစ်လိမ့်မည်မဟုတ်သကဲ့သို့ ၎င်းတို့ကို မယုံကြည်သူအဖြစ် သတ်မှတ်ဖို့ သေချာပေါက် ဖြစ်မည်မဟုတ်ပေ။ ၎င်းတို့သည် စားပွဲကို လက်ဖြင့် ဗြန်းကနဲရိုက်ကာသာ ငြင်းခုံလိမ့်မည်။ “သို့ဆိုလျှင် ကျွန်ုပ် မယုံကြည်သူဖြစ်သည်ဟု သင်ပြောသည်ပေါ့။ ကျွန်ုပ် ကယ်တင်မခံရနိုင်ပါက သင်တို့လည်း မည်သူမျှ ကယ်တင်မခံရနိုင်ပါ”ဟူ၍ ဖြစ်သည်။ တစ်စုံတစ်ဦးက “သင်သည် သမ္မာတရားကို လက်မခံပါ။ လူတို့က သင်၏ ပြဿနာများကို ထောက်ပြသည့်အခါ သင် အတော်လေး နှိမ့်ချပြီး သည်းခံပုံပေါ်သော်လည်း စိတ်ထဲတွင် တကယ် ခုခံနေသည်။ သမ္မာတရားနှင့် ပတ်သက်၍ သင် မိတ်သဟာယပြုနေချိန်တွင် သင် ဟောပြောသည့်အရာမှာ မှန်ကန်သော်လည်း သင်သည် လူသား၏ ဖောက်ပြန်ပျက်စီးသော စိတ်သဘောထား အနှစ်သာရကို ဖော်ထုတ်ပြီး တရားစီရင်သည့် ဘုရားနှုတ်ကပတ်တော် တစ်လုံးကိုမျှ လက်မခံသည့် အမှန်တရားက ကျန်ရှိနေသည်။ ထိုအရာများကို သင်သည် ခုခံပြီး ငြင်းပယ်သည်။ သင်သည် ဆိုးယုတ်သော စိတ်သဘောထားတစ်ခုရှိသည်”ဟု ဆိုခြင်းအားဖြင့် ၎င်းတို့ကို ဖော်ထုတ်ကောင်းဖော်ထုတ်နိုင်သည်။ ၎င်းတို့ကို “ဆိုးယုတ်သည်”ဟု သင် သတ်မှတ်ပါက ၎င်းတို့ တကယ်ကို လက်မခံနိုင်ကြချေ။ “ကျွန်ုပ်က ဆိုးယုတ်သတဲ့လား။ ကျွန်ုပ် ဆိုးယုတ်ပါက အချိန်ကြာမြင့်စွာကတည်းက သင်တို့ကို ကျွန်ုပ် ခြေဖဝါးအောက်တွင် နင်းချေပြီးဖြစ်မည်။ ကျွန်ုပ် ဆိုးယုတ်ပါက သင်တို့အားလုံးကို ဖျက်ဆီးနှင့်ပြီး ဖြစ်မည်”ဟူ၍ ဖြစ်သည်။ ၎င်းတို့နှင့် ပတ်သက်၍ သင် ဖော်ထုတ်သမျှ၊ သို့မဟုတ် ၎င်းတို့နှင့် မှန်မှန်ကန်ကန် မိတ်သဟာယပြုသမျှကို ၎င်းတို့ သဘောမပေါက်နိုင်ကြချေ။ အမှုအရာများကို မှန်မှန်ကန်ကန် သဘောပေါက်ဖို့ဆိုသည်မှာ အဘယ်အရာကို ဆိုလိုသနည်း။ တစ်စုံတစ်ဦးက သင့်အထဲတွင် မည်သည့်ပြဿနာကို ထုတ်ဖော်ပြသည်ဖြစ်စေ၊ သင်၏ ရည်ရွယ်ချက်များနှင့် အတွေးများတွင် အမှားတစ်ခုတလေ အမှန်တကယ် ရှိမရှိကို ဆန်းစစ်ရန် ထိုပြဿနာများကို ဘုရားနှုတ်ကပတ်တော်များဖြင့် နှိုင်းယှဉ်၍ အကဲဖြတ်ခြင်းနှင့် သင့်အထဲတွင် ပြဿနာမည်မျှ ပေါ်လွင်လာသည်ဖြစ်စေ၊ ထိုပြဿနာအားလုံးကို လက်သင့်ခံခြင်းနှင့် ကျိုးနွံနာခံခြင်း သဘောထားဖြင့် ချဉ်းကပ်ခြင်းကို ဆိုလိုသည်။ ယင်းမှာ လူတစ်ဦးက မိမိ၏ ပြဿနာများအပေါ် သိသောအသိကို အမှန်တကယ် ရရှိနိုင်ပုံ ဖြစ်သည်။ အကြင်သူသည် မိမိ၏ အယူအဆများနှင့် စိတ်ကူးများနှင့်အညီ မိမိ၏ ဖောက်ပြန်ပျက်စီးသော စိတ်သဘောထားကို သိသောအသိ မရရှိနိုင်ပေ။ ဤအရာကို ဘုရားနှုတ်ကပတ်တော်များအရ လုပ်ဆောင်ရမည်။ ထို့ကြောင့် မိမိကိုယ်ကိုယ် သိသောအသိအတွက် မရှိမဖြစ်လိုအပ်ချက်မှာ အဘယ်နည်း။ စာတန်သည် လူသားမျိုးနွယ်ကို အထင်အမြင်မှားစေပြီး ဖောက်ပြန်ပျက်စီးစေပြီးဖြစ်ကာ လူခပ်သိမ်းတို့သည် ဖောက်ပြန်ပျက်စီးသော စိတ်သဘောထားများရှိသည်ဆိုသည့် အချက်ကို သင် အသိအမှတ်ပြုရမည်။ သင်သည် ဤအချက်ကို လက်ခံခြင်းအားဖြင့်သာ ဘုရားနှုတ်ကပတ်တော်များ၏ ထုတ်ဖော်ပြချက်အတိုင်း မိမိကိုယ်ကိုယ် သုံးသပ်နိုင်ပြီး ဤမိမိကိုယ်ကိုယ် သုံးသပ်ခြင်းဖြစ်စဉ်တွင် သင်၏ ပြဿနာများကို ဖြည်းဖြည်းချင်း ဖော်ထုတ်နိုင်ပေသည်။ သင် သတိမထားမိလိုက်ဘဲ သင်၏ ပြဿနာများသည် နည်းနည်းချင်း ပေါ်လာလိမ့်မည်ဖြစ်ပြီး ထို့နောက်တွင် သင်၏ ဖောက်ပြန်ပျက်စီးသော စိတ်သဘောထားက မည်သည့်အရာဖြစ်သည်ကို ရှင်းလင်းပြတ်သားမှုဖြင့် သင် နားလည်သွားလိမ့်မည်။ ဤအခြေခံအုတ်မြစ်ပေါ်တွင် သင်သည် မည်သည့် လူစားမျိုးဖြစ်ပြီး သင်၏ အနှစ်သာရက မည်သည့်အရာဖြစ်သည်ဆိုသည်ကို သိသောအသိအား သင် ရရှိနိုင်သည်။ ထိုသို့ဖြင့် ဘုရားသခင် ပြောပြီး ထုတ်ဖော်ပြသမျှအားလုံးကို လက်သင့်ခံခြင်းအား သင် စွမ်းဆောင်ရရှိလိမ့်မည်ဖြစ်ပြီး ထို့နောက်တွင် လူသားအတွက် ဘုရားသခင် ခင်းကျင်းထားသည့် လက်တွေ့လုပ်ဆောင်မှု လမ်းကြောင်းကို ဘုရားနှုတ်ကပတ်တော်များတွင် ဆက်လက်ရှာဖွေကာ သူ၏ နှုတ်ကပတ်တော်များအတိုင်း လက်တွေ့လုပ်ဆောင်ပြီး အသက်ရှင်လိမ့်မည်ဖြစ်သည်။ ယင်းမှာ သမ္မာတရား လိုက်စားခြင်းဆိုသည်မှာ ဟူသည့်အရာ ဖြစ်သည်။ သို့ရာတွင် ယင်းမှာ ဤလူစားမျိုးက ဘုရားနှုတ်ကပတ်တော်များကို လက်ခံရရှိပုံ ဖြစ်သလော။ မဟုတ်ပါ။ ၎င်းတို့အနေဖြင့် ဘုရားနှုတ်ကပတ်တော်များက သမ္မာတရားဖြစ်ကြောင်းနှင့် ဖောက်ပြန်ပျက်စီးသော လူသားမျိုးနွယ်ကို ဖော်ထုတ်နေသည့် သူ၏ နှုတ်ကပတ်တော်များသည် အားလုံး အမှန်တရားဖြစ်ကြောင်း သိမြင်ခြင်းကို ဖွင့်ဟဝန်ခံနိုင်သော်လည်း ၎င်းတို့၏ ကိုယ်ပိုင် ဖောက်ပြန်ပျက်စီးသော စိတ်သဘောထားအား သိရှိဖို့ ၎င်းတို့ကို သင် စေခိုင်းမည်ဆိုပါက ၎င်းတို့ လက်ခံလိမ့်မည်မဟုတ်သကဲ့သို့ အသိအမှတ်ပြုလိမ့်မည်လည်း မဟုတ်ပေ။ ထိုအရာက ၎င်းတို့နှင့် မည်သို့မျှ ပတ်သက်ခြင်းမရှိဟု ၎င်းတို့ ယုံကြည်ကြသည်။ ဤသည်မှာ အဘယ့်ကြောင့်ဆိုသော် ၎င်းတို့သည် မိမိတို့ကိုယ်ကိုယ် ဂုဏ်သိက္ခာရှိပြီး ရည်မွန်သောလူများဖြစ်သည်၊ ဖြောင့်မှန်ပြီး ဂုဏ်ရှိသူများဖြစ်သည်ဟု ထင်မှတ်ကြသောကြောင့် ဖြစ်သည်။ ဖြောင့်မှန်သောလူတစ်ဦးဖြစ်ခြင်းသည် ထိုသူက သမ္မာတရား ပိုင်ဆိုင်သည်ဟု ဆိုလိုသလော။ ဖြောင့်မှန်သူဖြစ်ခြင်းသည် တစ်ဦးတစ်ယောက်၏ လူ့သဘာဝနှင့်ဆိုင်သော အပြုသဘောဆောင်သည့် သရုပ်သကန်တစ်ခုမျှသာဖြစ်သည်။ ယင်းက သမ္မာတရားကို ကိုယ်စားမပြုပေ။ ထို့ကြောင့် သာမန်လူ့သဘာဝ၏ ထူးခြားသော လက္ခဏာတစ်ခုရှိရုံသက်သက်ကြောင့် သင်သည် သမ္မာတရား လိုက်စားရန်မလိုအပ်ဟု မဆိုလိုသကဲ့သို့ သမ္မာတရားကို သင်ရရှိပြီးဖြစ်သည်ဟုလည်း မဆိုလိုပေ။ ပြီးလျှင် သင်သည် ဘုရားသခင် ချစ်သော လူတစ်ဦးဖြစ်သည်ဟု သာ၍ပင် မဆိုလိုသေးချေ။ ထိုသို့ဖြစ်သည် မဟုတ်လော။ (ဟုတ်ပါသည်။) ဤ“တည်ကြည်မြင့်မြတ်သောလူများ”ဟု ခေါ်သူများသည် ၎င်းတို့တွင် မာနထောင်လွှားသော၊ လှည့်စားတတ်သော စိတ်သဘောထားများ၊ သို့မဟုတ် သမ္မာတရားကို အလွန်အမင်း မနှစ်မြို့သည့် စိတ်သဘောထားမရှိကြောင်းနှင့် ကောက်ကျစ်ဆိုးယုတ်ကာ ရက်စက်သည့် စိတ်သဘောထားများ သေချာပေါက်မရှိကြောင်း ယုံကြည်ကြသည်။ ၎င်းတို့သည် တည်ကြည်မြင့်မြတ်သောလူများ ဖြစ်သောကြောင့်၊ သဘာဝအားဖြင့် ဖြောင့်မှန်ပြီး ကြင်နာတတ်သောကြောင့်၊ အခြားသူများ၏အနိုင်ကျင့်ခြင်းကို ၎င်းတို့ အမြဲခံရပြီး ၎င်းတို့အနေဖြင့် အစွမ်းအစ ညံ့ဖျင်းကာ မသိနားမလည်ဖြစ်ကြသော်လည်း ရိုးသားကြသောကြောင့် ဤဖောက်ပြန်ပျက်စီးသော စိတ်သဘောထားများ တစ်ခုမျှ ၎င်းတို့အတွင်းတွင် မတည်ရှိဟု ထင်ကြသည်။ ဤ “ရိုးသားခြင်း”သည် စစ်မှန်သော ရိုးသားခြင်းမဟုတ်၊ မာယာကင်းခြင်း၊ မဝံ့မရဲဖြစ်ခြင်းနှင့် မသိနားမလည်ခြင်း ဖြစ်သည်။ ထိုသို့သော လူများက အလွန်မိုက်မဲသူများ ဖြစ်သည် မဟုတ်လော။ လူတိုင်းက ၎င်းတို့ကို လူကောင်းများအဖြစ် မြင်သည်။ ဤအမြင်သည် မှန်ကန်ပါ၏လော။ လူကောင်းများအဖြစ် လူတို့ တွေးဆမိကြသူများတွင် ဖောက်ပြန်ပျက်စီးသော စိတ်သဘောထားများ ရှိသလော။ အဖြေမှာ “ရှိသည်”ဟူ၍ ဖြစ်၏။ ဤသည်မှာ သေချာပေသည်။ မာယာကင်းသောလူများသည် အလိမ်အညာများ မပြောကြသလော။ အခြားသူများကို ၎င်းတို့ မလှည့်စားကြလေသလော၊ သို့မဟုတ် မိမိတို့ကိုယ်ကိုယ် ဟန်ဆောင်ဖုံးကွယ်ခြင်း မရှိကြလေသလော။ ၎င်းတို့ တစ်ကိုယ်ကောင်းမဆန်ကြသလော။ လောဘမကြီးကြသလော။ မြင့်မားသော ရာထူးကို မလိုချင်ကြသလော။ လွန်ကဲသည့် စိတ်ဆန္ဒများအားလုံး ကင်းကြသလော။ သေချာပေါက် မကင်းကြချေ။ ၎င်းတို့ မကောင်းမှုမလုပ်သည့် တစ်ခုတည်းသော အကြောင်းရင်းမှာ သင့်တော်သည့် အခွင့်အရေး မရှိကြသောကြောင့် ဖြစ်သည်။ ဤအရာနှင့်ပတ်သက်၍ ၎င်းတို့ ဂုဏ်ယူဝင့်ကြွားကြသည်။ ၎င်းတို့သည် မိမိတို့ကိုယ်ကိုယ် တည်ကြည်မြင့်မြတ်သောလူများအဖြစ် ဘိသိက်ပေးကြပြီး ၎င်းတို့တွင် ဖောက်ပြန်ပျက်စီးသော စိတ်သဘောထားများ မရှိဟု ယုံကြည်ကြသည်။ ထို့ကြောင့် တစ်စုံတစ်ဦးက ၎င်းတို့ရှိ ဖောက်ပြန်ပျက်စီးသော စိတ်သဘောထား၊ ပွင့်အံထွက်ခြင်း၊ သို့မဟုတ် အခြေအနေတစ်မျိုးမျိုးကို ထောက်ပြမည်ဆိုပါက ၎င်းတို့က “ကျွန်ုပ် မလုပ်ပါ။ ယင်းမှာ ကျွန်ုပ်ဖြစ်သည့်အရာမဟုတ်သကဲ့သို့ ကျွန်ုပ် ပြုမူပုံ၊ စဉ်းစားပုံမဟုတ်ပါ။ ကျွန်ုပ်ကို သင်တို့ အထင်လွဲပြီ။ ကျွန်ုပ် မာယာကင်းကြောင်း၊ နုံအကြောင်း၊ ကြောက်တတ်ကြောင်း သင်တို့ အားလုံးမြင်ကြသောကြောင့် ကျွန်ုပ်ကို အနိုင်ကျင့်ကြသည်”ဟု ဆိုကာ ချေပကြပေမည်။ ဤသို့ ပြန်လည်တိုက်ခိုက်သည့် လူသည် မည်သည့်လူစားမျိုး ဖြစ်သနည်း။ အကြင်သူသည် ထိုသို့သောလူကို ရန်စဝံ့လျှင် ထိုသူ၏ ထာဝစဉ် လိုက်လံပြောဆိုခြင်းခံရလိမ့်မည်။ မည်သည့်အခါတွင်မျှ နားထောင်၍ ဆုံးတော့မည်မဟုတ်။ တတ်နိုင်သမျှ ကြိုးစားပါစေ ထိုလူကို ၎င်းတို့ ခါချနိုင်မည်မဟုတ်။ ဤကျိုးကြောင်းဆီလျော်မှု မရှိသော၊ မရပ်မနား စိတ်အနှောင့်အယှက်ပေးသော လူများသည် ၎င်းတို့က ဖောက်ပြန်ပျက်စီးသော စိတ်သဘောထားများမရှိသည့် သမ္မာတရား လိုက်စားသူများဖြစ်သည်၊ မာယာကင်းသည်၊ မသိနားမလည်သောလူများဖြစ်သည်ဟု တွေးထင်ကြဆဲဖြစ်သည်။ မကြာခဏဆိုသလို ၎င်းတို့က “ကျွန်ုပ်သည် မသိနားမလည်ဖြစ်နိုင်သော်လည်း မာယာကင်းသည်။ ကျွန်ုပ်သည် ရိုးသားသောလူတစ်ဦးဖြစ်ပြီး ဘုရားသခင်က ကျွန်ုပ်ကို ချစ်သည်”ဟုပင် ဆိုကြသည်။ ၎င်းတို့အတွက်မှာမူ ဤသည်တို့မှာ အမြတ်ထုတ်ရမည့်အရာများ ဖြစ်သည်။ ဤသည်မှာ အနည်းငယ် အရှက်မဲ့ခြင်း ဖြစ်သည် မဟုတ်လော။ ဘုရားသခင်က သင့်ကို ချစ်သည်ဟု သင်ဆိုသည်။ ယင်းမှာ မှန်ပါ၏လော။ ထိုသို့ပြောဆိုခြင်းအတွက် သင့်မှာ အခြေခံအကြောင်းရင်း ရှိသလော။ သန့်ရှင်းသော ဝိညာဉ်တော်၏ အလုပ် ရှိသလော။ သင့်ကို စုံလင်စေမည်ဟု ဘုရားသခင် ပြောပြီလော။ သင့်ကို အသုံးပြုရန် ဘုရားသခင် စီစဉ်သလော။ ဤအရာများကို သင့်အား ဘုရားသခင် မပြောသေးပါက သင့်ကို သူချစ်သည်ဟု သင် ပြော၍မရ။ သင့်အပေါ် သူ သနားခြင်းရှိသည်ဟုသာ ဆိုနိုင်သည်။ ယင်းမှာ ကြီးမြတ်သောအရာ ဖြစ်နှင့်ပြီးသား ဖြစ်သည်။ ဘုရားသခင်က သင့်ကို ချစ်သည်ဟု သင် ပြောပါက ယင်းမှာ သင်၏ ကိုယ်ရေးကိုယ်တာ သိနားလည်မှုသာ ဖြစ်သည်။ ဘုရားသခင်က သင့်ကို အမှန်တကယ် ချစ်သည်ဟု သက်သေမပြပေ။ သမ္မာတရား မလိုက်စားသောလူတစ်ဦးကို ဘုရားသခင်က ချစ်ပါမည်လော။ မသိနားမလည်သော၊ ကြောက်တတ်သော လူတစ်ဦးကို ဘုရားသခင်က ချစ်ပါမည်လော။ ဘုရားသခင်သည် မသိနားမလည်သော၊ ကြောက်တတ်သောသူအတွက် သနားခြင်းရှိသည်။ ထိုမျှသည် မှန်ပေ၏။ ဘုရားသခင်သည် အမှန်တကယ် ရိုးသားသောသူများ၊ သမ္မာတရား လိုက်စားသူများ၊ သမ္မာတရားကို လက်တွေ့လုပ်ဆောင်နိုင်ပြီး သူ့ကို ကျိုးနွံနာခံနိုင်သူများ၊ သူ့ကို ချီးမြှောက်ပြီး သူ့အတွက် သက်သေခံနိုင်သူများ၊ သူ၏ ရည်ရွယ်ချက်များကို ထောက်ထားနိုင်ပြီး စိတ်ရင်းအတိုင်း သူ့ကို ချစ်နိုင်သူများအား ချစ်သည်။ မိမိတို့ကိုယ်ကိုယ် ဘုရားသခင်အတွက် အမှန်တကယ် အသုံးခံနိုင်ပြီး မိမိတို့တာဝန်များကို သစ္စာစောင့်သိစွာ ထမ်းဆောင်နိုင်သူများသာ ဘုရားသခင်၏ မေတ္တာ ပိုင်ဆိုင်သည်။ သမ္မာတရားအပြင် ပြုပြင်ခြင်းခံရခြင်းကို လက်ခံနိုင်သူတို့သာ ဘုရားသခင်၏ မေတ္တာ ပိုင်ဆိုင်သည်။ သမ္မာတရားကို လက်မခံသောသူများ၊ ပြုပြင်ခံရခြင်းကို လက်မခံသူများသည် ဘုရားသခင် ပစ်ပစ်ခါခါ ငြင်းသောသူများ ဖြစ်သည်။ သင်သည် သမ္မာတရားကို အလွန်အမင်း မနှစ်မြို့သည့်အပြင် ဘုရားသခင် ပြောသမျှ နှုတ်ကပတ်တော်အားလုံးကို ခုခံပါက ဘုရားသခင်သည် သင့်ကို အလွန်အမင်း မနှစ်မြို့သည့်အပြင် ပစ်ပစ်ခါခါ ငြင်းလိမ့်မည်။ သင့်ကိုယ်သင် လူကောင်းတစ်ဦးအဖြစ်၊ သနားစဖွယ်၊ ရိုးဖြောင့်ပြီး မာယာကင်းသော လူတစ်ဦးအဖြစ် အမြဲတွေးထင်သော်လည်း သမ္မာတရားကို မလိုက်စားပါက ဘုရားသခင်က သင့်ကို ချစ်လိမ့်မည်လော။ မဖြစ်နိုင်ပေ။ သူ၏ နှုတ်ကပတ်တော်များတွင် ယင်းအတွက် အခြေခံအကြောင်းရင်း မရှိပေ။ သင်သည် မာယာကင်းခြင်း ရှိမရှိကို ဘုရားသခင် မကြည့်သကဲ့သို့ မည်သည့် လူ့သဘာဝ၊ သို့မဟုတ် အစွမ်းအစမျိုးဖြင့် သင် မွေးဖွားခဲ့သည်ဆိုသည်ကိုလည်း သူ ဂရုမစိုက်ပေ။ သူ၏ နှုတ်ကပတ်တော်များကို ကြားပြီးနောက်တွင် ထိုနှုတ်ကပတ်တော်များကို သင် လက်ခံခြင်း၊ သို့မဟုတ် ငြင်းပယ်ခြင်း ရှိမရှိ၊ ထိုနှုတ်ကပတ်တော်များကို သင် ကျိုးနွံနာခံခြင်း၊ သို့မဟုတ် ခုခံခြင်း ရှိမရှိဆိုသည်ကို သူကြည့်သည်။ သူ၏ နှုတ်ကပတ်တော်များက သင့်အပေါ်တွင် သက်ရောက်မှုရှိပြီး သင့်အထဲတွင် အကျိုးဖြစ်ထွန်းခြင်းရှိမရှိ သူ ပြောဆိုခဲ့သည့် များစွာသော နှုတ်ကပတ်တော်များအဖို့ စစ်မှန်သော သက်သေ ခံနိုင်ခြင်းရှိမရှိဆိုသည်ကို သူ ကြည့်သည်။ သင့်အတွေ့အကြုံ၏ အဆုံးသတ်ရလဒ်မှာ “ကျွန်ုပ်သည် မာယာကင်းသည်၊ ကြောက်တတ်သည်၊ ကျွန်ုပ်ဆုံရသည့် လူတိုင်း၏ အနိုင်ကျင့်ခြင်းကို ကျွန်ုပ်ခံရသည်။ လူတိုင်းက ကျွန်ုပ်ကို အထင်သေးကြသည်”ဟူ၍ ဖြစ်ပါက ဤသည်မှာ သက်သေခံချက်မဟုတ်ကြောင်း ဘုရားသခင်က ပြောလိမ့်မည်။ သင်က “ကျွန်ုပ်သည် ဘုရားသခင် ပြောဆိုသည့် ရိုးသားသော်လည်း မသိနားမလည်သောလူတစ်ဦးဖြစ်သည်”ဟု ဖြည့်စွက်ပါက သင်သည် မုသားများဖြင့်ပြည့်ကြောင်းနှင့် သင်၏ နှုတ်တွင် အမှန်စကားတစ်ခွန်းတလေမျှ ရှာမတွေ့နိုင်ကြောင်း ဘုရားသခင်က ပြောလိမ့်မည်။ သင့်အပေါ် ဘုရားသခင်၏ သတ်မှတ်ချက်များရှိသည့်အခါ ထိုသတ်မှတ်ချက်များကို သင် လုံးဝ ကျိုးနွံနာခံဖို့ ပျက်ကွက်သည်သာမက “ကျွန်ုပ်သည် ဆင်းရဲဒုက္ခခံ၊ အဖိုးအခပေးပြီးဖြစ်ကာ ဘုရားသခင်ကို ကျွန်ုပ်ချစ်သည်”ဟု ပြောဆိုလျက် ဘုရားသခင်ကို အကျိုးသင့်အကြောင်းသင့် ရှင်းပြပြီး မိမိအတွက် ဆင်ခြေများ ပေးဖို့ ကြိုးစားပါက ယင်းသည် ခိုင်လုံလိမ့်မည်မဟုတ်။ သင်သည် သမ္မာတရားကို လိုက်စားသလော။ သင်၏ စစ်မှန်သော အတွေ့အကြုံဆိုင်ရာ သက်သေခံချက်မှာ အဘယ်မှာနည်း။ ဘုရားသခင်အတွက် ရှိသည့် သင်၏မေတ္တာသည် မည်သို့ ထင်ရှားသနည်း။ သက်သေအထောက်အထား မပေးနိုင်ပါက မည်သူကမျှ ယုံကြည်လက်ခံလိမ့်မည်မဟုတ်။ သင်က “ကျွန်ုပ်သည် တည်ကြည်မြင့်မြတ်သောလူတစ်ဦးဖြစ်ပြီး ယဉ်ကျေးဖွယ်ရာစွာ ပြုမူသည်။ ကျွန်ုပ်သည် မတရားသော မေထုန်စပ်ယှက်မှု မရှိသကဲ့သို့ ကျွန်ုပ်၏ လုပ်ရပ်များတွင် စည်းမျဉ်းများအားလုံးကို လိုက်နာပါသည်။ ကျွန်ုပ်သည် အကျင့်စာရိတ္တကောင်းမွန်သူ ဖြစ်ပါသည်။ အရက်သွားသောက်ခြင်း၊ ပြည့်တန်ဆာဖြင့် စပ်ယှက်ခြင်းနှင့် လောင်းကစား လုပ်ခြင်းတို့ မရှိပါ။ ကျွန်ုပ်သည် ဘုရားသခင်၏ အိမ်တော်တွင် အနှောင့်အယှက်၊ သို့မဟုတ် ဆူပူမှုများ မဖြစ်စေပါ၊ သို့မဟုတ် သဘောထားကွဲလွဲမှု မဖြစ်စေပါ။ ဆင်းရဲဒုက္ခကို ကြံ့ကြံ့ခံပြီး ကြိုးစားလုပ်ဆောင်ပါသည်။ ဤအရာများသည် ကျွန်ုပ် သမ္မာတရား လိုက်စားသည့် လက္ခဏာများ မဟုတ်ပါလော။ သမ္မာတရားကို ကျွန်ုပ် လိုက်စားနေပြီးသားဖြစ်သည်”ဟု ဆိုသည်။ ပြီးလျှင် ဘုရားသခင်က သင့်ကို ဤသို့ ပြောလိမ့်မည်။ သင်၏ ဖောက်ပြန်ပျက်စီးသော စိတ်သဘောထားကို သင် ဖြေရှင်းပြီးပြီလော။ သင်၏ သမ္မာတရားလိုက်စားခြင်းအတွက် သင်၏ သက်သေခံချက်မှာ အဘယ်မှာနည်း။ ဘုရားရွေးချယ်ထားသော လူများ၏ လက်ခံမှုနှင့် လေးစားမှုကို သင် ရရှိနိုင်သလော။ သင့်အနေဖြင့် မည်သည့် အတွေ့အကြုံဆိုင်ရာ သက်သေခံချက်မျှ မပေးနိုင်သည့်တိုင် သင်သည် ဘုရားသခင်ကို ချစ်သည့် ရိုးသားသောလူတစ်ဦးဖြစ်သည်ဟုဆိုလျှင် သင်သည် အခြားသူများကို အယောင်ဆောင် စကားလုံးများဖြင့် အထင်အမြင်မှားစေသည့်လူတစ်ဦးဖြစ်သည်။ သင်သည် ကျိုးကြောင်းဆီလျော်မှုမရှိသည့် နတ်ဆိုးနှင့် စာတန်ဖြစ်ပြီး ကျိန်ဆဲခြင်းခံထိုက်သည်။ သင့်အတွက် ကျန်ရှိသမျှမှာ ဘုရားသခင်၏ ရှုတ်ချခြင်းနှင့် ဖယ်ရှားရှင်းလင်းခြင်းခံရဖို့ ဖြစ်သည်။

လူအချို့သည် မိမိတို့တာဝန်များကို ထမ်းဆောင်စဉ်တွင် မကြာခဏ ထင်ရာမြင်ရာ၊ မဆင်မခြင် ပြုမူတတ်ကြသည်။ ၎င်းတို့သည် အလွန်အမင်း စိတ်လိုက်မာန်ပါပြုကြသည်။ ၎င်းတို့ပျော်ရွှင်သည့်အခါ မိမိတို့တာဝန်အနည်းငယ် လုပ်ကြပြီး မပျော်သည့်အခါ သုန်မှုန်ကာ “ကျွန်ုပ် ယနေ့ စိတ်မကြည်ပါ။ မည်သည့်အရာမျှ စားမည်မဟုတ်သကဲ့သို့ ကျွန်ုပ်တာဝန်ကို ထမ်းဆောင်မည်မဟုတ်ပါ”ဟု ဆိုကြသည်။ ထိုအခါ အခြားသူများက ၎င်းတို့နှင့် စေ့စပ်ဆွေးနွေးရပြီး “ယင်းက ဖြစ်မည်မဟုတ်ပါ။ သင် အလွန်စိတ်လိုက်မာန်ပါပြု၍ မရပါ”ဟု ဆိုကြသည်။ ယင်းကို ထိုလူများက မည်သို့ ပြောကြလိမ့်မည်နည်း။ “ဖြစ်မည်မဟုတ်သည်ကို ကျွန်ုပ်သိသည်။ သို့သော် ကျွန်ုပ်သည် ချမ်းသာကြွယ်ဝပြီး အခွင့်ထူးရသည့် မိသားစုတွင် မွေးဖွားခဲ့သည်။ ကျွန်ုပ်၏ အဖိုးအဖွားများနှင့် အန်တီတို့က ကျွန်ုပ်ကို အလိုလိုက်ခဲ့ပြီး ကျွန်ုပ်၏ မိဘများက သာ၍ပင် ဆိုးသည်။ ကျွန်ုပ်သည် သူတို့၏ အသည်းလေး၊ သူတို့၏ အသည်းကြော်ဖြစ်ပြီး အရာရာကို ကျွန်ုပ်ကို လိုက်လျောကြကာ အလိုလိုက်ခဲ့ကြသည်။ ထိုသို့ကြီးပြင်းလာရခြင်းက ကျွန်ုပ်တွင် ဤစိတ်လိုက်မာန်ပါပြုသည့် ပင်ကိုစရိုက် ကျန်ခဲ့သောကြောင့် ဘုရားအိမ်တော်တွင် တာဝန်တစ်ခုကို ကျွန်ုပ်ထမ်းဆောင်သည့်အခါ ကိစ္စများကို အခြားသူများနှင့် ကျွန်ုပ် မဆွေးနွေးခဲ့ပါ၊ သို့မဟုတ် သမ္မာတရားကို မရှာဖွေခဲ့ပါ၊ သို့မဟုတ် ဘုရားသခင်ကို ကျိုးနွံနာခံခြင်း မရှိခဲ့ပါ။ ကျွန်ုပ်သည် ယင်းအတွက် အပြစ်တင်ခံရမည်လော”ဟူ၍ ဖြစ်သည်။ ၎င်းတို့၏ သိနားလည်မှုသည် မှန်ကန်ပါ၏လော။ ၎င်းတို့၏ သဘောထားသည် သမ္မာတရား လိုက်စားသည့် သဘောထားဖြစ်သလော။ (မဟုတ်ပါ။) ၎င်းတို့သည် အစားစားချိန်တွင် အစားအစာ၏ အကောင်းဆုံးအပိုင်းများကို စားသုံးပုံ၊ မိမိတို့ကိုယ်ကိုယ်သာ ဂရုစိုက်ပြီး အခြားသူများအတွက် မတွေးပေးပုံကဲ့သို့သော ၎င်းတို့၏ အပြစ်အနည်းငယ်ကို တစ်စုံတစ်ဦးက ထောက်ပြသည့်အခါတိုင်းတွင် ၎င်းတို့က “ငယ်ငယ်ကတည်းက ကျွန်ုပ် ဤအတိုင်းဖြစ်ခဲ့သည်။ ထိုအရာကို ကျွန်ုပ် ကျင့်သားရနေပြီဖြစ်သည်။ အခြားလူများအတွက် ကျွန်ုပ် လုံးဝ မတွေးပေးမိခဲ့ပါ။ ကျွန်ုပ်သည် ကျွန်ုပ်ကို ချစ်ခင်ကြင်နာသည့် မိဘများနှင့် ကျွန်ုပ်အပေါ် တုန်နေအောင်ချစ်သည့် အဖိုးအဖွားများနှင့်အတူ အခွင့်ထူးရသည့် ဘဝကို အမြဲ ရှင်သန်နေထိုင်ခဲ့သည်။ ကျွန်ုပ်သည် တစ်မိသားစုလုံး၏ အသည်းကြော်ဖြစ်သည်”ဟု ဆိုကြလိမ့်မည်။ ဤသည်မှာ ပေါက်ကရစကားနှင့် အတွေးမှား တစ်ပုံတစ်ခေါင်း ဖြစ်သည်။ ဤသည်မှာ အနည်းငယ် အရှက်မဲ့ခြင်းနှင့် မျက်နှာပြောင်တိုက်ခြင်း ဖြစ်သည် မဟုတ်လော။ သင်၏ မိဘများက သင့်အပေါ် တုန်နေအောင် ချစ်ကြသဖြင့် အခြားလူတိုင်းကလည်း ထိုသို့ချစ်ရမည်ဟု ဆိုလိုသလော။ သင်၏ ဆွေမျိုးများက သင့်ကို ချစ်ခင်ကြင်နာပြီး တုန်နေအောင် ချစ်ကြသဖြင့် ဘုရားအိမ်တော်ထဲတွင် မဆင်မခြင်နှင့် ထင်ရာမြင်ရာ ပြုမူဖို့ရန် သင့်ကို အကြောင်းပြချက် ပေးသလော။ ယင်းမှာ ခိုင်လုံသော အကြောင်းပြချက်တစ်ခု ဖြစ်သလော။ ဤသည်မှာ သင်၏ ဖောက်ပြန်ပျက်စီးသော စိတ်သဘောထားအပေါ် ရှိရမည့် မှန်ကန်သော သဘောထား ဖြစ်သလော။ သမ္မာတရား လိုက်စားသည့် သဘောထား ဖြစ်သလော။ (မဟုတ်ပါ။) ဤလူများအပေါ် တစ်ခုခုဖြစ်ပျက်သည့်အခါ၊ ၎င်းတို့၏ ဖောက်ပြန်ပျက်စီးသော စိတ်သဘောထား၊ သို့မဟုတ် ၎င်းတို့ ဘဝများနှင့် ပတ်သက်၍ ပြဿနာတစ်ခုခု ရှိသည့်အခါ ထိုအတွက် တုံ့ပြန်ဖို့၊ ရှင်းပြဖို့၊ မှန်ကန်ကြောင်းပြဖို့ ဓမ္မဓိဋ္ဌာန်ကျသော ကျိုးကြောင်းပြချက်များကို ရှာဖွေကြသည်။ သမ္မာတရားကို လုံးဝ မရှာဖွေကြ၊ သို့မဟုတ် ဘုရားသခင်ထံ ဆုမတောင်းကြသကဲ့သို့ မိမိတို့ကိုယ်ကိုယ် သုံးသပ်ရန် ဘုရားသခင်၏ ရှေ့မှောက်သို့ ရောက်မလာကြချေ။ မိမိကိုယ်ကိုယ် သုံးသပ်ခြင်းမရှိဘဲ အကြင်သူသည် မိမိ၏ ပြဿနာများနှင့် ဖောက်ပြန်ပျက်စီးခြင်းကို သိရှိနိုင်သလော။ (မသိနိုင်ပါ။) ပြီးလျှင် မိမိတို့၏ ဖောက်ပြန်ပျက်စီးခြင်းကို မသိရှိဘဲ နောင်တရနိုင်သလော။ (မရနိုင်ပါ။) တစ်စုံတစ်ဦးသည် နောင်တမရနိုင်ပါက ၎င်းတို့ အစဉ်သဖြင့် အသက်ရှင်ကြမည့် အခြေအနေမှာ အဘယ်နည်း။ မိမိကိုယ်ကိုယ် ခွင့်လွှတ်ခြင်း ဖြစ်လိမ့်မည်မဟုတ်လော။ ၎င်းတို့အနေဖြင့် ဖောက်ပြန်ပျက်စီးခြင်းကို ဖွင့်ထုတ်ကြပြီးဖြစ်သော်လည်း မကောင်းမှု မလုပ်ကြသေး၊ သို့မဟုတ် စီမံအုပ်ချုပ်ရေးဆိုင်ရာ အမိန့်များကို မချိုးဖောက်ကြသေး၊ ထိုသို့ လုပ်ဆောင်ခြင်းသည် သမ္မာတရား စည်းမျဉ်းများနှင့်အညီ မဟုတ်သော်လည်း ဤသည်မှာ ရည်ရွယ်ချက်ဖြင့် လုပ်ခြင်းမဟုတ်သကဲ့သို့ ခွင့်လွတ်သင့်သည် ဟူသည့် ခံစားချက်တစ်ခု ဖြစ်လိမ့်မည် မဟုတ်လော။ (ဟုတ်ပါသည်။) ကောင်းပြီ၊ ယင်းသည် သမ္မာတရား လိုက်စားသူတစ်ဦး ရှိသင့်သည့် အခြေအနေမျိုးလော။ (မဟုတ်ပါ။) တစ်စုံတစ်ဦးသည် လုံးဝ အမှန်တကယ် နောင်တမရသကဲ့သို့ ဤအခြေအနေမျိုးတွင် အမြဲ အသက်ရှင်ပါက ၎င်းတို့သည် မိမိတို့ကိုယ်ကိုယ် ပြောင်းလဲနိုင်ကြလိမ့်မည်လော။ လုံးဝ ပြောင်းလဲနိုင်ကြလိမ့်မည်မဟုတ်။ ပြီးလျှင် လူတစ်ဦးသည် မိမိကိုယ်ကိုယ် မပြောင်းလဲပါက မိမိ၏ ဆိုးယုတ်မှုကို အမှန်တကယ် စွန့်လွှတ်နိုင်လိမ့်မည်မဟုတ်။ မိမိ၏ ဆိုးယုတ်မှုကို အမှန်တကယ် စွန့်လွှတ်နိုင်လိမ့်မည်မဟုတ်ဆိုသည်မှာ မည်သည့်အရာကို ဆိုလိုသနည်း။ ယင်းမှာ အကြင်သူသည် သမ္မာတရားကို အမှန်တကယ် လက်တွေ့မလုပ်ဆောင်နိုင်သကဲ့သို့ ထိုသမ္မာတရား စစ်မှန်မှုထဲသို့ မဝင်ရောက်နိုင်ဟု ဆိုလိုသည်။ ယင်းမှာ သိသာထင်ရှားသည့် ရလဒ်ဖြစ်သည်။ သင်သည် မိမိ၏ ဆိုးယုတ်မှုကို လက်မလွှတ်နိုင်ပါက၊ သို့မဟုတ် သမ္မာတရားကို လက်တွေ့လုပ်ဆောင်ပြီး စစ်မှန်မှုထဲသို့ မဝင်ရောက်နိုင်ပါက ဘုရားသခင်၏ စိတ်ကို သင်နှင့်ပတ်သက်၍ ပြောင်းလဲစေလိုလျှင်၊ သန့်ရှင်းသော ဝိညာဉ်တော်၏ အလုပ်ကို ရရှိလိုလျှင်၊ ဘုရားသခင်၏ ဉာဏ်အလင်းပေးခြင်းနှင့် အလင်းပြခြင်းတို့ကို ရရှိလိုပြီး ဘုရားသခင်အား သင်၏ ပြစ်မှားမှုများကို ခွင့်လွှတ်ကာ သင်၏ ဖောက်ပြန်ပျက်စီးခြင်းကို ဖြေရှင်းစေလိုလျှင် ဖြစ်နိုင်လိမ့်မည်လော။ (ဖြစ်နိုင်မည်မဟုတ်ပါ။) ယင်းက မဖြစ်နိုင်လျှင် ဘုရားသခင်၌ သင်၏ ယုံကြည်မှုသည် သင်၏ ကယ်တင်ခြင်း၌ အကျိုးသက်ရောက်နိုင်သလော။ (မသက်ရောက်နိုင်ပါ။) လူတစ်ဦးသည် မိမိကိုယ်ကိုယ် ခွင့်လွှတ်ပြီး ကြည်ညိုလေးစားသည့် အခြေအနေတွင် အသက်ရှင်ပါက သမ္မာတရား လိုက်စားရာတွင် အလွန်ပင်အဆင့်မမီပေ။ ၎င်းတို့ မိမိတို့ကိုယ်ကိုယ် အလုပ်များစေသည့်အရာ၊ ကြည့်သည့်အရာ၊ နားထောင်သည့်အရာနှင့် ပြေးလွှားလုပ်ဆောင်နေကြသည့်အရာများသည် ဘုရားသခင်ကို ယုံကြည်ခြင်းနှင့် အတော်အတန် ဆက်နွှယ်ကောင်း ဆက်နွှယ်နိုင်သော်လည်း ထိုအရာများသည် သမ္မာတရား လိုက်စားခြင်း၊ သို့မဟုတ် လက်တွေ့လုပ်ဆောင်ခြင်းနှင့် မည်သို့မျှ ပတ်သက်လိမ့်မည်မဟုတ်ပေ။ ဤရလဒ်က သိသာထင်ရှားပေသည်။ ထိုအရာများသည် သမ္မာတရား လိုက်စားခြင်း၊ သို့မဟုတ် လက်တွေ့လုပ်ဆောင်ခြင်းနှင့် မဆက်နွှယ်သည့်အတွက် ထိုလူသည် မိမိကိုယ်ကိုယ် သုံးသပ်ပြီးဖြစ်လိမ့်မည်မဟုတ်သကဲ့သို့ မိမိကိုယ်ကိုယ် သိသည့်အသိ ရှိလိမ့်မည်လည်း မဟုတ်ပေ။ ၎င်းတို့ ဖောက်ပြန်ပျက်စီးပြီးဖြစ်သည့် အတိုင်းအတာကို ၎င်းတို့ သိလိမ့်မည်မဟုတ်သကဲ့သို့ နောင်တရခြင်းငှာ မည်သို့ လက်တွေ့လုပ်ဆောင်ရမည်ကို သိလိမ့်မည်မဟုတ်။ ထို့ကြောင့် စစ်မှန်သော နောင်တ ရရှိရန်၊ သို့မဟုတ် ၎င်းတို့နှင့် ပတ်သက်၍ ဘုရားသခင်အား သူ၏ စိတ်ကို ပြောင်းလဲအောင်လုပ်ရန် ပို၍ပင် ဖြစ်နိုင်ဖွယ်မရှိပေ။ သင်သည် ထိုသို့သော အခြေအနေတစ်ခုတွင် အသက်ရှင်ပြီး ဘုရားသခင်အား သင့်အပေါ် သူ၏စိတ်ကို ပြောင်းလဲစေလိုလျှင်၊ ခွင့်လွှတ်စေလိုလျှင်၊ သို့မဟုတ် လက်ခံစေလိုလျှင် ယင်းသည် ဧကန်အမှန် ခက်ခဲလိမ့်မည်။ ဤနေရာတွင် “လက်ခံသည်”ဆိုသည်မှာ မည်သည့်အရာကို ဆိုလိုသနည်း။ သင်လုပ်ဆောင်သည့်အရာကို ဘုရားသခင်က အသိအမှတ်ပြုသည်၊ ထိုအရာကို လက်ခံပြီး အမှတ်ရသည်ဟု ဆိုလိုသည်။ ဤအရာတစ်ခုတစ်လေမျှ သင် မရရှိနိုင်ပါက သင်လုပ်ဆောင်သည့်အရာများ၊ သင်၏ အားစိုက်မှုများ၊ သင်၏ ပွင့်အံထုတ်မှုများနှင့် အပြုအမူများတွင် သင်သည် သမ္မာတရားကို လိုက်စားနေခြင်းမရှိကြောင်း သက်သေပြသည်။ သင်သည် မည်သည့်အရာတွေးသည်မှာ အရေးမကြီးပေ။ အပြုအမူကောင်းအချို့ကို သင် ဆောင်ရွက်နိုင်လျှင်ပင် ဤအပြုအမူများက သင်၏ လူ့သဘာဝအတွင်းတွင် အသိစိတ်နှင့် ဆင်ခြင်တုံတရား အနည်းငယ်ရှိသည်ကိုသာ ကိုယ်စားပြုသည်။ သို့ရာတွင် သင်၏ စမှတ်၊ ရည်ရွယ်ချက်များနှင့် အကြောင်းရင်းများမှာ သမ္မာတရားလိုက်စားခြင်းနှင့် မသက်ဆိုင်သောကြောင့် ဤအပြုအမူကောင်းများသည် သမ္မာတရား လိုက်စားခြင်း၏ သရုပ်သကန်တစ်ခု မဟုတ်ပေ။ ထိုသို့ ပြောဆိုခြင်းအတွက် အကြောင်းပြချက်များမှာ အဘယ်နည်း။ အကြောင်းပြချက်များမှာ သင်၏ အတွေးများ၊ လုပ်ရပ်များ၊ သို့မဟုတ် လုပ်ဆောင်ချက်များ တစ်ခုမျှသည် သမ္မာတရား လိုက်စားရာတွင်မရှိသကဲ့သို့ သမ္မာတရားနှင့် မပတ်သက်ကြခြင်း ဖြစ်သည်။ အကြင်သူ လုပ်သမျှ အရာတိုင်းသည် ဘုရားသခင်၏ လက်ခံမှုနှင့် အသိအမှတ်ပြုခြင်း ရရှိဖို့ မဟုတ်ပါက ၎င်းတို့ လုပ်ဆောင်သည့် မည်သည့်အရာမျှသည် ဘုရားသခင်၏ လက်ခံမှု၊ သို့မဟုတ် အသိအမှတ်ပြုခြင်းကို ရရှိနိုင်လိမ့်မည်မဟုတ်သကဲ့သို့ ဤအပြုအမူများနှင့် လက်တွေ့လုပ်ဆောင်မှုများကို လူသားအပြုအမူကောင်းများအဖြစ်သာ ခေါ်ဆို၍ရနိုင်သည်မှာ သိသာထင်ရှားပေသည်။ ထိုအရာများသည် ၎င်းတို့က သမ္မာတရားကို လက်တွေ့လုပ်ဆောင်နေသည့် လက္ခဏာများ မဟုတ်သကဲ့သို့ ထိုသမ္မာတရားကို ၎င်းတို့ လိုက်စားနေသည့် လက္ခဏာလည်း သေချာပေါက် မဟုတ်ပေ။ အထူးသဖြင့် စိတ်လိုက်မာန်ပါပြုပြီး မဆင်မခြင်နှင့် ထင်ရာမြင်ရာ မကြာခဏ ပြုမူတတ်သောလူများသည် ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်မခံကြသကဲ့သို့ ပြုပြင်ခံရခြင်းကိုလည်း လက်မခံကြချေ။ သမ္မာတရား လိုက်စားရန် ၎င်းတို့၏ ပျက်ကွက်မှုနှင့် ပြုပြင်ခြင်းကို ၎င်းတို့၏ လက်ခံနိုင်စွမ်း မရှိခြင်းတို့အတွက် မကြာခဏ ဆင်ခြေများလည်း ပေးကြသည်။ ယင်းမှာ မည်သည့် စိတ်သဘောထား ဖြစ်သနည်း။ ယင်းမှာ သမ္မာတရားကို အလွန်အမင်း မနှစ်မြို့သည့် စိတ်သဘောထားတစ်ခု၊ စာတန်၏ စိတ်သဘောထားဖြစ်သည်မှာ သိသာထင်ရှားပေသည်။ လူသားသည် စာတန်၏ သဘာဝနှင့် ၎င်း၏ စိတ်သဘောထားကို ပိုင်ဆိုင်သောကြောင့် စာတန်နှင့်သက်ဆိုင်သည်မှာ သံသယဖြစ်ဖွယ် မရှိပေ။ ၎င်းတို့သည် နတ်ဆိုးများ၊ စာတန်၏ ရင်သွေးများနှင့် အဆင်းနီသော နဂါးကြီး၏ သားသမီးများ ဖြစ်ကြ၏။ လူအချို့သည် ၎င်းတို့က နတ်ဆိုးများ၊ စာတန်များနှင့် အဆင်းနီသော နဂါးကြီး၏ သားသမီးများဖြစ်ကြောင်း ဝန်ခံနိုင်ကြပြီး ၎င်းတို့၏ မိမိကိုယ်ကိုယ် သိသောအသိအကြောင်းကို အလွန် လှလှပပ ပြောတတ်ကြသည်။ သို့ရာတွင် ဖောက်ပြန်ပျက်စီးသော စိတ်သဘောထားတစ်ခုကို ၎င်းတို့ ထုတ်ဖော်ပြပြီး တစ်စုံတစ်ဦးက ၎င်းတို့ကို ဖော်ထုတ်သည့်အခါ၊ ၎င်းတို့ကို ပြုပြင်သည့်အခါ မိမိတို့ကိုယ်ကိုယ် မှန်ကြောင်းရှင်းပြဖို့ အစွမ်းကုန်ကြိုးစားကြပြီး သမ္မာတရားကို လုံးဝ လက်ခံကြလိမ့်မည် မဟုတ်။ ဤနေရာတွင် ပြဿနာမှာ အဘယ်နည်း။ ဤတွင် ဤလူတို့သည် အလွန်အမင်း ဖော်ထုတ်ခံကြရသည်။ ၎င်းတို့သည် မိမိတို့ကိုယ်ကိုယ် သိကျွမ်းခြင်းအကြောင်း ပြောသည့်အချိန်တွင် အလွန် လှလှပပ ပြောတတ်ကြသည်။ ထို့ကြောင့် ပြုပြင်ခြင်းကို ရင်ဆိုင်ရသည့်အခါ အဘယ်ကြောင့် သမ္မာတရားကို လက်မခံနိုင်ကြသနည်း။ ဤနေရာတွင် ပြဿနာတစ်ခု ရှိ၏။ ဤကိစ္စမျိုးသည် အတော်လေး ဖြစ်နေကျဖြစ်သည် မဟုတ်လော။ ပိုင်းခြားသိမြင်ရန် လွယ်ကူပါသလော။ အမှန်ပင် လွယ်၏။ မိမိတို့ကိုယ်ကိုယ် သိသောအသိအကြောင်း ပြောဆိုကြသည့်အခါ ၎င်းတို့က နတ်ဆိုးများနှင့် စာတန်များဖြစ်ကြောင်း ပြောသောလူများ အတော်လေးရှိကြသော်လည်း နောက်ပိုင်းတွင် နောင်တမရ၊ သို့မဟုတ် မပြောင်းလဲကြချေ။ ထို့ကြောင့် ၎င်းတို့ပြောသည့် မိမိကိုယ်ကိုယ် သိမြင်မှုသည် မှန်သလော၊ မှားသလော။ ၎င်းတို့သည် စစ်မှန်သော မိမိတို့ကိုယ်ကိုယ် သိမြင်မှု ရှိကြသလော၊ သို့မဟုတ် ယင်းသည် အခြားသူများကို လှည့်စားဖို့ လိမ်လည်သောသဘောသာ ဖြစ်သလော။ အဖြေမှာ ပကတိအတိုင်း ရှင်းနေပြီးဖြစ်သည်။ ထို့ကြောင့် လူတစ်ဦးသည် စစ်မှန်သော မိမိကိုယ်ကိုယ် သိမြင်မှု ရှိမရှိဆိုသည်ကို ကြည့်ရန် ထိုလူက ထိုအကြောင်း ပြောသည်ကိုသာ သင် နားမထောင်သင့်။ ပြုပြင်ခြင်းအပေါ် ၎င်းတို့ရှိသည့် သဘောထားနှင့် သမ္မာတရားကို ထိုသူ လက်ခံခြင်း ရှိမရှိဆိုသည်ကို ကြည့်သင့်သည်။ ယင်းမှာ အရေးအပါဆုံးသောအရာ ဖြစ်၏။ ပြုပြင်ခြင်းကို လက်မခံသောသူ မည်သူမဆိုသည် သမ္မာတရားကို လက်မခံသည့်၊ လက်ခံရန် ငြင်းပယ်သည့် အနှစ်သာရရှိပြီး၊ ၎င်းတို့၏ စိတ်သဘောထားသည် သမ္မာတရားကို အလွန်အမင်း မနှစ်မြို့ချေ။ ယင်းမှာ သံသယရှိစရာမလိုပေ။ လူအချို့သည် ဖောက်ပြန်ပျက်စီးခြင်း မည်မျှ ထုတ်ဖော်ပြသည်ဖြစ်စေ၊ အခြားသူများက မိမိတို့ကို ပြုပြင်သည်ကို ခွင့်မပြုကြချေ။ မည်သူကမျှ ၎င်းတို့ကို ပြုပြင်ခြင်း မပြုနိုင်ကြချေ။ ၎င်းတို့၏ မိမိကိုယ်ကိုယ် သိမြင်မှုအကြောင်းကို ၎င်းတို့သဘောကျ မည်သည့်နည်းလမ်းဖြင့်မဆို ပြောခွင့်ရကြသော်လည်း အခြားတစ်စုံတစ်ဦးက ၎င်းတို့ကို ဖော်ထုတ်၊ ဝေဖန်လျှင်မူ၊ သို့မဟုတ် ပြုပြင်လျှင်မူ ယင်းသည် မည်သို့ ဓမ္မဓိဋ္ဌာန်ကျသည်ဖြစ်စေ၊ သို့မဟုတ် အမှန်တရားများနှင့် မည်သို့ ကိုက်ညီသည်ဖြစ်စေ၊ ၎င်းတို့ လက်ခံကြလိမ့်မည်မဟုတ်။ ၎င်းတို့၌ မည်သည့် ဖောက်ပြန်ပျက်စီးသော စိတ်သဘောထား ပွင့်အံထွက်ခြင်းမျိုးကို အခြားလူက ဖော်ထုတ်သည်ဖြစ်စေ ၎င်းတို့သည် အလွန်အမင်း ရန်လိုကြပြီး စစ်မှန်သော ကျိုးနွံနာခံခြင်း စိုးစဉ်းမျှပင် မရှိဘဲ မိမိတို့ကိုယ်ကိုယ်အတွက် ဟုတ်မှန်သယောင်ရှိသော်လည်း စင်စစ်မှားနေသော ကျိုးကြောင်းပြချက်များကို ပေးမြဲပေးကြသည်။ ထိုသို့သောလူများသည် သမ္မာတရားကို မလိုက်စားကြပါက ပြဿနာ ရှိလိမ့်မည်။ အသင်းတော်တွင် ၎င်းတို့သည် ထိ၍မရသကဲ့သို့ အပြစ်တင်၍မရသောသူများ ဖြစ်သည်။ ၎င်းတို့နှင့် ပတ်သက်၍ ကောင်းမွန်သော အရာတစ်ခုခုကို လူတို့ ပြောသည့်အခါ ထိုအရာက ၎င်းတို့ကို ပျော်ရွှင်စေလိမ့်မည်။ ၎င်းတို့နှင့် ပတ်သက်၍ မကောင်းသော အရာတစ်ခုခုကို ထောက်ပြသည့်အခါ ဒေါသထွက်ကြလိမ့်မည်။ တစ်စုံတစ်ဦးက ၎င်းတို့ကို ဖော်ထုတ်ပြီး “သင်သည် လူကောင်းတစ်ဦး ဖြစ်သော်လည်း အလွန် စိတ်လိုက်မာန်ပါပြုသည်။ သင်သည် အမြဲ ထင်ရာမြင်ရာနှင့် မဆင်မခြင်ပြုမူနေသည်။ ပြုပြင်ခြင်းကို သင်လက်ခံဖို့လိုသည်။ ဤချို့တဲ့ခြင်းများနှင့် ဖောက်ပြန်ပျက်စီးသော စိတ်သဘောထားများကို ဖယ်ရှားရန်မှာ သင့်အတွက် ပိုကောင်းမည် မဟုတ်လော”ဟု ပြောသည်။ တုံ့ပြန်သည့်အနေဖြင့် ၎င်းတို့က “ဆိုးယုတ်သည့်အရာတစ်ခုမျှ ကျွန်ုပ် မလုပ်ဖူးပါ။ ကျွန်ုပ် အပြစ်မလုပ်ဖူးပါ။ အဘယ်ကြောင့် ကျွန်ုပ်ကို သင် ပြုပြင်နေသနည်း။ ကျွန်ုပ်သည် ငယ်ငယ်ကတည်းက အိမ်တွင် မိဘများကရော၊ အဖိုးအဖွားတို့ကပါ တုန်နေအောင် ချစ်သည်ကို ခံခဲ့ရသည်။ ကျွန်ုပ်သည် သူတို့၏ အသည်းလေး၊ အသည်းကြော် ဖြစ်သည်။ ယခု ဘုရားအိမ်တော်တွင်မူ မည်သူကမျှ ကျွန်ုပ်ကို တုန်နေအောင် မချစ်ကြပါ။ ဤနေရာတွင် အသက်ရှင်ရသည်မှာ ပျော်စရာမရှိပါ။ သင်တို့သည် ကျွန်ုပ်၏ အပြစ်တစ်ခုမဟုတ် တစ်ခုကို အမြဲ ယိုးမယ်ဖွဲ့နေပြီး ကျွန်ုပ်ကို ပြုပြင်ဖို့ ကြိုးစားနေသည်။ ကျွန်ုပ်သည် အဘယ်သို့ ထိုသို့ အသက်ရှင်ရမည်နည်း”ဟု ပြောကြသည်။ ဤနေရာတွင် ပြဿနာမှာ အဘယ်နည်း။ ချင့်ချိန်ဆုံးဖြတ်နိုင်စွမ်းရှိသူက ဤလူများသည် ၎င်းတို့ မိဘများနှင့် မိသားစု၏ ဖျက်ဆီးခြင်း ခံရပြီးဖြစ်ကာ ယခုတွင်ပင် ၎င်းတို့ မည်သို့ ပြုမူနေထိုင်ရမည်၊ သို့မဟုတ် အမှီအခိုကင်းစွာ အသက်ရှင်ရမည်ကို မသိကြကြောင်း ချက်ချင်း ပြောနိုင်သည်။ သင်၏ မိသားစုသည် သင့်အပေါ် အရုပ်တစ်ရုပ်ကဲ့သို့ တုန်နေအောင် ချစ်ပြီး သင်သည် လောကတွင် မိမိနေရာကို မသိချေ။ သင်သည် မိမိ သတိမထားမိသကဲ့သို့ ဆင်ခြင်သုံးသပ်ရကောင်းမှန်းလည်း မသိသော မာနထောင်လွှားခြင်း၊ မိမိကိုယ်ကိုယ် အမှန်ဟုမှတ်ယူခြင်းနှင့် လွန်ကဲသော စိတ်လိုက်မာန်ပါပြုခြင်းတည်းဟူသော အကျင့်ဆိုးများ ဖြစ်ပေါ်ပြီးဖြစ်သည်။ ဘုရားသခင်ကို သင်ယုံကြည်သော်လည်း သူ၏ နှုတ်ကပတ်တော်များကို နားမထောင်၊ သို့မဟုတ် သမ္မာတရားကို လက်တွေ့လုပ်ဆောင်ခြင်း မရှိချေ။ ထိုသို့သော ဘုရားသခင်ကို ယုံကြည်မှုဖြင့် သမ္မာတရားကို သင် ရရှိနိုင်သလော။ ထိုသမ္မာတရား စစ်မှန်မှုထဲသို့ ဝင်ရောက်နိုင်သလော။ စစ်မှန်သော လူသားပုံသဏ္ဌာန်ကို သင် အသက်ရှင် နေထိုင်နိုင်သလော။ သေချာပေါက် အသက်မရှင်နိုင်ပေ။ ဘုရားသခင်၌ ယုံကြည်သူတစ်ဦးအနေဖြင့် သင်သည် အနည်းဆုံး သမ္မာတရားကို လက်ခံပြီး မိမိကိုယ်ကိုယ် သိရှိရမည်။ ထိုသို့ဖြင့်သာ သင်သည် ပြောင်းလဲနိုင်လိမ့်မည်။ သင်၏ ယုံကြည်ခြင်းတွင် သင်သည် မိမိ၏ အယူအဆများနှင့် စိတ်ကူးများအပေါ် အမြဲ မှီခိုပါက၊ သမ္မာတရားကို လိုက်စားမည့်အစား ငြိမ်သက်ခြင်းနှင့် ပျော်ရွှင်ခြင်းကိုသာ ရှာဖွေပါက၊ စစ်မှန်သော နောင်တရနိုင်စွမ်းမရှိသကဲ့သို့ သင်၏ အသက် စိတ်သဘောထားတွင် ပြောင်းလဲမှု မရှိပါက ဘုရားသခင်၌ သင်၏ ယုံကြည်မှုသည် အဓိပ္ပာယ်မဲ့လိမ့်မည်။ ဘုရားသခင်၌ယုံကြည်သူတစ်ဦးအနေဖြင့် သမ္မာတရားကို သင် နားလည်ရမည်။ မိမိကိုယ်ကိုယ် သိမြင်ရာ၌ သင် အားထုတ်ရမည်။ သင့်ကို မည်သည့်အရာ ဖြစ်ပျက်ပါစေ သင်သည် သမ္မာတရားကို ရှာဖွေပြီး သင့်ထံတွင် မည်သည့် ဖောက်ပြန်ပျက်စီးသော စိတ်သဘောထား ပွင့်အံ့ထွက်လာသည်ဖြစ်စေ ဘုရားနှုတ်ကပတ်တော်များအတိုင်း သမ္မာတရားကို မိတ်သဟာယပြုခြင်းအားဖြင့် သင် ဖြေရှင်းရမည်။ တစ်စုံတစ်ဦးသည် သင်၏ ဖောက်ပြန်ပျက်စီးသော စိတ်သဘောထားကို ထောက်ပြပါက၊ သို့မဟုတ် သင့်ကိုယ်သင် ဆန်းစစ်ဖို့ ကနဦးခြေလှမ်းလှမ်းပါက၊ ယင်းကို ဘုရားနှုတ်ကပတ်တော်များနှင့် အသိရှိရှိ နှိုင်းယှဉ်ပြီး ဆန်းစစ်၊ စစ်ဆေးနိုင်ကာ မိမိကိုယ်ကိုယ် သိရှိနိုင်ပြီးနောက်တွင် သင်၏ ပြဿနာကို ပြုပြင်ပြီး နောင်တတရားကို လက်တွေ့လုပ်ဆောင်ဖို့ ဆက်လက်လုပ်ဆောင်နိုင်ပါက လူသားတစ်ဦးအဖြစ် အသက်ရှင်နိုင်စွမ်း ရှိလိမ့်မည်။ ဘုရားသခင်ကို ယုံကြည်သောသူများသည် သမ္မာတရားကို လက်ခံရမည်။ သင့်မိသားစု၏ တုန်နေအောင်ချစ်သည့် ခံစားချက်ကို သင် အမြဲ အကြိုက်တွေ့နေပါက၊ ၎င်းတို့၏ အသည်းကြော်၊ အသည်းလေးဖြစ်ခြင်းကို အမြဲ ကျေနပ်နှစ်သိမ့်ပါက မည်သည့်အရာကို သင် ရရှိနိုင်လိမ့်မည်နည်း။ သင်သည် သင့်မိသားစု၏ အသည်းကြော်နှင့် ၎င်းတို့၏ အသည်းလေး မည်မျှဖြစ်ပါစေ သမ္မာတရား စစ်မှန်မှုမရှိပါက သင်သည် အမှိုက်ဖြစ်၏။ ဘုရားသခင်ကို ယုံကြည်ခြင်းသည် သမ္မာတရားကို သင် လိုက်စားမှသာ တန်ဖိုးရှိသည်။ သမ္မာတရားကို သင်နားလည်သည့်အခါ သင်သည် မည်သို့ ပြုမူကျင့်ကြံရမည်ကို သိလိမ့်မည်ဖြစ်ပြီး စစ်မှန်သော ပျော်ရွှင်မှုကို တွေ့ကြုံခံစားပြီး ဘုရားသခင်ကို ကျေနပ်စေသည့် လူတစ်ဦးဖြစ်ဖို့ မည်သို့ အသက်ရှင်ရမည်ကို သိလိမ့်မည်။ မိသားစု အခြေအနေနှင့် တစ်ကိုယ်ရေ အားသာချက်များ၊ အရည်အချင်းများ၊ သို့မဟုတ် ဆုကျေးဇူးများသည် သမ္မာတရား စစ်မှန်မှုကို အစားမထိုးနိုင်သကဲ့သို့ ထိုသို့သော အရာတစ်ခုတစ်လေမျှသည် သင့်အတွက် သမ္မာတရား မလိုက်စားဖို့ ဆင်ခြေတစ်ခု မဖြစ်သင့်ပေ။ သမ္မာတရားကို ရရှိခြင်းသည် လူတို့ကို စစ်မှန်သည့် ပျော်ရွှင်မှုဆောင်ကြဉ်းပေးနိုင်သည့် တစ်ခုတည်းသောအရာ၊ အဓိပ္ပာယ်ရှိသည့် ဘဝတစ်ခုကို အသက်ရှင်ခွင့်ပေးနိုင်ပြီး လှပသည့် ခရီးပန်းတိုင်ကို ပေးနိုင်သည့် တစ်ခုတည်းသော အရာဖြစ်သည်။ ဤသည်တို့မှာ အမှန်တရားများ ဖြစ်သည်။

အသင်းတော်တွင် ခေါင်းဆောင်များနှင့် အမှုဆောင်များ ဖြစ်ပြီးနောက် လူအချို့သည် မိမိတို့ကိုယ်ကိုယ် ထူးချွန်ပြောင်မြောက်သူဖြစ်သည်ဟု ယုံကြည်ကြပြီး နောက်ဆုံးတွင် ထင်ပေါ်ဖို့ အခွင့်အရေးရှိသည်ဟု တွေးထင်ကြသည်။ ၎င်းတို့သည် မိမိတို့ကိုယ်ကိုယ် ကျေနပ်အားရပြီး မိမိတို့၏ အားသာချက်များကို စတင်အသုံးပြုကြသည်။ ၎င်းတို့သည် လွတ်လပ်စွာ ရည်မှန်းချက်များထားရှိကြပြီး မိမိတို့၏ အစွမ်းအစများကို အပြည့်အဝ ပြသကြသည်။ ဤလူများသည် အတန်းပညာနှင့် ပညာရေး၊ စီမံခန့်ခွဲရေးပညာများနှင့် ခေါင်းဆောင်တစ်ဦး၏ ဟန်ပန်နှင့် အမူအရာများရှိကြသည်။ ၎င်းတို့သည် မိမိတို့ အတန်းထဲတွင် အတော်ဆုံးဖြစ်ပြီး ကျောင်းတွင် ကျောင်းသားသမဂ္ဂ၏ အကြီးအကဲဖြစ်ကာ ၎င်းတို့အလုပ်လုပ်သည့် ကုမ္ပဏီ၏ မန်နေဂျာ၊ သို့မဟုတ် ဥက္ကဋ္ဌ ဖြစ်ကြသည်။ ပြီးလျှင် ဘုရားသခင်ကို ၎င်းတို့ စတင်ယုံကြည်ကာ သူ၏ အိမ်တော်သို့ လာကြသည့်အချိန်တွင် ခေါင်းဆောင်အဖြစ် အရွေးခံရကြသည်။ ထို့ကြောင့် ၎င်းတို့သည် မိမိတို့ကိုယ်ကိုယ် “ကောင်းကင်က ကျွန်ုပ်ကို မည်သည့်အခါတွင်မျှ စိတ်မပျက်စေပါ။ ကျွန်ုပ်လောက် စွမ်းဆောင်နိုင်သူ တစ်စုံတစ်ဦးအတွက် သိုသိုသိပ်သိပ်နေဖို့က ခက်ပေမည်။ ကုမ္ပဏီဥက္ကဋ္ဌရာထူးမှ ကျွန်ုပ် ဆင်းလျှင်ဆင်းချင်း ဘုရားအိမ်တော်သို့ ကျွန်ုပ်လာပြီး ခေါင်းဆောင် ရာထူးကို ယူခဲ့သည်။ ကျွန်ုပ်ကြိုးစားလျှင်ပင် သာမန်လူတစ်ဦး ဖြစ်၍ရမည်မဟုတ်။ ဤသည်မှာ ကျွန်ုပ်ကို ဘုရားသခင် ချီးမြှောက်ခြင်းဖြစ်သည်။ ကျွန်ုပ် လုပ်ဆောင်ရန်အတွက် သူ စီစဉ်ခဲ့သည့်အရာဖြစ်သောကြောင့် ကျွန်ုပ် ကျိုးနွံနာခံမည်”ဟု တွေးကြသည်။ ခေါင်းဆောင် ဖြစ်လာပြီးနောက်တွင် ၎င်းတို့သည် မိမိတို့၏ အတွေ့အကြုံ၊ အသိပညာ၊ စီမံခန့်ခွဲရေးပညာနှင့် ခေါင်းဆောင်မှု ပုံစံတို့ကို အသုံးပြုကြသည်။ ၎င်းတို့သည် စွမ်းဆောင်နိုင်ပြီး ရဲရင့်ကြကာ အမှန်ပင် ကျွမ်းကျင်ပြီး ပါရမီရှိသော သူတစ်ဦးဖြစ်သည်ဟု တွေးထင်ကြသည်။ ထိုအခါ ဤနေရာတွင် ပြဿနာရှိသည်မှာ စိတ်မကောင်းစရာဖြစ်၏။ ခေါင်းဆောင်ဖို့ အစွမ်းအစဖြင့် မွေးဖွားလာခဲ့ကြသည့် ဤကျွမ်းကျင်သည့်၊ ပါရမီရှိသော ခေါင်းဆောင်များသည် အသင်းတော်၌ မည်သည့်အရာကို လုပ်ဆောင်ရာတွင် အတော်ဆုံး ဖြစ်ကြသနည်း။ အမှီအခိုကင်းသော နယ်ပယ်တစ်ခုကို တည်ထောင်ခြင်း၊ ရှိသမျှအာဏာဖြင့် ပိုင်စိုးပိုင်နင်းပြုမူခြင်းနှင့် ဆွေးနွေးမှုများကို စိုးမိုးခြယ်လှယ်ခြင်းတို့ဖြစ်သည်။ ခေါင်းဆောင် ဖြစ်လာပြီးနောက်တွင် အလုပ်မှလွဲ၍ မည်သည့်အရာမျှ မလုပ်ကြ၊ မိမိတို့ကိုယ်ပိုင် သိက္ခာနှင့် အဆင့်အတန်းအတွက် ပြေးလွှားကြသည်၊ အခက်အခဲများကို ကြုံကြရပြီး အဖိုးအခပေးကြသည်။ အခြား မည်သည့်အရာကိုမျှ ၎င်းတို့ ဂရုမစိုက်ကြချေ။ ၎င်းတို့ အလုပ်များခြင်းနှင့် အလုပ်တို့သည် ဘုရားသခင်၏ ရည်ရွယ်ချက်များနှင့် ကိုက်ညီကြောင်း၊ ၎င်းတို့တွင် မည်သည့် ဖောက်ပြန်ပျက်စီးခြင်းမျှ မရှိကြောင်း၊ အသင်းတော်က ၎င်းတို့ကို အမြဲလိုအပ်ကြောင်းနှင့် ညီအစ်ကို မောင်နှမများကလည်း ၎င်းတို့ကို လိုအပ်ကြောင်း ၎င်းတို့က ယုံကြည်ကြသည်။ ၎င်းတို့ မပါဘဲနှင့် မည်သည့် အလုပ်မျှ မပြီးနိုင်ကြောင်း၊ အားလုံးကို ၎င်းတို့ဘာသာ တာဝန်ယူနိုင်ပြီး တန်ခိုးအာဏာကို လက်ဝါးကြီးအုပ်၍ရကြောင်း ယုံကြည်ကြသည်။ ပြီးလျှင် မိမိတို့၏ အမှီအခိုကင်းသော နယ်ပယ်ကို တည်ထောင်သည့်နေရာတွင် အတော် ကျွမ်းကျင်လေသည်။ ၎င်းတို့သည် တီထွင်ဖန်တီးမှုရှိသည့်၊ ဆန်းသစ်သော အရာမျိုးစုံကို စွမ်းဆောင်နိုင်သည်။ အရာရှိများကဲ့သို့ ပြုမူခြင်းနှင့် ဟိတ်ဟန်လုပ်ရာတွင် အထူးသဖြင့် ကျွမ်းကျင်ကြပြီး အထက်စီးမှ အခြားသူများကို ဩဝါဒခြွေခြင်းကို ကျင့်သုံးကြသည်။ ၎င်းတို့ မလုပ်နိုင်သည့် အရေးကြီးသော အရာတစ်ခုသာ ရှိသည်။ ခေါင်းဆောင် ဖြစ်လာပြီးနောက်တွင် ၎င်းတို့သည် စိတ်ရင်းအတိုင်း အခြားသူများကို စကားမပြောနိုင်တော့ပေ၊ မိမိတို့ကိုယ်ကိုယ် မသိမြင်နိုင်၊ မိမိတို့ကိုယ်ပိုင် ဖောက်ပြန်ပျက်စီးခြင်းကို သတိမထားမိနိုင်၊ သို့မဟုတ် ညီအစ်ကို မောင်နှမများထံမှ အကြံများကို နားမထောင်နိုင်တော့ချေ။ အလုပ်ဆွေးနွေးမှုများအတောအတွင်းတွင် မတူညီသော စိတ်ကူးအချို့ကို တစ်စုံတစ်ဦးက တင်ပြသည့်အခါ ယင်းတို့ကို ဤခေါင်းဆောင်များက ငြင်းပယ်လိမ့်မည်သာမက ထိုသို့လုပ်ဆောင်ခြင်းကို “ထိုအဆိုပြုချက်ကို သင်တို့ စေ့စေ့စပ်စပ် မစဉ်းစားသေးပါ။ ကျွန်ုပ်သည် အသင်းတော်ခေါင်းဆောင် ဖြစ်သည်။ သင်တို့ပြောသည့်အတိုင်း ကျွန်ုပ်လုပ်ပြီး မည်သည့်အရာမျှ မမှားပါက ကိစ္စမရှိသော်လည်း မကောင်းသည့်အရာတစ်ခုခု ဖြစ်သွားလျှင် တာဝန်က ကျွန်ုပ်တစ်ဦးတည်းပေါ် ကျရောက်လိမ့်မည်။ ထို့ကြောင့် အချိန်အများစုတွင် သင်တို့၏ အယူအဆများကို သင်တို့ ဖွင့်ဟနိုင်သည်။ ထိုလုပ်ရိုးလုပ်စဉ်ကို ကျွန်ုပ်တို့ လိုက်နာနိုင်သည်။ သို့သော် အဆုံးတွင် ရွေးချယ်မှုပြုလုပ်ပြီး ကိစ္စများကို မည်သို့လုပ်ဆောင်သည်ကို ဆုံးဖြတ်သူမှာ ကျွန်ုပ်တစ်ဦးတည်းသာ ဖြစ်ရမည်”ဟု ဆိုခြင်းဖြင့် ၎င်းတို့ မှန်ကြောင်းရှင်းပြလိမ့်မည်။ အချိန်ကြာလာသည်နှင့်အမျှ ညီအစ်ကို မောင်နှမအများစုသည် ဆွေးနွေးမှုများ၊ သို့မဟုတ် အလုပ်အကြောင်း မိတ်သဟာယပြုခြင်းတွင် ပါဝင်ကြတော့မည်မဟုတ်သကဲ့သို့ ဤခေါင်းဆောင်များသည် အလုပ်တွင်ရှိသည့် ပြဿနာများနှင့် ပတ်သက်၍ ၎င်းတို့ကို ဒုက္ခခံ၍မိတ်သဟာယပြုလိမ့်မည် မဟုတ်ပေ။ မည်သူကိုမျှ စကားတစ်ခွန်းမပြောဘဲ ၎င်းတို့သည် ဆုံးဖြတ်ချက်များ ပြုလုပ်ကာ ဆက်လက် ဝေဖန်အကဲဖြတ်ကြလိမ့်မည်ဖြစ်ပြီး ၎င်းတို့တွင် ကျိုးကြောင်းပြချက်များ ရှိကြလိမ့်ဦးမည်ဖြစ်သည်။ ၎င်းတို့က “အသင်းတော်သည် ခေါင်းဆောင်၏ အသင်းတော်ဖြစ်သည်။ ခေါင်းဆောင်က လမ်းစဉ်ကို ကြံစည်သည်။ ညီအစ်ကို မောင်နှမများ သွားသည့် ဦးတည်ရာနှင့် ၎င်းတို့ လျှောက်သည့် လမ်းကြောင်းကို ဆုံးဖြတ်ပိုင်ခွင့်ရှိသည်မှာ ခေါင်းဆောင်ဖြစ်သည်”ဟု ယုံကြည်ကြသည်။ ထို့နောက်တွင် ဤခေါင်းဆောင်များသည် ညီအစ်ကို မောင်နှမများ၏ အသက်ဝင်ရောက်မှု၊ ၎င်းတို့ လျှောက်သည့် လမ်းကြောင်းနှင့် ၎င်းတို့ လိုက်စားမှု၏ ဦးတည်ရာကို အလိုအလျောက် ထိန်းချုပ်လိုက်ကြသည်။ ၎င်းတို့ “ခေါင်းဆောင်” ဖြစ်လာသည်နှင့်တစ်ပြိုင်နက် အာဏာကို လက်ဝါးကြီးအုပ်ကာ အမှီအခိုကင်းသည့် နယ်ပယ်တစ်ခုကို တည်ထောင်လိုက်ကြသည်။ ၎င်းတို့၏ လုပ်ရပ်များတွင် ပွင့်လင်းမြင်သာမှုမရှိသကဲ့သို့ သတိမမူမိဘဲ လူအနည်းငယ်ကို ၎င်းတို့ ဖိနှိပ်ကာ သမ္မာတရားကို လိုက်စားပြီး သဘောပေါက်နားလည်နိုင်စွမ်းရှိသော ညီအစ်ကို မောင်နှမအချို့ကို ဖယ်ကြဉ်ကြလေတော့သည်။ ထိုတစ်ချိန်လုံးတွင် ၎င်းတို့သည် ထိုသို့ လုပ်ဆောင်ရာ၌ အသင်းတော်၏ အလုပ်နှင့် ဘုရားရွေးချယ်ထားသောလူတို့၏ အကျိုးစီးပွားများကို ကာကွယ်နေခြင်းဖြစ်သည်ဟု တွေးထင်ကြဆဲ ဖြစ်သည်။ ထိုသို့သော တိကျသည့် တွေးခေါ်မြော်မြင်မှုဖြင့်၊ ကျိုးကြောင်းပြချက်များနှင့် ဆင်ခြေအမြောက်အများဖြင့် အရာရာကို လုပ်ဆောင်ကြသည်။ အဆုံးတွင် ရလဒ်မှာ အဘယ်နည်း။ ၎င်းတို့ လုပ်သမျှတိုင်းမှာ မိမိတို့၏ အဆင့်အတန်းကို ကာကွယ်ရန်နှင့် အာဏာအပေါ် မိမိတို့ လက်ဝါးကြီးအုပ်ခြင်းအား ကာကွယ်ရန် ဖြစ်သည်။ ၎င်းတို့သည် လောကီဆန်သည့် လူမှုအဖွဲ့အစည်းနှင့် မိသားစုဘဝမှ စည်းမျဉ်းများ၊ နည်းလမ်းများနှင့် အပြုအမူ နည်းစနစ်များကို ဘုရားအိမ်တော်ထဲသို့ ယူဆောင်လာကြပြီး ထိုသို့ လုပ်ဆောင်ခြင်းဖြင့် ဘုရားအိမ်တော်၏ အကျိုးစီးပွားများကို ကာကွယ်နေကြသည်ဟု တွေးထင်ကြသည်။ သို့တိုင် မိမိတို့ကိုယ်ကိုယ် မည်သည့်အခါတွင်မျှ မသိကြ၊ သို့မဟုတ် မသုံးသပ်ကြချေ။ ၎င်းတို့သည် သမ္မာတရား စည်းမျဉ်းများကို ချိုးဖောက်နေကြောင်း တစ်စုံတစ်ဦးက ထောက်ပြမည်ဆိုလျှင်ပင်၊ ဘုရားသခင်၏ ဉာဏ်အလင်းပေးခြင်း၊ ပဲ့ပြင်ဆုံးမခြင်းနှင့် ရိုက်နှက်ဆုံးမခြင်းတို့နှင့် ၎င်းတို့ ကြုံတွေ့ရမည်ဆိုလျှင်ပင် ထိုအရာကို ၎င်းတို့ အသိရှိကြမည်မဟုတ်။ ပြဿနာက မည်သည့်နေရာတွင် တည်ရှိသနည်း။ ခေါင်းဆောင်ရာထူးကို ၎င်းတို့ ယူသည့်နေ့မှစ၍ ၎င်းတို့သည် မိမိတို့တာဝန်ကို အလုပ်အကိုင်တစ်ခုကဲ့သို့ သဘောထားခဲ့ကြပြီး ဤအရာကြောင့်ပင် ၎င်းတို့သည် အန္တိခရစ်များ၏ လမ်းကြောင်းကို လျှောက်ဖို့ ကြမ္မာငင်ပြီး သမ္မာတရားကို ၎င်းတို့ မလိုက်စားနိုင်ကြောင်း သေချာသွားစေလေသည်။ သို့တိုင် ဤ“အလုပ်အကိုင်” လမ်းကြောင်းတွင် ၎င်းတို့ လုပ်ဆောင်သမျှတိုင်းသည် သမ္မာတရား လိုက်စားခြင်းဖြစ်သည်ဟု ယုံကြည်ကြသည်။ သမ္မာတရား လိုက်စားခြင်းကို ၎င်းတို့ မည်သို့ ရှုမြင်ကြသနည်း။ ညီအစ်ကို မောင်နှမများနှင့် ဘုရားအိမ်တော်၏ အကျိုးစီးပွားများကို ကာကွယ်နေသည်ဆိုသည့် အယောင်ဆောင်မှုအောက်တွင် မိမိတို့ကိုယ်ပိုင် အဆင့်အတန်းနှင့် အာဏာတို့ကို ကာကွယ်စောင့်ရှောက်ကြပြီး ဤသည်မှာ ၎င်းတို့၏ သမ္မာတရား လိုက်စားခြင်း သရုပ်သကန်တစ်ခု ဖြစ်သည်ဟု ၎င်းတို့ ယုံကြည်ကြသည်။ ၎င်းတို့ ဤရာထူးကို ရထားစဉ်တွင် ၎င်းတို့ထံမှ သိသာထင်ရှားပြီး ပွင့်အံထွက်လာသည့် ဖောက်ပြန်ပျက်စီးသော စိတ်သဘောထားကို ၎င်းတို့ လုံးဝ မသိရှိကြချေ။ တစ်ခါတစ်ရံတွင် ၎င်းတို့သည် ထိုအရာမှာ ဖောက်ပြန်ပျက်စီးသော စိတ်သဘောထားဖြစ်ကြောင်း၊ ဘုရားသခင်က စက်ဆုပ်ကြောင်း၊ ယင်းမှာ ဆိုးသော၊ ခေါင်းမာသော စိတ်သဘောထားဖြစ်ကြောင်း ရေးရေးမျှ အသိစိတ်ရှိကြလျှင်ပင် “ယင်းမှာ မဖြစ်ပါ။ ငါသည် ခေါင်းဆောင်တစ်ဦး‌ဖြစ်သဖြင့် ခေါင်းဆောင်တစ်ဦး၏ ဂုဏ်သိက္ခာရှိဖို့ လိုအပ်သည်။ ဖောက်ပြန်ပျက်စီးသော စိတ်သဘောထားတစ်ခု ကျွန်ုပ် ပွင့်အံထွက်သည်ကို ညီအစ်ကို မောင်နှမများအား တွေ့ခွင့်ပေး၍ မဖြစ်ပါ”ဟု တွေးရင်း မိမိတို့စိတ်ကို အလျင်အမြန် ပြောင်းလိုက်ကြသည်။ ထို့ကြောင့် ၎င်းတို့သည် ဖောက်ပြန်ပျက်စီးမှုများစွာ ပွင့်အံထုတ်မိပြီးဖြစ်ကြောင်းနှင့် မိမိတို့၏ အဆင့်အတန်းနှင့် ဩဇာအာဏာတို့ကို ကာကွယ်စောင့်ရှောက်ရန်အလို့ငှာ စည်းမျဉ်းများနှင့် ဆန့်ကျင်သည့် အရာများစွာကို လုပ်ဆောင်မိပြီးဖြစ်ကြောင်း သဘောပေါက်ကြသော်လည်း တစ်စုံတစ်ဦးက ၎င်းတို့ကို ဖော်ထုတ်သည့်အခါ ထိုအရာကို အခြားမည်သူမျှ မသိစေဖို့အလို့ငှာ မတတ်သာသည့်အဆုံး တစ်ပတ်ရိုက်ကြသည်၊ သို့မဟုတ် ထိုအရာကို ဟန့်တားဖို့ ကြိုးစားကြလေသည်။ ဩဇာအာဏာနှင့် အဆင့်အတန်းကို ၎င်းတို့ ရရှိသည်နှင့်တစ်ပြိုင်နက် ၎င်းတို့သည် မိမိတို့ကိုယ်ကိုယ် ကြီးမြတ်၊ မှန်ကန်၊ အပြစ်ကင်းကာ သံသယထားစရာမလိုသူအဖြစ် တွေးထင်လျက် မိမိတို့ကိုယ်ကိုယ် မြင့်မြတ်၍ အစဉ်လေးစားလိုက်နာအပ်သော၊ မချိုးဖောက်အပ်သော ရာထူးတွင် ထားလိုက်ကြသည်။ ထိုသို့သော ရာထူးတစ်ခုကို ယူထားသည့်နောက်တွင် ညီအစ်ကို မောင်နှမများ၏ အသက်ဝင်ရောက်မှုနှင့် အသင်းတော်၏ အလုပ်ကို အကျိုးရှိစေနိုင်မည့် မည်သည့် ကွဲလွဲသော သဘောထားများကိုမဆို၊ မည်သည့် အကြံပေးချက်များကိုမဆို၊ သို့မဟုတ် မည်သည့်အကြံဉာဏ်ကိုမဆို တစ်သမတ်တည်း ၎င်းတို့က ခုခံကာ ငြင်းပယ်ကြလေသည်။ သမ္မာတရား မလိုက်စားခြင်းအတွက် မည်သည့် ဆင်ခြေကို ၎င်းတို့ ပေးကြသနည်း။ ၎င်းတို့က “ကျွန်ုပ်တွင် အဆင့်အတန်းရှိသည်။ ကျွန်ုပ်သည် အဆင့်ရှိသော လူတစ်ဦးဖြစ်သည်။ ဆိုလိုသည်မှာ ကျွန်ုပ်သည် သိက္ခာရှိပြီး မြင့်မြတ်၍ အစဉ်လေးစားလိုက်နာအပ်သကဲ့သို့ မချိုးဖောက်အပ်သောသူ ဖြစ်သည်ဟု ဆိုလိုသည်”ဟု ပြောကြသည်။ ထိုသို့သော အကြောင်းပြချက်များနှင့် ဆင်ခြေများကို အကြံရလာသည့်နောက်တွင် သမ္မာတရားကို ၎င်းတို့ လိုက်စားနိုင်သလော။ (မလိုက်စားနိုင်ပါ။) ၎င်းတို့ မလိုက်စားနိုင်ပေ။ ၎င်းတို့ အဆင့်အတန်း၏ အကျိုးအမြတ်များကို မွေ့လျော်နေစဉ်တွင် ၎င်းတို့၏ မြင့်မားသော ရာထူးအဆင့်အတန်းမှ အမြဲ စကားပြောကာ ပြုမူကြသည်။ ဤသို့လုပ်ဆောင်ခြင်းအားဖြင့် မိမိတို့ကိုယ်ကိုယ် ဝေဖန်ဆန်းစစ်ခြင်းခံရအောင် ဖွင့်ချပြမိသလိုဖြစ်ကာ ၎င်းတို့ကို ဖော်ထုတ်ဖို့ လိုအပ်လာလေတော့သည်။ ထိုသို့သော လူများသည် သနားချင့်စဖွယ် မဟုတ်သလော။ ၎င်းတို့သည် သနားစရာ၊ မုန်းစရာကောင်းပြီး ရွံရှာဖွယ်ရာလည်းကောင်းကာ ၎င်းတို့သည် စက်ဆုပ်ဖွယ်ရာလည်းဖြစ်၏။ ခေါင်းဆောင်တစ်ဦးအနေဖြင့် ၎င်းတို့သည် မိမိတို့ကိုယ်ကိုယ် သူတော်စင်တစ်ဦး၏ ပုံရိပ်ဖြင့် ဆင်မြန်းထားကြသည်။ သူတော်စင်တစ်ဦး၊ ကြီးမြတ်ကာ ကျက်သရေရှိပြီး၊ မှန်ကန်သောလူတစ်ဦးဟူသည့် ဤဂုဏ်ပုဒ်များမှာ အဘယ်နည်း။ ၎င်းတို့သည် သံခြေချင်းများဖြစ်ပြီး ၎င်းတို့ကို တပ်ဆင်သူမည်သူမဆိုသည် သမ္မာတရားကို မလိုက်စားနိုင်တော့ပေ။ တစ်စုံတစ်ဦးသည် ဤသံခြေချင်းများကို ဆင်မြန်းပါက ၎င်းတို့သည် သမ္မာတရား လိုက်စားခြင်းနှင့် မည်သည့် ဆက်နွှယ်မှုမျှ မရှိတော့သည့် သဘောဖြစ်သည်။ ဤလူများက သမ္မာတရား မလိုက်စားရသည့် အဓိကအကြောင်းရင်းမှာ အဘယ်နည်း။ အမှန်တွင် အကြောင်းရင်းမှာ အဆင့်အတန်း၏ ဘောင်ခတ်မှုကို ၎င်းတို့ ခံကြရပြီးဖြစ်သောကြောင့်တည်း။ ၎င်းတို့သည် မိမိတို့ကိုယ်ကိုယ် ဤသို့ အမြဲ တွေးကြသည်။ “ငါသည် ခေါင်းဆောင်တစ်ဦး ဖြစ်သည်။ ဤနေရာတွင် ကြီးကြပ်သူဖြစ်သည်။ ငါသည် ရပ်တည်ချက်နှင့် အဆင့်အတန်းရှိသော လူတစ်ဦး ဖြစ်သည်။ သိက္ခာရှိသောလူတစ်ဦး ဖြစ်သည်။ ငါသည် မာနာထောင်လွှားသော၊ သို့မဟုတ် ကောက်ကျစ်ဆိုးယုတ်သော စိတ်သဘောထားတစ်ခု ရှိ၍မဖြစ်။ ငါ၏ ဖောက်ပြန်ပျက်စီးသော စိတ်သဘောထားအကြောင်း ငါ ဖွင့်ဟပြီး မိတ်သဟာယပြု၍ မဖြစ်။ ငါ၏ သိက္ခာနှင့် ဂုဏ်ကို ငါ ကာကွယ်ရမည်။ ငါ့ကို လူများ အထင်ကြီးပြီး ကြည်ညိုစေရမည်”ဟူ၍ ဖြစ်သည်။ ၎င်းတို့သည် ဤအရာများဖြင့် အမြဲ ဘောင်ခတ်ခံရသောကြောင့် ဖွင့်မပြောနိုင်ကြ၊ သို့မဟုတ် မိမိကိုယ်ကိုယ် မသုံးသပ်နိုင်သကဲ့သို့ မသိမြင်နိုင်ကြချေ။ ဤအရာများဖြင့် ၎င်းတို့ ဖျက်ဆီးခြင်းခံရကြသည်။ ၎င်းတို့၏ အမြင်နှင့် ပုံသေအတွေးအခေါ်သည် သမ္မာတရားနှင့် ကိုက်ညီပါသလော။ မကိုက်ညီသည်မှာ အတော်လေး သိသာပေသည်။ မာနထောင်လွှားခြင်းနှင့် မိမိကိုယ်ကိုယ် အမှန်ထင်ခြင်း၊ ထင်ရာစိုင်းခြင်း၊ ဟန်ဆောင်ခြင်း၊ လှည့်စားခြင်း စသည်ဖြင့် မိမိတို့၏တာဝန်များတွင် ၎င်းတို့ ပြသနေကျ အပြုအမူများဖြစ်သည့် ဤအလေ့အကျင့်များသည် သမ္မာတရား လိုက်စားခြင်း ဖြစ်သလော။ (မဟုတ်ပါ။) အတော်သိသာစွာပင် ထိုအရာများတစ်ခုမျှ သမ္မာတရား လိုက်စားခြင်း မဟုတ်ပေ။ ပြီးလျှင် သမ္မာတရား မလိုက်စားခြင်းအတွက် ၎င်းတို့ ပေးသည့် ကျိုးကြောင်းပြချက်၊ သို့မဟုတ် အကြောင်းရင်းမှာ အဘယ်နည်း။ (၎င်းတို့က ခေါင်းဆောင်များသည် အဆင့်အတန်းနှင့် ဂုဏ်ရှိကြသော လူများဖြစ်ကြောင်းနှင့် ၎င်းတို့တွင် ဖောက်ပြန်ပျက်စီးသော စိတ်သဘောထား ရှိလျှင်ပင် ဖော်ထုတ်ခံရ၍ မဖြစ်ဟု ယုံကြည်ကြသည်။) ဤသည်မှာ အဓိပ္ပာယ်မရှိသော ရှုထောင့်အမြင်တစ်ခု မဟုတ်လော။ လူတစ်ဦးက ဖောက်ပြန်ပျက်စီးသော စိတ်သဘောထား တစ်ခုရှိကြောင်း ဝန်ခံသော်လည်း ထိုအရာကို ဖော်ထုတ်ခံခွင့်မပေးပါက ထိုသူသည် သမ္မာတရား လက်ခံသောသူတစ်ဦး ဟုတ်ပါသလော။ ခေါင်းဆောင်တစ်ဦးအနေဖြင့် သမ္မာတရားကို သင်လက်မခံနိုင်ပါက ဘုရားသခင်၏ အမှုတော်ကို သင် အဘယ်သို့ တွေ့ကြုံလိမ့်မည်နည်း။ သင်၏ ဖောက်ပြန်ပျက်စီးခြင်းသည် အဘယ်သို့ သန့်စင်ခံရလိမ့်မည်နည်း။ ပြီးလျှင် သင်၏ ဖောက်ပြန်ပျက်စီးခြင်းသည် သန့်စင်မခံရသကဲ့သို့ မိမိ၏ ဖောက်ပြန်ပျက်စီးသော စိတ်သဘောထားဖြင့် သင်ဆက်လက် အသက်ရှင်ပါက သင်သည် လက်တွေ့ကျသော အလုပ်ကို မလုပ်နိုင်သည့် ခေါင်းဆောင်တစ်ဦး ဖြစ်သည်။ အယောင်ဆောင် ခေါင်းဆောင်တစ်ဦး ဖြစ်သည်။ ခေါင်းဆောင်တစ်ဦးအနေဖြင့် သင်သည် အမှန်တကယ် အဆင့်အတန်း ရှိသော်ငြားလည်း ယင်းမှာ မတူကွဲပြားသော အလုပ်တစ်ခု၊ မတူကွဲပြားသော တာဝန်တစ်ခုကို ရှိခြင်းကိစ္စမျှသာ ဖြစ်သည်။ သင်သည် ရပ်တည်ချက်ရှိသည့် လူတစ်ဦး ဖြစ်လာသည်ဟု မဆိုလိုပေ။ သင်သည် ဤအဆင့်အတန်းကို ရရှိပြီး မတူကွဲပြားသည့် တာဝန်တစ်ခုကို ထမ်းဆောင်သောကြောင့် အခြားသူများထက် ပိုဂုဏ်မရှိလာပေ၊ သို့မဟုတ် ဂုဏ်ရှိသော ရပ်တည်ချက်တစ်ခုရှိသည့် လူတစ်ဦး ဖြစ်မလာပေ။ ဤသို့ တွေးသည့် လူများ အမှန်တကယ် ရှိပါက ၎င်းတို့သည် အရှက်မဲ့ကြသည် မဟုတ်လော။ (အရှက်မဲ့ကြပါသည်။) ယင်းကို အရပ်သုံးစကားဖြင့် မည်သို့ပြောကြသနည်း။ ၎င်းတို့သည် ပေါ်တင်လူပါးဝခြင်း မဟုတ်လော။ ၎င်းတို့သည် ခေါင်းဆောင်များ မဟုတ်ကြသည့်အခါ လူတို့ကို စစ်မှန်ရိုးသားမှုဖြင့် ဆက်ဆံကြသည်။ မိမိတို့၏ ဖောက်ပြန်ပျက်စီးခြင်း ပွင့်အံထွက်မှုများအကြောင်း ဖွင့်ပြောနိုင်ကြပြီး မိမိတို့၏ ဖောက်ပြန်ပျက်စီးသော စိတ်သဘောထားများကို စိစစ်နိုင်ကြသည်။ ခေါင်းဆောင်အဖြစ် ရာထူးတစ်ခု ယူလိုက်သည်နှင့် ၎င်းတို့သည် လုံးဝ သူစိမ်းပြင်ပြင် ဖြစ်လာကြသည်။ ၎င်းတို့ သူစိမ်းပြင်ပြင် ဖြစ်လာသည်ဟု အဘယ်ကြောင့် ငါ ပြောသနည်း။ အဘယ်ကြောင့်ဆိုသော် ၎င်းတို့သည် ကိုယ့်အခြေအနေအမှန်ကို မျက်နှာဖုံးတစ်ခု တပ်ဆင်ကာ ဖုံးကွယ်ထားသောကြောင့် ဖြစ်သည်။ မျက်နှာဖုံးက မည်သည့် အမူအရာမျှ မပြပေ၊ ငိုခြင်း၊ ရယ်ခြင်း၊ ကျေနပ်ခြင်း၊ သို့မဟုတ် ဒေါသထွက်ခြင်း မပြ၊ ဝမ်းနည်းခြင်း သို့မဟုတ် ဝမ်းမြောက်ခြင်း မပြ၊ စိတ်ခံစားချက်များနှင့် ဆန္ဒများ မပြသကဲ့သို့ ဖောက်ပြန်ပျက်စီးသော စိတ်သဘောထားကို သေချာပေါက် မပြပေ။ ခေါင်းဆောင်၏ စစ်မှန်သော အခြေအနေများ၊ ကိုယ်ရေးကိုယ်တာ အတွေးများနှင့် စိတ်ကူးများအားလုံးက မျက်နှာဖုံး၏ နောက်ကွယ်၌ မည်သူမျှ မတွေ့နိုင်သည့်နေရာတွင် ရှိနေစဉ်တွင် ယင်း၏ သွင်ပြင်အမူအရာနှင့် အခြေအနေက တစ်ချိန်လုံး မပြောင်းမလဲရှိနေသည်။ မိမိတို့ကိုယ်ကိုယ် ရပ်တည်ချက်နှင့် အဆင့်အတန်းရှိနေသကဲ့သို့ အမြဲ တွေးထင်သော ခေါင်းဆောင်များနှင့် အမှုဆောင်အချို့ ရှိသည်။ တစ်စုံတစ်ဦးက ၎င်းတို့ကို ပြုပြင်ပါက မိမိတို့၏ ဂုဏ်သိက္ခာ ဆုံးရှုံးသွားမည်ကို ၎င်းတို့ ကြောက်လန့်ကြသောကြောင့် သမ္မာတရားကို ၎င်းတို့ လက်မခံကြချေ။ ချိုသာသော၊ အယောင်ဆောင် စကားလုံးများကို ပြောဆိုပြီး မိမိတို့၏ ဖောက်ပြန်ပျက်စီးသော စိတ်သဘောထားကို ဖုံးဖိဖို့ရန် မိမိတို့အဆင့်အတန်းနှင့် ဩဇာအာဏာများကို အကျိုးရှိရှိ အသုံးချကြသည်။ တစ်ချိန်တည်းတွင် ၎င်းတို့၏ အဆင့်အတန်းကြောင့် အခြားသူများထက် ၎င်းတို့ ပိုဂုဏ်ရှိကာ ပိုသန့်ရှင်းကြောင်းနှင့် ထို့ကြောင့် သမ္မာတရားကို လိုက်စားရန် မလိုကြောင်း၊ သမ္မာတရားကို လိုက်စားခြင်းသည် အခြားသူများ လုပ်ဆောင်ရန်အတွက်ဖြစ်ကြောင်း တလွဲ ယုံကြည်ကြသည်။ ဤတွေးခေါ်မှုနည်းလမ်းသည် မှားယွင်းပြီး အတော်အတန် အရှက်မဲ့ကာ အသိစိတ်မဲ့၏။ ဤသည်မှာ ဤလူစားမျိုး ပြုမူပုံ ဖြစ်သည်။ ထိုသို့သော လူများ၏ အပြုအမူ အနှစ်သာရမှ၊ ၎င်းတို့သည် သမ္မာတရားကို လိုက်စားမနေကြကြောင်း တွေ့မြင်ဖို့ ရှင်းလင်းသိသာပေသည်။ ထိုအစား ၎င်းတို့သည် အဆင့်အတန်းနှင့် သိက္ခာကို လိုက်စားနေကြသည်။ ၎င်းတို့ အလုပ်လုပ်ကြသည့်အခါတွင် မိမိတို့၏ အဆင့်အတန်းနှင့် ဩဇာအာဏာကို ၎င်းတို့ ကာကွယ်နေကြပြီး သမ္မာတရားကို ၎င်းတို့ လိုက်စားနေသည်ဟု တွေးတောရင်း မိမိတို့ကိုယ်ကိုယ် လှည့်ဖြားနေကြသည်။ ၎င်းတို့သည် ၎င်းတို့ လုပ်ပြီးသည့် အလုပ်နှင့် ထမ်းဆောင်ပြီးသည့် တာဝန်များကိုလည်းကောင်း၊ အသင်းတော် အလုပ်ကို လုပ်ရာတွင် ကိုင်တွယ်ပြီးသည့် လုပ်ငန်းတာဝန်များနှင့် ဘုရားအိမ်တော်၏ အလုပ်ကို ၎င်းတို့ လုပ်နေစဉ် ရရှိပြီးသည့် အောင်မြင်မှုများကိုလည်းကောင်း အတိုချုံး၍ မကြာခဏ ပြန်လည်ပြောပြသည့် ပေါလုကဲ့သို့သာ ဖြစ်ကြသည်။ ပေါလုက “ကောင်းစွာသော တိုက်လှန်ခြင်းကို ငါပြုပြီ။ ပြေးရသောလမ်းကို အဆုံးတိုင်အောင်ပြေးပြီ။ ယုံကြည်ခြင်းတရားကို စောင့်ရှောက်ပြီ။ ယခုမှစ၍ ဓမ္မသရဖူသည် ငါ့အဘို့သိုထားလျက်ရှိ၏။” (တိမောသေသြဝါဒစာဒုတိယစောင် ၄:၇-၈)ဟု ဆိုခဲ့ချိန်ကဲ့သို့ ဤအရာများကို ၎င်းတို့ မကြာခဏ စာရင်းပြုကြသည်။ ဤသို့အားဖြင့် ပေါလုက သူ၏ ပြေးရသော လမ်းကြောင်းကို ပြီးစီးကာ ကောင်းစွာသော တိုက်လှန်ခြင်းကို ပြုပြီးသည့်နောက်တွင် ယင်းမှာ ကယ်တင်ခြင်း၌ မည်မျှ ကြီးမားသည့် အခွင့်အရေးကို သူရရှိခဲ့သည်၊ သူ၏ ပံ့ပိုးမှုများက မည်မျှကြီးမားခဲ့သည်၊ သူ၏ ဆုလာဘ်က မည်မျှ ကြီးမားမည်ဆိုသည်ကို တွက်ချက်ရမည့်အချိန်ဖြစ်ကြောင်း၊ သူ၏ ပံ့ပိုးမှုများအတွက် ဆုချီးမြှင့်ပေးရန် ဘုရားသခင်ကို တောင်းဆိုရမည့် အချိန်ဖြစ်ကြောင်း ဆိုလိုခြင်း ဖြစ်ပေသည်။ ဘုရားသခင်က သူ့ကို သရဖူဖြင့် ဆုမချီးမြှင့်ပါက ဘုရားသခင် ဖြောင့်မတ်သည်ဟု သူ တွေးထင်မည်မဟုတ်ကြောင်း၊ ကျိုးနွံနာခံရန် သူ ငြင်းမည်ဖြစ်ကာ ဘုရားသခင်၏ မဖြောင့်မတ်ကြောင်းကို စောဒကပင်တက်မည်ဖြစ်ကြောင်း သူ ဆိုလိုပေသည်။ ဤသို့သော ပုံသေအတွေးအခေါ်နှင့် စိတ်သဘောထားမျိုးရှိသည့် ထိုသို့သော လူတစ်ဦးသည် သမ္မာတရားကို လိုက်စားနေပါသလော။ ၎င်းတို့သည် ဘုရားသခင်ကို အမှန်တကယ် ကျိုးနွံနာခံသော တစ်စုံတစ်ဦး ဖြစ်ပါသလော။ ဘုရားသခင်၏ စီစဉ်ညွှန်ကြားမှုများအောက်တွင် မိမိတို့ကိုယ်ကိုယ် ၎င်းတို့ ထားရှိနိုင်ကြသလော။ ဤသည်မှာ တစ်ချက်ကြည့်ရုံဖြင့် မရှင်းနေသလော။ ၎င်းတို့က မိမိတို့ ပြေးရမည့်လမ်းကြောင်းကို ပြေးခြင်းနှင့် တိုက်လှန်ခြင်းများ ပြုရခြင်းကို သမ္မာတရား လိုက်စားခြင်းဖြစ်သည်ဟု တွေးထင်ကြသည်။ သမ္မာတရားကို လုံးဝ မရှာဖွေကြသကဲ့သို့ ထိုသမ္မာတရားကို အမှန်တကယ် လိုက်စားသည့် သရုပ်သကန်များကို မပိုင်ဆိုင်ကြချေ။ ထို့ကြောင့် ၎င်းတို့သည် သမ္မာတရား လိုက်စားသောသူ မဟုတ်ကြချေ။

ကျွန်ုပ်တို့ ယခုလေးတင် ပြုသွားသည့် မိတ်သဟာယက လူသား၏ မည်သည့် ပြဿနာကို အဓိက ဖော်ထုတ်သနည်း။ ဂဃဏနဆိုရလျှင် ထိုမိတ်သဟာယက လူသား ဖောက်ပြန်ပျက်စီးသော စိတ်သဘောထားများထဲမှ မည်သည့်အရာကို အဓိက ဖော်ထုတ်သနည်း။ အခြေခံကျသော အရာတစ်ခုမှာ လူသားသည် သမ္မာတရားကို အလွန်အမင်း မနှစ်မြို့သည့်အပြင် ထိုသမ္မာတရားကို လက်ခံရန် ငြင်းပယ်ခြင်း ဖြစ်သည်။ ဤသည်မှာ အလွန်တိကျသော အပြုအမူတစ်ခု ဖြစ်သည်။ နောက်ထပ် အဓိကကျသည့်အရာတစ်ခုမှာ လူတိုင်း၏ စိတ်သဘောထား အနှစ်သာရတွင် တည်ရှိသည့် အရာတစ်ခု၊ ခေါင်းမာခြင်း ဖြစ်၏။ ဤအရာသည်လည်း အတော်လေး ခိုင်လုံစွာနှင့် သိသာစွာ ပေါ်လွင်ထင်ရှားသည် မဟုတ်လော။ (ဟုတ်ပါသည်။) ဤသည်တို့မှာ လူသား၏ ဖောက်ပြန်ပျက်စီးသော စိတ်သဘောထား ထင်ရှားပြီး ပွင့်အံထွက်သည့် အဓိကနည်းလမ်းများထဲမှ နှစ်ခု ဖြစ်သည်။ ဤတိကျသည့် အပြုအမူများ၊ ဤတိကျသည့် အမြင်များ၊ သဘောထားများ စသည်တို့သည် လူသား၏ ဖောက်ပြန်ပျက်စီးသော စိတ်သဘောထားအတွင်းတွင် သမ္မာတရားကို အလွန်အမင်း မနှစ်မြို့သည့် လက္ခဏာတစ်ခုရှိကြောင်း အမှန်အတိုင်းနှင့် တိကျစွာ ဖော်ပြကြသည်။ လူသား၏ စိတ်သဘောထားတွင် သာ၍ ထင်ရှားသည်မှာ ခေါင်းမာခြင်း သရုပ်သကန်များဖြစ်သည်မှာ အမှန်ဖြစ်၏။ ဘုရားသခင် မည်သည့်အရာ ပြောသည်ဖြစ်စေ၊ ပြီးလျှင် ဘုရားသခင်၏ အမှုတော် လမ်းကြောင်းတွင် လူသား၏ မည်သည့် ဖောက်ပြန်ပျက်စီးသော စိတ်သဘောထား ဖော်ထုတ်ခံရသည်ဖြစ်စေ လူတို့သည် ထိုအရာကို အသိအမှတ်ပြုရန် ခေါင်းမာမာဖြင့် ငြင်းပြီး ခုခံကြသည်။ သိသာသည့် ခုခံခြင်း၊ သို့မဟုတ် အထင်သေးသည့် ငြင်းပယ်မှုအပြင် နောက်ထပ် အပြုအမူတစ်မျိုးလည်း ရှိသည်မှာ အမှန်ဖြစ်၏။ ယင်းမှာ လူတို့သည် ဘုရားသခင်၏ အမှုတော်မှာ ၎င်းတို့နှင့် ဘာမျှမပတ်သက်သည့်အလား ဘုရားသခင်၏ အမှုတော်ကို စိတ်မဝင်စားကြသည့်အခါတွင် ဖြစ်သည်။ ဘုရားသခင်ကို စိတ်မဝင်စားခြင်းဆိုသည်မှာ မည်သည့်အရာကို ဆိုလိုသနည်း။ ယင်းမှာ လူတစ်ဦးက “ကိုယ်တော် အလိုရှိသည့်အရာကို ပြောပါ။ ထိုအရာက ကျွန်ုပ်နှင့် မသက်ဆိုင်ပါ။ ကိုယ်တော်၏ တရားစီရင်ခြင်း သို့မဟုတ် ဖော်ထုတ်ခြင်းတစ်ခုမျှ ကျွန်ုပ်နှင့် မပတ်သက်ပါ။ ထိုအရာကို ကျွန်ုပ် လက်မခံ၊ အသိအမှတ်မပြုပါ”ဟု ပြောသည့်အခါတွင် ဖြစ်သည်။ ထိုသို့သော သဘောထားတစ်ခုကို “ခေါင်းမာသည်”ဟု ကျွန်ုပ်တို့ သတ်မှတ်၍ရနိုင်မည်လော။ (ရနိုင်ပါသည်။) ယင်းမှာ ခေါင်းမာခြင်း သရုပ်သကန်တစ်ခု ဖြစ်သည်။ ဤလူများက “ကျွန်ုပ် နှစ်သက်သည့်ပုံစံအတိုင်း ကျွန်ုပ်ကို သက်သောင့်သက်သာ ဖြစ်စေပြီး ကျွန်ုပ်ကို ပျော်ရွှင်စေသည့် မည်သည့်ပုံစံဖြင့်မဆို ကျွန်ုပ် အသက်ရှင်သည်။ မာနထောင်လွှားခြင်း၊ လှည့်စားခြင်း၊ သမ္မာတရားကို အလွန်အမင်း မနှစ်မြို့ခြင်း၊ ကောက်ကျစ်ဆိုးယုတ်ခြင်း၊ ရက်စက်ခြင်း စသည်ကဲ့သို့သော ကိုယ်တော် ပြောသည့် အပြုအမူများ ကျွန်ုပ်တွင် ရှိလျှင်ပင် အရေးမကြီးပါ။ ထိုအရာများကို ကျွန်ုပ် မဆန်းစစ်ပါ၊ သို့မဟုတ် မသိရှိပါ၊ သို့မဟုတ် လက်မခံပါ။ ဤသည်မှာ ဘုရားသခင်ကို ကျွန်ုပ် ယုံကြည်သည့်ပုံဖြစ်သည်၊ ယင်းနှင့်ပတ်သက်၍ ကိုယ်တော် မည်သည့်အရာကို လုပ်မည်နည်း”ဟု ဆိုကြသည်။ ဤသည်မှာ ခေါင်းမာသည့် သဘောထားဖြစ်သည်။ လူတို့သည် ဘုရားနှုတ်ကပတ်တော်များကို စိတ်မဝင်စားကြသည့်အခါ၊ သို့မဟုတ် ထိုနှုတ်ကပတ်တော်များကို အလေးဂရုမပြုသည့်အခါ ယင်းမှာ ဘုရားသခင်သည် မည်သည့်အရာကို ပြောသည်ဖြစ်စေ၊ နှိုးဆော်ချက်များ၊ သို့မဟုတ် သတိပေးချက်များ၊ သို့မဟုတ် တိုက်တွန်းချက်များပုံစံဖြင့် သူ စကားပြောဆိုသည်ဖြစ်စေ၊ မည်သည့် စကားပြောဆိုပုံကို သူ အသုံးပြုသည်ဖြစ်စေ၊ သူ့စကား၏ အရင်းအမြစ်နှင့် ပန်းတိုင်များက မည်သည့်အရာများဖြစ်ပါစေ ဘုရားသခင်ကို တစ်သမတ်တည်း ၎င်းတို့ မသိကျိုးကျွန်ပြုကြပြီးနောက် ၎င်းတို့၏ သဘောထားက ခေါင်းမာသည့် သဘောထားတစ်ခု ဖြစ်သည်ဟု ဆိုလိုသည်။ ယင်းမှာ ၎င်းတို့သည် လူသားကို ကယ်တင်ဖို့ဖြစ်သော ဘုရားသခင်၏ ရိုးသားစစ်မှန်သော၊ စိတ်ရင်းစေတနာကောင်းသော ဆန္ဒကို မဆိုထားနှင့်၊ ဘုရားသခင်၏ အလျင်လိုနေသော ရည်ရွယ်ချက်များကို အလေးမထားကြဟု ဆိုလိုသည်။ ဘုရားသခင် မည်သည့်အရာကို လုပ်ဆောင်သည်ဖြစ်စေ၊ လူတို့သည် ပူးပေါင်းလုပ်ဆောင်ဖို့ စိတ်ပိုင်းဖြတ်ချက် မရှိကြသကဲ့သို့ သမ္မာတရားအတွက် ကြိုးပမ်းရန် မလိုမလား ဖြစ်နေကြသည်။ ဘုရားသခင်၏ တရားစီရင်ခြင်းနှင့် ထုတ်ဖော်ပြချက်တို့သည် လုံးဝ အဖြစ်မှန်ဖြစ်သည်ဟု ၎င်းတို့ အသိအမှတ်ပြုလျှင်ပင် ၎င်းတို့ စိတ်နှလုံးများတွင် နောင်တမရှိသကဲ့သို့ ယခင်အတိုင်း ဆက်လက် ယုံကြည်ကြသည်။ အဆုံးတွင် တရားဒေသနာများစွာ ၎င်းတို့ ကြားနာပြီးနောက်တွင် မပြောင်းလဲသည့်အရာကို ပြောဆိုကြသည်။ “ကျွန်ုပ်သည် စစ်မှန်သော ယုံကြည်သူတစ်ဦး ဖြစ်သည်၊ မည်သို့ဖြစ်စေ ကျွန်ုပ်၏ လူ့သဘာဝသည် မညံ့ဖျင်းပါ။ ဆိုးယုတ်မှုကို တမင် ကျွန်ုပ် လုပ်မည်မဟုတ်။ အမှုအရာများကို ကျွန်ုပ် စွန့်လွှတ်နိုင်သည်။ ကျွန်ုပ်၏ ယုံကြည်ခြင်းအတွက် အခက်အခဲကို ခံယူနိုင်ပြီး အဖိုးအခပေးရန် လိုလားနေသည်။ ဘုရားသခင်က ကျွန်ုပ်ကို စွန့်ပစ်မည်မဟုတ်ပါ”ဟူ၍ ဖြစ်သည်။ ဤသည်မှာ ပေါလုပြောသည့် ပုံအတိုင်းသာ မဟုတ်လော။ “ကောင်းစွာသော တိုက်လှန်ခြင်းကို ငါပြုပြီ။ ပြေးရသောလမ်းကို အဆုံးတိုင်အောင်ပြေးပြီ။ ယုံကြည်ခြင်းတရားကို စောင့်ရှောက်ပြီ။ ယခုမှစ၍ ဓမ္မသရဖူသည် ငါ့အဘို့သိုထားလျက်ရှိ၏။” ဤသည်မှာ လူတို့ရှိကြသည့် သဘောထားမျိုး ဖြစ်သည်။ ထိုသို့သော သဘောထားတစ်ခုနောက်ကွယ်တွင် မည်သည့် စိတ်သဘောထား ရှိသနည်း။ ခေါင်းမာခြင်းဖြစ်၏။ ခေါင်းမာသော စိတ်သဘောထားသည် ပြောင်းလဲရန် ခက်ခဲသလော။ ထိုသို့လုပ်ဆောင်ခြင်းအတွက် လမ်းကြောင်းတစ်ခု ရှိသလော။ အရိုးရှင်းဆုံးနှင့် တိုက်ရိုက် အကျဆုံးနည်းလမ်းမှာ ဘုရားသခင်၏ နှုတ်ကပတ်တော်များနှင့် ဘုရားသခင် ကိုယ်တိုင်အပေါ် သင်၏ သဘောထားကို ပြောင်းလဲရန် ဖြစ်သည်။ ဤအရာများကို သင် မည်သို့ ပြောင်းလဲနိုင်သနည်း။ သင်၏ ခေါင်းမာသော သဘောထားမှ ထွက်ပေါ်သည့် အခြေအနေများနှင့် ပုံသေအတွေးအခေါ်များကို စိစစ်ကာ သိရှိလာခြင်းအားဖြင့်၊ ပြီးလျှင် သင် ဖက်တွယ်သည့် သင်၏ လုပ်ရပ်များနှင့် စကားများ၊ ရှုထောင့်အမြင်များနှင့် ရည်ရွယ်ချက်များထဲမှ မည်သည့်အရာများနှင့် သင် ပွင့်အံထုတ်သည့် အတွေးများနှင့် စိတ်ကူးများထဲမှပင် တိတိကျကျ မည်သည့်အရာများက သင်၏ ခေါင်းမာသော စိတ်သဘောထား၏ စိုးမိုးခြယ်လှယ်မှုအောက်တွင် ရှိသည်ကို မြင်ရန် ကြည့်ခြင်းအားဖြင့် ဖြစ်သည်။ ဤအပြုအမူများ၊ ပွင့်အံထုတ်ခြင်းများနှင့် အခြေအနေများကို တစ်ခုပြီးတစ်ခု ဆန်းစစ်ကာ ဖြေရှင်းပြီးနောက် ထိုအရာများကို ပြောင်းလဲလော့။ သင် ဆန်းစစ်ကာ တစ်စုံတစ်ခုကို သတိပြုမိသည်နှင့် ထိုအရာကို အမြန် ပြောင်းလဲလော့။ ဥပမာ စိတ်လိုက်မာန်ပါပြုခြင်းဖြစ်သော မိမိ၏ နှစ်သက်မှုများနှင့် စိတ်ခြေအနေများအရ ပြုမူခြင်းအကြောင်းကို ငါတို့ ပြောနေခြင်းသာဖြစ်၏။ စိတ်လိုက်မာန်ပါပြုခြင်း စိတ်သဘောထားတွင် သမ္မာတရားကို အလွန်အမင်း မနှစ်မြို့သည့် စရိုက် ပါဝင်လာတတ်သည်။ သင်သည် ထိုဖောက်ပြန်ပျက်စီးသော စိတ်သဘောထားမျိုးရှိသည့် ထိုလူစားမျိုးဖြစ်ကြောင်းကို သင် သဘောပေါက်ပြီး သင် အဆင်ပြေသည်ဟုသာ တွေးလျက် မိမိကိုယ်ကို မသုံးသပ်ပါက၊ သို့မဟုတ် ထိုအရာကို ဖြေရှင်းဖို့ သမ္မာတရား မရှာဖွေပါက ယင်းမှာ ခေါင်းမာခြင်း ဖြစ်သည်။ ဤတရားဒေသနာ ပြီးသည့်နောက်တွင် သင်က “ထိုသို့သော အရာများကို ကျွန်ုပ် ပြောမိပြီး ထိုသို့သော အမြင်များ ရှိသည်။ ကျွန်ုပ်၏ ဤစိတ်သဘောထားသည် သမ္မာတရားကို အလွန်အမင်း မနှစ်မြို့သော စိတ်သဘောထားတစ်ခု ဖြစ်သည်။ ထိုသို့ ဖြစ်သည့်အတွက် ထိုစိတ်သဘောထားကို ကျွန်ုပ် စဖြေရှင်းမည်”ဟု ရုတ်တရက် သဘောပေါက်သွားနိုင်သည်။ သို့ဆိုလျှင် သင်သည် ထိုအရာကို မည်သို့ စတင်ဖြေရှင်းသနည်း။ သင်၏ ဘဝမြင့်စိတ်၊ သင်၏ စိတ်လိုက်မာန်ပါပြုခြင်းနှင့် သင်၏ ထင်တိုင်းကြဲခြင်းတို့ကို စွန့်လွှတ်ခြင်းအားဖြင့် စတင်လော့။ စိတ်ကြည်သည်ဖြစ်စေ၊ မကြည်သည်ဖြစ်စေ ဘုရားသခင်၏ သတ်မှတ်ချက်များ မည်သည့်အရာဖြစ်သည်ကို ကြည့်လော့။ ဇာတိပကတိကို သင် ပုန်ကန်နိုင်ပြီး ဘုရားသခင်၏ သတ်မှတ်ချက်များနှင့်အညီ လက်တွေ့လုပ်ဆောင်နိုင်ပါက သူသည် သင့်ကို မည်သို့ ရှုမြင်လိမ့်မည်နည်း။ ဤဖောက်ပြန်ပျက်စီးသော အပြုအမူများကို ဖြေရှင်းဖို့ သင်အမှန်တကယ် စတင်နိုင်ပါက သင်သည် ဘုရားသခင်၏ အမှုတော်နှင့်အတူ အသေအချာ တက်ကြွစွာ ပူးပေါင်းလုပ်ဆောင်နေသည့် လက္ခဏာတစ်ခု ဖြစ်သည်။ သင်သည် သမ္မာတရားကို အလွန်အမင်း မနှစ်မြို့သည့် ထိုစိတ်သဘောထားကို သတိရှိရှိ ပုန်ကန်ကာ ဖြေရှင်းနေလိမ့်မည်ဖြစ်ပြီး တစ်ချိန်တည်းတွင် သင်၏ ခေါင်းမာသော စိတ်သဘောထားကို ဖြေရှင်းနေလိမ့်မည်ဖြစ်သည်။ ဤဖောက်ပြန်ပျက်စီးသော စိတ်သဘောထားနှစ်ခုလုံးကို သင် ဖြေရှင်းပြီးသည့်အခါ ဘုရားသခင်ကို သင် ကျိုးနွံနာခံကာ စိတ်ကျေနပ်စေနိုင်လိမ့်မည်ဖြစ်ပြီး ဤအရာက သူ့ကို ကျေနပ်နှစ်သိမ့်စေလိမ့်မည်။ ဤမိတ်သဟာယ၏ အကြောင်းအရာကို သင်တို့ နားလည်ပြီးဖြစ်ကာ ဤနည်းဖြင့် ဇာတိပကတိကို ပုန်ကန်ခြင်းအား လက်တွေ့လုပ်ဆောင်ပါက ငါ အလွန်ဝမ်းမြောက်မိပေမည်။ ထိုအခါ ဤစကားကို အချည်းနှီး ကျွန်ုပ် ပြောဆိုမိပြီး ဖြစ်လိမ့်မည်မဟုတ်။

ခေါင်းမာခြင်းသည် ဖောက်ပြန်ပျက်စီးသော စိတ်သဘောထားနှင့်ဆိုင်သည့် ပြဿနာတစ်ခု ဖြစ်သည်။ ယင်းသည် မိမိ၏ သဘာဝ၌ ရှိသောအရာတစ်ခု ဖြစ်ပြီး ဖြေရှင်းရ မလွယ်ကူပေ။ တစ်စုံတစ်ဦးသည် ခေါင်းမာသော စိတ်သဘောထားတစ်ခု ရှိသည့်အခါ မိမိ၏ စိတ်ကူးများအတိုင်း ဆက်လက်ယုံကြည်ကာ အသစ်သောအရာများကို အလွယ်တကူ လက်မခံဘဲ ကျိုးကြောင်းပြချက်များနှင့် ဟုတ်မှန်သယောင် ရှိသော်လည်း မှားနေသော အကြောင်းပြချက်များ ပေးရန်အတွက် အထုံပါခြင်းအဖြစ် ထိုခေါင်းမာသော စိတ်သဘောထားက အဓိကပေါ်လွင်ထင်ရှား၏။ မိမိတို့၏ စိတ်ကူးများ မှားယွင်းကြောင်း လူတို့ သိသော်လည်း မိမိတို့၏ ဝင့်ဝါမှုနှင့် မာနတို့ကြောင့် ထိုစိတ်ကူးများအတိုင်း ဆက်လက်ယုံကြည်ကာ အဆုံးထိ ခေါင်းမာသည့်အချိန်များ ရှိသည်။ အကြင်သူသည် ထိုသို့သော ခေါင်းမာသည့် စိတ်သဘောထားတစ်ခုကို သတိထားမိလျှင်ပင် ပြောင်းလဲရန် ခက်ခဲသည်။ ခေါင်းမာခြင်း ပြဿနာကို ဖြေရှင်းရန် အကြင်သူသည် လူသား၏ မာနထောင်လွှားခြင်း၊ လှည့်စားခြင်း၊ ဆိုးယုတ်ခြင်း၊ သမ္မာတရားကို အလွန်အမင်း မနှစ်မြို့ခြင်းနှင့် အခြား ထိုသို့သော စိတ်သဘောထားများကို သိရှိရမည်။ အကြင်သူသည် မိမိ၏ ကိုယ်ပိုင် မာနထောင်လွှားခြင်း၊ လှည့်စားခြင်း၊ ဆိုးယုတ်ခြင်းတို့ကိုလည်းကောင်း၊ သမ္မာတရားကို ၎င်းတို့ အလွန်အမင်း မနှစ်မြို့ကြောင်း၊ သမ္မာတရားကို လက်တွေ့လုပ်ဆောင်လိုသော်ငြားလည်း ဇာတိပကတိကို ပုန်ကန်ရန် မလိုမလားဖြစ်နေကြောင်း၊ ဘုရားသခင်ကို ကျိုးနွံနာခံချင်သော်ငြား ဆင်ခြေများကို အမြဲပေးပြီး မိမိ၏ အခက်အခဲများကို အမြဲရှင်းပြနေကြောင်းကိုလည်းကောင်း သိရှိသည့်အခါ သူ့တွင် ခေါင်းမာခြင်းနှင့်သက်ဆိုင်သည့် ပြဿနာတစ်ခုရှိကြောင်း သတိပြုမိရန် သူ့အတွက် လွယ်ကူလိမ့်မည်။ ဤပြဿနာကို ဖြေရှင်းရန် အကြင်သူသည် သာမန် လူသားအသိစိတ်ကို ဦးစွာပထမ ပိုင်ဆိုင်ရမည်ဖြစ်ပြီး ဘုရားနှုတ်ကပတ်တော်များကို နားထောင်ရန် သင်ယူခြင်းအားဖြင့် စတင်ရမည်။ သင်သည် ဘုရားသခင်၏ သိုးဖြစ်ရန် ဆန္ဒရှိပါက သူ၏ နှုတ်ကပတ်တော်များကို နားထောင်ရန် သင်ယူရမည်။ ထိုနှုတ်ကပတ်တော်များကို သင် မည်သို့ နားထောင်သင့်သနည်း။ ဘုရားသခင်က သူ၏ နှုတ်ကပတ်တော်များတွင် ဖော်ထုတ်သည့် သင်နှင့်ဆီလျော်သော ပြဿနာမှန်သမျှကို နားထောင်ခြင်းအားဖြင့် ဖြစ်သည်။ ပြဿနာတစ်ခုတလေကို သင် တွေ့ရှိပါက လက်ခံသင့်သည်။ ယင်းမှာ အခြားလူများတွင် ရှိသည့် ပြဿနာဖြစ်ကြောင်း၊ လူတိုင်း၏ ပြဿနာ၊ သို့မဟုတ် လူသားမျိုးနွယ်၏ ပြဿနာဖြစ်ကြောင်း၊ သင်နှင့် မည်သို့မျှမပတ်သက်ကြောင်း မယုံကြည်ရ။ ထိုသို့သော ယုံကြည်မှုမျိုး သင်၌ ရှိလျှင် မှားပေမည်။ ဘုရားသခင် ဖော်ထုတ်နေသည့် ဖောက်ပြန်ပျက်စီးသော အခြေအနေများ၊ သို့မဟုတ် လိုရာဆွဲတွေးသော အမြင်များ ရှိမရှိဆိုသည်ကို ဘုရားနှုတ်ကပတ်တော်များ၏ ထုတ်ဖော်ပြချက်မှတစ်ဆင့် သင် သုံးသပ်သင့်သည်။ ဥပမာအားဖြင့် တစ်စုံတစ်ဦးထံမှ မာနထောင်လွှားသော စိတ်သဘောထား သရုပ်သကန်များ ပွင့်အံထွက်ခြင်းကို ထုတ်ဖော်ပြသည့် ဘုရားနှုတ်ကပတ်တော်များကို သင် ကြားရသည့်အခါ “မာနထောင်လွှားခြင်း၏ သရုပ်သကန်များကို ငါ ပြသမိသလား။ ငါသည် ဖောက်ပြန်ပျက်စီးသော လူသားတစ်ဦး ဖြစ်သောကြောင့် ထိုသရုပ်သကန်အချို့ကို ငါ မပြမိဘဲ မရှိနိုင်။ ယင်းကို မည်သည့်နေရာတွင် ငါပြမိသည်ကို ငါ သုံးသပ်သင့်သည်။ ငါ မာနထောင်လွှားကြောင်း၊ ငါ အမြဲ ကြီးကျယ်စွာ ပြုမူနေကြောင်း၊ စကားပြောသည့်အခါ လူတို့ကို ဘောင်ခတ်ကြောင်း လူတို့က ပြောကြသည်။ ယင်းမှာ အမှန်တကယ်ပင် ငါ၏ စိတ်သဘောထား ဖြစ်ပါသလား” ဟု သင့်ကိုယ်သင် တွေးသင့်သည်။ သုံးသပ်ခြင်းမှတစ်ဆင့် ဘုရားနှုတ်ကပတ်တော်များ၏ ထုတ်ဖော်ပြချက်သည် လုံးဝ မှန်ကန်တိကျကြောင်း၊ သင်သည် မာနထောင်လွှားသော လူတစ်ဦးဖြစ်ကြောင်း နောက်ဆုံးတွင် သင် သဘောပေါက်လိမ့်မည်။ ပြီးလျှင် ဘုရားနှုတ်ကပတ်တော်များ၏ ထုတ်ဖော်ပြချက်များက လုံးဝ မှန်ကန်တိကျသည်နှင့်အမျှ၊ ကွာဟချက် အနည်းငယ်မျှမရှိဘဲ သင်၏ အခြေအနေနှင့် ပကတိကိုက်ညီကာ ဆက်လက် သုံးသပ်ကြည့်ရာတွင် သာ၍ပင် မှန်ကန်တိကျပုံပေါ်နေသည်နှင့်အမျှ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့ကို သင် လက်ခံသင့်သည်။ ထိုနှုတ်ကပတ်တော်များအတိုင်း သင်၏ ဖောက်ပြန်ပျက်စီးသော စိတ်သဘောထား၏ အနှစ်သာရကို ပိုင်းခြားကာ သိမြင်လာသင့်သည်။ ထိုအခါ စစ်မှန်သော နောင်တကို သင် ခံစားနိုင်လိမ့်မည်။ ဘုရားသခင်ကို ယုံကြည်ရာတွင် ဤသို့ သူ၏ နှုတ်ကပတ်တော်များကို စားသောက်ခြင်းအားဖြင့်သာ သင့်ကိုယ်သင် သိရှိလာနိုင်သည်။ သင်၏ ဖောက်ပြန်ပျက်စီးသော စိတ်သဘောထားများကို ဖြေရှင်းရန်အလို့ငှာ ဘုရားနှုတ်ကပတ်တော်များ၏ တရားစီရင်ခြင်းနှင့် ဖော်ထုတ်ခြင်းတို့ကို သင် လက်ခံရမည်။ ယင်းကို သင် မလုပ်နိုင်ပါက သင်၏ ဖောက်ပြန်ပျက်စီးသော စိတ်သဘောထားများကို စွန့်ပစ်ရန် သင့်အတွက် နည်းလမ်း ရှိလိမ့်မည်မဟုတ်။ သင်သည် ဘုရားနှုတ်ကပတ်တော်များ၏ ထုတ်ဖော်ပြချက်က ယေဘုယျအားဖြင့် မှန်ကန်တိကျကြောင်း သိမြင်သည့် ချက်ချာပါးနပ်သော လူတစ်ဦးဖြစ်ပါက၊ သို့မဟုတ် ယင်း၏ ထက်ဝက်သည် မှန်ကန်ကြောင်း သင် ဝန်ခံနိုင်ပါက ချက်ချင်း လက်ခံသင့်ပြီး ဘုရားသခင် ရှေ့မှောက်တွင် ကျိုးနွံနာခံသင့်သည်။ သူ့ကို သင် ဆုလည်းတောင်းသင့်ကာ သင့်ကိုယ်သင် သုံးသပ်သင့်သည်။ ထိုအခါမှသာ ထုတ်ဖော်ပြချက်နှင့်ဆိုင်သည့် ဘုရားနှုတ်ကပတ်တော်များအားလုံး မှန်ကန်တိကျကာ အမှန်တရားများသာ လုံးဝဥဿုံဖြစ်ကြောင်း သင်နားလည်လိမ့်မည်။ လူတို့သည် ဘုရားသခင်ကို ကြောက်ရွံ့သော စိတ်နှလုံးဖြင့် ဘုရားရှေ့မှောက်တွင် ကျိုးနွံနာခံခြင်းအားဖြင့်သာ မိမိတို့ကိုယ်ကို အမှန်တကယ် သုံးသပ်နိုင်သည်။ ထိုအခါမှသာ ၎င်းတို့အတွင်း၌ တည်ရှိသည့် ဖောက်ပြန်ပျက်စီးသော စိတ်သဘောထားမျိုးစုံနှင့် ၎င်းတို့သည် အသိစိတ်တစ်စက်မျှမရှိဘဲ ဧကန်အမှန် မာနထောင်လွှားပြီး မိမိကိုယ်ကို မှန်သည်ဟု မှတ်ယူကြကြောင်းတို့ကို ၎င်းတို့ မြင်နိုင်ကြလိမ့်မည်။ တစ်စုံတစ်ဦးသည် သမ္မာတရားကို ချစ်သောသူတစ်ဦးဖြစ်ပါက ဘုရားသခင် ရှေ့မှောက်တွင် မိမိကိုယ်ကို ပျပ်ဝပ်နိုင်လိမ့်မည်၊ ၎င်းသည် နက်နက်ရှိုင်းရှိုင်း ဖောက်ပြန်ပျက်စီးပြီဖြစ်ကြောင်း ဘုရားကို ဝန်ခံကာ ဘုရား၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်ခံဖို့ အလိုဆန္ဒရှိနိုင်လိမ့်မည်။ ဤသို့ဖြင့် ၎င်းသည် နောင်တစိတ်နှလုံး ဖြစ်ပေါ်နိုင်သည်၊ မိမိကိုယ်ကို စတင်ငြင်းပယ်ကာ မုန်းတီးနိုင်ပြီး “ဘုရားနှုတ်ကပတ်တော်များကို စဖတ်ချိန်တွင် အဘယ်ကြောင့် ထိုနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့ကို ငါလက်မခံနိုင်ခဲ့သနည်း။ ဘုရားနှုတ်ကပတ်တော်များအပေါ် ငါကိုင်စွဲသည့် ဤသဘောထားသည် မာနထောင်လွှားသည့် သဘောထားဖြစ်သည် မဟုတ်ပါလား။ ငါ အဘယ်သို့ အလွန် မာနထောင်လွှားနိုင်ရသနည်း” ဟု တွေးရင်း ယခင်က သမ္မာတရား မလိုက်စားခဲ့ခြင်းကို နောင်တရနိုင်သည်။ အချိန်အတော်ကြာ ဤသို့ မကြာခဏ မိမိကိုယ်ကို သုံးသပ်ပြီးနောက်တွင် ၎င်းသည် ဧကန်အမှန် မာနထောင်လွှားကြောင်း၊ ဘုရားနှုတ်ကပတ်တော်များက သမ္မာတရားနှင့် အမှန်တရားများဖြစ်သည်ကို ၎င်းအနေဖြင့် လုံးဝ ဝန်ခံနိုင်စွမ်းမရှိကြောင်းနှင့် အမှန်တကယ် အသိစိတ်တစ်စက်မျှ မရှိကြောင်းတို့ကို သတိပြုမိလိမ့်မည်။ သို့ရာတွင် မိမိကိုယ်ကို သိရန်မှာ ခက်ခဲသောအရာတစ်ခု ဖြစ်သည်။ လူတစ်ဦး သုံးသပ်သည့်အခါတိုင်းတွင် အနည်းငယ် ပို၍များပြီး အနည်းငယ် ပို၍နက်ရှိုင်းသော မိမိကိုယ်ကို သိမြင်မှုကိုသာ ရနိုင်သည်။ ဖောက်ပြန်ပျက်စီးသော စိတ်သဘောထားအပေါ် ရှင်းလင်းသည့် အသိရရှိရန်မှာ တိုတောင်းသည့် အချိန်ကာလတစ်ခုတွင် ပြီးမြောက်နိုင်သည့် အရာတစ်ခု မဟုတ်ပေ။ အကြင်သူသည် ဘုရားနှုတ်ကပတ်တော်များကို ပိုဖတ်ရမည်၊ ပိုဆုတောင်းပြီး မိမိကိုယ်ကို ပိုသုံးသပ်ရမည်။ ထိုသို့ဖြင့်သာ ၎င်းသည် တဖြည်းဖြည်း မိမိကိုယ်ကို သိရှိလာနိုင်သည်။ မိမိတို့ကိုယ်ကို အမှန်တကယ် သိရှိကြသူအားလုံးသည် ယခင်က အကြိမ်အနည်းငယ် ကျရှုံးကာ အမှားလုပ်မိကြပြီးဖြစ်သည်။ ထို့နောက်တွင် ၎င်းတို့သည် ဘုရားနှုတ်ကပတ်တော်များကို ဖတ်ကြသည်၊ သူ့ထံ ဆုတောင်းကြပြီး မိမိတို့ကိုယ်ကို သုံးသပ်ကြကာ ထိုသို့ဖြင့် မိမိတို့ကိုယ်တိုင် ဖောက်ပြန်ပျက်စီးခြင်း၏ အမှန်တရားကို ရှင်းရှင်းလင်းလင်း မြင်လာကြပြီး ၎င်းတို့သည် ဧကန်အမှန် အကြီးအကျယ် ဖောက်ပြန်ပျက်စီးခဲ့ကာ သမ္မာတရား စစ်မှန်မှု လုံးဝ ကင်းမဲ့ကြကြောင်းကို ခံစားမိလာကြသည်။ ဘုရားသခင်၏ အမှုတော်ကို ဤသို့ သင်တွေ့ကြုံရပြီး ကိစ္စများ သင့်အပေါ် ဖြစ်ပျက်သည့်အခါ သူ့ထံ ဆုတောင်းကာ သမ္မာတရားကို ရှာဖွေပါက သင်သည် မိမိကိုယ်ကို တဖြည်းဖြည်း သိရှိလာလိမ့်မည်။ ထိုအခါ တစ်နေ့တွင် သင်၏ စိတ်နှလုံးသည် နောက်ဆုံး၌ ရှင်းလင်းသွားလိမ့်မည်။ “ကျွန်ုပ်သည် အခြားသူများထက် အနည်းငယ်မျှ ပိုကောင်းသည့် အစွမ်းအစ ရှိကောင်းရှိနိုင်သော်လည်း ဤအရာကို ဘုရားက ပေးထားခြင်းဖြစ်သည်။ ကျွန်ုပ်သည် စကားပြောသည့်အခါ အခြားသူများထက်သာရန် ကြိုးပမ်းရင်း၊ အမှုအရာများကို ကျွန်ုပ်သဘောအတိုင်း လူတို့လုပ်အောင် ကြိုးစားရင်း အမြဲ လေလုံးထွားနေသည်။ ကျွန်ုပ်တွင် အမှန်တကယ် အသိစိတ်မဲ့သည်။ ဤသည်မှာ မာနထောင်လွှားခြင်းနှင့် မိမိကိုယ်ကို အမှန်ထင်ခြင်းဖြစ်သည်။ သုံးသပ်ခြင်းမှတစ်ဆင့် ကျွန်ုပ်၏ကိုယ်ပိုင် မာနထောင်လွှားသော စိတ်သဘောထားကို ကျွန်ုပ် သိလိုက်ရပြီ။ ဤသည်မှာ ဘုရားသခင်၏ ဉာဏ်အလင်းပေးခြင်းနှင့် ကျေးဇူးတော်ဖြစ်ပြီး ထိုအတွက် သူ့ကို ကျွန်ုပ် ကျေးဇူးတင်မိပါသည်” ဟူ၍ ဖြစ်သည်။ သင်၏ ကိုယ်ပိုင် ဖောက်ပြန်ပျက်စီးသော စိတ်သဘောထားကို သိအောင်လုပ်ခြင်းသည် ကောင်းသောအရာလော၊ ဆိုးသောအရာလော။ (ကောင်းသောအရာ ဖြစ်ပါသည်။) ထိုနေရာမှစ၍ အသိစိတ်နှင့် နာခံမှုဖြင့် မည်သို့ ပြောဆိုပြုမူရမည်၊ အခြားသူများနှင့် မည်သို့ တန်းတူ ရပ်တည်ရမည်၊ အခြားသူများအား စိတ်ကျဉ်းကျပ်စေခြင်းမရှိဘဲ မည်သို့ မျှမျှတတ ဆက်ဆံရမည်၊ သင်၏ အစွမ်းအစ၊ ဆုကျေးဇူးများ၊ အားသာချက်များ စသည်တို့ကို မည်သို့ မှန်ကန်စွာ သဘောထားရမည်ကို သင် ရှာဖွေသင့်သည်။ ဤနည်းအားဖြင့် တောင်ကြီးသည် မြေမှုန့်ဖြစ်အောင် တစ်ချက်ချင်း အထုခံရသကဲ့သို့ သင်၏ မာနထောင်လွှားသော စိတ်သဘောထားသည် ပြေလည်သွားလိမ့်မည်။ ထို့နောက်တွင် အခြားသူများနှင့် သင် ဆက်ဆံသည့်အခါ၊ သို့မဟုတ် တာဝန်တစ်ခုကို ထမ်းဆောင်ရန် ၎င်းတို့နှင့် အတူ အလုပ်လုပ်သည့်အခါ ၎င်းတို့၏ အမြင်များကို မှန်မှန်ကန်ကန် သင်သဘောထားနိုင်လိမ့်မည်ဖြစ်ပြီး ၎င်းတို့ကို နားထောင်စဉ်တွင် ဂရုတစိုက်၊ သေချာ အာရုံစိုက်နိုင်လိမ့်မည်။ ပြီးလျှင် မှန်ကန်သည့် အမြင်တစ်ခု ၎င်းတို့ ဖွင့်ဟသည်ကို သင် ကြားသည့်အခါ “ကျွန်ုပ်၏ အစွမ်းအစသည် အကောင်းဆုံး မဟုတ်ပုံရသည်။ အမှန်မှာ လူတိုင်းတွင် မိမိတို့ကိုယ်ပိုင် အားသာချက်များရှိသည်။ ၎င်းတို့သည် ကျွန်ုပ်ထက် လုံးဝ မနိမ့်ကျကြပါ။ ယခင်က ကျွန်ုပ်သည် အခြားသူများထက် ပိုကောင်းသော အစွမ်းအစရှိသည်ဟု အမြဲ တွေးခဲ့သည်။ ယင်းမှာ မိမိကိုယ်ကို စိတ်ကြီးဝင်ခြင်းနှင့် သဘောထား ကျဉ်းမြောင်းသည့် မသိနားမလည်မှု ဖြစ်သည်။ ကျွန်ုပ်သည် ရေတွင်းအောက်ခြေက ဖားတစ်ကောင်ကဲ့သို့ အမြင် အလွန်သေးသိမ်ခဲ့သည်။ ထိုသို့စဉ်းစားခြင်းသည် တကယ်ကို အသိစိတ်မဲ့သည်။ အရှက်မဲ့ခြင်းဖြစ်သည်။ ကျွန်ုပ်၏ မာနထောင်လွှားသော စိတ်သဘောထားကြောင့် ကျွန်ုပ် မျက်ကန်းဖြစ်ပြီး နားပင်းခဲ့သည်။ အခြားလူများ၏ စကားများကို ကျွန်ုပ် နားမဝင်ခဲ့ဘဲ သူတို့ထက် ကျွန်ုပ် ပိုတော်သည်၊ ကျွန်ုပ်မှန်သည်ဟု တွေးထင်ခဲ့သည်။ တကယ်တမ်းတွင် ကျွန်ုပ်သည် သူတို့တစ်ဦးတစ်ယောက်ထက်မျှ ပိုမတော်ပါ” ဟု သင် သိရှိသွားလိမ့်မည်။ ထိုအချိန်မှစ၍ သင်သည် မိမိ၏ ချို့တဲ့ခြင်းများနှင့် မိမိ၏ နည်းပါးသည့် ဝိညာဉ်ရင့်ကျက်မှုကို စစ်မှန်သည့် ထိုးထွင်းအမြင်နှင့် သိမြင်မှုတို့ ရှိလိမ့်မည်။ ထို့နောက်တွင် အခြားသူများနှင့် မိတ်သဟာယပြုသည့်အခါ သင်သည် ၎င်းတို့၏ အမြင်များကို သေချာစွာ နားထောင်လိမ့်မည်ဖြစ်ပြီး “ကျွန်ုပ်ထက် ပိုတော်သည့် လူများစွာရှိသည်။ ကျွန်ုပ်၏ အစွမ်းအစနှင့် သဘောပေါက်နားလည်နိုင်စွမ်းတို့မှာ မိုင်ကုန်ထုတ်သုံးမှ အလယ်အလတ် အဆင့်သာရှိသည်” ဟု သဘောပေါက်လိမ့်မည်။ ဤအသိတရား ရသွားသောအခါ သင်သည် မိမိကိုယ်ကို သိမြင်မှု ရရှိပြီးဖြစ်လိမ့်မည် မဟုတ်လော။ ဤအရာကို တွေ့ကြုံခြင်းနှင့် ဘုရားနှုတ်ကပတ်တော်များအတိုင်း မိမိကိုယ်ကို မကြာခဏ သုံးသပ်ခြင်းအားဖြင့် ယခင်ထက် တိုး၍ နက်ရှိုင်းသော စစ်မှန်သည့် မိမိကိုယ်ကို သိမြင်မှုကို သင် ရရှိနိုင်လိမ့်မည်။ သင်သည် မိမိဖောက်ပြန်ပျက်စီးမှု၏ အမှန်တရား၊ သင်၏ ညံ့ဖျင်းမှုနှင့် အသုံးမကျမှု၊ သင်၏ မနှစ်မြို့ဖွယ် အကျည်းတန်ခြင်းတို့ကို ရိပ်စားမိနိုင်လိမ့်မည်ဖြစ်ပြီး ထိုအချိန်တွင် မိမိကိုယ်ကို အလွန်အမင်း မနှစ်မြို့သည့်အပြင် မိမိ၏ ဖောက်ပြန်ပျက်စီးသော စိတ်သဘောထားကို မုန်းတီးလိမ့်မည်။ ထိုအခါ သင့်ကိုယ်သင် ပုန်ကန်ဖို့ သင့်အတွက် လွယ်ကူလိမ့်မည်။ ယင်းမှာ ဘုရားသခင်၏ အမှုတော်ကို တွေ့ကြုံပုံ ဖြစ်သည်။ သင်သည် မိမိ၏ ဖောက်ပြန်ပျက်စီးခြင်း ပွင့်အံထွက်မှုများကို ဘုရားနှုတ်ကပတ်တော်များအတိုင်း သုံးသပ်ရမည်။ အထူးသဖြင့် မည်သည့် အခြေအနေမျိုးတွင်မဆို ဖောက်ပြန်ပျက်စီးသော စိတ်သဘောထားကို ထုတ်ဖော်ပြပြီးနောက်တွင် သင်သည် မိမိကိုယ်ကို မကြာခဏ သုံးသပ်ကာ သိရှိရမည်။ ထို့နောက်တွင် သင်၏ ဖောက်ပြန်ပျက်စီးသော အနှစ်သာရကို ရှင်းလင်းစွာ သိမြင်ဖို့ သင့်အတွက် လွယ်ကူလိမ့်မည်ဖြစ်ပြီး သင်၏ ဖောက်ပြန်ပျက်စီးခြင်းကိုလည်းကောင်း၊ သင်၏ ဇာတိပကတိနှင့် စာတန်ကိုလည်းကောင်း စိတ်နှလုံးမှ သင် မုန်းတီးနိုင်လိမ့်မည်။ ပြီးလျှင် သင်သည် သမ္မာတရားကို စိတ်နှလုံးမှ ချစ်နိုင်ပြီး သမ္မာတရားအတွက် ကြိုးပမ်းနိုင်လိမ့်မည်။ ဤနည်းဖြင့် သင်၏ မာနထောင်လွှားသော စိတ်သဘောထားသည် ‌မပြတ် လျော့နည်းလာမည်ဖြစ်ပြီး သင်သည် ထိုစိတ်သဘောထားကို တဖြည်းဖြည်း စွန့်ပစ်လိမ့်မည်။ သင်သည် အသိစိတ် ပိုပိုပြီး ရရှိလိမ့်မည်ဖြစ်ပြီး ဘုရားသခင်ကို ကျိုးနွံနာခံရန် သင့်အတွက် ပိုမိုလွယ်ကူလိမ့်မည်။ အခြားသူများ၏ အမြင်တွင် သင်သည် ပိုတည်ငြိမ်ပြီး ချင့်ချိန်တတ်ပုံပေါ်ကာ ပိုမိုဓမ္မဓိဋ္ဌာန်ကျကျ ပြောဆိုပုံရလိမ့်မည်ဖြစ်သည်။ အခြားသူများကို သင် နားထောင်နိုင်စွမ်းရှိလိမ့်မည်ဖြစ်ကာ ၎င်းတို့ကို စကားပြောချိန် ပေးလိမ့်မည်။ အခြားသူများ မှန်သည့်အခါ ၎င်းတို့၏ စကားများကို လက်ခံဖို့ သင့်အတွက် လွယ်ကူလိမ့်မည်ဖြစ်ပြီး လူတို့နှင့် သင်၏ ဆက်ဆံမှုများသည် အလွန် ခက်ခဲပင်ပန်းလိမ့်မည် မဟုတ်ပေ။ မည်သူနှင့်မဆို အတွဲအဖက်ညီစွာ သင် ပူးပေါင်းလုပ်ဆောင်နိုင်လိမ့်မည်။ ဤသည်မှာ မိမိတာဝန်ကို ထမ်းဆောင်ပုံဖြစ်ပါက သင်သည် အသိစိတ်နှင့် လူ့သဘာဝ ရှိလိမ့်မည် မဟုတ်လော။ ယင်းမှာ ဤဖောက်ပြန်ပျက်စီးသော စိတ်သဘောထားမျိုးကို ဖြေရှင်းရန် နည်းလမ်း ဖြစ်သည်။

ယခုတင် ငါ ဖော်ပြခဲ့သည့် ခေါင်းမာသော စိတ်သဘောထား ပြဿနာမှတစ်ဆင့် ဖောက်ပြန်ပျက်စီးသော စိတ်သဘောထားအား ဖြေရှင်းရန်နည်းလမ်းနှင့် ပတ်သက်ပြီး ယခု ငါတို့ အနည်းငယ် မိတ်သဟာယ ပြုကြစို့။ ဖောက်ပြန်ပျက်စီးသော စိတ်သဘောထားကို ဖြေရှင်းရန် အကြင်သူသည် ပထမဦးစွာ သမ္မာတရားကို လက်ခံနိုင်ရမည်။ သမ္မာတရားကို လက်ခံရန်မှာ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်ခံရန်ဖြစ်သည်။ လူသား၏ ဖောက်ပြန်ပျက်စီးခြင်း အနှစ်သာရကို ဖော်ထုတ်သည့် သူ၏ နှုတ်ကပတ်တော်များကို လက်ခံရန် ဖြစ်သည်။ ဘုရားနှုတ်ကပတ်တော်များအရ သင်သည် သင်၏ ဖောက်ပြန်ပျက်စီးခြင်း ပွင့်အံထွက်မှုများ၊ သင်၏ ဖောက်ပြန်ပျက်စီးသော အခြေအနေများနှင့် ဖောက်ပြန်ပျက်စီးသော ရည်ရွယ်ချက်များ၊ အပြုအမူများကို သိရှိလာပြီး စိစစ်လာကာ သင့်ပြဿနာများ၏ အနှစ်သာရကို ဖော်ထုတ်နိုင်ပါက သင်၏ ဖောက်ပြန်ပျက်စီးသော စိတ်သဘောထားကို သိမြင်မှုအား သင် ရရှိပြီးဖြစ်လိမ့်မည်ဖြစ်ကာ ယင်းကို ဖြေရှင်းသည့်ဖြစ်စဉ်အား စတင်ပြီးဖြစ်လိမ့်မည်။ သို့သော်ငြားလည်း ဤသို့ သင်လက်တွေ့မလုပ်ဆောင်ပါက သင်၏ ခေါင်းမာသော စိတ်သဘောထားကို သင် ဖြေရှင်းနိုင်လိမ့်မည် မဟုတ်ရုံသာမက သင်၏ ဖောက်ပြန်ပျက်စီးသော စိတ်သဘောထားများကိုလည်း အမြစ်ဖြတ်ရန် ဖြစ်နိုင်မည်မဟုတ်ပေ။ လူတိုင်းသည် ဖောက်ပြန်ပျက်စီးသော စိတ်သဘောထား တစ်သီတစ်တန်း ပိုင်ဆိုင်ကြသည်။ ထိုအရာများကို အကြင်သူသည် မည်သည့်နေရာတွင် စတင် ဖြေရှင်းသင့်သနည်း။ ပထမဦးစွာ ခေါင်းမာသော စိတ်သဘောထားက လူတို့ကို ဘုရားသခင်ထံ တိုးဝင်ချဉ်းကပ်ခြင်း၊ သမ္မာတရား ရှာဖွေခြင်းနှင့် ဘုရားသခင်ကို ကျိုးနွံနာခံခြင်းမှ ဟန့်တားလာသည့်အခါတွင် အကြင်သူသည် မိမိတို့၏ ခေါင်းမာမှုကို ဖြေရှင်းရမည်။ ခေါင်းမာခြင်းသည် လူ၏ ဆုတောင်းခြင်းအတွက်လည်းကောင်း၊ ဘုရားသခင်နှင့် မိတ်သဟာယပြုခြင်းအတွက်လည်းကောင်း အကြီးမားဆုံးသော ခလုတ်တံသင်း ဖြစ်သည်။ ယင်းသည် လူသား၏ ဘုရားသခင်နှင့် ပုံမှန်ဆက်ဆံရေးကို အနှောင့်ယှက်ဆုံးသောအရာ ဖြစ်သည်။ သင်၏ ခေါင်းမာသော စိတ်သဘောထားကို သင် ဖြေရှင်းပြီးနောက်တွင် အခြားအရာများက ဖြေရှင်းဖို့ လွယ်လိမ့်မည်။ ဖောက်ပြန်ပျက်စီးသော စိတ်သဘောထားကို ဖြေရှင်းခြင်းသည် မိမိကိုယ်ကိုယ် သုံးသပ်ခြင်းနှင့် မိမိကိုယ်ကိုယ် သိမြင်မှုဖြင့် စတင်၏။ သင် သတိပြုမိသည့် မည်သည့် ဖောက်ပြန်ပျက်စီးသော စိတ်သဘောထားကိုမဆို ဖြေရှင်းလော့။ ယင်းတို့အပေါ် သိမြင်မှု သင် ပိုမိုရရှိလေ၊ ပိုဖြေရှင်းနိုင်လေ၊ ယင်းတို့အပေါ် သင်၏ အသိ သာ၍ နက်ရှိုင်းလေ၊ ယင်းတို့ကို သင် စေ့စေ့စပ်စပ် ပိုမိုဖြေရှင်းနိုင်လေ ဖြစ်သည်။ ဤသည်မှာ ဖောက်ပြန်ပျက်စီးသော စိတ်သဘောထားကို ဖြေရှင်းခြင်း ဖြစ်စဉ်ဖြစ်သည်။ ယင်းကို အကြင်သူက ဇာတိပကတိကို ပုန်ကန်နိုင်ပြီး သမ္မာတရားကို လက်တွေ့လုပ်ဆောင်နိုင်သည်အထိ ဘုရားသခင်ထံ ဆုတောင်းခြင်းအားဖြင့်၊ ပြီးလျှင် မိမိကိုယ်ကိုယ် သုံးသပ်ခြင်း၊ သိရှိခြင်းနှင့် ဘုရားနှုတ်ကပတ်တော်များမှတစ်ဆင့် မိမိ၏ ဖောက်ပြန်ပျက်စီးသော စိတ်သဘောထား၏ အနှစ်သာရကို စိစစ်ခြင်းအားဖြင့် လုပ်ဆောင်ရပေသည်။ မိမိ၏ ဖောက်ပြန်ပျက်စီးသော စိတ်သဘောထား၏ အနှစ်သာရကို သိရှိခြင်းသည် ရိုးရှင်းသော အလုပ်ကိစ္စမဟုတ်ပေ။ သင့်ကိုယ်သင် သိရှိခြင်းသည် “ကျွန်ုပ်သည် ဖောက်ပြန်ပျက်စီးသော လူတစ်ဦးဖြစ်သည်။ နတ်ဆိုးတစ်ဦး ဖြစ်သည်။ စာတန်၏ သားသမီး၊ အဆင်းနီသော နဂါးကြီး၏ သားစဉ်မြေးဆက် ဖြစ်သည်။ ဘုရားသခင်အပေါ် ကျွန်ုပ် အတိုက်အခံလုပ်ကာ ရန်လိုသည်။ ကျွန်ုပ်သည် သူ၏ ရန်သူဖြစ်သည်”ဟု ယေဘုယျအားဖြင့် ပြောဆိုခြင်း မဟုတ်ပေ။ ထိုသို့သော ပြောဆိုခြင်းက သင်သည် မိမိ၏ ဖောက်ပြန်ပျက်စီးသော စိတ်သဘောထားအပေါ် စစ်မှန်သော သိမြင်မှု ရှိသည်ဟု သေချာပေါက် မဆိုလိုပေ။ သင်သည် ထိုစကားများကို အခြားတစ်စုံတစ်ဦးထံမှ သင်ယူပြီးဖြစ်နိုင်ကာ သင့်ကိုယ်သင်နှင့် ပတ်သက်၍ သိပ်မသိခြင်း ဖြစ်နိုင်သည်။ စစ်မှန်သည့် မိမိကိုယ်ကိုယ် သိမြင်မှုသည် လူ၏ သင်ယူခြင်း၊ သို့မဟုတ် အကဲဖြတ်ခြင်းများ၌ အခြေမခံပေ။ ဘုရားသခင်၏ နှုတ်ကပတ်တော်များ၌ အခြေခံ၏။ ယင်းသည် ဖောက်ပြန်ပျက်စီးသော စိတ်သဘောထားများ၏ အကျိုးဆက်များ၊ ပြီးလျှင် ထိုစိတ်သဘောထားများ၏ အကျိုးဆက်အဖြစ် သင်တွေ့ကြုံပြီးဖြစ်သည့် ဆင်းရဲဒုက္ခကို တွေ့မြင်ခြင်း၊ ဖောက်ပြန်ပျက်စီးသော စိတ်သဘောထားက သင့်ကိုသာမက၊ အခြားလူများကိုပါ ထိခိုက်နစ်နာစေပုံကို ခံစားရခြင်းတို့ ဖြစ်သည်။ ယင်းမှာ ဖောက်ပြန်ပျက်စီးသော စိတ်သဘောထားများက စာတန်၌ ပေါ်ပေါက်ကြောင်း၊ ယင်းတို့သည် စာတန်၏ အဆိပ်များနှင့် အတွေးအခေါ်များ ဖြစ်ကြောင်းနှင့် သမ္မာတရားနှင့် ဘုရားသခင်ကို လုံးဝ အန္တရာယ်ပေးကြောင်း အမှန်တရားကို ရိပ်စားမိခြင်း ဖြစ်သည်။ ဤပြဿနာကို သင် ရိပ်စားမိပြီးသည့်အခါ သင်၏ ဖောက်ပြန်ပျက်စီးသော စိတ်သဘောထားကို သင် သိရှိလာပြီး ဖြစ်လိမ့်မည်။ လူအချို့က ၎င်းတို့သည် နတ်ဆိုးများနှင့် စာတန် ဖြစ်ကြောင်း အသိအမှတ်ပြုပြီးနောက်တွင် ပြုပြင်ခြင်းကို လက်မခံကြသေးချေ။ ၎င်းတို့အနေဖြင့် မှားယွင်းသည့်အရာ တစ်ခုခု လုပ်ပြီးကြောင်း၊ သို့မဟုတ် သမ္မာတရားကို ချိုးဖောက်မိပြီးဖြစ်ကြောင်းကို ဝန်မခံကြချေ။ ၎င်းတို့၏ ပြဿနာမှာ အဘယ်နည်း။ ၎င်းတို့သည် မိမိတို့ကိုယ်ကိုယ် မသိကြသေးချေ။ လူအချို့က ၎င်းတို့သည် နတ်ဆိုးများနှင့် စာတန်ဖြစ်သည်ဟု ပြောကြသည့်တိုင် ၎င်းတို့ကို သင်က “သင်သည် နတ်ဆိုးတစ်ကောင်နှင့် စာတန်ဖြစ်သည်ဟု အဘယ်ကြောင့် ပြောပါသနည်း”ဟု မေးမည်ဆိုပါက ၎င်းတို့ ပြန်ဖြေနိုင်မည် မဟုတ်။ ဤအရာက ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထား၊ သို့မဟုတ် ၎င်းတို့၏ သဘာဝ အနှစ်သာရကို မသိကြကြောင်း သက်သေပြပေသည်။ ၎င်းတို့၏ သဘာဝက နတ်ဆိုး၏ သဘာဝဖြစ်ကြောင်း၊ ၎င်းတို့၏ ဖောက်ပြန်ပျက်စီးသော စိတ်သဘောထားသည် စာတန်၏ စိတ်သဘောထားဖြစ်ကြောင်း ၎င်းတို့ မြင်နိုင်ပြီး ထို့ကြောင့် ၎င်းတို့သည် နတ်ဆိုးဖြစ်သည်ဟု ဝန်ခံနိုင်ပါက မိမိတို့ကိုယ်ပိုင် သဘာဝ အနှစ်သာရကို ၎င်းတို့ သိရှိလာကြပြီးဖြစ်မည်။ စစ်မှန်သည့် မိမိကိုယ်ကိုယ် သိမြင်မှုကို ဘုရားနှုတ်ကပတ်တော်များ၏ ဖော်ထုတ်မှု၊ တရားစီရင်ခြင်း၊ လက်တွေ့လုပ်ဆောင်ခြင်းနှင့် အတွေ့အကြုံမှတစ်ဆင့် စွမ်းဆောင်ရရှိပေသည်။ ယင်းကို သမ္မာတရားကို သိနားလည်ခြင်းမှတစ်ဆင့် စွမ်းဆောင်ရရှိပေသည်။ လူတစ်ဦးသည် သမ္မာတရားကို နားမလည်ပါက ၎င်းတို့၏ မိမိကိုယ်ကိုယ် သိမြင်မှုအကြောင်း မည်သည့်အရာ ပြောသည်ဖြစ်စေ၊ အမြစ်တွယ်ပြီး ပဓာနကျသော ထိုအရာများကို ၎င်းတို့ ရှာမတွေ့နိုင်၊ သို့မဟုတ် သဘောမပေါက်နိုင်သောကြောင့် ယင်းသည် အနှစ်သာရမဲ့ပြီး လက်တွေ့မကျပေ။ မိမိကိုယ်ကိုယ်မိမိ သိရှိရန်မှာ အကြင်သူသည် တိကျသော ဖြစ်ရပ်များတွင် မည်သည့် ဖောက်ပြန်ပျက်စီးခြင်းများကို ၎င်းက ထုတ်ဖော်ပြပြီးဖြစ်သည်၊ မိမိတို့၏ ရည်ရွယ်ချက်က မည်သည့်အရာဖြစ်သည်၊ ၎င်းတို့ မည်သို့ပြုမူကြသည်၊ မည်သည့်အရာကြောင့် ၎င်းတို့ မသန့်စင်ရသည်ဆိုသည်နှင့် သမ္မာတရားကို ၎င်းတို့ လက်မခံရသည့်အကြောင်းရင်းတို့ကို သိမှတ်ရမည်။ ဤအရာများကို ၎င်းတို့ ရှင်းရှင်းလင်းလင်း ဖော်ပြနိုင်ရမည်ဖြစ်သည်။ ထို့နောက်တွင်မှ ၎င်းတို့သည် မိမိတို့ကိုယ်ကိုယ် သိရှိနိုင်ကြပေသည်။ လူအချို့သည် ပြုပြင်ခြင်းနှင့် ရင်ဆိုင်ရသည့်အခါ သမ္မာတရားကို ၎င်းတို့ အလွန်အမင်း မနှစ်မြို့မိကြောင်း၊ ဘုရားသခင်နှင့် ပတ်သက်၍ သံသယများနှင့် အထင်လွဲမှုများရှိကြောင်းနှင့် သူ့ကို ၎င်းတို့ သတိထားပြီး တွန်းလှန်ကြကြောင်းတို့ကို ဝန်ခံကြသည်။ လူသားကို တရားစီရင်ပြီး ဖော်ထုတ်သည့် ဘုရားနှုတ်ကပတ်တော်များအားလုံးသည် အမှန်တရား ဖြစ်ကြောင်းလည်း ၎င်းတို့ အသိအမှတ်ပြုကြသည်။ ဤအရာက ၎င်းတို့သည် မိမိကိုယ်ကိုယ် သိမြင်မှု အနည်းငယ်ရှိကြောင်း ပြပေသည်။ သို့ရာတွင် ၎င်းတို့သည် ဘုရားသခင်၊ သို့မဟုတ် သူ၏ အမှုတော်ကို သိမြင်မှု မရှိကြသောကြောင့်၊ သူ၏ ရည်ရွယ်ချက်များကို နားမလည်ကြသောကြောင့် ၎င်းတို့၏ မိမိကိုယ်ကိုယ် သိမြင်မှုသည် အတော်လေး ပေါ့တန်လေသည်။ တစ်စုံတစ်ဦးသည် မိမိတို့ကိုယ်ပိုင် ဖောက်ပြန်ပျက်စီးခြင်းကိုသာ သိမှတ်သော်လည်း ပြဿနာ၏ ရင်းမြစ်ကို ရှာမတွေ့ပါက ဘုရားသခင်နှင့် ပတ်သက်သည့် ၎င်းတို့၏ သံသယများ၊ အထင်လွဲမှုများနှင့် သတိထား တွန်းလှန်မှုများကို ဖြေရှင်း၍ရနိုင်သလော။ မရနိုင်ပေ။ ဤသည်မှာ မိမိကိုယ်ကိုယ် သိမြင်မှုသည် မိမိ၏ ဖောက်ပြန်ပျက်စီးခြင်းနှင့် ပြဿနာများကို အသိအမှတ်ပြုခြင်းမျှထက် ပိုသည့်အကြောင်းရင်း ဖြစ်သည်။ အကြင်သူသည် သမ္မာတရားကိုလည်း နားလည်ရမည်ဖြစ်ပြီး မိမိတို့၏ ဖောက်ပြန်ပျက်စီးသော စိတ်သဘောထား၏ ပြဿနာကို အမြစ်မှ ဖြေရှင်းရမည်။ ယင်းမှာ မိမိ၏ ဖောက်ပြန်ပျက်စီးခြင်း၏အမှန်တရားကို ရိပ်စားမိပြီး စစ်မှန်သည့် နောင်တ စွမ်းဆောင်ရရှိရန် တစ်ခုတည်းသော နည်းလမ်းဖြစ်သည်။ သမ္မာတရားကို ချစ်သောသူတို့သည် မိမိတို့ကိုယ်ကိုယ် သိရှိလာကြသည့်အခါ မိမိတို့၏ ပြဿနာများကို ဖြေရှင်းရန် သမ္မာတရားကိုလည်း ၎င်းတို့ ရှာဖွေကာ နားလည်နိုင်ကြသည်။ ဤမိမိကိုယ်ကိုယ် သိမြင်မှုမျိုးသည်သာ ရလဒ်များ ဖြစ်ထွန်းစေသည်။ သမ္မာတရားကို ချစ်သောလူတစ်ဦးသည် လူသားကို ထုတ်ဖော်ပြီး တရားစီရင်သည့် ဘုရားနှုတ်ကပတ်တော် စကားရပ်တစ်ခုကို ဖတ်သည့်အခါတိုင်းတွင် လူသားကို ထုတ်ဖော်ပြသည့် ဘုရားနှုတ်ကပတ်တော်များက စစ်မှန်ပြီး အမှန်တရား ဖြစ်ကြောင်းနှင့် လူသားကို တရားစီရင်သည့် ဘုရားနှုတ်ကပတ်တော်များက သမ္မာတရားဖြစ်ကြောင်း၊ ပြီးလျှင် ယင်းတို့သည် ဘုရားသခင်၏ ဖြောင့်မတ်ခြင်းအား ကိုယ်စားပြုကြောင်း အဓိကအားဖြင့် ၎င်းတို့ ယုံကြည်ကြသည်။ သမ္မာတရားကို ချစ်သောသူတို့သည် အနည်းဆုံးအနေဖြင့် ဤအရာကို သတိပြုနိုင်ရမည်။ တစ်စုံတစ်ဦးသည် ဘုရားနှုတ်ကပတ်တော်များကိုပင် မယုံကြည်သကဲ့သို့ လူသားကို ဖော်ထုတ်‌ပြီး တရားစီရင်သည့် ဘုရားနှုတ်ကပတ်တော်များက အမှန်တရားများနှင့် သမ္မာတရားဖြစ်ကြောင်း မယုံကြည်ပါက ဘုရားနှုတ်ကပတ်တော်များမှတစ်ဆင့် မိမိတို့ကိုယ်ကိုယ် သိရှိနိုင်ကြသလော။ သေချာပေါက် မသိနိုင်ကြချေ။ ၎င်းတို့ သိရှိရန် ဆန္ဒရှိလျှင်ပင် သိရှိနိုင်မည်မဟုတ်ပေ။ ဘုရားနှုတ်ကပတ်တော်များအားလုံးက သမ္မာတရားဖြစ်ကြောင်း သင်၏ ယုံကြည်မှုတွင် သင် ခိုင်မာနိုင်ပြီး မည်သည့်အရာကို ဘုရားသခင် ပြောသည်ဖြစ်စေ၊ သူ၏ စကားပြောသည့်ပုံစံက မည်သို့ဖြစ်စေ ထိုနှုတ်ကပတ်တော်များအားလုံးကို ယုံကြည်နိုင်ပါက၊ သင် နားမလည်လျှင်ပင် ဘုရားနှုတ်ကပတ်တော်များကို ယုံကြည်ပြီး လက်ခံနိုင်ပါက ထိုနှုတ်ကပတ်တော်များမှတစ်ဆင့် မိမိကိုယ်ကိုယ် သုံးသပ်ကာ သိရှိရန် သင့်အတွက် လွယ်ကူလိမ့်မည်။ မိမိကိုယ်ကိုယ် ဆင်ခြင်သုံးသပ်ခြင်းသည် သမ္မာတရားအပေါ် အခြေခံရမည်ဖြစ်သည်။ ယင်းမှာ သံသယရှိရန် မလိုပေ။ ဘုရားနှုတ်ကပတ်တော်များသာ သမ္မာတရားဖြစ်၏။ လူ၏ စကားများနှင့် စာတန်၏ စကားများတစ်ခုမျှ သမ္မာတရား မဟုတ်။ စာတန်သည် သင်ယူခြင်း၊ သင်ကြားခြင်းနှင့် သဘောတရားမျိုးစုံဖြင့် လူသားမျိုးနွယ်ကို နှစ်ထောင်ချီ ဖောက်ပြန်ပျက်စီးစေပြီး ဖြစ်ကာ လူတို့သည် အလွန် ထုံထိုင်းပြီး နုံအလာကြသည်မှာ မိမိတို့ကိုယ်ကိုယ် သိမြင်မှု စိုးစဉ်းမျှ မရှိကြရုံသာမက မိစ္ဆာဒိဋ္ဌိအယူများနှင့် အတွေးမှားများကိုပင် လိုက်နာစောင့်ထိန်းကာ သမ္မာတရားကို လက်ခံရန် ငြင်းပယ်ကြလေသည်။ ဤသို့သော လူသားများသည် အဖတ်ဆယ်၍ မရနိုင်ကြပေ။ ဘုရားသခင်၌ စစ်မှန်သော ယုံကြည်ခြင်းရှိသူတို့သည် ဘုရားသခင်၏ နှုတ်ကပတ်တော်များသာ သမ္မာတရားဖြစ်ကြောင်း ယုံကြည်ကြသည်။ ဘုရားနှုတ်ကပတ်တော်များနှင့် သမ္မာတရားအပေါ် အခြေခံ၍ မိမိတို့ကိုယ်ကိုယ် သိရှိနိုင်ကြပြီး ထိုသို့ဖြင့် စစ်မှန်သော နောင်တတရားကို ရရှိနိုင်ကြသည်။ လူအချို့သည် သမ္မာတရားကို မလိုက်စားကြချေ။ ၎င်းတို့သည် မိမိကိုယ်ကိုယ် သုံးသပ်ခြင်းအား လူသား၏ သင်ယူမှုများ အပေါ်တွင်သာ အခြေခံကြပြီး အပြစ်ရှိသည့် အပြုအမူထက်ပို၍ မည်သည့်အရာမျှ ဝန်မခံကြသကဲ့သို့ တစ်ချိန်လုံးတွင် မိမိတို့ကိုယ်ပိုင် ဖောက်ပြန်ပျက်စီးသော အနှစ်သာရကို မရိပ်စားမိနိုင်ကြချေ။ ထိုသို့သော မိမိကိုယ်ကိုယ် သိမြင်မှုသည် အချည်းနှီးဖြစ်သော အားထုတ်မှုဖြစ်ပြီး မည်သည့်ရလဒ်မျှ မဖြစ်ထွန်းပေ။ အကြင်သူသည် ၎င်း၏ မိမိကိုယ်ကိုယ် သုံးသပ်ခြင်းအား ဘုရားနှုတ်ကပတ်တော်များအပေါ် အခြေခံ ရမည်ဖြစ်ပြီး သုံးသပ်ပြီးနောက်တွင် ၎င်းထုတ်ဖော်ပြသည့် ဖောက်ပြန်ပျက်စီးသော စိတ်သဘောထားကို တဖြည်းဖြည်း သိရှိလာရမည်။ အကြင်သူသည် မိမိ၏ ချို့တဲ့မှုများ၊ မိမိလူ့သဘာဝ အနှစ်သာရ၊ အမှုအရာများအပေါ် မိမိ၏ အမြင်များ၊ မိမိ၏ ဘဝ အမြင်နှင့် တန်ဖိုးများကို သမ္မာတရားအပေါ် အခြေခံ၍ အကဲဖြတ်ကာ သိရှိနိုင်ရမည်။ ထို့နောက်တွင် ဤအရာအားလုံးအပေါ် မှန်ကန်တိကျသည့် အကဲဖြတ်ချက်နှင့် ထင်မြင်ချက် စိတ်ကူးရလာနိုင်ရမည်။ ဤနည်းဖြင့် မိမိတို့ကိုယ်ကိုယ် သိမြင်မှုကို ၎င်းတို့ တဖြည်းဖြည်း ကြိုးပမ်းရယူနိုင်ပေသည်။ သို့ရာတွင် အကြင်သူသည် ဘဝတွင် သာ၍ တွေ့ကြုံသည်နှင့်အမျှ မိမိကိုယ်ကိုယ် သိမြင်မှုက ယခင်ကထက် သာ၍ နက်ရှိုင်းသွားပြီး သမ္မာတရား မရရှိမီတွင် မိမိ၏ သဘာဝ အနှစ်သာရကို လုံးလုံး ရိပ်စားမိရန် ၎င်းအတွက် ဖြစ်နိုင်လိမ့်မည်မဟုတ်ပေ။ လူတစ်ဦးသည် မိမိကိုယ်ကိုယ် အမှန်တကယ် သိပါက ဖောက်ပြန်ပျက်စီးသော လူသားများသည် ဧကန်အမှန် စာတန်၏ သားသမီးနှင့် ပြယုဂ်များဖြစ်ကြောင်းကို မြင်နိုင်သည်။ ၎င်းတို့သည် ဘုရားသခင် ရှေ့မှောက်တွင် အသက်မရှင်ထိုက်ကြောင်း၊ သူ၏ မေတ္တာ၊ ကယ်တင်ခြင်းတို့နှင့် မထိုက်တန်ကြောင်း ခံစားကြလိမ့်မည်ဖြစ်ပြီး ဘုရားသခင်ရှေ့မှောက်တွင် မိမိတို့ကိုယ်ကိုယ် လုံးဝ ဝပ်စင်းနိုင်ကြလိမ့်မည်။ ထိုသို့သော သိမြင်မှုအတိုင်းအတာတစ်ခုကို သိမြင်နိုင်စွမ်းရှိသူတို့သာ မိမိတို့ကိုယ်ကိုယ် အမှန်တကယ် သိပေသည်။ မိမိကိုယ်ကိုယ် သိမြင်မှုသည် သမ္မာတရား စစ်မှန်မှုထဲသို့ ဝင်ရောက်ခြင်းအတွက် ကြိုတင်သတ်မှတ်ချက်တစ်ခု ဖြစ်သည်။ တစ်စုံတစ်ဦးသည် သမ္မာတရားကို လက်တွေ့လုပ်ဆောင်ကာ စစ်မှန်မှုထဲသို့ ဝင်ရောက်ချင်ပါက မိမိတို့ကိုယ်ကိုယ် သိရှိရမည်။ လူအားလုံးသည် ဖောက်ပြန်ပျက်စီးသော စိတ်သဘောထားများ ရှိကြပြီး မရည်ရွယ်ဘဲ ဤဖောက်ပြန်ပျက်စီးသော စိတ်သဘောထားများဖြင့် ၎င်းတို့ အမြဲ ချုပ်ချယ်ခံရကာ ထိန်းချုပ်ခံရကြသည်။ ၎င်းတို့သည် သမ္မာတရားကို လက်တွေ့မလုပ်ဆောင်နိုင်၊ သို့မဟုတ် ဘုရားသခင်ကို ကျိုးနွံနာခံနိုင်ခြင်း မရှိကြချေ။ ထို့ကြောင့် ဤအရာများကို ၎င်းတို့ လုပ်ဆောင်ရန် ဆန္ဒရှိပါက ပထမဦးစွာ မိမိတို့ကိုယ်ကို သိရှိရမည်ဖြစ်ပြီး မိမိတို့၏ ဖောက်ပြန်ပျက်စီးသော စိတ်သဘောထားများကို ဖြေရှင်းရမည်။ သမ္မာတရားကို နားလည်ပြီး ဘုရားသခင်ကို သိကျွမ်းခြင်းကို ရရှိနိုင်သည်မှာ ဖောက်ပြန်ပျက်စီးသော စိတ်သဘောထားတစ်ခုကို ဖြေရှင်းခြင်း ဖြစ်စဉ်မှတစ်ဆင့်သာ ဖြစ်သည်။ ထိုအခါမှသာ အကြင်သူသည် ဘုရားသခင်ကို ကျိုးနွံနာခံနိုင်ပြီး သူ့အတွက် သက်သေခံနိုင်ပေသည်။ ယင်းမှာ သမ္မာတရားကို ရရှိပုံဖြစ်သည်။ သမ္မာတရား စစ်မှန်မှုထဲသို့ ဝင်ရောက်ခြင်း ဖြစ်စဉ်သည် မိမိ၏ ဖောက်ပြန်ပျက်စီးသော စိတ်သဘောထားကို ဖြေရှင်းခြင်း ဖြစ်စဉ်ဖြစ်သည်။ ထို့ကြောင့် မိမိတို့၏ ဖောက်ပြန်ပျက်စီးသော စိတ်သဘောထားကို ဖြေရှင်းရန် အကြင်သူသည် မည်သည့်အရာကို လုပ်ဆောင်ရမည်နည်း။ ပထမဦးစွာ မိမိ၏ ဖောက်ပြန်ပျက်စီးသော အနှစ်သာရကို သိရှိရမည်။ အတိအကျဆိုရလျှင် ဤသည်မှာ မိမိ၏ ဖောက်ပြန်ပျက်စီးသော စိတ်သဘောထား ထွက်ပေါ်ပုံကိုလည်းကောင်း၊ မိမိလက်ခံသည့် စာတန်၏ မည်သည့် နတ်ဆိုးဆန်သော စကားများနှင့် မှားယွင်းပြီး အဓိပ္ပာယ်မဲ့သော အတွေးများက ထိုအရာကို ထွက်ပေါ်စေသည်ကိုလည်းကောင်း သိရှိခြင်းအား ဆိုလိုပေသည်။ အကြင်သူသည် ဘုရားနှုတ်ကပတ်တော်များအရ ဤဖြစ်ကြောင်းရင်းမြစ်များကို အပြည့်အဝ နားလည်လာပြီး ယင်းတို့အပေါ် ချင့်ချိန်နိုင်စွမ်း ရှိသည်နှင့်တစ်ပြိုင်နက် မိမိ၏ ဖောက်ပြန်ပျက်စီးသော စိတ်သဘောထားဖြင့် အသက်ရှင်ရန် လိုလားနေလိမ့်မည် မဟုတ်တော့ပေ။ ဘုရားသခင်ကိုသာ ကျိုးနွံနာခံပြီး သူ၏ နှုတ်ကပတ်တော်များဖြင့် အသက်ရှင်ချင်လိမ့်မည်။ ဖောက်ပြန်ပျက်စီးသော စိတ်သဘောထားတစ်ခုကို ထိုသူ ထုတ်ဖော်ပြသည့်အခါတိုင်းတွင် သတိပြုမိနိုင်လိမ့်မည်ဖြစ်ပြီး ငြင်းပယ်ကာ မိမိ၏ ဇာတိပကတိကို ပုန်ကန်နိုင်လိမ့်မည်။ ဤသို့ လက်တွေ့လုပ်ဆောင်ကာ တွေ့ကြုံခြင်းအားဖြင့် မိမိ၏ ဖောက်ပြန်ပျက်စီးသော စိတ်သဘောထားအားလုံးကို တဖြည်းဖြည်း စွန့်ပစ်လိမ့်မည်။

လူအချို့က “ဘုရားသခင်၏ ဖော်ထုတ်ခြင်းနှင့် တရားစီရင်ခြင်း နှုတ်ကပတ်တော်များကို ကျွန်ုပ် ဖတ်သည့်အခါ မိမိကိုယ်ကိုယ် ကျွန်ုပ် သုံးသပ်ကာ ကျွန်ုပ်သည် မာနထောင်လွှား၊ လှည့်စားတတ်ကြောင်း၊ တစ်ကိုယ်ကောင်းဆန်၊ ကောက်ကျစ်ဆိုးယုတ်ကာ ခေါင်းမာပြီး လူ့သဘာဝ ကင်းမဲ့ကြောင်း သဘောပေါက်ခဲ့သည်”ဟု ဆိုကြသည်။ ၎င်းတို့ အလွန်အမင်း မာနထောင်လွှားကြောင်း၊ လူ့တိရစ္ဆာန်များဖြစ်ကြောင်း၊ နတ်ဆိုးများနှင့် စာတန်ဖြစ်ကြောင်းပင် ပြောသောသူအချို့ရှိသည်။ ဤသည်မှာ စစ်မှန်သည့် မိမိကိုယ်ကိုယ် သိမြင်မှုဖြစ်သလော။ ၎င်းတို့သည် စိတ်နှလုံးမှ စကားပြောနေကြပြီး တစ်စုံတစ်ခုကို တုပခြင်းသာ မဟုတ်ပါက အနည်းဆုံးအနေဖြင့် ၎င်းတို့တွင် မိမိကိုယ်ကိုယ် သိမြင်မှုရှိကြောင်း ပြသည်။ တစ်ခုတည်းသော မေးစရာမှာ ထိုအသိက ပေါ့တန်ခြင်း၊ နက်ရှိုင်းခြင်း ရှိမရှိ ဖြစ်သည်။ ထိုအရာများသည် တစ်စုံတစ်ခုကို တုပခြင်း၊ အခြားတစ်စုံတစ်ဦး၏ စကားများကို လိုက်ပြောခြင်း ဖြစ်ပါက ယင်းမှာ စစ်မှန်သော မိမိကိုယ်ကိုယ် သိမြင်မှု မဟုတ်ပေ။ အကြင်သူ၏ ဖောက်ပြန်ပျက်စီးသော စိတ်သဘောထားအား သိမြင်မှုသည် ကိစ္စနှင့် အခြေအနေတိုင်းတွင် ခိုင်လုံရမည်။ ဤသည်မှာ ဖောက်ပြန်ပျက်စီးသော စိတ်သဘောထားနှင့် ဆက်နွှယ်သည့် အခြေအနေများ၊ ပွင့်အံထွက်ခြင်းများ၊ အပြုအမူများ၊ အတွေးများနှင့် စိတ်ကူ းများကဲ့သို့သော အသေးစိတ်အချက်များကို ဆိုလိုသည်။ ထိုအခါမှသာ အကြင်သူသည် မိမိတို့ကိုယ်ကိုယ် အမှန်တကယ် သိမြင်နိုင်ပေသည်။ လူတစ်ဦးသည် မိမိကိုယ်ကိုယ် အမှန်တကယ် သိရှိသည့်အခါ ၎င်းတို့ စိတ်နှလုံးသည် နောင်တနှင့် ပြည့်လိမ့်မည်ဖြစ်ပြီး စစ်မှန်သည့် နောင်တတရားရနိုင်စွမ်း ရှိလာလိမ့်မည်။ နောင်တရရန်အလို့ငှာ ပထမဦးဆုံး လက်တွေ့လုပ်ဆောင်ရမည့် အရာမှာ အဘယ်နည်း။ (မိမိ၏ အမှားများကို ဝန်ခံရမည်။) “မိမိ၏အမှားများကို ဝန်ခံခြင်း”သည် ဤအရာကို ဖော်ပြ ရန် မှန်ကန်သည့် နည်းလမ်း မဟုတ်။ ယင်းထက် မိမိ၌ ဖောက်ပြန်ပျက်စီးသည့် စိတ်သဘောထား တစ်ခုခု ရှိကြောင်းကို အသိအမှတ်ပြုခြင်းနှင့် သိမြင်ခြင်း ကိစ္စတစ်ခု ဖြစ်သည်။ အကြင်သူက မိမိ၏ ဖောက်ပြန်ပျက်စီးသော စိတ်သဘောထားသည် အမှားတစ်မျိုး ဖြစ်သည်ဟု ဆိုလျှင် မှားယွင်းပေသည်။ ဖောက်ပြန်ပျက်စီးသော စိတ်သဘောထားတစ်ခုသည် မိမိ၏ သဘာဝနှင့် သက်ဆိုင်သည့် အရာတစ်ခု၊ လူတစ်ဦးကို ထိန်းချုပ်သည့်အရာတစ်ခု ဖြစ်သည်။ တစ်ကြိမ်တည်းလုပ်သည့် အမှားတစ်ခုနှင့် တူသောအရာ မဟုတ်ပေ။ ဖောက်ပြန်ပျက်စီး‌ခြင်းကို ထုတ်ဖော်ပြပြီးနောက် လူအချို့က ဘုရားသခင်ထံ ဆုတောင်းကြသည်။ “အို ဘုရားသခင်၊ ကျွန်ုပ် အမှားတစ်ခု ပြုခဲ့ပါသည်။ ကျွန်ုပ် တောင်းပန်ပါသည်”ဟူ၍ ဖြစ်သည်။ ဤသည်မှာ မမှန်ပေ။ “အပြစ်တစ်ခုကို ဝန်ခံခြင်း”သည် ပိုသင့်တော်မည်။ နောင်တတရားကို လူတို့ လက်တွေ့လုပ်ဆောင်သည့် တိကျသော နည်းလမ်းမှာ မိမိတို့ကိုယ်ကိုယ် သိရှိခြင်းနှင့် မိမိတို့၏ ပြဿနာများကို ဖြေရှင်းခြင်းအားဖြင့် ဖြစ်သည်။ လူတစ်ဦးသည် ဖောက်ပြန်ပျက်စီးသော စိတ်သဘောထားတစ်ခုကို ထုတ်ဖော်ပြသည့်အခါ၊ သို့မဟုတ် ပြစ်မှားမှုတစ်ခုကို ကျူးလွန်မိပြီး ၎င်းက ဘုရားသခင်ကို အတိုက်အခံ လုပ်မိနေကာ သူ၏ အမုန်းတရားကို လှုံ့ဆော်ပေးနေကြကြောင်း သဘောပေါက်သည့်အခါ ၎င်းသည် ဆီလျော်သည့် ဘုရားနှုတ်ကပတ်တော်များအတွင်း၌ မိမိကိုယ်ကိုယ် သုံးသပ်ပြီး သိရှိသင့်သည်။ ထို့ကြောင့် ၎င်းသည် မိမိ၏ ဖောက်ပြန်ပျက်စီးသော စိတ်သဘောထားများအပေါ် သိမြင်မှုအချို့ ရရှိလိမ့်မည်ဖြစ်ပြီး ထိုအရာက စာတန်၏ အဆိပ်များနှင့် ဖောက်ပြန်ပျက်စီးခြင်းမှ လာကြောင်း အသိအမှတ်ပြုလိမ့်မည်။ ထို့နောက်တွင် သမ္မာတရားကို လက်တွေ့လုပ်ဆောင်ခြင်းအတွက် စည်းမျဉ်းများအား ရှာတွေ့ပြီး သမ္မာတရားကို လက်တွေ့လုပ်ဆောင်နိုင်ပြီးသည့်အခါ ယင်းမှာ စစ်မှန်သော နောင်တတရား ဖြစ်သည်။ လူတစ်ဦးက မည်သည့် ဖောက်ပြန်ပျက်စီးခြင်းကို ထုတ်ဖော်ပြသည်ဖြစ်စေ ၎င်းသည် ပထမဦးစွာ မိမိ၏ ဖောက်ပြန်ပျက်စီးသော စိတ်သဘောထားကို သိရှိနိုင်ပါက ယင်းကို ဖြေရှင်းဖို့ သမ္မာတရားကို ရှာဖွေနိုင်ပြီး သမ္မာတရားကို လက်တွေ့လုပ်ဆောင်လာနိုင်ပါက ယင်းသည် စစ်မှန်သော နောင်တတရားဖြစ်၏။ လူအချို့သည် မိမိတို့ကိုယ်ကိုယ်နှင့်ပတ်သက်၍ အနည်းငယ် သိရှိကြသော်လည်း ၎င်းတို့အတွင်း၌ နောင်တလက္ခဏာများ မရှိသကဲ့သို့ ၎င်းတို့၏ သမ္မာတရား လက်တွေ့လုပ်ဆောင်ကြောင်း သက်သေအထောက်အထား တစ်ခုမျှ မရှိကြချေ။ မိမိကိုယ်ကိုယ် သိမြင်မှု ရရှိပြီးနောက်တွင် ၎င်းတို့သည် မပြောင်းမလဲရှိနေပါက ယင်းသည် စစ်မှန်သော နောင်တတရားနှင့် အလှမ်းဝေး၏။ စစ်မှန်သော နောင်တကို ရရှိရန် အကြင်သူသည် မိမိ၏ ဖောက်ပြန်ပျက်စီးသော စိတ်သဘောထားကို ဖြေရှင်းရမည်။ ထို့ကြောင့် တိတိကျကျဆိုရလျှင် မိမိ၏ ဖောက်ပြန်ပျက်စီးသော စိတ်သဘောထားကို ဖြေရှင်းရန်အလို့ငှာ အကြင်သူသည် မည်သို့ လက်တွေ့လုပ်ဆောင်ကာ ဝင်ရောက်သင့်သနည်း။ ဤနေရာတွင် ဥပမာတစ်ခုရှိ၏။ လူတို့သည် လှည့်စားတတ်သော စိတ်သဘောထားများရှိကြ၏။ ၎င်းတို့သည် အမြဲ လိမ်ညာကာ လှည့်စားနေကြသည်။ ယင်းကို သင် သဘောပေါက်ပါက သင်၏ လှည့်စားတတ်ခြင်းကို ဖြေရှင်းရန် အရိုးရှင်းဆုံးနှင့် တိုက်ရိုက်အကျဆုံးသော လက်တွေ့လုပ်ဆောင်မှု စည်းမျဉ်းမှာ ရိုးသားသော လူတစ်ဦးဖြစ်ရန်၊ အမှန်တရားကို ပြောပြီး ရိုးသားသော အရာများကို လုပ်ဆောင်ရန် ဖြစ်သည်။ သခင်ယေရှု ပြောခဲ့သည်မှာ “သင်၏စကားမှာ ဟုတ်သည်ကိုအဟုတ်၊ မဟုတ်သည်ကို မဟုတ်ဖြစ်စေလော့။” ဟူ၍ဖြစ်သည်။ ရိုးသားသော လူတစ်ဦးဖြစ်ရန် အကြင်သူသည် ဘုရားနှုတ်ကပတ်တော်များ၏ စည်းမျဉ်းများကို လိုက်လျှောက်သင့်သည်။ ဤရိုးရှင်းသော လက်တွေ့လုပ်ဆောင်မှုသည် အထိရောက်ဆုံးဖြစ်သည်။ နားလည်ရန်နှင့် လက်တွေ့လုပ်ဆောင်ရန် လွယ်ကူ၏။ သို့ရာတွင် လူတို့သည် အလွန်အမင်း ဖောက်ပြန်ပျက်စီးကြသောကြောင့်၊ ၎င်းတို့အားလုံး ဆိုးယုတ်သော သဘာဝများရှိကြပြီး ဆိုးယုတ်သော စိတ်သဘောထားများဖြင့် အသက်ရှင်နေကြသောကြောင့် သမ္မာတရားကို လက်တွေ့လုပ်ဆောင်ရန် ၎င်းတို့အတွက် အတော်လေး ခက်ခဲသည်။ ၎င်းတို့သည် ရိုးသားချင်ကြသော်လည်း မရိုးသားနိုင်ကြချေ။ အလိမ်အညာများပြောပြီး လှည့်စားမှုတွင် ပါဝင်ပတ်သက်ခြင်း မရှိဘဲမနေနိုင်ကြသကဲ့သို့ ဤအရာကို သတိပြုပြီးနောက်တွင် နောင်တရကောင်း ရနိုင်သော်လည်း ၎င်းတို့၏ ဖောက်ပြန်ပျက်စီးသော စိတ်သဘောထားများ၏ ထိန်းချုပ်မှုများကို ၎င်းတို့ မစွန့်ပစ်နိုင်ကြသေးသကဲ့သို့ ယခင်ကဲ့သို့ ဆက်လက် လိမ်ညာကာ လှည့်စားနေကြလိမ့်မည်။ ဤပြဿနာကို မည်သို့ ဖြေရှင်းသင့်သနည်း။ ယင်း၏ တစ်စိတ်တစ်ပိုင်းမှာ မိမိ၏ ဖောက်ပြန်ပျက်စီးသော စိတ်သဘောထား၏ အနှစ်သာရမှာ အကျည်းတန်ပြီး စက်ဆုပ်ဖွယ်ဖြစ်ကြောင်း သိရှိခြင်းနှင့် ယင်းကို မိမိစိတ်နှလုံးမှ မုန်းတီးနိုင်ခြင်း ဖြစ်သည်။ နောက်တစ်ပိုင်းမှာ သမ္မာတရား စည်းမျဉ်းအတိုင်း လက်တွေ့လုပ်ဆောင်ရန် မိမိကိုယ်ကိုယ် လေ့ကျင့်ခြင်း ဖြစ်သည်။ “သင်၏စကားမှာ ဟုတ်သည်ကိုအဟုတ်၊ မဟုတ်သည်ကို မဟုတ်ဖြစ်စေလော့။” ဤစည်းမျဉ်းကို သင် လက်တွေ့လုပ်ဆောင်နေသည့်အချိန်တွင် သင်သည် သင်၏ လှည့်စားတတ်သော စိတ်သဘောထားကို ဖြေရှင်းခြင်း ဖြစ်စဉ်တွင် ရှိနေသည်။ သင်၏ လှည့်စားတတ်သော စိတ်သဘောထားကို ဖြေရှင်းနေစဉ်တွင် သင်သည် သမ္မာတရား စည်းမျဉ်းများအတိုင်း ပင်ကိုအားဖြင့် လက်တွေ့လုပ်ဆောင်နိုင်ပါက ယင်းသည် မိမိကိုယ်ကိုယ် ပြောင်းလဲခြင်း၏ သရုပ်သကန်တစ်ခုနှင့် သင်၏ စစ်မှန်သော နောင်တတရား အစပြုခြင်း ဖြစ်ကာ ဘုရားသခင်က ထိုအရာကို လက်ခံပေသည်။ ဤသည်မှာ သင်သည် မိမိကိုယ်ကိုယ် ပြောင်းလဲစေသည့်အခါ ဘုရားသခင်သည် သင်နှင့်ပတ်သက်၍ သင်၏ စိတ်ကို ပြောင်းလဲလိမ့်မည်ဟု ဆိုလိုသည်။ အမှန်တွင် ဤအရာကို ဘုရားသခင် လုပ်ဆောင်ခြင်းသည် လူသား၏ ဖောက်ပြန်ပျက်စီးသော စိတ်သဘောထားများနှင့် ပုန်ကန်မှုအတွက် ခွင့်လွှတ်ခြင်း အမျိုးအစားတစ်ခု ဖြစ်သည်။ သူသည် လူတို့ကို ခွင့်လွှတ်ပြီး ၎င်းတို့၏ အပြစ်များ၊ သို့မဟုတ် ပြစ်မှားမှုများကို မအောက်မေ့ပေ။ ဤမျှပြောလျှင် အသေးစိတ်ကျသလော။ ဤအရာကို သင်တို့ နားလည်ပြီလော။ နောက်ထပ် ဥပမာမှာ ဤသို့ဖြစ်၏။ သင်သည် မာနထောင်လွှားသော စိတ်သဘောထားတစ်ခုရှိပြီး သင့်အပေါ် မည်သည့်အရာဖြစ်ပျက်ပါစေ သင်သည် အလွန် တစ်ဇွတ်ထိုးနိုင်သည်၊ သင်သည် အမြဲ အဆုံးအဖြတ်ပေးလိုသည်၊ အခြားသူများအား သင့်ကို နာခံစေချင်ပြီး ၎င်းတို့အား သင့်သဘောကျ လုပ်စေချင်သည် ဆိုပါစို့။ ထို့နောက် ဤသည်မှာ မာနထောင်လွှားသော စိတ်သဘောထားအားဖြင့် ဖြစ်ကြောင်း သင် သဘောပေါက်သည့်နေ့ ရောက်လာ၏။ ယင်းသည် မာနထောင်လွှားသော စိတ်သဘောထားဖြစ်ကြောင်း သင်၏ ဝန်ခံခြင်းသည် မိမိကိုယ်ကိုယ် သိမြင်မှု၏ ပထမအဆင့် ဖြစ်သည်။ ထိုနေရာမှ သင့်ကိုယ်သင် ယှဉ်ကြည့်ရန် မာနထောင်လွှားသော စိတ်သဘောထားကို ဖော်ထုတ်သည့် ဘုရားနှုတ်ကပတ်တော် စာပိုဒ်အနည်းငယ်ကို သင် ရှာဖွေသင့်ပြီး သင့်ကိုယ်သင် သုံးသပ်ကာ သိရှိသင့်သည်။ နှိုင်းယှဉ်ခြင်းက လုံးဝ လျော်ကန်ကြောင်းကို သင် ရှာတွေ့ပြီး ဘုရားသခင် ဖော်ထုတ်သည့် မာနထောင်လွှားသော စိတ်သဘောထားက သင့်အထဲ၌ တည်ရှိသည်ကို သင် ဝန်ခံပြီးနောက် သင်၏ မာနထောင်လွှားသော စိတ်သဘောထား မည်သည့်နေရာမှ လာသည်ဆိုသည်နှင့် ထိုအရာထွက်ပေါ်ရသည့်အကြောင်းရင်း၊ ပြီးလျှင် စာတန်၏ မည်သည့် အဆိပ်များ၊ မိစ္ဆာဒိဋ္ဌိအယူများနှင့် အတွေးမှားများက ထိုအရာကို အုပ်စိုးသည်ဆိုသည်ကို ပိုင်းခြားသိမြင်ပြီး ဖော်ထုတ်ပါက ဤမေးခွန်းများအားလုံး၏ အချက်အချာကို မြင်ပြီးနောက်တွင် သင်၏ မာနထောင်လွှားမှု အရင်းအမြစ်ထိ ရှာဖွေတွေ့ရှိပြီး ဖြစ်လိမ့်မည်။ ဤသည်မှာ စစ်မှန်သော မိမိကိုယ်ကိုယ် သိမြင်မှုဖြစ်သည်။ ဤဖောက်ပြန်ပျက်စီးသော စိတ်သဘောထားအား သင် ထုတ်ဖော်ပြပုံနှင့်ဆိုင်သည့် ပိုမိုတိကျသော အဓိပ္ပာယ်ဖွင့်ဆိုချက် သင်ရှိသည့်အခါ ထိုအရာက ပိုနက်ရှိုင်းပြီး ပိုမိုလက်တွေ့ကျသည့် သင့်ကိုသင် သိမြင်မှုအား ပံ့ပိုးပေးလိမ့်မည်။ နောက်ထပ် မည်သည့်အရာကို သင် လုပ်ဆောင်သင့်သနည်း။ သင်သည် ဘုရားနှုတ်ကပတ်တော်များ၌ သမ္မာတရား စည်းမျဉ်းများကို ရှာဖွေသင့်ပြီး မည်သည့် လူသား ပြုမူနေထိုင်ပုံနှင့် စကားမျိုးက ပုံမှန် လူ့သဘာဝ၏ သရုပ်သကန်များဖြစ်သည်ကို နားလည်သင့်သည်။ လက်တွေ့လုပ်ဆောင်မှု လမ်းကြောင်းကို သင် ရှာတွေ့ပြီးနောက်တွင် ဘုရားနှုတ်ကပတ်တော်များအတိုင်း သင် လက်တွေ့လုပ်ဆောင်ရမည်ဖြစ်ပြီး သင်၏ စိတ်နှလုံး ပြောင်းလဲပြီးချိန်တွင် သင်သည် အမှန်တကယ် နောင်တရပြီး ဖြစ်လိမ့်မည်။ သင်၏ စကားနှင့် လုပ်ရပ်များအတွက် စည်းမျဉ်းများ ရှိလိမ့်မည်သာမက လူသားပုံသဏ္ဌာန်ကိုလည်း သင် အသက်ရှင်နေထိုင်နေလိမ့်မည်ဖြစ်ပြီး သင်၏ ဖောက်ပြန်ပျက်စီးသော စိတ်သဘောထားကို တဖြည်းဖြည်း ခါချနေလိမ့်မည်။ အခြားသူများက သင့်ကို လူသစ်တစ်ဦးအဖြစ် မြင်ကြလိမ့်မည်။ သင်သည် ယခင်တစ်ချိန်ကကဲ့သို့ ဖောက်ပြန်ပျက်စီးသော လူတစ်ဦး ဖြစ်တော့မည်မဟုတ်ဘဲ ဘုရားနှုတ်ကပတ်တော်များဖြင့် ပြန်လည်မွေးဖွားသည့်သူတစ်ဦး ဖြစ်လိမ့်မည်။ ထိုသို့သော လူတစ်ဦးသည် မိမိ၏ အသက်စိတ်သဘောထား ပြောင်းလဲပြီးသည့်သူ ဖြစ်သည်။

မိမိကိုယ်ကိုယ် သိရှိခြင်းသည် ရိုးရှင်းသောအလုပ် မဟုတ်။ သမ္မာတရားကို လက်ခံခြင်းအပြင် ဘုရားနှုတ်ကပတ်တော်များကို လက်တွေ့လုပ်ဆောင်ခြင်းနှင့် တွေ့ကြုံခြင်းအားဖြင့် ထိုအရာကို စွမ်းဆောင်ရရှိပြီး ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်ခံခြင်းအားဖြင့်သာ စစ်မှန်သည့် မိမိကိုယ်ကိုယ် သိမြင်မှုကို ကြိုးပမ်းရရှိနိုင်၏။ တရားစီရင်ခြင်းနှင့် ပြစ်တင်ဆုံးမခြင်းတို့ကို မတွေ့ကြုံဖူးသူများသည် အလွန်ဆုံးအနေဖြင့် ၎င်းတို့ လုပ်ခဲ့ပြီးသော အမှားများနှင့် ပြုခဲ့ပြီးသော အပြစ်များကို ဝန်ခံနိုင်သည်။ ၎င်းတို့အနေဖြင့် မိမိတို့၏ သဘာဝအနှစ်သာရကို ရှင်းရှင်းလင်းလင်း မြင်ဖို့ အလွန်ခက်လိမ့်မည်။ ကျေးဇူးတော်ခေတ်ရှိ ယုံကြည်သူများသည် အချို့သော အမှားများကို မကျူးလွန်တော့သကဲ့သို့ မိမိတို့ အပြုအမူကို ပိုကောင်းစေဖို့အတွက် ပြောင်းလဲခဲ့ကြသော်လည်း မိမိတို့၏ အသက်စိတ်သဘောထားများ ပြောင်းလဲမှုကို လုံးဝ မရရှိကြသည်မှာ အဘယ်ကြောင့်နည်း။ ဘုရားသခင်ကို ၎င်းတို့ ယုံကြည်ကြသော်လည်း အဘယ်ကြောင့် သူ့ကို ခုခံပြီး သစ္စာပင်ဖောက်ကြသနည်း။ ဖောက်ပြန်ပျက်စီးသော လူ့သဘာဝအတွက် ဤပြဿနာ၏ ရင်းမြစ်ကို သတိပြုမိရန်မှာ ခက်ခဲသည်။ အဘယ်ကြောင့် လူခပ်သိမ်းတို့သည် ဆိုးယုတ်သော စိတ်သဘောထားများ ရှိကြသနည်း။ ယင်းမှာ စာတန်သည် လူသားမျိုးနွယ်ကို ဖောက်ပြန်ပျက်စီးစေပြီးဖြစ်ကာ ၎င်း၏ နတ်ဆိုးဆန်သော စကားများနှင့် အတွေးအခေါ်များကို လူတို့က လက်ခံကြပြီးဖြစ်သောကြောင့် ဖြစ်သည်။ ယင်းမှာ ဖောက်ပြန်ပျက်စီးသော စိတ်သဘောထားများကို ဖြစ်ပေါ်စေသောအရာဖြစ်ပြီး စာတန်၏ စိတ်သဘောထားက ဘုရားသခင်အပေါ် လူများ ဆန့်ကျင်ရခြင်း အရင်းအမြစ် ဖြစ်လာခဲ့ပုံ ဖြစ်သည်။ ဤသည်မှာ လူတို့အတွက် သတိပြုမိရန် အခက်ခဲဆုံးသော အရာဖြစ်၏။ စာတန်၏ စွမ်းအားမှ လူသားမျိုးနွယ်ကို ကယ်တင်ရန်နှင့် လူသားမျိုးနွယ်၏ အပြစ်နှင့် ဘုရားသခင်ကို ဆန့်ကျင်ခုခံခြင်း အရင်းအမြစ်ကို ဖြေရှင်းရန် ဘုရားသခင်သည် နောက်ဆုံးသော ကာလတွင် သူ၏ တရားစီရင်ခြင်း အမှုတော်ကို လုပ်ဆောင်နေသည်။ စာတန်သည် လူသားမျိုးနွယ်ကို နှစ်ထောင်ချီ ဖောက်ပြန်ပျက်စီးစေပြီးဖြစ်ကာ ၎င်း၏ သဘာဝက လူသား၏ စိတ်နှလုံးတွင် အမြစ်တွယ်ပြီးဖြစ်သည်။ ထို့ကြောင့် မည်သည့်ဖောက်ပြန်ပျက်စီးသော စိတ်သဘောထားမျိုးကိုမျှ တစ်ကြိမ်၊ နှစ်ကြိမ်မျှ မိမိကိုယ်ကိုယ် သုံးသပ်ဆင်ခြင်ရန်နှင့် မိမိကိုယ်ကိုယ် သိမြင်ရန် ကြိုးပမ်းခြင်းဖြင့် ဖြေရှင်း၍မရနိုင်ပေ။ ဖောက်ပြန်ပျက်စီးသော စိတ်သဘောထားများသည် စဉ်ဆက်မပြတ် ထပ်တလဲလဲ ပွင့်အံထွက်လာတတ်၏။ ထို့ကြောင့် လူတို့သည် သမ္မာတရားကို လက်ခံဖို့လိုသကဲ့သို့ စာတန်ကို ၎င်းတို့ အောင်နိုင်သည်အထိ မိမိတို့၏ ဆိုးယုတ်သော စိတ်သဘောထားများကို ရေရှည် ရင်ဆိုင်တိုက်ခိုက်ဖို့ လိုအပ်သည်။ ထိုအခါမှသာ ၎င်းတို့၏ ဖောက်ပြန်ပျက်စီးသော စိတ်သဘောထားများကို လုံးလုံးလျားလျား ဖယ်ရှားနိုင်ကြလိမ့်မည်။ ထို့ကြောင့် လူတို့သည် ၎င်းတို့ထံမှ ဖောက်ပြန်ပျက်စီးခြင်း ပွင့်အံထွက်မလာတော့သည်အထိ ၎င်းတို့၏ အသက်စိတ်သဘောထား ပြောင်းလဲပြီး ဘုရားသခင်ကို ကျိုးနွံနာခံခြင်း စွမ်းဆောင်ရရှိသည်အထိ ဘုရားသခင်ထံ မရပ်မနား ဆုတောင်းရမည်၊ သမ္မာတရား ရှာဖွေရမည်၊ မိမိကိုယ်ကိုယ် ဆင်ခြင်သုံးသပ်ရမည်၊ မိမိကိုယ်ကိုယ် သိရှိရမည်ဖြစ်ပြီး သမ္မာတရားကို လက်တွေ့လုပ်ဆောင်ရမည်။ ထိုအခါမှသာ ဘုရားသခင်၏ လက်ခံမှုကို ၎င်းတို့ ရရှိနိုင်၏။ တိုက်ပွဲတစ်ခုစီတိုင်း၏ ရလဒ်များသည် ချက်ချင်း မသိသာနိုင်သကဲ့သို့ ထို့နောက်ပိုင်းတွင် ဖောက်ပြန်ပျက်စီးသော စိတ်သဘောထားများကို သင် ထုတ်ဖော်ပြဆဲ ဖြစ်နိုင်သည်။ သင်သည် အနည်းငယ် အပျက်သဘောဆောင်ပြီး စိတ်ပျက်နိုင်သော်လည်း လက်လျှော့ဖို့ မလိုမလားဖြစ်နိုင်သည်။ ပြီးလျှင် ဆက်လက် ကြိုးစားနေနိုင်သေးသည်၊ ဘုရားသခင်ကို ကြည်ညိုပြီး သူ့အပေါ် မှီခိုနိုင်သေး၏။ ထိုသို့ နှစ်နှစ်၊ သုံးနှစ်ကြာ သင် မဆုတ်မနစ် လုံ့လထုတ်ပါက သမ္မာတရားကို အမှန်တကယ် လက်တွေ့လုပ်ဆောင်နိုင်လိမ့်မည်ဖြစ်ပြီး သင်၏ စိတ်နှလုံးတွင် ငြိမ်သက်ခြင်းနှင့် ဝမ်းမြောက်ခြင်း ရှိလိမ့်မည်။ ထို့နောက်တွင် သင် ပြုခဲ့သည့် ကျရှုံးမှု၊ အားထုတ်မှုနှင့် အကျိုးအမြတ်တိုင်းသည် သင်၏ စိတ်သဘောထား ပြောင်းလဲမှုတစ်ခုနှင့် သင်နှင့်ပတ်သက်၍ ဘုရားသခင်၏ စိတ်ကို ပြောင်းလဲစေခြင်းအဖြစ်ဆီသို့ သင် ဦးတည်ရှေ့ဆက်နေခဲ့သည့် ကောင်းမွန်သော လက္ခဏာတစ်ခုဖြစ်ကြောင်းကို သင်ရှင်းရှင်းလင်းလင်း တွေ့ရလိမ့်မည်။ လူသား၏ အသိဉာဏ်အဖို့ အပြောင်းအလဲတစ်ခုစီတိုင်းကို မသိရှိနိုင်သော်လည်း အကြိမ်တိုင်း ဖြစ်လာသည့် စိတ်သဘောထားဆိုင်ရာ ပြောင်းလဲမှုကို အခြား မည်သည့်လုပ်ရပ်၊ အမှုအရာအားဖြင့်မျှ စွမ်းဆောင်မရရှိနိုင်ပေ။ ဤသည်မှာ အကြင်သူသည် မိမိ၏ စိတ်သဘောထားဆိုင်ရာ ပြောင်းလဲမှုနှင့် အသက်ဝင်ရောက်မှုတွင် လျှောက်ရမည့် လမ်းကြောင်း ဖြစ်သည်။ ဤသည်မှာ စိတ်သဘောထားဆိုင်ရာ ပြောင်းလဲမှုကို လိုက်စားခြင်းအား လက်တွေ့လုပ်ဆောင်ရမည့်ပုံ ဖြစ်၏။ ဟုတ်ပေ၏၊ လူတို့သည် စိတ်သဘောထားဆိုင်ရာ ပြောင်းလဲမှု ဖြစ်ပျက်ပုံအပေါ် မှန်ကန်သည့် သိနားလည်မှု ရှိသင့်ပေ၏။ ယင်းမှာ ၎င်းတို့ စိတ်ကူးသကဲ့သို့ အံ့အားသင့်စေပြီး ကြည်နူးဖွယ် ရုတ်တရက်ဖြစ်သော၊ ကမ္ဘာတုန်လောက်သော အပြောင်းအလဲတစ်ခု မဟုတ်ပေ။ ဖြစ်ပျက်ပုံမှာ ထိုသို့မဟုတ်ပေ။ ယင်းမှာ မသိလိုက်ဘဲ ဖြည်းညှင်းစွာ တစ်စချင်း ပြောင်းလဲသည့် ကိစ္စတစ်ခု ဖြစ်သည်။ အကြင်သူသည် သမ္မာတရားကို လက်တွေ့လုပ်ဆောင်နိုင်သည့်အခါ တစ်စုံတစ်ခုကို ရရှိလိမ့်မည်။ ဤလမ်းကြောင်းကို သုံး၊ ငါး၊ ဆယ်နှစ်ကြာ လျှောက်လှမ်းပြီးနောက် သင်နောက်ပြန်လှည့်ကြည့်သည့်အခါ ထိုဆယ်နှစ်တာကာလတွင် သင်၏ စိတ်သဘောထား အလွန့်အလွန် ပြောင်းလဲပြီးဖြစ်ကြောင်း၊ သင်သည် လုံးဝ မတူကွဲပြားကြောင်းကို တွေ့မြင်အံ့အားသင့်ရလိမ့်မည်။ သင်၏ ပင်ကိုစရိုက်နှင့် စိတ်က မပြောင်းလဲ၊ သို့မဟုတ် သင်၏ ဘဝနေထိုင်မှုပုံစံ စသည်တို့ မပြောင်းလဲသေးသည်မှာ ဖြစ်ကောင်းဖြစ်နိုင်သည်။ သို့သော် သင်သည် မတူကွဲပြားသောလူတစ်ဦး အမှန်တကယ် ဖြစ်လာပြီးဖြစ်သည့်အလား သင် ပွင့်အံထွက်တတ်သည့် စိတ်သဘောထားများ၊ အခြေအနေများနှင့် အပြုအမူများက တခြားစီဖြစ်လိမ့်မည်။ ထိုသို့သော အပြောင်းအလဲတစ်ခု အဘယ်ကြောင့် ဖြစ်လိမ့်မည်နည်း။ အဘယ်ကြောင့်ဆိုသော် ထိုဆယ်နှစ်တာတွင် သင်သည် ဘုရားနှုတ်ကပတ်တော်များအားဖြင့် အကြိမ်ပေါင်းများစွာ တရားစီရင်ခြင်း ပြစ်တင်ဆုံးမခြင်း၊ ပြုပြင်ခြင်း၊စမ်းသပ်ခြင်းနှင့် စစ်ဆေးခြင်းခံရပြီး ဖြစ်လိမ့်မည်ဖြစ်ကာ သမ္မာတရားများစွာကို သင် နားလည်ပြီး ဖြစ်လိမ့်မည်။ အမှုအရာများအပေါ် သင်၏ အမြင်များတွင် ပြောင်းလဲမှုတစ်ခု၊ ဘဝနှင့် သင်၏ စံများအပေါ် သင်၏ သဘောထားတွင် ပြောင်းလဲမှုတစ်ခုဖြင့် အစပြုလိမ့်မည်။ ယင်းနောက်တွင် သင်၏ စိတ်သဘောထားတွင် ပြောင်းလဲမှု၊ ရှင်သန်ဖို့ သင် မှီခိုသည့် အခြေခံအုတ်မြစ်တွင် ပြောင်းလဲမှုတစ်ခုက လိုက်လာလိမ့်မည်။ ဤအပြောင်းအလဲများ ဖြစ်ပေါ်သည်နှင့်အမျှ၊ သင်သည် တဖြည်းဖြည်း အခြားလူတစ်ဦး၊ လူသစ်တစ်ဦး ဖြစ်လာလိမ့်မည်။ သင်၏ ပင်ကိုစရိုက်၊ စိတ်၊ ဘဝနေထိုင်မှုပုံစံအပြင် သင်၏ ပြောပုံဆိုပုံနှင့် ကိုယ်ဟန်အမူအရာတို့ပင် မပြောင်းမလဲရှိနေနိုင်သော်ငြား သင်၏ အသက်စိတ်သဘောထားကို သင် ပြောင်းလဲပြီး ဖြစ်လိမ့်မည်ဖြစ်ကာ ယင်းတစ်ခုတည်းကပင် အဓိကကျသည့် မုချလိုအပ်သော အပြောင်းအလဲတစ်ခု ဖြစ်၏။ စိတ်သဘောထားဆိုင်ရာ ပြောင်းလဲမှု၏ လက္ခဏာများမှာ အဘယ်နည်း။ ယင်းသည် မည်သို့ အတိအကျ သိသာထင်ရှားသနည်း။ ယင်းသည် အမှုအရာများအပေါ် လူတစ်ဦး၏ အမြင်များရှိ အပြောင်းအလဲတစ်ခုဖြင့် အစပြုသည်။ ယင်းမှာ လူတစ်ဦးသည် သမ္မာတရားအပေါ် သိနားလည်မှု ရရှိသည်နှင့်အမျှ ဘာသာတရားမရှိသူများ၏ အမှုအရာများအပေါ် ၎င်းထားရှိသည့် အမြင်အမြောက်အမြား ပြောင်းလဲပြီး ထိုအမြင်များက ဘုရားနှုတ်ကပတ်တော်များ၏ သမ္မာတရားနှင့် သာ၍ နီးစပ်သည့်အခါတွင် ဖြစ်သည်။ ဤသည်မှာ စိတ်သဘောထားဆိုင်ရာ ပြောင်းလဲမှု၏ ပထမအဆင့်ဖြစ်၏။ ထို့အပြင် မိမိကိုယ်ကိုယ် သုံးသပ်ဆင်ခြင်ခြင်းနှင့် မိမိကိုယ်ကိုယ် သိမြင်မှုတို့မှတစ်ဆင့် လူတို့သည် သမ္မာတရား လက်တွေ့လုပ်ဆောင်ခြင်းကို အာရုံစိုက်၍ရသည်။ ၎င်းတို့အတွင်း ထွက်ပေါ်သည့် အမျိုးမျိုးသော ကြံရွယ်ချက်များ၊ ရည်ရွယ်ချက်များ၊ အတွေးများနှင့် စိတ်ကူးများ၊ အယူအဆများ၊ ရှုထောင့်အမြင်များနှင့် သဘောထားများအပေါ် သုံးသပ်ဆင်ခြင်ခြင်းအားဖြင့် ၎င်းတို့သည် မိမိတို့၏ ပြဿနာများကို ရှာတွေ့နိုင်ပြီး ယင်းတို့အတွက် စတင် နောင်တရနိုင်သည်။ ထို့နောက်တွင် ဇာတိပကတိကို ၎င်းတို့ ပုန်ကန်နိုင်ပြီး သမ္မာတရားကို လက်တွေ့လုပ်နိုင်ကြသည်။ ပြီးလျှင် ထိုသို့လုပ်ဆောင်သည်နှင့်အမျှ၊ ဘုရားနှုတ်ကပတ်တော်များနှင့် သမ္မာတရားကို ၎င်းတို့ ပိုမို တန်ဖိုးထားမြတ်နိုးလာကြလိမ့်မည်ဖြစ်ပြီး ခရစ်တော်သည် သမ္မာတရား၊ လမ်းခရီးနှင့် အသက်ဖြစ်ကြောင်း အသိအမှတ်ပြုလာကြလိမ့်မည်။ ၎င်းတို့သည် ခရစ်တော်နောက်လိုက်ပြီး သူ့ကို ကျိုးနွံနာခံဖို့ ပိုမို လိုလားကြလိမ့်မည်ဖြစ်ကာ လူသားကို ဖော်ထုတ်၊ တရားစီရင်ကာ ပြစ်တင်ဆုံးမရန်နှင့် လူတို့၏ ဖောက်ပြန်ပျက်စီးသော စိတ်သဘောထားများကို ပြောင်းလဲစေရန် ဘုရားသခင်က သမ္မာတရားကို ဖော်ပြကြောင်း၊ ပြီးလျှင် ထိုသို့လုပ်ဆောင်ခြင်းအားဖြင့် ဘုရားသခင်သည် လူသားကို အမှန်တကယ် လက်တွေ့ကျသည့် နည်းလမ်းဖြင့် ကယ်တင်ကာ စုံလင်စေကြောင်း ခံစားကြရလိမ့်မည်။ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်း၊ သို့မဟုတ် သူ့နှုတ်ကပတ်တော်များ၏ ထောက်ပံ့မှုနှင့် လမ်းပြမှုမရှိဘဲ လူတို့သည် ကယ်တင်ခြင်း ရရှိရန် နည်းလမ်းရှိမည်မဟုတ်သကဲ့သို့ ထိုသို့သော ဆုလာဘ်များကို ရရှိခံစားနိုင်မည်မဟုတ်ဟု ၎င်းတို့ ခံစားရကြလိမ့်မည်။ ၎င်းတို့သည် ဘုရားနှုတ်ကပတ်တော်များကို စတင်ချစ်လာကြလိမ့်မည်ဖြစ်ပြီး မိမိတို့၏ လက်တွေ့ဘဝတွင် ထိုနှုတ်ကပတ်တော်များအပေါ် မှီခိုရကြောင်း၊ ၎င်းတို့ကို ထောက်ပံ့ပေးရန်၊ လမ်းပြရန်နှင့် ၎င်းတို့အတွက် လမ်းရှင်းပေးရန် သူ၏ နှုတ်ကပတ်တော်များကို ၎င်းတို့ လိုအပ်ကြောင်း ခံစားမိကြလိမ့်မည်။ ၎င်းတို့ စိတ်နှလုံးများသည် ငြိမ်သက်ခြင်းနှင့် ပြည့်လိမ့်မည်ဖြစ်ပြီး ၎င်းတို့အပေါ် တစ်စုံတစ်ခု ဖြစ်ပျက်သည့်အခါ ဘုရားနှုတ်ကပတ်တော်များကို မရည်ရွယ်ဘဲ ရှာဖွေကြပြီး မိမိတို့၏ အခြေခံအုတ်မြစ်အဖြစ် အသုံးပြုကြလိမ့်မည်။ ပြီးလျှင် ထိုနှုတ်ကပတ်တော်များအတွင်းတွင် လက်တွေ့လုပ်ဆောင်မှု စည်းမျဉ်းများနှင့် လမ်းကြောင်းများကို ရှာဖွေကြလိမ့်မည်။ ဤသည်မှာ မိမိကိုယ်ကိုယ် သိရှိခြင်းမှတစ်ဆင့် စွမ်းဆောင်ရရှိသည့် ရလဒ်တစ်ခု ဖြစ်သည်။ နောက်ထပ်တစ်ခု ရှိသေး၏။ လူတို့သည် မိမိတို့၏ ဖောက်ပြန်ပျက်စီးသော စိတ်သဘောထားများ ပွင့်အံထွက်ခြင်းများအား တစ်ချိန်ကကဲ့သို့ ခေါင်းမာသော သဘောထားဖြင့် သဘောထားကြတော့မည်မဟုတ်။ ထိုအစား မိမိတို့ စိတ်နှလုံးများကို ငြိမ်သက်စေကာ ရိုးသားသော သဘောထားတစ်ခုဖြင့် ဘုရားနှုတ်ကပတ်တော်များကို နားထောင်နိုင်ကြလိမ့်မည်ဖြစ်ပြီး သမ္မာတရားနှင့် အပြုသဘောဆောင်သောအရာများကို လက်ခံနိုင်ကြလိမ့်မည်။ ဤသည်မှာ ၎င်းတို့အနေဖြင့် ဖောက်ပြန်ပျက်စီးသော စိတ်သဘောထားတစ်ခု ပွင့်အံထွက်သည့်အခါ ယခင်ကကဲ့သို့ ခေါင်းမာခြင်း၊ ထိန်းချုပ်ရခက်ခြင်း၊ အလွန်အမင်း ကြမ်းကြုတ်ခြင်း၊ မာနထောင်လွှားခြင်း၊ မိုက်ရိုင်းပြီး ရက်စက်ခြင်းတို့ ဖြစ်တော့မည်မဟုတ်ဟု ဆိုလိုသည်။ ထိုအစား ၎င်းတို့သည် မိမိတို့ကိုယ်ကိုယ် တက်ကြွစွာ သုံးသပ်ပြီး မိမိတို့၏ တကယ့် ပြဿနာများအား သိရှိကြလိမ့်မည်။ ၎င်းတို့၏ ဖောက်ပြန်ပျက်စီးသော စိတ်သဘောထား၏ အနှစ်သာရက မည်သည့်အရာဖြစ်သည်ကို ၎င်းတို့ မသိနိုင်သော်လည်း မိမိတို့ကိုယ်ကိုယ် ငြိမ်သက်စေနိုင်ကြလိမ့်မည်၊ ဘုရားသခင်ထံ ဆုတောင်းပြီး သမ္မာတရားကို ရှာဖွေနိုင်ကြလိမ့်မည်။ ထို့နောက်တွင် မိမိတို့၏ ပြဿနာများနှင့် မိမိတို့၏ ဖောက်ပြန်ပျက်စီးသော စိတ်သဘောထားတို့ကို ဝန်ခံကြလိမ့်မည်ဖြစ်ပြီး ဘုရားသခင်ထံ နောင်တရကာ အနာဂတ်တွင် မတူကွဲပြားစွာ ပြုမူနေထိုင်ဖို့ ဆုံးဖြတ်ကြလိမ့်မည်။ ယင်းမှာ လုံးလုံးလျားလျား ကျိုးနွံနာခံသည့် သဘောထားတစ်ခု ဖြစ်၏။ ဤသို့ဖြင့် ဘုရားသခင်ထံ ကျိုးနွံနာခံသည့် စိတ်နှလုံးများကို ၎င်းတို့ ရရှိကြလိမ့်မည်။ ဘုရားသခင် မည်သည့်အရာကိုပြောသည်ဖြစ်စေ၊ ၎င်းတို့အပေါ် မည်သည့်အရာ တောင်းဆိုသည်ဖြစ်စေ၊ ၎င်းတို့အတွက် မည်သည့်အမှုကို သူ ပြုသည်ဖြစ်စေ၊ သို့မဟုတ် မည်သည့်ပတ်ဝန်းကျင်များ သူ စီစဉ်သည်ဖြစ်စေ ယင်းကို ကျိုးနွံနာခံဖို့ လူတို့အတွက် လွယ်ကူလိမ့်မည်။ ၎င်းတို့၏ ဖောက်ပြန်ပျက်စီးသော စိတ်သဘောထားများက ၎င်းတို့အတွက် ကြီးမားသည့် အတားအဆီးတစ်ခု ဖြစ်စေလိမ့်မည်မဟုတ်။ ယင်းတို့ကို ဖြေရှင်းကာ အောင်မြင်ဖို့ လွယ်ကူလိမ့်မည်။ ထိုအဆင့်တွင် သမ္မာတရားကို လက်တွေ့လုပ်ဆောင်ခြင်းသည် ၎င်းတို့အတွက် သက်သောင့်သက်သာဖြစ်လိမ့်မည်ဖြစ်ပြီး ဘုရားသခင်ထံ ကျိုးနွံနာခံခြင်းကို ၎င်းတို့ စွမ်းဆောင်ရရှိနိုင်ကြလိမ့်မည်။ ဤသည်တို့မှာ စိတ်သဘောထားဆိုင်ရာ ပြောင်းလဲမှု၏ လက္ခဏာများဖြစ်၏။ တစ်စုံတစ်ဦးသည် သမ္မာတရားကို လက်တွေ့လုပ်ဆောင်နိုင်ပြီး ဘုရားသခင်ကို အမှန်တကယ် ကျိုးနွံနာခံနိုင်သည့်အခါ ၎င်းတို့၏ အသက်စိတ်သဘောထားက အပြောင်းအလဲတစ်ခု၊ သမ္မာတရားကို လိုက်စားခြင်းမှတစ်ဆင့် လုံးဝ စွမ်းဆောင်ရရှိသည့် စစ်မှန်သော အပြောင်းအလဲတစ်ခုကို ကြုံနှင့်ပြီးဖြစ်သည်ဟု ဆိုနိုင်သည်။ ဤဖြစ်စဉ်အတောအတွင်း အပြုသဘောဆောင်သည့် အပြုအမူများဖြစ်စေ၊ သာမန် အပျက်သဘောဆောင်ခြင်းနှင့် အားနည်းမှုဖြစ်စေ လူတို့တွင် ဖြစ်ပေါ်သော အပြုအမူအားလုံးသည် မရှိမဖြစ်ဖြစ်ပြီး ရှောင်လွှဲမရပေ။ အပြုသဘောဆောင်သည့် အပြုအမူများ ရှိသည့်အတွက် အပျက်သဘောဆောင်ခြင်းနှင့် အားနည်းခြင်း အပြုအမူများလည်း ရှိရမည်။ သို့ရာတွင် အပျက်သဘောဆောင်ခြင်းနှင့် အားနည်းမှုတို့သည် ယာယီဖြစ်၏။ လူတစ်ဦးသည် ဝိညာဉ်ရင့်ကျက်မှု အနည်းငယ် ပိုင်ဆိုင်သည်နှင့် ယခင်ထက် ပိုမိုနည်းပါးသည့် အပျက်သဘောဆောင်သော၊ အားနည်းသော အခြေအနေများ ရှိလိမ့်မည်ဖြစ်ပြီး ယခင်က ပိုသည့် အပြုသဘောဆောင်သော အပြုအမူများနှင့် ဝင်ရောက်မှုတို့ ရှိလိမ့်မည်ဖြစ်ကာ ၎င်းတို့၏ လုပ်ရပ်များသည် တိုး၍ တိုး၍ စည်းမျဉ်းနှင့်ညီလာလိမ့်မည်။ ထိုသို့သော လူတစ်ဦးသည် ဘုရားသခင်ကို ကျိုးနွံနာခံသူတစ်ဦး၊ မိမိ၏ ဖောက်ပြန်ပျက်စီးသော စိတ်သဘောထားများ သန့်စင်ခံရသည့်နောက် မိမိ၏ အသက်စိတ်သဘောထား ပြောင်းလဲခဲ့သည့်သူတစ်ဦး ဖြစ်သည်။ ဤသည်တို့မှာ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့ကို တွေ့ကြုံခြင်းအားဖြင့် ထပ်တလဲလဲ ပြုပြင်ကာ၊ စမ်းသပ်ပြီး စစ်ဆေးခံရခြင်းတို့အားဖြင့် သမ္မာတရား လိုက်စားသူတို့ ရယူကြသည့် ရလဒ်များဖြစ်သည်ဟု ဆိုနိုင်သည်။

သမ္မာတရား လိုက်စားခြင်း၏ တိကျသည့် သာမန် ဖြစ်စဉ်များကို လူတို့အားလုံး ယခု ကြားကာ နားလည်ကြပြီး ဖြစ်သည့်အတွက် သမ္မာတရားကို ၎င်းတို့ အလွန်အမင်း မနှစ်မြို့ရသည့် အကြောင်းရင်း၊ သို့မဟုတ် ထိုသမ္မာတရားကို ခုခံရသည့် အကြောင်းရင်း၊ မလိုက်စားရသည့် အကြောင်းရင်းအတွက် မတူကွဲပြားသည့် ကျိုးကြောင်းပြချက်များ၊ ဆင်ခြေများကို လုပ်ကြံပြောဆိုခြင်း မပြုသင့်တော့ပေ။ ဤသမ္မာတရားများကို နားလည်ပြီး ဤကိစ္စကို ရှင်းရှင်းလင်းလင်း မြင်သည့်နောက် ယခုတွင် သမ္မာတရား မလိုက်စားခြင်းအတွက် လူတို့ပေးသည့် ကျိုးကြောင်းပြချက်များနှင့် ဆင်ခြေများအပေါ် ချင့်ချိန်နိုင်စွမ်း သင်တို့ ရှိကြပြီလော။ လူကြီးတစ်ဦးက “ကျွန်ုပ် အိုပြီ။ လူငယ်တစ်ဦးကဲ့သို့ တက်ကြွခြင်း၊ စိတ်ထက်သန်ခြင်း မရှိပါ။ ဇရာကြောင့် ငယ်ရွယ်မှု၏ ရန်လိုခြင်းနှင့် ရည်မှန်းချက်တို့ ကျွန်ုပ် ဆုံးရှုံးရသကဲ့သို့ နောက်ထပ် မာနထောင်လွှားခြင်း မရှိတော့ပါ။ ထို့ကြောင့် ကျွန်ုပ် မာနထောင်လွှားသည်ဟု သင် ပြောဆိုခြင်းက အဓိပ္ပာယ်မရှိ။ ကျွန်ုပ် မာနမထောင်လွှားပါ”ဟု ဆိုသည်။ ၎င်းတို့ မှန်ကန်ပါ၏လော။ (မမှန်ပါ။) မမှန်သည်မှာ သိသာထင်ရှားပေ၏။ ယခုတွင် ထိုသို့သော စကားများအပေါ် သင်တို့အားလုံး ချင့်ချိန်နိုင်စွမ်း ရှိကြပြီဖြစ်သည်။ ထိုလူကို သင်တို့ ထုတ်ဖော်ပြနိုင်ပြီး၊ “သင် အိုမင်းသော်လည်း မာနထောင်လွှားသော စိတ်သဘောထား ရှိနေသေးသည်။ သင်၏ တစ်သက်တာလုံး ထိုမာနထောင်လွှားမှုကို တစ်ကြိမ်တစ်ခါမျှ မဖြေရှင်းခဲ့ဘဲ မာနထောင်လွှားပြီးဖြစ်သည်။ သင် ဆက်လက် မာနထောင်လွှားချင်သေးသလော”ဟု ဆိုနိုင်လိမ့်မည်ဖြစ်သည်။ ပိုမိုငယ်ရွယ်သော လူအချို့က “ကျွန်ုပ် ငယ်ရွယ်သည်။ လူမှုအဖွဲ့အစည်း၏ ပရမ်းပတာဖြစ်သော ကဏ္ဍများကို မတွေ့ကြုံရသေး၊ သို့မဟုတ် မတူကွဲပြားသော အဖွဲ့များအတွင်း ရုန်းကန်ကာ မကောင်းသည့်အခြေအနေသို့ တစ်စတစ်စချင်း ကျရောက်သွားခြင်း မဟုတ်သေးပါ။ ကမ္ဘာတစ်ဝှမ်းက လူများတွင်ရှိသည့် အတွေ့အကြုံများ ကျွန်ုပ်တွင် မရှိပါ။ ပြီးလျှင် ပိုမို အရေးကြီးသည်မှာ ထိုဉာဏ်နီဉာဏ်နက်များသူများလောက် ကျွန်ုပ် စိတ်မချရသောသူ၊ သို့မဟုတ် ဖောက်ပြန်သောသူ မဟုတ်သည်မှာ အမှန်ဖြစ်၏။ လူငယ်တစ်ဦးအနေဖြင့် မာနထောင်လွှားသော စိတ်သဘောထား အနည်းငယ်ရှိသည်မှာ ကျွန်ုပ်အတွက် ပုံမှန်ဖြစ်သည်။ အနည်းဆုံးအနေဖြင့် ကျွန်ုပ်သည် လူအိုတစ်ယောက်လောက် အပိုင်ကြံတတ်ခြင်း၊ လှည့်ဖြားတတ်ပြီး ကောက်ကျစ်ဆိုးယုတ်ခြင်း မရှိပါ”ဟု ဆိုကြသည်။ ဤသို့ပြောရန်မှာ သင့်လျော်ပါ၏လော။ (မသင့်လျော်ပါ။) လူတိုင်းတွင် ဖောက်ပြန်ပျက်စီးသော စိတ်သဘောထားတစ်ခု ရှိ၏။ ယင်းသည် အသက်အရွယ်၊ သို့မဟုတ် လိင်နှင့်မဆိုင်ပေ။ အခြားသူများတွင် ရှိသည့်အရာ သင့်တွင် ရှိသလို သင့်တွင်ရှိသည့်အရာသည် အခြားသူများတွင်လည်း ရှိကြသည်။ မည်သူ့ကိုမျှ အပြစ်ဖို့ရန် မလိုအပ်ပေ။ ဟုတ်ပေ၏၊ လူတိုင်းတွင် ဖောက်ပြန်ပျက်စီးသော စိတ်သဘောထားရှိကြောင်း သိမှတ်ရုံမျှသည် မလုံလောက်ပေ။ သင်သည် ဖောက်ပြန်ပျက်စီးသော စိတ်သဘောထားတစ်ခု ရှိကြောင်း သိမှတ်သည့်အတွက် ယင်းကို ဖြေရှင်းဖို့ သမ္မာတရား ရှာဖွေရမည်။ သမ္မာတရားကို ရရှိပြီး သင်၏ စိတ်သဘောထား မပြောင်းလဲမချင်း သင်၏ ရည်မှန်းချက်ပန်းတိုင် ရောက်ပြီး ဖြစ်လိမ့်မည်မဟုတ်။ ဖောက်ပြန်ပျက်စီးသော စိတ်သဘောထား တစ်ခုကို ဖြေရှင်းခြင်းသည် သမ္မာတရားကို သင် လက်ခံခြင်း၊ သင်၏ ကျိုးကြောင်းပြချက်များနှင့် ဆင်ခြေများကို စွန့်လွှတ်ခြင်းနှင့် သင်၏ ဖောက်ပြန်ပျက်စီးသော စိတ်သဘောထားကို မှန်မှန်ကန်ကန် ရင်ဆိုင်နိုင်ခြင်းတို့အပေါ် နောက်ဆုံး တည်မှီသည်။ ထိုအရာကို သင် မရှောင်လွှဲရ၊ သို့မဟုတ် ဆင်ခြေများဖြင့် ခေါင်းမရှောင်ရသကဲ့သို့ ထိုအရာကို မုချ မငြင်းပယ်ရပေ။ ဤသည်တို့မှာ စွမ်းဆောင်ရရှိဖို့ လွယ်ကူသည့်အရာများ ဖြစ်၏။ လုပ်ဆောင်ဖို့ အခက်ခဲဆုံးသောအရာမှာ အဘယ်နည်း။ တစ်စုံတစ်ရာကို ငါ စဉ်းစား၍ရသည်။ “ကျွန်ုပ်က သမ္မာတရားကို လိုက်စားသည်ဆိုပါစို့၊ သို့မဟုတ် မလိုက်စားဘူးဆိုပါစို့၊ သမ္မာတရားကို ကျွန်ုပ် မချစ်ဘူးဆိုပါစို့၊ သို့မဟုတ် အလွန်အမင်း မနှစ်မြို့သည်ဆိုပါစို့၊ ကျွန်ုပ်ကို ဖောက်ပြန်ပျက်စီး‌သော စိတ်သဘောထားတစ်ခုခု ရှိသည်ဟု ထုတ်ဖော်ပြပါလေ။ သင့်ကို ကျွန်ုပ် မသိကျိုးကျွန်ပြု၍သာ နေလိုက်မည်။ ဘုရားအိမ်တော်က စေခိုင်းသည့် မည်သည့်အရာကိုမဆို၊ သို့မဟုတ် လုပ်ဆောင်ဖို့လိုသည့် မည်သည့်အလုပ်ကိုမဆို ကျွန်ုပ် လုပ်သည်။ တရားဒေသနာများနှင့် စုဝေးပွဲများအတောအတွင်းတွင် ကျွန်ုပ် နားထောင်သည်။ ဘုရားနှုတ်ကပတ်တော်များကို လူတိုင်း စားသောက်နေချိန်တွင် ကျွန်ုပ် အတူလိုက်ဆိုသည်။ သင်တို့နှင့်အတူ အတွေ့အကြုံဆိုင်ရာ သက်သေခံချက် ဗီဒီယိုများကို ထိုင်ကြည့်ပြီး သင်တို့ စားသည့်အခါ စားသည်။ သင်တို့လုပ်သည့်အတိုင်း ကျွန်ုပ် လိုက်လုပ်သည်။ သမ္မာတရားကို ကျွန်ုပ် လိုက်စားခြင်းမရှိဟု သင်တို့ထဲက မည်သူက ဆိုနိုင်သနည်း။ ဤသည်မှာ ကျွန်ုပ် ယုံကြည်သည့်ပုံ ဖြစ်သောကြောင့် သင် ကြိုက်သည့် မည်သည့်အရာကိုမဆို သင် လုပ်နိုင်၊ ပြောနိုင်သည်။ ကျွန်ုပ် ဂရုမစိုက်”ဟု ပြောသည့် လူအချို့ရှိသည်။ ဤလူစားမျိုးက ဘုရားသခင်၏ ကယ်တင်ခြင်း အမှုတော်သည် ၎င်းတို့နှင့် မသက်ဆိုင်သည့်အလား၊ ယင်းကို ၎င်းတို့ မလိုအပ်သည့်အလား ဆင်ခြေများ၊ သို့မဟုတ် ကျိုးကြောင်းပြချက်များ မပေးသည့်ပုံ ဟန်ဆောင်သော်လည်း သမ္မာတရား လိုက်စားရန် ရည်ရွယ်ချက်လည်း မရှိပေ။ ဤလူစားမျိုးများသည် “ကျွန်ုပ်၏ လူ့သဘာဝက ကောင်းသည်။ ဘုရားသခင်ကို ကျွန်ုပ် အမှန်တကယ် ယုံကြည်သည်။ အမှုအရာများကို စွန့်လွှတ်ရန် ကျွန်ုပ် လိုလားသည်။ ဆင်းရဲဒုက္ခခံပြီး အဖိုးအခံပေးနိုင်သည်။ ထိုအရာများအပြင် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို ကျွန်ုပ် လက်ခံဖို့ လိုအပ်ပါသလား”ဟု တိကျပွင့်လင်းစွာ မပြောကြချေ။ ဤအရာကို ၎င်းတို့ တိကျပွင့်လင်းစွာ မပြောကြ။ သမ္မာတရားအပေါ် ရှင်းလင်းသော သဘောထား မရှိကြသကဲ့သို့၊ ဘုရားသခင်၏ အမှုတော်ကို အပြင်ပန်းအားဖြင့် မရှုတ်ချကြချေ။ သို့ရာတွင် ထိုသို့သော လူများကို ဘုရားသခင်က မည်သို့ သဘောထားသနည်း။ သမ္မာတရားကို ၎င်းတို့ မလိုက်စားကြပါက၊ ဘုရားနှုတ်ကပတ်တော်များနှင့်ပတ်သက်၍ အလွန် စိတ်ဝင်စားမှုမရှိဘဲ ပစ်ပယ်ထားပါက၊ ၎င်းတို့အပေါ် ဘုရားသခင်၏ သဘောထားသည် အလွန်ရှင်း၏။ သမ္မာကျမ်းစာတွင် “သင်သည် အဧမဟုတ်၊ အပူမဟုတ်သည်ကို ငါသိ၏။ ထိုသို့အအေးမဟုတ်၊ အပူမဟုတ်၊ နွေးရုံရှိသောကြောင့် ငါ၏ခံတွင်းသည် သင့်ကိုထွေးလုပြီ။” (ဗျာဒိတ်ကျမ်း ၃:၁၆)ဟု ဆိုသည့် စာကြောင်းကဲ့သို့သာ ဖြစ်သည်။ ဘုရားသခင်က ၎င်းတို့ကို အလိုမရှိပေ။ ယင်းမှာ ပြဿနာဖြစ်သည်။ အသင်းတော်တွင် ထိုသို့သောလူများ ရှိကြပါ၏လော။ (ရှိပါသည်။) သို့ဆိုလျှင် ၎င်းတို့ကို မည်သို့ အမျိုးအစားခွဲရမည်နည်း။ မည်သည့်နေရာသို့ ၎င်းတို့ကို ခွဲထားသင့်သနည်း။ ၎င်းတို့ကို အမျိုးအစားခွဲရန်မလိုအပ်ပေ။ အတိုချုပ်ဆိုရလျှင် ထိုသို့သော လူများသည် သမ္မာတရားကို မလိုက်စားကြချေ။ သမ္မာတရားကို လက်မခံကြ၊ သို့မဟုတ် မိမိတို့ကိုယ်ကိုယ် မသုံးသပ်ကြ၊ မသိရှိကြသကဲ့သို့ နောင်တရသည့် စိတ်နှလုံးမရှိကြချေ။ ထိုအစား ၎င်းတို့သည် ဘုရားသခင်ကို ယုံကြည်ရာတွင် နားဝေတိမ်တောင်ဖြစ်ပြီး မရှင်းလင်းကြချေ။ ၎င်းတို့သည် ဘုရားအိမ်တော် စေခိုင်းသည့် မည်သည့်အရာကိုမဆို မည်သည့် အတားအဆီး၊ သို့မဟုတ် အနှောင့်အယှက်မျှ မဖြစ်စေဘဲ လုပ်ဆောင်ကြသည်။ ၎င်းတို့ကို မေးလော့။ “အယူအဆ တစ်ခုတစ်လေ သင် ရှိသလော။” “မရှိပါ။” “ဖောက်ပြန်ပျက်စီးသည့် စိတ်သဘောထားတစ်ခုတစ်လေ ရှိသလော။” “မရှိပါ။” “ကယ်တင်ခြင်း ရရှိလိုသလော။” “ကျွန်ုပ် မသိပါ။” “ဘုရားနှုတ်ကပတ်တော်များက သမ္မာတရားဖြစ်ကြောင်း သင် အသိအမှတ်ပြုပါသလော။” “မသိပါ။” ၎င်းတို့ကို မည်သည့်အရာကိုမဆို မေးလော့။ ၎င်းတို့ မသိဟု ပြောကြ၏။ ထိုသို့သော လူများနှင့် ပတ်သက်၍ ပြဿနာတစ်ခု ရှိသလော။ (ရှိပါသည်။) ရှိ၏၊ သို့တိုင် ပြဿနာမဟုတ်ကြောင်းနှင့်‌ ဖြေရှင်းစရာမလိုကြောင်း သင် ခံစားသည်။ သမ္မာကျမ်းစာထဲတွင် ပြောထားသည်မှာ- “သင်သည် အဧမဟုတ်၊ အပူမဟုတ်သည်ကို ငါသိ၏။ ထိုသို့အအေးမဟုတ်၊ အပူမဟုတ်၊ နွေးရုံရှိသောကြောင့် ငါ၏ခံတွင်းသည် သင့်ကိုထွေးလုပြီ။” “ငါ၏ခံတွင်းသည် သင့်ကိုထွေးလုပြီ”ဟူသည့် စကားစုသည် ထိုသို့သော လူများကို ကိုင်တွယ်ခြင်းအတွက် စည်းမျဉ်း ဖြစ်၏။ ယင်းမှာ ၎င်းတို့အတွက် ထွက်လာသည့် ရလဒ်ဖြစ်သည်။ အပူလည်းမဟုတ်၊ အအေးလည်းမဟုတ်ဆိုသည်မှာ ဤလူများတွင် မည်သည့်အမြင်မျှ မရှိဟု ဆိုလိုသည်။ စိတ်သဘောထားဆိုင်ရာ ပြောင်းလဲခြင်း၊ သို့မဟုတ် ကယ်တင်ခြင်း ကိစ္စများနှင့်ပတ်သက်၍ ၎င်းတို့ကို သင်မည်သို့ မိတ်သဟာယပြုသည်ဖြစ်စေ ၎င်းတို့ စိတ်မဝင်စားဘဲ ရှိနေသည်ဆိုသည့် သဘောဖြစ်၏။ ဤတွင် “စိတ်မဝင်စား”ဆိုသည်မှာ မည်သည့်အရာကို ဆိုလိုသနည်း။ ထိုသို့သော ကိစ္စများကို ၎င်းတို့ စိတ်ပါဝင်စားခြင်း မရှိသကဲ့သို့ ထိုကိစ္စများအကြောင်း ကြားလိုစိတ်မရှိဟု ဆိုလိုသည်။ အချို့က “အမြင်မရှိခြင်း၊ သို့မဟုတ် ဖောက်ပြန်ပျက်စီးခြင်းကို ပွင့်အံထွက်ခြင်းတို့နှင့် ပတ်သက်၍ မည်သည့်အရာ အလွန်မှားနေသနည်း”ဟု ဆိုနိုင်သည်။ ပေါက်ကရစကား သက်သက်ပါတကား။ ဤလူများသည် အေးလည်းမအေး ပူလည်းမပူသည့် အသက်ဝိညာဉ်မပါသော လူသေများဖြစ်ပြီး ၎င်းတို့အပေါ် ဘုရားသခင် အမှုပြုဖို့ နည်းလမ်းမရှိပေ။ ကယ်တင်မခံရနိုင်သည့် လူများနှင့် ပတ်သက်၍ ဘုရားသခင်သည် ၎င်းတို့ကို ထွေးထုတ်ပြီး ၎င်းတို့နှင့်ပတ်သက်၍ အဆုံးသတ်ပြီဖြစ်သည်။ ၎င်းတို့အပေါ် သူ အမှုမပြုသကဲ့သို့ ထိုသို့သော လူများအပေါ် သုံးသပ်ချက်မျိုးလည်း ငါတို့ ပေးလိမ့်မည်မဟုတ်။ ၎င်းတို့ကို မသိကျိုးကျွံသာ ပြုလိုက်မည်ဖြစ်၏။ အသင်းတော်တွင် ထိုသို့သော လူများရှိပါက မည်သည့် အနှောင့်အယှက်မျှ မဖြစ်စေသရွေ့ ၎င်းတို့ နေနိုင်သည်။ ၎င်းတို့ အနှောင့်အယှက်ဖြစ်စေပါက ဖယ်ရှားခံရမည်ဖြစ်၏။ ဤသည်မှာ ဖြေရှင်းဖို့ လွယ်ကူသည့်အရာ ဖြစ်သည်။ ငါ၏ စကားများသည် သမ္မာတရား လက်ခံနိုင်သူများ၊ ထိုသမ္မာတရားကို လိုက်စားလိုစိတ်ရှိပြီး ထိုသမ္မာတရားနှင့်ပတ်သက်၍ ရှင်းလင်းသော သဘောထားရှိသူများ၊ ၎င်းတို့တွင် ဖောက်ပြန်ပျက်စီးသော စိတ်သဘောထားများရှိပြီး ကယ်တင်ခံရနိုင်ကြောင်း သိမှတ်သောသူများကို ရည်ညွှန်းသည်။ ထိုစကားများသည် ဘုရားနှုတ်ကပတ်တော်များကို နားလည်နိုင်ပြီး သူ၏ အသံကို ကြားနိုင်သူများကို ရည်ရွယ်သည်၊ ဘုရားသခင်၏ သိုးများကို ရည်ရွယ်သည်။ ထိုသူများသည် ဘုရားနှုတ်ကပတ်တော်များက ရည်ညွှန်းသောလူများ ဖြစ်သည်။ ဘုရားသခင်အပေါ် အအေးမဟုတ်၊ အပူမဟုတ်သောသူများကို ဘုရားနှုတ်ကပတ်တော်များက မရည်ညွှန်းပါ။ ထိုသို့သော လူများသည် သမ္မာတရားကို စိတ်မဝင်စားသကဲ့သို့ ဘုရားနှုတ်ကပတ်တော်များနှင့် အမှုတော်အပေါ် အအေးလည်း မဟုတ်၊ အပူလည်း မဟုတ်ကြချေ။ ထိုသို့သောလူများကို ကိုင်တွယ်ရန်နည်းလမ်းမှာ “ထွက်သွားပါ။ သင်ဖြစ်တည်သည့်ပုံစံသည် ကျွန်ုပ်နှင့် အဘယ်သို့မျှ မဆိုင်” ဟု ပြောဆိုရန် ဖြစ်သည်။ ၎င်းတို့ကို မသိကျိုးကျွန်ပြုကာ ၎င်းတို့နှင့်ပတ်သက်၍ မည်သည့်အားထုတ်မှုမျှ မဖြုန်းတီးရန် ဖြစ်သည်။

သမ္မာတရားကို လိုက်စားခြင်း အကြောင်းအရာနှင့် ဆက်နွှယ်သည့် အပျက်သဘောဆောင်သော ဥပမာအချို့ကို ငါတို့ ခုတင် မိတ်သဟာယပြုပြီးဖြစ်၏။ လူတို့သည် ၎င်းတို့၏ ဖောက်ပြန်ပျက်စီးသော စိတ်သဘောထားများ ပွင့်အံထွက်မှုများကို ငြင်းပယ်ရန် အမျိုးမျိုးသော ကျိုးကြောင်းပြချက်များ၊ ဆင်ခြေများနှင့် မူမမှန်သော အကြောင်းပြချက်များကို မရည်ရွယ်ဘဲ အကြံထုတ်မိကြသည်။ ၎င်းတို့သည် မိမိတို့ကိုယ်ကိုယ်နှင့် အခြားသူများကို လှည့်စားရင်း မိမိတို့၏ ဖောက်ပြန်ပျက်စီးသည့် စိတ်သဘောထားများ တည်ရှိခြင်းကို မကြာခဏ ကွယ်ဝှက်ကြသည်။ ဤသည်တို့မှာ လူသား၏ မိုက်မဲပြီး စဉ်းစားဉာဏ်မဲ့သော နည်းလမ်းများဖြစ်၏။ တစ်ဖက်တွင် လူသားကို တရားစီရင်သည့် ဘုရားနှုတ်ကပတ်တော်များအားလုံး သမ္မာတရားဖြစ်ကြောင်း လူတို့က အသိအမှတ်ပြုကြသည်။ အခြားတစ်ဖက်တွင် မိမိတို့ကိုယ်ပိုင် ဖောက်ပြန်ပျက်စီးသော စိတ်သဘောထားများအပြင် သမ္မာတရားကို ချိုးဖောက်သည့် ၎င်းတို့၏ မှားယွင်းသော အပြုအမူများ တည်ရှိခြင်းကို ၎င်းတို့ ငြင်းပယ်ကြသည်။ ဤသည်မှာ သမ္မာတရားကို ၎င်းတို့ လက်မခံကြသည့် ရှင်းလင်းသော လက္ခဏာတစ်ခု ဖြစ်၏။ သင်သည် ဖောက်ပြန်ပျက်စီးသော စိတ်သဘောထားရှိကြောင်း ငြင်းသည်ဖြစ်စေ၊ အသိအမှတ်ပြုသည်ဖြစ်စေ၊ သင်၏ ဖောက်ပြန်ပျက်စီးသော အပြုအမူများ ပွင့်အံထွက်မှုများအတွက် ဆင်ခြေများ၊ ကျိုးကြောင်းပြချက်များ၊ သို့မဟုတ် မှန်သယောင်နှင့်မှားသော အကြောင်းပြချက်များ ပေးသည်ဖြစ်စေ အတိုချုပ်အနေဖြင့် သမ္မာတရားကို သင် လက်မခံပါက ဘုရားသခင်၏ ကယ်တင်ခြင်း မရရှိနိုင်။ ဤအရာကို မငြင်းနိုင်ပေ။ သမ္မာတရားကို လုံးဝ မလိုက်စားသူ မည်သူမဆိုသည် နှစ်ပေါင်းမည်မျှ ယုံကြည်သူဖြစ်ခဲ့သည်ဖြစ်စေ နောက်ဆုံးတွင် ဖော်ထုတ်ခံရကာ ဖယ်ရှားရှင်းလင်းခံရလိမ့်မည် ဖြစ်၏။ ဤရလဒ်သည် ကြောက်လန့်စရာကောင်းသည့် ရလဒ်ဖြစ်သည်။ မကြာမီ ကပ်ဘေးများ ကျရောက်ပြီး သင် ထုတ်ဖော်ခံရမည်ဖြစ်ကာ ကပ်ဘေးများရောက်လာသည့်အခါ သင် ကြောက်ရွံ့ရလိမ့်မည်။ သင့်အနေဖြင့် ကျိုးကြောင်းပြချက်များစွာနှင့် အလျှံပယ် ဆင်ခြေများ ရှိနေနိုင်သည်၊ သို့မဟုတ် သင်သည် ကောင်းစွာ ဟန်ဆောင်ပြီး လုံအောင် ဖုံးဖိထားခြင်း ဖြစ်နိုင်သော်လည်း ငြင်း၍မရနိုင်သည့် အချက်တစ်ချက်ရှိ၏။ သင်၏ ဖောက်ပြန်ပျက်စီးသော စိတ်သဘောထားသည် ပကတိအတိုင်း ရှိနေသည်၊ လုံးဝ မပြောင်းလဲသေးပေ။ သင်သည် မိမိကိုယ်ကိုယ် မှန်ကန်စွာ မသိနိုင်၊ စစ်မှန်သော နောင်တရနိုင်စွမ်း မရှိသကဲ့သို့ အဆုံးတွင် သင်သည် မိမိကိုယ်ကိုယ် အမှန်တကယ် ပြောင်းလဲနိုင်လိမ့်မည်မဟုတ်၊ သို့မဟုတ် ဘုရားသခင်ကို ကျိုးနွံနာခံနိုင်လိမ့်မည် မဟုတ်သကဲ့သို့၊ ဘုရားသခင်သည် သင်နှင့်ပတ်သက်၍ သူ၏စိတ်ကို ပြောင်းလဲလိမ့်မည်မဟုတ်ပေ။ ထိုအခါ သင်သည် ပြဿနာကြီးကြီးမားမား ဖြစ်လိမ့်မည် မဟုတ်လော။ ဖယ်ရှားရှင်းလင်းခံရမည့် အန္တရာယ်ရှိလိမ့်မည်ဖြစ်၏။ ယင်းမှာ တော်သောလူတစ်ဦးက ဉာဏ်အမြော်အမြင်မရှိသော ဆင်ခြေများနှင့် မိုက်မဲသော ကျိုးကြောင်းပြချက်များ ပေးခြင်းကို ရပ်လိုက်ပြီး မိမိတို့၏ ဟန်ဆောင်မှုများနှင့် ဖုံးကွယ်မှုများကို စွန့်ပစ်ရသည့် အကြောင်းရင်းဖြစ်သည်။ ၎င်းတို့သည် ၎င်းတို့နှင့်ပတ်သက်၍ ဘုရားသခင်က သူ၏စိတ်ကို ပြောင်းလဲဖို့အလို့ငှာ ၎င်းတို့လုပ်ဆောင်သမျှ အရာရာတွင် အားစိုက်ထုတ်ပြီး ကောင်းမှုများကို လုပ်ဆောင်ကြရင်း ၎င်းတို့ ပွင့်အံထုတ်သည့် ဖောက်ပြန်ပျက်စီးသော စိတ်သဘောထားများကို မှန်ကန်စွာ ရင်ဆိုင်ပြီး ဖြေရှင်းကြသည်။ သင်နှင့်ပတ်သက်၍ ဘုရားသခင်က သူ၏ စိတ်ကို ပြောင်းလဲပါက ယင်းမှာ သူသည် သင်၏အတိတ်က ပုန်ကန်မှုနှင့် ခုခံမှုတို့အပေါ် သင့်ကို အမှန်တကယ် လွတ်ငြိမ်းခွင့်ပေးပြီးဖြစ်ကြောင်း သက်သေပြပေသည်။ သင်သည် ငြိမ်သက်ခြင်းနှင့် ဝမ်းမြောက်ခြင်း ခံစားရလိမ့်မည်ဖြစ်ပြီး ဝန်တစ်ခု ပျက်ပြယ်သွားသည့်အလား သင် စိတ်ဖိစီးတော့မည်မဟုတ်။ ဤခံစားချက်သည် သင့်စိတ်ဝိညာဉ်၏ အတည်ပြုချက်ဖြစ်သည်။ ယခု သင်သည် ကယ်တင်ခြင်း၌ မျှော်လင့်ချက်ရှိလေပြီ။ ဤမျှော်လင့်ချက်မှာ သမ္မာတရား သင်လိုက်စားရာတွင် သင်ပေးသည့် အဖိုးအခ၊ သင်၏ ကောင်းမှုတို့ဖြင့် သင် ဖလှယ်လိုက်သည့်အရာ ဖြစ်သည်။ သမ္မာတရားကို လိုက်စားခြင်းနှင့် ကောင်းမှုများကို ပြင်ဆင်ခြင်းအားဖြင့် သင် စွမ်းဆောင်ရရှိသည့် ရလဒ်ဖြစ်သည်။ အပြန်အလှန်အားဖြင့် သင်သည် သင့်ကိုယ်သင် တော်လှပြီဟု ထင်နှင့်နေနိုင်ပြီး ဖောက်ပြန်ပျက်စီးခြင်းကို သင် ပွင့်အံထုတ်သည့်အခါတိုင်းတွင် မိမိကိုယ်ကိုယ် ခုခံကာကွယ်ပြီး အပြစ်မရှိကြောင်းပြောရန် အလျှံပယ် ကျိုးကြောင်းပြချက်များ ရှာတွေ့နေနိုင်သည်။ သင်၏ ဖောက်ပြန်ပျက်စီးသော စိတ်သဘောထားကို သင် ဖုံးကွယ်ပြီး ဖုံးဖိကောင်း ဖုံးဖိထားနိုင်ကာ ထိုသို့ဖြင့် မည်သည့် ဖောက်ပြန်ပျက်စီးမှုမျှ သင် မပွင့်အံထုတ်ခဲ့သည့်အလား ထိုအရာအပေါ် သုံးသပ်ခြင်းနှင့် သိရှိခြင်းကို လိမ္မာပါးနပ်စွာ ရှောင်ရှားနိုင်သည်။ ဘုရားသခင် စီစဉ်သည့် အမျိုးမျိုးသော အခြေအနေများ၏ ဖော်ထုတ်ခံရခြင်းကို အကြိမ်ကြိမ် ရှောင်ရှားရင်း သင့်ကိုယ်သင် တော်လှပြီဟု ထင်ကောင်းထင်နိုင်သည်။ သင်သည် မိမိကိုယ်ကိုယ် သုံးသပ်ပြီးဖြစ်လိမ့်မည်မဟုတ်၊ သို့မဟုတ် သိရှိပြီးဖြစ်လိမ့်မည် မဟုတ်၊ သမ္မာတရားကို ရရှိပြီး ဖြစ်လိမ့်မည် မဟုတ်သကဲ့သို့ ဘုရားသခင်၏ စုံလင်စေခြင်း ခံရဖို့ အခွင့်အရေးများစွာ သင်လွဲချော်ပြီး ဖြစ်လိမ့်မည်။ ဤအရာ၏ အကျိုးဆက်များမှာ အဘယ်အရာများ ဖြစ်လိမ့်မည်နည်း။ ယခုတွင် သင်သည် နောင်တရနိုင်စွမ်းရှိမရှိ၊ သို့မဟုတ် ကယ်တင်ခြင်း ရရှိနိုင်စွမ်းရှိမရှိဆိုသည်ကို ဘေးဖယ်ထားလိုက်ပြီး ဘုရားသခင်က နောင်တရဖို့ သင့်ကို အခွင့်အရေးများ အကြိမ်ကြိမ် ပေးကာ ထိုအခွင့်အရေးတစ်ခုကမျှ သင်၏ စိတ်ကိုပြောင်းလဲရန် သင့်ကို တစ်ကြိမ်တစ်ခါမျှ မလှုံ့ဆော်လျှင် သင်သည် ပြဿနာကြီးကြီးမားမား တက်ပြီဖြစ်၏ဟုသာ ဆိုပါစို့။ သင့်ကိုယ်သင် မည်မျှကောင်းကောင်း ခုခံပြောဆိုသည်၊ သင့်ကိုယ်သင် မည်မျှကောင်းကောင်း ဖော်ပြသည်၊ သင့်ကိုယ်သင် မည်မျှကောင်းကောင်း ဟန်ဆောင်ဖုံးကွယ်သည်၊ သင့်ကိုယ်သင် မည်မျှကောင်းကောင်း ဆင်ခြေပေးပြီး ရှင်းချက်ထုတ်နိုင်သည်မှာ အဘယ်အရေးကြီးပါလိမ့်မည်နည်း။ ဘုရားသခင်က သင့်ကို အကြိမ်ကြိမ် အခွင့်အရေးများ ပေးပြီးဖြစ်ကာ ဤအရာက သင်၏ စိတ်ကို ပြောင်းလဲဖို့ပင် သင့်ကို မလှုံ့ဆော်သေးပါက သင် အန္တရာယ်ရှိ၏။ ထိုအန္တရာယ်မှာ အဘယ်အရာဖြစ်သည်ကို သိပါသလော။ သင်၏ ဖောက်ပြန်ပျက်စီးသော စိတ်သဘောထားအတွက် သင်သည် ခေါင်းမာမာဖြင့် ဆင်ခြေများ ဆက်ပေးနေသည်၊ သမ္မာတရား မလိုက်စားခြင်းအတွက် ဆင်ခြေများနှင့် ကျိုးကြောင်းပြချက်များ ပေးနေပြီး၊ ဘုရားသခင်၏ တရားစီရင်ခြင်းနှင့် သူ၏ အမှုတော်ကို ခုခံကာ ငြင်းပယ်နေသည်။ သို့တိုင် သင့်ကိုယ်သင် အတော်အဆင်ပြေသည်ဟု တွေးထင်ပြီး သင်၏ လိပ်ပြာသန့်ကြောင်း ယုံကြည်နေသည်။ ဘုရားသခင်ကို ပုန်ကန်ပြစ်မှားမှုအပြည့်ရှိသည့် စိတ်နှလုံးဖြင့် ဘုရားသခင်၏ တရားစီရင်ခြင်း၊ ပြစ်တင်ဆုံးမခြင်းနှင့် ကယ်တင်ခြင်းကို အကြိမ်ကြိမ် ရှောင်လွှဲရင်း ဘုရားအိမ်တော်၏ ကြီးကြပ်ခြင်းနှင့် ပြုပြင်ခြင်းကို သင်လက်ခံဖို့ ငြင်းပယ်သည်။ ဘုရားသခင်သည် သင့်ကို စက်ဆုပ်နှင့်ပြီးဖြစ်ကာ စွန့်ပစ်နှင့်ပြီးဖြစ်သည်။ သို့တိုင် သင် ကယ်တင်ခံရနိုင်သေးသည်ဟု သင် တွေးထင်သည်။ သင်သည် မှားယွင်းသည့် လမ်းကြောင်းကို ဝေးသည်ထက်ဝေးအောင် လျှောက်နှင့်ပြီးဖြစ်ကြောင်းနှင့် သင့်ကို အဖတ်ဆယ်မရဘဲ ရှိနှင့်ပြီးဖြစ်ကြောင်းကို သင် မသိသလော။ ဘုရားအိမ်တော်တွင် ဘုရားသခင် စိုးစံ၏။ သင်သည် သူ့ကို ခုခံပြီး သင်၏ မကောင်းမှုအမျိုးမျိုးကို သင် လုပ်နေချိန်တွင် ဘုရားသခင် လက်လှမ်းမမီသည့်နေရာတွင် သင်ရှိသည်ဟု ထင်သလော။ သင်သည် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို သင် လက်မခံ၊ သမ္မာတရားနှင့် အသက်ကို သင် မရရှိသေးသကဲ့သို့ အတွေ့အကြုံဆိုင်ရာ သက်သေခံချက် လုံးဝ မရှိပေ။ ဤအတွက် ဘုရားသခင်သည် သင့်ကို ရှုတ်ချ၏။ သင်သည် မိမိကိုယ်ကိုယ် ဘေးဒုက္ခကျရောက်စေခြင်းဖြစ်၏။ ယင်းနှင့်ပတ်သက်၍ ချက်ချာပါးနပ်မှု ဘာမျှမရှိ။ မိုက်မဲမှု၊ အလွန်အမင်း မိုက်မဲမှုတည်း။ ဒုက္ခဖြစ်သတည်း။ ဤအရာကို ဤနေရာတွင် ငါတို့ တင်ပြပြီးဖြစ်သည်။ သင် မယုံကြည်ပါက စောင့်သာကြည့်ပါလေ။ သမ္မာတရား မလိုက်စားခြင်းအတွက် သင်၏ ကျိုးကြောင်းပြချက်များ တစ်ပုံတစ်ခေါင်း သင့်မှာရှိပြီး သင်သည် စကားပြောကောင်းခြင်းနှင့် အကြံအစည်တို့ရှိလျှင်၊ မည်သူကမျှ သင့်ကို ပြိုင်မငြင်းနိုင်သကဲ့သို့ ညီအစ်ကို မောင်နှမများက သင့်ကို မဖော်ထုတ်နိုင်လျှင်၊ သင့်ကို ဖယ်ထုတ်ပစ်ခြင်းအတွက် အသင်းတော်က ကျိုးကြောင်းပြချက် မရှိလျှင်၊ ဘုရားအိမ်တော်က သင့်ကို မည်သည့်အရာမျှ လုံးဝ မလုပ်နိုင်ဟု မထင်လျှင် ပိုကောင်းလိမ့်မည်။ ယင်းနှင့်ပတ်သက်၍ သင်မှား၏။ သင်သည် ဘုရားသခင်နှင့် မပြတ်ယှဉ်ပြိုင်နေသည်။ သူနှင့် သင် မည်မျှကြာကြာ ယှဉ်ပြိုင်နိုင်မည်ကို ငါ ကြည့်မည်။ ဘုရားသခင်က သူ၏ အမှုတော် ပြီးစီးသည့်နောက် ကောင်းသူကို ဆုပေးပြီး မကောင်းသူကို အပြစ်ပေးသည့်နေ့ထိတိုင် သင်သည် သူ့ကို ပြိုင်ဆိုင်နိုင်လိမ့်မည်လော။ ကပ်ဘေးများတွင် သင် သေမည်မဟုတ်၊ ထိုကပ်ဘေးများကို ဖြတ်ကျော်ရှင်သန်နိုင်မည်ဟု သေချာနိုင်၏လော။ သင်၏ ကိုယ်ပိုင် ကံကြမ္မာအပေါ် သင်သည် အချုပ်အခြာအာဏာ အမှန်တကယ် ရှိပါ၏လော။ သင်၏ ကျိုးကြောင်းပြချက်များနှင့် ဆင်ခြေများသည် ဘုရားအိမ်တော်၏ စုံစမ်းမေးမြန်းခြင်းကို ခဏတာ လွတ်မြောက်ခွင့် ပေးကောင်းပေးနိုင်သည်။ သင်၏ ရှက်ဖွယ်ကောင်းသော အသက်ရှင်ခြင်းကို အချိန်တစ်ခုကြာ အချိန်ဆွဲထားနေနိုင်သည်။ သင်သည် လူတို့ကို ယာယီ ကြောင်းကျိုးမမြင်ဖြစ်စေနိုင်ပြီး အသင်းတော်တွင် အခြားသူများကို ဟန်ဆောင်ပြီး လှည့်စားနေနိုင်ကာ ထိုနေရာတွင် ရာထူးတစ်ခု ရကောင်း ရထားနိုင်သည်။ သို့သော် ဘုရားသခင်၏ စစ်ဆေးခြင်း၊ သို့မဟုတ် စေ့စေ့စပ်စပ် စိစစ်ခြင်းကို သင် မလွတ်မြောက်နိုင်။ ဘုရားသခင်သည် လူတစ်ဦး ရလဒ်ကို ထိုသူက သမ္မာတရား ရှိမရှိဆိုသည့်အပေါ် အခြေခံကာ ဆုံးဖြတ်၏။ သူသည် သူ၏ ကိုယ်ပိုင် အလုပ်နှင့် အမျိုးအစားခွဲခြားခြင်းကို လုပ်ဆောင်သည်။ သင်သည် မည်သည့်လူစားမျိုး၊ သို့မဟုတ် မည်သည့် နတ်ဆိုးဖြစ်ပါစေ၊ ဘုရားသခင်၏ တရားစီရင်ခြင်းနှင့် ရှုတ်ချခြင်းကို သင် မလွတ်မြောက်နိုင်ပေ။ ဘုရားသခင် ရွေးချယ်သောလူများက သမ္မာတရားကို နားလည်ပြီး ချင့်ချိန်နိုင်စွမ်း ရရှိသည်နှင့် မည်သူမျှ လွတ်မြောက်နိုင်လိမ့်မည်မဟုတ်၊ ယင်းသည် အသင်းတော်မှ သင် ဖယ်ထုတ်ပစ်ခြင်းခံရမည့်အချိန် ဖြစ်သည်။ လူအချို့သည် ယုံကြည်လက်ခံခြင်းမရှိနိုင်ဘဲ “ဘုရားသခင်အတွက် ကျွန်ုပ် များစွာ အပြေးအလွှား လုပ်ဆောင်ရပြီးဖြစ်သည်၊ သူ့အတွက် အလုပ်များစွာ လုပ်ပြီးဖြစ်ကာ ကြီးစွာသော အဖိုးအခ ပေးပြီးဖြစ်သည်။ ကျွန်ုပ်၏ မိသားစုနှင့် အိမ်ထောင်ကို စွန့်လွှတ်ပြီးဖြစ်သည်။ ကျွန်ုပ်၏ ငယ်ရွယ်မှုကို ဘုရားသခင်နှင့် သူ၏ အမှုတော်အတွက် ပေးခဲ့သည်။ ဘုရားပေးသနားသည့် ကောင်းချီးများကို ရဖို့သေချာသည်ဟု တွေးထင်လျက် ကျွန်ုပ်၏ အလုပ်အကိုင်ကို စွန့်လွှတ်ပြီး ကျွန်ုပ်ဘဝ၏ ခွန်အားထက်ဝက်ကို ကုန်ဆုံးခဲ့သည်။ သမ္မာတရား မလိုက်စားခြင်းနှင့် ထိုသမ္မာတရားကို လုံးဝ လက်တွေ့မလုပ်ဆောင်ခြင်းအတွက် ကျွန်ုပ် ဖယ်ရှားရှင်းလင်းခံရမည်ဟု လုံးဝ စိတ်မကူးမိပါ”ဟု ညည်းကောင်း ညည်းနိုင်သည်။ ဘုရားအိမ်တော်တွင် သမ္မာတရား အုပ်စိုးသည်ကို သင် မသိလေသလော။ ဘုရားသခင်က မည်သူကို ဆုချပြီး မည်သူကို ကောင်းချီးပေးကြောင်း သင့်အတွက် မရှင်းလင်းသလော။ သင်၏ စွန့်လွှတ်ခြင်းနှင့် အသုံးခံခြင်းတို့သည် စစ်မှန်သော အတွေ့အကြုံဆိုင်ရာ သက်သေခံချက် ဖြစ်စေပြီး၊ ထိုအရာများက ဘုရားသခင်၏ အမှုတော်ကိုလည်း သက်သေခံပါက ဘုရားသခင်သည် သင့်ကို ဆုချကာ ကောင်းချီးပေးလိမ့်မည်။ သင်၏ စွန့်လွှတ်ခြင်းနှင့် အသုံးခံခြင်းတို့သည် ဘုရားသခင်၏ အမှုတော်ကို သက်သေခံဖို့မပြောနှင့် စစ်မှန်သော အတွေ့အကြုံဆိုင်ရာ သက်သေခံချက်မဟုတ်ပါက ထိုအစား မိမိကိုယ်ကိုယ် သက်သေခံချက်ဖြစ်ပြီး သင်၏ အောင်မြင်မှုများကို အသိအမှတ်ပြုပေးဖို့ ဘုရားသခင်ကို တောင်းဆိုချက်တစ်ခု ဖြစ်ပါက သင်သည် ပေါလုကဲ့သို့ တူညီသည့်လမ်းကြောင်းကို လျှောက်နေပေသည်။ သင် လုပ်ဆောင်နေသည့်အရာမှာ မကောင်းမှုဖြစ်ပြီး ဘုရားသခင်ကို ခုခံခြင်းဖြစ်ကာ ဘုရားသခင်က သင့်ကို “အသင် မကောင်းမှုပြုသူ၊ ငါ့ထံမှ ထွက်သွားလော့”ဟု ပြောလိမ့်မည်ဖြစ်သည်။ ဤအရာက အဘယ်အရာကို ဆိုလိုလိမ့်မည်နည်း။ သင်သည် အပယ်ခံဖြစ်ကြောင်း၊ ကပ်ဘေးများထဲ ကျရောက်ပြီး အပြစ်ပေးခံရကိန်းဆိုက်ကြောင်း သက်သေဖြစ်လိမ့်မည်။ ကပ်ဘေးနှင့် သင် တွေ့ကြုံရလိမ့်မည်။ ပေါလုသည် အဆင့်အတန်းအရ၊ သူလုပ်ခဲ့သည့် အလုပ်၊ သူ၏ အရည်အချင်းနှင့် ဆုကျေးဇူးများအရ သူ့ခေတ်သူ့အခါတွင် သာမန်လူထက် သာလွန်ခဲ့သည်။ သို့သော် အကျိုးဆက်ရလဒ်မှာ အဘယ်နည်း။ ဘုရားသခင်ကို သူ၏ ယုံကြည်မှုတွင် အစမှအဆုံးထိ ပေါလုသည် ဘုရားသခင်နှင့် အပေးအယူလုပ်ဖို့၊ သတ်မှတ်ချက်များ ချမှတ်ဖို့ ကြိုးစားခဲ့သည်။ ဘုရားသခင်ထံမှ ဆုလာဘ်နှင့် သရဖူတစ်ခု ရှာဖွေခဲ့သည်။ အဆုံးတွင် သူသည် အမှန်တကယ် နောင်တမရခဲ့၊ သို့မဟုတ် ကောင်းမှုများစွာ မပြင်ဆင်ခဲ့ပေ။ သူသည် များစွာသော စစ်မှန်သည့် အတွေ့အကြုံဆိုင်ရာ သက်သေခံချက်ကို ပိုင်ဆိုင်ခြင်းမှ အလိုအလျောက် ဝေးကွာသွားခဲ့သည်။ အမှန်တကယ် နောင်တရခြင်းပင် မရှိဘဲ ဘုရားသခင်၏ ခွင့်လွှတ်မှုကို သူ ရရှိနိုင်ခဲ့မည်လော။ သူနှင့် ပတ်သက်၍ ဘုရားသခင်၏ စိတ်ကို ပြောင်းလဲစေနိုင်ခဲ့မည်လော။ ဖြစ်နိုင်မည်မဟုတ်ပေ။ ပေါလုသည် သခင့်အတွက် သူ့ဘဝတစ်ခုလုံး အချိန်ကုန်ဆုံးခဲ့သော်လည်း အန္တိခရစ်၏ လမ်းကြောင်းကို လျှောက်ခဲ့ပြီး နောင်တရရန် လုံးဝ ငြင်းပယ်ခဲ့သောကြောင့် ဆုချခြင်းမခံခဲ့ရသည်သာမက ဘုရားသခင်၏ အပြစ်ပေးခြင်း ခံခဲ့ရသည်။ သူ ခံစားခဲ့သည့် အကျိုးဆက်များက ကြီးမားလှသည်မှာ ပြောစရာမလိုပေ။ ထို့ကြောင့် သင်သည် သမ္မာတရား လိုက်စားသူတစ်ဦး မဟုတ်ပါက အနည်းဆုံးအနေဖြင့် အသိစိတ်အနည်းအကျဉ်း ရှိသင့်ပြီး ဘုရားသခင်နှင့် အငြင်းမပွားသင့်ကြောင်း၊ သို့မဟုတ် သင် လောင်းကစားလုပ်နေသည့်အလား သင်၏ ရလဒ်နှင့် ခရီးပန်းတိုင်ကို အလောင်းအစားတစ်ခုအဖြစ် လောင်းကြေး မထပ်သင့်ကြောင်း ယခု သင့်ကို ရှင်းရှင်းလင်းလင်း ပြောနေခြင်း ဖြစ်၏။ ယင်းမှာ ဘုရားသခင်နှင့် အပေးအယူလုပ်ဖို့ ကြိုးပမ်းနေခြင်းဖြစ်သည်၊ ယင်းမှာ ဘုရားသခင်ကို ခုခံခြင်း နည်းလမ်းတစ်ခု ဖြစ်သည်။ ဘုရားသခင်ကို ယုံကြည်သည့်တိုင် သူ့ကို ခုခံသူတို့အတွက် မည်သည့် အဆုံးသတ်ကောင်း ရောက်လာနိုင်မည်နည်း။ သေခြင်းကိုရင်ဆိုင်ရာတွင် လူတို့သည် လိမ္မာလာကြ၏။ ကျိုးကြောင်းပြောပြ၍ မရနိုင်သူတို့သည် သေမင်းတံခါးဝရောက်သည်အထိ မိမိတို့၏ လမ်းများကို စွန့်ကြလိမ့်မည်မဟုတ်။ ကယ်တင်ခံရဖို့အလို့ငှာ အကောင်းဆုံး၊ အရိုးရှင်းဆုံးနှင့် ဉာဏ်အမြော်အမြင်အရှိဆုံး နည်းလမ်းမှာ သင်၏ ဆင်ခြေများ၊ ကျိုးကြောင်းပြချက်များနှင့် သတ်မှတ်ချက်များ အားလုံးကို ရပ်တန့်ပြီး အသိတရားရှိရှိ လက်တွေ့ကျသော စိတ်နေသဘောထားဖြင့် သမ္မာတရားကို လက်ခံကာ လိုက်စားရန်၊ ထိုသို့ဖြင့် ဘုရားသခင်အား သင်နှင့် ပတ်သက်၍ သူ၏ စိတ်ကို ပြောင်းလဲစေရန် ဖြစ်သည်။ သင်နှင့် ပတ်သက်၍ ဘုရားသခင်က သူ၏ စိတ်ကို ပြောင်းလဲသည့်အခါ သင်သည် ကယ်တင်ခံရမည့် မျှော်လင့်ချက်ရှိသည်။ လူသား၏ ကယ်တင်ခြင်း မျှော်လင့်ချက်ကို ဘုရားသခင်က ပေးထားခြင်းဖြစ်ပြီး သင့်ကို ဘုရားသခင်က ဤမျှော်လင့်ချက် ပေးခြင်းအတွက် မရှိမဖြစ်လိုအပ်ချက်မှာ သူနှင့်အတူ အပေးအယူလုပ်ဖို့ ကြိုးစားခြင်းမရှိဘဲ သူ့နောက်လိုက်ပြီး သမ္မာတရား လိုက်စားရန် သင် ချစ်ခင်မြတ်နိုးသည့်အရာ မှန်သမျှကို လက်လွှတ်ကာ အရာအားလုံးကို စွန့်လွှတ်ဖို့ ဖြစ်၏။ သင် အသက်အရွယ်ကြီးသည်ဖြစ်စေ၊ ငယ်သည်ဖြစ်စေ၊ အမျိုးသားဖြစ်စေ၊ အမျိုးသမီးဖြစ်စေ၊ ပညာတတ်ဖြစ်စေ၊ ပညာမတတ်သည်ဖြစ်စေ၊ အရေးမကြီးသကဲ့သို့ မည်သည့်နေရာတွင် သင် မွေးဖွားသည်မှာလည်း အရေးမကြီးပေ။ ဘုရားသခင်သည် ဤအရာတစ်ခုမျှ မကြည့်ပေ။ သင်က၊ “ကျွန်ုပ်တွင် စိတ်ကောင်းရှိသည်။ ကျွန်ုပ် စိတ်ရှည်၊ သည်းခံတတ်ပြီး မေတ္တာကရုဏာကြီးမားသည်။ အဆုံးထိ ကျွန်ုပ် ဆက်လက် စိတ်ရှည်ပါက ယင်းက ကျွန်ုပ်နှင့် ပတ်သက်၍ ဘုရားသခင်၏ စိတ်ကို ပြောင်းလဲစေလိမ့်မည်”ဟု ဆုကောင်းဆိုနိုင်သည်။ ထိုအရာများသည် အသုံးမဝင်ပေ။ ဘုရားသခင်သည် သင်၏ စိတ်၊ သို့မဟုတ် သင်၏ ပင်ကိုအရည်အသွေး၊ သို့မဟုတ် သင်၏ ပညာရေး၊ သို့မဟုတ် သင်၏ အသက်ကို မကြည့်သကဲ့သို့ သင် မည်မျှ ဆင်းရဲဒုက္ခခံပြီးဖြစ်သည်၊ သို့မဟုတ် အလုပ်မည်မျှ လုပ်ပြီးသည်မှာလည်း အရေးမကြီးပေ။ ဘုရားသခင်က သင့်ကို၊ “သင် ယုံကြည်ခဲ့သည့် နှစ်ကာများတစ်လျှောက်လုံးတွင် သင်၏ စိတ်သဘောထား ပြောင်းလဲပြီးပြီလော။ မည်သည့်အရာအားဖြင့် သင် အသက်ရှင်သနည်း။ သမ္မာတရားကို လိုက်စားပြီလော။ ဘုရားနှုတ်ကပတ်တော်များကို သင် လက်ခံပြီးပြီလော” ဟု မေးလိမ့်မည်။ သင်က “ထိုအရာများကို ကျွန်ုပ် နားထောင်ကာ လက်ခံပြီးဖြစ်သည်”ဟု ဆိုကောင်းဆိုနိုင်သည်။ ထိုအခါ ဘုရားသခင်က သင့်ကို “ထိုအရာများကို သင် နားထောင်ပြီးဖြစ်ကာ လက်ခံပြီးဖြစ်သည့်အတွက် သင်၏ ဖောက်ပြန်ပျက်စီးသော စိတ်သဘောထား ပြေလည်သွားပြီလော။ သင် အမှန်တကယ် နောင်တရပြီးပြီလော။ ဘုရားနှုတ်ကပတ်တော်များကို အမှန်တကယ် ကျိုးနွံနာခံပြီး လက်ခံပြီးပြီလော”ဟု မေးလိမ့်မည်။ သင်က “ကျွန်ုပ်သည် ဆင်းရဲဒုက္ခခံပြီး အဖိုးအခပေးပြီးဖြစ်သည်။ မိမိကိုယ်ကိုယ် အသုံးခံကာ အမှုအရာများကို စွန့်လွှတ်ပြီး လှူဖွယ်ပစ္စည်းများ ပေးပြီးဖြစ်သည်။ ကျွန်ုပ်၏ သားသမီးများကိုလည်း ဘုရားသခင်ထံ ပူဇော်ဆက်ကပ်ပြီးဖြစ်သည်”ဟု ဆိုသည်။ သင်၏ ပူဇော်မှုများအားလုံးသည် အချည်းနှီးဖြစ်၏။ ထိုသို့သောအရာများကို ကောင်းကင်နိုင်ငံတော်၏ ကောင်းချီးများအတွက် ဖလှယ်၍မရနိုင်၊ သို့မဟုတ် သင်နှင့် ပတ်သက်၍ ဘုရားသခင်အား သူ၏ စိတ်ကိုပြောင်းလဲစေရန် အသုံးပြု၍ မရနိုင်ပေ။ သင်နှင့် ပတ်သက်၍ ဘုရားသခင်အား သူ၏ စိတ်ကိုပြောင်းလဲစေဖို့ တစ်ခုတည်းသော နည်းလမ်းမှာ သမ္မာတရား လိုက်စားခြင်း လမ်းကြောင်းပေါ် အစပြုရန်ဖြစ်သည်။ အခြား ရွေးချယ်စရာရှိပေ။ ကယ်တင်ခြင်းနှင့် ပတ်သက်လာသည့်အခါ လူသည် အခွင့်အရေးသမား မဖြစ်သင့်၊ သို့မဟုတ် ဉာဏ်မများသင့်သကဲ့သို့ သွယ်ဝိုက်နည်းလမ်း မရှိပေ။ သင် နားလည်သလော။ ဤအရာနှင့် ပတ်သက်၍ သင် ရှင်းလင်းရမည်။ နားဝေတိမ်တောင် မဖြစ်နှင့်။ သင် နားဝေတိမ်တောင် ဖြစ်လျှင်ပင် ဘုရားသခင် ဖြစ်လိမ့်မည် မဟုတ်။ ထို့ကြောင့် ယခုမှစ၍ မည်သည့်အရာကို သင် လုပ်ဆောင်သင့်သနည်း။ သင်၏ သဘောထားကို ပြောင်းပြန်လှန်ပြီး သင်၏ ရှုထောင့်အမြင်ကို ပြောင်းလော့။ ပြီးလျှင် မည်သည့်အရာကို လုပ်ဆောင်နေသည်ဖြစ်စေ၊ ဘုရားနှုတ်ကပတ်တော်များကို သင်၏ အခြေခံအုတ်မြစ် ဖြစ်ခွင့်ပြုလော့။ လူလုပ်သည့် မည်သည့် “ကောင်းမြတ်ခြင်း”မျှ၊ မည်သည့် လူသားဆင်ခြေမျှ၊ မည်သည့် လူသားအတွေးအခေါ်၊ အသိပညာ၊ ကိုယ်ကျင့်တရားများ၊ ကျင့်ဝတ်များမျှ၊ သို့မဟုတ် အသိတရားအပြင် လူသား၏ သမာဓိနှင့် ဂုဏ်သိက္ခာဟု ခေါ်သည့်အရာများပင်လျှင် သမ္မာတရားအတွက် အစားဝင်ပေး၍ မရနိုင်ပေ။ ဤအရာများကို ဘေးဖယ်ထားလော့၊ သင်၏ စိတ်နှလုံးကို ဆိတ်ငြိမ်စေပြီး သင်၏ အပြုအမူနှင့် လုပ်ရပ်အားလုံးအတွက် အခြေခံအုတ်မြစ်ကို ဘုရားနှုတ်ကပတ်တော်များအတွင်း၌ ရှာဖွေလော့။ ထိုသို့ သင်လုပ်ဆောင်သည်နှင့်အမျှ လူသား၏ ဖောက်ပြန်ပျက်စီးသော စိတ်သဘောထားနှင့်ဆိုင်သည့် သွင်ပြင်လက္ခဏာအမျိုးမျိုးအပေါ် ဘုရားသခင်၏ ထုတ်ဖော်ပြချက်ကို သူ၏ နှုတ်ကပတ်တော်များအတွင်း၌ ရှာဖွေလော့။ သင့်ကိုယ်သင် ထိုအရာများနှင့် နှိုင်းယှဉ်အကဲဖြတ်ကာ သင်၏ ဖောက်ပြန်ပျက်စီးသော စိတ်သဘောထားများကို ဖြေရှင်းလော့။ သင့်ကိုယ်သင် သိရှိရန် ဖြစ်နိုင်သမျှ မြန်မြန် ကြိုးပမ်းလော့၊ ဖောက်ပြန်ပျက်စီးခြင်းကို စွန့်ပစ်ကာ နောင်တရပြီး မိမိကိုယ်ကိုယ် ပြောင်းလဲရန် အလျင်အမြန်ဆောင်ရွက်လော့။ သင်၏ မကောင်းမှုကို စွန့်ပြီး သင်၏ အပြုအမူနှင့် လုပ်ရပ်များတွင် ဘုရားနှုတ်ကပတ်တော်များပေါ် အားလုံး အခြေပြုလျက် သမ္မာတရား စည်းမျဉ်းများကို ရှာဖွေလော့။ ဤအရာများကို လူသားအယူအဆများနှင့် စိတ်ကူးများပေါ် သင် လုံးဝ အခြေမပြုရ။ သင်သည် ဘုရားသခင်နှင့် အပေးအယူလုပ်ရန် လုံးဝ မကြိုးစားရ။ သင်၏ မဖြစ်စလောက် ဆင်းရဲဒုက္ခနှင့် စတေးမှုများကို ဘုရားသခင်၏ ဆုလာဘ်များ၊ ကောင်းချီးများနှင့် ဖလှယ်ရန် မကြိုးပမ်းရ။ သင်နှင့်ပတ်သက်၍ ဘုရားသခင် ပို၍ ဒေါသထွက်ပြီး သင့်ကို ကျိန်ဆဲကာ ဖယ်ရှားခြင်းမရှိစေရန် ထိုသို့သော မိုက်မဲသည့်အရာများ လုပ်ဆောင်ခြင်းကို ရပ်လော့။ ရှင်းသလော။ ဤအရာကို သင်တို့ နားလည်ပါသလော။ (နားလည်ပါသည်။) ကောင်းပြီ၊ သို့ဆိုလျှင် ရှေ့ဆက်ထိုအရာကို သေချာစွာ တွေးဆကြလော့။

ယခုတင် ငါတို့ မိတ်သဟာယပြုခဲ့သမျှသည် သမ္မာတရား လိုက်စားခြင်းနှင့် ဆက်နွှယ်ပြီး သမ္မာတရား လိုက်စားခြင်းဆိုသည်မှာ အဘယ်ဖြစ်သည်ဆိုသည့် အယူအဆပေါ်အခြေတည်သော မေးခွန်အဖို့ တိကျသည့် အဖြေတစ်ခုကို ငါတို့ မပေးခဲ့သော်လည်း သမ္မာတရား လိုက်စားခြင်းအပေါ် လူသား၏ အမျိုးမျိုးသော အထင်အမြင်လွဲမှားမှုများနှင့် လိုရာဆွဲတွေးသော အသိပညာအပြင် သမ္မာတရားကို အကြင်သူ လိုက်စားချိန်တွင် တည်ရှိသည့် အမျိုးမျိုးသော အခက်အခဲများနှင့် ပြဿနာများကို ရည်ရွယ်သည့် မိတ်သဟာယအချို့တွင် ငါတို့ ပါဝင်ခဲ့ကြ၏။ အပြီးသတ်ရန်အတွက် သမ္မာတရား လိုက်စားခြင်းဆိုသည်မှာ အဘယ်ဖြစ်ကြောင်း၊ သမ္မာတရား လိုက်စားခြင်း ပေါ်လွင်ထင်ရှားသည့် နည်းလမ်းများနှင့် သမ္မာတရား လိုက်စားခြင်းအတွက် လက်တွေ့လုပ်ဆောင်မှု လမ်းကြောင်းက မည်သည့်အရာ အတိအကျဖြစ်သည်တို့ကို ငါအကျဉ်းချုပ် ပြောချင်သည်။ ထို့ကြောင့် သမ္မာတရား လိုက်စားခြင်းဆိုသည်မှာ အဘယ်ဖြစ်သနည်း။ သမ္မာတရား လိုက်စားခြင်းမှာ ဘုရားနှုတ်ကပတ်တော်များကို စတင် လက်တွေ့လုပ်ဆောင်ခြင်းနှင့် တွေ့ကြုံခြင်းဖြစ်ပြီး ထို့နောက်တွင် ဘုရားနှုတ်ကပတ်တော်များကို တွေ့ကြုံခြင်း ဖြစ်စဉ်မှတစ်ဆင့် သမ္မာတရားအား သိနားလည်ခြင်းကို စွမ်းဆောင်ရရှိရန်နှင့် ထိုသမ္မာတရား စစ်မှန်မှုထဲသို့ ဝင်ရောက်ရန်ဖြစ်ကာ ဘုရားသခင်ကို အမှန်တကယ် သိရှိပြီး ကျိုးနွံနာခံသောသူတစ်ဦး ဖြစ်လာရန် ဖြစ်သည်။ ယင်းမှာ သမ္မာတရား လိုက်စားခြင်းအားဖြင့် စွမ်းဆောင်ရရှိသည့် နောက်ဆုံး ရလဒ်ဖြစ်သည်။ သမ္မာတရား လိုက်စားခြင်းသည် အဆင့်များရှိသည့် ဖြစ်စဉ်တစ်ခုဖြစ်သည်မှာ အမှန်ဖြစ်ပြီး အဆင့်အချို့အဖြစ် ခွဲခြားထားသည်။ သင်သည် ဘုရားနှုတ်ကပတ်တော်များကို ဖတ်ရှုပြီး ထိုနှုတ်ကပတ်တော်များက သမ္မာတရားနှင့် စစ်မှန်မှုဖြစ်သည်ကို တွေ့ရှိပြီးဖြစ်သည့်အခါတွင် ဘုရားနှုတ်ကပတ်တော်များအတွင်းတွင် မိမိကိုယ်ကိုယ် သင် စတင်သုံးသပ်လိမ့်မည်ဖြစ်ပြီး မိမိကိုယ်ကိုယ် သိမြင်မှုကို ရရှိလိမ့်မည်။ သင်သည် အလွန် ပုန်ကန်တတ်ပြီး ဖောက်ပြန်ပျက်စီးမှုများစွာ ပွင့်အံထုတ်တတ်ကြောင်းကို တွေ့မြင်ရလိမ့်မည်။ သမ္မာတရားကို လက်တွေ့လုပ်ဆောင်နိုင်ရန်နှင့် ဘုရားသခင်အား ကျိုးနွံနာခံခြင်းကို စွမ်းဆောင်ရရှိနိုင်ရန် သင် တမ်းတလိမ့်မည်ဖြစ်ကာ သမ္မာတရားအတွက် စတင်ကြိုးပမ်းလိမ့်မည်။ ယင်းမှာ မိမိကိုယ်ကိုယ် သုံးသပ်ခြင်းနှင့် မိမိကိုယ်ကိုယ် သိသောအသိမှ ရလာသည့် ရလဒ် အတိအကျဖြစ်၏။ ထိုအချိန်မှစ၍ သင်၏ ဘဝအတွေ့အကြုံ စတင်သည်။ သင်၏ ဖောက်ပြန်ပျက်စီးသော စိတ်သဘောထားမှ ထွက်ပေါ်သည့် အခြေအနေများနှင့် ပြဿနာများကို သင် စတင် စုံစမ်းပြီး ဆန်းစစ်သည့်အခါ ဤအရာက သင်သည် သမ္မာတရားကို လိုက်စားဖို့ စတင်ပြီးဖြစ်သည်ကို သက်သေပြသည်။ ဖြစ်ပေါ်သည့် မည်သည့် ပြဿနာကိုမဆို၊ သို့မဟုတ် သင် ပွင့်အံထုတ်သည့် မည်သည့် ဖောက်ပြန်ပျက်စီးခြင်းကိုမဆို သင်သည် တက်ကြွစွာ သုံးသပ်ပြီး ဆန်းစစ်နိုင်လိမ့်မည်။ ပြီးလျှင် ထိုအရာများက ဧကန်အမှန် ဖောက်ပြန်ပျက်စီးခြင်းနှင့် ဖောက်ပြန်ပျက်စီးသော စိတ်သဘောထား ပွင့်အံထွက်မှုများဖြစ်ကြောင်း သင်သဘောပေါက်သည့်အခါ သင်သည် သမ္မာတရားကို အလိုအလျောက် ရှာဖွေလိမ့်မည်ဖြစ်ကာ ထိုပြဿနာများကို စတင် ဖြေရှင်းလိမ့်မည်။ အသက်ဝင်ရောက်မှုသည် မိမိကိုယ်ကိုယ် သုံးသပ်ခြင်းဖြင့် စတင်၏။ ယင်းသည် သမ္မာတရား လိုက်စားခြင်း၏ ပထမအဆင့် ဖြစ်သည်။ ထို့နောက်တွင်ပင် မိမိကိုယ်ကိုယ် သုံးသပ်ခြင်းနှင့် မိမိကိုယ်ကိုယ် သိမြင်မှုမှတစ်ဆင့် ဘုရားသခင်၏ ဖော်ထုတ်ခြင်း နှုတ်ကပတ်တော်အားလုံးသည် အမှန်တရားများဖြင့် ကိုက်ညီကြောင်း သင် မြင်လိမ့်မည်။ ထိုနှုတ်ကပတ်တော်များကို သင်၏ စိတ်နှလုံးမှ ကျိုးနွံနာခံနိုင်လိမ့်မည်ဖြစ်ပြီး ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးခြင်းတို့ကို လက်ခံနိုင်လိမ့်မည်။ ယင်းသည် သမ္မာတရားလိုက်စားခြင်း၏ ဒုတိယအဆင့် ဖြစ်သည်။ လူအများစုသည် လူသား၏ ဖောက်ပြန်ပျက်စီးသော အပြုအမူများကို ထုတ်ဖော်ပြသည့် ဘုရားနှုတ်ကပတ်တော်များကို လက်ခံနိုင်ကြသော်လည်း လူသား၏ ဖောက်ပြန်ပျက်စီးသော အနှစ်သာရကို ထုတ်ဖော်ပြသည့် ဘုရားနှုတ်ကပတ်တော်များကို အလွယ်တကူ လက်မခံနိုင်ကြချေ။ ဘုရားနှုတ်ကပတ်တော်များကို ဖတ်ရှုပြီးနောက် မိမိတို့ ကိုယ်ပိုင် ဖောက်ပြန်ပျက်စီးခြင်း၏ ကြီးမားသော နက်ရှိုင်းမှုကို ၎င်းတို့ အသတ်အမှတ်မပြုကြချေ။ လူသား၏ ဖောက်ပြန်ပျက်စီးသော အပြုအမူများကို ထုတ်ဖော်ပြသည့် ဘုရားနှုတ်ကပတ်တော်များကိုသာ ၎င်းတို့ အသိအမှတ်ပြုကြသည်။ ဤအရာကြောင့် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို မိမိတို့ စိတ်နှလုံးများမှ ၎င်းတို့ လက်မခံနိုင်ကြချေ။ ထိုအစား ၎င်းတို့က ထိုအရာကို ဘေးဖယ်ထားလိုက်ကြသည်။ အချို့က “ကျွန်ုပ်တွင် ဖောက်ပြန်ပျက်စီးသော အပြုအမူ အနည်းငယ်သာရှိသည်။ သို့သော် ကောင်းသောအရာအချို့ကို ကျွန်ုပ် လုပ်နိုင်သည်။ ကျွန်ုပ်သည် လူကောင်းတစ်ယောက်ဖြစ်သည်။ စာတန် မဟုတ်ပါ။ ဘုရားသခင်ကို ကျွန်ုပ် ယုံကြည်သောကြောင့် ဘုရားသခင်နှင့် သက်ဆိုင်သင့်သည်”ဟု ဆိုကြသည်။ ဤသည်မှာ ပေါက်ကရစကား မဟုတ်လော။ သင်သည် လူ့လောကထဲသို့ မွေးဖွားလာခဲ့၏။ စာတန်၏ အာဏာအောက်တွင် အသက်ရှင်ပြီး ရိုးရာယဉ်ကျေးမှုနှင့်ဆိုင်သော သွန်သင်မှုများကို ရရှထားပြီးဖြစ်သည်။ သင်၏ မွေးရာပါ အမွေအနှစ်နှင့် သင်ယူပြီးသော အသိပညာတို့သည် စာတန်ထံမှ လာသည်။ သင် ကြည်ညိုသည့် ကြီးမြတ်ပြီး ကျော်ကြားသော လူအားလုံးသည် စာတန်ဖြစ်ကြ၏။ သင်သည် စာတန်နှင့် မသက်ဆိုင်ဟု ပြောခြင်းသည် ထိုစာတန်၏ ဖောက်ပြန်ပျက်စီးခြင်းမှ သင့်ကို လွတ်မြောက်စေလိမ့်မည်လော။ ယင်းမှာ ကလေးသူငယ်များက မိမိတို့နှုတ်များကို ဖွင့်လိုက်သည်နှင့် လိမ်ညာနိုင်ပြီး အခြားသူများကို စော်ကားနိုင်သည့်အတိုင်းသာ ဖြစ်သည်။ ထိုသို့လုပ်ရန် မည်သူက ၎င်းတို့ကို သင်ပေးသနည်း။ မည်သူမျှ မသင်ပေးပါ။ ယင်းသည် စာတန်၏ ဖောက်ပြန်ပျက်စီးခြင်း အကျိုးဆက်ထက် မည်သည့်အရာ ဖြစ်နိုင်လေမည်နည်း။ ဤသည်တို့သည် အမှန်တရားများဖြစ်၏။ လူတို့သည် စာတန်နှင့် ဝိညာဉ်‌ရေးရာ နယ်ပယ်၏ ဝိညာဉ်ဆိုးများကို မမြင်နိုင်သော်လည်း၊ အသက်ရှင်သည့် မကောင်းဆိုးဝါးများနှင့် နတ်ဆိုးမင်းများမှာ လူ့လောကတွင် နေရာတကာ၌ ရှိလေသည်။ ၎င်းတို့အားလုံးသည် စာတန်၏ သရုပ်သကန်များ ဖြစ်၏။ ဤသည်မှာ လူအားလုံး အသိအမှတ်ပြုရမည့် အမှန်တရားတစ်ခု ဖြစ်သည်။ သမ္မာတရားကို နားလည်သောသူတို့သည် ဤအရာများကို ရိပ်စားမိနိုင်ကြပြီး ဘုရားသခင်၏ ဖော်ထုတ်ခြင်း နှုတ်ကပတ်တော်များအားလုံး အမှန်တရားများဖြစ်သည်ကို ၎င်းတို့ အသိအမှတ်ပြုနိုင်ကြသည်။ လူအချို့သည် မိမိတို့ကိုယ်ကိုယ် သိရှိခြင်းအကြောင်း ပြောကောင်း ပြောနိုင်သော်လည်း ဘုရားနှုတ်ကပတ်တော်များ ထုတ်ဖော်ပြသည့် ဖောက်ပြန်ပျက်စီးခြင်းများသည် အဖြစ်မှန်ဖြစ်ကြောင်း၊ သို့မဟုတ် သူ၏ နှုတ်ကပတ်တော်များသည် သမ္မာတရား ဖြစ်ကြောင်းကို ၎င်းတို့ လုံးဝ အသိအမှတ် မပြုကြချေ။ ဤသည်မှာ သမ္မာတရားကို လက်မခံနိုင်ခြင်းနှင့် တူညီသည်။ အကြင်သူသည် မိမိတွင် ဖောက်ပြန်ပျက်စီးသော စိတ်သဘောထား ရှိသည့်အချက်ကို အသိအမှတ်မပြုပါက အမှန်တကယ် နောင်တရနိုင်လိမ့်မည် မဟုတ်။ လူအားလုံးတွင် ဖောက်ပြန်ပျက်စီးသော စိတ်သဘောထားများ ရှိသည်ဆိုသည့် အချက်ကို အသိအမှတ်ပြုပြီး လက်ခံရန်အလို့ငှာ အကြင်သူသည် ဘုရားနှုတ်ကပတ်တော်များကို အတန်ကြာ တွေ့ကြုံရမည်မှာ အမှန်ဖြစ်၏။ ဖောက်ပြန်ပျက်စီးသော စိတ်သဘောထားများစွာ ပွင့်အံထုတ်ပြီးနောက်တွင် ၎င်းတို့သည် ထိုအမှန်တရား ရှေ့မှောက်၌ ကျိုးနွံနာခံခြင်းဖြင့် အလိုအလျောက် ဦးညွှတ်ကြလိမ့်မည်။ ၎င်းတို့သည် လူသားကို ထုတ်ဖော်၊ တရားစီရင်ပြီး ရှုတ်ချသည့် ဘုရားနှုတ်ကပတ်တော်အားလုံးသည် အမှန်တရားများနှင့် သမ္မာတရား ဖြစ်ကြောင်း အသိအမှတ်ပြုကာ လုံးလုံးလျားလျား လက်ခံရုံမှလွဲ၍ ရွေးချယ်စရာ ရှိလိမ့်မည်မဟုတ်။ ယင်းမှာ ဘုရားနှုတ်ကပတ်တော်များ၏ သိမ်းပိုက်ခံရခြင်းကို ဆိုလိုသည့်အရာ ဖြစ်သည်။ လူတို့သည် မိမိတို့၏ ဖောက်ပြန်ပျက်စီးသော စိတ်သဘောထားများနှင့် ဖောက်ပြန်ပျက်စီးသော အနှစ်သာရကို ဘုရားနှုတ်ကပတ်တော်များအရ သိရှိနိုင်ကြပြီး ၎င်းတို့တွင် ဆိုးယုတ်သော စိတ်သဘောထား ရှိကြောင်းနှင့် ၎င်းတို့၏ ဖောက်ပြန်ပျက်စီးခြင်းက နက်ရှိုင်းကြောင်း ဝန်ခံနိုင်သည့်အခါ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို အပြည့်အဝ လက်ခံကာ ကျိုးနွံနာခံနိုင်ကြသည်။ ၎င်းတို့သည် လူသားမျိုးနွယ်ကို ထုတ်ဖော်ပြပြီး တရားစီရင်သည့် ဘုရားနှုတ်ကပတ်တော်များကို မည်မျှ ပြင်းထန်သည်ဖြစ်စေ၊ စူးရှသည်ဖြစ်စေ ကျိုးနွံနာခံရန် လိုလားနေကြလိမ့်မည်။ ဘုရားနှုတ်ကပတ်တော်များက ဖောက်ပြန်ပျက်စီးသော လူသားမျိုးနွယ်အား သတ်မှတ်၊ အမျိုးအစားခွဲပြီး ရှုတ်ချပုံအပြင် ဖောက်ပြန်ပျက်စီးသော လူသားမျိုးနွယ်ကို တရားစီရင်ပြီး ထုတ်ဖော်ပြပုံတို့အကြောင်း အနည်းငယ် သင်နားလည်ပြီး သိရှိသည့်အခါ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့ကို သင် အမှန်တကယ် လက်ခံကာ သင်၏ ကိုယ်ပိုင် ဖောက်ပြန်ပျက်စီးသော စိတ်သဘောထားနှင့် ဖောက်ပြန်ပျက်စီးသော အနှစ်သာရတို့ကို စတင်သိရှိပြီးသည့်အခါ၊ သင်၏ ဖောက်ပြန်ပျက်စီးသော စိတ်သဘောထား၊ စာတန်နှင့် သင်၏ ကိုယ်ပိုင် ဇာတိပကတိတို့ကို စတင်မုန်းတီးပြီးသည့်အခါ၊ ပြီးလျှင် သမ္မာတရား ရရှိဖို့၊ လူသားတစ်ဦး အသက်ရှင်သင့်သည့်အတိုင်း အသက်ရှင်ဖို့နှင့် ဘုရားသခင်ကို အမှန်တကယ် ကျိုးနွံနာခံသည့်သူတစ်ဦး ဖြစ်လာဖို့ တောင့်တသည့်အခါ ယင်းမှာ သင်၏ စိတ်သဘောထားတွင် အပြောင်းအလဲတစ်ခုကို ရဖို့ အားထုတ်ခြင်းအား သင် စတင်အာရုံစိုက်မည့်အချိန် ဖြစ်သည်။ ဤသည်မှာ သမ္မာတရား လိုက်စားခြင်း၏ တတိယအဆင့် ဖြစ်သည်။

မိမိကိုယ်ကိုယ် အမှန်တကယ် သိရှိရန်မှာ ဘုရားနှုတ်ကပတ်တော်များကို အခြေခံ၍ မိမိ၏ ဖောက်ပြန်ပျက်စီးသော စိတ်သဘောထားကို သုံးသပ်ကာ သိရှိရန်ဖြစ်ပြီး ထိုသို့ဖြင့် မိမိ၏ ဖောက်ပြန်ပျက်စီးခြင်း အနှစ်သာရနှင့် မိမိ၏ ဖောက်ပြန်ပျက်စီးခြင်း အမှန်တရားကို သိမြင်မှုအား စွမ်းဆောင်ရရှိခြင်း ဖြစ်သည်။ လူတစ်ဦးသည် ဤအရာကို လုပ်ဆောင်သည့်အခါ လူသားမျိုးနွယ်၏ ဖောက်ပြန်ပျက်စီးခြင်း အလွန်နက်ရှိုင်းမှုကို ပြည့်စုံသော ရှင်းလင်းပြတ်သားမှုဖြင့် တွေ့မြင်လိမ့်မည်။ လူသားမျိုးနွယ်သည် လူတို့အသက်ရှင်သင့်သည့်အတိုင်း အသက်မရှင်ကြကြောင်း၊ လူသားမျိုးနွယ်သည် ဖောက်ပြန်ပျက်စီးသော စိတ်သဘောထားများကိုသာ အသက်ရှင်နေထိုင်ကြကြောင်းနှင့် လူသားမျိုးနွယ်သည် အသိဉာဏ်၊ သို့မဟုတ် ဆင်ခြင်တုံတရား အနည်းငယ်မျှပင် မရှိကြောင်းတို့ကို တွေ့မြင်လိမ့်မည်။ အမှုအရာများအပေါ် လူတို့၏ အမြင်များသည် စာတန်၏ အမြင်များသာ ဖြစ်ကြောင်းနှင့် ထိုအမြင်များထဲမှ တစ်ခုမျှ မှန်ကန်ခြင်းမရှိ၊ သို့မဟုတ် သမ္မာတရားနှင့် မကိုက်ညီကြောင်း၊ ပြီးလျှင် လူတို့၏ နှစ်သက်မှုများ၊ လိုက်စားမှုများနှင့် ၎င်းတို့ ရွေးချယ်သည့် လမ်းကြောင်းများ အားလုံးသည် စာတန်၏ အဆိပ်များဖြင့် ရောနှောကြောင်းနှင့် ဤအရာအားလုံးတွင် လူသား၏ လွန်ကဲသော စိတ်ဆန္ဒများနှင့် ကောင်းချီးများရရှိဖို့ ရည်ရွယ်ချက် ပါရှိကြောင်း တွေ့မြင်လိမ့်မည်။ လူသား ပွင့်အံထုတ်သည့် စိတ်သဘောထားများသည် စာတန်၏ စိတ်သဘောထားနှင့် သဘာဝအနှစ်သာရတို့ အတိအကျဖြစ်ကြောင်းကို တွေ့မြင်လိမ့်မည်။ မိမိကိုယ်ကိုယ် ထိုသို့သော အတိုင်းအတာတစ်ခုအထိ သိမြင်ခြင်းသည် ရိုးရှင်သော ကိစ္စမဟုတ်ပေ။ ယင်းကို ဘုရားနှုတ်ကပတ်တော်များအရသာ စွမ်းဆောင်ရရှိနိုင်၏။ ယင်းကို ရိုးရာယဉ်ကျေးမှုနှင့်ဆိုင်သော ကိုယ်ကျင့်တရား သဘောတရားများ၊ ပြောဆိုချက်များနှင့် အတွေးများအရ သိမြင်ခြင်းဖြစ်ပါက အကြင်သူသည် စစ်မှန်သော မိမိကိုယ်သိမြင်မှုအား စွမ်းဆောင်ရရှိနိုင်လိမ့်မည်လော။ လုံးဝ မရရှိနိုင်ပေ။ သင်၏ ဖောက်ပြန်ပျက်စီးသော စိတ်သဘောထားသည် ဤဆိုးယုတ်သော အတွေးအခေါ်များနှင့် သဘောတရားများအတွင်းမှ လာခဲ့ပေသည်။ သင်၏ မိမိကိုယ်ကိုယ် သိမြင်မှုကို စာတန်နှင့် သက်ဆိုင်သည့် ဤအရာများတွင် အခြေခံခြင်းသည် အဓိပ္ပာယ်မဲ့မည်မဟုတ်လော။ ကြောင်းကျိုးမမြင်သည့် အဓိပ္ပာယ်မရှိသော စကားဖြစ်မည်မဟုတ်လော။ ထို့ကြောင့် မိမိကိုယ်ကိုယ် သိမြင်မှုကို ဘုရားနှုတ်ကပတ်တော်များတွင် အခြေပြုရမည်။ ဘုရားနှုတ်ကပတ်တော်များသည်သာလျှင် သမ္မာတရားဖြစ်ပြီး ဘုရားနှုတ်ကပတ်တော်များသည်သာလျှင် လူများ၊ ကိစ္စရပ်များနှင့် အမှုအရာများအားလုံးကို တိုင်းတာသည့် စံနှုန်းမှတ်ကျောက်ဖြစ်သည်။ ဘုရားနှုတ်ကပတ်တော်များက သမ္မာတရားဖြစ်ကြောင်းနှင့် ယင်းတို့သည် လူများ၊ ကိစ္စရပ်များနှင့် အမှုအရာများအားလုံးကို အကဲဖြတ်ရန် တစ်ခုတည်းသော မှန်ကန်သည့် အခြေခံအကြောင်းရင်းဖြစ်ကြောင်းကို သင် အမှန်တကယ် တွေ့မြင်ပါက သင်သည် ရှေ့ဆက်ရမည့်လမ်းတစ်ခု ရှိ၏။ ထိုအခါ အလင်းတွင် သင် အသက်ရှင်နိုင်သည်။ ယင်းသည် ဘုရားသခင်၏ ရှေ့မှောက်တွင် အသက်ရှင်ရန်ဖြစ်၏။ လူတို့သည် ဘုရားနှုတ်ကပတ်တော်များအတွင်းတွင် မိမိတို့ကိုယ်ပိုင် ဖောက်ပြန်ပျက်စီးသော အနှစ်သာရအပေါ် စစ်မှန်သော သိမြင်မှုကို ရရှိသည့်အခါ နောက်ပိုင်းတွင် မည်သို့ ပြုမူကာ လက်တွေ့လုပ်ဆောင်ကြလိမ့်မည်နည်း။ (နောင်တရကြပါလိမ့်မည်။) မှန်ပေ၏။ လူတစ်ဦးသည် မိမိ၏ သဘာဝအနှစ်သာရကို သိမြင်မှု ရရှိပြီးသည့်အခါ မိမိနှလုံးသား၌ အလိုအလျောက် နောင်တ ထွက်ပေါ်လိမ့်မည်ဖြစ်ပြီး စတင် နောင်တရလိမ့်မည်။ ဤသည်မှာ ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားများကို ဖယ်ရှားဖို့ ကြိုးစားကြလိမ့်မည်ဖြစ်ပြီး ဆိုးယုတ်သော စိတ်သဘောထားများဖြင့် အသက်ရှင်ကြတော့မည် မဟုတ်ဟု ဆိုလိုသည်။ ထိုအစား ၎င်းတို့သည် ဘုရားနှုတ်ကပတ်တော်များအတိုင်း အသက်ရှင်ပြီး ပြုမူနေနိုင်ကြလိမ့်မည်ဖြစ်ကာ ဘုရားသခင်၏ စီစဉ်ညွှန်ကြားမှုများနှင့် အစီအစဉ်များကို ကျိုးနွံနာခံနိုင်စွမ်း ရှိကြလိမ့်မည်။ ဤသည်မှာ စစ်မှန်သော နောင်တဖြစ်၏။ ဤသည်မှာ သမ္မာတရား လိုက်စားခြင်းနှင့် စတုတ္ထအဆင့် ဖြစ်သည်။ ယခုတွင် သင်တို့အားလုံးသည် စစ်မှန်သော နောင်တမှာ မည်သည့်အရာဖြစ်သည်ကို ရှင်းလင်းသွားကြပေပြီ။ ထို့ကြောင့် ထိုအရာကို သင်တို့ မည်သို့ လက်တွေ့လုပ်ဆောင်သင့်သနည်း။ မိမိကိုယ်ကိုယ် ပြောင်းလဲခြင်းအား လက်တွေ့လုပ်ဆောင်လော့။ ဤသည်မှာ သင် ဖက်တွယ်ပြီး မှန်ကန်သည့် တွေးထင်သည့် အရာများကို စွန့်လွှတ်ခြင်း၊ ဆိုးယုတ်သော စိတ်သဘောထားဖြင့် အသက်မရှင်ခြင်းနှင့် ဘုရားနှုတ်ကပတ်တော်များအတိုင်း သမ္မာတရားကို လက်တွေ့လုပ်ဆောင်ရန် လိုလားခြင်းကို ဆိုလိုသည်။ ယင်းမှာ မိမိကိုယ်ကိုယ် ပြောင်းလဲခြင်းအား ဆိုလိုသည့်အရာ ဖြစ်သည်။ တိတိကျကျဆိုရလျှင် ပထမဦးစွာ သင်သည် မိမိကိုယ်ကိုယ် ငြင်းပယ်ပြီး ဘုရားနှုတ်ကပတ်တော်များကို အခြေခံ၍ သင်၏ အတွေးများ၊ စိတ်ကူးများ၊ လုပ်ရပ်များနှင့် လုပ်ဆောင်ချက်များက သမ္မာတရားနှင့် ကိုက်ညီခြင်း ရှိမရှိဆိုသည်နှင့် ထိုအရာများ ဖြစ်ပေါ်ပုံတို့ကို ဖော်ပြရမည်။ ဤအရာများက ဖောက်ပြန်ပျက်စီးသော စိတ်သဘောထားနှင့် သက်ဆိုင်ပြီး ဆိုးယုတ်သော အတွေးအခေါ်များမှ ပေါက်ဖွားလာသည်ဟု သင်ဆုံးဖြတ်လျှင် ထိုအရာများအပေါ် ရှုတ်ချခြင်းနှင့် ကျိန်ဆဲခြင်း သဘောထားကို သင် ခံယူသင့်သည်။ ထိုသို့လုပ်ဆောင်ခြင်းသည် ဇာတိပကတိနှင့် စာတန်ကို ပုန်ကန်ခြင်းကို ဖြစ်စေသည်။ ဤသည်မှာ မည်သည့် အပြုအမူမျိုး ဖြစ်သနည်း။ ယင်းမှာ သင်၏ ဖောက်ပြန်ပျက်စီးသော စိတ်သဘောထားကို ငြင်းပယ်ခြင်း၊ ပစ်ပယ်ခြင်း၊ စွန့်လွှတ်ခြင်းနှင့် ပုန်ကန်ခြင်း မဟုတ်လော။ မှန်ကန်သည်ဟု သင် ယုံကြည်သောအရာများကို ငြင်းပယ်ခြင်း၊ သင်၏ အကျိုးစီးပွားများကို လက်လွှတ်ခြင်း၊ သင်၏ မမှန်ကန်သော ရည်ရွယ်ချက်များကို ပုန်ကန်ခြင်းနှင့် ထိုသို့ဖြင့် သင်၏ လမ်းကြောင်းကို ပြောင်းပြန်ဖြစ်စေခြင်းအား စွမ်းဆောင်ရရှိခြင်းသည် သိပ်မရိုးရှင်းသကဲ့သို့ ထိုအရာအတွက် တိကျသည့် အသေးစိတ်အချက်အလက်များစွာ ရှိသည်။ သင်သည် နောင်တရရန် လိုလားလျက်ရှိသော်လည်း ဤအရာကိုသာ ပြောပြီး သင်၏ ဖောက်ပြန်ပျက်စီးသော စိတ်သဘောထားကို မငြင်းပယ်၊ မပစ်ပယ်၊ မစွန့်လွှတ်၊ သို့မဟုတ် မပုန်ကန်ပါက ဤသည်မှာ နောင်တတရား၏ သရုပ်သကန်မဟုတ်သကဲ့သို့ သင်သည် နောင်တတရားထဲသို့ လက်တွေ့ကျကျ မဝင်ရောက်သေးပေ။ စစ်မှန်သော နောင်တတရားသည် မည်သို့ ထင်ရှားသနည်း။ ပထမဦးစွာ ဥပမာအားဖြင့် သင် မှန်ကန်သည်ဟု တွေးထင်သောအရာများဖြစ်သည့် ဘုရားသခင်အပေါ် သင်၏ အယူအဆများနှင့် တောင်းဆိုချက်များအပြင် အမှုအရာများအပေါ် သင်၏ အမြင်များကဲ့သို့သော အရာများ၊ ပြဿနာများကို ကိုင်တွယ်သည့် သင်၏ နည်းစနစ်များနှင့် နည်းလမ်းများ၊ သင်၏ လူသားအတွေ့အကြုံ စသည်တို့ကို သင် ငြင်းပယ်ခြင်း ဖြစ်၏။ ဤအရာအားလုံးကို ငြင်းပယ်ခြင်းသည် စိတ်နှလုံး၌ နောင်တရခြင်းနှင့်ဆိုင်သည့် ခိုင်လုံသော လက်တွေ့လုပ်ဆောင်မှု တစ်ခုဖြစ်ပြီး ဘုရားသခင်ဆီသို့ လှည့်ခြင်း ဖြစ်သည်။ သင်သည် မှားယွင်းသော အရာများကို ရိပ်စားမိသည့်အခါမှသာ လက်လွှတ်နိုင်ပြီး ငြင်းပယ်နိုင်ပေသည်။ သင်သည် ဤအရာများကို မငြင်းပယ်သကဲ့သို့ ကောင်းမွန်ပြီး မှန်ကန်သည်ဟု ယုံကြည်ဆဲဖြစ်ပါက အခြားသူများက သင့်ကို လက်လွှတ်ခိုင်းလျှင်ပင် လက်လွှတ်နိုင်လိမ့်မည် မဟုတ်ပေ။ သင်က၊ “ကျွန်ုပ်သည် ပညာကောင်းကောင်းတတ်သောသူဖြစ်ပြီး၊ အတွေ့အကြုံ ပေါများသည်။ ဤအရာများ မှန်ကန်သည်ဟု ကျွန်ုပ် ယုံကြည်သည်။ အဘယ်ကြောင့် ယင်းတို့ကို ကျွန်ုပ် လက်လွှတ်သင့်သနည်း”ဟု ပြောလိမ့်မည်။ သင်သည် သင်၏ နည်းလမ်းများကို ဖက်တွယ်ပြီး ထိုသို့ မလျှော့တမ်း ဖက်တွယ်ပါက သမ္မာတရားကို သင် လက်ခံနိုင်လိမ့်မည်လော။ လုံးဝ လွယ်ကူလိမ့်မည်မဟုတ်ပေ။ သင်သည် သမ္မာတရားကိ ရရှိလိုပါက ပထမဦးစွာ မှန်ကန်ပြီး အပြုသဘောဆောင်သည်ဟု သင် တွေးထင်သည့်ထိုအရာများကို ငြင်းရမည်။ ထို့နောက် ထိုအရာများက အနှစ်သာရအားဖြင့် အပျင်သဘောဆောင်ကြောင်း၊ စာတန်ထံမှ အစပြုလာကြောင်း အားလုံးက ဟုတ်မှန်သယောင်ရှိသော်လည်း စင်စစ်မှားနေသည့် အတွေးမှားများဖြစ်ကြောင်းနှင့် ဆိုးယုတ်သော အရာများကို ဖက်တွယ်ထားခြင်းသည် သင့်အား မကောင်းမှု လုပ်ဆောင်ဖို့၊ ဘုရားသခင်ကို ခုခံပြီး နောက်ဆုံးတွင် အပြစ်ပေးခံရကာ ဖျက်ဆီးခံရဖို့သာ ဦးတည်စေကြောင်းကို ရှင်းရှင်းလင်းလင်း မြင်ရမည်။ စာတန်က လူသားကို ဖောက်ပြန်ပျက်စီးစေသည့် အတွေးများနှင့် အဆိပ်များသည် လူသား၏ ပျက်စီးခြင်းသို့ ဆိုက်ရောက်စေနိုင်စွမ်းရှိကြောင်းကို သင် ရှင်းရှင်းလင်းလင်း မြင်နိုင်ပါက ထိုအရာများကို လုံးဝ ပစ်ပယ်နိုင်လိမ့်မည်။ ငြင်းပယ်ခြင်း၊ ပစ်ပယ်ခြင်း၊ စွန့်လွှတ်ခြင်း၊ ပုန်ကန်ခြင်း စသည်တို့အားလုံးသည် စာတန်၏ အင်အားစုများနှင့် သဘာဝအပြင် လူတို့ကို လှည့်စားဖို့ စာတန်အသုံးပြုသည့် အတွေးအခေါ်များ၊ ဆင်ခြင်တွေးခေါ်မှုစနစ်၊ အတွေးများနှင့် အမြင်များကို ဆန့်ကျင်သော အကြင်သူ ခံယူသည့် သဘောထားများနှင့် နည်းစနစ်များ ဖြစ်သည်။ ဥပမာအားဖြင့်၊ မိမိဇာတိပကတိ၏ အကျိုးစီးပွားများကို လက်လွှတ်ခြင်း၊ မိမိဇာတိပကတိ၏ နှစ်သက်မှုများနှင့် လိုက်စားမှုများကို ပစ်ပယ်ခြင်း၊ စာတန်၏ အတွေးအခေါ်များ၊ အတွေးများ၊ မိစ္ဆာဒိဋ္ဌိအယူများနှင့် အတွေးမှားများကို စွန့်လွှတ်ခြင်း၊ စာတန်၏ စွမ်းအားနှင့် ၎င်း၏ ဆိုးယုတ်သော အင်အားစုများကို ပုန်ကန်ခြင်းတို့ ဖြစ်သည်။ ဤလက်တွေ့လုပ်ဆောင်မှု ဖြစ်စဉ်တစ်ခုလုံးသည် နောင်တတရားကို လူတို့ လက်တွေ့လုပ်ဆောင်နိုင်သည့် နည်းစနစ်များနှင့် လမ်းကြောင်းများသာ ဖြစ်သည်။ စစ်မှန်သော နောင်တတရားထဲသို့ ဝင်ရောက်ရန် အကြင်သူသည် သမ္မာတရား အမြောက်အမြားကို နားလည်ရမည်။ ထိုအခါမှသာ ၎င်းတို့သည် မိမိတို့ကိုယ်ကိုယ် လုံးဝ ငြင်းပယ်ကာ မိမိတို့၏ ဇာတိပကတိကို ပုန်ကန်နိုင်ပေသည်။ ဥပမာအားဖြင့် သင့်ကိုယ်သင် အသိနှံ့စပ်ပြီး အတွေ့အကြုံ ကြွယ်ဝကြောင်းနှင့် သင်သည် ဘုရားအိမ်တော်အတွက် တန်ဖိုးရှိသောလူတစ်ဦးဖြစ်သင့်ပြီး အလွန်အသုံးပြုခံရသင့်ကြောင်းဟု ယုံကြည်သည်ဆိုပါစို့။ သမ္မာတရားအကြောင်း တရားဒေသနာများကို နှစ်အတော်များများ ကြားနာကာ သမ္မာတရားအချို့ကို နားလည်ပြီးသည့်တိုင် သင်၏ အသိပညာနှင့် သင်ယူမှုတို့သည် သုံးမရသကဲ့သို့ ဘုရားအိမ်တော်အဖို့ စိုးစဉ်းမျှ အသုံးမဝင်ဟု သင် ခံစားရသည်။ လူတို့ကို ကယ်တင်နိုင်သည်မှာ သမ္မာတရားနှင့် ဘုရားနှုတ်ကပတ်တော်များ ဖြစ်ကြောင်းနှင့် လူတစ်ဦး၏ အသက်ဖြစ်နိုင်သည်မှာ သမ္မာတရားဖြစ်ကြောင်း သင် သဘောပေါက်သည်။ လူတစ်ဦးသည် အသိပညာ၊ သို့မဟုတ် အတွေ့အကြုံ မည်မျှရှိသည်ဖြစ်စေ၊ ဤသည်မှာ သမ္မာတရားကို ၎င်းတို့ ပိုင်ဆိုင်သည်ဟု မဆိုလိုကြောင်းနှင့် လူသားအမှုအရာများက လူသား အယူအဆများနှင့် မည်မျှ ကိုက်ညီသည်ဖြစ်စေ၊ ယင်းတို့သည် သမ္မာတရား မဟုတ်ကြောင်း သင် ခံစားလာရသည်။ ထိုအရာအားလုံး စာတန်ထံမှ လာကြောင်းနှင့် အားလုံးက သမ္မာတရားနှင့် ဆက်နွှယ်မှုမရှိသည့် အပျက်သဘောဆောင်သော အရာများဖြစ်ကြောင်းကို သင် သဘောပေါက်သည်။ သင့်အနေဖြင့် မည်သို့ ပညာတတ်သည်ဖြစ်စေ၊ အသိနှံ့စပ်သည်ဖြစ်စေ၊ သို့မဟုတ် အတွေ့အကြုံရှိသည်ဖြစ်စေ ဝိညာဉ်ရေးရာ နားလည်သဘောပေါက်မှု မရှိသကဲ့သို့ သမ္မာတရားကို နားမလည်နိုင်ပါက အနည်းသာ အသုံးဝင်ပေသည်။ ခေါင်းဆောင်တစ်ဦးအဖြစ် သင် အစေခံရမည်ဆိုပါက သင်သည် သမ္မာတရား စစ်မှန်မှု ရှိမည်မဟုတ်သကဲ့သို့ ပြဿနာများကို ဖြေရှင်းနိုင်စွမ်းရှိမည် မဟုတ်ပေ။ အတွေ့အကြုံဆိုင်ရာ သက်သေခံချက် စာတမ်းတိုကို သင် ရေးရမည်ဆိုပါက ရေးစရာစကား ရှိမည် မဟုတ်ချေ။ ဘုရားသခင်အတွက် သက်သေခံရမည်ဆိုပါက သူနှင့်ဆိုင်သည့် အသိပညာ ရှိမည်မဟုတ်။ ဧဝံဂေလိ ဖြန့်ဝေရမည်ဆိုပါက လူတို့၏ အယူအဆများကို ဖြေရှင်းဖို့ သမ္မာတရားနှင့်ပတ်သက်၍ မိတ်သဟာယပြုနိုင်မည်မဟုတ်။ လူသစ်များကို ရေလောင်းရမည်ဆိုပါက ရူပါရုံနှင့်ဆိုင်သည့် သမ္မာတရားများကို သင် ရှင်းမည်မဟုတ်သကဲ့သို့ စကားများနှင့် အယူဝါဒများကိုသာ သင် ဟောနိုင်ပေမည်။ သင်၏ ကိုယ်ပိုင် အယူအဆများကို သင် မဖြေရှင်းနိုင်ပါက လူသစ်များ၏ အယူအဆများကို သင် မည်သို့ ဖြေရှင်းနိုင်မည်နည်း။ ဤအလုပ်တစ်ခုတစ်လေကိုမျှ သင် မလုပ်နိုင်ပေ။ ထို့ကြောင့် မည်သည့်အရာကို သင် လုပ်ဆောင်နိုင်သနည်း။ သင့်ကို အားသွန်ခွန်စိုက်လုပ်ခိုင်းပါက သင်၏ ပါရမီကို ဖြုန်းတီးခြင်းဖြစ်သည်ဟု သင် ထင်မည်။ သင် ပါရမီရှိသည်ဟု သင် ဆိုသည့်တိုင် လုပ်ငန်းဆောင်တာတစ်ခုမျှ သင် မကိုင်တွယ်နိုင်သကဲ့သို့ မည်သည့်တာဝန်ကိုမျှ ကောင်းစွာ မထမ်းဆောင်နိုင်။ ထို့ကြောင့် သင် လုပ်နိုင်သည့်အရာမှာ အတိအကျ မည်သည့်အရာဖြစ်သနည်း။ ဘုရားအိမ်တော်က သင့်ကို အသုံးမပြုချင်သည် မဟုတ်၊ ဖြည့်ဆည်းသင့်သည့် တာဝန်ကို သင် မဖြည့်ဆည်းရသေးခြင်း ဖြစ်၏။ ထိုအတွက် အသင်းတော်ကို သင် အပြစ်တင်၍မရပေ။ သို့တိုင် သင်က “ဘုရားသခင်သည် လူသားကို မျှော်လင့်လွန်းသည် မဟုတ်ပါလား။ ဤသတ်မှတ်ချက်များကို ကျွန်ုပ် ဉာဏ်မမီနိုင်ပါ။ အဘယ်ကြောင့် ကျွန်ုပ်အပေါ် တောင်းဆိုချက် အလွန်များရသနည်း”ဟု မိမိဘာသာ တွေးကောင်း တွေးနိုင်သေးသည်။ တစ်စုံတစ်ဦးသည် ဘုရားသခင်အပေါ် ထိုမျှကြီးမားသည့် အထင်လွဲမှုတစ်ခု သိုထားပါက ၎င်းတို့သည် သူနှင့်သက်ဆိုင်သည့် သိမြင်မှု မရှိကြောင်းနှင့် သမ္မာတရား တစ်စက်မျှ နားမလည်ကြောင်း သက်သေပြပေသည်။ သင်၏ အမြင်များက မှန်ကန်ပြီး ပြောင်းပြန်လှန်ဖို့ မလိုအပ်ကြောင်း သင် ခံစားပါက ပြီးလျှင် ဘုရားသခင်၏ နှုတ်ကပတ်တော်များက သဘောတရားအရ သမ္မာတရားဖြစ်သည်ဟု သင် အသိအမှတ် ပြုသော်လည်း သင် ဖက်တွယ်ထားသည့် မဟုတ်တမ်းတရမ်း အရာများကို သင် လက်မလွှတ်ပါက ဤအရာက သင်သည် သမ္မာတရားကို နားမလည်သေးကြောင်း ဖော်ပြပေသည်။ သင်သည် ဘုရားသခင်၏ ရှေ့မှောက်သို့ လာပြီး သမ္မာတရားနှင့်ပတ်သက်၍ ပိုမိုရှာဖွေသင့်ကာ သူ၏ နှုတ်ကပတ်တော်များကို ပိုမိုဖတ်ရှုပြီး ပိုများသည့် တရားဒေသနာများကို နားထောင်ကာ မိတ်သဟာယပြုသင့်သည်။ ထို့နောက်တွင် ဘုရားသခင်၏ နှုတ်ကပတ်တော်များက သမ္မာတရားဖြစ်ကြောင်း သင် တဖြည်းဖြည်း နားလည်လာလိမ့်မည်။ လူတစ်ဦးအနေဖြင့် သမ္မာတရားနှင့် ဘုရားသခင်ကို သင် ဆက်ဆံသင့်သည့် ပထမဦးဆုံး နည်းလမ်းမှာ ကျိုးနွံနာခံမှုဖြင့် ဖြစ်သည်။ ဤသည်မှာ လူသား၏ အလေးအနက်ထားအပ်သော တာဝန်ဖြစ်သည်။ ဤအရာများကို သင် နားလည်နိုင်ပါက သင်၏ လမ်းကြောင်းကို သင် ပြောင်းနေသည့်သဘောဖြစ်သည်။ သင်၏ လမ်းကြောင်းကို ပြောင်းခြင်းသည် နောင်တတရားအတွက် လက်တွေ့လုပ်ဆောင်မှု လမ်းကြောင်းဖြစ်၏။ ယင်းမှာ တစ်ချိန်က မှန်ကန်သည်ဟု သင် တွေးထင်ခဲ့သည့် စာတန်ထံမှလာသည့် အရာများကို လုံးဝ ပစ်ပယ်လိုက်ဖို့နှင့် သင် လျှောက်မည့် လမ်းသစ်ကို ရွေးချယ်ရန် ဖြစ်သည်။ ယင်းမှာ ဘုရားသခင်၏ နှုတ်ကပတ်တော်များကို သူ၏ သတ်မှတ်ချက်များနှင့် သမ္မာတရား စည်းမျဉ်းများအတိုင်း လက်တွေ့လုပ်ဆောင်ရန်နှင့် သမ္မာတရားကို လိုက်စားသည့်လမ်းအား လျှောက်ရန် ဖြစ်သည်။ ဤသည်မှာ မိမိ၏ လမ်းကြောင်းကို ပြောင်းခြင်း အဓိပ္ပာယ်ဖြစ်သည်။ ယင်းမှာ ဘုရားသခင်ရှေ့မှောက်သို့ အမှန်တကယ် ရောက်လာဖို့နှင့် နောင်တတရား၏ စစ်မှန်မှုထဲသို့ ဝင်ရောက်ပြီးဖြစ်ရန် ဖြစ်သည်။ အကြင်သူသည် သမ္မာတရားကို လက်တွေ့လုပ်ဆောင်နိုင်သည့်အခါ ၎င်းသည် သမ္မာတရား စစ်မှန်မှုထဲသို့ စတင်ဝင်ရောက်ပြီးဖြစ်ကာ အမှန်တကယ် နောင်တရပြီးဖြစ်သည်မှာ သိသာထင်ရှားပေသည်။ ကယ်တင်ခြင်းဆီသို့ သွားသည့် လမ်းပေါ် လူတို့ စတင်ပြီးဖြစ်သည်ဟု ပြောနိုင်သည်မှာ ၎င်းတို့ အမှန်တကယ် နောင်တရသည့်အခါတွင် ဖြစ်သည်။ ထိုသို့အမှန်တကယ် နောင်တရခြင်းသည် သမ္မာတရား လိုက်စားခြင်း၏ စတုတ္ထမြောက် အဆင့်တွင် ပါဝင်ပြီးခြင်း ဖြစ်သည်။

လူတစ်ဦးသည် အမှန်တကယ် နောင်တရပြီးသည့်အခါ သမ္မာတရား လိုက်စားသည့် လမ်းပေါ် စတင်ပြီဖြစ်လိမ့်မည်။ အခြေခံအားဖြင့် ဘုရားသခင်၏ အမှုတော်အကြောင်း မည်သည့်အယူအဆများ၊ သို့မဟုတ် အထင်လွဲမှုများမျှ သိုထားလိမ့်မည်မဟုတ်။ ၎င်းသည် ဘုရားသခင်၏ တရားစီရင်ခြင်းနှင့် ပြစ်တင်ဆုံးမမှုများကို ကျိုးနွံနာခံရန် လိုလားနေလိမ့်မည်ဖြစ်ပြီး ဘုရားသခင်၏ အမှုတော်ကို တရားဝင် စတင်တွေ့ကြုံလိမ့်မည်ဖြစ်သည်။ လူတစ်ဦးက ဘုရားသခင်ကို ပထမဦးဆုံး ယုံကြည်လာခြင်းနှင့် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို တရားဝင်တွေ့ကြုံခြင်းတို့ကြား ရှည်ကြာသည့် အပြောင်းလဲကာလတစ်ခု ရှိသည်။ ဤအပြောင်းအလဲကာလသည် လူတစ်ဦးက ဘုရားသခင်ကို စတင်ယုံကြည်ခြင်းမှသည် ၎င်းတို့ အမှန်တကယ် နောင်တရသည်အထိဖြစ်သော အဆင့်ဖြစ်သည်။ တစ်စုံတစ်ဦးသည် သမ္မာတရားကို မချစ်ပါက ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့အပြင် သမ္မာတရားကို စိုးစဉ်းမျှ လက်ခံလိမ့်မည်မဟုတ်သကဲ့သို့ မိမိကိုယ်ကိုယ် လုံးဝ သိမြင်နိုင်စွမ်းရှိလိမ့်မည်မဟုတ်။ ထိုသို့သောလူတို့သည် ဖယ်ရှားရှင်းလင်းခံရလိမ့်မည်။ တစ်စုံတစ်ဦးသည် သမ္မာတရားကို ချစ်ပါက ဘုရားသခင်၏ နှုတ်ကပတ်တော်များကို ဖတ်ရှုခြင်းနှင့် တရားဒေသနာများကို နားထောင်ခြင်း နှစ်ခုလုံးတွင် တစ်စုံတစ်ရာကို အမှန်တကယ် ရရှိနိုင်လိမ့်မည်ဖြစ်ပြီး ဘုရားသခင်၏ အမှုတော်သည် လူသားကို ကယ်တင်ခြင်းနှင့် ဆိုင်ကြောင်းကို သိရှိနိုင်လိမ့်မည်ဖြစ်ကာ ၎င်း နားလည်သည့် သမ္မာတရားဖြင့် မိမိကိုယ်ကိုယ် သုံးသပ်ကာ သိရှိနိုင်လိမ့်မည်။ မိမိ၏ကိုယ်ပိုင် ဖောက်ပြန်ပျက်စီးသော စိတ်သဘောထားများကို ပိုပိုပြီး မုန်းလာလိမ့်မည်ဖြစ်ပြီး သမ္မာတရားကို ယခင်ထက် ပိုမိုစိတ်ဝင်စားလိမ့်မည်။ မိမိကိုယ်ကိုယ် အစစ်အမှန် သိမြင်မှုကို အမှတ်တမဲ့ ရရှိလိမ့်မည်ဖြစ်ပြီး အမှန်တကယ် ဝမ်းနည်းကာ နောင်တရလိမ့်မည်။ သမ္မာတရားကို ချစ်သောလူများက ဘုရားနှုတ်ကပတ်တော်များကို ဖတ်ရှုသည့်အခါ၊ သို့မဟုတ် တရားဒေသနာများကို နားထောင်သည့်အခါ ထိုသို့သော ရလဒ်များကို အလိုအလျောက် ရရှိကြသည်။ ၎င်းတို့သည် မိမိတို့ကိုယ်ကိုယ် တဖြည်းဖြည်း သိမြင်လာကြပြီး စစ်မှန်သော နောင်တတရားကို ရရှိကြသည်။ အကြင်သူသည် အမှန်တကယ် နောင်တရသည်နှင့် မည်သို့ လက်တွေ့လုပ်ဆောင်သင့်သနည်း။ အရာခပ်သိမ်းတွင် သမ္မာတရားကို ရှာသင့်၏။ မိမိအပေါ် မည်သည့်အရာ ဖြစ်ပျက်ဖြစ်စေ ဘုရားနှုတ်ကပတ်တော်များ၌ အခြေခံ၍ လက်တွေ့လုပ်ဆောင်မှု စည်းမျဉ်းများနှင့် လမ်းကြောင်းများကို ရှာတွေ့နိုင်သင့်သည်။ ထို့နောက်တွင် ဆက်လက်၍ သမ္မာတရားကို စတင်လက်တွေ့လုပ်ဆောင်နိုင်သင့်သည်။ ဤသည်မှာ သမ္မာတရား လိုက်စားခြင်းနှင့် ပဉ္စမအဆင့် ဖြစ်သည်။ သမ္မာတရားကို ရှာဖွေခြင်း ရည်ရွယ်ချက်မှာ အဘယ်နည်း။ သမ္မာတရားကို လက်တွေ့လုပ်ဆောင်ရန်နှင့် ဘုရားသခင်ကို ကျိုးနွံနာခံခြင်းအား စွမ်းဆောင်ရရှိရန် ဖြစ်သည်။ သို့ရာတွင် သမ္မာတရားကို လက်တွေ့လုပ်ဆောင်ရန်အလို့ငှာ အကြင်သူသည် ထိုသမ္မာတရား စည်းမျဉ်းများအတိုင်း လုပ်ဆောင်ရမည်။ ယင်းတစ်ခုတည်းသာ မှန်ကန်တိကျသည့် သမ္မာတရားကို လက်တွေ့လုပ်ဆောင်ခြင်း ဖြစ်သည်။ ယင်းတစ်ခုတည်းသာ ဘုရားသခင်၏ လက်ခံမှုကို ရရှိစေသည်။ ထို့ကြောင့် သမ္မာတရား စည်းမျဉ်းများအတိုင်း ဆောင်ရွက်နိုင်ခြင်းသည် သမ္မာတရား လိုက်စားခြင်းက စွမ်းဆောင်ရရှိရန် ရည်ရွယ်သည့်အရာဖြစ်သည်။ ဤအဆင့်ကို အလှမ်းမီခြင်းသည် အကြင်သူက သမ္မာတရားကို လက်တွေ့လုပ်ဆောင်ခြင်း၏ စစ်မှန်မှုထဲသို့ ဝင်ရောက်ပြီးဖြစ်သည်ဟု ဆိုလိုပေသည်။ လူသား၏ ဖောက်ပြန်ပျက်စီးသော စိတ်သဘောထားကို ဖြေရှင်းရန်အလို့ငှာ သမ္မာတရား ရှာဖွေခြင်းကို လုပ်ဆောင်ခြင်း ဖြစ်သည်။ လူတစ်ဦးသည် သမ္မာတရားကို လက်တွေ့လုပ်ဆောင်နိုင်ပါက ၎င်း၏ ဖောက်ပြန်ပျက်စီးသော စိတ်သဘောထားများသည် အလိုအလျောက် လျော့ပါးပျောက်ကွယ်လိမ့်မည်ဖြစ်ပြီး ၎င်း၏ သမ္မာတရားကို လက်တွေ့လုပ်ဆောင်ခြင်းက ဘုရားသခင် တောင်းဆိုသည့် ရလဒ်ကို စွမ်းဆောင်ရရှိပေသည်။ ယင်းမှာ စစ်မှန်သော နောင်တတရားမှသည် သမ္မာတရား လက်တွေ့လုပ်ဆောင်ခြင်းဆီသို့ ဆိုက်ရောက်စေသည့် ဖြစ်စဉ်ဖြစ်၏။ ဖောက်ပြန်ပျက်စီးသော စိတ်သဘောထားများ အလယ်တွင် တစ်ကြိမ်အသက်ရှင်ဖူးခြင်းသည် စာတန်၏ တန်ခိုးအာဏာအောက်တွင် အသက်ရှင်ခြင်းဖြစ်ပြီး အကြင်သူ၏ လုပ်ရပ်များနှင့် အပြုအမူများက ဘုရားသခင်၏ ရှုတ်ချကာ စက်ဆုပ်ခြင်း ခံရဖို့ဖြစ်သည်။ ယခုတွင် သမ္မာတရားကို လက်ခံနိုင်ခြင်း၊ အမှန်တကယ် နောင်တရခြင်း၊ သမ္မာတရားကို လက်တွေ့လုပ်ဆောင်ပြီး ဘုရားသခင်ကို ကျိုးနွံနာခံနိုင်ခြင်းနှင့် သူ၏ နှုတ်ကပတ်တော်များဖြင့် အသက်ရှင်ခြင်းတို့သည် ဘုရားသခင်အတွက် လက်ခံနိုင်ဖွယ်ဖြစ်သည်မှာ အမှန်ဖြစ်၏။ သမ္မာတရားကို လိုက်စားသူများသည် မကြာခဏ မိမိတို့ကိုယ်ကိုယ် သုံးသပ်သင့်သည်။ မိမိတို့၏ ဖောက်ပြန်ပျက်စီးသော စိတ်သဘောထားများကို အသိအမှတ်ပြုပြီး ဘုရားသခင်၏ တရားစီရင်ခြင်းနှင့် ပြစ်တင်ဆုံးမှုကို လက်ခံသင့်သည်။ မိမိတို့၏ ဖောက်ပြန်ပျက်စီးသော အနှစ်သာရအပေါ် စစ်မှန်သော အသိကို ရရှိပြီး နောင်တစိတ်နှလုံး ဖြစ်ပေါ်သင့်သည်။ နောင်တရပြီးနောက် အရာခပ်သိမ်း၌ သမ္မာတရားကို ၎င်းတို့ စတင်ရှာဖွေသင့်သည်။ သမ္မာတရား စည်းမျဉ်းများအတိုင်း လက်တွေ့လုပ်ဆောင်ပြီး ဘုရားသခင်ကို ကျိုးနွံနာခံမှုအား စွမ်းဆောင်ရရှိသင့်သည်။ ဤသည်မှာ သမ္မာတရား လိုက်စားခြင်းနှင့် အကြင်သူ၏ အသက်ဝင်ရောက်မှု တဖြည်းဖြည်း နက်ရှိုင်းခြင်းက ဖြစ်မြောက်နိုင်သည့်အရာ ဖြစ်သည်။ အကြင်သူသည် မိမိကိုယ်ကိုယ် အမှန်တကယ် မသိရှိပါက ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို ကျိုးနွံနာခံရန်၊ သို့မဟုတ် အမှန်တကယ် နောင်တရရန် ၎င်းတို့အတွက် မဖြစ်နိုင်ပေ။ ပြီးလျှင် အကြင်သူသည် အမှန်တကယ် နောင်တမရပါက ထိုလူသည် ဆိုးယုတ်သော စိတ်သဘောထားအားဖြင့် ဆက်လက်အသက်ရှင်လိမ့်မည်။ ဘုရားသခင်ကို နှစ်ပေါင်းမည်မျှ ယုံကြည်သည်ဖြစ်စေ ၎င်းတို့တွင် စစ်မှန်သော ပြောင်းလဲခြင်း ဖြစ်လာလိမ့်မည်မဟုတ်။ ၎င်းတို့၏ အပြုအမူ အနည်းငယ် ပြောင်းလဲလိမ့်မည်။ ထိုမျှသာဖြစ်၏။ သမ္မာတရား မလိုက်စားသူတို့အတွက် သမ္မာတရားကို မိမိတို့၏ အသက်အဖြစ် လက်ခံဖို့ မဖြစ်နိုင်။ ထို့ကြောင့် ၎င်းတို့၏ လုပ်ရပ်များနှင့် အပြုအမူများသည် ဖောက်ပြန်ပျက်စီးသော စိတ်သဘောထား ပွင့်အံထွက်မှုများ ဖြစ်နေလိမ့်ဦးမည်မှာ သေချာသလို ဤအရာများက သမ္မာတရားနှင့် သဟဇာတဖြစ်လိမ့်မည် မဟုတ်သကဲ့သို့ ဘုရားသခင်ကို ခုခံတတ်လိမ့်မည်မှာ သေချာ၏။ သမ္မာတရား လိုက်စားသူတို့သည် သမ္မာတရားကို မိမိတို့ အသက်အဖြစ် လက်ခံနိုင်သည်။ မိမိတို့၏ ဖောက်ပြန်ပျက်စီးသော စိတ်သဘောထားများကို စွန့်ပစ်နိုင်သည်၊ သမ္မာတရားကို လက်တွေ့လုပ်ဆောင်နိုင်ပြီး ဘုရားသခင်ကို စစ်မှန်သော ကျိုးနွံနာခံမှု စွမ်းဆောင်ရရှိနိုင်သည်။ သမ္မာတရား လိုက်စားသောသူတို့သည် ၎င်းတို့အတွက် မရှင်းလင်းသည့် အရာများ ဖြစ်ပျက်သည့်အခါ ထိုသမ္မာတရားကို ရှာဖွေကြလိမ့်မည်။ မိမိတို့ကိုယ်တိုင်အတွက် အကြံထုတ်ကြတော့မည် မဟုတ်သကဲ့သို့ ဘုရားသခင်နှင့် သဟဇာတဖြစ်သည့် စိတ်နှလုံးဖြင့် မကောင်းမှုအားလုံးကို ရှောင်ရှားကြလိမ့်မည်။ သမ္မာတရား လိုက်စားသူတို့သည် ဘုရားသခင်ကို ယခင်ထက် ပိုကျိုးနွံနာခံနိုင်ကြပြီး လူသား အသက်ရှင်သင့်သည့်အတိုင်း ယခင်ထက် ပိုအသက်ရှင်ရင်း ဘုရားသခင်ကို ကြောက်ရွံ့ကာ မကောင်းမှုကို ရှောင်ကြဉ်နိုင်ကြသည်။ ထိုသို့သော ပြောင်းလဲမှုများည် သမ္မာတရားကို မလိုက်စားသည့်သူများအတွက် မဖြစ်နိုင်ချေ။ သမ္မာတရား မလိုက်စားသောသူများက မည်သည့်အရာကို လိုက်စားကြသနည်း။ ဂုဏ်သိက္ခာ၊ အကျိုးအမြတ်နှင့် အဆင့်အတန်းကို လိုက်စားကြ၏။ ကောင်းချီးများနှင့် ဆုလာဘ်များကို လိုက်စားကြ၏။ ၎င်းတို့၏ ရည်မှန်းချက်များနှင့် စိတ်ဆန္ဒများက ယခင်ထက် တိုး၍ ကြီးမားပြီး ဘဝတွင် မှန်ကန်သည့် ရည်မှန်းချက်ပန်းတိုင် မရှိကြချေ။ မည်သည့်အရာကို ၎င်းတို့ လိုက်စားရန် နှစ်သက်သည်ဖြစ်စေ၊ မိမိတို့၏ ရည်မှန်းချက်ပန်းတိုင် မရရှိနိုင်ပါက ၎င်းတို့ လက်လျှော့လိမ့်မည် မဟုတ်သကဲ့သို့ ၎င်းတို့၏ စိတ်များကိုလည်း သာ၍ပင် ပြောင်းလိမ့်ဦးမည်မဟုတ်ပေ။ အခြေအနေပေးပြီး အဆင်သင့်သည့်အခါ ၎င်းတို့သည် မကောင်းမှုကို လုပ်နိုင်စွမ်းရှိပြီး ဘုရားသခင်ကို ခုခံနိုင်စွမ်းရှိကြလိမ့်မည်ဖြစ်ကာ အမှီအခိုကင်းသော နယ်ပယ်တစ်ခုကို တည်ထောင်ဖို့ ကြိုးစားကြလိမ့်မည်။ ဤသည်မှာ ၎င်းတို့က ဘုရားသခင်ကို ကြောက်ရွံ့သော၊ သို့မဟုတ် သူ့ကို ကျိုးနွံနာခံသော စိတ်နှလုံး မရှိကြသောကြောင့် ဖြစ်ပြီး အဆုံးတွင် အထူးထူးအပြားပြားသော မကောင်းမှုများကို ကျူးလွန်ခြင်းနှင့် ဘုရားသခင်ကို သစ္စာဖောက်ခြင်းတို့အတွက် ဘုရားသခင်၏ ချေဖျက်ခြင်းကိုသာ ခံရနိုင်ပေသည်။ သမ္မာတရားကို မလိုက်စားသောသူအားလုံးသည် သမ္မာတရားကို အလွန်အမင်း မနှစ်မြို့သောသူများဖြစ်ပြီး သမ္မာတရားကို အလွန်အမင်း မနှစ်မြို့သောသူအားလုံးသည် မကောင်းမှုကို ချစ်မြတ်နိုးသူများ ဖြစ်သည်။ ၎င်းတို့၏ စိတ်ဝိညာဉ်များ၊ အသွေးနှင့် အရိုးများထဲတွင်၊ ၎င်းတို့ ကြည်ညိုသည်မှာ ဂုဏ်သိက္ခာ၊ အကျိုးအမြတ်၊ အဆင့်အတန်းနှင့် လွှမ်းမိုးမှုတို့ဖြစ်သည်။ ၎င်းတို့သည် ဆိုးယုတ်သော စိတ်သဘောထားများဖြင့် အသက်ရှင်ချင်ကြပြီး မိမိတို့၏ ပန်းတိုင်များ ရရှိဖို့အလို့ငှာ ကောင်းကင်၊ မြေကြီးနှင့် လူသားတို့ကို ဆန့်ကျင်တိုက်ခိုက်လိုကြသည်။ ထိုသို့သော ဘဝတစ်ခုသည် ဝမ်းမြောက်ဖွယ်ဖြစ်သည်ဟု တွေးထင်ကြသည်။ ထူးချွန်ပြောင်မြောက်သော လူတစ်ဦးအဖြစ် အသက်ရှင်ပြီး သူရဲကောင်းအဖြစ် သေဆုံးဖို့ ဆန္ဒရှိကြသည်။ သိသိသာသာပင် ၎င်းတို့သည် ဆိုးယုတ်သော ပျက်ဆီးခြင်း လမ်းကို လျှောက်လှမ်းနေကြပေသည်။ သမ္မာတရားကို လိုက်စားသောသူတို့သည် ထိုသမ္မာတရားကို နားလည်လေလေ၊ ဘုရားသခင်ကို ပိုချစ်လေဖြစ်ပြီး သမ္မာတရား မည်မျှ အဖိုးတန်သည်ကို ခံစားရလေဖြစ်သည်။ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို လက်ခံရန် ၎င်းတို့ လိုလားနေကြပြီး အခက်အခဲ မည်မျှ ကြံ့ကြံ့ခံရသည်ဖြစ်စေ၊ သမ္မာတရားကို လိုက်စားပြီး ရရှိဖို့ စိတ်ဆုံးဖြတ်ထားကြသည်။ ဤသည်မှာ ၎င်းတို့သည် ကယ်တင်ခြင်းနှင့် စုံလင်စေခြင်း လမ်းကြောင်းပေါ် စတင်ပြီးဖြစ်ကြောင်း၊ ဘုရားသခင်နှင့် သဟဇာတဖြစ်ခြင်းကို စွမ်းဆောင်ရရှိနိုင်စွမ်းရှိကြကြောင်း ဆိုလိုပေသည်။ အရေးအကြီးဆုံးမှာ ဘုရားသခင်ကို ၎င်းတို့ ကျိုးနွံနာခံနိုင်ကြ၏။ အဖန်ဆင်းခံတစ်ဦးအဖြစ် မိမိတို့၏ မူလ ရာထူးအဆင့်အတန်းဆီသို့ ပြန်သွားကြပြီးဖြစ်ကာ ဘုရားသခင်အတွက် ကြောက်ရွံ့သော စိတ်နှလုံးများ ရှိကြပေသည်။ ၎င်းတို့သည် ဘုရားသခင်၏ ဦးဆောင်မှု၊ လမ်းပြမှုနှင့် ကောင်းချီးများကို အမှန်အားဖြင့် ရရှိနိုင်ကြပြီး ဘုရားသခင်သည် ၎င်းတို့ကို ပစ်ပစ်ခါခါ မငြင်းတော့ပေ။ ကောင်းလိုက်လေခြင်း။ သမ္မာတရား မလိုက်စားသောသူတို့သည် မိမိတို့၏ ဖောက်ပြန်ပျက်စီးသော စိတ်သဘောထားများကို မစွန့်ပစ်နိုင်ကြသောကြောင့် ၎င်းတို့၏ စိတ်နှလုံးများက ဘုရားသခင်ထံမှ တိုး၍ ဝေးသွားပြီး သမ္မာတရားကို အလွန်အမင်း မနှစ်မြို့ကာ ငြင်းပယ်ကြလေသည်။ အကျိုးဆက်အနေဖြင့် ဘုရားသခင်အပေါ် တိုး၍ တိုး၍ အတိုက်အခံလုပ်တတ်ကြပြီး သူ့ကို ဆန့်ကျင့်သည့်လမ်းပေါ် စလျှောက်ကြသည်။ ၎င်းတို့သည် မိမိတို့ ဆုလာဘ်များအတွက် ဘုရားသခင်ကို ပွင့်ပွင့်လင်းလင်း တောင်းဆိုလျက် ပေါလုကဲ့သို့သာ ဖြစ်ကြ၏။ ထိုဆုလာဘ်ကို မရရှိပါက၊ ဘုရားသခင်နှင့် အငြင်းပွားကာ သူ့ကို ခုခံကြလိမ့်မည်ဖြစ်ပြီး အဆုံးတွင် အကျည်းတန်သော စာတန်၏ မျက်နှာထားကို လုံးလုံးလျားလျား ဖော်ထုတ်လျက် အန္တိခရစ်များ ဖြစ်လာကြလိမ့်မည်။ ထို့နောက်တွင် ဘုရားသခင်က ၎င်းတို့ကို ကျိန်ဆဲကာ ဖျက်ဆီးလိမ့်မည်။ အခြားတစ်ဖက်တွင် သမ္မာတရား လိုက်စားသည့် လမ်းကြောင်းကို လျှောက်ကြသူများသည် သမ္မာတရားကို လက်ခံနိုင်ပြီး ထိုသမ္မာတရားကို ကျိုးနွံနာခံနိုင်ကြသည်။ စာတန်၏ ဖောက်ပြန်ပျက်စီးသော စိတ်သဘောထားကို ၎င်းတို့ စွန့်ပစ်နိုင်ကြသည်။ မိမိတို့တာဝန်များကို ကောင်းစွာ ထမ်းဆာင်ရန်နှင့် ဘုရားသခင်၏ မေတ္တာကို ပြန်ပေးဆပ်ဖို့ အရာရာကို စွန့်လွှတ်ရန် လိုလားနေကြပြီး ဘုရားသခင်ကို ကျိုးနွံနာခံပြီး ကိုးကွယ်သည့် လူများ ဖြစ်လာနိုင်ကြသည်။ ဘုရားသခင်ကို ကျိုးနွံနာခံရန် လိုလားနေပြီး ထိုသို့ အပြည့်အဝ ကျိုးနွံနာခံနေသည့် အဖန်ဆင်းခံတစ်ဦး၏ မူလ နေရာအဆင့်အတန်းဆီ လုံးဝ ပြန်လာပြီးဖြစ်ကာ အရာရာတွင် ဘုရားသခင်၏ စီစဉ်ညွှန်ကြားချက်များနှင့် အစီအစဉ်များကို ကျိုးနွံနာခံနိုင်စွမ်း ရှိကြသည်။ ဤသည်မှာ ၎င်းတို့သည် အခြေခံကျသော လူသားပုံသဏ္ဌာန် ပိုင်ဆိုင်ကြောင်း ဆိုလိုပေသည်။ စစ်မှန်သော လူသားပုံသဏ္ဌာန်မှာ မည်သည့်အရာကို ရည်ညွှန်းသနည်း။ ယင်းမှာ လူတစ်ဦးက ယောဘနှင့် ပေတရုကဲ့သို့ ဖန်ဆင်းရှင်ကို ကျိုးနွံနာခံပြီး ကြောက်ရွံ့သည့်အခါတွင် ဖြစ်သည်။ ထိုသို့သောသူတို့မှာ ဘုရားသခင် အမှန်တကယ် ကောင်းချီးပေးသူများ ဖြစ်သည်။

ယနေ့ ငါတို့ မိတ်သဟာယပြုပြီးသည့် အဓိကကျသော သမ္မာတရား လိုက်စားခြင်း အဆင့်များမှာ ထိုမျှလောက် ရိုးရှင်းပေသည်။ ငါ့ကို အဆင့်များကို ပြန်ပြောကြလော့။ (ပထမဦးစွာ ဘုရားနှုတ်ကပတ်တော်များအတိုင်း မိမိကိုယ်ကိုယ် သုံးသပ်ပါ။ ဒုတိယမှာ ဘုရားနှုတ်ကပတ်တော်များ ထုတ်ဖော်ပြသည့် အမှန်တရားများကို အသိအမှတ်ပြုကာ လက်ခံပါ။ တတိယမှာ သင်၏ ကိုယ်ပိုင် ဖောက်ပြန်ပျက်စီးသော စိတ်သဘောထားနှင့် အနှစ်သာရကို သိကာ သင်၏ ဖောက်ပြန်ပျက်စီးသော စိတ်သဘောထားနှင့် စာတန်ကို စတင်မုန်းတီးပါ။ စတုတ္ထမှာ နောင်တတရားကို လက်တွေ့လုပ်ဆောင်ကာ သင်၏ ဆိုးယုတ်သော လုပ်ဆောင်ချက်များအားလုံးကို ဘေးဖယ်ထားပါ။ ပဉ္စမမှာ သမ္မာတရာ စည်းမျဉ်းများကို ရှာဖွေပြီး သမ္မာတရားကို လက်တွေ့လုပ်ဆောင်ပါ။) ယင်းတို့မှာ အဆင့်ငါးဆင့် ဖြစ်ကြ၏။ ထိုအဆင့်အသီးသီးကို လက်တွေ့လုပ်ဆောင်ခြင်းသည် ဖောက်ပြန်ပျက်စီးသော စိတ်သဘောထားများအလယ်တွင် အသက်ရှင်သောလူများအတွက် အလွန်ခဲယဉ်း၏။ တစ်ခုချင်းစီတွင် များစွာသော ခလုတ်တံသင်းများနှင့် အခက်အခဲများ ပါဝင်ပြီး အားလုံးက လက်တွေ့လုပ်ဆောင်ပြီး စွမ်းဆောင်ရရှိဖို့ အပတ်တကုတ်လုပ်ရသော အားထုတ်မှုကို အသုံးပြုခြင်း လိုအပ်ကာ လမ်းတစ်လျှောက်တွင် ကျရှုံးမှုများနှင့် ဆုတ်ဆိုင်းမှုများအချို့ကို ရှောင်လွှဲ၍မရနိုင်သည်မှာ အမှန်ဖြစ်၏။ သို့ရာတွင် သင်တို့ကို ငါ ဤသို့ပြောမည်။ စိတ်မပျက်နှင့်။ အခြားသူများက “သင်တော့ သွားပြီ”၊ “သင် မတော်ပါ”၊ “ဤသည်မှာ သင် ဖြစ်သည့်ပုံသာဖြစ်သည်။ သင် ပြောင်းလဲ၍ မရပါ”ဟု ဆိုလျက် သင့်ကို ရှုတ်ချကောင်းရှုတ်ချနိုင်သည်။ ၎င်းတို့၏ စကားများ မည်သို့ပင် ဆိုးသော်လည်း သင်၏ ပိုင်းခြားသိမြင်မှုတွင် ရှင်းလင်းနေရမည်။ သမ္မာတရားကို လိုက်စားခြင်းလမ်းကြောင်းသည်သာ၊ ဤအဆင့်များကို ဝင်ရောက်ခြင်းနှင့် လက်တွေ့လုပ်ဆောင်ခြင်းကသာ သင်၏ ဒုက္ခမှ သင့်အား အမှန်တကယ် လွတ်မြောက်နိုင်စေလိမ့်မည် ဖြစ်သောကြောင့် စိတ်မပျက်နှင့်၊ လက်မလျှော့နှင့်။ ချက်ချာပါးနပ်သောလူများသည် မိမိတို့၏ အခက်အခဲများ အားလုံးကို ဘေးဖယ်ထားရန် ရွေးချယ်ကြလိမ့်မည်။ ကျရှုံးမှုများနှင့် ဆုတ်ဆိုင်းမှုများကို ၎င်းတို့ ရှောင်လွှဲကြလိမ့်မည် မဟုတ်သကဲ့သို့ မည်မျှ ခက်ခဲသည်ဖြစ်စေ ရှေ့ဆက်တိုးကြလိမ့်မည်။ မိမိကိုယ်ကို ဆန်းစစ်ခြင်းနှင့် သိမြင်ခြင်း အဆင့်တွင် သုံးနှစ်၊ ငါးနှစ်ကြာ သင် ဆက်ရှိနေလျှင်ပင်၊ သို့မဟုတ် ရှစ်နှစ်၊ ဆယ်နှစ်ကြာပြီးနောက်တွင်ပင် သင့်ထံတွင် မည်သည့် ဖောက်ပြန်ပျက်စီးသော စိတ်သဘောထားများ ရှိသည်ကို သိရုံသက်သက်သာရှိသော်လည်း သင်သည် သမ္မာတရားကို နားမလည်နိုင်ဆဲရှိလျှင်၊ သို့မဟုတ် သင်၏ ဖောက်ပြန်ပျက်စီးသော စိတ်သဘောထားကို မဖယ်ရှားနိုင်ဆဲရှိလျှင် ယခင်အတိုင်းသာ သင့်အား ငါ ပြောဦးမည်။ စိတ်မပျက်နှင့်။ သင်သည် စစ်မှန်သည့် အလှည့်အပြောင်းကို စွမ်းဆောင်ရရှိနိုင်စွမ်း မရှိသေးသော်လည်း ပထမအဆင့်သုံးဆင့်ထဲသို့ ဝင်ရောက်နှင့်ပြီး ဖြစ်သည်။ ထို့ကြောင့် ကျန်ရှိသည့် နှစ်ဆင့်ထဲသို့ မဝင်ရောက်နိုင်ခြင်းကို အဘယ်ကြောင့် စိုးရိမ်နေသနည်း။ မစိုးရိမ်နှင့်။ အလုပ်ပိုကြိုးစားလော့၊ ပို၍ အားထုတ်လော့၊ ပြီးလျှင် ထိုနေရာသို့ သင် ရောက်လိမ့်မည်။ နောင်တတရား၏ စတုတ္ထအဆင့်သို့ ရောက်လာသူအချို့ ရှိကောင်းရှိနိုင်သော်လည်း သမ္မာတရား စည်းမျဉ်းများ ရှာဖွေခြင်းကို ၎င်းတို့ စံမမီကြသကဲ့သို့ ဤအဆင့်ထဲသို့ မဝင်ရောက်နိုင်ကြချေ။ သို့ဆိုလျှင် မည်သည့်အရာကို လုပ်ဆောင်ရမည်နည်း။ သင်သည်လည်း စိတ်မပျက်ရပေ။ ထိုသို့လုပ်ဆောင်ရန် ဆန္ဒရှိသရွေ့ အရာခပ်သိမ်း၌ သင်၏ သမ္မာတရား ရှာဖွေခြင်း လိုက်စားမှုတွင် မလျှော့တမ်း လုပ်ဆောင်သင့်ပြီး ဘုရားသခင်ထံ ပိုမို ဆုတောင်းသင့်သည်။ ထိုသို့လုပ်ဆောင်ခြင်းသည် မကြာခဏ အကျိုးများ၏။ သင်၏ အစွမ်းအစနှင့် အခြေအနေများကို အခြေခံ၍ သင်တတ်နိုင်သမျှ လိုက်စားလော့၊ ပြီးလျှင် သင် စွမ်းဆောင်ရရှိနိုင်သည့်အရာကို ရရှိရန် ကြိုးစားလုပ်ဆောင်လော့။ အစွမ်းကုန် သင် လုပ်နေသရွေ့ သင်၏ လိပ်ပြာသန့်ပြီး ပိုကြီးမားသော အကျိုးအမြတ်များကို ဧကန်မုချ သင် ဖန်တီးနိုင်လိမ့်မည်။ နောက်ထပ် သမ္မာတရားတစ်ခုကို နားလည်ခြင်းသည်ပင် ကောင်းမွန်သည့်အရာတစ်ခု ဖြစ်သည်။ သင်၏ ဘဝသည် ထိုအတွက် အနည်းငယ် ပိုမို ပျော်ရွှင်လာလိမ့်မည်ဖြစ်ပြီး အနည်းငယ် ပိုမို ဝမ်းမြောက်လာလိမ့်မည်။ အကျဉ်းချုပ်အနေဖြင့် သမ္မာတရား လိုက်စားခြင်းသည် အနှစ်မဲ့သောအရာတစ်ခု မဟုတ်ပေ။ ယင်း၏ အဆင့်တစ်ခုစီအတွက် တိကျသည့် လက်တွေ့လုပ်ဆောင်မှု လမ်းကြောင်းရှိပြီး လူတို့အနေဖြင့် အချို့သော နာကျင်မှုကို ခံစားကာ အဖိုးအခတစ်ခုခု ပေးဆပ်ရန် လိုအပ်သည်။ သမ္မာတရားသည် ပညာရပ်ဆိုင်ရာ လေ့လာမှုနယ်ပယ်တစ်ခု၊ သို့မဟုတ် သီအိုရီတစ်ခု၊ သို့မဟုတ် ဆောင်ပုဒ်တစ်ခု၊ သို့မဟုတ် အကြောင်းပြချက်တစ်ခု မဟုတ်ပါ။ ယင်းသည် အနှစ်သာရမမဲ့ပေ။ သမ္မာတရား အသီးသီးသည် လူတို့က ထိုသမ္မာတရားကို နားလည်ပြီး မသိရှိနိုင်မီ နှစ်ကာလအတော်ကြာ တွေ့ကြုံပြီး လက်တွေ့လုပ်ဆောင်ဖို့ လိုအပ်သည်။ သို့ရာတွင် မည်သည့် အဖိုးအခကို သင် ပေးသည်ဖြစ်စေ၊ မည်သည့် အားထုတ်မှုကို သင် ပြုလုပ်သည်ဖြစ်စေ သင်၏ ချဉ်းကပ်မှု၊ နည်းစနစ်၊ လမ်းကြောင်းနှင့် ဦးတည်ချက်တို့ မှန်ကန်သရွေ့ ကြီးမားသည့် ဆုလာဘ်ကို သင် ခံစားရမည့်နေ့ရက်၊ သမ္မာတရား ရရှိပြီး ဘုရားသခင်ကို သိကျွမ်းကာ သူ့ကို ကျိုးနွံနာခံနိုင်မည့် နေ့ရက် အနှေးနှင့်အမြန် ရောက်လာလိမ့်မည်ဖြစ်ကာ ထိုသို့ဖြင့် သင် အပြည့်အဝ အားရကျေနပ်ရလိမ့်မည်။

၂ဝ၂၂ ခုနှစ်၊ ဇန်နဝါရီလ ၈ ရက်