အနန္တတန်ခိုးရှင် ဘုရားသခင် အသင်းတော် အကြောင်းအရာ

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နှုတ်ကပတ်တော်သည် လူ့ဇာတိ၌ ပေါ်လာ၏

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

အတုမရှိ ဘုရားသခင်ကိုယ်တော်တိုင် VII

ဘုရားသခင်ရဲ့ အာဏာ၊ ဖြောင့်မတ်တဲ့ စိတ်သဘောထားနဲ့ သန့်ရှင်းမှုကို ခြုံငုံသုံးသပ်ခြင်း

ဆုတောင်းပြီးတဲ့အခါ သင်တို့ရဲ့ နှလုံးသားတွေ ဘုရားသခင် မျက်မှောက်မှာ ငြိမ်းအေးသွားတယ်လို့ ခံစားကြရတယ် မဟုတ်လား။ (ဟုတ်ပါတယ်)။ နှလုံးသားငြိမ်းအေးမှ လူတွေဟာ ဘုရားသခင်ရဲ့ နှုတ်ကပတ်တော်ကို ကြားနိုင်၊ နားလည်နိုင်မှာ ဖြစ်ပြီး သမ္မာတရားကိုလည်း ကြားနိုင်၊ နားလည်နိုင်မှာ ဖြစ်တယ်။ တကယ်လို့ သင့်နှလုံးသားက မငြိမ်းအေးရင်၊ သင့်နှလုံးသား အမြဲတမ်း မျောလွင့်နေရင်၊ ဒါမှမဟုတ် တခြားအကြောင်းတွေဆီကိုပဲ စိတ်ရောက်နေရင် ဘုရားသခင်ရဲ့ နှုတ်ကပတ်တော်ကို အများနဲ့အတူ လာနားထောင်တဲ့ သင့်အပေါ် သက်ရောက်မှု ရှိလိမ့်မယ်။ ဒါနဲ့ ငါတို့ ခုဆွေးနွေးမှုရဲ့ အဓိကအချက်က ဘာလဲ။ အဓိကအချက်တွေကို အနည်းငယ် ပြန်တွေးကြည့် ကြရအောင်။ အတုမရှိ ဘုရားသခင် ကိုယ်တော်တိုင်ကို သိရှိခြင်းဆိုတာနဲ့ ပတ်သက်ပြီး ငါတို့ ပထမဆုံး ဆွေးနွေးခဲ့တဲ့ အချက်က ဘာလဲ။ (ဘုရားသခင်ရဲ့ အာဏာပါ)။ ဒုတိယ အချက်ကကော။ (ဘုရားသခင်ရဲ့ ဖြောင့်မတ်တဲ့ စိတ်သဘောထားပါ)။ တတိယအချက်က။ (ဘုရားသခင်ရဲ့ သန့်ရှင်းမှုပါ)။ ဘုရားသခင်ရဲ့ အာဏာကို ငါတို့ ဘယ်နှစ်ကြိမ် ဆွေးနွေးပြီးပြီလဲ။ (နှစ်ကြိမ်ပါ)။ ဘုရားသခင်ရဲ့ ဖြောင့်မတ်တဲ့ စိတ်သဘောထားကိုရော။ (တစ်ကြိမ်ပါ)။ ဘုရားသခင်ရဲ့ သန့်ရှင်းမှုကိုရော ဘယ်နှစ်ကြိမ် ငါတို့ ဆွေးနွေးပြီးပြီဆိုတာ သင်တို့စိတ်ထဲ မှတ်မိကောင်း မှတ်မိလိမ့်မယ်၊ ဒါပေမဲ့ ငါတို့ ဘယ်အချက်တွေကို ဆွေးနွေးလဲဆိုတာ သင်တို့ မှတ်မိကြရဲ့လား။ "ဘုရားသခင်ရဲ့ အာဏာ" ဆိုတဲ့ ပထမဆုံးအပိုင်းမှာ သင်တို့အတွက် အထူးခြားဆုံး မှတ်သားစရာ ဘာရှိလဲ၊ ဘယ်အပိုင်းက သင်တို့အပေါ် အကြီးမားဆုံး သက်ရောက်မှုရှိလဲ။ (ဘုရားသခင်ဟာ အချက်ကတော့ ဘုရားသခင်ဟာ သူ့ရဲ့ အာဏာနဲ့ သူ့ နှုတ်ကပတ်တော်ရဲ့ အာနုဘော်ကို နားလည်အောင်ပြောပြပါတယ်၊ ဘုရားသခင်ဟာ သူ့နှုတ်ကပတ်တော်လိုပဲ မြင့်မြတ်တယ်၊ နှုတ်ကပတ်တော်သာလျှင် စစ်မှန်လာမယ်။ အဲဒါဟာ ဘုရားသခင်ရဲ့ အနှစ်သာရ ဖြစ်တယ်။) (ဘုရားသခင်ရဲ့ အာဏာဟာ သူ့ရဲ့ ကောင်းကင်၊ မြေကြီးနဲ့ အဲဒီအထဲက အရာခပ်သိမ်းကို ဖန်ဆင်းခြင်းအပေါ်မှာ တည်ရှိတယ်။ ဘုရားသခင်ရဲ့ အာဏာကို ဘယ်လူသားကမှ ပြောင်းလဲလို့မရဘူး။ ဘုရားသခင်ဟာ အရာခပ်သိမ်းရဲ့ အုပ်စိုးသူဖြစ်ပြီး သူဟာ အရာခပ်သိမ်းကို ထိန်းချုပ်ပါတယ်။) (ဘုရားသခင်ဟာ သက်တံကို အသုံးချပြီး လူတွေနဲ့ ပဋိညာဉ်ဖွဲ့ခဲ့တယ်။) ဒါဟာ တိကျတဲ့ အချက်တစ်ချက်ပဲ။ တခြား ဘာရှိသေးသလဲ။ (သူဟာ ယောဘကို သွေးဆောင်နိုင်ပေမယ့် သူ့ရဲ့ အသက်ကို မနုတ်ယူရဘူးလို့ ဘုရားသခင်က စာတန်ကို အမိန့်ပေးခဲ့တယ်။ ဒါကို ကြည့်ရင် ဘုရားသခင် နှုတ်ကပတ်တော်ရဲ့ အာဏာကို ကျွန်တော်တို့ မြင်ရပါတယ်။) ဒါဟာ မိတ်သဟာယဖွဲ့ ဆွေးနွေးတာကို ကြားနာပြီးနောက်ပိုင်း ရလာတဲ့ နားလည်မှုပဲ။ တခြားအချက်တွေ ရှိသေးလား။ (ဘုရားသခင်ရဲ့ အာဏာသာ ဘုရားသခင်ရဲ့ အတုမရှိတဲ့ဂုဏ်နဲ့ အနေအထားကို ကိုယ်စားပြုပြီး အခြား ဖန်ဆင်းထားတဲ့အရာတွေ၊ ဖန်ဆင်းမထားတဲ့အရာတွေမှာ ဘုရားသခင်ရဲ့ အာဏာမရှိဘူးဆိုတာ ကျွန်တော်တို့ နားလည်လာပါတယ်။) (ဘုရားသခင်ဟာ လူတွေနဲ့ ပဋိညာဉ်ဖွဲ့ပြီး လူတွေကို ကောင်းချီးတွေပေးဖို့ စကားပြောဆိုတယ်၊ ဒါတွေဟာ ဘုရားသခင်ရဲ့ နှုတ်ကပတ်တော်မှာ အာဏာရှိတယ်ဆိုတဲ့ ဥပမာတွေပါပဲ။) (ဘုရားသခင်ရဲ့ နှုတ်ကပတ်တော်နဲ့ ကောင်းကင်နဲ့ မြေကြီးကို ဖန်ဆင်းခဲ့လို့ ဘုရားသခင်ရဲ့ အာဏာကို နားလည်လာပါတယ်၊ ပြီးတော့ လူ့ဇာတိခံယူတဲ့ ဘုရားသခင်ကနေလည်း ကိုယ်တော်ရဲ့ နှုတ်ကပတ်တော်မှာလည်း ဘုရားသခင်ရဲ့ အာဏာတော်တည်တယ် ဆိုတာကို မြင်ရပါတယ်။ အဲဒီနှစ်ချက်စလုံးဟာ ဘုရားသခင်ရဲ့ အတုမရှိမှု ပြယုဂ်ပါပဲ။ သခင်ယေရှုဟာ လာဇရုကို သင်္ချိုင်းထဲက ထွက်လာဖို့ အမိန့်ပေးတဲ့အခါ စာတန်က ထိန်းချုပ်နိုင်စွမ်း မရှိတဲ့ သေခြင်းနဲ့ ရှင်ခြင်း ဆိုတာကိုလည်း ဘုရားသခင်က ထိန်းချုပ်တယ်ဆိုတာ တွေ့မြင်ရပါတယ်၊ ပြီးတော့ ဘုရားသခင်ရဲ့ အလုပ်ဟာ ဇာတိပကတိထဲမှာ လုပ်ဆောင်တာဖြစ်ဖြစ်၊ ဝိညာဉ်တော်ထဲမှာ လုပ်ဆောင်တာပဲဖြစ်ဖြစ် ဘုရားသခင်ရဲ့ အာဏာဟာ အတုမရှိဘူးဆိုတာ တွေ့မြင်ရပါတယ်။) ဘာထပ်ဖြည့်ချင်သေးလဲ။ (ဘဝရဲ့ ဆုံမှတ်ခြောက်ခုကိုလည်း ဘုရားသခင်က ချုပ်ကိုင်ခြယ်လှယ်တယ် ဆိုတာ ကျွန်တော်တို့ တွေ့မြင်ရပါတယ်။) သိပ်ကောင်းတယ်။ ဘုရားသခင်ရဲ့ အာဏာလို့ ငါတို့ သုံးတဲ့အခါ သင်တို့ အဲဒီ အာဏာ ဆိုတဲ့ စကားလုံးကို ဘယ်လို နားလည်ကြသလဲ။ ဘုရားသခင်ရဲ့ အာဏာစက်အတွင်းမှာ ဘုရားသခင်က ဘာတွေလုပ်လဲ၊ ဘာတွေဖော်ပြလဲ၊ လူတွေက ဘာကို မြင်ကြလဲ။ (ဘုရားသခင်ရဲ့ အနန္တတန်ခိုးနဲ့ ဉာဏ်ပညာကို ကျွန်တော်တို့ မြင်ပါတယ်။) (ဘုရားသခင်ရဲ့ အာဏာဟာ အမြဲရှိနေတယ်၊ အဲဒီအာဏာဟာ တကယ်ရှိတယ်လို့ ကျွန်တော်တို့ တွေ့မြင်ရပါတယ်။) (စကြဝဠာ တစ်ခုလုံးကိုတောင် စိုးမိုးနိုင်တဲ့ ဘုရားသခင်ရဲ့ အာဏာဟာ ကြီးမားလွန်းလှတယ်လို့ ကျွန်တော်တို့ နားလည်လာတယ်၊ အဲဒါနဲ့ နှိုင်းရင် လူ့ဘဝကို ဘုရားသခင် ချုပ်ကိုင်ထားမှုဟာ အသေးလေးပဲလို့ နားလည်လာတယ်။ ဘဝရဲ့ ဆုံမှတ်ခြောက်ခုကနေ ဘုရားသခင်ဟာ ကျွန်တော်တို့ ဘဝတွေရဲ့ ကဏ္ဍအားလုံးကို စီမံတယ်၊ ထိန်းချုပ်တယ်ဆိုတာ တွေ့မြင်ရပါတယ်။) (ဒါ့အပြင် ဘုရားသခင်ရဲ့ အာဏာဟာ အတုမရှိဘူး၊ ဘုရားသခင် ကိုယ်တိုင်ကို ကိုယ်စားပြုတယ်၊ အခြား ဖန်ဆင်းထားတဲ့အရာတွေ၊ ဖန်ဆင်းမထားတဲ့အရာတွေဟာ ဘုရားသခင်ရဲ့ အာဏာမရှိဘူးဆိုတာ တွေ့မြင်ရပါတယ်။ ဘုရားသခင်ရဲ့ အာဏာဟာ ကိုယ်တော်ရဲ့ ဂုဏ်ရဲ့ ပြယုဂ် ဖြစ်တယ်။) "ဘုရားသခင်ရဲ့ ဂုဏ်နဲ့ ဘုရားသခင်ရဲ့ အနေအထား ပြယုဂ်"၊ သင်တို့ဟာ အဲဒီ စာလုံးတွေကို လှေနံဓားထစ် လက်ခံထားကြပုံပဲ။ ငါခုလေးတင် မေးခဲ့တဲ့ မေးခွန်းက ဘာလဲ၊ သင်တို့ ပြန်ပြောနိုင်မလား။ (ဘုရားသခင်က ဘာလုပ်လဲ၊ ဘာတွေ ဖော်ပြလဲနဲ့ ကျွန်တော်တို့ ဘယ်ကိုမြင်ကြလဲ ဆိုတာပါ။) ဘာမြင်သလဲ။ ဘုရားသခင်ရဲ့ အာဏာကိုပဲ မြင်နေတာ မဖြစ်နိုင်ဘူးလား။ ဘုရားသခင်ရဲ့ အာဏာကိုပဲ ခံစားခဲ့တာလား။ (ကျွန်တော်တို့ ဘုရားသခင်ရဲ့ လက်တွေ့သဘော၊ မှန်ကန်မှု၊ သစ္စာရှိမှုတို့ကို တွေ့မြင်ရပါတယ်။) (ဘုရားသခင်ရဲ့ ဉာဏ်ပညာကိုလည်း တွေ့မြင်ရပါတယ်။) ဘုရားသခင်ရဲ့ သစ္စာရှိမှု၊ မှန်ကန်မှု အပြင် တချို့က ဘုရားသခင်ရဲ့ ဉာဏ်ပညာလို့လည်း တစ်ယောက်ယောက်က ပြောလိုက်တယ်။ ဘာကျန်သေးလဲ။ (ဘုရားသခင်ရဲ့ အနန္တတန်ခိုးပါ။) (ဘုရားသခင်ရဲ့ ဖြောင့်မတ်ခြင်းနဲ့ ကောင်းမွန်ခြင်းကို တွေ့မြင်ရခြင်းပါ။) သင်တို့ အဖြေက ချက်ကျလက်ကျ မဖြစ်သေးဘူး၊ နည်းနည်း ထပ်စဉ်းစားကြည့်ပါဦး။ (ကိုယ်တော်ရဲ့ လူသားမျိုးနွယ်ကို တာဝန်ယူမှု၊ ဦးဆောင်မှု၊ စီမံခန့်ခွဲမှု တွေမှာ ဘုရားသခင်ရဲ့ အာဏာနဲ့ တန်ခိုးဟာ ပေါ်လွင် ထင်ရှားနေပါတယ်။ ဒါဟာ အင်မတန် သဘာဝကျပြီး မှန်ကန်တဲ့အချက် ဖြစ်တယ်။ ကိုယ်တော်ဟာ သူ့အလုပ်သာ သူလုပ်နေပြီး ဘယ်ဖန်ဆင်းခံ၊ ဖန်ဆင်းမခံအရာမှ အဲဒီလို အာဏာနဲ့ တန်ခိုး မရှိပါဘူး။) သင်တို့အားလုံး ကိုယ့်ရဲ့ မှတ်စုတွေကို ကြည့်နေကြတာလား။ ဘုရားသခင်ရဲ့ အာဏာအကြောင်း သင်တို့ တကယ် အသိဝင်သွားတာလား။ ဘုရားသခင်ရဲ့ အာဏာကို သင်တို့ထဲက တယောက်ယောက် တကယ် နားလည်သွားပြီလား။ (ဘုရားသခင်ဟာ ကျွန်တော်တို့ကို ငယ်ငယ်လေးကတည်းက ကြည့်ရှုစောင့်ရှောက် လာခဲ့ပါတယ်၊ အဲဒီအရာကနေ ကျွန်တော်တို့ဟာ ဘုရားသခင်ရဲ့ အာဏာကို တွေ့မြင်ရပါတယ်။ ကျရောက်လာတဲ့ အန္တရာယ်တိုင်းကို ကျွန်တော်တို့ မသိခဲ့ပေမယ့် ဘုရားသခင်က ကျွန်တော်တို့ကို ကန့်လန့်ကာ နောက်ကွယ်ကနေ အမြဲတမ်း ကာကွယ်ပေးပါတယ်၊ ဒါဟာလည်း ဘုရားသခင်ရဲ့ အာဏာပါပဲ။) ပြောသွားတာ အရမ်းကောင်းတယ်။

ဘုရားသခင်ရဲ့ အာဏာကို ဆွေးနွေးတဲ့အခါ ဗဟိုအချက်အချာက ဘယ်မှာလဲ၊ အဓိကအကြောင်းအရာက ဘာလဲ။ ဘာဖြစ်လို့ ဒီအကြောင်းအရာကို ဆွေးနွေးဖို့ လိုအပ်တာလဲ။ ပထမဆုံးအနေနဲ့ ဒီအကြောင်းအရာကို ဆွေးနွေးရတဲ့ ရည်ရွယ်ချက်က ဘုရားသခင်ရဲ့ ဖန်ဆင်းရှင်ဆိုတဲ့ ဂုဏ်နဲ့ အရာခပ်သိမ်းကြားက သူ့ရဲ့ အနေအထားကို လူတွေ အတည်ပြုဖို့ ဖြစ်တယ်။ ဒါက သူတို့တွေ နားလည်နိုင်တဲ့၊ မြင်တွေ့နိုင်တဲ့၊ ခံစားနိုင်တဲ့ အရာတစ်စုံတစ်ခုပဲ။ သင်မြင်တာ၊ သင်ခံစားရတာတွေဟာ ဘုရားသခင်ရဲ့ လှုပ်ရှားမှု၊ ဘုရားသခင်ရဲ့ နှုတ်ကပတ်တော်နဲ့ ဘုရားသခင်ရဲ့ စကြဝဠာကို ထိန်းချုပ်မှုတွေ ဖြစ်တယ်။ အဲဒီတော့ ဘုရားသခင်ရဲ့ အာဏာကို မြင်တဲ့အခါ၊ သင်ယူတဲ့အခါနဲ့ အဲဒီကနေတစ်ဆင့် သူတို့တွေ အသိတရားရတဲ့အခါ ဒီအရာတွေကနေ လူတွေဟာ ဘယ်လိုစစ်မှန်တဲ့ နားလည်မှုမျိုး ရသလဲ။ ဒါက ပထမအချက်ဖြစ်ပြီး ငါတို့ ဆွေးနွေးပြီးသားအရာပဲ။ ဒုတိယအချက်အနေနဲ့ ဘုရားသခင် ဘာတွေပြောခဲ့တယ်၊ ဘာတွေလုပ်ခဲ့တယ်၊ အာဏာနဲ့ ဘယ်လိုထိန်းချုပ်ခဲ့တယ် ဆိုတာကို လူတွေ သိမြင်လာတဲ့အခါ ဘုရားသခင်ရဲ့ တန်ခိုးနဲ့ ဉာဏ်ပညာကို သိမြင်လာမယ်။ ဒီအရာဟာ အရာအားလုံးကို ထိန်းချုပ်ဖို့ ဘုရားသခင်ရဲ့ ကြီးမြတ်တဲ့ တန်ခိုးနဲ့ ကိုယ်တော်က အဲ့ဒီလို လုပ်ဆောင်တဲ့အခါ ဘယ်လောက်ထိ ဉာဏ်ပညာရှိသလဲဆိုတာကို သိမြင်လာစေတယ်။ ဒါဟာ ငါတို့ အရင်တုန်းက ဆွေးနွေးခဲ့ဖူးတဲ့ ဘုရားသခင်ရဲ့ အတုမရှိ အာဏာအကြောင်းရဲ့ ဗဟိုအချက်အချာနဲ့ အဓိကအချက် မဟုတ်လား။ အဲဒီအကြောင်း ဆွေးနွေးထားတာတောင် မကြာသေး၊ သင်တို့ထဲက တစ်ချို့က အဲဒီအချက်ကို မေ့လျော့သွားပြီဆိုတော့ သင်တို့ဟာ ဘုရားသခင်ရဲ့ အာဏာကို ကျကျနန နားမလည်သေးဘူးဆိုတာ ထင်ရှားတယ်၊ သင်တို့ဟာ ဘုရားသခင်ရဲ့ အာဏာကို မတွေ့ဖူးသေးဘူးလို့တောင် ပြောလို့ရတယ်။ အခု သင် ဒါကို နည်းနည်း နားလည်လာပြီလား။ ဘုရားသခင်ရဲ့ အာဏာ လှုပ်ရှားတာကို သင်မြင်တဲ့အခါ သင် တကယ် ဘယ်လိုခံစားရမလဲ။ ဘုရားသခင်ရဲ့ အစွမ်းကို သင် တကယ်ခံစားရဖူးလား။ (ခံစားဖူးပါတယ်။) ဘုရားသခင်က စကြဝဠာကို ဖန်ဆင်းတဲ့ အကြောင်းအရာကို သင်ဖတ်ရတဲ့အခါမှာ ကိုယ်တော်ရဲ့ တန်ခိုးကို သင်တို့ ခံစားရမယ်၊ ကိုယ်တော်ရဲ့ အနန္တတန်ခိုးကိုလည်း သင်ခံစားရမယ်။ လူသားတွေရဲ့ ကံကြမ္မာပေါ် ဘုရားသခင်ရဲ့ အုပ်စိုးမှုကို မြင်ရတဲ့အခါ သင်ဘယ်လိုခံစားရလဲ။ ဘုရားသခင်ရဲ့ တန်ခိုးနဲ့ ဘုရားသခင်ရဲ့ ဉာဏ်ပညာကို သင်ခံစားရလား။ (ခံစားရပါတယ်။) ဘုရားသခင်သာ အဲဒီလို တန်ခိုးမရှိခဲ့ရင်၊ ကိုယ်တော်သာ အဲဒီလို ဉာဏ်ပညာမရှိခဲ့ရင် ကိုယ်တော်မှာ စကြဝဠာကို အုပ်စိုးဖို့ အရည်အချင်းရှိပါ့မလား၊ လူတွေရဲ့ ကံကြမ္မာကို အုပ်စိုးဖို့ရော အရည်အချင်းရှိပါ့မလား။ (မရှိပါဘူး။) တကယ်လို့ လူတွေမှာ အလုပ်တစ်ခုလုပ်ဖို့ အရည်အချင်းမရှိဘူး၊ လိုအပ်တဲ့ ခွန်အားမရှိဘူး၊ သင့်တော်တဲ့ အတတ်ပညာ၊ အသိပညာ ချွတ်ယွင်းနေတယ်ဆိုရင် အဲဒီလူတွေက အဲဒီအလုပ်အတွက် အရည်အချင်း ပြည့်မီပါ့မလား။ အဲဒီလူတွေက အဲဒီအလုပ်အတွက် လုံးဝ အရည်အချင်း ပြည့်မီမှာ မဟုတ်ဘူး၊ လူတစ်ယောက်ရဲ့ ကြီးမားတဲ့ အမှုအရာတွေကို ဆောင်ရွက်နိုင်မယ့် အလားအလာဟာ အဲဒီလူရဲ့ အရည်အချင်းတွေ ဘယ်လောက် ကြီးမားလဲ ဆိုတဲ့အပေါ် မူတည်တယ်။ ဘုရားသခင်မှာ အဲဒီလို တန်ခိုးသာမက ဉာဏ်ပညာလည်း ရှိတယ်၊ ဒါ့ကြောင့် ကိုယ်တော်မှာ အာဏာလည်း ရှိတယ်၊ ဒါဟာ အတုမရှိတဲ့ အချက်ပဲ။ ဒီစကြဝဠာကြီးထဲမှာ ဘုရားသခင်လို တန်ခိုးရှိတဲ့ ဖန်ဆင်းခံ သတ္တဝါ ဒါမှမဟုတ် လူပုဂ္ဂိုလ် ဆိုတာမျိုး သင်တွေ့ဖူးသလား။ ကောင်းကင်၊ မြေကြီးနဲ့ အရာအားလုံးကို ဖန်ဆင်းနိုင်စွမ်း ရှိရုံသာမက အဲဒီအရာအားလုံးကို အုပ်စိုးနိုင်စွမ်းရှိတဲ့အရာ တစ်စုံတစ်ခု ဒါမှမဟုတ် တစ်စုံတစ်ယောက် ရှိသလား။ လူသားမျိုးနွယ် အားလုံးကို အုပ်ချုပ်၊ ဦးဆောင်ပြီး အမြဲတည်ရှိနေတဲ့၊ တစ်ပြိုင်နက် နေရာတိုင်းမှာ တည်ရှိနေတဲ့အရာ တစ်စုံတစ်ခု ဒါမှမဟုတ် တစ်စုံတစ်ယောက် ရှိသလား။ (မရှိပါဘူး။) ဘုရားသခင်ရဲ့ အတုမရှိ အာဏာနဲ့ ပတ်သက်တဲ့ အနက်အဓိပ္ပာယ် အစစ်အမှန်ကို သင်တို့ အခုနားလည်ပြီလား။ သင်တို့ နားလည်လာပြီလား။ (နားလည်လာပါပြီ။) ဒါဟာ ဘုရားသခင်ရဲ့ အတုမရှိ အာဏာနဲ့ ပတ်သက်တဲ့အချက်တွေကို ငါတို့ ပြန်သုံးသပ်တာ ဖြစ်တယ်။

ငါတို့ ဆွေးနွေးခဲ့တဲ့ ဒုတိယအချက်က ဘာလဲ။ (ဘုရားသခင်ရဲ့ ဖြောင့်မတ်တဲ့ စိတ်သဘောထားပါ။) ဘုရားသခင်ရဲ့ ဖြောင့်မတ်တဲ့ စိတ်သဘောထားနဲ့ ပတ်သက်လို့ ငါတို့ အကျယ်တဝင့် မဆွေးနွေးခဲ့ဘူး။ ဘာကြောင့်လဲ သိလား။ အကြောင်းပြချက် တစ်ခုရှိတယ်၊ အခုအဆင့်မှာတော့ ဘုရားသခင်ရဲ့ အလုပ်ဟာ အဓိကအားဖြင့် တရားစီရင်ခြင်းနဲ့ ပြစ်တင်ဆုံးမခြင်းပဲ ရှိသေးတယ်။ ဘုရားသခင်ရဲ့ ဖြောင့်မတ်တဲ့ စိတ်သဘောထားကို နိုင်ငံတော်ခေတ်မှာ ရှင်းရှင်းလင်းလင်းနဲ့ အထူးတလည် ဖော်ပြပြီး ဖြစ်တယ်။ အဲဒီတုန်းက ကိုယ်တော်ဟာ စကြဝဠာကို ဖန်ဆင်းချိန်တုန်းကတည်းက မပြောခဲ့တဲ့ စကားကို အဲဒီခေတ်မှာ ပြောခဲ့တယ်၊ ကိုယ်တော်ရဲ့ နှုတ်ကပတ်တော်ကို သိမြင်ပြီးသူတိုင်း၊ ကိုယ်တော်ရဲ့ နှုတ်ကပတ်တော်ကို တွေ့ကြုံခံစားပြီးသူတိုင်း၊ ကိုယ်တော်ရဲ့ ဖြောင့်မတ်တဲ့ စိတ်သဘောထား ဖော်ပြတာကို သိမြင်ပြီး ဖြစ်တယ်။ အဲဒါဆိုရင် ကိုယ်တော်ရဲ့ ဖြောင့်မတ်တဲ့ စိတ်သဘောထားနဲ့ ပတ်သက်လို့ ငါတို့ ဆွေးနွေးခဲ့တဲ့ အဓိကအချက်က ဘာလဲ။ သင်တို့ သင်ယူခဲ့သမျှကို နက်နက်ရှိုင်းရှိုင်း နားလည်သဘောပေါက်လာပြီလား။ သင်တို့ အတွေ့အကြုံတွေကနေရော နားလည်မှု ရကြရဲ့လား။ (အဲဒီအချိန်တုန်းက လူတွေဟာ အင်မတန် အကျင့်ပျက်နေကြပြီး ဘုရားသခင်ကို အမျက်တော်ရှစေခဲ့လို့ ဘုရားသခင်က သောဒုံမြို့ကို မီးရှို့ဖျက်ဆီးခဲ့တာပါ။ အဲဒီအချက်ကနေ ဘုရားသခင်ရဲ့ ဖြောင့်မတ်တဲ့ စိတ်သဘောထားကို ကျွန်တော်တို့ သိမြင်လာတာပါ။) အရင်ဆုံး ကြည့်လိုက်ရအောင်၊ ဘုရားသခင်ကသာ သောဒုံမြို့ကို မဖျက်ဆီးခဲ့ဘူးဆိုရင် သင်ဟာ ဘုရားသခင်ရဲ့ ဖြောင့်မတ်တဲ့ စိတ်သဘောထားကို သိနိုင်ပါ့မလား။ အဲဒါဆိုရင်လည်း သင်ဟာ ဘုရားသခင်ရဲ့ ဖြောင့်မတ်တဲ့ စိတ်သဘောထားကို သိနိုင်တုန်းပါပဲ၊ ဟုတ်တယ်မဟုတ်လား။ ဘုရားသခင်ရဲ့ ဖြောင့်မတ်တဲ့ စိတ်သဘောထားကို နိုင်ငံတော်ခေတ်မှာ ကိုယ်တော်ပြောခဲ့တဲ့ စကားလုံးတွေမှာ သင် မြင်နိုင်တယ်၊ အဲဒါတင်မက ကိုယ်တော်ရဲ့ တရားစီရင်မှု၊ ပြစ်တင်ဆုံးမမှုနဲ့ လူတွေကို ကျိန်ဆိုတဲ့ အမှုတွေမှာလည်း ကိုယ်တော်ရဲ့ ဖြောင့်မတ်တဲ့ စိတ်သဘောထားကို မြင်နိုင်တယ်။ နိနေဝေမြို့ကို ခွင့်လွှတ်လိုက်တဲ့အချက်ကနေ ကိုယ်တော်ရဲ့ ဖြောင့်မတ်တဲ့ စိတ်သဘောထားကို သင်တို့ မြင်ရဲ့လား။ (မြင်ပါတယ်။) ဒီခေတ်မှာ ဘုရားသခင်ရဲ့ ကရုဏာ၊ ချစ်ခြင်းမေတ္တာနဲ့ သည်းခံမှုကို သင်တွေ့နိုင်တယ်။ လူတွေ နောင်တရတဲ့အခါ သူတို့အပေါ် ဘုရားသခင်လည်း စိတ်အပြောင်းအလဲ ဖြစ်သွားတာကို သင် မြင်နိုင်တယ်။ ဘုရားသခင်ရဲ့ ဖြောင့်မတ်တဲ့ စိတ်သဘောထားကို နားလည်ဖို့ ဒီဥပမာနှစ်ခုနဲ့ ဆွေးနွေးလိုက်ခြင်းအားဖြင့် ကိုယ်တော်ရဲ့ မှန်ကန်တဲ့ စိတ်သဘောထားဟာ ပေါ်လွင်ထင်ရှားလာတယ်။ ဒါပေမဲ့ တကယ့်လက်တွေ့မှာတော့ ဒီသမ္မာကျမ်းစာ ပုံဝတ္ထုနှစ်ပုဒ်ကပဲ ဘုရားသခင်ရဲ့ ဖြောင့်မတ်တဲ့ စိတ်သဘောထားအကြောင်းကိုပဲ ဖော်ပြနေတာမဟုတ်၊ ဘုရားသခင်ရဲ့ နှုတ်ကပတ်တော်နဲ့ ကိုယ်တော်ရဲ့ အလုပ်အကြောင်း သင်တို့ ယခု လေ့လာ၊ နားလည်ပြီးခဲ့သမျှထဲ သင့်ရဲ့ လက်ရှိအတွေ့အကြုံထဲက ဘုရားသခင်ရဲ့ ဖြောင့်မတ်တဲ့ စိတ်သဘောထားဆိုတာ ဘာလဲ။ သင်တို့ရဲ့ ကိုယ်ပိုင် အတွေ့အကြုံတွေနဲ့ ရှင်းပြပါ။ (လူတွေအတွက် ဘုရားသခင် ဖန်ဆင်းထားတဲ့ ပတ်ဝန်းကျင်တွေမှာ အဲဒီလူတွေဟာ သမ္မာတရားကို ရှာဖွေနိုင်တဲ့အခါ၊ ဘုရားသခင်ရဲ့ အလိုဆန္ဒအတိုင်း လုပ်ဆောင်တဲ့အခါ သူတို့ဟာ ဘုရားသခင်ရဲ့ ချစ်ခြင်းမေတ္တာနဲ့ ကရုဏာကို တွေ့ရမှာ ဖြစ်တယ်။ သူတို့ကို ဘုရားသခင်က လမ်းပြတယ်၊ ဉာဏ်အလင်းပြတယ်၊ သူတို့ရဲ့ အတွင်းသဏ္ဌာန်က အလင်းကို သူတို့ ကိုယ်တိုင် ခံစားရစေတယ်။ လူတွေ ဘုရားသခင်ကို ဆန့်ကျင်တဲ့အခါ၊ ကိုယ်တော်ကို ခုခံတဲ့အခါ၊ ကိုယ်တော်ရဲ့ ဆန္ဒကို ဆန့်ကျင်တဲ့အခါ ဘုရားသခင်က လူတွေကို ပစ်ပယ်လိုက်သလို လူတွေရဲ့ အတွင်းသဏ္ဌာန်မှာ အမှောင် ကြီးစိုးတယ်။ အဲဒါကို ကြည့်ခြင်းအားဖြင့် ဘုရားသခင်ရဲ့ ဖြောင့်မတ်တဲ့ စိတ်သဘောထားရဲ့ သန့်ရှင်းမှုကို ကျွန်တော်တို့ ခံစားရတယ်၊ ဘုရားသခင်ဟာ သန့်ရှင်းတဲ့ နိုင်ငံတော်မှာ ပေါ်လာပြီး ကိုယ်တော်ကို ညစ်ညမ်းတဲ့ နေရာတွေမှာ တွေ့ရမှာ မဟုတ်။) (ကျွန်တော်တို့ အတွေ့အကြုံတွေကနေ တစ်ဆင့် သန့်ရှင်းသော ဝိညာဉ်တော်ရဲ့ အလုပ်ထဲမှာ ဘုရားသခင်ရဲ့ ဖြောင့်မတ်တဲ့ စိတ်သဘောထားကို ကျွန်တော်တို့ သိမြင်ရပါတယ်။ ကျွန်တော်တို့ ဒီအတိုင်းနေတဲ့အခါမှာ ဒါမှမဟုတ် ဘုရားသခင်ကို ဆန့်ကျင်ခုခံတဲ့အခါမှာ သန့်ရှင်းတဲ့ ဝိညာဉ်တော်ဟာ ကိုယ်ထင်မပြဘဲ ဘာမှမလုပ်ဘဲ နေပါတယ်။ တခါတလေမှာ ကျွန်တော်တို့ ဆုတောင်းပေမယ့် ဘုရားသခင်ကို မခံစားရဘူး၊ ဆုတောင်းရင်တောင်မှ ကိုယ်တော်ကို ဘာပြောရမှန်းမသိ ဖြစ်နေတတ်တယ်၊ ဒါပေမဲ့ လူတစ်ယောက်ရဲ့ အခြေအနေပြောင်းသွားပြီး ဘုရားသခင်နဲ့ ပူးပေါင်းဆောင်ရွက်ချင်လာတဲ့အခါ အဲဒီလူဟာ ကိုယ့်အယူအဆတွေ၊ ကိုယ့်စိတ်ကူး စိတ်သန်းတွေကို ဘေးချိတ်ပြီး မိမိကိုယ်ကို တိုးတက်အောင် ကြိုးစားလာတဲ့အခါမှာ ဘုရားသခင်ရဲ့ ပြုံးနေတဲ့ မျက်နှာဟာ တဖြည်းဖြည်း ပေါ်လာပါတယ်။) သင်တို့ ဘာဖြည့်ပြောချင်သေးလဲ။ (ကိုယ်တော်ကို သစ္စာဖောက်တဲ့အခါ၊ ဘုရားသခင်က လူကို လျစ်လျူရှုပြီး ကိုယ်ထင်ပြမှာမဟုတ်။) (ကျွန်တော်ကတော့ ဘုရားသခင်ရဲ့ ဖြောင့်မတ်တဲ့ စိတ်သဘောထားကို ကိုယ်တော်က လူတွေကို ဆက်ဆံပုံကို ကြည့်ခြင်းအားဖြင့် မြင်ပါတယ်။ ကျွန်တော်တို့ ညီအစ်ကို မောင်နှမတွေအားလုံးဟာ ဝိညာဉ်အသက်တာအရရော စွမ်းပကားအရရော မတူညီတဲ့အတွက် ဘုရားသခင်က ကျွန်တော်တို့ တစ်ယောက်ချင်းစီက လိုချင်တာလည်း မတူညီပါဘူး၊ ဘုရားသခင်က ပေးတဲ့ ဉာဏ်အလင်းရောင်ကို ကျွန်တော်တို့ ရရှိပုံချင်းလည်း မတူပါဘူး၊ ဒီလိုနည်းနဲ့ ကျွန်တော်ကတော့ ဘုရားသခင်ရဲ့ ဖြောင့်မတ်ခြင်း သိမြင်ရပါတယ်။ အဲဒါဘာ့ကြောင့်လဲဆိုတော့ လူလူချင်း တစ်သမတ်တည်း ဆက်ဆံလို့ မရပါဘူး၊ ဘုရားသခင်ကသာ ဆက်ဆံနိုင်ပါတယ်။) သင်တို့ဟာ လက်တွေ့ကျတဲ့ အသိတစ်ချို့ကို ပြောသွားကြတာပဲ။

ဘုရားသခင်ရဲ့ ဖြောင့်မတ်တဲ့ စိတ်သဘောထားကို သိခြင်းနဲ့ ပတ်သက်တဲ့ အဓိကအချက်ကို သင်တို့ နားလည်ကြပြီလား။ ဒီအချက်နဲ့ ပတ်သက်လို့ သင့်မှာ သင့်အတွေ့အကြုံတွေအကြောင်း ပြောစရာတွေ အများကြီး ရှိလောက်ပေမယ့် ငါ သင်တို့ကို ပြောပြစရာ အဓိကအချက်အလက် အနည်းငယ်ရှိတယ်။ ဘုရားသခင်ရဲ့ ဖြောင့်မတ်တဲ့ စိတ်သဘောထားကို နားလည်ဖို့ သင်ဟာ ဘုရားသခင်ရဲ့ ခံစားချက်ကို အရင် နားလည်ရမယ် –– ကိုယ်တော် ဘာကို မုန်းသလဲ၊ ကိုယ်တော် ဘာကို ရွံရှာသလဲ၊ ကိုယ်တော် ဘာကို ချစ်သလဲ၊ ကိုယ်တော် ဘယ်သူ့ကို သည်းခံနိုင်သလဲ၊ ဘယ်သူ့ကို ကိုယ်တော်က သနားကြင်နာသလဲ၊ ဘယ်လိုလူမျိုးက ကိုယ်တော်ရဲ့ သနားကြင်နာခြင်း ခံရသလဲ။ ဒီအချက်က သိထားရမယ့် အရေးကြီးတဲ့အချက် ဖြစ်တယ်။ ဒါ့အပြင် ဘုရားသခင်က ဘယ်လောက်ပဲ ချစ်တယ်ဆိုပါစေ၊ ကိုယ်တော်မှာ လူတွေအတွက် အကြင်နာတရားနဲ့ အချစ် ဘယ်လောက်ပဲ ရှိတယ်ဆိုပါစေ ဘုရားသခင်ဟာ ကိုယ်တော်ရဲ့ ဂုဏ်နဲ့ နေရာကို စော်ကားသူ ဘယ်သူ့ကိုမှ သည်းခံမှာမဟုတ်၊ ကိုယ်တော်ရဲ့ သိက္ခာကို စော်ကားသူ ဘယ်သူ့ကိုမှလည်း သည်းခံမှာမဟုတ်ဘူး ဆိုတာ သင် နားလည်ထားရမယ်။ ဘုရားသခင်က လူတွေကို ချစ်တယ်ဆိုပေမယ့် လူတွေကို ကိုယ်တော်က ဖျက်ဆီးနေတာ မဟုတ်ဘူး။ ကိုယ်တော်က လူတွေကို ကိုယ်တော်ရဲ့ အချစ်၊ ကိုယ်တော်ရဲ့ ကြင်နာခြင်း၊ ကိုယ်တော်ရဲ့ သည်းခံခြင်းတွေ ပေးပေမယ့် လူတွေကို ကိုယ်တော်က ဘယ်တော့မှ အလိုမလိုက်ဘူး၊ ကိုယ်တော့်မှာ ကိုယ်တော်ရဲ့ နည်းဥပဒေသတွေနဲ့ ကိုယ်တော်ရဲ့ ကန့်သတ်ချက်တွေ ရှိတယ်။ ဘုရားသခင်ရဲ့ အချစ်ကို သင် ဘယ်အတိုင်းအတာထိ ခံစားရပါစေ၊ အဲဒီအချစ်က ဘယ်လောက်ပဲ နက်ရှိုင်းပါစေ ဘုရားသခင်ကို တခြားလူတစ်ယောက်ကို ဆက်ဆံသလို လုံးဝမဆက်ဆံရဘူး။ ဘုရားသခင်က လူတွေကို ကိုယ်တော်နဲ့ နီးနီးကပ်ကပ် ဆက်ဆံပေမယ့် တကယ်လို့ လူတစ်ယောက်ဟာ ဘုရားသခင်ကို တခြားလူတစ်ယောက်လို ဆက်ဆံမိရင်၊ ကိုယ်တော်ကို ဖန်ဆင်းခံ တခြားသက်ရှိတစ်ယောက်အလား ဆက်ဆံမိရင်၊ သူငယ်ချင်းတစ်ယောက်လို ဒါမှမဟုတ် ကိုးကွယ်ရာ ရုပ်ဝတ္ထုတစ်ခုလို ထင်မိရင် ဘုရားသခင်ဟာ ကိုယ်တော်ရဲ့ မျက်နှာကို ဖုံးကွယ်ထားပြီး အဲဒီလူတွေကို စွန့်ပယ်ထားလိမ့်မယ်။ ဒါဟာ ကိုယ်တော်ရဲ့ စိတ်သဘောထားဖြစ်ပြီး ဒီကိစ္စနဲ့ ပတ်သက်လို့ ကိုယ်တော့်ကို မေ့လျော့ပေါ့ဆမှုနဲ့ ဆက်ဆံတဲ့ ဘယ်သူ့ကိုမှ ကိုယ်တော်က ခွင့်လွှတ်မှာ မဟုတ်ဘူး။ အဲဒါကြောင့် ဘုရားသခင်ရဲ့ စိတ်သဘောထားကို ကိုယ်တော်ရဲ့ နှုတ်ကပတ်တော်ထဲ ပြောလေ့ရှိတယ် –– သင် ခရီးတွေ ဘယ်လောက်ပဲ သွားပြီးပါစေ၊ သင် အလုပ် ဘယ်လောက်များများပဲ လုပ်ပြီးပါစေ ဒါမှမဟုတ် ဘုရားသခင်အတွက် ဘယ်လောက်ပဲ ဒုက္ခခံပြီးပါစေ ဘုရားသခင်ရဲ့ စိတ်သဘောထားကို စော်ကားမိတာနဲ့ သင်တို့ တစ်ဦးချင်း လုပ်ထားတဲ့အရာအလိုက် ဘုရားသခင် ပြန်ပေးဆပ်လိမ့်မယ်။ သင်တွေ့မြင်ဖူးပြီလား။ (တွေ့မြင်ဖူးပါပြီး။) အဓိပ္ပာယ်က ဘုရားသခင်က လူတွေကို ကိုယ်တော်နဲ့ နီးစပ်တယ်လို့ ထင်မြင်ကောင်း ထင်မြင်နိုင်ပေမယ့် လူတွေက ဘုရားသခင်ကို မိတ်ဆွေလို၊ ဆွေမျိုးလို သဘောထားလို့ မရဘူးဆိုတာပဲ။ ဘုရားသခင်ကို သင့် ဘော်ဒါတစ်ယောက်လို သဘောမထားနဲ့။ သင် ကိုယ်တော်ဆီက အချစ်မေတ္တာ ဘယ်လောက်ပဲရရ၊ ကိုယ်တော့်ဆီက ခွင့်လွှတ်မှု ဘယ်လောက်ပဲရရ ဘုရားသခင်ကို မိတ်ဆွေတစ်ယောက်လို သဘောမထားရဘူး။ ဒါဟာ ဘုရားသခင်ရဲ့ ဖြောင့်မတ်တဲ့ စိတ်သဘောထားပဲ။ နားလည်တယ် မဟုတ်လား။ ဒါနဲ့ပတ်သက်ပြီး ငါ ထပ်ပြောဖို့ လိုသေးလား။ သင်တို့မှာ ဒါနဲ့ ပတ်သက်ပြီး အရင်က နားလည်ထားတာ ရှိလား။ ယေဘုယျအားဖြင့်ပြောရရင် အယူဝါဒကို နားလည်သူ ဖြစ်ဖြစ်၊ အဲဒီအကြောင်း လုံးဝ မစဉ်းစားထားသူပဲ ဖြစ်ဖြစ် ဒီကိစ္စဟာ အမှားအလွယ်ဆုံးပဲ။ လူတွေက ဘုရားသခင်ကို စော်ကားမိတဲ့အခါမှာ သူတို့လုပ်တဲ့ အလုပ် ဒါမှမဟုတ် သူတို့ပြောတဲ့ စကားတစ်ခွန်းကြောင့် စော်ကားမိတာ မဟုတ်၊ သူတို့ရဲ့ ကိုင်စွဲထားတဲ့ စိတ်သဘောထားနဲ့ သူတို့ ရောက်နေတဲ့ အနေအထားကြောင့် စော်ကားမိတာ။ ဒါဟာ အင်မတန် ကြောက်စရာကောင်းတယ်။ လူတချို့က သူတို့ဟာ ဘုရားသခင်ကို နားလည်တယ်၊ ကိုယ်တော်ကို သိတယ် လို့ ယုံကြည်ပြီး ဘုရားသခင် ကြိုက်မယ့် အရာတစ်ချို့ကိုတောင် လုပ်ကောင်း လုပ်တတ်ကြမယ်။ သူတို့ဟာ သူတို့ကိုယ်သူတို့ ဘုရားသခင်နဲ့ တန်းတူသတ်မှတ်လာကြပြီး ဘုရားသခင်ရဲ့ မိတ်ဆွေတွေလို့ သူတို့ကိုယ်သူတို့ ပါးနပ်စွာ ခံယူလိုက်ကြတယ်။ ဒီလို ခံစားချက်တွေဟာ လုံးဝ လွဲနေတယ်။ တကယ်လို့ သင်ဟာ ဒီကိစ္စနဲ့ပတ်သက်ပြီး နက်နက်ရှိုင်းရှိုင်း နားမလည်ရင်၊ တကယ်လို့ သင်ဟာ ဒီကိစ္စကို ရှင်းရှင်းလင်းလင်း နားမလည်ရင် ဘုရားသခင်ကို စော်ကားမိဖို့ အရမ်းလွယ်တယ်၊ ကိုယ်တော်ရဲ့ ဖြောင့်မတ်တဲ့ စိတ်သဘောထားကို စော်ကားမိဖို့လည်း အရမ်းလွယ်တယ်။ သင် ဒါကို အခု နားလည်ပြီ မဟုတ်လား။ (နားလည်ပါပြီ။) ဘုရားသခင်ရဲ့ ဖြောင့်မတ်တဲ့ စိတ်သဘောထားဟာ အတုမရှိ မဟုတ်လား။ လူသားမျိုးနွယ်ရဲ့ အရည်အသွေးနဲ့ နှိုင်းလို့ရလား။ လူတစ်ယောက်ရဲ့ အရည်အသွေးနဲ့ရော တန်းတူ ဟုတ်ရဲ့လား။ လုံးဝ မဟုတ်လား။ (မဟုတ်ပါဘူး။) ဒါ့ကြောင့် သင်ဟာ ဘုရားသခင်က လူတွေကို ဘယ်လိုပဲ ဆက်ဆံပါစေ၊ ဘုရားသခင်က လူတွေကို ဘယ်လိုပဲ မြင်ပါစေ၊ ဘုရားသခင်ရဲ့ အနေအထား၊ အာဏာနဲ့ ဂုဏ်ဟာ ဘယ်တော့မှ မပြောင်းလဲဘူးဆိုတာ သင်မေ့လို့မရဘူး။ လူသားမျိုးနွယ်အတွက် ဘုရားသခင်ဟာ အမြဲတမ်း သခင်ဖြစ်ပြီး ဖန်ဆင်းရှင်လည်း ဖြစ်တယ်။ သင် နားလည်ပြီ မဟုတ်လား။ (နားလည်ပါပြီ။)

ဘုရားသခင်ရဲ့ သန့်ရှင်းမှုနဲ့ ပတ်သက်လို့ သင်တို့ ဘာတွေ လေ့လာပြီးပြီလဲ။ စာတန်ရဲ့ မကောင်းမှုတွေနဲ့ ဆန့်ကျင်တယ် ဆိုတာကလွဲလို့ ဘုရားသခင်ရဲ့ သန့်ရှင်းမှုကို ဆွေးနွေးရာမှာ အဓိကအချက်က ဘာလဲ။ ဒါဟာ ဘုရားသခင်ရဲ့ အရာအားလုံးနဲ့ ဖြစ်ခြင်းပဲ မဟုတ်ဘူးလား။ ဘုရားသခင်ရဲ့ အရာအားလုံးနဲ့ ဖြစ်ခြင်းဆိုတာ ဘုရားသခင် ကိုယ်တိုင်အတွက် အတုမရှိဘူး မဟုတ်လား။ (ဟုတ်ပါတယ်။) ဘုရားသခင် ဖန်ဆင်းထားတဲ့ ဘယ်အရာမှာမှ ဒါမရှိဘူး။ ဒါ့ကြောင့် ဘုရားသခင်ရဲ့ သန့်ရှင်းမှုဟာ အတုမရှိဘူးလို့ ငါတို့ ပြောနိုင်တယ်။ ဒါဟာ သင်တို့ နားလည်နိုင်တဲ့ အကြောင်းအရာတစ်ခု ဖြစ်တယ်။ ငါတို့ဟာ ဘုရားသခင်ရဲ့ သန့်ရှင်းမှု အကြောင်း ဆွေးနွေးဖို့ သုံးကြိမ် တွေ့ပြီးပြီ။ ဘုရားသခင်ရဲ့ သန့်ရှင်းမှု ဆိုတာကို သင် ဘယ်လို ယုံကြည်ထားလဲ ဆိုတာကို သင် နားလည်သလို သင့် ကိုယ်ပိုင်စကားလုံးနဲ့ ပြောပါ။ (ဘုရားသခင်က နောက်ဆုံး ကျွန်တော်တို့နဲ့ ဆက်သွယ်ခဲ့တုန်းက ကျွန်တော်တို့ ကိုယ်တော့်ရှေ့မှာ ဦးညွှတ်ခဲ့ကြတယ်။ ကိုယ်တော် ဘယ်မှာ ရှိတယ်ဆိုတာကို ကျွန်တော်တို့ ကြားသိခဲ့ရတယ်။ ဝပ်စင်းခြင်းရယ် ကိုယ်တော်ကို ကိုးကွယ်ဖို့ ဦးညွှတ်ခြင်းရယ်နဲ့ ပတ်သက်တဲ့ သမ္မာတရားကို ဘုရားသခင်က ကျွန်တော်တို့နဲ့ မိတ်သဟာယဖွဲ့ ဆွေးနွေးခဲ့တယ်။ ကျွန်တော်တို့ဟာ ကိုယ်တော်ရဲ့ သတ်မှတ်ချက်တွေနဲ့ မကိုက်ညီတဲ့အချိန်မှာ ကိုယ်တော်ကို ဦးညွှတ်ပြီး ကိုးကွယ်တာဟာ ကိုယ်တော်ရဲ့ အလိုတော်နဲ့ မညီဘူးဆိုတာကို မြင်ခဲ့ရတယ်၊ အဲဒီကနေ ကျွန်တော်တို့ဟာ ဘုရားသခင်ရဲ့ သန့်ရှင်းမှုကို မြင်ခဲ့ရတယ်။) အရမ်းမှန်တယ်။ နောက်ပြီး ဘာရှိသေးလဲ။ (ဘုရားသခင်ရဲ့ လူသားမျိုးနွယ်ကို ပြောတဲ့ နှုတ်ကပတ်တော်မှာ ကိုယ်တော်ဟာ ရှင်းရှင်းလင်းလင်း ပြောတယ်၊ ကိုယ်တော်ဟာ လိုရင်းနဲ့ အဓိက အချက်ကိုပဲ ပြောတယ်၊ စာတန်ကတော့ ဝေ့လည်ကြောင်ပတ် ပြောတတ်ပြီး မုသားတွေ အပြည့်ပဲ။ ကျွန်တော်တို့ ဘုရားသခင် ရှေ့မှောက်မှာ နောက်ဆုံးအကြိမ် ဝပ်စင်းခဲ့ကြတုန်းက ကိုယ်တော်ရဲ့ နှုတ်ကပတ်တော်တွေနဲ့ ကိုယ်တော်ရဲ့ လုပ်ရပ်တွေဟာ အမြဲတမ်း နည်းဥပဒေကျတယ်ဆိုတာ ကျွန်တော်တို့ မြင်ခဲ့ရတယ်။ ကိုယ်တော်ဟာ ကျွန်တော်တို့ကို ဘယ်လိုနေရမယ်၊ ဘာတွေလိုက်နာရမယ်၊ ဘာတွေလုပ်ရမယ်လို့ ပြောတဲ့အခါမှာ တိုတိုနဲ့ လိုရင်းပဲ ပြောတတ်တယ်။ ဒါပေမဲ့ လူတွေက အဲလိုမဟုတ်ဘူး၊ စာတန်က လူသားမျိုးနွယ်ကို ဖျက်ဆီးပြီးတဲ့နောက်ပိုင်းမှာ လူတွေဟာ သူတို့ လိုချင်တဲ့အရာတွေနဲ့ သူတို့ ပုဂ္ဂိုလ်ရေးအလိုဆန္ဒတွေကို သူတို့ လုပ်ရပ်တွေ၊ စကားလုံးတွေနဲ့ ရှာဖွေကြတယ်။ လူသားမျိုးနွယ်ကို ဘုရားသခင်က ကြည့်ရှုစောင့်ရှောက်တာ၊ ဂရုစိုက်တာ၊ ကာကွယ်ပေးတာတွေကို ကြည့်ခြင်းအားဖြင့် ဘုရားသခင် လုပ်သမျှအားလုံးဟာ အပြုသဘောဆောင်တယ်ဆိုတာနဲ့ အရမ်းရှင်းတယ်ဆိုတာကို ကျွန်တော်တို့ နားလည်လာတယ်။ ကျွန်တော်တို့အတွက် ဒါဟာ ဘုရားသခင်ရဲ့ သန့်ရှင်းမှုအနှစ်သာရ ဖော်ပြမှုပါပဲ။) တော်ပါပေတယ်။ တစ်ယောက်ယောက်က ထပ်ဖြည့်ပြောဦးမလား။ (ဘုရားသခင်က စာတန်ရဲ့ မကောင်းမှုကို ဖော်ထုတ်တဲ့အခါ ကျွန်တော်တို့ဟာ ဘုရားသခင်ရဲ့ သန့်ရှင်းမှုကို မြင်ရတယ်။ ဘုရားသခင်က စာတန်ရဲ့ အနှစ်သာရကို ဖော်ထုတ်တဲ့အခါ ကျွန်တော်တို့ဟာ စာတန်ရဲ့ မကောင်းမှုကို ပိုသိလာပြီး လူသားမျိုးနွယ်ရဲ့ ဒုက္ခအရင်းအမြစ် ဖြစ်ကို ကျွန်တော်တို့ တွေ့လာတယ်။ အရင်တုန်းက စာတန်ရဲ့ လွှမ်းမိုးမှုအောက်က ဒုက္ခကို ကျွန်တော်တို့ဟာ ကောင်းကောင်းနားမလည်ခဲ့ဘူး။ ဒုက္ခတွေအားလုံးဟာ စာတန်ဖန်ဆင်းထားတဲ့ ကျော်ကြားမှုနဲ့ စည်းစိမ်ဥစ္စာ နောက်ကိုလိုက်ရင်း ရလာတာတွေပဲ ဆိုတာကို ဘုရားသခင်က သိစေတာကြောင့် ကျွန်တော်တို့ မြင်လာတယ်။ အဲဒါကြောင့်သာ ဘုရားသခင်ရဲ့ သန့်ရှင်းမှုဟာ လူသားမျိုးနွယ်ရဲ့ စစ်မှန်တဲ့ ကယ်တင်ခြင်း ဖြစ်တယ်ဆိုတာ ကျွန်တော်တို့ ခံစားရတယ်။ ဒါ့အပြင် ဘုရားသခင်ဟာ ကျွန်တော်တို့ ကယ်တင်ခြင်းကို လက်ခံရရှိဖို့ အခြေအနေတွေ စီမံပေးတယ်၊ ကျွန်တော်တို့ကို အရမ်းချမ်းသာတဲ့ မိသားစုတစ်ခုမှာ မမွေးဖွားစေရင်တောင်မှ သင့်တော်တဲ့ မိသားစု၊ သင့်တော်တဲ့ အသိုင်းအဝိုင်းမှာ မွေးဖွားစေတယ်။ ဒါ့အပြင် ကျွန်တော်တို့ရဲ့ နောက်ဆုံးသော ကာလမှာ ဘုရားသခင်ရဲ့ ကယ်တင်ခြင်းကို လက်ခံနိုင်ဖို့ အခြေအနေတွေ၊ အတွေးအခေါ်တွေ၊ သာမန်ကျိုးကြောင်း ဆင်ခြင်တုံတရားတွေကို ကျွန်တော်တို့ရှိနိုင်ဖို့အတွက် စာတန်ရဲ့ ဖိနှိပ်မှုနဲ့ အန္တရာယ်ပေးမှုကို ကျွန်တော်တို့ကို မခံစားစေဘူး။ ဘုရားသခင်ရဲ့ စီမံချက်တွေရဲ့ တိကျမှု၊ ကိုယ်တော်ရဲ့ အစီအစဉ်တွေ၊ အဲဒီအစီအစဉ်တွေကို ဘယ်လို အကောင်အထည် ဖော်သလဲဆိုတာကို ဒီအရာတွေ အားလုံးထဲမှာ တွေ့ရတယ်။ ကိုယ်တော်က ကျွန်တော်တို့ကို စာတန်ရဲ့ လွှမ်းမိုးမှုအောက်က ကယ်တဲ့အခါမှာ ကိုယ်တော်ရဲ့ အသေးစိတ်တဲ့အလုပ်ကို ကျွန်တော်တို့ ကျကျနနမြင်ရပါတယ်၊ အဲဒီမှာပဲ ကိုယ်တော်ရဲ့ သန့်ရှင်းမှုနဲ့ လူသားမျိုးနွယ်ကို ကိုယ်တော်ချစ်တဲ့အချစ်ကို မြင်ရပါတယ်။) အဲဒါအပြင် ဘာထပ်ဖြည့်ချင်သေးလဲ။ (ဖောက်ပြန်ပျက်စီးတဲ့ လူသားမျိုးနွယ်ဟာ ဘုရားသခင်နဲ့ ပတ်သက်ပြီး ဒါမှမဟုတ် ချစ်ခြင်းမေတ္တာနဲ့ ပတ်သက်ပြီး စစ်မှန်တဲ့ အသိပညာ မရှိပါဘူး။ ကျွန်တော်တို့ဟာ ဘုရားသခင်ရဲ့ သန့်ရှင်းမှုရဲ့ အနှစ်သာရကို နားမလည်ဘဲ ကိုယ်တော်ရှေ့မှာ ဦးညွတ်တာကအစ စင်ကြယ်မှုမရှိဘူး၊ အကျိုးမျှော်ကိုးပြီး တမင်တကာ လုပ်နေတာမျိုး ဖြစ်နေတဲ့အတွက် ဘုရားသခင်ဟာ မပျော်ရွှင်ဘူး။ ဘုရားသခင်ဟာ စာတန်နဲ့ အရမ်းကွာတယ်၊ စာတန်က လူတွေကို သူ့ကို ချစ်စေချင်တယ်၊ မြှောက်ပင့်ပေးစေချင်တယ်၊ ဦးညွှတ်ပြီး ကိုးကွယ်စေချင်တယ်ဆိုတာ ကျွန်တော်တို့ မြင်ရပါတယ်။ စာတန်မှာ ဘာစည်းမျဉ်းဥပဒေမှ မရှိဘူး။ ဒီအချက်ကနေ ဘုရားသခင်ရဲ့ သန့်ရှင်းမှုကိုလည်း ကျွန်တော် နားလည်ရပါတယ်။) သိပ်ကောင်းတယ်။ ဘုရားသခင်ရဲ့ သန့်ရှင်းမှုအကြောင်း ငါတို့ရဲ့ မိတ်သဟာယဖွဲ့ ဆွေးနွေးမှုကနေ ဘုရားသခင်ရဲ့ ပြီးပြည့်စုံခြင်းကို သင်တို့ တွေ့ရဲ့လား။ (တွေ့ပါတယ်။) တစ်ခြား ဘာတွေ့သေးလဲ။ ဘုရားသခင်ဟာ အပြုသဘောဆောင်တဲ့ အရာအားလုံးရဲ့ ပင်မအရင်းအမြစ် ဘယ်လိုဖြစ်တယ်ဆိုတာ သင်တို့ တွေ့ရဲ့လား။ ဘုရားသခင်ဟာ သမ္မာတရားနဲ့ တရားဥပဒေရဲ့ ပြယုဂ် ဘယ်လိုဖြစ်တယ်ဆိုတာ သင်တို့ တွေ့ရဲ့လား။ ဘုရားသခင်ဟာ ချစ်ခြင်းမေတ္တာရဲ့ အရင်းအမြစ် ဘယ်လိုဖြစ်တယ်ဆိုတာကိုရော သင်တို့ တွေ့ရဲ့လား။ ဘုရားသခင် ဘာပဲလုပ်လုပ်၊ ကိုယ်တော် ဘာပဲဖန်တီးဖန်တီး၊ ကိုယ်တော် ဘာပဲပြပြ အရာအားလုံးဟာ အပြစ်ပြောစရာမရှိဘူးဆိုတာ သင်တို့ တွေ့ရဲ့လား။ (တွေ့ပါတယ်။) ငါပြောနေတဲ့ ဒီဥပမာတွေဟာ ငါပြောတဲ့ ဘုရားသခင်ရဲ့ သန့်ရှင်းမှုရဲ့ အဓိကအချက်တွေပဲ။ ဒီနေ့မှာ ဒီစကားလုံးတွေဟာ သင်တို့အတွက် အယူဝါဒသာသာလောက်ပဲ ဆန်နေလိမ့်မယ်၊ ဒါပေမဲ့ သင်ဟာ ဘုရားသခင် ကိုယ်တော်တိုင်ကို ကိုယ်တော်ရဲ့ နှုတ်ကပတ်တော်နဲ့ ကိုယ်တော်ရဲ့ အလုပ်တွေကနေ တွေ့ကြုံသိမြင်လာတဲ့ တစ်နေ့မှာ ဘုရားသခင်ဟာ သန့်ရှင်းတယ်၊ ဘုရားသခင်ဟာ လူသားမျိုးနွယ်နဲ့ မတူဘူး၊ ကိုယ်တော်ရဲ့ နှလုံးသား၊ စိတ်သဘောထားနဲ့ အနှစ်သာရတို့အားလုံးဟာ သန့်ရှင်းတယ်လို့ သင့်ရဲ့ နှလုံးသားထဲကနေ ပြောလာလိမ့်မယ်။ ဒီသန့်ရှင်းမှုကြောင့် ကိုယ်တော်ရဲ့ ပြီးပြည့်စုံမှုကို လူတွေ တွေ့ကြရရုံမက ဘုရားသခင်ရဲ့ သန့်ရှင်းမှု အနှစ်သာရဟာ လုံးဝစင်ကြယ်တယ် ဆိုတာပါ လူတွေ သိကြရတယ်။ ကိုယ်တော်ဟာ အတုမရှိ ဘုရားသခင်ကိုယ်တိုင် ဖြစ်တယ်ဆိုတာကို ကိုယ်တော်ရဲ့ သန့်ရှင်းမှုအနှစ်သာရက အဆုံးအဖြတ်ပေးပြီး ကိုယ်တော်ရဲ့ သန့်ရှင်းမှုအနှစ်သာရကပဲ ကိုယ်တော်ဟာ အတုမရှိ ဘုရားသခင်ကိုယ်တိုင် ဖြစ်တယ်ဆိုတာကို လူတွေကို မျက်မြင်သက်သေပြုစေတယ်။ ဒါဟာ အဓိကအချက်ပဲ မဟုတ်ဘူးလား။ (ဟုတ်ပါတယ်။)

ဒီနေ့ ငါတို့ဟာ အရင်နေ့တွေက ဆွေးနွေးပွဲတွေက အပိုင်းအများစုကို ခြုံငုံသုံးသပ်ပြီးသွားပြီ။ ငါတို့ရဲ့ သုံးသပ်ချက်ကို ဒီမှာ အဆုံးသတ်ကြမယ်။ သင်တို့အားလုံးဟာ အကြောင်းအရာတစ်ခုစီရဲ့ အဓိကအချက်အလက်တွေကို စွဲစွဲမြဲမြဲ မှတ်သားကြမယ်လို့ ငါ မျှော်လင့်တယ်။ အဲဒီအချက်တွေကို အယူဝါဒချည်းပဲလို့ မယူဆစေချင်ဘူး၊ သင် အချိန်ရတဲ့အခါ အဲဒီအချက်တွေကို သေသေချာချာ ပြန်ဖတ်ပြီး ကျကျနန နားလည်အောင် ကြိုးစားပါ။ အဲဒီအချက်တွေကို သင်တို့ နှလုံးသားထဲမှာ စွဲမြဲနေစေပြီး သင် လက်တွေ့ကျင့်ကြံတဲ့ပါ၊ ဒါဆိုရင် သင်ဟာ ဘုရားသခင်ရဲ့ စိတ်သဘောထား၊ ဘုရားသခင်ရဲ့ အရာအားလုံးနဲ့ ဖြစ်ခြင်းနဲ့ ပတ်သက်လို့ ငါ ပြောခဲ့သမျှအားလုံးကို သင် တကယ် နားလည်လာလိမ့်မယ်။ ဒါပေမဲ့ အဲဒီအချက်တွေကို ချရေးထားပြီး ထပ်မဖတ်ဘူးဆိုရင်၊ တွေးမကြည့်ဘူးဆိုရင် သင် ဘယ်တော့မှ နားလည်မှာမဟုတ်ဘူး။ အခု သင် နားလည်ပြီ မဟုတ်လား။ ဒီအကြောင်းအရာ သုံးခုကို ငါတို့ ဆွေးနွေးပြီးတဲ့နောက် သင်တို့ဟာ ဘုရားသခင်ရဲ့ ဂုဏ်၊ ကိုယ်တော်ရဲ့ အနှစ်သာရနဲ့ ကိုယ်တော်ရဲ့ စိတ်သဘောထားကို အကြမ်းအားဖြင့်တော့ –– အသေးစိတ်လည်း နားလည်ကောင်း နားလည်နိုင်တယ် –– နားလည်နိုင်တယ်။ ဒါပေမဲ့ လူတွေဟာ ဘုရားသခင်ကို အပြည့်အဝ နားလည်နိုင်ပါ့မလား။ (နားမလည်နိုင်ပါဘူး။) အခု သင်တို့ကိုယ်တိုင် ဘုရားသခင်ကို နားလည်မှုထဲမှာ ပိုပြီးနက်နက်ရှိုင်းရှိုင်း နားလည်သင့်တဲ့နေရာ ရှိသလား။ ငါ ဆိုလိုတာက ဘုရားသခင်ရဲ့ အာဏာ၊ ကိုယ်တော်ရဲ့ ဖြောင့်မတ်တဲ့ စိတ်သဘောထား၊ ကိုယ်တော်ရဲ့ သန့်ရှင်းမှုကို သင် နားလည်ပြီးတဲ့နောက်မှာ ကိုယ်တော်ရဲ့ အတုမရှိတဲ့ ဂုဏ်နဲ့ အနေအထားကို သင်တို့ရဲ့ စိတ်ထဲက အသိအမှတ်ပြုပြီး ဖြစ်လိမ့်မယ်၊ ဒါပေမဲ့ ကိုယ်တော်ရဲ့ အလုပ်၊ ကိုယ်တော်ရဲ့ အစွမ်းနဲ့ ကိုယ်တော်ရဲ့ အနှစ်သာရကို သင့်ရဲ့ ဘဝအတွေ့အကြုံအရ သိမြင်လက်ခံလာပြီးမှ ပိုမိုနက်ရှိုင်းတဲ့နားလည်မှုမျိုး သင့်မှာ ရှိလာမယ်။ အခု သင်တို့ဟာ ဒီမိတ်သဟာယဖွဲ့ ဆွေးနွေးပွဲကို နားထောင်ပြီး သင့်ရဲ့ နှလုံးသားထဲမှာ ဒီလိုယုံကြည်မှုအကြောင်း ကိန်းဝပ်သွားသင့်တယ် –– ဘုရားသခင်ဟာ တကယ် တည်ရှိတယ်၊ ပြီးတော့ ကိုယ်တော်ကပဲ အရာအားလုံးကို စေခိုင်းတယ်။ ဘယ်သူကမှ ကိုယ်တော်ရဲ့ ဖြောင့်မတ်တဲ့ စိတ်သဘောထားကို မစော်ကားရဘူး၊ ပြီးတော့ ကိုယ်တော်ရဲ့ သန့်ရှင်းမှုဟာ ဘယ်လူကမှ မေးခွန်းမထုတ်သင့်တဲ့ အမှန်တရားတစ်ခုပဲ။ ဒါဟာ အမှန်တရားတွေပဲ။ ဒီမိတ်သဟာယဖွဲ့ ဆွေးနွေးပွဲတွေဟာ ဘုရားသခင်ရဲ့ ဂုဏ်နဲ့ အနေအထားကို လူတွေရဲ့ နှလုံးသားထဲမှာ အခြေခိုင်ခံ့သွားစေဖို့ ရည်ရွယ်တယ်။ ဒီအခြေခံ ခိုင်သွားပြီးသွားတာနဲ့ လူတွေဟာ ပိုပြီးနားလည်ဖို့ ကြိုးစားကြရမယ်။

ဘုရားသခင်သည်သာ အရာအားလုံးရဲ့ ဘဝ ပင်မအရင်းအမြစ် (၁)

ယနေ့ အကြောင်းအရာသစ် တစ်ခုအကြောင်း သင်တို့နဲ့ ငါမိတ်သဟာယဖွဲ့ ဆွေးနွေးပါမယ်။ ဘာအကြောင်းအရာဖြစ်မလဲ။ ငါပြောမယ့် အကြောင်းအရာရဲ့ ခေါင်းစဉ်က “ဘုရားသခင်သည်သာ အရာအားလုံးရဲ့ ဘဝ ပင်မအရင်းအမြစ်” ဆိုတဲ့ ခေါင်းစဉ် ဖြစ်တယ်။ ဒီအကြောင်းအရာဟာ ဆွေးနွေးဖို့ အတော်အသင့် ကျယ်ပြန့်တယ် မဟုတ်လား။ ဒါဟာ တော်ရုံတန်ရုံ လက်လှမ်းမမီနိုင်လောက်တဲ့ အကြောင်းအရာလို့ ခံစားရလား။ ဘုရားသခင်သည်သာ အရာအားလုံးရဲ့ ဘဝ ပင်မအရင်းအမြစ် ဖြစ်တယ်ဆိုတာ လူတွေ အတွက်တော့ အလှမ်းဝေးနေတဲ့ အကြောင်းအရာမျိုး ဖြစ်ကောင်း ဖြစ်နိုင်ပေမယ့် ဘုရားသခင်နောက်ကို လိုက်သူအားလုံးကတော့ ဒါကို နားလည်ထားရမယ်။ ဘာလို့လဲဆိုတော့ ဒီအကြောင်းအရာဟာ ဘုရားသခင်ကို သိတဲ့၊ သူ့ကို စိတ်ကျေနပ်မှုပေးနိုင်တဲ့၊ သူ့အပေါ်မှာ နက်နက်ရှိုင်းရှိုင်း လေးစားမှုရှိတဲ့ လူတစ်ဦးစီတိုင်းနဲ့ ခွဲမရအောင် ဆက်စပ်နေလို့ ဖြစ်တယ်။ ဒါ့ကြောင့် ဒီအကြောင်းအရာအကြောင်း နားလည်အောင် ပြောကို ပြောရလိမ့်မယ်။ အရင်တုန်းက တချို့ဟာ ဒီအကြောင်းအရာအကြောင်း အခြေခံ နားလည်ကောင်း နားလည်ထားကြမယ်၊ ဒါမှမဟုတ် တချို့က သတိမူမိခဲ့ကြမယ်။ သူတို့ရဲ့ စိတ်ထဲမှာ ဒီအကြောင်းနဲ့ပတ်သက်ပြီး ရိုးရှင်းတဲ့ အသိပညာ ဒါမှမဟုတ် အပေါ်ယံ နားလည်မှုတို့ ရှိကောင်း ရှိနိုင်တယ်။ တခြားလူတွေကတော့ ဒီအကြောင်းနဲ့ ပတ်သက်ပြီး ထူးထူးခြားခြား အတွေ့အကြုံတချို့ ရှိကောင်းရှိမယ်၊ ထူးခြားတဲ့ ကိုယ်ပိုင် အတွေ့အကြုံတွေကြောင့် သူတို့ရဲ့ နှလုံးသားတွေထဲမှာ ဒါကို လေးလေးနက်နက် နားလည်ထားကြတယ်။ ဒါပေမဲ့ ဒီအသိဟာ နက်ရှိုင်းတဲ့ အသိဖြစ်ဖြစ်၊ အပေါ်ယံအသိဖြစ်ဖြစ် သင်တို့အတွက်တော့ တဖက်သတ်အသိ ဖြစ်တဲ့အတွက် လုံလောက်တဲ့ တိကျတဲ့ အသိမဟုတ်ဘူး။ ဒါ့ကြောင့် ဒီအကြောင်းအရာကို နားလည်လာတဲ့ အထိဆွေးနွေးရမယ်၊ ရည်ရွယ်ချက်ကတော့ သင်တို့ကို ပိုပြီး တိကျ နက်ရှိုင်းတဲ့ နားလည်မှု ပေးဖို့ဖြစ်တယ်။ ငါသင်တို့နဲ့ ဒီအကြောင်းအရာကို ဆွေးနွေးဖို့ အထူးနည်းလမ်းကို အသုံးပြုမှာ ဖြစ်တယ်၊ ဒီနည်းလမ်းကို ငါတို့ ယခင်က အသုံးမပြုဖူးသေးဘူး၊ ဒီနည်းလမ်းက သင်တို့အတွက် နည်းနည်းတော့ ထူးဆန်းနေမယ် ဒါမှမဟုတ် သင်တို့ကို အနည်းငယ် စိတ်မသက်မသာ ဖြစ်စေလိမ့်မယ်။ ဘာနည်းလမ်းပဲဖြစ်ဖြစ် သင်တို့ ကြားတဲ့အခါကျ နားလည်ပါလိမ့်မယ်။ သင်တို့ ပုံပြင်တွေကို နားထောင်ရတာ ကြိုက်ကြလား။ (ကြိုက်ပါတယ်။) ဘယ်လိုပုံပြင်မျိုးကို နားထောင်ရတာ ကြိုက်လဲ။ နတ်သမီး ပုံပြင်တွေ၊ ဒဏ္ဍာရီ ပုံပြင်တွေ ဒါမှမဟုတ် သိပ္ပံဝတ္ထုလား။ (ဒဏ္ဍာရီ ပုံပြင်တွေပါ။) (ဘုရားသခင်နဲ့ လူသားအကြောင်း ပုံပြင်။) ဘုရားသခင်နဲ့ လူသားအကြောင်း ပုံပြင်တွေ ရှိသလား။ (ရှိပါတယ်။) သင်တို့ အနီးအနားမှာ နေ့ဓဒူဝ ဖြစ်ပျက်နေတဲ့ ဘုရားသခင်နဲ့ လူသားအကြောင်း ပုံပြင်တွေရှိတယ်။ ဒီပုံပြင်တွေအကြောင်း ငါရှင်းပြဖို့ လိုသေးလား။ ကြည့်ရတာ ပုံပြင်ပြောတဲ့ နည်းလမ်းကို ငါရွေးလိုက်တာ မှန်တယ် ထင်တယ်။ သင်တို့အားလုံး ပုံပြင်တွေကို နားထောင်ချင်ကြတာပဲ။ ကောင်းပြီ၊ စလိုက်ရအောင်။ ငါအခုပြောမယ့် အကြောင်းအရာကို သင်တို့ မှတ်စုစာအုပ်တွေထဲမှာ ချရေးစရာ မလိုဘူး။ သင်တို့ စိတ်ငြိမ်ငြိမ်ထားပါ၊ ဂနာမငြိမ် မဖြစ်ပါစေနဲ့။ သင်ရဲ့မျက်လုံးတွေကို ဖွင့်ထားတဲ့အခါ သင်ရဲ့ ပတ်ဝန်းကျင်၊ ဒါမှမဟုတ် အနီးအနားက လူတွေကြောင့် စိတ်အနှောင့်အယှက် ဖြစ်တယ်ဆိုရင် သင့်မျက်လုံးတွေ မှိတ်ထားလို့ ရပါတယ်။ သင်တို့ကို ငါပြောပြမယ့် ပုံပြင်လေးက အရမ်းစိတ်ဝင်စားဖို့ ကောင်းတယ်။ အဲဒါက မျိုးစေ့လေး၊ ကမ္ဘာကြီး၊ သစ်ပင်၊ နေအလင်းရောင်၊ တေးဆိုငှက်တွေနဲ့ လူသားတွေ အကြောင်းပဲ။ သင်တို့ကို ငါပြောပြမယ့် ပုံပြင်ထဲမှာပါတဲ့ အဓိက ဇာတ်ကောင်တွေက ဘာတွေလဲ။ (မျိုးစေ့လေး၊ ကမ္ဘာကြီး၊ သစ်ပင်၊ နေအလင်းရောင်၊ တေးဆိုငှက်တွေနဲ့ လူသားတွေပါ။) အဲဒီထဲမှာ ဘုရားသခင် ပါသလား။ (မပါပါဘူး။) ဒါပေမဲ့ သင်တို့ကို ငါပုံပြင် ပြောပြပြီးတာနဲ့ သင်တို့ လန်းဆန်း၊ ကျေနပ်သွားမယ် ဆိုတာ ငါအသေအချာ ပြောရဲတယ်။ ကောင်းပါပြီ၊ ငြိမ်ငြိမ်လေး နားထောင်ကြပါ။

ပုံပြင်နံပါတ် ၁။ မျိုးစေ့၊ ကမ္ဘာမြေကြီး၊ သစ်ပင်၊ နေအလင်းရောင်၊ တေးဆိုငှက်တွေနဲ့ လူသား

ကမ္ဘာမြေကြီးပေါ်ကို မျိုးစေ့လေးတစ်စေ့ ကျလာခဲ့တယ်။ မိုးသည်းကြီး မည်းကြီး ရွာချလိုက်ပြီးတဲ့နောက် အစေ့လေးကနေ အညှောက်နုလေး ပေါက်လာပြီး အမြစ်လောင်းလေးတွေဟာလည်း အောက်ဖက် မြေကြီးထဲကို တဖြည်းဖြည်း တိုးဝင်ကြီးထွားလာကြတယ်။ လဆန်းမှလဆုတ်၊ လဆုတ်မှလဆန်း ရာသီတွေအလီလီ ပြောင်းလာတာနဲ့အမျှ အညှောက်လေးဟာ မိုးသက်လေပြင်းဒဏ်ကို ကြံ့ကြံ့ခံပြီး ကြီးထွားလာတယ်။ နွေရာသီရောက်တော့ ဒီအညှောက်လေး အပူဒဏ်ကို ခံနိုင်ရည်ရှိစေဖို့ ကမ္ဘာမြေကြီးဟာ ရေလက်ဆောင်တွေကို ယူလာပေးတယ်။ ကမ္ဘာမြေကြီးကြောင့် အညှောက်လေးဟာ အပူဒဏ်ကို မခံစားရဘဲ နွေရာသီရဲ့ အပူဒဏ်ကနေ လွတ်မြောက် ရှင်သန်ခဲ့တယ်။ ဆောင်းရာသီရောက်တော့ ကမ္ဘာမြေကြီးက သူ့ရဲ့နွေးထွေးထဲ ရင်ခွင်ထဲမှာ အညှောက်လေးကို ထွေးပွေ့ထားပြီး တစ်ယောက်နဲ့ တစ်ယောက် တင်းတင်းကြပ်ကြပ် ဖက်တွယ်ထားခဲ့ကြတယ်။ ကမ္ဘာမြေကြီးရဲ့ အနွေးဓာတ်ကြောင့် သာလျှင် အညှောက်လေးဟာ ဆောင်းရာသီရဲ့ ပြင်းထန်တဲ့ လေနဲ့ နှင်းဒဏ်ကို ဖြတ်သန်းရင်း ကြမ်းတမ်းတဲ့ အအေးဒဏ်ကနေ ရှင်သန်ခဲ့ရပြန်တယ်။ ကမ္ဘာမြေကြီးရဲ့ စောင့်ရှောက်မှုကြောင့် အညှောက်လေးဟာ ရဲရင့်လာပြီး ပျော်ရွှင်ခဲ့ရတယ်။ အညှောက်လေးဟာ ကမ္ဘာမြေကြီးရဲ့ ကိုယ်ကျိုးမဖက်တဲ့ ပြုစုစောင့်ရှောက်မှုကြောင့် ဝင့်ဝင့်ကြွားကြွား ကြီးထွားဖွံ့ဖြိုးလာရတယ်၊ ပျော်ပျော်ရွှင်ရွှင် ကြီးပြင်းလာရတယ်။ မိုးစက် မိုးပေါက်လေးတွေ ကျတဲ့အသံနဲ့အတူ သူဟာ တေးဆိုတယ်၊ လေနဲ့အတူ ယိမ်းနွဲ့ကခုန်တယ်။ ဒါ့ကြောင့် အညှောက်လေးနဲ့ ကမ္ဘာမြေကြီးတို့ဟာ တစ်ယောက်ကို တစ်ယောက် အပြန်အလှန် မှီခိုနေကြရတယ် …

နှစ်တွေ ကုန်လွန်လာပြီးတဲ့နောက် အညှောက်လေးဟာ အခုဆိုရင် အလွန်မြင့်မားတဲ့ သစ်ပင်ကြီး ဖြစ်နေပါပြီ။ မရေမတွက်နိုင်တဲ့ သစ်ရွက်ပေါင်းများစွာနဲ့ အုံ့ဆိုင်းနေပြီး အကိုင်းအခက်တွေ ယှက်ဖြာနေကာ ကမ္ဘာမြေကြီးပေါ်မှာ မားမားမတ်မတ် ရပ်နေနိုင်ပြီ။ အရင်ကလို မြေကြီးထဲ တိုးဝင်နေတဲ့ သစ်ပင်ရဲ့ အမြစ်တွေဟာ အခုတော့ မြေကြီးရဲ့ နက်ရှိုင်းတဲ့နေရာတွေမှာ ကုပ်တွယ်ထားနိုင်ပြီ။ တစ်ချိန်က အညှောက်လေးကို အကာအကွယ်ပေးခဲ့တဲ့ အရာဟာ အခုတော့ သစ်ပင်ကြီးအတွက် အခြေခံအုတ်မြစ်ဖြစ်နေပြီ။

သစ်ပင်ပေါ် နေအလင်းတန်း ဖြာကျတဲ့အခါ ပင်စည်ဟာ လှုပ်ခါသွားတယ်။ သစ်ပင်ဟာ သူ့ရဲ့ အကိုင်းအခက်တွေကို ငွားငွားစွင့်စွင့် ဖြန့်ကျက်ထားလိုက်ပြီး နေအလင်းရောင်ကို အပြည့်အဝ ခံယူတယ်။ အောက်ဘက် မြေကြီးကတော့ သစ်ပင်နဲ့အတူ စည်းချက်ကျကျ အသက်ရှုလိုက်ပြီး လန်းဆန်းမှုကို ခံစားရတယ်။ အဲဒီအချိန်မှာပဲ အကိုင်းအခက်တွေကြား လတ်ဆတ်တဲ့ လေနုအေးလေး တိုက်ခတ်သွားတော့ သစ်ပင်ဟာ ပျော်ရွှင်မြူးတူးလာပြီး၊ ခွန်အားတွေ လျှံထွက်လာတယ်။ ဒီလိုပဲ သစ်ပင်နဲ့ နေအလင်းရောင်ဟာလည်း တစ်ယောက်ကို တစ်ယောက် အပြန်အလှန် မှီခိုနေကြရတယ် …

လူသားတွေဟာ သစ်ပင်ရဲ့ အေးမြတဲ့ အရိပ်အောက်မှာ နားခိုကြပြီး လန်းဆန်းမွှေးမြတဲ့ လေညင်းခံရင်း နေအပူဒဏ်ကို ရှောင်ကြတယ်။ လေက သူတို့ရဲ့ နှလုံးသားတွေနဲ့ အဆုတ်တွေကို သန့်ရှင်းစေတယ်၊ ခနာကိုယ်အတွင်းက သွေးကိုလည်း သန့်ရှင်း စင်ကြယ်စေတယ်။ စိတ်ညစ်ညူးမှု၊ စိတ်ဒုက္ခတွေ ကင်းဝေးစေတယ်။ ဒါ့ကြောင့် လူသားတွေနဲ့ သစ်ပင်ဟာ တစ်ဦးကို တစ်ဦး အပြန်အလှန် မှီခိုနေကြရတယ် …

တေးဆိုငှက်တစ်အုပ်ဟာ သစ်ပင်ရဲ့ အကိုင်းအခက်တွေပေါ်မှာ ခိုနားရင်း တေးသီကြတယ်။ ငှက်ကလေးတွေဟာ ရန်သူကို ရှောင်ပြေးလာတာ ဖြစ်ကောင်းဖြစ်မယ်၊ ဒါမှမဟုတ် မျိုးပွား သားပေါက်ဖို့နဲ့ ကလေးတွေကို ပြုစုပျိုးထောင်ဖို့ အပင်ရိပ် လာခိုတာလည်း ဖြစ်ကောင်းဖြစ်မယ်၊ ဒါမှမဟုတ် ခဏတဖြုတ် လာနားခိုတာလည်း ဖြစ်ကောင်းဖြစ်မယ်။ ဒါ့ကြောင့် ငှက်လေးတွေနဲ့ သစ်ပင်ဟာ တစ်ယောက်ကို တစ်ယောက် အပြန်အလှန် မှီခိုနေကြရတယ် …

လိမ်ကျစ် ရှုပ်ထွေးနေတဲ့ သစ်ပင်ရဲ့ အမြစ်တွေဟာ မြေကြီးထဲမှာ နက်နက်ရှိုင်းရှိုင်း ထိုးဝင် ကုပ်တွယ်ထားတယ်။ သစ်ပင်ရဲ့ ပင်စည်ကတော့ သူ့ရဲ့ အကိုင်းအခက်တွေကို ဖြန့်ကျက်ထားပြီး မြေကြီးကို လေဒဏ်၊ မိုးဒဏ်ကနေ ကာကွယ်ပေးထားတယ်၊ ဘာလို့လဲဆိုတော့ မြေကြီးဟာ သစ်ပင်ရဲ့ မိခင်ဖြစ်လို့ပါပဲ။ သူတို့ဟာ တစ်ယောက်ကို တစ်ယောက် မှီခိုရင်း အတူတူ နေထိုင်အသက်ရှင် ကြတယ်၊ ပြီးတော့ သူတို့ဟာ ဘယ်တော့မှ ခွဲခွာမှာ မဟုတ်ပါဘူး …

ကဲ ပုံပြင်လေးကတော့ ဒါပါပဲ။ သင်တို့ မျက်လုံးဖွင့်နိုင်ပါပြီ။ ငါပြောပြလိုက်တဲ့ ပုံပြင်လေးကတော့ မျိုးစေ့တစ်စေ့၊ ကမ္ဘာမြေကြီး၊ သစ်ပင်တစ်ပင်၊ နေအလင်းရောင်၊ တေးဆိုငှက်တွေနဲ့ လူသား အကြောင်းပဲ ဖြစ်တယ်။ ပုံပြင်လေးမှာ အပိုင်းအနည်းငယ်ပဲ ပါတယ်။ ပုံပြင်လေးကို နားထောင်လိုက်တော့ သင်တို့ ဘာတွေ ခံစားရလဲ။ ပုံပြင်ကို ဒီနည်းလမ်းအတိုင်း ပြောတော့ရော နားလည်ကြရဲ့လား။ (နားလည်ပါတယ်။) သင်တို့ရဲ့ ခံစားချက်တွေကို ပြောပြလို့ ရပါတယ်။ ဒီတော့ ပုံပြင်လေးကို နားထောင်လိုက်တော့ သင်တို့ ဘယ်လိုခံစားရလဲ။ (ပုံပြင်လေးက စိတ်ထိခိုက်စရာ ကောင်းတယ်၊ ဘုရားသခင်နဲ့ လူသားအကြောင်း ဖြစ်မယ်ထင်တယ်၊ လူသားကို ပြုစုပျိုးထောင် ကာကွယ်ပေးတဲ့ သူ့ရဲ့ နည်းလမ်းဖြစ်တယ်၊ ဒါကြောင့်သာ လူသားဟာ သန်သန်မာမာ ကြီးထွားဖွံ့ဖြိုးလာရတာ ဖြစ်တယ်။ လူသားဟာ လူတစ်လုံးသူတစ်လုံး ဖြစ်လာတဲ့အခါ ဘုရားသခင်ရဲ့ ချစ်ခြင်းမေတ္တာကို နားလည်လာပြီး သူ့ကို ပြန်ပေးဆပ်တယ်။ ဘုရားသခင်နဲ့ လူသားဆိုတာ တစ်ယောက်နဲ့ တစ်ယောက် ခွဲမရအောင် ရင်းနှီးကြတယ်။) ငါရှင်းပြခဲ့သမျှ အရာအားလုံးကို သင်တို့ မြင်နိုင်ပြီးတော့ ထိတွေ့လို့လည်းရတယ်ဆိုတာကို သင်တို့ကို ငါအရင်ပြောပြထားမယ်။ ဒါတွေဟာ အစစ်အမှန်တွေ ဖြစ်တယ်၊ ဥပမာပေး ခိုင်းနှိုင်းထားတာတွေ မဟုတ်ဘူး။ ငါဆွေးနွေးခဲ့တာနဲ့ ပတ်သက်ပြီး သင်တို့ကိုယ်တိုင် ဆက်စဉ်းစားကြည့်စေချင်တယ်။ ငါနက်နက်နဲနဲ ကွယ်ဝှက်ထားတာ တစ်ခုမှမရှိဘူး၊ ပုံပြင်ရဲ့ အဓိကဆိုလိုရင်း အဓိပ္ပာယ်အကြောင်း စာကြောင်း အနည်းငယ်ပဲ ရှိတယ်။ (သစ်ပင်တစ်ပင်ပဲ ဖြစ်ဖြစ်၊ တိရစ္ဆာန်တစ်ကောင်ပဲ ဖြစ်ဖြစ်၊ ငှက်တစ်ကောင်ပဲ ဖြစ်ဖြစ်၊ လူသားတစ်ယောက်ပဲ ဖြစ်ဖြစ်၊ ၄င်းရဲ့ဘဝ ပင်မအရင်းအမြစ်ဟာ ဘုရားသခင်ပါပဲ။) နောက်ထပ် ဘာရှိသေးလဲ။ (ပုံပြင်ထဲက အဖြစ်အပျက်တွေဟာ ကျွန်တော်တို့ အနီးပတ်ဝန်းကျင်မှာ ဖြစ်ပျက်နေကျ အရာတွေ ဖြစ်ပေမယ့်လည်း ကျွန်တော်တို့ဟာ ဘုရားသခင်ရဲ့ အချုပ်အခြာကို မကြာခဏ လျစ်လျူရှုထားမိကြတယ်။ ဘုရားသခင်က ဒီအကြောင်းကို သဘာဝကျကျ ပြောသွားပြီး ဒီအကြောင်းအရာဟာလည်း ကျွန်တော်တို့ အနီးဘေးနားမှာ အင်မတန် သဘာဝကျကျ ဖြစ်ပျက်နေပေမယ့်၊ ဘုရားသခင်ရဲ့ အချုပ်အခြာအောက်မှာ တည်ရှိနေပါတယ်။ ဘုရားသခင်ဟာ အရာအားလုံးကို အစိုးရပြီး ဘုရားသခင်သည်သာလျှင် အရာအားလုံးတို့ရဲ့ ဘဝ ပင်မအရင်းအမြစ် ဖြစ်တယ်။) ထပ်ဖြည့်ပြောစရာ ရှိသေးလား။ (ကျွန်တော်တို့ နားထောင်ခဲ့ရတဲ့ ပုံပြင်လေးက ဆေးခြယ်ထားတဲ့ ပန်းချီကားလေး တစ်ချပ်လိုပါပဲ –– မျိုးစေ့လေး အသက်ဝင်လာတယ်၊ နွေဦးပေါက်၊ နွေဥတု၊ ဆောင်းဦးပေါက်၊ ဆောင်းဥတု –– နှစ်တစ်နှစ်ရဲ့ ဥတုလေးပါးဒဏ်ကို တွေ့ကြုံခံစားရပြီး ရှင်သန်ကြီးထွားလာတယ်။ ကမ္ဘာမြေကြီးရဲ့ ပြုစုစောင့်ရှောက်မှုဟာ မိခင်တစ်ယောက်နဲ့ တူတယ်။ ဆောင်းတွင်းမှာ အနွေးဓာတ်ကို ပေးပြီး အညှောက်လေးကို အအေးဒဏ်ကနေ လွတ်မြောက် ရှင်သန်စေတယ်။ အညှောက်ဘဝကနေ သစ်ပင်ကြီးဘဝသို့ ရင့်ကျက်လာတဲ့ အခါမှာလည်း နေရောင်ခြည်ဟာ အပင်ရဲ့ အကိုင်းအခက်တွေပေါ် ဖြာကျပြီး အပင်ကို ပျော်ရွှင်မှုတွေ ပေးပြန်တယ်။ ကျွန်တော်တို့ သိရတာက ဘုရားသခင်ရဲ့ ဖန်ဆင်းမှုတွေထဲမှာ ကမ္ဘာမြေကြီးဟာ အသက်ရှိတဲ့အတွက်ကြောင့် သစ်ပင်ကို မှီခိုရတယ် ဆိုတာပဲ။ နေရောင်ခြည်ဟာ သစ်ပင်ကို အနွေးဓာတ်ပေးတယ်၊ ပြီးတော့ ငှက်ကလေးတွေဟာလည်း မြင်နေကျဖြစ်ပေမယ့် ငှက်ကလေးတွေ၊ သစ်ပင်နဲ့ လူသားတွေ အားလုံး အတူတကွ ဘယ်လို သဟဇာတ ဖြစ်လဲဆိုတာ ကျွန်တော်တို့ တွေ့ရပါတယ်။ ဒါတွေဟာ ဒီပုံပြင်ကို ကျွန်တော်တို့ နားထောင်ရတဲ့အခါ ကျွန်တော်တို့ရင်ထဲမှာ ခံစားရတဲ့ အကြောင်းအရာတွေ ဖြစ်ပါတယ်၊ တကယ်တော့ ဘုရားသခင်ရဲ့ ဖန်ဆင်းမှုအားလုံးဟာ အသက်ရှိတွေ ဖြစ်ပါတယ်။) မှန်တာပေါ့။ ဘယ်သူများ ထပ်ဖြည့်ပြောချင်သေးလဲ။ (ပုံပြင်ထဲမှာ အစေ့လေးကနေ အညှောက်ပေါက်ပြီး သစ်ပင်ကြီးအဖြစ် ကြီးထွားလာတာကို ကြည့်ခြင်းအားဖြင့် ဘုရားသခင် ဖန်ဆင်းထားတဲ့ အရာတွေဟာ ဘယ်လောက်တောင် အံ့သြဖို့ကောင်းသလဲဆိုတာ ကျွန်တော်တို့ သိရပါတယ်။ ဘုရားသခင်က အရာရာတိုင်းကို အသက်ဝင်စေပြီး တစ်ယောက်နဲ့ တစ်ယောက် အပြန်အလှန် မှီခိုအားထားစေတယ်၊ ပြီးတော့ သူတို့အားလုံးကလည်း တစ်ယောက်နဲ့ တစ်ယောက် အပြန်အလှန် ချိတ်ဆက်မှုရှိကြတယ်၊ တစ်ယောက်နဲ့တစ်ယောက် အစေခံကြတယ်။ ဘုရားသခင်ရဲ့ ဉာဏ်ပညာ၊ အံ့သြဖွယ်ရာကို ကျွန်တော်တို့ တွေ့ရတယ်၊ ပြီးတော့ ဘုရားသခင်ဟာ အရာအားလုံးတို့ရဲ့ ဘဝ ပင်မအရင်းအမြစ် ဖြစ်ဆိုတာ ကျွန်တော်တို့ တွေ့ရပါတယ်။)

ငါပြောခဲ့သမျှ အကြောင်းအရာ အားလုံးဟာ သင်တို့ ယခင်က တွေ့ဖူး၊ ကြားဖူး၊ မြင်ဖူးပြီးသား အကြောင်းအရာတွေပဲ၊ ဥပမာ မျိုးစေ့တွေ၊ သင်တို့ သိတယ် ဟုတ်တယ်မဟုတ်လား။ အစေ့လေး တစ်စေ့ကနေ သစ်ပင် ဖြစ်လာတယ်ဆိုတာ သင် အသေးစိတ်သိထားတဲ့ ဖြစ်စဉ်တော့ ဟုတ်မှာ မဟုတ်ဘူး၊ ဒါပေမဲ့ အဲဒါဟာ အဖြစ်မှန် ဆိုတာတော့ သင်သိတယ် မဟုတ်လား။ ကမ္ဘာမြေကြီးနဲ့ နေရောင်ခြည်အကြာင်း သင်သိတယ်။ တေးသီငှက်တွေ သစ်ပင်မှာ နားနေတဲ့ ပုံရိပ်ဟာ လူတိုင်း မြင်ဖူးကြတဲ့ အကြောင်းအရာပဲ မဟုတ်လား။ (ဟုတ်ပါတယ်။) ပြီးတော့ သစ်ပင်ရိပ်မှာ လူတွေ အမောဖြေကြတာ သင်တို့ အားလုံးမြင်ဖူးကြတာပဲ မဟုတ်လား။ (ကျွန်တော်တို့ မြင်ဖူးပါတယ်။) ဒီတော့ ဒီဥပမာတွေကို ပုံရိပ်တစ်ခုတည်းမှာ မြင်လိုက်ရတဲ့အခါ သင်တို့ ဘာကို ခံစားမိသလဲ။ (သဟဇာတဖြစ်မှုပါ။) ဒီပုံရိပ်မှာ ရှိတဲ့ ဥပမာတွေအားလုံးဟာ ဘုရားသခင်ဆီက လာတာလား။ (ဟုတ်ပါတယ်။) သူတို့တွေကို ဘုရားသခင်ဆီက လာတာ ဖြစ်တဲ့အတွက် ကမ္ဘာမြေကြီးပေါ်မှာ အတူတကွ တည်ရှိနေတဲ့ ဒီမြောက်မြားစွာသော ဥပမာတွေရဲ့ တန်ဖိုးနဲ့ အရေးပါမှုကို ဘုရားသခင် သိတယ်။ ဘုရားသခင်က အရာအားလုံးကို ဖန်တီးတဲ့အခါ တစ်မျိုးစီအတွက် သူ့မှာ အစီအစဉ်ရှိတယ်၊ သူဖန်ဆင်းတဲ့ အရာတစ်ခုချင်းစီမှာ သူ့ရဲ့ စေတနာတွေကို တွေ့ရမယ်၊ ပြီးတော့ သူက သူတို့ကို အသက်သွင်းပေးတယ်။ လူသားမျိုးနွယ်အတွက် လူနေပတ်ဝန်းကျင်ကို ဖန်တီးပေးခဲ့တယ်၊ ငါတို့ ခုနလေးတင် နားထောင်ခဲ့ရတဲ့ ပုံပြင်ထဲမှာ ဒီအကြောင်းကို ဆွေးနွေးထားတယ်။ ပုံပြင်ထဲမှာ အစေ့နဲ့ ကမ္ဘာမြေကြီးတို့ရဲ့ အပြန်အလှန် မှီခိုကြရပုံကို ဆွေးနွေးထားတယ်၊ ကမ္ဘာမြေကြီးက အစေ့ကို အာဟာရပြည့်ဝစေပြီး အစေ့လေးက ကမ္ဘာမြေကြီးကို ချည်နှောင်ထားတယ်။ ကနဦးကတည်းက ဒီနှစ်ခုရဲ့ ဆက်နွှယ်မှုကို ဘုရားသခင်ကပဲ ကြိုတင် စီရင်ထားတာ မဟုတ်လား။ (ဟုတ်ပါတယ်။) ဒီပုံရိပ်ထဲက သစ်ပင်၊ နေရောင်ခြည်၊ တေးသီငှက်တွေနဲ့ လူသားတွေဟာ လူသားမျိုးနွယ်အတွက် ဘုရားသခင် ဖန်ဆင်းထားတဲ့ လူနေပတ်ဝန်းကျင် ဥပမာပဲ မဟုတ်လား။ (ဟုတ်ပါတယ်။) အရင်ဆုံး သစ်ပင်က ကမ္ဘာမြေကြီးကို ခွဲခွာလို့ ရသလား။ (မရပါဘူး။) သစ်ပင်ကရော နေရောင်ခြည်မရှိဘဲ ဖြစ်နိုင်ပါ့မလား။ (မဖြစ်နိုင်ပါဘူး။) ဒီလိုဆို ဘုရားသခင်က သစ်ပင်ကို ဘာရည်ရွယ်ချက်နဲ့ ဖန်ဆင်းခဲ့တာလဲ၊ ကမ္ဘာမြေကြီးအတွက် သက်သက်ပဲလို့ ပြောလို့ရလား။ တေးသီငှက်တွေအတွက် သက်သက်ပဲလို့ ပြောလို့ရလား။ လူသားတွေအတွက် သက်သက်ပဲလို့ကော ပြောလို့ရလား။ (မရပါဘူး။) သူတို့တွေရဲ့ကြားက ဆက်နွှယ်မှုက ဘာလဲ။ သူတို့တွေကြားက ဆက်နွှယ်မှုဆိုတာ တစ်ယောက်နဲ့ တစ်ယောက် ခွဲထားလို့မရတဲ့ သူတို့ရဲ့ အပြန်အလှန် မှီခိုမှုတွေထဲက တစ်ခုပဲ။ တစ်နည်းအားဖြင့်ဆိုရရင် ကမ္ဘာမြေကြီး၊ သစ်ပင်၊ နေရောင်ခြည်၊ တေးသီငှက်တွေနဲ့ လူသားတွေဟာ သူတို့ရဲ့ ဖြစ်တည်မှုအတွက် တစ်ယောက်နဲ့ တစ်ယောက် အပြန်အလှန် အမှီသဟဲ ပြုကြရတယ်၊ တစ်ယောက်ကို တစ်ယောက် ပြုစုစောင့်ရှောက်ကြရတယ်။ ကမ္ဘာမြေကြီးက သစ်ပင်ကို ပြုစုစောင့်ရှောက်သလို သစ်ပင်ကလည်း ကမ္ဘာမြေကြီးကို ကာကွယ်ပေးတယ်၊ နေရောင်ခြည်က သစ်ပင်ကို ထောက်ပံ့ကူညီတယ်၊ သစ်ပင်ဟာ နေရောင်ခြည်ကနေ လတ်ဆတ်တဲ့လေကို ဖန်ဆင်းပြီး ကမ္ဘာမြေကြီးကို နေအပူဒဏ်ကနေ ကာကွယ်ပေးတယ်။ အဆုံးမှာ ဒါတွေထဲကနေ ဘယ်သူက အကျိုးအမြတ်ရသလဲ။ လူသားမျိုးနွယ်တွေပဲ မဟုတ်ဘူးလား။ ဒါဟာ လူနေပတ်ဝန်းကျင်ကို လူသားမျိုးနွယ်အတွက် ဘုရားသခင်က ဖန်ဆင်းပေးခဲ့တဲ့ နိယာမတွေထဲက တစ်ခုဖြစ်ပြီး အခြေခံ ရည်ရွယ်ချက်တွေထဲက တစ်ခုလည်း ဖြစ်တယ်။ ဒါဟာ ရိုးရှင်းတဲ့ ပုံရိပ်ဖြစ်ပေမယ့် ဘုရားသခင်ရဲ့ ဉာဏ်တော်နဲ့ သူ့ရဲ့ စေတနာတွေကို ငါတို့အားလုံး တွေ့နိုင်တယ်။ လူသားမျိုးနွယ်ဟာ ကမ္ဘာမြေကြီးမရှိဘဲ၊ ဒါမှမဟုတ် သစ်ပင်တွေမရှိဘဲ၊ ဒါမှမဟုတ် တေးသီငှက်တွေနဲ့ နေရောင်ခြည်မရှိဘဲ မရပ်တည်နိုင်ဘူး၊ ဟုတ်တယ်မဟုတ်လား။ ဒါဟာ ပုံပြင်လေး တစ်ပုဒ်ဆိုပေမယ့် ဘုရားသခင်ရဲ့ စကြဝဠာကြီးကို ဖန်းဆင်းမှုရဲ့ သရုပ်သကန် ဖြစ်ပြီး လူသားတွေကို လူနေပတ်ဝန်းကျင် ပေးအပ်လိုက်ခြင်းဖြစ်တယ်။

ဘုရားသခင်က ကောင်းကင်ကြီး၊ မြေကြီးနဲ့ အရာအားလုံးကို လူသားမျိုးနွယ်အတွက် ဖန်ဆင်းပေးခဲ့တယ်၊ လူနေပတ်ဝန်းကျင်ကိုလည်း ဖန်ဆင်းပေးခဲ့တယ်။ ပထမဆုံးအနေနဲ့ ဒီပုံပြင်ထဲမှာ ငါတို့ ဆွေးနွေးခဲ့တဲ့ အဓိက အကြောင်းအရာကတော့ အရာအားလုံးကြားက ဆက်နွှယ်မှုနဲ့ အရာအားလုံးတို့ရဲ့ အပြန်အလှန် မှီခိုမှုတို့ပဲ ဖြစ်တယ်။ ဒီနိယာမက လူသားမျိုးသားနွယ်ရဲ့ ပတ်ဝန်းကျင်ကို ကာကွယ်ပေးထားတယ်၊ ဒါ့ကြောင့် ၎င်းဟာ ရှင်သန် ရပ်တည်နိုင်တယ်၊ ဒီပတ်ဝန်းကျင် တည်ရှိနေတာကြောင့် လူသားတွေဟာ ကျန်းမာသန်စွမ်းပြီး မျိုးပွားနိုင်ကြတယ်။ မြင်ကွင်းထဲမှာ သစ်ပင်၊ ကမ္ဘာမြေကြီးနဲ့၊ တေးသီငှက်တွေနဲ့ လူသားတွေကို ငါတို့ တွေ့ခဲ့ရတယ်။ အဲဒီထဲမှာ ဘုရားသခင်ရော ပါသလား။ လူသားတွေ မမြင်လောက်ဘူး၊ ဟုတ်တယ် မဟုတ်လား။ ဒါပေမဲ့ မြင်ကွင်းထဲက အကြောင်းအရာတွေကြားက အပြန်အလှန် ဆက်စပ်မှုတွေရဲ့ နိယာမတွေကိုတော့ လူသားတွေ မြင်နိုင်ပါတယ်၊ ဒါ့ကြောင့် ဘုရားသခင် တည်ရှိတယ်ဆိုတာ၊ ဘုရားသခင်က အုပ်ချုပ်သူ ဖြစ်တယ်ဆိုတာ ဒီနိယာမတွေကတဆင့် လူသားတွေ သိနိုင်တယ်။ ဘုရားသခင်က အရာအားလုံးရဲ့ တည်ရှိမှုနဲ့ ရှင်သန်မှုကို ထိန်းသိမ်းဖို့ ဒီနိယာမတွေနဲ့ စည်းမျဉ်းစည်းကမ်းတွေကို အသုံးပြုတာဖြစ်တယ်။ ဒီနည်းနဲ့ သူဟာ အရာအားလုံးကို ကူညီထောက်ပံ့ပေးပြီး လူသားမျိုးနွယ်ကိုလည်း ကူညီထောက်ပံ့ပေးတယ်။ ဒီပုံပြင်လေးဟာ ငါတို့ ခုလေးတင် ဆွေးနွေးခဲ့တဲ့ အဓိကဆိုလိုရင်းနဲ့ ဆက်စပ်မှု ရှိသလား။ အပေါ်ယံကြည့်ရင် ဆက်စပ်မှု မရှိဘူးလို့ ထင်ရပေမယ့်၊ အမှန်တကယ်က ဖန်ဆင်းရှင်အနေနဲ့ ဘုရားသခင်က အရာအားလုံးပေါ်မှာ ချမှတ်ခဲ့တဲ့ စည်းမျဉ်းတွေနဲ့ အရာအားလုံးကို အုပ်စိုးထားတဲ့ သူ့ရဲ့ အချုပ်အခြာ အာဏာဟာ အရာအားလုံးရဲ့ ဘဝ ပင်မအရင်းအမြစ်ဖြစ်ခြင်းနဲ့ အခိုင်အမာ ဆက်စပ်မှုရှိပြီး သူတို့ဟာ ခွဲမရနိုင်အောင် ချိတ်ဆက်ထားတယ်။ ဟုတ်တယ် မဟုတ်လား။ (ဟုတ်ပါတယ်။) သင်တို့ နည်းနည်းလောက်တော့ လေ့လာမိပြီ မဟုတ်လား။

ဘုရားသခင်ဟာ စကြဝဠာကြီးကို ထိန်းချုပ်ထားတဲ့ စည်းမျဉ်းတွေရဲ့ အရှင်သခင်ဖြစ်တယ်၊ သူဟာ အရာအားလုံးရဲ့ ရှင်သန်မှုကို အုပ်ချုပ်တဲ့ စည်းမျဉ်းတွေကို ထိန်းချုပ်တယ်၊ ပြီးတော့ စကြဝဠာကြီးနဲ့ အရာအားလုံးကို အတူတကွ ရှင်သန်နေစေဖို့ သူက ထိန်းချုပ်ထားတယ်၊ သူတို့တွေ မျိုးတုန်း ပျောက်ကွယ်မသွားအောင် ဘုရားသခင်က ဖန်ဆင်းထားတယ်၊ ဒါမှသာ လူသားမျိုးနွယ်ဟာ ဆက်လက် တည်ရှိနေနိုင်မယ်၊ ဘုရားသခင်ရဲ့ ဦးဆောင်မှုနဲ့သာ ထိုပတ်ဝန်းကျင်မျိုးမှာ လူသားတွေ နေထိုင်နိုင်မယ်။ အရာအားလုံးကို အုပ်ချုပ်ထားတဲ့ ဒီစည်းမျဉ်းတွေဟာ ဘုရားသခင်ရဲ့ အချုပ်အခြာ အာဏာအောက်မှာ ရှိနေပေမယ့် လူသားမျိုးနွယ်ကတော့ အဲဒီစည်းကမ်းတွေကို ကြားဝင် နှောင့်ယှက်လို့၊ ပြောင်းလဲလို့ မရပါဘူး၊ ဘုရားသခင် ကိုယ်တိုင်သာလျှင် ဒီစည်းမျဉ်းတွေကို သိပြီး သူကိုယ်တိုင်ကသာ သူတို့ကို စီမံခန့်ခွဲတယ်။ သစ်ပင်တွေ ဘယ်တော့ အညှောက်ပေါက်မယ်၊ မိုးဘယ်တော့ရွာမယ်၊ ကမ္ဘာမြေကြီးက အပင်ငယ်လေးတွေကို ရေနဲ့ အာဟာရ ဘယ်လောက်ပေးမယ်၊ ဘယ်ရာသီမှာ သစ်ရွက်တွေ ကြွေမယ်၊ ဘယ်ရာသီမှာ သစ်ပင်တွေ အသီး သီးမယ်၊ နေရောင်ခြည်က သစ်ပင်ကို စွမ်းအင်ဘယ်လောက် ပေးမယ်၊ သစ်ပင်တွေဟာ နေရောင်ခြည်ကရတဲ့ စွမ်းအင်ကို အသုံးချပြီး ဘာကို ထုတ်ပေးမယ် –– စကြဝဠာကြီးကို ဘုရားသခင် ဖန်ဆင်းကတည်းက ဒါတွေအားလုံးကို သူ အစီအစဉ် ချထားပြီးသားပါ၊ ဒီနည်းဥပဒေသတွေကို လူသားတွေ ချိုးဖောက်လို့ မရနိုင်ဘူး။ ဘုရားသခင် ဖန်ဆင်းထားတဲ့ အရာတွေ –– သူတို့ဟာ သက်ရှိတွေ ဖြစ်ပါစေ ဒါမှမဟုတ် လူသားတွေက သက်မဲ့လို့ ထင်ခံရတဲ့ အရာတွေ ဖြစ်ပါစေ –– အားလုံးဟာ ဘုရားသခင်ရဲ့ လက်တွေထဲမှာရှိပြီး သူ့ရဲ့ အချုပ်အခြာ အာဏာအောက်မှာ ရှိတယ်။ ဘယ်သူကမှ ဒီစည်းကမ်းကို ချိုးဖောက်လို့ မရဘူး။ ပြောရရင် ဘုရားသခင်က အရာအားလုံးကို ဖန်ဆင်းတဲ့အခါ သူတို့ဘယ်သို့ ဘယ်ပုံ ဖြစ်သင့်တယ်ဆိုတာ ဘုရားသခင်ကပဲ ဖန်တီးတယ်။ သစ်ပင်ဟာ ကမ္ဘာမြေကြီးမရှိဘဲ အမြစ်တွယ်လို့ မရဘူး၊ အညှောက်ပေါက်လို့ မရဘူး၊ ကြီးထွားလို့ မရဘူး။ သစ်ပင်တွေ မရှိရင် ကမ္ဘာမြေကြီးဟာ ခြောက်သွေ့သွားမှာပေါ့၊ ဟုတ်တယ်မဟုတ်လား။ ဒါ့အပြင် သစ်ပင်ဟာ တေးသီငှက်တို့ရဲ့ နားခိုရာအိမ်လည်း ဖြစ်တယ်၊ သူတို့တွေ လေဒဏ်ကနေ အကာအကွယ်ယူတဲ့ နေရာလည်း ဖြစ်တယ်။ သစ်ပင်က နေရောင်ခြည် မရှိရင် အဆင်ပြေပါ့မလား။ (အဆင်မပြေပါဘူး။) သစ်ပင်က ကမ္ဘာမြေကြီးပဲ ရှိရင်လည်း အလုပ်မဖြစ်ဘူး။ ဒါတွေအားလုံးဟာ လူသားမျိုးနွယ်အတွက်၊ လူသားမျိုးနွယ် အသက်ရှင်သန်မှုအတွက်ပဲ ဖြစ်တယ်။ သစ်ပင်ပေးတဲ့ လတ်ဆတ်တဲ့လေကို လူသားတွေ ရှူရှိုက်ကြရတယ်၊ သစ်ပင်က ကာကွယ်ပေးထားတဲ့ ကမ္ဘာမြေကြီးပေါ်မှာ နေထိုင်ကြရတယ်။ လူသားတွေဟာ နေရောင်ခြည်မရှိဘဲ အသက်မရှင်နိုင်ဘူး၊ လူသားတွေဟာ အမျိုးမျိုးသော သက်ရှိအရာတွေအားလုံး မရှိဘဲ အသက်မရှင်နိုင်ဘူး။ ဒီအရာတွေ အားလုံးကြားက ဆက်နွှယ်မှုတွေဟာ ရှုပ်ထွေးပေမယ့် အရာအားလုံးကို အုပ်ချုပ်တဲ့ စည်းမျဉ်းတွေကို ဘုရားသခင်ကပဲ ဖန်ဆင်းခဲ့တဲ့ အတွက်ကြောင့် သူတို့ဟာ အချင်းချင်း ဆက်စပ်နေပြီး အပြန်အလှန် မှီခိုနေကြတယ်ဆိုတာ သင်နားလည်ထားရမယ်၊ သူဖန်ဆင်းခဲ့တဲ့ အရာတိုင်းမှာ တန်ဖိုးနဲ့ အရေးပါမှုရှိတယ်။ အရာတစ်ခုခုကို အရေးပါမှု မပါဘဲ ဖန်ဆင်းခဲ့မယ်ဆိုရင် ဘုရားသခင်က အဲဒီအရာကို ပျောက်ကွယ်ခွင့် ပေးလိုက်မှာပဲ။ နားလည်ကြလား။ ဒါဟာ အရာအားလုံးကို ထောက်ပံ့တဲ့အခါမှာ သူအသုံးပြုခဲ့တဲ့ နည်းလည်းတွေထဲက တစ်ခုပဲ။ ဒီပုံပြင်ထဲမှာပါတဲ့ “ထောက်ပံ့တယ်” ဆိုတာ ဘာကို ရည်ညွှန်းတာလဲ။ ဘုရားသခင်က နေ့တိုင်း အပြင်ထွက်ပြီး သစ်ပင် ရေလောင်းတာကို ပြောတာလား။ သစ်ပင် အသက်ရှူဖို့ ဘုရားသခင်ရဲ့ အကူအညီ လိုသလား။ (မလိုပါဘူး။) ဒီဥပမာမှာပါတဲ့ “ထောက်ပံ့တယ်” ဆိုတာ အရာအားလုံးကို ဖန်းဆင်းပြီးတဲ့နောက် ဘုရားသခင်ရဲ့ စီမံခန့်ခွဲမှုကို ပြောတာ၊ အရာအားလုံး ချောချောမွေ့မွေ့ လည်ပတ်နေစေမယ့် စည်းမျဉ်းတွေပဲ သူလိုအပ်တယ်။ သစ်ပင်ကို ကမ္ဘာမြေကြီးမှာ စိုက်လိုက်တဲ့အတွက် သစ်ပင်ဟာ သူ့ဘာသာ ကြီးထွားနိုင်တယ်။ သစ်ပင် ရှင်သန်စေဖို့ အခြေအနေတွေကိုလည်း ဘုရားသခင်ကပဲ ဖန်ဆင်းထားတာ။ နေရောင်ခြည်၊ ရေထု၊ မြေထု၊ လေထုနဲ့ ပတ်ဝန်းကျင်၊ လေ၊ ဆီးနှင်း၊ နှင်းနဲ့ မိုး ပြီးတော့ ဥတုလေးပါး၊ ဒါတွေဟာ သစ်ပင် ကြီးထွားဖို့ မရှိမဖြစ်လိုအပ်တဲ့ အခြေအနေတွေ ဖြစ်တယ်၊ ဘုရားသခင်က ဒီအရာတွေကို ပြင်ဆင်ထားပြီးသား ဖြစ်တယ်။ ဒါဆို ဘုရားသခင်ဟာ ဒီလူနေပတ်ဝန်းကျင်ရဲ့ ပင်မအရင်းအမြစ် ဟုတ်သလား။ (ဟုတ်ပါတယ်။) ဘုရားသခင်က နေ့တိုင်း အပြင်ထွက်ပြီး သစ်ပင်က သစ်ရွက် တစ်ရွက်ချင်းစီကို လိုက်ရေတွက်နေစရာ လိုလား။ မလိုအပ်ဘူး၊ ဟုတ်တယ် မဟုတ်လား။ သစ်ပင် အသက်ရှူဖို့အတွက် ဘုရားသခင်ရဲ့ ကူညီမှု မလိုဘူး။ နေ့တိုင်း ဘုရားသခင်က “သစ်ပင်အတွက် နေသာဖို့ အချိန်ရောက်ပြီ” ဒီလိုပြောပြီး နေရောင်ခြည်ကို နှိုးဖို့ မလိုဘူး။ သူဒီလို လုပ်စရာမလိုဘူး။ စည်းမျဉ်းအတိုင်း နေကလည်း သူ့ဘာသာသူ သာမယ်၊ လိုအပ်တဲ့အခါကျရင် သစ်ပင်က နေရောင်ခြည်တွေ စုပ်ယူတယ်၊ နေရောင်ခြည်ကို မလိုတော့ရင်လည်း သစ်ပင်က စည်းမျဉ်းတွေအထဲမှာ ရှင်သန်နေတုန်းပဲ။ ဒါဟာ သင်တို့ သေသေချာချာ ရှင်းမပြနိုင်တဲ့ နိယာမ သဘောတရားလည်း ဖြစ်ကောင်းဖြစ်လိမ့်မယ်၊ ဒါပေမဲ့ ဒါဟာ လူတိုင်း သိနိုင်ပြီး၊ လက်ခံနိုင်တဲ့ အမှန်တရားတစ်ရပ် ဖြစ်တယ်။ သင်တို့အားလုံးလုပ်ရမှာက အရာအားလုံးတည်ရှိမှုရဲ့ စည်းမျဉ်းတွေဟာ ဘုရားသခင်ဆီက လာတယ်ဆိုတာနဲ့ သူတို့ရဲ့ ကြီးထွားရှင်သန်မှုဟာ ဘုရားသခင်ရဲ့ အချုပ်အခြာ အာဏာအောက်မှာ ရှိတယ်ဆိုတာကို အသိအမှတ်ပြုရုံပါပဲ။ သင်တို့ နားလည်တယ် မဟုတ်လား။

ဒီပုံပြင်ထဲမှာ ဥပမာအလင်္ကာ သုံးထားတယ်လို့ လူသားတွေ ပြောမလား။ (မပြောပါဘူး။) အဲဒီအလင်္ကာက လူသားအသွင် ဆောင်သလား။ (မဆောင်ပါဘူး။) ငါပြောခဲ့တာတွေက အမှန်တွေပဲ။ အသက်ရှင်တဲ့ အရာတိုင်း၊ အသက်ရှိတဲ့ အရာတိုင်းဟာ ဘုရားသခင်ရဲ့ အုပ်စိုးမှုအောက်မှာ ရှိတယ်။ အရာရာတိုင်းကို ဘုရားသခင်က ဖန်ဆင်းပြီးတာနဲ့ အသက်သွင်းပေးတယ်၊ ဒါဟာ ဘုရားသခင်ကပေးတဲ့ အသက်ဖြစ်ပြီး ဘုရားသခင် ဖန်ဆင်းထားတဲ့ နည်းဥပဒေတွေနဲ့ လမ်းစဉ်ကို လိုက်နာရတယ်။ ဒါကို ဘယ်လူသားကမှ ပြောင်းလဲစရာမလိုသလို လူသားတွေရဲ့ အကူအညီလည်း မလိုအပ်ဘူး၊ ဒါ ဘုရားသခင်က အရာအားလုံးကို ကူညီထောက်ပံ့တဲ့ နည်းပဲ။ သင်တို့ နားလည်တယ် မဟုတ်လား။ လူသားတွေ ဒါကို မှတ်ထားဖို့ လိုအပ်တယ်လို့ သင်တို့ထင်သလား။ (မှတ်ထားသင့်ပါတယ်။) ဒီလိုဆို ဒီပုံပြင်ဟာ ဇီဝဗေဒနဲ့ ဆက်စပ်မှု တစ်စုံတစ်ရာများ ရှိသလား။ အသိပညာ ဒါမှမဟုတ် သိပ္ပံပညာ နယ်ပယ်နဲ့ရော ဆက်နွှယ်မှု ရှိသလား။ (မရှိပါဘူး။) ဒီနေရာမှာ ငါတို့ဟာ ဇီဝဗေဒအကြောင်း ပြောနေတာ မဟုတ်ဘူး၊ ပြီးတော့ ဇီဝဗေဒဆိုင်ရာ သုတေသန လုပ်နေတာလည်း မဟုတ်ဘူး။ ဒီနေရာမှာ ငါတို့ ပြောနေတဲ့ အဓိက အကြောင်းအရာက ဘာလဲ။ (ဘုရားသခင်ဟာ အရာအားလုံးအတွက် အသက်ရဲ့ ပင်မအရင်းအမြစ် ဖြစ်တယ်ဆိုတဲ့ အကြောင်းပါ။) ဒါက အဓိကအချက်ပဲ။ ဖန်ဆင်းထားတဲ့ အရာအားလုံးကြားမှာ သင်တို့ ဘာကို မြင်ရသလဲ။ သစ်ပင်တွေကို မြင်ပြီးပြီလား။ ကမ္ဘာမြေကြီးကိုရော မြင်ပြီးပြီလား။ (မြင်ပြီးပါပြီ။) နေရောင်ခြည်ကိုလည်း မြင်ပြီးပြီ မဟုတ်လား။ သစ်ပင်တွေထဲမှာ အိပ်တန်းတက်နေတဲ့ ငှက်တွေကိုရော မြင်ပြီးပြီလား။ (မြင်ပြီးပါပြီ။) ဒီလို ပတ်ဝန်းကျင်မျိုးမှာ နေရတာ လူသားမျိုးနွယ်က ပျော်ရဲ့လား။ (ပျော်ပါတယ်။) ပြောရရင် ဘုရားသခင်က အရာအားလုံးကို အသုံးချထားတယ်၊ အရာအားလုံးဆိုတာ လူသားမျိုးနွယ် အသက်ရှင်သန်နားခိုရာ အိမ်ကို ထိန်းသိမ်းဖို့နဲ့ လူသားမျိုးနွယ်ရဲ့ နေအိမ်ကို ကာကွယ်စောင့်ရှောက်ဖို့ သူဖန်တီးထားတဲ့ အရာတွေကို ပြောတာ၊ ဒါဟာ သူက လူသားတွေကို ကူညီထောက်ပံ့တဲ့၊ အရာအားလုံးကို ကူညီထောက်ပံ့တဲ့ နည်းပဲ။

အကြောင်းအရာတွေကို ငါက ဒီနည်းနဲ့ ဆွေးနွေးသွားတာ၊ ဒီလို ရှင်းလင်း တင်ပြသွားတာ သင်တို့ ဘယ်လိုခံစားရလဲ။ (ကောင်းပါတယ်။) ကောင်းရဲ့လား။ (ကောင်းပါတယ်၊ သဘာဝကျပါတယ်။) ဘယ်လို ကောင်းတာလဲ။ (နားလည်လွယ်တယ် ပြီးတော့ လက်တွေ့ကျတဲ့ ဥပမာတွေလည်း ပါတယ်။) ဒါဟာ အကြောင်းအရာတွေ ဆွေးနွေးဖို့အတွက် လက်တွေ့ကျပြီး အဓိပ္ပာယ်ရှိတဲ့နည်းပဲ ဟုတ်တယ်မဟုတ်လား။ ဘုရားသခင်သည်သာ အရာအားလုံးတို့ရဲ့ ဘဝပင်မအရင်းအမြစ် ဖြစ်တယ်ဆိုတာ လူသားတွေ မှတ်မိစေဖို့ ဒီပုံပြင်မျိုးဟာ မရှိမဖြစ် လိုအပ်သလား။ (လိုအပ်ပါတယ်။) လိုအပ်တယ်ဆိုရင် နောက်ထပ် ပုံပြင်တစ်ပုဒ်ကို ဆက်သွားလိုက်ရအောင်။ နောက်ပုံပြင်ရဲ့ အကြောင်းအရာက နည်းနည်းလေး ကွဲပြားတယ်၊ ပုံပြင်ရဲ့ အဓိကဆိုလိုရင်း အချက်ကလည်း အနည်းငယ် ကွဲပြားတယ်၊ ပုံပြင်ထဲက အကြောင်းအရာတွေကလည်း ဘုရားသခင်ရဲ့ ဖန်ဆင်းမှုထဲမှာ လူတွေ မြင်တွေ့နိုင်တဲ့ အရာတွေဖြစ်တယ်။ သင်တို့ကို ပုံပြင်ပြောပြတဲ့ နည်းကိုပဲ ငါ တစ်ခါထပ် သုံးရလိမ့်ဦးမယ်၊ ဒါကို သင်တို့အားလုံး ငြိမ်ငြိမ်လေး နားထောင်ပြီးတော့ ငါပြောနေတာ ဘာလဲဆိုတာ စဉ်းစားထားရမယ်။ ငါပုံပြင်ပြောပြီးတာနဲ့ သင်တို့ ဘယ်လောက် လေ့လာမိသလဲဆိုတာ သိဖို့ သင်တို့ကို မေးခွန်းတချို့ မေးမယ်။ ဒီပုံပြင်ထဲက အဓိက ဇာတ်ကောင်တွေကတော့ ကြီးမားတဲ့ တောင်ကြီးရယ်၊ စမ်းချောင်းလေးရယ်၊ လေကြမ်းကြီးနဲ့ ဧရာမလှိုင်းလုံးကြီးရယ်တို့ပါပဲ။

ပုံပြင်နံပါတ်၂။ ကြီးမားတဲ့ တောင်ကြီး၊ စမ်းချောင်းလေး၊ လေကြမ်းကြီးနဲ့ ဧရာမလှိုင်းလုံးကြီး

တသွင်သွင်စီးဆင်းနေတဲ့ စမ်းချာင်းလေးတစ်ခု ရှိခဲ့ပါသတဲ့၊ စမ်းချောင်းလေးဟာ နောက်ဆုံးတော့ ကြီးမားတဲ့ တောင်ကြီးရဲ့ တောင်ခြေရင်းကို ရောက်ရှိလာခဲ့တယ်။ တောင်ကြီးက စမ်းချောင်းလေးရဲ့ ရေစီးကြောင်းကို ကာဆီးထားတဲ့ အတွက်ကြောင့် စမ်းချောင်းက တောင်ကြီးကို အားနည်း သေးငယ်တဲ့လေသံနဲ့ “ကျေးဇူးပြုပြီး ကျွန်တော့်ကို ဖြတ်သွားခွင့်ပြုပါ၊ သင်က ကျွန်တော် သွားမယ့်လမ်းမှာ ရပ်နေပြီး ကျွန်တော် ရှေ့ဆက်သွားမယ့် လမ်းကြောင်းကို ပိတ်ဆို့နေပါတယ်”လို့ မေးလိုက်တယ်။ ဒီတော့ တောင်ကြီးက “သင် ဘယ်သွားမလို့လဲ”လို့ ပြန်မေးတယ်။ စမ်းချောင်းလေးက “ကျွန်တော် နားခိုရာအိမ် ရှာနေတာပါ”လို့ ပြန်ဖြေတယ်။ တောင်ကြီးက “ကောင်းပြီ၊ ဆက်လုပ်၊ ငါ့ပေါ်ကနေ စီးဆင်းသွား” လို့ ပြောလိုက်တယ်။ ဒါပေမဲ့ စမ်းချောင်းလေးဟာ အားနည်းလွန်းပြီး၊ သေးငယ်လွန်းတာကြောင့် ဒီလို ကြီးမားလွန်းလှတဲ့ တောင်ကြီးကို ကျော်ပြီး စီးဆင်းဖို့ဆိုတာ မဖြစ်နိုင်ဘူး၊ ဒါ့ကြောင့် တောင်ခြေမှာ ဆက်ပြီးစီးဆင်းနေရုံက လွဲပြီး သူ့မှာ ရွေးချယ်စရာမရှိဘူး …

လေကြမ်းကြီးဟာ သဲတွေ၊ ဖုန်တွေကို သယ်ဆောင်ရင်း တောင်ကြီးရှိတဲ့ဆီ တိုက်ခတ်လာတယ်။ လေက တောင်ကြီးကို “ငါ့ကို သွားခွင့်ပေး”လို့ အော်ပြောတယ်။ တောင်ကြီးက “သင် ဘယ်ကို သွားမလို့လဲ”လို့ မေးတယ်။ လေက “တောင်ကြီးရဲ့ အဲဒီဘက်ကို ငါ သွားချင်တယ်” လို့ ပြန်အော်ပြောလိုက်တယ်။ တောင်ကြီးက “ကောင်းပြီ၊ ကျွန်ုပ်ရဲ့ အလယ်ကနေ ဖြတ်သွားနိုင်ရင် သင်သွားလို့ရမယ်။” လေကြမ်းကြီးဟာ ဒီနည်းနဲ့ တစ်မျိုး၊ ဟိုနည်းနဲ့ တစ်ဖုံ ပြင်းပြင်းထန်ထန် တိုက်ခတ်ကြည့်တယ်၊ လေဟာ ဘယ်လောက်ပဲ သည်းကြီးမည်းကြီး တိုက်ခတ်ကြည့်ပေမယ့်လည်း တောင်ရဲ့ အလယ်ကို ဖောက်မထွက်နိုင်ခဲ့ဘူး။ လေဟာ ပင်ပန်းလာပြီး အနားယူဖို့ ရပ်တန့်ခဲ့ရတယ်။ တောင်ကြီးရဲ့ အဲဒီဘက်ခြမ်းမှာတော့ လူတွေကို စိတ်ကျေနပ်စေမယ့် ညင်သာပျော့ပျောင်းတဲ့ လေသာ တိုက်ခတ်တယ်။ ဒါဟာ တောင်ကြီးက လူတွေကို ပေးတဲ့ နှုတ်ခွန်းဆက်သခြင်းပါပဲ …

ပင်လယ်ကမ်းစပ်မှာတော့ သမုဒ္ဒရာလှိုင်းဟာ သောင်ပြင် ကျောက်တန်းကို ညင်ညင်သာသာ ပုတ်ခတ်တတ်တယ်။ ရုတ်တရတ် ဧရာမလှိုင်းလုံးကြီး ရောက်ရှိလာပြီး တောင်ကြီးဆီ တဟုန်တိုး ပြေးတက်လာတယ်။ “ဖယ်စမ်း” ဧရာမလှိုင်းလုံးကြီးက အော်ပြောတယ်။ တောင်ကြီးက “သင် ဘယ်ကို သွားမလို့လဲ”လို့ မေးတယ်။ လှိုင်းလုံးကြီးကတော့ မရပ်ဘဲ တောင်ကြီးကို “ငါ့ရဲ့ နယ်ပယ်ကို ချဲ့ထွင်နေတာ၊ ငါ့လက်တွေကို နည်းနည်းလောက် ဖြန့်ကျက်ထားချင်တယ်’’လို့ ပြန်ဖြေရင်း ဆက်လက် ပြေးတက်နေတယ်။ တောင်ကြီးက ပြောတယ် “ကောင်းပြီ၊ ငါ့ ထိပ်ဆုံးကို ကျော်သွားနိုင်ရင် ငါလမ်းဖယ်ပေးမယ်။” လှိုင်းလုံးကြီးက နောက်နည်းနည်းဆုတ်လိုက်ပြီး တောင်ထိပ်ဆီ ပြေးတက်ဖို့ နောက်တစ်ကြိမ် ကြိုးစားပြန်တယ်။ ဒါပေမဲ့ ဘယ်လောက်ပဲ ကြိုးစားကြိုးစား၊ တောင်ကြီးကိုတော့ မကျော်လွှားနိုင်ဘူး။ သူ့ မူလနေရာဆီ တဖြည်းဖြည်း ပြန်ဆုတ်သွားရုံ ကလွဲလို့ သူ့မှာ ရွေးစရာမရှိဘူး …

ရာစုနှစ်တွေကြာသည့်တိုင် စမ်းချောင်းလေးဟာ တောင်ခြေ တစ်ဝိုက်မှာ ညင်သာစွာ စီးဆင်းနေတယ်။ တောင်ကြီးရဲ့ လမ်းပြမှုနောက် လိုက်ရင်း စမ်းချောင်းလေးဟာ သူ့အိမ်ကို ပြန်နိုင်ခဲ့တယ်၊ မြစ်နဲ့ ပူးပေါင်းပြီး ပင်လယ်ထဲကို စီးဝင်ခဲ့တယ်။ တောင်ကြီးရဲ့ ဂရုစိုက်မှုအောက်မှာ စမ်းချောင်းဟာ ဘယ်တုန်းကမှ ပျောက်ကွယ်မသွားခဲ့ဘူး။ စမ်းချောင်းလေးနဲ့ တောင်ကြီးတို့ဟာ တစ်ယောက်ကို တစ်ယောက် အားထားကြတယ်၊ သူတို့ဟာ တစ်ယောက်ကို တစ်ယောက် သည်းခံချုပ်ထိန်းခဲ့ကြပြီး တစ်ယောက်ကို တစ်ယောက် အမှီသဟဲပြုကြတယ်။

ရာစုနှစ်တွေကြာသည့်တိုင် တောင်ကြီးကို အော်ဟစ် တောင်းဆိုတတ်တဲ့ လေကြမ်းကြီးရဲ့ အကျင့်တွေကတော့ ပြောင်းလဲ မသွားဘူး။ လေဟာ သဲမှုန်တွေကို ဝေ့ဝဲသယ်ဆောင် တိုက်ခတ်လာပြီး အရင်ကလိုပဲ တောင်ကြီးဆီ ‘’ရောက်လာခဲ့’’ ပြန်တယ်။ သူဟာ တောင်ကြီးကို ခြိမ်းခြောက်ပေမယ့် တောင်ရဲ့အလယ်ကို ဘယ်တော့မှ ဖောက်မထွက်ခဲ့ဘူး။ လေကြမ်းကြီးနဲ့ တောင်ကြီးတို့ဟာ တစ်ယောက်ကို တစ်ယောက် အားထားကြတယ်၊ သူတို့ဟာ တစ်ယောက်ကို တစ်ယောက် သည်းခံချုပ်ထိန်းကြပြီး တစ်ယောက်ကို တစ်ယောက် အမှီသဟဲပြုကြတယ်။

ရာစုနှစ်တွေ ကြာသည့်တိုင် ဧရာမ လှိုင်းလုံးကြီးကလည်း ငြိမ်မနေပါဘူး၊ သူ့ရဲ့ ချဲ့ထွင်မှုဟာ ရပ်တန့်မသွားဘူး။ အသံကုန်ဟစ်ပြီး တောင်ကြီးဆီ ထပ်တလဲလဲ ပြေးပြေးရိုက်ပေမယ့်လည်း တောင်ကြီးကတော့ တစ်လက်မလောက်တောင် ရွေ့မသွားဘူး။ တောင်ကြီးက ပင်လယ်ကို အပေါ်ကနေ စောင့်ကြည်နေတယ်၊ ဒီလိုနဲ့ ပင်လယ်ထဲက သတ္တဝါတွေဟာ အချင်းချင်း မျိုးပွားကြပြီး အဆမတန် များပြားလာကြတယ်။ ဧရာမ လှိုင်းလုံးကြီးနဲ့ တောင်ကြီးတို့ဟာ တစ်ယောက်ကို တစ်ယောက် အားထားကြတယ်၊ သူတို့ဟာ တစ်ယောက်ကို တစ်ယောက် သည်းခံချုပ်ထိန်းကြပြီးတော့ တစ်ယောက်ကို တစ်ယောက် အမှီသဟဲပြုကြတယ်။

ပုံပြင်ကတော့ ဒါပါပဲ။ အရင်ဆုံး ဒီပုံပြင်နဲ့ ပတ်သက်ပြီး သင်တို့ ငါ့ကို ဘာတွေပြောပြနိုင်လဲ၊ အဓိက အကြောင်းအရာက ဘာလဲ။ ပထမအနေနဲ့ တောင်ကြီးပါတယ်၊ ပြီးတော့ ဘာပါသေးလဲ။ (စမ်းချောင်းလေး၊ လေကြမ်းကြီးနဲ့ ဧရာမလှိုင်းလုံးကြီးပါ။) စမ်းချောင်းလေနဲ့ တောင်ကြီးပါတဲ့ ပထမပိုင်းမှာ ဘာဖြစ်ခဲ့သလဲ။ မှတ်မိကြလား။ (စမ်းချောင်းလေးဟာ တောင်ကြီးရဲ့ တောင်ခြေမှာ စီးဆင်းနေပါတယ်။) တောင်ခြေမှာ စီးဆင်းနေတဲ့ စမ်းချောင်းလေး၊ ဒါက သူတို့ကြားမှာ ဖြစ်ခဲ့တဲ့ ဇာတ်လမ်းလား။ စမ်းချောင်းက ဘယ်ကို စီးဆင်းတာလဲ။ ကြီးမားတဲ့ တောင်ကြီးနဲ့ သေးငယ်တဲ့ စမ်းချောင်းလေးအကြောင်း ငါတို့ ဘာ့ကြောင့် ပြောကြတာလဲ။ (ဘာလို့လဲဆိုတော့ တောင်က စမ်းချောင်းကို အကာအကွယ်ပေးတဲ့အတွက်ကြောင့် စမ်းချောင်းဟာ ဘယ်တော့မှ လမ်းမပျောက်တော့ဘူး။ သူတို့ဟာ တစ်ယောက်ကို တစ်ယောက် အားထားကြတယ်။) တောင်က စမ်းချောင်းလေးကို ကာကွယ်ပေးတာလား၊ ပိတ်ပင်တာလား။ (ကာကွယ်ပေးတာပါ။) ပိတ်ပင်တာရော မဖြစ်နိုင်ဘူးလား။ တောင်ကြီးနဲ့ စမ်းချောင်းလေးဟာ အတူတူ ယှဉ်တွဲနေကြတယ်။ တောင်ကြီးက စမ်းချောင်းလေးကို ကာကွယ်ပေးသလို ကန့်သတ် ပိတ်ပင်တယ်လို့လည်း ပြောလို့ရတယ်။ စမ်းချောင်းလေးကို တောင်က ကာကွယ်ပေးတဲ့အတွက် စမ်းချောင်းလေးဟာ မြစ်ထဲကို စီးဝင်သွားတယ်၊ ဒီလိုကာကွယ်ပေးခြင်းဟာ စမ်းချောင်းလေး နေရာတိုင်း စီးဆင်းသွားပြီး လူသားတွေအတွက် ရေကြီးမှုတွေ၊ ရာသီဥတုဖောက်ပြန်မှုတွေ ဖြစ်မလာအောင် တာဆီးရာလည်း ရောက်တယ်။ ဒါဟာ ဒီအပိုင်းရဲ့ အဓိကအချက် မဟုတ်လား။ တောင်ကြီးရဲ့ စမ်းချောင်းလေးကို အကာအကွယ်ပေးမှုနဲ့ လူသားတွေရဲ့ အသက်အိုးအိမ်တွေကို လုံခြုံအောင် ကာကွယ် စောင့်ရှောက်ပေးမှုပါ။ တောင်ခြေမှာ စမ်းချောင်းလေးဟာ မြစ်နဲ့ပူးပေါင်းသွားပြီး နောက်တော့ ပင်လယ်ထဲကို စီးဝင်သွားတယ်၊ ဒါဟာ စမ်းချောင်းလေး လုပ်ကိုလုပ်ရမယ့်အလုပ်ပဲ မဟုတ်လား။ (ဟုတ်ပါတယ်။) စမ်းချောင်းလေးဟာ မြစ်ထဲကို၊ နောက် ပင်လယ်ထဲကို စီးဆင်းသွားခဲ့တဲ့အခါ၊ သူ ဘာကို အားထားသလဲ။ တောင်ကြီးကို အားထားတယ် ဟုတ်တယ်မလား။ သူဟာ တောင်ကြီးရဲ့ ကာကွယ်စောင့်ရှောက်မှုနဲ့ အတားအဆီးသဖွယ် ဖြစ်တဲ့ တောင်ကြီးကို အားထားတယ်၊ အဓိကအချက်က ဒါပဲမဟုတ်လား။ (ဟုတ်ပါတယ်။) ဒီဥပမာမှာ ရေအတွက် တောင်တွေရဲ့ အရေးပါမှုကို သင်တို့ တွေ့ရတယ်မဟုတ်လား။ (တွေ့ရပါတယ်။) ဒါက အရေးပါသလား။ (အရေးပါပါတယ်။) ဘုရားသခင်က တောင်တွေကို အနိမ့်အမြင့်အလိုက် ဖန်ဆင်းရာမှာ ရည်ရွယ်ချက် ရှိသလား။ ရည်ရွယ်ချက်ရှိတယ် ဟုတ်တယ် မဟုတ်လား။ ဒါကလည်း ပုံပြင်ရဲ့ အစိတ်အပိုင်းလေး တစ်ခုပဲ၊ စမ်းချောင်းလေးနဲ့ တောင်ကြီးကို ကြည့်ခြင်းအားဖြင့် ငါတို့ဟာ ဘုရားသခင်ရဲ့ ဖန်ဆင်းမှုဖြစ်တဲ့ ဒီအရာနှစ်ခုရဲ့ တန်ဖိုးနဲ့ အရေးပါမှုကို တွေ့နိုင်တယ်။ ဒီအရာနှစ်ခုကို အုပ်ချုပ်တဲ့ သူ့ရဲ့ အုပ်ချုပ်ပုံကနေ သူ့ရဲ့ ဉာဏ်ပညာနဲ့ ရည်ရွယ်ချက်ကို ငါတို့ တွေ့နိုင်တယ်။ ဟုတ်တယ်မဟုတ်လား။

ပုံပြင်ဒုတိယပိုင်းက ဘာအကြောင်းလဲ။ (လေကြမ်းကြီးနဲ့ တောင်ကြီး အကြောင်းပါ။) လေဆိုတာ ကောင်းတဲ့အရာ ဟုတ်သလား။ (ဟုတ်ပါတယ်။) ဟုတ်ချင်မှလည်း ဟုတ်မယ်၊ တစ်ခါတစ်ရံ လေဟာ အလွန် ပြင်းထန်မယ်ဆိုရင် အန္တရာယ် ရှိနိုင်တယ်။ ခပ်ပြင်းပြင်း တိုက်နေတဲ့လေထဲမှာ သင်ဟာ အပြင်ထွက် နေရတယ်ဆိုရင် သင်ဘယ်လိုခံစားရမလဲ။ လေဘယ်လောက် ပြင်းသလဲဆိုတဲ့ အပေါ်မှာလည်း မူတည်တယ် မဟုတ်လား။ လေပြေညင်းလေးဆိုရင်၊ ဒါမှမဟုတ် အဆင့် ၃ ကနေ ၄လောက်ရှိတဲ့ လေဆိုရင်တော့ ခံနိုင်လိမ့်ဦးမယ်၊ အများဆုံးအနေနဲ့ကတော့ လူတစ်ယောက် မျက်လုံးဖွင့်ဖို့ အခက်တွေ့လိမ့်မယ်ပေါ့။ ဒါပေမဲ့ လေဆင်နှာမောင်း ဖြစ်လာနိုင်တဲ့နှုန်းနဲ့ လေဟာ ခပ်ကြမ်းကြမ်း တိုက်ခတ်မယ်ဆိုရင် အဲဒီလေကို သင် ဘယ်လို ထိန်းချုပ်နိုင်မလဲ။ ဒီလိုလေမျိုးကို သင် ခံနိုင်မှာ မဟုတ်ဘူး။ ဒီတော့ လူသားတွေက လေဟာ အမြဲတမ်း ကောင်းတဲ့အရာ ဒါမှမဟုတ် ၎င်းဟာ အမြဲတမ်း ဆိုးတဲ့အရာလို့ ပြောမယ်ဆိုရင် မမှန်ကန်နိုင်ပါဘူး၊ ဘာ့ကြောင့်ဆို ထိုအချက်ဟာ လေတိုက်နှုန်း ဘယ်လောက် ပြင်းထန်လဲဆိုတဲ့ အပေါ်မှာ မူတည်နေလို့ ဖြစ်တယ်။ ကဲ ဒီနေရာမှာ တောင်ကြီးရဲ့ အသုံးဝင်မှုက ဘာလဲ။ တောင်ဟာ လေကို စစ်ပေးတဲ့ အရာတစ်မျိုးနဲ့ တူတယ် မဟုတ်လား။ တောင်က လေကြမ်းကြီးကို ထိန်းချုပ်ပြီး ဘာဖြစ်သွားအောင် လျော့ချလိုက်သလဲ။ (လေပြေညင်းလေးပါ။) လူအများစုဟာ သူတို့နေထိုင်ရာ ပတ်ဝန်းကျင်မှာ လေကို ထိတွေ့ခံစားလို့ရတယ် –– သူတို့ခံစားမိတာ လေကြမ်းလား၊ လေပြေညင်းလား။ (လေပြေညင်းပါ။) ဒါဟာ ဘုရားသခင်ရဲ့ တောင်တွေ ဖန်ဆင်းမှု နောက်ကွယ်က ရည်ရွယ်ချက်တွေထဲက တစ်ခုပဲ မဟုတ်လား။ ဒါဟာ သူ့ရဲ့ ရည်ရွယ်ချက်ပဲ မဟုတ်ဘူးလား။ သဲမှုန်တွေ အပြည့်နဲ့ လေခပ်ပြင်းပြင်း တိုက်ခတ်တဲ့ ပတ်ဝန်းကျင်မျိုးမှာ လေကို စစ်နိုင်တဲ့၊ တားဆီးနိုင်တဲ့ အရာမရှိဘဲ လူသားတွေ နေရမယ်ဆိုရင် ဘာနဲ့တူမလဲ။ ကုန်းပေါ်မှာ လူတွေ မနေနိုင်လောက်အောင် သဲတွေ၊ ကျောက်ခဲတွေပါတဲ့ လေမျိုးတိုက်နိုင်သလား။ လွင့်စင်လာတဲ့ ကျောက်ခဲတွေက လူတွေရဲ့ နဖူးကို လာမှန်နိုင်တယ်၊ ဒါမှမဟုတ် မျက်လုံးတွေထဲ သဲတွေ ဝင်ပြီးတော့ ဘာကိုမှ မြင်ရတော့မှာ မဟုတ်ဘူး။ လူတွေဟာ လေထုထဲကို စုပ်ယူခြင်း ခံရနိုင်တယ်၊ ဒါမှမဟုတ် လေက အလွန်ပြင်းတဲ့အတွက်ကြောင့် သူတို့တွေ ရပ်နိုင်မှာ မဟုတ်ဘူး။ အိုးအိမ်တွေလည်း ပျက်စီးကုန်ပြီး ဘေးန္တရာယ်ပေါင်းစုံ ကျရောက်လာနိုင်တယ်။ ဒီလိုဆို လေကြမ်းကြီးမှာ တန်ဖိုးရှိသလား။ (ရှိပါတယ်။) ဘယ်လိုတန်ဖိုးလဲ။ ဒီလေဟာ မကောင်းဘူးလို့ ငါပြောခဲ့တုန်းက သူ့မှာ တန်ဖိုးမရှိဘူးလို့ လူတွေ ထင်ကောင်း ထင်သွားလိမ့်မယ်၊ ဒါပေမဲ့ တန်ဖိုးမရှိဘူးဆိုတာ မှန်သလား။ လေညင်းလေးအဖြစ် ပြောင်းသွားတဲ့အခါ တန်ဖိုးမရှိဘူးလား။ ရာသီဥတု ပူအိုက် စိုစွတ်တဲ့အခါ လူတွေ ဘာကို အလိုအပ်ဆုံးဖြစ်မလဲ။ သူတို့ရဲ့ စိတ်တွေကို ကြည်လင်လန်းဆန်းစေဖို့၊ စိတ်တည်ငြိမ်စေဖို့နဲ့ စိတ်အခြေအနေ တိုးတက်စေဖို့ လေနုအေးလေး သူတို့အပေါ် ညင်သာစွာ တိုက်ခတ်ဖို့ လိုအပ်တယ်။ ဥပမာပြောရရင် အခန်းတစ်ခန်းထဲမှာ သင်တို့အားလုံးဟာ လူအများကြီးနဲ့ ထိုင်နေကြပြီး၊ လေထုကလည်း မွန်းကျပ်တယ်ဆိုရင် သင်တို့ ဘာကို အလိုအပ်ဆုံးဖြစ်မလဲ။ (လေနုအေးလေး လိုအပ်ပါတယ်။) လေထုဟာ နောက်ကျိနေမယ်၊ ဖုန်မှုန့်တွေနဲ့ ပြည့်နေမယ်ဆိုရင် လူတစ်ယောက်ရဲ့ စဉ်းစားတွေးခေါ်နိုင်မှုကို လျော့နည်းစေတယ်၊ သွေးစီးဆင်းမှုကို လျော့ကျစေတယ်၊ ရှင်းရှင်းလင်းလင်း မတွေးနိုင်တော့ဘဲ ခေါင်းရှုပ်တာတွေ ဖြစ်လာနိုင်တယ်။ ဒါပေမဲ့ လေထုဟာ ရွေ့လျားသွားလာနိုင်ပြီး လေဝင်လေထွက် ပိုကောင်းလာမယ် ဆိုရင်တော့ လူသားတွေအနေနဲ့ ပိုပြီး နေလို့ကောင်းလာလိမ့်မယ်။ စမ်းချောင်းလေးနဲ့ လေကြမ်းကြီးဟာ ဘေးန္တရာယ် ဖြစ်စေနိုင်ပေမယ့် အဲဒီနေရာမှာ တောင်ကြီးရှိနေသရွေ့ ဖြစ်လာမယ့် ဘေးအန္တရာယ်တွေကို လူသားတွေအတွက် အကျိုးရှိစေမယ့် အရာတွေအဖြစ် တောင်ကြီးက ပြောင်းပေးလိမ့်မယ်၊ ဟုတ်တယ်မဟုတ်လား။

ပုံပြင် တတိယအပိုင်းက ဘာအကြောင်းလဲ။ (တောင်ကြီးနဲ့ ဧရာမလှိုင်းလုံးကြီး အကြောင်းပါ။) တောင်ကြီးနဲ့ ဧရာမလှိုင်းလုံးကြီး။ ဒီနေရာမှာ ရှုခင်းကတော့ ပင်လယ်ကမ်းစပ်က တောင်ကြီးတစ်ခု၊ ဒီရှုခင်းထဲမှာ တောင်ရယ်၊ သမုဒ္ဒရာ ရေစီးကြောင်းရယ်၊ ပြီးတော့ ဧရာမ လှိုင်းလုံးကြီးရယ်ကို ငါတို့ တွေ့ရမယ်။ ဒီဥပမာထဲမှာ ရေလှိုင်းအတွက် တောင်ကြီးဟာ ဘယ်နေရာက ပါဝင်သလဲ။ (အကာအကွယ်ပေးသူ တစ်ယောက်ဖြစ်ပြီး အဟန့်အတား တစ်ခုလည်း ဖြစ်ပါတယ်။) အကာအကွယ်ပေးသူလည်း ဟုတ်တယ်၊ အဟန့်အတားပြုသူလည်း ဟုတ်တယ်။ အကာအကွယ် ပေးရခြင်းရဲ့ ရည်ရွယ်ချက်က ပင်လယ်ကို ပျောက်ကွယ် မသွားအောင်လို့၊ ဒါမှသာ ပင်လယ်ထဲက သတ္တဝါတွေ မျိုးပွား အသက်ရှင်နိုင်မယ်။ အဟန့်အတားအနေနဲ့ တောင်ကြီးက လူသားတွေရဲ့ အိုးအိမ်တွေကို အန္တရာယ်ပြုနိုင်တဲ့၊ ဖျက်ဆီးနိုင်တဲ့ ရေကြီးခြင်းနဲ့ သဘာဝ ဘေးအန္တရာယ်ကနေ ပင်လယ်ရေ –– ရေရဲ့ ဒီကိုယ်ထည် –– ကို ထိန်းထားတယ်။ ဒါ့ကြောင့် တောင်ကြီးဟာ အဟန့်အတားလည်း ဖြစ်သလို အကာအကွယ်ဆိုလည်း ဟုတ်တယ်လို့ ငါတို့ ပြောလို့ရတယ်။

တောင်ကြီးနဲ့ စမ်းချောင်း၊ တောင်ကြီးနဲ့ လေကြမ်းကြီး၊ တောင်ကြီးနဲ့ ဧရာမ လှိုင်းလုံးကြီး၊ သူတို့ကြားက အပြန်အလှန် အားထားမှုနဲ့ တစ်ယောက်နဲ့ တစ်ယောက် အဟန့်အတားပြုပုံတွေရဲ့ အရေးပါမှုကို ဒီအရာက ဖော်ပြနေတယ်၊ ဒီအကြောင်းကို ငါ ပြောခဲ့ပြီးပြီ။ ဘုရားသခင် ဖန်ဆင်းထားတဲ့ သက်ရှိအရာတွေရဲ့ ရှင်သန်မှုကို အုပ်ချုပ်တဲ့ စည်းမျဉ်းတစ်ခုနဲ့ နည်းဥပဒေသတစ်ခု ရှိတယ်။ ပုံပြင်ထဲက အဖြစ်အပျက်တွေကို ကြည့်ပြီး ဘုရားသခင် ဘာပြုခဲ့လဲဆိုတာ သင်တို့ မြင်နိုင်သလား။ ဘုရားသခင်က စကြဝဠာကြီးကို ဖန်ဆင်းခဲ့ပြီး၊ အဲ့ဒီနောက် အဖြစ်အပျက်တွေကို လျစ်လျူရှုခဲ့သလား။ ကိုယ်တော်က သူတို့ကို စည်းမျဉ်းတွေ ချပေးခဲ့ပြီး၊ သူတို့တွေရဲ့ လုပ်ငန်းဆောင်ရွက်ပုံ နည်းတွေကို ဒီဇိုင်းဆွဲခဲ့ပြီးနောက် သူတို့ကို လျစ်လျူရှုခဲ့သလား။ ဖြစ်ပျက်ခဲ့တာက ဒီလိုလား။ (မဟုတ်ပါဘူး။) ဒါဆို ဘာကိုပြောတာလဲ။ (ဘုရားသခင်က ထိန်းချုပ်ထားတာကို ပြောတာပါ။) ရေ၊ လေနဲ့ ရေလှိုင်းတွေကို ဘုရားသခင်က ထိန်းချုပ်ထားတယ်။ သူတို့ကို ဘုရားသခင်က အထိန်းအကွပ်မဲ့ ဖျက်ဆီးခွင့်မပြုဘူး၊ လူသားတွေရဲ့ အသက်အိုးအိမ် တွေကိုလည်း ထိခိုက်ခွင့်၊ ဒါမှမဟုတ် ဖျက်ဆီးခွင့် မပေးဘူး၊ ဒါ့ကြောင့်သာ လူသားတွေဟာ ဒီကုန်းမြေလေးပေါ်မှာ ဆက်လက် ရှင်သန် မျိုးပွားနိုင်ကြတာ ဖြစ်တယ်။ ဒါဟာ ဘုရားသခင် စကြဝဠာကြီးကို ဖန်ဆင်းတုန်းက ဖြစ်တည်မှု စည်းမျဉ်းတွေကို သူကိုယ်တိုင် အစီအစဉ် ဆွဲထားပြီးသားလို့ ဆိုလိုတာပဲ။ ဒီအရာတွေကို ဘုရားသခင် ဖန်ဆင်းခဲ့တုန်းက လူသားမျိုးနွယ်အတွက် အကျိုးဖြစ်၊ မဖြစ် သေချာအောင် လုပ်တယ်၊ ပြီးတော့ သူကိုယ်တိုင် ဒီအရာတွေကို ထိန်းချုပ်တဲ့အတွက်ကြောင့် လူသားမျိုးနွယ်ကို ဒုက္ခရောက်စေတာ ဒါမှမဟုတ် ဘေးအန္တရာယ် ဖြစ်စေတာမျိုး မရှိဘူး။ ဒီအရာတွေကို ဘုရားသခင်ကိုယ်တိုင် မစီမံ မခန့်ခွဲခဲ့ဘူးဆိုရင် နေရာတိုင်းမှာ ရေတွေ စီးကုန်မယ် မဟုတ်လား။ နေရာတိုင်းမှာ လေမုန်တိုင်းတွေ ထန်ကုန်မယ် မဟုတ်လား။ ဒီအရာတွေဟာ စည်းမျဉ်းတွေကို လိုက်နာသလား။ ဒီအရာတွေကို ဘုရားသခင်ကသာ မစီမံခဲ့ဘူးဆိုရင်၊ သူတို့ကို ဘယ်စည်းမျဉ်းတွေနဲ့မှ ထိန်းချုပ်နိုင်မှာ မဟုတ်တော့ဘူး၊ ဒီတော့ နေရာတိုင်းလိုလိုမှာ လေထန်မယ်၊ ရေကြီးရေလျှံမှုတွေ ဖြစ်မယ်။ အကယ်၍ ဧရာမ ရေလှိုင်းကြီးသာ တောင်ကြီးကို ကျော်သွားခဲ့မယ်ဆိုရင် အဲဒီနေရာက ပင်လယ်လေးဟာ မပျောက်မပျက် တည်ရှိနေနိုင် ပါဦးမလား။ ပင်လယ်ကတော့ ဆက်ပြီး တည်ရှိနေနိုင်မှာ မဟုတ်ဘူး။ တောင်ကြီးကလည်း ရေလှိုင်းလောက် မမြင့်ဘူးဆိုရင်လည်း ပင်လယ်က တည်ရှိနေနိုင်မှာ မဟုတ်ဘူး၊ ပြီးတော့ တောင်ကြီးကလည်း သူ့ရဲ့တန်ဖိုးနဲ့ အရေးပါမှုကို ဆုံးရှုံးလိုက်ရလိမ့်မယ်။

ဒီပုံပြင်နှစ်ပုဒ်မှာ ဘုရားသခင်ရဲ့ ဉာဏ်ပညာကို သင်တို့ မြင်သလား။ (မြင်ပါတယ်။) ဘုရားသခင်က စကြဝဠာကြီးကို ဖန်ဆင်းခဲ့ပြီး သူသည်သာ ၎င်းရဲ့ အရှင်သခင် ဖြစ်တယ် ––သူသည်သာ တာဝန်ရှိသူ ဖြစ်ပြီးတော့ လုပ်ဆောင်ချက်တိုင်း၊ စကားလုံးတိုင်းကို စောင့်ကြည့်ရင်း စကြဝဠာကြီးကို ထောက်ပံ့နေတယ်။ သူက လူသားတွေရဲ့ ဘဝ အချိုးအကွေ့တိုင်းကို ကြီးကြပ်ပေးနေတယ်။ ဒါ့ကြောင့် ဘုရားသခင်က စကြဝဠာကြီးကို ဖန်ဆင်းခဲ့ပြီး သက်ရှိအရာ တစ်ခုစီတိုင်းရဲ့ အရေးပါမှုနဲ့ တန်ဖိုးကိုသာမက ထိုအရာတစ်ခုစီတိုင်းရဲ့ လုပ်ဆောင်ပုံ၊ ပင်ကိုယ်သဘာဝနဲ့ အသက်ရှင်သန်မှုအတွက် စည်းမျဉ်းတွေကိုလည်း သူက ဂဃနဏသိတယ်။ ဘုရားသခင်က စကြဝဠာကြီးကို ဖန်ဆင်းခဲ့တယ်၊ စကြဝဠာကြီးကို ထိန်းချုပ်ထားတဲ့ ဒီစည်းမျဉ်းတွေကို ကိုယ်တော်က သုတေသနပြုကြည့်ရသေးတယ်လို့ သင်တို့ ထင်သလား။ ဘုရားသခင်က သုတေသနလုပ်ဖို့နဲ့ နားလည်ဖို့အတွက် လူသားတွေရဲ့ အသိပညာ ဒါမှမဟုတ် သိပ္ပံပညာကို လေ့လာဖို့ လိုသလား။ (မထင်ပါဘူး။) ဘုရားသခင်လို အရာအားလုံးကို နားလည်နိုင်တဲ့ ကျယ်ပြန့်တဲ့ လေ့လာဆည်းပူးမှုရှိသူ၊ လုံလောက်တဲ့ ဉာဏ်ပညာကို ပိုင်ဆိုင်ထားသူမျိုး လူသားမျိုးနွယ်ထဲမှာ တစ်ယောက်လောက်များ ရှိသလား။ မရှိဘူး မဟုတ်လား။ အရာအားလုံး ဘယ်လိုဘယ်ပုံ ရှင်သန်ကြီးထွားကြတယ်ဆိုတာ အမှန်တကယ် နားလည်တဲ့ အာကာသဗေဒ ပညာရှင်တွေ ဒါမှမဟုတ် သိပ္ပံပညာရှင်တွေ ရှိလား။ အရာရာတိုင်း တည်ရှိနေမှုရဲ့ တန်ဖိုးကိုရော သူတို့ အမှန်တကယ် နားလည်နိုင်သလား။ (နားမလည်နိုင်ပါဘူး။) ဘာ့ကြောင့်လဲ။ အရာအားလုံးကို ဘုရားသခင်က ဖန်ဆင်းခဲ့တာပဲ၊ ပြီးတော့ ဒီအသိပညာကို လူသားမျိုးနွယ်ဟာ ဘယ်လောက်ပဲ နက်နက်ရှိုင်းရှိုင်း လေ့လာလေ့လာ၊ ဒါမှမဟုတ် ဒါကို လေ့လာဖို့ သူတို့ ဘယ်လောက်ပဲ ကြိုးစားကြိုးစား၊ ဘုရားသခင် အရာအားလုံးကို ဖန်းဆင်းမှုရဲ့ ရည်ရွယ်ချက်နဲ့ လျှို့ဝှက်နက်နဲတဲ့ သဘောတရားကို သူတို့ ဘယ်တော့မှ ဉာဏ်မှီမှာ မဟုတ်ဘူး၊ ဟုတ်တယ်မဟုတ်လား။ (ဟုတ်ပါတယ်။) ဒီလောက်ထိနွေးခဲ့ပြီးပြီဆိုတော့ “ဘုရားသခင်သည်သာ အရာအားလုံးရဲ့ ဘဝ ပင်မအရင်းအမြစ် ဖြစ်တယ်” ဆိုတဲ့ စကားရပ်ရဲ့ ဂယက်အနက်ကို သင်တို့ တစ်စိတ်တစ်ပိုင်းလောက်တော့ နားလည်ကြပြီလို့ ခံစားရသလား။ (ခံစားရပါတယ်။) ငါ ဒီအကြောင်းအရာကို ဆွေးနွေးလိုက်တော့ ဘုရားသခင်ဟာ ဘယ်လောက်မှန်ကန်သလဲ၊ သူ့ရဲ့ စကားဟာ ငါတို့ကို ဘယ်လိုထောက်ပံ့နေသလဲ ဆိုတာ လူအများစု ချက်ချင်းတွေးမိကြမယ် ဆိုတာ ငါသိတယ်၊ ဒါပေမဲ့ သူတို့ ဒီအကြောင်းကို ဒီလောက်ထိပဲ တွေးကြလိမ့်မယ်။ လူသားဘဝအတွက် ဘုရားသခင်ရဲ့ ထောက်ပံ့မှု၊ နေ့စဉ်စားသုံးတဲ့ အစားအသောက်နဲ့ နေ့စဉ်လိုအပ်ချက်တွေကို ထောက်ပံ့ပေးနေတာဟာ လူအတွက် ထောက်ပံ့တယ်လို့ ပြောလို့မရဘူးလို့တောင် တချို့က ထင်ကြလိမ့်မယ်။ လူတချို့က ဒီလိုထင်ကြတယ် မဟုတ်လား။ (ထင်ကြပါတယ်။) လူသားမျိုးနွယ်ဟာ ပုံမှန် အသက်ရှင် ဖြစ်တည်နေနိုင်ဖို့အတွက် အရာရာတိုင်းကို ဖန်ဆင်းခဲ့တဲ့ ဘုရားသခင်ရဲ့ ရည်ရွယ်ချက်ဟာ အင်မတနန်မှ ရှင်းလင်းတယ် မဟုတ်လား။ လူသားတွေ နေထိုင်တဲ့ ပတ်ဝန်းကျင်ကို ဘုရားသခင်က ထိန်းသိမ်းပေးပြီးတော့ ဒီလူသားမျိုးနွယ် လိုအပ်တဲ့ အရာအားလုံးကို သူက ထောက်ပံ့တယ်။ ဒါတင်မကသေး အရာအားလုံးအပေါ် စိုးမိုး အုပ်ချုပ်ပိုင်ခွင့် အာဏာကို သူကိုယ်တိုင် စီမံခန့်ခွဲပြီး ဆုပ်ကိုင်ထားတယ်။ ဒါတွေအားလုံးကြောင့် လူသားမျိုးနွယ်ဟာ ပုံမှန် အသက်ရှင် နေထိုင်နိုင်ပြီး ပုံမှန် မျိုးပွားနိုင်ကြတယ်၊ ဘုရားသခင်ဟာ အရာအားလုံးနဲ့ လူသားမျိုးနွယ်ကို ဒီနည်းနဲ့ ထောက်ပံ့ပေးတယ်။ ဒီအရာတွေကို လူသားတွေ မှတ်မိ နားလည်ထားဖို့ လိုတယ် မဟုတ်လား။ (လိုပါတယ်။) လူတချို့က ပြောချင်ပြောမယ် “ဒီအကြောင်းအရာက ဘုရားသခင်အစစ်အကြောင်း ကျွန်တော်တို့ သိထားတာနဲ့ အလွန် အလှမ်းဝေးလွန်းတယ် ပြီးတော့ ကျွန်တော်တို့ ဒီအကြောင်းလည်း မသိချင်ဘူး၊ ဘာလို့လဲဆိုတော့ လူသားတွေဟာ မုန့်အားဖြင့်ပဲ အသက်မရှင်နိုင်ဘူး၊ ဒါပေမဲ့ အဲဒီအစား ဘုရားသခင်ရဲ့ နှုတ်ကပတ်တော်ကြောင့်တော့ အသက်ရှင်နိုင်တယ်။” ဒါမှန်သလား။ (မှားပါတယ်။) ဒီနေရာမှာ ဘာမှားနေလဲ။ ဘုရားသခင် ပြောသမျှအရာတွေကို သိရုံနဲ့ပဲ သူ့ကို သင်တို့ အလုံးစုံ နားလည်နိုင်ပါ့မလား။ သူ့ရဲ့ အလုပ်၊ စီရင်ဆုံးဖြတ်မှုနဲ့ ပြင်းပြင်းထန်ထန် ဒဏ်ခတ်မှုတွေကိုသာ သင်တို့ လက်ခံမယ်ဆိုရင် ဘုရားသခင်ကို သင်တို့ အလုံးစုံ နားလည်တယ်လို့ နားလည်ပါ့မလား။ သင်တို့ဟာ ဘုရားသခင်ရဲ့ ပင်ကိုယ်စရိုက်နဲ့ အချုပ်အခြာ အာဏာကို စိုးစဉ်မျှလောက်ပဲ သိမယ်ဆိုရင်၊ ဘုရားသခင်ကို နားလည်ဖို့ လုံလောက်ပြီ ဟုတ်တယ် မဟုတ်လား။ (မလုံလောက်ပါဘူး။) ဘာလို့လဲ။ (ကျွန်တော်တို့ရဲ့ အသိပညာဟာ တိမ်တဲ့အတွက်ကြောင့် ကျွန်တော်တို့ရဲ့ အမြင်တွေဟာ တဖတ်သတ်ဆန်လွန်းတယ်။ ဒါပေမဲ့ ဘုရားသခင်ရဲ့ အလုပ်ကဏ္ဍတစ်ခုစီမှာ ဘုရားသခင်ကို ကျွန်တော်တို့ သိလာတဲ့အခါ ကျွန်တော်တို့ မြင်တွေ့ခံစားနိုင်တဲ့အရာတွေဖြစ်တဲ့ တောင်တွေနဲ့ စမ်းချောင်းတွေ၊ ရေကန်တွေ၊ မျိုးစေ့တွေ၊ နေရောင်ခြည်နဲ့ မိုးလို ဖန်ဆင်းခံ သက်ရှိ၊ သက်မဲ့[a]တွေ အတူဒွန်တွဲ ပါဝင်တဲ့အတွက်ကြောင့် ကျွန်တော်တို့ဟာ ဘုရားသခင်ကို လက်တွေ့ကျကျ နားလည်နိုင်တယ်။ ကျွန်တော်တို့ရဲ့ နားလည်မှုဟာ ကလေးတွေလို အိပ်မက်က နိုးထလာတာနဲ့ ဒီအရာတွေကို ကျွန်တော်တို့ စပြီး မြင်လာကြတယ်လို့ ခံစားမိတယ်၊ သူတို့တွေဟာ စစ်မှန်လာတယ်ဆိုတာ ခံစားမိတယ်။) ဘုရားသခင်ရဲ့ လုပ်ဆောင်ချက်တွေဟာ စကြဝဠာဖန်ဆင်းနဲ့ အစပြုပြီးတော့ ဘုရားသခင်ရဲ့ လုပ်ဆောင်ချက်တွေ အချိန်တိုင်း နေရာတိုင်း ထင်ရှားမြင်သာဖြစ်တဲ့ နေရာမှာပဲ ထိုလုပ်ဆောင်ချက်တွေဟာ ဆက်လက်ဖြစ်ပေါ်တယ်။ ဘုရားသခင်က လူတချို့ကို ရွေးချယ်ပြီး ကယ်တင်ဖို့အတွက် သူဟာ အလုပ်လုပ်တယ်ဆိုတဲ့ အချက်ကြောင့်သာ ဘုရားသခင် တည်ရှိတယ်ဆိုတာ လူတွေ ယုံကြည်ကြမယ်ဆိုရင်၊ ဘုရားသခင်၊ သူ့ရဲ့ အချုပ်အခြာအာဏာ၊ သူ့ရဲ့ ဂုဏ်၊ သူ့ရဲ့ လုပ်ဆောင်ချက်တွေ မပါဝင်တဲ့ တခြားအရာတွေကိုပဲ လူတွေ ယုံကြည်ကြမယ်ဆိုရင် ဘုရားသခင်ကို အမှန်တကယ် နားလည်ပါတယ်လို့ ယူဆလို့ရသလား။ ဘုရားသခင်အကြောင်း အမည်ခံအသိလောက်သာ ရှိတဲ့ လူတွေ –– လူနည်းစုအတွက်ပဲ ဘုရားသခင် တည်ရှိနေတယ် ဆိုတဲ့ တဖတ်သတ်ဆန်တဲ့ အယူအဆအပေါ်မှာ အမည်ခံအသိဟာ အခြေခံထားတယ် –– ဟာ အမြင်ကျဉ်းတဲ့ သူတွေသာ ဖြစ်တယ်။ ဒါဟာ ဘုရားသခင်ကို အမှန်တကယ်သိတဲ့ အသိ ဟုတ်သလား။ ဒီလို အသိမျိုးရှိတဲ့ လူတွေဟာ သူ့ရဲ့ အရာအားလုံး ဖန်ဆင်းမှုနဲ့ သူတို့ပေါ်မှာ စိုးမိုးထားတဲ့ သူ့ရဲ့ အာဏာကို ငြင်းပယ်နေကြတာပဲ မဟုတ်ဘူးလား။ လူတချို့က ဒါကို အသိအမှတ် မပြုချင်ကြတဲ့အပြင် “အရာအားလုံးကို စိုးမိုးထားတဲ့ ဘုရားသခင်ရဲ့ အာဏာကို ကျွန်တော်ဖြင့် မမြင်ပါဘူး၊ အဲဒါက ကျွန်တော်နဲ့ အလှမ်းဝေးကွာလွန်းတဲ့ အရာတစ်ခုပဲ၊ ကျွန်တော် အဲဒါကို နားမလည်ချင်ဘူး။ ဘုရားသခင်က သူလုပ်ချင်ရာကို လုပ်တာ၊ သူဘာပဲလုပ်လုပ် ကျွန်တော်နဲ့ ဘာမှ မဆိုင်ဘူး။ ဘုရားသခင်ရဲ့ ဦးဆောင်မှုနဲ့ ကိုယ်တော်ရဲ့ စကားကို လက်ခံလိုက်တာနဲ့ ကျွန်တော့်ဘဝဟာ ပြီးပြည့်စုံသွားမယ်၊ ကျွန်တော့်ကို ဘုရားသခင်က ကယ်တင်မယ် ဆိုတာပဲ ကျွန်တော် ဂရုစိုက်တယ်။ ဒီအရာတွေကိုပဲ ကျွန်တော် စိတ်ဝင်စားတယ်၊ ဒါပေမဲ့ တခြား ဘယ်အကြောင်းအရာကိုမှ နားလည်နိုင်အောင် ကြိုးစားမှာ မဟုတ်ဘူး၊ အဲဒီအကြောင်းတွေကို တွေးတောင် တွေးကြည့်မှာ မဟုတ်ဘူး။ အရာတွေအားလုံးကို ဘုရားသခင် ဖန်ဆင်းတဲ့အခါ ဘယ်စည်းမျဉ်းတွေပဲ ချမှတ်ခဲ့၊ ချမှတ်ခဲ့၊ သူတို့နဲ့ လူသားမျိုးနွယ်အတွက် ဘာတွေပဲ ထောက်ပံ့၊ ထောက်ပံ့၊ ကျွန်တော်နဲ့ ဘာမှ မဆိုင်ဘူး။” လို့ သူတို့ကိုယ်သူတို့ တွေးထင်ကောင်း တွေးထင်ကြလိမ့်မယ်။ ဒါ ဘယ်လို စကားမျိုးလဲ။ ဒါ အင်မတန် ကျက်သရေမရှိတဲ့စကား မဟုတ်လား။ သင်တို့တွေထဲမှာ ဒီလိုတွေးတဲ့သူ ပါသလား။ သင်တို့ မပြောပေမယ့်လည်း လူတော်တော်များများ ဒီလိုတွေးကြမယ်ဆိုတာ ငါသိတယ်။ ဒီလို စာအုပ်ကြီးသမားဟာ အရာရာကို ရှုမြင် သုံးသပ်တဲ့အခါ သူ့ရဲ့ အမည်ခံ ဘာသာရေး ရှုမြင်သုံးသပ်ပုံကိုပဲ သုံးကောင်းသုံးလိမ့်မယ်။ သူတို့က ဘုရားသခင်ကို သမ္မာကျမ်းစာ ထဲမှာပဲ ကန့်သတ်ထားချင်တယ်၊ ဘုရားသခင်ကို သူပြောခဲ့တဲ့ စကားလုံးတွေနဲ့ ကန့်သတ်ထားချင်တယ်၊ ဘုရားသခင်ကို ရေးသားထားတဲ့ စာစကားလုံးအဖြစ်သာ မှတ်ထားချင်ကြတယ်။ ဘုရားသခင်အကြောင်း ဒီထက်ပိုပြီး မသိချင်ကြဘူး၊ ပြီးတော့ ဘုရားသခင်ကို တခြားအရာတွေ ဆောင်ရွက်ခြင်းမှာ ပိုပြီး အာရုံမစိုက် စေချင်ကြဘူး။ ဒီလိုအတွေးမျိုးဟာ ကလေးဆန်တယ်၊ အင်မတန်မှ ဘာသာရေးဆန်တယ်။ ဒီလိုအမြင်မျိုးကို လက်ကိုင်ထားတဲ့ လူတွေဟာ ဘုရားသခင်ကို သိနိုင်သလား။ သူတို့ ဘုရားသခင်ကို သိဖို့ တော်တော် ကြိုးစားယူရလိမ့်မယ်။ ဒီနေ့ ပုံပြင်နှစ်ပုဒ်လည်း ပြောပြပြီးပြီ၊ ဒီအမြင်နှစ်မျိုး အကြောင်းလည်း ငါပြောခဲ့ပြီးပြီ။ သင်တို့ ဒီအကြောင်းတွေကို နားထောင်ပြီး သိလာပြီးတဲ့နောက် အကြောင်းအရာတွေဟာ နက်နဲတယ် ဒါမှမဟုတ် နားလည်ရခက်ပြီး သဘောပေါက်ဖို့ ခက်တယ်လို့ ခံစားရကောင်း ခံစားရနိုင်တယ်။ သူတို့ကို ဘုရားသခင်ရဲ့ လုပ်ဆောင်ချက်တွေနဲ့ ဘုရားသခင်ကိုယ်တိုင်ကို ဆက်စပ် ကြည့်မယ်ဆိုရင် ခက်တောင်ခက်ခဲလိမ့်မယ်။ ဒါပေမဲ့ ဘုရားသခင်ကို နားလည်ဖို့ ကြိုးစားရှာဖွေသူ တစ်ဦးချင်း၊ တစ်ယောက်ချင်းစီဟာ ဘုရားသခင်ရဲ့ လုပ်ဆောင်ချက်အားလုံးနဲ့ အရာအားလုံးနဲ့ လူသားမျိုးနွယ် အားလုံးအတွက် ဘုရားသခင် ဆောင်ရွက်ပေးခဲ့သမျှ အားလုံးကို ရှင်းရှင်းလင်းလင်း တိတိကျကျ သိထားဖို့ လိုအပ်တယ်။ ဒီအသိက ဘုရားသခင် အမှန်တကယ် တည်ရှိတယ်ဆိုတာ သင့်ကို ယုံကြည်သက်ဝင်လာစေမယ်။ ဒီအသိက ဘုရားသခင်ရဲ့ ဉာဏ်ပညာ၊ တန်ခိုးနဲ့ အရာအားလုံးအတွက် သူက ဘယ်လိုထောက်ပံ့ပေးတဲ့ အကြောင်း သင့်ကို တိတိကျကျ သိလာစေမယ်။ ဒီအသိကပဲ သင့်ကို ဘုရားသခင် အမှန်တကယ် တည်ရှိခြင်းဟာ ပုံပြင် မဟုတ်ဘူး၊ ဒဏ္ဍာရီ မဟုတ်ဘူး ဆိုတာ ထင်ထင်ရှားရှား သိလာစေလိမ့်မယ်။ ဒီအသိဟာ ဝိုးတဝါး အသိမဟုတ်ဘူး၊ သီအိုရီမျှသာ မဟုတ်ဘူးဆိုတာ သင် သိလာစေမယ်၊ နောက်ပြီးတော့ ဘုရားသခင်ဟာ ဝိညာဉ်ရေးရာ မှီခိုအားထားရာမျှသာ မဟုတ်ဘူး၊ သူဟာ အမှန်တကယ် တည်ရှိတယ်ဆိုတာကိုလည်း သိလာစေလိမ့်မယ်။ ဒါ့ပြင် သူ့ကို ဘုရားသခင်အဖြစ် ဒီအသိကပဲ သင့်ကို သိစေမယ် အရာအားလုံးနဲ့ လူသားမျိုးနွယ်အတွက် သူအမြဲထောက်ပံ့တဲ့ နည်းအတိုင်း၊ သူ့ရဲ့ ကိုယ်ပိုင် စည်းချက်အတိုင်း သူက သူ့နည်းနဲ့သူ ဆောင်ရွက်တယ်။ ဒါဟာ ဘုရားသခင်က အရာအားလုံးကို ဖန်ဆင်းခဲ့ပြီး သူတို့ တစ်ယောက်ချင်းစီက အလုပ်တွေကို ခွဲဝေဆောင်ရွက်ကြ၊ တာဝန်တွေကို ပြီးစီးအောင်လုပ်ကြ၊ သူတို့တစ်ယောက်ချင်းစီကို ပေးအပ်ထားတဲ့ အခန်းကဏ္ဍမှာ ကျေပွန်အောင် ဆောင်ရွက်ကြတာတွေဟာ ဘုရားသခင်ရဲ့ အမိန့်အာဏာနဲ့ အရာအားလုံးအတွက် ချမှတ်ထားတဲ့ စည်းမျဉ်းတွေကြောင့်လို့ ဆိုနိုင်တယ်။ အရာအားလုံးဟာ လူသားမျိုးနွယ်အတွက် သူတို့ရဲ့ ကိုယ်ပိုင်အခန်းဏ္ဍကို လူသားတွေ နေထိုင်တဲ့ နေရာ၊ ပတ်ဝန်းကျင်မှာ ပြီးစီးအောင် ဆောင်ရွက်ကြတယ်။ ဘုရားသခင်ကသာ ဒီအရာတွေကို ဒီလို မစီစဉ်ခဲ့ဘူးဆိုရင် လူသားမျိုးနွယ်ရဲ့ ပတ်ဝန်းကျင်ဟာလည်း ယနေ့လို ဖြစ်လာမှာ မဟုတ်ဘူး။ ဘုရားသခင်အပေါ် လူသားတွေရဲ့ ယုံကြည်မှု ဒါမှမဟုတ် သူ့နောက်လိုက်မှု –– ဘာတစ်ခုမှ ဖြစ်လာနိုင်မှာ မဟုတ်ဘူး၊ ဒါတွေဟာ အချည်းနှီးစကားမျှသာ ဖြစ်နေလိမ့်မယ်၊ ဒါ မှန်တယ် မဟုတ်လား။

ငါတို့ ခုနက နားထောင်ခဲ့ရတဲ့ ကြီးမားတဲ့ တောင်ကြီးနဲ့ သေးငယ်တဲ့ စမ်းချောင်းလေးပုံပြင်ကို နောက်တစ်ခေါက် ကြည့်လိုက်ကြရအောင်။ တောင်ကြီးရဲ့ အသုံးဝင်ပုံက ဘာလဲ။ တောင်ပေါ်မှာ သက်ရှိသတ္တဝါတွေ မှီတင်း နေထိုင်ကြတဲ့အတွက် တောင်ကြီးရဲ့ တည်ရှိမှုဟာ တန်ဖိုးရှိပြီးသား။ တချိန်တည်းမှာပဲ တောင်ကြီးက စမ်းချောင်းလေးကို သူစီးဆင်းချင်တဲ့ နေရာတွေဆီ စီးဆင်း မသွားအောင်၊ လူသားတွေဆီ ဘေးန္တရာယ်တွေ သယ်မသွားအောင် တားဆီးပိတ်ပင်တယ်။ ဟုတ်တယ်မလား။ တောင်ကြီးရှိနေခြင်းရဲ့ ကောင်းကျိုးကြောင့် တောင်ပေါ်မှာရှိတဲ့ သစ်ပင်တွေနဲ့ မြက်ပင်တွေနဲ့ တခြားအပင်ငယ်တွေ အားလုံးနဲ့ တိရစ္ဆာန်တွေလို သက်ရှိ သတ္တဝါတွေကို ရှင်သန် ကြီးထွားစေတယ်၊ စမ်းချောင်းလေးကို သူစီးဆင်းရမယ့် အရပ်ဆီ လမ်းပြတယ်၊ တောင်ကြီးက စမ်းချောင်းထဲက ရေတွေကို စုဆောင်းပြီး သူတို့ကို သဘာဝကျကျ တောင်ခြေတဝိုက်မှာ စီးဆင်းဖို့ လမ်းပြပေးတယ်၊ တောင်ခြေကနေ မြစ်ထဲကို၊ နောက်ဆုံးမှာ ပင်လယ်ထဲကို စီးဝင်လို့ ရစေတယ်။ ဒီနေရာမှာ ချမှတ်ထားတဲ့ စည်းမျဉ်းတွေဟာ သဘာဝတရားက ဖန်တီးထားတာ မဟုတ်ဘူး၊ ဒါပေမဲ့ ဒီစည်းမျဉ်းတွေကို အထူးသဖြင့် ဖန်းဆင်းချိန်မှာ ဘုရားသခင်က တခါတည်း စီစဉ်ထားခဲ့တာ ဖြစ်တယ်။ တောင်ကြီးနဲ့ လေကြမ်းကြီးဆိုရင်လည်း တောင်က လေကို လိုအပ်တာပဲ။ တောင်ပေါ်မှာနေထိုင်တဲ့ သက်ရှိသတ္တဝါတွေကို ကြင်နာစွာထိတွေ့ဖို့ တောင်က လေကို လိုအပ်သလို၊ တချိန်တည်းမှာပဲ လေက မွှေနှောင့် ဖျက်ဆီးတာမျိုး မဖြစ်စေဖို့ တိုက်ခတ်တဲ့ ပြင်းနှုန်းပေါ်မူတည်ပြီး တောင်က လေကို ကန့်သတ် တားဆီးတယ်။ တောင်ကြီးရဲ့ တာဝန်ကို ဒီစည်းမျဉ်းနဲ့ ထိန်းထားတယ်၊ ဒီတော့ တောင်ရဲ့ တာဝန်နဲ့ သက်ဆိုင်တဲ့ ဒီစည်းမျဉ်းဟာ သူ့ဘာသာ ရုပ်လုံးပေါ်လာတာလား။ (မဟုတ်ပါဘူး။) ဒီစည်းမျဉ်းကို ဘုရားသခင် စီစဉ်ခဲ့တာ ဖြစ်တယ်။ တောင်ကြီးမှာ သူ့ကိုယ်ပိုင်တာဝန်ရှိသလို လေကြမ်းကြီးမှာလည်း သူ့ကိုယ်ပိုင်တာဝန် ရှိတယ်။ အခု အလှည့်ကျတာက တောင်ကြီးနဲ့ ဧရာမ လှိုင်းလုံးကြီးအကြောင်း၊ အဲဒီနေရာမှာ တောင်ကြီးသာ မရှိဘူးဆိုရင် ရေဟာ စီးဆင်းဖို့ ဦးတည်ရာကို သူ့ဘာသာ ရှာတွေ့နိုင်ပါ့မလား။ (ရှာမတွေ့နိုင်ပါဘူး။) ရေကလည်း လွှမ်းမိုးပြီး မွှေနှောင့် ဖျက်ဆီးနိုင်တာပဲ။ တောင်မှာလည်း တောင်အနေနဲ့ ကိုယ်ပိုင်တန်ဖိုး ရှိတယ်၊ ပြီးတော့ ပင်လယ်ကလည်း ပင်လယ်အနေနဲ့ သူ့ကိုယ်ပိုင်တန်ဖိုး ရှိတယ်။ ဒီလိုနဲ့ သူတို့ တစ်ယောက်ကို တစ်ယောက် အတူတကွ ပုံမှန်တည်ရှိနေနိုင်တဲ့၊ မနှောင့်ယှက်နိုင်တဲ့ အခြေအနေတွေအောက်မှာ သူတို့ဟာ တစ်ယောက်ကို တစ်ယောက် ကန့်သတ်ပိတ်ပင်ကြတယ်၊ တောင်ကြီးက ပင်လယ်ကို ကန့်သတ် ပိတ်ပင်တဲ့အတွက် ရေမကြီးတော့ဘူး၊ ဒါ့ကြောင့် လူသားတွေရဲ့ အိုးအိမ်တွေကို ကာကွယ်ပေးတယ်၊ ဒါ့ပြင် ဒါဟာ ပင်လယ်ထဲမှာ နေထိုင်ကြတဲ့ သက်ရှိသတ္တဝါတွေကို ပင်လယ်က ပြုစုစောင့်ရှောက် ရာလည်း ရောက်တယ်။ ဒီရှုမျှော်ခင်းက သူ့ဘာသာ ရုပ်လုံးပေါ်လာတာလား။ (မဟုတ်ပါဘူး။) ဒါကိုလည်း ဘုရားသခင်ကပဲ ဖန်ဆင်းခဲ့တာပါ။ ဒီပုံရိပ်တွေကနေ ငါတို့ မြင်ရတာက ဘုရားသခင် စကြဝဠာကြီးကို ဖန်းဆင်းတဲ့အချိန်မှာ တောင်က ဘယ်နေရာမှာ ရှိမယ်၊ စမ်းချောင်းက ဘယ်နေရာမှာ စီးဆင်းမယ်၊ လေကြမ်းကြီးက ဘယ်အရပ်ကနေ စပြီး တိုက်ခတ်မယ် ပြီးတော့ ဘယ်အရပ်ကို သွားမယ်၊ ဧရာမ လှိုင်းလုံးကြီးတွေ ဘယ်လောက်ထိ မြင့်မယ် ဆိုတာတွေကို သူက ရှေးမဆွက ခွဲခန့်မှတ်သားပြီးသားဖြစ်တယ်။ ဘုရားသခင်ရဲ့ ရည်မှန်းချက်တွေနဲ့ ရည်ရွယ်ချက်ဟာ ဒီအရာတွေအားလုံးထဲမှာ အကျုံးဝင်ပြီးတော့ သူတို့ဟာ သူ့ရဲ့ လုပ်ဆောင်ချက်တွေ ဖြစ်တယ်။ အရာတိုင်းမှာ ဘုရားသခင်ရဲ့ လုပ်ဆောင်ချက်တွေ ပါရှိတယ်ဆိုတာ သင်တို့ အခုမြင်ပြီလား။ (ကျွန်တော်တို့ မြင်ပါပြီ။)

ဒီအရာတွေအကြောင်း ငါတို့ ဆွေးနွေးရခြင်းရဲ့ ရည်ရွယ်ချက်က ဘာလဲ။ ဘုရားသခင်ရဲ့ စကြဝဠာကြီး ဖန်ဆင်းမှု နောက်ကွယ်က စည်းမျဉ်းတွေကို လူသားတွေ သုတေသန လုပ်နိုင်စေဖို့လား။ နက္ခတ္တဗေဒနဲ့ ပထဝီဝင်ကို လူသားတွေ စိတ်ဝင်စားလာစေဖို့လား။ (မဟုတ်ပါဘူး။) ဒါဆို ဘာလဲ။ ဘုရားသခင်ရဲ့ လုပ်ဆောင်ချက်တွေကို လူသားတွေ နားလည် လာစေဖို့ပဲ။ ဘုရားသခင်ရဲ့ လုပ်ဆောင်ချက်တွေထဲမှာ ဘုရားသခင်သည်သာ အရာအားလုံးရဲ့ ဘဝပင်မအရင်းအမြစ် ဖြစ်တယ်ဆိုတာ လူသားတွေ အခိုင်အမာ ပြောနိုင်လာမယ်၊ အသေအချာ သိလာမယ်။ သင် ဒီအချက်ကို နားလည်နိုင်ရင် သင်တို့ နှလုံးသားထဲမှာ ဘုရားသခင်ရဲ့ နေရာရှိတယ် ဆိုတာ သင်အသေအချာ ပြောနိုင်တယ်၊ ပြီးတော့ ကောင်းကင်ကြီး၊ ကမ္ဘာမြေကြီးနဲ့ အရာအားလုံးရဲ့ ဖန်ဆင်းရှင်ဟာ အတုမရှိတဲ့ ဘုရားသခင်ကိုယ်တိုင်ပဲ ဆိုတာ သင် အသေအချာ ပြောနိုင်လိမ့်မယ်။ ဘုရားသခင်ကို နားလည်အောင်ကြိုးစားရာမှာ အရာအားလုံးရဲ့ စည်းမျဉ်းတွေနဲ့ ဘုရားသခင်ရဲ့ လုပ်ဆောင်ချက်တွေကို သိဖို့က သင့်အတွက် အသုံးဝင်သလား။ (အသုံးဝင်ပါတယ်။) ဘယ်လို အသုံးဝင်တာလဲ။ အရင်ဆုံး ဘုရားသခင်ရဲ့ ဒီလုပ်ဆောင်ချက်တွေကို သင် နားလည်တဲ့အခါ နက္ခတ္တဗေဒနဲ့ ပထဝီဝင်ကို သင် စိတ်ဝင်စားဦးမယ်လို့ ထင်သလား။ အရာအားလုံးရဲ့ ဖန်ဆင်းရှင်ဟာ ဘုရားသခင် ဖြစ်တယ်ဆိုတာ လက်မခံ၊ သံသယဝင်နေသူလို နှလုံးသားမျိုး သင့်မှာ ရှိနေဦးမှာလား။ အရာအားလုံးရဲ့ ဖန်ဆင်းရှင်ဟာ ဘုရားသခင် ဖြစ်တယ်ဆိုတာ သံသယဝင်နေတဲ့ သုတေသနပညာရှင်လို နှလုံးသားမျိုး ရှိနေဦးမှာလား။ (မရှိပါဘူး။) စကြဝဠာကြီးရဲ့ ဖန်ဆင်းရှင်ဟာ ဘုရားသခင်ဖြစ်တယ်ဆိုတာ သင် အတည်ပြုပြီးတဲ့နောက် သူ့ရဲ့ ဖန်းဆင်းမှုနောက်ကွယ်က စည်းမျဉ်းတွေကို သိလာရပြီးတဲ့အခါ စကြဝဠာကြီးကို ဘုရားသခင်က ထောက်ပံ့တယ်ဆိုတာ သင့်နှလုံးသားထဲမှာ အမှန်တကယ် ယုံကြည်ထားမှာလား။ (ယုံကြည်မှာပါ။) “ထောက်ပံ့မှုတွေ” ဆိုတာ ဘယ်အဓိပ္ပာယ်အတွက်မဆို ပြောတာလား ဒါမှမဟုတ် သီးသန့် အခြေအနေမှာ ပြောတာလား။ ဘုရားသခင်က စကြဝဠာအတွက် ထောက်ပံ့တယ် ဆိုတဲ့ အဓိပ္ပာယ်ဟာ အလွန်ကျယ်ပြန့်သလို အသုံးချပုံလည်း အမျိုးမျိုး ရှိတယ်။ ဘုရားသခင်က လူသားတွေကို အစားအသောက်လို နေ့စဉ် လိုအပ်မှုတွေကိုသာ ထောက်ပံ့ပေးတာမဟုတ်ဘဲ လူသားတွေ မျက်စိနဲ့ မြင်နိုင်တဲ့ အရာတွေရော၊ မမြင်နိုင်တဲ့ အရာတွေအပါအဝင် လူသားမျိုးနွယ် လိုအပ်သမျှကိုပါ ထောက်ပံ့ပေးတယ်။ လူသားမျိုးနွယ် လိုအပ်တဲ့ အသက်ရှိ ပတ်ဝန်းကျင်ကို ဘုရားသခင်ကပဲ ထောက်ပံ့၊ စီမံခန့်ခွဲပြီးတော့ အုပ်ချုပ်တယ်။ ဘယ်ရာသီမှာ ဘယ်ပတ်ဝန်းကျင်မျိုးကိုပဲ လူသားမျိုးနွယ် လိုအပ် လိုအပ်၊ ဘုရားသခင်က ပြင်ဆင်ထားပြီးသားပါ။ လူသားဖြစ်တည်မှုအတွက် သင့်လျော်တဲ့ ဘယ်လေထုဖြစ်ဖြစ်၊ ဒါမှမဟုတ် ဘယ်အပူချိန်ဖြစ်ဖြစ် ဘုရားသခင်ရဲ့ ထိန်းချုပ်မှု အောက်မှာ ရှိပြီးတော့၊ ဒီစည်းမျဉ်းတွေဟာ သူ့တို့အလိုလို ဖြစ်လာတာ မဟုတ်သလို၊ ကြုံရာကျပန်း ပေါ်လာတာလည်း မဟုတ်ဘူး၊ သူတို့ဟာ ဘုရားသခင်ရဲ့ အုပ်ချုပ်မှုနဲ့ လုပ်ဆောင်ချက်တွေရဲ့ ရလဒ်တွေ ဖြစ်တယ်။ ဒီစည်းမျဉ်းတွေရဲ့ ပင်မအရင်းအမြစ်ဟာ ဘုရားသခင်ကိုယ်တိုင် ဖြစ်ပြီး အရာအားလုံးတို့ရဲ့ ပင်မအရင်းအမြစ်ဟာလည်း ဘုရားသခင် ကိုယ်တိုင်ပဲ ဖြစ်တယ်။ ဒီအချက်ကို သင် ယုံသည်ဖြစ်စေ၊ မယုံသည်ဖြစ်စေ၊ သင် မြင်နိုင်သည်ဖြစ်စေ၊ မမြင်နိုင်သည်ဖြစ်စေ၊ သင် နားလည်သည်ဖြစ်စေ၊ နားမလည်သည်ဖြစ်စေ ဒီအချက်ဟာ အခြေခိုင်ပြီး မပြိုပျက်နိုင်တဲ့ အမှန်တရားပဲ ဖြစ်တယ်။

လူအများစုက သမ္မာကျမ်းစာမှာ ဘုရားသခင်ပြောတာ၊ ပြုလုပ်တာတွေကိုပဲ ယုံကြည်လက်ခံကြပြီးတော့ လူနည်းစုလောက်ကိုသာ ဘုရားသခင်က သူ့ရဲ့ လုပ်ဆောင်ချက်တွေကို ဖော်ပြတဲ့အတွက်ကြောင့် လူသားတွေအနေနဲ့ ဘုရားသခင် ဖြစ်တည်မှုရဲ့ တန်ဖိုးကို မြင်နိုင်ပြီး၊ သူ့ရဲ့ ဂုဏ်ကို နားလည်ကာ သူအမှန်တကယ် တည်ရှိတယ်ဆိုတာ သိနိုင်တယ်လို့ ယုံကြည်နေကြတာကို ငါသိတယ်။ ဒါပေမဲ့ လူအများကြီးအတွက်တော့ စကြဝဠာကြီးကို ဘုရားသခင်က ဖန်ဆင်းခဲ့ပြီး အရာအားလုံးကို သူကပဲ စီမံခန့်ခွဲပြီး၊ ထောက်ပံ့နေတယ်ဆိုတဲ့ အချက်ဟာ မတိကျဘူး ဒါမှမဟုတ် အနက် မပြတ်သားဘူးလို့ ထင်ရပြီး၊ သူတို့ရဲ့ သံသယဝင်တတ်တဲ့ သဘောထားကိုပါ ဆုပ်ကိုင်ထားကြတယ်။ ဒီလိုသဘောထားမျိုးက သဘာဝလောကကြီးရဲ့ နည်းဥပဒေသတွေဟာ သူ့ဘာသာဖြစ်ပေါ်လာတယ် ဆိုတာနဲ့ သဘာဝလောကကြီးရဲ့ အပြောင်းအလဲတွေ၊ အသွင် ကူးပြောင်းခြင်းတွေ၊ သဘာဝဖြစ်စဉ်တွေနဲ့ သဘာဝတရားကို အုပ်ချုပ်ထားတဲ့ နည်းဥပဒေသတွေဟာ အလိုလျောက် ပေါ်ပေါက်လာတာလို့ လူသားတွေကို တသမတ်တည်း ယုံကြည်သွားစေတယ်။ ဒါဟာ လူသားတွေရဲ့ စိတ်ထဲမှာ အရာအားလုံးကို ဘုရားသခင်က ဘယ်လို ဖန်ဆင်းခဲ့တယ်၊ ဘယ်လို အုပ်ချုပ်တယ်ဆိုတာ သူတို့ မတွေးနိုင်ဘူးလို့ ဆိုလိုတာပဲ၊ အရာအားလုံးကို ဘုရားသခင်က ဘယ်လို စီမံခန့်ခွဲပြီး ဘယ်လို ထောက်ပံ့တယ်ဆိုတာ သူတို့ နားမလည်နိုင်ဘူးလို့ ဆိုလိုတာ။ ဒီအဆိုရဲ့ ကန့်သတ်မှုတွေကြောင့် ဘုရားသခင်ရဲ့ အရာအားလုံးကို ဖန်ဆင်းမှုနဲ့ အရာအားလုံးပေါ်မှာရှိတဲ့ ဘုရားသခင်ရဲ့ အစိုးရမှု၊ ဒါ့ပြင် ဘုရားသခင်သည် ထောက်ပံ့သူ ဖြစ်တယ် ဆိုတာ လူတွေ မယုံကြည်ကြဘူး၊ ပြီးတော့ ယုံကြည်သူတွေတောင်မှ ပညတ်တော်ခေတ်၊ ကျေးဇူးတော်ခေတ်နဲ့ နိုင်ငံတော်ခေတ်ဆိုပြီး ခေတ်သုံးခေတ်ခွဲပြီး ကန့်သတ်ထားကြသေးတယ်၊ ဘုရားသခင်ရဲ့ လုပ်ဆောင်ချက်တွေရော လူသားမျိုးနွယ်အတွက် သူ့ရဲ့ ထောက်ပံ့ခြင်းတွေဟာ သူ့ရဲ့ အရွေးချယ်ခံ လူတွေအတွက်ပဲ တနည်းမဟုတ်တနည်းနဲ့ ကန့်သတ်ထားတယ် လို့ဆိုလိုတာပဲ။ ဒါကို ငါမြင်တွေ့ရမှာ အမုန်းဆုံးပဲ၊ ပြီးတော့ ငါ့ကို အရမ်းနာကျင်စေတယ်၊ ဘာလို့လဲဆိုတော့ လူသားမျိုးနွယ်ဟာ ဘုရားသခင် ယူဆောင်လာတဲ့ အရာအားလုံးကိုတော့ ခံစားပျော်မွေ့ကြပေမယ့် တချိန်တည်းမှာ သူလုပ်သမျှအားလုံးနဲ့ သူတို့ကို သူပေးသမျှအားလုံးကို ငြင်းပယ်နေကြလို့ပဲ။ လူတွေက ကောင်းကင်၊ မြေကြီးနဲ့ အရာအားလုံးဟာ သူတို့ကိုယ်ပိုင် သဘာဝစည်းမျဉ်းတွေ၊ သဘာဝနည်းဥပဒေသတွေနဲ့ အုပ်ချုပ်ထားတယ်လို့သာ ယုံကြည်ကြတယ်၊ ၎င်းအရာတွေကို ထိန်းချုပ်မယ့် အုပ်ချုပ်သူ ဒါမှမဟုတ် သူတို့ကို ထောက်ပံ့မယ့်၊ ထိန်းသိမ်းမယ့် အုပ်ချုပ်သူ သူတို့မှာ မရှိဘူးလို့ ယုံကြည်ကြတယ်။ သင်ဟာ ဘုရားသခင်ကို ယုံကြည်တယ် ဆိုရင်တောင်မှ ဒီအရာတွေအားလုံးဟာ ဘုရားသခင်ရဲ့ လုပ်ဆောင်ချက်တွေ ဖြစ်တယ်လို့ သင် ယုံကြည်မှာ မဟုတ်ဘူး၊ ဒီအချက်ဟာ ဘုရားသခင်ကို ယုံကြည်သူတိုင်း၊ ဘုရားသခင်ရဲ့ စကားကို လက်ခံသူတိုင်း၊ ဘုရားသခင် နောက်လိုက်တဲ့ လူတိုင်း အများဆုံး လျစ်လျူရှုကြတဲ့ အချက်တွေထဲက တစ်ခုဖြစ်တယ်။ ဒါ့ကြောင့် ငါက သမ္မာကျမ်းစာ ဒါမှမဟုတ် အမည်ခံ ဝိညာဉ်ဆိုင်ရာ ဝေါဟာရနဲ့ မဆက်စပ်တဲ့ အကြောင်းအရာ တစ်ခုခုကို ဆွေးနွေးလိုက်တာနဲ့ လူတချို့က ပျင်းလာကြတယ်၊ ဒါမှမဟုတ် ငြီးငွေ့လာကြတယ်၊ ဒါမှမဟုတ် စိတ်မသက်မသာတောင် ဖြစ်လာကြတယ်။ ဒါက ဝိညာဉ်ရေးရာ လူတွေနဲ့ ဝိညာဉ်ရေးရာ အရာတွေကနေ ကွဲထွက်လာတဲ့ပုံပဲ။ ဒါဟာ မကောင်းတဲ့အရာပဲ။ ဘုရားသခင်ရဲ့ လုပ်ဆောင်ချက်တွေကို သိရှိနားလည်ခြင်းနဲ့ ပတ်သက်လာတဲ့အခါ ငါတို့ဟာ နက္ခတ္တဗေဒ၊ ဘူမိဗေဒ ဒါမှမဟုတ် ဇီဝဗေဒ အကြောင်းတွေကို မပြောကြပေမယ့်လည်း အရာအားလုံးပေါ်မှာ ရှိတဲ့ ဘုရားသခင်ရဲ့ အုပ်စိုးမှုကို ငါတို့သိတယ်၊ အရာအားလုံးအတွက် သူ့ရဲ့ ထောက်ပံ့မှုနဲ့ သူသည်သာ အရာအားလုံးရဲ့ ပင်မအရင်းအမြစ် ဖြစ်တယ်ဆိုတာလည်း ငါတို့ သိတယ်။ ဒါဟာ မဖြစ်မနေကို လေ့လာရမယ့် အရေးကြီးတဲ့အလုပ်ဖြစ်တယ်၊ နားလည်ကြလား။

ငါခုလေးတင်ပြောပြခဲ့တဲ့ ပုံပြင်နှစ်ပုဒ်မှာ ထူးထူးခြားခြား အကြောင်းအရာတွေ ပါနိုင်ပေမယ့်၊ သင်တို့ကို တမူထူးခြားတဲ့ပုံစံနဲ့ ပြောပြ၊ ဖော်ပြခဲ့တာလည်း ဖြစ်ကောင်း ဖြစ်နိုင်ပေမယ့် ငါကတော့ ရိုးရှင်းတဲ့ ဘာသာစကားနဲ့ ရိုးရိုးရှင်းရှင်း နည်းလမ်းကိုပဲ သုံးချင်ခဲ့တာ၊ ဒါမှသာ ပိုပြီးနက်နဲတဲ့ အရာတစ်ခုခုကို သင်တို့တွေ နားလည် သဘောပေါက်နိုင်ပြီး လက်ခံနိုင်မှာ ဖြစ်တယ်။ ဒါကတော့ ငါ့ရဲ့ တစ်ခုတည်းသော ရည်မှန်းချက်ပဲ –– ဘုရားသခင်ဟာ အရာအားလုံးတို့ရဲ့ အုပ်ချုပ်သူဖြစ်တယ်ဆိုတာ ဒီပုံပြင်လေးတွေနဲ့ ရှုခင်းလေးတွေကနေ သင်တို့ကို မြင်စေချင်တယ်၊ ယုံကြည်စေချင်တယ် –– ဖြစ်တယ်။ ဒီပုံပြင်တွေကို ပြောပြရခြင်းရဲ့ ရည်ရွယ်ချက်ကတော့ ပုံပြင်တစ်ပုဒ်ရဲ့ ဘောင်ခတ်ထားတဲ့ ကန့်သတ်ချက်တွေ အတွင်းမှာ ဘုရားသခင်ရဲ့ တိုင်းတာလို့မရနိုင်တဲ့ လုပ်ဆောင်ချက်တွေကို သင်တို့ မြင်တွေ့ သိရှိစေဖို့ပဲ ဖြစ်တယ်။ ဒီရလဒ်မျိုး သင်တို့ဘယ်အချိန်မှာ ပြည့်ပြည့်ဝဝ ရရှိနိုင်မလဲ ဆိုတာကတော့ သင်တို့ရဲ့ ကိုယ်ပိုင်အတွေ့အကြုံတွေ့နဲ့ သင်တို့ တစ်ဦးချင်းရဲ့ ကြိုးစားအားထုတ်မှုပေါ်မှာ မူတည်တယ်။ သင်ဟာ သမ္မာတရားကို မီအောင်လိုက်ရင်၊ ဘုရားသခင်ကို သိဖို့ ကြိုးစားနေရင် ဒီအရာတွေက သင့်ကို မြဲမြံခိုင်မာတဲ့ သတိပေးတဲ့အရာ အဖြစ် သူတို့က သင့်ကို ပိုပြီးနက်နက်နဲနဲ သတိပြုမိလာစေမယ်၊ ကြည်လင်ပြတ်သားတဲ့ နားလည်မှုတွေ သင့်ကို ရရှိလာစေမယ်၊ ပြီးတော့ ဘုရားသခင်ရဲ့ အမှန် လုပ်ဆောင်ချက်တွေနဲ့ သင်ဟာ တဖြည်းဖြည်း နီးနီးလာလိမ့်မယ်၊ ဒီနီးကပ်မှုမှာ အကွာအဝေးလည်း ကင်းလိမ့်မယ်၊ အမှားလည်း ကင်းလိမ့်မယ်။ ဒါပေမဲ့ ဘုရားသခင်ကို သင်သိအောင် မကြိုးစားဘူးဆိုရင်တော့ သင်နားထောင်ခဲ့တဲ့ အဲဒီပုံပြင်တွေဟာ သင့်ကို ဘာအန္တရာယ်မှ ပေးမှာမဟုတ်ဘူး။ သူတို့ကို ဖြစ်ရပ်မှန်တွေလို့ပဲ သဘောထားလိုက်လို့ ရတယ်။

ဒီပုံပြင်နှစ်ပုဒ်ကနေ သင်တို့ နားလည်လာတာ တစ်ခုခု ရှိသလား။ လုပ်ပါ၊ ပြောကြည့်ကြပါ။ (ကျွန်တော်တို့ကို ဒီပုံပြင်နှစ်ပုဒ်ပြောပြတဲ့ ဘုရားသခင်ဆီကနေ ကိုယ်တော်ဟာ အရာအားလုံးရဲ့ အရှင်သခင်၊ ဖန်ဆင်းရှင်နဲ့ စီမံခန့်ခွဲသူ ဖြစ်တယ်ဆိုတာ ကျွန်တော်တို့ အမှန်တကယ် ခံစားမိပါတယ်။ ဘုရားသခင်ရဲ့ လုပ်ဆောင်ချက်တွေ၊ ကိုယ်တော်ရဲ့ အနန္တတန်ဖိုးနဲ့ ကိုယ်တော်ရဲ့ ဉာဏ်တော်ကို ကျွန်တော်တို့ မြင်တွေ့ရတယ်၊ ပြီးတော့ ဒီအချက်ကနေ လူသားမျိုးနွယ်အပေါ်မှာထားတဲ့ ဘုရားသခင်ရဲ့ ကြီးမားတဲ့ ချစ်ခြင်းမေတ္တာတော်ကို ပိုပြီးနက်နက်ရှိုင်းရှိုင်း ခံစားရတယ်။ ဘုရားသခင် ဘာပဲလုပ်လုပ်၊ ကိုယ်တော်လုပ်သမျှဟာ လူသားမျိုးနွယ်အတွက်ပဲ ဖြစ်ပါတယ်။) ကောင်းပြီ၊ အရင်ဆုံး လူသားတွေအတွက် ဘုရားသခင်ရဲ့ ပူပန်မှုအကြောင်း အရင်က ဆွေးနွေးခဲ့တာနဲ့ ဒီပုံပြင်နှစ်ပုဒ်ဟာ ကွဲပြား ခြားနားနေသလား။ မလွဲဧကန် ဆက်နွှယ်မှု ရှိသလား။ (ရှိပါတယ်။) အဲဒီဆက်နွှယ်မှုက ဘာလဲ။ ဒီပုံပြင်နှစ်ပုဒ်ထဲမှာ ငါတို့တွေ့ရတဲ့ ဘုရားသခင်ရဲ့ လုပ်ဆောင်ချက်တွေနဲ့ အရာရာတိုင်းကို လူသားမျိုးနွယ်အတွက် သူ့ရဲ့ စီစဉ်ပုံနဲ့ ကိုင်တွယ်ဖြေရှင်းပုံ လား။ ဆက်နွှယ်မှုဆိုတာ ဘုရားသခင်ပြုလုပ်တဲ့ အရာရာတိုင်းနဲ့ သူ့ရဲ့ အတွေးတွေအားလုံးဟာ လူသားမျိုးနွယ်ဖြစ်တည်မှုနဲ့ လိုက်လျော ညီထွေရှိတာကို ပြောတာလား။ လူသားမျိုးနွယ်အတွက် ဘုရားသခင်ရဲ့ စေ့စပ်သေချာတဲ့ အတွေးနဲ့ စဉ်းစား ဆင်ခြင်မှုဟာ အလွန်ထင်ရှား မြင်သာတယ် မဟုတ်လား။ (ထင်ရှားမြင်သာပါတယ်။) လူသားမျိုးနွယ်ဟာ ဘာကိုမှ လုပ်စရာမလိုဘူး။ လူသားတွေ အသက်ရှူဖို့ လေထုကို ဘုရားသခင်က ပြင်ဆင်ထားပြီးသား။ လူသားတွေ စားသုံးဖို့ ဟင်းသီးဟင်းရွက်တွေနဲ့ သစ်သီးဝလံတွေကလည်း အဆင့်သင့်ရနိုင်တယ်။ မြောက်အရပ်မှ တောင်အရပ်၊ အရှေ့အရပ်မှ အနောက်အရပ်၊ နေရာတစ်နေရာစီမှာ သဘာဝသယံဇာတတွေ ကိုယ်စီရှိပြီး အမျိုးမျိုးသော ကောက်ပဲသီးနှံတွေ၊ သစ်သီးဝလံတွေနဲ့ ဟင်းသီးဟင်းရွက်တွေကိုလည်း ဘုရားသခင်ကပဲ ပြင်ဆင်ထားတယ်။ ပိုမိုကြီးမားတဲ့ ပတ်ဝန်းကျင်အကြောင်းကို ပြောရမယ်ဆိုရင် ဘုရားသခင်က အရာအားလုံးကို အချင်းချင်း ချိတ်ဆက်ပေးထားတယ်၊ အပြန်အလှန် ရောယှက်ထားပြီးတော့ အပြန်အလှန် အမှီသဟဲ ပြုစေတယ်။ အရာအားလုံးရဲ့ ဖြစ်တည်မှုနဲ့ ရှင်သန်မှုကို ထိန်းချုပ်ထားတဲ့ ဒီစည်းမျဉ်းတွေနဲ့ ဒီနည်းလမ်းကို သူက အသုံးပြုတဲ့အတွက်ကြောင့် လူသားမျိုးနွယ်ဟာ စိတ်ငြိမ်အေးချမ်းစွာ နေထိုင်နိုင်ကြပြီးတော့ ဒီသက်ရှိပတ်ဝန်းကျင်မှာ ရှင်သန်ကြီးထွားပြီး မျိုးဆက်တစ်ခုကနေ နောက်မျိုးဆက်တွေထိ ပေါက်ဖွားလာခဲ့ကြတာ ယနေ့အချိန်ထိတိုင်ပဲ။ ပြောရမယ်ဆိုရင် သဘာဝပတ်ဝန်းကျင်ကို ဟန်ချက်ညီအောင် ဘုရားသခင်က ပြုလုပ်ပေးတယ်။ ဘုရားသခင်ရဲ့ အချုပ်အခြာအာဏာနဲ့ ထိန်းချုပ်မှုသာ အရန်သင့် တည်ရှိမနေဘူးဆိုရင် အဲဒီပတ်ဝန်းကျင်ကို အစကတည်းက ဘုရားသခင် ဖန်ဆင်းခဲ့တယ် ဆိုရင်တောင်မှ ဘယ်လူသားကမှ သဘာဝပတ်ဝန်းကျင်ကို ထိန်းသိမ်းပြီး ဟန်ချက်ညီအောင် လုပ်နိုင်မှာ မဟုတ်ဘူး။ တကယ်လို့ လူသားက ပလတ်စတစ် မျိုးစေ့တစ်စေ့ကို ဖန်းတီးပြီး မြေကြီးထဲမှာ စိုက်ရင် အညှောက်ပေါက်လာပါ့မလား။ အကယ်၍ လူသားက ပလတ်စတစ် သစ်ပင်တစ်ပင်ကို ဖန်တီးပြီး မြေကြီးထဲမှာ ထားလိုက်ရင်ရော နှစ်ပေါင်းရာချီ ကြာတာတောင် သစ်ရွက်လေး တစ်ရွက်တောင် ထွက်လာမှာ မဟုတ်ဘူး။ ဟုတ်တယ်မဟုတ်လား။ တချို့နေရာတွေမှာဆို လေထုမရှိတဲ့အတွက်ကြောင့် အဲဒီနေရာတွေမှာ လူသားတွေ အသက်မရှင်နိုင်ကြဘူး၊ ပြီးတော့ လူတွေဟာလည်း ဘောင်ကျော်ပြီး မသွားသင့်ဘူး၊ ဒါဟာ လူသားမျိုးနွယ်ရဲ့ အကာအကွယ်အတွက် ဖြစ်ပြီး ဒီအရာဟာ အရမ်းလျို့ဝှက် ဆန်းကြယ်တယ်။ ပတ်ဝန်းကျင်ရဲ့ ဒေါင့်တစ်ဒေါင့်စီ၊ ကမ္ဘာကြီးရဲ့ အလျားနဲ့ အနံတစ်ခုစီ၊ ကမ္ဘာပေါ်မှာ နေထိုင်ကြတဲ့ သက်ရှိသတ္တဝါတိုင်း –– အသက်ရှင်သူရော သေသူရော –– ကို ဘုရားသခင်ကပဲ ပြင်ဆင်ထားခဲ့ပြီး သူတို့အတွက်ပဲ သူက တွေးခဲ့တယ် –– ဒီဟာက ဘာ့ကြောင့် လိုအပ်တာလဲ၊ အဲဒါက ဘာ့ကြောင့် မလိုအပ်တာလဲ၊ ဒီဟာ ဒီနေရာမှာ ရှိရတဲ့ ရည်ရွယ်ချက်က ဘာလဲ၊ အဲဒီဟာက ဘာ့ကြောင့် ဟိုနေရာကို သွားသင့်သလဲ။ ဒီအရာတွေ အားလုံးကို ဘုရားသခင်က သေသေချာချာ စဉ်းစားကြည့်ပြီးသား၊ ဒီအရာတွေအကြောင်း လူသားတွေ စဉ်းစားဖို့ မလိုဘူး။ တောင်တွေကို ရွှေ့ပစ်ဖို့ အမြဲစဉ်းစားနေတဲ့ လူမိုက်တချို့ ရှိတယ်၊ ဒါပေမဲ့ အဲဒီလို လုပ်မယ့်အစား မြေပြန့်ဒေသကို ဘာလို့ ပြောင်းမသွားကြတာလဲ။ တောင်တွေကို သင် မကြိုက်ဘူးဆိုရင် သူတို့နားမှာ သင် ဘာလို့သွားနေ နေတာလဲ။ ဒါ အရူးလုပ်ရပ် မဟုတ်လား။ အဲဒီတောင်တွေကို သင် ရွှေ့ပစ်လိုက်မယ်ဆိုရင် ဘာတွေ ဖြစ်လာနိုင်သလဲ။ ဟာရီကိန်းမုန်တိုင်း တိုက်ခတ်မယ် ဒါမှမဟုတ် ဧရာမလှိုင်းလုံးကြီး ရုတ်တရတ် ဖြစ်လာပြီးတော့ လူသားတွေရဲ့ အသက်အိုးအိမ်တွေကို ဖျက်ဆီးပစ်လိမ့်မယ်။ ဒီလုပ်ရပ်ဟာ တော်တော် မိုက်ရူးရဲဆန်တဲ့ လုပ်ရပ်ပဲ မဟုတ်လား။ ဟုတ်သလား။ လူသားတွေက ဖျက်ဆီးရုံပဲတတ်တာ။ သူရှင်သန်နေရမယ့် တစ်ခုတည်းသော နေရာကိုတောင် သူက မထိန်းသိမ်းနိုင်ဘူး၊ ဒါပေမဲ့ သူတို့က အရာအားလုံးကို ထောက်ပံ့ချင်နေတာ။ ဒါက မဖြစ်နိုင်တာပဲ။

ဘုရားသခင်က အရာအားလုံးကို စီမံခန့်ခွဲဖို့နဲ့ သူတို့အပေါ်မှာ အစိုးရဖို့ လူသားကို ခွင့်ပြုထားပေမယ့် လူသားက အလုပ်ကို ကောင်းကောင်းလုပ်ရဲ့လား။ (မလုပ်ပါဘူး။) လူသားက မကောင်းတဲ့ အလုပ်ကို ဘယ်လိုလုပ်သလဲ။ လူသားမျိုးနွယ်ဟာ အပျက်အစီးပဲ လုပ်တတ်တယ်၊ ဘုရားသခင် ဖန်ဆင်းခဲ့တဲ့ အရာတွေကို မထိန်းသိမ်းနိုင်တဲ့အပြင် တကယ်တော့ အဲဒီအရာတွေကို ဖျက်ဆီးပစ်တာ။ လူသားမျိုးနွယ်ဟာ တောင်တွေကို ကျောက်တောင်ကတုံးဖြစ်အောင် လုပ်ပစ်တယ်၊ ပင်လယ်တွေကို မြေကြီးနဲ့ ပိတ်ဆို့ပစ်တယ်၊ မြေပြန့်တွေကို ဘယ်သူမှ မနေနိုင်တဲ့ ကန္တာရတွေဖြစ်အောင် ပြောင်းပစ်တယ်။ ဒါတောင် ကန္တာရထဲမှာ စက်ရုံတွေနဲ့ နျူးကလီးယား အခြေစိုက်စခန်းတွေ ဆောက်ပြီး ဖျက်ဆီးရေးတွေ နည်းလမ်းပေါင်းစုံနဲ့ နေရာအနှံ့ လုပ်နေကြတယ်။ မြစ်တွေကလည်း မြစ်နဲ့ မတူတော့ဘူး၊ ပင်လယ်ကလည်း ပင်လယ်နဲ့ မတူတော့ဘူး။ သဘာဝတရားရဲ့ ဟန်ချက်ညီမျှမှုနဲ့ စည်းကမ်းတွေကို လူသားမျိုးနွယ်က ချိုးဖောက်တဲ့အခါ သူတို့ ကပ်ဆိုက်မယ့်နေ့နဲ့ သေခြင်းတရားဟာ သိပ်မဝေးတော့ဘူး၊ လူသားတွေ ဒါကို ရှောင်လွဲလို့ မရဘူး။ ဘေးအန္တရာယ် ကျရောက်လာတာနဲ့ ဘုရားသခင်ရဲ့ ဖန်ဆင်းမှုက ဘယ်လောက် အဖိုးတန်တယ်၊ လူသားမျိုးနွယ်အတွက် ဘယ်လောက် အရေးပါတယ်ဆိုတာ သူတို့သိလာလိမ့်မယ်။ သမမျှတတဲ့ ရာသီဥတုမျိုးရှိတဲ့ ပတ်ဝန်းကျင်မှာ လူသားတွေ နေရတာဟာ ပရဒိသုဘုံ ရောက်နေသလိုပဲ။ ဒီကောင်းချီးကို လူသားတွေ သဘောမပေါက်ကြဘူး၊ ဒါပေမဲ့ ဒါကိုလူသားတွေ ဆုံးရှုံးလိုက်တဲ့အချိန်မှာပဲ ဒါတွေ အားလုံးဟာ ဘယ်လောက် ရှားပါးပြီး အဖိုးတန်လိုက်သလဲ ဆိုတာ သူတို့ သိလာလိမ့်မယ်။ ဒါတွေအားလုံးကို ဘယ်လိုပြန်ရယူကြမလဲ။ ဘုရားသခင်က ဒါကို နောက်ထပ် ဖန်ဆင်းချင်စိတ် မရှိတော့ဘူးဆိုရင် လူသားတွေ ဘာလုပ်ကြမလဲ။ သင်တို့ ဘာလုပ်နိုင်သလဲ။ (ကျွန်တော်တို့ ဘာမှ မလုပ်နိုင်ပါဘူး။) တကယ်တော့ သင်တို့ လုပ်နိုင်တာ တစ်ခုတော့ ရှိတယ်၊ အဲဒါက အရမ်းရိုးရှင်းပြီးတော့ အဲဒါဘာလဲဆိုတာ ငါပြောပြလိုက်တာနဲ့ သင်တို့ လုပ်နိုင်တဲ့အရာဆိုတာ ချက်ချင်း သိလိမ့်မယ်။ လူသားတွေဟာ လက်ရှိ ပတ်ဝန်းကျင်ဆိုင်ရာ အကျပ်အတည်း ပြဿနာတွေကြားကို ဘာကြောင့် ရောက်လာကြတာလဲ။ ဘာလို့လဲဆိုတော့ လူသားတွေရဲ့ လောဘနဲ့ ဖျက်ဆီးမှုတွေကြောင့်ပဲ မဟုတ်လား။ လူသားတွေဟာ ဒီဖျက်ဆီးမှုတွေကို အဆုံးသတ်လိုက်တာနဲ့ သက်ရှိ ပတ်ဝန်းကျင်လည်း သူ့ဘာသာ တဖြည်းဖြည်း ပြန်လည် ကောင်းမွန်လာမှာပဲ မဟုတ်ဘူးလား။ ဘုရားသခင်က ဘာမှမလုပ်ရင်၊ လူသားမျိုးနွယ်အတွက် တစ်ခုခုလုပ်ပေးဖို့ ဘုရားသခင်က ဆန္ဒမရှိတော့ဘူးဆိုရင် –– ရှင်းရှင်းပြောရရင် ကိုယ်တော်က ကြားဝင် မစွက်ဖက်လိုတော့ရင် –– လူသားမျိုးနွယ်အတွက် အကောင်းဆုံးနည်းလမ်းက ဒီဖျက်ဆီးမှုကို ရပ်တန့်ပြီး အရာရာတိုင်းကို နဂိုအတိုင်း ပြန်လုပ်ဖို့ပဲ။ ဒီဖျက်ဆီးမှုကို အဆုံးသတ်တယ်ဆိုတာ ဘုရားသခင်ဖန်ဆင်းခဲ့တဲ့ အရာတွေကို အဓမ္မလုယူပြီး ဖျက်ဆီးပစ်တာကို ရပ်ရမယ်လို့ ဆိုလိုတယ်။ ဒီလိုလုပ်မှသာ လူသားတွေ နေထိုင်တဲ့ ပတ်ဝန်းကျင်ဟာ တဖြည်းဖြည်း တိုးတက် ကောင်းမွန်လာမယ်။ ဒီလိုမလုပ်ရင်တော့ ပတ်ဝန်းကျင်ဟာ ဒီထက်ပိုပြီး ယိုယွင်းလာပြီးတော့ ပိုပြီး စိုးရိမ်စရာ အခြေအနေထိ ရောက်လာမယ်။ ငါ့ရဲ့ နည်းလမ်းက မရိုးရှင်းဘူးလား။ (ရိုးရှင်းပါတယ်။) ရိုးရှင်းပြီး ဆောင်ရွက်ဖို့ လွယ်ကူတယ်၊ မှန်သလား။ အမှန်တကယ် ရိုးရှင်းပြီးတော့ လူတချို့အတွက် လုပ်ဆောင်ဖို့ အဆင်ပြေပေမယ့် ကမ္ဘာပေါ်က လူတွေအများကြီးအတွက် အဆင်ပြေနိုင်ပါ့မလား။ (အဆင်မပြေနိုင်ပါဘူး။) အနည်းဆုံး သင်တို့အတွက်တော့ အဆင်ပြေလွယ်ကူတယ် မဟုတ်လား။ (ဟုတ်ပါတယ်။) သင်တို့ရဲ့ “ဟုတ်ပါတယ်” ဆိုတာ ဘယ်မှာ အရင်းခံတာလဲ။ ဘုရားသခင်ရဲ့ လုပ်ဆောင်ချက်တွေအကြောင်း အခြေခံနားလည်မှု တည်ဆောက်ဖို့ လိုအပ်တယ်လို့ ပြောလို့ရသလား။ ဘုရားသခင်ရဲ့ စည်းကမ်းနဲ့ အစီအစဉ်ကို လိုက်နာရမယ်လို့ ပြောလို့ရသလား။ (ဟုတ်ပါတယ်။) ဒါတွေအားလုံးကို ပြောင်းလဲဖို့ နည်းလမ်းတစ်ခုရှိတယ်၊ ဒါပေမဲ့ ဒါက ငါတို့ အခုဆွေးနွေးနေတဲ့ အကြောင်းအရာမဟုတ်ဘူး။ လူသားဘဝ တစ်ခုချင်းစီအတွက် ဘုရားသခင်မှာ တာဝန်ရှိတယ်၊ အဆုံးသတ်အထိ သူ့မှာ တာဝန်ရှိတယ်။ ဘုရားသခင်က သင့်ကို ထောက်ပံ့ပေးတယ်၊ စာတန် ဖျက်ဆီးလိုက်တဲ့ ပတ်ဝန်းကျင်ကြောင့် သင် နေမကောင်း ဖြစ်နေရင်တောင်၊ ညစ်ညမ်းမှု ဒါမှမဟုတ် တခြားအန္တရာယ်ကြောင့် သင် ထိခိုက်နေရင်တောင်၊ ဘုရားသခင်က သင့်ကို ထောက်ပံ့ပေးပြီးတော့ သင့်ကို အသက်ရှင်ခွင့်ပေးလိမ့်မယ်။ ဒါကို သင်ယုံရဲ့လား။ (ယုံပါတယ်။) လူသားဘဝရဲ့ ဆုံးရှုံးမှုကို ဘုရားသခင်က ပေါ့ပေါ့တန်တန် သဘောမထားဘူး။

ဘုရားသခင်သည် အရာအားလုံးရဲ့ အသက်ပင်မအရင်းအမြစ် ဖြစ်တယ်လို့ အသိအမှတ်ပြုခြင်းရဲ့ အရေးပါမှုကို သင်တို့ ခံစားမိလာကြပြီလား။ သင်တို့ ဘာတွေခံစားမိသလဲ။ ပြောကြည့်ပါ၊ ငါနားထောင်ပေးမယ်။ (အရင်တုန်းက ကျွန်တော်တို့ဟာ တောင်တွေ၊ ပင်လယ်နဲ့ ရေကန်တွေကို ဘုရားသခင်ရဲ့ လုပ်ဆောင်ချက်တွေနဲ့ ဘယ်တုန်းကမှ ဆက်စပ်မတွေးမိခဲ့ကြဘူး။ ဒီနေ့တော့ ဘုရားသခင်ရဲ့ မိတ်ဿဟာယဖွဲ့ ဆွေးနွေးခြင်းကနေ ကျွန်တော်တို့ ယခုနားလည်လာတာက ဒီအရာတွေဟာ အမြဲပဲ ဘုရားသခင်ရဲ့ လုပ်ဆောင်ချက်တွေ ဖြစ်တယ်ဆိုတာ၊ ဒီအရာတွေဟာ ကိုယ်တော်ရဲ့ ဉာဏ်တော်ကနေ ဖြစ်ပေါ်လာတာ ဖြစ်တယ်ဆိုတာပါပဲ၊ ဒါ့ကြောင့် ဘုရားသခင်က အရာအားလုံးရဲ့ ဖန်ဆင်းမှုတွေကို ဟိုးကနဦးကတည်းက ခွဲခန့်မှတ်သားထားခဲ့ပြီး သူတို့အားလုံးမှာ ဘုရားသခင်ရဲ့ ကောင်းမြတ်တဲ့ စေတနာ ပါရှိတယ်ဆိုတာ ကျွန်တော်တို့ တွေ့ရတယ်။ အရာအားလုံးဟာ အပြန်အလှန် ချိတ်ဆက်နေကြပြီး လူသားမျိုးနွယ်ဆိုတာ အများဆုံး အကျိုးခံစားခွင့် ရှိသူတွေ ဖြစ်တယ်။ ကျွန်တော်တို့ ဒီနေ့ နားထောင်ခဲ့ရတာတွေဟာ အရမ်း လန်းဆန်း တက်ကြွစရာကောင်းပြီး စိတ်ဝင်စားစရာလည်း ကောင်းတယ်။ ဘုရားသခင်ရဲ့ လုပ်ဆောင်ချက်တွေဟာ ဘယ်လောက် စစ်မှန်သလဲဆိုတာ ကျွန်တော်တို့ သိရှိခံစားရတယ်။ လက်တွေ့မှာနဲ့ ကျွန်တော်တို့ရဲ့ နေ့စဉ်ဘဝတွေမှာ သက်ရှိအရာတွေနဲ့ ထိတွေ့ ဆက်ဆံလာရတဲ့အခါ သူတို့ကို အရှိကိုအရှိအတိုင်း မြင်ရတယ်။) သင် ဒါကို အမှန်တကယ် မြင်တွေ့ရတယ် မဟုတ်လား။ လူသားမျိုးနွယ်အတွက် ဘုရားသခင်ရဲ့ ထောက်ပံ့မှုမှာ ကျိုးကြောင်း ခိုင်လုံတဲ့ အခြေခံအုတ်မြစ်တစ်ခု မပါဘဲမနေဘူး၊ သူက စကားလုံးအချို့ကို ပြောရုံပဲ ပြောခဲ့တာ မဟုတ်ဘူး၊ အဲဒါက အဓိကအချက်ပဲ။ ဘုရားသခင် လုပ်ခဲ့တဲ့ အရာတွေက အများကြီးပဲ၊ သင့်ကောင်းကျိုးအတွက် သူလုပ်ပေးတဲ့ သင် မမြင်နိုင်တဲ့ အရာတွေတောင် ရှိတယ်။ ဘုရားသခင် ဖန်ဆင်းခဲ့တဲ့ ဒီပတ်ဝန်းကျင်၊ ဒီစကြဝဠာကြီးမှာ လူသားတွေ နေထိုင်ကြပြီးတော့၊ ဒီအထဲမှာ လူတွေနဲ့ တခြားအရာတွေဟာ အပြန်အလှန် အမှီသဟဲပြုနေကြတယ်၊ အပင်က ထွက်တဲ့ ဓာတ်ငွေ့က လေထုကို သန့်စင်ပေးပြီးတော့ လေကို ရှူရှိုက်ကြရတဲ့ လူသားတွေကို အကျိုးပြုတယ်။ ဒါပေမဲ့ တချို့အပင်တွေကတော့ လူသားတွေကို အဆိပ်အတောက် ဖြစ်စေပေမယ့် ဒီလိုအပင်တွေအတွက် အဆိပ်ဖြေပင်တွေလည်း မရှိဘူးလား။ ဒါဟာ ဘုရားသခင် ဖန်းတီးမှုရဲ့ အံ့ဖွယ်ရာတွေထဲက တစ်ခုပေါ့။ ငါတို့ ဒီအကြောင်းကို ဒီနေ့ မဆွေးနွေးရသေးဘူး၊ အဲဒီအစား လူသားတွေနဲ့ တခြားအရာတွေရဲ့ အပြန်အလှန် အမှီသဟဲပြုမှုအကြောင်းနဲ့ တခြားသက်ရှိအရာတွေ မရှိဘဲ လူသားတွေ အသက်မရှင်နိုင်တဲ့ အကြောင်း ငါတို့ အဓိထား ဆွေးနွေးခဲ့ကြတယ်။ ဘုရားသခင်ရဲ့ အရာအားလုံးကို ဖန်ဆင်းမှုရဲ့ အရေးပါပုံက ဘာလဲ။ တခြားအရာတွေမရှိဘဲ လူသားတွေအသက်မရှင်နိုင်ဘူး၊ လူသားတွေ အသက်ရှင်ဖို့ လေကို လိုအပ်သလိုပေါ့၊ သင့်ကို လေဟာနယ်ထဲမှာ ထားလိုက်မယ်ဆိုရင် သင်ဟာ မကြာခင်မှာ သေသွားလိမ့်မယ်။ ဒါဟာ အသက်ရှင်ဖို့ တခြားအရာတွေကို လူသားတွေ လိုအပ်တယ်ဆိုတာ သင့်ကို မြင်လာစေတဲ့ သိပ်ကို အခြေခံကျတဲ့ နိယာမပဲ။ ဒါဆို အရာအားလုံးအပေါ် လူသားတွေ ဘယ်လိုသဘောထားမျိုး ထားသင့်သလဲ။ (သူတို့ကို တန်ဖိုးထားရပါမယ်။) သူတို့ကို တန်ဖိုးထားရမယ်၊ သူတို့ကို ကာကွယ်ပေးရမယ်၊ သူတို့ကို အကျိုးရှိရှိ အသုံးချရမယ်၊ သူတို့ကို မဖျက်ဆီးရဘူး၊ သူတို့ကို ဖြုန်းတီးမပစ်ရဘူး၊ သူတို့ကို စိတ်ထင်တိုင်း ပြောင်းလဲမပစ်ရဘူး၊ အရာအားလုံးဟာ ဘုရားသခင်ဆီက ရရှိထားတာ ဖြစ်တဲ့အတွက်ကြောင့်၊ လူသားမျိုးနွယ်အတွက် ဘုရားသခင်က ထောက်ပံ့ပေးထားတာ ဖြစ်တဲ့အတွက်ကြောင့် လူသားမျိုးနွယ်ဟာ သူတို့ကို အသိဉာဏ်ရှိရှိနဲ့ ဆက်ဆံရမယ်။ ယနေ့ ဒီအကြောင်းအရာ နှစ်မျိုးကို ငါတို့ ဆွေးနွေးခဲ့ပြီးပြီ၊ ဒီတော့ သင်တို့ ပြန်သွားပြီး ဒီအကြောင်းတွေကို စေ့စေ့စပ်စပ် တွေးကြည့်ပါ။ နောက်တခါကျရင် အကြောင်းအရာတချို့ကို ငါတို့ ပိုပြီး အသေးစိတ် ဆွေးနွေးကြမယ်။ ငါတို့ရဲ့ မိတ်ဿဟာယဖွဲ့ ဆွေးနွေးမှုက ဒီနေ့တော့ ဒီလောက်ပဲ။

ပြန်လည်ဆုံတွေ့ကြစို့။ (ပြန်လည်ဆုံတွေ့ကြပါစို့။)

ယခင်က:အတုမရှိ ဘုရားသခင် ကိုယ်တော်တိုင် ၅

နောက်တစ်ခုသို့:နိဂုံးကမ္မ အမှာစကား

သင်နှစ်သက်နိုင်သည့် အရာများ