သမ္မာတရားကို မည်သို့လိုက်စားရမည်ဟူသည့် ဤခေါင်းစဉ်နှင့်ပတ်သက်၍ ငါတို့သည် အတော်ကြာ အချိန်အထိ မိတ်သဟာယဖွဲ့ခဲ့ပြီးဖြစ်သည်၊ ပြီးလျှင် ငါတို့ မိတ်သဟာယဖွဲ့ခဲ့သည့်အရာအားလုံးသည် သမ္မာတရားကို မည်သို့လိုက်စားရမည်နှင့်ပတ်သက်၍ လက်တွေ့လုပ်ဆောင်ခြင်း၏ ကဏ္ဍတစ်ခုဖြစ်သည့် လက်လွှတ်ခြင်းနှင့် သက်ဆိုင်ခဲ့သည်။ ဆိုလိုသည်မှာ ငါတို့ မိတ်သဟာယ၏ အကြောင်းအရာအားလုံးသည် လူတို့က ဘုရားသခင်ကို ယုံကြည်ခြင်းနှင့် သမ္မာတရားကို လိုက်စားခြင်း လုပ်ငန်းစဉ်တွင် လက်လွှတ်သင့်သည့် အရာများအကြောင်း ဖြစ်ခဲ့ပြီး ယင်းတို့သည် လူတို့က မိမိတို့၏ အသက်တာများနှင့် မိမိတို့ လျှောက်လှမ်းသည့် အသက်လမ်းကြောင်းတွင် လက်လွှတ်သင့်သည့် အရာများလည်း ဖြစ်ကြသည်။ ဤသည်တို့မှာ လူတို့၏ သမ္မာတရားကို လိုက်စားခြင်းအပေါ် လွှမ်းမိုးမှုရှိသော အရာအချို့ အတိအကျပင် ဖြစ်သည်။ သို့ဆိုလျှင် လက်လွှတ်ခြင်းနှင့်ပတ်သက်သည့် ငါတို့၏ အကြောင်းအရာ၏ ပထမအချက်မှာ အဘယ်နည်း။ (လူတို့၏ အမျိုးမျိုးသော အပျက်သဘောဆောင်သည့် စိတ်ခံစားချက်များကို လက်လွှတ်ခြင်း ဖြစ်ပါသည်။) ဒုတိယအချက်မှာရော အဘယ်နည်း။ (လူတို့၏ လိုက်စားမှုများ၊ ရည်သန်မျှော်မှန်းချက်များနှင့် လိုအင်ဆန္ဒများကို လက်လွှတ်ခြင်း ဖြစ်ပါသည်။) လက်လွှတ်ခြင်းနှင့်ပတ်သက်သည့် ငါတို့ အကြောင်းအရာ၏ ပထမအချက်မှာ အမျိုးမျိုးသော အပျက်သဘောဆောင်သည့် စိတ်ခံစားချက်များကို လက်လွှတ်ခြင်းဖြစ်ပြီး ဒုတိယအချက်မှာ လူတို့၏ လိုက်စားမှုများ၊ ရည်သန်မျှော်မှန်းချက်များနှင့် လိုအင်ဆန္ဒများကို လက်လွှတ်ခြင်း ဖြစ်သည်။ အချက်တစ်ချက်စီတွင် ခေါင်းစဉ်ငယ်များနှင့် အသေးစိတ်အချက်အတော်များများစီ ပါဝင်သည် မဟုတ်လော။ (ပါဝင်ပါသည်။) မည်သည့်အကြောင်းအရာကို ငါတို့ မိတ်သဟာယဖွဲ့ခဲ့သည်ဖြစ်စေ၊ ဤအကြောင်းအရာအတွင်း မည်သည့်အမျိုးအစားများနှင့် အချက်များ ရှိခဲ့သည်ဖြစ်စေ၊ ဥပမာ မည်မျှပေးခဲ့သည်ဖြစ်စေ၊ အခြေအနေ မည်မျှနှင့် ပြဿနာများ၏ အနှစ်သာရ မည်မျှကို ဖော်ထုတ်ခဲ့သည်ဖြစ်စေ အတိုချုပ်အားဖြင့် ငါတို့ မိတ်သဟာယဖွဲ့ခဲ့သည့် အကြောင်းအရာအားလုံးသည် လူတို့က ဘုရားသခင်ကို ယုံကြည်ခြင်းနှင့် သမ္မာတရားကို လိုက်စားခြင်း လုပ်ငန်းစဉ်တွင် သို့မဟုတ် ၎င်းတို့၏ လက်တွေ့အသက်တာများတွင် ကြုံတွေ့ရသော အမျိုးမျိုးသော ပြဿနာများနှင့် သက်ဆိုင်သည့်အပြင် ဤပြဿနာများကို ရင်ဆိုင်ရသည့်အခါတိုင်း လူတို့ ရွေးချယ်သင့်သည့် လက်တွေ့လုပ်ဆောင်ခြင်း လမ်းကြောင်းများနှင့် ၎င်းတို့ စောင့်ထိန်းလိုက်နာသင့်သည့် သမ္မာတရား စည်းမျဉ်းများနှင့်လည်း သက်ဆိုင်သည်။ ဤပြဿနာများတွင် ပါဝင်သည့် အမျိုးမျိုးသော ကဏ္ဍများသည် အနှစ်မဲ့ခြင်းမရှိသကဲ့သို့ လူတို့၏ အတွေးအခေါ်များ သို့မဟုတ် ဝိညာဉ်ရေးရာနယ်ပယ်များတွင်သာ တည်ရှိခြင်းလည်း မဟုတ်ပေ။ ထိုအစား ယင်းတို့သည် လူတို့၏ လက်တွေ့အသက်တာများတွင် တည်ရှိကြသည်။ သို့ဖြစ်၍ သင်သည် သမ္မာတရားကို လိုက်စားရန် ဆန္ဒရှိပါက မည်သို့သော ပြဿနာမျိုး သင့်အပေါ် ကျရောက်သည်ဖြစ်စေ သင်သည် သမ္မာတရားကို ရှာဖွေကာ သက်ဆိုင်ရာ သမ္မာတရား စည်းမျဉ်းများကို သင်၏ အခြေခံအဖြစ် မှတ်ယူလျက် လက်တွေ့လုပ်ဆောင်ခြင်း လမ်းကြောင်းကို ရှာဖွေတွေ့ရှိပြီး ထိုသို့ဖြင့် ဤပြဿနာများ သင့်အပေါ် ကျရောက်သည့်အခါတိုင်း လိုက်လျှောက်ရန် လမ်းကြောင်းတစ်ခု ရှိနိုင်မည်ဟု ငါမျှော်လင့်သည်။ ဤသည်မှာ ဤအကြောင်းအရာအားလုံးကို မိတ်သဟာယဖွဲ့ခြင်း၏ အခြေခံကျသော ရည်ရွယ်ချက်တစ်ခု ဖြစ်သည်။ ဤသမ္မာတရားအားလုံးကို ငါတို့ မိတ်သဟာယဖွဲ့ပြီး ဖြစ်သော်လည်း လူတို့သည် ဤသမ္မာတရား လက်တွေ့ကျမှုများထဲသို့ ဝင်ရောက်ရန် အချိန်အနည်းငယ် ကြာမြင့်ဦးမည် ဖြစ်သည်။ လူတို့သည် ဤသမ္မာတရားများကို မိတ်သဟာယဖွဲ့ခြင်းဖြင့် စတင်သင့်ပြီး အမျိုးမျိုးသော သမ္မာတရား စည်းမျဉ်းများကို ၎င်းတို့၏ အခြေခံအဖြစ် မှတ်ယူကာ၊ အရာအမျိုးမျိုးအပေါ် ၎င်းတို့၏ ရှုမြင်ပုံများ၊ ဘဝနေထိုင်မှု သဘောထားများနှင့် တည်ရှိခြင်းနည်းလမ်းများကို ပြောင်းလဲသင့်သည်။ ထိုသို့ဖြင့် ဘုရားသခင်ကို ယုံကြည်ခြင်း လုပ်ငန်းစဉ်တွင် သို့မဟုတ် အသက်ရှင်ခြင်းနှင့် တည်ရှိခြင်း လုပ်ငန်းစဉ်တွင် ဤသမ္မာတရား စည်းမျဉ်းများကို လက်ခံလာခြင်းအားဖြင့် လူတို့သည် မိမိတို့ကိုယ်တိုင် သတိမပြုမိဘဲ ယခင်က တည်ရှိနှင့်သော၊ ဟောင်းနွမ်းသော၊ စာတန်ထံမှ မြစ်ဖျားခံသော ၎င်းတို့၏ အမျိုးမျိုးသော မှားယွင်းပြီး အဓိပ္ပာယ်မဲ့သည့် အတွေးအခေါ်များ၊ ရှုမြင်ပုံများ သို့မဟုတ် သဘောထားများနှင့် တည်ရှိခြင်းအတွက် နည်းလမ်းများကို ပြောင်းလဲနိုင်မည်ဖြစ်ပြီး ၎င်းတို့၏ ဖောက်ပြန်ပျက်စီးသော စိတ်သဘောထားများကို ဖယ်ရှားနိုင်မည် ဖြစ်သည်။ ထို့ကြောင့် ငါတို့ ယခင်က မိတ်သဟာယဖွဲ့ခဲ့သော ဤနှုတ်ကပတ်တော်များနှင့် အနာဂတ်တွင် ငါတို့ မိတ်သဟာယဖွဲ့မည့် နှုတ်ကပတ်တော်များသည် အသိပညာတစ်မျိုးလည်းမဟုတ်၊ ပညာရပ်တစ်မျိုးလည်းမဟုတ်၊ သီအိုရီတစ်ခုလည်း မဟုတ်သည်မှာ သေချာသည်။ ထိုအစား ယင်းတို့ကို လူတို့သည် မိမိတို့၏ နေ့စဉ်အသက်တာများတွင် ကြုံတွေ့ရသော အမျိုးမျိုးသော ပြဿနာများနှင့် အခက်အခဲများကို ဖြေရှင်းရာ၌ လမ်းညွှန်ရန်၊ ညွှန်ကြားရန်နှင့် ကူညီရန် အသုံးပြုသည်။ သင်သည် ပြဿနာတစ်ခုကို ကြုံတွေ့ရသည့်အခါတိုင်း၊ သို့မဟုတ် အခြေအနေတစ်ခု၊ သို့မဟုတ် လူတစ်ဦး၊ ဖြစ်ရပ်တစ်ခု၊ အမှုအရာတစ်ခုကို ကြုံတွေ့ရသည့်အခါတိုင်း သင်၏ ဖောက်ပြန်ပျက်စီးသော စိတ်သဘောထားများနှင့် သင်၏ မမှန်ကန်သော ယခင် ရှုမြင်ပုံများအတိုင်း လက်တွေ့လုပ်ဆောင်မည့်အစား သမ္မာတရားကို သင်၏ အခြေခံနှင့် စံသတ်မှတ်ချက်အဖြစ်ထား၍ လုပ်ဆောင်နိုင်ရန်အလို့ငှာ သင်စောင့်ထိန်းလိုက်နာသင့်ပြီး လက်တွေ့လုပ်ဆောင်သင့်သည့် သမ္မာတရား စံသတ်မှတ်ချက်များကို ငါတို့၏ မိတ်သဟာယ အကြောင်းအရာထဲတွင် ရှာဖွေနိုင်သည်။ လူတို့ ဘုရားသခင်ကို ယုံကြည်ခြင်း၏ ရည်ရွယ်ချက်မှာ သမ္မာတရားကို လိုက်စားရန် ဖြစ်သော်လည်း သမ္မာတရားကို လိုက်စားခြင်း၏ ရည်ရွယ်ချက်မှာ လူတို့၏ အနှစ်မဲ့သောဘဝများကို ဖြည့်ဆည်းရန် သို့မဟုတ် ၎င်းတို့၏ အနှစ်မဲ့သောဘဝများကို ပြောင်းလဲရန် သို့မဟုတ် ၎င်းတို့၏ ဝိညာဉ်ရေးရာနယ်ပယ်များကို ကြွယ်ဝစေရန် မဟုတ်ပေ။ သမ္မာတရားကို လိုက်စားခြင်း၏ ရည်ရွယ်ချက်မှာ အဘယ်နည်း။ လူတို့အတွက်မူ ရည်ရွယ်ချက်မှာ ကယ်တင်ခြင်းခံရရန်အလို့ငှာ ၎င်းတို့၏ ဖောက်ပြန်ပျက်စီးသော စိတ်သဘောထားများကို ဖယ်ရှားရန် ဖြစ်သည်၊ ပြောစရာမလိုသည်မှာ လူတစ်ဦး၏ ဖောက်ပြန်ပျက်စီးသော စိတ်သဘောထားများကို ဖယ်ရှားခြင်းသည် ဘုရားသခင်ကို ကျိုးနွံနာခံရန်နှင့် ဘုရားသခင်ကို ကြောက်ရွံ့ပြီး မကောင်းမှုကို ရှောင်ကြဉ်ရန်လည်း ဖြစ်သည်။ သို့သော် ဘုရားသခင်အတွက်မူ လူတို့ သမ္မာတရားကို လိုက်စားခြင်း၏ ရည်ရွယ်ချက်နှင့် အရေးပါမှုမှာ ထိုမျှ သာမညမဟုတ်ပေ၊ ယင်းမှာ လူတစ်ဦး ကယ်တင်ခြင်းခံရခြင်းအကြောင်းမျှသာ မဟုတ်ပေ။ ထိုအစား ယင်းမှာ စာတန်၏ ဖောက်ပြန်ပျက်စီးသော စိတ်သဘောထားများ၏ အရူးလုပ်ခြင်းကို မခံရတော့သည့် လူတစ်ဦးကို ဘုရားသခင် ရရှိခြင်းအကြောင်း ဖြစ်သည်၊ ပြီးလျှင် ပြောစရာမလိုသည်မှာ ယင်းမှာ ဘုရားသခင်နှင့် သဟဇာတဖြစ်နိုင်သော လူအမျိုးအစားတစ်ရပ်ကို ရရှိခြင်းအကြောင်းလည်း ဖြစ်သည်၊ ပို၍အရေးကြီးသည်မှာ ယင်းမှာ ဖန်ဆင်းခံ လူသားမျိုးနွယ်ထဲမှ သူအလိုရှိသော လူအမျိုးအစားတစ်ရပ်၊ အရာခပ်သိမ်းကို စီမံခန့်ခွဲနိုင်ပြီး အရာခပ်သိမ်းနှင့်အတူ ထာဝရ တည်ရှိနိုင်သော လူအမျိုးအစားတစ်ရပ်ကို ဘုရားသခင် ရရှိနိုင်ခြင်းအကြောင်း ဖြစ်သည်။ ဤအရေးပါမှုသည် လူတို့အတွက်ဖြစ်သကဲ့သို့ ကယ်တင်ခြင်းခံရခြင်းမျှသာကဲ့သို့ မရိုးရှင်းပေ။ ထို့ကြောင့် လူတို့အတွက်ဖြစ်စေ၊ ဘုရားသခင်အတွက်ဖြစ်စေ သမ္မာတရားကို လိုက်စားခြင်းသည် အလွန် အရေးကြီးသည်။ ယင်းသည် ဤမျှ အရေးကြီးသောကြောင့် သမ္မာတရားကို လိုက်စားခြင်းနှင့်ပတ်သက်သည့် လက်တွေ့လုပ်ဆောင်ခြင်း၏ ကဏ္ဍတစ်ခုဖြစ်သော “လက်လွှတ်ခြင်း” ၏ အကြောင်းအရာသည် ကယ်တင်ခြင်းကို စွမ်းဆောင်ရရှိရန် လိုက်စားလိုသူတိုင်းအတွက် အလွန်အရေးကြီးသည်။ “လက်လွှတ်ခြင်း” ကို လက်တွေ့လုပ်ဆောင်ခြင်းသည် ဤမျှ အရေးကြီးသောကြောင့် “လက်လွှတ်ခြင်း” နှင့် သက်ဆိုင်သော အမျိုးမျိုးသော သမ္မာတရား စည်းမျဉ်းများအပြင် ဖော်ထုတ်ပြီးဖြစ်သော “လက်လွှတ်ခြင်း” ကို လက်တွေ့လုပ်ဆောင်ခြင်းနှင့် သက်ဆိုင်သည့် အမျိုးမျိုးသော အခြေအနေများ၊ ဖောက်ပြန်ပျက်စီးသော စိတ်သဘောထားများ၏ ထုတ်ဖော်မှုများနှင့် ဖောက်ပြန်ပျက်စီးသော အတွေးအခေါ်များနှင့် ရှုမြင်ပုံများသည် လူတို့ စေ့စေ့စပ်စပ် နားလည်ရမည့်အရာများ ဖြစ်ကြသည်။ လူတို့သည် နေ့စဉ်အသက်တာတွင် မကြာခဏ ထုတ်ဖော်ပြသော မှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများအပြင် ၎င်းတို့၏ ဖောက်ပြန်ပျက်စီးသော စိတ်သဘောထားများနှင့် ဖောက်ပြန်ပျက်စီးခြင်း၏ ထုတ်ဖော်မှုများကို ဆန်းစစ်ပြီး နားလည်ကာ ထိုသို့ဖြင့် မိမိတို့ကိုယ်ကို သိရှိလာပြီး သမ္မာတရား၏ ကဏ္ဍတစ်ခုကို နားလည်လက်ခံကာ ထို့နောက် သက်ဆိုင်ရာ သမ္မာတရား စည်းမျဉ်းများအတိုင်း လက်တွေ့လုပ်ဆောင်မှသာလျှင် သမ္မာတရားကို လိုက်စားခြင်း၏ ရည်ရွယ်ချက်ကို ၎င်းတို့ စွမ်းဆောင်ရရှိကြလိမ့်မည်။ သမ္မာတရားကို မည်သို့လိုက်စားရမည်ဟူသည့်အထဲမှ “လက်လွှတ်ခြင်း” ၏ အဓိကကျသော အချက်ကြီးနှစ်ချက်နှင့်ပတ်သက်ပြီး ဤအချိန်ကာလမှစ၍ ငါတို့၏ မိတ်သဟာယကို အခြေခံအားဖြင့် အဆုံးသတ်လိုက်ပြီ ဖြစ်သည်။ ပထမအချက်မှာ အဘယ်နည်း။ လူတို့၏ အမျိုးမျိုးသော အပျက်သဘောဆောင်သည့် စိတ်ခံစားချက်များကို လက်လွှတ်ခြင်း ဖြစ်သည်။ ဒုတိယအချက်မှာ အဘယ်နည်း။ လူတို့၏ လိုက်စားမှုများ၊ ရည်သန်မျှော်မှန်းချက်များနှင့် လိုအင်ဆန္ဒများကို လက်လွှတ်ခြင်း ဖြစ်သည်။ ဤအချက်နှစ်ချက်နှင့်ပတ်သက်၍ ငါတို့၏ မိတ်သဟာယတွင် အကြောင်းအရာများစွာ ပါဝင်ခဲ့သော်လည်း ပို၍အရေးကြီးသည်မှာ ဤခေါင်းစဉ်များတွင် ပါဝင်သော တိကျသည့် သမ္မာတရား စည်းမျဉ်းတစ်ခုစီကို သင်နားလည်ရန် လိုအပ်ခြင်း ဖြစ်သည်။ လူတို့ သမ္မာတရား စည်းမျဉ်းများကို နားလည်မှသာလျှင် ၎င်းတို့၏ နေ့စဉ်အသက်တာများနှင့် ၎င်းတို့၏ အသက်လမ်းကြောင်းတွင် ဤသမ္မာတရား စည်းမျဉ်းများအတိုင်း ပြုမူကျင့်ကြံပြီး လုပ်ဆောင်နိုင်မည်ဖြစ်ကာ သမ္မာတရား လက်တွေ့ကျမှုထဲသို့ တဖြည်းဖြည်း ဝင်ရောက်နိုင်မည်ဖြစ်ပြီး သမ္မာတရားကို လိုက်စားခြင်း လုပ်ငန်းစဉ်တွင် သမ္မာတရားကို နားလည်ခြင်းနှင့် ရရှိခြင်း၏ အကျိုးရလဒ်များကို တဖြည်းဖြည်းချင်း စွမ်းဆောင်ရရှိကြလိမ့်မည်။

သမ္မာတရားကို မည်သို့လိုက်စားရမည်ဟူသည့်အထဲမှ “လက်လွှတ်ခြင်း” ကို လက်တွေ့လုပ်ဆောင်ခြင်း၏ အချက်နှစ်ချက်ကို ငါတို့ ယခင်က မိတ်သဟာယဖွဲ့ခဲ့ပြီးဖြစ်ရာ ယင်းတို့သည် လူတို့၏ ဖောက်ပြန်ပျက်စီးသော စိတ်သဘောထားများ၊ ၎င်းတို့၏ အမျိုးမျိုးသော အတွေးအခေါ်များနှင့် ရှုမြင်ပုံများ၊ ၎င်းတို့၏ နေ့စဉ်အသက်တာများတွင် ၎င်းတို့အပေါ် ကျရောက်သော အမျိုးမျိုးသော ပြဿနာများနှင့် သက်ဆိုင်သည်။ သို့သော် “လက်လွှတ်ခြင်း” အတွင်း၌ ငါတို့ မိတ်သဟာယဖွဲ့ရမည့် ပို၍အရေးကြီးသည်ဟုပင်ဖြစ်စေ၊ ကြီးမြတ်သည်ဟုပင်ဖြစ်စေ ဆိုနိုင်သော အခြားအချက်တစ်ချက် ရှိနေသေးသည်။ ထိုအချက်မှာ အဘယ်နည်း။ ယင်းတွင် ဘုရားသခင်အပေါ် လူတို့ ထားရှိသော သဘောထားများ၊ ဘုရားသခင်နှင့်ပတ်သက်သည့် ၎င်းတို့၏ အတွေးအခေါ်များနှင့် ရှုမြင်ပုံများ၊ ၎င်းတို့၏ နေ့စဉ်အသက်တာများတွင် ဘုရားသခင်ကို ဆက်ဆံသည့် လက်တွေ့လုပ်ဆောင်ခြင်း စည်းမျဉ်းများ ပါဝင်သည်။ ဤအချက်သည် ပထမအချက်နှစ်ချက်ထက် အနည်းငယ် ပို၍အရေးကြီးသည်ဟု ဆိုနိုင်သည်။ အကြောင်းမှာ ဤအချက်သည် လူတို့၏ ဘုရားသခင်အပေါ်ထားရှိသော သဘောထားများ၊ ဘုရားသခင်နှင့်ပတ်သက်သည့် ၎င်းတို့၏ အတွေးအခေါ်များနှင့် ရှုမြင်ပုံများ၊ လူနှင့် ဘုရားသခင်ကြားရှိ ဆက်ဆံရေးတို့နှင့် တိုက်ရိုက်သက်ဆိုင်သောကြောင့် ဖြစ်သည်၊ ထို့ကြောင့် ဤသည်မှာ “လက်လွှတ်ခြင်း” ဟူသည့် ဤအချက်အောက်တွင် ငါတို့ပြောဆိုမည့် နောက်ဆုံးအချက်ဖြစ်သလို အရေးအကြီးဆုံးသော အချက်လည်း ဖြစ်သည်။ ငါတို့ ယခင်က ဆွေးနွေးခဲ့သော အချက်နှစ်ချက်အတွင်းရှိ ခေါင်းစဉ်အချို့သည် လူတို့က ဘုရားသခင်နှင့်ပတ်သက်၍ ထားရှိသော အချို့သော သဘောထားများနှင့် ရှုမြင်ပုံများ သို့မဟုတ် လူနှင့် ဘုရားသခင်ကြားရှိ ဆက်ဆံရေးတို့နှင့် သက်ဆိုင်သော်လည်း ငါတို့၏ မိတ်သဟာယတွင် ငါတို့ခံယူခဲ့သော ရပ်တည်ချက်ရှုထောင့်အရမူ ငါတို့သည် လူတို့နှင့်ဆိုင်သော အမျိုးမျိုးသော ပြဿနာများကို လူ့ရှုထောင့်မှ အခြေခံအားဖြင့် စိတ်ဖြာလေ့လာဆွေးနွေးခဲ့သည်၊ ငါတို့သည် လူတို့၏ အမျိုးမျိုးသော ဖောက်ပြန်ပျက်စီးသည့် စိတ်သဘောထားများ သို့မဟုတ် မှားယွင်းပြီး အဓိပ္ပာယ်မဲ့သော အတွေးအခေါ်များနှင့် ရှုမြင်ပုံများကို ၎င်းတို့၏ မတူညီသော ပြဿနာအမျိုးအစားများ၏ နောက်ခံအခြေအနေအတွင်း၌ စိတ်ဖြာလေ့လာဆွေးနွေးခဲ့သည်။ ယနေ့ ငါတို့ မိတ်သဟာယဖွဲ့မည့်အရာမှာ လူတို့၏ ဘုရားသခင်အပေါ်ထားရှိသော သဘောထားများနှင့် ဘုရားသခင်နှင့်ပတ်သက်သည့် ၎င်းတို့၏ အတွေးအခေါ်များနှင့် ရှုမြင်ပုံများနှင့် သက်ဆိုင်သည်။ ဤသည်တို့မှာ လူတို့သည် သမ္မာတရားကို လိုက်စားခြင်း လုပ်ငန်းစဉ်တွင် လက်လွှတ်ရမည့် အရေးအကြီးဆုံးသော အရာများ ဖြစ်ကြသည်။ ဤအချက်သည်လည်း ထိုသို့ မရိုးရှင်းပေ၊ အကြောင်းမှာ ၎င်းတို့သည် မည်သူပင်ဖြစ်စေ၊ မည်သည့်လူအမျိုးအစားပင်ဖြစ်စေ မည်သူမျှ ဘုရားသခင်အပေါ် သဘောထားတစ်မျိုးတည်း သို့မဟုတ် ဘုရားသခင်နှင့်ပတ်သက်၍ အတွေးအခေါ်နှင့် ရှုမြင်ပုံတစ်မျိုးတည်း မရှိသောကြောင့်ဖြစ်ပြီး ပြောစရာမလိုသည်မှာ လူနှင့် ဘုရားသခင်ကြားရှိ ဆက်ဆံရေးသည်လည်း ဆက်ဆံရေးတစ်မျိုးတည်းသာ မဟုတ်သကဲ့သို့ လူ့အခြေအနေတစ်မျိုးတည်းနှင့်သာ သက်ဆိုင်ခြင်းလည်း မဟုတ်ပေ။ လူတို့၏ ဘုရားသခင်အပေါ်ထားရှိသော အမျိုးမျိုးသော သဘောထားများကြောင့်လည်းကောင်း၊ ဘုရားသခင်၏ ပင်ကိုလက္ခဏာ၊ အဆင့်အတန်းနှင့် ပုံသဏ္ဌာန်တို့အပေါ် လူတို့ထားရှိသော အမျိုးမျိုးသော အတွေးအခေါ်များနှင့် ရှုမြင်ပုံများကြောင့်လည်းကောင်း၊ အခြားသောအကြောင်းရင်းများကြောင့်လည်းကောင်း လူနှင့် ဘုရားသခင်ကြားတွင် အမျိုးမျိုးသော ဆက်ဆံရေးများ ပေါ်ပေါက်လာသည်။ သို့ဖြစ်၍ ယနေ့ ငါတို့သည် ဤအချက်ကို မိတ်သဟာယဖွဲ့ပြီး လူနှင့် ဘုရားသခင်ကြားတွင် မည်သည့်ဆိုးရွားသော ပြဿနာများ သို့မဟုတ် မဖြေရှင်းနိုင်သော ပဋိပက္ခများ ရှိနေသေးသည်ကိုလည်းကောင်း၊ လူတို့ အခြားမည်သည့်အရာများကို အတိအကျ လက်လွှတ်ရန် လိုအပ်သည်ကိုလည်းကောင်း ကြည့်ရှုကြမည်။ ဤအရာကို နားလည်ပြီးနောက် သင်သည် သမ္မာတရားကို လိုက်စားသောသူတစ်ဦးဖြစ်ပါက သင်၏ ဘုရားသခင်နှင့် ဆက်ဆံရေးသည် တိုးတက်လာမည်ဖြစ်ပြီး ဘုရားသခင်နှင့်ပတ်သက်သည့် သင်၏ ရှုမြင်ပုံသည် မှန်ကန်ခြင်း၊ အပြုသဘောဆောင်ခြင်း သို့မဟုတ် သမ္မာတရားနှင့် ကိုက်ညီခြင်းသို့ တဖြည်းဖြည်း ပို၍နီးကပ်လာလိမ့်မည်။ လက်လွှတ်ခြင်းနှင့်ပတ်သက်သည့် အကြောင်းအရာ၏ တတိယအချက်မှာ မိမိနှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် မိမိ၏ ရန်လိုမုန်းတီးမှုကို လက်လွှတ်ရန် ဖြစ်သင့်သည်၊ ဤသည်မှာ လူတို့ လက်လွှတ်သင့်သည့် အရာများ၏ တတိယအချက် ဖြစ်သည်။ ဤခေါင်းစဉ်ကို ငါတို့ သတ်သတ်မှတ်မှတ် မိတ်သဟာယမဖွဲ့မီ နေ့စဉ်အသက်တာရှိ မည်သည့်ပြဿနာများတွင် လူနှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် လူတို့၏ ရန်လိုမုန်းတီးမှုတို့ ပါဝင်သည်ကို ဦးစွာ အကျဉ်းချုံး ဆွေးနွေးကြစို့။ လူတို့ကိုယ်တိုင်နှင့်ဆိုင်သော ပုဂ္ဂလဓိဋ္ဌာန်ကျသည့် ပြဿနာအချို့အပြင် လူတို့ ဘုရားသခင်ကို ယုံကြည်ခြင်းနှင့် သမ္မာတရားကို လိုက်စားခြင်း လုပ်ငန်းစဉ်တွင် လူတို့ ဘုရားသခင်ကို ဆက်ဆံပုံ၌ အမျိုးမျိုးသော ပြဿနာများ မရှိပေလော။ လူတို့သည် အမျိုးမျိုးသော ဖြစ်ရပ်များနှင့် အမှုအရာများကို ဆက်ဆံပုံ၌ အမျိုးမျိုးသော မှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများ၊ မမှန်ကန်သော လက်တွေ့လုပ်ဆောင်ခြင်း စည်းမျဉ်းများ ရှိကြပြီး ထိုနည်းတူစွာပင် ၎င်းတို့သည် ဘုရားသခင်ကို ဆက်ဆံပုံ၌လည်း အမျိုးမျိုးသော မှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများ၊ မမှန်ကန်သော လက်တွေ့လုပ်ဆောင်ခြင်း စည်းမျဉ်းများ ရှိကြသည်။ လူအမျိုးမျိုး၊ ဖြစ်ရပ်အမျိုးမျိုးနှင့် အမှုအရာအမျိုးမျိုးအတွက် သင်သည် ၎င်းတို့ကို သမ္မာတရား စည်းမျဉ်းများကို အခြေခံ၍ ဆက်ဆံပြီး လက်တွေ့လုပ်ဆောင်နိုင်မည်ဆိုလျှင်၊ ဆိုလိုသည်မှာ သင်သည် လူအမျိုးမျိုး၊ ဖြစ်ရပ်အမျိုးမျိုးနှင့် အမှုအရာအမျိုးမျိုးနှင့်ပတ်သက်၍ သင်ထားရှိသော မှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများကို သိရှိလာပြီး တစ်ချိန်တည်းတွင် ဤမှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများကို ပြုပြင်ကာ လက်လွှတ်လိုက်ပြီးနောက် ဘုရားသခင်က လူတို့ကို ပြောပြသော မှန်ကန်သည့် အတွေးအခေါ်များနှင့် ရှုမြင်ပုံများအတိုင်း အမျိုးမျိုးသော ပြဿနာများကို ရင်ဆိုင်ဖြေရှင်လျှင် သင်သည် လူအမျိုးမျိုး၊ ဖြစ်ရပ်အမျိုးမျိုးနှင့် အမှုအရာအမျိုးမျိုးကို ဆက်ဆံပုံအတွက် သင်၏ လက်တွေ့လုပ်ဆောင်ခြင်း စည်းမျဉ်းများသည် သမ္မာတရား စည်းမျဉ်းများနှင့် အတော်အတန် ကိုက်ညီနေလိမ့်မည်။ ဤသည်မှာ လူတစ်ဦး ကယ်တင်ခြင်းခံရသည့် လက္ခဏာတစ်ခုအဖြစ် မှတ်ယူနိုင်သလော။ ယခုကြည့်လျှင် မမှတ်ယူနိုင်ပေ။ ငါသည် ယနေ့ မိတ်သဟာယ၏ အကြောင်းအရာကို ထုတ်မပြောခဲ့ပါက လူတို့သည် “အမှုအရာအမျိုးမျိုးနှင့်ပတ်သက်လာလျှင် ကျွန်ုပ်သည် ဘုရားသခင်၏ နှုတ်ကပတ်တော်များရှိ သမ္မာတရား စည်းမျဉ်းများနှင့်အညီ ရှုမြင်ပြီး လက်တွေ့လုပ်ဆောင်နိုင်သည်၊ ထို့ကြောင့် ကျွန်ုပ်သည် သမ္မာတရားကို လိုက်စားသောသူတစ်ဦး၊ သမ္မာတရားကို လိုက်စားရာတွင် အကျိုးရလဒ်များ စွမ်းဆောင်ရရှိပြီးသူတစ်ဦး၊ ကယ်တင်ခြင်းခံရသူတစ်ဦး ဖြစ်သည်ဟု ကျွန်ုပ်ထင်သည်” ဟု တွေးထင်ကောင်း တွေးထင်ကြလိမ့်မည်။ ယနေ့ ငါထုတ်ပြောခဲ့သော အကြောင်းအရာဖြစ်သည့် လူတို့ ဘုရားသခင်အပေါ်ထားရှိသော အမျိုးမျိုးသော သဘောထားများကို အခြေခံ၍ အကဲဖြတ်ကြည့်လျှင် ၎င်းတို့၏ ဤစိတ်ကူးသည် အဖြစ်မှန်များနှင့် ကိုက်ညီသလော။ (မကိုက်ညီပါ။) ယင်းသည် အဖြစ်မှန်များနှင့် မကိုက်ညီသည်မှာ အလွန် သိသာထင်ရှား၏။ သင်သည် လူအမျိုးမျိုး၊ ဖြစ်ရပ်အမျိုးမျိုးနှင့် အမှုအရာအမျိုးမျိုးကို ဆက်ဆံပုံ၌ အချို့သော အခြေခံနှင့် အချို့သော အပြုသဘောဆောင်သည့် သဘောထား ရှိသော်လည်း သင်နှင့် ဘုရားသခင်ကြားတွင် အမျိုးမျိုးသော အတားအဆီးများ ရှိနေဆဲဖြစ်ပြီး အမျိုးမျိုးသော ပြဿနာများနှင့်ပတ်သက်လာလျှင် ဘုရားသခင်အပေါ် သင်၏ သဘောထားသည် ရန်လိုနေဆဲ ဖြစ်သည်။ ဤပြဿနာသည် ဆိုးရွားပြီး ပြဿနာအားလုံးထဲတွင် အကြီးမားဆုံးသော ပြဿနာ ဖြစ်သည်။ သင် ဘုရားသခင်နောက်လိုက်ပြီး သင်၏ တာဝန်ကို ထမ်းဆောင်နေသည့် ကာလအတွင်း ကဏ္ဍအားလုံး၌ သင်၏ စွမ်းဆောင်ရည်သည် အခြားသူများအတွက် အတော်အတန် လျောက်ပတ်ပုံရပြီး အပြင်ပန်းအားဖြင့် သမ္မာတရားနှင့် စည်းမျဉ်းများနှင့် ကိုက်ညီပုံရသည်။ သို့သော် သင်၏ စိတ်နှလုံးထဲတွင် ဘုရားသခင်နှင့်ပတ်သက်သည့် အယူအဆများစွာနှင့် သင်နှင့် ဘုရားသခင်ကြားတွင် အတားအဆီးများ ရှိနေပြီး ပြဿနာများစွာနှင့် ကြုံတွေ့ရသည့်အခါ ဘုရားသခင်အပေါ် ရန်လိုသော သဘောထားကိုပင် သင်ထားရှိနေဆဲ ဖြစ်သည်။ ဤပြဿနာများသည် အလွန်ဆိုးရွားသည်။ ဤပြဿနာများသည် သင်၏ စိတ်နှလုံးထဲတွင် ရှိနေပါက ဤသည်မှာ သင်သည် ကယ်တင်ခြင်းခံရသူတစ်ဦးဖြစ်ကြောင်း သက်သေမပြပေ။ အကြောင်းမှာ သင်နှင့် ဘုရားသခင်ကြားတွင် အတားအဆီးများစွာ ရှိနေဆဲဖြစ်ပြီး အဓိကကျသော၊ အရေးပါသော ပြဿနာများနှင့်ပတ်သက်လာလျှင် ဘုရားသခင်အပေါ် ရန်လိုသော သဘောထားကို သင်ထားရှိနေဆဲဖြစ်သောကြောင့် သင်သည် ကယ်တင်ခြင်းခံရသူတစ်ဦး မဟုတ်ရုံသာမက အန္တရာယ်ရှိသူတစ်ဦးလည်း ဖြစ်သည်။ သင်သည် အသက်တာတွင် ပြဿနာများစွာ ကြုံတွေ့ရသည့်အခါ သမ္မာတရား စည်းမျဉ်းများအတိုင်း လုပ်ဆောင်နိုင်သည်ဟုလည်းကောင်း၊ သင်၏ လုပ်ဆောင်ချက်များသည် သမ္မာတရားနှင့် အတော်အတန် ကိုက်ညီသည်ဟုလည်းကောင်း သင်ယုံကြည်လျှင်ပင် ဤသည်မှာ အပြင်ပန်း အသွင်အပြင်မျှသာဖြစ်ပြီး သင်သည် ကယ်တင်ခြင်းခံရပြီးဖြစ်ကြောင်း သက်သေမပြနိုင်ဟု ဆိုနိုင်ပေသည်။ အကြောင်းမှာ သင်သည် သင်၏ ဘုရားသခင်နှင့် ဆက်ဆံရေးတွင် သဟဇာတဖြစ်မှုကို စွမ်းဆောင်ရရှိခြင်း မရှိသေးဘဲ ဘုရားသခင်ကို သင်ကျိုးနွံနာခံခြင်း သို့မဟုတ် ကြောက်ရွံ့ခြင်း မရှိသေးသောကြောင့် ဖြစ်သည်။ ထို့ကြောင့် အမျိုးမျိုးသော အမှုအရာများ သင့်အပေါ် ကျရောက်သည့်အခါတိုင်း သင်၏ အပြင်ပန်း အပြုအမူ သို့မဟုတ် သင်၏ အတွေးအခေါ်များနှင့် ရှုမြင်ပုံများသည် သင်သည် သမ္မာတရား စည်းမျဉ်းများကို စွဲကိုင်မည့်အစား ဤကိစ္စများတွင် သင်မှန်ကန်သည်ဟု ယုံကြည်သော အယူဝါဒများ၊ ဆောင်ပုဒ်များနှင့် စည်းမျဉ်းစည်းကမ်းများကို ပုံသေစောင့်ထိန်းခဲ့ကြောင်းကိုသာ ပြသနိုင်သည်။ ဤသည်မှာ ဤနေရာတွင် အပြန်အလှန်အမှီသဟဲပြုသော ဆက်နွှယ်မှုမျိုး ဖြစ်ကောင်းဖြစ်နိုင်ပြီး ရှုပ်ထွေးသည်ဟု ထင်ရနိုင်သော်လည်း မိမိနှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် မိမိ၏ ရန်လိုမုန်းတီးမှုကို လက်လွှတ်ခြင်း၏ တိကျသော အကြောင်းအရာကို ငါတို့ မိတ်သဟာယဖွဲ့ပြီးနောက် လူတို့သည် စေ့စေ့စပ်စပ် ဆန်းစစ်မှု ပြုလုပ်ပြီးသည့်အခါ ငါ၏ နှုတ်ကပတ်တော်များ၏ အဓိပ္ပာယ်ကို နားလည်ကြလိမ့်မည်။

မိမိနှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် မိမိ၏ ရန်လိုမုန်းတီးမှုကို လက်လွှတ်ခြင်းဟူသည့် ခေါင်းစဉ်ကို တရားဝင် မိတ်သဟာယမဖွဲ့မီ၊ လူနှင့် ဘုရားသခင်ကြားတွင် မည်သည့်အတားအဆီးများ တည်ရှိသည်ကို ဦးစွာ ဆွေးနွေးကြစို့။ သင်၏ နေ့စဉ်အသက်တာတွင် သင်ခံစားနိုင်ပြီး သတိပြုမိသော သို့မဟုတ် အခြားလူများတွင် ဖြစ်ပေါ်သော လူနှင့် ဘုရားသခင်ကြားရှိ မည်သည့်အတားအဆီးများနှင့် ဘုရားသခင်အပေါ် ရန်လိုမုန်းတီးမှုများ ရှိသနည်း။ ဤသရုပ်သကန်များသည် မုချ တည်ရှိသည်။ ယင်းတို့သည် နေ့စဉ် လူတို့၏ ပတ်ဝန်းကျင်တွင် ဖြစ်ပျက်ပြီး နေ့စဉ် သင့်အပေါ်တွင်လည်း ဖြစ်ပျက်သည်၊ သို့ဖြစ်၍ သင်သည် တွေးတောရန် စွမ်းအင်များစွာ အသုံးမပြုရပေ၊ သင် ပါးစပ်ဟလိုက်သည့်အခါ ဤပြဿနာများစာရင်းသည် ချက်ချင်း ထွက်လာလိမ့်မည်။ ဤသည်မှာ ထိုသို့မဟုတ်လော။ (ဟုတ်ပါသည်။) လူနှင့် ဘုရားသခင်ကြားရှိ အတားအဆီးများမှာ အတိအကျအားဖြင့် အဘယ်နည်း။ “အတားအဆီးများ” ဟူသည့် ဝေါဟာရတွင် မည်သည့်အရာများ ပါဝင်သည်ကို ဦးစွာ ပြောကြစို့။ ယင်းတွင် ပဋိပက္ခ၊ မနာခံခြင်း၊ အယူအဆများ၊ နားလည်မှုလွဲခြင်းများနှင့် အလားတူအရာများ ပါဝင်သည် မဟုတ်လော။ ငါ့ကို ထပ်ပြောလော့။ (တစ်စုံတစ်ဦးသည် မိမိ၏ တာဝန်ကို ထမ်းဆောင်နေစဉ် ဖော်ထုတ်ခြင်း သို့မဟုတ် ပြုပြင်ခြင်းခံရသည့်အခါ ၎င်းတို့သည် ဘုရားသခင်နှင့်ပတ်သက်၍ အချို့သော နားလည်မှုလွဲခြင်းများ ရှိနိုင်ပြီး မိမိတို့ ထမ်းဆောင်သည့် တာဝန်က ပို၍အရေးကြီးလေ၊ ပို၍ လျင်မြန်စွာ ဖော်ထုတ်ခံရလေဟု တွေးထင်လျက် ကိုယ်တော့်အပေါ် သတိဖြင့် ကာကွယ်လာနိုင်သည်။ ထို့ကြောင့် ၎င်းတို့၏ စိတ်နှလုံးထဲတွင် ၎င်းတို့နှင့် ဘုရားသခင်ကြား၌ အချို့သော အတားအဆီးများ ရှိလာမည်ဖြစ်ပြီး အချို့သော တာဝန်များနှင့် တာဝန်ပေးစေခိုင်းချက်များကို စင်ကြယ်၍ ပွင့်လင်းသော စိတ်နှလုံးဖြင့် လက်မခံနိုင်ကြတော့ပေ။) ဤနေရာတွင် အတားအဆီးမှာ အဘယ်နည်း။ (သတိထားရှောင်ခြင်းနှင့် နားလည်မှုလွဲခြင်းများ ဖြစ်သည်။) သတိထားရှောင်ခြင်းနှင့် နားလည်မှုလွဲခြင်းများဖြစ်၏။ ဤသည်မှာ အတားအဆီးတစ်မျိုး ဖြစ်သည်။ မည်သူ ထပ်ဖြည့်စွက်နိုင်သေးသနည်း။ သင်တို့ထဲမှ ကျန်သောသူများနှင့် ဘုရားသခင်ကြားတွင် အတားအဆီးများ မရှိကြသလော။ သင်တို့၏ စိတ်နှလုံးများသည် သန့်ရှင်းစင်ကြယ်နေပြီလော။ သင်တို့သည် ဘုရားသခင်နှင့်ပတ်သက်၍ မည်သည့် ဆန့်ကျင်ဘက် သို့မဟုတ် အပျက်သဘောဆောင်သည့် အတွေးအခေါ်များကိုမျှ မထားရှိဖူးသလော။ (ဘုရားသခင်၊ ကျွန်ုပ် တစ်စုံတစ်ခု ထပ်ဖြည့်စွက်နိုင်ပါသည်။ ဘုရားသခင်က ကျွန်ုပ်အတွက် စီစဉ်ညွှန်ကြားပေးသော အခြေအနေများတွင် အမှုအရာများ အတော်အတန် ချောမွေ့နေသည့်အခါတိုင်း ကျွန်ုပ်နှင့် ဘုရားသခင်ကြားရှိ ဆက်ဆံရေးသည် အတော်အတန် ပုံမှန်ဖြစ်ပုံရပါသည်။ သို့သော် ကျွန်ုပ်သည် အခက်အခဲ သို့မဟုတ် ကျွန်ုပ်၏ အယူအဆများနှင့် မကိုက်ညီသော တစ်စုံတစ်ခုနှင့် ကြုံတွေ့ရပါက ဘုရားသခင်က မည်သို့ပြုလုပ်မည်၊ ကျွန်ုပ်အပေါ် နောက်ထပ် မည်သည့်အရာ ကျရောက်မည်၊ အကျိုးဆက်မှာ မည်သို့ဖြစ်မည်တို့ကို ကျွန်ုပ် စတင်၍ မှန်းဆလေသည်။ ကျွန်ုပ်သည် များစွာ တွေးတောပြီး ကျွန်ုပ်၏ စိတ်ထဲတွင် ဘုရားသခင်ကို တိုင်တန်းခြင်းများပင် ပြုလုပ်ကာ တရားစီရင်ပြီး နားလည်မှုလွဲကာ ထိုအခါတွင် ကျွန်ုပ်၏ စိတ်နှလုံးသည် ပိတ်သွားတော့သည်။ ကျွန်ုပ် မြင်တွေ့ခဲ့ရသော အရာတစ်ခုအကြောင်းကိုလည်း ပြောလိုပါသည်။ အချို့လူများသည် မလိုလားအပ်သော အခြေအနေများနှင့် ကြုံတွေ့ရသည့်အခါ ၎င်းတို့သည် စိတ်နှလုံးထဲ၌ အတိုက်အခံပြုသည်ဟု ခံစားရပြီး “ဘုရားသခင်က ကျွန်ုပ်ကို ဤအခြေအနေများနှင့် အဘယ်ကြောင့် ကြုံတွေ့စေရသနည်း။ အခြားလူများအပေါ် အဘယ်ကြောင့် မကျရောက်ရသနည်း” ဟု ပြောဆိုကြသည်။ ၎င်းတို့သည် ဘုရားသခင် စီစဉ်ပေးသော အခြေအနေများကို မနာခံနိုင်ကြဘဲ ၎င်းတို့နှင့် ဘုရားသခင်ကြားတွင် ပဋိပက္ခ ဖြစ်ပေါ်လာပါသည်။) သင် ပထမဦးစွာ ဖော်ပြခဲ့သော ပြဿနာမှာ လူနှင့် ဘုရားသခင်ကြားတွင် အတားအဆီးများ ရှိနေခြင်း၊ အချို့သော အခြေအနေများ၏ အကျင့်ပါနေသော တုံ့ပြန်မှုတစ်ခုအဖြစ် လူတို့သည် မိမိတို့နှင့် ဘုရားသခင်ကြားတွင် အတားအဆီးများ၊ ဘုရားသခင်အပေါ် သတိဖြင့် ကာကွယ်ခြင်းနှင့် ဘုရားသခင်နှင့်ပတ်သက်သည့် နားလည်မှုလွဲခြင်းများ ဖြစ်ပေါ်လာခြင်း ဖြစ်သည်။ သင် ဒုတိယ ဖော်ပြခဲ့သော ပြဿနာမှာ လူတို့သည် စိတ်အတွင်း၌ မနာခံသောကြောင့် ဘုရားသခင်အပေါ် ရန်လိုလာခြင်း ဖြစ်သည်။ အခြားမည်သူ ထပ်ဖြည့်စွက်နိုင်သေးသနည်း။ (ကျွန်ုပ်သည် အထက်လူကြီး၏ ပြုပြင်ခြင်းကို ခံရပြီး ကျွန်ုပ်၏ ညံ့ဖျင်းသော အစွမ်းအစ ဖော်ထုတ်ခံရသည့်အခါတိုင်း ကျွန်ုပ်သည် မိမိကိုယ်ကို သတ်မှတ်လိုက်ပြီး ကယ်တင်ခြင်းမခံရနိုင်ဟု တွေးထင်ကာ သမ္မာတရားကို လိုက်စားလိုသော်လည်း လိုက်စားရန် စိတ်အားထက်သန်မှု မရှိတော့ပါ။ ဤသည်မှာ ဘုရားသခင်နှင့်ပတ်သက်သည့် နားလည်မှုလွဲခြင်းတစ်မျိုး ဖြစ်ပါသည်။ ထို့အပြင် အချို့သော ညီအစ်ကိုမောင်နှမများသည် နာမကျန်းဖြစ်ပြီး သေခြင်းတရားနှင့် ရင်ဆိုင်ရသည့်အခါ ၎င်းတို့က “ငါ ကိုယ်တော့်အတွက် ပြေးလွှားပြီး အသုံးခံခဲ့သမျှကို ဘုရားသခင်က မအောက်မေ့ဘူးလား” ဟု တွေးထင်ကြသည်။ ၎င်းတို့၏ စိတ်နှလုံးထဲတွင် ၎င်းတို့သည် ဘုရားသခင်နှင့် အငြင်းအခုံပြုကြသည်၊ ကိုယ်တော့်ကို ပွက်လောရိုက်ကြသည်၊ ကိုယ်တော့်ကို ဆန့်ကျင်တိုက်ခိုက်ကြသည်။ ဤအခြေအနေမျိုးသည် အတော်ပင် အဖြစ်များပါသည်။) မိမိနှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် ရန်လိုမုန်းတီးမှုတို့နှင့်ပတ်သက်၍ လူအများစု ဖော်ပြသည့် ပြဿနာများမှာ သတိဖြင့် ကာကွယ်ခြင်းနှင့် နားလည်မှုလွဲခြင်းများအပြင် လူတို့သည် အချို့သော အမှုအရာများနှင့် ကြုံတွေ့ရသည့်အခါ ဖော်ပြသည့် မနာခံခြင်းနှင့် မကျေနပ်ခြင်းတို့ ဖြစ်ပြီး တစ်နည်းအားဖြင့်ဆိုသော် ဘုရားသခင်အပေါ် ရန်လိုမုန်းတီးမှု ဖြစ်သည်။ အခြေခံအားဖြင့် ထိုမျှသာ ဖြစ်သည်။ လူတို့၏ ဘုရားသခင်အပေါ်ထားရှိသော စိတ်အတွင်းပိုင်း သဘောထားများနှင့်ဆိုင်သော အမျိုးမျိုးသော ပြဿနာများသည် အမှန်တကယ်တွင် သင်တို့ မိတ်သဟာယဖွဲ့ခဲ့သော ပြဿနာများ၏ အတိုင်းအတာကို များစွာ ကျော်လွန်သည်။ သင်တို့ သတိမပြုမိသော ပြဿနာအချို့ ရှိနေသည်။ တစ်ဖက်တွင် ဤသည်မှာ လူတို့သည် အမျိုးမျိုးသော အခြေအနေများကို တွေ့ကြုံခံစားရသည့်အခါတိုင်း မိမိတို့ကိုယ်၌ မည်သည့်ပြဿနာများ တည်ရှိသည်ကို မဆန်းစစ်သောကြောင့် ဖြစ်သည်။ အခြားတစ်ဖက်တွင် လူတို့သည် မိမိတို့၏ ဘုရားသခင်နှင့် ဆက်ဆံရေးသည် အတိအကျ မည်သို့ရှိသည်ကို သို့မဟုတ် လူတို့ ဘုရားသခင်အပေါ် ထားရှိသင့်သော မှန်ကန်သည့် သဘောထားများနှင့် ရှုမြင်ပုံများမှာ အဘယ်အရာဖြစ်သည်ကို မည်သည့်အခါမျှ စေ့စေ့စပ်စပ် မစဉ်းစားခဲ့ကြသောကြောင့် ဖြစ်သည်။ သို့ဖြစ်၍ လူတို့၏ မတူညီသော သရုပ်သကန်များနှင့် လက်ရှိတွင် လူတို့၌ အမှန်တကယ် တည်ရှိနေသော ဤအခြေအနေများကို အခြေခံ၍ ယနေ့ ငါတို့သည် လူနှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် လူတို့၏ ရန်လိုမုန်းတီးမှုတို့၏ မတူညီသော သရုပ်သကန်များအကြောင်းကို အတိအကျ မိတ်သဟာယဖွဲ့ကြမည်။ ဤမတူညီသော သရုပ်သကန်များကို မိတ်သဟာယဖွဲ့ခြင်း၏ ရည်မှန်းချက်မှာ လူတို့သည် မိမိတို့၏ နေ့စဉ်အသက်တာများတွင် ဤအရာများ ၎င်းတို့၌ ဖြစ်ပေါ်သည့်အခါတိုင်း မိမိတို့နှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် ၎င်းတို့ထားရှိသော ရန်လိုမုန်းတီးမှုကို တက်ကြွစွာ လက်လွှတ်နိုင်စေရန်၊ ကိုယ်တော်နှင့် သဟဇာတဖြစ်သော ဆက်ဆံရေးကို ရရှိစေရန်နှင့် နောက်ဆုံးတွင် ကိုယ်တော်နှင့် အပြည့်အဝ သဟဇာတဖြစ်လာစေရန် ဖြစ်သည်။ ဤနည်းအားဖြင့် ၎င်းတို့သည် မိမိတို့နှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် ၎င်းတို့၏ ရန်လိုမုန်းတီးမှုကို လုံးဝ ဖယ်ရှားပြီးဖြစ်လိမ့်မည်၊ ပြီးလျှင် ဘုရားသခင်ကို ကြောက်ရွံ့ကာ ကိုယ်တော်အား အမှန်တကယ် ကျိုးနွံနာခံလာကြလိမ့်မည်။ ဤသည်သာလျှင် လူနှင့် ဘုရားသခင်ကြားရှိ ပုံမှန်ဆက်ဆံရေးဖြစ်ပြီး ဤကဲ့သို့သော လူတို့သာလျှင် စစ်မှန်သော ဖန်ဆင်းခံများ ဖြစ်ကြသည်။

ဘုရားသခင်နှင့် မိမိတို့ကြားရှိ အတားအဆီးများနှင့် ဘုရားသခင်အပေါ် ၎င်းတို့၏ ရန်လိုမုန်းတီးမှုကို လက်လွှတ်ခြင်းနှင့်ပတ်သက်လာလျှင် လူတို့ ပထမဆုံး လက်လွှတ်သင့်သည့်အရာမှာ ၎င်းတို့၏ အယူအဆများနှင့် စိတ်ကူးများ ဖြစ်သည်။ ဤသည်မှာ အလွန် အရေးကြီးသော အကြောင်းအရာတစ်ခု ဖြစ်သည် မဟုတ်လော။ (ဟုတ်ပါသည်။) ဘုရားသခင်နှင့်ပတ်သက်သော အယူအဆများနှင့် စိတ်ကူးများသည် လူတိုင်း၌ တည်ရှိသည် မဟုတ်လော။ (ဟုတ်ပါသည်။) မည်သည့်လူမျှ လေဟာနယ်ထဲတွင် အသက်မရှင်သကဲ့သို့ မည်သည့်လူမျှ စက်ရုပ်မဟုတ်ပေ။ လူတိုင်းတွင် လွတ်လပ်စွာ ရွေးချယ်ပိုင်ခွင့်ရှိသည်၊ ပြီးလျှင် ပြင်ပလောကမှ ရရှိထားသော အမျိုးမျိုးသော အတွေးအခေါ်များနှင့် ရှုထောင့်အမြင်များကို စိတ်ထဲတွင် ထားရှိကြသည်။ ပြောစရာမလိုသည်မှာ၊ လူတိုင်းတွင် မိမိတို့၏ ကိုယ်ပိုင်လိုအပ်ချက်များ၊ နှစ်သက်မှုများနှင့် လိုအင်ဆန္ဒများကို အခြေခံ၍ ၎င်းတို့၏ ပုဂ္ဂလဓိဋ္ဌာန်ကျသော ဆန္ဒအတွင်း၌ ဖြစ်ပေါ်လာခဲ့သည့် ဘုရားသခင်နှင့်ပတ်သက်သော အမျိုးမျိုးသော အယူအဆများနှင့် စိတ်ကူးများလည်း ရှိကြသည်။ ၎င်းတို့ကို “အယူအဆများ” နှင့် “စိတ်ကူးများ” ဟု ခေါ်ဆိုခြင်းက ၎င်းတို့သည် သမ္မာတရား သို့မဟုတ် အဖြစ်မှန်များနှင့် လုံးဝကိုက်ညီမှုမရှိကြောင်းကို ဆိုလိုသည်၊ အနည်းဆုံးအနေဖြင့် ၎င်းတို့သည် ဘုရားသခင်၏ ရည်ရွယ်ချက်များ၊ ဘုရားသခင်၏ ပင်ကိုလက္ခဏာ၊ ဘုရားသခင်၏ အနှစ်သာရတို့နှင့် ကိုက်ညီမှုမရှိပေ။ ထို့ကြောင့် ဤအယူအဆများနှင့် စိတ်ကူးများသည် လူတို့ ပထမဆုံး လက်လွှတ်သင့်သည့် အဓိကကျသောအရာ ဖြစ်သည်။ သို့ဖြစ်၍ ဘုရားသခင်နှင့်ပတ်သက်သော အယူအဆများ၊ စိတ်ကူးများနှင့် သက်ဆိုင်သည့် အကြောင်းအရာတွင် အဓိကအားဖြင့် မည်သည့်အရာများ ပါဝင်သနည်း။ တစ်ဖက်တွင်မူ ၎င်းတို့တွင် လူတို့ ဘုရားသခင်ကို မယုံကြည်မီကတည်းက ဘုရားသခင်အပေါ် ထားရှိခဲ့သော အယူအဆများ ပါဝင်သည်။ အခြားတစ်ဖက်တွင်မူ ၎င်းတို့တွင် လူတို့ ဘုရားသခင်ကို ယုံကြည်ပြီးနောက် ဘုရားသခင်အပေါ် ဖြစ်ပေါ်လာသော အယူအဆသစ်များ ပါဝင်ပြီး ဤအယူအဆသစ်များသည် ပို၍ တိကျပြီး လက်တွေ့ကျသော အယူအဆများနှင့် စိတ်ကူးများ ဖြစ်ကြသည်။ လူတို့ ဘုရားသခင်ကို မယုံကြည်မီတွင် ၎င်းတို့၏ စိတ်နှလုံးများသည် ဘုရားသခင်နှင့်ပတ်သက်သော စိတ်ကူးများဖြင့် ပြည့်နှက်နေပြီး ဤစိတ်ကူးများကို လူသားအားလုံးတွင် ရှိသော တစ်ပုံစံတည်းသော အယူအဆများဟုလည်း ဆိုနိုင်ပေသည်။ ယင်းမှာ တရုတ်လူမျိုးတို့သည် ဘုရားသခင်ကို မယုံကြည်ကြသော်လည်း ကိုယ်တော်အား “မိုးကောင်းကင်ပေါ်ရှိ အဘိုးအို” ဟု ခေါ်ဆိုကြသကဲ့သို့လည်းကောင်း၊ ဘုရားသခင်ကို ယုံကြည်သူ အချိုးအစား ပိုမိုမြင့်မားသော အနောက်တိုင်းသားတို့က ကိုယ်တော်အား “သခင်” ဟု ခေါ်ဆိုကြသကဲ့သို့လည်းကောင်း ဖြစ်သည်။ လူများစွာတို့သည် ဘုရားသခင်ကို မယုံကြည်ကြသော်လည်း လူအများစုမှာမူ ဘုရားသခင်တစ်ပါး ရှိသည်ဟု ယုံကြည်ကြပြီး ကိုယ်တော်နှင့်ပတ်သက်သော စိတ်ကူးများဖြင့် ပြည့်နှက်နေကြကာ ဘုရားသခင်သည် အရာခပ်သိမ်းတို့တွင် တည်ရှိပြီး အရာခပ်သိမ်းအထက်၌ စိုးမိုးတော်မူသည်ဟူ၍လည်းကောင်း၊ ကိုယ်တော်သည် နေရာတိုင်း၌ရှိပြီး အရာခပ်သိမ်းကို တတ်စွမ်းနိုင်ကာ ကြီးမြတ်၍ မယုံနိုင်ဖွယ်သော တန်ခိုးများကို ပိုင်ဆိုင်သည်ဟူ၍လည်းကောင်း တွေးထင်ကြသည်။ သို့ဆိုလျှင် ဤဘုရားသခင်သည် အတိအကျ မည်သူဖြစ်သနည်း။ မည်သူမျှ မသိကြပေ၊ သို့သော် မည်သို့ပင်ဖြစ်စေ ဘုရားသခင်သည် အကြီးမြတ်ဆုံးဖြစ်ပြီး အရာခပ်သိမ်းကို အုပ်စိုးသည်ကိုမူ ၎င်းတို့ သိကြသည်။ သို့ဆိုလျှင် ဘုရားသခင်၏ တိကျသော ပုံသဏ္ဌာန်မှာ အဘယ်နည်း။ လူတိုင်းသည် မိမိတို့၏ စိတ်ထဲတွင် မိမိတို့ စိတ်ကူးပြီး သတ်မှတ်ထားသော ဘုရားသခင်၏ ရုပ်သွင်နှင့် ပုံသဏ္ဌာန်ဆိုင်ရာ အတွေးတစ်ခုကို စွဲကိုင်ထားကြသည်။ လူသားတို့၏ ဤတူညီသော အယူအဆများနှင့် စိတ်ကူးများကို ငါတို့ ယခင်က ဆွေးနွေးခဲ့ပြီးဖြစ်ပြီး ယင်းတို့သည် ယနေ့ မိတ်သဟာယ၏ အဓိကအကြောင်းအရာ မဟုတ်ပေ။ ယနေ့ ငါတို့ မိတ်သဟာယပြုကြမည့်အရာမှာ လူတို့နှင့် ဘုရားသခင်ကြားရှိ အတားအဆီးများ၊ ဘုရားသခင်အပေါ် ၎င်းတို့၏ ရန်လိုမုန်းတီးမှုတို့နှင့် သက်ဆိုင်သော အမျိုးမျိုးကွဲပြားသည့် အယူအဆများနှင့် စိတ်ကူးများအားလုံးထဲမှ လူတို့ လက်လွှတ်သင့်သည့် ဘုရားသခင်ကို ဆန့်ကျင်ပြီး ကိုယ်တော်၏ အနှစ်သာရနှင့် မကိုက်ညီသော အမျိုးမျိုးသော အယူအဆများနှင့် စိတ်ကူးများပင် ဖြစ်သည်။ အနှစ်မဲ့ပြီး အစစ်အမှန်မဟုတ်ကာ နားလည်ရခက်သော ထိုအယူအဆများနှင့် စိတ်ကူးများကို ငါတို့ ပြောဆိုကြမည်မဟုတ်ပေ။ သင်တို့၏ လက်ရှိ ဝိညာဉ်ရင့်ကျက်မှုကို ထောက်ရှုလျှင် ထိုအရာများသည် အခြေခံအားဖြင့် ပြဿနာတစ်ရပ်မဟုတ်တော့ဘဲ သင်တို့၏ ဘုရားသခင်နောက်လိုက်ခြင်းအပေါ် သက်ရောက်မှုရှိရန်ကို မဆိုထားနှင့် သင်တို့၏ သမ္မာတရားကို လိုက်စားခြင်းအပေါ် သက်ရောက်မှုရှိမည် မဟုတ်ကြောင်း၊ အချို့သော လူပုဂ္ဂိုလ်များ၏ စိတ်ထဲတွင် စိတ်ကူးယဉ်ဆန်သော စိတ်ကူးအချို့ ရှိနေသေးလျှင်ပင် ဤအရာများသည် ၎င်းတို့၏ ဘုရားသခင်နောက် လိုက်ခြင်းအပေါ် သက်ရောက်မှုရှိမည် မဟုတ်ကြောင်းနှင့် ထိုမျှ ကြီးမားသော ပြဿနာတစ်ရပ် မဟုတ်ကြောင်း ပြောနိုင်ပေသည်။ ငါတို့ မိတ်သဟာယပြုကြမည့် လူသားတို့၏ အယူအဆများနှင့် စိတ်ကူးများသည် ၎င်းတို့၏ နေ့စဉ်အသက်တာများတွင် ဘုရားသခင်အပေါ် ထားရှိသော လူတို့၏ သဘောထားများ၊ လူတို့၏ တာဝန်များကို ထမ်းဆောင်ခြင်း၊ လူတို့ လျှောက်လှမ်းကြသော လမ်းကြောင်းများနှင့် သက်ဆိုင်ပြီး ပြောစရာမလိုသည်မှာ ၎င်းတို့သည် လူတို့၏ လိုက်စားမှုများနှင့် သာ၍ပင် သက်ဆိုင်လေသည်။ လူတို့ ဘုရားသခင်အပေါ် ထားရှိသော အမျိုးမျိုးသော အယူအဆများနှင့် စိတ်ကူးများထဲတွင် ပထမဦးစွာ လူတို့သည် ကိုယ်တော်၏ အမှုတော်နှင့်ပတ်သက်၍ များစွာသော အယူအဆများနှင့် စိတ်ကူးများ ရှိကြသည်၊ ယင်းတို့သည် ဘာသာတရားမရှိသူများ ဘုရားသခင်အပေါ်ထားရှိသော အမျိုးမျိုးသော စိတ်ကူးများထက် များစွာ ပို၍ လက်တွေ့ကျပြီး အနှစ်မဲ့ခြင်း သို့မဟုတ် နားလည်ရခက်ခြင်းလည်း မရှိပေ။ ယင်းတို့သည် လူတိုင်း ဘုရားသခင်နောက်လိုက်နေစဉ် ၎င်းတို့၏ စိတ်ထဲတွင် တည်ရှိနေသော အရာများ ဖြစ်ကြသည်။ ဆိုလိုသည်မှာ လူတို့သည် ဘုရားသခင်၏ အမှုတော်နှင့်ပတ်သက်၍ စိတ်ကူးယဉ်ဆန်ပြီး လက်တွေ့မကျသော အယူအဆများ၊ စိတ်ကူးများစွာတို့ဖြင့် ပြည့်နှက်နေကြခြင်း ဖြစ်သည်။ ဥပမာအားဖြင့် လူတို့သည် ကိုယ်တော်၏ အမှုတော်သည် ထူးဆန်းသောတန်ခိုးများနှင့် ပြည့်နှက်နေသည်ဟူ၍လည်းကောင်း၊ လူသားတို့ ကြိုမမြင်နိုင်သော သို့မဟုတ် မစွမ်းဆောင်နိုင်သော အံ့ဖွယ်ရာများဖြင့် ပြည့်နှက်နေသည်ဟူ၍လည်းကောင်း စိတ်ကူးကြသည်။ ပြောစရာမလိုသည်မှာ ဤကိစ္စနှင့်ပတ်သက်၍ လူတို့၏ အကြီးမားဆုံးသော အယူအဆများနှင့် စိတ်ကူးများမှာ ဘုရားသခင်၏ အမှုတော်သည် လူတစ်ဦးကို ချက်ချင်းလက်ငင်း စုံလင်အောင် ပြုလုပ်ပေးနိုင်ကောင်း ပြုလုပ်ပေးနိုင်မည်ဟူ၍လည်းကောင်း၊ သို့မဟုတ် စကားအနည်းငယ် ပြောဆိုရုံဖြင့်ဖြစ်စေ၊ ထူးဆန်းသောတန်ခိုး သို့မဟုတ် အံ့ဖွယ်အမှုတစ်ခုကို ပြုလုပ်ရုံဖြင့်ဖြစ်စေ ဘုရားသခင်သည် လူတစ်ဦးကို ချက်ချင်း ပြောင်းလဲစေနိုင်ပြီး ဇာတိပကတိ၏ အသက်တာနှင့် ဇာတိပကတိ၏ အမျိုးမျိုးသော လက်တွေ့ကျသည့် အခက်အခဲများမှ လွတ်မြောက်ပြီးသူတစ်ဦးအဖြစ်သို့ ဖန်တီးပေးနိုင်သည်ဟူ၍လည်းကောင်း ဖြစ်သည်။ ဤလူသည် စားခြင်းဖြစ်စေ၊ သောက်ခြင်းဖြစ်စေ မရှိဘဲ စက်ရုပ်တစ်ရုပ်ကဲ့သို့ ကာယပိုင်းဆိုင်ရာ လိုအပ်ချက်များ မရှိဟု ၎င်းတို့ စိတ်ကူးကြသည်၊ ထို့အပြင် ဤလူသည် တစ်ကိုယ်ကောင်းဆန်သော စဉ်းစားမှုများမရှိဘဲ ဖြူစင်သောနည်းလမ်းဖြင့် တွေးခေါ်သည်ဟူ၍လည်းကောင်း၊ အတွင်း၌ အလွန် သန့်ရှင်းစင်ကြယ်သည်ဟူ၍လည်းကောင်း ၎င်းတို့ ယုံကြည်ကြသည်။ ဤအရာကို စွမ်းဆောင်ရရှိရန် သမ္မာတရားကို လိုက်စားရန် မလိုအပ်ကြောင်း၊ သို့မဟုတ် သမ္မာတရားကို မိတ်သဟာယဖွဲ့ရန် သို့မဟုတ် နှစ်ပေါင်းများစွာ ပြုပြင်ခြင်းကို လက်ခံရန် မလိုအပ်ကြောင်း၊ ထိုအစား ဘုရားသခင် မိန့်တော်မူသမျှသည် ဖြစ်မြောက်မည်ဖြစ်ပြီး ကိုယ်တော် အမိန့်ပေးသမျှသည် ခိုင်မာစွာ တည်တံ့မည်ဖြစ်သောကြောင့် ဘုရားသခင်သည် ဤအရာအားလုံးကို စကားအနည်းငယ်မျှဖြင့် စွမ်းဆောင်နိုင်သည်ဟု ၎င်းတို့ စိတ်ကူးကြသည်။ အထူးသဖြင့် ကနဦးတွင် လူတို့ ဘုရားသခင်၏ တတိယအဆင့် အမှုတော်ကို လက်ခံခဲ့ကြစဉ်အခါက ၎င်းတို့သည် ကိုယ်တော်၏ အမှုတော်နှင့်ပတ်သက်၍ အမျိုးမျိုးသော အယူအဆများ၊ စိတ်ကူးများဖြင့် သာ၍ပင် ပြည့်နှက်ခဲ့ကြသည်။ အချို့လူတို့သည် “ဘုရားသခင်၏ အမှုတော်သည် မကြာမီ ပြီးဆုံးတော့မည်” ဟု ကြားသိသောအခါ မည်သည့်နှစ်၊ မည်သည့်လ၊ မည်သည့်နေ့တွင် ပြီးဆုံးမည်ကို ၎င်းတို့ မသိခဲ့ကြသည့်တိုင် စိုးရိမ်ပူပန်လာကြပြီး ၎င်းတို့၏ အလုပ်များနှင့် မိသားစုများကိုပင် စွန့်လွှတ်ခဲ့ကြသည်။ အချို့သော လယ်သမားများသည် သီးနှံများ စိုက်ပျိုးခြင်းကို ရပ်တန့်ခဲ့ကြပြီး အခြားသူများမှာမူ နွားများနှင့် သိုးများကို မွေးမြူခြင်းအား ရပ်တန့်ခဲ့ကြသည်။ အချို့လူများဆိုလျှင် ၎င်းတို့၏ ပိုင်ဆိုင်မှုများနှင့် ကားများကိုပင် ရောင်းချခဲ့ကြပြီး ဘဏ်၌ရှိသော ငွေအားလုံးကို ထုတ်ယူကာ ၎င်းတို့၏ ပိုင်ဆိုင်မှုများကို စုစည်းခဲ့ကြလျက် ဘုရားသခင်နောက် လိုက်ဖို့ အသင့်ဖြစ်စေရန် ၎င်းတို့၏ ရွှေ၊ ငွေနှင့် တန်ဖိုးရှိပစ္စည်းများကို မိမိတို့အပေါ်၌ ဆောင်ထားခဲ့ကြသည်။ ဤသို့ဖြစ်ရခြင်းမှာ လူတို့က ဘုရားသခင်၏ အမှုတော်သည် ပြီးဆုံးနေပြီဖြစ်သောကြောင့် ၎င်းတို့၏ အသက်တာများကို ဆက်လက်အသက်ရှင်ရန် မလိုအပ်တော့ဟု ထင်မြင်ခဲ့ကြသည့်အပြင် ဘုရားသခင်သည် မိသားစုများနှင့် အိမ်ထောင်များကို ပြိုကွဲစေခဲ့ပြီးဖြစ်သောကြောင့် ၎င်းတို့သည် မိမိတို့၏ အိမ်ထောင်များ၊ အလုပ်များနှင့် အနာဂတ်များကို စွန့်လွှတ်သင့်ကာ လောကီဆိုင်ရာ သာယာမှုအားလုံးကို စွန့်ပယ်ပြီး ဘုရားသခင်နောက် လိုက်သင့်သည်ဟု ယုံကြည်ခဲ့ကြသောကြောင့် ဖြစ်သည်။ တစ်စုံတစ်ဦးက ၎င်းတို့ကို “သင်သည် ထိုခရီးဆောင်သေတ္တာနှင့် သင်၏ မိသားစုတစ်စုလုံးကို ဆွဲလျက် အဘယ်အရပ်သို့ သွားမည်နည်း” ဟု မေးမြန်းပါက ၎င်းတို့က “ကျွန်ုပ်သည် ကောင်းကင်နိုင်ငံတော်သို့ သွားမည်” ဟု ပြောဆိုကြပေမည်။ ထို့နောက်တွင် ၎င်းတို့ကို “ကောင်းကင်နိုင်ငံတော်သည် အဘယ်မှာနည်း” ဟု မေးမြန်းပါက ၎င်းတို့က “ကျွန်ုပ် မသိသေးပါ၊ ဘုရားသခင် ခေါ်ဆောင်သည့် မည်သည့်နေရာကိုမဆို ကျွန်ုပ် သွားမည်” ဟု ပြန်ဖြေကြပေမည်။ မည်သို့ပင်ဖြစ်စေ ၎င်းတို့သည် စိတ်လိုက်မာန်ပါ ပြုမူဆောင်ရွက်ခြင်းဖြစ်စေ၊ သေချာစဉ်းစားပြီးသားဖြစ်စေ၊ ဤသရုပ်သကန်များသည် လူတို့၌ ဘုရားသခင်၏ အမှုတော်နှင့်ပတ်သက်၍ များစွာသော အယူအဆများနှင့် စိတ်ကူးများ ရှိကြသည်ဟူသော အချက်တစ်ရပ်ကို ဖော်ပြနေသည်။ ဘုရားသခင်သည် ၎င်းတို့ကို ကယ်တင်ရန် မည်သို့ အမှုပြုမည်ကိုဖြစ်စေ၊ ကိုယ်တော်က ၎င်းတို့ကို ကယ်တင်ပြီးနောက် ၎င်းတို့ မည်သို့ ခံစားရမည်ကိုဖြစ်စေ၊ မည်သို့သော အခြေအနေနှင့် ပတ်ဝန်းကျင်မျိုးတွင် အသက်ရှင်ကြမည်ကိုဖြစ်စေ ၎င်းတို့ မသိကြပေ။ ပြီးလျှင် ဘုရားသခင်၏ ရည်ရွယ်ချက်များ အတိအကျ မည်သည့်အရာ ဖြစ်သည်ကိုဖြစ်စေ၊ ဘုရားသခင်သည် လူတို့အပေါ် သူ၏အမှုတော်မှတစ်ဆင့် မည်သည့်ရလဒ်ကို ရရှိရန် အလိုရှိသည်ကိုဖြစ်စေ ဤအရာတစ်ခုကိုမျှ ၎င်းတို့ မသိကြပေ။ သို့ဆိုလျှင် ၎င်းတို့ မည်သည့်အရာကို သိကြသနည်း။ ၎င်းတို့သည် စာကြောင်းတစ်ကြောင်းကိုသာ မှတ်မိကြသည်။ ဘုရားသခင်၏ နေ့ရက်သည် နီးကပ်ပြီ၊ ကပ်ဘေးများ ကျရောက်ပြီ၊ ဘုရားသခင်၏ အမှုတော်သည် မကြာမီ ပြီးဆုံးတော့မည်၊ ကျွန်ုပ်တို့သည် အရာခပ်သိမ်းကို စွန့်လွှတ်ပြီး ဘုရားသခင်နောက် လိုက်သင့်သည်ဟူ၍ ဖြစ်သည်။ ဤသည်မှာ ၎င်းတို့၏ အယူအဆများနှင့် စိတ်ကူးများအားလုံး ဖွဲ့စည်းဖြစ်ပေါ်လာခြင်း၏ ရင်းမြစ်နှင့် အခြေခံဖြစ်ပြီး ဤအယူအဆများ၊ စိတ်ကူးများမှတစ်ဆင့်ပင် ၎င်းတို့သည် အမျိုးမျိုးသော ရွေးချယ်မှုများနှင့် ဆုံးဖြတ်ချက်များကို ပြုလုပ်ခဲ့ကြခြင်း ဖြစ်သည်။ ၎င်းတို့သည် မည်သို့သော ရွေးချယ်မှုများနှင့် ဆုံးဖြတ်ချက်များကို ပြုလုပ်ခဲ့ကြသနည်း။ ၎င်းတို့သည် လောကီကို စွန့်လွှတ်ရန်၊ ၎င်းတို့၏ ပညာရေးကို စွန့်လွှတ်ရန်၊ ၎င်းတို့၏ လုပ်ငန်းများကို စွန့်လွှတ်ရန်၊ ၎င်းတို့၏ အိမ်ထောင်ရေးများကို စွန့်လွှတ်ရန်၊ ၎င်းတို့၏ မိသားစုများကို စွန့်လွှတ်ရန်၊ ဇာတိပကတိဆိုင်ရာ၊ မိသားစုချစ်ခြင်းမေတ္တာကိုပင် စွန့်လွှတ်ရန် စသည်တို့ကို ရွေးချယ်ခဲ့ကြပြီး ဤအရာအားလုံးကို လက်လွှတ်ပြီးနောက် ဘုရားသခင်၏ အမှုတော် ပြီးဆုံးရန် စောင့်မျှော်နေကြသည်။ ဘုရားသခင်၏ အမှုတော် ပြီးဆုံးရန် စောင့်မျှော်ခြင်း၌ ၎င်းတို့၏ ရည်ရွယ်ချက်မှာ အဘယ်နည်း။ ယင်းမှာ ခေါ်ဆောင်ခြင်းခံရပြီး ဘုရားသခင်နောက် လိုက်ရန် ဖြစ်သည်။ အတိအကျ မည်သည့်နေရာသို့ ခေါ်ဆောင်ခြင်း ခံရမည်နည်း။ မည်သည့်နေရာသို့ ခေါ်ဆောင်ခြင်း ခံရသည်ဖြစ်စေ၊ မည်သည့်နေ့တွင် အတိအကျ ခေါ်ဆောင်ခြင်းခံရမည်ဖြစ်စေ၊ မည်သို့ပင်ဖြစ်စေ ၎င်းတို့သည် ငရဲသို့ သွားရမည်မဟုတ်ဟု ၎င်းတို့ တွေးထင်ကြသည်။ ကောင်းကင်ဘုံ မဟုတ်လျှင်ပင် ၎င်းတို့သည် ပိုမြင့်သောနေရာတစ်ခုသို့ သွားကြမည်ဖြစ်ကြောင်း၊ ကောင်းကင်ဘုံ မဟုတ်လျှင်ပင် သို့မဟုတ် ရုပ်ခန္ဓာနှင့်ဆိုင်သော နိုင်ငံတော်တစ်ခု မဟုတ်လျှင်ပင် ဘုရားသခင်နောက် လိုက်ခြင်းဖြင့် ၎င်းတို့ မှားနိုင်မည်မဟုတ်ကြောင်း၊ ပြီးလျှင် ဘုရားသခင်ရှိရာ မည်သည့်နေရာသို့မဆို ၎င်းတို့ ခေါ်ဆောင်ခြင်း ခံရဖွယ်ရှိကြောင်း ယုံကြည်ကြသည်။ လူတို့၌ရှိသော ဤအယူအဆများနှင့် စိတ်ကူးများသည် အလွန်ပြီးပြည့်စုံပုံရသော်လည်း ယင်းတို့ အမှန်တကယ် ဖြစ်လာနိုင်သလော။ ၎င်းတို့ စောင့်မျှော်နေခဲ့သော အချိန်အခါဖြစ်သည့် ဘုရားသခင်၏ အမှုတော် ပြီးဆုံးချိန်သည် ရောက်ရှိလာပြီးပြီလော။ (မရောက်ရှိသေးပါ။) ပြီးလျှင် ဘုရားသခင်၏ အမှုတော်သည် မပြီးဆုံးသေးသောကြောင့် လူတို့သည် စိတ်ပျက်ခြင်း သို့မဟုတ် စိုးရိမ်ပူပန်ခြင်းကို ခံစားကြရသလော။ ၎င်းတို့ နောင်တရကြသလော။ အချို့လူတို့သည် စိတ်ပျက်ကြသည်၊ ဟုတ်သည် မဟုတ်လော။ အချို့လူတို့သည် မိမိတို့၏ တာဝန်ကို ထမ်းဆောင်စဉ် အခက်အခဲများနှင့် ကြုံတွေ့ရသည့်အခါ အပျက်သဘောဆောင်လာကြသည်၊ သို့မဟုတ် ၎င်းတို့၏ အိမ်တွင်းအသက်တာ၌ ဆင်းရဲဒုက္ခကို တွေ့ကြုံခံစားရသည့်အခါ သို့မဟုတ် ညှဉ်းပန်းနှိပ်စက်ခြင်းကို ခံရပြီး ထွက်ပေါက်မရှိသည့်အခါ နောင်တရကြသည်။ ပြောစရာမလိုသည်မှာ အချို့လူများအတွက် ယခုအချိန်ထိတိုင် ခံနိုင်ရည်ရှိရန် မလွယ်ကူခဲ့သော်လည်း ၎င်းတို့၏ စိတ်နှလုံးထဲတွင်မူ အမှန်တကယ်ပင် အလွန် စိုးရိမ်ပူပန်နေကြသည်။ ၎င်းတို့သည် မည်သည့်အရာအတွက် စိုးရိမ်ပူပန်နေကြသနည်း။ ၎င်းတို့က “အဘယ်ကြောင့် ဘုရားသခင်၏ အမှုတော်သည် မပြီးဆုံးသေးသနည်း။ ဘုရားသခင်၏ အမှုတော်သည် မည်မျှကြာဦးမည်နည်း။ ကျွန်ုပ် အိမ်ပြန်ပြီး ကျွန်ုပ်၏ဘဝကို ဆက်လက်ရှင်သန်သင့်သလော။ ကျွန်ုပ် အလုပ်ပြန်လုပ်ပြီး လောက၌ ကျွန်ုပ်ကိုယ်တိုင်အတွက် အနာဂတ်တစ်ခုကို ရှာဖွေသင့်သလော။ ကျွန်ုပ်၏အိမ်ကို ပြန်ဝယ်သင့်သလော။ ဘုရားသခင်သည် ကျွန်ုပ်တို့ကို ပြန်မဖြေကြားဘဲ ဤအကြောင်းနှင့်ပတ်သက်၍ ရှင်းလင်းသောအဖြေတစ်ခုကိုလည်း မပေးပေ။ ဘုရားသခင်၏ အမှုတော်သည် မည်သည့်အချိန်တွင် ပြီးဆုံးမည်ကိုလည်းကောင်း၊ ကိုယ်တော်သည် အခြားမည်သည့်အမှုကို ပြုဦးမည်ကိုလည်းကောင်း ကျွန်ုပ်တို့အား ပြောပြသင့်သည် မဟုတ်လော၊ သို့မှသာ ကျွန်ုပ်တို့ ပြင်ဆင်ထားနိုင်မည် ဖြစ်သည်။ ဘုရားသခင်သည် ကျွန်ုပ်တို့ကို ဤအရာများ မပြောပြဘဲ သမ္မာတရားများကို ဆက်လက်ဖော်ပြနေသည်၊ သမ္မာတရားများကို မိတ်သဟာယဖွဲ့နေပြီး ကယ်တင်ခြင်းအကြောင်းကို ပြောဆိုနေသည်။ ကိုယ်တော်သည် နောင်ဖြစ်လာမည့်အရာအကြောင်း၊ သို့မဟုတ် အနာဂတ်အကြောင်း၊ သို့မဟုတ် လူသားမျိုးနွယ်သည် လှပသော ပန်းတိုင်တစ်ခုသို့ မည်သည့်အချိန်တွင် ဝင်ရောက်မည်အကြောင်း၊ သို့မဟုတ် ဇာတိပကတိ၏ အသက်တာသည် မည်သည့်အချိန်တွင် ပြီးဆုံးမည်အကြောင်းကို မည်သည့်အခါမျှ မပြောပေ၊ ကိုယ်တော်သည် ကျွန်ုပ်တို့ကို အကန့်အသတ်မရှိ စောင့်ခိုင်းနေသည်” ဟု တွေးထင်ကြသည်။ လူတို့သည် ဘုရားသခင်၏ အမှုတော်ကို မသိနားမလည်ကြပေ။ ပို၍ တိတိကျကျဆိုရလျှင် ဘုရားသခင်သည် လူတို့ကို မည်သို့ ကယ်တင်သည်၊ လူတို့ကို ကယ်တင်ရန် မည်သည့်နည်းလမ်းများကို အသုံးပြုသည်၊ လူတို့ ကယ်တင်ခြင်းခံရစေရန် ဘုရားသခင်သည် သူ၏ အမှုတော်အားလုံးအတွင်း၌ မည်သည့် တိကျသော အမှုကို ဆောင်ရွက်သည် စသည်တို့ကို ၎င်းတို့ ရှင်းလင်းစွာ မသိကြပေ။ ထိုအစား ၎င်းတို့သည် မိမိတို့၏ ကိုယ်ပိုင် အယူအဆများနှင့် စိတ်ကူးများအတွင်း၌ အစဉ်အသက်ရှင်နေကြပြီး ဘုရားသခင်၏ အမှုတော်ကို ပုံစံတစ်ခု သို့မဟုတ် အံ့ဖွယ်ဆန်းကြယ်သော မျက်လှည့်တစ်မျိုးအဖြစ် မှတ်ယူကြသည်။ ကိုယ်တော်၏ အမှုတော်သည် စကားအလှသက်သက်ဖြစ်ပြီး ယင်း၌ မည်သည့် တိကျသော အကြောင်းအရာမျှ မပါဝင်ဘိသကဲ့သို့ ဖြစ်သည်၊ ဘုရားသခင်သည် စကားအနည်းငယ်သာ ပြောဆိုရန် လိုအပ်ပြီး ကိုယ်တော် မိန့်တော်မူသမျှသည် ဖြစ်မြောက်မည်ဖြစ်ကာ ကိုယ်တော် အမိန့်ပေးသမျှသည် ခိုင်မာစွာ ရပ်တည်မည်ဖြစ်၍ ထို့နောက်တွင် လူတို့သည် ပြောင်းလဲသွားကြပြီး ဗျာဒိတ်ကျမ်း၌ ကြိုတင်ဟောကိန်း ထုတ်ထားသည့်အတိုင်းပင် သူတော်စင်များအဖြစ်သို့ ပြောင်းလဲကာ သန့်ရှင်းစင်ကြယ်စေခြင်းခံရကြမည် ဖြစ်သည်။ လူတို့ ဘုရားသခင်၏ အမှုတော်နှင့်ပတ်သက်၍ မည်သည့်စိတ်ကူးယဉ်ဆန်ပြီး အနှစ်မဲ့သည့် အတွေးများ ရှိနေသည်ဖြစ်စေ၊ ယင်းတို့သည် တိကျသည်ဖြစ်စေ မတိကျသည်ဖြစ်စေ၊ အတိုချုပ်အားဖြင့် လူတို့သည် ကိုယ်တော်၏ အမှုတော်နှင့်ပတ်သက်၍ အယူအဆများ၊ စိတ်ကူးများဖြင့် ပြည့်နှက်နေကြပြီး ၎င်းတို့သည် ဘုရားသခင်၏ အမှုတော်ကို ချဉ်းကပ်ပုံတွင်၊ ဘုရားသခင်က လူသားမျိုးနွယ်ကို ကယ်တင်ရန် ပြုတော်မူသော တိကျသည့် အမှုတော်အပိုင်းအစတိုင်းနှင့် မိန့်တော်မူသော တိကျသည့် အရာတိုင်းကို ချဉ်းကပ်ပုံတွင် အနှစ်မဲ့သော အယူအဆများ၊ စိတ်ကူးများအတွင်း၌ အစဉ်အသက်ရှင်နေကြသည်။ ပြောစရာမလိုသည်မှာ လူအများစုတွင် ဘုရားသခင်၏ အမှုတော်နှင့်ပတ်သက်၍ အယူအဆနှင့် စိတ်ကူးတစ်ခုတည်းသာ ရှိကြသည်၊ ယင်းမှာ ဘုရားသခင်၏ အမှုတော် ပြီးဆုံးသွားသည်နှင့်တစ်ပြိုင်နက် လူတို့သည် နောက်ဆုံးတွင် ဖြတ်သန်းအောင်မြင်ခဲ့ကြမည်ဖြစ်ပြီး ၎င်းတို့သည် ကိုယ်တော်၏ အမှုတော် ပြီးဆုံးသည်အထိ စောင့်ဆိုင်းနိုင်သရွေ့၊ ထိုအချိန်တွင် အသက်ရှင်ကျန်ရစ်နေသရွေ့ ၎င်းတို့သည် အောင်မြင်ခဲ့ကြမည်ဖြစ်ကာ ၎င်းတို့ စွန့်လွှတ်ခဲ့ပြီး ဆက်ကပ်ခဲ့သည့်အရာအားလုံး၊ ၎င်းတို့ ခံစားခဲ့ရသော ဆင်းရဲဒုက္ခများနှင့် ၎င်းတို့ ပေးဆပ်ခဲ့သော အဖိုးအခများအားလုံးသည် တန်ဖိုးရှိခဲ့ပေလိမ့်မည်ဟူ၍ ဖြစ်သည်။ ဤအချက်ကို အခြေခံ၍ အကဲဖြတ်ရလျှင် တစ်ဖက်တွင် လူတို့သည် ဘုရားသခင်၏ အမှုတော်နှင့်ပတ်သက်၍ အမျိုးမျိုးသော အယူအဆများနှင့် စိတ်ကူးများဖြင့် ပြည့်နှက်နေကြသည်။ အခြားတစ်ဖက်တွင်မူ လူတို့သည် ဘုရားသခင်ကို ယုံကြည်ခြင်း၌ သမ္မာတရားကို လိုက်စားနေကြခြင်း မဟုတ်ပေ၊ ထိုအစား ၎င်းတို့၏ ယုံကြည်ခြင်း၌ လောင်းကစားသဘောသဘာဝတစ်ခု ရှိနေသည်၊ ၎င်းတို့သည် မိမိတို့၏ အသက်နှင့် ပိုင်ဆိုင်မှုအားလုံး၊ မိမိတို့၏ အနာဂတ်၊ မိမိတို့၏ အိမ်ထောင်ရေးနှင့် မိမိတို့၌ရှိသမျှ အရာအားလုံးကို လောင်းကြေးထပ်နေကြပြီး ဘုရားသခင်၏ အမှုတော် ပြီးဆုံးသည်အထိ ခံနိုင်ရည်ရှိရန်သာ လိုအပ်သည်ဟု တွေးထင်ကြကာ ဘုရားသခင်က သူ၏အမှုတော် ပြီးဆုံးကြောင်း ကြေညာသည့်အချိန်တွင် ၎င်းတို့ အသက်ရှင်နေသရွေ့ ၎င်းတို့သည် အမြတ်ထွက်ခဲ့ကြမည်ဖြစ်ပြီး မိမိတို့ပေးဆပ်ခဲ့သမျှ အားလုံးကို ပြန်ရရှိခဲ့ကြမည် ဖြစ်သည်။ လူတို့ ဤသို့ တွေးထင်ကြသည် မဟုတ်လော။ (ဟုတ်ပါသည်။) ယခု ဤအကြောင်းကို များစွာ ပြောဆိုပြီးဖြစ်ရာ ဘုရားသခင်၏ အမှုတော်နှင့်ပတ်သက်၍ လူတို့၏ အဓိက အယူအဆများနှင့် စိတ်ကူးများမှာ အဘယ်နည်း။ (လူတို့က ဘုရားသခင်၏ အမှုတော်သည် ထူးဆန်းသောတန်ခိုးများဖြင့် ပြည့်နှက်နေသည်ဟု ယုံကြည်ကြပြီး ဘုရားသခင်သည် လူတို့ကို စကားအနည်းငယ်မျှဖြင့် သန့်စင်ပေးနိုင်ကာ ၎င်းတို့သည် မည်သည့်အဖိုးအခမျှ ပေးဆပ်ရန်မလိုဘဲ သို့မဟုတ် သမ္မာတရားကို လိုက်စားရန်မလိုဘဲ ကောင်းကင်နိုင်ငံတော်သို့ ဝင်ရောက်နိုင်သည်ဟု ယုံကြည်ကြပါသည်။) ဤသည်တို့မှာ လူတို့ ဘုရားသခင်၏ အမှုတော်အပေါ်ထားရှိသော အယူအဆများနှင့် စိတ်ကူးများ ဖြစ်ကြသည်။ အခြားမည်သည့် အယူအဆများနှင့် စိတ်ကူးများ ရှိသေးသနည်း။ (လူတို့သည် ဘုရားသခင်က လူတို့အပေါ် သူ၏အမှုတော်မှတစ်ဆင့် အတိအကျ မည်သည့်ရလဒ်ကို ရရှိရန် အလိုရှိသည်ကို မသိကြဘဲ ဘုရားသခင်၏ အမှုတော် ပြီးဆုံးသည်အထိ ၎င်းတို့ ခံနိုင်ရည်ရှိသရွေ့ ကောင်းကင်နိုင်ငံတော်သို့ ဝင်ရောက်ရန် မျှော်လင့်ချက်ရှိမည်ဟု တွေးထင်ကြပါသည်။) ဤသည်မှာလည်း အယူအဆနှင့် စိတ်ကူးတစ်ခုဖြစ်သည်၊ လူတို့သည် ဘုရားသခင်၏ အမှုတော်ကို ပုံစံတစ်ခုနှင့် လုပ်ငန်းစဉ်တစ်ခုသက်သက်ဟု တွေးထင်ကြသည်။ အခြားမည်သည့်အရာ ရှိသေးသနည်း။ (ဘုရားသခင်ကို ယုံကြည်ခြင်း၌ လူတို့သည် သမ္မာတရားကို လိုက်စားနေကြခြင်း မဟုတ်ဘဲ ၎င်းတို့၏ ယုံကြည်ခြင်း၌ လောင်းကစားသဘောသဘာဝတစ်ခု ရှိနေပါသည်။) ဤသည်မှာ အယူအဆနှင့် စိတ်ကူးတစ်ခုလော။ ဤသည်မှာ လူတို့၏ ဘုရားသခင်ကို ယုံကြည်ခြင်း၏ အနှစ်သာရနှင့် ၎င်းတို့၏ လိုက်စားမှု၏ အနှစ်သာရ ဖြစ်သည်။ ဤအထဲတွင် မည်သည့် အယူအဆများနှင့် စိတ်ကူးများ ရှိနေသနည်း။ လူတို့သည် ဘုရားသခင်နောက်လိုက်စဉ် အရာခပ်သိမ်းကို စွန့်လွှတ်ပြီး တာဝန်တစ်ခုကို ထမ်းဆောင်သရွေ့ မျက်လှည့်ပြလိုက်သကဲ့သို့ ၎င်းတို့သည် ပြောင်းလဲသွားကြမည်ဟု တွေးထင်ကြသည် မဟုတ်လော။ (ဟုတ်ပါသည်။) လူတို့၏ အတွေးများသည် အလွန်အနှစ်မဲ့ပြီး သဘာဝလွန်အရာများနှင့် သက်ဆိုင်ကာ စိတ်ကူးယဉ်ဆန်လှသည်။ လူတို့သည် ပြစ်တင်ဆုံးမခြင်း၊ တရားစီရင်ခြင်း သို့မဟုတ် ပြုပြင်ခြင်းကို လက်ခံရန် မလိုအပ်ကြောင်း၊ သို့မဟုတ် ဘုရားသခင်၏ နှုတ်ကပတ်တော်များ၏ ထောက်ပံ့မှုကို လက်ခံရန် မလိုအပ်ကြောင်း၊ ၎င်းတို့သည် ဤနည်းလမ်းဖြင့် ဘုရားသခင်နောက်သို့ လိုက်ရန်သာ လိုအပ်ပြီး တောင်းဆိုခံရသည့် မည်သည့်တာဝန်ကိုမဆို ထမ်းဆောင်လျက် အဆုံးတိုင်အောင် လိုက်လျှောက်သရွေ့ ၎င်းတို့သည် ပြောင်းလဲသွားကြမည်ဖြစ်ကာ နောက်ဆုံးတွင် ဘုရားသခင်၏ အမှုတော် ပြီးဆုံးသည့်အခါ ကောင်းကင်နိုင်ငံတော်သို့ ဝင်ရောက်ကြမည်ဖြစ်ကြောင်း တွေးထင်ကြသည်။ ဤသည်တို့မှာ လူတို့၏ အယူအဆများနှင့် စိတ်ကူးများ မဟုတ်လော။ (ဟုတ်ပါသည်။)

လူတို့သည် ဘုရားသခင်၏ အမှုတော်အပေါ် အမျိုးမျိုးသော အယူအဆများနှင့် စိတ်ကူးများဖြင့် ပြည့်နေကြသည်။ ငါတို့ ခုနက မိတ်သဟာယဖွဲ့ခဲ့သည့်အရာမှာ ဘုရားသခင်၏ အမှုတော်နှင့်ဆိုင်သော နေ့ရက်များအပေါ် လူတို့၏ အယူအဆများနှင့် သက်ဆိုင်ပေသည်။ ဤအယူအဆများအပြင် အခြားသော အယူအဆနှင့် စိတ်ကူးတစ်မျိုးလည်း ရှိသေးသည်။ ယင်းမှာ လူတို့သည် လက်တွေ့ကျသော အခက်အခဲအချို့ကို ကြုံတွေ့ရသည့်အခါတိုင်း၊ သာမန်အချိန်များတွင် ဘုရားသခင်၏ နှုတ်ကပတ်တော်များကို စားသောက်ရန်၊ သမ္မာတရားဖြင့် မိမိကိုယ်ကို ပြင်ဆင်ရန် သို့မဟုတ် သမ္မာတရား စည်းမျဉ်းများကို ဆုပ်ကိုင်ရန် မလိုအပ်ဘဲ၊ ဘုရားသခင်ထံမှ ဉာဏ်ပွင့်ခြင်းတစ်ခု ရရှိပြီးနောက်တွင် ဖျတ်ခနဲပေါ်လာသော အကြံဉာဏ်ကောင်းတစ်ခု ရရှိရန် မိမိတို့၏ ပုဂ္ဂလဓိဋ္ဌာန်ကျသော ဆန္ဒဖြင့် မကြာခဏ မျှော်လင့်ကြခြင်း ဖြစ်သည်၊ ပြီးလျှင် ၎င်းတို့၏ နေ့စဉ်အသက်တာများတွင် ကြီးသည်ဖြစ်စေ ငယ်သည်ဖြစ်စေ မည်သို့သော ပြဿနာများကို ကြုံတွေ့ရသည်ဖြစ်စေ ဘုရားသခင်က ၎င်းတို့ကို ကူညီဖြေရှင်းပေးနိုင်သည်ဟု မျှော်လင့်ကြခြင်း ဖြစ်သည်။ လူတို့၏ ဘုရားသခင်၏ အမှုတော်အပေါ် နားလည်သဘောပေါက်မှုသည် အလွန်အမင်း မရေရာ၍ စိတ်ကူးယဉ်ဆန်ပြီး အနှစ်သာရမဲ့နေကာ လူကို ကယ်တင်ခြင်းဆိုင်ရာ ဘုရားသခင်၏ နည်းလမ်းများအပေါ်တွင်လည်း အယူအဆများနှင့် စိတ်ကူးများဖြင့် ပြည့်နှက်နေကြသည်။ လူတို့သည် ဘုရားသခင်၏ အမှုတော်တွင် အမျိုးမျိုးသော သမ္မာတရားများကို ရှာဖွေရန်နှင့် ကိစ္စရပ်တိုင်းကို သမ္မာတရား စည်းမျဉ်းများအတိုင်း လက်တွေ့ကျသော နည်းလမ်းဖြင့် ကိုင်တွယ်ဖြေရှင်းရန် မလိုလားကြပေ။ ထိုသို့ပြုမည့်အစား ၎င်းတို့သည် မည်သည့်ပြဿနာမျိုးကိုမဆို ကြုံတွေ့ရသည့်အခါတိုင်းတွင် ၎င်းတို့သည် ဘုရားသခင်ထံ ဆုတောင်းရန်နှင့် သမ္မာတရားကို ရှာဖွေရန် သို့မဟုတ် ဘုရားသခင်၏ နှုတ်ကပတ်တော်များကို စားသောက်ရန် မလိုအပ်ဘဲ၊ ၎င်းတို့သည် မှော်ကမ္ဘာတစ်ခုတွင် အသက်ရှင်နေကြသည့်အလား ဘုရားသခင်သည် ပရောဖက်များကို ဗျာဒိတ်တော်များ ပေးခဲ့သကဲ့သို့ ၎င်းတို့အား အလင်းပေးခြင်းနှင့် ဗျာဒိတ်တော်များ ပေးမည်ဖြစ်ပြီး ထိုသို့ဖြင့် ၎င်းတို့၏ လက်တွေ့အသက်တာများတွင် မည်သည့်အရာကိုပင် ကြုံတွေ့ရသည်ဖြစ်စေ ဉာဏ်ပညာနှင့် စွမ်းရည်ရှိကာ ပြဿနာအမျိုးမျိုးကို ကိုင်တွယ်ဖြေရှင်းရန် နည်းလမ်းများ ရှိလာမည်ဟု မျှော်လင့်ကြသည်။ လူတို့၏ စိတ်ကူးများအရ ၎င်းတို့သည် ဘုရားသခင်ကို စတင်ယုံကြည်သည်နှင့်တစ်ပြိုင်နက် ၎င်းတို့သည် ထက်မြက်ပြီး လိမ္မာပါးနပ်လာမည်ဟု ထင်မှတ်ကြသည်။ အချို့ဆိုလျှင် ဘုရားသခင်ကို စတင်ယုံကြည်သည်နှင့်တစ်ပြိုင်နက် ၎င်းတို့သည် လှပလာမည်ဖြစ်ပြီး ဇာတိပကတိ၏ အခက်အခဲများနှင့် ပြဿနာများ တစ်ခုမျှ ရှိတော့မည်မဟုတ်၊ သို့မဟုတ် ဖောက်ပြန်ပျက်စီးသော စိတ်သဘောထားများ၏ အတားအဆီး သို့မဟုတ် ၎င်းတို့၏ နေ့စဉ်အသက်တာများတွင် မည်သည့်လက်တွေ့ကျသော အခက်အခဲမျှ ရှိတော့မည်မဟုတ်ဟုပင် ထင်မှတ်ကြသည်။ ၎င်းတို့သည် ဘုရားသခင်ကို စိတ်ကျေနပ်စေလိုသော ဆန္ဒရှိနေသရွေ့ ကိုယ်တော်က ၎င်းတို့အား ခွန်အားပေးမည်ဖြစ်ပြီး ၎င်းတို့အတွက် ကောင်းမွန်သာလွန်သော ပတ်ဝန်းကျင်များကို ဖန်တီးပေးကာ ဤအရာအားလုံးကို လက်တွေ့ဖြစ်လာစေပြီး ၎င်းတို့၏ ရည်မှန်းချက်များနှင့် ဆန္ဒများအားလုံးကို အမှန်တကယ် ဖြစ်မြောက်စေမည်ဟု ယုံကြည်ကြသည်၊ အထူးသဖြင့် ၎င်းတို့၏ အစွမ်းအစနှင့် ပင်ကိုသိစိတ်တို့ဖြင့် မစွမ်းဆောင်နိုင်သည့်အရာများကို ကြုံတွေ့ရသည့်အခါတွင် ဘုရားသခင်သည် ၎င်းတို့ လိုလားသည့်အရာများကို လိမ္မာပါးနပ်စွာ သို့မဟုတ် လွယ်ကူစွာ လုပ်ဆောင်နိုင်ရန်အလို့ငှာ သာ၍ပင် ကူညီမစမည်ဟု ယုံကြည်ကြသည်။ အစွမ်းအစ ညံ့ဖျင်းပြီး အတတ်ပညာအမျိုးမျိုးတွင် ကျွမ်းကျင်မှု ကင်းမဲ့သော အချို့လူများလည်း ရှိကြသည်၊ ၎င်းတို့က ဘုရားသခင်သည် အံ့ဖွယ်အမှုတစ်ခု သို့မဟုတ် ထူးဆန်းသောတန်ခိုးတစ်ခုကို ပြုလုပ်လိုက်ရုံမျှဖြင့် ၎င်းတို့၏ အစွမ်းအစသည် ရုတ်တရက် ကောင်းမွန်လာမည်ဖြစ်ပြီး ၎င်းတို့သည် ရုတ်တရက် ထက်မြက်လာမည်ဟု ထင်မှတ်ကြသည်။ ဘုရားသခင်အတွက် စွမ်းဆောင်ရန် ခက်ခဲသောအရာ တစ်ခုမျှမရှိကြောင်း၊ ၎င်းတို့ကိုယ်တိုင် မပြီးမြောက်နိုင်သည့် အရာများကို ဘုရားသခင်က ၎င်းတို့အား ကူညီပြီးမြောက်စေနိုင်ကြောင်းနှင့် ၎င်းတို့ကိုယ်တိုင် မကျော်လွှားနိုင်သည့်အပြင် ၎င်းတို့၏ စွမ်းရည်ထက် ကျော်လွန်သော ခက်ခဲသည့် ပြဿနာများကို ဘုရားသခင်က ၎င်းတို့အား ကူညီဖြေရှင်းပေးနိုင်ကြောင်းကိုလည်း ၎င်းတို့ ယုံကြည်ကြသည်။ အတိုချုပ်ဆိုရလျှင် ဘုရားသခင်၏ အမှုတော်တွင် လူတို့၌ အယူအဆများနှင့် စိတ်ကူးများစွာ ရှိကြသည်။ တစ်ဖက်တွင် ၎င်းတို့သည် ဘုရားသခင်၏ အမှုတော် ကြာမြင့်ချိန်နှင့်ပတ်သက်၍ အမျိုးမျိုးသော စိတ်ကူးများဖြင့် ပြည့်နေကြပြီး ဤကိစ္စနှင့်စပ်လျဉ်း၍ အမျိုးမျိုးသော လုပ်ဆောင်ချက်များကိုလည်း ပြုလုပ်ခဲ့ကြကာ အမျိုးမျိုးသော အဖိုးအခများကိုလည်း ပေးဆပ်ခဲ့ကြသည်။ တစ်ချိန်တည်းမှာပင် လူတို့သည် ၎င်းတို့ကြုံတွေ့ရသော အမျိုးမျိုးသော အခက်အခဲများနှင့် ပြဿနာများအပေါ်၊ ၎င်းတို့၏ ကိုယ်ပိုင် ဖောက်ပြန်ပျက်စီးသော စိတ်သဘောထားများအပေါ်တွင်ပင် အမျိုးမျိုးသော အယူအဆများနှင့် စိတ်ကူးများဖြင့် ပြည့်နှက်နေကြသည်။ ဤအယူအဆများနှင့် စိတ်ကူးအများစုမှာ အနှစ်သာရမဲ့ပြီး စိတ်ကူးယဉ်ဆန်ကာ လက်တွေ့မကျသည့်အပြင် သာ၍ပင် ၎င်းတို့သည် လူတို့၏ အစွမ်းအစနှင့် စိတ်များထက် ကျော်လွန်လျက် ၎င်းတို့၏ ပင်ကိုသိစိတ် အတိုင်းအတာထက် ကျော်လွန်နေကြသည်။ လူတို့က ဘုရားသခင်သည် ၎င်းတို့၏ လက်တွေ့ကျသော အခက်အခဲများအပေါ် အခြေခံ၍ သို့မဟုတ် ၎င်းတို့၏ အစွမ်းအစ၊ စိတ်နှင့် ပင်ကိုသိစိတ်တို့အပေါ် အခြေခံ၍ အမှုမပြုဘဲ၊ ထိုအစား ကိုယ်တော်က ၎င်းတို့အား ဤအရာအားလုံးကို ကျော်လွှားနိုင်စေရန်နှင့် အချို့သောအရာများကို လုပ်ဆောင်ရန် ၎င်းတို့၏ ပုံမှန်လူ့သဘာဝ၊ ၎င်းတို့၏ အစွမ်းအစနှင့် ပင်ကိုသိစိတ်တို့ကို ကျော်လွှားနိုင်စေရန် မကြာခဏ မျှော်လင့်ကြသည်။ လူတို့သည် ဘုရားသခင်၏ အမှုတော်အပေါ် အယူအဆများနှင့် စိတ်ကူးများဖြင့် ပြည့်နေကြပြီး ၎င်းတို့၏ စိတ်ကူးများ၏ အကြောင်းအရာမှာ အလွန်အမင်း သဘာဝလွန်ကျပေသည်။ ဤအယူအဆများနှင့် စိတ်ကူးများသည် ဘုရားသခင် ဖော်ပြသည့် သမ္မာတရားများနှင့် လုံးဝ ဆန့်ကျင်ပြီး ရန်လိုမုန်းတီးကြသည်။ လူတို့သည် မိမိတို့ဘာသာ မစဉ်းစားကြပေ။ ဘုရားသခင်သည် ဤသဘာဝလွန်အရာများကို လုပ်ဆောင်ပါက ကိုယ်တော်သည် အဘယ်ကြောင့် နှုတ်ကပတ်တော်များစွာကို ပြောကြားပြီး သမ္မာတရားများစွာကို လူတို့အား ထောက်ပံ့နေဦးမည်နည်း။ ထိုသို့ပြုလုပ်ရန် ကိုယ်တော်အတွက် လိုအပ်တော့မည် မဟုတ်ပေ။ ဘုရားသခင်၏ အမှုတော်သည် အလွန် လက်တွေ့ကျရခြင်း၏ အကြောင်းရင်းမှာ ဘုရားသခင်သည် သူ၏ နှုတ်ကပတ်တော်များနှင့် သမ္မာတရားများအားလုံးကို လူတို့အား ထောက်ပံ့ပေးရန်နှင့် ၎င်းတို့ကို လူတို့အတွင်း၌ အလုပ်လုပ်ရန် မျှော်လင့်သောကြောင့် ဖြစ်သည်၊ ဤသို့ဖြင့် ၎င်းတို့သည် ဤနှုတ်ကပတ်တော်များနှင့် ဤသမ္မာတရားများအားဖြင့် အသက်ရှင်နေထိုင်နိုင်ကြမည် ဖြစ်သည်။ ကိုယ်တော်၏ ရည်ရွယ်ချက်မှာ လူတို့အား ပုံမှန်လူ့သဘာဝ သို့မဟုတ် ၎င်းတို့၏ ပင်ကိုသိစိတ်တို့ကို ကျော်လွှားနိုင်စေရန် မဟုတ်ဘဲ ပုံမှန်လူ့သဘာဝကို အခြေခံလျက် ၎င်းတို့အား သမ္မာတရား စည်းမျဉ်းများကို စောင့်ထိန်းနိုင်စေရန်နှင့် ကိုယ်တော်က ၎င်းတို့အား ပေးအပ်ထားသည့် တာဝန်များနှင့် တာဝန်ပေးစေခိုင်းချက်များကို စောင့်ထိန်းနိုင်စေရန် ဖြစ်သည်။ သို့သော် လူတို့၏ အယူအဆများနှင့် စိတ်ကူးများသည် ဘုရားသခင်၏ အမှုတော်နှင့် လုံးဝ ဆန့်ကျင်ဘက်ဖြစ်ပြီး ဘုရားသခင် အမှုပြုသည့် နည်းလမ်းနှင့် လုံးဝ မကိုက်ညီပေ။ ဘုရားသခင်သည် လက်တွေ့ကျသော နည်းလမ်းဖြင့် အမှုပြုလိုသော်လည်း ဘုရားသခင်၏ အမှုတော်အပေါ် လူတို့၏ စိတ်ကူးများသည် သဘာဝလွန်အရာများ၊ အနှစ်သာရမဲ့သော အရာများ၊ လက်တွေ့မကျသောအရာများနှင့် သက်ဆိုင်နေသည်။ အချို့လူများသည် ဘုရားသခင်က ၎င်းတို့အား ဗျာဒိတ်တော်များ ပေးရန်၊ ၎င်းတို့အား ထောက်ပံ့ရန်၊ ထောက်မကူညီရန်၊ ၎င်းတို့ကို ပြောင်းလဲရန်နှင့် ကယ်တင်ခြင်းခံရစေရန်အတွက် သာ၍ပင် ထူးခြားသော နည်းလမ်းအချို့ကို အသုံးပြုမည်ဟု မျှော်လင့်ကြသည်မှာ ပြောစရာမလိုပေ။ ဥပမာအားဖြင့် အချို့လူများသည် ပြဿနာတစ်ခုကို ကြုံတွေ့ရသည့်အခါတိုင်း ဘုရားသခင်၏ နှုတ်ကပတ်တော်များထဲတွင် အဖြေများ သို့မဟုတ် လက်တွေ့လုပ်ဆောင်ခြင်း လမ်းကြောင်းများကို မကြာခဏ မရှာဖွေကြဘဲ၊ ထိုအစား ဒူးထောက်၊ မျက်စိမှိတ်ကာ ဆုတောင်းကြသည်။ ၎င်းတို့ ဆုတောင်းသည့်အခါ ပြဿနာနှင့်ပတ်သက်၍ သမ္မာတရားကို မရှာဖွေကြဘဲ ထို့နောက် ယင်းကို ဖြေရှင်းရန် သက်ဆိုင်ရာ ဘုရားသခင်၏ နှုတ်ကပတ်တော်များကိုလည်း မရှာဖွေကြပေ။ ထိုအစား ဘုရားသခင်က ၎င်းတို့၏ စိတ်နှလုံးထဲတွင် မည်သို့လုပ်ဆောင်ရမည်ကို ပြောပြနိုင်မည်ဟု မျှော်လင့်ကြသည်၊ သို့မဟုတ် ဝါကျတစ်ကြောင်း၊ စိတ်ကူးတစ်ခု သို့မဟုတ် ပုံရိပ်တစ်ခုဖြင့် ၎င်းတို့အား ဉာဏ်ပွင့်စေမည်ဟု မျှော်လင့်ကြသည်၊ သို့မဟုတ် အလင်းတချို့ကို ရရှိစေပြီး လှုံ့ဆော်မှုတချို့ကို ပေးမည်ဟု မျှော်လင့်ကြသည်၊ ၎င်းတို့သည် ဤနည်းလမ်းဖြင့် သမ္မာတရားကို နားလည်ရန် လိုလားကြသည်။ အချို့လူများမှာမူ သာ၍ အစွန်းရောက်သော လုပ်နည်းကိုင်နည်းကို ကျင့်သုံးကြသည်မှာ ပြောစရာမလိုပေ၊ ယင်းမှာ ၎င်းတို့သည် ပြဿနာတစ်ခုကို ကြုံတွေ့ရသည့်အခါတိုင်း ဘုရားသခင်က ၎င်းတို့အား အိပ်မက်ထဲတွင် သူ၏ နှုတ်ကပတ်တော်တစ်ပိုဒ်ကို ထုတ်ဖော်ပြသကာ ဤမည်သော အမှုကို လုပ်ဆောင်သင့်ခြင်း ရှိမရှိနှင့် မည်သို့လုပ်ဆောင်ရမည်ကို ပြောပြမည်ဟုဖြစ်စေ၊ ဤမည်သော နေရာသို့ သွားသင့် မသင့်ကို ပြောပြမည်ဟုဖြစ်စေ၊ မည်သူမည်ဝါအား ဧဝံဂေလိတရာဟောသင့်ခြင်း ရှိမရှိကို ပြောပြမည်ဟုဖြစ်စေ မျှော်လင့်ကြခြင်း ဖြစ်သည်။ အချို့လူများသည် ကြီးမားသော အခက်အခဲများနှင့် ရင်ဆိုင်ရသည့်အခါ အိပ်မက်တစ်ခု ရရှိရန် သို့မဟုတ် အိပ်မက်ထဲတွင် အဖြေရရှိရန် မျှော်လင့်ကြပြီး “ဘုရားသခင်က ကျွန်ုပ်ကို ပေးခဲ့သည့် ဤအိပ်မက်၏ အဓိပ္ပာယ်က အဘယ်နည်း။ ကိုယ်တော်က ကျွန်ုပ်ကို မည်သည့်အရာ လုပ်စေချင်သနည်း။ ကိုယ်တော်က ကျွန်ုပ်ကို သွားခိုင်းသလား၊ မသွားခိုင်းဘူးလား” ဟု တွေးတောလျက် ၎င်းတို့၏ ညီအစ်ကိုမောင်နှမများ သို့မဟုတ် အသင်းတော်ခေါင်းဆောင်များနှင့်အတူ ၎င်းတို့၏ အိပ်မက်ကို ပိုင်းခြားစိတ်ဖြာပြီး အဓိပ္ပာယ်ဖွင့်ဆိုရန်ပင် မျှော်လင့်ကြသည်။ ၎င်းတို့သည် ဘုရားသခင်၏ အမှုမှာ ဤထူးခြားသော နည်းလမ်းများကို အသုံးပြု၍ လူတို့အား ဗျာဒိတ်တော်များ ပေးခြင်း၊ လူတို့ကို ဦးဆောင်ခြင်းနှင့် လူတို့အား ထောက်ပံ့ပေးခြင်းဖြစ်ပြီး ဤသို့ဖြင့် ၎င်းတို့အား ကယ်တင်ခြင်းခံရစေရန် ဖြစ်သည်ဟု ယုံကြည်ကြသည်။ ဤသည်မှာ အယူအဆနှင့် စိတ်ကူးတစ်ခု မဟုတ်လော။ (ဟုတ်ပါသည်၊ ဖြစ်ပါသည်။) ၎င်းတို့ထံ ပြဿနာတစ်ခု ကျရောက်လာသည့်အခါ၊ မည်သို့လုပ်ဆောင်ရမည်ကို မသိဘဲ ဆုတောင်းရာတွင် ဘုရားသခင်ထံမှ အဖြေများ မရရှိသည့်အခါ ဒင်္ဂါးပြားလှန်၍ ဆုံးဖြတ်ချက်များချခြင်းကို အသုံးပြုကြသည့် အခြားသောလူများ ရှိကြသည်။ ဥပမာအားဖြင့် ဧဝံဂေလိတရားဟောရန် တစ်နေရာရာသို့ သွားခြင်းနှင့်ပတ်သက်လာသည့်အခါ ၎င်းတို့သည် သွားသင့် မသင့်ကို ဘုရားသခင်ထံ ဆုတောင်းပြီး အဖြေမရရှိသည့်အခါ ၎င်းတို့ မည်သည့်အရာကို လုပ်သနည်း။ ၎င်းတို့သည် သွားသင့် မသင့်ကို ဆုံးဖြတ်ရန် ဒင်္ဂါးပြားလှန်လိုက်ရုံသာ ဖြစ်သည်။ ခေါင်းဘက်ကျလျှင် ဘုရားသခင်က ၎င်းတို့ကို သွားစေလိုကြောင်း သက်သေပြသည်ဟု ၎င်းတို့ ထင်မှတ်ကြပြီး ပန်းဘက်ကျလျှင်မူ ဘုရားသခင်က ၎င်းတို့ကို မသွားစေလိုကြောင်း သက်သေပြသည်ဟု ထင်မှတ်ကြသည်။ ၎င်းတို့သည် ဒင်္ဂါးပြားကို သုံးကြိမ် ပစ်လှန်ရာ တစ်ကြိမ် ခေါင်းကျပြီး နှစ်ကြိမ် ပန်းကျသဖြင့် ၎င်းတို့က “နှစ်ကြိမ်နှင့် တစ်ကြိမ်ဖြစ်သဖြင့်၊ ထို့ကြောင့် ဘုရားသခင်က ကျွန်ုပ်တို့ကို မသွားစေလိုဟု ဆိုလိုသည်” ဟု ကောက်ချက်ချကာ မသွားကြတော့ပေ။ ၎င်းတို့သည် မသွားရသည့်အတွက် စိတ်သက်သာရာရလျက် ယင်းမှာ ဘုရားသခင်၏ ဆန္ဒဖြစ်သည်ဟု ထင်မှတ်ကာ မိမိတို့ကိုယ်ကို “ကျွန်ုပ်သည် ဘုရားသခင်၏ လမ်းညွှန်မှုကို လိုက်နာရမည်။ ဤသည်မှာ ဘုရားသခင်၏ ဆုံးဖြတ်ချက်ဖြစ်သည်၊ ကျွန်ုပ်၏ ဆုံးဖြတ်ချက် မဟုတ်ပေ။ ကျွန်ုပ်သည် ဘုရားသခင်၏ လမ်းညွှန်မှုကို ကျိုးနွံနာခံပြီး မသွားသင့်ပေ” ဟု ပြောဆိုကြသည်။ သို့ဆိုလျှင် ၎င်းတို့သည် အမှန်တကယ် သွားသင့်သလော၊ မသွားသင့်သလော။ ဤနည်းလမ်းဖြင့် ဘုရားသခင်၏ ရည်ရွယ်ချက်များကို ရှာဖွေခြင်းသည် တိကျသော အဖြေတစ်ခုကို ရနိုင်သလော။ အဖြေမှာ လုံးဝ တိကျနိုင်မည် မဟုတ်ပေ။ ထိုသို့သော အခြေအနေနှင့် ရင်ဆိုင်ရသည့်အခါ သင်သည် စည်းမျဉ်းများကို အခြေခံ၍လည်းကောင်း၊ အခါအခွင့်သင့်ခြင်း ရှိမရှိကို အခြေခံ၍လည်းကောင်း ဆုံးဖြတ်ချက်ချသင့်သည်၊ ဤနည်းလမ်းသာလျှင် မှန်ကန်ပေသည်။ ဧဝံဂေလိတရားဟောခြင်းသည် သင်၏ တာဝန်၊ သင်၏ အလုပ်ဖြစ်ပြီး သင် ယနေ့ လုပ်ဆောင်သင့်သည့် အမှုဖြစ်သည်၊ ထို့ကြောင့် သင် သွားသင့်သည်၊ သင် သွားခြင်းသာလျှင် မှန်ကန်ပေသည်။ သို့သော် လူတို့သည် ထိုသို့သော ကိစ္စရပ်များကို ဤလက်တွေ့အရှိတရားများအပေါ် အခြေခံ၍ မကြာခဏ သဘောပေါက်နားလည်ခြင်း သို့မဟုတ် ကိုင်တွယ်ခြင်း မရှိကြပေ။ ၎င်းတို့သည် အချို့သော အယူအဆများနှင့် စိတ်ကူးများကို အခြေခံ၍ ထိုအရာများကို ချဉ်းကပ်လေ့ရှိပြီး အချို့သော ထူးခြားသည့် နည်းလမ်းများနှင့် နည်းစနစ်များကို အသုံးပြု၍ ၎င်းတို့ကို ဆုံးဖြတ်ကာ အဆုံးတွင် အဓိပ္ပာယ်မဲ့ပြီး လွဲချော်သော ဆုံးဖြတ်ချက်အချို့ကို ချမှတ်ကြသည်။ ဤသည်မှာ ၎င်းတို့၏ အယူအဆများနှင့် စိတ်ကူးများကြောင့် ဖြစ်ပေါ်လာခြင်း မဟုတ်လော။ (ဟုတ်ပါသည်။) ဘုရားသခင်၏ အမှုတော်အတွင်း၌ ဘုရားသခင်သည် အမှုအရာတစ်ခုစီကို မည်သို့လုပ်ဆောင်သင့်သည် သို့မဟုတ် ပြဿနာအမျိုးအစားတစ်ခုစီကို ကိုင်တွယ်ရာတွင် မည်သည့်စည်းမျဉ်းများကို လိုက်နာသင့်သည်ကို လူတို့အား ပြောပြသည့် ရှင်းလင်းသော နှုတ်ကပတ်တော်များကို မပေးသည့်အခါ လူတို့သည် သန့်ရှင်းသောဝိညာဉ်တော်၏ လမ်းညွှန်မှုကို လိုက်နာရန်နှင့် လက်တွေ့ ပတ်ဝန်းကျင်များအတွင်း ဘုရားသခင်က ၎င်းတို့အား ပေးသည့် လမ်းပြမှုကို လိုက်နာရန် လိုအပ်သည်။ ၎င်းတို့သည် ညီအစ်ကိုမောင်နှမများနှင့်အတူ စုပေါင်းဆွေးနွေးဖို့ သို့မဟုတ် ဆုတောင်းပြီး ရှာဖွေရန်နှင့် အဆုံးတွင် လက်ရှိကိစ္စကို မည်သို့ကိုင်တွယ်ရမည်ကို လက်တွေ့အခြေအနေအပေါ် အခြေခံ၍ ဆုံးဖြတ်ရန် လိုအပ်သည်မှာ ပြောစရာမလိုပေ။ သို့သော် ဘုရားသခင်၏ အမှုတော်တွင် ဘုရားသခင်၌ အမျိုးမျိုးသော ကိစ္စရပ်များအတွက် လက်တွေ့လုပ်ဆောင်ခြင်း စည်းမျဉ်းများကို လူတို့အား ပြောပြသည့် ရှင်းလင်းသော နှုတ်ကပတ်တော်များနှင့် ရှင်းလင်းသော ညွှန်ကြားချက်များ ရှိသည့်အခါ ယခင်က ကျင့်သုံးခဲ့သော လုပ်ရိုးလုပ်စဉ် ကျင့်ထုံးများကို ဖယ်ရှားနိုင်ပြီး လူတို့သည် ၎င်းတို့ကို လိုက်နာရန် မလိုအပ်တော့ပေ။ ၎င်းတို့သည် ယင်းတို့ကို ဆက်လက်လိုက်နာနေပါက အမှုအရာများကို နှောင့်နှေးစေရုံသာ ဖြစ်မည်။ ဥပမာအားဖြင့် တစ်စုံတစ်ခု ပေါ်ပေါက်လာပြီး သွား၍ လုပ်ဆောင်ရန် လိုအပ်သည့်အခါတိုင်း လူတို့သည် ဒူးထောက်၍ “ဘုရားသခင်၊ ကျွန်ုပ် သွားသင့်ပါသလော၊ မသွားသင့်ပါသလော။ ကိုယ်တော်က ကျွန်ုပ်ကို မသွားစေလိုပါက ကျွန်ုပ်ကို တားဆီးရန် ပတ်ဝန်းကျင်တစ်ခုခုကို ဖန်တီးပေးပါ၊ သို့မဟုတ် ကိုယ်တော်က ကျွန်ုပ်ကို သွားစေလိုပါက၊ ကျွန်ုပ်အတွက် အရာအားလုံးကို ချောမွေ့စေပါ” ဟု ဆုတောင်းနေဆဲဟု ဆိုကြပါစို့။ ဤသည်မှာ လုပ်ရိုးလုပ်စဉ် ကျင့်ထုံးများကို တစ်သဝေမတိမ်း လိုက်နာခြင်းဖြစ်ပြီး လူတို့အပေါ် ဘုရားသခင်၏ တောင်းဆိုချက် မဟုတ်ပေ။ ဘုရားသခင်၌ သူ၏ တောင်းဆိုချက်များ၊ စံသတ်မှတ်ချက်များနှင့် ပတ်သက်၍ ရှင်းလင်းသော နှုတ်ကပတ်တော်များ ရှိသည့်အခါ လူတို့သည် ရှာဖွေခြင်း၊ ဆုတောင်းခြင်း၊ စူးစမ်းခြင်း စသည်တို့ကဲ့သို့သော မည်သည့် လုပ်ရိုးလုပ်စဉ် ကျင့်ထုံးများကိုမျှ လုပ်ဆောင်ရန် မလိုအပ်တော့ပေ။ ထိုအစား တစ်ဖက်တွင် ၎င်းတို့သည် လက်တွေ့အခြေအနေနှင့် လက်တွေ့ ပတ်ဝန်းကျင်များအတိုင်း လုပ်ဆောင်သင့်ပြီး အခြားတစ်ဖက်တွင်မူ အဓိကအားဖြင့် ၎င်းတို့သည် သမ္မာတရား စည်းမျဉ်းများအတိုင်း လုပ်ဆောင်သင့်သည်၊ ဤသည်မှာ မှန်ကန်ပေသည်။ နေ့စဉ်နေ့တိုင်း၊ အမှုအရာများကို သင့်လျော်သော အစီအစဉ်အတိုင်း ကိုင်တွယ်လော့၊ သင် လုပ်ဆောင်သင့်သည့် မည်သည့်အရာကိုမဆို လုပ်ဆောင်လော့၊ သင် မလုပ်ဆောင်သင့်သည့်အရာများကို မလုပ်ဆောင်နှင့်၊ အရေးတကြီးဖြစ်ပြီး ကိုင်တွယ်ရန် လိုအပ်သည့် မည်သည့်အရာကိုမဆို ကိုင်တွယ်လော့၊ လောလောဆယ် ဘေးဖယ်ထားနိုင်သည့် မည်သည့်အရာကိုမဆို ဆိုင်းငံ့ထားပြီး အရေးကြီးသော ကိစ္စရပ်များကို ဦးစွာ ဂရုပြုဆောင်ရွက်လော့။ ဤသည်တို့မှာ စည်းမျဉ်းများ မဟုတ်လော။ (ဟုတ်ပါသည်။) ၎င်းတို့သည် အမှန်ပင် စည်းမျဉ်းများ ဖြစ်ကြသည်။ သင် ဤအရာကို မှတ်သားထားရမည်။ သင် ဘုရားသခင်ထံ ဆုတောင်းပြီး သူ၏ ရည်ရွယ်ချက်များကို သဘောပေါက်ရန် ရှာဖွေသည့်အခါ သင်သည် သူ၏ နှုတ်ကပတ်တော်များကို အခြေခံ၍ ထိုသို့ပြုလုပ်ရမည်၊ ထူးခြားသော အခြေအနေများတွင် ဆိုလိုသည်မှာ ညွှန်ကြားချက်ပေးသည့် ဘုရားသခင်ထံမှ ရှင်းလင်းသော နှုတ်ကပတ်တော်များ မရှိသည့်အခါ ကိုယ်တော်၌ ကိစ္စရပ်အမျိုးအစားအားလုံးအတွက် ရှင်းလင်းသော နှုတ်ကပတ်တော်များနှင့် လက်တွေ့လုပ်ဆောင်ခြင်း စည်းမျဉ်းများ ရှိကြောင်းကို မည်သို့ပင်ဖြစ်စေ သင် သိသင့်သည်၊ ထိုသို့သော အခြေအနေများတွင်၊ သင်သည် ဘုရားသခင်က လူတို့အား ယခင်က သတိပေးဆုံးမခဲ့သည့် အမျိုးမျိုးသော သမ္မာတရား စည်းမျဉ်းများနှင့်အညီ လုပ်ဆောင်သင့်သည်။ သို့သော် ၎င်းတို့၏ စိတ်ထဲတွင် လူတို့သည် ဘုရားသခင်၏ အမှုတော်အပေါ် ရယ်ဖွယ်ကောင်းသော၊ ထူးဆန်းသော၊ သဘာဝလွန်အရာများနှင့် သက်ဆိုင်သော အယူအဆများနှင့် စိတ်ကူးများစွာကို ဖြစ်ပေါ်စေခဲ့ကြသည်၊ ယင်းတို့က ဘုရားသခင်၏ နှုတ်ကပတ်တော်များနှင့် အမျိုးမျိုးသော သမ္မာတရား စည်းမျဉ်းများကို စကားအလှများနှင့် အနှစ်သာရမဲ့သော အယူဝါဒများအဖြစ်သို့ ပြောင်းလဲစေပြီး ပြဿနာများ ၎င်းတို့ထံ ကျရောက်လာသည့်အခါ ၎င်းတို့သည် လူတို့၏ အမှုအရာများကို ကိုင်တွယ်ခြင်းအတွက် စံသတ်မှတ်ချက်များ သို့မဟုတ် လက်တွေ့လုပ်ဆောင်ခြင်း လမ်းကြောင်းများ မဖြစ်နိုင်အောင် ပြုလုပ်ကြသည်။ ဤသည်မှာ ဝမ်းနည်းဖွယ်ရာ အမှုအရာတစ်ခုဖြစ်ပြီး ယင်းမှာ လူတို့သည် ဘုရားသခင်၏ အမှုတော်အပေါ် အလွန်များပြားသော အယူအဆများနှင့် စိတ်ကူးများကို ဖြစ်ပေါ်စေခဲ့သည်ဟူသောအချက်ကြောင့် လုံးလုံးလျားလျား ဖြစ်ပေါ်လာခြင်း ဖြစ်သည်။

လူတို့သည် ၎င်းတို့၏ နေ့စဉ်အသက်တာများတွင် ပျံ့နှံ့နေသော ဘုရားသခင်၏ အမှုတော်အပေါ် အခြားသော ရယ်ဖွယ်ကောင်းသော၊ ထူးဆန်းသော၊ ထူးထွေသော အယူအဆများနှင့် စိတ်ကူးများလည်း ရှိကြသေးသည်။ ဥပမာအားဖြင့် တစ်စုံတစ်ဦးသည် ၎င်းတို့ အလုပ်သင့်ဆုံးသော အလုပ်တစ်ခုကို လုပ်ဆောင်တော့မည် ပြုသည့်အခါ ၎င်းတို့က မဖြစ်သင့်ဟု ထင်မှတ်သည့် အရာတစ်ခု ဖြစ်ပျက်လာသည်ဟု ဆိုကြပါစို့၊ ဥပမာအားဖြင့် အလုပ်သွားလုပ်သည့် လမ်းတွင် ၎င်းတို့၏ လက်ကိုင်ဖုန်း အခိုးခံရခြင်း၊ သို့မဟုတ် လမ်းတွင် ၎င်းတို့၏ ကားပျက်ခြင်း သို့မဟုတ် ခြေချော်လဲကျခြင်း၊ သို့မဟုတ် အခြားတစ်ခုခု မှားယွင်းသွားခြင်းတို့ ဖြစ်သည်။ ဤသည်မှာ အဘယ်အရာကို ဆိုလိုသနည်း။ ဤအလုပ်ကို လုပ်ဆောင်ခြင်းမှ ဘုရားသခင်က ၎င်းတို့ကို တားဆီးနေသည်ဟု ဆိုလိုသလော။ ဤအလုပ်ကို လုပ်ဆောင်ခြင်းသည် ဘုရားသခင်၏ ရည်ရွယ်ချက်များနှင့် မကိုက်ညီဟု ဆိုလိုသလော။ ဤအလုပ်ကို မလုပ်ဆောင်သင့်ဟု ဆိုလိုသလော။ ဤနည်းလမ်းဖြင့် သိမြင်ပြီး သဘောပေါက်နားလည်သင့်သလော။ (မသင့်ပေ။) ဤသည်မှာ သင်၏ တာဝန်ကို ထမ်းဆောင်ရာတွင် ယခု လက်ရှိ သင် လုပ်ဆောင်သင့်သည့် အရေးကြီးဆုံးအရာဖြစ်ပြီး သင် သွား၍ လုပ်ဆောင်ပါက လမ်းတစ်လျှောက်တွင် အတားအဆီးများနှင့် အခက်အခဲအချို့ကို ကြုံတွေ့ရလျှင်ပင်၊ သို့မဟုတ် လူတို့က မဖြစ်သင့်ဟု ထင်မှတ်သည့်အရာများကိုပင် ကြုံတွေ့ရလျှင်ပင် သင် ထမ်းဆောင်နေသည့် ဤတာဝန်နှင့် သင် လုပ်ဆောင်နေသည့် ဤအလုပ်သည် ဘုရားသခင်ကို စိတ်မကျေနပ်စေဟုဖြစ်စေ၊ ဘုရားသခင်က သင့်အား ဤအရာများကို လုပ်ဆောင်ခြင်းမှ တားဆီးနေသည်ဟုဖြစ်စေ မပြောဆိုနိုင်ပေ၊ ယင်းမှာ လူသား၏ အယူအဆနှင့် စိတ်ကူးတစ်ခုသာ ဖြစ်သည်။ ဘုရားသခင်က သင့်ကို တားဆီးလိုပါက ကိုယ်တော်သည် ထိုနည်းလမ်းများကို အသုံးပြုမည်မဟုတ်ပေ။ ကိုယ်တော်သည် ပတ်ဝန်းကျင်တစ်ခုကို တိုက်ရိုက် စီစဉ်ညွှန်ကြားမည်ဖြစ်ပြီး သို့မှသာ သင်သည် ထိုအလုပ်ကို သွား၍ လုပ်ဆောင်ရန် သဘာဝကျကျ မလိုအပ်တော့မည် ဖြစ်သည်။ ဆိုလိုသည်မှာ ဘုရားသခင်သည် သင် ယနေ့ လုပ်ဆောင်သင့်သည့် ပို၍ အရေးကြီးသော အရာတစ်ခုရှိကြောင်းကို သင်၏ စိတ်ထဲတွင် အလွန်ရှင်းလင်းစေမည်ဖြစ်ပြီး အကျိုးဆက်အားဖြင့် ထိုအလုပ်ကို သင်၏ စာရင်းတွင် ဒုတိယ သို့မဟုတ် တတိယနေရာသို့ တွန်းပို့ထားရမည်ဖြစ်ကာ နောက်မှ လုပ်ဆောင်ရန် ချန်ထားရမည် ဖြစ်သည်။ သင် သင်၏ တွက်ချက်မှုများကို မည်သို့ပင် ပြုလုပ်စေကာမူ အမှန်တကယ်ဖြစ်သော အခြေအနေအရ ထိုအလုပ်ကို ယနေ့ ပြီးမြောက်အောင်မြင်ရန် မဖြစ်နိုင်ကြောင်းကို သင် တွေ့ရှိလိမ့်မည်။ ဤသည်မှာ ဘုရားသခင်က သင့်ကို တားဆီးခြင်း ဖြစ်သည်။ သို့သော် သင် မည်သို့ပင် တွေးထင်သည်ဖြစ်စေ၊ ထိုအလုပ်ကို လုပ်ဆောင်သည့် ဖြစ်စဉ်တွင် မည်သို့သော အဆင်မပြေမှုများ သို့မဟုတ် အခက်အခဲများ ပေါ်ပေါက်လာသည်ဖြစ်စေ၊ မည်သို့ပင်ဖြစ်စေ ထိုအလုပ်ကို ယနေ့ လုပ်ဆောင်သင့်ပါက သင် သွား၍ လုပ်ဆောင်သင့်သည်။ ဘုရားသခင်က သင့်ကို တားဆီးပါက ကိုယ်တော်သည် သင့်အား ထိုအလုပ်ကို သဘာဝကျကျ စွန့်လွှတ်စေရန် အသင့်တော်ဆုံးနှင့် အကိုက်ညီဆုံးသော နည်းလမ်းကို အသုံးပြုမည်ဖြစ်သည်၊ ဤသည်မှာ ဘုရားသခင် အမှုပြုသည့် နည်းလမ်း ဖြစ်သည်။ ဘုရားသခင် အမှုပြုသည့် နည်းလမ်းမှာ လူ့သဘာဝ၏ ပင်ကိုသိစိတ် အတိုင်းအတာအတွင်း လူတို့ လုပ်ဆောင်သင့်သည့်အရာကို လုပ်ဆောင်ခွင့်ပြုခြင်း ဖြစ်သည်။ တစ်ဖက်တွင် ဤသည်မှာ လူတို့ ရှိသင့်သည့် သဘောထား ဖြစ်သည်။ အခြားတစ်ဖက်တွင် ဓမ္မဓိဋ္ဌာန်ကျသော ပတ်ဝန်းကျင် အခြေအနေများ ဟူသော အချက်လည်း ရှိသည်၊ အလုပ်ကို လုပ်ဆောင်ရန် အခါအခွင့်သင့်ပါက ယင်းကို လုပ်ဆောင်သင့်သည်၊ အခါအခွင့်မသင့်ပါက လူတို့သည် ယင်းကို လုပ်ဆောင်ရန် ခဏစောင့်ဆိုင်းသင့်သည်။ စောင့်ဆိုင်းရခြင်း၏ ရည်ရွယ်ချက်မှာ အဘယ်နည်း။ ယင်းမှာ ဘုရားသခင် စီစဉ်ပေးသည့် သင့်တော်သော အချိန်နှင့် ပတ်ဝန်းကျင်ကို စောင့်ဆိုင်းခြင်း ဖြစ်သည်။ ပတ်ဝန်းကျင် အခြေအနေများသည် အစဉ်မသင့်တော်ဘဲ ဤအလုပ်ကို သင် လုပ်ဆောင်ရန် ကြိုးစားနေစဉ်တွင် အမှုအရာများ ဆက်လက်မှားယွင်းနေပါက သင်သည် ယင်းကို မလုပ်ဆောင်သင့်ပေ။ သင် နားလည်ပြီလော။ (နားလည်ပါပြီ။) လူတို့၏ နေ့စဉ်အသက်တာများတွင် ၎င်းတို့သည် မည်သို့သောအလုပ်အမျိုးအစားများဖြစ်စေ၊ ကြီးသည်ဖြစ်စေ ငယ်သည်ဖြစ်စေ၊ သို့မဟုတ် ပုဂ္ဂိုလ်ရေးဆိုင်ရာ ကိစ္စရပ်များဖြစ်စေ၊ အသင်းတော်ဆိုင်ရာ ကိစ္စရပ်များဖြစ်စေ အလုပ်များကို လုပ်ဆောင်သည့်အခါ ၎င်းတို့၏ ဝိညာဉ်ထဲတွင် ခံစားနေရသည့်အရာကို သဘောပေါက်ဖို့ ကြိုးစားရန် မလိုအပ်ပေ။ သင်သည် ယနေ့ ဝိညာဉ်ရေးရာ၌ နိမ့်ကျသည်ဟု ခံစားရပြီး သင်၏ စိတ်နှလုံးထဲတွင် အလုပ်တစ်ခုကို မလုပ်ဆောင်လိုပါက သင်နှင့်အတူ ထိုအလုပ်ကို လုပ်ဆောင်မည့် အခြားသူများကို ၎င်းတို့ ဝိညာဉ်ရေးရာ၌ နိမ့်ကျသည်ဟု ခံစားရခြင်း ရှိမရှိ မေးမြန်းလော့။ အခြားသူများက ဝိညာဉ်ရေးရာ၌ နိမ့်ကျသည်ဟု မခံစားရဘဲ ၎င်းတို့၏ စိတ်နှလုံးထဲတွင် ထိုအလုပ်ကို လုပ်ဆောင်လိုစိတ်ရှိသည့်တိုင် သင်သည် သင်၏ ကိုယ်ပိုင်ခံစားချက်များကို အခြေခံ၍ ယင်းကို မလုပ်ဆောင်သင့်ဟု ကောက်ချက်ချပါက သင်သည် ယင်းနှင့်ပတ်သက်၍ အနည်းငယ် ပုဂ္ဂလဓိဋ္ဌာန်ကျလွန်းနေသည် မဟုတ်လော။ (ဟုတ်ပါသည်။) သို့ဖြစ်၍ လူတို့သည် အလုပ်တစ်ခုကို လုပ်ဆောင်သည့်အခါတိုင်း မိမိတို့၏ ခံစားချက်များကို သဘောပေါက်ရန် မကြိုးစားသင့်ကြောင်း သို့မဟုတ် မိမိတို့၏ ခံစားချက်များကို အခြေခံ၍ မပြုမူသင့်ကြောင်းကို အနည်းဆုံး နားလည်ရမည်။ ဥပမာအားဖြင့် သင်သည် အလုပ်တစ်ခုခုကို လုပ်ဆောင်ရမည်ဖြစ်ပြီး အနည်းငယ် စိတ်လှုပ်ရှားနေသည်၊ သင်၏ မျက်ခမ်းသည် အဆက်မပြတ် လှုပ်နေပြီး သင်၏ နားများလည်း အူနေသည်၊ သင်က “ငါ၏ ညာဘက် မျက်ခမ်းက လှုပ်နေသည်၊ ဤသည်မှာ မကောင်းသည့် သတင်းတစ်ခုခုကို ဆိုလိုသလော၊ ဤအလုပ်ကို ငါလုပ်ဆောင်သင့်သလော” ဟု ပြောဆိုသည်ဟု ဆိုကြပါစို့။ ထိုအခါ တစ်စုံတစ်ဦးက “ဘယ်ဘက် မျက်ခမ်းလှုပ်ခြင်းက ကံကောင်းခြင်း နိမိတ်ဖြစ်သော်လည်း ညာဘက်မျက်ခမ်းလှုပ်ခြင်းက ကံဆိုးခြင်း နိမိတ်ဖြစ်သည်။” ဟု ပြောဆိုရာ ဤသည်ကို ကြားပြီးနောက် သင်သည် ထိုအလုပ်ကို သွား၍ လုပ်ဆောင်ရန် မရဲတော့ပေ။ သင်၏ မျက်လုံး မည်သည့်ဘက်က လှုပ်သည်ဖြစ်စေ၊ အကယ်၍ ဤသည်မှာ ယခင်က သဘောတူညီထားသည့် အလုပ်တစ်ခုဖြစ်ပြီး ဤအလုပ်ကို လုပ်ဆောင်ရန် လိုအပ်သော အကြောင်းအချက်အားလုံးသည် အသင့်ရှိနေကာ အချိန်နှင့် နေရာသည်လည်း မှန်ကန်ပါက သင်သည် သွား၍ လုပ်ဆောင်ရမည်သာ ဖြစ်သည်။ သင်သည် တစ်စုံတစ်ဦးက သင်၏ ညာဘက်မျက်ခမ်းလှုပ်ခြင်းသည် ကံဆိုးခြင်းနိမိတ် ဖြစ်သည်ဟု ပြောဆိုရုံမျှဖြင့် မသွားရန် ဆုံးဖြတ်ပါက ယင်းမှာ သင့်လျော်သလော။ (မသင့်လျော်ပါ။) အဘယ်ကြောင့် မသင့်လျော်သနည်း။ ၎င်းသည် သင်၏ တာဝန်ဝတ္တရားဖြစ်ပြီး ယနေ့ ဓမ္မဓိဋ္ဌာန်ကျသော ပတ်ဝန်းကျင် အခြေအနေများနှင့် အခြေအနေအားလုံးက ယင်းကို လုပ်ဆောင်ရန် ခွင့်ပြုပါက၊ ထို့အပြင် အလုပ်ကို အရေးတကြီး လုပ်ဆောင်ရန် လိုအပ်ပါက သင်သည် သွား၍ လုပ်ဆောင်သင့်သည်။ သင်၏ ညာဘက်မျက်ခမ်းလှုပ်လျှင်ကော ဘာဖြစ်နိုင်မည်နည်။ ယင်းမှာ အသေးအဖွဲ ပြဿနာအချို့ ပေါ်ပေါက်လာပြီး အမှုအရာများ အလွန်ချောမွေ့ခြင်း မရှိနိုင်သော်လည်း အလုပ်မှာမူ မည်သို့ပင်ဖြစ်စေ ပြီးမြောက်သွားသည်။ ဘုရားသခင်က ယင်းကို တားဆီးပြီး ပတ်ဝန်းကျင် အခြေအနေများက ခွင့်မပြုမှသာလျှင် သင်သည် ထိုအလုပ်ကို သွား၍ မလုပ်ဆောင်ဘဲ နေနိုင်သည်။ တစ်စုံတစ်ဦးက “သင်၏ ညာဘက်မျက်ခမ်းလှုပ်သည်မှာ တစ်ခုခုမှားနေပြီ” ဟု ပြောသော်လည်း၊ အခြားတစ်စုံတစ်ဦးကမူ “ဤသည်မှာ ယခင်ကတည်းက သဘောတူထားသည့် အလုပ်ဖြစ်သဖြင့် ကျွန်ုပ်တို့ သွား၍ လုပ်ဆောင်သင့်သည်” ဟု ပြောသည်။ အဆုံးတွင် သင်တို့အားလုံးသည် မည်သို့ပင်ဖြစ်စေ ယင်းကို လုပ်ဆောင်ရန် ထွက်ခွာသွားကြသော်လည်း ကားသည် လမ်းတစ်ဝက်တွင် မမျှော်လင့်ဘဲ ပျက်သွားသည်။ ငါ့ကို ပြောလော့၊ အဖွဲ့ထွက်ခွာသည့်အခါ တစ်စုံတစ်ဦး၏ ညာဘက်မျက်ခမ်းလှုပ်ပါက ထိုအခြေအနေတွင် ၎င်းတို့ သွားသင့်သလော။ သင်တို့သည် သမ္မာတရားကို အမှန်တကယ် နားလည်ခြင်း ရှိမရှိကို ငါ ကြည့်မည်။ သင်တို့ မည်သို့ထင်သနည်း၊ ဤအလုပ်ကို သွား၍ လုပ်ဆောင်ခြင်းသည် မှန်ကန်မည်လော။ (မှန်ကန်မည် ဖြစ်ပါသည်။) ယင်းမှာ သေချာပါသည်။ သင်၏ ညာဘက် သို့မဟုတ် ဘယ်ဘက် မျက်ခမ်းလှုပ်ခြင်းအပေါ် အခြေခံ၍ သင် သွားသင့်၊ မသွားသင့်ကို မဆုံးဖြတ်နိုင်ပေ။ ပထမဦးစွာ ဤအလုပ်ကို သွား၍ လုပ်ဆောင်ခြင်းသည် မှန်ကန်သည်။ သို့ဆိုလျှင် ကားသည် အသွားလမ်းတွင် အဘယ်ကြောင့် ပျက်သွားသနည်း။ ယင်းကို ဘုရားသခင်က ခွင့်ပြုခဲ့ခြင်းလော။ ရှင်းပြရန် ခက်ခဲသည် မဟုတ်လော။ (လမ်းတွင် ကားပျက်ခြင်းမှာ ဥပမာအားဖြင့် ကားတွင် ပြဿနာတစ်စုံတစ်ရာ ရှိမရှိကို သိမြင်ရန် ကြိုတင်စစ်ဆေးခြင်း မရှိခဲ့သည့်ကိစ္စမျိုးကဲ့သို့ လူ၏ ပေါ့ဆမှုကြောင့် ဖြစ်နိုင်ပါသည်။) ယင်းမှာ ဖြစ်နိုင်ချေရှိသော အကြောင်းရင်းတစ်ခု ဖြစ်သည်။ ထိုအကြောင်းရင်းကို ငါတို့ ဖယ်ထုတ်လိုက်မည်ဆိုလျှင် ခရီးစဉ်အလယ်တွင် ကားတစ်စီး ပျက်ခြင်းသည် ပုံမှန်ဖြစ်သလော။ (ဖြစ်ပါသည်။) သင်သည် မူလကတည်းက အရည်အသွေး သိပ်မကောင်းသော တစ်ပတ်ရစ် တရုတ်ကားတစ်စီးကို ဝယ်ပြီး သင်က ယင်းကို ကောင်းစွာ ထိန်းသိမ်းခြင်း သို့မဟုတ် ပြုပြင်ခြင်းမရှိဘဲ ဆက်လက်မောင်းနှင်နေပါက ကားသည် ခရီးစဉ်အလယ်တွင် ပျက်သွားမည် ဖြစ်သည်။ ကားသည် ခရီးစဉ်အလယ်တွင် ပျက်သွားပါက ယင်းမှာ အလုပ်ကို သေချာပေါက် မပြီးမြောက်နိုင်ဟု ဆိုလိုသလော။ (မဆိုလိုပါ။) ကားပျက်သွားပြီး ပြင်ဆင်ရန် တစ်နာရီ သို့မဟုတ် နှစ်နာရီ ကြာမြင့်သည်။ သင်တို့ ဦးတည်ရာသို့ ရောက်ရှိသည့်အခါ ထိုနေရာရှိ ညီအစ်ကိုမောင်နှမများက “သင်တို့ ဤအချိန်တွင် ရောက်လာခြင်းက ကံကောင်းသည်၊ စောင့်ကြည့်နေကြသည့်သူများသည် ယခုပင် ထွက်သွားကြသည်။ သင်တို့သာ နှစ်နာရီစောပြီး ရောက်လာခဲ့လျှင် အဆင်းနီသော နဂါးကြီးက သင်တို့ကို သေချာပေါက် ဖမ်းသွားလောက်ပြီဖြစ်သည်။ အလွန်အန္တရာယ်များလှပါတကား” ဟု ပြောဆိုကြသည်။ သင် မြင်သည် မဟုတ်လော၊ မကောင်းသောအရာတစ်ခုသည် ကောင်းသောအရာတစ်ခု ဖြစ်သွားခဲ့သည်။ အလုပ်ကို သွား၍ လုပ်ဆောင်ခြင်းသည် မှန်ကန်ခဲ့သလော။ (မှန်ကန်ခဲ့ပါသည်။) ကားပျက်ခြင်းတွင် ဘုရားသခင်၏ ကောင်းမြတ်သော ရည်ရွယ်ချက် ရှိခဲ့သလော။ (ရှိခဲ့ပါသည်။) သို့ဆိုလျှင် သင်၏ ညာဘက်မျက်ခမ်းလှုပ်ခြင်းသည် ကံဆိုးခြင်း သို့မဟုတ် ကံကောင်းခြင်း၏ နိမိတ်လက္ခဏာ ဖြစ်ခဲ့သလော။ (နှစ်မျိုးလုံး မဟုတ်ပါ။) ယင်းကြောင့် မည်သည့်အရာမျှ ဖြစ်မလာခဲ့ပေ။ ငါတို့သည် ဇာတ်လမ်းကို ကားပျက်သည့်အချိန်တွင် ဖြတ်တောက်လိုက်ပါက “ညာဘက်မျက်ခမ်းလှုပ်ခြင်းက ကံဆိုးခြင်း နိမိတ်ဖြစ်သည်။” ဟူသော အဆိုမှာ အတော်အတန် တိကျပုံရပေမည်။ ကားပျက်ခြင်းသည် မတော်တဆမှုတစ်ခု ဖြစ်ခဲ့သည် မဟုတ်လော။ သို့သော် နောက်ဆုံးရလဒ်ကို ကြည့်သည့်အခါ ကားပျက်ခြင်းသည် ကောင်းသောအရာတစ်ခု ဖြစ်သွားခဲ့သည်။ ကားမပျက်ခဲ့ပါက သင်တို့အားလုံးသည် ဦးတည်ရာသို့ ရောက်သည်နှင့်တစ်ပြိုင်နက် ဒုက္ခရောက်ကြမည် ဖြစ်သည်၊ သင်တို့သည် အလုပ်ကို မပြီးမြောက်နိုင်ရုံသာမက ဖမ်းဆီးခြင်းကိုလည်း ခံရမည် ဖြစ်သည်။ သို့သော် ဖြစ်လာသည်မှာ ကားသည် လမ်းတွင် ပျက်သွားပြီး ပြင်ဆင်ရန် နှစ်နာရီ ကြာခဲ့သဖြင့် သင်တို့ ထိုနေရာသို့ ရောက်သည့်အချိန်တွင် အန္တရာယ်သည် ကင်းစင်သွားခဲ့ပြီး သင်တို့ ဘေးကင်းလုံခြုံသွားခဲ့သည်။ ဤသည်မှာ ဘုရားသခင်က သင်တို့ကို ကာကွယ်စောင့်ရှောက်ခြင်း ဖြစ်သည်။ စဉ်းစားကြည့်လော့၊ ကားပျက်ခြင်း၏ ရှုထောင့်မှ ကြည့်ပါက ဘုရားသခင်သည် သင့်အား သွားခြင်းမှ တားဆီးနေသကဲ့သို့ ထင်ရသော်လည်း အမှန်တကယ်တွင်မူ ကားပြင်ပြီး၍ နောက်ထပ် မတော်တဆမှုမရှိဘဲ သင် ရောက်ရှိသွားပြီးနောက်မှသာ မည်သည့်အရာ ဖြစ်ပျက်ခဲ့သည်ကို သင် သိရှိခဲ့ခြင်း ဖြစ်သည်။ ဤဖြစ်စဉ်တစ်ခုလုံးအတွင်း ဘုရားသခင်၏ လုပ်ဆောင်ချက်များ၏ စည်းမျဉ်းများနှင့် နည်းလမ်းများကို သင်တို့ မည်သို့ ရှုမြင်သနည်း။ ဘုရားသခင်၏ အမှုတော်အပေါ် လူတို့၌ မည်သို့သော နားလည်မှုမျိုး ရှိသင့်သနည်း။ ယင်းကို အကျဉ်းချုပ်ဖော်ပြလော့၊ ဤနေရာတွင် ရှာဖွေနိုင်သော သမ္မာတရားများ ရှိသည်၊ သင်တို့သည် ၎င်းတို့ကို ရှာဖွေနိုင်ခြင်း ရှိမရှိကို ငါ ကြည့်မည်။ (ဘုရားသခင်၊ ကျွန်ုပ်၏ နားလည်မှုမှာ လူတို့အပေါ် ကောင်းသောအရာများဖြစ်စေ၊ ဆိုးသောအရာများဖြစ်စေ မည်သည့်အရာပင် ကျရောက်သည်ဖြစ်စေ ဤအထဲတွင် ဘုရားသခင်၏ ကောင်းမြတ်သော ရည်ရွယ်ချက် ရှိပါသည် ဟူ၍ ဖြစ်ပါသည်။) ဤသည်မှာ ကဏ္ဍတစ်ခု ဖြစ်သည်။ (အခြားကဏ္ဍတစ်ခုလည်း ရှိသေးသည်၊ ယင်းမှာ ဘုရားသခင်၏ အမှုတော်သည် သဘာဝလွန်ဖြစ်ခြင်း သို့မဟုတ် စိတ်ကူးယဉ်ဆန်ခြင်းမရှိဘဲ အလွန် လက်တွေ့ကျပါသည် ဟူ၍ ဖြစ်ပါသည်။) ဟုတ်သည်၊ ယင်းမှာ ကောင်းသော နားလည်မှုတစ်ခု ဖြစ်သည်။ ဘုရားသခင်၏ အမှုတော်သည် လက်တွေ့ကျပြီး ယင်းသည် စိတ်ကူးယဉ်ဆန်ခြင်း သို့မဟုတ် သဘာဝလွန်ခြင်း မရှိပေ၊ ပုံမှန်လူ့သဘာဝရှိသော မည်သူမဆို ယင်းကို ခံစားနိုင်ပြီး အတွေ့အကြုံမှတစ်ဆင့် သိရှိလာနိုင်သည်၊ ပြီးလျှင် ယင်းသည် လူတို့ နားလည်နိုင်စွမ်းရှိသော အရာတစ်ခုလည်း ဖြစ်သည်။ ဤသည်မှာ ဘုရားသခင်၏ အမှုတော်နှင့်ပတ်သက်၍ လူတို့ ရှိသင့်သည့် နားလည်မှု မဟုတ်လော။ (ဟုတ်ပါသည်။) ဤနားလည်မှုအပြင် လူတို့သည် အခြားမည်သည့်အရာကို နားလည်သင့်သေးသနည်း။ ဘုရားသခင်သည် အရာခပ်သိမ်းအပေါ် အချုပ်အခြာအာဏာ ကိုင်စွဲသည်ကို ၎င်းတို့ နားလည်သင့်သည်။ ဘုရားသခင်၏ အမှုတော်တွင် ကိုယ်တော် လုပ်ဆောင်သည့် တိကျသော အမှုအရာတိုင်းသည် ကိုယ်တော်၏ လုပ်ဆောင်ချက်များမှာ အလွန် လက်တွေ့ကျကြောင်းကို လူတို့အား မြင်တွေ့စေသည်။ အစပိုင်းတွင် သင်တို့အဖွဲ့ ထွက်ခွာသည့်အခါ သင်တို့ထဲမှ အချို့သည် သွားသင့်ခြင်း ရှိမရှိကို ဆွေးနွေးခဲ့ကြသည်။ ဘုရားသခင်သည် သင်တို့ကို မတားဆီးခဲ့ပေ၊ ကိုယ်တော်သည် သင့်အား ပျို့အန်ခြင်း၊ သို့မဟုတ် ဝမ်းလျှောခြင်းတို့ကို မဖြစ်စေခဲ့ပေ။ ကိုယ်တော်သည် သင့်ကို မတားဆီးခဲ့သကဲ့သို့ သွားရန်လည်း မတိုက်တွန်းခဲ့ပေ။ ဤသည်မှာ အလွန် လက်တွေ့ကျသည် မဟုတ်လော။ ကိုယ်တော်သည် အဖွဲ့ကို အတူတကွ ဆွေးနွေးတိုင်ပင်ခွင့် ပြုခဲ့သည်။ အချို့လူများက ၎င်းတို့၏ ညာဘက်မျက်ခမ်းလှုပ်သည်ဟု ပြောဆိုကြပြီး အခြားသူများကမူ စိတ်ထဲတွင် မသက်မသာဖြစ်ကြောင်း ခံစားရသည်ဟု ပြောဆိုကြသော်လည်း သင်သည် သင်၏ ခံစားချက်များနှင့် စိတ်အခြေအနေကိုဖြစ်စေ၊ သို့မဟုတ် သဘာဝလွန်အရာများနှင့် သက်ဆိုင်သော စိတ်ကူးများကိုဖြစ်စေ အားကိုးခြင်း ရှိရှိ မရှိရှိ အဆုံးတွင် သင် သွားသင့်သည့်နေရာကို သင် သွားသင့်ပြီး ဘုရားသခင်သည် သင့်ကို မည်သည့်နည်းနှင့်မျှ မတားဆီးခဲ့ပေ။ ဘုရားသခင်သည် ဤနည်းလမ်းဖြင့် အမှုပြုခြင်းသည် အလွန် လက်တွေ့ကျသည် မဟုတ်လော။ (ဟုတ်ပါသည်။) ဘုရားသခင်၏ လုပ်ဆောင်ချက်များသည် အနည်းငယ်မျှပင် အနှစ်သာရမဲ့ခြင်းမရှိပေ၊ လူသား၏ သရုပ်သကန်အမျိုးမျိုးကို ခွင့်ပြုထားပြီး အချို့လူများ၏ မျက်ခမ်းလှုပ်ခြင်းကိုပင် ပါဝင်ခွင့်ပြုထားသည်။ ငါ့ကို ပြောလော့၊ ဘုရားသခင်သည် လူတို့၏ မျက်ခမ်းလှုပ်ခြင်းကို တားဆီးနိုင်သလော သို့မဟုတ် ထိန်းချုပ်နိုင်သလော။ ဤအရာကို ထိန်းချုပ်ရန် ဘုရားသခင်အတွက် အလွန်လွယ်ကူမည် မဟုတ်လော။ သို့သော် ကိုယ်တော် ထိုသို့ပြုလုပ်ခဲ့သလော။ (မပြုလုပ်ခဲ့ပါ။) ဘုရားသခင်သည် ထိုသို့ မပြုလုပ်ခဲ့ပေ။ ကိုယ်တော်သည် ဝင်ရောက်စွက်ဖက်ခြင်းမရှိဘဲ သင့်အား လွတ်လပ်ခွင့်ပေးခဲ့သည်။ သင်၏ မျက်ခမ်းသည် လှုပ်သင့်သကဲ့သို့ လှုပ်ခဲ့သော်လည်း အဆုံးတွင် အဖွဲ့သည် မည်သို့ပင်ဖြစ်စေ ထွက်ခွာသွားခဲ့သည်၊ ဤအရာအားလုံးသည် အလွန် လက်တွေ့ကျခဲ့သည်။ သို့သော် ဦးတည်ရာတွင် ဒုက္ခရှိခဲ့ပြီး သင်တို့ ထိုနေရာသို့ ဦးတည်နေသောကြောင့် ဘုရားသခင်သည် ဤအန္တရာယ်ကို ဖယ်ရှားပေးခြင်း မရှိခဲ့ပေ။ ဘုရားသခင်သည် ထိုသို့ မပြုလုပ်ခဲ့ဘဲ ဒုက္ခသည်လည်း ဖြစ်သင့်သကဲ့သို့ ဖြစ်ပွားခဲ့သည်။ သို့ရာတွင် ဘုရားသခင်သည် လိမ္မာပါးနပ်သောအရာတစ်ခုကို လုပ်ဆောင်ခဲ့သည်၊ ကိုယ်တော်သည် သင်တို့၏ ကားကို လမ်းတစ်ဝက်တွင် ပျက်စေခဲ့သည်၊ သို့မှသာ ကားပြင်ပြီး၍ သင်တို့အားလုံး ဦးတည်ရာသို့ ရောက်ရှိသည့်အချိန်တွင် အန္တရာယ် ကင်းစင်သွားခဲ့သည်။ ဤသည်မှာ ဘုရားသခင်က သင်တို့ကို ကာကွယ်စောင့်ရှောက်ခြင်း ဖြစ်သည်။ သင်တို့ မြင်သည် မဟုတ်လော၊ ဤအချိန်ကွာဟမှုကြောင့် ကိုယ်တော်သည် သင်တို့အား အန္တရာယ်ကို လိမ္မာပါးနပ်စွာ ရှောင်ရှားနိုင်စေခဲ့သည်။ ဘုရားသခင် လုပ်ဆောင်သမျှ အရာတိုင်းသည် အလွန် လက်တွေ့ကျသည် မဟုတ်လော။ (ဟုတ်ပါသည်။) သို့ဖြစ်၍ ဤအရာက သင်တို့ကို အလွန် လက်တွေ့ကျသော နည်းလမ်းဖြင့် ပြသသည်မှာ ဘုရားသခင် လုပ်ဆောင်သည့်အရာသည် လုံးဝ အနှစ်သာရမဲ့ခြင်း သို့မဟုတ် သဘာဝလွန်ခြင်း မရှိကြောင်းနှင့် အမှုအရာတစ်ခုစီ၏ ဖြစ်ပွားမှုသည် သဘာဝကျပြီး မလွဲမသွေဖြစ်သော်လည်း ထိုအထဲတွင် ဘုရားသခင်၏ အနန္တတန်ခိုး တည်ရှိနေကြောင်း ဖြစ်သည်။ ဖြစ်စဉ်တစ်ခုလုံးတစ်လျှောက်လုံးတွင် လူတို့၏ စိတ်ကူးများ မည်သို့ပင်ဖြစ်စေ၊ ၎င်းတို့၏ အခက်အခဲများ၊ အားနည်းချက်များနှင့် ပြဿနာများ မည်သို့ပင်ဖြစ်စေ၊ ၎င်းတို့ အတူတကွ ဆွေးနွေးခဲ့ကြသော ရှုထောင့်အမြင်များ မှန်သည်ဖြစ်စေ မှားသည်ဖြစ်စေ၊ ဤအရာများ တစ်ခုမျှသည် နောက်ဆုံးတွင် ဖြစ်ပျက်ခဲ့သည့်အရာကို မထိခိုက်ခဲ့သကဲ့သို့ ဖြစ်ရပ်၏ မလွဲမသွေဖြစ်သော ရလဒ်ကိုလည်း မထိခိုက်ခဲ့ပေ။ ဖြစ်သင့်သည့် အမှုအရာတိုင်းသည် ဖြစ်ပျက်ခဲ့သည်၊ ဖြစ်ပွားသင့်သည့် ဒုက္ခသည် ဖြစ်ပွားခဲ့သည်၊ ပျက်သင့်သည့် ကားသည် ပျက်ခဲ့သည်၊ လူတို့၏ ရှုထောင့်အမြင်များသည်လည်း ထုတ်ဖော်ခြင်းခံခဲ့ရသည်၊ သို့သော် ဖြစ်ရပ်၏ နောက်ဆုံးရလဒ်မှာမူ ဘုရားသခင် ချမှတ်ထားသည့် နည်းလမ်းအတိုင်း၊ ဘုရားသခင် ကြိုတင်သတ်မှတ်ပြီး ဘုရားသခင်က ထိုဖြစ်ရပ်ကို အုပ်စိုးတော်မူခဲ့သည့်အတိုင်းပင် ဖြစ်ပျက်ခဲ့သည်။ ဤသည်မှာ ဘုရားသခင်၏ အနန္တတန်ခိုး မဟုတ်လော။ (ဟုတ်ပါသည်။) ဤအရာအားလုံးသည် လူတို့၏ နေ့စဉ်အသက်တာများတွင် နေ့စဉ်ကြုံတွေ့ရသည့် အရာအားလုံးကဲ့သို့ပင် အလွန် လက်တွေ့ကျပြီး ပုံမှန်အတိုင်း ဖြစ်ပျက်ခဲ့သည်၊ ယင်းသည် သဘာဝကျကျ ဖြစ်ပျက်ခဲ့ပြီး သဘာဝလွန်ခြင်းဖြစ်စေ၊ စိတ်ကူးယဉ်ဆန်ခြင်းဖြစ်စေ၊ အနှစ်သာရမဲ့ခြင်းဖြစ်စေ မရှိခဲ့ပေ။ သို့ဖြစ်၍ ဤကိစ္စတွင် လူတို့က ဘုရားသခင်၏ အမှုတော်သည် လက်တွေ့ကျကြောင်းနှင့် ကိုယ်တော်သည် အရာခပ်သိမ်းအပေါ် အချုပ်အခြာအာဏာ ကိုင်စွဲကြောင်းကို နားလည်သင့်သည်။ လူတို့သည် မည်သို့ လက်တွေ့လုပ်ဆောင်သင့်သနည်း။ ပထမဦးစွာ ၎င်းတို့အပေါ် မည်သည့်အရာပင် ကျရောက်သည်ဖြစ်စေ ၎င်းတို့ လိုက်နာသင့်သည့် စည်းမျဉ်းများမှာ အဘယ်အရာဖြစ်သည်ကို ၎င်းတို့ နားလည်ရမည်။ ၎င်းတို့သည် လူ့ခံစားချက်များအတိုင်းသာ လိုက်ပါက ယင်းမှာ အားကိုးမရပေ။ ၎င်းတို့သည် သဘာဝလွန် ခံစားချက်များအတိုင်း မလိုက်သင့်သကဲ့သို့ အနှစ်သာရမဲ့သော စိတ်ကူးများကို အခြေခံ၍လည်း အကြောင်းမဲ့ ထင်ကြေးမပေးသင့်ပေ။ ထိုအစား ၎င်းတို့သည် လက်တွေ့ ပတ်ဝန်းကျင် အခြေအနေများနှင့် ၎င်းတို့ လုပ်ဆောင်သင့်သည့် တာဝန်များကို အခြေခံ၍လည်းကောင်း၊ မိမိတို့ လုပ်ဆောင်သင့်သည့်အရာကို သွား၍လည်းကောင်း လုပ်ဆောင်သင့်သည်။ ထို့အပြင် အရေးကြီးသောအရာမှာ ၎င်းတို့သည် သမ္မာတရား စည်းမျဉ်းများကို အခြေခံ၍ မိမိတို့ လုပ်ဆောင်သင့်သည့်အရာကို သွား၍ လုပ်ဆောင်ရန် ဖြစ်သည်။ ဤသို့ဆိုလျှင် ပို၍ လွယ်ကူသွားသည် မဟုတ်လော။ (ဟုတ်ပါသည်။) သို့ဖြစ်၍ သင် မည်သည့်ပြဿနာများကို ကြုံတွေ့ရသည်ဖြစ်စေ၊ ဘုရားသခင်၏ အမှုတော်သည် မည်သည့်အဆင့်သို့ ရောက်ရှိနေသည်ဖြစ်စေ သင်သည် သင်၏ ခံစားချက်များအတိုင်း လိုက်ရန် မလိုအပ်ပေ၊ သင်သည် နေ့တစ်နေ့ မင်္ဂလာရှိမရှိကို စစ်ဆေးရန် မလိုအပ်ပေ၊ သင်သည် မည်သည့် နက္ခတ္တဆိုင်ရာ ဖြစ်စဉ်များကိုမျှ ကြည့်ရှုရန် သို့မဟုတ် မည်သည့် ပရောဖက်ပြုချက်များကိုမျှ နားထောင်ရန် အထူးသဖြင့် မလိုအပ်သည်မှာ ပြောစရာမလိုပေ၊ သင် လုပ်ဆောင်သင့်သည့်အရာကိုသာ လုပ်ဆောင်လော့။ အချို့လူများသည် နက္ခတ္တဆိုင်ရာ ဖြစ်စဉ်များကို ကြည့်ရှုရန် သို့မဟုတ် နေ့များ မင်္ဂလာရှိမရှိကို စစ်ဆေးရန် နှစ်သက်ကြပြီး “မနက်ဖြန်က နေ့ကောင်းရက်သာ မဟုတ်၊ ကျွန်ုပ် အပြင်ထွက်လျှင် အရာရာ လွဲချော်သွားမလား။ အဆင်းနီသော နဂါးကြီးက ဖမ်းဆီးမှုများ လုပ်ဆောင်နေမလား။ ဤမနက်ခင်းတွင် ကျွန်ုပ် စောစောထ၍ အပြင်ထွက်ချိန်တွင် တံခါးဝတွင် ကျီးကန်းတစ်ကောင်က အဘယ်ကြောင့် လာအော်နေရသနည်း။ အချို့လူများက မနေ့ညက အပြင်ထွက်သည့်အခါတွင် ကြောင်နက်တစ်ကောင် တွေ့သည်ဟု ကျွန်ုပ်ကြားသည်။ ဤအရာများအားလုံးက မကောင်းသော နိမိတ်လက္ခဏာများဖြစ်သည်။ ကျွန်ုပ် မည်သည့်အရာကို လုပ်သင့်သနည်း။ အန္တရာယ်တစ်ခုခု ဖြစ်တော့မည်လော” ဟု ပြောဆိုကြသည်။ သင်၌ ပုံမှန်လူ့သဘာဝနှင့် ပုံမှန်လူ့စဉ်းစားဉာဏ် ရှိပါက မည်သို့သော ပတ်ဝန်းကျင် အခြေအနေများသည် အန္တရာယ်ရှိပြီး မည်သို့သော ပတ်ဝန်းကျင် အခြေအနေများသည် အတော်အတန် ဘေးကင်းလုံခြုံသည်ကို သင် ပိုင်းခြားနိုင်သင့်ပြီး လက်တွေ့အခြေအနေအရ ၎င်းတို့ကို မည်သို့ ချဉ်းကပ်ကိုင်တွယ်ရမည်ကို သိသင့်သည်၊ သင်သည် ထိုအခြားအရာများကို ကြည့်ရှုရန် မလိုအပ်ပေ။ နေ့စဉ် သင် လုပ်ဆောင်သင့်သည့်အရာနှင့် မလုပ်ဆောင်သင့်သည့်အရာနှင့်ပတ်သက်၍မူ တစ်ဖက်တွင် သမ္မာတရား စည်းမျဉ်းများအဖြစ် ဆောင်ရွက်သည့် ဘုရားသခင်၏ ရှင်းလင်းသော နှုတ်ကပတ်တော်များ ရှိသည်၊ အခြားတစ်ဖက်တွင်မူ သင်၌ ပုံမှန်လူ့သဘာဝ၊ အသိစိတ်နှင့် ဆင်ခြင်တုံတရား ရှိပြီး သင်သည် လက်တွေ့ ပတ်ဝန်းကျင် အခြေအနေများ၏ စီစဉ်မှုနှင့် ၎င်းတို့ ပေးသည့် လမ်းညွှန်မှုကို အခြေခံ၍ ပုံမှန်လူ့သဘာဝ၏ လက်တွေ့ကျသော လိုအပ်ချက်များနှင့် သင်၏ ကိုယ်ပိုင် တာဝန်ဝတ္တရားများနှင့် တာဝန်များအတိုင်း နေ့စဉ် သင် လုပ်ဆောင်သင့်သည့်အရာကို လုပ်ဆောင်နေသရွေ့ ဆိုလျှင် လုံလောက်ပေသည်။ လူတို့သည် ၎င်းတို့၏ နေ့စဉ်အသက်တာများကို ဤကဲ့သို့ ချဉ်းကပ်ပါက အမှုအရာများသည် ပို၍ ရိုးရှင်းသွားမည် မဟုတ်လော။ (ဟုတ်ပါသည်။)

ဘုရားသခင်၏ အမှုတော်သည် အနန္တတန်ခိုးနှင့် ပြည့်စုံပြီး အံ့ဩဖွယ်ကောင်းသော်လည်း၊ ဘုရားသခင်၏ နှုတ်ကပတ်တော်များသည် သမ္မာတရားနှင့် အသက်ဖြစ်သော်လည်း လူတို့ကို ညတွင်းချင်း စုံလင်စေရန် သို့မဟုတ် ပြောင်းလဲစေရန် မဖြစ်နိုင်ပေ။ အချို့လူတို့သည် မိမိတို့၏ အယူအဆများနှင့် စိတ်ကူးများကို အခြေခံ၍ “ကျွန်ုပ်သည် ဘုရားသခင်ကို နှစ်ပေါင်းများစွာ ယုံကြည်ခဲ့ပြီးဖြစ်ရာ အဘယ်ကြောင့် ယခုထိ မပြောင်းလဲသေးသနည်း။ အဘယ်ကြောင့် သန့်ရှင်းစင်ကြယ်ခြင်းကို ယခုထိ မရရှိသေးသနည်း။ အဘယ်ကြောင့် ကျွန်ုပ်၏ စိတ်နှလုံးထဲ၌ လောကကို ချစ်နေဆဲဖြစ်သနည်း။ အဘယ်ကြောင့် ဤမျှ အချည်းနှီးသောအရာများကို တပ်မက်နေဆဲဖြစ်သနည်း။ အဘယ်ကြောင့် ကောက်ကျစ်ဆိုးယုတ်သော တပ်မက်စိတ် ရှိနေဆဲဖြစ်သနည်း။ ကျွန်ုပ်သည် ဘာသာတရားမရှိသူများ၏ လောက၏ ဗီဒီယိုအချို့ သို့မဟုတ် ဖျော်ဖြေရေးအစီအစဉ်များကို ကြည့်ရှုခြင်းကို ယခင်က နှစ်သက်ခဲ့သည်။ ကျွန်ုပ်သည် ယခုအချိန်အထိ ဘုရားသခင်ကို ယုံကြည်ခဲ့ပြီး ဘုရားသခင်၏ နှုတ်ကပတ်တော်များကို နှစ်ပေါင်းများစွာ စားသောက်ခဲ့ကာ ကျွန်ုပ်၏ တာဝန်ကို ထမ်းဆောင်ခဲ့ပြီး အမှုအရာများကို စွန့်လွှတ်ခဲ့၍ နှစ်ပေါင်းများစွာ မိမိကိုယ်ကို အသုံးခံခဲ့ပြီးဖြစ်သည့်အပြင် ကျွန်ုပ်၏ စိတ်နှလုံးထဲ၌ ထိုအရာများကို စွန့်လွှတ်ပြီးဖြစ်သည်ဟု ခံစားရသော်ငြားလည်း အဘယ်ကြောင့် အခါအားလျော်စွာ ထိုအရာများကို ကြည့်ရှုချင်နေဆဲဖြစ်သနည်း” ဟု မကြာခဏ ပြောဆိုကြသည်။ ဤသည်တို့မှာ လူတို့၌ရှိသော အယူအဆအချို့ ဖြစ်သည် မဟုတ်လော။ အထူးသဖြင့် အချို့လူတို့သည် ဘုရားသခင်ကို ယုံကြည်ခြင်း၌ ကိုယ်ကိုထိုး၍နှိပ်စက်ခြင်း၊ ဇာတိပကတိ၏ သာယာမှုများကို မတပ်မက်ခြင်း၊ ပို၍ ဆင်းရဲဒုက္ခခံပြီး အားသွန်ခွန်စိုက်လုပ်ခြင်းနှင့် ရုပ်ပိုင်းဆိုင်ရာ ဒုက္ခများစွာကို ကျော်လွှားနိုင်ခြင်းကဲ့သို့သော အမှုအရာများကို အစဉ်လိုက်စားကြသည်။ သို့သော် ၎င်းတို့သည် ဤနည်းလမ်းဖြင့် ဆက်လက် လိုက်စားနေကြသော်လည်း ဇာတိပကတိ၏ လွန်ကျူးသော လိုအင်ဆန္ဒများ၊ သက်သောင့်သက်သာဖြစ်မှုကို တောင့်တခြင်းများနှင့် ပျင်းရိခြင်းတို့၏ ထိန်းချုပ်မှုကို မကြာခဏ ခံနေရဆဲဖြစ်သည်ဟု ၎င်းတို့ ခံစားကြရဆဲဖြစ်ရာ ၎င်းတို့သည် မကြာခဏ အပျက်သဘောဆောင်လာပြီး “ဘုရားသခင်၏ အမှုတော်သည် ဤအဆင့်သို့ ရောက်ရှိနေပြီဖြစ်ရာ အဘယ်ကြောင့် ကျွန်ုပ်သည် ဤမျှ စိတ်ပျက်ဖွယ်ကောင်းပြီး မကြာခဏ အပျက်သဘောဆောင်နေရဆဲ ဖြစ်သနည်း” ဟု တွေးလျက် ဘုရားသခင်အပေါ် ယုံကြည်ခြင်း ပျောက်ဆုံးကြသည်။ တစ်ခါတစ်ရံတွင် ၎င်းတို့သည် တာဝန်တစ်ခု၌ ရလဒ်အနည်းငယ် စွမ်းဆောင်ရရှိပြီး လူတိုင်း၏ အသိအမှတ်ပြုမှုကို ရရှိသည့်အခါ စိတ်သက်သာရာရကာ “ကျွန်ုပ်၌ ကယ်တင်ခြင်းခံရရန် မျှော်လင့်ချက် ရှိနေသေးသည်။ ဘုရားသခင်၏ အမှုတော်နှင့် ကိုယ်တော်၏ နှုတ်ကပတ်တော်များသည် အလွန်ကောင်းမြတ်လှသည်။ ကိုယ်တော်၏ အမှုတော်သည် လူတို့ကို အမှန်တကယ် ပြောင်းလဲစေနိုင်သည်” ဟု တွေးထင်ကြသည်။ သို့သော် ခဏအကြာတွင် ၎င်းတို့သည် မိမိတို့၏ ချစ်ခင်ရသူများကို လွမ်းဆွတ်နေဆဲဖြစ်သည်ဟု ခံစားကြရသည်။ အထူးသဖြင့် ၎င်းတို့သည် တစ်ခါတစ်ရံတွင် မိမိတို့ တစ်ချိန်က မြတ်နိုးခဲ့သောသူများကိုပင် ပြန်လည်အောက်မေ့ကြပြီး ၎င်းတို့ နေထိုင်ခဲ့သော လောကီအသက်တာကို တမ်းတမ်းတတ ပြန်လည်အမှတ်ရကြကာ လောက၌ ရှိစဉ်က ၎င်းတို့၏ ဘုန်းကျက်သရေရှိသော နေ့ရက်များကို အမှန်တကယ် လွမ်းဆွတ်ကြသောကြောင့် “အဘယ်ကြောင့် ကျွန်ုပ်သည် ထိုအရာများကို လွမ်းဆွတ်နေဆဲဖြစ်သနည်း။ အဘယ်ကြောင့် ဇာတိပကတိ၏ သာယာမှုများကို မစွန့်လွှတ်သေးဘဲ လောကနှင့် သန့်ရှင်းစွာ ခွဲခွာနေခြင်း မရှိသေးသနည်း။ အဘယ်ကြောင့် ကျွန်ုပ်သည် ယခုထိ မပြောင်းလဲသေးသနည်း” ဟု ၎င်းတို့ အံ့ဩကြသည်။ ပြီးလျှင် ၎င်းတို့သည် နောက်တစ်ဖန် စိတ်မချမ်းမသာ ဖြစ်ကြပြန်သည်။ ၎င်းတို့သည် ဤအတွေးအခေါ်များနှင့် ရှုထောင့်အမြင်များအလယ်တွင် မကြာခဏ ကျင်လည်နေကြသည်။ ၎င်းတို့၏ အခြေအနေသည် တစ်ခါတစ်ရံ ကောင်းပြီး တစ်ခါတစ်ရံ ဆိုးသည်၊ ၎င်းတို့သည် ခဏတာ အားနည်းပြီးနောက် ခဏတာ အားရှိသည်၊ ၎င်းတို့သည် ခဏတာ အပျက်သဘောဆောင်ပြီးနောက် ခဏတာ အပြုသဘောဆောင်သည်။ ၎င်းတို့သည် နေ့စဉ်အသက်တာရှိ မိမိတို့၏ သရုပ်သကန်များကို အခြေခံ၍ မိမိတို့ကိုယ်ကို မကြာခဏ ဆုံးဖြတ်သတ်မှတ်ကြသည်။ ၎င်းတို့သည် ကောင်းသော အခြေအနေ၌ ရှိနေပါက မိမိတို့သည် ကယ်တင်ခြင်းခံရမည့်သူများဖြစ်သည်ဟု ယူဆကြသည်၊ မကောင်းသော အခြေအနေ၌ ရှိနေပါက မိမိတို့ ကယ်တင်ခြင်းခံရရန် မျှော်လင့်ချက်မရှိတော့ကြောင်းနှင့် ကယ်တင်၍မရနိုင်တော့ကြောင်း ၎င်းတို့ ခံစားကြရသည်။ ၎င်းတို့သည် အစွန်းတစ်ဖက် သို့မဟုတ် အခြားတစ်ဖက်၌ ရှိနေကြသည်။ ၎င်းတို့သည် ကောင်းသော အခြေအနေ၌ ရှိနေသည့်အခါ မိမိတို့သည် သူတော်စင်တစ်ဦးကဲ့သို့ ဖြစ်ပြီး ဘုရားသခင်နှင့် အလွန်နီးစပ်သည်ဟုလည်းကောင်း၊ မိမိတို့နှင့် ဘုရားသခင်အကြားတွင် မည်သည့်အတားအဆီးမျှ မရှိဟုလည်းကောင်း ခံစားကြရပြီး ဘုရားသခင်သည် မိမိတို့၏ ဘေး၌ပင် ရှိနေသည်ဟု ခံစားကြရသည်။ ၎င်းတို့သည် မကောင်းသော အခြေအနေ၌ ရှိနေသည့်အခါ မိမိတို့သည် ငရဲ၏ ၁၈ ထပ်မြောက် အလွှာထဲသို့ ကျရောက်သွားပြီး ဘုရားသခင်ကို မမြင်နိုင်၊ မထိတွေ့နိုင်ဟု ခံစားကြရကာ ဘုရားသခင်သည် မိမိတို့နှင့် အလွန်ကွာဝေးသည်ဟု ခံစားကြရသည်။ ဤသည်မှာ အဘယ်ကြောင့်နည်း။ အဘယ်ကြောင့် ၎င်းတို့၌ ဤအခြေအနေများ ရှိနေသနည်း။ ဤအခြေအနေများသည် ပုံမှန်လော သို့မဟုတ် ပုံမှန်မဟုတ်လော။ (ပုံမှန်မဟုတ်ပါ။) ၎င်းတို့သည် ကောင်းသော အခြေအနေ၌ ရှိနေသည့်အခါ အသင်းတော်က ၎င်းတို့ကို လုပ်ဆောင်ရန် စီစဉ်ပေးသည့် မည်သည့်အရာကိုမဆို လုပ်ဆောင်ကြပြီး မည်သည့်အခက်အခဲကိုမဆို ကျော်လွှားနိုင်ကာ မည်သည့်ဆင်းရဲဒုက္ခကိုမဆို ခံနိုင်ပြီး မည်သည့်အဖိုးအခကိုမဆို ပေးဆပ်နိုင်သည်။ ၎င်းတို့သည် မိမိတို့သည် ဘုရားသခင်ကို အကျိုးနွံနာခံနိုင်ဆုံးသောသူ ဖြစ်သည်ဟုလည်းကောင်း၊ မိမိတို့သည် ဘုရားအိမ်တော်ရှိ သမ္မာတရားကို လိုက်စားသော လူတစ်ဦး ဖြစ်သည်ဟုလည်းကောင်း၊ မည်သည့်အခက်အခဲကမျှ ၎င်းတို့ကို အကျပ်မရိုက်စေနိုင်ဟုလည်းကောင်း ခံစားကြရသည်။ ၎င်းတို့သည် မိမိတို့၏ တာဝန်ကို ထမ်းဆောင်ရန် အလွန်ကြိုးစားလုပ်ဆောင်ကြပြီး ကြိုးစားအားထုတ်လိုစိတ်ရှိကြသည်။ အခြားသူများနှင့် မိတ်သဟာယဖွဲ့သည့်အခါ မည်မျှပင် စကားပြောဆိုပါစေ ပင်ပန်းသည်ဟု ၎င်းတို့ မခံစားရဘဲ အစာတစ်နပ်လွတ်ခြင်း သို့မဟုတ် အိပ်ချိန် နှစ်နာရီ၊ သုံးနာရီ လျော့နည်းခြင်းကို ဂရုမစိုက်ကြပေ။ ၎င်းတို့သည် ဘုရားသခင်အတွက် မိမိတို့ကိုယ်ကို အသုံးခံလိုပြီး မိမိတို့၏ တစ်သက်တာလုံးကို ဘုရားသခင်ထံ ရည်စူးဆက်ကပ်လိုကြသည်။ ထို့ကြောင့် ၎င်းတို့သည် မိမိတို့ ပြောင်းလဲပြီးဖြစ်သည်ဟု ခံစားကြရသည်။ ၎င်းတို့သည် မိမိတို့၏ မိသားစုအကြောင်းကို မစဉ်းစားကြတော့ပေ၊ မိမိတို့ တစ်ချိန်က ချစ်ခဲ့သောသူများကို မလွမ်းဆွတ်ကြတော့ပေ၊ ပြီးလျှင် လောက၌ မိမိတို့ ရရှိခဲ့သော ဘုန်းကျက်သရေနှင့် ဂုဏ်ကို တမ်းတမ်းတတ ပြန်လည်အမှတ်မရကြတော့ပေ။ ၎င်းတို့သည် ထိုအရာအားလုံးကို ကောင်းကင်ဘုံ၏ အပြင်ဘက်သို့ လွှင့်ပစ်လိုက်ပြီး စိတ်နှလုံးအကြွင်းမဲ့ ဘုရားသခင်အတွက် မိမိတို့ကိုယ်ကို အသုံးခံကြကာ စည်းမျဉ်းများကို လိုက်နာစောင့်ထိန်းလျက်၊ အနှောင့်အယှက်ပေးခြင်းများ သို့မဟုတ် အဖျက်အမှောင့်လုပ်ခြင်းများကို ဖြစ်စေသူတိုင်းကို ပြုပြင်လျက်၊ ဘုရားအိမ်တော်အတွက် တရားမျှတမှုကို ထိန်းသိမ်းလျက်၊ တရားမျှတမှုဘက်၌ ခိုင်မာစွာ ရပ်တည်လျက်၊ ဘုရားအိမ်တော်၏ အကျိုးစီးပွားများကို ကာကွယ်လျက်၊ တင်းကျပ်ပြီး မျှတသော “တရားသူကြီး” တစ်ဦးအဖြစ် မိမိတို့၏ ပုံရိပ်ကို တည်ဆောက်ကြသည်။ ၎င်းတို့သည် ခဏတာအတွက် အတော်ပင် ကောင်းစွာ လုပ်ဆောင်ကြသည်။ သို့သော် ၎င်းတို့၏ ဖောက်ပြန်ပျက်စီးသော စိတ်သဘောထားများကို ထုတ်ဖော်သည့် သို့မဟုတ် မှားယွင်းသောအရာတစ်ခုကို လုပ်ဆောင်သည့် အချိန်တစ်ခု ရောက်လာနိုင်ပြီး ထိုအခါတွင် ၎င်းတို့သည် “ဘုရားသခင်က ကျွန်ုပ်ကို ထုတ်ဖေပြီ၊ ကိုယ်တော်သည် ကျွန်ုပ်ကို မချစ်တော့ပါ” ဟု တွေးလျက် အပျက်သဘောဆောင်ပြီး အားနည်းလာကြလိမ့်မည်။ ထိုအချိန်မှစ၍ ၎င်းတို့သည် ပြန်လည်နလန်ထူနိုင်တော့မည် မဟုတ်ပေ။ ၎င်းတို့သည် မိမိတို့သည် ဘာမျှမဟုတ်ကြောင်းနှင့် မည်သည့်အရာကိုမျှ မလုပ်ဆောင်နိုင်ကြောင်း၊ မိမိတို့၌ တစ်ကိုယ်ကောင်းဆန်သော အတွေးအခေါ်များနှင့် ကောက်ကျစ်ဆိုးယုတ်သော တပ်မက်စိတ်များ ရှိနေဆဲဖြစ်ကြောင်း၊ မိမိတို့ တစ်ချိန်က ချစ်ခဲ့ပြီး နှစ်သက်ခဲ့သောသူများကို မကြာခဏ လွမ်းဆွတ်ကြောင်း၊ မိမိတို့သည် မကြာခဏ အပျက်သဘောဆောင်ပြီး အားနည်းကြောင်း၊ မိမိတို့သည် ဘုရားသခင်ကို အတိုက်အခံလုပ်နေဆဲဖြစ်ကြောင်း၊ မိမိတို့သည် သမ္မာတရားကို လက်တွေ့မလုပ်ဆောင်နိုင်ကြောင်း၊ နှစ်ပေါင်းများစွာ ဘုရားသခင်ကို ယုံကြည်ခဲ့သော်လည်း မပြောင်းလဲသေးကြောင်း ခံစားကြရပြီး “ဤသည်မှာ ကျွန်ုပ်အတွက် အဆုံးသတ်ပြီဟု မဆိုလိုပေလော” ဟု တွေးထင်ကြလိမ့်မည်။ ၎င်းတို့သည် မိမိတို့၌ ကယ်တင်ခြင်းခံရရန် အခွင့်အရေးမရှိတော့ကြောင်းနှင့် မိမိတို့အတွက် လုံးဝ မျှော်လင့်ချက်မရှိတော့ကြောင်း တွေးထင်ကြလိမ့်မည်။ ၎င်းတို့သည် ပျော်ရွှင်သည့်အခါ အတိုင်းမသိ ဝမ်းမြောက်ကြပြီး နာကျင်သည့်အခါ မယုံနိုင်လောက်အောင်ပင် ဆင်းရဲဒုက္ခရောက်ကြသည်။ ၎င်းတို့သည် အစွန်းတစ်ဖက်မှ အခြားတစ်ဖက်သို့ ကူးပြောင်းလျက် ဤအစွန်းနှစ်ဖက်သို့ အစဉ် သွားလာနေကြသည်။ ဤသည်မှာ အဘယ်ကြောင့်နည်း။ ဤအခြေအနေများနှင့် သရုပ်သကန်များသည် အပြုသဘောဆောင်သည်ဖြစ်စေ၊ စိတ်မချမ်းမသာဖြစ်ခြင်းဖြစ်စေ အချုပ်အားဖြင့် ဤသည်မှာ ပြဿနာအမျိုးအစားတစ်ခုတည်းပင် ဖြစ်သည်၊ ဆိုလိုသည်မှာ ဘုရားသခင်၏ အမှုတော်နှင့်ပတ်သက်၍ အယူအဆများနှင့် စိတ်ကူးများဖြင့် ပြည့်နှက်နေခြင်း၊ မိမိတို့၏ စိတ်ခံစားချက်များကို အခြေခံ၍လည်းကောင်း၊ ကာလတစ်ခုအတွင်း မိမိတို့၏ ထုတ်ဖော်မှုများနှင့် သရုပ်သကန်များကို အခြေခံ၍လည်းကောင်း မိမိတို့ကိုယ်ကို အစဉ်သဖြင့် ဆုံးဖြတ်သတ်မှတ်ခြင်းနှင့် စရိုက်လက္ခဏာ သရုပ်ဖော်ခြင်းတို့ဖြစ်ပြီး တစ်ချိန်တည်းမှာပင် ဘုရားသခင်၏ အမှုတော်ကိုလည်းကောင်း၊ လူတို့အပေါ် ကိုယ်တော်၏ အမှုတော်မှ ရရှိသော ရလဒ်များကိုလည်းကောင်း၊ လူတို့အပေါ် ကိုယ်တော်၏ အမှုတော်က ရရှိစေသည့် ရည်ရွယ်ချက်နှင့် ပန်းတိုင်ကိုလည်းကောင်း ဆုံးဖြတ်သတ်မှတ်ခြင်း ဖြစ်သည်။ ဤသည်မှာ ပြဿနာ၏ အရင်းအမြစ် မဟုတ်လော။ (ဟုတ်ပါသည်။) လူတို့သည် အပြုသဘောဆောင်သည့်အခါ ဘုရားသခင် ရှေ့မှောက်၌ ဆုတောင်းကြပြီး မည်သည့်အရာကိုမျှ မတောင်းဆိုဘဲ မိမိတို့၏ တစ်သက်တာလုံးကို ဘုရားသခင်ထံ ရည်စူးဆက်ကပ်ရန် လိုလားလျက်၊ ဘုရားသခင်နောက်လိုက်ပြီး ကိုယ်တော့်အတွက် မိမိတို့ကိုယ်ကို အသုံးခံရန် လိုလားလျက် ပြင်းထန်စွာ ငိုကြွေးရင်း မိမိတို့၏ သန္နိဋ္ဌာန်ကို ဖော်ပြကြသည်။ ၎င်းတို့သည် ဤကဲ့သို့ ဆုတောင်းပြီး သန္နိဋ္ဌာန်များ ချမှတ်သည့်အခါ အခက်အခဲအားလုံးသည် အခက်အခဲများ မဟုတ်တော့ဟု ခံစားကြရသည်။ ၎င်းတို့သည် မျက်ရည်ကျသည်အထိ တို့ထိခံစားရပြီး ယင်းမှာ မိမိတို့ကို တို့ထိသော သန့်ရှင်းသောဝိညာဉ်တော်ပင် ဖြစ်သည်ဟု ယုံကြည်ကြသည်။ ၎င်းတို့က “သန့်ရှင်းသောဝိညာဉ်တော်က ကျွန်ုပ်ကို တို့ထိလေပြီ။ ဘုရားသခင်သည် ကျွန်ုပ်ကို အလွန်ပင် ချစ်လိုက်လေခြင်း။ ဘုရားသခင်သည် ကျွန်ုပ်ကို မစွန့်ပစ်ခဲ့ပါတကား” ဟု တွေးထင်ကြသည်။ ၎င်းတို့သည် မျက်ရည်များဖြင့် ဆုတောင်းပြီး သန့်ရှင်းသောဝိညာဉ်တော်၏ တို့ထိခြင်းကို ခံခဲ့ရသည်ဟု ပြောဆိုကြသည်၊ ဤသည်မှာ အထင်မှားခြင်းတစ်ခု မဟုတ်လော။ (ဟုတ်ပါသည်။) စင်စစ်အားဖြင့် သင်သည် သန့်ရှင်းသောဝိညာဉ်တော်ကြောင့် မဟုတ်ဘဲ သင်၏ ကိုယ်ပိုင် သန္နိဋ္ဌာန်၊ ရည်မှန်းချက်များ၊ ဆန္ဒများနှင့် သင်၏ ကိုယ်ပိုင် လုပ်ဆောင်ချက်များကြောင့် တို့ထိခံစားခဲ့ရခြင်း ဖြစ်သည်၊ သင်သည် သင်၏ ကိုယ်တိုင်အပေါ် ကောင်းသော ခံစားချက်ကြောင့် တို့ထိခံစားရခြင်း ဖြစ်သည်။ အဘယ်ကြောင့် သင်သည် သင်၏ ကိုယ်တိုင်ကြောင့် တို့ထိခံစားခဲ့သည်ဟု ငါပြောရသနည်း။ သင်သည် ဘုရားသခင်၏ အမှုတော်နှင့်ပတ်သက်၍ အလွန်များပြားသော အယူအဆများနှင့် စိတ်ကူးများ ရှိနေပြီး ယင်းတို့သည် အလွန်လွဲချော်နေသည်၊ ဘုရားသခင်က သင့်ကို တို့ထိမည်ဟု သင်ထင်သလော။ သင်သည် ဤအစွန်းရောက်သော အခြေအနေ၌ ရှိနေလျက် ဘုရားသခင်က သင့်ကို ပို၍ပင် အစွန်းရောက်စေရန် တို့ထိမည်လော။ ဘုရားသခင်က သင့်ကို တို့ထိပါက ယင်းသည် သင့်ကို ပို၍ပင် အစွန်းရောက်စေပြီး သင့်ကိုယ်သင် ပို၍ အထင်ကြီးကာ သင့်ကိုယ်သင်ကြောင့် ပို၍ တို့ထိခံစားရုံသာ ဖြစ်မည်ဖြစ်ပြီး “ကျွန်ုပ်သည် အိပ်ချိန်လျှော့ပြီး ပို၍ ဆင်းရဲဒုက္ခခံမည်၊ အစားအစာ ကောင်းသည်ဖြစ်စေ၊ ဆိုးသည်ဖြစ်စေ ကျွန်ုပ် စားမည်၊ မည်သည့်အရာကိုမဆို စားရသည်ကို အဆင်ပြေမည်ဖြစ်ပြီး ယင်းက ကျွန်ုပ်၏ ခန္ဓာကိုယ်အတွက် ကောင်းကျိုးပြုသည်ဖြစ်စေ၊ မပြုသည်ဖြစ်စေ ဂရုမစိုက်ပေ။ ကျွန်ုပ်သည် ကျွန်ုပ်၏ ဇာတိပကတိဟောင်း၏ နှစ်သက်မှုများကို ကျော်လွှားရမည်၊ ကျွန်ုပ်၏ ဇာတိပကတိဟောင်း၏ ချို့ယွင်းချက်များကို အတိအကျ ကုစားရမည်၊ ပြီးလျှင် ကျွန်ုပ်၏ ဇာတိပကတိကို ပို၍ ဆင်းရဲဒုက္ခခံစေပြီး သက်သောင့်သက်သာ မဖြစ်စေရ။ ယင်းက သက်သောင့်သက်သာ ခံစားရပါက ကျွန်ုပ်သည် ဘုရားသခင်ကို ချစ်မည်မဟုတ်ပေ၊ ယင်းက သက်သောင့်သက်သာ ခံစားရပါက ကျွန်ုပ်သည် ဇာတိပကတိ၏ သက်သောင့်သက်သာဖြစ်မှုများ၌ စိတ်အလိုလိုက်ပြီး ကျွန်ုပ်၏ တာဝန်ကို ထမ်းဆောင်ရန် ကြိုးစားလုပ်ဆောင်တော့မည် မဟုတ်ပေ” ဟူသော ဤသန္နိဋ္ဌာန်ကို ချမှတ်ရန် သင့်ကို ပို၍ပင် အလိုရှိစေမည်ဖြစ်သည်။ ဤသည်မှာ သင့်ကို တို့ထိသော သန့်ရှင်းသောဝိညာဉ်တော်ဖြစ်ပါက သင်သည် ဤအစွန်းရောက်မှုကို ဆက်လက် ထိန်းသိမ်းထားမည်သာဖြစ်ပြီး သင်သည် ဇာတိပကတိကို အောင်မြင်ပြီး စာတန်ကို အနိုင်ယူပြီးဖြစ်ကြောင်းနှင့် သင်သည် ကယ်တင်ခြင်းခံရပြီးဖြစ်ကြောင်းကို ပို၍ပင် မှားယွင်းစွာ ယုံကြည်ပေလိမ့်မည်။ ထို့ကြောင့် သင်သည် သန့်ရှင်းသောဝိညာဉ်တော်ကြောင့် တို့ထိခံစားရခြင်း မဟုတ်ဘဲ သင့်ကိုယ်သင်ကြောင့် တို့ထိခံစားခဲ့ရခြင်း ဖြစ်သည်ဟု ငါပြောခြင်းဖြစ်သည်။ သင်တို့သည် သင်တို့ကိုယ်တိုင်ကြောင့် မကြာခဏ တို့ထိခံစားခဲ့ကြရသလော။ (ဟုတ်ပါသည်။) သင်တို့သည် ဘုရားသခင်အတွက် မိမိတို့ကိုယ်ကို အသုံးခံရန်နှင့် ဆင်းရဲဒုက္ခခံရန် မိမိတို့၏ ကိုယ်ပိုင် သန္နိဋ္ဌာန်ကြောင့် တို့ထိခံစားကြပြီး သင်တို့၏ စိတ်နှလုံးထဲ၌ ဘုရားသခင်အတွက် ဆင်းရဲဒုက္ခခံရန်၊ မည်သည့် ဆင်းရဲဒုက္ခကိုမဆို ခံရန် သို့မဟုတ် သေဆုံးရန်ပင် အလွန်လိုလားကြရာ ထို့နောက်တွင် သင်တို့၏ မျက်နှာပေါ်၌ မျက်ရည်များ စီးကျလာသည်။ စင်စစ်အားဖြင့် သင် တို့ထိခံစားရခြင်းကြောင့် ဘုရားသခင်သည် တို့ထိခံစားရခြင်း မဟုတ်ဘဲ သင်၏ သန္နိဋ္ဌာန်ကြောင့်လည်း ကိုယ်တော်သည် တို့ထိခံစားရခြင်း မဟုတ်ပေ။ သင်၏ ဤစိတ်ခံစားမှု ပြင်းထန်စွာ ပေါ်ထွက်လာခြင်းသည် ယာယီ စိတ်လိုက်မာန်ပါမှုတစ်ခု၊ ခဏတာ ပြင်းပြသော စိတ်အားထက်သန်မှုတစ်ခုသာ ဖြစ်သည်။ ဤအခြေအနေတွင် သင်သည် ကိုယ်တော်ထံသို့ “ဘုရားသခင်၊ အကျွန်ုပ်သည် ကိုယ်တော့်အတွက် သေဆုံးရန် လိုလားပါ၏။ ဘုရားသခင်၊ အကျွန်ုပ်သည် ယနေ့ ကျွန်ုပ်၏ တာဝန်ကို ထမ်းဆောင်ရာ၌ အလွန်အလုပ်များခဲ့သဖြင့် အစာတစ်နပ် လွတ်ခဲ့ပါသည်။ အစာ ၁၀ နပ် လွတ်ရမည်ဆိုလျှင်ပင် အကျွန်ုပ် လိုလားမည် ဖြစ်ပါသည်။ လူတို့သည် မုန့်အားဖြင့်သာ အသက်ရှင်ရသည်မဟုတ်၊ ဘုရားသခင်၏ နှုတ်တော်ထွက် စကားအားဖြင့် အသက်ရှင်ရပါသည်။ ဘုရားသခင်၊ အကျွန်ုပ်သည် ကိုယ်တော့်ကို ကျွန်ုပ်၏ တစ်သက်တာလုံး၊ ထာဝစဉ် ချစ်ရန် လိုလားပါ၏၊ ကိုယ်တော့်အပေါ် ကျွန်ုပ်၏ အချစ်သည် မည်သည့်အခါမျှ ပြောင်းလဲမည်မဟုတ်ပါ” ဟု ဆုတောင်း၍ပင် ပြောဆိုပေမည်။ သင်၏ ဤကြီးကျယ်ခမ်းနားသော စကားများသည် သင့်ကို ပြင်းထန်စွာ ငိုကြွေးသည်အထိ တို့ထိခံစားစေသော်လည်း သင့်အပေါ် ဘုရားသခင်၏ သဘောထားသည် ပြောင်းလဲခြင်းမရှိပေ။ အဘယ်ကြောင့်နည်း။ အကြောင်းမှာ သင်သည် ယာယီ စိတ်လိုက်မာန်ပါမှုတစ်ခုကြောင့် တို့ထိခံစားရခြင်းဖြစ်ပြီး သင်၏ မျက်ရည်များသည် နောင်တ၏ မျက်ရည်များ၊ အကြွေးတင်ခြင်း၏ မျက်ရည်များ မဟုတ်သကဲ့သို့၊ သင်ကိုယ်တိုင်ကို အမှန်တကယ် သိလာခြင်းမှ ကျသော မျက်ရည်များလည်း မဟုတ်ပေ၊ သမ္မာတရားကို လက်တွေ့လုပ်ဆောင်ရန်နှင့် သမ္မာတရား စည်းမျဉ်းများကို စောင့်ထိန်းရန် သင်၏ မစွမ်းဆောင်နိုင်မှုအတွက် ဝမ်းနည်းသည့် မျက်ရည်များလည်း လုံးဝမဟုတ်ပေ။ ထို့ကြောင့် သင်၏ ဤစိတ်ခံစားမှုသည် သင်ကိုယ်တိုင်ကိုသာ တို့ထိခံစားစေနိုင်ပြီး အခြားသူများ သို့မဟုတ် သင်၏ ပတ်ဝန်းကျင်ရှိသူများကိုလည်း တို့ထိခံစားစေနိုင်သော်လည်း ဘုရားသခင်သည် ယင်းကြောင့် တို့ထိခံစားရခြင်း မရှိချေ။ ထို့ကြောင့် သင့်ကို တို့ထိခံစားစေသည်မှာ သန့်ရှင်းသောဝိညာဉ်တော် မဟုတ်ဘဲ သင်ကိုယ်တိုင်က သင့်ကိုယ်သင် တို့ထိခံစားစေခြင်းသာ ဖြစ်သည်။ သင်၏ မျက်ရည်များသည် သင်ကိုယ်တိုင် တို့ထိခံစားစေသောကြောင့် စီးကျလာခြင်း ဖြစ်သည်။ သင်၏ မျက်ရည်များ၊ သင်၏ စိတ်လှုပ်ရှားစွာ ပြောသောစကားများနှင့် သင်၏ ပြင်းပြသော စိတ်အားထက်သန်မှုတို့သည် အပေါ်ယံ ဖြစ်စဉ်တစ်ခုသာ ဖြစ်သည်၊ ယင်းတို့သည် အပြုအမူတစ်မျိုးသာ ဖြစ်သည်။ ယင်းတို့သည် သင်၏ အနှစ်သာရနှင့် အသက်တာအတွက် ပြောင်းလဲခြင်းတစ်ခုမဟုတ်သကဲ့သို့ သမ္မာတရားသည် သင်၏ အသက်ဖြစ်ခြင်း၏ ထုတ်ဖော်ပြသမှုတစ်ခုလည်း မဟုတ်ပေ။ သင်သည် ဘုရားသခင်အတွက် မိမိကိုယ်ကို အသုံးခံရန်နှင့် ဆင်းရဲဒုက္ခခံရန် စိတ်အားထက်သန်မှုနှင့် စိတ်လိုက်မာန်ပါမှု ရှိပြီး အထူးတက်ကြွနေသည့်အခါ ယင်းမှာ သင့်ကို တို့ထိခံစားစေသော သန့်ရှင်းသောဝိညာဉ်တော် ဖြစ်သည်ဟုလည်းကောင်း၊ သင်ပြောင်းလဲခဲ့ပြီးဖြစ်သည်ဟုလည်းကောင်း၊ သင်သည် ကယ်တင်ခြင်းခံရမည့်သူတစ်ဦးဖြစ်သည်ဟုလည်းကောင်း သင်ခံစားရသည်၊ ဤသည်မှာ ဘုရားသခင်၏ အမှုတော်နှင့်ပတ်သက်၍ သင်၌ရှိသော အယူအဆနှင့် စိတ်ကူးတစ်မျိုး ဖြစ်သည်။ သင်သည် ယာယီ ကျရှုံးခြင်းနှင့် လဲကျခြင်းကြောင့်ဖြစ်စေ၊ သင်၏ ဖောက်ပြန်ပျက်စီးခြင်းနှင့် ချို့တဲ့မှုများ ထုတ်ဖော်ခံရသောကြောင့်ဖြစ်စေ၊ သို့မဟုတ် သင်သည် ပြုပြင်ခြင်းနှင့် ထုတ်ဖော်ခြင်းခံရသောကြောင့်ဖြစ်စေ အပျက်သဘောဆောင်လာသည့်အခါ သင်သည် ဝမ်းနည်းပြီး နာကျင်သည်ဟု ခံစားရကာ သင်မပြောင်းလဲသေးကြောင်းနှင့် ကယ်တင်ခြင်းခံရရန် မျှော်လင့်ချက်မရှိတော့ကြောင်း တွေးထင်သည်၊ ဤသည်မှာ ဘုရားသခင်၏ အမှုတော်နှင့်ပတ်သက်၍ သင်၌ရှိသော အခြားအယူအဆနှင့် စိတ်ကူးတစ်မျိုး ဖြစ်သည်။ အမှန်မှာ ဘုရားသခင် မြင်တွေ့သည့်အရာ မည်သို့ပင်ဖြစ်စေ၊ သင်သည် အပျက်သဘောဆောင်သော သို့မဟုတ် အပြုသဘောဆောင်သော အခြေအနေ၌ ရှိသည်ဖြစ်စေ၊ သို့မဟုတ် သင်၏ အခြေအနေသည် မည်သည့်အတိုင်းအတာအထိ ဆိုးရွားပြီး ကျဆင်းသွားသည်ဖြစ်စေ ဘုရားသခင်သည် သင့်ကို အစဉ်တစ်လျှောက် မည်သို့ ရှုမြင်တော်မူသနည်း။ သင်၏ ဝိညာဉ်ရင့်ကျက်မှုသည် ရှိရင်းစွဲအတိုင်းပင် ဖြစ်သည်။ ဘုရားသခင်သည် သင်မည်မျှ ပြောင်းလဲခဲ့သည်ကိုလည်းကောင်း၊ သင်သည် သမ္မာတရား လက်တွေ့ကျမှုမည်မျှ ဝင်ရောက်ခဲ့သည်ကိုလည်းကောင်း သင်၏ အမှန်တကယ်ရှိသော အခြေအနေ၊ သင်၏ အမှန်တကယ်ရှိသော သရုပ်သကန်များနှင့် သင်၏ အမှန်တကယ်ရှိသော ဝိညာဉ်ရင့်ကျက်မှုကို အခြေခံ၍ ဆုံးဖြတ်တော်မူလိမ့်မည်။ သင်၏ လက်ရှိ ပြန်လည် နလန်မထူနိုင်ခြင်းနှင့် သင်၏ လက်ရှိ လုံးဝ စိတ်မချမ်းမသာဖြစ်ခြင်းထဲသို့ ကျရောက်ခြင်းတို့သည် ဘုရားသခင်က သင့်ကို ရှုမြင်သည့် သို့မဟုတ် သင်၏ အမှန်တကယ်ရှိသော ဝိညာဉ်ရင့်ကျက်မှုကို ဆုံးဖြတ်သည့် စံနှုန်းမဟုတ်ပေ။ သို့ဖြစ်၍ သင်သည် အပြုသဘောဆောင်သော အခြေအနေ၌ ရှိသည်ဖြစ်စေ၊ အပျက်သဘောဆောင်သော အခြေအနေ၌ ရှိသည်ဖြစ်စေ၊ သင်သည် ပြင်းပြသော စိတ်အားထက်သန်မှုဖြင့် ပြည့်နေသည်ဖြစ်စေ၊ စိတ်မချမ်းမသာဖြစ်နေသည်ဟု ခံစားရသည်ဖြစ်စေ ယင်းသည် သင်၏အပေါ် ဘုရားသခင်၏ အကဲဖြတ်ခြင်းနှင့် သတ်မှတ်ခြင်းကို သက်ရောက်မှုရှိမည်မဟုတ်ပေ။ သင်သည် ဘုရားသခင်၏ အမှုတော်နှင့်ပတ်သက်၍ များစွာသော အယူအဆများနှင့် စိတ်ကူးများ ရှိသောကြောင့် သင်၏ ယာယီ ထုတ်ဖော်မှုများနှင့် သရုပ်သကန်များကို အခြေခံ၍ မိမိကိုယ်ကို မှားယွင်းစွာ သတ်မှတ်သည့် တစ်ဦးတည်းသောသူ ဖြစ်သည်၊ ပေတရုကဲ့သို့ ဖြစ်နေပြီဖြစ်သောသူတစ်ဦးအဖြစ်ဖြစ်စေ၊ ကယ်တင်၍မရနိုင်တော့သောသူတစ်ဦးအဖြစ်ဖြစ်စေ သတ်မှတ်ခြင်း ဖြစ်သည်။ သို့သော် သင်သည် မည်သို့ပင် အဆုံးအဖြတ်ပေးပါစေ၊ သင်သည် မည်သို့သော ကောင်းသော သို့မဟုတ် မကောင်းသော ခံစားချက်များကို တွေ့ကြုံရပါစေ ယင်းတို့အားလုံးသည် ဘုရားသခင်၏ အမှုတော်နှင့်ပတ်သက်၍ သင်၌ ဖြစ်ပေါ်လာသော အယူအဆများနှင့် စိတ်ကူးများကြောင့် ဖြစ်ရခြင်းဖြစ်ပြီး ဤအယူအဆများနှင့် စိတ်ကူးများသည် လူတစ်ဦးအပေါ် ဘုရားသခင်၏ တိကျပြီး လက်တွေ့ကျသော အဓိပ္ပာယ်ဖွင့်ဆိုချက်နှင့် ကိုယ်တော်ချမှတ်သော တိကျပြီး လက်တွေ့ကျသော အဆုံးအဖြတ်တို့နှင့် မကိုက်ညီပေ။ ဤသည်မှာ ထိုသို့မဟုတ်ပေလော။ (ဟုတ်ပါသည်။) ထို့ကြောင့် ၎င်းတို့၏ ကိုယ်ပိုင် သရုပ်သကန်များဖြစ်စေ၊ ၎င်းတို့၏ ကိုယ်ပိုင် အနှစ်သာရဖြစ်စေ၊ မိမိတို့ကိုယ်ကို နောက်ဆုံး သတ်မှတ်ခြင်းဖြစ်စေ လူတို့သည် ဤအရာများကို မိမိတို့၏ ကိုယ်ပိုင် အယူအဆများနှင့် စိတ်ကူးများကို အခြေခံ၍ အဆုံးအဖြတ် မပေးနိုင်ပေ။ ထိုအစား ၎င်းတို့သည် ဤအရာများကို ဘုရားသခင်၏ အမှုတော်၏ ပုံမှန် နိယာမများနှင့် ဘုရားသခင်က မိမိ၏ အမှုတော်၌ ရရှိလိုသော အမှန်တကယ်ရှိသော ရလဒ်များကို အခြေခံ၍ဖြစ်စေ၊ သို့မဟုတ် ဘုရားသခင် အမှုပြုသည့် နည်းလမ်းများနှင့် လူတို့အပေါ် ကိုယ်တော်၏ တိကျသော အဓိပ္ပာယ်ဖွင့်ဆိုချက်များကို အခြေခံ၍ဖြစ်စေ တိုင်းတာသင့်သည်။ ဤနေရာတွင် ဘုရားသခင်၏ အမှုတော်နှင့်ပတ်သက်၍ လူတို့၏ အဓိက အယူအဆများနှင့် စိတ်ကူးများမှာ အဘယ်နည်း။ လူတို့သည် မိမိတို့၏ အမှန်တကယ်ရှိသော ဝိညာဉ်ရင့်ကျက်မှုသည် မိမိတို့၏ ယာယီ သရုပ်သကန်များ သို့မဟုတ် ကာလတစ်ခုအတွင်း မိမိတို့၏ သရုပ်သကန်များကို အခြေခံ၍ ဆုံးဖြတ်သည်ဟု ယုံကြည်ကြသည်။ ၎င်းတို့သည် ဤကာလအတွင်း ကောင်းသော အခြေအနေ၌ ရှိနေပါက သန့်ရှင်းသောဝိညာဉ်တော်သည် ၎င်းတို့အပေါ် အမှုပြုမည်ဖြစ်ပြီး ၎င်းတို့သည် ပြောင်းလဲမည်ဖြစ်ကာ အသက်ကို ပိုင်ဆိုင်ပြီး ဝိညာဉ်ရင့်ကျက်မှု ကြီးထွားလာကာ ကယ်တင်ခြင်းကို ရရှိနိုင်မည်ဖြစ်သည်။ ၎င်းတို့သည် ဤကာလအတွင်း မကောင်းသော အခြေအနေ၌ ရှိနေပြီး ဘုရားသခင်အပေါ် စစ်မှန်သော ယုံကြည်ခြင်း တစ်စုံတစ်ရာ မရှိပါက ဤသည်မှာ ၎င်းတို့၌ မည်သည့် ဝိညာဉ်ရင့်ကျက်မှုမျှ မရှိဟု ဆိုလိုသည်။ ဤသည်တို့မှာ လူတို့၏ အယူအဆများနှင့် စိတ်ကူးများ မဟုတ်လော။ (ဟုတ်ပါသည်။) ဘုရားသခင်၏ အမှုတော်နှင့်ပတ်သက်၍ လူတို့၌ရှိသော အယူအဆနှင့် စိတ်ကူးတစ်ခုမှာ ကိုယ်တော်၏ အမှုတော်သည် လူတို့အပေါ် ရေရှည်နှင့် စဉ်ဆက်မပြတ်သော နည်းလမ်းဖြင့် ဆောင်ရွက်ခြင်းမဟုတ်ဘဲ၊ ခွန်အားတစ်ဟုန်ထိုး ထွက်ပေါ်လာခြင်းနှင့် ယာယီ စိတ်လိုက်မာန်ပါမှုတစ်ခုကို ၎င်းတို့အား ထင်ရှားပြစေလျက် ဉာဏ်အလင်းအနည်းငယ်ကို ခဏတာမျှ ပေးခြင်းသာဖြစ်သည်ဟူ၍ ဖြစ်သည်။ အခြားတစ်မျိုးမှာ လူတို့သည် ဘုရားသခင်၏ အမှုတော်သည် သဘာဝလွန်ဖြစ်သည်ဟု ယုံကြည်ကြသည်၊ ကိုယ်တော်သည် လူတို့ကို အပြုသဘောဆောင်သော သဘောထားရှိစေရန်နှင့် ဆင်းရဲဒုက္ခခံရန်နှင့် ကိုယ်တော့်အတွက် မိမိတို့ကိုယ်ကို အသုံးခံရန် အလိုရှိစေရန် တို့ထိခံစားစေပြီး ထို့နောက်တွင် ၎င်းတို့သည် ဝိညာဉ်ရင့်ကျက်မှု ရရှိကာ ဘုရားသခင်၏ သမ္မာတရားကို မိမိတို့၏ အသက်အဖြစ် ရှိသောသူများ ဖြစ်လာကြသည်ဟု ယုံကြည်ကြသည်။ ၎င်းတို့သည် ပြဿနာတစ်ခုကြောင့် အားနည်းလာပါက ၎င်းတို့ ကျရှုံကာ ထုတ်ဖော်ခံရပြီဖြစ်ကြောင်း ဘုရားသခင်က ဆုံးဖြတ်မည်ဖြစ်ပြီး ထို့နောက်တွင် ၎င်းတို့သည် ဘုရားသခင်၏ ပြစ်တင်ရှုတ်ချခြင်းကို ခံရကာ ကိုယ်တော်၏ ဖယ်ရှားရှင်းလင်းခြင်းနှင့် စွန့်ပစ်ခြင်းတို့ကို ခံရမည်ဟု ၎င်းတို့ ယုံကြည်ကြသည်။ ဤသည်တို့မှာ လူတို့၏ အယူအဆများနှင့် စိတ်ကူးများ မဟုတ်လော။ (ဟုတ်ပါသည်။)

ငါတို့ခုလေးတင်မိတ်သဟာယဖွဲ့ခဲ့သော လူတို့၏ အယူအဆများနှင့် စိတ်ကူးများမှာ အဘယ်အရာများ ဖြစ်သနည်း။ (လူတို့သည် ဘုရားသခင်၏ အမှုတော်နှင့်ပတ်သက်၍ အယူအဆများနှင့် စိတ်ကူးများ အမျိုးမျိုးရှိကြသည်။ ၎င်းတို့က လူတစ်ဦး၏ အမှန်တကယ်ရှိသော ဝိညာဉ်ရင့်ကျက်မှုကို အချိန်ကာလတစ်ခုအတွင်း ၎င်းတို့၏ သရုပ်သကန်များဖြင့်ဖြစ်စေ၊ ၎င်းတို့၏ ယာယီသရုပ်သကန်များဖြင့်ဖြစ်စေ ဆုံးဖြတ်သည်ဟု ယုံကြည်ကြပြီး လူတို့အပေါ် ဘုရားသခင်၏ အမှုတော်သည် ရေရှည်နှင့် အဆက်မပြတ်ဖြစ်မည့်အစား ခဏအတွင်း၌သာ ဖြစ်ပျက်သည်ဟု ထင်မှတ်ကြသည်။ ဘုရားသခင်၏ အမှုတော်သည် အလွန် သဘာဝလွန်ပြီး ဘုရားသခင်က လူတို့ကို မကြာခဏ တို့ထိသည်ဟုလည်း လူတို့က ယုံကြည်ကြသည်။ လူတို့သည် သန့်ရှင်းသောဝိညာဉ်တော်၏ ခဏတာ တို့ထိခြင်းကို ခံရသည့်အခါ ၎င်းတို့သည် စုံလင်အောင် ပြုခြင်းခံရတော့မည်ဟုဖြစ်စေ၊ ပေတရု၏ စံနှုန်းကို ရရှိရန် ပို၍နီးစပ်နေပြီဟုဖြစ်စေ ခံစားကြရပြီး လူတို့ ကျရှုံး၍ အားနည်းလာသည့်အခါတွင်မူ ၎င်းတို့သည် ဖယ်ရှားရှင်းလင်းခြင်းခံရပြီဖြစ်ကြောင်း ဆုံးဖြတ်ကြသည်။) ဤကိစ္စနှင့်ပတ်သက်၍ ဘုရားသခင်၏ အမှုတော်အပေါ် လူတို့၏ အယူအဆများနှင့် စိတ်ကူးများမှာ အဘယ်အရာများ ဖြစ်သနည်း။ လူတို့သည် ၎င်းတို့၏ ယာယီသရုပ်သကန်များက ၎င်းတို့၏ အမှန်တကယ်ရှိသော ဝိညာဉ်ရင့်ကျက်မှုကို ကိုယ်စားပြုသည်ဟုလည်းကောင်း၊ ဘုရားသခင်သည် လူတို့ကို ၎င်းတို့၏ ယာယီသရုပ်သကန်များကို အခြေခံ၍ ဆုံးဖြတ်သတ်မှတ်သည်ဟုလည်းကောင်း ယုံကြည်ကြသည်။ လူတို့သည် ဘုရားသခင်က လူတို့ ဆင်းရဲဒုက္ခခံပြီး အဖိုးအခပေးသည်ကို မြင်လိုသည်ဟုလည်းကောင်း၊ လူတို့ မကြာခဏ ဆုတောင်းပြီး သန္နိဋ္ဌာန်များချကာ မျက်ရည်လည်ရွှဲဖြင့် ငိုကြွေးသည်အထိ တို့ထိခံစားကြသည်ကို မြင်လိုသည်ဟုလည်းကောင်း၊ လူတို့သည် အမှုအရာများကို စွန့်လွှတ်နိုင်ပြီး မိမိတို့ကိုယ်ကို အသုံးခံကာ လုံ့လဝီရိယရှိရှိ အလုပ်လုပ်နိုင်သည်ကိုလည်းကောင်း၊ ဇာတိပကတိ၏ အမျိုးမျိုးသော အခက်အခဲများကို ကျော်လွှားနိုင်သည်ကိုလည်းကောင်း သူနှစ်သက်သည်ဟု ထင်မှတ်ကြသည်။ ၎င်းတို့သည် စည်းမျဉ်းများနှင့်အညီဖြစ်စေ၊ သမ္မာတရားနှင့်အညီဖြစ်စေ ပြုမူခြင်း ရှိရှိ မရှိရှိ အရေးမကြီးဘဲ ၎င်းတို့သည် မကြာခဏ အဖိုးအခပေးနိုင်သရွေ့ မိမိတို့၏ တာဝန်ကို ထမ်းဆောင်ရာတွင် အစားပျက်ခံ၊ အအိပ်ပျက်ခံခြင်း၊ စောစောထ၍ နောက်ကျမှအိပ်ခြင်း၊ နေ့ရောညပါ အလုပ်လုပ်ခြင်းတို့ကို မကြာခဏ ပြုလုပ်သရွေ့ ဘုရားသခင်သည် ဤအရာကို နှစ်သက်လိမ့်မည်ဟု ထင်မှတ်ကြသည်။ ဤသည်မှာ ဘုရားသခင် မည်သည့်အမှုကို ပြုသည်ဖြစ်စေ၊ နှုတ်ကပတ်တော် မည်မျှ ပြောဆိုသည်ဖြစ်စေ လူအားလုံးသည် သူ့အတွက် ဆင်းရဲဒုက္ခခံပြီး အဖိုးအခပေးနိုင်ရန်၊ အစားကောင်းအသောက်ကောင်းများ မစားရန် သို့မဟုတ် ဝတ်ကောင်းစားလှများ မဝတ်ဆင်ရန်၊ အားလပ်ချိန် တစ်ခုမျှ မရှိရန် သူမျှော်လင့်သည်ဟု သွယ်ဝိုက်ညွှန်းဆိုနေပြီး ၎င်းတို့သည် နေ့ရက်တိုင်းကို မိမိတို့၏ တာဝန်များကို ထမ်းဆောင်ခြင်း သို့မဟုတ် ဆုတောင်းခြင်းဖြင့် ကုန်ဆုံးရမည်ဖြစ်ကာ မကြာခဏ သန္နိဋ္ဌာန်များချခြင်း၊ မိမိတို့၏ စိတ်ပိုင်းဖြတ်မှုကို ဖော်ပြခြင်း၊ စိတ်ပိုင်းဖြတ်ခြင်းနှင့် သစ္စာဆိုခြင်းတို့ကို ပြုလုပ်ရမည် ဖြစ်သည်။ အချို့လူများက ဘုရားသခင်သည် လူတို့၏ စိတ်နှလုံးနှင့် ခြေလက်များကို ချုပ်တည်းလိုသည်ဟုလည်းကောင်း၊ သူသည် လူတို့ကို လွတ်လပ်မှုနှင့် လွတ်မြောက်မှုကို မပေးဘဲ ၎င်းတို့ကို လွတ်မြောက်နိုင်ခြင်းမရှိစေရန် ဖိနှိပ်ခံရသည်ဟု ခံစားစေကာ ပုံမှန်လူ့သဘာဝရှိသော အသက်တာ၏ လွတ်လပ်ခွင့်ကို နုတ်ယူသည်ဟုလည်းကောင်း ထင်မှတ်ကြသည်။ လူတို့သည် ဤသို့ ထင်မှတ်ကြသည် မဟုတ်လော။ (ဟုတ်ပါသည်။) လူတို့သည် အခြားမည်သည့်အရာကို ထင်မှတ်ကြသေးသနည်း။ ဘုရားသခင်သည် လူတို့ကို ကျရှုံးခွင့်၊ အားနည်းခြင်း သို့မဟုတ် ဖောက်ပြန်ပျက်စီးခြင်းကို ထုတ်ဖော်ခွင့် သို့မဟုတ် ၎င်းတို့၏ ချို့ယွင်းချက်များကို ပြသခွင့် မပြုဟု ထင်မှတ်ကြသည်။ လူတို့သည် ကယ်တင်ခြင်းကို ရရှိပြီး စုံလင်အောင် ပြုခြင်းခံရလိုပါက မိမိတို့၏ တာဝန်ကို ထမ်းဆောင်သည့် လုပ်ငန်းစဉ်တွင် လုံးဝ အားနည်းခြင်းမရှိနိုင်ဟုလည်းကောင်း၊ ပုံမှန်လူ့သဘာဝ၏ လိုအပ်ချက်များ၊ ချို့ယွင်းချက်များ သို့မဟုတ် အပြစ်အနာအဆာများ တစ်ခုမျှ မရှိနိုင်ဟုလည်းကောင်း၊ မည်သည့် ဖောက်ပြန်ပျက်စီးသော စိတ်သဘောထားများကိုမျှ ထုတ်ဖော်ခြင်း မပြုရဟုလည်းကောင်း ယုံကြည်ကြသည်။ ဤသည်တို့မှာ လူတို့၏ အယူအဆများနှင့် စိတ်ကူးများ မဟုတ်လော။ (ဟုတ်ပါသည်။) လူတို့၏ အယူအဆများနှင့် စိတ်ကူးများထဲတွင် ၎င်းတို့သည် ဘုရားသခင်၏ အမှုတော်နှင့် လမ်းညွှန်မှုအောက်၌ စိတ်နှလုံးနုပျိုနေရမည်၊ စိတ်အားထက်သန်နေရမည်၊ မိမိတို့၏ အလုပ်အတွက် ပြင်းပြသော စိတ်အားထက်သန်မှု အပြည့်ရှိရမည်၊ ယင်းအပေါ် လေးနက်သော သဘောထားရှိရမည်၊ ထို့အပြင် အစဉ်သဖြင့် တင်းတင်းကျပ်ကျပ်ဖြစ်နေပြီး မည်သည့်အခါမျှ အပန်းမဖြေရဟု ထင်မှတ်ကြသည်။ ဤသည်မှာ လူတို့ ထင်မှတ်သည့်အရာ မဟုတ်လော။ ဤသည်မှာ လူတို့၌ရှိသော အယူအဆနှင့် စိတ်ကူးတစ်ခုလော သို့မဟုတ် လူတို့အပေါ် ဘုရားသခင်၏ စစ်မှန်သော တောင်းဆိုချက်လော။ (ဤသည်မှာ လူတို့၌ရှိသော အယူအဆနှင့် စိတ်ကူးတစ်ခု ဖြစ်ပါသည်။) လူတို့သည် မိမိတို့ အနည်းငယ် အပျက်သဘောဆောင်ပြီး အားနည်းပါက သို့မဟုတ် အနည်းငယ် ဇာတိပကတိဆိုင်ရာ အခက်အခဲရှိပါက သို့မဟုတ် ၎င်းတို့၏ လူ့သဘာဝ၌ ချို့ယွင်းချက်များ သို့မဟုတ် အပြစ်အနာအဆာအချို့ ရှိပါက သို့မဟုတ် ဖောက်ပြန်ပျက်စီးသော စိတ်သဘောထားများကို ထုတ်ဖော်ပါက၊ ရံဖန်ရံခါ ဇာတိပကတိဆိုင်ရာ သက်သောင့်သက်သာဖြစ်မှုကို တပ်မက်ပါက ဘုရားသခင်သည် ၎င်းတို့ကို အလိုရှိတော့မည်မဟုတ်၊ သူသည် ၎င်းတို့အား စကားပြောတော့မည်မဟုတ် သို့မဟုတ် ၎င်းတို့အပေါ် အမှုပြုတော့မည်မဟုတ်၊ ၎င်းတို့သည် ဖယ်ရှားရှင်းလင်းခြင်းခံရမည်ဖြစ်ပြီး ကယ်တင်ခြင်းခံရရန် မျှော်လင့်ချက်မရှိတော့ဟု ထင်မှတ်ကြသည်။ ဤသည်မှာ စင်စစ်အားဖြင့် မှန်ကန်သလော။ (မဟုတ်ပါ။) ဤသည်တို့မှာ လူတို့၏ အယူအဆများနှင့် စိတ်ကူးများ မဟုတ်လော။ (ဟုတ်ပါသည်။) လူတို့၏ အယူအဆများနှင့် စိတ်ကူးများထဲတွင် ၎င်းတို့သည် တစ်ဖက်တွင် ဘုရားသခင်က မိမိတို့၏ အလုပ်နှင့်ပတ်သက်၍ အစဉ်သဖြင့် စိတ်အားထက်သန်မှုနှင့် ပြင်းပြသော စိတ်အားထက်သန်မှုတို့ အပြည့်ရှိသောလူများကို နှစ်သက်သည်ဟုလည်းကောင်း၊ အခြားတစ်ဖက်တွင်မူ ဘုရားသခင်သည် လူတို့၏ အပျက်သဘောဆောင်ခြင်းကို မနှစ်သက်ဘဲ ၎င်းတို့၏ အားနည်းချက်များကို ပြသခွင့်မပြုဟုလည်းကောင်း ယုံကြည်ကြသည်။ တစ်နည်းအားဖြင့်ဆိုသော် လူတို့သည် ဘုရားသခင်က ခြိုးခြံစွာကျင့်ကြံသူများကို နှစ်သက်သည်ဟု ထင်မှတ်ကြသည် မဟုတ်လော။ ၎င်းတို့သည် မိမိတို့၏ တစ်သက်တာလုံးကို ဆင်းရဲစွာ နေထိုင်ရန်၊ ပြင်ပကိစ္စများကို လုံးဝ အာရုံမစိုက်ရန်၊ နေ့စဉ်နေ့တိုင်း ဘုရားသခင်၏ နှုတ်ကပတ်တော်များကို မှိန်ဖျော့သော အေးစက်သည့် ဆီမီးခွက်၏ အလင်းရောင်အောက်တွင် ဖတ်ရှုရန် လိုအပ်သည်ဟု ထင်မှတ်ကြသည်၊ နံနက်ခင်းနှင့် ညနေခင်း ဆုတောင်းချက်များ နှစ်မျိုးစလုံးသည် မဖြစ်မနေလုပ်ရမည့်အရာဖြစ်သည်ဟုလည်းကောင်း၊ အစာမစားမီတိုင်း ဘုရားသခင်ကို ကျေးဇူးတော် ချီးမွမ်းရမည်ဟုလည်းကောင်း၊ ပုံမှန်လူ့သဘာဝ၏ အမျိုးမျိုးသော လိုအပ်ချက်များ တစ်ခုမျှ မရှိနိုင်ဟုလည်းကောင်း ၎င်းတို့ ယုံကြည်ကြသည်။ ထိုသို့ပြုမှသာ ၎င်းတို့ကို ဘုရားသခင်အပေါ် အကြွင်းမဲ့ သစ္စာစောင့်သိသူများနှင့် မိမိတို့၏ အလုပ်အပေါ် အကြွင်းမဲ့ သစ္စာရှိသူများအဖြစ် မှတ်ယူနိုင်မည်ဖြစ်ပြီး ဤသို့သော စိတ်အားထက်သန်မှုကို ထိန်းသိမ်းထားခြင်းဖြင့်သာ ၎င်းတို့သည် ဘုရားသခင်၏ နှစ်သက်ခြင်းကို ခံရနိုင်ပြီး ဘုရားသခင် ကယ်တင်လိုကာ စုံလင်စေလိုသောသူတစ်ဦး ဖြစ်နိုင်မည်ဟု ၎င်းတို့ ယုံကြည်ကြသည်။ လူတို့သည် ဤအယူအဆများနှင့် စိတ်ကူးများ ရှိသောကြောင့် အချို့သည် ရံဖန်ရံခါ မိမိတို့၏ မိသားစုကို လွမ်းဆွတ်သည့်အခါ စိတ်ထဲ၌ အထူးပင် အပြစ်တင်ခံရသည်ဟု ခံစားကြရပြီး ရံဖန်ရံခါ အတန်ငယ် စကားစမြည်ပြောသည့်အခါတိုင်းတွင်လည်း ဘုရားသခင်က ၎င်းတို့ကို အပြစ်တင်လိမ့်မည်ဟု ထင်မှတ်လျက် စိတ်မသက်မသာ ခံစားကြရသည်။ အချို့သော အမျိုးသမီးငယ်များသည် ရံဖန်ရံခါ အနည်းငယ် တက်ကြွပြီး အတော်အတန် ခေတ်မီသော အဝတ်အစားများကို ဝတ်ဆင်သည့်အခါ တစ်ကိုယ်လုံး မသက်မသာ ခံစားကြရပြီး “ကျွန်ုပ် ဤကဲ့သို့ ဝတ်ဆင်သည်မှာ မတော်တရော် ဖြစ်နေသလော။ ယင်းမှာ အနည်းငယ် အကျင့်ပျက်သည် မဟုတ်လော” ဟု ထင်ကြသည်။ အမှန်မှာ ၎င်းတို့သည် ထူးဆန်းသော ဝတ်စုံများ သို့မဟုတ် ခန္ဓာကိုယ်ကို ဖော်ပြသော အဝတ်အစားများကို ဝတ်ဆင်ထားခြင်း မဟုတ်သော်လည်း ၎င်းတို့သည် ကိုယ်ကျင့်တရား ပျက်သည်ဟု ခံစားရပြီး “ဘုရားသခင်က ငါ့ကို စိတ်ထဲတွင် အပြစ်တင်နေသည်။ ဤအရာ လုပ်ဆောင်သည်ကို သူ မကြိုက်” ဟု ထင်မှတ်ကြသည်။ ဘုရားသခင် မကြိုက်ဟု သင်ထင်လျှင် သင်သည် အဘယ်ကြောင့် ဘုန်းကြီးသင်္ကန်း သို့မဟုတ် ရသေ့ဝတ်ရုံကို မဝတ်ဆင်သနည်း။ ယင်းမှာ မည်မျှ “ကျက်သရေရှိ” ပြီး “သင့်တော်” လိုက်ပါဘိ။ ယင်းဆိုလျှင် ကိုယ်ကျင့်တရားပျက်တော့မည် မဟုတ်ပေ၊ ဟုတ်သည် မဟုတ်လော။ အချို့လူများသည် ရံဖန်ရံခါ မာနအနည်းငယ်ကို စိတ်အလိုလိုက်ခြင်း သို့မဟုတ် မိမိကိုယ်ကို ဂုဏ်ဖော်ခြင်း ပြုလုပ်ပြီးနောက် စိတ်ထဲ၌ အပြစ်တင်ခံရပြီး မသက်မသာဖြစ်ကာ “ဘုရားသခင်က ငါ့ကို မကြိုက်တော့ပါ။ သူ ငါ့ကို မလိုချင်တော့ပါ” ဟု ထင်မှတ်ကြသည်။ အချို့လူများဆိုလျှင် မိမိတို့ကိုယ်ကို ဆံပင်မဖြီးရန်၊ မိတ်ကပ်မလိမ်းရန် သို့မဟုတ် မှန်မကြည့်ရန် စည်းမျဉ်းများပင် သတ်မှတ်ကြပြီး တစ်လလျှင် တစ်ကြိမ် သို့မဟုတ် ခြောက်လလျှင် တစ်ကြိမ်သာ ရေချိုးနိုင်သည်ဟု သတ်မှတ်ကာ တစ်လလျှင် တစ်ကြိမ် သို့မဟုတ် ခြောက်လလျှင် တစ်ကြိမ်ထက် ပို၍မကြာခဏ ရေချိုးပါက ဤသည်မှာ ဘုရားသခင် ရွံရှာသည့်အရာဖြစ်ပြီး ၎င်းတို့သည် ကယ်တင်ခြင်းကို သေချာပေါက် ခံရမည်မဟုတ်ဟု ထင်မှတ်ကြသည်။ ၎င်းတို့သည် နံနက် ငါးနာရီမတိုင်မီ ထရမည်ဟု စည်းမျဉ်းတစ်ခု သတ်မှတ်ပြီး နာရီဝက်နောက်ကျ၍ ထပါက သက်သောင့်သက်သာ ဖြစ်မှုကို စိတ်အလိုလိုက်ခြင်းဖြစ်ပြီး ဘုရားသခင်ကို ချစ်သောလူများ မဟုတ်ဟု ထင်မှတ်ကြသည်၊ ၎င်းတို့သည် သန်းခေါင်ကျော်မှ အိပ်ရာဝင်ရမည်ဟု စည်းမျဉ်းတစ်ခု သတ်မှတ်ပြီး သန်းခေါင်မတိုင်မီ အိပ်ရာဝင်ပါက မိမိတို့၏ တာဝန်ကို သစ္စာရှိရှိ ထမ်းဆောင်သောသူတစ်ဦး မဟုတ်ဟု ထင်မှတ်ကြသည်။ ဤလူတို့သည် မိမိတို့၏ အပြုအမူ၊ နေ့စဉ်အသက်တာနှင့် ဘဝလိုအပ်ချက်များအတွက် သတ်မှတ်ထားသော စည်းမျဉ်းများစွာကို ဖန်တီးကြသည်။ ၎င်းတို့သည် ဘုရားသခင်၏ တောင်းဆိုချက်များမှာ အဘယ်အရာ ဖြစ်သည်ကို မရှာဖွေကြသကဲ့သို့ ဤကိစ္စရပ်များအပေါ် ဘုရားသခင်၏ ရှုမြင်ပုံများနှင့် သဘောထားများမှာ အဘယ်အရာဖြစ်သည်ကို နားလည်ရန်လည်း မကြိုးစားကြပေ။ ထိုအစား ၎င်းတို့သည် ဘုရားသခင်၏ အမှုတော်တွင် ဘုရားသခင်က လူတို့ကို ဤသရုပ်သကန်များ ရှိခွင့်မပြုဟုလည်းကောင်း၊ ၎င်းတို့၌ ဤသရုပ်သကန်များ ရှိပါက လုံးလုံးလျားလျား ပုန်ကန်နေခြင်းဖြစ်ပြီး ဘုရားသခင် ရွံရှာသည့်အတွက် ကယ်တင်ခြင်းကို မခံရနိုင်ဟုလည်းကောင်း လုံးဝ ပုဂ္ဂလဓိဋ္ဌာန်ကျသောပုံစံဖြင့် ယုံကြည်ကြသည်။ မကြာခဏဆိုသလို၊ မှားယွင်းသောစကားကို ပြောဆိုခြင်း၊ မှားယွင်းသောစကားလုံးကို အသုံးပြုခြင်း၊ သရေစာအနည်းငယ် ပိုစားမိခြင်း သို့မဟုတ် ရံဖန်ရံခါ ဖျော်ဖြေရေးဗီဒီယိုအချို့ကို ကြည့်ရှုခြင်းကဲ့သို့သော ပြောပလောက်အောင်မရှိသည့် အသေးအဖွဲကိစ္စအချို့ကြောင့် လူတို့သည် “ငါတော့ သွားပြီ၊ ဤသည်မှာ ငါ့အတွက် လုံးလုံးလျားလျား ပုန်ကန်ခြင်းပင်တကား။ ငါ့မှာ ထိုသို့သော အပြုအမူများနှင့် ထိုသို့သော နှစ်သက်မှုများ ရှိနိုင်မှန်း ငါမသိခဲ့ပါတကား၊ ငါ့မှာ ဤပြဿနာများ ရှိနေသေးမှန်းပင် ငါမသိခဲ့ပါ။ ဤသည်မှာ ဆိုးရွားလှသည်။ ငါသည် မိမိကိုယ်ကို နက်နက်ရှိုင်းရှိုင်း ဆင်ခြင်သုံးသပ်ရမည်၊ ငါ့စိတ်ဝိညာဉ်၏ နက်ရှိုင်းသောနေရာ၌ မိမိကိုယ်ကို စိတ်ဖြာလေ့လာဆွေးနွေးရမည်၊ တော်လှန်ရေးတစ်ခုကို ပြုလုပ်ရမည်။ ဤအရာကို ငါလက်လွှတ်၍မဖြစ်” ဟု ထင်မှတ်ကြသည်။ လူတို့သည် သမ္မာတရား စည်းမျဉ်းများနှင့် မည်သို့မျှ မသက်ဆိုင်သော ဤကိစ္စရပ်များကို အလွန်အရေးကြီးသည်ဟု မှတ်ယူကြသည်။ ဤသည်တို့အားလုံးမှာ လူတို့၏ အယူအဆများနှင့် စိတ်ကူးများဖြစ်ပြီး ဘုရားသခင်က ၎င်းတို့ကို ရွံရှာတော်မူသည်။ ဘုရားသခင်သည် လူတို့ ဤသရုပ်သကန်များကို ထုတ်ဖော်သည်ကို မြင်လိုတော်မမူပေ။ သို့ဆိုလျှင် ဤကိစ္စနှင့်ပတ်သက်၍ လူတို့ နားလည်သင့်သော သမ္မာတရားများမှာ အဘယ်နည်း။ စောင့်ထိန်းလိုက်နာသင့်သော စည်းမျဉ်းများမှာ အဘယ်နည်း။ ဤအရာများသည် လူတို့၏ အယူအဆများနှင့် စိတ်ကူးများ ဖြစ်သောကြောင့် ၎င်းတို့သည် ဘုရားသခင်က လူတို့အတွက် တောင်းဆိုသော စည်းမျဉ်းများ သေချာပေါက် မဟုတ်သကဲ့သို့ ဘုရားသခင်၏ လူတို့အတွက် တောင်းဆိုချက်များနှင့်လည်း သေချာပေါက် မည်သို့မျှ မသက်ဆိုင်ပေ။ ပြီးလျှင် ၎င်းတို့သည် အယူအဆများနှင့် စိတ်ကူးများ ဖြစ်သောကြောင့် ၎င်းတို့သည် လူ့စိတ်ထဲတွင် စိတ်ကူးပုံဖော်ပြီး ပေါင်းစပ်ထားခြင်းဖြစ်သည်ဟု ဆိုလိုသည်၊ အတိုချုပ်အားဖြင့် ၎င်းတို့သည် လူတို့၏ စိတ်ထဲမှ လာပြီး ဘုရားသခင်က လူတို့ ပိုင်ဆိုင်ရန် တောင်းဆိုသော သမ္မာတရား လက်တွေ့ကျမှုများနှင့် လုံးဝ သက်ဆိုင်ခြင်းမရှိပေ။ လူတို့သည် ဤအယူအဆများနှင့် စိတ်ကူးများကို မည်သို့ပင် စောင့်ထိန်းလိုက်နာပါစေ၊ ၎င်းတို့သည် သမ္မာတရားနှင့် မည်သို့မျှ မသက်ဆိုင်သရွေ့ လူတို့ ၎င်းတို့ကို စောင့်ထိန်းလိုက်နာခြင်းသည် အချည်းနှီးဖြစ်သည်။ သင်သည် ၎င်းတို့ကို စောင့်ထိန်းလိုက်နာလျှင်ပင် သင်သည် သမ္မာတရား စည်းမျဉ်းများကို စောင့်ထိန်းလိုက်နာနေခြင်း မဟုတ်သဖြင့် ဘုရားသခင်က ယင်းကို အမှတ်ရမည်မဟုတ်ပေ။ အထူးသဖြင့် အချို့လူများသည် ရံဖန်ရံခါ မိမိတို့၏ နှစ်သက်မှုများ သို့မဟုတ် ဇာတိပကတိဆိုင်ရာ အလေ့အထများကို ထုတ်ဖော်သည့်အခါ စိတ်ထဲ၌ အလွန်မသက်မသာဖြစ်ပြီး ပြင်းထန်စွာ အပြစ်တင်ခံရသည်ဟု ခံစားကြရသည်။ ဤမသက်မသာဖြစ်ခြင်းနှင့် မိမိကိုယ်ကို အပြစ်တင်ခြင်းသည် မည်သို့ ဖြစ်ပေါ်လာသနည်း။ ယင်းမှာ သန့်ရှင်းသောဝိညာဉ်တော်၏ တို့ထိခြင်းကို ခံရသည့် ရလဒ်လော။ (မဟုတ်ပါ၊ လူတို့သည် ဘုရားသခင်အပေါ် အယူအဆများနှင့် စိတ်ကူးများ ရှိကြသည်၊ ထို့ကြောင့် ၎င်းတို့ မသက်မသာ ခံစားကြရခြင်း ဖြစ်ပါသည်။) ဤခံစားချက်များ၏ အခြေခံမှာ သမ္မာတရားမဟုတ်ဘဲ လူတို့၏ အယူအဆများနှင့် စိတ်ကူးများ ဖြစ်သည်။ အချို့လူများသည် အလွယ်တကူပင် စိတ်ထဲ၌ အပြစ်တင်ခံရပြီး မသက်မသာဖြစ်ကာ ဆုတောင်းပြီး မိမိတို့၏ အပြစ်များကို ဝန်ခံရန် အလျင်အမြန်သွားကြလျက် အလျင်စလို နောင်တရကြသည်။ သင်သည် အဘယ်အရာအတွက် နောင်တရရန် လိုအပ်သနည်း။ သင်ပြုလုပ်ခဲ့သော ဤအရာများသည် နေ့စဉ်အသက်တာရှိ သာမန်အပြုအမူများ ဖြစ်ကြသည်။ ၎င်းတို့သည် အပြစ်များ မဟုတ်သကဲ့သို့ ကြီးမားသော ပြစ်မှားခြင်းများလည်း သေချာပေါက် မဟုတ်ပေ။ အရေးမပါသော ထိုသို့သောအရာများအတွက် ပမွှားကို ဆင်မလုပ်နှင့်။ ထိုအရာများသည် မှားယွင်းသည်ဟု သင်ထင်လျှင် သင်သည် ၎င်းတို့ကို မပြုလုပ်ရန် ရွေးချယ်နိုင်သည်။ သို့သော် ၎င်းတို့ကို မပြုလုပ်ခြင်းက သင်သည် သမ္မာတရား စည်းမျဉ်းများကို စောင့်ထိန်းလိုက်နာနေသည်ဟု မဆိုလိုသကဲ့သို့ မသက်မသာဖြစ်ခြင်းကလည်း သင်သည် သမ္မာတရား စည်းမျဉ်းများကို ချိုးဖောက်ခဲ့သည်ဟု မဆိုလိုပေ။ သင်သည် အဘယ်ကြောင့် နောင်တရနေသနည်း။ သင်သည် အဘယ်ကြောင့် လမ်းကြောင်းပြောင်းလဲနေသနည်း။ သင်၏ အယူအဆများနှင့် စိတ်ကူးများက ထိုအရာများသည် သင်မပြုလုပ်သင့်သော အပြုအမူများဖြစ်သည်ဟု သင့်အား မှားယွင်းစွာ ယုံကြည်စေသောကြောင့်လော သို့မဟုတ် သင်၏ အပြုအမူများသည် ဘုရားသခင်၏ နှုတ်ကပတ်တော်များနှင့် သမ္မာတရား စည်းမျဉ်းများကို ဆန့်ကျင်သည်ဟု သင်ထင်သောကြောင့်လော။ ၎င်းတို့သည် သမ္မာတရား စည်းမျဉ်းများကို ဆန့်ကျင်ပြီး သင်သည် အမှန်တကယ် မသက်မသာ ခံစားရပါက သင်၏ လမ်းကြောင်းကို အလျင်အမြန် ပြောင်းပြန်လှန်ပြီး ဘုရားသခင်ထံ နောင်တရသင့်သည်။ ဤမသက်မသာဖြစ်ခြင်းသည် အနည်းဆုံးအားဖြင့် လူ့သဘာဝ၏ အသိစိတ်၏ အပြစ်တင်ခြင်း ဖြစ်သည်။ သင်သည် မိမိ၏ အယူအဆများနှင့် စိတ်ကူးများကို ဆန့်ကျင်ခဲ့သည့်အတွက်ကြောင့်သာ မသက်မသာ ခံစားရပါက သင်သည် ကိုယ့်ဘာသာကိုယ် အရေးလုပ်နေခြင်း မဟုတ်လော။ (ဟုတ်ပါသည်။) ဤသည်မှာ ကိုယ့်ဘာသာကိုယ် အရေးလုပ်နေခြင်းသက်သက်ဖြစ်ပြီး ပိုလျှံသောအရာ ဖြစ်သည်။ သင်သည် အန္တိခရစ်များနောက်သို့ လိုက်သည့်အခါ အဘယ်ကြောင့် မသက်မသာ မခံစားရသနည်း။ ထိုအတွက် အဘယ်ကြောင့် အပြစ်တင်ခံရသည်ဟု မခံစားရသနည်း။ သင်သည် ဆိုးယုတ်သောလူများ အသင်းတော်၏အလုပ်ကို အဖျက်အမှောင့်လုပ်ပြီး နှောင့်ယှက်သည်ကိုလည်းကောင်း၊ ဘုရားအိမ်တော်၏ အကျိုးစီးပွားများကို ပျက်စီးစေသည်ကိုလည်းကောင်း မြင်တွေ့သည့်အခါ သင်သည် ၎င်းတို့ကို တားဆီးရန် မရပ်တည်ဘဲနေလျှင် မသက်မသာ ခံစားရဖူးသလော။ သင်သည် သမ္မာတရား စည်းမျဉ်းများကို ချိုးဖောက်ပြီး သင်၏ ကိုယ်ပိုင်အလိုဆန္ဒကို အခြေခံ၍ ပြောဆိုပြုမူသည့်အခါ မသက်မသာ ခံစားရဖူးသလော။ သင်သည် ဤကိစ္စများတွင် သမ္မာတရား စည်းမျဉ်းများကို ချိုးဖောက်ခဲ့သည့်တိုင် ယင်းနှင့်ပတ်သက်၍ မည်သည့်အခါမျှ မသက်မသာ မခံစားရပါက သင့်တွင် လူ့သဘာဝပင် မရှိသကဲ့သို့ အသိစိတ်လည်း မရှိပေ။ ပြီးလျှင် သင့်တွင် အသိစိတ်မရှိပါက မည်သည့်အရာများက သင့်ကို စိတ်မသိုးမသန့် ခံစားရစေမည်နည်း။ သင်၏ မသက်မသာဖြစ်ခြင်းသည် ကိုယ့်ဘာသာကိုယ် အရေးလုပ်နေခြင်းသက်သက်သာ ဖြစ်သည်။ ယင်းမှာ သင့်ကို ညှဉ်းပန်းနှိပ်စက်ပြီး မသက်မသာ ခံစားရစေသည့် သင်၏ ကိုယ်ပိုင် အယူအဆများနှင့် စိတ်ကူးများသာ ဖြစ်သည်၊ ထိုအရာ၌ အသုံးဝင်မှုမရှိပေ။ သင်၏ ကိုယ်ပိုင် အယူအဆများနှင့် စိတ်ကူးများအတွင်း၌ ဘုရားသခင်ကို ယုံကြည်ခြင်း၏ အဆုံးသတ်ရလဒ်မှာ အဘယ်အရာ ဖြစ်မည်နည်း။ သင်သည် ပို၍ပို၍ အရေခြုံဖြစ်လာပြီး ဖာရိရှဲများနှင့် ပို၍ပို၍ တူလာမည်သာ ဖြစ်သည်။ သင်သည် ဘုရားသခင်၏ နှုတ်ကပတ်တော်များနှင့် သမ္မာတရား စည်းမျဉ်းများမှ ပို၍ပို၍ ဝေးကွာသွားမည်သာဖြစ်ပြီး သင် သမ္မာတရား လက်တွေ့ကျမှုထဲသို့ ဝင်ရောက်ရန် မဖြစ်နိုင်ပေ။ သင်သည် မိမိကိုယ်ကို အစဉ်အမြဲ ကောင်းသည်ဟု ခံစားနေရသော်လည်း သင့်၌ အတိအကျ မည်သည့်အရာက ကောင်းနေသနည်း။ သင်သည် အယူအဆများနှင့် စိတ်ကူးများဖြင့် အလွန်ပြည့်နှက်နေပြီး သင်ခံစားရသည့် အရာတိုင်းသည် သမ္မာတရားနှင့် မည်သို့မျှ မသက်ဆိုင်ပေ။ သင်၏ တို့ထိခံစားခြင်းနှင့် အပြစ်တင်ခံရခြင်း ခံစားချက်များ၊ သင်ခံစားရသော အကြွေးတင်ခြင်းနှင့် နောင်တရခြင်း၊ သင်ရှိသင့်သည်ဟု ထင်သော နောင်တနှင့် သင်ပြုလုပ်သော သစ္စာဆိုချက်များနှင့် သန္နိဋ္ဌာန်များအားလုံးသည် သင်၏ အယူအဆများနှင့် စိတ်ကူးများနှင့် သက်ဆိုင်သည်။ ဤအရာများသည် သင်၏ အယူအဆများနှင့် စိတ်ကူးများကိုသာ အခြေခံပြီး သမ္မာတရားနှင့် မည်သို့မျှ မသက်ဆိုင်ပေ။ သို့ဖြစ်၍ သင်ပြုလုပ်သည့် မည်သည့်အရာမဆို၊ ဆင်းရဲဒုက္ခခံပြီး အဖိုးအခပေးခြင်းဖြစ်စေ၊ အရာများကို ပူဇော်ဆက်ကပ်ပြီး မိမိကိုယ်ကို အသုံးခံခြင်းဖြစ်စေ၊ သင်မည်သည့်အရာကို အသုံးခံသည်ဖြစ်စေ ယင်းသည် သမ္မာတရားနှင့် မည်သို့မျှ မသက်ဆိုင်ပါက အချည်းနှီးသာ ဖြစ်သည်။ သင်နားလည်ပြီလော။ (နားလည်ပါပြီ။)

လူတို့၌ ဘုရားသခင်၏ အမှုတော်အပေါ်ရှိသော ဤအယူအဆများနှင့် စိတ်ကူးများကို ငါတို့ မိတ်သဟာယဖွဲ့ကာ စိတ်ဖြာလေ့လာဆွေးနွေးပြီးသည့်နောက်တွင် လူတို့သည် မိမိတို့၏ တာဝန်များကို ထမ်းဆောင်ရာ၌ ဒုက္ခဆင်းရဲခံခြင်း၊ အဖိုးအခပေးဆပ်ခြင်းနှင့် မိမိတို့ကိုယ်ကို ချုပ်တည်းခြင်း ရှိမရှိ၊ အစားကောင်းစားရခြင်းနှင့် ကောင်းစွာ ဝတ်စားဆင်ယင်ရခြင်းတို့ကို နှစ်သက်ခြင်း ရှိမရှိ စသည့်အပြုအမူများကို မည်သို့ရှုမြင်ရမည်ကိုလည်းကောင်း၊ ဘုရားသခင်က လူတို့ထံမှ တောင်းဆိုသော စည်းမျဉ်းများမှာ အဘယ်အရာဖြစ်သည်ကိုလည်းကောင်း၊ ဘုရားသခင်သည် သူ၏အမှုတော်ဖြင့် လူတို့အပေါ်၌ အတိအကျ ရရှိလိုသော အကျိုးသက်ရောက်မှုမှာ အဘယ်အရာ ဖြစ်သည်ကိုလည်းကောင်း သင်တို့ အနည်းငယ် ပို၍ ရှင်းလင်းသွားပြီလော။ ဘုရားသခင်က လူတို့အပေါ်၌ ရရှိလိုသော အကျိုးသက်ရောက်မှုမှာ သင်၏ အလုပ်အတွက် စိတ်အားထက်သန်မှုကို အစဉ်မြင်တွေ့ရန် မဟုတ်ပေ။ ဆိုလိုသည်မှာ ဘုရားသခင် မြင်တွေ့လိုသည့်အရာမှာ သင်၏ စိတ်အားထက်သန်မှု သို့မဟုတ် ဒုက္ခဆင်းရဲခံပြီး အဖိုးအခပေးဆပ်ရန် သင်၏ စိတ်ပိုင်းဖြတ်မှု မဟုတ်ပေ။ ဘုရားသခင်၏ အမြင်တွင် သင်သည် သမ္မာတရားကို နားမလည်ပါက ဤသရုပ်သကန်များသည် ခဏတာ စိတ်လိုက်မာန်ပါ ပြုမူခြင်းမျှသာ ဖြစ်သည်။ တစ်နည်းအားဖြင့်ဆိုသော် ယင်းတို့သည် သင်၏ စိတ်အားထက်သန်မှုမျှသာ ဖြစ်သည်။ စိတ်အားထက်သန်မှု၏ အနှစ်သာရမှာ အဘယ်နည်း။ ယင်းမှာ သင်၏ စိတ်လိုက်မာန်ပါဖြစ်ခြင်းဖြစ်သည်၊ ပို၍ တိတိကျကျဆိုရလျှင် ယင်းမှာ အမှုအရာများအပေါ် စိတ်လှုပ်ရှားမှုဖြင့် ချဉ်းကပ်ခြင်း ဖြစ်သည်။ ဘုရားသခင် အလိုရှိသောအရာမှာ လူတို့၏ စိတ်အားထက်သန်မှု၊ အမှုအရာများအပေါ် ၎င်းတို့၏ စိတ်လှုပ်ရှားမှုဖြင့် ချဉ်းကပ်ခြင်း၊ ၎င်းတို့၏ ခဏတာ စိတ်လိုက်မာန်ပါ ပြုမူခြင်းများ သို့မဟုတ် ဤသို့သော စိတ်ပြင်းပြသည့် အခြေအနေ မဟုတ်ပေ။ ဘုရားသခင် အလိုရှိသောအရာမှာ အဘယ်နည်း။ (ကိုယ်တော်သည် လူတို့ သမ္မာတရားကို နားလည်နိုင်စွမ်းရှိရန် အလိုရှိပါသည်။) အနည်းဆုံးအားဖြင့် ကိုယ်တော်သည် သင် သမ္မာတရားကို ချစ်နိုင်စွမ်းရှိရန်နှင့် သမ္မာတရားကို နားလည်နိုင်စွမ်းရှိရန်၊ အမျိုးမျိုးသော ကိစ္စရပ်များနှင့် ရင်ဆိုင်ရသည့်အခါ စည်းမျဉ်းစည်းကမ်းတစ်ခု၊ ပုံစံတစ်ခု သို့မဟုတ် အပြုအမူတစ်ခုကို ပုံသေစောင့်ထိန်းခြင်းမပြုဘဲ သမ္မာတရား စည်းမျဉ်းများကို လိုက်နာရန် အလိုရှိသည်၊ ကိုယ်တော်သည် သင်ထမ်းဆောင်သော တာဝန်တွင်လည်းကောင်း၊ အရာရာတိုင်းတွင်လည်းကောင်း သမ္မာတရား စည်းမျဉ်းများကို ရှာဖွေနိုင်စွမ်းရှိရန်၊ သမ္မာတရား စည်းမျဉ်းများအတိုင်း လက်တွေ့လုပ်ဆောင်နိုင်စွမ်းရှိရန်နှင့် ဘုရားသခင်၏ နှုတ်ကပတ်တော်များနှင့် သမ္မာတရားကို သင်၏ လက်တွေ့ကျမှုဖြစ်စေနိုင်စွမ်း ရှိရန်လည်း အလိုရှိသည်၊ ဤသည်မှာ ဘုရားသခင်၏ အမှုတော်က ရရှိရန် ရည်ရွယ်ထားသော အကျိုးသက်ရောက်မှု ဖြစ်သည်။ သင်၏ ပုဂ္ဂိုလ်ရေးဘဝတွင် သင်သည် စောစောအိပ်ပြီး စောစောထလိုသည်ဖြစ်စေ၊ နောက်ကျမှအိပ်ပြီး နောက်ကျမှထလိုသည်ဖြစ်စေ၊ သင့်တွင် မည်သို့သော ဆုကျေးဇူးများရှိသည်ဖြစ်စေ၊ သင်သည် မည်မျှ စကားပြောကောင်းသည်ဖြစ်စေ ဤအရာအားလုံးသည် ဘုရားသခင်အတွက် အရေးမကြီးပေ။ သင့်တွင် ဒုက္ခဆင်းရဲခံရန် စိတ်ပိုင်းဖြတ်မှု ရှိသည်ဖြစ်စေ မရှိသည်ဖြစ်စေ၊ သင်သည် အဖိုးအခ မည်မျှပေးဆပ်သည်ဖြစ်စေ ဘုရားသခင်သည် ဤအရာများကို တန်ဖိုးမထားပေ။ အချို့လူများက “ဘုရားသခင်ကို ကျွန်ုပ်ယုံကြည်ခြင်းအတွက် နှစ်အတန်ကြာအောင် အဝတ်အစားကောင်းများ မဝယ်ခဲ့သကဲ့သို့ ဆံပင်ညှပ်ဆိုင်သို့လည်း ဆယ်နှစ်ကျော် မသွားခဲ့ပါ” ဟု ပြောဆိုကြသည်။ သင်သည် တစ်သက်လုံး အစားကောင်းမစား၊ အဝတ်အထည်ကောင်းများ မဝတ်ဆင်ဘဲ များစွာသော ဒုက္ခဆင်းရဲများကို ခံလျှင်ပင် အဘယ်အရေးနည်း။ ယင်းမှာ ဘုရားသခင် အလိုရှိသောအရာလော။ ဘုရားသခင်၏ တရားဟောပြောခြင်းနှင့် မိတ်သဟာယဖွဲ့ခြင်း၏ နောက်ဆုံးရည်ရွယ်ချက်မှာ သင့်ကို ခြိုးခြံစွာကျင့်ကြံသူတစ်ဦးအဖြစ်သို့ ပြောင်းလဲရန်အတွက် လူတို့အား များပြားလှသော သမ္မာတရားများဖြင့် ထောက်ပံ့ပေးခြင်းမျှသာလော။ ယင်းမှာ သင့်ကို သနားစရာကောင်းသော ကလေကချေတစ်ယောက်၊ သူတောင်းစားတစ်ဦး သို့မဟုတ် ဒေါသထွက်နေသော လူငယ်တစ်ဦးအဖြစ်သို့ ပြောင်းလဲရန်အတွက်မျှသာလော။ မဟုတ်ပေ။ ဘုရားသခင် လုပ်ဆောင်လိုသည့်အရာမှာ သူ၏ နှုတ်ကပတ်တော်များနှင့် သမ္မာတရား စည်းမျဉ်းများကို လူတို့အတွင်း၌ အလုပ်လုပ်ရန် ဖြစ်သည်။ သို့ဖြစ်၍ ဘုရားသခင်သည် လူတို့ ပို၍ ဒုက္ခဆင်းရဲခံရခြင်းနှင့် ပို၍ အဖိုးအခပေးဆပ်ရခြင်းကို မြင်တွေ့လိုသည်ဟုလည်းကောင်း၊ ၎င်းတို့ အလွန်အမင်း ခြိုးခြံသော၊ ခက်ခဲကြမ်းတမ်းပြီး ရိုးရှင်းသောဘဝများဖြင့် နေထိုင်ခြင်း၊ အလွန်အမင်းဖြစ်သော စိတ်ပိုင်းဖြတ်မှုနှင့် ရည်မှန်းချက်များ ရှိခြင်း၊ အလွန်အမင်း စိတ်ပြင်းပြခြင်း သို့မဟုတ် အလွန်အမင်း မိမိကိုယ်ကို ချုပ်တည်းခြင်း၊ မိမိတို့၏နေရာ၌ အမှန်တကယ်နေပြီး ကောင်းစွာပြုမူနေထိုင်ခြင်းတို့ကို မြင်တွေ့လိုသည်ဟု လူများစွာတို့က ယုံကြည်သည့်အခါ ဤသည်တို့မှာ ဘုရားသခင်၏ အမှုတော်အပေါ် ၎င်းတို့၏ အယူအဆများနှင့် စိတ်ကူးများမျှသာ ဖြစ်သည်။ သင်၏ဘဝတွင် နှစ်ပေါင်းများစွာကြာအောင် တစ်နေ့လျှင် အစာတစ်နပ်သာစားပြီး တစ်ညလျှင် သုံးနာရီသာအိပ်သည်၊ အစားကောင်းများ မစားနိုင် သို့မဟုတ် အဝတ်အထည်ကောင်းများ မဝတ်ဆင်နိုင်ဟု ဆိုကြပါစို့၊ သင်လုပ်ဆောင်သင့်သည်ဟု ထင်သည့်အရာကို နှစ်ပေါင်းများစွာ လုပ်ဆောင်ခဲ့ပြီး မရေမတွက်နိုင်သော ဒုက္ခဆင်းရဲများကို ခံစားခဲ့ရကာ မရေမတွက်နိုင်သော စိတ်ပိုင်းဖြတ်ချက်များကို ချခဲ့သည် ဆိုကြပါစို့။ သင်တို့၏ ကိုယ်ပိုင်စကားများဖြင့်ဆိုသော် သင်သည် “သင်၏ မူလရည်မှန်းချက်အပေါ် သစ္စာစောင့်သိဆဲဖြစ်သည်”၊ သင်သည် ဘုရားသခင်အတွက် ဒုက္ခဆင်းရဲခံပြီး အသုံးခံကာ သင်၏ဘဝတစ်ခုလုံးကို ဘုရားသခင်ထံ ဆက်ကပ်ခဲ့သည်။ သို့သော် ဤအရာအားလုံးရှိနေသော်လည်း သင်သည် ဘုရားသခင်၏ နှုတ်ကပတ်တော်များ သို့မဟုတ် သမ္မာတရားအပေါ် မည်သည့်အခါမျှ ကြိုးစားအားထုတ်ခြင်း မရှိဘဲ သင်လုပ်ဆောင်သမျှအရာတိုင်းတွင် သမ္မာတရား စည်းမျဉ်းများကို မရှာဖွေပါက သင်သည် စွန့်ပစ်ခံရရန် သေချာသူ ဖြစ်သည်။ သင်သည် ဒုက္ခဆင်းရဲခံခြင်းနှင့် အဖိုးအခပေးဆပ်ခြင်းအားဖြင့်လည်းကောင်း၊ သင်၏ မူလရည်သန်မျှော်မှန်းချက်ကို မည်သည့်အခါမျှ မပြောင်းလဲခြင်းအားဖြင့်လည်းကောင်း၊ သင်၏ဘဝတစ်ခုလုံး ဘုရားသခင်အတွက် အသုံးခံခြင်းအားဖြင့်လည်းကောင်း၊ သင့်ထံ၌ရှိသမျှ အရာအားလုံးကို ကိုယ်တော်ထံ ဆက်ကပ်ခြင်းအားဖြင့်လည်းကောင်း ကယ်တင်ခြင်းကို ရရှိလိုသည်။ ဤသည်မှာ အိပ်မက်တစ်ခုမျှသာ ဖြစ်သည်၊ ယင်းမှာ ဖြစ်နိုင်ချေမရှိသော အတွေးတစ်ခု ဖြစ်သည်။ သင်သည် တစ်သက်လုံး ပြောင်းဖူးမှုန့်နှင့် ပြောင်းဖူးပေါင်းမုန့်ကိုသာစားပြီး အစားကောင်းများကို မည်သည့်အခါမျှ မစားဘဲ သို့မဟုတ် ကောင်းမွန်သောအရာများကို မခံစားဘဲနေလျှင်ပင် အသုံးဝင်မည် မဟုတ်ပေ။ ဘုရားသခင်သည် လူတစ်ဦး၏ အပြုအမူကို မည်သည့်အခါမျှ မကြည့်ပေ၊ လူတစ်ဦးက အပြင်ပန်း၌ မည်သည့်စည်းမျဉ်းများကို လိုက်နာသည်ကိုဖြစ်စေ၊ ၎င်းတို့သည် အပြင်ပန်း၌ ရိုးရှင်းပြီး သာမန်ဘဝဖြင့် နေထိုင်ခြင်း ရှိမရှိကိုဖြစ်စေ ကိုယ်တော် မကြည့်ပေ။ ဘုရားသခင် မြင်တွေ့လိုသည့်အရာမှာ သင်လျှောက်လှမ်းနေသော လမ်းကြောင်းသည် အဘယ်အရာဖြစ်သည်၊ သင်ကြုံတွေ့ရသော ကိစ္စရပ်တိုင်းတွင် သင်လိုက်နာသော စည်းမျဉ်းများသည် အဘယ်အရာဖြစ်သည်၊ ပြဿနာများကို ကိုင်တွယ်ဖြေရှင်းရာတွင် သင်သည် သမ္မာတရား စည်းမျဉ်းများကို လိုက်နာခြင်း ရှိမရှိတို့ ဖြစ်သည်။ သင်သည် သမ္မာတရား စည်းမျဉ်းများကို မလိုက်နာပါက ထိုသတ်မှတ်ထားသော စည်းကမ်းချက်များနှင့် စည်းမျဉ်းများကို သင်မည်မျှပင် ကောင်းစွာ လိုက်နာသည်ဖြစ်စေ အသုံးဝင်မည် မဟုတ်ပေ။ ယင်းက သင်သည် အယူအဆများနှင့် စိတ်ကူးများအတွင်း၌ အသက်ရှင်နေထိုင်သောသူတစ်ဦး၊ လုံးလုံးလျားလျား ပုဂ္ဂလဓိဋ္ဌာန်ကျသော ကောင်းမွန်သည့် ဆန္ဒများအတွင်း၌ အသက်ရှင်နေထိုင်သောသူတစ်ဦး၊ ဘုရားသခင်၏ အမှုတော်နှင့် လုံးဝမသက်ဆိုင်သောသူတစ်ဦး၊ ဘုရားသခင်က လူတို့အပေါ် သူ၏ ကယ်တင်ခြင်းအမှုကို ဆောင်ရွက်သည့် နည်းလမ်းတစ်ခုနှင့်မျှ မသက်ဆိုင်သောသူတစ်ဦး၊ ဘုရားသခင်၏ အမှုတော်နှင့် အလှမ်းဝေးသောသူတစ်ဦး ဖြစ်ကြောင်းကိုသာ ဖော်ပြလိမ့်မည်။ သို့ဖြစ်၍ သင်သည် ဘုရားသခင်၏ အမှုတော်မှ တစ်စုံတစ်ခုကို ရရှိလိုပါက သင်သည် သမ္မာတရားအပေါ်၌ ဦးစွာ ကြိုးစားအားထုတ်ရမည်၊ သင်၏ ကိုယ်ပိုင် အယူအဆများနှင့် စိတ်ကူးများအပေါ် မည်သည့်အလုပ်ကိုမျှ မလုပ်ဆောင်ရ၊ မည်သည့်ကြိုးစားအားထုတ်မှုကိုမျှ မပြုလုပ်ရ၊ ထိုသို့ပြုလုပ်ခြင်းသည် အသုံးမဝင်ပေ။ အချို့လူများက ငါ့ကို “ကျွန်ုပ်က ဆံပင်ရှည်ထားတာ ပိုပြီး တင့်တယ်လျောက်ပတ်သည်ဟု ကိုယ်တော် ထင်သလား၊ သို့မဟုတ် ဆံပင်တိုထားတာ ပိုပြီး တင့်တယ်လျောက်ပတ်သည်ဟု ထင်သလား” ဟု မေးကြသည်။ ငါက ၎င်းတို့ကို “သင်က ဆံပင်ရှည်ထားရသည်ကို ကြိုက်သလား၊ ဆံပင်တိုထားရသည်ကို ကြိုက်သလား” ဟု ပြန်မေးသည်။ ၎င်းတို့က “ကျွန်ုပ်က ဆံပင်ရှည်ထားရသည်ကို ကြိုက်ပါသည်။ သို့သော် ဆံပင်ရှည်က တင့်တယ်လျောက်ပတ်မှုမရှိဘဲ ဘုရားသခင်က ယင်းကို မနှစ်သက်ဟု ကျွန်ုပ်ထင်သည်” ဟု ပြောသည်။ ငါကလည်း “ဘုရားသခင်က ထိုစကားကို မည်သည့်အချိန်က ပြောခဲ့သနည်း။ ဤသည်မှာ သမ္မာတရားနှင့် သက်ဆိုင်မှု တစ်ခုတလေ ရှိသလော” ဟု ပြန်ပြောသည်။ ငါ့ကို “ကျွန်ုပ် သရေစာ စား၍ရမလား” ဟု မေးသော အခြားသူများလည်း ရှိသည်။ ငါကလည်း “သရေစာစားခြင်းက ပုံမှန်လူ့သဘာဝ၏ လိုအပ်ချက်တစ်ခုလား။ လူများ သရေစာမစားရဟု ဘုရားသခင်က ပြဋ္ဌာန်းထားသလား။ ဘုရားသခင်က ယင်းကို ပြစ်တင်ရှုတ်ချသလား” ဟု ပြန်ပြောသည်။ ၎င်းတို့ကလည်း “ဘုရားသခင်က ပြစ်တင်ရှုတ်ချသည်ဟု ကျွန်ုပ်ထင်သည်၊ အကြောင်းမှာ သရေစာစားခြင်းသည် ပေါ့ပျက်ပျက်နိုင်သောကြောင့် ဖြစ်သည်” ဟု ပြောသည်။ “ပေါ့ပျက်ပျက်နိုင်သည်” ဟူသည်မှာ မည်သည့်အဓိပ္ပာယ်နည်း။ သရေစာစားခြင်းသည် ပေါ့ပျက်ပျက်နိုင်သည်ဟု သင်ထင်လျှင် သရေစာမစားခြင်းက သင်သည် ပေါ့ပျက်ပျက်မနိုင်ဟု ဆိုလိုသလော။ သရေစာမစားခြင်းက သင်သည် သမ္မာတရားကို နားလည်ပြီး လက်တွေ့လုပ်ဆောင်သည်ဟု ဆိုလိုသလော။ ဤသို့ ငါပြောသည့်အခါ သင် နားလည်နိုင်သည် မဟုတ်လော။ (နားလည်နိုင်ပါသည်။) အယူအဆများနှင့် စိတ်ကူးများသည် သမ္မာတရားမဟုတ်သကဲ့သို့ သမ္မာတရားနှင့်လည်း မည်သို့မျှ မသက်ဆိုင်ပေ။ သင်က ဉာဏ်ရှိလျှင် သင့်ထံတွင် မည်သည့်အယူအဆများနှင့် စိတ်ကူးများ ရှိနေသေးသည်၊ ဖာရိရှဲတို့၏ မည်သည့်ကျင့်ကြံမှုများ၊ အတွေးအခေါ်များနှင့် အမြင်ရှုထောင့်များ သင့်ထံတွင် ရှိနေသေးသည်ကို သင် အမြန် ဆန်းစစ်သင့်ပြီး အချိန်မဆွဲဘဲ ယင်းတို့ကို လက်လွှတ်သင့်သည်။ ဤအရာများကို စွန့်လွှတ်ရခြင်း၏ ရည်ရွယ်ချက်မှာ သင့်ကို ပေါ့ပျက်ပျက်နိုင်သွားပြီး မိမိကိုယ်ကို စိတ်အလိုလိုက်စေရန် မဟုတ်ဘဲ သမ္မာတရား စည်းမျဉ်းများကို ရှာဖွေဖို့ ဘုရားသခင်၏ ရှေ့မှောက်သို့ သင်လာရောက်ရန်နှင့် သမ္မာတရားကို သင်၏အသက်အဖြစ် ရရှိလာစေရန် ဖြစ်သည်။ ဘုရားသခင်သည် သင် သူတောင်းစားတစ်ဦးဖြစ်ပြီး ခြိုးခြံစွာကျင့်ကြံသူတစ်ဦး၏ ဘဝဖြင့် နေထိုင်သည်ကို မြင်တွေ့လိုခြင်း မရှိပေ။ အချို့လူများက “ဘုရားသခင်က လူများ သူတောင်းစားဖြစ်သည်ကို မနှစ်သက်သဖြင့် ယင်းမှာ သူသည် လူများအား ချမ်းသာသည်ကို နှစ်သက်သည်ဟု ဆိုလိုသလော” ဟု ပြောကြသည်။ ဘုရားသခင်သည် လူတို့ ချမ်းသာကြွယ်ဝခြင်းကိုလည်း မကြိုက်ပေ။ အချို့လူများက “ဘုရားသခင်က လူများ ရုပ်ပိုင်းဆိုင်ရာ ဆင်းရဲဒုက္ခခံသည်ကို နှစ်သက်သည်ဟူသည်မှာ လူ၏ အယူအဆနှင့် စိတ်ကူးတို့သာ ဖြစ်သည်။ သို့ဖြစ်၍ ဘုရားသခင်က လူတို့ ဆင်းရဲဒုက္ခခံသည်ကို မနှစ်သက်လျှင် ယင်းမှာ သူသည် လူတို့ သက်သောင့်သက်သာ အသက်ရှင်နေထိုင်သည်ကို နှစ်သက်သည်ဟု ဆိုလိုသလော” ဟု ပြောကြသည်။ မှားသည်၊ ဤသည်မှာလည်း သင်၏ အယူအဆနှင့် စိတ်ကူးပင် ဖြစ်သည်။ သို့ဆိုလျှင် မှန်ကန်သော ပြုမူနည်းမှာ အဘယ်နည်း။ (ဘုရားသခင်သည် လူတို့ မည်သည့်အရာနှင့် ကြုံတွေ့ရသည်ဖြစ်စေ ကိုယ်တော်၏ ရှေ့မှောက်သို့ လာရောက်နိုင်စွမ်းရှိပြီး သမ္မာတရား စည်းမျဉ်းများကို ရှာဖွေနိုင်စွမ်းရှိခြင်းကို နှစ်သက်ပါသည်။) မည်သည့်အချိန်အခါမျိုး၌မဆို သမ္မာတရား စည်းမျဉ်းများကို မေ့ပစ်၍မရပေ။ အချို့လူများက “ဘုရားသခင်သည် လူတို့ ကိုယ်တော်၏ ရှေ့မှောက်၌ စိတ်ပိုင်းဖြတ်ချက်များ ချမှတ်ခြင်းကို နှစ်သက်ပြီး ဒုက္ခဆင်းရဲခံရန် စိတ်ပိုင်းဖြတ်မှုကို ပိုင်ဆိုင်ခြင်းကို နှစ်သက်သည်” ဟု ပြောကြသည်။ အခြားသူများကမူ “ဘုရားသခင်သည် ဒုက္ခဆင်းရဲခံရန် မလိုလားသောသူများကို မနှစ်သက်ပေ” ဟု ပြောကြသည်။ ဤအရာများကို ပြောဆိုခြင်းသည် မှန်သလော မှားသလော။ မည်သည့်စကားက မှန်ပြီး မည်သည့်စကားက မှားသနည်း။ (နှစ်ခုစလုံး မှားပါသည်။) အချို့လူများသည် မိမိတို့၏ ကိုယ်ပိုင်အဆင့်အတန်း၊ ကျော်ကြားမှုနှင့် အကျိုးအမြတ်တို့အတွက် အစဉ် ဒုက္ခဆင်းရဲခံကြသည်၊ ၎င်းတို့တွင် ဒုက္ခဆင်းရဲခံရန် ခိုင်မာသော စိတ်ပိုင်းဖြတ်မှုတစ်ခု ရှိသည်။ ဤသရုပ်သကန်များသည် ဘုရားသခင်ကို နှစ်သက်စေသလော။ (မနှစ်သက်စေပါ။) အချို့လူများသည် ပုဂ္ဂိုလ်ရေးဆိုင်ရာ ကိစ္စရပ်များနှင့် ပတ်သက်လာလျှင် ဒုက္ခဆင်းရဲခံရန် မလိုလားကြသော်လည်း မိမိတို့၏ တာဝန်ကို ထမ်းဆောင်ခြင်းနှင့် သမ္မာတရားအတွက်မူ ဒုက္ခဆင်းရဲခံရန် လိုလားကြပြီး သမ္မာတရား စည်းမျဉ်းများအတိုင်း ပြုမူရန်အလို့ငှာ ဒုက္ခဆင်းရဲ အနည်းငယ်ကို ခံရန် လိုလားကြသည်။ ဤသရုပ်သကန်များထဲမှ မည်သည့်အရာက ပိုကောင်းသနည်း။ (သမ္မာတရား စည်းမျဉ်းများအတွက် ဒုက္ခဆင်းရဲခံခြင်း ဖြစ်ပါသည်။) ဤအရာများမှ အဘယ်အရာကို မြင်တွေ့နိုင်သနည်း။ သမ္မာတရား စည်းမျဉ်းများအတိုင်း ပြုမူခြင်းနှင့် သမ္မာတရားကို လက်တွေ့လုပ်ဆောင်ခြင်းသည် မှန်ကန်သည်ကို မြင်တွေ့နိုင်သည်။ လူတစ်ဦး၏ တာဝန်ကို ထမ်းဆောင်ခြင်းဆိုင်ရာ ကိစ္စရပ်များနှင့် ပတ်သက်သည်ဖြစ်စေ၊ လူတစ်ဦး၏ ကိုယ်ပိုင်ဘဝမှ ကိစ္စရပ်များနှင့် ပတ်သက်သည်ဖြစ်စေ၊ လူတစ်ဦး ဒုက္ခဆင်းရဲခံရခြင်း ရှိမရှိသည် စံနှုန်းတစ်ခု သို့မဟုတ် စည်းမျဉ်းတစ်ခု မဟုတ်ပေ။ စည်းမျဉ်းများမှာ အဘယ်နည်း။ စည်းမျဉ်းများမှာ ဘုရားသခင်၏ တောင်းဆိုချက်များ၊ ဘုရားသခင်၏ နှုတ်ကပတ်တော်များနှင့် သမ္မာတရားတို့ ဖြစ်ကြသည်။ သင်သည် သမ္မာတရား စည်းမျဉ်းများအတိုင်း လက်တွေ့လုပ်ဆောင်ပါက ထိုသို့ပြုလုပ်ရာတွင် သင် ဒုက္ခဆင်းရဲမခံရလျှင်ပင် သင်လုပ်ဆောင်နေသည့်အရာသည် မှန်ကန်ပြီး ဘုရားသခင်က ယင်းကို အသိအမှတ်ပြုတော်မူသည်၊ သင်သည် သမ္မာတရား စည်းမျဉ်းများအတိုင်း မပြုမူပါက ထိုဖြစ်စဉ်တွင် သင်သည် များစွာသော ဒုက္ခဆင်းရဲကို ခံရလျှင်ပင် သို့မဟုတ် ကြီးစွာသော အရှက်ရခြင်းကို တွေ့ကြုံရလျှင်ပင် ယင်းမှာ အချည်းနှီးဖြစ်ပြီး ဘုရားသခင်သည် သင်၏ လုပ်ဆောင်ချက်များကို အသိအမှတ်မပြုပေ။ ယင်းမှာ အချို့လူများက အန္တိခရစ်တစ်ဦးထံမှ အမိန့်တစ်ခုကို ကြားပြီးနောက် ခိုင်းသည့်အတိုင်း လုပ်ဆောင်ကာ အန္တိခရစ်၏ နှစ်သက်မှုများအတိုင်း အလုပ်ကို အကောင်အထည်ဖော်လျက် များစွာ စကားပြောဆိုပြီး ဒုက္ခဆင်းရဲခံကာ မိမိတို့ကိုယ်ကို အလွန်အလုပ်များစေလျက် ကိုယ်ခန္ဓာသည် ကာယပင်ပန်းနွမ်းနယ်မှုကြောင့် ကိုင်းညွတ်ပြီး ပျက်စီးသွားသည်အထိ ဖြစ်ရသကဲ့သို့ပင် ဖြစ်သည်။ ဘုရားသခင်သည် ဤအရာကို အသိအမှတ်ပြုတော်မူသလော။ ဘုရားသခင်သည် ယင်းကို အမှတ်ရမည်လော။ (ကိုယ်တော်သည် ယင်းကို အသိအမှတ်မပြုသကဲ့သို့ အမှတ်ရမည်လည်း မဟုတ်ပါ။) သို့ဆိုလျှင် ဘုရားသခင်၏ သဘောထားမှာ အဘယ်နည်း။ (ဘုရားသခင်သည် ထိုသို့သောလူများကို ရွံရှာတော်မူပါသည်။) ဘုရားသခင်က မည်သို့ မိန့်တော်မူခဲ့သနည်း။ “အဓမ္မအမှုကို ပြုသောသူတို့၊ ငါ့ထံမှ ဖယ်ကြ” ဟူ၍ ဖြစ်သည်။ ဤသည်မှာ ဘုရားသခင်၏ သဘောထား ဖြစ်သည် မဟုတ်လော။ (ဟုတ်ပါသည်။) သင်သည် မည်မျှ ဒုက္ခဆင်းရဲခံခဲ့ရသည်ဖြစ်စေ သို့မဟုတ် မည်မျှ အဖိုးအခပေးဆပ်ခဲ့သည်ဖြစ်စေ သင်သည် သင်၏ ဖြည့်ဆည်းချက်များကို ကြွားဝါရန် ဤအရာများကို အသုံးပြုသော်လည်း ဘုရားသခင်သည် ဤအရာများကို မကြည့်ပေ။ ဘုရားသခင်သည် သင် ဤအရာများကို သမ္မာတရား စည်းမျဉ်းများအတိုင်း လုပ်ဆောင်ခဲ့ခြင်း ရှိမရှိနှင့် သင်သည် ဘုရားသခင်၏ နှုတ်ကပတ်တော်များကို လိုက်နာနေခြင်း ရှိမရှိကိုသာ ကြည့်သည်၊ ကိုယ်တော်သည် သင့်ကို တိုင်းတာရန် ဤစည်းမျဉ်းကို အသုံးပြုသည်။ သင်သည် ဘုရားသခင်၏ နှုတ်ကပတ်တော်များကို မလိုက်နာဘဲ သင်၏ ကိုယ်ပိုင်စိတ်ကူးများအတိုင်း ပြုမူပါက သင်သည် မည်မျှ ဒုက္ခဆင်းရဲခံရသည်ဖြစ်စေ သို့မဟုတ် မည်မျှ အဖိုးအခပေးဆပ်သည်ဖြစ်စေ ယင်းတို့အားလုံးသည် အချည်းနှီးဖြစ်လိမ့်မည်။ ဘုရားသခင်သည် ယင်းကို အမှတ်ရမည် မဟုတ်ရုံသာမက ပြစ်တင်ရှုတ်ချတော်မူမည်လည်း ဖြစ်သည်။ ယင်းမှာ ကိုယ့်သေတွင်းကိုယ်တူးခြင်း ဖြစ်မည် မဟုတ်လော။ (ဟုတ်ပါသည်။) ထိုသို့သောလူများသည် အဆုံးတွင် ဖယ်ရှားရှင်းလင်းခြင်းခံရမည်၊ ၎င်းတို့သည် ဤအရာနှင့် ထိုက်တန်သည် မဟုတ်လော။ (ဟုတ်ပါသည်။) ဘုရားသခင်သည် ထောင်ပေါင်းများစွာသော နှုတ်ကပတ်တော်များကို မိန့်တော်မူခဲ့ပြီး သမ္မာတရား စည်းမျဉ်းများကို သင့်အား ပြောပြခဲ့သော်လည်း သင်သည် နားမထောင်ဘဲနေသည်။ သင်သည် အစဉ် သင်၏ ကိုယ်ပိုင်စိတ်ကူးများ ရှိနေပြီး သင်၏ ကိုယ်ပိုင် အယူအဆများနှင့် စိတ်ကူးများဖြင့် သမ္မာတရားကို အစားထိုးကာ ထိုသို့ဖြင့် ဘုရားသခင်၏ အသိအမှတ်ပြုခြင်းကို ရရှိရန်၊ နိုင်ငံတော်ထဲသို့ ဝင်ရောက်ရန်၊ ကောင်းချီးပေးခြင်းနှင့် ဆုချခြင်းတို့ကို ခံစားရရန် ဖြစ်နိုင်ချေမရှိဘဲ မျှော်လင့်နေသည်။ ဤသည်မှာ သေခြင်းတရားကို လက်ယပ်ခေါ်ခြင်း မဟုတ်လော။ ထိုသို့သောလူများသည် ရှင်ပေါလုနှင့် အမျိုးအစားတူသူများ မဟုတ်လော။ (ဟုတ်ပါသည်။) သို့ဖြစ်၍ လူတို့သည် မိမိတို့နှင့် ဘုရားသခင်ကြားရှိ အတားအဆီးများနှင့် ဘုရားသခင်အပေါ် ၎င်းတို့၏ ရန်လိုမှုကို စွန့်လွှတ်လိုပါက ၎င်းတို့သည် ဘုရားသခင်၏ အမှုတော်ကို တိကျသော နားလည်မှုတစ်ခု ရှိသင့်သည်။ ၎င်းတို့သည် ဘုရားသခင်အကြောင်းကို မှန်းဆခြင်း၊ သူ၏ အမှုတော်ကို တိုင်းတာခြင်း သို့မဟုတ် မိမိတို့၏ ကိုယ်ပိုင်အပြုအမူနှင့် ကျင့်ကြံပြုမူမှုများကို၊ ၎င်းတို့၏ အယူအဆများနှင့် စိတ်ကူးများကို အခြေခံ၍ တိုင်းတာခြင်း မပြုသင့်ဘဲ ထို့နောက် အရာရာတိုင်းကို ဤအယူအဆများနှင့် စိတ်ကူးများကို အခြေခံ၍ ကိုင်တွယ်ခြင်း မပြုသင့်ပေ။ ဤလုပ်နည်းကိုင်နည်း၏ နောက်ဆုံးသော ရလဒ်မှာ အချည်းနှီး ဖြစ်သွားမည်ဖြစ်ပြီး ဆိုးရွားသော အခြေအနေများတွင် ၎င်းတို့သည် အသင်းတော်၏အလုပ်ကို အဖျက်အမှောင့်လုပ်ပြီး နှောင့်ယှက်ကာ ဘုရားသခင်၏ စိတ်သဘောထားကို ပုန်ကန်ပြစ်မှားပြီး အပြစ်ပေးခံရမည် ဖြစ်သည်။ သို့ဖြစ်၍ ဘုရားသခင်၏ အမှုတော်ကို ချဉ်းကပ်ရာတွင် လူတို့သည် ဘုရားသခင်နှင့်ပတ်သက်သော ၎င်းတို့၏ အမျိုးမျိုးသော အယူအဆများနှင့် စိတ်ကူးများကို စွန့်လွှတ်သင့်သည်။ ဆိုလိုသည်မှာ ၎င်းတို့သည် မိမိတို့၏ ကိုယ်ပိုင် အယူအဆများနှင့် စိတ်ကူးများကို ဆန်းစစ်ပြီး စိတ်ဖြာလေ့လာဆွေးနွေးကာ ထို့နောက် ယင်းတို့ကို လက်လွှတ်သင့်သည်၊ ဘုရားသခင်၏ ရည်ရွယ်ချက်များနှင့် သမ္မာတရားကို ရှာဖွေရန် လာရောက်သင့်ပြီး ၎င်းတို့၏ အယူအဆများ၊ စိတ်ကူးများ၊ မှားယွင်းသော စည်းမျဉ်းများနှင့် ကျင့်ကြံပြုမူမှုများကို အစားထိုးရန် သမ္မာတရား စည်းမျဉ်းများကို အသုံးပြုသင့်သည်။ ဤနည်းလမ်းဖြင့်သာ သင်သည် ကယ်တင်ခြင်းလမ်းကြောင်းပေါ်သို့ စတင်လျှောက်လှမ်းနိုင်မည် ဖြစ်သည်။ သို့တည်းမဟုတ်ပါက သင် ကယ်တင်ခြင်းခံရရန်မှာ မဖြစ်နိုင်ပေ၊ ယင်းမှာ လုံးဝ မဖြစ်နိုင်သည့်အရာဖြစ်သည်။ ဤသည်မှာ ဘုရားသခင်၏ အမှုတော်အပေါ် လူတို့ ထားရှိသော အယူအဆနှင့် စိတ်ကူးတစ်မျိုး ဖြစ်သည်။ ငါတို့၏ မိတ်သဟာယကို ဤနေရာတွင် အဆုံးသတ်ကြစို့။

ဘုရားသခင်၏ အမှုတော်နှင့်ပတ်သက်၍ လူတို့၌ အခြားသော အယူအဆနှင့် စိတ်ကူးတစ်မျိုး ရှိသေးသည်၊ ယင်းမှာ ၎င်းတို့၏ နေ့စဉ်အသက်တာများတွင် ၎င်းတို့ အားနည်းသည့်အခါ၊ ဘုရားသခင်အပေါ် အမျိုးမျိုးသော ပုန်ကန်မှုများ ၎င်းတို့ထဲ၌ ပေါ်ပေါက်လာသည့်အခါ သို့မဟုတ် ဘုရားသခင်ကို ပုန်ကန်ပြီး ဆန့်ကျင်သည့်အရာများကို ၎င်းတို့ လုပ်ဆောင်ခဲ့သည့်အခါ ၎င်းတို့သည် မိမိတို့၏ အယူအဆများနှင့် စိတ်ကူးများတွင် ၎င်းတို့သည် ဆုံးမပဲ့ပြင်ခြင်း၊ ရိုက်နှက်ဆုံးမခြင်း သို့မဟုတ် အပြစ်ဒဏ်ပေးခြင်း၊ ကျိန်ဆဲခြင်း စသည်တို့ကိုပင် ခံရသင့်သည်ဟု ယုံကြည်ကြခြင်း ဖြစ်သည်။ ဥပမာအားဖြင့် လူတို့သည် တစ်ခါတစ်ရံ စကားမှားပြောမိခြင်း သို့မဟုတ် အယူအဆအချို့ကို ထုတ်ဖော်မိခြင်း၊ သို့မဟုတ် တစ်စုံတစ်ခုအပေါ် အမြင်အချို့နှင့် မနာခံမှုအချို့ ရှိခြင်းတို့ ဖြစ်သည်၊ ပြီးနောက် အချိန်အတန်ကြာသော် ၎င်းတို့က “ကျွန်ုပ်သည် ဤပုန်ကန်မှုနှင့် သစ္စာမဲ့ခြင်းကို ထုတ်ဖော်ခဲ့ပြီးဖြစ်သည်၊ သို့သော် အဘယ်ကြောင့် ကျွန်ုပ် ဆုံးမပဲ့ပြင်ခြင်း မခံရသနည်း။ ကျွန်ုပ်၏ လျှာပေါ်တွင် အနာဖုများ မရှိ၊ ညဘက်တွင် အိပ်မက်ဆိုးများ မမက်၊ ကျွန်ုပ်၏ စိတ်နှလုံးထဲတွင်လည်း မငြိမ်မသက် မခံစားရပါ။ အဘယ်ကြောင့်နည်း။ ကျွန်ုပ်သည် သန့်ရှင်းသော ဝိညာဉ်တော်၏ အမှုတော်ကို အဘယ်ကြောင့် မခံစားရသနည်း” ဟု တွေးကြသည်။ ၎င်းတို့၏ အယူအဆများနှင့် စိတ်ကူးများတွင် ၎င်းတို့က ဘုရားသခင်သည် ၎င်းတို့ကို ကယ်တင်ရန် ကြွလာခဲ့သည်၊ ဘုရားသခင်၏ အမှုတော်သည် ၎င်းတို့ကို သိမ်းပိုက်ရုံသာမက ပြောင်းလဲပြီး သန့်စင်ရမည်၊ ၎င်းတို့၌ရှိသော သမ္မာတရားနှင့် မကိုက်ညီသည့် အတွေးအခေါ်များနှင့် ရှုထောင့်အမြင် အမျိုးမျိုးကို ပြောင်းလဲရမည်ဖြစ်သောကြောင့် ၎င်းတို့၏ အတွေးများထဲတွင် သမ္မာတရားနှင့် မကိုက်ညီသည့်အရာများ သို့မဟုတ် ညစ်ညမ်းသော၊ ညစ်ပတ်သော သို့မဟုတ် ကောက်ကျစ်ဆိုးယုတ်သောအရာများ ရှိနေပါက ၎င်းတို့သည် ဆုံးမပဲ့ပြင်ခြင်း၊ ပြစ်တင်ဆုံးမခြင်း သို့မဟုတ် အပြစ်ဒဏ်ပေးခြင်းကိုပင် ခံရသင့်သည်ဟု ယုံကြည်ကြသည်၊ ပြီးလျှင် ၎င်းတို့က “လူတို့သည် မကြာခဏ ဆုံးမပဲ့ပြင်ခြင်း မခံရလျှင် မည်သို့ ပြောင်းလဲနိုင်မည်နည်း၊ မည်သို့ သန့်ရှင်းစင်ကြယ်နိုင်မည်နည်း” ဟု တွေးကြသည်။ ဤတွင် လူတို့၏ အယူအဆများနှင့် စိတ်ကူးများမှာ အဘယ်နည်း။ ဆိုလိုသည်မှာ ၎င်းတို့သည် မကြာခဏ ဆုံးမပဲ့ပြင်ခြင်း၊ ကဲ့ရဲ့ပြစ်တင်ခြင်း၊ ရိုက်နှက်ဆုံးမခြင်း၊ အပြစ်ဒဏ်ပေးခြင်း၊ ပြစ်တင်ဆုံးမခြင်းနှင့် တရားစီရင်ခြင်းတို့ကိုပင် ခံရသင့်သည်၊ ထိုသို့ပြုလုပ်မှသာ ၎င်းတို့သည် စိတ်သဘောထား ပြောင်းလဲခြင်းကို ရရှိနိုင်သည်ဟူ၍ ဖြစ်သည်။ သို့ရာတွင် နေ့စဉ်အသက်တာ၌ လူတို့သည် ညစ်ညမ်းခြင်း၊ ကောက်ကျစ်ဆိုးယုတ်ခြင်းနှင့် ဖောက်ပြန်ပျက်စီးခြင်းတို့ကို ထုတ်ဖော်သည့်အခါ ၎င်းတို့က ယင်းတို့ကို အလွန်သဘာဝကျကျ ထုတ်ဖော်ကြသည်၊ ၎င်းတို့သည် ယင်းကို ခံစားနိုင်ကြသည်၊ ပြီးလျှင် ဤနည်းလမ်းဖြင့် အသက်ရှင်နေထိုင်ရသည်မှာ ငြိမ်သက်သည်ဟုပင် ခံစားရပြီး ၎င်းတို့သည် ဆုံးမပဲ့ပြင်ခြင်း သို့မဟုတ် အပြစ်ဒဏ်ပေးခြင်း ခံနေရသည်ဟု မခံစားရဘဲ ယင်းကို ပုံမှန်မဟုတ်ဟု ၎င်းတို့က တွေ့ရှိကြသည်။ လူတို့က ဖောက်ပြန်ပျက်စီးခြင်းကို ထုတ်ဖော်ပါက အနည်းဆုံးအနေဖြင့် ၎င်းတို့သည် ပြစ်တင်ဆုံးမခံရသည်ဟု ခံစားရသင့်သည်၊ သို့မဟုတ် ဖျားနာသင့်သည်၊ သို့မဟုတ် ၎င်းတို့၏ ပါးစပ်တွင် အနာဖုများ ပေါက်သင့်သည်၊ သို့မဟုတ် အစာစားသည့်အခါ နင်ခြင်း သို့မဟုတ် လျှာကို ကိုက်မိခြင်း ဖြစ်သင့်သည်၊ ပြီးလျှင် ၎င်းတို့ မကြည့်သင့်သည့်အရာတစ်ခုကို ကြည့်မိပါက ၎င်းတို့၏ မျက်လုံးများ နီရဲပြီး ရောင်ရမ်းသင့်သည်ဟု တွေးကြသည်။ ငါ့ကို ပြောလော့၊ ဘုရားသခင်သည် ဤအရာများကို လုပ်ဆောင်တော်မူသလော။ (မလုပ်ဆောင်ပါ။) ကိုယ်တော်သည် ယင်းတို့ကို လုံးဝ မလုပ်ဆောင်သလော။ (လူတို့သည် သမ္မာတရားကို နားမလည်သည့်အခါ ဘုရားသခင်သည် ၎င်းတို့၏ ဝိညာဉ်ရင့်ကျက်မှုအတိုင်း ၎င်းတို့ကို အနည်းငယ် ဆုံးမပဲ့ပြင်ပြီး ပြစ်တင်ဆုံးမကောင်း ဆုံးမနိုင်သည်၊ ထိုသို့ဖြင့် ၎င်းတို့သည် မိမိတို့ကိုယ်ကို ဆင်ခြင်သုံးသပ်ပြီး သမ္မာတရားထဲသို့ ဝင်ရောက်နိုင်မည်။ သို့ရာတွင် လူတို့သည် သမ္မာတရားကို နားလည်ပြီး မိမိတို့ လုပ်ဆောင်ခဲ့သည့်အရာသည် မှားယွင်းကြောင်း မိမိတို့၏ စိတ်နှလုံးထဲတွင် ရှင်းရှင်းလင်းလင်း သိရှိသည့်အခါ ထိုအခြေအနေတွင် ဘုရားသခင်သည် ၎င်းတို့ကို လုံးဝ ဆုံးမပဲ့ပြင်တော်မူမည် မဟုတ်ပေ။ အကြောင်းမှာ ကိုယ်တော်သည် ၎င်းတို့ သမ္မာတရားကို ရှာဖွေနိုင်ရန်နှင့် သူ၏ နှုတ်ကပတ်တော်များနှင့် သမ္မာတရားကို အသုံးပြု၍ မိမိတို့၏ လုပ်ဆောင်ချက်များနှင့် အပြုအမူများကို တိုင်းတာနိုင်ရန် မျှော်လင့်တော်မူသောကြောင့် ဖြစ်သည်။) အလွန်ကောင်းစွာ မိတ်သဟာယဖွဲ့ခဲ့သည်။ လူတို့၏ အယူအဆများနှင့် စိတ်ကူးများတွင် ၎င်းတို့က ဖောက်ပြန်ပျက်စီးခြင်းနှင့် ပုန်ကန်ခြင်းတို့ကို ထုတ်ဖော်သည့်အခါတိုင်း ဘုရားသခင်သည် ၎င်းတို့ကို ဆုံးမပဲ့ပြင်သင့်သည်၊ အထူးသဖြင့် ဆိုးယုတ်သောလူများက မကောင်းမှုပြုသည့်အခါ ဘုရားသခင်၏ အပြစ်ဒဏ်သည် ၎င်းတို့အပေါ် ချက်ချင်း ကျရောက်သင့်သည်၊ ထိုသို့ဖြင့် ဆိုးယုတ်သောလူများသည် သေချာပေါက် အပြစ်ဒဏ်ခံရမည်ဟု ယုံကြည်ကြသည်။ သို့ရာတွင် လက်တွေ့ဘဝ၌ ၎င်းတို့သည် ဤအပြစ်ဒဏ်များ ဖြစ်ပေါ်သည်ကို မြင်တွေ့ရသည်မှာ ရှားလှသည်။ တစ်ဖက်တွင် လူတို့သည် အမျိုးမျိုးသော ဖောက်ပြန်ပျက်စီးခြင်းနှင့် ပုန်ကန်ခြင်းတို့ကို ထုတ်ဖော်သည့်အခါ ၎င်းတို့သည် ဆုံးမပဲ့ပြင်ခြင်း သို့မဟုတ် ပြစ်တင်ဆုံးမခြင်း မခံရကြပေ၊ အခြားတစ်ဖက်တွင် ဆိုးယုတ်သောလူများက မကောင်းမှုပြုသည့်အခါ ၎င်းတို့သည် အပြစ်ဒဏ်ပေးခြင်း မခံရကြပေ။ ဤသည်က လူတို့၏ စိတ်နှလုံး နက်ရှိုင်းရာ၌ ဘုရားသခင်၏ အမှုတော်အပေါ် အယူအဆအချို့ကို ဖြစ်ပေါ်စေသည်၊ ပြီးလျှင် အချို့လူများသည် မိမိတို့၏ ယုံကြည်ခြင်းကိုပင် ဆုံးရှုံးကြလိမ့်မည်ဖြစ်ကာ ဤအပြင်ပန်းအရာများကို အခြေခံ၍ ဘုရားသခင်၏ အမှုတော်ကို တိုင်းတာပြီး သူ၏ အမှုတော်ကို ဝေဖန်အပြစ်တင်ကြလိမ့်မည်။ ဤသည်တို့မှာ လူတို့၏ အယူအဆများနှင့် စိတ်ကူးများ ဖြစ်သည် မဟုတ်လော။ လူတို့သည် ဖောက်ပြန်ပျက်စီးခြင်းနှင့် ပုန်ကန်ခြင်းတို့ကို ထုတ်ဖော်သည့်အခါ ဘုရားသခင်သည် ၎င်းတို့ကို ဆုံးမပဲ့ပြင်ရမည်လော သို့မဟုတ် ပြစ်တင်ဆုံးမပြီး တရားစီရင်ရမည်လော။ (မဟုတ်ပါ။) အချို့လူများက “ဘုရားသခင်သည် လူများကို ကယ်တင်သည့်အခါ ကိုယ်တော်သည် ၎င်းတို့ကို လုံးလုံးလျားလျား ကယ်တင်ရမည်။ ဘုရားသခင်၏ အမှုတော်၏ ရည်ရွယ်ချက်မှာ အဘယ်နည်း။ လူများကို သန့်စင်ရန် မဟုတ်လော။ သို့ဖြစ်၍ လူတို့သည် ဖောက်ပြန်ပျက်စီးခြင်းနှင့် ပုန်ကန်ခြင်းတို့ကို ထုတ်ဖော်သည့်အခါ ဘုရားသခင်သည် ၎င်းတို့ကို ဆုံးမပဲ့ပြင်ပြီး ပြစ်တင်ဆုံးမသင့်သည်၊ ဤသည်မှာ ၎င်းတို့အပေါ် တာဝန်ယူခြင်း ဖြစ်သည်။ သို့မဟုတ်ပါက ကိုယ်တော်သည် လူများကို ဂရုမစိုက်ဘဲ ၎င်းတို့ကို အမှန်တကယ် ချစ်ခြင်းနှင့် သနားကရုဏာထားခြင်း မဟုတ်ပေ” ဟု ပြောကြသည်။ လူတို့သည် ဤနည်းလမ်းဖြင့် တွေးကြသည် မဟုတ်လော။ (ဟုတ်ပါသည်။) ဤတွင် နားလည်သင့်သော သမ္မာတရားများမှာ အဘယ်နည်း။ ဆုံးမပဲ့ပြင်ခြင်း၊ ပြစ်တင်ဆုံးမခြင်းနှင့် အပြစ်ဒဏ်ပေးခြင်းတို့သည် လူတို့ သမ္မာတရားကို နားလည်ပြီး သမ္မာတရား လက်တွေ့ကျမှုထဲသို့ ဝင်ရောက်ရန်အတွက် မရှိမဖြစ်လိုအပ်သော လုပ်ငန်းစဉ်များ ဖြစ်သလော။ ယင်းတို့သည် ဘုရားသခင် လူများကို ကယ်တင်ရန်နှင့် ပြောင်းလဲရန်အတွက် မရှိမဖြစ်လိုအပ်သော နည်းလမ်းများနှင့် နည်းစနစ်များ ဖြစ်သလော။ အချို့လူများသည် ယင်းကို နားမလည်နိုင်ဘဲ “ဘုရားသခင် အမှန်တကယ် တည်ရှိပြီး ကိုယ်တော်သည် လူများကို ကယ်တင်ရန် သူ၏ အမှုတော်ကို လုပ်ဆောင်သည်ဆိုလျှင် ကိုယ်တော်သည် လူတို့ ဖောက်ပြန်ပျက်စီးခြင်းကို ထုတ်ဖော်သည့်အခါ သို့မဟုတ် ကိုယ်တော်ကို ပုန်ကန်သည့်အခါ အဘယ်ကြောင့် ဆုံးမပဲ့ပြင်တော်မမူသနည်း။ ဘုရားသခင်သည် ဆိုးယုတ်သောလူများ မကောင်းမှုပြုသည့်အတွက် အဘယ်ကြောင့် အပြစ်ဒဏ်ပေးတော်မမူသနည်း” ဟု တွေးကြသည်။ ဘုရားသခင်သည် လူများကို ဆုံးမပဲ့ပြင်တော်မမူသည့်အခါ သို့မဟုတ် ဆိုးယုတ်သောလူများ မကောင်းမှုပြုသည့်အတွက် အပြစ်ဒဏ်ပေးခြင်း မခံရသည့်အခါ ယင်းက အချို့လူများကို ဘုရားသခင် တည်ရှိခြင်းအပေါ် သံသယဖြစ်စေမည် မဟုတ်လော၊ သူ၏ အမှုတော်၏ ရလဒ်များအပေါ် သံသယဖြစ်စေမည် မဟုတ်လော။ မကြာခဏ ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းတို့သည် လူတို့ သမ္မာတရားကို ရှာဖွေခြင်းကို အစားထိုးနိုင်လျှင် သို့မဟုတ် ၎င်းတို့ကို သမ္မာတရား လက်တွေ့ကျမှုထဲသို့ ဝင်ရောက်စေနိုင်လျှင် ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းတို့သည် ဘုရားသခင် လူများကို ကယ်တင်ရန် အဓိက အမှုတော်နည်းလမ်းတစ်ခု ဖြစ်လိမ့်မည်ဖြစ်ပြီး မရှိမဖြစ်လိုအပ်သော နည်းလမ်းတစ်ခုလည်း ဖြစ်လိမ့်မည်။ သို့သော် လူတို့၏ လက်ရှိ ဖောက်ပြန်ပျက်စီးမှု အဆင့်ကို ထောက်ဆသော် ၎င်းတို့၏ စာတန်ဆန်သော သဘာဝသည် ဘုရားသခင်၏ ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းအားဖြင့် ချက်ချင်း ပြောင်းလဲနိုင်မည်လော။ လူတို့သည် ချက်ချင်း စစ်မှန်သော နောင်တရနိုင်မည်လော။ ၎င်းတို့သည် ချက်ချင်း သမ္မာတရား လက်တွေ့ကျမှုထဲသို့ ဝင်ရောက်နိုင်မည်လော။ (မဝင်ရောက်နိုင်ပါ။) ယင်းမှာ ၎င်းတို့၏ စွမ်းဆောင်နိုင်စွမ်းထက် ကျော်လွန်ပေမည်။ ထို့ကြောင့် ဘုရားသခင်၏ အမှုတော်၏ ဤအဆင့်တွင် ဘုရားသခင်သည် လူတို့အား အသက်ဖြင့် ထောက်ပံ့ရန် သမ္မာတရားများကို ဖော်ပြသည့် တစ်ချိန်တည်းမှာပင် သန့်ရှင်းသော ဝိညာဉ်တော်၏ လူများကို အသိဉာဏ်ပွင့်လင်းစေခြင်းနှင့် လမ်းပြခြင်း အမှုတော်မှလွဲ၍ ကိုယ်တော်သည် သဘာဝလွန်အရာတစ်ခုကိုမျှ မလုပ်ဆောင်ပေ၊ ပြီးလျှင် လူများကို ပြစ်တင်ဆုံးမခြင်း၊ ဆုံးမပဲ့ပြင်ခြင်း သို့မဟုတ် အပြစ်ဒဏ်ပေးခြင်း စသည့်အရာများကိုပင် လုပ်ဆောင်သည်မှာ ရှားပင်ရှားလှသည်။ ပြစ်တင်ဆုံးမခြင်း၊ ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းတို့သည် ဘုရားသခင်၏ အမှုတော်၏ အဓိက အစိတ်အပိုင်း မဟုတ်သော်လည်း ကိုယ်တော်သည် ဤအရာများကို ဆက်လက် လုပ်ဆောင်နေဆဲ ဖြစ်သည်။ ဆိုလိုသည်မှာ အချို့သော အထူးလူများ သို့မဟုတ် အထူးကိစ္စရပ်များတွင် သို့မဟုတ် အချို့သော အထူးပတ်ဝန်းကျင်များတွင် အချို့သော အထူးရလဒ်များကို ရရှိရန်အတွက် သို့မဟုတ် အချို့သော အထူးအကြောင်းရင်းများကြောင့် ဘုရားသခင်သည် လူများကို ဆုံးမပဲ့ပြင်ခြင်း၊ ပြစ်တင်ဆုံးမခြင်း သို့မဟုတ် အပြစ်ဒဏ်ပေးခြင်း အမှုတော်ကို လုပ်ဆောင်တော်မူမည်။ သို့သော် ယေဘုယျအားဖြင့် ကိုယ်တော်၏ အမှုတော်၏ ဤအဆင့်တွင် ကိုယ်တော် အမှုပြုသည့် အဓိကနည်းလမ်းမှာ လူတို့ သမ္မာတရားကို လိုက်စားသည့် လမ်းခရီးပေါ်တွင် လိုအပ်သည့်အရာကို ထောက်ပံ့ရန် စကားပြောဆိုပြီး သမ္မာတရားကို ဖော်ပြခြင်းဖြစ်သည်၊ ပြီးလျှင် ဤအရာ၏ ရည်ရွယ်ချက်မှာ ၎င်းတို့ သမ္မာတရား စည်းမျဉ်းများကို နားလည်ပြီး သမ္မာတရား လက်တွေ့ကျမှုထဲသို့ ဝင်ရောက်နိုင်စေရန် ဖြစ်သည်။ ယခု ဘုရားသခင်သည် များပြားလှသော သမ္မာတရားများကို ဖော်ပြပြီးဖြစ်သောကြောင့် ကိုယ်တော်သည် အတိတ်တွင် လုပ်ဆောင်ခဲ့သော ဤဆုံးမပဲ့ပြင်ခြင်း၊ ရိုက်နှက်ဆုံးမခြင်းနှင့် အပြစ်ဒဏ်ပေးခြင်း အမှုတော်ကိုပင် လုပ်ဆောင်သည်မှာ ရှားလှပေသည်။ သို့ဖြစ်၍ လူတို့ ပို၍ အာရုံစိုက်သင့်သည့်အရာမှာ ၎င်းတို့ နေ့စဉ်အသက်တာတွင် ကိစ္စရပ်များနှင့် ကြုံတွေ့သည့်အခါ လက်တွေ့လုပ်ဆောင်သင့်သော အမျိုးမျိုးသော သမ္မာတရား စည်းမျဉ်းများ ဖြစ်သည်၊ သတ်မှတ်ထားသော ကိစ္စရပ်တစ်ခုတွင် ဘုရားသခင်သည် ၎င်းတို့ကို ဆုံးမပဲ့ပြင်နေခြင်း၊ တားဆီးနေခြင်း သို့မဟုတ် ၎င်းတို့အတွက် အဆင်ပြေချောမွေ့အောင် လုပ်ဆောင်ပေးနေခြင်း ရှိမရှိနှင့် အခြားသော ထိုသို့သော နည်းလမ်းများနှင့် ကျင့်ကြံပြုမူမှုများအပေါ် အာရုံစိုက်ခြင်းထက် ဖြစ်သည်။ ဘုရားသခင်သည် ဆုံးမပဲ့ပြင်ခြင်း၊ ရိုက်နှက်ဆုံးမခြင်းနှင့် အပြစ်ဒဏ်ပေးခြင်းကဲ့သို့သော နည်းလမ်းများကို ရှားရှားပါးပါး အသုံးပြုသောကြောင့် ကိုယ်တော်သည် ယင်းတို့ကို မည်သည့်အခါမျှ အသုံးမပြုဟု မဆိုလိုပေ၊ ကိုယ်တော်သည် ယင်းတို့ကို ရှားရှားပါးပါးသာ အသုံးပြုခြင်း ဖြစ်သည်။ “ရှားရှားပါးပါး အသုံးပြုသည်” ဟု ငါဆိုလိုသည့်အရာမှာ အဘယ်နည်း။ ရံဖန်ရံခါ အချို့သော အထူးအခြေအနေများတွင် ကိုယ်တော်သည် လူတို့ သမ္မာတရားကို နားလည်ပြီး သမ္မာတရား စည်းမျဉ်းများအတိုင်း လက်တွေ့လုပ်ဆောင်ရန် ကူညီပေးသည့် အမှုအချို့ကို ပေါ့ပါးစွာဖြင့် သို့မဟုတ် ကိုယ်စားပြုသည့်အနေနှင့် ပုံဆောင်သဘောအရ လုပ်ဆောင်ရန် ဆုံးမပဲ့ပြင်ခြင်း၊ ရိုက်နှက်ဆုံးမခြင်း သို့မဟုတ် အပြစ်ဒဏ်ပေးခြင်း နည်းလမ်းများကို အသုံးပြုလိမ့်မည်။ ဆိုလိုသည်မှာ ကိုယ်တော်သည် လူတို့ သမ္မာတရား စည်းမျဉ်းများထဲသို့ ဝင်ရောက်ရန် ကူညီပေးရန် ဤနည်းလမ်းများကို အသုံးပြုသည်၊ သို့သော် ထိုမျှသာ ဖြစ်သည်။ သို့ဆိုလျှင် ဘုရားသခင်သည် သူ၏ အမှုတော်တွင် ဤနည်းလမ်းများကို အဘယ်ကြောင့် များစွာ အသုံးမပြုသနည်း။ ကိုယ်တော်သည် အဘယ်ကြောင့် ဤနည်းလမ်းများဖြင့် အဓိကအားဖြင့် အမှုမပြုသနည်း။ တစ်ဖက်တွင်မူ ယင်းမှာ ကိုယ်တော်၏ အမှုတော်၏ ဤအဆင့်တွင် ကိုယ်တော်သည် ၎င်းတို့ နားလည်သင့်သော အမျိုးမျိုးသော သမ္မာတရားများကို လူတို့အား ပြောပြပြီး ထောက်ပံ့ပေးခဲ့ပြီးဖြစ်သည်၊ ၎င်းတို့သည် ဤသမ္မာတရားများကို ကြားခဲ့ပြီးဖြစ်သည်၊ ၎င်းတို့၏ နားလည်နိုင်စွမ်း နယ်ပယ်အတွင်း၌ ယင်းတို့ကို နားလည်သဘောပေါက်ပြီး သိရှိပြီးဖြစ်သောကြောင့် ဖြစ်သည်။ ဤသည်မှာ အကြောင်းရင်းတစ်ခု ဖြစ်သည်။ အခြားအကြောင်းရင်းမှာ လူတို့၏ ပုဂ္ဂလဓိဋ္ဌာန်ကျသော အကြောင်းရင်းများနှင့် သက်ဆိုင်သည်။ လူတို့၌ ပုံမှန်လူ့သဘာဝ၏ ဟီရိသြတ္တပ္ပ ရှိသည်၊ ပြီးလျှင် ဤဟီရိသြတ္တပ္ပ၏ အကျိုးသက်ရောက်မှုအောက်တွင် ၎င်းတို့သည် မိမိတို့ ထုတ်ဖော်သည့် ဖောက်ပြန်ပျက်စီးသော စိတ်သဘောထားများ သို့မဟုတ် မိမိတို့၏ လုပ်ဆောင်ချက်များ၊ အတွေးအခေါ်များနှင့် ရှုထောင့်အမြင်များသည် အပြုသဘောဆောင်ခြင်း သို့မဟုတ် အပျက်သဘောဆောင်ခြင်း ရှိမရှိကို တိုင်းတာလိမ့်မည်။ လူတို့အတွင်း၌ အနည်းဆုံးအားဖြင့် ဤအရာအားလုံးကို တိုင်းတာရန် အသိစိတ်၏ စံနှုန်းတစ်ခု ရှိသည်။ သင်သည် အချို့သောအရာတစ်ခုကို တိုင်းတာရန် သင်၏ အသိစိတ်ကို အသုံးပြုပြီး ယင်းမှာ အပြုသဘောဆောင်သည်ဟု သင် ဆုံးဖြတ်ပါက သင်သည် ရှေ့ဆက်ပြီး ယင်းကို လုပ်ဆောင်သင့်သည်၊ ပြီးလျှင် သင်သည် ယင်းကို လုပ်ဆောင်ရာတွင် အနည်းငယ် နှေးကွေးခြင်း သို့မဟုတ် နောက်ကျခြင်း ရှိပါက မိမိကိုယ်ကို ပြစ်တင်ရန် မလိုအပ်ပေ။ သင်သည် ထိုအရာကို တိုင်းတာရန် သင်၏ အသိစိတ်ကို အသုံးပြုပြီး ယင်းမှာ အပျက်သဘောဆောင်ပြီး မလုပ်ဆောင်သင့်သည့်အရာတစ်ခုဖြစ်ကြောင်း သင် ဆုံးဖြတ်ပါက သင်သည် မိမိကိုယ်ကို ချုပ်တည်းပြီး ယင်းကို မပြောဆို သို့မဟုတ် မလုပ်ဆောင်သင့်ပေ။ သို့ရာတွင် သင်သည် သင်၏ အသိစိတ်နှင့် ဆင်ခြင်တုံတရားဖြင့် လှုံ့ဆော်သော ခံစားချက်များ မရှိပါက သင်သည် လူသားတစ်ဦး မဟုတ်ပေ။ သင့်တွင် အသိစိတ်နှင့် ဆင်ခြင်တုံတရားပင် မရှိပါက တစ်စုံတစ်ခုသည် မှန်ခြင်း သို့မဟုတ် မှားခြင်း၊ အပြုသဘောဆောင်ခြင်း သို့မဟုတ် အပျက်သဘောဆောင်ခြင်း ရှိမရှိကို သင် အကဲဖြတ်နိုင်ဖွယ်မရှိပေ၊ ထို့ကြောင့် ဘုရားသခင်သည် သင့်ကို ဆုံးမပဲ့ပြင်ပြီး အပြစ်ဒဏ်ပေးခြင်းသည် အဓိပ္ပာယ်မဲ့ပေလိမ့်မည်။ တစ်နည်းအားဖြင့်ဆိုသော် ဘုရားသခင်သည် အသိစိတ်၏ အကျိုးသက်ရောက်မှုများကို မခံရသောသူတို့အပေါ် အမှုမပြုပေ၊ ပြီးလျှင် ကိုယ်တော်သည် ထိုသို့သောလူများကို မကယ်တင်ပေ။ “၎င်းတို့ကို မကယ်တင်ခြင်း” တွင် အဘယ်အရာ ပါဝင်သနည်း။ ကိုယ်တော်သည် ၎င်းတို့ကို ဆုံးမပဲ့ပြင်ရန်ပင် အလိုမရှိပေ၊ ကိုယ်တော်သည် ၎င်းတို့ကို ဆုံးမပဲ့ပြင်ခြင်း သို့မဟုတ် ရိုက်နှက်ဆုံးမခြင်း မပြုပေ။ “တစ်စုံတစ်ဦးက မကောင်းမှုပြုလျှင် ဘုရားသခင်သည် ၎င်းတို့ကို အပြစ်ဒဏ်ပေးမည်လော” ဟု မေးသောသူများ ရှိသည်။ ဘုရားသခင်သည် ၎င်းတို့ကို တိုက်ရိုက် အပြစ်ဒဏ်ပေးမည် မဟုတ်ပေ၊ အကြောင်းမှာ အသင်းတော်၌ စီမံအုပ်ချုပ်ရေးဆိုင်ရာ အမိန့်များ ရှိသောကြောင့် ဖြစ်သည်။ ၎င်းတို့သည် နှောင့်ယှက်ခြင်း သို့မဟုတ် အဖျက်အမှောင့်လုပ်ခြင်းကို ဖြစ်စေသော ဆိုးယုတ်သောသူတစ်ဦး ဖြစ်ပါက ၎င်းတို့ကို ရှင်းလင်းပစ်ခြင်း သို့မဟုတ် နှင်ထုတ်ခြင်းသည် ယင်း၏အဆုံးသတ် ဖြစ်လိမ့်မည်။ ၎င်းတို့သည် ရှင်းလင်းပစ်ခြင်း သို့မဟုတ် နှင်ထုတ်ခြင်းခံရရန် အခြေအနေများနှင့် မကိုက်ညီလျှင်ပင် ၎င်းတို့ကို ဘီ အုပ်စုသို့ ပို့ဆောင်ခြင်းခံရမည်။ တစ်စုံတစ်ဦးက ဘုရားသခင်၏ ပူဇော်သက္ကာများကို ဖြုန်းတီးပါက ယင်းမှာ ပို၍ ဆိုးရွားသည်၊ ပြီးလျှင် ၎င်းတို့သည် ပေးဆပ်သင့်သည့် မည်သည့်အရာကိုမဆို ပြန်လည်ပေးဆပ်ရမည်၊ ပြီးနောက် ၎င်းတို့ကို သင့်လျော်စွာ ကိုင်တွယ်ရမည်။ ဤသည်မှာ ဘုရားသခင်၏ အမှုတော်၏ စည်းမျဉ်းနှင့် ကိုယ်တော် လူတို့ကို ဆက်ဆံသည့် စည်းမျဉ်း ဖြစ်သည်။ ယင်းမှာ ရိုးရှင်းသည် မဟုတ်လော။ (ဟုတ်ပါသည်၊ ရိုးရှင်းပါသည်။) ဘုရားသခင်သည် သင့်ကို ရွေးချယ်ခြင်းမှာ ကိုယ်တော်သည် သင့်ကို စုံလင်စေရမည်၊ ပြီးလျှင် ကိုယ်တော် ထိုသို့မလုပ်ဆောင်မချင်း ရပ်တန့်မည်မဟုတ်ဟု ဆိုလိုကြောင်း သင်ထင်သလော။ ထိုအရာသည် အသိစိတ်နှင့် ဆင်ခြင်တုံတရားရှိပြီး သမ္မာတရားကို လိုက်စားသောသူတို့အတွက်သာ ဖြစ်သည်၊ ယင်းမှာ ကယ်တင်ခြင်း ခံရနိုင်သောသူတို့အတွက်သာ ဖြစ်သည်။ အသိစိတ်၏ သိနားလည်မှုပင် မရှိသောသူတို့အတွက်မူ ၎င်းတို့ကို အသင်းတော်၏ စီမံအုပ်ချုပ်ရေးဆိုင်ရာ အမိန့်များအတိုင်း ဆက်ဆံပြီး ကိုင်တွယ်ရန်သာ လိုအပ်သည်၊ ဘုရားသခင်သည် ၎င်းတို့ကို ဆုံးမပဲ့ပြင်တော်မူမည် မဟုတ်ပေ။ ၎င်းတို့ကို ဆုံးမပဲ့ပြင်ရာ၌ အဘယ်အကျိုးရှိမည်နည်း။ ပုံမှန်လူ့သဘာဝနှင့် အသိစိတ် ကင်းမဲ့သောလူများကို ဆုံးမပဲ့ပြင်ခြင်းသည် ငါးတစ်ကောင်ကို ကုန်းပေါ်တွင် အသက်ရှင်ခိုင်းခြင်းနှင့်ဖြစ်စေ၊ ဝက်တစ်ကောင်ကို ပျံသန်းခိုင်းခြင်းနှင့်ဖြစ်စေ ညီမျှသည်၊ ယင်းမှာ ဝက်ရှေ့၌ ပုလဲကိုချထားခြင်းနှင့် သန့်ရှင်းသောအရာများကို မစင်ကြယ်သောအရာများအား စားရန် ပစ်ချပေးခြင်းနှင့် တူညီသည်၊ ဘုရားသခင်သည် ယင်းကို သေချာပေါက် မလုပ်ဆောင်ပေ။ သို့ဖြစ်၍ ဤကိစ္စရပ်တွင် လူတို့က “ကျွန်ုပ်သည် ဘုရားသခင်၏ ရွေးချယ်ခြင်းကို ခံခဲ့ရသည်၊ ကျွန်ုပ်သည် ဘုရားသခင်၏ သိုးတစ်ကောင်ဖြစ်သည်၊ ပြီးလျှင် ကျွန်ုပ် အမှားများ ပြုလုပ်ပြီး မကောင်းမှုပြုလျှင်ပင် ဘုရားသခင်သည် ကျွန်ုပ်ကို စွန့်ပစ်တော်မူမည် မဟုတ်” ဟု မတွေးသင့်ပေ။ ဤပြောဆိုချက်သည် ခိုင်လုံခြင်းမရှိပေ၊ သင်သည် သိုးတစ်ကောင် သို့မဟုတ် ဝံပုလွေတစ်ကောင် ဟုတ်မဟုတ် ပြောရန် ခက်သည်။ သင်သည် ဘုရားသခင်၏ သိုးတစ်ကောင် ဟုတ်မဟုတ်ကို သင် မည်သို့ အကဲဖြတ်သနည်း။ ယင်းမှာ သင်သည် လူ့သဘာဝနှင့် အသိစိတ်ကို ဆန့်ကျင်သည့်အရာတစ်ခုကို လုပ်ဆောင်ခဲ့သည့်အခါ သင်၌ ယင်းကို သိနားလည်မှု ရှိမရှိနှင့် သင်၏ အသိစိတ်သည် ပြစ်တင်ဆုံးမခြင်းနှင့် ရှုတ်ချခြင်းကို ခံစားရခြင်း ရှိမရှိအပေါ် မူတည်သည်။ ယင်းက ရှုတ်ချခြင်းကို ခံစားရပါက သင်သည် မိမိကိုယ်ကို ပြုပြင်လိမ့်မည်၊ ပြီးလျှင် သင်သည် သမ္မာတရားကို နားမလည်လျှင်ပင် သင်သည် အသိစိတ်၏ စံနှုန်းအတိုင်း ပြုမူနိုင်စွမ်းရှိလိမ့်မည်။ အနည်းဆုံးအားဖြင့် သင်သည် ပုံမှန်လူ့သဘာဝနှင့်အညီ ပြုမူနိုင်စွမ်းရှိလိမ့်မည်။ သင့်တွင် ဤသရုပ်သကန်များ ရှိပါက သင်သည် ဘုရားသခင်၏ သိုးတစ်ကောင် ဖြစ်သည်။ ပုံမှန်လူ့သဘာဝ၏ အသိစိတ်ကို ဆန့်ကျင်ပြီး ကိုယ်ကျင့်တရားဆိုင်ရာ တရားမျှတမှုကို ချိုးဖောက်သည့်အရာတစ်ခုနှင့် သင်ကြုံတွေ့သည့်အခါ သင့်တွင် တရားမျှတစိတ် အနည်းငယ်မျှပင် မရှိပါက၊ သင်လုပ်ဆောင်ခဲ့သော မကောင်းမှုအတွက် သို့မဟုတ် ဆိုးယုတ်သောလူများကြောင့် ဖြစ်ပေါ်လာသော နှောင့်ယှက်မှုအတွက် ရွံရှာခြင်း သို့မဟုတ် မုန်းတီးခြင်းကို သင်မခံစားရပါက၊ သင်၏ အသိစိတ်သည် လုံးဝ ရှုတ်ချခြင်းကို မခံစားရပါက သင်သည် ဘုရားသခင်၏ သိုးတစ်ကောင် မဟုတ်ပေ၊ သင်သည် ဝံပုလွေတစ်ကောင်၊ သားရဲတစ်ကောင်၊ နတ်ဆိုးတစ်ကောင် ဖြစ်သည်။ ဤသည်မှာ သင်သည် ဘုရားသခင်၏ သိုးတစ်ကောင် သို့မဟုတ် ဝံပုလွေတစ်ကောင် ဟုတ်မဟုတ်ကို တိုင်းတာရန် စံနှုန်း ဖြစ်သည်။ သင်သည် ဘုရားသခင်၏ သိုးတစ်ကောင် မဟုတ်ဘဲ “ကျွန်ုပ်သည် ဖောက်ပြန်ပျက်စီးခြင်းနှင့် ပုန်ကန်ခြင်းတို့ကို ထုတ်ဖော်ခဲ့သော်လည်း ဘုရားသခင်သည် ကျွန်ုပ်ကို ဆုံးမပဲ့ပြင်တော်မမူ၊ ဘုရားသခင်သည် ကျွန်ုပ်ကို ဆုံးမပဲ့ပြင်သင့်သည်” ဟူသကဲ့သို့သော စိတ်ကူးများ၊ အယူအဆများနှင့် စိတ်ကူးများကို အသုံးပြု၍ ဘုရားသခင်၏ အမှုတော်ကို အစဉ်မပြတ် အကဲဖြတ်နေဆဲဖြစ်ပါက သင်သည် မိုက်မဲပေသည်။ သင်သည် ဘုရားသခင်၏ သိုးတစ်ကောင် လုံးဝမဟုတ်ပေ၊ ပြီးလျှင် ဘုရားသခင်သည် သင့်ကို ကယ်တင်ရန် ရည်ရွယ်ချက်မရှိပေ၊ သို့ဖြစ်၍ သင်သည် ဘုရားသခင်၏ အမှုတော်ကို တိုင်းတာရန်နှင့် ဝေဖန်အပြစ်တင်ရန် အရည်အချင်းပြည့်မီသလော။ ဤသည်မှာ မိုက်မဲခြင်းမဟုတ်လျှင် အဘယ်အရာ ဖြစ်မည်နည်း။ ဤကိစ္စကို သင် အကဲဖြတ်နိုင်သည် မဟုတ်လော။ (ယခု အကဲဖြတ်နိုင်ပါပြီ။)

ဟီရိဩတ္တပ္ပရှိခြင်းအတွက် စံနှုန်းမှာ အဘယ်နည်း။ လူတစ်ဦးတွင် ဟီရိဩတ္တပ္ပ ရှိမရှိကို သင်မည်သို့ တိုင်းတာသင့်သနည်း။ (၎င်းတို့သည် ဆိုးယုတ်သောလူများ မကောင်းမှုပြုသည်ကို မြင်သည့်အခါ သို့မဟုတ် ဘုရားအိမ်တော်၏ အကျိုးစီးပွားများကို ထိခိုက်စေသည့်အရာများကို မြင်သည့်အခါ ၎င်းတို့၏ စိတ်နှလုံးထဲတွင် တရားမျှတစိတ် ရှိမရှိနှင့် ဤအရာများကို မုန်းတီးနိုင်ခြင်း ရှိမရှိအပေါ် မူတည်ပါသည်။ ၎င်းတို့၏ စိတ်နှလုံးထဲတွင် လုံးဝ သိနားလည်မှုမရှိလျှင် ၎င်းတို့၌ ဟီရိဩတ္တပ္ပမရှိပေ။ ထို့အပြင် တစ်စုံတစ်ဦးသည် မိမိပြုခဲ့သော မကောင်းမှု သို့မဟုတ် စည်းမျဉ်းများကို သိသိသာသာ ချိုးဖောက်သည့် မိမိပြုခဲ့သော အမှုအရာများနှင့်ပတ်သက်၍ မိမိ၏ စိတ်နှလုံးထဲတွင် သိနားလည်မှုမရှိလျှင် ထိုသို့သောလူများ၌လည်း ဟီရိဩတ္တပ္ပမရှိပေ။) သင်၌ ဟီရိဩတ္တပ္ပမရှိလျှင် သင်သည် လူမဟုတ်ပေ။ ထိုသို့ဖြစ်လျှင် ဘုရားသခင်သည် သင့်ကို ကယ်တင်ဦးမည်လော။ ဘုရားသခင်က သင့်ကို ကယ်တင်မည်မဟုတ်လျှင် ကိုယ်တော်သည် သင့်ကို ဆုံးမပဲ့ပြင်ဦးမည်လော။ ဆုံးမပဲ့ပြင်ခြင်းနှင့် ရိုက်နှက်ခြင်းတို့သည် ဘုရားသခင်၏ အမှုတော်၏ အနည်းငယ်သော အစိတ်အပိုင်းတစ်ခု ဖြစ်သည်။ “အနည်းငယ်သော” ဟု ငါဆိုသည့်အခါ ဘုရားသခင်သည် ဤနည်းလမ်းများကို လျှော့လျှော့ပေါ့ပေါ့ အသုံးပြုတော်မူသည်ဟု ဆိုလိုသော်လည်း ၎င်းတို့သည် ဘုရားသခင်၏ အမှုတော်၏ အစိတ်အပိုင်းတစ်ခု ဖြစ်နေဆဲ ဖြစ်သည်။ သင်၌ ဟီရိဩတ္တပ္ပ သို့မဟုတ် ဆင်ခြင်တုံတရားပင် မရှိလျှင် ဘုရားသခင်က သင့်ကို ဆုံးမပဲ့ပြင်ခြင်းသည် အသုံးဝင်ဦးမည်လော။ သင်၌ တရားမျှတစိတ်မရှိလျှင်၊ ကောက်ကျစ်ဆိုးယုတ်သော အရာအားလုံး၊ သမ္မာတရားကို ဆန့်ကျင်သောအရာအားလုံး၊ ကိုယ်ကျင့်တရားဆိုင်ရာ တရားမျှတမှုကို ဆန့်ကျင်သောအရာအားလုံးနှင့် သင်၏ ဟီရိဩတ္တပ္ပကိုပင် ဆန့်ကျင်သောအရာတို့အပေါ် သင်သည် မည်သည့်အရာမျှ မခံစားရဘဲ ထိုသို့သောအရာများကို သင်မမုန်းတီးလျှင်၊ ဘုရားအိမ်တော်၏ အကျိုးစီးပွားများကို ကာကွယ်ရန် ဘုရားသခင်၏ ဘက်၌ သင်မရပ်တည်နိုင်လျှင်၊ အသင်းတော်၏အလုပ်ကို ကာကွယ်ပြောဆိုရန် သင်ထ၍ စကားတစ်ခွန်းမျှ မပြောနိုင်လျှင်၊ မျှတသော စကားတစ်ခွန်းမျှပင် မပြောနိုင်လျှင် သင်သည် လူမဟုတ်ပေ။ သင်သည် လူမဟုတ်သည့်တိုင် ဘုရားသခင်က သင့်ကို ဆုံးမပဲ့ပြင်ရန် လွန်ကဲစွာ မျှော်လင့်နေသေးသည်။ သင်သည် အမှန်ပင် သင့်ကိုယ်သင် ချီးမြှောက်နေပြီး သင့်ကိုယ်သင် အပြင်လူတစ်ဦးအဖြစ် မမှတ်ယူဘဲနေပေသည်။ “တစ်စုံတစ်ဦးသည် ဘုရားသခင်၏ သိုးတစ်ကောင်မဟုတ်ဘဲ ဝံပုလွေတစ်ကောင်ဖြစ်လျှင် ဘုရားသခင်သည် ၎င်းကို ဆုံးမပဲ့ပြင်မည်မဟုတ်ပေ။ သို့ဆိုလျှင် ၎င်းသည် ဘုရားသခင်၏ သိုးတစ်ကောင်ဖြစ်ပါက ဘုရားသခင်သည် ၎င်းကို ဆုံးမပဲ့ပြင်မည်လော” ဟု ပြောဆိုသူအချို့ ရှိပါသည်။ အထူးအခြေအနေများအောက်တွင် ဘုရားသခင်သည် သင့်ကို ရံဖန်ရံခါ ဆုံးမပဲ့ပြင်ပြီး သင့်အတွက် တာဝန်ယူလိမ့်မည်။ သင်သည် ထုံထိုင်းပြီး သတိမမူလျှင်ပင် ဘုရားသခင်သည် သင့်ကို သတိပေးမည်၊ ဆုံးမပဲ့ပြင်မည်၊ ကဲ့ရဲ့ပြစ်တင်မည် ဖြစ်သည်။ ဘုရားသခင်၏ အမှုတော်သည် သင့်လျော်သော အတိုင်းအတာအထိ လုပ်ဆောင်ပြီး ထိုမျှနှင့် ရပ်ထားခြင်း ဖြစ်သည်။ အဘယ်ကြောင့် ကိုယ်တော်သည် ဤနည်းလမ်းဖြင့် အမှုပြုသနည်း။ အကြောင်းမှာ သင်၌ ဟီရိဩတ္တပ္ပရှိလျှင် ဘုရားသခင်က သင့်ကို ဤနည်းလမ်းဖြင့် ကဲ့ရဲ့ပြစ်တင်သည့်အခါ သင်၏ ဟီရိဩတ္တပ္ပသည် လျင်မြန်စွာ သိနားလည်လာမည်ဖြစ်ပြီး သင်သည် သင့်ကိုယ်သင် အပြစ်တင်ကာ ကိုယ်တော့်အပေါ် အကြွေးတင်သည်ဟု ခံစားရမည် ဖြစ်သောကြောင့်တည်း။ သင်သည် နောင်တရကာ ဝမ်းနည်းပြီး ပူဆွေးသောကရောက်မည်ဖြစ်ပြီး သင်သည် သင့်ကိုယ်သင် ပြုပြင်ပြောင်းလဲနိုင်ကာ နောက်ဆုံးတွင် သမ္မာတရား စည်းမျဉ်းများကို ရှာဖွေပြီး သမ္မာတရားနှင့်အညီ လက်တွေ့လုပ်ဆောင်နိုင်မည် ဖြစ်သည်၊ ဤသည်မှာ ဘုရားသခင်အလိုရှိသော အကျိုးရလဒ် ဖြစ်သည်။ သင်၌ ထက်မြက်သော ဟီရိဩတ္တပ္ပရှိပြီး သမ္မာတရားများစွာကို နားလည်လျှင်၊ ဘုရားသခင်က သင့်ကို ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် သတိပေးခြင်း မပြုလျှင်ပင် သင်သည် ပြဿနာကို သဘောပေါက်နားလည်နိုင်ဆဲဖြစ်ပြီး သင်၏ ဟီရိဩတ္တပ္ပသည်လည်း သိနားလည်မှုရှိနေဆဲဖြစ်ကာ ကဲ့ရဲ့ပြစ်တင်ခြင်းနှင့် ပြစ်တင်ဆုံးမခြင်း ခံရသည်ဟု ခံစားရပါက ထိုသည်မှာ သာ၍ပင် ကောင်းမွန်ပြီး ဘုရားသခင်၏ ဆုံးမပဲ့ပြင်ခြင်းကို မလိုအပ်တော့ပေ။ ဘုရားသခင်က သင့်ကို ဆုံးမပဲ့ပြင်ခြင်းမပြုလျှင်ပင် သင်၏ ဟီရိဩတ္တပ္ပသည် အလွန်အမင်း ထက်မြက်ပြီး ပြစ်တင်ဆုံးမခြင်းခံရသည်ဟု ခံစားရကာ သင်သည် နောင်တရပြီး ဝမ်းနည်းကာ ဘုရားသခင်အပေါ် အကြွေးတင်သည်ဟု ခံစားရပြီး ကိုယ်တော့်ကို သင်ပြစ်မှားခဲ့ကြောင်း၊ စိတ်ပျက်စေခဲ့ကြောင်းနှင့် စိတ်ကျေနပ်မှုမရှိစေခဲ့ကြောင်း ခံစားရကာ သင်သည် သမ္မာတရား စည်းမျဉ်းများကို တက်ကြွစွာ ရှာဖွေပြီး ကိုယ်တော်၏ တောင်းဆိုချက်များအတိုင်း ပြုမူနိုင်ပေသည်။ ဤသည်မှာ ပုံမှန် လူ့သဘာဝ၏ ဟီရိဩတ္တပ္ပက လူတို့အပေါ် သက်ရောက်စေသော အကျိုးသက်ရောက်မှုဖြစ်ပြီး လူတို့အပေါ် သက်ရောက်စေသင့်သော အကျိုးသက်ရောက်မှုလည်း ဖြစ်သည်။ သို့ဖြစ်၍ လူတစ်ဦးသည် ဘုရားသခင်၏ သိုးတစ်ကောင် ဟုတ်မဟုတ်နှင့် ၎င်းတို့ ကယ်တင်ခြင်းခံနိုင်ခြင်း ရှိမရှိသည် ၎င်းတို့၌ ပုံမှန် လူ့သဘာဝနှင့် ဟီရိဩတ္တပ္ပ ရှိမရှိအပေါ် မူတည်သည်။ ဤသည်မှာ အလွန်အရေးကြီးပြီး အရေးပါပေသည်။ သင်သည် သမ္မာတရားများစွာကို နားလည်သည်ဟု ပြောဆိုလျှင် သင်ကိုယ်တိုင် ပုန်ကန်သည့်အခါ သို့မဟုတ် ဆိုးယုတ်သောလူများ မကောင်းမှုပြုသည်ကို သင်ကြုံတွေ့ရသည့်အခါ သင်နားလည်သော သမ္မာတရားများသည် အကျိုးသက်ရောက်မှု ရှိလာသလော။ ၎င်းတို့သည် သင့်ကို ကြီးကြပ်ခြင်း၊ ဉာဏ်ပွင့်စေခြင်းနှင့် သင်၏ ဟီရိဩတ္တပ္ပကို ကဲ့ရဲ့ပြစ်တင်ခြင်း ခံစားရစေကာ အသက်ဝင်လှုပ်ရှားလာစေသည့် အာနိသင် ရှိစေသလော။ သင်၌ ဟီရိဩတ္တပ္ပ၏ သိနားလည်မှုမရှိလျှင် သင်၌ ဟီရိဩတ္တပ္ပနှင့် ပုံမှန် လူ့သဘာဝ ကင်းမဲ့နေပြီး သင်နားလည်သည့်အရာသည် သမ္မာတရားမဟုတ်ဘဲ အယူဝါဒသာ ဖြစ်သည်။ သင်သည် အယူဝါဒကိုသာ နားလည်လျှင် သမ္မာတရားကို လက်တွေ့မလုပ်ဆောင်နိုင်ဘဲ သင်သည် ကယ်တင်ခြင်းခံရမည့်သူများထဲမှ တစ်ဦးမဟုတ်ပေ။ ဤသည်ကို သင်နားလည်သည် မဟုတ်လော။ (နားလည်ပါသည်။) သို့ဖြစ်၍ ဘုရားသခင်၏ အမှုတော်တွင် ဘုရားသခင် အမှုပြုသည့် အခြေခံအကျဆုံးသော နည်းလမ်းအချို့နှင့် ပတ်သက်လာလျှင် လူတို့သည် ယင်းတို့ကို မိမိတို့၏ ကိုယ်ပိုင်အယူအဆများနှင့် စိတ်ကူးများကို အခြေခံ၍ ဘောင်မခတ်သင့်ပေ။ သင်သည် ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်းနှင့် အပြစ်ဒဏ်ပေးခြင်းတို့ကို ခံရသည်ဖြစ်စေ၊ သို့မဟုတ် ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းတို့ကို မည်သည့်အခါမျှ မခံရသည်ဖြစ်စေ ဤသည်မှာ သင်သည် သမ္မာတရား စည်းမျဉ်းများ မည်မျှ နားလည်ကြောင်းကို ညွှန်ပြခြင်း မဟုတ်သကဲ့သို့ သင်သည် ဘုရားသခင် ရွေးချယ်ထားသော ပုဂ္ဂိုလ်တစ်ဦးဖြစ်ကြောင်းကိုလည်း ညွှန်ပြခြင်းမဟုတ်ပေ။ သင်သည် ဘုရားသခင်ကို နှစ်ပေါင်းများစွာ ယုံကြည်ခဲ့ပြီး မရေမတွက်နိုင်သောအကြိမ်ပေါင်းများစွာ ဆုံးမပဲ့ပြင်ခြင်းနှင့် ရိုက်နှက်ခြင်းတို့ကို ခံခဲ့ရသော်လည်း သမ္မာတရား စည်းမျဉ်းများအတိုင်း မည်သည့်အခါမျှ လုပ်ဆောင်ခဲ့ခြင်း မရှိပေ၊ ထိုသို့ဖြစ်လျှင် အဆုံး၌ သင်ကယ်တင်ခြင်းမခံရသည့်အခါ ယင်းမှာ သင်၏ ကိုယ်ပိုင်အမှားသာဖြစ်ပြီး သင်နှင့် ထိုက်တန်သည့်အရာ အတိအကျပင် ဖြစ်ပေမည်။ သင်သည် ဘုရားသခင်ကို ယုံကြည်ခြင်း၌ ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းတို့ကို ခံရသည်မှာ ရှားလှသော်လည်း သင်၏ ဟီရိဩတ္တပ္ပကြောင့် သင်သည် မကြာခဏ ပြစ်တင်ဆုံးမခြင်းနှင့် ကဲ့ရဲ့ပြစ်တင်ခြင်းတို့ကို ခံစားရပြီး သင်ပြစ်မှားမှုများ ကျူးလွန်သည့်အခါ နောင်တရကာ သင့်ကိုယ်သင် ပြုပြင်ပြောင်းလဲပြီး သမ္မာတရား စည်းမျဉ်းများကို ရှာဖွေနိုင်ကာ သမ္မာတရားကို လက်တွေ့လုပ်ဆောင်ပြီး သမ္မာတရား စည်းမျဉ်းများအတိုင်း လုပ်ဆောင်နိုင်ခြင်းလည်း ဖြစ်နိုင်သည်၊ ဤသို့ဖြစ်လျှင် သင်သည် ကယ်တင်ခြင်းခံရမည့်သူများထဲမှ တစ်ဦးဖြစ်ပေသည်။ သင်နားလည်ပြီလော။ (နားလည်ပါပြီ။) ငါသည် အခြေအနေနှစ်မျိုးကို ဖော်ပြခဲ့သည်။ ယင်းတို့မှာ အတိအကျအားဖြင့် အဘယ်နည်း။ (အခြေအနေတစ်ခုမှာ လူတို့သည် ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းများစွာကို ခံခဲ့ရသော်လည်း အဆုံး၌ ၎င်းတို့သည် သမ္မာတရား စည်းမျဉ်းများအတိုင်း လုပ်ဆောင်နိုင်ခြင်းမရှိသေးဘဲ သမ္မာတရားကို မရရှိခဲ့သဖြင့် ၎င်းတို့သည် ကယ်တင်ခြင်းမခံရဘဲ ဤသည်မှာ ကိုယ့်အပြစ်နှင့်ကိုယ်သာ ဖြစ်သည်။ အခြားအခြေအနေတစ်ခုမှာ အချို့လူများသည် ဘုရားသခင်၏ ဆုံးမပဲ့ပြင်ခြင်း သို့မဟုတ် ရိုက်နှက်ခြင်းများစွာကို ခံယူရန်မလိုဘဲ မိမိတို့ကိုယ်ကို ချုပ်တည်းရန် မိမိတို့၏ ဟီရိဩတ္တပ္ပကို အသုံးပြုနိုင်ကြပြီး ၎င်းတို့သည် စည်းမျဉ်းများကို ချိုးဖောက်သည့်အခါတိုင်း သို့မဟုတ် ပုန်ကန်မှုကို ထုတ်ဖော်သည့်အခါတိုင်း ၎င်းတို့၏ ဟီရိဩတ္တပ္ပ၏ ပြစ်တင်ဆုံးမခြင်းကို ခံစားရကာ သမ္မာတရားကို တက်ကြွစွာ ရှာဖွေနိုင်ပြီး သမ္မာတရား စည်းမျဉ်းများအတိုင်း လုပ်ဆောင်နိုင်ကြသည်၊ အနည်းဆုံးအနေဖြင့် ၎င်းတို့သည် အပြုသဘောဆောင်သော အမှုအချို့ကို လုပ်ဆောင်နိုင်ကြသဖြင့် ၎င်းတို့သည် ကယ်တင်ခြင်းခံရမည့်သူများထဲတွင် ပါဝင်သည်။ ဘုရားသခင်သည် ဤအခြေအနေနှစ်မျိုးအကြောင်းကို ယခုလေးတင် ပြောဆိုခဲ့ပါသည်။) ၎င်းတို့သည် သမ္မာတရား စည်းမျဉ်းများအတိုင်း လုပ်ဆောင်နိုင်ခြင်း ရှိမရှိသည် ဤလူစားနှစ်မျိုးကို အကဲဖြတ်ခြင်းအတွက် စံနှုန်းဖြစ်ပေသည်။ အချို့လူများသည် သမ္မာတရား စည်းမျဉ်းများအတိုင်း မလုပ်ဆောင်နိုင်ကြဘဲ ၎င်းတို့သည် အယူဝါဒမည်မျှ နားလည်သည်ဖြစ်စေ သို့မဟုတ် ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းကို မည်မျှခံရသည်ဖြစ်စေ ၎င်းတို့သည် ကယ်တင်ခြင်းခံရမည့်သူများ မဟုတ်ကြပေ။ ဆန့်ကျင်ဘက်အားဖြင့် အခြားအချို့လူများသည် ဘုရားသခင်၏ ဆုံးမပဲ့ပြင်ခြင်းနှင့် အပြစ်ဒဏ်ပေးခြင်း သို့မဟုတ် ကိုယ်တော်၏ ရိုက်နှက်ဆုံးမခြင်းနှင့် ကဲ့ရဲ့ပြစ်တင်ခြင်းတို့ကို ခံရသည်မှာ ရှားလှသော်လည်း ၎င်းတို့သည် မိမိတို့ကိုယ်ကို မကြာခဏ ဆင်ခြင်သုံးသပ်နိုင်ကြပြီး ၎င်းတို့သည် စည်းမျဉ်းများကို ချိုးဖောက်၍ ပြုမူသည့်အခါတိုင်း သို့မဟုတ် ပုန်ကန်မှုကို ထုတ်ဖော်သည့်အခါတိုင်း ၎င်းတို့၏ ဟီရိဩတ္တပ္ပ၏ ပြစ်တင်ဆုံးမခြင်းနှင့် ကဲ့ရဲ့ပြစ်တင်ခြင်းကို ခံစားရနိုင်ကာ ထို့နောက်တွင် နောင်တရပြီး သမ္မာတရား စည်းမျဉ်းများနှင့်အညီ တက်ကြွစွာ လက်တွေ့လုပ်ဆောင်နိုင်ကြသည်။ ၎င်းတို့သည် ဘုရားသခင်၏ ဆုံးမပဲ့ပြင်ခြင်း သို့မဟုတ် ရိုက်နှက်ဆုံးမခြင်းကို ခံရသည်မှာ ရှားလှသော်လည်း ဤလူစားမျိုးသည် မည်သို့ပင်ဖြစ်စေ ကယ်တင်ခြင်းခံရမည့်သူများ ဖြစ်ကြသည်။ ဤနေရာတွင် ငါ ရည်ညွှန်းသော ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းသည် ဘုရားသခင်၏ နှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့နှင့် မည်သို့မျှ မသက်ဆိုင်ပေ၊ ယင်းတို့သည် လူတို့က မိမိတို့၏ ကိုယ်ပိုင်အယူအဆများနှင့် စိတ်ကူးများထဲတွင် ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းအဖြစ် တွေးထင်သည့်အရာမျှသာ ဖြစ်သည်။ လူတို့၏ အယူအဆများနှင့် စိတ်ကူးများထဲတွင် ၎င်းတို့သည် မကြာခဏ ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းတို့ကို ခံရပါက ဤသည်မှာ ၎င်းတို့၌ အတွေ့အကြုံဆိုင်ရာ သက်သေခံချက်ရှိသည်ကို ဆိုလိုပြီး ၎င်းတို့သည် ဝိညာဉ်ရေးရာဆန်သော လူများဖြစ်သည်ဟု ၎င်းတို့က ယုံကြည်ကြသည်။ လူတို့သည် ဆုံးမပဲ့ပြင်ခြင်းနှင့် အပြစ်ဒဏ်ပေးခြင်းတို့ကို သန့်ရှင်းသောဝိညာဉ်တော်၏ အလုပ်နှင့် မကြာခဏ ချိတ်ဆက်ကြပြီး ၎င်းတို့သည် သန့်ရှင်းသောဝိညာဉ်တော်၏ ရေစီးကြောင်းနှင့် ချိတ်ဆက်မိသည်ဟု ယုံကြည်ကြသည်။ “ကျွန်ုပ်သည် ကျွန်ုပ်၏ တာဝန်ကို ကောင်းစွာမထမ်းဆောင်ခဲ့သဖြင့် နောက်တစ်ကြိမ် ပြုပြင်ခြင်းခံခဲ့ရသည်။ ယခု ကျွန်ုပ်၏ ပါးစပ်တွင် အရည်ကြည်ဖုများပေါက်ပြီး နေမကောင်းဖြစ်နေသည်၊ ဤသည်မှာ ဘုရားသခင်က ကျွန်ုပ်ကို ဆုံးမပဲ့ပြင်နေခြင်း ဖြစ်သည်” ဟု မကြာခဏ ပြောဆိုသော လူအချို့ရှိပါသည်။ လူများစွာတို့သည် ဤအတွေ့အကြုံများအကြောင်းကို မကြာခဏ မိတ်သဟာယဖွဲ့ကြသော်လည်း ကိစ္စရပ်များ ၎င်းတို့အပေါ် ကျရောက်သည့်အခါတိုင်း ၎င်းတို့၏ သရုပ်သကန်များသည် မည်သို့ဖြစ်သည်ကို သင်ကြည့်ရှုသင့်သည်၊ ၎င်းတို့သည် အမှားတစ်ခုခု လုပ်သည့်အခါ ၎င်းတို့၏ ဟီရိဩတ္တပ္ပ၏ ပြစ်တင်ဆုံးမခြင်းကို ခံစားရခြင်း ရှိမရှိနှင့် ၎င်းတို့သည် ဆိုးယုတ်သောလူများ မကောင်းမှုပြုသည်ကို ကြုံတွေ့ရသည့်အခါ သို့မဟုတ် ကောက်ကျစ်ဆိုးယုတ်သော အမှုအရာများကို ကြုံတွေ့ရသည့်အခါ ဘုရားအိမ်တော်၏ အကျိုးစီးပွားများကို ကာကွယ်ရန်နှင့် သမ္မာတရား စည်းမျဉ်းများကို ထောက်ခံရန် ထ၍ရပ်တည်နိုင်ခြင်း ရှိမရှိကို ကြည့်ရှုလော့။ မဟုတ်ပါက ဤလူတို့၌ ဟီရိဩတ္တပ္ပမရှိဘဲ ၎င်းတို့သည် လူများမဟုတ်ကြပေ။ ၎င်းတို့သည် ကြားကောင်းအာင် ပြောဆိုကြပြီး ၎င်းတို့ပိုင်ဆိုင်သော အတွေ့အကြုံဆိုင်ရာ သက်သေခံချက်များစွာ အကြောင်းကို အလွန် ပြည့်စုံကောင်းမွန်စွာ ပြောဆိုကြသည်၊ ဘုရားသခင်သည် ၎င်းတို့အား ကျေးဇူးတော်များစွာ ပြသခဲ့ပြီး ၎င်းတို့အပေါ် အမှုတော်များစွာကို ပြု၍ နှုတ်ကပတ်တော်များစွာကို ပြောကြားခဲ့သည့်အလားဖြစ်ပြီး ဤသည်မှာ ၎င်းတို့သည် ကယ်တင်ခြင်းကို ရရှိပြီးဖြစ်ကြောင်း ညွှန်ပြနေပုံရသည်။ သို့ရာတွင် ၎င်းတို့၏ နေ့စဉ်အသက်တာများ၌ စည်းမျဉ်းများနှင့် သက်ဆိုင်သော ပြဿနာများကို ကြုံတွေ့ရသည့်အခါတိုင်း ၎င်းတို့သည် သမ္မာတရား စည်းမျဉ်းများကို မည်သည့်အခါမျှ မထောက်ခံကြဘဲ လိပ်က အခွံထဲသို့ဝင်သကဲ့သို့ အမြဲတမ်း ကိစ္စကို ရှောင်လွှဲကြသည်။ ပြီးလျှင် ၎င်းတို့၏ အမြင်များနှင့် ရပ်တည်ချက်ကို ပြောဆိုဖော်ပြရန် တောင်းဆိုခံရသည့်အခါတိုင်း ၎င်းတို့သည် ရှောင်ကြဉ်ခြင်း၊ မသိဟန်ဆောင်ခြင်းနှင့် တိတ်ဆိတ်နေခြင်းတို့ကို ပြုလုပ်ကြသည်။ ၎င်းတို့သည် သမ္မာတရား စည်းမျဉ်းများကို လုံးဝမထောက်ခံသကဲ့သို့ သမ္မာတရားကိုလည်း လက်တွေ့မလုပ်ဆောင်ကြပေ။ ဤသူတို့သည် အဘယ်သို့သော လူစားမျိုးများ ဖြစ်ကြသနည်း။ ၎င်းတို့သည် ကြောင်သူတော်များ ဖြစ်ကြသည်။ ၎င်းတို့သည် အခြားသူများကို ရေလောင်းပေးပြီး ကူညီသည့်အခါ ဝိညာဉ်ရေးရာ သီအိုရီများကို အလွန်စနစ်တကျပြီး ကျိုးကြောင်းဆီလျော်သော ပုံစံဖြင့် ပြောဆိုကြကာ တစ်ကြိမ်လျှင် နာရီပေါင်းများစွာ ကြာအောင်ပြောဆိုလျက် အချို့လူများကို မျက်ရည်ကျသည်အထိ စိတ်လှုပ်ရှားစေသော်လည်း မိမိတို့၏ ကိုယ်ပိုင်လုပ်ဆောင်ချက်များတွင်မူ သမ္မာတရားကို မည်သည့်အခါမျှ လက်တွေ့မလုပ်ဆောင်ကြပေ၊ ဤသူတို့သည် ဖာရိရှဲများ ဖြစ်ကြသည်။ ၎င်းတို့သည် ဝိညာဉ်ရေးရာ အယောင်ဆောင်သော အတွေ့အကြုံများနှင့် ဝိညာဉ်ရေးရာ အယောင်ဆောင်သော အယူဝါဒများကို မည်မျှပင် ပြောဆိုသည်ဖြစ်စေ သို့မဟုတ် အနှစ်မဲ့သော စကားလုံးများနှင့် ချဲ့ကားထားသော စကားလုံးများကို မည်မျှပင် ပြောဆိုသည်ဖြစ်စေ ၎င်းတို့၏ ဟီရိဩတ္တပ္ပသည် ၎င်းတို့ကို မကဲ့ရဲ့ပြစ်တင်ပေ။ ပြီးလျှင် အမှားနှင့်အမှန်၏ အဓိကကျသော ကိစ္စရပ်များ သို့မဟုတ် စည်းမျဉ်းဆိုင်ရာ ကိစ္စရပ်များနှင့်ပတ်သက်လာလျှင် ၎င်းတို့သည် သမ္မာတရားဘက်၌ မရပ်တည်ဘဲ သမ္မာတရား စည်းမျဉ်းများကိုလည်း မထောက်ခံပေ၊ ၎င်းတို့၏ ဟီရိဩတ္တပ္ပသည်လည်း ၎င်းတို့ကို လုံးဝမကဲ့ရဲ့ပြစ်တင်ပေ၊ သို့သော် ထို့နောက်တွင် ၎င်းတို့သည် ဘုရားအိမ်တော်၏ အကျိုးစီးပွားများကို မည်သို့ ကာကွယ်ကြောင်းကို ရှက်ကြောက်ခြင်းမရှိဘဲ ဝါကြွားနိုင်သေးပြီး ကြားကောင်းသော အယူဝါဒများစွာကိုလည်း ထုတ်ဖော်ပြောဆိုနိုင်သေးသည်၊ ဤသည်မှာ ကြောင်သူတော်ဆန်ခြင်းနှင့် ဟီရိဩတ္တပ္ပ၏ သိနားလည်မှု ကင်းမဲ့ခြင်းပင် ဖြစ်သည်။ ၎င်းတို့သည် သမ္မာတရားကို အကြိမ်များစွာ လက်တွေ့လုပ်ဆောင်ရန် ပျက်ကွက်သည်၊ သမ္မာတရားကို အကြိမ်များစွာ ချိုးဖောက်သည်၊ လူတို့ကို အကြိမ်များစွာ လှည့်ဖြားပြီး အထင်အမြင်မှားစေသည်၊ သို့တိုင် ၎င်းတို့၏ ဟီရိဩတ္တပ္ပသည် ၎င်းတို့ကို လုံးဝမကဲ့ရဲ့ပြစ်တင်ဘဲ ၎င်းတို့သည် မိမိတို့ကိုယ်ကို မျက်နှာပြောင်တိုက်ပြီး ကြွားဝါနိုင်သေးသည်၊ ဤသည်မှာ လူ့သဘာဝ ကင်းမဲ့ခြင်းပင် ဖြစ်သည်။ ၎င်းတို့သည် နေရာအနှံ့တွင် ဤနည်းလမ်းဖြင့် မောက်မာစွာ လှည့်လည်ပြီး ဟန်ဆောင်လိမ်ညာကြကာ ရှက်ရွံ့ခြင်းပင် မခံစားရပေ။ ၎င်းတို့သည် သမ္မာတရားကို လက်တွေ့မလုပ်ဆောင်ဘဲ မိမိတို့သည် ဝိညာဉ်ရေးရာလူများ ဖြစ်ကြောင်း၊ ဘုရားသခင်၏ ကယ်တင်ခြင်းနှင့် စုံလင်အောင်ပြုခြင်းကို ခံရသောလူများ ဖြစ်ကြောင်းနှင့် အခြားမည်သူ့ထက်မဆို ဘုရားသခင်ကို ပို၍ချစ်သောသူများဖြစ်ကြောင်း ဝါကြွားနေကြသေးသည်၊ ဤသည်မှာ ဟီရိဩတ္တပ္ပ၏ သိနားလည်မှု ကင်းမဲ့ခြင်းဖြစ်ပြီး ဤသူတို့သည် ကယ်တင်ခြင်း ခံရသောလူများ မဟုတ်ကြပေ။ ကယ်တင်ခြင်း ခံရသောသူတို့သည် ပုံမှန် လူ့သဘာဝနှင့် ဟီရိဩတ္တပ္ပ၏ သိနားလည်မှု ကင်းမဲ့နိုင်သလော။ အချို့လူများသည် မိမိတို့သည် သမ္မာတရားကို ထိုမျှမနှစ်သက်ကြောင်း ခံစားရပြီး သမ္မာတရား စည်းမျဉ်းများပါဝင်သော ပြဿနာများ သို့မဟုတ် အမှားနှင့်အမှန်၏ အဓိကကျသော ကိစ္စရပ်များကို ကြုံတွေ့ရသည့်အခါတိုင်း လူ့အကြိုက်လိုက်သူများ ဖြစ်လာကြပြီး အမှားအမှန်မခွဲခြားဘဲ ပြီးစလွယ်လုပ်ရန် ကြိုးစားကြကာ သမ္မာတရား စည်းမျဉ်းများကို မည်သည့်အခါမျှ မထောက်ခံနိုင်ကြသဖြင့် ၎င်းတို့၏ စိတ်နှလုံးထဲတွင် ကဲ့ရဲ့ပြစ်တင်ခြင်းကို ခံစားရပြီး ဘုရားသခင်ရှေ့မှောက်၌ မကြာခဏ ဆုတောင်းကာ ကိုယ်တော့်အပေါ် အကြွေးတင်သည်ဟု ခံစားကြရသည်။ ၎င်းတို့သည် မကြာခဏ အားနည်းပြီး ဤအတားအဆီးကို မကျော်လွှားနိုင်သော်လည်း မိမိတို့သည် သမ္မာတရား သို့မဟုတ် တရားမျှတမှုကို မထောက်ခံခဲ့ကြောင်းနှင့် ဘုရားသခင်အတွက် မိမိတို့၏ သက်သေခံချက်တွင် ခိုင်မာစွာ မရပ်တည်ခဲ့ကြောင်းနှင့် မိမိတို့သည် လူ့အကြိုက်လိုက်သူများသာ ဖြစ်ကြောင်းကို ၎င်းတို့၏ စိတ်နှလုံးထဲတွင် သိကြသဖြင့် မိမိတို့၌ မည်သည့်သက်သေခံချက်မျှ ရှိသည်ဟု ပြောဆိုရန် အလွန်ရှက်ကြပေမည်။ ဤသည်မှာ ၎င်းတို့သည် သမ္မာတရား စည်းမျဉ်းများကို မထောက်ခံခဲ့ဘဲ စစ်မှန်သော အတွေ့အကြုံဆိုင်ရာ သက်သေခံချက် မရှိသည့်အပြင် ၎င်းတို့သည် ဆင်းရဲမွဲတေပြီး မျက်မမြင်ဖြစ်ကာ ဘုရားသခင်၏ တောင်းဆိုချက်များကို မဖြည့်ဆည်းခဲ့သောကြောင့် ဖြစ်သည်၊ ၎င်းတို့သည် ဤအရာကို မိမိတို့၏ စိတ်နှလုံးထဲတွင် သိကြပြီး ၎င်းတို့၏ ဟီရိဩတ္တပ္ပများသည် ယင်းအတွက် မကြာခဏ ပြစ်တင်ဆုံးမခြင်းကို ခံစားရကာ ဘုရားသခင်အပေါ် အကြွေးတင်သည်ဟု ခံစားရပြီး ဝမ်းနည်းကြသည်။ ဤလူတို့အတွက် ကယ်တင်ခြင်းကို ရရှိရန် မျှော်လင့်ချက်နှင့် အခွင့်အလမ်း ရှိနေသေးသည်။ ဆန့်ကျင်ဘက်အားဖြင့် အပြင်ပန်းတွင် သမ္မာတရားကို အလွန်ကောင်းစွာ နားလည်ပုံရပြီး လူတို့ကို ရေလောင်းပေးနိုင်၊ ထောက်ပံ့ပေးနိုင်နှင့် ကူညီနိုင်ပုံရသော်လည်း သမ္မာတရား စည်းမျဉ်းများ ပါဝင်သော ပြဿနာများ သို့မဟုတ် အမှားနှင့်အမှန်၏ အဓိကကျသော ကိစ္စရပ်များကို ကြုံတွေ့ရသည့်အခါ ဘုရားသခင်၏ ဘက်၌ မည်သည့်အခါမျှ မရပ်တည်ဘဲ သမ္မာတရား စည်းမျဉ်းများကိုလည်း မည်သည့်အခါမျှ မထောက်ခံသည့်တိုင် မိမိတို့သည် ဝိညာဉ်ရေးရာလူများ၊ ဘုရားသခင်ကို ချစ်သောလူများနှင့် ဘုရားသခင်အပေါ် သစ္စာစောင့်သိသောလူများဖြစ်ကြောင်း ဝါကြွားသောသူများ ရှိကြသည်။ ဤလူစားမျိုးသည် အလွန် ဒုက္ခရောက်နေပေသည်။ ၎င်းတို့သည် လက်တွေ့အရှိတရားကို ရင်ဆိုင်ရန် မဝံ့ရဲကြ၊ တကယ့်ပြဿနာများကို ဖြေရှင်းရန် မဝံ့ရဲကြ၊ အဓိကကျသော ကိစ္စရပ်များအပေါ် ၎င်းတို့၏ ရပ်တည်ချက်ကို ကြေညာရန် မဝံ့ရဲကြဘဲ သမ္မာတရား စည်းမျဉ်းများကို ပွင့်လင်းပြီး ရိုးရှင်းသောပုံစံဖြင့် ထောက်ခံရန် မဝံ့ရဲကြပေ၊ သို့သော် အဖြစ်အပျက် ပြီးနောက်တွင် ၎င်းတို့သည် မိမိတို့သည် ဝိညာဉ်ရေးရာဆန်သော လူများဖြစ်ကြောင်း ရှက်ကြောက်ခြင်းမရှိဘဲ ဝါကြွားနေကြသေးသည့်အပြင် မိမိတို့သည် ဘုရားသခင်ကို အချစ်ဆုံးဖြစ်ကြောင်းနှင့် ဘုရားသခင်၏ ရည်ရွယ်ချက်များကို အကောင်းဆုံး နားလည်သဘောပေါက်နိုင်ကြောင်း ပြောဆိုကြသည်။ ဤလူစားမျိုး၌ ဟီရိဩတ္တပ္ပ၏ သိနားလည်မှု လုံးဝမရှိပေ။ ဟီရိဩတ္တပ္ပ၏ သိနားလည်မှု ကင်းမဲ့သောလူတစ်ဦးသည် သမ္မာတရား စည်းမျဉ်းများကို ထောက်ခံနိုင်မည်လော။ ၎င်းတို့သည် မိမိတို့၏ ရပ်တည်ချက်ကို ပွင့်လင်းစွာ ကြေညာပြီး ဆိုးယုတ်သောလူများကို ကိုင်တွယ်ရန် ဘုရားသခင်၏ ဘက်၌ ရပ်တည်ဝံ့မည်လော။ ထိုသို့ဖြစ်ရန် အခွင့်အလမ်းမရှိပေ၊ ထိုသို့သောလူများအတွက် သမ္မာတရားကို လက်တွေ့လုပ်ဆောင်ရန် အလွန်ခက်ခဲပေသည်။

လူတစ်ဦးတွင် ပုံမှန်လူ့သဘာဝ၏ ဟီရိဩတ္တပ္ပရှိပါက ယင်းတို့သည် မိမိ၏ အတွေးအခေါ်များ၊ စကားများနှင့် လုပ်ဆောင်ချက်များကို စည်းကမ်းဖြင့်ထိန်းညှိပေးလိမ့်မည်။ “စည်းကမ်းဖြင့်ထိန်းညှိပေးသည်” ဟူသည်မှာ အဘယ်အရာကို ဆိုလိုသနည်း။ ဆိုလိုသည်မှာ သင်၏ အတွေးအခေါ်များနှင့် အပြုအမူများသည် ပုံမှန်လူ့သဘာဝ၏ စံနှုန်းအပြင်ဘက်သို့ လမ်းလွဲသွားသောအခါ သင်၏ ဟီရိဩတ္တပ္ပက ထိုသို့သောနည်းလမ်းဖြင့် တွေးတောခြင်းသည် မှားယွင်းကြောင်းနှင့် ထိုအရာကို ပြုလုပ်ခြင်းသည် မကောင်းကြောင်း ဝေဖန်သုံးသပ်လိမ့်မည်၊ သို့ဖြစ်၍ သင်သည် မျက်နှာနီမြန်းလာပြီး စိတ်မသက်မသာဖြစ်ကာ ကဲ့ရဲ့ပြစ်တင်ခြင်းကို ခံစားရလိမ့်မည်။ ဤခံစားချက်များ ရှိပြီးနောက် သင်၏ အတွေးအခေါ်များနှင့် အပြုအမူများသည် အတိုင်းအတာတစ်ခုအထိ ချုပ်တည်းခြင်း ခံရလိမ့်မည်ဖြစ်ပြီး ဤအတိုင်းအတာတစ်ခုအထိ ချုပ်တည်းခြင်းက သင်၏ အပြုအမူကို စည်းကမ်းဖြင့်ထိန်းညှိပေးကာ သမ္မာတရား စည်းမျဉ်းများကို သိသာထင်ရှားစွာ ချိုးဖောက်သည့်အရာများနှင့် သင်၏ ဟီရိဩတ္တပ္ပနှင့် ကိုယ်ကျင့်တရား တရားမျှတမှုကို ဆန့်ကျင်သည့်အရာများကို မပြုလုပ်မိစေရန် သင့်ကို ထောက်ကူပေးလိမ့်မည်။ သို့သော် သင့်တွင် ဟီရိဩတ္တပ္ပ၏ စံနှုန်းမရှိပါက သင်သည် အမှုအရာများကို ပြုလုပ်သည့်အခါ သင်၏ အတွေးအခေါ်များနှင့် အပြုအမူများကို စည်းကမ်းဖြင့်ထိန်းညှိရန်နှင့် ချုပ်တည်းရန် မည်သည့်စံနှုန်းမျှ ရှိမည်မဟုတ်ပေ၊ သို့ဖြစ်၍ သင်သည် စည်းမရှိကမ်းမရှိ ဖြစ်သွားလိမ့်မည်၊ သင်၏ ခေါင်းထဲသို့ ရောက်လာသမျှကိုလည်းကောင်း၊ သင်အလိုရှိသမျှကိုလည်းကောင်း၊ သင့်အတွက် အကျိုးရှိပြီး အကျိုးဖြစ်ထွန်းစေမည့် မည်သည့်အရာကိုမဆိုလည်းကောင်း သင်လုပ်ဆောင်လိမ့်မည်။ သင့်တွင် မည်သည့်ချုပ်တည်းမှုမျှ လုံးဝမရှိသည့် ဤအခြေအနေများအောက်တွင် သင်၏ အတွေးအခေါ်များနှင့် အပြုအမူများသည် အဆများစွာ ချဲ့ထွင်ခြင်းခံရလိမ့်မည်။ “အဆများစွာ ချဲ့ထွင်ခြင်းခံရသည်” ဟူသည်မှာ အဘယ်အရာကို ဆိုလိုသနည်း။ ယင်းတို့အပေါ် မည်သည့်စည်းကမ်းဖြင့် ထိန်းညှိမှုမျှ လုံးဝရှိမည်မဟုတ်ပေ။ ယင်းမှာ ဘာသာတရားမရှိသူများက လူများကို လိမ်လည်သည့်အခါ ဖြစ်သကဲ့သို့ပင် ဖြစ်လိမ့်မည်၊ ၎င်းတို့သည် ဟီရိဩတ္တပ္ပ၏ သိနားလည်မှု ကင်းမဲ့ကြပြီး သင့်ထံမှ ဒေါ်လာတစ်ထောင် လိမ်လည်သွားပါက ၎င်းတို့ စိတ်မကောင်းဖြစ်မည် မဟုတ်ပေ၊ သင်၏ မိသားစု ပျက်စီးသွားသည်အထိ သင့်ကို လိမ်လည်လှည့်ဖြားသွားပါကလည်း ၎င်းတို့ စိတ်မကောင်းဖြစ်မည် မဟုတ်ပေ၊ သင်သည် ဒူးထောက်၍ အသနားခံသည့်တိုင် ၎င်းတို့သည် သင့်ကို အရေးစိုက်မည် မဟုတ်ပေ။ ၎င်းတို့သည် အမှန်တကယ်ပင် အလွန်အမင်း ဆိုးယုတ်သောလူများ ဖြစ်ကြသည်။ ၎င်းတို့သည် အဘယ်ကြောင့် ထိုသို့သော မကောင်းမှုကို ပြုလုပ်နိုင်သနည်း။ အကြောင်းမှာ ၎င်းတို့တွင် ဟီရိဩတ္တပ္ပ၏ သိနားလည်မှု သို့မဟုတ် ဟီရိဩတ္တပ္ပက ပေးသော ချုပ်တည်းမှု မရှိသောကြောင့်ဖြစ်ပြီး သို့ဖြစ်၍ ၎င်းတို့သည် အလွန်ဆိုးယုတ်နိုင်ကာ အပြစ်ကြီးမားပြီး ဆိုးယုတ်သောသူများ ဖြစ်လာကြခြင်း ဖြစ်သည်။ သို့ဖြစ်၍ ပုံမှန်လူ့သဘာဝ၏ ဟီရိဩတ္တပ္ပရှိရန် အရေးကြီးသည်။ လူတို့သည် သမ္မာတရား စည်းမျဉ်းများကို ထိန်းသိမ်းနိုင်ခြင်းမှာ ပထမဦးစွာ ၎င်းတို့တွင် ဟီရိဩတ္တပ္ပ၏ သိနားလည်မှု ရှိသည့်အခြေအနေအောက်တွင် ဖြစ်သည်။ ဟီရိဩတ္တပ္ပ၏ သိနားလည်မှုနှင့် အရှက်တရားရှိခြင်းသည် သင်၏ အပြုအမူကို စည်းကမ်းဖြင့်ထိန်းညှိပေးနိုင်ပြီး သမ္မာတရားကို ရှာဖွေခြင်းနှင့် လက်တွေ့လုပ်ဆောင်ခြင်း လမ်းကြောင်းပေါ်သို့ စတင်လျှောက်လှမ်းရန် အခွင့်အရေးကို သင့်အား ပေးသည့်အရာ ဖြစ်သည်။ သင့်ကိုယ်သင် စည်းကမ်းဖြင့်ထိန်းညှိရန် ဟီရိဩတ္တပ္ပ၏ သိနားလည်မှု သင့်တွင် မရှိပါက သင်သည် သမ္မာတရားကို လိုက်စားခြင်း လမ်းကြောင်းပေါ်သို့ စတင်လျှောက်လှမ်းရန် အခွင့်အရေး ရရှိမည်မဟုတ်ပေ။ သို့ဖြစ်၍ ဟီရိဩတ္တပ္ပ၏ သိနားလည်မှု ပိုင်ဆိုင်ခြင်းဟူသည့် အခြေခံအုတ်မြစ်ပေါ်၌သာ လူတို့သည် သမ္မာတရားကို လက်တွေ့လုပ်ဆောင်ခြင်းနှင့် သမ္မာတရား စည်းမျဉ်းများကို ထိန်းသိမ်းခြင်း လမ်းကြောင်းပေါ်သို့ ပို့ဆောင်ခံရရန် အခွင့်အရေး ရရှိနိုင်သည်၊ သို့သော် ထိုသို့ဖြစ်သည့်တိုင် ၎င်းတို့သည် ဤအခွင့်အရေးကိုသာ ရရှိကြခြင်း ဖြစ်သည်။ ၎င်းတို့သည် ဤအခွင့်အရေးကိုသာ ရရှိကြသည်ဟု ငါပြောဆိုရခြင်းမှာ လူတစ်ဦး၏ အတွေးအခေါ်များနှင့် အပြုအမူများသည် ဟီရိဩတ္တပ္ပ၏ သိနားလည်မှုဖြင့် စည်းကမ်းဖြင့် ထိန်းညှိခြင်းခံရလျှင်ပင် ၎င်းတို့သည် သမ္မာတရား စည်းမျဉ်းများကို ချိုးဖောက်နိုင်သေးသည် သို့မဟုတ် ယင်းတို့နှင့်အညီ မပြုမူဘဲ ကြားနေလမ်းစဉ်ကို လိုက်ကာ သမ္မာတရား စည်းမျဉ်းများကို မထိန်းသိမ်းဘဲ ဆိုးယုတ်သောလူများနှင့်လည်း ပူးပေါင်းခြင်းမပြုဘဲ နေနိုင်သေးသောကြောင့် ဖြစ်သည်။ ဆိုလိုသည်မှာ ဟီရိဩတ္တပ္ပ၏ အကျိုးသက်ရောက်မှုအောက်တွင် အတော်အတန် ကောင်းမွန်သောလူများသည် သမ္မာတရားကို လက်တွေ့လုပ်ဆောင်နိုင်ပြီး သမ္မာတရား စည်းမျဉ်းများကို ထိန်းသိမ်းနိုင်သော်လည်း အနည်းငယ် အစွမ်းအစညံ့သောလူများမှာမူ အနည်းဆုံးအနေဖြင့် ဆိုးယုတ်သောလူများ၏ ထိန်းချုပ်ခြင်း သို့မဟုတ် အတင်းအကျပ်စေခိုင်းခြင်းကို ခံရခြင်းမှ ရှောင်ရှားနိုင်ပြီး မကောင်းမှုပြုရာတွင် ၎င်းတို့နောက်သို့ လိုက်ပါခြင်းမှ ရှောင်ရှားနိုင်သည်၊ ဤသည်မှာ ဟီရိဩတ္တပ္ပ၏ စံနှုန်းမှ လာသော အခြေခံစည်းကို ရောက်ရှိရုံမျှသာ ဖြစ်သည်။ သင်သည် သမ္မာတရားကို လက်တွေ့မလုပ်ဆောင်ခဲ့သော်လည်း မကောင်းမှုကိုမူ မပြုလုပ်ခဲ့ပေ။ ဤကဲ့သို့သောလူတစ်ဦးကို အနည်းဆုံးအနေဖြင့် ဟီရိဩတ္တပ္ပရှိသူဟု ခေါ်ဆိုနိုင်သေးပြီး ၎င်းတို့သည် သမ္မာတရားကို လက်တွေ့မလုပ်ဆောင်ခဲ့သော်လည်း မကောင်းမှုကိုမူ မပြုလုပ်ရန် သေချာပေသည်။ ဤသည်မှာ ဟီရိဩတ္တပ္ပက လူတို့အပေါ် သက်ရောက်သည့် အကျိုးသက်ရောက်မှု ဖြစ်သည်။ သမ္မာတရားကို ချစ်သောသူတို့အတွက် ဟီရိဩတ္တပ္ပ၏ အကျိုးအရှိဆုံးသော အကျိုးသက်ရောက်မှုတစ်ခုမှာ ယင်းသည် ၎င်းတို့၏ စကားများနှင့် အပြုအမူများကို စည်းကမ်းဖြင့်ထိန်းညှိပေးရန် အခွင့်အရေးရှိပြီး ၎င်းတို့ကို သမ္မာတရားကို လက်တွေ့လုပ်ဆောင်ခြင်းနှင့် သမ္မာတရား စည်းမျဉ်းများကို ထိန်းသိမ်းခြင်း လမ်းကြောင်းပေါ်သို့ ပို့ဆောင်ပေးနိုင်ခြင်း ဖြစ်သည်။ သို့ဖြစ်၍ လူတို့အတွက် ဟီရိဩတ္တပ္ပသည် ၎င်းတို့၏ လူ့သဘာဝ၏ အလွန်အရေးကြီးသော အစိတ်အပိုင်းတစ်ခုဖြစ်ပြီး ယင်းမှာ ၎င်းတို့ မရှိဘဲ နေ၍မရသည့်အရာတစ်ခု ဖြစ်သည်။ သို့ဆိုလျှင် “ဟီရိဩတ္တပ္ပ” ဟူသည်မှာ အဘယ်အရာကို ဆိုလိုသနည်း။ အခွင့်အရေးရသည့်အခါ ထိုအကြောင်းကို နောက်ပိုင်းတွင် အသေးစိတ် ပြောဆိုကြမည်၊ သို့သော် ယနေ့တွင်မူ ယင်းအကြောင်းကို အကျဉ်းချုပ်မျှသာ ပြောဆိုကြစို့။ ဟီရိဩတ္တပ္ပသည် လူတစ်ဦး၏ ကြင်နာတတ်ခြင်းနှင့် တရားမျှတစိတ်ကို ရည်ညွှန်းပြီး ယင်းတို့သည် အခြေခံအကျဆုံးသော အရည်အသွေးနှစ်ခု ဖြစ်သည်။ သင်သည် ဤအရည်အသွေးနှစ်ခုကို ပိုင်ဆိုင်ပါက သင်သည် ဟီရိဩတ္တပ္ပရှိသူတစ်ဦး ဖြစ်သည်၊ သင်သည် ဤအရည်အသွေးနှစ်ခုထဲမှ တစ်ခုကိုမျှ မပိုင်ဆိုင်ပါက သင်သည် ဟီရိဩတ္တပ္ပ ကင်းမဲ့သူ ဖြစ်သည်။ ဟီရိဩတ္တပ္ပ ကင်းမဲ့သောလူများသည် ပုံမှန်လူ့သဘာဝ မရှိကြပေ၊ ပြီးလျှင် ပုံမှန်လူ့သဘာဝ မရှိခြင်းဆိုသည်မှာ ၎င်းတို့တွင် တရားမျှတစိတ်မရှိဘဲ ကြင်နာတတ်ခြင်း မရှိသည်ကို ဆိုလိုသည်။ “တရားမျှတစိတ်မရှိခြင်း” ဟူသည်မှာ အဘယ်အရာကို ဆိုလိုသနည်း။ ယင်းမှာ ကလိမ်ကကျစ်ကျခြင်းနှင့် ကောက်ကျစ်ဆိုးယုတ်ခြင်းကို ဆိုလိုသည်။ “ကြင်နာတတ်ခြင်းမရှိခြင်း” ဟူသည်မှာ အဘယ်အရာကို ဆိုလိုသနည်း။ ယင်းမှာ မလိုမုန်းထားခြင်း၊ ရက်စက်ကြမ်းကြုတ်ခြင်းနှင့် ကောက်ကျစ်ဆိုးယုတ်ခြင်းကို ဆိုလိုသည်။ ဤစိတ်သဘောထားများကို ပိုင်ဆိုင်သောလူများသည် လူ့သဘာဝမရှိသောလူများ ဖြစ်ကြပြီး အကျိုးဆက်အားဖြင့် ၎င်းတို့သည် မည်သည့်မကောင်းမှုကိုမဆို ပြုလုပ်နိုင်စွမ်းရှိကြသည်၊ အကြောင်းမှာ ၎င်းတို့တွင် ပုံမှန်လူ့သဘာဝ၏ ဟီရိဩတ္တပ္ပမရှိသကဲ့သို့ ပုံမှန်လူ့သဘာဝ၏ ဟီရိဩတ္တပ္ပ၌ ပါဝင်သော တရားမျှတစိတ်နှင့် ကြင်နာတတ်ခြင်းဟူသည့် အနှစ်သာရနှစ်ခုလည်း မရှိသောကြောင့် ဖြစ်သည်။ ၎င်းတို့သည် အရှက်မရှိ၊ အလွန်အမင်း ကလိမ်ကကျစ်ကျပြီး အထူးသဖြင့် ရက်စက်ကြမ်းကြုတ်ကာ မလိုမုန်းထားတတ်ကြသောကြောင့် မည်သည့်မကောင်းမှုကိုမဆို ပြုလုပ်နိုင်စွမ်းရှိကြသည်။ ဆိုလိုသည်မှာ ၎င်းတို့သည် မည်မျှပင် ကောက်ကျစ်ဆိုးယုတ်ပြီး မလိုမုန်းထားသည့်အရာများကို ပြုလုပ်ပါစေ မည်သည့်အရာကိုမျှ မခံစားရပေ၊ ၎င်းတို့သည် စိတ်မကောင်းမဖြစ်သကဲ့သို့ ကဲ့ရဲ့ပြစ်တင်ခြင်းကိုလည်း မခံစားရပေ။ ၎င်းတို့သည် အဘယ်ကြောင့် မည်သည့်မကောင်းမှုကိုမဆို ပြုလုပ်နိုင်စွမ်းရှိသနည်း။ အကြောင်းမှာ ၎င်းတို့သည် ကြင်နာတတ်ခြင်းမရှိဘဲ လူ့သဘာဝ၏ အနှစ်သာရ ကင်းမဲ့သောကြောင့် ဖြစ်သည်၊ ၎င်းတို့ မည်သည့်မကောင်းမှုကို ပြုလုပ်ပါစေ ယင်းမှာ ပြုသင့်ပြုထိုက်သည်ဟု တွေးထင်ကြပြီး မကောင်းမှုဖြစ်သည်ဟု မခံစားရပေ။ ဥပမာအားဖြင့် သင်သည် ဟီရိဩတ္တပ္ပ၏ သိနားလည်မှုရှိသူတစ်ဦး ဖြစ်ပါက အခြားသူတစ်ဦးကို ကျိန်ဆဲသည့် သို့မဟုတ် တိုက်ခိုက်သည့် စကားတစ်ခွန်းကို သင်ပြောဆိုသည့်အခါ သင်သည် လုပ်ရက်မည် မဟုတ်ချေ။ “ကျွန်ုပ်သည် ၎င်းတို့ကို ကျိန်ဆဲသည့် စကားအနည်းငယ် ပြောခဲ့ပြီးဖြစ်၍ ယင်းမှာ လုံလောက်ပြီ။ လူများကို ကျိန်ဆဲခြင်းသည် ၎င်းတို့ကို အလွန်စိတ်မကောင်းဖြစ်စေသည်။ တစ်စုံတစ်ဦးက ကျွန်ုပ်ကို ထိုသို့ ကျိန်ဆဲပါက ကျွန်ုပ်လည်း စိတ်မကောင်းဖြစ်မည်၊ သို့ဖြစ်၍ ယခုအခါ ကျွန်ုပ်၏ အမုန်းတရားကို ဖြေရန်နှင့် ဒေါသအနည်းငယ်ကို လွှတ်ထုတ်ပေးရန် ၎င်းတို့ကို ကျိန်ဆဲသည့် စကားအနည်းငယ် ပြောခဲ့ပြီးဖြစ်သဖြင့် ထိုမျှနှင့်ပင် ရပ်လိုက်တော့မည်” ဟု သင်တွေးလိမ့်မည်။ သို့ဖြစ်၍ သင်သည် ရပ်တန့်လိုက်လိမ့်မည်။ သို့သော် ဆိုးယုတ်သောလူများသည် ထိုသို့မတွေးထင်ကြပေ။ ၎င်းတို့က “သင့်ကို ကျိန်ဆဲခြင်းသည် သင့်ကို လျှော့ပေါ့ပေးရာကျမည်။ ကျွန်ုပ်သည် သင့်ကို ရိုက်နှက်ဦးမည်၊ သင်၏ မိသားစုကို ပျက်စီးစေမည်၊ သင်၏ မျိုးဆက်များကို ဒုက္ခခံစားစေမည်။ သင့်အပေါ် ကျွန်ုပ်ပြုလုပ်သည့် မည်သည့်မကောင်းမှု သို့မဟုတ် ဆိုးယုတ်သည့်အရာမဆိုသည် ကျိုးကြောင်းဆီလျော်သည်။ သင်နှင့်ထိုက်တန်သော အပြစ်ဒဏ်ကို သင်ရပြီး ကျွန်ုပ်၏ အမုန်းတရားကို ဖြေနိုင်သရွေ့ သင့်ကို ဒုက္ခပေးမည့် မည်သည့်အရာကိုမဆို လုပ်ဆောင်ရန် ကျွန်ုပ် ဆန္ဒရှိသည်” ဟု တွေးတောကြသည်။ ၎င်းတို့သည် သင့်ကို ကျိန်ဆဲခြင်းပင် ပြုလုပ်မည်မဟုတ်ဘဲ သင့်အပေါ်ကိုသာ မကောင်းမှုများကို ပြုလုပ်လိုက်ကာ သင့်ကို လက်စားချေလိမ့်မည်၊ ဤသည်မှာ ဆိုးယုတ်ခြင်းပင် ဖြစ်သည်။ ဟီရိဩတ္တပ္ပ၏ သိနားလည်မှု မရှိသောလူများသည် ဤကဲ့သို့ပင် ဖြစ်သည်၊ ၎င်းတို့သည် အမျိုးမျိုးသော မကောင်းမှုများကို ကျူးလွန်နိုင်စွမ်း ရှိကြသည်။

လူတို့တွင် ဘုရားသခင်၏ အမှုတော်နှင့်ပတ်သက်၍ ရှိသော အမျိုးမျိုးသော အယူအဆများနှင့် စိတ်ကူးများထဲတွင် လူတို့ သတိပြုမိသည့်အရာများမှာ အဓိကအားဖြင့် ဆုံးမပဲ့ပြင်ခြင်း၊ ရိုက်နှက်ခြင်းနှင့် အပြစ်ဒဏ်ပေးခြင်းတို့နှင့် သက်ဆိုင်သည့် ၎င်းတို့ မကြာခဏ ပြောဆိုလေ့ရှိသော အယူအဆများ ဖြစ်ကြသည်။ တစ်ဖက်တွင် ငါတို့သည် ဘုရားသခင်၏ အမှုတော်အတွင်း၌ လူတို့တွင် ပေါ်ပေါက်လာသော အယူအဆများနှင့် စိတ်ကူးများအကြောင်းကို မိတ်သဟာယဖွဲ့ခဲ့ပြီးဖြစ်သည်၊ အခြားတစ်ဖက်တွင်လည်း လူတို့သည် ဘုရားသခင်က လူတို့အပေါ် များပြားပြီး အမျိုးမျိုးသော နည်းလမ်းများဖြင့် အမှုပြုကြောင်းကိုလည်း သိသင့်သည်။ ကိုယ်တော်အမှုပြုသည့် မတူညီသောခေတ်များအပေါ် မူတည်၍လည်းကောင်း၊ လူတို့ထံမှ ကိုယ်တော်တောင်းဆိုသည့် မတူညီသော စံနှုန်းများအပေါ် မူတည်၍လည်းကောင်း၊ ပြောစရာမလိုသည်မှာ ကိုယ်တော်၏ အမှုတော်မှတစ်ဆင့် လူတို့၌ ကိုယ်တော် စွမ်းဆောင်ရရှိလိုသော မတူညီသော အကျိုးရလဒ်များအပေါ် မူတည်၍လည်းကောင်း၊ ကိုယ်တော်၏ အမှုတော်၏ မတူညီသော ပစ်မှတ်များနှင့် လူတို့၏ မတူညီသော သဘာဝအနှစ်သာရများအပေါ် မူတည်၍လည်းကောင်း ဘုရားသခင်သည် မတူညီသော နည်းလမ်းများကို အသုံးပြုပြီး လူတို့အပေါ် များပြား၍ အမျိုးမျိုးသော နည်းလမ်းများဖြင့် အမှုပြုသည်။ ဆုံးမပဲ့ပြင်ခြင်း၊ ရိုက်နှက်ခြင်းနှင့် အပြစ်ဒဏ်ပေးခြင်းတို့သည် ကိုယ်တော်၏ အမှုတော်၏ သေးငယ်သော အစိတ်အပိုင်းတစ်ခုသာဖြစ်ပြီး ကိုယ်တော်၏ အမှုတော်၌ ကိုယ်တော်အသုံးပြုသည့် အဓိကနည်းလမ်းများ မဟုတ်ပေ။ အကြောင်းမှာ ကိုယ်တော်၏ အမှုတော်၏ တတိယအဆင့်တွင် ဘုရားသခင်သည် လူတို့ကို ထောက်ပံ့ရန်နှင့် ၎င်းတို့ကို ကယ်တင်ခြင်းဟူသည့် အကျိုးရလဒ်ကို စွမ်းဆောင်ရရှိရန် များစွာသော သမ္မာတရားများကို ဖော်ပြခဲ့ပြီးဖြစ်သောကြောင့် ကိုယ်တော်က လူတို့အပေါ် ပြုလုပ်သည့် ဆုံးမပဲ့ပြင်ခြင်း၊ ရိုက်နှက်ခြင်းနှင့် အပြစ်ဒဏ်ပေးခြင်း အမှုပမာဏသည် အလွန်ပင် နည်းပါးသည်။ ထို့အပြင် ကိုယ်တော်၏ အမှုတော်၏ မတူညီသော ပစ်မှတ်များအပေါ် မူတည်၍ ဘုရားသခင်သည် ဤအရာများကို သက်ဆိုင်ရာ စည်းမျဉ်းများနှင့်အညီလည်း ပြုလုပ်ပြီး ကိုယ်တော်၏ လုပ်ဆောင်ချက်များသည် ခံယူရမည့်သူများနှင့် အမျိုးမျိုးသော မတူညီသည့် အခြေအနေများအပေါ် မူတည်၍ ကွဲပြားသည်။ သို့ဖြစ်၍ နှိုင်းယှဉ်ကြည့်လျှင် ကိုယ်တော်သည် လူတို့ကို ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းကို ရှားရှားပါးပါးသာ ပြုလုပ်သည်။ သို့ဖြစ်၍ လူတို့သည် ဘုရားသခင်၏ အမှုတော်နှင့်ပတ်သက်၍ ၎င်းတို့၏ ယခင် အယူအဆများနှင့် စိတ်ကူးများကို ဆက်လက်ဆုပ်ကိုင်ထားခြင်းကို ရပ်သင့်ပြီး ဘုရားသခင်သည် များစွာသော နှုတ်ကပတ်တော်များနှင့် များစွာသော သမ္မာတရားများကို ဖော်ပြခဲ့ပြီးဖြစ်သဖြင့် ၎င်းတို့သည် သမ္မာတရားကို လက်တွေ့လုပ်ဆောင်ရန်နှင့် သမ္မာတရား လက်တွေ့ကျမှုထဲသို့ ဝင်ရောက်ရန် ဘုရားသခင်က ၎င်းတို့ကို တိုက်တွန်းသည်ကို အလိုက်သင့် ခွင့်ပြုလျက် ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းတို့အပေါ် ဆက်လက်မှီခိုမနေသင့်ပေ၊ ဤသည်မှာ လူတို့ မရှိသင့်သည့် အတွေးအခေါ်တစ်ခု ဖြစ်သည်။ လူတို့ ရှိသင့်သည့် မှန်ကန်သော အတွေးအခေါ်မှာ ၎င်းတို့သည် ဘုရားသခင်၏ ရည်ရွယ်ချက်များကို နားလည်စေရန် သို့မဟုတ် ကိုယ်တော်၏ ရှေ့မှောက်သို့ ရောက်လာစေရန် ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းတို့အပေါ် ဘာသိဘာသာဖြင့် မှီခိုနေမည့်အစား ကိုယ်တော်၏ ရည်ရွယ်ချက်များနှင့် သမ္မာတရား စည်းမျဉ်းများကို ရှာဖွေရန် ဘုရားသခင်၏ ရှေ့မှောက်သို့ ပို၍ အပြုသဘောဆောင်ပြီး တက်ကြွစွာ လာရောက်ရမည်ဟူ၍ ဖြစ်သည်။ မည်သည့်အချိန်အခါ၌မဆို ဘုရားသခင်၏ နှုတ်ကပတ်တော်များနှင့် သမ္မာတရား စည်းမျဉ်းများသည် သင်ရှေ့ဆက်ရန် လားရာဖြစ်ပြီး သင်၏ နေ့စဉ်အသက်တာ၌ သို့မဟုတ် သင်၏ ဖြစ်တည်မှုလမ်းကြောင်း၌ သင်အများဆုံး စွဲကိုင်ပြီး လက်တွေ့လုပ်ဆောင်သင့်သည့် စည်းမျဉ်းများနှင့် လမ်းကြောင်းများ ဖြစ်ကြသည်၊ သို့သော် ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းတို့မှာမူ ကိုယ်တော်က လိုအပ်သည်ဟု ယူဆသည့် အချို့သော အထူးအခြေအနေများနှင့် အနေအထားများတွင် ကိုယ်တော်ပြသသည့် အမှုပြုခြင်းနည်းလမ်းများသာ ဖြစ်သည်။ လူတို့အနေဖြင့် “ဘုရားသခင်သည် ကျွန်ုပ် သမ္မာတရားကို ချစ်မြတ်နိုးလာနိုင်ပြီး သမ္မာတရား စည်းမျဉ်းများထဲသို့ ဝင်ရောက်နိုင်စေရန် ကျွန်ုပ်ကို ဆုံးမပဲ့ပြင်သင့်သည်၊ ရိုက်နှက်သင့်သည်၊ အပြစ်ဒဏ်ပေးသင့်သည်” ဟု တွေးထင်လျက် ဤအရာ ဖြစ်ပေါ်လာရန် ဘာသိဘာသာ စောင့်ဆိုင်းခြင်း သို့မဟုတ် မတက်ကြွဘဲ တောင်းဆိုခြင်း မပြုသင့်ပေ။ ဤသည်မှာ မှားယွင်းပြီး အဓိပ္ပာယ်မဲ့သော အတွေးအခေါ်တစ်ခုဖြစ်ပြီး လူတို့ မရှိသင့်သည့်အရာတစ်ခု ဖြစ်သည်။ အချို့လူများက ဟီရိဩတ္တပ္ပ ကင်းမဲ့သောသူတို့သည် တိရစ္ဆာန်များဖြစ်ကြပြီး ကယ်တင်ခြင်းမခံရနိုင်ဟု ကြားသိရသောအခါ စိုးရိမ်လာကြပြီး “ကျွန်ုပ် ကယ်တင်ခြင်းမခံရနိုင်လျှင် တကယ်ကို ဒုက္ခရောက်မည်။ ကျွန်ုပ်တွင် ပုံမှန်လူ့သဘာဝ၏ ဟီရိဩတ္တပ္ပ၏ သိနားလည်မှု မရှိသောကြောင့် ပုံမှန်လူ့သဘာဝ၏ ဟီရိဩတ္တပ္ပအစား ဘုရားသခင်က ကျွန်ုပ်ကို ဆုံးမပဲ့ပြင်ပြီး အပြစ်ဒဏ်ပေးခြင်းကို ပို၍ နှစ်သက်သည်” ဟု တွေးထင်ကြသည်။ ဤသည်မှာ စိတ်ကူးကောင်းတစ်ခု ဟုတ်သလော။ ဖန်ဆင်းခံတစ်ဦးအနေဖြင့်၊ ဖောက်ပြန်ပျက်စီးသော သာမန်လူသားမျိုးနွယ်ဝင် တစ်ဦးအနေဖြင့် သင်သည် မိမိကိုယ်ကို ပုံမှန်လူ့သဘာဝ ကင်းမဲ့ပြီး ပုံမှန်လူ့သဘာဝ၏ ဟီရိဩတ္တပ္ပ ကင်းမဲ့သည်ဟု အမှန်တကယ် တွေးထင်ပါက ဤအရာ၏ နာကျင်မှုကို နက်ရှိုင်းစွာ ခံစားရပြီး ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်းနှင့် အပြစ်ဒဏ်ပေးခြင်းတို့က သင့်ကို စွန့်ခွာသွားမည်မဟုတ်ကြောင်းနှင့် ယင်းတို့က သင့်ကို အသွင်ပြောင်းလဲစေပြီး နောက်ဆုံးတွင် ရှင်သန်စေရန် ထောက်ကူပေးလိမ့်မည်ဟု မျှော်လင့်ပါသည်၊ သင်တွင် ဤကဲ့သို့သော စိတ်ပိုင်းဖြတ်ချက် အမှန်တကယ် ရှိပါက ယင်းမှာ ကောင်းသောအရာတစ်ခု ဖြစ်နိုင်ပြီး သင်၏ ရှင်သန်ရေးအတွက် မျှော်လင့်ချက်အလင်းတန်းတစ်ခု ဖြစ်သည်။ သို့သော် သင့်ထံတွင် ထိုသို့သော စိတ်ပိုင်းဖြတ်ချက် မရှိပါက၊ သင်သည် ပုံမှန်လူ့သဘာဝ၏ ဟီရိဩတ္တပ္ပ၏ သိနားလည်မှု မရှိပါက ကြီးမားသောအန္တရာယ်၌ ရှိနေသည်ဟု သင့်ကို ငါပြောမည်။ သင်သည် ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်းနှင့် အပြစ်ဒဏ်ပေးခြင်းတို့ကို ရံဖန်ရံခါ လက်ခံရရှိခဲ့လျှင်ပင် ယင်းမှာ ကိုယ်တော်က သင့်အား ချီးမြှင့်သောအရာတစ်ခု ဖြစ်သည်။ ဘုရားသခင်သည် သင် မကောင်းမှု နည်းနိုင်သမျှ နည်းအောင် ပြုလုပ်ပြီး အပြစ်ဒဏ် နည်းနိုင်သမျှ နည်းအောင် ခံရစေရန်အလို့ငှာ သင့်ကို သတိပေးနှိုးဆော်ရန်နှင့် သတိပေးရန် ဤအရာများကို ပြုလုပ်ပြီး ဤနည်းလမ်းများကို အသုံးပြုသည်။ ဘုရားသခင်သည် သင့်ကို အတော်အတန် သိက္ခာဆယ်ပေးခဲ့ပြီးဖြစ်သည်၊ ဘုရားသခင်က သင့်အား ခြွင်းချက်အနေဖြင့် ဤကျေးဇူးတော်ကို ပြုခြင်းအတွက် သင်သည် ဘုရားသခင်ကို ကျေးဇူးကန်းမည့်အစား ကျေးဇူးတင်သင့်သည်။ ပုံမှန်အခြေအနေများတွင် ဘုရားသခင်သည် လူ့သဘာဝ၏ ဟီရိဩတ္တပ္ပနှင့် ဆင်ခြင်တုံတရား ကင်းမဲ့သူတစ်ဦးအပေါ် မည်သည့်အမှုကိုမျှ ပြုလုပ်မည်မဟုတ်သကဲ့သို့ မည်သည့်အမှုပြုခြင်း နည်းလမ်းကိုမျှ အသုံးပြုမည် မဟုတ်ပေ။ သင်သည် ဘုရားသခင်ထံမှ ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းကို လက်ခံရရှိခဲ့ပါက မည်သည့်အရာဖြစ်စေ၊ အနည်းငယ်သာဖြစ်စေ သို့မဟုတ် အတော်အတန် ပို၍ပြင်းထန်သည်ဖြစ်စေ ယင်းအားလုံးအတွက် ဘုရားသခင်ကို သင်ကျေးဇူးတင်သင့်သည်။ လူ၏ အရပ်သုံးစကားဖြင့် ပြောရလျှင် ဤသည်မှာ ဘုရားသခင်က သင့်ကို အလေးထားပြီး ချီးမြှောက်ခြင်း ဖြစ်သည်။ ဘုရားသခင်သည် သင့်ကို ရန်လိုမှုဖြင့် သို့မဟုတ် ပြစ်တင်ရှုတ်ချခြင်းဖြင့် လုံးဝမကြည့်ပေ၊ သို့ဖြစ်၍ သင်သည် ယင်းကို ဘုရားသခင်ထံမှ လက်ခံသင့်သည်။ သင်သည် သမ္မာတရား၏ ထောက်ပံ့မှုအပြင် ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းကို လက်ခံရရှိရန် အခွင့်အရေး အမှန်တကယ် ရှိပါက ယင်းက ဘုရားသခင်သည် သင့်ကို ဖန်ဆင်းခံတစ်ဦးအဖြစ်နှင့် ဖောက်ပြန်ပျက်စီးသော လူသားမျိုးနွယ်၏ အဖွဲ့ဝင်တစ်ဦးအဖြစ် ဆက်ဆံနေဆဲဖြစ်ကြောင်း သက်သေပြသည်။ သင်သည် ဘုရားသခင်ကို ကျေးဇူးတင်သင့်သည်၊ ဤအရာကို မှန်ကန်စွာ နားလည်သင့်ပြီး ဘုရားသခင်၏ ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်းကို ကျိုးနွံနာခံသင့်သည်။ သင်သည် ယင်းကြောင့် ဘုရားသခင်အပေါ် ရန်လိုသော သဘောထား မထားသင့်သကဲ့သို့ ယင်းကြောင့် ဘုရားသခင်ကို သာ၍ပင် ပုန်ကန်ခြင်းလည်း မပြုသင့်ပေ။ သင်သည် မည်သို့သော ဆုံးမပဲ့ပြင်ခြင်းမျိုးကို လက်ခံရရှိခဲ့သည်ဖြစ်စေ သို့မဟုတ် သင်လက်ခံရရှိခဲ့သော အပြစ်ဒဏ်သည် မည်မျှပင် ပြင်းထန်သည်ဖြစ်စေ သင်သည် ဘုရားသခင်ကို ချက်ချင်း ကျိုးနွံနာခံပြီး ကျေးဇူးတင်သင့်သည်၊ သင့်ကို သတိပေးနှိုးဆော်ပြီး သတိပေးသည့်အတွက်လည်းကောင်း၊ သင့်အား ဤအခွင့်အရေးကို ပေးသည့်အတွက်လည်းကောင်း၊ ဘုရားသခင်ထံမှ ဤအရာအားလုံးကို လက်ခံရရှိရန် အခွင့်အရေး ရရှိစေသည့်အတွက်လည်းကောင်း ကိုယ်တော်အား ကျေးဇူးတင်သင့်သည်။ ဤအရာက သင်သည် ဘုရားသခင်နှင့် ဆက်ဆံရေး ရှိနေဆဲဖြစ်ပြီး ဤဆက်နွှယ်မှုသည် လုံးဝ မပြတ်တောက်သေးကြောင်းကိုလည်း သက်သေပြသည်။ ဘုရားသခင်၏ လူသားမျိုးနွယ်ကို စီမံခန့်ခွဲသည့် အမှုတော်၌လည်းကောင်း၊ ကိုယ်တော်က လူတို့ကို ကယ်တင်သည့် ဖြစ်စဉ်၌လည်းကောင်း ဘုရားသခင်သည် သူ၏စိတ်နှလုံးထဲတွင် သင့်ကို ထားရှိနေဆဲဖြစ်သည်၊ အနည်းဆုံးအနေဖြင့် ဘုရားသခင်သည် သင့်ကို မြင်နေဆဲဖြစ်သည်၊ ကိုယ်တော်သည် သင်၏ ပုန်ကန်မှုနှင့် သင်၏ ဖောက်ပြန်ပျက်စီးမှုကို မြင်တွေ့သည့်အခါ သင့်ကို ဆုံးမပဲ့ပြင်ရန်၊ ရိုက်နှက်ရန်နှင့် အပြစ်ဒဏ်ပေးရန် ဆန္ဒရှိနေဆဲ ဖြစ်သည်။ ဤအရာက ကိုယ်တော်သည် သင့်ကို လုံးဝ စွန့်လွှတ်မထားသေးကြောင်း သက်သေပြသည်၊ သင့်အတွက် ဤသည်မှာ ကံကောင်းခြင်းဖြစ်ပြီး သတင်းကောင်းလည်း ဖြစ်သည်။ သို့ဖြစ်၍ သင်သည် နာကျင်ဖွယ်ကောင်းသော ဆုံးမပဲ့ပြင်ခြင်း သို့မဟုတ် ရိုက်နှက်ခြင်း အနည်းငယ်ကို ခံရသည့်တိုင် ဘုရားသခင်၏ ရှေ့မှောက်သို့ ချက်ချင်း လာသင့်သည်။ ဘုရားသခင်၏ ရှေ့မှောက်သို့ လာရခြင်း၏ ရည်ရွယ်ချက်မှာ ကိုယ်တော်၏ရှေ့မှောက်၌ သင်ဦးညွှတ်ပျပ်ဝပ်ရန် မဟုတ်သကဲ့သို့ ဘုရားသခင်သည် ကြောက်မက်ဖွယ်ကောင်းသည် သို့မဟုတ် ကြောက်ရွံ့ဖွယ်ကောင်းသည်ဟု သင့်ကို ခံစားစေရန်လည်း မဟုတ်ပေ။ ထိုအစား သင်သည် ဘုရားသခင်ကို နှစ်သက်စေရန် မည်သည့်အရာကို လုပ်ဆောင်သင့်သည်၊ ဘုရားသခင်သည် သင့်အပေါ် နောက်ထပ် အမျက်မထွက်စေရန် မည်သည့်အရာကို လုပ်ဆောင်သင့်သည်နှင့် ကိုယ်တော်၏ အမျက်ဒေါသကို ပြေပျောက်စေရန် မည်သည့်အရာကို လုပ်ဆောင်သင့်သည်တို့ကို သင်နားလည်သင့်သည်။ အနည်းဆုံးအနေဖြင့် သင်သည် သင်၏ အစွမ်းအစက ဖြစ်မြောက်အောင်နိုင်သည့်အရာ၏ နယ်ပယ်အတွင်းတွင် ဘုရားသခင်က သင့်ကို ပြောပြခဲ့သော သမ္မာတရား စည်းမျဉ်းများကို လက်တွေ့လုပ်ဆောင်ရန် အစွမ်းကုန် ကြိုးစားသင့်ပြီး ဘုရားသခင်ကို သင့်အပေါ် နောက်တစ်ကြိမ် အမျက်ထွက်စေခြင်း မပြုသင့်ပေ။ ဘုရားသခင်သည် သင့်အပေါ် အကြိမ်ကြိမ် အမျက်ထွက်ပြီး သင်သည် အလွန်အမင်း ထုံထိုင်းနေဆဲဖြစ်ကာ ခေါင်းမာစွာ၊ စိတ်နှလုံးခိုင်မာစွာဖြင့် ဘုရားသခင်ကို ရန်လိုမှုဖြင့် ရှုမြင်ပြီး အဆုံးတိုင် ကိုယ်တော်အား တိုက်ခိုက်နေဆဲဖြစ်ပါက အဆုံးတွင် သင်မလွဲမသွေ ကြုံတွေ့ရမည့်အရာမှာ ဘုရားသခင်က သင့်ကို စွန့်လွှတ်ခြင်းပင် ဖြစ်သည်။ ဘုရားသခင်သည် သင့်ကို နောက်ထပ် ဆုံးမပဲ့ပြင်ခြင်း၊ ရိုက်နှက်ခြင်း သို့မဟုတ် အပြစ်ဒဏ်ပေးခြင်း မပြုတော့သည့်အချိန်သည် ဘုရားသခင်က သင့်ကို စွန့်လွှတ်လိုက်သည့်အချိန် ဖြစ်သည်။ ပြီးလျှင် ဘုရားသခင်က သင့်ကို စွန့်လွှတ်လိုက်သည်နှင့်တစ်ပြိုင်နက် ကိုယ်တော်သည် သင့်ကို သတိပေးနှိုးဆော်ခြင်းကို ရပ်တန့်လိမ့်မည်ဖြစ်ပြီး ကိုယ်တော်သည် သင့်ကို သူ၏မျက်မှောက်တော်မှ ဖယ်ရှားကာ အသင်းတော်အပြင်ဘက်ရှိ နေရာတစ်ခုသို့၊ သူ၏အမှုတော်ဗဟိုချက်မှ အဝေးရှိ နေရာတစ်ခုသို့ ရွှေ့ပြောင်းလိမ့်မည်၊ အနည်းဆုံးအနေဖြင့် ကိုယ်တော်သည် သူ၏အမှုတော်ကာလအတွင်း သင့်ကို မမြင်နိုင်စေရန် ပြုလုပ်လိမ့်မည်၊ ဘုရားသခင်သည် သင့်ကို နောက်ထပ် မြင်လိုတော့မည်မဟုတ်ပေ။ သင်သည် ဤအတိုင်းအတာအထိ မကောင်းမှုကို ကျူးလွန်ပြီး ဤအဆင့်သို့ ရောက်ရှိပါက သင်ကယ်တင်ခြင်းခံရရန် မျှော်လင့်ချက် မရှိတော့ပေ။ သင်နားလည်ပြီလော။ (နားလည်ပါပြီ။)

ယနေ့ မိတ်သဟာယဖွဲ့ခြင်းသည် ဘုရားသခင်နှင့် မိမိကြားရှိ အတားအဆီးများကို စွန့်လွှတ်ခြင်းနှင့် ဘုရားသခင်အပေါ်ထားရှိသော မိမိ၏ ရန်လိုမှုကို စွန့်လွှတ်ခြင်းဟူသည့် အကြောင်းအရာနှင့် သက်ဆိုင်သည်။ ဘုရားသခင်နှင့်ပတ်သက်သော လူတို့၏ အယူအဆများနှင့် စိတ်ကူးများကို ဖော်ထုတ်ခြင်းဖြစ်စေ၊ ဘုရားသခင်အပေါ်ထားရှိသော ၎င်းတို့၏ သဘောထားများကို ဖော်ထုတ်ခြင်းဖြစ်စေ၊ ဘုရားသခင်သည် လူတို့အပေါ် သူ၏အမှုကို အတိအကျ မည်သို့မည်ပုံနှင့် မည်သည့်နည်းလမ်းများဖြင့် ဆောင်ရွက်သည်ကို မိတ်သဟာယဖွဲ့ခြင်းဖြစ်စေ မည်သို့ပင်ဖြစ်စေ ဤအရာအားလုံးက လူတို့ကို နောက်ဆုံးတွင် ပြောပြသည့်အရာမှာ အောက်ပါအတိုင်းပင် ဖြစ်သည်။ ဘုရားသခင်၏ အမှုတော်အပေါ် ၎င်းတို့ အများဆုံးထားရှိသင့်သည့် မှန်ကန်သော ရှုမြင်ပုံမှာ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို လက်ခံပြီး ကျိုးနွံနာခံရန်နှင့် ဘုရားသခင်ထံမှ ဝေးကွာသွားမည့်အစား ဘုရားသခင်၏ နှုတ်ကပတ်တော်များနှင့် ကိုယ်တော်က ၎င်းတို့အား ပေးသနားသည့် သမ္မာတရား စည်းမျဉ်းတစ်ခုစီကို လက်ခံရန် ဖြစ်သည်။ ၎င်းတို့သည် မည်သည့်အရာကိုမဆို ပြုလုပ်သည့်အခါတိုင်း ၎င်းတို့၏ အပြင်ပန်းအပြုအမူတွင် အားထုတ်ကြိုးပမ်းမည့်အစား သို့မဟုတ် အပြင်ပန်းအားဖြင့် ဆင်းရဲဒုက္ခခံပြီး အဖိုးအခပေးရာတွင် အားထုတ်ကြိုးပမ်းမည့်အစား၊ ၎င်းတို့၏ အယူအဆများနှင့် စိတ်ကူးများတွင် နစ်မွန်းနေပြီး ယင်းတို့ကို အရေးလုပ်နေမည့်အစား သမ္မာတရား စည်းမျဉ်းများကို ရှာဖွေပြီး ယင်းတို့နှင့်အညီ လက်တွေ့လုပ်ဆောင်သင့်ကာ သမ္မာတရား လက်တွေ့ကျမှုထဲသို့ ဝင်ရောက်ရန် လိုက်စားသင့်သည်။ မည်သို့ပင်ဆိုစေကာမူ သင်၏ ဘုရားသခင်အပေါ် ထားရှိသော အယူအဆများနှင့် စိတ်ကူးများက မည်သို့ပင်ဖြစ်စေကာမူ ဘုရားသခင်၏ အမှုတော်က စွမ်းဆောင်ရရှိရန် ရည်ရွယ်သည့် အကျိုးရလဒ်မှာ ကိုယ်တော်၏ နှုတ်ကပတ်တော်များနှင့် သမ္မာတရားကို လူတို့အတွင်းသို့ အလုပ်လုပ်ထည့်သွင်းရန်နှင့် ၎င်းတို့၏ နေ့စဉ်အသက်တာများနှင့် ၎င်းတို့၏ ဘဝလမ်းခရီးအတွင်း ကြုံတွေ့ရသည့် အရာအားလုံးတွင် လိုက်နာရန် သမ္မာတရား စည်းမျဉ်းများ ရှိစေရန်နှင့် ဤသမ္မာတရား စည်းမျဉ်းများကို ထိန်းသိမ်းနိုင်စေရန် ဖြစ်သည်၊ ဤသည်မှာ ဘုရားသခင်၏ အမှုတော်၏ ရည်ရွယ်ထားသော အကျိုးရလဒ် ဖြစ်သည်။ ဘုရားသခင်၏ အမှုတော်က စွမ်းဆောင်ရရှိသည့် နောက်ဆုံးအကျိုးရလဒ်မှာ ကိုယ်တော်က ဤအရာအားလုံးကို ၎င်းတို့၏ အယူအဆများနှင့် စိတ်ကူးများအတိုင်း ပြီးမြောက်စေခြင်းထက် သမ္မာတရားသည် လူတို့၏ လက်တွေ့ကျမှုနှင့် လူတို့၏ အသက် ဖြစ်လာခြင်းပင် ဖြစ်သည်။ သင် ဤသည်ကို နားလည်ပြီလော။ ငါတို့သည် ဤအကြောင်းအရာများအပေါ် အနည်းနှင့်အများဆိုသကဲ့သို့ လုံလောက်အောင် မိတ်သဟာယဖွဲ့ခဲ့ပြီးဖြစ်သည် မဟုတ်လော။ (ဟုတ်ပါသည်။) သို့ဆိုလျှင် ယနေ့အတွက် ငါတို့၏ မိတ်သဟာယဖွဲ့ခြင်းကို ဤနေရာတွင် အဆုံးသတ်မည်။ နှုတ်ဆက်ပါသည်။

၂၀၂၃ ခုနှစ်၊ ဇူလိုင်လ ၈ ရက်