ငါတို့၏ လတ်တလော မိတ်သဟာယ၏ အကြောင်းအရာမှာ လူအမျိုးအစား အမျိုးမျိုးကို ပိုင်းခြားသိမြင်ခြင်းဖြစ်သည့်၊ ၎င်းတို့၏ ဇာစ်မြစ်များကို အခြေခံ၍ ၎င်းတို့၏ မတူညီသော အမျိုးအစားများနှင့် အမျိုးအစားခွဲခြားမှုများကို ခွဲခြားသိမြင်ခြင်းနှင့် ထို့နောက် လက်တွေ့ဘဝတွင် ၎င်းတို့၏ ကွဲပြားသော သရုပ်သကန်များမှတစ်ဆင့် လူအမျိုးအစား အမျိုးမျိုး၏ အနှစ်သာရကို ပိုင်းခြားသိမြင်ခြင်းအကြောင်း ဖြစ်သည်။ လူအမျိုးမျိုးကို ပိုင်းခြားသိမြင်တတ်ရန် သင်ယူခြင်းသည် ၎င်းတို့အား မည်သို့ မှန်ကန်စွာ သဘောထားရမည်ဟူသည်နှင့် သင့်ကိုယ်သင် မည်သို့ မှန်ကန်စွာ သဘောထားရမည်ဟူသည်တို့နှင့်ပတ်သက်၍ အကျိုးရှိသည် မဟုတ်လော။ (ဟုတ်ပါသည်။) ဤအရာများအပေါ် မိတ်သဟာယဖွဲ့ခြင်းက ဘုရားသခင်ကို ယုံကြည်သူများနှင့်ပတ်သက်၍ လူတို့၏ ယခင် အယူအဆများနှင့် စိတ်ကူးများကို ဖြေရှင်းပေးခဲ့သည် မဟုတ်လော။ ဥပမာအားဖြင့်၊ လူများစွာတို့သည် ယုံကြည်သူအားလုံးကို ညီအစ်ကိုမောင်နှမများအဖြစ် ဆက်ဆံလေ့ရှိခဲ့ကြသည်။ တစ်စုံတစ်ဦးသည် အသင်းတော်၌ ရှိနေသရွေ့၊ မိမိတို့၏ တာဝန်ကို ထမ်းဆောင်ရာ၌ စိတ်အားထက်သန်နေသရွေ့၊ ၎င်းတို့ မည်မျှပင် မကောင်းမှု ကျူးလွန်သည်ဖြစ်စေ၊ ၎င်းတို့၏ လူ့သဘာဝက မည်မျှပင် ဆိုးရွားသည်ဖြစ်စေ၊ သို့မဟုတ် ၎င်းတို့၏ စိတ်သဘောထားက မည်မျှပင် မာနထောင်လွှားပြီး၊ ဉာဏ်များသည်ဖြစ်စေ သို့မဟုတ် လှည့်ဖြားတတ်သည်ဖြစ်စေ၊ ဤလူတို့သည် ၎င်းတို့ကို ညီအစ်ကိုမောင်နှမများအဖြစ် သဘောထားခဲ့ကြပြီး မေတ္တာဖြင့် ကူညီခဲ့ကြသည်။ ထိုသို့သော လူတို့တွင် ပိုင်းခြားသိမြင်မှု ရှိသလော။ (မရှိပါ။) ရေလောင်းပေးပြီး ကျွေးမွေးခဲ့သည့် လွန်ခဲ့သော ဤနှစ်ကာလအနည်းငယ်မှတစ်ဆင့်၊ သင်တို့၏ ရှုမြင်ပုံများမှာ အတော်အတန် ပြောင်းလဲပြီးဖြစ်သည် မဟုတ်လော။ (ဟုတ်ပါသည်။) ယခု သင်တို့၏ ရှုထောင့်များ ပြောင်းလဲသွားပြီဖြစ်သောကြောင့်၊ လူအမျိုးအစား အမျိုးမျိုးကို သဘောထားရာတွင် သင်တို့ အတော်အတန် စည်းမျဉ်းရှိလာသည် မဟုတ်လော။ (ဟုတ်ပါသည်။) လူအမျိုးအစား အမျိုးမျိုးအပေါ် သင်တို့၏ ရှုထောင့်များနှင့် သဘောထားများသည် ယခင်ကနှင့် မတူတော့သည် မဟုတ်လော။ (ဟုတ်ပါသည်၊ မတူတော့ပါ။) ဤကိစ္စများကို မိတ်သဟာယမဖွဲ့မီတွင်၊ တစ်စုံတစ်ဦးသည် ဘုရားသခင်ကို ယုံကြည်သရွေ့ ၎င်းတို့သည် လူကောင်းတစ်ဦး၊ ဘုရားအိမ်တော်သားတစ်ဦးဖြစ်သည်၊ ဆိုးသော လူ့သဘာဝရှိသူများပင် ဘုရားသခင် ကယ်တင်ရန် ရည်ရွယ်သောသူများ ဖြစ်သည်ဟု ယုံကြည်ခဲ့ကြလျက် လူတို့သည် လူအမျိုးအစား အမျိုးမျိုးကို ပိုင်းခြားသိမြင်မှု မရှိခဲ့ကြပေ။ ယခု ယင်းကို ကြည့်လိုက်သောအခါ၊ ထိုသို့ ဟုတ်သလော။ (မဟုတ်ပါ။) ယခုအခါ ဤသည်မှာ ထိုသို့မဟုတ်တော့ချေ။ သို့ဆိုလျှင်၊ ယခု ယင်းကို ကြည့်လိုက်သောအခါ၊ လူကောင်းများ ပိုများသလော သို့မဟုတ် လူဆိုးများ ပိုများသလော။ (ကျွန်ုပ်ထင်သည်မှာ လူဆိုးများ ပိုများပါသည်။ ယခင်က၊ ကျွန်ုပ်သည် လူများစွာတို့ကို အတော်အတန် ကောင်းသည်ဟု မြင်ခဲ့သော်လည်း၊ ဘုရားသခင်၏ မိတ်သဟာယဖွဲ့ခြင်းမှတစ်ဆင့်လည်းကောင်း၊ လူအမျိုးအစား အမျိုးမျိုး၏ သရုပ်သကန်များနှင့် ယင်းကို ဆက်စပ်ကြည့်ခြင်းအားဖြင့်လည်းကောင်း၊ လူဆိုးများ ပိုများကြောင်း ကျွန်ုပ်ခံစားရပါသည်။) ယခင်က၊ အလွန်ဆုံးအနေဖြင့်၊ သင်သည် သိသာထင်ရှားစွာ မယုံကြည်သူများ၊ အခွင့်အရေးသမားများ၊ ဝိညာဉ်ဆိုးများ၊ ညစ်ညမ်းသော နတ်ဆိုးများနှင့် သိသာထင်ရှားသော အဖျက်အမှောင့်လုပ်ခြင်းများနှင့် နှောင့်ယှက်ခြင်းများကို ဖြစ်စေနိုင်သူတို့သည် လူကောင်းများ သို့မဟုတ် ညီအစ်ကိုမောင်နှမများ မဟုတ်ကြောင်းကို သိလျက်၊ ၎င်းတို့နှင့်ပတ်သက်၍ ပိုင်းခြားသိမြင်မှုတစ်ခုခု ရှိခဲ့သည်။ ယခုတွင်၊ ထိုသို့သော မိတ်သဟာယဖွဲ့ခြင်းမှတစ်ဆင့်၊ သိသာထင်ရှားသော သရုပ်သကန်များရှိသူတို့ကို ပိုင်းခြားသိမြင်နိုင်ခြင်းအပြင်၊ သင်သည် လူအားလုံးကို ၎င်းတို့၏ ထုတ်ဖော်ချက်များနှင့် သရုပ်သကန်များအရ အခြေခံအားဖြင့် ပိုင်းခြားသိမြင်နိုင်ပြီ မဟုတ်လော။ (ဟုတ်ပါသည်။) သို့ဖြစ်၍၊ ထိုသို့သော မိတ်သဟာယဖွဲ့ခြင်းပြီးသည့်နောက်တွင်၊ သင်တို့သည် လူတို့နှင့် တစ်ဖန်ပြန်၍ အပြန်အလှန်ဆက်ဆံသောအခါ၊ ယခင်ကနှင့် မတူဟု ခံစားရသည် မဟုတ်လော။ (အနည်းငယ် ကွဲပြားပါသည်။ ယခုတွင် ကျွန်ုပ် လူတို့နှင့် အပြန်အလှန်ဆက်ဆံသောအခါ၊ ၎င်းတို့သည် လူများ၊ တိရစ္ဆာန်များ၊ သို့မဟုတ် နတ်ဆိုးများမှ ဝင်စားသူများ ဟုတ်မဟုတ်ဟူသည်ကို ချိန်ဆရန်၊ ၎င်းတို့၏ ထုတ်ဖော်ချက်များကို လေ့လာစောင့်ကြည့်ခြင်းနှင့် အမှုအရာများ ကြုံတွေ့ရသောအခါ ၎င်းတို့ ဖော်ပြသည့် ရှုထောင့်များကို အာရုံစိုက်ပါသည်။ ကျွန်ုပ်သည် လူတို့ကို ၎င်းတို့၏ အနှစ်သာရနှင့် အမျိုးအစားခွဲခြားမှုအား အခြေခံ၍ ပိုင်းခြားသိမြင်ရန် အာရုံစိုက်လာပြီဖြစ်ပါသည်။) ဤသည်မှာ သင်သည် လူတို့ကို ပိုင်းခြားသိမြင်တတ်လာပြီဟု ဆိုလိုသည်။ သို့ဆိုလျှင် သင်သည် သင်ကိုယ်တိုင်ကို ပိုင်းခြားသိမြင်နိုင်သလော။ (အနည်းငယ် ပိုင်းခြားသိမြင်နိုင်ပါသည်။) တိုတိုပြောရလျှင်၊ ဤအကြောင်းအရာကို မိတ်သဟာယဖွဲ့ခြင်းသည် လူတို့ကို ပိုင်းခြားသိမြင်ရန်အတွက် အကျိုးရှိသည်။ ယင်းက သင့်အား လူအမျိုးအစား အမျိုးမျိုး၏ အပြုအမူများနှင့် ရှုထောင့်များကို ပိုင်းခြားသိမြင်ရန်နှင့် ဤလူတို့၏ အနှစ်သာရကို ထိုးထွင်းသိမြင်နိုင်ရန် ကူညီနိုင်သည်။ ဤနည်းအားဖြင့်၊ သင်သည် လူအမျိုးအစား အမျိုးမျိုးကို စည်းမျဉ်းများအတိုင်း သဘောထားလိမ့်မည်ဖြစ်ပြီး၊ အချို့သော အထူးပုဂ္ဂိုလ်များ၊ ဖြစ်ရပ်များ၊ သို့မဟုတ် အမှုအရာများကို ကြုံတွေ့ရသောအခါ၊ သင်သည် ၎င်းတို့ကို အယူအဆများနှင့် စိတ်ကူးများအား အခြေခံ၍ သဘောထားမည်မဟုတ်သည့်အပြင်၊ ပြဿနာများကို ကိုင်တွယ်ရာတွင် အချို့သော အခြေခံစည်းမျဉ်းများကို သဘောပေါက်နိုင်လိမ့်မည်ဖြစ်ကာ၊ ထိုသို့ဖြင့် မိုက်မဲသောအရာများ လုပ်ဆောင်ခြင်း နည်းပါးသွားလိမ့်မည်ဖြစ်သည်။ ဥပမာအားဖြင့်၊ ယခင်က၊ ပုံမှန်မဟုတ်သော အပြုအမူ သို့မဟုတ် လွဲချော်သော အတွေးများနှင့် အမြင်များရှိသည့် အချို့လူတို့ကို မြင်သောအခါ၊ ထိုသို့သော လူတို့တွင် ညံ့ဖျင်းသော အစွမ်းအစရှိပြီး၊ သဘောပေါက်နားလည်နိုင်စွမ်း မရှိ သို့မဟုတ် ၎င်းတို့သည် တရားဒေသနာ အနည်းငယ်သာ ကြားနာခဲ့ပြီး အလွန်ပေါ့တန်သော အခြေခံအုတ်မြစ်တစ်ခု ရှိကြောင်းနှင့် ထို့ကြောင့် သင်သည် ၎င်းတို့ကို ပို၍ ရေလောင်းပေးရန်နှင့် ကူညီရန် အားထုတ်မှုအချို့ ပြုလုပ်သင့်ကြောင်း တွေးထင်ကောင်း တွေးထင်နိုင်သည်။ ယခု၊ မိတ်သဟာယဖွဲ့ခြင်းမှတစ်ဆင့်၊ တိရစ္ဆာန်များမှ လူဝင်စားသူများနှင့် နတ်ဆိုးများမှ လူဝင်စားသူတို့ကို ပိုင်းခြားသိမြင်မှု ရရှိပြီးဖြစ်သဖြင့်၊ သင်သည် ယခင်က ထိုမိုက်မဲသော လက်တွေ့လုပ်ဆောင်မှုများကို စွန့်လွှတ်မည်ဖြစ်ပြီး အကျိုးမရှိသော အလုပ်တာဝန်များကို ဆက်လက်လုပ်ဆောင်တော့မည် မဟုတ်ပေ။ သို့ဆိုလျှင်၊ သင်တို့သည် လူတို့ကို သမ္မာတရား စည်းမျဉ်းများအတိုင်း သဘောထားနိုင်ကြသလော။ (အတိုင်းအတာတစ်ခုအထိ ကျွန်ုပ်တို့ လုပ်ဆောင်နိုင်ပါသည်။) သင်၏ လက်တွေ့လုပ်ဆောင်မှုတွင် သွေဖည်ခြင်းများ ရှိလိမ့်မည်လော။ (အကယ်၍ ကျွန်ုပ်သည် လူတစ်ဦး၏ အနှစ်သာရကို တိကျစွာ အကဲမဖြတ်နိုင်ပါက၊ ကျွန်ုပ်၏ လက်တွေ့လုပ်ဆောင်မှုတွင် သွေဖည်ခြင်းများ ရှိနိုင်ပါသည်။) မည်သည့်အခြေအနေများအောက်၌ သင်၏ လက်တွေ့လုပ်ဆောင်မှုတွင် သွေဖည်ခြင်းများ ရှိမည်နည်း။ ၎င်းတို့၏ အပြင်ပန်း အပြုအမူသည် လူအများစု၏ အယူအဆများနှင့် အလွန်ကိုက်ညီသည်ဟု ဆိုကြပါစို့။ ၎င်းတို့သည် အဖိုးအခပေးနိုင်ပြီး အမှုအရာများကို စွန့်လွှတ်နိုင်သည်၊ မကြာခဏ မှန်ကန်သောအရာများကို ပြောဆိုပြီး မကြာခဏဆိုသလို ဆင်းရဲသားများကို စွန့်ကြဲပေးကမ်းကာ အခြားသူများကို ကူညီသည်။ လူ့သဘာဝအရ၊ ဤလူသည် သနားကြင်နာသည်ဟု ယူဆခံရသော်လည်း တစ်ချိန်တည်းမှာပင် ၎င်းတို့သည် လုံးဝ ပုံမှန်မဟုတ်သည့်အပြင်၊ မကြာခဏ အစွန်းရောက်သော အပြုအမူအချို့ကို ပြသပြီး၊ သဘာဝလွန် သရုပ်သကန်အချို့ကို ပြသပါက၊ သင်သည် ထိုသို့သော ပုဂ္ဂိုလ်တစ်ဦးကို ပိုင်းခြားသိမြင်နိုင်မည်လော။ ၎င်းတို့အား မည်သို့သဘောထားရမည်ကို သင်သိသလော။ (ပြီးခဲ့သည့်အကြိမ်က ဘုရားသခင်၏ မိတ်သဟာယဖွဲ့ခြင်းကြောင့်သာ ထိုသို့သော ပုဂ္ဂိုလ်တစ်ဦးသည် နတ်ဆိုးများမှ ဝင်စားသူများထဲမှ တစ်ဦးဖြစ်ကြောင်း ကျွန်ုပ်သိပါသည်။) သင်သည် ၎င်းတို့၏ အနှစ်သာရကို နတ်ဆိုးတစ်ကောင်၏ အနှစ်သာရဖြစ်သည်ဟု သတ်မှတ်နိုင်ပြီး ဤအဖြစ်မှန်ကို ထွင်းဖောက်မြင်နိုင်သော်လည်း၊ နေ့စဉ်ဘဝတွင် ၎င်းတို့၏ သရုပ်သကန်များနှင့် ၎င်းတို့၏ လက်ရှိအခြေအနေကို အခြေခံ၍ ၎င်းတို့ကို ဆက်ဆံရန် သင့်လျော်သောနည်းလမ်းက အဘယ်အရာဖြစ်သည်ကို သင် ဆုံးဖြတ်နိုင်သလော။ ဤသည်မှာ လူတို့ကို ဆက်ဆံခြင်း၏ စည်းမျဉ်းများနှင့် သက်ဆိုင်သည်။ သို့ဆိုလျှင်၊ ဤလူအမျိုးအစားကို သဘောထားရန် သင့်လျော်သောနည်းလမ်းမှာ အဘယ်နည်း။ အကယ်၍ ၎င်းတို့၏ အသက်တာ အခြေအနေသည် အခြေခံအားဖြင့် ပုံမှန်ဖြစ်လျှင်၊ ၎င်းတို့သည် အသင်းတော်၏ အလုပ်ကို နှောင့်ယှက်မှုများ မဖြစ်စေခဲ့သည့်အပြင်၊ အခြားသူများကို မနှောင့်ယှက်ခဲ့ပါက၊ ၎င်းတို့ကို မှန်ကန်စွာ ဆက်ဆံလော့။ အကယ်၍ ၎င်းတို့သည် အစေခံမှု ပေးနိုင်ပါက၊ ၎င်းတို့ကို ထိုသို့လုပ်ဆောင်ခွင့်ပြုလော့။ အကယ်၍ ၎င်းတို့ အစေခံမှု မပေးနိုင်သည့်အပြင်၊ အခြားသူများကို နှောင့်ယှက်မှုများ ဖြစ်စေခဲ့ပြီး၊ လူအများစုက ၎င်းတို့၏ သရုပ်သကန်များနှင့် ထုတ်ဖော်ချက်များကို ထွင်းဖောက်မြင်ကြပြီးဖြစ်ကာ ၎င်းတို့၏ အနှစ်သာရက နတ်ဆိုးတစ်ကောင်၏ အနှစ်သာရဖြစ်သည်ဟု ဆုံးဖြတ်၍ရပါက၊ ၎င်းတို့ကို ရှင်းလင်းပစ်ခြင်းဖြင့် ကိုင်တွယ်ရန် အလွန်နောက်မကျသေးပေ။ ဤသည်မှာ စည်းမျဉ်းတစ်ခု မဟုတ်လော။ (ဟုတ်ပါသည်။) ဤသည်မှာ စည်းမျဉ်းတစ်ခုဖြစ်သည်၊ သင်၏ စိတ်နှလုံးထဲတွင် ရှင်းရှင်းလင်းလင်း သိရမည်။ နောက်ပိုင်းတွင် ၎င်းတို့ကို မည်သို့ပင် ကိုင်တွယ်သည်ဖြစ်စေ၊ အချိန်အခါသည် သင့်လျော်ရမည်။ သင်သည် ၎င်းတို့ကို ထွင်းဖောက်မြင်သော်လည်း၊ လူအများစုက ၎င်းတို့ကို ထွင်းဖောက်မြင်ဖို့ မဆိုထားနှင့်၊ ၎င်းတို့နှင့် ထိတွေ့ဆက်ဆံမှုပင် မရှိခဲ့ဟု ဆိုကြပါစို့။ ထိုအခါ သင်သည် သမ္မာတရားကို မိတ်သဟာယမဖွဲ့သည့်အပြင် ၎င်းတို့အား မည်သို့ပိုင်းခြားသိမြင်ရမည်ကို မရှင်းပြဘဲ ၎င်းတို့ကို တိုက်ရိုက် သတ်မှတ်ပြီး ကိုင်တွယ်ပါက၊ ယင်းမှာ အလွန်မဆင်မခြင်နိုင်ရာကျသည်။ ပြီးလျှင် ၎င်းတို့၏ အနှစ်သာရကို ထွင်းဖောက်မြင်ပြီးနောက်၊ သင်သည် ၎င်းတို့အပေါ် စက်ဆုပ်ရွံရှာမှု ခံစားလာရပြီး၊ ထို့နောက်တွင် ၎င်းတို့ကို ပြုပြင်ရန် အခွင့်အရေးများ ရှာဖွေသည်၊ သို့မဟုတ် သင်၏ စကားလုံးများနှင့် လုပ်ရပ်များတွင်အပြင်၊ သမ္မာတရားကို မိတ်သဟာယဖွဲ့သည့်အခါတွင်လည်း ၎င်းတို့ကို အမြဲတစေ ပစ်မှတ်ထားသည်ဟု ဆိုကြပါစို့။ ဤသည်မှာ ပြုမူရန် နည်းလမ်းကောင်းတစ်ခု ဖြစ်သလော။ (မဟုတ်ပါ။) အဘယ်ကြောင့် မဟုတ်သနည်း။ (အဘယ်ကြောင့်ဆိုသော် ကျွန်ုပ်တို့သည် ၎င်းတို့ကို ဤနည်းဖြင့် ဆက်ဆံပါက၊ လူအများစုသည် မည်သည့်အရာဖြစ်နေသည်ကို သိမည်မဟုတ်သည့်အပြင်၊ အထင်အမြင်လွဲမှားမှုများပင် ဖြစ်ပေါ်လာနိုင်သောကြောင့် ဖြစ်ပါသည်။ ဤလူ၏ အနှစ်သာရကို အဖြစ်မှန်များမှတစ်ဆင့် ထုတ်ဖော်ပြီး ပွင့်ပွင့်လင်းလင်း ချပြရမည်ဖြစ်ပြီး၊ လူတို့သည် ထိုအရာနှင့်ပတ်သက်၍ ပိုင်းခြားသိမြင်မှု ရှိလာသည့်အခါမှသာ ၎င်းတို့ကို ဖော်ထုတ်ပြီး စိတ်ဖြာလေ့လာဆွေးနွေးရန် သို့မဟုတ် ပြုပြင်ရန် သင့်လျော်ပါသည်။ ထိုအခါ လူတိုင်း နားလည်ကြလိမ့်မည်။ အကယ်၍ ဤလူသည် သမ္မာတရားကို လိုက်စားသူတစ်ဦး မဟုတ်သော်လည်း၊ နှောင့်ယှက်မှုများ မဖြစ်စေသည့်အပြင် အစေခံမှုအချို့ကို ပေးနိုင်ဆဲဖြစ်ပါက၊ ကျွန်ုပ်တို့သည် ၎င်းတို့ကို အစေခံမှုပေးခွင့်ပြုသင့်ပါသည်။ အကယ်၍ ၎င်းတို့သည် သမ္မာတရားကို လိုက်စားသူတစ်ဦး မဟုတ်ကြောင်း ကျွန်ုပ်တို့ သိလျက်နှင့် ၎င်းတို့ကို အဆက်မပြတ် ပြုပြင်နေဆဲဖြစ်ပါက၊ ယင်းက ၎င်းတို့၏ တာဝန်ထမ်းဆောင်မှုကို ထိခိုက်စေပါလိမ့်မည်။) ထိုသို့ ပြုမူခြင်းသည် စည်းမျဉ်းမရှိပေ။ နတ်ဆိုးများမှ ဝင်စားသူများနှင့် တိရစ္ဆာန်များမှ ဝင်စားသူတို့ကို ဆက်ဆံသည့်အခါ၊ ရှည်ကြာသော အချိန်ကာလတစ်ခုအတွင်း ထိတွေ့ဆက်ဆံခြင်းနှင့် စောင့်ကြည့်လေ့လာခြင်းမှတစ်ဆင့် သင်သည် ၎င်းတို့၏ အနှစ်သာရကို ထွင်းဖောက်မြင်ပြီးဖြစ်လျှင်ပင်၊ သင်သည် ဉာဏ်ပညာအချို့ကို ကျင့်သုံးပြီး ၎င်းတို့ကို စည်းမျဉ်းများအတိုင်း ဆက်ဆံသင့်သည်။ ဉာဏ်ပညာကို ကျင့်သုံးခြင်းမှာ အဆင်ပြေသော်လည်း၊ သင်သည် စည်းမျဉ်းများကို ချိုးဖောက်၍မရပေ။ ထိုသို့သော လူတို့ကို စည်းမျဉ်းများအတိုင်း ဆက်ဆံရာတွင် ပါဝင်သော အသေးစိတ်အချက်များ များစွာရှိသည်။ ၎င်းတို့ထဲမှ တစ်ခုမှာ ၎င်းတို့က သမ္မာတရားကို အလွန်အမင်း မနှစ်မြို့သောသူများ၊ မိမိတို့၏အနှစ်သာရက နတ်ဆိုးများ၏ အနှစ်သာရဖြစ်သောသူများ ဖြစ်ကြောင်း သင် ရှင်းလင်းစွာ မြင်တွေ့လျှင်ပင်၊ သင်သည် ၎င်းတို့ကို ပြုပြင်ရန်အတွက် ၎င်းတို့နှင့်ပတ်သက်၍ အမြဲတစေ အပြစ်ရှာခြင်း သို့မဟုတ် ချစ်တီးခေါင်းသန်းရှာခြင်း၊ သို့မဟုတ် အခါအခွင့်သင့်တိုင်း ၎င်းတို့ကို ဖော်ထုတ်ခြင်း မပြုနိုင်ခြင်းပင် ဖြစ်သည်။ ၎င်းတို့သည် မည်သည့်အရာဖြစ်နေသည်ကို သိမည်မဟုတ်ပေ။ ၎င်းတို့သည် မည်သည့်အရာမျှ သိလိမ့်မည် မဟုတ်သည့်အပြင်၊ သင်က ၎င်းတို့ကို အဘယ်ကြောင့် ပြုပြင်ပြီး ပစ်မှတ်ထားနေသည်ကို သိမည်မဟုတ်ပေ။ ဤသို့ပြုလုပ်ခြင်းသည် ၎င်းတို့၏ တာဝန်ထမ်းဆောင်မှုကိုပင် ထိခိုက်စေလိမ့်မည်။ အခြားသူများ၏ အမြင်တွင်၊ သင် ပြုလုပ်သည့်အရာ သို့မဟုတ် ပြောဆိုသည့်အရာ၌ သင် မမှားယွင်းလျှင်ပင်၊ ဤနည်းဖြင့် ပြုမူခြင်းသည် မည်သည့်ရလဒ်မျှ မဖြစ်ထွန်းစေသည့်အပြင် မကောင်းသော အကျိုးဆက်များကိုပင် ဖြစ်ပေါ်စေပြီး၊ သမ္မာတရား စည်းမျဉ်းများနှင့် မကိုက်ညီပေ။ ထို့ကြောင့်၊ သင်သည် မည်သည့်လူအမျိုးအစားကို ကိုင်တွယ်ဖြေရှင်းနေသည်ဖြစ်စေ၊ ၎င်းတို့ကို စည်းမျဉ်းများအတိုင်းလည်းကောင်း၊ မျှတစွာဖြင့်လည်းကောင်း ဆက်ဆံရမည်။ သင် မည်သို့ခံစားရသည်ကို အခြေခံ၍ မပြုမူနှင့်။ ဉာဏ်ပညာအချို့ကို ကျင့်သုံးခြင်းက အဆင်ပြေသော်လည်း၊ သင်သည် ၎င်းတို့ကို စည်းမျဉ်းများအတိုင်း ဆက်ဆံရမည်။ တစ်ချက်အနေဖြင့်၊ ဤနည်းဖြင့် ပြုမူခြင်းသည် ညွှန်ကြားချက်ကို လိုက်နာပြီး စည်းမျဉ်းများကို လိုက်နာခြင်းဖြစ်ကာ၊ အဖျက်အမှောင့်လုပ်ခြင်းများ ဖြစ်စေနိုင်ခြေ နည်းပါးသည်။ နောက်တစ်ချက်အနေဖြင့်၊ ယင်းက သင်သည် ဘုရားသခင်ကို ကြောက်ရွံ့သော စိတ်နှလုံးရှိကြောင်း၊ မကောင်းမှုများ ကျူးလွန်လျက် သောင်းကျန်းနေခြင်း မရှိကြောင်းနှင့် သင်၏ ကိုယ်ပိုင်ရည်ရွယ်ချက်များအတိုင်း တမင်တကာ သို့မဟုတ် မဆင်မခြင် အမှုအရာများကို လုပ်ဆောင်နေခြင်း မရှိကြောင်းကိုလည်း သက်သေပြသည်။ သင်သည် လူအမျိုးအစားတိုင်းကို ဆက်ဆံရာတွင် စည်းမျဉ်းများ ရှိရမည်။ ၎င်းတို့သည် နတ်ဆိုးများ၊ တိရစ္ဆာန်များ၊ သို့မဟုတ် လူသားများဖြစ်သည်ဖြစ်စေ၊ သင်သည် ၎င်းတို့ကို စည်းမျဉ်းများအတိုင်း ဆက်ဆံရမည်။ သင်သည် ဤလူအမျိုးအစားများကို ပိုင်းခြားသိမြင်နိုင်ပြီး လူတို့ကို ဆက်ဆံခြင်းအတွက် စည်းမျဉ်းများကို သဘောပေါက်နိုင်ရမည်။ ဤကိစ္စနှင့်ပတ်သက်လာသည့်အခါ သင်သည် လွဲချော်သော နားလည်သဘောပေါက်မှု မရှိသင့်ပေ၊ မှန်သလော။ (မှန်ပါသည်။) အဖျက်အမှောင့်ဖြစ်စေသော မည်သည့်အရာကိုမျှ မလုပ်နှင့်။ အကယ်၍ သင်သည် အဖျက်အမှောင့်လုပ်ခြင်းများ သို့မဟုတ် နှောင့်ယှက်ခြင်းများကို ဖြစ်စေသည့် တစ်စုံတစ်ခုကို လုပ်ဆောင်ပါက၊ သင် အလွန်မိုက်မဲပေသည်။ ဤသည်မှာ လူသားတစ်ဦး လုပ်ဆောင်သင့်သည့်အရာ မဟုတ်ပေ။ နားလည်ပြီလော။ (နားလည်ပါပြီ။)

ယခင်က၊ ငါတို့သည် မတူညီသော အမျိုးအစားခွဲခြားမှုနှစ်ခုဖြစ်သည့် တိရစ္ဆာန်များမှ ဝင်စားသူများနှင့် နတ်ဆိုးများမှ ဝင်စားသူတို့၏ အနှစ်သာရများနှင့်ဆိုင်သည့် သရုပ်သကန်များအကြောင်းကို မိတ်သဟာယဖွဲ့ခဲ့ကြသည်။ ဤအရာက လူအမျိုးအစား အမျိုးမျိုးတို့တွင် လူသား အသွင်အပြင် ရှိကြသော်လည်း၊ ၎င်းတို့၏ အနှစ်သာရနှင့် ၎င်းတို့၏ အမျိုးအစားခွဲခြားမှုတို့ရှိ ကွာခြားချက်များအား သမ္မာတရားအပေါ် ၎င်းတို့ ထားရှိသည့် မတူညီသော သဘောထားများမှတစ်ဆင့် ပိုင်းခြားသိမြင်နိုင်ကြောင်းကို လူတို့အား မြင်တွေ့ရန် ကူညီပေးခဲ့သည်။ လူတစ်ဦး၏ အပြင်ပန်း အသွင်အပြင်က မည်သို့ပင်ဖြစ်စေ၊ တစ်စုံတစ်ဦးတွင် အချိုးကျသော ရုပ်သွင်ပြင်များရှိခြင်း၊ အတော်အတန် ယဉ်ကျေးသိမ်မွေ့ပြီး ကြင်နာတတ်ပုံရခြင်း၊ သို့မဟုတ် ပညာတတ်၊ အမူအကျင့်ကောင်းမွန်ပြီး၊ အဆင့်အတန်းနှင့် ကျက်သရေ ပိုင်ဆိုင်ပုံရကာ၊ ဂုဏ်သိက္ခာပင် ရှိပုံရပြီး၊ သာမန်လူတစ်ဦးမဟုတ်ဘဲ အတော်အတန် ကြီးမြတ်ပုံရကောင်းရနိုင်သည်ဖြစ်စေ၊ ဤအရာများထဲမှ တစ်ခုမျှသည် ၎င်းတို့၏ အနှစ်သာရကို သတ်မှတ်ခြင်းအတွက် အခြေခံအကြောင်းရင်း မဟုတ်ချေ။ ၎င်းတို့၏ ပုံပန်းများက မည်သို့ပင်ဖြစ်စေ၊ ၎င်းတို့သည် အရပ်ရှည်သည်ဖြစ်စေ၊ ပုသည်ဖြစ်စေ၊ ဝသည်ဖြစ်စေ၊ ပိန်သည်ဖြစ်စေ၊ ၎င်းတို့၏ အသားအရောင်က မည်သို့ဖြစ်စေ၊ သို့မဟုတ် ၎င်းတို့၏ ဘဝသည် ချမ်းသာသည်ဖြစ်စေ၊ ဆင်းရဲသည်ဖြစ်စေ၊ ဤအရာများထဲမှ တစ်ခုမျှသည် ၎င်းတို့၏ အနှစ်သာရ အမှန်တကယ် မည်သည့်အရာဖြစ်သည်ကို မဖော်ပြနိုင်ပေ။ လူတစ်ဦး၏ အနှစ်သာရကို သတ်မှတ်ခြင်းသည် လူ့ရိုးရာယဉ်ကျေးမှု၏ စံနှုန်းများ သို့မဟုတ် ကိုယ်ကျင့်တရားဆိုင်ရာ ဆိုရိုးစကားများကို အခြေခံ၍မရနိုင်သည့်အပြင်၊ သမိုင်းတစ်လျှောက် လူတို့ အနှစ်ချုပ်ထားသည့် ကျော်ကြားသူများ၏ ဆောင်ပုဒ်များ သို့မဟုတ် ကျော်ကြားသော ဆိုစကားများ၊ သို့မဟုတ် အာဏာရပါတီများ၏ အထင်အမြင်မှားစေသော ပြောဆိုချက်များကိုလည်း အခြေခံ၍မရနိုင်ပေ။ သို့ဆိုလျှင်၊ ယင်းကို အဘယ်အရာအပေါ် အခြေခံသင့်သနည်း။ လူတို့သည် လူအမျိုးအစား အမျိုးမျိုး၏ အနှစ်သာရကို အကဲဖြတ်ရန်နှင့် ဆုံးဖြတ်ရန်အတွက် ဘုရားသခင်၏ နှုတ်ကပတ်တော်များ၊ ဘုရားသခင် ဖော်ပြသည့် သမ္မာတရားနှင့် လူတို့အပေါ် ဘုရားသခင်၏ သတ်မှတ်ချက်များကို အခြေခံအဖြစ် အသုံးပြုရမည်။ လူတစ်ဦးကို ၎င်းတို့၏ အပြင်ပန်း အသွင်အပြင်၊ ၎င်းတို့၏ ဆုကျေးဇူးများ၊ သို့မဟုတ် ၎င်းတို့ သဘောပေါက်လာခဲ့သော အသိပညာကို အခြေခံ၍ လုံးဝ အကဲမဖြတ်ရသည့်အပြင်၊ လူတစ်ဦး၏ အဆင့်အတန်း သို့မဟုတ် လူ့အဖွဲ့အစည်းနှင့် လူတို့ကြားတွင် ၎င်းတို့ ပါဝင်ဆောင်ရွက်သည့် အခန်းကဏ္ဍကို အခြေခံ၍လည်း ဧကန်မုချ အကဲမဖြတ်ရပေ။ လူတို့ကို ထိုသို့အကဲဖြတ်သည့် နည်းလမ်းအားလုံးက မှားယွင်းသည်။ ဘုရားသခင်၏ နှုတ်ကပတ်တော်များကို အခြေခံ၍ လူတို့ကို အကဲဖြတ်ရမည်။ ဘုရားသခင်၏ နှုတ်ကပတ်တော်များသာလျှင် သမ္မာတရားဖြစ်သည်။ တစ်ချက်အနေဖြင့်၊ ယင်းသည် သမ္မာတရားအပေါ် အခြေခံရမည်၊ နောက်တစ်ချက်အားဖြင့်၊ ယင်းသည် သမ္မာတရားအပေါ် လူတစ်ဦး၏ သဘောထားနှင့် သမ္မာတရားကို ၎င်းတို့ သဘောပေါက်နိုင်ခြင်း ရှိမရှိဟူသည့်အပေါ် အခြေခံရမည်။ သမ္မာတရားကို အခြေခံ၍ လူတစ်ဦး၏ အနှစ်သာရကို ပိုင်းခြားသိမြင်ခြင်းနှင့် ၎င်းတို့၏ အမျိုးအစားခွဲခြားမှုကို ဆုံးဖြတ်ခြင်းသည် အတိကျဆုံးဖြစ်သည်။ သေချာပေါက် အမှားအယွင်း ရှိလိမ့်မည်မဟုတ်ပေ။

တိရစ္ဆာန်များမှ ဝင်စားသူများနှင့် နတ်ဆိုးများမှ ဝင်စားသူများဟူသည့် ထိုလူအမျိုးအစားနှစ်မျိုး၏ သရုပ်သကန်များကို မိတ်သဟာယဖွဲ့ပြီးနောက်၊ ဆက်လက်၍ ငါတို့သည် စစ်မှန်သော လူများမှ ဝင်စားသူတို့၏ သရုပ်သကန်များကို မိတ်သဟာယဖွဲ့သင့်သည်။ ယခု အရေးကြီးဆုံးသော အပိုင်းသို့ ငါတို့ ရောက်ရှိလာပြီဖြစ်သည်။ တိရစ္ဆာန်များမှ ဝင်စားသူတို့တွင် ဤအရာအတွက် ပြသရန် အချို့သော သရုပ်သကန်များနှင့် ထူးခြားသော လက္ခဏာရပ်များ ရှိသကဲ့သို့ပင်၊ နတ်ဆိုးများမှ ဝင်စားသူတို့တွင်လည်း ရှိကြသည်။ သို့ဆိုလျှင်၊ လူများမှ ဝင်စားသူတို့တွင်လည်း သက်ဆိုင်ရာ သရုပ်သကန်များနှင့် ထူးခြားသော လက္ခဏာရပ်များ ရှိသလော။ (ရှိပါသည်။) ဤသည်မှာ သေချာသည်။ ငါတို့သည် စစ်မှန်သော လူများ ပိုင်ဆိုင်သည့် လူ့သဘာဝ၏ အခြေခံ သရုပ်သကန်များနှင့် ထူးခြားသော လက္ခဏာရပ်များအချို့ကို ဖော်ပြပြီးဖြစ်သည်။ ယနေ့တွင်၊ ငါတို့သည် လူများမှ ဝင်စားသူတို့၏ တိကျသော သရုပ်သကန်များနှင့် ထူခြားသော လက္ခဏာရပ်များကို မိတ်သဟာယဖွဲ့ကြမည်။ ဤလူအမျိုးအစားနှင့်ဆိုင်သည့် အမျိုးအစားခွဲခြားမှုမှာ လူဖြစ်သည်ကို ထောက်ရှု၍၊ ငါတို့ တရားဝင် မိတ်သဟာယမဖွဲ့မီ၊ လူဖြစ်ခြင်း၏ အခြေခံ ထူးခြားသော လက္ခဏာရပ်များမှာ အဘယ်အရာဖြစ်သည်ကို ဦးစွာ စဉ်းစားကြစို့။ သို့မဟုတ်၊ နှစ်ပေါင်းများစွာ လူတို့နှင့် သင်၏ အပြန်အလှန်ဆက်ဆံခြင်းနှင့် ပေါင်းသင်းခြင်းမှတစ်ဆင့်၊ လူဖြစ်ခြင်းဟူသော အမျိုးအစားခွဲခြားမှုရှိသည့် ဤလူအမျိုးအစားတွင် သင်လေ့လာတွေ့ရှိပြီးဖြစ်သော ထူးခြားသည့် လက္ခဏာရပ်များမှာ အဘယ်နည်း။ ၎င်းတို့၏ သရုပ်သကန်များမှာ အဘယ်နည်း။ ပြောကြည့်လော့။ (လူဖြစ်ခြင်းဟူသော အမျိုးအစားခွဲခြားမှုရှိသည့် ဤလူအမျိုးအစားသည် အသိစိတ်နှင့် ဆင်ခြင်တုံတရားကို ပိုင်ဆိုင်ပါသည်။ ဥပမာအားဖြင့်၊ ၎င်းတို့သည် အမှားတစ်ခုခု လုပ်မိလျှင်၊ သို့မဟုတ် တစ်စုံတစ်ဦးအပေါ် အမှားလုပ်မိလျှင်၊ သို့မဟုတ် သမ္မာတရားကို ချိုးဖောက်သည့်အရာ တစ်စုံတစ်ခုကို လုပ်မိလျှင်၊ ၎င်းတို့သည် မိမိတို့၏ အသိစိတ်၌ အပြစ်တင်ခြင်းကို ခံစားရပါသည်။) (ဤလူအမျိုးအစားသည် အနည်းဆုံးအနေဖြင့် သမ္မာတရားကို သဘောပေါက်နိုင်သည်၊ အပြုသဘောဆောင်သော အရာများကို ချစ်မြတ်နိုးပြီး၊ အပျက်သဘောဆောင်သော အရာများကို စက်ဆုပ်ရွံရှာပါသည်။ ၎င်းတို့၏ အသိစိတ်နှင့် ဆင်ခြင်တုံတရားက ကောင်းမွန်ပါသည်။) သမ္မာတရားကို သဘောပေါက်နိုင်ခြင်းသည် အတော်အတန် မြင့်မားသော စံနှုန်းတစ်ခုဖြစ်သည်။ ၎င်းတို့ သမ္မာတရားကို မကြုံတွေ့မီတွင်၊ ဤလူအမျိုးအစားသည် လူ့သဘာဝ၏ မည်သည့် ထူးခြားသော လက္ခဏာရပ်များကို ပိုင်ဆိုင်သနည်း။ ၎င်းတို့၏ လုပ်ရပ်များ၊ စကားနှင့် ၎င်းတို့ ပြုမူကျင့်ကြံပုံအပြင် လောကနှင့် ဆက်ဆံပုံတို့နှင့်ဆိုင်သည့် ထူးခြားသော လက္ခဏာရပ်များမှာ အဘယ်နည်း။ ၎င်းတို့ ပြသသည့် ပုံမှန် လူ့သဘာဝ၏ သရုပ်သကန်များနှင့် ထုတ်ဖော်ချက်များမှာ အဘယ်နည်း။ ဆိုလိုသည်မှာ၊ ၎င်းတို့သည် လူတို့နှင့် အပြန်အလှန်ဆက်ဆံပြီး ပေါင်းသင်းသောအခါ၊ ၎င်းတို့သည် အပြုသဘောဆောင်သည့် ပုဂ္ဂိုလ်များဖြစ်ကြောင်း အခြားသူများကို မြင်နိုင်စေသည့် မည်သည့် သရုပ်သကန်များကို ၎င်းတို့ ပြသသနည်း။ (၎င်းတို့သည် အတော်အတန် ဆင်ခြင်တုံတရားရှိသည်၊ ကြင်နာတတ်သည်၊ အခြားသူများကို လှည့်ဖြားသည့် သို့မဟုတ် ထိခိုက်စေသည့် အရာများ မလုပ်ဆောင်သည့်အပြင်၊ အခြားသူများကို ထိခိုက်စေလိုသော ရည်ရွယ်ချက် မရှိပါ။) သင်တို့ စဉ်းစားနိုင်သည့်အရာများမှာ လူ့သဘာဝနှင့် အတော်အတန် ကိုက်ညီသော ဤအပြုသဘောဆောင်သည့် သရုပ်သကန်များဖြစ်ပြီး၊ ယင်းတို့သည် လူတို့၏ စိတ်ထဲတွင် လူကောင်းတစ်ဦး၏ သရုပ်သကန်များ ဖြစ်ကြသည်။ ကြင်နာတတ်ခြင်း၊ အခြားသူများကို မလှည့်ဖြားခြင်း သို့မဟုတ် မထိခိုက်စေခြင်း၊ မိမိတို့၏ စကားကို တည်ခြင်း၊ တာဝန်ယူစိတ်ရှိခြင်း၊ အခြားသူများနှင့် ကောင်းမွန်စွာ ပေါင်းသင်းနိုင်ခြင်း၊ အပြုသဘောဆောင်သော အရာများကို တမ်းတပြီး အပျက်သဘောဆောင်သော အရာများကို စက်ဆုပ်မုန်းတီးခြင်း၊ ဤအရာများအားလုံးသည် လူ့သဘာဝ၏ အပြုသဘောဆောင်သော သရုပ်သကန်အချို့ ဖြစ်ကြသည်။ နောက်ထပ်တစ်ခုတလေ ရှိသေးသလော။ (ဝိညာဉ်ရေးရာ သိနားလည်မှု ရှိခြင်းဖြစ်သည့် ဘုရားသခင်၏ နှုတ်ကပတ်တော်များကို နားလည်နိုင်ခြင်းလည်း ရှိပါသည်။) ဝိညာဉ်ရေးရာ သိနားလည်မှုရှိခြင်းသည် ငါတို့ လက်ရှိ ဆွေးနွေးနေသည့် လူ့သဘာဝနှင့် ဆက်စပ်မှုမရှိပေ။ ငါတို့သည် အဓိကအားဖြင့် အမှုအရာများကို ကိုင်တွယ်ရာတွင် လူ့သဘာဝရှိသူတို့၏ အမျိုးမျိုးသော ရှုထောင့်များအပြင်၊ လူတစ်ဦး၏ ပြုမူကျင့်ကြံခြင်းနှင့် အခြားသူများကို ဆက်ဆံခြင်း၏ အနှစ်သာရနှင့်ဆိုင်သည့် သရုပ်သကန်များ၊ ၎င်းတို့၏ ပြုမူကျင့်ကြံခြင်းနှင့် လုပ်ရပ်များနှင့် ပတ်သက်လာသည့်အခါ ၎င်းတို့၏ စည်းမျဉ်းများနှင့် အနိမ့်ဆုံး စံနှုန်းများ စသည်တို့ကို ပြောဆိုဆွေးနွေးနေကြခြင်း ဖြစ်သည်။ လူတို့ မြင်နိုင်ပြီး သင်ယူနိုင်သည့် လူ့သဘာဝ၏ အပြုသဘောဆောင်သော သရုပ်သကန်များသည် အရေအတွက်အားဖြင့် နည်းပါးသည်။ လူသားမျိုးနွယ်ထဲတွင် မည်သို့ ပြုမူကျင့်ကြံရမည်ကို နားလည်သူများသည် အမှန်တကယ် ရှားပါးပုံရသည်။ လူများစွာတို့က ၎င်းတို့သည် ပြုမူကျင့်ကြံရာတွင် ပျက်ကွက်ခဲ့ကြပြီးဖြစ်သည်ဟု ပြောဆိုကြသည်မှာ အံ့ဩစရာမရှိပေ။ ရုပ်ရှင်နှင့် တီဗီရှိုးများတွင် သရုပ်ဆောင်များက အပြုသဘောဆောင်သော ဇာတ်ကောင်များအား မည်သို့ သရုပ်ဖော်သည်ကို ကြည့်လော့။ ကိစ္စရပ်တစ်ခုတွင် ရှုထောင့်၊ သရုပ်သကန်၊ သို့မဟုတ် သဘောထားတစ်ခုခုကို ထုတ်ဖော်ခြင်းနှင့် ပတ်သက်လာသည့်အခါ၊ သရုပ်ဆောင်များသည် မည်သို့ သရုပ်ဆောင်ရမည် သို့မဟုတ် ဖော်ပြရမည်ကို မသိကြသည့်အပြင်၊ ဤနယ်ပယ်တွင် ၎င်းတို့၏ နားလည်မှုမှာ ဗလာနတ္ထိ ဖြစ်နေသည်။ အကယ်၍ သင်သည် ၎င်းတို့အား လူမိုက်၊ လူဆိုး၊ မာဖီးယားဂိုဏ်းခေါင်းဆောင်၊ ပြည့်တန်ဆာ၊ ကာမဂုဏ်လိုက်စားသော အမျိုးသမီး၊ သို့မဟုတ် ကျော်ကြားသော သို့မဟုတ် ကြီးမြတ်သော ပုဂ္ဂိုလ်တစ်ဦးအဖြစ် သရုပ်ဆောင်ခိုင်းပါက၊ ၎င်းတို့သည် ဤလူတို့၏ အမူအရာတိုင်း၊ စကားလုံးနှင့် လုပ်ရပ်တိုင်း၊ အကြည့်တစ်ချက်ကိုပင် လုံးဝ ကွက်ကွက်ကွင်းကွင်းဖြစ်မှုနှင့် တိကျမှုတို့ဖြင့် အလွန်ကောင်းမွန်စွာ သရုပ်ဆောင်နိုင်ကြသည်။ အချို့သော ကြည့်ရှုသူများသည် အပျက်သဘောဆောင်သော ဇာတ်ကောင်အဖြစ် ထိုသူတို့ သရုပ်ဆောင်သည်ကို မြင်ပြီးနောက်၊ ၎င်းတို့သည် ရှိုးထဲမှ လူဆိုး အမှန်တကယ်ဖြစ်သည်ဟုပင် မှားယွင်းစွာ ယုံကြည်ကြပြီး၊ ၎င်းတို့ကို တစ်ကြိမ်တစ်ခါမျှ မြင်ပါက ရိုက်ချင်ကြလိမ့်မည်။ အချို့က ၎င်းတို့အပေါ် တံတွေးပင် ထွေးကြလိမ့်မည်။ ၎င်းတို့၏ ဇာတ်ကောင်ကို ၎င်းတို့ မည်မျှ ကွက်ကွက်ကွင်းကွင်း သရုပ်ဖော်ခဲ့သည်ကို ကြည့်လော့၊ ၎င်းတို့သည် ထိုလူဆိုးကို အမှန်တကယ် အသက်ဝင်စေခဲ့ပေသည်။ လူကောင်းတစ်ဦးအဖြစ် သရုပ်ဆောင်ခြင်းနှင့် ပတ်သက်လာသည့်အခါတွင်ကော မည်သို့နည်း။ လူ့သဘာဝရှိသော လူတစ်ဦး မည်သို့ဖြစ်ရမည်ကို သိလျက်၊ လူတို့သည် ၎င်းတို့၏ သရုပ်ဆောင်မှုမှနေ၍ စေ့ဆော်မှုအချို့ ရနိုင်ကြသလော။ ထိုသို့သော သရုပ်ဆောင်များ အမှန်တကယ် မရှိပေ။ လူ့သဘာဝရှိသော လူတစ်ဦး မည်သို့ဖြစ်ရမည်နှင့် ပတ်သက်လာသည့်အခါ လူသားမျိုးနွယ်က ဘာမျှသိပုံမရကြပေ။ ဇာတ်ညွှန်းရေးဆရာများနှင့် ဒါရိုက်တာများသာ ဘာမျှသိပုံမရသည်သာမက၊ ပရိသတ်များလည်း ဘာမျှသိပုံမရဖြစ်နေသည်၊ လူ့သဘာဝရှိခြင်းဟူသည် အဘယ်အရာ ဆိုလိုသည်ကို မည်သူမျှ နားမလည်ပေ။ သို့ဖြစ်၍၊ ရုပ်ရှင်နှင့် တီဗီရှိုးများတွင် ယင်းကို လုံးဝ အနှစ်သာရမရှိဘဲ သရုပ်ဖော်ထားသည်။ ဥပမာအားဖြင့်၊ သရုပ်ဆောင်တစ်ဦးက မသေမီ မျက်စိမှိတ်လျက် ကွန်မြူနစ်ပါတီဝင်တစ်ဦးအဖြစ် သရုပ်ဆောင်သည့်အခါ၊ ကြည့်ရှုသူများက၊ “သူ လုံးဝ မသေသေးပါ၊ သူ ပါတီကြေး မပေးရသေးပါ”ဟု ပြောကြသည်။ အမှန်ပင်၊ တစ်စက္ကန့်မပြည့်မီမှာပင်၊ သူသည် မျက်စိဖွင့်လိုက်ပြီး၊ တုန်တုန်ယင်ယင်ဖြင့် သူ၏ အိတ်ကပ်ထဲမှ ဒင်္ဂါးအနည်းငယ်ကို ထုတ်ယူကာ၊ “ဤသည်တို့မှာ ကျွန်ုပ်၏ ပါတီကြေးများဖြစ်သည်။ ကျွန်ုပ် ပါတီကို အကြွေးတင်၍မရပါ။ ပါတီ စိတ်ချပါစေ။ ကျွန်ုပ် အခြားတစ်ဘက်ကို ရောက်သွားသည့်အခါ၊ ကျွန်ုပ် ပါတီကို မဆုတ်မနစ် သေသည်အထိ သစ္စာစောင့်သိလိမ့်ဦးမည်ဖြစ်သည်” ဟု ပြောဆိုသည်။ ထိုအခါမှသာ သူ သေဆုံးသွားသည်။ ဤသည်မှာ ရုပ်ရှင်နှင့် တီဗီရှိုးများတွင် လူ့သဘာဝရှိသော လူတစ်ဦးကို သရုပ်ဖော်ပုံ ဖြစ်သည်။ ပရိသတ်များ၏ အမြင်တွင်၊ ယင်းမှာ အမှန်တကယ် လုံးဝ အနှစ်သာရမရှိပေ။ ထိုသို့သော လူများသည် လက်တွေ့ဘဝတွင် မတည်ရှိသည့်အပြင်၊ လူတို့အတွက် ဤအရာကို စွမ်းဆောင်ရန် အလွန်ခက်ခဲသည်။ ထို့ကြောင့်၊ လူသားမျိုးနွယ်သည် စစ်မှန်သော လူ့သဘာဝက အဘယ်အရာဖြစ်သည်ကို လုံးဝ နားမလည်သည့်အပြင်၊ ၎င်းတို့အတွက် ယင်း၏ စံနှုန်းကို သတ်မှတ်ရန် အလွန်ခက်ခဲသည်။ စံနှုန်းကို အလွန်မြင့်မားစွာ သတ်မှတ်ထားပြီး လုံးဝ အနှစ်သာရမရှိခြင်းဖြစ်စေ၊ လူတို့သည် မည်သည့်အရာမျှ မသိသည့်အပြင် ယင်းကို ကြုံသလို သတ်မှတ်ခြင်းဖြစ်စေ တစ်ခုမဟုတ်တစ်ခု ဖြစ်သည်။ အမှန်တကယ်တွင်၊ စစ်မှန်သော လူတစ်ဦး ပိုင်ဆိုင်သည့် လူ့သဘာဝသည် အလွန်ရိုးရှင်းသည်။ မည်သို့ ရိုးရှင်းသနည်း။ ယင်းသည် သင်၏ လက်လှမ်းမီရာတွင် ရှိသောအရာ၊ သင် ရယူနိုင်သောအရာ တစ်စုံတစ်ခု ဖြစ်သည်။ သင်၏ လက်လှမ်းမီရာတွင် ရှိသည်ဟု ဆိုရာ၌ မည်သည့်အရာကို ဆိုလိုသနည်း။ ယင်းမှာ အလွန် လက်တွေ့ကျသည်၊ အလွန် စစ်မှန်သည်၊ အလွန် ဓမ္မဓိဋ္ဌာန်ကျပြီး၊ လုံးဝ အနှစ်သာရမဲ့ခြင်း မရှိဟု ဆိုလိုသည်။ ယင်းသည် အလွန် ဓမ္မဓိဋ္ဌာန်ကျပြီး လက်တွေ့ကျသောကြောင့်၊ လူတို့သည် ဤသရုပ်သကန်များက လူသားမျိုးနွယ် ပြသသင့်သည့်အရာဖြစ်သည်ဟု ခံစားရန်မဆိုထားနှင့်၊ ယင်းကို အလွန် သာမန်ဖြစ်ပြီး လုံးဝ ဖော်ပြရန်မထိုက်တန်ဟုပင် ခံစားကြရလေသည်။ ဤလူသားမျိုးနွယ်သည် ခမ်းနားသော၊ မြင့်မြတ်သော၊ အထင်ကြီးစရာကောင်းသော အရာများကို အားပေးထောက်ခံသည်။ လူများစွာတို့သည် စစ်မှန်သော လူ့သဘာဝ၏ သရုပ်သကန်များကို မပိုင်ဆိုင်သည်သာမက၊ ပုံမှန် လူ့သဘာဝ၏ သရုပ်သကန်များက အလွန် လက်တွေ့ကျပြီး၊ အလွန် သာမန်ဖြစ်ကာ၊ အလွန် သာမညောင်ညဖြစ်သောကြောင့် ယင်းတို့ကို စက်ဆုပ်ရွံရှာကြပြီး၊ ထိုအစား ၎င်းတို့သည် အသိပညာကို လိုက်စားပြီး ကြည်ညိုကြသည်။ ဤနည်းအားဖြင့်၊ စစ်မှန်သော လူတစ်ဦး၏ သရုပ်သကန်များကို စက်ဆုပ်ရွံရှာပြီး အထင်သေးသည့် ဆိုးယုတ်သော ခေတ်ရေစီးကြောင်းတစ်ခုသည် လူ့အဖွဲ့အစည်းတစ်ခုလုံးအနှံ့ ဖြစ်ပေါ်လာပြီးဖြစ်သည်။ အမှန်တကယ် လူ့သဘာဝရှိသော လူတစ်ဦးပင်လျှင် ဤနည်းဖြင့် ပြုမူကျင့်ကြံခြင်းသည် စစ်မှန်သော လူတစ်ဦးဖြစ်ခြင်း သို့မဟုတ် လူ့သဘာဝရှိသော လူတစ်ဦးဖြစ်ခြင်းဟု မခံစားရပေ။ ဆန့်ကျင်ဘက်အနေဖြင့်၊ ၎င်းတို့သည် လူ့အဖွဲ့အစည်း၏ ဆိုးယုတ်သော ခေတ်ရေစီးကြောင်းများမှ ထောက်ခံအားပေးသည့် မွန်မြတ်ပြီး ထူးခြားသော လူများဟုခေါ်သူများ ဖြစ်လာရန် ကြိုးစားကြသည်။ ဤအရာက လူ့သဘာဝရှိသော အချို့လူများ ပိုင်ဆိုင်သည့် လူ့သဘာဝ အနှစ်သာရကို ငြင်းပယ်ပြီး ဖုံးဖိခြင်း ဖြစ်သည်။ ဤနေရာတွင် “ဖုံးဖိသည်” ဟူသည်မှာ မည်သည့်အရာကို ဆိုလိုသနည်း။ မည်သူမျှ သင့်ကို လူ့သဘာဝရှိသော လူတစ်ဦးအဖြစ် မမှတ်ယူဟု ဆိုလိုသည်။ သင် မည်သည့်အရာကိုပင် လုပ်ဆောင်သည်ဖြစ်စေ၊ အခြားသူများက သင့်ကို ဖယ်ကျဉ်ပြီး အထင်သေးကြသည်၊ လူတို့ကြားတွင် သင်၏ ပါရမီများကို အသုံးပြုရန် နေရာမရှိ၊ သင် စကားပြောရန် နေရာမရှိ၊ သင်၏ အားသာချက်များကို အသုံးချရန် အခွင့်အရေးမရှိဟု ဆိုလိုသည်။ “ငြင်းပယ်သည်” ဟူသည်မှာ သင်၏ ပုံမှန် လူ့သဘာဝက ဖောက်ပြန်ပျက်စီးသော လူသားမျိုးနွယ်ကြားတွင် တကယ်ကို ဖော်ပြရန်မထိုက်တန်ဟု ဆိုလိုသည်။ လူ့သဘာဝရှိခြင်းသည် ၎င်းတို့ အားပေးထောက်ခံသည့်အရာ မဟုတ်ပေ။ ၎င်းတို့သည် အဘယ်အရာကို အားပေးထောက်ခံကြသနည်း။ လူအုပ်နောက်လိုက်ခြင်း၊ လည်လည်ပတ်ပတ်လုပ်နိုင်သူတစ်ဦး ဖြစ်ခြင်း၊ မြှောက်ပင့်ပြောဆိုခြင်းနှင့် မျက်နှာလိုမျက်နှာရလုပ်ခြင်း၊ လိမ်လည်ခြင်းနှင့် လှည့်ဖြားခြင်း၊ မည်မျှပင် အချင့်မရဲဖြစ်ရလောက်အောင် ချိုသာသည်ဖြစ်စေ သို့မဟုတ် ၎င်းတို့၏ စစ်မှန်သော ခံစားချက်များနှင့် ဆန့်ကျင်သည်ဖြစ်စေ မည်သည့်အရာကိုမဆို ပြောဆိုနိုင်ခြင်းတို့ကို ၎င်းတို့ အားပေးထောက်ခံသည်။ ဤလူ့အဖွဲ့အစည်းတွင် အမှန်တရားကို ပြောဆိုခြင်းသည် သင့်ကို မည်သည့်နေရာသို့မျှ ရောက်စေမည်မဟုတ်ပေ။ သင်၏ လူ့သဘာဝက မည်မျှပင် ကောင်းမွန်သည်ဖြစ်စေ၊ ဤလူ့အဖွဲ့အစည်းသည် ယင်းကို အားပေးထောက်ခံခြင်း မရှိသည့်အပြင်၊ ငြင်းပယ်လိမ့်မည်။ အကယ်၍ သင်သည် အပြုသဘောဆောင်သော၊ တရားသော၊ သို့မဟုတ် မျှတသောအရာအချို့၊ သို့မဟုတ် အသိစိတ်နှင့်ဆိုင်သော စကားအချို့ကို ပြောဆိုပါက၊ သင်၏ သင့်လျော်သော နေရာကို ယူလျက်ဆင်ခြင်တုံတရားရှိသော အရာအချို့ကို ပြောဆိုပါက၊ ၎င်းတို့သည် သင့်ကို ဖယ်ကျဉ်ကြလိမ့်မည်၊ သင့်ကို ငြင်းပယ်ကြလိမ့်မည်ဖြစ်ပြီး သင့်ကို သေးသိမ်စေကြလိမ့်မည်ဖြစ်သည်။ သင့်ကို လှောင်ပြောင်မည့်သူ၊ သရော်မည့်သူ၊ အရှက်ရစေပြီးနောက် သင့်ကို တိုက်ခိုက်ပြီး ဝိုင်းပယ်ရန် ဆိုးယုတ်သော အင်အားစုများနှင့် အာဏာများအားလုံးကို စုစည်းပြီး နောက်ဆုံးတွင် သင့်ကို မျက်နှာပြရန် အလွန်ရှက်ရွံ့စေကာ၊ သင်ကိုယ်တိုင်ကို ငြင်းပယ်စေမည့်သူအချို့ပင် ရှိသည်။ သင်က၊ “ကျွန်ုပ် မကောင်းပါ၊ ကျွန်ုပ်သည် လူ့အဖွဲ့အစည်း၏ ခေတ်ရေစီးကြောင်းများနှင့်လည်းကောင်း၊ ဤလူတို့နှင့်လည်းကောင်း လိုက်လျောညီထွေ မဖြစ်နိုင်ပါ။ ကျွန်ုပ်သည် လှည့်ကွက်များအား မည်သို့ ဆောင်ရွက်ရမည်ကို မသိပါ၊ ကျွန်ုပ်သည် အကြံအစည်များ သို့မဟုတ် လှည့်ကွက်များကို မကြံဖန်နိုင်ပါ။ ထို့ကြောင့် ဤလူတို့ကြားတွင် ကျွန်ုပ် ရှင်သန်ရန် အလွန်ခက်ခဲပါသည်”ဟု တွေးတောလျက် အဆုံးသတ်သွားလိမ့်မည်။ သင်သည် ဤလူတို့နှင့် ပေါင်းစပ်နိုင်ခြင်းမရှိဟု ခံစားရလျက်၊ အလွန် နိမ့်ကျသည်ဟု ခံစားလာရသည်။ အမှန်တကယ်တွင်၊ သင်သည် ၎င်းတို့၏ လောကီ ဆက်ဆံမှုများအတွက် အတွေးအခေါ်များ၊ အမှုအရာများကို ကိုင်တွယ်သည့် ၎င်းတို့၏ နည်းလမ်းများနှင့် နည်းစနစ်များ၊ ၎င်းတို့၏ ရှင်သန်မှုနည်းလမ်းတို့ကို လက်သင့်ခံ၍မရနိုင်ပေ။ ဤဆိုးယုတ်သော ခေတ်ရေစီးကြောင်းနှင့် ဤဆိုးယုတ်သော လူတို့၏ ငြင်းပယ်ခြင်းကို ခံရပြီးနောက်၊ သင်သည် သင်၏ ကိုယ်ပိုင် လူ့သဘာဝကို ငြင်းပယ်ပြီးနောက် ယင်းတို့နှင့် လိုက်လျောညီထွေဖြစ်ရန်၊ ယင်းတို့ကို လိုက်လျှောက်ရန်၊ လူ့အဖွဲ့အစည်းထဲတွင် ပူးပေါင်းရန်၊ ဤဆိုးယုတ်သော လူတို့နှင့် ပေါင်းစည်းရန်၊ ဤဆိုးယုတ်သော လမ်းကြောင်းထဲသို့ ပေါင်းစည်းရန် ဖြစ်နိုင်သမျှ နည်းလမ်းတိုင်းကို ကြိုးစားသည်။ သင်သည် အခြားသူများက လှည့်ကွက်များ၊ ပရိယာယ်များနှင့် အကြံအစည်များအား မည်သို့ အသုံးပြုသည်ကို အတုခိုးရန် ကြိုးစားပြီး၊ မြှောက်ပင့်ပြောဆိုသော စကားများ၊ မချင့်မရဲဖြစ်ရလောက်အောင် ချိုသာသော စကားများ၊ ၎င်းတို့၏ စစ်မှန်သော ခံစားချက်များနှင့် ဆန့်ကျင်သော စကားများအား အခြားသူများက မည်သို့ ပြောဆိုသည်ကိုလည်း အတုခိုးရန် ကြိုးစားသည်။ သို့သော် သင်သည် ဤအရာများကို မည်သို့ပင် အတုခိုးရန် ကြိုးစားသည်ဖြစ်စေ၊ သင် မည်မျှပင် အားထုတ်သည်ဖြစ်စေ၊ အားလုံးခြုံကြည့်လျှင်၊ ဤအရာများသည် သင် ပြောဆိုလိုသော စကားများ မဟုတ်၊ သို့မဟုတ် သင် လုပ်ဆောင်လိုသော အရာများ မဟုတ်ဟု သင် ခံစားရသည်။ သင် ပြောဆိုသည့် စကားလုံးတိုင်းသည် သင်၏ စစ်မှန်သော ခံစားချက်များနှင့် အလွန် ဆန့်ကျင်နေပြီး၊ သင် လုပ်ဆောင်သည့် အရာတိုင်းသည် သင်၏ အသိစိတ်၌ အပြစ်တင်ခြင်းကို ခံစားရစေသည်၊ ဤသည်မှာ သင် ပြောဆိုသင့်သည့်အရာ သို့မဟုတ် လုပ်ဆောင်သင့်သည့်အရာ မဟုတ်ဟု သင် ခံစားရသည်။ သင်သည် မျက်နှာဖုံးတစ်ခု တပ်ဆင်လျက်၊ နေ့စဉ် ဤသို့ အသက်ရှင်နေရသည်။ အပြုအမူ၊ စကား၊ သို့မဟုတ် အချို့သော အတွေးများနှင့် ရှုထောင့်များအရ သင်သည် ဤဆိုးယုတ်သော ခေတ်ရေစီးကြောင်းနှင့် ပေါင်းစည်းပြီး ဤဖောက်ပြန်ပျက်စီးသော လူသားမျိုးနွယ်နှင့် ပေါင်းစည်းခဲ့သည်ဟု ထင်ရသော်လည်း၊ စိတ်ထဲတွင်မူ၊ သင်သည် နာကျင်ရသည်၊ ဖိနှိပ်ခံရပြီး မကျေမချမ်းဖြစ်နေပေသည်။ ထိုသို့သော ဘဝအတွေ့အကြုံတစ်ခု ရှိပြီးနောက်၊ သင်သည် မျှတပြီး တရားသော ဆက်ဆံမှုကို တမ်းတလာသည်၊ အပြုသဘောဆောင်သော အရာများကို တမ်းတပြီး၊ အလင်းကို တောင့်တလာလေသည်။ သို့ဆိုလျှင်၊ ထိုသို့သော လူတစ်ဦးသည် အခြားလူများနှင့် ဆိုးယုတ်သော ခေတ်ရေစီးကြောင်းများအလယ်တွင် ၎င်းတို့အား ထိုသို့သော ခံစားချက်များနှင့် ထိုသို့သော အတွေ့အကြုံများ ရရှိခွင့်ပေးသည့် လူ့သဘာဝ၏ မည်သည့် ထူးခြားသော လက္ခဏာရပ်များကို ပိုင်ဆိုင်သနည်း။ အမှန်တကယ်တွင်၊ ယင်းမှာ အလွန်ရိုးရှင်းသည်။ လူတစ်ဦးသည် အသိစိတ်နှင့် ဆင်ခြင်တုံတရား၏ လူ့သဘာဝ အနှစ်သာရကို ပိုင်ဆိုင်သောအခါ၊ ၎င်းတို့သည် လူတို့ကြားတွင် နေထိုင်သည့်အခါ ထိုသို့သော အတွေ့အကြုံများ ရှိကြလိမ့်မည်ဖြစ်သည်။

အသိစိတ်နှင့် ဆင်ခြင်တုံတရားတို့သည် လူ့သဘာဝရှိသူများ ပိုင်ဆိုင်သင့်သည့် အခြေခံအကျဆုံးသော အရာနှစ်ခုဖြစ်သည်။ ဤအရာနှစ်ခုကို အကြိမ်ကြိမ် ဆွေးနွေးခဲ့ပြီးဖြစ်သော်လည်း ယင်းတို့သည် လူတို့အတွက် အလွန့်အလွန် အရေးကြီးပြီး လူတစ်ဦး၏ အုပ်စုအမျိုးအစားက လူသား ဟုတ်မဟုတ်ဟူသည်ကို အကဲဖြတ်ခြင်းအတွက်လည်း အရေးကြီးဆုံးသော စံသတ်မှတ်ချက်များ ဖြစ်သည်။ အသိစိတ်ဟူသည်မှာ အတိအကျအားဖြင့် အဘယ်အရာကို ရည်ညွှန်းသနည်း။ အသိစိတ်သည် လူတစ်ဦး၏ စိတ်နှလုံးထဲတွင် ဖြစ်ပေါ်လာသော စွမ်းရည်တစ်ခုဖြစ်ပြီး ယင်းက လူတို့အပေါ် အချို့သော တောင်းဆိုချက်များကို ပြုလုပ်ကာ အဓိကအားဖြင့် ပြုမူကျင့်ကြံခြင်း၏ စည်းမျဉ်းများနှင့် ပြုမူကျင့်ကြံခြင်း၏ အနိမ့်ဆုံးစံနှုန်းများတွင် ပေါ်လွင်ထင်ရှားသည်ကို ယခင်က ငါ ပြောဆိုပြီးဖြစ်သည်။ အတိအကျဆိုရလျှင် ပြုမူကျင့်ကြံခြင်းအတွက် လူတစ်ဦး၏ ယုံကြည်ချက်၊ ပြုမူကျင့်ကြံခြင်းနှင့် လောကကို ဆက်ဆံခြင်းအတွက် သူ၏ စည်းမျဉ်းများနှင့် သူ၏ လူ့သဘာဝနှင့်ဆိုင်သော ထုတ်ဖော်ပြသချက်များက သူ့တွင် အသိစိတ် ရှိမရှိဟူသည်ကို သက်သေပြနိုင်သည်။ အသိစိတ်က အတိအကျ ရည်ညွှန်းသည့်အရာကို ယခု ငါမေးသောအခါ သင်တို့ မဖြေနိုင်ခဲ့ကြပေ။ သင်တို့သည် နက်နဲသော သမ္မာတရားများဖြစ်သည်ဟု သင်တို့ ယူဆသော အရာကိုသာ အာရုံစိုက်ကြသော်လည်း ဤသို့သော သမ္မာတရားများနှင့်ပတ်သက်၍မူ အလွန်သေးငယ်လွန်းသည်၊ အလွန်သာမန်ဖြစ်လွန်းပြီး ဖော်ပြရန်မထိုက်တန်လောက်အောင် အလွန်အရေးမပါဟု ခံစားရသောကြောင့် သင်တို့သည် ယင်းတို့ကို အရေးမစိုက်ခြင်းသာဖြစ်ပြီး အလေးအနက် မထားကြပေ။ အကယ်၍ လူတစ်ဦးတွင် အသိစိတ်ရှိပါက ၎င်း၏ လူ့သဘာဝက ထူခြားသော လက္ခဏာရပ်နှစ်ခုကို ပိုင်ဆိုင်သည်ဟု အဓိပ္ပာယ်ရသည်။ တစ်ခုမှာ တည်ကြည်ဖြောင့်မတ်ခြင်းဖြစ်ပြီး နောက်တစ်ခုမှာ ကြင်နာခြင်း ဖြစ်သည်။ လူတစ်ဦးက ကြင်နာခြင်း ရှိမရှိဟူသည်ကို အပြင်ပန်း သွင်ပြင်မှနေ၍ သင် မပြောကောင်းမပြောနိုင်သော်လည်း အကယ်၍ လူတစ်ဦးသည် ကြင်နာစိတ်ရှိပါက ၎င်းနှင့် ပေါင်းသင်းဆက်ဆံသည်နှင့်တစ်ပြိုင်နက် သင်သိလိမ့်မည်။ လူတစ်ဦးက တည်ကြည်ဖြောင့်မတ်ခြင်းရှိမရှိဟူသည်ကို အကဲဖြတ်ခြင်းအတွက် အခြေခံမှာ အဘယ်အရာဖြစ်သနည်း။ ယင်းမှာ ပြုမူကျင့်ကြံခြင်းနှင့် လောကကို ဆက်ဆံခြင်းအတွက် ၎င်း၏ စည်းမျဉ်းများပင် ဖြစ်သည်။ အကယ်၍ ၎င်းသည် ပြုမူကျင့်ကြံခြင်းနှင့် လောကကို ဆက်ဆံပုံတွင် ကောက်ကျစ်စဉ်းလဲရလျှင်၊ ဉာဏ်များလျှင်၊ ယုတ်မာလျှင်၊ လောကီဆန်ဆန် မြော်မြင်တတ်ပြီး၊ ကျိတ်ကြံစည်တတ်ကာ နားလည်၍မရနိုင်သောသူဖြစ်ပါက၊ ဤလူသည် ဧကန်မုချ တည်ကြည်ဖြောင့်မတ်သူမဟုတ်ပေ။ အကယ်၍ ၎င်း၏ ပြုမူကျင့်ကြံခြင်းနှင့် လောကကို ဆက်ဆံပုံသည် အလွန်ရိုးရှင်းလျှင်၊ အလွန်တိုက်ရိုက်ကျလျှင်၊ အလွန်တဲ့တိုးကျလျှင်၊ အကယ်၍ ၎င်းသည် အခြားသူများကို အလွန်ရိုးရှင်းစွာ ပြောဆိုပြီး၊ လူတို့နှင့် ဆက်ဆံရာတွင် ကလိမ်ကကျစ်ကျခြင်း သို့မဟုတ် လှည့်ဖြားတတ်ခြင်းတို့ကို မလုပ်ဆောင်လျှင်၊ အနက်ကို အနက်၊ အဖြူကို အဖြူဟု ခေါ်ဆိုပြီး ထိုသို့သောအရာများကို အလွန်ရှင်းလင်းစွာ ခွဲခြားလျက်၊ မုသားမရှိဘဲ ပြောဆိုလုပ်ဆောင်လျှင်၊ အပြုသဘောဆောင်သော အရာများကို လိုက်နာစောင့်ထိန်းနိုင်ပြီး ဆိုးယုတ်သော အင်အားစုများနှင့် အပေးအယူမလုပ်လျှင်၊ ထိုလူသည် အလွန်ပင် တည်ကြည်ဖြောင့်မတ်ပေသည်။ အကယ်၍ လူတစ်ဦးသည် တည်ကြည်ဖြောင့်မတ်ခြင်းနှင့် ကြင်နာခြင်း နှစ်မျိုးလုံးရှိပါက ထိုလူတွင် အသိစိတ်ရှိပြီး ၎င်းသည် လူ့သဘာဝ၏ အနိမ့်ဆုံးသော ထူးခြားသည့် လက္ခဏာရပ်များကို ပိုင်ဆိုင်သည်။ လူ့သဘာဝ၏ နောက်ထပ် ထူးခြားသော လက္ခဏာရပ်တစ်ခုမှာ ဆင်ခြင်တုံတရား ဖြစ်သည်။ ဆင်ခြင်တုံတရားသည်လည်း ငါတို့ မကြာခဏ ဆွေးနွေးလေ့ရှိသော ဝေါဟာရတစ်ခုနှင့် အကြောင်းအရာတစ်ခု ဖြစ်သော်လည်း ဆင်ခြင်တုံတရားဟူသည် အဘယ်အရာဖြစ်သည်ကို မည်သူမျှ ရှင်းလင်းတိကျစွာ အဓိပ္ပာယ်ဖွင့်ဆိုခြင်း မရှိဖူးပေ။ ဆင်ခြင်တုံတရားထဲတွင် အဘယ်အရာများ ပါဝင်ပြီး မည်သည့် သရုပ်သကန်မျိုးများသည် ဆင်ခြင်တုံတရားရှိခြင်း၏ သရုပ်သကန်များ ဖြစ်သနည်း။ ဤအရာကို သင်တို့ ရှင်းလင်းစွာ သိကြသလော။ လူအများစုက သိပ်မရှင်းလင်းကြပေ။ ဤနယ်ပယ်တွင် ၎င်းတို့၏ နားလည်မှုသည် အတော်အတန် မရေမရာဖြစ်နေဆဲဖြစ်သည်။ သို့ဆိုလျှင် ဆင်ခြင်တုံတရားရှိခြင်းဟူသည်မှာ အဘယ်အရာကို ဆိုလိုသနည်း။ ယင်းမှာ မှန်ကန်သော ရပ်တည်ချက်ကို ယူလျက် ပြောသင့်သည်ကို ပြောနိုင်ခြင်းနှင့် လုပ်သင့်သည်ကို လုပ်နိုင်ခြင်းအား ဆိုလိုသည်။ ဤသည်မှာ ဆင်ခြင်တုံတရားရှိခြင်း ဖြစ်သည်။ အကယ်၍ သင်သည် လူ့သဘာဝရှိသော လူတစ်ဦးဖြစ်ပါက သင်၏ စကားနှင့် လုပ်ရပ်များက စဉ်းစားချင့်ချိန်ခြင်းရှိလိမ့်မည်။ လက်ရှိပတ်ဝန်းကျင်အတွင်းတွင်လည်းကောင်း၊ သင်၏ ပင်ကိုလက္ခဏာနှင့် အဆင့်အတန်းကို အခြေခံ၍လည်းကောင်း၊ သင်သည် မည်သည့်စကားများကို ပြောသင့်သည်၊ မည်သည့်အရာများကို လုပ်သင့်သည်၊ ဤစကားများကို ပြောရာတွင် သင်၏ ရပ်တည်ချက်က မည်သို့ဖြစ်သင့်သည်ဟူသည်နှင့် ကိစ္စရပ်တစ်ခုခုကို ဖော်ပြရန် မည်သည့် စကားပြောဆိုပုံမျိုးကို သင်အသုံးပြုသင့်သည်ဟူသည်တို့ကို သင်သိလိမ့်မည်။ ဤအရာများအတွက် သင်၏ စိတ်နှလုံးထဲတွင် စံနှုန်းများနှင့် ချင့်ချိန်နိုင်ခြင်း ရှိလိမ့်မည်။ ဆိုလိုသည်မှာ သင်၏ စကားနှင့် လုပ်ရပ်များက မှန်ကန်ကာ လူတို့ကို တည်ဆောက်ပေးနိုင်စွမ်းရှိလျက် အပြင်ပန်းအားဖြင့် ယင်းတို့သည် ဆင်ခြင်တုံတရားရှိပြီး စဉ်းစားချင့်ချိန်ခြင်းရှိသည်ဟု အခြားသူတို့ မြင်ရန်အလို့ငှာ သင်၏ ဆင်ခြင်တုံတရားသည် သင်၏ စကားလုံးများနှင့် အပြုအမူကို သင့်လျော်စေလျက် ထိန်းညှိပေးနိုင်လိမ့်မည်ဖြစ်သည်။ သင်၏ အစွမ်းအစ၊ သင်၏ ပညာရေးအဆင့်အတန်း သို့မဟုတ် သင်၏ အသက်အရွယ်အရ သင်ပြောသော စကားများနှင့် သင်လုပ်သော အမှုအရာများသည် လုံးဝသင့်လျော်သည်ဖြစ်စေ မသင့်လျော်သည်ဖြစ်စေ၊ အနည်းဆုံးအနေဖြင့် သင်၏ စိတ်နှလုံးထဲတွင် သင့်အား ဆင်ခြင်တုံတရားရှိသော အခြေအနေဖြင့် စကားပြောကာ ပြုမူဆောင်ရွက်ခွင့်ပေးလျက် သင့်ကို ထိန်းကျောင်းပေးသော စံတစ်ခုဖြစ်သည့် စည်းဘောင်များရှိလိမ့်မည်ဖြစ်သည်။ ဤသည်မှာ ဆင်ခြင်တုံတရားရှိခြင်းဟု ဆိုလိုသည့်အရာ ဖြစ်သည်။ ဆင်ခြင်တုံတရားရှိသော လူတစ်ဦးသည် ချမ်းသာသောသူတစ်ဦးကို ဖြစ်စေ ဆင်းရဲသောသူတစ်ဦးကိုဖြစ်စေ သို့မဟုတ် အဆင့်အတန်းရှိသောသူတစ်ဦးကို ဖြစ်စေ၊ အဆင့်အတန်းမရှိသောသူတစ်ဦးကို ဖြစ်စေ မည်သူ့ကိုမဆို ရင်ဆိုင်ရသည်ဖြစ်စေ၊ မည်သည့်အခြေအနေတွင်မဆို ၎င်း၏ စကားနှင့် လုပ်ရပ်များသည် ၎င်း၏ စိတ်အခြေအနေ ကောင်းခြင်း၊ ဆိုးခြင်းဟူသည့်အရာ၏ ဘောင်ခတ်ခြင်းကို မခံရသည့်အပြင်၊ ကိစ္စရပ်တစ်ခုက ၎င်းအတွက် အကျိုးရှိမရှိဟူသည်ကိုလည်း ၎င်းတို့ မစဉ်းစားပေ။ ၎င်းတို့၏ စိတ်နှလုံးထဲတွင် ၎င်းတို့ကို ထိန်းညှိပေးရန် ဆောင်ရွက်သည့် စံတစ်ခု သို့မဟုတ် စည်းဘောင်တစ်ခုဖြစ်သည့် ချုပ်ထိန်းမှု အမြဲရှိသည်။ ၎င်းတို့သည် မလိမ့်တစ်ပတ်လုပ်သော ကျိုးကြောင်းပြချက်များကို တမင်တကာ ပြောဆိုလိမ့်မည်မဟုတ်သည့်အပြင်၊ လွန်လွန်ကဲကဲ အနှောင့်အယှက်ပေးလိမ့်မည်လည်း မဟုတ်ပေ။ တစ်ခါတစ်ရံ ၎င်းတို့သည် စိတ်ဆိုးပြီး စိတ်ထဲ၌ အလွန်စိတ်လှုပ်ရှားနေကာ ၎င်းတို့၏ စကားလုံးရွေးချယ်မှုသည် အတော်ပင် သင့်တင့်လျောက်ပတ်ခြင်းမရှိလျှင်ပင်၊ ၎င်းတို့ပြောဆိုသည့်အရာများသည် မလိမ့်တစ်ပတ်လုပ်သော ကျိုးကြောင်းပြချက်များ သို့မဟုတ် မှားယွင်းပြီး အဓိပ္ပာယ်မဲ့သော အယူအဆများ မဟုတ်ပေ။ ထို့ထက် ယင်းတို့သည် ကြားကောင်းပြီး ခိုင်လုံသည့်အရာများ ဖြစ်သည်။ “ခိုင်လုံသည်” ဟူသည်မှာ အဘယ်အရာကို ဆိုလိုသနည်း။ ယင်းမှာ ၎င်းတို့ပြောဆိုသည့်အရာသည် သမ္မာတရားနှင့် သေချာပေါက် ကိုက်ညီခြင်းမရှိလျှင်ပင် လူအများစု၏ အမြင်တွင် ဤ“ကျိုးကြောင်းဆင်ခြင်မှု”သည် ခိုင်လုံနိုင်သည်ဟု ဆိုလိုသည်။ ယင်းကို မှန်ကန်သောအရာတစ်ခုအဖြစ် ယေဘုယျအားဖြင့် အသိအမှတ်ပြုကြပြီး မည်သူမျှ ဆန့်ကျင်ခြင်းမရှိပေ။ ထိုသို့သော လူတစ်ဦးသည် ဆင်ခြင်တုံတရားရှိသူတစ်ဦး ဖြစ်သည်။

အသိစိတ်နှင့် ဆင်ခြင်တုံတရားတည်းဟူသော ဤသွင်ပြင်လက္ခဏာနှစ်ခုလုံးကို ရှင်းလင်းစွာ ရှင်းပြပြီးဖြစ်သည်။ လူ့သဘာဝရှိခြင်း၏ အဓိကသရုပ်သကန်များမှာ ဤအရာနှစ်ခုဖြစ်သည်။ တစ်ခုမှာ အသိစိတ်ရှိခြင်းဖြစ်ပြီး နောက်တစ်ခုမှာ ဆင်ခြင်တုံတရားရှိခြင်း ဖြစ်သည်။ ငါ့ကို ပြောလော့၊ ဤအရာနှစ်ခုသည် အနှစ်သာရမဲ့သလော၊ မမဲ့သလော။ (အနှစ်သာရမမဲ့ပါ။) ယင်းတို့သည် အလွန်စစ်မှန်သည် မဟုတ်လော။ (ဟုတ်ပါသည်။) ယင်းတို့သည် အလွန်စစ်မှန်ပြီး အနှစ်သာရမဲ့ခြင်း မရှိပေ။ သို့ဆိုလျှင် လူသားမျိုးနွယ်က အဘယ်ကြောင့် ယင်းတို့ကို အားပေးထောက်ခံခြင်း မရှိသနည်း။ အဘယ်ကြောင့်ဆိုသော် အသိစိတ်ရှိသော လူတစ်ဦးသည် တည်ကြည်ဖြောင့်မတ်ခြင်းနှင့် ကြင်နာခြင်းကို ပိုင်ဆိုင်ပြီး၊ တည်ကြည်ဖြောင့်မတ်ပြီး ကြင်နာသောလူတို့သည် ဆိုးယုတ်သော ခေတ်ရေစီးကြောင်းများနှင့် ဆိုးယုတ်သည့် ဖောက်ပြန်ပျက်စီးသော လူသားမျိုးနွယ်ကြားတွင် မနှစ်မြို့စရာအဖြစ် ယူဆခံရသည့်အပြင် အလွန်အရေးမပါသူ၊ လူတိုင်း၏ အထင်သေးခြင်းကို ခံရသောသူအဖြစ် ယူဆခံရသောကြောင့် ဖြစ်သည်။ အကယ်၍ သင်သည် တည်ကြည်ဖြောင့်မတ်ပြီး ကြင်နာသော လူတစ်ဦးဖြစ်ပါက ၎င်းတို့သည် သင့်ကို အမှန်တကယ်ပင် “သင် တည်ကြည်ဖြောင့်မတ်ပြီး ကြင်နာခြင်းက မည်သည့်အသုံးဝင်မှု ရှိသနည်း။ သင် အသိပညာရှိသလော။ သင် လူမှုအဆင့်အတန်း ရှိသလော။ လူမှုအဖွဲ့အစည်းတွင် သင်သည် ကျော်ကြားမှု သို့မဟုတ် အာဏာရှိသလော”ဟုပင် စစ်ဆေးမေးမြန်းကြလိမ့်မည်။ သင်က “ကျွန်ုပ်တွင် ကျော်ကြားမှုရော အာဏာပါ မရှိပါ။ ကျွန်ုပ်က အတော်အတန် တည်ကြည်ဖြောင့်မတ်ပြီး ကြင်နာတတ်သော လူတစ်ယောက်ဖြစ်သည်” ဟု ပြောသည်။ လူအားလုံးက သင့်ကို လှောင်ရယ်မောပြီး ပစ်ပယ်ကြလိမ့်မည်။ ၎င်းတို့၏ အမြင်တွင် သင်၏ အသိစိတ်ရှိခြင်းနှင့် သင်၏ တည်ကြည်ဖြောင့်မတ်ကာ ကြင်နာခြင်းတို့သည် အရင်းအနှီးမဟုတ်ပေ။ အသိပညာ၊ အဆင့်အတန်းနှင့် ကျော်ကြားမှုမရှိဘဲ၊ သို့မဟုတ် အာဏာမရှိဘဲ သင်သည် လူမှုအဖွဲ့အစည်း၌ မည်သည့်နေရာမျှ ရောက်မည် မဟုတ်။ ၎င်းတို့က “သင် အသိစိတ်ရှိသော်လည်း အသိစိတ်က တန်ဖိုးမည်မျှ ရှိသနည်း။ သင် မည်သည့်အရာကို လုပ်ဆောင်နိုင်သနည်း။ သင်က လျှို့ဝှက်ကြံစည်ခြင်းနှင့် အကြံအစည်များကို အသုံးချနိုင်သလော သို့မဟုတ် လူများကို လှည့်စားနိုင်သလော။ သင်သည် လူတို့၏ နှလုံးသားများကို စည်းရုံးသိမ်းသွင်းပြီး သူတို့၏ ထောက်ခံမှုကို ဝယ်ယူနိုင်သလော”ဟု ပြောကြသည်။ သင်သည် ဤအရာများထဲမှ တစ်ခုကိုမျှ မလုပ်နိုင်ပေ။ အကယ်၍ သင်သည် အသိစိတ်ကို ပိုင်ဆိုင်လျှင်၊ တည်ကြည်ဖြောင့်မတ်ခြင်းနှင့် ကြင်နာခြင်းတည်းဟူသော လူ့သဘာဝနှင့်ဆိုင်သည့် ဤသွင်ပြင်လက္ခဏာနှစ်ခုကို ပိုင်ဆိုင်လျှင်၊ သင်သည် လူ့အဖွဲ့အစည်း၏ ဆိုးယုတ်သော ခေတ်ရေစီးကြောင်းများတွင် တွေ့ရသည့် ထိုအရာများကို စိတ်ဝင်စားမည်မဟုတ်။ သင်သည် ဤခေတ်ရေစီးကြောင်းများနောက် လိုက်မည်မဟုတ်။ သို့ဖြစ်၍ သင်သည် လူ့အဖွဲ့အစည်းတွင် မည်သည့်နေရာသို့မျှ ရောက်မည်မဟုတ်သည့်အပြင်၊ လူတို့၏ ဖယ်ကြဉ်ခြင်းကို ခံရလိမ့်မည်။ အဘယ်ကြောင့် ၎င်းတို့က သင့်ကို ဖယ်ကြဉ်ကြလိမ့်မည်နည်း။ အဘယ်ကြောင့်ဆိုသော် လူအများစုသည် ဆိုးယုတ်သော ခေတ်ရေစီးကြောင်းများကို မြတ်နိုးကြပြီး ဆိုးယုတ်သော ခေတ်ရေစီးကြောင်းများသည် လူ့အဖွဲ့အစည်းတွင် အဓိကခေတ်ရေစီးကြောင်း ဖြစ်လာသောကြောင့် ဖြစ်သည်။ အကယ်၍ သင်သည် သင်၏ အသိစိတ်အတိုင်း ပြုမူပြီး ကိစ္စရပ်အားလုံးတွင် အမှုအရာများကို သမာသမတ်ကျစွာကိုင်တွယ်ပါက၊ အခြားသူများက သင့်ကို ပတ်ဝန်းကျင်နှင့် အံဝင်ခွင်ကျမှုမရှိသူတစ်ဦးအဖြစ် မြင်ပြီး သင့်ကို ဖယ်ကြဉ်ကြလိမ့်မည်။ အကယ်၍ အသင်းတော်၌ သင်သည် သင်၏ အသိစိတ်ကို မှီခိုအားကိုးနိုင်ပြီး သင်၏ စကားနှင့် လုပ်ရပ်များတွင် သမ္မာတရား စည်းမျဉ်းများကို လိုက်နာစောင့်ထိန်းနိုင်ကာ ဆိုးယုတ်သောလူများကို ဖော်ထုတ်ပြီး စိစစ်ဝံ့ပါက၊ နတ်ဆိုးများနှင့်ဆိုင်သော သူတို့သည် မိမိတို့၏ ခြေကုပ်ကို ဆုံးရှုံးလိမ့်မည်ဖြစ်ပြီး ထုတ်ဖော်ခြင်းခံရလိမ့်မည်။ ၎င်းတို့၏ လျှို့ဝှက်ကြံစည်ခြင်းများနှင့် အကြံအစည်များအပြင် သမ္မာတရားကို မုန်းတီးသော ၎င်းတို့၏ စာတန်ဆန်သည့် သဘာဝသည် လုံးလုံးလျားလျား ဖွင့်ချခြင်းခံရလိမ့်မည်။ သို့ဖြစ်၍ နတ်ဆိုးများနှင့်ဆိုင်သော ဤလူတို့သည် အသင်းတော်၌ သမ္မာတရား စည်းမျဉ်းများကို လိုက်နာစောင့်ထိန်းသူများရှိနေမည်ကို အထူးသဖြင့် ကြောက်ရွံ့ကြသည်။ သမ္မာတရားကို နားလည်သူ မည်သူ့ကိုမဆို ၎င်းတို့ မြင်သည့်အခါတိုင်း သမ္မာတရားကို နားလည်သူများက ၎င်းတို့ကို ဖော်ထုတ်ရန် ထကြွလာပြီး ၎င်းတို့ ထုတ်ဖော်ခံရကာ ဖယ်ရှားရှင်းလင်းခြင်း ခံရမည်ကို အလွန်ကြောက်ရွံ့လျက် ထိုသူတို့ကို ဖယ်ကြဉ်ပြီး ဖိနှိပ်ကြလေသည်။ ၎င်းတို့သည် ဤနည်းအတိုင်း ပြုမူရန် မိမိတို့၏ စာတန်ဆန်သော သဘာဝ၏ စေ့ဆော်ခြင်းကို ခံကြရသည်။ ဘုရားသခင်၏ အိမ်တော်၌ နတ်ဆိုးများနှင့်ဆိုင်သော သူတို့သည် ခိုင်မာစွာ မရပ်တည်နိုင်ကြပေ၊ အကြောင်းမှာ ဘုရားသခင်၏ အိမ်တော်၌ အာဏာစွဲကိုင်သည်မှာ သမ္မာတရားဖြစ်သောကြောင့်၊ အာဏာစွဲကိုင်သည်မှာ ဘုရားသခင်ဖြစ်သောကြောင့်ပင် ဖြစ်သည်။ သို့သော် ဘာသာတရားမရှိသောလောကတွင်မူ မတူညီပေ။ ဤလောကတွင် ဘုရားမဲ့ဝါဒနှင့် ဆိုးယုတ်သော ခေတ်ရေစီးကြောင်းများက လွှမ်းမိုးနေသောကြောင့် လူ့သဘာဝရှိသော လူတို့သည် ဆိုးယုတ်သော ခေတ်ရေစီးကြောင်းများအလယ်နှင့် ဆိုးယုတ်သည့်၊ ဖောက်ပြန်ပျက်စီးသော လူသားမျိုးနွယ်ကြားတွင် မိမိတို့၏ ခြေကုပ်ကို ရှာမတွေ့နိုင်ကြပေ။ ဤအတောအတွင်းတွင်၊ မိမိတို့၏ နည်းဗျူဟာများတွင် ရက်စက်သောသူများ၊ ယုတ်မာပြီး ဉာဏ်များသောသူတို့သည် လူတို့ကြားတွင် ခေါင်းဆောင်များ၊ ထင်ရှားကျော်ကြားသူများ၊ အထက်တန်းလွှာဟုခေါ်သူများ ဖြစ်လေ့ရှိကြသည်။ လူ့သဘာဝရှိသော လူတစ်ဦးသည် ၎င်း၏ အစွမ်းအစ၊ ဆုကျေးဇူးများ၊ အားသာချက်များ သို့မဟုတ် ပင်ကိုစွမ်းရည်များက မည်သို့ပင်ရှိစေကာမူ ဖယ်ကြဉ်ခြင်းခံရပြီး အောင်မြင်တိုးတက်ရန် အခွင့်အရေးမရှိပေ။ ၎င်းတို့က မျှတသော စကားအနည်းငယ် ပြောဆိုသရွေ့ သို့မဟုတ် ကိစ္စရပ်များကို သမာသမတ်ကျစွာ ကိုင်တွယ်သရွေ့၊ ထိုဆိုးယုတ်သောလူများနှင့် နတ်ဆိုးများက ၎င်းတို့ကို ညှဉ်းဆဲကြလိမ့်မည်ဖြစ်သည်။ သို့ဖြစ်၍ နတ်ဆိုးများနှင့်ဆိုင်သော ဤဆိုးယုတ်သည့် လူသားမျိုးနွယ်သည် အသိစိတ်ကို အလေးမထားပေ။ လူ့သဘာဝရှိသူများသာလျှင် အသိစိတ်ကို ပိုင်ဆိုင်ကြသည်။ ဆင်ခြင်တုံတရားနှင့်ပတ်သက်၍မူ ဆင်ခြင်တုံတရားရှိခြင်း၏ သရုပ်သကန်မှာ လူတစ်ဦးအပေါ် မည်သည့်အရာ ကျရောက်သည်ဖြစ်စေ ၎င်းသည် ယင်းကို အကျိုးသင့်အကြောင်းသင့် သဘောထားနိုင်သည်၊ တရားမျှတစွာ ပြောဆိုကာ ပြုမူနိုင်သည်၊ ၎င်း၏ ခံစားချက်များ သို့မဟုတ် ၎င်း၏ ကျော်ကြားမှု သို့မဟုတ် အဆင့်အတန်းအတိုင်း ပြုမူမည်မဟုတ်သည့်အပြင်၊ အခြားသူများကို အတင်းအကျပ်ခိုင်းခြင်း သို့မဟုတ် ဘောင်ခတ်ခြင်းတို့ ပြုလုပ်မည်မဟုတ်ပေ။ ၎င်းသည် ကိစ္စရပ်တစ်ခုကို အကျိုးသင့်အကြောင်းသင့်သဘောထားနိုင်သည်။ မှန်ကန်လျှင် မှန်ကန်သည်၊ မမှန်ကန်လျှင် မမှန်ကန်ပေ။ အမှန်ဖြစ်လျှင် အမှန်ဖြစ်ပြီး အမှားဖြစ်လျှင် အမှားဖြစ်သည်။ ၎င်းသည် အမှုအရာများကို သမာသမတ်ကျစွာ ဆန်းစစ်ပြီး အမှုအရာများကို စည်းမျဉ်းများအတိုင်း တရားမျှတစွာ လုပ်ဆောင်ကာ လူ့သဘာဝ၏ ကိုယ်ကျင့်တရားဆိုင်ရာ စည်းဘောင်များကို မကျော်လွန်ပေ။ ဤသည်မှာ ဆင်ခြင်တုံတရားရှိခြင်း၏ သရုပ်သကန် ဖြစ်သည်။ အသိစိတ်နှင့် ဆင်ခြင်တုံတရားတည်ဟူသော ဤအရာနှစ်ခုသည် လူ့အဖွဲ့အစည်းတွင် ခိုင်လုံခြင်းမရှိ၊ အထူးသဖြင့် ဆိုးယုတ်သော နိုင်ငံများနှင့် ဆိုးယုတ်သော ခေတ်ရေစီးကြောင်းများအလယ်တွင် ယင်းတို့သည် ပို၍ပင် ခိုင်လုံခြင်းမရှိသည့်အပြင် မရပ်တည်နိုင်ပေ။ သို့သော် အသိစိတ်နှင့် ဆင်ခြင်တုံတရားတို့သည် ပုံမှန်လူ့သဘာဝက ပိုင်ဆိုင်သော အဓိက ထူးခြားသည့် လက္ခဏာရပ်နှစ်ခု အတိအကျဖြစ်ပြီး လူသားမျိုးနွယ်က ပိုင်ဆိုင်သင့်သော ထူးခြားသည့် လက္ခဏာရပ်များလည်း ဖြစ်သည်။ သင်သည် ဤထူးခြားသော လက္ခဏာရပ်နှစ်ခုကို ပိုင်ဆိုင်မှသာလျှင် စစ်မှန်သော လူသားတစ်ဦးဖြစ်သည်။ အကယ်၍ သင်သည် အသိစိတ်နှင့် လူ့သဘာဝရှိသော လူတစ်ဦးဖြစ်ပါက တစ်ချက်အနေဖြင့် သင် ပြုမူကျင့်ကြံပုံတွင် အထူးသဖြင့် စည်းမျဉ်းရှိလိမ့်မည်ဖြစ်ပြီး လူတို့ကို အတော်အတန် မျှတသော နည်းလမ်းဖြင့် ဆက်ဆံနိုင်လိမ့်မည်။ လူတစ်ဦးနှင့် သင်၏ ဆက်ဆံရေးက မည်သို့ပင်ဖြစ်စေ သို့မဟုတ် ၎င်းတို့က သင့်ကို နာကျင်စေပြီးသည်ဖြစ်စေ သင်သည် ၎င်းတို့ကို မှန်ကန်စွာ ဆက်ဆံနိုင်ပြီး ဓမ္မဓိဋ္ဌာန်ကျကျ အကဲဖြတ်နိုင်သည်။ ဤသည်မှာ တည်ကြည်ဖြောင့်မတ်ခြင်းဖြစ်ပြီး လူ့သဘာဝ၏ ထူးခြားသော လက္ခဏာရပ်တစ်ခု ဖြစ်သည်။ ထို့အပြင် သင်သည် လူ့သဘာဝ၏ နောက်ထပ် ထူးခြားသော လက္ခဏာရပ်တစ်ခုဖြစ်သည့် သနားကြင်နာခြင်းကို ပိုင်ဆိုင်ပါက လူတို့နှင့် ဆက်ဆံသည့်အခါ သို့မဟုတ် အမှုအရာများကို လုပ်ဆောင်သည့်အခါ သင်၌ စည်းဘောင်တစ်ခုခု ရှိလိမ့်မည်ဖြစ်သည်။ ယင်းက သင်၏ သိစိတ်ကို ဆန့်ကျင်၍ စကားပြောဆိုခြင်း သို့မဟုတ် ပြုမူခြင်းမဖြစ်စေရန် သင့်ကို ချုပ်ထိန်းပေးနိုင်သည်။ ဥပမာအားဖြင့် ဆိုးယုတ်သောလူများသည် အဖြူကို အနက်၊ အနက်ကို အဖြူဖြစ်အောင် ပြောင်းပြန်လှန်ပြီး အချက်အလက်များကို မလိမ့်တစ်ပတ်လုပ်လျက် အမြဲ လည့်ပတ်သော စကားများကို ပြောဆိုပြီး လည့်ပတ်သော ကျိုးကြောင်းပြချက်များကို ကြာရှည်စွာပြောဆိုကြသည်။ ၎င်းတို့သည် မိမိတို့ကို ထိခိုက်နစ်နာစေသူ သို့မဟုတ် မိမိတို့ကို နာကျင်စေခဲ့သူ သို့မဟုတ် မိမိတို့ကို ပစ်မှတ်ထားခဲ့သူ မည်သူ့ကိုမဆို ရန်ငြိုးထားပြီး ညှဉ်းဆဲရန်နှင့် လက်စားချေရန် အခွင့်အရေးများရှာဖွေဖို့ နည်းလမ်းတိုင်းကို ကြိုးစားစဉ်းစားကြသည်။ သို့သော် လူ့သဘာဝရှိသော လူတစ်ဦးအတွက်မူ ၎င်းသည် အသိစိတ်၏ တစ်စိတ်တစ်ပိုင်းဖြစ်သည့် တည်ကြည်ဖြောင့်မတ်ခြင်းနှင့် ကြင်နာခြင်းကို ပိုင်ဆိုင်သောကြောင့် တစ်စုံတစ်ဦးက ၎င်းကို ထိခိုက်နစ်နာစေပြီးဖြစ်ကာ သို့မဟုတ် လိမ်လည်ပြီးဖြစ်ကာ ၎င်းက လက်တုံ့ပြန်ပြီး လက်စားချေလိုသည့်အပြင် စိတ်လိုက်မာန်ပါဖြစ်ချိန်တွင် “သူ့ကို ရိုးတွင်းချဉ်ဆီထဲမှနေ၍ ကျွန်ုပ် မုန်းသည်” ဟူသကဲ့သို့သော ကြမ်းတမ်းသည့်အရာတစ်ခုခုကို ပြောကောင်းပြောနိုင်လျှင်ပင်၊ လက်စားချေရန် တကယ့်အခွင့်အရေး ပေါ်လာသည့်အခါ ၎င်း၏ စိတ်နှလုံးသည် ပျော့ပျောင်းသွားပြီး အလျှော့ပေးလိုက်ကြလေသည်။ ၎င်းသည် ထိုသို့လုပ်ဆောင်ရန် အားမထုတ်နိုင်ပေ၊ လုပ်ဆောင်လိုသည့်စိတ်နှလုံး မရှိပေ။ ခဏအကြာတွင် ၎င်းတို့သည် ဤအမုန်းတရားကို လှုံ့ဆော်၍မရတော့ပေ။ ဤသည်မှာ သနားကြင်နာတတ်သူတစ်ဦး ဖြစ်သည့် ပုံစံဖြစ်သည်။ အကယ်၍ တစ်စုံတစ်ဦးက သင့်ကို လိမ်လည်ခဲ့ သို့မဟုတ် ထိခိုက်နစ်နာစေခဲ့ပြီး လက်စားချေခြင်းအတွက် အခွင့်အရေးတစ်ခု၊ သင်၏ ရန်သူက အပြစ်ဒဏ်နှင့် ဒဏ်ခတ်ခံရခြင်း ခံစားရသည်ကို မြင်တွေ့ရန် အခွင့်အရေးတစ်ခု သင့်တွင် ရှိပါက သင်သည် ၎င်းအပေါ် လက်တုံ့ပြန်ရန်အတွက် အရေးယူဆောင်ရွက်ပြီး အမှုအရာများကို လုပ်ဆောင်နိုင်မည်လော။ ဒေါသထွက်နေချိန်တွင် သင်က “သူတို့အပေါ် ကျွန်ုပ် သေချာပေါက် လက်တုံ့ပြန်မည်။ သူတို့က လုံးဝ ကြောက်စရာကောင်းပြီး ရက်စက်ကြသည်”ဟု ပြောကောင်းပြောနိုင်သည်။ သို့သော် လက်စားချေရန် အခွင့်အရေး တကယ်ပေါ်လာသည့်အခါ သင်သည် ထိုသို့ ပြုလုပ်ရန် အားမထုတ်နိုင်ပေ။ သင်က “ထားလိုက်ပါ၊ ယင်းမှာ အလွန်ရှည်ကြာခဲ့သောအချိန်က ဖြစ်သည်။ ယင်းကို ပြီးစေလိုက်ကြစို့”ဟု ပြောလိမ့်မည်။ သင်သည် ယင်းကို အဆုံးမရှိ လိုက်နေမည်မဟုတ်သည့်အပြင်၊ သင်၏ ရန်သူက အပြစ်ဒဏ် သို့မဟုတ် မကောင်းသော အဆုံးသတ်တစ်ခုခုအား ခံစားရသည်ကို မြင်တွေ့ရန်လည်း မရမကတောင်းဆိုမည်မဟုတ်ပေ။ သင်သည် သင်၏ စိတ်နှလုံးထဲတွင် စဉ်ဆက်မပြတ် အမုန်းတရားဖြင့် ရှင်သန်နေမည်မဟုတ်။ တစ်ခဏအကြာတွင် ထိုအမုန်းတရားက ပျက်ပြယ်သွားလိမ့်မည်။ ဤသည်မှာ ကြင်နာသော စိတ်နှလုံးရှိခြင်း၏ သရုပ်သကန်ဖြစ်သည်။ ကြင်နာခြင်းသည် လူတစ်ဦးတွင် အသိစိတ်ရှိခြင်း၏ ထူးခြားသော လက္ခဏာရပ်ဆိုင်ရာ သရုပ်သကန်တစ်ခုဖြစ်ပြီး လူသားတစ်ဦးဖြစ်ခြင်းဟူသော အမျိုးအစားရှိခြင်း၏ ထူးခြားသော လက္ခဏာရပ်တစ်ခုလည်း ဖြစ်သည်။ အချို့၏ အမြင်တွင် သနားကြင်နာခြင်းသည် အားနည်းချက်တစ်ခု ဖြစ်သည်မှာ အမှန်ပင်ဖြစ်၏။ အချို့သော ဘာသာတရား မရှိသူများသည် သင့်ကို သတ္တိမရှိဟုပင် ထင်ကောင်းထင်နိုင်ပြီး “သင်က ရက်စက်ပြီး အကြင်နာမဲ့ရန် လိုအပ်သည်။ လက်စားချေဖို့ အခွင့်အရေးပေါ်လာသည့်အခါ သွားတစ်ချောင်းအတွက် သွားတစ်ချောင်း ယူသင့်သည်၊ သူတို့ကို ကိုယ်တိုင် ချိုးနှိမ်ပြီး၊ သင်၏ရန်သူကို သင်ကိုယ်တိုင်၏လက်ဖြင့် သတ်သင့်သည်”ဟု ပြောလျက် သင့်ကို မြှောက်ပေးကောင်းပင် မြှောက်ပေးမည်။ သို့သော် သင်က “ငါ၏ရန်သူကို ငါကိုယ်တိုင်၏လက်ဖြင့် သတ်လိုက်လျှင် ငါမကောင်းမှုလုပ်ခြင်း ဖြစ်သွားမည် မဟုတ်လော။ သူတို့ အသက်ရှင်နေခြင်းက ငါ့ကို မထိခိုက်ပါ။ သူတို့လုပ်ခဲ့သည့် အရာတစ်ခုကသာ အလွန်အကျွံဖြစ်ပြီး ငါ့ကိုနာကျင်စေခဲ့ခြင်းဖြစ်သည်။ သို့သော် ထိုအရာအားလုံးက အတိတ်တွင်ကျန်ခဲ့ပြီဖြစ်သည်”ဟု စဉ်းစားဆင်ခြင်သည်။ အချိန်ကြာလာသည်နှင့်အမျှ သင်သည် ၎င်းတို့ကို မမုန်းတော့ကြောင်း သင်တွေ့ရှိရသည်။ အချို့လူများက သင်သည် အလွန်သူရဲဘောကြောင်သည်၊ လုံလောက်အောင် ရက်စက်ခြင်းမရှိဟု ပြောကြသည်။ သင်ကိုယ်တိုင်လည်း “ငါ အဘယ်ကြောင့် မရက်စက်နိုင်ရသနည်း။ အဘယ်ကြောင့် ငါ၏ ရန်သူများအပေါ် ငါ အမြဲ သက်ညှာပြီး ရန်ငြိုးမထားနိုင်ရသနည်း”ဟု ဇဝေဇဝါဖြစ်ရသည်။ အချို့သူများ၏ အမြင်တွင် သနားကြင်နာသော စိတ်နှလုံးရှိခြင်းသည် လူ့သဘာဝ၏ အားနည်းချက်တစ်ခုဖြစ်သည်။ သို့သော် လက်တွေ့တွင်မူ ယင်းသည် လူ့သဘာဝ၏ ထူးခြားသော လက္ခဏာရပ်တစ်ခုဖြစ်သည်၊ မှန်သလော။ (မှန်ပါသည်။)

ငါတို့သည် လူ့သဘာဝ၏ ထူးခြားသော လက္ခဏာရပ်များနှင့်ဆိုင်သည့် အရေးကြီးသော အစိတ်အပိုင်းနှစ်ခုဖြစ်သည့် အသိစိတ်နှင့် ဆင်ခြင်တုံတရားအကြောင်းကို အသေးစိတ် ထပ်မံဆွေးနွေးမည် မဟုတ်။ အလွယ်တကူ လျစ်လျူရှုအခံရဆုံး သို့မဟုတ် လူတို့ တစ်ခါမျှ သတိမပြုမိခဲ့သော အခြား အတိကျဆုံးသော သွင်ပြင်လက္ခဏာနှစ်ခုအကြောင်းကို ပြောကြစို့။ အကယ်၍ လူတစ်ဦးသည် လူ့သဘာဝ၏ အသိစိတ်နှင့် ဆင်ခြင်တုံတရားကို ပိုင်ဆိုင်သည်ဟုသာ ငါတို့ ပြောလျှင်၊ ဤသည်မှာ လူတို့အတွက် အတော်အတန် ယေဘုယျကျပုံရပြီး လူတစ်ဦးက ၎င်း၌ အမှန်တကယ် အသိစိတ်နှင့် ဆင်ခြင်တုံတရားရှိကြောင်း ပြသသည့် မည်သည့်အရာများကို လုပ်ဆောင်ခဲ့သည် သို့မဟုတ် မည်သည့်သရုပ်သကန်များ ရှိသည်ဟူသည်ကို ဆုံးဖြတ်ရန် အလွန်ခက်ခဲလိမ့်မည်ဖြစ်ကာ ၎င်း၌ ပုံမှန်လူ့သဘာဝ အမှန်တကယ် ရှိမရှိဟူသည်ကို အကဲဖြတ်ရန် ခက်ခဲမည်ဖြစ်သည်။ သို့ဖြစ်၍ ငါတို့သည် အသိစိတ်နှင့် ဆင်ခြင်တုံတရား၏ တိကျသော သရုပ်သကန်များအကြာင်းကို မိတ်သဟာယဖွဲ့မည်မဟုတ်ဘဲ အခြားသော သွင်ပြင်လက္ခဏာနှစ်ခုမှ မိတ်သဟာယဖွဲ့ကြမည်ဖြစ်သည်။ ဆိုလိုသည်မှာ အကယ်၍ လူတစ်ဦးသည် လူ့သဘာဝ အနှစ်သာရကို ပိုင်ဆိုင်ပါက တစ်ချက်အနေဖြင့် ၎င်းသည် အမှားနှင့်အမှန်ကို ပိုင်းခြားသိမြင်နိုင်သည့်အပြင်၊ မည်သည့်အရာက မှန်ကန်ပြီး မည်သည့်အရာက မှားယွင်းသည်ကိုလည်း သိရှိကြသည်။ တစ်စုံတစ်ဦးက ဤသွင်ပြင်လက္ခဏာနှစ်ခု ပိုင်ဆိုင်ခြင်း ရှိမရှိဟူသည့်အရာက ၎င်း၌ အသိစိတ်နှင့် ဆင်ခြင်တုံတရားရှိမရှိဟူသည်ကို ပြသရန် လုံလောက်သည်။ ဤသည်မှာ တစ်စုံတစ်ဦး၏ လူ့သဘာဝ၌ အသိစိတ်နှင့် ဆင်ခြင်တုံတရား ပိုင်ဆိုင်ခြင်းရှိမရှိဟူသည်ကို စိစစ်ရန် ပိုမိုတိကျသော နည်းလမ်း ဖြစ်သည်။ လူတစ်ဦးသည် ဤသွင်ပြင်လက္ခဏာနှစ်ခုဖြစ်သည့် အမှားနှင့်အမှန်ကို ပိုင်းခြားသိမြင်ခြင်းနှင့် မည်သည့်အရာက မှန်ကန်ပြီး မည်သည့်အရာက မှားယွင်းသည်ကို သိရှိခြင်းတို့အား ပိုင်ဆိုင်သည့်အခါမှသာ ၎င်းတို့သည် လူ့သဘာဝ၏ အသိစိတ်နှင့် ဆင်ခြင်တုံတရားကို ပိုင်ဆိုင်ကြောင်း အမှန်တကယ် ပြသပေသည်။ အကယ်၍ ၎င်းသည် ဤသွင်ပြင်လက္ခဏာနှစ်ခုကို မပိုင်ဆိုင်ပါက အသိစိတ်နှင့် ဆင်ခြင်တုံတရားရှိသည်ဟု ၎င်းက အခိုင်အမာပြောဆိုခြင်းသည် မှားယွင်းပြီး အချက်အလက်များနှင့် မကိုက်ညီပေ။ အမှားနှင့်အမှန်ကို ပိုင်းခြားသိမြင်နိုင်ခြင်းအား ဦးစွာကြည့်ကြစို့။ “ပိုင်းခြားသိမြင်သည်” ဟူသည်မှာ နားလည်ခြင်း၊ သိရှိခြင်း၊ သတိပြုမိခြင်းနှင့် သဘောပေါက်ခြင်းကို ဆိုလိုသည်။ “အမှားနှင့်အမှန်” ဟူသည်မှာ အဘယ်အရာကို ဆိုလိုသနည်း။ အမှားနှင့်အမှန်သည် အပြုသဘောဆောင်သော အရာများနှင့် အပျက်သဘောဆောင်သော အရာများကို ရည်ညွှန်းသည်။ သို့ဆိုလျှင် မည်သည့်အရာက မှန်ကန်ပြီး မည်သည့်အရာက မှားယွင်းသည်ကို သိရှိခြင်းဟူသည်မှာ အဘယ်အရာကို ဆိုလိုသနည်း။ ဥပမာအားဖြင့် “လူသားမျိုးနွယ်ကို ဘုရားသခင်က ဖန်ဆင်းခဲ့သည်။” ဤဖော်ပြချက်သည် မှန်ကန်သလော သို့မဟုတ် မှားယွင်းသလော။ (မှန်ကန်ပါသည်။) “လူသားမျိုးနွယ်သည် မျောက်ဝံများမှ ဆင့်ကဲပြောင်းလဲလာခြင်းဖြစ်သည်။” ဤဖော်ပြချက်သည် မှန်ကန်သလော သို့မဟုတ် မှားယွင်းသလော။ (မှားယွင်းပါသည်။) အကယ်၍ သင်သည် မည်သည့်အမြင်များက မှန်ကန်ပြီး မည်သည့်အမြင်များက မှားယွင်းသည်ကို ပိုင်းခြားသိမြင်နိုင်ကာ အကဲဖြတ်နိုင်ပါက၊ ဤသည်မှာ မည်သည့်အရာက မှန်ကန်ပြီး မည်သည့်အရာက မှားယွင်းသည်ကို သိရှိခြင်း ဖြစ်သည်။ နတ်ဆိုးများက “လူသားမျိုးနွယ်သည် မျောက်ဝံများမှ ဆင့်ကဲပြောင်းလဲလာခြင်းဖြစ်သည်”ဟု ပြောကြသည်။ ဤအရာကို ကြားပြီးနောက် သင်က “ဤသည်မှာ မမှန်ကန်ပါ။ လူသားမျိုးနွယ်ကို ဘုရားသခင်က ဖန်ဆင်းခဲ့သည်”ဟု ပြောသည်။ သို့ဆိုလျှင် ဤကိစ္စရပ်တွင် သင်သည် နားဝေတိမ်တောင်ဖြစ်ခြင်းမရှိသည့်အပြင်၊ မည်သည့်အရာက မှန်ကန်ပြီး မည်သည့်အရာက မှားယွင်းသည်ကို သင်သိပေသည်။ သို့ဆိုလျှင် မှန်ကန်ခြင်းနှင့် မှားယွင်းခြင်း၊ အမှားနှင့်အမှန်တို့ကြားတွင် ခြားနားချက် ရှိသလော။ (ရှိပါသည်။) “ဘုရားသခင်သည် လူသားမျိုးနွယ်အားလုံး၏ ကံကြမ္မာအပေါ် အချုပ်အခြာအာဏာကို ကိုင်စွဲထားသည်။” ဤဖော်ပြချက်သည် မှန်ကန်သလော သို့မဟုတ် မှားယွင်းသလော။ (မှန်ကန်ပါသည်။) “လူသားမျိုးနွယ်သည် မိမိ၏ ကံကြမ္မာကို မိမိထိန်းချုပ်သည်။” ဤဖော်ပြချက်သည် မှန်ကန်သလော သို့မဟုတ် မှားယွင်းသလော။ (မှားယွင်းပါသည်။) “လူတစ်ဦး အသက်မည်မျှရှည်ရှည်နေထိုင်ခြင်းသည် ၎င်းတို့ မိမိကိုယ်ကို မည်သို့ဂရုစိုက်ပြီး ကျန်းမာအောင်နေထိုင်သည်ဟူသည့်အပေါ် မူတည်သည်။” ဤဖော်ပြချက်သည် မှန်ကန်သလော သို့မဟုတ် မှားယွင်းသလော။ (မှားယွင်းပါသည်။) “လူတစ်ဦး၏ သက်တမ်းကို ဘုရားသခင်က အမိန့်ဖြင့်ပြဋ္ဌာန်းသည်။” မှန်ကန်သလော သို့မဟုတ် မှားယွင်းသလော။ (မှန်ကန်ပါသည်။) ယခုတွင် သင်သည် မည်သည့်အရာက မှန်ကန်ပြီး မည်သည့်အရာက မှားယွင်းသည်ကို သိရှိခြင်းဟူသည်မှာ အဘယ်အရာကို ဆိုလိုသည်ကို သိပြီ မဟုတ်လော။ (သိပါသည်။) သို့ဆိုလျှင် အမှားနှင့်အမှန်ကို ပိုင်းခြားသိမြင်ခြင်းအား ကြည့်ကြစို့။ “အမှားနှင့်အမှန်”ဟူသည်မှာ အဘယ်အရာအား ရည်ညွှန်းသည်ဟု ငါတို့ ယခုပြောခဲ့သနည်း။ (အပြုသဘောဆောင်သော အရာများနှင့် အပျက်သဘောဆောင်သော အရာများ ဖြစ်ပါသည်။) ဥပမာအားဖြင့် ရိုးသားသောလူတစ်ဦးဖြစ်ခြင်းသည် အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပြုသဘောဆောင်သော အရာ ဖြစ်ပါသည်။) “ငွေကြေးသည် ကမ္ဘာကို လည်ပတ်စေသည်” ဆိုလျှင် အဘယ်သို့နည်း။ (ထိုအရာသည် အပျက်သဘောဆောင်သော အရာ ဖြစ်ပါသည်။) နောက်ထပ်ဥပမာတစ်ခု မည်သူပေးနိုင်သနည်း။ (လူတို့ ဘုရားသခင်ကို ဝတ်ပြုကိုးကွယ်ခြင်းသည် လုံးဝ သဘာဝကျပြီး ကျိုးကြောင်းခိုင်လုံသည်။ ဤသည်မှာ အပြုသဘောဆောင်သော အရာ ဖြစ်ပါသည်။) သို့ဆိုလျှင် အမွှေးတိုင်များထွန်းညှိပြီး ဗုဒ္ဓကို ဝတ်ပြုကိုးကွယ်ခြင်းဆိုလျှင် အဘယ်သို့နည်း။ (ထိုအရာသည် အပျက်သဘောဆောင်သော အရာ ဖြစ်ပါသည်။) အမှုအရာများကို လုပ်ဆောင်ရာတွင် သမ္မာတရားကို ရှာဖွေခြင်း။ (ထိုအရာသည် အပြုသဘောဆောင်သော အရာ ဖြစ်ပါသည်။) မိမိလုပ်ဆောင်သည့် မည်သည့်အရာတွင်မဆို မိမိ၏ အလိုဆန္ဒအတိုင်း လိုက်ပြီး တစ်ဖက်သတ် ဆုံးဖြတ်ချက်များ ချမှတ်ခြင်း။ (ထိုအရာသည် အပျက်သဘောဆောင်သော အရာ ဖြစ်ပါသည်။) သင်သည် မည်သည့်အရာများက အပြုသဘောဆောင်ပြီး မည်သည့်အရာများက အပျက်သဘောဆောင်သည်ကို သိသည့်အပြင်၊ မည်သည့်အမြင်များက မှန်ကန်ပြီး မည်သည့်အမြင်များက မှားယွင်းသည်ကိုလည်း အကဲဖြတ်နိုင်သည်။ ဤသည်ကို အမှားနှင့်အမှန်အား ပိုင်းခြားသိမြင်နိုင်ခြင်းနှင့် မည်သည့်အရာက မှန်ကန်ပြီး မည်သည့်အရာက မှားယွင်းသည်ကို သိရှိခြင်းဟု ခေါ်သည်။ ဤထိုးထွင်းအမြင်နှင့် နားလည်မှုရှိခြင်း၊ သင်၏ စိတ်နှလုံးထဲတွင် ဤအရာများကို ပိုင်းခြားသိမြင်နိုင်စွမ်းရှိခြင်းက သင်သည် လူ့သဘာဝ့် အရည်အသွေးရှိသူတစ်ဦးဖြစ်ကြောင်း ညွှန်ပြသည်။ အမှားနှင့်အမှန်ကို ပိုင်းခြားသိမြင်နိုင်ခြင်းနှင့် မည်သည့်အရာက မှန်ကန်ပြီး မည်သည့်အရာက မှားယွင်းသည်ကို သိရှိခြင်းဟူသည်မှာ လူတစ်ဦး၏ လူ့သဘာဝအတွင်း၌ အချို့သော အပြုသဘောဆောင်သည့် အရာများနှင့် အပျက်သဘောဆောင်သည့် အရာများကို ခွဲခြားသိရှိနိုင်သည့် ပင်ကိုယ်စွမ်းရည်တစ်ခု ရှိသည်ဟု အဓိပ္ပာယ်ရသည်။ ထို့အပြင် အချို့သောအရာများက မှန်ကန်ခြင်း ရှိမရှိဟူသည်နှင့်ပတ်သက်၍ ၎င်းတို့၏ စိတ်နှလုံးထဲတွင် သတိပြုမိခြင်းနှင့် ခံစားချက်တစ်ခုခု ရှိပေသည်။ သမ္မာတရားကို မကြားဖူးဘဲ သို့မဟုတ် သမ္မာတရားကို နားမလည်ဘဲနှင့်ပင် ၎င်းတို့၏ လူ့သဘာဝသည် ဤ ပိုင်းခြားသိမြင်မှုမျိုးကို ပိုင်ဆိုင်လေသည်။ ၎င်းတို့အနေဖြင့် ရှင်းလင်းစွာ မပြောဆိုနိုင်လျှင်ပင် မည်သည့်အရာများက အပြုသဘောဆောင်ပြီး မည်သည့်အရာများက အပျက်သဘောဆောင်သည်ကို ၎င်းတို့၏ စိတ်နှလုံးထဲတွင် သိကြပြီး အပျက်သဘောဆောင်သော အရာများက မမှန်ကန်ကြောင်းကိုလည်း သိကြသည်။ အကယ်၍ ၎င်းတို့၏ စိတ်နှလုံးထဲတွင် အလွန်အမင်း မုန်းတီးစက်ဆုပ်သည့် ခံစားချက်တစ်ခုလည်းရှိပြီး ဤအရာများကို ငြင်းပယ်ကာ မလိုက်လျှောက်နိုင်ပါက ယင်းမှာ ပို၍ပင် ကောင်းသည်။ ၎င်းတို့ သမ္မာတရားကို နားမလည်သည့်အခါ အပြုသဘောဆောင်သောအရာများနှင့် အပျက်သဘောဆောင်သော အရာများကို အလွန်ရှင်းလင်းစွာ မပိုင်းခြားနိုင်လျှင်ပင် ၎င်းတို့၏ စိတ်နှလုံးထဲတွင် အပြုသဘောဆောင်သောအရာများနှင့် အပျက်သဘောဆောင်သော အရာများအပေါ် ကွဲပြားသော ခံစားချက်များနှင့် ကွဲပြားသော သဘောထားပုံနည်းလမ်းများ ရှိကြသည်။ ဥပမာအားဖြင့် လူ့အသိုင်းအဝိုင်းထဲက အချို့သော ဆိုးယုတ်သည့် ခေတ်ရေစီးကြောင်းများနှင့်ပတ်သက်၍ လူ့သဘာဝရှိသော လူတို့သည် ဤဆိုးယုတ်သော ခေတ်ရေစီးကြောင်းများကို မြင်သည့်အခါ ၎င်းတို့၏ စိတ်နှလုံးထဲတွင် နက်ရှိုင်းသော စက်ဆုပ်မုန်းတီးမှုကို ခံစားရသည်။ ၎င်းတို့သည် ဤအရာများသည် မှန်ကန်သော လမ်းကြောင်း မဟုတ်ကြောင်း၊ အပြုသဘောဆောင်သော အရာများမဟုတ်သည့်အပြင်၊ လူတို့ လိုက်စားသင့်သော သို့မဟုတ် လုပ်ဆောင်သင့်သော အရာများမဟုတ်ကြောင်း ခံစားရသည်။ ဤလူမှုပတ်ဝန်းကျင်တွင် နေထိုင်သူတစ်ဦးအနေဖြင့် ၎င်းတို့သည် ဆိုးယုတ်သော ခေတ်ရေစီးကြောင်းများကို လိုက်လျှောက်ခြင်းမှလွဲ၍ ရွေးချယ်စရာမရှိဟူသော အချက်ရှိလင့်ကစား စိတ်ထဲတွင် ၎င်းတို့သည် ထိုအရာများကို စက်ဆုပ်ရွံရှာကြသည်။ ယင်းတို့ကို စက်ဆုပ်ရွံရှာနေစဉ်တွင် ၎င်းတို့သည် ဤပတ်ဝန်းကျင်မှ လွတ်မြောက်ရန် အခွင့်အရေးတိုင်းကိုလည်း ရှာဖွေကြသည် သို့မဟုတ် ယင်းကို ရှောင်ရှားရန်နှင့် ဤဆိုးယုတ်သော ခေတ်ရေစီးကြောင်းများကို ငြင်းပယ်ရန် နည်းလမ်းတိုင်းကိုလည်း စဉ်းစားကြလေသည်။

လူတစ်ဦးအတွက် အမှားနှင့်အမှန်ကို ပိုင်းခြားသိမြင်ခြင်းသည် အလွန် အရေးကြီးပေသည်။ အမှားနှင့်အမှန်တွင် အပြုသဘောဆောင်သော အရာများနှင့် အပျက်သဘောဆောင်သော အရာများ ပါဝင်သည့်အတွက်၊ အပြုသဘောဆောင်သော အရာအချို့ကား အဘယ်အရာများဖြစ်သည်၊ အပျက်သဘောဆောင်သော အရာအချို့ကား အဘယ်အရာများဖြစ်သည်ဟု သင်တို့ ထင်သနည်း။ (ဘုရားသခင်ကို ယုံကြည်ခြင်း၊ ဘုရားသခင်နောက်လိုက်ခြင်း၊ ဘုရားသခင်ကို ဝတ်ပြုကိုးကွယ်ခြင်း၊ ဘုရားသခင်ကို ကျိုးနွံနာခံခြင်းအပြင် မိမိ၏တာဝန်ကို ထမ်းဆောင်ခြင်းနှင့် ရိုးသားသောသူတစ်ဦး ဖြစ်ခြင်းတို့သည် အပြုသဘောဆောင်သော အရာများ ဖြစ်ကြပါသည်။ လိမ်ညာခြင်းနှင့်လှည့်ဖြားခြင်း၊ ဘုရားသခင်ကို အတိုက်အခံလုပ်ခြင်း၊ ဘုရားသခင်ကို ပုန်ကန်ခြင်း၊ ဘုရားသခင်ကို သစ္စာဖောက်ခြင်းတို့သည် အပျက်သဘောဆောင်သော အရာများ ဖြစ်ကြပါသည်။) (အပြုသဘောဆောင်သော အရာများသည် အဓိကအားဖြင့် ဘုရားသခင်ထံမှ လာပြီး သမ္မာတရားနှင့် ကိုက်ညီပါသည်။ ဥပမာအားဖြင့်၊ ဘုရားသခင်၏ အမှုတော်အားဖြင့် စွမ်းဆောင်ရရှိခဲ့သည့် အမျိုးမျိုးသော ရလဒ်များအပြင် ဘုရားသခင်၏ စိတ်သဘောထားနှင့် အနှစ်သာရအပေါ် လူတို့၏ စစ်မှန်သော သိကျွမ်းခြင်းတို့သည် အပြုသဘောဆောင်သော အရာများဖြစ်ကြပြီး သမ္မာတရားနှင့်လည်း ကိုက်ညီကြပါသည်။) အပြုသဘောဆောင်သော အရာများကို အနှစ်သာရမရှိသော သို့မဟုတ် အလွန်အဆင့်မြင့်သော အရာများအဖြစ် မတွေးထင်နှင့်။ လက်တွေ့တွင်၊ အပြုသဘောဆောင်သော အရာများဆိုသည်မှာ လူတို့အတွက် အကျိုးရှိသည့် အမျိုးမျိုးသော အပြုသဘောဆောင်ပြီး မှန်ကန်သည့် လူများ၊ ဖြစ်ရပ်များနှင့် အမှုအရာများ ဖြစ်ကြသည်။ လူတို့အတွက် အကျိုးရှိသည့် မည်သည့်အရာမဆို၊ ၎င်းတို့၏ ပုံမှန်ဘဝများအတွက် အကျိုးရှိပြီး ထိခိုက်နစ်နာစေခြင်းမရှိသည့် မည်သည့်အရာမဆိုသည် အပြုသဘောဆောင်သော အရာတစ်ခု ဖြစ်သည်။ ဥပမာအားဖြင့်၊ သဘာဝ၏ စည်းမျဉ်းများနှင့် နိယာမများသည် အပြုသဘောဆောင်သော အရာများ ဖြစ်ကြသလော။ (ဟုတ်ပါသည်။) ဘုရားသခင်၏ နှုတ်ကပတ်တော်များသည် သမ္မာတရားချည်းသာဖြစ်ပြီး အပြုသဘောဆောင်သော အရာများချည်းသာ ဖြစ်ကြသည်။ သမ္မာတရားနှင့် သက်ဆိုင်သည့် မည်သည့်အရာမဆိုသည် အပြုသဘောဆောင်သော အရာတစ်ခု ဖြစ်သည်။ ဘုရားသခင်က လူသားမျိုးနွယ်ကို အသက်နှင့် သမ္မာတရားဖြင့် ထောက်ပံ့ပေးခြင်းအပြင် လူသားမျိုးနွယ်ကို ဘုရားသခင်၏ စီမံခန့်ခွဲခြင်းနှင့် ကယ်တင်ခြင်းအမှုနှင့်ဆိုင်သည့် ပါဝင်သည့်အကြောင်းအရာတို့သည် သမ္မာတရားနှင့် ဆက်စပ်သော အပြုသဘောဆောင်သည့် အရာများ ဖြစ်ကြသည်။ လူတို့အတွက် ဘုရားသခင်၏ သတ်မှတ်ချက်အားလုံး၊ ဘုရားသခင်၏ နှုတ်ကပတ်တော်တိုင်း၊ အမျိုးမျိုးသော သမ္မာတရားများအတွက် လက်တွေ့လုပ်ဆောင်ခြင်း စည်းမျဉ်းများ၊ ဤသည်တို့အားလုံးသည် အပြုသဘောဆောင်သော အရာများ ဖြစ်ကြသည်။ လူသားမျိုးနွယ်အပေါ် ဘုရားသခင်၏ စီမံခန့်ခွဲသည့်အမှုအပြင်၊ လူသားတို့ ရှင်သန်ရေးအတွက် အကျိုးရှိပြီး လူတို့ကို ထိခိုက်နစ်နာစေခြင်းမရှိသည့် အခြားသော အပြုသဘောဆောင်သည့် အရာများစွာ ရှိသည်။ ယင်းတိုကို သင်တို့ မြင်နိုင်သလော။ ယင်းတို့ကို သင်တို့ ခွဲခြားသိမြင်နိုင်သလော။ သင်တို့၏ စိတ်နှလုံး နက်ရှိုင်းသောနေရာမှ ယင်းတို့ကို လက်ခံပြီး အသိအမှတ်ပြုနိုင်သလော။ ယင်းတို့နှင့် သင်တို့ အဆင်ပြေပြေ၊ လိုက်လျောညီထွေဖြစ်အောင် နေနိုင်ပြီး၊ လိုက်နာနိုင်သလော။ ဥပမာအားဖြင့်၊ ရာသီဥတုလေးခု၏ နိယာမများသည် အပြုသဘောဆောင်သော အရာများ ဖြစ်ကြသလော။ (ဟုတ်ပါသည်။) နွေဦးရာသီတွင် ရာသီဥတု ပူနွေးလာပြီး ပန်းများပွင့်ကြသည်၊ အရာခပ်သိမ်းက ကြီးထွားပြီး ပြန်လည်ရှင်သန်လာသည်၊ ရေခဲနှင့်နှင်းများ အရည်ပျော်ကြသည်။ ဤသည်မှာ အပြုသဘောဆောင်သော အရာတစ်ခု ဖြစ်သလော။ (ဟုတ်ပါသည်။) နွေရာသီတွင် နေသည် လင်းလက်စွာ ထွန်းလင်းတောက်ပပြီး ၎င်း၏ရောင်ခြည်များက ပူပြင်းလှကာ၊ အရာခပ်သိမ်းသည် နေရောင်ခြည်ကို ခံယူလျက် လျင်မြန်စွာ ကြီးထွားကြသည်။ ဤသည်မှာ အပြုသဘောဆောင်သော အရာတစ်ခု ဖြစ်သလော။ (ဟုတ်ပါသည်။) ဆောင်းဦးရာသီတွင် ပူပြင်းတောက်လောင်နေသော အပူဒဏ်မှ ကြည်လင်သန့်ရှင်းသည့် ကောင်းကင်နှင့် အေးမြလတ်ဆတ်သည့် လေကို တဖြည်းဖြည်း ခံစားလာရသည်။ အမျိုးမျိုးသော အပင်များသည် တဖြည်းဖြည်း ရင့်မှည့်လာပြီး မျိုးစေ့များနှင့် အသီးအနှံများကို သီးပွင့်ကာ ရိတ်သိမ်းစရာများ ဖြစ်ထွန်းစေသည်။ ဤသည်မှာ အပြုသဘောဆောင်သော အရာတစ်ခု ဖြစ်သလော။ (ဟုတ်ပါသည်။) ဆောင်းရာသီတွင် အပူချိန်ကျဆင်းလာသည်၊ ရာသီဥတုက တဖြည်းဖြည်း အေးလာပြီး တစ်ခါတစ်ရံ နှင်းများကျတတ်သည်။ အခြားရာသီများကဲ့သို့ သာယာပျော်ရွှင်ဖွယ်၊ သက်သောင့်သက်သာရှိမှု သို့မဟုတ် လွတ်လပ်မှု မရှိသော်လည်း၊ ဆောင်းရာသီတွင် အရာခပ်သိမ်းသည် ၎င်းတို့၏စွမ်းအင်ကို သိုမှီးထားနိုင်ပြီး လူသားမျိုးနွယ်သည်လည်း အနားယူကာ အားအင်ပြန်လည်ဖြည့်တင်းလေသည်။ သို့ဆိုလျှင် ဤနိယာမသည် အပြုသဘောဆောင်သော အရာတစ်ခု ဖြစ်သလော။ (ဟုတ်ပါသည်။) နေထွက်ချိန်တွင် ဘီလုံးငှက်များက တေးသီကြပြီး နံနက်ခင်းငှက်များက ကျည်ကျည်ကျာကျာ မြည်ကြကာ၊ နံနက်ခင်းဖြစ်ကြောင်းနှင့် အိပ်ရာထချိန်ရောက်ပြီဖြစ်ကြောင်း၊ အသက်ရှင်ရပ်တည်ရေးအတွက်၊ အသက်မွေးဝမ်းကျောင်းမှုအတွက်နှင့် လူသားမျိုးနွယ် ဆက်လက်ရှင်သန်ရေးအတွက် အလုပ်စတင်လုပ်ဆောင်ရမည်ဖြစ်ကြောင်း လူတို့ကို သတိပေးကြသည်။ ဤသည်မှာ အပြုသဘောဆောင်သော အရာတစ်ခု ဖြစ်သလော။ (ဟုတ်ပါသည်။) လူသားမျိုးနွယ်သည် နံနက်ခင်းငှက်များနှင့် ဘီလုံးငှက်များ၏ အော်မြည်သံများကြားတွင် အိပ်ရာမှထပြီး တစ်နေ့တာ၏ အလုပ်ကို စတင်လုပ်ဆောင်သည်။ ဤသည်မှာ အပြုသဘောဆောင်သော အရာတစ်ခု ဖြစ်သည်။ ညအချိန်တွင် အမျိုးမျိုးသော အင်းဆက်ပိုးမွှားများနှင့် သတ္တဝါများသည် ၎င်းတို့၏ ကိုယ်ပိုင်နိယာမများနှင့်အညီ အမျိုးမျိုးသော လှုပ်ရှားမှုများကို ပြုလုပ်ကြသည်။ အချို့မှာ အစာရှာရန် ထွက်လာကြပြီး အချို့မှာ စတင်အော်မြည်ကြသည်။ ဤအချိန်တွင် လူသားမျိုးနွယ်သည် တိတ်ဆိတ်ငြိမ်သက်သွားပြီး အိပ်ပျော်သွားသည်။ ပုရစ်များ၏ မြည်သံကို နားထောင်ရင်း၊ အမျိုးမျိုးသော သတ္တဝါများ၏ အော်မြည်သံများနှင့် ၎င်းတို့၏ ညပိုင်းလှုပ်ရှားမှုများဖြင့် အတူလိုက်ပါရင်း၊ လူတို့သည် အလွန်နှစ်ခြိုက်စွာ၊ အလွန်ပျော်ရွှင်ချမ်းမြေ့စွာနှင့် ငြိမ်းချမ်းစွာ အိပ်စက်လျက် အိပ်မက်ကမ္ဘာထဲသို့ လွင့်မျောရောက်ရှိသွားကြသည်။ ဤသည်မှာ အပြုသဘောဆောင်သော အရာတစ်ခု ဖြစ်သလော။ (ဟုတ်ပါသည်။) လူတို့အတွက်၊ ဤအပြုသဘောဆောင်သော အရာများသည် မကြာခဏ ဖြစ်ပေါ်လေ့ရှိသော အရာများချည်းသာ ဖြစ်ကြသည်။ သင်သည် ယင်းတို့၏ အမျိုးမျိုးသော လက္ခဏာများနှင့် အချက်ပြမှုများကို လက်ခံရရှိနိုင်ပြီး၊ သင်၏ဘဝအတွက် ၎င်းတို့ ဆောင်ကြဉ်းပေးသည့် အကျိုးကျေးဇူးများအပြင် သင်အသက်ရှင်သည်နှင့်အမျှ သင့်ထံ ၎င်းတို့ ဆောင်ကြဉ်းပေးသည့် အမျိုးမျိုးသော ပြောင်းလဲမှုများနှင့် လွှမ်းမိုးမှုများကိုလည်း သင်ခံစားနိုင်သည်။ သင်၏အနီးဝန်းကျင်ရှိ အမျိုးမျိုးသော အပြုသဘောဆောင်သည့် အရာများ တည်ရှိနေခြင်းအပေါ် သင်သည် မှန်ကန်သော တုံ့ပြန်မှုနှင့် မှန်ကန်သော နားလည်သဘောပေါက်မှုအပြင် ဤအပြုသဘောဆောင်သော အရာများကို သဘောထားရန် မှန်ကန်သော နည်းလမ်းလည်း ရှိပါက၊ ယင်းက သင်သည် အမှားနှင့်အမှန်ကို အတန်ငယ် နားလည်သောသူတစ်ဦးဖြစ်ကြောင်း၊ ဘုရားသခင် ဖန်ဆင်းထားသော အရာခပ်သိမ်းဖြင့် ဖွဲ့စည်းထားသည့် ရှင်သန်ရာပတ်ဝန်းကျင်အပေါ် သင်သည် တုံ့ပြန်တတ်သူ၊ အာရုံခံစားတတ်ပြီး သိမြင်တတ်သူဖြစ်ကြောင်း၊ သင်၏အနီးဝန်းကျင်ရှိ ဤအရာခပ်သိမ်း၏ လွှမ်းမိုးမှု သို့မဟုတ် သင်၏ဘဝတွင် ယင်းတို့၏ အဖော်ပြုပေးမှုအတွက် သင်၌ ကျေးဇူးတင်ရှိသော စိတ်နှလုံးရှိကြောင်း ပြသပေသည်။ ထိုအရာက သင်သည် ဘုရားသခင်၏ တည်ရှိမှုနှင့် သူဖန်ဆင်းခဲ့သော အရာခပ်သိမ်းသည် အလွန်သိသိသာသာပင် စစ်မှန်ကြောင်း ခံစားနိုင်ပြီး၊ သင့်အတွက် အရာခပ်သိမ်း၏ အကျိုးကျေးဇူးများနှင့် အမျိုးမျိုးသော ကဏ္ဍများတွင် သင့်အပေါ် ၎င်းတို့၏ လွှမ်းမိုးမှုကို ခံစားနိုင်ကြောင်း ပြသသည်။ သင်သည် ထိုသို့သော သတင်းစကားများကို ရရှိနိုင်ပြီး ဤခံစားချက်များ ရှိနိုင်ပါက၊ သင်သည် အမှားနှင့်အမှန်ကို နားလည်နိုင်ပြီး လူ့သဘာဝကို ပိုင်ဆိုင်သောသူတစ်ဦး ဖြစ်ပေသည်။ သင်သည် အပြုသဘောဆောင်သော အရာများကို မှန်ကန်စွာ သဘောပေါက်နားလည်နိုင်သည်၊ ယင်းတို့နှင့်အသားကျအောင် နေနိုင်သည်၊ ယင်းတို့နှင့် လိုက်လျောညီထွေဖြစ်အောင် နေနိုင်ပြီး ယင်းတို့နှင့်အတူ ယှဉ်တွဲနေထိုင်နိုင်သည်။ သင်သည် ဤအရာများကို စက်ဆုပ်ခြင်းမရှိရုံမျှ မဟုတ်။ ထို့ထက်၊ သင်သည် ဘုရားသခင်ကို ယုံကြည်ပြီး သမ္မာတရားအချို့ကို နားလည်သောကြောင့် ဤအပြုသဘောဆောင်သော အရာအားလုံးသည် ဘုရားသခင်ထံမှ၊ ဖန်ဆင်းရှင်ထံမှ လာသည်ကို သင် ပို၍ပင် လက်ခံယုံကြည်ပြီး ဤအပြုသဘောဆောင်သော အရာများ တည်ရှိနေခြင်းအတွက် သင် ပို၍ ကျေးဇူးတင်နိုင်သည်။ ထို့အတူ၊ သင်၏စိတ်နှလုံးထဲတွင် အပျက်သဘောဆောင်သော အရာများအပေါ် စက်ဆုပ်ခြင်းနှင့် မနှစ်မြို့ခြင်းကို သင်ခံစားရသည်။ သို့ဆိုလျှင် အပျက်သဘောဆောင်သော အရာအချို့ကား အဘယ်အရာများ ဖြစ်သနည်း။ (ပတ်ဝန်းကျင်ကို ညစ်ညမ်းစေခြင်း၊ အလွန်အကျွံ ထုတ်ယူခြင်းတို့ဖြစ်သည်။) ပတ်ဝန်းကျင်ကို ဖျက်ဆီးခြင်းနှင့် ညစ်ညမ်းစေခြင်း၊ လက်လွတ်စပယ် သစ်ခုတ်ခြင်း၊ အလွန်အကျွံ ထုတ်ယူခြင်းနှင့် အသုံးချခြင်း၊ ဤသည်တို့အားလုံးသည် အပျက်သဘောဆောင်သော အရာများ ဖြစ်ကြသည်။ ဤအရာများအပြင်၊ အခြားမည်သည့်အရာများကို သင်တို့ အပျက်သဘောဆောင်သည်ဟု ခံစားရပြီး သင်တို့၏ စိတ်နှလုံးထဲတွင် သိသိသာသာ စက်ဆုပ်ရွံရှာသနည်း။ လူသားမျိုးနွယ်သည် သဘာဝတရားကို အမြဲတစေ သိမ်းပိုက်စိုးမိုးလိုသည်၊ ဤသည်မှာ အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) ဥပမာအားဖြင့်၊ အချို့နေရာများတွင် ဟာရီကိန်းမုန်တိုင်းများ မကြာခဏ တွေ့ကြုံရလေ့ရှိရာ အချို့လူများက၊ “ဤဟာရီကိန်းမုန်တိုင်းများသည် အိမ်များနှင့် လယ်ကွင်းများကို ဖျက်ဆီးလျက် နေရာတိုင်းတွင် ဖုန်မှုန့်များကို လွင့်စင်စေသည်။ လူသားတို့၏ နည်းပညာသည် ဆန်းသစ်ကြောင်းနှင့် လူသားတို့၏ စွမ်းဆောင်ရည်များသည် ပိုမိုအားကောင်းလာကြောင်း ပြသရန်၊ ထိုမုန်တိုင်းများကို ပိတ်ဆို့တားဆီးဖို့အတွက် တံတိုင်းတစ်ခု တည်ဆောက်ဖို့ ကျွန်ုပ်တို့ တတ်နိုင်သမျှ ကြိုးစားရမည်”ဟု အမြဲ တွေးဆကြသည်။ ဤသည်မှာ အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) ဤသည်ကို ကြားပြီးနောက် သင်တို့၏ စိတ်နှလုံးထဲတွင် မည်သို့ ခံစားရသနည်း။ (လူတို့သည် မိမိတို့၏ ကိုယ်ပိုင်စွမ်းရည်များကို အထင်ကြီးလွန်းသည်ဟု ကျွန်ုပ် ခံစားရပါသည်။) ယင်းမှာ အတိအကျပင် ဖြစ်သည်။ အချို့နေရာများသည် ကျယ်ပြန့်သော မြက်ခင်းပြင်များဖြင့် ဖုံးလွှမ်းနေသဖြင့် အချို့လူများက၊ “မွေးမြူရေးသမားများသည် မြက်ခင်းပြင်များပေါ်တွင် ရေကြည်ရာမြက်နုရာ လှည့်လည်နေထိုင်ကြပြီး တစ်နှစ်ပတ်လုံး ကောင်းမွန်သော အစားအစာ တစ်ခုတလေကိုမျှ မစားကြရသလောက်ပင် ဖြစ်သည်။ နှစ်ဝက်ကြာ၊ ၎င်းတို့သည် မြက်ခင်းလွင်ပြင်များပေါ်တွင် နွားများနှင့် သိုးများကို ထိန်းကျောင်းလျက် အမြဲတစေ ကွင်းပြင်တွင် နေရသည်။ ဤခက်ခဲသော နေ့ရက်များသည် မည်သည့်အခါတွင် အဆုံးသတ်လိမ့်မည်နည်း။ ကျွန်ုပ်တို့သည် မွေးမြူရေးသမားများ၏ ဘဝကို တိုးတက်စေရန် နည်းလမ်းများ ရှာဖွေရမည်၊ မွေးမြူရေးသမားများအနေဖြင့် တိရစ္ဆာန်ထိန်းကျောင်းခြင်းဖြင့် အသက်ရှင်ရပ်တည်ဖို့ မလိုအပ်တော့ရန်အလို့ငှာ မြက်ခင်းလွင်ပြင်များနှင့် စားကျက်များကို အဆောက်အအုံများနှင့် မြို့များအဖြစ်သို့ ပြောင်းလဲပစ်ရမည်။ ထို့နောက် ၎င်းတို့သည် ပိုမိုကောင်းမွန်သော ဘဝကို မွေ့လျော်ခံစားကြလိမ့်မည်ဖြစ်ပြီး နိုင်ငံနှင့် အစိုးရကို ကျေးဇူးတင်ကြလိမ့်မည်”ဟု ပြောဆိုကြသည်။ ဤသည်မှာ အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) ဤသို့ပြုလုပ်ခြင်းသည် အပျက်သဘောဆောင်သော အရာတစ်ခုဖြစ်ကြောင်း သင်တို့ ခံစားသိရှိနိုင်သလော။ မြက်ခင်းလွင်ပြင်များကို အဆောက်အအုံများနှင့် မြို့များအဖြစ်သို့ ပြောင်းလဲခြင်း၊ ဤသည်မှာ မှားယွင်းသော အတွေးနှင့် ရှုထောင့်ဖြစ်သည်။ ဤအစဉ်အလာသည် အလွန်အဓိပ္ပာယ်မဲ့သည်တကား။ သင်တို့သည် ဤကိစ္စကို ထွင်းဖောက်မမြင်နိုင်ကြပေ၊ မြင်နိုင်ကြသလော။ သင်တို့က၊ “ဤသည်မှာ အစိုးရ၏ ကိစ္စဖြစ်သည်၊ ယင်းနှင့်ပတ်သက်၍ ကျွန်ုပ်တို့မည်သည့်အရာကိုမျှ မလုပ်ဆောင်နိုင်ပါ” ဟု ထင်ကြပြီး ထိုအရာနှင့်ပတ်သက်၍ သင်တို့ ဘာမျှမခံစားရပေ။ ထို့ပြင်၊ လူသားမျိုးနွယ်သည် အာကာသစူးစမ်းရှာဖွေရေးတွင် အမြဲတစေ တိုးတက်မှုများ ပြုလုပ်နေသည်၊ အမြဲတစေ လကမ္ဘာသို့ သွားလိုသည်၊ အင်္ဂါဂြိုဟ်နှင့် ကြာသပတေးဂြိုဟ်တို့ကို စူးစမ်းလေ့လာလိုသည်။ ၎င်းတို့သည် နေကိုပင် စူးစမ်းရှာဖွေလိုကြသော်လည်း နေ၏အပူချိန်သည် အလွန်မြင့်မားသည့်အတွက်၊ ထိုနေရာသို့ ၎င်းတို့ မသွားနိုင်ကြပေ။ သို့ဖြစ်၍ ၎င်းတို့သည် ကမ္ဘာမြေ၏ ဆွဲငင်အားကို ကျော်လွှားပြီး လကမ္ဘာနှင့် အင်္ဂါဂြိုဟ်သို့ ပျံသန်းရန် အာကာသယာဉ်များကို တည်ဆောက်ကြသည်။ ဤသည်မှာ အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) ဤသည်မှာ အပျက်သဘောဆောင်သော အရာတစ်ခု ဖြစ်သည်။ သို့ဆိုလျှင် သိပ္ပံပညာနှင့် သက်ဆိုင်သည့် အပြုသဘောဆောင်သည့် အရာ တစ်ခုတလေ ရှိသလော။ အပြုသဘောဆောင်ပြီး ဘုရားသခင် ဖန်ဆင်းခဲ့သော အရာခပ်သိမ်း၏ သဘာဝနိယာမများနှင့် ကိုက်ညီသည့် အခိုင်အမာပြောဆိုချက်များ တစ်ခုတလေ ရှိသလော။ (သိပ္ပံနည်းကျနည်းလမ်းများဖြင့် တီထွင်ထုတ်လုပ်ထားသည့် ကွန်ပျူတာများကဲ့သို့သော ကိရိယာအချို့သည် ကျွန်ုပ်တို့၏ အလုပ်စွမ်းဆောင်ရည်ကို တိုးတက်စေနိုင်သည်။ ဤသည်တို့မှာ အပြုသဘောဆောင်သော အရာများ ဖြစ်ကြပါသည်။) ဤသည်တို့မှာ အပြုသဘောဆောင်သော အရာများလည်း မဟုတ်သည့်အပြင် အပျက်သဘောဆောင်သော အရာများလည်း မဟုတ်ပေ။ ယင်းတို့သည် ကိရိယာများမျှသာ ဖြစ်သည်။ ယင်းတို့တွင် သီးသန့် အတွေး၊ သီအိုရီ သို့မဟုတ် အကြောင်းပြချက်တစ်ခုတစ်လေမျှ မပါဝင်ပေ။ ငါတို့ ပြောဆိုနေကြသည့် အပြုသဘောဆောင်သော အရာများနှင့် အပျက်သဘောဆောင်သော အရာများသည် အမှုအရာများ၏ အနှစ်သာရနှင့် အခြေခံမူများပါဝင်ပြီး လူသားမျိုးနွယ်က စီမံလုပ်ဆောင်သည့် အမျိုးမျိုးသော သိပ္ပံဆိုင်ရာ သုတေသနစီမံကိန်းများ နောက်ကွယ်ရှိ ရည်ရွယ်ချက်များလည်း ပါဝင်ပေသည်။ ဤအရာများကို အခြေခံ၍ တစ်စုံတစ်ခုသည် အပြုသဘောဆောင်ခြင်း ရှိမရှိ သို့မဟုတ် အပျက်သဘောဆောင်ခြင်း ရှိမရှိဟူသည်ကို ငါတို့ ဆုံးဖြတ်ကြသည်။ သို့ဆိုလျှင် အခြားမည်သည့် အပျက်သဘောဆောင်သော အရာများ ရှိသနည်း။ (လက်ရှိတွင်၊ လူသားမျိုးနွယ်သည် အရာခပ်သိမ်း၏ ကြီးထွားမှုနိယာမများကို မလိုက်နာသော်လည်း ဤနိယာမများကို ပြောင်းလဲရန် သိပ္ပံနည်းကျနည်းလမ်းများကို အသုံးပြုပါသည်။ ဥပမာအားဖြင့်၊ ကြက်များကို ဟော်မုန်းပါသော အစာများ ကျွေးမွေးပြီး ရက်သုံးဆယ်အတွင်း ဈေးကွက်ပို့ဖို့ အသင့်ဖြစ်သောအရွယ်သို့ ရောက်ရှိစေနိုင်သည့်အပြင်၊ ရာသီမဟုတ်သော ဟင်းသီးဟင်းရွက်များနှင့် သစ်သီးများကို စိုက်ပျိုးကြသည်။ သိပ္ပံနှင့် နည်းပညာသည် တိုးတက်ပြီးဖြစ်ပုံရသော်လည်း၊ ဤသည်မှာ အရာခပ်သိမ်း၏ ကြီးထွားမှုနိယာမများကို ချိုးဖောက်ခြင်းဖြစ်ပြီး လူတို့၏ အစားအစာ တပ်မက်မှုကို ဖြည့်ဆည်းပေးရန် ဖြစ်သည်။ ဤသည်မှာ အပျက်သဘောဆောင်သော အရာတစ်ခု ဖြစ်ပါသည်။) ဤသည်မှာ အပျက်သဘောဆောင်သော အရာတစ်ခု ဖြစ်သည်။ အချို့လူများသည် ကျားများနှင့် ခြင်္သေ့များကို နိုင်နင်းအုပ်စိုးလိုကြသည်။ ၎င်းတို့သည် ကျားများ၏ ရုပ်သွင်က ခန့်ညားလောက်သည်ကို မြင်ကြသည်၊ ကျားတစ်ကောင် သမ်းဝေလိုက်ခြင်းကပင် လူများကို ကြောက်လန့်ထွက်ပြေးသွားစေသည်၊ သို့ဖြစ်၍ ၎င်းတို့သည် ကျားများကို နိုင်နင်းအုပ်စိုးလိုကြပြီး၊ ထို့နောက် ၎င်းတို့၏ စွယ်များကို ဆွဲနှုတ်ကာ ၎င်းတို့၏ ခြံဝင်းများထဲတွင် ထားရှိပြီး၊ ကျားများကို ခွေးများကဲ့သို့ ၎င်းတို့၏ အိမ်များကို စောင့်ရှောက်စေသည်။ ဤသည်မှာ အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) ဤသည်မှာ အပျက်သဘောဆောင်သော အရာတစ်ခု ဖြစ်သည်။ လူသားတို့သည် ဇာတိပကတိဆိုင်ရာ သာယာမှုကို လိုက်စားရာတွင် အမျိုးမျိုးသော သိပ္ပံနည်းကျနည်းလမ်းများကို အသုံးပြု၍ သဘာဝနိယာမများကို ဆန့်ကျင်လျက် ပြုလုပ်သမျှသော အရာအားလုံးနှင့် ၎င်းတို့ တီထွင်သည့် အမျိုးမျိုးသော အမှုအရာအားလုံးသည် အပြုသဘောဆောင်သော အရာများမဟုတ်ဘဲ အပျက်သဘောဆောင်သော အရာများချည်းသာ ဖြစ်ကြသည်၊ အဘယ့်ကြောင့်ဆိုသော် လူသားမျိုးနွယ်အပေါ် ယင်းတို့၏ အန္တရာယ်သည် အလွန်ကြီးမားပြီး လူသားတို့၏ ရှင်သန်ရာပတ်ဝန်းကျင်အပေါ် ၎င်းတို့၏ ပျက်စီးစေမှုသည် အလွန်ပြင်းထန်သောကြောင့် ဖြစ်သည်။ ဥပမာအားဖြင့်၊ အချို့နေရာများသည် အလွန့်အလွန် မိုးခေါင်သဖြင့် အစိုးရသည် မိုးရွာသွန်းစေရန် မိုးတိမ်ဖန်တီးသည့် ဓာတုပစ္စည်းများကို ကြဲချဖို့အတွက် လေယာဉ်များကို အသုံးပြုသည်။ ဤသည်မှာ အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) အချို့နေရာများတွင် မိုးအလွန်များစွာ ရွာသွန်းပြီး ရေဘေးများ ဖြစ်ပေါ်စေသဖြင့် အစိုးရသည် မိုးရွာသွန်းမှုကို ထိန်းချုပ်ရန် တိမ်များကို ကွဲလွင့်စေဖို့အတွက် လေယာဉ်များကို ထိထိရောက်ရောက် အသုံးချသည်။ ဤသည်မှာ သဘာဝနိယာမများကို ချိုးဖောက်ပြီး ဖျက်ဆီးခြင်း မဟုတ်လော။ (ဟုတ်ပါသည်။) သဘာဝနိယာမများကို ဖျက်ဆီးခြင်း၊ သဘာဝနိယာမများကို ချိုးဖောက်ခြင်း၊ သဘာဝနိယာမများနှင့် မကိုက်ညီခြင်း၊ မိမိအလိုရှိသည့် မည်သည့်အရာကိုမဆို ပြုလုပ်ခြင်း၊ တိုးတက်သော လူ့နည်းပညာကို ထုတ်ဖော်ပြသခြင်း၊ ဤသည်တို့မှာ အပျက်သဘောဆောင်သော အရာများ ဖြစ်ကြသည်။ ဤအရာများအပြင်၊ အခြားမည်သည့် အပျက်သဘောဆောင်သော အရာများ ရှိသနည်း။ ဇီဝပစ္စည်းများနှင့် မျိုးဗီဇပြုပြင်ခြင်းဆိုင်ရာ သုတေသနပြုလုပ်ခြင်းသည် အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) မျိုးရိုးဗီဇဆိုင်ရာ သိပ္ပံနည်းကျ သုတေသနများ ပြုလုပ်ခဲ့သောကြောင့် လူတို့သည် မျိုးဗီဇပြုပြင်ထားသော အစားအစာများကို ပိုမိုစားသုံးနိုင်ကြသည်။ သို့ဆိုလျှင် မျိုးဗီဇပြုပြင်ထားသော အစားအစာများသည် အပြုသဘောဆောင်သော အရာများလော သို့မဟုတ် အပျက်သဘောဆောင်သော အရာများလော။ (အပျက်သဘောဆောင်သော အရာများ ဖြစ်ပါသည်။) အဘယ်ကြောင့် အပျက်သဘောဆောင်သည်ဟု သင်တို့ ဆိုသနည်း။ အချို့လူများက၊ “ဤသည်မှာ သိပ္ပံဆိုင်ရာ အောင်မြင်မှုတစ်ခုဖြစ်ပြီး၊ ပိုများသောလူတို့ကို အစာ၀၀လင်လင် စားသုံးနိုင်ပြီး ငတ်မွတ်ခြင်းမရှိစေရန် ရည်ရွယ်သည်။ ထို့အပြင်၊ လူတို့သည် မျိုးဗီဇပြုပြင်ထားသော အစားအစာများကို ဆယ်စုနှစ်ချီ စားသုံးလာခဲ့ကြပြီး အရပ်ရှည်ကာ ထွားကျိုင်းလာကြသည်။ အထူးသဖြင့် ယနေ့ခေတ် လူငယ်များသည် ယခင်မျိုးဆက်ထက် အရပ်ပိုရှည်ကြသည်။ ဤသည်တို့အားလုံးသည် လူသားမျိုးနွယ်အပေါ် သိပ္ပံပညာ၏ ပံ့ပိုးကူညီမှုများကြောင့် ဖြစ်သည်။ မျိုးဗီဇပြုပြင်ထားသော အစားအစာများသည် လူတို့အတွက် ဤမျှကြီးမားသော အကျိုးကျေးဇူးများကို ဆောင်ကြဉ်းပေးသည့်အတွက်၊ အဘယ်ကြောင့် ယင်းတို့ကို အပျက်သဘောဆောင်သော အရာများဟု ဆိုရသနည်း”ဟု ပြောဆိုကြသည်။ သင်တို့ ဤသည်ကို ရှင်းပြနိုင်သလော။ (ယခုအခါ လူတို့သည် အရပ်ပိုရှည်လာကြသော်လည်း ၎င်းတို့၏ ကိုယ်ခန္ဓာကြံ့ခိုင်မှုသည် ပိုမိုဆိုးရွားလာပြီး ရောဂါများလည်း ပိုမိုဖြစ်ပွားလာကြသည်။ ဤသည်တို့အားလုံးသည် လူတို့က သိပ္ပံနည်းကျ ပြုပြင်ထားသော ထိုအရာများကို စားသုံးခြင်းကြောင့် ဖြစ်ပေါ်လာခြင်း ဖြစ်သည်။ ထို့ကြောင့် ယင်းတို့သည် အပျက်သဘောဆောင်သော အရာများ ဖြစ်ကြပါသည်။) အပေါ်ယံအားဖြင့်၊ မျိုးဗီဇပြုပြင်ထားသော အစားအစာများသည် လူတို့ကို အကျိုးပြုပုံရသည်၊ လူတို့သည် အရပ်ပိုရှည်ပြီး ပိုမိုထွားကျိုင်းလာကြသည်၊ သို့သော် ၎င်းတို့၏ ကိုယ်ခန္ဓာကြံ့ခိုင်မှုက ယိုယွင်းလာပြီးဖြစ်သည်။ ယေဘုယျအားဖြင့်၊ ယင်းတို့သည် အကျိုးပြုခြင်းထက် အန္တရာယ်ဖြစ်စေလျက် လူတို့အပေါ် အပျက်သဘောဆောင်သော သက်ရောက်မှုရှိသည်။ လူတို့က ယင်းတို့ကို အကျိုးရှိသောအရာအဖြစ် မြင်သည်ဖြစ်စေ၊ ထိခိုက်နစ်နာစေသောအရာအဖြစ် မြင်သည်ဖြစ်စေ၊ ယတို့သည် အပျက်သဘောဆောင်သော အရာများဖြစ်ကြပြီး လုံးဝ အပြုသဘောဆောင်သော အရာများ မဟုတ်ကြပေ။ အဘယ်ကြောင့်ဆိုသော် ယင်းတို့သည် ဘုရားသခင် ဖန်ဆင်းခဲ့သော သဘာဝနိယာမများကို ချိုးဖောက်ပြီး၊ ဘုရားသခင် ဖန်ဆင်းခဲ့သော မူလသတ္တဝါအမျိုးမျိုးတို့က လူ့ခန္ဓာကိုယ်ထဲတွင် ရှိသင့်သည့် လုပ်ငန်းဆောင်တာများကို ဆန့်ကျင်သောကြောင့် ဖြစ်သည်။ လူတို့အပေါ် ထိုအရာများ၏ သက်ရောက်မှုကို အစပိုင်းတွင် မခံစားရနိုင်သော်လည်း အနှစ်နှစ်ဆယ်ကြာပြီးနောက်တွင် မကောင်းသော အကျိုးဆက်များက သိသာထင်ရှားလာသည်။ လူအများအပြားသည် ထူးဆန်းသည့်ရောဂါမျိုးစုံ ဖြစ်ပွားကြပြီး ၎င်းတို့၏ မျိုးပွားနိုင်စွမ်းကိုပင် ထိခိုက်စေသည်။ ထိုသို့သော အစားအစာများသည် အပြုသဘောဆောင်သော အရာများ မဟုတ်ကြောင်း သက်သေပြရန် ဤသည်မှာ လုံလောက်ပေသည်။ လူ့ရှုထောင့်အမြင်မှကြည့်လျှင် မျိုးဗီဇပြုပြင်ထားသော အစားအစာသည် နည်းပညာ၏ ထုတ်ကုန်တစ်ခု၊ လူသားမျိုးနွယ်အပေါ် သိပ္ပံပညာ၏ ပံ့ပိုးကူညီမှုတစ်ခု ဖြစ်သော်လည်း၊ အပြုသဘောဆောင်သောအရာများနှင့် အပျက်သဘောဆောင်သော အရာများ၏ ရှုထောင့်အမြင်မှကြည့်လျှင်၊ ယင်းသည် လုံးဝ အပြုသဘောဆောင်သော အရာတစ်ခု မဟုတ်ပေ။

လူသားမျိုးနွယ်သည် လကမ္ဘာကို သုတေသနပြုရန်နှင့် ဂြိုဟ်များတစ်ခုတလေက လူသားတို့နေထိုင်ရန် သင့်တော်မှု ရှိ၊ မရှိဟူသည်ကို စူးစမ်းရှာဖွေရန် အမြဲတစေ ကြိုးစားနေသည်။ ဤသိပ္ပံဆိုင်ရာ သုတေသန၊ ဤရှုထောင့်သည် အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) အဘယ်ကြောင့် အပျက်သဘောဆောင်သော အရာတစ်ခု ဖြစ်သနည်း။ (ဘုရားသခင်သည် လူသားများကို ကမ္ဘာမြေပေါ်တွင် နေထိုင်ရန် ဖန်ဆင်းခဲ့သည်၊ သူသည် ကျွန်ုပ်တို့ကို အခြားဂြိုဟ်များပေါ်တွင် နေထိုင်ရန် ဘယ်သောအခါမျှ ရည်ရွယ်ခဲ့ခြင်း မရှိပါ။ လူသားများသည် အမြဲတစေ ရည်မှန်းချက်ကြီးပြီး နေရာတိုင်းသို့ သွားလိုကြသည်။ အဆုံးတွင်၊ ထိုအရာက အချည်းနှီးအားထုတ်မှုတစ်ခု ဖြစ်ပြီး ၎င်းတို့ မည်သည့်နေရာသို့မျှ မသွားနိုင်ကြပါ။) လူတို့၏ ရှုထောင့်အမြင်မှကြည့်လျှင်၊ ဤအရာများကို သုတေသနပြုခြင်းသည် အတော်ပင် ပုံမှန်ဖြစ်သည်။ ယင်းမှာ လူသားမျိုးနွယ်၏ အနာဂတ်အတွက် ရှင်သန်နေထိုင်မှု အခြေအနေများကို ဖန်တီးပေးနေခြင်းဖြစ်ပြီး ကောင်းမွန်သော အရာတစ်ခု ဖြစ်သည်။ ကမ္ဘာမြေပေါ်တွင် ဘုရားသခင် ထူထောင်ခဲ့သော လုပ်ငန်းဆောင်တာများစွာတို့သည် ဖျက်ဆီးခြင်းခံရပြီးဖြစ်သည်။ အမျိုးမျိုးသော ကပ်ဘေးများ မကြာခဏ ဖြစ်ပွားသည်၊ ကမ္ဘာမြေ၏ ရှင်သန်ရာပတ်ဝန်းကျင်သည် ပျက်စီးရပြီးဖြစ်သည်၊ လေ၊ ရေနှင့် မြေဆီလွှာတို့သည် အားလုံး အကြီးအကျယ်ညစ်ညမ်းနေပြီး သက်ရှိသတ္တဝါမျိုးစုံတို့သည် မျိုးသုဉ်းမည့်အရေးနှင့် ရင်ဆိုင်နေကြရသည်။ ကမ္ဘာမြေပေါ်တွင် နေထိုင်ရန် ခက်ခဲလာသည်။ ထို့ကြောင့် အချို့သော သိပ္ပံဆိုင်ရာ သုတေသနအဖွဲ့အစည်းများသည် လူသားမျိုးနွယ်က အခြားဂြိုဟ်များသို့ သွားရောက်၍ ထိုနေရာတွင် အခြေချနိုင်မည်ဟု မျှော်လင့်လျက် အခြားဂြိုဟ်များကို စတင်သုတေသနပြုကြပြီး ဖြစ်သည်။ ၎င်းတို့က လူသားမျိုးနွယ်၏ သားစဉ်မြေးဆက်များ ရှင်သန်နိုင်ရန်အတွက် လူတို့က ကြိုတင်ပြင်ဆင်ထားရမည်ဟု ယုံကြည်ကြသည်။ အကယ်၍ ၎င်းတို့ ယခု မပြင်ဆင်ထားသည့်အပြင် အနာဂတ်တွင် လူသားမျိုးနွယ်သည် ကမ္ဘာမြေပေါ်တွင် မရှင်သန်နိုင်တော့ပါက၊ လူသားမျိုးနွယ်အတွက် ထွက်ပေါက်မရှိဘဲနေမည် မဟုတ်လော။ သို့ဆိုလျှင် ဤရှုထောင့်၊ ဤသိပ္ပံဆိုင်ရာ သုတေသနသည် နောက်ဆုံးတွင် အပျက်သဘောဆောင်သော အရာလော သို့မဟုတ် အပြုသဘောဆောင်သော အရာလော။ (အပျက်သဘောဆောင်သော အရာတစ်ခု ဖြစ်ပါသည်။) မည်သည့်အခြေခံအချက်အပေါ်မူတည်၍ ထိုအရာက အပျက်သဘောဆောင်သော အရာတစ်ခုဖြစ်သည်ဟု သင်တို့ ဆိုသနည်း။ (ဘုရားသခင်သည် အခြားဂြိုဟ်များပေါ်တွင် လူသားများအတွက် သင့်တင့်လျောက်ပတ်သော အခြေအနေများကို တကယ်ကို ပြင်ဆင်ပေးမထားဟူသော အခြေခံအကြောင်းရင်းအပေါ် မူတည်၍ ဖြစ်ပါသည်။ အခြားဂြိုဟ်များမဆိုထားနှင့်၊ ကမ္ဘာမြေပေါ်ရှိ အလွန်ပူသောနေရာနှင့် အလွန်အေးသော နေရာများပင်လျှင် လူသားတို့ နေထိုင်ရန် မသင့်တော်ပေ။ သို့သော် လူသားများသည် အမြဲတစေ ရည်မှန်းချက်ကြီးသည်၊ အမြဲတစေ အခြားဂြိုဟ်များပေါ်သို့ သွားရောက်နေထိုင်လိုလျက်၊ ဘုရားသခင်၏ အချုပ်အခြာအာဏာနှင့် ဘုရားသခင်၏ စီစဉ်ညွှန်ကြားမှုများမှ ခွဲထွက်လိုသည်။ ဤသည်မှာ ဘုရားသခင်၏ စီစဉ်မှုများနှင့် ပြဋ္ဌာန်းချက်များကို ဆန့်ကျင်ပါသည်။ ထို့ကြောင့် ထိုအရာသည် အပျက်သဘောဆောင်သော အရာတစ်ခု ဖြစ်ပါသည်။) ဘုရားသခင်သည် လူသားများအတွက် အံ့ဖွယ်ကောင်းသော ရှင်သန်ရာပတ်ဝန်းကျင်ဖြစ်သည့် ကမ္ဘာမြေကို ဖန်ဆင်းခဲ့သော်လည်း လူသားတို့သည် ယင်းကို ကောင်းမွန်စွာ မစီမံမခန့်ခွဲကြပေ။ ၎င်းတို့သည် သိပ္ပံပညာနှင့် ခေတ်မီစက်မှုလုပ်ငန်းကို အမြဲတစေ ဖွံ့ဖြိုးတိုးတက်စေခဲ့ပြီး၊ ရလဒ်အနေဖြင့် ကမ္ဘာမြေ၏ ဂေဟစနစ်ပတ်ဝန်းကျင်ကို ဖျက်ဆီးကာ လေ၊ ရေနှင့် မြေကြီးကိုပင် ညစ်ညမ်းစေကြပြီးဖြစ်သည်။ လူတို့သည် သဘာဝအတိုင်းစိုက်ပျိုးထားသော ကောက်နှံများနှင့် ဟင်းသီးဟင်းရွက်များကို မရရှိနိုင်တော့သည့်အပြင်၊ အမျိုးမျိုးသော ရောဂါများကို ခံစားနေကြရသည်။ ကမ္ဘာမြေပေါ်တွင် ရှင်သန်ရန် ခက်ခဲလာခဲ့ပြီး၊ ယခုအခါ ၎င်းတို့၏ သေမျိုးဖြစ်သော ဇာတိပကတိက ထိုနေရာသို့ သွားရောက်နိုင်စွမ်း ရှိ၊ မရှိဟူသည်ကိုပင် မစဉ်းစားမဆင်ခြင်ဘဲ အခြားဂြိုဟ်များသို့ သွားရောက်ရန် စဉ်းစားနေကြသည်။ သေမျိုးဇာတိပကတိ ဖြစ်ကြသော လူသားများသည် ကမ္ဘာမြေပေါ်တွင် နေထိုင်ရန်သာ သင့်တော်ပြီး ကမ္ဘာမြေပေါ်တွင်သာ ထိုသို့နေထိုင်နိုင်ကြသည်။ ဤသည်မှာ ဘုရားသခင်၏ ပြဋ္ဌာန်းချက် ဖြစ်သည်။ လူသားများသည် ၎င်းတို့၏ အမျိုးမျိုးသော ပင်ကိုယ်အခြေအနေများကို အားကိုးရုံမျှဖြင့် မည်သည့်နေရာသို့ပင် သွားနိုင်မည်နည်း။ ငှက်များသည် ၎င်းတို့၏ အတောင်ပံများကို ခတ်ပြီး မီတာထောင်ပေါင်းများစွာ မြင့်သော ကောင်းကင်သို့ ပျံသန်းနိုင်သော်လည်း လူသားများသည် မိမိတို့ဘာသာ ထိုနေရာသို့ မပျံတက်နိုင်ကြပေ။ လေယာဉ်များ၏ အကူအညီကို ၎င်းတို့ လိုအပ်သည်။ သို့တိုင် လေယာဉ်ဖြင့် ပျံသန်းခြင်းသည် တစ်ခါတစ်ရံ အန္တရာယ်ရှိသည်။ ထို့ကြောင့် လူသားများသည် ကမ္ဘာမြေပေါ်တွင် နေထိုင်ရန် အသင့်တော်ဆုံး ဖြစ်သည်။ လူသားတို့၏ ရုပ်ပိုင်းဆိုင်ရာ ပင်ကိုအရည်အချင်းများသည် ကမ္ဘာမြေ၏ မြေဆီလွှာနှင့်လည်းကောင်း၊ အရာခပ်သိမ်း၊ ရာသီဥတုလေးခုနှင့် သဘာဝနိယာမများကဲ့သို့သော ကမ္ဘာမြေပေါ်ရှိ ရှင်သန်နေထိုင်မှု အခြေအနေများ၏ ကဏ္ဍအားလုံးနှင့်လည်းကောင်း သဟဇာတဖြစ်သည်။ ထို့ကြောင့် လူသားမျိုးနွယ်ကို ကမ္ဘာမြေသားများဟုသာ ခေါ်ဆိုနိုင်သည်။ လူသားတို့ ရှင်သန်မှုဆိုင်ရာ ဤနိယာမများနှင့် ဤရှင်သန်နေထိုင်မှု အခြေအနေများကို ဘုရားသခင်က အရာခပ်သိမ်းအား ဖန်ဆင်းခဲ့စဉ်ကပင် လူသားများအတွက် ကြိုတင်ပြဋ္ဌာန်းထားပြီး ဖြစ်သည်။ ထို့ကြောင့် လူသားမျိုးနွယ်သည် အခြားဂြိုဟ်များတွင် နေထိုင်ရန်မဟုတ်ဘဲ ကမ္ဘာမြေပေါ်တွင် ရှင်သန်ခြင်းအတွက်သာ သင့်တော်သည်။ လူသားမျိုးနွယ်သည် ကမ္ဘာမြေကို နေထိုင်၍မရနိုင်တော့သည့်အထိ ပျက်စီးစေပြီး ဖျက်ဆီးကြပြီးဖြစ်ကာ ၎င်းတို့သည် အခြားဂြိုဟ်များတွင် နေထိုင်ရန် အမြဲတစေ ရှာဖွေလျက် ယတိပြတ် ထွက်ခွာသွားပြီး ယင်းနှင့်ပတ်သက်၍ အဆုံးသတ်လိုက်ချင်ကြသည်။ ဤသည်မှာ အချည်းနှီးဖြစ်သော ကြိုးပမ်းမှုတစ်ခု ဖြစ်သည်။ ဤလုပ်ရပ်သည် ကမ္ဘာမြေသားများအတွက် ဘုရားသခင် ပြဋ္ဌာန်းထားသော သဘာဝနိယာမများနှင့် မကိုက်ညီပေ။ ထို့ထက် ယင်းသည် ကမ္ဘာမြေသားများ၏ ရုပ်ပိုင်းဆိုင်ရာ ရှင်သန်မှုနိယာမများကို ချိုးဖောက်ပြီး အလွန် အမြော်အမြင်မရှိသောလုပ်ရပ်တစ်ခု ဖြစ်သည်။ သို့ဖြစ်၍ ယင်းသည် အပျက်သဘောဆောင်သော အရာတစ်ခု ဖြစ်သည်။ လေထုရှိသော ဂြိုဟ်အချို့ ရှိလျှင်ပင်၊ ကမ္ဘာမြေသားများသည် ထိုနေရာသို့ သွားရောက်ကြည့်ရှုနိုင်သော်လည်း၊ ယင်းက လူသားမျိုးနွယ်အနေဖြင့် ထိုဂြိုဟ်များပေါ်တွင် ရှင်သန်နိုင်မည်ဟု မဆိုလိုပေ။ ကမ္ဘာမြေပေါ်တွင်ပင်၊ သင်သည် တောင်ဝင်ရိုးစွန်း သို့မဟုတ် မြောက်ဝင်ရိုးစွန်းသို့ သွားရောက်ကြည့်ရှုနိုင်သည်၊ ထိုနေရာတွင် သင် ခြေချနိုင်သော်လည်း၊ အကယ်၍ သင်သည် ထိုနေရာတွင် နှစ်ပေါင်းများစွာ နေထိုင်ရမည်ဆိုပါက သင်ခံနိုင်မည်လော။ တစ်နှစ်ပတ်လုံး ခြောက်ဆယ်ကျော် ဒီဂရီ စင်တီဂရိတ်ရှိသော အတော်လေး ပူပြင်းသည့် နေရာအချို့လည်း ရှိသည်။ ယင်းတို့သည်လည်း လူသားတို့ ရှင်သန်ရန် မသင့်တော်ပေ။ လူသားများသည် အခြားဂြိုဟ်များပေါ်တွင် နေထိုင်ရန် မဆိုထားနှင့်၊ အထူးပထဝီဝင်ဆိုင်ရာ ပတ်ဝန်းကျင်များကြောင့် ကမ္ဘာမြေပေါ်ရှိ နေရာအနည်းငယ်တွင်ပင် ရေရှည်ရှင်သန်ရန် မသင့်တော်ပေ။ ယင်းမှာ ဘုရားသခင်၏ စီစဉ်မှုများထဲက တစ်စိတ်တစ်ပိုင်း မဟုတ်ပေ။ လူ့ဇာတိပကတိ၏ ထူးခြားသော လက္ခဏာရပ်များကို အခြေခံ၍၊ ဤလူသားမျိုးနွယ်သည် ကမ္ဘာမြေပေါ်တွင် နေထိုင်ရန်သာ သင့်တော်သည်။ ဤသည်မှာ အခြေအမြစ်ခိုင်လုံပေသည်။ ကမ္ဘာမြေကို ဘုရားသခင် ဖန်ဆင်းခဲ့သည့် ရည်ရွယ်ချက်မှာ လူသားမျိုးနွယ်အတွက် သင့်တော်သော ရှင်သန်ရာပတ်ဝန်းကျင်တစ်ခုကို စီစဉ်ပေးရန် ဖြစ်သည်။ အကယ်၍ သင်သည် ထိုသို့သော ပတ်ဝန်းကျင်မှ လွတ်မြောက်ပြီး အခြားထွက်ပေါက်တစ်ခုကို ရှာဖွေလိုပါက၊ ယင်းက ပျက်စီးခြင်းသို့သာ ဆိုက်ရောက်စေလိမ့်မည်။ ထို့ကြောင့် ဤသည်မှာ အပျက်သဘောဆောင်သော အရာတစ်ခု ဖြစ်သည်။ အခြားဂြိုဟ်များပေါ်တွင် နေထိုင်ရန် အမြဲတစေ သုတေသနပြုခြင်းသည် အပျက်သဘောဆောင်သော အရာတစ်ခုဖြစ်ကြောင်း သင်သိသော်လည်း၊ သင်၏စိတ်နှလုံးထဲတွင် လူသားမျိုးနွယ်က အခြားဂြိုဟ်များပေါ်တွင် နေထိုင်ဖို့ နည်းလမ်းရှာဖွေရန် သိပ္ပံဆိုင်ရာ သုတေသနပြုလုပ်ခြင်းအား သင်သဘောတူနေသေးလျှင်၊ ယင်းက သင်၏လူ့သဘာဝနှင့်ပတ်သက်၍ ပြဿနာတစ်ခုရှိကြောင်း၊ သင်သည် အမှားနှင့်အမှန်ကို နားမလည်ကြောင်းနှင့် သင်သည် မည်သည့်အရာက မှန်ကန်ပြီး မည်သည့်အရာက မှားယွင်းသည်ကို မပိုင်းခြားနိုင်ကြောင်းတို့ကို သက်သေပြပေသည်။ ဤလမ်းကြောင်းသည် မဖြစ်နိုင်ကြောင်း သင်ရှင်းလင်းစွာ သိသော်လည်း၊ နောင်လာမည့်ခေတ်တွင် အခြားဂြိုဟ်များပေါ်၌ နေထိုင်နိုင်ရန် သင်တမ်းတပြီး မျှော်လင့်နေသေးလျှင်၊ သင်သည် ပုံမှန်လူတစ်ဦး မဟုတ်ပေ၊ သင်သည် လူကြောင်တစ်ဦး ဖြစ်သည်။

အမှားနှင့်အမှန်ကို နားလည်သောသူတစ်ဦးသည် တဟ်ချက်အနေဖြင့်၊ အပြုသဘောဆောင်သော အရာများကို ချစ်ခင်ကာ လက်ခံနိုင်ပြီး ယင်းတို့အပေါ် ရှင်းလင်းသော သိနားလည်မှုရှိနိုင်သည်။ ထို့အပြင် ၎င်းတို့သည် အပျက်သဘောဆောင်သော အရာများကို ပိုင်းခြားသိမြင်နိုင်ပြီး၊ လူ့သဘာဝနှင့် ဆင်ခြင်တုံတရားရှိသောကြောင့် ၎င်းတို့၏ စိတ်နှလုံးထဲတွင် အပျက်သဘောဆောင်သော အရာများအပေါ် အလွန်အမင်း မနှစ်မြို့ခြင်းနှင့် စက်ဆုပ်ရွံရှာခြင်းကို ခံစားရသည်။ ၎င်းတို့အနေဖြင့် သမ္မာတရားအချို့ကို နားလည်ခြင်းအပေါ် အခြေခံ၍ ၎င်းတို့ကို မထီမဲ့မြင်ပြုနိုင်သည်၊ ဝေဖန်နိုင်သည်၊ ငြင်းပယ်နိုင်သည်မှာ အမှန်ပင် ဖြစ်သည်။ အကယ်၍ သင်သည် ဤသည်ကို မလုပ်ဆောင်နိုင်လျှင်၊ သင်သည် အမှားနှင့်အမှန်ကို နားလည်သောသူတစ်ဦး မဟုတ်ပေ။ သင်သည် လူ့သဘာဝအရ ချို့တဲ့နေသည်ဟုလည်း ဆိုနိုင်သည်။ အကယ်၍ သင်၏လူ့သဘာဝတွင် အမှားနှင့်အမှန်ကို ပိုင်းခြားသိမြင်နိုင်စွမ်း ချို့တဲ့လျှင်၊ သင်၏လူ့သဘာဝသည် အလွန်အရေးကြီးသော အခြေအနေတစ်ခု၊ အလွန်အရေးကြီးသော အစိတ်အပိုင်းတစ်ခု ပျောက်ဆုံးနေပေသည်။ ဤသည်မှာ သင်သည် ပုံမှန်လူ့သဘာဝ မရှိကြောင်းနှင့် သင့်ကို စစ်မှန်သော လူတစ်ဦးဟု မခေါ်နိုင်ကြောင်း ဆိုလိုသည်။ အချို့လူများက၊ “ယခုတင်ပေးခဲ့သော ဥပမာများသည် လူတို့၏ နေ့စဉ်ဘဝ အခြေခံလိုအပ်ချက်များနှင့် သက်ဆိုင်သော အရာအချို့ ပါဝင်ပြီး သိပ္ပံပညာနှင့်လည်း သက်ဆိုင်သည်။ အကယ်၍ ထိုအရာများသည် အပျက်သဘောဆောင်သော အရာများဖြစ်ပြီး ကျွန်ုပ်တို့ ပိုင်းခြားသိမြင်ရန် လိုအပ်ပါက၊ ထိုအရာများကို ကျွန်ုပ်တို့ ငြင်းပယ်သင့်သလော” ဟု ပြောကောင်းပြောနိုင်သည်။ ယင်းမှာ မလိုအပ်ပေ။ အမှားနှင့်အမှန်ကို ပိုင်းခြားသိမြင်ခြင်းဆိုသည်မှာ သင်၏စိတ်နှလုံးထဲတွင် အပြုသဘောဆောင်သော အရာများနှင့် အပျက်သဘောဆောင်သော အရာများကို ပိုင်းခြားသိမြင်မှုရှိခြင်းအား ဆိုလိုသည်။ သင်၏လူ့သဘာဝအတွင်း၌၊ သင်သည် အကဲဖြတ်ခြင်းအတွက်စံနှုန်းတစ်ခုရှိပြီး၊ မည်သည့်အရာများက အပြုသဘောဆောင်ပြီး မည်သည့်အရာများက အပျက်သဘောဆောင်သည်ကို သင်သိသည်။ သင်၌ အပြုသဘောဆောင်သော အရာများနှင့် အပျက်သဘောဆောင်သော အရာများအား မည်သို့သဘောထားရမည်ကို သိရှိသည့် ရှင်းလင်းသော သဘောထားတစ်ခုလည်း ရှိသည်။ သင်သည် အပြုသဘောဆောင်သော အရာများကို လက်ခံနိုင်သည်၊ လိုက်လျောညီထွေဖြစ်အောင် နေနိုင်သည်၊ အသားကျအောင် နေနိုင်ပြီး၊ ၎င်းတို့အပေါ် သင်၏စိတ်နှလုံးထဲတွင် အတိုက်အခံလုပ်ခြင်း သို့မဟုတ် အလွန်အမင်း မနှစ်မြို့ခြင်း မရှိပေ။ အပျက်သဘောဆောင်သော အရာများနှင့် ပတ်သက်၍မူ၊ သင်သည် ထိုအရာများကို သင်၏စိတ်နှလုံး နက်ရှိုင်းသောနေရာမှ ပိုင်းခြားသိမြင်နိုင်ပြီး၊ ယင်းတို့ကို မထီမဲ့မြင်ပြုနိုင်သည်၊ အလွန်အမင်း မနှစ်မြို့ခြင်းဖြစ်နိုင်ပြီး စက်ဆုပ်မုန်းတီးနိုင်သည့်အပြင်၊ ၎င်းတို့ကို ဝေဖန်ရန် သင်အသုံးပြုလေ့သည့် ၎င်းတို့အပေါ် သင်၏ကိုယ်ပိုင်ရှုထောင့်များပင် ရှိနိုင်သည်။ ဤသည်မှာ အမှားနှင့်အမှန်ကို ပိုင်းခြားသိမြင်နိုင်သောသူတစ်ဦးတွင် ရှိသင့်သည့် သဘောထားနှင့် သရုပ်သကန်ဖြစ်သည်။ သို့သော်လည်း၊ သင်သည် သိသာထင်ရှားစွာ အပြုသဘောဆောင်သော အရာများကို စိတ်ထဲတွင် မထီမဲ့မြင်ပြုပြီး စက်ဆုပ်မုန်းတီးသည့်အပြင်၊ အပျက်သဘောဆောင်သော အရာများနှင့် နှိုင်းယှဉ်လျှင် ယင်းတို့ကို ထူးမခြားနားဟု မြင်ပြီး အလွန်သာမန်ဖြစ်လွန်းသည်၊ အလွန်မဆန်းတော့သည့်အရာဖြစ်ကာ ဖော်ပြရန်ပင် မထိုက်တန်ဟု မြင်သည် ဆိုကြပါစို့။ သင်သည် စိတ်နှလုံးထဲတွင် အပျက်သဘောဆောင်သော အရာများကိုလည်း အထင်ကြီးလေးစားသည်၊ တမ်းတပြီး လိုက်စားသည့်အပြင်၊ လူ့အဖွဲ့အစည်းနှင့် ကမ္ဘာလောကတွင်ရှိသည့် ထိုအပျက်သဘောဆောင်သော အရာများကိုပင် သဘောတူသည်။ သမ္မာတရား သို့မဟုတ် ပိုင်းခြားသိမြင်ခြင်း၏ စည်းမျဉ်းများကို မည်သို့ပင် မိတ်သဟာယဖွဲ့စေကာမူ၊ သင်သည် ယင်းတို့ကို ခံယူနိုင်ခြင်း သို့မဟုတ် လက်သင့်ခံနိုင်ခြင်း မရှိပေ။ ထိုသို့ဆိုလျှင် သင်၏လူ့သဘာဝသည် ပုံမှန်မဟုတ်ပေ။ အကယ်၍ သင်သည် ငယ်ရွယ်ပြီး ဘဝတွင် အတွေ့အကြုံ သို့မဟုတ် ထိုးထွင်းသိမြင်မှု ချို့တဲ့သောကြောင့်၊ သို့မဟုတ် ဤအရာများသည် သင်နှင့် မသက်ဆိုင်သောကြောင့် သို့မဟုတ် သင်၏အသက်တာတွင် ပါဝင်ခြင်းမရှိသောကြောင့် အပြုသဘောဆောင်သော နှင့် အပျက်သဘောဆောင်သော အရာများနှင့် ပတ်သက်လာသည့်အခါ သင်၌ သိမြင်မှု သို့မဟုတ် ရှင်းလင်းသော ရှုထောင့်များ မရှိပါက၊ သင်သည် အမှားနှင့်အမှန်ကို မပိုင်းခြားနိုင်သောသူတစ်ဦးဖြစ်သည်ဟု ဆို၍မရနိုင်သေးပေ။ သို့သော်လည်း၊ အပြုသဘောဆောင်သော အရာများက အဘယ်အရာဖြစ်ပြီး အပျက်သဘောဆောင်သော အရာများက အဘယ်အရာဖြစ်သည်ဟူသည်ကို မိတ်သဟာယဖွဲ့ပြီးနောက်တွင်၊ အကယ်၍ သင်သည် အပြုသဘောဆောင်သော အရာများကို သင်၏စိတ်နှလုံး နက်ရှိုင်းသောနေရာမှ လက်မခံနိုင် သို့မဟုတ် သဘောတူနိုင်ခြင်းမရှိဘဲ၊ ထိုအစား ယင်းတို့အပေါ် အလွန်အမင်း မနှစ်မြို့ခြင်းကို ခံစားရပြီး မထီမဲ့မြင်ပြုစဉ်တွင်၊ အပျက်သဘောဆောင်သော အရာများကိုမူ အားသွန်ခွန်စိုက် လိုက်ပြီး တမ်းတနေသေးလျှင်၊ သင်သည် အမှားနှင့်အမှန်ကို ပိုင်းခြားသိမြင်သောသူတစ်ဦး မဟုတ်ပေ။ ဤအချက်မှ ကြည့်သည့်အခါ၊ ထိုသို့သောသူတစ်ဦး၌ လူ့သဘာဝမရှိကြောင်းမှာ အလွန် သိသာထင်ရှားပေသည်။ အမှားနှင့်အမှန်ကို ပိုင်းခြားသိမြင်ခြင်းဆိုင်ရာ ဤကိစ္စသည် အပြုသဘောဆောင်သော အရာများနှင့် အပျက်သဘောဆောင်သော အရာများအပေါ် လူတစ်ဦး၏ စိတ်ကိုင်းညွှတ်မှုကို ထုတ်ဖော်ပြသပြီး၊ ထိုသို့ဖြင့် ဤလူ၏ အမျိုးအစားက အမှန်တကယ် အဘယ်အရာဖြစ်သည်ကို ငါတို့အား ဆုံးဖြတ်နိုင်စေသည်။ ၎င်းတို့ မည်သည့်အရာကိုပင် ကြုံတွေ့ရပါစေ၊ အပြုသဘောဆောင်သော အရာများထက် အပျက်သဘောဆောင်သော အရာများအပေါ် စိတ်တိမ်းညွှတ်ပါက၊ ဤလူ၌ လူ့သဘာဝမရှိကြောင်းနှင့် အသိစိတ်နှင့် ဆင်ခြင်တုံတရား မပိုင်ဆိုင်ကြောင်း သိသာထင်ရှားပေသည်။ အဘယ်ကြောင့် ငါဤသို့ ဆိုသနည်း။ ၎င်းတို့သည် ဘုရားသခင်ထံမှလာသော အပြုသဘောဆောင်သည့် အရာများ၏ မူလစည်းမျဉ်းများနှင့် နိယာမများကို တမ်းတပြီး လိုက်နာမည့်အစား၊ စာတန်နှင့် ဆိုးယုတ်သော လူသားမျိုးနွယ်က ထောက်ခံအားပေးသော၊ သဘောတူသော၊ ပါဝင်လုပ်ဆောင်သည့် အမျိုးမျိုးသော လုပ်ငန်းဆောင်တာများ၊ သုတေသနစီမံကိန်းများ သို့မဟုတ် နည်းပညာ၏ အချို့သော ကဏ္ဍများကို တမ်းတလျက်၊ ဆိုးယုတ်သော အရာများကို တမ်းတကြသည်။ သို့ဆိုလျှင် ထိုသို့သောလူများသည် ဧကန်မုချ လူသားများ မဟုတ်ကြပေ။ ဤသည်မှာ ရှင်းလင်းသလော။ (ရှင်းပါသည်။)

ငါတို့သည် လူတို့၏ လူ့သဘာဝအတွင်းရှိ အမှားနှင့်အမှန်ကို ပိုင်းခြားသိမြင်နိုင်စွမ်းနှင့်ပတ်သက်၍၊ ဆိုလိုသည်မှာ လူတို့က အပြုသဘောဆောင်သော အရာများနှင့် အပျက်သဘောဆောင်သော အရာများကို ခွဲခြားသိမြင်နိုင်ခြင်း ရှိမရှိဟူသည်နှင့်ပတ်သက်၍ ယခုလေးတင် ပြောခဲ့ကြသည်။ လူများစွာက ဤပိုင်းခြားသိမြင်နိုင်စွမ်း မရှိကြပေ၊ သို့တိုင်း ၎င်းတို့၏ ဘဝများတွင် လူတို့သည် အပြုသဘောဆောင်သော အရာများနှင့်ရော အပျက်သဘောဆောင်သော အရာများနှင့်ပါ မကြာခဏ ထိတွေ့ဆက်ဆံလာကြရသည်။ ဥပမာအားဖြင့်၊ လူတို့၏ ပုံမှန် စိတ်ခံစားချက်များဖြစ်သည့် ဝမ်းမြောက်ခြင်း၊ ဒေါသထွက်ခြင်း၊ ဝမ်းနည်းခြင်း၊ ပျော်ရွှင်ခြင်းတို့သည် အပြုသဘောဆောင်သော အရာများလော သို့မဟုတ် အပျက်သဘောဆောင်သော အရာများလော။ (အပြုသဘောဆောင်သော အရာများ ဖြစ်ပါသည်။) ဘုရားသခင်အပေါ် လူတို့၏ ပုန်ကန်ခြင်းနှင့်ပတ်သက်၍ကော မည်သို့နည်း။ ယင်းမှာ အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပျက်သဘောဆောင်သော အရာ ဖြစ်ပါသည်။) ပြီးလျှင် လူတို့က ဘုရားသခင်အပေါ် ဦးတည်သော လွန်ကဲသည့် လိုအင်ဆန္ဒများနှင့်ပတ်သက်၍ကော မည်သို့နည်း။ ၎င်းတို့သည် အပြုသဘောဆောင်သော အရာများလော သို့မဟုတ် အပျက်သဘောဆောင်သော အရာများလော။ (အပျက်သဘောဆောင်သော အရာများ ဖြစ်ပါသည်။) ၎င်းတို့၏ နေ့စဉ်ဘဝများတွင်၊ လူတို့သည် ၎င်းတို့ ကြုံတွေ့ရသော အမှုအရာများစွာနှင့် ပတ်သက်လာသည့်အခါ အမှန်တကယ်တွင် သိမြင်နားလည်မှု မရှိကြပေ။ အချို့သော အပြုသဘောဆောင်သည့် အရာများသည် လူတို့နှင့်အတူ ၎င်းတို့၏ ဘဝများနှင့် တည်ရှိမှုတွင် အမြဲရှိနေ၏။ ထိုအရာများက ၎င်းတို့၏ ဘဝများတွင် အလွန်အရေးကြီးသော အခန်းကဏ္ဍမှ ပါဝင်ပြီး လူသားတို့ ရှင်သန်ရေးအပေါ် ယင်းတို့၏ အပြုသဘောဆောင်သော သက်ရောက်မှုကို အပျက်သဘောဆောင်သော အရာ၏ မည်သည့်သက်ရောက်မှုကမျှ အစားထိုး၍မရနိုင်ပေ။ သို့သော်လည်း လူတို့သည် ဤအပြုသဘောဆောင်သော အရာများကို မကြာခဏ လျစ်လျူရှုကြပြီး၊ ထိုအစား လူတို့နှင့်အတူ အမြဲရှိနေကာ ၎င်းတို့၏ ဘဝများကို ထောက်ပံ့ပေးပြီး ၎င်းတို့၏ တည်ရှိမှုတွင် လိုက်ပါနေသည်မှာ အပျက်သဘောဆောင်သော အရာများဖြစ်သည်ဟု ယုံကြည်နေကြသည်။ ဤအချက်မှ ကြည့်လျှင် လူများစွာသည် အပြုသဘောဆောင်သော အရာများအတွက် မည်သည့်ခံစားချက်မျှ အမှန်တကယ် မရှိသည်ကို တွေ့မြင်နိုင်သည်။ သင်သည် ဤအရာများအတွက် ခံစားချက်မရှိလျှင် အရေးမကြီးပေ။ ယင်းတို့က အပြုသဘောဆောင်သော အရာများဖြစ်ကြောင်း သိရှိသည့်အခါ သင်သည် ယင်းတို့ကို အလွန်အမင်း မနှစ်မြို့ခြင်း မရှိသရွေ့၊ ပြီးလျှင် ယင်းတို့ကို သင်၏ စိတ်နှလုံး နက်ရှိုင်းရာမှ တမ်းတပြီး ချစ်မြတ်နိုင်းနိုင်သရွေ့၊ ဤအရာက သင်၏ လူ့သဘာဝသည် အပြုသဘောဆောင်သည့်အရာကို တမ်းတကြောင်း သက်သေပြပေသည်။ အပြုသဘောဆောင်သော အရာများဟူသည်မှာ အဘယ်အရာဖြစ်သည်ကိုလည်းကောင်း၊ အပျက်သဘောဆောင်သော အရာများဟူသည် အဘယ်အရာဖြစ်သည်ကိုလည်းကောင်း သင် သိသော်လည်း သင်သည် အပြုသဘောဆောင်သော အရာများကို နှစ်သက်ရန် မိမိကိုယ်ကို မပြုလုပ်နိုင်သေးဟု ဆိုပါစို့။ ထိုအစား သင်၏ စိတ်နှလုံးထဲတွင် အပျက်သဘောဆောင်သော အရာများကို နှစ်သက်မှုရှိပြီး ထိုအရာများကို အထူးပင် စိတ်ဝင်စားကာ၊ တစ်ဆင့်တိုး၍ အခြေအနေများ သင့်တော်ပြီး သင့်တွင် အခွင့်အရေးရှိပါက ယင်းတို့ကို လိုက်စားပြီး ရယူရန် သင် ကြိုးစားမည်မှာ သေချာသည်။ ဤအရာက အပြုသဘောဆောင်သော အရာများနှင့် အပျက်သဘောဆောင်သော အရာများအပေါ် သင်၏ စိတ်တိမ်းညွှတ်မှုနှင့် ပတ်သက်လာသည့်အခါ သင်သည် အပျက်သဘောဆောင်သည့်အရာကို ချစ်ပြီး အပြုသဘောဆောင်သည့်အရာကို မချစ်ကြောင်း ညွှန်ပြပေသည်။ သင်သည် အပြုသဘောဆောင်သော အရာများကို မချစ်လျှင်၊ ဤအရာက သင်သည် အပြုသဘောဆောင်သော ပုဂ္ဂိုလ်တစ်ဦး မဟုတ်ကြောင်း ညွှန်ပြသည်။ သင်သည် အပြုသဘောဆောင်သော ပုဂ္ဂိုလ်တစ်ဦး မဟုတ်လျှင် အသိစိတ်နှင့် ဆင်ခြင်တုံတရားရှိသော သူတစ်ဦး သေချာပေါက် မဟုတ်ပေ။ သင်သည် အပျက်သဘောဆောင်သော ပုဂ္ဂိုလ်တစ်ဦး ဖြစ်သည်။ သင်သည် အသိစိတ်နှင့် ဆင်ခြင်တုံတရားရှိသော သူတစ်ဦး မဟုတ်လျှင် လူသားမဟုတ်၊ လူတစ်ဦး မဟုတ်ပေ။ ဥပမာအားဖြင့်၊ တစ်စုံတစ်ဦးက ခရမ်းချဉ်သီး စိုက်ပျိုးသည်။ ခရမ်းချဉ်သီးများ ကြီးထွားလာသည်နှင့်တစ်ပြိုင်နက် ဓာတုပစ္စည်းတစ်မျိုး သုတ်လိမ်းလိုက်ရုံဖြင့် တစ်ညတည်းနှင့် အစိမ်းရောင်မှ အနီရောင်သို့ ပြောင်းသွားအောင် လုပ်၍ရနိုင်ပြီး ချက်ချင်း ရောင်းချရန် အသင့်ဖြစ်နိုင်သည်ဟု ၎င်းတို့ ကြားသိရသည်။ ထို့နောက် ၎င်းတို့က “ဤသည်မှာ သိပ်ကောင်းပေသည်။ အခြားလူတိုင်းက ဤနည်းဖြင့် ရောင်းကြသဖြင့် ငါလည်း ရောင်းမည်။ ဤနည်းဖြင့် ငါ ချမ်းသာနိုင်ပြီး ခရမ်းချဉ်သီးကိုလည်း စောစော စား၍ရသည်။ ဤသည်မှာ အကောင်းဆုံး ဖြစ်သည်”ဟု တွေးသည်။ သို့ဖြင့် ၎င်းတို့သည် ဤခရမ်းချဉ်သီးများကို ရောင်းချပြီး ၎င်းတို့ကိုယ်တိုင်လည်း စားသုံးကြသည်။ တစ်စုံတစ်ဦးက ဓာတုပစ္စည်းများဖြင့် မှည့်စေသော ခရမ်းချဉ်သီးများသည် လူကို အန္တရာယ်ဖြစ်စေကြောင်းနှင့် ထိုသို့သောအရာများကို ရောင်းချခြင်းသည် အခြားသူများကို အန္တရာယ်ဖြစ်စေခြင်းဖြစ်ကြောင်း ၎င်းတို့ကို သတိပေးသော်လည်း ၎င်းတို့က ဤသည်ကို လက်ခံရန် ငြင်းပယ်လျက် “ဤသည်မှာ အဘယ်သို့ဖြစ်ပြီး လူများကို အန္တရာယ်ပေးခြင်း ဖြစ်ရသနည်း။ ဤသည်မှာ သိပ္ပံဆိုင်ရာ သုတေသန၏ အကျိုးတစ်ခုဖြစ်သည်။ အပြုသဘောဆောင်သော အရာတစ်ခုဖြစ်သည်။ သိပ္ပံပညာက လူသားမျိုးနွယ်ကို အကျိုးပြုပြီး၊ ဤအရာများကို သိပ္ပံပညာမှတစ်ဆင့် တီထွင်ခဲ့ခြင်းဖြစ်သည့်အတွက်၊ လူတို့၏ ဘဝများအတွက် ကျယ်ကျယ်ပြန့်ပြန့် အသုံးချသင့်သည်။ လူတို့၏ဘဝများက သိပ္ပံပညာမရှိဘဲ မဖြစ်နိုင်ပါ။ ယင်းအပေါ် ကျွန်ုပ်တို့ မှီခိုရမည်” ဟု ဆိုသည်။ အချို့လူများသည် သိပ္ပံပညာကို သမ္မာတရားအဖြစ်ပင် သဘောထားပြီး လူတို့ကို သိပ္ပံပညာအား ချစ်ရန်၊ သင်ယူရန်နှင့် အသုံးပြုရန်အပြင် ထိုသိပ္ပံပညာအပေါ် အရာခပ်သိမ်းကို အခြေခံရန် သင်ကြားပေးကြသည်။ အချို့လူများသည် ယခုအခါတွင် သိပ္ပံပညာက မလွဲမသွေ မှန်ကန်ခြင်း မရှိကြောင်းနှင့် သိပ္ပံပညာမှတစ်ဆင့် တီထွင်ထားသော အချို့အရာများသည် လူကို အန္တရာယ်ဖြစ်စေကြောင်း၊ ဥပမာအားဖြင့် ဓာတုလက်နက်များနှင့် အဆင့်မြင့်လက်နက်များသည် လူသားမျိုးနွယ်ကို သတ်ဖြတ်နိုင်စွမ်းရှိပြီး အထူးသဖြင့် မျိုးဗီဇပြုပြင်ထားသော အစားအစာများသည် လူသားမျိုးနွယ်အတွက် အဆုံးမရှိသော ဘေးဒုက္ခတစ်ခုဖြစ်ကြောင်း၊ ရှာဖွေတွေ့ရှိကောင်း တွေ့ရှိပေမည်။ သို့သော် လူများစွာက၊ “သိပ္ပံပညာက မှားနိုင်သလော။ သိပ္ပံပညာသာ မှားယွင်းခဲ့မည်ဆိုလျှင်၊ နိုင်ငံတော်က အားပေးထောက်ခံမည်လော။ လူသားမျိုးနွယ်အားလုံးက သိပ္ပံပညာကို သင်ယူပြီး အသုံးပြုကြသည်၊ လူသားမျိုးနွယ်အားလုံး မှားနိုင်မည်လော”ဟု ဆိုလျက် ထိုသို့မထင်ကြပေ။ ဤပြောဆိုချက်သည် မှန်ကန်သလော။ လူသားမျိုးနွယ်အားလုံးက သိပ္ပံပညာကို လေးစားကြည်ညိုပြီး အသုံးပြုသည့်အပြင်၊ ဤသည်မှာ လူမှုရေးဆိုင်ရာ ခေတ်ရေစီးကြောင်းဖြစ်သည့်အတွက် မည်မျှပင် အပျက်သဘောဆောင်စေကာမူ အပြုသဘောဆောင်သော အရာတစ်ခု ဖြစ်လာနိုင်သည်ဟု ၎င်းတို့ ယုံကြည်ကြသည်။ ဤလူများသည် အမှားနှင့်အမှန်ကို ပိုင်းခြားသိမြင်နိုင်သူများဖြစ်သလော။ (မဟုတ်ပါ။) ၎င်းတို့ ပြောဆိုသော ဤစကားများမှာ အဘယ်အရာများဖြစ်သနည်း။ (မှားယွင်းပြီး အဓိပ္ပာယ်မဲ့သော အယူအဆများ ဖြစ်ပါသည်။) ၎င်းတို့သည် မှားယွင်းပြီး အဓိပ္ပာယ်မဲ့သော အယူအဆများ၊ မိစ္ဆာအယူများနှင့် ကောက်ကျစ်သော အကြောင်းပြချက်များ ဖြစ်ကြသည်။ ဆိုးယုတ်သော လူသားမျိုးနွယ်ထဲမှ လူအများစုသည် ဤပြောဆိုချက်များကို သဘောတူပြီး အသိအမှတ်ပြုကြသော်လည်း၊ ယင်းတို့ကို လူမည်မျှက အသိအမှတ်ပြုပြီး လက်ခံကြစေကာမူ၊ မှားယွင်းသောအရာသည် အမြဲတမ်း မှားယွင်းနေလိမ့်မည်ဖြစ်ပြီး၊ အပျက်သဘောဆောင်သော အရာများသည် အမြဲ အပျက်သဘောဆောင်သော အရာများသာ ဖြစ်နေလိမ့်မည်ဖြစ်ကာ၊ ကောက်ကျစ်သော အကြောင်းပြချက်များသည် အမြဲပင် ကောက်ကျစ်သော အကြောင်းပြချက်များသာ ဖြစ်နေလိမ့်မည်ဖြစ်သည်။ ယင်းတို့အနေဖြင့် အပြုသဘောဆောင်သော အရာများ ဖြစ်လာရန် မဖြစ်နိုင်သည့်အပြင်၊ မည်သည့်အခါမျှ သမ္မာတရား ဖြစ်မလာနိုင်ပေ။

အမြဲတမ်း လူမှုရေး ခေတ်ရေစီးကြောင်းများကို လိုက်စားပြီး မှားယွင်းပြီး အဓိပ္ပာယ်မဲ့သော အယူအဆများကို ပြောဆိုဖို့ နှစ်သက်သော လူများသည် အပျက်သဘောဆောင်သော အရာများကို အထူးသဖြင့် ချစ်သောသူများဖြစ်သည် မဟုတ်လော။ (ဟုတ်ပါသည်။) ၎င်းတို့သည် သမ္မာတရားနှင့် အပြုသဘောဆောင်သော အရာများကို လက်ခံနိုင်ကြသလော။ (လက်မခံနိုင်ကြပါ။) ၎င်းတို့သည် အပြုသဘောဆောင်သော အရာများကို လက်မခံနိုင်ကြပေ။ ဥပမာအားဖြင့်၊ လူအချို့က နေမကောင်းဖြစ်ကြပြီး၊ အမှန်တကယ်တွင် ၎င်းတို့၏ ရောဂါက လေ့ကျင့်ခန်းလုပ်ခြင်းနှင့် ၎င်းတို့၏ နေ့စဉ်လုပ်ရိုးလုပ်စဉ်များကို ချိန်ညှိခြင်းဖြင့် ကုသပျောက်ကင်းနိုင်သော်လည်း၊ ၎င်းတို့သည် ကုသမှုအတွက် ခေတ်မီသော၊ နည်းပညာမြင့်သော နည်းလမ်းများနှင့် နည်းစနစ်များကို မရမက အသုံးပြုကြသည်။ သင်က၊ “ယခုတွင် ဆေးပညာက တိုးတက်နေပြီဖြစ်ပြီး ထိုကုသမှုက သိသာသည့် ရလဒ်များ ရှိသော်လည်း၊ နဂိုအတိုင်းပြန်မဖြစ်နိုင်သော နောက်ဆက်တွဲ သက်ရောက်မှုများ၊ အကျိုးဆက်များ ဖြစ်စေလိမ့်မည်။ သင်က လေ့ကျင့်ခန်းလုပ်ခြင်း၊ သင်၏ နေ့စဉ်လုပ်ရိုးလုပ်စဉ်ကို ချိန်ညှိခြင်း၊ သင်၏ အစားအသောက် အလေ့အထများနှင့် ပုံစံများကို ချိန်ညှိခြင်းတို့ကဲ့သို့သော သဘာဝနည်းလမ်းတစ်ခုကို အသုံးပြုပြီး သင့်ခန္ဓာကိုယ်ကို ပုံမှန်၊ သဘာဝကျသည့် မှန်မှန်လှုပ်ရှားမှုတစ်ခုထဲသို့ တဖြည်းဖြည်း ဝင်ရောက်စေသင့်သည်။ ထို့နောက်တွင် အချို့သော ရောဂါလက္ခဏာများက တဖြည်းဖြည်း သက်သာသွားပါလိမ့်မည်”ဟု ပြောကောင်းပြောပေမည်။ လူအချို့က ဤအမြင်မျိုးကို လက်ခံနိုင်သော်လည်း အခြားသူများကမူ မလက်ခံနိုင်ကြပေ။ ၎င်းတို့က “ယင်းမှာ ခေတ်နောက်ကျသည့် လုပ်နည်းကိုင်နည်းဖြစ်သည်။ ယင်းမှာ လွန်ခဲ့သော နှစ်ပေါင်းထောင်ချီတွင် လူသားမျိုးနွယ်က ရောဂါများကို ကုသခဲ့သည့် နည်းလမ်းနှင့် အတွေးအခေါ်ဖြစ်သည်။ ပိုသက်သာလာဖို့ဟူသည်မှာ သုံးဆယ်ရာခိုင်နှုန်းက ကုသမှုဖြစ်ပြီး ခုနစ်ဆယ်ရာခိုင်နှုန်းက အနားယူခြင်းဟူသည့် အတွေးအခေါ်မှာ ယခုခေတ်တွင် အရာမရောက်တော့ပါ။ ဆေးပညာက ယခု တိုးတက်နေပြီဖြစ်ပြီး နည်းပညာမြင့် ကုသမှုများက ရလဒ်မြန်မြန် ထွက်စေသည်။ ဆေးများက မျက်စိတစ်မှိတ်အတွင်းတွင်ပင် ပျောက်ကင်းစေသည်”ဟု တွေးကြသည်။ ၎င်းတို့၏ အမြင်များအရ၊ ဆေးပညာက တိုးတက်နေပြီး လူသားမျိုးနွယ်၏ အမျိုးမျိုးသော ရောဂါများကို ကုသနိုင်ကာ လူတို့ကို အသက်ရှည်ရှည် နေနိုင်အောင် ခွင့်ပြုနေသမျှ ကာလပတ်လုံး၊ ဆေးပညာသည် အပြုသဘောဆောင်သော အရာတစ်ခု ဖြစ်လာခဲ့ပြီး၊ လူတို့သည် ဆေးပညာကို ယုံကြည်သင့်ကာ သိပ္ပံပညာကို ယုံကြည်သင့်ပြီး၊ သိပ္ပံပညာကို ၎င်းတို့၏ ကံကြမ္မာများအပေါ် အချုပ်အခြာအာဏာကိုင်စွဲခွင့် ပေးသင့်သည်ဟူ၍ ဖြစ်သည်။ လူတို့ မည်မျှပင် ရောဂါများဖြစ်စေကာမူ၊ ကြောက်စရာ ဘာမျှမရှိဟု ၎င်းတို့ တွေးကြသည်။ နည်းပညာမြင့် နည်းလမ်းများဖြင့် ခက်ခဲရှုပ်ထွေးသည့်၊ ကုသရခက်သော မည်သည့် ရောဂါကိုမဆို ကုသ၍ရနိုင်ပြီး၊ နောက်ဆက်တွဲ သက်ရောက်မှုများ ရှိလျှင်ပင် စိုးရိမ်စရာ ဘာမျှမရှိဟု တွေးကြသည်။ ဤအမြင်များသည် တိကျမှန်ကန်သလော။ ယင်းတို့သည် မှားယွင်းပြီး အဓိပ္ပာယ်မဲ့သော အယူအဆများ ဖြစ်ကြသည်။ ငါ့ကို ပြောလော့၊ သင်သည် ဤလူစားမျိုးကို အပြုသဘောဆောင်သော အရာများဟူသည်မှာ အဘယ်အရာဖြစ်ကြောင်း ပြောလျှင်၊ ၎င်းတို့ နားလည်လက်ခံအောင် သင် ပြောနိုင်သလော။ ၎င်းတို့ လက်ခံနိုင်သလော။ (လက်မခံနိုင်ပါ၊ ကျွန်ုပ်တို့ ၎င်းတို့ကို နားလည်လက်ခံအောင် ပြော၍မရနိုင်ပါ။) ၎င်းတို့ကို နားလည်လက်ခံအောင် သင် ပြော၍မရနိုင်သည့် အကြောင်းရင်းတစ်ခုမှာ ၎င်းတို့ကိုယ်တိုင်က အပြုသဘောဆောင်သော ရှုထောင့်များကို လက်မခံနိုင်ခြင်းကြောင့် ဖြစ်သည်။ နောက်တစ်ခုမှာ ကမ္ဘာတစ်ဝှမ်းလုံးရှိ လူသားမျိုးနွယ်အားလုံးသည် ခြွင်းချက်တစ်ဦးတစ်ယောက်မျှမရှိဘဲ ဆိုးယုတ်သော ခေတ်ရေစီးကြောင်းများ၏ လွှမ်းမိုးခြင်းကို ခံနေရခြင်းကြောင့် ဖြစ်သည်။ ၎င်းတို့သည် ဘုရားသခင်ကို ယုံကြည်ကြသော်လည်း၊ ၎င်းတို့၏ စိတ်နှလုံး နက်ရှိုင်းသည့်နေရာတွင်မူ ၎င်းတို့သည် သမ္မာတရားကို လက်မခံကြ၊ အပြုသဘောဆောင်သော အရာများကို လက်မခံကြသည့်အပြင်၊ ဘုရားသခင်၏ နှုတ်ကပတ်တော်များကို အခြေခံ၍ လူများနှင့် အမှုအရာများကို မရှုမြင်ကြပေ။ ထိုအစား ၎င်းတို့သည် စာတန်၏ အမြင်များနှင့် စာတန်၏ ဆိုးယုတ်သော ခေတ်ရေစီးကြောင်းများကို ကိစ္စရပ်တိုင်းအား ရှုမြင်ရန် သို့မဟုတ် သဘောထားရန်အတွက် အခြေခံများအဖြစ် ဆက်လက်အသုံးပြုနေကြဆဲ ဖြစ်သည်။ ထို့ကြောင့် ဤလူစားမျိုးသည် ဘုရားသခင်ကို နှစ်ပေါင်းများစွာ ယုံကြည်ပြီးဖြစ်ကာ တရားဒေသနာအချို့ကို နားထောင်ပြီးသည့်အပြင်၊ ၎င်းတို့၏ တာဝန်ကို ထမ်းဆောင်ပြီးဖြစ်ကာ သမ္မာတရားကို လက်ခံလိုစိတ်ရှိကြောင်း အခိုင်အမာ ပြောဆိုကြသော်လည်း၊ လက်တွေ့ဘဝတွင် အမှုအရာများအပေါ် ၎င်းတို့ စွဲကိုင်ထားသော အမြင်များသည် မပြောင်းမလဲရှိနေပြီး အပျက်သဘောဆောင်သော အရာများနှင့် အပြုသဘောဆောင်သော အရာများအကြား ၎င်းတို့ ရွေးချယ်ရာ၌လည်း ပြောင်းလဲခြင်း မရှိသေးပေ။ ၎င်းတို့ လက်ခံထားသော အပျက်သဘောဆောင်သည့် အရာများသည် ၎င်းတို့၏ စိတ်နှလုံးများထဲတွင် အမြစ်တွယ်ပြီး ဖြစ်နေကာ၊ ဤအရာများက သမ္မာတရားမဟုတ်ကြောင်း ၎င်းတို့ သိလျှင်ပင် ယင်းတို့ကို ဆက်လက်စွဲကိုင်ထားကြလိမ့်ဦးမည် ဖြစ်သည်။ ဤအရာက ၎င်းတို့၏ စိတ်နှလုံးများထဲတွင် အမှန်တကယ် ချစ်သောအရာမှာ အပျက်သဘောဆောင်သော အရာများသာဖြစ်ပြီး သမ္မာတရား မဟုတ်ကြောင်း အလွန်ပင် ဖော်ပြပေသည်။ ၎င်းတို့သည် ဘုရားသခင်၏ နှုတ်ကပတ်တော်များကို ဖတ်ရှုပြီးဖြစ်ကာ သမ္မာတရားနှင့်ပတ်သက်သည့် တရားဒေသနာများကို နားထောင်ပြီးဖြစ်သည့်အပြင်၊ ဤနှုတ်ကပတ်တော်များက မှန်ကန်ပြီး သမ္မာတရားဖြစ်ကြောင်း အယူဝါဒအရ နားလည်ကြသော်လည်း၊ ၎င်းတို့၏ စိတ်နှလုံး နက်ရှိုင်းသောနေရာတွင် အချိန်ကြာမြင့်စွာ လက်ခံခဲ့ပြီးဖြစ်သော အပျက်သဘောဆောင်သည့် အရာများကို စွန့်လွှတ်ရန် ဆန္ဒမရှိကြသေးသည့်အပြင်၊ အပျက်သဘောဆောင်သော အရာများကို ပိုင်းခြားသိမြင်ရန် ဘုရားသခင်၏ နှုတ်ကပတ်တော်များကို အခြေခံအဖြစ် ဘယ်သောအခါမျှ အသုံးမပြုကြပေ။ ၎င်းတို့သည် တိကျသော ကိစ္စရပ်များကို ကြုံတွေ့ရသောအခါ၊ ၎င်းတို့၏ စိတ်နှလုံးထဲတွင် ၎င်းတို့၏ နဂိုမူလ၊ မှားယွင်းသော အမြင်များကို ဖက်တွယ်နေကြဆဲဖြစ်ပြီး အပျက်သဘောဆောင်သော အရာများကို အပြုသဘောဆောင်သော အရာများအဖြစ်လည်းကောင်း၊ မှားယွင်းသော အမြင်များကို မှန်ကန်သော အမြင်များအဖြစ်လည်းကောင်း မှတ်ယူနေကြဆဲ ဖြစ်သည်။ အပြုသဘောဆောင်သော အရာများနှင့် ပတ်သက်၍မူ၊ ယင်းတို့သည် အပျက်သဘောဆောင်သော အရာများဖြစ်ကြောင်း ၎င်းတို့ ပြတ်ပြတ်သားသား မပြောဆိုကြသော်လည်း၊ ၎င်းတို့၏ စိတ်နှလုံးထဲတွင် အပျက်သဘောဆောင်သော အရာများကို စွန့်လွှတ်ပြီး အပြုသဘောဆောင်သော အရာများကို လက်ခံရန် ဆန္ဒမရှိကြပေ။ အဘယ်ကြောင့်ဆိုသော် ၎င်းတို့က “အပြုသဘောဆောင်သည့် အရာများက လွှမ်းမိုးမှု အလွန်နည်းပါးသည့်ပုံပေါ်ပြီး ယင်းတို့ကို လက်ခံသောလူများလည်း အလွန်နည်းပါသည်။ ယင်းတို့သည် လူ့အဖွဲ့အစည်းတွင် အလားအလာမရှိပါ။ ဤသည်မှာ မျက်မြင်အမှန်တရားဖြစ်သည်”ဟု ခံစားရသောကြောင့် ဖြစ်သည်။ ဤအရာက ၎င်းတို့၏ စိတ်နှလုံးများထဲတွင် အမှားနှင့်အမှန်ကို ပိုင်းခြားသိမြင်နိုင်စွမ်း မရှိကြောင်းနှင့် ၎င်းတို့၏ လူ့သဘာဝနှင့်ပတ်သက်၍ ပြဿနာတစ်ခု ရှိနေကြောင်း သက်သေပြသည်။ ဤလူစားမျိုးသည် အပြုသဘောဆောင်သော အရာများကို စိတ်မဝင်စားသည့်အပြင်၊ သဘာဝတရားနှင့် အမျိုးမျိုးသော သက်ရှိများကို အမြဲတမ်း သိမ်းပိုက်စိုးမိုးလိုလျက်၊ သဘာဝတရားကို ပြောင်းလဲရန်၊ သဘာဝလောက၏ ရှင်သန်မှု နိယာမများကို ပြောင်းလဲရန်၊ လူသားဇီဝကမ္မဗေဒဆိုင်ရာ နိယာမများကို ပြောင်းလဲရန်နှင့် လူသားတို့၏ ရှင်သန်မှု နိယာမများကို ပြောင်းလဲရန် မကြာခဏ အလိုရှိကြသည်။ ဥပမာအားဖြင့်၊ ၎င်းတို့သည် အမှုအရာများကို ဤသို့ အမြဲ တွေးဆကြသည်။ “ခွေးများကို ကြောင်များကဲ့သို့ ကြွက်ဖမ်းနိုင်အောင်၊ ခွေးများကို ကြောင်များ၏ မျိုးဗီဇမည်သို့ပေး၍ရမည်နည်း။ ပြီးလျှင် ကြောင်များက ကြွက်လည်းဖမ်းနိုင်၊ ခွေးများကဲ့သို့ အိမ်လည်းစောင့်နိုင်လျှင် သိပ်ကောင်းမည် မဟုတ်လော။” “ကြက်မများက ဥလည်းဥနိုင်၊ တွန်လည်းတွန်နိုင်လျှင်၊ ကြက်မများကိုသာ ကျွန်ုပ်တို့ မွေးဖို့လိုတော့မည်ဖြစ်သည်။ သိပ်ကောင်းလိုက်လေခြင်း။” သင်တို့ မြင်သည့်အတိုင်း၊ ၎င်းတို့သည် မလျော်ကန်သော အရာများကို အမြဲတမ်း တွေးဆနေကြသည်။ အကယ်၍ ထိုသူသည် အမှားနှင့်အမှန်ကို ပိုင်းခြားသိမြင်နိုင်သူတစ်ဦး ဖြစ်ခဲ့ပါမူ၊ ၎င်းတို့က “ဘုရားသခင် ဖန်ဆင်းခဲ့သည့် တိရစ္ဆာန်များ သိပ်ကောင်းပေသည်။ ကြက်ဖများက တွန်နိုင်ပြီး၊ ကြက်မများကို အဖော်လုပ်ပေးနိုင်သည့်အပြင်၊ ကြက်မများက ဥဥနိုင်သည်။ ကြက်ပေါက်လေးများ ပေါက်ဖွားပေးနိုင်သည်။ လူသားများက ကြက်ဖသားရော ကြက်မသားရော စားနိုင်သည်။ ခွေးများက အိမ်ကို ကာကွယ်ပေးနိုင်ပြီး မိမိတို့သခင်များကို အဖော်လုပ်ပေးနိုင်သည်။ ကြောင်များက ကြွက်ဖမ်းနိုင်ပြီး တစ်ခါတရံ မိသားစု၏ မထင်မရှား မိသားစုဝင်များလည်း ဖြစ်လာနိုင်သည်။ ဤအရာများအားလုံး သိပ်ကောင်းသည်၊ တစ်ခုချင်းစီမှာ မိမိ၏ ကိုယ်ပိုင် လုပ်ငန်းဆောင်တာရှိသည်။ ဘုရားသခင် ဖန်ဆင်းထားသည့် အရာအားလုံးက ကောင်းမြတ်သည်”ဟု တွေးကြပေမည်။ သို့သော် အပြုသဘောဆောင်သော အရာများကို နားမလည်နိုင်သူတို့သည် ယင်းတို့ကို ငြင်းပယ်ပြီး ပြစ်တင်ရှုတ်ချရန် စာတန်၏ အမြင်များကို အသုံးပြုကြလိမ့်မည်ဖြစ်ပြီး၊ သိပ္ပံပညာကို အာဏာကိုင်စွဲခွင့်ပေးရန်အလို့ငှာ ၎င်းတို့သည် စာတန်၏ အမြင်များကို အခြေခံ၍ အမျိုးမျိုးသော သက်ရှိများ၏ ရှင်သန်မှု နိယာမများကို ပြောင်းလဲရန်၊ သဘာဝလောက၏ အမျိုးမျိုးသော နိယာမများကို ပြောင်းလဲရန်၊ လူသားတို့၏ ရှင်သန်မှု နိယာမများကိုပင် ပြောင်းလဲရန် ကြိုးပမ်းကြလိမ့်မည်။ ထိုသို့သော လူများတွင် ပုံမှန် လူ့သဘာဝ သေချာပေါက် မရှိပေ။ ၎င်းတို့၏ လူ့သဘာဝသည် အမှားနှင့်အမှန်ကို ပိုင်းခြားသိမြင်နိုင်ခြင်းနှင့်ဆိုင်သည့် ထူးခြားသော လက္ခဏာရပ် ကင်းမဲ့နေသည်။ ထို့အပြင် ၎င်းတို့သည် သဘာဝနိယာမများအတိုင်း မိမိတို့၏ ဘဝများအား မည်သို့ စီမံခန့်ခွဲရမည်ကို မသိကြသည့်အပြင်၊ ရုပ်ပိုင်းဆိုင်ရာ ဘဝ၏ပုံမှန် နိယာမများကို ပြောင်းလဲရန် နည်းပညာဆိုင်ရာ နည်းလမ်းများ သို့မဟုတ် သဘာဝကို တုပပြုလုပ်ထားသော နည်းလမ်းများကို အသုံးပြုလျက် လူ့အလိုဆန္ဒအတိုင်း အမှုအရာများကို လုပ်ဆောင်လိုကြသည်။ ဥပမာအားဖြင့်၊ ပုံမှန်လူတစ်ဦးသည် တစ်နေ့တာ အသက်ရှင်ခြင်းနှင့် အလုပ်လုပ်ခြင်းကို ထိန်းထားနိုင်ရန်နှင့် အင်အားပြည့်ဝနေရန် တစ်နေ့လျှင် ခုနစ်နာရီ သို့မဟုတ် ရှစ်နာရီ အနားယူရန် လိုအပ်သော်လည်း၊ ဤသို့သော လူစားမျိုးကမူ “လူများသည် အိပ်ရန်၊ စားရန် မလိုဘဲ နေ့စဉ် ပုံမှန် အသက်ရှင်ပြီး အလုပ်လုပ်နိုင်လျှင် အလွန်ကောင်းမည် မဟုတ်လော။ ဤအရာကို စွမ်းဆောင်ရရှိရန် မည်သည့် နည်းပညာမြင့် နည်းလမ်းများအား အသုံးပြုနိုင်မည်ကို ကျွန်ုပ် သိချင်မိသည်”ဟု တွေးဆလေသည်။ အဓိပ္ပာယ်မဲ့ပြီး ထူးဆန်းသော အတွေးအခေါ်များက ၎င်းတို့၏ စိတ်ထဲတွင် ပေါ်ပေါက်လာနိုင်သည်။ ၎င်းတို့သည် ပုံမှန် လူ့သဘာဝ၏ ရှုထောင့်မှ ဤနိယာမများအား မည်သို့ လိုက်လျောညီထွေဖြစ်အောင် နေထိုင်ပြီး လိုက်နာရမည်ကိုလည်းကောင်း၊ ထိုသို့ဖြင့် ဇာတိပကတိ၏ အမျိုးမျိုးသော လိုအပ်ချက်များနှင့် ပြဿနာများအား မည်သို့ မှန်ကန်စွာ ကိုင်တွယ်ရမည်ကိုလည်းကောင်း မတွေးဆကြဘဲ၊ ထိုအစား သာမန်လူများနှင့် ကွဲပြားရန်၊ ၎င်းတို့၏ ရုပ်ပိုင်းဆိုင်ရာ ပင်ကိုစိတ်များကို ကျော်လွှားနိုင်ရန်နှင့် ၎င်းတို့ ဇာတိပကတိ၏ ထိန်းချုပ်ခြင်း သို့မဟုတ် ကန့်သတ်ချုပ်ချယ်ခြင်းကို မခံရစေရန် ဤနိယာမများကို အမြဲတမ်း ပြောင်းလဲလိုကြသည်။ ဤသည်မှာ ကြောက်လန့်ဖွယ်ဖြစ်သည် မဟုတ်လော။ ၎င်းတို့သည် လူအုပ်ကြားထဲမှ အမြဲ ထင်ပေါ်လိုကြသည်။ အခြားသူများက တစ်နေ့ ရှစ်နာရီ အိပ်သော်လည်း ၎င်းတို့ကမူ ဆယ်မိနစ်၊ သို့မဟုတ် အများဆုံး တစ်နာရီ၊ နှစ်နာရီသာ အိပ်လိုပြီး တစ်နေ့တာအတွက် လုံလောက်သော အင်အားကို ရှိနေဆဲဖြစ်လိုကြသည်။ ဤသည်မှာ ပုံမှန်လူများ မစွမ်းဆောင်နိုင်သော အရာတစ်ခု ဖြစ်သည်။ လူ့ခန္ဓာကိုယ်၏ သဘာဝနိယာမများသည် ဘုရားသခင်၏ ပြဋ္ဌာန်းချက်အောက်တွင် ပုံသေ သတ်မှတ်ပြီးဖြစ်နေသည်။ လူတစ်ဦး၏ အစာစားချင်စိတ်သည် အဘယ်မျှကြီးမားသည်၊ ၎င်းတို့၏ အတွင်းကလီစာများ၏ လုပ်ဆောင်မှု နိယာမများက မည်သို့ဖြစ်သည်၊ လူတစ်ဦးတွင် အင်အား အဘယ်မျှရှိသည်၊ တစ်နေ့လျှင် အလုပ် အဘယ်မျှ လုပ်နိုင်သည်၊ ၎င်းတို့၏ ဦးနှောက်သည် တစ်နေ့လျှင် အမှုအရာ မည်မျှ စဉ်းစားနိုင်သည်ဟူသည်နှင့် ထိုအမှုအရာများအကြောင်းကို အချိန်မည်မျှကြာအောင် စဉ်းစားနိုင်သည်ဟူသည့် ဤအရာအားလုံးသည် ပုံသေ သတ်မှတ်ပြီးဖြစ်၏။ လူ့သဘာဝ၏ ရှုထောင့်အမြင်မှကြည့်လျှင် ဤနိယာမများသည် အမှန်တကယ်တွင် ပုံမှန်ဖြစ်ပြီး အပြုသဘောဆောင်သော အရာများ ဖြစ်ကြသည်။ အချို့သော နိယာမများကို လိုက်နာခြင်းဖြင့်သာ လူသားမျိုးနွယ်သည် တစ်နှစ်ပြီးတစ်နှစ် ဆက်လက်အသက်ရှင်နိုင်သည်၊ မျိုးဆက်တစ်ဆက်ပြီးတစ်ဆက် ဆက်လက်၍ မျိုးပွားပြီး အသက်ရှင်နေနိုင်သည့်အပြင်၊ လူသားမျိုးနွယ်၏ ရှင်သန်မှုက ဆက်လက်တည်တံ့နိုင်ပေသည်။ သက်ရှိသတ္တဝါအားလုံးအတွက်လည်း ဤသို့ပင် ဖြစ်သည်။ အချို့သော သဘာဝနိယာမများနှင့် ဘဝ၏ အချို့သော နိယာမများကို လိုက်နာခြင်းဖြင့်သာလည်းကောင်း၊ အနားယူချိန်နှင့် လှုပ်ရှားချိန် နှစ်မျိုးစလုံး ရှိခြင်းဖြင့်သာလည်းကောင်း ၎င်းတို့၏ အသက် ဆက်လက်ရှင်သန်ခြင်းကို ထိန်းသိမ်းထားနိုင်ပေသည်။ အကယ်၍ တစ်စုံတစ်ဦးသည် သဘာဝနိယာမများကို ချိုးဖောက်ပါက၊ ၎င်းတို့ အသက်၏ ဆက်လက်ရှင်သန်ခြင်းက ပြဿနာများနှင့် ကြုံတွေ့ရမည်ဖြစ်ပြီး ၎င်းတို့ အသက်ရှည်ရှည် နေကောင်းမနေရနိုင်ပေ။ အကယ်၍ လူတစ်ဦး၏ ရုပ်ပိုင်းဆိုင်ရာ အခြေအနေတွင် ပြဿနာတစ်ခု ပေါ်ပေါက်လာပါက၊ ၎င်းတို့၏ ပုံမှန်ဘဝ၊ ၎င်းတို့၏ နေ့စဉ်စားသောက်မှုများအပြင် ၎င်းတို့၏ ပုံမှန်စဉ်းစားတွေးခေါ်မှု၊ ပုံမှန်ဝေဖန်ပိုင်းခြားနိုင်စွမ်းနှင့် တစ်နေ့တာအတွင်း ၎င်းတို့ လုပ်နိုင်သော အလုပ်ပမာဏ စသည်တို့အားလုံးက သက်ရောက်မှုရှိပေလိမ့်မည်။ သို့ဖြစ်၍ လူသားမျိုးနွယ်၏ သဘာဝနိယာမများသည် လူသားမျိုးနွယ်၏ ပုံမှန်ရှင်သန်မှုကို ကာကွယ်ပေးသည်။ ဤအရာများသည် အပြုသဘောဆောင်သော အရာများဖြစ်ပြီး လူတို့က မထီမဲ့မြင် မပြုသင့်သည့်အပြင်၊ ယင်းတို့အပေါ် အလွန်အမင်း မနှစ်မြို့မှုကိုလည်း မခံစားသင့်ပေ။ ထို့ထက်၊ ၎င်းတို့သည် ထိုအရာများကို လေးစားပြီး လိုက်နာသင့်သည်။ စာတန်နှင့်ဆိုင်သော ထိုလူသားမဟုတ်သည့် သူများသည် “ဤသဘာဝနိယာမများကို လူသားမျိုးနွယ် လိုက်နာခြင်းက လူများကို လုံးဝ စွမ်းဆောင်နိုင်ခြင်းမရှိသည့်ပုံ၊ အသုံးမကျသည့်ပုံ ပေါက်စေသည်။ ကျွန်ုပ်တို့သည် ဤသဘာဝနိယာမများ၏ ကန့်သတ်ခြင်းကို အမြဲခံနေရသည်။ သင်ပင်ပန်းသည့်အခါ အိပ်ရမည်၊ ဆာလောင်သည့်အခါ စားရမည်ဖြစ်သည်။ ဤအရာများကို မလုပ်လျှင် စိတ်က ပြောသည့်အတိုင်း လိုက်မလုပ်နိုင်တော့ပေ၊ လက်များက တုန်လာသည်၊ နှလုံးက ခုန်လာသည်၊ ခြေထောက်များက အားနည်းပြီး မြဲမြံစွာ မရပ်နိုင်တော့ပေ။ ဤသည်မှာ အလွန်ပင် ဒုက္ခများလှသည်။ ဆေးတစ်မျိုးမျိုး သောက်လိုက်ရုံဖြင့် ပုံမှန် အသက်ရှင်နိုင်လျှင်၊ သို့မဟုတ် ရက်ပေါင်းများစွာ အနားယူခြင်းမရှိဘဲ အင်အားပြည့်ဝနေနိုင်လျှင်၊ ယင်းက သင့်ကို စက်ရုပ်တစ်ရုပ်ထက်ပင် ပို၍ မယုံနိုင်စရာ ဖြစ်စေမည်ကို စိတ်ကူးကြည့်ပါ။ သို့မဟုတ် ဆာလောင်သည့်အခါ အပ်စိုက်မှတ်တစ်ခုကို ဖိလိုက်ရုံဖြင့် ချက်ချင်း မဆာဘဲနေနိုင်သည်ဟု စိတ်ကူးကြည့်လော့။ သို့မဟုတ် ရက်ပေါင်းများစွာ အစာမစားဘဲနေပြီး အဆင်ပြေနေသေးသည့်အပြင်၊ ခန္ဓာက မပိန်လှီသွားဘဲ၊ အင်အားက မလျော့ကျဘဲ၊ ခန္ဓာကိုယ်က ပုံမှန်နှင့် ကျန်းမာနေဆဲဖြစ်သည်ဟု စိတ်ကူးကြည့်ပါ။ ထိုသို့ဆိုလျှင် အလွန်ကောင်းပေမည်”ဟု အမြဲတမ်း ခံစားကြရသည်။ လူတို့သည် ဤသဘာဝနိယာမများကို အမြဲ ပြောင်းလဲလိုကြသည်။ ဤသည်မှာ အပြုသဘောဆောင်သော အရာများကို ငြင်းပယ်ခြင်းနှင့် ဆန့်ကျင်ခြင်း မဟုတ်လော။ (ဟုတ်ပါသည်။) ဤအပြုသဘောဆောင်သော အရာများ၏ တည်ရှိမှုသည် လူသားမျိုးနွယ်၏ ပုံမှန်တည်ရှိမှုကို သေချာစေပြီး လူသားမျိုးနွယ်၏ ပုံမှန်ဘဝကို ထိန်းသိမ်းပေးသည်။ ထို့ကြောင့် လူတို့သည် ထိုအရာများကို လိုက်နာသင့်သည်သာမက ချင့်ချင့်ချိန်ချိန် သဘောထားသင့်သည်။ ၎င်းတို့သည် ထိုအရာများကို ဆန့်ကျင်သင့်ဖို့ မဆိုထားနှင့်၊ ဆန့်ကျင်ခြင်း၊ ဖိနှိပ်ခြင်း သို့မဟုတ် ထိုအရာများင့် ဆန့်ကျင်ဘက်ပြုခြင်း မလုပ်သင့်ပေ။ အခြားတစ်ဖက်တွင်မူ၊ လူသားမျိုးနွယ်၏ သဘာဝနိယာမများကို ကျော်လွန်သော အရာများ၊ လူတို့၏ စိတ်ကူးစိတ်သန်းများ၊ ၎င်းတို့၏ မူမမှန်သော အတွေးအခေါ်အချို့နှင့် ထူးကဲသော အပြုအမူများသည် အပျက်သဘောဆောင်သော အရာများချည်းသာ ဖြစ်ကြသည်။ ယင်းတို့အားလုံးသည် အပျက်သဘောဆောင်သော အရာများ ဖြစ်သည့်အတွက်၊ လူတို့သည် ယင်းတို့ကို ပိုင်းခြားသိမြင်ပြီး ငြင်းပယ်သင့်သည်၊ လက်မခံသင့်ပေ။ သင်သည် အပြုသဘောဆောင်သော အရာများနှင့် အပျက်သဘောဆောင်သော အရာများအပေါ် ပိုင်းခြားသိမြင်မှုရှိပြီး၊ သင် အသက်ရှင်နေစဉ်တွင် ယင်းတို့ကို မှန်ကန်စွာ သဘောထားနိုင်ကာ ချင့်ချင့်ချိန်ချိန် ကိုင်တွယ်နိုင်ပါက၊ သင်၏ လူ့သဘာဝက ပုံမှန်ဖြစ်ပေသည်။ သင့်အပေါ် ဤအပြုသဘောဆောင်သော အရာများ၏ အပြုသဘောဆောင်သော သက်ရောက်မှုများကို မကြာခဏ သင် မခံစားရသည့်အပြင်၊ ယင်းတို့ကို မကြာခဏ ဆန့်ကျင်လိုပြီး ယင်းတို့နှင့် ဆန့်ကျင်သော အမှုအရာများကို လုပ်ဆောင်လိုကာ၊ အချို့သော အပျက်သဘောဆောင်သည့် ပြောဆိုချက်များနှင့် အမြင်များကို အခြေခံ၍ အမှုအရာများ၏ ဓမ္မဓိဋ္ဌာန်ကျသော နိယာမများကို ချိုးဖောက်လျက် ဤအပြုသဘောဆောင်သော အရာများကို ပြောင်းလဲရန် ကြိုးစားပါက၊ သင်၏ လူ့သဘာဝအရ သင်သည် အမှားနှင့်အမှန်ကို နားလည်နိုင်စွမ်း မရှိကြောင်း ထိုအရာကသက်သေပြပေသည်။ ဤသို့ မိတ်သဟာယဖွဲ့ပြီးသည့်နောက်၊ ယခု သင် နားလည်ပြီလော။ (နားလည်ပါပြီ။)

အကယ်၍ လူတစ်ဦးတွင် လူ့သဘာဝရှိပါက၊ အပြုသဘောဆောင်သော အရာများဟူသည် အဘယ်အရာဖြစ်သည်ကို နားလည်သင့်ပြီး လက်ခံသင့်သည် မဟုတ်လော။ (ဟုတ်ပါသည်။) ပြီးလျှင် ၎င်းတို့သည် အပျက်သဘောဆောင်သည့်အရာများကိုလည်း ပိုင်ခြားသိမြင်နိုင်သင့်သည့်အပြင်၊ တစ်ချိန်တည်းမှာပင် ၎င်းတို့၏ စိတ်နှလုံးထဲမှ ယင်းတို့ကို စက်ဆုပ်ရွံရှာပြီး ငြင်းပယ်နိုင်သင့်သည် မဟုတ်လော။ (ဟုတ်ပါသည်။) သို့ဆိုလျှင် လူတို့က အပြုသဘောဆောင်သော အရာများအဖြစ် သို့မဟုတ် အပျက်သဘောဆောင်သော အရာများအဖြစ် မခွဲခြားနိုင်သည့် အခြားအရာများမှာ အဘယ်အရာများ ဖြစ်သနည်း။ ဘုရားသခင်ကို ယုံကြည်ခြင်းနှင့် နောက်သို့လိုက်ခြင်းသည် အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပြုသဘောဆောင်သော အရာ ဖြစ်ပါသည်။) လူ၏ ကံကြမ္မာအပေါ် ဘုရားသခင်၏ အချုပ်အခြာအာဏာသည် အပြုသဘောဆောင်သော အရာလော သို့မဟုတ် အပျက်သဘောဆောင်သော အရာလော။ (အပြုသဘောဆောင်သော အရာ ဖြစ်ပါသည်။) လူ၏ ကံကြမ္မာအပေါ် ဘုရားသခင်၏ အချုပ်အခြာအာဏာသည် အပြုသဘောဆောင်သော အရာတစ်ခု ဖြစ်သည်။ သို့ဆိုလျှင် ဘုရားသခင်၏ အချုပ်အခြာအာဏာနှင့် စီစဉ်ညွှန်ကြားမှုများကို ဖောက်ပြန်ပျက်စီးသော လူသားမျိုးနွယ်က ဆန့်ကျင်ခြင်းအား ကျောထောက်နောက်ခံပြုထားသည့် အဓိကရှုထောင့်များမှာ အဘယ်အရာများ ဖြစ်သနည်း။ (လူတို့က လူတစ်ဦး၏ ကံကြမ္မာသည် ထိုသူ၏ လက်ထဲတွင် ရှိပြီး၊ အသိပညာက လူတစ်ဦး၏ ကံကြမ္မာကို ပြောင်းလဲစေနိုင်သည်ဟု ယုံကြည်ကြပါသည်။) ဤအရာများသည် ဘုရားသခင်ကို ဖောက်ပြန်ပျက်စီးသော လူသားမျိုးနွယ်က ငြင်းပယ်ခြင်းနှင့် ဘုရားသခင်ကို ဆန့်ကျင်ခြင်းတို့အား ကျောထောက်နောက်ခံပြုထားသော ရှုထောင့်များ ဖြစ်သည်။ ယင်းတို့သည် အမှန်တွင် အပျက်သဘောဆောင်သော အရာများ ဖြစ်ကြသည်။ သို့ဆိုလျှင် လူ၏ ကံကြမ္မာအပေါ် ဘုရားသခင်က အချုပ်အခြာအာဏာကိုင်စွဲသည့် အကြောင်းကိစ္စကို လူတို့ မည်သို့ နားလည်သဘောပေါက်သင့်သနည်း။ အချို့လူများသည် အယူဝါဒအရ “ဘုရားသခင်သည် လူ၏ ကံကြမ္မာအပေါ် အချုပ်အခြာအာဏာရှိသည်”ဟူသော ပြောဆိုချက် မှန်ကန်ပြီး အပြုသဘောဆောင်သော အရာတစ်ခုဖြစ်ကြောင်း အသိအမှတ်ပြုကြသော်လည်း၊ ၎င်းတို့၏ စိတ်နှလုံးထဲတွင်မူ လူ၏ ကိုယ်ပိုင်ကြိုးပမ်းမှုများက သူ၏ ကံကြမ္မာကို ပြောင်းလဲနိုင်သည်၊ သူ၏ ကံကြမ္မာသည် သူ၏ လက်ထဲတွင် ရှိနိုင်သည့်အပြင်၊ သူသာလျှင် အဆုံးအဖြတ်ပေးပိုင်ခွင့်ရှိသည်ဟု ဆက်လက်ယုံကြည်နေကြဆဲ ဖြစ်သည်။ ၎င်းတို့သည် ကြိုးစားလေ့လာခြင်းမရှိသည့်အပြင် မိမိတို့ကိုယ်ကို လုံ့လဝီရိယ မစိုက်ထုတ်ပါက ကောင်းမွန်သော တက္ကသိုလ်တစ်ခုသို့ ဝင်ခွင့်ရလိမ့်မည်မဟုတ်သည့်အပြင်၊ ကောင်းမွန်သောအလုပ်၊ ကောင်းမွန်သော ရှေ့ရေး သို့မဟုတ် ကောင်းမွန်သော အသက်ရှင်နေထိုင်မှု အခြေအနေများ ရှိလိမ့်မည်မဟုတ်ဟု ခံစားကြရသည်။ ဤလူစားမျိုးများသည် အမှားနှင့်အမှန်ကို ပိုင်းခြားသိမြင်နိုင်သူများ ဖြစ်သလော။ (မဟုတ်ပါ။) အနှစ်နှစ်ဆယ် သို့မဟုတ် သုံးဆယ်ကြာ အသက်ရှင်ပြီးသည့်နောက်၊ ၎င်းတို့က၊ “ဘုရားသခင်သည် လူ၏ ကံကြမ္မာအပေါ် အချုပ်အခြာအာဏာရှိသည်” ဟူသော ပြောဆိုချက်က မည်သည့်အရာဆိုလိသည်ကို မသိကြသေးပေ။ ၎င်းတို့သည် ဘုရားသခင်ကို နှစ်ပေါင်းများစွာ ယုံကြည်ကြပြီးဖြစ်သော်လည်း ၎င်းတို့၏ ကံကြမ္မာသည် ၎င်းတို့၏ လက်ထဲတွင် ရှိသည်၊ အသိပညာက ၎င်းတို့၏ ကံကြမ္မာကို ပြောင်းလဲစေနိုင်သည့်အပြင်၊ ၎င်းတို့အနေဖြင့် ကောင်းမွန်သော ပန်းတိုင်တစ်ခု လိုချင်ပြီး ကောင်းမွန်သောအရာများကို ခံစားကာ ကောင်းမွန်သော ဘဝတစ်ခုကို နေထိုင်လိုပါက ၎င်းတို့၏ ကိုယ်ပိုင်ကြိုးပမ်းမှုအပေါ် အားကိုးရမည်ဟု ဆက်လက်တွေးထင်နေကြဆဲ ဖြစ်သည်။ ဘာသာမဲ့များက “အနိုင်ရလိုလျှင် အရာအားလုံးကို ပုံအောရမည်”ဟု ပြောဆိုသကဲ့သို့ပင် ဖြစ်သည်။ ဤသည်မှာ အမှားနှင့်အမှန်ကို ပိုင်းခြားသိမြင်နိုင်သော လူစားမျိုးဖြစ်သလော။ (မဟုတ်ပါ။) အမှားနှင့်အမှန်ကို မပိုင်းခြားနိုင်သော လူတစ်ဦးသည် လူသားတစ်ဦး ဖြစ်သလော။ (မဟုတ်ပါ။) ၎င်းတို့သည် ကောင်းမွန်သော ဘဝတစ်ခုကို မွေ့လျော်ခံစားကြပြီး ကောင်းမွန်စွာ စားသောက်ကာ ဝတ်စားကြသည့်အပြင်၊ လူ့အဖွဲ့အစည်းရှိ အခြားသူများ၏ အထင်ကြီးလေးစားမှုကို ခံကြရပြီး၊ ၎င်းတို့ ယခု ရရှိထားသော ဘဝသည် ၎င်းတို့၏ ကိုယ်ပိုင်ကြိုးစားအားထုတ်မှုကြောင့်သာ ဖြစ်သည်ဟု ခံစားကြသည်။ သို့ဖြစ်၍ ၎င်းတို့က၊ “အနိုင်ရလိုလျှင် အရာအားလုံးကို ပုံအောရမည်၊ လူ၏ ကံကြမ္မာသည် မိမိကိုယ်တိုင်အပေါ် မူတည်သည်၊ အခြားသူများအပေါ် မမူတည်” ဟူသော ပြောဆိုချက်က စစ်မှန်ပြီး မှန်ကန်သော အမြင်တစ်ခုဖြစ်ကြောင်း ယုံကြည်ကြသည်။ ဤသည်မှာ ပုံမှန် လူ့သဘာဝ၏ သရုပ်သကန်တစ်ခုလော။ (မဟုတ်ပါ။) လူတို့သည် အသိပညာ မဆည်းပူးမီတွင် ဤအရာများကို နားမလည်ကြသော်လည်း၊ အသိပညာအချို့ကို သဘောပေါက်သည်နှင့်တစ်ပြိုင်နက် ၎င်းတို့က “ဘုရားသခင်သည် လူသားမျိုးနွယ်၏ ကံကြမ္မာအပေါ် အချုပ်အခြာအာဏာရှိသည်” ဟူသော ပြောဆိုချက်ကို လုံးဝ ငြင်းပယ်ကြပြီး၊ ထိုအစား “လူတစ်ဦး၏ ကံကြမ္မာသည် ထိုသူ၏ လက်ထဲတွင် ရှိ၏၊ လူတစ်ဦးသည် မိမိကိုယ်တိုင်၏ လက်များဖြင့် ပျော်ရွှင်မှုကို ဖန်တီးနိုင်သည်” ဟု တွေးထင်ကြသည်။ ဤလူစားမျိုးသည် အမှားနှင့်အမှန်ကို ပိုင်းခြားသိမြင်နိုင်သူတစ်ဦး ဖြစ်သလော။ (မဟုတ်ပါ။) သို့ဆိုလျှင် ထိုသို့သော လူတစ်ဦးသည် မည်သည့် သတ္တဝါမျိုး ဖြစ်သနည်း။ ၎င်းတို့သည် လူ့သဘာဝ ကင်းမဲ့နေသည် မဟုတ်လော။ (ဟုတ်ပါသည်။) ထိုသို့သော လူတစ်ဦးသည် အသိစိတ်နှင့် ဆင်ခြင်တုံတရားမရှိသူတစ်ဦးဖြစ်ပြီး၊ အသိစိတ်နှင့် ဆင်ခြင်တုံတရားမရှိသူတစ်ဦးသည် အမှားနှင့်အမှန်ကို မပိုင်းခြားနိုင်ပေ။ ၎င်းတို့သည် ဘဝ၏ အဖြစ်မှန်များကို အမှန်တကယ် တွေ့ကြုံပြီးသည့်နောက်တွင်ပင်၊ အပြုသဘောဆောင်သော အရာများက အဘယ်အရာဖြစ်သည်ကို အမှန်တကယ် နားမလည်နိုင်ကြသေးသည့်အပြင်၊ အပြုသဘောဆောင်သော အရာများ၏ အနှစ်သာရက အဘယ်အရာဖြစ်သည်ကိုလည်း အမှန်တကယ် သဘောမပေါက်နိုင်ကြသေးပေ။ ဤအရာက ၎င်းတို့အနေဖြင့် အမှားနှင့်အမှန်ကို မပိုင်းခြားနိုင်ကြောင်း ပြသည်။ ထိုသို့သော လူတစ်ဦးတွင် လူ့သဘာဝ မရှိပေ။ ၎င်းတို့သည် လုံးဝ လူသားတစ်ဦး မဟုတ်ပေ။ “အရာခပ်သိမ်း၏ နိယာမများသည် ဘုရားသခင်ထံမှ လာသည်၊ ထိုအရာများသည် အပြုသဘောဆောင်သော အရာများဖြစ်သည်၊ ယင်းတို့သည် လူသားမျိုးနွယ်အတွက် အကျိုးရှိသည်၊ လူသားမျိုးနွယ်က လိုက်နာသင့်သောအရာဖြစ်ပြီး၊ လူသားမျိုးနွယ်က တမ်းတပြီး လိုက်စားသင့်သောအရာလည်း ဖြစ်သည်” ဟု ဆိုလျက် အယူဝါဒကို ပါးစပ်ဖျားတွင် ရွတ်ဆိုနိုင်သော အချို့လူများလည်း ရှိသော်လည်း၊ နည်းပညာမြင့် သတင်းအချက်အလက်အချို့နှင့် နည်းပညာမြင့် ပစ္စည်းများနှင့် ထိတွေ့ပြီးနောက် ဤကိစ္စရပ်များအပေါ် ၎င်းတို့၏ အမြင်များက ပြောင်းလဲသွားသည်။ မည်သည့် အမြင်အမျိုးအစားများအဖြစ်သို့ ပြောင်းလဲသွားသနည်း။ ၎င်းတို့က “ဘုရားသခင်ကို ယုံကြည်သူများဖြစ်သည့် ကျွန်ုပ်တို့သည် အသက်ရှင်ခြင်း၏ နိယာမများ၊ အရာခပ်သိမ်း၏ နိယာမများ၊ အရာခပ်သိမ်း၏ ရှင်သန်မှု နိယာမများအကြောင်း အမြဲပြောဆိုနေကြပြီး၊ ဤအရာများက အပြုသဘောဆောင်သော အရာများဖြစ်သည်ဟု ထင်နေကြသည်။ ယင်းမှာ အလွန်ခေတ်နောက်ကျလှသည်။ ဤသည်မှာ ရေတွင်းထဲက ဖားသူငယ်လိုပင်ဖြစ်လျက် အသိပညာကင်းမဲ့ခြင်းကို ပြသည်။ နည်းပညာသည် ယခု အလွန်တိုးတက်နေသည်။ နည်းပညာထုတ်ကုန်များက သင့်အတွက် လုပ်ဆောင်ပေးနိုင်သည်နှင့်အမျှ၊ သင်ကိုယ်တိုင် လုပ်ဆောင်ရန်မလိုသော အမှုအရာများစွာရှိသည်။ ထိုအရာကို တိုးတက်သည်ဟု ခေါ်သည်။ ကြည့်ပါ၊ ကားအချို့သည် သူ့ဘာသာသူ မောင်းနှင်နိုင်သည်။ သင် ကားထဲသို့ ဝင်ပြီးသည့်နောက်၊ သွားမည့်နေရာကို သတ်မှတ်လိုက်ပြီး၊ ထို့နောက်တွင် စကားတစ်ခွန်း ပြောလိုက်ရုံဖြင့် ကားက စတင်မောင်းနှင်သွားသည်။ ယင်းမှာ အမှန်တကယ် နည်းပညာမြင့်ဖြစ်သည်၊ အလွန်ချီးကျူးဖွယ်ကောင်းလှသည်။ လူသားမျိုးနွယ်သည် အဆင့်မြင့်နည်းပညာကို တိုးထက်ဖြစ်ထွန်းစေပြီးဖြစ်ကာ၊ ကျွန်ုပ်တို့သည် မည်သည့်အရာကိုမျှ မလုပ်ဆောင်ဘဲ အရာခပ်သိမ်း၏ ဆရာသခင်များ ဖြစ်လာကြပြီဖြစ်သည်။ သို့ဖြစ်၍ သိပ္ပံပညာတစ်ခုတည်းသာ အကြွင်းမဲ့ အမှန်တရားဖြစ်သည်။ ပညာရေးနှင့် အသိပညာ ကင်းမဲ့ပြီး သိပ္ပံပညာကို နားမလည်သော လူများသည် ခေတ်နောက်ကျပြီး ပညာဗဟုသုတမကြွယ်ဝသူများ ဖြစ်သည်”ဟု ဆိုကြသည်။ ၎င်းတို့၏ အမြင် ပြောင်းလဲသွားပြီဖြစ်သည် မဟုတ်လော။ ၎င်းတို့၏ စိတ်နှလုံးထဲတွင် ၎င်းတို့သည် အပြုသဘောဆောင်သော အရာများနှင့် အပျက်သဘောဆောင်သော အရာများအကြား ခြားနားချက်ကို မပိုင်းခြားကြသေးပေ။ လေကြောင်းပြတိုက်တစ်ခုသို့ သွားရောက်လည်ပတ်ပြီးနောက် “ဝိုး၊ မျက်စိပွင့်နားပွင့် ဖြစ်လိုက်လေခြင်း၊ သိပ္ပံပညာက တိုးတက်လိုက်လေခြင်းပါတကား။ ကျွန်ုပ်တို့ သာမန်လူများက ထိုနေရာတွင် ဉာဏ်မမီနိုင်ဟု ခံစားရသည်။ ထိုအရာထဲမှ တစ်ခုကိုမျှ ကျွန်ုပ်တို့ နားမလည်နိုင်ပါ။ သိပ္ပံပညာက ယခုမည်သည့်အတိုင်းအတာထိ တိုးတက်ပြီးဖြစ်သည်ကို သင်တို့ စိတ်ကူး၍ပင်မရနိုင်ပေ။ ကျွန်ုပ်တို့က ထိုခေတ်မီသော၊ အဆင့်မြင့်သော နည်းပညာပစ္စည်းများနှင့် ထိတွေ့ဖူးခြင်းပင် မရှိပါ။ ပြီးလျှင် ကျွန်ုပ်တို့က ဘုရားသခင်ကို ယုံကြည်နေကြဆဲဖြစ်ပြီး သဘာဝစည်းမျဉ်းများနှင့် နိယာမများအကြောင်း ပြောနေကြဆဲဖြစ်သည်။ ကျွန်ုပ်တို့ ခေတ်နောက်ကျလိုက်လေခြင်းပါတကား”ဟု အံ့အားသင့်စွာပြောသည့် လူအချို့လည်း ရှိသည်။ ခေတ်သစ်လူ့အဖွဲ့အစည်း၏ ဤထူးချွန်ပြောင်မြောက်သော အရာများကို မြင်တွေ့ပြီးနောက်၊ ထိုသို့သော လူများသည် ၎င်းတို့ ယခင်က နားလည်ခဲ့သော အပြုသဘောဆောင်သည့် အရာများ၊ အပျက်သဘောဆောင်သော အရာများနှင့်ပတ်သက်သည့် သီအိုရီများကို ၎င်းတို့၏ စိတ်နှလုံး နက်ရှိုင်းသောနေရာမှနေ၍ လုံးဝ ငြင်းပယ်လိုက်ကြသည်။ ၎င်းတို့သည် အပြုသဘောဆောင်သော အရာများက အဘယ်အရာဖြစ်သည်ကို ပို၍ ရှင်းလင်းစွာ မဆုံးဖြတ်ကြဘဲ၊ ထိုအစား အပြုသဘောဆောင်သော အရာများသည် ခေတ်နောက်ကျပြီး ခေတ်မီနည်းပညာနှင့် ခေတ်မီလူသားတို့၏ ဖွံ့ဖြိုးတိုးတက်မှုနောက်တွင် နောက်ကျကျန်နေရစ်သည်ဟု ယုံကြည်ကြသည်။ ထိုမျှသာမက၊ ၎င်းတို့သည် ခေတ်မီသော၊ အဆင့်မြင့်သော နည်းပညာကို တီထွင်သူများထဲမှ တစ်ဦးဖြစ်လာရန် မျှော်လင့်လျက် ဤအပျက်သဘောဆောင်သော အရာများကို အထူးသဖြင့် လက်ခံပြီး တမ်းတကြသည်။ ဤလူစားမျိုးသည် အမှားနှင့်အမှန်ကို နားလည်နိုင်သူတစ်ဦး ဖြစ်သလော။ (မဟုတ်ပါ။) အမှားနှင့်အမှန်ကို ပိုင်းခြားသိမြင်နိုင်ခြင်းသည် လူ့သဘာဝ၏ ထူးခြားသော လက္ခဏာရပ်တစ်ခုဖြစ်သည်ကို ထောက်ရှုသော်၊ ထိုအရာသည် နောက်ပိုင်းတွင် ဖြစ်ပေါ်လာသော အရာမဟုတ်ဘဲ လူ့သဘာဝတွင် မွေးရာပါနှင့် ပင်ကိုဖြစ်သော အရာတစ်ခုဖြစ်သည့်သဘော ဖြစ်သည်။ အမှားနှင့်အမှန်ကို ပိုင်းခြားသိမြင်နိုင်ခြင်းဟူသည့် လူ့သဘာဝ၏ ဤထူးခြားသော လက္ခဏာရပ်သည် အချိန်ကုန်လွန်ခြင်း၊ သို့မဟုတ် ပထဝီဝင်ဆိုင်ရာ ပတ်ဝန်းကျင် သို့မဟုတ် လူများ၊ အဖြစ်အပျက်များနှင့် အမှုအရာများ ပြောင်းလဲခြင်းနှင့်အတူ ပြောင်းလဲလိမ့်မည် မဟုတ်ပေ။ မည်သူကမျှ ထိုအရာကို မပြောင်းလဲနိုင်သည့်အပြင်၊ မည်သည့်အရာကမျှ ထိုအရာကို ပြောင်းလဲခြင်း သို့မဟုတ် ဖယ်ရှားခြင်း မပြုနိုင်ပေ။ အမှားနှင့်အမှန်ကို ပိုင်းခြားသိမြင်နိုင်သော လူတို့၏ စိတ်နှလုံး နက်ရှိုင်းရာနေရာတွင်၊ အပြုသဘောဆောင်သော အရာများက ၎င်းတို့ အမြဲတမ်း တမ်းတသောအရာဖြစ်ပြီး၊ အပျက်သဘောဆောင်သော အရာများမှာမူ ၎င်းတို့ အမြဲ အလွန်အမင်း မနှစ်မြို့သည့်အပြင် စက်ဆုပ်မုန်းတီးသောအရာဖြစ်ကာ ၎င်းတို့၏ လူ့သဘာဝက လိုအပ်သောအရာ မဟုတ်ပေ။ ၎င်းတို့ အဘယ်အရာကို လိုအပ်သနည်း။ ၎င်းတို့သည် ရုပ်ပိုင်းဆိုင်ရာ ဘဝ၏ နိယာမများနှင့် ၎င်းတို့၏ ရုပ်ပိုင်းဆိုင်ရာ ရှင်သန်မှုအတွက် အကျိုးရှိသောအရာများ၊ သဘာဝကျသောအရာများ၊ လူတို့ကို အေးချမ်းစေပြီး တည်ငြိမ်သည်ဟု ခံစားရစေသောအရာများနှင့် ပုံမှန် လူ့သဘာဝ၏ အသိစိတ်နှင့် ဆင်ခြင်တုံတရားတို့၏ လိုအပ်ချက်များနှင့် ကိုက်ညီသောအရာများကို လိုအပ်ပေသည်။ ခမ်းနားကြီးကျယ်သည့်၊ အဆင့်မြင့်ပြီး အထင်ကြီးစရာကောင်းသော အရာများကို မလိုအပ်ပေ။ သင် မြင်သည့်အတိုင်း၊ လူတစ်ဦး မည်သို့ ကျင့်ကြံပြုမူသည်ဟူသည်နှင့် ပတ်သက်လာသည့်အခါ၊ အချို့လူများသည် ၎င်းတို့၏ ဘဝများကို အနည်းငယ် ပိုရိုးရှင်းပြီး ပို၍ ခပ်လျိုလျိုဖြစ်စေချင်ကြသည်။ ၎င်းတို့သည် ထူးခြားသော ဘဝများကို မနှစ်သက်ကြဘဲ၊ တည်ငြိမ်မှုကိုသာ ကြိုက်နှစ်သက်ကြပြီး အေးချမ်းမှုနှင့် ပျော်ရွှင်မှု ရှိရန်၊ ၎င်းတို့၏ ဘဝများကို အလွန်တိတ်ဆိတ်ငြိမ်သက်စွာ ဖြတ်သန်းလိုကြသည်။ သို့သော် အခြားလူများမှာမူ ဤသည်ကို မနှစ်သက်ကြပေ။ ၎င်းတို့သည် ထူးခြားသော ဘဝများကို ကြိုက်နှစ်သက်ကြသည်၊ ၎င်းတို့သည် ခမ်းနားကြီးကျယ်သည့်၊ အဆင့်မြင့်ပြီး အထင်ကြီးစရာကောင်းသော အရာများကို ကြိုက်နှစ်သက်ကြသည်၊ ၎င်းတို့သည် အစွမ်းပြရန် နှစ်သက်ကြသည်၊ ၎င်းတို့သည် လူအုပ်ကြားမှ ထင်ပေါ်ရန်နှင့် ကျော်ကြားရန် နှစ်သက်ကြပြီး၊ ရိုးရှင်းမှုကို သို့မဟုတ် သဘာဝကျမှုကို မကြိုက်ကြပေ။ ဤအရာက လူတို့၏ လူ့သဘာဝအကြားက ခြားနားချက်ကို ပြသပေသည်။

အမှားနှင့်အမှန်ကို မပိုင်းခြားနိုင်သော လူများသည် မှန်ကန်ပြီး အပြုသဘောဆောင်သော ပြောဆိုချက်အချို့ကို သဘောတူကောင်းတူနိုင်သည် သို့မဟုတ် အပြင်ပန်းအားဖြင့် ၎င်းတို့သည် အပြုသဘောဆောင်သော အရာအချို့ကို နှစ်သက်ပြီး တမ်းတရာတွင် အခြားသူများနောက် လိုက်ကောင်းလိုက်နိုင်သည်။ သို့သော်လည်း အချိန်ကုန်လွန်သွားသည်နှင့်တစ်ပြိုင်နက် ပတ်ဝန်းကျင် ပြောင်းလဲသွားပြီး လူများ၊ ဖြစ်ရပ်များနှင့် အမှုအရာများလည်း ပြောင်းလဲသွားသည်နှင့်တစ်ပြိုင်နက်၊ ဤအပြုသဘောဆောင်သော အရာများသည် ၎င်းတို့၏ စိတ်နှလုံး နက်ရှိုင်းသောနေရာ၌ ချက်ချင်းပင် အပျက်သဘောဆောင်သော အရာများ ဖြစ်လာလိမ့်မည်ဖြစ်စဉ်တွင်၊ ၎င်းတို့ အမှန်တကယ် နှစ်သက်သည့် အပျက်သဘောဆောင်သော အရာများမှာမူ ထို့နောက်တွင် ၎င်းတို့ လိုက်စားသည့်အရာများဖြစ်လာလျက်၊ အပြုသဘောဆောင်သော အရာများ ဖြစ်လာလေသည်။ ဆိုလိုသည်မှာ ၎င်းတို့နှစ်သက်သည့် အပျက်သဘောဆောင်သော အရာများ တစ်ခုတလေကို မမြင်တွေ့ရသေးမီတွင် အပြုသဘောဆောင်သော အရာများသည် ၎င်းတို့အတွက် အယူဝါဒတစ်ခုမျှသာဖြစ်ပြီး ၎င်းတို့သည် အလိုက်သင့်လုပ်ဆောင်နိုင်ပြီး လူအများနောက်သို့ လိုက်နိုင်သည်သော်လည်း၊ ၎င်းတို့ အသက်ကြီးလာကာ အချိန်ကုန်လွန်လာသည်နှင့်အမျှ ၎င်းတို့၏ စိတ်နှလုံးထဲ၌ အမှန်တကယ် ချစ်မြတ်နိုးသည့်အရာများနှင့် ၎င်းတို့၏ စစ်မှန်သော ရှုထောင့်များသည် အလိုအလျောက် ပေါ်လာလိမ့်မည်။ ဥပမာအနေဖြင့် လူအချို့က၊ “ဘုရားသခင်ကို ယုံကြည်ခြင်းသည် ကောင်းပါသည်၊ ဘုရားသခင်ကို ယုံကြည်သူတို့သည် လမ်းကြောင်းမှန်ကို လျှောက်လှမ်းပြီး မကောင်းမှုကို မပြုကြပါ။ ၎င်းတို့အားလုံးသည် လူကောင်းများ ဖြစ်ကြသည်”ဟု မကြာခဏ ပြောဆိုကြသည်။ သို့သော် ဘုရားသခင်ကို နှစ်အနည်းငယ်ကြာ ၎င်းတို့ ယုံကြည်ပြီး ဘုရားအိမ်တော်ရှိ တရားဒေသနာများနှင့် မိတ်သဟာယဖွဲ့ခြင်းများအားလုံးက လူတို့အား ရိုးသားရန်၊ သမ္မာတရားကို လိုက်စားပြီး ဘုရားသခင်ကို ကျိုးနွံနာခံရန်နှင့် ဖန်ဆင်းခံတစ်ဦး၏ တာဝန်ကို ထမ်းဆောင်ရန် ပြောဆိုသည်ကို မြင်တွေ့ပြီးသည့်နောက်၊ ၎င်းတို့သည် ထိုအရာကို အလွန်အမင်း မနှစ်မမြို့ဖြစ်လာပြီး ဘုရားသခင်ကို ယုံကြည်ခြင်းသည် အဓိပ္ပာယ်မဲ့သည်ဟု ခံစားရကာ အသင်းတော်ကို စွန့်ခွာပြီး လောကသို့ ပြန်သွားလိုကြလေသည်။ ၎င်းတို့၏ စိတ်နှလုံးများက အသင်းတော်၌ မရှိပေ။ ဤသည်မှာ သမ္မာတရားကို မချစ်မြတ်နိုးသော လူများဖြစ်သည့်ပုံစံ ဖြစ်သည်။ အမှန်တွင် ဤလူစားမျိုးသည် အပြုသဘောဆောင်သော အရာများကို မချစ်မြတ်နိုးသည့်အပြင် ၎င်း၏ စိတ်နှလုံးထဲ၌ ကောက်ကျစ်သော ကျိုးကြောင်းဆင်ခြင်မှုများနှင့် မိစ္ဆာအယူဝါဒများစွာ ရှိသည်။ ၎င်းအတွက်မူ ဤကောက်ကျစ်သော ကျိုးကြောင်းဆင်ခြင်မှုများနှင့် မိစ္ဆာအယူဝါဒများသည် အပြုသဘောဆောင်သော အရာများဖြစ်ပြီး၊ ၎င်း၏ စိတ်နှလုံး နက်ရှိုင်းသောနေရာ၌မူ စစ်မှန်သော အပြုသဘောဆောင်သည့် အရာများကို အလွန်အမင်း မနှစ်မြို့ကြ၊ စက်ဆုပ်မုန်းတီးပြီး၊ အထင်သေးသည့်အပြင် မည်သည့်အခါမျှ လက်မခံကြပေ။ ဤလူစားမျိုး၏ လူ့သဘာဝက အမှန်နှင့် အမှားကို ပိုင်းခြားနိုင်စွမ်းမရှိခြင်းသည် ၎င်းတို့က အပြုသဘောဆောင်သော အရာများကို မည်သည့်အခါမျှ လက်မခံခြင်းကြောင့်လည်းကောင်း၊ ၎င်းတို့နှစ်သက်သည့်အရာများမှာ အပျက်သဘောဆောင်သော အရာများဖြစ်ခြင်းကြောင့်လည်းကောင်း အတိအကျဖြစ်ပေသည်။ ယင်းမှာ ဘုရားသခင်ကို စတင်ယုံကြည်သည့်အချိန်တွင် ကောင်းချီးမင်္ဂလာများအတွက်သာ ယုံကြည်ကြသည့် အချို့သောလူများကဲ့သို့ပင် ဖြစ်သည်။ နှစ်ပေါင်းများစွာ တရားဒေသနာများကို နားထောင်ပြီးနောက် နောက်ဆုံးတွင် ၎င်းတို့ နားလည်သွားသည်မှာ၊ “ဘုရားသခင်ကို ယုံကြည်ခြင်းဆိုသည်မှာ လူတို့အနေဖြင့် ရိုးသားရန်၊ မိမိတို့၏ တာဝန်ကို ထမ်းဆောင်ရာ၌ သစ္စာစောင့်သိပြီး အဖိုးအခပေးလိုစိတ်ရှိရန်၊ ဘုရားသခင်အပေါ် စစ်မှန်ရိုးသားရန်၊ မဆင်မခြင်နှင့် တစ်ဇွတ်ထိုး ပြုမူခြင်းမရှိရန်နှင့် ဘုရားအိမ်တော်၏ အကျိုးစီးပွားများကို ကာကွယ်ရန် လိုအပ်သည်ကို ဆိုလိုသည်။ အထူးသဖြင့် ဘုရားအိမ်တော်၏ အကျိုးစီးပွားများနှင့် မိမိတို့၏ ကိုယ်ပိုင်အကျိုးစီးပွားများ ကွဲလွဲဆန့်ကျင်သည့်အခါ ၎င်းတို့သည် ဘုရားအိမ်တော်၏ အကျိုးစီးပွားများကို ကာကွယ်ရမည်ဖြစ်ပြီး မိမိတို့၏ ကိုယ်ပိုင်အကျိုးစီးပွားများကို စွန့်လွှတ်ရမည်ဖြစ်သည်” ဟူ၍ ဖြစ်သည်။ သမ္မာတရား၏ မတူကွဲပြားသော သွင်ပြင်လက္ခဏာအားလုံးနှင့် ပတ်သက်၍ သိရှိပြီးနောက်တွင်၊ ၎င်းတို့သည်၊ “ကျွန်ုပ်က ဘုရားသခင်ကို ယုံကြည်ခြင်းမှာ အားကိုးရမည့် ကြီးမားသောအုပ်စု၊ အားကောင်းသော အင်အားစုတစ်ခု ရှိခြင်းကို ဆိုလိုကြောင်းနှင့် လူတို့သည် များစွာစွန့်လွှတ်ပြီး ဆင်းရဲဒုက္ခခံကာ အဖိုးအခပေးသရွေ့ နိုင်ငံတော်ထဲသို့ ဝင်ရောက်နိုင်ပြီး ကောင်းသောပန်းတိုင်တစ်ခု ရရှိနိုင်ကာ နောက်တစ်ခေတ်ထဲသို့ ဟစ်ကြွေးဝင်ရောက်ကာ ထိုခေတ်၏ ဆရာသခင်များနှင့် ဘုရင်များအဖြစ် စိုးစံရမည်ဖြစ်ကြောင်း တွေးထင်ခဲ့သည်။ သို့သော်လည်း လက်စသတ်တော့ ယင်းမှာထိုသို့မဟုတ်ပါ။ ဘုရားသခင်ကို ယုံကြည်ခြင်းသည် လူတို့အား မည်သို့ကျင့်ကြံပြုမူရမည်ဟူသည်နှင့် ဘုရားသခင်အား မည်သို့ကျိုးနွံနာခံပြီး မကောင်းမှုအား ရှောင်ကြဉ်ရမည်ဟူသည်တို့ကို သွန်သင်ခြင်းသက်သက်သာ ဖြစ်သည်။ အထူးသဖြင့် လူတို့သည် ဘုရားသခင်ကို ယုံကြည်လျှင် ရိုးသားရန်နှင့် ရိုးသားစွာ စကားပြောဆိုရန် အမြဲတောင်းဆိုခြင်းခံရပြီး သမ္မာတရားကို လက်တွေ့လုပ်ဆောင်ရန် အမြဲတောင်းဆိုခြင်းခံရသည်။ ၎င်းတို့သည် အဆုံးအဖြတ်ပေးပိုင်ခွင့် မရှိပေ။ သို့ဆိုလျှင် ဘုရားသခင်ကို ယုံကြည်ခြင်းသည် အဘယ်အဓိပ္ပာယ်ရှိသနည်း”ဟု ဆိုလျက် ဘုရားသခင်ကို ယုံကြည်ခြင်းအား နောင်တရကြလေသည်။ ထို့နောက်တွင် ၎င်းတို့သည် မိမိတို့၏ စိတ်နှလုံးထဲ၌ မကျေနပ်ချက်များ ဖြစ်ပေါ်လာပြီး မိမိတို့၏ ယုံကြည်ခြင်းမှ နုတ်ထွက်လိုကြသည်။ သို့သော် ထို့နောက်တွင် ၎င်းတို့က “ကျွန်ုပ်သည် ဘုရားသခင်ကို နှစ်အချို့ကြာ ယုံကြည်ပြီးဖြစ်သည်။ အကယ်၍ ယခု ရပ်လိုက်လျှင် ကျွန်ုပ်သည် အချည်းနှီး ယုံကြည်ခဲ့ခြင်း ဖြစ်မည် မဟုတ်လော”ဟု တွေးကြသည်။ ထိုအချိန်တွင် ၎င်းတို့သည် စွန့်လွှတ်ရန် ဝန်လေးလာကြသည်။ သို့သော် ၎င်းတို့ ဆက်၍ ယုံကြည်မည်ဆိုလျှင်လည်း သမ္မာတရားကို စိတ်မဝင်စားကြပေ။ ဘုရားအိမ်တော်သည် သမ္မာတရားကို လိုက်စားခြင်းနှင့် လက်တွေ့ကျမှုထဲသို့ ဝင်ရောက်ခြင်းအကြောင်း၊ ဘုရားသခင်ကို ကျိုးနွံနာခံခြင်း၊ သမ္မာတရားကို ရှာဖွေခြင်းနှင့် စည်းမျဉ်းများအတိုင်း ပြုမူဆောင်ရွက်ခြင်းအကြောင်းတို့ကို အမြဲပြောဆိုနေသည်။ ၎င်းတို့သည် ဤအရာများအကြောင်း ကြားရသည်ကို ငြီးငွေ့နေကြပြီး ယင်းတို့ကို မကြားလိုကြတော့ပေ။ အထူးသဖြင့် ဘုရားအိမ်တော်က သမ္မာတရားကို လက်တွေ့လုပ်ဆောင်ခြင်းအကြောင်း ပြောဆိုသည့်အခါ ၎င်းတို့သည် စိတ်ထဲတွင် စိတ်ဆင်းရဲပြီး နာကျင်သည်ဟု ခံစားရသည်။ အပြုသဘောဆောင်သော အရာများကို ဖော်ပြသည့်အခါ ၎င်းတို့သည် မိမိတို့၏ စိတ်နှလုံးများထဲ၌ အလွန်အမင်း မနှစ်မြို့ခြင်းကို ခံစားရပြီး အထင်သေးကာ နားထောင်ရန် မလိုလားကြပေ။ အချို့သောလူများသည် အဆုံးတိုင် ယုံကြည်လျှင်ပင် သမ္မာတရား သို့မဟုတ် ကောင်းသောပန်းတိုင်တစ်ခုကို ရရှိမည်မဟုတ်ကြောင်း သိရှိသည့်အခါ ယုံကြည်ခြင်းကို ယတိပြတ် ရပ်လိုက်ကြသည်။ ၎င်းတို့ထဲမှ အချို့သည် အလုပ်သွားရှာ သို့မဟုတ် စီးပွားရေးလုပ်ကြပြီး အချို့သည် အိမ်ထောင်ပြုရန် အိမ်ပြန်သွားကြသည်။ ၎င်းတို့သည် သမ္မာတရားကို မချစ်မြတ်နိုးသောကြောင့် ဘုရားသခင်ကို ယုံကြည်ခြင်းအား ရပ်လိုက်ကြခြင်း ဖြစ်သည်။ ဘုရားအိမ်တော်သည် သမ္မာတရားအကြောင်း အမြဲပြောဆိုပြီး သမ္မာတရားနှင့်ပတ်သက်၍ မိတ်သဟာယဖွဲ့နေသည်ကို ၎င်းတို့က အထူးပင် အလွန်အမင်း မနှစ်မြို့ခြင်း ဖြစ်ကြသည်။ ဤအရာက ဤလူစားမျိုးသည် အသိစိတ်နှင့် ဆင်ခြင်တုံတရား မရှိသည့်အပြင်၊ အမှားနှင့်အမှန်ကို မပိုင်းခြားနိုင်ကြောင်း ပြသနေသည်။ အမှားနှင့်အမှန်ကို မပိုင်းခြားနိုင်ခြင်းဆိုသည်မှာ ၎င်းတို့၏ လူ့သဘာဝ၌ အပြုသဘောဆောင်သော အရာများနှင့် အပျက်သဘောဆောင်သော အရာများကို ခွဲခြားသိမြင်ရန် စံနှုန်းနှင့် စွမ်းရည်မရှိခြင်းကို ဆိုလိုသည်။ ဤသည်မှာ၎င်းတို့၌ မရှိသည့်အရာတစ်ခု ဖြစ်သည်။ သို့ဆိုလျှင် ဤလူစားမျိုး၌ ပုံမှန် လူ့သဘာဝ ရှိသလော။ (မရှိပါ။) ၎င်းတို့သည် လူသားများ မဟုတ်ကြပေ။ အကယ်၍ တစ်စုံတစ်ဦး၌ လူ့သဘာဝ အမှန်တကယ်ရှိလျှင် အချက်တစ်ချက်က သက်သေပြနိုင်သည်။ ၎င်းတို့သည် မိမိတို့၏ စိတ်နှလုံးထဲ၌ အပြုသဘောဆောင်သော အရာများကို ချစ်မြတ်နိုးပြီး တမ်းတကြသည်။ သမ္မာတရားကို ၎င်းတို့ နားမလည်သည့်အခါတွင်ပင် တရားမျှတပြီး အမှောင်ထု ကင်းစင်သော လူ့အဖွဲ့အစည်းတစ်ခုကို တမ်းတကြသည်၊ အပြုသဘောဆောင်သော အရာများကို တမ်းတကြပြီး၊ သမ္မာတရားက အာဏာစွဲကိုင်ရန် တမ်းတကြသည်။ သို့သော် ဤဆိုးယုတ်သော လူ့အဖွဲ့အစည်းသည် ၎င်းတို့အတွက် ဤနေရာကို မပေးသည့်အပြင် လူတို့သည် အပြုသဘောဆောင်သောအရာ တစ်စုံတစ်ခုကို ထုတ်ဖော်ပြလျှင် ဖယ်ကျဉ်ခံရပြီး ဖိနှိပ်ခြင်း ခံကြရသည်။ ဤအခြေအနေများအောက်တွင် လူ့သဘာဝရှိသော လူတို့သည် ၎င်းတို့နှစ်သက်ပြီး တမ်းတသည့် အပြုသဘောဆောင်သော အရာများကို မရရှိနိုင်သောကြောင့် မိမိတို့၏ စိတ်နှလုံးထဲ၌ စိတ်ဆင်းရဲကြရသည်။ သို့သော် ဘုရားသခင်ကို ၎င်းတို့ ယုံကြည်ပြီးနောက် ဘုရားသခင်၏ နှုတ်ကပတ်တော်များကို ဖတ်ရှုခြင်းနှင့် တရားဒေသနာများကို နားထောင်ခြင်းအားဖြင့် သမ္မာတရားများစွာကို နားလည်လာကြပြီး ဤသမ္မာတရားများသည် အပြုသဘောဆောင်သော အရာများအတွက် ၎င်းတို့၏ လိုအပ်ချက်များကို အတိအကျ ဖြည့်ဆည်းပေးလျက်၊ ၎င်းတို့၏ လူ့သဘာဝက ချစ်မြတ်နိုးသည့် အပြုသဘောဆောင်သော အရာများနှင့် ညီညွှတ်ပြီး ကိုက်ညီလေသည်။ ထို့ကြောင့် ၎င်းတို့၏ စိတ်နှလုံးများသည် အပြုသဘောဆောင်သော အရာများကို သာ၍ပင် တမ်းတကြသည်။ ပတ်ဝန်းကျင်ဆိုင်ရာ ကန့်သတ်ချက်များ၊ ၎င်းတို့၏ သေးငယ်သော ဝိညာဉ်ရင့်ကျက်မှုကြောင့်ဖြစ်စေ၊ အချို့သော ဖောက်ပြန်ပျက်စီးသည့် စိတ်သဘောထားများ၏ ကန့်သတ်ချုပ်ချယ်ခြင်းနှင့် ချည်နှောင်ခြင်းကို ခံရခြင်းကြောင့်ဖြစ်စေ ယခုတွင် ၎င်းတို့သည် သမ္မာတရားကို အပြည့်အဝ လက်တွေ့မလုပ်ဆောင်နိုင်ကြသော်လည်း မည်သို့ပင်ဖြစ်စေ တစ်နေ့နေ့တွင် သမ္မာတရားနှင့် ဘုရားသခင်၏ နှုတ်ကပတ်တော်များအတိုင်း အပြည့်အဝ လက်တွေ့လုပ်ဆောင်နိုင်ပြီး၊ ထိုသို့ဖြင့် ဘုရားသခင်၏ နှုတ်ကပတ်တော်များကို ကျိုးနွံနာခံခြင်းအား စွမ်းဆောင်ရရှိကာ အပြုသဘောဆောင်သော အရာများကို ချစ်မြတ်နိုးခြင်းမှ ဖြစ်ပေါ်လာသည့် ၎င်းတို့၏ လိုအပ်ချက်များကို ဖြည့်ဆည်းနိုင်ရန် စိတ်ပိုင်းဖြတ်ချက်နှင့် ဆန္ဒရှိကြလေသည်။ ထိုသို့သော လူများသည် မိမိတို့၏ သဘာဝက အမှားနှင့်အမှန်ကို ပိုင်းခြားသိမြင်နိုင်သည့် အရည်အသွေးအား ပိုင်ဆိုင်သည့် သူများဖြစ်ကြသည်။ ၎င်းတို့သည် လူ့သဘာဝရှိသော လူများ ဖြစ်ကြသည်။ သင်သည် အပြုသဘောဆောင်သော အရာများကို ချစ်မြတ်နိုးသည်ဟုသာ အခိုင်အမာဆိုပြီး ဘုရားသခင်ပြုသမျှ အရာရာတိုင်းက ကောင်းမြတ်သည်ဟု နှုတ်ဖြင့် အသိအမှတ်ပြုရုံပြုလျှင်၊ ဤသည်မှာ အယူဝါဒများကို ပြောဆိုခြင်းနှင့် ကြွေးကြော်သံများကို ဟစ်ကြွေးခြင်းမျှသာ ဖြစ်သည်။ နှစ်လိုဖွယ်သော စကားများနှင့် မှန်ကန်သော သီအိုရီများကို ပြောဆိုခြင်း သို့မဟုတ် အဆင့်မြင့်ပုံရသော စကားများကို ပြောဆိုခြင်းအား မည်သူမဆို လုပ်နိုင်သည်။ ဤအရာက သင်သည် အပြုသဘောဆောင်သော အရာများကို အမှန်တကယ် ချစ်မြတ်နိုးကြောင်း မပြပေ။ သို့သော် သင်သည် သမ္မာတရားကို ကြားရသည့်အခါ ယင်းကို ချစ်မြတ်နိုးပြီး တမ်းတနိုင်လျှင်၊ သမ္မာတရားကို သင် ပို၍ကြားရလေလေ ထိုသမ္မာတရားကို ပို၍တမ်းတပြီး ရှာဖွေရန် သင်၏ စိတ်အားထက်သန်မှု ကြီးမားလေလေဖြစ်ကာ ဘုရားသခင်နောက်သို့လိုက်ပြီး ကယ်တင်ခြင်းကို ရရှိရာ၌ သင်၏ ယုံကြည်ခြင်းသည် ပို၍ခိုင်မာလာလေလေ ဖြစ်လျှင်၊ ထို့အပြင်၊ ဘုရားသခင်ကို ယုံကြည်သည့် ဖြစ်စဉ်တွင် သင်၏ အမျိုးမျိုးသော လိုက်စားမှုများ၌ အကျိုးကျေးဇူးများ ရရှိလျှင်၊ သင်၏ ဖောက်ပြန်ပျက်စီးသော စိတ်သဘောထားများသည် တဖြည်းဖြည်း ဖယ်ရှားခြင်းခံရကာ ဘုရားသခင်ကို အတိုက်အခံလုပ်ပြီး ဘုရားသခင်ကို ပုန်ကန်သည့် သင်၏ လုပ်ရပ်များသည် နည်းသည်ထက်နည်းပါးလာလျှင် သင်သည် အပြုသဘောဆောင်သော အရာများကို ချစ်မြတ်နိုးသူတစ်ဦး၊ သမ္မာတရား လက်တွေ့ကျမှုကို ပိုင်ဆိုင်သူတစ်ဦး ဖြစ်ပေသည်။ ထိုသို့သော လူများသည် ဘုရားသခင်ကို ယုံကြည်ခြင်း၌ အသီးအပွင့်များ ဖြစ်ထွန်းပြီး အကျိုးကျေးဇူးများ ရရှိကြသည်။ သင် ပြောင်းလဲပြီးဖြစ်ကြောင်းနှင့် ဘုရားသခင်နှင့် သမ္မာတရားအပေါ် သင်၏ သဘောထားက ယခင်နှင့် မတူတော့ကြောင်းကို သင် ခံစားနိုင်သည်။ ယခင်က သင်သည် အလွန်သေးငယ်သော ကိစ္စရပ်များ၌ပင် ဘုရားသခင်အပေါ် ပုန်ကန်ခဲ့ပြီး ဘုရားသခင်ကို ကျိုးနွံနာခံခြင်းမရှိခဲ့သည့်အပြင် သမ္မာတရားကို လက်တွေ့မလုပ်ဆောင်နိုင်ခဲ့ပေ။ သို့သော် လိုက်စားခဲ့သည့် ဤနှစ်ကာလများမှတစ်ဆင့်၊ သင်၏ တာဝန်ကို ထမ်းဆောင်ခဲ့သည့် ဤနှစ်ကာလများမှတစ်ဆင့်၊ ပြီးလျှင် ကဏ္ဍအားလုံး၌ သင်၏ ကြိုးစားအားထုတ်မှုများမှတစ်ဆင့် သင်သည် သမ္မာတရားအချို့ကို နားလည်ပြီးဖြစ်ကာ ကိစ္စရပ်များကို ကြုံတွေ့သည့်အခါ သင်သည် သမ္မာတရားကို ရှာဖွေနိုင်ပြီး သင်၏ ဇာတိပကတိ လိုအင်ဆန္ဒများကို ဆန့်ကျင်တွန်းလှန်နိုင်ပေသည်။ စည်းမျဉ်းများနှင့် သက်ဆိုင်သည့် အချို့သော အဓိကကိစ္စရပ်များတွင် သင်သည် စည်းမျဉ်းများကိုလည်း လိုက်နာစောင့်ထိန်းနိုင်ပြီး သင်၏ ကိုယ်ပိုင်အလိုဆန္ဒအတိုင်း မပြုမူဘဲနေနိုင်သည့်အပြင် ဘုရားအိမ်တော်၏ အကျိုးစီးပွားများကို ထိန်းသိမ်းနိုင်ပြီး အသင်းတော်၏ အလုပ်ကိုလည်း ထိန်းသိမ်းနိုင်ပေသည်။ ဤသည်မှာ သင်က ဝိညာဉ်ရင့်ကျက်မှုတစ်ခုခု ရှိကြောင်း၊ သင့်ကိုယ်သင် ဆန့်ကျင်တွန်းလှန်ခြင်းနှင့် သမ္မာတရားကို လက်ခံပြီး ကျိုးနွံနာခံခြင်းတွင် လက်တွေ့လုပ်ဆောင်ခြင်းနှင့် ဝင်ရောက်ခြင်း တစ်ခုခုရှိကြောင်းနှင့် သင်၏ အမျိုးမျိုးသော ဖောက်ပြန်ပျက်စီးသည့် စိတ်သဘောထားများသည်လည်း အမျိုးမျိုးသော အတိုင်းအတာအထိ ပြောင်းလဲပြီးဖြစ်ကြောင်းတို့ကို ဆိုလိုပေသည်။ ဤသည်မှာ လူ့သဘာဝ အမှန်တကယ်ရှိသော လူများ၌ အမှားနှင့်အမှန်ကို ပိုင်းခြားသိမြင်ခြင်း၏ သရုပ်သကန် ဖြစ်ပေသည်။

အမှားနှင့်အမှန်ကို မပိုင်းခြားနိုင်သော လူများသည်လည်း သမ္မာတရားကို လက်ခံလိုပြီး ကယ်တင်ခြင်းကို လိုက်စားလိုစိတ်ရှိကောင်းရှိနိုင်သည်။ သို့သော် ၎င်းတို့သည် အမှုအရာများကို ကြုံတွေ့သည့်အခါ သမ္မာတရားကို လက်တွေ့မလုပ်ဆောင်နိုင်ကြပေ။ ၎င်းတို့သည် သတိပြုမိခြင်းတစ်ခုမျှ မရှိဘဲ ဘုရားသခင်ကို မကြာခဏ ပုန်ကန်ပြီး အတိုက်အခံလုပ်လျက် မိမိတို့၏ ဖောက်ပြန်ပျက်စီးသော စိတ်သဘောထားများအတိုင်း အသက်ရှင်နေကြဆဲဖြစ်သည်။ ၎င်းတို့သည် လွန်ခဲ့သော ဆယ်နှစ်က ဤနည်းလမ်းအတိုင်း ဘုရားသခင်ကို ပုန်ကန်ခဲ့ကြပြီး ဆယ်နှစ်ကြာပြီးနောက်တွင်လည်း ထိုသို့ပင် လုပ်ဆောင်နိုင်ကြဆဲဖြစ်သည်။ ၎င်းတို့သည် သမ္မာတရားကို လက်ခံခြင်းလည်းမရှိသည့်အပြင်၊ လက်တွေ့လုပ်ဆောင်ခြင်းလည်းမရှိပေ။ ဤအတွက် အကြောင်းရင်းနှစ်ရပ်ရှိသည်။ တစ်ခုမှာ ၎င်းတို့သည် သမ္မာတရားက အဘယ်အရာဖြစ်သည်ကို လုံးဝနားမလည်ကြသည့်အပြင် မိမိတို့၏ ကိုယ်ပိုင်ကျိုးကြောင်းဆင်ခြင်မှု၊ ကိုယ်ပိုင်ပြောဆိုချက်များနှင့် ကိုယ်ပိုင်အမြင်များကိုသာ ဖက်တွယ်ထားကြခြင်း ဖြစ်သည်။ အခြားတစ်ခုမှာ ၎င်းတို့သည် သမ္မာတရားကို လက်ခံသောလူများ လုံးဝမဟုတ်ကြခြင်း ဖြစ်သည်။ လွန်ခဲ့သော ဆယ်နှစ်က ဘုရားသခင်ကို ၎င်းတို့ မည်သည့်နည်းလမ်းဖြင့် ပုန်ကန်ခဲ့သည်ဖြစ်စေ၊ ယင်းမှာ ဆယ်နှစ်ကြာပြီးနောက်တွင် ပြောင်းလဲခြင်းမရှိဘဲ ၎င်းတို့ ပုန်ကန်ကြသည့် နည်းလမ်း ဖြစ်နေဆဲ ဖြစ်သည်။ ဘုရားသခင်ကို နှစ်ပေါင်းမည်မျှ ၎င်းတို့ ယုံကြည်ပြီးသည်ဖြစ်စေ ဇာတိပကတိနှင့် မိမိတို့၏ ဖောက်ပြန်ပျက်စီးသော စိတ်သဘောထားများကို ဆန့်ကျင်တွန်းလှန်သည့် သက်သေခံချက် တစ်ခုတလေကို မဆိုထားနှင့်၊ သမ္မာတရားကို လက်ခံပြီး ဘုရားသခင်ကို ကျိုးနွံနာခံသည့် သက်သေခံချက်ပင် မရှိကြပေ။ ဤအရာက ၎င်းတို့သည် သမ္မာတရားကို လက်ခံသောလူများ မဟုတ်ကြောင်း ပြသသည်။ ထိုသို့သော လူများသည် အမှားနှင့်အမှန်ကို ပိုင်းခြားသိမြင်သူများ မဟုတ်ကြပေ။ ၎င်းတို့သည် လူ့သဘာဝရှိသော လူများမဟုတ်ဟုလည်း ဆိုနိုင်သည်။ ရှင်းလင်းစွာ ပြောရလျှင် ၎င်းတို့သည် လူသားများ မဟုတ်ကြပေ။ အချို့သောလူများသည် ဤစကားများကို ကြားပြီးနောက် မိမိတို့၏ စိတ်နှလုံးများထဲ၌ ယုံကြည်လက်ခံခြင်းမရှိကြပေ။ ၎င်းတို့က “ကျွန်ုပ်သည် ဘုရားသခင်ကို ဆယ်နှစ်ကျော်ကြာ ယုံကြည်ပြီးဖြစ်ကာ ကျွန်ုပ်၏ တာဝန်ကို အမြဲထမ်းဆောင်နေပြီးဖြစ်သည်။ ကျွန်ုပ်သည် ရံဖန်ရံခါ အမှားအချို့လုပ်ပြီး ပြုပြင်ခြင်းတစ်ခုခုကို ခံရခြင်းသာ ဖြစ်သည်။ ယင်းမှာ အလွန်ပုံမှန်ဖြစ်သည် မဟုတ်လော။ လူတိုင်း၌ ဖောက်ပြန်ပျက်စီးသော စိတ်သဘောထားများ ရှိကြသည်၊ မည်သူက အမှားမလုပ်မိဘဲ နေသနည်း။ မည်သို့ပင်ဖြစ်စေ ကျွန်ုပ်သည် စစ်မှန်သော ယုံကြည်သူတစ်ဦး ဖြစ်သည်။ ကျွန်ုပ်၌ လူ့သဘာဝမရှိဟု ကိုယ်တော် မည်သို့ဖြစ်ပြီး ပြောနိုင်ရသနည်း”ဟု ဆိုကြသည်။ သင်သည် စစ်မှန်သော ယုံကြည်သူတစ်ဦးဖြစ်သည်မှာ မှန်သော်လည်း၊ စစ်မှန်သော ယုံကြည်သူတစ်ဦးဖြစ်ခြင်းက သမ္မာတရားကို သင် လက်ခံနိုင်သည်ဟု ဆိုလိုသလော။ စစ်မှန်သော ယုံကြည်သူတစ်ဦးဖြစ်ခြင်းက ဇာတိပကတိကို သင် ဆန့်ကျင်တွန်းလှန်နိုင်ပြီး တစ်ဇွတ်ထိုးလုပ်လိမ့်မည် မဟုတ်ဟု ဆိုလိုသလော။ စစ်မှန်သော ယုံကြည်သူတစ်ဦးဖြစ်ခြင်းက ဘုရားသခင်ကို သင် ကျိုးနွံနာခံနိုင်သည်ဟု ဆိုလိုသလော။ မဆိုလိုပေ။ စစ်မှန်သော ယုံကြည်သူတစ်ဦးဖြစ်ခြင်းသည် အရာရာမဟုတ်သည့်အပြင် ယင်းက ကယ်တင်ခြင်းကို သင်ရရှိနိုင်သည်ဟု မဆိုလိုပေ။ ကယ်တင်ခြင်းကို ရရှိခြင်းသည် သင်၏ လူ့သဘာဝက သမ္မာတရားကို လက်ခံနိုင်ခြင်းရှိမရှိဟူသည်နှင့် သင်သည် အမှားနှင့်အမှန်ကို ပိုင်းခြားသိမြင်နိုင်ခြင်းရှိမရှိဟူသည်တို့အပေါ်တွင် အဓိက မူတည်သည်။ စစ်မှန်သော ယုံကြည်သူတစ်ဦးဖြစ်ခြင်းသည် နောက်ဆုံးတွင် လူတို့က ကယ်တင်ခြင်းရရှိရန်အတွက် အရေးကြီးဆုံးသော အခြေအနေမဟုတ်သည့်အပြင်၊ အခြေခံကျသော အခြေအနေတစ်ခုလည်း မဟုတ်ပေ။ သင်သည် စစ်မှန်သော ယုံကြည်သူတစ်ဦးဖြစ်သည်ဟု သင်ဆိုသော်လည်းသမ္မာတရား သင် မည်မျှနားလည်ပြီး ရရှိပြီးပြီနည်း။ ဘုရားအိမ်တော်၏ အကျိုးစီးပွားများနှင့် ပတ်သက်လာသည့်အခါ သင်သည် ယင်းတို့ကို အကြိမ်မည်မျှ ကာကွယ်ပြီးပြီနည်း။ သင်သည် စစ်မှန်သော ယုံကြည်သူတစ်ဦးဖြစ်ကြောင်း၊ သင်၌ အသိစိတ်နှင့် လူ့သဘာဝရှိကြောင်း၊ သင်သည် စစ်မှန်သော လူတစ်ဦးဖြစ်ကြောင်း သင်ထင်လျှင်၊ အလားတူကိစ္စရပ်ဖြင့် လွန်ခဲ့သော ဆယ်နှစ်က ဘုရားသခင်ကို သင် ပုန်ကန်နိုင်ခဲ့လျှင် ယခု ဘုရားသခင်ကို သင် ပုန်ကန်နိုင်သေးသလော။ သင် ပြောင်းလဲပြီးပြီလော။ ဇာတိပကတိကို သင် ဆန့်ကျင်တွန်းလှန်ပြီးပြီလော။ ဇာတိပကတိကို သင် ဆန့်ကျင်တွန်းလှန်ခြင်းမရှိသေးလျှင် လာမည့်ဆယ်နှစ်တွင် ထိုသို့ပြုလုပ်နိုင်သလော။ သင်သည် ဇာတိပကတိကို ဆန့်ကျင်တွန်းလှန်နိုင်ခြင်း မရှိသေးသည့်အပြင်၊ ဘုရားသခင်ကိုလည်း ပုန်ကန်နိုင်သေးလျှင် ယင်းက သင်၏ လူ့သဘာဝနှင့်ပတ်သက်၍ ပြဿနာတစ်ခုရှိကြောင်း ပြသပေသည်။ သင်သည် သမ္မာတရားကို လက်တွေ့မလုပ်ဆောင်နိုင်ပေ၊ ထို့ကြောင့် သင်သည် စစ်မှန်သော ယုံကြည်သူတစ်ဦးဖြစ်သည်ဟု သင်ဆိုလျှင်ပင် အချည်းနှီးဖြစ်သည်။ သင်သည် ဆင်းရဲဒုက္ခခံပြီး အဖိုးအခပေးရန် လိုလားကာ သင်၏ တာဝန်ကို သစ္စာစောင့်သိစွာ ထမ်းဆောင်ရန် လိုလားသည်ဟု သင်ဆိုသော်လည်း ဤလိုလားမှုသည် တန်ဖိုးမရှိပေ။ ဤသည်မှာ သမ္မာတရားကို သင် လက်တွေ့လုပ်ဆောင်နိုင်ပြီး ဘုရားသခင်ကို ကျိုးနွံနာခံနိုင်ရန်အတွက် မရှိမဖြစ်ရှိထားရမည့် လိုအပ်ချက်တစ်ခုမျှသာ ဖြစ်သည်။ သို့သော် နောက်ဆုံးတွင် သင် ယင်းကို လက်တွေ့လုပ်ဆောင်နိုင်ခြင်းရှိမရှိဟူသည်မှာ သင်၌ လူ့သဘာဝရှိမရှိဟူသည့်အပေါ် မူတည်သည်။ သင်၏ စိတ်နှလုံးသည် သင်၏ ဖောက်ပြန်ပျက်စီးသော စိတ်သဘောထားများကို အစဉ်အမြဲ ချုပ်ထိန်းကာ ထိန်းချုပ်နိုင်ခြင်းမရှိသည့်အပြင်၊ သင်၏ ကိုယ်ပိုင်အကျိုးစီးပွားများကို ထိန်းသိမ်းရန် သင်ရွေးချယ်ပြီး အပြုသဘောဆောင်သော အရာများအစား အပျက်သဘောဆောင်သော အရာများကို ရွေးချယ်လျှင် ယင်းက သင်၏ လူ့သဘာဝသည် သမ္မာတရားကို မချစ်မြတ်နိုးကြောင်းနှင့် သင်၏ ဖောက်ပြန်ပျက်စီးသော စိတ်သဘောထားများကို ထိန်းချုပ်နိုင်စွမ်း မရှိကြောင်း ပြသနေပေသည်။ သင်သည် သမ္မာတရားကို နားမလည်သည့်အခါ သင်၏ ဖောက်ပြန်ပျက်စီးသော စိတ်သဘောထားများ၏ ထုတ်ဖော်ပြမှုများအား ထိန်းချုပ်နိုင်စွမ်း မရှိခဲ့လျှင် ယင်းမှာ ခွင့်လွှတ်နိုင်လောက်သောအရာဖြစ်သည်။ သို့သော် ယခုတွင်မူ ကွဲပြားပေသည်။ သင်သည် သမ္မာတရားနှင့်ပတ်သက်သည့် တရားဒေသနာများကို နှစ်ပေါင်းများစွာ နားထောင်ပြီးဖြစ်သော်လည်း အမှုအရာများကို ကြုံတွေ့သည့်အခါ သမ္မာတရား စည်းမျဉ်းများအတိုင်း လက်တွေ့လုပ်ဆောင်နိုင်ပြီး မှန်ကန်သော ရွေးချယ်မှုများ ပြုလုပ်နိုင်ရန်အလို့ငှာ သင်၏ ဖောက်ပြန်ပျက်စီးသော စိတ်သဘောထားများကို ချုပ်ထိန်းနိုင်ခြင်း မရှိသေးပေ။ ဆိုးယုတ်သောလူများက အသင်းတော်၏ အလုပ်အား နှောင့်ယှက်နေသည်ကို ရှင်းလင်းစွာ သင် မြင်တွေ့သော်လည်း ဘုရားအိမ်တော်၏ အကျိုးစီးပွားများကို ကာကွယ်ရန် ထရပ်နိုင်ခြင်း မရှိပေ။ သို့သော် တစ်စုံတစ်ဦးက သင်၏ ကိုယ်ပိုင်အကျိုးစီးပွားများကို ထိခိုက်နစ်နာစေသည့်အခါ သင်သည် ယင်းတို့ကို ကာကွယ်ရန် အစွမ်းကုန် လုပ်ဆောင်နိုင်သည်။ ဤသည်မှာ မှန်ကန်သော လမ်းခရီးနှင့် လက်တွေ့လုပ်ဆောင်ခြင်း၏ စည်းမျဉ်းများကို သင် ရွေးချယ်ရန်အလို့ငှာ သင်၏ လူ့သဘာဝတွင် သင့်ကို ထိန်းညှိပေးပြီး ချုပ်ထိန်းပေးမည့် အသိစိတ် သို့မဟုတ် ဆင်ခြင်တုံတရား မရှိကြောင်း သက်သေပြရန် လုံလောက်ပေသည်။ သင်သည် ထိုသို့သော ယုတ္တိမတန်သည့် အမှုအရာများကို ပြုလုပ်သည့်တိုင် လူသားဖြစ်သည်ဟု အခိုင်အမာဆိုနေသေးလျှင် ယင်းက သင်၏ အသိစိတ်နှင့် ဆင်ခြင်တုံတရားတို့သည် အလုပ်မလုပ်တော့ကြောင်း ပြသနေသည်။ သို့ဆိုလျှင် သင်၏ လူ့သဘာဝ၌ အသိစိတ်နှင့် ဆင်ခြင်တုံတရား မရှိသည့်အပြင် မှန်ကန်သော ရွေးချယ်မှုများ ပြုလုပ်နိုင်စေသည့်အရာ တစ်ခုတလေမျှမရှိသောကြောင့် သင်သည် ပုံမှန်လူတစ်ဦး မဟုတ်ပေ။ နားလည်ပြီလော။ အချို့လူများက “ကျွန်ုပ်၏ ဝိညာဉ်ရင့်ကျက်မှုသည် ယခု သေးငယ်ပါသည်။ ကျွန်ုပ်၏ မိသားစုပတ်ဝန်းကျင်နှင့် ကြီးပြင်းလာရမှုကြောင့် ကျွန်ုပ်သည် တစ်ဇွတ်ထိုးလုပ်သည်၊ စိတ်အလိုလိုက်ပြီး၊ မာနကြီးပါသည်။ သို့သော် လက်တွေ့ဘဝတွင် အပြုသဘောဆောင်သော အရာများက အဘယ်အရာများဖြစ်ပြီး အပျက်သဘောဆောင်သော အရာများက အဘယ်အရာများဖြစ်သည်ကို ကျွန်ုပ်သိသည့်အပြင်၊ မည်သည့်အရာ ကျွန်ုပ် လုပ်ဆောင်သင့်သည်ဟူသည်နှင့် မည်သည့်အရာ မလုပ်ဆောင်သင့်သည်ဟူသည်ကို ကျွန်ုပ်သိပါသည်။ ကျွန်ုပ်၏ ဝိညာဉ်ရင့်ကျက်မှု သေးငယ်ပြီး ကျွန်ုပ်ကို ဉာဏ်အလင်းရစေရန်၊ ကြီးကြပ်ပြီး တိုက်တွန်းရန် သမ္မာတရားကို နားလည်သည့်သူတစ်ဦး ကျွန်ုပ်တွင် မရှိခဲ့သောကြောင့်သာ ကျွန်ုပ်သည် သမ္မာတရားကို လက်တွေ့မလုပ်ဆောင်ခဲ့ခြင်းဖြစ်ပြီး ပြစ်မှားခြင်းအချို့ကို ကျူးလွန်ခဲ့ကာ စိတ်ထဲတွင် အနည်းငယ် နောင်တရသည်ဟု ခံစားရပါသည်”ဟု ဆိုကြသည်။ လက်တွေ့ဘဝတွင် ထိုသို့သော လူများသည် လမ်းကြောင်းမှန်ကို လျှောက်လှန်းရန်အလို့ငှာ မိမိတို့၏ ကျင့်ကြံပြုမူခြင်းကို ထိန်းညှိပြီး မိမိတို့ကိုယ်ကို ချုပ်ထိန်းရန် မိမိတို့၏ အသိစိတ်ကို အသုံးပြုနိုင်ကြသည်။ ၎င်းတို့သည် ကယ်တင်ခြင်းခံရနိုင်သော လူများ ဖြစ်ကြသည်။ ဤသည်မှာ အဘယ့်ကြောင့်ဆိုသော် ၎င်းတို့သည် သမ္မာတရားကို လက်ခံနိုင်သောကြောင့်၊ သမ္မာတရားအချို့ကို လက်တွေ့လုပ်ဆောင်နိုင်သောကြောင့်ဖြစ်ပြီး အပြောင်းအလဲအချို့ကို ကြုံတွေ့ပြီးဖြစ်သောကြောင့် ဖြစ်သည်။ ၎င်းတို့၏ တိုးတက်မှု အရှိန်သည် ပျမ်းမျှထက် အနည်းငယ်နှေးပြီး ၎င်းတို့၏ ကြီးထွားမှုသည် အတော်အတန်း ကျယ်ပြန့်မှုလျော့နည်းခြင်းသာ ဖြစ်သည်။ သို့သော် ၎င်းတို့သည် ပြောင်းလဲနေကြပေသည်။ ယင်းမှာ အချို့သော မျိုးစေ့များသည် ကောင်းသောမြေ၌ လျင်မြန်စွာ ကြီးထွားကြစဉ်တွင် အခြားမျိုးစေ့များမှာမူ သဲ သို့မဟုတ် ကျောက်များထဲတွင် ပို၍နှေးကွေးစွာနှင့် ပို၍ ကြီးမားသော အခက်အခဲဖြင့် ကြီးထွားကြသည့်အတိုင်းပင် ဖြစ်သည်။ သို့သော် ၎င်းတို့၌ အသက်ရှိနေသရွေ့ ၎င်းတို့ ကြီးထွားကြလိမ့်မည်။ လူများနှင့်ပတ်သက်၍လည်း အလားတူပင် ဖြစ်သည်။ ၎င်းတို့၏ လူ့သဘာဝသည် လူတို့၌ ရှိသင့်သည့် အသိစိတ်နှင့် ဆင်ခြင်တုံတရားကို ပိုင်ဆိုင်နေသရွေ့ ယင်းက ၎င်းတို့၌ လူ့အသက်ရှိကြောင်း သက်သေပြသည်။ သမ္မာတရားကို လက်ခံပြီးနောက် ၎င်းတို့ ပြောင်းလဲကြလိမ့်မည်ဖြစ်သည်။ ပြောင်းလဲခြင်းက နှေးကွေးလျှင်ပင်၊ အခြားသူများသည် ဆယ်နှစ်အတွင်း ကြီးမားသော တိုးတက်မှု ဖြစ်စေစဉ်တွင် ၎င်းတို့က အနှစ်နှစ်ဆယ် သို့မဟုတ် သုံးဆယ်အတွင်း တိုးတက်မှု အနည်းငယ်သာ ဖြစ်စေရှိလျှင်ပင်၊ နှေးကွေးမှုရှိလင့်ကစား၊ ၎င်းတို့သည် အပြုသဘောဆောင်သော ဦးတည်ချက်တစ်ခုဖြင့် တိုးတက်နေကြခြင်း ဖြစ်သည်၊ ၎င်းတို့ ပြောင်းလဲနေကြပြီး ၎င်းတို့၏ အသက်က အဆက်မပြတ် ကြီးထွားနေသည်။ ၎င်းတို့ မည်မျှ လျင်မြန်စွာ ကြီးထွားသည်ဖြစ်စေ သို့မဟုတ် နှေးကွေးစွာ ကြီးထွားသည်ဖြစ်စေ ဤလူစားမျိုးသည် လူ့သဘာဝ၏ အရည်အသွေးကို ပိုင်ဆိုင်သည်။ သို့သော်လည်း ဘုရားသခင်ကို နှစ်ပေါင်းများစွာ ယုံကြည်ပြီးဖြစ်သော်လည်း အသက်တာ ကြီးထွားမှု လုံးဝ အကောင်အထည်မပေါ်သေးသည့် အခြားလူစားတစ်မျိုး ရှိသည်။ မည်သူက သမ္မာတရားကို မိတ်သဟာယဖွဲ့သည်ဖြစ်စေ ၎င်းတို့သည် အလွန်အမင်း ရွံမုန်းခြင်း ခံစားချက်တစ်ခုကို ခံစားရပြီး နားထောင်ရန် မလိုမလားဖြစ်ကြသည်။ ဘုရားသခင်က မည်သည့် ပတ်ဝန်းကျင်ကို ပြင်ဆင်ပေးသည်ဖြစ်စေ ၎င်းတို့သည် သမ္မာတရားကို မရှာဖွေကြသည့်အပြင်၊ ယင်းမှ သင်ခန်းစာများကို မသင်ယူနိုင်ကြသည့်အပြင် ယင်းမှ အပြုသဘောဆောင်သော လမ်းညွှန်မှုနှင့် အကူအညီကို မရရှိနိုင်ကြပေ။ ၎င်းတို့သည် မိမိတို့၏ စိတ်နှလုံးထဲ၌ အပြုသဘောဆောင်သော အရာများကို အလွန်အမင်း မနှစ်မြို့ခြင်း ဖြစ်ကြသည်။ ၎င်းတို့နှစ်သက်သည့် မည်သည့်အရာကိုမဆို လုပ်ဆောင်သည့် ၎င်းတို့၏ စိတ်သဘောထားနှင့် ဘဝနေထိုင်မှုပုံစံသည် မည်သည့်အခါမျှ ပြောင်းလဲခြင်း မရှိလေပြီ။ ထိုသို့သော လူများသည် အသိစိတ်နှင့် ဆင်ခြင်တုံတရားမရှိသူများ ဖြစ်ကြသည်။ ၎င်းတို့သည် လူသားများမဟုတ်၊ လူသားမဟုတ်သူများ ဖြစ်ကြသည်။ ငါ ဤသို့ ရှင်းပြသည်နှင့်အမျှ၊ သင်တို့အတွက် ပို၍ရှင်းလင်းပြီး ပို၍နားလည်နိုင်ဖွယ် ဖြစ်လာသလော။ (ဖြစ်လာပါသည်။)

အခြားလူစားတစ်မျိုး ရှိသေးသည်။ ၎င်းတို့သည် ဘုရားသခင်ကို ယုံကြည်ခြင်းက ကောင်းသည်ဟု သိကြသော်လည်း အပြုသဘောဆောင်သော အရာများနှင့် အပျက်သဘောဆောင်သော အရာများက အဘယ်အရာများဖြစ်သည်ကို ၎င်းတို့ နားမလည်ကြပေ။ ထို့အပြင် ၎င်းတို့သည် မိမိတို့၏ စကားနှင့် လုပ်ရပ်များကို ထိန်းညှိရန် သို့မဟုတ် ချုပ်ထိန်းရန် မိမိတို့၏ အသိစိတ်ကို အသုံးပြုရန် မည်သို့မျှ မနီးစပ်ပေ။ ထိုသို့သော လူများကို ပိုင်းခြားသိမြင်ရန် ပို၍လွယ်ကူသည်။ ၎င်းတို့သည် အပြုသဘောဆောင်သော အရာများကို ချစ်မြတ်နိုးခြင်းနှင့် မည်သို့မျှ မနီးစပ်သည့်အပြင် အမှုအရာများနှင့်ဆိုင်သည့် အဓိပ္ပာယ်ကို သိနားလည်ခြင်းနှင့်လည်း မနီးစပ်ကြပေ။ ဤအရာအားလုံးသည် ၎င်းတို့အတွက် နားဝေတိမ်တောင်ဖြစ်သည့်အရာတစ်ခု ဖြစ်သည်။ သင်သည် ၎င်းတို့အား အပြုသဘောဆောင်သော အရာများက အဘယ်အရာဖြစ်သည်ကို မေးလျှင် ၎င်းတို့သည် အယူဝါဒများအရ ပြောဆိုလိမ့်မည်ဖြစ်ပြီး ဘုရားသခင်ပြောဆိုသည့်အရာနှင့် လုပ်ဆောင်သည့်အရာအားလုံးသည် အပြုသဘောဆောင်သော အရာများဖြစ်သည်ဟု ဆိုကြလိမ့်မည်။ ၎င်းတို့ပြောဆိုသည့်အရာသည် အတော်လေး ကောင်းမွန်ပုံပေါက်သော်လည်း အမှုအရာများကို ၎င်းတို့ ကြုံတွေ့သည့်အခါ ယင်းတို့ကို ဘုရားသခင်၏ နှုတ်ကပတ်တော်များနှင့် ဆက်စပ်၍မရနိုင် သို့မဟုတ် ပိုင်းခြားသိမြင်နိုင်ခြင်း မရှိကြပေ။ ၎င်းတို့၏ စိတ်များက ပျော့ပြဲသောအရာကဲ့သို့ ဖြစ်လာသည်။ ၎င်းတို့သည် နားဝေတိမ်တောင်ဖြစ်လာပြီး မည်သည့်အရာကိုမျှ ရှင်းလင်းစွာ မသိကြပေ။ သင်သည် ၎င်းတို့အား နှစ်ပေါင်းများစွာ ဘုရားသခင်ကို ယုံကြည်ခြင်းမှ မည်သည့်သမ္မာတရားများ ရရှိပြီးဖြစ်သည်ကို မေးလျှင် ၎င်းတို့က “ဘုရားသခင်သည် အရာခပ်သိမ်းအပေါ် အချုပ်အခြာအာဏာ စွဲကိုင်သည်၊ လူအတွက် ကိုယ်တော်ပြုသမျှ အရာရာတိုင်းက ကောင်းမြတ်ပြီး ဘုရားသခင်သည် လူကို ချစ်သည်။ စာတန်သည် ဘုရားသခင်ကို အတိုက်အခံလုပ်ပြီး စာတန်က လူကို ထိခိုက်နစ်နာစေသည်၊ ညှဉ်းပန်းနှိပ်စက်ပြီး မတရားဖိနှိပ်သည်”ဟု ဆိုကြသည်။ သင်သည် ၎င်းတို့အား အခြားမည်သည့်အရာ ရရှိပြီးဖြစ်သည်ကို မေးလျှင် ၎င်းတို့က “ကျွန်ုပ်တို့သည် ကျွန်ုပ်တို့၏ တာဝန်ကို ကောင်းစွာထမ်းဆောင်ရမည်၊ ပို၍ ဆင်းရဲဒုက္ခခံပြီး ပို၍ကြီးမားသော အဖိုးအခကို ပေးရမည်” ဟု ဆိုကြသည်။ ထို့နောက် သင်သည် ၎င်းတို့အား မိမိတို့၏ တာဝန်ကို ထမ်းဆောင်ရာ၌ မည်သည့်စည်းမျဉ်းများ လိုက်နာသင့်သည်ကို မေးလျှင် ၎င်းတို့က “ကျွန်ုပ်တို့သည် အထက်လူကြီးများ ပြောဆိုသည့် မည်သည့်အရာကိုမဆို နားထောင်သင့်ပြီး ကျွန်ုပ်တို့ကို ခိုင်းသည့် မည်သည့်အရာကိုမဆို လုပ်ဆောင်သင့်သည်။ အလုပ်သည် ညစ်ပတ်ပြီး ပင်ပန်းစရာဖြစ်လျှင်ပင် ယင်းကို ကျွန်ုပ်တို့ ကောင်းစွာလုပ်ဆောင်ရမည်။ ကျွန်ုပ်တို့သည် အဖျက်အမှောင့်လုပ်ပြီး နှောင့်ယှက်ခြင်း သို့မဟုတ် ဒုက္ခပေးခြင်း မဖြစ်စေရ။ လူတိုင်းအတွက်နှင့် ဘုရားအိမ်တော်အတွက် အကျိုးရှိသော အမှုအရာများကို ကျွန်ုပ်တို့ လုပ်ဆောင်ရမည်”ဟု ဆိုကြသည်။ ၎င်းတို့ပြောဆိုသည့် ဤအယူဝါဒအားလုံးက မှန်ကန်သည်။ ယင်းတို့အထဲ၌ မှားယွင်းသော စကားလုံးတစ်လုံးမျှ မရှိပေ။ သို့သော်လည်း ၎င်းတို့သည် အမှုအရာများကို ကြုံတွေ့သည့်အခါ လွဲချော်ပြီး မိုက်မဲသော ရှုထောင့်အချို့မှလွဲ၍ မည်သည့်အရာကိုမျှ ထုတ်ဖော်မပြကြသည့်အပြင် ၎င်းတို့ကို သင် အကြိမ်မည်မျှပင် ပြုပြင်ပေးသည်ဖြစ်စေ ၎င်းတို့ မပြောင်းလဲနိုင်ကြပေ။ ထိုသို့သော လူများသည် မည်သည့် အယုတ်တမာမျိုးများ ဖြစ်ကြသနည်း။ (၎င်းတို့သည် နားဝေတိမ်တောင်ဖြစ်သော လူများ ဖြစ်ကြပါသည်။) နားဝေတိမ်တောင်ဖြစ်သော လူများသည် လူသားများ ဖြစ်သလော။ (မဟုတ်ပါ။) နားဝေတိမ်တောင်ဖြစ်သော လူများဟူသည် အဘယ်အရာ ဖြစ်ကြနည်း။ (သားရဲတိရစ္ဆာန်များ ဖြစ်ပါသည်။) ယဉ်ကျေးသော စကားလုံးမှာ “တိရစ္ဆာန်” ဖြစ်ပြီး အရပ်သုံးစကားလုံးမှာ “သားရဲတိရစ္ဆာန်” ဖြစ်သည်။ ၎င်းတို့သည် တရားဒေသနာ မည်မျှပင် နားထောင်သည်ဖြစ်စေ သမ္မာတရားက အဘယ်အရာဖြစ်သည်၊ အပြုသဘောဆောင်သော အရာများက အဘယ်အရာဖြစ်သည် သို့မဟုတ် အပျက်သဘောဆောင်သော အရာများက အဘယ်အရာဖြစ်သည်ကို နားမလည်ကြပေ။ ၎င်းတို့သည် ဘုရားသခင်ကို ပုန်ကန်သည့် အမှုအရာ မည်မျှပင် ပြုလုပ်သည်ဖြစ်စေ မိမိတို့၏ စိတ်နှလုံးထဲ၌ ယင်းကို သတိပြုမိခြင်းမရှိသည့်အပြင်၊ မိမိတို့သည် အလိုအလျောက် ကြင်နာစိတ်ရှိပြီး စာနာတတ်သော စိတ်နှလုံးရှိသည်ဟု ခံစားနေကြဆဲ ဖြစ်သည်။ တစ်စုံတစ်ဦး ဆင်းရဲဒုက္ခခံစားနေရသည်ကို မြင်သည့်အခါ မိမိတို့၏ စိတ်နှလုံးထဲ၌ နာကျင်သည်ဟု ၎င်းတို့ ခံစားရပြီး ထိုသူ၏ ကိုယ်စား ဆင်းရဲဒုက္ခခံပေးနိုင်ရန် ဆန္ဒရှိကြသည်။ ၎င်းတို့သည် တစ်စုံတစ်ဦး၌ စားစရာ သို့မဟုတ် ဝတ်စရာမရှိသည်ကို မြင်သည့်အခါ မိမိတို့၏ ကိုယ်ပိုင်အဝတ်အစားများနှင့် အစားအစာကို ထိုသူအား ပေးလိုကြသည်။ လူသားမျိုးနွယ်၏ ဖောက်ပြန်ပျက်စီးမှုကို ဖော်ထုတ်သည့် ဘုရားသခင်၏ နှုတ်ကပတ်တော် မည်မျှကိုပင် ၎င်းတို့ နားထောင်သည်ဖြစ်စေ မိမိတို့က အလွန်ကောင်းပြီး အခြားမည်သူထက်မဆို ပိုကောင်းသည်ဟု ခံစားနေကြဆဲ ဖြစ်သည်။ မှားယွင်းသော အမှုအရာ မည်မျှကိုပင် ၎င်းတို့ ပြုလုပ်သည်ဖြစ်စေ မည်သည့်နေရာတွင် မှားသွားသည်ကို မသိကြသည့်အပြင် မိမိတို့၌ ဖောက်ပြန်ပျက်စီးသော စိတ်သဘောထားရှိသည်ကို မည်သည့်အခါမျှ ဝန်မခံကြပေ။ သင်က ၎င်းတို့အား “သင်သည် ဖောက်ပြန်ပျက်စီးသော လူသားတစ်ဦးလော။ သင်၌ ဖောက်ပြန်ပျက်စီးသော စိတ်သဘောထား ရှိသလော”ဟု မေးလျှင် ၎င်းတို့က “ဟုတ်ကဲ့၊ ရှိပါသည်၊ လူတိုင်း၌ ဖောက်ပြန်ပျက်စီးမှု ရှိသည်။ ကျွန်ုပ်၌ မည်သို့ဖြစ်ပြီး မရှိဘဲ နေနိုင်မည်နည်း။ သင်သည် မိုက်မဲသော စကားများကို ပြောနေသည်”ဟု ဆိုကြသည်။ ၎င်းတို့က သင့်ကို မိုက်မဲသည်ဟုပင် ခေါ်ကြသည်။ သို့သော် ၎င်းတို့သည် မှားယွင်းသောအအရာ တစ်စုံတစ်ခုကို ပြုလုပ်သည့်အခါ ဝန်မခံသည့်အပြင် အပြစ်ကိုပင် အခြားသူများအပေါ်သို့ လွှဲချကြသည်။ ၎င်းတို့ မည်သည့်အမှားကို ပြုလုပ်သည်ဖြစ်စေ ဝန်မခံကြသည့်အပြင် ၎င်းတို့ ပြုမိသည့် မကောင်းမှုများက မည်မျှ ဆိုးရွားသည်ဖြစ်စေ၊ မိမိတို့ကိုယ်ကို မှန်ကြောင်းပြရန် ဆင်ခြေများနှင့် အကြောင်းပြချက်များ အမြဲရှိကြသည်။ ထိုသို့သော လူများ၌ ဆင်ခြင်တုံတရား တစ်ခုတလေ ရှိသလော။ ၎င်းတို့သည် အမှားနှင့်အမှန်ကို ပိုင်းခြားသိမြင်နိုင်သော လူများဖြစ်သလော။ (၎င်းတို့၌ ဆင်ခြင်တုံတရားမရှိသည့်အပြင် အမှားနှင့်အမှန်ကို မပိုင်းခြားနိုင်ပါ။) ၎င်းတို့သည် နေ့စဉ်နေ့တိုင်း မိုးသောက်မှ နေဝင်သည်ထိ တရားဒေသနာများကို နားထောင်ပြီး ဘုရားသခင်၏ နှုတ်ကပတ်တော်များကို ဖတ်ရှုလျက် အလွန်ကြိုးစားအားထုတ်ပုံရသော်လည်း သမ္မာတရားနှင့်ဆိုင်သည့် စာတစ်ကြောင်းကိုမျှ နားမလည်နိုင်၊ သမ္မာတရား စည်းမျဉ်းများနှင့် ကိုက်ညီသော အမှုအရာတစ်ခုကိုမျှ မလုပ်ဆောင်နိုင်သည့်အပြင်၊ သမ္မာတရားနှင့် ကိုက်ညီသော စကားတစ်ခွန်းကိုမျှ မပြောနိုင်ကြပေ။ သမ္မာတရားနှင့် ကိုက်ညီသော စကားများကို မဆိုထားနှင့်၊ လူ့သဘာဝ၏ အသိစိတ်နှင့် ဆင်ခြင်တုံတရားတို့နှင့် ကိုက်ညီသော စကားတစ်ခွန်းကိုပင် မပြောနိုင်ကြပေ။ ၎င်းတို့သည် နားဝေတိမ်တောင်ဖြစ်ပြီး အဓိပ္ပာယ်မဲ့သော စကားများကိုသာ ပြောဆိုပြီး ကောက်ကျစ်သော ကျိုးကြောင်းပြချက်များကိုသာ ရေရွတ်ပြောဆိုကြသည်။ ထိုသို့သော လူများသည် အသိစိတ်နှင့် ဆင်ခြင်တုံတရားရှိခြင်းကို အလွန်စံမမီကြပေ။ ၎င်းတို့သည် ကောက်ကျစ်သော ကျိုးကြောင်းဆင်ခြင်မှုများနှင့် ပြည့်လျှမ်းနေသည့် နားဝေတိမ်တောင်ဖြစ်သော လူများသာ ဖြစ်ကြသည်။ တရားဒေသနာများစွာကို နားထောင်ပြီးနောက် ၎င်းတို့သည် ဝိညာဉ်ရေးရာ စကားအချို့ကို ပြောနိုင်ကြသည်။ ၎င်းတို့ ဝိညာဉ်ရေးရာ စကားများ ပြောဆိုသည်ကို သင် ကြားသည့်အခါ ၎င်းတို့သည် အတော်လေး ကျွမ်းကျင်ပြီး ရှင်းလင်းပြတ်သားစွာ ပြောဆိုနိုင်သည်ဟု သင်ခံစားရသည်။ သို့သော် အမှုအရာများကို ကိုင်တွယ်ခြင်းနှင့် ပတ်သက်လာသည့်အခါတွင်မူ ၎င်းတို့သည် နားဝေတိမ်တောင်ဖြစ်ပြီး အဓိပ္ပာယ်မဲ့ကြောင်းကို သင် တွေ့ရှိရသည်။ ၎င်းတို့သည် ကောက်ကျစ်သော ကျိုးကြောင်းပြချက်များကို ရေရွတ်ပြောဆိုသည့်အခါ သင့်ကို စကားမပြောနိုင်အောင် ဖြစ်စေနိုင်သည်။ “စကားမပြောနိုင်အောင် ဖြစ်စေသည်” ဟူသည်မှာ အဘယ်အရာကို ဆိုလိုသနည်း။ ယင်းမှာ တစ်စုံတစ်ဦးသည် ထိုသို့သော အဓိပ္ပာယ်မဲ့သည့် စကားများကို ပြောနိုင်မည် သို့မဟုတ် ထိုသို့သော တွေးခေါ်ပုံမျိုး ရှိနိုင်မည်ကို သင် စိတ်ကူးမရနိုင်ကြောင်း၊ ယင်းမှာ သင့်အတွက် လုံးဝ စိတ်ကူး၍ပင် မရနိုင်ကြောင်းနှင့် အဆုံးတွင် သင်သည် ၎င်းတို့အား နုတ်ဆိတ်ခြင်းဖြင့်သာ တုံ့ပြန်နိုင်ပြီး ယင်းမှာ ၎င်းတို့ကို ကိုင်တွယ်ရန် အကောင်းဆုံးနည်းလမ်းဖြစ်ကြောင်းတို့ကို ဆိုလိုပေသည်။

လူတစ်ဦးသည် လူသားဖြစ်ပြီး ပုံမှန်လူ့သဘာဝကို ပိုင်ဆိုင်ထားပါက အမှားနှင့်အမှန်ကို ပိုင်းခြားသိမြင်နိုင်ခြင်းသည် အရေးပါလှပေသည်။ ၎င်းတို့က ဘုရားသခင်၏ နှုတ်ကပတ်တော်များ၏ ထောက်ပံ့မှုကို မရရှိသေးသည့်အပြင်၊ သမ္မာတရားကို နားမလည်ချိန်တွင် ရိုးရှင်းသော အပြုသဘောဆောင်သည့် အရာအချို့နှင့် အပျက်သဘောဆောင်သော အရာအချို့ကို နားလည်ရန် ၎င်းတို့၏ အသိစိတ်နှင့် ဆင်ခြင်တုံတရားကို အသုံးပြုနိုင်ကြသည်။ ၎င်းတို့သည် လက်တွေ့ဘဝတွင် ထိတွေ့ဆက်ဆံရသည့် အချို့သော အပြုသဘောဆောင်သော အရာများအပြင် အပျက်သဘောဆောင်သော အရာများနှင့် ပတ်သက်လာသည့်အခါ ပိုင်းခြားသိမြင်မှု တစ်ခုခုနှင့် သိမြင်တတ်သော အစွမ်းအစများ ရှိကြသည်။ ၎င်းတို့သည် အခြေခံကျသော လူသား သာမန်အသိစိတ်အောက်တွင် အကျိုးဝင်သောအရာများအပေါ်၊ လူသားတို့ ရှင်သန်ရေး နိယာမများနှင့် ၎င်းတို့ မကြာခဏ ကြုံတွေ့ရသည့် အချို့သော လူများ၊ ဖြစ်ရပ်များနှင့် အမှုအရာများအပေါ်တွင် ပိုင်းခြားသိမြင်မှု တစ်ခုခု ရှိကြသည်။ ၎င်းတို့သည် နားဝေတိမ်တောင်ဖြစ်သည့် နည်းလမ်းဖြင့် အသက်ရှင်သူတစ်ဦး မဟုတ်ဘဲ လူ့လောကရှိ အပြုသဘောဆောင်သော အရာများအပြင်၊ အပျက်သဘောဆောင်သော အရာများနှင့်ပတ်သက်လာသည့်အခါ ပိုင်းခြားသိမြင်မှုနှင့် သိမြင်တတ်သော အစွမ်းအစများ ရှိကြပြီး၊ ဤအရာများအပေါ် အချို့သော အတွေးများ၊ ရပ်တည်ချက်များနှင့် မှန်ကန်သော သဘောထားများလည်း ရှိကြသည်မှာ အမှန်ပင်ဖြစ်သည်။ အသက်သုံးဆယ်နောက်ပိုင်းတွင် ထိုသို့သောလူများသည် ဘဝ၏ ကိစ္စရပ်အမျိုးမျိုးကို တဖြည်းဖြည်း စတင်ကြုံတွေ့လာရသည်။ ၎င်းတို့သည် ဘုရားသခင်၏ နှုတ်ကပတ်တော်များကို မဖတ်သေးလျှင် သို့မဟုတ် ဘုရားသခင်၏ နှုတ်ကပတ်တော်များမှ ထောက်ပံ့မှုကို မရရှိသေးလျှင်ပင် ၎င်းတို့ အသက် ငါးဆယ် သို့မဟုတ် ခြောက်ဆယ်အရွယ်သို့ ရောက်သောအခါတွင် အပြုသဘောဆောင်သော အရာများက အဘယ်အရာဖြစ်သည်၊ အပျက်သဘောဆောင်သော အရာများက အဘယ်အရာဖြစ်သည်ဟူသည်ကို တဖြည်းဖြည်း အကျဉ်းချုပ်သုံးသပ်နိုင်ပြီး ထို့နောက်တွင် ၎င်းတို့ နားလည်သဘောပေါက်နိုင်သည့် ထိုအပြုသဘောဆောင်သော အရာများအတိုင်း အသက်ရှင်နိုင်ကာ အပြုသဘောဆောင်သော အရာများ၏ နိယာမအချို့ကို လိုက်နာနိုင်ကြသည်။ အပျက်သဘောဆောင်သော အရာအချို့အတွက်မူ ယင်းတို့ကို ပိုင်းခြားသိမြင်နိုင်သည့်အပြင် ၎င်းတို့သည် မိမိတို့၏ စိတ်နှလုံး နက်ရှိုင်းသောနေရာမှလည်း ယင်းတို့နှင့် ခပ်ကင်းကင်း နေနိုင်ကြသည်။ ၎င်းတို့သည် လောကီ ခေတ်ရေစီးကြောင်းများ သို့မဟုတ် လူအများကြား ပျံ့နှံ့နေသော လောကီဆိုင်ရာ ဆက်ဆံမှုများအတွက် အတွေးအခေါ်အချို့နှင့် ဆိုရိုးစကားအချို့ကို လိုက်နာရန်မှလွဲ၍ အခြားရွေးချယ်စရာမရှိသောအခါတွင် မိမိတို့၏ အသိစိတ်ကို ဆန့်ကျင်နေသည်ဟု ၎င်းတို့ ခံစားရပြီး ၎င်းတို့၏ အသိစိတ်က ၎င်းတို့ကို အပြစ်တင်လိမ့်မည်။ ၎င်းတို့၏ စိတ်နှလုံး နက်ရှိုင်းသောနေရာမှနေ၍ ၎င်းတို့သည် ထိုသို့သော အမြင်များကို လက်မခံကြပေ။ ၎င်းတို့သည် ရှင်သန်ရေးအတွက် သို့မဟုတ် ယာယီအကျိုးအမြတ်များအတွက်သာ ဤသို့ ပြုမူကြခြင်း ဖြစ်သည်။ ဤအရာများကို ပြုလုပ်ရန်မှာ ၎င်းတို့၏ မူလရည်ရွယ်ချက် မဟုတ်။ ထို့ထက် မိမိတို့၏ အလိုဆန္ဒနှင့် ဆန့်ကျင်၍ ပြုလုပ်ခဲ့သော ရွေးချယ်မှုတစ်ခုသာ ဖြစ်သည်။ ထိုသို့သောလူများသည် ဘုရားသခင်ကို ယုံကြည်ပြီးနောက်တွင် လူ့ဘဝ၊ ရှင်သန်မှုတို့နှင့် သက်ဆိုင်သည့်အရာများကဲ့သို့သော ကိစ္စရပ်မျိုးစုံနှင့်ပတ်သက်၍ ဘုရားသခင်၏ နှုတ်ကပတ်တော်များက အတိအကျ မည်သည့်အရာ ပြောသည်ကိုလည်းကောင်း၊ လူ့ဘဝတွင်ရှိသည့် ခက်ခဲသော ပြဿနာများနှင့်စပ်လျဉ်း၍ ဘုရားသခင်၏ တိကျသော မိန့်ဆိုချက်များက အတိအကျ အဘယ်အရာဖြစ်သည်ကိုလည်းကောင်း၊ ထိုအရာများနှင့် ရင်ဆိုင်ရသည့်အခါ လူတို့အား ဘုရားသခင်က အတိအကျ မည်သည့်အရာကို လုပ်ဆောင်ရန် တောင်းဆိုသည်ကိုလည်းကောင်း ပို၍ စိတ်ဝင်စားကြသည်။ ၎င်းတို့သည် ဤမေးခွန်းများအတွက် အဖြေများကို တမ်းတကြသည်။ အဖြေများကို ရရှိသောအခါ ဘုရားသခင်၏ နှုတ်ကပတ်တော်များအတိုင်း လက်တွေ့လုပ်ဆောင်ခြင်းသည် အလွန်ခက်ခဲသည် သို့မဟုတ် လူ့သဘာဝ၏ လိုအပ်ချက်များနှင့် အလွန်ဆန့်ကျင်သည်ဟု ၎င်းတို့ မခံစားရပေ။ ထိုအစား ဤသမ္မာတရားများသာလျှင် မှန်ကန်သော လမ်းကြောင်းဖြစ်ကြောင်း၊ လူတို့ ပိုင်ဆိုင်သင့်ပြီး စွမ်းဆောင်ရရှိသင့်သည့်အရာ ဖြစ်ကြောင်းနှင့် ဘဝတွင် လူတို့ ရှိသင့်သော ပုံသဏ္ဌာန်ဖြစ်ကြောင်း ၎င်းတို့ ခံစားရသည်။ လူတို့သည် ဤသို့ အသက်ရှင်ပါက ထိုအရာက ၎င်းတို့၏ အသိစိတ်နှင့် လူ့သဘာဝ၏ လိုအပ်ချက်များကို အမှန်တကယ် ဖြည့်ဆည်းနိုင်ကြောင်းနှင့် ဤသို့ အသက်ရှင်ခြင်းဖြင့်သာ ၎င်းတို့သည် မိမိတို့၏ အလိုဆန္ဒကို မဆန့်ကျင်သည့်အပြင်၊ ထိုအခါမှသာ စိတ်တည်ငြိမ်ပြီး ဝမ်းမြောက်ခြင်းနှင့် ငြိမ်သက်ခြင်း ရှိနိုင်ကြောင်းကို ၎င်းတို့ ခံစားရသည်။ ထိုအခါမှသာ လူတို့သည် မျှော်လင့်ချက်ရှိပြီး ဆက်လက်အသက်ရှင်လိုစိတ် ရှိလိမ့်မည်ဖြစ်ကြောင်းနှင့် ထိုအခါမှသာလျှင် ၎င်းတို့သည် အမျိုးမျိုးသော ဆိုးယုတ်သည့် အင်အားစုများ၊ အမျိုးမျိုးသော ဆိုးယုတ်သည့် ခေတ်ရေစီးကြောင်းနှင့် လူသားမျိုးနွယ် အသက်ရှင်နေသည့် အနှစ်မဲ့သော အခြေအနေတို့မှ လွတ်မြောက်နိုင်မည်ဖြစ်ကြောင်းကို ၎င်းတို့ ခံစားရသည်။ ၎င်းတို့၏ စိတ်နှလုံးအတွင်း နက်ရှိုင်းသောနေရာရှိ အသိစိတ်၏ လွှမ်းမိုးမှုအောက်တွင် ၎င်းတို့သည် ဘုရားသခင်၏ နှုတ်ကပတ်တော်များရှိ အမျိုးမျိုးသော မိန့်ဆိုချက်များ၊ သွန်သင်ချက်များနှင့် ထောက်ပံ့မှုများအတွက် နှစ်သက်မှုရှိကြပြီး ယင်းတို့ကို ၎င်းတို့၏ စိတ်နှလုံး နက်ရှိုင်းသောနေရာမှ လက်ခံယုံကြည်ကြသည်။ ၎င်းတို့သည် သမ္မာတရားကို ရရှိခြင်းအား လိုက်စားလိုသည့် ဆန္ဒရှိကြသည်။ ထို့အပြင် ဘုရားသခင်၏ နှုတ်ကပတ်တော်များကို ပိုပိုပြီး ဖော်ပြထားသည့်အပြင်၊ ဘုရားနှုတ်ကပတ်တော်များ၏ ထောက်ပံ့မှုက ပိုပိုပြီး လက်တွေ့ကျကာ အသေးစိတ်လာသည်နှင့်အမျှ သမ္မာတရားနှင့် အပြုသဘောဆောင်သော အရာများအတွက် ၎င်းတို့၏ တမ်းတမှုသည် တိုး၍ ဖြည့်ဆည်းခြင်းခံရလေသည်။ ၎င်းတို့သည် ပို၍ နားထောင်လေလေ ပို၍ မငြိမ်မသက်ဖြစ်လာလေလေ ဖြစ်ခြင်း၊ ယင်းကို အသေးစိတ်ကျလွန်းသည်ဟု မြင်လေလေဖြစ်ခြင်း သို့မဟုတ် ပို၍ နားဝေတိမ်တောင်ဖြစ်လေလေဖြစ်သည်ဟု ခံစားရခြင်း မဟုတ်ပေ။ ဆန့်ကျင်ဘက်အားဖြင့် ၎င်းတို့ ပို၍ နားထောင်လေလေ အမှုအရာများက ပို၍ ရှင်းလင်းလာပုံရလေလေဖြစ်ပြီး အမှုအရာများကို ၎င်းတို့ ထိုးထွင်းသိမြင်နိုင်ကာ လမ်းကြောင်းတစ်ခုရှိသည်ဟု ပို၍ ခံစားရလေလေ ဖြစ်သည်။ ရှေ့တွင် မျှော်လင့်ချက်ရှိကြောင်း၊ အလင်းကို မြင်တွေ့ရပြီး သမ္မာတရားကို လက်တွေ့လုပ်ဆောင်ကာ ကယ်တင်ခြင်းကို ရရှိရန် လမ်းကြောင်းတစ်ခု ရှိကြောင်း ၎င်းတို့ ခံစားရသည်။ ၎င်းတို့၏ စိတ်နှလုံးများက ပိုပိုပြီး တည်ငြိမ်လာသည်ဟု ခံစားရပြီး ဘုရားသခင်ကို ယုံကြည်ခြင်းလမ်းကြောင်းက မှန်ကန်ကြောင်းနှင့် ဘုရားသခင်ကို ယုံကြည်ရာတွင် ယခုအချိန်အထိ နေ့စဉ်နေ့တိုင်း ၎င်းတို့ ပေးဆပ်ခဲ့သော အဖိုးအခအပြင်၊ အသုံးခံခဲ့သော အားအင်နှင့် နှလုံးသွေးတို့သည် အကျိုးနပ်ပြီး အဓိပ္ပာယ်ရှိကြောင်းကို ၎င်းတို့ ပိုပိုပြီး ခံစားလာရသည်။ ဤအရာကို ၎င်းတို့၏ စိတ်နှလုံး နက်ရှိုင်းသောနေရာ၌ အတည်ပြုခြင်းခံရသည်။ ၎င်းတို့၏ ဆန္ဒ ပြည့်ဝပြီးဖြစ်ကာ သမ္မာတရားအတွက် ၎င်းတို့၏ တမ်းတမှုက အတော်အတန် ဖြည့်ဆည်းခံရပြီးဖြစ်သော်လည်း သမ္မာတရားကို အမှန်တကယ် တမ်းတသောလူများသည် သမ္မာတရား၏ သွင်ပြင်လက္ခဏာအားလုံးကို လက်တွေ့လုပ်ဆောင်ရန်နှင့် ဝင်ရောက်ရန်၊ ဘုရားသခင်၏ နှုတ်ကပတ်တော်များ၊ သမ္မာတရား စည်းမျဉ်းအမျိုးမျိုးနှင့် ဘုရားသခင်၏ သတ်မှတ်ချက်အမျိုးမျိုးကို မိမိတို့ကိုယ်တိုင်ထဲ၌ အကောင်အထည်ဖော်ရန် မိမိတို့ကိုယ်ကို တောင်းဆိုလျက်၊ ဘုရားသခင်၏ နှုတ်ကပတ်တော်များကို လက်တွေ့ဘဝတွင် ၎င်းတို့၏ လုပ်ရပ်များနှင့် ကျင့်ကြံပြုမူခြင်းအတွက် စံသတ်မှတ်ချက်များ ဖြစ်လာခွင့်ပေးပြီး ၎င်းတို့၏ အသက် လက်တွေ့ကျမှု ဖြစ်လာခွင့်ပေးလျက်၊ စိတ်ဆုံးဖြတ်ချက် ချမှတ်ကာ အစီအစဉ်များ ပြုလုပ်လိမ့်မည် ဖြစ်သည်။ အတိတ်တွင် ၎င်းတို့သည် သမ္မာတရားကို နားမလည်ခဲ့ချိန်တွင်၊ အချို့သော စကားလုံးများနှင့် အယူဝါဒများကိုသာ ပြောဆိုနိုင်ခဲ့ကြသည်။ ၎င်းတို့သည် အမှုအရာများနှင့် ကြုံတွေ့ရသည့်အခါ မျက်မမြင်များနှင့် ဆင်တို့နှင့်ဆိုင်သော ပုံဥပမာထဲမှာကဲ့သို့ပင် ထိုအရာများအပေါ် တစ်ဖက်သတ်အမြင်သာ ရှိခဲ့ကြသည်။ ၎င်းတို့သည် ပြဿနာ၏ အနှစ်သာရကို မမြင်နိုင်ခဲ့ကြသည့်အပြင်၊ မည်သည့်အရာ လုပ်ဆောင်ရမည်ကိုလည်း မသိခဲ့ကြပေ။ ဘဝက အလွန်ပျင်းစရာကောင်းသည်၊ ကြိုးပမ်းရမည့် ပန်းတိုင်များမရှိသည့်အပြင် မျှော်လင့်ချက်လည်းမရှိဟု ၎င်းတို့ ခံစားခဲ့ရပြီး နားဝေတိမ်တောင်ဖြစ်သောပုံစံဖြင့် အသက်ရှင်ခဲ့ကြသည်။ သို့သော်လည်း ယခုတွင် ကွဲပြား၏။ ဘုရားသခင်၏ နှုတ်ကပတ်တော်များကို ပိုပိုပြီးရှင်းလင်းစွာ ပြောဆိုထားသည့်အပြင်၊ သမ္မာတရားကို ပိုပိုပြီး ရှင်းလင်းစွာ မိတ်သဟာယပြုထားပေသည်။ လမ်းကြောင်းက ပို၍ တောက်ပပြီး ရှင်းလင်းလာနေကြောင်းနှင့် ရှေ့ဆက်ရမည့် လမ်းခရီးတစ်ခု ရှိနေကြောင်း ၎င်းတို့ ခံစားရသည်။ ထို့ပြင် ၎င်းတို့ပြောဆိုသည့် စကားလုံးတိုင်း၊ ၎င်းတို့လုပ်ဆောင်သည့် အမှုအရာတိုင်းနှင့် ၎င်းတို့ကြုံတွေ့ရသည့် လူအမျိုးအစားတိုင်းအတွက် အခြေခံအဖြစ် လိုက်နာရန် ၎င်းတို့၌ ဘုရားသခင်၏ နှုတ်ကပတ်တော်များ ရှိသည်။ ၎င်းတို့သည် ဘုရားသခင်၏ နှုတ်ကပတ်တော်များက အလွန်လက်တွေ့ကျပြီး အလွန်ကောင်းမွန်သည်ဟု ခံစားရသည့်အပြင်၊ ဘုရားသခင်ကို ယုံကြည်ခြင်းက မှန်ကန်သော လမ်းကြောင်းဖြစ်ကြောင်း၊ ဘုရားသခင်ကို ယုံကြည်ခြင်းသည် ကယ်တင်ခြင်းသို့ ပို့ဆောင်နိုင်ကြောင်းနှင့် ဤနည်းလမ်းဖြင့် ဘုရားသခင်ကို ယုံကြည်ခြင်းသည် ၎င်းတို့အား လူသားပုံသဏ္ဌာန်ဖြင့် အသက်ရှင်နေထိုင်နိုင်စေသည့်အပြင်၊ ယင်းမှာ အလွန်အဓိပ္ပာယ်ရှိကာ တန်ဖိုးရှိလှကြောင်းတို့ကို အတည်ပြုကြပြီး ဖြစ်သည်။ သမ္မာတရားများကို တမ်းတပြီး လက်တွေ့လုပ်ဆောင်နေသော်လည်း၊ ၎င်းတို့သည် ဤသမ္မာတရားများထဲသို့လည်း အစဉ်မပြတ် ဝင်ရောက်နေကြပြီး ကောင်းမွန်သော အကျိုးကျေးဇူးများကိုလည်း အစဉ်မပြတ် ရရှိခံစားနေကြသည်။ ၎င်းတို့၏ အသိစိတ်နှင့် လူ့သဘာဝ၏ အပြုသဘောဆောင်သော အရာများအတွက် တမ်းတမှုနှင့် လိုအပ်ချက်တို့ ဖြည့်ဆည်းခြင်းခံရသည်နှင့်အမျှ၊ ၎င်းတို့၏ အသက်တာသည်လည်း တဖြည်းဖြည်း ပြောင်းလဲနေသည်။ ၎င်းတို့သည် ဖောက်ပြန်ပျက်စီးသော စိတ်သဘောထားများကို မကြာခဏ ထုတ်ဖော်ပြီး ဘုရားသခင်ကို ပုန်ကန်လေ့ရှိသည့်အပြင်၊ အမှုအရာများနှင့် ကြုံတွေ့ရသည့်အခါ မရည်ရွယ်ဘဲနှင့် မိမိတို့၏ ဖောက်ပြန်ပျက်စီးသော စိတ်သဘောထားများ၊ ဇာတိပကတိနှင့် မိုက်မဲသည့်၊ အဓိပ္ပာယ်မဲ့ပြီး မှားယွင်းသော အတွေးများနှင့် ရှုထောင့်များအတိုင်း မကြာခဏ ပြုမူလေ့ရှိသော်လည်း တစ်ချိန်တည်းတွင် ကောင်းမွန်သော ဖြစ်စဉ်တစ်ခုလည်း ရှိနေသည်။ ဤအရာကို ၎င်းတို့ လုပ်ဆောင်သည့်အခါ၊ ၎င်းတို့၏ အသိစိတ်က မကြာခဏ မသက်မသာ ခံစားရပြီး ၎င်းတို့၏ ဖောက်ပြန်ပျက်စီးသော စိတ်သဘောထားများက နက်ရှိုင်းစွာ အမြစ်တွယ်နေကာ ပြောင်းလဲရန် ခက်ခဲသည်ဟု ၎င်းတို့ ခံစားရသည်။ ထို့နောက် ၎င်းတို့၏ အသိစိတ် လွှမ်းမိုးမှုအောက်တွင် ၎င်းတို့သည် မိမိတို့၏ စိတ်နှလုံးများထဲ၌ မကြာခဏ အပြစ်တင်ခြင်းကို ခံစားရပြီး အပြစ်ရှိသည်ဟု ခံစားရကာ နောင်တရကြသည်။ ၎င်းတို့ မည်သည့်နေရာတွင် အတိအကျ မှားယွင်းခဲ့သည်ကို မကြာခဏ ဆင်ခြင်သုံးသပ်ကြပြီး မကြာခဏ နောင်တရကြသည်။ ဤအရာအားလုံးသည် အသိစိတ်၏ သက်ရောက်မှုများ ဖြစ်သည်။ လူတို့တွင် အသိစိတ်ရှိပါက ဤခံစားချက်များနှင့် ဤသရုပ်သကန်များ ရှိကြလိမ့်မည်။ လူတို့၌ အသိစိတ်ရှိပါက မိမိတို့ကိုယ်ကို မကြာခဏ ဆင်ခြင်သုံးသပ်ကာ မကြာခဏ နောင်တရပြီး လမ်းကြောင်းပြောင်းလျက် ဤသည်မှာ ၎င်းတို့ အသက်ရှင်မည့်ပုံစံ ဖြစ်သည်။ ၎င်းတို့သည် ရှုံးနိမ့်မှုများနှင့် ဆုတ်ဆိုင်းမှုများကို မကြာခဏ ရင်ဆိုင်ရသည့်အပြင်၊ မှားယွင်းစွာ လုပ်ဆောင်ခြင်းအတွက် ပြုပြင်ခြင်း၊ တရားစီရင်ခြင်းနှင့် ပြစ်တင်ဆုံးမခြင်းတို့ကို မကြာခဏ ရင်ဆိုင်ရသော်လည်းကောင်း ၎င်းတို့ မကြာခဏ နောင်တရပြီး ပြောင်းလဲသောကြောင့် သမ္မာတရားကို လိုက်စားခြင်းဟူသော ၎င်းတို့၏ ပန်းတိုင်သည် မပြောင်းလဲဘဲ ရှိနေကာ အဆုံးတွင် ၎င်းတို့သည် ကောင်းမွန်သော ရလဒ်တစ်ခုနှင့် ကောင်းမွန်သော အကျိုးတရားတစ်ခုကို ရရှိကြလိမ့်မည်။ ၎င်းတို့သည် မကြာခဏ ပြစ်တင်ခြင်းနှင့် အပြစ်ရှိခြင်းကို ခံစားရပြီး မကြာခဏ လမ်းကြောင်းပြောင်းကာ နောင်တရကြသည်။ ဤသည်မှာ ကောင်းမွန်သော ဖြစ်စဉ်တစ်ခုဖြစ်သည်၊ ယင်းက ၎င်းတို့အနေဖြင့် မှန်ကန်သော လမ်းခရီးပေါ်တွင် ရှိနှင့်နေသည့်အပြင်၊ နောက်ဆုံးတွင် စစ်မှန်သော အကျိုးကျေးဇူးများကို ရရှိကြလိမ့်မည်ဖြစ်ကြောင်း ပြသနေသည်။ တစ်ချက်အနေဖြင့်၊ ၎င်းတို့၏ ဖောက်ပြန်ပျက်စီးသော စိတ်သဘောထားများသည် အတိုင်းအတာတစ်ခုအထိ လျော့ပါးသွားပြီးဖြစ်ကာ ဘုရားသခင်အပေါ် ၎င်းတို့၏ ပုန်ကန်မှုက လျော့နည်းသွားပြီးဖြစ်သည်။ ယခင်က ၎င်းတို့၏ အယူအဆများနှင့် မကိုက်ညီသော အမှုအရာများနှင့် ကြုံတွေ့ရသည့်အခါ ၎င်းတို့ ညည်းညူတတ်သော်လည်း ယခုအခါ ၎င်းတို့သည် ညည်းညူခြင်းမရှိတော့သည့်အပြင် သမ္မာတရားကို ရှာဖွေနိုင်ကြသည်။ ဘုရားသခင်နှင့် ဘုရားသခင်၏ အမှုကို အယူအဆများနှင့် စိတ်ကူးများအပေါ် အခြေခံ၍ သဘောထားခြင်းသည် အဓိပ္ပာယ်မဲ့သည်၊ ရယ်ဖွယ်ရာဖြစ်ပြီး မမှန်ကန်ကြောင်း ၎င်းတို့ သိရှိကြသည်။ ထို့အပြင် ယခင်က ၎င်းတို့သည် အခက်အခဲများနှင့် ကြုံတွေ့ရသည့်အခါ အပျက်သဘောဆောင်တတ်သော်လည်း ယခုအခါ ၎င်းတို့ အပျက်သဘော မဆောင်တော့ပေ။ ၎င်းတို့သည် ထိုအရာများကို မှန်ကန်စွာ သဘောထားနိုင်ပြီး ဘုရားသခင်၏ စီစဉ်ညွှန်ကြားခြင်းများနှင့် အစီအစဉ်များကို ကျိုးနွံနာခံနိုင်ကြသည်။ တစ်ခါတစ်ရံ ၎င်းတို့ အပျက်သဘောဆောင်ကောင်း ဆောင်နိုင်သော်လည်း ယင်းက ၎င်းတို့၏ တာဝန်ထမ်းဆောင်ခြင်းကို မထိခိုက်သည့်အပြင်၊ မိမိတို့၏ တာဝန်ကို ထမ်းဆောင်ရာတွင် ၎င်းတို့ သစ္စာစောင့်သိလာကြပြီး ဖြစ်သည်။ ထိုသို့လုပ်ဆောင်ခြင်းက မှန်ကန်ကြောင်း ၎င်းတို့၏ အသိစိတ်က ၎င်းတို့ကို ပြောပြလိမ့်မည်။ ၎င်းတို့ ဤသို့ ပြုမူသောအခါ ၎င်းတို့၏ စိတ်နှလုံးများထဲတွင် ငြိမ်သက်ခြင်းရှိလိမ့်မည်ဖြစ်ပြီး စွပ်စွဲခံရသည့် ခံစားချက်ရှိလိမ့်မည် မဟုတ်သည့်အပြင်၊ ဤသည်မှာ ၎င်းတို့ ပြုမူသင့်သည့် ပုံစံဖြစ်ကြောင်းကို တိုး၍ ခံစားကြလိမ့်မည်။ ၎င်းတို့ ဤသို့ ပို၍ လက်တွေ့လုပ်ဆောင်လေ အရာခပ်သိမ်း၌ သမ္မာတရားအား ရှာဖွေခြင်းနှင့် လက်တွေ့လုပ်ဆောင်ခြင်း၏ အရေးပါမှုကို ပို၍ နားလည်သဘောပေါက်လေဖြစ်ပြီး သမ္မာတရားကို ရှာဖွေကာ သမ္မာတရား စည်းမျဉ်းများအတိုင်း လက်တွေ့လုပ်ဆောင်သင့်ကြောင်း၊ ဤလမ်းကြောင်းသည် မှန်ကန်ကြောင်းနှင့် ဤသို့ လက်တွေ့လုပ်ဆောင်ခြင်းက အကျိုးကျေးဇူးများ ဖြစ်ထွန်းစေကြောင်းတို့ကို ပို၍ ခံစားရလေ ဖြစ်သည်။ လူတို့၌ ထိုသို့သော အကျိုးကျေးဇူးများ ရှိသောအခါ ဘုရားသခင်နှင့် ၎င်းတို့၏ ဆက်ဆံရေးက ပြောင်းလဲနေကြောင်း၊ ၎င်းတို့အတွင်းရှိ အသက်က ပြောင်းလဲနေကြောင်းနှင့် ၎င်းတို့၏ ဖောက်ပြန်ပျက်စီးသော စိတ်သဘောထားများသည် တိုး၍ ထိန်းချုပ်မှုဆုံးရှုံးကြောင်း၊ ထိုစိတ်သဘောထားများက ၎င်းတို့အပေါ်ရှိသည့် ချည်နှောင်ခြင်းနှင့် ဘောင်ခတ်ခြင်းတို့က လျော့နည်းလာနေကြောင်းတို့ကို ၎င်းတို့ တွေ့မြင်ကြသည်။ သမ္မာတရားကို လိုက်စားလိုသည့် ၎င်းတို့၏ ဆန္ဒနှင့် ယင်းအတွက် ၎င်းတို့၏ တမ်းမှုက ပို၍ အားကောင်းလာနေကြောင်းနှင့် သမ္မာတရားကို လက်တွေ့လုပ်ဆောင်ပြီး မိမိတို့၏ ဖောက်ပြန်ပျက်စီးသော စိတ်သဘောထားများကို အောင်မြင်ရန် ၎င်းတို့၏ ခွန်အားသည်လည်း တိုးပွားလာနေကြောင်းတို့ကိုလည်း ၎င်းတို့ တွေ့မြင်ကြသည်။ ဤနည်းဖြင့် လူတို့သည် ဖောက်ပြန်ပျက်စီးသော စိတ်သဘောထားများကို ဖယ်ရှားပြီး ကယ်တင်ခြင်းကို ရရှိရန် ၎င်းတို့အတွက် မျှော်လင့်ချက်ရှိကြောင်း၊ ၎င်းတို့ လျှောက်လှမ်းနေသော လမ်းကြောင်းက မှန်ကန်ကြောင်းနှင့် သမ္မာတရားကို လက်ခံခြင်း၊ လက်တွေ့လုပ်ဆောင်ခြင်းနှင့် ကျိုးနွံနာခံခြင်းတို့သည် မှန်ကန်ကြောင်း ခံစားချက်တစ်မျိုး ရှိလာကြလိမ့်မည်။ ဤသည်မှာ လူ့သဘာဝ၏ အသိစိတ်နှင့် ဆင်ခြင်တုံတရားကို ပိုင်ဆိုင်သောလူများက သမ္မာတရားအပေါ် ထားရှိသည့် သဘောထား ဖြစ်သည်။ ဤသည်မှာ လူတို့က သမ္မာတရားကို တဖြည်းဖြည်း လက်ခံလာသည်နှင့်အမျှ ၎င်းတို့၌ ရှိသော သရုပ်သကန် ဖြစ်သည်။ ဤသည်မှာ ပုံမှန်အဖြစ်ဆုံးသော သရုပ်သကန် ဖြစ်သည်။ ဤသရုပ်သကန် မရှိသောသူများအတွက်မူ ၎င်းတို့၏ အသိစိတ်က ထိန်းသိမ်းပေးသည့် အခန်းကဏ္ဍတစ်ခုကိုမျှ မဆောင်ရွက်ပေးနိုင်ပေ။ ယင်းမှာ အနည်းဆုံးအနေဖြင့် ဖြစ်သည်။ သင်သည် အသိစိတ်ရှိပါက သင်၏ အသိစိတ်သည် ထိန်းသိမ်းပေးသည့် အခန်းကဏ္ဍကို သေချာပေါက် ဆောင်ရွက်ပေးလိမ့်မည်။ သင်၏ အသိစိတ်က ထိန်းသိမ်းပေးသည့် အခန်းကဏ္ဍကို မဆောင်ရွက်နိုင်ပါက၊ သင်၏ ထိုအသိစိတ်သည် အသိစိတ်မဟုတ်။ သင်၌ အသိစိတ်မရှိပေ။ လူတို့တွင် အသိစိတ်ရှိပါက အမှားနှင့်အမှန်ကို ပိုင်းခြားသိမြင်နိုင်ကြလိမ့်မည်၊ အပြုသဘောဆောင်သော အရာများနှင့် အပျက်သဘောဆောင်သော အရာများကို ပိုင်းခြားသိမြင်နိုင်ကြလိမ့်မည်ဖြစ်ပြီး အပြုသဘောဆောင်သော အရာများကို ရွေးချယ်ကာ အပျက်သဘောဆောင်သော အရာများကို စွန့်ပစ်ကြလိမ့်မည်။ လူတို့၌ အသိစိတ်ရှိပြီး အမှားနှင့်အမှန်ကို ပိုင်းခြားသိမြင်နိုင်ပါက ၎င်းတို့သည် သမ္မာတရားကို လက်ခံရန်၊ လက်တွေ့လုပ်ဆောင်ရန်နှင့် ကျိုးနွံနာခံရန် ရွေးချယ်ကြလိမ့်မည်ဖြစ်ပြီး သမ္မာတရား စည်းမျဉ်းများအတိုင်း ပြုမူကြလိမ့်မည်။ ၎င်းတို့သည် ဤအကြိမ်တွင် သမ္မာတရားကို လက်တွေ့မလုပ်ဆောင်ပါက ၎င်းတို့၏ အသိစိတ်က ၎င်းတို့ကို အပြစ်တင်လိမ့်မည်ဖြစ်ပြီး နောက်တစ်ကြိမ်တွင် သမ္မာတရားကို လက်တွေ့မလုပ်ဆောင်ပါက ထပ်မံ၍ အပြစ်တင်ခြင်း ခံရလိမ့်မည်။ သင်သည် အသိစိတ်နှင့်ဆိုင်သည့် ခံစားချက်ရှိပြီး အမှားနှင့်အမှန်ကို နားလည်ပါက များစွာသော သမ္မာတရားများကို ကြားနာပြီးသည့်နောက်၊ အမှားကို ထပ်ခါတလဲလဲ သင် ပြုလုပ်သောအခါ သင်၏ အသိစိတ်က သင့်ကို ပို၍ပင် အပြစ်တင်ကာ စွပ်စွဲလိမ့်မည်ဖြစ်ပြီး သင်သည် သင်၏ အသိစိတ်နှင့်ဆိုင်သည့် ခံစားချက်ကို ကျိုးနွံနာခံနိုင်လိမ့်မည်ဖြစ်သည့်အပြင်၊ မှန်ကန်သော ရွေးချယ်မှုကို ပြုလုပ်နိုင်လိမ့်မည်။ အချို့လူများက “ကျွန်ုပ် အမှားလုပ်သည့်အခါ ကျွန်ုပ်၏ အသိစိတ်ကလည်း ကျွန်ုပ်ကို အပြစ်တင်သည်။ သို့သော် ဆယ်နှစ်၊ အနှစ်နှစ်ဆယ်ကြာ အပြစ်တင်ခံရပြီးသည့်နောက်တွင်ပင် သမ္မာတရားကို ကျွန်ုပ်တို့ လက်တွေ့လုပ်ဆောင်ဖို့ မရွေးချယ်ချင်သေးပါ”ဟု ဆိုကြသည်။ သို့ဆိုလျှင် သင်၏ ထိုအသိစိတ်သည် အသိစိတ်အစစ်အမှန် မဟုတ်ဟု ငါဆိုသည်။ သင့် အသိစိတ်၏ အပြစ်တင်ခြင်းကို ခံစားရသည်ဟု သင် ဆိုသော်လည်း နှစ်ပေါင်းများစွာကြာ သင်သည် လမ်းကြောင်းပြောင်းနိုင်ခြင်းမရှိ သို့မဟုတ် နောင်တရနိုင်ခြင်း မရှိသေးသည့်အပြင်၊ သင်၏ အသိစိတ်ဟုခေါ်သောအရာက သင့်အား မှန်ကန်သော လမ်းကြောင်းကို ရွေးချယ်ရန်အလို့ငှာ ထိန်းသိမ်းပေးဖို့ ပျက်ကွက်လေပြီဖြစ်သည်။ သို့ဆိုလျှင် သင်၏ အသိစိတ်သည် အသိစိတ် မဟုတ်သည့်အပြင်၊ သင်၌ လူ့သဘာဝမရှိပေ။ သင်က “ကျွန်ုပ်က မှန်သည့်အရာနှင့် မှားသည့်အရာကို သိသည်။ မည်သို့ဖြစ်ပြီး ကျွန်ုပ်တွင် အသိစိတ်မရှိဟု ကိုယ်တော် ပြောနိုင်ရသနည်း” ဟု ဆိုသည်။ ယင်းက သင်၏ စိတ်နှလုံးသည် အလွန် ခိုင်မာလွန်းပြီး သင်၏ အသိစိတ်က အလုပ်မလုပ်တော့ကြောင်းကိုသာ ဆိုလိုနိုင်သည်။ သင်သည် လူ့သဘာဝ၏ အသိစိတ်ကို အမှန်တကယ် ပိုင်ဆိုင်ထားပါက သင် အမှားလုပ်မိပြီး သင်၏ အသိစိတ်က သင့်ကို အပြစ်တင်သောအခါ သင်၏ လူ့သဘာဝသည် အပြုသဘောဆောင်သော အရာများဘက်သို့ တိမ်းညွှတ်လိမ့်မည်ဖြစ်ပြီး သင်၏ အသိစိတ်က သင့်ကို အတွင်းမှနေ၍ “ဤအရာမှားသည်၊ ဤအရာကလူ့သဘာဝ အလွန်ကင်းမဲ့သည်”ဟု ဆိုလျက် စွပ်စွဲလိမ့်မည်။ ယင်းက သင့်ကို ဤသို့ အမြဲ အပြစ်တင်နေပါက ထိုအရာကို မသိမြင်ဖို့ရန် သင်သည် မည်သည့် လူစားမျိုး ဖြစ်ရမည်နည်း။ အသိစိတ်မရှိသူများသာလျှင် ဤသိမြင်မှု ကင်းမဲ့ကြသည်။ သင်သည် အသိစိတ် အမှန်တကယ် ရှိပါက သင့် အသိစိတ်၏ အပြစ်တင်ခြင်းကို သင် ခံရသောအခါ သင်သည် စိတ်နှလုံးခိုင်မာနေနိုင်သေးသလော။ သင်က “ကျွန်ုပ်က ဆယ်နှစ်၊ အနှစ်နှစ်ဆယ်ကြာ အပြစ်တင်ခြင်းခံခဲ့ရပြီး အထူးတလည် မည်သည့်အရာမျှ မခံစားရလေပြီ”ဟု ဆိုပါက သင်သည် အသိစိတ်ရှိသူတစ်ဦး မဟုတ်ပေ။ ဤသို့ဖြစ်သည် မဟုတ်လော။ (ဟုတ်ပါသည်။) သင်၌ အသိစိတ်မရှိသည့်တိုင် သင်၌ လူ့သဘာဝရှိသည်ဟု အခိုင်အမာဆိုနေသည်။ ဤသည်မှာ လူတို့ကို လှည့်ဖြားခြင်း မဟုတ်လော။ သင်၌ လူ့သဘာဝရှိပါက အဘယ်သို့ဖြစ်ပြီး အသိစိတ်မရှိနိုင်ရသနည်း။ သင်၌ အသိစိတ်မရှိပါက လူ့သဘာဝမရှိပေ။ လူ့သဘာဝမရှိခြင်း၏ လက္ခဏာတစ်ခုမှာ အပြုသဘောဆောင်သော အရာများက အဘယ်အရာဖြစ်ပြီး အပျက်သဘောဆောင်သော အရာများက အဘယ်အရာဖြစ်သည်ကို နားမလည်ခြင်း ဖြစ်သည်။ သင်၌ အသိစိတ်ရှိသည်ဟု သင်ဆိုသည်၊ သို့ဆိုလျှင် အဘယ်ကြောင့် သင်သည် အမှားနှင့်အမှန်ကို မပိုင်းခြားနိုင်ရသနည်း။ သင်သည် တရားဒေသနာများစွာကို ကြားနာပြီးဖြစ်သည်၊ သို့ဆိုလျှင် အဘယ်ကြောင့် သင်သည် သမ္မာတရားကို လိုက်စားရန် မတမ်းတသနည်း။ သင်က “ကျွန်ုပ်၏ စိတ်နှလုံးသည် သမ္မာတရားကို လိုက်စားရန် လိုလားနေပြီး သမ္မာတရားကို လက်တွေ့လုပ်ဆောင်ရန် လိုလားနေပါသည်” ဟု ဆိုသည်။ သို့ဆိုလျှင် သင်သည် မည်သည့်သမ္မာတရားများကို လက်တွေ့လုပ်ဆောင်ပြီးပြီနည်း။ သက်သေအထောက်အထားမှာ အဘယ်မှာနည်း။ သင်၏ စိတ်နှလုံးသည် သမ္မာတရားကို ချစ်မြတ်နိုးပြီး သမ္မာတရားကို လိုက်စားရန် လိုလားနေပါက၊ အဘယ်ကြောင့် သင်သည် သမ္မာတရားကို လက်တွေ့မလုပ်ဆောင်သနည်း။ ဤသည်မှာ လူတို့ကို လှည့်ဖြားခြင်း မဟုတ်လော။ ဤသည်မှာ လှည့်ဖြားသူတစ်ဦး၏ လိမ်ညာမှုများကဲ့သို့ပင်ဖြစ်သည် မဟုတ်လော။ ယင်းမှာ မိမိလုပ်ဆောင်သမျှသည် ပြည်သူကို အမှုထမ်းရန်နှင့် ၎င်းတို့အား ပျော်ရွှင်သော ဘဝများဖြင့် အသက်ရှင်နိုင်စေရန် ဖြစ်သည်ဟု အမြဲကြွေးကြော်သော်လည်း၊ လူတို့က ဘုရားသခင်ကို ယုံကြည်ပြီး မှန်ကန်သော လမ်းခရီးကို လျှောက်လှမ်းသောအခါ ၎င်းတို့ကို အရူးအမူး ဖမ်းဆီးပြီး ညှဉ်းပန်းနှိပ်စက်သည့် အဆင်းနီသော နဂါးကြီးကဲ့သို့ပင် ဖြစ်သည်။ ၎င်းသည် လူတို့အား ဘုရားသခင်နောက် လိုက်ခွင့်မပြု၊ ၎င်းတို့အား သမ္မာတရားကို လက်ခံပြီး ကယ်တင်ခြင်းကို ရရှိခွင့်မပြုပေ။ ၎င်းတို့အား ငရဲသို့ အဆုံးသတ်ရောက်ရှိပြီး အပြစ်ပေးခံရစေလျက်၊ ပါတီနောက်လိုက်ရန်နှင့် ၎င်း၏ အမိန့်များကို နာခံရန်သာ ခွင့်ပြုသည်။ ယင်းက အဆင်းနီသော နဂါးကြီးကို ကျေနပ်အားရစေသည်။ သို့ဆိုလျှင် အဆင်းနီသော နဂါးကြီး၏ “ပြည်သူကို အမှုထမ်းသည်” ဟူသော စကားများသည် မှန်သလော၊ မှားသလော။ စာတန်သည် မိမိလုပ်ဆောင်သောအရာသည် လူတို့၏ အကျိုးအတွက်ဖြစ်သည်ဟု အမြဲဆိုသော်လည်း ၎င်းသည် လူတို့ကို သမ္မာတရားဖြင့် မထောက်ပံ့နိုင်သည့်အပြင် ဘဝ၏ မှန်ကန်သော လမ်းကြောင်းပေါ်သို့လည်း လမ်းညွှန်မပေးနိုင်ပေ။ ၎င်းသည် လူတို့အား မိစ္ဆာအယူဝါဒများနှင့် အဓိပ္ပာယ်မဲ့ပြီး မှားယွင်းသော အဆိုများကိုသာ စွဲမှတ်အောင်သွန်သင်သည်၊ ၎င်းတို့အား အကျင့်ပျက်ခြစားသော ဘဝတွင် မွေ့လျော်စေသည်၊ ဆိုးယုတ်သော လမ်းကြောင်းကိုလျှောက်လှမ်းစေသည်၊ လောကကို လိုက်စားစေသည်၊ ကျော်ကြားမှုနှင့် အကျိုးအမြတ်ကို လိုက်စားစေပြီး၊ အချင်းချင်း တိုက်ခိုက်ပြီး ထိခိုက်နစ်နာစေသည်။ လူတို့ကို မှန်ကန်သော လမ်းကြောင်းအား လျှောက်လှမ်းခွင့်မပြုသည့်အပြင်၊ ဘုရားသခင်၏ ဘက်မှ လူတို့ကို လုယူသွားလေသည်။ အဆုံးတွင် လူတို့သည် ကျော်ကြားမှုနှင့် အကျိုးအမြတ်ကို အကောင်အထည်ဖော်ကြသော်လည်း ၎င်းတို့၏ ကိုယ်ခန္ဓာနှင့် စိတ်များက လုံးဝ ပျက်စီးသွားသည်။ ၎င်းတို့သည် စာတန်၏ မိစ္ဆာအယူဝါဒများနှင့် အဓိပ္ပာယ်မဲ့ပြီး မှားယွင်းသော အဆိုများဖြင့် ပြည့်နှက်နေသည်။ ၎င်းတို့၏ စိတ်နှလုံးများထဲတွင် ဘုရားသခင် မရှိသည့်အပြင်၊ လူသားမျိုးနွယ်ကို ဘုရားသခင် ဖန်ဆင်းခဲ့ကြောင်းကိုလည်း ၎င်းတို့ မယုံကြည်ကြပေ။ ၎င်းတို့သည် ဘုရားသခင်ကို စတင်ငြင်းပယ်ပြီး သူ့ကို ရန်လိုလာကြသည်။ စာတန်ကဤအရာကို လုပ်ဆောင်ခြင်းသည် လူ၏ အကျိုးအတွက် ဖြစ်သလော။ ဤသည်မှာ လူတို့ကို ထိခိုက်နစ်နာစေပြီး ဖျက်ဆီးနေခြင်း မဟုတ်လော။ သို့တိုင် အမှားနှင့်အမှန်ကို မပိုင်းခြားနိုင်သောလူများသည် ဤအရာများကို ထိုးထွင်းသိမြင်နိုင်ခြင်း မရှိကြပေ။

လူအချို့က “ကျွန်ုပ်တွင် လူ့သဘာဝရှိပြီး အမှန်နှင့်အမှားကို ပိုင်းခြားသိမြင်နိုင်သည့်အပြင်၊ လူအများစုထက် ပို၍ အသိစိတ်ရှိသည်”ဟု ပြောကြသည်။ သို့ဆိုလျှင် ယနေ့ မိတ်သဟာယဖွဲ့ခဲ့သော အကြောင်းအရာနှင့် သင်ကိုယ်သင် နှိုင်းယှဉ်ကြည့်ပြီး သင်၌ အသိစိတ်ရှိသလော၊ သင်သည် သမ္မာတရားကို လက်ခံပြီး လက်တွေ့လုပ်ဆောင်နိုင်ခြင်း ရှိသလော၊ သင်အမှားလုပ်မိသည့်အခါ နောင်တရခြင်းနှင့် အပြစ်ရှိသည့် စိတ်ခံစားချက် ရှိသလော၊ သင်သည် အမှန်တကယ် နောင်တရပြီး ပြောင်းလဲပြီးပြီလောဟူသည်တို့ကို ကြည့်လော့။ သင့်၌ ဤအသက်ဝင်ရောက်မှုဆိုင်ရာ သရုပ်သကန်များ မရှိလျှင် ယင်းက သင်သည် ဘုရားသခင်ကို စတင်ယုံကြည်ခဲ့ကတည်းက နှစ်ပေါင်းများစွာကြာ တရားဒေသနာများကို နားထောင်ပြီးဖြစ်လင့်ကစား၊ သင်၏အသိစိတ်က အလုပ်လုပ်ခြင်းမရှိသေးကြောင်းကို သက်သေပြနေသည်။ သင်၏အသိစိတ် အလုပ်မလုပ်ခြင်း နောက်ကွယ်တွင် အဘယ်အရာ ရှိနေသနည်း။ ဤပြဿနာကို ရှင်းပြနိုင်သည့် အကြောင်းရင်းတစ်ခုတည်းသာ ရှိသည်။ သင်သည် အသိစိတ်မရှိသော လူတစ်ဦးဖြစ်ပေသည်။ လူအချို့က “ကျွန်ုပ်၌ အသက် ဝင်ရောက်မှု မရှိသော်လည်း၊ သမ္မာတရားအားလုံးကို နားလည်သည်”ဟု ပြောကြသည်။ သင်သည် သမ္မာတရားကို နားလည်လျှင် အဘယ်ကြောင့် လက်တွေ့မလုပ်ဆောင်သနည်း။ အဘယ်ကြောင့် သင့်တွင် မည်သည့်ဝင်ရောက်မှုမျှ မရှိလေပြီနည်း။ ယခုအချိန်၌ပင် သင်၏အသက်တာ မပြောင်းလဲသေးသည်မှာ အဘယ်သို့ ဖြစ်သနည်း။ သင်သည် သမ္မာတရားကို နားလည်သော်လည်း လက်တွေ့မလုပ်ဆောင်ပေ၊ သင်၏အသိစိတ်သည် အဘယ်မှာနည်း။ လူအချို့က “ကျွန်ုပ်သည် ဘုရားသခင်ကို နှစ်ပေါင်းများစွာ ယုံကြည်ခဲ့ပြီးဖြစ်သည်။ ကျွန်ုပ်၌ အသိစိတ်မရှိခဲ့လျှင်၊ များစွာ စွန့်လွှတ်နိုင်မည်လော၊ များစွာ ဆင်းရဲဆင်းရဲဒုက္ခခံနိုင်မည်လော၊ ပြီးလျှင် အလွန်ကြီးမားသော အဖိုးအခကို ပေးဆပ်နိုင်မည်လော။ ကျွန်ုပ်၏ တာဝန်ကို စိတ်လိုလက်ရ ထမ်းဆောင်နိုင်မည်လော”ဟုပင် ငြင်းခုံကြသည်။ သင်၌ အသိစိတ်ရှိလျှင်၊ အလွန်များသော သမ္မာတရားများကို သင်နားထောင်ပြီးသည့်နောက်တွင် ယင်းကမည်သည့်အကျိုးသက်ရောက်မှု ရှိလေပြီနည်း။ သင်သည် သမ္မာတရား စည်းမျဉ်းများအတိုင်း ပြုမူဆောင်ရွက်ရန်အလို့ငှာ ယင်းကသင့်ကို ချုပ်ထိန်းနိုင်သလော။ ယင်းက သင်၏အပြုအမူနှင့် သင်၏အတွေးများကို ထိန်းချုပ်ပေးနိုင်သလော။ သင်သည် နှစ်ပေါင်းများစွာ တရားဒေသနာများကို နားထောင်ပြီးဖြစ်သည်၊ သင်သည် အယူဝါဒများစွာကို ပြောဆိုနိုင်ပြီး၊ အလွန်များစွာ ဆင်းရဲဒုက္ခခံပြီးဖြစ်ကာ ထိုသို့သော ကြီးမားသည့် အဖိုးအခကို ပေးဆပ်ပြီးဖြစ်သည်။ သို့ဆိုလျှင် အဘယ်ကြောင့် သင်၏အသိစိတ်သည် သင့်ကို စည်းမျဉ်းများအတိုင်း ပြုမူဆောင်ရွက်စေခြင်း မရှိဘဲ၊ စည်းမျဉ်းများကို ချိုးဖောက်ခြင်းမှ သင့်ကို တားဆီးလျက် သင်၏အပြုအမူကို အုပ်စိုးရာတွင် အခန်းကဏ္ဍတစ်ခုကို ဆောင်ရွက်ခြင်းမရှိသနည်း။ သင်သည် အသိစိတ်နှင့် လူ့သဘာဝ အလွန်များစွာရှိပြီး သမ္မာတရားများစွာကို နားလည်ခဲ့ပြီးဖြစ်လျှင်၊ အဘယ်ကြောင့် ယင်းတို့ကို လက်တွေ့မလုပ်ဆောင်နိုင်ရသနည်း။ သင်သည် စည်းမျဉ်းများကို အဘယ်သို့ဖြစ်ပြီး ဗြောင်ကျကျ ချိုးဖောက်နိုင်ကာ အသင်းတော်၏အလုပ်ကို ဗြောင်ကျကျ နှောင့်ယှက်နိုင်ရသနည်း။ သင့်တွင် အသိစိတ်ရှိလျှင်၊ နှစ်ပေါင်းများစွာ သင်၏တာဝန်ကို ထမ်းဆောင်ပြီးနောက်တွင် သင်၏အသက်တာ ပြောင်းလဲပြီးပြီလော။ သင် မပြောင်းလဲသေးသည့်အပြင်၊ သမ္မာတရားထဲသို့ ဝင်ရောက်မှု ဘာဆိုဘာမျှ မရှိပေ။ ဤအရာက သင်သည် အသိစိတ်မရှိကြောင်း ပြနေသည်။ လူအချို့က “ကျွန်ုပ်၌ အသိစိတ်မရှိလျှင် ကျွန်ုပ်၏တာဝန်ကို ထမ်းဆောင်နိုင်မည်လော”ဟု ပြောကြသည်။ သင်သည် သင်၏တာဝန်ကို ထမ်းဆောင်နေခြင်းမဟုတ်ပေ။ သင် အလုပ်လုပ်ပေးနေခြင်း ဖြစ်သည်။ အလုပ်လုပ်ပေးခြင်းသည် အသိစိတ်မလိုအပ်ပေ။ အားအနည်းငယ် စိုက်ထုတ်လိုက်ရုံဖြင့် လုံလောက်သည်။ ဤသည်မှာ “အလုပ်လုပ်ပေးသောလူများသည် အသိစိတ်မရှိသောလူများ ဖြစ်ကြသည်။ ၎င်းတို့သည် အသက် ဝင်ရောက်မှုကိုဖြစ်စေ၊ သမ္မာတရားကိုဖြစ်စေ မလိုက်စားသည့်အပြင်၊ အလုပ်လုပ်ပေးရန်ကိုသာ ကြိုးစားပြီး အားစိုက်ထုတ်ရန် လိုလားကြသည်” ဟူသော ဆိုစကားကို တိတိကျကျ အတည်ပြုပေသည်။ အလုပ်လုပ်ပေးခြင်း၏ ထူးခြားသော လက္ခဏာများမှာ အဘယ်အရာများ ဖြစ်သနည်း။ ယင်းတို့မှာ ဒုက္ခဆင်းရဲခံရန်နှင့် အဖိုးအခပေးရန် လိုလားခြင်း၊ ဒုက္ခဆင်းရဲခံခြင်းနှင့် အဖိုးအခပေးခြင်းတို့တွင် မိမိ၏ပျော်ရွှင်မှု၊ အရေးပါမှုနှင့် တန်ဖိုးတို့ကို ရှာဖွေခြင်း၊ ကောင်းချီးမင်္ဂလာများအတွက် မိမိ၏လိုအင်ဆန္ဒကိုလည်းကောင်း၊ ဘုရားသခင်နှင့် အပေးအယူလုပ်ဖို့ မိမိ၏ရည်မှန်းချက်ကိုလည်းကောင်း ဖြည့်ဆည်းရန် ကြိုးစားခြင်း၊ ပြီးလျှင် မိမိတို့၏ ဒုက္ခခံခြင်းနှင့် စွန့်လွှတ်အနစ်နာခံခြင်းတို့အတွက် အလဲအလှယ်အနေဖြင့် ကောင်းချီးမင်္ဂလာများကို ရရှိရန် ကြိုးစားခြင်းတို့ ဖြစ်သည်။ အကယ်၍ သင်က ၎င်းတို့ကို အလုပ်တွင် အားစိုက်ထုတ်ရန်၊ ဒုက္ခဆင်းရဲခံရန်နှင့် အဖိုးအခပေးရန် တောင်းဆိုလျှင်၊ ၎င်းတို့၌ ဤအရာအတွက် အားမာန်အပြည့်ရှိကြသည်။ သို့သော် သင်က ၎င်းတို့အား စည်းမျဉ်းများအတိုင်း ပြုမူရန်နှင့် သမ္မာတရားကို လက်တွေ့လုပ်ဆောင်ရန် တောင်းဆိုလျှင်မူ ၎င်းတို့သည် နုံးချည့်လာကြသည်၊ စိတ်ရှုပ်ထွေးလာပြီး မည်သို့လက်တွေ့လုပ်ဆောင်ရမည်ကို မသိကြတော့ပေ။ လူအချို့က “အကယ်၍ သင်က ကျွန်ုပ်ကို အားစိုက်ထုတ်ရန်၊ ဒုက္ခဆင်းရဲခံရန်နှင့် အဖိုးအခပေးရန် တောင်းဆိုလျှင် ကိစ္စမရှိပါ။ မည်မျှပင် ဒုက္ခဆင်းရဲခံရပါစေ ကျွန်ုပ် ခံနိုင်ရည်ရှိပြီး မည်မျှပင်ပန်းပါစေ ညည်းညူမည်မဟုတ်ပါ။ သို့သော် စည်းမျဉ်းများအတိုင်း ပြုမူရန် တောင်းဆိုခြင်းမှာ ကျွန်ုပ်အတွက် အမှုအရာများ ခက်ခဲအောင် လုပ်နေခြင်း မဟုတ်လော။ အားစိုက်ထုတ်နိုင်ခြင်း၊ ညည်းညူခြင်းမရှိဘဲ ဒုက္ခဆင်းရဲခံနိုင်ပြီး အဖိုးအခပေးဆပ်နိုင်ခြင်းတို့သည် အတော်ပင် ကောင်းနှင့်နေပြီဖြစ်သည်။ အဘယ်ကြောင့် သင်က ကျွန်ုပ်ကို စည်းမျဉ်းများအတိုင်း ပြုမူရန် တောင်းဆိုနေသေးသနည်း။ လူတို့အပေါ် သင်၏တောင်းဆိုချက်များမှာ မြင့်မားလွန်းလှသည်။ လူများအနေဖြင့် ၎င်းတို့အလိုရှိသည့်ပုံစံအတိုင်း လုပ်ဆောင်ကြပါစေ။ အလုပ်ပြီးသရွေ့ လက်ခံ၍ရနိုင်လောက်ပေသည်။ အကယ်၍ ကောင်းစွာမပြီးမြောက်လျှင်၊ အချိန်နှင့်အမျှ ပြုပြင်၍ရသည်ပင်ဖြစ်သည်”ဟု တွေးလျက် ၎င်းတို့သည် ခက်ခဲသော အခြေအနေတစ်ခုသို့ ရောက်နေသည်ဟုပင် ခံစားကြရသည်။ ၎င်းတို့သည် အလုပ်လုပ်ပေးရန်သာ လိုလားကြပြီး အလုပ်လုပ်ပေးသည့်အခါ အလွန်တက်ကြွကြသော်လည်း သမ္မာတရားကို လက်တွေ့လုပ်ဆောင်သည့်အခါတွင်မူ နုံးချည့်လာကြသည်အပြင်၊ အသက် ဝင်ရောက်မှုနှင့် ပတ်သက်လာသည့်အခါတွင် ပို၍ပင် စိတ်ရှုပ်ထွေးသွားကြသည်။ သို့တိုင် ၎င်းတို့သည် မိမိတို့ကိုယ်ကို လူကောင်းများဟု ထင်နေကြဆဲဖြစ်သည်။ ၎င်းတို့က “ကျွန်ုပ်သည် အသိစိတ်ရှိသော လူတစ်ဦးဖြစ်ပြီး ကြင်နာတတ်ပါသည်။ ကျွန်ုပ်၏ တာဝန်ကို ထမ်းဆောင်ရာတွင် ကျွန်ုပ်၌ရှိသမျှ အင်အားကို အသုံးပြုပြီး မည်သည့်အခါမျှ ချုပ်တည်းထားခြင်းမရှိပါ။ ကျွန်ုပ်သည် ဘုရားသခင်အတွက် အသုံးခံရန် ကျွန်ုပ်၏မိသားစုနှင့် အသက်မွေးဝမ်းကျောင်းကို စွန့်လွှတ်နိုင်သည်။ ကျွန်ုပ် အဘယ်ကြောင့် ဤမျှလောက် စိတ်အားထက်သန်နိုင်ရသနည်း။ ကျွန်ုပ်သည် ပင်ကိုအားဖြင့် လူကောင်းတစ်ဦး ဖြစ်သည်” ဟု မကြာခဏ ပြောဆိုကြသည်။ အမှန်တကယ်တွင် ၎င်းတို့သည် သမ္မာတရား စည်းမျဉ်းများအတိုင်း ပြုမူနိုင်ဖို့ မဆိုထားနှင့်၊ မည်သည့်သမ္မာတရားကိုမျှ နားမလည်ကြပေ။ ၎င်းတို့သည် အရှိအတိုင်း အင်အားကို အသုံးပြုရန်သာ သိကြသော်လည်း၊ မိမိတို့ကိုယ်ကို တော်သည်ဟု ထင်နေကြဆဲဖြစ်သည်။ ဤအဆင့်သို့ ရောက်နေသည့်တိုင် ၎င်းတို့၏ အသိစိတ်နှင့် ဆင်ခြင်တုံတရားတို့တွင် မည်သည့်ခံစားမှုမျှ လုံးဝမရှိပေ။ သင်သည် အမှန်တကယ် အသိစိတ်ရှိခဲ့လျှင်၊ အဘယ်သို့ဖြစ်ပြီး ထိုသို့သော ကောက်ကျစ်သည့် အကြောင်းပြချက်များကို ရေရွတ်ပြောဆိုနိုင်မည်နည်း။ သင်သည် အဘယ်သို့ဖြစ်ပြီး သမ္မာတရားအပေါ် စင်ကြယ်သော သဘောပေါက်နားလည်နိုင်စွမ်း မရှိဘဲနေနိုင်မည်နည်း။ သင်၌ အသိစိတ်နှင့် လူ့သဘာဝရှိခဲ့လျှင်၊ သင်သည် ဘုရားသခင်၏ နှုတ်ကပတ်တော်များကိုလည်းကောင်း၊ လူတို့အတွက် ဘုရားသခင်၏ သတ်မှတ်ထားသော စံသတ်မှတ်ချက်များက အဘယ်အရာဖြစ်သည်ကိုလည်းကောင်း၊ သင်လုပ်ဆောင်သည့် အမှုအရာတစ်ခုစီတွင် မည်သည့်စည်းမျဉ်းများအား လိုက်နာသင့်သည်ကိုလည်းကောင်း အဘယ်သို့ဖြစ်ပြီး သင် အာရုံစိုက်နားမထောင်ဘဲနေနိုင်ခဲ့သနည်း။ သင် နားထောင်သော်လည်း နားမလည်သည့်အပြင် သင်သည် သမ္မာတရားအတွက် ထုံထိုင်းနေလျှင်၊ သင်သည် အသိစိတ်နှင့် လူ့သဘာဝမရှိသော လူတစ်ဦး ဖြစ်သည်။ သင်သည် သင်၏ အရှိအတိုင်း အားစိုက်မှုကို သမ္မာတရားနှင့် အသက်အတွက်၊ ကယ်တင်ခြင်းအတွက် အလဲအလှယ်လုပ်နိုင်သည်ဟု ထင်သလော။ ဤသည်မှာ မဖြစ်နိုင်ပေ။ ထိုလမ်းကြောင်းသည် အလုပ်မဖြစ်ပေ။ သင်သည် အားစိုက်ထုတ်ရန် လိုလားနေလျှင်ပင်၊ ရိုးသားစစ်မှန်မှုဖြင့် ကြိုးစားပမ်းစားလုပ်ကာ ဆင်းရဲဒုက္ခအနည်းငယ်ခံနိုင်ပြီး၊ လူတို့၏အမြင်တွင် သင်သည် အတော်အတန် ဆက်ကပ်အပ်နှံမှုရှိလျှင်ပင်၊ သင်သည် အဆုံးတိုင်အောင် ဆက်ကပ်အပ်နှံနိုင်ခြင်း ရှိမရှိဟူသည်မှာ ပြောရန် ခက်ခဲနေဆဲဖြစ်သည်။ သင်၏ လူမဆန်သော သဘာဝက ထကြွလိမ့်မည့်အချိန်တွင်၊ သင်သည် ပြဿနာရှာကာ အဖျက်အမှောင့်လုပ်ခြင်းများနှင့် နှောင့်ယှက်ခြင်းများကို ဖန်တီးလိမ့်မည်ဖြစ်ပြီး၊ ထို့နောက်တွင် သင်သည် ဖယ်ရှားရှင်းလင်းခြင်း ခံရပေလိမ့်မည်။ လတ်တလောတွင်အသင်းတော်မှ လူအနည်းငယ် ဖယ်ရှားရှင်းလင်းခြင်း ခံခဲ့ရသည် မဟုတ်လော။ ဤကဲ့သို့သောလူများသည် အလွန်နားကြားကောင်းသော စကားများကို ပြောတတ်ကြပြီး၊ ကြားရသူတိုင်းက ၎င်းတို့သည် သမ္မာတရားကို နားလည်သည်ဟု ထင်ကြသော်လည်း၊ သမ္မာတရားကို ၎င်းတို့ တကယ်ကိုပင် လက်တွေ့မလုပ်ဆောင်ကြပေ။ ၎င်းတို့သည် နားကြားကောင်းသောအရာများကို ပြောသော်လည်း စစ်မှန်သောအလုပ်ကို မလုပ်ဆောင်ကြပေ။ ၎င်းတို့သည် လူတို့အပေါ် မိမိတို့ဘာသာ ဆန့်ကျင်ရုံသာမက ဘုရားသခင်၏အိမ်တော်ကိုလည်း မိမိတို့ဘာသာ ဆန့်ကျင်ကြသည်။ ဤသည်မှာ ဘုရားသခင်ကို အတိုက်အခံလုပ်ခြင်း ဖြစ်သည် မဟုတ်လော။ ဘုရားသခင်၏အိမ်တော်က ၎င်းတို့ကို လိုက်လျောနိုင်သလော။ အကယ်၍ ၎င်းတို့သည် မိမိတို့၏တာဝန်ကို ထမ်းဆောင်ရန် လိုလားလျှင်၊ လိုက်လျောစွာနှင့် စည်းကမ်းလိုက်နာသောနည်းလမ်းဖြင့် ထမ်းဆောင်သင့်သော်လည်း၊ ၎င်းတို့က ထိုသို့မလုပ်ဆောင်ကြပေ။ ၎င်းတို့သည် ကြီးကြပ်ပြီး အာဏာကိုင်စွဲရန် ကြိုးစားကြသည့်အပြင်၊ နှောင့်ယှက်ခြင်းများနှင့် ပျက်စီးခြင်းများကိုပင် ဖြစ်စေကြသည်။ နှောင့်ယှက်မှုများကို မည်သည့်အတိုင်းအတာအထိ ၎င်းတို့ ဖြစ်စေကြသနည်း။ တစ်စုံတစ်ခုကို ငါ လုပ်ဆောင်နေသည့်အခါတွင်ပင်၊ ၎င်းတို့သည် ဝင်ရောက်စွက်ဖက်ရန်၊ ဟိုသည်ဝေဖန်ပိုင်းခြားရန်၊ ဟန့်တားရန်နှင့် နှောင့်ယှက်ရန် ကြိုးစားကြသည်။ ၎င်းတို့သည် ငါ၏လုပ်ရပ်များကို နှောင့်ယှက်ရန် ကြိုးစားကြသည်။ ငါက ၎င်းတို့ကို သက်ညှာမှုပြနိုင်မည်လော။ အကယ်၍ သင်သည် ငါ၏ကိုယ်ပိုင်ဘဝကိုသာ နှောင့်ယှက်နေခဲ့မည်ဆိုလျှင်၊ ငါသည် သင့်ကို ဘေးဖယ်ထားပြီး လျစ်လျူရှုနိုင်မည်ဖြစ်သော်လည်း၊ ငါသည် ဘုရားသခင်၏အိမ်တော်၌ အလုပ်လုပ်နေခြင်း၊ ဘုရားသခင် ရွေးချယ်ထားသောလူများအတွက် စစ်မှန်သောအလုပ်တစ်ခုခုကို လုပ်ဆောင်နေခြင်းဖြစ်ပြီး၊ သင်သည် ယင်းကို နှောင့်ယှက်ကာ သေးသိမ်စေရန် ကြိုးစားနေဆဲဖြစ်သည်။ ဤနေရာတွင် ပြဿနာမှာ အဘယ်အရာနည်း။ ထိုသို့သောလူတစ်ဦးနှင့်ပတ်သက်၍ မည်သည့်အရာကို လုပ်ဆောင်သင့်သနည်း။ (၎င်းတို့ကို ဖယ်ရှားရှင်းလင်းသင့်ပါသည်။) ဘုရားသခင်၏အိမ်တော်သည် လူတို့ကို ကိုင်တွယ်ရန် စည်းမျဉ်းများရှိပြီး၊ ထိုသို့သောလူများကို ဖယ်ရှားရှင်းလင်းသင့်သည်။ လူအချို့က “ကျွန်ုပ် မတရားခံရလေပြီ။ ဤအရာက ကိုယ်တော့်ကို ပုန်ကန်ပြစ်မှားခြင်းဖြစ်မှန်း ကျွန်ုပ်မသိခဲ့ပါ။ ဤသည်မှာ အထက်ကို အာခံခြင်းနှင့် ဘုရားသခင်ကို အာခံခြင်းဖြစ်မှန်း ကျွန်ုပ်မသိခဲ့ပါ။ ကျွန်ုပ် တမင်တကာ လုပ်ဆောင်ခဲ့ခြင်း မဟုတ်ပါ”ဟု ပြောကြသည်။ ထိုသို့သောအရာကို သင် လုပ်ဆောင်နိုင်သည့်အချက်က သင်သည် တမင်တကာ ပြုမူဆောင်ရွက်နေခဲ့ကြောင်း ပြနေသည်။ သင်သည် တရားဒေသနာများကို နှစ်ပေါင်းမည်မျှ နားထောင်ပြီးပြီနည်း။ သင်၌ အသိစိတ်ရှိသလော၊ သင်၌ လူ့သဘာဝရှိသလော။ အကယ်၍ သင်သည် လူသားဖြစ်လျှင်၊ သင်၌ လူ့သဘာဝရှိပြီး အသိစိတ်နှင့် ဆင်ခြင်တုံတရားကို ပိုင်ဆိုင်လျှင်၊ သင်သည် တမင်တကာဖြစ်စေ၊ မတော်တဆဖြစ်စေ ထိုသို့သောအရာများကို လုပ်ဆောင်မည်မဟုတ်ပေ။ ငါသည် အလုပ်လုပ်နေပြီး ၎င်းတို့က ယင်းကို တမင်တကာ နှောင့်ယှက်ကာ သေးသိမ်စေရန် ကြိုးစားကြသည်။ ၎င်းတို့သည် လူသားပင် ဟုတ်ကြသလော။ ၎င်းတို့သည် နတ်ဆိုးများ မဟုတ်လော။ အကယ်၍ လူတို့၌ အမှန်တကယ် အသိစိတ်နှင့် ဆင်ခြင်တုံတရားရှိပြီး၊ အမှန်တကယ် လူ့သဘာဝရှိလျှင်၊ သာမန်လူတစ်ဦးက တစ်စုံတစ်ခုကို လုပ်ဆောင်နေလျှင်ပင်၊ ယင်းသည် အသင်းတော်၏အလုပ်နှင့် ညီအစ်ကိုမောင်နှမများအတွက် အကျိုးရှိသရွေ့၊ ယင်းသည် ငါ ကိုယ်တိုင်ကိုယ်ကျ အာရုံစိုက်လုပ်ဆောင်သည့်အရာတစ်ခု ဖြစ်ဖို့မဆိုထားနှင့်၊ ၎င်းတို့အနေဖြင့် ယင်းကို ထိန်းသိမ်းသင့်ပြီး မသေးသိမ်စေသင့်ကြောင်း သိကြပေသည်။ သို့တိုင် ၎င်းတို့သည် နှောင့်ယှက်မှုများကို မရမက ဖြစ်စေပြီး ယင်းကို တမင်ဖျက်ဆီးရန် မရမက ကြိုးစားကာ မည်သူမျှ ၎င်းတို့ကို မတားဆီးနိုင်ပေ။ ၎င်းတို့သည် နတ်ဆိုးစစ်စစ် ဖြစ်လာကြပြီး ဖြစ်သည် မဟုတ်လော။ ထိုသို့သောဇာတ်ကောင်များ၏ မကောင်းမှုပြုခြင်းက ဆိုးရွားလှသည်၊ ငါတို့သည် ၎င်းတို့နှင့်ပတ်သက်၍ မသက်ညှာရဟု ငါ ပြော၏။ ဘုရားသခင်၏အိမ်တော်၌ လူတို့ကို ကိုင်တွယ်ရန် စည်းမျဉ်းများရှိပြီး၊ ၎င်းတို့ကို ရှင်းလင်းပစ်ခြင်းဖြင့် ကိုင်တွယ်သင့်သည်။ ဤသည်မှာ ၎င်းတို့ကို ဆက်ဆံရန် သင့်လျော်သော နည်းလမ်းတစ်ခု ဖြစ်သလော။ (ဟုတ်ပါသည်။) အကယ်၍ ၎င်းတို့သည် မိမိတို့၏နေ့စဉ်ဘဝများတွင်သာ မိမိတို့၏ကိုယ်ပိုင်နှစ်သက်မှုများကို လိုက်လျှောက်လျှင်၊ ယင်းမှာ လက်ခံနိုင်ဖွယ်ရှိသည်။ ဥပမာအားဖြင့်၊ ငါက “ငါ ခေါက်ဆွဲစားချင်သည်” ဟု ပြောကောင်းပြောမည်၊ ယင်းကို ၎င်းတို့က “ကျွန်ုပ် ခေါက်ဆွဲမကြိုက်ပါ။ ကျွန်ုပ်ထမင်းချက်သည့်အခါ၊ ကိုယ်တော့်အတွက် ခေါက်ဆွဲအချို့ ချက်ပေးပြီး၊ ကျွန်ုပ်အတွက်တော့ ထမင်းချက်စားပါမည်” ဟု တုံ့ပြန်သည်။ ဤကိစ္စသည် လူတစ်ဦး၏လူ့သဘာဝ သို့မဟုတ် အသိစိတ်နှင့် သက်ဆိုင်ဖို့ မဆိုထားနှင့်၊ အသင်းတော်၏အလုပ်နှင့် မသက်ဆိုင်သည့်အပြင်၊ မည်သည့်သမ္မာတရား စည်းမျဉ်းနှင့်မျှလည်း မသက်ဆိုင်ပေ။ ဤနေရာတွင် သင်၏ကိုယ်ပိုင်နှစ်သက်မှုများကို လိုက်လျှောက်ခြင်းက အဆင်ပြေသော်လည်း၊ အသင်းတော်၏ အလုပ်နှင့်သက်ဆိုင်သော ကိစ္စရပ်များနှင့် ပတ်သက်လာသည့်အခါ ယင်းက လက်ခံနိုင်ဖွယ်မရှိပေ။ သင်သည် မဆင်မခြင် မကောင်းမှုများကို ကျူးလွန်ပြီး အဖျက်အမှောင့်လုပ်ခြင်းများနှင့် နှောင့်ယှက်ခြင်းများကို ဖြစ်စေလျှင်၊ စီမံအုပ်ချုပ်ရေးဆိုင်ရာ အမိန့်များကို ချိုးဖောက်နေခြင်းဖြစ်သည်။ မည်သည့်လူစားမျိုးက စီမံအုပ်ချုပ်ရေးဆိုင်ရာ အမိန့်များကို ဗြောင်ကျကျ ချိုးဖောက်နိုင်သနည်း။ မည်သည့်လူစားမျိုးက သမ္မာတရားနှင့် ဘုရားသခင်၏အိမ်တော်ကို ပွင့်ပွင့်လင်းလင်း အာခံနိုင်သနည်း။ (နတ်ဆိုးများဖြစ်သည်။) ထိုမိုက်ရူးရဲနိုင်သော နားဝေတိမ်တောင်ဖြစ်သည့်လူများနှင့် သားရဲတိရစ္ဆာန်များသည် ဤနည်းဖြင့် အာခံကာ နှောင့်ယှက်နိုင်ပြီး၊ နတ်ဆိုးများသည် သာ၍ပင် ထိုသို့လုပ်ဆောင်နိုင်စွမ်း ရှိကြသည်။ ဘုရားသခင်၏အိမ်တော်က မည်သည့်အရာကို လုပ်ဆောင်သည်ဖြစ်စေ၊ နတ်ဆိုးများက ယင်းကို အမြဲနှောင့်ယှက်ရန် ကြိုးစားကြသည်၊ ၎င်းတို့သည် အကျိုးဆက်များအတွက် မည်သည့် အလေးထားမှုမျှမရှိဘဲ ဝင်ပူးခံထားရသည့်အလား နှောင့်ယှက်မှုများကို ဖြစ်စေကြသည်။ ၎င်းတို့သည် ထိုအတိုင်းအတာအထိ နှောင့်ယှက်နိုင်ပြီး ယင်းကို သတိမပြုမိကြသေးပေ၊ မိမိတို့အနေဖြင့် နှောင့်ယှက်မှုများကို မဖြစ်စေခဲ့ကြောင်း၊ မိမိတို့မှာ လုံးဝအပြစ်ကင်းကြောင်း ခံစားနေကြဆဲဖြစ်ကာ၊ မိမိတို့ကိုယ်ကိုပင် ခုခံကာကွယ်ကြသေးသည်။ ထိုသို့သောလူများနှင့် မည်သည့်အရာကိုမျှ မိတ်သဟာယဖွဲ့ရန် မလိုအပ်ပေ။ ၎င်းတို့ကို ရှင်းလင်းပစ်လိုက်ခြင်းသည်သာ လုပ်ဆောင်ရန် မှန်ကန်သောအရာဖြစ်သည်။ လူ့သဘာဝ၏ အသိစိတ်နှင့် ဆင်ခြင်တုံတရားမရှိသည့် ဤကဲ့သို့သောလူများသည် နတ်ဆိုးစစ်စစ်များဖြစ်ကြသည်။ ၎င်းတို့ မည်သည့်အခါမျှ ပြောင်းလဲကြလိမ့်မည်မဟုတ်ပေ။ သင်သည် သမ္မာတရားကို လိုက်စားရန် မလိုအပ်သည့်အပြင်၊ အမှုအရာအားလုံးတွင် သမ္မာတရားကို လက်တွေ့လုပ်ဆောင်ရန် မလိုအပ်သော်လည်း၊ အနည်းဆုံးအနေဖြင့် စည်းမျဉ်းများကို လိုက်နာရန် သင် သိရမည်။ အကယ်၍ သင်သည် စည်းမျဉ်းများကိုပင် နားမလည်လျှင်၊ ဘုရားအိမ်တော်၏ စီမံအုပ်ချုပ်ရေးဆိုင်ရာ အမိန့်များကို နားမလည်သည့်အပြင်၊ စီမံအုပ်ချုပ်ရေးဆိုင်ရာ အမိန့်များကို သင်ချိုးဖောက်သည့်အခါတွင်ပင် မသိလျှင်၊ သင်သည် လူ့သဘာဝရှိသလော။ သင်၌ လူ့သဘာဝမရှိပေ။ သင်သည် နတ်ဆိုးတစ်ကောင်ဖြစ်သည်။ နတ်ဆိုးများက မကောင်းမှုပြုသည့်အခါ၊ ၎င်းတို့သည် မိမိတို့ကိုယ်ကို မထိန်းချုပ်နိုင်ကြပေ။ ဘုရားသခင်ကို ၎င်းတို့၏ အတိုက်အခံလုပ်ခြင်း၊ ဘုရားသခင်အပေါ် ၎င်းတို့၏ ဝေဖန်ခြင်းနှင့် ဘုရားသခင်အပေါ် ၎င်းတို့၏ ပြစ်မှားစော်ကားခြင်းတို့သည် ၎င်းတို့သဘာဝ၏ ပင်ကိုထုတ်ဖော်ခြင်းများ ဖြစ်သည်။ ၎င်းတို့ကို မည်သူကမျှ သွေးထိုးလှုံ့ဆော်ခြင်း သို့မဟုတ် အယူဝါဒသွတ်သွင်းခြင်းမရှိဘဲ၊ ၎င်းတို့သည် ဤကဲ့သို့ မကောင်းမှုကို အလိုအလျောက် လုပ်ဆောင်နိုင်ကြသည်။ ဤသည်မှာ အဘယ့်ကြောင့်ဆိုသော် ၎င်းတို့သည် မိမိတို့၏ နတ်ဆိုးဆန်သော သဘာဝ၏ စိုးမိုးခြင်းကို ခံနေရသောကြောင့် ဖြစ်သည်။

ယနေ့တွင်၊ ငါတို့သည် လူတို့၏ အသိစိတ်နှင့် ဆင်ခြင်တုံတရားတို့၏ တစ်စိတ်တစ်ပိုင်းဖြစ်သည့် အမှန်အမှားကို ပိုင်းခြားသိမြင်ခြင်းဆိုင်ရာ ကိစ္စရပ်နှင့်ပတ်သက်၍ မိတ်သဟာယဖွဲ့ခဲ့ကြသည်။ ဤမိတ်သဟာယဖွဲ့ခြင်းမှတစ်ဆင့် သင်တို့သည် ဤကဏ္ဍကို ယခု ရှင်းလင်းစွာ မြင်ပြီလော။ စစ်မှန်သောလူသားတစ်ဦးသည် အသိစိတ်ရှိပြီး အမှန်အမှားကို ပိုင်းခြားသိမြင်နိုင်သည်။ ၎င်းတို့၏ အသိစိတ်က အလုပ်လုပ်သည်။ ၎င်းတို့သည် မည်သည့်လူများ၊ ဖြစ်ရပ်များ၊ သို့မဟုတ် အမှုအရာများကို ကြုံတွေ့ရသည်ဖြစ်စေ၊ မည်သည့်ပြဿနာများ ပေါ်ပေါက်သည်ဖြစ်စေ၊ ၎င်းတို့၏ အသိစိတ်သည် အနည်းဆုံးအနေဖြင့် ပထမဆုံးသော အကာအကွယ် ဖြစ်သည်။ တစ်ချက်အနေဖြင့်၊ သင်၏အသိစိတ်သည် မည်သည့်အရာများက အပြုသဘောဆောင်ပြီး မည်သည့်အရာများက အပျက်သဘောဆောင်သည်ကို အကဲဖြတ်ချက်ပြုလုပ်ကာ ပိုင်းခြားသိမြင်ဖို့ သင့်ကို ကူညီလိမ့်မည်။ နောက်တစ်ချက်အနေဖြင့်၊ ယင်းက သင့်အနေဖြင့် လူ့ကျင့်ဝတ်၏ အနိမ့်ဆုံးစံနှုန်းများအောက်သို့ မကျရောက်စေရန် သင်၏ရှေ့ဆက်ရမည့်လမ်းကြောင်းကို စိစစ်သုံးသပ်ပြီး စစ်ဆေးရာတွင် သင့်ကို ကူညီနိုင်သည့်အပြင်၊ နောက်ဆုံးတွင် ချင့်ချိန်ကာ မှန်ကန်သော လမ်းကြောင်းကို ရွေးချယ်ဖို့ သင့်ကို ကူညီလိမ့်မည်။ ပင်ကိုအားဖြင့်၊ သမ္မာတရားကို နားလည်သောလူများ သို့မဟုတ် ဘုရားသခင်ကို နှစ်ပေါင်းများစွာ ယုံကြည်ပြီးဖြစ်ကာ မိမိတို့၏ယုံကြည်မှု၌ အခြေခံအုတ်မြစ်ရှိသောလူများသည် မိမိတို့ အသိစိတ်၏ လွှမ်းမိုးမှုအောက်တွင် နောက်ဆုံး၌ အပြုသဘောဆောင်သော အရာများကို ရွေးချယ်ကြလိမ့်မည်ဖြစ်ပြီး၊ သမ္မာတရားကို ရှာဖွေကာ လက်ခံရန် ရွေးချယ်ကြလိမ့်မည်။ ထို့ကြောင့် အသိစိတ်သည် လူ့သဘာဝအတွင်း၌ ဦးဆောင်သောကဏ္ဍကို ဆောင်ရွက်သည်။ ယင်းသည်လူတို့အား မှန်ကန်သော လမ်းကြောင်းအတွက် လမ်းညွှန်ပေးခြင်းနှင့် လူတို့အား အပြုသဘောဆောင်သော အရာများကို ရွေးချယ်ရန်အလို့ငှာ ထိန်းကျောင်းပေးခြင်း အခန်းကဏ္ဍကို ဆောင်ရွက်သည်။ အကယ်၍ လူတစ်ဦးသည် အသိစိတ်မရှိလျှင်၊ အပြုသဘောဆောင်သော အရာများနှင့် မှန်ကန်သောလမ်းကြောင်းတို့ကို ရွေးချယ်နိုင်စွမ်းရှိလိမ့်မည် မဟုတ်သည်သာမက၊ ၎င်းတို့လုပ်ဆောင်သည့် မည်သည့်အရာတွင်မဆို အသိစိတ်၏ အနိမ့်ဆုံးသော ကန့်သတ်ချက်နှင့် ထိန်းကျောင်းခြင်းတို့လည်း ကင်းမဲ့လိမ့်မည်မှာ ပြောစရာမလိုပေ။ ထိုသို့သောလူတစ်ဦးသည် ကြီးမားသော ဘေးအန္တရာယ်၌ ရှိနေသည်။ ၎င်းတို့သည် မကောင်းမှုကိုပြုကာ ဘုရားသခင်ကို ဆန့်ကျင်ရန် အလွန်အလားအလာများသည်။ အကယ်၍ ၎င်းတို့သည် တိရစ္ဆာန်တစ်ကောင်၏ လူဝင်စားခြင်းဖြစ်လျှင်၊ မကောင်းဆိုးဝါးများ လုပ်ဆောင်သည့်အရာများကို လုပ်ဆောင်ကောင်းလုပ်ဆောင်နိုင်မည်ဖြစ်ပြီး၊ မကောင်းဆိုးဝါးများနှင့် နတ်ဆိုးများဖြစ်သောလူများသည် သာ၍ပင် ကြီးမားသော မကောင်းမှုများကို လုပ်ဆောင်နိုင်ကြသည်။ ယင်းမှာ အလွန်ကြောက်မက်ဖွယ်ကောင်းပေသည်။ သို့ဖြစ်၍ အသိစိတ်ကို ပိုင်ဆိုင်ခြင်းသည် အလွန်အရေးကြီးသည်။ ယင်းမှာ ရှင်းလင်းသလော။ (ရှင်းလင်းပါသည်။) အကယ်၍ လူတစ်ဦး၌ ၎င်းတို့၏အပြုအမူကို ထိန်းကျောင်းရန်နှင့် မှန်ကန်သောလမ်းကြောင်းကို လျှောက်လှမ်းရန် ၎င်းတို့ကို လမ်းညွှန်ပေးမည့် အသိစိတ်မရှိလျှင်၊ ၎င်းတို့ရွေးချယ်သောလမ်းကြောင်းက မလွဲမသွေ မှားယွင်းသောလမ်းကြောင်းတစ်ခု ဖြစ်လိမ့်မည်ဖြစ်ပြီး၊ ၎င်းတို့လုပ်ဆောင်သည့်အရာသည် အပျက်သဘောဆောင်သော အရာများ ဖြစ်လိမ့်မည်။ အကျိုးဆက်များက မစဉ်းစားတတ်အောင်ပင် ဖြစ်လိမ့်မည်။ အကယ်၍ ၎င်းတို့သည် သမ္မာတရားနှင့် အရာခပ်သိမ်း၏ တိုးတက်ဖြစ်ပေါ်မှု နိယာမတရားများကို ဗြောင်ကျကျ ချိုးဖောက်နိုင်ပြီး၊ သမ္မာတရားနှင့် ဘုရားသခင်ပြုသမျှ အမှုအားလုံးကို တရားစီရင်လျက် မဆင်မခြင် ပြစ်မှားစော်ကားနိုင်လျှင်၊ ဘုရားသခင်ကို ဗြောင်ကျကျ အတိုက်အခံလုပ်ကာ ဘုရားသခင်၏ စီမံအုပ်ချုပ်ရေးဆိုင်ရာ အမိန့်များကို ချိုးဖောက်ပြီး၊ ဘုရားသခင်ကို ရဲတင်းစွာ ကျိန်ဆဲ၊ ပြစ်တင်ရှုတ်ချကာ ပြစ်မှားစော်ကားလျှင်၊ ၎င်းတို့သည် နတ်ဆိုးများနှင့် စာတန်နှင့် တစ်ထပ်တည်း တူညီကြသည်။ ၎င်းတို့သည် နတ်ဆိုးများနှင့် စာတန် ကျူးလွန်သည့် မကောင်းမှုအားလုံးကို ကျူးလွန်နိုင်သည်၊ နတ်ဆိုးများနှင့် စာတန်လုပ်ဆောင်သည့် အမှုအရာအားလုံးကို လုပ်ဆောင်နိုင်သည့်အပြင်၊ နတ်ဆိုးများနှင့် စာတန်ပြောဆိုသည့် မှားယွင်းပြီး အဓိပ္ပာယ်မဲ့သော အယူအဆများ၊ အယူမှားများနှင့် ကောက်ကျစ်သော အကြောင်းပြချက်အားလုံးကို ပြောဆိုနိုင်ကြသည်။ ဤလူများသည် နတ်ဆိုးစစ်စစ်များနှင့် စာတန်စစ်စစ်များ ဖြစ်ကြသည်။

ယနေ့ မိတ်သဟာယဖွဲ့ခြင်းမှ သင်တို့ အဘယ်အရာကို နားလည်သဘောပေါက်ကြလေပြီနည်း။ (လူ့သဘာဝရှိသောလူများသည် အသိစိတ်နှင့် ဆင်ခြင်တုံတရားကို ပိုင်ဆိုင်ပြီး အမှန်အမှားကို ပိုင်းခြားသိမြင်နိုင်ကြောင်း ကျွန်ုပ်နားလည်သဘောပေါက်ပြီဖြစ်သည်။ အမှန်အမှားကို ပိုင်းခြားသိမြင်ခြင်းနှင့်စပ်လျဉ်း၍၊ ကျွန်ုပ်တို့သည် အမှုအရာများကို ကြုံတွေ့ရသည့်အခါ တိကျသောဆုံးဖြတ်ချက်များကို ချနိုင်ပြီး တစ်ချိန်တည်းတွင် ကျွန်ုပ်တို့၏ လိုက်စားမှုနောက်ကွယ်တွင် မှန်ကန်သော ရှုထောင့်အမြင်များ ရှိနိုင်ရန်အလို့ငှာ၊ ဘုရားသခင်သည် မတူကွဲပြားသော ဥပမာများကို အသုံးပြုလျက်၊ အပြုသဘောဆောင်သော အရာများနှင့် အပျက်သဘောဆောင်သော အရာများက အဘယ်အရာများဖြစ်သည်ကို အဆုံးစွန် ရှင်းလင်းပြတ်သားမှုဖြင့် ရှင်းပြခဲ့ပါသည်။ ကျွန်ုပ်တို့သည် အပြုသဘောဆောင်သော အရာများကို တမ်းတပြီး လိုက်စားသင့်ကာ၊ အပျက်သဘောဆောင်သော အရာများကို မုန်းတီးပြီး ငြင်းပယ်သင့်ပါသည်။) လူ့သဘာဝအတွင်းရှိ အသိစိတ်နှင့် ဆင်ခြင်တုံတရားသည် လူတစ်ဦးက ကယ်တင်ခြင်းကို ရရှိရန်အတွက် အခြေခံအကျဆုံးသော သတ်မှတ်ချက်များ ဖြစ်သည်။ အကယ်၍ သင်သည် ဤအခြေခံကျသော သတ်မှတ်ချက်နှစ်ခုကို ပိုင်ဆိုင်သော်လည်း သမ္မာတရားကို မလိုက်စားသည့်အပြင်၊ သင်နားလည်သော သမ္မာတရားအနည်းငယ်ကို လက်တွေ့မလုပ်ဆောင်ဘဲ၊ နောက်ဆုံး၌ သမ္မာတရားအား ကျိုးနွံနာခံခြင်းကို စွမ်းဆောင်ရရှိခြင်း မရှိနိုင်လျှင်၊ သင်သည် ကယ်တင်ခြင်းကို ရရှိနိုင်လိမ့်ဦးမည်မဟုတ်ပေ။ အသိစိတ်နှင့် ဆင်ခြင်တုံတရားသည် ကယ်တင်ခြင်းအတွက် အခြေခံ သတ်မှတ်ချက်များမျှသာ ဖြစ်သည်၊ မည်သည့်လမ်းကြောင်းကို သင် လျှောက်လှမ်းသည်ဟူသည်အတွက်မူ၊ ယင်းမှာ သင်၏ကိုယ်ပိုင်ရွေးချယ်မှုအပေါ်တွင် မူတည်သည်။ အကယ်၍ သင်သည် အမှန်တကယ် အသိစိတ်နှင့် ဆင်ခြင်တုံတရားရှိသော လူတစ်ဦးဖြစ်လျှင်၊ သင်၏ အသိစိတ် ထိန်းကျောင်းမှုအောက်တွင် သမ္မာတရားကို လိုက်စားခြင်း လမ်းကြောင်းပေါ်သို့ စတင်လျှောက်လှမ်းရန် ရွေးချယ်ဖို့ အခွင့်အရေး ရှိလိမ့်မည်။ အကယ်၍ သင်သည် မှန်ကန်သော လမ်းကြောင်းကို ရွေးချယ်ရန်အလို့ငှာ သင်၏အသိစိတ်က သင့်အား ထိန်းကျောင်းပြီး လမ်းညွှန်သော်လည်း၊ သင်သည် ဆင်းရဲဒုက္ခခံပြီး အဖိုးအခပေးဆပ်ရန် မလိုလားလျှင်၊ ဇာတိပကတိကို ဆန့်ကျင်တွန်းလှန်ပြီး သင်၏ဇာတိပကတိဆိုင်ရာ အကျိုးစီးပွားများနှင့် ဆက်စပ်သောအရာများကို စွန့်လွှတ်ရန် မလိုလားသည့်အပြင်၊ သမ္မာတရားကို လိုက်စားခြင်းလမ်းကြောင်းပေါ်သို့ သင် အစပြုခြင်းမရှိသေးလျှင်၊ သင်သည် ကယ်တင်ခြင်းရရှိရန် မျှော်လင့်ချက် ရှိလိမ့်ဦးမည်မဟုတ်ပေ။ တစ်ချက်အနေဖြင့်၊ ကယ်တင်ခြင်းရရှိခြင်းနှင့်ဆိုင်သည့် မျှော်လင့်ချက်သည် သင်၏လူ့သဘာဝနှင့်ဆိုင်သည့် အသိစိတ်နှင့် တိုက်ရိုက်ဆက်စပ်သည်။ နောက်တစ်ချက်အနေဖြင့်၊ ယင်းသည် သမ္မာတရားကို လိုက်စားရာတွင် သင်ပေးနိုင်သော အဖိုးအခအပြင်၊ သမ္မာတရားကို လက်တွေ့လုပ်ဆောင်ရန် သင်၏စိတ်ပိုင်းဖြတ်မှုနှင့် လိုအင်ဆန္ဒတို့နှင့်လည်း တိုက်ရိုက်ဆက်စပ်သည်။ အသိစိတ်သည် သင့်အား ကယ်တင်ခံရခြင်းအတွက် အခြေခံ သတ်မှတ်ချက်တစ်ခုကို ပေးရုံမျှပေးပြီး၊ ယင်းက သင့်အသိစိတ်၏ ထိန်းကျောင်းမှုအောက်တွင် မှန်ကန်သောလမ်းကြောင်းပေါ်သို့ စတင်လျှောက်လှမ်းရန် အခွင့်အရေးကို သင့်အားပေးလျက်၊ သမ္မာတရားကို လက်တွေ့လုပ်ဆောင်ရန် အခွင့်အရေးများစွာကိုလည်း သင့်အတွက် ဖန်တီးပေးသည်။ ဆိုလိုသည်မှာ၊ မှန်ကန်သောလမ်းကြောင်းပေါ်သို့ စတင်လျှောက်လှမ်းခြင်းနှင့်ဆိုင်သည့် သင်၏ အခွင့်အရေးသည် အတော်အတန် မြင့်မားလိမ့်မည်ဖြစ်ပြီး၊ ကယ်တင်ခြင်းရရှိခြင်းနှင့်ဆိုင်သည့် သင်၏မျှော်လင့်ချက်သည်လည်း ရာခိုင်နှုန်းငါးဆယ်ထက် ကျော်လွန်လျက် အတော်အတန် မြင့်မားလိမ့်မည်။ သို့သော်၊ ထိုအရာက အာမခံချက်ရှိလိမ့်မည်မဟုတ်ပေ။ ထို့ကြောင့် သင်၌ အသိစိတ်နှင့် လူ့သဘာဝရှိသည်ဟု သင်ခံစားရလျှင်ပင်၊ အသိစိတ်နှင့် ဆင်ခြင်တုံတရားရှိခြင်းမျှက သင်သည် လူကောင်းတစ်ဦးဖြစ်ပြီး ကယ်တင်ခြင်းကို ရရှိနိုင်သည်၊ ယင်းမှာ ကျိန်းသေသည်ဟု တွေးလျက် ထိုအရာနှင့်ပတ်သက်၍ မိမိဘာသာအားရကျေနပ်ခြင်း မရှိနှင့်။ အကယ်၍ သင်သည် ဤသို့တွေးထင်လျှင်၊ ဤကိစ္စရပ်နှင့်ဆိုင်သည့် သင်၏ သဘောပေါက်နားလည်နိုင်စွမ်းတွင် သွေဖည်မှုများရှိသည်ဟု သင့်အား ငါပြော၏။ သင်သည် အသိစိတ်ကို ပိုင်ဆိုင်ပြီး လူ့သဘာဝရှိလျှင်၊ ဤအရာက သင်သည် ဘုရားသခင်ရွေးချယ်ပြီး ခေါ်ခြင်းခံရပြီးဖြစ်သည့် တစ်စုံတစ်ဦးဖြစ်ကြောင်းကိုသာ အတည်ပြုပေးသည်။ သို့သော်၊ နောက်ဆုံးတွင် သင် ကယ်တင်ခြင်း ရရှိနိုင်ခြင်း ရှိမရှိဟူသည့်အရာတွင် အရေးကြီးဆုံး အဆုံးအဖြတ်ပေးသည့် အကြောင်းရင်းမှာ သင်၏ကိုယ်ပိုင်လိုက်စားမှု၌ တည်ရှိသည်။ သင်၏အသိစိတ်သည် သင်၏အပြုအမူကို မကြာခဏ ထိန်းကျောင်းပြီး သင့်အနေဖြင့် မှန်ကန်သော လမ်းကြောင်းကို ရွေးချယ်နိုင်ရန်အလို့ငှာ သင့်ကို ထိန်းကျောင်းလျက် ပုံမှန်အားဖြင့် နိုးကြားလျှင်ပင်၊ အကယ်၍ သင်သည် သင်၏အသိစိတ်ကို မကြာခဏ ချိုးဖောက်ပြီး မှန်ကန်သောလမ်းကြောင်းကို မရွေးချယ်သည့်အပြင်၊ သမ္မာတရားကို လက်တွေ့လုပ်ဆောင်ရန် မရွေးချယ်ဘဲ၊ ထိုအစား သင်၏ ကိုယ်ပိုင်အကျိုးစီးပွားများ၊ သင်၏ကိုယ်ပိုင်ဂုဏ်သတင်းနှင့် မာနကို မကြာခဏ ကာကွယ်စောင့်ရှောက်ပြီး၊ သင်၏ကိုယ်ပိုင် ရှေ့ရေး၊ ရည်မှန်းချက်များနှင့် လိုအင်ဆန္ဒများကို မကြာခဏ ထည့်သွင်းစဉ်းစားလျှင်၊ နောက်ဆုံး၌ ကယ်တင်ခြင်းရရှိခြင်းနှင့်ဆိုင်သည့် သင်၏မျှော်လင့်ချက်သည် အလွန်နည်းပါးသွားလိမ့်မည်။ ယင်းသည် သင့်ကြောင့် တဖြည်းဖြည်း ပျက်စီးသွားပြီး ဖြစ်လိမ့်မည်။ ဤသည်မှာ အလွန်ဝမ်းနည်းဖွယ်ကောင်းသော အရာတစ်ခု ဖြစ်ပေမည်။ သင်နားလည်သလော။ (နားလည်ပါသည်။) ကောင်းပြီ၊ ယနေ့ ငါတို့၏ မိတ်သဟာယအတွက် ထိုမျှသာ ဖြစ်သည်။ နှုတ်ဆက်ပါသည်။

၂၀၂၄ ခုနှစ်၊ မတ်လ ၉ ရက်