ကောက်နုတ်ချက် (၁)

ဘုရားသခင်ဖော်ပြသော နှုတ်ကပတ်တော်များသည် သမ္မာတရား အမှန်တကယ်ဖြစ်ကြောင်း မြင်လာသောအခါ လူအချို့သည် ဘုရားသခင်ကို ယုံကြည်လာကြသည်။ သို့သော် သူတို့သည် ဘုရားသခင်၏အိမ်တော်သို့ ရောက်ပြီး ဘုရားသခင်သည် သာမန်လူတစ်ဦးဖြစ်ကြောင်းကို မြင်သောအခါ သူတို့၏စိတ်နှလုံးများထဲတွင် အယူအဆများ ဖြစ်ပေါ်လာကြသည်။ သူတို့၏စကားလုံးများနှင့် လုပ်ဆောင်မှုများသည် အထိန်းအချုပ်မရှိ ဖြစ်လာကြသည်၊ သူတို့သည် အပျော်အပါး လိုက်စားလာကြပြီး တာဝန်မဲ့စွာ ပြောဆို၍ သူတို့ ဝေဖန်ပြီး အသရေဖျက်ကြသည်။ ဤသည်မှာ ထိုကဲ့သို့သော ဆိုးယုတ်သည့်လူတို့ကို ထုတ်ဖော်သည့်နည်းလမ်းဖြစ်သည်။ ထိုလူ့သဘာဝ မရှိသော သတ္တဝါများသည် မကောင်းမှုကို မကြာခဏ ပြုကြပြီး အသင်းတော်၏အလုပ်များကို နှောင့်ယှက်ကြသည်၊ သူတို့ထံ ကောင်းကျိုးတစ်စုံတစ်ရာ မရောက်နိုင်ပါ။ သူတို့သည် ဘုရားသခင်ကို ပြောင်ပြောင်တင်းတင်း ဆန့်ကျင်၍ အသရေဖျက်ကာ ဝေဖန်ကြပြီး စော်ကားကြသည်၊ ပြောင်ပြောင်တင်းတင်း ဘုရားကိုပြစ်မှားကြပြီး ဘုရားနှင့် ဆန့်ကျင်ဘက်ပြုကြသည်။ ထိုကဲ့သို့သောလူများသည် ပြင်းထန်သော အပြစ်ဒဏ်ကို ခံယူကြရမည့်သူများဖြစ်သည်။ အချို့လူများသည် အယောင်ဆောင် ခေါင်းဆောင်များနှင့် အဆင့်တူဖြစ်ပြီး နှင်ထုတ်ခံရပြီးနောက်တွင် သူတို့သည် ဘုရားသခင်အပေါ် အဆက်မပြတ် ဒေါသထွက်နာကြည်းကြသည်။ သူတို့သည် သူတို့၏အယူအဆများကို ဆက်ဖြန့်ရန်နှင့် သူတို့၏မကျေနပ်ချက်များကို ပြောဆိုထုတ်ဖော်ရန် စုဝေးရသည့် အခွင့်အရေးကို အမိအရ အသုံးချကြသည်။ မည်သည့် ကြမ်းတမ်းသောစကားလုံးများကိုမဆို၊ သို့မဟုတ် သူတို့၏အမုန်းတရားကို ထွက်ပေါက်ပေးသည့် စကားလုံးများကိုပင် မစဉ်းမစားပြောထွက်ကြသည်။ ထိုကဲ့သို့သောလူများသည် မကောင်းဆိုးဝါးများ မဟုတ်လော။ ဘုရားသခင်၏အိမ်တော်မှ ရှင်းလင်းခံရပြီးနောက် သူတို့သည် မိုက်မဲမိသည့် တစ်ခဏအတွင်းတွင် အမှားတစ်ခုခုကို ပြောမိလေပြီဟုဆိုကာ နောင်တရကြသည်။ လူအချို့က သူတို့ကို ပိုင်းခြားသိမြင်နိုင်ခြင်းမရှိဘဲ “သူတို့က တော်တော် သနားစရာကောင်းတယ်၊ စိတ်နှလုံးထဲကနေ နောင်တရနေကြပါပြီ။ ဘုရားသခင်ကို သူတို့ အကြွေးတင်နေပြီ၊ ဘုရားသခင်ကို သူတို့ မသိဘူးလို့ သူတို့ပြောတယ်၊ ဒါကြောင့် သူတို့ကို ခွင့်လွှတ်လိုက်ကြရအောင်ပါ” ဟု ပြောကြသည်။ ထိုသို့ လွယ်လွယ်နှင့် ခွင့်လွှတ်ပေး၍ ရပါသလား။ ဘုရားသခင်ကို မဆိုထားနှင့်၊ လူများတွင် သူတို့၏ဂုဏ်သိက္ခာ ရှိကြသည်။ ထိုလူများ ဘုရားကိုပြစ်မှား၊ အသရေဖျက်ပြီးနောက် သူတို့ကို ခွင့်လွှတ်ပေးပြီး မိုက်မဲမိသည့် တစ်ခဏအတွင်းမှာ သူတို့ အမှားလုပ်မိကြရှာသည်ဟုဆိုသည့် လူအချို့၏စိတ်ထဲတွင် သူတို့သည် နောင်တရသယောင်ရှိကြသည်။ သို့သော် ထိုအချိန်သည် မိုက်မဲမိသည့်တစ်ခဏ ဟုတ်ပါ၏လော။ သူတို့ပြောသည့်စကားတွင် ရည်ရွယ်ချက်တချို့ အမြဲရှိကြသည်၊ သူတို့သည် ဘုရားသခင်ကိုပင် ဝေဖန်အပြစ်တင် ရဲကြပေသည်။ ဘုရားသခင်၏အိမ်တော်က သူတို့ကို အစားထိုးခဲ့သည်၊ ထို့နောက် အဆင့်အတန်း၏အကျိုးကျေးဇူးများကို သူတို့ ဆုံးရှုံးသွားခဲ့သည်။ ဖယ်ရှားရှင်းလင်းခြင်းခံရမည်ကို ကြောက်ရွံ့သောကြောင့် မကျေနပ်ချက်များစွာကို ပြောဆိုရင်း ခါးသီးစွာ ငိုကြွေးလျက် နောက်ပိုင်းတွင် နောင်တရကြသည်။ ဤသည်က ကောင်းကျိုးတစ်စုံတစ်ရာကို ပေးပါသလား။ သင်၏စကားလုံးများကို ပြောပြီးသည်နှင့်တစ်ပြိုင်နက် ရေကို မြေကြီးပေါ် လောင်းချလိုက်သကဲ့သို့ ပြန်အဖတ်ဆယ်၍မရနိုင်တော့ပေ။ လိုသလို ဆန့်ကျင်တတ်သော၊ ဝေဖန်အပြစ်တင်သော၊ သူ့ကို ပြစ်မှားစော်ကားသော လူများကို ဘုရားသခင်က သည်းခံပါမည်လော။ လျစ်လျူရှုထားလိုက်မည်လော။ ထိုသို့ဆိုလျှင် ဘုရားသခင်တွင် ဂုဏ်သိက္ခာရှိတော့မည် မဟုတ်ပေ။ အချို့လူများက ဆန့်ကျင်ပြီးနောက်တွင် “ဘုရားသခင်၊ ကိုယ်တော်၏အဖိုးတန်သွေးတော်က ကျွန်ုပ်ကို ရွေးနုတ်တော်မူပါသည်။ ကိုယ်တော်က ကျွန်ုပ်တို့ကို လူများအား အကြိမ်ခုနှစ်ဆယ် ခုနှစ်လီမြောက်အောင် ခွင့်လွှတ်ရမည်ဆိုသည်။ ကိုယ်တော်သည်လည်း ကျွန်ုပ်အား ခွင့်လွှတ်တော်မူသင့်ပါသည်”ဟု ပြောကြသည်။ အရှက်မဲ့လိုက်လေခြင်း။ လူအချို့သည် ဘုရားသခင်နှင့်ပတ်သက်သည့် ကောလာဟလများကို ဖြန့်ကြသည်၊ သူ့အား အသရေဖျက်ပြီးနောက်တွင် ကြောက်လာကြသည်။ အပြစ်ပေးခံရမည်ကို ကြောက်သည့်အတွက် သူတို့သည် အလျင်အမြန် ဒူးထောက်လျက် “ဘုရားသခင်၊ ကျွန်ုပ်ကို မထားခဲ့ပါနှင့်။ ကျွန်ုပ်ကို အပြစ်မပေးပါနှင့်၊ ကျွန်ုပ် ဝန်ခံပါသည်၊ ကျွန်ုပ် နောင်တရပါပြီ။ ကိုယ်တော့်ထံ ကျွန်ုပ် အကြွေးတင်နေပါပြီ။ ကျွန်ုပ် မှားခဲ့ပါပြီ”ဟု ဆုတောင်းကြသည်။ ပြောလော့၊ ထိုကဲ့သို့သော လူများခွင့်လွှတ်ခံရနိုင်မည်လော။ ခွင့်လွှတ်မခံရနိုင်ပါ။ မည်သည့်အတွက်ကြောင့် မခွင့်လွှတ်နိုင်ရမည်နည်း။ သူတို့ပြုခဲ့ပြီးသော အရာသည် သန့်ရှင်းသောဝိညာဉ်တော်ကို ပုန်ကန်ပြစ်မှားခဲ့ပြီ။ သန့်ရှင်းသောဝိညာဉ်တော်ကို ပြစ်မှားမိသော အပြစ်သည် ဤဘဝတွင်သာမဟုတ်၊ နောင်ဘဝအတွက်ပါ မည်သည့်အခါမှ ခွင့်လွှတ်ခံရမည်မဟုတ်ပါ။ ဘုရားသခင်သည် ကတိတည်သည်။ သူ့တွင် ဂုဏ်သိက္ခာ၊ အမျက်ဒေါသနှင့် ဖြောင့်မတ်သော စိတ်သဘောထားရှိသည်။ ဘုရားသခင်သည် လူသားနှင့်တူပြီး တစ်စုံတစ်ဦးက သူ့အပေါ် အနည်းငယ် ကောင်းပြရုံနှင့် သူက သူတို့ကျူးလွန်ခဲ့သော ပြစ်မှားမှုများကို ခွင့်လွှတ်ပေးလိမ့်မည်ဟု သင်ထင်သလော။ ထိုသို့ မဟုတ်ပါ။ ဘုရားသခင်ကို သင် ဆန့်ကျင်ပါက သင့်အတွက် ကိစ္စများ အဆင်ပြေချောမွေ့လာမည်လော။ တဒင်္ဂ မိုက်မဲမှုကြောင့် သင် အမှားတစ်ခုခုလုပ်မိပါက၊ သို့မဟုတ် တစ်ခါတစ်ရံ ဖောက်ပြန်ပျက်စီးသော စိတ်သဘောထားတစ်ခုကို အနည်းငယ်မျှ သင်ထုတ်ဖေါ်ပြမိပါက နားလည်နိုင်ပါသည်။ သို့သော် သင် တိုက်ရိုက် ခုခံကာ ပုန်ကန်ပြီး ဘုရားသခင်အား ဖီဆန်ခြင်းပြုပါက သင် ဘုရားသခင်ကို အသရေဖျက်ကာ ပြစ်မှားစော်ကားပြီး သူ့အကြောင်း ကောလာဟလများ ဖြန့်ပါက သင်သည် လုံးဝဥဿုံ ပျက်စီးခြင်းသို့ ရောက်ပြီဖြစ်သည်။ အဆိုပါလူများ ဆက်လက် ဆုတောင်းရန် မလိုပါ၊ သူတို့သည် အပြစ်ပေးခံရဖို့သာ စောင့်နေသင့်သည်။ သူတို့ကို ခွင့်လွှတ်နိုင်စရာမရှိပါ။ ထိုအချိန်သို့ ရောက်လာသောအခါ “ဘုရားသခင်၊ ကျွန်တော်မျိုးကို ကျေးဇူးပြု၍ ခွင့်လွှတ်တော်မူပါ” ဟု အရှက်မဲ့စွာ မပြောနှင့်။ သင် မည်သို့ အသနားခံပါစေ ပြောရမည်ကို အားနာသော်လည်း အသုံးဝင်လိမ့်မည် မဟုတ်ပါ။ အချို့သော သမ္မာတရားတို့ကို နားလည်သဘောပေါက်ပြီးသည့်နောက်တွင် လူတို့သည် သိလျက်နှင့်ပင် ပြစ်မှားကြလျှင် သူတို့ကို ခွင့်လွှတ်မပေးနိုင်ပေ။ ယခင်က ဘုရားသခင်သည် လူတစ်ဦး၏ ပြစ်မှားမှုများကို သတိမရဟု ဆိုကြသည်။ ယင်းက ဘုရားသခင်၏ စီမံအုပ်ချုပ်ရေးဆိုင်ရာ အမိန့်များ မပါဝင်သလို ဘုရားသခင်၏ စိတ်သဘောထားကို ပုန်ကန်ပြစ်မှားခြင်း မရှိသည့် အသေးစား ပြစ်မှားမှုများကို ဆိုလိုသည်။ ဤအရာများတွင် ဘုရားသခင်ကို ပြစ်မှားစော်ကားခြင်းနှင့် အသရေဖျက်ခြင်းတို့ မပါဝင်ပါ။ သို့သော် သင်သည် တစ်ကြိမ်တစ်ခါမျှပင် ဘုရားသခင်ကို ပြစ်မှားစော်ကားခြင်း၊ ဝေဖန်ခြင်း၊ သို့မဟုတ် အသရေဖျက်ခြင်းတို့ကို ပြုလုပ်မိပါက ဤသည်က ချေဖျက်မရနိုင်သည့် ထာဝရ အစွန်းအထင်းတစ်ခု ဖြစ်သွားပါလိမ့်မည်။ လူတို့သည် သူတို့အလိုကျ ဘုရားသခင်ကို ပြစ်မှားစော်ကား၍ စော်ကားလိုကြပြီး ကောင်းချီးများကို ရရန် သူ့ကို အပြည့်အဝ အသုံးချလိုကြသည်။ ကမ္ဘာပေါ်ရှိ မည်သည့်အရာကမှ ထိုမျှ ဈေးမပေါချေ။ ဘုရားသခင်သည် သနားကရုဏာနှင့် ပြည့်စုံ၍ ကြင်နာတတ်သည်၊ သူသည် စေတနာကောင်းသည်၊ သူ့တွင် ကြီးမားကျယ်ပြန့်ပြီး တိုင်းတာ၍ မရနိုင်သော နှလုံးသားတစ်ခုရှိသည်။ သူသည် လူတို့၏ ပြစ်မှားမှုများကို သတိမရဘဲ လူတို့၏ အတိတ်မှ ပြစ်မှားမှုများနှင့် ပြုခဲ့ပြီးသော အမှုများအတွက် သင်ပုန်းချေတတ်သည် ဟူ၍ လူတို့သည် အမြဲ ထင်မြင်ကြသည်။ သင်ပုန်းချေခြင်းသည် အသေးအဖွဲ ကိစ္စများအပေါ်တွင် ဖြစ်သည်။ သူ့ကို ပွင့်ပွင့်လင်းလင်း ခုခံပြီး ပြစ်မှားစော်ကားသောသူတို့ကို ဘုရားသခင်သည် ဘယ်တော့မျှ ခွင့်လွှတ်လိမ့်မည် မဟုတ်ပေ။

အသင်းတော်ရှိ လူအများစုသည် ဘုရားသခင်ကို အမှန်တကယ် ယုံကြည်ကြသော်လည်း သူတို့သည် ဘုရားသခင်ကို ကြောက်ရွံ့သော စိတ်နှလုံးများ မရှိကြပေ။ ဤသည်က လူအများစုတွင် ဘုရားသခင်၏ စိတ်သဘောထားနှင့်ပတ်သက်သည့် စစ်မှန်သော သိမြင်မှု မရှိကြကြောင်းကို ပြသည်၊ ထို့ကြောင့် ဘုရားသခင်ကို ကြောက်ရွံ့ပြီး မကောင်းမှုကို ရှောင်ရန် သူတို့အတွက် ခက်ခဲလေသည်။ အကယ်၍ လူတို့သည် သူတို့၏ ယုံကြည်ခြင်းတွင် ဘုရားသခင်ကို မကြောက်ရွံ့သကဲ့သို့ သူ့ကို ထိတ်လန့်တုန်လှုပ်ခြင်း မရှိသည့်အပြင် ဘုရားသခင်၏ အမှုတော်က သူတို့၏ ကိုယ်ပိုင် အကျိုးများကို ထိပါးလာသည်နှင့်တစ်ပြိုင်နက် သူတို့ကြိုက်နှစ်သက်ရာ မည်သည့်အရာကိုမဆို ပြောပြီး သူတို့ ပြောဆိုပြီးသောအခါ ထိုအရာသည် အဆုံးသတ်ဖြစ်လိမ့်မည်လော။ ထို့နောက်တွင် သူတို့ပြောသည့်အရာအတွက် နောက်ဆက်တွဲအကျိုးကို သူတို့ခံစားကြရမည်။ ဤသည်က ရိုးရှင်းသော ကိစ္စတစ်ခု မဟုတ်ပါ။ လူအချို့က ဘုရားသခင်ကို ပြစ်မှားစော်ကားသောအခါ၊ ဝေဖန်သောအခါ သူတို့၏ စိတ်နှလုံးထဲတွင် သူတို့မည်သည့်အရာ ပြောနေသည်ကို သူတို့ သိသလော။ ဤအရာများကို ပြောသောသူ အားလုံးသည် သူတို့ မည်သည့်အရာပြောသည်ကို သူတို့၏ စိတ်နှလုံးထဲတွင် သိကြသည်။ နတ်ဆိုးစွဲခြင်း ခံထားရသောသူများနှင့် ပုံမှန် မဟုတ်သော အကြောင်းပြချက်ရှိသူများမှအပ ပုံမှန် လူများသည် သူတို့ ပြောနေသည့်အရာကို သူတို့၏ စိတ်နှလုံးထဲတွင် သိကြသည်။ သူတို့ မသိပါဟု သူတို့ ပြောပါက သူတို့သည် လိမ်နေခြင်းဖြစ်သည်။ သူတို့စကားပြောသောအခါ “ကိုယ်တော်က ဘုရားသခင်ဆိုတာ ကျွန်ုပ်သိပါတယ်။ ကိုယ်တော် လုပ်နေတာ မမှန်ဘူးလို့ ကျွန်ုပ်ပြောနေတယ်၊ ဒီတော့ ကိုယ်တော်က ကျွန်ုပ်ကို ဘာများ လုပ်နိုင်မှာလဲ။ ကျွန်ုပ်စကားပြောပြီးသောအခါ ကိုယ်တော်က ဘာလုပ်မည်နည်း” ဟု သူတို့က စဉ်းစားလေသည်။ သူတို့သည် ဤအရာကို အခြားသူများကို နှောင့်ယှက်ဖို့၊ အခြားသူများကို သူတို့ဘက်သို့ပါအောင် ဆွဲဖို့၊ အခြားသူများကို အလားတူစကားများ ပြောစေဖို့၊ အခြားသူများကို အလားတူလုပ်ရပ်များ လုပ်စေဖို့ ရည်ရွယ်ချက်ရှိရှိ လုပ်ကြသည်။ သူတို့ပြောသည့်အရာသည် ဘုရားသခင်နှင့် ဆန့်ကျင်နေပြီး ဘုရားသခင်ကို ပြစ်မှားစော်ကားနေသည့် ဘုရားသခင်ကို ပြောင်ပြောင်တင်းတင်း အာခံခြင်းဖြစ်ကြောင်းကို သူတို့ သိကြသည်။ သူတို့ အလေးအနက် စဉ်းစားဆင်ခြင်ပြီးနောက် သူတို့လုပ်ခဲ့သည့်အရာသည် မှားနေသည်ဟု ထင်မြင်မိသည်။ “ကျွန်ုပ် မည်သည့်အရာကို ပြောလိုက်သနည်း။ ထိုအချိန်သည် စိတ်မြန်လက်မြန် လုပ်လိုက်သော တစ်ခဏဖြစ်ပြီး ကျွန်ုပ် အလွန်နောင်တရသည်” ဟူ၍ ဖြစ်လေသည်။ သူတို့၏နောင်တသည် စင်စစ်အားဖြင့် ထိုအချိန်က သူတို့မည်သည့်အရာ လုပ်ခဲ့ကြသည်ကို သူတို့သိခဲ့ကြောင်းကို သက်သေပြသည်။ သူတို့ မသိခဲ့ခြင်း မဟုတ်ချေ။ အကယ်၍ သူတို့သည် စေ့စေ့စပ်စပ် နားမလည်ဘဲ ခဏတာ မသိနားမလည်ဖြစ်ပြီး စိတ်ရှုပ်ထွေးနေခဲ့ခြင်း ဖြစ်သည်ဟု သင်ထင်ပါက ဤသည်မှာ လုံးလုံးလျားလျား မမှန်ပေ။ လူတို့သည် စေ့စေ့စပ်စပ် နားမလည်ဖြစ်ကောင်းဖြစ်နိုင်သော်လည်း ဘုရားသခင်ကို သင် ယုံကြည်ပါက သင့်တွင် အနည်းဆုံး သာမန် ဘဝပေးအသိစိတ် ရှိကို ရှိရမည်။ ဘုရားသခင်ကို ယုံကြည်ရန် သင်သည် ဘုရားသခင်ကို ကြောက်ရွံ့သင့်ပြီး ထိတ်လန့်သင့်သည်။ သင်သည် ဘုရားသခင်ကို ပြစ်မှားစော်ကား၍မရ၊ သူ့ကို သင့်သ‌ဘောရှိ ဝေဖန်၍မရ၊ သို့မဟုတ် အသရေဖျက်၍ မရချေ။ “ဝေဖန်ခြင်း”၊ “ပြစ်မှားစော်ကားခြင်း”နှင့် “အသရေဖျက်ခြင်း” ဟူသည်မှာ မည်သည့်အရာကို ဆိုလိုကြောင်း သင်သိသလော။ သင်တစ်စုံတစ်ခုကို ပြောသောအခါ ဘုရားသခင်ကို ဝေဖန်လိုသည့်သဘောဖြင့် ပြောဆိုနေခြင်း ရှိမရှိကို သင်မသိလေသလော။ လူအချို့သည် သူတို့က ဘုရားသခင်ကို ဧည့်ဝတ်ပြုရာတွင် ပါဝင်ဆောင်ရွက်ဖူးကြောင်း၊ ပြီးနောက် ဘုရားသခင်ကို မကြာခဏ မြင်တွေ့ပြီး ဘုရားသခင်၏ တေ့တေ့ဆိုင်ဆိုင် မိတ်သဟာယပြုခြင်းကို နားထောင်ဖူးကြောင်းဆိုသည့် အချက်ကို အမြဲပြောကြသည်။ သူတို့သည် အမှတ်မထင် တွေ့ဆုံမိသည့် မည်သူနှင့်မဆို ဤအကြောင်းအရာများ အကြောင်းကို ပြောကြသည်။ အပေါ်ယံကိစ္စများကို ရှည်ရှည်ဝေးဝေး ပြောဆိုကြသည်။ သူတို့တွင် စစ်မှန်သော အသိပညာ လုံးဝ မရှိကြပေ။ သူတို့ ဤအကြောင်းအရာများကို ပြောသောအခါ သူတို့တွင် မကောင်းသောရည်ရွယ်ချက်များ မရှိသည်မှာ ဖြစ်ကောင်းဖြစ်နိုင်သည်။ သူတို့သည် ညီအစ်ကိုမောင်နှမများအတွက် ‌စေတနာကောင်းပြီး လူတိုင်းကို အားပေးလိုခြင်း ဖြစ်နိုင်သည်။ သို့သော် သူတို့သည် ဘာကြောင့် ဤအကြောင်းအရာများကို ပြောရန် ရွေးသနည်း။ အကယ်၍ သူတို့သည် ဤကိစ္စကို စိတ်ထက်သန်တက်ကြွစွာ ထည့်သွင်းဆွေးနွေးလာပါက ထိုအခါ အဓိကအားဖြင့် ကြွားရန်နှင့် လူများက သူတို့ကို အထင်ကြီးလာစေရန်စသည့် ရည်ရွယ်ချက်တစ်စုံတစ်ခု သူတို့တွင် ရှိသည်။ သူတို့သည် လူတို့ ယုံကြည်မှုရှိအောင် လုပ်နိုင်ပြီး ဘုရားသခင်ကို လူတို့၏ ယုံကြည်ခြင်းတွင် အားပေးနိုင်ပါက သူတို့သည် လူတို့အား သမ္မာတရားဖြစ်သည့် ဘုရားသခင်၏ နှုတ်ကပတ်တော်များကို ပို၍ ဖတ်ရွတ်ပြနိုင်သည်။ သို့ဆိုလျှင် အဆိုပါ ပြင်ပ အကြောင်းအရာများ အကြောင်းကို သူတို့ အဘယ်ကြောင့် မလျှော့တမ်း ပြောနေရသနည်း။ သူတို့ ဤအကြောင်းအရာများကို ပြောခြင်း၏ အရင်းအမြစ်က သူတို့သည် ဘုရားသခင်ကို ကြောက်ရွံ့သော စိတ်နှလုံး တကယ်ကို မရှိခြင်းပင်ဖြစ်သည်။ သူတို့သည် ဘုရားသခင်ကို မကြောက်ရွံ့ပါ။ သူတို့သည် ဘုရားသခင် ရှေ့မှောက်တွင် ထိန်းမနိုင်သိမ်းမရပြုမူပြီး နှုတ်မစောင့်စည်းဘဲ မည်သို့ နေနိုင်သနည်း။ ဘုရားသခင်တွင် ဂုဏ်သိက္ခာရှိသည်။ လူတို့သည် ဤအရာကို သဘောပေါက်လျှင် အဆိုပါကိစ္စများကို သူတို့ ဆက်လက် လုပ်ဆောင်နေဦးမည်လော။ လူတို့သည် ဘုရားသခင်ကို ကြောက်ရွံ့သော စိတ်နှလုံး မရှိကြချေ။ သူတို့၏ ပုဂ္ဂိုလ်ရေး ရည်မှန်းချက်များကို ရရန်နှင့် အခြားသူများက သူတို့အား အထင်ကြီးစေရန်ဖြစ်သည့် သူတို့၏ ကိုယ်ပိုင် အကြောင်းပြချက်များအတွက် ဘုရားသခင်သည် မည်သို့ဖြစ်သည်နှင့် ဘုရားသခင်သည် မည်သည့်အရာနှင့် တူသည်ဆိုသည်ကို စိတ်ကူးပေါက်သလို သူတို့ ပြောကြသည်။ ဤသည်မှာ ဘုရားသခင်ကို ဝေဖန်ခြင်းနှင့် ပြစ်မှားစော်ကားခြင်းမျှသာ ဖြစ်သည်။ အဆိုပါလူတို့တွင် သူတို့၏ စိတ်နှလုံးသားထဲ၌ ဘုရားသခင်အတွက် ကြောက်ရွံ့ခြင်း မရှိချေ။ သူတို့သည် ဘုရားသခင်ကို ခုခံပြီး ပြစ်မှားစော်ကားကြသည့် လူအားလုံးဖြစ်သည်။ သူတို့သည် နတ်ဆိုးများနှင့် မကောင်းဆိုးဝါးများသာ ဖြစ်သည်။ လူအချို့သည် ဘုရားသခင်ကို နှစ်အနည်းငယ်ကြာ ယုံကြည်ခဲ့ကြသော်လည်း အဆင်းနီသော နဂါးကြီး၏ ဖမ်းဆီးခြင်းကို ခံရပြီးနောက်တွင် သူတို့သည် ယုဒများ ဖြစ်လာကြသည်၊ ဘုရားသခင်ကို ပြစ်မှားစော်ကားရာတွင် အဆင်းနီသော နဂါးကြီး၏ နောက်သို့ပင် လိုက်ကြသေးသည်။ အချို့လူတို့သည် ဘုရားသခင်၏ အမှုတော်ကို ဝေဖန်ပြီး ဘုရားသခင်ကို ရှုတ်ချသည့် အကြောင်းအရာများကို ဘာသာရေးကိုင်းရှိုင်းသော လူများ ပြောသကဲ့သို့ သံယောင်လိုက်ပြောကြရင်း ဧဝံဂေလိတရားကို ဟောကြသည်။ ဤပုံစံမျိုးပြောဆိုခြင်းသည် ဘုရားသခင်ကို ခုခံခြင်းနှင့် ဘုရားသခင်ကို ပြစ်မှားစော်ကားခြင်းဖြစ်ကြောင်းကို သူတို့ သိကြသော်လည်း သူတို့သည် မစိုးရိမ်ကြပေ။ သင့်ကြံရွယ်ချက်များက မည်သို့ပင်ဖြစ်စေ ဤနည်းဖြင့် စကားပြောခြင်းသည် မသင့်တော်ချေ။ အခြားအကြောင်းကို သင်မပြောနိုင်သလော။ ဤအကြောင်းအရာများကို သင် အဘယ်ကြောင့် ပြောမှ ဖြစ်မည်နည်း။ ထိုအရာသည် ဘုရားသခင်ကို ပြစ်မှားစော်ကားခြင်း မဟုတ်လော။ အဆိုပါ စကားမျိုး သင့်ပါးစပ်မှ ထွက်လာပါက သင်သည် ဘုရားသခင်ကို ပြစ်မှားစော်ကားနေခြင်း ဖြစ်သည်။ သင် ထိုကဲ့သို့ ရည်ရွယ်ချက်ရှိရှိ လုပ်သည်ဖြစ်စေ၊ မလုပ်သည်ဖြစ်စေ အဆိုပါအကြောင်းအရာများကို ပြောခြင်းသည် သင့်ကို ဘုရားတရား မကိုင်းရှိုင်းသူ ဖြစ်စေသည်။ သင့်ထံတွင် ဘုရားသခင်ကို ကြောက်ရွံ့သော စိတ်နှလုံး မရှိချေ။ သင်သည် အခြားလူများကို လိုက်လျောပြီး အခြားလူတို့ စိတ်ကျေနပ်စေရန် ဘုရားကို ပြစ်မှားစော်ကားသော စကားများကို ပြောကာ သူတို့ကို သိမ်းသွင်းစည်းရုံးသည်။ သင်သည် ဘုရားတရား မကိုင်းရှိုင်းလိုက်လေခြင်း။ သင်သည် နတ်ဆိုးနှင့် တစ်ကျိတ်တည်း တစ်ဉာဏ်တည်းပင်။ သင်သည် မိမိစိတ်ကူးပေါက်သလို ဘုရားသခင်ကို ဆော့ကစားနိုင်သလော၊ ဝေဖန်နိုင်သလော၊ ဘောင်ခတ်နိုင်သလော၊ ပြစ်မှားစော်ကားနိုင်သလော။ ထိုသို့ပြုလုပ်ခြင်းသည် အလွန် စိတ်ပျက်ဖွယ်ကောင်းသည်။ သင် အမှားတစ်စုံတစ်ခုကို ပြောမိပြီး ထိုအရာက ဘုရားသခင်၏ စိတ်သဘောထားကို ပုန်ကန်ပြစ်မှားမိပါက ထိုအခါတွင် သင်သည် ပျက်စီးခြင်းသို့ ဆိုက်ရောက်ပြီဖြစ်သည်။ ဤသည်မှာ သေစေလောက်သော ကိစ္စတစ်ခုဖြစ်သည်။ “ဘာသာရေးလောကရှိ လူများသည် သင်းအုပ်များနှင့် အကြီးအကဲများ၏ အထင်အမြင်မှားစေခြင်းကို ခံနေရပြီး ဘုရားသခင်ကို ပြစ်မှားစော်ကားကာ ဝေဖန်ပြီး သူ၏ အမှုတော်ကို ရှုတ်ချသည့် အကြောင်းအရာများကို သူတို့အများစုသည် ပြောပြီးကြပြီးဖြစ်သည်။ အချို့လူတို့သည် နောက်ဆုံးသော ကာလအတွင်း ဘုရားသခင်၏ အမှုတော်ကို လက်ခံပြီး နောင်တရကြသည်။ သို့ဆိုလျှင် သူတို့သည် ကယ်တင်ခြင်း ခံရမည်လော။ အကယ်၍ သူတို့အားလုံးသည် ဘုရားသခင်၏ စွန့်ပစ်ခြင်းကို ခံရပါက ကယ်တင်ခြင်းခံရမည့် လူများ အနည်းငယ်မျှသာ ရှိတော့မည်၊ တစ်ယောက်ယောက် ကယ်တင်ခြင်းခံရဖို့ဆိုသည်မှာပင် ခဲယဉ်းလှသည်” ဟု လူအချို့က တွေးထင်ကြသည်။ သင်သည် ဤကိစ္စကို ရှင်းလင်းစွာ မမြင်နိုင်ပါ၊ ဟုတ်သည် မဟုတ်လော။ ဘုရားသခင်၏ စိတ်သဘောထားသည် ဖြောင့်မတ်ပြီး သူသည် လူတိုင်းအပေါ် ဖြောင့်မတ်သည်။ နောဧ၏ နေ့ရက်များတွင် လှေပေါ်သို့ လူရှစ်ယောက်သာ ကယ်တင်ခံရသည်၊ ကျန်သောလူများသည် ဖျက်ဆီးခြင်းခံရသည်။ ဘုရားသခင်သည် ဖြောင့်မတ်ခြင်းမရှိဟု သင်ပြောရဲသလော။ လူသားမျိုးနွယ်သည် ပြင်းပြင်းထန်ထန် ဖောက်ပြန်ပျက်စီးနေကြသည်။ သူတို့အားလုံးသည် စာတန်နှင့် ဆိုင်သည်၊ သူတို့အားလုံးသည် ဘုရားသခင်ကို ခုခံကြသည်၊ သူတို့သည် အားလုံး ယုတ်ညံ့ပြီး တန်ဖိုးမဲ့ကြသည်။ သူတို့သည် ဘုရားသခင်၏ အမှုတော်ကို လက်မခံနိုင်ပါက ယခင်ကအတိုင်း ဖျက်ဆီးခြင်း ခံရလိမ့်မည်။ အချို့လူများက သူတို့ကိုယ်သူတို့ ထင်ကောင်းထင်နိုင်သည်။ “အကယ်၍ ကျွန်ုပ်တို့အထဲမှ တစ်ယောက်ကိုမျှ ဘုရားသခင်က မကယ်တင်နိုင်ခဲ့လျှင် ဘုရားသခင်၏အမှုတော်သည် အချည်းနှီးဖြစ်သည် မဟုတ်လော။ ဘုရားသခင်သည် လူသားမျိုးနွယ်ကိုကယ်တင်ရာ၌ လူသားမပါ၍မဖြစ်ဟု ကျွန်ုပ်ထင်သည်။ အကယ်၍ ဘုရားသခင်က လူသားကို ထားခဲ့ပါက ဘုရားသခင်၏ စီမံခန့်ခွဲမှုသည် ပျောက်ကွယ်သွားလိမ့်မည်” ဟူ၍ ဖြစ်သည်။ သင် မှားနေပြီ။ ဘုရားသခင်သည် လူသား မရှိလျှင်ပင် သူ၏ စီမံခန့်ခွဲမှု အစီအစဉ်ကို အားလုံး ဆက်လက်လုပ်ဆောင်သွားလိမ့်မည်။ လူတို့သည် သူတို့ကိုယ်သူတို့ ပို၍ တန်ဖိုးဖြတ်ကြသည်။ လူတို့ထံတွင် ဘုရားသခင်ကို ကြောက်ရွံ့သော စိတ်နှလုံး မရှိကြချေ။ ဘုရားသခင် ရှေ့မှောက်တွင် သူတို့သည် ဘာသာတရား ရိုသေကိုင်းရှိုင်းခြင်း လုံးဝ မရှိကြပေ၊ သူတို့တွင် မည်သည့် ကောင်းစွာ ပြုမူသည့် သဘောထားမျိုးမှ မရှိကြပေ။ အကြောင်းမှာ လူတို့သည် စာတန်၏ အာဏာအောက်တွင် နေထိုင်ကြပြီး စာတန်နှင့် သက်ဆိုင်သောကြောင့် အချိန်နေရာမရွေး သူတို့သည် ဘုရားသခင်ကို ဝေဖန်နိုင်ကြပြီး ဘုရားသခင်ကို ပြစ်မှားစော်ကားနိုင်ကြသည်။ ဤသည်မှာ ကြောက်စရာကောင်းသော အရာတစ်ခုဖြစ်သည်။ ဘုရားသခင်၏ စိတ်သဘောထားကို ပုန်ကန်ပြစ်မှားခြင်း ဖြစ်သည်။

ကောက်နုတ်ချက် (၂)

ဘုရားသခင်အပေါ် ယုံကြည်သူများသည် အဓိကအရာအချို့ကို နားလည်သဘောပေါက်ရမည်။ အနည်းဆုံးအနေဖြင့် သူတို့သည် သူတို့၏စိတ်နှလုံးထဲတွင် ဘုရားသခင်အပေါ် ယုံကြည်ဖို့ဆိုသည်မှာ မည်သည်ကို ဆိုလိုခြင်းဖြစ်သည်၊ ဘုရားသခင်အပေါ် ယုံကြည်သူများက မည်သည့်သမ္မာတရားများကို နားလည်သင့်သည်၊ ဘုရားသခင်ထံ ကျိုးနွံနာခံခြင်းအား မည်သို့လက်တွေ့လုပ်ဆောင်သင့်သည်ဆိုသည်အပါအဝင်၊ ဘုရားသခင်ထံ ကျိုးနွံနာခရာတွင် မည်သည့်သမ္မာတရားများနှင့် သူ၏ မည်သည့်နှုတ်ကပတ်တော်များကို နားလည်သင့်သည်နှင့် သူ့ကို စိတ်ကျေနပ်စေဖို့ လူတွင် မည်သည့်စစ်မှန်မှုများကို ပိုင်ဆိုင်သင့်သည်ဆိုသည်တို့ကို သိရမည်။ အကယ်၍ သင့်တွင် ဤယုံကြည်ခြင်းနှင့် ဤစိတ်ပိုင်းဖြတ်ချက်တို့ရှိပါက ထိုအခါ သင့်တွင် ရံဖန်ရံခါ၌ အနည်းငယ်သောအယူအဆများ သို့မဟုတ် ထိုထိုသောအချို့ရည်ရွယ်ချက်များကို စိတ်ထဲသိုထားလျှင်တောင်မှ ၎င်းတို့ကို လက်လွှတ်ဖို့ လွယ်ကူလိမ့်မည်။ ဤယုံကြည်ခြင်းမရှိသောသူများသည် သူတို့ ကျိုးနွံနာခံရာတွင် အမြဲ ဇီဇာကြောင်နေလိမ့်မည်ဖြစ်ပြီး၊ ရံဖန်ရံခါ၌ သူတို့သည် သေးသိမ်စွာ အပြစ်ရှာခြင်း၊ အငြင်းသန်ခြင်း၊ မကျေမချမ်းမှုကို စိတ်ထဲသိုထားခြင်း၊ မကျေနပ်ရခြင်းအကြောင်းကို ညည်းတွားခြင်းတို့ကိုပင် ပြုလုပ်ကြဦးမည်။ ပုန်ကန်ချင်သည့်အပြုအမူမျိုးစုံသည် ရံဖန်ရံခါ၌ ဖြစ်ပွားလိမ့်မည်။ ၎င်းမှာ အခါအားလျော်စွာဖြစ်သည့် ဖြစ်ရပ်တစ်ခု သို့မဟုတ် နှစ်ခုမျှသာ မဟုတ်သလို၊ တဒင်္ဂအတွေးလည်း မဟုတ်ပါ။ သို့သော် တကယ်တမ်းတွင် ပုန်ကန်လိုသည့်စကားများကို ပြောပြီး ပုန်ကန်လိုသည့်အရာများကို လုပ်နိုင်စွမ်းသာဖြစ်သည်။ ဤသည်က အထူးပြင်းထန်သောပုန်ကန်လိုသည့်စိတ်သဘောထားကို ဖော်ပြသည်။ လူများတွင် ဖောက်ပြန်ပျက်စီးသောစိတ်သဘောထားများရှိကြသည်။ ထို့အပြင် အကယ်၍ သူတို့တွင် ဘုရားသခင်ထံ ကျိုးနွံနာခံဖို့ စိတ်ပိုင်းဖြတ်ချက်ရှိလျှင်ပင် သူတို့၏ကျိုးနွံနာခံခြင်းသည် ကန့်သတ်ချက်ရှိသည်။ ၎င်းသည် နှိုင်းယှဉ်ချက်ရှိသည်၊ ၎င်းသည် ရံဖန်ရံခါဖြစ်ခြင်း၊ တဒင်္ဂဖြစ်ခြင်းနှင့် အခြေအနေအရဖြစ်ခြင်းတို့လည်းဖြစ်သည်။ ၎င်းသည် အပြည့်အဝ မဟုတ်ပေ။ ဖောက်ပြန်ပျက်စီးသောစိတ်သဘောထားဖြင့် သူတို့၏ပုန်ကန်လိုမှုသည် အထူးကြီးမားလှသည်။ သူတို့သည် ဘုရားသခင်ကို အသိအမှတ်ပြုသော်လည်း မကျိုးနွံမနာခံနိုင်ကြပေ။ သည့်အပြင် သူတို့သည် သူ၏နှုတ်ကပတ်တော်များကို နားထောင်လိုသော်လည်း ၎င်းတို့ထံ မကျိုးနွံမနာခံနိုင်ကြပေ။ ဘုရားသခင်က ကောင်းသည်ကို သူတို့သိကြသည်။ ထို့အပြင် သူတို့သည် သူ့ကို ချစ်မြတ်နိုးလိုသော်လည်း မချစ်နိုင်ကြပေ။ သူတို့သည် ဘုရားသခင်၏စကားကို လုံးဝ နားမထောင်နိုင်ကြပေ၊ သူ့ကို အရာရာတိုင်းကို စီစဉ်ညွှန်ကြားခွင့်မပြုနိုင်ကြပေ။ ထို့အပြင် သူတို့တွင် သူတို့၏ကိုယ်ပိုင်ရွေးချယ်မှုများရှိနေကြသေးသည်။ သူတို့၏ကိုယ်ပိုင် ရည်ရွယ်ချက်များနှင့် စေ့ဆော်မှုအကြောင်းရင်းများကို စိတ်ထဲတွင် သိုထားကြသေးသည့်အပြင်၊ သူတို့၏ကိုယ်ပိုင် စီမံချက်များ၊ စိတ်ကူးအကြံဉာဏ်များနှင့် ကိစ္စများကို လုပ်သည့် သူတို့၏ကိုယ်ပိုင်နည်းနာတို့ရှိနေကြသေးသည်။ ကိစ္စများကို လုပ်ရာတွင် သူတို့၏ကိုယ်ပိုင်နည်းနာများ၊ သူတို့၏ကိုယ်ပိုင်နည်းလမ်းများရှိခြင်းဆိုသည်မှာ ဘုရားသခင်ထံ သူတို့ ကျိုးနွံနာခဖို့ မဖြစ်နိုင်ဟုဆိုလိုသည်။ သူတို့၏ကိုယ်ပိုင်စိတ်ကူးအကြံဉာဏ်များအတိုင်းသာ သူတို့ ပြုမူနိုင်ကြပြီး ဘုရားသခင်ကို ပုန်ကန်နိုင်ကြသည်။ ဤသည်မှာ လူများ မည်မျှပုန်ကန်လိုစိတ်ရှိကြကြောင်းပင်ဖြစ်သည်။ ထို့ကြောင့် လူသား၏သဘာဝသည် အပေါ်ယံ မိမိကိုယ်ကို မှန်ကန်သည်ဟု ယူမှတ်မှု၊ မိမိဘာသာကြီးကျယ်နေခြင်းနှင့် မာန သို့မဟုတ် အခါအားလျော်စွာ လိမ်ပြောခြင်းများနှင့် ဘုရားသခင်အပေါ် လိမ်ညာခြင်းတို့ကဲ့သို့သော ရိုးစင်းသည့် ဖောက်ပြန်ပျက်စီးသောစိတ်သဘောထားများမျှသာ မဟုတ်ချေ။ ဤအစား လူသား၏အနှစ်သာရသည် စာတန်၏အနှစ်သာရဖြစ်လာပြီးသားဖြစ်သည်။ ယခင်အချိန်တုန်းက ကောင်းကင်တမန်မင်းသည် ဘုရားသခင်ကို မည်သို့သစ္စာဖောက်ခဲ့သနည်း။ ယနေ့ခေတ်လူများကရော အဘယ်နည်း။ ပွင့်ပွင့်လင်းလင်းပြောရလျှင် သင်တို့ ၎င်းကို လက်ခံနိုင်သည်ဖြစ်စေ၊ လက်မခံနိုင်သည်ဖြစ်စေ ယနေ့ခေတ်လူများသည် စာတန်လုပ်ခဲ့သလို ဘုရားသခင်ကို လုံးလုံးလျားလျား သစ္စာဖောက်ရုံသာမက၊ သူတို့၏စိတ်နှလုံးများ၊ သူတို့၏အတွေးနှင့် သူတို့၏အတွေးအမြင်စနစ်များထဲတွင်လည်း ဘုရားသခင်အပေါ် တိုက်ရိုက် ရန်လိုကြသည်။ ဤသည်မှာ စာတန်က လူသားမျိုးနွယ်ကို နတ်ဆိုးများအဖြစ်သို့ ဖျက်ဆီးခြင်းဖြစ်သည်။ လူသားများသည် စာတန်က ပေါက်ဖွားသောသားသမီးများ အမှန်အကန် ဖြစ်လာခဲ့ကြပြီ။ သင်တို့က “ကျွန်ုပ်တို့က ဘုရားသခင်အပေါ် ရန်မလိုပါ။ ဘုရားသခင်ဘာပြောပြော ကျွန်ုပ်တို့ နားထောင်ပါသည်” ဟူ၍ ဆိုကောင်းဆိုနိုင်သည်။ ယင်းသည် အပေါ်ယံသာဖြစ်သည်။ ဘုရားသခင်ပြောသမျှဘာမဆိုကို သင်နားထောင်သယောင် ထင်ရသည်။ အကယ်စင်စစ် ငါသည် တရားဝင်တစ်ခမ်းတစ်နား မိတ်သဟာယပြုပြီး စကားပြောသောအခါ လူအများစုတွင် အယူအဆများမရှိကြဘဲ ယဉ်ကျေးစွာပြုမူပြီး နာခံကြသော်လည်း၊ ကျွန်ုပ်က သာမန်လူ့သဘာဝအတိုင်း စကားပြော၍ ကိစ္စများကို လုပ်သောအခါ သို့မဟုတ် သာမန်လူ့သဘာဝအတိုင်း နေထိုင်ပြုမူသောအခါတွင်မူ သူတို့၏အယူအဆများ ပေါ်ပေါက်လာတော့သည်။ သူတို့၏စိတ်နှလုံးများထဲတွင် ငါ့အတွက် နေရာဖယ်ပေးချင်သော်ငြားလည်း၊ သူတို့သည် ငါ့ကို နေရာမပေးနိုင်ကြပေ။ ထို့အပြင် သမ္မာတရားကို မည်မျှမိတ်သဟာယပြုပါစေ သူတို့သည် သူတို့၏အယူဝါဒများကို လက်မလွှတ်နိုင်ကြပေ။ ဤသည်က လူသားသည် ဘုရားသခင်ထံသို့ အတော်အသင့်မျှသာ ကျိုးနွံနာခံနိုင်ပြီး၊ အပြည့်အဝ မဟုတ်ကြောင်းကို ပြသသည်။ သူသည် ဘုရားသခင်ဖြစ်သည်ဆိုသည်ကို သင်သိပြီး၊ လူ့ဇာတိခံယူသည့် ဘုရားသခင်တွင် သာမန်လူ့သဘာဝရှိရမည်ဖြစ်ကြောင်းကို သင်သိသည်။ သို့ဖြစ်လျှင် သင်သည် ဘုရားသခင်ထံ အဘယ်ကြောင့် အပြည့်အဝ မကျိုးနွံမနာခံနိုင်ရသနည်း။ လူ့ဇာတိခံဘုရားသခင်သည် လူသားဖြစ်သောခရစ်တော်ဖြစ်သည်။ သူ့တွင် ဘုရားသဘောသဘာဝနှင့် သာမန်လူ့သဘာဝ နှစ်မျိုးလုံးရှိသည်။ အပေါ်ယံဟန်ပြအနေဖြင့် သူ့တွင် သာမန်လူ့သဘာဝရှိသော်လည်း၊ သူ၏ဘုရားသဘောသဘာဝသည် ဤသာမန်လူ့သဘာဝအတွင်းတွင် နေထိုင်၍ အလုပ်လုပ်သည်။ ယခုတွင် ဘုရားသခင်သည် ခရစ်တော်အဖြစ် လူ့ဇာတိခံယူခဲ့ပြီး၊ ဘုရားသဘောသဘာဝနှင့် လူ့သဘာဝတို့ကို ပိုင်ဆိုင်သည်။ သို့သော် လူအချို့သည် သူ၏ဘုရားသခင်အသွင်ထံမှ နှုတ်ကပတ်တော်များနှင့် အမှုတော်အချို့ကိုသာ ကျိုးနွံနာခံနိုင်ကြသည်။ သူတို့သည် သာမန်လူ့သဘာဝဖြင့် ဟောပြောသည့် သူ့နှုတ်ကပတ်တော်များနှင့် ပြုလုပ်သည့် အမှုတော်အချို့ကို ဂရုမစိုက်ဘဲ နေစဉ်တွင်၊ သူ၏ဘုရားသခင်အသွင်ဖြင့် ဟောပြောသည့် နှုတ်ကပတ်တော်များနှင့် နက်နဲသိမ်မွေ့သောဘာသာစကားကိုမူကား ဘုရားသခင်၏နှုတ်ကပတ်တော်များအဖြစ် မှတ်ယူကြသည်။ လူအချို့သည် သူ၏ဘုရားသခင်အသွင်ဖြင့် ပြောသည့် ဘာသာစကားကသာ ဘုရားသခင်၏နှုတ်ကပတ်တော်ဖြစ်ပြီး၊ သူ၏လူသားအသွင်ဖြင့် ပြောသည့် ဘာသာစကားသည် ဘုရားသခင်၏နှုတ်ကပတ်တော်မဟုတ်ဟူ၍ ယုံကြည်လျက်၊ သူတို့၏စိတ်နှလုံးများထဲတွင် စိတ်ကူးအကြံဉာဏ်များနှင့် အယူအဆများအချို့ပင် ရှိကြသည်။ ထိုကဲ့သို့သောလူများသည် ဘုရားသခင်ဖော်ပြသည့် သမ္မာတရားများအားလုံးကို လက်ခံနိုင်ကြသလော။ သူတို့သည် ဘုရားသခင်က သန့်စင်ပေးပြီး စုံလင်အောင် ပြုလုပ်ပေးခြင်းကို ခံရနိုင်မည်လော။ မလုပ်ပေးနိုင်ပါ။ အဘယ်ကြောင့်ဆိုသော် ထိုကဲ့သို့သောလူများသည် အဓိပ္ပါယ်မရှိသောနည်းဟန်တစ်မျိုးဖြင့် နားလည်သဘောပေါက်ကြပြီး၊ သမ္မာတရားကို မရနိုင်ကြသောကြောင့်ဖြစ်သည်။ အတိုချုပ်ဆိုရသော် လူသား၏အတွင်းစိတ်ကမ္ဘာသည် အလွန်အမင်း ရှုပ်ထွေးလှပြီး၊ ဤကဲ့သို့သောပုန်ကန်လိုသည့် ကိစ္စရပ်များသည် အထူးသဖြင့် ခက်ခဲရှုပ်ထွေးသည်။ ဤသည်အပေါ် အသေးစိတ်ဖော်ပြရှင်းလင်းဖို့ မလိုအပ်ပါ။ လူများသည် ဘုရားသခင်၏ဘုရားသဘောသဘာဝထံသို့ ကျိုးနွံနာခံနိုင်ကြသော်လည်း၊ သူ၏သာမန်လူ့သဘာဝဖြင့် ပြုလုပ်သည့်အမှုတော်နှင့် နှုတ်ကပတ်တော်များအချို့ထံတွင် မကျိုးနွံမနာခံနိုင်ကြပေ။ ဤသည်က သူတို့သည် ဘုရားသခင်ထံ အမှန်အကန် မကျိုးနွံမနာခ်ကြသေးသည်ကို ပြသသည်။ ဘုရားသခင်ထံ လူများ၏ကျိုးနွံနာခံခြင်းသည် အမြဲ အခြေအနေအရဖြစ်သည်။ မှန်ကန်ပြီး အကျိုးအကြောင်းသင့်သည်ဟု သူတို့ယုံကြည်သမျှဘာမဆိုကို သူတို့ နားထောင်ကြပြီး၊ မမှန်ကန်ဘဲ အကျိုးအကြောင်းမသင့်ဟု သူတို့ယုံကြည်သည့်အရာကို နားထောင်ဖို့ စိတ်မပါကြတော့ပေ။ သူတို့သည် သူတို့နားထောင်ဖို့ စိတ်မပါသည့်အရာထံ သို့မဟုတ် သူတို့လုပ်ဆောင်ဖို့ မတတ်နိုင်သည့်အရာထံ မကျိုးနွံမနာခံကြပေ။ ဤသည်ကို အမှန်အကန် ကျိုးနွံနာခံခြင်းဟု ခေါ်နိုင်သလော။ လုံးဝ မခေါ်နိုင်ပါ။ ဤသည်က လူများ၏စိတ်သဘောထားများသည် မကောင်းသည်ကိုလည်းကောင်း၊ သူတို့၏စိတ်သဘောထားများသည် အထူးသဖြင့် မသတီစရာဖြစ်ပြီး ဆိုးယုတ်သည်ကိုလည်းကောင်း ပြသသည်။ ဤသည်က အရေးပါလှသည်! ဆိုလိုသည်မှာ လူများက ဘုရားသခင်ထံ အနည်းငယ်ဆိုရုံမျှသာ ကျိုးနွံနာခံသောအခါတွင်ပင် ၎င်းသည် အမြဲ ရွေးချယ်လုပ်ဆောင်ခြင်းဖြစ်ပြီး အခြေအနေအရဖြစ်သည့် ကျိုးနွံနာခံခြင်းမျိုးဖြစ်ကာ ဘုရားသခင်ထံ ဘယ်တော့မှ အပြည့်အဝ ကျိုးနွံနာခံခြင်းမျိုး မဟုတ်ပေ။ အကယ်၍ လူတစ်ဦးက နားထောင်ပြီး ကျိုးနွံနာခံသည်ဟု ဆိုလျှင်ပင် ဤသည်မှာ နှိုင်းယှဉ်၍ ပြောဆိုခြင်းဖြစ်သည်။ အဘယ်ကြောင့်ဆိုသော် သင်သည် သူတို့၏အကျိုးစီးပွားများအကြောင်းကို အကျဉ်းချုံး ထည့်မပြောရသေးသောကြောင့် သို့မဟုတ် သူတို့ကို အမှန်တကယ် မပြုပြင်ရသေးသောကြောင့်ဖြစ်သည်။ သင်သည် သူတို့ကို ပွင့်ပွင့်လင်းလင်း၊ တိုက်ရိုက် မပြုပြင်ရသေးပေ။ သူတို့ကို သင်က အမှန်တကယ် ပြုပြင်လိုက်သည်နှင့်တစ်ပြိုင်နက်၊ သူတို့သည် သင့်ကို ဆန့်ကျင်ဖို့ လုပ်ဆောင်မည်ဖြစ်ပြီး တစ်နေ့လုံး မျက်နှာသုန်မှုန်နေပေလိမ့်မည်။ အကယ်၍ သင်က သူတို့ကို တစ်ခုခုတောင်းဆိုလိုက်လျှင် သူတို့သည် တုံ့ပြန်မည်မဟုတ်ပေ။ အကယ်၍ သင်က သူတို့ကို တစ်ခုခုလုပ်ဖို့ ပြောသောအခါတွင် သူတို့သည် ၎င်းကို လုပ်ဖို့ စိတ်ပါလိမ့်မည်မဟုတ်ပေ။ သင်က သူတို့ကို တစ်ခုခုလုပ်ဖို့ ပြောသောအခါ သူတို့သည် လုပ်ဖို့ စိတ်မပါကြပေ။ သူတို့သည် ပစ္စည်းများကို စတင်၍ ပစ်ပေါက်ခွဲလာကြပြီး၊ သင့်အပေါ် ခေါင်းမာကြလိမ့်မည်။ လူတစ်ဦး၏စိတ်သဘောထားသည် မည်မျှဆိုးယုတ်သွားနိုင်ရသနည်း! သူက ဘုရားသခင်ဖြစ်ကြောင်းကို သိနေပါလျက်၊ သင်သည် သူ့ကို ထိုကဲ့သို့ အဘယ်ကြောင့် ဆက်ဆံရသနည်း။ ဤသည်မှာ ယခင်အချိန်က ဖာရိရှဲများ၊ ပေါလုတို့နှင့် သိပ်မကွာခြားလှပေ။ ပေါလုက ယေရှုသည် ဘုရားသခင်ဖြစ်ကြောင်းကို သိခဲ့သလော။ အဘယ်ကြောင့် သူသည် ယေရှု၏တပည့်တော်များကို နှိပ်စက်ညှဉ်းပန်းခဲ့သနည်း။ အဘယ်ကြောင့် သူသည် ယေရှု၏ တပည့်တော်များစွာကို ဖမ်းဆီးခဲ့သနည်း။ နောက်ဆုံးတွင် ယေရှုသည် ပေါလုက သူ၏ဖိနှိပ်ညှဉ်းဆဲမှုကို အတိုင်းထက်အလွန်ကျော်အောင် လုပ်ခဲ့ပြီဖြစ်ကြောင်း မြင်ခဲ့ပြီး၊ ဒမာသက်သို့ သွားရာလမ်းတွင် သူသည် ပေါလုကို ရိုက်ချခဲ့သည်။ သူ့အထက်တွင် အလင်းရောင်တစ်ခု တောက်ပလာခဲ့ပြီး၊ ပေါလုသည် မြေကြီးပေါ်သို့ လဲကျသွားခဲ့သည်။ လဲကျသွားပြီးနောက်တွင် သူက ယေရှုကို “သခင်၊ ကိုယ်တော်သည် အဘယ်သူနည်း” ဟူ၍ မေးခဲ့သည်။ “ငါကား သင်ညှဉ်းဆဲသော ယေရှုဖြစ်သတည်း။” (တမန်တော်ဝတ္ထု ၉:၅) ဟု ယေရှုက သူ့ကို ပြောခဲ့သည်။ ထိုအချိန်မှစ၍ ပေါလုသည် လွန်စွာပို၍ချုပ်တည်းလာခဲ့သည်။ အကယ်၍ ယေရှုက “အလင်းပေး”၍ သူ့ကို အကြီးအကျယ် ရိုက်မချခဲ့ပါက ပေါလုသည် ယေရှုအတွက် တရားဟောဖို့ မဆိုထားနှင့်၊ ယေရှုကို လက်ခံနိုင်လိမ့်မည်ပင် မဟုတ်ပေ။ ဤသည်က ဘာကို သက်သေပြသနည်း။ ၎င်းက လူများ၏သဘာဝများသည် တတ်နိုင်သမျှ ဆိုးသွမ်းကြောင်းကို သက်သေပြသည်။

လူတို့က “ကျွန်ုပ်တို့ လူသားများအားလုံးတွင် ဖောက်ပြန်ပျက်စီးသောစိတ်သဘောထားများရှိကြသည်၊ ကျွန်ုပ်တို့ထဲက မည်သူကမျှ ဘုရားသခင်ကို စိတ်မကျေနပ်စေနိုင်ပါ” နှင့် “လူသားများသည် အလွန်မိမိကိုယ်ကို မှန်ကန်သည်ဟု ယူမှတ်ကြပြီး၊ မိမိကိုယ်ကို အလွန်အရေးပါသည်ဟုထင်ကြသည်။ သူတို့သည် တော်ကြသည်၊ အခြားလူများထက် ပို၍တော်ကြသည်ဟု သူတို့ အမြဲ ယုံကြည်ကြသည်” ဟူ၍ မကြာခဏ ပြောကြသည်။ အကယ်စင်စစ်တွင် ဤသည်မှာ သာမန်ကာလျှံကာအဖြစ်ဆုံးအသိအမြင်များဖြစ်ကြသည်။ ဤသည်မှာ ဖောက်ပြန်ပျက်စီးသောစိတ်သဘောထား၏အသေးအဖွဲအပိုင်းမျှသာဖြစ်သည်။ သင်၏ကိုယ်ပိုင်သဘာဝတွင် ဘုရားသခင်ကို ပုန်ကန်ခုခံသည့် ထိုကဲ့သို့သောအတွေးများနှင့် ရည်ရွယ်ချက်များအကြောင်း အဘယ်ကြောင့် သင်မဆွေးနွေးသနည်း။ ဘုရားသခင်က သင့်အားတစ်ခုခုကို နည်းလမ်းတစ်မျိုးဖြင့် လုပ်ဖို့ တောင်းဆိုသည်။ သင်က အခြားနည်းလမ်းတစ်မျိုးဖြင့် ၎င်းကို လုပ်ကိုလုပ်ဖို့ လိုသည်။ ဘုရားသခင်က နည်းလမ်းတစ်မျိုးဖြင့် အလုပ်လုပ်ပြီး၊ သင်က သူ့ကို အခြားနည်းလမ်းတစ်မျိုးဖြင့် အလုပ်လုပ်ဖို့ တောင်းဆိုရန် လိုသည်။ ဤသည်မှာ ဘုရားသခင်နှင့် ဖက်ပြိုင်ရင်ဆိုင်ခြင်းမဟုတ်လော။ လူတိုင်းတွင် ဤကဲ့သို့သောစိတ်သဘောထားမျိုးရှိကြသည်။ မည်သူမျှ ၎င်းမှ မလွတ်မြောက်နိုင်ပါ။ လူအချို့က “ဤသည်က ကျွန်ုပ်နှင့် မသက်ဆိုင်ပါ၊ ကျွန်ုပ် မသိခဲ့ပါ” ဟူ၍ လူအချို့က ပြောဆိုကောင်းပြောဆိုကြလိမ့်မည်။ ယင်းမှာ သင်သည် ဘုရားသခင်နှင့် မထိတွေ့ရသေးသောကြောင့်ဖြစ်သည်။ သင်ထိတွေ့လိုက်သည်နှင့်တစ်ပြိုင်နက်၊ သူ့ကို တစ်ဖြည်းဖြည်းချင်း သိလာပြီး၊ ရက်သတ္တပတ်တစ်ပတ်ကြာပြီးနောက်တွင် သင်သည် ပြောင်းလဲလာဖို့နှင့် သင်၏သရုပ်မှန်ကို ထုတ်ဖော်ဖို့ အာမခံသည်။ ဤသည်မှာ ချဲ့ထွင်ပြောနေခြင်းမဟုတ်သလို၊ သင့်ကို လျှော့တွက်နေခြင်းလည်း မဟုတ်ပါ။ ယနေ့ခေတ်တွင် လူများသည် ဖောက်ပြန်ပျက်စီးသောစိတ်သဘောထားများရှိရုံသာမကဘဲ သူတို့၏သဘာဝများကလည်း ဖောက်ပြန်ပျက်စီးလာကြသည်။ သူတို့၏သာမန်လူ့သဘာဝသည် အလွန်ဖောက်ပြန်ပျက်စီးလွန်းသည့်အတွက်ကြောင့် ၎င်းသည် စုတ်ပြတ်သတ်၍ လုံးလုံးလျားလျား လမ်းပျောက်ကုန်ကြသည်။ ဆိုလိုသည်မှာ လူများတွင် သာမန်လူ့သဘာဝမရှိကြတော့ပေ။ လူ့ဇာတိခံဘုရားသခင်တွင် သာမန်လူ့သဘာဝရှိသော်လည်း၊ လူများအားလုံးတွင် ဖောက်ပြန်ပျက်စီးသောစိတ်သဘောထားများရှိကြသည်။ ထို့အပြင် သာမန်လူ့သဘာဝနည်းလမ်းအတိုင်း အများကြီး မရှိကြတော့ပေ။ ၎င်းက သူတို့ကို ဘုရားသခင်နှင့် သဟဇာတမဖြစ်နိုင် ဖြစ်စေသည်။ ကိစ္စရပ်ပေါင်းများစွာနှင့်ပတ်သက်၍ သူတို့တွင် ဘုရားသခင်နှင့် ကွာခြားချက်များ၊ အငြင်းပွားစရာများ ဧကန်မုချ ရှိကြလိမ့်မည်။ သူ့အပေါ် ရန်လိုရန်ဖက်ပြုကြသည်အထိပင် လုပ်ကြလိမ့်မည်။ ဤသည်မှာ အဘယ်ကြောင့်ဆိုသော် လူများတွင် ဘုရားသခင်ကို ကြောက်ရွံ့သောစိတ်နှလုံးများ သို့မဟုတ် ဘုရားသခင်ထံ ကျိုးနွံနာခံလိုသည့်စိတ်နှလုံးများ မရှိကြသောကြောင့်ဖြစ်သည်။ “သူက ဘုရားသခင်ဖြစ်သည်ဟု သင်အသိအမှတ်ပြုသောကြောင့် သူဘာကိုပြောပြော သင်သည် သူ့ထံ ကျိုးနွံနာခံရမည်” ဟူ၍ လူများကို တောင်းဆို၍ မရနိုင်ပါ။ ကိစ္စတိုင်းတွင် သူတို့ အား ဘုရားသခင်ထံ အလျှော့ပေးဖို့ တောင်းဆိုရန်မှာ ပို၍ပင် မဖြစ်နိုင်ပါ။ ဤသည်မှာ အလျှော့ပေးရသည့်ကိစ္စတစ်ခုမဟုတ်ပါ။ လူများသည် ဖန်ဆင်းခံများဖြစ်ကြသည်။ ထို့အပြင် အဆုံးတွင်တော့ ဘုရားသခင်သည် ဘုရားသခင်သာဖြစ်ပြီး၊ လူသားသည် လူသားသာဖြစ်လေသည်။ သူတို့အကြားတွင် နယ်နိမိတ်ကန့်သတ်ချက်တစ်ခု ရှိကိုရှိရမည်။ ပညတ်တော်ခေတ်တွင် အာဗြဟံ၏အစေခံက ယေဟောဝါဘုရားသခင်ထံ မည်သို့ဆုတောင်းခဲ့သနည်း။ “အို အကျွန်ုပ်၏သခင် အာဗြဟံ၏ ယေဟောဝါဘုရားသခင်။” (ကမ္ဘာဦးကျမ်း ၂၄:၁၂) သူသည် အဆင့်အတန်း၏ခြားနားခြင်းများကို အလွန်ရှင်းရှင်းလင်းလင်းဖြစ်စေခဲ့သည်။ ယခုခေတ်လူများကမူ “ဘုရားသခင်က ကျွန်ုပ်တို့နှင့် သိပ်မကွာခြားလှပေ။ သူ့တွင်လည်း သာမန်လူ့သဘာဝရှိပြီး၊ လိုအပ်ချက်များ၊ စိတ်ခံစားမှုအမျိုးမျိုး၊ အသက်နှင့် သာမန်လူ့သဘာဝ၏လှုပ်ရှားမှုများရှိကြသည်။ သူသည် ဘုရားသဘာဝအလုပ်ကို လုပ်သော်လည်း၊ သူ၏သာမန်လူ့သဘာဝမှာ မရှိမဖြစ် ဖြစ်သည်!” ဟူ၍ ယုံကြည်ကြသည်။ လူများတွင် သူတို့၏အတွင်းစိတ်ထဲ၌ ဤ “သာမန်လူ့သဘာဝ” ဟူသည့် အကြမ်းဖျင်းစိတ်ကူးအကြံဉာဏ်ရှိလိုက်သည်နှင့်တစ်ပြိုင်နက်၊ သူတို့သည် သူ၏ဘုရားသဘောသဘာဝအနှစ်သာရကို ငြင်းဆန်လျက် ဘုရားသခင်၏အမှုတော်၊ သူ၏နှုတ်ကပတ်တော်များနှင့် သူ၏စိတ်သဘောထားတို့ကို လူသား၏သာမန်လူ့သဘာဝအဖြစ် ပြဋ္ဌာန်းလေ့ရှိလိမ့်မည်။ ဤသည်မှာ ဧရာမအမှားကြီးဖြစ်သည်။ ဤသည်က ဘုရားသခင်ကို သိဖို့ မဖြစ်နိုင် ဖြစ်စေသည်မဟုတ်လော။ သင်တို့သည် ဘုရားသခင်နှင့် မထိတွေ့ရသေးပေ။ သင်တို့အထဲမှ မည်သူက “အကယ်၍ ကျွန်ုပ်သည် ဘုရားသခင်နှင့် တစ်နှစ်လုံးလုံး ထိတွေ့ခွင့်ရမည်ဆိုလျှင်၊ ကျွန်ုပ်သည် လုံးဝ ပုန်ကန်လိုမည်မဟုတ်ဟု အာမခံပါသည်” ဟု ပြောရဲသနည်း။ မည်သူမှ အလွန်မသေချာနိုင်ပါ။ လူအများစုသည် ဘုရားသခင်ကို ယုံကြည်လာခဲ့ကြသည်မှာ နှစ်ပေါင်း ၁၀ သို့မဟုတ် ၂၀ ကျော်ကြာခဲ့ပေပြီ။ သို့သော် မည်သူကမျှ ဘုရားသခင်အပေါ် အမှန်တကယ် ကျိုးနွံနာခံခြင်းကို မရနိုင်ကြပေ။ လူများသည် စာတန်ကြောင့် ဖောက်ပြန်ပျက်စီးခြင်းကို နက်နက်ရှိုင်းရှိုင်းခံစားနေကြရပြီး၊ လူများ၏စိတ်နှလုံးများထဲတွင် စာတန်၏စိတ်သဘောထားသည် ခိုင်မာစွာ အမြစ်တွယ်နေခဲ့ပြီးဖြစ်သည်ကို ဤသည်က ပြသရန် လုံလောက်ပါသည်။ သင်တို့ကိုယ်တိုင်ပင်လျှင် တူးဖော်ထုတ်၍ မရနိုင်သည့် ဖောက်ပြန်ပျက်စီးသည့်အရာအချို့ရှိကြသည်။ ငါသည် စကားလုံးပေါင်းများစွာကို ပြောခဲ့ပြီးပြီ၊ သမ္မာတရားများစွာကို ဖော်ပြခဲ့ပြီးပြီ။ သို့သော်လည်း သမ္မာတရားကို အမှန်တကယ် နားလည်သူ တစ်ယောက်မျှ မရှိသလောက်ပင် ဖြစ်သည်။ ယခုခေတ်လူများသည် ခေါင်းမာစွာဖြင့် ဦးနှောက်ကို မသုံးကြပေ။ သူတို့သည် ပြင်းထန်လွန်ကဲသော အတိုင်းအတာတစ်ခုအထိ ထုံထိုင်းကြပြီး၊ တုံးအကြသည်။ သူတို့သည် အနည်းငယ်မျှသာ မသနားမလည်ကြသည်မဟုတ်ပေ။ သူတို့၏ပုန်ကန်လိုသည့်သဘာဝများသည် ပုံပေါ်နေပြီဖြစ်သော်လည်း၊ သင်တို့သည် ဤသည်ကို ရှင်းလင်းပြတ်သားစွာ မမြင်နိုင်ကြသေးပေ။

လူအချို့သည် ခရစ်တော်ကို တစ်ရက် သို့မဟုတ် နှစ်ရက်ကြာ ကြုံတွေ့ပြီးသည့်နောက် “ဤသည်မှာ ဘုရားသခင်ဖြစ်သည်” ဟူ၍ သူ့ကို အကျွမ်းတဝင်မရှိလှကြောင်း တွေ့ရှိပြီး၊ အနည်းငယ် ချုပ်တည်းထားရသလို ခံစားမိသည်။ သူတို့၏စိတ်နှလုံးများထဲ၌ ဤအတွေးမျိုးရှိကြသော်လည်း၊ သူနှင့်ထိတွေ့ပြီးနောက် ရက်ပေါင်း ၁၀ ရက် သို့မဟုတ် ရက်သတ္တပတ် နှစ်ပတ်ခန့်ကြာပြီးနောက်တွင် သူတို့သည် တစ်ဖြည်းဖြည်းချင်း သူနှင့်ပို၍ရင်းနှီးလာကြပြီး၊ သူနှင့် တိုး၍တိုး၍ နီးစပ်လာသည်။ သူတို့၏စိတ်နှလုံးများထဲတွင် ချုပ်တည်း၍ မထားကြတော့ဘဲ၊ သူတို့သည် သူတို့၏အဆင့်အတန်းနှင့် သူ၏အဆင့်အတန်းအကြားတွင် ခွဲခြားထားခြင်းမရှိကြတော့ပေ။ သူတို့အကြားတွင် အဆင့်မခြား၊ ဝါစဉ်မထားဘဲ လုံးဝဥဿုံ တူညီခြင်းရှိသည့်အလားဖြစ်သည်။ သူတို့သည် သူတို့နှင့်အတူ အသက်နှင့် ပျော်ရွှင်မှုကို ဝေမျှဖို့ ဘုရားသခင်အတွက် သင့်တော်သည်ဟု ထင်ကြသည်။ ရံဖန်ရံခါတွင် ဤလူများသည် အဘယ်ကြောင့် ဤကဲ့သို့ဖြစ်နေရသနည်းဟု ငါ တွေးဆမိသည်။ အကယ်၍ ငါသည် သူတို့ကို အမြဲ ပြုပြင်ပြီး ဩဝါဒပေးနေမည်ဆိုပါက၊ သူတို့သည် မုချဧကန် ယဉ်ကျေးစွာ ပြုမူ၍ ကျိုးနွံနာခံလိမ့်မည်။ ရံဖန်ရံခါတွင် ငါသည် တစ်ယောက်ယောက်နှင့် တန်းတူရည်တူသကဲ့သို့ စကားပြောသောအခါ၊ “အင်း ဘုရားသခင်က ကျွန်ုပ်အပေါ် မည်မျှကောင်းလိုက်သလဲဆိုသည်ကို ကြည့်ပါ” ဟူ၍ သူတို့ တွေးကြသည်။ သင့်အပေါ် ကောင်းခြင်းဆိုသည်က သင့်တွင် ပုန်ကန်လိုသည့်စိတ်သဘောထား မရှိကြောင်း သို့မဟုတ် သင်၏သဘာဝအနှစ်သာရသည် ကောင်းကြောင်းကို သက်သေမပြပါ။ ထိုသို့မဟုတ်လော။ လူအချို့နှင့် ဆက်ဆံလျှင် ငါသည် သူတို့ကို နည်းနည်းပို၍ကောင်းပြပြီး နည်းနည်းပြုံးပြလိုက်သောအခါ သူတို့သည် သူတို့လာသည့်နေရာ၊ သူတို့၏ကိုယ်ပိုင် လက္ခဏာနှင့် သူတို့၏အနှစ်သာရက မည်သည်ဖြစ်သည်ဆိုသည်တို့ကို မေ့သွားကြပြီး၊ စကြဝဠာထဲရှိ သူတို့၏နေရာကို မေ့သွားကြသည်။ သူတို့သည် ဤသည်တို့အားလုံးကို မေ့သွားကြသည်။ လူများ၏သဘာဝများသည် အစစ်အမှန်ပင် ဆိုးနိုင်သမျှ အဆိုးဆုံးဖြစ်ကြသည်။ သူတို့တွင် ဘာပဲဖြစ်ဖြစ် မည်သည့်အသိစိတ်မျှ မရှိကြချေ။ အကယ်၍ လူအချို့သည် သူတို့က အလွန်ပင် ကောင်းသည်ဟု ယုံကြည်ပါက ထိုအခါ အချိန်ကာလတစ်ခုကြာအောင် ဘုရားသခင်နှင့်ဆက်ဆံကြည့်ကာ သင့်အတွင်းစိတ်ထဲရှိ ပုန်ကန်လိုစိတ်နှင့် ခုခံလိုစိတ်အားလုံးတို့ကို မည်သို့ထုတ်ဖော်ပုံကို ကြည့်ကြည့်ပါ။ အချိန်ကာလတစ်ခုကြာအောင် ဘုရားသခင်နှင့် ထိတွေ့ကြည့်ပါ။ ငါသည် သင့်ကို သတိပေးလိမ့်မည်မဟုတ်ပါ သို့မဟုတ် အပြစ်ဖော်ဆုံးမလိမ့်မည်မဟုတ်ပါ၊ သို့မဟုတ် ပြုပြင်မည်မဟုတ်။ ထို့အပြင် သင့်ကို မည်သူကမျှ မိတ်သဟာယဖွဲ့လိမ့်မည်မဟုတ်ပါ။ သင်သည် သင်ကိုယ်တိုင် တွေ့ကြုံရလိမ့်မည်ဖြစ်ပြီး၊ မည်သည့်အတိုင်းအတာအထိ သင်တွေ့ကြုံခံစားနိုင်သည်ကို ငါတို့ ကြည့်မည်။ သမ္မာတရားကို မရရှိဘဲ သင်သည် လုံးဝ စိတ်မသက်မသာဖြင့် သေချာပေါက် ကျရှုံးလိမ့်မည်။ အကျိုးဆက်များက မတွေးဝံ့စရာပင်ဖြစ်လိမ့်မည်။ လူများ၏ပုန်ကန်လိုသည့်စိတ်သဘောထားများသည် အလွန်ပြင်းထန်လွန်းသည်။ သူတို့၏စိတ်နှလုံးများသည် အခြားလူများကို နေရာမပေးနိုင်ပါ။ သင်၏ပုန်ကန်လိုသောစိတ်သဘောထား၊ စာတန်ဆန်သောသဘာဝနှင့် မာနထောင်လွှားသောစိတ်နှလုံးတို့သည် အခြားလူများကို နေရာမပေးနိုင်ပါ။ အချိန်ကာလတစ်ခုကြာအောင် ငါ်နှင့် ထိတွေ့ဆက်ဆံကြည့်ပြီးသည့်နောက်တွင် လူအချို့တွင် မမှန်ကန်သည့်အတွေးအချို့ ရှိကောင်းရှိလာနိုင်သည်။ အကယ်၍ ဤအတွေးများကို မဖြေရှင်းပါက ၎င်းတို့က အယူဝါဒများ သို့မဟုတ် ထင်မြင်ယူဆချက်များဖြစ်လာသည်နှင့်တစ်ပြိုင်နက်၊ သူတို့သည် သူတို့အန္တရာယ်ကျရောက်သည်ကို တွေ့ရလိမ့်မည်။ “ယင်းက သင်သည် သာမန်၊ ပုံမှန်ဆန်လွန်းသောကြောင့်ဖြစ်သည်။ သခင်ယေရှုအပေါ် ကျွန်ုပ်၏ယုံကြည်ခြင်းမှာတော့ ကျွန်ုပ်သည် ဤကဲ့သို့မဟုတ်ပါ” ဟူ၍ လူအချို့က ပြောဆိုကြသည်။ ၎င်းမှာ ယေရှုအပေါ်ထားသည့် သင်၏ယုံကြည်ချက်နှင့် အတူတူပင်ဖြစ်ပါသည်။ အကယ်၍ သင်တို့သည် ယေရှု၏ခေတ်တွင် ရှိနေပါက သင်တို့သည် ဖာရိရှဲများထက် ပိုကောင်းအောင်လုပ်နိုင်လိမ့်မည်မဟုတ်ပေ။ သင်တို့၏စိတ်ထဲတွင် အယူဝါဒများအပြည့်ဖြစ်နေလိမ့်မည်။ သင်သည် ယုဒထက် ပိုကောင်းလိမ့်မည်ဟု မထင်ပါနှင့်။ သူသည် သခင့်ကို သစ္စာဖောက်နိုင်ပြီး၊ ကိုယ်တော်၏ပိုက်ဆံကို သူ့ကိုယ်ပိုင်သုံးစွဲဖို့အတွက် ခိုးယူခဲ့သည်။ သင်သည် ကိုယ်တော်ကို သစ္စာဖောက်ခြင်း သို့မဟုတ် အသင်းတော်ပိုင်ပိုက်ဆံကို အဆင်အခြင်မဲ့သုံးစွဲခြင်း မပြုလုပ်ကောင်း မပြုလုပ်နိုင်သော်လည်း၊ သခင့်ထံ ကျိုးနွံနာခံခဲ့သည့်သူဖြစ်မည်မဟုတ်။ ထို့အပြင် သင်သည် ဧကန်မုချ အယူအဆများ၊ ပုန်ကနိုခြင်းနှင့် ခုခံခြင်းတို့အပြည့်နှင့်ဖြစ်လိမ့်မည်။ သခင်ယေရှု၏နှုတ်ကပတ်တော်များနှင့် အမှုတော်တို့သည် ဘုရားသခင်၏ပေါ်ထွန်းခြင်းနှင့် အမှုတော်တို့ပင်ဖြစ်သည်။ အဘယ်ကြောင့် ယုဒက သခင့်ကို ဆန့်ကျင်ခဲ့ရသနည်း။ သူ၏သဘာဝသည် ဆိုးယုတ်လွန်းသောကြောင့်ဖြစ်သည်။ သူသည် ခရစ်တော်ကို နေရာမပေးနိုင်ခဲ့ဘဲ သူ့ကို ဆက်လက်၍ ရန်လိုရန်ဖက်ပြုခဲ့သည်။ ပေတရုသည်လည်း ထိုစဉ်အချိန်က ဆင်းရဲဒုက္ခကြီးစွာခံစားခဲ့ရသည်မဟုတ်လော။ နောက်ဆုံးတွင် သူ၏လူ့သဘာဝက အခြားသူများနှင့် နှိုင်းစာလျှင် ထိုစဉ်အချိန်က အနည်းငယ်ပို၍ကောင်းနေခဲ့သောကြောင့်နှင့် သူသည် ဘုရားသခင်အား ချစ်ခြင်းကို လိုက်စားနိုင်ခဲ့သောကြောင့်၊ သူသည် နောက်ဆုံးတွင် စုံလင်အောင်ပြုလုပ်ပေးခြင်းကို ခံခဲ့ရသည်။ ထိုစဉ်တုန်းက သူ့တွင်လည်း အယူအဆအချို့နှင့် ယေရှုနှင့်ပတ်သက်၍ ထင်မြင်ချက်များရှိခဲ့သော်လည်း၊ သူသည် သခင့်အား ချစ်ခြင်းကို လိုက်စားနိုင်ခဲ့သောကြောင့် နောက်ဆုံးတွင် သခင်ယေရှုအကြောင်း အသိပညာအချို့ကို ရခဲ့သည်။ ထို့ကြောင့် မကြွားဝါနှင့်။ သင်မတွေ့ကြုံရသေးသောတစ်ခုခုတွင် သင်အောင်မြင်နိုင်ပြီး ရမှတ်အပြည့်ရနိုင်သည်ဟု အာမ မခံနှင့်။ ဤသည်မှာ အစစ်အမှန်မဟုတ် သို့မဟုတ် လက်တွေ့မကျပါ။ ဤသည်ကို သင်သည် ပထမဦးစွာ တွေ့ကြုံကြည့်ရမည်။ သို့မှသာ သင်ဝေမျှသည့် အသိပညာနှင့် ထိုးထွင်းအမြင်များသည် လက်တွေ့ကျလိမ့်မည်။ “ဘုရားသခင်၊ ကျွန်ုပ်၏အိမ်သို့ ကြွတော်မူပါ။ အခြားလူများလုပ်သလို ကျွန်ုပ်က သင့်ကို စိတ်ဆိုးအောင် မလုပ်ပါဟု ကျွန်ုပ် ကတိပေးပါသည်။ အခြားလူများကဲ့သို့ လူမဆန်စွာ ပြုမူမည်မဟုတ်ဟု ကျွန်ုပ် ကတိပေးပါသည်” ဟူ၍ မပြောပါနှင့်။ ဤသည်မှာ မကျိန်းသေပါ။ အဘယ်ကြောင့်ဆိုသော် လူများအတွင်းရှိ ပုံမှန်လူ့သဘာဝ၏အရိပ်အယောင်များသည် ဖျက်ဆီးခြင်းခံလိုက်ရပြီးဖြစ်သောကြောင့်၊ သူတို့၏ပုံမှန်လူ့သဘာဝသည် သူတို့၏အသိစိတ်နှင့် ဆင်ခြင်တုံတရားတို့နှင့်အတူတစ်ကွ ပျောက်ဆုံးသွားခဲ့သောကြောင့်ဖြစ်သည်။ ပုံမှန်လူ့သဘာဝ၏အခြေခံအသိဉာဏ်၊ ရိုးရှင်းစွာနှင့် ရိုးသားစွာ စကားပြောဆိုခြင်း၊ နားထောင်နိုင်ခြင်းနှင့် ကျိုးနွံနာခံနိုင်ခြင်းစသည့် ဤကဲ့သို့သောအပြုသဘောဆောင်သည့်အရာများအားလုံးသည် လူများအတွင်းထဲမှနေ၍ ပျောက်ဆုံးသွားပြီးခဲ့လေပြီ။ သို့ဖြစ်၍ အသက်ရှင်နေထိုင်ဖို့အတွက် လူများ၏စည်းမျဉ်းများနှင့် ဘဝတွင် သူတို့၏ရည်မှန်းချက်ပန်းတိုင်များသည် ပြောင်းလဲသွားခဲ့ပြီးဖြစ်သည်။ သူတို့အားလုံးသည် စာတန်ဆန်သောအတွေးအခေါ်ကို လိုက်နာစောင့်ထိန်းကြပြီး၊ စာတန့်သဘာဝ၏လွှမ်းမိုးခြင်းကို ခံရသည်။ သူတို့၏စကားသည် လှည့်ဖြားတတ်ပြီး ဖြီးဖြန်းသည့်စကားဖြစ်သည်။ သူတို့သည် လေယူရာ မည်သည့်ဘက်သို့မဆို တိမ်း၍ ယိမ်းကြသည်။ ထို့အပြင် သူတို့သည် သာယာနှစ်လိုဖွယ်ထင်ရသည့်အရာများကို ပြောရာတွင် ထူးချွန်ကြသည်။ ဤကဲ့သို့အသက်ရှင်နေထိုင်ရခြင်းသည် ကောင်းသည်ဟု သူတို့ ယုံကြည်ကြသည်။ အဘယ်ကြောင့် လူသားများသည် နက်နက်ရှိုင်းရှိုင်း ဖောက်ပြန်ပျက်စီးနေသည်ဟု ဆိုရသနည်း။ အလွန်နက်နက်ရှိုင်းရှိုင်း ဖောက်ပြန်ပျက်စီးနေသောကြောင့် လူသားများတွင် ပုံမှန်လူ့သဘာဝတစ်ခုခု ကျန်နေသေးသလော။ သင့်တွင် ဖောက်ပြန်ပျက်စီးသောစိတ်သဘောထားရှိသည်ဟု သင်ယုံကြည်သည်။ သင်ယုံကြည်သောထိုစိတ်သဘောထားသည် အနည်းငယ် မာနထောင်လွှားရုံသာ၊ မိမိကိုယ်ကို မှန်ကန်သည်ဟု ယူမှတ်ပြီး မာနကြီးရုံသာ၊ စကားပြောရာတွင် အနည်းငယ် လှည့်ဖြားတတ်ရုံသာ သို့မဟုတ် သင်၏တာဝန်များကို ထမ်းဆောင်ရာတွင် အနည်းငယ် ဝတ်ကျေတမ်းကျေလုပ်ရုံသာဖြစ်သည်။ ဤမျှသာ ဖြစ်သည်။ သို့သော် ဤအသိသည် တိမ်လွန်းသည်။ ၎င်းသည် အပေါ်ယံသာဖြစ်သည်။ အဓိကသော့ချက်မှာ လူသားသည် သဘာဝအားဖြင့် ဆိုးယုတ်သည်ဟူသည့်အချက်ဖြစ်သည်။ လူများအားလုံးသည် ဆိုးယုတ်မှုကို ချစ်ကြောက်ရိုသေကြပြီး ဘုရားသခင်ကို ငြင်းဆန်၍ အာခံကြသည်။ ထို့အပြင် သူတို့၏ပုံမှန်လူ့သဘာဝသည် ကမ္ဘာမြေကြီး၏မျက်နှာပြင်ပေါ်မှနေ၍ ပျောက်ကွယ်သွားပြီးဖြစ်သည်။ ဤသို့ဖြစ်နေသည်မဟုတ်လော။ ထို့ကြောင့် လူများသည် ဖန်ဆင်းခံဖြစ်ခြင်း၏စံနှုန်းပြည့်မီစေရန် မည်သည်ကို လုပ်သင့်သနည်း။ အဓိကသော့ချက်မှာ ဘုရားသခင်၏နှုတ်ကပတ်တော်များအတွင်းမှနေ၍ လက်တွေ့လုပ်ဆောင်ခြင်းလမ်းကြောင်းတစ်ခု၊ သင့်တော်သော လက်တွေ့လုပ်ဆောင်ခြင်းနည်းလမ်းတစ်ခုတို့ကို ရှာဖို့ ဖြစ်သည်။ လူသားမျိုးနွယ်အကြားတွင် သူမတူထူးကဲစွာ ကောင်းသောလူများမရှိသည်ကို သင်တို့အားလုံး သိကြသည်။ သို့ဖြစ်လျှင် အဘယ်ကြောင့် လူအချို့တွင် လူ့သဘာဝရှိကြ၍ အခြားလူများတွင် မရှိကြကြောင်းကို ယခုမှလာ၍ ပြောသနည်း။ လူ့သဘာဝရှိသောလူများသည် ဤသမ္မာတရားများကို အမှန်တကယ် လက်တွေ့လုပ်ဆောင်နိုင်ကြသလော။ သူတို့သည်လည်း ၎င်းတို့ကို လက်တွေ့မလုပ်ဆောင်နိုင်ကြပေ။ နှိုင်းယှဉ်၍ ပြောရလျှင် သူတို့သည် သူတို့၏စိတ်နှလုံးများထဲတွင် အနည်းငယ်ဆိုရုံမျှသာ ပို၍ကြင်နာတတ်ကြပြီး ပို၍နူးညံ့ကြခြင်း၊ သူတို့၏အလုပ်တွင် အနည်းငယ် ပို၍တာဝန်သိတတ်ကြခြင်းသာဖြစ်သည်။ သို့သော် ဤသည်တို့အားလုံးမှာ အတော်အသင့်ဖြစ်ကြပြီး၊ အပြည့်အဝ မဟုတ်ကြပေ။ အကယ်၍ သင်သည် တစ်ယောက်ယောက်ကို အကဲဖြတ်၍ ဤလူသည် လုံးဝ ကောင်းပြီး အပြစ်အနာအဆာ သို့မဟုတ် ပုန်ကန်လိုခြင်းမရှိကြောင်း၊ သူသည် လုံးလုံးလျားလျား လိုက်လျောလွယပြီး ကျိုးနွံနာခံတတ်ကြောင်းနှင့် သူ၏တာဝန်များကို ထမ်းဆောင်ရာတွင် လုံးဝ ဝတ်ကျေတမ်းကျေမလုပ်ကြောင်း ပြောပါက ဤသည်မှာ ချဲ့ကားပြောခြင်းမဟုတ်လော။ ၎င်းသည် အချက်အလက်အမှန်များအတိုင်းဖြစ်သလော။ ဤကဲ့သို့သောလူ အမှန်တကယ် ရှိသလော။ အကယ်၍ ဤသည်မှာ ကိစ္စများကို သင်တို့ နားလည်သဘောပေါက်သည့်ပုံနည်းလမ်းဖြစ်ပါက၊ ယင်းသည် လွဲချော်နေသည်။ သို့သော် အကယ်၍ သင်တို့က “ကျွန်ုပ်တို့လူသားများကတော့ သွားပါပြီ။ ကျွန်ုပ်တို့အထဲမှ တစ်ဦးကမျှ မကောင်းပါ၊ သို့ဖြစ်လျှင် ဘုရားသခင်အပေါ် ယုံကြည်ခြင်းက ဘာအသုံးကျတော့မည်နည်း။ ကျွန်ုပ်ကတော့ ရိုးရိုးရှင်းရှင်းပဲ ယုံကြည်ခြင်းကို ရပ်လိုက်ပြီး သေဖို့ကိုပဲ စောင့်လိုက်ပါတော့မည်!” ဟု ယုံကြည်ကြပါက ဤသည်မှာလည်း အဓိပ္ပါယ်မရှိခြင်းဖြစ်သည်။ သင်တို့သည် သာမန်ရိုးရိုးစကားကို နားမလည်ကြဘိသကဲ့သို့ အမြဲ အစွန်းရောက်ကြသည်။ သင်တို့သည် အမြဲ တစ်ဘက်သို့ ယိမ်းလျှင်ယိမ်း၊ မဟုတ်လျှင် အခြားတစ်ဘက်သို့ ယိမ်းကြသည်။ အကယ်၍ ငါက ပို၍နူးညံ့၊ ညင်သာစွာပြောပါက သင်တို့သည် သင်တို့ကိုယ်သင်တို့ သိဖို့ ပျက်ကွက်ကြလိမ့်မည်။ သို့သော် အကယ်၍ ကျွန်ုပ်က ခက်ထန်လွန်း၊ ကြမ်းတမ်းလွန်းစွာ ပြောပါက သင်တို့သည် သင်တို့၏ခေါင်းများကို ငိုက်စိုက်ချလျက် အပျက်သဘောဆောင်လာကြကာ၊ သင်တို့ကိုယ်သင်တို့အပေါ်ပင်လျှင် အရှုံးပေးလက်လျှော့လိုက်ကြလိမ့်မည်။ လူအချို့သည် ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ရှုတ်ချခြင်းတို့ကို ကြားရသောအခါ သူတို့သည် ချက်ချင်း ကြက်သေသေသွားကြပြီး သူတို့သည် သွားပြီ၊ သူတို့တွင် ကယ်တင်ခြင်းခံရဖို့ မျှော်လင့်ချက်မရှိတော့ ဟူ၍ ယုံကြည်ကြသည်။ ဤလူများသည် အတိအကျပင် ကယ်တင်ဖို့ အခက်ခဲဆုံးသောလူများဖြစ်ကြလေသည်။ အဘယ်ကြောင့်ဆိုသော် သူတို့သည် သာမန်ရိုးရိုးစကားကိုပင် နားမလည်ကြသောကြောင့်ဖြစ်သည်။ ယခုတွင် ဘုရားသခင်က လူများကို စကားပြော၍ ဖော်ထုတ်သောအခါ ၎င်းမှာ လူသား၏ဖောက်ပြန်ပျက်စီးသောသဘာဝ၏အရင်းအမြစ်ကို သူတို့ နားလည်အောင်လုပ်ဖို့နှင့် အဘယ်ကြောင့် လူသားသည် ဘုရားသခင်ကို ပုန်ကန်နိုင်ရသည်ကို နားလည်စေဖို့ဖြစ်သည်။ ဤအရာများကို ဖော်ထုတ်ခြင်းသည် လူများအတွက် ကောင်းကျိုးဖြစ်ထွန်းစေသည်။ အကယ်၍ ဤအရာများကို မဖော်ထုတ်ပါက သင်သည် ကောင်းကင်တမန်မင်းက သွေးနားထင်ရောက်နေသည်ဟု အမြဲ ပြောဆိုလျက် သို့မဟုတ် ဤလူက မာနထောင်လွှားသည်၊ ထိုလူက ပုန်ကန်လိုသည်ဟု ပြောဆိုလျက် သင့်ကိုယ်သင် ဘယ်တော့မှ မသိလိုက်ဘဲ၊ အဆုံးအထိ ယုံကြည်နေလိမ့်ဦးမည်။ သင့်ကိုယ်သင်နှင့်ပတ်သက်လျှင် အဘယ်သိုန့ည်း။ “ကျွန်ုပ်တို့သည် တကယ့်ကို ဘုရားသခင်အပေါ် ပုန်ကန်လိုကြသည်” ဟူ၍ အမြဲ ပြောသောလူများလည်း ရှိကြသည်။ သို့သော် သူတို့ပုန်ကန်လိုခြင်း၏အရင်းအမြစ်ကို မသိကြသေးဘဲ၊ ထိုအခြေအနေများ၏အနှစ်သာရကို ထိုးထွင်းသိမြင်ခြင်း သို့မဟုတ် နားလည်ခြင်းမရှိကြပေ။ ဆိုလိုသည်မှာ သူတို့သည် မပြောင်းလဲနိုင်ကြသည့်အပြင် ကယ်တင်၍ မရနိုင်ပေ။ သင်တို့သည် ဤစကားများကို နားလည်သဘောပေါက်နိုင်စွမ်းရှိကြသလော။ (ရှိပါသည်။)

ကျွန်ုပ် ယခုလေးတင် မိတ်သဟာယပြုခဲ့ပြီးသည့်အရာနှင့်ပတ်သက်၍ ပဓာနကျသည့်အပိုင်းနှစ်ပိုင်းရှိသည်။ တစ်ခုမှာ ဘုရားသခင်အပေါ် ယုံကြည်ရာတွင် လူတစ်ယောက်သည် ဖန်ဆင်းခံတစ်ဦး၏စံနှုန်းကို လုံးဝ ပြည့်မီစေလျက် အစစ်အမှန် ကျိုးနွံနာခံခြင်းကို ရရှိသင့်သည်။ နောက်တစ်ခုမှာ လူများအတွင်းတွင် ပုန်ကန်လိုခြင်းကို ဖော်ထုတ်ခြင်းနှင့် သူတို့၏သဘာဝကို ဖော်ထုတ်ခြင်းတို့က သူတို့ကိုယ်သူတို့ သရစေသည်။ အကယ်၍ သူတို့ကို ဤကဲ့သို့ မဖော်ထုတ်ဘဲ သူတို့ကိုယ်သူတို့ သိအောင် မလုပ်ပါက ထိုအခါတွင် လူတိုင်းက သူတို့သည် ကောင်းပြီး အခြားလူများထက် သာကြောင်းကို ပြောကြလိမ့်မည်။ ဥပမာ “ကျွန်ုပ်သည်လည်း အလွန်နက်နက်ရှိုင်းရှိုင်းဖောက်ပြန်ပျက်စီးနေသည်” ဟူ၍ လူအချို့က ပြောကြသော်လည်း၊ သူတို့သည် အချိန်ကာလတစ်ခုကြာအောင် အခြားလူများနှင့် အပြန်အလှန်ပေါင်းဖော်ဆက်ဆံသောအခါ “ကျွန်ုပ်ဟာ ဘာမှ မကောင်းပါ၊ သင်သည်လည်း မထူးပေ၊ ထို့အပြင် တကယ်တမ်းတွင် ကျွန်ုပ်ထက် ပို၍ပင်ဆိုးသည်ဟု ကျွန်ုပ်မြင်သည်” ဟူ၍ တွေးလျက် သူတို့သည် အခြားလူများထက် သာနေသေးသည်ဟု ယုံကြည်ကြသည်။ သင်သည် အခြားလူများထက် ပိုသာသည်ဟု မထင်ပါနှင့်။ သင်သည် အခြားလူများထက် ပို၍သာသည်ဆိုသည်မှာ လုံးဝ လုံးဝ မဖြစ်နိုင်ပါ။ လူများ၏ပုန်ကန်လိုသောသဘာဝများသည် အားလုံး အတူတူချည်းပင်ဖြစ်သည်။ ဤသည်မှာ အားလုံး ရှင်းလင်းပါသလော။ ယခုတွင် ကျွန်ုပ်တို့သည် ဤအကြောင်းကို မိတ်သဟာယပြုခြင်း ပြီးဆုံးသည့်အခါတွင် သင်တို့အားလုံး မည်သို့ထင်ကြသနည်း။ “ဘုရားသခင်အပေါ် ကျွန်ုပ် ယုံကြည်လာခဲ့သည်မှာ နှစ်ပေါင်းများစွာကြာခဲ့ပြီ။ ထို့အပြင် ဘုရားသခင်ထံ ကျိုးနွံနာခံခဲ့သောတစ်ယောက်သည် ကျွန်ုပ်ပင် ဖြစ်ခဲ့သည်ဟု ကျွန်ုပ် ထင်ခဲ့သည်။ ယနေ့၊ ဘုရားသခင်သည် မိတ်သဟာယပြုခြင်းပြီးဆုံးသည့်အခါတွင် ဘုရားသခင်ထံ ကျွန်ုပ် အမှန်အကန် ကျိုးနွံနာခံခြင်း မရှိကြောင်းကို နောက်ဆုံးတော့ ကျွန်ုပ် သဘောပေါက်သွားသည်။ ထို့အပြင် ကျွန်ုပ်သည် သူ့ကို ဘုရားသခင်အဖြစ် မဆက်ဆံသေးပေ။ ဘုရားသခင်ထံ ကျိုးနွံနာခံဖို့ကိုပင်လျှင် ကျွန်ုပ် မလုပ်ဆောင်နိုင်တော့ပါ။ ကျွန်ုပ်သည် လုံးဝကို အသိစိတ်ကင်းမဲ့ပြီး ကျွန်ုပ်၏ယုံကြည်ခြင်းသည် ရှုပ်ထွေးနေသည်” ဟူ၍ သင်တို့ တွေးနေကြသလော။ အကယ်၍ သင်တို့တွင် ဤကဲ့သို့သောအသိမျိုး အမှန်တကယ် ရှိနေပါက ထိုအခါ ဘုရားသခင်အပေါ် ယုံကြည်ခြင်း၏မှန်ကန်သောလမ်းကြောင်းပေါ်သို့ ဝင်ရောက်ပြီး သူ့ထံ ကျိုးနွံနာခံသောသူတစ်ယောက်ဖြစ်လာဖို့ သင့်အတွက် မျှော်လင့်ချက်ရှိပါသည်။ ထိုအခါမှသာ သင်သည် ကယ်တင်ခြင်းရရှိနိုင်သည်။

ကောက်နုတ်ချက် (၃)

အရေအတွက် များပြားလှစွာသော ယုံကြည်သူများသည် အသက်စိတ်သဘောထား ပြောင်းလဲခြင်းအပေါ် အရေးထားဖို့ ပျက်ကွက်ကြသည်။ ယင်းအစား ၎င်းတို့အပေါ်ထားသည့် ဘုရားသခင်၏ သဘောထားအပေါ်ကိုလည်းကောင်း၊ ဘုရားသခင်၏ စိတ်နှလုံးထဲတွင် ၎င်းတို့နေရာတစ်ခု ယူထားခြင်း ရှိမရှိဆိုသည့်အပေါ်ကိုလည်းကောင်း ၎င်းတို့ အာရုံစိုက်ပြီး စိုးရိမ်ပူပန်ကြသည်။ ဘုရားသခင်၏အမြင်တွင် ၎င်းတို့ မည်သို့ပုံပေါက်သည်နှင့်ပတ်သက်၍လည်းကောင်း၊ သူ၏ စိတ်နှလုံးထဲတွင် ၎င်းတို့ နေရာတစ်ခုကို ယူထားမထားဆိုသည်နှင့်ပတ်သက်၍လည်းကောင်း ၎င်းတို့သည် အစဉ်သဖြင့် ခန့်မှန်းဖို့ ကြိုးစားနေကြသည်။ လူများစွာတို့သည် ဤအတွေးမျိုးကို စိတ်ထဲတွင် သိုထားကြသည်။ ပြီးလျှင် အကယ်၍ ဘုရားသခင်နှင့် ၎င်းတို့ မျက်နှာချင်းဆိုင် အမှန်တကယ် တွေ့လာရပါက ဘုရားသခင်က ၎င်းတို့ကို စကားပြောသောအခါ သူသည် ပျော်ရွှင်နေသလော သို့မဟုတ် စိတ်ဆိုးနေသလောဆိုသည်ကို ၎င်းတို့ အစဉ်သဖြင့် စောင့်ကြည့်လေ့လာကြသည်။ ထို့နောက်တွင် “ဘုရားသခင်က ကျွန်တော့်ရဲ့ အခက်အခဲတွေကို ပြောခဲ့သေးသလား။ အဲဒီအပြင် ကျွန်တော့်ကို သူဘယ်လိုထင်သလဲ။ ကျွန်တော့်အတွက် သူစိုးရိမ်ပူပန်မှု တစ်ခုခုကို ပြသေးသလား” ဟူ၍ အခြားသူများအား အစဉ်သဖြင့် မေးမြန်းစုံစမ်းနေသူများ ရှိကြသည်။ အချို့တွင် ပို၍ပင် ပြင်းထန်သော ပြဿနာများ ရှိကြသည်။ အကယ်၍ ဘုရားသခင်က ၎င်းတို့ကို ဖျတ်ခနဲကြည့်လိုက်လျှင်ပင် ၎င်းတို့သည် ပြဿနာအသစ်တစ်ခုကို ရှာဖွေတွေ့ရှိလိုက်ဘိသကဲ့သို့ ဖြစ်သည်။ “အိုး သွားပြီ၊ ဘုရားသခင်က အခုပဲ ကျွန်တော့်ကို မျက်လုံးတစ်ချက် ဝေ့ကြည့်လိုက်တယ်။ ပြီးတော့ သူ့မျက်လုံးထဲက အကြည့်တွေက အရမ်း ပျော်ရွှင်တဲ့ပုံ မပေါက်ဘူး။ ဒါဟာ ကောင်းတဲ့ လက္ခဏာတော့ မဟုတ်ဘူး” ဟူ၍ဖြစ်သည်။ လူများသည် ထိုကဲ့သို့သော အရာများအပေါ် အလွန့်အလွန် အရေးထားကြသည်။ အချို့လူများက “ကျွန်တော်တို့ ယုံကြည်တဲ့ ဘုရားသခင်က လူ့ဇာတိခံ ဘုရားသခင်ပဲ။ ဒီတော့ တကယ်လို့များ သူက ကျွန်တော်တို့ကို အာရုံမစိုက်ဘူးဆိုရင် ဒါဟာ ကျွန်တော်တို့အတွက် ဇာတ်သိမ်းသွားပြီ မဟုတ်လား” ဟု ပြောကြသည်။ ဤအရာအားဖြင့် ၎င်းတို့ ဆိုလိုသည်မှာ “တကယ်လို့များ ဘုရားသခင်ရဲ့ စိတ်နှလုံးထဲမှာ ကျွန်တော်တို့အတွက် နေရာမရှိရင် ကျွန်တော်တို့က ဘာလို့များ ဒုက္ခခံ ယုံကြည်သင့်လဲ။ ယုံကြည်တာကို ကျွန်တော်တို့ ရပ်လိုက်သင့်တယ်” ဟူ၍ဖြစ်သည်။ ဤသည်မှာ အသိစိတ် ကင်းမဲ့ခြင်း မဟုတ်လော။ လူများသည် ဘုရားသခင်အပေါ် အဘယ်ကြောင့် ယုံကြည်သင့်သည်ကို သင်သိပါသလား။ ၎င်းတို့၏စိတ်နှလုံးများထဲတွင် ဘုရားသခင်အတွက် နေရာတစ်ခုရှိမရှိကို လူများသည် မည်သည့်အခါမျှ မဆင်ခြင်ကြသည့်တိုင် ၎င်းတို့သည် ဘုရားသခင်၏ စိတ်နှလုံးထဲတွင်မူ ၎င်းတို့အတွက် နေရာတစ်ခုကို လိုချင်ကြသည်။ ၎င်းတို့သည် မာနထောင်လွှားပြီး စိတ်ကြီးဝင်လိုက်လေခြင်းပါတကား။ ဤသည်မှာ ၎င်းတို့၏ အသိစိတ် အကင်းမဲ့ဆုံးသော အစိတ်အပိုင်းဖြစ်သည်။ ဘုရားသခင်က အခြားသူတစ်ဦးဦးကို သာကြောင်းမာကြောင်း မေးမြန်းပြီး ၎င်းတို့၏ အမည်ကို မမေးမခေါ်သောအခါ သို့မဟုတ် ၎င်းတို့ထက် အခြားသူများကို စိုးရိမ်ပူပန်ကြောင်းနှင့် ဂရုစိုက်ကြောင်းတို့ကို ပြသသောအခါ ၎င်းတို့သည် မကျေမနပ်ခံစားကြရပြီး ဘုရားသခင်သည် မဖြောင့်မတ်ကြောင်းနှင့် တရားမမျှတသည့်အပြင် ကျိုးကြောင်းမသင့်ကြောင်းတို့ကို ပြောရင်း ဘုရားသခင်နှင့်ပတ်သက်၍ မကျေမနပ်ဖြစ်ပြီး ညည်းညူကာ စောဒကတက် စပြုလာကြသည်အထိ အသိစိတ် အလွန်ကင်းမဲ့သော သူများပင် ရှိလေသည်။ ဤသည်မှာ ၎င်းတို့၏ အသိစိတ်နှင့်ပတ်သက်သည့် ပြဿနာတစ်ခုဖြစ်သည်။ ထို့ပြင် ၎င်းတို့သည် စိတ်ပိုင်းဆိုင်ရာအရလည်း အတော်အတန် မူမမှန်ကြပေ။ ပုံမှန်အခြေအနေများတွင် ဘုရားသခင်၏ ကြိုတင်စီစဉ်မှုများနှင့် စီစဉ်ညွှန်ကြားခြင်းများကို ၎င်းတို့ ကျိုးနွံနာခံမည်ဖြစ်ကြောင်း၊ ဘုရားသခင်က ၎င်းတို့ကို မည်သို့ဆက်ဆံပါစေ ၎င်းတို့သည် မည်သည့်အခါမျှ စောဒကတက်မည် မဟုတ်ကြောင်းနှင့် ဘုရားသခင်၏ ၎င်းတို့အပေါ် ပြုပြင်ခြင်း၊ တရားစီရင်ခြင်း သို့မဟုတ် ပြစ်တင်ဆုံးမခြင်းတို့ကိုလည်း ၎င်းတို့ အဆင်ပြေပါသည်ဟု လူများက အစဉ်သဖြင့် အခိုင်အမာဆိုကြသည်။ သို့သော် လက်တွေ့ဘဝတွင် ထိုကဲ့သို့သောကိစ္စများကို ၎င်းတို့ ရင်ဆိုင်တွေ့ကြုံသောအခါ ၎င်းတို့ကို ၎င်းတို့ လက်မခံကြချေ။ လူများတွင် အသိစိတ်ရှိကြသလော။ လူများသည် မိမိတို့ကိုယ်ကို အလွန်အထင်ကြီးကြပြီး မိမိတို့ကိုယ်ကို အလွန် အရေးပါသည်ဟု ယုံကြည်ကြသဖြင့် ဘုရားသခင်ကသာ ၎င်းတို့ကို အမှန်တကယ် ပြုပြင်ခဲ့လျှင်ကို မဆိုထားဘိ၊ ဘုရားသခင်က ၎င်းတို့အပေါ် မကျေနပ်သည့်ပုံဖြင့် ကြည့်လိုက်သည်ဟု မြင်လျှင်ပင် ၎င်းတို့သည် ကယ်တင်ခြင်းကို ရရှိဖို့ မျှော်လင့်ချက်မရှိဟု ခံစားရသည်။ သို့မဟုတ် အကယ်၍ ဘုရားသခင်က ၎င်းတို့ကို ပို၍ပြင်းထန်သော အသံနေအသံထားတစ်ခုဖြင့် စကားပြောမိ၍ ယင်းက ၎င်းတို့၏ စိတ်နှလုံးများကို ထိုးဖောက်သွားပါက ၎င်းတို့သည် အပျက်သဘောဆောင်လာကြပြီး ဘုရားသခင်အပေါ် ယုံကြည်ခြင်းသည် အဓိပ္ပါယ်မဲ့သည်ဟု တွေးစပြုလာကြသည်။ “ဘုရားသခင်က ကျွန်တော့်ကို လျစ်လျူရှုနေရင် သူ့ကို ကျွန်တော်က ဘယ်လိုဆက်ပြီး ယုံကြည်နိုင်မှာလဲ” ဟု ၎င်းတို့ တွေးကြသည်။ အချို့သည် ဤကဲ့သို့သောလူမျိုးကို ပိုင်းခြားသိမြင်နိုင်စွမ်း မရှိဘဲ “ဘုရားသခင်အပေါ် သူတို့ရဲ့ ယုံကြည်ခြင်းက ဘယ်လောက် စစ်မှန်လိုက်လဲဆိုတာကို ကြည့်ကြပါ။ ဘုရားသခင်က သူတို့အတွက် အရမ်းကို အရေးပါတယ်။ အကြည့်တစ်ချက်ကနေ သူတို့က ဘုရားသခင်ရဲ့ ဆိုလိုရင်းကိုတောင် အဓိပ္ပာယ် ကောက်နိုင်ကြတယ်။ သူတို့က ဘုရားသခင်ကို ပြင်းပြင်းထန်ထန် သစ္စာစောင့်သိကြတယ်။ သူတို့က ကမ္ဘာမြေပေါ်က ဘုရားသခင်ကို ကောင်းကင်ဘုံက ဘုရားသခင်အနေနဲ့ အမှန်တကယ်ကို မြင်ကြတယ်” ဟု ထင်ကြသည်။ ထိုသို့ပင် ဖြစ်သလော။ ဤလူများသည် အလွန် နားဝေတိမ်တောင် ဖြစ်နေကြသောကြောင့် ကိစ္စရပ်များအားလုံးတွင် ထိုးထွင်းအမြင် ကင်းမဲ့နေကြသည်။ ၎င်းတို့၏ ဝိညာဉ်ရင့်ကျက်မှုမှာ အလွန် သေးနုပ်ပြီး ၎င်းတို့သည် အကျည်းတန်ခြင်း အမျိုးအစားအားလုံးကို အမှန်တကယ်ပင် ထုတ်ဖော်ပြနေကြသည်။ လူများတွင် ထိုကဲ့သို့သော ညံ့ဖျင်းသည့် အသိစိတ် ရှိကြသည်။ ၎င်းတို့တွင် ဘုရားသခင်နှင့်ပတ်သက်၍ အလွန် များပြားသော တောင်းဆိုချက်များ ရှိကြပြီး သူ့ထံမှ အလွန်အမင်း တောင်းဆိုကြသည်။ ၎င်းတို့တွင် အသိစိတ် စိုးစဉ်းမျှပင် မရှိကြချေ။ လူများသည် ဘုရားသခင်က ဤသည်ကို သို့မဟုတ် ထိုသည်ကို လုပ်ပေးပါရန် အစဉ်သဖြင့် တောင်းဆိုနေကြသော်လည်း သူ့ထံ အပြည့်အဝ ကျိုးနွံနာခံဖို့ကိုဖြစ်စေ၊ သူ့ကို ကိုးကွယ်ဖို့ကိုဖြစ်စေ ၎င်းတို့ မတတ်နိုင်ကြပေ။ ထိုအစား ၎င်းတို့၏ တစ်ကိုယ်ရေ နှစ်သက်မှုများအပေါ် မူတည်၍ ယုတ္တိမတန်သော တောင်းဆိုချက်များကို ၎င်းတို့ ပြုလုပ်ကြသည်။ ဘုရားသခင်သည် အလွန် သဘောထားကြီးဖို့ကိုလည်းကောင်း၊ မည်သည့်အရာကြောင့်မျှ သူသည် မည်သည့်အခါမျှ စိတ်မဆိုးဖို့ကိုလည်းကောင်း၊ လူများကို သူမြင်သည့်အချိန်တိုင်း သူသည် အစဉ်သဖြင့် ပြုံးနေသင့်ပြီး ၎င်းတို့ကို အစဉ်သဖြင့် စကားပြောပေးနေသင့်သည်ဟုလည်းကောင်း၊ ၎င်းတို့ကို သမ္မာတရားဖြင့် ပံ့ပိုးပေးသင့်ပြီး ၎င်းတို့ကို သမ္မာတရားဖြင့် မိတ်သဟာယ ဖွဲ့ပေးသင့်ဟုလည်းကောင်း တောင်းဆိုကြသည်။ သူက အစဉ်သဖြင့် စိတ်ရှည်ဖို့နှင့် ၎င်းတို့အနားတွင် ရှိနေစဉ် သူသည် ယဉ်ကျေးဖော်ရွေသော မျက်နှာအမူအရာ ထားဖို့ကိုလည်း ၎င်းတို့ တောင်းဆိုကြသေးသည်။ လူများတွင် တောင်းဆိုချက်များ အလွန်ပင် များပြားလှသည်။ ၎င်းတို့သည် ဇီဇာကြောင်လွန်းသည်။ ဤကိစ္စရပ်များကို သင်တို့ ဆန်းစစ်သင့်သည်။ လူသား၏ အသိစိတ်သည် အလွန်ညံ့ဖျင်းသည်၊ ဟုတ်သည်မဟုတ်လော။ လူတို့သည် ဘုရားသခင်၏ စီစဉ်ညွှန်ကြားမှုများနှင့် အစီအစဉ်များထံ အပြည့်အဝ ကျိုးနွံနာခံဖို့ သို့မဟုတ် ဘုရားသခင်ထံမှလာသမျှကို လက်ခံဖို့ မတတ်နိုင်ရုံသာမက ဆန့်ကျင်ဘက်အားဖြင့် ၎င်းတို့သည် ဘုရားသခင်အပေါ် ထပ်တိုး တောင်းဆိုချက်များ ချမှတ်ကြသည်။ ထိုကဲ့သို့သော တောင်းဆိုချက်များနှင့် လူများသည် ဘုရားသခင်အပေါ် မည်သို့ သစ္စာရှိနိုင်မည်နည်း။ ၎င်းတို့သည် ဘုရားသခင်၏အစီအစဉ်များကို မည်ကဲ့သို့ ကျိုးနွံနာခံနိုင်မည်နည်း။ ဘုရားသခင်ကို ၎င်းတို့ မည်သို့ ချစ်နိုင်မည်နည်း။ လူများအားလုံးတွင် ဘုရားသခင်က ၎င်းတို့ကို မည်သို့ ချစ်သင့်ကြောင်း၊ သည်းခံသင့်ကြောင်း၊ စောင့်ကြပ်သင့်ကြောင်း၊ ကာကွယ်ပေးသင့်ကြောင်းနှင့် စောင့်ရှောက်ပေးသင့်ကြောင်း တောင်းဆိုချက်များ ရှိကြသည်။ သို့တိုင်အောင် ၎င်းတို့ကိုယ်တိုင်က ဘုရားသခင်ကို မည်သို့ ချစ်သင့်ကြောင်း၊ ဘုရားသခင်အကြောင်းကို တွေးသင့်ကြောင်း၊ ဘုရားသခင်ကို အလေးထားသင့်ကြောင်း၊ ဘုရားသခင်ကို စိတ်ကျေနပ်အောင် လုပ်ဆောင်သင့်ကြောင်း၊ ၎င်းတို့၏စိတ်နှလုံးထဲတွင် ဘုရားသခင်ကို ထားရှိသင့်ကြောင်းနှင့် ပြီးလျှင် ဘုရားသခင်ကို ကိုးကွယ်သင့်ကြောင်း ဆိုသည်တို့အတွက်မူ သတ်မှတ်ချက်တစ်စုံတစ်ရာ မရှိပေ။ လူများ၏ စိတ်နှလုံးများထဲတွင် ဤအရာများ တည်ရှိသလော။ ဤသည်တို့မှာ လူများက ပြီးမြောက်သင့်သည့်အရာများ ဖြစ်ကြသည်။ ထို့ကြောင့် ၎င်းတို့သည် အဘယ်ကြောင့် ဤအရာများတွင် လုံ့လဝီရိယရှိရှိဖြင့် ရှေ့သို့ ဆက်၍ မတိုးကြသနည်း။ လူအချို့သည် အချိန်ကာလတစ်ခုကြာအောင် စိတ်အားထက်သန်တက်ကြွနိုင်ကြပြီး အရာများကို အတော်အတန် စွန့်လွှတ်နိုင်ကြကာ မိမိတို့ကိုယ်ကို အသုံးခံနိုင်ကြသည်။ သို့သော် ယင်းမှာ ကြာရှည်မခံပါ။ အနည်းငယ်သော ဆုတ်ဆိုင်းမှုတစ်ခုကို ကြုံကြိုက်ရခြင်းဖြင့် ၎င်းတို့ကို စိတ်ပျက်အားလျော့လာစေနိုင်သည်၊ မျှော်လင့်ချက် ပျက်သုန်းသွားပြီး စောဒကတက်လာစေနိုင်သည်။ လူများတွင် အခက်အခဲပေါင်း မြောက်မြားစွာ ရှိကြသည်။ ပြီးလျှင် သမ္မာတရားကို လိုက်စားပြီး ဘုရားသခင်ကို ချစ်ဖို့နှင့် စိတ်ကျေနပ်အောင်လုပ်ဖို့ အားထုတ်သော လူများမှာ နည်းပါးလွန်းလှသည်။ လူသားများသည် အသိစိတ် လုံးလုံး ကင်းမဲ့ကြသည်။ ၎င်းတို့သည် မှားသည့်နေရာတွင် ရပ်တည်ကြပြီး မိမိတို့ကိုယ်ကို ထူးထူးခြားခြား တန်ဖိုးကြီးသူများအဖြစ် ရှုမြင်ကြသည်။ “ဘုရားသခင်က ကျွန်တော်တို့ကို သူ့ရဲ့အသည်းကြော်တွေအနေနဲ့ ရှုမြင်တယ်။ လူသားမျိုးနွယ်ကို ရွေးနုတ်ဖို့အတွက် သူ့ရဲ့ တစ်ပါးတည်းသော သားတော်ကို လက်ဝါးကပ်တိုင်မှာ သံမှိုစွဲခွင့်ပြုဖို့တောင် သူ မတွေဝေနေခဲ့ဘူး။ ဘုရားသခင်က ကျွန်‌တော်တို့ကို ပြန်ဝယ်ဖို့ အဖိုးအခကြီးကြီး ပေးဆပ်ခဲ့ပါတယ်။ ကျွန်တော်တို့က အရမ်းကို အဖိုးထိုက်ပြီး ဘုရားသခင်ရဲ့ စိတ်နှလုံးထဲမှာ အားလုံးက နေရာတစ်ခု ယူထားကြတယ်။ ကျွန်တော်တို့က အထူးသီးသန့်လူတစ်စုဖြစ်ကြပြီး ဘာသာတရားမရှိသူတွေထက် အများကြီး ပိုမြင့်မားတဲ့ အဆင့်အတန်းကို ပိုင်ဆိုင်ကြတယ်။ ကျွန်တော်တို့က ကောင်းကင်နိုင်ငံတော်ရဲ့ လူတွေပဲ” ဟု ပြောသောသူများလည်း ရှိကြသည်။ ၎င်းတို့သည် မိမိတို့ကိုယ်ကို အလွန်မြင့်မြတ်ပြီး ကြီးကျယ်ခမ်းနားသည်ဟု ထင်ကြသည်။ ရာထူးတိုးပြီးသည့်နောက်တွင် ဘုရားသခင့်အိမ်တော်၌ ၎င်းတို့တွင် အချို့သောအဆင့်အတန်းနှင့် ရာထူးနေရာတစ်ခု ရှိခဲ့သည်ဟု ယုံကြည်ရင်း အတိတ်တွင် ခေါင်းဆောင်များစွာတို့သည် ဤစိတ်နေသဘောထားမျိုး ရှိခဲ့ကြသည်။ “ဘုရားသခင်က ကျွန်တော့်ကို လေးစားမှုအများကြီး ရှိပြီး အကောင်းမြင်တယ်။ အဲဒီအပြင် သူက ကျွန်တော့်ကို ခေါင်းဆောင်တစ်ယောက်အနေနဲ့ အစေခံဖို့ ခွင့်ပြုခဲ့တယ်။ ကျွန်တော်လည်း သူ့အတွက် အစွမ်းကုန် လှည့်လည်သွားလာပြီး အလုပ်လုပ်ပေးရမယ်” ဟု ၎င်းတို့ ထင်ခဲ့ကြသည်။ ၎င်းတို့သည် မိမိတို့ကိုယ်ကို အလွန်အမင်း ကျေနပ်အားရနေခဲ့ကြသည်။ သို့ရာတွင် အချိန်ကာလ အပိုင်းအခြားတစ်ခုခန့် ကြာပြီးနောက်တွင် ၎င်းတို့သည် ဆိုးရွားသောအရာတစ်ခုကို လုပ်ခဲ့ကြကာ ၎င်းတို့၏စရိုက်မှန်များ ပေါ်လာခဲ့ကြပြီးနောက် ၎င်းတို့ကို အစားထိုးခံခဲ့ကြရသည်၊ ထို့နောက်တွင် ၎င်းတို့သည် စိတ်မချမ်းမြေ့ဘဲ စိတ်ပျက်အားလျော့ခဲ့ကြသည်။ ၎င်းတို့၏မလျော်ကန်သော အပြုအမူသည် ဖော်ထုတ်ခံရပြီး ပြုပြင်ခြင်းခံရသောအခါ ၎င်းတို့သည် ပို၍ပင် အပျက်သဘောဆောင်လာကြပြီး ဆက်၍ယုံကြည်ဖို့ကို မတတ်နိုင်ကြတော့ပေ။ “ဘုရားသခင်က ကျွန်တော့်ရဲ့ခံစားချက်တွေကို သိပ်မငဲ့ကွက်ဘူး။ သူက ကျွန်တော့်ဂုဏ်သိက္ခာကို ဆယ်ဖို့ လုံးဝကို ဂရုမစိုက်တာပါ။ လူတွေရဲ့ အားနည်းချက်တွေကို ဘုရားသခင်က စာနာတယ်လို့ ပြောကြတယ်။ ဒါဆိုရင် ပြစ်မှားမှု အသေးအဖွဲတချို့ကို ကျူးလွန်မိပြီးတဲ့နောက်မှာ ကျွန်တော်က ဘာဖြစ်လို့ ဖယ်ရှားခံရတာလဲ” ဟု မိမိတို့ဘာသာ တွေးခဲ့ကြသည်။ ထို့နောက်တွင် ၎င်းတို့သည် စိတ်ပျက်အားလျော့လာခဲ့ကြပြီး ၎င်းတို့၏ယုံကြည်ခြင်းကို စွန့်ပစ်ဖို့ လိုလားခဲ့ကြသည်။ ထိုကဲ့သို့သောလူများတွင် ဘုရားသခင်အပေါ် စစ်မှန်သောယုံကြည်ခြင်း ရှိသလော။ အကယ်၍ ၎င်းတို့သည် ပြုပြင်ခြင်းကိုပင် လက်မခံနိုင်ပါက ၎င်းတို့၏ ဝိညာဉ်ရင့်ကျက်မှုသည် သေးနုပ်လွန်းလှသည်။ ထို့ပြင် အနာဂတ်တွင် သမ္မာတရားကို ၎င်းတို့ လက်ခံနိုင်ခြင်း ရှိမရှိဆိုသည်မှာလည်း မသေချာပါ။ ထိုကဲ့သို့သော လူများသည် အန္တရာယ်ရှိနေပြီဖြစ်သည်။

လူများသည် မိမိတို့ကိုယ်ကို ကြီးမားသော တောင်းဆိုချက်များကို မတောင်းဆိုကြသော်လည်း ဘုရားသခင်ကိုမူ ကြီးမားသော တောင်းဆိုချက်များကို ပြုကြသည်။ ၎င်းတို့သည် ၎င်းတို့အား အထူးကြင်နာခြင်းကို ပြသဖို့၊ ၎င်းတို့ကို စိတ်ရှည်ဖို့နှင့် လိုက်လျောဖို့၊ ၎င်းတို့ကို ချစ်ခင်မြတ်နိုးဖို့၊ ၎င်းတို့အတွက် ထောက်ပံ့ဖို့နှင့် ၎င်းတို့ကို ပြုံးပြဖို့၊ ၎င်းတို့ကို သည်းခံဖို့၊ ၎င်းတို့အတွက် ကင်းလွတ်သက်ညှာခွင့်များ ပေးဖို့နှင့် ၎င်းတို့ကို နည်းလမ်းများစွာဖြင့် စောင့်ရှောက်ဖို့ သူ့ကို တောင်းဆိုကြသည်။ သူသည် ၎င်းတို့ကို လုံးဝ စည်းကမ်းမတင်းကျပ်ဖို့ သို့မဟုတ် ၎င်းတို့ကို စိတ်ပျက်စေသည့် မည်သည့်အရာကိုမျှ စိုးစဉ်းမျှ မလုပ်ဖို့ ၎င်းတို့ မျှော်လင့်ကြသည်။ ပြီးလျှင် နေ့တိုင်း ၎င်းတို့ကို သူက ချော့မော့သည့်စကားများကို ပြောနေပါမှ ၎င်းတို့ စိတ်ကျေနပ်သည်။ လူသားများတွင် ထိုကဲ့သို့သော ညံ့ဖျင်းသည့် အသိစိတ်ရှိကြသည်။ ၎င်းတို့ မည်သည့်အရာကို လုပ်သင့်ကြောင်း၊ ၎င်းတို့ မည်သည်ကို ပြီးမြောက်သင့်ကြောင်း၊ ၎င်းတို့တွင် မည်သည့်ထင်မြင်ချက်များရှိသင့်ကြောင်း၊ ဘုရားသခင်ကို အစေခံဖို့ မည်သည့်နေရာတွင် ၎င်းတို့ ရပ်တည်သင့်ကြောင်းနှင့် ၎င်းတို့ နေရာယူဖို့ မည်သည့်နေရာက သင့်တော်သည်ဆိုသည်တို့အပေါ်တွင် ၎င်းတို့သည် မရှင်းလင်း ဖြစ်နေသည်။ အဆင့်အတန်းအနည်းငယ် ရှိသောလူများသည် မိမိတို့ကိုယ်ကို အလွန် အထင်ကြီးကြသည်။ ထို့ပြင် အဆင့်အတန်း မရှိသောသူများသည်လည်း မိမိတို့ကိုယ်ကို အတော်အတန် အထင်ကြီးကြသည်။ လူသားများသည် မိမိတို့ကိုယ်ကို မည်သည့်အခါမျှ မသိကြပေ။ ဘုရားသခင်အပေါ် သင်၏ယုံကြည်ခြင်းတွင် သူက သင့်ကို မည်သို့စကားပြောသည်ဖြစ်စေ၊ သူက သင့်ကို မည်မျှစည်းကမ်းတင်းကျပ်သည်ဖြစ်စေ၊ ပြီးလျှင် သူက သင့်ကို မည်မျှလျစ်လျူရှုထားနိုင်သည်ဖြစ်စေ၊ စောဒကတက်ခြင်း မရှိဘဲ သင်သည် ဆက်၍ ယုံကြည်နိုင်ပြီး သင့်တာဝန်ကို ထုံးစံအတိုင်း ဆက်၍ လုပ်နိုင်သည့်နေရာကို ရောက်ရမည်။ ထိုအခါတွင် သင်သည် ရင့်ကျက်ပြီး အတွေ့အကြုံရှိသော လူတစ်ဦးဖြစ်လာလိမ့်မည်၊ ပြီးလျှင် သင့်တွင် ဝိညာဉ်ရင့်ကျက်မှုအချို့နှင့် သာမန်လူတစ်ဦး၏ အသိစိတ်အနည်းငယ်ကို အမှန်တကယ် ရရှိလာလိမ့်မည်။ သင်သည် ဘုရားသခင်ထံတွင် တောင်းဆိုမှုများ လုပ်မည် မဟုတ်ပေ။ သင့်တွင် လွန်ကဲသော လိုအင်ဆန္ဒများ ရှိတော့မည် မဟုတ်ပေ။ ပြီးလျှင် သင်၏ တစ်ကိုယ်ရေ နှစ်သက်မှုများအပေါ် မူတည်၍ အခြားသူများထံမှ သို့မဟုတ် ဘုရားသခင်ထံမှနေ၍ တောင်းဆိုမှုများကို သင် လုပ်တော့မည် မဟုတ်ပေ။ ဤသည်က လူသားပုံသဏ္ဌာန်ကို သင်အတိုင်းအတာတစ်ခုအထိ ပိုင်ဆိုင်ကြောင်းကို ပြလိမ့်မည်။ လောလောဆယ် သင်တို့တွင် တောင်းဆိုချက်များ မြောက်မြားစွာရှိကြသည်။ ဤတောင်းဆိုချက်များသည် အလွန်အကျွံ ဖြစ်လွန်းပြီး သင့်တွင် များပြားလွန်းသည့် လူ့ရည်ရွယ်ချက်များ ရှိသည်။ ဤသည်က သင်သည် မှန်ကန်သောနေရာတွင် မရပ်တည်နေခြင်းကို သက်သေပြသည်။ သင်ရပ်တည်နေသည့်နေရာသည် မြင့်လွန်းပြီး သင်သည် သင့်ကိုယ်သင် အလွန်ပင် ဂုဏ်အသရေ ရှိလွန်းသူအဖြစ် မြင်သည်။ ဘုရားသခင်အောက် များစွာ မနိမ့်ကျသောနေရာတွင် သင်ရှိဘိသကဲ့သို့ဖြစ်သည်။ ထို့ကြောင့် သင်သည် ကိုင်တွယ်ဖြေရှင်းဖို့ ခက်ခဲသည်။ ပြီးလျှင် ဤသည်မှာ စာတန်၏သဘောသဘာဝ အတိအကျပင်ဖြစ်သည်။ အကယ်၍ ထိုကဲ့သို့သောအခြေအနေများ သင့်အတွင်းတွင် တည်ရှိပါက သင်သည် ဧကန်မုချ ပို၍ မကြာခဏ အပျက်သဘောဆောင်လာလိမ့်မည်၊ ထို့ပြင် ပုံမှန်ဖြစ်သည့် အကြိမ်ရေပိုနည်းသွားလိမ့်မည်၊ ထို့ကြောင့် သင့်အသက်တာတိုးတက်မှုသည် နှေးကွေးသွားလိမ့်မည်။ ဆန့်ကျင်ဘက်အနေဖြင့် စိတ်နှလုံးဖြူစင်ပြီး ဇီဇာကြောင်ခြင်း နည်းပါးသောသူတို့သည် သမ္မာတရားကို အလွယ်တကူ လက်ခံကြလိမ့်မည်ဖြစ်ပြီး ပို၍မြန်မြန် တိုးတက်လာလိမ့်မည်။ စိတ်နှလုံးဖြူစင်သူများသည် ဆင်းရဲဒုက္ခများစွာကို မတွေ့ကြုံမခံစားရသော်လည်း သင့်တွင် အလွန်ပြင်းထန်သော ခံစားချက်များရှိကြသည်၊ သင်သည် ဇီဇာကြောင်လွန်းသည်၊ ပြီးလျှင် သင်သည် ဘုရားသခင်ကို အစဉ်သဖြင့် တောင်းဆိုချက်များ ပြုသည်၊ ထို့ကြောင့် သင်သည် သမ္မာတရားကို လက်ခံရာတွင် ကြီးမားသော ခလုတ်တံသင်းများကို ရင်ဆိုင်ကြုံတွေ့ရပြီး သင်၏ အသက်တာ တိုးတက်မှုသည် နှေးကွေးစွာ ရှေ့ဆက်သည်။ လူအချို့သည် အခြားသူများက ၎င်းတို့ကို မည်သို့ တိုက်ခိုက်ပြီး ဖယ်ကြဉ်ထားပါစေ ၎င်းတို့က မပြောင်းလဲဘဲ လိုက်စားကြပြီး ထိုအရာကြောင့် စိုးစဉ်းမျှပင် မထိခိုက်ပေ။ ဤကဲ့သို့သော လူများသည် စိတ်ထားမြင့်မြတ်ကြသည်၊ ထို့ကြောင့် ၎င်းတို့သည် ဆင်းရဲဒုက္ခခံစားရခြင်း အနည်းငယ်ပို၍ နည်းပါးပြီး ၎င်းတို့၏ အသက်ဝင်ရောက်မှုတွင် အနည်းငယ် ပို၍နည်းပါးသော အတားအဆီးများကို ရင်ဆိုင်ကြုံတွေ့ကြသည်။ သင်သည် ဇီဇာကြောင်ပြီး တစ်ခုမဟုတ် တစ်ခုကြောင့် အမြဲတစေ ထိခိုက်ခြင်းခံရလေသည်။ လူတစ်ဦးက သင့်ကို မနှစ်သက်သည့်ပုံစံဖြင့် ကြည့်သည်ဖြစ်စေ၊ သင့်ကို အထင်သေးသည်ဖြစ်စေ၊ လျစ်လျူရှုသည် ဖြစ်စေ၊ ဘုရားသခင် ပြောသည့်အရာက သင်၏ ဒဏ်ရာဟောင်းကို ပိုမိုပြင်းထန်စေသည်ဖြစ်စေ၊ ဘုရားသခင်ပြောသည့် မည်သည့်စကားက သင်၏ စိတ်နှလုံးကို ထိုးဖောက်ပြီး သင်၏ မိမိကိုယ်ကို လေးစားမှုအား ထိခိုက်စေသည်ဖြစ်စေ၊ ဘုရားသခင်က မည်သည့်ကောင်းသောအရာများကို အခြားသူတစ်ဦးကို ပေးပြီး သင့်ကိုမပေးသည်ဖြစ်စေ သင်သည် အပျက်သဘောဆောင်လာပြီး ဘုရားသခင်ကိုပင် အထင်လွဲနိုင်သည်။ ဤကဲ့သို့သောလူများသည် ဇီဇာကြောင်ပြီး အနည်းငယ် အသိခေါက်ခက် အဝင်နက်လေ၏။ လူတစ်ဦးက ၎င်းတို့အပေါ် သမ္မာတရားအား မည်သို့မိတ်သဟာယဖွဲ့သည်ဖြစ်စေ၊ ၎င်းတို့သည် လက်ကို မခံကြဘဲ ၎င်းတို့၏ ပြဿနာများသည် ဖြေရှင်းမရဘဲ ဖြစ်သွားလိမ့်မည်။ ဤကဲ့သို့သောလူများသည် ကိုင်တွယ်ဖြေရှင်းဖို့ အခက်ခဲဆုံးဖြစ်ကြသည်။

“ကျွန်တော် တစ်ခုခုလုပ်ရင်းနဲ့ အမှားလုပ်ခဲ့မိတယ်။ နောက်ပိုင်းမှာ ဆင်းရဲဒုက္ခတချို့ကို ဖြတ်ကျော်ပြီးတဲ့နောက်မှာ နားလည်မှုနည်းနည်းကို ကျွန်တော် ရလာခဲ့တယ်” ဟူ၍ ဤနည်းဖြင့် သင်တို့ မိတ်သဟာယဖွဲ့ကြသည်ကို ငါ မကြာခဏ ကြားရသည်။ လူအများစုတွင် ဤကဲ့သို့သော အတွေ့အကြုံမျိုး ရှိခဲ့ဖူးကြသည်၊ ဤအတွေ့အကြုံသည် အလွန်ပေါ့တန်သည်။ ဤအနည်းငယ်သောနားလည်မှုသည် နှစ်ပေါင်းများစွာ ကြာအောင် အတွေ့အကြုံများကို ကြုံတွေ့ခံစားရပြီးသည့်နောက်ပိုင်းတွင် ရောက်လာနိုင်သည်။ ပြီးလျှင် လူများသည် ဆင်းရဲဒုက္ခများစွာကို တွေ့ကြုံရနိုင်ပြီး ဤအနည်းငယ်မျှသော နားလည်မှုနှင့် ပြောင်းလဲခြင်းကို ရဖို့အတွက်သက်သက်ဖြင့် ခက်ခဲကြမ်းတမ်းပြီး မနှစ်မြို့ဖွယ်ကောင်းသော အတွေ့အကြုံကို ဖြတ်သန်းခဲ့ရသည်မှာ ဖြစ်ကောင်း ဖြစ်နိုင်သည်။ သနားဖွယ် ကောင်းလိုက်လေခြင်းပါတကား။ လူများ၏ယုံကြည်မှုထဲတွင် မစင်ကြယ်မှုများစွာရှိကြသည်။ ဘုရားသခင်အပေါ် ယုံကြည်ဖို့ ၎င်းတို့အတွက် ကြိုးပမ်းအားထုတ်မှုများစွာ အလွန်လိုအပ်သည်။ ယနေ့ခေတ်အထိ လူတိုင်း၏အတွင်းတွင် မစင်ကြယ်မှုများစွာ ရှိနေဆဲပင်။ ပြီးလျှင် ၎င်းတို့သည် ဘုရားသခင်ကို တောင်းဆိုမှုများစွာ ပြုလုပ်နေကြဆဲဖြစ်သည်။ ဤသည်မှာ လူသား၏မစင်ကြယ်မှုများအားလုံးဖြစ်ကြသည်။ ထိုကဲ့သို့သော မစင်ကြယ်မှုများကို ပိုင်ဆိုင်ခြင်းသည် ၎င်းတို့၏ လူ့သဘာဝနှင့်ပတ်သက်၍ ပြဿနာတစ်ခုရှိကြောင်း သက်သေဖြစ်သည်။ ပြီးလျှင် ၎င်းတို့၏ ဖောက်ပြန်ပျက်စီးသော စိတ်သဘောထားများကို ထုတ်ဖော်ပြခြင်းတစ်ခုဖြစ်သည်။ လူသားက ဘုရားသခင်ကို ပြုသော တောင်းဆိုချက်များအနက် သင့်တော်သောတောင်းဆိုချက်များနှင့် မသင့်တော်သော တောင်းဆိုချက်များအကြားတွင် ကွာခြားချက်တစ်ခုရှိသည်။ ဤသည်ကို ရှင်းလင်းပြတ်သားစွာ ပိုင်းခြားသိမြင်ရမည်။ မည်သည့်နေရာတွင် လူသားက ရပ်တည်သင့်ပြီး မည်သည့်အသိစိတ်ကို လူသားက ပိုင်ဆိုင်သင့်သည်ဆိုသည်ကို လူတစ်ဦးသည် ရှင်းရှင်းလင်းလင်း သိရမည်။ လူအချို့သည် လူများရှေ့တွင် ငါ၌ မည်သည့်မျက်နှာအမူအရာမျိုး ရှိသည်ဆိုသည်ကို အစဉ်သဖြင့် အာရုံစိုက်နေကြောင်းနှင့် မည်သူ့ကို ဘုရားသခင်က ကောင်းစွာ ဆက်ဆံပြီး မည်သူ့ကို ဆိုးရွားစွာ ဆက်ဆံသည်ကို အစဉ်သဖြင့် လေ့လာနေကြောင်းကို ငါသတိထားမိပြီးဖြစ်သည်။ အကယ်၍ ၎င်းတို့ကို ဘုရားသခင်က အပျက်သဘောဆောင်သော မျက်နှာအမူအရာတစ်ခုဖြင့် ကြည့်နေသည်ကို ၎င်းတို့ မြင်ပါက သို့မဟုတ် ၎င်းတို့ကို သူက ဖော်ထုတ်‌သည်ကိုဖြစ်စေ၊ ပြစ်တင်ရှုတ်ချသည်ကိုဖြစ်စေ ကြားပါက၊ ၎င်းတို့သည် ယင်းကို လက်မလွှတ်နိုင်ကြပါ။ ၎င်းတို့နှင့် သင်မည်မျှမိတ်သဟာယပြုပါစေ အလုပ်မဖြစ်သကဲ့သို့ အချိန်မည်မျှများများ ကုန်လွန်သွားပါစေ ၎င်းတို့သည် နောက်ပြန် မလှည့်နိုင်တော့ပေ။ ထိုပြောပြီးသွားသော စကားတစ်ခွန်းကို ဖက်တွယ်ထားပြီး ၎င်းတို့အပေါ် ဘုရားသခင်၏သဘောထားကို ဆုံးဖြတ်ဖို့ ထိုစကားကို သုံးခြင်းဖြင့် မိမိတို့ကိုယ်ကိုအပေါ် စီရင်ချက်ချသည်။ ၎င်းတို့သည် အပျက်သဘောဆောင်ခြင်းတွင် သာယာနေပြီး တစ်စုံတစ်ယောက်က ၎င်းတို့အပေါ် သမ္မာတရားကို မည်မျှမိတ်သဟာယပြုပါစေ လက်ခံဖို့ ၎င်းတို့ ဆန္ဒမရှိကြပေ။ ဤသည်မှာ ယုတ္တိမတန်ပေ။ လူသားသည် ဘုရားသခင်၏ ဖြောင့်မတ်သော စိတ်သဘောထားနှင့်ပတ်သက်၍ သိမြင်မှု စိုးစဉ်းမျှပင် မရှိကြောင်းနှင့် လုံးဝ နားမလည်ကြောင်း သိသာထင်ရှားသည်။ လူများသည် နောင်တရဖို့နှင့် ပြောင်းလဲဖို့ တတ်နိုင်သရွေ့ ၎င်းတို့အပေါ် ဘုရားသခင်၏ သဘောထားသည်လည်း ပြောင်းလဲလိမ့်မည်။ အကယ်၍ ဘုရားသခင်အပေါ် သင်၏သဘောထားက မပြောင်းလဲပါက သင့်အပေါ် ဘုရားသခင်၏သဘောထားကရော ပြောင်းလဲနိုင်မည်လော။ အကယ်၍ သင်ပြောင်းလဲပါက သင့်ကို ဘုရားသခင်ဆက်ဆံသည့်နည်းလမ်းသည် ပြောင်းလဲလိမ့်မည်၊ သို့သော် အကယ်၍ သင်မပြောင်းလဲပါက သင့်အပေါ် ဘုရားသခင်၏ဆက်ဆံပုံကလည်း ပြောင်းလဲမည် မဟုတ်ပေ။ လူအချို့တွင် ဘုရားသခင် မုန်းတီးသည့်အရာ၊ သူနှစ်သက်သည့်အရာ၊ သူ၏ဝမ်းမြောက်မှု၊ ဒေါသ၊ ဝမ်းနည်းမှုနှင့် ပျော်ရွှင်မှု၊ သူ၏အနန္တတန်ခိုးနှင့် ပြီးလျှင် သူ၏ ဉာဏ်ပညာတို့အကြောင်း သိမြင်မှု မရှိကြသေးပါ။ ထို့ပြင် ၎င်းတို့သည် သိမြင်နားလည်နိုင်သော အသိပညာအချို့နှင့်ပတ်သက်၍ပင် မပြောနိုင်ကြပါ။ ဤသည်မှာ လူသားကို ကိုင်တွယ်ဖို့ အလွန်ခက်ခဲအောင် လုပ်သည့်အရာ ဖြစ်သည်။ ဘုရားသခင်က သူ့ကို ပြောသည့် ရည်ရွယ်ချက်ကောင်း ရှိသော စကားများအားလုံးကို လူသားသည် မေ့လျော့သော်လည်း အကယ်၍ ဘုရားသခင်သည် ကြမ်းတမ်းခက်ထန်သော မှတ်ချက်တစ်ခု ပေးလိုက်ရုံမျှဖြင့် သို့မဟုတ် ပြုပြင်ခြင်း သို့မဟုတ် တရားစီရင်ခြင်းနှင့်ဆိုင်သော ဝါကျတစ်ကြောင်းကို ပြောလိုက်ရုံမျှဖြင့် ထိုအရာက လူသား၏စိတ်နှလုံးကို ထိုးဖောက်လေသည်။ လူများသည် စိတ်ပျက်ဝမ်းနည်းလာစဉ်၊ အပျက်သဘောဆောင်လာစဉ်နှင့် တရားစီရင်ခြင်း၊ ပြုပြင်ခြင်းနှင့်ပတ်သက်သော စကားများကို ကြားရာတွင် ဣန္ဒြေမဆည်နိုင်ဖြစ်လာသော်လည်း အပြုသဘောဆောင်သည့် လမ်းညွှန်သောစကားများကိုမူ အဘယ်ကြောင့် အလေးအနက် မခံယူကြသနည်း။ နောက်ဆုံးတွင် ၎င်းတို့ မပြောင်းလဲမီ လေးလေးနက်နက် ဆင်ခြင်ကြည့်ရှုဖို့ အချိန်အကြာကြီး ကြာကောင်းကြာနိုင်သည်။ ပြီးလျှင် ဘုရားသခင်၏နှစ်သိမ့်မှုပေးသော စကားလုံးအချို့နှင့် ဤသည်ကို ပေါင်းစပ်ပြီးနောက်တွင်မှ ၎င်းတို့ အသိတရား ရလာလိမ့်မည်။ ထိုနှစ်သိမ့်မှုပေးသောစကားလုံးများ မပါဘဲ ၎င်းတို့၏ အပျက်သဘောဆောင်ခြင်းမှ ရုန်းထွက်လာနိုင်မည် မဟုတ်ချေ။ လူများသည် ဘုရားသခင်၏ အမှုတော်ကို တွေ့ကြုံခါစရှိသေးသောအခါ ၎င်းတို့တွင် ဘုရားသခင်နှင့်ပတ်သက်၍ မှားယွင်းသော သိမြင်မှုနှင့် အထင်လွဲခြင်းများစွာ ရှိကြသည်။ ၎င်းတို့ မှန်ကန်သည်ဟု ၎င်းတို့သည် အစဉ်သဖြင့် ယုံကြည်ကြသည်။ ၎င်းတို့၏ ကိုယ်ပိုင်စိတ်ကူးများကို အစဉ်သဖြင့် တွယ်ဖက်ထားသည်။ ပြီးလျှင် အခြားလူများပြောသည့်အရာများကို ၎င်းတို့ လက်မခံကြပါ။ အတွေ့အကြုံ သုံးနှစ်မှ ငါးနှစ်အထိ ရှိပြီးသည့်နောက်မှသာ ၎င်းတို့သည် တဖြည်းဖြည်း နားလည်စပြုလာသည်၊ ထိုးထွင်းအမြင်ရစပြုလာသည်၊ ၎င်းတို့ မှားနေကြောင်းကို သတိပြုမိစပြုလာပြီး ၎င်းတို့ကို ကိုင်တွယ်ဖြေရှင်းဖို့ မည်မျှခက်ခဲကြောင်း သိမြင်စပြုလာသည်။ ထိုအခါမှသာ ၎င်းတို့သည် အရွယ်ရောက်ဘိသကဲ့သို့ဖြစ်သည်။ ၎င်းတို့သည် အတွေ့အကြုံပိုရလာသောကြောင့် ဘုရားသခင်ကို ၎င်းတို့ နားလည်လာသည်။ ထို့ပြင် ဘုရားသခင်နှင့် ပတ်သက်သည့် ၎င်းတို့၏အထင်လွဲခြင်းများလည်း လျော့ပါးသွားသည်၊ ၎င်းတို့သည် စောဒကမတက်တော့ပါ။ ထို့ပြင် ၎င်းတို့တွင် ဘုရားသခင်အပေါ် သာမန်ယုံကြည်ခြင်း ရှိစပြုလာသည်။ အတိတ်ကာလနှင့် နှိုင်းယှဉ်လျှင် ၎င်းတို့၏ ဝိညာဉ်ရင့်ကျက်မှုသည် အရွယ်ရောက်သူတစ်ယောက်နှင့် ပို၍တူလာသည်။ ၎င်းတို့သည် ကလေးများကဲ့သို့ ဖြစ်လေ့ရှိခဲ့သည်။ စိတ်ကောက်တတ်သည်၊ အပျက်သဘောဆောင်တတ်သည်၊ ပြီးလျှင် အချို့အချိန်များတွင် ဘုရားသခင်နှင့် ခပ်ခွာခွာနေကြသည်။ ထိုထိုသောအချို့ကိစ္စများနှင့် ရင်ဆိုင်ရသောအခါ ၎င်းတို့သည် စောဒကတက်ကောင်း တက်နိုင်သည်။ ဘုရားသခင်၏ အချို့သောနှုတ်ကပတ်တော်များသည် ၎င်းတို့၏ အသစ်ဆုံးသော အယူအဆနှင့်ဆိုင်သောအကြောင်းအရာ ဖြစ်လာနိုင်သည်။ ထို့ပြင် အချို့အချိန်များတွင် ဘုရားသခင်ကို ၎င်းတို့ သံသယဝင်စပြုမိနိုင်သည်။ ဤသည်မှာ လူတစ်ဦး၏ ဝိညာဉ်ရင့်ကျက်မှု နည်းပါးလွန်းသောအခါ ဖြစ်တတ်ပုံဖြစ်သည်။ ယခုတွင် ၎င်းတို့သည် အတွေ့အကြုံများစွာ ရခဲ့ပြီး နှစ်ပေါင်းများစွာကြာအောင် ဘုရားသခင်၏ နှုတ်ကပတ်တော်များကို ဖတ်ခဲ့ကြသည်။ ၎င်းတို့သည် တိုးတက်မှုရှိလာပြီး ယခင်ကထက် များစွာ ပို၍တည်ငြိမ်လာခဲ့ကြသည်။ ဤအရာအားလုံးမှာ သမ္မာတရားကို နားလည်ခြင်း၏ ရလဒ်ပင်ဖြစ်သည်။ ယင်းမှာ ၎င်းတို့အတွင်းတွင် သမ္မာတရားက အကျိုးသက်ရောက်ခြင်း ဖြစ်သည်။ ထို့ကြောင့် သမ္မာတရားကို လူများ နားလည်ပြီး ၎င်းကို လက်ခံနိုင်သရွေ့ ၎င်းတို့ မဖြေရှင်းနိုင်သောအခက်အခဲဟူ၍ မရှိပေ။ ပြီးလျှင် ၎င်းတို့ မည်မျှကြာအောင် တွေ့ကြုံရပါစေ တစ်ခုခုကို ၎င်းတို့ အစဉ်သဖြင့် ရနေလိမ့်မည်။ အကယ်၍ ၎င်းတို့သည် လုံလောက်သည့်အချိန်တစ်ခု ကြာသည့်တိုင်အောင် အတွေ့အကြုံ မရှိပါက မဖြစ်သည်မှာ အမှန်ပေ။ သို့သော် ၎င်းတို့၏ အတွေ့အကြုံတစ်ခုချင်းစီမှနေ၍ အကျိုးကျေးဇူးကို ခံစားရသရွေ့ ၎င်းတို့သည် အသက်တာတွင် လျင်မြန်စွာ ကြီးထွားလာလိမ့်မည်။

ခေါင်းဆောင်၊ အမှုဆောင်၊ သို့မဟုတ် ကြီးကြပ်သူတစ်ဦး ဖြစ်လာဖို့ သို့မဟုတ် အရေးကြီးသောတာဝန်များကို ထမ်းဆောင်ရန် ယခု သင်တို့သည် ပျိုးထောင်ခံနေရခြင်း ဖြစ်သည်ဟူသည့်အချက်က သင်တို့တွင် ပို၍ကြီးသော ဝိညာဉ်ရင့်ကျက်မှုတစ်ခုရှိသည်ဟု သက်သေပြနေခြင်း မဟုတ်ပေ။ ဆိုလိုသည်မှာ သင်တို့သည် သာမန်လူထက် အနည်းငယ် ပို၍ကောင်းသော အစွမ်းအစရှိကြကြောင်း၊ သင်၏လိုက်စားခြင်းတွင် သင်သည် အနည်းငယ် ပို၍ စိတ်ထက်သန်ကြောင်းနှင့် သင့်ကို ပျိုးထောင်ရာတွင် တန်ဖိုးအနည်းငယ် ပို၍ရှိကြောင်းတို့ဖြစ်သည်။ ယင်းက သင်တို့သည် ဘုရားသခင်ထံ ကျိုးနွံနာခံနိုင်ကြောင်း သို့မဟုတ် ဘုရားစီစဉ်ညွှန်ကြားမှုများ၏ ပြုသမျှကိုခံနိုင်ကြောင်း သေချာပေါက် မဆိုလိုပေ။ ထို့ပြင် ၎င်းက သင်တို့သည် သင်တို့၏ ရှေ့ရေးများနှင့် မျှော်လင့်ချက်များကို ဘေးသို့ဖယ်ထားပြီဟု မဆိုလိုပေ။ လူများတွင် ယခုထက်ထိတိုင် ဤကဲ့သို့သော အသိစိတ်မျိုး မရှိကြသေးပေ။ သင်တို့သည် အလုပ်လုပ်နေစဉ်အတွင်း ကောင်းချီးများရဖို့ ရည်ရွယ်ချက်များနှင့် ပြင်းပြသောဆန္ဒများနှင့် လူသား၏ အယူအဆများနှင့် စိတ်ကူးစိတ်သန်းများပင်လျှင်အပါအဝင် အပျက်သဘောဆောင်ခြင်း အချို့ကို သင်တို့နှင့်အတူ သယ်ဆောင်နေကြသေးသည်။ တစ်ချိန်တည်းတွင် သင်၏ အလုပ်ကို လုပ်ဆောင်ရာတွင် ရွှင်ပျသော လိုလားမှုကြောင့် လုပ်ရမည့်အစား အတိတ်မှ အပြစ်များကို ကောင်းမှုများမှတစ်ဆင့် သင်သည် အပြစ်ဖြေနေသည့်အလား သင့်အလုပ်ကို လုပ်နေစဉ်အတွင်း အချို့သော စိတ်ခံစားချက်ဆိုင်ရာ ဝန်ထုပ်ဝန်ပိုးများကို သင် သယ်ဆောင်သည်။ ဘုရားသခင်က သင့်ကို မည်သို့ဆက်ဆံသည်ဖြစ်စေ သူ၏ ရည်ရွယ်ချက်များနှင့် တောင်းဆိုချက်များနှင့်အညီ ပြုမူဆောင်ရွက်ဖို့ကိုသာ အလေးထားသည့်နေရာသို့လည်း သင်လည်း မရောက်ရှိသေးပေ။ ဤသည်ကို သင်တို့ စွမ်းဆောင်ရယူနိုင်သလော။ လူများတွင် ဤအသိစိတ် မရှိကြပေ။ “ကျွန်တော့်အပေါ်ကို ဘုရားသခင်က ဘယ်လိုသဘောထားမျိုး အတိအကျ ထားရှိသလဲ။ ဘုရားသခင်အတွက် အစေခံမှုပေးဖို့ သူက ကျွန်တော့်ကို အသုံးချနေတာလား၊ ဒါမှမဟုတ် ကျွန်တော့်ကို ကယ်တင်နေပြီး စုံလင်စေအောင် လုပ်နေတာလား” ဟု တွေးရင်း ၎င်းတို့အားလုံးသည် ဘုရားသခင်ကို အဓိပ္ပာယ်ကောက်ဖို့ ကြိုးစားချင်ကြသည်။ ဤနည်းအတိုင်း ၎င်းတို့အားလုံးသည် အဓိပ္ပာယ်ကောက်ဖို့ ကြိုးစားချင်ကြသည်။ ပြောဖို့ ၎င်းတို့ မဝံ့ရဲရုံသာဖြစ်သည်။ ပြောဖို့ ၎င်းတို့ မဝံ့ရဲဟူသောအချက်က ၎င်းတို့ကို စိုးမိုးခြယ်လှယ်နေသော စိတ်ကူးတစ်ခု ရှိနေသေးကြောင်းကို သက်သေပြသည်။ “အဲဒီအကြောင်းကို ပြောရတာက အဓိပ္ပာယ်မရှိဘူး။ အဲဒါက ကျွန်တော့်ရဲ့ သဘာဝပဲ။ အဲဒါကို ပြောင်းလဲဖို့ မဖြစ်နိုင်ဘူး။ ဆိုးတဲ့အရာတစ်ခုခုကို လုပ်တာက ရှောင်နိုင်သရွေ့ လုံလောက်ပါပြီ။ ကိုယ့်ကိုယ်ကိုယ် အလွန်အကျွံ မတောင်းဆိုဘူး” ဟူ၍ဖြစ်သည်။ ၎င်းတို့၏ တာဝန်များကို ၎င်းတို့ ထမ်းဆောင်သည့်အခါတွင် ဝတ်ကျေတမ်းကျေ ဖြစ်သော တွေးခေါ်ပုံတစ်ခုကိုလည်း ထားရှိစဉ် နိမ့်နိုင်သမျှအနိမ့်ဆုံးနေရာအထိ မိမိတို့ကိုယ်ကို ဘောင်ခတ်ထားကြကာ နောက်ဆုံးတွင် အဆုံးသတ်ရောက်ရာ၌ တိုးတက်မှုမရှိချေ။ အကြိမ်အနည်းငယ်မျှ မိတ်သဟာယ ပြုပြီးသည့်နောက်ပိုင်းတွင်မှသာ သင်တို့အားလုံးသည် သမ္မာတရား အနည်းငယ်ကို နားလည်စပြုကြပြီး သမ္မာတရားစစ်မှန်မှုနှင့်ပတ်သက်၍ အနည်းငယ်ကို သိလာကြသည်။ သင်အသုံးချခံရသည်ဖြစ်စေ၊ အသုံးချမခံရသည်ဖြစ်စေ၊ သင့်အပေါ် ဘုရားသခင်က မည်သည့်သဘောထားရှိသည်ဖြစ်စေ ဤအရာများသည် အရေးမကြီးချေ။ သင်၏ တက်ကြွသော အားထုတ်မှုများ၊ သင်လျှောက်ဖို့ ရွေးချယ်လိုက်သည့်လမ်းကြောင်းနှင့် သင်သည် နောက်ဆုံးတွင် ပြောင်းလဲနိုင်ခြင်း ရှိမရှိဆိုသည်တို့အပေါ်တွင် အဓိက မူတည်နေသည်။ ဤအရာများသည် အရေးအကြီးဆုံးသော အချက်များဖြစ်ကြသည်။ သင့်အပေါ်တွင် ဘုရားသခင်က မည်မျှကောင်းသောသဘောထားတစ်ခုကို ထားရှိသည်ဖြစ်စေ သင် မပြောင်းလဲလျှင် အလုပ်မဖြစ်ပါ။ အကယ်၍ သင်တစ်ခုခုကို ကြုံလာသောအချိန်တိုင်းတွင် မှောက်မှားမိပါက၊ သင်သည် စိုးစဉ်းမျှပင် သစ္စာမရှိပါက သင့်အပေါ်တွင် ဘုရားသခင်က မည်မျှကောင်းသော သဘောထားတစ်ခုကို ထားရှိသည်ဖြစ်စေ ၎င်းက အသုံးဝင်မည်မဟုတ်ပါ။ အရေးကြီးသည့်အရာမှာ သင်လျှောက်ဖို့ ရွေးချယ်သည့် လမ်းကြောင်းဖြစ်သည်။ အတိတ်တွင် ဘုရားသခင်က သင့်ကို ကျိန်ဆဲကောင်း ကျိန်ဆဲနိုင်ပြီး အမုန်းစကားများကို ပြောမိကာ စက်ဆုပ်ခဲ့နိုင်သော်လည်း ယခုတွင် သင်သည် ပြောင်းလဲခဲ့ပြီဖြစ်ပါက သင့်အပေါ် ဘုရားသခင်၏ သဘောထားသည်လည်း ပြောင်းလဲသွားလိမ့်မည်။ လူများသည် အစဉ်သဖြင့် ကြောက်ရွံ့နေကြသည်၊ စိတ်တထင့်ထင့် ဖြစ်နေကြသည်၊ ပြီးလျှင် စစ်မှန်သောယုံကြည်ခြင်း ကင်းမဲ့နေကြသည်။ ယင်းက ၎င်းတို့သည် ဘုရားသခင်၏ ရည်ရွယ်ချက်များကို နားမလည်ကြောင်းကို ပြသသည်။ ယခု သင်တို့တွင် နားလည်ခြင်းအချို့ ရှိပြီဖြစ်သဖြင့် အနာဂတ်တွင် သင့်ထံ ကိစ္စများ ဖြစ်လာသောအခါ သင်သည် အပျက်သဘောဆောင်လာပြီး အားနည်းနေဦးမည်လော။ သမ္မာတရားကို သင်လက်တွေ့လုပ်ဆောင်ပြီး သင်၏ သက်သေခံချက်အတွက် ခိုင်မြဲစွာ ရပ်တည်နေနိုင်ဦးမည်လော။ ဘုရားသခင်ထံ သင်သည် စစ်မှန်စွာ ကျိုးနွံနာခံနိုင်မည်လော။ အကယ်၍ ဤအရာများကို သင် စွမ်းဆောင်ရယူနိုင်ပါက သင့်တွင် သာမန်လူ့သဘာဝ၏ အသိစိတ်ရှိလိမ့်မည်။ သင်တို့တွင် ယခု လူသား၏ ဖောက်ပြန်ပျက်စီးသော စိတ်သဘောထားများနှင့် ဘုရားသခင်၏ကယ်တင်ခြင်းနှင့် ရည်ရွယ်ချက်တို့အကြောင်း သိမြင်မှု မရှိသလော။ အနည်းဆုံးအနေဖြင့် သင့်တွင် အကြမ်းဖျင်းစိတ်ကူးတစ်ခု ရှိသည်။ တစ်နေ့တွင် သမ္မာတရား၏ သွင်ပြင်လက္ခဏာများ အားလုံး၏စစ်မှန်မှုများအချို့ဆီသို့ သင်ဝင်ရောက်နိုင်သောအခါ သင်သည် သာမန်လူ့သဘာဝအတိုင်း လုံးလုံးလျားလျား အသက်ရှင်နေထိုင်နိုင်လိမ့်မည်။

ကောက်နုတ်ချက် (၄)

သမ္မာတရားကို လိုက်စားခြင်း၏ အရေးအကြီးဆုံးသော အပိုင်းမှာ ဘုရားနှုတ်ကပတ်တော်များအား ဖတ်ရှုခြင်းကို အာရုံစိုက်ရန်ဖြစ်သည်။ ဘုရားနှုတ်ကပတ်တော်များကို ဖတ်ရှုခြင်းမှ လူတစ်ဦး ရရှိနိုင်သည့် ပမာဏသည် ထိုသူ၏ သဘောပေါက်နားလည်နိုင်စွမ်းပေါ်တွင် မူတည်သည်။ လူတိုင်း ဘုရားနှုတ်ကပတ်တော်များကို ဖတ်ရှုသော်ငြားလည်း အချို့က စစ်မှန်သော အဓိပ္ပာယ်ကို သဘောပေါက်နိုင်ပြီး ယင်းတို့ထဲတွင် အလင်းကို ရှာတွေ့နိုင်ကာ ဘုရားနှုတ်ကပတ်တော်များကို ၎င်းတို့ ဖတ်ရှုသရွေ့ တစ်စုံတစ်ခုကို ရရှိလိမ့်မည် ဖြစ်သည်။ သို့ရာတွင် အခြားလူများမှာမူ ထိုသို့ မဟုတ်ကြချေ။ ၎င်းတို့သည် ဘုရားနှုတ်ကပတ်တော်များကို ဖတ်ရှုသည့်အခါတွင် အယူဝါဒများကို နားလည်ခြင်းကိုသာ အာရုံစိုက်ကြသည်။ ဤအရာ၏ ရလဒ်မှာ ဘုရားနှုတ်ကပတ်တော်များကို နှစ်အနည်းငယ်ကြာ ဖတ်ရှုပြီးသည့်နောက်တွင် ၎င်းတို့သည် အယူဝါဒများစွာကို နားလည်သည့်တိုင် ပြဿနာများကို ၎င်းတို့ တွေ့ကြုံရသည့်အခါတိုင်း မဖြေရှင်းနိုင်ကြပေ။ ၎င်းတို့ သိရှိခဲ့သည့်အရာတစ်ခုမျှ အသုံးမတည့်ပေ။ ဤနေရာတွင် မည်သည့်အရာ ဖြစ်ပျက်နေသနည်း။ လူများအားလုံးသည် ဘုရားနှုတ်ကပတ်တော်များကို ဖတ်ရှုနေလင့်ကစား ရလဒ်များက ကွဲပြားခြားနားသည်။ သမ္မာတရားကို ချစ်သည့်သူများသည် ယင်းကို လက်ခံနိုင်သော်လည်း သမ္မာတရားကို မချစ်သည့်သူများကမူ ဘုရားနှုတ်ကပတ်တော်များကို ဖတ်ရှုလျှင်ပင် ယင်းကို လက်ခံရန် လိုလားခြင်း မရှိကြပေ။ ၎င်းတို့သည် မည်သည့်ပြဿနာများကို ကြုံတွေ့ရပါစေ ဘုရားနှုတ်ကပတ်တော်များ၌ သမ္မာတရားကို ရှာဖွေကြလိမ့်မည် မဟုတ်ချေ။ အတွေ့အကြုံအနည်းငယ် ရှိသူတို့သည် ဘုရားနှုတ်ကပတ်တော်များကို ၎င်းတို့ ဖတ်ရှုသည့်အခါတွင် လက်တွေ့ကျသော အမှုကိစ္စအချို့ကို ဆွေးနွေးနိုင်ပြီး သမ္မာတရားနှင့်ပတ်သက်သော ၎င်းတို့၏ လက်တွေ့ကျသော အသိပညာအကြောင်း ပြောနိုင်ကြသည်။ ဤသည်မှာ သမ္မာတရားကို နားလည်ခြင်း ဖြစ်သည်။ အတွေ့အကြုံ မရှိသည့်သူများကမူ ဘုရားနှုတ်ကပတ်တော်၏ တိုက်ရိုက်အဓိပ္ပာယ်ကိုသာ နားလည်သဘောပေါက်ကြပြီး အသိပညာနှင့် အတွေ့အကြုံ စိုးစဉ်းမျှ မရှိကြပေ။ ဤအရာကို သမ္မာတရားကို နားလည်ခြင်းဟု မှတ်ယူ၍မရပေ။ ခေါင်းဆောင်အချို့က ၎င်းတို့သည် အထူးသဖြင့် သမ္မာတရားဖြင့် ထောက်ပံ့ပေးရန် အသင်းတော်ကို သွားခြင်းဖြစ်သည်ဟု အခြားသူများကို ၎င်းတို့က မကြာခဏ ပြောကြသည်။ ဤစကားက မှန်ကန်သလော။ “သမ္မာတရားဖြင့် ထောက်ပံ့ပေးရန်” ဟူသည့် စကားများကို ပေါ့တန်စွာ မပြောဆိုသင့်ပေ။ မည်သူက သမ္မာတရားကို ပိုင်ဆိုင်သနည်း။ မိမိသည် သမ္မာတရာ ပံ့ပိုးပေးပါသည်ဟု မည်သူက အခိုင်အမာဆိုဝံ့သနည်း။ ဤအခိုင်အမာပြောဆိုချက်သည် အလွန် ဟိတ်ဟန်များသည် မဟုတ်လော။ ဘုရားသခင်ကို သင်ယုံကြည်ပြီး သူ့နောက်လိုက်သည့်အခါတွင် သင်သည် သမ္မာတရားကို လက်ခံပြီး လိုက်စားသည့်သူတစ်ဦးမျှသာ ဖြစ်ချေ၏။ ဤအရာကို သင်လုပ်ဆောင်နိုင်လျှင် ယင်းမှာ အတော်အတန် ကောင်းမွန်ပြီးသားဖြစ်သည်။ မည်သူတစ်ဦးတစ်ယောက်မျှ သမ္မာတရားကို မပိုင်ဆိုင်သောကြောင့် လူတစ်ဦးသည် သမ္မာတရားအချို့ကို နားလည်နိုင်ပြီး သမ္မာတရားနှင့်ပတ်သက်သော အချို့သော အတွေ့အကြုံနှင့် အသိပညာအကြောင်းကို ပြောဆိုနိုင်လျှင်ပင် ထိုသူသည် သမ္မာတရားကို ပံ့ပိုးပေးသည်ဟု ပြော၍မရနိုင်ပေ။ အချို့သော အတွေ့အကြုံနှင့် အသိပညာတို့အကြောင်း ပြောဆိုခြင်းကို သမ္မာတရားဖြင့် ပံ့ပိုးပေးခြင်းဟု အဘယ်သို့များ ခေါ်ဝေါ်နိုင်သနည်း။ သို့ဖြစ်၍ ခေါင်းဆောင်များနှင့် အမှုဆောင်များကို ရေလောင်းခြင်းအလုပ်ကို ထမ်းဆောင်ခြင်းနှင့် အသင်းတော်ရှိ ညီအစ်ကိုမောင်နှမများ၏ အသက်ဝင်ရောက်ခြင်းအတွက် အထူးတလည် တာဝန်ရှိခြင်း အဖြစ်သာ သရုပ်ဖော်ပြနိုင်လေသည်။ ၎င်းတို့သည် သမ္မာတရားကို ပံ့ပိုးပေးနေသည်ဟု ပြောဆို၍မရနိုင်ပေ။ လူတစ်ဦးသည် ဝိညာဉ်ရင့်ကျက်မှုအချို့ ရှိလျှင်ပင် ထိုသူသည် အခြားသူများကို သမ္မာတရားဖြင့် ပံ့ပိုးပေးနေသည်ဟု ပြော၍မရနိုင်သေးပေ။ ဤအရာကို လုံးဝ ပြော၍မရနိုင်ပေ။ လူအယောက်မည်မျှသည် သမ္မာတရားကို နားလည်ကြသနည်း။ လူတစ်ဦး၏ ဝိညာဉ်ရင့်ကျက်မှုသည် သူက သမ္မာတရားဖြင့် ပံ့ပိုးပေးရန် အရည်အချင်းပြည့်ဝစေသလော။ တစ်စုံတစ်ဦးသည် သမ္မာတရားနှင့်ပတ်သက်သော အတွေ့အကြုံနှင့် အသိပညာရှိလျှင်ပင် ထိုသူသည် သမ္မာတရားဖြင့် ပံ့ပိုးပေးနိုင်သည်ဟု ဆို၍မရနိုင်ပေ။ ယင်းကို လုံးဝ ဆို၍မရနိုင်ပေ။ ယင်းမှာ အလွန်ပင် ကျိုးကြောင်းဆီလျော်မှု မရှိချေ။ အချို့သောလူများသည် ၎င်းတို့က သမ္မာတရားကို များစွာ နားလည်လေသည့်အလား အသင်းတော်ကို ရေလောင်းရာတွင်လည်းကောင်း၊ သမ္မာတရားဖြင့် ပံ့ပိုးပေးရာတွင်လည်းကောင်း ဂုဏ်ယူကြသည်။ သို့ရာတွင် ၎င်းတို့သည် အယောင်ဆောင် ခေါင်းဆောင်များနှင့် အန္တိခရစ်များကို ပိုင်းခြားသိမြင်နိုင်စွမ်း မရှိကြပေ။ ဤသည်မှာ ဆန့်ကျင်ကွဲလွဲနေသည် မဟုတ်လော။ တစ်စုံတစ်ဦးက သမ္မာတရားသည် မည်သည့်အရာ ဖြစ်ကြောင်း သင့်ကို မေးမြန်းပြီး သင်က “ဘုရားနှုတ်ကပတ်တော်သည် သမ္မာတရားဖြစ်သည်။ သမ္မာတရားသည် ဘုရားနှုတ်ကပတ်တော် ဖြစ်သည်” ဟု ဖြေလျှင် သင်သည် သမ္မာတရားကို နားလည်သလော။ သင်သည် စကားများနှင့် အယူဝါဒများကိုသာ ပြောဆိုနိုင်ခြင်း ဖြစ်ပြီး သမ္မာတရားဟူသည်မှာ မည်သည့်အရာဖြစ်ကြောင်းနှင့် ပတ်သက်သည့် အတွေ့အကြုံနှင့် အသိပညာ ကင်းမဲ့သောကြောင့် သင်သည် အခြားသူများအား သမ္မာတရားဖြင့် ပံ့ပိုးပေးရန် အရည်အချင်း မပြည့်မီပေ။ ယခုအချိန်တွင် ခေါင်းဆောင်များအဖြစ် အစေခံသည့်သူများအားလုံးသည် အတွေ့အကြုံ ကင်းမဲ့လေသည်။ ၎င်းတို့သည် အစွမ်းအစအနည်းငယ်နှင့် သမ္မာတရားကို လိုက်စားရန် လိုလားမှုတို့သာ ရှိ၏။ ၎င်းတို့သည် ပြုစုပျိုးထောင်ပေးရန်နှင့် လေ့ကျင့်ပေးရန် သင့်တော်သလို တာဝန်များ ထမ်းဆောင်ရာတွင် ဦးဆောင်နိုင်ကြသည်။ ၎င်းတို့က အသိပညာအချို့အကြောင်း မိတ်သဟာယပြုပေးနိုင်လျှင်ပင် ယင်းမှာ ၎င်းတို့က သမ္မာတရားဖြင့် ပံ့ပိုးပေးသည်ဟု မည်သို့များ ဆိုနိုင်သနည်း။ ခေါင်းဆောင်နှင့် အမှုဆောင်အများစုတို့သည် အသိပညာအချို့အကြောင်း ပြောဆိုနိုင်ကြသော်လည်း ယင်းမှာ ၎င်းတို့သည် သမ္မာတရား စစ်မှန်မှု ရှိသည်ဟု မဆိုလိုပေ။ အမှန်မှာမူ ၎င်းတို့သည် တရားဒေသနာများကို နှစ်ပေါင်းများစွာ နားထောင်ခဲ့ကြပြီး အပေါ်ယံ အသိပညာအနည်းငယ် ရှိကြသည်။ ၎င်းတို့သည် သမ္မာတရားနှင့်ပတ်သက်၍ မိတ်သဟာယပြုပေးရန် လိုလားနေကြပြီး အခြားသူများအတွက် အတော်အတန် အထောက်အကူ ပြုနိုင်သော်လည်း ၎င်းတို့သည် သမ္မာတရားကို ပံ့ပိုးပေးနေသည်ဟု မဆိုနိုင်ပေ။ ခေါင်းဆောင်များနှင့် အမှုဆောင်များသည် သမ္မာတရားဖြင့် ပံ့ပိုးပေးနိုင်စွမ်း ရှိကြသလော။ လုံးဝ မရှိကြပေ။ ခေါင်းဆောင်များနှင့် အမှုဆောင်များသည် တရားဟောပြီး အသင်းတော်ကို ရေလောင်းပေးကြသည်။ အရေးအကြီးဆုံးမှာ ၎င်းတို့သည် လက်တွေ့ကျသော ပြဿနာများကို ဖြေရှင်းနိုင်စွမ်းရှိရမည်ဖြစ်ကာ ယင်းသည်သာ အသင်းတော်ကို ၎င်းတို့ အမှန်တကယ် ရေလောင်းနိုင်သည့် တစ်ခုတည်းသော နည်းလမ်းဖြစ်သည်။ ယခုအချိန်တွင် ခေါင်းဆောင်နှင့် အမှုဆောင်အများစုသည် လက်တွေ့ကျသော ပြဿနာများစွာကို ဖြေရှင်းနိုင်စွမ်း မရှိကြသေးပေ။ ၎င်းတို့သည် သမ္မာတရားနှင့်သက်ဆိုင်သော အသိပညာအချို့အပေါ် မိတ်သဟာယပြုပေးနိုင်လျှင်ပင် ၎င်းတို့ပြောသည့် အရာအများစုသည် စကားများနှင့် အယူဝါဒများသာ ဖြစ်နေဆဲဖြစ်သည်။ ၎င်းတို့သည် သမ္မာတရား စစ်မှန်မှုနှင့်ပတ်သက်၍ ရှင်းလင်းစွာ မိတ်သဟာယမပြုပေးနိုင်သောကြောင့် ပြဿနာများကို အမှန်တကယ် ဖြေရှင်းနိုင်သလော။ ခေါင်းဆောင်နှင့် အမှုဆောင်အများစုသည် သဘောပေါက်နားလည်နိုင်စွမ်း အနည်းငယ်သာ ရှိပြီး လက်တွေ့ကျသော အတွေ့အကြုံများစွာ မရှိသေးပေ။ ယင်းမှာ ၎င်းတို့သည် အခြားသူများထက် သမ္မာတရားကို ပိုနားလည်ပြီး သမ္မာတရား စစ်မှန်မှု ပို၍ရှိသည်ဟု ဆိုနိုင်သလော။ ဤသည်ကို မဆိုနိုင်ပေ။ ၎င်းတို့သည် ဤသို့ဆိုရန် စံမမီကြပေ။ အချို့သော ခေါင်းဆောင်များနှင့် အမှုဆောင်များသည် ပျိုးထောင်ပေးရန် ရည်ရွယ်ချက်သက်သက်ဖြင့် ရာထူးတိုးမြှင့်ခံရခြင်း ဖြစ်သည်။ ၎င်းတို့သည် အစွမ်းအစ အနည်းငယ်ရှိကာ သဘောပေါက်နားလည်နိုင်စွမ်း အနည်းငယ် ပိုင်ဆိုင်သကဲ့သို့ ၎င်းတို့၏ မိသားစု ပတ်ဝန်းကျင်က သင့်တော်သောကြောင့် ၎င်းတို့သည် လက်တွေ့လုပ်ဆောင်ခွင့်ရှိသည်။ ယင်းမှာ တစ်စုံတစ်ဦးကို ရာထူးတိုးပေးခြင်းသည် ၎င်းအနေဖြင့် သမ္မာတရား စစ်မှန်မှုကို ပိုင်ဆိုင်ပြီး သမ္မာတရားဖြင့် ပံ့ပိုးပေးနိုင်သည့်အလား ဆိုလိုခြင်း မဟုတ်ချေ။ သမ္မာတရားကို လိုက်စားသည့်သူများသည် အခြားသူများရှေ့တွင် ဉာဏ်အလင်းပွင့်ခြင်းနှင့် အလင်းတို့ ရရှိသော်လည်း ထိုအလင်းငယ်လေးသည် သမ္မာတရား၏ စံကို မမီပေ၊ ယင်းသည် သမ္မာတရား၏ တစ်စိတ်တစ်ပိုင်း မဟုတ်ဘဲ သမ္မာတရားနှင့် ကိုက်ညီမှု ရှိခြင်းသာ ဖြစ်၏။ ဘုရားသခင် တိုက်ရိုက်ဖော်ပြသည့်အရာသာလျှင် သမ္မာတရားဖြစ်သည်။ သန့်ရှင်းသော ဝိညာဉ်တော်သည် လူများကို ၎င်းတို့၏ ဝိညာဉ်ရင့်ကျက်မှုနှင့်အညီ ဉာဏ်အလင်းပေးသောကြောင့် သန့်ရှင်းသောဝိညာဉ်တော်၏ ဉာဏ်အလင်းပေးခြင်းသည်သာလျှင် သမ္မာတရားနှင့် ကိုက်ညီသည်။ သူသည် လူများအား သမ္မာတရားကို တိုက်ရိုက်မပြောပေ။ ထိုအစား သူသည် ၎င်းတို့ ရရှိနိုင်သည့် အလင်းကို ပေးသည်။ ဤအရာကို သင်နားလည်ရမည်။ လူတစ်ဦးသည် ဘုရားနှုတ်ကပတ်တော်များအပေါ် ထိုးထွင်းအမြင်အချို့ ရှိပြီး အတွေ့အကြုံမှ အသိပညာအချို့ ရရှိလျှင် ဤအရာကို သမ္မာတရားအဖြစ် မှတ်ယူ၍ ရသလော။ မရပေ။ အများဆုံးအနေဖြင့် သူသည် သမ္မာတရားနှင့်ပတ်သက်သော နားလည်မှုအချို့ရှိ၏။ သန့်ရှင်းသော ဝိညာဉ်တော်၏ ဉာဏ်အလင်းပေးခြင်းနှင့်ဆိုင်သော စကားများသည် ဘုရားနှုတ်ကပတ်တော်များကို ကိုယ်စားမပြု၊ သမ္မာတရားကို ကိုယ်စားမပြုသကဲ့သို့ သမ္မာတရားလည်း မဟုတ်ချေ။ အများဆုံးအနေဖြင့် လူတစ်ဦးသည် သမ္မာတရားနှင့်ဆိုင်သော နားလည်မှုအချို့ရှိပြီး သန့်ရှင်းသော ဝိညာဉ်တော်အားဖြင့် အနည်းငယ် ဉာဏ်အလင်းပေးခြင်း ခံရသည်။ လူတစ်ဦးသည် သမ္မာတရားနှင့်ပတ်သက်သော နားလည်မှုအချို့ရှိပြီး ထို့နောက်တွင် အခြားသူများကို ပံ့ပိုးပေးလျှင် သူလုပ်ဆောင်သမျှသည် သူ၏ နားလည်မှုနှင့် အတွေ့အကြုံတို့ဖြင့် အခြားသူများကို ပံ့ပိုးပေးနေခြင်းသာ ဖြစ်သည်။ သူသည် အခြားသူများကို သမ္မာတရားဖြင့် ပံ့ပိုးပေးနေသည်ဟု သင်ဆို၍ မရနိုင်ပေ။ သူသည် သမ္မာတရားအပေါ် မိတ်သဟာယပြုပေးနေသည်ဟု သင်ဆိုလျှင် အဆင်ပြေသည်။ ဤသည်မှာ သင့်တင့်လျောက်ပတ်သော သရုပ်ဖော်ချက် ဖြစ်သည်။ ငါ အဘယ်ကြောင့် ဤအရာကို ပြောသနည်း။ အကြောင်းမှာ သင်မိတ်သဟာယပြုနေသည့် အရာသည် သမ္မာတရားနှင့်ပတ်သက်သည့် သင်၏ နားလည်မှု ဖြစ်သောကြောင့်တည်း။ ယင်းက သမ္မာတရားကိုယ်၌နှင့် မညီမျှပေ။ ထို့ကြောင့် သင်သည် နားလည်မှုနှင့် အတွေ့အကြုံအချို့ကို မိတ်သဟာယပြုပေးနေခြင်း ဖြစ်သည်ဟုသာ ဆိုနိုင်သည်။ သင်သည် သမ္မာတရားကို ပံ့ပိုးပေးနေသည်ဟု မည်သို့များ ပြောနိုင်သနည်း။ သမ္မာတရားကို ပံ့ပိုးပေးခြင်းသည် ရိုးရှင်းသော ကိစ္စတစ်ရပ် မဟုတ်ချေ။ မည်သူက ဤစာကြောင်းကို ပြောဆိုရန် ထိုက်တန်သနည်း။ ဘုရားသခင်သည်သာလျှင် လူများအား သမ္မာတရားကို ပံ့ပိုးပေးနိုင်စွမ်း ရှိ၏။ လူများသည် ပံ့ပိုးပေးနိုင်စွမ်း ရှိသလော။ သို့ဖြစ်၍ ဤကိစ္စကို သင်သည် ရှင်းလင်းစွာ မြင်ရမည်။ ဤသည်မှာ မှားယွင်းသော စကားများကို အသုံးပြုသည့် ပြဿနာတစ်ရပ်သာ မဟုတ်ဘဲ အဓိကအချက်မှာ သင်သည် အမှန်တရားကို ချိုးဖောက်ခြင်းနှင့် လိုရာဆွဲပြောခြင်းသာ ဖြစ်သည်။ သင်အခိုင်အမာဆိုသည့်အရာမှာ ပုံကြီးချဲ့နေခြင်း ဖြစ်သည်။ လူများသည် ဘုရားနှုတ်ကပတ်တော်များနှင့်ပတ်သက်၍ နားလည်မှုအချို့နှင့် အတွေ့အကြုံ ရှိကောင်း ရှိနိုင်သော်လည်း ၎င်းတို့သည် သမ္မာတရားရှိသည်၊ သို့မဟုတ် ၎င်းတို့သည် သမ္မာတရားနှင့်သက်ဆိုင်သည်ဟု သင်ဆို၍မရနိုင်ပေ။ ဤအရာကို သင်လုံးဝ ဆို၍မရနိုင်ပေ။ လူများသည် သမ္မာတရားမှ မည်မျှနားလည်ခြင်း ရရှိပါစေ ၎င်းတို့သည် သမ္မာတရားနှင့်သက်ဆိုင်သည်ဟု မဆိုထားနှင့် သမ္မာတရား၏ အသက်ကို ပိုင်ဆိုင်သည်ဟုပင် သင်မဆိုနိုင်ပေ။ ဤအရာကို သင်လုံးဝ မဆိုနိုင်ပေ။ လူတို့သည် သမ္မာတရား အနည်းငယ်သာ နားလည်ပြီး အလင်းအနည်းငယ်ရှိကြကာ လက်တွေ့လုပ်ဆောင်မှု နည်းလမ်းအချို့သာ ရှိကြသည်။ ၎င်းတို့သည် ကျိုးနွံနာခံမှု၏ လက်တွေ့အရှိတရား အချို့နှင့် စစ်မှန်သော ပြောင်းလဲမှုအချို့သာ ရှိလေသည်။ သို့ရာတွင် ၎င်းတို့သည် သမ္မာတရား ရရှိပြီးဖြစ်သည်ဟု သင်မဆိုနိုင်ပေ။ ဘုရားသခင်သည် သမ္မာတရားကို ဖော်ပြခြင်းအားဖြင့် လူတို့အား အသက်ကို ထောက်ပံ့ပေးသည်။ ဘုရားသခင်သည် သူ့ကို အစေခံဖို့နှင့် စိတ်ကျေနပ်စေဖို့အလို့ငှာ လူတို့အား သမ္မာတရားကို နားလည်ပြီး သမ္မာတရားကို ရရှိဖို့ တောင်းဆိုသည်။ လူတို့သည် သမ္မာတရားကို အမှန်တကယ် ရရှိပြီးဖြစ်သည်အထိ ဘုရားအမှုတော်ကို တွေ့ကြုံခံစားသည့် နေ့ရက်အချိန် ရောက်လာလျှင်ပင် လူများသည် သမ္မာတရားကို ပိုင်ဆိုင်သည်ဟု ပြောဖို့ မဆိုထားနှင့် လူများသည် သမ္မာတရားနှင့်သက်ဆိုင်သည်ဟုပင် သင်ပြော၍မရသေးပေ။ အကြောင်းမှာ လူတို့သည် အတွေ့အကြုံ နှစ်ပေါင်းများစွာ ထပ်မံရရှိလျှင်ပင် ၎င်းတို့ ရရှိမည့် သမ္မာတရား ပမာဏသည် အကန့်အသတ်ရှိနေပြီး ယင်းမှာ အလွန် ပေါ့တန်သော ပမာဏသာ ဖြစ်သောကြောင့်တည်း။ သမ္မာတရားသည် အနက်ရှိုင်းဆုံးနှင့် အနက်နဲဆုံးသော အရာဖြစ်သည်။ ယင်းမှာ ဘုရားသခင်၏ အရာအားလုံးနှင့် ဖြစ်ခြင်း ဖြစ်သည်။ လူတို့သည် သမ္မာတရားကို တစ်သက်လုံး တွေ့ကြုံရလျှင်ပင် ထိုသမ္မာတရားထံမှ ၎င်းတို့ရရှိသည့်အရာသည် အလွန်နည်းပါးလိမ့်မည်။ လူတို့သည် သမ္မာတရားကို မည်သည့်အခါမျှ လုံးလုံးလျားလျား ရရှိနိုင်မည် မဟုတ်ချေ၊ လုံးလုံးလျားလျား နားလည်နိုင်မည် မဟုတ်ချေ၊ သို့မဟုတ် လုံးလုံးလျားလျား အသက်ရှင်နေထိုင်နိုင်မည် မဟုတ်ချေ။ ဤသည်မှာ လူများသည် ဘုရားသခင်၏ မျက်မှောက်တော်တွင် အစဉ်သဖြင့် ကလေးငယ်များသာ ဖြစ်နေမည်ဟု ဘုရားသခင် ပြောသည့်အချိန်က သူဆိုလိုသည့်အရာ ဖြစ်သည်။

လူအချို့သည် ဘုရားသခင် ဖော်ပြခဲ့သော သမ္မာတရားများနှင့်သက်ဆိုင်သည့် အတွေ့အကြုံနှင့် အသိပညာကိုလည်းကောင်း၊ သမ္မာတရား၏ ရှုထောင့်တိုင်းအပေါ် စေ့စေ့စပ်စပ် နားလည်မှုကိုလည်းကောင်း ပိုင်ဆိုင်ကာ သမ္မာတရားအတိုင်း ပြုမူဆောင်ရွက်နိုင်သည်နှင့် ၎င်းတို့သည် သမ္မာတရားကို ဖော်ပြနိုင်လိမ့်မည်ဟု ယုံကြည်ကြသည်။ ထိုသို့ယုံကြည်ခြင်းအားဖြင့် “အသက်ရှင်သည့်အရာမှာ ခရစ်တော်ဖြစ်၏” (ဖိလိပ္ပိ သြဝါဒစာ ၁:၂၁) ဟု ပေါလုပြောခဲ့သကဲ့သို့ပင် ခရစ်တော်အဖြစ် အသက်ရှင်ခြင်း ဖြစ်လိမ့်မည်ဟု ၎င်းတို့ ထင်မြင်ကြသည်။ ထိုအမြင်ရှုထောင့်သည် မှန်ကန်သလော။ ယင်းသည် “လူဘုရားများ” ဟူသည့် ငြင်းခုံချက်ကို နောက်ထပ် ထောက်ခံအားပေးခြင်းဖြစ်သည် မဟုတ်လော။ ဤသည်မှာ လုံးဝ မှားယွင်း၏။ လူများသည် အမှုအရာတစ်ခုကို နားလည်ရမည်။ သင်သည် သမ္မာတရားနှင့်ဆိုင်သော အတွေ့အကြုံနှင့် အသိပညာ မည်မျှ များပြားပါစေ၊ သို့မဟုတ် သင်သည် သမ္မာတရား စစ်မှန်မှုသို့ ဝင်ရောက်ပြီးဖြစ်ကာ ဘုရားသခင်၏ စီစဉ်ညွှန်ကြားမှုနှင့် အစီအစဉ်များကို ကျိုးနွံနာခံနိုင်လျှင်ပင်၊ ဘုရားသခင်ကို ကျိုးနွံနာခံနိုင်ပြီး ဘုရားသခင်အတွက် သက်သေခံနိုင်လျှင်ပင်၊ သင်၏ အသက်ဝင်ရောက်မှုသည် မည်မျှ မြင့်မားလာပါစေ၊ သို့မဟုတ် နက်နဲလာပါစေ သင်၏ အသက်သည် လူ့အသက်ဖြစ်နေဆဲဖြစ်ကာ လူသားတစ်ဦးသည် မည်သည့်အခါမျှ ဘုရားသခင် ဖြစ်မလာနိုင်ပေ။ ဤသည်မှာ လူတို့နားလည်ရမည့် အကြွင်းမဲ့အမှန်တရားဖြစ်သည်။ အဆုံးတွင် သင်သည် သမ္မာတရား၏ ရှုထောင့်တိုင်းနှင့် ပတ်သက်၍ အတွေ့အကြုံနှင့် နားလည်မှုကို ရကာ ဘုရားသခင်အား သင့်ကို စီစဉ်ညွှန်ကြားခွင့်ပေးပြီး စုံလင်စေခြင်းခံရသော လူတစ်ဦး ဖြစ်လာလျှင်ပင် သင်သည် သမ္မာတရားနှင့် သက်ဆိုင်သည်ဟု မဆိုနိုင်သေးပေ။ စစ်မှန်သော အတွေ့အကြုံဆိုင်ရာ သက်သေခံချက်ကို သင်ပြောနိုင်သည်ဆိုလျှင်ပင် သင်သည် သမ္မာတရားကို ဖော်ပြနိုင်သည်ဟု မဆိုလိုပေ။ ယခင်က အကြင်သူတစ်ဦးသည် “အတွင်း၌ ခရစ်တော်၏ အသက်” ရှိကြောင်း ဘာသာရေးအုပ်စုများအတွင်းတွင် ပြောလေ့ရှိခဲ့ကြသည်။ ဤသည်မှာ မှားယွင်းပြီး မရေရာသော စကားတစ်ခုဖြစ်သည်။ လူများသည် ဤအရာကို မပြောတော့သော်လည်း ဤကိစ္စနှင့်ပတ်သက်သည့် ၎င်းတို့၏ နားလည်မှုသည် မရှင်းလင်းပေ။ လူအချို့က “ကျွန်ုပ်တို့သည် သမ္မာတရားကို ရရှိပြီးဖြစ်ကာ ကျွန်ုပ်တို့အတွင်း၌ သမ္မာတရား ရှိသည့်အတွက် ကျွန်ုပ်တို့သည် သမ္မာတရားကို ပိုင်ဆိုင်ပြီး ကျွန်ုပ်တို့၏ စိတ်နှလုံးများတွင် သမ္မာတရားရှိကာ သမ္မာတရားကို ကျွန်ုပ်တို့ ဖော်ပြ၍လည်း ရနိုင်သည်” ဟု တွေးထင်ကြသည်။ ဤသည်မှာလည်း မှားယွင်းသည် မဟုတ်လော။ လူများသည် ၎င်းတို့၌ သမ္မာတရား ရှိမရှိနှင့်ပတ်သက်၍ မကြာခဏ ပြောကြသည်။ ယင်းသည် ၎င်းတို့၌ သမ္မာတရားနှင့်သက်ဆိုင်သော အတွေ့အကြုံနှင့် အသိပညာ ရှိမရှိနှင့် ၎င်းတို့သည် သမ္မာတရားနှင့်အညီ လက်တွေ့လုပ်ဆောင်နိုင်ခြင်း ရှိမရှိတို့ကိုသာ အဓိကအားဖြင့် ရည်ညွှန်းလေသည်။ လူတိုင်းသည် သမ္မာတရားကို တွေ့ကြုံခံစားကြသော်လည်း လူတစ်ဦးချင်းစီ တွေ့ကြုံခံစားရသည့် အခြေအနေသည် ကွဲပြားခြားနားသည်။ သမ္မာတရားမှ လူတစ်ဦးချင်း ရရှိသည့်အရာသည်လည်း မတူကွဲပြားသည်။ သင်သည် လူတိုင်း၏ အတွေ့အကြုံနှင့် နားလည်မှုတို့ကို စုပေါင်းလိုက်လျှင်ပင် ယင်းက သမ္မာတရား၏ အနှစ်သာရကို လုံးလုံးလျားလျား ထင်ဟပ်ဦးမည် မဟုတ်ချေ။ ယင်းမှာ သမ္မာတရား မည်မျှ နက်ရှိုင်းပြီး နက်နဲပုံဖြစ်၏။ သင်ရရှိပြီးသမျှအရာအားလုံးနှင့် သင်၏နားလည်မှုအားလုံးတို့သည် သမ္မာတရားကို အစားထိုး၍ မရနိုင်ဟု ငါအဘယ်ကြောင့် ပြောသနည်း။ လူများက သင်၏ အတွေ့အကြုံနှင့် နားလည်မှုအချို့တို့ကို သင်မိတ်သဟာယပြုပေးသည်ကို ကြားပြီးသည့်နောက်တွင် ယင်းကို ၎င်းတို့ နားလည်လိမ့်မည်။ ပြီးလျှင် ၎င်းတို့သည် လုံးလုံးလျားလျား နားလည်ပြီး ရရှိဖို့အတွက် အချိန်အတော်ကြာအောင် တွေ့ကြုံခံစားဖို့ လိုအပ်မည် မဟုတ်ချေ။ အနည်းငယ်ပို၍ နက်ရှိုင်းသည့် အရာတစ်ခုဖြစ်လျှင်ပင် ၎င်းတို့သည် နှစ်အနည်းငယ်ကြာ အတွေ့အကြုံကို လိုအပ်မည် မဟုတ်ပေ။ သို့ရာတွင် သမ္မာတရား အတွက်မှာမူ လူများသည် ၎င်းတို့၏ သက်တမ်းတစ်ခုလုံးတွင် အားလုံးကို တွေ့ကြုံခံစားမည် မဟုတ်ချေ။ လူတိုင်းကို သင် စုရုံးလိုက်လျှင်ပင် ၎င်းတို့သည် သမ္မာတရားအားလုံးကို တွေ့ကြုံပြီးဖြစ်မည် မဟုတ်ချေ။ သင်တွေ့မြင်ရသည့်အတိုင်းပင် သမ္မာတရားသည် အလွန် နက်ရှိုင်းပြီး နက်နဲလေသည်။ စကားလုံးများသည် သမ္မာတရားကို နှံ့စပ်စွာ ရှင်းပြနိုင်စွမ်း မရှိကြပေ။ လူ့စကားဖြင့်ပြောဆိုရလျှင် သမ္မာတရားသည် လူ့အနှစ်သာရအတွက် စစ်မှန်၏။ လူသားတို့သည် ယင်းတို့အားလုံးကို မည်သည့်အခါမျှ တွေ့ကြုံနိုင်မည် မဟုတ်သကဲ့သို့ သမ္မာတရားကို မည်သည့်အခါမျှ လုံးလုံးလျားလျား အသက်ရှင်နေထိုင်နိုင်မည် မဟုတ်ပေ။ အကြောင်းမှာ လူတို့သည် နှစ်ထောင်ပေါင်းများစွာ အချိန်ကုန်လျှင်ပင် ၎င်းတို့သည် သမ္မာတရား၏ အချက်တစ်ခုကိုပင် လုံးလုံးလျားလျား တွေ့ကြုံပြီးဖြစ်မည် မဟုတ်သောကြောင့် ဖြစ်သည်။ လူတို့သည် နှစ်ပေါင်းမည်မျှ တွေ့ကြုံပါစေ ၎င်းတို့ နားလည်ပြီး ရရှိသော သမ္မာတရားသည် နည်းနေဦးမည်ဖြစ်သည်။ သမ္မာတရားသည် လူသားမျိုးနွယ်၏ ထာဝရအသက်စမ်းရေ ဖြစ်သည်ဟု ဆိုနိုင်သည်။ ဘုရားသခင်သည် သမ္မာတရား၏ အရင်းအမြစ်ဖြစ်ပြီး သမ္မာတရား စစ်မှန်မှုများထဲသို့ ဝင်ရောက်ခြင်းသည် အဆုံးမရှိသည့် လုပ်ငန်းဆောင်တာတစ်ခု ဖြစ်လေသည်။

သမ္မာတရားသည် ဘုရားသခင်ကိုယ်တော်တိုင်၏ အသက် ဖြစ်၏။ ယင်းသည် သူ၏စိတ်သဘောထား၊ သူ၏ အနှစ်သာရနှင့် ပြီးလျှင် သူ၏အရာအားလုံးနှင့်ဖြစ်ခြင်းတို့ကို ကိုယ်စားပြုသည်။ သင်၌ အချို့သော အတွေ့အကြုံနှင့် အသိပညာ ရှိခြင်းအားဖြင့်၊ ဤနည်းဖြင့် သင်၌ သမ္မာတရားရှိသည်ဟု ပြောလျှင်၊ သင်သည် သန့်ရှင်းခြင်းကို စွမ်းဆောင်ရရှိပြီးဖြစ်သလော။ သင်သည် ဖောက်ပြန်ပျက်စီးခြင်းကို အဘယ်ကြောင့် ထုတ်ဖော်နေသေးသနည်း။ သင်သည် အဘယ်ကြောင့် မတူညီသောလူအမျိုးအစားများကြားတွင် ခွဲခြားသိမြင်နိုင်ခြင်း မရှိရသနည်း။ သင်သည် အဘယ်ကြောင့် ဘုရားသခင်ကို သက်သေမခံနိုင်ရသနည်း။ သင်သည် သမ္မာတရားအချို့ကို နားလည်လျှင်ပင်၊ ဘုရားသခင်ကို သင် ကိုယ်စားပြုနိုင်သလော။ ဘုရားသခင်၏ စိတ်သဘောထားအားဖြင့် သင်အသက်ရှင်နေထိုင်နိုင်သလော။ သမ္မာတရားတစ်ခု၏ သွင်ပြင်လက္ခဏာ အချို့နှင့်စပ်လျဉ်း၍ သင်၌ အတွေ့အကြုံနှင့် အသိပညာအချို့ ရှိကောင်းရှိနိုင်သည်၊ ပြီးလျှင် သင်၏စကား၌ ပို၍နားလည်အောင် ရှင်းပြနိုင်စွမ်းပင် ရှိနိုင်သည်။ သို့သော် လူများကို သင်ထောက်ပံ့ပေးနိုင်သည့်အရာသည် အလွန်အမင်းနည်းပါးပြီး အချိန်ကြာမြင့်စွာ မတည်တံ့နိုင်ပေ။ ဤသည်မှာ အဘယ်ကြောင့်ဆိုသော် သင်၏နားလည်မှုနှင့် သင်ရရှိပြီးဖြစ်သည့် အလင်းတို့က သမ္မာတရား၏ အနှစ်သာရကို ကိုယ်စားမပြုသောကြောင့်ဖြစ်သည်၊ ပြီးလျှင် ယင်းက သမ္မာတရား တစ်ခုလုံးကို ကိုယ်စားမပြုပေ။ ယင်းက သမ္မာတရား၏ ဘက်တစ်ဖက်၊ သို့မဟုတ် သေးငယ်သော သွင်ပြင်လက္ခဏာကိုသာ ကိုယ်စားပြုသည်။ ယင်းက လူသားများသာ စွမ်းဆောင်ရရှိနိုင်သည့် အဆင့်ဖြစ်သည်။ ပြီးလျှင် ယင်းသည် သမ္မာတရား၏ အနှစ်သာရမှ ဝေးကွာနေဆဲဖြစ်သည်။ ဤအလင်းအနည်းငယ်၊ ဉာဏ်အလင်းပေးခြင်း၊ အတွေ့အကြုံနှင့် အသိပညာအနည်းငယ်သည် သမ္မာတရား၏ နေရာကို မည်သည့်အခါမျှ မယူနိုင်ပေ။ လူများအားလုံးက သမ္မာတရားတစ်ခုကို တွေ့ကြုံရာမှတစ်ဆင့် ရလဒ်အချို့ကို စွမ်းဆောင်ရရှိပြီးဖြစ်ကာ ၎င်းတို့၏ အတွေ့အကြုံများနှင့် သိမြင်မှုများ အားလုံးပေါင်းလိုက်လျှင်ပင် ဤသမ္မာတရား၏ စာကြောင်းတစ်ကြောင်းတည်း၏ အလုံးစုံနှင့် အနှစ်သာရကိုပင် လက်လှမ်းမီမည် မဟုတ်ချေ။ အတိတ်တွင် ပြောခဲ့ပြီးဖြစ်သည်၊ “ငါသည် လူ့လောကအတွက် ဤအရာကို ဆိုရိုးတစ်ခုနှင့် အကျဉ်းချုပ်မည်။ လူသားတို့အကြားတွင် ငါ့ကို ချစ်သောသူ တစ်ယောက်မျှမရှိပေ။” ဤစာကြောင်းသည် သမ္မာတရားဖြစ်သည်၊ အသက်၏ စစ်မှန်သော အနှစ်သာရဖြစ်သည်၊ အနက်နဲဆုံးသော အရာဖြစ်ပြီး ဘုရားသခင် ကိုယ်တော်တိုင်၏ ဖော်ပြခြင်း ဖြစ်သည်။ အတွေ့အကြုံ သုံးနှစ်ပြီးသည့်နောက်တွင် သင်၌ အပေါ်ယံ နားလည်မှုလေးတစ်ခု ရှိကောင်းရှိနိုင်ပြီး၊ ခုနစ်နှစ်၊ သို့မဟုတ် ရှစ်နှစ်ပြီးနောက်တွင်၊ သင်သည် အနည်းငယ် ပို၍များသော နားလည်မှု ရှိကောင်းရှိနိုင်သည်။ သို့သော် ဤနားလည်မှုသည် သမ္မာတရား၏ ဤစာကြောင်းအတွက် မည်သည့်အခါမျှ အစားထိုး၍ရမည် မဟုတ်ချေ။ နှစ်နှစ်ကြာပြီးနောက် အခြားလူတစ်ဦး၌ နားလည်မှုအနည်းငယ် ရှိနိုင်သည်၊ သို့မဟုတ် ဆယ်နှစ်ကြာပြီးသည့်နောက် ပို၍များသော နားလည်မှုအချို့ ရှိနိုင်သည်။ သို့မဟုတ် တစ်သက်တာပြီးနောက်တွင် အတော်အတန် မြင့်မားသော နားလည်မှု ရှိနိုင်သည်။ သို့သော် သင်တို့နှစ်ဦးလုံး၏ နားလည်မှုကို စုပေါင်းထားခြင်းက သမ္မာတရား၏ ဤစာကြောင်းကို အစားထိုး၍မရနိုင်ပေ။ သင်တို့နှစ်ဦး စုပေါင်း၍ ထိုးထွင်းအမြင်၊ အလင်း၊ အတွေ့အကြုံ၊ သို့မဟုတ် အသိပညာ မည်မျှ ရှိနိုင်ပါစေ ဤသမ္မာတရား၏ စာကြောင်းကို မည်သည့်အခါမျှ အစားထိုး၍မရနိုင်ပေ။ ဆိုလိုသည်မှာ လူ့အသက်သည် အစဉ်သဖြင့် လူ့အသက်ဖြစ်ပြီး သင်၏အသိပညာသည် သမ္မာတရား၊ ဘုရားသခင်၏ရည်ရွယ်ချက်များ၊ သို့မဟုတ် ဘုရားသခင်၏ သတ်မှတ်ချက်တို့နှင့် မည်မျှကိုက်ညီပါစေ၊ ယင်းက သမ္မာတရားအတွက် မည်သည့်အခါမျှ အစားထိုး၍မရနိုင်ပေ။ လူများ၌ သမ္မာတရား ရှိသည်ဟု ပြောခြင်းက လူများသည် သမ္မာတရားကို အမှန်တကယ် နားလည်ကြောင်း၊ ဘုရားသခင်၏ နှုတ်ကပတ်တော်များ၏ လက်တွေ့အရှိတရား အချို့ကို အသက်ရှင်နေထိုင်ကြောင်း၊ ဘုရားသခင်နှင့်သက်ဆိုင်သည့် စစ်မှန်သော သိမြင်ခြင်းအချို့ရှိကြောင်းနှင့် ဘုရားသခင်ကို ချီးမြှောက်ပြီး သက်သေခံနိုင်ကြောင်းကို ဆိုလိုခြင်းဖြစ်သည်။ သို့ရာတွင် လူများသည် သမ္မာတရားကို ပိုင်ဆိုင်ပြီးသားဖြစ်သည်ဟု မဆိုနိုင်ပေ။ အကြောင်းမှာ သမ္မာတရားသည် အလွန်နက်နဲသောကြောင့်ဖြစ်သည်။ ဘုရားနှုတ်ကပတ်တော်၏ စာကြောင်းတစ်ကြောင်းတည်းကို တွေ့ကြုံဖို့ကိုပင် လူများ၏တစ်သက်တာ အချိန်ကြာမြင့်နိုင်သည်။ ပြီးလျှင် အသက်တာအချို့၊ သို့မဟုတ် နှစ်ထောင်ပေါင်းများစွာ တွေ့ကြုံပြီးသည့်နောက်တွင်ပင်၊ ဘုရားနှုတ်ကပတ်တော်၏ စာကြောင်းတစ်ကြောင်းကို အပြည့်အဝ မတွေ့ကြုံနိုင်ပေ။ သမ္မာတရားကို နားလည်ခြင်းနှင့် ဘုရားသခင်ကို သိကျွမ်းခြင်း ဖြစ်စဉ်သည် အမှန်တကယ်ပင် အဆုံးမရှိကြောင်းနှင့်၊ တစ်သက်တာ တွေ့ကြုံမှုတွင် လူများသည် သမ္မာတရားမည်မျှကို နားလည်နိုင်သည် ဆိုသည့်အပေါ်တွင် အကန့်အသတ်ရှိကြောင်းတို့မှာ သိသာထင်ရှားပေသည်။ လူအချို့က ဘုရားသခင်၏ နှုတ်ကပတ်တော်၏ စာအရ အဓိပ္ပာယ်ကို နားလည်သည်နှင့်တစ်ပြိုင်နက် ၎င်းတို့၌ သမ္မာတရား ရှိသည်ဟု ပြောကြသည်။ ဤအရာမှာ အဓိပ္ပာယ်မမဲ့သလော။ အလင်းနှင့် အသိပညာတို့နှင့်ပတ်သက်လျှင် နက်ရှိုင်းသည့် အကြောင်းအရာတစ်ခု ရှိသည်။ ယုံကြည်မှု တစ်သက်တာ၌ လူတစ်ယောက် ဝင်ရောက်နိုင်သည့် သမ္မာတရား စစ်မှန်မှုများသည် နည်းပါးလေသည်။ ထို့ကြောင့် သင်သည် အသိပညာနှင့် အလင်းအချို့ ပိုင်ဆိုင်ရုံမျှဖြင့် သင်သည် သမ္မာတရား စစ်မှန်မှုများ ပိုင်ဆိုင်သည်ဟု အဓိပ္ပာယ်မရပေ။ ဤအလင်းနှင့် အသိပညာတို့၌ သမ္မာတရား၏ အနှစ်သာရ ပါဝင်ပတ်သက်ခြင်း ရှိမရှိကို သင် အဓိက ကြည့်ရမည်။ ဤသည်မှာ အရေးအကြီးဆုံး အရာဖြစ်သည်။ လူအချို့က အနည်းငယ် ရှင်းပြနိုင်သည့်အခါ၊ သို့မဟုတ် အပေါ်ယံ နားလည်မှုအချို့ပေးနိုင်သည့်အခါ သမ္မာတရားကို ပိုင်ဆိုင်သည်ဟု ခံစားကြရသည်။ ဤအရာက ၎င်းတို့ကို ပျော်ရွှင်စေသဖြင့် ၎င်းတို့သည် ကိုယ့်ကိုယ်ကိုယ် ဟုတ်လှပြီဟု ဘဝင်ခိုက်ကာ၊ စိတ်ကြီးဝင်လာကြသည်။ အမှန်မှာမူ ၎င်းတို့သည် သမ္မာတရား စစ်မှန်မှုသို့ ဝင်ရောက်ခြင်းမှ ဝေးကွာနေဆဲဖြစ်သည်။ လူများသည် မည်သည့် သမ္မာတရားကို ပိုင်ဆိုင်သနည်း။ သမ္မာတရား ပိုင်ဆိုင်သည့်လူများသည် အချိန်မရွေး၊ နေရာမရွေး လဲပြိုကျနိုင်သလော။ လူများ၌ သမ္မာတရား ပိုင်ဆိုင်သည့်အခါတွင် ၎င်းတို့သည် ဘုရားသခင်ကို အဘယ်သို့လျှင် အာခံပြီး သစ္စာဖောက်နိုင်သေးသနည်း။ သင်၌ သမ္မာတရားပိုင်ဆိုင်ကြောင်း သင် အခိုင်အမာပြောဆိုကာ၊ ယင်းက သင့်အတွင်းတွင် ခရစ်တော်၏ အသက်ရှိကြောင်းကို သက်သေပြလျှင် ယင်းမှာ လက်ခံနိုင်ဖွယ် မရှိပေ။ သင်သည် သခင်ဖြစ်လာပြီလော၊ သင်သည် ခရစ်တော် ဖြစ်လာပြီလော။ ဤသည်မှာ အဓိပ္ပာယ်မဲ့သော ပြောဆိုချက်ဖြစ်ပြီး လူများက ကောက်ချက်ချသည့်အရာ လုံးလုံးဖြစ်ပေသည်။ ယင်း၌ လူ့အယူအဆများနှင့် စိတ်ကူးများ ပါဝင်သည်။ ပြီးလျှင် ဘုရားသခင်အတွက် ယုတ္တိတန်သော ရပ်တည်ချက် မဟုတ်ချေ။

လူတို့ သမ္မာတရားကို နားလည်ကြောင်းနှင့် ယင်းကို ၎င်းတို့၏ အသက်ကဲ့သို့ အသက်ရှင်ကြကြောင်း ပြောသည့်အခါ၊ ဤ “အသက်”က မည်သည့်အရာကို ရည်ညွှန်းသနည်း။ ယင်းမှာ ၎င်းတို့ စိတ်နှလုံးထဲတွင် သမ္မာတရားက အဆုံးစွန် အုပ်စိုးသည့်သဘော ဖြစ်သည်၊ ဘုရားသခင်၏ နှုတ်ကပတ်တော်များဖြင့် ၎င်းတို့ အသက်ရှင်နိုင်သည့် သဘော ဖြစ်ပြီး ယင်းမှာ ၎င်းတို့၌ ဘုရားသခင်၏ နှုတ်ကပတ်တော်များနှင့်ပတ်သက်၍ စစ်မှန်သောအသိပညာနှင့် သမ္မာတရားနှင့်ပတ်သက်၍ စစ်မှန်သော သိနားလည်မှုတစ်ခု ရှိကြသည်ကို ဆိုလိုပေသည်။ လူတို့သည် ဤအသစ်သောအသက်ကို ၎င်းတို့အတွင်းတွင် ပိုင်ဆိုင်ကြသည့်အခါ ယင်းကို ဘုရားနှုတ်ကပတ်တော်များအား လက်တွေ့လုပ်ဆောင်ခြင်းနှင့် တွေ့ကြုံခြင်းမှ လုံးလုံးလျားလျား ရရှိပေသည်။ ယင်းကို ဘုရားနှုတ်ကပတ်တော်များ၏ သမ္မာတရား အခြေခံအုတ်မြစ်အပေါ်တွင် တည်ဆောက်ထားပြီး သမ္မာတရားနယ်ပယ်အတွင်း ၎င်းတို့ အသက်ရှင်ခြင်းအားဖြင့် ရယူရပေသည်။ လူတို့ အသက်တွင် ပါရှိသမျှမှာ ၎င်းတို့၏ အသိပညာနှင့် သမ္မာတရားအပေါ် အတွေ့အကြုံ ဖြစ်သည်။ ယင်းမှာ ထိုအသက်၏ အခြေခံအုတ်မြစ်ဖြစ်ပြီး ထိုနယ်ပယ်ကို မကျော်လွန်ချေ။ ဤသည်မှာ သမ္မာတရားနှင့် အသက်ကို ရရှိခြင်းအကြောင်း ပြောဆိုနေချိန်တွင် ရည်ညွှန်းနေသည့် အသက် ဖြစ်သည်။ ဘုရားသခင်၏ နှုတ်ကပတ်တော်များ၏ သမ္မာတရားအားဖြင့် အသက်ရှင်နိုင်ခြင်းသည် သမ္မာတရား၏ အသက်က လူများ၏အတွင်း၌ ရှိခြင်း မဟုတ်သကဲ့သို့ သမ္မာတရားကို ၎င်းတို့၏ အသက်အဖြစ် ၎င်းတို့ ပိုင်ဆိုင်ပါက ၎င်းတို့သည် သမ္မာတရား ဖြစ်လာပြီး ၎င်းတို့၏ အတွင်း အသက်က သမ္မာတရား၏အသက် ဖြစ်လာခြင်း မဟုတ်ပေ။ ၎င်းတို့သည် သမ္မာတရားနှင့် အသက်ဖြစ်သည်ဟု ပို၍ပင် ပြော၍မရနိုင်ပေ။ နောက်ဆုံးတွင် ၎င်းတို့၏ အသက်သည် လူသား၏ အသက်ဖြစ်နေဆဲဖြစ်သည်။ ဘုရားနှုတ်ကပတ်တော်များဖြင့် သင်အသက်ရှင်နိုင်ပြီး သမ္မာတရား၏ အသိပညာ ပိုင်ဆိုင်ပါက၊ ပြီးလျှင် ဤအသိပညာက သင့်အတွင်းတွင် အမြစ်တွယ်လာပြီး သင်၏ အသက်ဖြစ်လာကာ အတွေ့အကြုံမှတစ်ဆင့် သင်ရရှိပြီးဖြစ်သည့် သမ္မာတရားက သင့်တည်ရှိခြင်း၏ အခြေခံဖြစ်လာပါက၊ ဤဘုရားနှုတ်ကပတ်တော်များအားဖြင့် သင် အသက်ရှင်ပါက၊ မည်သူမျှ ယင်းကို မပြောင်းလဲနိုင်သကဲ့သို့ စာတန်က သင့်ကို အထင်အမြင်မမှားစေနိုင်၊ မဖောက်ပြန်မပျက်စီးစေနိုင်ပါက၊ သင်သည် သမ္မာတရားနှင့် အသက်ကို ပိုင်ဆိုင်ပြီးဖြစ်လိမ့်မည်။ ယင်းမှာ၊ သင်၏ အသက်တာသည် သမ္မာတရား ပါရှိရုံမျှသာ ရှိပေသည်၊ ဆိုလိုသည်မှာ သမ္မာတရားအပေါ် သင်၏ သိနားလည်မှု၊ အတွေ့အကြုံနှင့် ထိုးထွင်းသိမြင်ခြင်းနှင့် မည်သည့်အရာကို သင် လုပ်ဆောင်သည်ဖြစ်စေ၊ ဤအရာများဖြင့် သင် အသက်ရှင်လိမ့်မည်ဖြစ်ပြီး ယင်းတို့၏ နယ်ပယ်ကို ကျော်လွန်၍ သင် သွားလိမ့်မည်မဟုတ်ပေ။ ဤသည်မှာ သမ္မာတရား စစ်မှန်မှုကို ပိုင်ဆိုင်ခြင်းဟု ဆိုလိုသည့်အရာ ဖြစ်ပြီး ထိုသို့သောလူများမှာ ဘုရားသခင်က သူ၏ အမှုတော်ဖြင့် နောက်ဆုံးတွင် ရရှိချင်သည့် အရာ ဖြစ်သည်။ သို့သော် သမ္မာတရားကို လူတို့ မည်မျှကောင်းစွာ နားလည်သည်ဖြစ်စေ၊ ၎င်းတို့၏ အနှစ်သာရသည် လူသားမျိုးနွယ်၏ အနှစ်သာရတစ်ခု ဖြစ်နေဆဲဖြစ်ပြီး ဘုရားသခင်၏ အနှစ်သာရနှင့် လုံးဝ နှိုင်းယှဉ်မရနိုင်ပေ။ ဤသည်မှာ အဘယ်ကြောင့်ဆိုသော် သမ္မာတရားအားလုံးကို ၎င်းတို့ လုံးဝမတွေ့ကြုံနိုင်သကဲ့သို့ ၎င်းတို့အတွက် သမ္မာတရားကို လုံးလုံးလျားလျား အသက်ရှင်နေထိုင်ဖို့ဆိုသည်မှာ မဖြစ်နိုင်သောကြောင့် ဖြစ်ပေသည်။ ၎င်းတို့သည် လူသားတို့ ကြိုးပမ်းရရှိနိုင်သည့် အလွန်အမင်း နည်းပါးသော သမ္မာတရားအနည်းငယ်ကိုသာ အသက်ရှင်နေထိုင်နိုင်ကြသည်။ သို့ပါက ၎င်းတို့သည် ဘုရားအဖြစ်သို့ မည်သို့ ပြောင်းလဲနိုင်မည်နည်း။ ဘုရားသခင်သည် လူတစ်စုကို ပို၍ကြီးမြတ်သော ဘုရားများနှင့် ပို၍ နိမ့်ကျသော ဘုရားများအဖြစ် ကိုယ်တော်တိုင် စုံလင်စေခဲ့လျှင် ယင်းမှာ ပရမ်းပတာ ဖြစ်ကုန်မည် မဟုတ်လော။ ထို့အပြင် ထိုသို့သောအရာသည် မဖြစ်နိုင်သလို အဓိပ္ပာယ်မဲ့လေသည်။ ယင်းမှာ လူသား၏ ရယ်ဖွယ်ကောင်းသော စိတ်ကူးဖြစ်သည်။ ဘုရားသခင်သည် ကောင်းကင်၊ မြေကြီးနှင့် အရာခပ်သိမ်းတို့ကို ဖန်ဆင်းခဲ့ပြီးနောက်တွင် လူသားကို ဖန်ဆင်းခဲ့သည်။ ဤသို့အားဖြင့် လူသားသည် သူ့ကို ကျိုးနွံနာခံပြီး ကိုးကွယ်မည် ဖြစ်သည်။ လူသားကို ဘုရားသခင်၏ ဖန်ဆင်းခြင်းသည် အဓိပ္ပာယ်အရှိဆုံး လုပ်ဆောင်ချက်ဖြစ်သည်။ ဘုရားသခင်သည် လူကိုသာ ဖန်ဆင်းခဲ့သည်။ သူသည် ဘုရားများကို မဖန်ဆင်းခဲ့ပေ။ ဘုရားသခင်သည် လူ့ဇာတိခံယူခြင်း ပုံသဏ္ဌာန်ဖြင့် အလုပ်လုပ်သော်လည်း ယင်းမှာ သူက ဘုရားတစ်ပါးကို ဖန်ဆင်းခြင်းနှင့် မတူညီပေ။ ဘုရားသခင်သည် သူ့ကိုယ်သူ ဖန်ဆင်းခဲ့ခြင်း မဟုတ်ပေ။ သူသည် သူ၏ကိုယ်ပိုင် အနှစ်သာရရှိပြီး ယင်းမှာ ပြောင်းလဲ၍ မရနိုင်ပေ။ လူတို့သည် ဘုရားသခင်ကို မသိကြသောကြောင့် ၎င်းတို့သည် ဘုရားနှုတ်ကပတ်တော်များကို ပို၍ ဖတ်ရှုသင့်သည်။ လူများသည် သမ္မာတရားကို မကြာခဏ ရှာဖွေမှသာလျှင် သမ္မာတရားကို နားလည်နိုင်သည်။ လူတို့သည် မိမိတို့၏ စိတ်ကူးများကို အခြေခံ၍ အဓိပ္ပာယ်မဲ့သောအရာများကို မပြောသင့်ပေ။ ဘုရားနှုတ်ကပတ်တော်များနှင့် ပတ်သက်၍ အတွေ့အကြုံ အနည်းငယ်မျှ သင်ရှိပြီး၊ သမ္မာတရားအပေါ် စစ်မှန်သည့် အတွေ့အကြုံနှင့် အသိပညာဖြင့် အသက်ရှင်နေပါက၊ ဘုရားသခင်၏ နှုတ်ကပတ်တော်များသည် တဖြည်းဖြည်း သင်၏ အသက်ဖြစ်လာလိမ့်မည်။ သို့သော်၊ သမ္မာတရားသည် သင်၏ အသက်ဖြစ်သည် သို့မဟုတ် သင် ဖော်ပြနေသည့်အရာသည် သမ္မာတရားဖြစ်သည်ဟု သင် ပြောဆို၍ မရနိုင်သေးပေ။ ယင်းမှာ သင်၏ ထင်မြင်ချက်ဖြစ်ပါက၊ သင်သည် မှားယွင်းပေသည်။ သင်သည် သမ္မာတရား၏ သီးခြားရှုထောင့်တစ်ခုနှင့်ပတ်သက်၍သာ အတွေ့အကြုံ အချို့ရှိပါက ဤအရာကိုယ်၌က သင် သမ္မာတရား ပိုင်ဆိုင်ခြင်းကို ကိုယ်စားပြုနိုင်သလော။ ဤအရာကို သမ္မာတရားကို ရရှိခြင်းအဖြစ် မှတ်ယူနိုင်သလော။ သင်သည် သမ္မာတရားကို အကုန်အစင် ရှင်းပြနိုင်သလော။ ဘုရားသခင်၏ စိတ်သဘောထားနှင့် သူ၏ အရာခပ်သိမ်းနှင့် ဖြစ်ခြင်းတို့ကို သမ္မာတရားမှ သင် ရှာဖွေတွေ့ရှိနိုင်သလော။ ဤအကျိုးတရားများကို စွမ်းဆောင်မရရှိပါက၊ ဤအရာက သမ္မာတရား၏ သွင်ပြင်လက္ခဏာတစ်ခုခုကို တွေ့ကြုံခြင်းမျှကို သမ္မာတရားအား ရရှိခြင်းအဖြစ် ပြော၍ရဖို့မဆိုထားနှင့်၊ သမ္မာတရားကို အမှန်တကယ် သိနားလည်ခြင်း၊ သို့မဟုတ် ဘုရားကို သိကျွမ်းခြင်းအဖြစ် ယူဆ၍မရနိုင်ကြောင်း သက်သေပြပေသည်။ အယောက်တိုင်းသည် သမ္မာတရား၏ ရှုထောင့်တစ်ခုနှင့် နယ်ပယ်တစ်ခုနှင့်သာ ပတ်သက်သည့် အတွေ့အကြုံ ရှိသည်။ ၎င်းတို့၏ အကန့်အသတ်ရှိသော နယ်ပယ်အတွင်းတွင် ထိုအရာကို ၎င်းတို့ တွေ့ကြုံကြပြီး သမ္မာတရား၏ မရေမတွက်နိုင်သော ရှုထောင့်များကို ထည့်သွင်း မစဉ်းစားနိုင်ပေ။ လူတို့သည် သမ္မာတရား၏ မူရင်းအဓိပ္ပာယ်ကို အသက်ရှင် နေထိုင်နိုင်ကြသလော။ သင်၏ အတွေ့အကြုံ အနည်းငယ်သည် မည်မျှနှင့် ညီမျှသနည်း။ ကမ်းခြေတစ်ခုက သဲတစ်ပွင့်သာဖြစ်၏၊ သမုဒ္ဒရာထဲက ရေတစ်စက်တည်း ဖြစ်၏။ ထို့ကြောင့် သင်၏ အတွေ့အကြုံမှ ရရှိပြီးဖြစ်သည့် ထိုအသိပညာနှင့် ထိုခံစားချက်များက မည်မျှအဖိုးတန်နိုင်ပါစေ၊ ယင်းတို့ကို သမ္မာတရားအဖြစ် ယူမှတ်၍ မရနိုင်သေးပေ။ ယင်းတို့ကို သမ္မာတရားနှင့် ကိုက်ညီသည်ဟုသာ ပြော၍ရနိုင်သည်။ သမ္မာတရားသည် ဘုရားသခင်ထံမှလာပြီး၊ သမ္မာတရား၏ အတွင်းကျကျ အဓိပ္ပာယ်နှင့် စစ်မှန်မှုများသည် အလွန်ကျယ်ပြန့်သည့် အပိုင်းအခြားကို ခြုံငုံပြီး မည်သူမျှ နားမလည်နိုင်၊ သို့မဟုတ် မချေပနိုင်ပေ။ သင်သည် သမ္မာတရားနှင့် ဘုရားသခင်အပေါ် စစ်မှန်သည့် သိနားလည်မှု ရှိပါက၊ သမ္မာတရားအချို့ကို သင် သိနားလည်လိမ့်မည်၊ ဤစစ်မှန်သည့် သိနားလည်မှုများကို မည်သူကမျှ ချေပနိုင်လိမ့်မည်မဟုတ်သကဲ့သို့၊ သမ္မာတရား စစ်မှန်မှုများပါရှိသည့် သက်သေခံချက်များသည် အစဉ်အမြဲ ယုတ္တိတန်သည်။ ဘုရားသခင်သည် သမ္မာတရား စစ်မှန်မှုများ ပိုင်ဆိုင်သူများကို အသိအမှတ်ပြုသည်။ သမ္မာတရားကို သင် လိုက်စားပြီး၊ ဘုရားနှုတ်ကပတ်တော်များကို တွေ့ကြုံရန် ဘုရားသခင်အပေါ် မှီခိုနိုင်ပြီး၊ မည်သည့် ပတ်ဝန်းကျင်တွင်ရှိပါစေ သမ္မာတရားကို သင်၏ အသက်အဖြစ် သင် လက်ခံနိုင်ပါက၊ သင်သည် လမ်းကြောင်းတစ်ခု ရှိလိမ့်မည်ဖြစ်သည်၊ ရှင်ကျန်နိုင်လိမ့်မည်ဖြစ်ပြီး ဘုရားသခင်၏ လက်ခံမှုကို ရရှိလိမ့်မည်။ လူတို့ ရရှိသည့် အနည်းငယ်မျှသည် သမ္မာတရားနှင့် ကိုက်ညီသော်လည်း၊ သမ္မာတရားကို ၎င်းတို့ ရရှိပြီးဖြစ်သည်ဟု ဆိုနိုင်ဖို့မဆိုထားနှင့် ဤသည်မှာ သမ္မာတရားဖြစ်သည်ဟု ဆို၍မရနိုင်ပေ။ လူတို့ ရရှိပြီးဖြစ်သည့် အလင်းအနည်းငယ်မျှသည် မိမိတို့ကိုယ်တိုင်၊ သို့မဟုတ် နယ်ပယ်တစ်ခုခုအတွင်းရှိ အချို့သောအခြားသူတို့အတွက်သာ သင့်လျော်ပေသည်။ သို့သော်လည်း မတူညီသော အတိုင်းအတာတစ်ခုအတွင်း သင့်လျော်မည်မဟုတ်ပေ။ လူတစ်ဦး၏အတွေ့အကြုံသည် မည်မျှ နက်နဲသည်ဖြစ်စေ၊ ယင်းသည် အလွန် နည်းပါးဆဲဖြစ်၏၊ ထို့ပြင် ၎င်းတို့၏ အတွေ့အကြုံသည် သမ္မာတရား၏ နက်ရှိုင်းမှုသို့ မည်သည့်အခါမျှ ရောက်လိမ့်မည်မဟုတ်ပေ။ လူတစ်ဦး၏အလင်းနှင့် လူတစ်ဦး၏နားလည်မှုကို သမ္မာတရားနှင့် မည်သည့်အခါမျှ နှိုင်းယှဉ်၍ရနိုင်မည်မဟုတ်ပေ။

လူများသည် ဘုရားနှုတ်ကပတ်တော်နှင့်ပတ်သက်၍ အတွေ့အကြုံအချို့ရှိကာ သမ္မာတရားအချို့နှင့် ဘုရားသခင်၏ ရည်ရွယ်ချက်အနည်းငယ်ကို နားလည်သည့်အခါ၊ ၎င်းတို့သည် ဘုရားသခင်နှင့်ပတ်သက်သော အသိပညာအချို့ ရှိပြီး ၎င်းတို့၏ စိတ်သဘောထားသည် အနည်းငယ်သော ပြောင်းလဲမှုကို ကြုံတွေ့ရပြီးဖြစ်ကာ သန့်စင်ခြင်း ခံရပြီးဖြစ်သည့်အခါ ၎င်းတို့သည် လူပုဂ္ဂိုလ်ဖြစ်သည်၊ ဖန်ဆင်းခံ လူသားတစ်ဦးဖြစ်သည်ဟုသာ ဆိုနိုင်ဆဲဖြစ်သော်လည်း ဤသည်မှာ ဘုရားသခင် ရရှိရန် ဆန္ဒရှိသည့် သာမန်လူမျိုး အတိအကျပင် ဖြစ်လေသည်။ ဤသို့ဆိုလျှင် သင်သည် မည်သို့သော လူစားမျိုးဖြစ်သနည်း။ လူအချို့က “ကျွန်ုပ်သည် သမ္မာတရားကို ပိုင်ဆိုင်သည့် လူတစ်ယောက်ဖြစ်သည်” ဟု ပြောကြသည်။ ထိုအရာကို ပြောခြင်းမှာ သင့်တော်မည် မဟုတ်ပေ။ သင်က “ကျွန်ုပ်သည် စာတန်၏ ဖောက်ပြန်ပျက်စီးစေခြင်း ခံထားရကာ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းကို တွေ့ကြုံပြီးသော လူတစ်ယောက်ဖြစ်သည်။ ကျွန်ုပ်သည် နောက်ဆုံးတွင် သမ္မာတရားကို နားလည်ပြီး မိမိ၏ ဖောက်ပြန်ပျက်စီးသော စိတ်သဘောထားကို သန့်စင်ပြီးဖြစ်သည်။ ကျွန်ုပ်သည် ဘုရားသခင်၏ ကယ်တင်ခြင်းကို ခံထားရသော လူတစ်ဦးမျှသာ ဖြစ်သည်” ဟုသာ ပြောနိုင်သည်။ သင်က “ကျွန်ုပ်သည် သမ္မာတရားကို ပိုင်ဆိုင်သော လူတစ်ဦးဖြစ်သည်။ ဘုရားနှုတ်ကပတ်တော်များအားလုံးကို ကျွန်ုပ် တွေ့ကြုံပြီး နားလည်ပြီးသား ဖြစ်သည်။ ဘုရားသခင် ပြောသည့်အရာမှန်သမျှ၏ အဓိပ္ပာယ်ကိုလည်းကောင်း၊ ထိုနှုတ်ကပတ်တော်များကို ပြောခဲ့သည့် ဆက်စပ်အကြောင်းအရာနှင့် အခြေအနေများကိုလည်းကောင်း ကျွန်ုပ် သိသည်။ ကျွန်ုပ် အားလုံးကို သိသည်။ ဤသည်မှာ ကျွန်ုပ်သည် သမ္မာတရားကို ပိုင်ဆိုင်သည်ဟု မဆိုလိုသလော” ဟု ပြောခဲ့လျှင် သင်သည် တစ်ဖန်မှားယွင်းမည် ဖြစ်ပေသည်။ ဘုရားနှုတ်ကပတ်တော်များနှင့်ပတ်သက်၍ အတွေ့အကြုံအချို့ရှိခြင်းနှင့် ထိုနှုတ်ကပတ်တော်များမှ အလင်းအချို့ ရရှိခြင်းသည် သင့်အား သမ္မာတရားကို ပိုင်ဆိုင်သည့်သူတစ်ဦး မဖြစ်စေပေ။ အယူအဆအချို့ကို နားလည်ပြီး ဆွေးနွေးနိုင်ရုံသာ ရှိသည့်သူများသည် ထိုသို့အခိုင်အမာဆိုရန် သာ၍ပင် အရည်အချင်းမပြည့်မီပေ။ လူများသည် ဘုရားသခင်၏ ရှေ့မှောက်တွင်လည်းကောင်း၊ သမ္မာတရား၏ ရှေ့မှောက်တွင်လည်းကောင်း မည်သည့်နေရာကို ယူသင့်ကြောင်း၊ လူများသည် မည်သည့်အရာများဖြစ်ကြောင်း၊ လူ၏ အတွင်းရှိ အသက်သည် မည်သည့်အရာဖြစ်ကြောင်းနှင့် ဘုရားသခင်၏ အသက်သည် မည်သည့်အရာဖြစ်ကြောင်းတို့ကို ရှင်းရှင်းလင်းလင်း နားလည်ရမည်။ လူ၏ အနှစ်သာရသည် မည်သည့်အရာဖြစ်သည်ကို လူများ နားလည်ရမည်။ လူအချို့သည် ဘုရား၏အမှုကို ရက်အနည်းငယ် တွေ့ကြုံကာ စကားနှင့် အယူဝါဒအချို့ကို နားလည်ပြီးသည့်နောက်တွင် သမ္မာတရားကို ပိုင်ဆိုင်သည်ဟု ၎င်းတို့က ခံစားကြရသည်။ ဤသည်တို့မှာ မာနအထောင်လွှားဆုံးလူများဖြစ်ပြီး ၎င်းတို့သည် အသိစိတ် ကင်းမဲ့ကြသည်။ လူများသည် မိမိတို့ကိုယ်ကို အမှန်တကယ် နားလည်ပြီး လူသားမျိုးနွယ်ကို သိလာစေရန်အတွက်၊ ဖောက်ပြန်ပျက်စီးသော လူသားမျိုးနွယ်သည် မည်သည့်အရာ ဖြစ်သည်ကိုလည်းကောင်း၊ လူများသည် အဆုံး၌ စုံလင်စေခြင်း ခံရပြီးနောက်တွင် မည်သည့်အဆင့်ကို ၎င်းတို့ရရှိနိုင်သည်ကိုလည်းကောင်း၊ ယင်းတို့ကို ကိုင်တွယ်ပြီး အမည်တပ်ရန် မည်သည့်နည်းလမ်းက သင့်တော်သော နည်းလမ်း ဖြစ်သည်ကိုလည်းကောင်း နားလည်နိုင်ရန်အတွက် ဤကိစ္စကို စိတ်ဖြာလေ့လာဆွေးနွေးရန် လိုအပ်သည်။ လူတို့သည် ဤအရာများကို သိသင့်ပြီးစိတ်ကူးယဉ်ခြင်းများ၌ မမွေ့လျော်သင့်ပေ။ လူများအနေဖြင့် ကျင့်ကြံပြုမူပုံတွင် ပို၍ လက်တွေ့ကျသည်မှာ ပို၍ ကောင်းသည်။ ထိုနည်းအားဖြင့် ၎င်းတို့သည် အနည်းငယ် ပို၍ လက်တွေ့ကျလိမ့်မည် ဖြစ်သည်။ ဘုရားသခင်ကို ယုံကြည်သည့် လူအချို့သည် မိမိတို့၏ အိပ်မက်များကို အစဉ်သဖြင့် လိုက်စားပြီး ဘုရား၏ အသက်နှင့် ပုံသဏ္ဌာန်တော်တို့အတိုင်း အစဉ်သဖြင့် အသက်ရှင်နေထိုင်လိုသည်။ ဤသည်မှာ လက်တွေ့ကျသလော။ လူများသည် ဘုရားသခင်၏ အသက်ကို အစဉ်သဖြင့် ပိုင်ဆိုင်လိုကြသည်။ ဤသည်မှာ အန္တရာယ်ရှိသောအရာ ဖြစ်သည်မဟုတ်လော။ ယင်းမှာ လူသားတို့၏ မာနထောင်လွှားသော ရည်မှန်းချက်ဖြစ်ပြီး စာတန်၏ မာနထောင်လွှားသော ရည်မှန်းချက်ကဲ့သို့ပင် ဖြစ်လေသည်။ လူအချို့သည် အသင်းတော်တွင် အချိန်ကာလတစ်ခုကြာ အလုပ်လုပ်ပြီးသည့်နောက်တွင် “အဆင်းနီသောနဂါးကြီး အာဏာမရှိတော့လျှင် ကျွန်ုပ်တို့သည် ဘုရင်များဖြစ်လာပြီး အာဏာကိုင်စွဲသင့်သလော။ ကျွန်ုပ်တို့ တစ်ယောက်ချင်းစီတိုင်းသည် မြို့မည်မျှကို ထိန်းချုပ်သင့်သနည်း” ဟု စတင်တွေးတောကြသည်။ လူတစ်ဦးသည် ထိုသို့သော အရာများကို ထုတ်ဖော်ပြနိုင်လျှင် ယင်းမှာ ဆိုးရွားပေသည်။ အတွေ့အကြုံမရှိသော လူများသည် အယူအဆများအကြောင်း ပြောပြီး စိတ်ကူးယဉ်မှုများကို မွေ့လျော်လိုကြသည်။ ၎င်းတို့သည် ထိုသို့လုပ်ဆောင်သည့်အခါတွင် ထက်မြက်သည်ဟုပင် ခံစားကြရသည်မှာ ၎င်းတို့သည် ဘုရားသခင်၌ ၎င်းတို့၏ ယုံကြည်မှုတွင် အောင်မြင်မှု ရရှိပြီးဖြစ်သည့်အလား၊ ၎င်းတို့သည် ခရစ်တော်နှင့် ဘုရားသခင်ကဲ့သို့ အသက်ရှင်သန်နေသည့်အလားပင် ဖြစ်သည်။ ၎င်းတို့အားလုံးသည် ပေါလု၏ တပည့်တော်များဖြစ်ပြီး ပေါလု၏ လမ်းကြောင်းကို လျှောက်နေကြသည်။ ၎င်းတို့သည် စွဲမြဲစွာ နောင်တမရပါက ဤလူများအားလုံးသည် အန္တိခရစ်များဖြစ်လာကြမည် ဖြစ်ပြီး ပြင်းထန်သော အပြစ်ဒဏ်ကို ခံစားကြရမည်။

ကောက်နုတ်ချက် (၅)

ဘုရားသခင် မိန့်တော်မူခဲ့သောဤနှုတ်ကပတ်တော်များနှင့်စပ်လျဉ်း၍ သင်တို့ နားထောင်သောအခါ ၎င်းတို့ကို သင်တို့ကိုယ်သင်တို့ဖြင့် နှိုင်းယှဉ်ကြည့်သလော၊ သို့မဟုတ် ၎င်းတို့ကို အယူဝါဒအနေဖြင့် နားထောင်ရုံလော၊ ၎င်းဆိုလိုသည့်အဓိပ္ပါယ်ကို သင်နားလည်ရန်အတွက် သင့်စိတ်ထဲတွင် တစ်ကြိမ် ဆန်းစစ်ကြည့်ပြီး ဤမျှသာလော။ နားထောင်နေစဉ်တွင် သင်တို့တွင် မည်သည့်သဘောထားနှင့် ရည်ရွယ်ချက်မျိုးတို့ ရှိကြသနည်း။ သမ္မာတရားကို လက်တွေ့မလုပ်ဆောင်သောသူတို့သည် ဖယ်ရှားရှင်းလင်းခံရလိမ့်မည်ဖြစ်ကြောင်း၊ ဘုရားသခင်၏အမြင်တွင် သမ္မာတရားကို လက်တွေ့မလုပ်ဆောင်သောသူများသည် မကောင်းသည့် ဆိုးယုတ်သောလူများဖြစ်ကြကြောင်းစသဖြင့် ဘုရားသခင်က ပြောခဲ့သည့်အရာကို သင်တို့ အမှန်တကယ် နားလည်ပါက၊ ထိုအခါတွင် သင့်ကိုယ်သင် ပြန်လည်သုံးသပ်ဆင်ခြင်ကြည့်သင့်ပြီး သင်၏မည်သည့်လုပ်ရပ်များက သမ္မာတရားကို လက်တွေ့မလုပ်ဆောင်ခြင်းဖြစ်ကြောင်းနှင့် သင်၏မည်သည့်နည်းလမ်းများနှင့် သဘောထားများကို သမ္မာတရားကို လက်တွေ့မလုပ်ဆောင်ခြင်း၏သရုပ်သကန်များအဖြစ် ဘုရားသခင်က မြင်ကြောင်းတို့ကို ကြည့်သင့်သည်။ ဤကိစ္စများကို နားလည်သဘောပေါက်ဖို့ သင်တို့ တစ်ကြိမ်တစ်ခါမျှ ကြိုးစားကြည့်ဖူးသလော။ သင်တို့ကိုယ်သင်တို့ ပြန်လည်ဆင်ခြင်သုံးသပ်ကြည့်ဖူးသလော။ ဘုရားသခင်၏ နှုတ်ကပတ်တော်များကို သာမန်ကာလျှံကာ တစ်ချက်ကြည့်ပြီး ဖတ်ရုံဖြင့် မလုံလောက်ပါ။ သင်သည် ၎င်းတို့ကို ချင့်ချိန်စဉ်းစားရမည်၊ ကိုယ့်ကိုယ်ကိုယ် ပြန်လည်ဆင်ခြင်သုံးသပ်ကြည့်ရမည်၊ ပြီးလျှင် ဘုရားသခင်၏ထုတ်ဖော်သည့် နှုတ်ကပတ်တော်များနှင့် သင်၏ကိုယ်ပိုင်အတွေးများနှင့် လုပ်ရပ်များကို နှိုင်းယှဉ်ကြည့်ရမည်၊ ထို့အပြင် မိမိကိုယ်ကိုနားလည်ခြင်းကို ရယူရမည်။ ဤနည်းလမ်းဖြင့်သာ သင့်တွင် စစ်မှန်သော နောင်တရခြင်းနှင့် အပြောင်းအလဲတို့ ရနိုင်မည်ဖြစ်သည်။ ဘုရားသခင်၏နှုတ်ကပတ်တော်များကို သင်ဖတ်သော်လည်း ၎င်းတို့ကို သင်မတွေးဆသည့်အပြင် ကိုယ့်ကိုယ်ကိုယ် ဆင်ခြင်သုံးသပ်ခြင်းလည်း မလုပ်ပါက၊ ထိုအစား အယူဝါဒကို နားလည်ခြင်းအပေါ်တွင်သာ အာရုံစိုက်နေပါက၊ ထိုအခါတွင် ဘုရားသခင်အပေါ် သင်၏ယုံကြည်ခြင်းတွင် မည်သည့်အသက်ဝင်ရောက်ခြင်းမျှ ရှိလိမ့်မည်မဟုတ်ပေ၊ သို့မဟုတ် မည်သည့်စစ်မှန်သောပြောင်းလဲခြင်းတစ်စုံတစ်ခုကိုမျှ သင်ကြုံရလိမ့်မည်မဟုတ်ပေ။ ထို့ကြောင့် ဘုရားသခင်၏နှုတ်ကပတ်တော်များကို ဖတ်သောအခါ တွေးဆဖို့၊ သမ္မာတရားကို ရှာဖွေဖို့နှင့် ကိုယ့်ကိုယ်ကိုယ် ဆင်ခြင်သုံးသပ်ဖို့ မုချလိုအပ်ပါသည်။ ဘုရားသခင်၏နှုတ်ကပတ်တော်များမှာ မည်သည်တို့နည်း။ ၎င်းတို့သည် အပြုသဘောဆောင်သောအရာများအားလုံး၏စစ်မှန်မှုဖြစ်သည်။ ၎င်းတို့သည် သမ္မာတရားဖြစ်သည်။ ၎င်းတို့သည် လမ်းခရီးဖြစ်သည်။ ၎င်းတို့သည် လူသားများအပေါ် ဘုရားသခင်က ပေးအပ်သည့်အသက်ဖြစ်သည်။ ဘုရားသခင်၏နှုတ်ကပတ်တော်များသည် အယူဝါဒများမဟုတ်ကြပါ။ ၎င်းတို့သည် ဆောင်ပုဒ်များမဟုတ်ကြပါ။ ၎င်းတို့သည် သဘောတရား အမျိုးအစားတစ်ခုမဟုတ်ပါ။ ၎င်းတို့သည် ဒဿနဆိုင်ရာအသိပညာလည်း မဟုတ်ပါ။ ထိုအစား ၎င်းတို့သည် လူများ နားလည်ပြီး ရယူရမည့်သမ္မာတရားနှင့် လူများ ရရှိရမည့်အသက်ဖြစ်သည်။ ထို့ကြောင့် ဘုရားသခင်၏နှုတ်ကပတ်တော်များသည် လူတို့၏အသက်တာများနှင့် ၎င်းကိုယ်တိုင်၏အသက်တာ၊ လူများ လျှောက်သင့်သည့်လမ်းကြောင်းနှင့် လူများ၏ရလဒ်နှင့် လမ်းဆုံးပန်းတိုင်တို့နှင့် အတွင်းကျကျဆက်စပ်နေသည်။ အကယ်၍ တစ်စုံတစ်ယောက်သည် သမ္မာတရားကို အမှန်တကယ် နားလည်ပြီး သမ္မာတရားကို ရရှိပြီးဖြစ်ပါက သူနှင့်ပတ်သက်သမျှအရာခပ်သိမ်းသည် လျော်ညီစွာ ပြောင်းလဲသွားလိမ့်မည်။ အကယ်၍ တစ်စုံတစ်ယောက်သည် သမ္မာတရားကို မည်သည့်အခါမျှ နားမလည်နိုင်ပါက သို့မဟုတ် ဘုရားသခင်၏နှုတ်ကပတ်တော်များအတိုင်း မနေထိုင်ပါက သူတို့သည် စစ်မှန်သောပြောင်းလဲခြင်းကို ရယူဖို့ သို့မဟုတ် ဘုရားသခင်၏ခွင့်ပြုချက်ကို ရယူဖို့ မဖြစ်နိုင်ပေ။ ထိုလူအတွက် ရလဒ်နှင့် လမ်းဆုံးပန်းတိုင်တို့သည် လုံးဝပျက်စီးဆုံးရှုံးခြင်းကို ခံရဖို့နှင့် ဖျက်ဆီးခံရဖို့သာ ဖြစ်နိုင်သည်။ ဤသည်မှာ လူများအတွက် ဘုရားသခင်၏နှုတ်ကပတ်တော်များနှင့် သူဖော်ပြသည့်သမ္မာတရားတို့က မည်မျှအရေးကြီးကြောင်းဖြစ်သည်။ အကယ်၍ သင်သည် ဘုရားသခင်၏နှုတ်ကပတ်တော်များကို ဖတ်သော်လည်း ၎င်းတို့ကို ချင့်ချိန်စဉ်းစားခြင်းမပြုပါက၊ ကိုယ့်ကိုယ်ကိုယ်ဆင်ခြင်သုံးသပ်ခြင်းမလုပ်ပါက သို့မဟုတ် သင်၏ကိုယ်ပိုင်တကယ့်ပြဿနာများနှင့် တကယ့်အခက်အခဲများနှင့် ၎င်းတို့ကို မဆက်စပ်ပါက၊ ထိုအခါတွင် သင်နားလည်နိုင်သည့်အရာအားလုံးသည် အပေါ်ယံမျှသာဖြစ်ပြီး သင်သည် သမ္မာတရားကို နားလည်ဖို့ သို့မဟုတ် ဘုရားသခင်၏ရည်ရွယ်ချက်များကို နားလည်ဖို့ မဖြစ်နိုင်ပေ။ ထို့ကြောင့် သမ္မာတရားကို နားလည်ရန်အတွက် ဘုရားသခင်၏ နှုတ်ကပတ်တော်များကို စဉ်းစားဆင်ခြင်သည့် နည်းလမ်းကို သင်ယူရမည်။ ဤသည်မှာ အရေးကြီးလှသည်။ ဘုရားသခင်၏ နှုတ်ကပတ်တော်များကို စဉ်းစားဆင်ခြင်ဖို့ နည်းလမ်းများစွာရှိလေသည်။ သန့်ရှင်းသော ဝိညာဉ်တော်ထံမှ ဉာဏ်အလင်းပေးခြင်းနှင့် အလင်းပြခြင်းတို့ကို ရှာဖွေလျက်၊ ဘုရားသခင်၏ နှုတ်ကပတ်တော်များကို သင် တိတ်ဆိတ်စွာ ဖတ်ရှုနိုင်ပြီး၊ သင်၏ စိတ်နှလုံးထဲတွင် ဆုတောင်းနိုင်သည်။ သင်သည် သမ္မာတရားကို အားထုတ်သူတို့ကို အဖော်ပြု၍လည်း မိတ်သဟာယပြုနိုင်ပြီး၊ ဆုတောင်းဖတ်ရှုနိုင်သည်။ ပြီးလျှင် ဘုရားသခင်၏နှုတ်ကပတ်တော်များ အပေါ် သင်၏ နားလည်သဘောပေါက်ခြင်းကို ပို၍နက်ရှိုင်းစေဖို့ သင်၏ စဉ်းစားဆင်ခြင်ခြင်းနှင့် မိတ်သဟာယများနှင့် ဒေသနာများကို တစ်သားတည်း ဖြစ်အောင် လုပ်၍လည်း ရနိုင်ပေသည်။ နည်းလမ်းများမှာ များစွာရှိပြီး မျိုးစုံလှပေသည်။ အတိုချုပ်အားဖြင့် ဘုရားသခင်၏ နှုတ်ကပတ်တော်များကို ဖတ်ရှုရာတွင် ထိုနှုတ်ကပတ်တော်များ၊ သမ္မာတရားတို့နှင့် သက်ဆိုင်သည့် နားလည်သဘောပေါက်မှုတစ်ခုကို ရရှိလိုပါက၊ ဘုရားသခင်၏ နှုတ်ကပတ်တော်များကို စဉ်းစားဆင်ခြင်ဖို့ နှင့် ဆုတောင်းဖတ်ရှုဖို့တို့က အလွန် အရေးကြီးလေသည်။ ဘုရားသခင်၏ နှုတ်ကပတ်တော်များကို ဆုတောင်းဖတ်ရှုခြင်း၏ရည်ရွယ်ချက်မှာ၊ ထိုနှုတ်ကပတ်တော်များကို ရွတ်ဖတ်နိုင်ဖို့ မဟုတ်သကဲ့သို့၊ အလွတ်ကျက်ဖို့လည်း မဟုတ်ပေ။ ယင်းထက် ဤနှုတ်ကပတ်တော်များကို ဆုတောင်းဖတ်ရှုကာ၊ စဉ်းစားဆင်ခြင်ပြီးနောက်၊ ထိုနှုတ်ကပတ်တော်များနှင့် သက်ဆိုင်သည့် စစ်မှန်သော နားလည်သဘောပေါက်မှု တစ်ခုကို ရရှိဖို့ နှင့် ဘုရားသခင် မိန့်တော်မူခဲ့သည့် ဤနှုတ်ကပတ်တော်များ၏ အဓိပ္ပာယ်နှင့် ဘုရားသခင်၏ ရည်ရွယ်ချက်တို့ကို သိရှိဖို့ဖြစ်သည်။ ထိုနှုတ်ကပတ်တော်များတွင် လက်တွေ့လုပ်ဆောင်ရန် လမ်းကြောင်း တစ်ခုကို ရှာဖွေဖို့ နှင့် မိမိ၏ ကိုယ်ပိုင်လမ်းသို့ ပြန်လှည့်သွားခြင်းမှ ထိန်းထားဖို့ဖြစ်သည်။ ထို့အပြင် စည်းမျဉ်းများနှင့်အညီ ဘုရားသခင်၏ နှုတ်ကပတ်တော်များတွင် ဖော်ထုတ်သည့် အခြေအနေမျိုးစုံနှင့် လူအမျိုးအစားများအားလုံး အပေါ် ပိုင်းခြားသိမြင်မှုရှိနိုင်ဖို့၊ လူအမျိုးအစား တစ်ယောက်ချင်းစီကို ဆက်ဆံနိုင်ဖို့တို့ ဖြစ်သည်။ တစ်ချိန်တည်းမှာပင်၊ လမ်းလွဲခြင်းကို ရှောင်ကြဉ်ဖို့ ဖြစ်သည်။ သင်သည် ဘုရားသခင်၏နှုတ်ကပတ်တော်များကို ဆုတောင်းဖတ်ရှုနည်းနှင့် စဉ်းစားဆင်ခြင်နည်းတို့ကို သင်ယူလေ့လာပြီး ယင်းကို မကြာခဏ လုပ်ဆောင်သည်နှင့် တစ်ပြိုင်နက်၊ ဘုရားသခင်၏ နှုတ်ကပတ်တော်များသည် သင်၏ စိတ်နှလုံးထဲတွင် အမြစ်တွယ်နိုင်ပြီး၊ သင်၏ အသက်တာဖြစ်လာနိုင်သည်။

ကောက်နုတ်ချက် (၆)

နောက်ဆုံးသောကာလ၌ ဖန်ဆင်းရှင်သည် ဤနှုတ်ကပတ်တော်များအားလုံးကို လူသိရှင်ကြား မိန့်ဆိုခဲ့ပြီး၊ လူအမျိုးအစား အားလုံးကိုလည်း ထုတ်ဖော်ခဲ့၏။ ယခုအခါ လူအမျိုးအစား အားလုံးသည် သမ္မာတရားကိုလည်းကောင်း၊ မှန်သော လမ်းခရီးကိုလည်းကောင်း၊ ဖန်ဆင်းရှင်၏ မိန့်မြွက်ချက်များကိုလည်းကောင်း ရင်ဆိုင်မိကြပေပြီ။ အမျိုးမျိုးသော သဘောထားများနှင့် အမြင်များသည်လည်း ပေါ်ထွက်လာကြသည်။ တချို့သော ထင်မြင်ချက်များနှင့် အမြင်များမှာ လွဲချော်သည့်ဘက်သို့ ယိမ်းယိုင်ကြ၏။ တချို့မှာ မိမိကိုယ်ကိုယ် အမှန်ထင်၍ မာနထောင်လွှားခြင်းများ ဖြစ်၏။ တချို့မှာ ရှေးရိုးစွဲ၍ ရိုးရာ ယဉ်ကျေးမှုကို လိုက်နာစောင့်ထိန်းပြီး ဆိုးရွားလေသည်။ တော်တော်များများမှာမူ စဉ်းစားဉာဏ်မဲ့၊ မသိနားမလည်ခြင်းများ ဖြစ်၏။ သမ္မာတရားနှင့် အပြုသဘောဆောင်သော အကြောင်းအရာများကို သာမန်ကာလျှံကာ ဝေဖန်ရင်း၊ မဆင်မခြင် ပြစ်တင်ရှုတ်ချလျက်၊ သမ္မာတရားအပေါ် မုန်းတီးပြီး ရန်လိုကာ ခွေးရူးများကဲ့သို့ သွေးရူးသွေးတန်းဖြင့် ဒေါသတကြီး ရမ်းကြသည့် လူအချို့ပင် ရှိလေသည်။ ၎င်းတို့သည် သမ္မာတရား၏ အပြုသဘောဆောင်သော မည်သည့် အကြောင်းအရာ၊ ဖော်ပြချက်ကိုမဆို လက်လွတ်စပယ် ဝေဖန်ရှုတ်ချကြပြီး၊ ထိုအကြောင်းအရာတို့သည် မှန်သလော၊ မှားသလောဆိုသည်ကိုလည်းကောင်း၊ သမ္မာတရား ပါရှိ သလောဆိုသည်ကိုလည်းကောင်း ခွဲခြားရန်လည်း အားမထုတ်ကြပေ။ ဤလူများသည် တိရစ္ဆာန်များ၊ နတ်ဆိုးများ ဖြစ်ကြ၏။ လူသားတို့သည် သမ္မာတရားနှင့် မှန်သော လမ်းခရီးကို ရင်ဆိုင်တွေ့ရသည့်အခါ၊ ၎င်းတို့၏ အမြင်ကျဉ်းသော၊ ခေါင်းမာသော၊ စိတ်နှလုံးခိုင်မာသော၊ မာနထောင်လွှားသော၊ ဆိုးယုတ်သော အကျည်းတန်မှုတို့ဖြစ်သည့် စာတန်ဆန်သော အကျည်းတန်မှုကို ထုတ်ဖော်ပြသကြ၏။ သင်တို့သည် သမ္မာတရား၏ အချို့အရာများကို ရှာဖွေနေစဉ်တွင် ဤအရာမှ သင်တို့ သိမြင်တတ်ရန်၊ သင်တို့၏ ထိုးထွင်းအမြင် ကျယ်ပြန့်စေရန်အတွက် သင်ယူကြရမည်။ ဤအခြင်းအရာတို့သည် ဘုရားသခင်၏ နောက်ဆုံးသောကာလ အမှုတော်ကို လက်မခံကြသေးသော၊ မယုံကြည်ကြသော သူတို့တွင် ထုတ်ဖော်သည်ဆိုလျှင်၊ သင်တို့ကိုယ်တိုင်တွင်လည်း ဤအခြင်းအရာများ ထုတ်ဖော်ပြကြသလော။ တစ်ခါတစ်ရံ၌ ယင်းအခြင်းအရာများကို သင်တို့ ထုတ်ဖော်ပြပုံမှာ ကွဲပြားနေသလို၊ ယင်းအခြင်းအရာများကို သင်တို့ ပြောဆိုပုံမှာလည်း ကွဲပြား၏။ သို့သော် ဘာသာတရားမရှိသူများတွင် ထုတ်ဖော်သည့် စိတ်သဘောထားများသည် သင်တို့ထံတွင်လည်း အမှန်တကယ် ထုတ်ဖော်၏။ အချို့သောလူများက သခင်ယေရှုကို လက်ခံမိကြချိန်တွင်၊ သခင်ယေရှုကို လက်မခံကြသည့် ကမ္ဘာကြီးပေါ်ရှိ လူတိုင်းအား နိမ့်ကျသည်ဟု ၎င်းတို့ ယုံကြည်ကြပုံနှင့် အတူတူပင်ဖြစ်သည်။ ထိုလူများက သခင်ယေရှု၏ ကားတိုင် ကယ်တင်ခြင်းကို လက်ခံလိုက်ပြီဖြစ်ရာ ၎င်းတို့က သာလွန်သော လူပုဂ္ဂိုလ် ဖြစ်သည်ဟု ယုံကြည်ကြပြီး၊ လူတိုင်းအပေါ် အထင်အမြင်သေးကြ၏။ ဤသည်မှာ မည်သို့သော စိတ်သဘောထားမျိုး ဖြစ်သနည်း။ ၎င်းတို့သည် ထိုးထွင်းဉာဏ်ကင်းမဲ့၏၊ အမြင်ကျဉ်းလွန်းကြ၏၊ အလွန်အမင်း မာနထောင်လွှားကာ၊ မိမိကိုယ်ကိုယ် မှန်ကန်သည်ဟု ယူမှတ်ခြင်းဖြစ်၏။ ၎င်းတို့သည် အခြားသူများက ဖောက်ပြန်ပျက်စီးသော စိတ်သဘောထားများ ထုတ်ဖော်ပြနေသည်ဟု မြင်ကြသော်လည်း ထို ဖောက်ပြန်ပျက်စီးသော စိတ်သဘောထားများကို ၎င်းတို့လည်း ထုတ်ဖော်နေသည်ကို ၎င်းတို့ မမြင်ကြချေ။ သို့ဆိုလျှင် သင်တို့သည်လည်း ဤအခြင်းအရာများကို ထုတ်ဖော်ပြကြသလော။ လူသား၏ ဖောက်ပြန်ပျက်စီးသော စိတ်သဘောထားများ အားလုံးသည် တိကျစွာ တူညီကြသည်နှင့်အမျှ သင်တို့၌လည်း မုချ ထုတ်ဖော်ပြသကြ၏။ ထို့ပြင် ဘုရားသခင်၏ အမှုတော်နှင့် ကယ်တင်ခြင်း၊ သူ့အမှုတော်၏ လိုအပ်ချက်များနှင့် သူ၏ ကြိုတင်ပြဋ္ဌာန်းခြင်းကြောင့်သာ၊ လူပုဂ္ဂိုလ် အမျိုးအစားတိုင်း၏ သဘာဝ အနှစ်သာရများ၊ လိုက်စားမှုများနှင့် တောင့်တမှုများတွင် ခြားနားချက်တစ်ခု ရှိနေခြင်းဖြစ်သည်။ လူအချို့တွင် စိတ်နှလုံးဖြစ်စေ၊ ဝိညာဉ်ဖြစ်စေ၊ မရှိကြ။ ၎င်းတို့သည် ယုံကြည်ခြင်းကို နားမလည်သော လူသေများနှင့် လူ့တိရစ္ဆာန်များ ဖြစ်၏။ ဤလူများသည် လူသားမျိုးနွယ် အားလုံးထဲတွင် အောက်တန်းအကျဆုံး ဖြစ်ကာ၊ လူသားများအဖြစ် မှတ်ယူ၍မရနိုင်ချေ။ ဘုရားသခင်၏ အမှုတော်သစ်ကို လက်ခံသော သူတို့သည် သမ္မာတရားကို ပို၍ သိနားလည်ခြင်း ရှိကြ၏၊ ၎င်းတို့၏ ထိုးထွင်းဉာဏ်နှင့် ဘုရားသခင်အပေါ် သိနားလည်ခြင်းမှာ ပို၍ ကြီးမား၏၊ ၎င်းတို့၏ အယူအဆများနှင့် အမြင်များသည် အဆင့် တစ်ခုစာ ပိုမြင့်၏။ ခရစ်ယာန်ဘာသာကို ယုံကြည်သော သူတို့သည် ယေဟောဝါထံတွင် ပညတ်တော် လိုက်နာကြသော ယုံကြည်သူများထက် ဘုရားသခင်အပေါ် ပို၍ ကြီးမားသော သိနားလည်ခြင်းနှင့် ဖန်ဆင်းရှင်၏ ဖန်ဆင်းခြင်းများနှင့် လုပ်ဆောင်ချက်အပေါ် ပို၍ ကြီးမားသော အသိပညာ ရှိကြသကဲ့သို့၊ အမှုတော်၏ တတိယအဆင့်ကို လက်ခံသော သူတို့သည် ခရစ်ယာန်ဘာသာထဲရှိ ယုံကြည်သောသူများထက် ဘုရားသခင်အပေါ် ပို၍ ကြီးမားသော သိနားလည်ခြင်း ရှိကြ၏။ ဘုရားအမှုတော်၏ အဆင့်တစ်ခုစီမှာ ပြီးခဲ့သည့်အဆင့်ထက် ပို၍ မြင့်မားသောကြောင့်၊ လူတို့၏ သိနားလည်ခြင်းမှာလည်း ဧကန်မုချ ပို၍ ပို၍ ကြီးမားလာမည်မှာ အမှန်ပင်ဖြစ်၏။ သို့သော် သင့်အနေဖြင့် ထိုအခြင်းအရာကို အခြားနည်းလမ်းဖြင့် ကြည့်မည်ဆိုလျှင်၊ အမှုတော်၏ ဤအဆင့်ကို လက်ခံပြီးနောက် သင်တို့ထုတ်ဖော်နေသည့် ဖောက်ပြန်ပျက်စီးသော စိတ်သဘောထားများသည် ဘာသာတရားထဲရှိ လူများထုတ်ဖော်သည့် ဖောက်ပြန်ပျက်စီးသော စိတ်သဘောထားများအတိုင်း အနှစ်သာရအရ အတူတူပင် ဖြစ်သည်။ တစ်ခုတည်းသော ခြားနားချက်မှာ သင်တို့သည် အမှုတော်၏ ဤအဆင့်ကို လက်ခံထားပြီးကြခြင်း၊ တရားဒေသနာအများအပြားကို ကြားနာထားခြင်း၊ သမ္မာတရား အများအပြားကို နားလည်ထားခြင်း၊ မိမိ၏ သဘာဝ အနှစ်သာရအပေါ် စစ်မှန်သော သိနားလည်မှု ရရှိထားခြင်းနှင့် သမ္မာတရားကို လက်ခံကာ လက်တွေ့လုပ်ဆောင်ခြင်းအားဖြင့် အချို့သောနေရာများတွင် အမှန်တကယ် ပြောင်းလဲသွားခြင်းတို့သာ ဖြစ်သည်။ ထို့ကြောင့် ဘာသာတရားထဲရှိ လူများက ထုတ်ဖော်ပြသည့် အပြုအမူကို သင်တို့ တစ်ဖန် ကြည့်သည့်အခါ၊ ၎င်းတို့သည် သင်တို့ထက် ပို၍ ဖောက်ပြန်ပျက်စီးသည်ဟု သင်တို့ ထင်မိကြ၏။ သို့သော် အမှန်တကယ်၌ သင်တို့အား ၎င်းတို့နှင့် ယှဉ်တွဲလျက်ထားမည်ဆိုပါက၊ ဘုရားသခင်နှင့် သမ္မာတရားအပေါ် လူတို့၏ သဘောထားများမှာ အတူတူပင်ဖြစ်ကြောင်း သင်တို့ မြင်ပေလိမ့်မည်။ သင်တို့အားလုံးသည် အယူအဆများ၊ စိတ်ကူးစိတ်သန်းများနှင့် သင်တို့၏ နှစ်ခြိုက်မှုများအတိုင်း ပြုမူကြခြင်းဖြစ်ကာ သင်တို့၏ ပျက်စီးသော စိတ်သဘောထားများမှာ အတူတူပင် ဖြစ်သည်။ အကယ်၍ ၎င်းတို့က အမှုတော်၏ ဤအဆင့်ကို လက်ခံထားကြမည်၊ ဤ တရားဒေသနာများကို ကြားနာထားပြီး၊ ဤသမ္မာတရားများကို နားလည်ထားမည်ဆိုလျှင်၊ သင်တို့နှင့် ၎င်းတို့ကြား၌ ခြားနားချက် များစွာရှိလိမ့်မည် မဟုတ်။ သင်သည် ဤအကြောင်းအရာမှတစ်ဆင့် မည်သည်ကို မြင်နိုင်သနည်း။ သမ္မာတရားသည် လူတို့ထံ ပြောင်းလဲခြင်း ယူဆောင်ပေးကြောင်း၊ ဘုရားသခင် မိန့်ဆိုသော ဤနှုတ်ကပတ်တော်များနှင့် သူ ဟောကြားသော ဤတရားဒေသနာများသည် လူသားမျိုးနွယ် အားလုံးအတွက် ကယ်တင်ခြင်းဖြစ်သကဲ့သို့၊ လူသားမျိုးနွယ်အားလုံး လိုအပ်သည့် အကြောင်းခြင်းရာများလည်း ဖြစ်ကြောင်းတို့ကို မြင်နိုင်၏။ ထိုအရာများအားလုံးသည် သီးခြား လူအုပ်စုတစ်ခု၊ လူမျိုးစုတစ်ခု၊ လူအတန်းအစားတစ်ခု သို့မဟုတ် သီးခြား အသားအရောင်ရှိသော လူတို့ကိုသာ ဖြည့်ဆည်းပေးရန် ရည်ရွယ်သည်မဟုတ်။ လူသားမျိုးနွယ်အားလုံးသည် စာတန်၏ ဖောက်ပြန်ပျက်စီးစေခြင်း ခံရပြီးဖြစ်ကာ ဆိုးယုတ်သော စိတ်သဘောထားများ ရှိကြသည်။ လူတို့၏ ဖောက်ပြန်ပျက်စီးသော အနှစ်သာရများနှင့်ပတ်သက်လျှင် ခြားနားချက် ကြီးကြီးမားမား မရှိပေ။ ၎င်းတို့၏ အသားအရောင်၊ လူမျိုး၊ ၎င်းတို့ ကြီးပြင်းရာ ပတ်ဝန်းကျင်နှင့် လူမှုစနစ် မတူညီကြခြင်း၊ သို့မဟုတ် ၎င်းတို့၏ ရိုးရာယဉ်ကျေးမှု၊ လူမှုရေးနောက်ခံနှင့် ၎င်းတို့ ရရှိသည့် ပညာရေးတို့တွင် အနည်းငယ်သော ကွာခြားချက်များ ရှိနေခြင်းမျှသာ ဖြစ်၏။ သို့သော် ဤအရာများမှာ အပြင်ပန်းသွင်ပြင်များသာ ဖြစ်သည်။ လူသားမျိုးနွယ်အားလုံးသည် စာတန်တစ်ဦးတည်းကြောင့် ဖောက်ပြန်ပျက်စီးကြပြီးဖြစ်ကာ ၎င်းတို့၏ ဖောက်ပြန်ပျက်စီးသော သဘာဝအနှစ်သာရမှာ အတူတူပင် ဖြစ်သည်။ ထို့ကြောင့် ဘုရားသခင် မိန့်ဆိုသော ဤနှုတ်ကပတ်တော်များနှင့် သူ လုပ်ဆောင်သော ဤအမှုတော်သည် သီးခြားလူမျိုးစုတစ်ခု သို့မဟုတ် သီးခြားနိုင်ငံတစ်ခုခုမှ လူတို့ကို ရည်ရွယ်သည် မဟုတ်၊ ထိုထက် လူသားမျိုးနွယ် အားလုံးကို ရည်ရွယ်ခြင်းဖြစ်၏။ ယဉ်ကျေးမှုနှင့် အမျိုးမျိုးသော လူမျိုးစု နောက်ခံများတွင်ဖြစ်စေ၊ ၎င်းတို့ ရရှိသည့် ပညာရေးတွင်ဖြစ်စေ ခြားနားချက်များ ရှိနေသည့်တိုင်၊ ၎င်းတို့၏ ဖောက်ပြန်ပျက်စီးသော စိတ်သဘောထားများမှာ ဘုရားသခင်၏ အမြင်၌ အတူတူပင် ဖြစ်သည်။ ထို့ကြောင့် ဘုရားအမှုတော်၏ အဆင့်တစ်ခုကို ရှေးဦးစွာ နေရာတစ်ခုတွင်သာ လုပ်ဆောင်သော်လည်း၊ အခြားသောနေရာများသို့ သူ၏အမှုတော်ကို ဖြန့်ရန် ပုံစံငယ်တစ်ခုအနေဖြင့် ယင်းသည် လူသားမျိုးနွယ်အားလုံးနှင့် သက်ဆိုင်လေသည်။ ပြီးလျှင် ယင်းသည် လူသားမျိုးနွယ်အားလုံးကို ကယ်တင်နိုင်ကာ အထောက်အပံ့ပေးနိုင်၏။ “ဥရောပသားများနှင့် တခြားနိုင်ငံများမှ လူများသည် အဆင်းနီသော နဂါးကြီးထံမှ ဆင်းသက်လာသူများ မဟုတ်ပါ။ ထို့ကြောင့် ဘုရားသခင်က လူသားများအားလုံးဆိုးဆိုးဝါးဝါး ဖောက်ပြန်ပျက်စီးနေသည်ဟု ပြောခြင်းက သင့်တော်ခြင်းမရှိသည် မဟုတ်ပါလား” ဟူ၍ လူအချို့က ဆိုကြ၏။ ဤစကားတို့သည် မှန်သလော။ (ထိုစကားများသည် မမှန်ပါ။ လူသားများအားလုံးသည် စာတန်အားဖြင့် ဖောက်ပြန်ပျက်စီးခံရပြီးဖြစ်သည့် တူညီသော သဘာဝအနှစ်သာရ ရှိပါသည်။) မှန်ပေ၏၊ “အဆင်းနီသော နဂါးကြီးဆီမှ ဆင်းသက်လာသူများ” ဆိုသည်မှာ လူမျိုးစုတစ်ခု၏ လူများအတွက် အမည်တစ်ခုသာ ဖြစ်သည်။ ဤအမည် ရှိကြသော လူများနှင့် ဤအမည်မရှိကြသော လူများတွင် ခြားနားသော အနှစ်သာရများ ရှိကြသည်ဟု မဆိုလိုပေ။ အမှန်တွင် ၎င်းတို့၏ အနှစ်သာရများမှာ တူညီနေဆဲ ဖြစ်သည်။ လူသားမျိုးနွယ်အားလုံးသည် နတ်ဆိုးကြီး၏ လက်အောက်တွင် ရှိနေ၏၊ ၎င်းတို့အားလုံးသည် စာတန်အားဖြင့် ဖောက်ပြန်ပျက်စီးကြပြီး ဖြစ်သည်။ ၎င်းတို့၏ ဖောက်ပြန်ပျက်စီးသော သဘာဝ အနှစ်သာရများမှာလည်း အတူတူပင် ဖြစ်လေ၏။ ယခုအခါ တရုတ်လူမျိုးတို့သည် ဘုရားသခင် မိန့်ဆိုသော ဤနှုတ်ကပတ်တော်များကို ကြားရသည့်အချိန်၌ ပုန်ကန်၊ ခုခံကြ၏။ ၎င်းတို့တွင် အယူအဆများနှင့် စိတ်ကူးစိတ်သန်းများ ရှိကြ၏။ ဤသည်တို့မှာ ၎င်းတို့ ထုတ်ဖော်ပြသော အရာများဖြစ်၏။ ဤနှုတ်ကပတ်တော်များကို အခြားလူမျိုးတစ်ခု၏ လူများထံ ထပ်မံ ပြောဆိုသည့်အခါ၊ ၎င်းတို့သည်လည်း စိတ်ကူးစိတ်သန်းများ၊ အယူအဆများ၊ ပုန်ကန်ခြင်းများ၊ မာနထောင်လွှားမှုများ၊ မိမိကိုယ်ကိုယ် မှန်ကန်သည်ဟု ယူမှတ်ခြင်းများနှင့် ခုခံခြင်းများကိုပင် ထုတ်ဖော်ပြကြ၏။ တစ်ထေရာတည်း တူညီကြလေသည်။ လူသားမျိုးနွယ် အားလုံးသည် လူမျိုးနှင့် ယဉ်ကျေးမှုနောက်ခံ မည်သို့ပင် ရှိစေကာမူ၊ ဘုရားသခင် ဖော်ထုတ်သော ဖောက်ပြန်ပျက်စီးသည့် လူသားများ၏ အပြုအမူကိုသာ ပြကြလေသည်။

ဖောက်ပြန်ပျက်စီးသော စိတ်သဘောထားများသည် လူသားမျိုးနွယ်အားလုံးတွင် ရှိကြ၏။ ယင်း စိတ်သဘောထားများသည် ခြားနားချက်များထက် တူညီချက်များက ပိုများကာ၊ သိသာထင်ရှားသော ကွဲပြားခြင်းများ မရှိဘဲလျက်၊ အားလုံး အတူတူပင်ဖြစ်သည်။ ဘုရားသခင် မိန့်ဆိုသော ဤနှုတ်ကပတ်တော်များနှင့် သူ ဖော်ပြသော သမ္မာတရားများသည် လူမျိုးတစ်ခု၊ နိုင်ငံတစ်ခု၊ သို့မဟုတ် လူအုပ်စုတစ်ခုတည်းကိုသာ ကယ်တင်သည် မဟုတ်၊ ဘုရားသခင်သည် လူသားမျိုးနွယ်အားလုံးကို ကယ်တင်၏။ ဤအခြင်းအရာသည် သင်တို့အား မည်သည်ကို ပြဆိုသနည်း။ လူသားမျိုးနွယ်ထဲတွင် စာတန်၏ ဖောက်ပြန်ပျက်စီးစေခြင်းကို မကြုံရသေးသကဲ့သို့ မတူညီသော လူတန်းစားတစ်ခု သို့မဟုတ် လူအမျိုးအစားတစ်ခုတွင် ပါဝင်သောသူ တစ်ဦးတလေ ရှိသလော။ ဘုရားသခင် အချုပ်အခြာအာဏာကို မခံစားရသောသူ တစ်ဦးတလေ ရှိသလော။ (မရှိပါ။) ငါ မိန့်ဆိုသော ဤစကားများ၏ အဓိပ္ပာယ်မှာ အဘယ်သို့နည်း။ ဘုရားသခင်သည် လူသားမျိုးနွယ်အားလုံးအပေါ် အချုပ်အခြာအာဏာကိုင်စွဲထားသကဲ့သို့၊ လူသားမျိုးနွယ်အားလုံးကိုလည်း တစ်ဆူတည်းသော ဘုရားသခင်က ဖန်ဆင်းခဲ့၏။ မည်သည့် လူမျိုးအုပ်စုဖြစ်စေ၊ မည်သည့် လူအမျိုးအစားဖြစ်စေ၊ ၎င်းတို့ မည်မျှ အရည်အချင်းရှိသည်ဖြစ်စေ၊ အားလုံးကို ဘုရားသခင်က ဖန်ဆင်းခဲ့ခြင်းသာ ဖြစ်၏။ လူသား၏အမြင်၌ တချို့သောလူတို့မှာ တခြားသူများထက် ထူးခြားကာ သာလွန်နေကြ၏။ သို့သော် ဘုရားသခင်၏အမြင်၌မူ ၎င်းတို့မှာ အတူတူပင်ဖြစ်သည်။ လူသားတိုင်းသည် ဘုရားသခင်၏ အမြင်၌ တူညီနေသည်သာ ဖြစ်၏။ ဤအခြင်းအရာကို မည်သည့်နေရာတွင် သင် မြင်ရသနည်း။ အသားအရောင်နှင့် ဘာသာစကား ကွဲပြားချက်များမှာ အပြင်ပန်းသွင်ပြင်များမျှသာ ဖြစ်၏။ သို့သော် လူတို့၏ ဖောက်ပြန်ပျက်စီးသော စိတ်သဘောထားများနှင့် ၎င်းတို့၏ သဘာဝအနှစ်သာရများမှာ အတူတူပင်ဖြစ်သည်။ ဤသည်ကား ထိုအခြင်းအရာ၏ အမှန်တရား ဖြစ်၏။ စာတန်ဆန်သော ဖောက်ပြန်ပျက်စီးသော စိတ်သဘောထားရှိသည့် လူသားများအားလုံးအတွက် ဘုရားသခင်၏ နှုတ်ကပတ်တော်တို့သည် အကျိုးရလဒ်များကို စွမ်းဆောင်ရရှိနိုင်ကြ၏။ သူ၏နှုတ်ကပတ်တော်များသည် ၎င်းတို့၏ ဖောက်ပြန်ပျက်စီးသော စိတ်သဘောထားများကို ရည်ရွယ်ခြင်းဖြစ်ကာ ၎င်းတို့၏ ဖောက်ပြန်ပျက်စီးသော စိတ်သဘောထားများကို ဖြေရှင်းပေးနိုင်၏။ ဤအရာက ဘုရားသခင်၏ နှုတ်ကပတ်တော် အားလုံးသည် သမ္မာတရား ဖြစ်သည်ကိုလည်းကောင်း၊ ယင်းတို့သည် လူသားများကို သန့်စင်၊ ကယ်တင်ရန် အထောက်အပံ့ ပေးနိုင်သည်ကိုလည်းကောင်း ပြသပေသည်။ ဤအရာကို ငြင်းပယ်၍မရနိုင်ပေ။ ယခု နောက်ဆုံးသောကာလတွင် ဘုရားသခင် ဖော်ပြသော နှုတ်ကပတ်တော်များသည် ကမ္ဘာကြီး၏ နိုင်ငံများနှင့် လူမျိုးများအားလုံးဆီသို့ အနှံ့အပြား ပျံ့နှံ့နှင့်ပြီး ဖြစ်သည်။ ဤသည်မှာ အမှန်ပင်ဖြစ်၏။ ထို့ပြင် လူသား၏ တုံ့ပြန်မှုမှာ မည်သို့ ရှိလေပြီနည်း။ (တုံ့ပြန်မှုများမှာ အမျိုးစုံ ရှိနေပြီဖြစ်သည်။) သို့ဆိုလျှင် ဤတုံ့ပြန်မှုမျိုးစုံတို့သည် လူသား၏ အနှစ်သာရနှင့် ပတ်သက်၍ မည်သည်ကို ညွှန်ပြသနည်း၊ သို့မဟုတ် ထင်ဟပ်လေသနည်း။ လူသား၏ သဘာဝအနှစ်သာရမှာ အတူတူပင်ဖြစ်ကြောင်း၊ ၎င်းတို့၏ တုံ့ပြန်မှုများမှာ သခင်ယေရှု အမှုပြုရန် ကြွလာခဲ့ချိန်က ဖာရိရှဲများနှင့် ယုဒလူများကဲ့သို့ အတူတူပင် ဖြစ်ကြောင်းတို့ကို ပြသနေ၏။ ၎င်းတို့သည် သမ္မာတရားကို မနှစ်သက်ခြင်း ရှိကြ၏၊ ဘုရားသခင်နှင့်ပတ်သက်သော စိတ်ကူးစိတ်သန်းများ၊ အယူအဆများဖြင့် ပြည့်နှက်နေကြပြီး၊ ဘုရားသခင်အပေါ် ၎င်းတို့၏ ယုံကြည်မှုမှာ မရေရာသော စိတ်ကူးစိတ်သန်းများနှင့် အယူအဆများအတွင်းတွင် တည်ရှိနေ၏။ လူသားမျိုးနွယ်သည် ယေဘုယျအားဖြင့် ဘုရားသခင်ကို မသိကြဘဲ၊ အတိုက်အခံလုပ်ကြ၏။ ဘုရား၏နှုတ်ကပတ်တော်များကို ကြားကြားချင်း၌ ၎င်းတို့၏ ပထမဆုံး တုံ့ပြန်မှုမှာ သို့မဟုတ် ၎င်းတို့၏ သဘာဝအနှစ်သာရတွင် ပင်ကိုအားဖြင့် ထုတ်ဖော်သော အမှုအရာများမှာ ဘုရားသခင်အပေါ် အတိုက်အခံလုပ်ခြင်းနှင့် ရန်လိုခြင်း ဖြစ်၏။ ဤသည်မှာ ၎င်းတို့အားလုံးတွင် တူညီစွာ ရှိနေသော အရာတစ်ခု ဖြစ်သည်။ ဘုရားသခင် ဖော်ပြသော သမ္မာတရားများနှင့် ရင်ဆိုင်ရသည့်အခါ ၎င်းတို့၏ အပျက်သဘောဆောင်သော သဘောထားများနှင့် အမြင်များသည် ဖောက်ပြန်ပျက်စီးသော လူသား၏ သဘာဝအနှစ်သာရမှ ပေါ်ထွက်လာခြင်း ဖြစ်ကာ၊ ဤ လူသားမျိုးနွယ်၏ သဘောထားကို ထင်ဟပ်သောအရာလည်း ဖြစ်၏။ ၎င်းတို့၏ အယူအဆများနှင့် စိတ်ကူးစိတ်သန်းများမှာ သခင်ယေရှု ကြွရောက်ခဲ့ချိန်၌ ဘုရားသခင်နှင့်ပတ်သက်၍ ယဇ်ပုရောဟိတ်အကြီးအကဲများ၊ ကျမ်းပြုဆရာများနှင့် ဖာရိရှဲများတွင် ရှိခဲ့သည့် အယူအဆများ၊ စိတ်ကူးစိတ်သန်းများနှင့် အတူတူပင် ဖြစ်သည်။ ထိုအရာများသည် မပြောင်းလဲသေးပေ။ ဘာသာတရားထဲတွင် ရှိသောသူတို့သည် နှစ်ပေါင်း ၂၀၀၀ ကြာ ကားတိုင်ကို ထမ်းလာခဲ့ကြ၏၊ သို့သော် ၎င်းတို့သည် အနည်းငယ်မျှ မပြောင်းလဲဘဲ အရင်အတိုင်း ဆက်ရှိနေကြ၏။ လူတို့သည် သမ္မာတရားကို မရရှိသေးသော အချိန်၌၊ ဤသည်တို့မှာ ၎င်းတို့တွင် အလိုအလျောက် ပြသသော၊ ၎င်းတို့ထံမှ ပင်ကိုအားဖြင့် ထွက်ပေါ်သောအရာများ ဖြစ်ကြ၏။ ဤသည်မှာ ဘုရားသခင်အပေါ် ၎င်းတို့၏ သဘောထားပင် ဖြစ်သည်။ ထို့ကြောင့် လူတစ်ယောက်သည် ဘုရားသခင်ကို ယုံကြည်သော်လည်း သမ္မာတရားကို မလိုက်စားလျှင်၊ သူ၏ ဖောက်ပြန်ပျက်စီးသော စိတ်သဘောထားကို ပြုပြင်နိုင်မည်လော။ (မပြုပြင်နိုင်ပါ။) ၎င်းတို့သည် အချိန်မည်မျှ ကြာအောင် ယုံကြည်ပြီးသည်ဖြစ်စေ၊ သမ္မာတရားကို မလိုက်စားပါက၊ ၎င်းတို့၏ ဖောက်ပြန်ပျက်စီးသော စိတ်သဘောထား၏ ပြဿနာကို ဖြေရှင်းနိုင်ကြလိမ့်မည် မဟုတ်ပေ။ လွန်ခဲ့သော နှစ်ပေါင်း နှစ်ထောင်တွင် ဖာရိရှဲတို့သည် သခင်ယေရှုကို ဒေါသတကြီး ခုခံရှုတ်ချကာ၊ သူ့ကို ကားတိုင်တွင် သံမှိုစွဲခဲ့ကြ၏။ ယခုအခါ ဘာသာရေးလောကမှ သင်းအုပ်များ၊ အကြီးအကဲများ၊ ဘုန်းတော်ကြီးများနှင့် သင်းထောက်များသည် ဖာရိရှဲများ လုပ်ခဲ့ကြသည့်အတိုင်း လူ့ဇာတိခံယူသော ဘုရားသခင်အား ဒေါသတကြီး ခုခံရှုတ်ချနေဆဲ ဖြစ်သည်။ အကယ်၍ လူတစ်ဦးတစ်ယောက်သည် ၎င်းတို့ကြား သွားကာ၊ ဘုရားသခင်သည် လူ့ဇာတိခံယူသည်ဟု သက်သေခံမည်ဆိုလျှင်၊ ထိုသူသည် ဖမ်းဆီးခံရပြီး ကွပ်မျက်ခံရနိုင်ကောင်း၏။ အကယ်၍ လူ့ဇာတိခံယူသော ဘုရားသခင်သည်လည်း အဓိက ဘာသာတရားတိုင်း၏ ဝတ်ပြုရာ နေရာများသို့ တရားဟောရန် သွားရောက်မည်ဆိုလျှင်၊ ၎င်းတို့သည် သူ့အား ကားတိုင်တွင် သံမှိုစွဲခြင်း သို့မဟုတ် အာဏာရှိသူများထံ အပ်နှံခြင်းကို ဧကန်မုချ လုပ်ကြဦးမည်သာ ဖြစ်သည်။ ဖောက်ပြန်ပျက်စီးသော လူသားတို့၏ သဘာဝအနှစ်သာရများမှာ အားလုံး အတူတူပင် ဖြစ်သောကြောင့်၊ ၎င်းတို့သည် သူ့ကိုလုံးဝ သက်ညှာလိမ့်မည် မဟုတ်။ ဤစကားများကို သင်တို့ ကြားရသည့်အခါ စိတ်ထဲတွင် တုံ့ပြန်မှုတစ်ခုခု ရှိကြသလော။ ဘုရားသခင်ကို နှစ်ပေါင်းများစွာ ယုံကြည်လာသော်လည်း သမ္မာတရားကို အတိုင်းအတာတစ်ခုထိ လိုက်စားခြင်းမရှိသေးသော သူတို့သည် အတော်ပင် စိုးရိမ်ဖွယ်ကောင်းသည်ဟု ထင်ကြသလော။ (အနည်းငယ် ထင်မိပါသည်။) အလွန် စိုးရိမ်ဖွယ်ကောင်းသော အရာတစ်ခု ဖြစ်၏။ သမ္မာကျမ်းနှင့် ကားတိုင်သင်္ကေတကို ကိုင်ဆောင်ခြင်း၊ ပညတ်တရားကို အားကိုးခြင်း၊ ဖာရိရှဲတို့၏ အဝတ်အစားများ သို့မဟုတ် ယဇ်ပုရောဟိတ်တို့၏ ဝတ်ရုံများကို ဝတ်ဆင်ခြင်းနှင့်၊ ဗိမာန်တော်များတွင် ဘုရားသခင်အား လူသိရှင်ကြား အတိုက်အခံလုပ်၊ ရှုတ်ချခြင်း၊ ဤအရာများသည် ဘုရားသခင်ကို ယုံကြည်သော သူများက နေ့ခင်းကြောင်တောင်၌ပင် ပြုလုပ်ကြသော အရာများ မဟုတ်လော။ ဘုရားသခင်ကို ပြစ်တင်ရှုတ်ချ၊ ခုခံကြသော လူတို့သည် မည်သည့်နေရာ၌ ရှိသနည်း။ ဝေးဝေး ကြည့်စရာ မလိုပေ။ ဘုရားသခင်ကို ယုံကြည်သူများထဲတွင် သမ္မာတရားကို လက်မခံသကဲ့သို့ သမ္မာတရားကို အလွန်အမင်းမနှစ်မြို့သော မည်သူမဆိုသည် ဘုရားသခင်ကို အတိုက်အခံလုပ်သူတစ်ယောက်၊ အန္တိခရစ်တစ်ယောက်၊ ဖာရိရှဲတစ်ယောက် ဖြစ်ပေသည်။

လူတို့သည် သမ္မာတရားကို မလိုက်စားသကဲ့သို့ ထိုသမ္မာတရားကို မရရှိနိုင်ကြလျှင်၊ ၎င်းတို့သည် ဘုရားသခင်ကို ဘယ်သောအခါမှ သိကြလိမ့်မည်မဟုတ်။ လူတို့သည် ဘုရားသခင်ကို မသိသောအခါ၊ ဘုရားသခင်အပေါ် အမြဲ ရန်လိုခြင်း ဆက်ရှိနေကြလိမ့်မည်ဖြစ်ပြီး၊ ဘုရားသခင်နှင့် သဟဇာတဖြစ်ရန် ၎င်းတို့အတွက် မဖြစ်နိုင်ပေ။ သင်၏စိတ်နှလုံးက ဘုရားသခင်ကို ချစ်ခင်ရန် နှလုံးသွင်းအရ မည်မျှ ဆန္ဒရှိသည်ဖြစ်စေ၊ သူ့အား အတိုက်အခံလုပ်ရန် မည်မျှ မလိုလားသည်ဖြစ်စေ၊ အချည်းနှီးသာ ဖြစ်၏။ ဤသည်မှာ လူတို့၏ သဘာဝက ဆုံးဖြတ်သည့် အမှတ်တမဲ့ အခြေအနေတစ်ခု ဖြစ်လေရာ၊ ဆန္ဒရှိရုံ သို့မဟုတ် မိမိကိုယ်ကို ချုပ်ထိန်းချင်ရုံဖြစ်ခြင်းသည် အချည်းနှီးသာ ဖြစ်၏။ ထို့ကြောင့် သင်သည် သမ္မာတရားရှိသော လူတစ်ယောက် ဖြစ်လာအောင် အားထုတ်ရမည်၊ သမ္မာတရားအား လက်တွေ့လုပ်ဆောင်ခြင်းကို အားထုတ်ရမည်၊ သင်၏ ဖောက်ပြန်ပျက်စီးသော စိတ်သဘောထားကို ဖယ်ရှားရမည်၊ သမ္မာတရား စစ်မှန်မှုများအတွင်းသို့ ဝင်ရောက်ရမည်၊ ဘုရားသခင်နှင့် သဟဇာတဖြစ်ခြင်းကို စွမ်းဆောင်ရရှိရမည်။ ဤသည်မှာ မှန်သောလမ်းကြောင်း ဖြစ်၏။ ဘုရားသခင်ကို ယုံကြည်ခြင်း၏ အရေးကြီးဆုံး အပိုင်းမှာ သမ္မာတရားကို လိုက်စားခြင်းဖြစ်ကြောင်း သင်တို့စိတ်နှလုံးထဲ၌ သိရမည်။ သမ္မာတရားကို လိုက်စားသည့်အခါ သင့်အနေဖြင့် စတင် လုပ်ဆောင်သင့်သည့် ကဏ္ဍများနှင့်စပ်လျဉ်း၍ လက်တွေ့လုပ်ဆောင်မှုအချို့အပြင်၊ မည်သည့်အရာကို လုပ်ဆောင်ရန် လိုအပ်သည်၊ မိမိတာဝန်များကို မည်သို့ ချဉ်းကပ်ရမည်၊ မိမိအနီးအနားရှိ လူအမျိုးအစားတိုင်းကို မည်သို့ ချဉ်းကပ်ရမည်၊ အမှုအရာတိုင်း၏ အကြောင်းကိစ္စခပ်သိမ်းကို မည်သို့ ချဉ်းကပ်ရမည်၊ ယင်းတို့ကို ချဉ်းကပ်သည့်အခါ မည်သည့်အမြင်ကို ခံယူသင့်သည်၊ မည်သည့် လုပ်နည်းကိုင်နည်းသည် သမ္မာတရားစည်းမျဉ်းများနှင့် အညီဖြစ်သည်ကိုလည်း သဘောပေါက်ရမည်။ သင်သည် သမ္မာတရားကို မရှာဖွေ သို့မဟုတ် သမ္မာတရားစည်းမျဉ်းများကို နားမလည်သကဲ့သို့၊ စည်းမျဉ်းစည်ကမ်းများကိုသာ လိုက်လျှောက်နိုင်စွမ်းရှိကာ အမှုအရာများကို ထိုစည်းမျဉ်းများအတိုင်း၊ တွေးခေါ်ဆင်ခြင်မှု၊ အယူအဆများနှင့် စိတ်ကူးစိတ်သန်းများအတိုင်းသာ သတ်မှတ်နိုင်စွမ်းရှိပါက၊ သင်၏ လက်တွေ့လုပ်ဆောင်ခြင်း နည်းလမ်းသည် မှားယွင်းပြီး၊ ဘုရားသခင်ကို သင် ယုံကြည်ခဲ့သည့် နှစ်ကာလများတွင် သင်သည် စည်းမျဉ်းစည်းကမ်းများကိုသာ အတိအကျ လိုက်နာပြီးဖြစ်သော်လည်း၊ သမ္မာတရားကို နားမလည်သေးသကဲ့သို့ စစ်မှန်မှုလည်း မရှိသေးသည်ကိုသာ သက်သေပြပေသည်။ စည်းမျဉ်းစည်းကမ်းများ လိုက်လျှောက်ခြင်းနှင့် အယူအဆများ၊ စိတ်ကူးစိတ်သန်းများနှင့်အညီ နေထိုင်ခြင်းသည် သင့်အတွက် ခက်ခဲ ပင်ပန်းဖွယ်ရာ ကောင်းသော်လည်း၊ ယင်းသည် အချည်းနှီး အားထုတ်မှုသာ ဖြစ်ကာ ဘုရားသခင်သည် သင့်အား အနည်းငယ်မျှ အသိအမှတ်ပြုလိမ့်မည် မဟုတ်။ ခက်ခဲ ပင်ပန်းရခြင်းမှာ နည်းပင် နည်းသေး၏။ အကယ်၍ သင်သည် ဘုရားသခင်၏ နှုတ်ကပတ်တော်များကို ဖတ်သည့်အခါ သို့မဟုတ် တရားဒေသနာများကို ကြားနာပြီး မိတ်သဟာယပြုသည့်အခါ၊ ဝိညာဉ်ရေးရာ သိနားလည်ခြင်းနှင့် စစ်မှန်သော သဘောပေါက်ခြင်း ရှိပါက၊ သင့်အနေဖြင့် တွေ့ကြုံရလေလေ ပို၍ နားလည်ကာ ရရှိလေလေ ဖြစ်လိမ့်မည်။ သင် နားလည်သော အရာများမှာလည်း လက်တွေ့ကျ၍ သမ္မာတရားနှင့် အညီချည်းသာ ဖြစ်လိမ့်မည်။ ထို့နောက် သင်သည် သမ္မာတရားကို ရရှိကာ၊ အသက်ကိုလည်း ရရှိပြီးဖြစ်လိမ့်မည်။ အကယ်၍ ဘုရားသခင်ကို နှစ်ပေါင်းများစွာ ယုံကြည်ပြီးနောက် သင် ရရှိပြီး နားလည်ထားသော အရာများမှာ ဩဝါဒနှင့် စည်းမျဉ်းစည်းကမ်းများနှင့် ဆိုင်သည့်အရာ၊ အယူအဆများ၊ စိတ်ကူးစိတ်သန်းများနှင့် သက်ဆိုင်သည့်အရာများ၊ သင့်ကို ချည်နှောင်သော စည်းမျဉ်းစည်းကမ်းများသာ ဖြစ်နေသေးပါက၊ သင်သည် လုံးလုံး အဆုံးသတ်ပေပြီ။ ဤသည်မှာ သင်သည် သမ္မာတရားကို မရရှိသေးကြောင်း၊ သင့်တွင် အသက် မရှိကြောင်းကို သက်သေပြ၏။ သင့်အနေဖြင့် ဘုရားသခင်ကို နှစ်ပေါင်းမည်မျှ ယုံကြည်ပြီးသည်ဖြစ်စေ၊ စကားများနှင့် အယူဝါဒများကို မည်ရွေ့မည်မျှ ဟောပြောနိုင်သည်ဖြစ်စေ၊ သင်သည် အဓိပ္ပာယ်မဲ့ပြီး ယောင်ချာချာ လူတစ်ယောက် ဖြစ်နေဆဲပင် ဖြစ်သည်။ ထိုသို့ ဆိုရသည်မှာ နားဝင်မချိုလှသော်လည်း၊ အမှန်ပင် ဖြစ်၏။ ဘုရားသခင်ကို နှစ်ပေါင်းများစွာ ယုံကြည်လာသောလူ အများအပြား ရှိကြသော်လည်း၊ သမ္မာတရားနှင့် ခရစ်တော်သည် ဘုရားသခင်၏ အိမ်တော်၌ တန်ခိုးအာဏာ စွဲကိုင်ကြောင်း၊ သန့်ရှင်းသောဝိညာဉ်တော်သည် အရာခပ်သိမ်းအပေါ် အချုပ်အခြာအာဏာ ကိုင်စွဲထားကြောင်းကို ၎င်းတို့ မသိကြပေ။ ဤသို့သော လူများသည် မည်သည့် သိနားလည်ခြင်းမျှ မရှိကြဘဲ၊ မျက်မမြင်များလောက်သာ ဖြစ်ကြ၏။ အချို့ကမူ ဘုရားသခင်သည် လူတို့ကို တရားစီရင်ကာ ပြစ်တင်ဆုံးမကြောင်း၊ လူအုပ်စုတစ်ခုကို စုံလင်စေသော်လည်း၊ အခြားသော လူအများအပြားကို ဖယ်ရှားရှင်းလင်းကြောင်း မြင်ကြသောကြောင့်၊ ဘုရားသခင်၏ ချစ်ခြင်းနှင့် သူ၏ ဖြောင့်မတ်ခြင်းကိုပင် သံသယ ရှိကြ၏။ ဤသို့သော လူများသည် နားလည် သဘောပေါက်နိုင်စွမ်း တစ်ခုတလေ ရှိကြသလော။ ၎င်းတို့တွင် သိနားလည်ခြင်း တစ်ခုတလေ ရှိကြသလော။ ၎င်းတို့သည် နားလည်နိုင်စွမ်း လုံးဝ မရှိသည့် မိုက်မဲသောလူများ ဖြစ်သည်ဟု ဆို၍ ရပေသည်။ မိုက်မဲသော လူများသည် အမှုအရာများကို ယုတ္တိမရှိသော သိနားလည်မှုဖြင့် အမြဲတစေ ကြည့်တတ်၏။ သမ္မာတရားကို နားလည်သော သူတို့သာလျှင် အမှုအရာများကို မှန်ကန်တိကျစွာ၊ အချက်အလက်များနှင့် လျော်ညီစွာ ရှုမြင်နိုင်ကြလေသည်။

ကောက်နုတ်ချက် (၇)

ဘုရားသခင်၏အမှုကို ဖြန့်ပြီး သက်သေခံသော ဧဝံဂေလိ ဟောပြောသည့် လူအချို့သည် စိုးရိမ်ဖွယ်ရာ အမှားကြီးတစ်ခုကို ပြုလုပ်ကြသည်။ ၎င်းတို့သည် ဘာသာရေးသမားများက အယူအဆများ ဖြစ်ပေါ်နိုင်ခြေအရှိဆုံးသော ဘုရားနှုတ်ကပတ်တော်များအတွက် အဖြေအနေဖြင့် ထိုဘုရားနှုတ်ကပတ်တော်များကို ဖယ်ရှားပစ်ကာ ဧဝံဂေလိ လက်ခံရန် အလားအလာ ရှိသူများကို လိုရင်းတိုရှင်း အနှစ်ချုပ်ဖြစ်သော ဘုရားနှုတ်ကပတ်တော်များ ပေးလေသည်။ သူတို့၏အကြောင်းပြချက်မှာ အယူအဆများဖြစ်ပေါ်ခြင်းနှင့် အထင်လွဲခြင်းများမှ လူများကို ကာကွယ်တားဆီးဖို့ ဤအရာကို လုပ်ခြင်းဖြစ်သည် ဟူ၍ဖြစ်သည်။ သို့သော် ဤသည်မှာ မှန်ကန်သလော။ ဘုရားနှုတ်ကပတ်တော်များအားလုံးသည် သမ္မာတရား ဖြစ်သည်။ လူများတွင် အယူအဆများရှိကြသည်ဖြစ်စေ၊ သူတို့သည် ဤနှုတ်ကပတ်တော်များကို လက်ခံသည်ဖြစ်စေ၊ လက်မခံသည်ဖြစ်စေ၊ ချစ်မြတ်နိုးသည်ဖြစ်စေ၊ မချစ်မြတ်နိုးသည်ဖြစ်စေ သမ္မာတရားသည် သမ္မာတရားသာဖြစ်သည်။ ယင်းကို လက်ခံသူများသည် ကယ်တင်ခြင်း ခံရနိုင်သော်လည်း လက်မခံသူများသည် ပျက်စီးခြင်းသို့ ရောက်လိမ့်မည်။ သမ္မာတရားကို ငြင်းဆန်သူတိုင်းသည် သေဖို့နှင့် ပျက်စီးခြင်းသို့ရောက်ဖို့ ထိုက်တန်သည်။ ဤသည်က ဧဝံဂေလိကို ဖြန့်သောသူများနှင့် မည်သို့သက်ဆိုင်သနည်း။ ဧဝံဂေလိဖြန့်သူများသည် လူများက အယူအဆများ ရှိလာလိမ့်မည်ကို ကြောက်ရွံ့သောကြောင့် ဘုရားသခင်၏ မူရင်းနှုတ်ကပတ်တော်များကို အကျဉ်းချုပ်မည့်အစား လူများအား ယင်းတို့ကို ဖတ်ရှုခွင့်ပေးသင့်သည်။ လူများက စစ်မှန်သောလမ်းခရီးကို စုံစမ်းစစ်ဆေးသောအခါ ဘုရားသခင်၏ မူရင်းနှုတ်ကပတ်တော်များကို မည်သို့ပြောကြောင်း၊ ယင်းတို့အထဲတွင် မည်သည့်အကြောင်းအရာမျိုးရှိကြောင်းနှင့် အချို့သောကိစ္စရပ်များအပေါ် ဘုရားသခင်၏ မူရင်းအကျဆုံးသော ပြောဆိုချက်များက မည်သည်တို့ ဖြစ်ကြောင်းတို့ကို သူတို့က သိမြင်လိုကြသည်။ “ဘုရားသခင်သည် ဖန်ဆင်းရှင်ဖြစ်သည်ဟု သင်တို့ ဆိုကြသည်။ သို့ဆိုလျှင် သူပြောသောနှုတ်ကပတ်တော်များက မည်သည်တို့နည်း၊ သူ၏စကားပြောသောပုံစံက မည်သို့နည်း” ဟူ၍ လူများက သိလိုကြသည်။ ဘာသာရေးကိုင်းရှိုင်းသောလူများက သမ္မာကျမ်းစာကို ရှင်းပြသောအခါ သူတို့ပြောသမျှအရာအားလုံးသည် လူသား၏ အယူအဆများအတိုင်းဖြစ်နေသည့်အလား သင်တို့သည် လူသားအယူအဆများနှင့် မကိုက်ညီသည့် ဘုရားသခင်၏ ထိုနှုတ်ကပတ်တော်များကို ပြောင်းလဲဖို့ မရမကလုပ်ဆောင်ကြသည်။ ပြောင်းလဲပြင်ဆင်ထားသည့် ဘုရားနှုတ်ကပတ်တော်များ၏ တည်းဖြတ်မှုတစ်မျိုးကို လူများအား ပြသဖို့ သင်သည် မရမကလုပ်ဆောင်ပြီး သူ့နှုတ်ကပတ်တော်များ၏ မူရင်းပုံစံကို လူများအား မြင်ခွင့်မပေးပေ။ ဤအရာ၏အကြောင်းအရင်းမှာ အဘယ်နည်း။ သင်တို့တွင်လည်း ဤဘုရားနှုတ်ကပတ်တော်များနှင့်ပတ်သက်၍ အယူအဆများ ရှိကြသလော။ ဘာသာရေးသမားများကဲ့သို့ သင်တို့က လူသားအယူအဆများနှင့် မကိုက်ညီသည့် သူ၏ ထိုနှုတ်ကပတ်တော်များသည် သမ္မာတရားမဟုတ်ဟုလည်းကောင်း၊ သမ္မာတရားသည် လူသားအယူအဆများနှင့် ကိုက်ညီသည့် ထိုနှုတ်ကပတ်တော်များသာ သမ္မာတရားဖြစ်သည်ဟုလည်းကောင်း သင်တို့ ယုံကြည်ကြသလော။ သို့ဆိုလျှင် ယင်းသည် လူသားတို့၏ အမှားဖြစ်သည်။ ဘုရားနှုတ်ကပတ်တော်များကို မည်သို့ပြောသည်ဖြစ်စေ၊ ပြီးလျှင် လူသား၏အယူအဆများနှင့် ၎င်းတို့ ကိုက်ညီသည်ဖြစ်စေ၊ မကိုက်ညီသည်ဖြစ်စေ၊ ယင်းတို့သည် သမ္မာတရားဖြစ်သည်။ ယင်းမှာ ဖောက်ပြန်ပျက်စီးသောလူသားများတွင် သမ္မာတရား မရှိကြသကဲ့သို့ သမ္မာတရားကို မသိကြသောကြောင့်သာ သူတို့သည် ဘုရားသခင်၏ နှုတ်ကပတ်တော်များနှင့်ပတ်သက်၍ အယူအဆများ ဖြစ်ပေါ်ကြခြင်းဖြစ်သည်။ ဤသည်မှာ လူသား၏ မိုက်မဲခြင်းနှင့် မသိနားမလည်ခြင်းဖြစ်သည်။ ဘုရားနှုတ်ကပတ်တော်များသည် အထူးသဖြင့် လက်တွေ့ကျပြီး တိကျသောအကျိုးသက်ရောက်မှုတစ်ခုအနေဖြင့် လက်ဆုပ်လက်ကိုင် ပြနိုင်သည်ကို သင်တို့သည် ရှင်းလင်းပြတ်သားစွာ မြင်ဖို့ ပျက်ကွက်ကြသည်။ ပြီးလျှင် လူသား၏အစွမ်းအစ မည်မျှညံ့ဖျင်းကြောင်းနှင့် အကယ်၍ ဘုရားနှုတ်ကပတ်တော်များသည် အလွန် လိုရင်းတိုရှင်းဖြစ်လွန်းပြီး သဘောတရားဆန်လွန်းပါက လူများ နားလည်ဖို့အတွက် ယင်းက မည်မျှခက်ခဲကြောင်းတို့ကို သင်သတိပြုမိခြင်း ပို၍ပင်လျှင် နည်းပါးသည်။ အမှုကို ထမ်းဆောင်ဖို့ သခင်ယေရှု ထွက်ပေါ်လာခဲ့သောအချိန်ကို ပြန်လည်စဉ်းစားကြည့်လော့။ တပည့်တော်များစွာသည် သူ၏နှုတ်ကပတ်တော်များကို နားမလည်နိုင်ခဲ့ကြဘဲ ယင်းတို့၏ အဓိပ္ပါယ်ကို နားလည်သဘောပေါက်ဖို့အလို့ငှာ ပုံဥပမာများပေးဖို့နှင့် ပုံဆောင်ဝတ္ထုများ ပြောကြားပေးဖို့ သူ့ကို တောင်းဆိုခဲ့ရသည်။ ယင်းကဲ့သို့ မဟုတ်လော။ ယနေ့ ငါက အသေးစိတ်ကျလွန်းပြီး တိကျလွန်းစွာပြောသောအခါ ယင်းမှာ စကားကြောရှည်လွန်းသည်ဟု သင်တို့က မကျေနပ်ချက်ကို ညည်းညူကြသည်။ ငါက နက်နက်နဲနဲ စကားပြောသောအခါ သင်တို့သည် နားမလည်ကြပေ။ သို့သော် ငါက ယေဘုယျကောက်ချက်ချသောအခါ သင်တို့သည် ယင်းကို အယူဝါဒအနေဖြင့် မှတ်ယူကြသည်။ ဤနည်းလမ်းအားဖြင့် လူသားများသည် ခက်ခဲကြသည်။ ဘုရားနှုတ်ကပတ်တော်များတွင် ယခုအခါ၌ ဘုရားသဘောသဘာဝ ဘာသာစကားအပြင် လူသားဘာသာစကားလည်းရှိသည်။ လိုရင်းတိုရှင်းဖြစ်ခြင်းနှင့် တိကျခြင်း နှစ်မျိုးလုံးရှိသည်။ ထို့အပြင် လူများ၏ အခြေအနေအမျိုးမျိုးကို ဖော်ထုတ်သည့်ဥပမာများစွာလည်း ရှိခဲ့ကြသည်။ သမ္မာတရားကို နားလည်ပြီးဖြစ်သောသူများအတွက် အချို့နှုတ်ကပတ်တော်များသည် အသေးစိတ်ကျလွန်းသယောင် ထင်ရသည်။ သို့သော် ယုံကြည်သူအသစ်များအတွက်မူ ၎င်းတို့သည် သင့်တင့်ရုံသာဖြစ်သည်။ ပြီးလျှင် ဤအဆင့်အထိ အသေးစိတ်ကျ၍ တိကျခြင်းမရှိဘဲ ရလဒ်များကို ရဖို့ ခက်ခဲလိမ့်မည်။ ယင်းမှာ သားသမီးများကို မိဘများက လူလားမြောက်အောင် ကျွေးမွေးသုတ်သင်သကဲ့သို့ပင် ဖြစ်သည်။ သားသမီးများက ငယ်သေးသည့်အချိန်တွင် မိဘများသည် အသေးစိတ်ကျသည့် အရာများစွာကို လုပ်ဖို့ လိုအပ်သည်။ သို့သော် သားသမီးများ စဉ်းစားချင့်ချိန်တတ်လာပြီး သူတို့ကိုယ်သူတို့ ဂရုစိုက်လာနိုင်သည်နှင့်တစ်ပြိုင်နက် ယင်းတို့ကို လုပ်ဆောင်ခြင်းအား မိဘများက ရပ်တန့်လိုက်နိုင်သည်။ ဤသည်ကို လူများက နားလည်ကြသည်။ ထို့ကြောင့် ဘုရားသခင်၏အမှုကိစ္စကို သူတို့သည် အဘယ်ကြောင့် နားမလည်နိုင်ရသနည်း။ ယုံကြည်သူအသစ်များသည် ပို၍ပေါ့တန်ပြီး ဥပမာများဖြင့် ထောက်ကူပေးထားသော နှုတ်ကပတ်တော်များ၊ အတော်အတန် အသေးစိတ်ကျပြီး စေ့စပ်တိကျသောနှုတ်ကပတ်တော်များကို ဖတ်ရမည်။ နှစ်ပေါင်းများစွာ ဘုရားသခင်ကို ယုံကြည်လာခဲ့ပြီး သမ္မာတရားအချို့ကို နားလည်သောသူများသည် အတော်အတန် နက်နဲပြီး သူတို့ နားလည်သဘောပေါက်နိုင်သည့် နှုတ်ကပတ်တော်များကို ဖတ်ရမည်။ ဘုရားသခင်က မည်သို့စကားပြောသည်ဖြစ်စေ၊ ယင်းတို့အားလုံးသည် လူများအား သမ္မာတရားကို နားလည်ခွင့်ပေးဖို့၊ သူတို့၏ဖောက်ပြန်ပျက်စီးသော စိတ်သဘောထားများကို ဖယ်ရှားဖို့နှင့် သမ္မာတရားစစ်မှန်မှုထဲသို့ ဝင်ရောက်ဖို့ ရည်ရွယ်သည်။ ဤရလဒ်များကို စွမ်းဆောင်ရဖို့အလို့ငှာ သူပြောသည်။ သူ၏နှုတ်ကပတ်တော်များသည် နက်နဲသည်ဖြစ်စေ သို့မဟုတ် ပေါ့တန်သည်ဖြစ်စေ၊ လူများက ၎င်းတို့ကို လက်လှမ်းမီသည်ဖြစ်စေ သို့မဟုတ် လက်လှမ်းမမီသည်ဖြစ်စေ၊ သမ္မာတရားကို နားလည်ခြင်းနှင့် သမ္မာတရားစစ်မှန်မှုထဲသို့ ဝင်ရောက်ခြင်းသည် မလွယ်ကူချေ။ သင်သည် အစွမ်းအစကောင်းပြီး နက်နဲသောသမ္မာတရားများကို နားလည်သဘောပေါက်နိုင်ရုံဖြင့် သင့်တွင် ပေါ့တန်သောသမ္မာတရားများနှင့် စစ်မှန်မှုကို ပိုင်ဆိုင်ပြီးဖြစ်သည်ဟု မထင်မှတ်လေနှင့်။ ယင်းက မှန်ကန်သလော။ ရိုးသားသောလူတစ်ယောက် ဖြစ်ခြင်းနှင့်ပတ်သက်သည့် သမ္မာတရားတစ်ခုတည်းကပင် တစ်သက်တာ အတွေ့အကြုံတစ်ခုအတွက် လုံလောက်ပြီဖြစ်၏။ ဘုရားနှုတ်ကပတ်တော်များက မည်မျှပေါ့တန်သည်ဖြစ်စေ၊ သူက ဥပမာမည်မျှများများကို ပေးသည်ဖြစ်စေ၊ နှစ်ပေါင်း ဆယ်နှစ် သို့မဟုတ် ရှစ်နှစ်ကြာ အတွေ့အကြုံ ရှိပြီးသည့်နောက်တွင်ပင် စစ်မှန်မှုထဲသို့ သင်သည် မဝင်ရောက်နိုင်ပေ။ ထို့ကြောင့် ဘုရားနှုတ်ကပတ်တော်များကို ချဉ်းကပ်သောအခါ ယင်းတို့၏နက်နဲမှုကို ကြည့်ခြင်းက မှားယွင်းသည်။ ဤအမြင်သည် မမှန်ပေ။ စစ်မှန်မှုကို အနီးကပ် အာရုံစိုက်ခြင်းသည် လူတစ်ဦးအတွက် အကောင်းဆုံးဖြစ်သည်။ သင့်တွင် သဘောပေါက်နားလည်နိုင်စွမ်းရှိပြီး သမ္မာတရားကို နားလည်နိုင်ရုံဖြင့် သင့်တွင် စစ်မှန်မှုရှိခြင်း မဟုတ်ပေ။ အကယ်၍ သင်သည် သမ္မာတရားကို လက်တွေ့မလုပ်ဆောင်နိုင်ပါက အကောင်းဆုံးသော သဘောပေါက်နားလည်နိုင်စွမ်းသည်ပင်လျှင် သင့်အတွက် အနှစ်သာရမဲ့သော အယူဝါဒများသာ ဖြစ်လိမ့်မည်။ သင်သည် သမ္မာတရားကို လက်တွေ့လုပ်ဆောင်ရမည်၊ သင့်တွင် အတွေ့အကြုံနှင့် အသိပညာရှိရမည်။ ဤနည်းတစ်ခုတည်းဖြင့်သာ သင်၏သဘောပေါက်နားလည်နိုင်စွမ်းသည် လက်တွေ့ကျလိမ့်မည်။ ဘုရားနှုတ်ကပတ်တော်များသည် အသေးစိတ်ကျလွန်းသည် သို့မဟုတ် ပေါ့တန်လွန်းသည်ဟု စောဒကတက်သူတိုင်းသည် မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်သည့်အပြင် သူတို့တွင် သမ္မာတရားစစ်မှန်မှုတစ်စုံတစ်ရာ မရှိချေ။ လူသားသည် ဘုရားနှုတ်ကပတ်တော်များ၏ဉာဏ်ပညာနှင့် သူ၏အတွေးများကို နားလည်သဘောပေါက်နိုင်သလော။ ဘုရားနှုတ်ကပတ်တော်များအပေါ် လူများစွာတို့၏သဘောထားတွင် မာနထောင်လွှားလွန်းကြပြီး မသိနားမလည် ဖြစ်လွန်းသည်။ သူတို့တွင် သမ္မာတရားစစ်မှန်မှု များများစားစား ရှိကြသည့်အလား ပြုမူကြပြီး အမှန်အားဖြင့် သူတို့သည် သမ္မာတရားကို လက်တွေ့မလုပ်ဆောင်ကြဘဲ စစ်မှန်သည့်သက်သေခံချက်တစ်စုံတစ်ရာကို လုံးဝ မပြောနိုင်ကြပေ။ သဘောတရားအရ အနှစ်သာရမဲ့သောစကားလုံးများကိုသာ သူတို့ ပြောနိုင်ကြသည်။ သူတို့သည် သဘောတရားပညာရှင်များနှင့် အယောင်ဆောင်သူများဖြစ်ကြသည်။ သမ္မာတရားကို အစစ်အမှန် လိုက်စားသောသူများသည် ဘုရားနှုတ်ကပတ်တော်များကို မည်သို့ဖတ်သင့်သနည်း။ သူတို့သည် သမ္မာတရားကို ရှာဖွေသင့်သည်။ သမ္မာတရားကို ရှာဖွေခြင်းသည် အရာများစွာကို ခြုံငုံမိပြီး အရာများစွာ ပါဝင်သည်။ ထို့ကြောင့် ယင်းနှင့်ပတ်သက်၍ အသေးစိတ်မပြောဘဲ ရနိုင်ပါမည်လော။ တိတိကျကျနှင့် ပြည့်ပြည့်စုံစုံ မပြောဆိုဘဲ ရလဒ်များကို စွမ်းဆောင်ရနိုင်ပါမည်လော။ ဥပမာများစွာ၏ အထောက်အကူမပါဘဲ လူများသည် အမှန်တကယ် နားလည်နိုင်မည်လော။ ဘုရားနှုတ်ကပတ်တော်အချို့သည် ပေါ့တန်လွန်းသည်ဟု လူများစွာက ထင်ကြသည်။ သို့ဖြစ်လျှင် အဆိုပါပေါ့တန်သောစကား မည်မျှများများကို သင်ဝင်ရောက်ပြီးပြီနည်း။ မည်သည့်အတွေ့အကြုံဆိုင်ရာ သက်သေခံချက်ကို သင်ဝေမျှနိုင်သနည်း။ အကယ်၍ ဤပေါ့တန်သော စကားများထဲသို့ပင်လျှင် သင်မဝင်ရောက်ရသေးပါက ပို၍နက်နဲသော စကားများကိုဆိုလျှင် သင်နားလည်သဘောပေါက်နိုင်သလော။ ယင်းတို့ကို သင်သည် အမှန်တကယ် နားလည်နိုင်သလော။ သင့်ကိုယ်သင် လူတော်တစ်ဦးအဖြစ် စိတ်ကူးယဉ်မနေနှင့်။ မာနထောင်လွှားပြီး မိမိကိုယ်ကို မှန်ကန်သည်ဟု မယူမှတ်နှင့်။

ဘုရားနှုတ်ကပတ်တော်များကို ပြောင်းလဲပြင်ဆင်သည့် ပြဿနာကို ပြန်ဆွေးနွေးကြစို့။ ဘုရားအိမ်တော်သည် ‘နှုတ်ကပတ်တော်သည် လူ့ဇာတိ၌ ပေါ်လာ၏’၏ တရားဝင်တည်းဖြတ်မှုကို ပုံနှိပ်ထုတ်ဝေခဲ့သည်။ ပြီးလျှင် ပြောင်းလဲမှုများ စိုးစဉ်းမျှ ပြုလုပ်ဖို့ကို မည်သူ့ကိုမျှ ခွင့်မပြုပေ။ ဘုရားနှုတ်ကပတ်တော်များ၏ မည်သည့်တရားဝင်တည်းဖြတ်မှုကိုမျှ မည်သူကမျှ ပြောင်းလဲ၍ မရပေ။ အကယ်၍ တစ်စုံတစ်ယောက်က ထိုနှုတ်ကပတ်တော်တို့ကို ပြောင်းလဲပါက ယင်းကို သူ့နှုတ်ကပတ်တော်များအား ပြောင်းလဲပြင်ဆင်ခြင်းအဖြစ် မှတ်ယူမည်ဖြစ်သည်။ သူ့နှုတ်ကပတ်တော်များကို ပြောင်းလဲပြင်ဆင်သည့်သူများသည် သမ္မာတရားကို တမ်းတပြီး ဘုရားနှုတ်ကပတ်တော်များကို ဖတ်ဖို့ မျှော်လင့်စောင့်စားနေသူများအားလုံး၏ လိုအင်ဆန္ဒနှင့်ပတ်သက်၍ အနည်းဆုံးသောနားလည်မှုပင် မရှိကြချေ။ ဤလူများသည် ဘုရားမူရင်းနှုတ်ကပတ်တော်များ ဖြစ်သကဲ့သို့ သူ၏မူရင်းအဓိပ္ပါယ်နှင့် ရည်ရွယ်ချက်တို့၏ ဖော်ပြချက်များဖြစ်ကြသည့် သူ့နှုတ်ကပတ်တော်များ၏ တရားဝင်တည်းဖြတ်မှုကို ဖတ်ချင်ကြသည်။ သမ္မာတရားကို ချစ်သောလူများအားလုံးသည် ဤကဲ့သို့ပင်ဖြစ်သည်။ ဤအမှုအားလုံးကို လုပ်ရခြင်းနှင့် ဤနှုတ်ကပတ်တော်များအားလုံးကို ပြောရခြင်းအတွက် သို့မဟုတ် ထိုမျှအသေးစိတ်ပြောရခြင်း အကြောင်းအရင်းအတွက် ဘုရားသခင်၏ မူရင်းရည်ရွယ်ချက်၊ ရည်မှန်းချက်နှင့် အဓိပ္ပာယ်တို့ကို လူများ နားမလည်ကြပေ။ လူများသည် နားမလည်ကြသည့်တိုင် သူတို့၏စိတ်ဖြင့် ပိုင်းခြားစိတ်ဖြာပြီး အကျဉ်းချုပ်ကြသဖြင့် လူသားအယူအဆများနှင့် မကိုက်ညီသည့် ဘုရားသခင်၏ ထိုမူရင်းနှုတ်ကပတ်တော်များကို ပြောင်းလဲပြုပြင်ခြင်းဖြင့် အဆုံးသတ်ကြရလေသည်။ ရလဒ်အနေဖြင့် အခြားသူများက ပြောင်းလဲပြုပြင်ခြင်းခံထားရသည့် ဘုရားသခင်၏ ထိုနှုတ်ကပတ်တော်များကို ဖတ်ပြီးသောအခါ သူ၏မူရင်းအဓိပ္ပာယ်ကို နားလည်ဖို့ သူတို့အတွက် ခက်ခဲသည်။ ဤသည်က သမ္မာတရားကို သူတို့ နားလည်ခြင်းနှင့် သူတို့၏အသက်ဝင်ရောက်မှုအပေါ် လွှမ်းမိုးသည် မဟုတ်လော။ ဤနေရာတွင် ပြဿနာက အဘယ်အရာဖြစ်သနည်း။ ပြဿနာမှာ ဘုရားနှုတ်ကပတ်တော်များကို ပြောင်းလဲပစ်သောသူများတွင် ဘုရားသခင်ကို ကြောက်ရွံ့သော စိတ်နှလုံးမရှိခြင်းပင် ဖြစ်သည်။ သူတို့၏နည်းလမ်းသည် မယုံကြည်သူတို့၏ နည်းလမ်းတစ်ခုဖြစ်သည်။ သူတို့ ပြုမူဆောင်ရွက်သည်နှင့်တစ်ပြိုင်နက် သူတို့၏စာတန်ဆန်သော စိတ်သဘောထားသည် သူ့အလိုလို ထုတ်ဖော်ပြလေသည်။ သူတို့တွင် ဘုရားသခင်က မည်သည့်အရာကို လုပ်ခဲ့ပြီး ပြောခဲ့သည်ဆိုသည်နှင့်ပတ်သက်၍ အချို့သော ထင်မြင်ချက်များနှင့် စိတ်ကူးများအစဉ်သဖြင့် ရှိကြသည်။ ပြီးလျှင် သူတို့၏မည်းနက်သော နတ်ဆိုးဆန်သည့်လက်များဖြင့် လက်လှမ်းဖို့နှင့် ဘုရားနှုတ်ကပတ်တော်များကို သူတို့၏ ကိုယ်ပိုင်ပြောဆိုခြင်းများအဖြစ်သို့ ပြောင်းလဲဖို့ ဤကိစ္စများကို သူတို့သည် အမြဲတမ်း ကိုင်တွယ်၍ စီမံပြုပြင်လိုကြသည်။ ဤသည်မှာ စာတန်၏ မာနထောင်လွှားသည့် သဘာဝဖြစ်သည်။ ဘုရားသခင်က အချို့စစ်မှန်သောနှုတ်ကပတ်တော်များအချို့ကိုလည်းကောင်း၊ လူ့သဘာဝနှင့်နီးစပ်သည့် နေ့စဉ်သုံးစကားအချို့ကိုလည်းကောင်း ပြောသောအခါ လူများသည် ၎င်းတို့ကို စက်ဆုပ်ရွံရှာပြီး အထင်သေးကြသည့်အပြင် အထင်သေးသောသဘောထားတစ်ခုဖြင့် ယင်းတို့ကို ချဉ်းကပ်ကြသည်။ ပြန်လည်ပြင်ဆင်ခြင်းအချို့ကို လုပ်ဖို့နှင့် ပုံစံကို ပြောင်းလဲဖို့ လူသားအသိပညာနှင့် စိတ်ကူးစိတ်သန်းတို့ကို သူတို့ အမြဲတမ်း သုံးလိုကြသည်။ ဤသည်မှာ စက်ဆုပ်ရွံရှာဖွယ် မကောင်းဘူးလော။ (ကောင်းပါသည်။) သင်တို့သည် ဤအရာကို လုံးဝ မလုပ်ရပေ။ သင်သည် ဝတ္တရားသိတတ်စွာ ပြုမူရမည်။ ဘုရားနှုတ်ကပတ်တော်များသည် ဘုရားနှုတ်ကပတ်တော်များသာ ဖြစ်သည်။ ပြီးလျှင် ဘုရားသခင် မည်သို့စကားပြောသည်ဖြစ်စေ၊ ယင်းတို့၏မူရင်းပုံစံကို ထိန်းသိမ်းရမည်ဖြစ်ပြီး ပြောင်းလဲပစ်၍ မရပေ။ အသေးစားမွမ်းမံခြင်းတစ်ခုမျှသာဖြစ်ပြီး မူရင်းအဓိပ္ပာယ်ကို မပြောင်းလဲသရွေ့ တိုက်ရိုက်ဟောကြားသည့် ဒေသနာများကိုသာလျှင် အနည်းငယ်မျှ ပြန်စီနိုင်သည်။ မူရင်းအဓိပ္ပာယ်ကို လုံးဝ မပြောင်းလဲရပေ။ အကယ်၍ သင့်ထံတွင် သမ္မာတရားမရှိပါက မပြောင်းလဲနှင့်။ ပြောင်းလဲပစ်သည့်သူ မည်သူမဆိုသည် တာဝန်ယူရလိမ့်မည်။ ဘုရားအိမ်တော်သည် ဒေသနာများကို စီမံပြီး မိတ်သဟာယဖွဲ့ဖို့ လူအချို့ကို အလုပ်တာဝန် သတ်မှတ်ပေးထားသည်။ သို့သော် သူတို့သည် ယင်းတို့ကို စည်းမျဉ်းများနှင့်အညီ စီမံရမည်ဖြစ်ပြီး မည်သည့်အရာကိုမျှ လုံးဝ ပြောင်းလဲပြုပြင်၍ မရပေ။ ဝိညာဉ်ရေးရာ နားလည်ခြင်းမရှိသည့်အပြင် သမ္မာတရားကို နားမလည်သောသူများသည် အပြစ်ဒဏ်ပေးခြင်းကို ရင်မဆိုင်ရစေရန်အတွက် ဝင်ရောက်မစွက်ဖက်သင့်ပေ။ သင်သည် ဘုရားသခင်ရွေးချယ်ထားသည့်သူများထဲမှ တစ်ဦးဖြစ်သည့်အတွက် သူ့နှုတ်ကပတ်တော်များကို သင်သည် ဝီရိယရှိရှိ ဖတ်သင့်သည်၊ သမ္မာတရားကို နားလည်ဖို့နှင့် စစ်မှန်မှုထဲသို့ ဝင်ရောက်ဖို့အပေါ် အာရုံစိုက်သင့်ပြီး ဘုရားနှုတ်ကပတ်တော်များ သို့မဟုတ် သမ္မာတရားအပေါ် သံသယမဝင်သင့်ပေ။ အထူးသဖြင့် ဘုရားနှုတ်ကပတ်တော်များကို စေ့စေ့စပ်စပ် ကြည့်ရှုစစ်ဆေးဖို့ သင်၏စိတ်နှင့် အသိပညာကို မသုံးနှင့်။ ဆိုးညစ်သော အလေ့အကျင့်များတွင် အစဉ်သဖြင့် ပါဝင်လုပ်ဆောင်နေခြင်းသည် မကောင်းပေ။ ဘုရားသခင်၏ စိတ်သဘောထားကို သင်ပုန်ကန်ပြစ်မှားလိုက်သည်နှင့်တစ်ပြိုင်နက် သင့်အတွက် အလွန်ပင်ဒုက္ခပေးလိမ့်မည်။ လူအချို့သည် သမ္မာကျမ်းစာပါအသိပညာ အနည်းငယ်ကို နားလည်ကြသည်။ သူတို့သည် ဓမ္မပညာကို ရက်အတန်ငယ်ကြာအောင် လေ့လာပြီး စာအုပ်အနည်းငယ်ကို ဖတ်ကြသည်။ ထို့နောက်တွင် သမ္မာတရားကို သူတို့ နားလည်ကာ သူတို့ ကျွမ်းကျင်လာပြီး သူတို့ လုပ်နိုင်စွမ်းရှိလာသည်ဟု ထင်ကြသည်။ သို့သော် သင်၏လုပ်နိုင်စွမ်း အနည်းငယ်မျှလောက်က မည်သည့်ကောင်းကျိုး ရှိသနည်း။ သင်သည် ဘုရားသခင်ထံ သက်သေခံနိုင်သလော။ သင့်တွင် သမ္မာတရားစစ်မှန်မှုရှိသလော။ ဘုရားသခင်၏ရှေ့တော်မှောက်သို့ လူများကို သင်ခေါ်ဆောင်လာနိုင်သလော။ သင်၏အနည်းငယ်မျှသော အယူအဆနှင့် ပညာနှင့်အရည်အသွေးတို့က သမ္မာတရားကို နည်းနည်းမျှပင် ကိုယ်စားမပြုပေ။ သူ၏လူ့သဘာဝဖြင့် ဘုရားသခင်သည် အဓိပ္ပာယ်ကို လူများ နားလည်သဘောပေါက်ခွင့်ပေးသည့် စကားလုံးအချို့၊ လူသားမျိုးနွယ် နားလည်ဖို့အတွက် ပို၍လွယ်ကူသောစကားအချို့ကို ပြောသည်။ သို့သော် လူများသည် အစဉ်သဖြင့် ယုံကြည်လက်ခံခြင်း မရှိဘဲ သူ့နှုတ်ကပတ်တော်များကို ပြောင်းဖို့ ဆန္ဒရှိနေကြလေသည်။ သူတို့၏အယူအဆများနှင့် အညီဖြစ်ဖို့၊ သူတို့၏အကြိုက်များ၊ ဆန္ဒများနှင့် ကိုက်ညီဖို့၊ နားဝင်ချိုဖို့နှင့် မျက်စိနှင့်စိတ်နှလုံး ပသာဒဖြစ်စေဖို့ ဘုရားသခင်၏ နှုတ်ကပတ်တော်များကို သူတို့ ပြောင်းလဲပစ်လိုကြသည်။ ဤသည်မှာ မည်သည့်စိတ်သဘောထားမျိုး ဖြစ်သနည်း။ ယင်းသည် မာနထောင်လွှားသော စိတ်သဘောထားတစ်ခုဖြစ်သည်။ သမ္မာတရားစည်းမျဉ်းများ လုံးဝ မထားရှိဘဲ ကိစ္စများကို လုပ်ဆောင်ခြင်းနှင့် စာတန်၏ နည်းလမ်းများအတိုင်း ပြုမူခြင်းတို့သည် ဘုရားအိမ်တော်၏ အလုပ်ကို လွယ်လင့်တကူ နှောင့်ယှက်ပြီး အဖျက်အမှောင့်လုပ်လိမ့်မည်။ ဤသည်မှာ အလွန်အန္တရာယ်များသော ကိစ္စတစ်ခုတည်း။ ဘုရားသခင်၏စိတ်သဘောထားကို သင်ပုန်ကန်ပြစ်မှားမိသည်နှင့်တစ်ပြိုင်နက် အလွန်ဒုက္ခများလိမ့်မည်။ ထို့ပြင် ဖယ်ရှားရှင်းလင်းခြင်း ခံရမည့်အန္တရာယ်ရှိသေးသည်။

လူအချို့သည် ဘုရားနှုတ်ကပတ်တော်များက အသက်ဝင်ရောက်မှုအတွက် လက်တွေ့လုပ်ဆောင်ခြင်း လမ်းကြောင်းနှင့်ပတ်သက်၍ အလွန်အသေးစိတ်ကျကျ ပြောဆိုထားသည်ကို မြင်တွေ့ရသောအခါ အလွန်အမင်း မနှစ်မြို့ခြင်းကို ခံစားကြရသည်။ ထိုအခြေအနေတွင် အကယ်၍ ဓမ္မဟောင်းကျမ်း၌ ဘုရားသခင်က သတ်မှတ်ထားသည့် ထိုပညတ်များ၊ အမိန့်များနှင့် ပြဋ္ဌာန်းဥပဒေများအားလုံးကို သူတို့ မြင်ခဲ့ပါက သူတို့သည် ပိုကြီးမားသော အလွန်အမင်း မနှစ်မြို့ခြင်းကိုပင်လျှင် ခံစားရမည် မဟုတ်လော။ အကယ်၍ ထိုအခါတွင် သမ္မာကျမ်းစာ၏ မူလပညတ်တော်များရှိ ပို၍ပင်လျှင် အသေးစိတ်ကျသော နှုတ်ကပတ်တော်များကို ဆက်လက်၍ သူတို့ ဖတ်ခဲ့ပါက သူတို့သည် အယူအဆများ မဖြစ်ပေါ်သလော။ “ဤနှုတ်ကပတ်တော်များသည် ပေါ့တန်လွန်းသည်။ စာတစ်ကြောင်းထဲဖြင့် ရှင်းလင်းပြတ်သားစွာ ပြောနိုင်သည့်အရာကို စာသုံးကြောင်း သို့မဟုတ် လေးကြောင်းအထိ ဆွဲဆန့်ထားသည်။ သူတို့သည် ပို၍ လိုရင်းတိုရှင်းဖြစ်သင့်ပြီး လွယ်ကူရှင်းလင်းသင့်သည်။ ဤနည်းအားဖြင့် လူများက တစ်ချက်ကြည့်ရုံမျှဖြင့် အရာခပ်သိမ်းကို မြင်နိုင်ပြီး စာတစ်ကြောင်းကို နားထောင်လိုက်ရုံဖြင့် နားလည်နိုင်သည်။ အကယ်၍ သူတို့သာ အလွန်စကားကြောမရှည်ခဲ့ကြဘဲ ရိုးရှင်းပြီး နားလည်ရလွယ်ကာ လက်တွေ့လုပ်ဆောင်ဖို့ လွယ်ကူခဲ့ပါက မည်မျှကောင်းလိုက်မည်နည်း။ ဤသည်တို့က ဘုရားသခင်ကို ပို၍ထိရောက်စွာ သက်သေခံနိုင်ပြီး ဘုန်းတော်ထင်ရှားစေလိမ့်မည်မဟုတ်လော” ဟူ၍ သူတို့ တွေးထင်ကြသည်။ ဤအတွေးသည် မှန်ကန်သယောင် ထင်ရသော်လည်း ဘုရားနှုတ်ကပတ်တော်များကို ဖတ်ခြင်းသည် ဖတ်၍အဆင်ပိုချောလေ ပို၍ကောင်းလေဖြစ်သည့် ဝတ္ထုရှည်တစ်ပုဒ်ကို ဖတ်ခြင်းကဲ့သို့ ဖြစ်သင့်သည်ဟု သင်ထင်သလော။ ဘုရားနှုတ်ကပတ်တော်များသည် သမ္မာတရားဖြစ်သည်။ ထိုနှုတ်ကပတ်တော်များကို အာရုံပြုဆင်ခြင်ဖို့ လိုအပ်သည်။ ထို့ပြင် သမ္မာတရားကို နားလည်ဖို့နှင့် ရရှိဖို့အလို့ငှာ လူတစ်ဦးသည် လက်တွေ့လုပ်ဆောင်ပြီး တွေ့ကြုံရမည်။ ဘုရားနှုတ်ကပတ်တော်များသည် လူသား၏အယူအဆများနှင့် ကိုက်ညီမှု ပို၍နည်းလေ၊ ၎င်းတို့အထဲတွင် သမ္မာတရားရှိမှု ပို၍များလေဖြစ်သည်။ အမှန်အားဖြင့် သမ္မာတရား၏ မည်သည့်ရှုထောင့်ကမျှ လူသားအယူအဆများနှင့် မကိုက်ညီပေ။ ယင်းတို့သည် လူများ ယခင်က မြင်ဖူးသည့် သို့မဟုတ် တွေ့ကြုံဖူးသည့် အရာတစ်ခု မဟုတ်ကြဘဲ နှုတ်ကပတ်တော်အသစ်များဖြစ်ကြသည်။ သို့ရာတွင် နှစ်ပေါင်းများစွာကြာသည့်တိုင်အောင် ယင်းတို့ကို ဖတ်ရှုကာ တွေ့ကြုံပြီးသည့်နောက်တွင် ဘုရားနှုတ်ကပတ်တော်များအားလုံးက သမ္မာတရား ဖြစ်ကြကြောင်းကို သင်သည် သိလာလိမ့်မည်။ လူအချို့တွင် ဘုရားနှုတ်ကပတ်တော်များနှင့်ပတ်သက်၍ အယူအဆများ အစဉ်သဖြင့် ရှိကြသည်။ ဤပြဿနာသည် မည်သည့်နေရာက အစပြုလာသနည်း။ ၎င်းတို့သည် မည်သည့်အမှားများကို လုပ်ဆောင်နေကြသနည်း။ လူများသည် ဘုရားသခင်၏အမှု သို့မဟုတ် သူ၏စိတ်သဘောထားကို မသိကြကြောင်းကို ဤပြဿနာက ပြသည်။ သူပြောသည့်စာကြောင်းတိုင်းသည် သဘောတရားအရဖြစ်သော သို့မဟုတ် ကောင်းစွာ တတ်သိနားလည်နှံ့စပ်သောဘာသာစကားအား သုံးခြင်းကို အားကိုးအားထားမပြုဘဲ လူသားများ၏ နေ့စဉ်သုံးဘာသာစကားကိုသာ အသုံးပြုထားသည့်အပြင် လက်တွေ့ကျပြီး အဖြစ်မှန်ဖြစ်သည်။ ဤသည်မှာ လူများ၏သမ္မာတရားကို နားလည်ခြင်းအတွက် အကျိုးအရှိဆုံး ဖြစ်သည်။ ဤကိစ္စကို ရှင်းလင်းပြတ်သားစွာ နားလည်သဘောပေါက်နိုင်သူ တစ်ဦးမျှ မရှိပေ။ ဘုရားသခင်၏အမှုနှင့် သူ၏နှုတ်ကပတ်တော်များကသာ လက်တွေ့အကျဆုံးနှင့် အစစ်မှန်ဆုံးဖြစ်သည်။ “ဘုရားနှုတ်ကပတ်တော်များသည် အားလုံး မှန်ကန်ပါသည်။ သူ၏နှုတ်ကပတ်တော်များသည် လူများကို အကျိုးပြုသော်လည်း လူများက ဘုရားသခင်ကို နားမလည်ကြပါ။ လူများလိုအပ်သည့်အရာများကို သူက အသိဆုံးဖြစ်ပါသည်။ ထို့ပြင် လူများ နားလည်နိုင်အောင် မည်သို့စကားပြောဆိုရမည်ဆိုသည်ကို သူသိပါသည်။ လူများကို တိုက်တွန်းနှိုးဆော်ပြီး ပြောပြသည့် သူ၏နည်းလမ်းမှာ လက်ခံဖို့ ပို၍လွယ်ကူပါသည်။ လူများ၏အတွင်းစိတ် ဖွဲ့စည်းတည်ဆောက်ပုံနှင့် သူတို့တွင် မည်သည့်အတွေးမျိုးနှင့် အယူအဆမျိုးတို့ ရှိသည်ဆိုသည်ကို ဘုရားသခင်က သိပါသည်။ ပြီးလျှင် လူများသည် သူတို့ကိုယ်သူတို့ လုံးဝမသိသော်လည်း လူများအလိုအပ်ဆုံးအရာကို သူက ပို၍ပင် ကောင်းစွာ သိပါသည်” ဟူ၍ လူများက နှုတ်အားဖြင့် အသိအမှတ်ပြုကြသည်။ သို့သော် ဘုရားနှုတ်ကပတ်တော်များကို သင်ကြည့်သောအခါ သင်သည် ယင်းတို့ကို ရှင်းလင်းလွယ်ကူစေပြီး လူသား၏အယူအဆများနှင့် အကြိုက်များနှင့်အညီ ယင်းတို့ကို ပြောင်းလဲပစ်လိုကြသည်။ ထိုအခါတွင် ဘုရားနှုတ်ကပတ်တော်များသည် သမ္မာတရား ဖြစ်နေနိုင်ဦးမည်လော။ ၎င်းတို့သည် သူ၏နှုတ်ကပတ်တော်များ ဖြစ်နေနိုင်ဦးမည်လော။ ၎င်းတို့သည် လူသား၏စကားများ ဖြစ်မလာသလော။ ဤကဲ့သို့သောတွေးခေါ်ပုံမျိုးသည် မာနထောင်လွှားလွန်းပြီး မိမိကိုယ်ကို မှန်ကန်သည်ဟု ယူမှတ်လွန်းသည်မဟုတ်လော။ ဘုရားနှုတ်ကပတ်တော်များသည် လူသား၏အယူအဆများ၊ စိတ်ကူးတို့နှင့်ကိုက်ညီသည်ဖြစ်စေ မကိုက်ညီသည်ဖြစ်စေ ယင်းတို့သည် သမ္မာတရားဖြစ်သည်။ နှုတ်ကပတ်တော်စကားလုံးပေါင်း မည်မျှများများ သူပြောဆိုသည်ဖြစ်စေ၊ ပြီးလျှင် ယင်းတို့သည် မည်မျှအသေးစိတ်ကျသည်ဖြစ်စေ၊ ဘုရားနှုတ်ကပတ်တော်များသည် အချည်းနှီး ပြောဆိုခြင်းမဟုတ်ပေ။ အကယ်၍ သူက စာကြောင်းတစ်ကြောင်းကို ထပ်ထည့်ပါက လူများကို ပို၍နားလည်အောင် ကူညီဖို့ဖြစ်သည်၊ ယင်းမှာ လူများအတွက် အကျိုးပြုလေသည်။ အကယ်၍ သူက စာကြောင်းတစ်ကြောင်းကို ပယ်ချန်ထားခဲ့ပါက လူများသည် ကောင်းစွာ နားလည်နိုင်လိမ့်မည် မဟုတ်ပေ။ ထို့ပြင် စာတန်အဖို့ ဤအခြေအနေမှနေ၍ အမြတ်ထုတ်ဖို့ ပို၍လွယ်ကူသွားလိမ့်မည်။ လူအများစုသည် အစွမ်းအစညံ့ဖျင်းကြသည်၊ ပြီးလျှင် ဘုရားသခင်က အသေးစိတ် မစီစဉ်မပြင်ဆင်ထားဘဲ အသေးစိတ် မပြောပါက နှုတ်ကပတ်တော်များကို သူတို့ နားလည်သဘောပေါက်နိုင်မည်မဟုတ်ပေ။ လူများအားလုံးသည် ထုံနေကြပြီး တုံးအကြသည်။ ထို့ကြောင့် စာကြောင်းတစ်ကြောင်းမျှ ဖယ်ချန်မထားသင့်ပေ။ ကဏ္ဍတစ်ခုခုကို နှံ့နှံ့စပ်စပ် မပြောခဲ့ပါက ထိုကဏ္ဍကို လူများ နားလည်လိမ့်မည်မဟုတ်ပေ။ သင်သည် ယင်းကို နားလည်နိုင်သော်လည်း အခြားတစ်ယောက်ယောက်ကမူ နားမလည်နိုင်ပေ။ သင်တို့အဖွဲ့တစ်ခုက ၎င်းကို နားလည်နိုင်သော်လည်း အခြားတစ်ဖွဲ့ဖွဲ့ကမူ နားမလည်နိုင်ပေ။ နားမလည်သောသူများသည် အမြဲတမ်း ရှိနေလိမ့်မည်။ ဘုရားသခင်သည် သင့်တစ်ဦးတည်းကို စကားမပြောပေ။ လူသားမျိုးနွယ်တစ်ရပ်လုံးကို၊ နားရှိပြီး ဘုရားသခင် ပြောသည့်အရာကို နားလည်နိုင်သောသူများအားလုံးကို သူသည် စကားပြောသည်။ သင်၏အမြင်သည် ကျဉ်းမြောင်းလွန်းသလော။ လူများသည် သူတို့၏ရှေ့တည့်တည့်တွင် ရှိသောအရာကိုသာ မြင်နိုင်ကြပြီး “ဤစာကြောင်းကို ကျွန်ုပ် နားလည်သည်။ ဘုရားသခင်က အဘယ်ကြောင့် ယင်းကို အလွန်တရာအသေးစိတ်ကျကျ ရှင်းပြဖို့ လိုအပ်နေသေးသနည်း” ဟု တွေးကြသည်။ အကယ်၍ ယင်းက ရိုးရှင်းလွန်းပါက အစွမ်းအစကောင်းသောသူများက ယင်းကို နားလည်လိမ့်မည်။ သို့သော် သာမန်အစွမ်းအစ ရှိသူများကမူ နားလည်နိုင်လိမ့်မည် မဟုတ်ပေ။ အကယ်၍ သာမန်အစွမ်းအစ ရှိသူများအတွက် စာကြောင်းအနည်းငယ်ကို ဘုရားသခင်က အသေးစိတ်စီစဉ်ပြင်ဆင်ထားပါက သင်သည် ခြွင်းချက်ဖြစ်သည်။ ယင်းက သင်သည် သမ္မာတရားကို လက်ခံသောသူတစ်ယောက် ဖြစ်သည်ဟု ဆိုလိုသလော။ သင်၏ဤကန့်ကွက်မှုများသည် မည်သည့်နေရာမှ လာသနည်း။ ဤသည်မှာ စာတန်၏မာနထောင်လွှားသော စိတ်သဘောထား မဟုတ်လော။ သင်၏အယူအဆများနှင့် အနည်းငယ် မကိုက်ညီသော အရာတစ်ခုကို ဘုရားသခင်က အနည်းငယ်မျှပင် လုပ်သောအခါ၊ ချစ်ခင်မြတ်နိုးခြင်း၊ နားလည်ခြင်း၊ ဂရုစိုက်ခြင်း၊ စိုးရိမ်ပူပန်ခြင်းနှင့် လူများကို စေ့စေ့စပ်စပ် ကြည့်ရှုစောင့်ရှောက်ခြင်းတို့ဖြစ်သည့် သူ၏အရာအားလုံးနှင့် ဖြစ်ခြင်းတို့ထဲမှ အနည်းငယ်မျှလောက်ကို ထုတ်ဖော်သောအခါ ဘုရားသခင်က စကားကြောရှည်သည်၊ သူက စကားအလွန်များသည်၊ အသေးအဖွဲ ကိစ္စလေးများအပေါ်တွင် အချိန်ဖြုန်းသည်၊ သူသည် ထိုသို့ မလုပ်သင့်ပေဟု သင်ထင်သည်။ ဤသည်မှာ သင်၏ အယူအဆများတွင် သင်ယုံကြည်ပုံ အတိအကျဖြစ်သည်။ ဤသည်မှာ ဘုရားသခင်အပေါ် သင်၏သဘောထားထင်မြင်ချက် ဖြစ်သည်။ ဤသည်မှာ သင်က သူ့ကို မြင်သည့်ပုံဖြစ်သည်။ ထို့ကြောင့် “ဘုရားသခင်လုပ်သမျှ အရာခပ်သိမ်းသည် မှန်ကန်သည်၊ ဘုရားသခင်သည် လူသားကို နားအလည်ဆုံးဖြစ်သည်” ဟူသည့် သင်၏ယုံကြည်ချက်မှာ အယူဝါဒသက်သက်သာ ဖြစ်သလော။ သင့်အတွက်မှာမူ ယင်းသည် အယူဝါဒဖြစ်လာသည်။ ဘုရားသခင်နှင့်ပတ်သက်သည့် သင်၏သိမြင်မှုသည် သူထုတ်ဖော်သည့်အရာနှင့် မကိုက်ညီပေ။ ဆက်စပ်နှီးနွှယ်မှုမရှိပေ။ ထို့ထက်ပိုသည်မှာ ယင်းသည် ဘုရားသခင်အပေါ် သင်ပြုမူပုံမဟုတ်ပေ။ သင်သည် သူ၏ နှုတ်ကပတ်တော်များနှင့် အလုပ်တို့ကို သင်၏ အယူအဆများ၊ စိတ်ကူးများနှင့်အညီ၊ သင်၏မာနထောင်လွှားသော စိတ်သဘောထားနှင့်အညီ သဘောထားသည်။ သင်သည် သမ္မာတရားကို လက်ခံသောသူတစ်ဦး ဖြစ်သလော။ သင်သည် သမ္မာတရားကို လက်ခံသောသူတစ်ဦး မဟုတ်သကဲ့သို့ ဘုရားသခင်ကို ကြောက်ရွံ့သော စိတ်နှလုံးတစ်ခု ရှိသောသူတစ်ဦးလည်း မဟုတ်ပေ။ ဘုရားသခင်၏နှုတ်ကပတ်တော်များနှင့် လုပ်ဆောင်မှုများနှင့် ရင်ဆိုင်ရသောအခါ သင်သည် ဝေဖန်သုံးသပ်ဖို့၊ စောဒကတက်ဖို့၊ ထင်ကြေးပေးဖို့၊ သံသယဝင်ဖို့၊ ငြင်းဆန်ဖို့၊ ခုခံဖို့တို့ကို သင်သည် လုပ်ဆောင်နိုင်ပြီး သင့်တွင် ရွေးချယ်စရာများရှိပါသည်။ သင်သည် ဘုရားသခင်ကို အစစ်အမှန် ယုံကြည်သောသူတစ်ဦး ဖြစ်သလော။ အကယ်၍ ဘုရားသခင်၏အမှုကို သင်သည် ကျိုးနွံနာခံနိုင်ခြင်း မရှိပါက သမ္မာတရားကို သင်ရနိုင်သလော။ အကယ်၍ ဤသည်မှာ ဘုရားသခင်၏နှုတ်ကပတ်တော်များ၊ သူ၏အမှု၊ သမ္မာတရား၊ သူ၏အရာအားလုံးနှင့်ဖြစ်ခြင်းအပြင် သူ့ထံမှလာသောအရာခပ်သိမ်းကို သင်သဘောထားသည့်ပုံဖြစ်ပါက သူ၏ကယ်တင်ခြင်းကို သင်ရနိုင်သလော။ အကယ်၍ သင်သည် သမ္မာတရားကို မရနိုင်ပါက အပြစ်ဒဏ်ပေးခြင်းကို ခံရလိမ့်မည်။

ဘုရားနှုတ်ကပတ်တော်များကို သင်ချဉ်းကပ်ရာတွင် ယင်းတို့ကို ပိုင်းခြားစိတ်ဖြာခြင်း သို့မဟုတ် စေ့စေ့စပ်စပ် ကြည့်ရှုစစ်ဆေးခြင်းတို့ကို မလုပ်နှင့်။ ဉာဏ်နီဉာဏ်နက်မများနှင့်။ သံသယမဝင်နှင့်။ ပြီးလျှင် သင်၏ဦးနှောက်ခြောက်အောင် မစဉ်းစားနှင့်။ သမ္မာတရားကို သင်သဘောထားသကဲ့သို့ ထိုနှုတ်ကပတ်တော်များကို ဆက်ဆံလော့။ ဤသည်မှာ အပါးနပ်ဆုံးသောချဉ်းကပ်ခြင်းဖြစ်သည်။ သင်မည်သည့်အရာကို လုပ်ဆောင်ပါစေ “ကျွန်ုပ်သည် ခေတ်သစ်လူသားတစ်ဦး ဖြစ်သည်၊ ကောင်းစွာ တတ်သိနားလည်နှံ့စပ်ပြီး ပညာကောင်းစွာတတ်သည်၊ သဒ္ဒါကို သိသည်၊ ထိုထိုသောဘာသာရပ်တစ်ခုကို ကျွန်ုပ် လေ့လာသင်ယူခဲ့သည်၊ ကျွမ်းကျင်မှု သို့မဟုတ် အသက်မွေးဝမ်းကျောင်းပညာအချို့တွင် ကျွမ်းကျင်သည်၊ ကျွန်ုပ်သည် နားလည်သည်၊ သဘောပေါက်သည်။ ဘုရားသခင်က မသိချေ။ ဘုရားသခင်သည် လူသားမျိုးနွယ်အားလုံးကို နားလည်သော်လည်း သမ္မာတရားမှလွဲ၍ သူ့တွင် မည်သည့်အရာမှမရှိပါ။ သူသည် ကျွမ်းကျင်အတတ်ပညာဆိုင်ရာ ကိစ္စများကို သူနားမလည်ပါ။ သူကျွမ်းကျင်သည့်အရာတစ်ခုမျှမရှိ။ သူသည် သမ္မာတရားကို မည်သို့ဖော်ပြရမည်ဆိုသည်ကိုသာ သိသည်” ဟူ၍ သင့်ကိုယ်သင် မပြောနှင့်။ ယင်းသည် မှန်ပါသည်။ ဘုရားသခင်သည် သမ္မာတရားကိုသာ ဖော်ပြနိုင်သည်၊ ထို့ပြင် သူသည် သမ္မာတရားဖြစ်သောကြောင့် အရာခပ်သိမ်းကို သူ ရိပ်စားမိနိုင်သည်။ သူသည် လူသားမျိုးနွယ်၏ကံကြမ္မာအပေါ် အချုပ်အခြာအာဏာ ကိုင်စွဲထားသည်၊ ထို့ပြင် သူသည် သင်၏ကံကြမ္မာကို ထိန်းချုပ်ထားသည်။ ဘုရားသခင်၏အချုပ်အခြာအာဏာနှင့် အစီအစဉ်များထံမှ မည်သူမျှ မလွတ်မြောက်နိုင်ပေ။ ဘုရားနှုတ်ကပတ်တော်များအပေါ် လူများ၏သဘောထားမှာ မည်သို့ဖြစ်သင့်သနည်း။ နားထောင်ဖို့၊ ကျိုးနွံနာခံဖို့၊ လက်ခံဖို့နှင့် အဆုံးစွန် လေးစားလိုက်နာခြင်းဖြင့် လက်တွေ့လုပ်ဆောင်ဖို့ စသည်တို့ ဖြစ်သင့်ပါသည်။ ဤသည်မှာ လူများတွင် ရှိသင့်သောသဘောထား ဖြစ်သည်။ သင်မည်သည့်အရာကိုလုပ်သည်ဖြစ်စေ စေ့စေ့စပ်စပ် ကြည့်ရှုစစ်ဆေးခြင်းကို မပြုနှင့်။ သင်တို့ကို နှုတ်ကပတ်တော်များစွာ ငါ ပြောခဲ့ပြီးပြီဖြစ်သည်။ သို့သော် ယင်းတို့အနက်မှ အစိတ်အပိုင်းတစ်ခုကိုသာလျှင် သင်တို့ လက်ခံနိုင်သည်။ လူသားအယူအဆများနှင့် မကိုက်ညီသည့် မည်သည့်နှုတ်ကပတ်တော်များကိုမျှ သင်တို့ လက်မခံကြပေ။ သင်တို့သည် သင်တို့၏စိတ်နှလုံးများထဲတွင် ယင်းတို့ကို ခုခံပြီး ငြင်းဆိုခြင်းကိုပင်လျှင် ပြုလုပ်ကြသည်။ လူသားအယူအဆများနှင့် ကိုက်ညီသည့် ထိုနှုတ်ကပတ်တော်များကိုသာ သင်တို့သည် လက်ခံကြပြီး မကိုက်ညီသည့် ထိုနှုတ်ကပတ်တော်များကို ငြင်းဆန်ကြသည်။ ဤလမ်းခရီးဖြင့် သမ္မာတရားကို သင်တို့ ရနိုင်မည်လော။ လူသားအယူအဆများနှင့် မကိုက်ညီသည့်နှုတ်ကပတ်တော်များသည် သမ္မာတရား အမှန်တကယ် မဟုတ်တော့သလော။ ဤအကြောင်းကို သင်သည် ကျိန်းသေပြောဝံ့သလော။ သို့ဆိုလျှင် ငါ သင့်ကို မေးရမည်။ သမ္မာတရား၏ မည်မျှများများကို သင်နားလည်သနည်း။ မည်သည့်သမ္မာတရားများကို သင်ပိုင်ဆိုင်သနည်း။ သင်နားလည်သည့် သမ္မာတရားအားလုံးအကြောင်းကို သက်သေခံချက် ဝေမျှပေးလော့။ ထို့နောက်တွင် ၎င်းတို့သည် သမ္မာတရား ဟုတ်မဟုတ်ဆိုသည်ကို လူတိုင်းအား ဆုံးဖြတ်စေလော့။ အကယ်၍ သင့်တွင် သမ္မာတရားမရှိဟု သင်ဝန်ခံနိုင်ပါက ယင်းက သင့်တွင် ဆင်ခြင်တုံတရားရှိသည်ဟု ဆိုလိုသည်။ အကယ်၍ သင့်တွင် ဆင်ခြင်တုံတရား အစစ်အမှန် ရှိပါက လူသားအယူအဆများနှင့် မကိုက်ညီသည့်နှုတ်ကပတ်တော်များသည် သမ္မာတရားမဟုတ်ဟူ၍ ကောက်ချက်ချရဲသေးသလော။ သင်သည် ဘုရားသခင်နှင့် အလောင်းအစား လုပ်ရဲသေးသလော။ ဖန်ဆင်းခံလူသားတစ်ဦးအနေဖြင့် အလွန် မာနမထောင်လွှားနှင့်။ ပြီးလျှင် အလွန် မိမိကိုယ်ကို မှန်ကန်သည်ဟု မယူမှတ်နှင့်။ သင့်ကိုယ်သင် လွန်ကဲစွာ အထင်မကြီးနှင့်။ သင်သည် သမ္မာတရားကို လုံးဝ မသိပေ။ သင်၏တစ်သက်တာတွင် ဘုရားနှုတ်ကပတ်တော်များထဲမှ စာကြောင်းတစ်ကြောင်းကိုပင် သင်သည် အပြည့်အဝ တွေ့ကြုံနိုင်လိမ့်မည်မဟုတ်သကဲ့သို့ သင်၏တစ်သက်တာတွင် ထိုနှုတ်ကပတ်တော်များ နားလည်နိုင်မည်မဟုတ်။ သို့မဟုတ် အသက်ရှင်နေထိုင်နိုင်မည် မဟုတ်ပေ။ အကယ်၍ ယင်းတို့၏အပိုင်းတစ်ပိုင်းကို သင်နားလည်နိုင်ပြီး ယင်းတို့ကို လက်တွေ့လုပ်ဆောင်နိုင်ပါက သိပ်မဆိုးလှသေးပေ။ လူသားများသည် အလွန် ဆုတ်ယုတ်ပြီး သနားစဖွယ်ကောင်းလှသည်။ ဤသည်မှာ ထိုကိစ္စ၏ အမှန်တရားပင်ဖြစ်သည်။ သူတို့သည် အလွန် ဆုတ်ယုတ်ပြီး သနားစဖွယ်ကောင်းလှလျှင် သူတို့သည် အဘယ်ကြောင့် အလွန်မာနထောင်လွှားပြီး မိမိကိုယ်ကို မှန်ကန်သည်ဟုလည်း ယူမှတ်ကြသနည်း။ ဤသည်မှာ သူတို့ကို သနားစဖွယ်ရော၊ မုန်းစဖွယ်ပါ နှစ်မျိုးလုံးဖြစ်စေသည့်အရာ ဖြစ်သည်။ ဘုရားနှုတ်ကပတ်တော်များကို ရိုသေကျိုးနွံစွာ ဖတ်ရှုဖို့၊ သူတို့၏အယူအဆများကို ဖြစ်လာလာချင်း စွန့်ပစ်ဖို့၊ ထို့ပြင် ဘုရားနှုတ်ကပတ်တော်များကို သမ္မာတရားအဖြစ် သဘောထားဖို့နှင့် ယင်းတို့အပေါ် သူတို့အတတ်နိုင်ဆုံး ဆင်ခြင်ဖို့၊ ထို့နောက်တွင် ၎င်းတို့ကို တွေ့ကြုံဖို့ လူများကို ငါ အကြံပေးသည်။ ထိုအခါတွင် သမ္မာတရားက မည်သည့်အရာဖြစ်သည်ကို သူတို့ နားလည်ကောင်း နားလည်နိုင်မည် ဖြစ်သည်။ ဘုရားနှုတ်ကပတ်တော်များက မည်မျှအသေးစိတ်ကျပြီး မည်မျှစကားကြောရှည်ပုံအကြောင်းကို ဂရုမစိုက်နှင့်။ ယင်းတို့ကို သင်သည် နားလည်နိုင်ပြီး တွေ့ကြုံနိုင်ပါက ထိုအချိန်တွင် ယင်းတို့အတွက် သက်သေခံပါ။ ထိုသို့လုပ်ဆောင်ခြင်းဖြင့်သာ သင်သည် လုပ်နိုင်စွမ်းရှိသည်ဟု ယူဆနိုင်သည့်အချိန် ဖြစ်သည်။ ယင်းမှာ အချို့သည် အရသာရှိပြီး အချို့မှာ အရသာမရှိဟု တွေးရင်း မည်သည့်အစားအစာမျိုးကို သူတို့ စားမည်ဆိုသည့်အပေါ် လူများ အမြဲတမ်း ဇီဇာကြောင်ကြပုံနှင့် ဆင်တူသည်။ ဤအရာသည် မည်သည့်အရာကြောင့်ဖြစ်လာရသနည်း။ အရသာရှိသည့် အစားအစာများသည် အာဟာရဓာတ် ပြည့်ဝချင်မှ ပြည့်ဝပေလိမ့်မည်။ ထို့ပြင် သင်မနှစ်သက်သည့်အစားအစာများသည် အာဟာရဓာတ် နည်းချင်မှ နည်းပေလိမ့်မည်။ ၎င်းတို့တွင် ပို၍များပြီး ပို၍ကောင်းမွန်သောအာဟာရဓာတ်များပင် ရှိနေနိုင်သည်။ မည်သည့်အရာက အမှန်တရားဖြစ်ပြီး မည်သည့်အရာက အမှန်တရား မဖြစ်ကြောင်း၊ မည်သည့်အရာက ဘုရားသခင်ထံမှ လာကြောင်းနှင့် မည်သည့်အရာက လူသားထံမှလာကြောင်းတို့ကို ခွဲခြားရာတွင် လူများသည် အခက်အခဲရှိသည်။ သမ္မာတရားကို နားလည်ပြီးသည့်နောက်မှသာ ယင်းတို့အနက်မှအချို့ကို သူတို့သည် ကောင်းစွာ ပိုင်းခြားသိမြင်နိုင်သည်။ သမ္မာတရားကို နားမလည်သောသူတို့သည် အရာရာကို ထိုးထွင်း၍ မသိမြင်နိုင်ပေ။ အကယ်၍ သင့်တွင် ထိုးထွင်းသိမြင်နိုင်ခြင်းမရှိပါက သင်သည် နှိမ့်ချမြဲ နှိမ့်ချနေသင့်သည်၊ ခပ်လျှိုလျှိုနေမြဲ နေသင့်သည်၊ ထို့ပြင် သမ္မာတရားကို ပို၍ရှာဖွေသင့်သည်။ ဤသည်မှာ လိမ္မာပါးနပ်သော သူတစ်ယောက်လုပ်သည့်အရာဖြစ်သည်။ အကယ်၍ သင်သည် မည်သည့်အရာကိုမျှ ထိုးထွင်း၍ မသိမြင်နိုင်သော်လည်း ရှေ့ဆက်၍ ကျိုးကြောင်းမမြင် မာနထောင်လွှားနေသေးပါက အရာအားလုံးကို လိုက်၍ ခန့်မှန်းအကဲဖြတ်ဖို့နှင့် စကားပြောသူမည်သူမဆိုကို ဝေဖန်ဖို့ ဝံ့ရဲပါက ထိုအခါတွင် သင်သည် ဆင်ခြင်တုံတရား လုံးဝ မရှိတော့ပြီဖြစ်သည်။ ဤအရာက ဖြစ်နေသည့်ပုံစံပင် ဖြစ်သည်ကို သင်တို့ သဘောမတူကြသလော။ လူတစ်ဦးက မည်သည့်အရာကို လုပ်ဆောင်သည်ဖြစ်စေ သမ္မာတရားအပေါ် မလေးမစား မလုပ်ရပေ။ သူသည် ဘုရားသခင်ကို ကြောက်ရွံ့သောစိတ်နှလုံးတစ်ခုကို ဆက်လက်၍ ထိန်းသိမ်းထားရမည်ဖြစ်ပြီး အရာခပ်သိမ်းတွင် သမ္မာတရားကို ရှာဖွေရမည်ဖြစ်သည်။ ဤသည်ကသာလျှင် အစစ်အမှန် ဉာဏ်ရည်ဉာဏ်စွမ်းရှိပြီး အမြော်အမြင်ရှိသူတစ်ဦးဖြစ်သည်။

ကောက်နုတ်ချက် (၈)

ဘုရားသခင်၏ နှုတ်ကပတ်တော်များကို စွက်ဖက်ပြောင်းလဲခြင်း ပြဿနာ၏ သဘောသဘာဝက မည်သည်နည်း။ အကယ်၍ သင်သည် ဘုရားသခင်၏ နှုတ်ကပတ်တော်များကို ပြောင်းလဲပြီး သူ၏ဟောပြောချက်ကို စွက်ဖက်ပြောင်းလဲပါက ဤသည်မှာ ဘုရားသခင်ကို အပြင်းထန်ဆုံး ဆန့်ကျင်ပြီး ပုတ်ခတ်စော်ကားရာ ရောက်သည်။ စာတန်နှင့်တူသည့် လူစားများသာလျှင် ဤသို့သော ဒုစရိုက်အမှုမျိုးကို ကျူးလွန်ရန် တတ်နိုင်ကြသည်။ ထိုသူတို့သည် ကောင်းကင်တမန်မင်းနှင့် အတူတူပင် ဖြစ်၏။ ကောင်းကင်တမန်မင်းက ပြောသည်မှာ “ဘုရားသခင်၊ ကိုယ်တော်သည် ကောင်းကင်၊ မြေကြီးနှင့် အရာခပ်သိမ်းကို ဖန်ဆင်းနိုင်ပြီး နိမိတ်လက္ခဏာများနှင့် အံ့ဩဖွယ်များကို လုပ်ဆောင်နိုင်သည်။ ကျွန်ုပ်လည်း ဤသို့ လုပ်ဆောင်နိုင်၏။ ကိုယ်တော်သည် ပလ္လင်ပေါ်သို့ တက်ခဲ့ပြီးပြီ။ ကျွန်ုပ်လည်း ထိုသို့ လုပ်မည်။ ကိုယ်တော်သည် တိုင်းနိုင်ငံအားလုံးအပေါ် အုပ်စိုးသည်။ ကျွန်ုပ်လည်း အုပ်စိုးသည်ပင်။ ကိုယ်တော်သည် လူသားများကို ဖန်ဆင်းခဲ့၏။ ကျွန်ုပ်မူကား သူတို့ကို စီမံခန့်ခွဲသည်” ဟူ၍ ဖြစ်သည်။ ဤသည်မှာ ကောင်းကင်တမန်မင်း မည်မျှမာနထောင်လွှားပုံ ဖြစ်သည်။ သူ့တွင် အသိစိတ်ဟူ၍ စိုးစဉ်းမျှ မရှိချေ။ ဘုရားသခင်၏ နှုတ်ကပတ်တော်များကို စွက်ဖက်ပြောင်းလဲခြင်း၏ သဘောသဘာဝသည် ကောင်းကင်တမန်မင်း၏ သဘောသဘာဝနှင့် တူသည်။ ဆိုလိုသည်မှာ ယင်းသည် ဘုရားသခင်ကို တိုက်ရိုက် ဆန့်ကျင်ခြင်းနှင့် ဘုရားသခင်ကို ပုတ်ခတ်စော်ကားခြင်း၏ သရုပ်သကန်တစ်ခု ဖြစ်ကြောင်းပင်။ ဘုရားသခင်၏ နှုတ်ကပတ်တော်များကို စွက်ဖက်ပြောင်းလဲသော လူများသည် ဘုရားကို အဆန့်ကျင်ဆုံးသော လူများဖြစ်ကြသည်။ သူတို့သည် ဘုရား၏ စိတ်သဘောထားကို တိုက်ရိုက် ပုန်ကန်ပြစ်မှားကြ၏။ သူ့နှုတ်ကပတ်တော်များကို စွက်ဖက်ပြောင်းလဲသော လူများထက် ဘုရားသခင် ပိုမုန်းတီးသည့်သူ မရှိချေ။ ဘုရားသခင်၏ နှုတ်ကပတ်တော်များကို စွက်ဖက်ပြောင်းလဲခြင်းသည် ဘုရားသခင်နှင့် သန့်ရှင်းသော ဝိညာဉ်တော်ကို ပုတ်ခတ်စော်ကားခြင်းဖြစ်ပြီး ခွင့်လွှတ်၍ မရသော အပြစ်တစ်ခု ဖြစ်သည်ဟု ဆိုနိုင်သည်။ ဘုရားသခင်၏ နှုတ်ကပတ်တော်များကို လူတို့ စွက်ဖက်ပြောင်းလဲခြင်းအပြင် ဘုရားသခင်၏ စိတ်သဘောထားကို ပုန်ကန်ပြစ်မှားသည့် အခြားအရာ ရှိသေးသည်။ ယင်းမှာ လူတို့က အလုပ်အစီအစဉ်များကို အပြောင်းအလဲများ ပေါ့ပေါ့တန်တန် ပြုလုပ်ရဲပြီး ထို့နောက်တွင် ဘုရားသခင်ရွေးချယ်ထားသော သူများကို အထင်အမြင်မှားစေရန် အသင်းတော်သို့ ထိုအလုပ်အစီအစဉ်များကို လက်ဆင့်ကမ်းလွှဲပေး၍ အသင်းတော်၏ အလုပ်ကို နှောင့်ယှက်ပြီး ဖရိုဖရဲဖြစ်စေသည့်အခါတွင် ဖြစ်သည်။ ဤအရာသည်လည်း ဘုရားသခင်ကို တိုက်ရိုက် ဆန့်ကျင်ခြင်း၏ သရုပ်သကန်တစ်ခု ဖြစ်ပြီး ဘုရားသခင်၏ စိတ်သဘောထားကို ပုန်ကန်ပြစ်မှားသည့် တစ်စုံတစ်ခု ဖြစ်သည်။ လူတချို့တွင် ဘုရားသခင်ကို ကြောက်ရွံ့သည့် စိတ်နှလုံး လုံးဝ မရှိကြ။ အလုပ်အစီအစဉ်များကို လူက ရေးဆွဲထားခြင်း ဖြစ်သည်၊ အလုပ်အစီအစဉ်များသည် လူထံမှ လာခြင်းဖြစ်သည်ဟု ၎င်းတို့ယုံကြည်ကြ၏။ ထို့ပြင် ဤလူများ၏ အယူအဆများနှင့် မကိုက်ညီသည့် နေရာတိုင်းတွင် သူတို့ဆန္ဒအတိုင်း ၎င်းတို့ကို ပြောင်းလဲပစ်ကြသည်။ ဤသည်က ဘုရားသခင်၏ မည်သည့်စီမံအုပ်ချုပ်ရေးဆိုင်ရာ အမိန့်များအား ချိုးဖောက်သည်ကို သင်တို့ သိကြသလော။ (၇။ “အသင်းတော်၏အလုပ်နှင့် ကိစ္စရပ်များတွင် ဘုရားသခင်ကို ကျိုးနွံနာခံခြင်းမှလွဲ၍ အရာရာတိုင်းတွင် သန့်ရှင်းသော ဝိညာဉ်တော်၏ အသုံးပြုခြင်းခံရသည့် လူ၏ ညွှန်ကြားချက်များကို လိုက်နာလော့။ အနည်းငယ်မျှသော ချိုးဖောက်မှုကိုပင် လက်ခံ၍မရပေ။ အကြွင်းမဲ့ လေးစားလိုက်နာလော့၊ ပြီးလျှင် အမှန်၊ အမှား မစိစစ်နှင့်။ မှန်သည့်အရာ သို့မဟုတ် မှားသည့်အရာသည် သင်နှင့်မသက်ဆိုင်ပေ။ အကြွင်းမဲ့ကျိုးနွံနာခံခြင်းကိုသာ စိတ်ဝင်စားလော့။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ နိုင်ငံတော်ခေတ်၌ ဘုရားသခင် ရွေးချယ်ထားသောသူများ လိုက်နာရမည့် စီမံအုပ်ချုပ်ရေးဆိုင်ရာ အမိန့်တော် ဆယ်ရပ်)) စီမံအုပ်ချုပ်ရေးဆိုင်ရာ အမိန့်များကို ချိုးဖောက်သည့် အရာများသည် ဘုရားသခင်၏ စိတ်သဘောထားကို ပုန်ကန်ပြစ်မှားသည့် အရာများ ဖြစ်ကြသည်။ ယင်းကို သင်ရှင်းရှင်းလင်းလင်း မမြင်နိုင်လေသလော။ အထက်၏ အလုပ်အစီအစဉ်များအပေါ် လူတချို့၏ သဘောထားများသည် အလွန်အမင်း ပေါ့ပေါ့တန်တန် ရှိကြ၏။ သူတို့ ယုံကြည်သည်မှာ “အထက်က အလုပ်အစီအစဉ်များကို ဆွဲပြီး ကျွန်ုပ်တို့ကမူ အသင်းတော်တွင် ထိုအလုပ်ကို လုပ်ရသည်။ အချို့စကားများနှင့် ပြုဖွယ်ကိစ္စများကို လိုက်လျောညီထွေစွာ အကောင်အထည်ဖော်၍ ရသည်။ ၎င်းတို့ကို ပြီးစီးအောင် အတိအကျ မည်သို့လုပ်ရမည်မှာ ကျွန်ုပ်တို့အပေါ်တွင် မူတည်သည်။ အထက်က ပြောရုံပြောပြီး အလုပ်အစီအစဉ်များကို ရေးဆွဲပေးရုံသာ ရှိသည်။ တကယ်တမ်း လက်တွေ့လုပ်ရသူများက ကျွန်ုပ်တို့သာ ဖြစ်၏။ ထို့ကြောင့် အထက်က ကျွန်ုပ်တို့လက်ထဲ အလုပ်ကို လွှဲအပ်ပြီးနောက်တွင် ကြိုက်သလို ကျွန်ုပ်တို့ လုပ်နိုင်သည်။ အလုပ်ကို ပြီးအောင် မည်သို့ပင် လုပ်သည်ဖြစ်စေ အဆင်ပြေသည်။ မည်သူကမျှ ဝင်စွက်ဖက်ခွင့် မရှိ” ဟု ဖြစ်သည်။ သူတို့ကျင့်ကြံဆောင်ရွက်သည့် အခြေခံနိယာမများမှာ အောက်ပါအတိုင်းဖြစ်သည်။ မှန်သည်ဟု သူတို့ယုံကြည်သော အရာကို သူတို့နားထောင်ပြီး မှားသည်ဟု သူတို့ယုံကြည်သော အရာကိုကား လျစ်လျူရှုကြသည်။ သူတို့၏ ယုံကြည်ချက်များသည် သမ္မာတရားနှင့် အခြေခံနိယာမများ ဖြစ်သည်ဟု မှတ်ယူကြသည်။ သူတို့၏ဆန္ဒနှင့် မကိုက်ညီသော မည်သည့်အရာကိုမဆို သူတို့ ဆန့်ကျင်ကြပြီး ထိုအရာများနှင့် ပတ်သက်လျှင် သင့်အား သူတို့ အလွန်အမင်း ရန်မူလိုကြသည်။ အထက်၏ စကားများက သူတို့၏ဆန္ဒနှင့် မကိုက်ညီသောအခါ သူတို့သည် ထိုစကားများကို စတင်၍ ပြောင်းလဲပစ်ကြပြီး သူတို့၏ သဘောတူညီချက်အတိုင်း ဖြစ်သွားမှသာ ထိုစကားတို့ကို လက်ဆင့်ကမ်းလွှဲပေးကြသည်။ သူတို့၏ သဘောတူညီချက်မရှိဘဲ ထိုစကားတို့ကို လက်ဆင့်ကမ်းလွှဲပေးရန် သူတို့ ခွင့်မပြုကြချေ။ အခြားဒေသများတွင် အထက်၏ အလုပ်အစီအစဉ်များကို အရှိအတိုင်း လက်ဆင့်ကမ်းလွှဲပေးကြသော်လည်း ဤလူများကမူ သူတို့တာဝန်ယူထားသော အသင်းတော်များထံ သူတို့၏ ပြောင်းလဲထားသော အလုပ်အစီအစဉ်မူကွဲများကို လက်ဆင့်ကမ်း လွှဲပေးကြသည်။ ထိုကဲ့သို့သော လူများသည် ဘုရားသခင်ကို ဘေးချိတ်ထားရန် အမြဲတမ်း ဆန္ဒရှိနေကြ၏။ လူတိုင်း သူတို့ကို ယုံကြည်လာပြီး သူတို့နောက်လိုက်ကာ သူတို့ကို ကျိုးနွံနာခံလာအောင် လုပ်ဖို့ အလွန် စိတ်ထက်သန်နေကြသည်။ သူတို့စိတ်ထဲတွင် ဘုရားသခင်က သူတို့လောက် မတော်သည့် နယ်ပယ်တချို့ရှိသည်၊ သူတို့ကိုယ်တိုင် ဘုရားသခင် ဖြစ်သင့်ပြီး အခြားလူများက သူတို့ကို ယုံကြည်သင့်သည်ဟူသတတ်။ ယင်းမှာ ၎င်း၏သဘာဝဖြစ်သည်။ ဤအရာကို သင်တို့ နားလည်ပါက သူတို့ ထုတ်ပယ်ခံရချိန်တွင် သင်တို့ ငိုကြွေးကြဦးမည်လော။ သူတို့အတွက် စိတ်မကောင်း ဖြစ်နေဦးမည်လော။ “အထက်က မတော်မလျော် လုပ်ခဲ့သည်။ လူများကို သူတို့ မတရားဆက်ဆံ၏။ ဤမျှ အလုပ်ကြိုးစားသော လူတစ်ယောက်ကို သူတို့ မည်သို့များ ထုတ်ပယ်ပစ်နိုင်ရသနည်း” ဟု သင်တွေးနေဦးမည်လော။ ဤသို့ပြောသော သူများသည် ပိုင်းခြားသိမြင်ခြင်း မရှိကြပေ။ ထိုသူတို့က မည်သူ့အတွက် အလုပ်ကြိုးစားကြခြင်း ဖြစ်သနည်း။ ဘုရားသခင်အတွက်လော။ အသင်းတော်အလုပ်အတွက်လော။ မိမိတို့၏ ရာထူးအဆင့်အတန်း မြဲစေရန်အလို့ငှာ သူတို့အလုပ်ကြိုးစားကြခြင်း ဖြစ်သည်။ လွတ်လပ်သော နိုင်ငံတော်များ တည်ထောင်ရန်အလို့ငှာ သူတို့အလုပ်ကြိုးစားနေကြခြင်း ဖြစ်သည်။ ဘုရားသခင်ကို သူတို့အစေခံနေကြသလော။ သူတို့၏တာဝန်များကို သူတို့ထမ်းဆောင်နေကြသလော။ ဘုရားသခင်ကို သူတို့သစ္စာရှိပြီး ကျိုးနွံနာခံကြသလော။ သူတို့သည် စာတန်၏ လက်ပါးစေများသက်သက်သာ ဖြစ်ကြပြီး သူတို့အလုပ်လုပ်သောအခါ စိုးစံနေသူမှာ နတ်ဆိုးပင် ဖြစ်သည်။ သူတို့သည် ဘုရားသခင်၏ စီမံခန့်ခွဲမှုအစီအစဉ်ကို ထိခိုက်ပျက်စီးစေပြီး ဘုရားသခင်၏ အမှုတော်ကို နှောင့်ယှက်ကြသည်။ သူတို့သည် အန္တိခရစ် အစစ်အမှန်များသာ ဖြစ်ကြလေတော့၏။ “သူတို့ မည်မျှအလုပ်ကြိုးစားနေကြပုံကို ကြည့်ပါလော့။ ထိုအရာအားလုံးကို ရေးပြီး အသင်းတော်များထံ လက်ဆင့်ကမ်းလွှဲပေးဖို့ အတော်ပင် လုံ့လစိုက်ထုတ်ရ၏” ဟု လူတချို့က ပြောကြသည်။ သို့ဆိုလျှင် သင်တို့ကို ငါမေးမည်။ သူတို့ရေးသားသည့် အရာများသည် လူများအတွက် တည်ဆောက်စရာ ဖြစ်စေသလော။ သူတို့စွမ်းဆောင်ရရှိလိုသည့် ပန်းတိုင်အတိအကျက မည်သည်နည်း။ သင်၌ ဤကိစ္စရပ်များကို ပိုင်းခြားသိမြင်နိုင်စွမ်း ရှိသလော။ သူတို့၏ အထင်အမြင်မှားစေခြင်းကို သင်ခံရလျှင် အကျိုးဆက်များက မည်သည်တို့ ဖြစ်လိမ့်မည်နည်း။ ယင်းကို သင်စဉ်းစားကြည့်ပြီးပြီလော။ “သူတို့သည် အလွန် အလုပ်ကြိုးစားကြ၏။ ထိုအရာအားလုံးကို ရေးဖို့ဆိုသည်မှာ လွယ်သည် မဟုတ်။ ထို့ကြောင့် သူတို့ရေးထားသည့်အထဲ၌ သွေဖည်လွဲမှားမှုတချို့ သို့မဟုတ် လွဲချော်နေသော အရာတချို့ ရှိနေခဲ့လျှင် ဘုရားအိမ်တော်က သူတို့ကို ခွင့်လွှတ်ပေးသင့်၏” ဟု ပြောလျက် ဤကဲ့သို့သော လူများအပေါ် တချို့က သနားကြသည်။ ဤသည်ကို ပြောသည့် သူတို့တွင် မည်သည့်ပြဿနာ ရှိသနည်း။ လူတစ်ဦးသည် အလုပ်ကြိုးစားလုပ်ရုံမျှဖြင့် ဘုရားသခင်၏ အသိအမှတ်ပြုခြင်းကို အမှန်တကယ် ရနိုင်သလော။ ထိုလူများသည် မည်သူ့အတွက် အလုပ်ကို ကြိုးစားလုပ်နေကြခြင်း ဖြစ်သနည်း။ သူတို့သည် ဘုရားသခင် စိတ်ကျေနပ်စေရန်နှင့် ဘုန်းတော် ထင်ရှားစေရန် အလုပ်ကြိုးစားခြင်း မဟုတ်ဘဲ ထိုအစား မိမိတို့ ရာထူးအဆင့်အတန်း ရနိုင်ဖို့အတွက် အလုပ်ကြိုးစားနေကြခြင်း ဖြစ်ပါက မည်မျှအလုပ်ကြိုးစားပါစေ အဓိပ္ပာယ်တစ်စုံတစ်ရာ သို့မဟုတ် တန်ဖိုးတစ်စုံတစ်ရာ ရှိသလော။ ဤအလုပ်ကြိုးစားမှုမျိုးသည် တစ်ကိုယ်ကောင်းဆန်ပြီး ယုတ်ညံ့သည်၊ ဆိုးညစ်ပြီး အရှက်မဲ့ရာကျသည်။ ဤကဲ့သို့သော အန္တိခရစ်မျိုးကို မထုတ်ပယ်လျှင် အကျိုးဆက်များက မည်သည်တို့ ဖြစ်လိမ့်မည်နည်း။ လူများသည် အသင်းတော်၏ အလုပ်ကို သူတို့စိတ်ကြိုက် နှောင့်ယှက်ကြလိမ့်မည်ဖြစ်ပြီး သူတို့သဘောမပေါက်လိုက်ခင်မှာပင် ဘုရားသခင်ကို ဆန့်ကျင်သူများ ဖြစ်လာကြလိမ့်မည်။ ဤသည်မှာ ဘုရားသခင်၏ အမှုတော်ကို နှောင့်ယှက်၍ ဖရိုဖရဲဖြစ်စေခြင်း မဟုတ်လော။ သူတို့သည် မိမိတို့၏ ပန်းတိုင်များကို စွမ်းဆောင်ရရှိရန်အလို့ငှာ အလုပ်ကြိုးစားကြခြင်း ဖြစ်လျှင် ယင်းက သူတို့ကို ဘုရားသခင်အား ဆန့်ကျင်ပိုင်ခွင့် ပေးသလော။ ထိုအခါ သူတို့သည် ဘုရားကို ဆန့်ကျင်ပြီး ပုန်ကန်သင့်သလော။ သူတို့သည် ထင်တိုင်းကြဲပြီး ဆင်ခြင်ဉာဏ်ကင်းမဲ့စွာ ပြုမူ၍ ဘုရားကို ကျိုးနွံနာခံရန် ငြင်းဆန်သင့်သလော။ သူတို့လုပ်လိုရာ မှန်သမျှကို လုပ်နိုင်သလော။ သမ္မာတရားကို မပိုင်ဆိုင်သူများ၊ ဘုရားသခင်ကို မကျိုးနွံမနာခံသူများ၊ သူတို့လုပ်သမျှ အရာတိုင်းက ကျိုးကြောင်းဆီလျော်ပြီး မှန်ကန်သည်ဟု တွေးထင်လျက် ဆင်ကန်းတောတိုးသာ ပြုမူချင်ကြသူများသည် အသင်းတော်၏ အလုပ်ကို နှောင့်ယှက်၍ ဖရိုဖရဲဖြစ်အောင် လုပ်ရန် လာသော နတ်ဆိုးများနှင့် စာတန်၏ လက်ပါးစေစစ်စစ်များ ဖြစ်ကြသည်။ ဤကဲ့သို့သော လူများကို သင်ပိုင်းခြားသိမြင်နိုင်ခြင်း မရှိရုံသာမက သူတို့ကို စာလည်း စာနာ၍ သူတို့အတွက် မျက်ရည်ကျပြီး သူတို့ကို ကာကွယ်ပေးခြင်းပင် ပြုပါက သင်သည်လည်း အသုံးမကျသည့် လူတစ်ဦးဖြစ်သည်။ စိတ်ရှုပ်ထွေးနေသည့် လူတစ်ဦးဖြစ်ပြီး ငတုံးငအတစ်ဦးဖြစ်သည်။ “အထက်က သူ၏ ခံစားချက်များကို ထောက်ထားခြင်း မရှိ။ ထိုလူက အလွန်အလုပ်ကြိုးစားသည်ကို အထက်က မပြောမဆိုနှင့် သူ့အား ဖယ်ထုတ်ပစ်လိုက်သည်” ဟု သင်ထင်ဆဲ ဖြစ်ကောင်းဖြစ်မည်။ အကယ်၍ ဤသို့ သင်ပြောပါက သင်သည်လည်း စာတန်၏ လက်ပါးစေတစ်ဦးဖြစ်ပြီး နတ်ဆိုးနှင့် သက်ဆိုင်သူဖြစ်သည်။ ခေါင်းဆောင်အတုအယောင်များနှင့် အန္တိခရစ်များကို မည်သည့်အခါမျှ မဖော်ထုတ်ဘဲ သို့မဟုတ် သတင်းမပေးဘဲ စာတန်၏ အတွေးအခေါ်များနှင့်အညီ နေထိုင်သော လူအများအပြား ရှိကြသည်။ တစ်နေ့တွင် အန္တိခရစ်တယောက်က အလွန်အမင်း ပျက်စီးဆုံးရှုံးစေနိုင်သည့် တစ်စုံတစ်ခုကို ပြုလုပ်လိုက်သည့်အခါမှသာ ဤသည်မှာ အန္တိခရစ်တစ်ယောက်က လူများကို အထင်အမြင်မှားစေနေသည့် အဖြစ်အနေတစ်ခု အမှန်ပင် ဖြစ်ကြောင်းကို နောက်ဆုံးမှ သူတို့ သဘောပေါက်သွားကြသည်။ “ဘုရားသခင်သည် အနန္တတန်ခိုးရှင်ပင်။ သို့ဖြစ်၍ အသင်းတော်၌ အန္တိခရစ် ဘယ်နှဦးရှိကြောင်းကို လူ့ဇာတိခံဘုရားသခင်က သိနေသင့်သည်။ သူတို့အကြောင်းကို ငါတို့သတင်းပေးဖို့ လိုအပ်သလော” ဟု တွေးလျက် ဤကိစ္စနှင့်ပတ်သက်၍ အယူအဆများ လူတချို့တွင် ရှိဆဲဖြစ်သည်။ ဤသို့ ပြောသောလူများသည် အဓိပ္ပာယ်မဲ့သော လူစားမျိုး မဟုတ်လော။ ယခုအချိန်တွင် ဘုရားသခင်သည် လူ့သဘာဝတွင် အလုပ်လုပ်နေခြင်းဖြစ်၍ ဘုရားသခင်၏ အသုံးပြုခြင်းခံရသည့်သူသည် သာမန်လူသားဖြစ်၏။ ထို့ကြောင့် အသင်းတော်၏ ကိစ္စရေးရာများနှင့် သူတိုက်ရိုက်ထိတွေ့ဆက်ဆံခြင်း မရှိပါက ဤအရာများအကြောင်းကို မည်သို့သိနိုင်မည်နည်း။ အန္တိခရစ်များနှင့်ဆိုင်သည့် ဖြစ်ရပ်များ ဖြစ်ပျက်ခဲ့သည့် အကြိမ်များစွာတွင် လူတချို့က သူတို့ရှိကြောင်း သတင်းပေး၍ ထုတ်ဖော်ပြီး အထက်က စုံစမ်းစစ်ဆေးရန် အမိန့်ပေးလိုက်သည့် နောက်မှသာ ပြဿနာများ ပြေလည်သွားခဲ့သည်။ သာမန်လူ့သဘာဝဖြင့် လူများကို ဦးဆောင်ပြီး အလုပ်လုပ်စဉ်တွင် ဘုရားသခင်သည် သဘာဝလွန် လုံးဝ မဟုတ်ဘဲ အလွန်အမင်း လက်တွေ့ကျသည်။ သို့သော် သူသည် စာတန်ကို သိမ်းပိုက်အနိုင်ယူပြီး အရှက်ရစေသည်။ ဤနည်းလမ်းဖြင့်သာ သူ၏ အနန္တတန်ခိုးရှိခြင်းနှင့် ဉာဏ်ပညာတို့ကို ထုတ်ဖော်နိုင်သည်။ ဤသည်မှာ ဘုရားသခင်၏အမှုတော် မည်မျှလက်တွေ့ကျပုံ ဖြစ်သည်။ သူရွေးချယ်ထားသော သူများအနေဖြင့် သင်ခန်းစာများ ယူနိုင်ပြီး ပိုင်းခြားသိမြင်နိုင်စွမ်း ရရှိကာ မိမိတို့၏ အသိပညာများ ကျယ်ပြန့်လာအောင် လုပ်နိုင်ရန်အလို့ငှာ ဤလူများ၊ အဖြစ်အပျက်များ၊ အမှုအရာများ အားလုံးကို သူစီစဉ်ပေးခြင်း ဖြစ်သည်။ သူရွေးချယ်ထားသော သူများက ပိုင်းခြားသိမြင်နိုင်စွမ်း ရသွားသည့်အခါ ခေါင်းဆောင်အတုအယောင်များ၊ အန္တိခရစ်များ၊ ဆိုးယုတ်သော လူများသည် “တရားဥပဒေ၏ လက်တံရှည်” မှ လွတ်မြောက်ရန် တတ်နိုင်တော့မည် မဟုတ်ချေ။ ဘုရားသခင်သည် အချက်အလက်အမှန်များကို အသုံးပြုပြီး ထိုသူတို့ကို ထုတ်ဖော်၍ သူရွေးချယ်ထားသော သူများအားလုံးကို ရှင်းရှင်းလင်းလင်း မြင်နိုင်အောင်နှင့် နားလည်နိုင်အောင် လုပ်ပေးလိမ့်မည်။ အတိတ်ကာလတွင် မကောင်းသောလူများနှင့် အန္တိခရစ်များ များစွာတို့သည် အထုတ်ဖော်ခံရပြီး ဖယ်ရှားရှင်းလင်းခံခဲ့ကြရသည် မဟုတ်လော။ ဤကိစ္စကို မည်သူမျှ ရှင်းရှင်းလင်းလင်း မမြင်နိုင်လေသလော။ ထိုသို့ဖြစ်လျှင် သင်တို့သည် စိတ်ရှုပ်ထွေးလွန်းနေချေပြီ။

လူတချို့သည် ဘုရားအိမ်တော်၏ အလုပ်အစီအစဉ်များရှိ အချို့အပိုင်းအနည်းငယ်ကို နားမလည်ကြသော်လည်း ဤကဲ့သို့ ပြောကာ ကျိုးနွံနာခံနိုင်ကြဆဲပင် ဖြစ်သည်။ “ဘုရားသခင် ပြုလုပ်တော်မူသမျှမှာ မှန်ကန်ပြီး အဓိပ္ပာယ်ရှိ၏။ ကျွန်ုပ်တို့သည် အလုပ်အစီအစဉ်များကို အပြည့်အဝ နားမလည်လျှင် ဦးစွာ ကျိုးနွံနာခံသင့်သည်။ ဘုရားသခင်ကို ကျွန်ုပ်တို့ဝေဖန်၍ မရပါ။ အလုပ်အစီအစဉ်များက ကျွန်ုပ်တို့၏ အယူအဆများနှင့် မကိုက်ညီလျှင်ပင် ၎င်းတို့ကို ကျွန်ုပ်တို့ နားထောင်သင့်ဆဲပင် ဖြစ်၏။ အကြောင်းမှာ ကျွန်ုပ်တို့က လူသားများ ဖြစ်နေ၍ပင်။ ထို့အပြင် လူ့စိတ်ဆိုသည်မှာ အဘယ်အရာကို မြင်နိုင်ပါသနည်း။ ဘုရားသခင်၏ အစီအစဉ်များကို ကျွန်ုပ်တို့ ဤအတိုင်းသာ ကျိုးနွံနာခံသင့်သည်။ ၎င်းတို့ကို ကျွန်ုပ်တို့ နားလည်လာနိုင်သည့် နေ့ရက် ရောက်လာလိမ့်မည်။ အဆိုပါနေ့ရက် ရောက်လာချိန်တွင် ထိုအစီအစဉ်များကို ကျွန်ုပ်တို့ အပြည့်အဝ နားမလည်နိုင်သေးဘဲ ရှိနေလျှင်ပင် လိုလိုလားလား ကျိုးနွံနာခံသင့်ဆဲပင် ဖြစ်သည်။ ကျွန်ုပ်တို့သည် လူများဖြစ်၍ ဘုရားသခင်ကို ကျိုးနွံနာခံသင့်၏။ ဤသည်မှာ ကျွန်ုပ်တို့ လုပ်သင့်သည့်အရာပင်” ဟူ၍ ဖြစ်သည်။ သို့သော် လူတချို့ကမူ မတူကြချေ။ ဘုရားအိမ်တော်၏ အလုပ်အစီအစဉ်များကို သူတို့မြင်သောအခါ “ဤသည်မှာ ဘုရားသခင်ပြောသည့်အရာ ဖြစ်ပြီး ဤအရာများက ဘုရား၏ တောင်းဆိုချက်များ ဖြစ်သည်။ ပထမတစ်ချက်ကား အဆင်ပြေပုံ ရ၏။ သို့သော် ဒုတိယတစ်ချက်ကမူ သိပ်မသင့်တော်လှ။ ယင်းကို ငါပြောင်းပစ်လိုက်တော့မည်” ဟု ပြောလျက် ထိုအစီအစဉ်များကို ဦးစွာ လေ့လာကြည့်ကြပေလိမ့်မည်။ ဤသို့သော လူများတွင် ဘုရားသခင်ကို ကြောက်ရွံ့သည့် စိတ်နှလုံးရှိသလော။ အလုပ်အစီအစဉ်များကို မိမိစိတ်တိုင်းကျ သင်ပြောင်းလဲပစ်လျှင် ဤပြဿနာ၏ သဘောသဘာဝက အဘယ်နည်း။ ဤသည်မှာ ဘုရားအိမ်တော်၏ အလုပ်ကို နှောင့်ယှက်ခြင်းနှင့် ဖရိုဖရဲဖြစ်စေခြင်း မဟုတ်လော။ သင်ပိုင်ဆိုင်သော အရာများသည် သမ္မာတရားဖြစ်သလော။ သင့်တွင် သမ္မာတရား အမှန်တကယ် ရှိသည်ဆိုပါက အဘယ်ကြောင့် ထိုအရာကို မဖော်ပြသနည်း။ အဘယ်ကြောင့် ဘုရားသခင်၏ နှုတ်ကပတ်တော်များကို သင်ပြောင်းလဲပစ်ရသနည်း။ ဤသို့လုပ်ခြင်းဖြင့် မည်သည့်စိတ်သဘောထားကို သင်ဖော်ထုတ်သနည်း။ မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်သော စိတ်သဘောထား၊ မည်သူ့ကိုမျှ မနာခံသော စိတ်သဘောထား ဖြစ်သည်။ ဘုရားသခင်၏ အစီအစဉ်များနှင့်ပတ်သက်လာလျှင် သင်သည် စိတ်ကြိုက်ရွေးချယ်ရဲသည်ဆိုပါက သင့်တွေးခေါ်ပုံနှင့် စိတ်သဘောထားတွင် ဆိုးရွားသော ပြဿနာရှိနေပေပြီ။ ဘုရားသခင်ရွေးချယ်ထားသော သူများသည် ဤကဲ့သို့သော လူများကို ပိုင်းခြားသိမြင်နိုင်စွမ်း ရှိသင့်သည်။ ပထမအနေဖြင့် ထိုကဲ့သို့သော လူများသည် ပြဿနာများကို ဖြေရှင်းရန် သမ္မာတရားနှင့်ပတ်သက်၍ မိတ်သဟာယမပြုနိုင်ကြသော်လည်း သမ္မာတရားကို သူတို့နားလည်သည်ဟု ယုံကြည်ကြပြီး မည်သူ့ကိုမျှ နာခံလိမ့်မည် မဟုတ်ချေ။ ဒုတိယအနေဖြင့် အလုပ်အစီအစဉ်များနှင့်ပတ်သက်၍ အယူအဆများ သူတို့တွင် ရှိသောအခါ ဘုရားအိမ်တော်ကို ထိုအယူအဆများအကြောင်း မပြောပြဘဲ ဤအတိုင်း လျှောက်ဖြန့်ကြသည်။ တတိယအနေဖြင့် ဘုရားသခင်နှင့် ဘုရားအိမ်တော်၏ အလုပ်အကြောင်း သူတို့တွင် အယူအဆများ ရှိသောအခါ သူတို့သည် ထိုအယူအဆများကို မဖြေရှင်းရုံသာမက ဘုရားသခင်ရွေးချယ်ထားသော သူများတွင် ဘုရားနှင့်ပတ်သက်၍ အယူအဆများ ဖြစ်ပေါ်လာစေရန်နှင့် ဘုရားကို ထိုသူတို့ ဆန့်ကျင်ပြီး တိုက်ခိုက်ရန် ထိုသူတို့ကို လှုံ့လည်း လှုံ့ဆော်သည်။ ထိုသို့အားဖြင့် သူတို့ဆန္ဒအတိုင်း ဘုရားလုပ်အောင်နှင့် နောက်ဆုံးတွင် ကျိုးနွံနာခံလာအောင် ဘုရားကို အကျပ်ကိုင်ရန် ဖြစ်သည်။ ဤအပြုအမူသုံးခုအပေါ် အခြေခံ၍ ဤလူများသည် မည်ကဲ့သို့သော လူစားမျိုးဖြစ်သည်ကို လူတစ်ဦးသည် အသေအချာသိနိုင်၏။ သူတို့သည် သမ္မာတရားကို ရှာဖွေပြီး ဘုရားသခင်ထံ ကျိုးနွံနာခံသောလူများ ဖြစ်သလော။ လုံးဝ မဟုတ်ချေ။ သူတို့သည် သမ္မာတရားကို အနည်းငယ်မျှပင် မရှာဖွေကြချေ။ ထို့ပြင် ဘုရားသခင်ကိုလည်း မကျေမနပ် ဖြစ်ကြသေးသည်။ ဘုရားသခင်နှင့်ပတ်သက်သည့် အယူအဆများ သူတို့၌ ရှိသည့်အပြင် လူတိုင်းတွင် ဘုရားနှင့်ပတ်သက်သော အယူအဆများ ဖြစ်ပေါ်လာအောင်နှင့် ဘုရားကို လူတိုင်းဆန့်ကျင်ပြီး တိုက်ခိုက်အောင် လုပ်လျက် ထိုအယူအဆများကို သူတို့ဖြန့်ကြသည်။ ဤအချက်အပေါ် အခြေခံပြီး သူတို့ကို လုံးလုံးလျားလျား အန္တိခရစ်အစစ်အမှန်များအဖြစ် အမျိုးအစားသတ်မှတ်နိုင်၏။ ဤကဲ့သို့သော လူများကို မည်သို့ကိုင်တွယ်သင့်သနည်း။ သူတို့ကို မေတ္တာရှေ့ထား၍ ကူညီသင့်သလော။ ဤသည်မှာ အသုံးမဝင်ချေ။ အဘယ်ကြောင့်ဆိုသော် သူတို့သည် သမ္မာတရားကို လက်မခံ၍ ဖြစ်သည်။ သူတို့ကို ပြုပြင်လျှင်ရော မည်သို့ရှိမည်နည်း။ သူတို့သည် သမ္မာတရားကို လက်မခံသောကြောင့် ဤသည်ကလည်း အသုံးမဝင်ပေ။ ဘုရားသခင်ကို ယုံကြည်သောသူများက သမ္မာတရားကို လက်မခံနိုင်လျှင် ဤသည်မှာ ကြီးလေးသော ပြဿနာတစ်ခုနှင့် ဆိုးရွားသော အရာတစ်ခုပင် ဖြစ်ချေတော့သည်။ သင့်အနေဖြင့် ဤကိစ္စကို ရိုးရှင်းလွန်းစွာ ကြည့်ပြီး ကိစ္စကြီးမဟုတ်ဟု ယုံကြည်လျှင် ဘုရားသခင်ကို သင်ပြစ်မှားမိသည့် နေ့တစ်နေ့ ရောက်လာလိမ့်မည်။ ဤကဲ့သို့သော လူတချို့ကို ငါမြင်ဖူး၏။ သူတို့သည် ရှင်းထုတ်ခြင်း မခံရသေးသော်လည်း သူတို့၏ အဆုံးသတ်မှာ အကယ်စင်စစ် ဆုံးဖြတ်ခံထားရပြီးသား ဖြစ်သည်။ သူတို့သည် ဖယ်ရှားရှင်းလင်းခံရလိမ့်မည်ပင်။

ဘုရားသခင်ကို ယုံကြည်သူများသည် အနည်းဆုံးအနေဖြင့် ဘုရားသခင်ကို ကြောက်ရွံ့သော စိတ်နှလုံးရှိရမည်။ ဘုရားသခင်ကို ကြောက်ရွံ့ခြင်းဟူသည်မှာ မည်သည့်အရာကို ဆိုလိုသနည်း။ လူများသည် ဘုရားသခင်ကို ကြောက်ရွံ့ရမည်။ သူတို့လုပ်လိုသမျှ မည်သည့်အရာမဆိုကို လျှောက်မလုပ်ဘဲ မိမိတို့အတွက် လူးသာလွန့်သာရှိသည့် အနေအထားတစ်ခု ကျန်နေအောင် လုပ်လျက် အရာတိုင်းကို သတိနှင့် ဂရုတစိုက် လုပ်ရမည်။ ဥပမာ ဘုရားအိမ်တော်က ခေါင်းဆောင်အတုအယောင်တချို့ကို နှင်ထုတ်သောအခါ လူတချို့က ပြောကြသည်မှာ “ဤကိစ္စနှင့်ပတ်သက်၍ ကျွန်ုပ်ကား သိပ်မသေချာလှပါ။ သူတို့အတိအကျ အဘယ်အရာ လုပ်ခဲ့ကြောင်း ကျွန်ုပ်တို့ သိသည်မဟုတ်။ သိခဲ့လျှင်ပင် သူတို့လုပ်ခဲ့သည့် အရာများ၏ သဘောသဘာဝကို ကျွန်ုပ်တို့အနေဖြင့် စေ့စေ့စပ်စပ် နားလည်နိုင်သည် မဟုတ်ပါ။ ဘုရားသခင်ပြုသမျှ အရာတိုင်းသည် မှန်ကန်၏။ ထို့ပြင် ကိစ္စများ ရှင်းလင်းသွားအောင် ဘုရားလုပ်ပြီး သူ့ရည်ရွယ်ချက်ကို ငါတို့အား နားလည်ခွင့်ပေးမည့် နေ့တစ်နေ့ကား အမြဲ ရောက်လာလိမ့်မည်” ဟူ၍ ဖြစ်သည်။ ဘုရားအိမ်တော်က ကိစ္စများကို အဘယ်ကြောင့် ဤနည်းလမ်းအတိုင်း လုပ်သည်ကို သင်နားမလည်သော်လည်း ကျိုးနွံနာခံနိုင်သေးလျှင် သင်သည် ဘုရားသခင်ကို ကြောက်ရွံ့သော စိတ်နှလုံး အနည်းငယ်မျှ ရှိသည်ဟု ဆိုနိုင်သော အတန်အသင့် ဘုရားတရား ကိုင်းရှိုင်းသူတစ်ဦး ဖြစ်သည်။ သင်သည် နားမလည်သော်လည်း ဘုရားသခင်ကို ဆန့်ကျင်နေသေးပြီး အသင်းတော်၏ အလုပ်ကို နှောင့်ယှက်နေသေးသည်ဆိုလျှင် ဤသည်မှာ ဒုက္ခရောက်မည့် သဘောပင်။ အသင်းတော်က ခေါင်းဆောင်အတုအယောင်တချို့ကို ထုတ်ပယ်ပြီး အန္တိခရစ်တချို့ကို နှင်ထုတ်သည့်အချိန်တိုင်းတွင် သူတို့၏ အမာခံနောက်လိုက်တချို့က အမြဲတမ်း ရှေ့ထွက်လာ၍ ဘုရားသခင်သည် မဖြောင့်မတ်ဟု ပြောဆိုပြီး သန့်ရှင်းသော ဝိညာဉ်တော်အား ဤကိစ္စကို ထုတ်ဖော်ပေးဖို့ တောင်းဆိုလျက် ထိုကိစ္စကြောင့် ဘုရားသခင်ကို လူသိရှင်ကြား ဝေဖန်ရင်း ထိုသူတို့ကို ကာကွယ်ပေးကြသည်။ ဤသို့သော လူများအနေဖြင့် ဧဝံဂေလိတရား ဖြန့်ဝေရာတွင်၊ သူတို့၏ တာဝန်များကို ထမ်းဆောင်ရာတွင် သူမတူအောင် ကောင်းလှသော အစေခံမှုကို ပေးလျှင်ပင် ဘာမျှ အရေးမပါတော့ချေ။ သစ္စာဖောက်မှုတစ်ခုက သင့်ကံကြမ္မာကို ထာဝရ အဆုံးအဖြတ်ပေးလိမ့်မည်။ သင်သည် သစ္စာဖောက်ခြင်း၏ အနှစ်သာရကို ရှင်းရှင်းလင်းလင်း မြင်ရမည်။ ကိစ္စကြီးမဟုတ်ဟု မထင်လိုက်လေနှင့်။ သင်တို့အားလုံးသည် ဘုရားသခင်ကို ဆန့်ကျင်ခဲ့ကြပြီး ပြစ်မှားခဲ့ကြသည်ဟု ဆိုနိုင်၏။ သို့ရာတွင် သင်တို့၏ ဆန့်ကျင်ခြင်းနှင့် ပြစ်မှားခြင်းများ၏ သဘောသဘာဝသည် မတူညီချေ။ ငါယခုတင် ပြောခဲ့သော ကိစ္စ၏ သဘောသဘာဝကမူ အလွန်ကြီးလေးလှပြီး ဘုရားသခင်ကို လူသိရှင်ကြား ဝေဖန်ခြင်းနှင့် ဆန့်ကျင်ခြင်းတို့ ပါဝင်သည်။ လူတချို့သည် အသင်းတော်အတွင်း လက်လွတ်စပယ် သူတို့ လျှောက်ဖြန့်ပေးသည့် စာတချို့ ရေးရသည်ကို၊ အချို့အရာများ ရေးသားရသည်ကို အမြဲ နှစ်သက်ကြသည်။ ဤသည်က အခြေခံမူများနှင့် ကိုက်ညီသလော။ သူတို့ရေးသားသော အရာများသည် သက်သေခံချက်အစစ်အမှန် ဖြစ်သလော။ ထိုအရာများသည် ဘဝအတွေ့အကြုံများလော။ ဘုရားသခင်ရွေးချယ်ထားသော လူများအတွက် တည်ဆောက်စရာ ဖြစ်စေသလော။ ထိုကဲ့သို့ မဟုတ်သော်လည်း ဤလူများက ထိုအရာများကို အသင်းတော်အတွင်း လက်လွတ်စပယ် လျှောက်ဖြန့်နေသေးလျှင် သူတို့သည် လူများကို လှည့်စားနေခြင်း ဖြစ်သည်။ အယူလွဲများနှင့် ယုတ္တိအမှားများကို ဖြန့်နေခြင်း ဖြစ်သည်။ အချက်အလက်အမှန်များကို လိုရာဆွဲပြောနေခြင်း ဖြစ်သည်။ အမှန်နှင့် အမှားကို ရှုပ်ထွေးစေခြင်း ဖြစ်သည်။ လုံးဝ အဓိပ္ပာယ်မရှိသော စကားတစ်ပုံတစ်ခေါင်းကို ပြောဆိုနေခြင်း ဖြစ်သည်။ လူတချို့ဆိုလျှင် ကိုယ်ပိုင်စာအုပ်ပင် ရေးလိုကြသည်။ ထို့နောက်တွင်မူ ထိုစာအုပ်ကို အသင်းတော်သို့ ပို့ပြီး နာမည်ကျော်ကြားလာချင်ကြသည်။ လူတို့သည် ပေါလု၏ ဥပမာမှ နက်နဲသော သင်ခန်းစာကို မရလိုက်ကြလေသလော။ သင်သည် စာအုပ်တစ်အုပ် ရေးချင်နေဆဲ၊ “ကျော်ကြားသူ၏ ကိုယ်တိုင်ရေး အတ္ထုပ္ပတ္တိ” တစ်အုပ် ရေးချင်နေဆဲ၊ “သမ္မာတရား အကျဉ်းချုပ်” တစ်အုပ် ရေးချင်နေဆဲ ဖြစ်၏။ သင့်တွင် အသိစိတ်ဟူ၍ စိုးစဉ်းမျှ မရှိပါတကား။ သင်တတ်နိုင်လျှင် အတွေ့အကြုံကို အခြေခံသည့် သက်သေခံချက် လေးငါးပုဒ်ခန့် ရေးလော့။ ဘုရားသခင်ကို ယုံကြည်လာခဲ့သည့် ဤနှစ်အနည်းငယ်အတွင်းတွင် သင်ဝေဖန်ခံရပြီး ဒုက္ခခံခဲ့ရသည်တို့မှာ မလုံလောက်လေသလော။ ဤကိစ္စကို ရှင်းရှင်းလင်းလင်း မမြင်နိုင်သေးသလော။ လူများသည် အဘယ်အရာကို နားလည်ကြသနည်း။ သင်ပြောသည့် စကားများနှင့် အယူဝါဒများသည် သင့်ကိုယ်ပိုင်ပြဿနာများကိုပင် ဖြေရှင်းပေးနိုင်ခြင်း မရှိပါဘဲနှင့် သင်က ထိုအရာတို့ကို အခြားလူများအား ပေးချင်နေသေး၏။ သင့်တွင် ကိုယ့်ကိုယ်ကိုယ် သိနားလည်ခြင်း လုံးဝ မရှိပါတကား။ ဘုရားအိမ်တော်က အဘယ်ကြောင့် စာအုပ်များကို တစ်ပုံစံတည်း ပုံနှိပ်ထုတ်ဝေသနည်း။ အကြောင်းမှာ ဤစာအုပ်အများစုသည် ဘုရားသခင်၏ နှုတ်ကပတ်တော်များဖြင့် ပါဝင်ဖွဲ့စည်းထားပြီး ကျန်သည့် စာအုပ်များမှာလည်း ဘုရားသခင်ရွေးချယ်ထားသော သူများ၏ အတွေ့အကြုံကို အခြေခံသည့် သက်သေခံချက် အစစ်အမှန်များဖြင့်သာ ပါဝင်ဖွဲ့စည်းထားသောကြောင့် ဖြစ်သည်။ ဤအရာများသည် ဘုရားသခင်ရွေးချယ်ထားသော လူများ လိုအပ်သည့် အပြုသဘောဆောင်သော အရာများအားလုံး ဖြစ်၏။ ထို့ကြောင့် ဘုရားအိမ်တော်က တစ်ပုံစံတည်း ထုတ်ဝေသည့် စာအုပ်များ အားလုံးသည် အသင်းတော်၏ အလုပ်အတွက်ရော ဘုရားသခင်ရွေးချယ်ထားသော လူများ၏ အသက်ဝင်ရောက်မှုအတွက်ပါ လိုအပ်သည်။ ဤလုပ်ဆောင်ပုံ လုပ်ဆောင်နည်းသည်လည်း သန့်ရှင်းသော ဝိညာဉ်တော်၏ လမ်းညွှန်မှုမှ ဖြစ်ပေါ်လာခြင်း ဖြစ်သည်။ ဘုရားအိမ်တော်က တစ်ပုံစံတည်း ထုတ်ဝေထားသည့် စာအုပ်များသည် တန်ဖိုးအရှိဆုံး ဖြစ်ပြီး မရှိမဖြစ် အလိုအပ်ဆုံး ဖြစ်ကြောင်းကို သင်တို့အားလုံး နားလည်ကြသည်။ တရားဒေသနာများကို နားထောင်ခြင်းမှ မည်သည့်အကျိုးကျေးဇူးများ ရနိုင်သည်ကို သင်တို့ ကောင်းစွာ သိကြသည်။ ထို့ကြောင့် ခေါင်းဆောင်အတုအယောင်များနှင့် အန္တိခရစ်များက ဖြန့်သည့်အရာများကို ပိုင်းခြားသိမြင်နိုင်စွမ်း ရှိလျှင် သင်တို့သည် ခေါင်းဆောင်အတုအယောင်များနှင့် အန္တိခရစ်များကို အမှန်တကယ် ပိုင်းခြားသိမြင်နိုင်ကြလိမ့်မည်။ သို့သော် သင်တို့၏ လက်ရှိဝိညာဉ်ရင့်သန်မှုအရ သင်တို့သည် ဘုရားသခင်ကို ယုံကြည်ခြင်းနှင့်ဆိုင်သည့် အယူဝါဒများစွာကိုသာ နားလည်ကြပြီး သမ္မာတရားကိုမူ မရှင်းလင်းကြသေးချေ။ သင်တို့အပြည့်အဝ နားမလည်နိုင်သေးသည့်၊ သင်တို့အတွက် မသဲကွဲဘဲ ဝိုးတဝါးဖြစ်နေပုံရသည့် အရေးပါသော ကိစ္စရပ်တချို့ ရှိသည်။ ထို့ကြောင့် သင်တို့တွင် မည်သည့်သမ္မာတရားစစ်မှန်မှုမျှ မရှိသေးဘဲ ပိုင်းခြားသိမြင်နိုင်စွမ်းလည်း သိပ်မရှိကြသေးချေ။ အသင်းတော်ရှိ မည်သူမဆိုက မည်ကဲ့သို့ ပြုမူသည်ဖြစ်စေ၊ ပြောဆိုသည်ဖြစ်စေ သင်တို့တွင် ယင်းကို ရှင်းရှင်းလင်းလင်း ပိုင်းခြားသိမြင်နိုင်စွမ်း မရှိ။ လူတစ်ဦးသည် အာဝဇ္ဇန်းရွှင်ရွှင် စကားပြောသရွေ့ ဘုရားသခင်ကို သက်သေခံနိုင်သည်၊ အာဝဇ္ဇန်းရွှင်ရွှင် စကားမပြောသော သူတို့ကမူ သူတို့တွင် အတွေ့အကြုံကို အခြေခံသည့် သက်သေခံချက် ရှိလျှင်ပင် ထိုအကြောင်းကို မပြောနိုင်ဟု လူတချို့က ယုံကြည်ကြသည်။ ဤကိစ္စနှင့်ပတ်သက်၍ သူတို့မှန်သလော။ သူတို့သည် အကြီးအကျယ် အထင်မှားနေကြခြင်း ဖြစ်သည်။ အတွေ့အကြုံကို အခြေခံသော သက်သေခံချက်ကို မည်ကဲ့သို့ပင် ပြောသည်ဖြစ်စေ ထိုသက်သေခံချက်က လက်တွေ့ကျသည်။ အကယ်၍ လူတစ်ဦးတွင် အတွေ့အကြုံကို အခြေခံသည့် သက်သေခံချက် မရှိလျှင် အယူဝါဒများအကြောင်းကို မည်မျှကောင်းအောင် သူပြောနိုင်ပါစေ သူပြောသည့်အရာသည် လက်တွေ့မကျချေ။ ဤသည်မှာ အဘယ်ကြောင့်နည်း။ စကားများနှင့် အယူဝါဒများအကြောင်းကို ပြောခြင်းသည် သမ္မာတရားစစ်မှန်မှုကို လူတစ်ဦး ပိုင်ဆိုင်ကြောင်း ကိုယ်စားမပြု။ သမ္မာတရားအနည်းငယ်ကို ထိုသူနားလည်လျှင်ပင် ဤနားလည်ခြင်းသည် အတော်အတန် တိမ်ပြီး ကန့်သတ်ချက် ရှိနေဆဲ ဖြစ်သည်။ ထို့ပြင် သူတို့သည် အတွေ့အကြုံကို အခြေခံသည့် သက်သေခံချက်အကြောင်း လုံးဝ မရေးနိုင်ကြပေ။ အကယ်၍ တစ်စုံတစ်ယောက်သည် အတွေ့အကြုံကို အခြေခံသည့် သက်သေခံချက် မရှိသော်လည်း စကားများနှင့် အယူဝါဒများကို မျက်နှာပြောင်တိုက်ကာ ပြောနေဆဲ ဖြစ်ပြီး လူများကို ဩဝါဒပေးနေဆဲ ဖြစ်လျှင် ထိုသူသည် ကြောင်သူတော် ဖာရိရှဲတစ်ယောက် ဖြစ်လာပေပြီ။ သူသည် လူများကို အထင်အမြင်မှားရန် သက်သေခံချက်အတုကို ထွင်ရုံသာ တတ်နိုင်၏။ ဤသို့ လုပ်သော သူတို့သည် ဘုရားသခင်၏ ကျိန်ဆဲခြင်းကို ခံရပေလိမ့်မည်။ တစ်စုံတစ်ယောက်က စစ်မှန်သော သက်သေကို ခံနိုင်မနိုင်ဆိုသည်မှာ သူ၏ အာဝဇ္ဇန်းရွှင်မှုအပေါ် မမူတည်ချေ။ ပေတရုတွင် အတွေ့အကြုံကို အခြေခံသည့် သက်သေခံချက် မည်မျှအထိ ရှိသည်ကို ကြည့်လော့။ သူသည် စာဘယ်နှစောင် ရေးခဲ့သနည်း။ သက်သေခံချက်ဆောင်းပါး ဘယ်နှပုဒ် သူရေးခဲ့သနည်း။ အနည်းငယ်မျှသာ ဖြစ်ကောင်းဖြစ်နိုင်သည်။ သို့သော် ဘုရားသခင်ကမူ ပေတရုကို သူ့အား အသိဆုံးလူနှင့် သူ့အား အစစ်အမှန် ချစ်မြတ်နိုးသူတစ်ဦး ဖြစ်သည်ဟု အသိအမှတ်ပြုခဲ့၏။ သင့်တွင် အတွေ့အကြုံကို အခြေခံသည့် သက်သေခံချက် အမှန်တကယ် ရှိလျှင် သင်သည် ကျိန်းသေ ပြောင်းလဲသွားပြီး အများကြီးပို၍ လိမ္မာရေးခြား ရှိလာပေလိမ့်မည်။ သင်စိတ်အားထက်သန်သော ထိုအရာများ၊ ကောင်းသည်ဟု သင်ထင်ခဲ့သော ထိုအရာများကို လုပ်တော့မည် မဟုတ်။ လူသည် မည်မျှအရေးမပါဘဲ ချွတ်ခြုံကျနေကာ သနားစရာကောင်းကြောင်း သင်အသိအမှတ်ပြုလာသည့်အခါ သင်သည် စိတ်ကူးပေါက်သလို လုပ်ရဲတော့မည် မဟုတ် သို့တည်းမဟုတ် စာအုပ်တစ်အုပ်ဖြစ်စေ ကိုယ်တိုင်ရေး အတ္ထုပ္ပတ္တိတစ်အုပ်ဖြစ်စေ ရေးရဲတော့မည် မဟုတ်။ စာအုပ်များဖြစ်စေ၊ ကိုယ်တိုင်ရေး အတ္ထုပ္ပတ္တိများဖြစ်စေ ရေးရန် သို့မဟုတ် ကူညီထောက်ပံ့ပေးမှုတစ်မျိုးမျိုး လုပ်ပေးသည်ဟု ယိုးမယ်ဖွဲ့ပြီး သူတို့၏ နာမည်ဂုဏ်သတင်းကို တည်ဆောက်ရန် ဆန္ဒရှိသောသူများ အားလုံးသည် မိမိတို့ကိုယ်ပိုင် စွမ်းရည်များကို အထင်ကြီးလွန်းသည့်၊ ဘုရားသခင်ကို ကြောက်ရွံ့သည့် စိတ်နှလုံးကို မပိုင်ဆိုင်သည့်၊ မိမိဆန္ဒအတိုင်း လိုက်လုပ်ရသည်ကို ကြိုက်သည့် မာနထောင်လွှားကာ စိတ်ကြီးဝင်ပြီး ရည်မှန်းချက်ကြီးသော လူများသာ ဖြစ်ကြသည်။ သမ္မာတရားကို အမှန်တကယ် လိုက်စားသော လူများသည် သူတို့၏ တာဝန်များကို ကောင်းစွာ ထမ်းဆောင်ရေး၊ သမ္မာတရားကို နားလည်ရေး၊ အခြေခံမူများနှင့်အညီ လုပ်ဆောင်ရေးတို့အပေါ်တွင် အားလုံး အာရုံစိုက်ထားကြသည်။ မိမိ၏ တာဝန်များကို ကောင်းစွာ ထမ်းဆောင်ခြင်း၊ စိတ်သဘောထား ပြောင်းလဲခြင်း၊ သမ္မာတရား စစ်မှန်မှုသို့ ဝင်ရောက်ခြင်း၊ အတွေ့အကြုံကို အခြေခံသည့် သက်သေခံချက်အစစ်အမှန် ရှိခြင်းတို့သည် အခြားအရာများထက် ပိုကောင်းသည်ဟု သူတို့ထင်ကြသည်။ ဤနည်းအတိုင်း လိုက်စားနိုင်သူတို့သည် ဉာဏ်အမြော်အမြင် အရှိဆုံးသော လူများ ဖြစ်ကြပြီး အသိစိတ် အရှိဆုံးသော လူများဖြစ်ကြသည်။

ကောက်နုတ်ချက် (၉)

သမ္မာကျမ်းစာ၏ ဓမ္မဟောင်းကျမ်းတွင် မှတ်တမ်းတင်ထားသော နောဧ၊ အာဗြဟံနှင့် ယောဘတို့အတွက်မူ သူတို့၏လူ့သဘာဝ ဝိသေသလက္ခဏာများမှာ မည်သည်တို့ဖြစ်သနည်း။ ဘုရားသခင်က သူတို့ကို လက်ခံနိုင်ဖွယ်ရှိသည်ဟု ထင်စေသည့် သာမန်လူ့သဘာဝ၏ မည်သည့်ဝိသေသလက္ခဏာများ သူတို့တွင် ရှိခဲ့သနည်း။ (သူတို့တွင် အထူးသဖြင့် အသိစိတ်နှင့် ဆင်ခြင်တုံတရားတို့ကို ပိုင်ဆိုင်ထားသည်။) ယင်းသည် လုံးဝ မှန်သည်။ ဘုရားသခင်က သူ့ကို ကိုယ်တိုင်ကိုယ်ကျ လုံးဝ စကားပြောခြင်းမရှိဘဲနှင့် သူ့ထံ ဘုရားသခင်သည် ကိုယ်တိုင်ကိုယ်ကျ ပေါ်ထွန်းခြင်းမရှိဘဲ အသက်အရွယ်အိုမင်းသည့်တိုင်အောင် ယောဘသည် နေထိုင်ခဲ့သည်။ သို့သော် ယောဘသည် ဘုရားသခင်ပြုလုပ်ခဲ့သမျှအရာတိုင်းကို နားလည်နိုင်ပြီး ခံစားနိုင်သည်။ နောက်ဆုံးတွင် သူသည် ဘုရားသခင်နှင့်ပတ်သက်၍ သူသိထားသည်တို့ကို စကားလုံးအချို့ဖြင့် အကျဉ်းချုပ်ဖော်ပြခဲ့သည်။ “ယေဟောဝါသည် ပေးတော်မူ၏၊ ပြီးလျှင် ယေဟောဝါသည် ပြန်နုတ်သိမ်းတော်မူ၏၊ ယေဟောဝါ၏ နာမတော်သည် မင်္ဂလာရှိပါစေ။” (ယောဘ ဝတ္ထု ၁:၂၁) ဤစကားများက ဘာကိုဆိုလိုသနည်း။ ၎င်းတို့သည် “ယေဟောဝါသည် ဘုရားသခင်ဖြစ်သည်၊ သူသည် ဖန်ဆင်းရှင်ဖြစ်သည်၊ သူသည် ကျွန်ုပ်၏ဘုရားသခင်ဖြစ်ပြီး သူစကားပြောသောအခါ သူပြောသည့်အကြောင်းအရာ၏တစ်ဝက်ကိုသာ ကျွန်ုပ်နားလည်လျှင်တောင်မှ နားထောင်ပြီး ပြောသည့်အတိုင်း အနည်းငယ်မျှမတိမ်းမစောင်းဘဲ လိုက်နာရမည်” ဟု ဆိုလိုသည်။ ယောဘ၏ ဘုရားသခင်အပေါ် သိမြင်မှုသည် ဤအဆင့်သို့ ရောက်သောအခါမှသာ ဘုရားသခင်သည် ယောဘကို လက်ခံနိုင်ဖွယ်ဖြစ်သည်ဟု မြင်ခဲ့သည်။ ယောဘတွင် ထိုကဲ့သို့သောအတွေ့အကြုံများနှင့် သဘောပေါက်နားလည်နိုင်စွမ်းတို့ ရှိခဲ့ပြီး ဘုရားသခင်က သူ့အပေါ် ချမှတ်ပေးသည့် စမ်းသပ်မှုများကိုလည်း လက်ခံနိုင်ပြီး ကျိုးနွံနာခံနိုင်ခဲ့သည်။ သူ၏ သာမန်လူ့သဘာဝ၏ အသိစိတ်နှင့် ဆင်ခြင်တုံတရားရှိခြင်းအပေါ် အခြေခံ၍ ဤအရာအားလုံးကို ရရှိခဲ့ခြင်းဖြစ်သည်။ ဘုရားသခင်ကို သူမြင်ခဲ့သည်ဖြစ်စေ မမြင်ခဲ့သည်ဖြစ်စေ၊ ဘုရားသခင်က သူ့ကို မည်သည့်အရာလုပ်ခဲ့သည်ဖြစ်စေ၊ ပြီးလျှင် ဘုရားသခင်က သူ့ကို စမ်းသပ်ခဲ့သည်ဖြစ်စေ မစမ်းသပ်ခဲ့သည်ဖြစ်စေ သို့မဟုတ် သူ့ရှေ့တွင် ပေါ်ထွန်းခဲ့သည်ဖြစ်စေ မပေါ်ထွန်းခဲ့သည်ဖြစ်စေ၊ “ယေဟောဝါသည် ကျွန်ုပ်၏ဘုရားသခင်ဖြစ်သည်၊ ဘုရားသခင် ညွှန်ကြားသည့်အရာကို ကျွန်ုပ် လိုက်နာရမည်၊ ဘုရားသခင် ဝမ်းမြောက်ရွှင်လန်းသည့်အရာကို ကျွန်ုပ် လုပ်ရမည်၊ နားလည်သည်ဖြစ်စေ နားမလည်သည်ဖြစ်စေ၊ သူ့လမ်းခရီးနောက်ကို ကျွန်ုပ်လိုက်ရမည်၊ ပြီးလျှင် သူ့ကို နားထောင်ပြီး ကျိုးနွံနာခံရမည်” ဟု သူအမြဲတမ်းယုံကြည်ခဲ့သည်။ ယောဘဝတ္ထုတွင် ယောဘ၏သားသမီးများသည် စားပွဲသောက်ပွဲများကို မကြာခဏ ကျင်းပခဲ့ကြကြောင်း၊ ယောဘသည် ထိုပွဲများတွင် မည်သည့်အခါမှ မပါဝင်ခဲ့ကြောင်းနှင့် ထိုအစား ဆုတောင်း၍ သူတို့အတွက် မီးရှို့ယဇ်ပူဇော်ခြင်းများကို ပြုလုပ်ပေးခဲ့ကြောင်းကို မှတ်တမ်းတင်ထားသည်။ ယောဘ မကြာခဏ ဤသို့လုပ်ခဲ့သည်ဟူသည့် အချက်က လူသားမျိုးနွယ်၏ စားသောက်ပျော်ပါးရာတွင် ဇိမ်ခံခြင်းနှင့် စားပွဲသောက်ပွဲများကျင်းပ၍ ပျော်ပါးကြသည့် လူသားမျိုးနွယ်၏အသက်တာကို ဘုရားသခင်သည် စက်ဆုပ်ရွံရှာသည်ကို သူ့စိတ်နှလုံးထဲတွင် သိနေခဲ့သည်ဆိုသည်ကို သက်သေပြသည်။ ဤသည်မှာ သမ္မာတရားဖြစ်သည်ကို ယောဘ၏စိတ်နှလုံးထဲတွင် နားလည်ခဲ့သည်၊ ဘုရားသခင်က ဤအကြောင်း ပြောသည်ကို သူတိုက်ရိုက် မကြားခဲ့ရသော်လည်း ဤသည်မှာ ဘုရားသခင်ဆန္ဒရှိသည့်အရာဖြစ်ကြောင်းကို သူ့စိတ်နှလုံးထဲတွင် ယောဘ သိနေခဲ့သည်။ ဘုရားသခင် ဆန္ဒရှိသည့်အရာကို ယောဘ သိနေခဲ့သောကြောင့် ဘုရားသခင်ကို နားထောင်ပြီး ကျိုးနွံနာခံနိုင်ခဲ့သည်။ ယင်းကို သူသည် တစ်ချိန်လုံး လက်ကိုင်ထားခဲ့ပြီး စားပွဲသောက်ပွဲများကျင်းပ၍ စားသောက်ရာတွင် သူမည်သည့်အခါကမှ မပါဝင်ခဲ့ချေ။ ယောဘသည် သမ္မာတရားကို နားလည်ခဲ့ပါသလော။ သူနားမလည်ခဲ့ပါ။ ဤအရာကို သူလုပ်နိုင်ခဲ့ခြင်းမှာ သူ့တွင် သာမန်လူ့သဘာဝ၏ အသိစိတ်နှင့် ဆင်ခြင်တုံတရားတို့ ရှိခြင်းကြောင့်ဖြစ်သည်။ အသိစိတ်နှင့် ဆင်ခြင်တုံတရားတို့အပြင် အရေးပါဆုံးအရာမှာ ဘုရားသခင်ကို သူစစ်မှန်စွာ ယုံကြည်ခဲ့ခြင်းဖြစ်သည်။ ဘုရားသခင်သည် ဖန်ဆင်းရှင်ဖြစ်ကြောင်းနှင့် ဖန်ဆင်းရှင်ပြောသည့်အရာသည် ဘုရားသခင်၏အလိုတော်ဖြစ်ကြောင်းကို သူ့စိတ်နှလုံး၏အတွင်းထဲမှနေ၍ သူမှတ်မိခဲ့သည်။ ယနေ့ခေတ်စကားအရ ယင်းသည် သမ္မာတရားဖြစ်သည်၊ ယင်းသည် အမြင့်ဆုံးညွှန်ကြားချက်ဖြစ်ပြီး ယင်းသည် လူသား လိုက်နာရမည့်အရာဖြစ်သည်။ လူက နားလည်သဘောပေါက်နိုင်သည်မှာ ဘုရားသခင်၏ ဆန္ဒဖြစ်စေ၊ ဘုရားသခင်မိန့်ခဲ့သည့် စကားအနည်းငယ်မျှကိုသာ ဖြစ်စေ၊ လူသားသည် လက်ခံပြီး လိုက်နာသင့်သည်။ ဤသည်မှာ အတိအကျပင် လူသားပိုင်ဆိုင်သင့်သည့် အသိစိတ်ဖြစ်သည်။ လူသားက ဤအသိစိတ်ကို ပိုင်ဆိုင်သောအခါ ဘုရားသခင်၏နှုတ်ကပတ်တော်ကို လိုက်နာရန်၊ သူ့နှုတ်ကပတ်တော်ကို လက်တွေ့ကျင့်သုံးရန်နှင့် ကျိုးနွံနာခံရန် လူသားအတွက် အများကြီး ပို၍လွယ်ကူလေသည်။ ထိုသို့လုပ်ခြင်းဖြင့် အခက်အခဲများနှင့် ဆင်းရဲဒုက္ခ မရှိတော့ဘဲ မည်သည့်ဟန့်တားသည့်အရာတစ်စုံတစ်ရာမှ မရှိတော့မည်မှာ အသေအချာဖြစ်သည်။ သမ္မာတရားများစွာကို ယောဘ နားလည်ခဲ့သလော။ ဘုရားသခင်ကို သူသိခဲ့သလော။ ဘုရားသခင်၏ပိုင်ဆိုင်မှုများနှင့် ဖြစ်တည်မှု သို့မဟုတ် သူ့စိတ်သဘောထားအနှစ်သာရတို့အကြောင်းကို သူသိခဲ့သလော။ ယနေ့ခေတ်လူများနှင့်နှိုင်းယှဉ်ပါက ဘုရားသခင်ကို သူမသိခဲ့ပါ၊ အလွန်အနည်းအကျဉ်းလောက်ကို သူနားလည်ခဲ့သည်။ သို့ရာတွင် ယောဘ ပိုင်ဆိုင်ခဲ့သည့်အရာမှာ သူနားလည်သမျှအားလုံးကို လက်တွေ့ကျင့်သုံးသည့် အရည်အသွေးဖြစ်သည်။ တစ်စုံတစ်ခုကို နားလည်ပြီးနောက် သူသည် နာခံပြီး လိုက်နာသည်။ ဤသည်မှာ သူ့လူ့သဘာဝ၏အမွန်မြတ်ဆုံးသွင်ပြင်လက္ခဏာဖြစ်ပြီး လူအများက သူ့အပေါ် အထင်သေးခံရဆုံးအရာလည်းဖြစ်သည်။ “ယောဘက စားပွဲသောက်ပွဲကျင်းပခြင်းကို ရှောင်နေခြင်း မဟုတ်သလော။ ဘုရားရှေ့တွင် မီးရှို့ယဇ်ပူဇော်ပွဲကို ပုံမှန် သူလုပ်နေခြင်း မဟုတ်သလော။ ယခုခေတ်စကားအရဆိုလျှင် ကာမဂုဏ်အာရုံနှစ်သိမ့်မှုပေးခြင်းများနှင့် ဇိမ်ခံခြင်းကို သူရှောင်နေခြင်း မဟုတ်သလော” ဟု လူများကတွေးသည်။ ဤသည်တို့မှာ အပေါ်ယံအရေးကိစ္စတစ်ခုထက်ပို၍ ဘာမှမဟုတ်ပါ။ သို့သော် ဤအရာများ၏နောက်ကွယ်ရှိ ယောဘ၏စိတ်သဘောထား၊ အနှစ်သာရနှင့် လူ့သဘာဝတို့ကို သင်ကြည့်သောအခါ ယင်းတို့သည် ရိုးရှင်းသောအရေးကိစ္စများမဟုတ်ကြောင်း သို့မဟုတ် အောင်မြင်အောင်လုပ်ရန် အလွန်မလွယ်ကူကြောင်းကို သင်နားလည်လာလိမ့်မည်။ သာမန်လူတစ်ယောက်က ပိုက်ဆံချွေတာရန်အတွက် စားပွဲသောက်ပွဲများကျင်းပရာမှ ရှောင်ရှားဖို့ဆိုလျှင် အောင်မြင်အောင်လုပ်ဖို့ လွယ်ကူသည်။ သို့သော် ယောဘသည် ထိုအချိန်က လူချမ်းသာတစ်ဦးဖြစ်သည်။ မည်သည့်လူချမ်းသာက စားပွဲသောက်ပွဲများကို မကျင်းပဖို့ ရွေးချယ်မည်နည်း။ သို့ဆိုလျှင် ယောဘသည် အဘယ်ကြောင့် စားပွဲသောက်ပွဲများကျင်းပရာမှ ရှောင်ရှားနိုင်ရသနည်း။ (ဘုရားသခင်က ယင်းကို စက်ဆုပ်ရွံရှာမှန်း သူသိခဲ့သည်။ သူသည် ဘုရားသခင်ကို ကြောက်ရွံ့ရိုသေနိုင်ခဲ့ပြီး မကောင်းသောအကျင့်ကို ရှောင်နိုင်ခဲ့သည်။) အမှန်ပင်။ ဘုရားသခင်ကို ကြောက်ရွံ့ရိုသေရာတွင်နှင့် မကောင်းသောအကျင့်ကို ရှောင်ရာတွင် ယောဘသည် မည်သည့်အရာကို သေသေချာချာ လက်တွေ့ကျင့်သုံးခဲ့သနည်း။ ဘုရားသခင် စက်ဆုပ်ရွံရှာသည့် ထိုအရာများသည် အားလုံး မကောင်းမှုဖြစ်သည်ကို သူသိခဲ့သည်၊ ထို့ကြောင့် ဘုရားသခင်၏နှုတ်ကပတ်တော်ကို သူလိုက်နာခဲ့ပြီး ဘုရားသခင် စက်ဆုပ်ရွံရှာသည့် မည်သည့်အရာတစ်စုံတစ်ခုကိုမှ သူမလုပ်ခဲ့ပေ။ မည်သူက မည်သည့်အရာကို ပြောသည်ဖြစ်စေ ဤအရာများကို သူမည်သည့်နည်းနှင့်မျှ မလုပ်ခဲ့ပါ။ ဘုရားသခင်ကို ကြောက်ရွံ့ရိုသေပြီး မကောင်းသောအကျင့်ကို ရှောင်ခြင်းဆိုသည်မှာ ဤသည်ကို ဆိုလိုခြင်းဖြစ်သည်။ ယောဘသည် အဘယ်ကြောင့် ဘုရားသခင်ကို ကြောက်ရွံ့ရိုသေပြီး မကောင်းသောအကျင့်ကို ရှောင်နိုင်ရသနည်း။ သူ့စိတ်နှလုံးထဲတွင် သူမည်သည့်အရာကို တွေးနေသနည်း။ ဤဒုစရိုက်ကိစ္စများကို မလုပ်မိရန် သူမည်သို့ တတ်နိုင်သနည်း။ သူ့တွင် ဘုရားသခင်ကို ကြောက်ရွံ့သောစိတ်နှလုံးတစ်ခု ရှိခဲ့သည်။ ဘုရားသခင်ကို ကြောက်ရွံ့သောစိတ်နှလုံးတစ်ခုရှိခြင်းဆိုသည်မှာ မည်သည်ကိုဆိုလိုသနည်း။ သူ့စိတ်နှလုံးသည် ဘုရားသခင်ကို ကြောက်ရွံ့ကြောင်း၊ ဘုရားသခင်ကို ကြီးမြတ်သူအဖြစ် ဂုဏ်ပြုနိုင်ကြောင်းနှင့် သူ့စိတ်နှလုံးထဲတွင် ဘုရားသခင်အတွက် နေရာတစ်နေရာရှိကြောင်းကို ဆိုလိုသည်။ ၎င်းကို ဘုရားသခင်မြင်မည်ကို သူမကြောက်ပါ၊ ဘုရားသခင် အမျက်ထွက်မည်ကိုလည်း သူမကြောက်ပါ။ ထိုအစား ဘုရားသခင်ကို ကြီးမြတ်သူအဖြစ် သူ့စိတ်နှလုံးထဲတွင် ဂုဏ်ပြုသည်၊ ဘုရားသခင် စိတ်ကျေနပ်စေဖို့ ဆန္ဒရှိပြီး ဘုရားသခင်၏နှုတ်ကပတ်တော်များကို မြဲမြံစွာ စွဲကိုင်ထားဖို့ ဆန္ဒရှိသည်။ ထိုအကြောင်းကြောင့် သူသည် ဘုရားသခင်ကို ကြောက်ရွံ့ရိုသေပြီး မကောင်းသောအကျင့်ကို ရှောင်နိုင်ခဲ့ခြင်းဖြစ်သည်။ ယခု လူတိုင်းက “ဘုရားသခင်ကို ကြောက်ရွံ့ရိုသေခြင်းနှင့် မကောင်းသောအကျင့်ကို ရှောင်ခြင်း” ဆိုသည့် စာလုံးစုကို ပြောနိုင်ကြသော်လည်း ယင်းကို ယောဘ မည်သို့အထမြောက်ခဲ့သည်ကို သူတို့ မသိကြပေ။ အမှန်မှာ ယောဘသည် ဘုရားသခင်ကို ယုံကြည်ရာတွင် “ဘုရားသခင်ကို ကြောက်ရွံ့ရိုသေခြင်းနှင့် မကောင်းသောအကျင့်ကို ရှောင်ခြင်း” ကို အခြေခံအကျဆုံးနှင့် အရေးအကြီးဆုံးအဖြစ် ထုတ်ဖော်၍ ပြောခဲ့သည်။ ထို့ကြောင့် သူသည် ပညတ်တော်တစ်ပါးကို မြဲမြံစွာ စွဲကိုင်ထားသကဲ့သို့ ဤစကားများကို မြဲမြံစွာ စွဲကိုင်ထားနိုင်ခဲ့သည်။ ဘုရားသခင်၏နှုတ်ကပတ်တော်များကို သူနားထောင်ခဲ့သည်မှာ ဘုရားသခင်ကို ကြီးမြတ်သူအဖြစ် သူ့စိတ်နှလုံးက ဂုဏ်ပြုခဲ့သောကြောင့်ဖြစ်သည်။ လူသား၏အမြင်တွင် ဘုရားသခင်၏နှုတ်ကပတ်တော်များသည် မည်မျှ မထူးခြားဘဲ သာမညဖြစ်နေပါစေ၊ ၎င်းတို့သည် သာမန်စကားလုံးများမျှသာ ဖြစ်နေလျှင်တောင်မှ ယောဘ၏စိတ်နှလုံးထဲတွင် ဤနှုတ်ကပတ်တော်များသည် အမြတ်ဆုံးဖြစ်သောဘုရားသခင်ထံမှ လာသည်။ ၎င်းတို့သည် အကြီးကျယ်ဆုံး၊ အရေးအကြီးဆုံးစကားလုံးများဖြစ်ကြသည်။ ၎င်းတို့သည် လူများ အထင်သေးသောစကားလုံးများဖြစ်နေလျှင်တောင်မှ ဘုရားသခင်၏နှုတ်ကပတ်တော်များဖြစ်နေသရွေ့၊ လူတို့သည် ယင်းကြောင့် လှောင်ပြောင်သရော်ခံရလျှင်တောင်မှ သို့မဟုတ် အသရေဖျက်ခံရလျှင်တောင်မှ ၎င်းတို့ကို စောင့်ကြည့်လေ့လာသင့်သည်။ သူတို့သည် ဆင်းရဲဒုက္ခနှင့်ကြုံရလျှင်တောင်မှ သို့မဟုတ် ဖိစီးနှိပ်စက်ခံရလျှင်တောင်မှ သူ့နှုတ်ကပတ်တော်များကို အဆုံးအထိ မြဲမြံစွာ စွဲကိုင်ထားရမည်။ ၎င်းတို့အပေါ် သူတို့လက်မလျှော့သင့်ပါ။ ဘုရားသခင်ကို ကြောက်ရွံ့ရိုသေခြင်းဆိုသည်မှာ ဤသည်ကို ဆိုလိုသည်။ လူသားထံမှ ဘုရားသခင် တောင်းဆိုသောစကားလုံးတိုင်းကို သင်မြဲမြံစွာ စွဲကိုင်ထားရမည်။ ဘုရားသခင် တားမြစ်ထားသောထိုအရာများ သို့မဟုတ် ဘုရားသခင် စက်ဆုပ်သောထိုအရာများအတွက်မူ ၎င်းတို့အကြောင်းကို သင်မသိလျှင် ကိစ္စမရှိပါ၊ သို့သော် သင်သိလျှင် ထိုအခါ သင်သည် ထိုအရာများကို လုံးဝ မလုပ်ရန် တတ်နိုင်သင့်သည်။ သင့်မိသားစုက သင့်ကို စွန့်လွှတ်လိုက်လျှင်တောင်မှ၊ ဘာသာတရားမရှိသူများက သင့်ကို ပျက်ရယ်ပြုလျှင်တောင်မှ သို့မဟုတ် သင်နှင့်နီးစပ်သူများက လှောင်ပြောင်ပြီး သင့်အား သရော်ကြလျှင်တောင်မှ သင်သည် မြဲမြံစွာ စွဲကိုင်ထားနိုင်သင့်သည်။ သင်အဘယ်ကြောင့် မြဲမြံစွာ စွဲကိုင်ထားဖို့ လိုအပ်သနည်း။ သင်၏ စမှတ်က မည်သည့်အရာဖြစ်သနည်း။ သင်၏ စည်းမျဉ်းများက မည်သည်တို့နည်း။ ယင်းမှာ “ကျွန်ုပ်သည် ဘုရားသခင်၏ နှုတ်ကပတ်တော်များကို မြဲမြံစွာ စွဲကိုင်ထားပြီး သူ့ဆန္ဒများအတိုင်းလုပ်ရမည်။ ဘုရားသခင် ကြိုက်နှစ်သက်သောအရာများကို လုပ်ရာတွင် ကျွန်ုပ်သည် မြဲမြံရလိမ့်မည်။ ဘုရားသခင် စက်ဆုပ်သောအရာများကို စွန့်လွှတ်ရာတွင် ဆုံးဖြတ်ချက်ပြတ်သားရလိမ့်မည်။ ဘုရားသခင်၏ရည်ရွယ်ချက်ကို ကျွန်ုပ် မသိလျှင် ရပါသည်၊ သို့သော် သူ့ရည်ရွယ်ချက်ကို ကျွန်ုပ် အမှန်တကယ်သိပြီး နားလည်လျှင် ထိုအခါ သူ့နှုတ်ကပတ်တော်များကို နားထောင်ပြီး ကျိုးနွံနာခံရာတွင် ကျွန်ုပ်သည် ဆုံးဖြတ်ချက်ပြတ်သားရလိမ့်မည်။ မည်သူမှ ကျွန်ုပ်ကို ဟန့်တားရန် တတ်နိုင်လိမ့်မည်မဟုတ်ပါ၊ ကမ္ဘာကြီး အဆုံးသတ်သွားလျှင်တောင် ကျွန်ုပ်သည် မယိမ်းယိုင်ပါ” ဟူ၍ ဖြစ်သည်။ ဘုရားသခင်ကို ကြောက်ရွံ့ရိုသေပြီး မကောင်းသောအကျင့်ကို ရှောင်ခြင်းဆိုသည်မှာ ဤသည်ကို ဆိုလိုသည်။

မကောင်းမှုကို ရှောင်ဖို့ တတ်နိုင်ရန် လူများအတွက် ကြိုတင်သတ်မှတ်ချက်မှာ ဘုရားသခင်ကို ကြောက်ရွံ့သောစိတ်နှလုံးတစ်ခုရှိခြင်းဖြစ်သည်။ ဘုရားသခင်ကို ကြောက်ရွံ့သောစိတ်နှလုံးတစ်ခုကို မည်သို့ပြုလုပ်သနည်း။ ဘုရားသခင်ကို ကြီးမြတ်သူအဖြစ် ဂုဏ်ပြုခြင်းဖြင့်ပြုလုပ်သည်။ ဘုရားသခင်ကို ကြီးမြတ်သူအဖြစ် ဂုဏ်ပြုခြင်းဆိုသည်မှာ ဘာကို ဆိုလိုသနည်း။ ယင်းမှာ လူတစ်ဦးက ဘုရားသခင်သည် အရာခပ်သိမ်းအပေါ် အချုပ်အခြာအာဏာရှိကြောင်းကို သိပြီး သူတို့၏စိတ်နှလုံးက ဘုရားသခင်ကို ကြောက်ရွံ့သောအချိန်ကို ဆိုလိုသည်။ ရလဒ်အနေဖြင့် မည်သည့်အခြေအနေကိုမဆို အကဲဖြတ်သောအခါ ဘုရားသခင်၏နှုတ်ကပတ်တော်များကို သူတို့ အသုံးပြုနိုင်ပြီး ဘုရားသခင်၏နှုတ်ကပတ်တော်များကို သူတို့၏စံနှုန်းနှင့် စံသတ်မှတ်ချက်အဖြစ် သုံးသည်။ ဤသည်မှာ ဘုရားသခင်ကို ကြီးမြတ်သူအဖြစ် ဂုဏ်ပြုခြင်းဖြစ်သည်။ ရိုးရှင်းစွာပြောရလျှင် ဘုရားသခင်ကို ကြီးမြတ်သူအဖြစ် ဂုဏ်ပြုခြင်းသည် ဘုရားသခင်ကို သင့်စိတ်နှလုံးထဲတွင် ရှိရန်၊ သင့်စိတ်နှလုံးထဲတွင် ဘုရားသခင်ကို နှလုံးသွင်းထားရန်၊ သင်လုပ်သည့်အရာများတွင် သင့်ကိုယ်သင် မမေ့ရန်နှင့် သင့်ဘာသာသင် ဖောက်ထွက်ဖို့ မကြိုးစားဘဲ ထိုအစား ဘုရားသခင်ကို အုပ်ထိန်းစေရန်တို့ဖြစ်သည်။ အရာတိုင်းတွင် “ဘုရားသခင်ကို ကျွန်ုပ် ယုံကြည်ပြီး ဘုရားသခင်နောက်ကို လိုက်သည်။ ကျွန်ုပ်သည် ဘုရားသခင်က ရွေးချယ်ထားသည့် သေးငယ်သောဖန်ဆင်းခံလူသားတစ်ဦးသာဖြစ်သည်။ ကျွန်ုပ်၏ကိုယ်ပိုင်ဆန္ဒမှလာသည့် အမြင်များ၊ အကြံပြုချက်များနှင့် ဆုံးဖြတ်ချက်များကို လက်လွှတ်သင့်ပြီး ဘုရားသခင်သာ ကျွန်ုပ်၏ အရှင်သခင် ဖြစ်စေသင့်သည်။ ဘုရားသခင်သည် ကျွန်ုပ်၏ သခင်၊ ကျွန်ုပ်၏ ကျောက်နှင့် အရာတိုင်းတွင် ကျွန်ုပ်၏ လမ်းခရီးကို လမ်းညွှန်ပြသပေးသည့် တောက်ပသောအလင်းရောင်ဖြစ်သည်။ ကိုယ့်ကိုယ်ကိုယ် ဦးစားမပေးဘဲ သူ့နှုတ်ကပတ်တော်များနှင့် လိုအင်ဆန္ဒများအတိုင်း ကိစ္စများကို ကျွန်ုပ် လုပ်ရမည်” ဟု သင်တွေးသည်။ သင့်စိတ်နှလုံးထဲတွင် ဘုရားသခင်ရှိခြင်းဆိုသည်မှာ ဤသည်ကို ဆိုလိုသည်။ သင်တစ်စုံတစ်ခုလုပ်လိုသောအခါ စိတ်လိုက်မာန်ပါ လုပ်ခြင်း သို့မဟုတ် အလျင်စလိုလုပ်ခြင်းတို့ မလုပ်ပါနှင့်။ ဘုရားသခင်သည် သင့်လုပ်ရပ်များကို စက်ဆုပ်ရွံရှာသွားမည်လား၊ ပြီးလျှင် သင့်လုပ်ရပ်များသည် သူ့ရည်ရွယ်ချက်များနှင့်အညီဖြစ်မဖြစ်၊ ဘုရားသခင်၏နှုတ်ကပတ်တော်များက မည်သို့ပြောထားသည်ဆိုသည်တို့ကို ပထမ စဉ်းစားကြည့်ပါ။ သင့်စိတ်နှလုံးထဲတွင် ပထမဆုံး သင့်ကိုယ်သင် မေးကြည့်ပါ၊ စဉ်းစားပါ၊ ပြီးလျှင် တွေးတောချင့်ချိန်ပါ။ အလျင်မလိုပါနှင့်။ အလျင်လိုခြင်းသည် စိတ်လိုက်မာန်ပါပြုလုပ်ခြင်းဖြစ်ပြီး လူသားဆန္ဒနှင့် တဇောက်ကန်းလုပ်ဆောင်မှုတို့ကြောင့် စိတ်ပါဝင်စားခြင်းဖြစ်သည်။ သင်သည် အမြဲတမ်း အလျင်လိုပြီး စိတ်မြန်နေပါက ဘုရားသခင်သည် သင့်စိတ်နှလုံးထဲတွင် ရှိမနေခြင်းကို ပြသည်။ ထိုအခါ ဘုရားသခင်ကို ကြီးမြတ်သူအဖြစ် သင်ဂုဏ်ပြုသည်ဟု သင်ပြောသောအခါ ဤစကားများသည် အနှစ်မပါသည့်စကားများ ဖြစ်မနေဘူးလော။ သင့်စစ်မှန်မှုသည် ဘယ်မှာနည်း။ သင့်တွင် စစ်မှန်မှု မရှိပါ။ ပြီးလျှင် သင်သည် ဘုရားသခင်ကို ကြီးမြတ်သူအဖြစ် သင်ဂုဏ်မပြုနိုင်ပါ။ အခါတိုင်းတွင် သင့်အလိုဆန္ဒအတိုင်း လုပ်ပြီး၊ ကိစ္စရပ်များအားလုံးတွင် သင်သည် အိမ်ကြီးရှင်သခင်ကဲ့သို့ ပြုမူသည်။ သို့ဆိုလျှင် သင့်တွင် ဘုရားသခင်ကို ကြောက်ရွံ့သောစိတ်နှလုံးတစ်ခုရှိသည်ဟု သင်ပြောလျှင် ဤသည်မှာ အဓိပ္ပါယ်မဲ့သည်မဟုတ်လော။ သင်သည် လူများကို ဤစကားများဖြင့် လှည့်စားနေခြင်းဖြစ်သည်။ အကယ်၍ လူတစ်ယောက်တွင် ဘုရားသခင်ကို ကြောက်ရွံ့သောစိတ်နှလုံးတစ်ခုရှိပါက ယင်းက မည်သို့ အမှန်တကယ် သူ့ဘာသာ ပေါ်ထင်သနည်း။ ဘုရားသခင်ကို ကြီးမြတ်သူအဖြစ် ဂုဏ်ပြုခြင်းဖြင့်ဖြစ်သည်။ ဘုရားသခင်ကို ကြီးမြတ်သူအဖြစ် ဂုဏ်ပြုခြင်းကို အခိုင်အမာပေါ်ထင်အောင်ပြုသည့်အရာမှာ ဘုရားသခင်သည် သူတို့၏စိတ်နှလုံးထဲရှိ အထွတ်အမြတ်ဆုံးနေရာတွင် နေရာတစ်နေရာရှိနေခြင်းဖြစ်သည်။ သူတို့၏စိတ်နှလုံးထဲတွင် ဘုရားသခင်ကို သူတို့၏ဆရာအရှင်ဖြစ်ရန်နှင့် ဩဇာအာဏာကိုင်စွဲရန် သူတို့ အခွင့်ပေးထားသည်။ တစ်စုံတစ်ခုဖြစ်သောအခါ သူတို့တွင် ဘုရားသခင်ကို ကျိုးနွံနာခံသောစိတ်နှလုံးတစ်ခုရှိသည်။ သူတို့သည် အလျင်စလိုမလုပ်ပါ၊ စိတ်လိုက်မာန်ပါမလုပ်ပါ။ ပြီးလျှင် သူတို့သည် စိတ်မြန်လက်မြန်လည်း မလုပ်ကြပါ။ သို့သော် ထိုအစား သူတို့သည် တည်တည်ငြိမ်ငြိမ်ဖြင့် ရင်ဆိုင်နိုင်ကြပြီး သမ္မာတရားစည်းမျဉ်းများကို ရှာဖွေရန် ဘုရားသခင်၏ ရှေ့တော်မှောက်တွင် သူတို့ကိုယ်သူတို့ ဆိတ်ငြိမ်နိုင်ကြသည်။ ကိစ္စများကို ဘုရားသခင်၏နှုတ်ကပတ်တော်အတိုင်း သို့မဟုတ် သင့်ကိုယ်ပိုင်ဆန္ဒအတိုင်း လုပ်သည်ဖြစ်စေ မလုပ်သည်ဖြစ်စေ၊ ပြီးလျှင် သင့်ကိုယ်ပိုင်ဆန္ဒကို သင်ခွင့်ပြုသည်ဖြစ်စေ သို့မဟုတ် ဘုရားသခင်၏နှုတ်ကပတ်တော်ကို အုပ်ထိန်းစေခွင့်ပြုသည်ဖြစ်စေ သင့်စိတ်နှလုံးထဲတွင် ဘုရားသခင်ရှိမရှိဆိုသည့်အပေါ် မူတည်သည်။ သင်က ဘုရားသခင်သည် သင့်စိတ်နှလုံးထဲတွင် ရှိသည်ဟု ပြောသည်၊ သို့သော် တစ်စုံတစ်ခု ဖြစ်ပျက်သောအခါ သင်သည် ဆင်ကန်းတောတိုးလုပ်သည်။ ဘုရားသခင်ကို ဘေးသို့ တွန်းဖယ်ပစ်ရင်း အပြီးသတ်ဆုံးဖြတ်ချက်ကို ကိုယ့်ဘာသာချစေတော့သည်။ ဤသည်မှာ ဘုရားသခင်ရှိသည့် စိတ်နှလုံး၏ သရုပ်သကန်ဖြစ်သလော။ တစ်စုံတစ်ခု ဖြစ်ပျက်သောအခါ ဘုရားသခင်ထံ ဆုတောင်းနိုင်သောလူအချို့ရှိသည်၊ သို့သော် ဆုတောင်းပြီးနောက်တွင် “ဒီဟာကို ငါလုပ်သင့်တာလို့ ငါထင်တယ်။ ဟိုဟာကို ငါလုပ်သင့်တာလို့ ငါထင်တယ်” ဟု တွေးလျက် သူတို့သည် ကိစ္စများကို အလေးအနက် ဆက်စဉ်းစားနေသည်။ သင့်ကိုယ်ပိုင်ဆန္ဒနောက်ကို သင်အမြဲတမ်းလိုက်ပြီး သူတို့က သင့်ကို မည်မျှမိတ်သဟာယပြုပါစေ မည်သူ့ကိုမှ သင်နားမထောင်ပေ။ ဤသည်မှာ ဘုရားသခင်ကို ကြောက်ရွံ့သောစိတ်နှလုံးတစ်ခု မရှိခြင်း၏ သရုပ်သကန်မဟုတ်လော။ သမ္မာတရားစည်းမျဉ်းများကို သင်မရှာဖွေသည့်အပြင် သမ္မာတရားကို လက်တွေ့မကျင့်သုံးသောကြောင့် ဘုရားသခင်ကို ကြီးမြတ်သူအဖြစ် ဂုဏ်ပြုပြီး ဘုရားသခင်ကို ကြောက်ရွံ့သောစိတ်နှလုံးတစ်ခု ရှိသည်ဟု သင်ဆိုသောအခါ ၎င်းတို့သည် အနှစ်မပါသည့်စကားများသာဖြစ်ကြလေသည်။ ဘုရားသခင်ကို စိတ်နှလုံးများထဲ မရှိသောလူများနှင့် ဘုရားသခင်ကို ကြီးမြတ်သူအဖြစ် ဂုဏ်ပြုရန် မတတ်နိုင်သောလူများသည် ဘုရားသခင်ကို ကြောက်ရွံ့သောစိတ်နှလုံးတစ်ခု မရှိကြသောလူများဖြစ်သည်။ တစ်စုံတစ်ခု ဖြစ်ပျက်သောအခါ သမ္မာတရားကို ရှာဖွေရန် မတတ်နိုင်ကြသောလူများနှင့် ဘုရားသခင်ကို ကျိုးနွံနာခံသောစိတ်နှလုံးတစ်ခု မရှိကြသောလူများသည် ကောင်းဆိုးကျိုးပြစ်ကို အသိစိတ်နှင့် ဆင်ခြင်တုံတရား ကင်းမဲ့သောလူများအားလုံးဖြစ်သည်။ အကယ်၍ လူတစ်ယောက်သည် အသိစိတ်နှင့် ဆင်ခြင်တုံတရား အမှန်ရှိသည်ဆိုလျှင် တစ်စုံတစ်ခု ဖြစ်ပျက်သောအခါ သူတို့သည် သမ္မာတရားကို အလိုအလျောက်ရှာဖွေနိုင်ကြလိမ့်မည်။ “ဘုရားသခင်ကို ကျွန်ုပ် ယုံကြည်သည်။ ဘုရားသခင်၏ ကယ်တင်ခြင်းကို ရှာဖွေရန် ကျွန်ုပ် လာခဲ့ပြီ။ ကျွန်ုပ်တွင် ဖောက်ပြန်ပျက်စီးသောစိတ်သဘောထားရှိသောကြောင့် ကျွန်ုပ်လုပ်သမျှအရာတိုင်းမှာ တစ်ဦးတည်းဩဇာအာဏာရှိသူအဖြစ် ကိုယ့်ကိုယ်ကိုယ် ကျွန်ုပ် အမြဲတမ်း ဆက်ဆံသည်၊ ဘုရားသခင်၏ရည်ရွယ်ချက်များကို ကျွန်ုပ် အမြဲတမ်း ဆန့်ကျင်သည်။ ကျွန်ုပ် နောင်တရရမည်။ ဤနည်းအတိုင်း ဘုရားသခင်ကို ကျွန်ုပ် ဆက်ပြီး မပုန်ကန်နိုင်တော့။ ဘုရားသခင်ထံ ကျိုးနွံနာခံရန်နည်းလမ်းကို ကျွန်ုပ် သင်ယူရမည်။ ဘုရားသခင်၏နှုတ်ကပတ်တော်များက ဘာကို ပြောသည်၊ ပြီးလျှင် သမ္မာတရားစည်းမျဉ်းများက ဘာဖြစ်သည်ဆိုသည်တို့ကို ကျွန်ုပ် ရှာဖွေရမည်” ဟု သူတို့ ပထမဆုံး တွေးရမည်။ ဤသည်တို့သည် သာမန်လူ့သဘာဝ၏ ဆင်ခြင်တုံတရားမှ ထွက်ပေါ်လာသည့် အတွေးများနှင့် ရည်မှန်းချက်များဖြစ်ကြသည်။ ဤသည်တို့သည် ကိစ္စများကို သင်လုပ်ရာတွင် ရှိသင့်ရှိထိုက်သောစည်းမျဉ်းများနှင့် သဘောထားတို့ဖြစ်ကြသည်။ သာမန်လူ့သဘာဝ၏ အသိစိတ်ကို သင်ပိုင်ဆိုင်သောအခါ ဤသဘောထားကို သင်ပိုင်ဆိုင်ပြီဖြစ်သည်။ သာမန်လူ့သဘာဝ၏ အသိစိတ်ကို သင်မပိုင်ဆိုင်သောအခါ ဤသဘောထားကို သင်မပိုင်ဆိုင်ပါ။ ထို့ကြောင့် သာမန်လူ့သဘာဝ၏ အသိစိတ်ကို ပိုင်ဆိုင်ခြင်းသည် အရေးပါပြီး အလွန်အရေးကြီးသည်။ ယင်းသည် လူများ သမ္မာတရားကို နားလည်ခြင်းနှင့် ကယ်တင်ခြင်းရရှိခြင်းတို့နှင့် တိုက်ရိုက်ဆက်စပ်နေသည်။