ယခုတင်၊ ညီအစ်ကိုက သမ္မာတရား လိုက်စားခြင်း အကြောင်းအရာနှင့်ပတ်သက်၍ မိတ်သဟာယပြုခဲ့သည်။ ဤမျှ မိတ်သဟာယပြုပြီးနောက်တွင်၊ သမ္မာတရား လိုက်စားခြင်းက အရေးအကြီးဆုံးသောအရာဖြစ်ပုံနှင့် ဘုရားသခင်ကို သင် ယုံကြည်သော်လည်း သမ္မာတရားကို မလိုက်စားလျှင်၊ အမှုအရာတစ်ခုမျှ သင် ရရှိလိမ့်မည်မဟုတ်သည်ကို သင်တို့ ခံစားရသနည်း။ ယခုတွင် သင်တို့ထဲမှ အချို့သည် အသင့်ဖြစ်ကာ သမ္မာတရားကို လုံ့လဝီရိယရှိရှိ လိုက်စားရန်၊ ဘုရားနှုတ်ကပတ်တော်များနှင့်ပတ်သက်၍ ကြိုးစားရန်နှင့် သမ္မာတရားကို သာ၍ နားလည်ကာ ထိုသမ္မာတရားကို သာ၍ လက်တွေ့လုပ်ဆောင်ဖို့ ကြိုးပမ်းရန် စိတ်ပိုင်းဖြတ်ထားပြီး ဖြစ်ကောင်းဖြစ်မည်။ ဤသည်မှာ မှန်ကန်သည့် စိတ်နေစိတ်ထား ဖြစ်သလော။ ဟုတ်ပေ၏။ အလွန်များစွာ မိတ်သဟာယပြုပြီးနောက်တွင်၊ သင်တို့သည် မည်သည့် တုံ့ပြန်မှုမျှ မရှိသေးလျှင်၊ ယင်းမှာ ပုံမှန်မဟုတ်ဘဲ ဤစကားများက အချည်းနှီးဖြစ်သွားလိမ့်မည်။ သမ္မာတရားသည် ဘုရားသခင်ကို စစ်မှန်ရိုးသားစွာ ယုံကြည်ပြီး သူ ပေါ်ထွန်းဖို့ တောင့်တသူတိုင်းအတွက်၊ ပြီးလျှင် သမ္မာတရားကို ချစ်ပြီး နောက်ဆုံးသော ကာလတွင် ဘုရားသခင်၏ ကယ်တင်ခြင်းကို ရရှိဖို့ မျှော်လင့်သောသူတိုင်းအတွက် အရေးအကြီးဆုံးသောအရာ ဖြစ်သည်။ သမ္မာတရားလိုက်စားခြင်းသည် အခြားမည်သည့်အရာမဆိုထက် သာ၍ အရေးကြီး၏။ ငါတို့၏ အလုပ်များ၊ ငါတို့၏ ဘဝများ၊ သို့မဟုတ် ငါတို့ သွေးသား ရှေ့ရေးများထက် များစွာ သာ၍ အရေးကြီးသည်။ ယခုတွင် သမ္မာတရားလိုက်စားခြင်း၏ အရေးပါမှုကို သင်တို့ အသိအမှတ်ပြုကြပြီလော။ သင်တို့သည် သမ္မာတရား လိုက်စားခြင်းက သင်တို့၏ ဘဝများတွင် အရေးအကြီးဆုံးသော အရာဖြစ်သည်ဟု အသိအမှတ်ပြုလျက် သင်တို့၏ စိတ်နှလုံးများတွင် အချို့သော ခံစားချက်များကို မုချ တွေ့ကြုံခံစားနေရပေသည်။ ပြောရမည်ဆိုလျှင်၊ သင်တို့ တစ်ဦးစီတိုင်းအတွက် တစ်သက်လုံးတာရှည်ခံသော အဖြစ်အပျက်တစ်ခု ဖြစ်သည်။ အလွန်များသည့် မိတ်သဟာယကို နားထောင်ပြီးနောက်တွင်၊ သင်တို့ တစ်ဦးစီက ယခု သင်တို့၏ စိတ်နှလုံးများတွင် ထိုသို့သော အခြေခံအုတ်မြစ်တစ်ခု၊ ထိုသို့သော အသိပညာ၊ ခံစားချက်နှင့် အသိတရားဝင်ခြင်းတို့ ရှိကောင်းရှိနိုင်သည်။ ဤကဲ့သို့သော သိနားလည်ခြင်းနှင့် ခံစားချက်များသည် မှန်ကန်ပြီး တိကျကာ ယင်းတို့က သင်တို့ ရရှိပြီးဖြစ်သည့်အရာမှာ ဘုရားနှုတ်ကပတ်တော်၊ သင်တို့တစ်ဦးစီအပေါ် သူ ပြုမည့်အရာ၊ ပြီးလျှင် သူ၏ အလိုတော်နှင့် လုံးဝ အညီဖြစ်ကြောင်းကို သက်သေပြပေသည်။

လူအများစုက ကောင်းချီးများ ရရှိခြင်းအတွက် ဘုရားသခင်ကို ယုံကြည်ကြသည်။ သမ္မာတရားအနည်းငယ်ကို ၎င်းတို့ နားလည်လျှင်ပင်၊ ကောင်းချီးခံစားရဖို့ဖြစ်သော မိမိတို့၏ ကြံရွယ်ချက်ကို မစွန့်နိုင်ကြပေ။ သမ္မာတရားအပေါ် လူ၏ သဘောထားမှာ အဘယ်နည်း။ ၎င်းတို့၏ စိတ်နှလုံးများတွင်၊ လူအများစုသည် သမ္မာတရားကို စိတ်ကုန်ကြပြီး၊ ထိုသမ္မာတရားနှင့်ပတ်သက်၍ ဂရုပင်မစိုက်ကြပေ။ လူသည် သမ္မာတရားနှင့် အစိမ်းသက်သက်ဖြစ်သောကြောင့် ဖြစ်သည်။ သမ္မာတရားက မည်သည့်နေရာမှလာသည်၊ အဘယ်ကြောင့် ထိုသမ္မာတရားကို သူ လိုက်စားရမည်၊ အဘယ်ကြောင့် သူ လက်ခံရမည်၊ အဘယ်ကြောင့် လက်တွေ့လုပ်ဆောင်သင့်သည် သို့မဟုတ် ထိုသမ္မာတရားများစွာကို ဘုရားသခင်က အဘယ်ကြောင့် ဖော်ပြသည်ဟူသည်တို့ကို မဆိုထားနှင့်၊ သမ္မာတရားက မည်သည့်အရာဖြစ်သည်ကိုပင် သူ နားမလည်ပေ။ ဤမေးခွန်းအားလုံးက လူတိုင်းအတွက် စိမ်းနေပြီး၊ ယင်းတို့ကို ၎င်းတို့ မစဉ်းစားဖူးကြသကဲ့သို့ မဖော်ထုတ်ဖူးကြပေ။ ယခုတွင် ဘုရားသခင်က နောက်ဆုံးသောကာလ၌ တရားစီရင်ခြင်းအမှုကို လုပ်ဆောင်နေပြီး၊ နှုတ်ကပတ်တော်များစွာ ဖော်ပြပြီးဖြစ်သဖြင့်၊ ဘုရားသခင်ကို ယုံကြည်မှုလမ်းကြောင်းပေါ်တွင် သမ္မာတရား၏ သွင်ပြင်လက္ခဏာတိုင်း ပါဝင်သည့် ကိစ္စရပ်များစွာနှင့် ငါတို့ ထိတွေ့ဆက်ဆံလာရသည်။ သမ္မာတရားကို ရှာဖွေခြင်းမရှိဘဲ ထွက်ပေါက်မရှိပေ။ ထို့ကြောင့် ငါတို့သည် သမ္မာတရား သိနားလည်ခြင်းတစ်ခု လိုအပ်ပြီး၊ လက်တွေ့အရှိတရားအရ ဘုရားနှုတ်ကပတ်တော်များကို ဖတ်ရှုရမည်။ ဘုရားနှုတ်ကပတ်တော် စာကြောင်းတိုင်းသည် သမ္မာတရားဖြစ်ပြီး၊ ထိုသမ္မာတရားကို နားလည်ရန် အကြင်သူသည် ကိုယ်တိုင်ကိုယ်ကျ တွေ့ကြုံရန် လိုအပ်သည်။ မွေးဖွားချိန်မှ လူလားမြောက်အရွယ်အထိ၊ အလုပ်တစ်ခု ရသည်အထိ၊ အိမ်ထောင်ပြုပြီး အသက်မွေးအလုပ်တစ်ခုကို အသားကျသည့်အချိန်အထိ၊ ၎င်းတို့ ထိတွေ့ဆက်ဆံလာရသည့် လူများ၊ အဖြစ်အပျက်များနှင့် အမှုအရာများအပြင်၊ ၎င်းတို့ အနီးဝန်းကျင်တွက် ဖြစ်ပျက်သည့် အရာများအားလုံးအပါအဝင်၊ လူတစ်ဦး အသက်ရှင်သည့် ပတ်ဝန်းကျင်ရှိ အရာရာတိုင်းသည် အမှန်တွင် သမ္မာတရားနှင့် ဆက်စပ်နေသော်လည်း လူတစ်ဦးတစ်လေကမျှ သမ္မာတရားအရ ဤအရာများကို မမြင်ကြပေ။ ထို့ကြောင့် လူတိုင်းက သမ္မာတရားနှင့် စိမ်းသည်ဟု ပြောရခြင်းဖြစ်သည်။ လူသားမျိုးနွယ်အားလုံးထဲတွင် မည်သူကမျှ သမ္မာတရားကို နားမလည်ပေ။ ထို့ကြောင့် ဤအရာက သင့်အနေဖြင့် ယခုမှစ၍ သမ္မာတရားကို စတင်ရင်ဆိုင်၊ လက်ခံပြီး၊ လိုက်စားဖို့ တောင်းဆိုပေသည်။ ဘုရားသခင်ကို ယုံကြည်ခြင်းက သမ္မာတရား လိုက်စားခြင်း လိုအပ်ကြောင်းနှင့် သမ္မာတရားကသာ သင့်ကို ပြောင်းလဲစေနိုင်ကြောင်း၊ စုံလင်စေနိုင်ကြောင်း၊ ကယ်တင်ခြင်း ဆောင်ကြဉ်းပေးနိုင်ကြောင်းနှင့် သင့်ကို ဘုရားသခင်ထံ အမှန်တကယ် လာစေနိုင်ကြောင်း သင် နားမလည်သေးလျှင်၊ ဤအရာများကို သင် နားမလည်နိုင်လျှင်၊ သမ္မာတရားကို သင် စိတ်ဝင်စားလိမ့်မည် မဟုတ်၊ ထိုသမ္မာတရားကို လိုက်စားနိုင်လိမ့်မည် မဟုတ်သကဲ့သို့ သင် လုပ်ရင်းကိုင်ရင်းနှင့် သင်၏ စိတ်ထက်သန်မှု ပျောက်ဆုံးလိမ့်မည်ဖြစ်သည်။ လူအချို့က၊ “ဘုရားသခင်ကို ယုံကြည်မှုအတွက်၊ အသင်းတော် အသက်တာကို အသက်ရှင်ရန်နှင့် မိမိတာဝန်ကို လုပ်ဆောင်ရန် လုံလောက်သည်။ ထို့ကြောင့် သမ္မာတရားကို ကျွန်ုပ်တို့ လိုက်စားရန် အဘယ်ကြောင့် လိုအပ်သေးသနည်း။ ကျွန်ုပ်တို့သည် ဘုရားသခင်ကို အတိုက်အခံလုပ်သည့် အယောင်ဆောင် ခေါင်းဆောင်များ၊ သို့မဟုတ် အန္တိခရစ်များနောက်လိုက်ရန် မဆိုထားနှင့်၊ မည်သည့် မကောင်းမှုမျှ မလုပ်သကဲ့သို့ အခြားသူများနောက်လည်း မလိုက်ကြပါ။ ကျွန်ုပ်တို့အားလုံးက ဘုရားသခင်ကို ယုံကြည်ခြင်းနှင့်ပတ်သက်သည့် အယူဝါဒအချို့ကို နားလည်ပြီး၊ ဘုရားသခင်၌ ကျွန်ုပ်တို့၏ ယုံကြည်ခြင်းကို အဆုံးထိတိုင် ထိန်းသိမ်းနိုင်ကြသည်။ ထို့ကြောင့် ကျွန်ုပ်တို့အတွက် များစွာ သာ၍ နက်နဲသော သမ္မာတရားများကို နားလည်ရန် မလိုအပ်ပါ”ဟု ပြောကြသည်။ ဤရှုထောင့်သည် မှန်ကန်သလော။ (မမှန်ကန်ပါ။) အဘယ်ကြောင့် မမှန်ကန်သနည်း။ (အဘယ်ကြောင့်ဆိုသော် လူတို့က ဘုရားသခင်၏ ကယ်တင်ခြင်းခံရသည်မှာ သမ္မာတရားကို ရရှိကြသည့်အခါတွင်သာ ဖြစ်သောကြောင့် ဖြစ်သည်။) မှန်ပေ၏။ ၎င်းတို့၏ စိတ်နှလုံးများတွင်၊ လူအချို့သည် လူသားမျိုးနွယ်၏ ကယ်တင်ခြင်းအတွက် သမ္မာတရား၏ အရေးပါမှုကို ယခုတွင် ရေးတေးတေး သိရှိကြသည်။ သမ္မာတရားက အသက်ဖြစ်လာသည့် တန်ဖိုးနှင့် အရေးပါမှုကို ရှင်းလင်းစွာ သိမြင်ခြင်းမှ ၎င်းတို့ အလှမ်းဝေးဆဲဖြစ်နေနိုင်သော်လည်း၊ ၎င်းတို့၏ စိတ်နှလုံးများရှိ ဤခံစားချက်နှင့် အသိသည် အလွန် အဖိုးတန်လေသည်။ အဓိကအချက်မှာ လူတို့၏ စိတ်နှလုံးများတွင် ဤခံစားချက်နှင့် အသိက အမြစ်တွယ်နိုင်ခြင်း ရှိမရှိဖြစ်ပြီး ယင်းသည် လူတို့၏ အနာဂတ်လိုက်စားမှုများပေါ် မူတည်ပေသည်။ ယခု သင်၌ ဤအသိရှိခြင်းသည် ကောင်းမွန်သည့်အရာတစ်ခု ဖြစ်သည်။ ထိုအရာက ကယ်တင်ခြင်းလမ်းကို သင် လျှောက်ကောင်းလျှောက်နိုင်ကြောင်း မျှော်လင့်ချက် ပေး၏။ သမ္မာတရားလိုက်စားခြင်းက ဧကန်အမှန် အရေးကြီး၏။ ဥပမာအားဖြင့်၊ သင်သည် မတက်မကြွဖြစ်ကာ အားနည်းသည့်အခါ၊ သမ္မာတရား၏ အားပေးခြင်းနှင့် ထောက်ပံ့ပေးခြင်းမရှိဘဲ သင် အားကောင်းလာနိုင်သလော။ သင်၏ အားနည်းချက်များကို သင် အောင်မြင်ကျော်လွှားနိုင်သလော။ သင့်ကို အားနည်းစေပြီး မတက်မကြွဖြစ်စေသည့်အရာက မည်သည့်အရာဖြစ်သည်ကို သင် သိမှတ်ကာ စိတ်ဖြာလေ့လာဆွေးနွေးနိုင်သလော။ သင် သေချာပေါက် မလုပ်နိုင်ပေ။ သင်၏ တာဝန်များကို ထမ်းဆောင်ရာတွင် သင်သည် အမှုမဲ့အမှတ်မဲ့ဖြစ်ပြီး ဝတ်ကျေတမ်းကျေဖြစ်သည့်အခါ၊ သမ္မာတရားကို သင် မလိုက်စားလျှင် ဤဖောက်ပြန်ပျက်စီးသော စိတ်သဘောထားကို သင် ပြုပြင်နိုင်သလော။ သင်၏ တာဝန်များကို လုပ်ဆောင်ရာတွင် ဘုရားသခင်ကို သစ္စာရှိခြင်း စွမ်းဆောင်ရရှိနိုင်သလော။ သမ္မာတရား မရှာဖွေဘဲနှင့်၊ လူသည် မိမိကိုယ်ကို သိရှိပြီး၊ သူ၏ ကိုယ်ပိုင် ဖောက်ပြန်ပျက်စီးခြင်း၊ ကိုယ်ပိုင် မာနထောင်လွှားမှုကို ပြုပြင်နိုင်သလော။ လူသည် ဘုရားသခင်နှင့်ပတ်သက်၍ အယူအဆများ အမြဲရှိပြီး၊ သူ၏ ကိုယ်ပိုင် အယူအဆများနှင့် စိတ်ကူးများဖြင့် ဘုရားသခင်ကို အမြဲ အကဲဖြတ်နေသည်။ ဤအရာကို သမ္မာတရား မရှိဘဲနှင့် ပြုပြင်၍ရနိုင်သလော။ မရနိုင်ပေ။ ဘဝတွင် ငါတို့အပေါ် ဖြစ်ပျက်သည့် အရာများစွာတွင် ရွေးချယ်မှုများ ကျွန်ုပ်တို့ ရင်ဆိုင်ရသည်။ သမ္မာတရားကို ငါတို့ နားမလည်လျှင်၊ ဘုရားသခင်၏ အလိုတော်က မည်သည့်အရာဖြစ်ပြီး ငါတို့အပေါ် သူ မည်သည့်အရာတောင်းဆိုသည်ကို ငါတို့ မသိလျှင်၊ ငါတို့၌ လက်တွေ့လုပ်ဆောင်မှု နည်းလမ်း မရှိပေ။ ထိုအခါ ငါတို့သည် ငါတို့၏ ဖောက်ပြန်ပျက်စီးသော စိတ်သဘောထားများကို ထုတ်ဖော်ပြီး၊ အလွယ်တကူ အမှားများပြုလုပ်မိလိမ့်မည်ဖြစ်ကာ မှားယွင်းသည့် လမ်းကြောင်းကို လျှောက်မိကြလိမ့်မည်။ လူ၏ ဖောက်ပြန်ပျက်စီးသော စိတ်သဘောထား တည်ရှိခြင်းကို သူ နားလည်သည့် စကားများနှင့် အယူဝါဒများဖြင့် ဖြေရှင်း၍ရနိုင်သလော။ သင်သည် သမ္မာတရားကို မရှာဖွေလျှင်၊ ဘဝတွင် သင် လုပ်ဆောင်သည့် မည်သည့်အရာမဆိုအတွက် စည်းမျဉ်းများမရှိ၊ လိုက်လျှောက်ရမည့် လမ်းကြောင်းများမရှိသကဲ့သို့ ရည်မှန်းချက်များ သို့မဟုတ် ဦးတည်ချက်များမရှိဟု ဆိုကောင်းဆိုနိုင်ပေမည်။ ဤသို့ဖြစ်လျှင်၊ သင်တို့လုပ်ဆောင်သည့် အရာတိုင်းသည် သမ္မာတရား စည်းမျဉ်းများနှင့် ဆန့်ကျင်သည်၊ ဘုရားသခင်ကို အတိုက်အခံလုပ်ခြင်း လက္ခဏာတစ်ခုဖြစ်ပြီး သူ့ကို သစ္စာဖောက်ခြင်း ဖြစ်ကာ သင်တို့၏ လုပ်ရပ်များကို ဘုရားသခင်က စက်ဆုပ်ကာ ကျိန်ဆဲလိမ့်မည်ဖြစ်သည်။ သင်တို့သည် သင်တို့၏ ဖောက်ပြန်ပျက်စီးသော စိတ်သဘောထားများဖြင့် အသက်ရှင်လျှင်၊ သင်တို့ထဲမှ မည်သူကမျှ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်မခံလျှင် ကယ်တင်ခံရလိမ့်မည်မဟုတ်။ ထို့ကြောင့် သမ္မာတရားကို စစ်မှန်ရိုးသားစွာ နားမလည်မီတွင်၊ လူတိုင်းသည် တရားစီရင်ခြင်းနှင့် ပြစ်တင်ဆုံးမခြင်းတစ်ခုခု၊ ရိုက်နှက်ဆုံးမခြင်းနှင့် ပဲ့ပြင်ဆုံးမခြင်းတစ်ခုခု ရင်ဆိုင်ရလိမ့်မည်။ ဤအရာများအားလုံးမှာ လူတို့အား သမ္မာတရားကို ရရှိနိုင်စေပြီး ၎င်းတို့၏ ဖောက်ပြန်ပျက်စီးသော စိတ်သဘောထားများကို စွန့်ပယ်နိုင်စေရန် ရည်ရွယ်ချက်အတွက် ဖြစ်သည်။

သင်တို့သည် ဘုရားသခင်ကို ယုံကြည်ခြင်းနှင့်ဆိုင်သည့် အယူဝါဒအချို့ကို နားလည်သော်လည်း၊ အရာရာကို တွေ့ကြုံရသည့်အခါ မကြာခဏ စိတ်ရှုတ်ထွေးကြသည်။ သင်သည် ဘာလုပ်ရမှန်းမသိဖြစ်ကာ ဘုရားသခင်၏ အလိုတော်ကို သဘောမပေါက်နိုင်ပေ။ မည်သည့်အရာ လက်တွေ့လုပ်ဆောင်ရမည်ကို သင် မသိသကဲ့သို့ မည်သည့် စိုးရိမ်ခြင်းပမာဏကမျှ ဖြေရှင်းချက်တစ်ခု မပေးချေ။ မိတ်သဟာယတစ်ခု သင် ကြိုးစားလိုသော်လည်း ပြဿနာက မည်သည့်အရာဖြစ်သည်ကို သင် မသိ၊ ဘုရားနှုတ်ကပတ်တော်၌ အခြေများ ရှာချင်သော်လည်း၊ သူ၏ နှုတ်ကပတ်တော်က အကန့်အသတ်မဲ့ဖြစ်ပြီး၊ သင့်မှာ ရည်မှန်းချက်များမရှိပေ။ မကြာခဏ ဤသို့ဖြစ်သည် မဟုတ်လော။ ဤသည်မှာ ယုံကြည်သူသစ်များက အရာခပ်သိမ်းတွင် သမ္မာတရားအား မည်သို့ ရှာဖွေရမည်ကို မသိသည့် လက္ခဏာတစ်ခု ဖြစ်သည်။ ထို့ကြောင့် စုဝေးပွဲများတွင် သင်တို့ မေးကြသည့် မေးခွန်းအများစုမှာ သင်တို့ မိတ်သဟာယနှင့်ဆိုင်သည့် စကားအများစုဖြစ်သည်နှင့်အမျှ သမ္မာတရားနှင့် ဆက်စပ်ခြင်းမရှိပေ။ ဤအရာက လူအများစုအနေဖြင့် လက်တွေ့ဘဝတွင် သမ္မာတရားအား မည်သို့ လက်တွေ့လုပ်ဆောင်ရမည်ကို မသိကြသကဲ့သို့ သမ္မာတရားကို စည်းမျဉ်းတစ်ခုနှင့် မိမိတို့၏ လက်တွေ့လုပ်ဆောင်မှုအတွက် ရည်မှန်းချက်တစ်ခုအဖြစ် ရှိကြရန်မဆိုထားနှင့် ၎င်းတို့အပေါ် အဖြစ်အပျက်များ ဖြစ်ပျက်သည့်အခါ သမ္မာတရားအား မည်သို့ ရှာဖွေရမည်ကို မသိကြကြောင်း ပြသပေသည်။ ဤသည်မှာ လူတိုင်းအတွက် အခက်အခဲတစ်ခု ဖြစ်သလော။ သင်သည် သမ္မာတရား၏ စည်းမျဉ်းကို သဘောပေါက်ပြီး၊ သင့်အပေါ် ကျရောက်သည့် အဖြစ်အပျက်များတွင် ထိုသမ္မာတရား၏ အနှစ်သာရကို နားလည်ခဲ့ပြီးဖြစ်လျှင်၊ မကြာခဏဆိုသလို သင် စိတ်ရှုတ်ထွေးဦးမည်လော။ သေချာပေါက် စိတ်ရှုတ်ထွေးမည် မဟုတ်ပေ။ သင့်အနေဖြင့် စိတ်ရှုတ်ထွေးမှုတစ်ခုခု ခံစားရလျှင်ပင်၊ ထိုအရာမှာ သင်၏ သမ္မာတရား သိနားလည်ခြင်းက အလွန် ပေါ့တန်လွန်းခြင်းကြောင်း ဖြစ်လျှင်ဖြစ်၊ မဖြစ်လျှင် သင်၏ သမ္မာတရား အတွေ့အကြုံက အကန့်အသတ်ရှိသောကြောင့် ဖြစ်ပေသည်။ သင်သည် ဘုရားသခင်၏ အလိုတော်ကို နားလည်သဘောပေါက်နိုင်ခြင်းမရှိ၊ သင်၏ ဖောက်ပြန်ပျက်စီးသော စိတ်သဘောထားက ပြေလည်သွားခြင်းမရှိသေးသကဲ့သို့၊ သင်၏ စိတ်နှလုံးတွင် နာကျင်မှုခံစားရသည်။ ယခု သမ္မာတရား လိုက်စားရာတွင် သင်၏ အကြီးမားဆုံး အခက်အခဲမှာ အဘယ်နည်း။ သင့်အတွက် မိတ်သဟာယပြုရန် သမ္မာတရားနှင့်ဆိုင်သည့် အကြောင်းအရာ တင်ပြကြသည့်အခါတွင် သင် စိုးရွံ့ခြင်း ဖြစ်သလော။ စကားများနှင့် အယူဝါဒများကို ဖော်ပြဖို့ စိုးရွံ့ကာ လက်တွေ့အရှိတရားကို မပြောပြနိုင်ခြင်းလော။ သင့်ထံ အမှုအရာများဖြစ်ပျက်သည့်အခါ ဘာလုပ်ရမှန်းမသိဖြစ်လိမ့်မည်ကို သာ၍ စိုးရွံ့ခြင်း ဖြစ်သလော။ (ဟုတ်ပါသည်။) ဤသည်မှာ အဘယ့်ကြောင့်ဆိုသော် သင်တို့၏ စိတ်နှလုံးများတွင် သမ္မာတရား မရှိသောကြောင့် ဖြစ်သည်။ ရှိလျှင်၊ ဤအရာများကို ကိုင်တွယ်ရန် အလွန်ခက်ခဲသည်ဟု သင် မြင်မည်မဟုတ်ပေ။ လူအချို့သည် ၎င်းတို့အပေါ် အဖြစ်အပျက်များ ဖြစ်ပျက်သည့်အခါ မည်သည့်အရာ လုပ်ဆောင်ရမည်ကို မသိကြပေ။ ဘုရားနှုတ်ကပတ်တော်၌ သမ္မာတရား ရှာဖွေရမည်ကို ၎င်းတို့ သိကြသော်လည်း၊ မှန်ကန်သည့် အဖြေက ချက်ချင်း မထွက်ပေ။ ထို့ကြောင့် အလျော့ပေးသည့် လုပ်နည်းကိုင်နည်းတစ်ခုကို ခံယူကြသည်။ ဆိုလိုသည်မှာ၊ ၎င်းတို့သည် ဘုရားနှုတ်ကပတ်တော်၏ အဓိပ္ပာယ်ကို တိုက်ရိုက် နားလည်ခြင်းဖြင့် မိမိတို့ကိုယ်ကို ကျေနပ်ရောင့်ရဲလိုက်ကြပြီး၊ စည်းမျဉ်းများကို လိုက်နာကြလေသည်။ ၎င်းတို့၏ ဆုတောင်းချက်များနှင့် ၎င်းတို့၏ စိတ်နှလုံးများက အေးချမ်းပြီး စိတ်ချလက်ချရှိသည်ဟု ၎င်းတို့ ပြောလျှင်၊ ၎င်းတို့၏ ညီအစ်ကို မောင်နှမများကို မေးမြန်းပြီး မိမိတို့ကိုယ်ပိုင်ရှိသည်ထက် သာ၍ ကြီးမားသည့် ထိုးထွင်းအမြင်တစ်ခုမျှ ထိုသူတို့တွင် မရှိလျှင်၊ ဤသို့လက်တွေ့လုပ်ဆောင်ခြင်းက လုံလောက်သည်ဟု ၎င်းတို့ ခံစားကြသည်။ အမှန်တွင်၊ ထိုသို့သော လက်တွေ့လုပ်ဆောင်မှုသည် သမ္မာတရား စံနှုန်နှင့် အလွန်အလှမ်းဝေး၏၊ သမ္မာတရား စစ်မှန်မှုနှင့် အလွန်အလှမ်းဝေးပြီး ဘုရားသခင်၏ အလိုတော်နှင့် အလွန်အလှမ်းဝေးပေသည်။ ဤသည်မှာ သမ္မာတရားကို လက်တွေ့လုပ်ဆောင်ခြင်း စည်းမျဉ်း မဟုတ်ပေ။ သင်သည် သမ္မာတရားကို လက်တွေ့လုပ်ဆောင်ပြီး နားလည်လိုလျှင် သင်၏ နေ့စဉ်အသက်တာ၌ အမှုအရာများ ဖြစ်ပျက်သောအခါ ရှေးဦးစွာ သမ္မာတရားကို ရှာဖွေရမည်။ တစ်နည်းအားဖြင့် ဆိုရလျှင် အမှုအရာများကို ဘုရားနှုတ်ကပတ်တော်များနှင့် သမ္မာတရားကို အခြေခံပြီး ရှုမြင်ရမည်။ ပြဿနာ၏ အနှစ်သာရက သင့်အတွက် ရှင်းလင်းသွားသောအခါ သမ္မာတရား စည်းမျဉ်းများနှင့်အညီ မည်သို့လက်တွေ့လုပ်ဆောင်ရမည်ကို သင်သိလိမ့်မည်။ သင်သည် အမှုအရာများကို အစဉ်သဖြင့် ဘုရားနှုတ်ကပတ်တော်များနှင့်အညီ ရှုမြင်လျှင် သင့်အနီးတစ်ဝိုက်တွင် ဖြစ်ပျက်သော အရာရာ၌ ဘုရားသခင်၏ လက်တော်၊ ဘုရားသခင်၏ လုပ်ဆောင်မှုများကို မြင်နိုင်လိမ့်မည်။ လူအချို့သည် ၎င်းတို့အနီးတစ်ဝိုက်တွင် မည်သည့်အရာဖြစ်ပျက်နေပါစေ ယင်းက ဘုရားသခင်အပေါ် ၎င်းတို့၏ ယုံကြည်မှုနှင့်၊ သို့မဟုတ် သမ္မာတရားနှင့် လုံးဝ မသက်ဆိုင်ဟု ထင်ကြသည်။ ၎င်းတို့သည် စာတန်၏ အတွေးအခေါ်များနှင့်အညီ တုံ့ပြန်လျက် ၎င်းတို့၏ ကိုယ်ပိုင်လိုအင်ဆန္ဒများနောက်သို့သာ လိုက်ကြသည်။ ၎င်းတို့သည် ဤသို့ဖြင့် သင်ခန်းစာတစ်ခုခုကို သင်ယူနိုင်သလော။ လုံးဝ မသင်ယူနိုင်ပေ။ လူများစွာတို့သည် ဘုရားသခင်ကို ယုံကြည်သည်မှာ ဆယ်နှစ်၊ အနှစ်နှစ်ဆယ် ရှိနေပြီဖြစ်သော်လည်း သမ္မာတရားကို နားလည်မှု၊ သို့မဟုတ် အသက်ဝင်ရောက်မှု မရှိသေးသည်မှာ ဤအကြောင်းရင်းကြောင့် ဖြစ်သည်။ ၎င်းတို့သည် ၎င်းတို့၏နေ့စဉ်အသက်တာတွင် ဘုရားသခင်ကို ထည့်သွင်းရန် မစွမ်းဆောင်နိုင်ကြပေ၊ သို့မဟုတ် ၎င်းတို့၏အနီးတစ်ဝိုက်တွင် ဖြစ်ပျက်သော အရာရာကို ဘုရားနှုတ်ကပတ်တော်များအပေါ် အခြေခံပြီး ချဉ်းကပ်ရန် မစွမ်းဆောင်နိုင်ကြပေ။ ထို့ကြောင့် ၎င်းတို့ထံ တစ်စုံတစ်ခုဖြစ်ပျက်လာသည့် အခါတိုင်းတွင် ၎င်းတို့သည် အရှိအတိုင်း မသိမြင်နိုင်သကဲ့သို့ သမ္မာတရား စည်းမျဉ်းများကို အခြေခံပြီး ကိုင်တွယ်နိုင်ခြင်းလည်း မရှိပေ။ သို့ဖြစ်၍ ထိုသို့သောလူတို့သည် အသက်အတွင်းသို့ မဝင်ရောက်ကြ။ လူအချို့သည် စုဝေးပွဲတွင် ဘုရားနှုတ်ကပတ်တော်များကို ဖတ်သောအခါမှသာ ၎င်းတို့စိတ်ကို အသုံးချသည်။ ဤသို့သောအချိန်မျိုးတွင် ၎င်းတို့သည် အသိပညာအနည်းငယ်ကို ပြောဆိုနိုင်ကြ၏။ သို့သော် ၎င်းတို့သည် လက်တွေ့ဘဝတွင် ၎င်းတို့အပေါ် ဖြစ်ပျက်သည့် မည်သည့်အရာတွင်မျှ ဘုရားနှုတ်ကပတ်တော်များကို လက်တွေ့အကောင်အထည် မဖော်နိုင်ကြသကဲ့သို့ သမ္မာတရားကို မည်သို့ လက်တွေ့လုပ်ဆောင်ရမည်ကိုလည်း မသိကြချေ။ ထို့ကြောင့် ၎င်းတို့၏နေ့စဉ်အသက်တာတွင် ဖြစ်ပျက်သောအရာရာတိုင်းက သမ္မာတရားနှင့် ဆက်စပ်ခြင်းမရှိ၊ ဘုရားနှုတ်ကပတ်တော်များနှင့် ဆက်နွှယ်ခြင်းမရှိဟု ထင်ကြသည်။ ဘုရားသခင်အပေါ် ၎င်းတို့၏ ယုံကြည်ခြင်းတွင် ၎င်းတို့သည် ဘုရားနှုတ်ကပတ်တော်များနှင့် သမ္မာတရားကို အသိပညာနယ်ပယ်တစ်ခုကဲ့သို့ မှတ်ယူကြသည်၊ ၎င်းတို့၏ နေ့စဉ်အသက်တာနှင့် လုံးဝ ကွဲကွာနေပြီး အမှုအရာများအပေါ် ၎င်းတို့၏ ရှုမြင်မှုများ၊ ၎င်းတို့၏ ဘဝပန်းတိုင်များ၊ ၎င်းတို့၏ ဘဝလိုက်စားမှုများမှ လုံးလုံး ကွဲထွက်နေသကဲ့သို့ မှတ်ယူကြသည်။ ဘုရားသခင်အပေါ် ဤသို့ယုံကြည်မှုမျိုးသည် အဘယ်သို့နည်း။ ၎င်းတို့သည် သမ္မာတရားကို နားလည်ပြီး စစ်မှန်မှုသို့ ဝင်ရောက်နိုင်မည်လော။ ဘုရားသခင်ကို ဤသို့ယုံကြည်သောအခါ ၎င်းတို့သည် ဘုရားသခင်၏နောက်လိုက် ဖြစ်သလော။ ၎င်းတို့သည် ဘုရားသခင်၏နောက်လိုက်ဖြစ်ဖို့ မဆိုထားနှင့်၊ ဘုရားသခင်ကို အမှန်တကယ် ယုံကြည်သူများပင် မဟုတ်ပေ။ မိသားစု၊ အိမ်ထောင်ရေး၊ အလုပ်၊ သို့မဟုတ် ၎င်းတို့၏ ရှေ့ရေးအပါအဝင် ၎င်းတို့၏ နေ့စဉ်အသက်တာတွင် ရှိသော ပြဿနာများအားလုံးက သမ္မာတရားနှင့် ဆက်စပ်မှုမရှိဟု ၎င်းတို့မြင်ကြသည်။ ထို့ကြောင့် လူ့နည်းလမ်းများကို အသုံးပြု၍ ဖြေရှင်းဖို့ ကြိုးစားကြ၏။ ဤသို့ တွေ့ကြုံကြလျှင် ၎င်းတို့သည် သမ္မာတရားကို မည်သည့်အခါမျှ ရရှိမည်မဟုတ်၊ လူတို့တွင် ဘုရားသခင်ဖြစ်မြောက်လိုသောအရာ၊ ဘုရားသခင်ရရှိလိုသော သက်ရောက်မှုက မည်သည့်အရာဖြစ်သည်ကို ဘယ်သောအခါမျှ နားလည်နိုင်မည် မဟုတ်။ ဘုရားသခင်သည် လူတို့ကို ကယ်တင်ရန်၊ ၎င်းတို့၏ ဖောက်ပြန်ပျက်စီးသော စိတ်သဘောထားများကို သန့်စင်စေပြီး ပြောင်းလဲစေရန် သမ္မာတရားကို ဖော်ပြသည်။ သို့သော် ၎င်းတို့သည် သမ္မာတရားကို လက်ခံပြီး လိုက်စားမှသာ ၎င်းတို့၏ ကိုယ်ပိုင်ဖောက်ပြန်ပျက်စီးသည့် စိတ်သဘောထားများအား ဖြေရှင်းနိုင်မည်ကို သတိမပြုမိကြပေ။ ၎င်းတို့၏ နေ့စဉ်အသက်တာတွင် ဘုရားနှုတ်ကပတ်တော်ကို ကြုံတွေ့ပြီး လက်တွေ့လုပ်ဆောင်မှသာ သမ္မာတရားအား ရရှိနိုင်သည်ကို သတိမပြုမိကြပေ။ ထိုသို့သောလူများသည် ထုံထိုင်းပြီး မသိနားမလည်သူများ မဟုတ်သလော။ ၎င်းတို့သည် အမိုက်မဲဆုံး၊ အဓိပ္ပာယ်မရှိဆုံး ဖြစ်သည်မဟုတ်လော။ လူအချို့သည် ဘုရားသခင်အပေါ် ၎င်းတို့၏ ယုံကြည်ခြင်းတွင် သမ္မာတရားကို မည်သည့်အခါမျှ မလိုက်စားခဲ့ပေ။ ဘုရားသခင်အပေါ် ယုံကြည်ခြင်းသည် စုဝေးပွဲသို့ သွားခြင်း၊ ဆုတောင်းခြင်း၊ ဓမ္မသီချင်းများ သီဆိုခြင်း၊ ဘုရားနှုတ်ကပတ်တော်များ ဖတ်ရှုခြင်းတို့ဖြစ်သည်ဟု ၎င်းတို့က ထင်ကြ၏။ ၎င်းတို့က ဘာသာရေးအခမ်းအနားကို အလေးထားကြပြီး ဘုရားနှုတ်ကပတ်တော်များကို လက်တွေ့မလုပ်ဆောင်ကြ၊ သို့မဟုတ် တွေ့ကြုံခြင်း မရှိကြ။ ဤသည်မှာ ဘာသာရေးသမားများက ဘုရားသခင်ကို ယုံကြည်ပုံဖြစ်သည်။ လူတို့က ဘုရားသခင်အပေါ် ယုံကြည်ခြင်းကဲ့သို့ အင်မတန် အရေးကြီးလှသောအရာကို ဘာသာရေးခံယူချက်အဖြစ် မှတ်ယူသောအခါ ၎င်းတို့သည် မယုံကြည်သူများနှင့် သက်ဆိုင်ကြသည် မဟုတ်လော။ ၎င်းတို့သည် မယုံကြည်သူများ ဖြစ်ကြသည် မဟုတ်လော။ သမ္မာတရားကို လိုက်စားရာ၌ ဖြစ်စဉ်များစွာကို တွေ့ကြုံရန် လိုအပ်သည်။ ယင်းနှင့် ပတ်သက်၍ ရိုးရှင်းသည့်ဘက်ရှိသလို ရှုပ်ထွေးသည့် ဘက်လည်း ရှိသည်။ ရိုးရှင်းစွာ ပြောရလျှင်၊ ကျွန်ုပ်တို့ အနီးအနားတွင် ဖြစ်ပျက်သည့် အရာအားလုံး၌ သမ္မာတရားကို ကျွန်ုပ်တို့ ရှာဖွေသင့်ပြီး ဘုရားသခင်၏ နှုတ်ကပတ်တော်များကို လက်တွေ့လုပ်ဆောင်ကာ တွေ့ကြုံသင့်သည်။ ဤအရာကို စတင်လုပ်ဆောင်သည်နှင့်တစ်ပြိုင်နက်၊ ဘုရားသခင်ကို သင်၏ ယုံကြည်မှုတွင် သမ္မာတရား မည်မျှ သင် ရရှိပြီး လိုက်စားရန်လိုသည်ဆိုသည်နှင့် သမ္မာတရားက အလွန် စစ်မှန်ကာ သမ္မာတရားက အသက်ဖြစ်သည်ကို သာ၍ သာ၍ သင် မြင်လိမ့်မည်။ သမ္မာတရားကို အသက်အဖြစ် လူသားမျိုးနွယ်ရရှိနိုင်ရန်အတွက် ဘုရားသခင်သည် လူသားမျိုးနွယ်ကို ကယ်တင်၏။ ဖန်ဆင်းခံ လူသားမျိုးနွယ် အားလုံးသည် သမ္မာတရားကို အသက်အဖြစ် လက်ခံသင့်သည်။ တာဝန်များကို ထမ်းဆောင်သောသူများ၊ ခေါင်းဆောင်နှင့် အမှုဆောင်များ၊ ဘုရားသခင်ကို အစေခံသူများသာ လက်ခံသင့်သည်မဟုတ်ပေ။ ဘုရားနှုတ်ကပတ်တော်များသည် လူသားမျိုးနွယ်အားလုံးကို ရည်ညွှန်းသည်။ ဘုရားသခင်သည် လူသားမျိုးနွယ်အားလုံးကို စကားပြော၏။ ထို့ကြောင့် ဖန်ဆင်းခံအားလုံးနှင့် လူသားမျိုးနွယ်အားလုံးသည် ဘုရားနှုတ်ကပတ်တော်များနှင့် သမ္မာတရားကို လက်ခံသင့်သည်။ အရာရာတွင် သမ္မာတရားကို ရှာသင့်သည်။ ထို့နောက် သမ္မာတရားကို လက်တွေ့လုပ်ဆောင်ပြီး နာခံနိုင်ရန်အတွက် သမ္မာတရားစည်းမျဉ်းများနှင့်အညီ လက်တွေ့လုပ်ဆောင်သင့်သည်။ ခေါင်းဆောင်များနှင့် အမှုဆောင်များကသာ သမ္မာတရားကို လက်တွေ့လုပ်ဆောင်ဖို့ လိုအပ်သည်ဆိုလျင် ဤသည်မှာ ဘုရားသခင်၏အလိုတော်နှင့် လုံးဝ ဆန့်ကျင်လိမ့်မည်။ အဘယ်ကြောင့်ဆိုသော် ဘုရားသခင်ဖော်ပြသော သမ္မာတရားသည် လူသားမျိုးနွယ်တစ်ခုလုံးအတွက် ဖြစ်သောကြောင့် ဖြစ်သည်။ လူသားမျိုးနွယ်ကို ကယ်တင်ရန် ရည်ရွယ်ချက်ဖြင့် ဖော်ပြခြင်း ဖြစ်သောကြောင့် ဖြစ်သည်။ လူအနည်းငယ်ကို ကယ်တင်ရန်အတွက်သာ မဟုတ်ပေ။ ဤသို့ဖြစ်နေလျှင် ဘုရားသခင်ဖော်ပြသော နှုတ်ကပတ်တော်များသည် အဓိပ္ပာယ်သိပ်ရှိလိမ့်မည် မဟုတ်ချေ။ ယခု သင်တို့သည် သမ္မာတရားကို လိုက်စားဖို့ လမ်းကြောင်းတစ်ခု ရှိကြသလော။ သမ္မာတရားကို လိုက်စားနေချိန်တွင် ပထမဦးစွာ လက်တွေ့လုပ်ဆောင်ရမည့်အရာမှာ မည်သည့်အရာဖြစ်သနည်း။ အခြားအရာအားလုံးမတိုင်မီ၊ သင်သည် ဘုရားသခင်၏ နှုတ်ကပတ်တော်များကို စားသောက်ရင်းနှင့် တရားဒေသနာများနှင့် မိတ်သဟာယများကို နားထောင်ရင်း သာ၍ အချိန် ကုန်ဆုံးရမည်။ ပြဿနာတစ်ခုကို သင် ကြုံရသည့်အခါ၊ သာ၍ ဆုတောင်းကာ ရှာဖွေလော့။ သာ၍ များသော သမ္မာတရားများဖြင့် သင်တို့သည် မိမိကိုယ်ကိုယ် ပြင်ဆင်ပြီး လျင်မြန်စွာ ကြီးထွားတိုးတက်ကာ ဝိညာဉ်ရင့်ကျက်မှုကို ပိုင်ဆိုင်သည့်အခါ၊ သင်သည် တာဝန်တစ်ခုကို ထမ်းဆောင်နိုင်လိမ့်မည်၊ အလုပ်အနည်းငယ်ကို ဆောင်ရွက်နိုင်လိမ့်မည်ဖြစ်ပြီး ထိုသို့ဖြင့် စမ်းသပ်မှုအချို့နှင့် စုံစမ်းစစ်ဆေးခြင်းတို့ကို ဖြတ်သန်းနိုင်လိမ့်မည် ဖြစ်သည်။ ထိုအချိန်တွင်၊ သင်သည် သမ္မာတရားအချို့ကို အမှန်တကယ် နားလည်ပြီးဖြစ်ကာ ရရှိပြီးဖြစ်သည်ဟု ခံစားရလိမ့်မည်ဖြစ်ပြီး၊ ဘုရားသခင်ပြောဆိုသော နှုတ်ကပတ်တော်အားလုံးက သမ္မာတရားဖြစ်သည်၊ ဖောက်ပြန်ပျက်စီးသော လူသားမျိုးနွယ်ကို ကယ်တင်ခြင်းအတွက် အလိုအပ်ဆုံး သမ္မာတရားများဖြစ်သည်၊ အတုမရှိသော ဖန်ဆင်းရှင်က ပေးအပ်သည့် အသက်၏ သမ္မာတရားဖြစ်သည်ဟု ခံစားရလိမ့်မည်။ ယခု၊ သင်တို့တွင် အတွေ့အကြုံမရှိကြ။ သင်တို့၏ စိတ်နှလုံးတွင် တောင့်တမှု အနည်းငယ်သာ ရှိသည်။ ဘုရားနှုတ်ကပတ်တော်များက နက်နဲပြီး၊ သင် မရယူနိုင်သည့် အရာများစွာနှင့် သင် နားလည်သဘောပေါက်နိုင်ခြင်းမရှိသည့် သမ္မာတရားများစွာ ပါရှိသည်ဟု သင် ခံစားရသည်။ အချို့သော အရာများ၏ အနှစ်သာရက မရှင်းလင်းသေးသကဲ့သို့ သမ္မာတရားအပေါ် သင်၏ သိနားလည်ခြင်းက အလွန် အပေါ်ယံဆန်လွန်းသည်ဟု သင် ခံစားရသည်။ ထိုအရာမှာ သင်၏ စိတ်နှလုံးတွင် ထိုသို့သော တောင့်တမှုနှင့် ထိုသို့သော အားအင်ရှိသော်လည်း၊ သမ္မာတရားကို သင် ရရှိနိင်ခြင်း ရှိမရှိက အနာဂတ်တွင် ထိုသမ္မာတရားကို သင်တို့ လက်တွေ့လုပ်ဆောင်ကာ လိုက်စားပုံပေါ်တွင် မူတည်ခြင်းသာ ဖြစ်သည်။

နောက်ဆုံးသော ကာလ၏ တရားစီရင်ခြင်း အမှုတော်တွင်၊ ဘုရားသခင်က ရိုးရှင်းသည့် သမ္မာတရားအချို့ကိုသာ ဖော်ပြလျှင်၊ တရားစီရင်ခြင်း၊ ထုတ်ဖော်ပြခြင်းတို့နှင့် အလွန်များစွာ ဆက်စပ်မှုရှိရန် မဆိုထားနှင့်၊ မည်သည့်အရာကမျှ အလွန် နက်နဲခြင်းမရှိဘဲ၊ လူတို့ လက်ခံနိုင်သည့်အရာနှင့် ၎င်းတို့၏ စိတ်များက လက်ခံရရှိနိုင်သည့်အရာအတိုင်း အနည်းငယ်သော နှုတ်ကပတ်တော်သာဖြစ်လျှင်၊ ကတိတော်နှင့်လည်းကောင်း ကောင်းချီးနှင့်လည်းကောင်း သက်ဆိုင်သည့် စကားအချို့ သို့မဟုတ် တိုက်တွန်းအားပေးသည့် စကားအချို့သာဖြစ်လျှင် စိတ်ကူးကြည့်လော့။ ဤစကားများကို လူတို့ လက်ခံလျှင်ပင်၊ ကယ်တင်ခြင်း ရရှိနိုင်သလော။ ဥပမာတစ်ခု ကြည့်လော့။ ဘုရားသခင်က၊ “သင်တို့အားလုံး၌ရှိသည့် ဖောက်ပြန်ပျက်စီးခြင်းက အလွန်နက်ရှိုင်းသည်။ သင်တို့အားလုံးသည် သမ္မာတရားမရှိကြသကဲ့သို့ သင်တို့အားလုံးက ငါ့ကို သစ္စာမရှိကြပေ။ သင်တို့၏ သဘာဝ အနှစ်သာရက စာတန်၏ သဘာဝ ဖြစ်လာပြီဖြစ်သည်။ သင်တို့သည် ရှင်သန်နေသည့် စာတန်များဖြစ်လာကြလေပြီ။ သင်တို့သည် ငါ့ကို ရန်လိုကြပြီး သမ္မာတရားအတွက် ချစ်ခြင်းမေတ္တာ မရှိပေ”ဟု ရိုးရှင်းစွာ ပြောသည်ဆိုပါစို့။ ထို့နောက် သူက လူတို့ကို၊ “သွားပြီး အဖြေရှာကြလော့”ဟု ပြောပြီးနောက် ချက်ချင်း၊ “သမ္မာတရားကို ချစ်သောသူသည် မင်္ဂလာရှိ၏။ ငါ့ကို သစ္စာရှိသောသူသည် ငါ၏ အလိုတော်ကို ဖြည့်ဆည်းနိုင်လိမ့်မည်၊ အဆုံးတိုင် လမ်းခရီးကို လျှောက်လှမ်းက ငါ၏ ကတိတော်ကို ရရှိလိမ့်မည်”ဟု ပြောလေသည်။ ဘုရားသခင်က လူတို့အား ဤအရာကို ရိုးရှင်းစွာ ပြောဆိုလျှင် ၎င်းတို့၏ စိတ်နှလုံးများက နိုးကြွလာကြမည်လော။ သမ္မာတရားအတွက် ၎င်းတို့ ကြိုးပမ်းကြမည်လော။ လူတို့ မည်သို့ ခံစားကြမည်နည်း။ “ဘုရားနှုတ်ကပတ်တော်များအားလုံးကို ကျွန်ုပ်တို့ ဖတ်ရှုပြီးဖြစ်ကာ ကျွန်ုပ်တို့အားလုံးတွင် ဖောက်ပြန်ပျက်စီးသော စိတ်သဘောထားများ ရှိကြသော်လည်း၊ ကျွန်ုပ်တို့သည် ဆိုးယုတ်သော လူများမဟုတ်သကဲ့သို့ ဘုရားသခင်ကို အတိုက်အခံလုပ်မည် မဟုတ်ပါ။ ကျွန်ုပ်တို့တွင် ပုန်ကန်တတ်သော စိတ်သဘောထားများ ရှိကြခြင်းသာဖြစ်သည်၊ ကိုယ်ကျင့်တရားအရ အတော်အတန် ဖောက်ပြန်ပျက်စီးကာ နိမ့်ကျသည့် အကျင့်စရိုက်ရှိပြီး၊ လောကီ ရေပန်းစားမှုများနောက်လိုက်ရန် နှစ်သက်ကြခြင်းသာ ဖြစ်သည်။ ယခု သမ္မာတရားအချို့ကို ကျွန်ုပ်တို့ နားလည်ပြီး၊ မိမိတို့ကိုယ်ကို သုံးသပ်ကာ သိရှိနိုင်ကြသဖြင့်၊ ဤဖောက်ပြန်ပျက်စီးသော အရာများကို ကျွန်ုပ်တို့ ဧကန်မုချ ဖယ်ရှားနိုင်သည်”ဟူ၍ ဖြစ်သည်။ ဤအခြေအနေတွင် လူများစွာ ရှိသလော။ ဘုရားသခင်ကို ယုံကြည်မှု အယူဝါဒအား သိနားလည်ခြင်းသည် သမ္မာတရားကို သိနားလည်ခြင်းဖြစ်သည်ဟု ၎င်းတို့ တွေးထင်ကြပြီး၊ ဤသည်မှာ အလွန် အန္တရာယ်များပေသည်။ စကားများနှင့် အယူဝါဒများကို ဂုဏ်ယူဝင့်ကြွားစွာ ဟောပြောသည့်သူတို့သည် စမ်းသပ်မှုတစ်ခု ၎င်းတို့အပေါ် ကျရောက်သည်နှင့် ချက်ချင်း လဲကျကာ ထုတ်ဖော်ပြခြင်းခံရသည်။ သမ္မာတရား လိုက်စားခြင်းနှင့် တရားစီရင်ခြင်းကိုလည်းကောင်း၊ ပြစ်တင်ဆုံးမမှုကိုလည်းကောင်း လက်ခံခြင်း မရှိဘဲနှင့် ဖောက်ပြန်ပျက်စီးသော စိတ်သဘောထားတစ်ခုကို ခါချ၍ရနိုင်သလော။ မဖြစ်နိုင်ပေ။ ယခု အချိန် ကုန်ဆုံးနေပြီး၊ သမ္မာတရား ရရှိခြင်းအတွက် ဆင်းရဲဒုက္ခခံပြီး အဖိုးအခမပေးနိုင်လျှင်၊ အယူအဆများနှင့် စိတ်ကူးများပေါ် အခြေခံ၍ ဘုရားသခင်ကို ယုံကြည်ခြင်းအားဖြင့် သင်၏ အချိန်ကို ဖြုန်းတီးရန် လွယ်ကူလိမ့်မည်ကို သင်တို့ ရှင်းလင်းနေသင့်သည်။ ထို့နောက် ကြီးမားသည့် အတိဒုက္ခရောက်လာသည့်အခါ၊ သင် အလိုရှိလျှင်ပင် သမ္မာတရားလိုက်စားရန် အချိန်ရှိလိမ့်မည် မဟုတ်သကဲ့သို့၊ သင်၏ ကယ်တင်ခြင်း အခွင့်အရေးကို လုံးဝ ဆုံးရှုံးပြီး ဖြစ်လိမ့်မည်ဖြစ်သည်။ ယခုတွင် သင်တို့သည် ဘုရားသခင်ကို ယုံကြည်သော်လည်း၊ ဘုရားသခင်၏ အလိုတော်ကို နားမလည်ကြပေ။ ဘုရားသခင်က သမ္မာတရားကို အဘယ်ကြောင့် ဖော်ပြပြီး တရားစီရင်ခြင်းအမှု ပြုသည်ကို သင်တို့ အမှန်တကယ် သိကြသလော။ ဘုရားသခင် ဖော်ပြသည့် စကားလုံးတိုင်း၊ အကြောင်းအရာတိုင်း၊ သမ္မာတရားတိုင်းသည် အရေးပါမှုရှိပြီး သင့်အတွက် အလွန့်အလွန် အကျိုးရှိပေသည်။ ယနေ့တွင် ထိုအရာကို သင် မြင်နိုင်သည်ဖြစ်စေ၊ မမြင်နိုင်သည်ဖြစ်စေ၊ တွေ့ကြုံနိုင်သည်ဖြစ်စေ၊ မတွေ့ကြုံနိုင်သည်ဖြစ်စေ၊ ခံစားနိုင်သည်ဖြစ်စေ၊ မခံစားနိုင်သည်ဖြစ်စေ၊ ပြီးလျှင် ယခု သင် မည်မျှ အမှန်တကယ် ရရှိပြီးသည်ဖြစ်စေ၊ သင်၏ အတွေ့အကြုံ သုံးနှစ်၊ သို့မဟုတ် ငါးနှစ်ပြီးသည့်နောက်တွင်၊ ယနေ့ ဘုရားနှုတ်ကပတ်တော်များက မှန်ကန်ကြောင်းနှင့် ဤစကားများကို ဖော်ပြရန်မှာ ဘုရားသခင်အတွက် မည်မျှ အရေးကြီးကြောင်းကို သင်တို့ ခံစားရလိမ့်မည်။ ဘုရားသခင်က ကျေးဇူးတော်ခေတ်တွင် လုပ်ဆောင်ခဲ့သည့်အတိုင်း လူကို “သူ၏ ရင်ခွင်ထဲက သိုးလေး”နှင့် သွားရှာရန် အခြား ကိုးဆယ့်ကိုးကောင်ကို သူ စွန့်ပစ်မည်ဖြစ်သော ပျောက်သောသိုးတစ်ကောင်ဟု ခေါ်လျက်၊ ဂရုစိုက်ယုယနေဆဲဖြစ်ပါက၊ လူက၊ “ဘုရားသခင်၏ ကရုဏာနှင့် သနားကြင်နာခြင်းတို့သည် အလွန် ကြီးမြတ်သည်။ လူအတွက် ဘုရားသခင်၏ မေတ္တာသည် အလွန် နက်ရှိုင်းသည်”ဟု တွေးပေမည်။ လူက ဘုရားသခင်ကို ဤသို့ အမြဲတွေးကာ ကြည့်လျှင်၊ ဘုရားသခင်ကို သူ အမှန်တကယ် ရှာဖွေလိမ့်မည်မဟုတ်။ ဘုရားသခင်ထံ သူ လာလိမ့်မည်မဟုတ်၊ ဘုရားသခင်ကို ကျိုးနွံနာခံလိမ့်မည်မဟုတ်သကဲ့သို့၊ ဘုရားသခင်ကို ကြောက်ရွံ့သည့် စိတ်နှလုံး ရှိလိမ့်မည် မဟုတ်ပေ။ ဘုရားသခင်အပေါ် စစ်မှန်သည့် သိနားလည်မှုမရှိဘဲနှင့်၊ လူ၏ ဖောက်ပြန်ပျက်စီးသော စိတ်သဘောထားသည် ကွာကျလိမ့်မည် မဟုတ်ပေ။ သူသည် ဘုရားသခင်နှင့် သမ္မာတရားကို မထီမဲ့မြင်ပြုခြင်းဖြင့် သဘောထားလိမ့်မည်ဖြစ်ပြီး၊ နတ်ဆိုးများနှင့် စာတန်က လုပ်ဆောင်သည့်အတိုင်း ဘုရားသခင်ကို အတိုက်အခံလုပ်လိမ့်မည်။ ထိုသို့ဖြစ်လျှင်၊ လူသည် မည်သည့်အရာက သမ္မာတရားဖြစ်သည်ကို မည်သည့်အခါတွင်မျှ နားလည်လိမ့်မည်မဟုတ်၊ ဘုရားသခင်ကို ယုံကြည်ကာ နောက်လိုက်ခြင်းက မည်သည့်အရာဖြစ်သည်ဆိုသည်နှင့် သမ္မာတရားကို ရှာဖွေကာ ရရှိခြင်းက မည်သည့်အရာဖြစ်သည်တို့ကို မည်သည့်အခါတွင်မျှ အမှန်တကယ် နားလည်လိမ့်မည် မဟုတ်ပေ။ ဤသည်မှာ အမှန်ဖြစ်သည်။ ဘုရားသခင်က ဤစကားများကို မဖော်ပြလျှင်၊ သူက တစ်ယောက်မကျန် လူတိုင်းကို ရိုက်နှက်ဆုံးမပြီး တရားမစီရင်ခဲ့ဘဲ ထိုသို့သော ပြင်းထန်သည့် စကားများဖြင့် လူတိုင်းကို မဆက်ဆံခဲ့လျှင်၊ ဘုရားသခင်ကို ယုံကြည်ခြင်းမှာ ၎င်းတို့အနေဖြင့် သမ္မာတရားကို ရရှိပြီးဖြစ်သည်ကို ဆိုလိုကြောင်း၊ ဘုရားသခင်ကို ယုံကြည်ခြင်းမှာ နောက်ပိုင်းတွင် ချီဆောင်ခံရရန်၊ နိုင်ငံတော်ထဲသို့ ဝင်ရောက်ပြီး၊ ရှင်ဘုရင်ကဲ့သို့ တန်ခိုးအာဏာ စွဲကိုင်ရန်ဖြစ်ကြောင်း လူတို့က တွေးထင်ကြပေမည်။ လူအချို့က၊ “ကျွန်ုပ်ကဲ့သို့သော လူတစ်ဦးသည် တပ်မှူးတစ်ယောက်နီးပါး ဖြစ်နိုင်မည်”ဟု ပြောကြသည်။ အခြားသူတို့က၊ “ကျွန်ုပ် များစွာ မတောင်းဆိုပါ။ နိုင်ငံတော်တွင်၊ ဂိတ်များကိုပင် ကျွန်ုပ် စောင့်ကြပ်နိုင်သည် သို့မဟုတ် လမ်းများကိုပင် လှည်းကျင်းနိုင်ပါသည်”ဟု ပြောကြသည်။ ဤသည်မှာ ဘုရားသခင်ကို ယုံကြည်သည့်လူတိုင်း၏ မူလ ရည်ရွယ်ချက်၊ စံနှင့် စိတ်ဆန္ဒဖြစ်သည်။ ဘုရားသခင်သည် လူ၏ အယူအဆများနှင့် စိတ်ကူးများ၊ သူ၏ လွန်ကဲသော စိတ်ဆန္ဒများနှင့် သူ၏ ဖောက်ပြန်ပျက်စီးသော စိတ်သဘောထားများကို အကုန်အစင် ထုတ်ဖော်ပြသည့် အရာများစွာကို ပြောဆိုပြီးဖြစ်သည်။ လူတွေးထင်သည့် မည်သည့်အရာမျှသည် သမ္မာတရားနှင့် မကိုက်ညီ သို့မဟုတ် ဘုရားသခင်နှင့် သဟဇာတမဖြစ်သကဲ့သို့ လူက မျှော်လင့်သည့် သို့မဟုတ် စွမ်းဆောင်ရရှိရန် အထူးအလိုရှိသည့် မည်သည့်အရာမျှသည် ဘုရားသခင်၏ အလိုတော်နှင့် မကိုက်ညီပေ။ အားလုံးက ဘုရားသခင်နှင့် လုံးဝ ဆန့်ကျင်ကွဲလွဲပေသည်။ လူတို့က ဘုရားသခင်ကို ယုံကြည်ကြသည့်အခါ၊ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်း နှုတ်ကပတ်တော်များဖြင့်၊ လူ၏ သဘာဝ အနှစ်သာရကို ထုတ်ဖော်ပြသည့် နှုတ်ကပတ်တော်များဖြင့်၊လူ၏ အယူအဆများနှင့် မကိုက်ညီသည့် နှုတ်ကပတ်တော်များနှင့် လူ၏ စိတ်ကူးများနှင့် မကိုက်ညီသည့် ဘုရားသခင်၏ အမှုပြုခြင်း နည်းလမ်းဖြင့် ထိပ်တိုက်တွေ့ရသည်။ ဘုရားနှုတ်ကပတ်တော်များက သမ္မာတရားဖြစ်ကြောင်း လူများစွာတို့က အသိအမှတ်ပြုကြပြီး၊ ဘုရားသခင်၏ အမှုတော်နှင့် ပူးပေါင်းဆောင်ရွက်ကာ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို လက်ခံရန် လိုလားနေကြသော်လည်း၊ ဘုရားသခင်၏ သတ်မှတ်ချက်များကို ပြည့်မီရန် ၎င်းတို့အတွက် အလွန်ခက်ခဲလေသည်။ သမ္မာတရား လိုက်စားခြင်းနှင့် ပတ်သက်လာသည့်အခါ၊ လူများစွာတို့သည် နုံးချည့်လာကြပြီး၊ သမ္မာတရားအကြောင်း မိတ်သဟာယပြုခြင်းနှင့် ပတ်သက်လာသည့်အခါ၊ ၎င်းတို့ တစ်မှေးအိပ်ကာ နားထောင်ရန် အရေးမစိုက်ကြပေ။ သို့သော် နက်နဲမှုများ၊ ကောင်းချီးများနှင့် ကတိတော်များနှင့် ပတ်သက်လာသည့်အခါ၊ ၎င်းတို့ သက်ဝင်လှုပ်ရှားလာကြသည်။ မည်သည့်အရာ ဖြစ်နေသနည်း။ ၎င်းတို့၏ စိတ်နှလုံးနက်နက်တွင်၊ လူတို့က သမ္မာတရားကို မချစ်ကြပေ။ ထိုသမ္မာတရားကို လိုက်စားခြင်းက ဒုက္ခပေးလွန်းသည်၊ ခက်ခဲပင်ပန်းလွန်းသည်၊ နာကျင်ဖွယ်ရာဖြစ်လွန်းပြီး ပေးရမည့် အဖိုးအခ မြင့်လွန်းသည်ဟု ၎င်းတို့ မြင်ကြသည်။ သမ္မာတရား လိုက်စားခြင်းက အခြေခံကျောင်းသုံးဖတ်စာအုပ် သို့မဟုတ် ကလေးထိန်း တေးကဗျာတစ်ပုဒ်ကို ဖတ်ရှုခြင်းလောက် ရိုးရှင်းမည်ဆိုလျှင်၊ လူအချို့က အနည်းငယ် စိတ်ဝင်စားလိမ့်မည်ဖြစ်သည်။ အဘယ့်ကြောင့်ဆိုသော် ထိုအရာက ရိုးရှင်း၊ လွယ်ကူမည်ဖြစ်ပြီး၊ ပေးဆပ်ရမည့် အဖိုးအခ သို့မဟုတ် အသုံးပြုရမည့် အားအင်များစွာ တောင်းဆိုမည်မဟုတ်သောကြောင့် ဖြစ်သည်။ ယခုတွင်၊ ထိုအရာက အတော်လေး ဆန့်ကျင်ဖက်ဖြစ်နေသည်။ သမ္မာတရား လိုက်စားခြင်းက ထိုမျှ လွယ်ကူခြင်းမရှိသကဲ့သို့ ရိုးရှင်းခြင်းလည်း မရှိပေ။ လူတို့အနေဖြင့် ဘုရားနှုတ်ကပတ်တော်များကို ဖတ်ရှုပြီး နားလည်ရန် လုံလောက်သည့် အစွမ်းအစရှိလျှင်၊ သမ္မာတရား စစ်မှန်မှုထဲသို့ အလိုအလျောက် ဝင်ရောက်သွားကြသည် မဟုတ်ပေ။ စကားများနှင့် အယူဝါဒများကို နားလည်ခြင်းသည် သမ္မာတရား စစ်မှန်မှုထဲသို့ ဝင်ရောက်ခြင်းဟု မဆိုလိုပေ။ လူအချို့သည် ၎င်းတို့၏ ဘုရားသခင်ကို ယုံကြည်မှုတွင် အလွန် လှုပ်ရှားတက်ကြွကြသည်မှာ စုဝေးပွဲများနှင့် တရားဒေသနာများကိုလည်းကောင်း၊ မိတ်သဟာယများကိုလည်းကောင်း နားထောင်နေချိန်တွင် မှတ်စုများကို ယူကြလေသည်။ သို့သော် အတန်ကြာပြီးနောက်တွင်၊ ထိုအရာကို ၎င်းတို့ သေချာတွေးပြီး ထိုအရာမှ မည်သည့်အရာမျှ မရရှိကြပေ။ ၎င်းတို့က အားလုံးကို မေ့လိုက်ပြီး မှတ်မိလိုလျှင်ပင် မည်သည့်အရာမျှ မမှတ်မိကြ။ ထို့ကြောင့် သမ္မာတရားကို ရရှိခြင်းက လွယ်ကူခြင်းမရှိဟု ၎င်းတို့ ခံစားကြပြီး၊ ထိုအခါတွင်မှ ဘုရားသခင်ကို ယုံကြည်ခြင်းက ရိုးရှင်းသည့် ကိစ္စမဟုတ်ကြောင်းကို နားလည်ကြသည်။ အခြားလူတို့က ၎င်းတို့အနေဖြင့် စုဝေးပွဲများပြီးသည့်နောက်တွင် များစွာ ရရှိကာ နားလည်ပြီးဖြစ်သည်ဟု ခံစားကြသော်လည်း၊ တစ်ညတာအိပ်စက်ပြီးနောက်တွင် ထိုအကြောင်းအားလုံးကို မေ့လျော့သွားကြပြီးဖြစ်သည်။ ယင်းမှာ စုဝေးပွဲမရှိခြင်းထက် များစွာ မကွဲပြားပေ။ အခြားသူတို့က ဘုရားနှုတ်ကပတ်တော်ကို ဖတ်ရှုပြီးနောက်တွင် ဉာဏ်အလင်းရကာ အလင်းပေးခံရသည်ဟု ခံစားရဆဲဖြစ်သည်။ ၎င်းတို့သည် မိမိတို့ကိုယ်ကို အလွန်အားရကျေနပ်ကြသော်လည်း၊ မယုံကြည်သူများနှင့် အတန်ငယ် စကားပြောပြီးနောက်တွင်၊ ၎င်းတို့၏ စိတ်များက ရင်သပ်ရှုမောဖြစ်ကာ အိမ်သို့သွားပြီး ဘုရားသခင်ထံ ဆုတောင်းကြသည့်အခါ သူ့ကို ၎င်းတို့ အာရုံမခံနိုင်တော့ပေ။ သမ္မာတရား လိုက်စားခြင်း၊ ၎င်းတို့၏ စိတ်သဘောထားများ ပြောင်းလဲခြင်းနှင့် ဘုရားသခင်၏ ကယ်တင်ခံရခြင်းအကြောင်း အားလုံးကို မေ့လျော့သွားကြသည်။ ဤသည်မှာ အဘယ့်ကြောင့်ဆိုသော် ၎င်းတို့သည် ဝိညာဉ်ရင့်ကျက်မှုတွင် အလွန်သေးငယ်ကြပြီး စကားများနှင့် အယူဝါဒအချို့ကိုသာ နားလည်ကြသောကြောင့် ဖြစ်သည်။ ၎င်းတို့၏ စိတ်နှလုံးများတွင် ဘုရားသခင်အတွက် နေရာတစ်ခုမရှိသေးကြောင်းကို သက်သေပြလျက်၊ ဘုရားနှုတ်ကပတ်တော်က ၎င်းတို့၏ စိတ်နှလုံးများတွင် အမြစ်မတွယ်သေးသောကြောင့်၊ ပြင်ပ ကိစ္စရပ်များကို ကိုင်တွယ်ဖြေရှင်းသည့်အခါ၊ ဘုရားသခင်သည် ၎င်းတို့၏ စိတ်နှလုံးများကို ကြီးကြပ်ခြင်း မရှိပေ။ ဘုရားသခင်၏ အမှုတော်ကို တွေ့ကြုံခြင်းသည် ရိုးရှင်းသော ကိစ္စတစ်ခု မဟုတ်။ အချို့သော စမ်းသပ်မှုများ၊ ကျရှုံးမှုများနှင့် ဆုတ်ဆိုင်းမှုများကို တွေ့ကြုံခြင်းမရှိဘဲနှင့်၊ လူတို့သည် အကျိုးတရားများ အမှန်တကယ် ဖြစ်စေကြလိမ့်မည်မဟုတ်သကဲ့သို့ အထပ်ထပ် ရွတ်ဖတ်ကျက်မှတ်ခြင်းတစ်ခုတည်းက အလုပ်ဖြစ်လိမ့်မည် မဟုတ်။ ယနေ့ခေတ်တွင်၊ လူအများစုသည် နှစ်အနည်းငယ်ကြာ ယုံကြည်ပြီးသည့်နောက်တွင်သာ သမ္မာတရားအချို့ကို စတင်နားလည်ကြသည်။ အထူးသဖြင့် ဆုတ်ဆိုင်းမှုနှင့် ကျရှုံးမှုအချို့ကို တွေ့ကြုံပြီးသည့်နောက်တွင်၊ သမ္မာတရား လိုက်စားခြင်း၏ အရေးပါမှုကို ၎င်းတို့ ခံစားရပြီး၊ ထိုအခါတွင်မှ ဘုရားနှုတ်ကပတ်တော်ဖတ်ရှုခြင်း၊ သမ္မာတရားအပေါ် မိတ်သဟာယပြုခြင်းနှင့် သမ္မာတရားကို လက်တွေ့လုပ်ဆောင်ခြင်းတို့အား စတင် အာရုံစိုက်လာကြလေသည်။ ထိုအခါတွင်မှ စစ်မှန်မှုထဲသို့ ၎င်းတို့ စတင်ဝင်ရောက်ကြလေသည်။

လူအချို့က၊ “အခက်အခဲ သို့မဟုတ် အတားအဆီးတစ်ခုခု ရှိသည့်အခါ၊ ကျွန်ုပ် စိတ်ကျဉ်းကျပ်ပြီး မည်သည့်အရာ လုပ်ရမည်ကို မသိသကဲ့သို့ ဘုရားသခင်ကို ယုံကြည်ခြင်းက ခက်ခဲလွန်းသည်ဟု ခံစားရသည်မှာ အဘယ်ကြောင့်နည်း။ အခက်အခဲများရှိသည့်အခါ၊ ကျွန်ုပ် အပျက်သဘောဆောင်လာပြီး ဘုရားသခင်ကို ယုံကြည်ရန် အားအင်မဲ့လာသည်မှာ အဘယ်ကြောင့်နည်း။ တစ်ခါတစ်ရံ အစည်းအဝေးများ သို့မဟုတ် ဘုရားနှုတ်ကပတ်တော် ဖတ်ရှုခြင်းကို ကျွန်ုပ် စိတ်မဝင်စားဘဲ မယုံကြည်သူများနှင့်ဆိုင်သည့် အရာများကို ပြောဆိုသည့်အခါ၊ စိတ်လှုပ်ရှားသွားရသည်မှာ အဘယ်ကြောင့်နည်း”ဟု ပြောကြသည်။ ဤတွင် မည်သည့်အရာ ဖြစ်နေသနည်း။ အမှန်တွင်၊ လူ၏ သဘာဝ အနှစ်သာရကို ထောက်ရှုသော်၊ ထိုအရာမှာ လူက သမ္မာတရားကို မချစ်သောကြောင့် ဖြစ်သည်။ လူတို့သည် သမ္မာတရားကို မချစ်လျှင်၊ ဘုရားသခင်၌ ၎င်းတို့၏ ယုံကြည်ခြင်းသည် စစ်မှန်နိုင်သလော။ ၎င်းတို့၏ စိတ်နှလုံးများတွင် ဘုရားသခင်အတွက် နေရာတစ်ခု ရှိနိုင်သလော။ ၎င်းတို့၏ စိတ်နှလုံးများတွင် ဘုရားသခင် ရှိသလော။ မရှိပေ၊ ယင်းမှာ သေချာ၏။ သင်၏ စိတ်နှလုံးတွင် ဘုရားသခင် မရှိသကဲ့သို့ ဘုရားသခင်အတွက် နေရာမရှိလျှင်၊ ထိုအရာက သင်၏ စိတ်နှလုံးတွင် သမ္မာတရားမရှိကြောင်း၊ မည်သည့် သမ္မာတရားကိုမျှ သင် နားမလည်ကြောင်းနှင့် မည်သည့် သမ္မာတရားကိုမျှ သင် လက်တွေ့လုပ်ဆောင်လိမ့်မည် မဟုတ်ကြောင်း သက်သေပြပေသည်။ ထို့ကြောင့်၊ ဘုရားနှုတ်ကပတ်တော်ကို တွေးဆခြင်းနှင့် သမ္မာတရားကို လက်တွေ့လုပ်ဆောင်ခြင်းတို့နှင့် ပတ်သက်လာသည့်အခါ၊ လူတို့သည် နုံးချည့်ကြပြီး လမ်းကြောင်းမရှိကြချေ။ ၎င်းတို့ကို ငွေရှာခိုင်းပြီး အမှုအရာတစ်ခုခုကို လုပ်ဆောင်ခြင်းအားဖြင့် ငွေပိုရှာနိုင်သည်ဟု ပြောလျှင်၊ အခက်အခဲအားလုံးကို ကျော်လွှားပြီး အောင်မြင်ရန် ဖြစ်နိုင်သမျှတိုင်းကို ၎င်းတို့ လုပ်ဆောင်ကြလိမ့်မည်ဖြစ်ပြီး၊ ကျရှုံးမှုကို စိုးရွံ့ကြလိမ့်မည်မဟုတ်ဘဲ၊ ထိုအရာကို ဆက်လုပ်ကြလိမ့်မည်။ သင့်ကို ဆွဲဆောင်သည့် အကျိုးစီးပွားရှိသည်၊ သင်၏ စိတ်နှလုံးက အကျိုးစီးပွား၏ ပိုင်ဆိုင်ခြင်းခံရသည်၊ ထိုအကျိုးစီးပွားများက သင်၏ စိတ်နှလုံးတွင် ဦးစားပေးဖြစ်လာပြီး၊ ငွေနှင့် အကျိုးစီးပွားများက အလွန်အရေးကြီးသည်ဟု သင် ခံစားရကာ အလွယ်တကူ လက်မလျော့ပေ။ ထို့ကြောင့် သင်သည် သင်၏ ကိုယ်ပိုင် ဆန္ဒများနှင့် ရည်မှန်းချက်များကို မည်သည့် အဖိုးအခပေးရသည်ဖြစ်စေ၊ စွမ်းဆောင်ရရှိရန် တတ်နိုင်သမျှ သင် ကြိုးစားလိမ့်မည် ဖြစ်သည်။ ထို့ကြောင့် သမ္မာတရား လိုက်စားခြင်းကို သင်၏ ဘဝတွင် နံပါတ်တစ် ဦးစားပေးဖြစ်စေလျှင်၊ သမ္မာတရားကို ရှာဖွေခြင်းနှင့် လက်တွေ့လုပ်ဆောင်ခြင်းတွင် သင့်ကို ဟန့်တားသည့် အခက်အခဲများ တစ်ခုတလေကို တွေ့ကြုံခံစားရန်မဆိုထားနှင့်၊ သင်သည် လမ်းကြောင်းမရှိဘဲ ဖြစ်လိမ့်မည်မဟုတ်သကဲ့သို့ အချိန်မရှိဘဲ ဖြစ်လိမ့်မည် မဟုတ်ဟု ငါ ယုံကြည်သည်။ ထိုသို့သော သံန္နိာန်ကို သင် ပိုင်ဆိုင်သလော။ ထိုအရာက မိမိတို့၏ သားသမီးများကို စိတ်ကျေနပ်စေရန် မည်သည့်အဖိုးအခကိုမဆို ပေးဆပ်မည့် မိဘကဲ့သို့ ဖြစ်သည်။ သားသမီးများက ကောလိပ်သို့သွားရန် မည်မျှ ကုန်ကျမည်ကို ပြောသည့်အခါ၊ မိသားစုက ထိုမျှငွေမရှိလျှင်၊ မိဘများက လှည့်လည်ချေးငှားကြလိမ့်မည်၊ ငွေစုကြလိမ့်မည် သို့မဟုတ် မချေးငှားနိုင်လျှင် စီးပွားရေးလုပ်ငန်း လုပ်ရန် သို့မဟုတ် ကြုံရာကျပန်းအလုပ် လုပ်ဖို့ နည်းလမ်းများ ရှာကြလိမ့်မည်ဖြစ်သည်။ ၎င်းတို့ မည်မျှ ဆင်းရဲဒုက္ခခံရသည်ဖြစ်စေ၊ ၎င်းတို့၏ သားသမီးများ ကောလိပ်တက်ရန်အတွက် ပေးရန် သို့မဟုတ် ၎င်းတို့၏ သားသမီးများ၏ အောင်မြင်မှုကို ပျိုးထောင်ပေးရန်နှင့် ၎င်းတို့၏ သားသမီးများကို ကောင်းမွန်သည့် ရှေ့ရေးများပေးရန် လုံလောက်သည့်ငွေကို ခြစ်ကုတ်ရှာဖို့ စီမံကြလိမ့်မည်ဖြစ်သည်။ သင်၏ သမ္မာတရား လိုက်စားမှုတွင် ထိုသို့သော သန္နိာန် အမှန်တကယ် ရှိလျှင်၊ သင်တို့အနေဖြင့် စိတ်ပိုင်းဆိုင်ရာ ချို့တဲ့သောသူမဟုတ်လျှင်၊ သို့မဟုတ် မွေးရာပါ ဦးနှောက် ကစဉ့်ကလျားရောဂါ မရှိလျှင်၊ သင်တို့ တစ်ဦးတလေသည် အောင်မြင်ကျော်လွှားနိုင်ခြင်းမရှိသည့် အခက်အခဲတစ်ခုမျှ မရှိသင့်ဟု ငါထင်သည်။ သင့်အနေဖြင့် ဉာဏ်ရည်ချို့တဲ့မှုနှင့် မွေးဖွားခဲ့ခြင်းမဟုတ်လျှင်၊ ပုံမှန်လူတစ်ဦး၏ ဉာဏ်က စွမ်းဆောင်ရရှိနိုင်သည့်အရာကို စွမ်းဆောင်ရရှိနိုင်သင့်ပြီး၊ မည်သည့် အခက်အခဲကမျှ အခက်အခဲ မဟုတ်ပေ။ အဘယ်ကြောင့်ဆိုသော် သမ္မာတရားကို လိုက်စားခြင်းသည် လူ၏ စိတ်ကူးများဖြင့် ရရှိနိုင်သည့်အရာတစ်ခု မဟုတ်သောကြောင့် ဖြစ်သည်။ ထိုအရာသည် သန့်ရှင်းသော ဝိညာဉ်တော်၏ အလုပ် လိုအပ်ပြီး၊ လူက ပူးပေါင်းဆောင်ရွက်ရုံမျှ ဆောင်ရွက်ခြင်း ဖြစ်သည်။ ငါတို့တွင် ထိုသမ္မာတရားကို လိုက်စားရန် အလိုဆန္ဒရှိသရွေ့၊ အခက်အခဲတိုင်းကို ကျော်ဖြတ်ရန်နှင့် ငါတို့ နားမလည်သည့် သမ္မာတရားကို နားလည်ရန် ငါတို့ကို အခွင့်ပေးရင်း၊ သန့်ရှင်းသော ဝိညာဉ်တော်က ငါတို့ကို လမ်းပြလိမ့်မည်၊ ငါတို့အတွက် ထောက်ပံ့လိမ့်မည်ဖြစ်ပြီး၊ အချိန်မရွေး ဉာဏ်အလင်းပေးလိမ့်မည်။ လူအတွက် မဖြစ်နိုင်သည့်အရာသည် ဘုရားသခင်အတွက် ဖြစ်နိုင်ပြီး လူသည် အချည်းနှီးဖြစ်၏။ ဘုရားသခင် အမှုမပြုလျှင်၊ လူ၏ ကြီးမားသော အားထုတ်မှုများနှင့် ကြိုးပမ်းမှုအားလုံးသည် အလဟဿဖြစ်ပေသည်။

ကျေးဇူးတော်ခေတ်တွင်၊ လူတို့သည်လည်း ဘုရားသခင်ကို ယုံကြည်ပြီး ဘုရားသခင်နောက်လိုက်သည်ဟု ပြောခဲ့ကြသော်လည်း၊ ၎င်းတို့၏ ရည်မှန်းချက်မှာ ကောင်းကင်ဘုံထဲသို့ ဝင်ရောက်ရန် ဖြစ်သည်။ ၎င်းတို့သည် ဘုရားနှုတ်ကပတ်တော်ကို လက်တွေ့လုပ်ဆောင်ခြင်းနှင့် တွေ့ကြုံခြင်း ကိစ္စကို မပြောဆိုခဲ့ကြသကဲ့သို့ ကယ်တင်ခံရခြင်းက မည်သည့်အရာ ဆိုလိုသည်ကိုလည်း မသိခဲ့ကြပေ။ စည်းမျဉ်းများကိုသာ ၎င်းတို့ စောင့်ထိန်းခဲ့ကြသည်၊ ဘာသာရေး ဝတ်ပြုခြင်းအစီအစဉ်များကို လိုက်နာခဲ့ကြပြီးနောက် သမ္မာကျမ်းစာကို ဖတ်ကာ ထို့နောက်တွင် ယင်းမှာ အနည်းနှင့်အများဖြစ်ပြီး ၎င်းတို့ သေသည်နှင့် ကောင်းကင်ဘုံထဲသို့ ဝင်ရောက်နိုင်ကြမည်ဟု ခံစားရင်း၊ ရေးရေးမျှသော မျှော်လင့်ချက်တစ်ခု ထားရှိကြလေသည်။ နောက်ဆုံးသောကာလ အမှုတော်၏ ဤအဆင့်သည် ထိုမျှ မရိုးရှင်းသကဲ့သို့၊ ဘုရားသခင့် အမှုတော်နှင့်ဆိုင်သည့် ကိစ္စတိုင်းသည် ငါတို့အနေဖြင့် ဘုရားသခင် ဖော်ပြသည့် နှုတ်ကပတ်တော်များမှ သမ္မာတရားကို ရရှိနိုင်ရန်အလို့ငှာ အမှန်အားဖြင့် အဖိုးအခပေးရန်၊ လက်တွေ့ကျကျ ရှာဖွေပြီး တွေ့ကြုံရန် တောင်းဆိုသည့် စစ်မှန်မှုတစ်ခု ဖြစ်သည်။ အပတ်စဉ် အတူတကွ စုဝေးရုံမျှ စုဝေးရင်း၊ ကျမ်းစာဖတ်ပြီးနောက် ဆုတောင်း၊ သီချင်းဆိုကာ ဘုရားသခင်ကို ချီးမွမ်းရင်း၊ ထို့နောက် ကောင်းကင်သို့ ချီဆောင်ခြင်းခံရရန် စောင့်ဆိုင်းရင်း သို့မဟုတ် တတိယကောင်းကင်သို့ တက်ရန် စောင့်ဆိုင်းရင်း၊ လူတို့၏ ယုံကြည်မှုများက ကျေးဇူးတော်ခေတ်၏ ယုံကြည်မှုများနှင့် ဆင်တူနေဆဲဖြစ်လျှင်၊ မာနထောင်လွှားသည့် လူတစ်ဦးက ရိုင်းစိုင်းလာနိုင်လေခြင်းပါတကား။ ဖောက်ပြန်ပျက်စီးသော လူသားမျိုးနွယ်သည် ဤကဲ့သို့ဖြစ်၏။ ဘုရားသခင်က မည်သို့ အမှုပြုသည်ဖြစ်စေ၊ လူကို သူက ကတိတော်တစ်ခု ပေးသရွေ့၊ လူက ထိုကတိတော်ကို စည်းမျဉ်းတစ်ခုအဖြစ် ထိန်းသိမ်းကာ ဘုရားသခင်၏ အမှုတော် သို့မဟုတ် သူ၏ အလိုတော်ကို လုံးဝ ရှာဖွေခြင်းမရှိဘဲ ကောင်းကင်သို့ ချီဆောင်ခံရရန်သာ စောင့်ဆိုင်းရင်း ထိုကတိတော်ကို ထိန်းသိမ်းလိမ့်မည်ဖြစ်သည်။ လူတို့က ၎င်းတို့ မည်သည့်အရာဖြစ်သည်ကို မသိကြ၊ ကောင်းမွန်သည့်အရာများကို ၎င်းတို့ အိမ်မက်မက်ကြပြီး၊ ကြီးမားမြင့်မားသည့်အရာများကို မျှော်မှန်းကြသည်။ ၎င်းတို့သည် ထာဝရအပြစ်ဒဏ်ခံရမည့်သူဖြစ်သည်ကို မဆိုထားနှင့်၊ စာတန်၏ အမျိုးအစားဖြစ်သည်ကို ၎င်းတို့ထဲမှ မည်သူကမျှ မတွေးထင်ကြပေ။ ဘုရားသခင်ကို ရိုးသားစစ်မှန်စွာ ယုံကြည်လျှင်၊ မိမိတို့တာဝန်များကို ထမ်းဆောင်ရာတွင် ကြီးမားစွာ ဆင်းရဲဒုက္ခခံစားပြီးဖြစ်ကာ ဘုရားသခင်ကို တစ်ကြိမ်တစ်ခါမျှ သစ္စာဖောက်ခြင်းမရှိလျှင်၊ ၎င်းတို့အနေဖြင့် ဘုရားသခင်၏ ကယ်တင်ခြင်း ခံရနှင့်ပြီးဖြစ်ကာ ကောင်းကင်နိုင်ငံတော်ထဲသို့ ဧကန်မုချ ဝင်ရောက်နိုင်သည်ဟု ၎င်းတို့အားလုံးက တွေးထင်ကြသည်။ ဤရှုထောင့်သည် မှားယွင်းပြီး၊ သမ္မာတရားကို ၎င်းတို့ အမှန်တကယ် လုံးဝ နားမလည်ကြပေ။ အထူးသဖြင့် လူတို့က ဘုရားသခင်ကို စယုံကြည်သည့်အချိန်တွင်၊ အခြာလူတိုင်းကို မျက်စိစပါးမွေးစူးစရာတစ်ခုအဖြစ် မြင်ကာ မည်သူကိုမျှ၊ ဘုရားသခင်ကိုပင်လျှင်၊ မိမိတို့ကိုယ်တိုင်လောက် ကောင်းမြတ်မည်ဟု မစဉ်းစားဘဲ၊ နာခံခြင်းမရှိ၊ မကျေမချမ်းဖြစ်ပြီး အထူးသဖြင့် မာနထောင်လွှားကြလေသည်။ လူတစ်ဦးက ခရစ်တော်ကို လက်ခံပြီးလျှင်ပင်၊ ခရစ်တော် ပြောသည့်အရာ သို့မဟုတ် ခရစ်တော် လုပ်ဆောင်ပြီးသည့်အရာတိုင်းကို လက်ခံနိုင်သည်ဟု မဆိုလိုပေ။ ၎င်းတို့က ဘုရားသခင့်အမှုတော်၏ ဤအဆင့်ကို မည်ကာမတ္တ လက်ခံကြပြီး၊ လူ့ဇာတိခံ ဘုရားသခင်ကို မည်ကာမတ္တ လက်ခံကြသော်လည်း၊ ထိုအရာက ၎င်းတို့တွင် အယူအဆများမရှိ၊ စိတ်ကူးများမရှိသကဲ့သို့ ဘုရားသခင် လုပ်ဆောင်ခဲ့သည့်အရာကို အတိုက်အခံလုပ်ခြင်းမရှိဟု မဆိုလိုပေ။ လူအချို့သည် ခရစ်တော်ကို မြင်သည့်အခါ ၎င်းတို့ စိတ်နှလုံးများတွင် ဂုဏ်ယူမိကာ ၎င်းတို့ အချည်းနှီး အသက်မရှင်ကြလေပြီဟု ခံစားရလျက် စိတ်လှုပ်ရှားပြီး ပျော်မြူးကြသည်။ သို့သော်၊ ၎င်းတို့သည် သမ္မာတရား ကင်းမဲ့ပြီး၊ ဘုရားသခင်ကို မသိကြသောကြောင့်၊ ခရစ်တော် စကားပြောသည့်အခါ အယူအဆများရှိကြသည်၊ အမှုအရာများကို ခရစ်တော် ကိုင်တွယ်ဖြေရှင်းသည့်အခါ အယူအဆများရှိကြပြီး၊ တစ်စုံတစ်ဦးအပေါ် ခရစ်တော်က မည်သည့်သဘောထားရှိသည်ကို အယူအဆများ ရှိကြသည်။ ၎င်းတို့တွင် ခရစ်တော် စားပြီး ဝတ်စားဆင်ယင်သည့်အရာနှင့် ခရစ်တော်၏ မျက်နှာသွင်ပြင် သို့မဟုတ် အမူအရာ တစ်ခုတလေအပေါ် အယူအဆများ၊ ထင်မြင်ချက်များနှင့် စိတ်ကူးများ ရှိကြလေသည်။ ဤသည်မှာ အဘယ်နည်း။ ထိုအရာမှာ လူ့ စိတ်ကူးနှင့်ဆိုင်သော ဘုရားသည် စစ်မှန်သည့် ဘုရားနှင့် အခြေခံကျကျ ကွဲပြားခြင်းဖြစ်ပြီး၊ ပင်ကိုအားဖြင့် ဖောက်ပြန်ပျက်စီးသော စိတ်သဘောထားများနှင့် မာနထောင်လွှားသော သဘာဝများရှိသည့် လူတို့အတွက်၊ ဘုရားသခင်ကို ကျိုးနွံနာခံရန် ခက်ခဲပြီး သူ့ကို ချစ်ကာ ကြောက်ရွံ့ရန် သာ၍ပင် ခက်ခဲပေသည်။ သို့ရာတွင် ဘုရားသခင်၏ အမှုတော်ကို နှစ်များစွာ တွေ့ကြုံပြီးဖြစ်သည့်လူများ၊ အထူးသဖြင့် ဘုရားသခင်၏ တရားဒေသနာများနှင့် မိတ်သဟာယကို များစွာ နားထာင်ပြီးဖြစ်သည့်သူတို့သည် လူ့ဇာတိခံ ဘုရားသခင်ကို မည်သို့ သိရှိကာ ဆက်ဆံကြလိမ့်မည်နည်း။ ၎င်းတို့သည် ဘုရားသခင်နှင့်ပတ်သက်၍ အယူအဆများရှိခြင်းမှသည် ဘုရားသခင်ကို သိသည့်အသိ ရှိခြင်း၊ ပုန်ကန်ခြင်းနှင့် အတိုက်အခံလုပ်ခြင်းမှသည် စစ်မှန်သော နာခံမှုဆီသို့သွားသည့် ဖြစ်စဉ်ကို ကိုယ်တိုင်ကိုယ်ကျ တွေ့ကြုံပြီးဖြစ်ကာ ဘုရားသခင် လုပ်ဆောင်သည့်အတိုင်း၊ သူ မိန့်မြွက်သည့်အရာတိုင်းနှင့် သူ ကိုင်တွယ်သည့်အရာတိုင်းတွင် သမ္မာတရား စည်းမျဉ်းများ ပါရှိကြောင်းကို ၎င်းတို့ ကိုယ်တိုင်ကိုယ်ကျ တွေ့ကြုံပြီးဖြစ်သည်။ လူတို့သည် ၎င်းတို့၏ စိတ်နှလုံးများတွင် အတိုက်အခံလုပ်ခြင်း သို့မဟုတ် မနှစ်သက်ခြင်းကို မဆိုထားနှင့်၊ အယူအဆများပင် မရှိသင့်ပေ။ နှစ်အနည်းငယ် တွေ့ကြုံပြီးနောက်တွင်၊ သမ္မာတရား အနည်းငယ်ကို လူတို့ နားလည်သည့်အခါ၊ ထိုသမ္မာတရားကို မှန်ကန်စွာ သဘောထားကြလိမ့်မည်ဖြစ်ပြီး၊ ၎င်းတို့၏ အတွင်းတွင် သမ္မာတရား အနည်းငယ်ကို မိမိတို့၏ အသက်အဖြစ် ရှိကြပြီး၊ လက်တွေ့လုပ်ဆောင်မှု စည်းမျဉ်းများကို ဆည်းပူးရရှိသည့်အခါ၊ မိုက်မဲသည့် မည်သည့်အရာကိုမျှ အလိုအလျောက် လုပ်ကြလိမ့်မည် မဟုတ်။ ယုံကြည်သူသစ်များဖြစ်ပြီး၊ ဤကိစ္စရပ်များတွင် အတွေ့အကြုံမရှိသည့်သူများသည် ဘုရားသခင်ကို ဆန့်ကျင်ပုန်ကန်ကာ သူ့ကို အတိုက်အခံလုပ်တတ်ပြီး၊ မိုက်မဲ့ကာ အဆင်ခြင်မဲ့သည့်အရာများကို လုပ်ဆောင်တတ်ကြသည်။ ဆိုးရွားသည့် သဘာဝရှိသောသူအချို့သည် ဘုရားသခင်ကို ဝေဖန်ပြီး ပြစ်မှားစော်ကားနိုင်ပြီး၊ ထို့နောက်တွင် လုံးဝ ပြိုလဲသွားနိုင်သည်။ အခြားသူတို့မှာ အသင်းတော်အလုပ်ကို စဉ်ဆက်မပြတ် နှောင့်ယှက်ကာ ဟန့်တားနေကြပြီး ၎င်းတို့ ဖယ်ရှားခံရသည်။ ယခု သင်တို့အားလုံးသည် ဘုရားသခင်နှင့်ပတ်သက်၍ အယူအဆများ၊ စိတ်ကူးများနှင့် ပြည့်နေကြသလော။ လူ့ဇာတိခံ ဘုရားသခင်ကို ယုံကြည်ခြင်းက အလွန်ခက်ခဲသည်ဟု သင်တို့ ခံစားရသလော။ လူအချို့က၊ “သခင်ဘုရားကို ကျွန်ုပ်တို့ ယုံကြည်လေ့ရှိခဲ့ချိန်တွင်၊ အတော်လေး ရိုးရှင်းသည်။ ကျွန်ုပ်တို့ အတူတကွ စုဝေးရုံစုဝေးကြသည်၊ တရားဒေသနာများ နားထောင်ကြပြီး၊ အမှုအရာများအတွက် သခင်ဘုရားထံ ဆုတောင်းကြသည်။ သခင်ဘုရား၏ နှုတ်ကပတ်တော်များကို လက်တွေ့လုပ်ဆောင်ပြီး တွေ့ကြုံကာ သမ္မာတရားကို လိုက်စားရန် မဆိုထားနှင့်၊ မည်သူကမျှ သမ္မာတရားကို လက်တွေ့လုပ်ဆောင်ပြီး ဘုရားသခင်ကို ကျိုးနွံနာခံရန် မစေခိုင်းခဲ့ပါ။ သင်းအုပ်ဆရာများနှင့် တရားဟောဆရာများက ကျမ်းစာကို ရှင်းပြရုံရှင်းပြခဲ့ကြပြီး၊ ကျွန်ုပ်တို့ အလိုရှိသည့် မည်သည့်ပုံစံဖြင့်မဆို ထိုအရာကို ကျွန်ုပ်တို့ နားလည်နိုင်ခဲ့ကြသည်။ သို့ရာတွင် ယခု အနန္တတန်ခိုးရှင် ဘုရားသခင်ကို ကျွန်ုပ်တို့ ယုံကြည်သဖြင့်၊ သူ ဖော်ပြသည့် သမ္မာတရားများ အလွန်များသည်မှာ သမ္မာတရားကို လက်တွေ့လုပ်ဆောင်ရန် အလွန်ခက်ပြီး၊ စစ်မှန်မှုထဲသို့ ဝင်ရောက်ရန် အလွန်ခက်ခဲသည်ဟု ကျွန်ုပ်တို့ ခံစားရပါသည်”ဟု ဆိုကြသည်။ သခင်ဘုရားကို သင် ယုံကြည်လေ့ရှိသည့်ပုံစံဖြင့် ဘုရားသခင်ကို သင် ယုံကြည်ဆဲဖြစ်လျှင်၊ သမ္မာတရားနှင့် အသက်ကို သင် ရရှိနိုင်မည်လောဟု သင် တွေးဖူးသလော။ သင်သည် ဘုရားသခင်၏ ကယ်တင်ခြင်း ခံရနိုင်သလော။ (မခံရနိုင်ပါ။) ဤအရာကို သင်တို့ သဘောပေါက်နိုင်သည့်အချက်က သင်တို့သည် တိုးတက်မှုဖြစ်စေပြီးဖြစ်သည်ကို ပြပေသည်။

ဘုရားသခင်ကို ယုံကြည်မှုသည် စိတ်ကူးများ သို့မဟုတ် အယူအဆများအပေါ် အခြေမခံသကဲ့သို့၊ စိတ်ဝင်စားမှုပေါ် သာ၍ပင် အခြေမခံပေ။ သင်သည် ခဏတာ စိတ်ဝင်စားမှုအရ သို့မဟုတ် ရုတ်တရက်ဖြစ်ပေါ်သော ဆန္ဒအရ ဘုရားသခင်ကို ယုံကြည်လျှင်၊ သင့်အနေဖြင့် စိတ်တည်ငြိမ်စေပြီး သင် ဆက်လက် ယုံကြည်လိုခြင်း ရှိမရှိ၊ သမ္မာတရားကို အမှန်တကယ် သင် လိုက်စားလိုခြင်း ရှိမရှိ၊ သင်သည် ဘုရားသခင်၌ စစ်မှန်သော ယုံကြည်သူ ဟုတ်မဟုတ်၊ ဘုရားသခင်ကို ယုံကြည်သည့် လမ်းကြောင်း လျှောက်ရန် သင် စိတ်ပိုင်းဖြတ်ပြီးခြင်း ရှိမရှိဆိုသည်နှင့် သမ္မာတရား လိုက်စားရန် သင် စိတ်ပိုင်းဖြတ်ပြီးခြင်း ရှိမရှိဟူသည်တို့ကို သေချာစွာ စဉ်းစားသင့်ပေသည်။ ဤအချက်များကို အဘယ်ကြောင့် အလေးထားသနည်း။ အဘယ်ကြောင့်ဆိုသော် ငါတို့ ယခု ယုံကြည်သည့်အရာမှာ လူ့ဇာတိခံ ဘုရားသခင်ဖြစ်ပြီး ဘုရားသခင်၏ လူ့ဇာတိခံယူခြင်းသည် သူ့အနေဖြင့် ကောင်းကင်မှ မြေကြီးသို့ ကြွဆင်းလာကာ မိမိ၏ အသွင်အပြင်က လူ၏ အသွင်အမြင်နှင့် တစ်ထေရာတည်းတူသော်လည်း ခရစ်တော်ဖြစ်သည့်၊ ဘုရားသခင်ကိုယ်တိုင်ဖြစ်ပြီး၊ ရိုးရှင်းသည့် လူတစ်ဦးမဟုတ်သည့် လူသားတစ်ဦး အမှန်တကယ် ဖြစ်လာသည်ဟု ဆိုလိုသောကြောင့် ဖြစ်သည်။ ဘုရားသခင်၏ လူ့ဇာတိခံယူခြင်းက လူတို့ကို တရားစီရင်ခြင်းနှင့် သန့်စင်စေခြင်း အမှုတော်ကို အမှန်တကယ် ဆောင်ရွက်ပြီးဖြစ်သည်၊ နှုတ်ကပတ်တော်များစွာကို အမှန်တကယ် ဖော်ပြပြီးဖြစ်သည်၊ အမှုများစွာကို လုပ်ဆောင်ပြီးဖြစ်ကာ လူများစွာကို ရွေးကောက်ပြီးဖြစ်သကဲ့သို့၊ သူ၏ အမှုတော်နှင့် ဧဝံဂေလိတရားကို အမှန်တကယ် တိုးချဲ့နေခဲ့ပေသည်။ ဤလက်တွေ့ကျသည့် အမှု၏ တစ်စစီက လူတို့အနေဖြင့် သမ္မာတရား ရရှိနိုင်ရန်နှင့် ဘုရားသခင်ကို အမှန်တကယ် ကျိုးနွံနာခံပြီး ကိုးကွယ်နိုင်ရန်အလို့ငှာ လူတို့ကို ကယ်တင်ပြီး စုံလင်စေလိုသည့် ဘုရားသခင်၏ ဆန္ဒသည် လူတို့က သူ၏ နှုတ်ကပတ်တော်များနှင့် အမှုတော်ကို အမှန်တကယ် တွေ့ကြုံဖို့ ပင်ကိုအားဖြင့် တောင်းဆိုသည်ကို အတည်ပြုလေသည်။ ဤသည်မှာ ဘုရားသခင် ပြီးပြည့်စုံစေရန် အလိုရှိသည့်အရာ ဖြစ်သည်။ ဘုရားသခင်၏ အမှုတော်ကို သင် စတင်လက်ခံသည့်အချိန်မှစ၍ ယခုချိန်ထိတိုင်၊ သာလွန်ထူးကဲသည်ဟု သင်တို့ တွေးထင်ခဲ့ကြသည်ဖြစ်စေ၊ သို့မဟုတ် ပကတိအမြင်ဖြင့် မြင်နိုင်သောအရာ သို့မဟုတ် လူ့ဉာဏ်က ရယူနိုင်သောအရာ ဖြစ်သည်ဖြစ်စေ၊ အချို့သောအရာများကို သင်တို့ တွေ့ကြုံပြီး ဖြစ်ကောင်းဖြစ်နိုင်သည်။ တိုတိုပြောရလျှင်၊ ဘုရားသခင်သည် ငါတို့ မြင်နိုင်၊ ထိနိုင်ရန်အလို့ငှာ ငါတို့အပေါ်၊ ငါတို့အလယ်နှင့် ငါတို့ အနီးဝန်းကျင်တွင် အမှုပြုလျက်၊ လက်တွေ့ကျသည့် နည်းလမ်းတစ်ခုဖြင့် အရာရာကို လုပ်ဆောင်သည်။ ထို့ကြောင့်၊ သမ္မာတရားကို လိုက်စားခြင်းသည် လက်တွေ့ကျသည့် သင်ခန်းစာတစ်ခုဖြစ်ပြီး၊ သမ္မာတရားကို ရရှိရန်အလို့ငှာ ပူးပေါင်းဆောင်ရွက်ရန် ငါတို့၏ အားထုတ်မှုများပေါ် မှီခိုရင်း၊ ငါတို့အပေါ် ဖြစ်ပျက်သည့် အရာရာတိုင်းတွင် သမ္မာတရားကို ရှာဖွေကာ လက်တွေ့လုပ်ဆောင်ရမည်ဖြစ်သည်။ သမ္မာတရားကို လိုက်စားခြင်းသည် လူတို့က ဖြစ်ဖို့ စိတ်ကူးသည့်အရာ မဟုတ်။ ဘုရားနှုတ်ကပတ်တော်များကို ဖတ်ရှုခြင်းနှင့် ထိုနှုတ်ကပတ်တော်များ၏ တိုက်ရိုက် အဓိပ္ပာယ်ကို သိနားလည်ခြင်းသည် သမ္မာတရားကို သိနားလည်ခြင်းဖြစ်ကြောင်းနှင့် အကြင်သူက အလွန်ကျွမ်းကျင်လိမ္မာစွာ စကားပြောနိုင်သရွေ့၊ သမ္မာတရားကို လက်တွေ့လုပ်ဆောင်နေခြင်းဖြစ်သည်ဟု လူတို့ တွေးထင်ကြသည်။ ထိုအရာသည် ထိုမျှ မရိုးရှင်းပေ။ သမ္မာတရားကို လိုက်စားခြင်းက သမ္မာတရားကို အမှန်တကယ် ရှာဖွေပြီး လက်ခံရန်၊ ဆင်းရဲဒုက္ခခံပြီး အဖိုးအခပေးရန်၊ တွေ့ကြုံရန်၊ ရှာဖွေရန်၊ တွေးဆရန်၊ မိတ်သဟာယပြုရန်နှင့် လက်တွေ့ဘဝတွင် ကြိုးစားလုပ်ဆောင်ရန် ငါတို့ကို တောင်းဆိုသည်။ ဤနည်းဖြင့်သာ ငါတို့ တဖြည်းဖြည်း ဝင်ရောက်နိုင်ပြီး ဘုရားနှုတ်ကပတ်တော်နှင့် သမ္မာတရားမှ ရရှိနိုင်ပေသည်။ တစ်နေ့၊ သမ္မာတရားက မည်သည့်အရာဖြစ်သည်ဆိုသည်နှင့် သမ္မာတရား၏ အနှစ်သာရက မည်သည့်အရာဖြစ်သည်ကို သင် နားလည်သည့်အခါ၊ လူ့ဇာတိခံ ဘုရားသခင် ပြောဆိုသည့် နှုတ်ကပတ်တော်များသည် ငါတို့ လက်တွေ့အရှိတရား၏ လိုအပ်ချက်များဖြစ်ကြောင်း၊ ယင်းတို့သည် ငါတို့၏ ပြဿနာအားလုံးကို ကိုင်တွယ်ဖြေရှင်းရန် ငါတို့လိုအပ်သည့် လက်တွေ့လုပ်ဆောင်မှု စည်းမျဉ်းများဖြစ်ကြောင်းနှင့် ဘုရားနှုတ်ကပတ်တော်များက ငါတို့ ဘဝများ၏ ရည်မှန်းချက်နှင့် ဦးတည်ချက်ဖြစ်ကြောင်းတို့ကို သင် သိရှိလိမ့်မည်။ ထိုအချိန်တွင်၊ ဘုရားသခင် လုပ်ဆောင်သမျှအားလုံးက မည်မျှ အဓိပ္ပာယ်ရှိသည်ဆိုသည်နှင့် ဘုရားသခင်၏ လူ့ဇာတိခံယူခြင်းက မည်မျှ အရေးပါပြီး တန်ဖိုးရှိသည်ဆိုသည်ကို သင် မြင်လိမ့်မည်။ ဘုရားသခင် မိန့်မြွက်သည့် စာကြောင်းတိုင်း၊ သူ့အမှုတော်၏ အဆင့်တိုင်း၊ သူ၏ စကားနှင့် လုပ်ရပ်တိုင်း၊ သူ၏ အတွေးများ၊ သူ၏ စိတ်ကူးများနှင့် သူ၏ ရှုထောင့်များအားလုံးသည် လူတို့ကို သန့်စင်စေခြင်းနှင့် ကယ်တင်ခြင်းနှင့်ဆိုင်သည့် ရည်ရွယ်ချက်အတွက်ဖြစ်ပြီး ထိုအရာတစ်ခုမျှ အနှစ်မဲ့ခြင်း မရှိပေ။ ထို့ကြောင့်၊ အကြင်သူသည် ဘာသာတရားမှ လာသည်ဖြစ်စေ၊ မယုံကြည်သူများမှ ပြောင်းလဲပြီးဖြစ်သည်ဖြစ်စေ၊ အယူအဆများနှင့် စိတ်ကူးများအရ ဘုရားသခင်ကို မယုံကြည်သင့်တော့ဘဲ၊ ကြီးမားသည့် ကပ်ဘေးများ ရိုက်ခတ်သည့်အခါ သခင်ဘုရားကို တွေ့ဆုံရန် ကောင်းကင်သို့ ရုတ်တရက် ချီဆောင်ခံရလိမ့်မည်ဟု အိမ်မက်မက်ရင်း၊ ဘာသာရေး အိမ်မက်များဖြင့် မပတ်သက်သင့်တော့ပေ။ ဤသည်မှာ စိတ်ကူးနှင့် ရူးခြင်း ဖြစ်သည်။ ဘုရားသခင်သည် လူကို ထုတ်ဖော်ပြပြီး တရားစီရင်ကာ သမ္မာတရားကို လက်တွေ့ကျသည့် နည်းလမ်းဖြင့် ဖော်ပြခြင်းအားဖြင့် လူ၏ ဖောက်ပြန်ပျက်စီးခြင်းကို သန့်စင်စေရန်နှင့် စာတန်၏ စွမ်းအားမှ လက်တွေ့ကျည့် နည်းလမ်းဖြင့် လူကို ကယ်တင်ရန် ကြွလာပြီးဖြစ်သည်။ ဤကာလအတောအတွင်းတွင်၊ လူသည် သန့်စင်ခံရကာ ပြောင်းလဲခြင်း မရှိနိုင်မီ များစွာသော နှိပ်စက်ညှဉ်းပန်းမှုများနှင့် အတိဒုက္ခများကို ဖြတ်သန်းရမည်ဖြစ်ကာ များစွာသော ပြုပြင်ခြင်းနှင့် ကိုင်တွယ်ဖြေရှင်းခြင်းအပြင် များစွာသော တရားစီရင်ခြင်းနှင့် ပြစ်တင်ဆုံးမခြင်းတို့ကို တွေ့ကြုံရလိမ့်မည် ဖြစ်သည်။ ဤဘုရားသခင်၏ အမှုတော်နှင့်ဆိုင်သော အတွေ့အကြုံမှတစ်ဆင့်သာ သမ္မာတရားကို သူ ရရှိနိုင်သည်။ သမ္မာတရားကို သင် ရရှိသည်နှင့်၊ ဘုရားသခင်သည် သင်၏ စိတ်နှလုံးတွင် နေရာတစ်ခု ရှိလိမ့်မည်ဖြစ်ပြီး၊ သင်သည် ဘုရားသခင်ကို စစ်မှန်သည့် ကြောက်ရွံ့ခြင်းနှင့် နာခံမှု ရှိလိမ့်မည်။ ယင်းမှာ ဘုရားသခင် လုပ်ဆောင်လုပ်သည့်အရာ ဖြစ်သည်။ သမ္မာတရားကို သင် နားလည်ပြီး ထိုသမ္မာတရား၏ တန်ဖိုးကို သိရှိကာ သမ္မာတရားက သင်၏ စိတ်နှလုံးတွင် အမြစ်တွယ်ပြီး သင်သည် သမ္မာတရားနှင့်ဆိုင်သည့် လက်တွေ့ကျသော အတွေ့အကြုံနှင့် အသိပညာတို့ ရှိသည်နှင့်တစ်ပြိုင်နက်၊ ဘုရားနှုတ်ကပတ်တော်သည် သင်၏ စိတ်နှလုံးတွင် အသက်ဖြစ်လာပြီးဖြစ်လိမ့်မည်။ ဤဖြစ်စဉ်သည် လက်တွေ့ကျသလော။ (လက်တွေ့ကျပါသည်။) သို့ဆိုလျှင်၊ ဤဖြစ်စဉ်က လူတို့လုပ်ဆောင်ရန် မည်သည့်အရာကို တောင်းဆိုသနည်း။ ဦးစွာပထမ၊ လူတို့သည် ၎င်းတို့၏ ဖောက်ပြန်ပျက်စီးခြင်းမှ သန့်စင်ခံရရန်အလို့ငှာ၊ သမ္မာတရားကို လက်တွေ့လုပ်ဆောင်ပြီး ဘုရားသခင်ကို နာခံမှု စွမ်းဆောင်ရရှိရန်အလို့ငှာ၊ ပြီးလျှင် ဘုရားနှုတ်ကပတ်တော်များ၏ စစ်မှန်မှုထဲသို့ ဝင်ရောက်နိုင်ရန်အလို့ငှာ၊ ၎င်းတို့သည် ဘုရားသခင်ကို နာခံသည့် စိတ်နှလုံးရှိရမည်၊ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်ခံရမည်ဖြစ်ပြီး၊ ဘုရားသခင်၏ ပြုပြင်ခြင်း၊ ကိုင်တွယ်ဖြေရှင်းခြင်း၊ စမ်းသပ်မှုများနှင့် စစ်ဆေးမှုတို့ကို ကျိုးနွံနာခံရမည်။ အကြင်သူက ဘုရားသခင်၏ အမှုတော်ကို တွေ့ကြုံရမည့်ပုံ သိသရွေ့၊ ၎င်းတို့အထဲ၌ ဘုရားသခင် စုံလင်စေလိုသည့်အရာနှင့် မည်သည့် ရလဒ်များ သူ စွမ်းဆောင်ရရှိစေလိုသည်ဟူသည်တို့ကို ၎င်းတို့ သိကြလိမ့်မည်။ ဘုရားနှုတ်ကပတ်တော်က လူ့အပေါ် အဓိက အကျိုးတရားနှစ်ခု စွမ်းဆောင်ရရှိသည်။ ပထမမှာ ထိုနှုတ်ကပတ်တော်က လူကို မိမိကိုယ်ကို သိခွင့်ပေးသည်။ ဒုတိယမှာ ထိုနှုတ်ကပတ်တော်က လူအား ဘုရားသခင်ကို သိခွင့်ပေးသည်။ ဤအကျိုးတရားနှစ်ခုကို စွမ်းဆောင်ရရှိပြီးသည့်အခါ၊ အကြင်သူက ဘုရားနှုတ်ကပတ်တော်များကို အမှန်တကယ် သိရှိလိမ့်မည်ဖြစ်ပြီး သမ္မာတရားကို အမှန်တကယ် နားလည်လိမ့်မည်။

သင့်ကိုယ်သင် သိရှိရန်၊ သင်၏ဖောက်ပြန်ပျက်စီးခြင်း နှင့်ဆိုင်သော ဖော်ပြချက်များ၊ သင်၏ ဖောက်ပြန်ပျက်စီးသော စိတ်သဘောထား၊ သင်ကိုယ်တိုင်၏ ပဓာနကျသော အားနည်းချက်များ၊ သင်၏သဘာဝနှင့် အနှစ်သာရတို့ကို သင် သိရမည်။ သင်သည် သင်၏ ရည်ရွယ်ချက်များ၊ သင်၏ ရှုထောင့်အမြင်များနှင့် သင်၏ သဘောထားကဲ့သို့သော သင်၏ နေ့စဉ်ဘဝတွင် ထုတ်ဖော်ပြသည့် အရာများကိုလည်း၊ သင် အိမ်တွင် ရှိသည်ဖြစ်စေ အပြင်၌ရှိသည်ဖြစ်စေ၊ စုဝေးကြသည့်အခါများ၊ ဘုရားသခင်၏ နှုတ်ကပတ်တော်များကို သင် စားသောက် နေသည့်အခါ၊ သို့မဟုတ် သင် ကြုံရသည့် ကိစ္စရပ်တစ်ခု စီတိုင်းတွင် တကယ့်နောက်ဆုံး အသေးစိတ်အချက်အလက် အထိ သင် သိရှိရမည်။ ဤအချက်များမှတစ်ဆင့် သင့်ကိုယ်သင် သိရှိလာမည်။ သင့်ကိုယ်သင် ပိုမိုနက်ရှိုင်းသော အဆင့်၌ သိရှိဖို့၊ ဘုရားသခင်၏ နှုတ်ကပတ်တော်များကို သင် ပေါင်းစပ်ရမည်မှာ မှန်သည်။ သူ၏ နှုတ်ကပတ်တော်များအပေါ် အခြေပြု၍ သင့်ကိုယ်သင် သိရှိခြင်းအားဖြင့်သာ ရလဒ်များကို သင် ရရှိနိုင်ပေသည်။ ဘုရားနှုတ်ကပတ်တော်များ၏ တရားစီရင်ခြင်းကို လက်ခံသောအခါ ဒုက္ခ၊ သို့မဟုတ် နာကျင်မှုကို မကြောက်နှင့်။ ထို့အပြင် ဘုရားနှုတ်ကပတ်တော်များက သင်တို့၏ စိတ်နှလုံးကို ထိုးဖောက်ပြီး သင်တို့၏ အကျည်းတန်သော အခြေအနေအား ဖော်ထုတ်မည်ကို မကြောက်နှင့်။ ဤအရာများကို ဒုက္ခခံရသည်မှာ အကျိုးရှိသည်။ သင်သည် ဘုရားသခင်ကို ယုံကြည်လျှင် လူများကို တရားစီရင်ပြီး ပြစ်တင်ဆုံးမသည့် ဘုရားနှုတ်ကပတ်တော်များ၊ အထူးသဖြင့် လူသားမျိုးနွယ် ဖောက်ပြန်ပျက်စီးမှု၏ အနှစ်သာရကို ဖွင့်ပြသည့် ဘုရားနှုတ်ကပတ်တော်များကို ပို၍ ဖတ်သင့်သည်။ ဘုရားနှုတ်ကပတ်တော်များကို သင်၏ လက်တွေ့အခြေအနေနှင့် ပို၍ နှိုင်းယှဉ်ကြည့်သင့်ပြီး သင့်ကိုယ်သင်အပေါ်တွင် ပို၍ အသုံးချသင့်ကာ အခြားလူများအပေါ်တွင် အသုံးချခြင်းကို လျှော့သင့်၏။ ဘုရားသခင်ဖွင့်ပြသည့် အခြေအနေအမျိုးအစားများသည် လူတိုင်းတွင် တည်ရှိသည်။ အားလုံးကို သင့်အပေါ်တွင် အသုံးချနိုင်သည်။ ဤအရာကို သင်မယုံကြည်လျှင် တွေ့ကြုံခံစားဖို့ ကြိုးစားကြည့်လော့။ သင်တွေ့ကြုံခံစားလေလေ၊ သင့်ကိုယ်သင် သိလေလေဖြစ်ပြီး ဘုရားနှုတ်ကပတ်တော်များက အလွန်တိကျသည်ဟု ခံစားရလေလေဖြစ်လိမ့်မည်။ ဘုရားသခင်၏ နှုတ်ကပတ်တော်များကို ဖတ်ရှုပြီးနောက်တွင်၊ လူအချို့သည် ထိုနှုတ်ကပတ်တော်များကို မိမိတို့ကိုယ်ကိုယ်အဖို့ ကျင့်သုံးနိုင်စွမ်းမရှိကြပေ။ ၎င်းတို့က ဤနှုတ်ကပတ်တော်များ၏ အစိတ်အပိုင်းများသည် ၎င်းတို့နှင့် မပတ်သက်ဘဲ၊ ယင်းအစား အခြားလူများနှင့် ပတ်သက်သည်ဟု ထင်ကြ၏။ ဥပမာအားဖြင့်၊ ဘုရားသခင်က လူတို့ကို မိန်းမပျက်များနှင့် ပြည့်တန်ဆာများအဖြစ် ဖော်ထုတ်သည့်အခါတွင်၊ ညီအစ်မအချို့က ၎င်းတို့သည် ၎င်းတို့၏ လင်ယောက်ျားများကို မလွဲမသွေ သစ္စာရှိကြပြီးဖြစ်သောကြောင့်၊ ထိုသို့သော နှုတ်ကပတ်တော်များသည် ၎င်းတို့ကို ရည်ညွှန်းခြင်း ဖြစ်ရမည်မဟုတ်ဟု ခံစားရသည်။ ညီအစ်မ အချို့က၊ ၎င်းတို့အနေဖြင့် အိမ်ထောင်မပြုကြသကဲ့သို့ မည်သည့်အခါတွင်မျှ လိင်ဆက်ဆံခြင်းမရှိဖူးသည့်အတွက်၊ ထိုသို့သော နှုတ်ကပတ်တော်များသည် ၎င်းတို့နှင့်လည်း ပတ်သက်မည်မဟုတ်ဟု ခံစားကြလေသည်။ ညီအစ်ကို အချို့က ဤနှုတ်ကပတ်တော်များသည် အမျိုးသမီးများကိုသာ ရည်ရွယ်ထားပြီး ၎င်းတို့နှင့် မည်သို့မျှ ပတ်သက်မှုမရှိဟု ထင်ကြသည်။ လူအချို့က ဘုရားသခင်၏ နှုတ်ကပတ်တော်ဖွင့်ပြမှုများသည် အလွနပြင်းထန်သည်၊ လက်တွေ့အရှိတရားနှင့် မကိုက်ညီဟုယုံကြည်ကြသောကြောင့် ထိုနှုတ်ကပတ်တော်များကို လက်ခံဖို့ ငြင်းဆန်ကြသည်။ အချို့ဖြစ်ရပ်များတွင်၊ ဘုရားသခင်၏ နှုတ်ကပတ်တော်များသည် မှားယွင်းသည်ဟု ပြောဆိုသော လူများပင် ရှိလေသည်။ ဤသည်မှာ ဘုရားသခင်၏ နှုတ်ကပတ်တော်များအပေါ် ရှိသင့်သော မှန်ကန်သည့် သဘောထား ဖြစ်ပါသလော။ ဤသည်မှာ သိသိသာသာပင် မှားယွင်းသည်။ လူအားလုံးသည် ၎င်းတို့၏ ပြင်ပအပြုအမူများပေါ် အခြေခံပြီး မိမိတို့ကိုယ်ကို ရှုမြင်ကြ၏။ ၎င်းတို့သည် ဘုရားနှုတ်ကပတ်တော်များအတွင်းမှ မိမိတို့ကိုယ်ကို ဆင်ခြင်သုံးသပ်ဖို့၊ မိမိတို့၏ ဖောက်ပြန်ပျက်စီးသော အနှစ်သာရကို သိမြင်လာဖို့ မတတ်နိုင်ကြပေ။ ဤတွင် “မိန်းမပျက်များ” နှင့် “ပြည့်တန်ဆာများ” သည် လူသားမျိုးနွယ်၏ ဖောက်ပြန်ပျက်စီးခြင်း၊ ညစ်ညမ်းခြင်း၊ လူတကာနှင့်လိင်ဆက်ဆံခြင်း အနှစ်သာရကို ရည်ညွှန်းသည်။ ယောက်ျားဖြစ်စေ မိန်းမဖြစ်စေ၊ အိမ်ထောင်ရှိသူဖြစ်စေ အိမ်ထောင်မရှိသူ ဖြစ်စေ၊ အယောက်တိုင်းသည် လိင်မှုထွေပြားခြင်းနှင့်သက်ဆိုင်သည့် ဖောက်ပြန်ပျက်စီးသော အတွေးများရှိကြ၏- သို့ဆိုလျှင် ယင်းသည် သင်နှင့် မည်သို့မျှ မပတ်သက်ဘဲ ရှိနိုင်သနည်း။ ဘုရားသခင်၏ နှုတ်ကပတ်တော်များသည် လူ၏ ဖောက်ပြန်ပျက်စီးသော စိတ်သဘောထားများကို ဖော်ထုတ်၏။ အမျိုးသား ဖြစ်စေ၊ အမျိုးသမီးဖြစ်စေ၊ တစ်ဦးတစ်ယောက်၏ ဖောက်ပြန်ပျက်စီးခြင်း အဆင့်သည် တူညီပေသည်။ ဤသည်မှာ အမှန်တရားတစ်ခု မဟုတ်လော။ အခြားမည်သည့်အရာကိုမျှ မလုပ်ဆောင်မီ၊ ဘုရားသခင်ပြောဆိုသမျှသည် သမ္မာတရားဖြစ်သည်၊ အမှန်တရားနှင့် ကိုက်ညီသည်၊ လူတို့ကို တရားစီရင်ပြီး ဖော်ထုတ်သည့် သူ၏ နှုတ်ကပတ်တော်များသည် မည်မျှ ပြင်းထန်ပါစေ၊ သို့မဟုတ် သမ္မာတရားကို မိတ်သဟာယပြုသည့်၊ လူတို့ကို တိုက်တွန်းသည့် နှုတ်ကပတ်တော်များသည် မည်မျှသိမ်မွေ့ပါစေ၊ ဤနှုတ်ကပတ်တော်များသည် တရားစီရင်ခြင်းဖြစ်စေ၊ ကောင်းချီးများဖြစ်စေ၊ ရှုတ်ချခြင်းဖြစ်စေ၊ ကျိန်ဆဲခြင်းဖြစ်စေ ပြီးလျှင် ၎င်းတို့က လူများကို ခါးသီးသော ခံစားမှုကို ပေးသည်ဖြစ်စေ၊ ချိုမြိန်သော ခံစားမှုတစ်ခုကို ပေးသည်ဖြစ်စေ၊ လူတို့က ထိုနှုတ်ကပတ်တော်များကို လက်ခံရမည်ကို ငါတို့ နားလည်ထားရမည်ဖြစ်သည်။ ယင်းမှာ ဘုရားသခင်၏ နှုတ်ကပတ်တော်များအပေါ် ငါတို့ ရှိသင့်သည့် သဘောထား ဖြစ်သည်။ ဤသည်မှာ မည်သို့သောသဘောထားမျိုးဖြစ်သနည်း။ ယင်းသည် ဆက်ကပ်မှုရှိသော သဘောထား၊ ရိုသေကိုင်းရှိုင်းသော သဘောထား၊ သည်းခံမှုရှိသော သဘောထား သို့မဟုတ် ဆင်းရဲဒုက္ခကို ပွေ့ဖက်သည့် သဘောထား တစ်ခုလော။ သင်သည် အတော်အတန် စိတ်ရှုပ်ထွေးနေသည်။ သင့်ကိုငါပြောသည်၊ ဤအရာများထဲမှ တစ်ခုမျှမဟုတ်ပေ။ လူတို့၏ ယုံကြည်ခြင်းတွင် ဘုရားသခင်၏ နှုတ်ကပတ်တော်များသည် သမ္မာတရား ဖြစ်ကြောင်း အတည်ပြုရမည်။ ၎င်းတို့သည် သမ္မာတရား ဖြစ်သောကြောင့် လူတို့သည် ၎င်းတို့ကို ဆင်ခြင်တုံတရားဖြင့် လက်ခံသင့်သည်။ လူတို့သည် ၎င်းကို လက်ခံနိုင်ခြင်း သို့မဟုတ် အသိအမှတ်ပြုနိုင်ခြင်း ရှိသည်ဖြစ်စေ၊ မရှိသည်ဖြစ်စေ လူတို့၏ ပထမ သဘောထားမှာ ဘုရားသခင်၏ နှုတ်ကပတ်တော်များကို ခြွင်းချက်မရှိ လက်ခံခြင်း ဖြစ်သင့်သည်။ ဘုရားနှုတ်ကပတ်တော်က သင့်ကို မဖော်ထုတ်လျှင် မည်သူကို ဖော်ထုတ်သနည်း။ သင့်ကို ဖော်ထုတ်ရန်မဟုတ်လျှင် ထိုနှုတ်ကပတ်တော်ကို လက်ခံရန် အဘယ်ကြောင့် သင့်ကို တောင်းဆိုသနည်း။ ဤသည်မှာ ဆန့်ကျင်ကွဲလွဲနေခြင်း မဟုတ်သလော။ ဘုရားသခင်သည် လူသားမျိုးနွယ်တစ်ခုလုံးကို စကားပြောသည်။ ဘုရားသခင်က မိန့်မြွက်သော စာကြောင်းတိုင်းသည် ဖောက်ပြန်ပျက်စီးသော လူသားမျိုးနွယ်ကို ဖော်ထုတ်သည်။ မည်သူကမျှ လွတ်ငြိမ်းခွင့်မရပေ။ ဤအတွက်ကြောင့် သင်လည်း အလိုအလျောက်ပါဝင်သည်။ ဘုရားသခင်၏ မိန့်မြွက်ချက်များ၏ စာကြောင်းတစ်ကြောင်းကမျှ ပြင်ပစည်းကမ်းများအကြောင်း၊ သို့မဟုတ် လူတို့တွင်ရှိသည့် ရိုးရှင်းသော အပြုအမူပုံစံတစ်ခုအကြောင်းဖြစ်ဖို့ မဆိုထားနှင့်၊ ပြင်ပအသွင်အပြင်များ၊ သို့မဟုတ် အခြေအနေအမျိုးအစားတစ်ခုအကြောင်းပင် မဟုတ်ပေ။ ၎င်းတို့သည် ထိုကဲ့သို့ မဟုတ်ပေ။ ဘုရားသခင် မိန့်မြွက်သော စာကြောင်းတိုင်းကို လူသား၏ ရိုးရှင်းသော အပြုအမူအမျိုးအစားတစ်ခုကုသာ ဖွင့်ပြခြင်းအဖြစ် သို့မဟုတ် အပြင်ပန်း သွင်ပြင်တစ်ခုအဖြစ် သင် ထင်မြင်လျှင်၊ သင်သည် ဝိညာဉ်ရေးရာ သိနားလည်မှုမရှိသကဲ့သို့ သမ္မာတရားက မည်သည့်အရာဖြစ်သည်ကို သင် မသိပေ။ ဘုရားသခင်၏ နှုတ်ကပတ်တော်များသည် သမ္မာတရားဖြစ်သည်။ ဘုရားနှုတ်ကပတ်တော်များ၏ လေးနက်မှုကို လူတို့ခံစား၍ ရနိုင်သည်။ ဘုရားနှုတ်ကပတ်တော်များက မည်သို့လေးနက်သနည်း။ ဘုရားသခင်၏ နှုတ်ကပတ်တော်တိုင်းသည် လူတို့၏ ဖောက်ပြန်ပျက်စီးသော စိတ်သဘောထားများကို ဖော်ထုတ်ပြီး သူတို့၏ အသက်တာများအတွင်း ပဓာနကျပြီး နက်နက်ရှိုင်းရှိုင်း အမြစ်တွယ်သော အကြောင်းအရာတို့ကို ဖော်ထုတ်သည်။ ၎င်းတို့သည် ပဓာနကျသောအရာများဖြစ်ပြီး၊ အပြင်ပန်း သွင်ပြင်များ မဟုတ်သကဲ့သို့ အထူးသဖြင့် အပြင်ပန်း အပြုအမူများ မဟုတ်ပေ။ လူတို့ကို ၎င်းတို့၏ အပြင်ပန်း သွင်ပြင်များမှ ရှုမြင်သည့်အခါ၊ ၎င်းတို့အားလုံး သည် လူကောင်းများဖြစ်သည်ဟု ထင်ရသည်။ သို့ဆိုလျှင် လူအချို့သည် ဆိုးညစ်သော ဝိညာဉ်ဆိုးများဖြစ်ပြီး အချို့မှာ ညစ်ညူးသော ဝိညာဉ်များဖြစ်သည်ဟု ဘုရားသခင်က အဘယ်ကြောင့် ပြောပါသနည်း။ ဤသည်မှာ သင်အဖို့ မြင်သာသော ကိစ္စရပ်တစ်ခုမဟုတ်ပေ။ ထို့ကြောင့် လူသား အယူအဆများ၊ စိတ်ကူးများအရ သို့မဟုတ် လူသား တစ်ဆင့်စကားအရ၊ ဧကန်မုချ အာဏာရ ပါတီ၏ ထုတ်ပြန်ချက်များအရ ဘုရားသခင်၏ နှုတ်ကပတ်တော်များကို သဘောမထားရပေ။ ဘုရားသခင်၏ နှုတ်ကပတ်တော်တစ်ခုတည်းသာ သမ္မာတရားဖြစ်သည်။ လူသား၏ စကားများသည် အတွေးမှားခြင်းသာ ဖြစ်သည်။ ထိုသို့ မိတ်သဟာယပြုခံရပြီးနောက်၊ ဘုရားသခင်၏ နှုတ်ကပတ်တော်များအပေါ် သင်တို့၏ သဘောထား၌ ပြောင်းလဲမှုတစ်ခုကို သင်တို့ တွေ့ကြုံပြီးပြီလော။ အပြောင်းအလဲက မည်မျှ ကြီးမားသည်ဖြစ်စေ သေးငယ်သည်ဖြစ်စေ၊ လူတို့ကို တရားစီရင်ပြီး ဖော်ထုတ်သော ဘုရားသခင်၏ နှုတ်ကပတ်တော်များကို နောက်တစ်ကြိမ် သင်တို့ ဖတ်ရှုသည့်အခါတွင်၊ သင်သည် အနည်းဆုံး ဘုရားသခင်ကို အကျိုးသင့်အကြောင်းသင့် ပြောဆိုဖို့ မကြိုးစားသင့်ပေ။ သင်က၊ “ဘုရားသခင်၏ နှုတ်ကပတ်တော်ဖွင့်ပြမှုများသည် တကယ်ကိုပြင်းထန်သည်။ ဤကျမ်းပိုဒ်ကို ငါ ဖတ်မည်မဟုတ်။ ယင်းကို ကျော်သာကျော်လိုက်မည်။ ကိုယ်စိတ်ချမ်းသာမှုအချို့ တွေ့ရှိဖို့ ဖတ်ရှုရန် ကောင်းချီးမင်္ဂလာများနင့် ကတိတော်များနှင့်ပတ်သက်သည့် တစ်စုံတစ်ရာကို ရှာပါရစေ။” ဟုပြောဆိုပြီး ဘုရားသခင်အကြောင်း ညည်းညူခြင်းကို ရပ်တန့်သင့်သည်။ ဘုရားနှုတ်ကပတ်တော်ကို သင်၏ ကိုယ်ပိုင်လိုအင်ဆန္ဒများအတိုင်း စိတ်ကြိုက်ရွေး၍ မဖတ်သင့်တော့ပေ။ ဘုရားနှုတ်ကပတ်တော်များ၏ သမ္မာတရား၊ တရားစီရင်ခြင်း၊ ပြစ်တင်ဆုံးမခြင်းတို့ကို သင်လက်ခံရမည်။ ထိုအခါမှသာ သင်၏ ဖောက်ပြန်ပျက်စီးသော စိတ်သဘောထားက သန့်စင်ခြင်းကို ခံရနိုင်သည်။ ထိုအခါမှသာ ကယ်တင်ခြင်းကို သင်ရရှိနိုင်သည်။

ဘုရားနှုတ်ကပတ်တော်များအားလုံးက သမ္မာတရားဖြစ်သည်ကို သင်တို့ ယခု သိရှိကြပြီး၊ သမ္မာတရား လိုက်စားရန် လိုလားနေကြသော်လည်း၊ ဘုရားနှုတ်ကပတ်တော်များနှင့် ပတ်သက်ရာတွင် သင်တို့၌ သင်တို့ကိုယ်ပိုင် နှစ်သက်မှုများနှင့် ရွေးချယ်မှုများ ရှိနေကြဆဲဖြစ်ကာ သင်၏ ကိုယ်ပိုင် အလိုဆန္ဒအတိုင်း သင် ပြုမူဆောင်ရွက်လိမ့်ဦးမည် ဖြစ်သည်။ သင်တို့သည် ကတိတော်၊ ကောင်းချီးနှင့်ဆိုင်သော ဘုရားနှုတ်ကပတ်တော်များကို ဖတ်ရှုရန် အလိုလားဆုံးဖြစ်ပြီး၊ ဘုရားသခင်၏ ကတိတော်များနှင့်ဆိုင်သည့် နှုတ်ကပတ်တော်များကို သင် အထူးသဖြင့် မှတ်မိလိမ့်မည် ဖြစ်သည်။ ဤကဲ့သို့သော နှုတ်ကပတ်တော်များကို ဖတ်ရသည်ကို သင် ကိုယ်စိတ်ချမ်းသာခံစားရလိမ့်မည် သို့မဟုတ် မျှော်လင့်ချက် အနည်းငယ် သင် ခံစားရလိမ့်မည်ဖြစ်ပြီး၊ ဘုရားသခင်ကို ယုံကြည်ရန် ခွန်အားနှင့် စိတ်လှုံ့ဆော်မှု ရှိသေးသည်ကို တွေ့ရလိမ့်မည်။ သို့ရာတွင် သင်သည် လူတို့ကို တရားစီရင်ပြီး ထုတ်ဖော်ပြသည့် ဘုရားနှုတ်ကပတ်တော်များကို ဖတ်ရှုရန် လိုလားနေခြင်း မရှိပေ။ အဘယ်ကြောင့်ဆိုသော် အကြင်သူက လူတို့ကို ထုတ်ဖော်ပြပြီး တရားစီရင်ကာ ပြစ်တင်ဆုံးမသည့် ဘုရားနှုတ်ကပတ်တော်များကို အမြဲ ဖတ်ရှုလျှင်၊ စိတ်ဓာတ်ကျကာ ဘုရားသခင်ကို ယုံကြည်ရန် ခွန်အားလျော့သွားလိမ့်မည် ဖြစ်သောကြောင့်ဖြစ်သည်။ ထို့ကြောင့် အကြင်သူသည် အဘယ်သို့ ရှေ့ဆက်နိုင်မည်နည်း။ ယနေ့ခေတ်တွင်၊ နက်နဲမှုများကို ထုတ်ဖော်ပြသည့် ဘုရားနှုတ်ကပတ်တော်များကို လူအများစုက နားမလည်နိုင်ကြပေ။ ထိုနှုတ်ကပတ်တော်များက အလွန်နက်နဲကြောင်းနှင့် ကောင်းချီးနှင့်ဆိုင်သည့် နှုတ်ကပတ်တော်များကို ၎င်းတို့ အလှမ်းမမီကြောင်း ခံစားကြသည်။ လူ၏ ဖောက်ပြန်ပျက်စီးသော စိတ်သဘောထားကို ထုတ်ဖော်ပြသည့် ဘုရားနှုတ်ကပတ်တော်များကို ဖတ်ရှုသည့်အခါ၊ ထိုအရာများထဲမှ အချို့ကို ၎င်းတို့ နားလည်နိုင်ပြီး၊ ထိုနှုတ်ကပတ်တော်များကို မိမိတို့ကိုယ်တိုင်နှင့် ဆက်စပ်နိုင်ကြကာ၊ ထိုနှုတ်ကပတ်တော်များက သမ္မာတရားဖြစ်သည်ကို ၎င်းတို့၏ စိတ်နှလုံးများတွင် ဝန်ခံနိုင်ကြလျှင်ပင်၊ ထိုနှုတ်ကပတ်တော်များကို လက်ခံရန် မလိုမလား ရှိနေကြဆဲဖြစ်သည်။ လူတို့ အဘယ်မျှ ဒုက္ခပေးတတ်သည်ကို သင် မြင်ပြီလော။ ဘုရားနှုတ်ကပတ်တော်က သမ္မာတရားဖြစ်ကြောင်းကို ၎င်းတို့ သိကြသော်လည်း၊ ထိုအရာကို လက်ခံရန် မလိုမလား ရှိနေကြဆဲဖြစ်သည်။ ကောင်းချီးများကို ၎င်းတို့ ရရှိလိုကြသော်လည်း၊ ထိုကောင်းချီးများကို မရရှိနိုင်ကြသေးပေ။ ထို့ကြောင့် ဘုရားနှုတ်ကပတ်တော်ကို အကြင်သူက မည်သို့ မှန်ကန်စွာ စားသောက်သင့်သနည်း။ ဦးစွာပထမ၊ နက်နဲမှုများကို ထုတ်ဖော်ပြသည့် ဘုရားနှုတ်ကပတ်တော်များကို ပိုမို ဖတ်ရှုသင့်သည်။ ထိုသို့သော နှုတ်ကပတ်တော်များကို ဖတ်ရှုသည့်အခါ၊ ဘုရားသခင်က တတိယကောင်းကင်တွင်ရှိပြီး၊ မြင့်မြတ်ကြောင်းနှင့် ဘုရားသခင်ကို ကြောက်ရွံ့သည့် စိတ်နှလုံးရှိသင့်ကြောင်းတို့ကို အကြင်သူက ခံစားရသည်။ ထို့နောက် ၎င်းတို့က၊ “အို ဘုရားသခင်၊ ကိုယ်တော်သည် အလွန် ကြီးမြတ်ပါ၏။ ကိုယ်တော်သည် အကြီးမြင့်ဆုံးဖြစ်ပါ၏။ ကိုယ်တော်သည် အရာခပ်သိမ်းအပေါ် အချုပ်အခြာအာဏာရှိပြီး၊ ကျွန်ုပ်၏ ကံကြမ္မာကို ဆုံးဖြတ်ပေးနိုင်ပါသည်။ ကျွန်ုပ်အနီးအနားတွင် ဖြစ်ပျက်ရန် ကိုယ်တော် စီစဉ်သည့်အရာအားလုံးကို ကျိုးနွံနာခံရန် ကျွန်ုပ် လိုလားနေပါသည်”ဟု ဆုတောင်းကြသည်။ ဤသို့ ဆုတောင်းရင်း၊ လူတို့သည် ဘုရားသခင်အပေါ် ကြောက်ရွံစိတ်အချို့ ရှိကြလိမ့်မည်။ လူတို့သည် မြင့်မားသည့် ဘုရားသခင်ကို ယုံကြည်ရန် လိုလားနေကြသောကြောင့် ဘုရားနှုတ်ကပတ်တော်များကို မစားသောက်မီတွင်၊ ပထမဆုံးအဆင့်မှာ ဘုရားသခင်က လူတို့ကို ကောင်းကင်မှ စကားပြောနေကြောင်း သေချာစေရန်ဖြစ်ပြီး၊ လူတို့သည် ဘုရားနှုတ်ကပတ်တော်များကို ဖတ်ရှုရန် လိုလားနေလိမ့်မည်ဖြစ်ကာ အယူအဆများ ရှိတတ်ခြင်းက နည်းသွားလိမ့်မည်ဖြစ်သည်။ ဒုတိယခြေလှမ်းမှာ စားသောက်ရန် ဘုရားသခင်၏ ကတိတော်များ၊ ကောင်းချီးများနှင့်ဆိုင်သည့် နှုတ်ကပတ်တော်အချို့ကို ရှာဖွေရန်ဖြစ်သည်။ ဘုရားနှုတ်ကပတ်တော်များက လူကို ကောင်းချီးပေးခြင်းအား တွေ့မြင်သည့်အခါ၊ လူတို့သည် အလွန် စိတ်လှုပ်ရှားလာကြသည်မှာ၊ “အို ဘုရားသခင်၊ ကိုယ်တော် အလွန် ချစ်ဖွယ်ပါတကား။ ကိုယ်တော်သည် ကျွန်ုပ်တို့၏ ကိုယ်ကွယ်မှုနှင့် အလွန် ထိုက်တန်ပါသည်။ ကျွန်ုပ်တို့အတွက် ကိုယ်တော်၌ရှိသည့် ကောင်းချီးများကို လက်ခံရန် ကျွန်ုပ်တို့ လိုလားနေပြီး၊ ကျွန်ုပ်တို့ကို ကိုယ်တော် ပေးပြီးသည့် ကတိတော်များကို လက်ခံရန် သာ၍ပင် လိုလားနေကြပါသည်။ ကျွန်ုပ်တို့ ယခု ဝိညာဉ်ရင့်ကျက်မှု သေးငယ်ပြီး မကြီးထွားသေးခြင်းသာဖြစ်သည်။ ကိုယ်တော်၏ ကတိတော်များနှင့် ကောင်းချီးများကို ရရှိရန် အရည်အချင်းများ ကင်းမဲ့ကြပြီး၊ ကျွန်ုပ်တို့ကို သာ၍ ထောက်ပံ့ပေးဖို့ တောင်းလျှောက်အသနားခံပါ၏”ဟု ဆိုလျက်၊ စတင် ငိုကြွေးကြသည်။ ဘုရားသခင်၏ ကောင်းချီးများနှင့်ဆိုင်သည့် နှုတ်ကပတ်တော်များကို ဖတ်ခြင်းက အဘယ်မျှကောင်းလိုက်ပါသနည်း။ ထို့နောက် ၎င်းတို့က၊ “သို့ဆိုလျှင် မည်သည့် ကောင်းချီးမျိုးများ ရှိသနည်း။ အချိန်ကျလာသည့်အခါ၊ မည်သည့် ကပ်ဘေးမျှ လူသားအပေါ် ကျရောက်လိမ့်မည်မဟုတ်ကြောင်း၊ လူသည် တစ်နေ့ အစာသုံးနပ်စားခြင်း၊ အဝတ်လျှော်ခြင်း၊ သန့်ရှင်းရေးလုပ်ခြင်းတို့နှင့်ဆိုင်သော အနှောင့်အယှက်များမှ ကင်းလွတ်လိမ့်မည်။ ဤကဲ့သို့သော ကတိများကို ဘုရားသခင် ပြောဆိုပြီးဖြစ်သည်”ဟု တွေးဆကြသည်။ အကြင်သူက ဖတ်ရှုလေ၊ စိတ်လှုပ်ရှားလေဖြစ်သည်။ သို့သော် သင့်အနေဖြင့် မည်မျှ စိတ်ထက်သန်သည်ဖြစ်စေ၊ သမ္မာတရားကို လိုက်စားရန် မမေ့နှင့်။ တတိယအဆင့်မှာ လူသားမျိုးနွယ်၏ ဖောက်ပြန်ပျက်စီးသော စိတ်သဘောထားနှင့် အနှစ်သာရတို့ကို ထုတ်ဖော်ပြသည့် ဘုရားနှုတ်ကပတ်တော်များကို ဖတ်ရှုရန် ဖြစ်သည်။ ဤအရာနှင့် ပတ်သက်လာသည့်အခါ၊ အကြိမ်တိုင်းတွင် များစွာ စားသောက်ရန် မလိုအပ်ပေ။ တစ်ကြိမ်တွင် တစ်ခု သို့မဟုတ် နှစ်ခု စားသောက်ခြင်းက လုံလောက်သည်။ စားသောက်ပြီးနောက်တွင်၊ သင် နားမလည်သည့်အရာများ၊ သင်နှင့် ဆက်စပ်မရနိုင်သည့် အရာများကို ဘေးဖယ်ထားပြီး၊ သင်နှင့် ဆက်စပ်၍ရသည့်အရာများကို သေချာစွာ တွေးဆေလော့။ ပြီးလျှင် သင်၏ အခြေအနေကို သင် တဖြည်းဖြည်း သိရှိလာလိမ့်မည်။ သင်၏ ဖောက်ပြန်ပျက်စီးသော စိတ်သဘောထားကို သင် အမှန်တကယ် သဘောပေါက်ပြီး ပိုများသည်ထက်များသည့် သမ္မာတရားများကို နားလည်ပြီးဖြစ်သည့်အခါ၊ သင်၏ ကိုယ်ပိုင် သဘာဝ အနှစ်သာရကို မရည်ရွယ်ဘဲ ရိပ်စားမိနိုင်လိမ့်မည်ဖြစ်သည်။ ဤသည်မှာ ကောင်းသည်ဟု သင်တို့ တွေးထင်ကြသလော။ ထိုအရာက ကလေးတစ်ဦးကို ဆေးသောက်စေသည့်အခါနှင့် တူသည်။ အရင်ဆုံး သူ့ကို ချော့ရန် အရသာရှိသည့်အရာတစ်ခုခုကို သင် ပေးသည်။ ထို့နောက်၊ သူ အာရုံစိုက်မနေချိန်တွင်၊ ဆေးတစ်ငုံစာကို သူအား သင် ပေးလိုက်လေသည်။ ခါးသည်ကို သူ သိလျှင်၊ သူ့ကို ချော့ဖို့ သကြားလုံးနှစ်လုံး သင် ထပ်ပေးလိုက်ပြီး သူ၏ ဆေးကို သူ သောက်လိမ့်မည်ဖြစ်သည်။ သို့သော် သူ ကြီးပြင်းလာသည့်အခါ၊ ဤသည်မှာ မလိုအပ်တော့ပေ။ သူသည် ဆေးကို မည်မျှခါးကြောင်း အပြည့်အဝ သိရှိလျက်၊ မိမိဆန္ဒအလျောက် သောက်လေသည်။ ဤသည်မှာ ဝိညာဉ်ရင့်ကျက်မှုနှင့် သက်ဆိုင်သည်။ သင်သည် ဝိညာဉ်ရင့်ကျက်မှု ကင်းမဲ့လျှင်၊ ဘုရားနှုတ်ကပတ်တော်များရှိ လူ၏ ဖောက်ပြန်ပျက်စီးသော သဘာဝကို ထုတ်ဖော်ပြပြီး သမ္မာတရားနှင့် ဆက်စပ်သည့် ထိုစကားများကို ရှာဖွေပြီး၊ ယင်းတို့နှင့် သင့်ကိုယ်သင် ယှဉ်ကြည့်ရန် စေခိုင်းခြင်းခံရလိမ့်မည်ဖြစ်သည်။ ပြီးလျှင် တစ်နေလုံး ဤနှုတ်ကပတ်တော်များကို သင့်အား စားသောက်စေလျှင် ရေရှည်တွင် သင် ငြီးငွေ့လိမ့်မည်။ အဘယ့်ကြောင့်ဆိုသော် သင်၏ အတွေ့အကြုံတွင် ထိုအရာများ အကျုံးဝင်ခြင်း မရှိသကဲ့သို့ ထိုအရာကို မမီသောကြောင့် ဖြစ်သည်။ ထို့ကြောင့်၊ ထိုအရာ၏ အလယ်တွင် အပေါ်ယံရွှေမှုန်ကြဲခြင်းနှင့် ဆင်တူသည့် အရာတစ်ခုခုကို သင် ဖြည့်စွက်ရမည်ဖြစ်ကာ ဝိညာဉ်ရင့်ကျက်မှု သေးငယ်သည့်သူများက ဤသို့ဖြင့် ဘုရားနှုတ်ကပတ်တော်များကို စားသောက်နိုင်ကြလိမ့်မည်ဖြစ်သည်။ သင်သည် မကြာခဏ အားနည်းပြီး မတက်မကြွဖြစ်ကာ စစ်မှန်သည့် ယုံကြည်ခြင်း သို့မဟုတ် မျှော်လင့်ခြင်းမရှိလျှင်၊ ဘုရားသခင်၏ ကောင်းချီးများ၊ ကတိတော်များနှင့် ပတ်သက်သည့် နှုတ်ကပတ်တော်အချို့ကို အမြန် စားသောက်သင့်ပြီး၊ နက်နဲမှုများကို ဘုရားသခင် ထုတ်ဖော်ပြသည့် နှုတ်ကပတ်တော်များကို စားသောက်ရန် ရှာဖွေသင့်သည်။ သင်၏ ခွန်အား တိုးပွားနေပြီး ဘုရားသခင်နှင့် သင်၏ ဆက်ဆံရေး သာ၍ ရင်းနှီးလာသည်ကို သင် ခံစားရလျှင်၊ သင့်အနေဖြင့် မိုးရွာတုန်း ရေခံသင့်ပြီး၊ ပြစ်တင်ဆုံးမခြင်း၊ တရားစီရင်ခြင်းတိုနှင့် ပတ်သက်သည့် နှုတ်ကပတ်တော်များကို စားသောက်ရန် ရှာသင့်သည်။ ဤသို့ဖြင့် စားသောက်ခြင်းက သာ၍ လွယ်ကူစွာ အကျိုးသက်ရောက်လိမ့်မည်ဖြစ်ပြီး၊ အသက်တာ၏ ကြီးထွားမှုကို သင် နှောင့်နှေးစေလိမ့်မည် မဟုတ်။ သင်သည် ဝိညာဉ်ရင့်ကျက်မှု သေးငယ်လျှင် ဘုရားနှုတ်ကပတ်တော်များကို စားသောက်သည့်အခါ၊ ကောင်းမွန်သည့် စိတ်အခြေအနေတွင် မိမိကိုယ်ကို ရှိစေရန်နှင့် လျှင်မြန်စွာ ကြီးထွားရန် စားသောက်ခြင်း၊ သင် အလှမ်းမီနိုင်သည့်အတွင်းတွင်ရှိသောအရာကို စားသောက်ခြင်းနှင့် မရှိသည့်အရာကို ဘေးဖယ်ထားခြင်းအပြင်၊ စားသောက်ခြင်းမှ သင် နားလည်ပြီးဖြစ်သည့်အရာကို လက်တွေ့လုပ်ဆောင်ကာ တွေ့ကြုံရန် ကြိုးစားခြင်းတည်းဟူသော ပြင်ဆင်ချက်များ မည်သို့ ပြုလုပ်ရမည်ကို သင် သိရှိရမည်။ သင် နားလည်သည့် ဘုရားနှုတ်ကပတ်တော်များနှင့် သမ္မာတရားတို့အား မည်သို့ လက်တွေ့လုပ်ဆောင်ရမည်ကို သင် သိရှိသရွေ့၊ ဘုရားသခင်ကို ယုံကြည်ခြင်းနှင့်ဆိုင်သည့် မှန်ကန်သည့် လမ်းကြောင်းထဲသို့ သင် ဝင်ရောက်နိုင်လိမ့်မည်။

တစ်စုံတစ်ဦးက ဤကဲ့သို့သော တစ်စုံတစ်ရာ ပြောဆိုသည်ကို ငါ ပြန်အမှတ်ရမိသည်။ ဘုရားသခင်က ကမ္ဘာမြေကို စွန့်ခွာမည့်အချိန်ကို လေ့လာရန် အလွန်အားထုတ်ခဲ့သည့် လူတစ်ဦးရှိသည်။ ဤကြီးမားသည့် အားထုတ်မှုက ထိုအကြောင်းကို နေ့ရောညပါ စဉ်းစားခြင်းမဟုတ်။ ထို့ထက်၊ ထိုအရာမှာ ဘုရားသခင်ကို သူ စတင်ယုံကြည်သည့်အချိန်မှစ၍ သူ ပူပန်သည့် ကိစ္စတစ်ခု ဖြစ်သည်။ မှန်ကန်တိကျသည့် အဖြေတစ်ခု ရှာတွေ့ရန်အလို့ငှာ၊ ဘုရားသခင်က ကမ္ဘာမြေကို မည်သည့်အချိန်တွင် စွန့်ခွာမည်၊ မည်သည့် နိမိတ်များရှိမည်ဆိုသည်နှင့် အသင်းတော်ရှိ လူတို့က မည်သို့ တုံ့ပြန်မည်ဟူသကဲ့သို့သော ဘုရားသခင်၏ ထွက်ခွာခြင်းနှင့် ပတ်သက်သည့် နှုတ်ကပတ်တော်များအားလုံးကို သူ စုစည်းခဲ့သည်။ ထို့နောက် သမ္မာကျမ်းစာ ကျမ်းကိုးတစ်အုပ်မှ အကြံဉာဏ်ရယူသည့်အလား၊ ပြည့်စုံသော စိစစ်မှုကို ပြုလုပ်ရင်းနှင့် တစ်ခုပြီးတစ်ခု၊ အပြန်အပြန်အလှန်လှန် ယှဉ်ကြည့်ရင်း၊ ထိုအရာများကို တစ်စိမ့်စိမ့် ချင့်ချိန်လေသည်။ ဤသည်မှာ ကြီးမားသည့် အားထုတ်မှုတစ်ခု မဟုတ်ခဲ့သလော။ ဤလူသည် ဘုရားသခင်ကို အဘယ်မျှ အရေးစိုက်ပြီး ဘုရားသခင်အတွက် ချစ်ခြင်းမေတ္တာ အဘယ်မျှ ရှိလိုက်လေသနည်း။ ကမ္ဘာမြေမှ ဘုရားသခင်၏ ထွက်ခွာခြင်းသည် ဘုရားသခင်၏ အမှုတော်တွင် အလွန်အရေးပါသည့် ဖြစ်ရပ်တစ်ခုဖြစ်ပြီး၊ ထိုအရာကို သူ သိရှိသည့်အခါ၊ အရေးအကြီးဆုံးသောအရာအဖြစ် သဘောထားလေသည်။ ကယ်တင်ခြင်း ရရှိရန် သူ၏ သမ္မာတရား လိုက်စားခြင်းထက် သာ၍ အရေးကြီးပြီး၊ ဘုရားနှုတ်ကပတ်တော်များရှိ သမ္မာတရားနှင့်ဆိုင်သော အရာတစ်ခုတလေကို ရှာဖွေခြင်းထက် သာ၍ အရေးကြီးလေသည်။ ထို့ကြောင့်၊ သူသည် ထိုနှုတ်ကပတ်တော်များအားလုံးကို အတူတကွ စုစည်းပြီး နောက်ဆုံးတွင် “အဖြေ”ကို ရှာတွေ့သွားခဲ့သည်။ သူ၏ ရှာဖွေမှု ရလဒ်များ၏ တိကျမှန်ကန်မှုကို ဘေးဖယ်ထားလျက်၊ ဘုရားသခင်၌ ယုံကြည်ခြင်း လိုက်စားမှု၊ ထိုယုံကြည်ခြင်းကို သူ လိုက်စားပုံတို့နှင့်ပတ်သက်၍ ဤလူစားမျိုး၏ အမြင်များကို သင် မည်သို့ တွေးထင်ပါသနည်း။ သူ ထားရှိသည့် အားထုတ်မှုသည် လိုအပ်သလော။ ထိုသို့သော ကြိုးစားလုပ်ဆောင်မှုကို အားထုတ်ခြင်းက အဓိပ္ပာယ်မရှိပေ။ ကမ္ဘာမြေမှ ဘုရားသခင်၏ ထွက်ခွာမှုသည် သင်နှင့် အဘယ်ပတ်သက်မှု ရှိပါသနည်း။ ဘုရားသခင်သည် သူ၏ ကြွလာခြင်းကို သင့်အား အကြောင်းမကြားခဲ့သောကြောင့် သူ ထွက်သွားမည့်အချိန်ကိုလည်း သင့်ကို သိခွင့်ပေးမည်မဟုတ်ပေ။ လူတို့ကို ဘုရားသခင် သိခွင့်မပေးသည့်အရာများစွာရှိပြီး၊ ထိုအရာအတွက် အကြောင်းရင်းမှာ အဘယ်နည်း။ အကြောင်းရင်းမှာ လူတို့အတွက် သိရှိရန် မလိုအပ်သကဲ့သို့ ၎င်းတို့ သိရှိလျှင်၊ ၎င်းတို့အတွက် ထိုအရာက အကျိုးရှိမည်မဟုတ်ဘဲ ၎င်းတို့၏ အနာဂတ် ခရီးပန်းတိုင်များတွင် မည်သည့် ကဏ္ဍတွင်မျှ ထိုအရာက ပါဝင်လိမ့်မည် မဟုတ်ပေ။ ထို့ကြောင့် လူတို့အတွက် သိရှိရန် မလိုအပ်ပေ။ ယခု ဘုရားသခင်က လူ့ဇာတိခံယူပြီးဖြစ်သဖြင့်၊ သူသည် သမ္မာတရားနှင့် အရာခပ်သိမ်းတို့၏ နက်နဲမှုများနှင့် သွင်ပြင်လက္ခဏာများအားလုံးကို သိရှိပြီး၊ လူတို့ကို သူ ပြောပြနိုင်သော်လည်း၊ လူတို့ သိရှိရန် မလိုအပ်သကဲ့သို့ ၎င်းတို့ကို ပြောပြရန် တစ်ခုတလေမျှ မလိုအပ်သည့် အရာအချို့ ရှိသည်။ ဘုရားသခင်က ကမ္ဘာမြေမှ ထွက်ခွာသည့်အခါ သို့မဟုတ် သူ၏ အမှုတော်ကို သူ အဆုံးသတ်သည့်အခါ ထိုအရာသည် လူသားအပေါ် ဆက်စပ်မှုတစ်ခုတလေ ရှိသလော။ အကြင်သူက ဘာဆိုဘာမျှ မဆက်စပ်ပါဟု ပြောနိုင်သည်။ လူအချို့က၊ “အဘယ်သို့ အရေးမကြီးရလေသနည်း။ သမ္မာတရားကို လိုက်စားရန် ကျွန်ုပ်အတွက် အလွန်နောက်ကျသွားလျှင် ကျွန်ုပ် အဘယ်အရာ လုပ်ဆောင်မည်နည်း။ ဘုရားသခင်၏ နေ့ရက်ကာလထဲမှ အချိန်မည်မျှ ကျန်သည်ကို ကျွန်ုပ် ကြည့်ရမည်ဖြစ်ပြီး၊ သမ္မာတရားကို ကျွန်ုပ် မလိုက်စားမီအချိန်ထိကို ကျွန်ုပ် သေချာအောင်လုပ်ရမည်”ဟု ပြောဆိုကြသည်။ ထိုသို့သော လူတစ်ဦးသည် မိုက်မဲသလော။ ၎င်းသည် သမ္မာတရားကို လိုက်စားသူတစ်ဦး ဖြစ်သလော။ လုံးဝ မဟုတ်။ လူတစ်ဦးသည် သမ္မာတရားကို အမှန်တကယ် လိုက်စားလျှင်၊ ဤအကြောင်းကို ၎င်းတို့ ဂရုစိုက်ကြလိမ့်မည် မဟုတ်သကဲ့သို့၊ ဤအရာများကို စိတ်ဝင်စားရန် ဆန္ဒရှိကြလိမ့်မည် မဟုတ်ပေ။ ဤအရာများကို အရေးစိုက်ခြင်းသည် သမ္မာတရား လိုက်စားရာတွင် အထောက်အကူမဖြစ်သကဲ့သို့ မည်သည့် အရေးပါမှုမျှမရှိကြောင်း ၎င်းတို့ တွေးထင်ကြသောကြောင့်၊ ဤငြီးငွေ့ဖွယ် အကြောင်းအရာများကို ၎င်းတို့ မတွေးချင်ကြသလို၊ အားထုတ်ရန် လိုလားခြင်း မရှိကြပေ။ လူအချို့သည် ဘုရားသခင်၏ နေ့ရက်က မည်သည့်အချိန်တွင် ရောက်လာလိမ့်မည့်အကြောင်းကို ယခင်ထက် ပူပန်ကြသော်လည်း၊ ဤသည်မှာ ကိုယ်ရေးကိုယ်တာ လုပ်ငန်းစဉ်တစ်ခု ဖြစ်သည် မဟုတ်လော။ ဘုရားသခင်၏ နေ့ရက် မည်သည့်အချိန်တွင် ရောက်ရှိမည်ဆိုသည့်အပေါ် အဆက်မပြတ် သင်၏ ပူပန်ခြင်းသည် ဘုရားသခင်ကို သင် ချစ်ကြောင်း သက်သေပြသလော။ သင်သည် ဘုရားသခင်၏ အလိုတော်ကို လုပ်ဆောင်သော လူတစ်ဦးဖြစ်ကြောင်း ထိုအရာက သက်သေပြသလော။ ဘုရားသခင်အတွက် သင် သက်သေခံကြောင်း သက်သေပြနိုင်သလော။ ဘုရားသခင်၏ နိုင်ငံတော် ဧဝံဂေလိတရား တိုးချဲ့ခြင်းအတွက် သင် ပံ့ပိုးပြီးဖြစ်ကြောင်းကို ထိုအရာက သက်သေပြနိုင်သလော။ ကောင်းသော လုပ်ဆောင်ချက်များကို သင်၏ ပြင်ဆင်ခြင်းက အခြေအနေအဘယ်သို့ရှိသနည်း။ သမ္မာတရား မည်မျှကို သင် နားလည်ပြီးပြီနည်း။ မည်သည့် သမ္မာတရား စစ်မှန်မှုများထဲသို့ သင် ဝင်ရောက်ပြီးပြီနည်း။ ဤသည်တို့မှာ သင် အပူပန်သင့်ဆုံးသောအရာများဖြစ်သည်။ သင်သည် ဘုရားသခင်၏ သတင်းကို အမြဲမေးမြန်းနေသည်၊ အတင်းအဖျင်း အနည်းငယ်ကို အမြဲ သိချင်နေသည်၊ နက်နဲမှု အနည်းငယ်ကို အမြဲ သဘောပေါက်ချင်နေသည်။ သိုရာတွင် ဤသည်မှာ စူးစမ်းချင်စိတ်ပြင်းပြသော စိတ်နှလုံးတစ်ခုသာဖြစ်ပြီး၊ သမ္မာတရားကို လိုက်စားသည့် စိတ်နှလုံး သို့မဟုတ် ဘုရားသခင်ကို အလေးထားပြီး စိတ်နှလုံးတစ်ခု မဟုတ်သကဲ့သို့၊ ဘုရားသခင်ကို ကြောက်ရွံ့သည့်စိတ်နှလုံးတစ်ခု သာ၍ မဟုတ်ပေ။ နက်နဲမှုများကို သိနားလည်ခြင်းအား သင်၏ လိုက်စားမှုသည် သမ္မာတရား လိုက်စားမှုနှင့် အနည်းငယ်မျှ ဆက်စပ်ခြင်းမရှိပေ။ ဤလူစားမျိုးများကို မည်သို့ သဘောထားသင့်သနည်း။ ၎င်းတို့ကို သင် လေးစားသလော။ ၎င်းတို့ကို သင် အားကျသလော။ ၎င်းတို့ကို သင် မနာလိုဖြစ်သလော။ ထိုသို့သော နက်နဲမှုများကို ၎င်းတို့အား သင် ကူရှာပေးမည်လော။ ကူရှာပေးမည်မဟုတ်၊ “ကျွန်ုပ်တို့သည် သမ္မာတရားကို လိုက်စားရာတွင်၊ ဘုရားသခင်ကို သိကျွမ်းရာတွင် မတော်ကြသေးပါ။ မည်သည့်အရာကိုမျှ ကျွန်ုပ်တို့ စွမ်းဆောင်ရရှိခြင်း မရှိသေးပါ။ ရှာရမည့်၊ နားလည်ရမည့်၊ ပြီးလျှင် လက်တွေ့လုပ်ဆောင်ရမည့် သွင်ပြင်လက္ခဏာတိုင်းနှင့်ဆိုင်သော သမ္မာတရားများက စောင့်ဆိုင်းနေသည်။ ထို့ကြောင့် ထိုသို့သော နက်နဲမှုများကို လေ့လာရန် ကျွန်ုပ်တို့အတွက် အားထုတ်ဖို့ မလိုအပ်ပါ”ဟု ဆိုလျက်၊ ၎င်းတို့ကို သင် သေချာပေါက် အထင်သေးပေမည်။ အမှန်တွင်၊ သင်သည် သင်၏ စိတ်နှလုံးတွင် ဘုရားသခင် ရှိပြီး သမ္မာတရားကိုလိုက်လိုသည့် ဆန္ဒရှိသရွေ့၊ အချိန်ကျလာသည့်အခါ၊ ဘုရားသခင်သည် သင့်ကို မသိနားလည်မှုဖြင့် ချန်ထားရစ်လိမ့်မည် မဟုတ်ပေ။ ဘုရားသခင်က သင့်ကို စွန့်ပစ်လိမ့်မည် မဟုတ်။ ဤသည်မှာ သင် ရှိသင့်သည့် ယုံကြည်ခြင်းနှင့် သိနားလည်ခြင်းဖြစ်သည်။ သင့်ထံတွင် ဤယုံကြည်ခြင်းနှင့် သိနားလည်ခြင်းတို့ရှိလျှင်၊ မိုက်မဲသည့်အရာ မည်သည့်အရာကိုမျှ သင် လုပ်ဆောင်လိမ့်မည် မဟုတ်။ ဘုရားသခင်က သင့်ကို ပြောပြရန် ရည်ရွယ်ခဲ့လျှင်၊ ထိုအရာကို သူက တိုက်ရိုက်မပြောဘဲနေမည်လော။ ဝေ့လည်ကြောင်ပတ်လုပ်ရန် တစ်ခုတလေ လိုအပ်မည်လော။ စကားလုံးများကို စကားဝှက်လုပ်ရန် တစ်ခုတလေ လိုအပ်မည်လော။ သိုသိပ်ရန် လိုအပ်မှုတစ်ခုတလေ ရှိမည်လော။ လုံးဝ မရှိပေ။ လူတို့အား သိခွင့်ပေးရန် ဘုရားသခင် ရည်ရွယ်သည့်အရာမှာ သမ္မာတရားဖြစ်သည်။ သူ၏ အမှုတော်၊ စကားများနှင့် အလိုတော်က ဖော်ပြသည့်အရာတိုင်းသည် သမ္မာတရားဖြစ်ပြီး၊ ထိုအရာများကို လူတို့ထံမှ သူ လုံးဝ ကွယ်ဝှက်လိမ့်မည် မဟုတ်ပေ။ ထို့ကြောင့်၊ ဘုရားသခင်က လူတို့ကို မသိစေချင်သည့်အရာများအကြောင်းကို မေးမြန်းရန် သင့်အတွက် မလိုအပ်သကဲ့သို့၊ ထိုအရာများကို အချိန်ယူ စဉ်းစားရန်လည်း မလိုအပ်ပေ။ အကြောင်းမှာ ထိုအရာများထဲသို့ သင် ထားရှိသည့် အားထုတ်မှုပမာဏသည် အချည်းနှီးဖြစ်လိမ့်မည်ဖြစ်ပြီး၊ လုံးဝ တန်ဖိုးရှိလိမ့်မည် မဟုတ်ဘဲ ဘုရားသခင်အတွက် စက်ဆုပ်စရာ ဖြစ်လိမ့်မည်ဖြစ်သောကြောင့် ဖြစ်၏။ အဘယ်ကြောင့် ဘုရားသခင်အတွက် စက်ဆုပ်စရာဖြစ်လိမ့်မည်နည်း။ ဦးစွာပထမ၊ ဘုရားသခင်က သမ္မာတရားများစွာကို ဖော်ပြပြီးဖြစ်ကြောင်းနှင့် သမ္မာတရာများကို နေရာအားလုံးတွင် ဖော်ပြထားကြောင်းကို သင် နားလည်ရမည်။ သင့်ထံ အမှုအရာများ ဖြစ်ပျက်သည့်အခါ သင်၏ ကိုယ်ပိုင် စစ်မှန်သော ပြဿနာများကို ပြုပြင်ရန် သမ္မာတရားကို သင် မရှာဖွေလျှင်၊ သင်သည် သမ္မာတရားကို ချစ်သောသူ မဟုတ်။ သင်သည် အလွန်အကျွံ သိချင်စိတ်ပြင်းပြသော လူတစ်ဦး၊ ချစ်တီးခေါင်း သန်းရှာလုပ်ချင်သော လူတစ်ဦး၊ ဘုရားနှုတ်ကပတ်တော်များကို သင့်တင့်လျောက်ပတ်သည့် လေးစားမှုနှင့်မဟုတ်ဘဲ ဝတ်ကျေတမ်းကျေ ပုံစံတစ်ခုဖြင့် အမြဲ သဘောထားသော လူတစ်ဦးဖြစ်သည်။ သင်သည် ဘုရားသခင်အတွက် သင်၏ စိတ်နှလုံးတွင် နေရာမရှိ။ သင်၏ စိတ်နှလုံးတွင် ရှိသမျှမှာ ဘုရားသခင် နေထိုင်သည့်နေရာ၊ တတိယကောင်းကင်က မည်သည့်အရာနှင့်တူပြီး၊ မည်သည့်နေရာတွင် ထိုအရာက အမှန်တကယ် ရှိသည်၊ အနာဂတ်နိုင်ငံတော်က မည်သည့်အရာနှင့်တူလိမ့်မည်ဆိုသည်နှင့် မည်သည့်အချိန်တွင် ဘုရားသခင်၏ လူ့ဇာတိခံယူခြင်းက ကမ္ဘာမြေကို စွန့်ခွာလိမ့်မည်ဆိုသကဲ့သို့သော သင့်ကို ဘုရားသခင် မသိစေချင်သည့်အရာအနည်းငယ် ဖြစ်ပေသည်။ ထို့ကြောင့် ဘုရားသခင်က သင့်ကို စက်ဆုပ်သည်ဟု ငါပြော၏။ သင့်ကို စက်ဆုပ်ရန် ဘုရားသခင်အတွက် အကြောင်းပြချက်တစ်ခုခု ရှိသလော။ (ရှိပါသည်။) သင်၏ သားသမီးများက တစ်နေ့လုံး စာမလေ့လာသကဲ့သို့ ၎င်းတို့ လုပ်ရမည့် အိမ်စာများ မလုပ်ဘဲ၊ ထိုအစား၊ “ငါ၏ ဖခင်နှင့် မိခင်တို့က အဘယ်သို့ ဆုံခဲ့ကြသနည်း။ သူတို့က ငါ့ကို အဘယ်သို့ မွေးဖွားခဲ့ကြသနည်း။ ငါ မွေးပြီးသည့်နောက်တွင်၊ သူတို့ ငါ့ကို နှစ်သက်ခဲ့ကြသလော။ ငါ၏ မိသားစုသည် အနာဂတ်တွင် မည်သို့ တွေ့ကြုံရလိမ့်မည်နည်း။ ဥစ္စာဓနငါတို့ ရှာနိုင်ကြလိမ့်မည်လော”ဟူသော မေးခွန်းများကို အချိန်ယူစဉ်းစားနေသည် ဆိုပါစို့။ ဤမေးခွန်းများကိုသာ ၎င်းတို့ အမြဲ လေ့လာနေကြလျှင်၊ ထိုသို့သော ကလေးတစ်ဦးကို သင် သဘောမကျဖြစ်မည်လော။ သင်၏ သားသမီးများက ဤအရာ လုပ်ဆောင်သည်ကို သင် စက်ဆုပ်မည်လော။ သင်၏ သားသမီးများက မည်သည့်အရာ လုပ်ဆောင်ဖို့ သင် နှစ်သက်မည်နည်း။ ကောင်းစွာ ဖတ်တတ်၊ ရေးတတ်ဖို့ သင်ယူရန်နှင့် စာကြိုးစားရန် ဖြစ်သည်။ ဤသည်မှာ သင်၏ သားသမီးများအတွက် သင်၏ ရည်ရွယ်ချက်ဖြစ်သည်။ ထို့ကြောင့် လူအတွက် ဘုရားသခင်၏ ရည်ရွယ်ချက်မှာ အဘယ်နည်း။ လူက မှန်ကန်သည့် လမ်းကြောင်းလျှောက်ကာ သင့်တင့်လျောက်ပတ်သည့် အလုပ်ကို လုပ်ဖို့ကို အဘယ်သို့ ဘုရားသခင်က သာ၍ပင် မနှစ်သက်ဘဲ နေနိုင်မည်နည်း။ လူတို့အနေဖြင့် သူ့အား လေ့လာမည်ကို သို့မဟုတ် သူ၏ စကားနှင့် လုပ်ရပ်တိုင်းကို တိတ်တဆိတ် အမြဲ လေ့လာနေမည်ကို သို့မဟုတ် သူနှင့်ပတ်သက်၍ အဓိပ္ပာယ်မဲ့သည့် အချိန်နှင့် အားထုတ်မှုတို့ကို အသုံးပြုကြမည်ကို ဘုရားသခင် မနှစ်သက်ပေ။ များစွာသောသူတို့မှာ ဘုရားသခင်၏ နေ့ရက် မည်သည့်အချိန်တွင် ရောက်လာမည်ကို အမြဲ လေ့လာနေကြသူများဖြစ်သည်။ ၎င်းတို့သည် ဘုရားသခင်ကို ၎င်းတို့၏ စိတ်နှလုံးများတွင် သံသယရှိကာ အတိုက်အခံလုပ်နေကြခြင်း မဟုတ်လော။ ဘုရားသခင် ဖော်ပြသည့် သမ္မာတရားများစွာကို လူက တန်ဖိုးမထားသကဲ့သို့ လိုက်လည်းမလိုက်စားခြင်း၏ ပြဿနာမှာ အဘယ်နည်း။ ဘုရားတရားကိုင်းရှိုင်းသည့် လူတစ်ဦးသည် သမ္မာတရားကို ရှာဖွေပြီး အရာခပ်သိမ်းတွင် ဘုရားသခင်၏ စိတ်နှလုံးကို ခံစားရကာ ဘုရားနှုတ်ကပတ်တော်များကို ဖတ်ရှုပြီးနောက်တွင် ယင်းတို့က သမ္မာတရားဖြစ်ကြောင်းနှင့် လက်တွေ့လုပ်ဆောင်ကာ နာခံသင့်ကြောင်း ၎င်းတို့ သေချာနိုင်ကြသည်။ ဘုရားနှုတ်ကပတ်တော်က သမ္မာတရားဖြစ်သည်ကို မယုံကြည်သောသူတို့သာ ဘုရားသခင်ကို လေ့လာကြလိမ့်မည်ဖြစ်သည်။ ဤလူများသည် မိမိတို့၏ ဝတ္တရားများနှင့် မိမိတို့ကိုယ်ပိုင် တာဝန်များကို တစ်စက်မျှ အရေးမစိုက်ကြပေ။ ထိုအရာများကို ၎င်းတို့ လုံးဝ အာရုံမစိုက်ကြသကဲ့သို့၊ ယင်းတို့အတွက် အားထုတ်မှုတစ်ခုတလေမျှ မလုပ် သို့မဟုတ် မည်သည့်အဖိုးအခမျှ မပေးကြပေ။ ထိုအစား၊ မည်သည့်အချိန်တွင် ဘုရားသခင်က ကမ္ဘာမြေကို စွန့်ခွာမည်၊ မည်သည့်အချိန်တွင် ဘုရားသခင်က ကပ်ဘေးများ စေလွှတ်မည်ဆိုသည်နှင့် ဘုရားသခင်၏ နေ့ရက်မတိုင်မီ အချိန်မည်မျှ ကြာလိမ့်မည်ဟူသကဲ့သို့သော အရာများအကြောင်းနှင့် “ကမ္ဘာမြေကို သူ စွန့်ခွာပြီးနောက်တွင် ဘုရားသခင်က ငါတို့နှင့် ဆုံတွေ့လိမ့်ဦးမည်လော။ ကမ္ဘာမြေကို စွန့်ခွာပြီးနောက်တွင် ဘုရားသခင်၏ အမှုတော်သည် ဤသို့ ဖြစ်လိမ့်မည်လော။ ကမ္ဘာမြေကို ဘုရားသခင် စွန့်ခွာပြီးနောက်တွင်၊ တတိယကောင်းကင်၌ အချိန်မည်မျှကြာ သူ နေလိမ့်မည်နည်း။ သူ ပြန်လာလိမ့်မည်လော။ အနာဂတ် နိုင်ငံတော်ခေတ်တွင် ကောင်းကင်တမန်များ ရှိလိမ့်မည်လော။ ကောင်းကင်တမန်များက လူတို့နှင့် ဆက်ဆံကြသလော”ဟူသကဲ့သို့သော ထူးဆန်းသည့် မေးခွန်းများကို အမြဲ ပူပန်ကြသည်။ ဤအကြောင်းအရာမျိုးများကို စဉ်ဆက်မပြတ် လေ့လာနေသည့် လူတို့ကို ဘုရားသခင် စက်ဆုပ်သည်။ သို့ဆိုလျှင် လူက မည်သည့်အရာကို အာရုံစိုက်သင့်သနည်း။ လူ့ဇာတိခံ ဘုရားသခင်ကို မည်သို့ သိရှိရမည်၊ ဘုရားသခင်၏ အမှုတော်ကို မည်သို့ သိရှိရမည်ဆိုသည်နှင့် ဘုရားသခင် ပြောဆိုပြီးသည့် နှုတ်ကပတ်တော်တိုင်းအား မည်သို့ လက်ခံရရှိရမည်ဆိုသည်တို့ ဖြစ်သည်။ ဤသည်တို့မှာ လူ၏ တာဝန်များဖြစ်ပြီး၊ လူတို့ နားလည်သင့်ပြီး ဝင်ရောက်သင့်သည့် ပထမဆုံးသောအရာများ ဖြစ်သည်။ ဤသမ္မာတရားများကို နားလည်ပြီး ဝင်ရောက်ရန် သင် မကြိုးစားလျှင်၊ ဘုရားသခင်ကို သင်၏ ယုံကြည်မှုက အဓိပ္ပာယ်မဲ့ပေသည်။ စစ်မှန်သည့် အကြောင်းအရာမရှိသည့် အနှစ်မဲ့သော ဆောင်ပုဒ်တစ်ခုသာဖြစ်သည်။ သင်သည် နက်နဲသည့်အရာများနှင့် ကမ္ဘာမြေကို ဘုရားသခင် စွန့်ခွာမည့်အချိန်နှင့် ဆက်စပ်သောအရာများကို အမြဲ တိတ်တဆိတ် တွေးဆနေလျှင် သို့မဟုတ် ဘုရားသခင်၏ ဇာတိခန္ဓာက မည်သည့်နေရာတွင် မွေးဖွားသည်၊ မည်သည့် မိသားစုအမျိုးအစားထဲသို့ သူ မွေးဖွားသည်၊ သူ့တွင် မည်သည့် မိသားစုနောက်ခံမျိုးရှိသည်၊ မည်သည့်ဘဝမျိုး ရှိသည်၊ သူ မည်သည့် အသက်အရွယ်ရှိသည်၊ မည်သည့် ပညာရေးမျိုး သူ ရှိခဲ့သည်၊ ဘုရားသခင်ကို သူ ယုံကြည်ခြင်း ရှိမရှိ၊ ကျမ်းစာကို သူ ဖတ်ဖူးခြင်း ရှိမရှိဆိုသည်နှင့် ယေရှုကို သူ အချိန်မည်မျှကြာ ယုံကြည်ခဲ့သည်၊ စသည်တို့ကို သင်တို့ကိုယ်တိုင်ကြားထဲတွင် အမြဲ ပြောဆိုနေကြလျှင်၊ ဤအရာများကို သင်တို့ အမြဲ လေ့လာနေလျှင်၊ သင်တို့သည် ဘုရားသခင်ကို ဝေဖန်နေခြင်းဖြစ်ကာ ဘုရားသခင်၏ ဇာတိခန္ဓာကို ပြစ်မှားစော်ကားနေကြခြင်း ဖြစ်သည်။ သင့်အနေဖြင့် ဘုရားသခင်၏ စိတ်နှလုံးကို သိနိုင်ရန်၊ သူ့ကို နာခံနိုင်ရန်နှင့် သူ့ကို စိတ်ကျေနပ်စေဖို့ သမ္မာတရားကို လက်တွေ့လုပ်ဆောင်နိုင်ရန်အလို့ငှာ၊ ဘုရားသခင်က သင့်အား သူ၏ စိတ်သဘောထားနှင့် အနှစ်သာရတို့ကို သိရှိစေချင်သည်။ သူသည် သင့်အား သူ့ကို လ့လာခွင့်မပြုသကဲ့သို့ သူ့နောက်ကွယ်တွင် သူ့အကြောင်းကို ဆွေးနွေးခွင့်မပေးပေ။ ထို့ကြောင့် ဘုရားသခင်၏ လူ့ဇာတိခံယူခြင်းနှင့် ဘုရားသခင့် အမှုတော်၏ ဤအဆင့်ကို ငါတို့ လက်ခံပြီးဖြစ်သကဲ့သို့၊ ခရစ်တော်ကို ငါတို့အသက်နှင့် ငါတို့ ဘုရားသခင်အဖြစ် လက်ခံပြီးဖြစ်သည့်အတွက်၊ ဘုရားသခင်ကို ကြောက်ရွံ့သည့်စိတ်နှလုံးတစ်ခု ငါတို့ ရှိသင့်ပြီး၊ ဘုရားသခင်၏ ပိုင်ဆိုင်မှုများနှင့် ဖြစ်တည်မှုအပြင်၊ သူ လူ့ဇာတိခံယူပြီးဖြစ်သည့် ဇာတိခန္ဓာတို့ကို ဘုရားတရားကိုင်းရှိုင်းသည့် သဘောထားဖြင့် ဆက်ဆံသင့်ကြပေသည်။ ဤသည်မှာ ငါတို့ ရှိသင့်သည့် အသိစိတ်နှင့် လူ့သဘာဝဖြစ်သည်။ ယခုတွင် ဘုရားသခင်နှင့်ဆိုင်သည့် မည်သည့် အသိမျှမရှိဟု သင် ခံစားရလျှင်၊ ထိုအကြောင်းကို မပြောနှင့်။ ထိုအရား မိမိကိုယ်ကို သိရှိခြင်းအကြောင်း၊ သမ္မာတရားအား မည်သို့ လိုက်စားရမည်ဆိုသည်နှင့် သင်၏ တာဝန်များကို ကောင်းစွာ မည်သို့ ထမ်းဆောင်ကာ သင့်ကိုယ်သင် ဤသမ္မာတရား သွင်ပြင်လက္ခဏာများဖြင့် ပြင်ဆင်ရမည်ဆိုသည့်အကြောင်းကို ပြောလော့။ တစ်နေ့၊ သင့်ထံတွင် ဘုရားသခင်နှင့်ဆိုင်သည့် စစ်မှန်သည့် အသိပညာအချို့ရှိသည့်အလား သင် ခံစားရသည့်အခါ၊ သင် အတူတကွ မိတ်သဟာယပြုနိုင်ပေသည်။ သို့ရာတွင် ဘုရားသခင်၏ လူ့ဇာတိခံ ခန္ဓာ သို့မဟုတ် မသိရှိရသည့် နက်နဲမှုအချို့နှင့်စပ်လျဉ်းသည့် သတင်းအချက်အလက်အကြောင်းကို ပြောဆိုရန် မကြိုးပမ်းနှင့်။ အကြောင်းမှာ သင်သည် ဘုရားသခင်၏ စိတ်သဘောထားကို အလွယ်တကူ ပုန်ကန်ပြစ်မှားမိနိုင်သောကြောင့်ဖြစ်သည်၊ ဘုရားသခင်၏ ရှုတ်ချခြင်းခံရကာ ပြစ်မှားစော်ကားသောသူတစ်ဦး ဖြစ်လာနိုင်ပြီး၊ သန့်ရှင်းသော ဝိညာဉ်တော်က သင့်ကို စွန့်ပစ်နိုင်သောကြောင့်ဖြစ်သည်။ ဤသည်မှာ သင် ရှင်းလင်းစွာ သိမြင်သင့်သည့် ကိစ္စရပ်တစ်ခု ဖြစ်သည်။ သမ္မာတရား လိုက်စားခြင်းကို ဘုရားသခင်အား အမြဲ လေ့လာခြင်းနှင့် အတင်းအဖျင်းစကားများကို အမြဲမေးမြန်းခြင်းဖြင့် အစားထိုး၍ရနိုင်သလော။ ထိုအရာက သင့်အား ဘုရားသခင်ကို သိရှိစေနိုင်သလော။ သင်သည် ဤအရာများကို ရှင်းလင်းစွာ မမြင်နိုင်လျှင်၊ အလွန် မိုက်မဲပြီး မသိနားမလည်သည့် လူတစ်ဦး ဖြစ်သည် မဟုတ်လော။

သမ္မာတရား လိုက်စားခြင်းက အတိအကျ မည်သည့်အရာဖြစ်သည်ကို လူတို့ နားလည်ရမည်။ လူတို့ကို ကယ်တင်ရန် သမ္မာတရားများစွာကို ဘုရားသခင်က အဘယ်ကြောင့် ဖော်ပြသနည်း။ ဘုရားသခင်သည် လူတို့အား အလွန်များသည့် သမ္မာတရားများကို နားလည်ရန် အဘယ်ကြောင့် တောင်းဆိုသနည်း။ အကြင်သူသည် ဤသမ္မာတရားများကို နားမလည်လျှင်၊ မိမိ၏ ဖောက်ပြန်ပျက်စီးသော စိတ်သဘောထားကို ပြုပြင်နိုင်သလော။ ဤသမ္မာတရားများကို နားမလည်ဘဲနှင့် ဘုရားသခင်ကို သိရှိနိုင်သလော။ အကြင်သူက ဘုရားသခင်ကို မသိလျှင်၊ ဘုရားသခင်ကို နာခံမှု စွမ်းဆောင်ရရှိနိုင်သလော။ အကြင်သူသည် ဘုရားသခင်ကို ကိုးကွယ်နိုင်သလော။ ဤသမ္မာတရားအားလုံး ဆက်စပ်မှုရှိပေသည်။ ဤသမ္မာတရားများကို သိနားလည်ခြင်းမရှိဘဲနှင့် အကြင်သူသည် ကယ်တင်ခြင်းကို အဘယ်သို့ ရရှိနိုင်သနည်း။ ဤသမ္မာတရားများကို နားလည်ရန် လွယ်ကူသလော။ တရားစီရင်ခြင်းနှင့် ပြစ်တင်ဆုံးမခြင်းတို့ကို တွေ့ကြုံခြင်းမရှိဘဲ သမ္မာတရားသိနားလည်မှုကို စွမ်းဆောင်ရရှိနိုင်သလော။ ပြုပြင်ခြင်းနှင့် ကိုင်တွယ်ဖြေရှင်းခြင်းများကို တွေ့ကြုံခြင်းမရှိဘဲ မိမိကိုယ်ကို သိရှိနိုင်သလော။ မိမိကိုယ်ကို သိရှိခြင်းမရှိဘဲ စစ်မှန်သည့် နောင်တ ရှိနိုင်သလော။ စစ်မှန်သည့် နောင်တမရှိဘဲ ကယ်တင်ခြင်းကို စွမ်းဆောင်ရရှိနိုင်သလော။ ဤသမ္မာတရားအားလုံးမှာ ဘုရားသခင်ကို ယုံကြည်သူများက နားလည်သင့်သည့် သမ္မာတရားများဖြစ်ပြီး၊ ကယ်တင်ခြင်းကို စွမ်းဆောင်ရရှိရန်အလို့ငှာ နားလည်ရမည့် သမ္မာတရားများဖြစ်သည်။ သင်၏ ဘုရားသခင်၌ ယုံကြည်မှုသည် အမြဲ မရေမရာဖြစ်ပြီး၊ သမ္မာတရားကို သင် လိုက်စားနေခြင်းမရှိခဲ့လျှင်၊ ဘုရားသခင်ကို ယုံကြည်ခြင်း၏ အဓိပ္ပာယ်ကို သင် ဆုံးရှုံးပြီးဖြစ်လိမ့်မည်။

၂၀၀၇ ခုနှစ်၊ ဆောင်းဦးရာသီ