ဘုရားသခင်သည် လူသားအပေါ် မည်သို့လုပ်ဆောင်သနည်း။ ဤသည်ကို သင်နားလည်သလော။ ယင်းမှာ ရှင်းသလော။ ဤသည်ကို အသင်းတော်၌မည်သို့ပြုသနည်း။ သင်မည်သို့ထင်သနည်း။ ဤမေးခွန်းများကို သင်စဉ်းစားဖူးသလော။ အသင်းတော်၌ သူ၏အလုပ်မှတစ်ဆင့် မည်သည်ကိုအထမြောက်ရန် သူမျှော်လင့်သနည်း။ ယင်းတို့အားလုံး ရှင်းလင်းပြီလော။ မရှင်းသေးပါက သင်ပြုသမျှသည် အချည်းနှီးဖြစ်၏၊ ပျက်ပြယ်၏။ ဤနှုတ်ကပတ်တော်တို့သည် သင်၏နှလုံးသားကို တို့ထိသလော။ ဘုရားသခင်၏ဆန္ဒ အထမြောက်ရန် လိုအပ်သည့်အရာအားလုံးမှာ မိမိမှစတင်ဆောင်ရွက်သည့် တိုးတက်မှုသာဖြစ်၍ အပျက်သဘောမဆောင်ခြင်းနှင့် နောက်မဆုတ်ခြင်းတို့သာလော။ မျက်ကန်းတောတိုး ပူးပေါင်းဆောင်ရွက်ခြင်းသည် လုံလောက်သလော။ ရူပါရုံအကြောင်း မရေရာမှု ဖုံးအုပ်နေခြင်းတစ်ရပ် ရှိနေသေးပါက သင်မည်သို့လုပ်ဆောင်သင့်သနည်း။ ရှာဖွေခြင်းမပြုပါက ကောင်းသလော။ ဘုရားသခင်က “တစ်ခါတုန်းက ငါသည် လူသားတို့အကြားတွင် မဟာလုပ်ငန်းကြီးတစ်ခုကို ဆောင်ရွက်ခဲ့ဖူးသည်၊ သို့သော်လည်း၊ ၎င်းတို့သည် သတိမပြုမိခဲ့ကြပေ၊ ထို့ကြောင့် ထိုသူတို့ကို ယင်းအရာအား ဖွင့်ပြရန် ငါ၏ နှုတ်ကပတ်တော်ကို အသုံးပြုခဲ့ရသည်။ သို့သော်လည်း လူသားသည် ငါ၏နှုတ်ကပတ်တော်များကို နားမလည်နိုင်ဘဲ ရှိနေကြတုန်းပင်ဖြစ်ပြီး၊ ငါ့အစီအစဉ်၏ ရည်ရွယ်ချက်နှင့် ပတ်သက်၍ အသိခေါက်ခက် အဝင်နက်လျက် ရှိခဲ့ကြတုန်းပင်ဖြစ်၏” ဟုပြော၏။ ဤသည်မှာ အဘယ်အရာကို ဆိုလိုသနည်း။ ယင်း၏ရည်ရွယ်ချက်ကို သင်စဉ်းစားဖူးသလော။ ဘုရားသခင်သည် ရည်ရွယ်ချက်ကင်းမဲ့စွာနှင့် ဆင်ကန်းတောတိုးသာ ပြုလုပ်သလော။ ထိုသို့ဖြစ်ပါက မည်သည့် အကျိုးရှိသနည်း။ ရည်ရွယ်ချက် မရှင်းပါက၊ ထို့အပြင် လူသားသည် နားမလည်ပါက၊ ၎င်းတို့သည် မည်သို့စစ်မှန်စွာ ပူးပေါင်းဆောင်ရွက်နိုင်သနည်း။ လူတို့၏လိုက်စားမှုများသည် အတားအဆီးမဲ့သော ပင်လယ်များတွင် အနှစ်သာရမဲ့သောစကားများနှင့် အယူဝါဒများအတွင်းရှိ၏ဟု ဘုရားသခင်က ဆိုသည်။ သင်တို့သည် သင်တို့၏လိုက်စားမှုများ မည်သည့်အတန်းအစားတွင် ပါဝင်သည်ကိုပင် သင်တို့ မပြောနိုင်ကြပေ။ ဘုရားသခင်သည် လူသား၌ မည်သည်ကို အထမြောက်လိုသနည်း။ သင်တို့သည် ဤသည်အားလုံးအပေါ် ရှင်းသင့်သည်။ ဤသည်မှာ အဆင်းနီသောနဂါးကြီးကို အပျက်သဘောဆောင်သောကဏ္ဍမှ အရှက်ရစေရန်အတွက်သာလော။ အဆင်းနီသောနဂါးကြီးကို အရှက်ရစေပြီးနောက် ဘုရားသခင်သည် လက်ချည်းသက်သက် ရသေ့တစ်ပါးအဖြစ်သာ နေမည်များ ဖြစ်နိုင်သလော။ ထိုသို့ဆိုလျှင် ဘုရားသခင်လိုချင်သည့်အရာမှာ မည်သည်နည်း။ သူသည် လူသားတို့၏နှလုံးသားကို အကယ်စင်စစ်ပင် လိုချင်သလော။ သို့မဟုတ် ၎င်းတို့၏ဘဝများကိုလော။ သို့မဟုတ် ၎င်းတို့၏ကြွယ်ဝချမ်းသာမှုနှင့် ပိုင်ဆိုင်မှုများကိုလော။ ၎င်းတို့သည် မည်သို့အသုံးကျသနည်း။ ၎င်းတို့သည် ဘုရားသခင်အတွက် အသုံးမကျပေ။ ဘုရားသခင်သည် စာတန်အပေါ် အနိုင်ရခြင်း၏ အထောက်အထားအဖြစ် လူသားကို အသုံးပြုနိုင်ရန်နှင့် သူ၏တန်ခိုးကို ပြသနိုင်ရန်အတွက်သာ လူသား၌ များစွာဆောင်ရွက်ခဲ့ခြင်းလော။ ဤသည်မှာ ဘုရားသခင်အား သေးနုပ်ပုံ မပေါ်စေဘူးလော။ ဘုရားသခင်သည် အကယ်စင်စစ်ပင် ဤသို့သောဘုရားမျိုးလော။ လူကြီးများအား စိတ်တိုအောင်ပြုနေသော ကလေးတစ်ဦးကဲ့သို့လော။ ဤသည်မှာမည်သည့်အဓိပ္ပာယ်ရှိသနည်း။ လူသားသည် သူ၏ကိုယ်ပိုင်အယူအဆများအားဖြင့် ဘုရားသခင်အား အစဉ်စစ်ဆေးခဲ့၏။ တစ်ချိန်က ဘုရားသခင်မှ “တစ်နှစ်တွင် လေးရာသီရှိပြီး ရာသီတစ်ခုစီအတွက် သုံးလရှိသည်” ဟု ပြောခဲ့၏။ လူသားသည် နားထောင်၍ သူ၏နှုတ်ကပတ်တော်တို့ကို မှတ်မိကာ ရာသီတစ်ခုလျှင် သုံးလနှင့် တစ်နှစ်လျှင် လေးရာသီရှိသည်ဟု ဆက်၍ပြော၏။ ထို့နောက် ဘုရားသခင်က “တစ်နှစ်လျှင် ရာသီပေါင်းမည်မျှရှိသနည်း။ ရာသီတစ်ခုလျှင် လပေါင်းမည်မျှ ရှိသနည်း” ဟု မေးသောအခါ လူသားက တညီတညွတ်တည်း “လေးရာသီ၊ သုံးလ” ဟု ဖြေ၏။ လူသားသည် စည်းကမ်းအစုံများကို အခြေခံ၍ ဘုရားသခင်အပေါ် အဓိပ္ပာယ်သတ်မှတ်ရန် အစဉ်ကြိုးစား၏။ ယခုအခါ “တစ်နှစ်သုံးရာသီ၊ တစ်ရာသီလေးလ” ခေတ်တွင် လူသားသည် အရာခပ်သိမ်းတွင် စည်းမျဉ်းများကို ရှာဖွေရင်း မျက်စိကန်းသွားသည့်အလား သတိမမူဘဲရှိနေသည်။ ယခု လူသားသည် သူ၏စည်းကမ်းများကို ဘုရားသခင်အပေါ် ကျင့်သုံးရန် ကြိုးပမ်းလျက်ရှိသည်။ ၎င်းတို့သည် စစ်မှန်စွာပင် မျက်စိကန်းနေကြသည်။ ယခုအခါ “ဆောင်းရာသီ” မရှိ “နွေဦးရာသီ၊ နွေရာသီနှင့် ဆောင်းဦးရာသီ” တို့သာ ရှိသည်ကို ၎င်းတို့ မမြင်သလော။ လူသားသည် အမှန်တကယ်ပင် မိုက်မဲသည်တကား။ လက်ရှိအနေအထားတွင် လူသားသည် ဘုရားသခင်အား မည်သို့သိကျွမ်းရမည်ကို မသိဆဲဖြစ်၏။ ထိုသူတို့သည် ၁၉၂၀ ခုနှစ်များက လူတို့ကဲ့သို့ပင်ဖြစ်၏။ ထိုသူတို့သည် သယ်ယူပို့ဆောင်ရေးသည် အဆင်မပြေဟုထင်သဖြင့် လမ်းလျှောက်ကြ၏၊ သို့မဟုတ် မြည်းစီးကြ၏၊ သို့မဟုတ် ထိုသူတို့သည် ဆီမီးများ အသုံးပြုသင့်သည် သို့မဟုတ် ရှေးကျသော အသက်ရှင်နေထိုင်ပုံများကို အသုံးပြုသင့်သည်ဟု ထင်ကြ၏။ ဤသည်တို့အားလုံးသည် လူသား၏စိတ်များမှ အယူအဆများ မဟုတ်သလော။ ထို့ကြောင့် အကြင်နာနှင့် မေတ္တာအကြောင်း ယနေ့အဘယ်ကြောင့် ဆက်လက် ပြောနေသေးသနည်း။ ဤသည်မှာ မည်သည့်အကျိုးရှိသနည်း။ မိမိ၏အတိတ်အကြောင်း ပြန်ပြောနေသည့် တောင်စဉ်ရေမရပြောနေသော အဖွားအိုတစ်ဦးကဲ့သို့ ဤစကားများသည် မည်သည့်အကျိုးရှိသနည်း။ စင်စစ်မူကား ပစ္စုပ္ပန်သည် ပစ္စုပ္ပန်ဖြစ်၏၊ နာရီကို အနှစ် ၂၀ သို့မဟုတ် ၃၀ ပြန်လှည့်၍ရနိုင်သလော။ လူတို့သည် အများနည်းတူ အမြဲလိုက်လုပ်ကြ၏၊ ၎င်းတို့အနေဖြင့် ဤသည်ကို သိမှတ်ရန် အဘယ်ကြောင့် ခက်ခဲလွန်းလှသနည်း။ ဤလက်ရှိပြစ်တင်ဆုံးမမှုခေတ်တွင် အကြင်နာနှင့် မေတ္တာအကြောင်း ဤပြောဆိုချက်များအားလုံးသည် မည်သည့်အကျိုးရှိသနည်း။ ဘုရားသခင်သည် အကြင်နာနှင့် မေတ္တာချည်းဖြစ်သကဲ့သို့လော။ ဤ “ဂျုံနှင့်ဆန်” ခေတ်တွင် လူတို့သည် “အခွံချွတ်ထားသည့် နှံစားပြောင်းများနှင့် အလေ့ကျပေါက်သော ဟင်းသီးဟင်းရွက်များ”^က သာ အဘယ်ကြောင့် အစဉ်ကျွေးသနည်း။ ဘုရားသခင်သည် လိုလိုလားလား မရှိပေ၊ သို့သော် လူသားသည် သူ့အား အတင်းအကျပ် ဖိနှိမ်၏။ သူခုခံခဲ့သည်ရှိသော် သူသည် “တန်ပြန်တော်လှန်ရေးသမား” တစ်ဦးအဖြစ် အမည်တပ်ခံရမည်ဖြစ်ပြီး၊ ဘုရားသခင်သည် ပင်ကိုအားဖြင့် ကြင်နာသူ သို့မဟုတ် ချစ်ခင်သောသူမဟုတ်ကြောင်း ထပ်တလဲလဲပြောခဲ့သော်လည်း မည်သူနားထောင်မည်နည်း။ လူသားသည် ရယ်ဖွယ်ကောင်းလွန်း၏။ ဘုရားသခင်၏ နှုတ်ကပတ်တော်သည် ထိရောက်မှုရှိပုံမရပေ။ လူသားတို့သည် ငါ၏နှုတ်ကပတ်တော်တို့ကို ကွဲပြားသောအမြင်ဖြင့် အစဉ်မြင်၏။ ဘုရားသခင်သည် လူတို့၏အနိုင်ကျင့်ခြင်းကို အစဉ်ခံရပြီး အပြစ်ကင်းသူများသည် အခြေအမြစ်မရှိသော စွပ်စွဲချက်များနှင့် ရင်ဆိုင်ရပုံပေါက်၏၊ ဘုရားသခင်၏ သဘောထားနှင့်အညီ မည်သူလုပ်ကိုင်မည်နည်း။ သင်တို့သည် ဘုရားသခင်၏ကရုဏာနှင့် ချစ်ခင်ကြင်နာမှု၌ နေထိုင်ရန် အစဉ်လိုလိုလားလားရှိသဖြင့် ဘုရားသခင်အတွက် လူသား၏ စော်ကားမှုများကို သည်းခံဖို့မှလွဲ၍ လုပ်ဆောင်ဖို့ မည်သည့်အရာ ရှိပါသနည်း။ သို့သော် သင်တို့သည် ဘုရားသခင်နှင့် အငြင်းအခုံမပြုမီ သန့်ရှင်းသောဝိညာဉ်တော် မည်သို့လုပ်ကိုင်သည်ကို သိရှိအောင် ပြုလုပ်နိုင်မည်ဟု ငါမျှော်လင့်၏။ သို့ရာတွင် ဘုရားသခင်၏ နှုတ်ကပတ်တော်၏ မူရင်းအဓိပ္ပာယ်ကို သင်နားလည်ရန် ငါတိုက်တွန်း၏။ မိမိကိုယ်ကိုမိမိ တော်သည်ဟု သင်မထင်နှင့်၊ ထို့အပြင် ဘုရားသခင်၏ နှုတ်ကပတ်တော်တွင် မသန့်ရှင်းသည့်အရာများပါသည်ဟု မထင်လေနှင့်။ ဤသည်မှာ မလိုအပ်ပေ။ ဘုရားသခင်၏နှုတ်ကပတ်တော်တွင် “မသန့်စင်မှု” မည်မျှရှိသည်ကို မည်သူပြောနိုင်သနည်း။ ဘုရားသခင်မှ တိုက်ရိုက်မပြောမချင်း သို့မဟုတ် ရှင်းလင်းစွာ ညွှန်ပြမှုမပြုမချင်း မည်သူမျှမပြောနိုင်ပေ။ သင့်ကိုယ်သင် လွန်စွာအထင်မကြီးလေနှင့်။ သင်သည် သူ၏နှုတ်ကပတ်တော်များမှ လက်တွေ့ကျင့်သုံးခြင်း၏လမ်းကြောင်းကို တွေ့နိုင်ပါက သင်သည် သတ်မှတ်ချက်များနှင့် ပြည့်စုံ၏။ သင်သည် အခြားမည်သည့်အရာကို တွေ့ချင်သနည်း။ “လူသား၏အားနည်းချက်အတွက် ငါသည် အကြင်နာတစ်စုံတစ်ရာ မရှိတော့ပေ” ဟု ဘုရားသခင်ပြော၏။ ဤကွဲပြား၍ ရိုးရှင်းသောနှုတ်ကပတ်တော်များကိုပင် အနက်အဓိပ္ပာယ်ကောက်၍မရသောကြောင့် ရှေ့ဆက်၍ သုတေသနပြုလုပ်ခြင်းနှင့် စုံစမ်းစစ်ဆေးခြင်းမှာ မည်သည့်အဓိပ္ပာယ်ရှိသနည်း။ စက်နှင့်ဆိုင်သော အခြေခံအသိပညာပင်မရှိဘဲ လူသားသည် ဒုံးပျံတစ်စင်းကို တည်ဆောက်ရန် မည်သို့အရည်အချင်းမီနိုင်မည်နည်း။ ၎င်းသည် ဝါကြွားခြင်းကိုနှစ်သက်သူ တစ်စုံတစ်ဦးသာလျှင် မဟုတ်လော။ လူသားသည် ဘုရားသခင်၏အမှုကို ဆောင်ရွက်ရန် အရည်အချင်းမမီပေ၊ ဘုရားသခင်က ၎င်းတို့ကို ဂုဏ်တင်ချီးကျူးခြင်းသာဖြစ်၏။ သူမည်သည်ကို ချစ်သည်၊ မည်သည်ကို မုန်းသည်ကိုမသိဘဲ သူ့ကို အစေခံနေခြင်းသာဖြစ်၏။ ဤသည်မှာ ဘေးဒုက္ခအတွက် နည်းနာတစ်ရပ်ပင် မဟုတ်သလော။ လူသားတို့သည် ၎င်းတို့ကိုယ်ကို နားမလည်သော်လည်း ၎င်းတို့သည် ထူးကဲသည်ဟု ထင်ကြ၏။ ၎င်းတို့သည် မိမိတို့ကိုယ်ကို မည်သူဟုထင်ကြသနည်း။ ၎င်းတို့သည် အကောင်းနှင့်အဆိုးအကြား ကွဲပြားမှုကို အမှန်စင်စစ်ပင် မျက်စိကန်းနေကြသည်။ အတိတ်ကို ပြန်စဉ်းစားကာ အနာဂတ်ကို ကြို၍ကြည့်လော့။ သင်မည်သို့ထင်သနည်း။ ထို့နောက် သင့်ကိုယ်သင် သိအောင်လုပ်လော့။

ဘုရားသခင်သည် လူသား၏ ကြံရွယ်မှုနှင့် ရည်ရွယ်ချက်အကြောင်း များစွာထုတ်ဖော်ခဲ့ပြီးဖြစ်၏။ ဘုရားသခင်က “လူ၏ အကြံအစည်နှင့် ရည်ရွယ်ချက်တို့ကို ငါတွေ့ခဲ့သည့်အချိန်မှာ ဤအချိန်ဖြစ်၏။ မြူခိုးမှ ငါသည် သက်ပြင်းချခဲ့သည်၊ လူသားသည် အဘယ့်ကြောင့် သူ၏ကိုယ်ကျိုးများအတွက်သာ အမြဲပြုမူနေရပါသနည်း။ ငါ၏ပြစ်တင်ဆုံးမမှုများသည် ၎င်းတို့ကို စုံလင်စေရန်ပင် မဟုတ်လော။ ၎င်းတို့ကို စိတ်အားလျော့စေရန် ငါကြိုးပမ်းနေသလော” ဟုပြော၏။ ဤနှုတ်ကပတ်တော်များမှ သင်တို့သည် မိမိအကြောင်း မည်သည့်အရာကို သိလာသနည်း။ လူသား၏ကြံရွယ်မှုနှင့် ရည်ရွယ်ချက်တို့သည် အမှန်တကယ်ပင် မရှိတော့ပြီလော။ သင်တို့စစ်ဆေးဖူးသလော။ သင်တို့သည် ဘုရားသခင်ရှေ့မှောက်လာ၍ သင်ယူသင့်သည်၊ သူ၏ပြစ်တင်ဆုံးမခြင်းအမှုသည် သင်တို့၌အဘယ်အရာ အထမြောက်သနည်း။ ယင်းကို သင်တို့အကျဉ်းချုပ်ပြီးပြီလော။ မဖြစ်စလောက်သာ ဖြစ်ကောင်းဖြစ်နိုင်သည်၊ သို့မဟုတ်ပါက သင်တို့သည် ချဲ့ကား၍ပြောဆိုခြင်းကို ရှေးမဆွကပင် ကျူးလွန်ခဲ့ကြလိမ့်မည် ဖြစ်သည်။ ဘုရားသခင်မှ သင်တို့ကို မည်သည့်အရာ ရယူခိုင်းသနည်း။ သင်တို့ကို ပြောကြားသည့် နှုတ်ကပတ်တော်များတွင် သင်တို့သည် မည်မျှကို လက်တွေ့ကျင့်သုံးခဲ့ပြီးသနည်း။ မည်မျှသည် အချည်းနှီးပြောကြားခြင်း ဖြစ်သနည်း။ ဘုရားသခင်၏အမြင်တွင် သူ၏နှုတ်ကပတ်တော် အနည်းငယ်သာ အကယ်စင်စစ် အကောင်အထည်ဖော်ခြင်းခံရ၏၊ ဤသည်မှာ လူသားသည် သူ၏မူလအဓိပ္ပာယ်ကို မည်သည့်အခါမျှ ဖတ်ရှု၍ အဓိပ္ပာယ်ဖော်နိုင်ခြင်းမရှိသောကြောင့်ဖြစ်ပြီး ပြန်လည်ပဲ့တင်ထပ်သမျှကိုသာ ၎င်းတို့လက်ခံကြ၏။ ဤနည်းအားဖြင့် ၎င်းတို့သည် ဘုရားသခင်၏စိတ်ကို သိနိုင်မည်လော။ များမကြာမီအနာဂတ်တွင် ဘုရားသခင်သည် လူသားအတွက် အလုပ်ပိုရှိလိမ့်မည်၊ လူသားသည် ယခုရှိသည့် သေးငယ်သောဝိညာဉ်ရင့်ကျက်မှုဖြင့် ၎င်းအလုပ်ကို အထမြောက်စေနိုင်မည်လော။ လူသားသည် လူတို့၏သဘာဝကဲ့သို့ မမှားသည့်အခါ ရယ်ဖွယ်ကောင်း၏၊ သို့မဟုတ် ဝင့်ဝါ၏။ ယင်းမှာ အမှန်တကယ်ပင် နားလည်၍မရပေ၊ ဘုရားသခင်မှ အရာအားလုံးပြောခဲ့ပြီးနောက် လူသားသည် ယင်းကို အဘယ်ကြောင့် နှလုံးမသွင်းသနည်း။ ဘုရားသခင်၏နှုတ်ကပတ်တော်သည် သက်ရောက်မှု တစ်စုံတစ်ရာရှိရန် မရည်ရွယ်ထေားသော ဟာသတစ်ရပ်သာဖြစ်နေခြင်းများလော။ အားလုံးမှာ လူသားမှ “ပျော်ရွှင်မှု၊ ဒေါသ၊ ဝမ်းနည်းခြင်းနှင့် ဝမ်းမြောက်ခြင်း” ပြဇာတ် တင်ဆက်သည်ကိုကြည့်ရန်အတွက်သာလော။ လူသားအား တစ်ခဏပျော်ရွှင်စေ၍ နောက်တစ်ခဏတွင် ငိုစေကာ ၎င်းနောက် အခြားသူများမမြင်ရသည့်အခါ သူ၏ကိုယ်ပိုင်ကိစ္စကို အာရုံစိုက်၍ လုပ်ကိုင်ရန်လော။ ဤသည်မှာ မည်သည့် သက်ရောက်မှု ရှိမည်နည်း။ “လူသားအပေါ် ငါ၏သတ်မှတ်ချက်များသည် အဘယ့်ကြောင့် အမြဲပင် ဘာမျှဖြစ်မလာခဲ့သနည်း။ ငါသည် ခွေးတစ်ကောင်ကို သစ်ပင်တစ်ပင်ပေါ် တက်ဖို့ရန် တောင်းဆိုနေသကဲ့သို့ ဖြစ်နေခဲ့၍ပင်လော။ ငါသည် ပြဿနာမရှိရှိအောင် ကြိုးစားဖန်တီးနေခြင်းပင်လော။” ဘုရားသခင်၏ နှုတ်ကပတ်တော်များအားလုံးသည် လူသား၏ တကယ့်အခြေအနေကို ရည်ရွယ်လေသည်။ မည်သူသည် ဘုရားသခင်၏နှုတ်ကပတ်တော်အတွင်း အသက်ရှင်သည်ကို တွေ့မြင်ဖို့ လူအားလုံး၏ အတွင်းသို့ ကြည်ရှုရန်မှာ အကျိုးမယုတ်နိုင်ပေ။ “ယခုထိတိုင်အောင် မြေပြင်အခြေအနေ အများအပြားသည် ဆက်၍ပြောင်းလဲလျက်ပင် ရှိသေး၏။ အကယ်၍ တစ်နေ့ကျလျှင် ကမ္ဘာကြီးသည် အခြားသောပုံစံတစ်ခုသို့ အမှန်တကယ်ပင် ပြောင်းလဲသွားပါက၊ ၎င်းကို ငါသည် မဆိုင်းမတွပင် ဘေးဖယ်ထားလိုက်မည် ဖြစ်သည်၊ ယင်းသည် ငါ့အလုပ်ထဲ၌ ငါလက်ရှိလုပ်နေသော အဆင့်ပင်မဟုတ်လော။” ဘုရားသခင်သည် အမှန်ပင် သူ၏အမှုကို ဆောင်ရွက်နေ၏၊ သို့ရာတွင် ဘုရားသခင်မှ “မဆိုင်းမတွပင် ဘေးဖယ်ထားလိုက်သည်” ဟုပြောသည့်အခါ အရာခပ်သိမ်းသည် လုပ်ငန်းစဉ်တစ်ရပ် ဖြစ်သည့်အတွက် ဤသည်မှာ အနာဂတ်ကို ရည်ညွှန်း၏။ ဘုရားသခင်၏ လက်ရှိအမှုတွင် ဤသည်မှာ ဦးတည်ရာဖြစ်သည်ကို သင်မြင်တွေ့နိုင်သလော။ လူသား၏ရည်ရွယ်ချက်၏ အပြစ်အနာအဆာကြောင့် မသန့်ရှင်းသောဝိညာဉ်များသည် ပြသရန် အခွင့်အရေးယူကြ၏။ ယခုအချိန်တွင် “ကမ္ဘာမြေကြီးသည် အခြားသောပုံစံအဖြစ် ပြောင်းလဲ” ပြီး ၎င်းအချိန်တွင် လူတို့သည် အရည်အသွေးအားဖြင့် ပြောင်းလဲမည်ဖြစ်သော်လည်း အနှစ်သာရအားဖြင့် ဤအတိုင်း ဆက်လက်ရှိနေမည်ဖြစ်သည်။ ဤသည်မှာ ပိုမိုတိုးတက်ကောင်းမွန်သည့်ကမ္ဘာတွင် အခြားတစ်စုံတစ်ရာ ရှိနေသည့်အတွက်ဖြစ်၏။ တစ်နည်းအားဖြင့်ဆိုလျှင် မူလကမ္ဘာသည် ညံ့ဖျင်းပြီး၊ ၎င်းပိုမိုကောင်းမွန်လာသည်နှင့်တစ်ပြိုင်နက် ၎င်းကို အသုံးပြု၍ရချင်ရမည်ဖြစ်သည်။ သို့ရာတွင် ၎င်းကို ကာလတစ်ရပ်အထိအသုံးပြုခဲ့ပြီးနောက် ၎င်းကိုမသုံးတော့သည့်အခါ၊ ၎င်းသည် မူလပုံစံသို့ တဖြည်းဖြည်း ပြန်လည်ရောက်ရှိသွားမည် ဖြစ်သည်။ ဤသည်မှာ ဘုရားသခင်၏အမှုရှိ နောက်တဆင့်၏ အကျဉ်းချုပ်ဖြစ်၏။ လူအမျိုးအစား အမျိုးမျိုးအား အတန်းအစားခွဲခြားရန် အချိန်ကျရောက်ပြီဖြစ်သဖြင့် ဘုရားသခင်၏ အနာဂတ်အမှုသည် သာ၍ရှုပ်ထွေးမည်ဖြစ်၏။ အဆုံး၌တွေ့ဆုံရမည့်နေရာတွင် ဇဝေဇဝါဖြစ်မှုဖြင့် ရှုပ်ထွေးနေမည်ဖြစ်ကာ၊ လူသားသည် တိကျသောအမြင်တစ်ရပ် ရှိမည်မဟုတ်ပေ။ “လူများအားလုံးသည် အများမိုးခါးရေသောက်လျှင် လိုက်သောက်တတ်သော ဖျော်ဖြေသူများပင်တည်း” ဟူ၍ ဘုရားသခင်ပြောခဲ့သည့်အတိုင်းဖြစ်၏။ လူသားတို့သည် အများနှင့်အတူ မိုးခါးရေလိုက်သောက်နိုင်စွမ်းရှိသကဲ့သို့ ဘုရားသခင်မှ လူသားအားလုံးအား ဤချွတ်ယွင်းချက်ကို ပြန်ပြောင်းစေနိုင်ရန် ဘုရားသခင်သည် ဤအပြစ်အနာအဆာကို သူ၏အမှုရှိ နောက်တစ်ဆင့်အတွက် အသုံးပြု၏။ လူတို့သည် နံရံ၏ ထိပ်ဖျားတွင် ကြီးထွားလျက်ရှိသည့် မြက်ပင်ကဲ့သို့ ဖြစ်ကြသည်မှာ စစ်မှန်သောဝိညာဉ်ရင့်ကျက်မှု ၎င်းတို့ မရှိကြသောကြောင့် ဖြစ်သည်။ ၎င်းတို့တွင်သာ ရှိခဲ့ပါက ၎င်းတို့သည် မြင့်မားသောသစ်ပင်များ ဖြစ်ကြလိမ့်မည်။ လူသား၏အစိတ်အပိုင်းတစ်ရပ်ကို စုံလင်စေခြင်းငှာ ဘုရားသခင်သည် ဆိုးသောဝိညာဉ်တို့၏ အလုပ်အစိတ်အပိုင်းတစ်ရပ်ကို အသုံးပြုရန် ဘုရားသခင် ရည်ရွယ်၏။ ဤသည်မှာ ထိုသူတို့သည် နတ်ဆိုးတို့၏ လုပ်ဆောင်ချက်များကို အပြည့်အဝ ထိုးထွင်းမြင်နိုင်ရန်နှင့် လူတိုင်းအား ၎င်းတို့၏ ဘိုးဘေးများကို စစ်မှန်စွာ နားလည်ခွင့်ပြုရန်ဖြစ်၏။ ဤနည်းဖြင့်သာ လူသားများသည် နတ်ဆိုးတို့၏ နောင်လာနောက်သားတို့ကို စွန့်ရုံသာမက နတ်ဆိုးတို့၏ဘိုးဘေးများကိုပင် စွန့်ပစ်ရင်း၊ လုံးဝလွတ်မြောက်နိုင်ကြပေသည်။ ဤသည်မှာ အဆင်းနီသောနဂါးကြီး၏ စစ်မှန်သော ပုံသဏ္ဌာန်ကို လူသားတို့အားလုံးသိစေရန်၊ ၎င်း၏ မျက်နှာဖုံးကို လုံးဝဆွဲချွတ်၍ ၎င်း၏စစ်မှန်သော ပုံသဏ္ဌာန်ကို မြင်စေရန်၊ ဘုရားသခင်မှ အဆင်းနီသောနဂါးကြီးကို အပြည့်အဝရှုံးနိမ့်စေခြင်း၏ မူလရည်ရွယ်ချက်ဖြစ်သည်။ ဤသည်မှာ ဘုရားသခင် အထမြောက်လိုသည့်အရာဖြစ်၍ ယင်းသည် သူအလုပ်များစွာလုပ်ခဲ့သော မြေကြီးပေါ်ရှိ သူ၏နောက်ဆုံးပန်းတိုင်ဖြစ်၏၊ သူသည် လူသားအားလုံး၌ ဤသည်ကို အထမြောက်ရန် ရည်မှန်း၏။ ဤသည်ကို ဘုရားသခင်၏ရည်ရွယ်ချက်အတွက် အရာခပ်သိမ်း၏ လှုပ်ရှားဆောင်ရွက်ခြင်းဟု သိကြ၏။

အနာဂတ်အမှုကို မည်သို့ဆောင်ရွက်မည်ကို သင်တို့ရှင်းသလော။ ဤသည်အားလုံးကို နားလည်ရမည်ဖြစ်သည်။ ဥပမာ လူသားတို့သည် ၎င်းတို့၏တာဝန်များကို မည်သည့်အခါမျှ အာရုံစိုက်၍ လုပ်ဆောင်ခြင်းမရှိဟု ဘုရားသခင်က အဘယ်ကြောင့်ပြောသနည်း။ များစွာသောလူတို့သည် သူထားပေးခဲ့သော အိမ်စာကို ပြီးဆုံးအောင်လုပ်ရန် ပျက်ကွက်ပြီဟု သူအဘယ်ကြောင့် ပြောသနည်း။ ဤအရာတို့ကို မည်သို့ ရရှိနိုင်မည်နည်း။ ဤမေးခွန်းများကို သင်တို့စဉ်းစားခဲ့ဖူးသလော။ ဤအရာတို့သည် သင်တို့ဆက်သွယ်ပြောဆိုခြင်း အကြောင်းအရာ ဖြစ်ခဲ့ပြီလော။ အလုပ်၏ဤအဆင့်အတွက် လူသားသည် ဘုရားသခင်၏ မျက်မှောက်ရည်ရွယ်ချက်များကို နားလည်ရမည်။ ထိုအရာ ဖြစ်မြောက်ပြီးသည်နှင့် အခြားအရာများကို ဆွေးနွေးနိုင်မည်ဖြစ်သည်၊ ကောင်းပြီလော။ လူသား၌ ဘုရားသခင် ဖြစ်မြောက်ရန် မျှော်လင့်သည့်အရာကို အတိအကျရှင်းပြရန်လိုသည်၊ သို့မဟုတ်ပါက အသုံးမကျပေ။ ၎င်းတို့သည် ယင်းအတွင်းသို့ ဝင်ရောက်နိုင်ခြင်းရှိမည် မဟုတ်ပေ၊ ထို့အပြင် ယင်းကို ၎င်းတို့ ဖြစ်မြောက်နိုင်ရန်မှာ သာ၍ပင် မဖြစ်နိုင်ပေ၊ ယင်းအားလုံးသည် အရေးမပါပေ။ ဘုရားသခင်မှ လောလောဆယ်ပြောခဲ့သည့်အရာကို လက်တွေ့ကျင့်သုံးရန် လမ်းကြောင်းတစ်ရပ် သင်တွေ့ခဲ့ပြီလော။ လူတို့သည် ဘုရားသခင်၏နှုတ်ကပတ်တော်ကို ကြောက်ရွံ့စိတ်ဖြင့် ကြည့်ကြ၏။ ထိုသူတို့သည် ယင်းကို နားမလည်နိုင်ကြပေ၊ ထို့အပြင် ဘုရားသခင်အား စော်ကားမည်ကိုလည်း ကြောက်ရွံ့ကြ၏။ ယခုထောက်ပြခဲ့ပြီးသော စားနည်း၊ သောက်နည်း ဘယ်နှစ်မျိုးကို ၎င်းတို့တွေ့ပြီးပြီနည်း။ အများစုသည် မည်သို့စားရမည်နှင့် မည်သို့သောက်ရမည်ကို မသိကြပေ၊ ဤသည်ကို မည်သို့ဖြေရှင်းနိုင်မည်နည်း။ ယနေ့မိန့်မြွက်ချက်တွင် ဤသို့ပြုရန်နည်းတစ်နည်း သင်တွေ့ခဲ့သလော။ မည်သည့်နည်းဖြင့် ပူးပေါင်းဆောင်ရွက်ရန် သင်ကြိုးစားခဲ့သနည်း။ သင်တို့သည် နှုတ်ကပတ်တော်များကို သိမှတ်သည်နှင့်တစ်ပြိုင်နက် သင်တို့၏ ထင်မြင်ချက်တို့ကို မည်သည့်နည်းဖြင့် သင်တို့ ဆွေးနွေးသနည်း။ လူသားသည် ဤသို့မပြုသင့်သလော။ သင်တို့သည် သင့်တော်သောဆေးကို မည်သို့ညွှန်ကြားသင့်သနည်း။ သင်တို့သည် ဘုရားသခင်၏တိုက်ရိုက်အသံကို လိုသေးသလော။ ဤသည်ကို လိုအပ်သလော။ ဤပြဿနာများကို လုံးဝအမြစ်ပြတ်အောင် မည်သို့လုပ်ဆောင်နိုင်သနည်း။ ဤအရာက သင်တို့သည် သင်တို့၏ လက်တွေ့ကျသော လုပ်ရပ်များတွင် သန့်ရှင်းသောဝိညာဉ်တော်နှင့်အတူ ပူးပေါင်းလုပ်ဆောင်နိုင်ခြင်း ရှိ၊ မရှိ ဆိုသည့်အပေါ် မူတည်ပေသည်။ သင့်တော်သော ပူးပေါင်းဆောင်ရွက်ခြင်းဖြင့်၊ သန့်ရှင်းသောဝိညာဉ်တော်သည် ကြီးမားသောအမှုကို ပြုလုပ်လိမ့်မည်။ သင့်တော်သော ပူးပေါင်းဆောင်ရွက်ခြင်း မရှိဘဲ၊ ယင်းအစား ဇဝေဇဝါဖြစ်မှုသာရှိလျှင် သန့်ရှင်းသောဝိညာဉ်တော်သည် ကူညီရန်အနေအထားတွင် ရှိမည်မဟုတ်ပေ။ “သင်၏ရန်သူကိုသိ၍ သင့်ကိုယ်သင်သိလျှင်၊ သင်သည် အောင်မြင်ခြင်းဖြင့် အစဉ်ပေါ်ထွက်လာမည်။” ဤစကားများကို မူလက မည်သူပြောခဲ့သည်ဖြစ်စေ ၎င်းတို့သည် သင်တို့အတွက် အသင့်တော်ဆုံးဖြစ်သည်။ အတိုချုပ်အားဖြင့်၊ သင်တို့၏ရန်သူများကို မသိနိုင်မီ သင်တို့ကိုယ်သင်တို့ အရင်သိရမည်၊ ထိုအခါ အဆုံးတွင် သင်တို့သည် တိုက်ပွဲတိုင်းကို နိုင်နိုင်လိမ့်မည်။ သင်တို့အားလုံးသည် ဤသို့လုပ်နိုင်ရလိမ့်မည်။ ဘုရားသခင်သည် သင့်အပေါ် မည်သည့်အရာတောင်းဆိုသည်ဖြစ်စေ၊ ယင်းအား သင်၏အလုံးစုံကိုသာ ပေးရန်လို၏။ သင်သည် အဆုံး၌ ဘုရားသခင်၏ရှေ့မှောက်တွင် သူ့အား သင်၏သစ္စာရှိမှုကို ပြနိုင်မည်ဟု မျှော်လင့်ရသည်၊ ထို့အပြင် ဘုရားသခင်၏ ပလ္လင်တော်ပေါ်၌ သူ၏ကျေနပ်နှစ်သက်သော အပြုံးကို သင်မြင်နိုင်သမျှ၊ သင်သေဆုံးသည့်အချိန်ဖြစ်သော်လည်း၊ သင်၏မျက်လုံးများပိတ်စဉ် သင်သည် ရယ်နိုင်၍ ပြုံးနိုင်လိမ့်မည်။ သင်ကမ္ဘာမြေကြီးပေါ် ရှိနေချိန်အတွင်း ဘုရားသခင်အတွက် သင်၏နောက်ဆုံးတာဝန်ကို ဆောင်ရွက်ရမည်။ အတိတ်က ပေတရုသည် ဘုရားသခင်အတွက် ကားစင်တင်၍ ဇောက်ထိုး အဆုံးစီရင်ခံခဲ့ရ၏၊ သို့သော် သင်သည် အဆုံး၌ ဘုရားသခင်ကို ကျေနပ်စေသင့်ပြီး ဘုရားသခင်အတွက် သင်၏အင်အားအလုံးစုံကို သုံးသင့်သည်။ ဖန်ဆင်းခံသတ္တဝါတစ်ဦးသည် ဘုရားသခင်အတွက် ဘာများပြုလုပ်ပေးနိုင်သနည်း။ ထို့ကြောင့် သင်သည် သင့်ကိုယ်သင် ဘုရားသခင်၏ အကြင်နာထံ အချိန်ဆွဲမနေဘဲ မြန်မြန်အပ်နှံသင့်သည်။ ဘုရားသခင်သည် ပျော်ရွှင်၍ကျေနပ်နေသမျှကာလပတ်လုံး၊ သူလုပ်လိုသမျှကို လုပ်စေလော့။ လူသားများတွင် ညည်းညူရန် မည်သည့်အခွင့်ရှိသနည်း။

အောက်ခြေမှတ်စုများ-

က။ “အခွံချွတ်ထားသည့် နှံစားပြောင်းများနှင့် အလေ့ကျပေါက်သော ဟင်းသီးဟင်းရွက်များ” ဆိုသည်မှာ အတိတ်တွင် ဆင်းရဲသောလူများစားသည့် အစားအစာဖြစ်သည်။