ကောက်နုတ်ချက် (၄၂)

စိတ်သဘောထား၌ ပြောင်းလဲမှုတစ်ခု ရရှိခြင်းတွင် အဓိကသော့ချက်မှာ မိမိ၏ ကိုယ်ပိုင်သဘာဝကို သိရှိရန်ဖြစ်ပြီး၊ ဤအရာသည် ဘုရားသခင်ထံမှ ဖော်ထုတ်ချက်နှင့်အညီ ဖြစ်ပျက်ရမည်ဖြစ်၏။ ဘုရားသခင်၏ နှုတ်ကပတ်တော်၌သာ တစ်ဦးတစ်ယောက်သည် မိမိ၏ ကိုယ်ပိုင်အကျည်းတန်သော သဘာဝကို သိရှိနိုင်သည်၊ မိမိ၏ ကိုယ်ပိုင်သဘာဝထဲက စာတန်၏ အမျိုးမျိုးသော အဆိပ်များကို သတိပြုနိုင်သည်၊ မိမိ မိုက်မဲပြီး မသိနားမလည်သည်ကို နားလည်နိုင်ပြီး မိမိ၏ သဘာဝထဲက အားနည်းပြီး အပျက်သဘောဆောင်သော အရိပ်လက္ခဏာများကို သတိပြုမိနိုင်သည်။ ဤအရာများကို အပြည့်အဝ သိရှိပြီးသည့်နောက်တွင် သင်သည် မိမိကိုယ်ကို စစ်မှန်စွာ မုန်းတီးနိုင်ပြီး ဇာတိပကတိကို အမှန်တကယ် ပုန်ကန်နိုင်သည်၊ ဘုရားသခင်၏ နှုတ်ကပတ်တော်ကို တစ်သမတ်တည်း ဆောင်ရွက်နိုင်သည်၊ သင်၏တာဝန်များကို ထမ်းဆောင်နေစဉ်တွင် သမ္မာတရားကို မလျှော့တမ်းလိုက်စားနိုင်သည်၊ သင်၏စိတ်သဘောထား ပြောင်းလဲမှုရှိအောင် စွမ်းဆောင်နိုင်သည်၊ ဘုရားသခင်ကို အမှန်တကယ် ချစ်သောသူတစ်ယောက် ဖြစ်လာနိုင်သည်။ ထို့နောက်တွင် ပေတရု၏ လမ်းကြောင်းကို သင်စတင်လျှောက်မိနှင့်ပြီး ဖြစ်နေပေလိမ့်မည်။ ဘုရားသခင်၏ ကျေးဇူးတော်မပါဘဲနှင့် သန့်ရှင်းသော ဝိညာဉ်တော်ထံမှ ဉာဏ်အလင်းပေးခြင်းနှင့် လမ်းပြမှုတို့ မပါဘဲ၊ လူတို့သည် သမ္မာတရားကို မပိုင်ဆိုင်ကြသကဲ့သို့၊ မိမိတို့ကိုယ်ကို မပုန်ကန်နိုင်ကြသောကြောင့် ဤလမ်းကြောင်းကို လျှောက်လှမ်းဖို့ ခက်ခဲပေလိမ့်မည်။ ပေတရု၏ စုံလင်ခြင်းလမ်းကြောင်းကို လိုက်လျှောက်ခြင်းသည် အဓိကအားဖြင့် စိတ်ခိုင်မာမှုရှိခြင်း၊ ယုံကြည်ချက် ရှိခြင်းနှင့် ဘုရားသခင်ကို ကိုးစားခြင်းတို့အပေါ် တည်မှီပေသည်။ ထို့အပြင်၊ သန့်ရှင်းသော ဝိညာဉ်တော်၏ လုပ်ဆောင်ချက်ကို ကျိုးနွံနာခံရမည်။ အရာခပ်သိမ်းတွင်၊ ဘုရားသခင်၏ နှုတ်ကပတ်တော်များမပါဘဲ လုပ်ဆောင်၍ မရပေ။ ဤအရာများသည် အဓိက ရှုထောင့်များဖြစ်သည်၊ ယင်းထဲမှ မည်သည့်အရာကိုမျှ ချိုးဖောက်၍ မရပေ။ အတွေ့အကြုံထဲတွင် မိမိကိုယ်ကို သိရှိရန် အလွန် ခက်ခဲ၏။ သန့်ရှင်းသော ဝိညာဉ်တော်၏ လုပ်ဆောင်ချက်မရှိလျှင် အချည်းနှီးသာဖြစ်သည်။ ပေတရု၏ လမ်းကြောင်းကို လျှောက်ရန်၊ မိမိကိုယ်ကို သိရှိခြင်းနှင့် မိမိ၏ စိတ်သဘောထား အသွင်ပြောင်းလဲခြင်း အပေါ် အာရုံစူးစိုက်ရမည်။ ပေါလု၏ လမ်းကြောင်းသည် အသက်ကို ရှာဖွေခြင်း သို့မဟုတ် မိမိကိုယ်ကို သိရှိခြင်းအပေါ် အာရုံစိုက်ခြင်း လမ်းကြောင်းတစ်ခုမဟုတ်ပေ။ သူသည် အထူးသဖြင့် အမှုကို လုပ်ဆောင်ခြင်း၊ ယင်း၏လွှမ်းမိုးမှုနှင့် အရှိန်အဟုန်အပေါ် အာရုံစိုက်ခဲ့၏။ သူ၏ ကြံရွယ်ချက်မှာ သူ၏ အလုပ်နှင့် ဆင်းရဲဒုက္ခခံစားခြင်း အတွက် အလဲအလှယ်အနေဖြင့် ဘုရားသခင်၏ ကောင်းချီးမင်္ဂလာများကို ရရှိဖို့နှင့် ဘုရားသခင်ထံမှ ဆုလာဘ်များရရှိဖို့ ဖြစ်သည်။ ဤကြံရွယ်ချက်သည် မှားယွင်း၏။ ပေါလုသည် အသက်အပေါ် အာရုံမစိုက်ခဲ့သကဲ့သို့၊ စိတ်သဘောထား ပြောင်းလဲမှုတစ်ခုကို ရရှိခြင်းအပေါ် အရေးထားမှုတစ်ခုတလေမျှ မရှိခဲ့ပေ။ သူသည် ဆုလာဘ်များအပေါ်သာ အာရုံစိုက်ခဲ့သည်။ သူသည် မှားယွင်းသည့် ရည်မှန်းချက်ပန်းတိုင်များ ရှိခဲ့သောကြောင့်၊ သူ လျှောက်လှမ်းခဲ့သည့် လမ်းကြောင်းသည်လည်း အမှန်ပင် မှားယွင်းခဲ့လေသည်။ ဤအရာကို သူ၏ မာနထောင်လွှားပြီး စိတ်ကြီးဝင်သော သဘာဝအားဖြင့် ဖြစ်ပေါ်စေခဲ့ပေသည်။ သိသိသာသာပင်၊ ပေါလုသည် မည်သည့် သမ္မာတရားကိုမှ မပိုင်ဆိုင်ခဲ့သကဲ့သို့၊ သူသည် မည်သည့် အသိစိတ် သို့မဟုတ် ဆင်ခြင်တုံတရားမျှ မရှိခဲ့ပေ။ လူတို့ကို ကယ်တင်ခြင်းနှင့် ပြောင်းလဲခြင်းတွင်၊ ဘုရားသခင်သည် အဓိကအားဖြင့် ၎င်းတို့၏ စိတ်သဘောထားများကို ပြောင်းလဲ၏။ သူ၏ နှုတ်ကပတ်တော်များ၏ ရည်ရွယ်ချက်မှာ လူတို့အထဲ၌ အသွင်ပြောင်းလဲသော စိတ်သဘောထားများနှင့် ဘုရားသခင်ကို သိရှိနိုင်စွမ်း၊ သူ့ကို ကျိုးနွံနာခံနိုင်စွမ်းနှင့် ပုံမှန်နည်းလမ်းဖြင့် သူ့ကို ကိုးကွယ်နိုင်စွမ်း တို့ကို ပိုင်ဆိုင်ခြင်း၏ ရလဒ်ကို ရရှိဖို့ ဖြစ်သည်။ ဤသည်မှာ ဘုရားသခင်၏ နှုတ်ကပတ်တော်များနှင့် သူ၏ အမှုတို့၏ ရည်ရွယ်ချက်ဖြစ်သည်။ ပေါလု၏ ရှာဖွေခြင်း နည်းလမ်းသည် ဘုရားသခင်၏ အလိုကို တိုက်ရိုက် ချိုးဖောက်ပြီး ဘုရားသခင်၏ ရည်ရွယ်ချက်များနှင့် ဆန့်ကျင်ပေသည်။ ယင်းသည် ဘုရားသခင်၏အလိုကို လုံးဝ ဆန့်ကျင်ပေသည်။ သို့သော်၊ ပေတရု၏ ရှာဖွေခြင်း နည်းလမ်းသည် ဘုရားသခင်၏ ရည်ရွယ်ချက်များနှင့် လုံးဝ ကိုက်ညီခဲ့သည်၊ သူသည် အသက်အပေါ်၊ စိတ်သဘောထား ပြောင်းလဲမှုများအပေါ် အာရုံစိုက်ခဲ့သည်။ ယင်းသည် ဘုရားသခင်၏ လုပ်ဆောင်မှုနှင့် လူသားများထဲ၌ ရရှိဖို့ ဘုရားသခင် ဆန္ဒရှိသည့် ရလဒ် အတိအကျ ဖြစ်ပေသည်။ ထို့ကြောင့် ပေတရု၏ လမ်းကြောင်းသည် ကောင်းချီးခံစားရပြီး ဘုရားသခင်၏ အသိအမှတ်ပြုခြင်းကို ရရှိလေသည်။ ပေါလု၏ လမ်းကြောင်းသည် ဘုရားသခင်၏ ရည်ရွယ်ချက်များကို ဆန့်ကျင်သောကြောင့်၊ ဘုရားသခင်သည် ယင်းကို မုန်းတီးကာ ကျိန်ဆဲလေသည်။ ပေတရု၏ လမ်းကြောင်းကို လျှောက်ရန်၊ ဘုရားသခင်၏ ရည်ရွယ်ချက်များကို သိရှိရမည်ဖြစ်သည်။ သူ၏ နှုတ်ကပတ်တော်များမှတစ်ဆင့် သူ၏ ရည်ရွယ်ချက်များကို အမှန်တကယ် အပြည့်အဝ နားလည်နိုင်ပါက ဆိုလိုသည်မှာ လူသားထံမှ မည့်သည့်အရာကို ဘုရားသခင် ဖန်တီးလိုသည်ဆိုသည်နှင့် နောက်ဆုံးတွင် မည်သည့်ရလဒ်ကို ရရှိဖို့ သူ ဆန္ဒရှိသည်ဆိုသည်တို့ကို နားလည်ခြင်းဖြစ်သည်။ ထိုအခါမှသာ မည်သည့်လမ်းကြောင်း လိုက်လျှောက်ရမည်ကို တိကျသည့် သိနားလည်မှုတစ်ခု ရှိနိုင်ပေသည်။ သင်သည် ပေတရု၏ လမ်းကြောင်းကို အပြည့်အဝ နားမလည်သကဲ့သို့၊ ယင်းကို လိုက်လျှောက်ဖို့ စိတ်ဆန္ဒတစ်ခု ရှိရုံမျှရှိပါက၊ ၎င်းကို သင်လျှောက်လှမ်းနိုင်မည်မဟုတ်ပေ။ တစ်နည်းအားဖြင့်၊ သင်သည် အယူဝါဒများစွာ သိကောင်းသိလိမ့်မည်ဖြစ်သော်လည်း၊ နောက်ဆုံးတွင် လက်တွေ့အရှိတရားထဲသို့ ဝင်ရောက်နိုင်လိမ့်မည်မဟုတ်ပေ။ သင်သည် အပေါ်ယံ ဝင်ရောက်မှုတစ်ခုကို ပြုလုပ်ကောင်း ပြုလုပ်နိုင်လိမ့်မည် ဖြစ်သော်လည်း၊ စစ်မှန်သည့် မည်သည့် ရလဒ်ကိုမျှ သင် ရရှိနိုင်လိမ့်မည်မဟုတ်။

မျက်မှောက်ခေတ်တွင် လူအများစုက မိမိကိုယ်ကိုမိမိအပေါ် အလွန်ပင် အပေါ်ယံဆန်သော သိနားလည်ခြင်း ရှိကြသည်။ ၎င်းတို့သည် မိမိတို့သဘာဝ၏ အစိတ်အပိုင်းဖြစ်သော အမှုအရာများကို ရှင်းလင်းစွာ သိမြင်လာခြင်း လုံးဝမရှိခဲ့ကြပေ။ ၎င်းတို့သည် ၎င်းတို့ ထုတ်ဖော်ပြသည့် ဖောက်ပြန်ပျက်စီးသော အခြေအနေ အနည်းငယ်၊ သူတို့ပြုလုပ်တတ်သည့် အမှုအရာများ၊ သို့မဟုတ် သူတို့၏ အားနည်းချက်များ အနည်းငယ်ကိုသာ သိကြပြီး၊ ဤအရာက ၎င်းတို့အား မိမိကိုယ်ကိုသိသည်ဟု ယုံကြည်စေသည်။ ထို့ပြင် အကယ်၍ ၎င်းတို့သည် စည်းမျဉ်းစည်းကမ်းအနည်းငယ်ကို လိုက်နာကာ အချို့သော ကဏ္ဍများတွင် အမှားမလုပ်မိရန် သေချာစေပြီး၊ ထိုထိုသော ကျူးလွန်ပြစ်မှားခြင်းများ မလုပ်မိအောင် ရှောင်ကြဉ်နိုင်လျှင် ဘုရားသခင်အပေါ် သူတို့၏ယုံကြည်ခြင်း၌ စစ်မှန်မှုပိုင်ဆိုင်သည်ဟု မိမိကိုယ်ကို သဘောထားပြီး ကယ်တင်ခံရလိမ့်မည်ဟု ယူဆတတ်ကြသည်။ ဤသည်မှာ လုံးလုံးလျားလျားပင် လူသား၏ စိတ်အထင်ဖြစ်သည်။ ထိုအရာများကို သင်လိုက်နာလျှင် မည်သည့် ကျူးလွန်ပြစ်မှားခြင်းကိုမျှ မလုပ်မိစေဖို့ သင် အမှန်တကယ် ရှောင်ကြဉ်လာနိုင်လိမ့်မည်လော။ စိတ်သဘောထား၌ စစ်မှန်သောပြောင်းလဲမှုကို သင်ရရှိပြီးဖြစ်လိမ့်မည်လော။ လူသားတစ်ဦး၏ ပုံသဏ္ဌာန်ကို သင် အမှန်တကယ် အသက်ရှင်နေလိမ့်မည်လော။ သင်သည် ဘုရားသခင်ကို ထိုနည်းအတိုင်း အမှန်ပင် ကျေနပ်စေနိုင်သလော။ လုံးဝကျေနပ်စေနိုင်မည် မဟုတ်၊ ဤသည်မှာ သေချာ၏။ ဘုရားသခင်၌ ယုံကြည်ခြင်းသည် လူတစ်ဦးက မြင့်မားသော စံနှုန်းများရှိပြီး သမ္မာတရားနှင့် သူ၏ အသက်တာစိတ်သဘောထား၌ အသွင်ပြောင်းလဲမှု အတော်အတန် ရရှိထားသောအခါမှသာ အလုပ်ဖြစ်လေသည်။ ဤသည်မှာ ရှေးဦးစွာ မိမိကိုယ်ကို သိရန် စိတ်နှစ်မြုပ်လုပ်ဆောင်ခြင်းလိုအပ်သည်။ လူတို့၏ မိမိကိုယ်ကို သိကျွမ်းခြင်းက အလွန်ပေါ့တန်လျှင်၊ ပြဿနာများကို ဖြေရှင်းဖို့ မဖြစ်နိုင်သည်ကို ၎င်းတို့ တွေ့ရလိမ့်မည်ဖြစ်ပြီး၊ ၎င်းတို့၏ အသက်တာ စိတ်သဘောထား တကယ်ကို ပြောင်းလဲလိမ့်မည်မဟုတ်။ မိမိကိုယ်ကို နက်နဲသိမ်မွေ့သော အဆင့်တစ်ခုအထိ သိရှိရန် လိုအပ်၏၊ ယင်းမှာ မိမိ၏ ကိုယ်ပိုင်သဘာဝအား သိရှိခြင်းကို ဆိုလိုသည်။ ထိုသဘာဝတွင် မည်သည့် အရိပ်လက္ခဏာများ ပါဝင်သည်၊ ဤအရာများ မည်သို့ ပေါ်ပေါက်သည်၊ ထို့ပြင် ၎င်းတို့ မည်သည့်အရပ်မှ လာခဲ့သည် စသည်တို့ဖြစ်သည်။ ထို့အပြင်၊ ဤအရာများကို သင် အမှန်တကယ် မုန်းတီးနိုင်ပါသလော။ သင်၏ ကိုယ်ပိုင် အကျည်းတန်သော ဝိညာဉ်နှင့် သင်၏ ကောက်ကျစ်ဆိုးယုတ်သော သဘာဝကို သင် မြင်ပြီးပြီလော။ မိမိကိုယ်ကို၏ အမှန်တရားကို သင် အမှန်တကယ် တွေ့မြင်နိုင်လျှင်၊ သင်သည် မိမိကိုယ်ကို မုန်းတီးလိမ့်မည်။ မိမိကိုယ်ကို မုန်းတီးပြီး ဘုရားသခင်၏ နှုတ်ကပတ်တော်ကို သင် လက်တွေ့လုပ်ဆောင်သောအခါ၊ သင်သည် ဇာတိပကတိကို ပုန်ကန်နိုင်လိမ့်မည်ဖြစ်ပြီး ယင်းကို အားသွန်ခွန်စိုက်လုပ်ရသည်ဟု ယုံကြည်ခြင်းမရှိဘဲ သမ္မာတရားကို ဆောင်ရွက်ဖို့ ခွန်အား သင်ရှိပါလိမ့်မည်။ အဘယ်ကြောင့် လူများစွာတို့သည် မိမိတို့၏ သွေးသား နှစ်သက်မှုများနောက် လိုက်ကြသနည်း။ ၎င်းတို့သည် မိမိတို့ကိုယ်ကိုယ် အတော်ကောင်းသည်ဟု ထင်မှတ်ကြကာ ၎င်းတို့၏ လုပ်ရပ်များမှာ မှန်ကန်ပြီး တရားသည်၊ ၎င်းတို့တွင် အမှားများမရှိသကဲ့သို့ မှန်ကန်မှုတွင် လုံးလုံးလျားလျား ရှိသည်ဟုပင် ခံစားကြသောကြောင့် ၎င်းတို့သည် တရားမျှတခြင်းက ၎င်းတို့ဖက်တွင် ရှိသည်ဟု ယူဆချက်ဖြင့် လုပ်ဆောင်နိုင်စွမ်း ရှိကြလေ၏။ လူတစ်ဦးသည် မိမိ၏ စစ်မှန်သော သဘာဝမှာ မည်သည့်အရာဖြစ်သည်ကို မြင်သည့်အခါ၊ မည်မျှအကျည်းတန်ပုံ၊ မည်မျှစက်ဆုပ်ဖွယ်ကောင်းပုံနှင့် မည်မျှသနားဖွယ်ကောင်းပုံကို မြင်သည့်အခါတွင် မိမိကိုယ်ကို အလွန်အမင်း ဂုဏ်ယူနေခြင်း၊ လွန်လွန်ကဲကဲ မာနထောင်လွှားခြင်းနှင့် ယခင်ကဲ့သို့ မိမိကိုယ်ကို အလွန်ပင် ကျေနပ်အားရခြင်းတို့ မရှိတော့ပေ။ “ကျွန်ုပ်သည် ဘုရားသခင်၏ နှုတ်ကပတ်တော်အချို့ကို လက်တွေ့ကျင့်ဆောင်ရာတွင် အလွန်အလေးအနက်ထားပြီး လက်တွေ့ကျရမည်။ ထိုသို့မဟုတ်လျှင် ကျွန်ုပ်သည် လူသားဖြစ်ခြင်း၏ စံချိန်နှင့် ကိုက်ညီလိမ့်မည် မဟုတ်သည့်အပြင် ဘုရားသခင်၏ မျက်မှောက်ထဲ၌ အသက်ရှင်ရန် ရှက်လိမ့်မည်” ဟု သူ ခံစားရသည်။ သူသည် သူ့ကိုယ်သူ အမှန်တကယ် အသုံးမကျသူ၊ အမှန်တကယ် အရေးမပါသူအဖြစ် မြင်လေ၏။ ဤအချိန်တွင် သမ္မာတရားကို ကျင့်ဆောင်ရန် သူ့အတွက် လွယ်ကူပြီး သူ၌ လူသားတစ်ဦးဖြစ်သည့်အတိုင်း အတော်ပင်တူလာမည်။ လူတို့သည် မိမိတို့ကိုယ်ကို အမှန်တကယ် မုန်းတီးသည့်အခါမှသာ ဇာတိပကတိကို ၎င်းတို့ ပုန်ကန်နိုင်ပေသည်။ ၎င်းတို့ မိမိကိုယ်ကို မမုန်းတီးလျှင်၊ ဇာတိပကတိကို ၎င်းတို့ ပုန်ကန်နိုင်လိမ့်မည်မဟုတ်။ မိမိကိုယ်ကို အမှန်တကယ် မုန်းတီးခြင်းသည် ရိုးရှင်းသောကိစ္စတစ်ခု မဟုတ်ပေ။ ဤတွင် ပိုင်ဆိုင်ရမည့် အရာအချို့ရှိသည်။ ပထမဦးစွာ၊ မိမိ၏ ကိုယ်ပိုင် သဘာဝကို သိရှိခြင်းနှင့်၊ ဒုတိယ၊ မိမိကိုယ်ကိုချို့တဲ့ပြီး နုံချာသောသူအဖြစ် မြင်ခြင်း၊ မိမိကိုယ်ကိုအလွန်အမင်း သေးနုပ်ပြီး အရေးမပါသူအဖြစ် မြင်ခြင်းနှင့် နုံချာပြီး ညစ်ပတ်သော မိမိ၏ ကိုယ်ပိုင် ဝိညာဉ်ကို မြင်ခြင်းတို့ ဖြစ်သည်။ မိမိ အမှန်တကယ် မည်သည့်အရာဖြစ်သည်ကို အပြည့်အဝ မြင်ပြီး ဤရလဒ်ရရှိသည့်အခါတွင်၊ လူတစ်ဦးသည် မိမိကိုယ်ကိုသိကျွမ်းခြင်းအား အမှန်တကယ်ရရှိပြီး၊ မိမိကိုယ်ကိုအပြည့်အဝ သိရှိလာပြီဟု ဆိုနိုင်ပေသည်။ ထိုအခါတွင်မှ မိမိကိုယ်ကို ကျိန်ဆဲမိသည်အထိ ရောက်လျက် မိမိကိုယ်ကို အမှန်တကယ် မုန်းတီးနိုင်ပြီး၊ လူသားတစ်ဦးနှင့် မဆင်တော့သည်အထိ စာတန်အားဖြင့် အကြီးအကျယ် ဖောက်ပြန်ပျက်စီးခံခဲ့ရသည်ကို အမှန်တကယ် ခံစားနိုင်ပေသည်။ ထို့နောက်တွင်၊ တစ်နေ့၊ သေခြင်း၏ ခြိမ်းခြောက်မှု ထွက်ပေါ်သောအခါ၊ ထိုသို့သော လူတစ်ဦးက၊ “ဤသည်မှာ ဘုရားသခင်၏ ဖြောင့်မတ်သော အပြစ်ပေးခြင်း ဖြစ်သည်။ ဘုရားသခင်သည် အမှန်ပင် ဖြောင့်မတ်ပေ၏၊ ကျွန်ုပ် အမှန်တကယ် သေသင့်သည်တကား” ဟု တွေးလိမ့်မည်။ ဤအချိန်တွင် သူသည် ဘုရားသခင်ကို အပြစ်တင်ဖို့မဆိုထားနှင့်၊ မကျေနပ်ချက်ပင် တင်လိမ့်မည်မဟုတ်ဘဲ၊ သူသည် အလွန်နုံချာပြီး သနားစဖွယ်ဖြစ်သည်၊ ဘုရားသခင်အားဖြင့် ဖယ်ရှားရှင်းလင်းခြင်းခံရပြီး ဖျက်ဆီးခံရသင့်သည်အထိ အလွန် ညစ်ညမ်းပြီး ဖောက်ပြန်ပျက်စီးသကဲ့သို့၊ သူ၏ ဝိညာဉ်ကဲ့သို့သော ဝိညာဉ်သည် ကမ္ဘာမြေပေါ်တွင် အသက်ရှင်ဖို့ရန် မသင့်တော်ဟု တကယ်ကို ခံစားရပေသည်။ ထို့ကြောင့် ဤလူသည် ဘုရားသခင်ကို သစ္စာဖောက်ဖို့ မဆိုထားနှင့်၊ ဘုရားသခင်ကို စောဒကတက်လိမ့်မည်မဟုတ်၊ သို့မဟုတ် အာခံလိမ့်မည်မဟုတ်ပေ။ အကယ်၍ လူတစ်ဦးသည် မိမိကိုယ်ကို မသိရှိသကဲ့သို့ မိမိကိုယ်ကို အတော်ကောင်းမွန်သည်ဟု ထင်မှတ်သေးလျှင်၊ သေခြင်းက တံခါးခေါက်သည့်အခါ၊ ဤလူက၊ “ကျွန်ုပ်၏ ယုံကြည်ခြင်းတွင် ကျွန်ုပ်သည် အလွန်ကောင်းစွာ ပြုခဲ့ပေပြီ။ ကျွန်ုပ် အလွန်များစွာ ရှာဖွေပြီးဖြစ်သည်။ အလွန်များစွာ ကျွန်ုပ် ပေးဆပ်ခဲ့ပြီးဖြစ်သည်၊ အလွန်များစွာ ကျွန်ုပ် ဒုက္ခခံစားပြီးဖြစ်သည်၊ သို့တိုင် နောက်ဆုံးတွင်၊ ဘုရားသခင်က ယခု ကျွန်ုပ်ကို သေခိုင်းလေပြီ။ ဘုရားသခင်၏ ဖြောင့်မတ်ခြင်းတရား အဘယ်မှာရှိသည်ကို ကျွန်ုပ်မသိ။ အဘယ်ကြောင့် ကျွန်ုပ်ကို သေဖို့ သူ စေခိုင်းနေရပါသနည်း။ ကျွန်ုပ်သေရမည်ဆိုလျှင်၊ မည်သူ ကယ်တင်ခံရလိမ့်မည်နည်း။ လူသားမျိုးနွယ်သည် အဆုံးသတ်သို့ ရောက်ရှိလိမ့်မည် မဟုတ်လော”ဟု တွေးလိမ့်မည်။ ပထမဦးစွာ၊ ဤလူသည် ဘုရားသခင်နှင့် ပတ်သက်သော အယူအဆများ ရှိ၏။ ဒုတိယ၊ ဤလူသည် မည်သည့် ကျိုးနွံနာခံခြင်း တစ်ခုတလေကိုမျှ မပြသဘဲလျက် ညည်းညူနေပေသည်။ ဤသည်မှာ ပေါလုကဲ့သို့ ဖြစ်၏။ သူသေခါနီးအချိန်တွင်၊ သူသည် မိမိကိုယ်ကို မသိရှိခဲ့သကဲ့သို့၊ ဘုရားသခင်၏ တရားစီရင်ခြင်း နီးကပ်လာသည့်အချိန်တွင်၊ အားလုံးကအလွန် နောက်ကျခဲ့ပေသည်။

ကောက်နုတ်ချက် (၄၃)

စုဝေးပွဲများသည် သမ္မာတရားအပေါ် မကြာခဏ မိတ်သဟာယဖွဲ့ပြီး လူတို့၏ ဖောက်ပြန်ပျက်စီးသော စိတ်သဘောထားများကို စိစစ်သော်လည်း မိမိကိုယ်ကို သိမြင်ခြင်းအကြောင်းပြောပြီး လူတို့၏ အမျိုးမျိုးသော အခြေအနေများနှင့် အပြုအမူများအကြောင်းကို ဆွေးနွေးသော်လည်း ယခုတွင် မိမိတို့ကိုယ်တိုင်၏ ဖောက်ပြန်ပျက်စီးသော စိတ်သဘောထားကို မသိသောလူများစွာ ရှိသေးသည်။ လူအချို့သည် ၎င်းတို့တွင် ဖောက်ပြန်ပျက်စီးသော စိတ်သဘောထားရှိသည်ကိုသာ အသိအမှတ်ပြုသော်လည်း ယင်းကို ၎င်းတို့ ထုတ်ဖော်သောအခါ မသိကြပေ။ လူအချို့တွင် သဘောပေါက်နားလည်နိုင်စွမ်းရှိပြီး ဘုရားနှုတ်ကပတ်တော်ကို ဖတ်သောအခါ ဘုရားနှုတ်ကပတ်တော်များသည် သမ္မာတရားဖြစ်ပြီး ဘုရားပြောသည့်အရာက လက်တွေ့ကျသည်ကို အသိအမှတ်ပြုကြသည်။ သို့ရာတွင် ၎င်းတို့အပေါ်သို့ အမှုအရာများကျရောက်သောအခါ ၎င်းတို့၏ နားလည်မှုက အပေါ်ယံဆန်လာသည်။ ၎င်းတို့သည် အဆင်ပြေနေသေးသည်ဟုလည်းကောင်း၊ လူကောင်းဖြစ်နေဆဲ ဖြစ်သည်ဟုလည်းကောင်း အစဉ်ယုံကြည်ကြပြီး ၎င်းတို့တွင် ဖောက်ပြန်ပျက်စီးသော စိတ်သဘောထားအနည်းငယ်ရှိသည်ဟု ယုံကြည်သော်လည်း ၎င်းတို့သည် မိမိတို့ကိုယ်ကို လူကောင်းအုပ်စုထဲ ထည့်ထားကြဆဲဖြစ်၏။ ၎င်းတို့၏ ဖောက်ပြန်ပျက်စီးသော စိတ်သဘောထား၏ သဘာဝကို မသိပေ၊ သို့မဟုတ် ယင်းက မည်သည့်အကျိုးဆက်များ ဖြစ်စေမည်ကို မသိပေ။ ဤသည်မှာ မိမိကိုယ်ကိုသိမြင်ခြင်း အမှန်တကယ် ဖြစ်သလော။ လူတို့သည် ဘုရားသခင်ကို နှစ်အနည်းငယ်ကြာ ယုံကြည်ပြီးနောက်တွင် ဘုရားနှုတ်ကပတ်တော်ကို ဖတ်ခြင်း၊ တရားဒေသနာများနှင့် မိတ်သဟာယကို နားထောင်ခြင်း၊ ထို့အပြင် ပြုပြင်ခံရခြင်းတို့မှတစ်ဆင့် ၎င်းတို့အများစုမှာ နောက်ဆုံးတွင် ၎င်းတို့၏ လူ့သဘာဝက မကောင်းသည်ကိုလည်းကောင်း၊ ၎င်းတို့တွင် အမှန်ပင် ဖောက်ပြန်ပျက်စီးသော စိတ်သဘောထားရှိပြီး သမ္မာတရားကို ချိုးဖောက်ကာ ဘုရားသခင်ကို ဆန့်ကျင်သောအရာများအား လုပ်ဆောင်နိုင်သည်ကိုလည်းကောင်း ရှင်းလင်းစွာ မြင်ကြသည်။ သို့ရာတွင် လူများစွာတို့က ဤအရာကို အမှန်တကယ် မသိမြင်ကြပေ။ ၎င်းတို့သည် နတ်ဆိုးများ ဖြစ်သည်ဟုလည်းကောင်း၊ စာတန်များ ဖြစ်သည်ဟုလည်းကောင်း၊ ကျိန်ဆဲခြင်းခံရသင့်သည်ဟုလည်းကောင်း နှုတ်အားဖြင့် အသိအမှတ်ပြုခြင်းသာ ဖြစ်သည်။ ဤနားလည်မှုမျိုးက လက်တွေ့ကျသလော၊ သို့မဟုတ် လက်တွေ့မကျသလော။ ယင်းသည် စိတ်နှလုံးမှလာသောအရာတစ်ခု ဖြစ်သလော။ ယင်းသည် မိမိကိုယ်ကို အမှန်တကယ် မုန်းတီးခြင်းကြောင့် ပြောသောအရာတစ်ခု ဖြစ်သလော။ ဥပမာ တကယ့်အလုပ်ကို မလုပ်ခြင်းကြောင့် အထုတ်ခံရသော ခေါင်းဆောင်၊ သို့မဟုတ် အမှုဆောင်တစ်ဦးရှိပြီး ထိုသူသည် သူ၏ “နောင်တ”ကို လူတိုင်းအား ပြရန်အတွက် နောင်တရသည့်စာကို ရေးသည်။ “ကျွန်ုပ်သည် ဘုရားသခင်ကို စိတ်ပျက်စေပြီး ဘုရားသခင်အပေါ် အကြွေးတင်သည်။ ကျွန်ုပ်သည် သူ၏ ကယ်တင်ခြင်း၊ သို့မဟုတ် သူ၏ အပင်ပန်းခံသော စောင့်ရှောက်မှု၊ အားထုတ်မှုတို့နှင့် မထိုက်တန်ပါ။ ကျွန်ုပ်သည် မကောင်းဆိုးဝါးဖြစ်သည်။ စာတန်ဖြစ်သည်။ ကျွန်ုပ်၏ လူ့သဘာဝသည် ဆိုးသည်။ ကျိန်ဆဲခြင်းခံရသင့်သည်။ ငရဲသို့သွားပြီး ပျက်စီးသင့်သည်” ဟူ၍ ဖြစ်သည်။ ဤနောင်တစာတွင် စာကြောင်းတိုင်း၌ မိမိကိုယ်ကို ငြင်းဆန်ပြီး ရှုတ်ချသည်။ ဘာသာတရားမရှိသူတစ်ယောက်က လုံးဝ ပြောမည်မဟုတ်သည့် စကားများကို ပြောသည်။ သူသည် မကောင်းဆိုးဝါးနှင့် စာတန်ဖြစ်သည်ဟု အသိအမှတ်ပြုသော်လည်း ဤစကားတစ်ခုတလေက မှန်ကန်သလော။ (မမှန်ကန်ပါ။ မည်သည့်ဖောက်ပြန်ပျက်စီးမှုများအား ထုတ်ဖော်ခဲ့သည်ကိုလည်းကောင်း၊ မည်သည့်မကောင်းသောအရာများအား လုပ်ဆောင်ခဲ့သည်ကိုလည်းကောင်း၊ သို့မဟုတ် အသင်းတော်၏ အလုပ်အပေါ် မည်သည့်ဆုံးရှုံးမှုများကို ဖြစ်ပေါ်စေခဲ့သည်ကိုလည်းကောင်း ထုတ်မပြောပါ။) အမှန်တကယ် ဖြစ်သောအခြေအနေ၊ သို့မဟုတ် သူ၏ စိတ်နှလုံး၌ မည်သည့်အရာ ရှိသည်ဆိုသည်ကို ရှင်းပြသည့် စာကြောင်းတစ်ခုပင်မရှိ။ ယင်းတို့အားလုံးက အနှစ်မရှိသော စကားများဖြစ်သည်။ ဤသည်မှာ မှန်ကန်သော နားလည်မှု ဟုတ်သလော။ (မဟုတ်ပါ။) မှန်ကန်သော နားလည်မှုမဟုတ်လျှင် သူသည် ဖောက်ပြန်ပျက်စီးသည်ကို အသိအမှတ်ပြုသလော။ (မပြုပါ။) ထိုသူအတွက် အဓိပ္ပာယ်သတ်မှတ်ကြစို့။ ဤလူသည် သူ၏ ကိုယ်ပိုင်ဖောက်ပြန်ပျက်စီးမှုကို အသိအမှတ်မပြု။ နောင်တရသည့်စာကိုရေးပြီး အပေါ်ယံတွင် သူသည် မိမိကိုယ်ကိုသိပြီး မိမိ၏ ဖောက်ပြန်ပျက်စီးမှုကို အသိအမှတ်ပြုသည့်ပုံစံရှိသည်။ ထိုအချိန်မှစပြီး သူသည် နေ့စဉ်အသက်တာ၌ မည်သို့ပြုမူသည်၊ နောက်ကွယ်ရှိ သူ၏ တကယ့်အပြုအမူက ပြောင်းလဲပြီးခြင်း ရှိမရှိတို့ကို သင်ကြည့်သင့်သည်။ ထိုအခါမှသာ တိကျမှန်ကန်သောကောက်ချက်ကို သင်ချနိုင်သည်။ သူသည် မိမိ၏ ကိုယ်ပိုင်ဖောက်ပြန်ပျက်စီးမှုအား အမှန်တကယ် အသိအမှတ်ပြုသည်ဆိုသည်ကိုလည်းကောင်း၊ မိမိကိုယ်ကို အမှန်တကယ် သိသည်ဆိုသည်ကိုလည်းကောင်း မည်သည့်အပြုအမူများမှ ငါတို့ မြင်နိုင်သနည်း။ (လူတစ်ဦးသည် မိမိကိုယ်ကို အမှန်တကယ် နားလည်ပြီးနောက်တွင် အမှန်တကယ် ပြောင်းလဲမှုများ ရှိလိမ့်မည်။) ဤသည်မှာ မှန်ကန်သည်။ လူတစ်ဦးတွင် အမှန်တကယ်ပြောင်းလဲမှု ရှိမရှိကို ဘုရားသခင် ကြည့်သည်။ လူတစ်ဦးသည် နောင်တရသည့်စာကို ရေးပြီး သူ၏စကားများက စစ်မှန်သည့်ပုံစံရှိကာ သူသည် စစ်မှန်သောနားလည်မှုရှိသည့်ပုံစံရှိလျှင် သူသည် အမှန်တကယ် နောင်တရပြီးဖြစ်သည်ဟု ဆိုလိုသလော။ သူသည် အမှန်တကယ် နောင်တရပြီးဖြစ်သည်ဟု သက်သေပြနိုင်သလော။ မပြနိုင်ပေ။ ထိုသူတွင် စစ်မှန်သောပြောင်းလဲမှုရှိမရှိကို ကြည့်ရမည်။ ဤသည်မှာ အရေးပါဆုံးသော ကဏ္ဍဖြစ်သည်။ သို့သော် ထိုသူသည် အထုတ်ခံရပြီးနောက်တွင် ညီအစ်ကိုမောင်နှမများရှေ့၌ မကြာခဏ မိမိကိုယ်ကို မှန်ကန်ကြောင်းပြဆိုပြီး ခုခံသည်။ ဤသည်မှာ သူ၏ ကိုယ်ပိုင်ဖောက်ပြန်ပျက်စီးမှုကို အသိအမှတ်မပြုသေးခြင်း၊ မိမိကိုယ်ကို အမှန်တကယ်နားလည်မှုမရှိခြင်းနှင့် ညီမျှသည်။ နောက်ကွယ်တွင် သူ၏ အာခံမှု၊ မိမိကိုယ်ကို ခုခံမှု၊ မှန်ကန်ကြောင်းပြဆိုမှုတို့က ဤအချက်ကို အတည်ပြုပြီး ဖြစ်သည်။ ထို့အပြင် အထက်က သူ၏လုပ်ရပ်များကို စိစစ်ပြီး သူသည် အန္တိခရစ်ဖြစ်သည်၊ အယောင်ဆောင်ခေါင်းဆောင်ဖြစ်သည်၊ အမှန်တကယ်ဖြစ်သော အလုပ်ကို မလုပ်သူဖြစ်သည်ဟု ဆိုသောအခါ၌ အထက်က ဖော်ထုတ်သည်ကို ခံရခြင်းအပေါ် သူ၏ တုံ့ပြန်မှုမှာ အဘယ်နည်း။ သူသည် အကြောင်းပြသည်။ မိမိကိုယ်ကို ခုခံပြီး မှန်ကန်ကြောင်းပြဆိုသည်။ ဤအမှုကိစ္စများကို နေရာတိုင်း၌ ရှင်းလင်းပြသည်။ အမှန်တကယ်ဖြစ်သော အလုပ်ကို မလုပ်သည်ကိုလည်းကောင်း၊ အစွမ်းအစ ချို့တဲ့သည်ကိုလည်းကောင်း၊ သမ္မာတရားအား နားမလည်သည်ကိုလည်းကောင်း၊ အယောင်ဆောင်ခေါင်းဆောင် ဖြစ်သည်ကိုလည်းကောင်း အသိအမှတ်မပြုပေ။ ဤအသိအမှတ်မပြုခြင်းနှင့် မိမိကိုယ်ကို ခုခံခြင်းနောက်ကွယ်တွင် မည်သည့် စိတ်သဘောထားမျိုးရှိသနည်း။ ဤသည်မှာ စိတ်နှလုံးခိုင်မာပြီး မာနထောင်လွှားသော စိတ်သဘောထားမျိုး၊ သမ္မာတရားကို အလွန်အမင်းမနှစ်မြို့သော စိတ်သဘောထားဖြစ်သည်။ သူ၏နောင်တရသည့်စာကို ရေးသောအခါတွင် သူသည် နတ်ဆိုးတစ်ကောင်နှင့် စာတန်ဖြစ်သည်ဟုလည်းကောင်း၊ ဘုရားသခင်နှင့် မထိုက်တန်ဘဲ ဘုရားသခင်အပေါ် အကြွေးတင်သည်ဟုလည်းကောင်း၊ သူ၏ လူ့သဘာဝက မကောင်းဟုလည်းကောင်းဆိုသော်လည်း ဤအရာကို အသိအမှတ်ပြုပြီးပြီးချင်းတွင် သူ၏ ပုံစံဟောင်းများဆီသို့ ပြန်လည်ရောက်ရှိသွားသည်။ ဤတွင် မည်သည့်အရာ ဖြစ်နေသနည်း။ (သူ၏ အသိအမှတ်ပြုခြင်းက မမှန်ကန်ပါ။) မည်သည့်အရာက သူ၏ အမှန်တကယ် ရပ်တည်ချက်ဖြစ်သနည်း။ သူ၏ အမှန်တကယ် ဝိညာဉ်ရင့်ကျက်မှုက အဘယ်နည်း။ (မိမိကိုယ်ကို ခုခံခြင်းနှင့် မှန်ကန်ကြောင်းပြဆိုခြင်း ဖြစ်သည်။) သူ၏ နောက်ကွယ်တွင် မှန်ကန်ကြောင်းပြဆိုခြင်းနှင့် မိမိကိုယ်ကို ခုခံခြင်း၊ သူ၏ နေရာတကာတွင် မိမိကိုယ်ကို ရှင်းပြခြင်းသည် သူ၏ အမှန်တကယ် ရပ်တည်ချက်ဖြစ်သည်။ ဤသည်မှာ သူသည် အမှန်တကယ်ဖြစ်သော အလုပ်ကို မလုပ်နိုင်သည်ကိုလည်းကောင်း၊ သမ္မာတရားစစ်မှန်မှုမရှိသည်ကိုလည်းကောင်း အသိအမှတ်မပြုကြောင်းကို သက်သေမပြသလော။ သူသည် လုံးဝ အသိအမှတ်မပြုပေ။ ထိုသူသည် ဤအရာကိုပင် အသိအမှတ်မပြုလျှင် မိမိကိုယ်ကို အမှန်တကယ်သိသလော။ မိမိကိုယ်ကို မသိလျှင် သူ့ကိုယ်သူ နတ်ဆိုးတစ်ကောင်နှင့် စာတန်အဖြစ် သရုပ်ဖော်ပြခြင်းသည် လူတို့ကို အထင်အမြင်မှားစေခြင်း မဟုတ်သလော။ ဤသို့ဆိုလျှင် သူ့ကိုယ်သူသိခြင်းနှင့်ပတ်သက်ပြီး သူပြောသမျှတိုင်းသည် မုသားဖြစ်သည်။ အားလုံးက လှည့်ဖြားခြင်းဖြစ်သည်။ သူသည် အလုပ်ကို မလုပ်နိုင်သည်ကိုလည်းကောင်း၊ သူ၏ လူ့သဘာဝက မကောင်းသည်ကိုလည်းကောင်း အသိအမှတ်မပြုပေ။ ဤသို့ဆိုလျှင် မိမိကိုယ်ကို ရှုတ်ချသည့် ထိုစကားများကို အဘယ်ကြောင့် ပြောသေးသနည်း။ ယင်းသည် မတွေးတတ်အောင် နက်နဲသည်။ သူသည် မိမိကိုယ်ကို မသိလျှင် အဘယ်ကြောင့်သိသည်ဟု ဟန်ဆောင်ဆဲဖြစ်သနည်း။ ယင်းမှာ လူတို့ကို လိမ်ညာရန် ဖြစ်သည်။ ငါတို့ရှေ့ရှိ အချက်အလက်များက သူသည် ကြောင်သူတော်တစ်ဦးဖြစ်သည်ဆိုသည်ကို သက်သေပြပြီး ဖြစ်သည်။ ဤသို့ဆိုလျှင် သူသည် ဖောက်ပြန်ပျက်စီးသော စိတ်သဘောထားတစ်ခုရှိသည်ကို အသိအမှတ်ပြုသလော။ (အသိအမှတ်မပြုပါ။) အသိအမှတ်ပြုရန် ငြင်းဆိုသည်။ သူလုပ်ဆောင်ခဲ့သည့် ဤအရာများသည် မမှားယွင်းသည်ကို သက်သေပြရန် အမျိုးမျိုးသော ဆင်ခြေများနှင့် အကြောင်းပြချက်များအား ရှာရန်ပင် အထူးအားစိုက်ထုတ်သည်။ သူသည် မည်သည့်အရာကို လုပ်ဆောင်သည်ဖြစ်စေ မှန်ကန်သည်၊ အထက်က မရှုတ်ချသင့်၊ သို့မဟုတ် မစိစစ်သင့်ဟု ယုံကြည်သည်။ သူသည် အထုတ်ခံရခြင်းကို လက်ခံနိုင်သော်လည်း ဤအရာများကြောင့် မမျှတစွာ ဆက်ဆံခံရခြင်းကို လက်မခံနိုင်။ သူ၏ အထုတ်ခံရခြင်းအတွက် အကြောင်းပြချက်က မည်သို့ဖြစ်စေ သူသည် ယင်းကို ကျိုးနွံနာခံနိုင်ပြီး လက်ခံနိုင်သည်။ သူလုပ်ဆောင်ခဲ့သည့် ဤသီးသန့်အရာများအတွက် အထုတ်ခံရခြင်းကြောင့်သာ လက်မခံနိုင်ခြင်း၊ သို့မဟုတ် မကျိုးနွံမနာခံနိုင်ခြင်း ဖြစ်သည်။ ဤသည်မှာ သူ၏ မှန်ကန်ကြောင်းပြဆိုမှုများနှင့် မိမိကိုယ်ကို ခုခံမှု၏ အရင်းအမြစ်မဟုတ်လော။ ဤသို့သောသူတစ်ဦးသည် နတ်ဆိုးတစ်ကောင်နှင့် စာတန်ဖြစ်ခြင်းအကြောင်း ပြောဆိုသည်။ သူသည် ကျိန်ဆဲခံရသင့်ပြီး ငရဲသို့ပို့ခံရသင့်သည်ဟု ဆိုသည်။ ပြီးလျှင် ဆက်လက်၍ ငြင်းခုန်ပြီး မှန်ကန်ကြောင်းပြဆိုစဉ်တွင် ဤဆောင်ပုဒ်များကို ထပ်ခါထပ်ခါ အော်ဟစ်သည်။ သူသည် မိမိကိုယ်ကို အမှန်တကယ်သိသလော။ (မသိပါ။) ၎င်းတို့သည် နတ်ဆိုးများ၊ စာတန်များဖြစ်သည်ဟု ထပ်ခါထပ်ခါအော်ဟစ်သည်။ သို့တိုင်အောင် ၎င်းတို့၏ မှားယွင်းသောလုပ်ဆောင်မှုတစ်ခုတလေကို အသိအမှတ်မပြုကြပေ။ ၎င်းတို့တွင် ဖောက်ပြန်ပျက်စီးသော စိတ်သဘောထားများရှိသည်ကို ၎င်းတို့ အသိအမှတ်ပြုကြသလော။ (မပြုကြပါ။) ၎င်းတို့က အသိအမှတ်မပြုဟု အဘယ်ကြောင့် ဆိုသနည်း။ ၎င်းတို့သည် နတ်ဆိုးများနှင့် စာတန်များဖြစ်ကြောင်းကို ၎င်းတို့အားလုံး အသိအမှတ်ပြုကြသည်။ ဤသို့ဆိုလျှင် ၎င်းတို့၌ ဖောက်ပြန်ပျက်စီးသော စိတ်သဘောထားများ ရှိကြောင်းကို အဘယ်ကြောင့် ၎င်းတို့ အသိအမှတ်မပြုကြသနည်း။ မိမိတွင် ဖောက်ပြန်ပျက်စီးသော စိတ်သဘောထားတစ်ခုရှိသည်ကို အသိအမှတ်ပြုခြင်း၊ သို့မဟုတ် မိမိသည် နတ်ဆိုးတစ်ကောင်နှင့် စာတန်တစ်ကောင်ဖြစ်ခြင်းတွင် မည်သည့်အကျိုးဆက်က ပို၍ပြင်းထန်သနည်း။ အမှန်တကယ်တွင် ၎င်းတို့သည် စာတန်များနှင့် နတ်ဆိုးများဖြစ်သည်ဟု အသိအမှတ်ပြုခြင်းသည် အခြားလူများကို အထင်အမြင်မှားစေနိုင်ပြီး ရလဒ်ကောင်းတစ်ခု ရနိုင်သည်ကိုလည်းကောင်း၊ လူတို့က ၎င်းတို့အပေါ် မည်သည့်အရာကိုမျှ ပြုလုပ်မည်မဟုတ်သည်ကိုလည်းကောင်း ၎င်းတို့နားလည်ကြသည်။ သို့ရာတွင် ၎င်းတို့သည် ၎င်းတို့၏ မှားယွင်းသောလုပ်ဆောင်မှုများကို၊ သို့မဟုတ် ၎င်းတို့၌ လူ့သဘာဝမရှိသည်ကို အသိအမှတ်ပြုလျှင် လူတို့သည် ၎င်းတို့အား ရှောင်ဖယ်ပြီး မုန်းတီးလိမ့်မည်။ ထို့ကြောင့် ၎င်းတို့သည် လူတိုင်းကို အထင်အမြင်မှားစေပြီး အမှုအရာများကို ရှင်းလင်းပြပေးရန် ပိုစတာတွင်ရေးသားရန် ထိုက်တန်သော ဆောင်ပုဒ်တစ်ခုကို ရွေးချယ်ကြသည်။ ၎င်းတို့သည် အဘယ်ကြောင့် ဤသို့သော စကားလုံးများနှင့် ဆောင်ပုဒ်များကို အော်ဟစ်ကြသနည်း။ ရည်ရွယ်ချက်မှာ အဘယ်နည်း။ (၎င်းတို့က မိမိတို့ကိုယ်ကို မည်မျှသိသည်ကို လူတို့က မြင်လိမ့်မည်ဖြစ်ခြင်း ဖြစ်သည်။) တစ်ဖက်တွင် ၎င်းတို့သည် ၎င်းတို့၏ ဝိညာဉ်ရေးရာကို ကြွားလုံးထုတ်ကြသည်။ အခြားတစ်ဖက်တွင် ၎င်းတို့က “လူတိုင်းက သူတို့သည် နတ်ဆိုးများနှင့် စာတန်များဖြစ်သည်ဟု ပြောသည်။ ငါက နတ်ဆိုးတစ်ကောင်နှင့် စာတန်ဖြစ်သည်ဟု ဆိုလျှင် မည်သည့်အကျိုးဆက်ကိုမျှ ခံရမည်မဟုတ်ဘဲ လူတိုင်း၏ အသိအမှတ်ပြုခြင်းကိုပင် ရရှိနိုင်သည်။ အဘယ်ကြောင့် ဤသို့မလုပ်ရမည်နည်း။” ဟု တွေးသည်။ ဤသည်မှာ အဓိကမဟုတ်လော။ ဤသို့ မိမိကိုယ်ကို သိမြင်ခြင်းမျိုးသည် အလွန်ဉာဏ်မများသလော။ (ဟုတ်သည်။ ယင်းသည် အထင်အမြင်မှားစေသည်။) ဤသည်မှာ သဘောသဘာဝအားဖြင့် အထင်အမြင်မှားစေခြင်းနှင့် လိမ်ညာခြင်း ဖြစ်သည်။ ဘာသာရေးလူလိမ်တစ်ယောက်၏ လက္ခဏာများရှိသည်။ ဘာသာရေးလူလိမ်များက မည်သည့်အရာကို ပြောသနည်း။ “ကျွန်ုပ်တို့အားလုံးသည် အပြစ်သားများဖြစ်သည်။ ကျွန်ုပ်တို့အားလုံး အပြစ်ပြုပြီးဖြစ်သည်” ဟူ၍ ဖြစ်သည်။ ၎င်းတို့က မည်သို့မကောင်းသည်ကိုဖြစ်စေ၊ ၎င်းတို့လုပ်ဆောင်ခဲ့သည့် မကောင်းသောအရာများကိုဖြစ်စေ မပြောပေ။ ၎င်းတို့က “ကျွန်ုပ်တို့အားလုံးသည် အပြစ်သားများဖြစ်ပြီး နောင်တရရမည်။ သခင်ယေရှုက ကျွန်ုပ်တို့အတွက် အဖိုးတန်သောသွေးတော် မည်မျှကျခဲ့ရသည်ကို ကြည့်ပါ” ဟူ၍လည်း ဆိုသည်။ ၎င်းတို့သည် ဤစကားများဖြင့် မည်သည့်ပန်းတိုင်ကို ရလိုသနည်း။ ယင်းမှာ သူတို့ကိုယ်သူတို့ ဝိညာဉ်ရေးရာပြည့်ဝသည့် ပုံစံပေါ်စေရန် ဖြစ်သည်။ ၎င်းတို့သည် နှလုံးသားများနှင့် စိတ်များကို စည်းရုံးရန်ဖြစ်သည့် ၎င်းတို့၏ပန်းတိုင်ကို ရရှိရန် ကြွားဝါနေပြီး အခြားလူများကို ၎င်းတို့အား အထင်ကြီးစေရန် လုပ်ဆောင်နေခြင်း ဖြစ်သည်။ ၎င်းတို့သည် နတ်ဆိုးများနှင့် စာတန်များဖြစ်သည်ကို အသိအမှတ်ပြုသည်ဟု အခိုင်အမာဆိုသည့် ထိုလူများသည်လည်း ဤရလဒ်ကို ရရှိလိုသလော။ ဤသည်မှာလည်း ၎င်းတို့၏ ရည်ရွယ်ချက်မဟုတ်သလော။ ပထမတစ်ချက်ကြည့်လျှင် ၎င်းတို့သည် မိမိတို့ကိုယ်ကို သိမြင်သည့်ပုံစံရှိသည်။ ၎င်းတို့သည် စစ်မှန်စွာ နောင်တရသည့်လူများဖြစ်ပုံပေါ်ပြီး မိမိတို့ကိုယ်ကို နတ်ဆိုးများနှင့် စာတန်များဖြစ်သည်၊ ငရဲ၏ သားသမီးများဖြစ်သည်၊ သေခြင်းနှင့် ထိုက်တန်သည်ဟု ထုတ်ဖော်ပြောသည်။ ၎င်းတို့စကားများက လေးနက်လိုက်လေခြင်းပါတကား။ သို့သော် ၎င်းတို့က အလွန်လေးနက်စွာပြောဆိုစဉ်တွင် နောက်ကွယ်၌ ၎င်းတို့အမှန်တကယ် လုပ်ဆောင်သောအရာသည် ဤကဲ့သို့ လေးနက်သလော။ လုံးဝ မလေးနက်ပေ။ ၎င်းတို့က ဘက်နှစ်ဖက် ရှိသည့်နည်းကို အသုံးချသည်။ တစ်ဖက်တွင် ၎င်းတို့က နတ်ဆိုးများနှင့် စာတန်များဖြစ်သည်ဟု လူအများရှေ့တွင် အသိအမှတ်ပြုသည်။ သို့သော် အခြားတစ်ဖက်တွင် ၎င်းတို့သည် လှည့်လည်သွားလာ၍ မည်သည့်အမှားအယွင်းမှ မလုပ်ဆောင်ခဲ့ကြောင်း ရှင်းပြလျက် မိမိတို့ကိုယ်ကို ခုခံကာ မှန်ကန်ကြောင်းပြလေသည်။ ၎င်းတို့သည် အထက်မှ တရားမမျှတစွာ ဆက်ဆံသည်ကို ခံရသည်ဟုလည်းကောင်း၊ အထက်သည် တကယ့်အခြေအနေကို သတိမပြုမိဟုလည်းကောင်း၊ ဤအရာများကို လုပ်ဆောင်ရာ၌ ၎င်းတို့သည် ကြီးမားသော ဆင်းရဲဒုက္ခနှင့် နစ်နာမှုကို တောင့်ခံကာ ကြီးမားသော အဖိုးအခကို ပေးဆပ်ခဲ့ပြီးဖြစ်၍ ဤသို့ ဆက်ဆံခြင်း မခံရသင့်ဟုလည်းကောင်း ဆိုသည်။ ကရုဏာကို ပိုမိုရရှိရန်အတွက်၊ ၎င်းတို့က မိမိတို့ကိုယ်ကို နတ်ဆိုးများနှင့် စာတန်များအဖြစ် အသိအမှတ်ပြုသည်ကိုလည်းကောင်း၊ ၎င်းတို့သည် မိမိတို့ကိုယ်ကို သိမြင်သည်ကိုလည်းကောင်း၊ အထက်က ၎င်းတို့အပေါ် မမျှတသည်ကိုလည်းကောင်း၊ ၎င်းတို့သည် အသေးအဖွဲကိစ္စတစ်ခုကြောင့် အထုတ်ခံရသည်ဟုလည်းကောင်း လူတို့က မှားယွင်းစွာယုံကြည်စေရန် လုပ်ဆောင်ဖို့အတွက် ဤအရာများကို ပြောဆိုကြသည်။ ၎င်းတို့သည် မိမိတို့ကိုယ်ကိုသိပြီး ခေါင်းဆောင်များ ဖြစ်ထိုက်သည်ဟု ထင်မြင်အောင် လုပ်ဆောင်သည်။ ၎င်းတို့သည် အမှန်တကယ်တွင် မိမိတို့ကိုယ်ကို အင်တိုက်အားတိုက် ခုခံပြီး မှန်ကန်ကြောင်းပြဆိုကြသည်။ အယောင်ဆောင်ခြင်း၊ မိမိတို့ကိုယ်ကို မှန်ကန်ကြောင်းပြဆိုခြင်း၊ ဝိညာဉ်ရေးရာ ဆောင်ပုဒ်များကို အော်ဟစ်ခြင်း၌ ကျွမ်းကျင်သောဤလူတို့သည် မိမိတို့ကိုယ်ကို အမှန်တကယ်သိနိုင်သလော။ (မသိနိုင်ပါ။) ၎င်းတို့၏ မိမိကိုယ်ကို သိမြင်မှုဆိုသည့်အရာမှာ ဖြစ်သလိုလုပ်ခြင်း၊ အခြားလူများကို လိမ်ညာခြင်း၊ အခြားလူများ အကောင်းမြင်စေရန်သက်သက်ဖြင့် ဟန်လုပ်ခြင်းတို့ ဖြစ်သည်။ ၎င်းတို့သည် နောင်တရပြီး မိမိတို့အပြစ်ကို ဝန်ခံရန်အတွက် ဘုရားသခင်ရှေ့မှောက်သို့ စစ်မှန်စွာ မလာကြပေ။ ပြီးလျှင် ၎င်းတို့သည် ဘုရားသခင်က ၎င်းတို့အား ပြုပြင်ခြင်း၊ ဖော်ထုတ်ခြင်းနှင့် ဆုံးမပဲ့ပြင်ခြင်း၊ သို့မဟုတ် ထုတ်ပယ်ခြင်းကိုပင် လက်မခံကြပေ။ ၎င်းတို့တွင် ဤသို့သော သဘောထားတစ်ခု မရှိခြင်းသာ ဖြစ်သည်။

ယခုခေတ်ကာလတွင် လူအများစု၏ အတွေ့အကြုံသည် ပေါ့တန်လွန်းပြီး ၎င်းတို့၏ မိမိကိုယ်ကိုသိမြင်မှုက နည်းပါးလွန်းသည်။ လူများစွာတို့က ၎င်းတို့၏နည်းလမ်းများနှင့် ကိုယ်ပိုင်အမှားများရှိ မှားယွင်းမှုများကိုသာ အသိအမှတ်ပြုကြပြီး အနည်းငယ်သောလူတို့သာ ၎င်းတို့၏ ညံ့ဖျင်းသောအစွမ်းအစ၊ လွဲချော်သော သဘောပေါက်နားလည်မှု၊ ဝိညာဉ်ရေးရာ နားလည်သဘောပေါက်မှု ချို့တဲ့ခြင်းနှင့် လူ့သဘာဝ ချို့တဲ့ခြင်းတို့ကို အသိအမှတ်ပြုသည်။ ဤထက် ပို၍ပင် နည်းပါးသောလူတို့က ဘုရားသခင်၏ ဖော်ထုတ်သည့် နှုတ်ကပတ်တော်များသည် အကြွင်းမဲ့ အမှန်တရားများ ဖြစ်သည်ကိုလည်းကောင်း၊ ဤနှုတ်ကပတ်တော်များက ၎င်းတို့၏ ကိုယ်ပိုင်ဖောက်ပြန်ပျက်စီးမှုကို ဖော်ထုတ်သည်ကိုလည်းကောင်း၊ ဘုရားသခင်၏ နှုတ်ကပတ်တော်များသည် လုံးဝ တိကျမှန်ကန်ပြီး မည်သည့်အမှားအယွင်းမျှ မရှိသည်ကိုလည်းကောင်း အသိအမှတ်ပြုဖြစ်သည်။ ဤသည်မှာ လူတို့သည် မိမိတို့ကိုယ်ကို အမှန်တကယ် မသိသေးကြောင်း သက်သေဖြစ်သည်။ ၎င်းတို့က စာတန်ဆန်သော စိတ်သဘောထားများနှင့် စာတန်ဆန်သော သဘာဝတို့နှင့်အညီ နေထိုင်သည်ကို အသိအမှတ်မပြုခြင်းသည် ၎င်းတို့က မိမိတို့ကိုယ်ကို အမှန်တကယ် မသိခြင်းကို ဆိုလိုသည်။ ၎င်းတို့က မည်သည့်ဖောက်ပြန်ပျက်စီးသော စိတ်သဘောထားများကို ထုတ်ဖော်သည်ဖြစ်စေ ယင်းတို့ကို ၎င်းတို့အသိအမှတ်ပြုပေ။ ၎င်းတို့သည် ယင်းတို့ကို လျှို့ဝှက်ဖုန်းကွယ်ပြီး ၎င်းတို့၏ ဖောက်ပြန်ပျက်စီးမှုကို အခြားလူများမမြင်စေရန် တားဆီးသည်။ ဤသို့သောလူတို့သည် မိမိတို့ကိုယ်ကို အယောင်ဆောင်ရာတွင် အလွန်တော်ပြီး ကြောင်သူတော်များဖြစ်သည်။ ယခုအချိန်ကာလတွင် လူအများစုသည် သမ္မာတရားအပေါ် ယိမ်းယိုင်လာကြပြီး ၎င်းတို့၏ အခြေအနေမှာ အတော်အတန် တိုးတက်ခဲ့ကြသည်။ သို့သော် မိမိတို့ကိုယ်ကို အမှန်တကယ် မသိမြင်သေးပေ။ လူများစွာတို့သည် ထိုဖြစ်ရပ်တွင် ၎င်းတို့မှားယွင်းသည်ဟု အသိအမှတ်ပြုရုံဖြင့်သာ အမှားတစ်ခုလုပ်ဆောင်ခြင်းကို တစ်သမတ်တည်းဖြစ်သောပုံစံဖြင့် တုံ့ပြန်ကြသည်။ သင်က ၎င်းတို့အား “ဤကိစ္စတွင် အတိအကျ မည်သည့်နေရာ၌ မှားယွင်းခဲ့သနည်း။ မည်သည့်သမ္မာတရား စည်းမျဉ်းများအား သင်ချိုးဖောက်ခဲ့သနည်း။ မည်သည့်ဖောက်ပြန်ပျက်စီးသော စိတ်သဘောထားများကို သင် ထုတ်ဖော်ခဲ့သနည်း” ဟု မေးလျှင် ၎င်းတို့က “ဤသည်မှာ ဖောက်ပြန်ပျက်စီးသော စိတ်သဘောထားများနှင့် သက်ဆိုင်ခြင်းမရှိ။ ခဏတာ သတိလစ်ဟင်းမှုသာဖြစ်သည်။ ယင်းကို ကျွန်ုပ်သေချာမစဉ်းစားဘဲ စိတ်လိုက်မာန်ပါ လုပ်ဆောင်ခဲ့သည်။ ဤသို့ ကျွန်ုပ် မရည်ရွယ်ပါ” ဟု ဖြေဆိုလိမ့်မည်။ ၎င်းတို့၏ မရည်ရွယ်သော လုပ်ဆောင်မှုများနှင့် အမှားများသည် ၎င်းတို့ ထုတ်ဖော်ခဲ့သော ဖောက်ပြန်ပျက်စီးခြင်းအတွက် အကာအကွယ်များနှင့် ဆင်ခြေများ ဖြစ်လာခဲ့ကြသည်။ ဤသည်မှာ ၎င်းတို့၏ ကိုယ်ပိုင်ဖောက်ပြန်ပျက်စီးမှုအပေါ် အမှန်တကယ် အသိအမှတ်ပြုခြင်း ဟုတ်သလော။ မဟုတ်ပေ။ သင်သည် သင်ထုတ်ဖော်ပြသည့် ဖောက်ပြန်ပျက်စီးသော စိတ်သဘောထားများအတွက် မကြာခဏ ဆင်ခြေများပြုလုပ်လျှင်၊ သို့မဟုတ် အကြောင်းပြချက်များရှာလျှင် သင်သည် သင်၏ ကိုယ်ပိုင်ဖောက်ပြန်ပျက်စီးသော စိတ်သဘောထားများကို အမှန်တကယ် ရင်မဆိုင်နိုင်သကဲ့သို့ ယင်းတို့ကို သင်အသိအမှတ်မပြုနိုင်၊ သို့မဟုတ် နားမလည်နိုင်ပေ။ ဥပမာ လူတစ်ဦးသည် သူ၏တာဝန်များကို အချိန်ကာလတစ်ခုကြာ ကောင်းစွာ ထမ်းဆောင်သည်။ သူ၏ အခြေအနေက တည်ငြိမ်သည်။ သူလုပ်ဆောင်သမျှသည် ချောမွေ့ပြီး အခက်အခဲမရှိ။ ပြီးလျှင် သူသည် အပြုသဘောဆောင်သောရလဒ်အချို့ကို ရရှိပြီး အခြားလူများက ချီးမွမ်းခြင်းကို ရရှိသည်။ သူသည် အလွန်ကူညီထောက်ပံ့ခဲ့သည်ဟုလည်းကောင်း၊ ဘုရားသခင်က သူ့အပေါ် ဆုလာဘ်များပေးအပ်သင့်သည်ဟုလည်းကောင်း ခံစားရသည်။ ရလဒ်အနေဖြင့် သူသည် မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်သော ဖောက်ပြန်ပျက်စီးသည့် စိတ်သဘောထားကို ထုတ်ဖော်လေသည်။ သူသည် မိမိကိုယ်ကို သူတစ်ပါးတို့ထက်သာသည်ဟု ယုံကြည်သည်။ မည်သူ့ကိုမဆို နားထောင်ရန် ငြင်းဆန်ကာ မည်သူ့နှင့်မျှ သဟဇာတဖြစ်စွာ ပူးပေါင်းမလုပ်ဆောင်နိုင်ပေ။ မကြာခင်တွင် သူသည် တာဝန်များထမ်းဆောင်ရာတွင် အမှားများပြုလုပ်သည်။ ပြီးလျှင် သူ၏ ညီအစ်ကိုမောင်နှမများက သူ့အား မာနထောင်လွှားလွန်းသည်ဟု ပြောဆိုလျက် ပြုပြင်ကာ ဖော်ထုတ်သည်။ သူသည် ဤအချက်ကို လက်ခံရန် အခက်အခဲဖြစ်ပြီး ဤကိစ္စအပေါ် မရပ်မနား ချင့်ချိန်တွေးတောသည်။ “ကျွန်ုပ်သည် မာနထောင်လွှားသလော။ ဤသို့ မထင်ပါ။ မည်သည့်အရာကိုမျှ ကျွန်ုပ် ကြွားဝါပြီးမပြောဆိုခဲ့။ ထို့ကြောင့် ကျွန်ုပ်သည် အဘယ်သို့ မာနထောင်လွှားလာနိုင်ပါသနည်း” ဟူ၍ ဖြစ်သည်။ သူသည် “မာနထောင်လွှား” ဟူသည့်စကားတွင် ပိတ်မိနေပြီး မကျော်နိုင်ပေ။ ဤစကားလုံးကို သူလက်ခံနိုင်စွမ်းမရှိခြင်းက သူသည် အသိစိတ်မရှိသည်ကို ပြသည်။ မိမိကိုယ်ကို လုံးဝ မသိပေ။ မိမိ၏ ကိုယ်ပိုင်ဖောက်ပြန်ပျက်စီးသည့်စိတ်သဘောထားကို အသိအမှတ်မပြုပေ။ တစ်စုံတစ်ခုက သင့်အပေါ် ကျရောက်ကာ ဖောက်ပြန်ပျက်စီးသော စိတ်သဘောထားတစ်ခုကို ထုတ်ဖော်သောအခါ တစ်စုံတစ်ယောက်က သင့်ကို ဝေဖန်လျှင်၊ သို့မဟုတ် ပြုပြင်လျှင်၊ သင်လုပ်ဆောင်ခဲ့သည့်အရာက သမ္မာတရားစည်းမျဉ်းများအား ချိုးဖောက်သည်ဟု ပြောသည့်တိုင်အောင် သင်က ထိုသီးသန့်အမှုကိစ္စတစ်ခုရှိ သင်၏အမှားကိုသာ အသိအမှတ်ပြုလျှင်၊ ဤသည်မှာ ထုတ်ဖော်ပြသော ဖောက်ပြန်ပျက်စီးသည့် စိတ်သဘောထားတစ်ခုကြောင့်ဖြစ်သည့် အကျိုးဆက်တစ်ခုဖြစ်သည်ဟု ဝန်ခံလိုစိတ်မရှိလျှင်၊ ဖောက်ပြန်ပျက်စီးသည့် စိတ်သဘောထားတစ်ခုကို သင်ထုတ်ဖော်ပြသည့်အချက်အား လုံးဝ လက်ခံခြင်းမရှိဘဲသာ အမှားကို ပြုပြင်လိုစိတ်ရှိလျှင် သင်သည် သင့်ကိုယ်သင် အမှန်တကယ်မသိပေ။ အမှားများကို အသိအမှတ်ပြုခြင်းသည် မိမိကိုယ်ကို သိမြင်မှုကို သူ့ဘာသာ ကိုယ်စားပြုနိုင်သလော။ မိမိကိုယ်ကိုသိမြင်မှုသည် မိမိအမှားများ၏ အရင်းခံအကြောင်းကို ခွဲခြားသိမြင်ခြင်းနှင့် မိမိ၏ ဖောက်ပြန်ပျက်စီးသော စိတ်သဘောထားအား သိမြင်ခြင်းကို ရည်ညွှန်းသည်။ သင်သည် မှားယွင်းသောအရာတစ်စုံတစ်ခုကို လုပ်ဆောင်ခဲ့သည်ဟု အသိအမှတ်ပြုလျှင်၊ ထို့နောက်တွင် သင်၏အပြုအမူက ပြောင်းလဲသွားသည့်အတွက် သင်သည် တစ်ပုံစံတည်းသော အမှားတစ်ခုကို မပြုလုပ်တော့သည့်ပုံစံ ရှိသော်လည်း သင်သည် သင်၏ ဖောက်ပြန်ပျက်စီးသော စိတ်သဘောထားကို မဖယ်ရှားရသေးဘဲ အမှား၏ အရင်းခံအကြောင်းကို မဖြေရှင်းရသေးလျှင် အကျိုးဆက်က မည်သည့်အရာ ဖြစ်မည်နည်း။ သင်သည် ဖောက်ပြန်ပျက်စီးသော စိတ်သဘောထားတစ်ခုကို မလွှဲမရှောင်သာ ထုတ်ဖော်ပြဦးမည်ဖြစ်ပြီး ဘုရားသခင်ကို ပုန်ကန်ကာ ဆန့်ကျင်ဦးမည်ဖြစ်သည်။ အပြုအမူဆိုင်ရာ ပြောင်းလဲမှုအနည်းငယ်က သင့်စိတ်သဘောထားရှိ ပြောင်းလဲမှုနှင့် ညီမျှသည်ဟု မယူဆနှင့်။ မိမိကိုယ်ကိုသိမြင်ခြင်းသည် အဆုံးမရှိသော အမှုကိစ္စတစ်ခုဖြစ်သည်။ မိမိ၏ ဖောက်ပြန်ပျက်စီးသော စိတ်သဘောထား၏ အရင်းခံအကြောင်းကို၊ သို့မဟုတ် ဘုရားသခင်ကို ပုန်ကန်ပြီး ဆန့်ကျင်သည့် အကြောင်းရင်းက မည်သည့်နေရာ၌ တည်ရှိသည်ကို မသိနိုင်လျှင် သူသည် သူ၏ စိတ်သဘောထားတွင် ပြောင်းလဲမှုကို မရရှိနိုင်ပေ။ ဤသည်မှာ မိမိ၏ စိတ်သဘောထားပြောင်းလဲခြင်းနှင့်ပတ်သက်ပြီး ခက်ခဲသည့်အရာ ဖြစ်သည်။ ဘုရားသခင်ကို ယုံကြည်သူများစွာတို့သည် အဘယ်ကြောင့် မိမိအပြုအမူကိုသာ ပြောင်းလဲပြီး ၎င်းတို့၏ အသက်စိတ်သဘောထားကို မပြောင်းလဲသနည်း။ ဤသည်မှာ ပြဿနာတည်ရှိသည့်နေရာဖြစ်သည်။ သင်ထုတ်ဖော်သည့်အရာက သင့်အား သင်ကျေနပ်သလိုလုပ်ဆောင်စေခဲ့သော၊ ထင်ရာမြင်ရာ ဆုံးဖြတ်ချက်များချစေခဲ့သော၊ အခြားလူများနှင့် သဟဇာတဖြစ်စွာ ပူးပေါင်းမလုပ်ဆောင်စေသော၊ အခြားလူတို့၏အထက်တွင် မိမိကိုယ်ကိုထားရှိစေသော ဖောက်ပြန်ပျက်စီးသည့် စိတ်သဘောထားတစ်ခု ဖြစ်သည်ဟု အသိအမှတ်ပြုလျှင်၊ ထို့နောက် ဤအရာများကို အသိအမှတ်ပြုပြီးနောက်တွင် ယင်းတို့သည် ဖောက်ပြန်ပျက်စီးသော စိတ်သဘောထားတစ်ခုကြောင့်ဖြစ်သည်ဆိုသည်ကို သင်က ထပ်၍ အသိအမှတ်ပြုလျှင် ယင်းက သင့်အတွက် မည်သည့်အကျိုးများ ဖြစ်စေမည်နည်း။ ထိုအခါမှသာ သင်က ဤအမှုကိစ္စများအပေါ် အမှန်တကယ် ဆင်ခြင်သုံးသပ်လိမ့်မည်။ ပြီးလျှင် ဖောက်ပြန်ပျက်စီးသော စိတ်သဘောထားတစ်ခုက ဘုရားသခင်ကို ဆန့်ကျင်သည့် အရင်းအမြစ်ဖြစ်သည်၊ လူသားမျိုးနွယ်အပေါ် စာတန်၏ ဖျက်ဆီးခြင်း၏ ခိုင်မာသောသက်သေ ဖြစ်သည်ဆိုသည်ကို သိမြင်လိမ့်မည်။ ဤဖောက်ပြန်ပျက်စီးသော စိတ်သဘောထားကို မဖယ်ရှားလျှင် ထိုသူသည် လူသားဟုခေါ်ဆိုခံရဖို့ မထိုက်တန်ဘဲ ဘုရားသခင်ရှေ့တွင် အသက်ရှင်နေထိုင်ရန် မထိုက်တန်သည်ကို သိမြင်လိမ့်မည်။ သို့ရာတွင် သင်က တစ်စုံတစ်ခုကို မှားယွင်းစွာ လုပ်ဆောင်ခဲ့သည်ကိုသာ အသိအမှတ်ပြုလျှင် အကျိုးဆက်က မည်သည့်အရာ ဖြစ်မည်နည်း။ အမှုအရာများကို သင်လုပ်ဆောင်သည့်ပုံစံနှင့် ယင်းတို့အား ပြုပြင်ခြင်း၊ အပြင်ပန်းတွင် သင့်လျော်သည့်ပုံစံပေါ်စေရန် အမှုအရာများအား မည်သို့လုပ်ဆောင်ရမည်၊ သင်၏ မာနထောင်လွှားသော စိတ်သဘောထားကို ထုတ်ဖော်ခြင်းအား မည်သို့ ဖုံးကွယ်ရမည်ဆိုသည်တို့အပေါ်ကိုသာ အာရုံစိုက်ပြီး အားထည့်လိမ့်မည်။ သင်သည် ပိုပို၍ လှည့်ဖြားလာလိမ့်မည်ဖြစ်ပြီး အခြားလူတို့ကို သင်လိမ်ညာရန် အသုံးပြုသည့် နည်းလမ်းများက ပိုပို၍ ဆန်းပြားလာလိမ့်မည်။ သင်က “ဤတစ်ကြိမ်တွင် ငါ အမှားတစ်ခုပြုလုပ်ခဲ့ပြီဖြစ်သည်။ ငါ ဂရုမစိုက်ခဲ့သည့်အတွက် လူတိုင်းက မြင်သည်။ ငါသည် နောက်တစ်ကြိမ်တွင် ဤသို့ဖြစ်မည်မဟုတ်” ဟု တွေးလိမ့်မည်။ ရလဒ်မှာ အပေါ်ယံ၌ အမှုအရာများအား သင်လုပ်ဆောင်သည့်ပုံစံက ပြောင်းလဲပြီးဖြစ်ကာ အခြားလူများက မည်သည့်ပြဿနာကိုမျှ မမြင်ရသော်လည်း သင်က သင်၏ ဖောက်ပြန်ပျက်စီးသော စိတ်သဘောထားကို ဖုံးကွယ်ထားပြီး ဖြစ်သည်။ သင်သည် မည်သည့်အရာ ဖြစ်လာခဲ့သနည်း။ သင်သည် ပို၍ လှည့်ဖြားတတ်ကာ ကြောင်သူတော်ဆန်လာသည်။ အပေါ်ယံတွင် မည်သူကမျှ မည်သည့်ပြဿနာကိုမျှ မမြင်နိုင်စေရန်၊ သို့မဟုတ် အမှားမရှာနိုင်ဘဲ မိမိ၏ လုပ်ရပ်များက အပြစ်အနာအဆာမရှိသည့် ပုံစံရှိစေရန်အတွက် မိမိပြောဆိုပြုမူသည့်ပုံစံအပေါ် အာရုံစိုက်ကာ အားထည့်သော်လည်း မိမိ၏ ဖောက်ပြန်ပျက်စီးသော စိတ်သဘောထားကို စိုးစဉ်းမျှ မပြောင်းလဲလျှင် ထိုသူသည် ဖာရိရှဲဖြစ်လာသည် မဟုတ်လော။ ကြောင်သူတော်ဆန်စွာ လုပ်ဆောင်ခြင်းက လူတို့ကို လှည့်စားကောင်းလှည့်စားနိုင်သော်လည်း ဘုရားသခင်ကို လှည့်စားနိုင်သလော။ သမ္မာတရားအား လိုက်စားခြင်းသည် မည်သည့်အရာကို ဆိုလိုသနည်း။ အဓိကအားဖြင့် ယင်းသည် မိမိ၏ စိတ်သဘောထားတွင် ပြောင်းလဲခြင်းတစ်ခုအား လိုက်စားခြင်းကို ရည်ညွှန်းသည်။ မိမိ၏ ကိုယ်ပိုင်ဖောက်ပြန်ပျက်စီးသော စိတ်သဘောထားကို လုံးဝ မသိလျှင် မိမိ၏ စိတ်သဘောထား၌ ပြောင်းလဲခြင်းတစ်ခုရှိရန် မဖြစ်နိုင်ပေ။ ထိုသူ၌ ဖောက်ပြန်ပျက်စီးသော စိတ်သဘောထားတစ်ခုရှိသည်ကို အသိအမှတ်ပြုသည့် တစ်ချိန်တည်းတွင် သူသည် သမ္မာတရားကိုလည်း လက်ခံရမည်။ သူသည် အတိအကျမည်သည့်နေရာ၌ မှားယွင်းနေသည်၊ မည်သည့်နေရာ၌ ကျရှုံးသည်ကို ဆင်ခြင်သုံးသပ်ရမည်။ ထို့နောက် သူ၏ ပြဿနာများကို ဖြေရှင်းရန် သမ္မာတရားကို ရှာဖွေရမည်။ ဤနည်းအားဖြင့်သာ သူ၏ ဖောက်ပြန်ပျက်စီးသော စိတ်သဘောထားကို တဖြည်းဖြည်းချင်း ဖယ်ရှားနိုင်သည်။ သူ၏ တာဝန်ထမ်းဆောင်ခြင်းတွင် သမ္မာတရားကို လက်တွေ့လုပ်ဆောင်နိုင်သည်။ ပြီးလျှင် စည်းမျဉ်းများဖြင့် လုပ်ဆောင်နိုင်သည်။ ဤသို့ လုပ်ဆောင်ရာ၌ သူသည် သမ္မာတရားစစ်မှန်မှုအတွင်းသို့ ဝင်ရောက်လိမ့်မည်။ သမ္မာတရားကို ရှာဖွေနိုင်ပြီး လက်တွေ့လုပ်ဆောင်နိုင်သူတို့ကသာ သမ္မာတရားကို လိုက်စားသူများ ဖြစ်သည်။ ၎င်းတို့သည် သမ္မာတရားအား လက်တွေ့လုပ်ဆောင်ခြင်းနှင့် စည်းမျဉ်းများဖြင့် ပြုမူဆောင်ရွက်ခြင်းအပေါ် အဆက်မပြတ် အားစိုက်ထုတ်နိုင်သော၊ ၎င်းတို့၏ အတွေ့အကြုံများကို ပြန်လည်သုံးသပ်နိုင်ပြီး သင်ခန်းစာယူနိုင်သောသူများ ဖြစ်ကြသည်။ သမ္မာတရားကို ၎င်းတို့ လက်တွေ့လုပ်ဆောင်ပြီး စစ်မှန်မှုအတွင်းသို့ ဝင်ရောက်သည်နှင့်၊ မိမိ၏ လုပ်ရပ်များ၌ စည်းမျဉ်းများရှိပြီး အမှားများပြုလုပ်မှု ပိုမိုနည်းပါးသည်နှင့် ၎င်းတို့သည် တဖြည်းဖြည်းချင်းဖြင့် ဘုရားသခင်က အသုံးပြုခြင်းကို ခံရဖို့အတွက် သင့်တော်လာလိမ့်မည်။ လူတစ်ဦးသည် သမ္မာတရားအား လိုက်စားသူမဟုတ်လျှင် ထိုသူသည် မိမိကိုယ်ကို သိမြင်ခြင်းနှင့်ပတ်သက်ပြီး အနှစ်မဲ့စွာပြောဆိုရာ၌ မည်သို့မွေ့လျော်ပါစေ၊ မိမိကိုယ်ကို နတ်ဆိုးတစ်ကောင်နှင့် စာတန်အဖြစ် မည်သို့သရုပ်ဖော်ပါစေ အဆုံး၌ သူသည် သမ္မာတရားကို လက်တွေ့လုပ်ဆောင်ဦးမည်မဟုတ်။ ဤသို့ဆိုလျှင် ဤနှစ်ဦးကြား ကွာခြားချက်မှာ အဘယ်နည်း။ တစ်ဦးသည် သူ၏ ကိုယ်ပိုင်ဖောက်ပြန်ပျက်စီးသော စိတ်သဘောထားကို အသိအမှတ်ပြုသည်။ သမ္မာတရားစည်းမျဉ်းများကို ရှာဖွေသည်။ သမ္မာတရားနှင့်အညီ လက်တွေ့လုပ်ဆောင်သည်။ ဤသည်မှာ သမ္မာတရားအား လိုက်စားခြင်းလမ်းကြောင်း ဖြစ်သည်။ အခြားတစ်ဦးမှာ သူ့၌ ဖောက်ပြန်ပျက်စီးသော စိတ်သဘောထားတစ်ခုရှိသည်ကို အသိအမှတ်မပြုသကဲ့သို့ သူ၏ ကိုယ်ပိုင်ဖောက်ပြန်ပျက်စီးသော စိတ်သဘောထားနှင့်ဆိုင်သော အမှန်တရားကို လက်မခံပေ။ ထိုအစား အမှုအရာများကို သူလုပ်ဆောင်သည့်အပေါ် အားစိုက်ထုတ်သည်။ သို့ရာတွင် ဤသည်မှာ သူ၏ အပြင်ပန်းအပြုအမူကိုသာ ပြောင်းလဲသည်။ ပြီးလျှင် သူ၏ အသက်စိတ်သဘောထား၌ ပြောင်းလဲမှုမရှိ။ ဤအတွက်ကြောင့် သူ၏ အပြုအမူသည် ပို၍ လိမ်ညာခြင်းဖြစ်သည်။ ဤလူအမျိုးအစားများက လက်တွေ့လုပ်ဆောင်သည့်အရာသည် သမ္မာတရားစည်းမျဉ်းများနှင့် ကိုက်ညီသလော။ ယင်းမှာ လုံးဝပင် စံမမီဘဲ အနည်းငယ်မျှပင် မနီးစပ်ပေ။ ၎င်းတို့လုပ်ဆောင်သည့်အရာမှာ အယောင်ဆောင်ခြင်း၊ ဟန်ဆောင်ခြင်းနှင့် လိမ်ညာခြင်းဖြစ်သည်။ ၎င်းတို့၏ ပန်းတိုင်သည် ဘုရားသခင် ရွေးချယ်သောလူများကို လိမ်ညာရန် ဖြစ်သည်။ ၎င်းတို့သည် သမ္မာတရားကို လက်တွေ့မလုပ်ဆောင်သော်လည်း အသင်းတော်၌ အဆင့်အတန်းရှိနိုင်ရန်အတွက် လူတိုင်းအား ၎င်းတို့ကို ချီးမွမ်းစေလိုပြီး အသိအမှတ်ပြုစေလိုဆဲ၊ ထောက်ခံချက်ပေးစေလိုဆဲ ဖြစ်သည်။ ဤသည်မှာ အယောင်ဆောင်ခြင်းနှင့် လိမ်ညာခြင်းတို့၏ သရုပ်သကန်မဟုတ်သလော။ ၎င်းတို့သည် မိမိတို့ကိုယ်ကို အယောင်ဆောင်ဖုံးကွယ်ကာ အခြားလူများ၏ မျက်နှာသာပေးခြင်းအား မည်သို့ရယူရမည်ကို အာရုံစိုက်သည်။ အမှုအရာများအား ဤသို့လုပ်ဆောင်သည့်ပုံစံတွင် သမ္မာတရားစည်းမျဉ်းတစ်ခုခု ရှိသလော။ လုံးဝ မရှိ။ ယင်းသည် လူသားစိတ်၏ စိတ်ကူးထင်မြင်မှုများ၊ လူသားနည်းလမ်းများ၊ လောကီဆိုင်ရာ ဆက်ဆံမှုများအတွက် လူသားအတွေးအခေါ်များအပေါ် လုံးဝ အခြေခံပြီး စာတန်ဆန်သော စိတ်သဘောထားနှင့်အညီ အသက်ရှင်နေထိုင်ဆဲ ဖြစ်သည်။ ဤ ကြောင်သူတော်ဆန်ခြင်းအား ကျင့်သုံးမှုသည် အတုအယောင် ဝိညာဉ်ရေးရာပြည့်ဝခြင်းနှင့် သက်ဆိုင်သည်။ ဤသည်မှာ လူတို့ကို လိမ်ညာခြင်းဖြစ်ပြီး သမ္မာတရားစစ်မှန်မှု စိုးစဉ်းမျှပင် မရှိ။

အခြားသောလူများကဲ့သို့ မိမိတို့၏ တာဝန်များကို ထမ်းဆောင်ပုံရသော လူအချို့သည် ရုတ်တရက် မျှော်လင့်မထားဘဲ ကြီးမားသောဆိုးယုတ်မှုကို ကျူးလွန်ခြင်းအားဖြင့် အဆုံး၌ လူတို့ကို အံ့အားသင့်သွားစေရသည်မှာ အဘယ်ကြောင့်နည်း။ ဤသို့သောအရာတစ်ခု ဖြစ်ပွားခြင်းသည် တစ်ရက်မျှ၊ သို့မဟုတ် နှစ်ရက်မျှဖြင့် ဖြစ်ပေါ်နိုင်သလော။ လုံးဝ မဖြစ်ပေါ်နိုင်ပေ။ သုံးပေရှိသောရေခဲသည် တစ်ရက်တည်းဖြင့် မအေးခဲနိုင်ပေ။ အပြင်ပန်းတွင် ၎င်းတို့သည် ကောင်းစွာပြုမူနေထိုင်ပြီး ရိုးရှင်းသည်။ မည်သူကမျှ ၎င်းတို့ကို အမှားမရှာနိုင်ပေ။ အဆုံးတွင် ၎င်းတို့လုပ်ဆောင်သည့် မကောင်းသောအရာများမှာ အခြားမည်သူမဆိုက လုပ်ဆောင်သော အရာများထက် ပို၍ အလွန်အကျူးဖြစ်ပြီး အံ့အားသင့်ဖွယ်ကောင်းသည်။ ဤအရာများကို “ကောင်းစွာပြုမူနေထိုင်”သူများဆိုသော သူတို့က လုပ်ဆောင်ကြသည်။ ဤလူစားမျိုးတို့တွင် မည်သည့် အတွေ့ရများသည့် စရိုက်လက္ခဏာများရှိသည်ကို သင်တို့ သိသလော။ (၎င်းတို့သည် ကောင်းသောအပြုအမူရှိပုံပေါ်ပြီး ပုံမှန်အားဖြင့် အလွန်ပင် ယဉ်ကျေးသည်။) ၎င်းတို့ အသက်ရှင်နေထိုင်သည့်အရာနှင့် ၎င်းတို့၏ သဘာဝအနှစ်သာရတွင် ကွဲပြားသော စရိုက်လက္ခဏာနှစ်ခုရှိသည်။ ဤအဓိကအချက်များကို သင်တို့ သဘောပေါက်နိုင်သလော။ (၎င်းတို့သည် သမ္မာတရားကို မချစ်၊ သို့မဟုတ် ၎င်းတို့၏ ဖောက်ပြန်ပျက်စီးသော စိတ်သဘောထားကို အသိအမှတ်မပြု။ ၎င်းတို့သည် မိမိတို့ကိုယ်ကို သိမြင်ခြင်းအကြောင်းပြောသောအခါ အယောင်ဆောင်ပြီး ကြောင်သူတော်ဆန်စွာ ပြုမူကြသည်။) ကြောင်သူတော်ဆန်စွာ ပြုမူခြင်းသည် ဤအရာ၏ သွင်ပြင်လက္ခဏာတစ်ခု ဖြစ်သည်။ ဤသို့ဆိုလျှင် ဤလူတို့သည် ကြောင်သူတော်ဖြစ်သည်ကို မည်သို့ရှာဖွေတွေ့ရှိပြီး အတည်ပြုနိုင်သနည်း။ ၎င်းတို့ အသက်ရှင်နေထိုင်နေသည့် ဤအပြုအမူကောင်းများသည် အယောင်ဆောင်ခြင်းသာဖြစ်သည်ဆိုသည်ကို မည်သို့ အတည်ပြုနိုင်သနည်း။ (အပေါ်ယံတွင် ၎င်းတို့သည် အလွန်ကောင်းစွာ ပြောဆိုသည်။ သို့သော် ၎င်းတို့၏ အမှန်တကယ် လုပ်ရပ်များတွင် ဘုရားအိမ်တော်၏ အကျိုးစီးပွားများကို အလေးမထားဘဲ ကိုယ်ပိုင်အကျိုးစီးပွားများကို ကာကွယ်သည်။) ဤသည်မှာ ကြောင်သူတော်ဆန်စွာ လုပ်ဆောင်ခြင်း၏ တိကျသော သရုပ်သကန်ဖြစ်သည်။ ဤကြောင်သူတော်ဆန်သော လူတို့သည် ကောင်းစွာ စကားပြောဆိုသော်လည်း အမှန်တကယ်တွင် လူတို့အား လိမ်ညာပြီး အထင်အမြင်မှားစေနေခြင်း ဖြစ်သည်။ ထို့အပြင် ၎င်းတို့သည် ကိုယ့်အကျိုးစီးပွားများကိုသာ ကာကွယ်ပြီး ဘုရားအိမ်တော်၏ အကျိုးစီးပွားများကို အလေးမထားဘဲ ၎င်းတို့၏ တစ်ကိုယ်ကောင်းဆန်မှုနှင့် ယုတ်ညံ့မှုကို ဖော်ထုတ်သည်။ ၎င်းတို့သည် ပြည့်တန်ဆာကဲ့သို့ အသက်ရှင်နေထိုင်လိုသော်လည်း ၎င်းတို့၏ မေထုန်မမှီဝဲခြင်းအတွက် ဂုဏ်ပြုမော်ကွန်းတိုင်ကို မျှော်လင့်နေဆဲဖြစ်သည်။ ဤအရာအားလုံးက ၎င်းတို့၏ သဘာဝအနှစ်သာရကို ကိုယ်စားပြုသည်။ မည်သည့်လူ့သဘာဝမျှမရှိ။ ၎င်းတို့၏ သဘာဝအနှစ်သာရတွင် ကွဲပြားသော စရိုက်လက္ခဏာနှစ်ခုရှိသည်ဟု ယခုပင် ငါပြောခဲ့သည်။ ပထမ စရိုက်လက္ခဏာမှာ ဤလူစားမျိုးတို့သည် အလွန်အမင်း ဝိညာဉ်ရေးရာပြည့်ဝနေသည့်အလား ဆောင်ပုဒ်များကို မကြာခဏအော်ဟစ်ကာ အယူဝါဒများကို ပြောဆိုကြသည်။ သို့သော် အမှန်တွင် သမ္မာတရားကို အနည်းငယ်မျှမချစ်။ သမ္မာတရားအပေါ် ချစ်ခြင်းမရှိဘဲ သမ္မာတရားကို လက်တွေ့လုပ်ဆောင်ရန် ၎င်းတို့အတွက် မဖြစ်နိုင်ပေ။ ဤအချက်ကို အခြေခံလျှင် ၎င်းတို့က ၎င်းတို့၏ ကိုယ်ပိုင်အကျိုးစီးပွားများကိုသာ အလေးထားသည်ဟု အစောပိုင်းက သင်တို့ပြောဆိုခဲ့သောအရာသည် ဤသရုပ်သကန်များထဲမှ တစ်ခုမဟုတ်လော။ ၎င်းတို့၏ ကိုယ်ပိုင်အကျိုးစီးပွားကို အဘယ်ကြောင့် အလေးထားသနည်း။ သမ္မာတရားကို ၎င်းတို့ ချစ်သလော။ (သမ္မာတရားကို ၎င်းတို့ မချစ်ပါ။ အကျိုးစီးပွားများကိုသာ နှစ်သက်သည်။) ၎င်းတို့၏ ကိုယ်ပိုင်အကျိုးစီးပွားများကိုသာ ကာကွယ်ပြီး ဘုရားအိမ်တော်၏၊ သို့မဟုတ် ညီအစ်ကိုမောင်နှမများ၏ အကျိုးစီးပွားများကို လုံးဝ အလေးမထားပေ။ ဤသည်မှာ သမ္မာတရားကို စိုးစဉ်းမျှပင် မချစ်ခြင်း၏ အပြုအမူမဟုတ်လော။ လူအချို့က “၎င်းတို့က သမ္မာတရားကို မချစ်လျှင် သမ္မာတရားနှင့် ဆက်စပ်သည့် အရာများကို ၎င်းတို့ အဘယ်ကြောင့် အစဉ် မိတ်သဟာယဖွဲ့သနည်း” ဟု ဆိုသည်။ ဤအရာကို သင်တို့ မည်သို့ရှင်းမည်နည်း။ (အခြားလူများ အထင်ကြီးစေရန်၊ မိမိတို့ကိုယ်ကို အယောင်ဆောင်ရန်နှင့် ဟန်ဆောင်ရန် လုပ်ဆောင်ခြင်း ဖြစ်သည်။) ဤသည်မှာ ဤအရာ၏ သွင်ပြင်လက္ခဏာတစ်ခုဖြစ်သည်။ သို့သော် ဤအရာအပြင် ၎င်းတို့သည် သမ္မာတရားအကြောင်းကို အမှန်တကယ် မိတ်သဟာယဖွဲ့နေခြင်းဖြစ်သလော။ ယင်းသည် သမ္မာတရား လုံးဝ မဟုတ်။ စကားများနှင့် အယူဝါဒများသာဖြစ်သည်။ ယင်းသည် ရှင်းလင်းစွာပင် စကားများနှင့် အယူဝါဒများသာ ဖြစ်လျှင် သမ္မာတရားဟု အဘယ်သို့ ခေါ်ဆိုနိုင်သနည်း။ သူရူးများသည်သာ စကားများ၊ အယူဝါဒများကို သမ္မာတရားနှင့် တန်းတူထားရှိမည်ဖြစ်သည်။ နတ်ဆိုးများသည် လူတို့ကို အထင်အမြင်မှားစေရန်အတွက် စကားများနှင့် အယူဝါဒများအား ပြောဆိုရာတွင် အလွန်ပင် ကျွမ်းကျင်ကြသည်။ ၎င်းတို့သည် အခြားလူများနှင့် ဘုရားသခင်ကို လိမ်ညာရန်အတွက်လည်း သမ္မာတရားရှိသည့်လူများအဖြစ် ဟန်ဆောင်လိုကြသည်။ ၎င်းတို့ပြောဆိုသည့် စကားများနှင့် အယူဝါဒများသည် မည်မျှအဆင့်မြင့်ပါစေ သမ္မာတရားမဟုတ်။ ဘုရားသခင်ပြောဆိုသည့် စကားများသည်သာ သမ္မာတရား ဖြစ်သည်။ လူသားများက ပြောဆိုသောစကားများနှင့် အယူဝါဒများကို သမ္မာတရားနှင့် တန်းတူညီသကဲ့သို့ အဘယ်သို့ ပြောဆိုနိုင်သနည်း။ ယင်းတို့သည် မတူညီသော အရာနှစ်ခု ဖြစ်သည်။ ဤလူတို့တွင် သမ္မာတရားအပေါ် ချစ်ခြင်းလုံးဝမရှိသည်မှာ ဤအရာက ပထမသွင်ပြင်လက္ခဏာဖြစ်သည်။ ဤသွင်ပြင်လက္ခဏာသည် ၎င်းတို့၏ သဘာဝအနှစ်သာရ ဖြစ်သလော။ (ဟုတ်ပါသည်။) ယင်းသည် ၎င်းတို့၏ သဘာဝအနှစ်သာရဖြစ်ပြီး ယာယီထုတ်ဖော်ခြင်း၊ သို့မဟုတ် အပြုအမူတစ်ခုသာ ဖြစ်ခြင်းမဟုတ်ဟု ငါတို့ အဘယ်ကြောင့်ဆိုသနည်း။ ဤသည်မှာ အဘယ်ကြောင့်ဆိုသော် ၎င်းတို့၏ ထုတ်ဖော်ခြင်းများနှင့် အပြုအမူများအားလုံးကို ငါတို့ကြည့်သောအခါ ၎င်းတို့၏ လူ့သဘာဝအနှစ်သာရမှာ သမ္မာတရားကို ၎င်းတို့ လုံးဝ မချစ်ခြင်းဖြစ်သည်ဟု ကောက်ချက်ချနိုင်သောကြောင့် ဖြစ်သည်။ ဤအမျိုးမျိုးသော အပြုအမူများကြောင့် ၎င်းတို့သည် သမ္မာတရားကို မချစ်သောသူများဖြစ်သည်ဟု အဆုံးအဖြတ်ပေးနိုင်သည်။ ဤသည်မှာ ပထမ စရိုက်လက္ခဏာဖြစ်သည်။ ယခုတွင် ဒုတိယစရိုက်လက္ခဏာမှာ အဘယ်နည်း။ ယင်းမှာ ဤလူတို့သည် ၎င်းတို့၏ ကိုယ်ပိုင်ဖောက်ပြန်ပျက်စီးသော စိတ်သဘောထားကို လုံးဝ အသိအမှတ်မပြုခြင်း ဖြစ်သည်။ ၎င်းတို့က လုံးဝ အသိအမှတ်မပြုဆိုသည်မှာ အဘယ်အရာကို ဆိုလိုသနည်း။ ၎င်းတို့သည် ၎င်းတို့၏ ဖောက်ပြန်ပျက်စီးသော စိတ်သဘောထားကို အသိအမှတ်မပြုဟု ဆိုလျှင် မိမိတို့ကိုယ်ကို သိမြင်ခြင်းအကြောင်းကို ၎င်းတို့ အဘယ်ကြောင့် အစဉ်ပြောဆိုသနည်း။ ၎င်းတို့သည် မိမိတို့ကိုယ်ကို သိမြင်ခြင်းအကြောင်းကို ပြောဆိုရုံသာမက အခြားလူများကိုလည်း မိမိတို့ကိုယ်ကို သိမြင်စေရန် အရှက်မဲ့စွာ ကူညီသည်။ ၎င်းတို့သည် ၎င်းတို့လုပ်ဆောင်သည်မှာ မလုံလောက်ဟုလည်းကောင်း၊ ဘုရားသခင်အပေါ် အကြွေးတင်သည်ဟုလည်းကောင်း၊ ၎င်းတို့သည် နတ်ဆိုးများနှင့် စာတန်များဖြစ်ပြီး ကျိန်ဆဲခြင်းခံရထိုက်သည်ဟုလည်းကောင်း မကြာခဏပြောဆိုကြသည်။ ဤအရာကို မည်သို့ရှင်းပြနိုင်သနည်း။ (၎င်းတို့က မိမိတို့ကိုယ်ကို သိမြင်ခြင်းအကြောင်းပြောဆိုသောအခါ စစ်မှန်သော အကြောင်းအရာ၊ သို့မဟုတ် အသေးစိတ်အချက်မရှိ။ ဥပမာ မည်သည့်ဖောက်ပြန်ပျက်စီးမှုများကို ၎င်းတို့ ထုတ်ဖော်ပြသည်၊ မည်သည့်မှားယွင်းသော ရည်ရွယ်ချက်များကို ၎င်းတို့ စိတ်တွင်ထားရှိသည်၊ မည်သည့်ဖောက်ပြန်ပျက်စီးသော စိတ်သဘောထားများ၏ ထိန်းချုပ်ခြင်းကို ၎င်းတို့ ခံရသည်၊ ၎င်းတို့တွင် မည်သည့် သတ်သတ်မှတ်မှတ်ဖြစ်သော သရုပ်သကန်များရှိသည်၊ မည်သည့် သဘာဝအနှစ်သာရနှင့် ၎င်းတို့ သက်ဆိုင်သည် စသဖြင့်တို့နှင့်ပတ်သက်၍ လက်တွေ့ကျသော အကြောင်းအရာမရှိ။ ၎င်းတို့သည် စစ်မှန်သောခံစားချက်များနှင့် နားလည်မှုကို မဖော်ပြဘဲ ၎င်းတို့သည် နတ်ဆိုးများနှင့် စာတန်များဖြစ်သည်ဟု မရေရာစွာ ဖော်ပြရုံသာဖြစ်သည်။) (မိမိကိုယ်ကို အမှန်တကယ်သိမြင်ခြင်း၏ ရလဒ်တစ်ခုမှာ မိမိကိုယ်ကို အမှန်တကယ် မုန်းတီးနိုင်ခြင်း ဖြစ်သည်။ ဤလူစားမျိုးတို့သည် ၎င်းတို့၏ ဖောက်ပြန်ပျက်စီးမှုကို နှုတ်အားဖြင့် အသိအမှတ်ပြုသော်လည်း ၎င်းတို့၏ စိတ်နှလုံး၌ မိမိတို့ကိုယ်ကို လုံးဝ မမုန်းတီးကြပေ။ ပြီးလျှင် ၎င်းတို့သည် မိမိတို့ကိုယ်ကို ခုခံပြီး မှန်ကန်ကြောင်းပြရန် အကြောင်းပြချက်မျိုးစုံကိုလည်း ရှာဖွေကြသည်။ တစ်ခါတစ်ရံတွင် အပြင်ပန်း၌ မိမိတို့ကိုယ်ကို ရှင်းမပြသော်လည်း စိတ်အတွင်းတွင် ၎င်းတို့၏ ဖောက်ပြန်ပျက်စီးမှုကို လက်ခံခြင်း၊ အသိအမှတ်ပြုခြင်း မရှိကြပေ။ ၎င်းတို့သည် သမ္မာတရားကို လုံးဝ လက်မခံနိုင်သကဲ့သို့ လုံးဝ မပြောင်းလဲနိုင်ပေ။) ၎င်းတို့သည် မိမိတို့၏ ကိုယ်ပိုင်ဖောက်ပြန်ပျက်စီးမှုကို အသိအမှတ်မပြုကြပေ။ ဤအရာကို မည်သို့ရှင်းနိုင်သနည်း။ (၎င်းတို့အပေါ်သို့ တစ်စုံတစ်ခုကျရောက်ပြီး ထုတ်ဖော်ခြင်းခံရသောအခါ ၎င်းတို့သည် ဤသို့သောအရာကို လုပ်ဆောင်နိုင်စွမ်း မရှိဟု ခံစားရသည်။ ထို့ကြောင့် ၎င်းတို့တွင် ဤဖောက်ပြန်ပျက်စီးသည့် စိတ်သဘောထားမျိုးရှိသည်ကို အသိအမှတ်မပြုကြပေ။) ဤလူစားမျိုးတို့သည် မိမိတို့ကိုယ်ကို သိမြင်ခြင်းအကြောင်းကို အစဉ်ပြောဆိုကြသည်။ သို့သော် အတိအကျမည်သည့်အရာကို ၎င်းတို့ သိသနည်း။ ၎င်းတို့၏ အပြုအမူနှင့် သရုပ်သကန်များကို သိသလော၊ သို့မဟုတ် ၎င်းတို့၏ ဖောက်ပြန်ပျက်စီးသော စိတ်သဘောထားကို သိသလော။ သို့မဟုတ် မည်သည့်အရာကို ၎င်းတို့ မှားယွင်းလုပ်ဆောင်ခဲ့သည်ကိုသာ သိသလော။ ဤအသိပညာ အမျိုးအစားများကြားတွင် ကြီးမားသောကွာခြားချက်ရှိသည်။ အချို့သော အသိပညာအမျိုးအစားများမှာ မှန်ကန်သော အသိပညာဖြစ်ပြီး အချို့မှာမူ အပေါ်ယံဆန်ပြီး အနှစ်သာရကင်းမဲ့သည်။ လူအချို့၏ အသိပညာမှာ ပို၍ပင် တိမ်သည်။ ၎င်းတို့ မည်သည့်အရာကို မှားယွင်းလုပ်ဆောင်ခဲ့သည်ကိုသာ သိသည်၊ သို့မဟုတ် ကိုယ်ကျင့်တရား၊ သို့မဟုတ် ဥပဒေကို ဆန့်ကျင်သည့် ၎င်းတို့လုပ်ဆောင်ခဲ့သည့်အရာများကိုသာ အသိအမှတ်ပြုသည်။ ဤသည်မှာ ဘာသာရေးသမားများက ၎င်းတို့၏ အပြစ်ကို သခင့်ထံသို့ ဝန်ခံခြင်းနှင့် ကွာခြားခြင်းမရှိ။ ယင်းသည် စစ်မှန်သောနောင်တဆီသို့ ဦးမတည်ပေ။ မိမိတို့ကိုယ်ကို သိမြင်ခြင်းအကြောင်းကို ပြောဆိုသောအခါ၌ အယူဝါဒအချို့ကိုသာ ပြောသော၊ သို့မဟုတ် မိမိကိုယ်ကို သိမြင်မှုနှင့်ပတ်သက်၍ အခြားလူများကပြောသည့်အရာကို အတုခိုးသော လူအချို့လည်းရှိသည်။ ဤသည်မှာ ပို၍ပင် ကြီးမားသော ဟန်ဆောင်၊ လိမ်ညာမှုပုံစံဖြစ်သည်။ ဤလူတို့သည် အဘယ်ကြောင့် မိမိတို့ကိုယ်ကို အမှန်တကယ် မသိမြင်ကြသနည်း။ အရေးပါဆုံးသော အကြောင်းပြချက်မှာ သမ္မာတရားကို ၎င်းတို့ လုံးဝ လက်မခံခြင်းဖြစ်သည်။ ထို့ကြောင့် ၎င်းတို့၏ လုပ်ရပ်များ၊ အပြုအမူများအားလုံးသည် ၎င်းတို့၏ ကိုယ်ပိုင်နှစ်သက်မှုများ၊ ကိုယ်ပိုင်စာတန်ဆန်သော အတွေးအခေါ်၊ ကိုယ်ပိုင်အကျိုးစီးပွားများ၊ ရည်မှန်းချက်များ၊ လိုအင်ဆန္ဒများအပေါ် လုံးလုံး အခြေခံသည်။ ၎င်းတို့၏ စိတ်နှလုံးအတွင်းထဲ၌ ၎င်းတို့၏ ရည်မှန်းချက်များနှင့် လိုအင်ဆန္ဒများကို ဖောက်ပြန်ပျက်စီးသည်ဟု မမြင်ပေ။ ၎င်းတို့လိုအပ်သည့် မည်သည့်အရာမဆိုသည် ဖောက်ပြန်ပျက်စီးခြင်း မရှိပေ။ ထို့ကြောင့် ၎င်းတို့အလိုရှိသည့် မည်သည့်အရာကိုမဆို၊ ၎င်းတို့နှစ်သက်သည့် မည်သည့်အရာကိုမဆို လုပ်ဆောင်သည်။ ၎င်းတို့လုပ်ရပ်များ၏ စမှတ်မှနေ၍ ဤအရာကို အကဲဖြတ်လျှင် ၎င်းတို့၏ ကိုယ်ပိုင်ဖောက်ပြန်ပျက်စီးမှုများကို ၎င်းတို့ အသိအမှတ်ပြုကြသလော။ (အသိအမှတ်မပြုကြပါ။) မိမိတို့၏ ဖောက်ပြန်ပျက်စီးမှုများကို အသိအမှတ်ပြုသောလူတို့သည် မည်သို့ပြုမူလုပ်ဆောင်ကြသနည်း။ သမ္မာတရားစည်းမျဉ်းများကို ရှာဖွေခြင်းအားဖြင့် လုပ်ဆောင်ကြသလော၊ သို့မဟုတ် ဆုတောင်းခြင်း၊ ချင့်ချိန်စဉ်းစားခြင်း၊ ၎င်းတို့စိတ်ထဲတွင် ထင်မြင်သည့်အရာအတိုင်း လုပ်ဆောင်ခြင်းတို့ကိုသာ ပြုလုပ်သလော။ ဤအရာများထဲမှ မည်သည့်အရာကို ၎င်းတို့ လိုက်လျှောက်သနည်း။ (သမ္မာတရားစည်းမျဉ်းများကို ၎င်းတို့ ရှာဖွေသည်။) ဤသို့ဆိုလျှင် အထက်တွင်ဆိုခဲ့ပြီးဖြစ်သော ထိုလူစားမျိုးတို့၏ လုပ်ရပ်များကို ကြည့်ခြင်းဖြင့် ၎င်းတို့သည် ၎င်းတို့အလိုရှိသည့် မည်သည့်အရာကိုမဆို အစဉ်လုပ်ဆောင်သည်ဆိုသည်မှာ ထင်ရှားသည်။ ဘုရားနှုတ်ကပတ်တော်များသည် အခြားလူများအတွက် ရည်ရွယ်သည်ဟု ၎င်းတို့ ယုံကြည်ပြီး ၎င်းတို့နားလည်သည့် အယူဝါဒများအား အခြားလူတို့ကို ပေးသည်။ ဤသည်မှာ ၎င်းတို့သည် အခြားလူများအား ဘုရားနှုတ်ကပတ်တော်အတိုင်း လုပ်ဆောင်စေသည်ဟုဆိုလိုပြီး “သင်တို့အားလုံးက ဖောက်ပြန်ပျက်စီးမှုများကို ထုတ်ဖော်သော်လည်း ကျွန်ုပ်က ကျွန်ုပ်လုပ်ဆောင်သမျှတိုင်း၌ သမ္မာတရားကို ရှာဖွေပြီး မည်သည့်ဖောက်ပြန်ပျက်စီးမှုကိုမျှ မထုတ်ဖော်သလောက်ဖြစ်သည်” ဟု သွယ်ဝိုက်ညွှန်းဆိုသည်။ ဤလူတို့သည် မိမိတို့ကိုယ်ကို အမှန်တကယ် သိသောလူများဖြစ်သလော။ ၎င်းတို့သည် ၎င်းတို့၏ ကိုယ်ပိုင်ဖောက်ပြန်ပျက်စီးမှုကို အသိအမှတ်ပြုရဲပေ။ ဤသည်မှာ ဤကိစ္စ၏ အမှန်တရားဖြစ်သည်။ ၎င်းတို့က ၎င်းတို့၏ ရည်မှန်းချက်များနှင့် လိုအင်ဆန္ဒများကို ဖြည့်ဆည်းရန်အတွက် အဖိုးအခပေးဆပ်ခြင်း၊ ထို့အပြင် အနည်းငယ်ပို၍ စကားပြောဆိုခြင်း၊ အနည်းငယ်ပို၍ ဒုက္ခခံခြင်း၊ သို့မဟုတ် စွန့်ပစ်ခြင်းနှင့် မိမိတို့ကိုယ်ကို အသုံးခံခြင်းတို့အားလုံးသည် သမ္မာတရားနှင့်ညီပြီး မှန်ကန်သည်ဟု ယုံကြည်ကြသည်။ သင်က ၎င်းတို့အား “လူသားအားလုံး၌ ဖောက်ပြန်ပျက်စီးသည့် စိတ်သဘောထားများရှိသည့်အတွက် ဤသို့စဉ်းစားကြည့်သောအခါ မှားယွင်းမည်ကို သင်မကြောက်သလော” ဟု မေးလျှင် ၎င်းတို့က “ကိစ္စမရှိ။ ကျွန်ုပ်မကြောက်ပါ။ ကျွန်ုပ်၏ ရည်ရွယ်ချက်များက မှန်ကန်သည်” ဟု ဆိုလိမ့်မည်။ ၎င်းတို့၏ ရည်မှန်းချက်များ၊ လိုအင်ဆန္ဒများနှင့် ရည်ရွယ်ချက်များအား အပြုသဘောဆောင်သောအရာတစ်ခုအဖြစ် မှတ်ယူပုံကို ကြည့်လော့။ ဤလူစားမျိုးတို့သည် မိမိတို့၏ ကိုယ်ပိုင်ဖောက်ပြန်ပျက်စီးမှုများကို အသိအမှတ်ပြုကြသလော။ (အသိအမှတ်မပြုကြပါ။) ဓမ္မဓိဋ္ဌာန်ကျသော ရှုထောင့်မှကြည့်လျှင် ၎င်းတို့သည် ၎င်းတို့၏ ကိုယ်ပိုင်ဖောက်ပြန်ပျက်စီးမှုများကို အသိအမှတ်မပြုခြင်းသာ ဖြစ်သည်။ မိမိ၏ ကိုယ်ပိုင်ဖောက်ပြန်ပျက်စီးမှုကို အသိအမှတ်မပြုသူသည် စစ်မှန်စွာ နောင်တရနိုင်သလော။ (မရနိုင်ပါ။) ၎င်းတို့သည် လုံးဝ နောင်တရမည်မဟုတ်။ မည်သည့်အခါမျှ နောင်တရမည် မဟုတ်ပေ။ ၎င်းတို့၌ စစ်မှန်သော ကျိုးနွံနာခံမှုရှိသလော။ (မရှိပါ။) ဤသည်မှာ ပို၍ပင် နည်းပါးသည်။ ၎င်းတို့သည် သမ္မာတရားက မည်သည့်အရာ ဖြစ်သည်ကိုပင်မသိသောကြောင့် မည်သို့ကျိုးနွံနာခံနိုင်မည်နည်း။ ၎င်းတို့ကျိုးနွံနာခံသမျှမှာ ၎င်းတို့၏ ကိုယ်ပိုင်ရည်မှန်းချက်များနှင့် လိုအင်ဆန္ဒများဖြစ်သည်။ ၎င်းတို့သည် အမှုကိစ္စအားလုံးကို ၎င်းတို့၏ ကိုယ်ပိုင်လိုအင်ဆန္ဒများနှင့်အညီ လက်ခံဆောင်ရွက်ခြင်းအားဖြင့်သာ ၎င်းတို့၏ ဘဝများကို နေထိုင်သည်။ ပြီးလျှင် ၎င်းတို့သည် သမ္မာတရားကို လုံးဝ မရှာဖွေဘဲ ၎င်းတို့၏ ကိုယ်ပိုင်အလိုဆန္ဒကိုသာ အခြေခံပြီး စကားပြောသည်၊ ပြုမူဆောင်ရွက်သည်၊ ၎င်းတို့၏ လမ်းကြောင်းကို ရွေးချယ်သည်။ လူအချို့က “သမ္မာတရားကို ၎င်းတို့ လုံးဝ မရှာဖွေကြသောကြောင့် တရားဒေသနာများကို ၎င်းတို့ အဘယ်ကြောင့်နားထောင်ကြသနည်း” ဟု ဆိုသည်။ တရားဒေသနာများအား နားထောင်ခြင်းသည် သမ္မာတရားကို ၎င်းတို့ ရှာဖွေနိုင်သည်ဟု မလွဲဧကန် ဆိုလိုခြင်းမရှိ။ ဤသည်မှာ ဘုရားသခင်အား ယုံကြည်ခြင်း၏ သွင်ပြင်လက္ခဏာတစ်ခုသာ ဖြစ်သည်။ ၎င်းတို့က တရားဒေသနာများအား နားမထောင်လျှင်၊ သို့မဟုတ် စုဝေးပွဲများအား မတက်ရောက်လျှင် ထုတ်ဖော်ခံရမည် မဟုတ်လော။ ထို့ကြောင့် ဤဖြစ်စဉ်သည် ၎င်းတို့ ဖြတ်သန်းရန် လိုအပ်သည်။ သို့သော် တရားဒေသနာများအား နားထောင်ခြင်းအားဖြင့် ၎င်းတို့က သမ္မာတရားကို လက်ခံသောသူ၊ သို့မဟုတ် မိမိ၏ ကိုယ်ပိုင်ဖောက်ပြန်ပျက်စီးမှုကို အသိအမှတ်ပြုသူဟု မဆိုလိုပေ။ ဤသို့ ကောက်ချက်မချနိုင်ပေ။ မိမိတွင် ဖောက်ပြန်ပျက်စီးမှုရှိသည်ဟု အသိအမှတ်ပြုခြင်းသည် လွယ်ကူသောအရာမဟုတ်။ ပြီးလျှင် သမ္မာတရားကို မချစ်သောသူတို့အနေဖြင့် ဤသို့လုပ်ဆောင်ရန် ခက်ခဲသည်။

မိမိတို့ကိုယ်ကိုမသိသောသူတို့တွင် ကွဲပြားသော စရိုက်လက္ခဏာနှစ်ခုရှိသည်ဟု ငါတို့ ယခုတင်ပြောခဲ့သည်။ တစ်ခုမှာ အခြေခံအားဖြင့် သမ္မာတရားကို ၎င်းတို့ မချစ်ခြင်းဖြစ်ပြီး အခြားတစ်ခုမှာ ၎င်းတို့၌ ဖောက်ပြန်ပျက်စီးသော စိတ်သဘောထားများရှိသည်ကို လုံးဝ အသိအမှတ်မပြုခြင်းဖြစ်သည်။ ဤသို့ဆိုလျှင် သင်တို့သည် သင်တို့ကိုယ်သင်တို့ သိမြင်ခြင်းမှ မည်မျှအလှမ်းဝေးနေသနည်း။ (ယခုတွင် ကျွန်ုပ်တို့သည် မိမိတို့ကိုယ်ကို မသိသေးပါ။ ပြီးလျှင် မိမိတို့ကိုယ်ကို မုန်းတီးသည့် အဆင့်သို့ မရောက်သေးပါ။) သင်တို့သည် အလွန်အလှမ်းဝေးသည်။ မိမိကိုယ်ကိုသိမြင်ခြင်းသည် အဓိကအားဖြင့် မိမိ၏ ဖောက်ပြန်ပျက်စီးသော စိတ်သဘောထား၊ မိမိ၏ နှစ်သက်မှုများ၊ မိမိ၏ မှားယွင်းသောအမြင်များနှင့် အပြုအမူများကို သိမြင်ခြင်းအား ဆိုလိုသည်။ ဤသည်မှာ အဓိကသော့ချက်ဖြစ်သည်။ အခြားသော မိမိကိုယ်ကိုသိမြင်မှု ရှုထောင့်များက အဓိကမဟုတ်ပေ။ သင်သည် ဖောက်ပြန်ပျက်စီးသော စိတ်သဘောထား ရှိသည်ကိုလည်းကောင်း၊ ဘုရားသခင်က လူတို့တွင် အလင်းယူဆောင်ပေးသော ဖောက်ပြန်ပျက်စီးမှုများ၏ သဘာဝအနှစ်သာရများနှင့် ထုတ်ဖော်ခြင်းမျိုးစုံတို့သည် သင့်၌ ရှိသည်ကိုလည်းကောင်း သင်အသိအမှတ်ပြုသောအခါ၊ ပြီးလျှင် သင်သည် ယင်းတို့ကို တိတိကျကျစာရင်းပြုစုနိုင်ပြီး ဤတိကျသော အချက်များ၊ အပြုအမူများ၊ ထုတ်ဖော်ခြင်းများအားလုံးသည် သမ္မာတရားနှင့် မညီသည်ကိုလည်းကောင်း၊ ယင်းတို့အားလုံးက ဘုရားသခင်ကို ဆန့်ကျင်သည်ကိုလည်းကောင်း၊ ယင်းတို့အားလုံးကို ဘုရားသခင်က အလွန်မုန်းတီးသည်ကိုလည်းကောင်း အသိအမှတ်ပြုနိုင်သောအခါတွင်သာ သင်သည် သမ္မာတရားကို သင်အမှန်တကယ် လက်ခံနိုင်ပြီး စစ်မှန်သောနောင်တကို ဖြစ်ပေါ်စေနိုင်သည်။ ယခုခေတ်ကာလတွင် လူတို့သည် သမ္မာတရားကို လက်ခံသည်ဟု အခိုင်အမာဆိုသောအခါ ၎င်းတို့က သမ္မာတရားကို အယူဝါဒ၌သာ အသိအမှတ်ပြုပြီး ၎င်းတို့အပြုအမူများကို အတိုင်းအတာတစ်ခုအထိ ပြောင်းလဲခြင်းသာ ဖြစ်သည်။ သို့သော် ထို့နောက်တွင် ၎င်းတို့သည် စာတန်ဆန်သော ဖောက်ပြန်ပျက်စီးသည့် စိတ်သဘောထားများနှင့် အသက်ရှင်နေထိုင်ဆဲဖြစ်ပြီး စာတန်၏ အတွေးအခေါ်အတိုင်း နေထိုင်ဆဲ ဖြစ်သည်။ လုံးဝ မပြောင်းလဲပေ။ အပြုအမူ၌ ပြောင်းလဲခြင်းများသည် စိတ်သဘောထား၌ ပြောင်းလဲခြင်းများကို ကိုယ်စားမပြု။ မိမိ၏ စိတ်သဘောထားကို ပြောင်းလဲရန်မှာ မိမိ၏ ကိုယ်ပိုင်သဘာဝအနှစ်သာရနှင့် ကိုယ်ပိုင်ဖောက်ပြန်ပျက်စီးသည့် စိတ်သဘောထားကို သိရမည်။ ဤသည်မှာ စတင်သည့်အဆင့်ဖြစ်သည်။ မိမိ၏ ကိုယ်ပိုင်လုပ်ရပ်များက ပြဿနာဖြစ်စေတတ်သည်ကို၊ မိမိသည် လူကောင်းတစ်ယောက်မဟုတ်သည်ကို၊ သို့မဟုတ် မိမိသည် နတ်ဆိုးဖြစ်သည်၊ စာတန်ဖြစ်သည်ကိုသာ သိမြင်သူသည် မိမိ၏ သဘာဝအနှစ်သာရကိုသိမြင်ခြင်း၊ မိမိစိတ်သဘောထားအား ပြောင်းလဲခြင်းတို့နှင့် အလှမ်းဝေးနေဆဲ ဖြစ်သည်။

ကောက်နုတ်ချက် (၄၄)

အကယ်၍ လူတို့သည် ၎င်းတို့ကိုယ်ကိုယ် နားလည်ရမည်ဆိုပါက သူတို့သည် သူတို့၏ ဖောက်ပြန်ပျက်စီးသော စိတ်သဘောထားကို နားလည်ရမည်ဖြစ်ပြီး မိမိတို့၏ စစ်မှန်သော အခြေအနေများကို နားလည်သဘောပေါက်ခြင်း ရှိရမည်။ မိမိ၏ ကိုယ်ပိုင်အခြေအနေကို နားလည်ခြင်းနှင့်ဆိုင်သော အရေးကြီးဆုံးကဏ္ဍမှာ မိမိ၏ ကိုယ်ပိုင်အတွေးများနှင့် စိတ်ကူးများကို နားလည်သဘောပေါက်မှု ရှိရန်ပင် ဖြစ်သည်။ အချိန်ကာလတိုင်းတွင် လူတို့၏ အတွေးများနှင့် စိတ်ကူးများသည် အဓိကကျသော အရာတစ်ခု၏ ထိန်းချုပ်ခြင်းကို ခံထားရပြီးဖြစ်သည်။ အကယ်၍ သင်သည် သင်၏အတွေးများနှင့် စိတ်ကူးများအပေါ် ထိန်းချုပ်မှုကို ရရှိနိုင်ပါက သင်သည် ၎င်းတို့ နောက်ကွယ်၌ရှိသော အရာများအပေါ် နားလည်သဘောပေါက် နိုင်မည်ဖြစ်သည်။ လူတို့သည် မိမိတို့၏ အတွေးများနှင့် စိတ်ကူးများကို မထိန်းချုပ်နိုင်ကြချေ။ သို့ရာတွင် ဤအတွေးများနှင့် စိတ်ကူးများ မည်သည့်အရပ်မှ လာသည်၊ ၎င်းတို့ နောက်ကွယ်တွင် မည်သည့်အကြောင်းရင်းများ ရှိသည်၊ ဤအတွေးများနှင့် စိတ်ကူးများ မည်သို့ ထွက်ပေါ်သည်၊ မည်သည့်အရာက ၎င်းတို့ကို ထိန်းချုပ်သည်ဆိုသည်နှင့် ၎င်းတို့၏ သဘာဝက မည်သည့်အရာဖြစ်သည်တို့ကို ၎င်းတို့ သိဖို့လိုအပ်သည်။ လူတစ်ယောက်၏ စိတ်သဘောထား ပြောင်းလဲသွားသည့်နောက်တွင် ပြောင်းလဲသွားသော အပိုင်းက ဖန်တီးပေးသည့် အရာများဆီသို့ ထိုသူ ကြိုးပမ်းအားထုတ်သော ပန်းတိုင်များ၊ အမြင်များ၊ စိတ်ကူးများနှင့် အတွေးများမှာ ယခင်ကထက် များစွာ ခြားနားသွားပေလိမ့်မည်။ အခြေခံအားဖြင့် ၎င်းအရာများသည် သမ္မာတရားနှင့် နီးစပ်လာမည် ဖြစ်ပြီး သမ္မာတရားနှင့်အညီ ဖြစ်လာကြလိမ့်မည်။ လူတို့၏အတွင်း၌ မပြောင်းလဲသေးသော အရာများ၊ တစ်နည်းဆိုရသော် ၎င်းတို့ နှစ်သက် လိုက်စားကြသော အရာများအပါအဝင် ၎င်းတို့၏ အတွေးဟောင်းများ၊ စိတ်ကူးဟောင်းများ၊ အမြင်ဟောင်းများမှာ လုံးလုံး ညစ်ညူးကာ ညစ်ညမ်းပြီး အကျည်းတန်သော အရာများသာ ဖြစ်ကြ၏။ လူတစ်ယောက်သည် သမ္မာတရားကို နားလည်သွားသည့်နောက်တွင် ဤအရာများကို ခွဲခြားသိနိုင်သလို ၎င်းအရာများကို ရှင်းရှင်းလင်းလင်း မြင်နိုင်၏။ ထို့ကြောင့် ၎င်းတို့သည် ဤအရာများကို စွန့်လွှတ်နိုင်ကာ ပုန်ကန်နိုင်ကြ၏။ ဤသို့သော လူများသည် တစ်နည်းနည်းဖြင့် အမှန်တကယ် ပြောင်းလဲသွားခဲ့ပြီဖြစ်သည်။ ၎င်းတို့သည် သမ္မာတရားကို လက်ခံနိုင်ကြ၏၊ သမ္မာတရားကို လက်တွေ့လုပ်ဆောင်နိုင်ကြ၏၊ အချို့သော သမ္မာတရား စစ်မှန်မှုများထဲသို့လည်း ဝင်ရောက်နိုင်ကြ၏။ သမ္မာတရားကို နားမလည်သော လူတို့သည်ကား ဤဖောက်ပြန်ပျက်စီးသော၊ သို့မဟုတ် အပျက်သဘောဆောင်သော အရာများကို ရှင်းရှင်းလင်းလင်း မမြင်နိုင်ကြသလို ပိုင်းခြားသိမြင်နိုင်ခြင်းလည်း မရှိကြချေ။ ထို့ကြောင့် ၎င်းတို့သည် ဤအရာများကို ပုန်ကန်နိုင်စွမ်း ရှိဖို့ မဆိုထားနှင့် စွန့်လည်းမစွန့်လွှတ်နိုင်ပေ။ မည်သည့်အရာက ဤခြားနားချက်ကို ဖြစ်စေသနည်း။ ၎င်းတို့သည် ယုံကြည်သူများချည်းသာ ဖြစ်သော်လည်း အချို့က အပျက်သဘောဆောင်သော၊ မသန့်ရှင်းသော အရာများကို ပိုင်းခြားသိမြင်နိုင်ကာ စွန့်လွှတ်နိုင်သော်ငြားလည်း အခြားသောသူများက ဤအရာများကို ရှင်းရှင်းလင်းလင်း မမြင်နိုင်သကဲ့သို့ ကိုယ့်ကိုယ်ကိုယ် လွတ်အောင် မရုန်းနိုင်ကြသည်မှာ အဘယ့်ကြောင့်နည်း။ ယင်းသည် လူတစ်ယောက်အနေဖြင့် သမ္မာတရားကို ချစ်ကာ အားထုတ်လိုက်စားသလားဆိုသည်နှင့် တိုက်ရိုက် ဆက်စပ်လေသည်။ သမ္မာတရားကို လိုက်စားသော သူတို့သည် ဘုရားသခင်၏ နှုတ်ကပတ်တော်တို့ကို အချိန်ကာလတစ်ခုမျှ စားသောက်ပြီး တရားဒေသနာတို့ကို အချိန်ကာလ တစ်ခုမျှ ကြားနာသည့်အခါ ၎င်းတို့သည် သမ္မာတရားကို နားလည်နိုင်၍ အချို့သော အကြောင်းအရာများကို ရှင်းလင်းစွာ မြင်နိုင်ကြ၏။ ၎င်းတို့၏အသက်တွင် တိုးတက်မှု ရှိသွားပြီဖြစ်သည်။ ခြားနားချက်မှာ သမ္မာတရားကို မချစ်သောသူတို့မှာ စည်းဝေးပွဲများ တက်ကာ ဘုရားသခင်၏ နှုတ်ကပတ်တော်များကို ဖတ်ပြီး တရားဒေသနာများကို ကြားနာသည့် အချိန်ပမာဏတူသော်လည်း ၎င်းတို့သည် သမ္မာတရားကို နားမလည်နိုင်ကြချေ။ နှစ်ပေါင်း မည်မျှ ကြာအောင် ယုံကြည်လာခဲ့ကြသည်ဖြစ်စေ ၎င်းတို့တွင် အသက်ဝင်ရောက်မှု မရှိကြ။ ဤလူတို့သည် သမ္မာတရားကို မလိုက်စားသောကြောင့် ကျရှုံးခဲ့ကြ၏။ ၎င်းတို့အနေဖြင့် ဘုရားသခင်ကို နှစ်ပေါင်း မည်မျှ ကြာအောင် ယုံကြည်လာခဲ့ကြသည်ဖြစ်စေ သမ္မာတရားကို မလိုက်စားသောသူတို့သည် သမ္မာတရားကို နားမလည်နိုင်ကြပေ။ သို့ဖြစ်၍ ၎င်းတို့သည် အခြေအနေတစ်ခုကို ကြုံရသည့်အခါ ဘာသာရေးသမား တစ်ယောက်အလား ဖြစ်လုနီးပါး ရှိသည်မှာ ထိုအခြေအနေကို ရှင်းလင်းစွာ မမြင်တတ်ကြပေ။ ၎င်းတို့သည် မိမိတို့၏ နှစ်ပေါင်းများစွာ ယုံကြည်ခြင်းမှ မည်သည့်အရာကိုမျှ မရရှိခဲ့ကြချေ။ သင်တို့သည် ယခု သမ္မာတရား မည်မျှကို နားလည်ကြသနည်း။ မည်သည့်အရာများကို ရှင်းလင်းစွာ မြင်နိုင်ကြသနည်း။ အပျက်သဘောဆောင်သော အရာများနှင့် လူများကို ပိုင်းခြားသိမြင်နိုင်သလော။ ဘုရားသခင်ကို ယုံကြည်ခြင်းမှာ မည်သည့်အရာ ဖြစ်သည်ကိုလည်းကောင်း၊ သင် အမှန်တကယ် ယုံကြည်သည်မှာ မည်သူ ဖြစ်သည်ကိုလည်းကောင်း သင်သည် မရှင်းလင်းချေ။ သင်သည် နေ့စဉ်ဘဝ၌ သင့်ထံတွင် ရှိသော စိတ်ကူးများနှင့် ရည်ရွယ်ချက်များကို ရှင်းလင်းစွာ ပိုင်းခြားသိမြင်နိုင်ခြင်း မရှိပေ၊ သင်သည် ဘုရားသခင်ကို ယုံကြည်သူတစ်ယောက်အဖြစ် မည်သည့်လမ်းအား လိုက်လျှောက်သင့်သည်ကို လုံးလုံး သတိမမူမိပေ၊ သင်သည် အမှုအရာများ ပြုလုပ်သည့်အခါဖြစ်စေ၊ မိမိတာဝန်ကို ထမ်းဆောင်သည့်အခါဖြစ်စေ သမ္မာတရားအား မည်သို့ လက်တွေ့ လုပ်ဆောင်သင့်သည်ကိုလည်း ရှင်းရှင်းလင်းလင်း မရှိပေ။ ဤသည်တို့မှာ မည်သည့် အသက် ဝင်ရောက်မှုမျှ မရှိကြသော လူများ ဖြစ်ကြ၏။ သမ္မာတရားကို အစစ်အမှန် နားလည်ပြီး သမ္မာတရားအား မည်သို့ လက်တွေ့ လုပ်ဆောင်ပုံကို သိခြင်းအားဖြင့်သာ သင်သည် မတူညီသော လူအမျိုးအစားများကို ပိုင်းခြားသိမြင်နိုင်၏၊ မတူညီသော အခြေအနေများကို ရှင်းလင်းစွာ မြင်နိုင်၏၊ အမှုအရာများကို သမ္မာတရားနှင့်အညီ လုပ်ဆောင်နိုင်၏၊ ဘုရားသခင်၏ သတ်မှတ်ချက်များကို ပြည့်မီနိုင်စွမ်း ရှိသည့်အပြင် ဘုရားသခင်၏ ရည်ရွယ်ချက်များနှင့်လည်း တိုး၍ နီးစပ်နိုင်လေ၏။ ဤသို့သော နည်းလမ်းဖြင့် အားထုတ်လိုက်စားခြင်းကသာ သင့်အနေဖြင့် အကျိုးရလဒ်များ ရရှိပေလိမ့်မည်။

ကောက်နုတ်ချက် (၄၅)

လူသား၏အတွင်း၌ အချို့သော အပျက်သဘောဆောင်သည့် အခြေအနေများသည် မကြာခဏ ဖြစ်နေကြ၏။ ၎င်းတို့ထဲတွင် အချို့အခြေအနေများမှာ လူတို့ကို လွှမ်းမိုးနိုင်ကြ၏၊ သို့မဟုတ် ဘောင်ခတ်နိုင်ကြ၏။ လူတစ်ဦး တစ်ယောက်အား မှန်သောလမ်းခရီးမှ သွေဖည်စေ၍ လမ်းကြောင်းမှားဆီသို့ပင် ဦးတည်စေနိုင်သော အချို့အခြေအနေများ ရှိ၏။ လူတို့ လိုက်စားသောအရာ၊ ၎င်းတို့ အာရုံစိုက်သော အရာ၊ ၎င်းတို့ လျှောက်လှမ်းရန် ရွေးချယ်သောလမ်းတို့သည် ၎င်းတို့၏ စိတ်အတွင်းပိုင်း အခြေအနေများနှင့် ဆက်နွှယ်နေကြသည်။ လူတို့သည် ပျော့ညံ့သလော၊ သို့မဟုတ် ကြံ့ခိုင်သလောဆိုသည်မှာ ၎င်းတို့၏စိတ်အတွင်းပိုင်း အခြေအနေများနှင့် ပို၍ပင် တိုက်ရိုက် ဆက်စပ်နေလေသည်။ ဥပမာအားဖြင့် လူအများအပြားသည် ယခုအခါ ဘုရားသခင်၏ နေ့ရက်အကြောင်းကို အထူး အလေးထားကြ၏။ ၎င်းတို့အားလုံးတွင် ဤသို့သော အလိုဆန္ဒ ရှိလေသည်၊ ၎င်းတို့အနေဖြင့် ဤသို့သော ဆင်းရဲဒုက္ခ၊ ဤသို့သော ရောဂါဘယများ၊ ဤသို့သော ညှဉ်းပန်းနှိပ်စက်မှုနှင့် အခြားဝေဒနာမျိုးစုံမှ ရုန်းထွက်လွတ်မြောက်နိုင်ရန်အတွက် ဘုရားသခင်၏ နေ့ရက် အလျင်အမြန် ရောက်ရှိလာဖို့ကို တမ်းတခြင်းဖြစ်၏။ လူတို့သည် ဘုရားသခင်၏နေ့ရက် ရောက်ရှိလာသည့်အခါ ၎င်းတို့ ယခု ခံစားရသော ဆင်းရဲဒုက္ခမှ သက်သာရာရလိမ့်မည်ဟုလည်းကောင်း၊ ကြမ်းတမ်းခက်ခဲမှုများကို မည်သည့်အခါမျှ ကြုံရတော့မည် မဟုတ်ဟုလည်းကောင်း၊ ကောင်းချီးများကို ခံစားကြရလိမ့်မည်ဟုလည်းကောင်း ထင်မှတ်ကြ၏။ လူတစ်ဦးတစ်ယောက်သည် ဤသို့သော အခြေအနေမျိုးမှနေ၍ ဘုရားသခင်အား နားလည်ရန်ဖြစ်စေ၊ သမ္မာတရားကို လိုက်စားရန်ဖြစ်စေ ကြိုးစားသည်ဆိုလျှင် ၎င်းတို့၏ အသက်တိုးတက်မှုမှာ များစွာ နည်းပါးပေလိမ့်မည်။ အဟန့်အတားတစ်ခုခု၊ သို့မဟုတ် မကောင်းသောအရာ တစ်ခုခုက ၎င်းတို့အပေါ် ကျရောက်သည့်အခါ ပျော့ညံ့မှု၊ အပျက်သဘောဆောင်မှုနှင့် ၎င်းတို့အတွင်းမှ ပုန်ကန်မှုများ အားလုံးမှာ ထွက်ပေါ်လာ၏။ ထို့ကြောင့် လူတစ်ဦးတစ်ယောက်၏ အခြေအနေမှာ ပုံမှန်မဟုတ်လျှင်၊ သို့မဟုတ် မှားနေလျှင် ၎င်းတို့လိုက်စားမှု၏ ပန်းတိုင်သည်လည်း မှားယွင်းမည်ဖြစ်ကာ မုချ သန့်စင်မှု ရှိလိမ့်မည်မဟုတ်။ သင်သည် မမှန်ကန်သော အခြေအနေများအတွင်းမှနေ၍ ဝင်ရောက်မှုအတွက် ကြိုးပမ်းကြသည့်တိုင် သင်၏လိုက်စားမှု၌ သင့်အနေဖြင့် အဆင်ပြေသည်ဟုလည်းကောင်း၊ အမှုအရာများကို ဘုရားသခင်၏ သတ်မှတ်ချက်များနှင့်အညီ သင် လုပ်ဆောင်နေသည်ဟုလည်းကောင်း၊ သမ္မာတရားနှင့်အညီ လက်တွေ့လုပ်ဆောင်နေသည် ဟုလည်းကောင်း ထင်မှတ်လေ၏။ သင်သည် ဘုရားသခင်၏ လိုအင်ဆန္ဒများကို ဆန့်ကျင်သွားခဲ့ပြီဖြစ်ကြောင်း၊ သို့မဟုတ် သူ၏ ရည်ရွယ်ချက်များမှ သွေဖည်ခဲ့ပြီဖြစ်ကြောင်းကိုမူ မယုံကြည်ချေ။ သင်သည်လည်း ထိုနည်းအတိုင်း ခံစားမိနိုင်ကောင်း၏၊ သို့သော် မကောင်းသော ဖြစ်ရပ်တစ်ခု၊ သို့မဟုတ် ပတ်ဝန်းကျင်တစ်ခုက သင့်အား ဆင်းရဲဒုက္ခ ရောက်စေသည့်အခါ၊ သင်၏ပျော့ကွက်များ၊ သင်၏စိတ်နှလုံးအတွင်း၌ သင် သဘောကျ၍ လိုက်စားသော အရာများကို ထိခိုက်စေသောအခါတွင် သင်သည် အပျက်သဘောဆောင်လာလိမ့်မည်။ သင်၏ မျှော်လင့်ချက်များနှင့် အိပ်မက်များသည် အချည်းနှီး ဖြစ်လာလိမ့်မည်။ သင်သည်လည်း သဘာဝအလျောက် ပျော့ညံ့လာပေလိမ့်မည်။ သို့ဖြစ်ရာ ထိုအချိန်အခါမျိုးရှိ သင်၏အခြေအနေသည် သင့်အား ကြံ့ခိုင်သလော၊ သို့မဟုတ် ပျော့ညံ့သလောဟူသည်ကို ဆုံးဖြတ်ပေး၏။ ယခုအခါ၌ မိမိတို့သည် များစွာ ကြံ့ခိုင်သည်ဟုလည်းကောင်း၊ မိမိတို့တွင် ဝိညာဉ်ရင့်သန်မှု အနည်းငယ် ရှိသည် ဟုလည်းကောင်း၊ မိမိတို့တွင် ယခင်ကထက် ယုံကြည်ခြင်း ပို၍ ရှိသည်ဟုလည်းကောင်း ထင်မှတ်ကြသော လူအများအပြား ရှိကြသည်။ ၎င်းတို့သည် ဘုရားသခင်ကို ယုံကြည်ခြင်း လမ်းကြောင်းမှန်ပေါ် စတင်ခဲ့ကြပြီ ဖြစ်ကြောင်း၊ ထို့အပြင် အခြားလူများက ၎င်းတို့အား ထိုလမ်းတွင် ဆွဲခေါ်ရန်ဖြစ်စေ တွန်းပို့ရန်ဖြစ်စေ မလိုအပ်ကြောင်း ယူဆကြ၏။ ဤသို့ဆိုလျှင် အချို့သော ပတ်ဝန်းကျင် အခြေအနေများ၊ သို့မဟုတ် အခက်အခဲများကို ရင်ဆိုင်ကြုံတွေ့ရသည့်အခါ ၎င်းတို့သည် အဘယ်ကြောင့် အပျက်သဘောဆောင်ခြင်း၊ သို့မဟုတ် ပျော့ညံ့ခြင်း ဖြစ်လာကြသနည်း။ အဘယ်ကြောင့် ထိုအချိန်တွင် မကျေမနပ်ဖြစ်ကြကာ ၎င်းတို့၏ ယုံကြည်ခြင်းကို စွန့်ပစ်ခြင်းဖြင့် အဆုံးသတ်ကြသနည်း။ ဤသည်မှာ လူအယောက်တိုင်း၏အတွင်း၌ အပျက်သဘောဆောင်၍ ပုံမှန်မဟုတ်သော အခြေအနေအချို့ ရှိနေသည်ကို ပြ၏။ လူသားအတွင်း၌ ရှိသော မစင်ကြယ်မှုများထဲမှ အချို့မှာ လက်လွှတ်ရန် မလွယ်ကူပေ။ သင်သည် သမ္မာတရားကို လိုက်စားသော လူတစ်ယောက် ဖြစ်လျှင်ပင် ၎င်းအရာများကို လုံးလုံး လက်မလွှတ်နိုင်ချေ။ ဤအမှုအား ဘုရားနှုတ်ကပတ်တော်၏ ဖော်ထုတ်ခြင်းကို အခြေခံကာ လုပ်ဆောင်ရမည်ဖြစ်သည်။ မိမိတို့၏ အခြေအနေများကို ဆင်ခြင်ကာ နားလည်ပြီးသည့်နောက်တွင် လူတို့သည် ၎င်းအခြေအနေများကို ဘုရားသခင်၏ နှုတ်ကပတ်တော်နှင့် နှိုင်းယှဉ်ကြည့်ပြီး မိမိတို့၏ ဖောက်ပြန်ပျက်စီးသော စိတ်သဘောထားများကို ဖြေရှင်းကြရမည်။ ထိုအခါမှသာ ၎င်းတို့၏အခြေအနေများ တဖြည်းဖြည်း ပြောင်းလဲပေလိမ့်မည်။ လူတို့သည် ဘုရားသခင်၏ နှုတ်ကပတ်တော်များကို ဖတ်ရှု၍ ၎င်းတို့၏ အခြေအနေများကို သိလာသည့်အခါ ၎င်းတို့သည် ယင်းအခြေအနေများကို ချက်ချင်း ပြောင်းလဲနိုင်သည် ဆိုသည်မှာ မဟုတ်ပေ။ လူများသည် ဘုရားသခင်၏ နှုတ်ကပတ်တော်များကို မကြာခဏ ဖတ်ရှုခြင်း၊ မိမိတို့၏ အခြေအနေများကို ရှင်းလင်းစွာ မြင်ခြင်း၊ ဘုရားသခင်ဆီ ဆုတောင်းခြင်းနှင့် သမ္မာတရား ရရှိရန် ကြိုးပမ်းခြင်းများ ရှိနေသရွေ့ ၎င်းတို့ထံမှ ဖောက်ပြန်ပျက်စီးမှု တစ်ဖန် ထုတ်ဖော်သည့်အခါတွင်ဖြစ်စေ၊ အနာဂတ်၌ ပုံမှန်မဟုတ်သော အခြေအနေတစ်ခုတွင် ရှိနေသည့်အခါ ဖြစ်စေ ၎င်းတို့သည် ယင်းအခြေအနေကို အသိအမှတ်ပြုလာနိုင်မည် ဖြစ်၏။ ၎င်းတို့သည် ဘုရားသခင်ထံ ဆုတောင်းနိုင်လာမည် ဖြစ်ပြီး ပြဿနာကို ဖြေရှင်းရန် သမ္မာတရားကိုလည်း အသုံးပြုနိုင်လာမည် ဖြစ်သည်။ ထို့အပြင် ၎င်းတို့၏ မှားယွင်းသော အခြေအနေကို ပြန်တည့်နိုင်ကြကာ ၎င်းတို့သည် တဖြည်းဖြည်း ပြောင်းလဲနိုင်ကြ၏။ ဤနည်းလမ်းဖြင့် ၎င်းတို့သည် မစင်ကြယ်မှုများကို လက်လွှတ်နိုင်လာကြလိမ့်မည်၊ ၎င်းတို့အတွင်း၌ သိုလှောင်ထားသော လက်လွှတ်သင့်သည့် အရာများကိုလည်း လက်လွှတ်နိုင်လာကြလိမ့်မည်။ လူတို့သည် အကျိုးရလဒ်များ မရရှိနိုင်သေးမီတွင် အတွေ့အကြုံ အတိုင်းအတာတစ်ခုမျှ ရှိကြရမည် ဖြစ်၏။

ဘုရားသခင်ကို ၎င်းတို့၏ ယုံကြည်ခြင်း စတင်ကတည်းကပင် လူအများအပြားသည် ၎င်းတို့၏ အယူအဆများနှင့် စိတ်ကူးစိတ်သန်းများကို အခြေခံကာ ကောင်းချီးများကို အားထုတ်လိုက်စားကြ၏။ ထို့ကြောင့် ၎င်းတို့၏အယူအဆများနှင့် မကိုက်ညီသော အရာများနှင့် ကြုံရသည့်အခါ အပျက်သဘောဆောင်လာ၍ ပျော့ညံ့လာကြ၏။ ၎င်းတို့သည် ဘုရားသခင်ကို သံသယရှိလာကြပြီး ဘုရားသခင်နှင့်ပတ်သက်သည့် အယူအဆများ၊ သို့မဟုတ် လွဲမှားသော စိတ်ကူးများကိုပင် ရရှိလာကြ၏။ ၎င်းတို့အား သမ္မာတရားဖြင့် မိတ်သဟာယ ပြုပေးမည့်သူ မရှိလျှင် ၎င်းတို့သည် ခိုင်မာစွာ ရပ်တည်နိုင်လိမ့်မည် မဟုတ်သလို ဘုရားသခင်အား အချိန်မရွေး သစ္စာဖောက်နိုင်သေး၏။ သင်တို့အား ဥပမာတစ်ခု ပေးချင်သည်။ လူတစ်ဦးတစ်ယောက် ဘုရားသခင်ကို မိမိယုံကြည်ခြင်း၌ အယူအဆများနှင့် စိတ်ကူးများကို အစဉ်အမြဲ သိုထားခဲ့သည် ဆိုပါစို့။ သူသည် သူ့မိသားစုကို စွန့်လွှတ်ကာ သူ၏တာဝန်ကို ထမ်းဆောင်နေသရွေ့ ဘုရားသခင်က သူ့အား ကာကွယ်ကာ ကောင်းချီးပေးလိမ့်မည်၊ သူ့မိသားစု၏ ဘဝကို စောင့်ရှောက်လိမ့်မည်၊ ဤသည်မှာ ဘုရားသခင် ပြုသင့်သောအရာ ဖြစ်သည်ဟု ဤပုဂ္ဂိုလ်က ယုံကြည်လေ၏။ ထို့နောက် တစ်ရက်တွင် သူ မဖြစ်စေချင်ခဲ့သော အရာတစ်ခုက သူ့အပေါ် ကျရောက်လာ၏၊ သူ မနာမကျန်းဖြစ်ခြင်းပင်။ ဧည့်ခံသော မိသားစုနှင့် နေထိုင်ရခြင်းမှာ သူ၏အိမ်တွင် နေရခြင်းလောက် သက်သောင့်သက်သာ မရှိလှ၊ ၎င်းတို့က သူ့အား ကောင်းကောင်းမွန်မွန် ဂရုမစိုက်ခြင်းလည်း ဖြစ်နိုင်၏။ သူသည် ၎င်းအခြေအနေကို သည်းမခံနိုင်ပေ၊ အချိန်အတော်ကြာအောင် အပျက်သဘောဆောင်လာပြီး စိတ်ပျက်အားလျော့လာ၏။ သူသည် သမ္မာတရားကိုလည်း မလိုက်စားသည့်အပြင် သမ္မာတရားအား အသိအမှတ်ပင် မပြုချေ။ ဤသည်မှာ လူများသည် ၎င်းတို့၏အတွင်း၌ အချို့သော အခြေအနေများ ရှိသည်ဟူသော အဓိပ္ပာယ်ဖြစ်၏။ ၎င်းတို့သည် ဤအခြေအနေများ မှားယွင်းကြောင်းကို အသိအမှတ်မပြု၊ သဘောမပေါက်၊ သတိမထားမိကြလျှင် ၎င်းတို့ထံ၌ စိတ်ထက်သန်ပြင်းပြမှုနှင့် အားထုတ်မှုများစွာ ရှိနေနိုင်ဆဲဖြစ်သည့်တိုင် တစ်ချိန်ချိန်တွင် ၎င်းတို့၏ စိတ်တွင်းအခြေအနေမှန်ကို ထုတ်ဖော်ပြသော၊ ၎င်းတို့အား မှောက်မှားပြီး ကျရှုံးစေသော အခြေအနေတစ်ခုကို ကြုံရပေလိမ့်မည်။ ဤသည်မှာ မိမိကိုယ်ကို မဆင်ခြင်နိုင်ခြင်း၊ သို့မဟုတ် မိမိကိုယ်ကို သိမလာခြင်းမှ ထွက်ပေါ်လာခြင်း ဖြစ်၏။ သမ္မာတရားကို နားမလည်ကြသူ အားလုံးတို့မှာ ဤအတိုင်းသာ ဖြစ်သည်။ မည်သည့်အချိန်၌ ၎င်းတို့ မှောက်မှားပြီး ကျရှုံးလိမ့်မည်၊ မည်သည့်အချိန်၌ ၎င်းတို့ အပျက်သဘောဆောင်ကာ ပျော့ညံ့လာလိမ့်မည်၊ မည်သည့်အချိန်၌ ဘုရားသခင်ကို သစ္စာဖောက်နိုင်စွမ်း ရှိတတ်သည် ဆိုသည်တို့ကို လုံးလုံး မသိရပေ။ သမ္မာတရားကို နားမလည်သောသူတို့ ရင်ဆိုင်ရမည့် အန္တရာယ် မည်မျှ များပြားသည်ကို ကြည့်လော့။ သို့သော် သမ္မာတရားကို နားလည်ခြင်းသည် ရိုးရှင်းသော ကိစ္စတစ်ခု မဟုတ်ချေ။ သင့်အနေဖြင့် ရိပ်ခနဲ အလင်းရောင်တစ်ခုကို နောက်ဆုံး၌ ရရှိနိုင်သည်အထိ၊ စစ်မှန်သောအသိ အနည်းငယ်ကို ရနိုင်သည်အထိ၊ သမ္မာတရား အနည်းငယ်ကို နားလည်နိုင်သည်အထိ အချိန်များစွာ ယူရ၏။ အကယ်၍ သင်၏အတွင်းမှ ရည်ရွယ်ချက်များမှာ အလွန်တရာ မသန့်စင်လှ၍ မပြေလည်နိုင်လျှင် ယင်းတို့သည် သင်၏ နားလည်မှု အလင်းရောင်ကလေးအား စဉ်ဆက်မပြတ် ငြှိမ်းသတ်ပစ်လိမ့်မည် ဖြစ်ပြီး သင့်ထံတွင် ရှိသော ယုံကြည်ခြင်း အနည်းငယ်ကလေးကိုပင် တိုက်စားပစ်လိမ့်မည်။ ဤသည်မှာ ဧကန်မုချ အန္တရာယ်များလွန်း၏။ ယခုအချိန်၌ အဓိကကျသော ပြဿနာမှာ လူများအားလုံးသည် ၎င်းတို့၏ စိတ်နှလုံးများတွင် ဘုရားသခင်နှင့် ပတ်သက်သည့် အချို့သော အယူအဆများနှင့် စိတ်ကူးများ ရှိနေကြခြင်း ဖြစ်သည်။ သို့သော် ၎င်းအရာများ မထုတ်ဖော်မီ၌ လူများသည် ၎င်းအရာများကို အသိအမှတ်ပြု ဝန်ခံခြင်း မရှိကြ။ ၎င်းတို့သည် အတွင်း၌ ပုန်းကွယ်နေပြီး မည်သည့်အချိန်တွင်၊ သို့မဟုတ် မည်သည့် အခြေအနေများအောက်တွင် ပေါ်ထွက်လာကာ လူများအား မှောက်မှားစေလိမ့်မည် ဆိုသည်ကို လုံးလုံး မသိရပေ။ လူအားလုံးတို့သည် ကောင်းသော ရည်မှန်းချက်များ ရှိကြ၍ ယုံကြည်သူကောင်းများ ဖြစ်ချင်ကာ သမ္မာတရားကို ရရှိချင်ကြသော်လည်း ၎င်းတို့၏ ရည်ရွယ်ချက်များမှာ အလွန်ပင် မသန့်စင်လှချေ။ ထို့ပြင် ၎င်းတို့အား သမ္မာတရား လိုက်စားခြင်းနှင့် အသက်ဝင်ရောက်မှု ရရှိခြင်းတွင် ကြီးမားစွာ နှောင့်ယှက်နေသည့် အယူအဆများနှင့် စိတ်ကူးပေါင်း များစွာသည် ၎င်းတို့တွင် ရှိ၏။ ၎င်းတို့သည် ဤအရာများကို လုပ်ဆောင်ချင်သော်လည်း မလုပ်နိုင်ကြချေ။ ဥပမာအားဖြင့် လူတို့သည် ပြုပြင်ခံရချိန်တွင် နာခံရန် ခက်ခဲ၏။ စမ်းသပ်ခြင်း၊ သို့မဟုတ် စစ်ဆေးခြင်း ခံရသည့်အခါ ၎င်းတို့သည် ဘုရားသခင်ကို စောဒကတက်ချင်ကြ၏။ မကျန်းမာသည့်အခါတိုင်း၊ သို့မဟုတ် ကပ်ဘေးတစ်ခုခု ကြုံရသည့်အခါတိုင်းတွင် ၎င်းတို့ကို မကာကွယ်ခြင်းအတွက် ဘုရားသခင်ကို မကျေမနပ်ပြောကြ၏။ ဤသို့သော လူများသည် ဘုရားသခင်၏ အမှုတော်ကို မည်သို့ တွေ့ကြုံနိုင်မည်နည်း။ ဘုရားသခင်ကို ကျိုးနွံနာခံသော စိတ်နှလုံးတစ်ခု ရှိခြင်းကိုပင် အနည်းဆုံးအနေဖြင့် မရောက်ကြသောကြောင့် ၎င်းတို့သည် သမ္မာတရားကို မည်သို့ ရနိုင်ကြမည်နည်း။ အချို့သော လူများမှာ သေးဖွဲလွန်းသော ကိစ္စတစ်ခု ၎င်းတို့ စိတ်တိုင်းကျ မဖြစ်သည့်အခါ အပျက်သဘောဆောင်လာကြ၏။ ၎င်းတို့သည် အခြားသော လူများ၏ အကဲဖြတ်ချက်များကြောင့် မှောက်မှားကြကာ ၎င်းတို့ ဖမ်းဆီးခံရချိန်တွင်လည်း ဘုရားသခင်ကို သစ္စာဖောက်၏။ လူတစ်ဦးတစ်ယောက်သည် အနာဂတ်၌ မည်သို့ ဖြစ်မည်၊ ပျော်ရွှင်ခြင်း ဖြစ်မည်လား၊ အတိဒုက္ခရောက်ခြင်း ဖြစ်မည်လား ဆိုသည်ကို ဘယ်သောအခါမျှ မသိ ဟူသည်မှာ အမှန်ပင် ဖြစ်၏။ လူတိုင်းတွင် ၎င်းတို့ လိုက်စားပြီး ရယူချင်သော အရာတစ်ခုခုသည် ၎င်းတို့၏အတွင်း၌ ရှိ၏။ ၎င်းတို့တွင် ၎င်းတို့နှစ်သက်သော အရာများ ရှိကြ၏။ ၎င်းတို့နှစ်သက်သော အရာများကို လိုက်စားခြင်းသည် ၎င်းတို့အပေါ် ကံဆိုးခြင်း ကျရောက်စေနိုင်၏၊ သို့သော် ၎င်းတို့သည် ဤအရာကို သတိမထားမိကြဘဲ ၎င်းတို့ နှစ်သက်၍ ကြိုးပမ်း အားထုတ်သော အရာများသည် မှန်ကန်သည်ဟု လည်းကောင်း၊ ဤအရာများနှင့်ပတ်သက်၍ အမှားတစ်စုံတစ်ရာ မရှိဟုလည်းကောင်း ယုံကြည်နေကြဆဲဖြစ်သည်။ သို့သော် ကံဆိုးခြင်း ကျရောက်သော နေ့တစ်နေ့ ရောက်ရှိလာပြီး ၎င်းတို့ လိုက်စားပြီး နှစ်သက်ကြသော အရာများ ၎င်းတို့ထံမှ ယူဆောင်သွားခြင်း ခံရသည်ဆိုလျှင် ၎င်းတို့သည် အပျက်သဘောဆောင်၍ ပျော့ညံ့လာကြကာ မားမားမတ်မတ် ရပ်တည်၍ မရနိုင်အောင် ဖြစ်လာကြလိမ့်မည်။ မည်သို့ ဖြစ်ပျက်ခဲ့သည်ကို ၎င်းတို့ သိကြလိမ့်မည်မဟုတ်၊ မမျှတခြင်းအတွက် ဘုရားသခင်နှင့်ပတ်သက်၍ စောဒကတက်ကြမည် ဖြစ်ကာ ဘုရားသခင်ကို သစ္စာဖောက်သော ၎င်းတို့၏ စိတ်နှလုံးသည် ထွက်ပေါ်လာလိမ့်မည်။ လူတို့သည် မိမိကိုယ်မိမိ မသိကြလျှင် မည်သည့်နေရာ၌ ၎င်းတို့၏ပျော့ကွက် ရှိနေသည်ကိုလည်းကောင်း၊ ၎င်းတို့အနေဖြင့် မည်သည့်နေရာ၌ ကျရှုံးလွယ်သည်၊ သို့မဟုတ် မှောက်မှားလွယ်သည်ကိုလည်းကောင်း သိကြလိမ့်မည် မဟုတ်။ အမှန်တကယ်ပင် သနားစရာကောင်း၏။ ထို့ကြောင့်ပင် လူတစ်ဦးတစ်ယောက်သည် မိမိကိုယ်ကို မသိလျှင် အချိန်မရွေး မှောက်မှားနိုင်ပြီး၊ သို့မဟုတ် ကျရှုံးနိုင်ပြီး မိမိ၏အဆုံးသတ်ကို မိမိကိုယ်တိုင်ကပင် ဖြစ်ပေါ်စေသည်ဟု ငါတို့ ဆိုကြခြင်းဖြစ်၏။

“ကျွန်ုပ်တို့သည် သမ္မာတရား၏ သွင်ပြင်လက္ခဏာတိုင်းကို နားလည်ပါသည်။ သို့သော် ၎င်းတို့ကို လက်တွေ့မလုပ်ဆောင်တတ်ဘဲ ဖြစ်နေသည်” ဟူ၍ လူအများအပြားက ပြောခဲ့ကြ၏။ ဤသည်မှာ လူတို့သည် အဘယ်ကြောင့် သမ္မာတရားကို လက်တွေ့ မလုပ်ဆောင်သနည်းဟူသော ဇာစ်မြစ်ကို ဖော်ထုတ်ပြ၏။ သမ္မာတရားကို နားလည်သော်လည်း လက်တွေ့မလုပ်ဆောင်နိုင်သည်မှာ မည်သည့် လူအမျိုးအစားများ ဖြစ်သနည်း။ သေချာသည်မှာ သမ္မာတရားကို အလွန်အမင်း မနှစ်မြို့သကဲ့သို့ မုန်းတီးကြသည့် လူများကသာ သမ္မာတရားကို လက်တွေ့မလုပ်ဆောင်နိုင်ခြင်း ဖြစ်သည်။ ဤသည်မှာ ၎င်းတို့၏သဘာဝအတွင်းမှ ပြဿနာတစ်ခု ဖြစ်၏။ သမ္မာတရားကို နားမလည်သည့်တိုင် သမ္မာတရားကို ချစ်သော လူများမှာမူ ၎င်းတို့၏ အသိတရားကို အခြေခံကာ ပြုမူကြမည်ဖြစ်ပြီး မကောင်းမှုကိုလည်း ပြုလုပ်ကြလိမ့်မည် မဟုတ်ပေ။ လူတစ်ဦးတစ်ယောက်၏ သဘာဝမှာ သမ္မာတရားကို အလွန်အမင်း မနှစ်မြို့လျှင် ထိုသူသည် သမ္မာတရားကို ဘယ်သောအခါမျှ လက်တွေ့ လုပ်ဆောင်နိုင်လိမ့်မည် မဟုတ်။ သမ္မာတရားကို အလွန်အမင်း မနှစ်မြို့သော လူများသည် ဘုရားသခင်ကို ကောင်းချီးများ ရရှိရန်အတွက် ယုံကြည်ခြင်းသာ ဖြစ်ပြီး သမ္မာတရားကို လိုက်စား၍ ကယ်တင်ခြင်း ရရှိရန်အတွက် မဟုတ်ပေ။ ၎င်းတို့သည် ၎င်းတို့၏တာဝန်များကို ထမ်းဆောင်ကြလျှင်ပင် ယင်းသည် သမ္မာတရားကို ရရှိရန်အတွက် မဟုတ်ဘဲ ကောင်းချီးများကိုသာ လုံးလုံးလျားလျား ရရှိရန်အတွက် ဖြစ်၏။ ဥပမာအားဖြင့် ညှဉ်းပန်းနှိပ်စက်ခံရကာ အိမ်မပြန်နိုင်ကြတော့သည့် လူအချို့က ၎င်းတို့၏ စိတ်နှလုံးများထဲတွင် “ငါသည် ဘုရားသခင်ကို ယုံကြည်ခြင်းကြောင့် ညှဉ်းပန်းနှိပ်စက် ခံရပြီး အိမ်ပြန်၍ မရနိုင်ပေ။ တစ်နေ့နေ့တွင် ဘုရားသခင်က ငါ့ကို ပိုကောင်းသော အိမ်တစ်လုံး ပေးလိမ့်မည်။ ဘုရားသခင်သည် ငါ့ကို အချည်းနှီး ဒုက္ခရောက်စေလိမ့်မည် မဟုတ်” ဟူ၍လည်းကောင်း၊ “ငါသည် ဘယ်နေရာကို ရောက်ရောက်၊ ဘုရားသခင်က ငါ့ကို စားဖို့ အစားအစာ ပေးလိမ့်မည်။ ကိုယ်တော်သည် ငါ့အား တစ်ဖက်ပိတ် လမ်းတစ်ခုကို လျှောက်စေလိမ့်မည် မဟုတ်။ ကိုယ်တော်သည် ငါ့အား လမ်းဆုံးတစ်ခုကို လျှောက်စေသည်ဆိုလျှင် သူသည် စစ်မှန်သော ဘုရားသခင် ဖြစ်မည်မဟုတ်။ ဘုရားသခင်သည် ထိုသို့ လုပ်မည်မဟုတ်” ဟူ၍လည်းကောင်း စဉ်းစားကြ၏။ ဤသို့သော အခြင်းအရာများသည် လူသား၏အတွင်း၌ မရှိလေသလော။ “ငါသည် ဘုရားသခင်အတွက် ငါ့ကိုယ်ငါ အသုံးခံရန် ငါ့မိသားစုကို စွန့်လွှတ်ပြီးပြီ။ ဘုရားသခင်က ငါ့ကို အာဏာရှိသူတို့လက်သို့ မလွှဲအပ်သင့်။ ငါသည် ကြီးမားသော စိတ်အားထက်သန်မှုဖြင့် လိုက်စားပြီးပြီ။ ဘုရားသခင်က ငါ့ကို ကာကွယ်ကာ ကောင်းချီး ပေးသင့်သည်။ ငါတို့သည် ဘုရားသခင်၏နေ့ရက် ရောက်ရှိဖို့ကို အလွန် တမ်းတကြသည်။ ထို့ကြောင့် ဘုရားသခင်၏နေ့ရက်သည် တတ်နိုင်သမျှ မြန်မြန် ရောက်လာသင့်သည်။ ဘုရားသခင်က လူသား၏ ဆန္ဒများကို ဖြည့်ဆည်းပေးသင့်သည်” ဟူ၍ တွေးကြသော လူအချို့လည်း ရှိ၏။ လူအများအပြားသည် ဤနည်းအတိုင်း ထင်တတ်ကြ၏၊ ဤသည်မှာ လူသား၏ တရားလွန် အလိုဆန္ဒ မဟုတ်လော။ လူတို့သည် ဘုရားသခင်အပေါ် လွန်ကဲသော တောင်းဆိုချက်များကို အမြဲတစေ ပြုလုပ်ခဲ့ကြပြီး “ငါတို့သည် ငါတို့တာဝန်များကို ထမ်းဆောင်ရန် ငါတို့မိသားစုများကို စွန့်လွှတ်ခဲ့ပြီးပြီ။ ထို့ကြောင့် ဘုရားသခင်က ငါတို့ကို ကောင်းချီးပေးသင့်သည်။ ငါတို့က ဘုရားသခင်၏ တောင်းဆိုချက်များနှင့်အညီ လုပ်ဆောင်ပြီးပြီဖြစ်၍ ဘုရားသခင်က ငါတို့ကို ဆုလာဘ်ပေးသင့်သည်” ဟူ၍ အမြဲပင် တွေးတောနေကြ၏။ လူအများအပြားသည် ဘုရားသခင်ကို ယုံကြည်လင့်ကစား ၎င်းတို့၏ စိတ်နှလုံးများ၌ ဤသို့သော အရာများကို သိုထားကြ၏။ ၎င်းတို့သည် အခြားသူများက ဘုရားသခင်အတွက် မိမိကိုယ်ကို အသုံးခံရန် မိမိတို့၏မိသားစုများကို ပစ်ခွာ၍ အရာအားလုံးကိုလည်း အလွယ်ကလေးပင် စွန့်လွှတ်နေကြသည်ကို မြင်မိကြပြီး “သူတို့က ကိုယ့်မိသားစုများကို ထိုမျှလောက် အချိန်အကြာကြီး ထားရစ်ခဲ့ကြသည်၊ သူတို့သည် အိမ်ကို မလွမ်းဘဲ မည်သို့များ နေကြသနည်း။ သူတို့သည် ဤအဖြစ်ကို မည်သို့ ကျော်လွှားကြသနည်း။ ငါက ဤအဖြစ်ကို ဘယ်လိုကြောင့် မကျော်လွှားနိုင်ရသနည်း။ ငါသည် ငါ့မိသားစု၊ ခင်ပွန်းသည် (သို့မဟုတ် ဇနီးသည်) နှင့် သားသမီးများကို ဘယ်လိုကြောင့် လက်မလွှတ်နိုင် ဖြစ်ရသနည်း။ ဘုရားသခင်သည် သူတို့အပေါ် ကျေးဇူးပြုပြီး၊ ငါ့အပေါ် ဘယ်လိုကြောင့် ကျေးဇူးမပြုသနည်း။ သန့်ရှင်းသော ဝိညာဉ်တော်သည် ဘာကြောင့် ငါ့အပေါ် ကျေးဇူးတော် မပေးအပ်သနည်း၊ သို့မဟုတ် ဘာကြောင့် ငါနှင့်အတူ ရှိမနေသနည်း” ဟု စဉ်းစားမိကြ၏။ ဤသည်မှာ မည်သို့သော အခြေအနေ ဖြစ်သနည်း။ လူတို့သည် အသိစိတ် ချို့တဲ့လွန်းလှ၏။ ၎င်းတို့သည် သမ္မာတရားကို လက်တွေ့ မလုပ်ဆောင်ကြဘဲ ဘုရားသခင်ကို မကျေမနပ် ပြောဆိုကာ ၎င်းတို့ ပြုလုပ်သင့်သော အရာများကို မပြုလုပ်ကြပေ။ လူတို့သည် သမ္မာတရားကို လိုက်စားသော လမ်းအား ရွေးချယ်သင့်၏၊ သို့ရာတွင် ၎င်းတို့မှာ သမ္မာတရားကို အလွန်အမင်း မနှစ်မြို့ကြ၊ ဇာတိပကတိဆိုင်ရာ သာယာမှုများကို မက်မောကြသည်၊ ကောင်းချီးများ ရရှိရန်နှင့် ကျေးဇူးတော်ကို ခံစားရန် အမြဲတစေ ကြိုးပမ်းကြသည်။ တစ်ချိန်တည်းမှာပင် လူသားအပေါ် ဘုရားသခင်၏ တောင်းဆိုချက်များမှာ လွန်ကဲလွန်းသည် ဟူ၍ ညည်းညူနေကြလေသည်။ ၎င်းတို့သည် ဘုရားသခင်အား ၎င်းတို့အပေါ် ကျေးဇူးပြုရန်၊ ၎င်းတို့အပေါ် ပို၍ များပြားသော ကျေးဇူးတော်ကို ပေးအပ်ရန်နှင့် ၎င်းတို့အား သွေးသားသာယာမှုကို ခံစားခွင့်ပေးရန်တို့ကိုသာ တောင်းဆိုနေကြ၏။ ၎င်းတို့သည် ဘုရားသခင်ကို စစ်မှန်စွာ ယုံကြည်ကြသော လူများ ဟုတ်သလော။ “ငါသည် ငါ့တာဝန်ကို ထမ်းဆောင်ရန် ငါ့မိသားစုကို စွန့်လွှတ်ပြီးပြီ။ ငါသည် အများကြီး ဆင်းရဲဒုက္ခ ခံပြီးပြီ။ ငါ့အနေဖြင့် အိမ်ကို မလွမ်းမိစေရန်၊ စွန့်လွှတ်ဖို့လည်း စိတ်ပိုင်းဖြတ်မှု ရှိစေရန်အတွက် ဘုရားသခင်က ငါ့အပေါ် ကျေးဇူးပြုသင့်သည်။ ကိုယ်တော်က ငါ့ကို ခွန်အား ပေးသင့်သည်၊ သို့မှသာ ငါသည် အပျက်သဘောဆောင်မှု၊ ပျော့ညံ့မှုတို့ ဖြစ်လာမည်မဟုတ်။ အခြားလူတို့မှာ စိတ်ဓာတ် ကြံ့ခိုင်လွန်းလှသည်၊ ဘုရားသခင်က ငါ့ကိုလည်း စိတ်ဓာတ်ကြံ့ခိုင်အောင် ပြုလုပ်ပေးသင့်သည်” ဟူ၍ ၎င်းတို့က တွေးထင်ကြ၏။ လူအများ ပြောဆိုကြသော ဤစကားများမှာ အသိစိတ်နှင့် ယုံကြည်ခြင်း လုံးလုံး ကင်းမဲ့၏။ လူတို့၏ တရားလွန် တောင်းဆိုချက်များသည် မပြည့်စုံသေးသဖြင့် ၎င်းတို့သည် ဘုရားသခင်ကို မကျေမနပ် ဖြစ်ကြ၍ ထိုစကားများကို ပြောဆိုကြခြင်းသာ ဖြစ်သည်။ ဤသည်တို့မှာ ၎င်းတို့၏ စိတ်နှလုံးများထဲမှ ၎င်းတို့ ထုတ်ဖော်သော အရာများ ဖြစ်ပြီး ထိုအရာများသည် လူတို့၏သဘာဝကို လုံးလုံး ကိုယ်စားပြု၏။ ဤအရာများသည် လူတို့၏အတွင်း၌ ရှိနေ၏၊ ၎င်းအရာများကို မဖယ်ရှားလျှင် ၎င်းတို့သည် လူတို့အား ဘုရားသခင်ကို အချိန်မရွေး နေရာမရွေး အထင်လွဲမှားခြင်း၊ မကျေမနပ်ဖြစ်ခြင်းဆီသို့ ဦးတည်စေနိုင်၏။ လူတို့သည် ဘုရားသခင်ကို ပြစ်မှား စော်ကားမိလာနိုင်သလို မှန်သောလမ်းခရီးကိုလည်း အချိန်အခါမရွေး၊ နေရာမရွေး စွန့်ခွာမိနိုင်မည်ဖြစ်၏။ ဤသည်ကား ဖြစ်ရိုးဖြစ်စဉ်ပင် ဖြစ်သည်။ သင်တို့သည် ဤပြဿနာကို ယခု ရှင်းရှင်းလင်းလင်း မြင်ကြသလော။ လူတို့သည် ၎င်းတို့၏သဘာဝမှ ထုတ်ဖော်သော အရာများကို သိကြရမည်။ ဤသည်မှာ ဂရုတစိုက်ဖြင့် ချဉ်းကပ်ရန် လိုအပ်သည့် အလွန်လေးနက်သော အကြောင်းအရာတစ်ခု ဖြစ်၏၊ အဘယ်ကြောင့်ဆိုသော် လူတို့အနေဖြင့် ၎င်းတို့၏ သက်သေခံချက်တွင် ခိုင်မာစွာ ရပ်တည်နိုင်ခြင်း ရှိမရှိဟူသော အချက်ဖြင့်လည်းကောင်း၊ ၎င်းတို့သည် ဘုရားသခင်ကို ၎င်းတို့၏ယုံကြည်ခြင်း၌ ကယ်တင်ခြင်း ရရှိနိုင် မရရှိနိုင်ဟူသော အချက်ဖြင့်လည်းကောင်း ဤအကြောင်းအရာက ဆက်နွှယ်နေခြင်းကြောင့် ဖြစ်သည်။ သမ္မာတရားကို အနည်းငယ်မျှ နားလည်ကြသော လူများအတွက်မူ ၎င်းတို့ဆီမှ ဤအရာများ ထုတ်ဖော်နေသည်ကို သဘောပေါက်လျှင်၊ ထို့ပြင် ဤပြဿနာကို တွေ့ရှိသည့်အချိန်၌ ဆန်းစစ်ပြီး နှံ့နှံ့စပ်စပ် ရှာဖွေလေ့လာနိုင်လျှင် ၎င်းတို့သည် ပြဿနာကို ဖြေရှင်းနိုင်ကြလိမ့်မည်။ အကယ်၍ ၎င်းတို့ဆီမှ ဤအရာများ ထုတ်ဖော်ထွက်နေသည်ကို သဘောမပေါက်ကြလျှင် ၎င်းတို့အနေဖြင့် ဤပြဿနာကို ဖြေရှင်းရန် ဘယ်လိုမျှ မဖြစ်နိုင်ဘဲ ဘုရားသခင်၏ ဖော်ထုတ်ခြင်းကိုဖြစ်စေ၊ အဖြစ်မှန်တို့ ထုတ်ဖော်ခြင်းကိုဖြစ်စေ စောင့်ကြရုံသာရှိ၏။ သမ္မာတရားကို မချစ်ကြသော လူများသည် မိမိကိုယ်ကို ဆန်းစစ်ခြင်းကို တန်ဖိုးမထားကြပေ။ ၎င်းတို့သည် ထိုအကြောင်းအရာကို အရေးမပါသော ကိစ္စတစ်ခု ဖြစ်သည်ဟု အမြဲတမ်း ယုံကြည်ကြပြီး “လူတိုင်းသည် ဤသို့ဖြစ်သည်။ အနည်းငယ် ညည်းညူခြင်းက ပြဿနာကြီး မဟုတ်ပါ။ ဘုရားသခင်က ခွင့်လွှတ်လိမ့်မည်၊ ဘုရားသခင်က အမှတ်ထားလိမ့်မည်မဟုတ်” ဟူ၍ စဉ်းစားကာ မိမိကိုယ်ကို အလိုလိုက်ကြလိမ့်မည်။ လူတို့သည် မိမိကိုယ်ကို မည်သို့ ဆင်ခြင်ရမည်၊ သို့မဟုတ် ပြဿနာများကို ဖြေရှင်းရန် သမ္မာတရားကို မည်သို့ ရှာဖွေရမည်ကို မသိကြ၊ ၎င်းတို့သည် ဤအရာများထဲမှ တစ်ခုတလေကိုပင် လက်တွေ့မလုပ်ဆောင်နိုင်ကြချေ။ ၎င်းတို့သည် ယောင်ချာချာများသာ ဖြစ်ပြီး အထူးသဖြင့် ပျင်းရိကြသည့်အပြင် မှီခိုတတ်သလို စိတ်ကူးယဉ်မှုများကို အရသာတွေ့တတ်သည်။ “တစ်နေ့နေ့တွင် ဘုရားသခင်က ငါတို့အတွင်း၌ အလုံးစုံ ပြောင်းလဲခြင်းတစ်ခုကို ဖြစ်ပေါ်စေလိမ့်မည်။ ထိုအခါ ငါတို့သည် ယခုကဲ့သို့ ပျင်းရိကြတော့မည်မဟုတ်၊ ငါတို့သည် လုံးဝ သန့်ရှင်းလာကြလိမ့်မည်၊ ဘုရားသခင်၏ တန်ခိုးတော်ကိုလည်း ကြည်ညိုလေးစားကြလိမ့်မည်” ဟူ၍ ၎င်းတို့က တမ်းတကြ၏။ ဤသည်မှာ စိတ်ကူးယဉ်ဆန်ဆန် ထင်မှတ်ခြင်း ဖြစ်သလို တကယ်ပင် လက်တွေ့မကျပေ။ လူတစ်ဦး တစ်ယောက်သည် တရားဒေသနာ အများအပြားကို ကြားနာပြီးသည့်နောက် ဤသို့သော အယူအဆနှင့် စိတ်ကူးစိတ်သန်းမျိုးကို ပြောဆိုနိုင်လျှင် ထိုသူသည် ဘုရားသခင်၏ အမှုတော်ကို သိခြင်း မရှိပေ။ ဘုရားသခင်က လူများကို မည်သို့ ကယ်တင်သည်ကိုလည်း ၎င်းတို့သည် ယနေ့အချိန်ထိ ရှင်းလင်းစွာ မမြင်ကြသေးချေ။ ဤသို့သော လူများသည် အလွန့်အလွန် မသိနားမလည်ဖြစ်ကြ၏။ ဘုရားသခင်၏ အိမ်တော်သည် မိမိကိုယ်ကို သိရှိခြင်းနှင့် ဘုရားသခင်၏ စိတ်သဘောထားအား သိရှိခြင်း အကြောင်းတို့ကို အဘယ်ကြောင့် အမြဲတစေ မိတ်သဟာယပြုရသနည်း။ ဤသည်ကား လူအယောက်တိုင်းအတွက် အရေးပါလှ၏။ ဘုရားသခင်က လူတို့အား မည်သို့ ကယ်တင်သည်ကို သင့်အနေဖြင့် အမှန်တကယ် ရှင်းလင်းစွာ မြင်နိုင်သည်ဆိုလျှင် သင်သည် မိမိကိုယ်ကို သိရှိခြင်းကို အာရုံစိုက်သင့်သည့်အပြင် မိမိကိုယ်ကို ဆင်ခြင်ခြင်းကိုလည်း ပုံမှန် လုပ်ဆောင်သင့်၏။ သို့မှသာ စစ်မှန်သော အသက်ဝင်ရောက်မှုကို သင်ရရှိပေလိမ့်မည်။ သင့်အနေဖြင့် မိမိသည် ဖောက်ပြန်ပျက်စီးခြင်းကို ထုတ်ဖော်ပြနေသည်ဟု သဘောပေါက်မိသည့်အချိန်တွင် သင်သည် သမ္မာတရားကို ရှာဖွေနိုင်ပါမည်လော။ ဘုရားသခင်ထံ ဆုတောင်းကာ ဇာတိပကတိကို ပုန်ကန်နိုင်မည်လော။ ဤသည်မှာ သမ္မာတရားကို လက်တွေ့ လုပ်ဆောင်ခြင်းအတွက် မရှိမဖြစ်သော လိုအပ်ချက်တစ်ခု ဖြစ်၏၊ အရေးပါသော အဆင့်တစ်ခုလည်း ဖြစ်၏။ အကယ်၍ သင့်ထံတွင် ဖြစ်ပျက်သော အရာအားလုံးနှင့် သင် ပြုလုပ်သော အရာအားလုံးတို့၌ သမ္မာတရားနှင့် ကိုက်ညီသော နည်းလမ်းမျိုးဖြင့် မည်သို့ လက်တွေ့လုပ်ဆောင်ရမည်ကို သင်က သိနားလည် နိုင်သည်ဆိုလျှင် သင့်အနေဖြင့် သမ္မာတရားကို လက်တွေ့လုပ်ဆောင်ရန် လွယ်ကူပေလိမ့်မည်၊ အသက်ဝင်ရောက်မှုကိုလည်း ရရှိပေလိမ့်မည်။ သင်သည် မိမိကိုယ်ကို သိရှိနိုင်စွမ်း မရှိလျှင် သင်၏အသက်သည် မည်သို့ တိုးတက်နိုင်မည်နည်း။ သင်သည် မည်မျှ အပျက်သဘောဆောင်၍ ပျော့ညံ့နေသည်ဖြစ်စေ၊ မိမိကိုယ်ကို ဆင်ခြင်ခြင်း မပြု၊ မိမိကိုယ်ကို သိရှိလာခြင်း မရှိ၊ သို့မဟုတ် ဘုရားသခင်ကို ဆုတောင်းခြင်း မရှိလျှင် သင်သည် သမ္မာတရားကို မချစ်ကြောင်း၊ သင်သည် သမ္မာတရားကို အားထုတ်သော လူတစ်ယောက် မဟုတ်ကြောင်း၊ သမ္မာတရားကို မည်သည့်အခါမှ ရရှိနိုင်လိမ့်မည် မဟုတ်ကြောင်းတို့ကိုသာ ဤအရာက သက်သေပြ၏။

“ငါတို့သည် အဆင်းနီသောနဂါးကြီး၏ မြန်မြန် ကျရှုံးမှုကို တောင့်တကြသည်၊ ဘုရားသခင်၏နေ့ရက် အလျင်အမြန် ရောက်လာဖို့ကိုလည်း မျှော်လင့်ကြသည်။ ဤသည်တို့မှာ သဘာဝကျသော တောင်းဆိုချက်များ မဟုတ်လော။ ဘုရားသခင်၏နေ့ရက် မကြာမီ ရောက်ရှိလာရန် တမ်းတခြင်းသည် ဘုရားသခင်ထံသို့ ဂုဏ်အသရေအား တတ်နိုင်သမျှ အလျင်အမြန် ဆောင်ယူပေးရန် တမ်းတခြင်းနှင့် အတူတူပင် မဟုတ်လော” ဟူ၍ အချို့သောလူများသည် ယခင်က စဉ်းစားခဲ့ကြ၏။ ၎င်းတို့သည် ဤအကြောင်းကို ဖော်ပြရန် ကြားကောင်းသော နည်းလမ်းအချို့ကို ခိုးကြောင်ခိုးဝှက် ရှာဖွေကြ၏၊ အမှန်မှာမူ ၎င်းတို့သည် ဤအရာများကို ၎င်းတို့ကိုယ်တိုင်အတွက် မျှော်လင့်နေခြင်းသာ ဖြစ်သည်။ ၎င်းတို့၏ ကိုယ်ပိုင် အကျိုးအတွက် လုပ်ဆောင်နေခြင်း မဟုတ်လျှင် ၎င်းတို့သည် မည်သည့်အရာကို တမ်းတမည်နည်း။ လူတို့ တမ်းတသည့် အရာအားလုံးမှာ ၎င်းတို့၏ စိတ်မချမ်းမြေ့စရာ ပတ်ဝန်းကျင်နှင့် ဤစိတ်ဆင်းရဲစရာ လောကကြီးမှ အလျင်အမြန် လွတ်မြောက်ဖို့သာ ဖြစ်၏။ ဘုရားသခင်၏ သားဦးများကို ဟိုယခင်က ပေးအပ်ခဲ့သည့် ကတိတော်များအား မြင်မိကြသော ထူးထူးထွေထွေ လူအချို့သည် ရှိနေကြပြီး ၎င်းတို့သည် ဤအရာအတွက် အလွန် အာသာဆန္ဒ ရှိကြ၏။ ၎င်းတို့အနေဖြင့် ထိုစာသားများကို ဖတ်မိသည့် အခါတိုင်းသည် တံလျှပ်တစ်ခုကို ကြည့်ရင်း မိမိတို့၏ အာသာဆန္ဒကို ပြေပျောက်အောင် လုပ်နေသကဲ့သို့ပင် ဖြစ်၏။ လူသား၏အတွင်းမှ တစ်ကိုယ်ကောင်းဆန်သော အလိုဆန္ဒများမှာ လုံးလုံးလျားလျား စွန့်လွှတ်ခံရခြင်း မရှိသေးချေ၊ ထို့ကြောင့် သင်သည် သမ္မာတရားကို မည်မျှ လိုက်စားသည်ဖြစ်စေ၊ စိတ်မပါ့တပါ အခြေအနေသာ အစဉ်အမြဲ ရှိနေလိမ့်မည်။ သမ္မာတရားကို မလိုက်စားသော လူအများအပြားသည် ၎င်းတို့၏ ဆင်းရဲဒုက္ခမှ သက်သာရာ ရနိုင်ရန်နှင့် ကောင်းကင်နိုင်ငံတော်၏ ကောင်းချီးများကို ခံစားနိုင်ရန်အတွက် ဘုရားသခင်၏နေ့ရက် ရောက်ရှိလာဖို့ကို အမြဲတစေ တမ်းတကြ၏။ ရောက်ရှိ မလာသည့်အခါတွင် ၎င်းတို့သည် စိတ်ဆင်းရဲမှုဖြင့် လောင်မြိုက်ကာ အချို့သောလူများက “ဘုရားသခင်၏ နေ့ရက်သည် ဘယ်အချိန်တွင် ရောက်ရှိလာမည်နည်း။ ကျွန်ုပ်တို့သည် အိမ်ထောင် မပြုရသေးပါ။ ဆက်ပြီး မစောင့်နိုင်တော့ပါ။ မိဘများအတွက် သားသမီးတို့၏ ဝတ္တရားကို ပြရပါမည်။ ဆက်ပြီး သည်းမခံနိုင်တော့ပါ။ မိမိတို့ အသက်အရွယ် ကြီးသည့်အခါ မိမိတို့ကို စောင့်ရှောက်နိုင်ရန်အတွက် သားသမီးများ ရှိဖို့ လိုအပ်ပါသေးသည်။ ဘုရားသခင်၏ နေ့ရက်သည် မြန်မြန်ဆန်ဆန် ရောက်လာသင့်သည်။ ထိုအတွက် အားလုံးအတူတူ ဆုတောင်းကြပါစို့” ဟူ၍ ဟစ်အော်ကြ၏။ သမ္မာတရားကို လိုက်စားသော ထိုလူများသည် လမ်းခရီးတစ်လျှောက် ယခုအချိန်ထိ မကျေနပ်ချက် တစ်ခုမျှ မရှိဘဲ မည်သို့များ လျှောက်လှမ်းနိုင်သနည်း။ ၎င်းတို့သည် ဘုရားသခင်၏ နှုတ်ကပတ်တော်အားဖြင့် လမ်းပြခြင်း မခံရလေသလော၊ ဘုရားသခင်၏ နှုတ်ကပတ်တော်အားဖြင့် ပံ့ပိုးခြင်း မခံရလေသလော။ လူတို့၏အတွင်း၌ မစင်ကြယ်မှု မြောက်များစွာ ရှိ၏၊ ၎င်းတို့အနေဖြင့် စစ်ဆေးခြင်းကို လက်မခံလျှင် အဆင်ပြေနိုင်သလော။ ဆင်းရဲဒုက္ခ မရှိလျှင် ၎င်းတို့ မည်သို့များ ပြောင်းလဲနိုင်သနည်း။ လူတို့သည် အတိုင်းအတာတစ်ခုအထိ စစ်ဆေးခြင်း ခံကြရမည် ဖြစ်ပြီး ဘုရားသခင်က ၎င်းတို့အား စီစဉ်ညွှန်ကြားသည်ကို ခွင့်ပြုရန် မကျေနပ်ချက် စိုးစဉ်းမျှ ရှိမလာတော့ဘဲ လိုလားရမည်။ ၎င်းတို့အနေဖြင့် လုံးလုံး ပြောင်းလဲကြမည်မှာ ထိုအချိန်ပင် ဖြစ်သည်။

ကောက်နုတ်ချက် (၄၆)

ဖောက်ပြန်ပျက်စီးသော လူသားမျိုးနွယ်တွင် လူဝင်စားသော နတ်ဆိုးများ သို့မဟုတ် ဝိညာဉ်ဆိုးများ၏ ဝင်ပူးခြင်းခံရသူများမှအပ လူတို့၏ သဘာဝ အနှစ်သာရက အတူတူပင် ဖြစ်သည်။ လူအမျိုးမျိုးတို့၏အထဲတွင် မည်သည့် ဝိညာဉ်များ ရှိကြသည်ကို လူအချို့က အမြဲ လေ့လာရန် နှစ်သက်ကြသော်လည်း ဤသည်မှာ လက်တွေ့မကျပေ။ ဤအရာကို အာရုံစိုက်ခြင်းက သွေဖည်မှုများဆီသို့ အလွယ်တကူ ဆိုက်ရောက်သွားစေနိုင်သည်။ လူအချို့က သဘာဝလွန် အဖြစ်အပျက်များ ၎င်းတို့ တွေ့ကြုံခဲ့ရသောကြောင့် ၎င်းတို့၏ ဝိညာဉ်နှင့်ပတ်သက်၍ တစ်စုံတစ်ရာ မှားယွင်းသည်ဟု အမြဲ ခံစားကြသော်လည်း အခြားသူများကမူ ၎င်းတို့ မည်သည့်အခါတွင်မျှ မပြောင်းလဲနိုင်သောကြောင့် မိမိတို့၏ ဝိညာဉ်တွင် ပြဿနာတစ်ခု ရှိသည်ဟု တွေးထင်ကြပေသည်။ အမှန်တွင် မိမိ၏ ဝိညာဉ်တွင် ပြဿနာတစ်ခု ရှိသည်ဖြစ်စေ၊ မရှိသည်ဖြစ်စေ လူသားသဘာဝသည် အတူတူပင်ဖြစ်သည်။ ယင်းက ဘုရားသခင်ကို အတိုက်အခံလုပ်ကာ သစ္စာဖောက်သည်။ လူတို့၏ သဘာဝတွင် တူညီသောအရာများ ရှိသည့်နည်းတူ လူတို့၏ ဖောက်ပြန်ပျက်စီးခြင်း အတိုင်းအတာသည်လည်း အတူအတူနီးပါး ဖြစ်သည်။ လူအချို့သည် မိမိတို့ ဝိညာဉ်နှင့်ပတ်သက်၍ တစ်စုံတစ်ရာ မှားယွင်းသည်ဟု အမြဲ မယုံသင်္ကာဖြစ်ကြပြီး “ထိုသို့သော အရာတစ်ခုကို ငါ အဘယ်ကြောင့် လုပ်ဆောင်နိုင်ရသနည်း။ ထိုအတွေးမျိုး ငါ တစ်ကြိမ်တစ်ခါမျှ မရှိခဲ့ဖူးပါ။ ငါ့ဝိညာဉ်နှင့် ပတ်သက်၍ တစ်စုံတစ်ရာ မှားယွင်းနေသလော”ဟု တွေးကြသည်။ ၎င်းတို့ကို ဘုရားသခင် ရွေးချယ်ထားခြင်း ရှိမရှိဟူသည်ကိုပင် ၎င်းတို့ သံသယရှိကြပြီး အကျိုးဆက်အနေဖြင့် ၎င်းတို့ ယခင်ပို၍ အပျက်သဘောဆောင်လာကြသည်။ လူအချို့သည် အမှုအရာများကို ဖြူစင်စွာ နားလည်သဘောပေါက်ကြပြီး ၎င်းတို့ မည်သည့်အရာကို လုပ်ဆောင်သည်ဖြစ်စေ သမ္မာတရားကို ရှာဖွေခြင်းနှင့် ဘုရားသခင်၏ နှုတ်ကပတ်တော်များနှင့်အညီ မိမိတို့ကိုယ်ကို ပြန်လည်သုံးသပ်ခြင်းကိုသာ အာရုံစိုက်ကြသည်။ “ဤအရာကို ငါ အဘယ်သို့ လုပ်ဆောင်နိုင်ရသနည်း။ မည်သည့် စိတ်သဘောထားကို ငါ ထုတ်ဖော်ခဲ့သနည်း။ မည်သည့် သဘာဝက ထိုအရာကို ထိန်းချုပ်သနည်း။ သမ္မာတရားနှင့်အညီ ငါ မည်သို့ ဆောင်ရွက်နိုင်မည်နည်း”ဟူ၍ ဖြစ်သည်။ ဤကဲ့သို့ သင့်ကိုယ်သင် ပြန်လည်သုံးသပ်ခြင်းအားဖြင့် သမ္မာတရားကို နားလည်ပြီး လက်တွေ့လုပ်ဆောင်မှု လမ်းကြောင်းတစ်ခု ရှာတွေ့ရန်အပြင် မိမိကိုယ်ကို သိသည့်အသိကို စွမ်းဆောင်ရရှိရန် လွယ်ကူပေသည်။ လူတိုင်း၏ မိမိကိုယ်ကို သုံးသပ်သည့် နည်းစနစ်များနှင့် လမ်းကြောင်းများသည် မတူပေ။ အချို့က သမ္မာတရားကို ရှာဖွေခြင်းနှင့် မိမိကိုယ်ကို သိရှိခြင်းအပေါ် အာရုံစိုက်ကြစဉ်တွင် အခြားသူတို့က တိုးတက်ရန် ခက်ခဲစေပြီး အပျက်သဘောဆောင်ခြင်းထဲတွင် ပိတ်မိရန် လွယ်ကူစေသည့် မရေရာသကဲ့သို့ လက်တွေ့မကျသော အရာများအပေါ် အမြဲ အာရုံစိုက်ကြသည်။ သင်၏ ဝိညာဉ်က မည်သည့်အရာဖြစ်စေ၊ မည်သူကမျှ ဝိညာဉ်၏ အမှုအရာများကို မမြင်နိုင်သကဲ့သို့ မထိတွေ့နိုင်သောကြောင့် ဤအရာကို အာရုံစိုက်လွန်းခြင်းက အမှုအရာများကို တားဆီးရုံသာ ဖြစ်စေလိမ့်မည်ကို သင် ယခု နားလည်ရန် လိုအပ်သည်။ အာရုံစိုက်ရမည့် အဓိကအရာမှာ လူတို့ကို ပိုင်းခြားသိမြင်ခြင်းနှင့် ဆက်စပ်သည့် လူသားမျိုးနွယ်၏ သဘာဝ အနှစ်သာရဖြစ်ပြီး လူတို့၏ သဘာဝ အနှစ်သာရကို သင် ပိုင်းခြားသိမြင်နိုင်လျှင် လူတို့ကိုယ်တိုင်ကို သင် ပိုင်းခြားသိမြင်နိုင်သည်။ အကြင်သူ၏ သဘာဝ အနှစ်သာရတွင် မည်သည့်အရာများ တည်ရှိသည်၊ မည်သည့် ဖောက်ပြန်ပျက်စီးသော စိတ်သဘောထားများ ထုတ်ဖော်ခံရနိုင်ပြီး ယင်းတို့ကို ဖြေရှင်းရန် သမ္မာတရား၏ မည်သည့် သွင်ပြင်လက္ခဏာများ လိုအပ်သည်ဟူသည်တို့ကို ရှင်းလင်းစွာ သိမြင်ခြင်းဟူသည့် ဤအရာမှာ ဘုရားသခင်ကို ယုံကြည်သည့်အခါ အာရုံစိုက်ရမည့် အရေးအကြီးဆုံးသောအရာ ဖြစ်သည်။ ဘုရားသခင်၏ အမှုတော်ကို ဤနည်းဖြင့် တွေ့ကြုံခြင်းဖြင့်သာ အကြင်သူသည် သမ္မာတရားကို ရရှိနိုင်ပြီး မိမိ၏ ဖောက်ပြန်ပျက်စီးသော စိတ်သဘောထားကို သန့်စင်စေနိုင်သည်။ သို့ရာတွင် မိမိကိုယ်ကို မည်သို့ သိရှိရမည်နည်း။ မိမိ၏ကိုယ်ပိုင် သဘာဝကို မည်သို့ သိရှိရမည်နည်း။ အကြင်သူသည် မိမိ၏ လုပ်ရပ်များမှတစ်ဆင့် မိမိထုတ်ဖော်သည့် စိတ်သဘောထားများအတိုင်း မိမိ၏ သဘာဝ အနှစ်သာရက မည်သည့်အရာဖြစ်သည်ကို သိမြင်နိုင်သည်။ ထို့ကြောင့် မိမိကိုယ်ကို သိရှိခြင်းအတွက် အဓိကသော့ချက်မှာ မိမိကိုယ်ပိုင် ဖောက်ပြန်ပျက်စီးသော စိတ်သဘောထားကို သိရှိရန် ဖြစ်သည်။ ဤသို့သိရှိခြင်းအားဖြင့်သာ လူတစ်ဦးသည် မိမိ၏ သဘာဝအနှစ်သာရကို နားလည်နိုင်မည်ဖြစ်ပြီး သဘာဝအနှစ်သာရကို ရှင်းရှင်းလင်းလင်း မြင်ခြင်းသည် မိမိကိုယ်ကို စေ့စေ့စပ်စပ် နားလည်ခြင်းဖြစ်သည်။ မိမိကိုယ်ကို သိရှိခြင်းသည် နက်နဲသော အလုပ်တာဝန်တစ်ခု ဖြစ်ပြီး လူတစ်ဦးက ကယ်တင်ခံရနိုင်ခြင်း ရှိမရှိဟူသည့်အရာအတွက် အဓိက သော့ချက်မှာ ၎င်းအနေဖြင့် မိမိကိုယ်ကို သိရှိပုံ ဖြစ်သည်။ လူတစ်ဦးသည် မိမိကိုယ်ကို အမှန်တကယ် သိရှိသည့်အခါတွင်သာ အမှန်တကယ် နောင်တရနိုင်သည်၊ သမ္မာတရားကို အလွယ်တကူ လက်ခံနိုင်ပြီး ကယ်တင်ခြင်းသို့သွားသည့် လမ်းကြောင်းပေါ် ခြေလှမ်းလှမ်းနိုင်ပေသည်။ မိမိတို့ကိုယ်ကို မသိရှိသောသူတို့အတွက် အမှန်တကယ် နောင်တရဖို့ မဆိုထားနှင့်၊ သမ္မာတရားကို လက်ခံရန်ပင် မဖြစ်နိုင်ပေ။ ထို့ကြောင့် အဓိက ပြဿနာမှာ မိမိကိုယ်ပိုင် ဖောက်ပြန်ပျက်စီးသော စိတ်သဘောထားကို သိနားလည်ရန် ဖြစ်သည်။ အတုအယောင် ဝိညာဉ်ရေးရာပြည့်ဝခြင်းကို လုံးဝ မလိုက်စားနှင့်။ လူတစ်ဦး၏ ဝိညာဉ်က မည်သည့်အရာ ဖြစ်သည်ဟူသည့်အပေါ် အမြဲ အာရုံစိုက်ခြင်းသည် သွေဖည်ရန် လွယ်ကူစေပြီး လူတို့ကို ဆုံးဖြတ်ချက်လွဲမှားစေရန် သို့မဟုတ် ထိခိုက်နစ်နာစေရန် လွယ်ကူစေသည်။ လူတို့အတွက် မိမိတို့ကိုယ်ကို သိရှိခြင်း၊ မိမိတို့၏ ဖောက်ပြန်ပျက်စီးသော စိတ်သဘောထားကို သိနားလည်ခြင်းနှင့် လူ၏ သဘာဝ အနှစ်သာရကို ရှင်းလင်းစွာ သိမြင်ခြင်းတို့ပေါ် အာရုံစိုက်ခြင်းက လက်တွေ့ကျသည်။ ပြီးလျှင် ဤအရာအားလုံးသည် ဖောက်ပြန်ပျက်စီးသော စိတ်သဘောထားကို ဖြေရှင်းခြင်းနှင့် သမ္မာတရားကို လူတို့ လိုက်စားကာ ဘုရားသခင်၏ ကယ်တင်ခြင်းကို ရရှိခြင်းအတွက် အကျိုးပြုလိမ့်မည် ဖြစ်သည်။

လူသားမျိုးနွယ်၏ သဘာဝ အနှစ်သာရသည် စာတန်၏ ဖောက်ပြန်ပျက်စီးခြင်းခံရသည့်နောက်တွင် သေးငယ်သော ကွဲပြားမှုများသာ ရှိလျက် အခြေခံအားဖြင့် အတူတူပင် ဖြစ်သည်။ ဤသည်မှာ အဘယ့်ကြောင့်ဆိုသော် အားလုံးတွင် တူညီသည့် ဘိုးဘေးဘီဘင်ရှိကြသောကြောင့်ဖြစ်သည်။ တူညီသည့် ကမ္ဘာလောကတွင် အသက်ရှင်ကြပြီး တူညီသည့် ဖောက်ပြန်ပျက်စီးခြင်းကို တွေ့ကြုံကြပြီး ဖြစ်သောကြောင့် ဖြစ်သည်။ ၎င်းတို့အားလုံးသည် တူညီသည့်အရာများ ရှိကြသည်။ သို့တိုင် အချို့သောလူတို့သည် ပတ်ဝန်းကျင်တစ်ခုတွင် အမှုအရာတစ်မျိုးကို လုပ်နိုင်စွမ်း ရှိကြပြီး လူအချို့မှာ အခြားသော ပတ်ဝန်းကျင်တွင် အခြားသော အမှုအရာတစ်မျိုးကို လုပ်နိုင်စွမ်း ရှိကြသည်။ လူအချို့သည် ပညာတတ်ဖြစ်သဖြင့် အတော်အတန် ယဉ်ကျေးကြပြီး လူအချို့မှာ ပညာမတတ်သဖြင့် မယဉ်ကျေးကြပေ။ လူအချို့သည် အမှုကိစ္စများအပေါ် အမြင်တစ်မျိုး ရှိကြသည်။ အခြားသူတို့မှာ အမှုကိစ္စများအပေါ် အခြားအမြင်တစ်မျိုး ရှိကြသည်။ အချို့သည် လူမှုပတ်ဝန်းကျင်တစ်မျိုးတွင် အသက်ရှင်နေထိုင်ကြပြီး အချို့မှာ အခြားလူမှု ပတ်ဝန်းကျင်တစ်မျိုးတွင် နေထိုင်ကြကာ ၎င်းတို့တွင် အမွေဆက်ခံရသည့် မတူကွဲပြားသော ဓလေ့များနှင့် အသက်ရှင်နေထိုင်ခြင်း အမူအကျင့်များ ရှိကြသည်။ သို့သော် လူ့သဘာဝအတွင်း၌ ပေါ်လွင်သည့် အမှုအရာများ၏ အနှစ်သာရမှာ အားလုံး အတူတူပင် ဖြစ်သည်။ ထို့ကြောင့် မည်သည့် ဝိညာဉ်မျိုးကို သင် ပိုင်ဆိုင်သည်ဟူသည်ကို အမြဲ စိတ်ဝင်စားရန် သို့မဟုတ် ထိုအရာက ဝိညာဉ်ဆိုးတစ်ခု ဟုတ်မဟုတ်ဟူသည်ကို အမြဲ စိုးရိမ်ပူပန်ရန် သင့်အတွက် မလိုအပ်ပေ။ ဤသည်မှာ လူက လက်လှမ်းမီနိုင်သည့် အရာတစ်ခု မဟုတ်။ ဤအရာကို ဘုရားသခင်သာ သိရှိနိုင်ပြီး လူက သိနိုင်လျှင်ပင် လူအတွက် သိရှိခြင်းသည် အကျိုးရှိမည် မဟုတ်။ မိမိ၏ ဝိညာဉ်အပေါ် စိတ်ဖြာလေ့လာဆွေးနွေးရန် သို့မဟုတ် စဉ်းစားချင့်ချိန်ရန် အမြဲ အလိုရှိခြင်းတွင် မည်သည့် အကျိုးကျေးဇူးမျှ မရှိပေ။ ဤသည်မှာ မသိနားမလည်သကဲ့သို့ နားဝေတိမ်တောင် အဖြစ်ဆုံးသော လူများ လုပ်ဆောင်သည့်အရာတစ်ခု ဖြစ်သည်။ သင်သည် တစ်စုံတစ်ရာကို အမှားလုပ်မိသည့်အခါ သို့မဟုတ် တစ်နည်းနည်းဖြင့် ပြစ်မှားမိသည့်အခါ “ငါ၏ ဝိညာဉ်နှင့်ပတ်သက်၍ တစ်စုံတစ်ရာ မှားယွင်းသလော။ ဤသည်မှာ ဝိညာဉ်ဆိုးတစ်ခု၏ အလုပ်လော။ ထိုသို့သော အဓိပ္ပာယ်မရှိသည့်အရာတစ်ခုကို ငါ အဘယ်သို့ဖြစ်ပြီး လုပ်ဆောင်နိုင်ခဲ့သနည်း”ဟုဆိုလျက် မိမိကိုယ်ကို သံသယမရှိနှင့်။ မည်သည့်အရာကို သင် လုပ်ဆောင်သည်ဖြစ်စေ ပြဿနာ၏ ရင်းမြစ်အတွက် သင်၏ သဘာဝကို သင် ကြည့်သင့်ပြီး လူတို့ ဝင်ရောက်သင့်သည့် သမ္မာတရားများကို ရှာဖွေသင့်သည်။ သင်၏ ဝိညာဉ်ကို သင် ဆန်းစစ်လျှင် လက်ချည်းဗလာဖြစ်သွားရလိမ့်မည်။ သင့်အတွင်းတွင် မည်သည့် ဝိညာဉ်မျိုး ရှိသည်ကို သင် သိရှိလာလျှင်ပင် သင်၏ ကိုယ်ပိုင် သဘာဝကို သင် သိရှိနိုင်မည်မဟုတ်သကဲ့သို့ သင်၏ ပြဿနာများကိုလည်း ဖြေရှင်းနိုင်မည် မဟုတ်ပေ။ ထို့ကြောင့် လူအချို့သည် အမှန်တွင် သာ၍ပင် အတွေ့အကြုံနုသေးပြီး မိုက်မဲနေချိန်တွင် ၎င်းတို့က အထူး ဝိညာဉ်ရေးရာ ပြည့်ဝသည့်အလား သို့မဟုတ် ပညာရှင်ပီသသည့်အလား၊ မည်သည့်ဝိညာဉ် ၎င်းတို့တွင် ရှိသည့်အကြောင်းကို အမြဲ ပြောနေကြသည်။ လူအချို့သည် မိမိတို့ပြောသည့် စကားများက အလွန်နက်နဲကာ သာမန်လူတို့က နားလည်မည်မဟုတ်ဟု တွေးထင်လျက် အထူးသဖြင့် ဝိညာဉ်ရေးရာပြည့်ဝစွာ စကားပြောတတ်ကြသည်။ ၎င်းတို့က “ကျွန်ုပ်တို့၏ ဝိညာဉ်များက မည်သည့်အရာဖြစ်သည်ကို ဆန်းစစ်ရန် အလွန်အရေးကြီးသည်။ ကျွန်ုပ်တို့တွင် လူသား ဝိညာဉ်များ မရှိလျှင် ဘုရားသခင်ကို ကျွန်ုပ်တို့ ယုံကြည်ကောင်း ယုံကြည်နိုင်သော်လည်း ကယ်တင်မခံရနိုင်ပါ။ ဘုရားသခင်ကို ကျွန်ုပ်တို့အပေါ် အလွန်အမင်း မနှစ်မြို့စေမည်မဟုတ်ပါ”ဟု ပြောကြသည်။ လူအချို့သည် ဤစကားများက ကျိုးကြောင်းသင့်သည်ဟု အလွန်အမင်း ခံစားလျက် ဤအရာကို ကြားသည့်အခါ အဆိပ်မိလာကြပြီး အထင်အမြင်မှားသွားကြကာ ၎င်းတို့က မည်သည့် ဝိညာဉ်မျိုးရှိသည်ကို စတင် ဆန်းစစ်လာကြသည်။ ၎င်းတို့သည် မိမိတို့၏ ဝိညာဉ်ကို ထိုသို့အထူး အာရုံစိုက်သောကြောင့် မည်သည့်အရာကိုမဆို လုပ်ဆောင်သည့်အခါ မိမိတို့၏ ဝိညာဉ်များကို ဆန်းစစ်လျက် စိတ်အနည်းငယ် မူမမှန်ဖြစ်သွားကြပြီး နောက်ဆုံးတွင် ပြဿနာတစ်ခုကို ၎င်းတို့ ရှာဖွေတွေ့ရှိကြသည်။ “ငါလုပ်ဆောင်သည့်အရာတိုင်းတွင် သမ္မာတရားကို အဘယ်ကြောင့် ငါ ဆန့်ကျင်သနည်း။ ငါ့ထံတွင် လူ့သဘာဝ သို့မဟုတ် အသိစိတ် တစ်စက်မျှ အဘယ်ကြောင့် မရှိရသနည်း။ ငါက ဝိညာဉ်ဆိုးတစ်ခု ဖြစ်ရမည်”ဟူ၍ ဖြစ်သည်။ အမှန်တွင် မကောင်းသည့် သဘာဝရှိပြီး သမ္မာတရား မရှိဘဲနှင့် လူသည် သမ္မာတရားနှင့် ကိုက်ညီသည့် အရာတစ်ခုတလေကို အဘယ်သို့ လုပ်ဆောင်နိုင်မည်နည်း။ ၎င်းတို့၏ လုပ်ရပ်များက မည်မျှ ကောင်းမွန်သည်ဖြစ်စေ ၎င်းတို့သည် သမ္မာတရားကို လက်တွေ့လုပ်ဆောင်ခြင်း မရှိသေးသကဲ့သို့ ဘုရားသခင်ကို ရန်လိုနေကြဆဲဖြစ်သည်။ လူ့သဘာဝသည် ဆိုးရွားပြီး စာတန်၏ ဖောက်ပြန်ပျက်စီးစေခြင်းနှင့် စီမံညွှန်ကြားခြင်းခံရပြီးဖြစ်သည်။ ၎င်းတို့တွင် တကယ်ကို လူသား ပုံသဏ္ဌာန် မရှိကြ။ ဘုရားသခင်ကို လုံးဝ ပုန်ကန်ကြပြီး အတိုက်အခံလုပ်ကြကာ ဘုရားသခင်နှင့် အလွန်ဝေးကွာကြသည်မှာ ဘုရားသခင်၏ ရည်ရွယ်ချက်များနှင့် ကိုက်ညီသည့် မည်သည့်အရာကိုမျှ ၎င်းတို့ အမှန်တကယ် မလုပ်ဆောင်နိုင်ကြပေ။ လူ၏ ပင်ကို သဘာဝအတွင်းတွင် ဘုရားသခင်နှင့် သဟဇာတဖြစ်သောအရာ မည်သည့်အရာမျှ မရှိ။ ဤသည်မှာ အားလုံး သိသာပေသည်။

လူအချို့သည် အမြဲ အလွန်အကျွံ ထိရှလွယ်ကြပြီး မိမိတို့သဘာဝကို သိနားလည်ခြင်းကိစ္စအား ဘေးဖယ်ထားရင်း မိမိတို့တွင် ဝိညာဉ်ရေးရာ နားလည်သဘောပေါက်ခြင်း ရှိမရှိ၊ သို့မဟုတ် မည်သည့် ဝိညာဉ်မျိုးကို မိမိတို့ ပိုင်ဆိုင်သည်ဟူသည်တို့ကို အလွန်အရေးထားကြသည်။ ဤသည်မှာ နှမ်းစေ့များကို ကောက်ရန် ဖရဲသီးတစ်လုံးကို ဆုံးရှုံးရခြင်းနှင့် တူသည်။ မရေရာသောအရာကို ဖမ်းဆုပ်သော်လည်း စစ်မှန်သည့်အရာကိုမူ လျစ်လျူရှုထားခြင်းသည် မိုက်မဲသည် မဟုတ်လော။ လေ့လာသည့် ဤနှစ်ကာလများတွင် ဝိညာဉ်နှင့်ဆိုင်သည့် အရာများ သို့မဟုတ် စိတ်ဝိညာဉ်နှင့်ဆိုင်သော ကိစ္စရပ်များကို သင် အကုန်အစင် နားလည်ပြီလော။ သင်၏ ဝိညာဉ်က မည်သည့်အရာကဲ့သို့ ဖြစ်သည်ကို သင် မြင်ပြီးပြီလော။ သင်၏ စိတ်ဝိညာဉ်ရှိ သဘာဝ အနှစ်သာရနှင့်ဆိုင်သော အရာများကို သင် နှိုက်နှိုက်ချွတ်ချွတ် ဖော်ထုတ်ရမည့်အစား သင်၏ ဝိညာဉ်ကို အမြဲ လေ့လာလျှင် သင်၏ လေ့လာမှုသည် ရလဒ်တစ်ခုတလေ ဖြစ်စေလိမ့်မည်လော။ ဤသည်မှာ မျက်စိကန်းသော လူတစ်ဦးက ဖယောင်းတိုင်ထွန်းပြီး ဖယောင်းကို ဖြုန်းတီးခြင်းနှင့်တူသည် မဟုတ်လော။ သင်၏ စစ်မှန်သည့် အခက်အခဲများကို သင် ဘေးဖယ်ပြီး ယင်းတို့ကို မည်သို့ ဖြေရှင်းရမည့်အကြောင်းကို သင် မစဉ်းစားပေ။ သင်သည် မရိုးဖြောင့်သော နည်းလမ်းများကို အမြဲ အသုံးပြုကာ သင့်တွင် မည်သည့် ဝိညာဉ်မျိုးရှိသည်ကို အမြဲ စဉ်းစားချင့်ချိန်နေသော်လည်း ဤသည်မှာ ပြဿနာတစ်ခုတလေကို ဖြေရှင်းနိုင်သလော။ သင်သည် ရိုးသားသည့်အလုပ်တွင် မည်သည့်အခါတွင်မျှ ပါဝင်ပတ်သက်ခြင်းမရှိဘဲ သင်၏ ဝိညာဉ်ကို အမြဲ လေ့လာနေရင်း ဘုရားသခင်ကို ယုံကြည်သော်လည်း သမ္မာတရားကို မလိုက်စားလျှင် သင်သည် အမိုက်မဲဆုံးသော လူဖြစ်သည်။ အမှန်တကယ် ဉာဏ်ရည်ဉာဏ်စွမ်း ရှိသောလူများသည် အောက်ပါ သဘောထား ရှိကြသည်။ “ဘုရားသခင်က မည်သည့်အရာကို လုပ်ဆောင်သည်ဖြစ်စေ၊ သို့မဟုတ် သူ မည်သို့ ကျွန်ုပ်ကို ဆက်ဆံသည်ဖြစ်စေ၊ ကျွန်ုပ် မည်မျှ အကြီးအကျယ် ဖောက်ပြန်ပျက်စီးပါစေ သို့မဟုတ် ကျွန်ုပ်၏ လူ့သဘာဝက မည်သည့်အရာနှင့် တူပါစေ သမ္မာတရားကို လိုက်စားပြီး ဘုရားသခင်ကို သိရှိရန် ကြိုးစားဖို့ ကျွန်ုပ်၏ စိတ်ပိုင်းဖြတ်ချက်တွင် ကျွန်ုပ် တည်ကြည်နေလိမ့်မည် ဖြစ်သည်”ဟူ၍ဖြစ်သည်။ ဘုရားသခင်ကို သိကျွမ်းခြင်းအားဖြင့်သာ မိမိတို့၏ ဖောက်ပြန်ပျက်စီးသော စိတ်သဘောထားကို ဖြေရှင်းနိုင်ပြီး ဘုရားသခင်၏ ရည်ရွယ်ချက်များကို အထမြောက်အောင် ဆောင်ရွက်ရန် မိမိတို့၏ တာဝန်ကို ကောင်းမွန်စွာ ဖြည့်ဆည်းနိုင်သည်။ ဤသည်မှာ လူ့ဘဝအတွက် ဦးတည်ချက်ဖြစ်သည်။ လူသားများက စွမ်းဆောင်ရရှိရန် ကြိုးစားနေသင့်သည့်အရာ ဖြစ်ပြီး ကယ်တင်ခြင်းသို့ရောက်ရန် တစ်ခုတည်းသော လမ်းကြောင်းဖြစ်သည်။ ယခုအခါတွင် လက်တွေ့ကျသည့်အရာမှာ သမ္မာတရား လိုက်စားခြင်း၊ သင်၏ ကိုယ်ပိုင် ဖောက်ပြန်ပျက်စီးသော သဘာဝကို သိရှိခြင်း၊ သင်၏ ဖောက်ပြန်ပျက်စီးသော စိတ်သဘောထားကို ဖယ်ရှားရန် သမ္မာတရားကို သိရှိနားလည်ခြင်းနှင့် ဘုရားသခင်၏ စိတ်ကျေနပ်သည်အထိ မိမိ၏တာဝန်ကို ကောင်းစွာ ထမ်းဆောင်နိုင်ခြင်းတို့ ဖြစ်သည်။ သမ္မာတရား စစ်မှန်မှုထဲသို့ ဝင်ရောက်ခြင်းနှင့် စစ်မှန်သော လူတစ်ဦး၏ ပုံသဏ္ဌာန်ကို အသက်ရှင်နေထိုင်ခြင်းဟူသည့် ဤသည်မှာ လက်တွေ့ကျသည့်အရာ ဖြစ်သည်။ လက်တွေ့ကျသည့်အရာမှာ ဘုရားသခင်ကို ချစ်ခြင်း၊ ဘုရားသခင်ကို ကျိုးနွံနာခံခြင်းနှင့် ဘုရားသခင်ကို သက်သေခံခြင်း ဖြစ်သည်။ ဤသည်တို့မှာ ဘုရားသခင် အလိုရှိသည့် ရလဒ်များ ဖြစ်သည်။ ထိတွေမရသကဲ့သို့ မြင်၍မရနိုင်သည့်အရာများကို လေ့လာဆန်းစစ်ခြင်းသည် အချည်းနှီးဖြစ်၏။ ယင်းတို့သည် လက်တွေ့ကျသည့်အရာနှင့် ဘာမျှ ပတ်သက်ခြင်းမရှိသကဲ့သို့ ဘုရားသခင်၏ အမှုတော်နှင့်ဆိုင်သည့် အကျိုးတရားများနှင့်လည်း ဘာမျှပတ်သက်ခြင်း မရှိပေ။ သင်သည် ယခုတွင် ရုပ်ခန္ဓာဖြင့် တည်ရှိသည်နှင့်အမျှ သမ္မာတရား သိနားလည်ခြင်း၊ သင်၏ တာဝန်ကို ကောင်းစွာ ထမ်းဆောင်ခြင်း၊ ရိုးသားသော လူတစ်ဦးဖြစ်ခြင်းနှင့် သင်၏ စိတ်သဘောထားကို ပြောင်းလဲခြင်းတို့အား သင် လိုက်စားအားထုတ်ရမည်။ ဤသည်တို့မှာ လူအများစုက စွမ်းဆောင်ရရှိနိုင်သည့် အရာဟူသမျှ ဖြစ်သည်။

လူအချို့တွင် ဝိညာဉ်ဆိုးများ၏ အလုပ် သိသိသာသာ ရှိကြပြီး ယင်းဝိညာဉ်ဆိုးများ၏ ဝင်ပူးခြင်းပင် ခံရကောင်းခံရနိုင်သည်။ ဤကဲ့သို့သော လူတစ်ဦးသည် ဘုရားသခင်ကို ယုံကြည်ခြင်းအားဖြင့် ကယ်တင်ခံရနိုင်သလော။ ဤသည်မှာ ပြောရန်ခက်ပြီး ၎င်းတို့အနေဖြင့် စဉ်းစဉ်းစားစား ပြုမူဆောင်ရွက်ကာ ပုံမှန် စိတ်အခြေအနေတစ်ခု ရှိမရှိဟူသည့်အပေါ် မူတည်သည်။ အရေးအကြီးဆုံးသောအရာမှာ သမ္မာတရားကို ၎င်းတို့ နားလည်နိုင်ကာ လက်တွေ့လုပ်ဆောင်နိုင်ခြင်း ရှိမရှိဖြစ်သည်။ ဤစံကို ၎င်းတို့ ပြည့်မီနိုင်ခြင်းမရှိလျှင် ၎င်းတို့ ကယ်တင်ခံရနိုင်သည့် နည်းလမ်း မရှိပေ။ ယခုအခါတွင် သင်တို့အားလုံးတွင် ပုံမှန် အသိစိတ် ရှိကြသည်၊ ပုံမှန်အတိုင်း စကားပြောကာ မည်သည့် သဘာဝလွန် သို့မဟုတ် မူမမှန်သည့် ဖြစ်စဉ်ကိုမျှ မတွေ့ကြုံရသေးပေ။ တစ်ခါတစ်ရံ သင်တို့၏ အခြေအနေများက အနည်းငယ် မူမမှန်ဖြစ်ကာ အမှုအရာများကို သင်တို့ လုပ်ဆောင်သည့် နည်းလမ်းများက မှားယွင်းနေသော်လည်း ဤသည်တို့မှာ လူသား သဘာဝ၏ ထုတ်ဖော်ချက်များသာ ဖြစ်သည်။ အမှန်တွင် ဤသည်မှာ အခြားလူတို့အတွက် အတူတူပင်ဖြစ်သည်။ ၎င်းတို့ ထုတ်ဖော်ချက်များ၏ နောက်ခံနှင့် အချိန်တို့သည်သာ ကွဲပြားပေသည်။ ယခု သင်တို့တွင် ဝိညာဉ်ရင့်ကျက်မှု အနည်းငယ် ရှိပုံရပြီး ဝိညာဉ်နှင့်ဆိုင်သည့် ကိစ္စရပ်များနှင့် စကားများအကြောင်း ပြောဆိုသည်ကို ကြားပြီးနောက်တွင် ဝိညာဉ်နှင့်ဆိုင်သည့် ကိစ္စရပ်များအား သင့်ဘာသာ အလွန်ကောင်းစွာ နားလည်ပြီး ထိုသို့ အလွန်တော်သည့် လူတစ်ဦးဖြစ်သည့်အလား သင်သည် အတုခိုးကာ လိုက်လုပ်လေသည်။ ဝိညာဉ်ရေးရာ နယ်ပယ်နှင့်ဆိုင်သော ကိစ္စရပ်များကို ဘုရားသခင်သာ သိရှိပြီး ထိန်းချုပ်သည်။ လူတို့က သူ၏နှုတ်ကပတ်တော်များမှ အနည်းငယ် နားလည်နိုင်လျှင်ပင် တော်လှပြီဖြစ်သည်။ သို့ဆိုလျှင် ဝိညာဉ်ရေးရာ နယ်ပယ်ကို တစ်ဦးတစ်ယောက်က မည်သို့ အကုန်အစင် နားလည်နိုင်မည်နည်း။ ထိုသို့သော အရာများကို အမြဲ တွေးဆနေခြင်းဖြင့် လမ်းလွဲသွားရန် လွယ်ကူသည် မဟုတ်လော။ ယနေ့ခေတ် လူအားလုံးသည် ၎င်းတို့အတွင်းတွင် ဤအခြေအနေ ရှိကြသည်။ သင်သည် ဤကိစ္စရပ်များကို အမြဲ လေးနက်စွာ မဆွေးနွေးနိုင်သကဲ့သို့ ယင်းတို့ကြောင့် သင်သည် အားနည်းမလာနိုင်သော်လည်း သို့မဟုတ် ပြိုလဲမလာနိုင်သော်လည်း အခြားသူတို့၏ ဤစကားများဖြင့် သင် ယာယီ ထိခိုက်နိုင်နေဆဲ ဖြစ်သည်။ ဤကိစ္စရပ်မျိုးကို သင် သိပ်အာရုံစိုက်ကောင်း မစိုက်နိုင်သော်လည်း သင်၏ စိတ်နှလုံးတွင် ဝိညာဉ်နှင့်ဆိုင်သော အရာများကို အာရုံမစိုက်ဘဲ မနေနိုင်ဖြစ်နေဆဲဖြစ်ကာ သင်သည် ဆုတ်ဆိုင်းမှုတစ်ခုကို ခံစားကာ မှောက်မှားလျက် အချို့သော အရာများကို အမှန်တကယ် တလွဲလုပ်ဆောင်သည့် နေ့ရက်ရောက်လာလျှင် သင့်အနေဖြင့် “ငါ၏ ဝိညာဉ်လည်း မှားယွင်းသလော”ဟု ဆိုလျက် သင့်ကိုယ်သင် သံသယဝင်သင့်ပေသည်။ သင်သည် ပုံမှန်အားဖြင့် မည်သည့်အခါတွင်မျှ သံသယမရှိသကဲ့သို့ အခြားသူတို့က သံသယနွံနစ်နေသည်ကို သင် မြင်သည့်အခါ ၎င်းတို့ကို အဓိပ္ပာယ်မရှိဟု သင် တွေးထင်သည်။ သို့သော် သင် ပြုပြင်ခံရသည့် နေ့တစ်နေ့ ရောက်လာသည့်အခါ သို့မဟုတ် သင်သည် စာတန်ဖြစ်သည် သို့မဟုတ် ဝိညာဉ်ဆိုးတစ်ခု ဖြစ်သည်ဟု အခြားတစ်စုံတစ်ဦးက ပြောသည့် နေ့တစ်နေ့ ရောက်လာသည့်အခါ ထိုအရာကို သင် ယုံကြည်လိမ့်မည်ဖြစ်ပြီး ၎င်းတို့ကဲ့သို့ပင် သင်သည် ရုန်းထွက်လွတ်မြောက်ရန် အားထုတ်နိုင်ခြင်းမရှိဘဲ သံသယနွံနစ်လာလိမ့်မည်။ အမှန်တွင် လူအများစုသည် ဝိညာဉ်နှင့်ဆိုင်သော အရေးကိစ္စများကို အလွန့်အလွန် အရေးကြီးသည့်အရာအဖြစ် မြင်ကာ မိမိတို့ကိုယ်ပိုင် သဘာဝ သို့မဟုတ် အသက်ဝင်ရောက်မှုကို သိနားလည်ခြင်းကဲ့သို့သော အရေးကိစ္စများကို လျစ်လျူရှုလျက် ဤပြဿနာကို ခံနိုင်ရည်မရှိပေ။ ဤအရာက ၎င်းတို့အား လက်တွေ့အရှိတရားနှင့် လုံးဝ ကင်းကွာသွားစေပြီး ထိုအရာသည် အတွေ့အကြုံဆိုင်ရာ သွေဖည်မှုတစ်ခု ဖြစ်သည်။

သင်တို့အားလုံးသည် သင်တို့ကိုယ်ပိုင် သဘာဝကိုလည်းကောင်း၊ သင့်သဘာဝ၏ မည်သည့် သွင်ပြင်လက္ခဏာများက သင့်ကို မှားယွင်းသည့်အရာများအား အလွယ်တကူ လုပ်ဆောင်စေနိုင်သည် သို့မဟုတ် သင့်ကို အလွယ်တကူ လမ်းလွဲသွားစေနိုင်သည်ကိုလည်းကောင်း သိရှိခြင်းအား အာရုံစိုက်သင့်ပြီး ဤအခြေခံအကြောင်းရင်းပေါ်တွင် အတွေ့အကြုံနှင့် သင်ခန်းစာများကို ပေါင်းရုံသုံးသပ်သင့်သည်။ အထူးသဖြင့် အစေခံခြင်း၊ ဘဝ အတွေ့အကြုံနှင့် သင်၏ ကိုယ်ပိုင် သဘာဝကို သိရှိခြင်းအရ သာ၍ နက်နဲသော အသိပညာကို တဖြည်းဖြည်း ဖြစ်ပေါ်စေခြင်းအားဖြင့်သာ သင်၏ ကိုယ်ပိုင် အခြေအနေကို သင် သဘောပေါက်နိုင်လိမ့်မည်ဖြစ်ပြီး မှန်ကန်သည့် ဦးတည်ချက်ဖြင့် ကြီးထွားနိုင်လိမ့်မည်။ သင်သည် သမ္မာတရား၏ ဤသွင်ပြင်လက္ခဏာများကို ပိုင်ဆိုင်နိုင်ပြီး သင်၏ အတွင်းအသက်ဖြစ်စေနိုင်လျှင် သင်သည် များစွာ သာ၍ တည်ငြိမ်လိမ့်မည်၊ သင် နားမလည်သည့် အရာများနှင့်ပတ်သက်၍ တာဝန်မဲ့ပြီး ထင်ရာမြင်ရာဖြစ်သော မှတ်ချက်များကို ပေးလိမ့်မည်မဟုတ်တော့ပေ။ သင့်စကားများ၏ စစ်မှန်မှုအပေါ် အာရုံစိုက်လိမ့်မည်ဖြစ်ပြီး စစ်မှန်သည့်အရာများအကြောင်းကို မိတ်သဟာယ ပြုလိမ့်မည်ဖြစ်သည်။ လူတို့သည် မိမိတို့ကိုယ်ပိုင် သဘာဝနှင့်ဆိုင်သည့် သာ၍ နက်နဲသော အသိပညာနှင့် သမ္မာတရားအပေါ် သာ၍ နက်နဲသော သိနားလည်မှုတစ်ခု ရရှိသည့်အခါ ရည်မွန်သည့် အသိစိတ်ဖြင့် သာ၍ စကားပြောကြလိမ့်မည်ဖြစ်ပြီး ထင်ရာမြင်ရာ ပြောဆိုကြလိမ့်မည် မဟုတ်တော့ပေ။ သမ္မာတရား မရှိသူတို့သည် အမြဲ ရိုးအပြီး မည်သည့်အရာကိုမဆို ပြောဆိုဝံ့ကြသည်။ ပြီးလျှင် ဧဝံဂေလိ ဖြန့်ဝေနေချိန်တွင် လူများကို ပိုမိုရရှိရန်အတွက် ဘာသာရေးသမားများနောက် လိုက်ပြီး ဘုရားသခင်ကို ပြစ်မှားစော်ကားသည့်စကား ပြောဆိုရန် ဝန်မလေးသော လူအချို့ပင် ရှိသည်။ ၎င်းတို့ မည်သည့်အရာ ဖြစ်သည်ကို ၎င်းတို့ မသိကြသကဲ့သို့ မိမိတို့ကိုယ်ပိုင် သဘာဝအပေါ် သိနားလည်မှုတစ်ခုမျှ မရှိကြဘဲ ဘုရားသခင်ကို မကြောက်ရွံ့ကြချေ။ ဤသည်မှာ အရေးကြီးသည့်ကိစ္စ မဟုတ်ဟု လူအချို့က ယုံကြည်ကြသော်လည်း အရေးကြီးသည့် ကိစ္စတစ်ခု အမှန်တကယ် မဟုတ်လေသလော။ ပြဿနာ၏ ဆိုးရွားမှုကို ၎င်းတို့ သတိပြုမိသည့် နေ့တစ်နေ့ ရောက်လာသည့်အခါ ၎င်းတို့ ကြောက်ရွံ့လာကြလိမ့်မည်။ ယင်းမှာ ဆိုးရွားသော လုပ်ဆောင်မှုတစ်ခုပါတကား။ ဤကိစ္စရပ်၏ အနှစ်သာရကို ၎င်းတို့ မရိပ်စားနိုင်သကဲ့သို့ မိမိတို့ကိုယ်ကိုပင်လျင် အလွန် အမြော်အမြင်ရှိပြီး အရာရာကို နားလည်သည်ဟု တွေးထင်ကြသည်။ သို့သော် ဘုရားသခင်ကို ၎င်းတို့ ပုန်ကန်ပြစ်မှားမိသည်ကို ၎င်းတို့ မသိကြသကဲ့သို့ ၎င်းတို့ မည်သို့ ပျက်စီးဆုံးရှုံးမည်ကိုလည်း မသိကြချေ။ သင်၏ ကိုယ်ပိုင် သဘာဝကို မသိလျှင် ငရဲ သို့မဟုတ် ဝိညာဉ်ရေးရာ နယ်ပယ်နှင့်ပတ်သက်သည့် ကိစ္စရပ်အားလုံးကို နားလည်ခြင်းသည် သင့်အတွက် အချည်းနှီး ဖြစ်သည်။ ယခုတွင် အဓိကသော့ချက်မှာ မိမိကိုယ်ကို သိရှိခြင်း၊ မိမိ၏ သဘာဝ အနှစ်သာရကို သိရှိခြင်းနှင့်ဆိုင်သည့် အခက်အခဲများကို ဖြေရှင်းရန် ဖြစ်သည်။ သင်၏ သဘာဝက ထုတ်ဖော်ပြသည့် အခြေအနေတစ်ခုစီတိုင်းကို သင် သဘောပေါက်ရမည်။ ဤအရာကို သင် မလုပ်ဆောင်နိုင်လျှင် အခြား မည်သည့် သိနားလည်မှုမဆိုသည် အချည်းနှီးဖြစ်၏။ သင့်တွင် မည်သည့် ဝိညာဉ် သို့မဟုတ် စိတ်ဝိညာဉ်မျိုး ရှိသည်ကို သိမြင်ရန် သင့်ကိုယ်သင် မည်မျှ စိတ်ဖြာလေ့လာဆွေးနွေးသည်ဖြစ်စေ အချည်းနှီးသာ ဖြစ်သည်။ အဓိကသော့ချက်မှာ သင်၏ သဘာဝတွင်ရှိသော သင့်အတွင်းတွင် အမှန်တကယ် တည်ရှိသည့် အမျိုးမျိုးသော အရာများကို သဘောပေါက်ရန် ဖြစ်သည်။ ယခုအခါတွင် သင့်အတွင်းတွင် မည်သည့် ဝိညာဉ်ရှိသည်ဖြစ်စေ သင်သည် ယခု ပုံမှန်တွေးခေါ်မှုရှိသည့် လူတစ်ဦးဖြစ်သောကြောင့် သမ္မာတရားကို သိနားလည်ခြင်းနှင့် လက်ခံခြင်းအား သင် လိုက်စားသင့်ပေသည်။ သင်သည် သမ္မာတရားကို နားလည်နိုင်လျှင် သမ္မာတရားနှင့်အညီ သင် ပြုမူဆောင်ရွက်သင့်သည်။ ဤသည်မှာ လူ၏ တာဝန်ဖြစ်၏။ ဝိညာဉ်နှင့်ဆိုင်သည့် ကိစ္စရပ်များအပေါ် စဉ်းစားချင့်ချိန်နေခြင်းသည် သင့်အတွက် တကယ်ကို အသုံးမဝင်သကဲ့သို့ အချည်းနှီးဖြစ်ကာ အကျိုးမရှိပေ။ ယနေ့ခေတ်တွင် ဝိညာဉ်ဆိုးများ၏ အလုပ်ရှိသောလူတို့သည် အသင်းတော်များတွင် နေရာအနှံ့ ထုတ်ဖော်ခံရလျက် ရှိသည်။ ဤလူများသည် သမ္မာတရားကို သဘောပေါက်နားလည်နိုင်လျှင် မျှော်လင့်ချက် ရှိကြသေးသော်လည်း သမ္မာတရားကို ၎င်းတို့ သဘောပေါက်နားလည်နိုင်ခြင်း မရှိသကဲ့သို့ လက်ခံနိုင်ခြင်း မရှိလျှင် ရှင်းလင်းပစ်ခြင်းသာ ခံရနိုင်သည်။ အကြင်သူသည် သမ္မာတရားကို သဘောပေါက်နားလည်နိုင်လျှင် ၎င်းတွင် ပုံမှန် အသိစိတ် ရှိသည်ကို ပြပြီး သမ္မာတရားကို ပိုမို နားလည်ပါက စာတန်က ၎င်းကို အထင်အမြင်မှားအောင် လုပ်နိုင်လိမ့်မည် မဟုတ် သို့မဟုတ် ထိန်းချုပ်နိုင်လိမ့်မည် မဟုတ်ဘဲ ၎င်းတို့ ကယ်တင်ခံရနိုင်သည့် မျှော်လင့်ချက် ရှိပေသည်။ ၎င်းတို့သည် မကောင်းဆိုးဝါးများ၏ ဝင်ပူးခြင်းခံရပြီး အချိန်အများစုတွင် ၎င်းတို့၏ အသိစိတ်က သိပ်ပုံမှန်မဟုတ်လျှင် ၎င်းတို့ လုံးဝ ဇာတ်သိမ်းသွားပြီဖြစ်ပြီး ပြဿနာ ဖိတ်ခေါ်မိခြင်းကို ရှောင်ရှားရန် ၎င်းတို့ ရှင်းလင်းပစ်ခံရမည်ဖြစ်သည်။ အတော်လေး ပုံမှန်ဖြစ်သော အသိစိတ်ရှိသည့် မည်သူမဆိုအတွက်၊ ၎င်းတို့ထဲတွင် မည်သည့် ဝိညာဉ်ရှိသည်ဖြစ်စေ၊ ၎င်းတို့တွင် ဝိညာဉ်ရေးရာ နားလည်သဘောပေါက်မှု အနည်းငယ်ရှိပြီး သမ္မာတရားကို ၎င်းတို့ နားလည်ကာ လက်ခံနိုင်သရွေ့ ၎င်းတို့တွင် ကယ်တင်ခြင်းအတွက် မျှော်လင့်ချက် ရှိပေသည်။ လူသည် သမ္မာတရားကို လက်ခံရန် အစွမ်းအစ မရှိကောင်း မရှိနိုင်သော်လည်း လူတစ်ယောက်သည် တရားဒေသနာများကို ထိရောက်စွာ နားထောင်လျှင်၊ သမ္မာတရားနှင့်ပတ်သက်၍ မိတ်သဟာယပြုသည့်အခါ နားလည်ပြီး သဘောပေါက်နားလည်နိုင်ကာ ပုံမှန် တွေးခေါ်မှုရှိပြီး အဓိပ္ပာယ်မဲ့ခြင်းမရှိလျှင် ကယ်တင်ခြင်းကို စွမ်းဆောင်ရရှိမည့် မျှော်လင့်ချက် ရှိသည်။ သို့သော် ဝိညာဉ်ရေးရာ နားလည်သဘောပေါက်မှု ကင်းမဲ့သည့်လူများ သို့မဟုတ် လူ့ဘာသာစကားများကို နားမလည်သည့်လူများနှင့် အခြားသူတို့က ၎င်းတို့ကို သမ္မာတရားအား မည်သို့ မိတ်သဟာယပြုသည်ဖြစ်စေ နားမလည်နိုင်သည့် လူများရှိလိမ့်မည်ကို ငါစိုးရွံ့မိသည်။ ဤလူများသည် ဒုက္ခပေးတတ်ပြီး အလုပ်လုပ်ပေးသူများအဖြစ်ပင် အလုပ်မလုပ်နိုင်ကြပေ။ ထို့အပြင် ဘုရားသခင်ကို ယုံကြည်သောသူတို့သည် သမ္မာတရားနှင့် ထိုသမ္မာတရားကို မိမိတို့လိုက်စားခြင်းကိုသာ အာရုံစိုက်သင့်သည်။ ဝိညာဉ်အကြောင်း ပြောခြင်း၊ လေ့လာခြင်း သို့မဟုတ် သိနားလည်ခြင်းကို ဆက်လက် အာရုံစိုက်မနေသင့်ပေ။ ဤသည်မှာ အဓိပ္ပာယ်မဲ့ပြီး ရယ်ဖွယ်ရာဖြစ်သည်။ ယခုတွင် အဓိကသော့ချက်မှာ တစ်စုံတစ်ဦးက သမ္မာတရားကို လက်ခံနိုင်ခြင်း ရှိမရှိ၊ သမ္မာတရားကို နားလည်ကာ စစ်မှန်မှုများထဲသို့ ဝင်ရောက်နိုင်ခြင်း ရှိမရှိဖြစ်သည်။ ဤသည်မှာ အဓိကသော့ချက်ဖြစ်၏။ သို့သော် အကြင်သူက မိမိကိုယ်ကို သိရှိနိုင်ကာ မိမိကိုယ်ကို ပြန်လည်သုံးသပ်နိုင်ခြင်း ရှိမရှိ၊ ၎င်းသည် မိမိကိုယ်ပိုင် သဘာဝကို သိနားလည်သည့် တစ်စုံတစ်ဦး ဟုတ်မဟုတ်ဆိုသည်မှာ အရေးအပါဆုံး ဖြစ်သည်။ သင်၏ ကိုယ်ပိုင် ဝိညာဉ်က မည်သည့်အရာဖြစ်သည်ကို လေ့လာရန်မှာ အဓိပ္ပာယ်မဲ့ပြီး အထူးသဖြင့် သုံးမရပေ။ သင်၏ ကိုယ်ပိုင် ဝိညာဉ်က မည်သည့်အရာဖြစ်သည်၊ သင်၏ စိတ်ဝိညာဉ်နှင့်ပတ်သက်၍ မည်သည့်အရာဖြစ်နေသည်၊ သင်၌ မည်သည့် ဝိညာဉ်ရှိသည်၊ သင်၏ ဝိညာဉ်သည် အဆင့်မြင့်သော ဝိညာဉ် သို့မဟုတ် အဆင့်နိမ့်သော ဝိညာဉ် ဟုတ်မဟုတ်၊ မည်သည့် ဝိညာဉ်မှ သင် လူဝင်စားခဲ့သည်၊ ယခင်က သင် အကြိမ်မည်မျှ ရောက်လာခဲ့သည်၊ သင်၏ နောက်ဆုံး ရလဒ်က မည်သည့်အရာ ဖြစ်လိမ့်မည် သို့မဟုတ် အနာဂတ်က မည်သည့်အရာဖြစ်လိမ့််မည်ဟူသကဲ့သို့သော အရာများကို သင် အမြဲ လေ့လာလျှင် ဤအရာများကို အမြဲ လေ့လာခြင်းက အရေးကြီးသည့် ကိစ္စရပ်များကို နှောင့်ယှက်လိမ့်မည်။ ယင်းတို့ကို သင် အကုန်အစင် လေ့လာလျှင်ပင် အခြားသူတို့က သမ္မာတရားကို နားလည်ပြီး စစ်မှန်မှုများထဲသို့ ဝင်ရောက်သည့် တစ်နေ့တွင် သင့်ထံတွင် မည်သည့်အရာမျှ ရှိလိမ့်မည် မဟုတ်။ သင်သည် အရေးကြီးသည့် ကိစ္စရပ်များကို နှောင့်ယှက်မိပြီး ဖြစ်လိမ့်မည်ဖြစ်ကာ ကိုယ့်ဒုက္ခကိုယ်ရှာမိပြီး ဖြစ်လိမ့်မည်။ သင်သည် မှားယွင်းသည့် လမ်းကြောင်းကို လျှောက်မိပြီး ဖြစ်လိမ့်မည်ဖြစ်ကာ ဘုရားသခင်ကို အချည်းနှီး ယုံကြည်မိပြီး ဖြစ်လိမ့်မည်။ ထိုအခါ မည်သူ့ကို သင် အပြစ်တင်မည်နည်း။ မည်သူ့ကိုမဆို အပြစ်တင်ခြင်းသည် အချည်းနှီးဖြစ်၏။ သင်ကိုယ်တိုင်၏ မသိနားမလည်မှုက ထိုအရာကို ဖြစ်စေခဲ့ခြင်းသာ ဖြစ်သည်။

ကောက်နုတ်ချက် (၄၇)

မည်သို့ ဘုရားသခင်နောက်လိုက်ကာ သမ္မာတရား လိုက်စားသည့် လမ်းကြောင်းအား မည်သို့ လျှောက်ရမည်ကို သင်တို့ ယခု ရှင်းလင်းစွာ မြင်ကြသလော။ ဘုရားသခင်ကို ယုံကြည်ခြင်းနှင့် ဘုရားသခင်နောက် လိုက်ခြင်းဟူသည်မှာ အတိအကျ အဘယ်အရာ ဖြစ်သနည်း။ အနည်းငယ်သော အမှုအရာများကို စွန့်လွှတ်ခြင်း၊ ဘုရားသခင်အတွက် မိမိကိုယ်ကို အသုံးခံနိုင်ကာ ဆင်းရဲဒုက္ခအနည်းငယ် သည်းညည်းခံနိုင်ခြင်းနှင့် လမ်းဆုံးထိတိုင် ဘုရားသခင်နောက်သို့ လိုက်ခြင်းအကြောင်းဖြစ်ပြီး ထိုမျှသာဖြစ်သလော။ ဘုရားသခင်နောက်သို့ ဤသို့လိုက်လျှောက်ခြင်းဖြင့် သမ္မာတရားကို ရရှိနိုင်သလော။ ကယ်တင်ခြင်းကို ရရှိနိုင်သလော။ သင်တို့၏ စိတ်နှလုံးများတွင် ဤအရာများနှင့်ပတ်သက်၍ ရှင်းလင်းကြသလော။ လူအချို့က လူတစ်ဦးအနေဖြင့် တရားစီရင်၊ ပြစ်တင်ဆုံးမခြင်းခံရကာ ပြုပြင်ခံရသည်နှင့်တစ်ပြိုင်နက်၊ သို့မဟုတ် ၎င်းတို့၏ စစ်မှန်သော စရိုက်များ ထုတ်ဖော်ခံရပြီးနောက်တွင် ၎င်းတို့၏ အဆုံးသတ် ချမှတ်ခြင်းခံရကာ ၎င်းတို့အနေဖြင့် ကယ်တင်ခြင်း မျှော်လင့်ချက်မရှိရန် သေချာသည်ဟု တွေးထင်ကြသည်။ လူအများစုက ဤကိစ္စရပ်ကို ရှင်းလင်းစွာ မမြင်နိုင်ကြချေ။ ၎င်းတို့သည် ရှေ့တွင်ရှိသည့် လမ်းကြောင်းအား မည်သို့လျှောက်ရမည်ကို မသိဘဲ လမ်းဆုံတွင် ချီတုံချတုံဖြစ်နေသည်။ ဤသည်မှာ ၎င်းတို့အနေဖြင့် ဘုရားသခင်၏ အမှုတော်အပေါ် စစ်မှန်သည့် အသိ ကင်းမဲ့သေးသည်ဟု ဆိုလိုသည် မဟုတ်လော။ ဘုရားသခင်၏ အမှုတော်နှင့် လူသားအပေါ် ဘုရားသခင်၏ ကယ်တင်ခြင်းအကြောင်း သံသယများ အမြဲရှိသူတို့သည် စစ်မှန်သည့် ယုံကြည်ခြင်း တစ်ခုတလေ လုံးဝ ရှိကြသလော။ သာမန်အားဖြင့် လူအချို့သည် ပြုပြင်ခြင်းကို မခံရသေးဘဲ ဆုတ်ဆိုင်းမှု တစ်စုံတစ်ခုမျှ မခံစားရသည့်အခါ ၎င်းတို့သည် မိမိတို့၏ယုံကြည်မှုတွင် သမ္မာတရားကို လိုက်စားသင့်ပြီး ဘုရားသခင်၏ ရည်ရွယ်ချက်များ အထမြောက်အောင် လုပ်ဆောင်သင့်သည်ဟု ခံစားကြရသည်။ သို့သော် ၎င်းတို့သည် ဒုက္ခခံစားရပြီးသည်နှင့်တစ်ပြိုင်နက် သို့မဟုတ် ပြဿနာတစ်စုံတစ်ရာ ပေါ်ပေါက်လာသည်နှင့် တစ်ပြိုင်နက် ၎င်းတို့၏ သစ္စာဖောက်သော သဘာဝက ပေါ်ထွက်လာသည်။ ယင်းကို မြင်ရသည်မှာ အော့နှလုံးနာစရာ ဖြစ်သည်။ ထို့နောက်တွင် ၎င်းတို့သည်လည်း အော့နှလုံးနာစရာ ဖြစ်သည်ဟု ခံစားကြရပြီး နောက်ဆုံးတွင် “ငါတော့ ပွဲသိမ်းသွားပြီ။ ငါက ဒီလိုအရာတွေကို လုပ်နိုင်စွမ်းရှိရင် ငါ့ဘဝ ဇတ်သိမ်းပြီလို့ ဆိုလိုတာ မဟုတ်ဘူးလား။ ဘုရားသခင်က ငါ့ကို ဘယ်တော့မှ ကယ်တင်မှာ မဟုတ်ဘူး” ဟု ပြောလျက် ၎င်းတို့၏ ကိုယ်ပိုင် အဆုံးသတ်ကို စီရင်ချက်ချကြသည်။ လူများစွာတို့သည် ဤအခြေအနေတွင် ရှိကြသည်။ လူတိုင်းသည် ဤကဲ့သို့ ဖြစ်သည်ဟုပင် ဆိုနိုင်သည်။ လူများသည် အဘယ့်ကြောင့် မိမိတို့ကိုယ်ကို ထိုသို့ စီရင်ချက်ချကြသနည်း။ ယင်းက ၎င်းတို့သည် လူသားမျိုးနွယ်ကို ကယ်တင်ဖို့ ဘုရားသခင်၏ ရည်ရွယ်ချက်ကို နားမလည်သေးဟု သက်သေပြနေသည်။ တစ်ကြိမ်တစ်ခါ ပြုပြင်ခံရခြင်းက သင်သည် ရုန်းထွက်ရန် အားထုတ်နိုင်ခြင်း မရှိဘဲ သင်၏ တာဝန်ကို စွန့်လွှတ်ကောင်း စွန့်လွှတ်လိုက်နိုင်သည့်အတိုင်းအတာထိတိုင်အောင် အချိန်ကာလကြာမြင့်စွာ အပျက်သဘောဆောင်ခြင်းထဲသို့ သင့်အား ကျဆင်းစေနိုင်သည်။ သေးငယ်သည့် အခြေအနေတစ်ခုသည်ပင်လျှင် သင့်ကို သမ္မာတရား မလိုက်စားတော့ဘဲ ပိတ်မိသွားစေနိုင်သည့်အဖြစ်သို့ ခြောက်လှန့်နိုင်သည်။ ယင်းမှာ လူတို့သည် မိမိတို့က အပြစ်အနာအဆာကင်းပြီး အပြစ်တင်စရာ မရှိကြောင်း ခံစားရသည့်အခါတွင်သာ ၎င်းတို့၏ လိုက်စားမှုတွင် စိတ်ထက်သန်ကြသည့်တိုင် ၎င်းတို့ အလွန်အကျွံ ဖောက်ပြန်ပျက်စီးသည်ကို သိရှိလိုက်ရသည့်အခါ ၎င်းတို့ သမ္မာတရား ဆက်လက်လိုက်စားရန် စိတ်မပါကြသည့်အလား ဖြစ်သည်။ များစွာသောလူတို့သည် “ကျွန်ုပ်အတွက် သေချာပေါက် ဇာတ်သိမ်းသွားပေပြီ။ ဘုရားသခင်က ကျွန်ုပ်ကို ကယ်တင်လိမ့်မည် မဟုတ်ပါ။ ဘုရားသခင်က ကျွန်ုပ်ကို ခွင့်လွှတ်လျှင်ပင် ကျွန်ုပ်ကိုယ်ကျွန်ုပ် မခွင့်လွှတ်နိုင်ပါ။ ကျွန်ုပ် လုံးဝ မပြောင်းလဲနိုင်ပါ”ဟူသကဲ့သို့သော အားမလိုအားမရဖြစ်ကာ အပျက်သဘောဆောင်သည့် စကားများ ပြောဆိုကြပြီးဖြစ်သည်။ ဘုရားသခင်၏ ရည်ရွယ်ချက်ကို လူတို့ နားမလည်ကြပေ။ ယင်းက သူ၏ အမှုတော်ကို ၎င်းတို့ နားမလည်ကြကြောင်းကို ပြသသည်။ အမှန်တွင် လူတို့အတွက် ၎င်းတို့၏ အတွေ့အကြုံများတစ်လျှောက်တွင် တစ်ခါတစ်ရံ ဖောက်ပြန်ပျက်စီးသော စိတ်သဘောထားအချို့ကို ထုတ်ဖော်ခြင်း သို့မဟုတ် မသမာသောပုံစံဖြင့် သို့မဟုတ် တာဝန်မဲ့စွာ သို့မဟုတ် ဝတ်ကျေတမ်းကျေနှင့် သစ္စာစောင့်သိမှုမရှိဘဲ ပြုမူဆောင်ရွက်ခြင်းက သဘာဝအလျောက်ဖြစ်သည်။ ဤသည်မှာ အဘယ့်ကြောင့်ဆိုသော် လူတို့တွင် ဖောက်ပြန်ပျက်စီးသော စိတ်သဘောထားများ ရှိကြသောကြောင့် ဖြစ်သည်။ ဤသည်မှာ ရှောင်လွှဲမရသော နိယာမဖြစ်သည်။ ဤထုတ်ဖော်မှုများကြောင့်သာ မဟုတ်လျှင် ၎င်းတို့ကို ဖောက်ပြန်ပျက်စီးသော လူသားများဟု အဘယ်ကြောင့် ခေါ်မည်နည်း။ လူသားများ ဖောက်ပြန်ပျက်စီးခြင်းမရှိလျှင် ဘုရားသခင်၏ ကယ်တင်ခြင်းအမှုတော်သည် အဓိပ္ပာယ်မဲ့သွားပေမည်။ ယခုတွင် ပြဿနာမှာ လူတို့သည် သမ္မာတရားကို နားမလည်ကြသောကြောင့် သို့မဟုတ် မိမိတို့ကိုယ်ကို နားမလည်ကြသောကြောင့်လည်းကောင်း၊ ၎င်းတို့သည် ၎င်းတို့၏ ကိုယ်ပိုင် အခြေအနေများကို ရှင်းလင်းစွာ မမြင်နိုင်သောကြောင့်လည်းကောင်း အလင်းကို မြင်ရန်အလို့ငှာ ဘုရားသခင်က သူ၏ဖော်ထုတ်ခြင်းနှင့် တရားစီရင်ခြင်း နှုတ်ကပတ်တော်များ ဖော်ပြရန် ၎င်းတို့ လိုအပ်ကြခြင်း ဖြစ်သည်။ သို့မဟုတ်လျှင် ၎င်းတို့သည် နုံအကာ ဉာဏ်ထိုင်းနေကြမည်ဖြစ်သည်။ ဘုရားသခင်သည် ဤနည်းဖြင့် အမှုမပြုလျှင် လူတို့ လုံးဝ ပြောင်းလဲကြမည် မဟုတ်။ အဆင့်တိုင်းတွင် သင်တို့အပေါ် ကျရောက်သည့် အခက်အခဲများရှိလင့်ကစား ငါသည် ရှင်းလင်းမှုနှင့် လမ်းပြမှုတို့ကို ပေးလျက် သင်တို့နှင့်အတူ သမ္မာတရားအကြောင်းကို မိတ်သဟာယပြုမည်ဖြစ်ပြီး သင်တို့အနေဖြင့် မှန်ကန်သည့် လမ်းကြောင်းပေါ်သို့ ဝင်ရောက်နိုင်သရွေ့ ယင်းမှာ လုံလောက်ပေသည်။ သို့မဟုတ်လျှင် လူတို့သည် အစွန်းရောက်သည်အထိ အစဉ်သဖြင့် လွဲချော်ကြလိမ့်မည်။ ၎င်းတို့သည် ရှေ့ဆက်ရမည့်လမ်းမရှိဘဲနှင့် လျှောက်လှမ်းရင်း မိမိတို့ကိုယ်ကို ထင်မြင်ချက်များပေးလျက် တစ်ဖက်ပိတ်လမ်းကြောင်းများကို အမြဲ လျှောက်လှမ်းသွားကြလိမ့်မည်။ လူတို့သည် ဘုရားသခင်၏ အမှုတော်ကို တွေ့ကြုံရန် အစပြုရုံရှိနေချိန်တွင် မိမိတို့ကိုယ်ကို နားမလည်ကြသေးပေ။ အကြိမ်အတော်များများ ကျရှုံးကာ ထုတ်ဖော်ခံရပြီးနောက်တွင် နောက်ဆုံး၌ မိမိတို့ကိုယ်တိုင်နှင့်ပတ်သက်၍ ထင်မြင်ချက် ပေးကြလေသည်။ ၎င်းတို့က “ကျွန်ုပ်သည် နတ်ဆိုးတစ်ကောင်ဖြစ်သည်။ ကျွန်ုပ်သည် စာတန်တစ်ကောင် ဖြစ်သည်။ ကျွန်ုပ်အတွက် အားလုံး အဆုံးသတ်ပြီဖြစ်သည်။ ကျွန်ုပ်သည် မည်သည့်အခါတွင်မျှ ကယ်တင်ခံရမည့် အခွင့်အရေးမရှိပါ။ ကျွန်ုပ်သည် ကယ်တင်၍ မရနိုင်လောက်အောင်ပင်ဖြစ်သည်”ဟု ပြောကြသည်။ လူတို့သည် ဧကန်အမှန် အလွန် နုနယ်ကြပြီး ဆက်ဆံရန် အတော်လေး ခက်ခဲကြကာ လမ်းလျှောက်ရင်း အစွန်းရောက်သည်အထိ လမ်းလွဲကြလိမ့်မည်။ ၎င်းတို့၏ ဖောက်ပြန်ပျက်စီးမှုသည် အလွန် နက်ရှိုင်းသည်ကိုလည်းကောင်း၊ ၎င်းတို့ နတ်ဆိုးများဖြစ်သည်ကိုလည်းကောင်း လူတို့ မမြင်နိုင်သည့်အခါ ၎င်းတို့ မာနထောင်လွှားလာကြပြီး မိမိကိုယ်ကို မှန်သည်ဟု ယူမှတ်လာကြသည်။ ၎င်းတို့အနေဖြင့် မရေမတွက်နိုင်သည့် အခက်အခဲများကို ခါးစီးခံရပြီးဖြစ်ကြောင်း၊ ၎င်းတို့သည် ဘုရားသခင်ကို ချစ်သောလူများ ဖြစ်ကြောင်းနှင့် ကောင်းကင်နိုင်ငံတော်ထဲသို့ ဝင်ရောက်ရန် အရည်အချင်းပြည့်မီကြကြောင်း ၎င်းတို့ ယုံကြည်ကြသည်။ သို့သော် လူတို့သည် ၎င်းတို့ ဖောက်ပြန်ပျက်စီးခြင်း၏ အတိမ်အနက်ကို သဘောပေါက်ကြသည့်အခါ၊ ၎င်းတို့အနေဖြင့် လူသားပုံသဏ္ဌာန်ဖြင့် အသက်ရှင်နေထိုင်ခြင်း မရှိခဲ့ကြဘဲ နတ်ဆိုးများနှင့် စာတန်များဖြစ်ကြောင်းကို သဘောပေါက်ကြသည့်အခါ ၎င်းတို့သည် မျှော်လင့်ချက်ပျက်သုဉ်းသော ခံစားမှု၏ လွှမ်းမိုးခြင်းခံကြရပြီး ၎င်းတို့ကို မျှော်လင့်၍မရနိုင်တော့သည့်အလား ၎င်းတို့အနေဖြင့် ဘုရားသခင်၏ ရှုတ်ချခြင်းခံကြရမည်ဖြစ်ကာ ထုတ်ဖော်ခံရပြီး ဖယ်ရှားရှင်းလင်းခံကြရမည်ဟု ခံစားကြလေသည်။ လူတို့သည် မိမိတို့ကိုယ်ကို နားမလည်ကြသည့်အခါ မာနထောင်လွှားပြီး မိမိတို့ကိုယ်ကို မှန်သည်ဟု ယူမှတ်ကြသည်။ မိမိတို့ကိုယ်ကို နားလည်ကြသည့်အခါ မျှော်လင့်ချက်ပျက်သုဉ်းသော ခံစားမှု၏ လွှမ်းမိုးခြင်းခံကြရလေသည်။ ဤသည်မှာ လူတို့အနေဖြင့် ဒုက္ခပေးတတ်ပြီး ခက်ခဲကြသည့်ပုံစံ ဖြစ်သည်။ သမ္မာတရားကို ၎င်းတို့ လက်ခံနိုင်လျှင်၊ တစ်နေ့တွင် ဘုရားသခင်၏ ရည်ရွယ်ချက်ကို ၎င်းတို့ အမှန်တကယ် နားလည်လာသည့်အခါ ၎င်းတို့က “ဤတစ်ချိန်လုံးတွင် ကျွန်ုပ်၏ ဖောက်ပြန်ပျက်စီးခြင်းက ဤမျှနက်ရှိုင်းခဲ့သည်ကို နောက်ဆုံးတွင် ကျွန်ုပ် သတိပြုမိလေပြီ။ ကံအားလျော်စွာ ဘုရားသခင်က ကျွန်ုပ်ကို ကယ်တင်ပြီး ယခု ထူးခြားပြောင်မြောက်သော ဘဝတစ်ခုကို ကျွန်ုပ် မြင်နိုင်ကာ ဘဝ၏ မှန်ကန်သော လမ်းကြောင်းပေါ် လျှောက်နိုင်သည်။ ဘုရားသခင်အား မည်သို့ ကျေးဇူးတင်ရမည်ကို ကျွန်ုပ် မသိပါ”ဟု ပြောကြလိမ့်မည်။ ထိုအရာသည် အိမ်မက်တစ်ခုမှ နိုးထခြင်းနှင့် အလင်းကို မြင်ရခြင်းကဲ့သို့ ဖြစ်သည်။ ၎င်းတို့သည် ကြီးမြတ်သော ကယ်တင်ခြင်းကို ရရှိလေပြီ မဟုတ်လော။ ဘုရားသခင်ကို ၎င်းတို့ မချီးမွမ်းသင့်သလော။ လူအချို့သည် သေဆုံးခါနီးချိန်တွင်ပင် မိမိတို့ကိုယ်ကို နားမလည်ကြပေ။ ၎င်းတို့သည် မာနထောင်လွှားကြဆဲဖြစ်ကာ အမှန်တရားများ၏ ထုတ်ဖော်ပြချက်ကို လက်မခံနိုင်ကြပေ။ ၎င်းတို့ အတော်လေး ကောင်းမြတ်သည်ဟု ခံစားကြသည်။ “ငါသည် လူကောင်းတစ်ဦးဖြစ်သည်။ ယင်းကို အဘယ်သို့ဖြစ်ပြီး ငါ လုပ်ဆောင်နိုင်မည်နည်း”ဟူ၍ ဖြစ်သည်။ ယင်းမှာ ၎င်းတို့အနေဖြင့် မတရားသဖြင့် စွပ်စွဲခံရပြီးသည့်အလား ထင်ရသည်။ လူအချို့သည် ဘုရားသခင်၏ အမှုပြုသည့် နှစ်ကာလများကို ဖြတ်သန်းရပြီး အဆုံးတွင် ၎င်းတို့၏ သဘာဝများကို ၎င်းတို့ နားမလည်ကြသေးချေ။ ၎င်းတို့သည် လူကောင်းများဖြစ်ကြောင်းနှင့် စိတ်ရှုပ်ထွေးသည့် အခိုက်အတန့်တွင် အမှားတစ်ခု ပြုခဲ့ခြင်းဖြစ်သည်ဟု အမြဲ တွေးကြသည်။ ပြီးလျှင် ၎င်းတို့ ဖယ်ရှားရှင်းလင်းခြင်းခံရသည့်အချိန် ယနေ့အထိတိုင် ကျိုးနွံနာခံခြင်း မရှိကြပေ။ ဤလူစားမျိုးသည် အလွန် မာနထောင်လွှားပြီး မသိနားမလည်ဖြစ်ကာ သမ္မာတရားကို တကယ်ပင် လက်ခံခြင်း မရှိကြပေ။ ၎င်းတို့သည် လုံးဝ ပြောင်းလဲကာ လူသားများ ဖြစ်လာကြနိုင်လိမ့်မည် မဟုတ်ပေ။ ဤအရာမှနေ၍ လူတို့၏ သဘာဝများသည် ဘုရားသခင်ကို အတိုက်အခံလုပ်ကာ သစ္စာဖောက်ကြသော်လည်း ၎င်းတို့၏ သဘာဝများတွင် ကွဲပြားမှုများရှိသည်ကို သင်တို့ တွေ့ရှိရနိုင်သည်။ ဤအရာသည် လူတို့၏ သဘာဝများကို သာ၍ နက်ရှိုင်းသည့် သိနားလည်မှု လိုအပ်ပေသည်။

လူတို့၏ သဘာဝများတွင် နားလည်ရမည့် တွေ့နေကျ လက္ခဏာအချို့ ရှိသည်။ လူအားလုံးသည် ဘုရားသခင်ကို သစ္စာဖောက်နိုင်စွမ်းရှိကြသည်။ ဤသည်မှာ တွေ့နေကျ လက္ခဏာတစ်ခု ဖြစ်သည်။ သို့သော် လူတစ်ဦးစီသည် ၎င်းတို့ ကိုယ်ပိုင် အလွန်အရေးပါသော အားနည်းချက် ရှိသည်။ လူအချို့သည် တန်ခိုးအာဏာကို ချစ်သည်။ အခြားသူတို့က အဆင့်အတန်းကို ချစ်သည်။ အချို့က ငွေကို ကိုးကွယ်ကြစဉ်တွင် အခြားသူတို့က ရုပ်ဝတ္ထုဆိုင်ရာ ပျော်ရွှင်မှုများကို ကိုးကွယ်ကြသည်။ ဤသည်တို့မှာ လူတို့၏ သဘာဝများတွင်ရှိသည့် ကွဲပြားချက်များ ဖြစ်သည်။ လူအချို့သည် ဘုရားသခင်ကို ယုံကြည်လာပြီးနောက် အခက်အခဲများစွာ ခါးစီးခံရသော်လည်း ခိုင်ခိုင်မာမာ ရပ်တည်နိုင်ကြစဉ်တွင် အခြားသူတို့မှာ အခက်အခဲအနည်းငယ် ရင်ဆိုင်ရသည့်အခါ အပျက်သဘောဆောင်လာသည်၊ ညည်းညူပြီး ခိုင်ခိုင်မာမာ ရပ်တည်ရန် ပျက်ကွက်ကြသည်။ သို့ဆိုလျှင် နှစ်ဦးလုံးက ဘုရားသခင်ကို ယုံကြည်ပြီး နှစ်ဦးလုံးက ဘုရားနှုတ်ကပတ်တော်ကို စားသောက်သော်လည်း အမှုအရာများ ၎င်းတို့အပေါ် ကျရောက်သည့်အခါ ၎င်းတို့ တုံ့ပြန်ချက်များက အဘယ်ကြောင့် ခြားနားရသနည်း။ ဤအရာက အလွန်အမင်း ဖောက်ပြန်ပျက်စီးသည့် လူသားများအားလုံးသည် စာတန်၏ သဘာဝရှိကြသော်လည်း ၎င်းတို့ လူ့သဘာဝ၏ အရည်အသွေး ခြားနားကြောင်းကို ဖော်ပြပေသည်။ လူအချို့သည် သမ္မာတရားကို အလွန်အမင်း မနှစ်မြို့ဘဲ မုန်းတီးကြစဉ်တွင် အခြားသူတို့မှာ ထိုသမ္မာတရားကို ချစ်ပြီး လက်ခံကြသည်။ လူအချို့၏ ဖောက်ပြန်ပျက်စီးသော စိတ်သဘောထားများ ပြသမှုများသည် ပိုမို ပြင်းထန်စဉ်တွင် အခြားသူတို့မှာ ထိုသို့ပြသခြင်းက လျော့နည်းလေသည်။ လူအချို့သည် အနည်းငယ် ပို၍ ကြင်နာသော စိတ်နှလုံးရှိကြစဉ်တွင် အခြားသူတို့မှာ အလွန် ရက်စက်ကြလေသည်။ ၎င်းတို့၏ စကားလုံးများ၊ အပြုအမူနှင့် သရုပ်သကန်များက ကွဲပြားကောင်းကွဲပြားနိုင်သော်လည်း ၎င်းတို့၏ ဖောက်ပြန်ပျက်စီးသော စိတ်သဘောထားများက အတူတူပင် ဖြစ်သည်။ ၎င်းတို့သည် စာတန်နှင့်သက်ဆိုင်ကြသည့် ဖောက်ပြန်ပျက်စီးသော လူသားများချည်းသာ ဖြစ်သည်။ ဤသည်မှာ ၎င်းတို့ကြားတွင်ရှိသည့် တွေ့ရလေ့ရှိသော လက္ခဏာတစ်ခု ဖြစ်သည်။ လူတစ်ဦး၏ သဘာဝက ၎င်းတို့ မည်သူဖြစ်သည်ကို သတ်မှတ်သည်။ ၎င်းတို့၏ သဘာဝအရ လူတစ်ဦးနှင့်တစ်ဦး တူညီမှုများရှိသော်လည်း လူတစ်ဦးစီသည် မိမိတို့၏ အနှစ်သာရအတိုင်း မတူကွဲပြားစွာ ဆက်ဆံခြင်း ခံရမည်ဖြစ်သည်။ ဥပမာအနေဖြင့် ဆိုးယုတ်သော တပ်မက်မှုများသည် လူအားလုံး တူညီသည့် တွေ့နေကျလက္ခဏာတစ်ခု ဖြစ်သည်။ လူတိုင်းသည် ဤအရာများကို ပိုင်ဆိုင်ပြီး ယင်းတို့ကို အလွယ်တကူ အောင်မြင်ကျော်လွှားနိုင်ခြင်း မရှိကြပေ။ သို့သော် လူအချို့တွင် ဤအရာနှင့်စပ်လျဉ်း၍ အထူးသဖြင့် ပြင်းထန်သော အထုံဝါသနာရှိကြသည်။ ဤကဲ့သို့သော လူများသည် ဆန့်ကျင်ဘက်လိင် ပါဝင်သည့် စုံစမ်းသွေးဆောင်မှုများ ကြုံရသည့်အခါတိုင်းတွင် ယင်းတို့ကို မလွန်ဆန်နိုင်ကြပေ။ ၎င်းတို့၏ စိတ်နှလုံးများသည် လွှမ်းမိုးခြင်းခံရကာ စုံစမ်းသွေးဆောင်ခြင်းထဲသို့ ကျဆင်းသွားကြသည်။ ၎င်းတို့သည် အခြားလူတစ်ဦးနှင့် အချိန်မရွေး လစ်ပြေးပြီး ဘုရားသခင်ကို သစ္စာဖောက်ရန် အသင့်ဖြစ်ကြသည်။ ထိုသို့ဖြင့် ဤလူများတွင် ဆိုးယုတ်သော သဘာဝများရှိသည်ဟု ဆိုနိုင်သည်။ လူအချို့သည် ဤအရာမျိုးနှင့် ရင်ဆိုင်ရသည့်အခါ အားနည်းချက်အနည်းငယ်ကို ၎င်းတို့ ဖော်ပြလျှင်ပင် သို့မဟုတ် ဆိုးယုတ်သော တပ်မက်မှုအချို့ကို ထုတ်ဖော်ပြလျှင်ပင် ၎င်းတို့ မသင့်လျော်သော အရာတစ်ခုမျှ လုပ်ဆောင်ကြလိမ့်မည် မဟုတ်။ ၎င်းတို့သည် ဤအခြေအနေမျိုးကို ချုပ်ထိန်းကာ ရှောင်ကြဉ်ခြင်းကို ကျင့်ကြံနိုင်စွမ်းရှိကြသည်။ ၎င်းတို့သည် ဇာတိပကတိကို ပုန်ကန်ကာ စုံစမ်းသွေးဆောင်ခြင်းကို ရှောင်ရှားနိုင်သည်။ ထိုသို့ဖြင့် ၎င်းတို့၏ သဘာဝက ဆိုးယုတ်သည်ဟု ပြော၍ မရပေ။ လူသားများသည် ဇာတိပကတိဖြင့် အသက်ရှင်ကြသည်။ ထို့ကြောင့် ၎င်းတို့တွင် ဆိုးယုတ်သော တပ်မက်မှုများ ရှိကြသည်။ သို့သော် လူအချို့သည် ထင်ရာမြင်ရာလုပ်ပြီး သောင်းကျန်းကြသည်။ ၎င်းတို့သည် ၎င်းတို့၏ တပ်မက်မှုတွင် စိတ်အလိုလိုက်ကာ အသင်းတော်၏ အလုပ်ကို အဖျက်အမှောင့်လုပ်ပြီး နှောင့်ယှက်သည့်အရာများကိုပင် လုပ်ဆောင်ကြသည်။ သို့သော် လူအချို့သည် ဤကဲ့သို့ မဟုတ်ပေ။ ၎င်းတို့သည် သမ္မာတရားကို လိုက်စားကာ ထိုသမ္မာတရားအတိုင်း ပြုမူဆောင်ရွက်နိုင်ကြပြီး ဇာတိပကတိကို ပုန်ကန်နိုင်ကြသည်။ လူအားလုံးတွင် ဇာတိပကတိနှင့်ဆိုင်သော တပ်မက်မှုများ ရှိကြသော်လည်း ၎င်းတို့သည် တစ်ပုံစံတည်း ပြုမူကြခြင်း မရှိပေ။ ဤသည်မှာ လူတို့၏ သဘာဝ အနှစ်သာရများ ကွဲပြားကြပုံ ဖြစ်သည်။ လူအချို့သည် ငွေအတွက် လောဘကြီးကြသည်။ ငွေ သို့မဟုတ် ပစ္စည်းကောင်းများကို မြင်သည့်အခါတိုင်းတွင် မိမိတို့အတွက် ရယူချင်ကြသည်။ ၎င်းတို့တွင် အထူးသဖြင့် ဤအရာများကို ရယူရန် ပြင်းထန်သည့် လိုအင်ဆန္ဒရှိကြသည်။ ဤလူများသည် သဘာဝအားဖြင့် လောဘကြီးကြသည်။ ၎င်းတို့ မြင်သည့် မည်သည့်ရုပ်ဝတ္ထုဆိုင်ရာ ပစ္စည်းဥစ္စာများကိုမဆို ၎င်းတို့ တပ်မက်လိုချင်ကြပြီး ဘုရားသခင်၏ လှူဖွယ်ပစ္စည်းများကိုပင် ခိုးယူခြင်းဖြစ်စေ၊ အလွဲသုံးစားပြုခြင်းဖြစ်စေ လုပ်ဝံ့ကြလေသည်။ ၎င်းတို့သည် ယွမ်ငွေပေါင်းထောင်ချီ၊ သောင်းချီ ပမာဏများကိုပင် ထိဝံ့ကြသည်။ ငွေပိုများလေ၊ ၎င်းတို့ ပိုသတ္တိရှိလာလေ ဖြစ်သည်။ ၎င်းတို့တွင် ဘုရားသခင်ကို ကြောက်ရွံ့သည့် စိတ်နှလုံး လုံးဝ ကင်းမဲ့ကြသည်။ ဤသည်မှာ လောဘကြီးသော သဘာဝ ဖြစ်သည်။ လူအချို့သည် ယွမ်ငွေအနည်းငယ် သို့မဟုတ် အသင်းတော်ငွေနှင့်ဆိုင်သည့် ယွမ်ငွေဆယ်ဂဏန်းမျှကို သုံးပြီးနောက်တွင် အသိစိတ်များ၌ လိပ်ပြာမသန့်ကြချေ။ ၎င်းတို့သည် ဘုရားသခင်၏ ခွင့်လွှတ်မှုကို တောင်းခံလျက် နောင်တမျက်ရည်များဖြင့် ဘုရားသခင်ရှေ့မှောက်တွင် အမြန် ဒူးထောက်ဆုတောင်းကြသည်။ ဤကဲ့သို့သော လူများသည် ငွေအတွက် လောဘကြီးကြသည်ဟု ငါတို့ ပြော၍မရပေ။ အဘယ်ကြောင့်ဆိုသော် လူတိုင်းတွင် ဖောက်ပြန်ပျက်စီးသော စိတ်သဘောထားများနှင့် အားနည်းချက်များ ရှိကြပြီး ဤလူများ၏ အမှန်တကယ် နောင်တရနိုင်စွမ်းက ၎င်းတို့၏ လုပ်ရပ်များသည် ၎င်းတို့၏ ဖောက်ပြန်ပျက်စီးသော စိတ်သဘောထားများ ထုတ်ဖော်ချက်တစ်ခုမျှသာ ဖြစ်သည်ကို သက်သေပြ၏။ လူအချို့သည် အခြားသူများအပေါ် ဝေဖန်သုံးသပ်တတ်ကြသည်။ ၎င်းတို့က “ဤလူသည် ဤတစ်ကြိမ်တွင် အသင်းတော်ငွေနှင့်ဆိုင်သော ယွမ်အနည်းငယ်ကို သုံးခဲ့သည့်အတွက် နောက်တစ်ကြိမ်တွင် ယွမ်ဆယ်ဂဏန်းမျှ ဖြစ်နိုင်သည်။ သူတို့သည် သေချာပေါက် လှူဖွယ်ပစ္စည်းများကို ခိုးယူသည့် လူဖြစ်ပြီး ရှင်းလင်းပစ်ခံရသင့်သည်”ဟူ၍ ပြောကြလိမ့်မည်။ ဤပုံစံဖြင့် စကားပြောခြင်းတွင် ထိုအရာကို ဝေဖန်သုံးသပ်သော သဘာဝ အနည်းငယ် ရှိသည်။ လူတို့တွင် ဖောက်ပြန်ပျက်စီးသော စိတ်သဘောထားများ ရှိကြသောကြောင့် ၎င်းတို့၏ ဖောက်ပြန်ပျက်စီးခြင်းကို ၎င်းတို့ မုချ ထုတ်ဖော်ပြလိမ့်မည်ဖြစ်ကာ မကောင်းသည့်အရာများစွာကို လုပ်ဆောင်ကြလိမ့်မည်။ ဤသည်မှာ ပုံမှန်ဖြစ်သော်လည်း လူတစ်ဦးက မိမိ၏ ဖောက်ပြန်ပျက်စီးခြင်းကို ထုတ်ဖော်ပြခြင်းသည် တစ်စုံတစ်ဦးက ဆိုးယုတ်သော လူတစ်ဦး၏ သဘာဝကို ရှိခြင်းနှင့် မတူပေ။ ဤလူနှစ်မျိုးနှစ်စားသည် တစ်ပုံစံတည်းသော အမှုအရာအချို့ကို လုပ်ဆောင်ကောင်း လုပ်ဆောင်နိုင်ကြသော်လည်း ၎င်းတို့သည် သဘာဝအားဖြင့် မတူပေ။ ဥပမာအနေဖြင့် လူတစ်ဦးသည် သမ္မာတရားကို လိုက်စားသည့် လမ်းကြောင်းကို လျှောက်ပြီး ရိုးသားသော လူတစ်ဦးဖြစ်ရန် ကြိုးစားသော်လည်း ၎င်းတို့သည် အလိမ်အညာများ၊ လှည့်ဖြားမှု သို့မဟုတ် လိမ်လည်လှည့်စားမှုများကို မကြာခဏဆိုသလို မလွဲမသွေ ထုတ်ဖော်လိမ့်မည်။ လိမ်ညာခြင်းနှင့် လှည့်ဖြားခြင်းတို့သည် နတ်ဆိုးတစ်ကောင်၏ သဘာဝ တစ်စိတ်တစ်ပိုင်းဖြစ်ပြီး ယင်းကမူ တစ်ချိန်လုံး အရာရာနှင့်ပတ်သက်၍ လိမ်ညာလိမ့်မည် ဖြစ်သည်။ နှစ်ဦးလုံးက လိမ်ညာသည့် အပြုအမူကို ပြကောင်းပြသနိုင်သော်လည်း နတ်ဆိုးတစ်ကောင်၏ အနှစ်သာရနှင့် သမ္မာတရားကို လိုက်စားသော တစ်စုံတစ်ဦး၏ အနှစ်သာရတို့သည် အခြေခံအားဖြင့် ကွဲပြား၏။ သို့ဆိုလျှင် ရိုးသားရန် ကြိုးစားသောလူများကို ခဏတာ ဖောက်ပြန်ပျက်စီးမှု ထုတ်ဖော်ခြင်းသက်သက်ကြောင့် နတ်ဆိုးများနှင့် စာတန်များအဖြစ် အမည်တပ်ရန် သင့်တော်သလော။ အခြားသူများကို လိမ်ညာခြင်း သို့မဟုတ် လိမ်လည်လှည့်စားခြင်းနှင့်ဆိုင်သည့် ပြစ်မှားမှုကို ကျူးလွန်ခြင်းသည် ၎င်းတို့အနေဖြင့် အမြဲ အခြားသူများကို အမြဲ လိမ်ညာပြီး လိမ်လည်လှည့်စားသည့် နတ်ဆိုးများဖြစ်သည်ဟု မဆိုလိုပေ။ လူတို့၏ သဘာဝ အနှစ်သာရသည် မတူသောကြောင့် ငါတို့သည် ၎င်းတို့ကို အတူတကွ ရောထွေးစုပြုံလိုက်၍ မရပေ။ ခဏတာ ပြစ်မှားမှုတစ်ခု ကျူးလွန်မိသည့် တစ်စုံတစ်ဦးကို နတ်ဆိုးနှင့်အတူ ယှဉ်ကြည့်ခြင်းသည် ထင်ရာမြင်ရာ ဝေဖန်ခြင်းနှင့် ပြစ်တင်ရှုတ်ချခြင်းပုံစံတစ်ခု ဖြစ်သည်။ ဤသည်မှာ လူတို့ကို အထိခိုက်စေဆုံးသောအရာ ဖြစ်သည်။ သင်သည် ပိုင်းခြားသိမြင်နိုင်စွမ်း ကင်းမဲ့ပြီး အမှုအရာများကို ရှင်းလင်းစွာ မမြင်နိုင်လျှင် ကြောင်းကျိုးမမြင်ဘဲ စကားမပြောရ သို့မဟုတ် စည်းမျဉ်းစည်းကမ်းများကို လက်လွတ်စပယ် မကျင့်သုံးရပေ။ သို့မဟုတ်လျှင် သင်က အခြားသူများကို ထိခိုက်နစ်နာစေလိမ့်မည်။ ဝိညာဉ်ရေးရာ နားလည်သဘောပေါက်မှု ကင်းမဲ့ပြီး စည်းမျဉ်းစည်းကမ်းများကို လိုက်နာစောင့်ထိန်းလိုသောလူများသည် အခြားသူများကို ဝေဖန်ကာ ပြစ်တင်ရှုတ်ချဖို့ အလားအလာအများဆုံး ဖြစ်သည်။ သမ္မာတရားကို နားမလည်သောလူတို့သည် စည်းမျဉ်းများမရှိဘဲ စကားပြောကာ ပြုမူဆောင်ရွက်သည်။ ပြီးလျှင် အခြားသူများကို လက်လွတ်စပယ် စကားပြော၍ ထင်ရာမြင်ရာ ဝေဖန်ကာ ပြစ်တင်ရှုတ်ချသောလူများသည် ၎င်းတို့ကိုယ်တိုင်သာမက အခြားသူများကိုပါ အကျိုးမရှိစေပေ။

လူတစ်ဦးသည် ဘုရားသခင်၏ ရည်ရွယ်ချက်များနှင့်အညီ ဖြစ်ရန်အလို့ငှာ ဘုရားသခင်ကို ၎င်းတို့၏ ယုံကြည်မှုတွင် မည်သည့် ရည်မှန်းချက်ပန်းတိုင်ကို အလှမ်းမီရမည်ဟူသည်ကို သင်တို့၏ စိတ်နှလုံးများတွင် သိကြသလော။ အလွန်နည်းပါးသော လူတို့သည် ဘုရားသခင်ကို သူ၏ သတ်မှတ်ချက်များနှင့်အညီ လုံးဝ ယုံကြည်နိုင်ကြသည်။ သင်တို့အတွင်းတွင် ပြဿနာများ အလွန်များပြီး ယင်းတို့ကို သင်တို့ သဘောမပေါက်သေးခြင်း ဖြစ်နိုင်ကာ မရှင်းလင်းသေးခြင်း ဖြစ်ကောင်းဖြစ်နိုင်သည်။ ဤအရာက သင်တို့သည် သမ္မာတရားကို နားမလည်သေးကြောင်း၊ သင်တို့ကိုယ်သင်တို့ ပြန်လည်မသုံးသပ်နိုင်သေးကြောင်းနှင့် သင့်အတွင်းတွင် တည်ရှိသည့် အမျိုးမျိုးသော သင်၏ အတွေးများနှင့် သင်၏ သဘာဝနှင့်ဆိုင်သော သွင်ပြင်လက္ခဏာများကို သင် မဖော်ထုတ်ရသေးသည့်အပြင် စိစစ်နိုင်ခြင်း မရှိသေးကြောင်းတို့ကို ပြသပေသည်။ တစ်နေ့နေ့တွင် တရားဒေသနာများစွာ သင်တို့ ကြားပြီးဖြစ်ကာ အတွေ့အကြုံရှိသည့်အခါ သမ္မာတရားကို နားလည်ကြလိမ့်မည်။ ထိုအခါတွင်မှ သင်တို့သည် မိမိကိုယ်ကို အစစ်အမှန် သိနိုင်စွမ်း ရှိကြလိမ့်မည်။ သင်တို့သည် ဘုရားသခင်ကို အမှန်တကယ် ယုံကြည်ကြသော်လည်း သင်တို့၏ ဖောက်ပြန်ပျက်စီးသော စိတ်သဘောထားများကို မဖယ်ရှားကြသေးကြသကဲ့သို့ သင်တို့၏ သဘာဝအတွင်းတွင် အပေါ်ယံဖြစ်သော အမှုအရာများစွာ ရှိနေဆဲဖြစ်သည်။ သင်တို့သည် အဝတ်အစားကောင်းများကို ဝတ်ဆင်လိုဆဲဖြစ်ကာ ကောင်းမွန်သည့် အရာများကို မွေ့လျော်ခံစားလိုကြဆဲ ဖြစ်သည်။ လူအချို့က အဝတ်အစားကောင်းများ ဝတ်ဆင်သည့်အခါ၊ သို့မဟုတ် ဖုန်းအကောင်းစားတစ်ခု ရသည့်အခါ ၎င်းတို့၏ လေသံ ပြောင်းလဲသွားသည်။ အမျိုးသမီးအချို့သည် ဒေါက်မြင့်များကို စီးသည့်အခါ ၎င်းတို့ လမ်းလျှောက်ပုံ ပြောင်းလဲသွားပြီး ၎င်းတို့ အဘယ်သူဖြစ်သည်ကို မသိကြတော့ချေ။ လူတို့က ၎င်းတို့၏ စိတ်နှလုံးများတွင် မည်သည့်အရာများကို ထားရှိပြီး ၎င်းတို့၏ ကောက်ကျစ်ဆိုးယုတ်သော၊ အကျည်းတန်ပြီး အပေါ်ယံဆန်သော အရာများကို မည်သည့် သဘာဝက ထုတ်ဖော်စေသည်ဟူသည်တို့နှင့် ပတ်သက်လာသည့်အခါ လူတို့သည် ၎င်းတို့၏ ကိုယ်ပိုင် ဖောက်ပြန်ပျက်စီးသော စိတ်သဘောထားများနှင့် ၎င်းတို့ ကိုယ်ပိုင် သဘာဝအတွင်းရှိ အမှုအရာများကို သိရှိလာရန် လိုအပ်သည်။ လူတို့အနေဖြင့် ဤဖောက်ပြန်ပျက်စီးသော စိတ်သဘောထားများကို ခံစားနိုင်ကြသော်လည်း မဖြေရှင်းနိုင်ကြချေ။ ၎င်းတို့သည် ယင်းတို့ကို ချုပ်ထိန်းရန်နှင့် ယင်းတို့အား အပြင်ပန်းတွင် ထုတ်ဖော်ခြင်းမရှိဖို့ တားဆီးရန် မိမိတို့ကိုယ်ပိုင် အလိုဆန္ဒကိုသာ မှီခိုအားကိုးနိုင်ကြသည်။ ၎င်းတို့၏ အတွေ့အကြုံများ နက်သည်ထက်နက်လာသည်နှင့်အမျှ ၎င်းတို့၏ သဘာဝနှင့်လည်းကောင်း၊ သမ္မာတရား သွင်ပြင်လက္ခဏာများအားလုံးနှင့်လည်းကောင်း သက်ဆိုင်သော သိမြင်မှု နက်သည်ထက်နက်လာသည်နှင့်အမျှ၊ ပြီးလျှင် ဘုရားသခင်၏ သတ်မှတ်ချက်များကို ၎င်းတို့ တဖြည်းဖြည်း နားလည်ကာ ဝင်ရောက်သည်နှင့်အမျှ လူတို့၏ ဖောက်ပြန်ပျက်စီးသော စိတ်သဘောထားများနှင့် ၎င်းတို့၏ သဘာဝနှင့်ဆိုင်သော သွင်ပြင်လက္ခဏာများက တဖြည်းဖြည်း စတင်ပြောင်းလဲလေသည်။ အစပထမတွင် ၎င်းတို့၏ မိမိကိုယ်ကိုသိမြင်မှုသည် အလွန် ပေါ့တန်သည်။ ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားများကို ၎င်းတို့ အသိအမှတ်ပြုနိုင်သော်လည်း သမ္မာတရားကို မရှာဖွေနိုင်သကဲ့သို့ မိမိတို့ ဖောက်ပြန်ပျက်စီးမှု၏ အနှစ်သာရကို သိမလာနိုင်ကြပေ။ ၎င်းတို့အနေဖြင့် သိမြင်မှုအနည်းငယ်ကို ဆည်းပူရရှိသည့်အခါ မိမိတို့ကိုယ်ကို ချုပ်ထိန်းလိုကြပြီး ကြိုးစားလုပ်ဆောင်ခြင်းမှတစ်ဆင့် ဇာတိပကတိကို ပုန်ကန်ကာ ရလဒ်များ စွမ်းဆောင် ရရှိလိုကြသည်။ သို့သော် ၎င်းတို့၏ အားထုတ်မှုများက အချည်းနှီးဖြစ်ပြီး ပြဿနာ၏ ရင်းမြစ်ကို ၎င်းတို့ မရိပ်စားမိနိုင်ကြသေးပေ။ နောက်ပိုင်းတွင် သမ္မာတရားကို ၎င်းတို့ အမှန်တကယ် နားလည်လာကြပြီး ၎င်းတို့၏ ဖောက်ပြန်ပျက်စီးသော စိတ်သဘောထားများကို အကုန်အစင် သိရှိကြသည့်အခါ မိမိတို့ကိုယ်ကို စတင် မုန်းတီးကြသည်။ ထိုအချိန်တွင် ၎င်းတို့သည် ဇာတိပတိကို ပုန်ကန်ရာတွင် များစွာ အားထုတ်ရန် မလိုအပ်ကြပေ။ ၎င်းတို့အနေဖြင့် သမ္မာတရားကို တက်ကြွစွာ လက်တွေ့လုပ်ဆောင်နိုင်ကြပြီး စည်းမျဉ်းများအတိုင်း ပြုမူဆောင်ရွက်နိုင်ကြသည်။ တစ်ခါတစ်ရံ သမ္မာတရားကို ၎င်းတို့ အပြည့်အဝ နားမလည်ကြသော်လည်း အနည်းဆုံးအနေဖြင့် ၎င်းတို့၏ အသိတရားနှင့် အသိစိတ်ပေါ် အခြေခံ၍ ၎င်းတို့ ပြုမူဆောင်ရွက်နိုင်ကြလေသည်။ လူတို့သည် ဘုရားသခင်၏ နှုတ်ကပတ်တော်များကို ပထမဆုံး စတင်တွေ့ကြုံကြချိန်တွင် အခက်အခဲများကို အားလုံးက ကြုံရသည်။ သမ္မာတရားကို ၎င်းတို့ နားမလည်ကြသကဲ့သို့ စည်းမျဉ်းများကို ၎င်းတို့၏ အခြေခံအကြောင်းရင်းအဖြစ် သဘောထားရန် မသိကြသောကြောင့် ဤအမှုအရာ သို့မဟုတ် ထိုအမှုအရာအား မည်သို့ လုပ်ဆောင်ရမည်ကို ၎င်းတို့ အမြဲ မေးမြန်းကြပြီး စည်းမျဉ်းစည်းကမ်းများကိုသာ လိုက်နာနိုင်ကြသည်။ ထို့အပြင် လူတို့သည် အပျက်သဘောဆောင်သော အခြေအနေများကြောင့် အမြဲ နှောင့်ယှက်ခြင်းခံရပြီး တစ်ခါတစ်ရံ ရှေ့ဆက်ရမည့်လမ်း မရှိကြချေ။ အပျက်သဘောဆောင်သည့် အခြေအနေများနှင့် ပတ်သက်လာသည့်အခါ လူတို့သည် မိတ်သဟာယမှတစ်ဆင့် ဖြေရှင်း၍ရသည့်အရာများကို မိတ်သဟာယမှတစ်ဆင့် ဖြေရှင်းသင့်သည်။ မိတ်သဟာယမှတစ်ဆင့် ဖြေရှင်း၍မရသည့် အရာများကိုမူ သင် လျစ်လျူရှုနိုင်သည်။ ထိုအစား သင်သည် လက်တွေ့လုပ်ဆောင်ခြင်းနှင့် ဝင်ရောက်ခြင်းအပေါ် ပုံမှန်အတိုင်း အာရုံစိုက်သင့်ပြီး သမ္မာတရားနှင့်ပတ်သက်၍ ပိုမို မိတ်သဟာယပြုသင့်ပေသည်။ တစ်နေ့ သမ္မာတရားကို သင် ရှင်းလင်းစွာ နားလည်ပြီး၊ အမှုအရာများစွာကို ရိပ်စားမိသည့်အချိန်တွင် သင်၏ အပျက်သဘောဆောင်သော အခြေအနေများ အလိုအလျောက် ပျောက်ကွယ်သွားလိမ့်မည်။ ယခုတွင် သင်တို့၏ အိုဟောင်းသည့်၊ အပျက်သဘောဆောင်သော အခြေအနေများ ပျောက်ကွယ်နှင့်လေပြီ မဟုတ်လော။ အနည်းဆုံးအနေဖြင့် သင်တို့သည် ထိုအရာများကို တွေ့ကြုံခံစားရသည်မှာ ယခင်ကထက် နည်းပါးလေသည်။ သမ္မာတရား လိုက်စားခြင်းကို ကြိုးစားလုပ်ဆောင်ခြင်းအပေါ်သာ အာရုံစိုက်လော့။ ပြီးလျှင် သင်၏ ပြဿနာများအားလုံးကို သင် ဖြေရှင်းနိုင်လိမ့်မည်။ သင်၏ ကိုယ်ပိုင် ပြဿနာများကို သင် ဖြေရှင်းနိုင်သည့်အခါ တိုးတက်မှု သင် ပြုလုပ်ပြီးဖြစ်လိမ့်မည်ဖြစ်ကာ သင် ကြီးထွားရင့်ကျက်ပြီးဖြစ်လိမ့်မည်။ လူတို့သည် ၎င်းတို့၏ဘဝအပေါ် အမြင်နှင့် ၎င်းတို့ ဖြစ်တည်ခြင်း၏ အဓိပ္ပာယ်နှင့် အခြေခံအကြောင်းရင်းတို့ လုံးလုံးလျားလျား ပြောင်းလဲသွားသည့်နေ့အထိ တွေ့ကြုံရသောအခါ၊ ၎င်းတို့၏အရိုးထဲအထိ ပြောင်းလဲသွားပြီး အခြားလူတစ်ဦး ဖြစ်သွားသောအခါ ဤအရာမှာ မယုံကြည်နိုင်လောက်အောင်ဖြစ်သည် မဟုတ်လော။ ဤသည်မှာ ကြီးစွာသောပြောင်းလဲမှုတစ်ခု၊ ကမ္ဘာတုန်လောက်သော ပြောင်းလဲမှုတစ်ခု ဖြစ်သည်။ သင်သည် လောကကြီး၏ ကျော်ကြားခြင်း၊ အကျိုးအမြတ်၊ အဆင့်အတန်း၊ ငွေကြေး၊ အပျော်အပါး၊ တန်ခိုးအာဏာနှင့် ဂုဏ်အသရေတို့ကို စိတ်ဝင်စားခြင်းမရှိတော့သကဲ့သို့ ၎င်းတို့ကို အလွယ်တကူ စွန့်လွှတ်နိုင်သောအခါမှသာ သင်၌ လူသားတစ်ဦး၏ ပုံသဏ္ဌာန်ရှိလိမ့်မည်။ အဆုံးတွင် ဘုရားသခင်၏ စုံလင်စေခြင်းခံရမည့် သူများမှာ ဤကဲ့သို့သော လူစုတစ်စု ဖြစ်သည်၊ ၎င်းတို့သည် သမ္မာတရားအတွက် အသက်ရှင်ကြသည်၊ ဘုရားသခင်အတွက် အသက်ရှင်ကြပြီး၊ တရားမျှတသောအရာအတွက် အသက်ရှင်ကြ၏။ ဤသည်မှာ စစ်မှန်သော လူသားတစ်ဦး၏ ပုံသဏ္ဌာန် ဖြစ်သည်။

လူအချို့က “လူသားတစ်ဦးသည် အတိအကျ မည်သည့်အရာ ဖြစ်သနည်း”ဟု မေးလိမ့်မည်။ ယနေ့ခေတ်လူများထဲမှ တစ်ဦးမျှ လူသားများ မဟုတ်ပေ။ ၎င်းတို့ လူသားများ မဟုတ်လျှင် မည်သည့်အရာ ဖြစ်ကြသနည်း။ ၎င်းတို့သည် တိရစ္ဆာန်များ၊ သားရဲများ၊ စာတန်များ သို့မဟုတ် နတ်ဆိုးများ ဖြစ်သည်ဟု သင် ပြောနိုင်သည်။ မည်သို့ဆိုစေ ၎င်းတို့သည် လူသားအရေခွံကို ခြုံရုံမျှခြုံထားသော်လည်း လူသားများဟု ခေါ်ဆို၍ မရပေ။ အဘယ်ကြောင့်ဆိုသော် ၎င်းတို့သည် ပုံမှန် လူ့သဘာဝ မပိုင်ဆိုင်ကြသောကြောင့် ဖြစ်သည်။ ၎င်းတို့ကို တိရစ္ဆာန်များအဖြစ် ခေါ်ခြင်းက အနည်းငယ် နီးစပ်လာသည်။ သို့သော် လူတို့သည် ဘာသာစကား၊ အသိဉာဏ်များနှင့် အတွေးများကို ပိုင်ဆိုင်ကြပြီး သိပ္ပံအတတ်နှင့် ကုန်ထုတ်လုပ်ခြင်းတွင် ပါဝင်လုပ်ဆောင်နိုင်ကြသည်။ ထို့ကြောင့် ၎င်းတို့ကို သာ၍အဆင့်မြင့်သည့် တိရစ္ဆာန်များအဖြစ်သာ သတ်မှတ်၍ရသည်။ သို့သော် လူတို့သည် စာတန်၏ ဖောက်ပြန်ပျက်စီးခြင်းကို အလွန်နက်ရှိုင်းစွာ ခံရပြီးဖြစ်သည်။ ၎င်းတို့သည် အချိန်ကြာမြင့်စွာကတည်းက ၎င်းတို့၏ အသိတရားနှင့် အသိစိတ်တို့ကို ဆုံးရှုံးရပြီးဖြစ်ကာ ဘုရားသခင်ကို ကျိုးနွံနာခံခြင်း သို့မဟုတ် ကြောက်ရွံ့ခြင်း လုံးဝ မရှိကြချေ။ ၎င်းတို့ကို နတ်ဆိုးများနှင့် စာတန်များအဖြစ် ခေါ်ဆိုခြင်းက လုံးဝ သင့်တော်သည်။ အဘယ်ကြောင့်ဆိုသော် ၎င်းတို့၏ သဘာဝသည် စာတန်၏ သဘာဝဖြစ်ပြီး စာတန်ဆန်သော စိတ်သဘောထားများကို ၎င်းတို့ ထုတ်ဖော်ကာ စာတန်ဆန်သော အမြင်များကို ဖော်ပြကြသောကြောင့် ဖြစ်သည်။ ၎င်းတို့ကို နတ်ဆိုးများနှင့် စာတန်များအဖြစ် ခေါ်ခြင်းက သာ၍ သင့်တော်သည်။ လူတို့သည် အလွန်နက်ရှိုင်းစွာ ဖောက်ပြန်ဖျက်ဆီးခြင်းခံရပြီးဖြစ်ကာ ၎င်းတို့တွင် လူသားပုံသဏ္ဌာန် များစွာ မရှိကြချေ။ ၎င်းတို့သည် သားရဲများနှင့် တိရစ္ဆာန်များကဲ့သို့ ဖြစ်ကြသည်။ နတ်ဆိုးများ ဖြစ်ကြသည်။ ယခုအခါတွင် လူတို့သည် တစ်ခု သို့မဟုတ် အခြားတစ်ခု မဟုတ်။ ၎င်းတို့သည် လူသားများနှင့်လည်းကောင်း၊ မကောင်းဆိုးဝါးများနှင့်လည်းကောင်း မဆင်တူကြသကဲ့သို့ စစ်မှန်သည့် လူသားပုံသဏ္ဌာန်လည်း မပိုင်ဆိုင်ကြပေ။ နှစ်များစွာ တွေ့ကြုံပြီးနောက် ရေရှည်ယုံကြည်ခဲ့သူအချို့သည် ဘုရားသခင်နှင့် အကျွမ်းဝင်မှုအနည်းငယ် ရရှိကြပြီး ဘုရားသခင်ကို အနည်းနှင့်အများဆိုသလို အနည်းငယ် နားလည်နိုင်ကြပြီး ဘုရားသခင် စိုးရိမ်သည့် အရာများကို အနည်းနှင့်အများဆိုသလို စိုးရိမ်ကြကာ ဘုရားသခင် စဉ်းစားသည့်အရာများကို အနည်းနှင့်အများဆိုသလို စဉ်းစားကြလေသည်။ ဤသည်မှာ ၎င်းတို့အနေဖြင့် လူသား အသွင်အပြင် အနည်းငယ်ရှိကြကာ တစ်ဝက်တစ်ပျက် ပုံပေါ်သည်ဟု ဆိုလိုသည်။ ယုံကြည်သူသစ်များသည် ပြစ်တင်ဆုံးမခြင်းနှင့် တရားစီရင်ခြင်း သို့မဟုတ် ပြုပြင်ခြင်းများစွာကို မတွေ့ကြုံကြသေးပေ။ ၎င်းတို့သည် သမ္မာတရားများစွာကိုလည်း မကြားရသေးပေ။ ဘုရားနှုတ်ကပတ်တော်များကိုသာ ၎င်းတို့ ဖတ်ရှုသော်လည်း စစ်မှန်သည့် အတွေ့အကြုံ မပိုင်ဆိုင်ကြပေ။ အကျိုးဆက်အနေဖြင့် ၎င်းတို့ အလွန် စံမမီပေ။ လူတစ်ဦး၏ အတွေ့အကြုံ အတိမ်အနက်က ၎င်းတို့ မည်မျှ ပြောင်းလဲသည်ကို ဆုံးဖြတ်သည်။ ဘုရားနှုတ်ကပတ်တော်များကို သင် တွေ့ကြုံမှုနည်းပါးလေ သမ္မာတရားကို နားလည်မှု နည်းပါးလေ ဖြစ်လိမ့်မည်။ သင့်ထံတွင် အတွေ့အကြုံ လုံးဝ မရှိလျှင် သင်သည် ပကတိအတိုင်း၊ အသက်ရှင်သော စာတန်ဖြစ်ပြီး နတ်ဆိုးတစ်ကောင် စစ်စစ် ဖြစ်သည်။ ဤအရာကို သင် ယုံကြည်သလော။ ထိုစကားများကို တစ်နေ့တွင် သင် နားလည်လိမ့်မည်။ ယခုတွင် လူကောင်းတစ်ဦးတလေ ရှိသလော။ လူတို့တွင် လူသားပုံသဏ္ဌာန် မရှိလျှင် ၎င်းတို့ကို လူသားများဟု ငါတို့ အဘယ်သို့ ခေါ်နိုင်သနည်း။ ၎င်းတို့ကို လူကောင်းများအဖြစ် ခေါ်ခြင်းသည် သာ၍ပင် စဉ်းစားစရာ မလိုပေ။ ၎င်းတို့တွင် လူသား ကိုယ်ထည်ခွံသာရှိသော်လည်း လူသား အနှစ်သာရ မရှိကြပေ။ ၎င်းတို့ကို လူအရေခြုံထားသည့် သားရဲများဟု ခေါ်ခြင်းက ချဲ့ကားခြင်း ဖြစ်မည် မဟုတ်ပေ။ တစ်စုံတစ်ဦးသည် ဘုရားသခင်၏ အမှုတော်ကို တွေ့ကြုံခြင်းမှတစ်ဆင့် လူသားပုံသဏ္ဌာန်ရှိသည့် လူတစ်ဦးဖြစ်လာလိုလျှင် ဘုရားနှုတ်ကပတ်တော်များ၏ ဖော်ထုတ်ခြင်း၊ ပြစ်တင်ဆုံးမခြင်းနှင့် တရားစီရင်ခြင်းတို့ကို ဖြတ်သန်းရမည်။ ထိုအခါတွင်မှ နောက်ဆုံးတွင် ပြောင်းလဲမှုကို ၎င်းတို့ ရရှိကြလိမ့်မည်ဖြစ်သည်။ ဤသည်မှာ လမ်းကြောင်းဖြစ်၏။ ဘုရားသခင်က ဤအရာကို မလုပ်ဆောင်လျှင် လူတို့က ပြောင်းလဲနိုင်မည် မဟုတ်ပေ။ ဘုရားသခင်သည် ဤသို့ နည်းနည်းချင်း ပြုမူဆောင်ရွက်ရမည်ဖြစ်သည်။ လူတို့သည် တရားစီရင်ခြင်း၊ ပြစ်တင်ဆုံးမခြင်းနှင့် အဆက်မပြတ် ပြုပြင်ခြင်းတို့ကို တွေ့ကြုံရမည်ဖြစ်ပြီး ၎င်းတို့၏ ဖောက်ပြန်ပျက်စီးသော စိတ်သဘောထားများအား ၎င်းတို့ ထုတ်ဖော်သည့် နည်းလမ်းများကို ဖော်ထုတ်ရမည်ဖြစ်သည်။ လူတို့သည် မိမိတို့ကိုယ်ကို ဆင်ခြင်သုံးသပ်ပြီး သမ္မာတရားကို နားလည်သည့်အခါမှသာ လမ်းကြောင်းမှန်ပေါ် အစပြုနိုင်သည်။ လူတို့က ခိုင်မာစွာ ရပ်တည်နိုင်ခြင်းငှာ သေချာမှုအချို့ ရှိကြသည်မှာ အတွေ့အကြုံနှင့် သမ္မာတရားအချို့ကို နားလည်လာသည့် အချိန်ကာလတစ်ခုနောက်တွင်သာ ဖြစ်သည်။ သင်တို့အားလုံးသည် ဝိညာဉ်ရင့်ကျက်မှုတွင် အလွန် သေးငယ်နေဆဲဖြစ်သည်ကို ငါ မြင်ရသည်။ သင်တို့သည် အလွန်နည်းပါးသည့် သမ္မာတရားကို သိနားလည်ကြပြီး သင်တို့၏ တာဝန်များကို လုံလောက်စွာ မထမ်းဆောင်နိုင်ကြပေ။ သင်တို့၏ တာဝန်များတွင် သင်တို့သည် မိမိတို့ကိုယ်ကို အလွန်တက်ကြွစွာ အလုပ်များစေပုံရကြသော်လည်း အမှန်တွင် သင်တို့အားလုံးသည် အန္တရာယ်ရောက်တော့မည့်ဆဲဆဲတွင် ရှိကြသည်။ သင်တို့အနေဖြင့် သမ္မာတရား စစ်မှန်မှုများတစ်ခုမျှ ပိုင်ဆိုင်သည်ကို ငါ မမြင်နိုင်သကဲ့သို့ သမ္မာတရားကို လိုက်စားသောလူများ ဟုတ်မဟုတ်ဟူသည်ကို ပြောရန် ခက်ခဲသည်။ ဤအရာက သင့်ကို ကြီးမားသည့် အန္တရာယ်တွင် ရှိစေသည်။ ငါသည် ဤကဲ့သို့သော စကားများကို အကြိမ်များစွာ ပြောဆိုပြီးဖြစ်သော်လည်း ထိုစကားများက မည်သည့်အရာ ဆိုလိုသည်ကို လူများစွာက နားမလည်ကြပေ။ လူအချို့က “ကျွန်ုပ်သည် ယခု ဘုရားသခင်ကို ကျွန်ုပ်၏ ယုံကြည်မှုတွင် စိတ်ထက်သန်မှုများစွာရှိသည်။ ကျွန်ုပ် မှောက်မှားမည်မဟုတ်၊ သို့မဟုတ် လမ်းပျောက်မည် မဟုတ်ပါ။ ဘုရားသခင်က ကျွန်ုပ်ကို များစွာသော ကျေးဇူးတော်ဖြင့် ဆက်ဆံသည်၊ ကျွန်ုပ် မည်သည့်အန္တရာယ်မျှ မရှိပါ”ဟု ပြောကြသည်။ ဘုရားသခင်က လူတိုင်းကို ကျေးဇူးတော်ဖြင့် ဆက်ဆံပြီး ၎င်းတို့ကို ကွယ်ကာသည်။ သို့သော် သင်သည် သမ္မာတရား စစ်မှန်မှုများထဲသို့ မဝင်ရောက်သေးသောကြောင့် သင်သည် ပင်ကိုအားဖြင့် အန္တရာယ်ရှိပေသည်။ စမ်းသပ်မှုများနှင့် ရင်ဆိုင်ရသည့်အခါ သင် ခိုင်ခိုင်မာမာ ရပ်တည်နိုင်လိမ့်မည်ဟု သင် အာမခံနိုင်သလော။ မည်သည့် လူကမျှ ဤအာမခံမှုမျိုးကို မပေးဝံ့ပေ။ လူများစွာတို့သည် စကားများနှင့် အယူဝါဒအချို့ကိုသာ ပြောဆိုနိုင်ကြသည်။ ဤအရာက ၎င်းတို့အနေဖြင့် သမ္မာတရားကို နားလည်သည်ဟု မဆိုလိုသကဲ့သို့ စစ်မှန်သော ဝိညာဉ်ရင့်ကျက်မှု ရှိသည်ဟု သေချာပေါက် မဆိုလိုသည့်တိုင် ၎င်းတို့ ရှိလုနီးပါးဖြစ်ပြီးဖြစ်သည်ဟု တွေးထင်ကြသည်။ လူတစ်ဦးသည် ထိုသို့သောအရာကို ပြောဆိုနိုင်လျှင် ၎င်းတို့ အလွန်စံမမီကြောင်းကို ပြပေသည်။ သမ္မာတရား စစ်မှန်မှုများကို မပိုင်ဆိုင်သည့် လူတိုင်းသည် အန္တရာယ်ချောက်ကမ်းပါးစွန်းတွင် အသက်ရှင်နေပေသည်။ ဤသည်မှာ လုံးဝ မှန်ကန်ပေသည်။

ကောက်နုတ်ချက် (၄၈)

ဘုရားသခင်ကို ယုံကြည်သူများထဲမှ မည်ကဲ့သို့သောလူမျိုးသည် ကယ်တင်ခြင်းခံရဖို့ အလားအလာအနည်းဆုံးဖြစ်သနည်း၊ ထို့အပြင် မည်သည့်သဘာဝမျိုးက ပျက်စီးခြင်းသို့ ဦးတည်ဖို့ အလားအလာအများဆုံး ဖြစ်သနည်း။ ဤသည်ကို သင်တို့ ရှင်းလင်းပြတ်သားစွာ မြင်သလော။ လူတစ်ဦးသည် ခေါင်းဆောင်တစ်ဦးဖြစ်သည်ဖြစ်စေ သို့မဟုတ် နောက်လိုက်တစ်ဦးဖြစ်သည်ဖြစ်စေ လူသား၏ ဖြစ်နေကျ သဘာဝမှာ အဘယ်နည်း။ လူသားသဘာဝအတွင်းရှိ ဖြစ်နေကျ အခြေခံသဘောတရားမှာ ဘုရားသခင်ကို သစ္စာဖောက်ခြင်းဖြစ်သည်။ လူတစ်ဦးချင်းစီတိုင်းသည် ဘုရားသခင်ကို သစ္စာဖောက်နိုင်စွမ်းရှိသည်။ ဘုရားသခင်ကို သစ္စာဖောက်ခြင်းဟူသည်မှာ အဘယ်နည်း။ ယင်း၏သရုပ်သကန်များမှာ မည်သည်တို့နည်း။ ဘုရားသခင်အပေါ် ယုံကြည်ခြင်းကို ရပ်တန့်လိုက်သောသူများသာ သူ့ကို သစ္စာဖောက်သူများ ဖြစ်ကြသလော။ လူသား၏အနှစ်သာရက မည်သည့်အရာဖြစ်သည်ကို လူများသည် နားလည်ရမည်၊ ပြီးလျှင် ယင်း၏အရင်းခံအကြောင်းရင်းကို နားလည်သဘောပေါက်ရမည်။ သင်၏ဒေါသဖြင့် ဝုန်းဒိုင်းကြဲခြင်း၊ အပြစ်အနာအဆာများ၊ ဆိုးသောအလေ့အထများ၊ သို့မဟုတ် သွန်သင်ဆုံးမမှု မရှိခြင်းတို့အားလုံးသည် အပေါ်ယံအချက်များမျှသာ ဖြစ်ကြသည်။ အကယ်၍ သင်သည် ဤအသေးအဖွဲအရာများကိုသာ အစဉ်သဖြင့် ဖက်တွယ်နေပါက၊ စည်းမျဉ်းစည်းကမ်းများကို မဆင်မခြင် ကျင့်သုံးပြီး မည်သည့်အရာကို မုချလိုအပ်သည်ကို နားလည်သဘောပေါက်ဖို့ ပျက်ကွက်ပါက၊ သင်၏သဘာဝရှိ ရှိရင်းစွဲအရာများကို ထိုအတိုင်းထားပြီး သင်၏ဖောက်ပြန်ပျက်စီးသော စိတ်သဘောထားကို မဖြေရှင်းပါက သင်သည် နောက်ဆုံးတွင် လမ်းကြောင်းမှ သွေဖည်နေဆဲပင် ဖြစ်လိမ့်မည်ဖြစ်ပြီး ဘုရားသခင်ကို ခုခံခြင်းဖြင့်သာ အဆုံးသတ်သွားလိမ့်မည်။ လူများသည် ဘုရားသခင်ကို အချိန်မရွေး၊ နေရာမရွေး သစ္စာဖောက်နိုင်သည်၊ ဤသည်မှာ ပြင်းထန်လေးနက်သော ပြဿနာတစ်ခုဖြစ်သည်။ ခဏတာဖြစ်ဖြစ် ဘုရားသခင်ကို ချစ်သောစိတ်နှလုံး သင့်တွင် အနည်းငယ် ရှိကောင်းရှိမည်၊ စိတ်အားထက်သန်စွာ သင့်ကိုယ်သင် ဘုရားသခင်အတွက် အသုံးခံကောင်းခံမည်၊ ထို့ပြင် သစ္စာစောင့်သိခြင်းအနည်းငယ်ဖြင့် သင်၏တာဝန်များကို ထမ်းဆောင်ကောင်း ထမ်းဆောင်မည်၊ သို့မဟုတ် ဤအချိန်ကာလအတောအတွင်း သင့်တွင် လုံးဝပုံမှန်ဖြစ်သော အသိစိတ်နှင့် အသိတရား ရှိကောင်းရှိမည်။ သို့သော် လူများသည် တည်ငြိမ်မှုမရှိဘဲ ပြောင်းလဲလွယ်ကြသည်၊ အဖြစ်အပျက်တစ်ခုကြောင့် အချိန်မရွေး၊ နေရာမရွေး ဘုရားသခင်ကို ခုခံပြီး သစ္စာဖောက်နိုင်စွမ်းရှိသည်။ ဥပမာအနေဖြင့် လူတစ်ဦးသည် ၎င်း၏တာဝန်ကို ထမ်းဆောင်ရာတွင် လုံးဝပုံမှန်ဖြစ်သော အသိစိတ်ကို ပိုင်ဆိုင်နိုင်သည်၊ သန့်ရှင်းသောဝိညာဉ်တော်၏ အမှုတော်၊ လက်တွေ့ကျသောအတွေ့အကြုံ၊ ဝန်တာတစ်ခုနှင့် သစ္စာစောင့်သိခြင်းတို့ ရှိနိုင်သည်။ သို့သော် ၎င်း၏ယုံကြည်ခြင်းက အထူးသဖြင့် အားကောင်းရုံသာ ရှိသေးသောအခါတွင် ၎င်း ကိုးကွယ်သော အန္တိခရစ်တစ်ဦးကို ဘုရားအိမ်တော်က နှင်ထုတ်သဖြင့် ၎င်းတွင် အယူအဆများရှိစပြုလာသည်။ ၎င်းသည် ချက်ချင်းဆိုသလို အပျက်သဘောဆောင်လာသည်၊ ၎င်း၏အလုပ်အတွက် စိတ်အားထက်သန်မှုပျောက်ဆုံးကုန်သည်၊ ၎င်း၏တာဝန်ကို ဝတ်ကျေတမ်းကျေသာ ထမ်းဆောင်တော့သည်၊ ဆုမတောင်းချင်တော့ဘဲ “အဘယ်ကြောင့် ဆုတောင်းရမည်နည်း။ ထိုမျှကောင်းမွန်သော လူတစ်ဦး နှင်ထုတ်ခံရလျှင် မည်သူသည် ကယ်တင်ခြင်းခံရနိုင်မည်နည်း။ ဘုရားသခင်သည် လူများကို ဤသို့ မဆက်ဆံသင့်ပါ” ဟူ၍ စောဒကတက်သည်။ ၎င်း၏စကားလုံးများ၏ သဘာဝက အဘယ်နည်း။ အဖြစ်အပျက်တစ်ခုဖြစ်ရုံဖြင့် ၎င်း၏ လိုအင်ဆန္ဒများနှင့် မကိုက်ညီတော့ပေ၊ ပြီးလျှင် ၎င်းသည် ဘုရားသခင်အပေါ် ဝေဖန်သုံးသပ်သည်။ ဤသည်မှာ ဘုရားသခင်ကို သစ္စာဖောက်ခြင်း၏ သရုပ်သကန်တစ်ခုမဟုတ်လော။ လူများသည် အချိန်မရွေး၊ နေရာမရွေး ဘုရားသခင်ထံမှ သွေဖည်သွားနိုင်သည်။ အခြေအနေအချို့ကို တွေ့ကြုံလိုက်ရာတွင် ၎င်းတို့သည် အယူအဆများ စိတ်ကူးများဖြစ်ပေါ်ကောင်း ဖြစ်ပေါ်လာနိုင်ပြီး ဘုရားသခင်ကို ပြစ်တင်ရှုတ်ချကြသည်။ ဤသည်မှာ ဘုရားသခင်ကို သစ္စာဖောက်ခြင်း၏ သရုပ်သကန်တစ်ခုမဟုတ်လော။ ဤသည်မှာ အရေးကြီးလေသည်။ ယခုအခါတွင် ဘုရားသခင်နှင့်ပတ်သက်၍ သင့်တွင် အယူအဆတစ်စုံတစ်ရာမရှိဘဲ သူ့ကို ကျိုးနွံနာခံနိုင်သည်ဟု သင်တွေးကောင်းတွေးနိုင်သည်၊ သို့သော် သင် တစ်ခုခုမှားယွင်းလုပ်မိပြီး ရုတ်တရက် ပြင်းပြင်းထန်ထန် ပြုပြင်ခြင်းကို ခံရပါက သင်သည် ကျိုးနွံနာခံနိုင်ဦးမည်လော။ ဖြေရှင်းချက်တစ်ခုအတွက် သမ္မာတရားကို သင်ရှာဖွေနိုင်သလော။ အကယ်၍ သင်သည် ကျိုးနွံနာခံနိုင်ခြင်း မရှိပါက သို့မဟုတ် သင်၏ပုန်ကန်လိုခြင်းပြဿနာကို ဖြေရှင်းဖို့ သမ္မာတရားကို မရှာနိုင်ပါက ဘုရားသခင်ကို သင်သစ္စာဖောက်နိုင်သည့် အခွင့်အရေးတစ်ခု ရှိသေးသည်။ “ဘုရားသခင်အပေါ် ကျွန်ုပ် မယုံကြည်တော့ပါ” ဟူ၍ သင်အမှန်တကယ် ပြောနိုင်ခဲ့မည် မဟုတ်သော်လည်း ထိုအခိုက်အတန့်တွင် သင်၏စိတ်နှလုံးသည် သူ့ကို သစ္စာဖောက်ပြီးဖြစ်သည်။ လူ့သဘာဝက အတိအကျ မည်သည့်အရာဖြစ်သည်ကို သင်သည် ရှင်းလင်းပြတ်သားစွာ မြင်ရမည်။ ဤသဘာဝ၏အနှစ်သာရက သစ္စာဖောက်ခြင်းဖြစ်သလော။ အလွန်နည်းပါးသည့်လူများသာ လူ့သဘာဝအနှစ်သာရကို ရှင်းလင်းပြတ်သားစွာ မြင်နိုင်သည်။ အခြားသူများတွင် လူ့သဘာဝ မရှိကြစဉ်တွင် လူအချို့တွင် အသိတရားအနည်းငယ်နှင့် အတော်ကောင်းမွန်သော လူ့သဘာဝရှိကြသော်လည်း တစ်ဦးတစ်ယောက်၏ လူ့သဘာဝက ကောင်းသည်ဖြစ်စေ၊ ဆိုးသည်ဖြစ်စေ၊ ၎င်းတို့၏အစွမ်းအစက ကောင်းသည်ဖြစ်စေ၊ ညံ့ဖျင်းသည်ဖြစ်စေ ဖြစ်လေ့ရှိသည့် အကြောင်းရင်းမှာ ၎င်းတို့အားလုံးသည် ဘုရားသခင်ကို သစ္စာဖောက်နိုင်ကြသည် ဟူ၍ဖြစ်သည်။ လူ့သဘာဝမှာ အခြေခံအားဖြင့် ဘုရားသခင်ကို သစ္စာဖောက်သည့်သဘာဝဖြစ်သည်။ “စာတန်အားဖြင့် ဖောက်ပြန်ပျက်စီးသည့် လူများသည် သဘာဝအရ ဘုရားသခင်ကို သစ္စာဖောက်ကြသောကြောင့် ၎င်းနှင့်ပတ်သက်၍ ကျွန်ုပ် ဘာမျှမတတ်နိုင်သော်လည်း တဖြည်းဖြည်းတော့ ပြောင်းလဲနိုင်သည်” ဟု သင်တို့ တွေးလေ့ရှိကြသည်။ ယခု ဤအတိုင်း သင်တို့ ထင်နေကြဆဲဖြစ်သလော။ သို့ဆိုလျှင် ငါ့ကို ပြောလော့။ လူတစ်ဦးသည် ဖောက်ပြန်ပျက်စီးခြင်းမရှိဘဲ ဘုရားသခင်ကို သစ္စာဖောက်နိုင်သလော။ ဖောက်ပြန်ပျက်စီးခြင်းမရှိဘဲ လူများသည် ဘုရားသခင်ကို သစ္စာဖောက်နိုင်သေးသည်။ ဘုရားသခင်က လူသားကို ဖန်ဆင်းခဲ့သောအချိန်က သူသည် ၎င်းတို့အား လွတ်လပ်သောစိတ်ဆန္ဒကို ပေးခဲ့သည်။ လူသားများသည် အထူးသဖြင့် နုနယ်သည်။ ဘုရားသခင်ထံ တိုးဝင်ချဉ်းကပ်ဖို့ မွေးရာပါ လိုအင်ဆန္ဒကို ၎င်းတို့ မပိုင်ဆိုင်ကြပါ၊ ပြီးလျှင် “ဘုရားသခင်သည် ကျွန်ုပ်တို့၏ ဖန်ဆင်းရှင်ဖြစ်ပြီး ကျွန်ုပ်တို့သည် ဖန်ဆင်းခံများဖြစ်ကြသည်” ဟု ပြောကြသည်။ လူများတွင် ထိုကဲ့သို့သော အမြင်သဘောထားမျိုးမရှိကြပေ။ ၎င်းတို့တွင် သဘာဝအားဖြင့် သမ္မာတရားမရှိကြသကဲ့သို့ ၎င်းတို့အတွင်းတွင် ဘုရားသခင်ကို ကိုးကွယ်ခြင်းနှင့် စပ်လျဉ်းသည့် အရာတစ်ခုတလေလည်း မရှိပေ။ ဘုရားသခင်က လူသားများကို တွေးဖို့ ခွင့်ပြုပေးရင်း ၎င်းတို့ကို လွတ်လပ်သောစိတ်ဆန္ဒကို ပေးခဲ့သော်လည်း လူများက သမ္မာတရားကို လက်မခံကြပေ။ ဘုရားသခင်ကို လုံးဝ မသိကြဘဲ သူ့ကို မည်သို့ကျိုးနွံနာခံပြီး ကိုးကွယ်ရမည်ကို နားမလည်ကြပေ။ ဤအရာများသည် လူသားများထံတွင် မရှိသောကြောင့် ဖောက်ပြန်ပျက်စီးခြင်း မရှိလျှင်ပင် ဘုရားသခင်ကို သင် သစ္စာဖောက်နိုင်ဆဲဖြစ်၏။ သင်သည် ဘုရားသခင်ကို သစ္စာဖောက်နိုင်သည်ဟု အဘယ်ကြောင့်ဆိုသနည်း။ သင့်ကို စုံစမ်းသွေးဆောင်ဖို့ စာတန်လာသောအခါ သင်သည် စာတန်နောက်သို့လိုက်ပြီး ဘုရားသခင်ကို သစ္စာဖောက်သည်။ သင့်ကို ဘုရားသခင်က ဖန်ဆင်းထားသော်လည်း သူ့နောက်သို့ လိုက်ရမည့်အစား စာတန်နောက်သို့ လိုက်သည်။ ဤသည်က သင့်ကို သစ္စာဖောက်တစ်ဦး ဖြစ်စေသည်မဟုတ်လော။ သစ္စာဖောက်တစ်ဦးဆိုသည်မှာ အဓိပ္ပာယ် ဖွင့်ဆိုချက်အရ သစ္စာဖောက်သော လူတစ်ယောက်ဖြစ်သည်။ ဤအရာ၏ အနှစ်သာရကို သင်အပြည့်အဝ နားလည်သလော။ ထို့ကြောင့် လူများသည် ဘုရားသခင်ကို အချိန်မရွေး၊ နေရာမရွေး သစ္စာဖောက်နိုင်သည်။ ဘုရားသခင်၏ နိုင်ငံတော်တွင်လည်းကောင်း၊ သူ၏ အလင်းအောက်တွင်လည်းကောင်း ၎င်းတို့ လုံးလုံး နေထိုင်သောအချိန်၊ စာတန်၏အရာအားလုံး ပျက်စီးသွားသောအချိန်နှင့် ၎င်းတို့ကို အပြစ်တရားအထဲသို့ စုံစမ်း‌သွေးဆောင်သည့်အရာ သို့မဟုတ် ဆွဲဆောင်သိမ်းသွင်းသည့်အရာ တစ်ခုတလေ မရှိတော့သည့်အချိန်မှသာ လူများသည် ဘုရားသခင်ကို သစ္စာမဖောက်ကြတော့မည်ဖြစ်သည်။ အကယ်၍ လူများကို အပြစ်တရားထဲသို့ ဆွဲဆောင်သိမ်းသွင်းသည့်တစ်ခုခု ရှိနေသေးပါက ထိုအခါတွင် ၎င်းတို့သည် ဘုရားသခင်ကို သစ္စာဖောက်နိုင်ကြဦးမည်။ ထို့ကြောင့် လူသားများသည် အသုံးမကျသော အရာများဖြစ်ကြသည်။ အချို့သော စကားများနှင့် အယူဝါဒများကို သင်က စကားကြောရှည်လေပန်းနိုင်ရုံဖြင့် သင်သည် သမ္မာတရားအချို့ကို နားလည်ပြီး ဘုရားသခင်ကို သစ္စာမဖောက်နိုင်ကြောင်း၊ ရွှေ သို့မဟုတ် ငွေကဲ့သို့၊ ကြေး သို့မဟုတ် သံကဲ့သို့ မဟုတ်လျှင်ပင် မြေထည်ပစ္စည်းထက် ပို၍အဖိုးတန်သည်ဟု အနည်းဆုံး သင့်ကို ယူဆသင့်ကြောင်း သင်ထင်နေနိုင်သည်။ သို့သော် သင်သည် သင့်ကိုယ်သင် ပိုလွန်၍ ခန့်မှန်းနေခြင်းဖြစ်သည်။ လူသားများသည် အမှန်တကယ် မည်သည့်အရာ ဖြစ်သည်ဆိုသည်ကို သင်သိသလော။ လူများသည် ဘုရားသခင်ကို အချိန်မရွေး၊ နေရာမရွေး သစ္စာဖောက်နိုင်သည်၊ ၎င်းတို့သည် တစ်ပြားမျှပင် မထိုက်တန်ချေ။ ဘုရားသခင် ပြောခဲ့သကဲ့သို့ပင် လူသားများသည် အသုံးမကျသော အကောင်ယုတ်များ လူ့တိရစ္ဆာန်များ ဖြစ်ကြသည်။ သို့သော် လူများသည် ၎င်းတို့၏စိတ်နှလုံးများထဲတွင် ဤအတိုင်း မတွေးကြပေ။ “ငါသည် အသုံးမကျသော အကောင်ယုတ်ဖြစ်သည်ဟု ငါမထင်ပါ။ ဤကိစ္စကို ငါ အဘယ်ကြောင့် မရိပ်စားမိနိုင်သနည်း။ ယင်းကို ငါ အဘယ်သို့များ မတွေ့ကြုံရသေးသနည်း။ ဘုရားသခင်၌ ငါ၏ ယုံကြည်လက်ခံမှုသည် ရိုးသားစစ်မှန်သည်။ ငါ့ထံတွင် ယုံကြည်ခြင်း ရှိသောကြောင့် ဘုရားသခင်ကို ငါ သစ္စာမဖောက်နိုင်ပါ။ ဘုရာနှုတ်ကပတ်တော်များအားလုံးသည် သမ္မာတရားဖြစ်သော်လည်း ‘လူများသည် ဘုရားသခင်ကို အချိန်မရွေး၊ နေရာမရွေး သစ္စာဖောက်နိုင်သည်’ ဟူသည့် စကားရပ်ကို ငါနားကိုမလည်နိုင်ပါ။ ငါသည် ဘုရားသခင်၏ ချစ်ခြင်းကို မြင်ပြီးဖြစ်သည်။ သူ့ကိုအချိန်မရွေး သစ္စာဖောက်ခြင်းမျိုး မည်သည့်အခါမျှ မရှိနိုင်ပါ” ဟု ၎င်းတို့ ထင်ကြသည်။ ဤသည်မှာ လူများက ၎င်းတို့၏စိတ်နှလုံးများထဲတွင် အမှန်တကယ် တွေးသည့်အရာဖြစ်သည်၊ သို့သော် ဘုရားနှုတ်ကပတ်တော်များမှာ အဖြစ်မှန်များ ဖြစ်ကြသည်၊ ၎င်းတို့ကို အခြေအမြစ်မရှိဘဲ လုပ်ကြံပြောခြင်း မဟုတ်ပေ။ ကိစ္စတိုင်းကို သင်တို့အား အတိအလင်း လက်ခံယုံကြည်စေလျက် သင်တို့အတွက် ထင်ရှားအောင်လုပ်ပြီးဖြစ်သည်။ ဤနည်းအားဖြင့်သာ သင်တို့သည် သင်တို့၏ဖောက်ပြန်ပျက်စီးခြင်းကို မှတ်မိနိုင်လိမ့်မည်ဖြစ်ပြီး သစ္စာဖောက်ခြင်းပြဿနာကို ဖြေရှင်းနိုင်လိမ့်မည်။ နိုင်ငံတော်တွင် သစ္စာဖောက်ခြင်း ရှိလိမ့်မည်မဟုတ်ပေ။ လူများသည် စာတန်၏ ထိန်းချုပ်မှုအောက်တွင် မဟုတ်ဘဲ ဘုရားသခင်၏ အုပ်စိုးမှုအောက်တွင် နေထိုင်ကြသောအခါ ၎င်းတို့သည် အစစ်အမှန် လွတ်လပ်ကြသည်။ ထိုအခါတွင် ဘုရားသခင်ကို သစ္စာဖောက်ခြင်းအကြောင်း စိုးရိမ်ပူပန်ဖို့ လိုအပ်လိမ့်မည်မဟုတ်ပေ။ ထိုကဲ့သို့သော စိုးရိမ်ပူပန်ခြင်းမျိုးသည် မလိုအပ်ပါ၊ မလိုလားအပ်ပေ။ အနာဂတ်တွင် သင်တို့၌ ဘုရားသခင်ကို သစ္စာဖောက်မည့်အရာ တစ်ခုမျှ မရှိတော့ကြောင်းကို ကြေညာနိုင်သော်လည်း ယခုတွင်မူကား ဤသို့ မလုပ်နိုင်သေးပေ။ အကြောင်းမှာ လူများတွင် ဖောက်ပြန်ပျက်စီးသော စိတ်သဘောထားများ ရှိကြသောကြောင့် ၎င်းတို့သည် ဘုရားသခင်ကို အချိန်မရွေး သစ္စာဖောက်နိုင်သည်။ အချို့အခြေအနေများ ရှိခြင်းက သစ္စာဖောက်ခြင်းဆီသို့ ဦးတည်သွားစေခြင်းနှင့် အချို့သောအခြေအနေများ သို့မဟုတ် အကျပ်ကိုင်မှုသာမရှိလျှင် သင်သည် ဘုရားသခင်ကို သစ္စာဖောက်လိမ့်မည် မဟုတ်ခြင်းတို့ မဟုတ်ပေ။ အကျပ်ကိုင်မှုမရှိလျှင်ပင် သင်သည် သူ့ကို သစ္စာဖောက်နိုင်သေးသည်။ ဤသည်မှာ လူသား၏ ဖောက်ပြန်ပျက်စီးသော အနှစ်သာရနှင့်ဆိုင်သော ပြဿနာတစ်ခု၊ လူ့သဘာဝ၏ ပြဿနာတစ်ခုဖြစ်သည်။ သင်သည် ယခု မည်သည့်အရာကိုမျှ မတွေးဘဲ သို့မဟုတ် မလုပ်ဘဲ နေလျှင်ပင် သင့်သဘာဝ၏စစ်မှန်မှုက အမှန်တကယ် တည်ရှိနေပြီး မည်သူတစ်ဦးတစ်ယောက်ကမျှ အမြစ်ပြတ် သုတ်သင်ရှင်းလင်းနိုင်မည် မဟုတ်ပေ။ သင်၏ အတွင်းတွင် ဘုရားသခင်ကို သစ္စာဖောက်ခြင်း သဘာဝရှိသည့်အတွက် သူသည် သင်၏ စိတ်နှလုံးထဲတွင် မရှိပေ။ သင့်စိတ်နှလုံး၏ နက်ရှိုင်းရာတွင် ဘုရားသခင်အတွက် နေရာမရှိသကဲ့သို့ သမ္မာတရား၏ တည်ရှိခြင်းလည်း မရှိပေ။ သို့ဖြစ်၍ သင်သည် ဘုရားသခင်ကို အချိန်မရွေး နေရာမရွေး သစ္စာဖောက်နိုင်သည်။ ကောင်းကင်တမန်များသည် မတူကွဲပြားသည်။ ၎င်းတို့တွင် ဘုရားသခင်၏ စိတ်သဘောထား သို့မဟုတ် အနှစ်သာရ မရှိကြလင့်ကစား အထူးသဖြင့် သူ့ကို အစေခံမှုပေးဖို့အတွက်၊ နေရာတိုင်းတွင် သူ၏အမိန့်များကို ဆောင်ရွက်ဖို့အတွက် ၎င်းတို့ကို သူက ဖန်ဆင်းထားခဲ့သောကြောင့် ၎င်းတို့သည် ဘုရားသခင်ထံ လုံးဝ ကျိုးနွံနာခံနိုင်ကြသည်။ ဘုရားသခင်က ၎င်းတို့ကို လုံးလုံးလျားလျား ပိုင်ဆိုင်သည်။ လူသားများအတွက်မူ သူ့ကို ကိုးကွယ်ရန် စွမ်းရည်ဖြင့် ၎င်းတို့ကို မပြင်ဆင်ပေးဘဲ ကမ္ဘာမြေကြီးပေါ်တွင် ၎င်းတို့ နေထိုင်ဖို့ ဘုရားသခင်က ရည်ရွယ်ခဲ့သည်။ ဤအကြောင်းကြောင့် လူသားများသည် ဘုရားသခင်ကို သစ္စာဖောက်ပြီး ခုခံနိုင်ကြသည်။ ဤသည်က လူသားများကို မည်သူမဆိုက အသုံးချနိုင်ပြီး ယှဉ်ပြိုင်နိုင်သည်ကို သက်သေပြသည်။ ၎င်းတို့တွင် မိမိတို့ကိုယ်တိုင်အပေါ် အချုပ်အခြာအာဏာ ကိုင်စွဲခြင်းမရှိပေ။ လူသားများသည် ထိုကဲ့သို့သောသတ္တဝါများ ဖြစ်ကြသည်။ လုံးလုံးလျားလျား ဂုဏ်သိက္ခာကင်းမဲ့ကြပြီး အသုံးမကျကြပေ။

လူသား၏ သစ္စာဖောက်တတ်သည့်သဘာဝကို ဘုရားသခင်က ထုတ်ဖော်သည်။ ဤသို့ဖြင့် လူများသည် ဤကိစ္စအပေါ်တွင်လည်းကောင်း၊ မိမိတို့ကိုယ်ကိုအပေါ်တွင်လည်းကောင်း စစ်မှန်သော နားလည်ခြင်းတစ်ခု ရှိနိုင်သည်။ မည်သည့်ကိစ္စများတွင် ဘုရားသခင်ကို သူတို့ သစ္စာဖောက်နိုင်သည်နှင့် ဘုရားသခင်ကို သစ္စာဖောက်ခြင်းသို့ ဦးတည်သွားနိုင်သည့် မည်သည့်ဖောက်ပြန်ပျက်စီးသည့် စိတ်သဘောထားများ ၎င်းတို့၌ ရှိသည်တို့ကို နားလည်ရင်း ဤကဏ္ဍမှစ၍ လူများသည် ပြောင်းလဲဖို့ စတင်နိုင်ပြီး လက်တွေ့လုပ်ဆောင်ခြင်း လမ်းကြောင်းများကို ရှာဖွေဖို့ကြိုးစားနိုင်သည်။ များစွာသောကဏ္ဍများတွင် ဘုရားသခင်ကို သင်မပုန်ကန်တော့ဘဲ ကဏ္ဍအများစုတွင် သူ့ကို သစ္စာမဖောက်တော့သည့် အဆင့်သို့ သင်ရောက်သည်နှင့်တစ်ပြိုင်နက် သင်၏ဘဝလမ်းခရီး၏ အဆုံးသတ်သို့၊ ဘုရားသခင်၏ အမှုတော်ပြီးဆုံးသည့် အခိုက်အတန့်သို့ သင်ရောက်သောအခါ အနာဂတ်တွင် ဘုရားသခင်ကို သင်သစ္စာဖောက်မည် မဖောက်မည်ကို စိုးရိမ်ပူပန်ဖို့ လိုအပ်တော့မည် မဟုတ်ပေ။ ဤသည်ကို အဘယ်ကြောင့် ငါ ပြောရသနည်း။ စာတန်ကြောင့် လူများ ဖောက်ပြန်ပျက်စီးမသွားမီက စာတန်က ဆွဲဆောင်သိမ်းသွင်းသောအခါ သူတို့သည် ဘုရားသခင်ကို သစ္စာဖောက်နိုင်သည်။ စာတန်ပျက်စီးသွားသောအခါ လူများသည် ဘုရားသခင်ကို သစ္စာဖောက်ခြင်း ရပ်တန့်သွားမည် မဟုတ်လော။ ထိုအချိန်သည် ယခုထက်ထိ မရောက်လာသေးပေ။ လူများသည် ၎င်းတို့အတွင်းတွင် စာတန်၏ဖောက်ပြန်ပျက်စီးသည့် စိတ်သဘောထားရှိနေကြဆဲပင် ဖြစ်သည်။ အချိန်မရွေး၊ နေရာမရွေး ဘုရားသခင်ကို သစ္စာဖောက်နိုင်သည်။ ဘုရားသခင်ကို ခုခံခြင်းနှင့် သစ္စာဖောက်ခြင်းတို့နှင့်ပတ်သက်သည့် ထိုမှားယွင်းသောအမြင်များ၊ အယူအဆများနှင့် စိတ်ကူးများအားလုံးကို သင်စွန့်ပယ်ပစ်လိုက်သည်မှာ သေချာသည့်အဆင့်တစ်ခုရောက်သည်အထိ အသက်တာကို သင်တွေ့ကြုံပြီးသည်နှင့်တစ်ပြိုင်နက် သင်၏စိတ်နှလုံးထဲတွင် အပြုသဘောဆောင်သည့်အရာများစွာနှင့်အတူ သင်သည် သမ္မာတရားကို နားလည်ခဲ့ချေပြီ။ သင်သည် သင့်ကိုယ်သင် ထိန်းချုပ်နိုင်ပြီဖြစ်ပြီး သင့်ကိုယ်ပိုင်လုပ်ရပ်များကို ထိန်းသိမ်းနိုင်ပေပြီ။ ထို့အပြင် အခြေအနေအတော်များများတွင် သင်သည် ဘုရားသခင်ကို သစ္စာမဖောက်တော့ပေ။ ထိုအခါ စာတန် ပျက်စီးသွားသောအခါ သင်သည်လည်း လုံးဝ ပြောင်းလဲသွားလိမ့်မည်။ လက်ရှိအမှုတော်အဆင့်မှာ လူသား၏သစ္စာဖောက်ခြင်းနှင့် ပုန်ကန်ခြင်းကို ဖြေရှင်းဖို့ဖြစ်သည်။ စာတန်ကို ကိုင်တွယ်ဖြေရှင်းပြီးဖြစ်လိမ့်မည် ဖြစ်သောကြောင့် အနာဂတ်လူသားမျိုးနွယ်သည် ဘုရားသခင်ကို သစ္စာဖောက်လိမ့်မည် မဟုတ်ပေ။ စာတန်က လူသားမျိုးနွယ်ကို အထင်အမြင်မှားစေခြင်းနှင့် ဖောက်ပြန်ပျက်စီးစေခြင်း ကိစ္စ ရှိတော့မည်မဟုတ်ပေ။ ဤကိစ္စသည် ထိုအခါတွင် လူသားမျိုးနွယ်နှင့် မဆက်စပ်ဘဲ ရှိနေလိမ့်မည်။ ယခုအခါတွင် အဆုံးစွန် အရေးပါသည့် ပြဿနာတစ်ခုဖြစ်သည့် လူသား၏ သစ္စာဖောက်ခြင်းသဘာဝကို နားလည်ဖို့ လူများသည် တောင်းဆိုခြင်း ခံရသည်။ ဤသည်မှာ သင်တို့ စတင်သင့်သည့်နေရာဖြစ်သည်။ ဘုရားသခင်ကို သစ္စာဖောက်ခြင်းသဘာဝတွင် မည်သည့်အရာ ပါဝင်သနည်း။ သစ္စာဖောက်ခြင်းကို ထုတ်ဖော်ခြင်းများတွင် မည်သည်တို့ ပါဝင်သနည်း။ လူများသည် မည်သို့ ပြန်လည်သုံးသပ်ပြီး နားလည်သင့်သနည်း။ ၎င်းတို့သည် မည်သို့ လက်တွေ့လုပ်ဆောင်ပြီး ဝင်ရောက်သင့်သနည်း။ ဤအရာများအားလုံးကို နားလည်သင့်ပြီး ရှင်းလင်းပြတ်သားစွာ မြင်သင့်သည်။ သစ္စာဖောက်ခြင်းသဘာဝက တစ်စုံတစ်ဦး၏အတွင်းတွင် တည်ရှိနေသေးသရွေ့ ၎င်းတို့သည် ဘုရားသခင်ကို အချိန်မရွေး၊ နေရာမရွေး သစ္စာဖောက်နိုင်သည်။ အကယ်၍ ၎င်းတို့သည် ဘုရားသခင်ကို ပွင့်ပွင့်လင်းလင်း ငြင်းပယ်ခြင်း သို့မဟုတ် သစ္စာဖောက်ခြင်းတို့ မလုပ်လျှင်ပင် သစ္စာဖောက်ခြင်းဟု လူများက မယူဆနိုင်သော်လည်း အနှစ်သာရအားဖြင့် ထိုသို့ဖြစ်သည့် အရာများစွာကို ၎င်းတို့ လုပ်နိုင်ကြဆဲဖြစ်သည်။ ဆိုလိုသည်မှာ လူများတွင် ကိုယ်ပိုင်လုပ်ပိုင်ခွင့် မရှိကြပါ။ စာတန်က ၎င်းတို့ကို ပထမဦးစွာ သိမ်းပိုက်ခဲ့ပြီဖြစ်သည်။ အကယ်၍ သင်သည် ဖောက်ပြန်ပျက်စီးခြင်းမရှိဘဲ ဘုရားသခင်ကို သစ္စာဖောက်နိုင်ပါက သင့်တွင် ယခုဆိုလျှင် စာတန်၏ဖောက်ပြန်ပျက်စီးသည့် စိတ်သဘောထား အပြည့်ဖြစ်သည့်အတွက် သင်သည် မည်မျှများများ ပို၍ သစ္စာဖောက်နိုင်သနည်း။ သင်သည် ဘုရားသခင်ကို အချိန်မရွေး၊ နေရာမရွေး ပို၍ပင် သစ္စာဖောက်နိုင်သည်မဟုတ်လော။ လက်ရှိလုပ်ငန်းတာဝန်မှာ ဘုရားသခင်ကို သင်သစ္စာဖောက်အောင် လုပ်သည့်ကိစ္စများကို လျှော့ချရင်း၊ သင့်ကို စုံလင်အောင်ပြုဖို့နှင့် ဘုရားသခင်၏ မျက်မှောက်တော်တွင် သူ၏လက်ခံခြင်းကို ခံရဖို့ အခွင့်အရေးများကို ပို၍ ပေးရင်း ထိုဖောက်ပြန်ပျက်စီးသည့် စိတ်သဘောထားများကို ရှင်းလင်းဖယ်ရှားဖို့ ဖြစ်သည်။ သင်သည် အမျိုးမျိုးသောကိစ္စရပ်များတွင် ဘုရားသခင်၏ အမှုတော်ကို ပို၍ တွေ့ကြုံရသည့်အတွက် သမ္မာတရားအချို့ကို ရနိုင်လိမ့်မည်ဖြစ်ပြီး အတိုင်းအတာတစ်ခုအထိ စုံလင်အောင်ပြုခြင်း ခံရလိမ့်မည်။ အကယ်၍ စာတန်နှင့် နတ်ဆိုးများက သင့်အား စုံစမ်းသွေးဆောင်ဖို့ လာနေဆဲဖြစ်ပါက၊ သို့မဟုတ် ဆိုးယုတ်သောဝိညာဉ်များက သင့်ကို အထင်အမြင်မှားစေဖို့နှင့် အဖျက်အမှောင့်လုပ်ဖို့ လာဆဲဖြစ်ပါက သင်သည် ချင့်ချိန်နိုင်စွမ်းအချို့ကို ဖြစ်မြောက်အောင် လုပ်နိုင်လိမ့်မည်။ ထို့အပြင် ထိုသို့ဖြင့် ဘုရားသခင်ကို သစ္စာဖောက်သည့် နည်းလမ်းများဖြင့် ပြုမူလုပ်ဆောင်ခြင်း ပို၍နည်းပါးလာလိမ့်မည်။ ဤသည်မှာ လူများအတွင်းတွင် အချိန်နှင့်အမျှ ကြီးထွားလာသည့်တစ်စုံတစ်ခုဖြစ်သည်။ လူသားများကို ပထမဦးစွာ ဖန်ဆင်းခဲ့သည့်အချိန်က ၎င်းတို့သည် ဘုရားသခင်ကို ကိုးကွယ်ရမှန်းကိုဖြစ်စေ၊ ကျိုးနွံနာခံရမှန်းကိုဖြစ်စေ မသိကြပေ။ ဘုရားသခင်ကို သစ္စာဖောက်ဖို့ဆိုသည်မှာ မည်သည့်အရာမှန်းလည်း ၎င်းတို့ မသိခဲ့ကြပေ။ စာတန်က ၎င်းတို့ကို သွေးဆောင်ဖြားယောင်းဖို့ လာခဲ့သောအခါက ၎င်းတို့သည် ကောင်းမြတ်ခြင်းနှင့် ဆိုးယုတ်ခြင်းကို မခွဲခြားနိုင်ခဲ့ကြဘဲ ဘုရားသခင်ကို ကိုးကွယ်ဆည်းကပ်ဖို့ အစွမ်းအစ မရှိခဲ့ကြသော ၎င်းနောက်သို့ လိုက်ခဲ့ကြပြီး ဘုရားသခင်ကို သစ္စာဖောက်ခဲ့ကြသည်၊ သစ္စာဖောက်များဖြစ်လာကြသည်။ ဘုရားသခင်သည် လူသားမျိုးနွယ်၏ ဖန်ဆင်းရှင်ဖြစ်ကြောင်းနှင့် သူ့ကို ၎င်းတို့ မည်သို့ကိုးကွယ်သင့်ကြောင်းကို ၎င်းတို့ နားလည်ခြင်း ပို၍ပင် နည်းပါးသည်။ ယခုတွင် သူ၏အနှစ်သာရ၊ စိတ်သဘောထား၊ အနန္တတန်ခိုး၊ လက်တွေ့ကျခြင်း စသည်တို့အပါအဝင် ဘုရားသခင်ကို သိခြင်းအကြောင်း သမ္မာတရားများကို ၎င်းတို့အတွင်းတွင် လုပ်ဆောင်ခြင်းအားဖြင့် လူများကို ဘုရားသခင်က ကယ်တင်သည်။ ဤသို့ဖြင့် ယင်းတို့သည် ၎င်းတို့အသက်များ ဖြစ်လာကြပြီး ၎င်းတို့ကို ကိုယ်ပိုင်လုပ်ပိုင်ခွင့်များ ပေးအပ်လျက် သမ္မာတရားနှင့်အညီ အသက်ရှင်နေထိုင်ဖို့ ထောက်ကူပေးသည်။ ဘုရားသခင်၏ နှုတ်ကပတ်တော်များကိုလည်းကောင်း၊ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းကိုလည်းကောင်း သင်ပို၍နက်ရှိုင်းစွာ တွေ့ကြုံရလေ၊ သင်၏ကိုယ်ပိုင်ဖောက်ပြန်ပျက်စီးသော စိတ်သဘောထားကို ပို၍နက်ရှိုင်းစွာ သင်နားလည်လေဖြစ်လိမ့်မည်ဖြစ်ပြီး ဤသည်က သင့်အား ဘုရားသခင်ကို ကျိုးနွံနာခံဖို့၊ ချစ်ဖို့နှင့် စိတ်ကျေနပ်စေဖို့ စိတ်ပိုင်းဖြတ်ချက် ပေးလိမ့်မည်။ ဘုရားသခင်ကို သင်ပို၍သိလေ၊ ထိုအခါတွင် သင်၏ဖောက်ပြန်ပျက်စီးသော စိတ်သဘောထားများကို ပို၍ သင်ဖယ်ရှားနိုင်လေဖြစ်ပြီး သင့်အတွင်းတွင် ဘုရားသခင်ကို သစ္စာဖောက်သည့်အရာများ ပိုနည်းပါးလာလိမ့်မည်ဖြစ်ပြီး ဘုရားသခင်နှင့် ပို၍သဟဇာတဖြစ်သည့်အရာများ ပိုများလာလိမ့်မည် ဖြစ်သည်။ ဤအကြောင်းကြောင့် စာတန်ကို လုံးလုံးလျားလျား အနိုင်ရပြီး အောင်ပွဲဆင်နိုင်လိမ့်မည်။ သမ္မာတရားကြောင့် လူများသည် ကိုယ်ပိုင်လုပ်ပိုင်ခွင့်ကို ရပြီး စာတန်၏ အထင်အမြင်မှားစေခြင်း သို့မဟုတ် ဘောင်ခတ်ခံရခြင်းတို့ မရှိတော့ဘဲ စစ်မှန်သော လူသားအသက်တာတစ်ခုအတိုင်း အသက်ရှင်နေထိုင်ရလိမ့်မည်။ “အကယ်၍ လူသားသည် မိမိအတွင်းတွင် ဖောက်ပြန်ပျက်စီးသော သဘာဝတစ်ခုရှိပြီး အချိန်မရွေး၊ နေရာမရွေး ဘုရားသခင်ကို သစ္စာဖောက်နိုင်ပါက ဘုရားသခင်က သူသည် လူသားကို စုံလင်အောင်ပြုခဲ့ပြီဟု မည်သို့ပြောနိုင်သေးသနည်း” ဟူ၍ လူအချို့က မေးကြသည်။ စုံလင်အောင်ပြုခံရခြင်းဟူသည်မှာ ဘုရားသခင်ကို ကိုးကွယ်သည့်နည်းလမ်းနှင့် ကျိုးနွံနာခံသည့်နည်းလမ်းတို့ကို နားလည်လျက် ဘုရားသခင်၏အမှုတော်ကို တွေ့ကြုံခြင်းမှတစ်ဆင့် လူများသည် ဘုရားသခင်နှင့် ၎င်းတို့၏ ကိုယ်ပိုင်သဘာဝကို သိလာခြင်းကို ဆိုလိုသည်။ ၎င်းတို့သည် ဘုရားသခင်၏အမှုတော်နှင့် လူသား၏ အလုပ်တို့အကြား ခွဲခြားသိမြင်လာနိုင်သည်၊ သန့်ရှင်းသောဝိညာဉ်တော်၏ အမှုတော်နှင့် ဆိုးယုတ်သောဝိညာဉ်များ၏ အလုပ်တို့အကြားက ကွာခြားချက်ကို သတိပြုမိနိုင်ပြီး စာတန်နှင့် မကောင်းဆိုးဝါးများက ဘုရားသခင်ကို မည်သို့ခုခံပုံ၊ ဘုရားသခင်ကို လူသားမျိုးနွယ်က မည်သို့ ခုခံပုံ၊ ဖန်ဆင်းခံတစ်ဦးဆိုသည်မှာ မည်သည်ဖြစ်သည်နှင့် ဖန်ဆင်းရှင်က မည်သူဖြစ်သည်တို့ကို နားလည်နိုင်သည်။ ၎င်းတို့ကို ဖန်ဆင်းပြီးနောက်တွင် ဘုရားသခင်၏အမှုတော်မှတစ်ဆင့် လူများထံသို့ ဤအရာများအားလုံးကို ထပ်ထည့်ခြင်းဖြစ်သည်။ ထို့ကြောင့် ဘုရားသခင်က ၎င်းတို့ထံ တစ်ခုခုကို ထည့်ပေးခဲ့ပြီး ၎င်းတို့အတွင်းတွင် တစ်ခုခုကို ပေါ်ပေါက်စေခဲ့သောကြောင့် အစပိုင်းတွင် ဖောက်ပြန်ပျက်စီးခြင်း မရှိခဲ့သောသူများထက် နောက်ဆုံး စုံလင်စေခြင်းခံရပြီးသော လူသားများသည် ပို၍မည်မည်ရရရှိပြီး ပို၍တန်ဖိုးရှိသည်။ ထိုသို့ဖြင့် ဘုရားသခင်ကို ကိုးကွယ်ခြင်း၊ ကျိုးနွံနာခံခြင်းနှင့်လည်းကောင်း၊ ကျင့်ကြံပြုမူပုံနှင့်လည်းကောင်း သက်ဆိုင်သော သမ္မာတရားကို ပို၍ကောင်းမွန်စွာ နားလည်ခြင်းအားဖြင့် နောက်ဆုံး စုံလင်စေခြင်းခံရပြီးဖြစ်သည့် လူသားများသည် အာဒံနှင့် ဧဝတို့ထက် ကိုယ်ပိုင်လုပ်ပိုင်ခွင့် ပို၍ရှိကြလေသည်။ အာဒံနှင့် ဧဝတို့သည် ဤအရာများကို မသိခဲ့ကြပေ။ မြွေ၏ စုံစမ်းသွေးဆောင်ခြင်းကို ခံရသောအခါ ကောင်းမကောင်းသိကျွမ်းရာအပင်မှ အသီးကို ၎င်းတို့ စားသုံးခဲ့ကြသည်၊ ထို့နောက်တွင် ၎င်းတို့၏ရှက်ဖွယ်ကို သိမြင်လာခဲ့သည့်တိုင် ဘုရားသခင်ကို မည်သို့ကိုးကွယ်ရမည်ကို မသိခဲ့ကြသေးပေ။ ထိုအချိန်မှစ၍ ယခုအချိန်အထိ လူသားမျိုးနွယ်သည် တိုး၍တိုး၍ ဖောက်ပြန်ပျက်စီးလာခဲ့ကြသည်။ ဤသည်မှာ အလွန်သိမ်မွေ့နက်နဲသော ကိစ္စတစ်ရပ်ဖြစ်သည်။ ယင်းကို မည်သူမျှရှင်းလင်းစွာ နားမလည်နိုင်ကြပေ။ လူ့ဇာတိ၏ ပင်ကိုစရိုက်များကြောင့် လူများသည် အချိန်မရွေး၊ နေရာမရွေး ဘုရားသခင်ကို သစ္စာဖောက်နိုင်သော်လည်း နောက်ဆုံးတွင် ဘုရားသခင်က လူသားကို စုံလင်အောင်ပြုမည်ဖြစ်ပြီး နောက်တစ်ခေတ်ထဲသို့ ၎င်းတို့ကို ခေါ်ဆောင်သွားလိမ့်မည်။ ဤသည်မှာ လူများ နားလည်ဖို့ ခက်ခဲသည့်အရာတစ်ခုဖြစ်သည်။ ယင်းကို တဖြည်းဖြည်းချင်းသာ တွေ့ကြုံနိုင်သည်။ သမ္မာတရားကို နားလည်ပြီးသည်နှင့်တစ်ပြိုင်နက် ယင်းသည် အလိုအလျောက် ရှင်းလင်းသွားလိမ့်မည်။

လူများအတွက် ဘုရားသခင်ကို သိဖို့ အဘယ်ကြောင့် လိုအပ်သနည်း။ အဘယ်ကြောင့်ဆိုသော် ဘုရားသခင်ကို သိခြင်းမရှိလျှင် လူများသည် သူ့ကို ခုခံလိမ့်မည်ဖြစ်သောကြောင့်ဖြစ်သည်။ အကယ်၍ တစ်စုံတစ်ဦးသည် သမ္မာတရားကို နားမလည်ပါက ၎င်းသည် စာတန်နှင့် ဆိုးယုတ်သောဝိညာဉ်များက အထင်အမြင်မှားစေခြင်းနှင့် အသုံးချခြင်းကို ခံရနိုင်ဖွယ်ရှိသည်။ ၎င်းသည် စာတန်၏ စွမ်းအားမှ လွတ်မြောက်ဖို့ တတ်နိုင်မည်မဟုတ်ပေ။ ထိုသို့ဖြင့် ကယ်တင်ခြင်းကို စွမ်းဆောင်ရရှိဖို့ အရေးနိမ့်ခဲ့သည်။ သို့သော် တစ်စုံတစ်ဦးသည် သမ္မာတရားကို နားလည်ပါက ဘုရားသခင်နှင့်ပတ်သက်သော စစ်မှန်သောသိမြင်မှုကို ရလိမ့်မည်၊ သူ့ကို အမှန်တကယ် ကျိုးနွံနာခံနိုင်လိမ့်မည်၊ သူ့ကို သက်သေခံနိုင်လိမ့်မည်၊ ပြီးလျှင် သူက ရယူခြင်းကို ခံရလိမ့်မည်။ ထိုကဲ့သို့သောလူတစ်ယောက်ကို စာတန်က အထင်အမြင်လွဲမှားအောင် လုပ်လိုလျှင်ပင် လုပ်နိုင်မည် မဟုတ်ချေ၊ သို့မဟုတ် အသုံးချနိုင်မည် မဟုတ်ချေ။ ဤသည်မှာ စာတန်၏ စွမ်းအားမှ အပြည့်အဝ လွတ်မြောက်ခြင်းနှင့် ကယ်တင်ခြင်းကို စွမ်းဆောင်ရရှိပြီးဖြစ်ခြင်းတို့ကို ဆိုလိုသည့်အရာဖြစ်သည်။ ထို့အပြင် ဤသည်မှာ ဘုရားသခင်ကို လူများ သိရှိဖို့အတွက် ဘုရားခင်၏ သတ်မှတ်ချက်နှင့်ပတ်သက်သော အရေးပါမှုဖြစ်သည်။ အကယ်၍ သင်သည် ဘုရားသခင်ကို သိပါက သူ၏ကယ်တင်ခြင်းကို သင်ခံရနိုင်သည်။ ဘုရားသခင်ကို သိခြင်းမရှိဘဲ သင်သည် ကယ်တင်ခြင်းမခံရနိုင်ပေ။ အကယ်၍ တစ်စုံတစ်ဦးသည် ဘုရားသခင်၏ရည်ရွယ်ချက်များကို နားမလည်ဘဲ သမ္မာတရားကိုလည်း လုံးဝ မလိုက်စားပါက ထိုအစား ၎င်း၏စာတန်ဆန်သော စိတ်သဘောထားများအတိုင်း နေထိုင်ပြီး သမ္မာတရားအချို့ကို နားလည်လျှင်ပင် ယင်းကို လက်တွေ့မလုပ်ဆောင်ဘဲ သိလျက်နှင့် ပြစ်မှားနေဆဲဖြစ်ပါက ၎င်းကို အမှန်တကယ် ကယ်တင်၍ မရတော့ပေ။ ယခုတွင် သင်တို့သည် မည်သည့်အခြေအနေတွင် ရှိနေသနည်း။ ယခု သင်တို့တွင် မျှော်လင့်ချက်ရေးရေးမျှ ရှိနေသေးသရွေ့ သင်၏အတိတ်မှပြစ်မှားခြင်းများကို ဘုရားသခင်က အောက်မေ့သည်ဖြစ်စေ၊ မအောက်မေ့သည်ဖြစ်စေ သင်သည် မည်သည့်စိတ်နေစိတ်ထားမျိုးကို ထိန်းသိမ်းသင့်သနည်း။ “ကျွန်ုပ်၏စိတ်သဘောထားထဲတွင် အပြောင်းအလဲတစ်ခုကို ကျွန်ုပ် လိုက်စားရမည်၊ ဘုရားသခင်ကို သိကျွမ်းခြင်းကို လိုက်စားရမည်၊ စာတန်က အရူးလုပ်ခြင်းကို မည်သည့်အခါမျှ မခံတော့ပေ၊ ပြီးလျှင် ဘုရားသခင်၏နာမတော်ကို အရှက်ရစေမည့်တစ်ခုခုကို မည်သည့်အခါမျှ မလုပ်တော့ပြီ” ဟူ၍ ဖြစ်သည်။ ယခုခေတ်လူများသည် အလွန်နက်နဲစွာ ဖောက်ပြန်ပျက်စီးပြီး မည်သည့်တန်ဖိုးမျှ မရှိချေ။ ၎င်းတို့ ကယ်တင်ခံရနိုင်ခြင်း ရှိမရှိနှင့် ၎င်းတို့တွင် မျှော်လင့်ချက်တစ်စုံတစ်ရာ ရှိမရှိတို့အပေါ် မည်သည့်အဓိကအပိုင်းများက ဆုံးဖြတ်ပေးသနည်း။ အဓိကသော့ချက်မှာ တရားဒေသနာတစ်ခုကို နားထောင်ပြီးသည့်နောက်တွင် သမ္မာတရားကို သင် သဘောပေါက်နားလည်နိုင်ခြင်း ရှိမရှိ၊ သမ္မာတရားကို သင်လက်တွေ့လုပ်ဆောင်နိုင်ခြင်း ရှိမရှိ၊ သင်ပြောင်းလဲနိုင်ခြင်း ရှိမရှိ တို့ဖြစ်ကြသည်။ ဤအရာများမှာ အဓိကအပိုင်းများဖြစ်ကြသည်။ အကယ်၍ သင်သည် နောင်တကြီးစွာရခြင်းကိုသာ ခံစားရပါက၊ ထို့အပြင် ကိစ္စများကို လုပ်ဆောင်ခြင်းနှင့်ပတ်သက်သည့်အခါ ယခင်နည်းလမ်းဟောင်းများအတိုင်း သင်လုပ်ဆောင်လိုသည့်အရာ မှန်သမျှကိုသာ လုပ်ဆောင်ပါက၊ သမ္မာတရားကို မရှာဖွေရုံသာမက အမြင်ဟောင်းများ၊ နည်းစနစ်များနှင့် စည်းမျဉ်းစည်းကမ်းများကိုသာ တွယ်ဖက်ထားဆဲဖြစ်ပါက၊ ထို့အပြင် သင့်ကိုယ်သင် ပြန်လည်သုံးသပ်ခြင်းနှင့် သိရှိရန် ကြိုးစားခြင်း မရှိသည်သာမက ထိုအစား ပို၍ပို၍ဆိုးဝါးလာပြီး သင်၏ လမ်းဟောင်းကို မရမက လျှောက်နေဆဲဖြစ်ပါက သင်သည် မျှော်လင့်ချက်မရှိဘဲ ဖြစ်လိမ့်မည်ဖြစ်ပြီး မျှော်လင့်ချက်မဲ့သဖြင့် သင့်ကို ဆုံးရှုံးမှုအဖြစ် သတ်မှတ်သင့်သည်။ ဘုရားသခင်နှင့်ပတ်သက်၍ ပို၍ကြီးမားသော သိမြင်မှုကြောင့်လည်းကောင်း၊ သင့်ကိုယ်သင် ပို၍နက်နက်နဲနဲ သိမြင်မှုကြောင့်လည်းကောင်း သင်သည် မကောင်းမှုကျူးလွန်ခြင်းနှင့် အပြစ်ပြုခြင်းတို့မှ သင့်ကိုယ်သင် ပို၍ကောင်းစွာ တားဆီးနိုင်လာလိမ့်မည်။ သင်၏သဘာဝနှင့်ပတ်သက်သော ပိုမိုသိမြင်မှုမှတစ်ဆင့် သင့်ကိုယ်သင် ပို၍ကောင်းစွာ ကာကွယ်နိုင်လာလေဖြစ်ပြီး သင်၏အတွေ့အကြုံများနှင့် သင်ခန်းစာများကို ပေါင်းရုံးသုံးသပ်ပြီးသည့်နောက်တွင် နောက်ထပ် ကျရှုံးတော့မည်မဟုတ်ပေ။ အကယ်စင်စစ်တွင်မူ လူတိုင်းတွင် အမည်းစက်အချို့ရှိကြသည်။ ဘုရားသခင်က ၎င်းတို့အား ဤအရာများအတွက် ဗွေမယူခြင်းသာဖြစ်လေသည်။ လူတိုင်းတွင် ထိုအရာများရှိကြသည်မှာ အတိုင်းအတာ အနည်းနှင့်အများသာ ကွာခြားသည်။ အချို့ကို ပြော၍ရနိုင်ပြီး အခြားမှာ ပြော၍မရနိုင်ပေ။ လူအချို့သည် အခြားလူများသိသည့် ကိစ္စများကို လုပ်ကြသည်၊ အချို့လူများကမူ မည်သူမျှ မသိအောင် ကိစ္စများကို လုပ်ကြသည်။ လူတိုင်း၌ ၎င်းတို့အထဲတွင် ပြစ်မှားမှုများနှင့် အမည်းစက်များရှိကြသည်။ ပြီးလျှင် မာနထောင်လွှားခြင်း သို့မဟုတ် မိမိကိုယ်ကို မှန်ကန်သည်ဟု ယူမှတ်ခြင်းတို့ကဲ့သို့သော အချို့သောဖောက်ပြန်ပျက်စီးသည့် စိတ်သဘောထားများကို ၎င်းတို့အားလုံး ထုတ်ဖော်ကြသည်။ ၎င်းတို့အားလုံးတွင် ၎င်းတို့၏ အလုပ်၌ လမ်းလွဲမှုအချို့ ရှိကြသည် သို့မဟုတ် ရံဖန်ရံခါ ပုန်ကန်ဖူးကြသည်။ ဤသည်တို့အားလုံးမှာ နားလည်၍ရနိုင်သည်။ ယင်းတို့မှာ ဖောက်ပြန်ပျက်စီးသော လူသားမျိုးနွယ်အတွက် ရှောင်လွှဲ၍မရချေ။ သို့သော် လူများ သမ္မာတရားကို နားလည်သည်နှင့်တစ်ပြိုင်နက် ဤအရာကို ၎င်းတို့ ရှောင်လွှဲနိုင်သင့်ပြီး နောက်ထပ်မပြစ်မှားသင့်တော့ချေ။ ပြီးလျှင် ယခင်က ကျူးလွန်ခဲ့မိသည့် ပြစ်မှားမှုများကြောင့် သောကရောက်နေဖို့ မလိုအပ်တော့ပေ။ အဓိကအချက်မှာ လူများ နောင်တရခြင်း ရှိမရှိ၊ ၎င်းတို့အမှန်တကယ် ပြောင်းလဲပြီးခြင်း ရှိမရှိ ဖြစ်သည်။ နောင်တရပြီး ပြောင်းလဲသူများသည် ကယ်တင်ခြင်း ခံရသူများဖြစ်သော်လည်း တစ်လျှောက်လုံး နောင်တ မရသေးသကဲ့သို့ မပြောင်းလဲသေးသည့်သူများသည် ဖယ်ရှားရှင်းလင်းခြင်းခံရမည် ဖြစ်သည်။ သမ္မာတရားကို နားလည်ပြီးသည့်နောက် လူများသည် သိလျက်နှင့် ပြစ်မှားဆဲဖြစ်ပါက ၎င်းတို့သည် စွဲစွဲမြဲမြဲ နောင်တမရဘဲရှိကာ မည်မျှပြုပြင်ခြင်းခံရပါစေ သို့မဟုတ် သတိပေးခံရပါစေ လုံးလုံး မပြောင်းလဲပါက ထိုသို့သော လူများသည် ကယ်တင်၍မရနိုင်ပေ။