အနန္တတန်ခိုးရှင် ဘုရားသခင် အသင်းတော် အပလီကေးရှင်း

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နှုတ်ကပတ်တော်သည် လူ့ဇာတိ၌ ပေါ်လာ၏

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

သင်တို့သည် ရာထူးဂုဏ်ဒြပ်ဆိုင်ရာ ကောင်းချီးများကို ဘေးဖယ်ပြီး လူသားတို့ကို ကယ်တင်ရန်ဖြစ်သော ဘုရားသခင်၏ အလိုတော်ကို နားလည်သင့်၏

လူသားတို့အဖို့ မောဘ၏သားစဉ်မြေးဆက်များကို စုံလင်စေရန် မဖြစ်နိုင်ပေ၊ ထို့ပြင် ထိုသို့စုံလင်အောင်ပြုပေးခြင်းကို ခံရန်လည်း အရည်အချင်းမမီချေ။ သို့သော်ငြားလည်း ဒါဝိဒ်၏သားများမှာမူ ဧကန်မုချပင် မျှော်လင့်ချက်ရှိကြပြီး စုံလင်အောင်ပြုပေးခြင်းကို ခံရရန်လည်း ဧကန်မုချပင် တတ်စွမ်းနိုင်ကြသည်။ တစ်စုံတစ်ဦးသည် မောဘ၏သားစဉ်မြေးဆက်ဖြစ်သည်ဆိုလျှင် ထိုသူသည် စုံလင်စေခြင်းကို မခံရနိုင်ချေ။ သင်တို့အကြားတွင် လုပ်ခဲ့ပြီးသောအလုပ်၏ အရေးပါမှုကို ယနေ့တိုင် သင်တို့မသိကြသေး၊ ယခုလက်ရှိအဆင့်အထိ သင်တို့၏စိတ်နှလုံးများထဲတွင် သင်တို့၏အနာဂတ်မျှော်လင့်ချက်များကို ဆုပ်ကိုင်ထားကြဆဲဖြစ်ပြီး ၎င်းတို့ကို စွန့်လွှတ်ရန် မလိုလားကြ။ ဘုရားသခင်သည် အမှုပြုရန်အတွက် မထိုက်တန်ဆုံးသော လူတစ်စုဖြစ်သည့် သင်တို့ကို ယနေ့ရွေးချယ်ထားခြင်းက အဘယ်ကြောင့်ဆိုသည်ကို မည်သူကမျှ အရေးမစိုက်ကြ၊ ထိုသို့ဆိုလျှင် ဤအမှုကို မှားယွင်းလုပ်ဆောင်ခဲ့ခြင်း ဖြစ်သလော။ ဤအမှုသည် တဒင်္ဂသတိမမူမိခြင်းပင်လော။ သင်တို့သည် မောဘ၏သားများဖြစ်သည်ကို ကြာမြင့်စွာကတည်းကပင် သိနှင့်ထားသော်လည်း သင်တို့အလယ်တွင် အမှုပြုရန်အတွက် ဘုရားသခင်သည် အဘယ်ကြောင့် အပ်ကျမပ်ကျကြွလာရသနည်း။ ဤအကြောင်းကို မည်သည့်အခါကမျှ သင်တို့မတွေးဖူးကြသလော။ ဘုရားသခင်သည် သူ့အမှုကို လုပ်ဆောင်သည့်အခါ ဤအကြောင်းကို မည်သည့်အခါကမျှ ထည့်မတွက်လေသလော။ ဤကဲ့သို့ လျှပ်တစ်ပြက်ဆုံးဖြစ်ချက်မျိုးကို သူချလေသလော။ သင်တို့သည် မောဘ၏သားစဉ်မြေးဆက်များ ဖြစ်ကြသည်ကို အစကတည်းကပင် သူမသိခဲ့လေသလော။ ဤအရာများကို ထည့်သွင်းစဉ်းစားရန် သင်တို့မသိကြသလော။ သင်တို့၏ အယူအဆများ ဘယ်ရောက်သွားကုန်သနည်း။ သင်တို့၏ ကျန်းခံ့လှသော အတွေးအခေါ်သည် ပတ်ဝန်းကျင်နှင့် အံချော်လာနေသလော။ သင်တို့၏လိမ္မာမှုနှင့် ဉာဏ်ပညာတို့ ဘယ်ရောက်သွားကုန်သနည်း။ သင်တို့အနေဖြင့် ထိုကဲ့သို့သော အသေးအဖွဲကိစ္စကို အရေးမစိုက်ကြခြင်းမှာ သင်တို့၌ သဘောထားကြီးသည့်ဟန်အမူအရာ ရှိသောကြောင့်ပေလော။ သင်တို့၏ အနာဂတ် မျှော်လင့်ချက်များနှင့် သင်တို့၏ ကံကြမ္မာတို့ကဲ့သို့ အရာများနှင့်ပတ်သက်လျှင် သင်တို့၏စိတ်သည် အကင်းအပါးဆုံးဖြစ်၏၊ သို့သော်လည်း အခြားအရာများနှင့်ပတ်သက်လျှင်မူ သင်တို့၏စိတ်သည် ထုံထိုင်းပြီး ဉာဏ်တုံးကာ လုံးလုံးလျားလျားပင် မသိနားမလည်ဖြစ်နေ၏။ အဘယ်အရာကိုများ သင်တို့ယုံကြည်ကြသနည်း။ သင်တို့၏အနာဂတ်မျှော်လင့်ချက်များကိုလော။ သို့မဟုတ် ဘုရားသခင်ကိုလော။ သင်၏ကောင်းမွန်သော ခရီးပန်းတိုင်ကိုသာ သင်ယုံကြည်နေသည် မဟုတ်လော။ သင်၏အနာဂတ်မျှော်လင့်ချက်များကိုသာ ယုံကြည်နေသည် မဟုတ်လော။ အသက်လမ်းအကြောင်း မည်မျှလောက်ကို သင်ယခုနားလည်သနည်း။ မည်မျှလောက်ကို သင်ကြိုးပမ်းရရှိထားသနည်း။ မောဘ၏သားစဉ်မြေးဆက်များအပေါ် ယခုပြုသော အမှုသည် သင်တို့ကို အရှက်ခွဲရန် ပြုခြင်းဖြစ်သည်ဟု သင်ထင်သလော။ သင်တို့၏ အကျည်းတန်ခြင်းကို ဖော်ထုတ်ရန် ထိုအမှုကို ရည်ရွယ်ချက်ရှိရှိ လုပ်ဆောင်ခြင်း ဖြစ်သလော။ ပြစ်တင်ဆုံးမခြင်းကို သင်တို့လက်ခံရန်နှင့် ထို့နောက်တွင် မီးအိုင်အတွင်း သင်တို့ကိုပစ်ချရန် ထိုအမှုကို ရည်ရွယ်ချက်ရှိရှိ လုပ်ဆောင်ခြင်း ဖြစ်သလော။ သင်တို့သည် ဖျက်ဆီးခြင်းကို ခံရမည်၊ သို့မဟုတ် ထာဝရပြစ်ဒဏ်ကို ခံစားရမည်ဟု ငါပြောဖူးရန်ဝေးစွ၊ သင်တို့တွင် အနာဂတ်မရှိဟုပင် မည်သည့်အခါကမျှ ငါမပြောခဲ့၊ ထိုကဲ့သို့သောအရာမျိုးကို လူသိရှင်ကြား ငါကြေညာထားသလော။ သင်တို့၌ မျှော်လင့်ချက် ကင်းမဲ့နေသည်ဟု သင်ပြောသော်လည်း ယင်းမှာ သင့်ကိုယ်ပိုင်သုံးသပ်ချက်ပင်ဖြစ်သည် မဟုတ်လော။ ယင်းမှာ သင့်ကိုယ်ပိုင်စိတ်နေစိတ်ထား၏ အကျိုးသက်ရောက်မှုပင်ဖြစ်သည် မဟုတ်လော။ သင့်ကိုယ်ပိုင်သုံးသပ်ချက်သည် အတည်ဖြစ်သလော။ အကယ်၍ သင်သည် မင်္ဂလာမရှိဟု ငါဆိုလျှင် သင်တို့သည် မလွဲမချွတ်ပင် ပျက်စီးယိုယွင်းခြင်းကို ခံရမည့်သူ ဖြစ်လိမ့်မည်၊ ထို့ပြင် အကယ်၍ သင်သည် မင်္ဂလာရှိ၏ဟု ငါဆိုလျှင် သင်သည် ဧကန်မုချပင် ဖျက်ဆီးခြင်း ခံရလိမ့်မည်မဟုတ်။ သင်သည် မောဘ၏သားစဉ်မြေးဆက်ဖြစ်သည်ဟုသာ ငါယခုပြောနေခြင်းဖြစ်သည်။ သင်သည် ဖျက်ဆီးခြင်းကို ခံရလိမ့်မည်ဟု ငါမပြောခဲ့။ မောဘ၏သားစဉ်မြေးဆက်များသည် ကျိန်ဆဲခံထားရသူများဖြစ်နေခြင်းသာဖြစ်ပြီး ဖောက်ပြန်သော လူသားမျိုးနွယ်ထဲမှ တစ်မျိုးဖြစ်နေခြင်းသာဖြစ်သည်။ အပြစ်အကြောင်းကို ယခင်က ပြောဆိုထားခြင်းဖြစ်သည်၊ သင်တို့အားလုံး အပြစ်ရှိသူများ ဖြစ်ကြသည်မဟုတ်လော။ အပြစ်သားများအားလုံးသည် စာတန်၏ ဖောက်ပြန်စေခြင်းကို ခံထားရသည် မဟုတ်လော။ အပြစ်သားများအားလုံးသည် ဘုရားသခင်ကို အာခံပြီး ပုန်ကန်ကြသည် မဟုတ်လော။ ဘုရားသခင်ကို အာခံကြသူများသည် ကျိန်ဆဲခြင်းကို ခံကြရသူများဖြစ်သည် မဟုတ်လော။ အပြစ်သားများအားလုံးကို ဖျက်ဆီးပစ်ရမည် မဟုတ်လော။ ထိုသို့ဆိုလျှင် အသွေးအသားနှင့်တည်ဆောက်ထားသော လူများအတွင်းမှ အဘယ်သူကို ကယ်တင်နိုင်မည်နည်း။ သင်တို့သည် ယနေ့တိုင်အောင် မည်ကဲ့သို့လျှင် အသက်ဆက်လာနိုင်ကြသနည်း။ သင်တို့သည် မောဘ၏သားစဉ်မြေးဆက်များ ဖြစ်ကြသောကြောင့် အပျက်သဘောဆောင်နေကြသည်၊ ထို့အပြင် သင်တို့သည် အပြစ်သားများထဲတွင် မပါဝင်သလော။ သင်တို့သည် ယနေ့အထိ အဘယ်ကဲ့သို့ ဆက်လက်တည်ရှိနေကြသနည်း။ စုံလင်ခြင်းအကြောင်းပြောလျှင် သင်တို့ပျော်ရွှင်လာ၏။ ကြီးမားသော အတိဒုက္ခကြီးကို သင်တို့ကြုံတွေ့ရမည်ဖြစ်ကြောင်း သင်တို့ကြားခဲ့ကြသည်၊ သို့သော်လည်း ထိုအရာက မင်္ဂလာပိုရှိသည်ဟု သင်တို့ယူဆကြသည်။ အတိဒုက္ခကြီးအားဖြင့် အောင်မြင်သောသူတစ်ဦး ဖြစ်လာနိုင်မည်ဟု သင်တို့ထင်ကြပြီး ၎င်းမှာ ဘုရားသခင်၏ ကြီးမားသော ကောင်းချီးမင်္ဂလာနှင့် သင်တို့ကို ကြီးစွာချီးမြှောက်ခြင်း ဖြစ်သည်ဟူ၍ပင် သာ၍ထင်မြင်ကြ၏။ မောဘအကြောင်း ထုတ်ဖော်ပြောဆိုသောအခါ သင်တို့အကြား အုတ်အော်သောင်းတင်း ဖြစ်ကြ၏။ လူကြီးများရော ကလေးများကပါ ပြောမပြနိုင်လောက်သည့် ဝမ်းနည်းမှုကို ခံစားကြရပြီး သင်တို့၏နှလုံးသားများသည် သောကနှင့်ပြည့်ကြ၏၊ သင်တို့အားလုံးသည် မွေးဖွားလာခဲ့သည်ကိုပင် နောင်တရကြတော့သည်။ အမှု၏ဤအဆင့်ကို မောဘ၏သားစဉ်မြေးဆက်များအပေါ် လုပ်ဆောင်ရသည့် အကြောင်းရင်း၏ အရေးပါပုံကို သင်တို့နားမလည်ကြပေ၊ ရာထူးအဆင့်အတန်းမြင့်မြင့်မားမားကို ရရှိဖို့ ကြိုးပမ်းရန်သာ သင်တို့သိကြသည်၊ ထို့ပြင် သင်တို့တွင် မျှော်လင့်ချက်မရှိဟု ထင်သောအခါ သင်တို့သည် သွေဖည်ဖောက်ပြန်ကြသည်။ စုံလင်ခြင်းနှင့် အနာဂတ်မျှော်လင့်ချက်တို့အကြောင်း ပြောသောအခါ သင်တို့ပျော်ရွှင်ကြ၏။ ဘုရားသခင်အပေါ် သင်တို့၏ယုံကြည်မှုသည် ကောင်းချီးမင်္ဂလာများ ရရှိရန်ဖြစ်သည်၊ ထိုသို့အားဖြင့် ကောင်းသော ခရီးဆုံးပန်းတိုင်ကို သင်တို့ရရှိနိုင်ရန်ဖြစ်သည်။ ယခုအခါ လူအချို့က မိမိတို့၏အဆင့်အတန်းအတွက် စိုးရိမ်ကြောင့်ကြနေကြသည်။ သူတို့သည် အဖိုးမထိုက်သောကြောင့်၊ သူတို့၏ နိမ့်ကျသော အဆင့်အတန်းကြောင့် စုံလင်စေခြင်းကို ခံရရန် ကြိုးစားလိုစိတ် ၎င်းတို့တွင်မရှိ။ ဘုရားသခင်သည် ဦးစွာ စုံလင်မှုအကြောင်းကို ပြောခဲ့သည်၊ ထို့နောက်တွင် မောဘ၏သားစဉ်မျိုးဆက်များအကြောင်း ထုတ်ဖော်ပြောဆိုခဲ့သည်၊ ထို့ကြောင့် လူတို့သည် ယခင်က သူတို့လိုက်လျှောက်ခဲ့သော စုံလင်စေခြင်းလမ်းကို အချည်းနှီး ဖြစ်စေခဲ့ကြသည်။ ယင်းသို့ဖြစ်ရသည်မှာ ဤအမှု၏ အရေးပါမှုကို မည်သည့်အခါကမျှ သင်တို့မသိခဲ့သောကြောင့်သော်လည်းကောင်း၊ ထိုအမှု၏အရေးပါမှုကို သင်တို့အရေးမစိုက်သောကြောင့်သော်လည်းကောင်း ဖြစ်သည်။ သင်တို့၏ဝိညာဉ်အသက်တာမှာ အလွန်သေးငယ်လှ၍ သင်တို့သည် အနည်းငယ်မျှလောက်သော အနှောင့်အယှက်ကိုပင် သည်းမခံနိုင်ကြ။ သင်တို့၏အဆင့်အတန်း အလွန်နိမ့်သည်ကို သင်တို့သိမြင်သည့်အခါ သင်တို့သည် အပျက်သဘောဆောင်လာကြပြီး ဆက်လက်ရှာဖွေဖို့ရန် သင်တို့၌ ယုံကြည်ချက်မရှိကြ။ ကျေးဇူးတော်ကို ရရှိခြင်းနှင့် ငြိမ်သက်ခြင်းကို မွေ့လျော်ခံစားရခြင်းတို့ကို ဘုရားသခင်အား ယုံကြည်ခြင်း၏ ပြယုဂ်များဖြစ်သည်ဟုသာ လူတို့က မှတ်ယူကြသည်၊ ထို့ပြင် ကောင်းချီးမင်္ဂလာများကို ရှာဖွေခြင်းအား ဘုရားသခင်ကို ယုံကြည်ခြင်း၏ အခြေခံအဖြစ် မှတ်ယူကြသည်။ လူအနည်းငယ်သာလျှင် ဘုရားသခင်ကို သိကျွမ်းရန် ကြိုးစားကြသည်၊ သို့မဟုတ် မိမိတို့၏စိတ်သဘောထားအတွင်း၌ အပြောင်းအလဲဖြစ်ရန် ကြိုးစားကြသည်။ ဘုရားသခင်ကို လူတို့ယုံကြည်ရာ၌ ဘုရားသခင်က ၎င်းတို့ကို သင့်တော်သည့် ခရီးပန်းတိုင်ကိုပေးစေရန်၊ နေအောက်ရှိ ကျေးဇူးတော်အပေါင်းကို ၎င်းတို့အား ပေးစေရန်၊ ဘုရားသခင်ကို ၎င်းတို့၏အစေခံဖြစ်အောင်လုပ်ရန်၊ ၎င်းတို့နှင့် ငြိမ်းချမ်းပြီး ရင်းနှီးသော ဆက်ဆံရေးကို ဘုရားသခင်ထိန်းသိမ်းထားစေရန်နှင့် ၎င်းတို့အကြားတွင် ပဋိပက္ခတစ်စုံတစ်ရာ မည်သည့်အခါမျှ မပေါ်ပေါက်စေရန် သူတို့ကြိုးစားကြသည်။ တစ်နည်းအားဖြင့်ဆိုသော် ဘုရားသခင်ကို ၎င်းတို့၏ယုံကြည်ခြင်းသည် “သင်တို့ဆုတောင်းချက်အားလုံးကို ငါနားညောင်းမည်” ဟူ၍ သမ္မာကျမ်းစာထဲ၌ ပြောထားသည့်အတိုင်း ၎င်းတို့၏ တောင်းဆိုချက်များအားလုံးကို ဖြည့်ဆည်းပေးရန်၊ ၎င်းတို့ဆုတောင်းသမျှကို အပ်နှင်းပေးရန် ဘုရားသခင်ကတိပေးခြင်းငှာ သူတို့တောင်းဆိုကြသည်။ ဘုရားသခင်သည် အချိန်မရွေး၊ နေရာမရွေး၌ လူတို့နှင့် ကောင်းမွန်သော ဆက်ဆံရေးကို ထိန်းသိမ်းထားသည့် အမြဲတမ်း ကြင်နာတတ်သော ကယ်တင်ရှင်ယေရှုဖြစ်သည့်အားလျော်စွာ ဘုရားသခင်အနေဖြင့် မည်သူတစ်ဦးတစ်ယောက်ကိုမျှ တရားမစီရင်ဖို့၊ သို့မဟုတ် ကိုင်တွယ်ဆုံးမခြင်း မပြုဖို့ သူတို့တောင်းဆိုကြသည်။ ၎င်းတို့ယုံကြည်ပုံသည် ဤကဲ့သို့ဖြစ်၏- ၎င်းတို့သည် ဘုရားသခင်ထံ အရှက်မရှိ အမြဲတမ်းတောင်းဆိုကြပြီး ၎င်းတို့ပုန်ကန်သည်ဖြစ်စေ၊ နာခံသည်ဖြစ်စေ ဘုရားသခင်က ကျိုးကြောင်းမကြည့်ဘဲ အရာရာကို ၎င်းတို့အား ပေးသနားသည်။ ထိုသူတို့သည် “အကြွေး” ပြန်ဆပ်ပေးရန် ဘုရားသခင်ကို အဆက်မပြတ် တောင်းဆိုကြပြီး ဘုရားသခင်က ၎င်းတို့ထံမှ တစ်စုံတစ်ရာကို ရယူထားခြင်း ရှိသည်ဖြစ်စေ၊ မရှိသည်ဖြစ်စေ အတိုက်အခံပြုခြင်း အလျှင်းမရှိဘဲ “သူတင်နေသော အကြွေးကိုဆပ်” ရမည်၊ နှစ်ဆ “ပြန်ဆပ်ပေး” ရမည်ဟု အဆက်မပြတ် တောင်းဆိုကြသည်။ ဘုရားသခင်သည် သူတို့ပြုသမျှ နုနိုင်ရုံသာရှိပြီး နှစ်ပေါင်းများစွာ ဖုံးကွယ်နေသည့် သူ၏ဉာဏ်ပညာနှင့် ဖြောင့်မတ်သော စိတ်သဘောထားတို့ကို သူတို့၏ခွင့်ပြုချက်မပါဘဲ သူ့စိတ်ကြိုက် ဖော်ထုတ်ပြနိုင်ရန်ဝေးစွ၊ လူတို့ကို ထင်ရာမြင်ရာ စီစဉ်ညွှန်ကြားခြင်းပင် သူမပြုနိုင်။ ဘုရားသခင်ထံ သူတို့၏အပြစ်များကို ဝန်ခံရုံသက်သက် ဝန်ခံကြပြီး ဘုရားသခင်ကလည်း ထိုအပြစ်များကို ဖြေပေးကာ စိတ်ကုန်ငြီးငွေ့သွားခြင်း မရှိဘဲ ထိုကဲ့သို့ အမြဲဖြစ်နေသည်။ သမ္မာကျမ်းစာထဲ၌ ဘုရားသခင်သည် သူတစ်ပါးကို စေစားခြင်းငှာ လာခြင်းမဟုတ်ကြောင်း၊ သူတစ်ပါး၏အစေကို ခံခြင်းငှာလာကြောင်း၊ ထို့ပြင် လူသား၏အစေခံဖြစ်ရန် လာခဲ့ကြောင်း မှတ်သားထားသည်နှင့်အညီ လူတို့သည် ဘုရားသခင်ကို အမိန့်ပေး၍ ဘုရားသခင်က နာခံရုံသာဖြစ်သည်။ သင်တို့သည် ထိုကဲ့သို့ပင် အမြဲတမ်း ယုံကြည်ခဲ့သည်မဟုတ်လော။ သင်တို့သည် ဘုရားသခင်ထံမှ မည်သည့်အရာကိုမျှ မရနိုင်သည့်အခါ ထွက်ပြေးလိုကြသည်။ တစ်ခုခုနားမလည်သည့်အခါ သင်တို့သည် အလွန်မကျေမချမ်းဖြစ်ကြ၏၊ ထို့ပြင် ဆဲရေးတိုင်းထွာခြင်းမျိုးစုံကို သံကုန်ဟစ်သည်အထိပင် လုပ်လာကြသည်။ ဘုရားသခင်၏ ဉာဏ်ပညာနှင့် အံသြဖွယ်ရာကို ဘုရားသခင်ကိုယ်တိုင် အပြည့်အဝ ထုတ်ဖော်ပြသရန် သင်တို့သက်သက်ခွင့်မပြု၊ ထိုအစား သင်တို့သည် ယာယီငြိမ်းအေးချမ်းသာခြင်းနှင့် သက်သောင့်သက်သာရှိခြင်းတို့ကို ခံစားရရန်သာ လိုချင်ကြသည်။ ယခုထိတိုင်အောင်ပင် ဘုရားသခင်အပေါ် သင်တို့၏ယုံကြည်ခြင်းသဘောထားမှာ ယခင်အတိုင်း အမြင်ဟောင်းများပင် ဖြစ်သည်။ အကယ်၍ ဘုရားသခင်သည် ဘုန်းအာနုဘော်ကို အနည်းငယ်ပြလိုက်ပါက သင်တို့သည် စိတ်မချမ်းမမြေ့ဖြစ်ကြ၏၊ သင်တို့၏ဝိညာဉ်အသက်တာက အဘယ်ကဲ့သို့ရှိသည်ကို ယခု အတိအကျ သိမြင်ကြပြီလော။ သင်တို့၏အမြင်ဟောင်းများ မပြောင်းလဲဘဲနှင့် သင်တို့သည် ဘုရားသခင်အပေါ် သစ္စာစောင့်သိသည်ဟု မထင်လိုက်နှင့်။ သင့်အပေါ်သို့ တစ်စုံတစ်ခု မကျရောက်မချင်း အရာရာသည် အထစ်အငေါ့မရှိ ဖြောင့်ဖြောင့်ဖြူးဖြူးဖြစ်သည်ဟု သင်မှတ်ထင်ပြီး ဘုရားသခင်ကို အခေါင်အဖျားတိုင်အောင် ချစ်သည်။ သို့သော် အသေးအမွှားတစ်စုံတစ်ရာ သင့်အပေါ်ကျရောက်ပြီဆိုသည်နှင့် သင်သည် မရဏနိုင်ငံသို့ သက်ဆင်းလေတော့သည်။ ဤသည်မှာ ဘုရားသခင်အပေါ် သင်၏သစ္စာစောင့်သိခြင်းပင်လော။

အကယ်၍ သိမ်းပိုက်ခြင်းအမှု၏ နောက်ဆုံးအဆင့်ကို ဣသရေလပြည်တွင် စတင်လုပ်ဆောင်ပါက သိမ်းပိုက်ခြင်းအမှုမှာ အဓိပ္ပာယ်ရှိမည် မဟုတ်ချေ။ ဤတိုင်းပြည်တွင် လုပ်ဆောင်ပြီးစီးမှ၊ သင်တို့အပေါ်တွင် လုပ်ဆောင်ပြီးစီးမှ ထိုအမှုသည် အဓိပ္ပာယ်အရှိဆုံးဖြစ်၏။ သင်တို့သည် အနိမ့်ကျဆုံးသောလူများ၊ အဆင့်အတန်း အနိမ့်ဆုံးသောလူများ ဖြစ်ကြသည်။ ဤလူမှုအသိုင်းအဝိုင်းတွင် သင်တို့သည် အနိမ့်ကျဆုံးသောလူများဖြစ်ကြပြီး ကနဦးအစတွင် ဘုရားသခင်ကို အသိအမှတ်ပြုမှု အနည်းဆုံးသောသူများ ဖြစ်ကြ၏။ သင်တို့သည် ဘုရားသခင်ထံမှ အဝေးဆုံးကို ထွက်သွားသောသူများဖြစ်ကြပြီး အဆိုးဝါးဆုံး ထိခိုက်ခံစားထားရသူများဖြစ်ကြ၏။ အမှု၏ယခုအဆင့်မှာ သိမ်းပိုက်ခြင်းအတွက်သာ ဖြစ်သောကြောင့် ရှေ့လာမည့်အရာကို မျက်မြင်သက်သေခံရန်အလို့ငှာ သင်တို့ကို ရွေးချယ်ရန်မှာ အကောင်းဆုံးဖြစ်သည် မဟုတ်လော။ အကယ်၍ သိမ်းပိုက်ခြင်းအမှု၏ ပထမအဆင့်သည် သင်တို့အပေါ်တွင် ပြုလုပ်ရန် မဟုတ်ပါက ရှေ့လာမည့် သိမ်းပိုက်ခြင်းအမှုကို တိုးတက်စေရန်မှာ ခက်ခဲလာပေလိမ့်မည်၊ အဘယ်ကြောင့်ဆိုသော် နောက်တွင်လိုက်လာမည့် သိမ်းပိုက်ခြင်းအမှုသည် ယနေ့ပြုလုပ်သည့် ဤအမှု၏ အချက်အလက်ပေါ်တွင် အခြေခံ၍ ရလဒ်များထွက်လာမည် ဖြစ်သောကြောင့်ဖြစ်သည်။ ယနေ့ကာလ၏ သိမ်းပိုက်ခြင်းအမှုသည် သိမ်းပိုက်ခြင်းအမှုတစ်ရပ်လုံး၏ အစသာဖြစ်သည်။ သင်တို့သည် သိမ်းပိုက်ခြင်းခံရမည့် ပထမအသုတ်ဖြစ်သည်၊ သိမ်းပိုက်ခြင်းခံရမည့် လူသားမျိုးနွယ်အားလုံးတို့အတွက် သင်တို့သည် ကိုယ်စားလှယ်များ ဖြစ်ကြ၏။ နားလည်မှု အမှန်တကယ်ရှိသောသူ တစ်စုံတစ်ယောက်ရှိပါက ယနေ့ ဘုရားသခင်လုပ်ဆောင်သော အမှုအားလုံးတို့သည် ကြီးမြတ်လှကြောင်း၊ ဘုရားသခင်သည် လူသားတို့၏ ပုန်ကန်လိုစိတ်ကို ၎င်းတို့တွေ့မြင်ရန် ခွင့်ပြုရုံသာမက ၎င်းတို့၏ အဆင့်အတန်းကိုပါ လှစ်ဟဖော်ပြကြောင်းကို မြင်တွေ့လိမ့်မည်။ သူ့နှုတ်ကပတ်တော်တို့၏ ရည်ရွယ်ချက်နှင့် အဓိပ္ပာယ်တို့မှာ လူတို့ကို အပျက်သဘောဖြစ်စေရန်မဟုတ်သကဲ့သို့ လူတို့ကို လဲကျစေရန်လည်း မဟုတ်ချေ။ သူတို့အနေဖြင့် သူ၏နှုတ်ကပတ်တော်များမှတစ်ဆင့် ဗျာဒိတ်တော်ကို ရနိုင်ကြစေရန်ဖြစ်ပြီး ကယ်တင်ခြင်းကို ခံကြရစေရန်ဖြစ်သည်။ သူ၏နှုတ်ကပတ်တော်အားဖြင့် လူသား၏ဝိညာဉ်ကို နိုးထစေရန်ဖြစ်သည်။ ကမ္ဘာကြီးကို ဖန်ဆင်းခဲ့သည့်အချိန်မှ ယနေ့တိုင်အောင် လူသားသည် ဘုရားသခင်တစ်ပါး ရှိကြောင်းကိုလည်းမသိ၊ ဘုရားသခင်တစ်ပါး ရှိသည်ကိုလည်း မယုံကြည်ဘဲ စာတန်၏ အုပ်စိုးမှုအောက်တွင် အမြဲနေလာခဲ့သည်။ ဘုရားသခင်၏ ကြီးမြတ်သော ကယ်တင်ခြင်းတွင် ဤလူများ ပါဝင်နိုင်ပြီး ဘုရားသခင်၏ ကြီးမားစွာ ချီးမြှောက်ခြင်းကို ခံရနိုင်ကြခြင်းသည် ဘုရားသခင်၏ချစ်ခြင်းမေတ္တာကို ဧကန်အမှန်ပင် ပြသပေသည်၊ အမှန်တကယ် နားလည်သူများအားလုံး ထိုသို့တွေးကြလိမ့်မည်။ နားလည်ခြင်း မရှိသောသူများကမူ မည်သို့တွေးကြလိမ့်မည်နည်း။ “ဟော၊ ကျွန်ုပ်တို့သည် မောဘ၏ သားစဉ်မြေးဆက်များဖြစ်ကြသည်ဟု ဘုရားသခင်ပြောတော်မူ၏။ ကျွန်ုပ်တို့သည် မောဘ၏သားစဉ်မြေးဆက်များဖြစ်ကြသည်ဟု ကိုယ်တော်တိုင်မိန့်တော်မူပြီ။ ကျွန်ုပ်တို့အနေဖြင့် ကောင်းနိုင်ပါဦးမည်လော။ ကျွန်ုပ်တို့ကို မောဘ၏သားစဉ်မြေးဆက်များဖြစ်အောင် မည်သူလုပ်ထားခဲ့သနည်း။ ယခင်က ကျွန်ုပ်တို့ကို ဘုရားသခင်အား အလွန်အမင်း အာခံစေခြင်းငှာ မည်သူပြုခဲ့သနည်း။ ဘုရားသခင်သည် ကျွန်ုပ်တို့ကို ပြစ်ဒဏ်ချမှတ်ရန် ကြွလာခဲ့လေပြီ။ ဘုရားသခင်သည် ကျွန်ုပ်တို့ကို ကနဦးကတည်းက အစဉ်အမြဲ တရားစီရင်နေခဲ့သည်ကို သင်မသိသလော။ ဘုရားသခင်ကို ကျွန်ုပ်တို့အာခံခဲ့ကြသည့်အတွက် ဤနည်းဖြင့် အပြစ်ဒဏ်ပေးခြင်းကို ခံကြရသင့်၏။” ဤစကားများသည် မှန်သလော။ ယနေ့ ဘုရားသခင်သည် သင်တို့ကို တရားစီရင်ကာ ပြစ်တင်ဆုံးမ၍ ပြစ်ဒဏ်ချမှတ်သည်၊ သို့သော် သင်တို့၏ပြစ်ဒဏ်ချမှတ်ခံရခြင်းသည် သင့်အနေဖြင့် သင့်ကိုယ်သင် သိလာနိုင်ရန် ဖြစ်သည်ကို သိမှတ်လော့။ ပြစ်ဒဏ်ချမှတ်ခြင်း၊ ကျိန်ဆဲခြင်း၊ တရားစီရင်ခြင်း၊ ပြစ်တင်ဆုံးမခြင်း စသည်တို့အားလုံးသည် သင့်အနေဖြင့် မိမိကိုယ်ကို သိလာနိုင်ရန်၊ သင်၏စိတ်သဘောထား ပြောင်းလဲလာနိုင်ရန်၊ ထို့အပြင် သင်၏တန်ဖိုးကို သင်သိလာနိုင်ရန်ဖြစ်ပြီး၊ ဘုရားသခင်၏ လုပ်ဆောင်ချက်များအားလုံးသည် ဖြောင့်မတ်၍ သူ၏စိတ်နေသဘောထားနှင့်အညီဖြစ်ပြီး သူ့အမှု၏လိုအပ်ချက်များနှင့်အညီဖြစ်ကြောင်းကို သင့်အနေဖြင့် သိမြင်လာနိုင်ရန်ဖြစ်ကာ၊ လူသားကို ကယ်တင်ခြင်းအတွက် သူ၏အစီအစဉ်အတိုင်း ဘုရားသခင်လုပ်ဆောင်ကြောင်းနှင့် သူသည် လူသားကို ချစ်သည့်၊ လူသားကို ကယ်တင်သည့်၊ လူသားကို တရားစီရင်ပြီး ပြစ်တင်ဆုံးမသည့် ဖြောင့်မတ်သော ဘုရားသခင်ဖြစ်ကြောင်းကို သင်သိလာနိုင်ရန်ဖြစ်သည်။ အကယ်၍ သင်သည် နိမ့်ကျသောအဆင့်၌ရှိကြောင်း၊ ဖောက်ပြန်ပျက်စီးကာ မနာခံတတ်ကြောင်းကိုသာလျှင် သင်သိပြီး၊ ယနေ့ သင့်အပေါ်တွင် သူပြုသည့် တရားစီရင်ခြင်းနှင့် ပြစ်တင်ဆုံးမခြင်းအားဖြင့် ဘုရားသခင်သည် သူ၏ကယ်တင်ခြင်းကို ပေါ်လွင်ထင်ရှားအောင် ပြုလိုသည်ကို သင်မသိပါက သင်၌ ရှေ့ဆက်နိုင်စွမ်း ရှိဖို့ရန် မဆိုထားနှင့်၊ တွေ့ကြုံခံစားရဖို့ နည်းလမ်းပင် ရှိမည်မဟုတ်ပေ။ ဘုရားသခင်သည် သတ်ဖြတ်ရန်၊ သို့မဟုတ် ဖျက်ဆီးရန် ကြွလာသည်မဟုတ်၊ တရားစီရင်ရန်၊ ကျိန်ဆဲရန်၊ ပြစ်တင်ဆုံးမရန်နှင့် ကယ်တင်ရန်အတွက် ကြွလာခြင်းဖြစ်သည်။ ဘုရားသခင်၏ အနှစ် ၆၀ဝ၀ စီမံခန့်ခွဲမှုအစီအစဉ် အဆုံးမသတ်မီ၊ လူသားတစ်မျိုးစီ၏ အဆုံးသတ်ကို ထင်ရှားစွာမပြမီတွင် ကမ္ဘာပေါ်ရှိ ဘုရားသခင်၏အမှုသည် ကယ်တင်ခြင်းအလို့ငှာသာဖြစ်သည်၊ သူ့ကိုချစ်သောသူများကို အပြည့်အဝစုံလင်စေရန်နှင့် သူ၏အုပ်စိုးမှုအောက်သို့ ကျိုးနွံနာခံလာဖို့ ခေါ်ဆောင်လာရန်အလို့ငှာသာဖြစ်သည်။ ဘုရားသခင်က လူတို့ကို မည်သို့ပင်ကယ်တင်စေကာမူ သူတို့၏ ဆိုးယုတ်သော သဘာဝဗီဇဟောင်းမှ သူတို့ကို လွတ်မြောက်အောင် ပြုလုပ်ပေးခြင်းအားဖြင့်သာလျှင် ကယ်တင်ခြင်းဖြစ်သည်၊ တစ်နည်းအားဖြင့်ဆိုသော် ဘုရားသခင်သည် သူတို့အား အသက်ကို ရှာဖွေစေခြင်းဖြင့် ကယ်တင်ပေးခြင်းဖြစ်သည်။ အကယ်၍ သူတို့သည် အသက်ကို မရှာဖွေပါက ဘုရားသခင်၏ ကယ်တင်ခြင်းကို လက်ခံရယူရန် နည်းလမ်းရှိလိမ့်မည်မဟုတ်ချေ။ ကယ်တင်ခြင်းသည် ဘုရားသခင်ကိုယ်တော်တိုင်၏ အမှုဖြစ်ပြီး အသက်ကို ရှာဖွေခြင်းသည် ကယ်တင်ခြင်းကို လက်ခံရန်အတွက် လူသားအနေဖြင့် ပိုင်ဆိုင်ထားရမည့်အရာဖြစ်သည်။ လူသား၏အမြင်တွင် ကယ်တင်ခြင်းသည် ဘုရားသခင်၏ ချစ်ခြင်းမေတ္တာဖြစ်ပြီး ဘုရားသခင်၏ ချစ်ခြင်းမေတ္တာသည် ပြစ်တင်ဆုံးမခြင်း၊ တရားစီရင်ခြင်းနှင့် ကျိန်ဆဲခြင်းတို့ မဖြစ်နိုင်ဟု မြင်သည်၊ ကယ်တင်ခြင်းတွင် ချစ်ခြင်းမေတ္တာ၊ သနားခြင်းကရုဏာအပြင် စိတ်သက်သာမှုပေးသည့် နှုတ်ကပတ်တော်များ ပါဝင်ပြီး၊ ဘုရားသခင်က နှင်းအပ်ပေးသည့် အကန့်အသတ်မဲ့သော ကောင်းချီးမင်္ဂလာများ ပါဝင်ရမည်ဟု မြင်သည်။ ဘုရားသခင်က လူသားကို ကယ်တင်သည့်အခါ သူတို့ကို တို့ထိခြင်းအားဖြင့်၊ သူ၏ကောင်းချီးမင်္ဂလာများနှင့် ကျေးဇူးတော်မှတစ်ဆင့် သူ့ထံ၌ သူတို့၏နှလုံးသားများကို ပေးအပ်စေခြင်းတို့အားဖြင့် ကယ်တင်သည်ဟု လူတို့က ယုံကြည်ကြသည်။ တစ်နည်းအားဖြင့်ဆိုသော် ဘုရားသခင်သည် လူသားတို့ကို တို့ထိသောအခါ သူတို့ကို ကယ်တင်သည်ဟူ၍ဖြစ်သည်။ ဤကဲ့သို့သော ကယ်တင်ခြင်းမျိုးသည် အပေးအယူပြုလုပ်ခြင်း ပါဝင်သည့် ကယ်တင်ခြင်းဖြစ်သည်။ ဘုရားသခင်က သူတို့ကို အဆတစ်ရာ နှင်းအပ်ပေးသောအခါမှသာ လူသားသည် ဘုရားသခင်၏ နာမတော်အောက်သို့ ဝင်ရောက်လာမည်ဖြစ်ပြီး ဘုရားသခင်အတွက် ကောင်းစွာကြိုးပမ်းလုပ်ဆောင်ကာ သူ့ကို ဘုန်းထင်ရှားစေမည့်သဘောဖြစ်သည်။ သို့သော် ဤသည်မှာ လူသားမျိုးနွယ်အတွက် ဘုရားသခင်၏အလိုတော် မဟုတ်ပါ။ ဘုရားသခင်သည် အကျင့်ပျက်သော လူသားမျိုးနွယ်ကို ကယ်တင်ဖို့အလို့ငှာ မြေကြီးပေါ်သို့ အမှုပြုရန်ကြွလာခဲ့သည်၊ ဤအရာတွင် မုသားမပါချေ၊ သို့မဟုတ်လျှင် ဘုရားသခင်သည် သူ၏အမှုကိုပြုရန် ကိုယ်တော်တိုင် လုံးဝကြွလာမည်မဟုတ်။ ယခင်က ဘုရားသခင်၏ ကယ်တင်ခြင်းနည်းလမ်းမှာ အဆုံးစွန်သော ချစ်ခြင်းမေတ္တာနှင့် သနားခြင်းကရုဏာကို ပြသခြင်းဖြစ်ခဲ့ပြီး လူသားမျိုးနွယ်တစ်ရပ်လုံးနှင့် အလဲအလှယ်လုပ်ရန်အတွက် ဘုရားသခင်သည် သူ၏အရာအားလုံးကို စာတန်အား ပေးအပ်ခဲ့သည်အထိပင်ဖြစ်သည်။ ယနေ့ကာလတွင်မူ ယခင်ကဲ့သို့မဟုတ်။ ယနေ့ကာလ၌ သင်တို့၏ကယ်တင်ခြင်းသည် တစ်ဦးစီကို အမျိုးအစားအလိုက် အုပ်စုခွဲခြားချိန်အတွင်းဖြစ်သည့် နောက်ဆုံးသောကာလ၏အချိန်တွင် ဖြစ်ပွားခြင်းဖြစ်သည်၊ သင်တို့ကို ကယ်တင်သည့်နည်းလမ်းမှာ ချစ်ခြင်းမေတ္တာ၊ သို့မဟုတ် သနားခြင်းကရုဏာ မဟုတ်တော့ဘဲ လူသားအနေဖြင့် ပို၍စေ့စေ့စပ်စပ် ကယ်တင်ခံရစေရန်အလို့ငှာ ပြစ်တင်ဆုံးမခြင်းနှင့် တရားစီရင်ခြင်းတို့ပင်ဖြစ်သည်။ ထို့ကြောင့် သင်တို့ရရှိသမျှသည် ပြစ်တင်ဆုံးမခြင်း၊ တရားစီရင်ခြင်းနှင့် မညှာမတာ ရိုက်နှက်ခြင်းတို့ဖြစ်သော်လည်း ဤကဲ့သို့ အကြင်နာမဲ့သော ရိုက်နှက်ခြင်းတွင် အပြစ်ဒဏ်ပေးခြင်း စိုးစဉ်းမျှ မပါသည်ကို သိမှတ်လော့၊ ငါ၏နှုတ်ကပတ်တော်တို့သည် မည်မျှကြမ်းတမ်းသည်ဖြစ်စေ သင်တို့အပေါ်သို့ ကျရောက်သည့်အရာမှာ သင်တို့အတွက် လုံးဝအကြင်နာမဲ့ဟန်တူသည့် နှုတ်ကပတ်တော် အနည်းငယ်သာလျှင်ဖြစ်သည်ကို သိမှတ်လော့၊ ထို့အပြင် ငါ၏ဒေါသသည် မည်မျှပင်ကြီးပါစေ သင်တို့အပေါ်သို့ ကျရောက်သည်မှာ အဆုံးအမနှုတ်ကပတ်တော်များသာလျှင် ဖြစ်သည်ကို သိမှတ်လော့၊ သင့်တို့ကို ထိခိုက်နစ်နာအောင်ပြုရန်၊ သို့မဟုတ် ကွပ်မျက်ရန် ငါမရည်ရွယ်ပေ။ ဤသည်မှာ အမှန်တရားချည်းပင် မဟုတ်လော။ ယခုခေတ်၌ ဖြောင့်မတ်သည့် တရားစီရင်မှုဖြစ်စေ၊ အကြင်နာကင်းမဲ့သည့် စစ်ဆေးခြင်းနှင့် ပြစ်တင်ဆုံးမခြင်းပင်ဖြစ်စေ အားလုံးသည် ကယ်တင်ခြင်းအဖို့အလို့ငှာဖြစ်ကြောင်း သိမှတ်လော့။ ယနေ့ တစ်ဦးစီကို အမျိုးအစားအလိုက် အုပ်စုခွဲခြားမှုရှိသည်ဖြစ်စေ၊ သို့မဟုတ် လူသား၏ အမျိုးအစားများကို ဖော်ထုတ်ပြသည်ဖြစ်စေ၊ ဘုရားသခင်၏ မိန့်မြွက်ချက်များနှင့် အမှုတို့သည် ဘုရားသခင်ကို အမှန်တကယ် ချစ်ကြသူများကို ကယ်တင်ရန်အတွက်ပင် ဖြစ်သည်။ ဖြောင့်မတ်သည့် တရားစီရင်ခြင်းမှာ လူသားကို သန့်စင်စေရန်ဖြစ်သည်၊ အကြင်နာကင်းမဲ့သည့် စစ်ဆေးခြင်းမှာ လူသားကို သန့်စင်စေရန်ဖြစ်သည်၊ ကြမ်းတမ်းသောစကားလုံးများ၊ သို့မဟုတ် ဆုံးမခြင်းတို့မှာ သန့်စင်စေရန်သာဖြစ်ပြီး ကယ်တင်ခြင်းအတွက်သာလျှင် ဖြစ်သည်။ ထို့ကြောင့် ယနေ့ကယ်တင်ခြင်း၏ နည်းစနစ်မှာ ရှေးယခင်ကနှင့် မတူပေ။ ယနေ့တွင် ဖြောင့်မတ်သည့် တရားစီရင်ခြင်းက သင်တို့ကို ကယ်တင်သည့်အပြင် အမျိုးအစားအလိုက် သင်တို့တစ်ဦးစီကို အုပ်စုခွဲခြားရန်အတွက် တန်ဆာပလာကောင်းပင်ဖြစ်သည်၊ ရက်စက်သည့် ပြစ်တင်ဆုံးမခြင်းသည် သင်တို့အတွက် အမြင့်ဆုံးသော ကယ်တင်ခြင်းကို ယူဆောင်လာပေးသည်။ ပြစ်တင်ဆုံးမခြင်းနှင့် တရားစီရင်ခြင်းတို့နှင့် ရင်ဆိုင်တွေ့သောအခါ သင်တို့၌ အဘယ်ပြောစရာရှိသနည်း။ ကယ်တင်ခြင်းကို အစမှအဆုံးတိုင်အောင် သင်တို့မွေ့လျော်ခဲ့သည် မဟုတ်လော။ လူ့ဇာတိခံယူသော ဘုရားသခင်၊ သူ၏အနန္တတန်ခိုးနှင့် ဉာဏ်ပညာနှစ်ခုလုံးကို သင်တို့မြင်ခဲ့ကြပြီးဖြစ်သည်၊ ထို့အပြင် အကြိမ်ကြိမ် ရိုက်နှက်ခြင်းနှင့် ဆုံးမပဲ့ပြင်ခြင်းကိုလည်း သင်တို့တွေ့ကြုံပြီးဖြစ်သည်။ သို့သော် အဆုံးစွန်ကျေးဇူးတော်ကိုလည်း သင်တို့ရရှိထားကြသည် မဟုတ်လော။ သင်တို့၏ကောင်းချီးမင်္ဂလာများသည် အခြားသူများ၏ ကောင်းချီးမင်္ဂလာတို့ထက် ပို၍ကြီးမားသည် မဟုတ်သလော။ သင်တို့ရရှိသော ကျေးဇူးတော်များမှာ ရှောလမုန်မင်းကြီး ခံစားခဲ့ရသည့် ဂုဏ်ကျက်သရေနှင့် ချမ်းသာကြွယ်ဝမှုများထက် ပို၍ရက်ရောကုံလုံသည် မဟုတ်လော။ စဉ်းစားကြည့်ကြလော့- ငါကြွလာခြင်း၏ ရည်ရွယ်ချက်သည် သင်တို့ကို စီရင်ချက်ချရန်နှင့် အပြစ်ဒဏ်ပေးရန်ဖြစ်ပြီး သင်တို့ကို ကယ်တင်ရန်မဟုတ်ပါက၊ သင်တို့၏နေ့ရက်များသည် ဤမျှကြာရှည်ခံနိုင်ခဲ့လိမ့်မည်လော။ အပြစ်နှင့်ပြည့်သော အသွေးအသားနှင့်ဖြစ်တည်သည့် သင်တို့သည် ယနေ့တိုင်အောင် ရှင်သန်နိုင်ခဲ့လိမ့်မည်လော။ အကယ်၍ ငါကြွလာခြင်း၏ ရည်ရွယ်ချက်သည် သင်တို့ကို အပြစ်ဒဏ်ပေးရန်သာဖြစ်ပါက၊ ငါသည် အဘယ့်ကြောင့် လူ့ဇာတိကိုခံယူပြီး ယင်းသို့သော ကြီးလေးသည့်အမှုကို စတင်လုပ်ဆောင်ခဲ့ရမည်နည်း။ သေမျိုးမျှသာဖြစ်သော သင်တို့ကို ပြစ်ဒဏ်ပေးရန်မှာ စကားတစ်ခွန်းကို မိန့်မြွက်ချိန်သာ ကြာမည်မဟုတ်လော။ ငါသည် သင်တို့ကို စီရင်ချက်ချပြီးနောက် ဖျက်ဆီးပစ်ရန် လိုလားနေဦးမည်လော။ ငါပြောသော ဤနှုတ်ကပတ်တော်များကို သင်တို့မယုံကြသေးသလော။ ငါသည် ချစ်ခြင်းမေတ္တာနှင့် သနားခြင်းကရုဏာအားဖြင့်သာ လူသားကို ကယ်တင်နိုင်မည်လော။ သို့တည်းမဟုတ် လူသားကို ကယ်တင်ရန် ကားတိုင်ပေါ်တွင် အသေခံခြင်းကိုသာ ငါအသုံးပြုနိုင်မည်လော။ ငါ၏ဖြောင့်မတ်သောစိတ်သဘောထားက လူသားတို့ကို လုံးလုံးနာခံလာရန် ပို၍ထောက်ကူနေသည် မဟုတ်လော။ ဤအရာက လူသားတို့ကို စေ့စေ့စပ်စပ် ပို၍ကယ်တင်နိုင်သည် မဟုတ်လော။

ငါ၏နှုတ်ကပတ်တော်တို့သည် ခက်ထန်နိုင်သော်လည်း ၎င်းတို့အားလုံးကို လူသား၏ ကယ်တင်ခြင်းအတွက် ပြောထားခြင်းဖြစ်သည်၊ ငါသည် နှုတ်ကပတ်တော်များကို ပြောခြင်းသာ ပြုပြီး လူသား၏ဇာတိခန္ဓာကိုယ်ကို အပြစ်ဒဏ်ပေးခြင်းကို မပြုသောကြောင့်ပင်တည်း။ ဤနှုတ်ကပတ်တော်များသည် လူသားတို့ကို အလင်းထဲတွင် နေထိုင်စေပြီး အလင်းရှိကြောင်း သိစေသည်၊ အလင်းသည် တန်ဖိုးရှိကြောင်း သိစေသည်၊ ထို့ထက်မက ဤနှုတ်ကပတ်တော်တို့သည် လူသားကို အဘယ်မျှလောက်အကျိုးပြုကြောင်း သိစေပြီး ဘုရားသခင်သည် ကယ်တင်ခြင်းဖြစ်ကြောင်းကို သိစေသည်။ ပြစ်တင်ဆုံးမခြင်းနှင့် တရားစီရင်ခြင်းဆိုင်ရာ နှုတ်ကပတ်တော်များကို ငါများစွာပြောခဲ့သော်လည်း စင်စစ်အားဖြင့် ၎င်းတို့ကို သင်တို့အပေါ်သို့ ငါမလုပ်ဆောင်ရသေး။ ငါ၏အမှုကို လုပ်ဆောင်ရန်၊ ငါ၏နှုတ်ကပတ်တော်များကို မိန့်ကြားရန် ငါလာခဲ့သည်၊ ငါ၏နှုတ်ကပတ်တော်တို့သည် ခက်ထန်နိုင်သော်လည်း သင်တို့၏ ဖောက်ပြန်ပျက်စီးမှုနှင့် ပုန်ကန်မှုတို့ကို တရားစီရင်သောအားဖြင့် ၎င်းတို့ကို မိန့်ကြားထားခြင်းဖြစ်၏။ ဤသို့ ငါပြုရသည့် ရည်ရွယ်ချက်မှာ စာတန်၏ အုပ်စိုးမှုအောက်မှ လူသားများကို ကယ်တင်ရန်၊ ငါ့နှုတ်ကပတ်တော်များကို အသုံးပြု၍ လူသားတို့ကို ကယ်တင်ရန်သာ ဖြစ်နေသေးသည်၊ ငါ၏ရည်ရွယ်ချက်မှာ လူသားတို့ကို ငါ၏နှုတ်ကပတ်တော်တို့ဖြင့် ထိခိုက်နာကျင်စေရန်မဟုတ်။ ငါ၏အမှုမှ ရလဒ်များ ရလာနိုင်ရန်အလို့ငှာ ငါ၏နှုတ်ကပတ်တော်များက ခက်ထန်နေခြင်း ဖြစ်သည်။ ဤနည်းဖြင့် အမှုပြုခြင်းဖြင့်သာ လူသားတို့သည် မိမိတို့ကိုယ်မိမိ သိလာကြမည်ဖြစ်ပြီး သူတို့၏ ပုန်ကန်တတ်သည့် စိတ်နေသဘောထားမှ ထွက်ပြေးလွတ်မြောက်နိုင်ကြမည်ဖြစ်သည်။ နှုတ်ကပတ်တော်များ၏ အမှုနှင့်ဆိုင်သည့် အကြီးမားဆုံးသော အရေးပါမှုမှာ လူတို့အား သမ္မာတရားကို နားလည်ခွင့်ပေးပြီးနောက် သမ္မာတရားကို လက်တွေ့ကျင့်သုံးခွင့်ပေးခြင်း၊ သူတို့၏ စိတ်နေသဘောထားတွင် ပြောင်းလဲမှုများ ရရှိစေခြင်းနှင့် မိမိတို့ကိုယ်မိမိနှင့် ဘုရားသခင်၏အမှုအကြောင်း သိစေခြင်းတို့ပင် ဖြစ်သည်။ စကားပြောခြင်းမှတစ်ဆင့် လုပ်ဆောင်သောနည်းလမ်းသည်သာ ဘုရားသခင်နှင့် လူသားအကြား ဆက်ဆံပြောဆိုခြင်းကို ဖြစ်မြောက်စေနိုင်ပြီး၊ နှုတ်ကပတ်တော်များသည်သာလျှင် သမ္မာတရားကို ရှင်းပြနိုင်သည်။ ဤနည်းလမ်းဖြင့် အလုပ်လုပ်ခြင်းသည် လူသားကိုသိမ်းပိုက်ရန်အတွက် အကောင်းဆုံး နည်းလမ်းဖြစ်သည်၊ နှုတ်ကပတ်တော်များကို မိန့်မြွက်ခြင်းမှလွဲ၍ အခြားမည်သည့်နည်းလမ်းကမျှ သမ္မာတရားနှင့် ဘုရားသခင်၏အမှုအကြောင်း ပိုမိုရှင်းလင်းသည့် နားလည်ခြင်းကို လူသားအား ပေးနိုင်မည်မဟုတ်ပေ။ ထို့ကြောင့် လူသားတို့ကို ဘုရားသခင်ထံမှ မှန်ကန်သောလမ်းနှင့် အသက်ကို ရယူခွင့်ပေးလျက် သူ့အမှု၏နောက်ဆုံးအဆင့်တွင် လူသားနားမလည်သည့် သမ္မာတရားများနှင့် နက်နဲမှုများအားလုံးကို ဖွင့်ပြရန်အလို့ငှာ လူသားကို ဘုရားသခင်စကားပြောသည်၊ ထိုသို့အားဖြင့် ဘုရားသခင်၏အလိုတော်ကို ဖြည့်ဆည်းသည်။ လူသားတို့အပေါ်ပြုသည့် ဘုရားသခင့်အမှု၏ ရည်ရွယ်ချက်မှာ လူတို့အနေဖြင့် ဘုရားသခင်၏အလိုတော်ကို ဖြည့်ဆည်းနိုင်ကြရန်ဖြစ်ပြီး ထိုအမှုကို လူသားတို့အား ကယ်တင်ရန်အတွက်သာ ပြုခြင်းဖြစ်သည်၊ ထို့ကြောင့် လူသားများကို သူကယ်တင်သည့်အချိန်အတွင်း လူသားများကို အပြစ်ဒဏ်ပေးသည့်အမှုကို ဘုရားသခင်မလုပ်ပေ။ လူသားတို့ကို ကယ်တင်သည့်အချိန်အတွင်း ဘုရားသခင်သည် ဆိုးယုတ်သူများကိုလည်း အပြစ်ဒဏ်မပေး၊ ကောင်းသောသူများကိုလည်း ဆုမချီးမြှင့်သကဲ့သို့ မတူကွဲပြားသော လူအမျိုးအစားအားလုံးအတွက် ပန်းတိုင်များကိုလည်း မထုတ်ဖော်ပြပေးချေ။ ယင်းအစား သူ့အမှု၏နောက်ဆုံးအဆင့် ပြီးစီးနောက်မှသာ ဆိုးယုတ်သူများကို အပြစ်ဒဏ်ပေးခြင်းနှင့် ကောင်းသောသူများကို ဆုချီးမြှင့်ခြင်းအလုပ်တို့ကို သူလုပ်လိမ့်မည်ဖြစ်ပြီး ထိုအချိန်ရောက်မှသာ မတူကွဲပြားသော လူသားအမျိုးအစားအားလုံး၏ အဆုံးသတ်များကို သူထုတ်ဖော်ပြလိမ့်မည်။ အပြစ်ဒဏ်ပေးခံရသူများသည် ကယ်တင်ခြင်းကို ဧကန်အမှန်ပင် မခံရနိုင်သူများဖြစ်ကြလိမ့်မည်ဖြစ်သော်လည်း ကယ်တင်ခြင်းခံရသူများမှာမူ လူသားများကို ကယ်တင်သည့် ဘုရားသခင့်အမှု၏အချိန်ကာလအတွင်း ဘုရားသခင်၏ ကယ်တင်ခြင်းကို ရရှိသူများဖြစ်ကြလိမ့်မည်။ ဘုရားသခင်၏ ကယ်တင်ခြင်းအမှုကာလအတွင်း ကယ်တင်ခြင်း ခံရနိုင်သူများသည် အဆုံးစွန်ထိ ကယ်တင်ခြင်းခံကြရမည်ဖြစ်ပြီး၊ ဘုရားသခင့်အမှု၏ ရည်ရွယ်ချက်မှာ လူသားတို့ကို ကယ်တင်ရန်ဖြစ်သည့်အားလျော်စွာ ထိုသူတို့အထဲမှ မည်သူတစ်ဦးတစ်ယောက်ကိုမျှ စွန့်ပစ်ထားခဲ့မည်မဟုတ်။ လူသားတို့ကို ကယ်တင်သည့် ဘုရားသခင့်အမှု၏အချိန်ကာလအတွင်း၌ မိမိတို့၏ စိတ်နေသဘောထား၌ အပြောင်းအလဲဖြစ်ပေါ်စေရန် မတတ်နိုင်သောသူများအားလုံးနှင့် ဘုရားသခင်ကို အပြည့်အဝ နာခံခြင်းမပြုနိုင်သောသူများအားလုံးမှာ အပြစ်ဒဏ်ပေးခြင်းကို ခံရသူများ ဖြစ်လာကြလိမ့်မည်။ နှုတ်ကပတ်တော်များနှင့်ဆိုင်သည့် အမှုဖြစ်သော အမှု၏ယခုအဆင့်သည် လူသားတို့ နားမလည်သည့် နည်းလမ်းများနှင့် နက်နဲမှုများကို သူတို့အား ဖွင့်ပြပေးသည်၊ ထိုသို့အားဖြင့် လူသားတို့သည် ဘုရားသခင်၏ အလိုတော်နှင့် လူသားတို့အပေါ်ထားသည့် ဘုရားသခင်၏ သတ်မှတ်ချက်များကို နားလည်နိုင်ရန်ဖြစ်သည့်အပြင်၊ ဘုရားသခင်၏ နှုတ်ကပတ်တော်များကို လက်တွေ့ကျင့်သုံးရန်အတွက် လူတို့ထံ၌ အခြေအနေများ ရှိနိုင်ကြစေရန်နှင့် သူတို့၏ စိတ်သဘောထား၌ အပြောင်းအလဲများ ရှိလာစေနိုင်ရန်ဖြစ်သည်။ ဘုရားသခင်သည် သူ၏အမှုကိုပြုရန် နှုတ်ကပတ်တော်များကိုသာ အသုံးပြုသည်၊ ထို့ပြင် ယခုအချိန်အခါသည် ကယ်တင်ခြင်းအမှုကို လုပ်ဆောင်နေသော အချိန်အခါဖြစ်သောကြောင့် လူသားတို့ အနည်းငယ် ပုန်ကန်တတ်ခြင်းအတွက်နှင့် ၎င်းတို့ကို အပြစ်ဒဏ်မပေးပေ။ အကယ်၍ ပုန်ကန်တတ်သော လူတိုင်းကို အပြစ်ဒဏ်ပေးမည်ဆိုပါက မည်သူတစ်ဦးတစ်ယောက်ကမျှ ကယ်တင်ခံရရန်အခွင့် ရှိကြလိမ့်မည် မဟုတ်ဘဲ အားလုံးအပြစ်ဒဏ်ပေးခံရပြီး မရဏနိုင်ငံသို့ သက်ဆင်းကြရမည်သာ ဖြစ်သည်။ လူသားတို့ကို နှုတ်ကပတ်တော်၏ တရားစီရင်ခြင်းရည်ရွယ်ချက်မှာ သူတို့ကို မိမိတို့ကိုယ်မိမိ သိရှိခွင့်ကိုပေးပြီး ဘုရားသခင်အား နာခံနိုင်ခွင့်ကိုပေးရန်ဖြစ်သည်။ နှုတ်ကပတ်တော်၏ တရားစီရင်ခြင်းအားဖြင့် ၎င်းတို့ကို အပြစ်ဒဏ်ပေးရန် မဟုတ်ချေ။ နှုတ်ကပတ်တော် အမှုပြုစဉ်အချိန်အတွင်းတွင် များစွာသောလူတို့သည် ၎င်းတို့၏ ပုန်ကန်မှုနှင့် အာခံမှုတို့ကို ဖော်ပြကြလိမ့်မည်ဖြစ်ပြီး လူ့ဇာတိခံယူသည့် ဘုရားသခင်အပေါ် ၎င်းတို့၏ မနာခံခြင်းကို ဖော်ပြကြလိမ့်မည်။ သို့သော်လည်း ထိုအချက်ကြောင့် ထိုလူများအားလုံးကို ဘုရားသခင်အပြစ်ပေးမည်မဟုတ်ပေ၊ ယင်းသို့ပြုမည့်အစား ရိုးတွင်းခြင်ဆီအထိ ဖောက်ပြန်ပျက်စီးနေသူများနှင့် ကယ်တင်ခြင်း မခံရနိုင်သူများကိုသာလျှင် သူဖယ်ထားလိမ့်မည်။ ထိုသူတို့၏ ဇာတိခန္ဓာများကို စာတန်အား သူပေးပစ်လိမ့်မည်ဖြစ်ပြီး အချို့အခြေအနေများတွင် ၎င်းတို့၏ဇာတိခန္ဓာကို အဆုံးသတ်ပစ်လိမ့်မည်။ ကြွင်းကျန်သောသူများသည် နောက်တော်သို့ ဆက်လက်လိုက်ကြပြီး ရိုက်နှက်ဆုံးမခြင်းနှင့် ပြုပြင်ခြင်းတို့ကို ဆက်လက်ကြုံတွေ့ကြရမည်ဖြစ်သည်။ အကယ်၍ ၎င်းတို့အနေဖြင့် နောက်တော်လိုက်နေစဉ်တွင် ရိုက်နှက်ဆုံးမခြင်းနှင့် ပြုပြင်ခြင်းတို့ကို လက်မခံနိုင်သေးပါက ၎င်းတို့သည် ပို၍ပို၍ ယိုယွင်းကျဆင်းလာကြမည်ဖြစ်ပြီး ကယ်တင်ခြင်းခံရရန် အခွင့်အရေးကို ၎င်းတို့ဆုံးရှုံးသွားကြလိမ့်မည်။ နှုတ်ကပတ်တော်၏ သိမ်းပိုက်ခြင်းကို လက်ခံထားသောသူ တစ်ယောက်စီတိုင်းသည် ကယ်တင်ခြင်းအတွက် အခွင့်အရေး အလျှံအပယ် ရပါလိမ့်မည်။ ဤလူ တစ်ဦးတစ်ယောက်ချင်းစီအတွက် ဘုရားသခင်၏ကယ်တင်ခြင်းက သူ၏အစွမ်းကုန်သက်ညှာမှုကို ပြသလျက်ရှိသည်၊ ဆိုလိုသည်မှာ ၎င်းတို့အနေဖြင့် အစွမ်းကုန် သည်းခံပေးမှုကို ခံကြရခြင်းဖြစ်သည်။ လူတို့သည် လမ်းမှားကို ကျောခိုင်းနေသမျှ၊ လူတို့သည် နောင်တရနေနိုင်သမျှ သူ၏ကယ်တင်ခြင်းကို ခံရနိုင်သောအခွင့်အရေးကို ဘုရားသခင်ပေးပါလိမ့်မည်။ လူတို့သည် ဘုရားသခင်ကို ဦးစွာပုန်ကန်ကြစဉ်က ၎င်းတို့ကို သတ်ပစ်ရန် ဘုရားသခင်၌ ဆန္ဒမရှိခဲ့ဘဲ ထိုအစား ၎င်းတို့အားလုံးကို ကယ်တင်ရန် တတ်နိုင်သမျှ သူလုပ်ခဲ့သည်။ အကယ်၍ တစ်စုံတစ်ဦးသည် ကယ်တင်ခြင်းခံရရန် အခွင့်မရှိတော့ပါလျှင် ဘုရားသခင်သည် ထိုသူကို ဖယ်ထားလိမ့်မည်ဖြစ်သည်။ ဘုရားသခင်အနေဖြင့် တစ်စုံတစ်ယောက်ကို အပြစ်ဒဏ်ပေးရန် နှေးရသည့် အကြောင်းရင်းမှာ ကယ်တင်နိုင်သူများ အားလုံးကို သူကယ်တင်လိုသောကြောင့်ဖြစ်သည်။ သူသည် လူတို့ကို တရားစီရင်ခြင်း၊ ဉာဏ်အလင်းဖွင့်ပေးခြင်းနှင့် လမ်းညွှန်ပေးခြင်းတို့ကို နှုတ်ကပတ်တော်များဖြင့်သာ ပြုလုပ်ပြီး ၎င်းတို့ကို သတ်ရန် တုတ်ကို အသုံးမပြုပါချေ။ နှုတ်ကပတ်တော်များကို အသုံးပြု၍ လူတို့ကို ကယ်တင်ခြင်းသည် အမှုနောက်ဆုံးအဆင့်၏ ရည်ရွယ်ချက်နှင့် အရေးပါမှုပင် ဖြစ်ပေသည်။

ယခင်က:စုံလင်ခြင်းသို့ ရောက်သော သူများသာ အဓိပ္ပါယ်ရှိသော အသက်တာဖြင့် အသက်ရှင်နိုင်သည်

နောက်တစ်ခုသို့:မိမိ၏ အယူအဆများထဲတွင် ဘုရားသခင်ကို ဘောင်ခတ်ထားသော လူသားမှာ ဘုရားသခင်၏ ဗျာဒိတ်တော်များကို အဘယ်သို့ လက်ခံရရှိနိုင်မည်နည်း

သင်နှစ်သက်နိုင်သည့် အရာများ

နှုတ်ကပတ်တော်သည် လူ့ဇာတိ၌ ပေါ်လာ၏ နောက်ဆုံးသောကာလ ခရစ်တော်၏ မိန့်မြွက်ချက်များ (လက်ရွေးစင်များ) သိုးသငယ် ဖွင့်သည့် စာစောင် တရားစီရင်ခြင်းသည် ဘုရားသခင်၏ အိမ်တော်မှ စတင်သည် နိုင်ငံတော်၏ ဧဝံဂေလိတရားအကြောင်း အနန္တတန်ခိုးရှင်ဘုရားသခင်၏ စံနမူနာ နှုတ်ကပတ်တော်များ လက်ရွေးစင်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ နောက်ဆုံးသောကာလ၏ ခရစ်တော်အတွက် သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ