ဧဝံဂေလိတရား ဖြန့်ဝေခြင်းသည် ကျင့်ဝတ်သိက္ခာအရ ယုံကြည်သူများအားလုံး မဖြစ်မနေလုပ်ရမည့် တာဝန်တစ်ခုဖြစ်သည်

ပြီးခဲ့သောစုဝေးပွဲတွင် သင်တို့၏တာဝန်ကို ကျေနပ်ဖွယ်ရာပုံစံဖြင့် လုပ်ဆောင်ခြင်းအကြောင်းကို ငါတို့ ပြောခဲ့ကြသည်။ ယင်းကိုရရှိခြင်းသည် လူသားအား ဘုရားသခင်၏ စုံလင်စေခြင်းအတွက် လိုအပ်သည့် အဓိကကျသော အခြေအနေလေးရပ်အနက် ပထမဆုံးနှင့် အခြေခံအကျဆုံးဖြစ်သည်။ ပြီးခဲ့သောအ‌ခေါက်တွင် လူတစ်ဦး၏တာဝန်ကို ထမ်းဆောင်ခြင်းနှင့်ဆိုင်သော အဓိပ္ပာယ်ဖွင့်ဆိုချက်နှင့် စည်းမျဉ်းများအပေါ် ငါတို့ မိတ်သဟာယပြုခဲ့ကြသည်။ မိမိတို့၏တာဝန်များကို ကျေနပ်ဖွယ်ရာပုံစံဖြင့် ထမ်းဆောင်ခြင်းမရှိသော လူတို့ကို ပြညွှန်သည့် အပြင်ပန်းလက္ခဏာ အမျိုးမျိုးတို့အကြောင်းကို မိတ်သဟာယပြုလျက် ဥပမာအချို့ကိုလည်း ငါတို့ ဆွေးနွေးခဲ့ကြသည်။ ဤသို့ပြုခြင်းအားဖြင့် ထိုသို့သော ပြဿနာများကို ပြင်သင့်ကြောင်း ဘုရားသခင် ရွေးကောက်သောလူတို့ ရှင်းလင်းစွာ မြင်တွေ့ရန်နှင့် ထိုသို့သောပုံစံဖြင့် မိမိတို့၏ တာဝန်များကို ပြုလုပ်သော သူတို့အ‌ပေါ် ဘုရားသခင်ထားရှိသော သဘောထားကို နားလည်ရန် ငါအခွင့်ပေးခဲ့သည်။ ဤအရာအပေါ် မိတ်သဟာယပြုပြီးနောက် သင်တို့၏တာဝန်ကို မည်သို့ ကျေနပ်ဖွယ်ရာ ထမ်းဆောင်ရမည့်ပုံ၊ မည်သည့်အရာကို အာရုံစိုက်ရမည်ဖြစ်ကြောင်း၊ မည်သည့်အရာများကို သင်တို့ မပြုလုပ်နိုင်ကြောင်း၊ ဘုရားသခင်၏ စိတ်နေသဘောထားကို မည်သည့်လုပ်ရပ်များက ပုန်ကန်ပြစ်မှားပြီး ပျက်စီးခြင်းသို့ ဆိုက်ရောက်စေနိုင်ကြောင်းနှင့် ပတ်သက်၍ ယေဘုယျ နားလည်သဘောပေါက်ခြင်းကို သင်တို့ရရှိခဲ့သည်။ တာဝန်ကို ကျေနပ်ဖွယ်ရာပုံစံဖြင့် မည်သို့ထမ်းဆောင်ရမည့်‌အပေါ် မိတ်သဟာယပြုခြင်းအားဖြင့် သင်တို့သည် ဤအကြောင်းကိစ္စနှင့် ပတ်သက်သော သမ္မာတရား တစ်စုံတစ်ရာကို သဘောတရားအရ သိမြင်နားလည်နိုင်သလော။ အမျိုးမျိုးသော တာဝန်များကို ထမ်းဆောင်သောအခါ လူအမျိုးမျိုးတို့အားလုံးက မည်သည့်စည်းမျဉ်းများကို လိုက်နာပြီး မည်သည့်သမ္မာတရားများကို လက်တွေ့လုပ်ဆောင်သင့်သနည်း။ ထိုသို့သော အသေးစိတ် အချက်အလက်များအပေါ် သင်တို့၌ ရှင်းလင်းသော နားလည်မှုရှိသလော။ (ဤအရာကို ကျွန်ုပ်တို့ ရှင်းလင်းစွာ နားမလည်ပါ။) သို့ဆိုလျှင် ထိုအကြောင်းကို ပို၍အသေးစိတ်ကျကျ ပြောဆိုရန် လိုအပ်သည်။ လူတစ်ဦး၏ တာဝန်ကို ကျေနပ်ဖွယ်ရာပုံစံဖြင့် လုပ်ဆောင်ခြင်းဟူသည်မှာ မည်သည့်အရာကို ဆိုလိုကြောင်း ဆွေးနွေးရန်အတွက် ပို၍ အသေးစိတ်ကျသော အမျိုးအစားခွဲခြားမှုများကို စတင်စီစဉ်ရပေမည်။

ဘုရားအိမ်တော်၏အလုပ်ကို အဓိကအမျိုးအစား အချို့အားဖြင့် ခွဲခြားသတ်မှတ်သည်။ ဘုရားအိမ်တော်၏ အလုပ်ဟူသမျှ၏ ရှေ့ဆုံးရှိ အလုပ်မှာ ဧဝံ‌ဂေလိတရား ဖြန့်ဝေခြင်းအလုပ် ဖြစ်သည်။ ယင်း၌ လူအရေအတွက်ပေါင်း မြောက်မြားစွာ ပါဝင်သည်။ ယင်းသည် အမှုအရာများစွာ၏ ကျယ်ပြန့်သော အတိုင်းအတာကို လွှမ်းခြုံထားပြီး အလုပ်တာဝန် မြောက်မြားစွာ ပါဝင်သည်။ ယင်းသည် အလုပ်၏ ပထမအမျိုးအစားဖြစ်ပြီး အသင်းတော်အလုပ်ရှိရှိသမျှ၌ အရေးကြီးဆုံးသော လုပ်ငန်းတာဝန်ဖြစ်သည်။ ဧဝံဂေလိတရားကို ကျယ်ပြန့်စေခြင်းအလုပ်သည် ဘုရားသခင်၏ စီမံခန့်ခွဲမှုအစီအစဉ်၌ ပထမအရေးကြီးသော လုပ်ငန်းတာဝန်ဖြစ်၏။ ထို့အတွက်ကြောင့် ယင်းကို အလုပ်၏ ပထမအမျိုးအစားအဖြစ် ခွဲခြားသတ်မှတ်ရမည် ဖြစ်သည်။ သို့ဆိုလျှင် ဤတာဝန်အား ထမ်းဆောင်သူတို့ ထိန်းသိမ်းရမည့် ဂုဏ်ပုဒ်မှာ အဘယ်နည်း။ ဧဝံဂေလိတရား ဖြန့်ဝေသူများဖြစ်၏။ ဒုတိယအမျိုးအစားအနေဖြင့် အသင်းတော်၏ အတွင်းလုပ်ငန်း၌ အရေးကြီးဆုံးသော တာဝန်မှာ အဘယ်နည်း။ (ခေါင်းဆောင်များနှင့် အမှုဆောင်များ၏ တာဝန်ဖြစ်သည်။) မှန်ပေ၏၊ ယင်းမှာ အုပ်စုအမျိုးမျိုး၏ ကြီးကြပ်သူများနှင့် အဖွဲ့ခေါင်းဆောင်များအပါအဝင် အသင်းတော်ထဲရှိ အဆင့်ပေါင်းစုံမှ ခေါင်းဆောင်များနှင့် အမှုဆောင်များ၏ တာဝန်ဖြစ်သည်။ ဤတာဝန်သည် အရေးကြီးဆုံးဖြစ်ကာ ဤလူတို့လုပ်ဆောင်သည့် အလုပ်အားလုံးမှာ အ‌ရေးပါ၏။ ဤသည်မှာ ဒုတိယအမျိုးအစား ဖြစ်သည်။ တတိယအမျိုးအစား၏ တာဝန်များအနေဖြင့် ဧဝံဂေလိတရား ဖြန့်ဝေခြင်းအလုပ်၌ အတော်ပင် အရေးကြီးသည်မှာ မည်သည့်တာဝန်များ ဖြစ်သနည်း။ (အထူးတာဝန် အချို့ဖြစ်သည်။) မှန်ပေ၏၊ တတိယအမျိုးအစား၌ စာရေးခြင်း၊ ဘာသာပြန်ခြင်း၊ တေးဂီတ၊ ရုပ်ရှင်ရိုက်ကူးရေး၊ အနုပညာနှင့် ပြင်ပရေးရာများလုပ်ငန်းအပါအဝင် အထူးတာဝန်အချို့ကို ထမ်းဆောင်ရသောလူတို့ ပါဝင်သည်။ စတုတ္ထအမျိုးအစားရှိ ထိုသူတို့သည် ကြိုဆိုလက်ခံရေး၊ ချက်ပြုတ်ရေးနှင့် ဝယ်ယူရေးတို့ကဲ့သို့ ထောက်ပံ့ပို့ဆောင်ရေးအလုပ် ပါဝင်သော သာမန်တာဝန်များကို အဓိအားဖြင့် ထမ်းဆောင်ရသည်။ ဤတာဝန်များအား အသေးစိတ် အမျိုးအစားခွဲခြင်းမှာ မလိုအပ်‌ပေ။ ပဉ္စမအမျိုးအစားက ၎င်းတို့၏မိသားစု အခြေအနေများ၊ ကျန်းမာရေး အခြေအနေများ၊ သို့မဟုတ် အခြားထိုသို့သော အကြောင်းရင်းများကြောင့် ၎င်းတို့အားလပ်သောအချိန်၌ တာဝန်အချို့ကိုသာ ထမ်းဆောင်နိုင်သောသူတို့အတွက် ဖြစ်သည်။ ဤလူတို့က ၎င်းတို့၏တာဝန်များကို သူတို့အတတ်နိုင်ဆုံး ထမ်းဆောင်ကြသည်။ ဤသည်မှာ ပဉ္စမအမျိုးအစားဖြစ်၏။ မိမိတို့၏တာဝန်များကို ထမ်းဆောင်ခြင်းမရှိသော အခြားသူများကို ဆဋ္ဌမအမျိုးအစားတွင် ထားရှိလေသည်။ ဤလူတို့သည် တာဝန်ထမ်းဆောင်ခြင်းနှင့် မည်သို့မျှ မသက်ဆိုင်သဖြင့် ၎င်းတို့ကို အဘယ်ကြောင့်များ အမျိုးအစားတစ်ခုတွင် ထည့်သွင်းသင့်သနည်း။ အဘယ့်ကြောင့်ဆိုသော် ၎င်းတို့ကို အသင်းသားဦးရေထဲ၌ ထည့်တွက်ထားသောကြောင့် ဤနောက်ဆုံးအမျိုးအစားထဲတွင် ထည့်သွင်းရခြင်းဖြစ်၏။ အကယ်၍ ၎င်းတို့သည် တရားဒေသနာများစွာကို နားထောင်ခဲ့ပြီးဖြစ်လျှင် သမ္မာတရားကို နားလည်နိုင်ပြီး တာဝန်များကို ထမ်းဆောင်ရန် ဆန္ဒအလျောက် တောင်းဆိုပါက ၎င်းတို့၌ စစ်မှန်သော ယုံကြည်ခြင်းရှိပြီး အလွန်အမင်း အရည်အသွေးနိမ့်ပါးသော လူတို့၊ သို့မဟုတ် ဆိုးယုတ်သော လူတို့မဟုတ်သရွေ့ ၎င်းတို့အနေဖြင့် အနှောင့်အယှက်များ မဖြစ်စေဖို့ ကတိပြုပေးသည်ကို ထောက်ရှု၍ ငါတို့သည် ထိုသို့သောလူတို့ကို တာဝန်များထမ်းဆောင်ခွင့် ပြုသင့်ပြီး ၎င်းတို့ကို နောင်တရရန်အတွက် အခွင့်အလမ်းပေးသင့်သည်။ အသင်းသားများသည် အခြေခံအားဖြင့် ယခုတင်ဖော်ပြသော အမျိုးအစားခြောက်ခုထဲတွင် အားလုံး ပါဝင်လေသည်။ ကျန်သောသူတို့မှာမူ ယုံကြည်သူလူသစ်များပင် ဖြစ်၏။ ၎င်းတို့ကို မိမိတို့၏တာဝန်များကို ဖြည့်ဆည်းခြင်းမရှိဟု ဆို၍မရပေ။ ထိုအစား ၎င်းတို့သည် ဝိညာဉ်ရင့်သန်မှုတွင် သေးငယ်ပြီး သမ္မာတရားအား အပေါ်ယံနားလည်မှုသာ ရှိသောကြောင့် မည်သည့်အရာတစ်ခုကိုမျှ လုပ်ဆောင်၍ မရသောကြောင့် ဖြစ်ပေသည်။ ၎င်းတို့ထဲမှ အချို့က အရည်အချင်းကောင်း ရှိလင့်ကစား သမ္မာတရား၊ သို့မဟုတ် စည်းမျဉ်းများကို နားမလည်သေးသဖြင့် မည်သည့်တာဝန်ကိုမျှ ထမ်းဆောင်နိုင်ခြင်း မရှိသေးပေ။ ၎င်းတို့သည် ဘုရားသခင်အား နှစ်နှစ်သုံးနှစ်မျှ ယုံကြည်ပြီးနောက် တာဝန်များကို စတင်ထမ်းဆောင်နိုင်သည်။ ထိုအချိန်တွင် ၎င်းတို့ကို တာဝန်များကို လက်ခံဆောင်ရွက်သူတို့၏ အမျိုးအစားအမျိုးမျိုးတို့၌ ငါတို့ထည့်သွင်းနိုင်သည်။ အဆုံးသတ်ရလျှင် ငါတို့သည် ယခုတင် အမျိုးအစား ခြောက်မျိုးကို ရှင်းလင်းစွာဖြင့် အသေးစိတ်ချပြခဲ့ပြီဖြစ်သည်။ ပထမအမျိုးအစားမှာ ဧဝံဂေလိတရားကို ဖြန့်ဝေသောသူတို့အတွက် ဖြစ်သည်။ ဒုတိယအမျိုးအစားက အသင်းတော်၏ အဆင့်ပေါင်းစုံမှ ခေါင်းဆောင်များနှင့် အမှုဆောင်များအတွက် ဖြစ်သည်။ တတိယအမျိုးအစားက အထူးတာဝန်များကို ထမ်းဆောင်သောသူများအတွက် ဖြစ်သည်။ စတုတ္ထအမျိုးအစားက သာမန်တာဝန်များကို ထမ်းဆောင်သောသူများအတွက် ဖြစ်သည်။ ပဉ္စမအမျိုးအစားက အချိန်ရ၍ အခြေအနေပေးသောအခါ တာဝန်ထမ်းဆောင်သော သူများအတွက် ဖြစ်ကာ ဆဋ္ဌမအမျိုးအစားက တာဝန်ထမ်းဆောင်ခြင်း မရှိသောသူများအတွက် ဖြစ်သည်။ ဤအမျိုးအစားများအား စီစဉ်ဖွဲ့စည်းခြင်းအတွက် အခြေခံကို မည်သည့်စည်းမျဉ်းများက သတ်မှတ်ပေးသနည်း။ ဤအမျိုးအစားများကို အလုပ်အမျိုးအစား၊ လုပ်ဆောင်ဖို့လိုအပ်သော အချိန်၊ အလုပ်ပမာဏနှင့် အလုပ်၏ အရေးကြီးမှုတို့အရ ခွဲခြားသတ်မှတ်လေသည်။ တာဝန်များကို ထမ်းဆောင်ခြင်းအကြောင်း ငါတို့ ယခင်က ပြောခဲ့ချိန်တွင် တာဝန်ထမ်းဆောင်ခြင်းနှင့် ပတ်သက်သည့် သမ္မာတရား၏ သွင်ပြင်လက္ခဏာအမျိုးမျိုးကို အခြေခံအားဖြင့် ငါတို့ ဆွေးနွေးခဲ့ကြသည်။ ငါတို့၏ မိတ်သဟာယပြုချက်သည် လူအားလုံးတို့က ၎င်းတို့၏ တာဝန်များကို ထမ်းဆောင်ရာ၌ လိုက်နာသင့်သည့် သမ္မာတရားစည်းမျဉ်းများနှင့် ပတ်သက်သည်။ ငါတို့သည် မည်သည့်အမျိုးအစားများကိုမျှ ဖန်တီးဖော်ထုတ်ခဲ့ခြင်း မရှိသည့်အပြင် မည့်သည့်စည်းမျဉ်းများကို ဤလူအမျိုးအစားများ တစ်ခုစီက လိုက်နာသင့်ကြောင်း အသေးစိတ် မဆွေးနွေးခဲ့သကဲ့သို့ ၎င်းတို့ဝင်ရောက်ရာ၌ အာရုံစိုက်သင့်သည့် တိကျသော သမ္မာတရားများကိုလည်း မဆွေးနွေးခဲ့ကြပေ။ ဆက်လက်၍ သမ္မာတရား၏ ဤသွင်ပြင်လက္ခဏာနှင့် ပတ်သက်ပြီး ပို၍ပြည့်ပြည့်စုံစုံ မိတ်သဟာယပြုပြီး အမျိုးအစားတစ်ခုစီကို ရှင်းရှင်းလင်းလင်းဖြစ်ရန် တစ်ခုချင်းစီ ဆွေးနွေးကြမည်။

ပထမဦးစွာ ဧဝံဂေလိဖြန့်ဝေသူများ နားလည်သင့်သော သမ္မာတရားများနှင့်ပတ်သက်သည့် ငါတို့၏မိတ်သဟာယကို အစပျိုးမည်။ ဧဝံဂေလိဖြန့်ဝေသူများ နားလည်ပြီး မိမိတို့ကိုယ်ကို ပြင်ဆင်ထားသင့်သည့် အခြေခံသမ္မာတရားများမှာ အဘယ်နည်း။ ဤတာဝန်ကို ကောင်းစွာထမ်းဆောင်ဖို့ သင် မည်ကဲ့သို့ လုပ်ဆောင်သင့်သနည်း။ သင်သည် ဧဝံဂေလိဖြန့်ဝေရန်အတွက် လိုအပ်သည့် ရူပါရုံနှင့်ပတ်သက်သော သမ္မာတရားအချို့ဖြင့် ပြင်ဆင်ရမည်ဖြစ်ပြီး ဧဝံဂေလိဖြန့်ဝေခြင်း၏ စည်းမျဉ်းများကို ပိုင်နိုင်ရမည်။ ဧဝံဂေလိဖြန့်ဝေခြင်း၏ စည်းမျဉ်းများကို ပိုင်နိုင်ပြီးသောအခါ အခြားသူများ၏ အယူအဆများနှင့် ပြဿနာများကို ဖြေရှင်းရန်အတွက် မိမိကိုယ်ကို အခြားမည်သည့် သမ္မာတရားများဖြင့် ပြင်ဆင်သင့်သနည်း။ မှန်သောလမ်းခရီးကို စုံစမ်းမေးမြန်းသူတို့အား မည်သို့ သဘောထားသင့်သနည်း။ အ‌ရေးကြီးဆုံးအရာမှာ ထိုးထွင်းသိမြင်မှုကို သင်ယူခြင်းဖြစ်သည်။ မည်သူ့ကို ဧဝံဂေလိတရား ဟောပြောနိုင်ပြီး မည်သူ့ကို မဟောပြောနိုင်သည်မှာ သင်နားလည်ရမည့် ပထမစည်းမျဉ်း ဖြစ်သည်။ ဧဝံဂေလိဟောပြော၍ မရနိုင်သူအား ဟောပြောမိပါက ယင်းသည် အချည်းနှီးဖြစ်သော ကြိုးပမ်းမှု ဖြစ်သည်သာမက မမြင်ရသော အန္တရာယ်များကိုလည်း အလွယ်တကူ ဖြစ်ပွားစေနိုင်သည်။ ဤသည်ကို နားလည်ထားရမည်။ ထိုမျှမက စကားအနည်းငယ် ပြောလိုက်ပါက၊ သို့မဟုတ် နက်နဲသော သြဝါဒအချို့အကြောင်း ပြောပြပါက ဧဝံဂေလိဟောပြော၍ ရနိုင်သူများကပင် ယင်းကို လက်ခံမည်မဟုတ်ပေ။ ယင်းမှာ သိပ်မလွယ်ကူပေ။ ပါးစပ်ညောင်းသွားပြီး အာခေါင်ခြောက်ကပ်သွားသည်အထိ သင်ဟောပြောပြီး မှန်သောလမ်းခရီးကို စုံစမ်းမေးမြန်သည့် ထိုသူများကို စွန့်ပစ်လိုသည်အထိ သင်သည် သည်းခံစိတ်ဟူသမျှ ကုန်ဆုံးသွားနိုင်လေသည်။ ထိုသို့သော အခြေအနေများ၌ မည်သည့်အရာကို ပိုင်ဆိုင်ရန် အရေးကြီးဆုံးဖြစ်သနည်း။ (ချစ်ခြင်းမေတ္တာနှင့် စိတ်ရှည်သည်းခံခြင်း ဖြစ်သည်။) သင်သည် ချစ်ခြင်းမေတ္တာနှင့် စိတ်ရှည်သည်းခံခြင်း ရှိရမည်။ မေတ္တာစိတ်ခံစားမှုမှန်သမျှ ကင်းမဲ့နေလျှင် စိတ်ရှည်သည်းခံမှု မရှိမည်မှာ အသေအချာဖြစ်သည်။ ရူပါရုံနှင့်ပတ်သက်သည့် သမ္မာတရားအား နားလည်ခြင်းအပြင် ဧဝံဂေလိဖြန့်ဝေခြင်းသည်လည်း ကြီးမားသော ချစ်ခြင်းမေတ္တာနှင့် ကြီးမားသော စိတ်ရှည်သည်းခံမှုတို့ လိုအပ်သည်။ ထိုသို့အားဖြင့်သာ ဧဝံဂေလိဖြန့်ဝေခြင်းဟူသည့် တာဝန်ကို ကောင်းမွန်စွာ ထမ်းဆောင်နိုင်သည်။ ဧဝံဂေလိဖြန့်ဝေခြင်းတာဝန်ကို မည်ကဲ့သို့ အဓိပ္ပာယ်ဖွင့်ဆိုသနည်း။ ဧဝံဂေလိ‌ဖြန့်ဝေခြင်းတာဝန်ကို သင် မည်ကဲ့သို့ ရှုမြင်သနည်း။ ဧဝံဂေလိဖြန့်ဝေသူတို့သည် အခြားတာဝန်များကို ထမ်းဆောင်သူတို့နှင့် မည်သည့်နေရာ၌ ကွာခြားသနည်း။ ထိုသူတို့သည် နောက်ဆုံးသောကာလ၌ ဘုရားသခင်၏အမှုတော်ကို သက်သေခံကြပြီး ဘုရားသခင်၏ ကြွလာခြင်းကို သက်သေခံကြသည်။ ၎င်းတို့သည် ဧဝံဂေလိတရား၏ တမန်များဖြစ်သည်၊ ၎င်းတို့ကို အထူးတာဝန်တစ်ခုဖြင့် စေလွှတ်ခံရခြင်းဖြစ်သည်၊ ၎င်းတို့သည် အထက်မှ ဆင်းသက်လာသည့် ကောင်းကင်တမန်များ ဖြစ်သည်ဟု လူအချို့က ပြောကြသည်။ ထိုသူတို့ကို ထိုသို့ အဓိပ္ပာယ်ဖွင့်ဆိုနိုင်သလော။ (ဖွင့်ဆို၍မရပါ။) ဧဝံဂေလိဖြန့်ဝေသူတို့၏ အထူးတာဝန်မှာ အဘယ်နည်း။ ၎င်းတို့သည် လူတို့၏စိတ်ထဲတွင် မည်သည့်ပုံရိပ်ရှိကြသနည်း။ ၎င်းတို့၏လုပ်ငန်းတာဝန်မှာ အဘယ်နည်း။ (တရားဟောဆရာများ ဖြစ်သည်။) တရားဟောဆရာများ၊ တမန်များအပြင် မည်သည့်အရာ ရှိသေးသနည်း။ (သက်သေခံသူများဖြစ်သည်။) လူအများစုက ၎င်းတို့ကို ဤသို့ အဓိပ္ပာယ်ဖွင့်ကြမည်။ သို့သော် ဤအဓိပ္ပာယ်ဖွင့်ဆိုချက်များမှာ အမှန်တကယ် တိကျမှန်ကန်သလော။ လူသိများသော အသုံးအနှုန်းများမှာ “တရား‌ဟောဆရာ” နှင့် “သက်သေခံသူ” ဖြစ်ကာ “ဧဝံဂေလိတမန်” မှာ ပို၍ ဂုဏ်ဒြပ်ကြီးသော ဂုဏ်ပုဒ်တစ်ခုဖြစ်၏။ ဤအသုံးအနှုန်းသုံးခုကို မကြာခဏ ကြားရသည်။ ဤတာဝန်ကို ထမ်းဆောင်သူတို့၏ ဂုဏ်ပုဒ်များကို လူတို့ မည်သို့နားလည်ပြီး အဓိပ္ပာယ်ဖွင့်ဆိုသည်ဖြစ်စေ ဤဂုဏ်ပုဒ်များအားလုံးမှာ “ဧဝံ‌ဂေလိတရား” ဟူသည့် စကားလုံးနှင့် ခွဲခြား၍မရနိုင်အောင် ဆက်စပ်နေသည်။ ဤအသုံးအနှုန်းသုံးခုအနက် မည်သည့်အသုံးအနှုန်းက ဧဝံဂေလိဖြန့်ဝေခြင်းတာဝန်နှင့် ပို၍ဆီလျော်ပြီး ပို၍လိုက်ဖက်ကာ ပို၍ယုတ္တိတန်သော ဂုဏ်ပုဒ်ဖြစ်စေသနည်း။ (တရားဟောဆရာများ ဖြစ်သည်။) တရားဟောဆရာဟူသည့် ဂုဏ်ပုဒ်က ပို၍လိုက်ဖက်သည်ဟု လူအများစုက ထင်ကြသည်။ တစ်စုံတစ်ဦးသည် သက်သေခံသူဟူသည့် ဂုဏ်ပုဒ်ကို သဘောတူသလော။ (သဘောတူပါသည်။) ဧဝံဂေလိတမန်ဟူသည့် ဂုဏ်ပုဒ်ရော အဘယ်သို့ရှိသနည်း။ (သဘောမတူပါ။) အခြေခံအားဖြင့် ဧဝံဂေလိတမန်ဟူသည့် ဂုဏ်ပုဒ်ကို မည်သူမျှ သဘောမတူပေ။ တရားဟောဆရာဟူသည့် ဂုဏ်ပုဒ်က သင့်တော်သည်၊ မတော်သည်ကို ငါတို့ ဦးစွာ ဆွေးနွေးကြစို့။ “တရားဟောသည်” ဟူသည်မှာ တစ်စုံတစ်ခုကို ဖြန့်ဝေခြင်း၊ ဖြန့်ဖြူးခြင်း၊ သိရှိစေခြင်းနှင့် ကြော်ငြာခြင်းကို ဆိုလိုသည်။ တရားဟောဆရာများ ဟောပြောသည့် “လမ်းခရီး” မှာ အဘယ်နည်း။ (မှန်သော လမ်းခရီးဖြစ်သည်။) ယင်းသည် ထိုအရာကိုပြောဖို့ နည်းလမ်းကောင်းဖြစ်၏။ “လမ်းခရီး” ဟူသည်မှာ လူသားအပေါ် ဘုရားသခင်၏ အမှုတော်နှင့်လည်းကောင်း ဘုရားသခင်၏ ကယ်တင်ခြင်းနှင့်လည်းကောင်း ပတ်သက်သည့် မှန်သောလမ်းခရီး ဖြစ်သည်။ ဤသည်မှာ တရားဟောဆရာဟူသည့် စကားလုံးအား ငါတို့ ရှင်းပြပြီး အဓိပ္ပာယ်ဖွင့်ဆိုပုံ ဖြစ်သည်။ ထို့နောက် သက်သေခံသူအကြောင်းကို ပြောကြစို့။ သက်သေခံသူတစ်ဦးက သက်သေခံသည့်အရာမှာ အဘယ်နည်း။ (နောက်ဆုံးသောကာလ ဘုရားသခင်၏ အမှုတော်ဖြစ်သည်။) သက်သေခံသူတစ်ဦးက နောက်ဆုံးသောကာလ ဘုရားသခင်၏ အမှုတော်ကို သက်သေခံသည်ဆိုလျှင် မမှားပေ။ ဤဂုဏ်ပုဒ်နှစ်ခုမှာ အတော်ပင် သင့်လျော်ဟန်ရှိသည်။ ဧဝံဂေလိတမန်ရော အဘယ်သို့ရှိသနည်း။ “ဧဝံဂေလိတရား” က မည်သည့်အရာကို ရည်ညွှန်းသနည်း။ ယင်းမှာ ဘုရားသခင်၏အလုပ်၊ လူသားအား ဘုရားသခင်၏ ကယ်တင်ခြင်း၊ ဘုရားသခင်၏ ပြန်ကြွလာခြင်းနှင့် ဆိုင်သော သတင်းကောင်းနှင့် ဝမ်းမြောက်စရာ သတင်းစကား ဖြစ်၏။ “တမန်” ကို ငါတို့ မည်ကဲ့သို့ ရှင်းပြနိုင်မည်နည်း။ “တမန်” ၏ ကောင်းမွန်သော ရှင်းပြချက်တစ်ခုမှာ ဘုရားသခင်စေလွှတ်သော လူတစ်ဦး၊ ဧဝံ‌ဂေလိတရားကို ဖြန့်ဝေရန် တိုက်ရိုက် စေလွှတ်ထားသူ၊ သို့မဟုတ် ဘုရားသခင်၏ နှုတ်ကပတ်တော်များ၊ သို့မဟုတ် အရေးကြီးသော သတင်းစကားကို သိရှိစေရန် သတ်မှတ်သော အချိန်တစ်ခု၌ ဘုရားသခင်စေလွှတ်သည့် လူတစ်ဦးဦး ဖြစ်သည်။ ဤသည်မှာ တမန်ဖြစ်သည်။ ဧဝံဂေလိတရားကို ဖြန့်ဝေသူတို့က ထိုသို့သော ကဏ္ဍတာဝန်ကို ဆောင်ရွက်သလော။ ၎င်းတို့က ဤအလုပ်မျိုးကို လုပ်သလော။ (မလုပ်ပါ။) သို့ဆိုလျှင် ၎င်းတို့က မည်သည့်အလုပ်မျိုးကို လုပ်ဆောင်သနည်း။ (၎င်းတို့က နောက်ဆုံးသောကာလ ဘုရားသခင်၏ အမှုတော်ကို သက်သေခံကြသည်။) နောက်ဆုံးသောကာလ ဘုရားသခင်၏ အမှုတော်အား ၎င်းတို့၏ သက်သေခံချက်သည် ဘုရားသခင်ထံမှ ၎င်းတို့ တိုက်ရိုက်ရရှိထားသည့် အထူးတာဝန် ဟုတ်သလော။ (မဟုတ်ပါ။) သို့ဆိုလျှင် ဤအထူးတာဝန်ကို မည်ကဲ့သို့ ရှင်းပြနိုင်သနည်း။ (ယင်းမှာ ဖန်ဆင်းခံများ၏ တာဝန်ဖြစ်၏။) ယင်းသည် လူတို့၏တာဝန် ဖြစ်သည်။ ဘုရားသခင်က သူ၏အမှုသစ်အား ကြေညာခြင်းနှင့် ဧဝံဂေလိတရားအား ဖြန့်ဝေခြင်းကို သင့်အား တာဝန်ပေးခြင်း၊ သင့်အား ပြောပြခြင်း သို့မဟုတ် သင့်အား အပ်နှံခြင်း ရှိသည်ဖြစ်စေ၊ မရှိသည်ဖြစ်စေ သင်သည် ဧဝံဂေလိတရားအကြောင်းကို ပို၍များပြားသော လူတို့အား ပြောပြရန်၊ ယင်းကို ဖြန့်ဝေရန်အပြင် ယင်းကို ပို၍များပြားသော လူတို့ထံ သယ်ဆောင်ရန်အတွက် တာဝန်နှင့် ဝတ္တရားရှိသည်။ ပို၍များပြားသော လူတို့က ဤသတင်းအား သိရှိရန်၊ ဘုရားသခင်ရှေ့မှောက်သို့ လာရန်နှင့် ဘုရားသခင်၏ အိမ်တော်သို့ ပြန်လာရန် သင် ထောက်ကူပေးဖို့အတွက် တာဝန်နှင့် ဝတ္တရားရှိသည်။ ဤသည်မှာ လူတို့၏ လုပ်ငန်းတာဝန်နှင့် ဝတ္တရားဖြစ်သဖြင့် ၎င်းတို့ကို ဘုရားသခင်က စေလွှတ်ထားသည်၊ ပို့ဆောင်ထားသည်ဟု ဆို၍မရပေ။ ထို့ကြောင့် “တမန်” ဟူသည့် စကားလုံးက ဤနေရာတွင် မသင့်လျော်ပေ။ ဤစကားလုံး၏ သဘောသဘာဝမှာ အဘယ်နည်း။ ယင်းသည် မှားယွင်းပြီး ပုံကြီးချဲ့လွန်းကာ အနှစ်သာရကင်းမဲ့သည်။ “တမန်” ဟူသည့် စကားလုံးသည် ပုံကြီးချဲ့လွန်းသဖြင့် မသင့်လျော်ပေ။ ဓမ္မဟောင်းခေတ်မှ မျက်မှောက်ခေတ်အထိ ဘုရားသခင်၏ စီမံခန့်ခွဲမှုအလုပ် အစပြုချိန်မှ ပစ္စုပ္ပန်အချိန်တိုင်အောင် တမန်၏ လုပ်ငန်းတာဝန်မှာ မည်သည့်အခါမျှ မရှိခဲ့ပေ။ ဆိုလိုသည်မှာ လူသားမျိုးနွယ်အား ကယ်တင်ခြင်းအတွက် ဘုရားသခင်၏ စီမံခန့်ခွဲမှုအလုပ် အချိန်ကာလတစ်လျှောက်လုံးတွင် ထိုသို့သော လုပ်ငန်းတာဝန် မပါဝင်ခဲ့ပေ။ သာမန်လူတို့သည် “တမန်” ဟူသည့် စကားလုံး၏ ဆိုလိုသည့်အရာကို မည်သို့ တာဝန်ယူနိုင်သနည်း။ ထိုသို့သော အလုပ်မျိုးကို မည်သူမျှ တာဝန်ယူ ဆောင်ရွက်နိုင်ခြင်း မရှိနိုင်ပေ။ ထို့ကြောင့် ဤလုပ်ငန်းတာဝန်သည် လူသားအတွက် မဖွင့်ထားသည့်အပြင် မည်သူ့ကိုမျှ ဤစကားလုံးနှင့် ဆက်စပ်၍၊ သို့မဟုတ် ယှဉ်တွဲ၍ မရနိုင်ပေ။ လူတို့နားလည်ထားသည့်အတိုင်း တမန်ဟူသည်မှာ တစ်စုံတစ်ခုကို ပြုလုပ်ရန်၊ သို့မဟုတ် သတင်းစကားတစ်ခုကို သိရှိစေရန် ဘုရားသခင် စေလွှတ်ထားသူတစ်ဦး ဖြစ်သည်။ ထိုသို့သော လူတစ်ဦးသည် လူသားမျိုးနွယ်အား စီမံခန့်ခွဲခြင်းဟူသည့် ဘုရားသခင်၏ ကြီးကျယ်ခမ်းနားပြီး ဆက်စပ်လွှမ်းခြုံနေသော အလုပ်နှင့် အနည်းငယ်သာ ပတ်သက်သည်။ ဆိုလိုသည်မှာ တမန်၏ လုပ်ငန်းတာဝန်မှာ ဘုရားသခင့်အလုပ်၏ အဆင့်သုံးဆင့်ထဲ၌ မပါဝင်သလောက် နီးနီး ဖြစ်၏။ ထို့ကြောင့် နောင်တွင် ဤစကားလုံးကို အသုံးမပြုလေနှင့်။ ဤသို့ပြောဆိုခြင်းက နုံအရာကျသည်။ လူတစ်ဦးက “ဧဝံဂေလိတမန်” ဟူသည့် ဂုဏ်ပုဒ်ကို တာဝန်ယူနိုင်သလော။ မယူနိုင်ကြပေ။ တစ်ချက်မှာ ထိုသူသည် အသွေးနှင့်ကိုယ် အသားနှင့်ကိုယ် ဖြစ်၏။ ထိုမျှမက သူသည် ဖောက်ပြန်ပျက်စီးသော လူသားမျိုးနွယ်ဝင်တစ်ဦး ဖြစ်သည်။ တမန်တစ်ဦးဟူသည်မှာ မည်သည့်သတ္တဝါမျိုး ဖြစ်သနည်း။ သင်တို့ သိသလော။ (ကျွန်ုပ်တို့ မသိပါ။) သင်တို့ မသိကြချေ။ သို့တိုင်အောင် ဤနာမည်ကို အသုံးပြုဝံ့သေးသည်။ ဤသည်မှာ ဟန်ဆောင်ခြင်းဖြစ်၏။ တမန်များသည် လူသားမျိုးနွယ်နှင့် သက်ဆိုင်မှုမရှိသည့်အပြင် လူသားတို့သည် “တမန်” ဟူသည့် စကားလုံးနှင့် ဘာမျှ သက်ဆိုင်မှုမရှိဟု အသေအချာ ဆိုနိုင်သည်။ လူသားမျိုးနွယ်သည် ယင်းကို တာဝန်မယူနိုင်ပေ။ ဧဝံဂေလိတမန်များ၊ အထက်မှ တမန်များ၏ ဆင်းသက်လာခြင်းနှင့် တမန်များ၏အလုပ် အားလုံးတို့မှာ အခြေခံအားဖြင့် ဓမ္မဟောင်းကျမ်းရှိ အာဗြဟံခေတ်တွင် အဆုံးသတ်ခဲ့ပြီ။ ဤအရာမှာ ကုန်လွန်ပြီးစီးခဲ့ပြီ ဖြစ်သည်။ ဘုရားသခင်က လူသားမျိုးနွယ်အား ကယ်တင်ခြင်းအလုပ်ကို တရားဝင် ထမ်းဆောင်ခဲ့ကတည်းက လူသားမျိုးနွယ်သည် “တမန်” ဟူသည့် စကားလုံးကို ဆက်လက်၍ အသုံးမပြုသင့်တော့ချေ။ အဘယ့်ကြောင့် ဤစကားလုံးကို နောက်ထပ် အသုံးမပြုသင့်သနည်း။ (လူသားက ယင်းကို တာဝန်မယူနိုင်ပါ။) ယင်းသည် လူက တာဝန်ယူနိုင်ခြင်းရှိမရှိ ဟူသည့်ကိစ္စမဟုတ်ဘဲ တမန်များက ဖောက်ပြန်ပျက်စီးသော လူသားမျိုးနွယ်နှင့် ပတ်သက်မှုမရှိခြင်းသာ ဖြစ်သည်။ ဖောက်ပြန်ပျက်စီးသော လူသားမျိုးနွယ်ကြားတွင် ထိုသို့သော လုပ်ငန်းတာဝန် မရှိသကဲ့သို့ ထိုသို့သော ဂုဏ်ပုဒ်လည်း မရှိပေ။ “တရားဟောဆရာ” ဟူသည့် စကားလုံးအကြောင်းကို ပြန်ပြောကြစို့။ အကယ်၍ ၎င်းတို့ဟောပြောသည့် “လမ်းခရီး” နှင့်ပတ်သက်၍ ဓမ္မဓိဋ္ဌာန်ကျသော၊ တိကျမှန်ကန်သော၊ နက်နဲသော အဓိပ္ပာယ်ဖွင့်ဆိုချက်တစ်ခု ပေးရမည်ဆိုလျှင် ယင်းကို ငါတို့ မည်သို့ဖွင့်ဆိုမည်နည်း။ (ဘုရားသခင်၏ နှုတ်ကပတ်တော်။) ဤသည်မှာ အတော်ပင် ယေဘုယျဆန်သော အသုံးအနှုန်းဖြစ်၏။ အတိအကျဆိုရလျှင် ယင်းက မျက်မှောက်ခေတ်ရှိ ဧဝံဂေလိတရားနှင့် ဘုရားသခင့်အလုပ်၏ သတင်းစကားကိုသာ ရည်ညွှန်းသလော။ (မရည်ညွှန်းပါ။) သို့ဆိုလျှင် ဧဝံဂေလိတရားကို ဖြန့်ဝေသူတို့ အမှန်တကယ် ကြေညာသည့်အရာမှာ မည်သည့်အရာနည်း။ ဧဝံဂေလိတရားကို ဖြန့်ဝေသူတို့၏ အလုပ်သည် “လမ်းခရီး” နှင့် မည်သည့်အတိုင်းအတာအထိ ဆက်စပ်သနည်း။ ၎င်းတို့၏ တာဝန်နယ်ပယ်ထဲ၌ အမှန်တကယ် မည်သည့်အလုပ်မျိုး ပါဝင်သနည်း။ ၎င်းတို့က လူတို့အနေဖြင့် ဤသတင်းစကားကို ကြားသိ၍ လက်ခံနိုင်ပြီးနောက် ဘုရားသခင်ထံ ပြန်လာကြရန်အတွက် ဘုရားသခင်သည် နောက်ဆုံးသောကာလတွင် ရောက်လာခဲ့ပြီဖြစ်ကြောင်း၊ သူပြီးမြောက်ခဲ့သည့် အလုပ်၊ ဘုရားသခင်၏ နှုတ်ကပတ်တော်များနှင့် ဘုရားသခင်၏ အလိုတော် စသည့် အခြေခံ သတင်းစကားတစ်ခုခုကို ဧဝံဂေလိအား လက်ခံသူတို့ထံ ပေးပို့ရုံသာဖြစ်သည်။ ၎င်းတို့သည် လူတို့အား ဘုရားသခင်ရှေ့မှောက်သို့ ပို့ဆောင်ပြီးနောက်တွင် ၎င်းတို့၏ ဧဝံဂေလိ‌ဖြန့်ဝေခြင်း တာဝန်မှာ ပြည့်စုံပြီဖြစ်သည်။ “လမ်းခရီး” ဟူသည့်အရာ၏ ဆိုလိုရင်း တစ်စုံတစ်ခုသည် ၎င်းတို့ပြောဆိုသည့် သတင်းစကားတွင် ပါဝင်သလော။ ဤတွင် “သတင်းစကား” နှင့် “ဧဝံဂေလိတရား” ဟူသည့် အသုံးအနှုန်းများမှာ အခြေခံအားဖြင့် တူညီသည်။ သို့ဆိုလျှင် ယင်းတို့တွင် “လမ်းခရီး” နှင့် တစ်စုံတစ်ရာ ပတ်သက်နေသလော။ (မပတ်သက်ပါ။) ထိုသို့သော နှီးနွှယ်ဆက်စပ်မှု အဘယ့်ကြောင့် မရှိသနည်း။ “လမ်းခရီး” သည် အတိအကျ မည်သည့်အရာကို ရည်ညွှန်းသနည်း။ ရှင်းပြချက်တစ်ခုအဖြစ် ငါတို့ အသုံးပြုနိုင်သည့် အရိုးရှင်းဆုံး စကားလုံးမှာ လမ်းကြောင်းဖြစ်၏။ “လမ်းကြောင်း” ဟူသည့် အသုံးအနှုန်းက “လမ်းခရီး” ၏ အဓိပ္ပာယ်ဖွင့်ဆိုချက်ကို အရှင်းဆုံးဖော်ပြပြီး ယင်းမှာ ပို၍တိကျသည်။ ပို၍ခိုင်ခိုင်လုံလုံ ပြောရလျှင် “လမ်းခရီး” ဟူသည်မှာ လူသားမျိုးနွယ်၏ ကယ်တင်ခြင်းအတွက်၊ လူသားများကို ၎င်းတို့၏ ဖောက်ပြန်ပျက်စီး ဆိုးယုတ်သော စိတ်သဘောထားများမှ လွတ်မြောက်စေရန်နှင့် ၎င်းတို့ကို စာတန်၏ ချည်နှောင်ခြင်းနှင့် အမှောင်စွမ်းအားမှ လွတ်မြောက်ခွင့်ပေးရန် ဘုရားသခင ်ပေးအပ်သော နှုတ်ကပတ်တော်များအားလုံးပင် ဖြစ်၏။ ဤသည်မှာ တိကျမှန်ကန်ပြီး ခိုင်လုံသော ဖော်ပြချက်တစ်ခု ဟုတ်သလော။ ယခုတွင် ယင်းကိုကြည့်ရလျှင် “တရားဟောဆရာ” ဟူသည့် စကားလုံးသည် ဧဝံဂေလိဖြန့်ဝေခြင်း တာဝန်ကို ဖြည့်ဆည်းသောသူတို့အတွက် သင့်လျော်သော အဓိပ္ပာယ်ဖွင့်ဆိုချက် ဟုတ်သလော။ (ယင်းမှာ မသင့်လျော်ပါ။) တရားဟောဆရာ၏ တာဝန်သည် ဧဝံဂေလိဖြန့်ဝေခြင်းထက် များစွာ ကျော်လွန်သည်။ ဘုရားသခင်ကို သိကျွမ်းပြီး ဘုရားသခင်အား သက်သေခံသူတို့ကသာ ဤဂုဏ်ပုဒ်ကို တာဝန်ယူနိုင်သည်။ ဧဝံဂေလိတရားကို ဖြန့်ဝေသော သာမန်လူတစ်ဦးက တရားဟောဆရာ၏ အလုပ်ကို တာဝန်ယူနိုင်သလော။ လုံးဝ မယူနိုင်ပေ။ ဧဝံဂေလိဖြန့်ဝေခြင်းသည် သတင်းကောင်းကို ကြေညာခြင်းနှင့် ဘုရားသခင်၏အလုပ်ကို သက်သေခံခြင်းမျှထက် မပိုပေ။ ဤလူတို့က တရားဟောဆရာများ၏ အလုပ်ကို လုံးဝ တာဝန်မယူနိုင်၊ ၎င်းတို့က တရားဟောဆရာများ၏ တာဝန်ကို မဖြည့်ဆည်းနိုင်၊ ထို့ကြောင့် ၎င်းတို့ကို တရားဟောဆရာများဟု မခေါ်နိုင်ပေ။ တရားဟောဆရာ၏ ဂုဏ်ပုဒ်သည် ပို၍မြင့်မားသော အဆင့်အတန်းကို ပေးအပ်ပြီး ဧဝံဂေလိဖြန့်ဝေသူတို့သည် ဤဂုဏ်ပုဒ်နှင့် မထိုက်တန်ပေ။ ဤဂုဏ်ပုဒ်က ၎င်းတို့အတွက် မဆီလျော်ပေ။ ယခုတွင် “သက်သေခံသူ” ဟူသည့် အသုံးအနှုန်းမှာ တစ်ခုတည်းကြွင်းကျန်သော အသုံးအနှုန်း ဖြစ်၏။ သက်သေခံသူတစ်ဦး သက်သေခံသည့်အရာမှာ အဘယ်နည်း။ (နောက်ဆုံးသောကာလ ဘုရားသခင်၏အလုပ် ဖြစ်သည်။) ၎င်းတို့သည် နောက်ဆုံးသောကာလ ဘုရားသခင်၏ အလုပ်ကို ကြေညာပြီး သက်သေခံသည်ဟုဆိုလျှင် ဆီလျော်သလော။ သက်သေခံသူ၏အဓိပ္ပာယ်ကို တိတိကျကျ အဓိပ္ပာယ်ဖွင့်မည်ဆိုလျှင် ယင်းသည် ဧဝံဂေလိတရားအား သက်သေခံသောသူထက် ဘုရားသခင်အား သက်သေခံသောသူကို ရည်ညွှန်းသင့်သည်။ ဧဝံဂေလိဖြန့်ဝေသော ဤလူတို့ကို ဘုရားသခင်အား သက်သေခံသူများဟု ငါတို့ခေါ်လျှင်ကော အဘယ်သို့ရှိသနည်း။ ၎င်းတို့သည် ဘုရားသခင်အား သက်သေခံနိုင်သလော။ (မခံနိုင်ပါ။) ဤတွင်အသုံးပြုသည့် “သက်သေခံသူ” ဟူသည့် အသုံးအနှုန်းကို ငါတို့ မည်သို့ ရှင်းပြနိုင်သနည်း။ အသေအချာ စစ်ဆေးကြည့်လျှင် “သက်သေခံသူ” ဟူသည့် စကားလုံးမှာလည်း မသင့်လျော်ပေ။ ဧဝံဂေလိဖြန့်ဝေသူတို့သည် ဘုရားသခင်၏ နှုတ်ကပတ်တော်များအား ဆာငတ်သူတို့ အားလုံးထံ ဘုရားမိန့်မြွက်သော နှုတ်ကပတ်တော်များကို ကြေညာပြီး ဘုရားသခင်၏ ပေါ်ထွန်းခြင်းကို ကြိုဆိုသောသူတို့ထံ ဘုရားသခင်၏ နှုတ်ကပတ်တော်အား ပြောပြရုံသာဖြစ်သဖြင့် ဤအရာက “သက်သေခံသူ” ဟူသည့် စကားလုံး၏ စစ်မှန်သော အဓိပ္ပာယ်သို့ မရောက်ရှိပေ။ ဤသည်မှာ သက်သေခံခြင်း၏ ဆိုလိုရင်းမဟုတ်ဟု အဘယ်ကြောင့် ငါဆိုရသနည်း။ သက်သေခံခြင်းတွင် လူတစ်ဦးက လူတို့ကို ဘုရားသခင်အား သိကျွမ်းလာစေရန်နှင့် ဤလူတို့အား သူ၏ရှေ့မှောက်သို့ ပို့ဆောင်ရန်အတွက် ထောက်ကူပေးဖို့အလို့ငှာ မိတ်သဟာယပြုသည့်အရာနှင့် ကြေညာသည့်အရာတို့ ပါဝင်သည်။ လက်ရှိတွင် ဧဝံဂေလိဖြန့်ဝေသူတို့က လူတို့အား အသင်းတော်ထဲသို့၊ ကမ္ဘာပေါ်ရှိ ဘုရားသခင်၏ လုပ်ငန်းခွင်ထဲသို့ ပို့ဆောင်ရုံမျှ ပို့ဆောင်နေကြခြင်း ဖြစ်သည်။ ၎င်းတို့က ဘုရားသခင်၏ စိတ်နေသဘောထား၊ ဘုရားသခင်၏ အရာအားလုံးနှင့် ဖြစ်ခြင်း၊ သို့မဟုတ် ဘုရားသခင်၏ အမှုတော်ကို သက်သေမခံကြပေ။ သက်သေခံသူဟူသည့် ဂုဏ်ပုဒ်က ၎င်းတို့အတွက် သင့်လျော်သလော။ အတိအကျဆိုရလျှင် ယင်းမှာ မသင့်တော်သကဲ့သို့ လိုက်လည်းမလိုက်ဖက်ပေ။ ယခုတွင် ငါတို့သည် ဧဝံဂေလိတမန်များ၊ တရားဟောဆရာများနှင့် သက်သေခံသူများဟူသည့် အသုံးအနှုန်းသုံးခုလုံးကို စုံစမ်းစစ်ဆေး၍ ချင့်ချိန်စဉ်းစားခဲ့ပြီးဖြစ်ကာ ယင်းတို့အားလုံးက ဧဝံဂေလိဖြန့်ဝေသူတို့အတွက် မသင့်တော်ကြောင်း တွေ့ရှိခဲ့ကြသည်။ ဤအသုံးအနှုန်းများက ဘာသာတရားမှ လာသည်ဖြစ်စေ၊ သို့မဟုတ် ဘုရားသခင်၏ အိမ်တော်သားများက အများအားဖြင့် အသုံးပြုသည်ဖြစ်စေ ဤဂုဏ်ပုဒ်များမှာ မသင့်လျော်သကဲ့သို့ လိုက်လည်း မလိုက်ဖက်ပေ။ ယခုတွင် ငါတို့၌ မေးခွန်းတစ်ခု ရှိလာပြီဖြစ်သည်။ ဂုဏ်ပုဒ်များက အရေးကြီးသလော။ (ယင်းတို့က အရေးကြီးပါသည်။) ယင်းတို့က အမှန်တကယ် အရေးကြီးသလော။ ဥပမာအနေဖြင့် သင်၏မူလအမည်မှာ ဂျွန်စမစ်ဖြစ်သော်လည်း ယခု သင့်ကို ဂျိမ်းစ်ကလာ့ခ်ဟု ခေါ်ကြသည်။ သင်သည် ပြောင်းလဲသွားသလော။ သင်သည် သင်ဖြစ်မြဲဖြစ်နေသလော။ ဤသည်မှာ သင်အသုံးပြုသော ဂုဏ်ပုဒ်၊ သို့မဟုတ် အမည်နာမက အရေးမကြီးကြောင်းကို ဆိုလိုသည်။ အကယ်၍ ယင်းသည် အရေးမကြီးပါက ဤစကားလုံးများကို အဘယ့်ကြောင့် ခွဲခြမ်းစိတ်ဖြာနေသနည်း။ လူတို့အနေဖြင့် ဧဝံဂေလိဖြန့်ဝေခြင်းတာဝန်နှင့် ပတ်သက်၍ တိကျမှန်ကန်သော ရှုမြင်ချက်တစ်ခုကို ရရှိနိုင်ရန်၊ ဤတာဝန်က အမှန်တကယ် မည်သည့်အရာဖြစ်သည်ကို တိကျမှန်ကန်စွာ အဓိပ္ပာယ်ဖွင့်ဆိုကာ ဤတာဝန်ကို ၎င်းတို့ လျောက်ပတ်စွာ ထမ်းဆောင်ပြီး သဘောထားသင့်ပုံကို သိရှိရန်အတွက် ငါသည် ဤစကားလုံးများကို ခွဲခြမ်းစိတ်ဖြာရခြင်း ဖြစ်သည်။ ဦးစွာ သင့်အနေဖြင့် ဤတာဝန်၌ရှိသော သင်၏ကိုယ်ပိုင်နေရာကို ဆုံးဖြတ်သတ်မှတ်ရန် လိုအပ်သည်။ ဤသည်မှာ အလွန် အရေးကြီးသည်။ ထို့ကြောင့် ဤဂုဏ်ပုဒ်က တိကျမှန်ကန်ရမည် ဖြစ်သည်။

ငါသည် ယခုတင် ဧဝံဂေလိဖြန့်ဝေခြင်းတာဝန်ကို ထမ်းဆောင်သူတို့အား ရည်ညွှန်းသည့် ဂုဏ်ပုဒ်များ၊ သို့မဟုတ် အသုံးအနှုန်းများ အချို့ကို အကြမ်းဖျင်း ခွဲခြမ်းစိတ်ဖြာပြီး ဖြစ်သည်။ သက်သေခံသူများ၊ တရားဟောဆရာများနှင့် ဧဝံဂေလိတမန်များဟူသည့် ဂုဏ်ပုဒ်များနှင့် အဓိပ္ပာယ်ဖွင့်ဆိုချက်များ အားလုံးမှာ တိကျမှန်ကန်မှု မရှိပေ။ ယင်းတို့သည် အဘယ့်ကြောင့် တိကျမှန်ကန်မှု မရှိသနည်း။ ယင်းမှာ ဧဝံဂေလိဖြန့်ဝေရုံ ဖြန့်ဝေသူတို့က ဤအမည်နာမများနှင့် ထိုက်တန်သည့် ထိရောက်သော မည်သည့်အလုပ်ကိုမျှ မလုပ်သောကြောင့် ဖြစ်သည်။ ၎င်းတို့က ဘုရားသခင်၏ လုပ်ဆောင်မှုများ၊ ဘုရားသခင်၏ အမှုတော်၊ သို့မဟုတ် ဘုရားသခင်၏ အနှစ်သာရကို သက်သေခံနေကြခြင်း မဟုတ်ပေ။ ဤသည်မှာ ၎င်းတို့ပြုလုပ်သော အလုပ် မဟုတ်သကဲ့သို့ ၎င်းတို့ ထမ်းဆောင်သည့် တာဝန်လည်း မဟုတ်ပေ။ ထို့ကြောင့် ၎င်းတို့ကို သက်သေခံသူဟူသည့် ဂုဏ်ပုဒ်ဖြင့် ခေါ်ဆိုရန် မထိုက်တန်ပေ။ ဧဝံဂေလိတမန်နှင့် ပတ်သက်၍ မဆိုထားနှင့်၊ တရားဟောဆရာဟူသည့် ဂုဏ်ပုဒ်မှာလည်း ဤသဘောသဘာဝအတိုင်းပင် ဖြစ်၏။ ဤဧဝံဂေလိတမန်ဟူသည့် ဂုဏ်ပုဒ်မှာ အဓိပ္ပာယ်ကင်းမဲ့ပြီး မည်သည့်အရာကိုမျှ လုံးဝ အခြေခံမထားပေ။ ယင်းသည် လူတို့က သူတို့ကိုယ်သူတို့ပေးသည့် ဟိတ်ဟန်ကြီးပုံပေါက်သော ဂုဏ်ပုဒ်သာလျှင် ဖြစ်၏။ တမန်ဟူသည့်ဂုဏ်ပုဒ်သည် မည်သည့်နေရာမှ လာခဲ့သနည်း။ ယင်းကို လူသား၏ အလွန်အကျွံဖြစ်သည့် မာနထောင်လွှားသော စိတ်သဘောထား ဖန်တီးထားခဲ့ခြင်း မဟုတ်လော။ (ဟုတ်ပါသည်။) ဤသည်မှာ မိမိကိုယ်ကို ဟိတ်ဟန်ကြီးသော ဂုဏ်ပုဒ်တစ်ခု ပေးလိုစိတ် ရှိခြင်းသာ ဖြစ်သည်။ အပေါ်ယံတွင် ဤတာဝန်မျိုးနှင့် ဆီလျော်ဟန်တူသည့် ပို၍ထိရောက်သော ဤဂုဏ်ပုဒ်များမှာ သင့်လျော်မှုမရှိပေ။ အခြားဂုဏ်ပုဒ်အချို့မှာ ပို၍ပင် မသင့်‌လျော်သည့်အပြင် ပို၍ပင် မဆီလျော်သောကြောင့် ယင်းတို့ကို တစ်ခုချင်းစီ ထည့်မတွက်ဘဲ ခွဲခြမ်းစိတ်ဖြာမှု ပြုမည်မဟုတ်ပေ။ ဤဂုဏ်ပုဒ်များက မဆီလျော်သည့်အတွက် ဧဝံဂေလိဖြန့်ဝေခြင်းဟူသည့် တာဝန်၏ အနှစ်သာရကို မည်သည့်အရာက အမှန်တကယ် ဖြစ်စေကြောင်း ကြည့်ကြစို့။ ဘာသာတရားတစ်ခုတွင် လူတစ်ဦးကို ဧဝံဂေလိ‌ဖြန့်ဝေခြင်းအားဖြင့် သိမ်းသွင်းရရှိသောအခါ ယင်းကို လူတို့ မည်သို့ခေါ်သနည်း။ (အသီးသီးခြင်းဟု ခေါ်သည်။) ဧဝံ‌ဂေလိဖြန့်ဝေသူတို့က လူတစ်ဦးကို သိမ်းသွင်းရရှိသောအခါ ၎င်းတို့သည် အသီးသီးပြီဟု ဆိုကြသည်။ ၎င်းတို့တွေ့ဆုံပြီး စကားပြောဆိုသောအခါ ၎င်းတို့သည် ထိုထိုဤဤနေရာ၌ ဧဝံဂေလိဖြန့်ဝေခြင်းဖြင့် မည်မျှအသီးသီးခဲ့ပြီဖြစ်ကြောင်း အမြဲတစေ ဆွေးနွေးကြသည်။ ၎င်းတို့သည် မည်သူက ပို၍ အသီးသီးကြောင်းနှင့် ဤအသီးများက မည်သည့်အသီးမျိုး ဖြစ်ကြောင်း တွေ့ရှိရန်အတွက် သူတို့ကိုယ်သူတို့ အချင်းချင်း နှိုင်းယှဉ် အကဲဖြတ်တတ်ကြသည်။ ၎င်းတို့သည် အဘယ့်ကြောင့် ထိုသို့သော နှိုင်းယှဉ်မှုများ ပြုလုပ်ရသနည်း။ ၎င်းတို့၏ အသီးအပွင့်အရေအတွက်ကို အပေါ်ယံ နှိုင်းယှဉ်ရာ၌ ၎င်းတို့သည် မည်သည့်အရာကို အမှန်တကယ် နှိုင်းယှဉ်နေကြသနည်း။ ၎င်းတို့သည် ကောင်းကင်နိုင်ငံတော်ကို ဝင်စားရန်အတွက် ကောင်းမှုများနှင့် အရည်အချင်းများကို နှိုင်းယှဉ်နေကြခြင်း ဖြစ်သည်။ အကယ်၍ ၎င်းတို့သည် အချင်းချင်းကြား၌ ထိုသို့သော နှိုင်းယှဉ်ချက်များ ပြုလုပ်ပါက ဧဝံဂေလိဖြန့်ဝေခြင်း ဟူသည့်အလုပ်ကို ၎င်းတို့၏တာဝန်အဖြစ် ရှုမြင်ကြသလော။ ၎င်းတို့သည် ၎င်းတို့သီးသော အသီးအပေါ် အဘယ့်ကြောင့် ထိုမျှလောက် အရေးတကြီးထားရသနည်း။ ၎င်းတို့သီးသော အသီးများသည် ကောင်းကင်ဘုံသို့ သွားခြင်း၊ ကောင်းချီးမင်္ဂလာ ရရှိခြင်းအပြင် ဆုလာဘ်များ ရရှိခြင်းနှင့် တစ်နည်းနည်းဖြင့် ဆက်စပ်သည်ဟု ၎င်းတို့ယုံကြည်ခြင်း ဖြစ်သည်။ ဤအသီးများသည် ထိုအရာတို့နှင့် ဆက်စပ်မှုမရှိပါက ၎င်းတို့တွေ့ဆုံသည့်အခါတိုင်း ဤနှိုင်းယှဉ်ချက်များကို ပြုလုပ်ကြမည်လော။ ၎င်းတို့သည် အခြားကဏ္ဍများ၌ အချင်းချင်း နှိုင်းယှဉ်ကြမည်ဖြစ်သည်။ ၎င်းတို့သည် ဆုလာဘ်များ ရရှိခြင်း၊ ကောင်းကင်နိုင်ငံတော် ဝင်ရောက်ခြင်းနှင့် စပ်လျဉ်းသည့် ဆက်စပ်မှုတစ်ခုခုဖြင့် အချင်းချင်း နှိုင်းယှဉ်ကြသည်။ ဧဝံဂေလိဖြန့်ဝေရာ၌ လူတို့အား သိမ်းသွင်းရရှိခြင်းနှင့် အသီးသီးခြင်းသည် ကောင်းကင်ဘုံသို့ သွားခြင်း၊ ဆုလာဘ်များ ရရှိခြင်းနှင့် ဆက်စပ်နေသောကြောင့် ဤအရာများကို ပြီးမြောက်အောင်မြင်ဖို့ရန်အတွက် လူတို့သည် ဧဝံဂေလိဖြန့်ဝေရာတွင် မည်သူက ပို၍များသော လူတို့ကို သိမ်းသွင်းရရှိပြီး ပို၍များသောအသီးကို သီးကြောင်း နှိုင်းယှဉ်ရာတွင် မည်သည့်အခါမျှ မရိုးအီကြချေ။ ထို့နောက် ကောင်းကင်ဘုံ ဝင်ရောက်ခြင်း၊ ဆုလာဘ်များ ရရှိခြင်းနှင့် ပတ်သက်လာလျှင် မိမိတို့၏ အရည်အချင်းများနှင့် ယုံကြည်စိတ်ချမှုကို တိုးတက်စေရန်အလို့ငှာ ၎င်းတို့၏ စိတ်နှလုံးထဲတွင် ပို၍များသော လူတို့ကို သိမ်းသွင်းရရှိရန်နှင့် ပို၍အသီးသီးရန် နည်းလမ်းများကို တွက်ချက်ကြသည်။ ဤနေရာ၌ ဧဝံဂေလိဖြန့်ဝေခြင်းနှင့် စပ်လျဉ်း၍ လူပေါင်းစုံတို့၏ သဘောထားမှာ ပေါ်လွင်ထင်ရှားလာသည်။ ဧဝံဂေလိဖြန့်ဝေခြင်းနှင့် ပတ်သက်၍ ၎င်းတို့၏ သဘောထားနှင့် အရင်းခံအကြောင်းမှာ ဖန်ဆင်းခံများအဖြစ် မိမိတို့၏ တာဝန်များကို ဖြည့်ဆည်းလိုသည့် ဆန္ဒဟုတ်သလော။ (မဟုတ်ပါ။) ဤသည်မှာ မမှန်ကန်သည့် ရှုထောင့်အမြင်တစ်ခု ဖြစ်သည်။ ၎င်းတို့၏ ရည်မှန်းချက်ပန်းတိုင်က မိမိတို့၏ တာဝန်များကို ကောင်းစွာ လုပ်ဆောင်ရန်မဟုတ်၊ ဘုရားသခင်၏ တာဝန်ပေးစေခိုင်းချက်ကို ပြည့်စုံစေရန် မဟုတ်ဘဲ ဆုလာဘ်များ ရရှိရန် ဖြစ်နေသည်။ လူတစ်ဦး၏ တာဝန်ကို ထိုသို့အရောင်းအဝယ်ဆန်သော ပုံစံဖြင့် ထမ်းဆောင်ခြင်းသည် သမ္မာတရားနှင့် ကိုက်ညီမှု မရှိဘဲ သမ္မာတရားအား ချိုးဖောက်ခြင်းသာ ဖြစ်သည်မှာ သိသာထင်ရှားသည်။ ယင်းက ဘုရားသခင်၏ အလိုတော်နှင့် မကိုက်ညီဘဲ သူ့အတွက် မနှစ်မြို့စရာဖြစ်၏။ ဤလူတို့သီးသော အသီးအပွင့်ပမာဏ မည်မျှရှိသည်ဖြစ်စေ ယင်းက ၎င်းတို့၏ အဆုံးသတ်ပန်းတိုင်၌ ဆက်စပ်မှုရှိလိမ့်မည် မဟုတ်ပေ။ ၎င်းတို့သည် ဧဝံဂေလိဖြန့်ဝေခြင်းကို အသက်မွေးမှုလုပ်ငန်းတစ်ခုအဖြစ်၊ ကောင်းချီးများနှင့် ဆုလာဘ်များ ရရှိရန်အတွက် နည်းလမ်းတစ်ခု၊ သို့မဟုတ် ကြားခံတစ်ခုအဖြစ် သတ်မှတ်ကြခြင်း ဖြစ်သည်။ မိမိတို့၏တာဝန်များကို ထမ်းဆောင်ခြင်းနှင့် ဤတာဝန်ပေးစေခိုင်းချက်အား လက်ခံခြင်းတွင် ထိုသို့သောလူတို့၏ ရည်ရွယ်ချက်မှာ ဘုရားသခင်၏ တာဝန်ပေးစေခိုင်းချက်ကို ပြည့်စုံစေရန်၊ သို့မဟုတ် မိမိတို့၏ တာဝန်များကို ကောင်းစွာ ထမ်းဆောင်ရန် မဟုတ်ဘဲ ကောင်းချီးများနှင့် ဆုလာဘ်များ ရရှိရန်သာ ဖြစ်သည်။ ထို့ကြောင့် ဤကဲ့သို့သော လူတို့အနေဖြင့် မည်မျှအသီးသီးသည်ဖြစ်စေ ၎င်းတို့သည် သက်သေခံသူများ မဟုတ်သကဲ့သို့ တရားဟောဆရာများလည်း မဟုတ်ပေ။ ၎င်းတို့လုပ်ဆောင်သော အလုပ်သည် တာဝန်တစ်ခုကို ထမ်းဆောင်ခြင်းမဟုတ်၊ မိမိတို့အတွက် ကောင်းချီးများ ရရှိရန်အတွက် အားသွန်ခွန်စိုက်လုပ်ဆောင်ခြင်းနှင့် အစေခံခြင်းမျှသာ ဖြစ်လေသည်။ ဤနေရာ၌ အကြီးလေးဆုံး ပြဿနာမှာ ဧဝံဂေလိဖြန့်ဝေရာ၌ ၎င်းတို့၏ ရည်ရွယ်ချက်သည် ကောင်းချီးများနှင့် ဆုလာဘ်များ ရရှိရန်အတွက်မျှသာ ဖြစ်သည်သာမက ဧဝံဂေလိဖြန့်ဝေခြင်းဖြင့် လူတို့ကို ၎င်းတို့သိမ်းသွင်းရရှိသည် ဟူသည့်အချက်ကို ဆုလာဘ်များနှင့် ကောင်းကင်ဘုံသို့ ဝင်ရောက်ခြင်းဟူသည့် ကောင်းချီးရရန်အတွက် ဘုရားသခင်နှင့် အလဲအလှယ် ပြုလုပ်ရမည့် တိုကင်ပြားအဖြစ် အသုံးပြုခြင်းပင် ဖြစ်သည်။ ဤသည်မှာ အလွန်ကြီးလေးသော ပြဿနာတစ်ခု မဟုတ်လော။ ဤပြဿနာ၏ အနှစ်သာရမှာ အဘယ်နည်း။ ၎င်းတို့သည် ဧဝံဂေလိတရားကို ရောင်းရန်အဖြစ် ပြသနေကြကာ ကောင်းချီးများနှင့် လဲလှယ်ရန်အတွက် “စျေးကွက်တင်” နေကြသည်။ ဤသည်မှာ ဘုရားသခင်နှင့်ပြုလုပ်ဖို့ ၎င်းတို့မျှော်လင့်နေသည့် အပေးအယူသဘော မဟုတ်လော။ ဤသည်မှာ ၎င်းတို့၏ ရည်ရွယ်ချက်များ၊ လက်တွေ့လုပ်ဆောင်မှုများ၏ အနှစ်သာရနှင့် ၎င်းတို့၏ ဆောင်ရွက်ချက်များ၏ သဘောသဘာဝပင် ဖြစ်သည်။ ဧဝံဂေလိတရားကို ဆုလာဘ်များနှင့် လဲလှယ်ရန် စျေးကွက်တင်ခြင်းသည် ဘာသာရေးလောကထဲရှိ “တရားဟောဆရာများ” ဟု ခေါ်လေသောသူတို့ကြား၌ တွေ့ရှိရသည့် ပြဿနာဖြစ်ဟန်တူသည်။ သို့ဆိုလျှင် ယခု ဘုရားသခင်၏အိမ်တော်ထဲတွင် ဧဝံဂေလိဖြန့်ဝေခြင်းတာဝန်ကို ဖြည့်ဆည်းနေကြသူတို့၌ တူညီသောပြဿနာ ရှိသလော။ (ရှိပါသည်။) ဤသူတို့နှစ်ဦးလုံး၌ ဖြစ်နေကျ ပဓာနကျသော ပြဿနာမှာ အဘယ်နည်း။ ၎င်းတို့သည် ကောင်းချီးများ ရရှိခြင်းနှင့် လှပသောအဆုံးသတ်ကို ပိုင်ဆိုင်ခြင်း ဟူသည့် ၎င်းတို့၏ရည်မှန်းချက်ပန်းတိုင်ကို ရရှိရန်အလို့ငှာ ဘုရားသခင်၏ ကျေနပ်အားရမှု၊ လက်ခံမှုတို့ဖြင့် လဲလှယ်ရန်အတွက် ဧဝံဂေလိတရားကို စျေးကွက်တင်နေကြခြင်း ဖြစ်သည်။ ယင်းကို ဤပုံစံဖြင့် ရှင်းလင်းဖော်ပြထားသောအခါ သင်တို့အချို့သည် လက်ခံယုံကြည်ခြင်း ရှိကောင်းရှိမည် မဟုတ်စေကာမူ အမှန်တွင် လူများစွာတို့သည် ဤနည်းအတိုင်း ပြုမူကြလေသည်။

လူတို့ကို သိမ်းသွင်းရရှိပြီးနောက် ဧဝံဂေလိတရားကို ဖြန့်ဝေသူတို့အနက် များစွာတို့က ၎င်းတို့သည် လူတို့ကို ကယ်တင်နိုင်စွမ်းရှိပြီး ကြီးမားသော လုပ်ငန်းတာဝန်တစ်ခုကို ထမ်းဆောင်ခဲ့ပြီဖြစ်သည်ဟု တွေးထင်ကာ ၎င်းတို့ထံမှ ဧဝံဂေလိတရားကို လက်ခံခဲ့ပြီးသောလူတို့အား “ကျွန်ုပ်သည် သင့်အား ဧဝံဂေလိမဟောကြားခဲ့ပါက သင်သည် ဘုရားသခင်ကို မည်သည့်အခါမျှ ယုံကြည်နိုင်လိမ့်မည်မဟုတ်။ ကျွန်ုပ်၏ ချစ်တတ်သော စိတ်နှလုံးကြောင့် သင်သည် ဧဝံဂေလိတရားကို လက်ခံရရှိနိုင်လောက်အောင် ကံကောင်းထောက်မခဲ့ခြင်း ဖြစ်သည်” ဟု မကြာခဏ ပြောတတ်ကြသည်။ ထို့နောက် ထိုလူသည် ၎င်းတို့ထံမှ ဧဝံဂေလိတရားကို လက်ခံပြီးသောအခါ ဤလူစားမျိုးကပင် ထိုသူအား “သင့်ကို ဧဝံဂေလိဖြန့်ဝေခဲ့သူမှာ မည်သူနည်း” ဟု မေးဖို့ အမြဲတမ်း စဉ်းစားကြမည် ဖြစ်သည်။ ထိုသူက ဤမေးခွန်းကို ဆင်ခြင်တွေးတောပြီး “သင် ကျွန်ုပ်ကို ဧဝံဂေလိတရား ဟောကြားခဲ့သည်မှာ မှန်ပါ၏၊ သို့သော် ယင်းက သန့်ရှင်းသော ဝိညာဉ်တော်၏ အလုပ်ဖြစ်သည်။ ထို့အတွက် သင့်အား ကျွန်ုပ် မချီးကျူးပေးနိုင်ပါ” ဟု စဉ်းစားကြမည်ဖြစ်သည်။ ထို့နောက် ထိုသူက ပြန်ဖြေလိုမည် မဟုတ်ပေ။ ပြန်မဖြေသောအခါ မေးမြန်းသူတို့က စိတ်ဆိုးလာပြီး သူ့ကို ဆက်လက်မေးကြမည် ဖြစ်သည်။ ၎င်းတို့၏ အတောမသတ်သော မေးမြန်းခြင်း၏ နောက်ကွယ်ရှိ ရည်ရွယ်ချက်မှာ အဘယ်နည်း။ ၎င်းတို့က ချီးကျူးမှုကို တောင်းဆိုလိုခြင်း ဖြစ်သည်။ ဧဝံဂေလိတရားကို ဖြန့်ဝေသူတို့ကြားတွင် တစ်စုံတစ်ဦးထံ ဧဝံဂေလိ ဆောင်ကြဉ်းပေးသော်လည်း ထိုသူသည် အသင်းတော်ထဲ ဝင်ရောက်ဖို့အတွက် လိုအပ်ချက်များ ပြည့်စုံသောအခါ ထိုသူအား အသင်းတော်သို့ လွှဲအပ်ရန် ငြင်းဆန်သောသူ အချို့လည်း ရှိလေသည်။ လူအချို့ကို ဧဝံဂေလိဖြန့်ဝေပေးမည် ဖြစ်သော်လည်း လွှဲအပ်ပေးမည် မဟုတ်သည့် ဧဝံ‌ဂေလိဖြန့်ဝေသူ အချို့လည်း ရှိသည့်အပြင် အသင်းတော်တစ်ပါး တည်ထောင်နိုင်လောက်သည့် လူ အယောက် ၂၀၊ သို့မဟုတ် ၃၀ကို ဧဝံဂေလိဖြန့်ဝေပြီး ထိုသူတို့ကို လွှဲအပ်မည် မဟုတ်သောသူ အချို့လည်း ရှိသေးသည်။ ၎င်းတို့က ဤလူတို့ကို အဘယ့်ကြောင့် အသင်းတော်သို့ မပေးအပ်ရသနည်း။ ၎င်းတို့က “ဤလူတို့၌ အလွန် ခိုင်မာတောင့်တင်းသော အခြေခံအုတ်မြစ် မရှိသေးပေ။ သူတို့၌ ခိုင်မာသော အခြေခံအုတ်မြစ် ရှိသည်အထိ၊ သံသယစိတ်များ ကင်းမဲ့သည်အထိ၊ အလွယ်တကူ လှည့်စားမခံရနိုင်သည်အထိ စောင့်ကြစို့။ ထို့နောက် သူတို့ကို ကျွန်ုပ် အသင်းတော်သို့ ပေးအပ်ပါမည်” ဟု ဆိုကြသည်။ နှစ်ဝက်မျှကြာသောအခါ ဤလူတို့တွင် အခြေခံအုတ်မြစ် တစ်စုံတစ်ရာ ရှိလာပြီး အသင်းတော်အတွင်းသို့ ဝင်ရောက်ဖို့ စည်းမျဉ်းများ ပြည့်မီတော့မည် ဖြစ်သော်လည်း ဤဧဝံဂေလိဖြန့်ဝေသူများက ထိုသူတို့ကို ပေးအပ်ဦးမည် မဟုတ်ချေ။ ဤလူတို့ကို ၎င်းတို့ကိုယ်တိုင် ဦးဆောင်လိုကြသည်။ ဤအရာ၏ နောက်ကွယ်၌ မည်သည့်ရည်ရွယ်ချက် ရှိသနည်း။ အကယ်၍ ယင်းမှမည်သည့်အကျိုးအမြတ်မျှရဖို့ မရှိပါက ဤလူတို့ကို ၎င်းတို့ ဦးဆောင်လိုမည်လော။ ၎င်းတို့သည် မည်သည့်အကျိုးအမြတ်ကို ရှာဖွေသနည်း။ ၎င်းတို့သည် ဤလူတို့ထံမှ တစ်ကိုယ်ရေ အမြတ်အစွန်းနှင့် အကျိုးကျေးဇူးများ ရရှိရန် ရှာဖွေကြခြင်းဖြစ်သည်။ ဤလူတို့ကို အသင်းတော်အား ပေးအပ်ရမည် ဆိုပါက ထိုအကျိုးကျေးဇူးများကို ၎င်းတို့ မရရှိနိုင်တော့ပေ။ ထို့ကြောင့် သင်သည် ဤပြဿနာအပေါ် ထိုးထွင်းသိမြင်မှု ရှိရမည်။ ဘာသာရေးလောကရှိ များစွာသော သင်းအုပ်ဆရာများနှင့် အကြီးအကဲများက မှန်သောလမ်းခရီးသည် မည်သည့်အရာ ဖြစ်သည်ကို ကောင်းကောင်းကြီး သိသော်လည်း ယင်းကို လက်မခံသည့်အပြင် ယုံကြည်သူများအား ယင်းကို လက်ခံခွင့် မပြုသည့်ပုံကဲ့သို့ပင် ဖြစ်သည်။ အမှန်တကယ်တွင် ၎င်းတို့သည် မိမိတို့ကိုယ်ပိုင် ဂုဏ်သိက္ခာနှင့် အကျိုးအမြတ်အတွက် ဤအရာကို ပြုလုပ်ခြင်းဖြစ်သည်။ အကယ်၍ ယုံကြည်သူများက မှန်သောလမ်းခရီးကို လက်ခံမည်ဆိုလျှင် ထိုသင်းအုပ်များနှင့် အကြီးအကဲများက ထိုသူတို့၏ ယုံကြည်မှုမှ အကျိုးအမြတ် ရရှိနိုင်တော့မည် မဟုတ်ပေ။ ဤကဲ့သို့သော ဧဝံဂေလိဖြန့်ဝေသူများသည် ၎င်းတို့၏ ဧဝံဂေလိတရား လက်ခံရရှိသူများက အသင်းတော်၌ ပါဝင်လိုက်သည်နှင့် မိမိတို့ မေ့ပျောက်ခံရမည် ဖြစ်ပြီး ထိုသူတို့၏ ယုံကြည်မှုမှ အကျိုးအမြတ်ကို နောက်ထပ် ရရှိနိုင်တော့မည်မဟုတ်ဟု စိုးရွံ့ကြခြင်း ဖြစ်သည်။ ဤသည်မှာ ၎င်းတို့က ဤလူတို့အား အသင်းတော်သို့ မပေးအပ်ရခြင်းအကြောင်း ဖြစ်၏။ ဤကဲ့သို့ ဧဝံဂေလိဖြန့်ဝေသူများသည် ဤလူတို့ကို မည်သည့်အချိန်မှ ပေးအပ်မည်နည်း။ ထိုလူတို့အားလုံးက ၎င်းတို့ကို နားထောင်ပြီး ၎င်းတို့ကို နာခံသောအခါ ထိုလူတို့ကို အသင်းတော်သို့ ပေးအပ်မည်ဖြစ်သည်။ ဤလူတို့သည် အသင်းတော်ထဲသို့ ဝင်ရောက်ပြီးသောအခါ သူတို့အထဲမှ အ‌တော်အတန် ကောင်းသော လူ့သဘာဝ၊ ရှင်းလင်းသော သဘော‌ပေါက် နားလည်မှုနှင့် သမ္မာတရားအား ချစ်သောသူအချို့သည် တရားဒေသနာများ မကြာခဏ နားထောင်ပြီး သမ္မာတရားအချို့ကို နားလည်လာမည် ဖြစ်ကာ ထိုသို့ဖြင့် သူတို့ထံ ဧဝံဂေလိဝေငှသော ဤလူတို့ကို ထိုးထွင်းသိမြင်နိုင်မည် ဖြစ်သည်။ ထိုအခါ ထိုသူတို့က “ထိုသူသည် ပေါလုကဲ့သို့ အန္တိခရစ်တစ်ဦး ဖြစ်ပုံရသည်” ဟု ပြောကြမည် ဖြစ်သည်။ နောက်တစ်ကြိမ် သူတို့ဆုံတွေ့သောအခါ ဧဝံဂေလိဖြန့်ဝေသူများကို အရေးစိုက်မည် မဟုတ်တော့ပေ။ ဤဧဝံဂေလိဖြန့်ဝေသူများသည် လျစ်လျူရှုခံရသောအခါ စိတ်ဆိုးလာပြီး “သင်သည် ကျေးဇူးမသိတတ်။ ကျွန်ုပ် သင့်အား ဧဝံဂေလိ မဖြန့်ဝေခဲ့ပါက သင်သည် ဘုရားသခင်ကို ယုံကြည်လာဦးမည်လော။ သင်သည် မှန်သောလမ်းခရီးကို တွေ့ရှိဦးမည်လော။ ယခုတွင် သင့်အား ဦးဆောင်မည့် အခြားတစ်ဦးဦး ရှိသောအခါ သင်သည် သင်၏မိခင်ဖြစ်သော ကျွန်ုပ်ကို မေ့လျော့သွားပြီလော” ဟု ဆိုကြသည်။ ၎င်းတို့သည် မိခင်တစ်ဦးအဖြစ် ရှုမြင်ခံလိုကြသည်။ ဤသို့ပြောဆိုသော လူတို့တွင် အသိစိတ်ရှိသလော။ (မရှိပါ။) အကယ်၍ တစ်စုံတစ်ဦးက ဤသို့ပြောနိုင်စွမ်းရှိပါက သူ့အတွက် မည်သည့်ကောင်းကျိုးမျှ မရှိသည်မှာ အသေအချာပင်။ ဤအရာကို ငါ အဘယ့်ကြောင့် ပြောသနည်း။ ၎င်းတို့သည် ဘုရားသခင်၏ ဧဝံဂေလိတရားကို ဖြန့်ဝေသောအခါ ၎င်းတို့ သိမ်းသွင်းရရှိသည့် လူတို့သည် မည်သူနှင့် သက်ဆိုင်သနည်း။ (ဘုရားသခင်နှင့် သက်ဆိုင်သည်။) ၎င်းတို့သည် ဧဝံဂေလိကို ကြိုးစား၍ ဖြန့်ဝေကောင်း ဖြန့်ဝေမည်ဖြစ်သော်လည်း ၎င်းတို့ သိမ်းသွင်းရရှိသည့် လူတို့ကို ၎င်းတို့နှင့်မသက်ဆိုင်၊ ဘုရားသခင်နှင့်သာ သက်ဆိုင်သည်။ ဧဝံဂေလိတရားကို လက်ခံသောသူတို့သည် ဘုရားသခင်နောက် လိုက်လိုကြကာ သူတို့အား ဧဝံဂေလိဟောပြောသော သူတို့ကို ယုံကြည်ကြခြင်း မဟုတ်၊ ဤကဲ့သို့သော ဧဝံဂေလိဖြန့်ဝေသူမျိုးက သူတို့ကို အသင်းတော်၌ ပါဝင်ပြီး ဘုရားသခင်နောက်လိုက်ရန် ခွင့်မပြုပေ။ ထိုအစား ၎င်းတို့သည် ဤလူတို့ကို ၎င်းတို့၏ လက်ထဲ၌ ထိန်းသိမ်းပြီး ချုပ်ကိုင်ထားကာ ၎င်းတို့နောက်သို့ လိုက်စေချင်ကြသည်။ ဤသည်မှာ ဧဝံဂေလိတရား ဖြန့်ဝေခြင်းနှင့်ဆိုင်၍ အဝေးပြေးလမ်း‌ပေါ်က လုယက်မှုပင် မဟုတ်လော။ ဤကဲ့သို့ ဧဝံဂေလိဖြန့်ဝေသူမျိုးက လူတို့ကို ဘုရားသခင်ရှေ့မှောက်သို့ ရောက်မလာရန် ပိတ်ဆို့ထားကာ ထိုသို့ပြုခြင်းဖြင့် ထိုသူတို့က ဘုရားသခင်ရှေ့မှောက် ရောက်လာရန်အတွက် ၎င်းတို့မှတစ်ဆင့် သွားရမည်ဖြစ်ပြီး အရာရာကို ၎င်းတို့မှတစ်ဆင့် ပြောဆိုဆွေးနွေးရမည် ဖြစ်သည်။ ၎င်းတို့သည် ထိုသူတို့၏ ယုံကြည်မှုမှ အကျိုးအမြတ်ရရှိရန် ကြိုးစားနေကြခြင်း မဟုတ်လော။ ဤလူတို့ကို ၎င်းတို့ ထိန်းချုပ်လိုသည် မဟုတ်လော။ (ဟုတ်ပါသည်။) ဤသည်မှာ မည်သို့သော အပြုအမူမျိုး ဖြစ်သနည်း။ ယင်းသည် စာတန်၏ အပြုအမူစစ်စစ်ပင် ဖြစ်၏။ အန္တိခရစ်တစ်ဦးက ၎င်းတို့၏ စရိုက်အမှန်ကို ပြသခဲ့ပြီဖြစ်ကြောင်း၊ ၎င်းတို့က အသင်းတော်နှင့် ဘုရားသခင်ရွေးကောက်သော လူတို့ကို ထိန်းချုပ်လိုခြင်း ဖြစ်ကြောင်း ဆိုလိုသည်။ ဤကဲ့သို့သော လူတို့ကို နေရာတကာရှိ အသင်းတော်များတွင် တွေ့ရနိုင်သည်။ ဆိုးရွားသော အခြေအနေများတွင် ၎င်းတို့က ဒါဇင်နှင့်ချီသော၊ သို့မဟုတ် ရာနှင့်ချီသော လူများကို ထိန်းချုပ်ကောင်း ထိန်းချုပ်ကြမည် ဖြစ်သည်။ သိပ်မဆိုးရွားသော အခြေအနေများတွင် လူအနည်းငယ်ကို ၎င်းတို့ ဧဝံဂေလိဟောပြောသောအခါ ၎င်းတို့သည် တွေ့ဆုံကြသည့်အခါအတိုင်း ၎င်းတို့အပေါ် ဤလူတို့၏ ကျေးဇူးကြွေးကို ဖော်ထုတ်ပြီး ဤလူတို့ ပထမဆုံး ယုံကြည်လာခဲ့သည့် အချိန်တုန်းက အကြောင်းအရာများကို အမြဲထုတ်ဖော်ပြောဆိုကြရင်း ၎င်းတို့ထံမှ ကျေးဇူးတင်ရှိမှုကို အစဉ်သဖြင့် တောင်းဆိုလိမ့်မည်။ ၎င်းတို့က ထိုကဲ့သို့သော အရာများကို အမြဲဖော်ထုတ်ပြောဆိုကြသည်မှာ အဘယ့်ကြောင့်နည်း။ ယင်းမှာ ထိုလူတို့က ၎င်းတို့၏ ကျေးဇူးကို မမေ့ပျောက်ရန်နှင့် ဘုရားသခင်၏ အိမ်တော်ထဲသို့ ထိုသူတို့ ဝင်ရောက်ရန် ထောက်ကူခဲ့သည်မှာ မည်သူ၏ ဟောပြောခြင်းကြောင့်ဖြစ်ကြောင်းနှင့် မည်သူ့ကို ချီးကျူးသင့်ကြောင်းတို့ကို ထိုလူတို့ မမေ့ပျောက်ရန်အတွက် ဖြစ်သည်။ ၎င်းတို့သည် ထိုသို့သော အကြောင်းအရာများအား ထုတ်ပြောရာ၌ ရည်ရွယ်ချက်တစ်ခု ထားရှိကြပြီး ဤအရာကို မရရှိလျှင် ထိုလူတို့အား ဆူပူကြိမ်းမောင်းကြသည်။ ထိုလူတို့အား ဆူပူကြိမ်းမောင်းရန် ၎င်းတို့ပြောသော ပထမဆုံးအရာက အဘယ်နည်း။ (ထိုသူတို့သည် ကျေးဇူးမသိတတ်ကြဟူ၍ ဖြစ်သည်။) ၎င်းတို့၏ ဤစကားများသည် အဓိပ္ပာယ်ရှိသလော။ (မရှိပါ။) ယင်းတို့၌ အဓိပ္ပာယ်ကင်းမဲ့သည်ဟု သင်တို့ အဘယ့်ကြောင့် ပြောသနည်း။ (ဤဧဝံဂေလိဖြန့်ဝေသူများသည် ၎င်းတို့ ရပ်တည်သင့်သော နေရာ၌ ရပ်တည်နေကြခြင်း မဟုတ်သောကြောင့် ဖြစ်သည်။ ဧဝံဂေလိဖြန့်ဝေခြင်းသည် ၎င်းတို့၏တာဝန်ဖြစ်၏၊ ၎င်းတို့လုပ်ဆောင်ရမည့် အရာတစ်ခုဖြစ်၏။ သို့ဖြစ်လင့်ကစား လူတို့ထံသို့ ဧဝံဂေလိတရားကို ဆောင်ကြဉ်းပေးပြီးနောက် ယင်းကို ၎င်းတို့၏ တာဝန်အဖြစ် မရှုမြင်ဘဲ ၎င်းတို့လုပ်ဆောင်ထားသည့် အကျိုးပြုဆောင်ရွက်မှု တစ်ခုအဖြစ် ရှုမြင်ကြသည်။) ၎င်းတို့သည် ဧဝံဂေလိတရားကို ဖြန့်ဝေခြင်းအားဖြင့် အကျိုးပြုဆောင်ရွက်မှု လုပ်ဆောင်ကြပြီဟု အမြဲထင်မှတ်ကြသည်။ ဤသည်မှာ မှားယွင်း၏။ တစ်ဖက်တွင် ၎င်းတို့သည် မိမိတို့ ရပ်တည်သင့်သော နေရာ၌ ရပ်တည်နေကြခြင်း မရှိပေ။ လူတို့ကို ကယ်တင်သည်မှာ ဘုရားသခင်ဖြစ်ပြီး လူတို့က ဤအရာ၌ ပူးပေါင်းဆောင်ရွက်မှုသာ ပြုနိုင်သည်။ ဘုရားသခင် အမှုမပြုပါက လူတစ်ဦးသည် မည်သည့်အရာကို ပြီးမြောက်အောင်မြင်နိုင်သနည်း။ အခြားတစ်ဖက်တွင် အခြားလူတို့အား ဧဝံဂေလိဖြန့်ဝေခြင်းသည် ၎င်းတို့၏ အကျိုးပြုဆောင်ရွက်မှု မဟုတ်ပေ။ ၎င်းတို့၌ ကြီးမားသော မည်သည့်အကျိုးပြုဆောင်ရွက်မှုမျှ မလုပ်ဆောင်ခဲ့၊ ယင်းက ၎င်းတို့၏တာဝန်ပင် ဖြစ်သည်။ လူတို့ကို ရယူလိုသည်မှာ ဘုရားသခင်ဖြစ်ပြီး ဧဝံဂေလိဖြန့်ဝေသူများမှာ သူနှင့်အတူ အနည်းငယ် ပူးပေါင်းလုပ်ဆောင်ရုံသာ ပြုနေကြခြင်းဖြစ်သည်။ လူတို့အား ကယ်တင်ပြီး ရယူရန်မှာ ဘုရားသခင်၏ ကိစ္စဖြစ်ပြီး ဧဝံဂေလိဖြန့်ဝေသူများနှင့် မသက်ဆိုင်ပေ။ ဤအရာများကို ၎င်းတို့ မလုပ်ဆောင်နိုင်ပေ။ ဧဝံဂေလိကို ဖြန့်ဝေရာ၌ ၎င်းတို့သည် ဧဝံဂေလိအား ပျံ့နှံ့စေခြင်းလုပ်ငန်းကို ထမ်းဆောင်ရုံသာ ထမ်းဆောင်ကြခြင်း ဖြစ်သည်။ နောက်ဆုံးသောကာလ ဘုရားသခင်၏ ဧဝံဂေလိတရားကို အခြားလူတို့အား ဝေမျှရုံသာ ဝေမျှကြခြင်း ဖြစ်သည်။ ဤအရာကို လူတို့အပေါ် ၎င်းတို့ပေးအပ်သည့် ကျေးဇူးတစ်ခုခု ဖြစ်သောကြောင့် ဤလူတို့က ၎င်းတို့ကို အရေးမစိုက်ပါက သူတို့သည် ကျေးဇူးကန်းကြသည်ဟု ပြော၍မရပေ။ ထိုကဲ့သို့သော အရာများမှာ လူတို့အနေဖြင့် ဧဝံဂေလိဖြန့်ဝေခြင်းအားဖြင့် မိမိတို့၏ တာဝန်များကို ဖြည့်ဆည်းနေကြစဉ် မကြာခဏ ဖြစ်ပျက်တတ်သည် မဟုတ်လော။ ဤသို့သော ဖောက်ပြန်ပျက်စီးမှုမျိုးမှာ သင်တို့ထံမှ ပွင့်အံထွက်လာပြီးပြီ မဟုတ်လော။ (ဟုတ်ပါသည်။) ယင်းက ပြင်းထန်သော ပွင့်အံထွက်မှုတစ်ရပ် ဖြစ်ခဲ့သလော။ သင်သည် အခြားသူများအား ဆူပူကြိမ်းမောင်းသည်အထိ ဖြစ်ဖူးသလော။ အခြားသူများကို မုန်းတီးသည်အထိ ဖြစ်ဖူးသလော။ လူတို့ကို ဆဲဆိုရန်နှင့် ထိန်းချုပ်ရန် စိတ်ဆန္ဒ ရှိသည်အထိ ဖြစ်ဖူးသလော။ သင်သည် သင့်ထံမှ ဧဝံဂေလိတရားကို လက်ခံသူတိုင်းအား စိုးမိုးခြယ်လှယ်ရန်နှင့် ထိန်းချုပ်ရန် အလိုရှိသည်။ ထိုလူတို့ကို ဘုရားသခင်အား ပေးအပ်သည်ထက် သင့်အတွက်သင် ရယူလိုသည်။ သင့်ထံမှ ဧဝံဂေလိတရား လက်ခံရရှိသူတိုင်းကို သင်၏ သစ္စာခံသားသမီးဖြစ်ရန် မျှော်လင့်သည်။ သင်တို့တွင် ထိုကဲ့သို့သော အတွေးမျိုးများ ရှိသလော။ လူများစွာတို့က ဧဝံဂေလိ‌ဟောပြောခြင်းကို အသီးသီးခြင်းကဲ့သို့ သဘောထားကြသည်။ ၎င်းတို့က ၎င်းတို့ထံမှ ဧဝံဂေလိတရား ရရှိသူတိုင်းသည် ၎င်းတို့၏အသီးအပွင့်နှင့် ၎င်းတို့၏ နောက်လိုက်ဖြစ်လာကာ ၎င်းတို့အား ကျိုးနွံစွာဖြင့် နောက်လိုက်ပြီး သူတို့၏ ဘုရားသခင်နှင့် သူတို့၏ သခင်ကဲ့သို့ သဘောထားရမည်ဟု တွေးထင်ကြသည်။ သင်တို့သည် ဤအတိုင်း တွေးထင်ကြသလော။ အကယ်၍ သင်တို့သည် ထိုမျှ ဗြောင်ကျသော အစွန်းရောက်ခြင်းအထိ မရောက်ရှိလျှင်ပင် ဖောက်ပြန်ပျက်စီးသော စိတ်သဘောထားနှင့်ဆိုင်သည့် ဤသွင်ပြင်လက္ခဏာကို ပိုင်ဆိုင်နေသေးသည်။ ဤအတွက် အကြောင်းရင်းမှာ အဘယ်နည်း။ အခြေခံအားဖြင့် နောက်ဆုံးတွင် ယင်းက ထိုအချက်နှစ်ချက်ဖြစ်လာသည်။ အချက်တစ်ခုအနေဖြင့် လူတို့သည် မိမိတို့၏ သင့်တော်သော နေရာ၌ မရပ်တည်သည့်အပြင် ၎င်းတို့သည် မည်သူဖြစ်ကြောင်း မသိကြပေ။ နောက်ထပ် အချက်တစ်ခုအနေဖြင့် ၎င်းတို့သည် ဧဝံဂေလိဖြန့်ဝေခြင်းကို ၎င်းတို့၏တာဝန်အဖြစ် သဘောမထားကြပေ။ အကယ်၍ သင်သည် ဧဝံဂေလိဖြန့်‌ဝေခြင်းကို သင်၏တာဝန်အဖြစ် သ‌ဘောထားပါက သင်သည် မည်သည့်အရာကို ပြုလုပ်သည်ဖြစ်စေ၊ လူမည်မျှကို သင်ဟောပြောသည် ဖြစ်စေ၊ သို့မဟုတ် လူမည်မျှကို သိမ်းသွင်းရရှိသည် ဖြစ်စေ ဤသည်မှာ ဖန်ဆင်းခံ လူသားတစ်ဦး၏ တာဝန်ကို ဖြည့်ဆည်းနေခြင်းသာ ဖြစ်ကြောင်း၊ ယင်းသည် သင်ဖြည့်ဆည်းရမည့် တာဝန်နှင့် ဝတ္တရားတစ်ခု ဖြစ်ကြောင်းနှင့် ယင်းသည် ပြောပလောက်အောင် ကြီးမားသည့် အကျိုးပြုဆောင်ရွက်မှု မဟုတ်ကြောင်းကို နားလည်လိမ့်မည်။ ဤအကြောင်းအရာကို ဤပုံစံအတိုင်း နားလည်ခြင်းက သမ္မာတရားနှင့် ကိုက်ညီသည်။ သို့သော် ဧဝံဂေလိတရား ဟောပြောသော လူအချို့က ၎င်းတို့ထံမှ ဧဝံဂေလိရရှိသော သူတို့အား အဘယ့်ကြောင့် ထိန်းချုပ်နိုင်ပြီး ထိုလူတို့ကို ၎င်းတို့ကိုယ်ပိုင်အဖြစ် ယူဆနိုင်ကြသနည်း။ ယင်းမှာ ၎င်းတို့သည် သဘာဝအားဖြင့် လွန်စွာ မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်ကာ ၎င်းတို့၌ အသိစိတ် စိုးစဉ်းမျှ မရှိသောကြောင့် ဖြစ်သည်။ ထိုမျှမက ယင်းမှာ ၎င်းတို့သည် သမ္မာတရားကို နားမလည်သည့်အပြင် ၎င်းတို့၏ ဖောက်ပြန်ပျက်စီးသော စိတ်သ‌ဘောထားနှင့်ဆိုင်သော ဤသွင်ပြင်လက္ခဏာကို မဖြေရှင်းထားသောကြောင့် ဖြစ်သည်။ ထို့အတွက်ကြောင့် ၎င်းတို့သည် အခြားလူတို့အား စက်ဆုပ်စေပြီး ဘုရားသခင်၏ ရွံရှာခြင်းခံရသည့် ထိုကဲ့သို့ မိုက်မဲသော၊ မာနထောင်လွှားသော၊ ရိုင်းစိုင်းသော အရာများကို ပြုလုပ်နိုင်ရခြင်း ဖြစ်သည်။

လူတို့သည် တစ်စုံတစ်ခုကို ပြုလုပ်သောအခါ၊ ၎င်းတို့သည် အဖိုးတန် အရည်အချင်းအနည်းငယ် ပိုင်ဆိုင်သောအခါ၊ သို့မဟုတ် အကျိုးပြုဆောင်ရွက်မှုတစ်ခု ပြုလုပ်သောအခါ ယင်းကို ကြွားဝါလိုကြသည်၊ လူတို့ကို ထိန်းချုပ်လိုကြသည်၊ ၎င်းတို့ပြုလုပ်ခဲ့သည့်အရာကို ဆုလာဘ်များနှင့် လဲလှယ်လိုကြသည်၊ သို့မဟုတ် ကောင်းမွန်သော ပန်းတိုင်တစ်ခုကို ရယူလိုကြသည်။ အချို့က ဘုရားသခင်၏ ဧဝံဂေလိတရားကို အသုံးချပြီး အရောင်းအဝယ်ပြုလုပ်ရန် ကြိုးပမ်းသည်အထိပင် ပြုလုပ်ကြမည်။ ၎င်းတို့သည် မည်သည့်အရောင်းအဝယ်ကို လုပ်ကိုင်လိုသနည်း။ ဥပမာတစ်ခုမှာ ဤသို့ဖြစ်သည်။ ဤကဲ့သို့သော လူတစ်ဦးသည် ဧဝံဂေလိလက်ခံရန် အလားအလာရှိသူတစ်ဦး၏ အိမ်သို့ရောက်ပြီး ထိုသူ၏မိသားစုက ဆင်းရဲကြောင်းကို တွေ့ရသည့်အခါ ဤသူအား ဧဝံဂေလိ‌ဖြန့်ဝေရာမှ အကျိုးအမြတ် ရရှိမည်မဟုတ်လောက်ဟု တွေးထင်သည်။ ဤသို့ဖြင့် ထိုသူ၌ စိတ်ဝင်စားမှုမရှိ၊ သို့မဟုတ် ထိုသူအား ခွဲခြားဆက်ဆံမှုပင် ပြုတတ်သည်။ ထိုသူကို ၎င်းတို့ တွေ့သည့်အခါတိုင်း မကျေမနပ်ဖြစ်ကာ မိမိတို့၏ ခေါင်းဆောင်ထံသို့ “ထိုသူသည် ဘုရားသခင်ကို ယုံကြည်နိုင်မည်မဟုတ်။ ထို့ပြင် ၎င်းတို့က ယုံကြည်လျှင်လည်း သမ္မာတရားကို ရရှိနိုင်မည်မဟုတ်” ဟု ပြောကြသည်။ ဤသည်မှာ ထိုသူတို့အား ဧဝံဂေလိဖြန့်ဝေခြင်းမှ ရှောင်ကြဉ်ရန် ၎င်းတို့အသုံးပြုသည့် ဆင်ခြေဖြစ်သည်။ များမကြာမီတွင် အခြားတစ်ယောက်ယောက်က ဤလူကို ဧဝံဂေလိတရား သွားရောက်ဖြန့်ဝေရာ ထိုသူက လက်ခံသည်။ ဧဝံဂေလိတရား ပထမဆုံးဖြန့်ဝေသူသည် ဤအရာကို မည်သို့ ရှင်းပြနိုင်မည်နည်း။ ဤသူသည် ဘုရားသခင်ကို ယုံကြည်လိမ့်မည် မဟုတ်ဟု ၎င်းတို့ အဘယ်သို့ ပြောနိုင်ရသနည်း။ ၎င်းတို့သည် အဘယ်သို့ ထင်ရာမြင်ရာ ပြောနိုင်ရသနည်း။ ၎င်းတို့က ထိုသူအား ဧဝံဂေလိ မဖြန့်ဝေခဲ့လျှင် လူတစ်ဦးက ယုံကြည်ခြင်းရှိမည်၊ မရှိမည်ကို အဘယ်သို့ သိနိုင်ရသနည်း။ ၎င်းတို့ မသိနိုင်ပေ။ ဤသူကိုလည်း ၎င်းတို့ အဘယ့်ကြောင့် သိမ်းသွင်းရယူခြင်း မပြုခဲ့ရသနည်း။ ယင်းမှာ ၎င်းတို့သည် ထိုလူအပေါ် မလိုမုန်းထားသည်၊ သူ့ကို အထင်သေးကြပြီး သူ့အား ချစ်ခင်ကြင်နာမှု မပြသဖြင့် ထိုသူကို သိမ်းသွင်းရန် ပျက်ကွက်ခြင်းဖြစ်သည်။ ထိုပုံစံအတိုင်း ၎င်းတို့၏တာဝန်ကို ထမ်းဆောင်ခြင်းအားဖြင့် ၎င်းတို့သည် ပေါ့ဆကြလေသည်။ ၎င်းတို့သည် ချစ်ခင်ကြင်နာမှုကို မပြသည့်အပြင် ၎င်းတို့၏ တာဝန်ဝတ္တရားကို ဖြည့်ဆည်းရန် ပျက်ကွက်သည်။ ဤသည်မှာ ဘုရားသခင်၏ အမြင်တွင် ချီးကျူးစရာလော၊ သို့မဟုတ် အပြစ်အနာအဆာလော။ (အပြစ်အနာအဆာ ဖြစ်ပါသည်။) ယင်းသည် အကြွင်းမဲ့ ပြစ်မှားခြင်း ဖြစ်သည်။ ဤပြစ်မှားခြင်းက အဘယ့်ကြောင့် ဖြစ်ပွားခဲ့သနည်း။ ယင်းမှာ ၎င်းတို့သည် ထိုဧဝံဂေလိလက်ခံသူထံမှ မည်သည့်အကျိုးအမြတ်မျှ မရရှိနိုင်သောကြောင့် မဟုတ်လော။ ထိုသူအား ဧဝံဂေလိဖြန့်ဝေခြင်းက ၎င်းတို့အား အကျိုးရှိစေမည် မဟုတ်ကြောင်း ၎င်းတို့တွေ့ရှိသောအခါ ၎င်းတို့သည် ထိုသူ့အပေါ် မနှစ်မြို့ခြင်းကို ခံစားရပြီး ထိုသူအား လက်တုံ့ပြန်လျက် သူ့အား ကယ်တင်ခြင်းရရှိခွင့် မပေးလိုသည့်အပြင် ဧဝံဂေလိဖြန့်ဝေခြင်းမှ ရှောင်ကြဉ်ရန် အကြောင်းပြချက်နှင့် ဆင်ခြေဆင်လက်မျိုးစုံကို ရှာကြသည်။ ဤသည်မှာ ကြီးလေးသော တာဝန်ဝတ္တရားပျက်ကွက်ခြင်းနှင့် ကြီးလေးသော ပြစ်မှားခြင်းပင်။ အကျိုးအမြတ် ရရန်မရှိသောအခါ လူတစ်ဦးအား ဧဝံဂေလိဖြန့်ဝေရန် ငြင်းဆန်ခြင်းသည် မည်ကဲ့သို့သော သဘောထားမျိုးနည်း။ ဤသည်မှာ ဧဝံဂေလိတရားအား စျေးကွက်တင်သော လူတစ်ဦး၏ သရုပ်သကန်စစ်စစ် မဟုတ်လော။ (ဟုတ်ပါသည်။) ၎င်းတို့သည် မည်သည့်ပုံစံဖြင့် ဧဝံဂေလိတရားကို စျေးကွက်တင်နေကြသနည်း။ အသေးစိတ်နှင့် ဖြစ်စဉ်ကို ရှင်းပြလော့။ (ထိုဧဝံဂေလိဖြန့်ဝေသူက ၎င်းတို့ အကျိုးကျေးဇူး ရရှိနိုင်၊ မရရှိနိုင်ဟူသည့်အပေါ် အခြေခံ၍ လူတစ်ဦးအား ဧဝံဂေလိ ဖြန့်ဝေလိုသည်၊ မဖြန့်ဝေလိုသည်ကို ဆုံးဖြတ်ခဲ့သည်။ ဤသည်မှာ ဘုရားသခင်၏ ဧဝံဂေလိတရားအား ကုန်ပစ္စည်းသဖွယ် သဘောထားခြင်းနှင့် ညီမျှပြီး မိမိအလိုရှိသော အကျိုးကျေးဇူးများကို ရရှိရန် ယင်းကို စျေးကွက်တင်ခြင်းပင် ဖြစ်သည်။ အကျိုးအမြတ် ရစရာမရှိကြောင်း ၎င်းတို့ တွေ့မြင်သောအခါ ဧဝံဂေလိဖြန့်ဝေရန် ငြင်းဆန်ခဲ့ကြသည်။) ၎င်းတို့သည် ဘုရားသခင်၏ ဧဝံဂေလိတရားကို ၎င်းတို့ကိုယ်ပိုင် အဖိုးတန်ပစ္စည်းအဖြစ် သဘောထားကြသည်။ အကယ်၍ ၎င်းတို့သည် ကောင်းစွာ စားသောက်ပြီး ကောင်းစွာ ဝတ်စားသည့် ချမ်းသာပြီး သြဇာတိက္ကမကြီးသော မိသားစုတစ်ခုမှ လူတစ်ဦးကို မြင်တွေ့ပါက “ကျွန်ုပ် သူ့ကို ဧဝံဂေလိဖြန့်ဝေပါက သူ၏အိမ်၌ နေရနိုင်သည်။ ထို့ပြင် ငါသည် အစားကောင်းကောင်း စားရန်နှင့် အဝတ်ကောင်းကောင်း ဝတ်ရန်လည်း ရှိနိုင်သည်” ဟု မိမိတို့ဘာသာ စဉ်းစားပြီးနောက် ထိုသူကို ဧဝံဂေလိဟောပြောရန် ဆုံးဖြတ်ကြသည်။ ဤသည်မှာ မည်ကဲ့သို့သော အပြုအမူမျိုး ဖြစ်သနည်း။ ဤသည်မှာ ဧဝံဂေလိတရားကို စျေးကွက်တင်သောလူတစ်ဦး၏ ဥပမာစစ်စစ် ဖြစ်သည်။ ဤဧဝံဂေလိဖြန့်ဝေသူက ဘုရားသခင်၏ ဧဝံဂေလိတရားနှင့် ဘုရားအမှုအသစ်၏ ဝမ်းမြောက်စရာ သတင်းစကားကို ကုန်ပစ္စည်းတစ်ခုအဖြစ်၊ ၎င်းတို့၏ကိုယ်ပိုင် အဖိုးတန်ပစ္စည်းအဖြစ် သဘောထားလျက် အကျိုးအမြတ်နှင့် မိမိတို့ကိုယ်ကိုအတွက် လိုအပ်သည့်အရာဟူသမျှကို ရယူနိုင်ရန်အတွက် နေရာတကာ၌ အခြားသူများကို လှည့်ဖြားပြီး လိမ်လည်နေကြခြင်း ဖြစ်သည်။ ဤသည်မှာ မိမိ၏တာဝန်ကို ဖြည့်ဆည်းနေခြင်း ဟုတ်သလော။ ဤအရာကို စီးပွားရေး လုပ်ကိုင်ခြင်းနှင့် ဧဝံဂေလိတရားအား ဖြန့်ဖြူးခြင်းမှ အကျိုးအမြတ်ရရှိခြင်းဟု ခေါ်သည်။ ဖြန့်ဖြူးခြင်းဟူသည်မှာ အရောင်းအဝယ်နည်းလမ်းအားဖြင့် လူတစ်ဦး၌ ရှိသည့်အရာများကို ရောင်းချခြင်းဖြစ်ပြီး အပြန်အလှန်အားဖြင့် သူအလိုရှိသည့် ငွေကြေး၊ သို့မဟုတ် ရုပ်ဝတ္ထုပစ္စည်းများကို ရရှိခြင်း ဖြစ်သည်။ သို့ဆိုလျှင် ၎င်းတို့က ဧဝံဂေလိတရားကို မည်ကဲ့သို့ ဖြန့်ဖြူးသနည်း။ ယင်းမှာ ၎င်းတို့က အလားအလာရှိသော ဧဝံဂေလိလက်ခံသူများထံမှ အကျိုးကျေးဇူးများကို ရရှိနိုင်ခြင်း ရှိမရှိအ‌ပေါ် မူတည်သည်။ ဤအရာက ဆိုလိုသည်မှာ “ကျွန်ုပ်အတွက် အကျိုးအမြတ်ရှိပါက သင့်အား ကျွန်ုပ် ဧဝံဂေလိတရားကို ဝေငှပေးမည်။ ယင်း၌ ကျွန်ုပ်အတွက် အကျိုးအမြတ်မရှိပါက သင့်အား ဧဝံဂေလိမဟောပြောရန် အကြောင်းပြချက်တစ်ခု ရှာမည်။ ယင်းသည် အလုပ်မဖြစ်သည့် အပေးအယူတစ်ခုသာ ဖြစ်မည်” ဟူ၍ ဖြစ်သည်။ ဤအပေးအယူက အဘယ့်ကြောင့် အလုပ်မဖြစ်ရသနည်း။ ဧဝံဂေလိဖြန့်ဝေသူက ယင်းမှ အကျိုးအမြတ်မရနိုင်သောကြောင့် အလုပ်မဖြစ်ရခြင်း ဖြစ်သည်။ ဤကဲ့သို့သော လူစားမျိုးကို ငါတို့ မည်သို့ခေါ်သနည်း။ ၎င်းတို့ကို “ခရီးသွား လူလိမ်” ဟု ခေါ်သည်။ ၎င်းတို့၌ ပေးစရာဟူ၍ တကယ်ရှိသောအရာ ဘာမျှ မရှိသော်လည်း နေရာအနှံ့သွားလျက် အခြားသူများကို လိမ်လည်လှည့်စားကာ ငွေရှာရန်နှင့် အကျိုးအမြတ်များရရှိရန် မိမိတို့၏ စကားလုံးများအပေါ် မှီခိုနေကြသည်။ ဤပုံစံအတိုင်း ဧဝံဂေလိ‌ဟောပြောခြင်းဖြင့် ၎င်းတို့တာဝန်ကို ဖြည့်ဆည်းနေကြသလော။ ၎င်းတို့သည် မကောင်းမှု ပြုလုပ်နေခြင်းသက်သက် ဖြစ်သည်။ ၎င်းတို့၏ လုပ်ရပ်များသည် တာဝန်ဖြည့်ဆည်းခြင်းနှင့် ဘာမျှမသက်ဆိုင်ပေ။ အဘယ့်ကြောင့်ဆိုသော် ၎င်းတို့သည် ဧဝံဂေလိဖြန့်ဝေခြင်းကို မိမိတို့၏တာဝန်အဖြစ် မသတ်မှတ်သည့်အပြင် ယင်းကို မိမိတို့၏တာဝန်၊ သို့မဟုတ် ဝတ္တရားအဖြစ်၊ သို့မဟုတ် ၎င်းတို့အား ဘုရားသခင်အပ်နှံသည့် တာဝန်ပေးစေခိုင်းချက်တစ်ခုအဖြစ် မရှုမြင်သောကြောင့် ဖြစ်သည်။ ထို့ထက် ယင်းကို မိမိတို့၏ကိုယ်ပိုင် အကျိုးစီးပွားကို ဖြည့်စွမ်းရန်နှင့် မိမိတို့၏ကိုယ်ပိုင် တောင်းဆိုမှုများကို ပြည့်ဝရန်အတွက် ၎င်းတို့လိုအပ်သည့် အရာများနှင့် လဲလှယ်ဖို့ ပြုလုပ်သည့် လုပ်ငန်းတစ်ခု၊ သက်မွေးမှုအလုပ်တစ်ခုအဖြစ် ရှုမြင်ကြသည်။ ချမ်းသာကြွယ်ဝသော ဒေသများသို့ ဧဝံဂေလိ‌ဟောပြောရန် သွားသောအခါ ပြန်လည်မစွန့်ခွာလိုသော လူအချို့ပင် ရှိသည်။ အဘယ့်ကြောင့်ဆိုသော် ၎င်းတို့သည် ထိုနေရာ၌ ကောင်းစွာ စားရသည်၊ ကောင်းစွာ ဝတ်ရပြီး ဇိမ်ရှိသောနေရာများ၌ နေရသောကြောင့် ဖြစ်သည်။ ၎င်းတို့သည် ဧဝံဂေလိတရားကို လက်ခံသူများရှေ့တွင် ၎င်းတို့ အဘယ်မျှဆင်းရဲကြောင်း “ဘုရားသခင်၏ ကျေးဇူးတော်နှင့် ကောင်းချီးမင်္ဂလာများသည် ဤနေရာ၌ သင်တို့အား ဝိုင်းရံထားပုံကို ကြည့်ရှုလော့။ မိသားစုတိုင်းက မောင်းစရာ ကိုယ်ပိုင်ကားရှိသည်၊ အသင့်အတင့်ရှိသော ကိုယ်ပိုင်အိမ်ကြီးများ၌ နေထိုင်ပြီး ကောင်းစွာဝတ်ဆင်ရသည်။ သင်တို့သည် နေ့တိုင်းပင် အသားဟင်းလျာစားရသည်။ ကျွန်ုပ်တို့ထံ၌ ထိုအရာသည် မဖြစ်နိုင်သောအရာ ဖြစ်၏” ဟု စတင်၍ ငိုပြကြသည်။ ဤသည်ကို ကြားရပြီးနောက် ဧဝံဂေလိလက်ခံသူများက “သင်တို့နေထိုင်သည့် အရပ်သည် အလွန်ဆင်းရဲသဖြင့် ကျွန်ုပ်တို့နှင့် မကြာခဏ လာနေပါ” ဟု ဆိုပြီးလျှင် ထိုသူတို့က ဤဧဝံဂေလိဖြန့်ဝေသူများအား ပစ္စည်းအချို့ ပေးကြသည်။ ဤသည်မှာ လူတို့ထံမှ ငွေကြေးနှင့် ရုပ်ဝတ္ထုပစ္စည်းများ တောင်းခံခြင်းနှင့် ညှစ်ယူခြင်းဟူသည့် အယောင်ဆောင်ထားသော ပုံသဏ္ဌာန်တစ်ခု ဖြစ်သည်။ ၎င်းတို့၏ ညှစ်ယူခြင်းမှာ မည်သည့်အရာပေါ် အခြေခံသနည်း။ “ကျွန်ုပ်တို့သည် သင်တို့အား ဘုရားသခင်၏ ဧဝံဂေလိတရားကို ဟောပြောပြီး အပြန်အလှန်အားဖြင့် ဘာမျှမရရှိပေ။ ကျွန်ုပ်တို့သည် ဘုရားသခင်၏ တာဝန်ပေးစေခိုင်းချက်ကို ပြည့်စုံစေကြပြီ။ သင်တို့သည် ထိုမျှကြီးမားသော ကောင်းချီးမင်္ဂလာများကို ရရှိကြပြီးဖြစ်ကာ ထို့အတွက်ကြောင့် သင်တို့သည် ဘုရားသခင်၏ ချစ်ခြင်းမေတ္တာကို ကျေးဇူးဆပ်သင့်ပြီး ကျွန်ုပ်တို့အား အနည်းငယ်သော ပေးကမ်းစွန့်ကြဲမှုကို ပေးသင့်သည်။ ယင်းမှာ ကျွန်ုပ်တို့ရရှိရန် ထိုက်တန်သည့်အရာ မဟုတ်လော” ဟူ၍ဖြစ်သည်။ ဤပုံစံအတိုင်း ၎င်းတို့သည် လူတို့ထံမှ ရုပ်ဝတ္ထုပစ္စည်းများနှင့် ငွေကြေးကို အယောင်ဆောင်လျက် တိုက်ရိုက်ဖြစ်စေ၊ သွယ်ဝိုက်၍ဖြစ်စေ ညှစ်ယူရန် နည်းလမ်းအမျိုးမျိုးကို အသုံးချခြင်းဖြစ်သည်။ ၎င်းတို့သည် ဧဝံဂေလိဖြန့်ဝေခြင်းကို ကိုယ်ကျိုးရှာရန် အခွင့်အလမ်းအဖြစ် အသုံးချသည်။ ဤအရာ၏ ပထမသရုပ်သကန်မှာ ဧဝံဂေလိတရားအား စျေးကွက်တင်ခြင်းဖြစ်ပြီး ယင်းက သဘာဝအားဖြင့် အကြီးလေးဆုံး ဖြစ်သည်။ ဒုတိယသရုပ်သကန်မှာ အယောင်ဆောင်ထားသော ညှစ်ယူခြင်းဖြစ်သည်။ ထို့ကြောင့် ဧဝံဂေလိဖြန့်ဝေခြင်း တာဝန်ကို ထမ်းဆောင်သော လူတို့၏ အဆင့်အတန်းများအတွင်း၌ လူအချို့၏ အိတ်ကပ်များသည် ၎င်းတို့ ဧဝံဂေလိတရားကို ဟောပြောနေကြစဉ် စတင်၍ မသိမသာ ဖောင်းလာပြီး ချမ်းသာလာကြသည်။ လူအချို့က “ချမ်းသာသည်မှာ ကောင်းသည်မဟုတ်လော။ ဤအရာမှာ ဘုရားသခင်၏ ကောင်းချီးမဟုတ်လော” ဟု ဆိုကြသည်။ ယင်းသည် ပေါက်ကရစကားဖြစ်၏။ သင်သည် လူတို့ထံမှ အရာရာကို ညှစ်ယူရန်နှင့် ကလိမ်ကျရန် သင်၏ လှည့်ကွက်များနှင့် ပရိယာယ်များကို အမှီပြုပြီးနောက် ယင်းသည် ဘုရားသခင်၏ ကောင်းချီးဖြစ်သည်ဟု ကြွေးကြော်ပေသည်။ ထိုကဲ့သို့သော စကားများ၏ သဘာဝမှာ အဘယ်နည်း။ ယင်းတို့မှာ ဘုရားသခင်ကို ပြစ်မှားစော်ကားခြင်း ဖြစ်သည်။ ဤသည်မှာ ဘုရားသခင်၏ ကောင်းချီးမဟုတ်ပေ။ ဘုရားသခင်က လူတို့ကို ဤပုံစံဖြင့် ကောင်းချီးမပေး‌ချေ။ သို့ဆိုလျှင် ဤကဲ့သို့သော အတွေးအခေါ်သည် လူတစ်ဦးထဲ၌ အဘယ့်ကြောင့် ပေါ်ပေါက်လာရမည်နည်း။ ဤသည်မှာ ၎င်းတို့၏ ရည်မှန်းချက်များနှင့် ၎င်းတို့၏ အလိုကြီးသော၊ ဆိုးယုတ်သော သဘာဝ၏ ရလဒ်ပင်ဖြစ်၏။

ဧဝံဂေလိတရားကို ဖြန့်ဝေသောသူတို့အားလုံးသည် များစွာ ဒုက္ခခံရသည်။ တစ်ခါတစ်ရံ ၎င်းတို့သည် ဘာသာရေးသမားများ၏ ညှဉ်းပန်းနှိပ်စက်ခြင်းနှင့် ဝိုင်းတိုက်ခိုက်ခြင်း၊ သို့မဟုတ် စာတန်၏အစိုးရထံသို့ အပ်နှံခြင်းကိုပင် ခံရကြ၏။ အကယ်၍ ၎င်းတို့သည် အနည်းငယ် သတိလက်လွတ်ဖြစ်ပါက အဆင်းနီသောနဂါးကြီး၏ ဖမ်းဆီးခြင်းကို ခံရကောင်း ခံရနိုင်စရာရှိသည်။ သို့သော်လည်း သမ္မာတရားကို ချစ်မြတ်နိုးသောသူတို့သည် ထိုသို့သော အရာများကို မှန်မှန်ကန်ကန် ကိုင်တွယ်ဖြေရှင်းနိုင်လင့်ကစား သမ္မာတရားကို ချစ်မြတ်နိုးခြင်းမရှိသော သူတို့သည် အသေးငယ်ဆုံးသော ဒုက္ခခံရခြင်းအကြောင်းကို မကြာခဏ ညည်းညူကြမည်ဖြစ်သည်။ ဧဝံဂေလိဖြန့်ဝေသူအချို့က “ကျွန်ုပ်သည် လူတစ်ဦးကို ဧဝံဂေလိဟောပြောခဲ့ပြီး ထိုမျှအချိန်အကြာကြီး စကားပြောပြီးနောက်တွင် သူသည် ကျွန်ုပ်ကို ရေတစ်ခွက်ပင် မတိုက်ခဲ့ပေ။ ကျွန်ုပ်သည် သူ့ကို မဟောပြောလိုပေ” ဟူကဲ့သို့သော အရာများကိုပင် ပြောခဲ့ကြသည်။ လူတစ်ဦးက ၎င်းတို့ကို ရေတစ်ခွက်ပင် မတိုက်ခဲ့သည်မှာ ပြဿနာတစ်ခု ဟုတ်သ‌လော။ ဤဧဝံဂေလိဖြန့်ဝေသူများ၏ စကားများ၌ ပုန်းကွယ်နေသော စိတ်သဘောထားတစ်မျိုး ရှိ၏။ သွယ်ဝိုက်ညွှန်းဆိုချက်မှာ ဧဝံဂေလိဖြန့်ဝေခြင်းသည် ပျော်ရွှင်ဖွယ်ကောင်းပြီး အကျိုးအမြတ် ရှိသောအခါ၌သာ လုပ်ရကျိုးနပ်သည် ဟူ၍ဖြစ်၏။ အကယ်၍ ယင်း၌ ဒုက္ခခံရခြင်း ပါဝင်ပါက၊ သို့မဟုတ် ၎င်းတို့သည် သောက်စရာ ရေတစ်ခွက်ပင် မရပါက ယင်းသည် လုပ်ရကျိုးမနပ်တော့ပေ။ ဤအရာ၌ တစ်စုံတစ်ခုကို တောင်းခံရန်နှင့် အပေးအယူပြုလုပ်ရန် ရည်ရွယ်ချက်ရှိသည်။ အကယ်၍ လူတစ်ဦးက ဧဝံဂေလိဖြန့်ဝေသည့် နည်းလမ်း၌ အရောင်းအဝယ်သဘော အမြဲရှိနေပါက ထိုသူသည် သူ့ကိုယ်သူ ဘုရားသခင်အဖို့ စိတ်ရင်းအတိုင်း အသုံးခံနေခြင်း ဖြစ်သလော။ သူသည် မိမိ၏တာဝန်ကို ထမ်းဆောင်သောအခါ ဤမျှသေးငယ်သော ဒုက္ခကိုပင် မခံနိုင်ဘဲ သေးငယ်သောအရာတစ်ခုက သူ့ကို အပျက်သဘော ဆောင်လာစေနိုင်ပါက သူသည် မိမိ၏တာဝန်ကို လက်သင့်ခံဖွယ်ရာ ပုံစံဖြင့် ဖြည့်ဆည်းနိုင်သလော။ သူက “ကျွန်ုပ်ကို ရေမျှ မတိုက်ခဲ့ရုံမက သူတို့သည် နေ့လည်စာစားချိန်၌ ကျွန်ုပ်ကို မည်သည့်အစာမျှလည်း မကျွေးခဲ့” ဟူ၍လည်း ပြောမည်ဖြစ်သည်။ လူတစ်ဦးက ဤဧဝံဂေလိဖြန့်ဝေသူများကို သူနှင့်အတူနေ၍ စားသောက်ခွင့်မပြုခဲ့လျှင် ယင်းသည် ပြဿနာတစ်ခု ဟုတ်သလော။ ၎င်းတို့သည် ဧဝံဂေလိတရားကို နှစ်အတန်ကြာ ဖြန့်ဝေလာခဲ့ပြီး လူတို့က ၎င်းတို့ကို မည်သို့ဧည့်ခံကြောင်း၊ ၎င်းတို့စားသောက်ရန် ထိုသူတို့က မည်သည့်အရာ ပေးကြောင်းနှင့် ၎င်းတို့က မည်သည့်လက်ဆောင်များ ရရှိကြောင်းကို အမြဲတမ်း အာရုံစိုက်နေသည်မှာ အဘယ့်ကြောင့်နည်း။ ၎င်းတို့သည် မှန်သောလမ်းခရီးကို စုံစမ်းမေးမြန်းနေသော လူတို့အား မည်သို့သဘောထားရမည်ကို မသိကြသလော။ ဤသည်မှာ ၎င်းတို့၏ စရိုက်နှင့်ဆိုင်သော ပြဿနာတစ်ခု ဖြစ်သည်။ ၎င်းတို့၏ စိတ်နှလုံးထဲ၌ လူတို့အား ချစ်ခြင်းမေတ္တာ အနည်းငယ်မျှပင် ရှိသလော။ သို့ဆိုလျှင် ၎င်းတို့သည် ဧဝံဂေလိဖြန့်ဝေသူများအနေဖြင့် ကြံ့ကြံ့ခံသင့်သည့် ဒုက္ခမျိုးစုံနှင့် ၎င်းတို့သည် သမ္မာတရားကို မည်သို့ လက်တွေ့လုပ်ဆောင်သင့်သည့်ပုံကို အဘယ့်ကြောင့် နားမလည်သေးသနည်း။ ၎င်းတို့သည် ဤအရာကို အဘယ့်ကြောင့် လုံးဝ လက်တွေ့မလုပ်ဆောင်ခဲ့သေးသနည်း။ အကယ်၍ ဧဝံဂေလိဟောပြောခံရသည့် လူတို့က သင့်အား သောက်စရာရေ၊ သို့မဟုတ် စားစရာအစာ မပေးလျှင် ယင်းက ပြဿနာတစ်ခု ဟုတ်သလော။ ဤသည်မှာ ပြဿနာမဟုတ်ပေ။ လူတို့အား ဧဝံဂေလိဖြန့်ဝေခြင်းသည် ငါတို့၏ဝတ္တရားကို ဖြည့်ဆည်းခြင်းဖြစ်သည်။ ယင်းမှာ ငါတို့၏တာဝန်ဖြစ်သည်။ နောက်ထပ်သတ်မှတ်ချက်များ မရှိပေ။ သင်ဟောပြောသည့် လူတို့သည် သင့်ကို ကျွေးမွေးရန်၊ သင့်ကို ဧည့်ခံပြုစုရန်၊ သို့မဟုတ် သင့်အား ပြုံးပြရန် ဝတ္တရားမရှိပေ။ ၎င်းတို့သည် သင်ပြောသမျှကို နားထောင်ရန်နှင့် သင့်အား နာခံရန် မလိုပေ။ ၎င်းတို့သည် ထိုသို့သော ဝတ္တရားမျိုးကို ကျေပွန်စရာ မလိုအပ်ပေ။ သင်သည် ဤပုံစံဖြင့် စဉ်းစားနိုင်လျှင် ယင်းသည် မျှတပြီး ကျိုးကြောင်းသင့်လျော်ပေသည်။ ထို့နောက် သင်သည် ဤအရာများကို မှန်မှန်ကန်ကန် သဘောထားနိုင်မည် ဖြစ်သည်။ သို့ဆိုလျှင် မှန်သောလမ်းခရီးအား စုံစမ်းမေးမြန်းသော လူတစ်ဦးကို မည်ကဲ့သို့ သဘောထားသင့်သနည်း။ သူသည် ဧဝံဂေလိဖြန့်ဝေခြင်းအတွက် ဘုရားအိမ်တော်၏ စည်းမျဉ်းများနှင့် ကိုက်ညီသရွေ့ ထိုသူတို့အား ဟောပြောရန် ငါတို့တွင် ဝတ္တရားရှိသည်။ ထို့ပြင် သူ၏ လက်ရှိ သဘောထားက ညံ့ဖျင်းပြီး လက်မခံနိုင်ပါက ငါတို့သည် စိတ်ရှည်သည်းခံခြင်းကို ကျင့်သုံးရမည်။ ငါတို့သည် မည်မျှကြာကြာနှင့် မည်သည့်အတိုင်းအတာအထိ စိတ်ရှည်ရမည်နည်း။ သူက သင့်ကို ငြင်းပယ်ပြီး သူ့အိမ်ထဲသို့ ဝင်ခွင့်မပြု၊ မည်သည့်ဆွေးနွေးချက်မျှ အလုပ်မဖြစ်သည်သာမက ၎င်းတို့ကို ဖုန်းခေါ်ဆိုမှုလည်း အလုပ်မဖြစ်၊ သို့မဟုတ် အခြားတစ်ယောက်ယောက်အား သူ့ကို သွား၍ ဖိတ်ခေါ်စေခြင်းလည်း အလုပ်မဖြစ်သည့်အပြင် သူက သင့်ကို အသိအမှတ်မပြုသည့် အချိန်အထိ စိတ်ရှည်ရမည် ဖြစ်သည်။ ဤကိစ္စရပ်တွင် သူ့အား ဧဝံဂေလိဖြန့်ဝေဖို့ မဖြစ်နိုင်တော့ပေ။ ယင်းသည် တာဝန်ဝတ္တရားကို သင် ဖြည့်ဆည်းပြီးသား ဖြစ်မည့်အချိန်ပင်ဖြစ်သည်။ ယင်းသည် သင်၏တာဝန်ကို ထမ်းဆောင်ခြင်း၏ ဆိုလိုရင်းဖြစ်သည်။ မည်သို့ဆိုစေ မျှော်လင့်ချက်အနည်းငယ် ရှိနေသရွေ့ သင်သည် တတ်နိုင်သည့် နည်းလမ်းတိုင်းကို စဉ်းစားပြီး ဘုရားသခင်၏ နှုတ်ကပတ်တော်များကို ဖတ်ရှုရန်နှင့် ဘုရားသခင်၏ အလုပ်ကို ထိုသူအား သက်သေခံရန်အတွက် အစွမ်းကုန် လုပ်ဆောင်သင့်ပေသည်။ သာဓကအနေဖြင့် သင်သည် လူတစ်ဦးနှင့် နှစ်နှစ်သုံးနှစ်မျှ အဆက်အသွယ် ရှိလာသည် ဆိုပါစို့။ သင်သည် ထိုသူအား ဧဝံဂေလိဖြန့်ဝေရန်နှင့် ဘုရားသခင်အား သက်သေခံရန် ကြိမ်ဖန်များစွာ ကြိုးစားခဲ့ပြီးဖြစ်သော်လည်း သူ၌ ယင်းကို လက်ခံရန် ရည်ရွယ်ချက်မရှိပေ။ သို့ဖြစ်စေကာမူ သူ၏ သိနားလည်မှုက အတော်ပင် ကောင်းမွန်ပြီး သူသည် အမှန်တကယ်ပင် ဧဝံဂေလိလက်ခံရန် အလားအလာရှိသော သူတစ်ဦး ဖြစ်သည်။ သင် မည်သည့်အရာ ပြုလုပ်သင့်သနည်း။ ပထမဦးစွာ သင်သည် ထိုသူကို လုံးဝ လက်မလျှော့ရ၊ ထိုအစား သူနှင့် ပုံမှန် အပြန်အလှန် ဆက်ဆံရေးကို ထိန်းသိမ်းထားသင့်ကာ ဘုရားသခင်၏ နှုတ်ကပတ်တော်အား ဖတ်ပြမြဲဖတ်ပြပြီး ကိုယ်တော်၏ အမှုတော်အတွက် သက်သေခံသင့်ပေသည်။ ထိုသူကို လက်မလျှော့လေနှင့်။ အဆုံးတိုင်အောင် စိတ်ရှည်သည်းခံလော့။ အနာဂတ် နေ့ရက်တစ်ရက်တွင် သူသည် နိုးထလာပြီး မှန်သော လမ်းခရီးကို စုံစမ်းလေ့လာရန် အချိန်ကျပြီဟု ခံစားလာမည်။ ထို့အတွက်ကြောင့် စိတ်ရှည်သည်းခံခြင်းကို လက်တွေ့လုပ်ဆောင်ပြီး အဆုံးတိုင်အောင် လုံ့လစိုက်ထုတ်ခြင်းသည် ဧဝံဂေလိဖြန့်ဝေခြင်း၏ အလွန် အရေးကြီးသော သွင်ပြင်လက္ခဏာ ဖြစ်ရခြင်းဖြစ်သည်။ သို့ဆိုလျှင် ဤအရာကို အဘယ့်ကြောင့် ပြုလုပ်ရသနည်း။ အဘယ့်ကြောင့်ဆိုသော် ယင်းသည် ဖန်ဆင်းခံလူသားတစ်ဦး၏ တာဝန်ပင်ဖြစ်၏။ သင်သည် ထိုသူနှင့် အဆက်အသွယ် ရှိသည်ဖြစ်၍ သင်သည် သူ့ကို ဘုရားသခင်၏ ဧဝံဂေလိတရား ဟောပြောရန် တာဝန်ဝတ္တရားတစ်ခု ရှိသည်။ ပထမဦးစွာ ဘုရားသခင်၏ နှုတ်ကပတ်တော်များနှင့် ဧဝံဂေလိတရားကို ကြားနာခြင်းမှသည် မိမိကိုယ်ကို ပြောင်းလဲသွားသည်အထိ ထိုအတောအတွင်း၌ ဖြစ်စဉ်များစွာ ရှိပြီး ဤအရာက အချိန်ယူရလေသည်။ သူ့ဘာသာသူ ပြောင်းလဲလာပြီး သူ့အား ဘုရားသခင်ရှေ့မှောက်၊ ဘုရားသခင်၏အိမ်တော်သို့ သင် ပြန်၍ ခေါ်ဆောင်လာသည့် ထိုနေ့ရက်ရောက်ရှိသည်အထိ ဤကာလအပိုင်းအခြားက သင့်ကို စိတ်ရှည်ရန်နှင့် စောင့်ဆိုင်းရန် တောင်းဆိုလေသည်။ ဤသည်မှာ သင်၏ ဝတ္တရားဖြစ်သည်။ ဝတ္တရားဟူသည်မှာ အဘယ်နည်း။ ယင်းသည် ကျင့်ဝတ်သိက္ခာအရ လူတစ်ဦး မဖြစ်မနေလုပ်ရမည့် အချောင်ခို၍ မရသော တာဝန်ဝတ္တရားတစ်ခု ဖြစ်သည်။ ယင်းမှာ မိခင်တစ်ဦးက သူမ၏ သားသမီးအား ပြုမူဆက်ဆံပုံနှင့်ပင် တူသည်။ ထိုသားသမီးသည် အဘယ်မျှ နာခံမှုကင်းမဲ့သည်ဖြစ်စေ၊ ကျီစယ်နောက်ပြောင်သည်ဖြစ်စေ၊ သို့မဟုတ် သူသည် ဖျားနာပြီး အစာမစားလျှင် မိခင်၏ တာဝန်ဝတ္တရားမှာ အဘယ်နည်း။ ဤသူသည် သူမ၏သားသမီးဖြစ်ကြောင်း သိသဖြင့် သူမသည် သူ့ကို တုန်နေအောင်ချစ်သည်၊ မေတ္တာထားပြီး ဂရုတစိုက် ပြုစုစောင့်ရှောက်သည်။ သားသမီးဖြစ်သူက သူမအား မိခင်အဖြစ် အသိအမှတ်ပြုသည် ဖြစ်စေ၊ မပြုသည်ဖြစ်စေ အရေးမကြီးသည့်အပြင် သားသမီးဖြစ်သူက သူမကို မည်သို့ဆက်ဆံပြုမူသည်ဖြစ်စေ ကိစ္စမရှိပေ။ မည်သို့ပင်ဆိုစေ သူမသည် သူ၏နံဘေးမှာနေလျက် သူ့ကို ကာကွယ်ရင်း တစ်ခဏမျှ ချန်ရစ်မထားဘဲ သူမသည် သူ၏မိခင်ဖြစ်ကြောင်း၊ သူ့အနေဖြင့် သူမ၏ရင်ခွင်သို့ ပြန်လာမည်ဖြစ်ကြောင်း ယုံကြည်ကာ အစဉ်အမြဲ စောင့်ဆိုင်းနေသည်။ သူမသည် ဤပုံစံအတိုင်း သားသမီးဖြစ်သူအား အစဉ်အမြဲ စောင့်ကြည့်ပြီး ဂရုစိုက်လေသည်။ ဤသည်မှာ တာဝန်ဝတ္တရားက ဆိုလိုသည့်အရာ ဖြစ်သည်။ ဤသည်မှာ ကျင့်ဝတ်သိက္ခာအရ မဖြစ်မနေ လုပ်ရမည့်တာဝန်ရှိခြင်း၏ ဆိုလိုရင်းဖြစ်သည်။ အကယ်၍ ဧဝံဂေလိဖြန့်ဝေရာ၌ ပါဝင်သောသူတို့သည် ဤပုံစံအတိုင်း လက်တွေ့လုပ်ဆောင်ပြီး လူတို့အတွက် ချစ်ခင်တတ်သော ဤနှလုံးသားမျိုးကို ထားရှိပါက ၎င်းတို့သည် ဧဝံဂေလိဖြန့်ဝေခြင်း၏ စည်းမျဉ်းများကို ထိန်းသိမ်းနေပြီး ရလဒ်များ ရရှိနိုင်စွမ်း လုံးဝရှိမည်ဖြစ်သည်။ အကယ်၍ ၎င်းတို့သည် အကြောင်းပြချက်များ အမြဲရှာဖွေနေပြီး ၎င်းတို့၏ အခြေအနေများကို ပြောဆိုနေပါက ဧဝံဂေလိတရားကို ဖြန့်ဝေနိုင်မည် မဟုတ်သည့်အပြင် ၎င်းတို့၏တာဝန်ကို ကျေပွန်နေလိမ့်မည် မဟုတ်ပေ။ ဧဝံဂေလိဖြန့်ဝေသူ လူအချို့က ဧဝံဂေလိလက်ခံရန် အလားအလာရှိသူများသည် မြောက်မြားစွာသော မေးခွန်းနှင့် အခက်အခဲများရှိကြပြီး အရည်အသွေး၌ ညံ့ဖျင်းကြသည်ဟု အမြဲ ဇီဇာကြောင်ကြကာ ရလဒ်အနေဖြင့် ၎င်းတို့သည် ထိုသူတို့ကို သိမ်းသွင်းရရှိရန်အတွက် ဒုက္ခခံပြီး အဖိုးအခပေးရန် စိတ်ဆန္ဒမရှိကြပေ။ သို့သော် ၎င်းတို့၏ မိဘများနှင့် ဆွေမျိုးများ၌ အခက်အခဲများစွာနှင့် ညံ့ဖျင်းသော အရည်အသွေးရှိလျှင်မူ ၎င်းတို့သည် ထိုသူတို့ကို ချစ်ခင်တတ်သော နှလုံးသားဖြင့် ဆက်ဆံပြုမူနိုင်ကြသေးသည်။ ဤသည်မှာ ၎င်းတို့သည် လူတို့ကို မျှမျှတတ ဆက်ဆံခြင်းမရှိဟု ဆိုလိုသည်မဟုတ်လော။ ဤလူတို့၌ ချစ်ခင်တတ်သော နှလုံးသား ရှိကြသလော။ ၎င်းတို့သည် ဘုရားသခင်၏ အလိုတော်အပေါ် အရေးထားမှုကို ပြသသောလူတို့ ဟုတ်သလော။ လုံးဝ မဟုတ်ပေ။ ဧဝံဂေလိကို ဖြန့်ဝေရာ၌ ၎င်းတို့သည် လူတို့အား ဧဝံဂေလိမဟောပြောရန် အရှိအတိုင်းဖြစ်သော အခြေအနေများအပေါ် မူတည်၍ ၎င်းတို့ရှာတွေ့နိုင်သည့် မည်သည့် အကြောင်းပြချက်များနှင့် ဆင်ခြေများကိုမဆို အမြဲ ရှာဖွေကြသည်၊ သို့မဟုတ် ၎င်းတို့သည် မည်သူ့ကိုတွေ့သည် ဖြစ်စေ ထိုသူကို နှစ်လိုဖွယ်ကောင်းသည်ဟု မမြင်ဘဲ မိမိတို့ထက် နိမ့်ကျသည်ဟု ထင်မြင်ကာ ဧဝံဂေလိဟောပြောရမည့်သူ တစ်ဦးမျှမရှိဟု အမြဲခံစားကြသည်။ ရလဒ်အနေဖြင့် ၎င်းတို့သည် လူတစ်ဦးတစ်ယောက်ကိုမျှ ဧဝံဂေလိ မဆောင်ကြဉ်းပေးဘဲ အဆုံးသတ်ရသည်။ ဧဝံဂေလိဖြန့်ဝေရာ၌ ဤကဲ့သို့သော စည်းမျဉ်းများ ရှိသလော။ ဤသို့သော လူတစ်ဦးသည် ဘုရားသခင်၏ အလိုတော်၊ သို့မဟုတ် ဘုရားသခင်၏ တောင်းဆိုချက်များကို လုံးဝ အရေးမစိုက်ပေ။ ဘုရားသခင်၏ နှုတ်ကပတ်တော်များသည် သမ္မာတရားဖြစ်သည်ဟု အသိအမှတ်ပြုနိုင်သူ မည်သူမဆိုနှင့် သမ္မာတရားကို လက်ခံနိုင်သူ မည်သူမဆိုသည် သိသိသာသာပင် ဆိုးယုတ်သော သူများ၊ သို့မဟုတ် အဓိပ္ပာယ်မဲ့သော အမျိုးအစားများ မဟုတ်ပါက ဧဝံဂေလိလက်ခံရန် အလားအလာရှိသူ ဖြစ်သည်။ အကယ်၍ လူတို့သည် ဘုရားသခင်၏ အလိုတော်အပေါ် အရေးထားမှု အမှန်တကယ် ပြသမည်ဆိုပါက ၎င်းတို့သည် မိမိတို့၏ တာဝန်များကို ထမ်းဆောင်ပြီး လူတို့ကို စည်းမျဉ်းများဖြင့် ပြုမူဆက်ဆံကြမည် ဖြစ်သည်။ မှန်သောလမ်းခရီးကို စုံစမ်းလေ့လာသော လူတို့တွင် မည်သည့်ပြဿနာများ ရှိသည်၊ သို့မဟုတ် ထိုသူတို့၏ ဖောက်ပြန်ပျက်စီးသော စိတ်သဘောထားများကို မည်မျှထုတ်ဖော်သည် ဖြစ်စေ ထိုသူတို့သည် သမ္မာတရားကို အသိအမှတ်ပြုပြီး လက်ခံနိုင်သရွေ့ သင်သည် ထိုသူတို့အား ဘုရားသခင်၏ နှုတ်ကပတ်တော်များကို မမောနိုင်မပန်းနိုင် ဖတ်ပြပြီး ဘုရားသခင်၏ အလုပ်ကို သက်သေခံသင့်သည်။ ဤသည်မှာ ဧဝံဂေလိဖြန့်ဝေရာ၌ လိုက်လျှောက်ရမည့် စည်းမျဉ်းဖြစ်သည်။

ဧဝံဂေလိတရားကို ဖြန့်ဝေသောသူအချို့သည် ၎င်းတို့၏ စိတ်နှလုံးထဲ၌ မည်သည့်ချစ်ခြင်းမေတ္တာမျှ လုံးဝမရှိဟု ငါကြားသိရသည်။ မှန်သောလမ်းခရီးကို စုံစမ်းစစ်ဆေးနေသော သူတို့၏ အယူအဆများနှင့် မေးခွန်းများကို ကိုင်တွယ်ဖြေရှင်းနေစဉ် ဧဝံဂေလိဖြန့်ဝေသော ဤသူတို့သည် ကြိမ်ဖန်များစွာ မိတ်သဟာယပြုရသည်။ သို့သော် ထိုလူတို့က နားမလည်သေးဘဲ မေးခွန်းများ ထပ်ခါထပ်ခါ မေးမြန်းသောအခါ ဧဝံဂေလိဖြန့်ဝေသော ဤသူတို့သည် ယင်းကို သည်းမခံနိုင်တော့ဘဲ ထိုသူတို့ကို စတင်၍ သြဝါဒပေးတော့သည်။ “သင်တို့သည် အမေးအမြန်း ထူလွန်းသည်။ ကျွန်ုပ်သည် မည်မျှပင် မိတ်သဟာယပြုစေကာမူ သမ္မာတရားကို သင်တို့နားမလည်။ သင်တို့၏ အရည်အချင်းမှာ နိမ့်ပါးလွန်းသည်။ သင်တို့၌ နားလည်နိုင်စွမ်း မရှိ၊ သင်တို့သည် သမ္မာတရားနှင့် အသက်ကို မရရှိနိုင်။ သင်တို့အားလုံးသည် အစေခံသူများ ဖြစ်ကြသည်” ဟူ၍ ဖြစ်သည်။ လူအချို့က ထိုကဲ့သို့သော စကားများကို နားမထောင်နိုင်ကြဘဲ တစ်ခဏမျှ အပျက်သဘောဆောင်လာကြသည်။ လူတို့သည် တစ်ဦးနှင့်တစ်ဦး မတူကြပေ။ လူအချို့သည် မှန်သောလမ်းခရီးကို စုံစမ်းစစ်ဆေးကြသောအခါတွင် ဘုရားသခင်၏ နှုတ်ကပတ်တော်များသည် သမ္မာတရားဖြစ်မှန်း သိမြင်ကြသည်။ ထိုသူတို့၌ အယူအဆများနှင့် ပြဿနာများ ရှိလင့်ကစား ဘုရားသခင်၏ နှုတ်ကပတ်တော်များကို ဖတ်ရှုစဉ်တွင် ဤအရာများက ပြေလည်သွားသည်။ ဤလူတို့သည် အလွန်ဖြူစင်သဖြင့် သမ္မာတရားကို အလွယ်တကူ လက်ခံနိုင်ကြသည်။ ထိုသူတို့သည် ဘုရားသခင်၏ နှုတ်ကပတ်တော်များကို မိမိတို့ဘာသာ ဖတ်ရှုသည်၊ ရှာဖွေသည်၊ စုံစမ်းစစ်ဆေးကြပြီးလျှင် တစ်စုံတစ်ဦးက ၎င်းတို့အား မိတ်သဟာယပြုသောအခါ မှန်သောလမ်းခရီးကို လိုလိုလားလား လက်ခံပြီး အသင်းတော်၌ ပါဝင်ကြသည်။ သို့သော် အခြားလူတို့၌ မေးခွန်းအမြောက်အမြား ရှိသည်။ ထိုသူတို့သည် ဘက်ပေါင်းစုံ၌ ရှင်းလင်းမှုရရှိသည်အထိ စုံစမ်းစစ်ဆေးတတ်ကြသည်။ အကယ်၍ ရှင်းလင်းသည်အထိ ၎င်းတို့ စုံစမ်းစစ်ဆေးမှု မပြုထားသော အချက်တစ်ခုပင် ရှိပါက မှန်သောလမ်းခရီးကို လက်ခံမည် မဟုတ်ပေ။ ဤလူတို့သည် ၎င်းတို့ပြုလုပ်သည့် အရာရာ၌ ဂရုစိုက်ပြီး သတိထားကြသည်။ ဧဝံဂေလိဖြန့်ဝေသူ အချို့၌ ထိုကဲ့သို့သော လူတို့အတွက် မိမိတို့၏စိတ်နှလုံးထဲတွင် မည်သည့်ချစ်ခြင်းမေတ္တာမျှ မရှိပေ။ ၎င်းတို့၏ သဘောထားမှာ အဘယ်နည်း။ “သင် ယုံချင်ယုံ၊ မယုံချင်နေ။ သင်သည် ဘုရားသခင်၏ အိမ်တော်အတွက် ဆုံးရှုံးမှုကြီးဖြစ်မည် မဟုတ်သကဲ့သို့ သင်သည် မည်သည့်အကျိုးအမြတ်ကြီးလည်း ဖြစ်မည်မဟုတ်ပေ။ သင်မယုံကြည်ပါက ထွက်သွားလော့။ သင်သည် အဘယ်သို့များ မေးခွန်းမြောက်မြားစွာ မေးရသနည်း။ ဤအရာများအားလုံးကို သင့်အတွက် ဖြေပေးခဲ့ပြီးပြီ” ဟူ၍ ဖြစ်သည်။ အမှန်တွင် ဧဝံဂေလိဖြန့်ဝေသော ဤသူတို့သည် ဧဝံဂေလိလက်ခံဖို့ အလားအလာရှိသူများက မေးမြန်းသော မေးခွန်းများကို ရှင်းလင်းစွာ အဖြေမပေးကြ၊ သမ္မာတရားကို ရှင်းလင်းစွာ မိတ်သဟာယမပြုကြ၊ ဤလူတို့၏ စိတ်နှလုံးထဲ၌ရှိသည့် သံသယများကို လုံးလုံးလျားလျား မဖျောက်ဖျက်ပေးဘဲ၊ ထိုသူတို့အား သူတို့၏ အယူအဆများကို စွန့်လွှတ်ပြီး ဧဝံဂေလိတရားကို တတ်နိုင်သမျှ အမြန်ဆုံး လက်ခံစေချင်ကြသည်။ ဤသည်မှာ လူတို့အား စိတ်ဆန္ဒမရှိလင့်ကစား အတင်းအဓမ္မ လက်ခံစေနိုင်သောအရာ ဟုတ်သလော။ လူတစ်ဦးက သူနားမလည်ဟု အမှန်အတိုင်း ပြောလျှင် သင်သည် ထိုသူတို့၏ ပြဿနာများ၊ အယူအဆများနှင့် စပ်လျဉ်း၍ ဘုရားသခင်၏ နှုတ်ကပတ်တော်များမှ ကျမ်းပိုဒ်အနည်းငယ်ကို ဖတ်ပြပြီးနောက် ထိုသူတို့နားလည်နိုင်ဖို့ အထောက်အကူပြုရန် သမ္မာတရားအပေါ် မိတ်သဟာယ ပြုသင့်သည်။ ဧဝံဂေလိလက်ခံဖို့ အလားအလာရှိသူ အချို့သည် အမှုအရာများ၏ ဇာစ်မြစ်ကို နားလည်ချင်ကြသည်။ ဤကဲ့သို့သော လူတို့သည် အရာရာကို ရှာဖွေတွေ့ရှိလိုကြသည်။ ထိုသူတို့သည် သင့်အတွက် အခြေအနေကို ခက်ခဲအောင် ပြုလုပ်နေကြခြင်းမဟုတ်၊ ချစ်တီးခေါင်း သန်းရှာနေခြင်း သို့မဟုတ် အပြစ်ရှာနေခြင်းမဟုတ်၊ အမှုအရာများကို အလေးအနက်ထားကြခြင်း ဖြစ်သည်။ ထိုကဲ့သို့သော လူတို့အား ကြုံတွေ့ရသောအခါ ဧဝံဂေလိဖြန့်ဝေသောသူ အချို့သည် ထိုသူတို့ကို အဖြေမပေးနိုင်ဘဲ ကိုယ့်ပေါင်ကိုယ် လှန်ထောင်းမိလေပြီဟု ခံစားတတ်ကြသည်။ အကျိုးဆက်အားဖြင့် ၎င်းတို့သည် ထိုသူတို့ကို မိတ်သဟာယ မပြုလိုဘဲ “ကျွန်ုပ်သည် နှစ်ပေါင်းများစွာ ဧဝံဂေလိ ဖြန့်ဝေလာခဲ့သော်လည်း ထိုကဲ့သို့ စိတ်အနှောင့်အယှက် ပေးသောသူမျိုး တစ်ခါဖူးမျှ မကြုံခဲ့ပါ” ဟု ဆိုကြသည်။ ဧဝံဂေလိဖြန့်ဝေသော ဤသူတို့က ထိုကဲ့သို့သော လူတို့ကို စိတ်အနှောင့်အယှက်ပေးသူများဟု သမုတ်ကြသည်။ အမှန်တွင် ဧဝံဂေလိဖြန့်ဝေသော ဤသူတို့သည် သမ္မာတရား၏ မည်သည့်သွင်ပြင်လက္ခဏာကိုမဆို တစ်ဝက်တစ်ပျက်သာ နားလည်ကြသည်၊ ၎င်းတို့သည် ကြီးကျယ်ခမ်းနားသော သြဝါဒများနှင့် အနှစ်သာရမဲ့သော စကားလုံးအချို့အကြောင်းကို ပြောပြီး လူတို့အား ယင်းတို့ကို သမ္မာတရားအဖြစ် လက်ခံစေရန် ကြိုးစားကြသည်။ ဤသည်မှာ အခြားသူများအတွက် အခြေအနေကို ခက်ခဲအောင် ပြုလုပ်နေခြင်း မဟုတ်လော။ အကယ်၍ အခြားလူများက နားမလည်ဘဲ အသေးစိတ်ကျသော မေးခွန်းများကိုမေးပါက ၎င်းတို့သည် စိတ်မပျော်တော့ဘဲ “ကျွန်ုပ်သည် သင့်အား ဘုရားသခင်၏ အမှုတော် အဆင့်သုံးဆင့်ကို ရှင်းပြခဲ့ပြီး၊ ယင်းတို့ကို ရှင်းရှင်းလင်းလင်း ပြောပြခဲ့ပြီးဖြစ်သည်။ များစွာပြောပြပြီးနောက် သင်နားမလည်နိုင်သေးလျှင် သင်သည် သင့်အယူအဆများကို ဖြေရှင်းရန်အတွက် ဘုရားသခင်၏ နှုတ်ကပတ်တော်များကို ကိုယ်တိုင်ဖတ်ရှုသင့်သည်။ ဘုရားသခင်၏ နှုတ်ကပတ်တော်သည် ဤနေရာ၌ အသင့်ရှိနေသည်။ သင်သည် ယင်းကို ဖတ်ရှုပြီး နားလည်ပါက ယုံကြည်ပါလေ။ အကယ်၍ နားမလည်ပါကလည်း မယုံကြည်နှင့်” ဆိုတတ်ကြသည်။ ဤသည်ကို ကြားရပြီးနောက် ဧဝံဂေလိလက်ခံဖို့ အလားအလာရှိသူများက “ကျွန်ုပ်သည် မေးခွန်းများ ဆက်မေးနေလျှင် ကယ်တင်ခြင်းရရှိဖို့ အခွင့်အရေး ဆုံးရှုံးသွားနိုင်ပြီး ကောင်းချီးမင်္ဂလာများ ရရှိနိုင်တော့မည်မဟုတ်။ သို့ဖြစ်၍ မေးခွန်းများ မမေးတော့ဘဲ သူ့ကို အမြန်ပင် သဘောတူပြီး ယုံကြည်လိုက်တော့မည်” စဉ်းစားလေသည်။ ထို့နောက်တွင် ဤလူတို့သည် စုဝေးပွဲများ တက်မြဲတက်ပြီး တရားဒေသနာများကို အာရုံစိုက်၍ နားထောင်ပြီးလျှင် တဖြည်းဖြည်းနှင့် သမ္မာတရားအချို့ကို နားလည်လာကာ သူတို့၏ အယူအဆများကို တဖြည်းဖြည်း ဖြေရှင်းကြသည်။ ထိုသူတို့၏ ယုံကြည်ခြင်းသည် ယခု မည်သို့ပင် ရှိနေသည်ဖြစ်စေ၊ ဤသို့ ဧဝံဂေလိတရားကို ဖြန့်ဝေခြင်းသည် သင့်လျော်သောပုံစံ ဟုတ်သလော။ ဧဝံဂေလိဖြန့်ဝေသော ဤသူတို့သည် ၎င်းတို့၏ တာဝန်ကို ကျေပွန်ပြီဟု ဆိုနိုင်သလော။ (မဆိုနိုင်ပါ။) ဧဝံဂေလိဖြန့်ဝေရာတွင် သင်သည် ပထမဦးစွာ သင်၏တာဝန်ကို ကျေပွန်ရမည်။ သင်လုပ်နိုင်သမျှနှင့် လုပ်သင့်သမျှအရာအားလုံးကို လုပ်ဆောင်ရာတွင် သင်၏ အသိစိတ်နှင့် ဆင်ခြင်တုံတရား နောက်ကို လိုက်ရမည်။ မှန်သောလမ်းခရီးကို စုံစမ်းစစ်ဆေးနေသောသူတွင် ရှိနိုင်သော မည်သည့်အယူအဆများအတွက်မဆို၊ သို့မဟုတ် ၎င်းတို့မေးသည့် မည်သည့်မေးခွန်းအတွက်မဆို ဖြေရှင်းချက်များကို သင်သည် မေတ္တာရှေ့ထား၍ ပေးရမည်။ သင်သည် အမှန်တကယ်ပင် ဖြေရှင်းချက် မပေးနိုင်လျှင် ၎င်းတို့ကို ဖတ်ပြရန်အတွက် သက်ဆိုင်မှုရှိသော ဘုရားနှုတ်ကပတ်တော်အချို့ကို ရှာဖွေနိုင်သည်၊ သို့မဟုတ် ၎င်းတို့အား ပြသရန် အတွေ့အကြုံဆိုင်ရာ သက်သေခံချက်အကြောင်းနှင့် သက်ဆိုင်သော ဗီဒီယိုအပိုင်းများကိုသော်လည်းကောင်း၊ ဆီလျော်မှုရှိသော ဧဝံဂေလိ သက်သေခံချက် ရုပ်ရှင်များကိုလည်းကောင်း ရှာဖွေနိုင်သည်။ ဤအရာ ထိရောက်ဖို့မှာ လုံးဝဖြစ်နိုင်ခြေရှိသည်။ အနည်းဆုံးအနေဖြင့် သင်သည် သင့်တာဝန်ကို ဖြည့်ဆည်းနေလိမ့်မည်ဖြစ်ပြီး သင့်အသိစိတ်၏ စွပ်စွဲခြင်းကို ခံစားရမည် မဟုတ်ပေ။ သို့သော် သင်သည် ဝတ်ကျေတမ်းကျေ လုပ်ဆောင်ပြီး ဖြစ်သလို ပြုလုပ်လျှင် အမှုအရာများက နှောင့်နှေးကြန့်ကြာနိုင်ခြေရှိပြီး ထိုလူကို သိမ်းသွင်းရရှိရန် လွယ်ကူမည်မဟုတ်ပေ။ သူတစ်ပါးတို့ကို ဧဝံဂေလိဖြန့်ဝေရာတွင် မိမိတို့၏ တာဝန်ကို ဖြည့်ဆည်းရမည်။ “တာဝန်” ဆိုသည့်စကားကို မည်သို့ နားလည်သင့်သနည်း။ ယင်းကို အတိအကျ မည်သို့လက်တွေ့လုပ်ဆောင်ပြီး အသုံးချသင့်သနည်း။ သခင့်ကို ကြိုဆိုပြီး ဘုရားသခင်၏ နောက်ဆုံးသောကာလ အမှုတော်ကို တွေ့ကြုံပြီးနောက်တွင် သင်သည် ဘုရားသခင်၏ ပေါ်ထွန်းခြင်းကို ဆာငတ်သောသူများထံသို့ ဘုရားသခင်၏ အမှုတော်ကို သက်သေခံရန် ဝတ္တရားတစ်ခုရှိသည်ကို နားလည်သင့်သည်။ ဤသို့ဆိုလျှင် ၎င်းတို့ထံ ဧဝံဂေလိတရားကို သင် မည်သို့ ဖြန့်ဝေရမည်နည်း။ အွန်လိုင်းတွင်ဖြစ်စေ၊ လက်တွေ့ဘဝတွင်ဖြစ်စေ လူတို့ကို သိမ်းသွင်းရရှိသည့်၊ ထိရောက်သည့် မည်သည့်နည်းလမ်းမဆိုဖြင့် ဖြန့်ဝေသင့်သည်။ ဧဝံဂေလိမျှဝေခြင်းသည် သင်လုပ်ချင်စိတ်ပေါက်သည့်အချိန်တွင် လုပ်ဆောင်ရသောအရာမဟုတ်၊ သင်စိတ်ပါသည့်အခါတွင် လုပ်ဆောင်ပြီး စိတ်မပါသောအခါတွင် မလုပ်ဆောင်သော အရာတစ်ခု မဟုတ်ပေ။ ယင်းမှာ မည်သူသည် ဦးစားပေးဆက်ဆံမှုကို ရရှိမည်ဟု သင်ဆုံးဖြတ်ကာ၊ သင်နှစ်သက်သည့်သူကို ဧဝံဂေလိဖြန့်ဝေပြီး မနှစ်သက်သည့်သူကို မဖြန့်ဝေဘဲနေလျက် သင့်အကြိုက်များနှင့်အညီ လုပ်ဆောင်ရသော အရာတစ်ခုလည်းမဟုတ်ပေ။ ဧဝံဂေလိကို ဘုရားသခင်၏ တောင်းဆိုချက်များနှင့်အညီ၊ ဘုရားအိမ်တော်၏ စည်းမျဉ်းများနှင့်အညီ ဖြန့်ဝေသင့်သည်။ သင်နားလည်သည့် သမ္မာတရားများ၊ ဘုရားသခင်၏ နှုတ်ကပတ်တော်များနှင့် ဘုရားသခင်၏ အမှုတော်တို့ကို မှန်သောလမ်းခရီးအား စုံစမ်းစစ်ဆေးနေသောသူများထံသို့ သက်သေခံရန် သင်စွမ်းဆောင်နိုင်သမျှအားလုံးကို လုပ်ဆောင်လျက် ဖန်ဆင်းခံတစ်ဦး၏ တာဝန်ဝတ္တရားကို သင်ဖြည့်ဆည်းသင့်သည်။ ဤသည်မှာ ဖန်ဆင်းခံတစ်ဦး၏ တာဝန်ဝတ္တရားကို သင်ဖြည့်ဆည်းသည့်ပုံစံပင် ဖြစ်သည်။ လူတစ်ယောက်သည် ဧဝံဂေလိဖြန့်ဝေသောအခါတွင် မည်သည့်အရာကို လုပ်ဆောင်သင့်သနည်း။ သူ၏ တာဝန်ကို ဖြည့်ဆည်းသင့်သည်။ တတ်နိုင်သမျှ လုပ်ဆောင်သင့်သည်။ အဖိုးအခတိုင်းကို ပေးဆပ်လိုစိတ် ရှိသင့်သည်။ သင်သည် ဧဝံဂေလိတရားကို ဖြန့်ဝေလာသည်မှာ အချိန်တိုတောင်းလျက်၊ လုံလောက်သော အတွေ့အကြုံမရှိ၊ အပြောအဟော မကောင်းသည့်အပြင် အဆင့်မြင့်ပညာရေး မရှိခြင်းလည်း ဖြစ်နိုင်သည်။ အမှန်တွင် ဤအရာများသည် အရေးပါလွန်းလှသည် မဟုတ်ပေ။ အရေးကြီးဆုံးအရာမှာ သင်သည် ဘုရားသခင်၏ နှုတ်ကပတ်တော်ထဲမှ သင့်တော်ရာကျမ်းပိုဒ်များကို ရွေးချယ်ကာ ထိထိမိမိရှိပြီး ပြဿနာများကို ဖြေရှင်းနိုင်သော သမ္မာတရားများအပေါ် မိတ်သဟာယပြုရန် ဖြစ်သည်။ သင်မည်သည့်အရာကို ပြောသည်ဖြစ်စေ၊ အထူးသဖြင့် သင်သည် သင်၏ တကယ့်အတွေ့အကြုံများအကြောင်းကို ပြောပြပြီး နှလုံးသားထဲမှ စကားပြောသောအခါ ဧဝံဂေလိလက်ခံဖို့ အလားအလာရှိသူများက သင့်ကို နားထောင်ဖို့အတွက် လုံးဝ လိုလိုလားလား ရှိနေရန်အလို့ငှာ သင်၏ စိတ်နေစိတ်ထားမှာ ရိုးသားစစ်မှန်ပြီး လူတို့ကို တို့ထိနိုင်ရန် အထောက်အကူ ပေးရမည်။ ဧဝံဂေလိလက်ခံဖို့ အလားအလာရှိသူများသည် သင့်ကို လိုလိုလားလား ပတ်သက်ပြီး သင်နှင့် လိုလိုလားလား မိတ်သဟာယဖွဲ့ကာ သင်၏ သက်သေခံချက်ကို လိုလိုလားလား နားထောင်ဖို့အတွက် သင့်ကိုနှစ်သက်အောင် သင်လုပ်ဆောင်နိုင်ပါက ယင်းသည် အောင်မြင်မှုတစ်ခု ဖြစ်သည်။ ထိုအခါ ၎င်းတို့သည် သင့်ကို လူယုံတစ်ဦးကဲ့သို့ ဆက်ဆံမည်ဖြစ်ပြီး သင်ပြောသမျှကို လိုလိုလားလား နားထောင်မည်ဖြစ်သည်။ ၎င်းတို့သည် မိတ်သဟာယပြုဖို့အတွက် သင်ရွေးချယ်သည့် သမ္မာတရား၏ သွင်ပြင်လက္ခဏာများ အားလုံးသည် ကောင်းမွန်ပြီး အလွန်လက်တွေ့ကျကြောင်း တွေ့ရှိမည်ဖြစ်ကာ ယင်းတို့အားလုံးကို လက်ခံနိုင်မည် ဖြစ်သည်။ ဤနည်းအားဖြင့် သင်သည် ထိုသူတို့ကို အလွယ်တကူ သိမ်းသွင်းရရှိနိုင်သည်။ ဤသည်မှာ ဧဝံဂေလိတရားကို ဖြန့်ဝေပါက သင်ပိုင်ဆိုင်ထားရမည့် ဉာဏ်ပညာဖြစ်သည်။ အကယ်၍ သင်သည် လူတို့ကို မေတ္တာထားသော စိတ်နှလုံးဖြင့် မကူညီနိုင်ဘဲ အခြားသူများအတွက် လူယုံတစ်ဦး မဖြစ်နိုင်ပါက ဧဝံဂေလိဖြန့်ဝေပြီး လူတို့အား သိမ်းသွင်းရရှိခြင်းကို အလွန့်အလွန်ကြီးမားသော အားထုတ်ကြိုးပမ်းမှုတစ်ခုအဖြစ် ခံစားရမည်ဖြစ်သည်။ ရိုးရိုးသားသားနှင့် ပွင့်ပွင့်လင်းလင်း စကားပြောသောသူ၊ ဖြောင့်မတ်ရိုးသားပြီး ကြင်နာတတ်သော သူတို့သည် ဧဝံဂေလိဖြန့်ဝေရာ၌ အဘယ့်ကြောင့် လွန်စွာထိရောက်သနည်း။ ယင်းမှာ လူတိုင်းက ဤကဲ့သို့သော ဧဝံဂေလိဖြန့်ဝေသူများကို နှစ်သက်ပြီး ထိုသူတို့နှင့် အပြန်အလှန် ဆက်ဆံရန်နှင့် ခင်မင်ရင်းနှီးမှုများ တည်ဆောက်ရန် အလိုရှိကြသည်။ ဤကဲ့သို့သော ဧဝံဂေလိဖြန့်ဝေသူများသည် သမ္မာတရားကို နားလည်ကာ သမ္မာတရားအပေါ် အထူးသဖြင့် လက်တွေ့ကျပြီး ရှင်းလင်းသောပုံစံဖြင့် မိတ်သဟာယပြုကြသည်။ အကယ်၍ ၎င်းတို့သည် အခြားသူများအား သမ္မာတရားကို စိတ်ရှည်လက်ရှည် မိတ်သဟာယပြုနိုင်လျက် လူတို့၌ရှိသည့် အမျိုးမျိုးသော ပြဿနာများ၊ အခက်အခဲများနှင့် စိတ်ရှုပ်ထွေးမှုများကို ဖြေရှင်းနိုင်ပြီး ထိုသူတို့၏ စိတ်နှလုံးများကို အားတက်စေနိုင်ကာ ထိုသူတို့အား ကြီးစွာသော နှစ်သိမ့်မှုကို ဆောင်ကြဉ်းပေးနိုင်ပါက လူတို့သည် ၎င်းတို့ကို သူတို့၏ စိတ်နှလုံးထဲ၌ နှစ်သက်ယုံကြည်ပြီး ၎င်းတို့ကို လူယုံအဖြစ် မှတ်ယူကာ ၎င်းတို့ပြောသော မည်သည့်အရာကိုမဆို လိုလိုလားလား နားထောင်ကြမည် ဖြစ်သည်။ အကယ်၍ ဧဝံဂေလိဖြန့်ဝေသူတစ်ဦးသည် အထက်စီးမှနေပြီး အခြားသူများကို သြဝါဒပေးလျက် ထိုသူတို့အား ကလေးများနှင့် တပည့်များကဲ့သို့ ဆက်ဆံပါက လူတို့သည် ၎င်းတို့ကို စိတ်တိုစရာကောင်းပြီး ရွံရှာဖွယ်ကောင်းသည်ဟု မြင်ကောင်း မြင်လာနိုင်သည်။ ထို့ကြောင့် ဧဝံဂေလိဖြန့်ဝေဖို့အတွက် သင်ပိုင်ဆိုင်သင့်သည့် ဉာဏ်ပညာမှာ ဤအရာဖြစ်သည်။ ဦးစွာ သင်၏ပရိသတ်များ သဘောတူနိုင်လောက်သည့် ပုံစံဖြင့် စကားပြောလျက် အခြားသူများက သင့်ကို အကောင်းမြင်လာရန် လုပ်ဆောင်လော့။ သင့်ကို နားထောင်ပြီးနောက် ၎င်းတို့သည် တစ်စုံတစ်ခုကို ရယူနိုင်ပြီး အကျိုးကျေးဇူးတစ်ခုခု ရရှိနိုင်ရမည်။ ဤသို့ဖြင့် သင်၏ ဧဝံဂေလိဖြန့်ဝေခြင်းသည် ချောမွေ့နေပြီး အတားအဆီးများကို မကြုံတွေ့ရဘဲ အကျိုးဖြစ်ထွန်းသော ရလဒ်များကို ရရှိမည်ဖြစ်သည်။ လူအချို့သည် ဧဝံဂေလိတရားကို လက်ခံကောင်းလက်ခံမည် မဟုတ်သော်လည်း သင်သည် လူကောင်းတစ်ဦးဖြစ်သည်ကို မြင်တွေ့ပြီး သင့်ကို လိုလိုလားလား ပတ်သက်မည် ဖြစ်သည်။ ဧဝံဂေလိတရားကို ဟောပြောသောသူတို့သည် လူတို့နှင့် ရင်းရင်းနှီးနှီး ဆက်ဆံနိုင်ရမည်။ မိတ်ဆွေအသိုင်းအဝိုင်း ကျယ်ပြန့်စေခြင်းသည် လျှောက်လှမ်းရမည့် ကောင်းသောလမ်းစဉ်ဖြစ်သည်။ ထိုမျှမက အလွန်တရာ အ‌ရေးကြီးသော အရာတစ်ခု ရှိသေးသည်။ မည်သူ့ကို ဧဝံဂေလိဟောပြောသည်ဖြစ်စေ သင်သည် ဦးစွာ ကြိုတင်ပြင်ဆင်မှု အများကြီး ပြုလုပ်ရမည်။ မိမိကိုယ်ကို သမ္မာတရားဖြင့် ပြင်ဆင်ထားရမည်၊ စည်းမျဉ်းများကို ကျွမ်းကျင်ပိုင်နိုင်ရမည်၊ လူတို့ကို ထိုးထွင်းသိမြင်နိုင်စွမ်းရှိပြီး အမြော်အမြင်ရှိသော နည်းလမ်းများကို အသုံးပြုရမည်။ ဤကြိုတင်ပြင်ဆင်မှု ပြုလုပ်ခြင်းကို ထပ်တလဲလဲ လေ့ကျင့်ရမည်။ ပထမဦးစွာ စုံစမ်းစစ်ဆေးနေသော လူတို့နှင့် စကားစမြည်များ ပြောရာတွင် သင်သည် ထိုသူတို့၏ နောက်ခံအခြေအနေများ၊ သူတို့ မည်သည့်ဂိုဏ်းဂဏတွင် ပါဝင်သည်၊ သူတို့၏ အရင်းခံအယူအဆများမှာ မည်သည့်အရာ ဖြစ်သည်၊ သူတို့သည် သီးသန့်နေတတ်သူများလော၊ အုပ်လိုက်သင်းလိုက်နေတတ်သူများလော ဟူသည့်အကြောင်း၊ သူတို့၏ နားလည်သဘော‌ပေါက်နိုင်စွမ်းက မည်သို့ရှိသည်နှင့် သူတို့၏ စရိုက်လက္ခဏာက မည်သို့ဖြစ်သည်တို့ကို နားလည်ပြီး သဘောပေါက်ရမည်။ ဤသည်မှာ အဓိကသော့ချက် ဖြစ်၏။ ဧဝံဂေလိလက်ခံဖို့ အလားအလားရှိသူများအား ဘက်ပေါင်းစုံမှ အခိုင်အမာ နားလည်သဘောပေါက်သည်နှင့် တစ်ပြိုင်နက် သင်၏ ဧဝံဂေလိ‌ဟောပြောခြင်းသည် များစွာပို၍ ထိရောက်မည်ဖြစ်ပြီး ထိုသူတို့၏ အယူအဆများနှင့် ပြဿနာများအား ကုစားဖို့အတွက် သင့်တော်သောကုစားမှုကို မည်သို့ညွှန်ကြားရမည်ဖြစ်ကြောင်း သင်သိမည်ဖြစ်သည်။ အကယ်၍ ကောက်ကျစ်စဉ်းလဲသော လူများ၊ ဘုရားမဲ့ဝါဒီများ သို့မဟုတ် နတ်ဆိုးများထံမှ စုံစမ်းသွေးဆောင်မှုနှင့် ကြုံတွေ့ရပါက ထိုသူတို့ကို သင်သတိပြုမိနိုင်မည်၊ ထိုသူတို့ကို အရှိအတိုင်း ထိုးထွင်းသိမြင်နိုင်ပြီး အလျင်အမြန် စွန့်ခွာနိုင်မည် ဖြစ်သည်။ ဘုရားသခင်၏ နှုတ်ကပတ်တော်များကို ဖတ်ရှုခြင်းက အမျိုးမျိုးသော လူတို့ကို ထုတ်ဖော်နိုင်လေသည်။ စဉ်းလဲသော လူတို့နှင့် ဘုရားမဲ့ဝါဒီများသည် နှုတ်ကပတ်တော်များကို ကြားသောအခါ အော့ကြောလန်ကြမည်ဖြစ်ပြီး နတ်ဆိုးများသည် ဘုရားသခင်၏ နှုတ်ကပတ်တော်များအား နားထောင်ရသည်ကို မုန်းတီးကြသည်။ သမ္မာတရားကို ဆာငတ်သောသူတို့သာလျှင် စိတ်ဝင်စားကြမည်။ ထိုသူတို့သည် သမ္မာတရားကို ရှာဖွေပြီး မေးခွန်းများ မေးကြမည်။ ဤသည်မှာ ထိုသူတို့သည် ဧဝံဂေလိလက်ခံဖို့ အလားအလာရှိသူများဖြစ်ကြောင်း သင် အတည်ပြုနိုင်သည့်ပုံ ဖြစ်သည်။ ဤသည်ကို ငါတို့ အတည်ပြုသည်နှင့် တစ်ပြိုင်နက် ငါတို့သည် ထိုသူတို့ကို သမ္မာတရားနှင့်ပတ်သက်၍ စနစ်တကျ မိတ်သဟာယပြုချက်ထဲ၌ ဆွဲခေါ်နိုင်ပြီဖြစ်သည်။ သမ္မာတရားအ‌ပေါ် မိတ်သဟာယ ပြုရာတွင် ငါတို့သည် ဧဝံဂေလိလက်ခံဖို့ အလားအလာရှိသော ဤသူတို့၏ အရည်အချင်း၊ သမ္မာတရားကို သူတို့ မည်မျှကောင်းစွာ သဘောပေါက်နိုင်သည်နှင့် သူတို့၏ စရိုက်လက္ခဏာများ၏ အခြေအနေတို့ကို အပြည့်အဝ နားလည်သဘောပေါက်နိုင်သည်။ ဤသို့ဖြင့် ငါတို့သည် မည်သည့်လူတို့အပေါ် အာရုံစိုက်ရန်ကြိုးပမ်းရမည်နှင့် သမ္မာအပေါ် မည်သို့ မိတ်သဟာယပြုရမည်ကို သိမည်ဖြစ်သည်။ ငါတို့သည် ကြိုးပမ်းအားထုတ်မှု မည်မျှစိုက်ထုတ်သည်ဖြစ်စေ အချည်းနှီးဖြစ်မည် မဟုတ်ပေ။ ဧဝံဂေလိဖြန့်ဝေခြင်း လုပ်ငန်းစဉ်တွင် သင်သည် တစ်ဖက်လူ၏ အခြေအနေကို နားလည်သဘော‌ပေါက်ခြင်း မရှိသည့်အပြင် သင့်တော်သော ကုစားမှုကို မညွှန်ကြားပါက လူတို့ကို သိမ်းသွင်းရရှိရန် လွယ်ကူမည်မဟုတ်ချေ။ အကယ်၍ လူအနည်းငယ်ကို သိမ်းသွင်းရရှိမိပါကလည်း ယင်းမှာ ကံကောင်းထောက်မ၍သာ ဖြစ်မည်။ သမ္မာတရားကို နားလည်ပြီး အမှုအရာများ၏ အကြောင်းရင်းကို သိမြင်ဖြေရှင်းနိုင်သောသူတို့သည် ဧဝံဂေလိဖြန့်ဝေရာ၌ လွဲချော်မှုများ ပို၍နည်းနိုင်သည် သို့မဟုတ် ယင်းတို့ကို လုံးဝ ရှောင်လွှဲနိုင်သည်။ ၎င်းတို့သည် ဟောပြောသင့်သည့် လူတို့ကို ဟောပြောပြီး မဟောပြောသင့်သည့် လူတို့ကို မဟောပြောကြပေ။ မဟောပြောမီ တိကျမှန်ကန်သော အကဲဖြတ်ချက်ကို ပြုလုပ်ပြီး အချည်းနှီးအလုပ်ကို ရှောင်လွှဲကြသည်။ ဤသို့ဖြင့် ၎င်းတို့သည် ပို၍ကြီးမားသော ခရီးရောက်မှုနှင့် အလဟဿနည်းသော အားထုတ်ကြိုးပမ်းမှုဖြင့် မိမိတို့၏တာဝန်ကို လုပ်ဆောင်ကြကာ ကောင်းသောရလဒ်များကို ရရှိကြသည်။ ထို့ကြောင့် သင်သည် ဧဝံဂေလိတရားကို ထိထိရောက်ရောက် ဖြန့်ဝေလိုပါက သင့်ကိုယ်သင် သမ္မာတရားဖြင့် ပြင်ဆင်ထားပြီး ကြိုတင်ပြင်ဆင်မှု အလုံအလောက် ပြုလုပ်လော့။ အကယ်၍ သမ္မာကျမ်းစာကို ကောင်းစွာသိနားလည်သော ဘာသာရေးသမားနှင့် တွေ့ဆုံလျက် သင်ကိုယ်တိုင်က သမ္မာကျမ်းစာ မဖတ်ထားလျှင် မည်သို့ဖြစ်မည်နည်း။ သင် ဘာတတ်နိုင်မည်နည်း။ ထိုအချိန်တွင် ကျမ်းစာ၏ သမ္မာတရားဖြင့် မိမိကိုယ်ကိုပြင်ဆင်ရန် သင့်အတွက် အလွန်နောက်ကျသွားပြီ။ သို့ဖြစ်၍ သင်သည် ထိုသူတို့ကို သမ္မာကျမ်းစာနားလည်သော ဧဝံဂေလိဖြန့်ဝေသူတစ်ဦးနှင့် အလျင်အမြန် မိတ်ဆက်ပေးသင့်သည်။ ဤပုဂ္ဂိုလ်အား သမ္မာကျမ်းစာ နားလည်သည့် မည်သူ့ကိုမဆို လွှဲပြောင်းပေးလော့။ ဤသည်မှာ သမ္မာတရားစည်းမျဉ်းများနှင့် ကိုက်ညီသည်။ အကယ်၍ သင်သည် ထိုသူတို့ကို မဖြစ်ဖြစ်သည့်နည်းနှင့် ဧဝံဂေလိဟောပြောခြင်းဖြင့် မဆင်မခြင် ဟိတ်ဟန်ထုတ်ဖို့ ကြိုးစားပါက ဤပုဂ္ဂိုလ်သည် ဧဝံဂေလိတရားကို လက်ခံမည်မဟုတ်ပေ။ ဤရလဒ်သည် သင်၏ တာဝန်မဲ့ခြင်းအားဖြင့် ဖြစ်လိမ့်မည်။ ထို့အပြင် သင် အလုပ်မလုပ်နေသည့်အချိန်တွင် သမ္မာကျမ်းစာဆိုင်ရာ ဗဟုသုတအချို့ဖြင့် မိမိကိုယ်ကို ပြင်ဆင်ထားဖို့အတွက် အချိန်ယူရန်လိုသည်။ သမ္မာကျမ်းစာအကြောင်း မည်သည့်အရာမျှ မသိဘဲ ဧဝံဂေလိဖြန့်ဝေခြင်းသည် အလုပ်သိပ်ဖြစ်မည်မဟုတ်ပေ။ စုံစမ်းစစ်ဆေးသူများ မေးမြန်းသော မေးခွန်းများစွာသည် သမ္မာကျမ်းစာထဲမှ စကားလုံးများနှင့် သက်ဆိုင်သည်။ သင်သည် သမ္မာကျမ်းစာကို နားလည်လျှင် ဤမေးခွန်းများကို ဖြေရှင်းဖို့ ကျမ်းစာ၏ သမ္မာတရားကို အသုံးချနိုင်သည်။ ဧဝံဂေလိလက်ခံဖို့ အလားအလာရှိသူများသည် မည်သည့်အယူအဆများကို ဆုပ်ကိုင်ထားသည်ဖြစ်စေ သင်သည် ထိုသူတို့၏ အယူအဆများကို ဖြေရှင်းရန်အတွက် ဆီလျော်သော ကျမ်းပိုဒ်များနှင့် ဘုရားသခင်၏ နှုတ်ကပတ်တော်များကို ရှာတွေ့နိုင်သည်။ လိုလားသောရလဒ်ကို ဤနည်းဖြင့်သာ ရရှိနိုင်သည်။ ထို့ကြောင့် ဧဝံဂေလိဖြန့်ဝေခြင်းက သမ္မာကျမ်းစာဗဟုသုတအချို့ လိုအပ်သည်။ ဥပမာ ဓမ္မဟောင်းကျမ်းထဲမှ မည်သည့်ပရောဖက်ပြုချက်များနှင့် ဓမ္မသစ်ကျမ်းထဲမှ မည်သည့်ကျမ်းပိုဒ်များသည် ဘုရားသခင်၏ ပြန်ကြွလာခြင်းနှင့် နောက်ဆုံးသောကာလ ဘုရားသခင်၏ အမှုတော်ကို ထောက်ခံကြောင်း သင်သိထားသင့်သည်။ သင်သည် ဤနှုတ်ကပတ်တော်များကို ပို၍ဖတ်သင့်သည်၊ ပို၍ဆင်ခြင်သင့်သည်၊ ထို့ပြင် ယင်းတို့ကို သင့်စိတ်နှလုံးထဲ၌ သိမ်းထားသင့်သည်။ ထိုမျှမက သင်သည် ဘာသာရေးသမားများက ဤကျမ်းပိုဒ်များကို မည်သို့နားလည်ကြောင်း နားလည်ထားရမည်၊ ထိုသူတို့ကို ဤကျမ်းပိုဒ်များနှင့်ပတ်သက်၍ တိကျမှန်ကန်ပြီး စစ်မှန်သော နားလည်မှုရရှိအောင် လမ်းပြဖို့အတွက် မည်ကဲ့သို့ မိတ်သဟာယပြုရမည်နှင့် နောက်ဆုံးသောကာလ ဘုရားသခင်၏ အမှုတော်ကို နားလည်လာအောင် ထိုသူတို့အား လမ်းညွှန်ဖို့အတွက် ဤကျမ်းပိုဒ်များအား မည်ကဲ့သို့ ထည့်ဖြည့်ရမည်ကို ချင့်ချိန်တွေးဆရမည်။ ယင်းသည် သင်၏ ကြိုတင်ပြင်ဆင်ချက်ကို ပြုလုပ်နေခြင်း ဟုတ်သလော။ ဤသည်မှာ ကြိုတင်ပြင်ဆင်ချက် ပြုလုပ်ခြင်း၏ ဆိုလိုရင်းအတိအကျ ဖြစ်၏။ သင်သည် မှန်သောလမ်းခရီးအား စုံစမ်းစစ်ဆေးသော လူအမျိုးမျိုးတို့၏ လိုအပ်ချက်များကို နားလည်ရမည်ဖြစ်ပြီး အခြေအနေနှင့်အညီ ကြိုတင်ပြင်ဆင်မှု အချို့ကို ပြုလုပ်ရမည်။ သို့မှသာ သင်တတ်နိုင်သမျှကို လုပ်ဆောင်နိုင်ပြီး သင်၏ တာဝန်ဝတ္တရားများကို ဖြည့်ဆည်းနိုင်မည် ဖြစ်သည်။ ဤသည်မှာ သင်၏ တာဝန်ဝတ္တရားပင် ဖြစ်သည်။ လူအချို့က “ကျွန်ုပ်သည် ထိုအရာအားလုံးကို လုပ်စရာမလို။ သမ္မာကျမ်းစာကို အကြိမ်ရေအနည်းငယ် ဖတ်ရန်သာလိုသည်။ မည်သူ့ကို ဧဝံဂေလိဖြန့်ဝေသည် ဖြစ်စေ ကျွန်ုပ်သည် တူညီသော အရာများကို အမြဲပြောသည်။ ဧဝံဂေလိဟောပြောဖို့ ကျွန်ုပ်အသုံးပြုသည့် စကားလုံးများက ပုံသေဖြစ်ပြီး မပြောင်းလဲပေ။ ကျွန်ုပ်သည် ဤစကားလုံးများကို အသုံးပြုပြီး သူတို့သည် ယုံချင်ယုံနိုင်သကဲ့သို့ မယုံချင်လည်းရသည်။ မယုံကြည်သောလူတို့သည် ကောင်းချီးများ ရရှိမည်မဟုတ်။ ယင်းအတွက် ကျွန်ုပ်အ‌ပေါ် အပြစ်တင်၍မရပေ။ အမှန်မှာမူ ကျွန်ုပ်တာဝန်ကျေပြီ” ဟူ၍ ပြောကြလိမ့်မည်။ ၎င်းတို့သည် သူတို့၏တာဝန်ကို ကျေပွန်ခဲ့သလော။ စုံစမ်းစစ်ဆေးသော ပုဂ္ဂိုလ်၏ အခြေအနေမှာ အဘယ်နည်း။ သူ၏ အသက်အရွယ်၊ ပညာရည်အဆင့်၊ အိမ်ထောင်ရှိမရှိ၊ ဝါသနာများ၊ ပင်ကိုစရိုက်၊ လူ့သဘာဝ၊ မိသားစု အခြေအနေ စသည်တို့မှာ အဘယ်နည်း။ သင်သည် ဤအရာတစ်ခုကိုမျှ မသိသော်လည်း ထိုသူတို့အား သွား၍ ဟောပြောနေသေးသည်။ သင်သည် မည်သည့် ကြိုတင်ပြင်ဆင်မှုမျှ မပြုလုပ်သည့်အပြင် ကြိုးပမ်းအားထုတ်မှု လုံးဝမရှိပေ။ သို့ဆိုလျှင် သင်၏တာဝန်ကို ကျေပွန်ပြီဟု ကြွေးကြော်သေးသလော။ ဤသည်မှာ လူတို့ကို လှည့်စားခြင်းသာ မဟုတ်လော။ သင်၏တာဝန်ကို ဤကဲ့သို့ ပြုမူဆက်ဆံခြင်းသည် ပေါ့တီးပေါ့ပျက်နှင့် တာဝန်မဲ့သော သဘောထားကို ပြသသည်။ ယင်းသည် ဝတ်ကျေတမ်းကျေ သဘောထားဖြစ်၏။ သင်သည် ဧဝံဂေလိတရားကို ထိုကဲ့သို့သော သဘောထားဖြင့် ဟောပြောပြီး လူတစ်ဦးကိုမျှ မသိမ်းသွင်း မရရှိသောအခါ “သူမယုံကြည်လျှင် သူ၏ကံဆိုးမှုသာ ဖြစ်သည်။ ထို့အပြင် သူသည် ဝိညာဉ်ရေးရာ သိနားလည်မှု ကင်းမဲ့သောကြောင့် သူသည် ယုံကြည်ခဲ့လျှင်ပင် သမ္မာတရားကိုဖြစ်စေ၊ ကယ်တင်ခြင်းကိုဖြစ်စေ ရရှိနိုင်မည် မဟုတ်” ဟု ဆိုသည်။ ဤသည်မှာ တာဝန်မဲ့၏။ သင်သည် တာဝန်ဝတ္တရားကို ခေါင်းရှောင်နေခြင်း ဖြစ်သည်။ သင်သည် ကြိုတင်ပြင်ဆင်မှုကို ကောင်းစွာ မလုပ်ခဲ့သည်မှာ ပေါ်လွင်၏။ သင်သည် သင်၏ တာဝန်ဝတ္တရားကို မကျေပွန်ခဲ့ကြောင်း၊ သင်၏တာဝန်ကို သစ္စာရှိစွာ မလုပ်ဆောင်ခဲ့ကြောင်း သိသာထင်ရှား၏။ ထို့ပြင် သင်သည် သင်၏ တာဝန်ဝတ္တရားကို စကားလုံးများဖြင့် ခေါင်းရှောင်ရန် ကြိုးစားလျက် အကြောင်းပြချက်မျိုးစုံ ပေးခြင်းဖြင့် ဆင်ခြေဆင်လက်များ ဖန်တီးသေးသည်။ ဤသည်မှာ မည်သို့သော အပြုအမူမျိုး ဖြစ်သနည်း။ ယင်းကို လှည့်စားခြင်းဟု ခေါ်သည်။ သင်၏ တာဝန်ဝတ္တရားကို ခေါင်းရှောင်ဖို့အတွက် သင်သည် လူတို့နှင့်ပတ်သက်၍ အကဲဖြတ်ချက်များ ပြုလုပ်ပြီး ကောက်ချက်များချကာ တာဝန်မဲ့သော ပေါက်ကရစကားကို ပြောသည်။ ဤသည်ကို မာနထောင်လွှားခြင်းနှင့် မိမိကိုယ်ကို မှန်ကန်သည်ဟု ယူမှတ်ခြင်း၊ တိတ်တဆိတ်ဒုက္ခပေးခြင်းနှင့် ရက်စက်ခြင်းဟု ခေါ်သည်။ ယင်းကို လိမ်လည်လှည့်ဖြားခြင်း ဟုလည်း ခေါ်သည်။ ယင်းသည် ဘုရားသခင်ကို လှည့်စားရန် ကြိုးစားခြင်းပင် ဖြစ်၏။

ဘုရားသခင်သည် သင့်အား ဧဝံဂေလိဖြန့်ဝေခြင်း တာဝန်ကို ပေးအပ်ထားလျှင် သင်သည် ဘုရားသခင်၏ တာဝန်ပေးစေခိုင်းချက်ကို လေးစားစွာနှင့် ကျိုးနွံစွာ လက်ခံသင့်သည်။ မှန်သောလမ်းခရီးကို စုံစမ်းစစ်ဆေးနေသော လူတိုင်းကို ချစ်ခြင်းမေတ္တာနှင့် စိတ်ရှည်မှုဖြင့် ဆက်ဆံရန် အားထုတ်သင့်ကာ အခက်အခဲနှင့် ဒုက္ခပြဿနာကို သည်းခံနိုင်ရမည်။ ဧဝံဂေလိဝေငှခြင်းအတွက် တာဝန်ယူရာတွင် လုံ့လဝီရိယထားလော့။ သင်သည် သမ္မာတရားနှင့်ပတ်သက်၍ ရှင်းလင်းသော မိတ်သဟာယပြုချက်ကို ပေးလော့၊ သို့ပြုလျှင် ထိုအကြောင်းကို ဘုရားသခင်ထံ ဖြစ်ကြောင်းကုန်စင် ရှင်းပြနိုင်မည်ဖြစ်သည်။ ဤသည်မှာ လူတစ်ဦးသည် မိမိ၏တာဝန်ကို ထမ်းဆောင်သင့်သည့် သဘောထား ဖြစ်လေသည်။ အကယ်၍ မှန်သောလမ်းခရီးကို စုံစမ်းစစ်ဆေးသော တစ်စုံတစ်ဦးသည် သင့်ထံမှ သမ္မာတရားကို ရှာဖွေပြီး သင်သည် ထိုသူကို ဘေးဖယ်ထားပါက၊ ထိုသူအား သမ္မာတရားအကြောင်း လေးလေးနက်နက် မိတ်သဟာယ မပြုနိုင်သည့်အပြင် သူ၏ ပြဿနာကို မဖြေရှင်းဘဲ ဆင်ခြေများပင် ပေးလျက် “ကျွန်ုပ်သည် ယခု စိတ်မပါပေ။ သူသည် မည်သူဖြစ်စေ၊ သမ္မာတရားကို သို့မဟုတ် ဘုရားသခင်၏ ပေါ်ထွန်းခြင်းနှင့် အမှုတော်ကို မည်မျှလောက် ဆာငတ်သည်ဖြစ်စေ၊ ယင်းသည် ကျွန်ုပ်၏အလုပ် မဟုတ်ပေ။ သူ့အနေဖြင့် ယုံကြည်နိုင်ခြင်း ရှိမရှိသည် ကျွန်ုပ်အ‌ပေါ် မမူတည်ပေ။ သန့်ရှင်းသော ဝိညာဉ်တော် အလုပ်မလုပ်လျှင် ကျွန်ုပ်သည် ကြိုတင်ပြင်ဆင်မှု မည်မျှပြုလုပ်သည်ဖြစ်စေ၊ ယင်းက အကျိုးရှိမည် မဟုတ်ချေ။ သို့ဖြစ်၍ ကျွန်ုပ်သည် ထိုအားထုတ်မှုကို ပြုလုပ်မည်မဟုတ်။ မည်သို့ဆိုစေ ကျွန်ုပ်နားလည်သည့် သမ္မာတရားမှန်သမျှကို ပြောပြပြီးပြီ။ မှန်သောလမ်းခရီးကို သူလက်ခံနိုင်ခြင်းရှိမရှိသည် ဘုရားသခင်၏ ကိစ္စဖြစ်၏။ ယင်းသည် ကျွန်ုပ်နှင့်မဆိုင်” ဟု ဆိုပါက ဤသည်မှာ မည်သည့်သဘောထား ဖြစ်သနည်း။ ယင်းသည် တာဝန်မဲ့သောသဘော၊ ခက်ထန်သောသဘောပင် ဖြစ်၏။ ဤပုံစံဖြင့် ဧဝံဂေလိဖြန့်ဝေသောသူ များစွာရှိသည် မဟုတ်လော။ ထိုကဲ့သို့ ဧဝံဂေလိဖြန့်ဝေခြင်းက လုံလောက်သော အဆင့်အတန်းကို ပြည့်မီနိုင်သလော။ ယင်းသည် ဘုရားသခင်ကို ချီးမြှောက်ပြီး သူ့အား သက်သေခံနိုင်သလော။ နည်းနည်းမျှပင် မဖြစ်နိုင်ပေ။ ထိုကဲ့သို့ ဧဝံဂေလိဖြန့်ဝေခြင်းသည် အနည်းငယ်မျှ အစေခံခြင်းသာ ဖြစ်သည်။ ယင်းသည် တာဝန်ထမ်းဆောင်ခြင်းနှင့် လုံးဝမနီးစပ်ပေ။ သို့ပြုလျှင် လူတစ်ဦးသည် ဧဝံဂေလိတရားကို ကျေနပ်ဖွယ်ရာပုံစံဖြင့် မည်ကဲ့သို့ ဖြန့်ဝေနိုင်သနည်း။ မှန်သောလမ်းခရီးကို စုံစမ်းစစ်ဆေးသောသူသည် မည်သူဖြစ်စေ ဦးစွာ ကြိုတင်ပြင်ဆင်မှု ပြုလုပ်ပြီး မိမိကိုယ်ကို သမ္မာတရားဖြင့် ပြင်ဆင်ထားရမည်၊ ပြီးလျှင် သင်၏ ဤတာဝန်ကို ကောင်းစွာ ထမ်းဆောင်ဖို့အတွက် ချစ်ခြင်းမေတ္တာ၊ စိတ်ရှည်ခြင်း၊ သည်းခံခြင်းနှင့် တာဝန်သိစိတ်ကို အမှီပြုရမည်။ စိတ်ရင်းအတိုင်းဖြစ်ပြီး သင်တတ်နိုင်သမျှနှင့် လုပ်သင့်သမျှကို လုပ်ဆောင်လော့။ ထိုကဲ့သို့ ဧဝံဂေလိဖြန့်ဝေခြင်းသည် ကျေနပ်ဖွယ်ရာ ဖြစ်၏။ အကယ်၍ အခြေအနေများသည် သင့်အား ဧဝံဂေလိဖြန့်ဝေဖို့ အခွင့်မပေးပါက၊ သို့မဟုတ် စုံစမ်းစစ်ဆေးသောသူသည် နားထောင်ဖို့ ငြင်းဆန်ပြီး ထွက်သွားပါက ဤသည်မှာ သင်၏ အပြစ်မဟုတ်ပေ။ လုပ်သင့်သည့်အရာကို သင်လုပ်ခဲ့ပြီဖြစ်ပြီး သင်သည် လိပ်ပြာလုံပေလိမ့်မည်။ ဤသည်မှာ သင်သည် မိမိ၏ တာဝန်ဝတ္တရားကို ကျေပွန်ပြီဟု ဆိုလိုခြင်းဖြစ်သည်။ လူအချို့သည် ဧဝံဂေလိဖြန့်ဝေရန်အတွက် စည်းမျဉ်းများနှင့် ကိုက်ညီကောင်း ကိုက်ညီမည်ဖြစ်သော်လည်း အချိန်သင့်အခါသင့် ဖြစ်ကောင်းဖြစ်မည် မဟုတ်ပေ။ ယင်းမှာ ဘုရားသခင်၏ အချိန်မတန်သေးခြင်း ဖြစ်သည်။ ဤအခြေအနေတွင် ဧဝံဂေလိ ဖြန့်ဝေခြင်းအလုပ်ကို လောလောဆယ် ရွှေ့ဆိုင်းရမည်။ ထိုအလုပ်ကို ရွှေ့ဆိုင်းခြင်းသည် ထိုပုဂ္ဂိုလ်အား သင် ဧဝံဂေလိ မဝေငှဟု ဆိုလိုသ‌လော။ ယင်းသည် သင် ဧဝံဂေလိမဝေငှဟု မဆိုလို၊ ထိုသို့ပြုရန် သင့်လျော်သောအချိန်ကို သင် စောင့်ဆိုင်းနေသည်ဟု ဆိုလိုသည်။ အခြားမည်သည့်လူတို့ကို မဟောပြောဘဲ နေသင့်သနည်း။ ဥပမာ လူတစ်ဦးသည် အခြားသော ဘာသာစကားဖြင့် တစ်ရက်နှစ်ရက်မဟုတ်၊ သို့မဟုတ် တစ်နှစ်နှစ်နှစ်မဟုတ်၊ အချိန်ကြာမြင့်စွာ ပြောဆိုပြီး ဤပုံစံအတိုင်း မည်သည့်အချိန်၊ မည်သည့်နေရာ၌မဆို ပြောနေနိုင်ပါက ဤလူသည် ဝိညာဉ်ဆိုးဖြစ်ကာ ထိုသူကို ဧဝံဂေလိဝေငှ၍ မရနိုင်ပေ။ အပြင်ပန်းတွင် လူကောင်းဖြစ်ပုံ‌ပေါက်သော လူများလည်း ရှိတတ်သည်။ သို့သော် စုံစမ်းမေးမြန်းပြီး ပို၍ နားလည်လာရာတွင် ထိုသူတို့သည် လူများစွာနှင့် အိမ်ထောင်ရေး ဖောက်ပြန်ထားကြောင်း သင်တွေ့ရှိရမည်။ ဤကဲ့သို့သော လူတို့ကို ဧဝံဂေလိဝေငှပါက ပြဿနာများစွာ ဖြစ်ပွားစေမည်။ ထိုသူတို့သည် ဘုရားသခင် ရွေးကောက်ထားသော လူတို့အတွက် အနှောင့်အယှက်ဖြစ်စေမည့် အလားအလာရှိသောကြောင့် ထိုသူတို့ကို ဧဝံဂေလိ မဟောပြောရပေ။ သမ္မာတရားကို လက်ခံဖို့အတွက် အားထုတ်ကြိုးပမ်းမှုများစွာ လိုအပ်သော ဘာသာရေး သင်းအုပ်ဆရာအချို့လည်း ရှိလေသည်။ ထိုသူတို့သည် သမ္မာတရားကို လက်ခံဖို့ စိတ်ဆန္ဒရှိလင့်ကစား သူတို့၌ အခြေအနေများ ရှိသေးသည်။ ထိုသူတို့သည် ခေါင်းဆောင်များနှင့် အမှုဆောင်များအဖြစ် အစေခံရမှသာ ကျေနပ်အားရကြသည်။ ဤကဲ့သို့သော လူအများစုမှာ အန္တိခရစ်များ ဖြစ်ကြသည်။ စည်းမျဉ်းများအရ ထိုသူတို့ကို ဧဝံဂေလိမဖြန့်ဝေသင့်ပေ။ ထိုသူတို့သည် ဧဝံဂေလိဖြန့်ဝေခြင်းတွင် အစေခံလိုစိတ်ရှိပြီး အခြားလူများစွာကို ခေါ်ဆောင်လာနိုင်မှသာ ထိုသို့သောလူတို့ကို ဧဝံဂေလိဖြန့်ဝေရန် ခွင့်ပြုထားသည်။ လူတစ်ဦး၏ လူ့သဘာဝမှာ အလွန်ဆိုးယုတ်ပြီး ထိုသူကို သူ၏ပုံပန်းတစ်ခုတည်းနှင့်ပင် ဆိုးယုတ်သောလူဖြစ်သည်ဟု သင်ပြောနိုင်လျှင် ဤကဲ့သို့သော လူစားမျိုးသည် သမ္မာတရားကို မည်သည့်အခါမျှ လက်ခံမည် မဟုတ်သည့်အပြင် မည်သည့်အခါမျှ နောင်တရမည် မဟုတ်ပေ။ ဤကဲ့သို့သော လူတစ်ဦးသည် အသင်းတော်ထဲသို့ ဝင်ရောက်ခဲ့လျှင်ပင် ထိုသူသည် မောင်းထုတ်ခြင်းခံရမည် ဖြစ်သောကြောင့် ထိုသူကို မည်သည့်အခါမျှ ဧဝံဂေလိမဖြန့်ဝေသင့်ပေ။ ဤကဲ့သို့သော လူတစ်ဦးကို ဟောပြောခြင်းသည် အသင်းတော်ထဲသို့ စာတန်နှင့် နတ်ဆိုးတစ်ဦးကို ခေါ်ဆောင်လာသည့်သဘော သက်ရောက်သည်။ အသက်မပြည့်သူအချို့သည် ဘုရားသခင်အား ယုံကြည်ဖို့ဆန္ဒရှိသောအခါ အခြားအခြေအနေ ပေါ်ပေါက်လာတတ်သည်။ သို့သော် ဒီမိုကရေစီကျင့်သုံးသော နိုင်ငံအချို့တွင် အသက်မပြည့်သူများသည် အသင်းတော်အသက်တာထဲ၌ ပါဝင်လိုပြီး သူတို့၏ တာဝန်များကို ထမ်းဆောင်လိုပါက သူတို့၏ အုပ်ထိန်းသူများထံမှ သ‌ဘောတူညီမှု ရယူဖို့လိုသည်။ ဤသတ်မှတ်ချက်ကို လျစ်လျူမရှုလေနှင့်။ ယင်းက ကျိုးကြောင်းဆီလျော်သော ဖြေရှင်းချက်နှင့် ဉာဏ်ပညာလိုအပ်သည်။ တရုတ်ပြည်တွင် မိဘတစ်ဦးဦးက ထိုသို့သော အသက်မပြည့်သူတစ်ဦးအား ဘုရားသခင်ကို ယုံကြည်ဖို့ ဦးဆောင်လမ်းပြသရွေ့ လုံးဝ ပြဿနာမရှိပေ။ အကယ်၍ အသက်မပြည့်သေးသူ မဟုတ်တော့သော လူငယ်လေးတစ်ဦးသည် သမ္မာတရားကို သဘော‌ပေါက်နိုင်ပြီး ဘုရားသခင်ကို ယုံကြည်လိုသော်လည်း သူ၏မိဘများက သူ့ကို ကန့်ကွက်ချုပ်ချယ်ပါက ထိုလူငယ်လေးသည် သူ၏မိသားစုကို ထားရစ်ကာ မိဘများ၏ ကန့်သတ်ချက်များနှင့် ဟန့်တားမှုများမှ လွတ်လွတ်ကျွတ်ကျွတ်ဖြင့် ဘုရားသခင်ကို ယုံကြည်ပြီး ဘုရားသခင်နောက်လိုက်ဖို့အတွက် အသင်းတော်သို့ လာနိုင်သည်။ ဤသည်မှာ လုံးဝ သင့်လျော်ပေသည်။ ဤသည်မှာ ဘုရားသခင်ကို ယုံကြည်လာစဉ်က ပေတရုအခြေအနေနှင့် တူညီ၏။ အဆုံးသတ်အနေဖြင့် မည်သည့်အခြေအနေ ရှိသည်ဖြစ်စေ အကယ်ဖြစ်သော အခြေအနေက ခွင့်ပြုသရွေ့ ဧဝံဂေလိဖြန့်ဝေရန် အခွင့်ရှိပြီး ယင်းသည် ဥပဒေကို မချိုးဖောက်ပေ။ ဤကိစ္စကို သမ္မာတရားစည်းမျဉ်းများနှင့် ဉာဏ်ပညာ၏ လမ်းညွှန်ချက်များအတိုင်း ဖြေရှင်းဖို့လိုသည်။

လူတစ်ဦးသည် ဧဝံဂေလိဖြန့်ဝေသောအခါ သူ၏တာဝန်ကို ကျေနပ်ဖွယ်ရာပုံစံဖြင့် မည်ကဲ့သို့ ဖြည့်ဆည်းနိုင်သနည်း။ ပထမအနေဖြင့် သူသည် ဧဝံဂေလိဖြန့်ဝေခြင်းနှင့် ပတ်သက်သည့် သမ္မာတရားကို သဘော‌ပေါက်ပြီး နားလည်နိုင်ရမည်။ သူသည် သမ္မာတရားကို နားလည်သောအခါမှသာ တိကျမှန်ကန်သော ရှုထောင့်များကို ပိုင်ဆိုင်နိုင်ပြီး မှားယွင်းသော သို့မဟုတ် အဓိပ္ပာယ်မဲ့သော ရှုထောင့်များအား မည်သို့ဖြေရှင်းရမည်ကို သိနိုင်သည့်အပြင် အရေးကိစ္စများနှင့် ပြဿနာများအား သမ္မာတရားစည်းမျဉ်းများနှင့်အညီ မည်ကဲ့သို့ ကိုင်တွယ်ပြီး ဖြေရှင်းရမည်ကို သိနိုင်မည်ဖြစ်သည်။ ထိုအခါ သူသည် မမှန်ကန်သော အလေ့အထအမျိုးမျိုးနှင့် သမ္မာတရားစည်းမျဉ်းများကို ချိုးဖောက်သည့် အန္တိခရစ်များ၏ အလေ့အထများကို ထိုးထွင်းသိမြင်နိုင်မည် ဖြစ်သည်။ ထိုသို့ဖြစ်ပါက သူသည် သူ၏ ဧဝံဂေလိဖြန့်ဝေခြင်းတာဝန်ကို ဖြည့်ဆည်းဖို့အတွက် မည်သည့်သမ္မာတရားစည်းမျဉ်းများအား ကျွမ်းကျင်ပိုင်နိုင်သင့်ကြောင်း ပင်ကိုအားဖြင့် နားလည်လိမ့်မည်။ ဤတာဝန်ကို ဖြည့်ဆည်းရန်အတွက် ပထမဦးဆုံး နားလည်ဖို့ အရေးကြီးဆုံးမှာ မည်သည့်သမ္မာတရား ဖြစ်သနည်း။ ဘုရားသခင့်အမှုတော်၏ သတင်းစကားကို ဖြန့်ဝေခြင်းသည် ဘုရားသခင်ရွေးကောက်ထားသော လူတစ်ဦးစီတိုင်း၏ တာဝန်နှင့် ဝတ္တရားဖြစ်သည်။ ယင်းသည် ဘုရားသခင်က အားလုံးကို ပေးအပ်ထားသည့် တာဝန်ပေးစေခိုင်းချက်ပင် ဖြစ်သည်။ ဤသည်မှာ ဤတာဝန်၏ အရင်းအမြစ်ဖြစ်သည်။ လူအချို့က “ကျွန်ုပ်သည် ဧဝံဂေလိအဖွဲ့၌ မပါဝင်သဖြင့် ကျွန်ုပ်၌ ဤတာဝန်နှင့် ဝတ္တရားရှိသလော” ဟု ဆိုကြသည်။ ၎င်းတို့အားလုံး၌ ဤတာဝန်နှင့် ဝတ္တရားရှိ၏။ တာဝန်၏ ဤကဏ္ဍနှင့်စပ်လျဉ်းသော သမ္မာတရားသည် လူတိုင်းအတွက် အသုံးဝင်သည်။ သင်တို့သည် အသင်းတော်ထဲရှိ ဝန်ထမ်းအမျိုးမျိုးတို့အတွက် တာဝန်များ ခွဲဝေသတ်မှတ်ချက်နှင့် ပတ်သက်သည့် ဖြစ်ရပ်အချို့ကို သတိထားမိခြင်းရှိမရှိ ငါမသိပေ။ လူအချို့သည် တစ်ချိန်က ခေါင်းဆောင်များ ဖြစ်ခဲ့သော်လည်း လက်တွေ့ကျသော အလုပ်ကို မလုပ်နိုင်သောကြောင့် ၎င်းတို့ကို လူစားထိုးခဲ့သည်။ ၎င်းတို့သည် မည်သည့်စွမ်းရည်များ သို့မဟုတ် မည်သည့်ကျွမ်းကျင်မှုကိုမျှ မပိုင်ဆိုင်သောကြောင့် လူစားထိုးခံရပြီးနောက် အထူးတာဝန်များကို မထမ်းဆောင်နိုင်ကြတော့ပေ။ ထို့ကြောင့် နောက်ဆုံးတွင် ၎င်းတို့ကို ဧဝံဂေလိဖြန့်ဝေရန်၊ သို့မဟုတ် လူသစ်ရောက်လာသူများကို ရေလောင်းပေးရန်၊ သို့မဟုတ် သာမန်တာဝန်အချို့ကို ထမ်းဆောင်ရန်အတွက် ဧဝံဂေလိအဖွဲ့များ၌ တာဝန်ပေးခဲ့သည်။ အကယ်၍ ၎င်းတို့သည် အသင်းတော်ထဲ၌ အခြားတာဝန်တစ်ခုခုကို ဖြည့်ဆည်းဖို့အတွက် အလားတူပျက်ကွက်ပါက ၎င်းတို့၌ ဘာဖြစ်သင့်သနည်း။ ထိုကဲ့သို့သော လူတို့သည် အမှိုက်သရိုက်ဖြစ်ပြီး ဖယ်ရှားခံရသင့်သည်။ ထို့ကြောင့် သင်သည် အသင်းတော်ခေါင်းဆောင်တစ်ဦးအနေဖြင့် ညံ့ဖျင်းမှုကြောင့် အလုပ်ဖြုတ်ခံရပြီး သင်၌ မည်သည့် အထူးပါရမီများ သို့မဟုတ် ကျွမ်းကျင်မှုများ မရှိပါက သင်သည် ဧဝံဂေလိဖြန့်ဝေဖို့ ပြင်ဆင်ထားရမည်။ အကယ်၍ သင်သည် ဧဝံဂေလိဖြန့်ဝေနိုင်ပြီး ဧဝံဂေလိအဖွဲ့သားတစ်ဦးအဖြစ် သင်၏တာဝန်ကို လုပ်ဆောင်နိုင်ပါက တာဝန်များကို ကျေနပ်ဖွယ်ရာ ထမ်းဆောင်ခြင်းနှင့် ပတ်သက်သည့် သမ္မာတရားသည် သင်နှင့် ဆီလျော်သည်။ အကယ်၍ သင်သည် သင်၏ ဧဝံဂေလိဖြန့်ဝေခြင်း တာဝန်ကို ဖြည့်ဆည်းရန် ပျက်ကွက်ပါက တာဝန်များကို ကျေနပ်ဖွယ်ရာ ထမ်းဆောင်ခြင်းနှင့် ပတ်သက်သည့် သမ္မာတရားသည် သင်နှင့် ဆီလျော်မှုမရှိသည့်အပြင်၊ ဘုရားသခင်၏ အိမ်တော်ထဲတွင် ဘုရားသခင်၏အမှုတော် အချိန်ကာလအတွင်း တာဝန်ထမ်းဆောင်ခြင်းအလုပ်သည် သင်နှင့် သက်ဆိုင်မှုမရှိချေ။ သင်သည် စိတ်နှလုံးထဲ၌ ဤအရာက ညွှန်းဆိုသည့်အရာအားလုံးကို ရှင်းလင်းစွာ သိသင့်သည်။ သင်သည် မည်သည့်တာဝန်ကိုမျှ မထမ်းဆောင်လျှင် သင်၌ ဘုရားသခင်၏ အမှုတော်နှင့် အဘယ်ဆက်နွှယ်မှု ရှိသနည်း။ ထို့ကြောင့် လူတစ်ဦးထမ်းဆောင်သည့် တာဝန်၏ အမျိုးအစားသည် မည်သည့်အရာဖြစ်စေ၊ သူသည် အဆုံးတိုင်အောင် သည်းခံကြိုးပမ်းပြီး သူ၏တာဝန်ကို ကောင်းစွာ ထမ်းဆောင်နိုင်ပါက ယင်းသည် ပင်ကိုအားဖြင့် အကောင်းဆုံးပင် ဖြစ်သည်။ လူအချို့က “ကျွန်ုပ်သည် ဧဝံဂေလိမဖြန့်ဝေလိုပေ။ အဘယ့်ကြောင့်ဆိုသော် ဤအရာက ကျွန်ုပ်ကို လူစိမ်းများနှင့် အမြဲတမ်း ဆက်ဆံစေသည်။ မကောင်းသောအရာအမျိုးမျိုးကို ပြုလုပ်နိုင်စွမ်းရှိသည့် လူဆိုးမျိုးစုံရှိတတ်သည်။ အထူးသဖြင့် ဘာသာရေးသမားများသည် နောက်ဆုံးသောကာလ ဘုရားသခင်၏ ဧဝံဂေလိတရားအား ဖြန့်ဝေသောသူတို့ကို ရန်သူများကဲ့သို့ သဘောထားကြပြီး ၎င်းတို့ကို စာတန်၏ အစိုးရထံ အပ်နှံခြင်းငှာ အတော်ပင် စွမ်းဆောင်နိုင်ကြသည်။ ထိုသူတို့သည် မယုံကြည်သူများထက်ပင် ပို၍ဆိုးသည်။ ဤနာကျင်မှုကို ကျွန်ုပ်မခံနိုင်ချေ။ ထိုသူတို့သည် ကျွန်ုပ်ကို သေသည်အထိ ရိုက်နှက်ချင် ရိုက်နှက်ကြမည်၊ ကိုယ်လက်အင်္ဂါများ ချို့တဲ့သွားအောင် လုပ်ချင်လုပ်ကြမည်၊ သို့မဟုတ် အဆင်းနီသော နဂါးကြီးထံ အပ်နှံချင် အပ်နှံကြမည်။ ယင်းက ကျွန်ုပ်ကို အဆုံးသတ်သွားစေမည်” ဟု ဆိုကြသည်။ သင်သည် အခက်အခဲကို မခံရပ်နိုင်ဘဲ သင်၏ ဝိညာဉ်ရင့်ကျက်မှုက အလွန်သေးငယ်သဖြင့် သင်သည် သင်၏လက်ရှိ အလုပ်တာဝန်ကို ကောင်းစွာ လုပ်ဆောင်သင့်သည်။ ယင်းသည် အမြော်အမြင်ရှိသော ရွေးချယ်မှု ဖြစ်မည်။ သင်သည် တာဝန်အမျိုးမျိုးကိုလည်းကောင်း၊ ဧဝံဂေလိ ဖြန့်ဝေခြင်းကိုလည်းကောင်း ထမ်းဆောင်နိုင်လျှင် အကောင်းဆုံးဖြစ်မည်မှာ အမှန်ပင်။ ဧဝံဂေလိဖြန့်ဝေခြင်းသည် ဧဝံဂေလိအဖွဲ့ဝင်များ၏ တာဝန်သာမက လူတိုင်း၏တာဝန် ဖြစ်လေသည်။ လူတိုင်းသည် ဘုရားသခင်၏ အမှုသစ်နှင့်ဆိုင်သော သတင်းကောင်းနှင့် ဝမ်း‌မြောက်ဖွယ် သတင်းစကားကို ဘုရားသခင်ထံမှ ကြားရပြီးဖြစ်သောကြောင့် ပို၍များသော လူတို့အနေဖြင့် သတင်းကောင်းကို ကြားရလျက် ဘုရားသခင်၏ အိမ်‌တော်သို့ ရောက်လာပြီး ဘုရားသခင်၏ ကယ်တင်ခြင်းကို လက်ခံရန်အတွက် သူ၏ရှေ့မှောက်သို့ ရောက်လာဖို့အလို့ငှာ ဤဧဝံဂေလိတရားကို ကြေညာရန် လူတိုင်း၌ တာဝန်နှင့် ဝတ္တရားရှိလေသည်။ ဤအရာသည် ဘုရားသခင်၏အလုပ်ကို တတ်နိုင်သမျှ ဆောလျင်စွာ အဆုံးသို့ရောက်ရှိရန် အခွင့်ပေးမည် ဖြစ်သည်။ ထိုကဲ့သို့သောအရာမှာ ဘုရားသခင်၏ တာဝန်ပေးစေခိုင်းချက် ဖြစ်၏၊ ထိုသို့သောအရာမှာ သူ၏ အလိုတော်ဖြစ်၏။

ဧဝံဂေလိဖြန့်ဝေသူအချို့သည် ဧဝံဂေလိတရားကို တစ်နေကုန် မအားမလပ်အောင် ဟောပြောကြလင့်ကစား နှစ်အတန်ကြာ ဟောပြောပြီးနောက် လူတစ်ဦးကိုမျှ သိမ်းသွင်းရရှိနိုင်ခြင်း မရှိကြပေ။ မည်သည့်အရာ ဖြစ်ပျက်သွားသနည်း။ ၎င်းတို့သည် အလုပ်ရှုပ်နေပုံ‌ပေါက်ပြီး ၎င်းတို့၏တာဝန်ကို အလွန်ပင် ဂရုတစိုက်ဖြင့် လုပ်ဆောင်ကြဟန်တူသည်။ သို့ဖြစ်လျှင် အဘယ့်ကြောင့် မည်သူတစ်ဦးတစ်ယောက်ကိုမျှ သိမ်းသွင်းရရှိခြင်း မရှိသနည်း။ အမှန်တွင် ဧဝံဂေလိဖြန့်ဝေခြင်း တာဝန်အတွက် နားလည်ထားရမည့် သမ္မာတရားသည် အခြားတာဝန်များအတွက် နားလည်ထားရမည့် သမ္မာတရားများနှင့် တူညီသည်။ အကယ်၍ လူတစ်ဦးသည် မည်သူတစ်ဦးတစ်ယောက်ကိုမျှ မရရှိဘဲ နှစ်အတန်ကြာ ဧဝံဂေလိဟောပြောနေပါက ဤသူ၌ ပြဿနာများရှိနေပြီဟု ဆိုလိုခြင်းဖြစ်သည်။ ဤပြဿနာများမှာ မည်သည့်အရာများ ဖြစ်သနည်း။ အဓိကပြဿနာမှာ ၎င်းတို့သည် ဧဝံဂေလိ ဖြန့်ဝေရာ၌ ရူပါရုံနှင့်ပတ်သက်သော သမ္မာတရားအပေါ် ရှင်းလင်းစွာ မိတ်သဟာယမပြုခြင်း ဖြစ်သည်။ ၎င်းတို့၏ မိတ်သဟာယပြုချက်က အဘယ့်ကြောင့် မရှင်းလင်းသနည်း။ ဤအတွက် ၎င်းတို့၏ အရည်အသွေးသည် အလွန် ညံ့ဖျင်းသောကြောင့် ဖြစ်လျှင်ဖြစ်၊ သို့မဟုတ်ပါက ၎င်းတို့သည် တစ်နေကုန် အလုပ်ရှုပ်လွန်းသဖြင့် ဘုရားသခင်၏ နှုတ်ကပတ်တော်များကို ဖတ်ရှုရန် သို့မဟုတ် သမ္မာတရားအပေါ် ဆင်ခြင်တွေးဆရန်အတွက် အချိန်မရှိဘဲ မည်သည့်သမ္မာတရားကိုမျှ နားမလည်သည့်အပြင် မည်သည့် အယူအဆ၊ မည်သည့် မိစ္ဆာဒိဋ္ဌိအယူဝါဒ သို့မဟုတ် မည်သည့် မှားယွင်းပြီး အဓိပ္ပာယ်မဲ့ခြင်းကိုမျှ မဖြေရှင်းနိုင်သောကြောင့် ဖြစ်နိုင်သည်။ အကယ်၍ ဤအကြောင်းရင်းနှစ်ခုလုံးက ထိုသူအတွက် မှန်ကန်နေလျှင် ၎င်းသည် ဧဝံဂေလိဖြန့်ဝေရမည့် သူ၏တာဝန်ကို ဖြည့်ဆည်းနိုင်မည်လော။ သူ့အနေဖြင့် လူတို့ကို သိမ်းသွင်းရရှိရန် အလွန်ခက်ခဲလိမ့်မည်ဖြစ်သည်ကို ငါစိုးရွံ့သည်။ သူသည် ဧဝံဂေလိဖြန့်ဝေခြင်းကို နှစ်‌ပေါင်းမည်မျှ လုပ်ကိုင်သည်ဖြစ်စေ သိသာထင်ရှားသော ရလဒ်ကို တွေ့ရမည် မဟုတ်ပေ။ သင်သည် ဧဝံဂေလိဖြန့်ဝေရန်အတွက် ရူပါရုံနှင့် သက်ဆိုင်သော သမ္မာတရားကို ဦးစွာနားလည်ရမည်။ လူတို့က မည်သည့်မေးခွန်းများကို မေးသည်ဖြစ်စေ သင့်အနေဖြင့် သမ္မာတရားကို ရှင်းလင်းလာအောင် မိတ်သဟာယပြုသရွေ့ ထိုသူတို့၏ မေးခွန်းများကို ဖြေနိုင်သည်။ သင်သည် ရူပါရုံနှင့်ဆိုင်သော သမ္မာတရားကို နားမလည်သည့်အပြင် မည်သို့ပင် မိတ်သဟာယပြုသည်ဖြစ်စေ ရှင်းလင်းအောင် မပြောဆိုနိုင်ပါက ဧဝံဂေလိတရားကို မည်ကဲ့သို့ဖြန့်ဝေစေကာမူ ရလဒ်များကို ရမည်မဟုတ်ပေ။ သင်သည် သမ္မာတရားကို နားမလည်ပါက သမ္မာတရားကိုရှာဖွေခြင်းနှင့် သမ္မာတရားအား မိတ်သဟာယပြုခြင်းကို အာရုံစိုက်သင့်သည်။ သင်သည် ဘုရားသခင်၏ နှုတ်ကပတ်တော်များကို ပို၍ဖတ်ရှုလျှင်၊ တရားဒေသနာများကို ပို၍နားထောင်လျှင်၊ ဧဝံဂေလိ ဖြန့်ဝေခြင်းနှင့်ဆိုင်သော သမ္မာတရားအပေါ် မိတ်သဟာယ ပို၍ပြုပြီး ရူပါရုံနှင့်ဆိုင်သော သမ္မာတရားကို အမှန်တကယ် နားလည်ရန်နှင့် အများဆုံးတွေ့နေကျ အယူအဆများနှင့် ဘာသာရေးသမားများ၏ ပြဿနာများကို ဖြေရှင်းနိုင်ရန်အတွက် ရူပါရုံနှင့်ဆိုင်သော သမ္မာတရားအပေါ် မိတ်သဟာယပြုရာ၌ အမြဲတမ်း ကြိုးစားပါက ရလဒ်များ လုံးဝ မရသည်ထက်စာလျှင် ရလဒ်အချို့ကို ရရှိနိုင်မည်ဖြစ်သည်။ ထို့ကြောင့် ဘုရားအမှုတော်၏ ရူပါရုံနှင့်ဆိုင်သော သမ္မာတရားကို နားမလည်နိုင်ခြင်းသည် လူတို့အနေဖြင့် ဧဝံဂေလိဖြန့်ဝေသောအခါ ရလဒ်များ မရရှိနိုင်သည့် အကြောင်းရင်းတစ်ခုပင် ဖြစ်သည်။ ထိုမျှသာမက သင်သည် မှန်သောလမ်းခရီးကို စုံစမ်းမေးမြန်းသောသူတို့ ထုတ်သည့် မေးခွန်းများကို သဘော‌ပေါက်ခြင်း သို့မဟုတ် နားလည်ခြင်း မရှိနိုင်သည်သာမက သင်သည် သူတို့၏ အကြီးမားဆုံးသော ပြဿနာများက မည်သည့်နေရာ၌ ရှိနေသည်ကို ရှာဖွေရန် သူတို့၏ အတွင်းစိတ်နှလုံးများကို မမြင်နိုင်သည့်အပြင် မှန်သောလမ်းခရီးကို သူတို့လက်မခံနိုင်အောင် တားဆီးနေသည့် အဓိကပြဿနာများကိုလည်း မစိစစ်နိုင်ပေ။ အကယ်၍ သင်သည် ဤပြဿနာများနှင့်ပတ်သက်၍ မသေချာနိုင်ပါက အခြားသူများထံ၌ ဧဝံဂေလိဖြန့်‌ဝေခြင်း သို့မဟုတ် ဘုရားသခင်အတွက် သက်သေခံခြင်းကို မပြုလုပ်နိုင်ပေ။ သင်သည် အနှစ်သာရမဲ့သော သဘောတရားများကို အသုံးပြုလျက် ဧဝံဂေလိဟောပြောခြင်းကို လက်တွေ့လုပ်ဆောင်ရုံသာ ပြုနေပါက အလုပ်ဖြစ်မည် မဟုတ်ချေ။ စုံစမ်းမေးမြန်းနေသော လူတို့က မေးခွန်းများကို စ‌မေးလိုက်သည်နှင့် ယင်းတို့ကို သင်ဖြေနိုင်မည် မဟုတ်တော့ပေ။ သြဝါဒအချို့အကြောင်း ပြောခြင်းဖြင့် မေးခွန်းများကို ဝတ်ကျေတမ်းကျေသာ ဖြေနိုင်မည်ဖြစ်သည်။ ဤပုံစံအတိုင်း ဧဝံဂေလိဖြန့်ဝေခြင်းက လူတို့ကို သိမ်းသွင်းရရှိမည်လော။ လုံးဝရရှိမည်မဟုတ်။ ကြိမ်ဖန်များစွာပင် စုံစမ်းမေးမြန်းနေသောသူတို့သည် မှန်သောလမ်းခရီးကို မဆိုင်းမတွ လက်ခံနိုင်ခြင်း မရှိသောအခါ ယင်းသည် သင်က ထိုသူတို့၏ မေးခွန်းများအတွက် ရှင်းလင်းသော အဖြေများ မပေးသောကြောင့်ဖြစ်သည်။ ထိုသို့ဖြစ်ပါက အချိန်ကြာမြင့်စွာ ယုံကြည်လာခဲ့သော သင်သည် ဤမေးခွန်းများအတွက် ရှင်းလင်းသော ဖြေရှင်းချက် မပေးနိုင်သည်မှာ အဘယ့်ကြောင့်နည်းဟူသည်ကို သူတို့ စူးစမ်းလိမ့်မည်။ သူတို့၏ စိတ်နှလုံးထဲတွင် ဤသည်မှာ မှန်သောလမ်းခရီး ဟုတ်မဟုတ်ဆိုသည်ကို သံသယ ဝင်မည်ဖြစ်သောကြောင့် ယင်းကို ယုံကြည်ခြင်း သို့မဟုတ် လက်ခံခြင်း ပြုဝံ့မည်မဟုတ်ပေ။ ဤသည်မှာ တကယ့်အခြေအနေ မဟုတ်လော။ ဤသည်မှာ လူတို့အနေဖြင့် ဧဝံဂေလိဖြန့်ဝေရာ၌ ရလဒ်များ မရရှိနိုင်သည့် ဒုတိယအကြောင်းရင်း ဖြစ်၏။ အကယ်၍ သင်သည် ဧဝံဂေလိဖြန့်ဝေချင်သော်လည်း တကယ့်ပြဿနာများကို မဖြေရှင်းနိုင်ပါက လူတို့ကို ဧဝံဂေလိဖြန့်ဝေဖို့ မည်သို့မျှ မဖြစ်နိုင်ချေ။ သမ္မာတရားကို နားမလည်လျှင် သူတို့၏ပြဿနာများကို မည်သို့ ဖြေရှင်းနိုင်မည်နည်း။ ထို့ကြောင့် သင်သည် ဧဝံဂေလိဖြန့်ဝေရာ၌ ရလဒ်များ ရရှိလိုပါက သမ္မာတရားကို ရှာဖွေရန်နှင့် စုံစမ်းမေးမြန်းသော လူတို့ထုတ်သော မေးခွန်းများအားလုံးကို လုံးစေ့ပတ်စေ့ နားလည်ရန်အတွက် ကြိုးစားရမည်။ ဤပုံစံဖြင့် သူတို့အား သမ္မာတရားကို မိတ်သဟာယပြုခြင်းအားဖြင့် သူတို့၏ မေးခွန်းများကို သင် အဖြေပေးနိုင်သည်။ ဧဝံဂေလိ ဖြန့်ဝေသူအချို့က “ဤလူတို့သည် ကိုင်တွယ်ဖြေရှင်းရ အလွန်ခက်သည်။ တွေ့လိုက်သမျှ အတွေးအခေါ်များက သူ့ထက်ငါ ပိုပို၍ ဖောက်ပြန်လာကြပြီး သူတို့ထဲမှ မည်သူမျှ သမ္မာတရားကို လက်မခံပေ။ သူတို့သည် ဆိုဆုံးမရန်ခက်ပြီး ခေါင်းမာကြကာ ဘာသာရေး အယူအဆများကို အစဉ် ဖက်တွယ်ထားကြသည်” ဟု ဆိုလျက် ဆင်ခြေတစ်ခုအဖြစ် အသုံးဝင်နိုင်သည့် ဓမ္မဓိဋ္ဌာန်ကျသော အကြောင်းပြချက်တစ်ခုခုကို အမြဲရှာတတ်ကြသည်။ ထိုကဲ့သို့သော ဧဝံဂေလိဖြန့်ဝေသူများသည် ဤလူတို့၏ အခက်အခဲများနှင့် ပြဿနာများကို ဖြေရှင်းပေးဖို့ ကြိုးစားမည် မဟုတ်သောကြောင့် ဧဝံဂေလိဖြန့်ဝေရန် ကြိုးစားသည့် အချိန်တိုင်းတွင် အောင်မြင်မည်မဟုတ်ပေ။ ၎င်းတို့သည် ချစ်ခြင်းမေတ္တာ စိုးစဉ်းမျှပင် ကင်းမဲ့ပြီး ဤတာဝန်၌ ကြာရှည်စွာ ကြိုးစားသည်းခံနိုင်ခြင်း မရှိပေ။ အပြင်ပန်းတွင် ၎င်းတို့က အရမ်းအလုပ်ရှုပ်နေပုံ‌ပေါက်သော်လည်း အမှန်မှာမူ မှန်သောလမ်းခရီးကို စုံစမ်းမေးမြန်းနေသော လူတစ်ဦးစီအတွက် ကြိုးပမ်းအားထုတ်မှု အလုံအလောက် မရှိခဲ့ပေ။ ၎င်းတို့သည် ဤလူတို့မေးသော မေးခွန်းများကို လေးလေးနက်နက်နှင့် တာဝန်ယူမှုရှိသော ပုံစံဖြင့် သဘောမထားကြပေ။ ၎င်းတို့သည် ဖြေရှင်းချက်တစ်ခု ရရှိဖို့၊ ဤမေးခွန်းများကို တစ်ဆင့်ချင်း ဖြေရှင်းဖို့နှင့် နောက်ဆုံးတွင် ထိုလူတို့ကို သိမ်းသွင်းရရှိဖို့အတွက် သမ္မာတရားကို မရှာဖွေကြပေ။ ထိုအစား တော်ရိလျော်ရိ လုပ်နေကြခြင်းသာ ဖြစ်သည်။ ၎င်းတို့သည် လူမည်မျှကို လက်လွတ်သွားသည် ဖြစ်စေ၊ တစ်ထေရာတည်းသော လုပ်နည်းကိုင်နည်းဖြင့်သာ လုပ်ဆောင်နေဆဲ ဖြစ်သည်။ ၎င်းတို့သည် ရက်အနည်းငယ် အလုပ်လုပ်ပြီးနောက် ရက်အနည်းငယ် အနားယူကြသည်။ ဧဝံဂေလိဖြန့်ဝေခြင်းကို မည်သို့ နားလည်သဘောပေါက်ကြသနည်း။ ၎င်းတို့သည် ယင်းကို ကစားနည်းတစ်ခု၊ လူမှုပေါင်းသင်းဆက်ဆံရေး ပုံစံတစ်ခုဖြစ်အောင် လုပ်ကြသည်။ ၎င်းတို့က “ယနေ့ ဤကဲ့သို့သောလူတို့နှင့် ငါတွေ့ဆုံပြီး ပျော်ပျော်ပါးပါး အချိန်ဖြုန်းလိုက်မည်။ နက်ဖြန် ထိုကဲ့သို့သောလူတို့နှင့် တွေ့ဆုံပြီး ယင်းက အသစ်အဆန်းဖြစ်၍ စိတ်ဝင်စားစရာ ကောင်းမည်” ဟု စိတ်ကူးကြသည်။ နောက်ဆုံးတွင်မူ ၎င်းတို့သည် မည်သူ့ကိုမျှ သိမ်းသွင်းရရှိခြင်း လုံးဝမရှိပေ။ ၎င်းတို့သည် တစ်ဦးတစ်ယောက်ကိုမျှ မရရှိနိုင်သည့် ဤကျရှုံးခြင်းအတွက်ကြောင့် မည်သည့်အရှက်ရခြင်းကိုဖြစ်စေ၊ မည်သည့်ဝန်တာစိတ်ကိုဖြစ်စေ လုံးဝမခံစားရပေ။ ဤပုံစံအတိုင်း ဧဝံဂေလိဖြန့်ဝေခြင်းအားဖြင့် ၎င်းတို့သည် မိမိတို့၏တာဝန်ကို ဖြည့်ဆည်းနိုင်သလော။ ၎င်းတို့သည် ဝတ်ကျေတမ်းကျေနှင့် နမော်နမဲ့ဖြစ်နေပြီး ဘုရားသခင်ကို လှည့်ဖြားရန် ကြိုးစားနေသည် မဟုတ်လော။ ဤပုံစံအတိုင်း အမြဲတမ်း ဧဝံဂေလိဖြန့်ဝေလာခဲ့သော လူတစ်ဦးသည် မိမိ၏တာဝန်ကို အမှန်တကယ် ဖြည့်ဆည်းနေခြင်းမရှိပေ။ အဘယ့်ကြောင့်ဆိုသော် ၎င်းသည် မိမိ၏တာဝန်ကို လုံးဝ မဖြည့်ဆည်းရသေးသောကြောင့်တည်း။ ၎င်းသည် အရာရာ၌ နမော်နမဲ့နှင့် ဝတ်ကျေတမ်းကျေပြုသည်။ ဧဝံဂေလိဖြန့်ဝေရာ၌ အခြားမည်သည့် အကြောင်းရင်းများက လူတို့အား သိမ်းသွင်းရရှိဖို့ မအောင်မြင်စေရသနည်း။ ငါ့အားပြောလော့။ (ဧဝံဂေလိတရားကို စည်းမျဉ်းများနှင့်အညီ မဖြန့်ဝေခြင်း ဖြစ်ပါသည်။) လူတို့သည် ဧဝံဂေလိဖြန့်ဝေသောအခါ ကိန်းဂဏန်းများကိုသာ အရေးထားသည်မှာ ဖြစ်တတ်သည်။ ထိုသို့သောလူတို့သည် စည်းမျဉ်းများအတိုင်း မဟောပြောသဖြင့် လူတို့ကို သိမ်းသွင်းရရှိဖို့ ယေဘုယျအားဖြင့် မအောင်မြင်ကြပေ။ ဧဝံဂေလိအဖွဲ့ထဲမှ လူအချို့သည် ပိုများသောလူတို့ထံ ဧဝံဂေလိဖြန့်ဝေသောသူက ချီးကျူးဂုဏ်ပြုမှု ပိုရရှိမည်ဟု တွေးထင်လျက် ဧဝံဂေလိလက်ခံရန် အလားအလာရှိသူများကို စိတ်အားထက်သန်စွာ အပြိုင်လုကြသည်မှာလည်း ဖြစ်တတ်သည်။ ဧဝံဂေလိလက်ခံရန် အလားအလာရှိသူများက ၎င်းတို့ ဤပုံစံဖြင့် ပြိုင်ဆိုင်ကြကြောင်းကို တွေ့မြင်သောအခါ ထိုသူတို့သည် တည်ဆောက်ပေးခြင်း ခံရမည်မဟုတ်ပေ။ ထိုအစား ထိုသူတို့၏ စိတ်ထဲ၌ “ဘုရားသခင်ကို ယုံကြည်သူများဖြစ်သော သင်တို့သည် မစည်းလုံးကြ၊ သင်တို့ကြားတွင် မနာလိုမှုနှင့် ပဋိပက္ခရှိသည်” ဟူသော အယူအဆများ ထွက်ပေါ်လာမည်။ ထို့နောက် ထိုသူတို့က ယုံကြည်ချင်ကြမည် မဟုတ်တော့ပေ။ ဤသည်မှာ အတားအဆီးတစ်ခု ဖြစ်၏။ ဤသည်မှာ ဧဝံဂေလိ ဖြန့်ဝေသောအခါ လူတို့ကို သိမ်းသွင်းရရှိဖို့ မအောင်မြင်ရခြင်း အကြောင်းရင်း၏ တစ်စိတ်တစ်ဒေသလည်း ဟုတ်သလော။ (ဟုတ်ပါသည်။) ဧဝံဂေလိလက်ခံရန် အလားအလာရှိသူ အချို့သည် လူ့အဖွဲ့အစည်းထဲ၌ အချိန်ကြာမြင့်စွာ နေထိုင်လာကြပြီဖြစ်ပြီး လူပေါင်းစုံ၊ အထူးသဖြင့် လူစိမ်းများကို သတိချပ်ကြသည်။ အကယ်၍ မိတ်ဆက်ပေးမည့် ကြားခံလူမရှိပါက လူတစ်ဦးကို ပထမဆုံး တွေ့ဆုံသောအခါ သတိထားကြမည်ဖြစ်သည်။ ဥပမာ သင်သည် လူစိမ်းတစ်ဦးကို ယခုမှ စတွေ့သည်ဆိုပါက မိမိ၏အမည်၊ လိပ်စာနှင့် ဖုန်းနံပါတ်တို့ကို သင် လက်လွတ်စပယ် ပြောပြမည် မဟုတ်သည်မှာ သေချာ၏။ ထိုသူနှင့် သင်ရင်းနှီးလာသောအခါ၊ တစ်ဦးနှင့်တစ်ဦး သိကျွမ်းလာသောအခါ၊ ထိုသူသည် သင့်အပေါ် စိတ်ပုပ်စိတ်ယုတ် မထားမှန်း သင်သိသောအခါ သင်တို့သည် မိတ်ဆွေများ ဖြစ်လာကြမည်။ ထိုအခါမှသာ သင်သည် ဤအချက်အလက်များကို သူ့အား ပေးမည်ဖြစ်သည်။ သို့သော်လည်း ဧဝံဂေလိဖြန့်ဝေသောသူ အချို့သည် လူတို့ကို နားမလည်တတ်သောကြောင့် လူတို့က ၎င်းတို့နှင့်ပတ်သက်၍ သတိထားသောအခါ ၎င်းတို့က ဤသူတို့ကို လှည့်စားတတ်ပြီး ဆိုးယုတ်သည်ဟု ခေါ်ကြသည်။ ၎င်းတို့သည် ထိုသူတို့၏ ကာကွယ်တတ်သော စိတ်ဓာတ်ကို ရှုတ်ချကာ ၎င်းတို့ကိုယ်တိုင်၏ တာဝန်ကို အခြားသူများထံ လွှဲချကြသည်။ ထိုဧဝံဂေလိဖြန့်ဝေသူများသည်လည်း လူစိမ်းများကို သတိထားကြသည် မဟုတ်လော။ အဘယ့်ကြောင့် သူတို့ကိုယ်သူတို့ မရှုတ်ချဘဲ သတိထားခြင်းသည် အမြော်အမြင်ရှိခြင်းဖြစ်သည်ဟု သူတို့ကိုယ်သူတို့ ထင်ကြသနည်း။ ဤပုံစံဖြင့် လူတို့ကို ဆက်ဆံသည်မှာ မတရားပေ။ ဧဝံဂေလိဖြန့်ဝေသောသူ အချို့က ဧဝံဂေလိလက်ခံရန် အလားအလာရှိသူများအား တွေ့လျှင်တွေ့ချင်း သူတို့၏ ကိုယ်ရေးအချက်အလက်များကို တောင်းတတ်ကြသည်။ အကယ်၍ တစ်ယောက်ယောက်က ၎င်းတို့အား မပေးလိုပါက ဤသို့သော ဧဝံဂေလိ ဖြန့်ဝေသူမျိုးသည် ဤသူကို ဟောပြောချင်ကြမည် မဟုတ်ပေ။ ဤသည်မှာ မည်ကဲ့သို့သော စိတ်သဘောထားမျိုး ဖြစ်သနည်း။ ယင်းမှာ အငြိုးထားသော စိတ်သဘောထားဖြစ်၏။ ၎င်းတို့သည် တစ်ယောက်ယောက်က ထိုသို့သော ကိစ္စလေး၌ ၎င်းတို့၏ တောင်းဆိုချက်များကို မလိုက်လျောပေးရုံမျှဖြင့် စိတ်ဆိုးလာပြီး ဧဝံဂေလိဟောပြောရန် ငြင်းကြသည်။ စက်ဆုပ်ဖွယ် ကောင်းလိုက်လေခြင်း။ သင်သည် အခြားသူများကို အဘယ့်ကြောင့် ဧဝံဂေလိဖြန့်ဝေလိုသနည်း။ ဤသည်မှာ သင်၏တာဝန်ကို လုပ်ဆောင်နေခြင်း မဟုတ်လော။ အကယ်၍ သင်သည် စိတ်ရှိသလို ပြုမူပါက ဤသည်မှာ သင်၏တာဝန်ကို လုပ်ဆောင်နေခြင်း ဟုတ်သေးသလော။ ဤသည်မှာ ဝန်ဆောင်မှုပေးနေခြင်းသက်သက်ပင် မဟုတ်လော။ သင်သည် ဘုရားသခင်ထံ မည်ကဲ့သို့ စာရင်းရှင်းမည်နည်း။ သင် လုံးဝ နောင်တမရလျှင် ဘုရားသခင်သည် သင့်ကို ရှုတ်ချပြစ်တင်ပြီး ဖယ်ရှားမည်ဖြစ်သည်။ သင်သည် မိမိကိုယ်မိမိ ဒုက္ခပေးနေခြင်း ဖြစ်သည်။

ဧဝံဂေလိအဖွဲ့နှစ်ဖွဲ့မှ အဖွဲ့သားများက ဧဝံဂေလိလက်ခံရန် အလားလာရှိသူတစ်ဦးနှင့် တွေ့ဆုံခဲ့သည့် ကိစ္စရပ်တစ်ခုကို ကြားမိသည်။ ထိုစဉ်က မိမိတို့သည် ဤလူနှင့် အရင်ဆုံး ဆက်သွယ်ခဲ့သောသူများ ဖြစ်သည်ဟုဆိုလျက် တစ်ဦးနှင့်တစ်ဦး ငြင်းခုံကြသည်။ ဤအရာနှင့်ပတ်သက်၍ ငြင်းခုံခြင်းက မည်သည့်အကျိုးရှိသနည်း။ ဤသည်မှာ မသိနားမလည်မှုကိစ္စ ဖြစ်သလော။ ဤသည်မှာ ပြုမူ၍မရသည့် အရာတစ်ခုဖြစ်၏။ သို့ဖြစ်လျှင် လုပ်သင့်လုပ်ထိုက်သောအရာမှာ အဘယ်နည်း။ လူတိုင်းက ထိုကိစ္စကို အတူတကွဆွေးနွေးဖို့လိုသည်။ မည်သူက အရင်ဆုံး အဆက်အသွယ် လုပ်ခဲ့သည်မှာ အရေးမကြီးပေ။ သင်တို့သည် ထိုသူတစ်ဦးတည်းကို ဆက်သွယ်မိပြီဖြစ်ကြောင်း တွေ့ရှိသောအခါ ဧဝံဂေလိကို အတူတကွ ဖြန့်ဝေလော့၊ လုပ်ငန်းခွဲဝေပြီး အတူတကွ ပူးပေါင်းလုပ်ဆောင်လော့။ အကယ်၍ သင်သည် ဤသူထံ ဧဝံဂေလိဆောင်ကြဉ်းပေးဖို့ နှစ်လတာအချိန်ယူရန် ကနဦး၌ စီစဉ်ထားခဲ့သည်ဆိုလျှင် သင်၌ အခြားလူများလည်းရှိသဖြင့် တစ်လအတွင်းသာ ကြိုးစားလုပ်ဆောင်လော့။ ထို့နောက် ဧဝံဂေလိလက်ခံရန် အလားအလာရှိသူ၏ ပြဿနာများနှင့် အခက်အခဲများနှင့်ပတ်သက်၍ ဤအရေးကိစ္စများကို ဖြေရှင်းရန်အလို့ငှာ အားလုံးက မည်သည့်သမ္မာတရား သွင်ပြင်လက္ခဏာများနှင့်ပတ်သက်၍ ရှာဖွေဖို့လိုအပ်ကြောင်းနှင့် ထိုအဖွဲ့နှစ်ဖွဲ့သည် မည်သို့ညှိနှိုင်းဆောင်ရွက်သင့်ကြောင်း အစရှိသည်တို့အပေါ် လူတိုင်းက မိတ်သဟာယပြုသင့်သည်။ ဤသို့ပြုလုပ်ရခြင်း၏ ရည်ရွယ်ချက်မှာ အဘယ်နည်း။ ယင်းမှာ ဤလူကို သိမ်းသွင်းရရှိရန်နှင့် သင်၏တာဝန်ကို ဖြည့်ဆည်းရန် ဖြစ်သည်။ လူတိုင်းက စိတ်သဘော တစ်ညီတစ်ညွတ်တည်း ဖြစ်ကာ အတူတကွ မိတ်သဟာယပြုပြီး ၎င်းတို့၏ ကြိုးပမ်းမှုများကို တူညီသော ရည်မှန်းချက်ပန်းတိုင်သို့ ဦးတည်သောအခါ သန့်ရှင်းသော ဝိညာဉ်တော်က ၎င်းတို့ကို ဉာဏ်အလင်းပေးပြီး ဦးဆောင်မည်ဖြစ်သည်။ လူတို့သည် စည်းလုံးညီညွတ်သောအခါ အမှုအရာများကို အလွယ်တကူ ပြီးမြောက်အောင်မြင်နိုင်ကာ ဘုရားသခင်၏ ကောင်းချီးမင်္ဂလာများနှင့် လမ်းညွှန်မှုကို ရရှိလိမ့်မည်။ သို့ရာတွင် သင်သည် ဤပုံစံအတိုင်း မလုပ်ဆောင်ပါက၊ အခြားသူများနှင့် အမြဲတမ်း ပြိုင်ဆိုင်ပါက၊ သင်သည် မိမိ၏ ကိုယ်ပိုင်အလုပ်ကိစ္စကို အမြဲတမ်း စီမံနေပါက၊ သင်ကိုယ်တိုင်နှင့် အခြားသူများကြားတွင် အမြဲတမ်း ပြတ်ပြတ်သားသား စည်းခြားထားပါက၊ ထို့အပြင် ဧဝံဂေလိဖြန့်ဝေသောအခါ သင့်အတွက်သင် ဟောပြောပြီး ကျွန်ုပ်ဘာသာကျွန်ုပ် လူတို့ကို သိမ်းသွင်းရရှိမည်ဟုဆိုလျက် လူတို့ကို သင်ကိုယ်တိုင် သိမ်းသွင်းရရှိဖို့ အရေးကိုသာ ဂရုစိုက်ပါက သင်သည် စိတ်သဘော တစ်ညီတစ်ညွတ်တည်းဖြင့် သင့်တာဝန်ကို ဖြည့်ဆည်းနိုင်မည်လော။ တစ်ခါတစ်ရံ လူတို့သည် မိမိတို့၏ တာဝန်များကို မိမိဘာသာ လုပ်ဆောင်နိုင်သော်လည်း ကျန်သည့်အချိန်များတွင် အသင်းတော်၏အလုပ်ကို ကောင်းမွန်စွာ ထမ်းဆောင်ဖို့ရန်အတွက် လူတိုင်းက အတူတကွ သဟဇာတကျကျ လုပ်ဆောင်ဖို့လိုသည်။ အကယ်၍ လူတိုင်းသည် မိမိဘာသာပြုမူပြီး သဟဇာတကျကျ ပူးပေါင်းလုပ်ဆောင်ခြင်း မရှိပါက အသင်းတော်၏အလုပ်ကို ရှုပ်ထွေးစေမည် ဖြစ်သည်။ ဤအရာအတွက် မည်သူက တာဝန်ယူမည်နည်း။ လူတိုင်း၌ တာဝန်ရှိပြီး အဓိကကြီးကြပ်သူက ပိုကြီးသော တာဝန်ကို မျှဝေခံယူရသည်။ သင်သည် အသင်းတော်၏အလုပ်ကို ရှုပ်ထွေးစေသောအခါ သင်၏တာဝန်ကို ကောင်းမွန်စွာ လုပ်ဆောင်ဖို့ ပျက်ကွက်သည်သာမက ကြီးမားသော မကောင်းမှုကိုလည်း ကျူးလွန်ကာ ဘုရားသခင်၏ စက်ဆုပ်ခြင်းနှင့် ရွံရှာခြင်းကို ဖြစ်ပေါ်စေလေသည်။ ထိုအခါ သင် ဒုက္ခရောက်လေပြီ။ ဘုရားသခင်သည် သင့်အား အသင်းတော်၏အလုပ်ကို အနှောင့်အယှက်ပေးသည့် ဆိုးယုတ်သော လူတစ်ဦး သို့မဟုတ် အန္တိခရစ်တစ်ဦးအဖြစ် ပြစ်တင်ရှုတ်ချပါက ပို၍ပင် ဆိုးဝါးမည်။ သင်သည် ဖော်ထုတ်ခြင်းနှင့် ဖယ်ရှားခြင်းကို ဧကန်မုချ ခံရမည်ဖြစ်ပြီး အပြစ်ဒဏ်ပေးခြင်းကိုပင် ခံရမည်ဖြစ်သည်။ အကယ်၍ သင်သည် သင်၏တာဝန်ကို စွန့်ခွာလျှင် ဤသည်မှာ မည်သည့်အရာနှင့် တူညီသနည်း။ သင်သည် ဘုရားသခင်၏ အမှုတော်၌ ပါဝင်မှုမရှိသည့်အပြင် ဘုရားသခင်၏ ကယ်တင်ခြင်းကို ရရှိမည်မဟုတ်ပေ။ သင်သည် မယုံကြည်သူများနှင့်သာ ဆိုင်မည်ဖြစ်ပြီး သင့်ဘဝ၏အဓိပ္ပာယ် ပျောက်ဆုံးလိမ့်မည်။ ယနေ့ သင်သည် မည်သည့်အရာအတွက် အသက်ရှင်နေသနည်း။ ဧဝံဂေလိအဖွဲ့အား မည်သည့်တန်ဖိုးကို သင် ဆောင်ကြဉ်းပေးသနည်း။ သင်သည် လူတစ်ဦးအဖြစ် သင်၏တန်ဖိုးကို မည်သို့ထင်ဟပ်စေနိုင်သနည်း။ သင်သည် သင်၏တာဝန်များကို လက်တွေ့ကျသော ပုံစံဖြင့် ဖြည့်ဆည်းရမည်၊ သင်၏တာဝန်ကို ကောင်းစွာ လုပ်‌ဆောင်ရမည်ဖြစ်ပြီး “ကျွန်ုပ်သည် ဧဝံဂေလိဖြန့်ဝေခြင်းဖြင့် လူအချို့ကို သိမ်းသွင်းရရှိပြီးဖြစ်သည်။ အရာရာကို ကျွန်ုပ်၏ တတ်နိုင်စွမ်းဖြင့် လုပ်ဆောင်ခဲ့ပြီးဖြစ်သည်။ ကျွန်ုပ်သည် ညံ့ဖျင်းသော အရည်အသွေးရှိပြီး သမ္မာတရားစစ်မှန်မှု အနည်းငယ်ကိုသာ ပိုင်ဆိုင်သော်လည်း ကျွန်ုပ်တတ်နိုင်သမျှ အကောင်းဆုံးကို လုပ်ဆောင်ခဲ့လေပြီ။ ကျွန်ုပ်၏တာဝန်ကို လက်လျှော့ခြင်း၊ စိတ်မကောင်းခြင်း၊ အပျက်သဘောဆောင်စွာ ခံစားခြင်းနှင့် အချောင်ခိုခြင်းမရှိဘဲ၊ သို့တည်းမဟုတ် ကျော်ဇောမှု သို့မဟုတ် အကျိုးအမြတ်ရရှိရန် ကြိုးစားခြင်း မရှိဘဲ လုပ်ဆောင်ခဲ့ပြီးဖြစ်သည်။ အဆိုပါအရာများအစား ကျွန်ုပ်သည် ဧဝံဂေလိဟောပြောရာ၌ အနည်းငယ်မျှ အရှက်ကွဲခြင်းထက် ပို၍ဒုက္ခခံစားခဲ့ပြီ၊ ဘာသာရေးအသိုင်းအဝိုင်း၏ စော်ကားမှုများနှင့် နှင်ထုတ်ခြင်းများကို ကြံ့ကြံ့ခံခဲ့ပြီဖြစ်ပြီး တာဝန်ဝတ္တရားကို ဖြည့်ဆည်းရာတွင် ဆူးခင်းလမ်းလျှောက်ခဲ့ပြီးဖြစ်သည်။ ကျွန်ုပ်သည် အပျက်သဘောဆောင်ခြင်းနှင့် အားနည်းခြင်းကို တွေ့ကြုံခဲ့ပြီ ဖြစ်သော်လည်း မိမိ၏တာဝန်ကို စွန့်ပစ်မထားဘဲ ဧဝံဂေလိဖြန့်ဝေခြင်း၌ အမြဲတမ်း သည်းခံကြိုးပမ်းခဲ့လေသည်။ ကျွန်ုပ်အား ဘုရားသခင်ပေးခဲ့သော ကွယ်ကာမှုနှင့် လမ်းညွှန်မှုအတွက် ကိုယ်တော့်ကိုကျေးဇူးတင်ပါ၏” ဟု ဆိုလျက် ဘုရားသခင်ကို အာမခံချက်များ ပေးနိုင်ရမည်ဖြစ်သည်။ ဤသည်မှာ သင်၏တာဝန်များကို အမှန်တကယ် ဖြည့်ဆည်းခြင်း၏ ဆိုလိုရင်းဖြစ်သည်။ နေ့ရက်အချိန် ကျရောက်သောအခါ သင်သည် ဘုရားသခင်ရှေ့မှောက်သို့ ဤသို့ရှင်းလင်းသော အသိတရားနှင့် ရောက်လာပြီး ဖြစ်ကြောင်းကုန်စင်ကို ရှင်းပြနိုင်လိမ့်မည်။ သင်သည် ဧဝံဂေလိလက်ခံရန် အလားအလာရှိသူ များစွာကို တွေ့ကောင်းတွေ့ခဲ့မည် ဖြစ်သော်လည်း လူများစွာကို သိမ်းသွင်းရရှိခဲ့ခြင်း မရှိပေ။ သို့သော်လည်း သင်၏ အရည်အသွေးနှင့် သင်၏လုပ်ဆောင်မှုများအပေါ် အခြေခံ၍ သင်၏အကောင်းဆုံး ကြိုးပမ်းလုပ်ဆောင်ခြင်းအားဖြင့် သင်တတ်နိုင်သမျှ လူအားလုံးကို သိမ်းသွင်းရရှိခဲ့ပေသည်။ ဤသို့ဆိုပါက ဘုရားသခင်သည် သင့်ကို မည်ကဲ့သို့ တန်ဖိုးဖြတ်မည်နည်း။ သင်သည် တာဝန်ကို ကျေနပ်ဖွယ်ရာ ထမ်းဆောင်ခဲ့ပြီး ဖြစ်သည်။ သင်သည် အကောင်းဆုံးကြိုးစားခဲ့ပြီး တာဝန်၌ သင်၏စိတ်နှလုံး တစ်ခုလုံးကို ပေးအပ်ခဲ့ပြီးဖြစ်သည်။ ဧဝံဂေလိလက်ခံရန် အလားအလာရှိသူများထံ ဧဝံဂေလိ ဖြန့်ဝေရန်အလို့ငှာ သင်သည် ရူပါရုံနှင့်ဆိုင်သော သမ္မာတရားဖြင့် မိမိကိုယ်ကို ပြင်ဆင်ထားရန် ကြိုးပမ်းခဲ့ပြီဖြစ်ပြီး သမ္မာကျမ်းစာမှ ဆီလျော်သော ကျမ်းပိုဒ်များကို အကျွမ်းဝင်အောင် လေ့ကျက်ခဲ့ပြီးဖြစ်သည်။ သင်သည် အလွတ်ကျက်မှတ်ဖို့ လိုအပ်သည့်အရာကို အလွတ်ကျက်မှတ်ခဲ့ပြီး အလွတ် မရနိုင်သည့်အရာကို ချရေးခဲ့သည်။ ဧဝံဂေလိဖြန့်ဝေသောအခါ မည်သူနှင့် တွေ့ဆုံခဲ့ပြီး ထိုသူတို့က မည်သည့်မေးခွန်းများကို မေးမြန်းခဲ့သည်ဖြစ်စေ ဖြေရှင်းချက်တစ်ခုကို ပေးစွမ်းနိုင်ခဲ့လေသည်။ ဤသို့ဖြင့် သင်၏အလုပ်ဖြစ်သော ဧဝံဂေလိဖြန့်ဝေခြင်းက ပို၍ပို၍ ထိရောက်မှုရှိခဲ့ပြီး လူတို့ကို ပို၍ သိမ်းသွင်းရရှိနိုင်ခဲ့သည်။ ဧဝံဂေလိဖြန့်ဝေသောအခါ လူတို့ကို ပို၍ သိမ်းသွင်းရရှိရန်အတွက်၊ ဤတာဝန်ကို ကောင်းစွာ ထမ်းဆောင်ရန်နှင့် သင်၏ ဝတ္တရားများကို ဖြည့်ဆည်းရန်အတွက် သင်သည် မိမိကိုယ်တိုင်၏ ချို့ယွင်းချက်များ၊ အားနည်းချက်များနှင့် အပျက်သဘောဆောင်သော စိတ်ခံစားမှုများအပါအဝင် သင့်အထဲ၌ ရှိသည့် အခက်အခဲများစွာကို ကျော်လွှားနိုင်ခဲ့သည်။ ဤအရာအားလုံးကို သင်ကျော်လွှားနိုင်ခဲ့ပြီး ဤလုပ်ငန်းတာဝန်အတွက် များစွာသော အချိန်ကို ပေးအပ်မြှုပ်နှံခဲ့ပေသည်။ သင်၏တာဝန်ကို ကောင်းစွာ ထမ်းဆောင်ရန်အတွက် ထိုကဲ့သို့သော အခက်အခဲများကို ကျော်လွှားရန် လိုအပ်သလော။ (လိုအပ်ပါသည်။) ထို့ထက်မက မှန်သောလမ်းခရီးသို့ စုံစမ်းမေးမြန်းသူတို့အား ဘုရားသခင်၏ အသံတော်ကို ကြားရအောင် ပို့ဆောင်ပေးရန်အတွက်၊ ဘုရားသခင်၏အလုပ်ကို သိရှိနားလည်ပြီး မှန်သောလမ်းခရီးကို လက်ခံရန်အတွက် သင့်အနေဖြင့် ဘုရားသခင်၏အလုပ်ကို ပို၍ကောင်းမွန်စွာ သက်သေခံနိုင်ရန်အလို့ငှာ သမ္မာတရားကို ပို၍ နားလည်ဖို့လိုအပ်သည်။ သမ္မာတရားအပေါ် သင်၏ မိတ်သဟာယပြုချက်က မည်မျှနက်သည်ဖြစ်စေ၊ မည်မျှတိမ်သည်ဖြစ်စေ ချစ်ခြင်းမေတ္တာနှင့် စိတ်ရှည်သည်းခံမှု ရှိသင့်သည်။ နားထောင်သူများက သင့်ကို ပြက်ရယ်ပြုကောင်းပြုမည်၊ စော်ကားကောင်း စော်ကားမည်၊ ငြင်းပယ်ကောင်း ငြင်းပယ်မည်၊ သို့မဟုတ် သင့်ကို နားလည်ကောင်း နားလည်မည်မဟုတ်၊ မည်သို့ဆိုစေ ဤအရာကို သင် မှန်ကန်စွာ ကိုင်တွယ်ဖြေရှင်းနိုင်ပြီး သူတို့အား သမ္မာတရားနှင့်ပတ်သက်၍ စိတ်ရှည်လက်ရှည် မိတ်သဟာယ ပြုပေးနိုင်သည့်အပြင် သင်သည် ဤအတိုင်းအတာအထိအောင် များစွာသော ကြိုးပမ်းမှုကို ရင်းနှီးမြှုပ်နှံပြီးဖြစ်ကာ ကြီးစွာသော အဖိုးအခကို ပေးဆပ်ပြီးပြီဆိုလျှင် သင်၏တာဝန်များကို ဖြည့်ဆည်းခဲ့ပြီဖြစ်သည်။ တာဝန်ကို ဤပုံစံအတိုင်း လုပ်ဆောင်ခြင်းသည် စိတ်ကျေနပ်ဖွယ်ရာ လုပ်ဆောင်ခြင်းပင် ဖြစ်သည်။

ဧဝံဂေလိဖြန့်ဝေသူအချို့က မိသားစု၏ ချမ်းသာကြွယ်ဝမှုနှင့် လူမှုရေးအဆင့်အတန်းကြောင့် မာနထောင်လွှားသည့် ဧဝံဂေလိလက်ခံရန် အလားအလာ ရှိသူတစ်ဦးကို တွေ့ဆုံသောအခါ ၎င်းတို့သည် အမြဲတမ်း သိမ်ငယ်ပြီး ထိုသူ၏ရှေ့၌ မတ်တပ်ရပ်သောအခါ အနေရခက်ကြသည်။ ဤကသိကအောက်ဖြစ်မှုက သင်၏ တာဝန်ထမ်းဆောင်ခြင်းကို ထိခိုက်မည်လော။ ယင်းက သင့်ကို ထိခိုက်သောကြောင့် သင်သည် မိမိ၏တာဝန်ကို ကောင်းစွာ မလုပ်ဆောင်နိုင်သည့်အပြင် သင်၏ တာဝန်ဝတ္တရားများကို မဖြည့်ဆည်းနိုင်ပါက သင်သည် မိမိ၏တာဝန်ကို ထမ်းဆောင်နေခြင်း မရှိပေ။ အကယ်၍ ယင်းက သင့်ကို မပျော်ရွှင်အောင်နှင့် ကသိကအောက်ဖြစ်အောင် ဖန်တီးလျက် သင်၏ စိတ်အခြေအနေကိုသာ ထိခိုက်သော်လည်း အဆုံးတွင် သင်သည် သင်သည် အလုပ်ပြီးမြောက်ကာ ကောင်းစွာ လုပ်ဆောင်ဖို့အလို့ငှာ သင်၏တာဝန်ကို စွန့်ပစ်မသွားပါက သို့မဟုတ် သင်၏ တာဝန်များနှင့် ဝတ္တရားများကို မေ့လျော့မသွားပါက သင်သည် တာဝန်ကို အမှန်တကယ် ဖြည့်ဆည်းခဲ့ပြီဖြစ်သည်။ ဤသည်မှာ အမှန်တရားလော။ (ဟုတ်ပါသည်။) ဤသည်မှာ အမှန်တရားဖြစ်ပြီး လူတိုင်းက ယင်းကို လက်ခံသင့်သည်။ ဤသည်မှာ သင့်ကိုယ်သင် တွေ့ရှိကောင်းတွေ့ရှိနိုင်မည့် အခြေအနေတစ်ခုလော။ သာဓကအားဖြင့် ဧဝံဂေလိလက်ခံသူအချို့က သင်သည် ကျေးလက်ဒေသမှ လာသောကြောင့် သင့်ကို အထင်သေးကောင်းသေးမည်။ ထိုသူတို့က သင့်ကို သိမ်ငယ်ပင် သိမ်ငယ်စေနိုင်မည်။ ဤအရာကို သင် မည်သို့ ကိုင်တွယ်ဖြေရှင်းမည်နည်း။ သင်က “သင်သည် မြို့ပြရှိ အခွင့်ထူးခံဘဝဖြင့် မွေးဖွားခဲ့စဉ် ကျွန်ုပ်သည် ဝေးလံသော ကျေးလက်ဒေသတွင် ဆင်းရဲနုံချာစွာ မွေးဖွားခဲ့သည်။ ဤသည်ကို ဘုရားသခင်က စီမံထားခြင်းဖြစ်သည်။ သို့ရာတွင် ကျွန်ုပ်တို့ မည်သည့်နေရာ၌ မွေးဖွားခဲ့သည်ဖြစ်စေ ဘုရားသခင်သည် သနားခြင်းကရုဏာနှင့် ပြည့်စုံ၏။ ကျွန်ုပ်တို့သည် ဤခေတ်ကာလတွင် နေထိုင်ကြပြီး နောက်ဆုံးသောကာလ ဘုရားသခင်၏ အမှုတော်တွင် ပါဝင်ပတ်သက်ထားရသည်မှာ ကျွန်ုပ်တို့အားလုံး ကောင်းချီးခံစားရပါသည်” ဟု ဆိုလော့။ ဤစကားများသည် အမှန်တရားဖြစ်ပြီး သင် မျက်နှာသာရဖို့ ကြိုးစားခြင်း မဟုတ်ပေ။ ဧဝံဂေလိလက်ခံသူများက “သို့ဆိုလျှင် သင်သည် ကျွန်ုပ်တို့ ကောင်းချီးခံစားရသလောက် မခံစားရ‌ပေ။ ကျွန်ုပ်တို့မှာမူ ဤဘဝတွင် ပျော်မွေ့ပြီး နောက်ဘဝပါ ပျော်မွေ့ခံစားရမည် ဖြစ်သော်လည်း သင်တို့သည် နောက်ဘဝကိုသာ ပျော်မွေ့ခံစားရနိုင်သည်။ ထို့ကြောင့် သင်တို့ထက် ကျွန်ုပ်တို့က ပို၍ ပျော်မွေ့ပါသည်” ဟု ဆိုကြမည်။ သင်က “ဤအရာအားလုံးမှာ ဘုရားသခင်၏ ကျေးဇူးတော်ပင် ဖြစ်၏” ဟု ဆိုလော့။ ထိုသူတို့က ဘုရားသခင်၏ အမှုတော်ကို မသိသည်ဖြစ်၍ သူတို့နှင့် အငြင်းပွားစရာ လိုသလော။ သင်သည် ထိုကဲ့သို့သော အရာများကို တန်ဖိုးမထားလျှင် သင်သည် သူတို့နှင့် ငြင်းခုံမည်မဟုတ်ပေ။ “ငါသည် စိတ်နှလုံးထဲတွင် တာဝန်တစ်ခုရှိသည်၊ ငါ၏ပခုံးထက်၌ ဝန်ထုပ်တစ်ခု၊ အထူးတာဝန်တစ်ခုနှင့် ဝတ္တရားတစ်ခုရှိသည်။ ငါသည် သူတို့နှင့် ထိုအကြောင်းကို ငြင်းခုန်မည်မဟုတ်။ သူတို့သည် ယုံကြည်ပြီး ဘုရားသခင်၏အိမ်တော်သို့ ပြန်လာသည့်နေ့ ရောက်လာလျက်၊ တရား‌ဒေသနာများကို ပို၍ကြားနာထားပြီးလျှင် သမ္မာတရားနှင့်ဆိုင်သည့် တစ်စုံတစ်ရာကို နားလည်သောအခါ ယနေ့ သူတို့၏အပြုအမူနှင့် လုပ်ရပ်များကို စဉ်းစားမိပြီး အရှက်ရလာမည်” ဟု သင့်စိတ်နှလုံးထဲတွင် ရှင်းရှင်းလင်းလင်း နားလည်ထားသင့်သည်။ သင်သည် ထိုအကြောင်းကို ဤပုံစံအတိုင်း စဉ်းစားပါက သင့်စိတ်နှလုံး ဖွင့်ဟလာမည်။ ဤသည်မှာ အမှန်တကယ် ဖြစ်သည့်အရာဖြစ်၏။ အကယ်၍ သင်သည် ထိုသူတို့ကို အမှန်ပင် သိမ်းသွင်းရရှိပြီး သူတို့က သမ္မာတရားကို အမှန်တကယ် လိုက်စားကြပါက သုံးလေးနှစ်ကြာမျှ ယုံကြည်ပြီးနောက် သင်နှင့် ပထမဆုံး တွေ့ဆုံခဲ့စဉ်က သင့်ကို သူတို့ ဆက်ဆံခဲ့သည့်အတိုင်း ဆက်ဆံခြင်းသည် မသင့်လျော်ကြောင်း၊ လူ့သဘာဝ ကင်းမဲ့ကြောင်းနှင့် သမ္မာတရားနှင့် မကိုက်ညီကြောင်းကို အသိအမှတ်ပြုလာမည်ဖြစ်သည်။ ထိုအခါ နောက်တစ်ကြိမ် သင့်ကို တွေ့မြင်သောအခါ သင့်ကို တောင်းပန်ရလိမ့်မည်။ ဧဝံဂေလိဖြန့်ဝေခြင်း လုပ်ငန်းစဉ်တွင် ဤအခြေအနေမျိုးကို မကြာခဏ ကြုံတွေ့ရမည် ဖြစ်သည်။ ဤသို့ဖြစ်ပျက်သောအခါ ငါ မည်သို့ ကိုင်တွယ်ဖြေရှင်းရမည်နည်း။ ငါသည် ထိုသို့သော အရာများကို များစွာ အာရုံမစိုက်ချေ။ ယင်းက အရေးမကြီးပေ။ ယင်းသည် အရေးကြီးသည်ဟု သင်မထင်ပါက ထိုသူတို့၏ စကားလုံးများက သင့်ကို စိတ်အနှောင့်အယှက်ပေးမည် မဟုတ်ပေ။ ဤသည်ကို ဝိညာဉ်ရင့်ကျက်မှုကို ပိုင်ဆိုင်ခြင်းဟု ခေါ်သည်။ သင်သည် သမ္မာတရားကို နားလည်ပြီး သမ္မာတရားစစ်မှန်မှုကို ပိုင်ဆိုင်ပါက လူတို့ကို ဒုက္ခ‌ပေးသည်ဟုဆိုသော ဆိုရိုးစကားများနှင့် အလေ့အထများစွာကို သင် ရိပ်စားမိနိုင်မည်။ ယင်းတို့ကို ဆွေးနွေးဖြေရှင်းနိုင်မည် ဖြစ်သည်။ သို့သော်လည်း သင်သည် ဤအရာများကို မရိပ်စားမိနိုင်ပါက ထိုကဲ့သို့သော စကားလုံးများနှင့် လုပ်ရပ်များကို တစ်သက်လုံး သတိရနေမည် ဖြစ်ပြီး တစ်ချက်မျှ မျက်စပစ်ပြခြင်း၊ စကားတစ်ခွန်း သို့မဟုတ် အမူအရာတစ်ကွက်မျှဖြင့် သင့်ကို မည်သူမဆို နစ်နာအောင် လုပ်ကောင်းလုပ်နိုင်မည် ဖြစ်သည်။ ထိုကဲ့သို့သော ဒဏ်ရာများက မည်မျှပြင်းထန်သနည်း။ ယင်းတို့သည် သင့်စိတ်နှလုံးတွင် အမှတ်အသားတစ်ခု ထင်ကျန်စေလိမ့်မည်။ ချမ်းသာကြွယ်ဝသော လူများ၊ သင့်ထက် အဆင့်အတန်း ပိုမြင့်သောလူများ သို့မဟုတ် တစ်ချိန်က သင့်ကို အထင်သေးပြီး သင့်ကိုတိုက်ခိုက်ခဲ့သော လူများကို မြင်သောအခါ သင်သည် စိုးရိမ်ပြီး ကြောက်ရွံ့နေမည်။ ဤကြောက်ရွံ့မှုကို မည်ကဲ့သို့ ဖယ်ရှားနိုင်သနည်း။ သင်သည် ထိုသူတို့၏ အနှစ်သာရကို ရိပ်စားမိဖို့လိုသည်။ သူတို့သည် အဘယ်မျှ ကြီးကျယ်ခမ်းနားပါစေ၊ မည်သည့်အခြေအနေ သို့မဟုတ် မည်သည့်အဆင့်အတန်းကို ပိုင်ဆိုင်ပါစေ ထိုသူတို့သည် ဖောက်ပြန်ပျက်စီးသော လူတို့သာလျှင် ဖြစ်ကြသည်။ သူတို့နှင့်ပတ်သက်၍ ဘာမျှ အထူးတလည်မရှိပေ။ ဤအရာကို တွေ့မြင်ပါက သင်၏စိတ်နှလုံးသည် ချုပ်နှောင်ခြင်းခံရမည် မဟုတ်ပေ။ ဧဝံဂေလိဖြန့်ဝေခြင်းအလုပ်တွင် ဤပြဿနာများကို မုချ ကြုံတွေ့ရမည်ဖြစ်သည်။ ယင်းတို့အားလုံးမှာ ဖြစ်နေကျ ပြဿနာများဖြစ်သည်။ လူအချို့က သင့်ကို နားလည်မည်မဟုတ်၊ သို့မဟုတ် သင်နှင့်ပတ်သက်၍ အာဃာတထားရှိမည်၊ သို့မဟုတ် သင့်ကို လှောင်ပြောင်ဖို့အတွက် အကျည်းတန်သော အရာများကို စောင်းပါးရိပ်ခြည်နှင့် သွယ်ဝိုက်၍ပင် ပြောကြမည်ဖြစ်သည်။ လူအချို့က သင်သည် ဧဝံဂေလိတရားကို ငွေရှာရန်၊ အကျိုးအမြတ်ရှာဖွေရန်၊ သို့မဟုတ် အချစ်ဇာတ်လမ်း ရှာတွေ့ရန်အတွက် ဟောပြောခြင်းဖြစ်သည်ဟု ပြောကြမည်။ ထိုကဲ့သို့သော အခြေအနေများကို သင် မည်ကဲ့သို့ ကိုင်တွယ်မည်နည်း။ ထိုသို့သောလူတို့နှင့် သင်ငြင်းခုံသင့်သလော။ အထူးသဖြင့် ဧဝံဂေလိလက်ခံရန် အလားအလာရှိသူတစ်ဦးသည် ငွေကြေးပြည့်စုံသည့် မိသားစုမှ ဖြစ်သည့်အခါ သင်သည် သူတို့၏အိမ်၌ အစာစားနေပြီး သူတို့၏မျက်နှာပေါ်၌ ထိုအကြည့်မျိုးကို မြင်ရပါက ဘာလုပ်သင့်သနည်း။ သင်၏ ဂုဏ်သိက္ခာကို ထိန်းသိမ်းဖို့အတွက် သူတို့၏အိမ်၌ မစားသောက်ပါက ဗိုက်ဟောင်းလောင်းဖြင့် ဆက်လက်၍ ဧဝံဂေလိ ဟောပြောနိုင်မည်လော။ ထိုကိစ္စရပ်ကို သင် ဤသို့ စဉ်းစားသင့်သည်။ “ယနေ့ ကျွန်ုပ်သည် သူတို့၏အိမ်၌ စားသောက်ပြီး သူတို့အား ဧဝံဂေလိဖြန့်ဝေနိုင်သည်။ သူတို့သည် ဧဝံဂေလိဖြန့်ဝေသောသူတို့ကို လက်ခံကြိုဆိုနိုင်ပါသည်။ ဤသည်မှာ သူတို့၏ ကံကောင်းခြင်းပင် ဖြစ်၏။” အမှန်တွင် ဤသည်မှာ အမှုအရာများ အမှန်တကယ်ဖြစ်သည့်ပုံ ဖြစ်သည်။ ဤသည်မှာ ထိုသူတို့၏ ကံကောင်းခြင်းဖြစ်သည်။ ယင်းကို သူတို့က နားမလည်သော်လည်း သင်သည် ဤအရာကို စိတ်နှလုံးထဲ၌ သိထားဖို့လိုသည်။ လူတစ်ဦးသည် ဧဝံဂေလိဖြန့်ဝေနေစဉ် ထိုသို့သော လှောင်ပြောင်သရော်မှု၊ ပြက်ရယ်ပြုခြင်း၊ အထင်သေးသည့် အကြည့်များနှင့် အသရေဖျက်ခြင်းတို့ကို မကြာခဏ ကြုံတွေ့ရမည် သို့မဟုတ် သူ့ကိုယ်သူ အန္တရာယ်ရှိသော အခြေအနေများထဲ၌ပင် မိမိကိုယ်ကို တွေ့ရလိမ့်မည်။ သာဓကအားဖြင့် ညီအစ်ကို မောင်နှမအချို့သည် ဆိုးယုတ်သောလူတို့၏ လူသိရှင်ကြား စွပ်စွဲရှုတ်ချခြင်း သို့မဟုတ် အဓမ္မခေါ်ဆောင်သွားခြင်း ခံရပြီး အခြားသူများမှာမူ ရဲများထံ အတိုင်ခံရကာ ထိုသူတို့မှာ အစိုးရထံ လွှဲပြောင်းအပ်နှံခြင်းခံရလေသည်။ အချို့မှာ အဖမ်းခံရပြီး အကျဉ်းချခံရစဉ် အခြားသူများမှာ သေသည်အထိပင် အရိုက်ခံရကောင်း ခံရမည်ဖြစ်သည်။ ဤအရာအားလုံးမှာ ဖြစ်ပျက်နေသော အရာများပင်ဖြစ်၏။ သို့သော် ယခုအခါတွင် ဤအရာများအကြောင်းကို ငါတို့ သိလာသဖြင့် ဧဝံဂေလိဖြန့်ဝေခြင်းအလုပ်အပေါ် ငါတို့၏ သဘောထားကို ပြောင်းသင့်သလော။ (မပြောင်းသင့်ပါ။) ဧဝံဂေလိဖြန့်ဝေခြင်းသည် လူတိုင်း၏ တာဝန်နှင့် ဝတ္တရားဖြစ်သည်။ မည်သည့်အချိန်၌မဆို၊ ငါတို့ကြားသည့်အရာ၊ သို့မဟုတ် မြင်သည့်အရာက မည်သည့်အရာဖြစ်စေ၊ သို့မဟုတ် မည်သည့်ဆက်ဆံမှုမျိုးကို ငါတို့ကြုံတွေ့သည်ဖြစ်စေ ဧဝံဂေလိဖြန့်ဝေခြင်း ဟူသည့် ဤတာဝန်ကို ငါတို့ အမြဲတမ်း ထိန်းသိမ်းရမည်။ မည်သည့်အခြေအနေ၌ဖြစ်စေ ငါတို့သည် အပျက်သဘောဆောင်ခြင်း သို့မဟုတ် အားနည်းချက်ကြောင့် ဤတာဝန်ကို စွန့်လွှတ်၍မရပေ။ ဧဝံဂေလိဖြန့်ဝေရမည့် တာဝန်သည် ချောမွေ့သောခရီး မဟုတ်ဘဲ အန္တရာယ်နှင့် အတိပြီး၏။ သင်တို့သည် ဧဝံဂေလိဖြန့်ဝေသောအခါ ကောင်းကင်တမန်များ၊ သို့မဟုတ် ဂြိုဟ်သားများ၊ သို့မဟုတ် စက်ရုပ်များကို ရင်ဆိုင်ရမည် မဟုတ်ပေ။ သင်တို့သည် ဆိုးယုတ်ပြီး ဖောက်ပြန်ပျက်စီးသော လူသားများ၊ အသက်ရှိသော နတ်ဆိုးများ၊ လူ့တိရစ္ဆာန်များကိုသာ ရင်ဆိုင်ရမည်ဖြစ်ပြီး ၎င်းတို့အားလုံးသည် ဆိုးယုတ်သော ဤနေရာ၊ ဆိုးယုတ်သော ဤကမ္ဘာ၌ ရှင်သန်နေသည့်၊ စာတန်၏ နက်ရှိုင်းစွာ ဖောက်ပြန်ပျက်စီးခြင်းကို ခံထားရသော လူသားများဖြစ်ကြပြီး ဘုရားသခင်ကို ခုခံကြသည်။ ထို့ကြောင့် ဧဝံဂေလိဖြန့်ဝေခြင်း လုပ်ငန်းစဉ်၌ တွေ့နေကျ ဖြစ်စဉ်များဖြစ်သည့် အသေးအဖွဲမျှသော အသရေဖျက်မှု၊ အထင်သေးသည့် အကြည့်များနှင့် နားလည်မှုလွဲမှားခြင်းများကို မဆိုနှင့်၊ အန္တရာယ်မျိုးပေါင်းစုံ ရှိနေသည်မှာ အသေအချာပင် ဖြစ်သည်။ အကယ်၍ သင်သည် ဧဝံဂေလိဖြန့်ဝေခြင်းကို တာဝန်တစ်ခုအဖြစ်၊ ဝတ္တရားတစ်ခုအဖြစ်သာမက သင်၏တာဝန်အဖြစ် အမှန်တကယ် သဘောထားပါက သင်သည် ဤအရာများကို မှန်ကန်စွာ သဘောထားနိုင်ပြီး ယင်းတို့ကို မှန်ကန်စွာပင် ကိုင်တွယ်နိုင်မည် ဖြစ်သည်။ သင်သည် တာဝန်နှင့် ဝတ္တရားကို စွန့်လွှတ်မည် မဟုတ်သကဲ့သို့ သင်သည် ဤအရာများကြောင့် ဧဝံဂေလိဖြန့်ဝေပြီး ဘုရားသခင်အား သက်သေခံမည့် သင်၏ နဂိုမူလ ရည်ရွယ်ချက်မှ လမ်းလွဲသွားမည် မဟုတ်သည့်အပြင် ဤသည်မှာ သင့်တာဝန်ဖြစ်သည့်အတွက် ဤတာဝန်ကို မည်သည့်အခါမျှ ဘေးဖယ်ထားမည် မဟုတ်ပေ။ ဤတာဝန်ကို မည်ကဲ့သို့ နားလည်သင့်သနည်း။ ယင်းသည် လူ့ဘဝ၏ တန်ဖိုးနှင့် အခြေခံဝတ္တရား ဖြစ်၏။ နောက်ဆုံးသောကာလ ဘုရားသခင်၏ အမှုတော်နှင့်ဆိုင်သည့် သတင်းကောင်းနှင့် ဘုရားသခင်၏ အမှုတော်နှင့်ဆိုင်သည့် ဧဝံဂေလိတရားအား ဖြန့်ဝေခြင်းသည် လူ့ဘဝ၏တန်ဖိုးပင် ဖြစ်သည်။

ဧဝံဂေလိဖြန့်ဝေရမည့် လူတစ်ဦး၏တာဝန်အား ဖြည့်ဆည်းခြင်းနှင့်ဆိုင်သည့် သမ္မာတရားကို ယနေ့ ငါတို့ မိတ်သဟာယပြုနေကြသည်။ ဤအရာမှ သင်တို့ တစ်စုံတစ်ရာ ရရှိပြီးပြီလော။ (ရရှိပြီးပါပြီ။) ယခင်က ဧဝံဂေလိဖြန့်ဝေခြင်းနှင့် ဆိုင်သည့် သမ္မာတရားအပေါ် ငါတို့၏ မိတ်သဟာယပြုချက်က ရူပါရုံကို ဗဟိုပြုခဲ့ကြသည်။ ဆိုလိုသည်မှာ ရူပါရုံနှင့် ဆက်စပ်သည့် သမ္မာတရားအပေါ် ငါတို့ အတိအကျ မိတ်သဟာယပြုခဲ့ပြီး ယနေ့ ငါတို့ ဆွေးနွေးနေသကဲ့သို့ အသေးစိတ်ကျသော ကိစ္စရပ်များစွာကို မဆွေးနွေးခဲ့ကြပေ။ အဘယ့်ကြောင့်ဆိုသော် လူအများစုသည် ရူပါရုံနှင့်ဆိုင်သည့် သမ္မာတရား၏ ယေဘုယျအနှစ်ချုပ်နှင့် ပတ်သက်၍ တစ်စုံတစ်ရာကို သိကြသော်လည်း အသေးစိတ်ကျသော လက်တွေ့လုပ်ဆောင်မှု လမ်းကြောင်းများနှင့် တိကျသော ကိစ္စရပ်များအတွက် စည်းမျဉ်းများကို ရှင်းလင်းနိုင်မည် မဟုတ်သဖြင့် ယနေ့တွင် ငါတို့၏ မိတ်သဟာယပြုချက်ထဲ၌ ဤတိကျသော ကိစ္စရပ်များကို ငါဖော်ပြမည်။ အချို့ကိစ္စများနှင့် လူတို့၏ အမူအကျင့် သို့မဟုတ် လူတစ်ဦးက ဤအခြေအနေများကို ကြုံတွေ့ရသောအခါ ပြုလုပ်ရမည့် မှန်ကန်သောအရာများနှင့် မှားယွင်းသောအရာများ၊ လူတို့ ကိုင်စွဲထားသော ရှုထောင့်များနှင့် ဤတာဝန်၊ ဤဝတ္တရားကို ၎င်းတို့ မည်သို့ ဖြည့်ဆည်းသင့်သည် ဟူသည့်အပေါ် မိတ်သဟာယပြုချက်မှ တစ်ဆင့်လည်းကောင်း၊ ဤအကြောင်းအရာများ အားလုံးအပေါ် မိတ်သဟာယပြုချက်မှ တစ်ဆင့်လည်းကောင်း ဧဝံဂေလိ ဖြန့်ဝေခြင်းနှင့်ဆိုင်သော သမ္မာတရားသည် ပို၍ခိုင်လုံလာပြီး လက်တွေ့ဘဝထဲ၌ အကောင်အထည်ဖော်ရန် ပို၍လွယ်ကူလာကြောင်း သင်တို့ တွေ့ရှိရသလော။ သမ္မာတရား၏ ဤသွင်ပြင်လက္ခဏာကို နားထောင်ပြီးနောက် သင်တို့၏ စိတ်နှလုံးများသည် များစွာ ပို၍ကြည်လင်ရှင်းလင်းလာမည်ဟု ငါယုံကြည်၏။ ဧဝံဂေလိဖြန့်ဝေခြင်း လုပ်ငန်းစဉ်၌ တိကျသော ပြဿနာအချို့ကို ကြုံတွေ့ရသောအခါ သင်တို့သည် ဤနှုတ်ကပတ်တော်များမှ အကျိုးရရှိပေမည်။ အဘယ့်ကြောင့်ဆိုသော် ယင်းတို့သည် လက်တွေ့ကျပြီး သမ္မာတရားစည်းမျဉ်းများကို ခြုံငုံမိသောကြောင့် ဖြစ်သည်။ ယင်းတို့သည် အနှစ်သာရမဲ့သော စကားလုံးများ မဟုတ်ပေ။ သင်တို့သည် နေ့စဉ်အသက်တာ၌ ဧဝံဂေလိဖြန့်ဝေခြင်းနှင့် သက်ဆိုင်သည့် ထိုသို့သော ကိစ္စရပ်များကို ကြုံတွေ့ရပြီး မှားယွင်းသော အခြေအနေအချို့တွင် အသက်ရှင်ရသောအခါ၊ သို့မဟုတ် ဧဝံဂေလိဖြန့်ဝေခြင်းဖြစ်သော သင်၏အလုပ်၌ ပြဿနာအချို့ကို ကြုံတွေ့ရသောအခါ သင်တို့ရင်ဆိုင်ရသော ပြဿနာများကို ဖြေရှင်းရန်အတွက် ဤသမ္မာတရားများကို သင်တို့ အသုံးပြုနိုင်သလော။ ထိုသို့သော ပြဿနာများကို ဖြေရှင်းနိုင်ပါက ယနေ့နှုတ်ကပတ်တော်များကို အချည်းနှီး ပြောဆိုခြင်း မဟုတ်တော့ပေ။ ထိုသို့သော ပြဿနာများကို မဖြေရှင်းနိုင်သေးပါက၊ သို့မဟုတ် အမှုအရာများကို ကိုယ်ပိုင်နည်းလမ်းဖြင့် လုပ်ဆောင်ပါက၊ သင့်ကိုယ်ပိုင် ဆုံးဖြတ်ချက်များကို ချမှတ်ပြီး ယင်းတို့အတိုင်း လိုက်နာဆောင်ရွက်ပါက၊ သင်လုပ်ချင်သမျှကို လုပ်ဆောင်ပါက၊ ထို့ပြင် သင်၏ တာဝန်များနှင့် ဝတ္တရားများကို ထည့်သွင်းစဉ်းစားခြင်း မရှိဘဲ တစ်ဇွတ်ထိုးနှင့် မဆင်မခြင် ကျင့်ကြံပြုမူပါက ဤနှုတ်ကပတ်တော်များသည် သင်တို့အတွက် အနှစ်သာရမဲ့သော စကားသာဖြစ်ပြီး မည်သည့်အရာအတွက်မျှ အသုံးမကျချေ။ ယင်းတို့က မည်သည့်အရာအတွက်မျှ အသုံးမကျရခြင်းမှာ သမ္မာတရားသည် သင့်ကို မကူညီနိုင်၍မဟုတ်၊ သမ္မာတရားသည် သင့်အတွက် အကျိုးကျေးဇူး မရှိ၍မဟုတ်ဘဲ သင်သည် သမ္မာတရားကို ချစ်မြတ်နိုးခြင်း လုံးဝမရှိသည့်အပြင် သမ္မာတရားကို လက်တွေ့လုပ်ဆောင်မှု မရှိသောကြောင့် ဖြစ်သည်။ သင်သည် ဧဝံဂေလိဖြန့်ဝေခြင်းတာဝန်ကို ဝါသနာတစ်ခုအဖြစ် သို့မဟုတ် အချိန်ကုန်လွန်စေသော နည်းလမ်းတစ်ခုအဖြစ်သာ ရှုမြင်သည်။ အကယ်၍ သင်တို့သည် ဧဝံဂေလိဖြန့်ဝေခြင်း တာဝန်ကို ဤရှုထောင့်အမြင်ဖြင့် ကိုင်တွယ်ဖြေရှင်းပါက မည်သည့်အရာ ဖြစ်ပျက်မည်နည်း။ သင်၏တာဝန်ကို ကျေနပ်ဖွယ်ရာပုံစံဖြင့် ဖြည့်ဆည်းနိုင်မည်လော။ (မဖြည့်ဆည်းနိုင်ပါ။) အကယ်၍ သင်၏တာဝန်ကို ကျေနပ်ဖွယ်ရာပုံစံဖြင့် ဖြည့်ဆည်းခြင်းနှင့်ပတ်သက်၍ ပြောဆိုချက်က အနည်းငယ် အလှမ်းဝေးပုံပေါက်လျှင် ဤအရာကို သင်တို့အား ငါမေးမည်။ ဧဝံဂေလိဖြန့်ဝေခြင်းတာဝန်ကို ဤရှုထောင့်အမြင်ဖြင့် ကိုင်တွယ်ဖြေရှင်းပါက ဘုရားသခင်၏ အလိုတော်ကို ကျေနပ်စေနိုင်မည်လော။ (မကျေနပ်စေနိုင်ပါ။) ဤအရာသည် သင်တို့အားလုံး၏ စိတ်နှလုံးထဲတွင် ရှင်းလင်းနေသင့်သည်။ သင်သည် ဤတာဝန်ကို ဤရှုထောင့်အမြင်မျိုးနှင့် ဤသဘောထားမျိုးဖြင့် ကိုင်တွယ်ဖြေရှင်းပါက သင်၏စိတ်နှလုံးသည် မငြိမ်မသက် ဖြစ်လိမ့်မည်။ သင်၏သဘောထားသည် ဘုရားသခင် နှစ်သက်မည့်ပုံစံအတိုင်း မဟုတ်ဟု သင်ထင်လိမ့်မည်။ သင်သည် ဤပုံစံအတိုင်း ပြုမူဆောင်ရွက်လျှင်၊ လူအချို့ကို သိမ်းသွင်းရရှိပြီး ယင်းက သင့်အနေဖြင့် အပြင်ပန်းတွင် ကောင်းမှုများ လုပ်ဆောင်နေပုံ ပေါက်လျှင်ပင် သင်၏တာဝန် ထမ်းဆောင်ခြင်းအတွက် သင်၏ ရည်ရွယ်ချက်များနှင့် စေ့ဆော်မှုများက သမ္မာတရား စည်းမျဉ်းများနှင့် ဆန့်ကျင်နေပေသည်။ သင်သည် ကောင်းချီးမင်္ဂလာများ ရရှိရန်အတွက် ဧဝံဂေလိဖြန့်ဝေပြီး ဘုရားသခင်နှင့် အပေးအယူများ ပြုလုပ်သော ထိုဘာသာရေးပုဂ္ဂိုလ်များကဲ့သို့ပင် ဖြစ်သည်။ ထိုကဲ့သို့သော ရည်ရွယ်ချက်နှင့် စေ့ဆော်မှုများ၏ အရင်းအမြစ်သည် မှားယွင်း၏။ လူတို့သည် ၎င်းတို့၏ တာဝန်များအား မည်သို့ထမ်းဆောင်သည်ကို သုံးသပ်ဆင်ခြင်လျက် ဘုရားသခင်သည် လူတို့၏ ရည်ရွယ်ချက်များနှင့် စေ့ဆော်မှုများကို အကဲဖြတ်သည်။ ဘုရားသခင်သည် လူတို့အနေဖြင့် ၎င်းတို့၏တာဝန်များကို ကိုင်တွယ်ဖြေရှင်းသည့် သဘောထားများနှင့် ပုံသေအတွေးအခေါ်များကို စစ်ကြောသည်။ ဤအရာအပေါ် အခြေခံ၍ ဘုရားသခင်သည် လူတို့အနေဖြင့် အပြစ်တရားမှ ရုန်းထွက်နိုင်ဖို့အလို့ငှာ ၎င်းတို့အား ဖောက်ပြန်ပျက်စီးခြင်းမှ သန့်စင်စေရန်နှင့် ကယ်တင်ရန် အမှုပြုခြင်းဖြစ်သည်။ ထို့ကြောင့် ဧဝံဂေလိကို မည်သို့ဖြန့်ဝေသည်ဖြစ်စေ သင်သည် ဘုရားသခင်၏ စေ့စေ့စပ်စပ် စစ်ဆေးခြင်းကို လက်ခံသင့်သည်။ သင်သည် မည်သည့်လူစားမျိုးဖြစ်စေ၊ သင်၌ မည်သည့်အရည်အချင်း ရှိပါစေ၊ သင်သည် မည်သည့်တာဝန်မျိုးကို ဖြည့်ဆည်းခဲ့ပြီးဖြစ်စေ၊ ထို့အပြင် ဧဝံဂေလိဖြန့်ဝေသောသူများဟူသည့် လူတန်းစား၌ မပါဝင်မီ သင်၏တာဝန်က မည်သည့်တာဝန်ဖြစ်ခဲ့ပါစေ သင်သည် ဧဝံဂေလိဖြန့်ဝေခြင်းနှင့်ဆိုင်သည့် ဤသမ္မာတရားစည်းမျဉ်းများကို လိုက်နာသင့်သည်၊ ဧဝံဂေလိဖြန့်ဝေခြင်းကို သင်၏တာဝန်နှင့် ဝတ္တရားအဖြစ် ရှုမြင်သင့်ပြီး ယင်းကို သင်၏တာဝန်အဖြစ် ခံယူသင့်လေသည်။

လက်တွေ့ကျသောအလုပ်ကို မလုပ်ဆောင်နိုင်သည့် သို့မဟုတ် လက်တွေ့ကျသော ပြဿနာများကို မဖြေရှင်းနိုင်သည့် အချို့သော ခေါင်းဆောင်များနှင့် အမှုဆောင်များသည် လူစားထိုးခြင်းနှင့် ဧဝံဂေလိအဖွဲ့ဝင်အဖြစ် ဧဝံဂေလိဖြန့်ဝေရန် တာဝန်ပေးခြင်းကို ခံရသည်။ ၎င်းတို့သည် ၎င်းတို့တွေ့သောသူတိုင်းကို “ကျွန်ုပ်သည် ခေါင်းဆောင်တစ်ဦး ဖြစ်ခဲ့သည်။ ကျွန်ုပ် မစွမ်းဆောင်နိုင်ခဲ့သဖြင့် ဧဝံဂေလိ ဖြန့်ဝေရန်အတွက် ဧဝံဂေလိအဖွဲ့သို့ စေလွှတ်ခံရခြင်း ဖြစ်သည်။ ဘုရားသခင်က ကျွန်ုပ်ကို အခိုက်အတန့် ဖေးမရန်၊ ကျွန်ုပ်ကို သမ္မာတရားဖြင့် ပြင်ဆင်စေရန်နှင့် လေ့ကျင့်ပေးရန် ဧဝံဂေလိဖြန့်ဝေစေခြင်း ဖြစ်နိုင်သည်။ ယင်းက ကျွန်ုပ်သည် ဧဝံဂေလိဖြန့်ဝေခြင်းထဲ၌ ထိုမျှအားထုတ်ကြိုးပမ်းမှု များစွာ စိုက်ထုတ်စရာမလိုဟု ဆိုလိုသည်။ ကျွန်ုပ် မည်သည့်အရာကို ပြုလုပ်သည်ဖြစ်စေ အဆင်ပြေသည်။ တကယ်တော့ ကျွန်ုပ်သည် ခေါင်းဆောင်လုပ်ဖို့ အလားအလာရှိသူဖြစ်သည်။ ကျွန်ုပ်သည် ဝိညာဉ်ရင့်ကျက်မှု၌ ကြီးထွားရင့်ကျက်သည်နှင့်တစ်ပြိုင်နက် ခေါင်းဆောင်လုပ်ခိုင်းသင့်သည်။ ကျွန်ုပ်၌ ထိုမျှ အရည်အချင်းကောင်း ရှိသည်ဖြစ်၍ ခေါင်းဆောင်တစ်ဦး မဖြစ်ခဲ့လျှင် ပါရမီကို ဖြုန်းတီးရာကျမည်။ ယခုတွင် အသင်းတော်၌ ခေါင်းဆောင်များနှင့် အမှုဆောင်များ ရှားပါးပြတ်လပ်မှုရှိသည်” ဟု ပြောကောင်းပြောမည်။ ၎င်းတို့၏ စကားလုံးများက ဘုရားသခင်၏အိမ်တော်သည် ခေါင်းဆောင်များအဖြစ် ၎င်းတို့မရှိလျှင်မဖြစ်ဟု သွယ်ဝိုက်ညွှန်းဆိုခြင်း ဖြစ်သည်။ ၎င်းတို့ကို လက်တွေ့လုပ်ဆောင်ဖို့ အခွင့်အလမ်းပေးရန်၊ ၎င်းတို့ကို သမ္မာတရားဖြင့် ပြင်ဆင်ရန်နှင့် ၎င်းတို့အား ပျိုးထောင်ပေးခြင်းနှင့် လေ့ကျင့်ပေးခြင်းတို့တွင် ပါဝင်သည့် ကွင်းဆင်းလုပ်ကိုင်ရသော အလုပ်အချို့ကို လုပ်ဆောင်စေရန်အတွက်သာ ၎င်းတို့ကို ဧဝံဂေလိဖြန့်ဝေခိုင်းခြင်း ဖြစ်သည်။ ထို့ကြောင့် ၎င်းတို့သည် ဧဝံဂေလိဖြန့်ဝေရမည့် ၎င်းတို့၏တာဝန်ကို ယာယီဖြစ်သော အရာတစ်ခုအဖြစ် ရှုမြင်ကြသည်။ ၎င်းတို့သည် ယင်းကို ၎င်းတို့၏ ကိုယ်ရေးအကျဉ်းအား အပိုထပ်ဖြည့်ရန်၊ ပျော်ရရန်နှင့် အတွေ့အကြုံနှင့် ဗဟုသုတနယ်ပယ် ဖြန့်ကျက်ရန်အတွက်သာ လုပ်ဆောင်နေကြခြင်း ဖြစ်သည်။ ၎င်းတို့သည် ဧဝံဂေလိဖြန့်ဝေရာ၌ ရလဒ်များရရှိပါက၊ သမ္မာတရားကို နားလည်ပြီး အလုပ်တချို့ကို လုပ်ဆောင်နိုင်ပါက ခေါင်းဆောင်တစ်ဦး သို့မဟုတ် အမှုဆောင်တစ်ဦးအဖြစ် အစေခံရန် ရာထူးတိုးမြှင့်ခံရမည်ဟု ထင်မှတ်ကြသည်။ ၎င်းတို့သည် ဧဝံဂေလိဖြန့်ဝေရမည့် ၎င်းတို့၏တာဝန်ကို ဖြည့်ဆည်းခြင်းအတွက် ဤပုံသေအတွေးအခေါ်ကို ခံယူထားပါက စစ်မှန်သော နောင်တတရားကို ရရှိနိုင်မည်လော။ ၎င်းတို့သည် မိမိတို့အပေါ်မိမိ ဆင်ခြင်သုံးသပ်ခြင်း သို့မဟုတ် မိမိတို့ကိုယ်ကို သိနားလည်လာခြင်း မရှိကြသေးပေ။ ၎င်းတို့၌ ကိုယ့်ကိုယ်ကိုယ် သိမြင်နားလည်ခြင်း မရှိကြပေ။ ဤလူတို့သည် ဒုက္ခရောက်နေသလော။ ၎င်းတို့သည် ဧဝံဂေလိဖြန့်ဝေခြင်းကို မှန်မှန်ကန်ကန် သဘော‌မပေါက်ကြချေ။ မိမိတို့ကိုယ်ကို အထင်ကြီးလွန်းကြသည်။ မိမိတို့ကိုယ်ကို အမှန်တကယ် သိနားလည်ခြင်း လုံးဝမရှိပေ။ ၎င်းတို့သည် အမှန်တကယ် မည်သည့်အရာ ဖြစ်ပျက်နေသည်ကို လုံးလုံးလျားလျား သတိမပြုမိကြပေ။ အမှန်တွင် ၎င်းတို့သည် သမ္မာတရားကို လိုက်စားသောလူများ မဟုတ်သည့်အပြင် သဘောပေါက်ခြင်း တစ်စုံတစ်ရာ လုံးလုံးလျားလျား ကင်းမဲ့သောကြောင့် ဤအရာ ဖြစ်ပျက်ရခြင်းဖြစ်သည်။ အပေါ်ယံအားဖြင့် ၎င်းတို့သည် ရှင်းလင်းစွာ ပြောဆိုနိုင်သည်၊ အရေးကိစ္စများအား ကိုင်တွယ်ဖြေရှင်းရခြင်းကို နှစ်သက်ကြသည်၊ ပြီးလျှင် ၎င်းတို့တွင် အရည်အချင်းအချို့ ရှိပုံရသော်လည်း ခေါင်းဆောင်များနှင့် အမှုဆောင်များအဖြစ် အစေခံသောအခါ ၎င်းတို့၏ အကျင့်စရိုက်နှင့် အရည်အချင်းက ၎င်းတို့ကို မသင့်လျော်စေခြင်း ဖြစ်သည်။ ၎င်းတို့သည် ခေါင်းဆောင်များနှင့် အမှုဆောင်များ ဖြစ်လာဖို့အတွက် စံနှုန်းနှင့် စံချိန်စံညွှန်းကို မပြည့်မီသောကြောင့် ဖယ်ရှားခံရခြင်း ဖြစ်သည်။ ၎င်းတို့သည် မိမိတို့ကိုယ်ကို တစ်မူထူးခြားသူ မဟုတ်ကြောင်း သိမြင်ကြရမည့်အစား အရှက်မရှိ ကြွားဝါပြီး မိမိတို့ကိုယ်ကို ဂုဏ်ဆာနေကြသည်။ လူအချို့က ယင်းကို မည်သည့်အခါမျှ ပြောမည် မဟုတ်သော်လည်း သူတို့၏ တစ်ကိုယ်ရေ ထင်မြင်ယူဆချက်တွင် အခြားမည်သည့်အရာကိုမျှ မလုပ်‌ဆောင်နိုင်သောသူတို့သာလျှင် ဧဝံဂေလိဖြန့်ဝေရန် တာဝန်ပေးခံရသည်ဟု ယုံကြည်ထားကြသည်။ သူတို့၏ စိတ်နှလုံးထဲတွင် ဘုရားသခင်၏ အိမ်တော်ထဲရှိ တာဝန်များအားလုံးကို အဆင့်မြင့်၊ အလယ်အလတ်နှင့် အဆင့်နိမ့်အဖြစ် ခွဲခြားထားကြသည်။ ၎င်းတို့သည် ဧဝံဂေလိဖြန့်ဝေခြင်းတာဝန်ကို ဘုရားသခင်၏ အိမ်တော်ထဲရှိ တာဝန်များအားလုံးအနက် အနိမ့်ဆုံးအဖြစ် သဘောထားကြသည်။ အမှားပြုလုပ်သူ သို့မဟုတ် မိမိတို့၏တာဝန်ကို ကျေနပ်ဖွယ်ရာ မဖြည့်ဆည်းကြသူ မည်သူမဆို ဧဝံဂေလိဖြန့်ဝေရန် စေလွှတ်ခြင်းခံရသည်ဟူ၍ ဖြစ်သည်။ ဤသည်မှာ ဤလူတို့က ဤတာဝန်ကို သဘော‌ပေါက်ကြသည့်ပုံ ဖြစ်သည်။ ဤနားလည်မှုနှင့် ဧဝံ‌ဂေလိဖြန့်ဝေခြင်းကို မိမိ၏အသက်တာထဲတွင် ဖြည့်ဆည်းရမည့် မိမိ၏တာဝန်နှင့် ဝတ္တရားအဖြစ် ခံယူခြင်းတို့ကြားတွင် ကွဲပြားမှုတစ်ခုခု ရှိသလော။ အကယ်၍ လူတစ်ဦးက ယင်းကို ဤအတိုင်းနားလည်ပါက သူ၏တာဝန်ကို ကောင်းစွာ လုပ်ဆောင်နိုင်မည်လော။ (မလုပ်ဆောင်နိုင်ပါ။) သူသည် မည်သည့်နေရာ၌ မှားယွင်းသွားသနည်း။ သူသည် သူ၏ အသက်တာထဲ၌ သူဖြည့်ဆည်းသင့်သည့် လူတစ်ဦး၏ အကြီးမားဆုံးသော တာဝန်နှင့် ဝတ္တရားဖြစ်သည့် ဧဝံဂေလိဖြန့်ဝေခြင်းအလုပ်ကို အနိမ့်ကျဆုံးသော အလုပ်အဖြစ် သ‌ဘောထား၍ဖြစ်သည်။ သူသည် ယင်းကို သူကိုယ်တိုင်၏ တာဝန်နှင့် ဝတ္တရားအဖြစ် မယူဆသည့်အပြင် ယင်းကို တာဝန်တစ်ခုအဖြစ် နားမလည်ပေ။ ဘုရားသခင်၏ အိမ်တော်သည် လူတစ်ဦး၏ တာဝန်ကို သစ္စာရှိစွာ ထမ်းဆောင်ခြင်းဟူသည့် မရှိမဖြစ် လိုအပ်ချက်နှင့် ဧဝံဂေလိဖြန့်ဝေခြင်းမှာ ဤတာဝန်များထဲမှ တစ်ခုဖြစ်ကြောင်း မည်သို့ မိတ်သဟာယပြုသည်ဖြစ်စေ သူက ဤသည်မှာ အကြောင်းရင်းဖြစ်မှန်း မသိမှတ်ပေ။ ၎င်း၏ စိတ်နှလုံးထဲ၌ ခေါင်းဆောင်များ၊ အမှုဆောင်များနှင့် ဘုရားသခင်၏ အိမ်တော်၌ တာဝန်ရှိသောသူတို့ဟူသည့် အလွှာအမျိုးမျိုးကို ထိပ်တန်း၌ ရှိသည်ဟု ယုံကြည်ထားသည်။ ၎င်းတို့၌ အကြွင်းမဲ့ အခွင့်အာဏာရှိပြီး နောက်ဆုံးတွင် ကြီးမားသောဆုလာဘ်များကို ရရှိကာ ဘုရားသခင်၏ စုံလင်အောင်ပြုခြင်းခံရမည်။ ၎င်းတို့အောက်ရှိ နောက်လိုက်များ၊ အထူးသဖြင့် အသင်းတော်ပြင်ပရှိ လူတို့နှင့် အမြဲတမ်း အပြန်အလှန် ဆက်သွယ်ရသည့် ဧဝံဂေလိဖြန့်ဝေသူများမှာ အောက်ခြေစစ်သည်များသာ ဖြစ်ကြသည်။ လုပ်ငန်းအားလုံးအနက် ၎င်းတို့၏အလုပ်မှာ အခက်ခဲဆုံးနှင့် အပင်ပန်းဆုံး ဖြစ်နိုင်သည်။ အဆုံးတွင် ဤလူတို့သည် စုံလင်အောင်ပြုခြင်းခံရမည် မခံရမည်ကို အသေအချာ မပြောနိုင်ပေ။ ၎င်းတို့အနေဖြင့် ဧဝံဂေလိဖြန့်ဝေခြင်းတာဝန်ကို ဤပုံစံအတိုင်း ထင်မြင်ယူဆသည်မှာ ၎င်းတို့၏အမှား ဟုတ်သလော။ ဧဝံဂေလိဖြန့်ဝေခြင်းဟူသည့် ဤမြင့်မြတ်သော တာဝန်နှင့် ဝတ္တရားကို အနိမ့်ကျဆုံးသော ငြီးငွေ့ဖွယ်အလုပ်အဖြစ် သဘောထားပြီး ယင်းကို အဆင့်အတန်းနှင့် အတန်းစားဟူသည့် ရာထူးအဆင့်ဆင့်တို့အနက် အနိမ့်ဆုံးအဆင့်၌ ထားရှိသောသူတို့ ရှိသ‌လော။ ၎င်းတို့က ဤတာဝန်ကို အထင်သေးကြပြီး ယင်းအား ထမ်းဆောင်သော သူတို့ကိုလည်း အထင်သေးကြသည်။ သို့ဆိုလျှင် ဤတာဝန်ကို လုပ်ဆောင်သောအခါ ၎င်းတို့သည် မည်သည့်ရှုထောင့် ပါရှိသနည်း။ (၎င်းတို့သည် ယင်းကို ယာယီအဖြစ် ရှုမြင်ကြပါသည်။) အခြားနောက်ထပ်ကော။ ၎င်းတို့သည် လူတစ်ဦးကို သိမ်းသွင်းရရှိသောအခါ ထိုအရာနှင့်ပတ်သက်၍ များစွာ မစဉ်းစားကြသည့်အပြင် မည်သူ့ကိုမျှ သိမ်းသွင်းရရှိနိုင်ခြင်း မရှိသောအခါ၌လည်း ဂရုမစိုက်ကြပေ။ ၎င်းတို့သည် ဧဝံဂေလိဖြန့်ဝေခြင်းကို သူတို့ကိုယ်ပိုင်အလုပ်၏ ကဏ္ဍတစ်ခုအဖြစ် သဘောမထားကြသည့်အပြင် ဤတာဝန်ကို ကောင်းစွာ ထမ်းဆောင်ရန် အစွမ်းကုန်အားထုတ်ကြိုးပမ်းမှု မပြုကြပေ။ ၎င်းတို့၏ စိတ်နှလုံးထဲတွင် ဧဝံဂေလိဖြန့်ဝေခြင်းတာဝန်ကို အထင်သေးကြသဖြင့် ဧဝံဂေလိဖြန့်ဝေရာ၌ ၎င်းတို့၏ လုပ်ငန်းရလဒ်မှာ မည်သည့်အရာဖြစ်မည်နည်း။ ၎င်းတို့သည် ဧဝံဂေလိဖြန့်ဝေခြင်းဖြစ်သည့် မိမိတို့၏တာဝန်ကို ဖြည့်ဆည်းရန်အလို့ငှာ သမ္မာတရား၏ သွင်ပြင်လက္ခဏာ အားလုံးဖြင့် မိမိတို့ကိုယ်ကို ပြင်ဆင်နိုင်သလော။ လူတို့ကို ပို၍ သိမ်းသွင်းရရှိရန်အလို့ငှာ ဧဝံဂေလိဖြန့်ဝေသောအခါ ၎င်းတို့တွေ့ရသည့် ပြဿနာအမျိုးမျိုးကို ဖြေရှင်းနိုင်ရန်အတွက် ၎င်းတို့သည် ဘုရားသခင်၏ နှုတ်ကပတ်တော်မှ ကောက်နုတ်ချက်များနှင့် ကျမ်းပိုဒ်များကို အလွတ်ကျက်မှတ်ပြီးလျှင် အတွေ့အကြုံဆိုင်ရာ သက်သေခံချက်အမျိုးမျိုးနှင့် မိမိတို့ကိုယ်ကို အကျွမ်းတဝင် ဖြစ်အောင် လုပ်ကြသလော။ (မလုပ်ကြပါ။) ဧဝံဂေလိဖြန့်ဝေရာတွင် အဓိပ္ပာယ်မဲ့သော သဘော‌ပေါက် နားလည်ခြင်းရှိပြီး အယူအဆများစွာ စွဲကိုင်ထားသော လူတို့က ၎င်းတို့ကို ခက်ခဲသော မေးခွန်းများ မေးမြန်းပါက ထိုသူတို့အား မည်ကဲ့သို့ ကိုင်တွယ်ဖြေရှင်းမည်နည်း။ (၎င်းတို့သည် ထိုသူတို့ကို လက်လျှော့ကြမည်ဖြစ်သည်။) ဤသည်မှာ သဘောထားတစ်မျိုး ဖြစ်သည်။ ၎င်းတို့က “ကျွန်ုပ်သည် ဧဝံဂေလိဖြန့်ဝေရာ၌ ဝိညာဉ်ရေးရာ သိနားလည်မှု ဘာမျှမရှိသည့် ထိုမျှအဓိပ္ပာယ်မဲ့သော လူတစ်ဦးနှင့် အဘယ့်ကြောင့် တွေ့ဆုံခဲ့ရသနည်း။ ကံဆိုးလိုက်လေခြင်း” ဟု ဆိုလျက် ဘုရားသခင်ကို ညည်းညူမည်လော။ ၎င်းတို့သည် ဧဝံဂေလိလက်ခံရန် အလားအလာရှိသူများအတွက် မေတ္တာမရှိသည့်အပြင် ဤလူစားမျိုးကို ဘုရားသခင် မကယ်တင်မည့်အရေးကို မျှော်လင့်ကြ၏။ ၎င်းတို့သည် ဤအကြောင်းအရာနှင့် ပတ်သက်၍ ဘုရားသခင်၏ အလိုတော်အား အနည်းငယ်မျှ ထည့်တွက်စဉ်းစားဖို့ မဆိုထားဘိ၊ ဘုရားသခင်ထံ ဆုမတောင်းကြသည့်အပြင် ဘုရားသခင်၏ အလိုတော်ကိုလည်း မရှာဖွေကြပေ။ ၎င်းတို့သည် ဧဝံဂေလိလက်ခံရန် အလားအလာရှိသူများကို လူ့ဇာတိ၏ နှစ်သက်မှုများအတိုင်း မည်ကဲ့သို့ ဆက်ဆံရမည်ကို ရွေးချယ်ပြီးလျှင် ပြဿနာမြောက်မြားစွာနှင့် လေးနက်သော အယူအဆများရှိသည့် လူတို့ကို ကြုံတွေ့ရသောအခါ ထိုသူတို့ကို လက်လျှော့ကြသည်။ ၎င်းတို့သည် အယူအဆအနည်းငယ်ရှိသော သို့မဟုတ် လုံးဝမရှိသော လူတို့ကိုသာ ဧဝံဂေလိဖြန့်ဝေရန် ရွေးချယ်ကြပြီး မည်သည့်အဖိုးအခမျှ မပေးလိုကြပေ။ ၎င်းတို့၏ ဝင့်ဝါမှု သို့မဟုတ် ဂုဏ်သိက္ခာကို၊ သို့မဟုတ် ၎င်းတို့၏ ကျော်ဇောမှု သို့မဟုတ် အဆင့်အတန်းကို တစ်စုံတစ်ခုက ထိခိုက်သည့်အခါတိုင်း၊ လူ့ဇာတိ၏ နှစ်သက်မှုများကို တစ်စုံတစ်ခုက ဆန့်ကျင်သည့်အခါတိုင်း သို့မဟုတ် လူ့ဇာတိ၏ ပျော်မွေ့ဖွယ်ရာများနှင့် ဆန့်ကျင်သည့်အခါတိုင်း မည်သည့်အရာကို လုပ်ဆောင်ရန် ၎င်းတို့ ရွေးချယ်ကြသနည်း။ လက်လျှော့ရန်၊ ထွက်ပြေးရန် ရွေးချယ်ကြပြီး၊ ဤတာဝန်ကို မဖြည့်ဆည်းဘဲ ငြင်းဆန်ရန် ရွေးချယ်ကြသည်။ တစ်ချိန်တည်းမှာပင် ၎င်းတို့သည် အတွင်းကျိတ် စိတ်နှလုံးထဲ၌ ဘုရားသခင်ကို “အယူအဆများစွာ ရှိသည့် ထိုမျှ အဓိပ္ပာယ်မရှိသော လူကို ကျွန်ုပ် အဘယ့်ကြောင့် တွေ့ဆုံခဲ့ရသနည်း။ ကျွန်ုပ်အား ဤအရာကို အဘယ့်ကြောင့် ခံစားကြုံတွေ့စေသနည်း။ ကျွန်ုပ်သည် မျက်နှာပျက်သွားရပြီ၊ အားထုတ်ကြိုးပမ်းမှုကို အလဟဿဖြစ်စေပြီးလျှင် မည်သူ့ကိုမျှ သိမ်းသွင်းရရှိနိုင်ခြင်း မရှိတော့ပြီ” ဟု ညည်းညူကြသည်။ ၎င်းတို့၏စိတ်နှလုံးသည် ဘုရားသခင်အား တိတ်တခိုး မကျေချမ်းမှုနှင့် ပြည့်နှက်နေသည်။ ထို့ကြောင့် ၎င်းတို့သည် ဧဝံဂေလိဖြန့်ဝေရမည့် တာဝန်ကို လက်မခံလိုကြသည့်အပြင် ဧဝံဂေလိဖြန့်ဝေခြင်းဟူသည့် ဝတ္တရားကို ဖြည့်ဆည်းရန် အလိုမရှိကြပေ။ ဧဝံဂေလိဖြန့်ဝေခြင်း တာဝန်အပေါ် ၎င်းတို့၏ သဘောထားများက ဤကဲ့သို့ဖြစ်နေပါက ၎င်းတို့သည် ဖယ်ရှားခံရဖို့ မဝေးတော့ချေ။

ဧဝံဂေလိဖြန့်ဝေခြင်းဖြစ်စဉ်တွင် ဧဝံဂေလိဖြန့်ဝေသောသူ များစွာတို့သည် ၎င်းတို့၏အလုပ်ကို ဝတ်ကျေတမ်းကျေနှင့် အရေးမစိုက်သော သဘောထားဖြင့် ဆက်ဆံပြုမူကြသည်။ ၎င်းတို့သည် မည်သည့်အခါမျှ မပြောင်းလဲပေ။ ယင်းကို ဂရုတစိုက် အာရုံစိုက်မှုရှိသော၊ ဆင်ခြင်မြော်တွေးမှုရှိသော သဘောထားဖြင့်လည်းကောင်း၊ ဘုရားသခင်ကို ကြောက်စိတ်ဖြင့်လည်းကောင်း မည်သည့်အခါမျှ ဆက်ဆံပြုမူခြင်း မရှိပေ။ ထိုအစား ၎င်းတို့က “မည်သို့ပင်ဆိုစေ ကျွန်ုပ်၌ ယခုလက်ရှိတွင် မည်သည့်အလုပ်ကိုမျှ တာဝန်ယူလက်ခံထားခြင်းမရှိသဖြင့် မည်သည့်အရာကိုမဆို ကျွန်ုပ် ပြုလုပ်နိုင်သည်။ ဧဝံဂေလိအဖွဲ့က ပျော်စရာကောင်းမည့်ပုံ ပေါက်သောကြောင့် ကျွန်ုပ် ပါဝင်လိုက်မည်” ဟု စဉ်းစားကြသည်။ ထို့နောက် ၎င်းတို့သည် လိုက်ပါသွားပြီး ဧဝံဂေလိဖြန့်ဝေကြသည်။ အမှန်မှာမူ ၎င်းတို့သည် ဤဖြစ်စဉ်အတွက် အလွန်နည်းပါးသည့် အထောက်အကူပြုဆောင်ရွက်မှုကို ပြုလုပ်ကြသည်။ ၎င်းတို့သည် အချိန်အနည်းငယ်ယူပြီးလျှင် ခဏတစ်ဖြုတ် ခရီးထွက်ကြကာ၊ အဘယ်အဖိုးအခမျှ တကယ်မပေးကြပေ။ ၎င်းတို့၏ လူ့ဇာတိ နှစ်သက်မှုများ၊ ၎င်းတို့၏ ကိုယ်ပိုင်အယူအဆများနှင့် စိတ်ကူးစိတ်သန်းများအတိုင်း ဧဝံဂေလိကို အမြဲ ဟောပြောကြသည်။ သမ္မာတရား စည်းမျဉ်းများကို နည်းနည်းလေးမျှ လုံးဝ မလိုက်လျှောက်ကြပေ။ ချမ်းသာကြွယ်ဝသူများနှင့် ငွေရှိသောလူတို့ကို ဟောပြောလိုပြီး ဆင်းရဲသားများကို မဟောပြောလိုသော လူများစွာရှိသည်။ ၎င်းတို့သည် ချောမောလှပသော လူတို့ကို ဟောပြောလိုပြီး သာမန်ရုပ်ရည်ရှိသော လူတို့ကို မဟောပြောလိုကြပေ။ ၎င်းတို့နှင့် အဆင်ပြေသော လူတို့ကို ဟောပြောလိုပြီး ၎င်းတို့နှင့် မဆင်မပြေသော လူတို့ကို မဟောပြောလိုကြပေ။ အယူအဆ အနည်းငယ်ရှိသော လူတို့ကို ဟောပြောလိုပြီး အယူအဆ‌ မြောက်မြားစွာရှိသောသူတို့ကို မဟောပြောလိုကြပေ။ ဧဝံဂေလိဆောင်ကြဉ်းရန် လွယ်ကူသောလူများ၊ စကားများစွာ နားထောင်စရာမလိုဘဲ ဧဝံဂေလိတရားကို လက်ခံမည့်လူများကို ဟောပြောလိုကြသည်။ ပင်ပန်းနွမ်းနယ်လောက်အောင် စကားများစွာ ပြောစရာ လိုအပ်ပါက လူတို့ကို မဟောပြောလိုကြပေ။ ဥပမာဆိုရလျှင် အမျိုးသမီးတစ်ဦးသည် ဧဝံဂေလိဖြန့်‌ဝေနေပြီး ချမ်းသာသောမိသားစုမှဖြစ်ကာ အိမ်နှင့်ကား ပိုင်ဆိုင်သည့်၊ မိဘများက အလုပ်အကိုင်ကောင်းများ ရှိသည့်၊ တစ်ဦးတည်းသောသား ဖြစ်ကာ ရုပ်ရည်ချောမောသည့် အမျိုးသားတစ်ဦးကို တွေ့ဆုံသည်ဆိုပါစို့။ သူသည် ထိုသူ့ကို လက်ထပ်နိုင်လျှင် ချမ်းသာကြွယ်ဝသော ဘဝတစ်ခုကို နေထိုင်နိုင်လိမ့်မည်ဟု စဉ်းစားသောကြောင့် ထိုသူက လက်ခံလျှင် အလွန်ကောင်းမည်ဟု တွေးလျက် သူ့ကို ဧဝံဂေလိ ဟောကြားလိုသည်။ အခြားသောလူအချို့က ဤသူသည် သမ္မာတရားကို ရှာဖွေသူမဟုတ်၊ ဟောပြော၍ရမည့် သူတစ်ဦးမဟုတ်ဟု ဆိုလျက် သူ့ကိုဟန့်တားရန် ကြိုးစားလေသည်။ သို့သော် သူက “ကျွန်ုပ်တို့သည် သမ္မာတရားကို ပို၍မိတ်သဟာယပြုလျှင် သူသည် လက်ခံလာနိုင်ဖွယ်ရှိသည်။ ထိုသို့သော လူကောင်းတစ်ဦးကို ဧဝံဂေလိမဆောင်ကြဉ်းဘဲ သူ့ကို မကယ်တင်ပါက ဘုရားသခင်၏ အလိုတော်နှင့် ဆန့်ကျင်မည် မဟုတ်လော” ဟု ဆို၏။ အမှန်တွင် သူ၌ ကိုယ်ပိုင်ရည်ရွယ်ချက် ရှိလေသည်။ သူသည် ထိုသူအား ဘုရားသခင်၏ ရှေ့မှောက်သို့ ခေါ်ဆောင်လာဖို့အလို့ငှာ သိမ်းသွင်းရရှိဖို့ ကြိုးစားနေခြင်း မဟုတ်ဘဲ မိမိကိုယ်ကို ကြော်ငြာပြီး အစွံထုတ်လိုခြင်း ဖြစ်သည်။ များစွာ ဈေးကွက်တင်အပြီး နောက်ဆုံးတွင် သူလိုက်နေသည့်အရာကို ရသွားပြီး သူ၏ပန်းတိုင်အတွက် ထိုသူနှင့် ချစ်သံယောဇဉ်တစ်ခုကို ပုံဖော်နိုင်ခဲ့သည်။ ဤတွင် ပြဿနာမှာ အဘယ်နည်း။ သူပြုလုပ်သမျှတွင် ကိုယ်ပိုင်အကြောင်းရင်းများ ရှိကာ ယင်းက သမ္မာတရားစည်းမျဉ်းကို ချိုးဖောက်လေသည်။ အဆုံးတွင် သူသည် ထိုသူ့ထံ ဧဝံဂေလိတရား “ဆောင်ကြဉ်း” ဖို့အတွက် နည်းလမ်းအမျိုးမျိုးကို အသုံးပြုပြီး “ကျွန်ုပ်၏ ဧဝံဂေလိဖြန့်ဝေခြင်းအလုပ်၌ အကြီးမားဆုံး အောင်မြင်မှုမှာ ထိုမျှတူညီသော စိတ်ဓာတ်တစ်ခုကို တွေ့ရှိခြင်းဖြစ်သည်။ ဤသည်မှာ ဘုရားသခင်ထံမှ ကျွန်ုပ်လက်ခံရမည့် အရာတစ်ခုဖြစ်သည်။ လက်ထပ်ထိမ်းမြားခြင်းကို ဘုရားသခင် စီမံသည်။ ဤလူကို ကျွန်ုပ်တွေ့ဆုံပြီး လက်ထပ်ခဲ့သည်မှာ ဘုရားသခင်၏ စီမံခန့်ခွဲမှု လုံးလုံးဖြစ်သည်။ ဤသည်မှာ ဘုရားသခင်၏ မျက်နှာသာပေးခြင်းနှင့် ကောင်းချီးမင်္ဂလာ ဖြစ်သည်” ဟု ဆိုလျက် ထိုသူ့ကို လက်ထပ်လိုက်တော့သည်။ သူသည် ဆက်လက်၍ မိသားစုလေးတစ်ခုကို တည်ဆောက်ပြီး ပျော်ရွှင်စရာ ဘဝတစ်ခုဖြင့် နေထိုင်သွားတော့သည်။ သူသည် ဧဝံဂေလိ ဖြန့်ဝေနိုင်သေးသလော။ (မဖြန့်ဝေနိုင်တော့ပါ။) တစ်နှစ်နှစ်နှစ်ကြာပြီးနောက် သူသည် စိတ်ကြည်သောအခါ ရံဖန်ရံခါ သွား၍ ဧဝံဂေလိဖြန့်ဝေသော်လည်း မိသားစုဘဝ၌သာ အများဆုံးအချိန်ကုန်ပြီး သူ၏စိတ်နှလုံးမှာ တစ်ဖြည်းဖြည်းနှင့် ဗလာဖြစ်သွားသည်။ နောက်ဆုံးတွင် မိသားစုဘဝဟူသည် အိုးခွက်ပန်းကန်၊ စားသောက်ခြင်း၊ ဆော့ကစားခြင်းနှင့် ဆူညံပွက်ခြင်းသာလျှင် ဖြစ်ကြောင်း သူသဘောပေါက်လေသည်။ ယင်းတို့အားလုံးမှာ အဓိပ္ပာယ်ကင်းမဲ့သည်ဟု ခံစားရတော့သည်။ ပြန်လည်စဉ်းစားရင်း သူ့ကိုယ်သူ တွေးဆပြီး ဆင်ခြင်စဉ်းစားမိသည်မှာ “ဘုရားသခင်၌ ယုံကြည်ခြင်းမှာ အဓိပ္ပာယ်ရှိနေဆဲ ဖြစ်သည်။ နောက်ကြောင်းပြန်ပြီး ယုံကြည်ခြင်းကို ပြန်ဖော်ကာ ဧဝံဂေလိကို ဆက်၍ဖြန့်ဝေပါရစေ” ဟူ၍ဖြစ်သည်။ အဆုံးတွင် သူသည် သူ၏အတွေ့အကြုံများကို ဟိတ်ကြီးဟန်ကြီး ပုံစံဖြင့် ပြောပြကာ “လူကို ဘုရားသခင်က ဖန်ဆင်းခဲ့သောကြောင့် သူသည် ဘုရားသခင်ကို စွန့်ခွာ၍ မဖြစ်ပေ။ လူသည် ဘုရားသခင်မပါဘဲ အသက်မရှင်နိုင်ပေ။ ငါးတစ်ကောင်သည် ရေမပါလျှင် သေရမည်ဖြစ်သကဲ့သို့ လူက ဘုရားကို စွန့်ခွာပါက ထိုသူသည် အသက်တာထဲ၌ ရှေ့ဆက်ရမည့်လမ်း မရှိတော့မည်မှာ ဧကန်မုချဖြစ်၏။ ဤအတွက်ကြောင့် ကျွန်ုပ်ပြန်လှည့်လာရခြင်း ဖြစ်သည်။ ယင်းသည် ဘုရားသခင်က ကျွန်ုပ်ကို ခေါ်ဆောင်သောကြောင့် ဖြစ်၏” ဟု ဆိုလေသည်။ လုံးလုံး အရှက်ကင်းမဲ့ခြင်းပါတကား။ ပြန်လှည့်လာပြီးနောက် သူသည် သူ့တာဝန်ကို ဖြည့်ဆည်းမည်ဟု တောင်းဆိုလျက် “ကျွန်ုပ်သည် မိမိ၏တာဝန်ကို မလုပ်ဆောင်ပါက အလွန် အနှစ်သာရကင်းမဲ့၏။ လူတိုင်းက မိမိ၏တာဝန်ကို လုပ်ဆောင်ရမည်” ဟု ဆိုလေသည်။ သမ္မာတရားကို လက်တွေ့မလုပ်ဆောင်သည့်အပြင် သမ္မာတရားအား ချစ်မြတ်နိုးခြင်းမရှိသော လူတို့၏ စကားများက ယင်းတို့ကိုကြားရသော သူတို့ကို စက်ဆုပ်ရွံရှာစေသည်။ သင်သည် ဘုရားသခင်ကို မစွန့်ခွာနိုင်ဟု ဆိုသည်၊ သို့ဆိုလျှင် ဘုရားက သင့်အား အလိုရှိမရှိဟူသည်ကို သူ့အား အဘယ့်ကြောင့် မမေးသနည်း။ သင်သည် တာဝန်ကိုထမ်းဆောင်ခြင်း ဖြစ်စဉ်၌ လက်တွဲဖော်ရှာတွေ့ခဲ့ပြီးနောက် သင့်တာဝန်ကို ချထားပြီး ထွက်ပြေးသွားခဲ့သည်။ ဘုရားသခင်က ဤအရာကို လိုက်လျောခြင်း ရှိမရှိကိုလည်းကောင်း၊ သူ၏ သဘောထားကို သိရှိရရန်အတွက်လည်းကောင်း သူ့ကို အဘယ့်ကြောင့် မမေးခဲ့သနည်း။ သင်သည် သင်၏တာဝန်များကို ဖြည့်ဆည်းခဲ့သလော။ သင့်အား ဘုရားသခင်ပေးအပ်ခဲ့သော တာဝန်ပေးစေခိုင်းချက်ကို သင် ဖြည့်ဆည်းခဲ့သလော။ သင်သည် ဘုရားသခင်ကို ဘုရားသခင်အဖြစ် သဘောထားခဲ့သလော။ သင်သည် သင့်တာဝန်ကို သင့်တာဝန်အဖြစ် ရှုမြင်ခဲ့သလော။ ဤမေးခွန်းများ အားလုံးအတွက် အဖြေမှာ ထိုသို့မပြုခဲ့ဟူသည်ပင်။ ဘုရားသခင်သည် သင့်အတွက် မည်သည့်အရာဖြစ်သနည်း။ သူသည် လမ်းဘေးက သင်တွေ့ဆုံခဲ့သော သူငယ်ချင်းတစ်ဦးပင်။ သူ့ကို သင်ကြိုဆိုနှုတ်ဆက်ပြီးနောက် ချက်ချင်းပင် သူငယ်ချင်း ဖြစ်ကြပြီဟု သင်ထင်သည်။ သင့်အကျိုးစီးပွားအတွက် အသုံးတည့်ပါက သူနှင့်အတူ ဆက်တွဲသွားသော်လည်း သင့်အကျိုးကျေးဇူးအတွက် မဟုတ်ပါက သင်လမ်းခွဲသည်။ သို့သော် သူ့ကို သင်အလိုရှိသောအခါ သူ့ကို သတိရပြန်သည်။ ဤသည်မှာ သင်ထားရှိသည့် ဆက်ဆံရေးမျိုးပင် ဖြစ်၏။ သင်သည် ဘုရားသခင်ကို တစ်ချိန်က သိကျွမ်းခဲ့သည့် သူငယ်ချင်းတစ်ဦးအဖြစ် မှတ်ယူပါက ဘုရားသခင်က သင့်ကို မည်သို့ထင်မည်နည်း။ သင့်ကို ဘုရားသခင် မည်သို့ ဆက်ဆံမည်နည်း။ သင်သည် ဝမ်းနည်းနေပြီး သင်၏နေ့ရက်များက အနှစ်မဲ့နေသောကြောင့် ဘုရားသခင်ကို သင်အလိုရှိသည်။ သင်သည် ပြန်လှည့်လာပြီး သင့်တာဝန်ကို ထမ်းဆောင်လိုသည်။ ဘုရားသခင်က သင့်အား တာဝန်တစ်ခုကို ထိုသို့ သာမန်ကာလျှံကာ ပေးမည်လော။ (ပေးမည်မဟုတ်ပါ။) အဘယ့်ကြောင့် မပေးမည်နည်း။ သင်သည် မထိုက်တန်ပါချေ။ ဤကဲ့သို့သော လူတို့သည် ဘုရားသခင်၌ ယုံကြည်လာပြီးပြီးချင်း ၎င်းတို့၏ တာဝန်များကို ထမ်းဆောင်နိုင်သော်လည် တာဝန်များကို မပြီးမြောက်မီ မည်သည့်သတိပေးချက်မျှမရှိဘဲ ဘုရားသခင်ကို စွန့်ပစ်မည်ဖြစ်ကာ မိမိတို့၏ ရာထူးနေရာများကို ချန်ရစ်ထားပြီး မိမိတို့၏အလုပ်ကို စွန့်ခွာသွားမည်ဖြစ်သည်။ ဤအရာကို ဘုရားသခင်က မည်သို့ရှုမြင်သနည်း။ ဤအပြုအမူ၏ သဘာဝမှာ အဘယ်နည်း။ (သစ္စာဖောက်ဖျက်ခြင်း ဖြစ်သည်။) သစ္စာဖောက်ဖျက်ခြင်းမှာ သေးငယ်သောကိစ္စ မဟုတ်ချေ။ ထိုသို့သောလူတို့သည် ထွက်ပြေးသူများပင်။ ထွက်ပြေးသူများက မိမိတို့၏တာဝန်ကို မည်သို့ထမ်းဆောင်သနည်း။ ၎င်းတို့သည် တာဝန်ထမ်းဆောင်ခြင်းဟူသည့် ခေါင်းစဉ်အောက်တွင် ၎င်းတို့၏ ကိုယ်ကျိုးကိုသာ ရှာဖွေကြသည်။ ၎င်းတို့သည် မိမိတို့၏ တာဝန်များကို ထမ်းဆောင်ဖို့ဟူသည့် မူလရည်မှန်းချက်ကို ချိုးဖောက်ရင်း မိမိတို့၏ကိုယ်ပိုင် အနာဂတ်နှင့် အသက်မွေးမှုကို ကာကွယ်ရန်အတွက် အစီအစဉ်များ ရေးဆွဲကြသည်။ နောက်ဆုံးတွင် မိမိတို့၏တာဝန်ကို ထမ်းဆောင်နေစဉ်အတွင်း ထွက်ပြေးသွားကြကာ မိမိတို့ကိုယ်ကို ထွက်ပြေးသူများ ဖြစ်စေကြသည်။ ထိုသို့သောလူတစ်ဦးသည် ဘုရားသခင်အဖို့ ရိုးသားမှန်ကန်သော စိတ်နှလုံးဖြင့် မိမိကိုယ်ကို အသုံးမခံကြပေ။ ထိုအစား ၎င်းတို့၌ ၎င်းတို့၏တစ်ကိုယ်ရေ ရည်မှန်းချက်များနှင့် ရည်ရွယ်ချက်များရှိပြီး ဘုရားသခင်ကို လှည့်စားရန် ကြိုးစားကာ၊ နောက်ဆုံးတွင် မိမိတို့၏ ဇာတိရုပ်အမှန်ကို ထုတ်ဖော်ကြသည်။ ဤလူတို့သည် ဘုရားသခင်ကို သစ္စာဖောက်သောသူများ မဟုတ်သလော။ လူအချို့က “ဘုရားသခင်၏အိမ်တော်၌ ဝင်ထွက်သွားလာဖို့ရန် လွတ်လပ်မှုမရှိသလော” ဟု ဆိုကြသည်။ ဝင်ထွက်သွားလာဖို့ရန် လွတ်လပ်မှုရှိသည်မှာ မှန်သော်လည်း လူတစ်ဦးသည် ဘုရားသခင်၏အိမ်တော်သို့ ဝင်ရောက်သောအခါ စစ်ဆေးခြင်းခံရမည်။ သင်သည် ဘုရားသခင်၏ အိမ်တော်ကို လွတ်လပ်စွာ စွန့်ခွာနိုင်ပြီး သင့်ကို မည်သူမျှ မတားဆီးပေ။ သို့ရာတွင် ဘုရားသခင်၏အိမ်တော်သို့ ပြန်လှည့်လာလိုပါက သိပ်မလွယ်ကူချေ။ သင်၏နောင်တရခြင်းသည် စစ်မှန်ကြောင်း သက်သေပြရန် အဆင့်အားလုံးရှိ အသင်းတော်၏ ခေါင်းဆောင်များနှင့် အမှုဆောင်များ၏ စစ်ကြောခြင်းနှင့် စစ်ဆေးခြင်းကို ခံရမည်။ ထိုမှသာ သင့်ကို လက်ခံမည်ဖြစ်သည်။ ထို့အတွက်ကြောင့် ထွက်သွားရန် လွယ်ကူသော်လည်း ပြန်ဝင်ရန် ခက်ခဲလေသည်။ လူအချို့သည် ဧဝံဂေလိဖြန့်ဝေရသည်ကို အလွန်ခက်ခဲသည်ကို သိရှိရပြီးပြီး လွန်စွာ ဒုက္ခခံစားကြရသဖြင့် ၎င်းတို့၏ ဝန်ထုပ်များကို ပစ်ချကာ ထွက်ပြေးသွားကြသည်ဟု ငါကြားသိခဲ့ရသည်။ ဤတွင် ပြဿနာမှာ အဘယ်နည်း။ ၎င်းတို့က ထွက်ပြေးသူများ ဖြစ်ကြခြင်းပင်။ ဧဝံဂေလိဖြန့်ဝေခြင်း၌ လုပ်ဆောင်သောအခါ အရေးကြီးဆုံးမှာ အဘယ်နည်း။ ဧဝံဂေလိဖြန့်ဝေသူတိုင်း၊ အထူးသဖြင့် အရေးကြီးသော ရာထူးနေရာအတွက် တာဝန်ရှိသောလူများသည် ဘုရားသခင်၏အမြင်၌ အရေးကြီးသော အခန်းကဏ္ဍရှိသည်။ သင်သည် ဧဝံဂေလိဖြန့်ဝေရာတွင် အရေးကြီးသောအပိုင်း၌ ပါဝင်နေပြီး ဘုရားသခင်၏ ခွင့်ပြုချက်မပါဘဲ သင်၏နေရာကို ပစ်ထားပါက ပို၍ကြီးမားသော ပြစ်မှားခြင်းမရှိတော့ပေ။ ယင်းသည် ဘုရားသခင်ကို သစ္စာဖောက်ဖျက်သည့် လုပ်ရပ်တစ်ခုအဖြစ် ယူဆရမည် မဟုတ်လော။ (ဟုတ်ပါသည်။) သို့ဆိုလျှင် သင်တို့၏အမြင်တွင် ဘုရားသခင်သည် ထွက်ပြေးသူများကို မည်ကဲ့သို့ သဘောထားသင့်သနည်း။ (၎င်းတို့ကို ဘေးဖယ်ထားသင့်သည်။) ဘေးဖယ်ခံရခြင်းသည် လျစ်လျူရှုခံရခြင်းကို ဆိုလိုကာ သင်၏စိတ်ကြိုက်ပြုလုပ်ရန် ချန်ရစ်ထားခြင်းဖြစ်သည်။ အကယ်၍ ဘေးဖယ်ထားခြင်း ခံရသောသူတို့သည် နောင်တရပါက ၎င်းတို့၏ သဘောထားသည် အလုံအလောက် နောင်တရကြောင်း ဘုရားသခင်က တွေ့မြင်ပြီး ၎င်းတို့ကို ပြန်လာစေချင်ဦးမည်မှာ ဖြစ်နိုင်သည်။ သို့သော် မိမိတို့၏တာဝန်ကို ပစ်ထားသောသူတို့၊ ဤသို့သောသူတို့ အ‌ပေါ်၌သာလျှင် ဘုရားသခင်သည် ဤသဘောထား မရှိပေ။ ဘုရားသခင်သည် ထိုသို့သောလူတို့ကို မည်သို့ ပြုမူဆက်ဆံသနည်း။ (ဘုရားသခင်သည် ၎င်းတို့ကို မကယ်တင်ပေ။ ၎င်းတို့ကို စက်ဆုပ်ရွံရှာပြီး ငြင်းပယ်သည်။) ယင်းမှာ လုံးဝ မှန်ကန်ပေသည်။ ပို၍အတိအကျဆိုရလျှင် အရေးကြီးသော တာဝန်တစ်ခုကို ထမ်းဆောင်ရသော သူတို့ကို ဘုရားသခင်မှ တာဝန်ပေးစေခိုင်းထားခြင်းဖြစ်ပြီး ၎င်းတို့သည် မိမိတို့၏ရာထူးနေရာကို ပစ်ထားပါက ၎င်းတို့ ယခင် သို့မဟုတ် နောက်ပိုင်း၌ အဘယ်မျှ ကောင်းစွာ လုပ်ဆောင်ခဲ့ပါစေ၊ ဘုရားသခင်အတွက်မှာမူ ၎င်းတို့သည် သူ့ကို သစ္စာဖောက်သွားခဲ့သော လူတို့ဖြစ်ကြပြီး ၎င်းတို့ကို တာဝန်ထမ်းဆောင်ဖို့ အခွင့်အရေး မည်သည့်အခါမျှ နောက်ထပ် ပေးတော့မည်မဟုတ်ပေ။ နောက်ထပ်အခွင့်အရေး မပေးတော့ ဆိုသည်မှာ မည်သည့်အရာကို ဆိုလိုသနည်း။ သင်က “ကျွန်ုပ်သည် အလွန်ပင် နောင်တရသည်။ ဘုရားသခင်ကို ကျွန်ုပ် အကြွေးတင်သွားပြီဖြစ်သည်။ ကျွန်ုပ်သည် အစကနဦးတွင် ထိုကဲ့သို့သော ရွေးချယ်မှုကို မပြုလုပ်ခဲ့သင့်ပေ။ ထိုအချိန်တုန်းက ကျွန်ုပ်သည် ညှို့ယူဆွဲဆောင်ခံခဲ့ရပြီး လမ်းလွဲခဲ့ကာ ယခုတွင် ယင်းကို နောင်တရသည်။ ကျွန်ုပ်ပြုမိခဲ့သော အရာအတွက် နောင်တရဖို့ အခွင့်အရေးရရန်အလို့ငှာ ကျွန်ုပ်၏တာဝန်ကို ချီးမွမ်းထိုက်သော လုပ်ဆောင်ချက်များဖြင့် ထမ်းဆောင်ပြီး ကျွန်ုပ်၏အမှားများကို ပြန်၍ထေမိစေဖို့ နောက်ထပ် အခွင့်အရေးပေးရန် ဘုရားသခင်ကို ကျွန်ုပ် အသနားခံ တောင်းပန်ပါသည်” ဟု ဆိုလျှင် ဘုရားသခင်သည် ဤကိစ္စကို မည်ကဲ့သို့ ကိုင်တွယ်ဖြေရှင်းမည်နည်း။ သင်၌ အခွင့်အရေးမရှိဟု ဘုရားသခင်ဆိုသည့်အတိုင်း သူသည် သင့်ကို နောက်ထပ် မည်သည့်အခါမျှ ဂရုပြုမည်မဟုတ်ပေ။ ဤသည်မှာ ထွက်ပြေးသူများအပေါ် ဘုရားသခင်၏ သဘောထားဖြစ်၏။ သာမန်ပြစ်မှားခြင်းများကို ကျူးလွန်သော လူတို့ကို ကိုင်တွယ်ဖြေရှင်းသည့်အခါ ဘုရားသခင်က ယင်းသည် တဒင်္ဂ ပြစ်မှားခြင်းဖြစ်သည်၊ သို့မဟုတ် ယင်းသည် ဖီလာဆန့်ကျင်သော ပတ်ဝန်းကျင်၊ သေးငယ်သော ဝိညာဉ်ရင့်ကျက်မှု၊ သမ္မာတရားအား သိနားလည်ခြင်းကင်းမဲ့မှု၊ သို့မဟုတ် ထိုသို့သော အခြားအကြောင်းရင်းတစ်ခုခုကြောင့် ဖြစ်သည်ဟု ဆိုကောင်းဆိုမည်။ ဤသို့ဖြစ်လျှင် ဘုရားသခင်သည် ၎င်းတို့ကို နောင်တရရန် အခွင့်အရေး ပေးကောင်းပေးမည်။ သို့ရာတွင် ထွက်ပြေးသူများအတွက်မူကား ဘုရားသခင်သည် ဒုတိယအခွင့်အရေး မပေးပါချေ။ လူတချို့က “ဘုရားသခင်သည် ဒုတိယအခွင့်အရေး မပေးဟူသည်မှာ မည်သည့်အရာကို ဆိုလိုသနည်း။ ထိုသူတို့သည် မိမိတို့၏ တာဝန်ကို ဖြည့်ဆည်းလိုလျှင် ဘုရားသခင်က ဤအရာကို ခွင့်မပြုဘဲ နေရမည်လော” ဟု ဆိုကြသည်။ သင်သည် သင့်တာဝန်ကို ဖြည့်ဆည်းနိုင်သည်၊ ဧဝံဂေလိဖြန့်ဝေနိုင်သည်၊ တရားဒေသနာများကို နားထောင်ပြီး အသင်းတော်၌လည်း ပါဝင်နိုင်သည်။ အသင်းတော်က သင့်နာမည်ကို အသင်းသားစာရင်းထဲမှ ဖယ်ရှားမည် မဟုတ်သော်လည်း ဘုရားသခင်အနေဖြင့် သင်သည် သင်၏တာဝန်ကို မည်သို့ထမ်းဆောင်ပြီး မည်သို့နောင်တရသည်ဖြစ်စေ သူ့အတွက် သင် အစေခံမှု ပေးနေလင့်ကစား ဘုရားသခင် သင့်ကို အလိုမရှိသကဲ့သို့ သဘောကျမည်လည်း မဟုတ်ပေ။ ဤသည်မှာ ဘုရားသခင်၏ သဘောထားဖြစ်၏။ လူအချို့က ဤကိစ္စရပ်ကို နားမလည်နိုင်ဘဲ “ဘုရားသခင်သည် ဤကဲ့သို့သော လူစားမျိုးကို ကိုင်တွယ်ဖြေရှင်းရာတွင် အဘယ့်ကြောင့် လွန်စွာ အကြင်နာကင်းမဲ့ပြီး ပြတ်သားရသနည်း” ဟု ဆိုကြရန် ဖြစ်နိုင်ချေရှိသည်။ လူသည် ဤကိစ္စကို နားလည်စရာ မလိုအပ်ပေ။ ဤသည်မှာ ဘုရားသခင်၏ စိတ်သဘောထား ဖြစ်သည်။ ဤသည်မှာ ဘုရားသခင်၏ သဘောထားဖြစ်သည်။ သင်သည် ကြိုက်သလို ထင်နိုင်သည်။ ဘုရားသခင်၌ ဆုံးဖြတ်ရန် အခွင့်အာဏာရှိ၏။ သူသည် ဤပုံစံအတိုင်း ပြုမူလုပ်ဆောင်ရန်နှင့် ဤကိစ္စကို ဤကဲ့သို့ ကိုင်တွယ်ဖြေရှင်းရန် အခွင့်အာဏာရှိ၏။ လူတစ်ဦးတလေသည် မည်သည့်အရာကို လုပ်ဆောင်နိုင်မည်နည်း။ လူတို့က ကန့်ကွက်နိုင်သလော။ အစကတည်းက မှန်သောလမ်းကြောင်းကို မလိုက်လျှောက်ဖို့၊ ဘုရားသခင်ကို သစ္စာဖောက်ပြီး ထွက်ပြေးသူတစ်ဦး ဖြစ်လာဖို့ သင့်ကို မည်သူပြောခဲ့သနည်း။ ဧဝံဂေလိဖြန့်ဝေခြင်းအလုပ်ကို လူတစ်ဦးတည်းဖြင့် မပြီးမြောက်နိုင်၊ လူများစွာ လိုအပ်သည်။ သင်သည် သင့်တာဝန်ကို မလုပ်ဆောင်နိုင်လျှင် ဘုရားသခင်က လုပ်ဆောင်နိုင်သော အခြားလူကို ရွေးချယ်လိမ့်မည်။ အကယ်၍ သင်သည် ပူးပေါင်းဆောင်ရွက်ခြင်း မရှိသည့်အပြင် သင့်တာဝန်ကို မဖြည့်ဆည်းပါက ယင်းက သင်သည် မျက်စိကန်းနေကြောင်း သက်သေပြသည်။ ယင်းက သင်သည် နားဝေတိမ်တောင် ဖြစ်နေပြီး မိုက်မဲနေကြောင်း သက်သေပြသည်။ ဤသည်မှာ ကောင်းချီးမင်္ဂလာဖြစ်သည်ကို သင်မသိသောကြောင့် သင်သည် ဤကောင်းချီးကို ရရှိမည်မဟုတ်ပေ။ သင် သွားသာသွားသင့်ပြီ။ သင်သည် ထွက်သွားသော်လည်း ခဏကြာပြီးနောက် ပြန်လာပါက သင့်ကို ဘုရားသခင် အလိုရှိနေသေးမည်လော။ ရှိမည် မဟုတ်တော့ပေ၊ ဘုရားသခင်က ဂရုမစိုက်တော့ချေ။ ဤသည်မှာ ထွက်ပြေးသူများအပေါ်၌သာလျှင် ဘုရားသခင် ထားရှိသော သဘောထားဖြစ်သည်။ လူအချို့က “ကျွန်ုပ်သည် ပြန်လာပြီး မိမိ၏တာဝန်ကို ထမ်းဆောင်ပြီးနောက် သန့်ရှင်းသော ဝိညာဉ်တော်၏ ဉာဏ်အလင်းပေးခြင်းကို ခံရသည်” ဟု ပြောကြသည်။ သင်သည် ပထမဆုံးအကြိမ် တာဝန်ထမ်းဆောင်နေခဲ့သည့် အချိန်က ခွင့်မရှိဘဲ ထွက်ပြေးသွားခဲ့သည့်အပြင် သန့်ရှင်းသောဝိညာဉ်တော်က သင့်ကို မတားဆီးခဲ့ပေ။ ယခုတွင်မူ သင်သည် ပြန်ရောက်နေသည်ဖြစ်၍ သန့်ရှင်းသောဝိညာဉ်တော်က သင့်ကို ဉာဏ်အလင်း ပေးနိုင်သေးသလော။ သင်၏ စိတ်ကူးယဉ်ခံစားချက်များမှနေ၍ ရေးကြီးခွင်ကျယ် လုပ်မနေနှင့်။ ဘုရားသခင်သည် သူ၏အလိုတော်နှင့် ဆန့်ကျင်၍ မည်သည့်အရာကိုမျှ ပြုလုပ်မည် မဟုတ်ဘဲ၊ သူ၌ အယောက်စီတိုင်းကို ကိုင်တွယ်ဖြေရှင်းရာ၌ စည်းမျဉ်းများရှိသည်။ ဤတွင် လူတို့အတွက် သတိပေးချက်မှာ အဘယ်နည်း။ သင်သည် သင့်တာဝန်၌ မဆုတ်မနစ်ကြိုးစားရမည်၊ သင်၏ရပ်တည်ချက်ကို ထိန်းသိမ်းထားပြီးလျှင် သင်၏တာဝန်များကို ဖြည့်ဆည်းရမည်။ ထိုသို့ ထွက်ပြေးသူများအပေါ် ဘုရားသခင်၏ သဘောထားက ပြင်းထန်လွန်းသလော။ (မပြင်းထန်လွန်းပါ။) အဘယ်ကြောင့် မပြင်းထန်လွန်းဟု ပြောသနည်း။ ဤအရာက မပြင်းထန်လွန်းဟု သင်တို့ မည်သို့နားလည်သနည်း။ လူတစ်ဦးသည် မည်သည့်တာဝန်ကို ဖြည့်ဆည်းသည်ဖြစ်စေ လက်ရှိကာလတွင် လူတစ်ဦးစီလုပ်‌ဆောင်သည့် တာဝန်တစ်ခုစီ၌ ဘုရားသခင် စီမံထားသည့်အရာနှင့် ဆက်စပ်မှုရှိသလော။ ယင်းတို့မှာ နီးကပ်စွာ ဆက်စပ်နေသည်။ ယင်းကို ဤပုံစံအတိုင်းကြည့်ပါက သင်သည် သင့်တာဝန်ကို ထမ်းဆောင်နိုင်လျှင် ယင်းသည် ဘုရားသခင်က အလုပ်များစွာကို လုပ်ဆောင်ပြီးပြီဟု ဆိုလိုသလော။ ဘုရားသခင်သည် သင့်အား ကမ္ဘာကြီးကို ဖန်ဆင်းခဲ့ကတည်းက ကြိုတင်ပြဋ္ဌာန်းထားပြီဖြစ်သည်။ သူသည် သင်မွေးဖွားမည့် ခေတ်နှင့် ကာလ၊ သင်မွေးဖွားလာမည့် မိသားစုမျိုး၊ သင့်မိသားစုက သင့်အပေါ်ထားရှိသည့် လွှမ်းမိုးမှု၊ ဘုရားသခင်က သင်ထမ်းဆောင်ရန် သတ်မှတ်သည့်တာဝန်နှင့် သင့်အနေဖြင့် လေ့လာရန် ကြိုတင်၍ ခွင့်ပြုထားသည့်အရာများကို ကြိုတင်ပြဋ္ဌာန်းထားပြီဖြစ်သည်။ သာဓကအားဖြင့် သင်သည် နိုင်ငံခြားဘာသာစကားတစ်ခုကို လေ့လာပြီးပါက ယခု သင်သည် သင့်တာဝန်ကို အောင်မြင်စွာ လုပ်ဆောင်ရန် အခွင့်ပေးသည့် ဤအရည်အချင်း၊ ဤပါရမီကို ပိုင်ဆိုင်လေသည်။ ဘုရားသခင်သည် ပြင်ဆင်မှုတွင် အလုပ်များစွာကို ပြုလုပ်ထားပြီး ဖြစ်သည်။ ဘုရားသခင်သည် ထိုသို့သော ပြင်ဆင်မှုများကို မည်သည့်ရည်ရွယ်ချက်ဖြင့် ပြုလုပ်သနည်း။ ယင်းမှာ သင်သည် လူပုံအလယ်တွင် ထင်ပေါ်နိုင်ရန်အတွက် ဖြစ်သလော။ ယင်းမှာ သင်သည် လောကီကို လိုက်စားပြီး စာတန်ကို အစေခံနိုင်ရန်အတွက် ဖြစ်သလော။ လုံးဝမဟုတ်ချေ။ ဘုရားသခင်သည် သင့်အားပေးထားသည့် အရာများကို သူ၏အိမ်တော်ထဲတွင်၊ ဘုရားသခင်၏ ဧဝံဂေလိတရား ဖြန့်ဝေခြင်းတွင်၊ ထို့အပြင် ဘုရားသခင်၏ စီမံခန့်ခွဲမှု အစီအစဉ်ထဲတွင် ဆက်ကပ်စေချင်သည်။ သို့ရာတွင် သင်သည် ဘုရားသခင် သင့်အားပေးထားသည့် အရာကို မဆက်ကပ်နိုင်ဘဲ၊ ထိုအစား စာတန်ကို အစေခံပါက ဘုရားသခင် မည်သို့ခံစားရမည်နည်း။ ဤအရာကို ဘုရားသခင် မည်ကဲ့သို့ ကိုင်တွယ်ဖြေရှင်းမည်နည်း။ ဤအရာကို သူ၏ စိတ်သဘောထားနှင့်အညီ မည်သို့ကိုင်တွယ်သင့်သနည်း။ ဘုရားသခင်သည် သင့်ကို တစ်ချက်တည်းဖြင့် သူ့ထံမှ ကန်ထုတ်ပစ်လိမ့်မည်။ သင့်ကို သူအလိုမရှိပေ။ သင်သည် သူ၏ သနားကြင်နာမှုကို မေ့လျော့ပြီး သူ၏စိတ်ချယုံကြည်မှုကို သစ္စာဖောက်သည်။ သင်သည် သင်၏ဖန်ဆင်းရှင်ကို အသိအမှတ်မပြုချေ၊ သို့မဟုတ် လှည့်ပြန်၍လည်း မလာချေ။ သင်သည် ဘုရားသခင် သင့်အား ပေးထားသည့်အရာကို သူ့အတွက် မဆက်ကပ်ဘဲ ထိုအစား စာတန်အတွက် ဆက်ကပ်လေသည်။ ဤသည်မှာ ပြင်းထန်သော သစ္စာဖောက်မှုဖြစ်ပြီး ဘုရားသခင်သည် ထိုသို့သော သစ္စာဖောက်တစ်ဦးကို အလိုမရှိပေ။

လူသားမျိုးနွယ်အား ကယ်တင်ခြင်းနှင့် ပတ်သက်သော ဘုရားသခင်၏အလုပ်တွင် လူတစ်ဦးစီက ပိုင်ဆိုင်သည့် အရည်အချင်းများသည် သူထမ်းဆောင်သင့်သည့် တာဝန်အား ဖြည့်ဆည်းခြင်းဟူသည့် အလုပ်တာဝန်အတွက် သူ့ကို ဖြည့်ဆည်းပံ့ပိုးပေးသည်။ ထို့ပြင် ဘုရားသခင်ကို ယုံကြည်လာပြီးနောက် သူရရှိသည့် အတွေ့အကြုံနှင့် အသိပညာသာမက သူနားလည်သည့် သမ္မာတရားများ အားလုံးကို သူ၏တာဝန်အား ဖြည့်ဆည်းဖို့အတွက် အသုံးပြုရမည်။ ဤနည်းအားဖြင့်သာ လူတို့သည် နိုင်ငံတော်၏ ဧဝံဂေလိတရားအား ဖြန့်ဝေခြင်းအလုပ်အဖို့ ၎င်းတို့၏ အညတရ အားထုတ်ကြိုးပမ်းမှုဖြင့် ဖြည့်ဆည်းပံ့ပိုးနိုင်သည်။ ဤအညတရ အားထုတ်ကြိုးပမ်းမှုမှာ အဘယ်နည်း။ ယင်းမှာ လူတစ်ဦး ဖြည့်ဆည်းသင့်သည့် တာဝန်ဖြစ်၏။ သင့်အနေဖြင့် တာဝန်ကို ကောင်းစွာ ထမ်းဆောင်နိုင်ရန်အလို့ငှာ ဘုရားသခင်သည် သင့်အား သမ္မာတရားကို နားလည်ရန်၊ ဉာဏ်ရည်နှင့် ဉာဏ်ပညာကို ပိုင်ဆိုင်ရန် အခွင့်ပေးသည်။ ဤသည်မှာ သင့်အသက်တာ၏ တန်ဖိုးနှင့် အဓိပ္ပာယ်ပင် ဖြစ်သည်။ ဤတန်ဖိုးနှင့် အဓိပ္ပာယ်အတိုင်း သင် အသက်ရှင်နေထိုင်ခြင်း မရှိလျှင် ဘုရားသခင်၌ သင်၏ယုံကြည်ခြင်းမှ မည်သည့်အရာမျှ သင်မရရှိသေးကြောင်း ယင်းက သက်သေပြသည်။ သင်သည် ဘုရားသခင်၏အိမ်တော်၌ အသုံးမဝင်သော ဗြုတ်စဗျင်းတောင်း ဖြစ်လာပေပြီ။ အကယ်၍ သင် အသက်ရှင်နေထိုင်သည့် အရာမှာ စာတန်နှင့် ဇာတိပကတိဖြစ်ပါက ဘုရားသခင် သင့်ကို အလိုရှိနိုင်ဦးမည်လော။ သင့်အသက်တာ၏ တန်ဖိုးနှင့် အဓိပ္ပာယ်မှာ သွားလေပြီ။ ဘုရားသခင်၏ အမြင်တွင် သင်သည် သူ၏အိမ်တော်မှ ပျောက်ကွယ်သွားပြီး ထာဝစဉ်သာ ပျောက်ကွယ်သွားသင့်ပေသည်။ သင့်ကို သူ နောက်ထပ် အလိုမရှိတော့ပေ။ ထိုမျှမက ဘုရားသခင်၏ စီမံခန့်ခွဲမှုအလုပ် တိုးချဲ့ခြင်းကာလတွင် ဘုရားသခင်နောက် လိုက်သောသူတိုင်းက မိမိတို့၏တာဝန်ကို ထမ်းဆောင်နေကြပြီး ၎င်းတို့အားလုံးသည် အဆင်းနီသော နဂါးကြီး၏ နှိမ်နင်းခြင်းနှင့် ရက်စက်သော နှိပ်စက်ညှဉ်းပန်းခြင်းကို အကြိမ်ကြိမ် တွေ့ကြုံခဲ့ပြီး ဖြစ်သည်။ ဘုရားသခင်၏ နောက်လိုက်ခြင်း လမ်းကြောင်းသည် ကြမ်းတမ်းပြီး မချောမွေ့သည့်အပြင် အလွန်အမင်း ခက်ခဲသည်။ နှစ်နှစ်သုံးနှစ်မက ဘုရားသခင်နောက် လိုက်ခဲ့ပြီးသူ မည်သူမဆိုသည် ဤအရာကို မိမိတို့ကိုယ်တိုင် တွေ့ကြုံခဲ့ပြီးဖြစ်လိမ့်မည်။ လူတစ်ဦးစီတိုင်း ထမ်းဆောင်သည့် တာဝန်သည် သတ်မှတ်ထားသော တာဝန်ဖြစ်စေ သို့မဟုတ် ယာယီစီစဉ်မှုဖြစ်စေ ဘုရားသခင်၏ အချုပ်အခြာအာဏာနှင့် စီစဉ်မှုများမှ လာခြင်းဖြစ်သည်။ လူတို့သည် မကြာခဏ အဖမ်းခံရကောင်း ခံရနိုင်ပြီး အသင်းတော်၏ အလုပ်သည် နှောင့်ယှက်ခြင်းနှင့် ဖျက်ဆီးခြင်းကို ခံကောင်း ခံရနိုင်သည်။ ပြီးလျှင် တာဝန်များကို ထမ်းဆောင်ရမည့် လူတို့၊ အထူးသဖြင့် လူနည်းစုထဲတွင်ရှိသည့် အရည်အချင်းကောင်းများနှင့် အတတ်ပညာဆိုင်ရာ ကျွမ်းကျင်မှုတို့ရှိသော လူများ သိသိသာသာ ပြတ်လပ်မှု ရှိကောင်းရှိမည်။ သို့သော် ဘုရားသခင်၏ ဦးဆောင်မှုကြောင့်၊ သူ၏ ဘုန်းတန်ခိုးနှင့် ဩဇာအာဏာကြောင့် ဘုရားသခင်၏အိမ်တော်သည် အခက်ခဲဆုံး ကာလများထဲမှ ပေါ်ထွက်လာပြီးဖြစ်ကာ ယင်း၏အလုပ်အားလုံးမှာ လမ်းကြောင်းမှန်ပေါ်သို့ ရောက်ရှိနေပြီဖြစ်သည်။ လူ့အနေဖြင့် ဤအရာသည် မဖြစ်နိုင်သည့်ပုံပေါက်သော်လည်း ဘုရားသခင်အနေဖြင့် မည်သည့်အရာမျှ ဖြစ်မြောက်အောင်မြင်ရန် မခက်ခဲပေ။ ဘုရားသခင်ပေါ်ထွန်းလာပြီး စတင်အမှုပြုခဲ့ကတည်းက လက်ရှိအချိန်တိုင်အောင် နှစ်ပေါင်းသုံးဆယ်ကာလကို မုန်တိုင်းများနှင့် အတိဒုက္ခမျိုးစုံအားဖြင့် အမှတ်သညာပြုထားသည်။ ဘုရားသခင်၏ ဦးဆောင်မှုနှင့် လူတို့အား ယုံကြည်ခြင်းနှင့် ခွန်အားဖြင့် ပြည့်ဝစေသည့် သူ၏ နှုတ်ကပတ်တော်များကြောင့်သာ မဟုတ်ခဲ့လျှင် ယခုအတိုင်းအတာထိ မည်သူမျှ ကျော်လွှားနိုင်ခဲ့မည် မဟုတ်ချေ။ ဘုရားသခင်ရွေးကောက်ထားသော လူတို့အားလုံးသည် ဤအရာကို ကိုယ်တိုင်ကိုယ်ကျ တွေ့ကြုံခဲ့ပြီးဖြစ်သည်။ ဘုရားအိမ်တော်၏ မည်သည့်အလုပ်ကမျှ ချောမွေ့စွာ ဖြစ်မြောက်ခြင်းမရှိ၊ ယင်းတို့အားလုံးသည် သုညမှ အစပြုခဲ့ပြီး ကြီးမားသော အခက်အခဲဖြင့် လုပ်ဆောင်ခဲ့ရကာ ဒုက္ခများဖြင့် ပတ်ချာဝိုင်းခဲ့သည်။ ဤသည်မှာ အဘယ့်ကြောင့်နည်း။ ယင်းမှာ ငါတို့သည် အဆင်းနီသော နဂါးကြီး အစိုးရ၏ သွေးရူးသွေးတန်း နှိမ်နင်းခြင်းနှင့် နှိပ်စက်ညှဉ်းပန်းခြင်းကိုသာမက ဘာသာရေး အသိုင်းအဝိုင်း တစ်ခုလုံးနှင့် ဖောက်ပြန်ပျက်စီးသော လူသားမျိုးနွယ်၏ ခွဲခြားဆက်ဆံခြင်း၊ အသရေဖျက်မှုနှင့် ပြစ်တင်ရှုတ်ချခြင်းကိုလည်း ရင်ဆိုင်ရကာ ခေတ်ကာလတစ်ခုလုံးကပင် ငါတို့ကို ပစ်ပယ်ပြီး ဟန့်တားလေသည်။ ဘုရားသခင်၏ စီမံခန့်ခွဲမှုအလုပ်အားလုံးသည် စာတန်၏ ဆိုးယုတ်သော ရေစီးကြောင်းများဖြင့် ပြည့်နှက်နေသော ပတ်ဝန်းကျင်နှင့် အခြေအနေများအောက်တွင် အစပျိုးပြီး လည်ပတ်နေကာ ယင်းမှာ စာတန်၏ လောင်းရိပ်အောက် ရောက်နေသည်။ ဤအရာသည် လုံးဝ မလွယ်ကူပါချေ။ ယင်းသည် သာမန်ထက် လွန်ကဲစွာ ခက်ခဲလှပေ၏။ ထို့ကြောင့် တာဝန်ထမ်းဆောင်နိုင်သော လူတိုင်းသည် ဘုရားသခင်အတွက် နှစ်သိမ့်စရာဖြစ်ပြီး ၎င်းတို့၏ တာဝန်ထမ်းဆောင်ခြင်းသည် ရှားပါးပြီး အဖိုးထိုက်သောအရာ ဖြစ်လေသည်။ လူတစ်ဦးစီက ပေးနိုင်သော စိတ်အားထက်သန်မှု၊ သစ္စာစောင့်သိမှုနှင့် အသုံးခံမှုသာမက မိမိ၏ တာဝန်အပေါ်ထားသော မိမိ၏ ရိုးသားစစ်မှန်ပြီး တာဝန်သိစိတ်၊ ဘုရားသခင်၏ တာဝန်ပေးစေခိုင်းချက်အား နာခံမှုနှင့် ဘုရားသခင်အား ကြောက်ရွံ့ခြင်းတို့နှင့်ယှဉ်သော ၎င်း၏ သဘောထားကို သူက မြတ်နိုးသည့်အပြင် ဤအရာများကို အလွန်အရေးကြီးသည်ဟု သူက ယူမှတ်သည်။ ဆန့်ကျင်ဘက်အနေဖြင့် မိမိတို့တာဝန်များကို စွန့်ပစ်သည့်၊ သို့မဟုတ် ယင်းတို့ကို ပျော်စေပျက်စေ သဘောထားသည့် လူများကိုလည်းကောင်း၊ ဘုရားသခင်ကို သစ္စာဖောက်သည့် အမျိုးမျိုးသော အပြုအမူများ၊ လုပ်ရပ်များနှင့် သရုပ်သကန်များကို‌လည်းကောင်း ဘုရားသခင်သည် အဆုံးစွန် ရွံရှာလေသည်။ အဘယ်ကြောင့်ဆိုသော် ဘုရားသခင် စီစဉ်သည့် အမျိုးမျိုးသော ဆက်စပ်အကြောင်းအရာများ၊ လူများ၊ ကိစ္စရပ်များနှင့် အမှုအရာများကြားတွင် ဤလူများသည် ဘုရားအမှုတော်၏ တိုးတက်မှုကို ကြန့်ကြာစေသည့်၊ ထိခိုက်နစ်နာစေသည့်၊ နှောင့်နှေးစေသည့်၊ နှောင့်ယှက်သည့်၊ သို့မဟုတ် ထိခိုက်သည့် အခန်းကဏ္ဍကို ပါဝင်လုပ်ဆောင်ကြသောကြောင့် ဖြစ်သည်။ ပြီးလျှင် ဤအကြောင်းကြောင့် စွန့်ခွာထွက်ပြေးသူများနှင့် ဘုရားသခင်ကို သစ္စာဖောက်သော လူတို့အပေါ် ဘုရားသခင်က မည်သို့ ခံစားပြီး တုံ့ပြန်သနည်း။ မည်သည့်သဘောထား ဘုရားသခင်၌ ရှိသနည်း။ (သူသည် ၎င်းတို့ကို မုန်းတီး၏။) ရွံရှာခြင်းနှင့် မုန်းတီးမှုသာ ရှိသည်။ သူသည် သနားခြင်း ခံစားရသလော။ မခံစားရပေ။ မည်သည့်အခါတွင်မျှ သူသနားနိုင်မည် မဟုတ်ပါ။ လူအချို့က “ဘုရားသခင်သည် ချစ်ခြင်းမေတ္တာ ဖြစ်သည်မဟုတ်လား” ဟု ဆိုကြသည်။ ထိုသို့သော လူတို့ကို ဘုရားသခင် အဘယ့်ကြောင့် မချစ်သနည်း။ ဤလူများသည် ချစ်ခြင်းမေတ္တာနှင့် မထိုက်တန်ပေ။ ၎င်းတို့ကို သင် ချစ်ပါက သင်၏ မေတ္တာသည် မိုက်မဲပြီး ၎င်းတို့ကို သင်ချစ်သည့်အတွက်ကြောင့် ဘုရားသခင်ကလည်း ချစ်သည်ဟု မဆိုလိုပေ။ ၎င်းတို့ကို သင် ချစ်ခင်မြတ်နိုးနိုင်သော်လည်း ဘုရားသခင်က မချစ်မြတ်နိုးပေ။ အကြောင်းမှာ ထိုသို့သော လူတို့တွင် ချစ်ခင်မြတ်နိုးထိုက်သည့် အရာတစ်ခုမျှ မရှိပေ။ ထို့ကြောင့် ထိုသို့သော လူတို့ကို ဘုရားသခင်က ပြတ်ပြတ်သားသား စွန့်ပစ်ပြီး မည်သည့် ဒုတိယအခွင့်အရေးမျှ မပေးပေ။ ဤသည်မှာ ကျိုးကြောင်းသင့်သည် မဟုတ်လော။ ဤအရာသည် ကျိုးကြောင်းသင့်ရုံသာမက အားလုံးထက်ပို၍ ဘုရားသခင်၏ စိတ်သဘောထား သွင်ပြင်တစ်ခု ဖြစ်ပြီး၊ သမ္မာတရားလည်း ဖြစ်ပေသည်။ ဧဝံဂေလိဖြန့်ဝေသည့် လုပ်ငန်းစဉ်၌ လူအချို့သည် သမ္မာတရား၏ မည်သည့်အပိုင်းကိုမျှ လက်မခံကြပေ။ ၎င်းတို့သည် ကိုယ်ပိုင်စိတ်သဘောအတိုင်း အမြဲတမ်း စိတ်ကူး‌ပေါက်ရာနှင့် မဆင်မခြင် ပြုမူလုပ်ဆောင်ကြသည်။ ၎င်းတို့သည် ဧဝံဂေလိ ဖြန့်ဝေခြင်းအလုပ်အတွက် ခလုတ်တံသင်းများနှင့် အတားအဆီးများ ဖြစ်ကြသည်။ ၎င်းတို့သည် ဧဝံဂေလိအလုပ်အား နှောင့်ယှက်ခြင်း၊ အလျဉ်ပြတ်စေခြင်းနှင့် ပျက်စီးစေခြင်းဖြင့် အပျက်သဘော ဆောင်သော အခန်းကဏ္ဍကို လုပ်ဆောင်ပြီး ဧဝံဂေလိ တိုးချဲ့ခြင်းကို ဟန့်တားကြသည်။ ထို့ကြောင့် ဤလူတို့အပေါ် ဘုရားသခင်၏ သဘောထားမှာ စက်ဆုပ်ရွံရှာခြင်းနှင့် မုန်းတီးခြင်းမျိုး ဖြစ်သည်။ ၎င်းတို့ကို ဖယ်ရှားမည်ဖြစ်သည်။ ဤသည်မှာ ဘုရားသခင်၏ ဖြောင့်မတ်သော စိတ်နေသဘောထား သိသာထင်ရှားသည့်ပုံ ဖြစ်သည်။ လူအချို့က “ထိုကဲ့သို့သော လူတို့ကို ဤနည်းအားဖြင့် ကိုင်တွယ်ခြင်းသည် အနည်းငယ် မလွန်ကဲသလော” ဟု ဆိုကြသည်။ ထိုအရာနှင့်ပတ်သက်၍ မည်သည့်အရာမျှ မလွန်ကဲပေ။ ထိုသို့သော မကောင်းဆိုးဝါးများကို ရင်ဆိုင်ရလျှင် ဘုရားသခင်သည် စက်ဆုပ်ရွံရှာခြင်းနှင့် မုန်းတီးခြင်းကိုသာ ခံစားရနိုင်သည်။ ဘုရားသခင်သည် မိမိကိုယ်ကို မဖုံးကွယ်ပေ။ ဘုရားသခင်၏ စိတ်သဘောထားမှာ ဖြောင့်မတ်ပြီး ဘုရားသခင်၏ စိတ်သဘောထားကို ရှင်းရှင်းလင်းလင်း မြင်တွေ့ရသည်။ ဘုရားသခင်၏ ဖြောင့်မတ်သော စိတ်သဘောထားရှိ အရေးအကြီးဆုံးသော လက္ခဏာသွင်ပြင်နှစ်ရပ်မှာ အဘယ်နည်း။ (ကြွယ်ဝသော သနားကရုဏာနှင့် နက်ရှိုင်းသော အမျက်ဒေါသ ဖြစ်ပါသည်။) ဤတွင် ဤအရာ၏ အရေးပါမှုမှာ အဘယ်နည်း။ ဘုရားသခင်၏ နက်ရှိုင်းသော အမျက်ဒေါသကို မည်သူခံစားရသနည်း။ ယင်းသည် ဘုရားသခင်ကို ခုခံသည့်သူများ၊ သမ္မာတရားကို ငြင်းပယ်သည့်သူများနှင့် စာတန်နောက်ကို လိုက်သည့်သူများအပေါ် ကျရောက်ပေသည်။ ဘုရားသခင်က စာတန်နောက်ကို လိုက်ဖို့ ဆုံးဖြတ်ထားသူများကို မလိုချင်သကဲ့သို့ သစ္စာဖောက်များနှင့် စွန့်ခွာပြေးသူများကိုလည်း မလိုချင်ပေ။ “အားနည်းသည့် အခိုက်အတန့်တွင် ကျွန်ုပ်၏တာဝန်ကို မဆောင်ရွက်ဖို့ ကျွန်ုပ်ရွေးချယ်မိသော်လည်း ကျွန်ုပ်သည် ဘုရားသခင်ကို အမှန်တကယ် မစွန့်ခွာလိုခဲ့ပါ၊ သို့မဟုတ် လောကီနှင့် စာတန်၏ အုပ်စုသို့ ပြန်မသွားလိုပါ” ဟု လူအချို့က ပြောကြသည်။ သင်သည် အားနည်းသည်ဖြစ်စေ၊ လောကီသို့ ပြန်သွားလိုခဲ့သည်ဖြစ်စေ ဘုရားသခင်က သင်၏ အားနည်းချက်ကို ကိုင်တွယ်ဖြေရှင်းသည့်အခါတွင် အခြေအနေပေါ် မူတည်ကာ သနားကရုဏာနှင့် သည်းခံခြင်းတို့ကို ပြကောင်းပြနိုင်သည်။ ဘုရားသခင်သည် အလျှံပယ် သနားကရုဏာ ပြည့်ဝ၏။ လူများသည် မိမိတို့၏ ဖောက်ပြန်ပျက်စီးသော စိတ်သဘောထားများအလယ်၌ နေထိုင်ပြီး အချို့အခြေအနေများတွင် ၎င်းတို့သည် အားနည်းကာ အပျက်သဘောင်ဆောင်သကဲ့သို့ ပျင်းရိကြမည်မှာ ရှောင်လွှဲ၍ မရနိုင်ပေ။ ဘုရားသခင်သည် အားလုံးကို စောင့်ကြည့်ပြီး ၎င်းတို့ကို အခြေအနေအရ ကိုင်တွယ်ဖြေရှင်းမည် ဖြစ်သည်။ သင်သည် စွန့်ခွာပြေးသူ မဟုတ်ပါက သူက သင့်ကို ထိုကဲ့သို့ဆက်ဆံမည် မဟုတ်ချေ။ သင်အားနည်းလျှင် သူက သင်၏ အားနည်းချက်အတိုင်း သင့်ကို ဧကန်မုချ ကိုင်တွယ်လိမ့်မည်။ သင်သည် ဖောက်ပြန်ပျက်စီးခြင်းကို တဒင်္ဂတမျှ ဖော်ထုတ်မိပါက၊ သင်သည် တဒင်္ဂတမျှ အားနည်းပါက၊ သို့မဟုတ် သင်သည် ခဏတာမျှ လမ်းပျောက်ပါက ဘုရားသခင်သည် သင့်ကို ဉာဏ်ပွင့်လင်းစေလိမ့်မည်၊ လမ်းပြလိမ့်မည်ဖြစ်ပြီး သင့်ကို ထောက်ပံ့လိမ့်မည်။ သင့်အား သမ္မာတရားကို နားမလည်သော ဝိညာဉ်ရင့်ကျက်မှု သေးနုပ်သူတစ်ဦးအဖြစ် သူသဘောထားလိမ့်မည်၊ အဘယ့်ကြောင့်ဆိုသော် ဤပြဿနာသည် သင်၏သဘာဝ အနှစ်သာရတစ်ခု မဟုတ်သောကြောင့် ဖြစ်သည်။ ဘုရားသခင်သည် အဘယ့်ကြောင့် ထိုသို့သော လူများကို စွန့်ပစ်ခြင်းအားဖြင့် ကိုင်တွယ်ဖြေရှင်းခြင်း မပြုသနည်း။ ယင်းမှာ ၎င်းတို့က သူ့ကိုဖြစ်စေ၊ သမ္မာတရားကိုဖြစ်စေ မငြင်းပယ်လိုသောကြောင့်ဖြစ်ပြီး ၎င်းတို့သည် စာတန်နောက်သို့ မလိုက်လိုသောကြောင့် ဖြစ်သည်။ ၎င်းတို့သည် အားနည်းချက်ကို ခဏမျှသာ ပြသည့်အပြင် ပေါ်လာသည့်အရေးကို မဖြေရှင်းနိုင်သောကြောင့် ဘုရားသခင်က ၎င်းတို့ကို နောက်ထပ် အခွင့်အရေးတစ်ခု ပေးခြင်းဖြစ်သည်။ သို့ဆိုလျှင် ခဏတာ အားနည်းချက်ကို တွေ့ကြုံပြီး မိမိတို့၏တာဝန်များကို မထမ်းဆောင်နိုင်သော်လည်း နောက်ပိုင်းတွင် ယင်းတို့ကို ဖြည့်ဆည်းဖို့ ပြန်လာသည့် ဤလူများကို မည်သို့ ကိုင်တွယ်သင့်သနည်း။ ၎င်းတို့ကို လက်ခံသင့်သည်။ ဤအခြေအနေသည် သဘာဝအားဖြင့် စွန့်ခွာပြေးသူများ၏ အခြေအနေနှင့် ကွဲပြားခြားနားသောကြောင့် သင်သည် ထိုသူများကို ကိုင်တွယ်ဖြေရှင်းဖို့ တူညီသော စည်းမျဉ်းကို အသုံးပြု၍ မရသကဲ့သို့ တူညီသော ကိုင်တွယ်ဖြေရှင်းနည်းကို အသုံးပြု၍မရပေ။ လူအချို့သည် အားနည်းချက်ကို မခံစားနေရပေ။ ၎င်းတို့သည် အမှန်တကယ် စွန့်ခွာပြေးသူများ ဖြစ်ကြ၏။ သင်သည် ၎င်းတို့ကို ပြန်လက်ခံပါက ၎င်းတို့သည် အလားတူ အခြေအနေတစ်ခုကို ကြုံတွေ့ရသည့်အခါ ၎င်းတို့သည် တစ်ဖန် စွန့်ခွာပြေးလိမ့်မည်။ ထိုကဲ့သို့ လူတစ်ဦးသည် ခဏတာ စွန့်ခွာပြေးသူ မဟုတ်ပေ။ ထိုသို့သော လူတစ်ဦးသည် အစဉ် စွန့်ခွာပြေးသူတစ်ဦး ဖြစ်လိမ့်မည်။ ဤသည်မှာ ဘုရားသခင်က ထိုသို့သော လူများကို ကန်ထုတ်ပြီး မည်သည့်အခါမျှ ပြန်မခေါ်သည့်အကြောင်းရင်း ဖြစ်သည်။ ဤသည်မှာ နည်းနည်းလေးမျှ မလွန်ကဲချေ။ ၎င်းတို့ကို မည်သည့်အခါမျှ ပြန်မခေါ်သည်ဖြစ်၍ ဤသည်မှာ ဘုရားသခင်သည် အခြားမည်သူကိုမဆို ကယ်တင်ကောင်းနိုင်သော်လည်း ထိုသူတို့ကို မကယ်တင်ဟု ဆိုလိုခြင်းဖြစ်သည်။ ကယ်တင်ခြင်းရရှိဖို့ အလားအလာရှိသော အဖွဲ့သည့် လူတစ်ဦးလိုနေကြောင်း ဘုရားသခင်တွေ့ရှိသောအခါ အခြားလူတစ်ဦးဦးကို သူထပ်ဖြည့်နိုင်သည်။ သို့သော် ဤသို့သောလူစားမျိုးကို အလိုမရှိပေ။ ထိုသူကို ထာဝရအဆက်ဖြတ်ပြီး အလိုမရှိတော့ပေ။

ဧဝံဂေလိဖြန့်ဝေစဉ် ဧဝံဂေလိလုပ်ငန်းကို မကြာခဏ နှောင့်ယှက်ဖျက်ဆီးသည့် အခြားလူအမျိုးအစားရှိသည်။ သို့သော် ၎င်းတို့သည် အလုပ်အချို့ကိုလည်း လုပ်ဆောင်ထားပြီး လူအချို့ကို သိမ်းသွင်းရရှိထားလေသည်။ ဤအရာများကို ၎င်းတို့၏ လုပ်ရပ်များထဲမှ ကောင်းမှုများဟု ယူဆနိုင်သလော။ လောလောဆယ်တွင် ၎င်းတို့သည် ကောင်းမှုများ ပြုလုပ်ခဲ့သည်၊ မပြုလုပ်ခဲ့သည်ဟူသော မေးခွန်းကို ဘေးဖယ်ထားကြစို့။ ထိုသို့သော လူတို့သည် ဧဝံဂေလိ ဖြန့်ဝေစဉ် ဧဝံဂေလိအလုပ်ကို မကြာခဏ နှောင့်ယှက်ဖျက်ဆီးသည်ကို ဦးစွာ ပြောကြပါစို့။ ဥပမာ၊ လူတစ်ဦးသည် ဧဝံဂေလိအလုပ်၌ ကြီးကြပ်နေပြီး အဆင့်အတန်းနှင့် အာဏာအတွက် အခြားသူများနှင့် အမြဲတမ်း ပြိုင်ဆိုင်ပါက သို့မဟုတ် အခြားသူများနှင့် မကြာခဏ အငြင်းပွားရင်း ဧဝံဂေလိအလုပ်ကို နှောင့်ယှက်ဖျက်ဆီးနေပါက ဤကိစ္စကို ဘုရားသခင် မည်သို့ရှုမြင်မည်နည်း။ ဘုရားသခင်သည် ထိုကဲ့သို့သော လူ၏ အောင်မြင်မှုများနှင့် အပြစ်အနာအဆာများကို ချိန်ထိုးကြည့်မည်လော သို့မဟုတ် ယင်းတို့ကို အခြားပုံစံ တစ်မျိုးမျိုးဖြင့် ကိုင်တွယ်ဖြေရှင်းမည်လော။ (ဘုရားသခင်သည် ယင်းတို့ကို မကောင်းမှုအဖြစ် သတ်မှတ်ပေးမည်။) ဘုရားသခင်သည် ယင်းတို့ကို မကောင်းမှုအဖြစ် အဘယ့်ကြောင့် သတ်မှတ်ပေးမည်နည်း။ ၎င်းတို့သည် လူအချို့ကို ဟောပြောခြင်း၊ အလုပ်အချို့ကို လုပ်ဆောင်ခြင်းနှင့် ရလဒ်အချို့ကို ရရှိခဲ့ပြီး ဖြစ်သော်လည်း ဒုစရိုက်အမှုများကို ဆက်လက်၍ လုပ်ဆောင်ခဲ့ကြသည်။ ၎င်းတို့သည် အမှားကြီးကြီးမားမား မကျူးလွန်သော်လည်း အမှားအသေးအဖွဲများ မကြာခဏ ပြုလုပ်တတ်သည်။ အမှားအသေးအဖွဲများ မကြာခဏ ပြုလုပ်သည် ဟူသည်မှာ မည်သည့်အရာကို ဆိုလိုသနည်း။ ယင်းမှာ သမ္မာတရားကို လက်တွေ့မလုပ်ဆောင်ခြင်း၊ ကျော်စောမှု၊ အကျိုးအမြတ်နှင့် အဆင့်အတန်းအတွက် ရုန်းကန်လှုပ်ရှားခြင်း၊ ဘုရားတရားကိုင်းရှိုင်းမှု စိုးစဉ်းမျှမရှိဘဲ စကားပြောဆိုခြင်း၊ သမ္မာတရားစည်းမျဉ်းများကို မည်သည့်အခါမျှ မရှာဖွေခြင်း၊ မကြာခဏပင် စိတ်ကူးပေါက်ရာ အထိန်းအချုပ်မဲ့ ပြုမူလုပ်ဆောင်ခြင်း၊ မည်သည့်ပြောင်းလဲမှုမျှ လုံးဝ မပြုလုပ်ခြင်းနှင့် မယုံကြည်သူများကဲ့သို့ ဖြစ်ခြင်းတို့ကို ဆိုလိုကာ၊ ထိုအရာ၌ အသင်းတော်အသက်တာနှင့် ဘုရားသခင် ရွေးကောက်ထားသော လူတို့အပေါ် ထိခိုက်နစ်နာစေသော သက်ရောက်မှုရှိပြီး အချို့သော ယုံကြည်သူလူသစ်များကို မှောက်မှားစေသည်။ ဤအရာများမှာ ဆိုးယုတ်သော လုပ်ရပ်များ မဟုတ်လော။ (ဟုတ်ပါသည်။) အကယ်၍ လူတို့သည် ထိုကဲ့သို့ ဒုစရိုက်မှုများကို ပြုလုပ်ခဲ့ပြီးဖြစ်ပါက၊ ၎င်းတို့သည် ၎င်းတို့၏တာဝန်များကို ကြိုးစား၍ လုပ်ဆောင်ခဲ့ပါစေ ၎င်းတို့၏ တာဝန်ဝတ္တရားများကို အမှန်တကယ် ဖြည့်ဆည်းခဲ့ပြီးပြီလော။ ၎င်းတို့၏တာဝန်များကို ကျေနပ်ဖွယ်ရာပုံစံဖြင့် အမှန်ပင် ဖြည့်ဆည်းခဲ့ပြီးပြီလော။ ဤလူတို့ကို ဘုရားသခင် မည်သို့ရှုမြင်သနည်း။ ၎င်းတို့သည် အလုပ်အချို့ကို လုပ်ဆောင်ခဲ့ပြီး ဖြစ်သော်လည်း မကောင်းမှုကို မဆင်မခြင် ပြုလုပ်နိုင်ကြဆဲ ဖြစ်သဖြင့် ၎င်းတို့၏တာဝန်များကို လုပ်ဆောင်နေကြခြင်း ဖြစ်သလော။ (မဟုတ်ပါ။) သို့ဆိုလျှင် ၎င်းတို့သည် ထိုသို့သော မဆင်မခြင်ပြုခြင်းဖြင့် မကောင်းမှုကို ပြုလုပ်နိုင်သည်မှာ အဘယ်ကြောင့်နည်း။ တစ်နည်းအားဖြင့် ယင်းသည် ၎င်းတို့၏ ဖောက်ပြန်ပျက်စီးသော စိတ်သဘောထားများကြောင့် ဖြစ်သည်။ နောက်တစ်နည်းအားဖြင့် ဤလူတို့သည် ဖြစ်နိုင်စရာအကြောင်းကို ယုံကြည်သည့် စိတ်ဓာတ်မျိုးကို ခံယူထားကြသည်။ ၎င်းတို့က “ကျွန်ုပ်သည် ဧဝံဂေလိဖြန့်ဝေရာ၌ ကောင်းသောအရာ များစွာ ပြုလုပ်ခဲ့ပြီ။ ဤအသင်းတော် သို့မဟုတ် ထိုအသင်းတော်၌ လူရာချီ၍ ရှိသည်မှာ ထိုသူတို့အား ကျွန်ုပ် ဧဝံဂေလိတရား ဆောင်ကြဉ်းခဲ့သောကြောင့် ဖြစ်သည်။ အကယ်၍ ဤလူတို့ ကယ်တင်ခြင်းရရှိနိုင်လျှင် ယင်းသည် ကျွန်ုပ်အတွက် ကောင်းမှု အမြောက်အမြားဖြစ်သည်ဟု အဓိပ္ပာယ်သက်ရောက်မည်ပင်။ သို့ဆိုလျှင် ဘုရားသခင်က ကျွန်ုပ်ကို အဘယ်သို့ သတိမရဘဲ နေနိုင်ရမည်နည်း။ ဘုရားသခင်က ဤလူတို့ကို ထည့်တွက်လျှင် ကျွန်ုပ်ကို သူ ပြစ်တင်ရှုတ်ချ၍ မရပါ” ဟု စဉ်းစားကြသည်။ ၎င်းတို့သည် မိမိတို့ကိုယ်ကို ဈေးတင်လွန်းနေကြသည် မဟုတ်လော။ ၎င်းတို့၌ ဘုရားသခင်ကို ကြောက်ရွံ့သော စိတ်နှလုံးရှိသလော။ ၎င်းတို့သည် ရိုးသားမှန်ကန်သော စိတ်နှလုံးဖြင့် ဘုရားသခင်အဖို့ မိမိတို့ကိုယ်ကို အသုံးခံသောလူများ ဟုတ်သလော။ ၎င်းတို့သည် ရှင်ပေါလုကဲ့သို့ ဆုလာဘ်များနှင့် သရဖူများရရှိရန် ရှာဖွေကြသည်။ ၎င်းတို့၏ စိတ်နှလုံးထဲ၌ ဘုရားသခင်အတွက် နေရာမရှိပေ။ ဘုရားသခင်၏ စိတ်နေသဘောထားကို နားမလည်ကြသည့်အပြင် ဘုရားသခင်နှင့် အပေးအယူလုပ်ရဲကြသည်။ ဤအရာက ၎င်းတို့သည် သမ္မာတရားစစ်မှန်မှု ဘာမျှမပိုင်ဆိုင်ကြောင်း သက်သေပြသည်။ နှစ်အနည်းငယ် ဧဝံဂေလိဖြန့်ဝေနေခဲ့ပြီး ယင်းနှင့်ပတ်သက်၍ အတွေ့အကြုံအချို့ရှိသည့် လူတစ်ဦးရှိခဲ့သည်။ သူသည် ဧဝံဂေလိဖြန့်ဝေစဉ်တွင် ဆင်းရဲဒုက္ခများစွာ ခံစားခဲ့ရပြီး ထောင်ပင်ကျကာ ထောင်ထဲတွင် နှစ်များစွာ ပြစ်ဒဏ်ကျခံခဲ့ရသည်။ ထောင်မှထွက်လာပြီးနောက်တွင် သူသည် ဧဝံဂေလိဆက်လက်ဖြန့်ဝေပြီး လူရာနှင့်ချီပြီး သိမ်းသွင်းရရှိခဲ့သည်။ ၎င်းတို့ထဲမှ အချို့မှာ အရေးပါသော ပါရမီရှိသူများ ဖြစ်လာကြသည်။ အချို့မှာ ခေါင်းဆောင်၊ သို့မဟုတ် အမှုဆောင်များအဖြစ်ပင် ရွေးချယ်ခံရသည်။ ရလဒ်အနေဖြင့် ဤလူသည် သူ့ကိုယ်သူ အလွန်ပင် ချီးကျူးဂုဏ်ပြုထိုက်သည်ဟု ယုံကြည်ပြီး သူ့ကိုယ်သူ ကြွားလုံးထုတ်ကာ သက်သေခံလျက် ဤအရာကို သူသွားသည့်နေရာတိုင်းတွင် ကြွားဝါပြောဆိုဖို့ အရည်အသွေးကောင်းအဖြစ် အသုံးပြုခဲ့သည်။ “ကျွန်ုပ်သည် ထောင်ရှစ်နှစ်ကျခဲ့သည်။ ကျွန်ုပ်၏ သက်သေခံချက်တွင် ခိုင်မာစွာ ရပ်တည်ခဲ့သည်။ ဧဝံဂေလိဖြန့်ဝေနေစဉ် လူများစွာကို ကျွန်ုပ် သိမ်းသွင်းရရှိခဲ့သည်။ အချို့မှာ ယခုအခါတွင် ခေါင်းဆောင်၊ သို့မဟုတ် အမှုဆောင်များဖြစ်ကြသည်။ ဘုရားသခင်၏ အိမ်တော်တွင် ကျွန်ုပ်သည် ဂုဏ်ပြုခံရထိုက်သည်။ ပံ့ပိုးမှုတစ်ခုကို ကျွန်ုပ်ပြုလုပ်ခဲ့ပြီးဖြစ်သည်” ဟူ၍။ မည်သည့်နေရာ၌ ဧဝံဂေလိ ဖြန့်ဝေသည်ဖြစ်စေ သူသည် နယ်ခံခေါင်းဆောင်များ၊ သို့မဟုတ် အမှုဆောင်များကို သေချာပေါက် ကြွားဝါပြောဆိုသည်။ သူက၊ “ကျွန်ုပ်ပြောသည့်အရာကို သင်တို့ နားထောင်ရမည်။ သင်တို့၏ အကြီးတန်းခေါင်းဆောင်များပင် ကျွန်ုပ်ကို စကားပြောသည့်အခါ ယဉ်ကျေးကြရမည်။ နားမထောင်သည့် မည်သူကိုမဆို ကျွန်ုပ် သင်ခန်းစာပေးမည်” ဟူ၍လည်း ပြောဆိုသည်။ ဤသူသည် အနိုင်ကျင့်သူတစ်ယောက် ဖြစ်သည်မဟုတ်လော။ ဤကဲ့သို့သောသူသည် ဧဝံဂေလိဖြန့်ဝေပြီး ထိုလူများကို သိမ်းသွင်းရရှိခဲ့ခြင်း မရှိလျှင် သူသည် အလွန် ကြီးကျယ်ဝံ့မည်လော။ အမှန်ပင် ဤသို့ဖြစ်လိမ့်မည်။ ၎င်းတို့က အလွန်ကြီးကျယ်နိုင်ခြင်းသည် ဤအရာက ၎င်းတို့၏ သဘာဝတွင် ရှိနေသည်ကို သက်သေပြသည်။ ယင်းမှာ ၎င်းတို့၏ သဘာဝအနှစ်သာရ ဖြစ်သည်။ ၎င်းတို့သည် အလွန် မာနထောင်လွှားလာသဖြင့် ဆင်ခြင်တုံတရားအားလုံး ကင်းမဲ့ကြတော့သည်။ ဧဝံဂေလိဖြန့်ဝေပြီး လူအချို့ကို သိမ်းသွင်းရရှိပြီးနောက်တွင် ၎င်းတို့၏ မာနထောင်လွှားသော သဘာဝမှာ ကြီးမားလာပြီး ပို၍ပင် ကြီးကျယ်လာသည်။ ဤကဲ့သို့သော သူတို့သည် ၎င်းတို့သွားသည့်နေရာတိုင်းတွင် ၎င်းတို့၏ အရည်အသွေးကောင်းကို ကြွားဝါပြောဆိုကြသည်။ ၎င်းတို့သွားသည့်နေရာတိုင်းတွင် ဂုဏ်ပြုခံထိုက်ကြောင်း အခိုင်အမာဆိုရန် ကြိုးစားကြသည်။ ပြီးလျှင် အမျိုးမျိုးသော အဆင့်များတွင်ရှိသော ခေါင်းဆောင်များနှင့် တန်းတူညီမျှဖြစ်ရန် ကြိုးစားလျက်၊ ၎င်းတို့ကိုယ်တိုင် အကြီးတန်းခေါင်းဆောင်များ ဖြစ်ကိုဖြစ်သင့်သည်ဟု ထင်မြင်လျက် ထိုခေါင်းဆောင်များကိုပင် ဖိအားပေးသည်။ ဤကဲ့သို့သောသူမျိုး၏ အပြုအမူအားဖြင့် ထင်ရှားသည့်အရာကို အခြေခံပြီး ၎င်းတို့တွင် မည်သည့်သဘာဝမျိုးရှိသည်၊ ၎င်းတို့အဆုံးသတ်သည် မည်သို့ဖြစ်နိုင်ခြေ ရှိသည်နှင့်ပတ်သက်ပြီး ကျွန်ုပ်တို့အားလုံး ရှင်းလင်းစွာသိသင့်သည်။ မကောင်းဆိုးဝါးတစ်ကောင်သည် ဘုရားသခင်၏ အိမ်တော်ထဲသို့ ထိုးဖောက်ဝင်ရောက်လာသောအခါ မိမိ၏ သရုပ်မှန်ကို မပြသခင်တွင် အနည်းငယ် အစေခံသည်။ ၎င်းသည် မည်သူက ၎င်းကို ကိုင်တွယ်ဖြေရှင်းသည်ဖြစ်စေ သို့မဟုတ် ပြုပြင်သည်ဖြစ်စေ နားမထောင်ပေ။ ၎င်းသည် ဘုရားသခင်၏ အိမ်တော်ကို ဆန့်ကျင်တိုက်ခိုက်ရာတွင် မလျှော့တမ်း ပြုလုပ်သည်။ ၎င်းလုပ်ရပ်များ၏ သဘာဝမှာ အဘယ်နည်း။ ဘုရားသခင်၏ အမြင်တွင်၊ ၎င်းသည် သေခြင်းတရားကို ဖိတ်ခေါ်နေပြီး၊ မိမိတို့ကိုယ်ကို မသတ်မိမချင်း အဆုံးသတ်မည်မဟုတ်ပေ။ ဤသည်မှာ ရှင်းလင်းပြရန် သင့်လျော်သည့် တစ်ခုတည်းသော နည်းလမ်းဖြစ်သည်။ “သေခြင်းတရားကို ဖိတ်ခေါ်ခြင်း” ဟူသည့် ဝေါဟာရတွင် လက်တွေ့ကျသော အဓိပ္ပာယ်ရှိသည်။ ဤလက်တွေ့ကျသော အဓိပ္ပာယ်မှာ အဘယ်နည်း။ လူတို့သည် သူတို့၏ တာဝန်များကို ထမ်းဆောင်နိုင်သောအခါ ကောင်းသောအရာ ဖြစ်၏။ လူအချို့သည် ထိုထိုသော ဆုကျေးဇူးများနှင့် မွေးဖွားလာကြသည်။ ယင်းသည် ကောင်းချီးမင်္ဂလာဖြစ်သော်လည်း ၎င်းတို့သည် မှန်ကန်သော လမ်းကြောင်းကို မလိုက်လျှောက်လျှင် ဒုက္ခရောက်မည်ဖြစ်သည်။ သာဓကအားဖြင့် လူအချို့သည် အာဝဇ္ဇန်းရွှင်ရွှင်ဖြင့် စကားပြောနိုင်သည်။ ၎င်းတို့သည် လူအမျိုးမျိုးအား မည်သို့ စကားပြောရမည်ကို သိပြီး မည်သူနှင့်မဆို အလွယ်တကူ စကားစမြည်ပြောနိုင်သည်။ ဤအရာကိုလည်း မွေးရာပါ အရည်အချင်းတစ်မျိုးအဖြစ် သဘောထားနိုင်သည်။ ယင်းမှာ ကောင်းသောအရာ ဖြစ်သည် သို့မဟုတ် ဆိုးသောအရာ ဖြစ်သည်ကို ဦးစွာပြောခြင်းထက် အဓိကကျသောအရာမှာ ထိုသူ၏ သဘာဝနှင့် သူသည် မှန်ကန်သော လမ်းကြောင်းကို လျှောက်သလော၊ ဆိုးယုတ်သော လမ်းကြောင်းကို လျှောက်သလောဆိုသည်ကို ကြည့်ရန်ဖြစ်သည်။ ဧဝံဂေလိဖြန့်ဝေခြင်းဟူသည့် ဘုရားသခင်၏ အမှုတော်ကာလအတွင်း သင်သည် သင်၏ ပါရမီများကို ဆက်ကပ်ခဲ့ပြီ ဖြစ်သည်၊ အကြံအစည်မြောက်မြားစွာ အသုံးခံခဲ့ပြီ ဖြစ်သည်၊ ထို့ပြင် လူများစွာကို သိမ်းသွင်းရရှိခဲ့ပြီ ဖြစ်သည်။ ဤကိုယ်၌က မဆိုးပေ။ သင်သည် ဧဝံဂေလိလုပ်ငန်းအတွက် အားထုတ်ကြိုးပမ်းခဲ့ပြီ ဖြစ်ကာ ယင်းက ဘုရားသခင်၏ အောက်မေ့သတိရခြင်းကို ခံရဖို့ ထိုက်တန်သည်။ အကယ်၍ ခမ်းကြီးနားကြီး မဟုတ်သည့်တိုင် သင်သည် ဤတာဝန်ကို ကောင်းစွာ လုပ်ဆောင်သည်၊ ညီအစ်ကိုမောင်နှမများက သင့်အလုပ်ကို တွေ့မြင်သောအခါ သင့်အား လေးစားကြမည်၊ ပြီးလျှင် တစ်စုံတစ်ခုကို နားမလည်သောသူတို့က သင့်ထံမှ ရှာဖွေပြီး ယင်းနှင့် ပတ်သက်၍ သင့်အကြံဉာဏ်ကို တောင်းခံကြမည်။ သင်၌ လူ့သဘာဝ ရှိပြီး သမ္မာတရားကို လိုက်စားလျှင် လူတို့က သင့်ကို နှစ်သက်ကြမည် ဖြစ်ပြီး ဘုရားသခင် သင့်ကို ကောင်းချီးပေးမည် ဖြစ်သည်။ သို့ရာတွင် သင်အနေဖြင့် မှန်ကန်သောလမ်းကြောင်းအား မလျှောက်သည်မှာ ဖြစ်ပျက်နိုင်သည်။ ဘုရားသခင်ထံမှ ဤသေးငယ်သော ဆုကျေးဇူးကို အရည်အသွေးကောင်းအဖြစ် စဉ်းစားကောင်း စဉ်းစားမည်ဖြစ်ပြီး ထောင်ကျခဲ့ဖူးသည့် အကြောင်းကို နေရာတိုင်းတွင် ကြွားဝါသည်အထိ ဖြစ်နိုင်သည်။ အမှန်တွင် ထောင်ချခံရခြင်းမှာ ကြီးမားသောအရာ မဟုတ်ပေ။ အဆင်းနီသော နဂါးကြီး၏ တိုင်းပြည်တွင် လူအမြောက်အမြားသည် ဧဝံဂေလိဖြန့်ဝေခြင်း သို့မဟုတ် အသင်းတော်အလုပ် ဆောင်ရွက်ခြင်းကြောင့် ဖမ်းဆီးခြင်းနှင့် ထောင်ချခြင်းကို ခံကြရပြီးဖြစ်သည်။ ဤအရာကို အရည်အသွေးကောင်းဟု မယူဆသင့်ဘဲ လူတို့ခံစားဖို့ သင့်တော်သည့် ဆင်းရဲဒုက္ခတစ်မျိုးဟု ယူဆသင့်သည်။ အကယ်၍ လူတို့တွင် ဆင်းရဲဒုက္ခခံစားပြီးနောက် သက်သေခံချက်ပေးရန် ရှိပါက ဘုရားသခင်၏ လုပ်‌ဆောင်ချက်များကို သက်သေခံနိုင်သည်၊ ၎င်းတို့ နှိပ်စက်ညှဉ်းပန်းမှု ခံရစဉ်ကာလအတွင်း စာတန်ကို အောင်မြင်ရန် ဘုရားသခင်ကို မည်သို့ကိုးစားခဲ့ကြောင်း၊ မည်သည့်ဆင်းရဲဒုက္ခမျိုးကို ခံစားခဲ့ကြောင်းနှင့် ထိုအရာမှ မည်သည့်အရာကို ရရှိခဲ့ကြောင်းကို သက်သေခံနိုင်သည်။ ဤသည်မှာ မှန်ကန်သောနည်းလမ်း ဖြစ်သည်။ သို့ရာတွင် ၎င်းတို့သည် ဤမှန်ကန်သောလမ်းကြောင်းကို တမင်ရည်ရွယ်၍ကို မလျှောက်ဘဲ နေကြသော်လည်း နေရာတိုင်းတွင် မိမိတို့ကိုယ်ကို လျှောက်၍ကြွားဝါကြသည်။ “ကျွန်ုပ်သည် နှစ်ပေါင်းများစွာ ထောင်ချခံခဲ့ရပြီး များစွာ ဒုက္ခခံခဲ့ရသည်။ ထို့ကြောင့် ဤသည်မှာ သင်တို့ ကျွန်ုပ်အား ဆက်ဆံသည့်သင့်ပုံစံ ဖြစ်သည်။ အကယ်၍ သင်တို့သည် ကျွန်ုပ်အား ထိုသို့မဆက်ဆံပါက သင်တို့သည် မျက်ကန်းနေသည်၊ ပညာမဲ့သည်၊ ပြီးလျှင် သနားကြင်နာမှု ကင်းမဲ့နေကြပေသည်” ဟူ၍ဖြစ်သည်။ ၎င်းတို့သည် မှန်ကန်သောလမ်းကြောင်းကို လျှောက်ရန် ပျက်ကွက်နေကြသည် မဟုတ်လော။ နဂိုမူလက ၎င်းတို့ ထောင်ချခံရခြင်း၊ ပြစ်ဒဏ်ချခံရပြီးနောက် သစ္စာဖောက်ခြင်းမရှိဘဲ ဒုက္ခခံရခြင်းနှင့် မိမိတို့ သက်သေခံရာ၌ အခိုင်အမာ ရပ်တည်ခြင်းတို့က ကောင်းသောအရာ ဖြစ်သည်။ ဤသည်မှာ ဘုရားသခင်၏ အောက်မေ့ခြင်း ခံရရန် ထိုက်တန်သည်။ သို့ရာတွင် ၎င်းတို့သည် တမင်ရည်ရွယ်၍ကို မိမိတို့ လုပ်‌ဆောင်ခဲ့သင့်သည့်အတိုင်း မလုပ်ဆောင်ဘဲ နေခဲ့ကြ၏။ ၎င်းတို့သွားသည့် နေရာတိုင်းတွင် လူတို့၏ လေးစားမှုနှင့် သနားကရုဏာကို ရယူဖို့အတွက် မိမိတို့၏ အောင်မြင်မှုများအကြောင်းကို ကြွားဝါခဲ့ကြသည်။ ၎င်းတို့သည် ရုပ်ဝတ္ထုပစ္စည်းတချို့ကို တောင်းခံသည်အထိပင် ဖြစ်ခဲ့ကြသည်။ ဤသည်မှာ ၎င်းတို့၏ အောင်မြင်မှုများအတွက် ဆုလာဘ်ကို ရှာဖွေခြင်းဖြစ်သည်။ လူတို့ထံမှ ဆုလာဘ်များကို ဤကဲ့သို့ ရှာဖွေခြင်း၏ သွယ်ဝိုက်အဓိပ္ပာယ်မှာ အဘယ်နည်း။ ၎င်းတို့သည် လူတို့ထံမှ ဆုလာဘ်များကို တောင်းခံနိုင်သော်လည်း ဘုရားသခင်ထံမှ ဆုလာဘ်များကို တောင်းခံနိုင်သလော။ ၎င်းတို့သည် လူတို့ထံသွား၍ ဆုလာဘ်များ အလုံအလောက် တောင်းခံကြသည်။ ၎င်းတို့သည် အဆင့်အတန်းအတွက်၊ ကျော်စောမှုနှင့် အကျိုးအမြတ်အတွက်၊ ဂုဏ်ဒြပ်သာမက ဇာတိပကတိ၏ ပျော်မွေ့ဖွယ်ရာများကို တောင်းခံကြပြီးနောက် ဘုရားသခင်ထံမှ ဆုလာဘ်များကို သွား၍တောင်းခံကြသည်။ ဤသည်မှာ ပေါလုကဲ့သို့ ဖြစ်သည်မဟုတ်လော။ ထို့ထက်ပိုသည်မှာ ၎င်းတို့သည် ဤတာဝန်ကို ထမ်းဆောင်ခြင်းဖြင့် လူများစွာကို သိမ်းသွင်းရရှိခဲ့ပြီး ဖြစ်သည်။ ဘုရားသခင်၏အမြင်မှ ၎င်းတို့သည် မိမိတို့၏ တာဝန်များကို သမ္မာတရား နားလည်ခြင်းဟူသည့် အခြေခံအုတ်မြစ်ပေါ် အခြေခံ၍ ဆက်လက် လုပ်ဆောင်နိုင်ပြီး ဤတာဝန်ကို ဆက်လက်၍ ကောင်းစွာ ထမ်းဆောင်နိုင်ပါက ဘုရားသခင်သည် ၎င်းတို့ကို ဧဝံဂေလိဖြန့်ဝေခြင်းကို ဆက်လက်၍ ပေးအပ်မည်ဖြစ်သည်။ သို့ရာတွင် ၎င်းတို့သည် ဤအရာကိုမလုပ်ဖို့ ရွေးချယ်သော်လည်း ၎င်းတို့တွင် လူတိုင်းအား ကြေညာနိုင်သည့် လုံလောက်သော ချီးကျူးဂုဏ်ပြုမှုနှင့် အရည်အချင်းများရှိသည်ဟု တွေးထင်ကြသည်။ ထို့ကြောင့် ၎င်းတို့သည် လုံးဝ အလုပ်မလုပ်တော့ဘဲ ဆုလာဘ်ပေးရန် စတင်တောင်းဆိုကြသည်။ ၎င်းတို့သွားသည့် နေရာတိုင်းတွင် ကြွားဝါကြသည်၊ ၎င်းတို့၏ အရည်အသွေးကောင်းကို ကြွားလုံးထုတ်ကြသည်၊ ကောင်းမှုများကို နှိုင်းယှဉ်ပြီးလျှင် ၎င်းတို့က လူ ဘယ်နှရာ၊ ဘယ်နှထောင်ကို ဧဝံဂေလိ ဆောင်ကြဉ်းခဲ့ပြီးကြောင်း ကြွားလုံးထုတ်ကြသည်။ ဤအရာ၌ ၎င်းတို့သည် ဘုရားသခင်အား ဂုဏ်အသရေ မပေးသည့်အပြင် ဘုရားသခင်၏ အနန္တတန်ခိုးနှင့် ဉာဏ်ပညာကို မည်သည့်အခါမျှ သက်သေမခံပေ။ ဤသည်မှာ သေခြင်းတရားကို ဖိတ်ခေါ်ခြင်း မဟုတ်သလော။ ၎င်းတို့သည် ဘုရားသခင်ကို ယုံကြည်သော်လည်း မှန်ကန်သော လမ်းကြောင်းကို မလျှောက်ကြပေ။ သို့ဆိုလျှင် တရားဒေသနာများနှင့် မိတ်သဟာယပြုချက်တို့ကို နားထောင်ခြင်းအပေါ် ၎င်းတို့၏ သဘောထားက အဘယ်နည်း။ ၎င်းတို့က “ကျွန်ုပ် နားထောင်စရာ မလို၊ ကျွန်ုပ်သည် ထောင်ချခံရဖူးသည်။ ကျွန်ုပ်သည် ယုဒတစ်ဦး ဖြစ်မလာခဲ့ပေ။ ကျွန်ုပ်၌ သက်သေခံစရာ ရှိသည်။ ထို့အပြင် ကျွန်ုပ်သည် အခြားလူတကာထက် လူတို့ကို ပို၍ သိမ်းသွင်းရရှိခဲ့ပြီ။ အများဆုံးသော အဖိုးအခကို ကျွန်ုပ် ပေးခဲ့ပြီးပြီ။ အခက်အခဲဟူသမျှကို ကျွန်ုပ် ခံစားခဲ့ပြီးပြီ။ ခြုံပုတ်များကြား၌ တိုးဝှေ့သွားခဲ့ပြီး ဂူများထဲ၌ အိပ်စက်ခဲ့ပြီးပြီ။ ကျွန်ုပ်မခံစားနိုင်သော ဒုက္ခမရှိသည့်အပြင် ကျွန်ုပ်မရောက်ခဲ့ဖူးသော နေရာမရှိပေ။ သင်တို့ထဲမှ မည်သူသည် ကျွန်ုပ်အား ယှဉ်ပြိုင်တုပနိုင်သလော။ ထို့ကြောင့် ကျွန်ုပ်နားထောင်သည့် ဒေသနာများကို လုံးစေ့ပတ်စေ့ နားလည်ရန် မလိုပေ။ တရားဒေသနာများ နားထောင်ခြင်းသည် လက်တွေ့လုပ်ဆောင်မှုအတွက်သာ မဟုတ်လော။ ယင်းတို့အားလုံးကို ကျွန်ုပ် လုပ်ဆောင်ခဲ့ပြီးပြီ။ ယင်းကို ကျွန်ုပ် အသက်ရှင်နေထိုင်ခဲ့ပြီးပြီ။ စိတ်လှုပ်ရှားစရာ ဘာမျှမရှိတော့၊ ဘုရားသခင်၏ လူဇာတိခံယူခြင်း အကြောင်းပင် အထင်ကြီးလောက်စရာ မရှိတော့ပေ။” ထိုသို့အလားတူ စကားများကို ပြောသည်မှာ မည်သည့်လူစားမျိုးနည်း။ (ရှင်ပေါလုဖြစ်ပါသည်။) ဤသည်မှာ အသက်ပြန်ဝင်လာသည့် ပေါလုပင် ဖြစ်သည်။ ၎င်းတို့က “သင်တို့သည် ကျွန်ုပ်ကဲ့သို့ မကျွမ်းကျင်ပေ။ သင်တို့ ကျွမ်းကျင်ခဲ့လျှင် တရားဒေသနာ မြောက်မြားစွာ နားထောင်စရာ လိုမည်မဟုတ်သည့်အပြင် ဘုရားသခင်၏ နှုတ်ကပတ်တော်များကို နေ့စဉ်နေ့တိုင်း စိတ်အာရုံစိုက်လျက် ရေးစရာ၊ ပြန်ကူးစရာနှင့် အလွတ်ကျက်မှတ်စရာ လိုမည်မဟုတ်ပေ။ ကျွန်ုပ်အား ကြည့်‌ပါ။ ဧဝံဂေလိတရားကို ဟောပြောခြင်းဖြင့် လူမြောက်မြားစွာကို သိမ်းသွင်းရရှိခဲ့ပြီးပြီ။ သင်တို့ကဲ့သို့ ကျွန်ုပ် မည်သည့်အချိန်က လေ့လာခဲ့ဖူးသနည်း။ လေ့လာဖို့မလို၊ သန့်ရှင်းသော ဝိညာဉ်တော်က သူ၏အမှုပြုလျှင်ပြုချင်း ကျွန်ုပ်အားလုံးကို ရရှိပြီဖြစ်သည်” ဟူ၍လည်း ပြောကြသည်။ ဤသည်မှာ ကြီးစွာသော မိုက်မဲခြင်းမဟုတ်လော။ ၎င်းတို့၏ မာနထောင်လွှားမှုမှာ အတိုင်းအဆမရှိပေ။ ဘုရားသခင်၏ အမှုနှင့် ကယ်တင်ခြင်းအား လိုက်စားမှုကို လက်ခံခြင်းအား မည်သည့်အရာဟု ၎င်းတို့ ထင်သနည်း။ ယင်းကို ကလေးကစားနည်းဟု ၎င်းတို့ထင်ပေသည်။ ၎င်းတို့သည် ကောင်းသောအမူအကျင့် အနည်းငယ်ကို ပြသပြီး အလုပ်အနည်းငယ်ကို ပြီးစီးခဲ့ပြီဖြစ်သဖြင့် မိမိတို့၏ ဆောင်ရွက်ချက်ကို ပြီးမြောက်ပြီး မိမိတို့၏ တိုက်လှန်မှုကို တိုက်ခဲ့ပြီးဖြစ်သောကြောင့် လုပ်ရန်ကျန်ရှိသည့်အရာ တစ်ခုတည်းမှာ ၎င်းတို့၏ သရဖူကိုရယူဖို့ဖြစ်သည်ဟု ယုံကြည်ကြသည်။ ၎င်းတို့အတွက် သရဖူများ မပေးသည့် ဘုရားသည် လုံးဝ ဘုရားမဟုတ်ပေ။ ဤအရာ၌ ၎င်းတို့သည် ဘာသာရေးသမားများနှင့် တူညီသောအမြင် ရှိကြသည်။ ၎င်းတို့က “ယခုတွင် ဒုက္ခခံစရာရှိသမျှကို ကျွန်ုပ်ခံခဲ့ပြီး အဖိုးအခအားလုံးကို ပေးခဲ့ပြီးပြီ။ ကျွန်ုပ်သည် ဘုရားသခင်ခံစားခဲ့သလောက်နီးပါး ခံစားခဲ့ပြီးပြီ။ ဘုရားသခင်၏ ဆုလာဘ်ကို ရရှိနိုင်သင့်ပေပြီ” ဟုလည်း ဆိုကြသည်။ ဤလူတို့သည် ပေါလုကဲ့သို့ပင် မဟုတ်လော။ ၎င်းတို့သည် လူတို့ကို အရည်အချင်းများနှင့် ဝါရင့်ခြင်းနုခြင်းအားဖြင့် အမြဲတမ်း အဆင့်အတန်း သတ်မှတ်သည်။ ၎င်းတို့အားလုံးက မိမိတို့အသက်ရှင်သည်မှာ ခရစ်တော်ဖြစ်သည်ဟု ပြောကြသည်။ အကယ်၍ ၎င်းတို့သည် အမှန်တကယ် ခရစ်တော်ဖြစ်လိုပါက ဒုက္ခရောက်ကြမည်ဖြစ်သည်။ ဤသည်မှာ ဒုတိယပေါလု ဖြစ်၏။ ဤလမ်းကြောင်းကို လျှောက်သောသူတစ်ဦး၌ မိမိကိုယ်ကို ပြန်လှည့်လာနိုင်ခြေရှိသေးသလော။ လုံးဝမရှိပေ။ ဤလမ်းကြောင်းမှာ အန္တိခရစ်များ၏ တစ်ဖက်ပိတ်လမ်းမြောင်ပင် ဖြစ်၏။

နှစ်ပေါင်းများစွာ ဘုရားသခင်ကို ယုံကြည်လာခဲ့ပြီဖြစ်သော လူအချို့သည် အဘယ့်ကြောင့် အန္တိခရစ်များ၏ လမ်းကြောင်းကို လျှောက်ကြသနည်း။ ဤအရာကို လူတစ်ဦး၏ သဘာဝအနှစ်သာရက အဆုံးအဖြတ်ပေးသည်။ ကောက်ကျစ်စဉ်းလဲသော လူအားလုံး၊ အသိတရားနှင့် ဆင်ခြင်တုံတရားမရှိသော လူအားလုံးတို့သည် သမ္မာတရားကို မချစ်သောသူများ ဖြစ်ကြသည်။ ထို့အတွက်ကြောင့် ဘုရားသခင်ကို ယုံကြည်လာပြီးနောက် အန္တိခရစ်များ၏ လမ်းကြောင်းကို လျှောက်ရန် ပင်ကိုအားဖြင့် ရွေးချယ်ကြခြင်းဖြစ်၏။ လူတိုင်းက ဘုရားသခင်ကို ယုံကြည်သည်၊ ဘုရားသခင်၏ နှုတ်ကပတ်တော်များကို ဖတ်ရှုသည်၊ ပြီးလျှင် တရားဒေသနာများကို နားထောင်သည်။ သို့ဆိုလျှင် အဘယ်ကြောင့် လူအချို့ကသာ သမ္မာတရားလိုက်စားခြင်း လမ်းကြောင်းကိုလျှောက်ဖို့ ရွေးချယ်ကြသနည်း။ အဘယ့်ကြောင့် အခြားလူတို့က ကျော်စောခြင်း၊ အကျိုးအမြတ်၊ အဆင့်အတန်းနှင့် ကောင်းချီးများအား လိုက်စားခြင်းလမ်းကြောင်းကို လျှောက်ဖို့ ရွေးချယ်ကြသနည်း။ ၎င်းတို့၏ အရှိအတိုင်းဖြစ်သော ပတ်ဝန်းကျင်များက တူညီသော်လည်း ၎င်းတို့၏ လူ့သဘာဝအရည်အသွေးနှင့် ကိုယ်ပိုင်ရွေးချယ်မှုများက ကွဲပြားသောကြောင့် မတူညီသောလမ်းကြောင်းများကို ရွေးချယ်ကြခြင်း ဖြစ်သည်။ ဘုရားသခင်၏ သိုးများက ဘုရားသခင်၏ အသံကို နားထောင်ကြသည်။ ဘုရားသခင်သည် နောက်ဆုံးသော ကာလတွင် မြောက်မြားစွာသော နှုတ်ကပတ်တော်များကို မိန့်မြွက်ခဲ့ပြီဖြစ်ပြီး ဘုရားသခင်၏ နှုတ်ကပတ်တော်များကို နှစ်ပေါင်း ၃၀ နီးပါး ဖော်ပြလာခဲ့ပြီဖြစ်သည်။ သို့သော် ယင်းတို့ကို ဤလူတို့က နားမလည်ကြပေ။ သို့ဆိုလျှင် ၎င်းတို့သည် ဘုရားသခင်၏ သိုးများ ဟုတ်သလော။ (မဟုတ်ပါ။) ၎င်းတို့သည် ဘုရားသခင်၏ သိုးများနှင့် မဆိုင်လျှင် လူသားများဟုခေါ်ဖို့ မထိုက်တန်ပေ။ သမ္မာတရားကို မချစ်သည့်အပြင် သမ္မာတရားကို မလိုက်စားသော သူတို့သည် မည်သည့်အရာကို အာရုံစိုက်ကြသနည်း။ ၎င်းတို့လိုက်စားသော အရာမှာ အဘယ်နည်း။ အဆင့်အတန်းနှင့် ကောင်းချီးမင်္ဂလာများကို လိုက်စားဖို့ ၎င်းတို့၏ အလိုဆန္ဒသည် အထူးသဖြင့် ပြင်းထန်ကြောင်းနှင့် သမ္မာတရားကို သင်မည်မျှ မိတ်သဟာယ ပြုသည် ဖြစ်စေ ယင်းကို ၎င်းတို့ နားထောင်မည် မဟုတ်ကြောင်း တွေ့မြင်ရန် လွယ်ကူလောက်သည်။ ၎င်းတို့သည် သမ္မာတရားကို လက်မခံနိုင်သည်သာမက ကျော်စောမှု၊ အကျိုးအမြတ်နှင့် အဆင့်အတန်းကိုလည်း ဆက်၍ မလျှော့တမ်း လိုက်စားကြသည်။ ၎င်းတို့၌ မိမိကိုယ်ကိုသိကျွမ်းခြင်းဟူသမျှ ကင်းမဲ့သည်သာမက ကောင်းမှုများကို အမြဲတမ်း နှိုင်းယှဉ်ပြီး နေရာတိုင်း၌ မိမိတို့၏ ကိုယ်ပိုင်အရည်အသွေးကောင်းကြောင်းကို ကြွားဝါကြသည်။ ထိုသို့သော အပြုအမူနှင့် အလေ့အထများ၏ သဘာဝမှာ အဘယ်နည်း။ (ယင်းမှာ သေခြင်းတရားကို ဖိတ်ခေါ်ခြင်း ဖြစ်သည်။) မှန်ပေ၏။ ယင်းသည် ပေါလုက သေခြင်းတရားကို ဖိတ်ခေါ်ခဲ့သည့်အတိုင်းပင် ဖြစ်သည်။ တရားဒေသနာများကို နှစ်‌ပေါင်းများစွာ နားထောင်လာပြီးနောက် လူတို့သည် နောင်တမရဘဲ ပေါလုကဲ့သို့ပင် ဖြစ်နိုင်စွမ်းရှိကြသေးသည်။ ၎င်းတို့၌ မည်သည့် သမ္မာတရားနားလည်မှုမျှ မရှိသည့်အပြင် သမ္မာတရားကို လုံးဝ လက်မခံကြပေ။ ဤသည်မှာ သေခြင်းတရားကို ဖိတ်ခေါ်နေခြင်း မဟုတ်လော။ အစဦးတွင် လူတို့သည် သမ္မာတရားကို နားမလည်သည့်အခါ လူ့စိတ်ဆန္ဒမှလာပြီး မသန့်စင်သည့် အမူအကျင့်နှင့် အလေ့အထအချို့ကို ထုတ်ဖော်ပြသည်၊ သို့မဟုတ် ၎င်းတို့သည် အပေးအယူ လုပ်ခြင်းတစ်ခုခု သို့မဟုတ် ကိုယ်ပိုင်ရည်ရွယ်ချက်များနှင့် အလိုဆန္ဒများကို ထုတ်ဖော်ပြကောင်း ပြမည်ဖြစ်သည်။ ၎င်းတို့သည် သမ္မာတရားကို နားမလည်သဖြင့် ဤအရာကို ဘုရားသခင် မကြည့်ချေ။ ဘုရားသခင်၏ နှုတ်ကပတ်တော်များက လူသားအတွက် ဤမျှရှင်းလင်းအောင် မပြုလုပ်ရသေးစဉ်က ဘုရားသခင်သည် လူသားအား ကိုယ်ပိုင် ဖောက်ပြန်ပျက်စီးခြင်း၊ မသန့်စင်ခြင်း၊ အားနည်းခြင်းနှင့် အပေးအယူလုပ်ခြင်းတို့ကို ခွင့်ပြုခဲ့သည်။ ယခုတွင်မူ ဘုရားသခင်သည် လုံလောက်သည့် အတိုင်းအတာအထိ များစွာ မိန့်မြွက်ထားပြီး ဖြစ်သည့်တိုင် သင်သည် သင်ဆုပ်ကိုင်ထားသော အရာများနှင့် သင်ကျင့်သုံးနေသော အမူအကျင့်များမှာ မှန်ကန်သည်ဟု မလျှော့တမ်း ယုံကြည်နေသေးသည်။ သင်သည် ဘုရားသခင်၏ ဤနှုတ်ကပတ်တော်များကို ငြင်းဆိုသည်၊ သို့မဟုတ် ဘုရားသခင်၏ နှုတ်ကပတ်တော်များကို အထင်သေးခြင်းနှင့် မသိကျိုးကျွန်ပြုခြင်းပင် ရှိကာ မမြင်ဘဲကြည့်ပြီး မကြားဘဲ နားထောင်သည်။ ထိုသို့သောလူတို့အပေါ် ဘုရားသခင်၏ သဘောထားမှာ အဘယ်နည်း။ ထိုသို့သောအရာများကို ဘုရားသခင် မည်သို့ရှုမြင်သနည်း။ ဘုရားသခင်က သင်သည် သမ္မာတရားကို မချစ်၊ အပြုသဘောဆောင်သော အရာများကို မချစ်သည့်အပြင် သင်သည် မယုံကြည်သူတစ်ဦး ဖြစ်သည်ဟု ဆိုလိမ့်မည်။ ထိုသို့သော လူတို့က သမ္မာတရားရှိကြောင်း၊ ဘုရားသခင် မိန့်မြွက်ထားသမျှသည် သမ္မာတရားဖြစ်ပြီး ကယ်တင်ခြင်းအဖို့ လူသား၏လမ်းကြောင်း ဖြစ်ကြောင်း မယုံကြည်ပေ။ ဤအချက်ကို ၎င်းတို့ လက်မခံကြပေ။ ဤသို့သောလူတို့သည် ဘုရားသခင်၏ ဤနှုတ်ကပတ်တော်များကို မငြင်းဆိုသည့်တိုင် ယင်းတို့ကို လက်လည်းမခံပေ။ ၎င်းတို့၏ အမူအကျင့်နှင့် ၎င်းတို့ ထုတ်ဖော်သည့်အရာအားဖြင့် ၎င်းတို့သည် သမ္မာတရားလိုက်စားခြင်း လမ်းကြောင်းတွင် မရှိကြသည်ကို သင် တွေ့နိုင်သည်။ မည်သည့်လမ်းကြောင်းကို ၎င်းတို့ လျှောက်နေကြသနည်း။ ဘုရားသခင်ထံမှ ဆုလာဘ်များကို ရှာဖွေရန်အတွက် မိမိတို့ကိုယ်ပိုင် အရည်အသွေးကောင်းနှင့် အောင်မြင်မှုများအပေါ် အမှီပြုခြင်းအားဖြင့် ၎င်းတို့သည် ပေါလု၏ လမ်းကြောင်းကို လျှောက်နေကြသည်။ ပေါလုကို မည်ကဲ့သို့ စိတ်ဖြာလေ့လာသည်ဖြစ်စေ ၎င်းတို့သည် မိမိတို့အထဲ၌ တူညီသော အရာများကို ဖော်ထုတ်တွေ့ရှိမည် မဟုတ်ပေ။ ပေါလုကို မည်ကဲ့သို့ စိတ်ဖြာလေ့လာသည်ဖြစ်စေ ၎င်းတို့သည် ပြောင်းလဲလာခြင်း၊ နောင်တရခြင်း၊ သို့မဟုတ် မိမိတို့ကိုယ်ကို သိမြင်လာခြင်း ရှိမည်မဟုတ်ပေ။ ၎င်းတို့သည် ၎င်းတို့ပြုလုပ်သမျှက မှန်ကန်ပြီး သမ္မာတရားနှင့် ကိုက်ညီသည်ဟု ယုံကြည်နေကြဆဲ ဖြစ်သည်။ ဘုရားသခင်သည် နှုတ်ကပတ်တော် မည်မျှကို ဖော်ပြပါစေ၊ သူသည် ထိုကဲ့သို့သော လူတို့ကို မည်ကဲ့သို့ ခွဲခြမ်းစိတ်ဖြာပြပြီး ပြစ်တင်ရှုတ်ချပါစေ ၎င်းတို့သည် မိမိတို့ကိုယ်ကို မည်သည့်အခါမျှ ဆင်ခြင်သုံးသပ်မည် မဟုတ်ပေ။ ဘုရားသခင်အား ယုံကြည်ခြင်းအပေါ် ၎င်းတို့၏ ရှုထောင့်အမြင်များ၊ ကောင်းချီးမင်္ဂလာများ ရရှိဖို့ ၎င်းတို့၏ ရည်ရွယ်ချက်နှင့် ဘုရားသခင်နှင့် အပေးအယူလုပ်သည့် ၎င်းတို့၏ အလေ့အကျင့်တို့က မမှိတ်မသုန် မပြောင်းမလဲ ရှိနေသေးသည်။ ဤအရာအတွက် အကြောင်းရင်းက အဘယ်နည်း။ ၎င်းတို့သည် ဘုရားသခင်၏ အသံတော်ကို နားမလည်သည့်အပြင် ဘုရားသခင်၏ အသံတော်ကို နားမထောင်ကြပေ။ ဘုရားသခင် မည်သည့်အရာကို မိန့်မြွက်ပါစေ၊ ယင်းမှာ ၎င်းတို့အတွက် အရေးကြီးမှု စိုးစဉ်းသာ ဖြစ်သည်။ “ကိုယ်တော်ပြောချင်သည်ကို ကိုယ်တော်ပြောသည်၊ ကျွန်ုပ်ကိုမူ ကျွန်ုပ်၏သဘောအတိုင်း လုပ်ခွင့်ပြုပါ။ ကိုယ်တော်သည် ကိုယ်တော်ပင်၊ ကျွန်ုပ်သည် ကျွန်ုပ်ပင်ဖြစ်၏။ ကိုယ်တော် မည်သည့်အရာ ပြုလုပ်သည်ဖြစ်စေ၊ ကိုယ်တော့်အလိုတော်သည် မည်သည့်အရာဖြစ်စေ ယင်းက ကျွန်ုပ်အဖို့ အဘယ်အရာ ဖြစ်သနည်း။ ယင်းက ကျွန်ုပ်၏ သေရေးရှင်ရေးနှင့် ဘာမျှမသက်ဆိုင်ပေ။” ဤသည်မှာ မည်သို့သောလူစားမျိုးများ ဖြစ်သနည်း။ (မယုံကြည်သူများ ဖြစ်သည်။) ၎င်းတို့သည် မည်သည့်အရာကို ယုံကြည်ကြသနည်း။ မိမိတို့ကိုယ်ကို ယုံကြည်ကြသည်။ ထိုသို့သော လူတို့သည် မုန်းတီးစက်ဆုပ်ဖွယ် ကောင်းသည်မဟုတ်လော။ (မုန်းတီးစက်ဆုပ်ဖွယ် ကောင်းပါသည်။) ၎င်းတို့သည် မုန်းတီးစက်ဆုပ်ဖွယ် ကောင်းသည်ဖြစ်၍ သေကျေပျက်စီးသင့်သည်။ ၎င်းတို့သည် ဘုရားသခင် ကယ်တင်မည့်သူများ မဟုတ်ကြပေ။ ထို့ကြောင့် ဧဝံဂေလိ ဖြန့်ဝေသောသူတို့ကြားတွင် ၎င်းတို့၏ ယခင်က အောင်မြင်မှုအပေါ် အမြဲတမ်း ကျေနပ်တင်းတိမ်ကာ ၎င်းတို့၏ ဝါရင့်ခြင်းကို ကြွားလုံးထုတ်ပြီး ဘုရားသခင်ထံမှ လွန်လေပြီးသော ကောင်းမှုများအတွက် ဆုလာဘ်များကို တောင်းဆိုသည့် လူများစွာ ရှိပါက ၎င်းတို့သည် ဒုက္ခရောက်မည်ဖြစ်သည်။ ၎င်းတို့၏ အပြုအမူကြောင့် ၎င်းတို့၏ အဆုံးသတ်အား သေခြင်းတရားကို ဖိတ်ခေါ်ခြင်းအဖြစ် အဆုံးအဖြတ်ပေးမည် ဖြစ်သည်။ သို့ဆိုလျှင် ဤသို့သော လူစားမျိုးကို တွေ့ဆုံသောအခါ သင့်အနေဖြင့် ၎င်းတို့အား သေခြင်းတရားကို ဖိတ်ခေါ်ခြင်းအတွက် သတိပေးရန် သင့်တော်သလော။ အကယ်၍ ၎င်းတို့သည် ဧဝံဂေလိ ဖြန့်ဝေနိုင်သေးလျှင် ၎င်းတို့ကို ထိုသို့ မပြောလေနှင့်။ ၎င်းတို့ကို သင် သတိဖော်နိုင်သည်၊ ၎င်းတို့ကို သတိပေးနိုင်သည်၊ ပြီးလျှင် ၎င်းတို့ကို အတတ်နိုင်ဆုံး ကူညီပေးမည့် သွယ်ဝိုက်အရိပ်အမြွက်များအားဖြင့် ၎င်းတို့ကို လမ်းညွှန်ပေးနိုင်သည်။ သို့ရာတွင် အကယ်၍ ၎င်းတို့၏ အနှစ်သာရနှင့် စိတ်သဘောထားမှာ အမှန်ပင် ပေါလု၏ အနှစ်သာရ၊ စိတ်သ‌ဘောထားနှင့် တစ်ထပ်တည်းကျနေပါက ၎င်းတို့ကို ငါတို့ မည်သို့သဘောထားသင့်သနည်း။ ၎င်းတို့သည် သေခြင်းတရားကို ဖိတ်ခေါ်နေသည်ကို သိသော်လည်း ၎င်းတို့အား အမှန်တရားကို မပြောပြဘဲ ဆက်၍ အားပေးနေသေးကာ ဆက်၍ အစေခံခွင့်ပြုနေပါက ဤသည်ကို စာတန်အား အရှက်ရစေခြင်းဟု ခေါ်သည်။ ဤသို့ပြုသည်မှာ သင့်တော်သ‌လော။ (သင့်တော်ပါသည်။) စာတန်၏ ဝန်ဆောင်မှုကို ကောင်းကောင်း အသုံးချသည်မှာ ဘုရားသခင်၏ ဉာဏ်ပညာပင်ဖြစ်သည်။ သင်သည် သင်၏ ညီအစ်ကိုမောင်နှမများကို ဤပုံစံအတိုင်း ဆက်ဆံပါက ယင်းမှာ မကောင်းမှုဖြစ်ပြီး ယင်းကို ဘုရားသခင် စက်ဆုပ်ရွံရှာ၏။ အကယ်၍ သင်သည် စာတန်၏ ဝန်ဆောင်မှုကို အသုံးချပါက ဤသည်ကို စာတန်အား အရှက်ရစေခြင်းဟု ခေါ်သည်။ ဤသည်ကို ဉာဏ်ပညာဟု ခေါ်သည်။ အဆင်းနီသော နဂါကြီးဖြစ်သော စာတန်နှင့် နတ်မိစ္ဆာများသည် ဘုရားသခင်ရွေးကောက်ထားသော လူတို့ကို အစေခံကြသည်။ ဤသည်မှာ ဘုရားသခင်၏အလုပ် ဟုတ်သလော။ (ဟုတ်ပါသည်။) ဤအရာကို ငါတို့ မည်ကဲ့သို့ ရှုမြင်သင့်သနည်း။ ဤသည်မှာ ဘုရားသခင်၏ ဉာဏ်ပညာပင်ဖြစ်၏။ ဤအရာကို ပြစ်တင်ရှုတ်ချ၍ မရပေ။ ဤသည်မှာ သမ္မာတရား ဖြစ်သည်။ သင်သည် ဤအရာဖြစ်သော စာတန်ကို သင်၏ အကျိုးအတွက် အသုံးချရမည်။ သင်သည် ယင်းကို အစေခံခြင်းအကြောင်းအတွက် အသုံးမချပါက အလုပ်အချို့မှာ ကောင်းစွာ မပြီးမြောက်ဘဲ ရှိနေမည်ဖြစ်ပြီး ရလဒ်များရရှိရန် လွယ်ကူမည်မဟုတ်ပေ။ သမ္မာတရား လိုက်စားခြင်းလမ်းကြောင်းနှင့် ကယ်တင်ခြင်းလမ်းကြောင်းတွင် လျှောက်သည့် လူများ၌လည်း အစေခံမှု ပေးခြင်းတွင် အဆင့်ရှိသော်ငြားလည်း ဤအရာသည် ရေရှည်မဟုတ်ပေ။ ဘုရားသခင်သည် သင့်အား အစေခံစေရန် ဉာဏ်ပညာကို အသုံးမပြုသော်လည်း သင်ကသာ ဤအဆင့်ကို ဖြတ်ကျော်သွားရမည် ဖြစ်သည်။ သင်သည် သမ္မာတရားကို နားမလည်သောကြောင့် စည်းမျဉ်းများမပါဘဲ သင်၏ တစ်ကိုယ်ရေစိတ်ဆန္ဒအတိုင်း အမှုအရာများစွာကို ပြုလုပ်လေသည်။ သင်၏အနှစ်သာရအားဖြင့် သင်သည် အစေခံရန် စိတ်ဆန္ဒမရှိ၊ သို့သော် အရှိအတိုင်းဖြစ်သော အချက်အားဖြင့် သင်သည် အစေခံနေသည်။ လူတို့သည် ကောင်းစွာ အစေခံပြီး ဘုရားသခင်၏ အလိုတော်နှင့် သမ္မာတရားအား တစ်ဖြည်းဖြည်း နားလည်သောအခါမှသာ ၎င်းတို့သည် သမ္မာတရားလိုက်စားခြင်းသို့ တစ်ဆင့်ပြီးတစ်ဆင့် ကူးပြောင်းနိုင်သည်၊ ၎င်းတို့၏ တာဝန်များကို အမှန်တကယ် ဖြည့်ဆည်းနိုင်သည်၊ ဘုရားသခင်ကို နာခံပြီး သူ၏အလိုတော်နှင့် ညီညွတ်နိုင်သည်၊ ပြီးလျှင် ကယ်တင်ခြင်းလမ်းကြောင်းပေါ် တစ်ဆင့်ပြီးတစ်ဆင့် တက်လှမ်းနိုင်လေသည်။ သို့ရာတွင် ဤအစေခံခြင်းသည် စာတန်၏ဝန်ဆောင်မှုအား အသုံးချခြင်းနှင့် လုံးလုံးလျားလျား ခြားနားသောအရာ ဖြစ်သည်။ ယင်းသည် ကွဲပြားသော သဘာဝရှိ၏။ ဘုရားသခင်ကသာ စာတန်၏ ဝန်ဆောင်မှုကို ကောင်းကောင်း အသုံးချလေသည်။ ဘုရားသခင်သည် စာတန်ကိုမူ မကယ်တင်ပေ။ ဘုရားသခင်ကို ရိုးသားမှန်ကန်သော စိတ်နှလုံးဖြင့် ယုံကြည်ပြီး သမ္မာတရားကို လိုက်စားနိုင်သော အစေခံသူများမှာ ဘုရားသခင်၏ ကယ်တင်ခြင်းကို လက်ခံရရှိသူများ ဖြစ်ကြသည်။ အစေခံသူအချို့၏ ကိစ္စရပ်တွင် ၎င်းတို့၏ အစေခံခြင်းကို ၎င်းတို့ကိုယ်တိုင် အသုံးဝင်သောအခါမှသာ အသုံးပြုသည်။ သို့သော် ၎င်းတို့သည် အသင်းတော်၏အလုပ်ကို ဖျက်ဆီးနှောင့်ယှက်ပါက ၎င်းတို့ကို ပြင်းထန်စွာ သတိပေးရမည် ဖြစ်သည်။ အကယ်၍ ၎င်းတို့သည် နောင်တမရပါက ကန်ထုတ်ခြင်းနှင့် နှင်ထုတ်ခြင်းကို ခံရမည်ဖြစ်သည်။ ဤသည်မှာ ၎င်းတို့ကို ဆက်ဆံရမည့်ပုံ ဖြစ်သည်။ ၎င်းတို့သည် ပုံမှန်အတိုင်း ရိုးသားစွာ အစေခံနိုင်ပြီး အလုပ်ကို မနှောင့်ယှက်ပါက ၎င်းတို့အား ဆက်၍ အစေခံခွင့်ပြုလော့။ တစ်နေ့တွင် သမ္မာတရားကို နားလည်မည်ဖြစ်ပြီး ကယ်တင်ခြင်းရကောင်း ရနိုင်မည်ဖြစ်သည်။ ဤသည်မှာ ကောင်းသောအရာဖြစ်၍ ယင်းကို ကောင်းသောစိတ်ဓာတ်ဖြင့် အဘယ်ကြောင့် မလုပ်ဆောင်လေသနည်း။ အချိန်မကျခင် လူတစ်ဦးကို ပြစ်တင်ရှုတ်ချ၍ မရပေ။ လူအချို့က ပြစ်တင်ရှုတ်ချခြင်း ခံရသည့်အကြောင်းရင်းမှာ အဘယ်နည်း။ ၎င်းတို့ဖြစ်ပွားစေသည့် အနှောင့်အယှက်များမှာ လွန်စွာ ပြင်းထန်သောကြောင့် ပြစ်တင်ရှုတ်ချခံရခြင်းဖြစ်သည်။ ၎င်းတို့အား သမ္မာတရားကို မည်မျှပင် မိတ်သဟာယပြုသည်ဖြစ်စေ၊ ယင်းကို လက်ခံနိုင်ကြမည် မဟုတ်သည့်အပြင် ၎င်းတို့၏တာဝန်များကို အားရလောက်စရာမရှိအောင် ထမ်းဆောင်ကြမည်ဖြစ်သည်။ ၎င်းတို့၏ သဘာဝအနှစ်သာရများမှာ ပေါလု၏ သဘာဝအနှစ်သာရနှင့် တစ်ထပ်တည်းကျနေသည်။ ၎င်းတို့သည် ခေါင်းမာစွာဖြင့် နောင်တရရန် ငြင်းဆန်ကြသည်။ ၎င်းတို့သည် သေခြင်းတရားကို ဖိတ်ခေါ်နေကြသည်မှာ သံသယဖြစ်စရာ မရှိပေ။ ထိုသို့သောသူတို့သည် အသင်းတော်ထဲ၌ ရှိနေသည်မှာ သေချာ၏။ ဧဝံဂေလိဖြန့်ဝေသောသူတို့ထဲတွင် ရှိနေသည်မှာ သေချာ၏။ ထိုသို့သော လူတို့အား စစ်မှန်သော သမ္မာတရားကို သိစေသည်မှာ ကောင်းသောအရာ ဟုတ်သလော၊ သင်တို့ မည်သို့ထင်သနည်း။ ထိုသို့သော လူတို့က စစ်မှန်သော သမ္မာတရားအား သိမည်ကို ကြောက်သလော။ (ကျွန်ုပ်တို့ မကြောက်ပါ။) ထိုကဲ့သို့သော လူတို့က ဤအရာနှင့်ပတ်သက်၍ မိမိတို့ကိုယ်ကို သိမြင်နိုင်ပြီး နောင်တရပါက ကောင်းသောအရာဖြစ်၏။ လူတို့ကို အခွင့်အရေးပေးရန် လိုသည်။ ၎င်းတို့ကို အဖတ်ဆယ်၍မရဟု သဘောမထားနှင့်။ သို့ရာတွင် ၎င်းတို့သည် စစ်မှန်သော သမ္မာတရားကို သိသော်လည်း မိမိတို့၏ အကျင့်စရိုက်များကို မပြောင်းလဲနိုင်ဘဲ အနှောင့်အယှက်များကို ဆက်၍ ဖြစ်ပွားစေပါက ဤသည်မှာ အမှန်ပင် သေခြင်းတရားကို ဖိတ်ခေါ်ခြင်းဖြစ်ပေ၏။ လူတို့သည် မှန်ကန်သော လမ်းကြောင်းပေါ်၌ မရှိသောအခါ ၎င်းတို့အတွက် စာနာသက်ညှာမှု မပေးနိုင်ချေ။ ဤကဲ့သို့သော လူတို့သည် ရှင်းလင်းပစ်ခြင်းနှင့် ဖယ်ရှားခြင်း ခံရသင့်သည်။

အခြေခံအားဖြင့် ဤအရာများသည် ဧဝံဂေလိ ဖြန့်ဝေခြင်းဆိုင်ရာ လက်တွေ့လုပ်ဆောင်မှုနှင့် ပတ်သက်သည့် စည်းမျဉ်းများဖြစ်သည်။ လူတို့သည် ဧဝံဂေလိ ဖြန့်ဝေရာတွင် မိမိတို့၏တာဝန်ကို ဖြည့်ဆည်းပြီး ဧဝံဂေလိလက်ခံရန် အလားအလာရှိသူတိုင်းကို စိတ်ပါလက်ပါ ကိုင်တွယ်ဖြေရှင်းရမည်။ ဘုရားသခင်သည် လူသားကို ဖြစ်နိုင်သမျှ အကြီးမားဆုံး အတိုင်းအတာအထိ ကယ်တင်ပြီး လူတို့သည် ဘုရားသခင်၏ အလိုတော်ကို အလေးဂရုပြုရမည်။ ၎င်းတို့သည် စစ်မှန်သော လမ်းခရီးကို ရှာဖွေပြီး စုံစမ်းမေးမြန်းနေသည့် မည်သူ့ကိုမျှ ပေါ့ပေါ့တန်တန် လျစ်လျူမရှုရပေ။ ထို့အပြင် ဧဝံဂေလိဖြန့်ဝေရာတွင် စည်းမျဉ်းများကို သင်နားလည်ရမည်။ မှန်သောလမ်းခရီးကို စုံစမ်းမေးမြန်းနေကြသည့် လူတိုင်းနှင့်ပတ်သက်၍ ၎င်းတို့၏ ဘာသာရေးနောက်ခံ၊ ၎င်းတို့၏ အစွမ်းအစက ကောင်းသည်၊ မကောင်းသည်၊ ၎င်းတို့၏ လူ့သဘာဝ အရည်အချင်းတို့ကဲ့သို့သော အရာများကို သင် လေ့လာစောင့်ကြည့်ပြီး နားလည်ရမည်၊ သဘောပေါက်ရမည်။ သမ္မာတရားကို ဆာငတ်သောသူ၊ ဘုရားနှုတ်ကပတ်တော်များကို နားလည်သောသူ၊ သမ္မာတရားကို လက်ခံနိုင်သောသူကို တွေ့ရှိလျှင် ထိုသူကို ဘုရားသခင်က ကြိုတင်သတ်မှတ်ပြီးဖြစ်သည်။ ၎င်းတို့နှင့် သမ္မာတရားကို မိတ်သဟာယဖွဲ့ပြီး ၎င်းတို့ကို သိမ်းသွင်းရရှိရန် အစွမ်းကုန် ကြိုးစားသင့်၏။ သို့ရာတွင် ၎င်းတို့သည် မကောင်းသော လူ့သဘာဝနှင့် ဆိုးရွားသော အကျင့်စရိုက် ရှိပါက၊ ၎င်းတို့၏ဆာငတ်မှုက ဟန်ဆောင်ခြင်း ဖြစ်ပါက၊ ထို့အပြင် ၎င်းတို့သည် အစဉ် ငြင်းခုံနေပြီး ၎င်းတို့၏ အယူအဆများကို ဖက်တွယ်ထားပါက သင်သည် ၎င်းတို့ကို ဘေးဖယ်လိုက်ပြီး လက်လျှော့သင့်သည်။ မှန်သောလမ်းခရီးကို စုံစမ်းမေးမြန်းနေသည့် လူအချို့သည် နားလည်နိုင်စွမ်းရှိပြီး အရည်အချင်း ကြီးမားသော်လည်း မာနထောင်လွှားကာ မိမိကိုယ်ကို မှန်ကန်သည်ဟု ယူမှတ်ကြသည်။ ၎င်းတို့သည် ဘာသာရေး အယူအဆများကို တစ်သဝေမတိမ်း လိုက်နာကြသောကြောင့် သင်သည် ဤအရာကို ကူညီဖြေရှင်းပေးရန် ချစ်ခြင်းနှင့် စိတ်ရှည်သည်းခံခြင်းဖြင့် ၎င်းတို့အား သမ္မာတရားအကြောင်းကို မိတ်သဟာယ ပြုပေးသင့်သည်။ သင် မည်သို့ မိတ်သဟာယပြုပေးသည်ဖြစ်စေ သမ္မာတရားကို ၎င်းတို့လက်မခံမှသာလျှင် လက်လျှော့သင့်သည်။ ထိုအခါ သင်တတ်နိုင်သည့် အရာတိုင်းကို လုပ်ထားပြီးဖြစ်လိမ့်မည်။ အတိုချုပ်အားဖြင့် သမ္မာတရားကို အသိအမှတ်ပြုပြီး ပေါ့ပေါ့တန်တန်ဖြင့် လက်ခံနိုင်သူ မည်သူမဆိုကို လက်မလျှော့လိုက်နှင့်။ မှန်သောလမ်းခရီးကို ၎င်းတို့ စုံစမ်းမေးမြန်းလိုစိတ်ရှိပြီး သမ္မာတရားကို ရှာဖွေနိုင်သရွေ့ ၎င်းတို့ကို ဘုရားနှုတ်ကပတ်တော်များ ပို၍ ဖတ်ပြကာ သမ္မာတရားကို ပို၍ မိတ်သဟာယဖွဲ့ပေးရန်၊ ဘုရားသခင်၏ အမှုတော်ကို သက်သေခံပြီး ၎င်းတို့၏ အယူအဆများနှင့် မေးခွန်းများကို ဖြေရှင်းပေးရန် တတ်နိုင်သမျှ လုပ်ဆောင်သင့်သည်။ ဤနည်းအားဖြင့် ၎င်းတို့ကို သိမ်းသွင်းရရှိနိုင်ပြီး ဘုရားသခင်ရှေ့သို့ ခေါ်ဆောင်လာနိုင်ရန်အတွက် ဖြစ်သည်။ ဤသည်မှာ ဧဝံဂေလိဖြန့်ဝေခြင်း စည်းမျဉ်းများနှင့် ညီ၏။ သို့ဖြစ်လျှင် ၎င်းတို့ကို မည်သို့သိမ်းသွင်းရရှိနိုင်သနည်း။ ၎င်းတို့နှင့် ထိတွေ့ဆက်ဆံခြင်း ဖြစ်စဉ်တွင် ဤပုဂ္ဂိုလ်သည် အရည်အချင်း ကောင်းမွန်ပြီး လူ့သဘာဝကောင်းမွန်ကြောင်း သင် သေချာအောင် လေ့လာစိစစ်ပါက သင့်တာဝန်ကို ဖြည့်ဆည်းရန် တတ်နိုင်သမျှ လုပ်ဆောင်ရမည်။ သင်သည် အဖိုးအခအချို့ ပေးဆပ်ရမည်ဖြစ်ပြီး အချို့သောနည်းလမ်းများနှင့် နည်းစနစ်များကို အသုံးပြုရမည်။ သင်သည် ယင်းတို့ကို ထိုသူအား သိမ်းသွင်းရရှိဖို့ အသုံးပြုသရွေ့၊ မည်သည့်နည်းလမ်းများနှင့် နည်းစနစ်များကို သင် အသုံးပြုပါစေ အရေးမကြီးပေ။ အချုပ်အားဖြင့်ဆိုရသော် သင်သည် ၎င်းကို သိမ်းသွင်းရရှိရန်အလို့ငှာ သင့်တာဝန်ကို ဖြည့်ဆည်းရမည်၊ ချစ်ခြင်းမေတ္တာကို အသုံးပြုကာ အရာရာကို အစွမ်းကုန် လုပ်ဆောင်ရမည်ဖြစ်သည်။ သင်နားလည်သဘောပေါက်သည့် သမ္မာတရားအားလုံးကို မိတ်သဟာယပြုပြီး သင်လုပ်ဆောင်သင့်သည့် အရာအားလုံးကို လုပ်ဆောင်ရမည် ဖြစ်သည်။ ဤလူကို သိမ်းသွင်းရရှိခြင်း မရှိလျှင်ပင် သင်သည် လိပ်ပြာလုံသောစိတ်ဖြင့် ကျန်ရစ်လိမ့်မည်ဖြစ်သည်။ သင်သည် သင်လုပ်ဆောင်နိုင်သမျှကို လုပ်ဆောင်ပြီးဖြစ်လိမ့်မည်။ အကယ်၍ သင်သည် သမ္မာတရားကို ရှင်းရှင်းလင်းလင်း မိတ်သဟာယ မပြုသကဲ့သို့၊ ထိုလူသည် မိမိ၏ အယူအဆများကို ဆက်လက် ဖက်တွယ်ထားပါက၊ အကယ်၍ သင်သည် စိတ်မရှည်ဘဲ သင့်သဘောအလျောက် ၎င်းကို စွန့်လွှတ်ပါက ဤသည်မှာ သင်၏ တာဝန်၌ ဂရုမစိုက်ခြင်း ဖြစ်သည်။ ပြီးလျှင် သင့်အတွက်မှာမူ ဤအရာသည် ပြစ်မှားမှုတစ်ခုနှင့် အစွန်းအထင်းတစ်ခု ဖြစ်လိမ့်မည်။ လူအချို့က “ဤအစွန်းအထင်း ရှိခြင်းသည် ကျွန်ုပ်အား ဘုရားသခင် ပြစ်တင်ရှုတ်ချခြင်းကို ခံရပြီးဖြစ်သည်ဟု ဆိုလိုသလော” ဟု ပြောကြသည်။ ထိုကဲ့သို့ကိစ္စများသည် လူများက ဤအရာများကို တမင်တကာနှင့် လုပ်နေကျအတိုင်း လုပ်ခြင်း ရှိမရှိဆိုသည့်အပေါ် မူတည်ပေသည်။ ရံဖန်ရံခါ ပြစ်မှားခြင်းများအတွက် ဘုရားသခင်သည် လူတို့ကို ပြစ်တင်ရှုတ်ချခြင်း မရှိချေ။ ၎င်းတို့ နောင်တရဖို့သာ လိုအပ်ပါသည်။ သို့သော် ၎င်းတို့သည် သိလျက်နှင့် အမှားလုပ်ပြီး နောင်တရဖို့ ငြင်းဆိုသည့်အခါ ဘုရားသခင်၏ ပြစ်တင်ရှုတ်ချခြင်းကို ခံရပေသည်။ စစ်မှန်သောလမ်းခရီးကို ရှင်းရှင်းလင်းလင်း သိသည့်တိုင် တမင်တကာ အပြစ်ပြုသောအခါတွင် ဘုရားသခင်သည် သူတို့ကို မည်သို့ ပြစ်တင်ရှုတ်ချခြင်း မရှိဘဲ နေနိုင်မည်နည်း။ သမ္မာတရား စည်းမျဉ်းများနှင့်အညီ ကြည့်လျှင် ဤသည်မှာ တာဝန်မဲ့ခြင်း၊ ပေါ့ဆခြင်းနှင့် ဝတ်ကျေတမ်းကျေပြုခြင်း ဖြစ်ကာ အနည်းဆုံးအနေဖြင့် ဤလူတို့သည် ၎င်းတို့၏တာဝန်ကို မဖြည့်ဆည်းရသေးပေ။ ဤသည်မှာ ဘုရားသခင်က ၎င်းတို့၏အမှားများကို စီရင်သည့်ပုံဖြစ်သည်။ အကယ်၍ ၎င်းတို့သည် နောင်တရရန် ငြင်းဆိုပါက အပြစ်စီရင်ခြင်းကို ခံရမည်။ ထို့ကြောင့် ထိုသို့သောအမှားများကို လျှော့ချရန်၊ သို့မဟုတ် ရှောင်ရှားရန်၊ လူများသည် မိမိတို့၏တာဝန်များကို ဖြည့်ဆည်းဖို့ အစွမ်းကုန် လုပ်ဆောင်သင့်သည်။ စစ်မှန်သော လမ်းခရီးကို စုံစမ်းမေးမြန်းနေသည့် လူများက ရှိသည့် မေးခွန်းများအားလုံးကို တက်ကြွစွာ ဖြေရှင်းဖို့ ကြိုးစားပြီး အရေးပါသောမေးခွန်းများကို ရွှေ့ဆိုင်းခြင်း၊ သို့မဟုတ် နှောင့်နှေးခြင်း လုံးဝမပြုသင့်ချေ။ စစ်မှန်သော လမ်းခရီးကို စုံစမ်းမေးမြန်းနေသူတစ်ဦးက မေးခွန်းတစ်ခုကို ထပ်တလဲလဲ မေးလျှင် သင်သည် မည်သို့ တုံ့ပြန်သင့်သနည်း။ ၎င်းတို့နားလည်ပြီး ထပ်မမေးတော့သည်အထိ ၎င်းတို့ကို ဖြေကြားဖို့ အချိန်ယူပြီး ဒုက္ခခံရခြင်းကို သင်စိတ်အနှောင့်အယှက် မဖြစ်သင့်ဘဲ သူတို့၏ မေးခွန်းနှင့်ပတ်သက်၍ ရှင်းလင်းစွာ မိတ်သဟာယပြုဖို့ နည်းလမ်းရှာသင့်သည်။ အချိန်ယူပြီး ဒုက္ခခံရခြင်းကို စိတ်အနှောင့်အယှက် မဖြစ်သင့်ပေ။ သို့ဆိုလျှင် သင်သည် သင်၏တာဝန်ကို ဖြည့်ဆည်းပြီးဖြစ်လိမ့်မည်ဖြစ်ပြီး သင်၏ စိတ်နှလုံးသည် လိပ်ပြာလုံလိမ့်မည်။ ပို၍အရေးကြီးသည်မှာ ဤတာဝန်၊ ဤဝတ္တရားသည် သင့်ကို ဘုရားသခင်က တာဝန်ပေးစေခိုင်းထားခြင်း ဖြစ်သောကြောင့် သင်သည် ဤကိစ္စ၌ ဘုရားသခင်အပေါ် အပြစ်ရှိသောစိတ် ကင်းလိမ့်မည် ဖြစ်သည်။ သင်လုပ်သမျှအရာအားလုံးကို ဘုရားသခင်ရှေ့မှောက်တွင် လုပ်ဆောင်ထားပြီး ဘုရားသခင်ကို ရင်ဆိုင်၍ လုပ်ဆောင်ထားသည့်အခါ၊ အရာအားလုံးကို ဘုရားသခင်၏ နှုတ်ကပတ်တော်နှင့် ချိန်ဆကြည့်သည့်အခါနှင့် သမ္မာတရား စည်းမျဉ်းများအတိုင်း လုပ်ဆောင်ထားသည့်အခါ သင်၏လက်တွေ့လုပ်ဆောင်မှုသည် သမ္မာတရား၊ ဘုရားသခင်၏ သတ်မှတ်ချက်များနှင့် လုံးလုံး ကိုက်ညီလိမ့်မည်။ ဤနည်းအားဖြင့် သင်လုပ်ဆောင်သမျှနှင့် ပြောဆိုသမျှသည် လူများအဖို့ အကျိုးရှိစေပြီး ၎င်းတို့က ယင်းကို ထောက်ခံကာ အလွယ်တကူ လက်ခံကြလိမ့်မည်။ သင်ပြောသည့် စကားများသည် အလင်းပေးပြီး လက်တွေ့ကျကာ၊ ရှင်းလင်းလျှင် အချေအတင်ငြင်းခုံခြင်း၊ ထိပ်တိုက်ပြောဆိုခြင်းတို့ကို ရှောင်နိုင်မည်ဖြစ်ပြီး လူတို့အား သမ္မာတရားကို နားလည်ဖို့ ထောက်ကူပေးပြီး ၎င်းတို့အား တည်ဆောက်ပေးနိုင်လိမ့်မည်။ သင်ပြောသော စကားများသည် မပြတ်သားသကဲ့သို့ မရေမရာဖြစ်လျှင်၊ သင်၏ သမ္မာတရားအပေါ် မိတ်သဟာယသည် နားလည်ရန်ခက်ပြီး အလင်းမပေးသကဲ့သို့ လက်တွေ့မကျလျှင် သင်သည် လူတို့၏ အယူအဆများနှင့် ပြဿနာများကို မဖြေရှင်းနိုင်ဘဲ ရှိလိမ့်မည်။ ပြီးလျှင် ၎င်းတို့သည် သင်၏ အမှားများကို မလွတ်တမ်းအသုံးချပြီး သင့်အား ဝေဖန်ကာ ရှုတ်ချနိုင်ခြေရှိသည်။ ဤပြဿနာများကို သင့်အနေဖြင့် ဖြေရှင်းရန် ပို၍ပင် လွယ်ကူမည်မဟုတ်ပေ။ သမ္မာတရားကို လူတို့နားလည်ပြီး လက်မခံနိုင်မီတွင် ဘုရားနှုတ်ကပတ်တော် သုံးလေးပိုဒ်ကို ထပ်၍ မိတ်သဟာယဖွဲ့ရနိုင်သည်။ ထို့ကြောင့် ဧဝံဂေလိဖြန့်ဝေရာတွင် စကားပြောဆိုရာ၌ အမြော်အမြင် ရှိရမည်ဖြစ်ပြီး သမ္မာတရားအကြောင်းကို ပွင့်လင်းမြင်သာစွာ မိတ်သဟာယဖွဲ့ရမည်။ လူတို့၏ အယူအဆများနှင့် စိတ်ကူးများကို ဖြေရှင်းနိုင်သည့်နည်းဖြင့် မိတ်သဟာယဖွဲ့ကာ ၎င်းတို့၏ လေးစားမှုနှင့် ၎င်းတို့အား ရိုးသားမှန်ကန်စွာ သိမ်းသွင်းစည်းရုံးခြင်း ရှိရမည်။ ဤသို့ပြုလုပ်ခြင်းအားဖြင့် ရလဒ်များကို ရရှိရန် လွယ်ကူပေသည်။ ယင်းက လူတို့ကို ဘုရားသခင်၏အမှုအား အနှောင့်အယှက်မရှိသည့် ပုံစံဖြင့် လက်ခံနိုင်ရန် အထောက်အကူပြုကာ ဧဝံဂေလိတရားအား ကျယ်ပြန့်စေခြင်းအဖို့ အကျိုးရှိသည်။

ဧဝံဂေလိ ဖြန့်ဝေခြင်းဆိုင်ရာ လက်တွေ့လုပ်ဆောင်မှုတွင် လိုက်လျှောက်ရမည့် စည်းမျဉ်းများနှင့် ပတ်သက်၍ နောက်ထပ်အချက်အနေဖြင့် ဧဝံဂေလိဖြန့်ဝေသူတို့သည် ၎င်းတို့၏ အပြုအမူ၌ သိက္ခာရှိပြီး တည်ကြည်ရမည်၊ သန့်ရှင်းသူများ၏ ဟန်ပန်ဖြင့် ပြောဆိုပြုမူရမည်၊ ဧဝံဂေလိဖြန့်ဝေခြင်း လုပ်ငန်းစဉ်၌ ၎င်းတို့လုပ်ဆောင်သမျှတွင် သင့်တင့်လျောက်ပတ်သော ချုပ်တည်းခြင်းကို ကျင့်သုံးရမည်ဖြစ်ပြီး စည်းကမ်းသေဝပ်သော ပုံစံဖြင့် ပြုမူရမည်။ ဧဝံဂေလိလက်ခံရန် အလားအလာရှိသူအချို့က သူစိမ်းများ၏ နှောင့်ယှက်မှုခံရခြင်းကို သဘောမကျပေ။ သို့ဆိုလျှင် ထိုသူတို့ကို သင်မည်ကဲသို့ ဟောပြောသင့်သနည်း။ လူအချို့သည် တစ်နေ့တွင် ဖုန်းသုံးကြိမ်မျှ ခေါ်ဆိုခြင်း၊ အလုပ်မှ အိမ်ပြန်လာပြီးနောက် လူတို့အိမ်များသို့ အပြေးအလွှားသွားခြင်းနှင့် ဧဝံဂေလိ လက်ခံရန် အလားအလာရှိသူများ မည်မျှ အလုပ်ရှုပ်ပါစေ ထိုသူတို့ကို တွေ့တွေ့ချင်း ဘုရားသခင်၏ နှုတ်ကပတ်တော်များကို ဖတ်ပြခြင်းတို့အားဖြင့် ဧဝံဂေလိ ဟောပြောကြသည်။ ဤလူတို့သည် မည်သည့်အခါမျှ အချိန်ကောင်းကို မရွေးချယ်သောကြောင့် အနှောင့်အယှက်များ ဖြစ်လာတတ်သည်။ လူအချို့သည် အလွန်မိုက်မဲသဖြင့် မှန်သောလမ်းခရီးကို စုံစမ်းမေးမြန်းသူတို့အား ဤပုံစံဖြင့်ပင် စကားပြောကြ၏။ “ဤကမ္ဘာလောကသည် အလွန်ဆိုးယုတ်သောကြောင့် သင်လုပ်နေသည့်အရာကို ရပ်ဆိုင်းပါလေ။ အလုပ်မသွားတော့နှင့်။ မည်သည့်အချိန်ဖြစ်သည်ကို သင်သိသ‌လော။ ကြီးမားသော ကပ်ဘေးသည် ကျရောက်အံ့ဆဲဆဲဖြစ်သည်။ သင် ဘုရားသခင်ကို ယုံကြည်ဖို့ အရေးတကြီး ဖြစ်နေပြီ” ဟူ၍ဖြစ်သည်။ ဤပုံစံဖြင့် ဧဝံဂေလိ ဖြန့်ဝေခြင်းသည် သင့်တော်သလော။ ဤအရာက မည်သည့် အကျိုးဆက်များကို ဖြစ်ပေါ်စေမည်နည်း။ ထိုသူတို့သည် ဘုရားသခင်၏အမှုတော်ကို လက်မခံရသေးသည့် မယုံကြည်သူများ ဖြစ်သည်။ ထိုသူတို့အား ဤပုံစံဖြင့် စကားပြောဖို့ လိုအပ်သ‌လော။ ထိုမျှမက ဧဝံဂေလိလက်ခံရန် အလားအလာရှိသူများ၏ ကိုယ်ရေးကိုယ်တာဘဝ သို့မဟုတ် ကိုယ်ပိုင်အမြင်များ၌ မစွက်ဖက်နှင့်။ ဥပမာ၊ လူအချို့က ၎င်းတို့ သိမ်းသွင်းရရှိရန် ကြိုးပမ်းနေသောသူတို့ကို အောက်ပါအတိုင်း ပြောကြသည်။ “ကြည့်ပါလေ။ သင်သည် ဘုရားသခင်ကို ယုံကြည်သေးသလော။ ကျွန်ုပ်တို့ ယုံကြည်သူများက မယုံကြည်သူများ၏ ဤအဝတ်အစားများကို မဝတ်ကြပေ” “ဘုရားသခင်ကို ယုံကြည်သူတို့က ဤအစားအစာမျိုးကို မစားကြပေ၊ သင်သည် ဟိုအစားအစာမျိုးကို စားရမည်” ဟူ၍ဖြစ်သည်။ ဤသည်မှာ အခြားသူများ၏ ကိစ္စများ၌ ကိုယ်နှင့်မဆိုင်ဘဲ ဝင်စွက်ဖက်နေခြင်း မဟုတ်လော။ ဤသည်ကို မိုက်မဲခြင်းဟု ခေါ်သည်။ တစ်စုံတစ်ခုသော အခိုက်အတန့်တွင် သင်၏ စကားလုံးများနှင့် လုပ်ရပ်များက မလျော်ကန်လျှင် ဧဝံဂေလိဖြန့်ဝေရင်း သင် ပေးဆပ်ခဲ့သော အဖိုးအခကို အလဟဿဖြစ်စေနိုင်သည်။ ဤအကြောင်းကြောင့် သင်သည် နေရာတိုင်း အချိန်တိုင်း၌ သတိကြီးစွာ လုပ်ဆောင်ရမည်၊ သင်၏ အပြုအမူကို ချုပ်တည်းပြီး ထိန်းညှိရမည်ဖြစ်ကာ စည်းကမ်းသေဝပ်သော ပုံစံဖြင့် ပြုမူရမည်။ စည်းကမ်းဟု ငါတို့ခေါ်သည်မှာ မည်သည့်အရာနည်း။ ယင်းမှာ အမှုအရာများကို စည်းကမ်းများနှင့်အညီ ပြုလုပ်ခြင်း၊ မည်သည့် စကားလုံးမျိုးက သင်ထမ်းဆောင်နေသော တာဝန်နှင့် လျော်ကန်မည် ဖြစ်ကြောင်းနှင့် ဧဝံဂေလိ လက်ခံသူများက မည်သည့်စကားလုံးမျိုးကို ကြားလိုစိတ် ရှိမည်ဖြစ်ကြောင်း စဉ်းစားခြင်းတို့ကို ဆိုလိုသည်။ ထိုသူတို့ မကြိုက်မည့် သို့မဟုတ် စိတ်အနှောင့်အယှက်ဖြစ်စေမည့် အရာများကို လုပ်လည်းမလုပ်၊ ပြောလည်းမပြောနှင့်၊ ထိပါးနှောင့်ယှက်တတ်သော မေးခွန်းများကို မမေးနှင့်၊ ထို့ပြင် သူတို့၏ ကိုယ်ရေးကိုယ်တာ ကိစ္စများ၌ မည်သည့်အခါမျှ ဝင်ရောက်စွက်ဖက်ခြင်း မပြုနှင့်။ လူတစ်ဦး၌ သားနှစ်ဦးရှိသည် ဆိုပါစို့၊ သင်က ထိုသူကို “သားနှစ်ယောက်ရှိသည်မှာ ကောင်းပေသည်၊ သို့သော် သမီးတစ်ယောက်ပါ ရှိလျှင် ပိုကောင်းမည် မဟုတ်လော” ဟုပြောသည်။ ဤကိစ္စသည် သင့်အတွက် မည်သည့်အရာ ဖြစ်သနည်း။ ဧဝံဂေလိလက်ခံရန် အလားအလာရှိသူအချို့က အင်္ဂလိပ်စကားတတ်သောအခါ သင်က “သင်၏ အင်္ဂလိပ်စကားသည် အမှန်ပင် ကောင်းမွန်လှပေသည်။ အကယ်၍ သင်သည် ဘုရားသခင်ကို ယုံကြည်လာပြီး ဘုရားသခင်၏ အိမ်တော်၌ တာဝန်ထမ်းဆောင်မည်ဆိုပါက အလွန်ကောင်းမည်။ ဘုရားသခင်၏ အိမ်တော်သည် သင်ကဲ့သို့သော လူတို့ကို လိုအပ်သည်” ဟူ၍ ဖြစ်သည်။ ဤပုံစံအတိုင်း ပြောဆိုခြင်းသည် သင့်လျော်သလော။ လူနှစ်ဦးသည် မတူညီတတ်ချေ။ ဤလူတို့သည် ယုံကြည်လာပြီးနောက် သူတို့သည် သင့်ထက် ပို၍တက်ကြွပြီး စိတ်ပါဝင်စားမှု ပိုရှိကောင်းရှိနိုင်သည်၊ သို့သော် သူတို့က ယုံလည်းမယုံသေးသကဲ့သို့ လက်လည်းမခံသေးချေ။ ထို့ကြောင့် သင့်တော်သောအချိန် မတိုင်မီ အမှုအရာများကို အတင်းအကျပ် မပြုရသည့်အပြင် အခြားလူတို့၏ဘဝထဲ၌ မည်သည့်အခါမျှ မစွက်ဖက်လေနှင့်။ သင်တို့ နားလည်သလော။

ဖြစ်ပျက်နိုင်သော အခြားအခြေအနေတစ်ခု ရှိ၏။ ဧဝံဂေလိ ဖြန့်ဝေခြင်းလုပ်ငန်းစဉ်၌ လူအချို့သည် နောက်ဆုံးသောကာလ ဘုရားသခင်၏ အမှုတော်ကို လက်ခံပြီး သမ္မာတရားအချို့ကို နားလည်သည်။ ထို့နောက် ၎င်းတို့သည် မိမိတို့ကိုယ်ကို သာမန်၊ သူလိုကိုယ်လို လူတို့ထက် များစွာမြင့်မားသည်ဟု တွေးတော့သည်။ ၎င်းတို့သည် မယုံကြည်သူများအားလုံးကို မထီမဲ့မြင်ပြုပြီး မှန်သောလမ်းခရီးကို စုံစမ်းမေးမြန်းသည့် ၎င်းတို့နှင့် တွေ့ဆုံသူတိုင်းကိုပင် မထီမဲ့မြင်ပြုကာ အထင်သေးသည်။ ၎င်းတို့က “အချင်းလူတို့၊ နောက်ဆုံးသောကာလ ဘုရားသခင်၏ အမှုတော်ကို လက်မခံလျှင် သင်တို့သည် မျက်ကန်း၏၊ မိုက်မဲပြီး ပညာမဲ့၏။ သေခြင်းမှလွဲ၍ မည်သည့်အရာနှင့်မျှ မသင့်တော်သည့်အရာ ဖြစ်ပြီး လုံးလုံးလျားလျား အသုံးမကျချေ။ ယနေ့ သင့်အား ဧဝံဂေလိ ဟောပြောရန်မှာ ကျွန်ုပ်၏တာဝန်ဖြစ်သည်။ သို့မဟုတ်ပါက သင့်ကို ကျွန်ုပ် မသိကျိုးကျွန်ပြုမည်” ဟူ၍ဖြစ်သည်။ ဤသည်မှာ မည်သည့် သဘောထားမျိုး ဖြစ်သနည်း။ သင်သည် နောက်ဆုံးသောကာလ ဘုရားသခင်၏ အမှုတော်ကို လက်ခံသည်ထက်ပို၍ မည်သည့်အရာမျှ မပြုလုပ်ရသေးချေ။ သင်သည် အခြားသူ တစ်ဦးဦးထက် ပို၍ မမြင့်မားပေ။ သင်သည် ဘုရင်တစ်ပါး ဖြစ်ခဲ့လျှင်ပင် ဖောက်ပြန်ပျက်စီးသော လူသားမျိုးနွယ်ထဲမှ တစ်ဦးဖြစ်နေဦးမည် မဟုတ်လော။ သင်သည် အခြားသူများထက် မည်သည့်ပုံစံဖြင့် ပို၍မြင့်မားသလော။ မှန်သောလမ်းခရီးကို စုံစမ်းမေးမြန်းသူတို့ကို မထီမဲ့မြင်မပြုနှင့်။ သင်သည် ထိုသူတို့ကို ဧဝံဂေလိဟောပြောလျှင်ပင် သင်သည် ထိုသူတို့ထက် ပို၍ မကြီးမြတ်သကဲ့သို့ ပို၍လည်း မသာလွန်ပေ။ ထိုသူတို့နည်းတူ သင်သည် ဖောက်ပြန်ပျက်စီးသော လူသားတစ်ဦးဖြစ်သည်ကို မမေ့လျော့နှင့်။ ဤအကြောင်းအရာကို စိတ်နှလုံးထဲ၌ သင် ရှင်းလင်းနေရမည်။ ကမ္ဘာကြီးအတွက် ကြီးမြတ်သော အစေခံမှုတစ်ခုခု ပြုပေးနေသည့်အလား သို့မဟုတ် အသိဉာဏ်ရှိသော သတ္တဝါများအားလုံးကို ၎င်းတို့၏ လွတ်မြောက်မှုအတွက် လမ်းပြနေသည့်အလား အမြဲတစေ အခြားသူများကို မကြည့်နှင့်။ သင်သည် “ဧဝံဂေလိတရားကို လက်မခံသေးသော အချင်းလူတို့သည် သနားစရာကောင်း၏။ ကျွန်ုပ်သည် နေ့စဉ်နေ့တိုင်း သင်တို့အတွက် ပူပန်မှုနှင့် လောင်ကျွမ်းရသည်” ဟူ၍ အစဉ်သဖြင့် တွေးလေသည်။ သင် လောင်ကျွမ်းနေသည့် ဤမီးက မည်သည့်အရာနည်း။ သင်သည် မိမိကိုယ်တိုင်၏ ပြဿနာများကို မဖြေရှင်းရသေးသော်လည်း အခြားသူများ၏ ကိစ္စအပေါ် ပူပန်မှုနှင့် လောင်ကျွမ်းနေသည်။ ယင်းမှာ ကြောင်သူတော်ဖြစ်ခြင်း မဟုတ်လော။ အခြားသူများကို လှည့်ဖြားနေခြင်း မဟုတ်လော။ သူတော်ကောင်းတရား မျက်နှာဖုံး၏ နောက်ကွယ်တွင် ပုန်းမနေနှင့်။ အမှန်တွင် သင်သည် မည်သည့်အရာမျှ မဟုတ်ပေ။ သင်သည် ဘုရားသခင်၏ အမှုသစ်ကို နှစ်ပေါင်းနှစ်ဆယ်သုံးဆယ်မျှ လက်ခံခဲ့ပြီးဖြစ်လျှင်ပင် သင်သည် မည်သူမျှမဟုတ်သေးပေ။ သင်သည် နေ့စဉ်နေ့တိုင်း ဘုရားသခင်နှင့် အသက်ရှင်ပြီး ဘုရားသခင်အား မျက်နှာချင်းဆိုင် စကားပြောလျှင်ပင် သာမန်လူတစ်ဦးသာ ဖြစ်သေး၏။ သင်၏အနှစ်သာရမှာ မပြောင်းလဲဘဲ ရှိနေသေး၏။ အခြားသူများကို ဧဝံဂေလိဖြန့်‌ဝေခြင်းသည် သင့်တာဝန်ကို ထမ်းဆောင်ခြင်းသာ ဖြစ်သည်။ ဤသည်မှာ သင်၏ဝတ္တရား၊ သင်၏တာဝန်ပင် ဖြစ်သည်။ လူမည်မျှများများ သင် သိမ်းသွင်းရရှိပါစေ သင်သည် သင်သာ ဖြစ်နေ‌သေးသည်ကို သင်နားလည်သင့်သည်။ သင်သည် အခြားလူတစ်ဦး ဖြစ်မလာသေးဘဲ ဖောက်ပြန်ပျက်စီးသော လူသားတစ်ဦး ဖြစ်နေသေး၏။ သင်သည် လူများစွာကို သိမ်းသွင်းရရှိပြီးသော်လည်း မာနထောင်လွှားဖို့မဆိုနှင့်၊ ဂုဏ်ပင် မယူသင့်ပေ။ သင်၏ အောင်မြင်မှုများကို လေလုံးထွားလျက် “ကျွန်ုပ်သည် နှစ်ပေါင်းများစွာ ဧဝံဂေလိဖြန့်ဝေခဲ့ပြီးဖြစ်၍ အတွေ့အကြုံ အမြောက်အမြားနှင့် သင်ခန်းစာများစွာကို စုဆောင်းထားခဲ့ပြီးပြီ။ ကျွန်ုပ်ဟောပြောသော မည်သူ့ကိုမဆို တစ်ချက်ကြည့်သည်နှင့် ၎င်းတို့ လူကောင်းဟုတ်မဟုတ် ပြောနိုင်ပြီး မည်သည့်အချိန်၌ ဟောပြောပြီး မည်သည့်အချိန်၌ ရှောင်ရမည်ကို သိ၏။ ဧဝံဂေလိဟောပြောရန် သင့်တော်သောအခါ ယင်းက လွယ်ကူမည်၊ မလွယ်ကူမည် သို့မဟုတ် ဖြစ်နိုင်မည်၊ မဖြစ်နိုင်မည်ကို ကျွန်ုပ်သိ၏။ ဖြန့်ဝေဖို့ ဖြစ်နိုင်သူများကို ဧဝံဂေလိ သယ်ဆောင်ပေးရန် နည်းလမ်းကို ကျွန်ုပ်အမြဲ ရှာတွေ့နိုင်သည်” ဟု ဆိုကာ ကြွားလုံးထုတ်မနေနှင့်။ သင်သည် ဧဝံဂေလိ ဖြန့်ဝေရာ၌ အတွေ့အကြုံရှိသော်လည်း သင်၏ အသက်ဝင်ရောက်မှုမှာ လွန်စွာ ပေါ့တန်နေသေးသည်။ ဘဝအတွေ့အကြုံအချို့ရှိပြီး အတော်‌လေး ပြောင်းလဲသွားသော်လည်း တစ်ခါတစ်ရံ ကြွားဝါရန် လေလုံးထွားတတ်သည်။ ဤသည်မှာ ပြဿနာမဟုတ်‌လော။ ဆုကျေးဇူးများရှိသော လူတို့သည် ဟိတ်ဟန်များပြီး အဓိပ္ပာယ်မဲ့သော ပြောဆိုခြင်း ပြုလုပ်လေ့အရှိဆုံး ဖြစ်တတ်သည်။ ၎င်းတို့သည် မိမိတို့ကိုယ်ကို အခြားသူများထက် ပိုတော်သည်ဟု အမြဲထင်တတ်သည်။ ဧဝံဂေလိလက်ခံရန် အလားအလာရှိသူများကို အမြဲတမ်း သြဝါဒပေးလိုပြီး လူတို့ကို ၎င်းတို့အား အမြဲတမ်း လေးစားကိုးကွယ်စေလိုကြသည်။ ဤသည်မှာ စိတ်သဘောထားနှင့် ဆိုင်သည့် ပြဿနာ မဟုတ်လော။ လူတစ်ဦးသည် သူ၏ အမူအကျင့်သာ ပြောင်းလဲပြီးနောက် စိတ်သဘောထား မပြောင်းလဲဘဲ ဘုရားသခင်အတွက် သက်သေခံနိုင်သလော။ အကယ်၍ စိတ်သဘောထားဆိုင်ရာ ပြောင်းလဲမှုသက်သေခံချက် မပေးနိုင်ပါက ဧဝံဂေလိ၏ သမ္မာတရားအကြောင်းကိုသာ ပြောပြပြီး ဘုရားသခင်အတွက် သက်သေမခံနိုင်ပါက သင်သည် ဘုရားသခင် အသုံးပြုရန် သင့်တော်သလော။ မှန်သောလမ်းခရီးကို လူတို့ လက်ခံပြီးနောက်တွင် အသက်ဝင်ရောက်ခြင်းဆိုင်ရာ သမ္မာတရားနှင့် လက်တွေ့ကျင့်သုံးမှုဆိုင်ရာ သမ္မာတရားကို ၎င်းတို့ နားလည်ဖို့လိုသည်။ အကယ်၍ သင်၌ စစ်မှန်သော အတွေ့အကြုံ မရှိသည့်အပြင် သင်၏ အတွေ့အကြုံကို အခြေခံသော သက်သေခံချက်အကြောင်း မည်သို့ပြောရမည်ကို မသိပါက ဤအရာများသည် ပျော့ကွက်များ မဟုတ်လော။ လူတို့ သင့်ကို လေးစားပြီး အထင်ကြီးရန်အတွက် အယူဝါဒများအကြောင်း ပြောပြခြင်းကို အမြဲတမ်း အာရုံစိုက်ပါက၊ မြင့်မားသော အနေအထား၌ ရပ်တည်ရန် အမြဲအလိုရှိပါက ဤသည်မှာ ဘုရားသခင်ကို သက်သေခံခြင်း ဟုတ်သလော။ လုံးဝ မဟုတ်ချေ။ ဤသည်မှာ မိမိကိုယ်ကို သက်သေခံခြင်းဖြစ်၏။ ဖောက်ပြန်ပျက်စီးသော စိတ်သဘောထားရှိခြင်း ဖြစ်၏။ အကယ်၍ သင်သည် တရားစီရင်မှုနှင့် ပြစ်တင်ဆုံးမခြင်းကို မကြုံရပါက သင်၏ စိတ်သဘောထား၌ ပြောင်းလဲမှုကို မည်သို့ရရှိနိုင်မည်နည်း။ ဧဝံဂေလိဖြန့်ဝေသူ အချို့က အတွေ့အကြုံဆိုင်ရာ သက်သေခံချက်အချို့နှင့် ပတ်သက်၍ ပြောကြပြီး ၎င်းတို့ကို ကြားနာသူများသည် ဤအရာမှ များစွာ အကျိုးရရှိကြသည်။ ထိုသူတို့သည် တို့ထိခြင်းခံကြရပြီး ဤဟောပြောသူများကို သူတို့ လှိုက်လှိုက်လှဲလှဲ လေးစားကြသည်။ သို့တစေ ဤဧဝံဂေလိ ဖြန့်ဝေသူများ၌ ဘုရားသခင်ကို ကြောက်ရွံသော စိတ်နှလုံးများ ရှိနေဆဲဖြစ်သည်။ ၎င်းတို့သည် ဧဝံဂေလိလက်ခံရန် အလားအလာ ရှိသော မည်သူ့ကိုမဆို မထီမဲ့မြင်မပြုကြပေ။ ၎င်းတို့သည် လူတို့ကို စိတ်ရင်းအမှန်ဖြင့် စကားပြောနိုင်ကာ လူတို့နှင့် အဆင်ပြေပြီး ပုံမှန်အတိုင်း မိတ်ဆွေဖွဲ့ပြီးလျှင် အမှန်ပင် သာမန်လူ့သဘာဝအသိ အနည်းငယ်ကို ပိုင်ဆိုင်ထားသည်။ ဤအရာကို ၎င်းတို့ မည်ကဲ့သို့ ပြီးမြောက်သနည်း။ ဤအရာက ၎င်းတို့သည် ဘုရားသခင်အပေါ် ၎င်းတို့၏ ယုံကြည်ခြင်းတွင် တစ်စုံတစ်ရာကို ရရှိထားကြောင်း သက်သေပြသည်။ အနည်းဆုံးအနေဖြင့် ၎င်းတို့သည် သမ္မာတရား အချို့ကို နားလည်သည်၊ မိမိတို့ကိုယ်ကို သိကျွမ်းမှုအချို့ရှိပြီး ၎င်းတို့ အသက်စိတ်သဘောထားများက အတော်ပင် ပြောင်းလဲသွားပြီး ဖြစ်သည့်အတွက် ၎င်းတို့သည် နောက်ထပ် မာနထောင်လွှားမလာတော့ပေ။ ဧဝံဂေလိကို လက်မခံသေးသော လူတို့ကို တွေ့သောအခါ ၎င်းတို့က “ကျွန်ုပ်သည် ဟိုယခင်က ဤအတိုင်းပင် ဖြစ်ခဲ့သည်။ ထို့ကြောင့် သူတို့ကို ကျွန်ုပ် သိမ်ငယ်အောင် မလုပ်သင့်ပေ။ ကျွန်ုပ်ကိုယ်တိုင်လည်း ထိုမျှ ကြီးမြတ်သည် မဟုတ်” ဟု စဉ်းစားကြသည်။ ၎င်းတို့၏ စိတ်နေစိတ်ထားသည် ယခင်ကကဲ့သို့ မဟုတ်တော့ပေ။ လူတို့သည် ၎င်းတို့ကိုယ်တိုင်၏ သဘာဝကို မြင်တွေ့သွားသည်နှင့် ဧဝံဂေလိလက်ခံရန် အလားအလာရှိသူများအနေဖြင့် မသိနားမလည်မှု၊ မိုက်မဲမှု သို့မဟုတ် အားနည်းမှု အနည်းငယ်ကို ထုတ်ဖော်ကြောင်း ၎င်းတို့ တွေ့ရှိသောအခါ ယင်းကို ဖြစ်ရိုးဖြစ်စဉ်သာ ဖြစ်သည်ဟု စဉ်းစားကြမည်ဖြစ်သည်။ အခြားသူများကို မလှောင်နှင့်။ ထို့အပြင် အခြားလူတိုင်းသည် အဆင့်အတန်းမရှိသော၊ သာမန်လူတို့ အမြောက်အမြားထဲမှ တစ်ဦးသာဖြစ်သည်ဟူသော ခံစားမှု သို့မဟုတ် သဘောထားမျိုးကို မစွဲကိုင်လေနှင့်။ အကယ်၍ သင်သည် ဤသဘောထားကို ဆုပ်ကိုင်ထားလျှင် ယင်းက သင်၏ ဧဝံဂေလိ ဖြန့်ဝေခြင်းအလုပ်ကို ဟန့်တားပြီး ထိခိုက်စေမည် ဖြစ်သည်။ သို့ရာတွင် ဘုရားသခင်ကို ယခုလေးတင်မှ ယုံကြည်လာသော လူများစွာကို မြင်တွေ့သောအခါ ဖောက်ပြန်ပျက်စီးသော ဤအခြေအနေမျိုးက သင်စိတ်နှလုံးထဲတွင် တစ်ခါတစ်ရံ ပေါ်လာမည်ဖြစ်သည်။ ဥပမာ၊ သင်သည် နောက်ဆုံးသောကာလ ဘုရားသခင်၏အမှုတော်ကို နှစ်ပေါင်းနှစ်ဆယ်တိုင်တိုင် လက်ခံထားပြီဖြစ်ကာ ဧဝံ‌ဂေလိကို ဆယ်နှစ်တိုင်တိုင် ဖြန့်ဝေလာခဲ့ပြီဟု ဆိုကြပါစို့။ သင်သည် ဧဝံဂေလိလက်ခံရန် အလားအလာရှိသူများကြား၌ နေသောအခါ သူတို့က “သင်သည် ဘုရားသခင်ကို နှစ်‌ပေါင်းနှစ်ဆယ်တိုင်တိုင် ယုံကြည်လာခဲ့ပြီ ဖြစ်သော်လည်း ကျွန်ုပ်တို့မှာမူ သူ့ကို ယခုမှ လက်ခံပြီးခါစ ရှိသေးသည်။ ကျွန်ုပ်တို့၏ ဝိညာဉ်ရင့်ကျက်မှုသည် အလွန်ပင် သေးငယ်နေသေးပြီး နှိုင်းယှဉ်ကြည့်လျှင် ကျွန်ုပ်တို့သည် သင့်အောက် များစွာကွာဝေးသည်မှာ သေချာသည်။ သင်သည် အရွယ်ရောက်ပြီးသားလူတစ်ဦးဖြစ်ပြီး ကျွန်ုပ်တို့သည် မကြာခင်က မွေးကင်းစ ကလေးငယ်များသာ ဖြစ်ကြသည်” ဟု ဆိုလျက် သင်သည် သူတို့ထက် သာလွန်သည်ဟု အမြဲခံစားသည်။ သူတို့က ထိုသို့သော နှိုင်းယှဉ်မှုများကို ပြုသောအခါ သင်သည် မည်သည့်အရာကို စဉ်းစားသင့်သနည်း။ “ကျွန်ုပ်သည် ဘုရားသခင်ကို သူတို့ထက် စော၍လက်ခံပြီး ယုံကြည်ခဲ့သည်မှာ သူတို့ထက် ပို၍ကြာပြီဖြစ်သော်လည်း ကျွန်ုပ်သည် အသက်နှင့် သမ္မာတရားအတွင်း ဝင်ရောက်မှုအားဖြင့် များစွာ နောက်ကျ ကျန်နေသေး၏။ ဘုရားသခင်၏ တကယ့်တရားစီရင်မှုနှင့် ပြစ်တင်ဆုံးမခြင်းကို လက်မခံရ‌သေးသည့်အပြင် ကျွန်ုပ်သည် ကယ်တင်ခြင်းနှင့် စုံလင်အောင်ပြုခြင်းကို ခံရဖို့ အလှမ်းဝေးကွာနေသေးသည်” ဟူ၍ ဖြစ်သည်။ သင် အမှန်တကယ် မည်သို့ဖြစ်နေသည်ကို သင့်စိတ်နှလုံးထဲ၌ သင်သိ၏။ လူတို့က သင့်ကို မည်သို့လေးစားပါစေ သို့မဟုတ် သင့်ကို မည်မျှမြင့်မားစွာ သဘောထားပါစေ သင် မည်ကဲ့သို့ ခံစားသနည်း။ “ကျွန်ုပ်သည် သာမန်လူတစ်ဦးသာ ဖြစ်သည်၊ ကျွန်ုပ်ကို မကြည်ညိုပါနှင့်” ဟူ၍ဖြစ်သည်။ သင်သည် မနှစ်မြို့သည့်အပြင် ပျော်ရွှင်သာယာမှု မခံစားရသည့်အကြောင်းမှာ သင်သည် လုံးဝ ဘာမျှမဟုတ်ကြောင်း၊ မည်သည့်သမ္မာတရားကိုမျှ နားမလည်ကြောင်း၊ အချို့သော စာများနှင့် အယူဝါဒများကိုသာ ပြောနိုင်ကြောင်းကို သင့်စိတ်ထဲတွင် ရှင်းလင်းစွာ သိမြင်သောကြောင့် ဖြစ်သည်။ လူတို့သည် စဉ်းစားဉာဏ်မရှိဘဲ အခြားသူများကို လေးစားကြည်ညိုတတ်ကြသည်။ အကယ်၍ သင်သည် လေးစားကြည်ညိုခံရသည့် ခံစားမှုကို ဝမ်းပန်းတသာ အရသာတွေ့နေပြီး ပျော်ရွှင်ကြည်နူးနေပါက သင် ဒုက္ခရောက်နေပြီ ဖြစ်သည်။ အကယ်၍ သင်သည် ထိုအရာကို စိတ်ပျက်ပြီး ဤအခြေအနေမျိုးကို ထားခဲ့လိုပါက၊ သင်သည် အခြားသူများက သင့်အား ဤပုံစံဖြင့် ဆက်ဆံသည်ကို မနှစ်သက်ပါက သင်၌ သင့်ကိုယ်သင် သိနားလည်မှုတစ်စုံတစ်ရာ ရှိသည်ကို သက်သေပြသည်။ ဤသည်မှာ မှန်ကန်သော အခြေအနေဖြစ်ပြီး ထိုအခြေအနေတွင် သင်သည် အမှားများကို ကျူးလွန်ဖို့ သို့မဟုတ် မှားယွင်းသောအရာများကို ပြုလုပ်ဖို့ အလားအလာ ရှိမည်မဟုတ်ပေ။

ငါပြောပြနေသော အခြေအနေများမှာ အခြေခံအားဖြင့် ဧဝံဂေလိဖြန့်ဝေသည့် လုပ်ငန်းစဉ်၌ လူတို့ အများအားဖြင့် ကြုံတွေ့ရသည့် အခြေအနေများဖြစ်သည်။ အကြောင်းအရာများ၏ အပျက်သဘောဆောင်သော အပိုင်းအားဖြင့် သင်တို့သည် မသင့်လျော်သော စကားပြောဆိုနည်း၊ အလေ့အထများနှင့် အမူအကျင့်များအချို့ကို ရှောင်ကြဉ်ရန်နှင့် သင့်စိတ်သဘောထားက သမ္မာတရားနှင့် မကိုက်ညီသည့် မသင့်လျော်သော အရာများကို မထုတ်ဖော်မိဖို့ သေချာစေရန် လိုအပ်သည်။ အပြုသဘောဆောင်သော အပိုင်းအားဖြင့်၊ ဤတာဝန်ကို ထမ်းဆောင်နေစဉ် သင်၏တာဝန်အပေါ် အဆုံးတိုင်အောင် သစ္စာရှိခြင်းနှင့် တာဝန်ယူခြင်း စိတ်သဘောတစ်ခု ရှိသင့်သည်။ ဤနည်းအားဖြင့် သင်သည် သင်၏တာဝန်ကို စိတ်ကျေနပ်ဖွယ်ရာ ဖြည့်ဆည်းနိုင်မည်ဖြစ်သည်။ ဤလုပ်ငန်းစဉ်ထဲတွင် သင်သည် ဘုရားသခင်၏ အလိုတော်ကို ဖြည့်ဆည်းဖို့အတွက် သမ္မာတရားနှင့် စည်းမျဉ်းများကို တဖြည်းဖြည်းချင်း ရှာဖွေသင့်ပြီး သင့်မှာရှိသော တာဝန်တိုင်းအား ထမ်းဆောင်ခြင်း၌ မဆုတ်မနစ် ကြိုးပမ်းကာ အဆုံးအထိ ဆက်၍ သစ္စာရှိသင့်သည်။ မည်သည့်တာဝန်မျိုးကို သင် ထမ်းဆောင်နေပါစေ ဘုရားသခင်ကို ကျေနပ်စေနိုင်ရမည် ဖြစ်ပြီး သင်လုပ်ဆောင်ခဲ့သည့် စိတ်ကျေနပ်ဖွယ်နှင့် ချီးကျူးဖွယ်ရာ ထိုအရာများကြောင့် ဘုရားသခင်၏ အောက်မေ့ခြင်းကို ခံရသင့်သည်။ ဧဝံဂေလိဖြန့်ဝေစဉ် ကာလအတွင်း သင်သည် ပြစ်မှားမှု ကျူးလွန်ခြင်းများ ပို၍ပို၍ နည်းပါးလာပြီး အမှားများ ပြုလုပ်ခြင်း ပို၍ပို၍ နည်းပါးလာအောင် ကြိုးစားရမည်။ သင်၏တာဝန် ထမ်းဆောင်စဉ်တွင် အပေးအယူလုပ်ခြင်း သို့မဟုတ် ဆုလာဘ်များ ရှာဖွေခြင်းကို ပါဝင်ဆောင်ရွက်သည့်အချိန် ပို၍ပို၍ နည်းပါးလာရမည်၊ သို့မဟုတ် အပေးအယူလုပ်ဖို့ သို့မဟုတ် ဆုလာဘ်များ ရှာဖွေဖို့ ရည်မှန်းချက်နှင့် အားကြီးသော စိတ်ဆန္ဒရှိသည့်အချိန် ပို၍ပို၍ နည်းပါးလာရမည်။ တစ်ချိန်တည်းမှာပင် သင်၏တာဝန်များကို ဖြည့်ဆည်းရန် တက်ကြွစွာ ကြိုးပမ်းရမည်၊ ယင်းတို့ကို အပြည့်အဝ ဖြည့်ဆည်းပြီး သင်၏တာဝန်ကို သင့်အပေါ်ကျရောက်သော အရာတစ်ခုအဖြစ် သတ်မှတ်ရမည်။ နှစ်ပေါင်းများစွာ ကြာပြီးနောက် ပြန်လည်စဉ်းစားသည့်အခါ သင်၏လိပ်ပြာလုံဖို့ရန် သင့်တာဝန်ကိုလည်း ကြိုးပမ်းလုပ်ဆောင်လော့။ ဤသည်မှာ သင်သည် အကြွေးတင်နေသည်ဟု သင့်ကို ခံစားစေမည့် အရာများ တချို့ကို တဖြည်းဖြည်းချင်း လျှော့ချရမည်ဟု ဆိုလိုခြင်းဖြစ်သည်။ ပြောင်းလဲခြင်း အလျဉ်းမရှိဘဲ ဆက်သွား၍မရပေ။ သင်သည် ဧဝံဂေလိလက်ခံရန် အလားအလာ ရှိသူတစ်ဦးကို ဧဝံဂေလိ ဖြန့်ဝေစဉ် သင်၏တာဝန်ကို ကောင်းစွာ မလုပ်ဆောင်ခဲ့သည့်အပြင် သင်အကြွေးတင်နေသည့်အလား ဤအရာက သင့်ကို စိတ်မသက်မသာ ဖြစ်စေပြီးလျှင် ကြိုတင်ပြင်ဆင်သည့်အလုပ်ကို အလုံအလောက် မလုပ်ခဲ့ဟု သင်ခံစားရသည် ဆိုပါစို့။ သို့သော်လည်း ယင်းနောက် ဧဝံဂေလိဖြန့်ဝေသောအခါတွင် သင်၏ အခြေအနေက ထူးမခြားနားဖြစ်နေပြီး ပြောင်းလဲမှုမရှိခဲ့ပေ။ ဤသည်မှာ သင်သည် ဤကာလအတွင်း လုံးဝ မတိုးတက်ခဲ့ဟု ဆိုလိုခြင်းဖြစ်သည်။ ဤတိုးတက်မှု ကင်းမဲ့ခြင်းက မည်သည့်အရာကို ဖော်ပြသနည်း။ ယင်းက သင်သည် သမ္မာတရား၏ ဤသွင်ပြင်လက္ခဏာကို လက်တွေ့လုပ်ဆောင်ခြင်း သို့မဟုတ် ရရှိခြင်း မရှိခဲ့သေးဟု ဆိုလိုသည်။ ယင်းက ငါ မိတ်သဟာယပြုနေသည့် ဤအရာများသည် သင့်အတွက် သြဝါဒများမှလွဲ၍ မည်သည့်အရာမျှ လုံးဝမဟုတ်ခဲ့သည်ကို ဆိုလိုသည်။ အကယ်၍ သင်သည် ပြစ်မှားမှု ကျူးလွန်ခြင်းကို ပို၍ပို၍ နည်းပါးစေပါက၊ အမှားများပြုလုပ်ခြင်းကို ပို၍ပို၍ နည်းပါးစေပါက အကြွေးတင်သော ခံစားမှု ပို၍လျော့ပါးပြီး အသိတရား၏ ထိုးနှက်ခံစားမှု ပို၍နည်းပါးလာပါက ဤအရာသည် မည်သည့်အရာကို ဖော်ပြသနည်း။ ယင်းက သင်သည် တာဝန်ကို ပို၍ပို၍ ကြီးမားသော စင်ကြယ်ခြင်းဖြင့် ထမ်းဆောင်နေသည်၊ ထို့ပြင် သင်၏ တာဝန်သိစိတ်မှာ ပို၍ပို၍ အားကောင်းလာသည်ဟု ဆိုလိုသည်။ တစ်နည်းအားဖြင့် သင်သည် ဤတာဝန်ကို ထမ်းဆောင်ရာ၌ ပို၍ပို၍ သစ္စာရှိလာနေသည်။ ဥပမာဆိုရလျှင် အတိတ်တွင် ဧဝံဂေလိဖြန့်ဝေခြင်းသည် သမ္မာတရားကို မိတ်သဟာယပြုခြင်း သို့မဟုတ် သမ္မာကျမ်းချက်များကို အနက်ပြန်ခြင်းအပေါ်ထက် လူသားနည်းစနစ်များအပေါ် အမှီပြုခဲ့သည်။ ယခုတွင် ထိုသို့သော လုပ်ကိုင်နည်းက မသင့်လျော်၊ ယင်းက ဘုရားသခင်၏ တာဝန်ပေးစေခိုင်းချက်ကို လက်ခံသောလူတစ်ဦး ပြုလုပ်သင့်သည့် အရာမဟုတ်၊ ထို့ပြင် ယင်းက ဘုရားသခင်အား ဂုဏ်သရေညှိုးစေသည့် အရာတစ်ခု ဖြစ်သည်ဟု ထင်ရသည်။ သင်တို့၌ ဤစိတ်ခံစားမှု ရှိခဲ့ဖူးသလော။ သင်တို့သည် ယခုတွင် ဤအတိုင်း ခံစားကောင်း ခံစားရမည် မဟုတ်သော်လည်း သင်သည် အမျိုးမျိုးအဖုံဖုံသော သမ္မာတရားများဖြင့် မိမိကိုယ်ကို ပို၍ပို၍ ပြင်ဆင်ထားကာ ဝိညာဉ်ရင့်ကျက်မှု အနည်းငယ်ကို ရရှိထားပြီးနောက် တစ်နေ့နေ့တွင် သင်သည် သင်၏အတိတ်က လက်တွေ့လုပ်ဆောင်မှုများကို ကြည့်သောအခါ ပို၍ တိကျမှန်ကန်ပြီး လက်တွေ့ကျသော သဘောထားတစ်ခုနှင့် အမြင်ရှုထောင့်ကို ခံယူမည်ဖြစ်သည်။ ဤသည်မှာ သင်၏ အတွင်းပိုင်းအခြေအနေက ပုံမှန်ဖြစ်လာပြီဖြစ်ကြောင်း သက်သေပြသည်။ ယခုတွင်မူ သင်သည် သင်၏ယခင်က လက်တွေ့လုပ်ဆောင်မှုများနှင့် ပတ်သက်၍ မည်သည့်အရာမျှ မခံစား၊ ယင်းတို့ကို ပမာမထားခြင်း မရှိသည့်အပြင် ယင်းတို့နှင့်ပတ်သက်၍ မှန်ကန်သော ရှုထောင့်အမြင် သို့မဟုတ် အကဲဖြတ်ချက် မရှိပေ။ ထိုအစား သင်သည် စိတ်ဝင်စားမှုမရှိပေ။ ဤသည်မှာ အလွန် သောကရောက်စေသည် မဟုတ်လော။ ဤသည်မှာ သင်သည် ထိုသို့သောအရာများနှင့် ဆီလျော်သော မည်သည့်သမ္မာတရားကိုမျှ မပိုင်ဆိုင်ကြောင်း သက်သေပြသည်။ သင်သည် လူသား၏ မကောင်းမှုများနှင့် ပရိယာယ်များ အမျိုးမျိုးအပြင် သမ္မာတရားနှင့် မညီညွတ်သည့် သူ၏ ထိုအလေ့အထများအပေါ် မထုံတက်သေး သဘောထားတစ်ခုကိုပင် ခံယူထားကာ၊ ညစ်ညမ်းသော ဤအရာများကို လက်ခံခြင်း၊ ထောက်ခံခြင်းနှင့် လိုက်လျောခြင်းပင် ရှိလေသည်။ ထိုအခါ သင်၏ အတွင်းပိုင်း အခြေအနေက အဘယ်နည်း။ သင်သည် မဖြောင့်မတ်သော အရာများကို ခုံမင်နှစ်သက်သည်၊ အပြစ်နှင့် ဆက်စပ်သော အရာများကို ခုံမင်နှစ်သက်သည်၊ ပြီးလျှင် သမ္မာတရားနှင့် မညီညွတ်ဘဲ ဆန့်ကျင်သည့် အရာများကို ချစ်လေသည်။ ဤသည်မှာ အလွန် သောကရောက်စေသည်။ အကယ်၍ သင်သည် ဤအလေ့အထများအတိုင်း ဆက်၍ ပြုမူလုပ်ဆောင်နေပါက အလွန်ပြင်းထန်သော အကျိုးဆက်များကို ရင်ဆိုင်ရမည်ဖြစ်သည်။ ဤအကျိုးဆက်မှာ အဘယ်နည်း။ သင်သည် ဆိုးယုတ်သော လုပ်ရပ်များကို အဆက်မပြတ် စုဆောင်းနေပြီး ကယ်တင်ခြင်း လမ်းကြောင်းမှ ပို၍ပို၍ ဝေးရာသို့ လမ်းလွဲနေသည်။ သင်သည် ပို၍ပို၍ ဝေးရာသို့ လမ်းလွဲနေသည်ဟု အဘယ့်ကြောင့် ငါဆိုရသနည်း။ ယင်းမှာ ဤတာဝန်ကို ထမ်းဆောင်နေစဉ် သင်သည် သမ္မာတရားကို ရှာဖွေရန် ပျက်ကွက်ပြီး သင်ပြုလုပ်သည့် အရာများတွင် စည်းမျဉ်းများကို မလိုက်နာသောကြောင့် ဖြစ်သည်။ သင့်ကိုယ်ပိုင်စိတ်ဆန္ဒနှင့် နှစ်သက်မှုများနောက်ကိုသာ လိုက်၏။ သို့ဖြစ်၍ သင်၏တာဝန်ကို မည်ကဲ့သို့ စိတ်ကျေနပ်ဖွယ်ရာ ထမ်းဆောင်နိုင်မည်နည်း။ သင် တာဝန်လုပ်ဆောင်သည့် ရည်ရွယ်ချက်မှာ သမ္မာတရားထဲသို့ ဝင်ရောက်ရန်မဟုတ်ဘဲ လုပ်ငန်းတာဝန်တစ်ခုကို ပြီးမြောက်ရန်နှင့် မိမိ၏ ဖြစ်ကြောင်းကုန်စင်ကို ပြောပြရန်သာ ဖြစ်သည်။ သင်လိုက်လျှောက်သည့် အရာမှာ ဘုရားသခင်၏ အလိုတော် မဟုတ်သည့်အပြင် သင်လက်ခံသည့် အရာမှာ ဘုရားသခင်၏ တာဝန်ပေးစေခိုင်းချက် မဟုတ်ပေ။ ဤအရာတို့၏ သဘာဝများက ကွဲပြားခြားနားသည်။ ထို့ကြောင့် သင်သည် ဧဝံဂေလိဖြန့်ဝေရန် သွားလာသည့်အခါ ကယ်တင်ခြင်းသို့ ဦးတည်နေသော လမ်းကြောင်းကို မဟုတ်ဘဲ အစေခံခြင်းလမ်းကြောင်း၊ ဘုရားသခင်နှင့် အပေးအယူလုပ်ခဲ့သည့် ပေါလုလမ်းကြောင်းကို လျှောက်နေခြင်းဖြစ်သည်။ အနှေးနှင့်အမြန် ဆိုသကဲ့သို့ သင်ပြုလုပ်သမျှအပေါ် မူတည်၍ ဘုရားသခင်သည် သင့်အတွက် ပေါလုနှင့်တူသော အဆုံးသတ်ကို သတ်မှတ်ဖန်တီးပေးမည် ဖြစ်သည်။ ဤသည်မှာ ရလဒ်ဖြစ်မည်မဟုတ်လော။ ရလဒ်ဖြစ်မည်မှာ လုံးဝအသေအချာပင်။ အပြန်အလှန်အားဖြင့် ဧဝံဂေလိဖြန့်ဝေခြင်း လုပ်ငန်းစဉ်၌ သင်၏ နည်းစနစ်များနှင့် နည်းလမ်းများအားလုံးက လက်တွေ့ကျလျှင်၊ သင်ထွက်ခွာသွားရသည့် လိုရင်းနှင့် ရည်ရွယ်ချက်မှာ ဘုရားသခင်ကို ကျေနပ်စေရန်နှင့် ဘုရားသခင်၏ ချစ်ခြင်းမေတ္တာကို ပြန်ပေးဆပ်ရန်ဖြစ်ကာ သင်ကျင့်သုံးသည့် စည်းမျဉ်းများနှင့် သင်လျှောက်လှမ်းသည့် လမ်းကြောင်းက ဘုရားသခင်၏ သတ်မှတ်ချက်များနှင့်အညီ ဖြစ်ပြီး သမ္မာတရားနှင့် လုံးဝညီညွတ်နေလျှင် ထိုသို့သော လက်တွေ့လုပ်ဆောင်မှုအားဖြင့် မည်သည့်ရလဒ်ကို ရရှိလိမ့်မည်နည်း။ သင်၏ သမ္မာတရားနားလည်မှုက ပို၍ပို၍ နက်နဲလာလိမ့်မည်၊ အရေးကိစ္စများကို စည်းမျဉ်းများနှင့် ပို၍ပို၍ ညီညွတ်အောင် ကိုင်တွယ်လိမ့်မည်၊ သင့်အသက်တာသည် ပို၍ပို၍ ရင့်ကျက်ကြီးထွားလာပြီး ဘုရားသခင်အပေါ် သင်၏ ယုံကြည်မှု၊ ချစ်ခြင်းမေတ္တာနှင့် သစ္စာစောင့်သိမှုက တဖြည်းဖြည်း တိုးပွားလာမည် ဖြစ်သည်။ ဤနည်းအားဖြင့် သင်သည် ကယ်တင်ခြင်းလမ်းကြောင်းအပေါ် တက်လှမ်းမည်ဖြစ်သည်။ တစ်ချိန်တည်းတွင် သင်၏တာဝန်ကို ထမ်းဆောင်ခြင်း လုပ်ငန်းစဉ်၌ သင်ကိုယ်တိုင်၏ ပုန်ကန်မှုနှင့် ဖောက်ပြန်ပျက်စီးမှုကို တဖြည်းဖြည်းချင်း စစ်ကြောမည်ဖြစ်ပြီး သင်၏ ဖောက်ပြန်ပျက်စီးသော စိတ်သဘောထားအမျိုးမျိုးကို စစ်ကြောမည်ဖြစ်သည်။ ထိုအခါ ဤတာဝန်ကို ထမ်းဆောင်ခြင်း လုပ်ငန်းစဉ်၌ သင့်ကိုယ်သင် ပို၍ပို၍ ချုပ်တည်းနိုင်ပြီး ဘုရားသခင်အား ကြောက်ရွံ့ခြင်းနှင့် နာခံခြင်းကို ပိုင်ဆိုင်နိုင်မည် ဖြစ်သည်။ ထိုနောက်တွင် သင်၏ တာဝန်သိစိတ်သည် ပို၍ပို၍ အားကောင်းလာပြီး သင့်သစ္စာရှိမှု၏ စင်ကြယ်ခြင်းက ပို၍ပို၍ တိုးပွားမည်ဖြစ်သည်။ သင်၏ ဘုရားသခင်အား ကြောက်ရွံ့ခြင်းသည်လည်း နက်ရှိုင်းလာမည်ဖြစ်သည်။ တစ်ချိန်တည်းတွင် သင်သည် သမ္မာတရားအမျိုးမျိုး၏ စစ်မှန်မှုအား တွေ့ကြုံခြင်းနှင့် သိနားလည်ခြင်းကို ပို၍ပို၍ ရရှိမည် ဖြစ်သည်။ ဤနည်းအားဖြင့် သင်လျှောက်လှမ်းသည့် လမ်းကြောင်းသည် ပေါလုလျှောက်ခဲ့သည့် လမ်းကြောင်းနှင့် လုံးဝ ဆန့်ကျင်ဘက် ဖြစ်လိမ့်မည်။ ဤသည်မှာ ပေတရု၏ သမ္မာတရားလိုက်စားမှု လမ်းကြောင်းဖြစ်၏။ ဤလမ်းကြောင်းက ကယ်တင်ခြင်းလမ်းကြောင်း ဖြစ်၏။ နောက်ဆုံးရလဒ်အနေဖြင့် သင်သည် ယင်းကို ကိုယ်တိုင်တွေ့ကြုံလိမ့်မည်။ ဘုရားသခင်က သင့်ကို ချီးကျူးမည်ဖြစ်ပြီး သင်၏စိတ်နှလုံးသည် ငြိမ်သက်ခြင်းနှင့် ပျော်ရွှင်ခြင်းကို ပို၍ပို၍ သိကျွမ်းမည်ဖြစ်သည်။ သင်၏လမ်းကြောင်းတွင် အကွေ့အကောက်များ မည်မျှရှိခဲ့ပါစေ၊ သင်သည် သွေဖည်မှုများ မည်မျှ ဖြတ်သန်းခဲ့ပါစေ၊ သို့မဟုတ် သင်၌ မည်သည့် အပျက်သဘောဆောင်မှု၊ အားနည်းချက် သို့မဟုတ် ရှုံးနိမ့်မှုများနှင့် ပြိုလဲမှုများပင် ရှိခဲ့ပါစေ ဘုရားသခင်၏ အမြင်၌ အရေးမကြီးပေ။ သင်ပြုလုပ်ခဲ့ပြီးသော အရာ၊ သင်ထုတ်ဖော်ခဲ့ပြီးသော အရာနှင့် သင် ပေါ်လွင်စေခဲ့ပြီးသော အရာတို့သည် ပြည့်ဝစုံလင်သည်ဟု ရှုမြင်ခံရသောအခါ သင်လျှောက်လှမ်းသည့် လမ်း‌ကြောင်းမှာ ကယ်တင်ခြင်းလမ်းကြောင်း ဖြစ်လိမ့်မည်။ သို့ဆိုလျှင် ဘုရားသခင်သည် သင်၏အဆုံးသတ်ကို မည်သို့ အဆုံးအဖြတ် ပေးမည်နည်း။ ဘုရားသခင်သည် သင်၏ အဆုံးသတ်ကို အလောတကြီး အဆုံးအဖြတ်ပေးမည် မဟုတ်ပေ။ နည်းစနစ်ကျကျနှင့် ညင်သာသော သည်းခံခြင်းဖြင့် ဘုရားသခင်က ကယ်တင်ခြင်းလမ်းကြောင်းပေါ်တွင် သင့်ကို ထောက်ပံ့မည်၊ သင့်ကို ကူညီမည်၊ ပြီးလျှင် သင့်ကို ခေါ်ဆောင်မည်ဖြစ်သည်။ သူသည် သင့်အား သူ၏ တရားစီရင်မှုနှင့် ပြစ်တင်ဆုံးမခြင်း၊ စမ်းသပ်မှုများနှင့် စစ်ဆေးခြင်းများကို လက်ခံခွင့်ပေးမည်ဖြစ်ပြီး နောက်ဆုံးတွင် သင့်ကို စုံလင်စေမည်ဖြစ်သည်။ ဤနည်းအားဖြင့် သင်သည် လုံးစေ့ပတ်စေ့နှင့် လုံးလုံးလျားလျား ကယ်တင်ခံရမည် ဖြစ်သည်။ ထို့ကြောင့် ဤရှုထောင့်အမြင်မှနေ၍ ဧဝံဂေလိဖြန့်‌ဝေခြင်း တာဝန်ကို ဖြည့်ဆည်းခြင်းအားဖြင့် လူတို့၌ ကယ်တင်ခြင်း လမ်းကြောင်းပေါ်သို့ တက်လှမ်းရန် အခွင့်အလမ်းနှင့် ဖြစ်နိုင်ခြေရှိသည် မဟုတ်လော။ (ဟုတ်ပါသည်။) ၎င်းတို့၌ ဤအခွင့်အလမ်းရှိပြီး ထိုအရာသည် အပြည့်အဝ ဖြစ်နိုင်ပေသည်။ ယင်းက ၎င်းတို့အနေဖြင့် သမ္မာတရားကို လိုက်စားနိုင်ခြင်းနှင့် သမ္မာတရားလိုက်စားမှု လမ်းကြောင်းကို လျှောက်နိုင်ခြင်း ရှိမရှိဟူသည့်အပေါ်၌သာ မူတည်သည်။

ယနေ့ ငါတို့သည် ဧဝံဂေလိဖြန့်ဝေခြင်း တာဝန်အား ဖြည့်ဆည်းခြင်းနှင့် ပတ်သက်၍ သမ္မာတရားအမျိုးမျိုးကို အဓိကအားဖြင့် မိတ်သဟာယပြုခဲ့ပြီး ဖြစ်သည်။ ငါတို့၏ မိတ်သဟာယပြုချက်ကို အစပြုခဲ့သည့် အကြောင်းအရာအား ပြန်ဆွေးနွေးကြစို့။ ဧဝံဂေလိဖြန့်ဝေခြင်း တာဝန်ကို ထမ်းဆောင်သူတို့အား ငါတို့ မည်သို့ခေါ်သင့်သနည်း။ (ဧဝံဂေလိ ဖြန့်ဝေခြင်းတာဝန်ကို ဆောင်ရွက်သောသူများ ဖြစ်သည်။) မှန်ပေ၏။ ၎င်းတို့ကို သက်သေများ၊ တရားဟောဆရာများဟု ခေါ်၍မရ၊ ထို့ပြင် ဧဝံဂေလိတမန်များဟု ခေါ်၍မရသည်မှာ သေချာ၏။ နောက်ဆုံး လေ့လာတွေ့ရှိချက်တွင် ၎င်းတို့သည် ဧဝံဂေလိဖြန့်ဝေသူများ ဖြစ်သည်။ သင့်ကိုယ်သင် သက်သေဟု မည်သည့်အခါ်မျှ မခေါ်လေနှင့်။ လူတို့သည် မည်သည့်အရာကိုမျှ သက်သေမခံနိုင်သည့်အပြင် ၎င်းတို့သည် ဘုရားသခင်အား အရှက်မရစေလျှင် လုံလောက်ပြီဖြစ်သည်။ သင့်ကိုယ်သင် တရားဟောဆရာဟု ခေါ်ခြင်းက ပို၍ပင် ဆိုး၏။ သင်သည် ဤအရာမှ ပို၍ဝေးသေး၏။ သင်ဟောပြောသည့်အရာမှာ “လမ်းခရီး” မဟုတ်သည့်အပြင် သင်ဟောပြောသည့် အရာများမှာ “လမ်းခရီး” နှင့် များစွာ အလှမ်းဝေး၏။ ထို့ကြောင့် ငါတို့သည် “ဧဝံဂေလိ ဖြန့်ဝေသူများ” ဟူသည့် အမည်နာမကို ရွေးချယ်ခြင်းဖြစ်ကာ လူတိုင်း၌ ဤတာဝန်၏ တိကျသော အဓိပ္ပာယ်ဖွင့်ဆိုချက်တစ်ခု ရှိမည်ဖြစ်ပြီး ယင်းမှာ ၎င်းတို့သည် ဤတာဝန်အား ထမ်းဆောင်သူများပင် ဖြစ်လေသည်။ ၎င်းတို့သည် သက်သေများ မဟုတ်သကဲ့သို့ တရားဟောဆရာများလည်း လုံးဝ မဟုတ်ပေ။ ထိုအရာများနှင့် များစွာ ခြားနား၏။ ၎င်းတို့ကို သက်သေများ သို့မဟုတ် တရားဟောဆရာများဟု ခေါ်လျှင် သူတို့ကိုယ်သူတို့ အခြားသူများထက် သာလွန်သည်ဟု ခံစားမည် မဟုတ်လော။ လူတို့အနေဖြင့် ကြွားဝါရန်နှင့် သွေးနားထင်ရောက်ရန် များစွာ မလိုအပ်ပေ။ ဤပုံစံဖြင့် ကြွားဝါခြင်းနှင့် သွေးနားထင်ရောက်ခြင်းက ကောင်းသောအရာလော၊ ဆိုးသောအရာလော။ (ဆိုးသောအရာ ဖြစ်ပါသည်။) သင်သည် လူတို့ကို ချီးမြှောက်ခြင်းနှင့် မြှောက်ပင့်ခြင်း မပြုလျှင်လည်း ၎င်းတို့က မိမိတို့ဘာသာ အမြဲတမ်း သွေးနားထင်ရောက်ချင်ကြသည်။ အကယ်၍ ၎င်းတို့ကို သက်သေများ၊ တရားဟောဆရာများ သို့မဟုတ် ဧဝံဂေလိတမန်များဟု သင်ခေါ်လျက် တကယ်ကို ချီးမြှောက်လျှင်မူ ထိုသို့သော အမွှမ်းတင်မှုကို ရရှိပြီးနောက် ၎င်းတို့ မည်သို့ဖြစ်မည်ကို သင် စိတ်ကူးကြည့်နိုင်သလော။ ၎င်းတို့သည် သွေးနားထင် ရောက်လွန်းသဖြင့် လေထဲလွင့်သွားမည် ဖြစ်သည်။ ယခုတွင် သင့်၌ ဧဝံဂေလိဖြန့်ဝေခြင်း တာဝန်နှင့်ပတ်သက်သော သမ္မာတရားအမျိုးမျိုးနှင့်စပ်လျဉ်း၍ အခြေခံနားလည်မှု ရှိပြီဖြစ်သလော။ (ရှိပါပြီ။) ဧဝံဂေလိဖြန့်ဝေခြင်းတာဝန်ကို ကောင်းစွာ ထမ်းဆောင်ရန် သမ္မာတရားများစွာဖြင့် ပြင်ဆင်ရမည်။ လူအချို့က “ကျွန်ုပ်သည် ဧဝံဂေလိမဖြန့်ဝေသဖြင့် မိမိကိုယ်ကို သမ္မာတရားဖြင့် ပြင်ဆင်ဖို့လိုသလော” ဟု ဆိုသည်။ အခြားလူတို့က “ကျွန်ုပ်သည် မည်သည့်အခါ၌ ဧဝံဂေလိ ဖြန့်ဝေနိုင်မည် မသိပေ။ မည်သည့်အခါမျှ ဧဝံဂေလိ မဖြန့်ဝေဖူးသည့်အပြင် ကျွန်ုပ်သည် စကားအပြောမတတ်သူတစ်ဦး ဖြစ်သောကြောင့် အဘယ်သို့ ဧဝံဂေလိဖြန့်ဝေနိုင်မည်နည်း” ဟု ဆိုကြသည်။ သင်သည် ဧဝံဂေလိဖြန့်ဝေကောင်း ဖြန့်ဝေနိုင်မည် မဟုတ်သော်လည်း သင်သည် ဧဝံဂေလိဖြန့်ဝေခြင်းနှင့် ပတ်သက်၍ သမ္မာတရားများဖြင့် မိမိကိုယ်ကို မပြင်ဆင်နိုင်သလော။ စကားပြောခြင်းနှင့် လူတို့အား တွေ့ဆုံခြင်းကို သင် မလေ့ကျင့်နိုင်သလော။ အကယ်၍ သင့်၌ သာသနာအသိနှင့် တာဝန်သိစိတ်ရှိပါက၊ သင်သည် ဤတာဝန်ကို ကောင်းစွာ ထမ်းဆောင်လိုပြီး ဘုရားသခင်နှင့် ပူးပေါင်းဆောင်ရွက်လိုပါက သင်သည် ဧဝံဂေလိဖြန့်ဝေခြင်းနှင့် ပတ်သက်၍ သမ္မာတရားများဖြင့် မိမိကိုယ်ကို ပြင်ဆင်သင့်သည်။ ရူပါရုံဆိုင်ရာ သမ္မာတရားများနှင့် လက်တွေ့လုပ်ဆောင်မှုဆိုင်ရာ သမ္မာတရားများဖြင့် မိမိကိုယ်ကို ပြင်ဆင်ထားရမည်။ ဘုရားသခင် ရွေးကောက်သော လူတို့အနေဖြင့် ဤကဏ္ဍနှစ်ခုနှင့် စပ်လျဉ်း၍ သမ္မာတရားများဖြင့် မဖြစ်မနေ ပြင်ဆင်ထားရမည်။ အဘယ့်ကြောင့်ဆိုသော် မိမိကိုယ်ကို ဤသမ္မာတရားများဖြင့် ပြင်ဆင်ထားခြင်းသည် မည်သည့်အခါမျှ ပိုသည်မရှိပေ။ ယင်းတို့သည် ဧဝံဂေလိဖြန့်ဝေခြင်းနှင့် သက်ဆိုင်သည်သာမက လူသားမျိုးနွယ် နားလည်ရမည့် သမ္မာတရားများ ဖြစ်သည်။ လူတို့သည် ဤသမ္မာတရားများ နားလည်ခြင်းအားဖြင့် မည်သို့ အကျိုးရရှိမည်နည်း။ ယင်းသည် ၎င်းတို့ကို မည်သည့်ကောင်းချီးများ ဆောင်ကြဉ်းပေးနိုင်သနည်း။ လူတိုင်းက ယေဘုယျခံယူချက်ကို ရကောင်းရနိုင်သော်လည်း ဘုရားသခင်၏ အမှုတော် ဆက်လက်၍ တိုးတက်နက်ရှိုင်းလာသည်နှင့်အမျှ လူတို့သည် ဘုရားသခင်၏ အမှုတော်ကို ဆက်လက်၍ တွေ့ကြုံရမည်ဖြစ်ပြီး ၎င်းတို့၏ သမ္မာတရားနားလည်မှုသည်လည်း ဆက်လက်၍ တိုးတက်နက်ရှိုင်းမည် ဖြစ်သည်။ ၎င်းတို့၏ ဘုရားသခင်နှင့် ဆက်ဆံရေးများသည် ပို၍ပို၍ နီးကပ်လာပြီး ၎င်းတို့၏ သူနှင့်ဆက်သွယ်မှုသည် ပို၍ပို၍ စိပ်လာမည်ဖြစ်သည်။ လူတို့သည် ဘုရားသခင်၏ လုပ်ဆောင်ချက်များ၊ လူတစ်ဦးချင်းစီအပေါ် ဘုရားသခင်၏ သဘောထားတို့နှင့် နှိုင်းယှဉ်ပြသည့်အနေဖြင့် ရူပါရုံနှင့် ဘုရားသခင်၏ အမှုတော်နှင့် သက်ဆိုင်သော သမ္မာတရားများကို တစ်ဆင့်ပြီးတစ်ဆင့် စံပြုလာမည်ဖြစ်သည်။ ဤတစ်ဆင့်ချင်း နှိုင်းယှဉ်ပြခြင်း ဖြစ်စဉ်သည် ဘုရားသခင်အား သိကျွမ်းခြင်းဖြစ်စဉ် ဖြစ်သည်။ ဖန်ဆင်းခံတစ်ဦးအနေဖြင့် သင်သည် ဘုရားသခင်ကို အချိန်အကြာကြီး ယုံကြည်လာခဲ့ပြီး ဖြစ်သော်လည်း ဘုရားသခင် မည်သူဖြစ်ကြောင်း သို့မဟုတ် သူသည် အဘယ်သို့ပေါ်ထွန်းပြီး အမှုပြုကြောင်းကို မသိပေ။ ထိုသို့သော ယုံကြည်မှုသည် လွန်စွာ မ‌ရေမရာဖြစ်ပြီး မရှင်းလင်းသည် မဟုတ်လော။ သင်သည် သင့်တာဝန်ကို နှစ်ပေါင်းများစွာ ထမ်းဆောင်ခဲ့ပြီဖြစ်သည်။ သို့သော် အဆုံးတွင် ဘုရားသခင်နှင့်ပတ်သက်၍ ဘာမျှမသိရှိသေးပါက ဘုရားသခင်၌ သင်၏ယုံကြည်မှုသည် အဓိပ္ပာယ်မဲ့နေပြီ ဖြစ်သည်။ သင်သည် နတ်မိစ္ဆာများက ဘုရားသခင်အကြောင်း ကောလာဟလအချို့ ဖြန့်ဝေသည်ကို ကြားရပါက ယင်းတို့ကို ယုံကြည်မည်လော။ (ကျွန်ုပ်တို့ ယုံကြည်မည်မဟုတ်ပါ။) ယခုတွင် ထိုကဲ့သို့သော အရာများကို ယုံကြည်မည်မဟုတ်ဟု သင်ပြောသော်လည်း၊ အကယ်၍ သင်သည် ဘုရားသခင်ကို အမှန်တကယ် နားမလည်ပါက ဤကောလာဟလများကို ကြားရသောနေ့ ရောက်လာသော် သင်သည် သံသယများ ရှိလာမည်ဖြစ်ပြီး သင့်စိတ်နှလုံးထဲတွင် “ယင်းက မှန်ကန်နိုင်သလော။ ဘုရားသခင်က ထိုသို့သောအရာမျိုးကို ပြုလုပ်နိုင်သလော” ဟု တွေးလျက် ထိုစကားများကို တစိမ့်စိမ့် ချင့်ချိန်တွေးဆမည် ဖြစ်သည်။ စိတ်မသက်မသာ ဖြစ်လျက် သင်သည် သင့်တာဝန်ကို လုပ်ဆောင်လိုစိတ်မရှိဘဲ ဖြစ်နေမည်။ ကောလာဟလများ၏ လွှမ်းမိုးမှုအောက် ကျရောက်ပြီးလျှင် ရှေ့တွင်ရှိသောလမ်းသည် စိတ်ဓာတ်ကျစရာနှင့် မှုန်မှိုင်းနေသည်ဟု ခံစားရမည်။ သို့ဖြစ်၍ သင်သည် လမ်းပျောက်နေပြီး စိတ်ရှုပ်ထွေးလာမည် ဖြစ်သည်။ လူတို့သည် အမြဲတမ်း လမ်းပျောက်ပြီး စိတ်ရှုပ်ထွေးနေကြသည်မှာ အဘယ်ကြောင့်နည်း။ ၎င်းတို့သည် ဘုရားသခင် မည်သည့်နေရာ၌ ရှိကြောင်း၊ သို့မဟုတ် ဘုရားသခင် တကယ်ရှိမရှိပင် မသိသောကြောင့် အမြဲတမ်း လမ်းပျောက်ပြီး စိတ်ရှုပ်ထွေးကြသောကြောင့် ဖြစ်သည်။ ဤစိတ်ရှုပ်ထွေးမှုသည် မည်သည့် အခြေအနေထဲတွင် ပေါ်ထွက်လာသနည်း။ ယင်းသည် အမြင်အားဖြင့် ဆန့်ကျင်သော အရာများစွာက လူတို့ကို စိတ်ရှုပ်စေသဖြင့် ၎င်းတို့သည် လျှောက်ရမည့် ဦးတည်ရာကို ရှင်းလင်းစွာ မမြင်နိုင်ဘဲ မည်သည့်လမ်းသို့ သွားရမည်ကို မသိသောအခါ ပေါ်ထွက်လာတတ်သည်။ ထို့ကြောင့် ၎င်းတို့သည် လမ်းပျောက်ပြီး စိတ်ရှုပ်ထွေးလာကြခြင်း ဖြစ်သည်။ သင်တို့သည် သင်တို့အမြင်၌ အမှုအရာများစွာကို ရှင်းလင်းစွာ မြင်တွေ့ကာ ထိုးထွင်းသိမြင်ပြီးလျှင် မှန်ကန်သော လမ်းကြောင်းကို လိုက်လျှောက်နိုင်သလော။ ဤအရာ၌ သင်၏ ဘုရားသခင်အား နားလည်မှု၊ သင်၏ သမ္မာတရား နားလည်သဘောပေါက်ခြင်းနှင့် သမ္မာတရားဖြင့် သင်ပြင်ဆင်ထားသည့် အတိုင်းအတာတို့ ပါဝင်သည်။ လူတို့သည် အမြဲတမ်း လမ်းပျောက်ပြီး စိတ်ရှုပ်ထွေးသောအခါ ယင်းက မည်သည့်အရာကို ဆိုလိုသနည်း။ အမှန်အားဖြင့် ၎င်းတို့သည် ရှေ့ဆီမှလမ်းကို အမှန်တကယ် မမြင်ရသလော။ လမ်းပျောက်သူနှင့် စိတ်ရှုပ်ထွေးသူတို့က အမှန်ပင် မျက်ကန်းကြသလော။ မဟုတ်ပေ။ ယင်းမှာ စိတ်နှလုံး၏ မျက်စိကန်းခြင်းနှင့် သမ္မာတရား၌၊ ဘုရားသခင်၌ ထုံထိုင်းခြင်းသာမက လူများ၊ ကိစ္စရပ်များ၊ အမှုအရာများအပေါ် အကဲဖြတ်ချက်များ၌ ထုံထိုင်းခြင်းဖြစ်သည်။ ၎င်းတို့သည် အဘယ့်ကြောင့် ထုံထိုင်းရသနည်း။ ယင်းမှာ ၎င်းတို့သည် သမ္မာတရားကို နားမလည်သောကြောင့်၊ ဘုရားသခင်၏ လုပ်‌ဆောင်ချက်များကို မသိသောကြောင့်၊ ဘုရားသခင်၏ စိတ်နေသဘောထားကို မသိသောကြောင့်အပြင် အရာခပ်သိမ်းအပေါ် တိကျမှန်ကန်သော အကဲဖြတ်ချက်များ ပြုလုပ်ရမည့် အခြေခံစနစ် မရှိသောကြောင့် ဖြစ်သည်။ ထို့ကြောင့် ၎င်းတို့၌ တစ်စုံတစ်ရာကို အကဲဖြတ်ရန်နှင့် သွင်ပြင်လက္ခဏာ ဖော်ပြရန်အတွက် စံသတ်မှတ်ချက်တစ်ခုမျှ မရှိပေ။ ၎င်းတို့သည် ဝေဝေဝါးဝါးဖြစ်ကြ၏၊ အရာရာတိုင်းကို ရှင်းလင်းမှု သို့မဟုတ် သိနားလည်မှုမပါဘဲ မြင်တွေ့ကြပြီး အကဲဖြတ်ချက်များကို ပြုလုပ်၍ မရနိုင်ပေ။ ၎င်းတို့သည် အမှုအရာများကို အဓိပ္ပာယ် မဖွင့်ဆိုနိုင်သကဲ့သို့ အကြောင်းရင်းအမှန်ကို မရိပ်စားမိနိုင်ပေ။ ဤသည်ကို ထုံထိုင်းခြင်းဟု ခေါ်သည်။ ထုံထိုင်းခြင်းက မျက်ကန်းခြင်းသို့ ဦးတည်ပြီး မျက်ကန်းခြင်းက လူတို့ကို လမ်းပျောက်ခြင်းနှင့် စိတ်ရှုပ်ထွေးခြင်းသို့ ဆိုက်ရောက်စေသည်။ ယင်းမှာ ထိုအရာ ဖြစ်သည့်ပုံစံ ဖြစ်သည်။ သို့ဆိုလျှင် တရားဒေသနာများကို နှစ်ပေါင်းများစွာ ကြားနာခဲ့ပြီးသော လူတို့က အမှုအရာများကို ထိုးထွင်းသိမြင်ခြင်း မရှိနိုင်ရသည်မှာ အဘယ်ကြောင့်နည်း။ ယင်းမှာ ထိုသို့သော လူတို့သည် သမ္မာတရားကို နားမလည်သောကြောင့် ဖြစ်သည်။ ၎င်းတို့သည် မည်သည့်အရာကိုမျှ ရိပ်စားမိနိုင်ခြင်း မရှိဘဲ စည်းကမ်းများကို ကျိုးကြောင်းမဆင်ခြင်ဘဲ လိုက်နာကြပြီး အလျင်စလို ကောက်ချက်ဆွဲကြသည်။ ဤသည်ကို မျက်ကန်းခြင်းဟု ယူဆ၍ရသလော။ ၎င်းတို့သည် လုံးလုံးလျားလျား မျက်ကန်းသည်ဟု မဆိုနိုင်သော်လည်း တစ်ဝက်တစ်ပျက် မျက်ကန်းကြသည်။ အမှန်တွင် သင်သည် သမ္မာတရားကို နားမလည်ပါက မည်သည့်အရာ၏ အကြောင်းရင်းကိုမျှ ရိပ်စားမိနိုင်မည် မဟုတ်ပေ။ တစ်စုံတစ်ဦးသည် ဘုရားသခင်ကို မည်မျှကြာကြာ ယုံကြည်လာခဲ့သည်ဖြစ်စေ သို့မဟုတ် တရားဒေသနာ မည်မျှကို ခံယူပြီးခဲ့သည်ဖြစ်စေ ၎င်းတို့သည် သမ္မာတရားကို လုံးဝ နားမလည်နိုင်ပါက ဤသည်မှာ ပြဿနာက ၎င်းတို့၏ အရည်အသွေးဖြစ်သည်ဟု ဆိုလိုသည်။ ဤသည်မှာ ၎င်းတို့၌ ဝိညာဉ်ရေးသိနားလည်မှု ရှိမရှိနှင့် တိုက်ရိုက် အပြန်အလှန် ဆက်စပ်နေသည်။ တရားဒေသနာများကို နှစ်ပေါင်းများစွာ ခံယူခဲ့ပြီးသော လူအများစုသည် သမ္မာတရား၏ တစ်စုံတစ်ရာကို နားလည်နိုင်ပြီး သင်တို့သည် အမှန်ပင် အတော်ပင် နားလည်ကောင်း နားလည်ကြမည်ဖြစ်ပြီး သင့်လျော်သော ပတ်ဝန်းကျင် မရှိခြင်းသာ ဖြစ်မည်၊ ထို့ကြောင့် အချို့သော သမ္မာတရားများကို အသုံးမချသေးဘဲ ယင်းတို့ကို သင်နားမလည်ဟု ခံစားနေရဆဲ ဖြစ်သည်။ ယင်းကို သင်ကိုယ်တိုင် အမှန်တကယ် တွေ့ကြုံသောအခါ၊ ရွေးချယ်မှု ပြုရမည့်အခါ သို့မဟုတ် အမှုအရာများကို အလေးအနက် သုံးသပ်ရန် လိုအပ်သောအခါ သမ္မာတရား၏ ဆီလျော်သော သွင်ပြင်လက္ခဏာက သင့်အတွက် တဖြည်းဖြည်း ရှင်းလင်းလာကောင်း ရှင်းလင်းလာမည်။ ယခုတွင် သင်၏ထင်မြင်ချက်များက အကြမ်းဖျင်းနှင့် အနှစ်သာရ ကင်းမဲ့သော အကြမ်းဖော်ပြချက်များနှင့် အယူဝါဒနှင့်ဆိုင်သော အရာများဖြင့် ပြည့်နှက်နေသည်။ အတွေ့အကြုံနှင့် အသက်အရွယ်၌ တဖြည်းဖြည်း ကြီးရင့်လာသည်နှင့်အမျှ သမ္မာတရားများစွာသည် သင့်အထဲ၌ တဖြည်းဖြည်းနှင့် ပို၍ လက်တွေ့ကျလာပြီး အစစ်အမှန် ဖြစ်လာမည်။ ဤအရာက သင့်အနေဖြင့် သမ္မာတရား၏ အနှစ်သာရကို တွေ့ရှိရန် ပို၍ပို၍ အခွင့်ပေးမည်ဖြစ်သည်။ ဤနည်းအားဖြင့် သင်သည် သမ္မာတရား နားလည်မှုကို အမှန်တကယ် ရရှိနိုင်ပြီး ပြဿနာများကို နိုးကြားထက်မြက်မှုဖြင့် ရှုမြင်နိုင်မည် ဖြစ်သည်။ သမ္မာတရားကို နားမလည်သော လူတို့က တရားဒေသနာ မည်မျှကို ကြားနာသည်ဖြစ်စေ ၎င်းတို့သည် လူ့သဘာဝ၏၊ ဖောက်ပြန်ပျက်စီးသော စိတ်သဘောထားများ၏၊ လူ့အခြေအနေ အမျိုးမျိုးနှင့် လူအမျိုးအစား အမျိုးမျိုးနှင့်ဆိုင်သော အနှစ်သာရများ၏ သရုပ်သကန်များကို မျက်လုံးနှစ်ဖက်လုံး ကျယ်ကျယ်ဖွင့်လျက်ပင် ရိပ်စားမိနိုင်မည် မဟုတ်ပေ။ ၎င်းတို့သည် မျက်ကန်းနေကြသည်။ သို့သော်လည်း အပြင်ပန်းအားဖြင့် သမ္မာတရားကို လိုက်စားသောသူ တစ်ဦးသည် အာရုံစိုက်နေသည့်ပုံ မပေါ်သော်လည်း အခြားလူများ၏ အမူအကျင့်နှင့် ပြောဆိုပြုမူပုံကို သူ၏စိတ်နှလုံးထဲ၌ တုံ့ပြန်ချက်တစ်ခု ရှိလိမ့်မည်ဖြစ်ပြီး ထိုကိစ္စနှင့်ပတ်သက်၍ အမှုမဲ့အမှတ်မဲ့ ထင်မြင်ချက်ကို ပုံဖော်မည်ဖြစ်သည်။ ဤထင်မြင်ချက်၊ ဤခံစားချက်မှာ မည်သည့်နေရာမှ လာသနည်း။ လူတို့နားလည်သော သမ္မာတရားများက ၎င်းတို့အား ပိုင်းခြားသိမြင်နိုင်စွမ်းကို ပေးခြင်း ဖြစ်သည်။ ဤအရာက ထိုသို့သော လူတို့အား ထိုအမူအကျင့်၊ ထိုအလေ့အထ သို့မဟုတ် ထိုသရုပ်သကန်မျိုး၏ အနှစ်သာရအတွက် အဓိပ္ပာယ်ဖွင့်ဆိုချက်ကို ပေးသည်။ ဤအဓိပ္ပာယ်ဖွင့်ဆိုချက်မှာ မည်သည့်နေရာမှ လာသနည်း။ ယင်းမှာ လူတို့အား နားလည်မှုသို့ ပို့ဆောင်ပေးသော သမ္မာတရားဖြစ်ပြီး လူတို့အား ပိုင်းခြားသိမြင်မှုနှင့် အကဲဖြတ်မှုကိုပေးသော သမ္မာတရား ဖြစ်လေသည်။ ယခုတွင် သင်တို့သည် သမ္မာတရားအချို့ကို နားလည်ပြီး ထိုထိုသော အမှုအရာများနှင့် ပတ်သက်၍ ပိုင်းခြားသိမြင်မှု အနည်းငယ် ရှိသည်။ သို့ရာတွင် သင်၏ ပိုင်းခြားသိမြင်မှုက တိကျမှန်ကန်လှသည် မဟုတ်သောကြောင့် စိတ်ချရန်အာမခံချက် အသိစိတ်မျိုးကဲ့သို့သော တစ်စုံတစ်ရာကို မခံစားရသေးဘဲ သင်ရှေ့ဆက်ရမည့် လမ်းကို စမ်းတဝါးဝါး ရှာရသည့် ဖြစ်စဉ်၌သာ ရှိနေသေးခြင်း ဖြစ်သည်။ လူအချို့က “ထိုသို့ဖြစ်လျှင် ကိုယ်တော်သည် ကျွန်ုပ်တို့အား အမှုအရာ တစ်ခုချင်းအပေါ် မိတ်သဟာယပြုသင့်သည်” ဟု ဆိုကြသည်။ ဤသည်မှာ မလိုအပ်ပေ။ လူသားတို့၌ လူသားတာဝန်များ ရှိပြီး ဘုရားသခင်၌ သူကိုယ်တိုင်၏ အမှုတော်အတိုင်းအတာ ရှိသည်။ ငါသည် သင်တို့အား သမ္မာတရား၏ သွင်ပြင်လက္ခဏာ တစ်ခုစီတိုင်းကို ပြောပြထားပြီဖြစ်ပြီး ကျန်ရှိနေသည်မှာ သင်တို့အနေဖြင့် သင်တို့၏ နေ့စဉ်အသက်တာရှိ အမျိုးမျိုးသော လူများ၊ အကြောင်းအရာများနှင့် အမှုအရာများအားလုံးကို တွေ့ကြုံဖို့ ဖြစ်သည်။ သန့်ရှင်းသော ဝိညာဉ်တော်သည် လုပ်ဆောင်ပြီး စီစဉ်ညွှန်ကြားလိမ့်မည်။ လူတို့အား တစ်ခုပြုလုပ်ရန် တောင်းဆိုသည်။ လူသား၏ ပူးပေါင်းဆောင်ရွက်မှုနှင့် လူသား၏ လိုက်စားမှုတွင် ပါဝင်ရန် ဖြစ်သည်။ အကယ်၍ သင်သည် ဤလိုက်စားမှု၌ မပါဝင်ပါက ငါသည် ထိုအရာကို မည်သို့ရှင်းလင်းစွာ ရှင်းပြပါစေ ယင်းကို သင်ရရှိမည်မဟုတ်။ ငါသည် သင့်ကို အတင်းအကျပ် အယူဝါဒသွတ်သွင်းမည် မဟုတ်၊ သင် သိနားလည်ရန်နှင့် ဝင်ရောက်မှုရရှိရန် ဇွတ်အတင်းလုပ်မည် မဟုတ်။ ထိုသို့ ငါပြုမည်မဟုတ်သကဲ့သို့ သန့်ရှင်းသော ဝိညာဉ်တော်လည်း ပြုမည်မဟုတ်ပေ။ သင်၏ စိတ်ဆန္ဒပါသော၊ သဘောအလျောက် ဖြစ်သော၊ တက်ကြွပါဝင်သော လက်‌တွေ့လုပ်ဆောင်မှုနှင့် သမ္မာတရားအတွင်း ဝင်ရောက်မှုအားဖြင့်သာ သမ္မာတရားသည် သင့်အထဲ၌ မသိလိုက်မီတွင်ပင် အသီးသီးမည် ဖြစ်သည်။ သမ္မာတရားက အသီးသီးသောအခါ သင်၏စိတ်နှလုံးသည် အလင်းနှင့် ပြည့်ဝလိမ့်မည်။ ဤသည်မှာ သမ္မာတရားအား နားလည်ခြင်းဖြစ်၏။ သို့သော် သင်သည် သမ္မာတရားကို နားမလည်ပါက အရာရာတိုင်းအဖို့ ထုံထိုင်းမည်၊ တုံ့ပြန်ဖို့ နှေးကွေးမည်ဖြစ်ပြီး မည်သည့်အရာ၏ အကြောင်းရင်းကိုမျှ အပြည့်အဝ နားလည်သဘောပေါက်နိုင်မည် မဟုတ်ပေ။ ဥပမာ၊ လူတစ်ဦးက တစ်စုံတစ်ခုကို ပြုလုပ်ပြီး အခြားလူတစ်ဦးက ထိုအရာကို မကောင်းမှုဖြစ်ကြောင်းနှင့် ဟိုသဘာဝ၊ သည်သဘာဝဖြစ်ကြောင်း ဆိုသောအခါ သင်သည် သိမည် မဟုတ်သကဲ့သို့ သင်ကိုယ်တိုင် မြင်နိုင်မည် မဟုတ်ပေ။ တစ်စုံတစ်ဦးက သင့်အား အဖြေကို ပြောပြသောအခါ သင်သည် ယင်းကို အယူဝါဒများအပေါ် အခြေခံ၍ လက်ခံခြင်းနှင့် ဝန်ခံခြင်း ရှိကောင်း ရှိနိုင်သော်လည်း အနှစ်သာရအားဖြင့် သင်သည် သဘောတူညီမှုကို ပေးနိုင်ဦးမည် မဟုတ်ချေ။ အကယ်၍ သဘောတူညီမှု မပေးနိုင်ပါက သင်သည် အမှန်တကယ် နားလည်သလော။ သင် နားမလည်သောကြောင့် သင်သည် ကြုံတွေ့ရသော အရာများကို ကိုင်တွယ်ဖြေရှင်းဖို့အတွက် စည်းကမ်းများကိုသာ လိုက်နိုင်လေသည်။ ဤအရာမှာ သမ္မာတရားကို သင်နားမလည်သောကြောင့် ဖြစ်ပျက်ရခြင်း ဖြစ်ပေသည်။

ဧဝံဂေလိဖြန့်ဝေခြင်း တာဝန်ကို မည်ကဲ့သို့ ကောင်းစွာ ထမ်းဆောင်နိုင်သနည်း။ ပထမအနေဖြင့် ဧဝံဂေလိဖြန့်ဝေခြင်း တာဝန်၌ပါဝင်သော သမ္မာတရားအမျိုးမျိုးကို နားလည်ရမည်။ ဥပမာ ဧဝံဂေလိဖြန့်ဝေခြင်း တာဝန်နှင့်ဆိုင်သော အဓိပ္ပာယ်ဖွင့်ဆိုချက်နှင့် ရာထူးနေရာပေးခြင်းသာမက ခံယူရမည့် မှန်ကန်သော သဘောထား၊ သည်းခံရမည့် သင့်လျော်သော ဒုက္ခဆင်းရဲ၊ ပေးဆပ်ရမည့် သင့်တော်သော အဖိုးအခနှင့် ဤတာဝန်ကို ထမ်းဆောင်စဉ် လက်တွေ့လုပ်ဆောင်ပြီး ဝင်ရောက်ရမည့် လျော်ညီသော သမ္မာတရားများနှင့် စပ်လျဉ်း၍၊ ဤသမ္မာတရားများကို နားလည်ပါက ဧဝံဂေလိဖြန့်ဝေခြင်း တာဝန်ကို ကောင်းမွန်စွာ ထမ်းဆောင်ရန် လွယ်ကူလိမ့်မည်။ ထိုမျှမက အပျက်သဘောဆောင်သော အပိုင်းအနေဖြင့် မမှန်ကန်သော မည်သည့်အလေ့အထများကို ရှောင်ကြဉ်ရမည်၊ မည်သည်တို့ကို လူ၏ ကောင်းသော ရည်ရွယ်ချက်များအဖြစ် ခွဲခြားသတ်မှတ်သည်၊ ထို့အပြင် လူတို့၏ အကြံအစည်များနှင့် အလေ့အထများက အဆုံးစွန်အားဖြင့် ဧဝံဂေလိ ဖြန့်ဝေခြင်းဆိုင်ရာ စည်းမျဉ်းများနှင့် ကိုက်ညီခြင်း ရှိသည်၊ မရှိသည် ဟူသည့် မေးခွန်းများအားလုံးကို ဆင်ခြင်သုံးသပ်သင့်သည်။ ဤသည်မှာ ဧဝံဂေလိဖြန့်ဝေခြင်း လုပ်ငန်းစဉ်၌ရှိသော အမူအကျင့်တိုင်း၊ လက်တွေ့လုပ်ဆောင်မှုတိုင်း၊ စည်းမျဉ်းတိုင်းနှင့် ကောက်ချက်ချမှုတိုင်းကို အဆုံးတွင် ယင်းက သမ္မာတရား စည်းမျဉ်းများနှင့် ကိုက်ညီသည်၊ မကိုက်ညီသည်ကို ကြည့်ဖို့အတွက် ရှင်းရှင်းလင်းလင်း စစ်ကြောသင့်သည်ဟု ဆိုလိုခြင်း ဖြစ်သည်။ သမ္မာတရားစည်းမျဉ်းများနှင့် ညီညွတ်သော ထိုအရာများကိုသာ မဆုတ်မနစ် လုပ်ဆောင်လော့။ သမ္မာတရားစည်းမျဉ်းများနှင့် သဘောချင်းမတူညီသော ထိုအရာများကို စွန့်ပစ်ရမည်။ ဤနည်းအားဖြင့်သာ ဧဝံဂေလိဖြန့်ဝေခြင်း တာဝန်ကို ဖြည့်ဆည်းခြင်းမှလာသော ရလဒ်များက တရွေ့ရွေ့ တိုးတက်မည် ဖြစ်သည်။ ထို့အပြင် ဧဝံဂေလိလုပ်ငန်းအဖို့ အကျိုးရှိဆုံးဖြစ်သည့် သဟဇာတကျသော ပူးပေါင်းလုပ်ဆောင်ခြင်းကို လက်တွေ့လုပ်ဆောင်ရမည်။ သဟဇာတကျသော ပူးပေါင်းလုပ်ဆောင်ခြင်း မရှိလျှင် လုပ်ငန်းကိုလုပ်ဆောင်ဖို့ ခက်ခဲသည်။ ညီအစ်ကိုမောင်နှမများသည် အချင်းချင်း သည်းခံစိတ်ရှည်သင့်ပြီး အချင်းချင်း အားပေးထောက်ခံသင့်သည်။ ၎င်းတို့၏ တာဝန်များကို ကောင်းစွာ ထမ်းဆောင်ရန်အလို့ငှာ သဟဇာတကျသော ညှိနှိုင်းဆောင်ရွက်မှု လိုအပ်သည်။ မည်သည့်အရာ မှန်ကန်သည်ဟုဆိုသော မည်သူ့ကိုမဆို နာခံသင့်သည်။ သင်က မှန်ကန်ပြီး အခြားသူများ မှားယွင်းသည်ဟု အမြဲတမ်း အလျင်စလို ကောက်ချက်မချနှင့်။ ဘုရားသခင်၏ နှုတ်ကပတ်တော်များအတိုင်း စိတ်ပိုင်းဖြတ်ခြင်းများကို ပြုလုပ်ရမည်။ သဘောတူညီမှု ရယူဖို့အတွက် ဘုရားသခင်၏ အိမ်တော်မှ ချမှတ်ထားသော စည်းမျဉ်းများအတိုင်း သမ္မာတရားကို မိတ်သဟာယ ပြုလော့။ ထိုမျှမက တာဝန်ထမ်းဆောင်ဖို့အတွက် ပူး‌ပေါင်းလုပ်ဆောင်သော လုပ်ငန်းစဉ်၌ တစ်ဦးနှင့်တစ်ဦးထံမှ လေ့လာရမည် ဖြစ်ကာ လူတစ်ဦး၏ အားသာချက်ကို အခြားတစ်ဦး၏ အားနည်းချက်အတွက် ထေခွင့်ပေးပြီးလျှင် အခြားသူများအပေါ် လွန်စွာ မကြမ်းတမ်းလေနှင့်။ ထို့အပြင် လမ်းမှန်ကို စူးစမ်းနေသောလူတို့အား သင်၏ ဆက်ဆံမှုတွင် သင်သည် ဂရုစိုက်မှု၊ မြော်မြင်တွေးခေါ်မှုကို ကျင့်သုံးပြီး မေတ္တာကို အမှီပြုရမည်ဖြစ်သည်။ ဤသည်မှာ အဘယ်ကြောင့်ဆိုသော် လမ်းမှန်ကို စူးစမ်းနေသောသူတိုင်းသည် မယုံကြည်သူများ ဖြစ်သောကြောင့်ဖြစ်သည်။ ၎င်းတို့အထဲတွင် ဘာသာတရား လိုက်စားသူများပင်လျှင် အနည်းနှင့်အများဆိုသလို မယုံကြည်သူများ ဖြစ်ကြသည်။ ၎င်းတို့အားလုံးသည် ထိလွယ်ရှလွယ်သည်။ တစ်စုံတစ်ခုက ၎င်းတို့၏ အယူအဆများနှင့် မကိုက်ညီလျှင် ၎င်းတို့သည် ဤအရာကို ဆန့်ကျင်တတ်သည်။ စကားတစ်ခုခုက ၎င်းတို့၏ စိတ်နှင့်မကိုက်လျှင် ယင်းကို ငြင်းခုံတတ်သည်။ ထို့ကြောင့် ၎င်းတို့ကို ဧဝံဂေလိဖြန့်ဝေခြင်းသည် ငါတို့ထံမှ သည်းခံခြင်းနှင့် စိတ်ရှည်ခြင်း လိုအပ်သည်။ ကျွန်ုပ်တို့ဘက်မှ အလွန်အမင်း ချစ်ခြင်း လိုအပ်သည်။ နည်းလမ်းနှင့် ချဉ်းကပ်မှုအချို့လိုအပ်သည်။ သို့သော်ငြားလည်း အရေးပါသည်မှာ ၎င်းတို့ကို ဘုရားနှုတ်ကပတ်တော်ဖတ်ပြခြင်း၊ လူသားကို ကယ်တင်ရန် ဘုရားသခင်ဖော်ပြသော သမ္မာတရားအားလုံးကို သူတို့အား သိရှိစေခြင်း၊ ဘုရားသခင်၏ အသံတော်နှင့် ဖန်ဆင်းရှင်၏ နှုတ်ကပတ်တော်များကို ၎င်းတို့အား ကြားခွင့်ပေးခြင်းတို့ဖြစ်သည်။ ဤနည်းအားဖြင့် ၎င်းတို့သည် အကျိုးအမြတ်များ ရရှိလိမ့်မည်။ ဧဝံဂေလိဖြန့်ဝေခြင်းနှင့် ပတ်သက်၍ အရေးကြီးဆုံးသော စည်းမျဉ်းမှာ ဘုရားသခင်၏ ပေါ်ထွန်းခြင်းကို ဆာငတ်ပြီး သမ္မာတရားကို ချစ်မြတ်နိုးသောသူတို့အား ဘုရားသခင်၏ နှုတ်ကပတ်တော်များကို ဖတ်ရှုစေပြီး ဘုရားသခင်၏ အသံတော်ကို ကြားနာစေဖို့ အခွင့်ပေးရန်ဖြစ်သည်။ ထို့ကြောင့် ထိုသူတို့အား လူသား၏ စကားများကို လျှော့ပြောပြီး ဘုရားသခင်၏ နှုတ်ကပတ်တော်များကို ပိုဖတ်ပြရန် ဖြစ်သည်။ ဖတ်ရှု၍ပြီးသည့်နောက်တွင် ထိုသူတို့က ဘုရားသခင်၏ အသံတော်ကို ကြားပြီး သမ္မာတရားတစ်စုံတစ်ရာကို နားလည်နိုင်ရန်အတွက် သမ္မာတရားအပေါ် မိတ်သဟာယပြုလော့။ ထိုအခါ ထိုသူတို့သည် ဘုရားသခင်ထံ ပြန်လာကောင်း လာမည်ဖြစ်သည်။ ဧဝံဂေလိဖြန့်ဝေခြင်းသည် တစ်ဦးချင်းနှင့် အားလုံး၏ တာဝန်နှင့် ဝတ္တရားဖြစ်သည်။ ဤဝတ္တရားက မည်သူ့အပေါ် ကျရောက်သည်ဖြစ်စေ ၎င်းတို့သည် ခေါင်းမရှောင်ရ သို့မဟုတ် ယင်းကို ငြင်းဆန်ဖို့အတွက် မည်သည့်ဆင်ခြေနှင့် အကြောင်းပြချက်ကိုမျှ မပေးရ။ လူအချို့က “ကျွန်ုပ်သည် စကားအပြောမတတ်၊ သမ္မာကျမ်းစာကို နားမလည်သည့်အပြင် အလွန်လည်း ငယ်ရွယ်သေးသည်။ စုံစမ်းသွေးဆောင်ခြင်း သို့မဟုတ် အန္တရာယ်ကို ကြုံတွေ့ရလျှင် ကျွန်ုပ် ဘာလုပ်နိုင်မည်နည်း” ဟု ဆိုသည်။ ထိုသို့သော စကားများမှာ မှားယွင်း၏။ ဧဝံဂေလိဖြန့်ဝေခြင်းဟူသည် အန္တရာယ်ရှိသော အရာများကို ပြုလုပ်ရန် သင့်အား တာဝန်ပေးသည်ဟု မဆိုလိုပေ။ ဘုရားသခင်၏ အိမ်တော်သည် သင့်အား အန္တရာယ်တွေ့ရှိရသော နေရာသို့သွားရန် ခွင့်ပြုမည်မဟုတ်ချေ။ အသင်းတော်သည် ဧဝံဂေလိဖြန့်ဝေဖို့အတွက် လူတို့အား တာဝန်ပေးရာ၌ စည်းမျဉ်းများကို လိုက်နာသည်။ ယင်းမှာ လူတို့အား စွန့်စားမှုများ ပြုလုပ်စေဖို့ မဟုတ်ဘဲ တစ်ဦးချင်းစီ၏ အခြေအနေများ၊ အရည်အသွေးများနှင့် အားအင်များအပေါ် အခြေခံ၍ လက်တွေ့ကျသော ကြိုတင်စီမံမှုများကို ပြုလုပ်စေဖို့ ဖြစ်သည်။ ညီအစ်ကိုမောင်နှမများသည် အချင်းချင်း ပူးပေါင်းလုပ်ဆောင်ကြပြီးလျှင် ယင်းကို ထမ်းဆောင်ဖို့ သင့်လျော်သူတို့အား အလုပ်ကိုပေးမည်။ အန္တရာယ်လုံးဝ မရှိဟု ပြော၍ မရပေ။ အသက်ရှင်သော မည်သူမဆို တစ်ခါတစ်ရံ အန္တရာယ်ကို ကြုံတွေ့လိမ့်မည်။ အကယ်၍ ဘုရားသခင်က သင့်ကို တိုက်ရိုက်စေလွှတ်ပါက ယင်းက သင်သည် စုံစမ်းသွေးဆောင်ခြင်း၊ နာကျင်မှု သို့မဟုတ် အန္တရာယ်နှင့် ရင်ဆိုင်ရမည်ဆိုလျှင်ပင် သင်သည် ကျင့်ဝတ်သိက္ခာအရ မဖြစ်မနေ လက်ခံရမည့် အရာဖြစ်သည်။ အဘယ်ကြောင့် သင့်ကိုယ်သင် ကျင့်ဝတ်သိက္ခာအရ မဖြစ်မနေ လက်ခံရမည်ဟု ရှုမြင်သင့်သနည်း။ (ဤသည်မှာ လူတို့၏ တာဝန်ပင် ဖြစ်၏။) မှန်၏၊ ဤနည်းအားဖြင့်သာ သင်သည် ဧဝံဂေလိ ဖြန့်ဝေခြင်းကို သင်၏ တာဝန်ဝတ္တရားအဖြစ် အမှန်တကယ် ခံယူမည်ဖြစ်သည်။ ဤသည် လူတစ်ဦး၌ ရှိသင့်သည့် မှန်ကန်သော သဘောထားဖြစ်သည်။ ဤသည်မှာ သမ္မာတရားဖြစ်ပြီး သမ္မာတရားအဖြစ် လူတို့ ယင်းကို လက်ခံသင့်ကာ ယင်းကို သံသယမရှိ လက်ခံသင့်သည်။ အကယ်၍ တစ်နေ့တွင် သင့်အနေဖြင့် အခြားတာဝန်များကို ထမ်းဆောင်ရန် မသင့်တော်တော့ပါက၊ သို့မဟုတ် လူတို့ကို ဧဝံဂေလိဖြန့်ဝေရန် လိုအပ်လာသည့်အတွက် သင်သည် ဧဝံဂေလိဖြန့်ဝေရန် တာဝန်ပေးအပ်ခံရပါက သင် ဘာလုပ်မည်နည်း။ သင်သည် ယင်းကို ကျင့်ဝတ်သိက္ခာအရ မဖြစ်မနေ လုပ်ဆောင်ရမည့် အရာတစ်ခုအဖြစ် ကွဲလွဲဆန့်ကျင်သော မည်သည့် စိတ်ခံစားမှုများ၊ စိစစ်တွေ့ရှိချက် သို့မဟုတ် နှိုင်းချိန်ခြင်းတို့ မရှိဘဲ လက်ခံသင့်သည်။ ဤသည်မှာ ဘုရားသခင်၏ တာဝန်ပေး စေခိုင်းချက်ပင် ဖြစ်၏။ ယင်းမှာ သင်၏ ဝတ္တရားဖြစ်၏၊ သင်၏ တာဝန်ဖြစ်၏။ ယင်းသည် သင့်အနေဖြင့် စံရွေးနေရမည့်အရာ မဟုတ်ချေ။ သင်သည် ဘုရားသခင်၏ နောက်လိုက်ကတည်းက သင့်အနေဖြင့် ကိုယ်ပိုင်ရွေးချယ်မှုများကို ပြုဖို့မဟုတ်တော့ပေ။ သင်သည် အဘယ့်ကြောင့် ရွေးချယ်မှုများ မပြုလုပ်သင့်သနည်း။ အဘယ့်ကြောင့်ဆိုသော် ဧဝံဂေလိ ဖြန့်ဝေခြင်းသည် ဘုရားသခင်၏ တာဝန်ပေးစေခိုင်းချက် ဖြစ်ပြီး ဤအလုပ်သည် ဘုရားသခင် ရွေးကောက်ထားသော လူတို့အားလုံးအဖို့ ဖြစ်သည်။ လူအချို့က “ကျွန်ုပ်သည် အသက် ၈၀ ကျော်ပြီ၊ ကျွန်ုပ်၏အိမ်ကိုပင် မစွန့်ခွာနိုင်။ ဘုရားသခင်က ကျွန်ုပ်အား ဤတာဝန်ပေးစေခိုင်းချက်ကို ပေးအပ်နိုင်သေးသလော” ဟု ဆိုသည်။ အခြားလူတို့က “ကျွန်ုပ်သည် ၁၈-၁၉ နှစ်သာ ရှိသေးသည်၊ ကျွန်ုပ်သည် ကမ္ဘာလောကကြီးကို သိပ်ပင် မတွေ့ကြုံဖူးသေးသည့်အပြင် လူတို့နှင့် အဘယ်သို့ ဆက်ဆံရမည် မသိသေးပါ။ ကျွန်ုပ်သည် လူရှေ့သူရှေ့ စကားပြောဖို့ အလွန်ပင် ရှက်ကြောက်သည်။ ဘုရားသခင်သည် ကျွန်ုပ်အား ဤတာဝန်ကို ပေးအပ်နိုင်သေးသလော” ဟု ဆိုပြန်သည်။ ဘုရားသခင်သည် ဂရုမထားဘဲ သင့်အား ဤတာဝန်ပေး စေခိုင်းချက်ကို ပေး၏။ သင် အသက်အရွယ် မည်မျှရှိသည်ဖြစ်စေ ဧဝံဂေလိဖြန့်ဝေရမည့် သင့်တာဝန်ကို ဖြည့်ဆည်းဖို့ရန် သင်လုပ်နိုင်သမျှကို လုပ်ဆောင်သင့်သည်။ ဧဝံဂေလိကို သင်တတ်နိုင်သမျှနှင့် လူများနိုင်သမျှ များများကို ဖြန့်ဝေလော့။ လက်ရှိတွင် သင်သည် မည်သည့်တာဝန်ကို ထမ်းဆောင်နေသည် ဖြစ်စေ၊ သင်သည် ဧဝံဂေလိဖြန့်ဝေဖို့ရန် သင်တတ်နိုင်သမျှကို လုပ်ဆောင်သင့်သည်။ တစ်နေ့တွင် သင်သည် တစ်စုံတစ်ယောက်အား ဧဝံဂေလိဖြန့်ဝေရန် အခွင့်အရေးရလျှင် ယင်းကို သင်လုပ်သင့်သလော။ (လုပ်သင့်ပါသည်။) ယင်းသည် မှန်၏။ လူများစွာတို့၌ ၎င်းတို့၏ ကိုယ်ပိုင်တာဝန်များ ရှိသော်လည်း ၎င်းတို့အားလပ်သည့်အချိန်၌ ဧဝံဂေလိဖြန့်ဝေနိုင်ပြီး ရလဒ်အချို့ပင် ရရှိနိုင်သည်။ ဘုရားသခင်သည် ဤအရာကို လက်ခံ၏။ ထို့ကြောင့် လူတိုင်း၌ ဧဝံဂေလိဖြန့်ဝေရမည့် တာဝန်ရှိလေသည်။ သင်သည် သင့်ကိုယ်ပိုင်ရွေးချယ်မှုများကို မပြုလုပ်သင့်ဘဲ သို့မဟုတ် ဤတာဝန်ကို မရှောင်လွဲသင့်ဘဲ တက်ကြွစွာနှင့် ဆန္ဒအလျောက် ပူးပေါင်းဆောင်ရွက်သင့်သည်။ မတက်ကြွသော သို့မဟုတ် အပျက်သဘောဆောင်သော သဘောထား မခံယူလေနှင့်၊ မငြင်းဆန်နှင့်၊ ပြီးလျှင် ဤတာဝန်ကို မဖြည့်ဆည်းဖို့အတွက် မည်သည့် အကြောင်းပြချက်များ သို့မဟုတ် ဆင်ခြေများကို လုပ်ကြံပြောဆိုခြင်း မပြုနှင့်။ လူအချို့က “ကျွန်ုပ် ရှိနေသော ပတ်ဝန်းကျင်သည် အလွန် အန္တရာယ်ရှိ၏။ ဧဝံဂေလိ ဖြန့်ဝေခြင်းမှ ကျွန်ုပ် ရှောင်ကြဉ်၍ရနိုင်မည်လော” ဟု ဆိုသည်။ သင်သည် လက်ရှိတွင် ဝိညာဉ်ရင့်ကျက်မှု သေးငယ်ပါက၊ သင့်အတွက် တာဝန်လွှဲပြောင်းယူပေးဖို့ အခြားလူတစ်ဦး ရှိနေပါက၊ ပြီးလျှင် သင်သည် အခြားတာဝန်များကို ထမ်းဆောင်ရန် သင့်တော်ပါက ဤတာဝန်ကို အခြားလူနှင့် လဲလှယ်နိုင်သည်။ သို့သော် သင်သည် တာဝန်ကို ထမ်းဆောင်ရမည့်သူပင် ဖြစ်ပါက သင် ဘာလုပ်သင့်သနည်း။ (ကျွန်ုပ်သည် ကျင့်ဝတ်သိက္ခာအရ မဖြစ်မနေ လက်ခံရမည် ဖြစ်ပါသည်။) ယင်းသည် မှန်ကန်၏။ သင်သည် ကျင့်ဝတ်သိက္ခာအရ ဘုရားသခင်ထံမှ ယင်းကို မဖြစ်မနေ လက်ခံရရှိသင့်သည်။ ဤသည်မှာ ဖန်ဆင်းခံသူတိုင်း၏ တာဝန်ဝတ္တရားပင် ဖြစ်သည်။ လူအချို့က “ကျွန်ုပ်သည် ခန္ဓာကိုယ်ပိုင်း အားနည်း၏။ ထို့ကြောင့် ဧဝံဂေလိဖြန့်ဝေဖို့ အပြင်ထွက်ခြင်းဟူသော ဒုက္ခကို မခံနိုင်” ဟု ဆိုကြသည်။ အကယ်၍ သင်သည် ဤမဟာ အခက်အခဲကြီးကို မခံနိုင်ပါက ပို၍သေးငယ်သော အခက်အခဲလေးများကို အနည်းဆုံး သင်ခံနိုင်သလော။ အကယ်၍ သင်သည် မည်သည့်အခက်အခဲကိုမျှ လုံးဝ မခံနိုင်လျှင် ပြစ်ဒဏ်ပေးခြင်းဟူသည့် ကြီးစွာသော အခက်အခဲကို သင် မခံစားသင့်သလော။ သင် ရှင်သန်ပြီး အသက်ရှူနေသရွေ့ သင်သည် တာဝန်ကို ထမ်းဆောင်သင့်သည်၊ ဧဝံဂေလိကို ဖြန့်ဝေသင့်သည်။ ဤအရာတစ်ခုတည်းကသာ မှန်ကန်ပြီး သင့်လျော်သည်။ အကယ်၍ သင်သည် တာဝန်ကို ငြင်းပယ်လျှင် ဧဝံဂေလိ မဖြန့်ဝေဘဲ သင်၏တာဝန်များကို ရှောင်တိမ်းပြီး ရုန်းထွက်လွတ်မြောက်ရန် ရွေးချယ်သည်ဆိုလျှင် ဤသည်မှာ လူသားတစ်ဦး၏ မှန်ကန်သော သဘောထား မဟုတ်သကဲ့သို့ လူတို့သည် ခုခံကာကွယ်တတ်သော သဘောထားကို မခံယူသင့်ပေ။ လူတို့သည် ဧဝံဂေလိဖြန့်ဝေခြင်းကို အချိန်တိုင်း နေရာတိုင်းအတွက် ၎င်းတို့၏ တာဝန်ဝတ္တရားအဖြစ် ခံယူရန် အဆင်သင့် ဖြစ်နေသင့်သည်။ လူအချို့က “ကျွန်ုပ်သည် ဘုရားသခင်ကို နှစ်ပေါင်းများစွာ ယုံကြည်ခဲ့ပြီ ဖြစ်သော်လည်း အသင်းတော်က ကျွန်ုပ်ကို ဧဝံဂေလိဖြန့်ဝေရန် မည်သည့်အခါမျှ တာဝန်မပေးခဲ့ဖူးပါ” ဟု ဆိုသည်။ ဤသည်မှာ ကောင်းသောအရာလော၊ သို့မဟုတ် ဆိုးသောအရာလော။ ဤသည်မှာ ကောင်းသည်၊ ဆိုးသည်နှင့်ဆိုင်သော မေးခွန်း မဟုတ်ပေ။ ဘုရားသခင် သင့်ကို ဧဝံဂေလိ သွားရောက်ဖြန့်ဝေရန် အလိုမရှိသေးခြင်း ဖြစ်ကောင်း ဖြစ်နိုင်သော်လည်း သင့်ကို အခြားတာဝန်များ လုပ်ဆောင်ရန် သူ အလိုရှိသည်။ တာဝန်များအားလုံးမှာ အရေးကြီးပေသည်။ သို့ဆိုလျှင် သင်သည် ယင်းတို့ထဲမှ မည်သို့ရွေးချယ်သင့်သနည်း။ အသင်းတော်၏ ကြိုတင်စီမံမှုများကို မည်သည့် တစ်ကိုယ်ရေဆန္ဒများ မရှိဘဲ ကျိုးနွံနာခံသင့်သည်။ ဘုရားသခင်သည် သင့်အား ဧဝံဂေလိဖြန့်ဝေရန် အလိုရှိသောအခါ ဘုရားသခင်က “သင့်အနေဖြင့် လက်ရှိတာဝန်ကို ထမ်းဆောင်ရန် မသင့်လျော် သို့မဟုတ် အရေးမကြီးပေ။ ဧဝံဂေလိ ဖြန့်ဝေခြင်းတာဝန်က ပိုအရေးကြီးသည်” ဟု ဆိုမည်။ ထိုအခါ သင် ဘာလုပ်သင့်သနည်း။ ယင်းကို ခုခံခြင်း သို့မဟုတ် ငြင်းပယ်ခြင်း မဆိုထားဘိ ပိုင်းခြားစိစစ်ခြင်း၊ အကဲဖြတ်ခြင်း သို့မဟုတ် စဉ်းစားချင့်ချိန်ခြင်း မရှိဘဲ ကျင့်ဝတ်သိက္ခာအရ မဖြစ်မနေ လုပ်ဆောင်ရမည့် အရာတစ်ခုအဖြစ် လက်ခံသင့်သည်။ ဤသည်မှာ ဖန်ဆင်းခံတစ်ဦးက ဖန်ဆင်းရှင်အပေါ် ထားသင့်သည့် မှန်ကန်သော သဘောထားဖြစ်သည်။ လူတို့သည် ထိုသို့သော သဘောထားမျိုး ထားရှိသောအခါ တစ်နည်းအားဖြင့် ၎င်းတို့နှင့် ဘုရားသခင်ကြားရှိ ဆက်ဆံရေးက ပုံမှန်ဖြစ်ပြီး သင့်လျော်သည်ဟု ဆိုနိုင်သလော။ လူနှင့် ဘုရားကြားက ဆက်ဆံရေးကို မည်သည့်အရာ၌ ပေါ်လွင်စေသနည်း။ ယင်းကို ဘုရားသခင် သင့်အား ပြုလုပ်စေမည့် အရာများကို သင် မည်သို့သဘောထားသနည်း ဟူသည့်အရာ၌ ပေါ်လွင်စေသည်။ ဘုရားသခင်သည် သင့်အား တစ်စုံတစ်ခုပြုလုပ်ရန် ပေးအပ်ပြီး သင်သည် ထိုကိစ္စကို ချင့်ချိန်တွေးဆကာ “ကိုယ်တော်သည် ကျွန်ုပ်အား ဤအရာကို အဘယ့်ကြောင့် ပြုလုပ်စေလိုသနည်း။ ဤအရာက ကျွန်ုပ်ကို အကျိုးရရှိစေမည်လော” ဟု မေးသည်ဆိုပါက၊ သင်သည် ဤပုံံစံဖြင့် စဉ်းစားနိုင်ပါက ဘုရားသခင်နှင့် သင်၏ဆက်ဆံရေးက ပုံမှန်မဟုတ်တော့ဘဲ သင်သည် ဘုရားသခင်ကို နာခံရန် ပျက်ကွက်ခဲ့ပြီး ဖြစ်လေသည်။ အကယ်၍ သင်က “ဤသည်မှာ ဘုရားသခင်က ကျွန်ုပ်ပြုလုပ်ရန် ပြောထားခဲ့သည့် အရေးကြီးသောအရာ ဖြစ်သည်။ ကျွန်ုပ်သည် ဘုရားသခင်က ပြုလုပ်ဖို့စေခိုင်းသည့်အရာနှင့် ပတ်သက်ပြီး အရေးမစိုက်၍ မရပေ။ ယင်းကို ကျွန်ုပ်သည် သတိဖြင့် ကိုင်တွယ်ရမည်။ ဘုရားသခင်သည် ကျွန်ုပ်လုပ်ဆောင်ရန် မည်သည့်အရာမဆို စေခိုင်းသည်ဖြစ်စေ၊ ဘုရားသခင်က ကျွန်ုပ်အား မည်သည့်အရာမဆို ပေးအပ်သည်ဖြစ်စေ ယင်းက ကျွန်ုပ်၏တာဝန် ဖြစ်သည်။ ကျွန်ုပ်သည် ဘုရားသခင်ကို နားထောင်ပြီး ဘုရားသခင် ကြိုတင်စီမံသည့် မည်သည့်အရာကိုမဆို လုပ်ဆောင်မည်။ ငြင်းပယ်၍ မရပေ။ အကယ်၍ ကျွန်ုပ်၏တာဝန်၌ တည်ကြည်ခိုင်မာခြင်း မရှိပါက၊ ကျွန်ုပ် ငြင်းပယ်ပါက၊ ယင်းကို ကျွန်ုပ် အလေးအနက် မထားပါက၊ ကောင်းစွာ အပြီးမသတ်ပါက ထိုအရာသည် ဘုရားသခင်အား သစ္စာဖောက်ခြင်းပင် ဖြစ်သည်” ဟု ဆိုလျှင် သင်၌ ဖန်ဆင်းခံတစ်ဦးအဖို့ သင့်လျော်သော အသိတရားရှိပြီး ဖန်ဆင်းခံတစ်ဦးက သူ၏တာဝန်အပေါ် ထားသင့်သည့် မှန်ကန်သော သဘောထားကို ခံယူထားပြီးဖြစ်သည်။ အကယ်၍ ယင်းသည် ဘုရားသခင်၏ တာဝန်ပေးစေခိုင်းချက် ဖြစ်မှန်း ကောင်းကောင်းကြီးသိလျက်ဖြင့် သင်သည် ယင်းကို လက်ခံရန် ငြင်းဆိုနေသေးပြီး သင်၏ တာဝန်ရှောင်လွဲခြင်းကို ရှင်းချက်ထုတ်ဖို့ အကြောင်းပြချက်များ ပေးနေသေးပါက ပြဿနာ၏ သဘောသဘာဝမှာ စိုးရိမ်ရပေသည်။ ဤသည်မျာ ဘုရားသခင်အား မနာခံခြင်းသက်သက် မဟုတ်၊ ဘုရားသခင်အား သစ္စာဖောက်နေခြင်းပင် ဖြစ်သည်။ ဘုရားသခင်ကို ယုံကြည်လျှင် ဖန်ဆင်းခံတစ်ဦး၏ ရပ်တည်ချက်နှင့် အဆင့်အတန်းကို နားလည်ရမည်ဖြစ်ပြီး ဖန်ဆင်းရှင်၏ တာဝန်ပေး စေခိုင်းချက်များကို လက်ခံကာ ကျိုးနွံနာခံရမည် ဖြစ်သည်။ ဤသည်မှာ မှန်ကန်သော သဘောထားဖြစ်၏။ သင့်၌ သင်၏တာဝန်အပေါ် မှန်ကန်သော သဘောထား မရှိပါက ဤပြဿနာ၏ သဘောသဘာဝမှာ အလွန်စိုးရိမ်ရသည်။ အကယ်၍ သင်သည် ယုံကြည်ခါစ ရှိသေးချိန်တွင် သမ္မာတရားကို နားမလည်ပါက သင့်အပေါ် အလေးအနက်ထားစရာ မလိုပေ။ အကယ်၍ သင်သည် ဘုရားသခင်ကို နှစ်အနည်းငယ်မျှ ယုံကြည်လာပြီး သမ္မာတရားအချို့ကို နားလည်သော်လည်း ဘုရားသခင်၏ တာဝန်ပေးစေခိုင်းချက်ကို ငြင်းဆိုနိုင်စွမ်း ရှိပါက၊ ဧဝံဂေလိကို မဖြန့်ဝေပါက၊ ထို့ပြင် တာဝန် ထမ်းဆောင်စဉ် ပေါ့ဆပြီး ဝတ်ကျေတမ်းကျေ ပြုလုပ်နေသေးပါက ဤပြဿနာ၏ သဘောသဘာဝမှာ အဘယ်နည်း။ ဤအရာသည် အသိတရားနှင့် ဆင်ခြင်တုံတရား ကင်းမဲ့ခြင်းကို ပြရုံသာမက အရေးကြီးဆုံးအနေဖြင့် ယင်းမှာ ဘုရားသခင်အား ပုန်ကန်ခြင်းနှင့် ခုခံခြင်းဖြစ်၏၊ ဘုရားသခင်အား သစ္စာဖောက်ခြင်း ဖြစ်၏။ ဤသည်မှာ ကြီးမားသော မနာခံမှုဖြစ်သည်ဟု ဆိုနိုင်သည်။ ယင်းမှာ ချဲ့ကားပြောဆိုခြင်း ဖြစ်မည်မဟုတ်ပေ။ ဤကဲ့သို့သော လူတစ်ဦးကို လူသားတစ်ဦးဟု မခေါ်ထိုက်သည့်အပြင် ပြစ်ဒဏ်ပေးခြင်းကို မလွဲမသွေ ခံစားရမည်ဖြစ်သည်။ သင်သည် ဖန်ဆင်းခံတစ်ဦးဖြစ်ကြောင်း ဝန်ခံသည်နှင့်အမျှ ဖန်ဆင်းခံများအတွက် သင့်လျော်သော အသိတရားမှာ အဘယ်နည်း။ ဖန်ဆင်းရှင်က သင့်အား စေခိုင်းသော မည်သည့်အရာကိုမဆို လုပ်ဆောင်ခြင်းနှင့် ဖန်ဆင်းရှင်၏ ကြိုတင်စီမံမှုအားလုံးကို ကျိုးနွံနာခံခြင်း ဖြစ်သည်။ ဤသည်မှာ လူသားများအတွက် သင့်လျော်သော အသိတရားနှင့် ဆင်ခြင်တုံတရားဖြစ်သည်။ သမ္မာတရား နားလည်သောသူတို့ကို ဘုရားသခင်၏ စီစဉ်ညွှန်ကြားမှုနှင့် ကြိုတင်စီစဉ်မှုများကို လုံးလုံးလျားလျား ကျိုးနွံနာခံရန်အတွက် ပို၍ပင် မျှော်လင့်ထားသည်။ ၎င်းတို့သည် စိုးစဉ်းမျှပင် လုံးဝ မပုန်ကန်ရချေ။

ဧဝံဂေလိဖြန့်ဝေခြင်းနှင့် သက်ဆိုင်သော သမ္မာတရားသည် များပြားလှသော လူအမျိုးမျိုးတို့နှင့် ဆက်စပ်နေ၏။ ယင်းသည် လူတိုင်းနှင့် ဆက်စပ်နေသင့်ပေသည်။ အစကနဦးတွင် လူတချို့သည် သမ္မာတရား၏ ဤကဏ္ဍနှင့်ဆိုင်သော မိတ်သဟာယပြုချက်ကို ကြားရသောအခါ ၎င်းတို့နှင့် မသက်ဆိုင်ဟု ထင်ကြသည်။ သို့သော် ယခုမူကား လူတိုင်းသည် ဧဝံဂေလိဖြန့်ဝေခြင်းတာဝန်နှင့် ပတ်သက်၍ လက်ခံတတ်သော သဘောထား ရှိသင့်ပြီး သမ္မာတရား၏ ဤကဏ္ဍကို သိမြင်နားလည်ခြင်း ရှိသင့်ပေပြီ။ ၎င်းတို့တွင် ဤတာဝန်အပေါ် တိကျမှန်ကန်သော အဓိပ္ပာယ်ဖွင့်ဆိုချက်လည်း ရှိသင့်သည်။ သို့ဆိုလျှင် လူတို့သည် သူတို့ကိုယ်သူတို့ မည်သည့်နေရာ၌ ထားသနည်း။ (ဖန်ဆင်းခံတစ်ဦး၏ နေရာ၌ ဖြစ်ပါသည်။) သင်သည် ဖန်ဆင်းခံတစ်ဦး ဖြစ်၏။ သို့ဖြစ်လေရာ ဖန်ဆင်းခံတစ်ဦး၏ ပထမဦးစားပေးမှာ မည်သည့်အရာ ဖြစ်သနည်း။ (ဖန်ဆင်းရှင်ကို ကျိုးနွံနာခံရန် ဖြစ်ပါသည်။) ဖန်ဆင်းရှင်အား ကျိုးနွံနာခံခြင်း၏ ခိုင်လုံသော ပထမ သရုပ်သကန်မှာ အဘယ်နည်း။ (ဖန်ဆင်းခံများအဖြစ် ကျွန်ုပ်တို့၏ တာဝန်ကို ဖြည့်ဆည်းခြင်း ဖြစ်ပါသည်။) သို့ဆိုလျှင် ဖန်ဆင်းခံတစ်ဦး ထမ်းဆောင်သင့်သည့် ပထမတာဝန်မှာ အဘယ်နည်း။ (ဧဝံဂေလိတရားကို ဖြန့်ဝေပြီး ဘုရားသခင်အား သက်သေခံရန် ဖြစ်ပါသည်။) မှန်ပေ၏။ ယင်းသည် ငါမျှော်လင့်နေသည့် အဖြေဖြစ်သည်။ သင်တို့သည် အလွန်တရာ ဟိုကွေ့သည်ပတ် လုပ်နေပြီး နောက်ဆုံးတွင်မှ တိကျမှန်ကန်သော အဖြေကို တွေးမိကြတော့သည်။ ဖန်ဆင်းခံလူတိုင်း၏ ပထမဦးစားပေးမှာ တစ်ကမ္ဘာလုံးအနှံ့နှင့် မြေကြီးစွန်းတိုင်အောင် ဧဝံဂေလိဖြန့်ဝေရန်၊ ဘုရားသခင်၏ အမှုတော်ကို သက်သေခံရန်နှင့် ပျံ့နှံ့စေရန် ဖြစ်သည်။ ဤသည်မှာ ဘုရားသခင်၏ ဧဝံဂေလိတရားကို လက်ခံသူတိုင်း၏ တာဝန်နှင့် ဝတ္တရားဖြစ်သည်။ ယင်းသည် ကျင့်ဝတ်သိက္ခာအရ ၎င်းတို့ မဖြစ်မနေလုပ်ရမည့် အရာဖြစ်၏။ သင်သည် ဤတာဝန်ကို လောလောဆယ်တွင် ဖြည့်ဆည်းနေခြင်း မရှိဘဲ ဖြစ်နေနိုင်သည်။ သို့မဟုတ် ဤတာဝန်သည် သင်နှင့် အလှမ်းကွာဝေးသည့် အရာတစ်ခု ဖြစ်နေနိုင်သည်။ သို့မဟုတ် ဤသည်မှာ သင်ထမ်းဆောင်ရမည့် တာဝန်တစ်ခုဖြစ်သည်ဟု သင် မည်သည့်အခါမျှ မတွေးခဲ့ဖူးခြင်း ဖြစ်ကောင်းဖြစ်နေနိုင်သည်။ သို့သော်လည်း သင်၏စိတ်နှလုံးသည် ဤအချက်ကိုကား ရှင်းနေရမည်။ ဤတာဝန်သည် သင်နှင့် ဆက်စပ်နေ၏။ ယင်းသည် အခြားသူများ၏ တာဝန်သာ ဖြစ်သည်မဟုတ်။ သင်၏တာဝန်နှင့် ဝတ္တရားလည်း ဖြစ်ပေသည်။ သင်သည် ဤတာဝန်ကို ထမ်းဆောင်ရန် လောလောဆယ် တာဝန်ပေးခြင်း မခံထားရရုံနှင့် ဤတာဝန်သည် သင်၏ အရေးကိစ္စမဟုတ်၊ ဤတာဝန်ကို သင့်အနေဖြင့် ထမ်းဆောင်ဖို့ မဟုတ်၊ သို့မဟုတ် ဤတာဝန်ကို ထမ်းဆောင်ရန် ဘုရားသခင်သည် သင့်ကို တာဝန်ပေးအပ်ထားခြင်း မရှိဟု မဆိုလိုပေ။ အကယ်၍ သင်၏ နားလည်သဘောပေါက်မှုသည် ဤအဆင့်အထိ ရောက်လာနိုင်ပါက ဧဝံဂေလိဖြန့်ဝေခြင်း တာဝန်နှင့်ပတ်သက်ပြီး သင်၏စိတ်နှလုံးထဲ၌ စွဲကိုင်ထားသည့် ရှုထောင့်အမြင်သည် သမ္မာတရားနှင့်ရော ဘုရားသခင်၏ အလိုတော်နှင့်ပါ ကိုက်ညီသည်ဟု ဆိုလိုသည် မဟုတ်လော။ သင်တို့၏ နားလည်မှုသည် ဤအဆင့်အထိ ရောက်လာသည့်အခါ လက်ထဲရှိ အလုပ်အားလုံးကို သင်တို့ လုပ်ပြီးသွားသည့် တစ်နေ့တွင် ဘုရားသခင်သည် သင်တို့ကို နေရာအနှံ့သို့၊ အစိမ်းဆုံး၊ မနှစ်မြို့ဖွယ် အကောင်းဆုံး၊ အခက်ခဲဆုံးဟု သင်တို့သိရှိရသည့် နေရာတချို့သို့ပင် လူစုကွဲရန်နှင့် ပျံ့နှံ့သွားစေရန် အမိန့်ထုတ်လိမ့်မည်။ ထိုအခါ သင်တို့ မည်သို့လုပ်မည်နည်း။ (ကျွန်ုပ်တို့သည် ကျင့်ဝတ်သိက္ခာအရ မဖြစ်မနေ လက်ခံရမည် ဖြစ်ပါသည်။) ယင်းမှာ သင်တို့ ယခုပြောသည့်အရာ ဖြစ်သော်လည်း ထိုနေ့ရက် ရောက်လာသောအခါ သင်တို့၏ မျက်စိများသည် မျက်ရည်များဖြင့် ပြည့်ကောင်းပြည့်နေပေမည်။ ယခုတွင် သင်တို့သည် ဤပုံစံဖြင့် ပြင်ဆင်ထားရမည်။ သင်သည် ဤသို့ သိမြင်နားလည်လာရမည်။ “ဤခေတ်ကာလသည် ကျွန်ုပ်မွေးဖွားလာသည့် ခေတ်ကာလဖြစ်၏။ ကျွန်ုပ်သည် ကံကောင်းထောက်မ၍ နောက်ဆုံးသော ကာလနှင့်ဆိုင်သည့် ဘုရားသခင်၏ အမှုတော်ကို လက်ခံထားပြီး ဘုရားသခင်၏ စီမံခန့်ခွဲမှု အစီအစဉ်နှင့်ဆိုင်သော အမှုတော်၌ ပါဝင်ရသည်။ ထို့ကြောင့် ကျွန်ုပ်အသက်တာ၏ တန်ဖိုးနှင့် အရေးပါမှုသည် ဘုရားသခင်၏ ဧဝံဂေလိတရား ကျယ်ပြန့်ရေးအဖို့ ကျွန်ုပ်တစ်ဘဝလုံး၏ စွမ်းအားကို ပေးအပ်မြှုပ်နှံရန်အတွက် ဖြစ်သင့်သည်။ အခြားမည်သည့်အရာကိုမျှ ကျွန်ုပ်စဉ်းစားမည်မဟုတ်” ဟူ၍ ဖြစ်သည်။ သင်တို့၌ ဤပြင်းပြသော ရည်မှန်းချက် ရှိသလော။ (ရှိပါသည်။) သင်တို့၌ ဤပြင်းပြသော ရည်မှန်းချက် ရှိသင့်ကာ ဤပြင်ဆင်မှုနှင့် အစီအစဉ်ကို ပြုလုပ်ထားပြီး ဖြစ်သင့်သည်။ ဤနည်းအားဖြင့်သာ စစ်မှန်သော ဖန်ဆင်းခံတစ်ဦး၊ ဘုရားသခင်၏ ချစ်မြတ်နိုးခြင်းခံရပြီး သူ့အတွက် ကျေနပ်ဖွယ်ဖြစ်သည့် ဖန်ဆင်းခံတစ်ဦး ဖြစ်နိုင်လေသည်။ လူတချို့က “ကျွန်ုပ်သည် အဆင်သင့်မဖြစ်သေးသဖြင့် ဧဝံဂေလိဖြန့်ဝေရန် ယခုအခိုင်းခံရပါက ကြောက်ရွံ့မိပါလိမ့်မည်” ဟု ဆိုကြသည်။ မကြောက်ရွံ့လေနှင့်။ သင်အဆင်သင့်မဖြစ်ခင် ဤအရာကို ပြုလုပ်ရန် ဘုရားသခင်က သင့်ကို အတင်းအကျပ် ခိုင်းမည်မဟုတ်ပေ။ ထို့အပြင် သင်က အဆင်သင့်ဖြစ်ပြီဟု ပြောလျှင်လည်း ဘုရားသခင်က သင့်ကို အသုံးမပြုသေးဘဲ ဖြစ်နေနိုင်သည်။ သို့ဆိုလျှင် သင်သည် မည်သည့်အချိန်၌ အသုံးပြုခံရမည်နည်း။ ယင်းသည် ဘုရားသခင်အပေါ် မူတည်၏။ ထို့ကြောင့် ယင်းနှင့်ပတ်သက်၍ သင် စိတ်ပူပန်နေစရာ မလိုပေ။ ဘုရားသခင်သည် သင့်ကို အသုံးပြုလိုသောအခါ အရာခပ်သိမ်းကို ပြင်ဆင်လိမ့်မည်။ သင်၌ လိုအပ်သော ဝိညာဉ်ရင့်သန်မှုနှင့် အတွေ့အကြုံတို့ ရှိပြီး အခြားလိုအပ်သော အခြေအနေများအားလုံးကို သင်ပြည့်မီသောအခါ နေရာအမျိုးမျိုး၌ ဧဝံဂေလိတရားကို သွားရောက်ဖြန့်‌ဝေရန် သင့်အတွက် သူစီစဉ်ကောင်း စီစဉ်ပေးလိမ့်မည်။ ထိုအချိန် ရောက်လာသောအခါ သင့်ကို ဧဝံဂေလိတမန်အဖြစ် ခေါ်နိုင်သလော။ (မခေါ်နိုင်ပါ။) ဤတာဝန်ကို ထမ်းဆောင်သောသူတို့အား ဧဝံဂေလိတမန်များဟု ဘယ်သောအခါမျှ မခေါ်နိုင်ပေ။ ဤအရာသည် မည်သည့်အခါမျှ ပြောင်းလဲမည်မဟုတ်။ ထိုသို့သောလူတို့ကို မည်သို့ ခေါ်သင့်သနည်း။ (ဧဝံဂေလိဖြန့်ဝေသော လူများဟု ခေါ်သင့်ပါသည်။) ယင်းက ပို၍ တိကျမှန်ကန်သည်။ ထိုသို့သောလူတို့ကို မည်သို့ပင်ခေါ်သည်ဖြစ်စေ ဤသည်မှာ ၎င်းတို့ထမ်းဆောင်သော တာဝန်ဖြစ်သည်။ ဤသည်မှာ သမ္မာတရားဖြစ်ပြီး မည်သည့်အခါမျှ ပြောင်းလဲမည်မဟုတ်။ အကယ်၍ အမည်နာမပြောင်းလဲပြီး ဤလူတို့၏ ဝိသေသလက္ခဏာ ပြောင်းလဲပါက အလုပ်၏ အနှစ်သာရက ပြောင်းလဲသွားမည် ဖြစ်သည်။ အနှစ်သာရ ပြောင်းလဲသည်နှင့် တစ်ပြိုင်နက် ယင်းသည် သမ္မာတရားလမ်းကြောင်းမှ သွေဖည်သွားမည် ဖြစ်သည်။ အလုပ်သည် သမ္မာတရားလမ်းကြောင်းမှ သွေဖည်သွားသည်နှင့် ဘာသာရေးအမူအကျင့် ဖြစ်သွားပေမည်။ ထိုသို့ဖြစ်လျှင် လူတို့သည် ကယ်တင်ခြင်းလမ်းကြောင်းမှ ပို၍ပို၍ဝေးရာသို့ လမ်းလွဲသွားလျက် မြောက်ဘက်သွားဖို့ ရည်ရွယ်သောအခါ တောင်ဘက်သို့ သွားကြမည် ဖြစ်သည်။ ထို့ကြောင့် မည်သည့်အခါမျှ လမ်းမှားကို မလျှောက်နှင့်။ ဧဝံဂေလိဖြန့်ဝေသူတို့အား နေရာအမျိုးမျိုးသို့ ပို့ဆောင်စေလွှတ်သည့် အချိန်တိုင်းတွင် ၎င်းတို့သည် ဧဝံဂေလိဖြန့်ဝေရန် မိမိတို့၏တာဝန်ကို ဖြည့်ဆည်းကြရုံသာ ဖြစ်သည်။ ၎င်းတို့သည် ဧဝံဂေလိတမန်များ ဖြစ်ဖို့မဆိုနှင့်၊ သက်သေခံသူများ မဟုတ်၊ တရားဟောဆရာများလည်း မဟုတ်ကြပေ။ ဤသည်မှာ ထာဝရမပြောင်းလဲသော သမ္မာတရား ဖြစ်၏။

ယခုအထိ ငါပြောပြီးသည့် အရာနှင့်ပတ်သက်၍ လူအများစုသည် ၎င်းတို့၏ စိတ်နှလုံးထဲ၌ အလင်းရောင်တောက်ပမှုကို ခံစားရမည်မှာ အသေအချာဖြစ်ပြီး ၎င်းတို့အနက် လူအများအပြားသည် စိတ်အားထက်သန်သော မျှော်လင့်စောင့်စားမှုဖြင့် ရင်ခုန်နေကြမည် ဖြစ်ကာ “ကောင်းလိုက်လေခြင်း။ အနာဂတ်သည် အလွန်တရာ အလားအလာကောင်းမည့်ပုံပေါက်၏။ ငါတို့အတွက် ဘုရားသခင်ပြင်ဆင်ပေးထားသည့် လမ်းကြောင်းမှာ တောက်ပသော အလင်းရောင်ဖြင့် ဝင်းလက်နေသည်တကား” ဟု စဉ်းစားနေကြမည် ဖြစ်သည်။ ဤသည်မှာ သေချာပေါက် မှန်နေသည်ကား မဟုတ်ပေ။ ဘုရားသခင်သည် သူ၏နောက်လိုက်များ အယောက်စီတိုင်းအတွက် အစီအစဉ်တစ်ခုရှိသည်။ ၎င်းတို့ တစ်ဦးချင်းစီတွင် ဘုရားသခင်က လူသားအတွက် ပံ့ပိုးပေးသော၊ ၎င်းတို့၏တာဝန်ကို ထမ်းဆောင်ရမည့် ပတ်ဝန်းကျင်တစ်ခုရှိသည်။ ၎င်းတို့တွင် လူသားအတွက် ပျော်မွေ့ခံစားဖို့ဖြစ်သည့် ဘုရားသခင်၏ ကျေးဇူးတော်နှင့် ထောက်ခံမှုတို့ရှိသည်။ ၎င်းတို့တွင် ဘုရားသခင်က လူသားအတွက် စီစဉ်ထားသည့် အထူးအခြေအနေများလည်းရှိပြီး ၎င်းတို့ ကြုံတွေ့ရမည့် ဒုက္ခများစွာရှိသည်။ ယင်းသည် လူက စိတ်ကူးထင်မြင်သည့် အဆင်ပြေချောမွေ့မှုနှင့် လုံးဝမတူပေ။ ဤအရာအပြင် သင်သည် ဖန်ဆင်းခံသတ္တဝါတစ်ဦး ဖြစ်သည်ကို အသိအမှတ်ပြုပါက၊ ဧဝံဂေလိတရား ဖြန့်ဝေဖို့နှင့် သင်၏တာဝန်ကို လျော်ကန်စွာ လုပ်ဆောင်ဖို့ သင်၏တာဝန်ကို ဖြည့်ဆည်းခြင်းအတွက် ဒုက္ခခံပြီး အဖိုးအခပေးဆပ်ရန် သင့်ကိုယ်သင် ပြင်ဆင်ရမည်။ အဖိုးအခသည် ကိုယ်ခန္ဓာ နာမကျန်းမှုတစ်ခုခု သို့မဟုတ် အခက်အခဲတစ်ခုခုကို ခံစားရခြင်း ဖြစ်နိုင်သည် သို့မဟုတ် အဆင်းနီသော နဂါးကြီး၏ ညှဉ်းပန်းနှိပ်စက်မှုများ သို့မဟုတ် လောကီလူများ၏ အထင်လွဲမှုများအပြင်၊ ဧဝံဂေလိ ဖြန့်ဝေနေချိန်တွင် ကြုံရသည့် ဒုက္ခများ၊ သစ္စာဖောက်ခံရခြင်း၊ အရိုက်ခံရကာ အဆူခံရခြင်း၊ ရှုတ်ချခံရခြင်း- အပြင်းထန်ဆုံးသော လူအုပ်ဝိုင်းခံရခြင်းနှင့် သေစေနိုင်လောက်သော အန္တရာယ်ဖြစ်ခြင်းတို့ ဖြစ်နိုင်သည်။ ဧဝံဂေလိတရား ဖြန့်ဝေခြင်းကာလတစ်လျှောက်တွင်၊ ဘုရားသခင်၏ အမှုတော် မပြီးဆုံးမီ သင်သေဆုံးမည်ဖြစ်ခြင်းနှင့်၊ ဘုရားသခင်၏ ဘုန်းအသရေ နေ့ရက်ကိုတွေ့ဖို့ သင်အသက်ရှင်မည် မဟုတ်ခြင်းတို့က ဖြစ်နိုင်ပေသည်။ သင်သည် ဤအရာအတွက် ပြင်ဆင်ထားရမည်။ ဤသည်က သင်တို့ကို ကြောက်လန့်စေဖို့ ရည်ရွယ်ခြင်း မဟုတ်ပေ။ ယင်းမှာ အမှန်တရား ဖြစ်ပေသည်။ ယခုတွင် ကျွန်ုပ်သည် ဤသည်ကို ရှင်းလင်းစေပြီး သင်သည်လည်း နားလည်ပြီးဖြစ်သည့်အတွက်၊ ဤပြင်းပြသောဆန္ဒ သင်၌ရှိသေးပြီး ယင်းက ပြောင်းလဲမည်မဟုတ်သကဲ့သို့ သင်သည် သေသည်အထိ သစ္စာစောင့်သိနေမည်မှာ သေချာပါက၊ ဤသည်မှာ သင်တို့သည် ဝိညာဉ်ရင့်ကျက်မှု တစ်ခုခု ပိုင်ဆိုင်သည်ဟု သက်သေပြပေသည်။ ဘာသာရေး လွတ်လပ်ခွင့်များနှင့် လူ့အခွင့်အရေးတို့ရှိသော ဤပင်လယ်ရပ်ခြားနိုင်ငံများတွင် ဧဝံဂေလိတရား ဖြန့်ဝေခြင်းသည် အန္တရာယ်ကင်းဝေးပြီး၊ သင်လုပ်သမျှက ချောမွေ့လိမ့်မည်၊ ယင်း၌ ဘုရားသခင်၏ ကောင်းချီးမင်္ဂလာများနှင့် သူ၏ကြီးစွာသော တန်ခိုးနှင့် ဩဇာအာဏာတို့ချည်း ရှိလိမ့်မည်ဟု မယူဆနှင့်။ ဤသည်မှာ လူ့အယူအဆများနှင့် စိတ်ကူးစိတ်သန်းများကိစ္စသာ ဖြစ်သည်။ ဖာရိရှဲများကလည်း ဘုရားသခင်၌ ယုံကြည်ခဲ့ကြသော်လည်း၊ ၎င်းတို့သည် လူ့ဇာတိခံ ဘုရားသခင်ကို ခေါ်ဆောင်ပြီး ကားတိုင်ပေါ်တွင် ကားစင်တင်သတ်ခဲ့ကြသည်။ သို့ဆိုလျှင် လက်ရှိ ဘာသာရေးလောကသည် လူ့ဇာတိခံယူထားသော ဘုရားသခင်အပေါ် မည်သည့်ဆိုးဝါးသော အရာများကို ပြုလုပ်နိုင်စွမ်း ရှိသနည်း။ ၎င်းတို့သည် ဘုရားသခင်အား ပြစ်တင်ဝေဖန်ခြင်း၊ ဘုရားသခင်အား ရှုတ်ချခြင်း၊ ဘုရားသခင်အား မထီမဲ့မြင်ပြောဆိုခြင်း စသည့် ဆိုးဝါးသောအရာ မြောက်မြားစွာကို ပြုလုပ်ထားကြပြီးဖြစ်ကာ ၎င်းတို့ ပြုလုပ်နိုင်စွမ်း မရှိသည့် ဆိုးဝါးသောအရာ ဟူ၍မရှိပေ။ သခင်ယေရှုကို ခေါ်ပြီး ကားတိုင်ပေါ် ကားစင်တင်သတ်ခဲ့သူများသည် ယုံကြည်သူများ ဖြစ်သည်ကို သင်မမေ့နှင့်။ ဤသို့သော အမှုအရာမျိုးကို လုပ်ဆောင်ဖို့ ၎င်းတို့တွင်သာ အခွင့်အရေးရှိကြသည်။ မယုံကြည်သူများသည် ထိုအရာများကို ဂရုမစိုက်ခဲ့ကြပေ။ သခင်ယေရှုကိုခေါ်ပြီး ကားတိုင်ပေါ်တွင် ကားစင်တင်သတ်ဖို့ အစိုးရနှင့် ပူးပေါင်းကြံစည်ခဲ့သူများမှာ ဤယုံကြည်သူများသာ ဖြစ်ကြသည်။ ထို့အပြင် သခင်ယေရှု၏ ထိုတပည့်တော်များသည် မည်သို့ သေဆုံးကြသနည်း။ တပည့်တော်များကြားတွင် မသေမချင်း ကျောက်တုံးဖြင့် ထုသတ်ခံခဲ့ရသူများ၊ မြင်းနောက်မှ ကြိုးဖြင့် ဆွဲခံရသူများ၊ ဇောက်ထိုးမိုးမျှော် ကားစင်တင်ခံရသူများ၊ မြင်းငါးကောင်ဖြင့် ကိုယ်လက်အင်္ဂါများကို တစ်စစီ ဆွဲဖျက်ခံရသူများ ရှိကြသည်- သေခြင်းတရားမျိုးစုံသည် ၎င်းတို့ပေါ် ကျရောက်ခဲ့သည်။ ၎င်းတို့၏ သေခြင်းတရားများအတွက် အကြောင်းရင်းမှာ အဘယ်နည်း။ ၎င်းတို့သည် ၎င်းတို့၏ ပြစ်မှုများအတွက် ဥပဒေနှင့်လျော်ညီစွာ ကွပ်မျက်ခံရခြင်းလော။ မဟုတ်ပေ၊ ၎င်းတို့သည် သခင်၏ ဧဝံဂေလိတရားကို ဖြန့်ဝေပြီး ကမ္ဘာသူကမ္ဘာသားများ၏ ငြင်းပယ်ခြင်းကို ခံခဲ့ကြရသောကြောင့်၊ စီရင်ခြင်းခံခဲ့ရသည်၊ ရိုက်နှက်ခြင်းခံခဲ့ရသည်၊ ဆူပူခြင်းခံခဲ့ရပြီး အသတ်ခံခဲ့ရသည်— ယင်းမှာ ၎င်းတို့ ညှဉ်းဆဲသတ်ဖြတ်ခံရသည့် ပုံစံဖြစ်သည်။ ထိုမာတုရများ၏ နောက်ဆုံး အဆုံးသတ်ကို မပြောကြစို့နှင့် သို့မဟုတ် ၎င်းတို့၏ အပြုအမူနှင့်သက်ဆိုင်သည့် ဘုရားသခင်၏ အနက်ဖွင့်ဆိုခြင်းကို မပြောကြစို့နှင့်၊ သို့ရာတွင် ဤသည်ကို မေးလော့၊ ၎င်းတို့သည် အဆုံးသတ်ကို ရောက်သည့်အခါ၊ ၎င်းတို့၏ အသက်တာများတွင် အဆုံးသတ်ကို ၎င်းတို့ကြုံရသည့် ပုံစံများသည် လူသားတို့၏ အယူအဆများနှင့် ကိုက်ညီသလော။ (မကိုက်ညီပေ။) လူသားအယူအဆများ၏ အမြင်ရှုထောင့်မှ၊ ၎င်းတို့သည် ဘုရားသခင်၏အမှုတော်ကို ဖြန့်ဝေဖို့ ထိုမျှကြီးမားသော အဖိုးအခကို ပေးခဲ့ကြသော်လည်း နောက်ဆုံးတွင် စာတန်၏ အသေသတ်ခြင်းကို ခံခဲ့ကြရသည်။ ဤသည်မှာ လူသားများ၏ အယူအဆများနှင့် မကိုက်ညီသော်လည်း၊ ဤသည်မှာ ၎င်းတို့၌ ဖြစ်ပျက်ခဲ့သည့်အရာ အတိအကျပင် ဖြစ်သည်။ ယင်းမှာ ဘုရားသခင် ခွင့်ပြုခဲ့သည့် အရာပင်ဖြစ်သည်။ ဤအရာ၌ မည်သည့်သမ္မာတရားကို ရှာတွေ့နိုင်သနည်း။ ဘုရားသခင်က ၎င်းတို့အား ဤနည်းဖြင့် သေခွင့်ပြုခြင်းသည် သူ၏ကျိန်စာနှင့် ပြစ်တင်ရှုတ်ချခြင်းလော၊ သို့မဟုတ် သူ၏အစီအစဉ်နှင့် ကောင်းချီးမင်္ဂလာလော။ ယင်းမှာ တစ်ခုမျှမဟုတ်ပေ။ ယင်းမှာ အဘယ်နည်း။ ယခု လူများသည် ၎င်းတို့၏ သေခြင်းတရားများကို စိတ်နှလုံးပူဆွေးခြင်းများဖြင့် ဆင်ခြင်သုံးသပ်ကြသော်လည်း ယင်းမှာ အမှုအရာများ ဖြစ်ပျက်ခဲ့သည့် ပုံစံပင် ဖြစ်လေသည်။ ဘုရားသခင်ကို ယုံကြည်ခဲ့သည့်သူများသည် ထိုနည်းဖြင့် သေဆုံးခဲ့ကြသည့် ဤအရာကို မည်သို့ ရှင်းပြရမည်နည်း။ ဤအကြောင်းအရာကို ကျွန်ုပ်တို့ ဖော်ပြသည့်အခါ၊ သင်တို့က ၎င်းတို့၏ နေရာတွင် ကိုယ်ချင်းစာကြည့်သည်။ သို့ဆိုလျှင် သင်တို့၏စိတ်နှလုံးများသည် ဝမ်းနည်းပြီး ဖုံးကွယ်နေသည့် နာကျင်မှုတစ်ခုကို သင်တို့ခံစားရသလော။ သင်က “ဤလူများသည် ဘုရားသခင်၏ ဧဝံဂေလိတရားကို ဖြန့်ဝေဖို့ ၎င်းတို့၏ တာဝန်ကို ထမ်းဆောင်ခဲ့ကြပြီး လူကောင်းများအဖြစ် မှတ်ယူသင့်သောကြောင့်၊ ၎င်းတို့သည် ထိုသို့သော အဆုံးသတ်တစ်ခုနှင့် ထိုသို့သော ရလဒ်တစ်ခုသို့ အဘယ့်ကြောင့် ရောက်နိုင်ကြသနည်း” ဟု တွေးသည်။ အမှန်တကယ်တွင် ဤသည်မှာ ၎င်းတို့၏ ခန္ဓာကိုယ်များ သေဆုံးပြီး ကွယ်လွန်သွားသည့်ပုံစံ ဖြစ်သည်။ ဤသည်မှာ လူ့လောကမှ ၎င်းတို့ ထွက်ခွာသွားသည့် ပုံစံဖြစ်သည်၊ သို့ရာတွင် သို့ရာတွင် ယင်းက ၎င်းတို့၏ အဆုံးသတ်နှင့် တူညီသည်ဟု မဆိုလိုပေ။ ၎င်းတို့၏ သေခြင်းတရားနှင့် ထွက်ခွာခြင်းတို့၏ နည်းလမ်းများမှာ မည်သို့ဖြစ်ပါစေ၊ ယင်းတို့က မည်သို့ဖြစ်ပျက်ခဲ့ပါစေ၊ ဘုရားသခင်က ထိုအသက်တာများ၏၊ ထိုဖန်ဆင်းခံသတ္တဝါများ၏ နောက်ဆုံး အဆုံးသတ်များကို သတ်မှတ်ခဲ့သည့်ပုံစံ မဟုတ်ပေ။ ဤသည်မှာ သင် ရှင်းလင်းစွာ တွေ့ရမည့်အရာ တစ်စုံတစ်ခုဖြစ်သည်။ ဆန့်ကျင်ဘက်အားဖြင့် ၎င်းတို့က ဤလောကကို ပြစ်တင်ရှုတ်ချဖို့နှင့် ဘုရားသခင်၏ လုပ်ဆောင်ချက်များကို သက်သေခံဖို့ ဤနည်းလမ်းများကို အတိအကျအားဖြင့် အသုံးပြုခဲ့ခြင်း ဖြစ်သည်။ ဤဖန်ဆင်းခံ သတ္တဝါများက ၎င်းတို့၏ အဖိုးအတန်ဆုံးသော အသက်တာများကို အသုံးပြုခဲ့သည်- ၎င်းတို့က ဘုရားသခင်၏ လုပ်ဆောင်ချက်များကို သက်သေခံဖို့၊ ဘုရားသခင်၏ကြီးမြတ်သော တန်ခိုးကို သက်သေခံဖို့နှင့် ဘုရားသခင်၏ လုပ်ဆောင်ချက်များသည် မှန်ကန်ကြောင်း၊ သခင်ယေရှုသည် ဘုရားသခင်ဖြစ်ကြောင်း၊ သူသည် သခင်နှင့် ဘုရားသခင်၏ လူ့ဇာတိခံ ဇာတိပကတိဖြစ်ကြောင်းတို့ကို စာတန်နှင့် လောကတို့အား ကြေညာဖို့ နောက်ဆုံးအခိုက်အတန့်ကို အသုံးပြုခဲ့ကြသည်။ ၎င်းတို့ အသက်တာများ၏ နောက်ဆုံး အခိုက်အတန့်အထိတွင်ပင် ၎င်းတို့သည် သခင်ယေရှု၏ နာမတော်ကို မည်သည့်အခါမျှ မငြင်းပယ်ခဲ့ပေ၊ ဤသည်မှာ ဤလောကအပေါ် တရားစီရင်ခြင်းပုံစံတစ်မျိုး မဟုတ်သလော။ ၎င်းတို့က လောကကြီးကို ကြေညာဖို့၊ သခင်ယေရှုသည် သခင်ဖြစ်သည်၊ သခင်ယေရှုသည် ခရစ်တော် ဖြစ်သည်၊ သူသည် ဘုရားသခင်၏ လူ့ဇာတိခံ ဇာတိပကတိဖြစ်သည်၊ လူသားမျိုးနွယ် တစ်ရပ်လုံးအတွက် သူပြုလုပ်ခဲ့သည့် ရွေးနုတ်ခြင်းအမှုတော်သည် လူသားမျိုးနွယ် တစ်ရပ်လုံးကို ဆက်လက် ရှင်သန်ခွင့်ပြုကြောင်းကို လူသားတို့အား အတည်ပြုဖို့ ၎င်းတို့၏အသက်တာများကို အသုံးပြုခဲ့သည်- ဤအမှန်တရားသည် ထာဝရမပြောင်းလဲပေ။ သခင်ယေရှု၏ ဧဝံဂေလိတရားကို ဖြန့်ဝေခြင်းအတွက် မာတုရဖြစ်ခဲ့သောသူတို့သည် ၎င်းတို့၏တာဝန်ကို မည်သည့်အတိုင်းအတာအထိ ထမ်းဆောင်ခဲ့သနည်း။ ယင်းက အဆုံးစွန်အတိုင်းအတာအထိ ဖြစ်ခဲ့သလော။ အဆုံးစွန်အတိုင်းအတာကို မည်သို့ထင်ရှားစေခဲ့သနည်း။ (၎င်းတို့က ၎င်းတို့၏ အသက်တာများကို ပေးအပ်ကြသည်။) မှန်ပေသည်၊ ၎င်းတို့သည် ၎င်းတို့၏အသက်တာများဖြင့် အဖိုးအခကို ပေးဆပ်ခဲ့သည်။ မိသားစု၊ ကြွယ်ဝခြင်းနှင့် ဤအသက်တာ၏ ရုပ်ပိုင်းဆိုင်ရာ အရာဝတ္ထုများသည် အပြင်ပန်းအရာများသာ ဖြစ်သည်။ ကိုယ်နှင့်ဆက်စပ်သည့် တစ်ခုတည်းသော အရာမှာ အသက်ဖြစ်သည်။ အသက်ရှင်သည့် လူတိုင်းအတွက် အသက်သည် တန်ဖိုးအထားထိုက်ဆုံးသော အရာ၊ အဖိုးတန်ဆုံးသော အရာဖြစ်ပြီး၊ အမှန်တွင် ဤလူများသည် လူသားမျိုးနွယ်အတွက် ဘုရားသခင်၏ ချစ်ခြင်းနှင့်ပတ်သက်၍ အတည်ပြုချက် အနေဖြင့်လည်းကောင်း၊ သက်သေခံချက် အနေဖြင့်လည်းကောင်း ၎င်းတို့၏ အဖိုးအတန်ဆုံး ပိုင်ဆိုင်မှုဖြစ်သည့် အသက်ကို ပူဇော်ဆက်ကပ်နိုင်ခဲ့ကြသည်။ ၎င်းတို့ သေဆုံးသည့် နေ့ရက်အထိ ၎င်းတို့သည် ဘုရားသခင်၏နာမတော်ကို မငြင်းပယ်ခဲ့ကြသကဲ့သို့၊ ဘုရားသခင်၏ အမှုတော်ကိုလည်း မငြင်းပယ်ခဲ့ကြဘဲ၊ ဤအမှန်တရား တည်ရှိမှုအတွက် သက်သေခံဖို့ ၎င်းတို့ဘဝ၏ နောက်ဆုံးအခိုက်အတန့်များကို အသုံးပြုခဲ့ကြသည်- ဤသည်မှာ အမြင့်မားဆုံး သက်သေခံသည့် ပုံစံမဟုတ်လော။ ဤသည်မှာ တစ်စုံတစ်ဦး၏တာဝန်ကို ထမ်းဆောင်ဖို့ အကောင်းဆုံး နည်းလမ်းဖြစ်သည်။ ဤသည်မှာ တစ်စုံတစ်ဦး၏တာဝန်ကို ဖြည့်ဆည်းခြင်း ဆိုသည့်အရာဖြစ်သည်။ စာတန်က ၎င်းတို့ကို ခြိမ်းခြောက်ပြီး အကြမ်းဖက်ကာ၊ အဆုံး၌ စာတန်သည် သူတို့၏ အသက်ကို အဖိုးအခ ပေးစေသည့်အခါတွင်ပင်၊ အဖိုးအခ ပေးစေသည့်အခါတွင်ပင်၊ ၎င်းတို့သည် ၎င်းတို့၏ တာဝန်ကို မစွန့်ပစ်ခဲ့ပေ။ ဤသည်မှာ တစ်စုံတစ်ဦး၏ တာဝန်ကို အဆုံးစွန်သော အတိုင်းအတာအထိ ဖြည့်ဆည်းခြင်းဖြစ်ပေသည်။ ဤသည်နှင့်ပတ်သက်၍ ငါမည်သည့်အရာကို ဆိုလိုသနည်း။ ဘုရားသခင်ကို သက်သေခံဖို့နှင့် သူ၏ဧဝံဂေလိတရားအား ဖြန့်ဝေဖို့ တစ်ထေရာတည်းသော နည်းစနစ်ကို သင်တို့အား အသုံးပြုစေဖို့ ငါရည်ရွယ်သလော။ ထိုသို့ ပြုလုပ်ရန် မလိုအပ်သော်လည်း၊ ဤသည်မှာ သင်၏တာဝန် ဖြစ်ကြောင်း၊ ဘုရားသခင်က သင့်အား လိုအပ်ပါက၊ ယင်းကို ကျင့်ဝတ်သိက္ခာအရ သင်တို့ မဖြစ်မနေ လုပ်ရမည့်အရာတစ်ခုအဖြစ် လက်ခံသင့်ကြောင်းတို့ကို သင်နားလည်ရမည်။ ယနေ့လူများသည် ၎င်းတို့ထဲ၌ ကြောက်စိတ်နှင့် စိုးရိမ်မှုတို့ ရှိကြသော်လည်း၊ ထိုခံစားချက်များသည် မည်သည့်အသုံးတည့်မှုရှိသနည်း။ ဘုရားသခင်က သင့်အား ဤသည်ကို လုပ်စေဖို့ လိုအပ်ခြင်းမရှိပါက၊ ယင်းနှင့်ပတ်သက်၍ စိုးရိမ်နေခြင်းမှာ မည်သည့် အသုံးတည့်မှုရှိသနည်း။ ဘုရားသခင်က သင့်အား ဤသည်ကို လုပ်ဖို့ လိုအပ်ပါက၊ သင်သည် သင်၏တာဝန်ကို ခေါင်းမရှောင်သင့်သကဲ့သို့ မငြင်းပယ်သင့်ပေ။ သင်သည် တက်ကြွစွာ ပူးပေါင်းသင့်ပြီး စိတ်ပူခြင်းမရှိဘဲ လက်ခံသင့်သည်။ တစ်စုံတစ်ဦးသည် မည်သို့သေဆုံးပါစေ၊ ၎င်းတို့သည် စာတန်ရှေ့မှောက်တွင် မသေဆုံးသင့်ပေ၊ ပြီးလျှင် စာတန်၏လက်ထဲတွင် မသေဆုံးသင့်ပေ။ တစ်စုံတစ်ဦးက သေဆုံးတော့မည်ဖြစ်ပါက၊ ၎င်းတို့သည် ဘုရားသခင်၏လက်ထဲတွင် သေဆုံးသင့်သည်။ လူများသည် ဘုရားသခင်ထံမှ လာကြသည်၊ ပြီးလျှင် ဘုရားသခင်ထံသို့ ၎င်းတို့ ပြန်ကြသည်- ယင်းမှာ ဖန်ဆင်းခံသတ္တဝါတစ်ဦး ပိုင်ဆိုင်သင့်သည့် အသိစိတ်နှင့် သဘောထားတို့ ဖြစ်သည်။ ဤသည်မှာ ဧဝံဂေလိတရားကို ဖြန့်ဝေခြင်းနှင့် မိမိတာဝန်ကို ထမ်းဆောင်ခြင်းတွင် နားလည်သင့်သည့် နောက်ဆုံးသမ္မာတရားဖြစ်သည်— လူ့ဇာတိခံယူထားသော ဘုရားသခင်၏ သူ၏အမှုတော်အား ထမ်းဆောင်ခြင်းနှင့် လူသားမျိုးနွယ်ကို ကယ်တင်ခြင်းနှင့် သက်ဆိုင်သည့် ဧဝံဂေလိတရားကို ဖြန့်ဝေဖို့နှင့် သက်သေခံဖို့ တစ်စုံတစ်ဦးသည် မိမိ၏အသက်တာကို အဖိုးအခ ပေးဆပ်ရမည်။ သင်၌ ဤပြင်းပြသောဆန္ဒရှိပါက၊ သင်သည် ဤနည်းလမ်းဖြင့် သက်သေခံနိုင်ပါက၊ ယင်းမှာ အံ့ဩချီးကျူးလောက်စရာ ဖြစ်သည်။ ဤပြင်းပြသော ဆန္ဒမျိုး သင်မပိုင်ဆိုင်သေးပါက၊ အနည်းဆုံးအနေဖြင့် သင်သည် သင်၏ရှေ့မှောက်ရှိ ဝတ္တရားနှင့် တာဝန်ကို လျော်ကန်စွာ ဖြည့်ဆည်းသင့်ကာ၊ ကျန်သည့်အရာများကို ဘုရားသခင်အား ပေးအပ်သင့်သည်။ သို့ဆိုလျှင် လများနှင့်နှစ်များ ကုန်ဆုံးပြီး၊ သင်၏ အတွေ့အကြုံနှင့် အသက်အရွယ်တို့ တိုးပွားလာကာ၊ သမ္မာတရားနှင့် သက်ဆိုင်သည့် သင်၏နားလည်မှုက နက်ရှိုင်းလာသည်နှင့်အညီ၊ ဘုရားသခင်၏ ဧဝံဂေလိတရားနှင့် သက်ဆိုင်သည့် အမှုတော်အဖို့ သင့်ဘဝ၏ နောက်ဆုံးအခိုက်အတန့်အထိပင် သင်၏အသက်တာကို ဆက်ကပ်ဖို့ သင်၌ ဝတ္တရားတစ်ခုနှင့် တာဝန်တစ်ခုရှိသည်ကို သင်သဘောပေါက်လိမ့်မည် ဖြစ်သည်။

နိုင်ငံတော်၏ ဧဝံဂေလိတရားကို ဖြန့်ဝေခြင်းသည် အစပြုနှင့်ပြီး ဖြစ်သောကြောင့် ယခုသည် ဤအကြောင်းအရာများနှင့် ပတ်သက်၍ စတင်ပြောဆိုရန် သင့်လျော်သောအချိန် ဖြစ်ပေပြီ။ ယခင်က ပညတ်တော်ခေတ်နှင့် ကျေးဇူးတော်ခေတ်တွင် ရှေးဦး ပရောဖက်များနှင့် သန့်ရှင်းသူများ တချို့သည် ဧဝံဂေလိဖြန့်ဝေရာ၌ ၎င်းတို့၏အသက်များကို ပေးခဲ့ကြသည်။ ထို့ကြောင့် နောက်ဆုံးသော ကာလ၌ မွေးဖွားသော သူတို့သည်လည်း ဤအရေးအတွက် ၎င်းတို့၏ အသက်များကို ပေးနိုင်သည်။ ယင်းသည် အလွန်အကျွံတောင်းဆိုမှု ဖြစ်ဖို့ဝေးစွ၊ အသစ်အဆန်း သို့မဟုတ် ရုတ်တရက်ဖြစ်ပေါ်လာသော အရာပင် မဟုတ်ပေ။ ဤသည်မှာ ဖန်ဆင်းခံများ ထမ်းဆောင်ပြီး ဖြည့်ဆည်းထိုက်သည့် တာဝန်ဖြစ်သည်။ ဤသည်မှာ သမ္မာတရားဖြစ်၏၊ အမြင့်ဆုံးသော သမ္မာတရားဖြစ်၏။ အကယ်၍ သင်ပြုလုပ်သမျှသည် ဘုရားသခင်အတွက် သင်လုပ်ဆောင်လိုသော အရာ၊ သင်၏တာဝန်ကို မည်သို့ဖြည့်ဆည်းလိုပြီး ဘုရားသခင်အတွက် မည်မျှ အသုံးခံလိုသည်တို့နှင့် ပတ်သက်သည့် ဆောင်ပုဒ်များကို ကြွေးကြော်ခြင်းသာ ဖြစ်ပါက ယင်းမှာ အချည်းနှီးဖြစ်၏။ လက်တွေ့အရှိတရားသည် သင့်အပေါ်ကျရောက်သောအခါ၊ သင့်အား မိမိ၏အသက်ကို စွန့်လွှတ်ပူဇော်ရန် တောင်းဆိုသောအခါ သင်သည် နောက်ဆုံးအခိုက်အတန့်တွင်ကျမှ ညည်းညူမည်လော၊ လိုလားလက်ခံမည်လော၊ အမှန်တကယ် ကျိုးနွံနာခံမည်လော။ ဤသည်မှာ သင်၏ ဝိညာဉ်ရင့်ကျက်မှုကို စမ်းသပ်ခြင်း ဖြစ်သည်။ အကယ်၍ သင်၏အသက်ကို သင့်ထံမှ နုတ်ယူတော့မည့်ဆဲဆဲ အခိုက်အတန့်တွင် သင်သည် အေးအေးသက်သာဖြစ်ကာ လိုလားလက်ခံပြီး ညည်းညူခြင်းမရှိ ကျိုးနွံနာခံပါက၊ မိမိ၏ တာဝန်များ၊ ဝတ္တရားများနှင့် အလုပ်တာဝန်များကို အဆုံးတိုင်အောင် ဖြည့်ဆည်းခဲ့ပြီးပြီဟု ခံစားရပါက၊ သင်၏စိတ်နှလုံးသည် ဝမ်းမြောက်ပြီး ငြိမ်းချမ်းနေပါက၊ အကယ်၍ သင်သည် ဤကဲ့သို့ ထွက်ခွာသွားပါက ဘုရားသခင်အတွက်မူ သင်သည် လုံးဝ မထွက်ခွာသွားသေးပေ။ ထို့ထက် အခြားလောက၌ အခြားပုံသဏ္ဌာန်ဖြင့် အသက်ရှင်နေခြင်း ဖြစ်၏။ သင်၏ အသက်ရှင်မှုပုံစံကို ပြောင်းလဲလိုက်ခြင်းသာ ဖြစ်သည်။ အမှန်တကယ် မည်သည့်နည်းနှင့်မျှ သင်မသေဆုံးသေးချေ။ လူမူကား ယင်းကို “ဤသူသည် အသက်ငယ်ငယ်ဖြင့် သေဆုံးရသည်။ သနားစရာ ကောင်းလိုက်လေခြင်း” ဟု မြင်သည်။ သို့သော် ဘုရားသခင်၏ အမြင်တွင်မူ သင်သည် သေဆုံးသွားခြင်းသော်လည်းကောင်း၊ ဒုက္ခခံစားရန် ထွက်ခွာသွားခြင်းသော်လည်းကောင်း မဟုတ်ပေ။ ထိုအစား ကောင်းချီးမင်္ဂလာများ ခံစားမွေ့လျော်ရန်၊ ဘုရားသခင်နှင့် ပို၍နီးကပ်လာရန် ထွက်ခွာသွားခြင်း ဖြစ်သည်။ အဘယ့်ကြောင့်ဆိုသော် ဖန်ဆင်းခံတစ်ဦးအနေဖြင့် သင်သည် ဘုရားသခင်၏ အမြင်တွင် သင်၏တာဝန်ကို ကျေနပ်ဖွယ်ပုံစံဖြင့် ဖြည့်ဆည်းခဲ့ပြီ ဖြစ်သည်၊ သင်သည် ယခု သင်၏တာဝန်ကို အပြီးသတ် လုပ်ခဲ့ပြီ ဖြစ်သည်၊ ဖန်ဆင်းခံ လူတန်းစားများကြားတွင် ဤတာဝန်ကို သင်ဆက်လက်ထမ်းဆောင်ရန် ဘုရားသခင် အလိုမရှိတော့ပေ။ ဘုရားသခင်အတွက်မှာမူ သင်၏ “ထွက်ခွာသွားခြင်း” ကို “ထွက်ခွာသွားခြင်း” ဟု မခေါ်၊ သင်သည် “ခေါ်တော်မူခြင်း ခံရခြင်း”၊ “ယူဆောင်သွားခြင်း ခံရခြင်း”၊ သို့မဟုတ် “ခေါ်ဆောင်သွားခြင်း ခံရခြင်း” ဖြစ်ပြီး ယင်းက ကောင်းသောအရာ ဖြစ်သည်။ သင်တို့သည် ဘုရားသခင်၏ ခေါ်ဆောင်သွားခြင်းကို ခံလိုသလော။ (ကျွန်ုပ်တို့ ဤအရာကို တောင့်တပါသည်။) ဤအရာကို မတောင့်တနှင့်။ ဤဘဝတွင် လူက နားမလည်သောအရာ မြောက်မြားစွာ ရှိသည်။ ဤအဆင့်သို့ ရောက်ရှိရန် ဆန္ဒမစောနှင့်။ ထိုနေ့ရက်မရောက်ရှိမီ သင်သည် သမ္မာတရားကို ပို၍များများ နားလည်ရန်နှင့် ဖန်ဆင်းရှင်အကြောင်းကို ပို၍သိကျွမ်းရန် ကြိုးပမ်းရမည်။ မည်သည့်နောင်တကိုမျှ မချန်ရစ်ခဲ့လေနှင့်။ မည်သည့်နောင်တကိုမျှ မချန်ရစ်ထားရန် ငါ အဘယ့်ကြောင့်ဆိုရသနည်း။ ဤဘဝတွင် ဖန်ဆင်းရှင်အပေါ် စစ်မှန်သော နားလည်မှု၊ သိကျွမ်းမှုနှင့် ကြောက်ရွံ့ရိုသေမှုတို့ ရရှိလျက် ဘုရားသခင်ကို ကြောက်ရွံ့ရိုသေပြီး မကောင်းသောအကျင့်ကို ရှောင်ခြင်းဟူသည့် လမ်းကြောင်းကို လျှောက်လှမ်းရန်အလို့ငှာ အမှုအရာများကို နားလည်ခြင်းမှသည် ဖန်ဆင်းရှင်နှင့် အပြန်အလှန်ဆွေးနွေးရာ၌ ပါဝင်ရန် ဤအခွင့်အရေးကို ရရှိခြင်း၊ ဤအရည်အချင်းကို ပိုင်ဆိုင်ခြင်း၊ သတ်မှတ်ချက်များ ပြည့်စုံခြင်းသို့ သွားဖို့အတွက် လူတို့တွင် အချိန်အကန့်အသတ်သာ ရှိလေသည်။ အကယ်၍ ယခုတွင် သင်သည် ဘုရားသခင်က သင့်အား အလျင်အမြန် ခေါ်ဆောင်သွားရန် အလိုရှိပါက သင်ကိုယ်တိုင်၏ အသက်တာအတွက် တာဝန်မသိတတ်ခြင်း ဖြစ်သည်။ တာဝန်သိတတ်ရန်အတွက် သင်သည် မိမိကိုယ်မိမိ သမ္မာတရားဖြင့် ပြင်ဆင်ထားရန် ပို၍ ကြိုးစားသင့်သည်။ သင်၌ အမှုအရာများ ဖြစ်ပျက်လာသောအခါ မိမိကိုယ်ကို ပို၍ ဆင်ခြင်သုံးသပ်သင့်ပြီး သင်၏ကိုယ်ပိုင် အားနည်းချက်များကို အလျင်အမြန် ပြန်ထေမိစေသင့်သည်။ သမ္မာတရားကို လက်တွေ့လုပ်ဆောင်ခြင်း၊ စည်းမျဉ်းများနှင့်အညီ ပြုမူလုပ်ဆောင်ခြင်း၊ သမ္မာတရားစစ်မှန်မှုထဲသို့ ဝင်ရောက်ခြင်း၊ ဘုရားသခင်အား ပို၍သိကျွမ်းခြင်း၊ ဘုရားသခင်၏ အလိုတော်အား သိကျွမ်းနားလည်နိုင်ခြင်းနှင့် ဘဝကို အလဟဿ မနေထိုင်ခြင်းတို့ ရှိလာသင့်သည်။ ဖန်ဆင်းရှင်သည် မည်သည့်နေရာ၌ တည်ရှိကြောင်း၊ ဖန်ဆင်းရှင်၏ အလိုတော်သည် မည်သည့်အရာ ဖြစ်ကြောင်းနှင့် ဖန်ဆင်းရှင်သည် ဝမ်းမြောက်ခြင်း၊ အမျက်ဒေါသ၊ ဝမ်းနည်းခြင်းနှင့် ပျော်ရွှင်မှုအား မည်ကဲ့သို့ ထုတ်ဖော်ကြောင်းကို သိနားလည်လာရမည်။ ပို၍နက်နဲသော သိမြင်နားလည်ခြင်း သို့မဟုတ် ပြည့်စုံသော သိကျွမ်းခြင်းကို မရရှိနိုင်လျှင်ပင် အနည်းဆုံးအနေဖြင့် ဘုရားသခင်အား အခြေခံသဘော သိနားလည်ခြင်းကိုကား ပိုင်ဆိုင်ရမည်ဖြစ်ပြီး ဘုရားသခင်အား မည်သည့်အခါမျှ သစ္စာမဖောက်ဘဲ အခြေခံအားဖြင့် ဘုရားသခင်နှင့် သဟဇာတဖြစ်ရမည်။ ဘုရားသခင်အား အရေးစိုက်မှု ပြသရမည်။ ဘုရားသခင်အား အခြေခံကျသော နှစ်သိမ့်မှု ပေးရမည်။ ဖန်ဆင်းခံတစ်ဦးအတွက် သင့်လျော်ပြီး အခြေခံအားဖြင့် ဖြစ်နိုင်ခြေရှိသော အရာများကို လုပ်ဆောင်ရမည်။ ဤအရာများမှာ လွယ်ကူသော အရာများကား မဟုတ်ချေ။ လူတို့သည် ၎င်းတို့၏ တာဝန်များကို ဖြည့်ဆည်းခြင်းဖြစ်စဉ်တွင် သူတို့ကိုယ်သူတို့ တဖြည်းဖြည်း သိနားလည်လာနိုင်ပြီး ထိုသို့အားဖြင့် ဘုရားသခင်ကို သိနားလည်လာနိုင်သည်။ ဤဖြစ်စဉ်သည် အမှန်အားဖြင့် ဖန်ဆင်းရှင်နှင့် ဖန်ဆင်ခံများကြားရှိ အပြန်အလှန် အကျိုးပြုမှုဖြစ်ပြီး လူတစ်ဦး၏ အသက်တာတစ်လျှောက်၌ စားမြုံ့ပြန်ထိုက်သော ဖြစ်စဉ်တစ်ခု ဖြစ်သင့်သည်။ ဤဖြစ်စဥ်သည် နာကျင်ခက်ခဲသော ဖြစ်စဉ်တစ်ခုအစား လူတို့ ပျော်ရွှင်ခံစားသင့်သော အရာတစ်ခု ဖြစ်သည်။ ထို့ကြောင့် လူတို့သည် ၎င်းတို့၏ တာဝန်များကို ဖြည့်ဆည်းသည့် နေ့ညများ၊ နှစ်လများကို မြတ်နိုးသင့်ပေသည်။ ၎င်းတို့သည် အသက်တာ၏ ဤအဆင့်ကို မြတ်နိုးသင့်ပြီး ဝန်ထုပ်ဝန်ပိုး သို့မဟုတ် ဝန်လေးစရာအဖြစ် သဘောမထားသင့်ပေ။ ၎င်းတို့သည် ၎င်းတို့အသက်တာ၏ ဤအဆင့်အား အရသာခံသင့်ပြီး ယင်း၏ အတွေ့အကြုံကို အခြေခံသော အသိပညာကို ရယူသင့်သည်။ ထို့နောက် ၎င်းတို့သည် သမ္မာတရားအား နားလည်ခြင်းကို ရရှိပြီး လူသား၏ ပုံသဏ္ဌာန်အတိုင်း အသက်ရှင်မည်ဖြစ်ကာ ဘုရားသခင်ကို ကြောက်ရွံ့ရိုသေသော နှလုံးသားကို ပိုင်ဆိုင်ပြီး မကောင်းမှုပြုလုပ်ခြင်း ပို၍ပို၍ နည်းလာမည် ဖြစ်သည်။ သင်သည် သမ္မာတရား မြောက်မြားစွာကို နားလည်မည်ဖြစ်ပြီး ဘုရားသခင်အား ဝမ်းနည်းစေသည့် သို့မဟုတ် အမျက်ထွက်စေသည့် အရာများကို ပြုလုပ်မည်မဟုတ်ချေ။ ဘုရားသခင်ရှေ့မှောက်သို့ တိုးဝင်သောအခါ ဘုရားသခင် သင့်ကို နောက်ထပ် မုန်းတီးခြင်းမရှိတော့ဟု သင်ခံစားရမည်။ ဝမ်းမြောက်ဖွယ် ကောင်းလိုက်လေခြင်း။ လူတစ်ဦးသည် ဤအရာကို ရရှိထားသည့်အခါ သူသေရတော့မည်ဆိုလျှင်ပင် စိတ်အေးချမ်းသာမည် မဟုတ်လော။ သို့ဆိုလျှင် ယခုသေဖို့အတွက် တောင်းဆိုနေသော လူတို့၌ အဘယ်ပြဿနာ ရှိသနည်း။ ၎င်းတို့သည် လွတ်မြောက်ရန်သာ အလိုရှိပြီး ဒုက္ခမခံလိုကြပေ။ ဘုရားသခင်ထံ သွား၍ သတင်းပို့နိုင်ရန် ဤဘဝအား အမြန်အဆုံးသတ်ရန်သာ အလိုရှိကြသည်။ သင်သည် ဘုရားသခင်ထံ သတင်းပို့လိုသော်လည်း ဘုရားသခင်က သင့်ကို အလိုမရှိသေးပေ။ ဘုရားသခင်က သင့်ကို မခေါ်မီကပင် သင်သည် သူ့ထံ အဘယ့်ကြောင့် သတင်းပို့ရမည်နည်း။ သင်၏အချိန်မတန်ခင် သူ့ကို သတင်းမပို့လေနှင့်။ ဤသည်မှာ ကောင်းသောအရာ မဟုတ်ပေ။ အကယ်၍ သင်သည် အဓိပ္ပာယ်ရှိပြီး တန်ဖိုးရှိသော အသက်တာဖြင့် အသက်ရှင်နေထိုင်ကာ ဘုရားသခင်က သင့်ကို ခေါ်ဆောင်သွားပါက ယင်းမှာ ဝမ်းမြောက်ဖွယ်ကောင်းသော အရာတစ်ခုဖြစ်ပေသည်။

ငါတို့ ယနေ့ ဆွေးနွေးခဲ့ပြီးသောအရာကို သင်တို့အားလုံး နားလည်သလော။ ဤနှုတ်ကပတ်တော်များသည် သင်တို့အ‌ပေါ် နောက်ထပ် မည်သည့်ဝန်ထုပ်ဝန်ပိုးကိုမျှ ချမထားဖို့ ငါမျှော်လင့်သည်။ ထို့ပြင် ယနေ့ မိတ်သဟာယပြုချက်၏ အကြောင်းအရာသည် သင်တို့အား အထိတ်တလန့် မဖြစ်စေခဲ့ဖို့ ငါ မျှော်လင့်သည်။ ထို့ထက် ယင်းသည် သင်တို့နားလည်သင့်သည့် သမ္မာတရားတချို့ကို သင်တို့အား နားလည်ခွင့်ပေးဖို့ ငါမျှော်လင့်သည်။ ထိုသို့ဖြင့် သင်တို့သည် ဘုရားသခင်အား ယုံကြည်ခြင်းကိစ္စကို ပို၍ နားလည်သဘောပေါက်ကာ ယင်းနှင့်ပတ်သက်၍ ပိုအခြေခိုင်ပြီး ပိုရှင်းလင်းသည်ဟု ခံစားရစေရန် ဖြစ်သည်။ ငါ၏ နှုတ်ကပတ်တော်များသည် ဤအကျိုးသက်ရောက်မှုကို ရရှိခဲ့ပြီး ဖြစ်သလော။ (ရရှိခဲ့ပြီး ဖြစ်ပါသည်။) ယင်းကို ငါ့အား ဖော်ပြလော့။ (အတိတ်တွင် ကျွန်ုပ်သည် ဧဝံဂေလိဖြန့်ဝေခြင်းကို ကျွန်ုပ်၏တာဝန်အဖြစ် အမှန်တကယ် မသတ်မှတ်ခဲ့ပါ။ ကျွန်ုပ်၏ စိတ်နှလုံးထဲတွင် မှားယွင်းသောအမြင် မြောက်မြားစွာကို သိုထားခဲ့ပါသည်။ ကျွန်ုပ်၏ အခြားတာဝန်များကို ညံ့ဖျင်းစွာ ထမ်းဆောင်ထားပါမှ ဧဝံဂေလိဖြန့်ဝေရန် တာဝန်ပေးခံရမည်ဟု ထင်ခဲ့ပါသည်။ ဧဝံဂေလိဖြန့်ဝေခြင်းသည် အဆိုးဆုံးတာဝန် ဖြစ်သည်ဟု ကျွန်ုပ်မြင်ခဲ့ပြီး ဧဝံဂေလိဖြန့်ဝေခြင်းကို လူအား ဘုရားသခင်ပေးအပ်သော စေခိုင်းချက်တစ်ခုအဖြစ် အမှန်တကယ် မသတ်မှတ်ခဲ့ပါ။ ယနေ့တွင် ဘုရားသခင်၏ မိတ်သဟာယပြုချက်က ဧဝံဂေလိဖြန့်ဝေခြင်းနှင့် ဘုရားသခင်အား သက်သေခံခြင်းသည် လူ၏ တာဝန်ဝတ္တရားဖြစ်ပြီး လူတို့အနေဖြင့် ဤတာဝန်ဝတ္တရားကို ကျင့်ဝတ်သိက္ခာအရ မဖြစ်မနေ သွား၍ ဖြည့်ဆည်းရမည်ဟု ခံစားရသင့်ကြောင်း ပြောပြခဲ့ပါသည်။ ထိုအခါမှသာ ကျွန်ုပ်၏ အမြင်များသည် လွန်စွာ အဓိပ္ပာယ်မဲ့ကြောင်းနှင့် ကျွန်ုပ်အနေဖြင့် ဧဝံဂေလိဖြန့်ဝေခြင်း တာဝန်ကို အမှန်တကယ် လျောက်ပတ်စွာ ထမ်းဆောင်လိုခြင်း မရှိအောင် ထိုအမြင်များက လုပ်ထားခြင်း ဖြစ်ကြောင်းကို သိမြင်ခဲ့ပါသည်။ ဘုရားသခင်၏ ယနေ့ မိတ်သဟာယပြုချက်ကို နားထောင်ခြင်းကြောင့် ကျွန်ုပ်၏ အမြင်များ ပြောင်းပြန်လှန်သွားပါပြီ။) ကောင်းပေစွ။ အခြားသူတစ်ဦးဦး ပြောလိုသေးသလော။ (ကျွန်ုပ်သည် သေးငယ်သော ဖန်ဆင်းခံတစ်ဦးသာ ဖြစ်သည်ဟု ထင်မှတ်နေကျဖြစ်ပြီး ကျွန်ုပ်၏ ဤတာဝန်ထမ်းဆောင်ခြင်းကို ကြီးမားသောကိစ္စ ဖြစ်သည်ဟု မယူဆခဲ့ပါ။ ကျွန်ုပ်၏တာဝန်သည် အရေးမကြီးသည့်အပြင် အာရုံစိုက်ခံရဖို့ မထိုက်တန်ဟု ခံစားခဲ့ပါသည်။ သို့သော်လည်း ဘုရားကြိုတင်ခွဲခန့်ထားသော လူတိုင်းက ထမ်းဆောင်သည့် တာဝန်များကို ဘုရားကိုယ်တိုင် စီမံထားခဲ့ကြောင်းနှင့် ယင်းတို့အားလုံးကို ဘုရားက ဂရုတစိုက် ကြံစည်စီစဉ်ထားခဲ့ကြောင်း ယနေ့ ဘုရားသခင်ပြောသည်ကို ကြားသိခဲ့ရပါသည်။ အကယ်၍ လူတို့သည် ၎င်းတို့၏ တာဝန်များကို ပေးအပ်မြှုပ်နှံမှုဖြင့် မထမ်းဆောင်ပါက မိမိတို့၏ တာဝန်များနှင့် ဝတ္တရားများကို ရှောင်လွှဲနေခြင်း ဖြစ်ပါသည်။ အထူးသဖြင့် ဧဝံဂေလိဖြန့်ဝေခြင်းနှင့် ဘုရားသခင်အား သက်သေခံခြင်းသည် ဘုရားသခင်က လူတိုင်းကို ပေးအပ်သော စေခိုင်းချက်တစ်ခုဖြစ်ပြီး ဖန်ဆင်းခံများ၏ တာဝန်ဝတ္တရားဖြစ်ကြောင်း ဘုရားသခင်၏ မိတ်သဟာယပြုချက်ထဲတွင် ကျွန်ုပ်ကြားရသောအခါ ဘုရားသခင်စီမံထားသည့် လမ်းကြောင်းကို လျှောက်လှမ်းရန်အတွက် ကြီးမားသော ယုံကြည်မှုနှင့် ကြီးမားသော ရည်သန်မျှော်မှန်းချက်ကို ကျွန်ုပ်ရလိုက်ပါသည်။ ကျွန်ုပ်သည် မိမိ၏အသက်တာအတွက် တာဝန်ယူလိုပါသည်။ ကျွန်ုပ်၏တာဝန်ကို ကောင်းစွာ လုပ်ဆောင်လိုပြီး ကျွန်ုပ်၏ အထူးတာဝန်ကို အပြီးသတ် လုပ်လိုပါသည်။ ထိုအခါ ကျွန်ုပ်သည် ဘုရားသခင်ကို အနည်းငယ်မျှ နှစ်သိမ့်ပေးနိုင်မည် ဖြစ်ပါသည်။ ဘုရားသခင်၏ မိတ်သဟာယပြုချက်ကို နားထောင်ပြီးနောက် ကျွန်ုပ်၏စိတ်နှလုံးသည် အထူးသဖြင့် စေ့ဆော်ခြင်းခံခဲ့ရပါ၏။ ဘုရားသခင် ကျွန်ုပ်အား ပေးထားသည့် စေခိုင်းချက်ကို နောက်ထပ် လျှော့တွက်နေ၍ မဖြစ်တော့ဟု ခံစားမိပါသည်။) မှန်လိုက်လေစွ။ လူတိုင်းက ထိုသို့ပင် ခံစားရသည် မဟုတ်လော။ (ခံစားရပါသည်။) သင်မြင်တွေ့နိုင်သည့်အတိုင်း လူတို့သည် သမ္မာတရားကို နားမလည်သောအခါ နားဝေတိမ်တောင် ဖြစ်လာကြပြီး ဧဝံဂေလိဖြန့်ဝေခြင်းကဲ့သို့ ကြီးမားလှသော အရာကိုပင် လျစ်လျူရှုနိုင်ကြသည်။ သို့သော်လည်း သမ္မာတရားကို ရှင်းလင်းစွာ မိတ်သဟာယပြုပေးသောအခါ လူတို့သည် ဤကိစ္စ၏ အရေးပါမှုကို သဘော‌ပေါက်ကြသည်။ ၎င်းတို့ကိုယ်တိုင်၏ အနေအထားကို သိလာကြပြီးလျှင် ၎င်းတို့ကိုယ်ပိုင် အသက်တာ၏ တန်ဖိုးကို သိလာကြသည်။ ဤအရာသည် ၎င်းတို့၌ ဦးတည်ရာရှိသည်ဟု ဆိုလိုသလော။ (ဆိုလိုပါသည်။) သမ္မာတရားသည် လူတို့၏ စိတ်နှလုံးများကို ပြောင်းလဲပေးနိုင်သည်။ သမ္မာတရားမှလွဲ၍ သင်၏ စိတ်နှလုံးကို စေ့ဆော်နိုင်ပြီး သင့်အမြင်များကို ပြောင်းလဲပေးနိုင်သော သဘောတရား တစ်ခုခုရှိသလော။ တစ်ခုမျှ မရှိပေ၊ သမ္မာတရား၏ နည်းလမ်းကသာ သင့်အမြင်များကို ပြောင်းလဲပေးနိုင်သည်။ ဤနည်းလမ်းက သင့်အမြင်များကို ပြောင်းလဲပေးနိုင်သည်မှာ အဘယ့်ကြောင့်နည်း။ ဤသမ္မာတရားများသည် အလွန်လက်တွေ့ကျသည်ဖြစ်၍ ယင်းတို့ကို မည်သူမျှ မငြင်းဆိုနိုင်သောကြောင့် ဖြစ်သည်။ ဤသမ္မာတရားများသည် လူ့ဘဝနှင့်ရော လူ့ဘဝ၏ အထူးတာဝန်နှင့်ပါ ဆက်စပ်နေလေသည်။ ယင်းတို့သည် လူသားများနှင့် နီးကပ်စွာ ဆက်နွှယ်နေ၏။ ၎င်းတို့နှင့် မဆက်စပ်သည် မဟုတ်ပေ။ ယင်းတို့သည် အရေးမပါသော အရာတချို့ မဟုတ်ဘဲ လူ့ဘဝ၏ အထူးတာဝန်၊ အသက်ရှင်မှု၏ တန်ဖိုး၊ အသက်ရှင်မှု၏ အဓိပ္ပာယ်တို့နှင့် ဆက်စပ်နေသည်။ ထို့ကြောင့် ရှင်းလင်းစွာ ပြောဆိုသောအခါ ဤနှုတ်ကပတ်တော်များသည် လူတို့အနေဖြင့် ဤနှုတ်ကပတ်တော်များကို လက်ခံပြီး ၎င်းတို့၏ အမြင်များကို ပြောင်းလဲလာမည့်အကြောင်း ၎င်းတို့၏ စိတ်နှလုံးများကို ပြောင်းလဲပေးနိုင်လေသည်။ ယနေ့ မိတ်သဟာယပြုချက်သည် လူတို့၏ တာဝန်များအ‌ပေါ် ၎င်းတို့၏ စိတ်နေစိတ်ထားများကို ပြောင်းလဲရာ၌ တိကျသော အခန်းကဏ္ဍတွင် ပါဝင်ခဲ့ပေမည်။ အကယ်၍ ဤသမ္မာတရားများသည် လူတို့၏ အသက်တာများ၊ ၎င်းတို့ အသက်ရှင်နေထိုင်ပုံနှင့် ၎င်းတို့လိုက်စားသည့် ဦးတည်ချက်တို့ကို ပြောင်းလဲပေးနိုင်ပါက ဝမ်းမြောက်ဖွယ် ဖြစ်ပေမည်။ ယင်းက ငါသည် ယနေ့ ဤနှုတ်ကပတ်တော်များကို အချည်းနှီး ပြောဆိုခဲ့ခြင်းမဟုတ်ဟု ဆိုလိုပေမည်။ ယခုတွင် ငါသည် ဤနှုတ်ကပတ်တော်များနှင့် ပတ်သက်ပြီး ငါ၏ မိတ်သဟာယပြုချက်ကို လက်စသတ်ခဲ့ပြီဖြစ်၍ သင်တို့သည် သင်တို့၏ နေ့စဉ်အသက်တာများတွင် ယင်းတို့ကို တဖြည်းဖြည်းချင်း အသုံးချရန်၊ တွေ့ကြုံခံစားရန်နှင့် ဆင်ခြင်မှတ်သားရန် လိုအပ်သည်။ ဤသမ္မာတရားများသည် သင်၏ လက်တွေ့အရှိတရားနှင့် သင်၏ အသက်ဖြစ်လာသောအခါ ဘုရားသခင်သည် သင်၏ဖန်ဆင်းခံဖြစ်ခြင်း ဂုဏ်ပုဒ်ကို ဖျောက်ဖျက်မည် မဟုတ်သည့်အပြင် သင်သည် တစ်စုံတစ်ရာကို အမှန်တကယ် ရရှိပြီးဖြစ်လိမ့်မည်။ ထိုအချိန်မျိုးတွင် ဘုရားသခင်သည် သင့်အား မိမိအသက်တာကို ဆက်ကပ်ရန်အပြင် သူ၏ လုပ်ဆောင်ချက်များအား ထင်ရှားစေဖို့နှင့် သူ၏ ဧဝံဂေလိတရားအား သက်သေခံဖို့အတွက် သင့်အသက်တာကို အသုံးပြုရန် အမှန်တကယ် တောင်းဆိုသောအခါ သင်သည် စိုးရိမ်ခြင်းနှင့် ကြောက်ရွံ့ခြင်း ကင်းမည်ဖြစ်ပြီး သေချာပေါက် ငြင်းဆန်မည် မဟုတ်တော့ပေ။ သင်သည် ပျော်ရွှင်စွာ လက်ခံမည်ဖြစ်သည်။ ဖန်ဆင်းရှင်က သင့်အား အပ်နှံထားသော စေခိုင်းချက်တစ်ခု ဖြစ်သည်နှင့်အညီ သင်သည် ဘုရားသခင်ထံမှ ယင်းကို လက်ခံမည်ဖြစ်သည်။ ထို့ကြောင့် ထိုနေ့ရက်ကို စောင့်စားကြိုဆိုရန်အတွက် လူတို့အနေဖြင့် ဤသမ္မာတရားများကို နားလည်နိုင်ခြင်းအပြင် မိမိတို့ကိုယ်ကို ဘုရားသခင်၏ နှုတ်ကပတ်တော်များဖြင့် ပြင်ဆင်ထားရန်၊ ဘုရားသခင်၏ အမှုတော်၊ ဘုရားသခင်၏ စိတ်နေသဘောထားတို့နှင့် ပတ်သက်၍ ပိုကြီးမားပြီး ပိုနက်နဲသော အသိပညာကို ရရှိရန်အတွက် ယခု ကြိုးစားရမည် ဖြစ်သည်။ ဤသည်မှာ အရေးကြီးဆုံးအရာ ဖြစ်၏။

၂၀၁၈ ခုနှစ်၊ ဒီဇင်ဘာလ ၂၅ ရက်

အရှေ့သို့- သမ္မာတရားကို နားလည်ခြင်းအားဖြင့်သာ ဘုရားသခင်၏လုပ်ဆောင်ချက်များကို သိနိုင်သည်

နောက်တစ်ခုသို့- လူနှင့် ဘုရားသခင်ကြားက ဆက်နွှယ်မှုကို ပြုပြင်ဖို့ အရေးကြီး၏

ယနေ့မှာ ကပ်ဘေးများကျရောက်နေပြီ။မည်သို့လုပ်ဆောင်မှ သခင်တဖန်ပြန်ကြွလာခြင်းကို ကြိုဆိုရန် လက်မလွှတ်နိုင်မည်နည်း။ကျွန်ုပ်တို့ကိုဆက်သွယ်ပါ။သင့်အားအဖြေပြောပြပေးမည်။

ဘုရားသခင်၏ ပေါ်ထွန်းခြင်းနှင့် အမှုတော် ဘုရားသခင်ကို သိကျွမ်းခြင်းနှင့် စပ်လျဉ်း၍ နောက်ဆုံးသော ကာလ ခရစ်တော်၏ ဟောပြောချက်များ သမ္မာတရားကို လိုက်စားခြင်းနှင့် စပ်လျဉ်း၍ ၁ တရားစီရင်ခြင်းသည် ဘုရားသခင်၏ အိမ်တော်မှ စတင်သည် နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှ စံနမူနာ နှုတ်ကပတ်တော်များ ဘုရားသခင်၏ နေ့စဉ် နှုတ်ကပတ်တော်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ နိုင်ငံတော် ဧဝံဂေလိတရားတော် ဖြန့်ဝေခြင်းအတွက် လမ်းညွှန်ချက်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ဘုရားသခင်၏ အသံကို နားထောင်လော့ ဘုရားသခင်၏ ပေါ်လာခြင်းကို ရှုမြင်ကြလော့ နိုင်ငံတော်၏ ဧဝံဂေလိတရားအကြောင်း စံပြုလောက်သော အမေးအဖြေများ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ

ဆက်တင်

  • စာတို
  • နောက်ခံအပြင်အဆင်များ

တပြေးညီ အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာကြောင်း အကွာအဝေး

စာမျက်နှာအနံ

မာတိကာ

ရှာဖွေမည်

  • ဤစာကို ရှာမည်
  • ဤစာအုပ်ကို ရှာမည်

Messenger မှတဆင့် ကျွန်ုပ်တို့ကို ဆက်သွယ်လိုက်ပါ။