ငါ၏ အိမ်တွင် မည်သူ နေထိုင်ခဲ့ဖူးသနည်း။ ငါ့အတွက် မည်သူ မားမားမတ်မတ် ရပ်တည်ပေးခဲ့ဖူးသနည်း။ ငါ့ကိုယ်စား မည်သူ ဆင်းရဲဒုက္ခ ခံစားခဲ့ဖူးသနည်း။ ငါ့ရှေ့မှောက်တွင် မည်သူ ကတိပြုခဲ့ဖူးသနည်း။ ယနေ့တိုင်အောင် ငါ့နောက်သို့ လိုက်ခဲ့ပြီး အေးစက်စက် မဖြစ်သွားခဲ့သူ မည်သူရှိသနည်း။ လူသားအားလုံးသည် အဘယ်ကြောင့် အေးစက်ပြီး ခံစားချက် ကင်းမဲ့နေကြသနည်း။ လူသားမျိုးနွယ်သည် အဘယ်ကြောင့် ငါ့ကို စွန့်ပစ်ခဲ့ကြသနည်း။ လူတို့သည် အဘယ်ကြောင့် ငါ့အပေါ် အလွန်အမင်း မနှစ်မြို့မှုကို ခံစားကြရသနည်း။ လူ့လောကတွင် အဘယ်ကြောင့် နွေးထွေးမှု မရှိရသနည်း။ ဇိအုန်တွင် ရှိနေစဉ် ငါသည် ကောင်းကင်ဘုံ၌ရှိသော နွေးထွေးမှုကို မြည်းစမ်းခဲ့ပြီး ဇိအုန်တွင် ရှိနေစဉ် ငါသည် ကောင်းကင်ဘုံ၌ရှိသော ကောင်းချီးမင်္ဂလာကို ပျော်မွေ့ခံစားခဲ့သည်။ တစ်ဖန် ငါသည် လူသားမျိုးနွယ်အလယ်တွင် နေထိုင်ခဲ့ပြီး လူ့လောက၏ ခါးသီးမှုကို မြည်းစမ်းခဲ့ကာ လူတို့အကြား တည်ရှိသော ဖြစ်ပျက်မှုအားလုံးကို ငါ၏ မျက်လုံးဖြင့်တပ်အပ် မြင်တွေ့ခဲ့ရသည်။ ငါ “ပြောင်းလဲ” ခဲ့သည်နှင့်အမျှ လူသည်လည်း သတိမထားမိဘဲ ပြောင်းလဲခဲ့ပြီး ဤနည်းအားဖြင့်သာ သူသည် ယနေ့အချိန်သို့ ရောက်ရှိလာခဲ့သည်။ လူက ငါ့အတွက် တစ်စုံတစ်ရာ လုပ်ဆောင်ပေးနိုင်ရန် ငါ မလိုအပ်သည့်အပြင် ငါ့အတွက် သူက တစ်စုံတစ်ရာ တိုးပွားအောင် လုပ်ဆောင်ပေးရန်လည်း ငါ မလိုအပ်ပေ။ သူသည် ငါ၏ အစီအစဉ်နှင့်အညီ ပြုမူနိုင်ရန်နှင့် ငါ့ကို ပုန်ကန်ခြင်း သို့မဟုတ် ငါ့အတွက် ရှက်ဖွယ်အမှတ်အသားတစ်ခု မဖြစ်စေဘဲ ငါ့အတွက် အားကောင်းသော သက်သေခံချက်ပေးရန်သာ ငါ အလိုရှိသည်။ လူတို့အကြားတွင် ငါ့အတွက် ကောင်းမွန်စွာ သက်သေခံခဲ့ပြီး ငါ၏ နာမကို ဘုန်းထင်ရှားစေခဲ့သူများ ရှိခဲ့သော်လည်း လူ၏ လက်တွေ့လုပ်ဆောင်မှုများ သို့မဟုတ် အပြုအမူများသည် ငါ၏ စိတ်နှလုံးကို မည်သို့များ ကျေနပ်စေနိုင်မည်နည်း။ သူသည် ငါ၏ စိတ်နှလုံးနှင့် မည်သို့များ ကိုက်ညီနိုင်မည်နည်း၊ သို့မဟုတ် ငါ၏ ရည်ရွယ်ချက်များကို မည်သို့များ ဖြည့်ဆည်းနိုင်မည်နည်း။ မြေကြီးပေါ်ရှိ တောင်များနှင့် ရေများအပြင် မြေကြီးပေါ်ရှိ ပန်းများ၊ မြက်များနှင့် သစ်ပင်များအားလုံးသည် ငါ၏ လက်ရာများကို ပြသပြီး အားလုံးသည် ငါ၏ နာမအတွက် တည်ရှိကြသည်။ သို့ရာတွင် လူသည် ငါတောင်းဆိုသော စံနှုန်းများကို အဘယ်ကြောင့် မမီနိုင်ရသနည်း။ ဤသည်မှာ သူ၏ ယုတ်ညံ့မှုကြောင့် ဖြစ်နိုင်သလော။ ယင်းမှာ သူ့ကို ငါ ချီးမြှောက်ခြင်းကြောင့် ဖြစ်နိုင်သလော။ ငါသည် သူ့အပေါ် အလွန် ရက်စက်လွန်းနေခြင်း ဖြစ်နိုင်သလော။ လူသည် ငါ၏ တောင်းဆိုချက်များကို အဘယ်ကြောင့် အစဉ်သဖြင့် ကြောက်ရွံ့နေရသနည်း။ ယနေ့ နိုင်ငံတော်ထဲရှိ ငါ ရွေးချယ်ထားသောလူများအကြားတွင် သင်တို့သည် ငါ၏ အသံကိုသာ နားထောင်ပြီး ငါ၏ မျက်နှာကို မြင်တွေ့ရန် အဘယ်ကြောင့် ဆန္ဒမရှိကြသနည်း။ သင်တို့သည် ငါ၏ နှုတ်ကပတ်တော်များကို ငါ၏ ဝိညာဉ်တော်နှင့် ယှဉ်တွဲခြင်းမရှိဘဲ အဘယ်ကြောင့် ကြည့်ရုံသာ ကြည့်ကြသနည်း။ သင်တို့သည် အဘယ်ကြောင့် ငါ့ကို အထက်ကောင်းကင်နှင့် အောက်မြေကြီးဟူ၍ ဤမျှ သီးခြားခွဲထားကြသနည်း။ မြေကြီးပေါ်တွင် ရှိနေစဉ် ငါသည် ကောင်းကင်ဘုံတွင် ရှိနေသော ငါနှင့် မတူညီခြင်း ဖြစ်နိုင်သလော။ ကောင်းကင်ဘုံတွင် ရှိနေစဉ် ငါသည် မြေကြီးပေါ်သို့ ဆင်းသက်၍ မရနိုင်ခြင်း ဖြစ်နိုင်သလော။ မြေကြီးပေါ်တွင် ရှိနေစဉ် ငါသည် ကောင်းကင်ဘုံသို့ ချီဆောင်ခြင်းခံရရန် မထိုက်တန်ခြင်း ဖြစ်နိုင်သလော။ ယင်းမှာ မြေကြီးပေါ်တွင် ရှိနေစဉ် ငါသည် ယုတ်ညံ့သော သတ္တဝါတစ်ဦး ဖြစ်သည့်အလား၊ ကောင်းကင်ဘုံတွင် ရှိနေစဉ် ငါသည် မွန်မြတ်သော ဖြစ်တည်မှုတစ်ခု ဖြစ်သည့်အလား၊ ကောင်းကင်နှင့် မြေကြီးအကြားတွင် ကူးဖြတ်၍မရနိုင်သော ချောက်ကမ်းပါးတစ်ခု ထာဝရ တည်ရှိနေသည့်အလား ဖြစ်သည်။ သို့သော် လူ့လောကတွင် လူတို့သည် ဤအရာများ၏ ဇာစ်မြစ်များနှင့်ပတ်သက်၍ မည်သည့်အရာကိုမျှ မသိကြပုံရသော်လည်း ငါ၏ နှုတ်ကပတ်တော်များတွင် အသံသာရှိပြီး အဓိပ္ပာယ်မရှိသည့်အလား ငါ့ကို အစဉ်သဖြင့် ဆန့်ကျင်နေခဲ့ကြသည်။ လူသားမျိုးနွယ်အားလုံးသည် ငါ၏ နှုတ်ကပတ်တော်များအပေါ် အားထုတ်မှု ပြုကြပြီး ငါ၏ အပြင်ပန်း ပုံသဏ္ဌာန်ကို ၎င်းတို့ကိုယ်တိုင်၏ သုတေသနပြုမှုများ လုပ်ဆောင်ကြသော်လည်း ၎င်းတို့အားလုံးသည် ကျရှုံးမှုနှင့် ရင်ဆိုင်ရကာ ၎င်းတို့၏ အားထုတ်မှုများက မည်သည့်အသီးအပွင့်မျှ မသီးဘဲ ထိုအစား ငါ၏ နှုတ်ကပတ်တော်များ၏ ဒဏ်ခတ်ခြင်းကို ခံရပြီး တစ်ဖန် ပြန်ထရန် မဝံ့မရဲ ဖြစ်ကြသည်။

ငါသည် လူတို့၏ ယုံကြည်ခြင်းကို စစ်ကြောသောအခါ ၎င်းတို့ထဲမှ တစ်ဦးတစ်ယောက်မျှ စစ်မှန်စွာ သက်သေမခံပေ၊ ၎င်းတို့ထဲမှ တစ်ဦးတစ်ယောက်မျှ ၎င်းတို့၏ အရာအားလုံးကို ပူဇော်ဆက်ကပ်နိုင်စွမ်း မရှိကြပေ၊ ထိုအစား ငါသည် ၎င်းတို့၏ စိတ်နှလုံးများကို လုယူတော့မည့်အလား ၎င်းတို့သည် ပုန်းကွယ်နေကြပြီး မိမိတို့ကိုယ်ကို ရင်ဖွင့်ရန် ငြင်းပယ်ကြသည်။ ယောဘပင်လျှင် သူ၏ စမ်းသပ်မှုအတွင်း၌ အမှန်တကယ် ခိုင်မာစွာ မရပ်တည်ခဲ့ဖူးသည့်အပြင် ဆင်းရဲဒုက္ခအလယ်တွင် မွှေးကြိုင်သော ရနံ့ကို မထုတ်လွှတ်ခဲ့ပေ။ လူအားလုံးသည် နွေဦးရာသီ၏ နွေးထွေးမှုတွင် စိမ်းလန်းမှု အရိပ်အယောင် အနည်းငယ်ကို ထုတ်လုပ်ကြသော်လည်း ဆောင်းရာသီ၏ အေးစက်သော လေပြင်းများထဲတွင် မည်သည့်အခါမျှ စိမ်းလန်းမနေကြပေ။ သူ၏ အရိုးပေါ်အရေတင်ဖြစ်ပြီး ပိန်ချုံးနေသော ဝိညာဉ်ရင့်ကျက်မှုဖြင့် လူသည် ငါ၏ ရည်ရွယ်ချက်များကို မဖြည့်ဆည်းနိုင်ပေ။ လူသားမျိုးနွယ် တစ်ရပ်လုံးတွင် အခြားသူများအတွက် စံပြအဖြစ် အစေခံနိုင်သူ တစ်ဦးတစ်ယောက်မျှ မရှိပေ၊ အကြောင်းမှာ လူအားလုံးသည် အခြေခံအားဖြင့် တူညီကြပြီး တစ်ဦးနှင့်တစ်ဦး မကွဲပြားကြဘဲ ၎င်းတို့ကို တစ်ဦးနှင့်တစ်ဦး ခွဲခြားသိမြင်ရန် အနည်းငယ်မျှသာ ရှိသောကြောင့် ဖြစ်သည်။ ဤအကြောင်းကြောင့် ယနေ့တိုင်အောင် လူတို့သည် ငါ၏ လုပ်ဆောင်မှုများကို အပြည့်အဝ မသိနိုင်သေးပေ။ ငါ၏ ပြစ်တင်ဆုံးမခြင်းသည် လူသားမျိုးနွယ် တစ်ရပ်လုံးအပေါ် ကျရောက်လာသောအခါမှသာ ၎င်းတို့သည် မိမိတို့ကိုယ်တိုင် သတိမထားမိဘဲ ငါ၏ လုပ်ဆောင်မှုများကို သတိပြုမိလာကြလိမ့်မည်ဖြစ်ပြီး ငါက မည်သည့်အရာကိုမျှ လုပ်ဆောင်ခြင်း သို့မဟုတ် မည်သူ့ကိုမျှ အတင်းအကျပ် စေခိုင်းခြင်း မရှိဘဲ လူသည် ငါ့ကို သိကျွမ်းလာလိမ့်မည်ဖြစ်ကာ ထိုသို့ဖြင့် ငါ၏ လုပ်ဆောင်မှုများကို မြင်တွေ့ရလိမ့်မည်။ ဤသည်မှာ ငါ၏ အစီအစဉ် ဖြစ်သည်၊ ယင်းမှာ ငါ၏ လုပ်ဆောင်မှုများကို ထုတ်ဖော်သည့် ပုံစံဖြစ်ပြီး ယင်းမှာ လူသိသင့်သည့်အရာ ဖြစ်သည်။ နိုင်ငံတော်ထဲတွင် အရာခပ်သိမ်းသည် စတင် နိုးကြားလာပြီး သက်ဝင်လှုပ်ရှားမှုကို ဖြာထွက်စေသည်။ မြေကြီး၏ အခြေအနေ ပြောင်းလဲမှုများကြောင့် ကုန်းမြေတစ်ခုနှင့် အခြားတစ်ခုအကြားရှိ နယ်နိမိတ်များသည်လည်း စတင် ရွေ့လျားလာသည်။ ကုန်းမြေသည် ကုန်းမြေမှ ကွဲကွာသွားပြီး ကုန်းမြေသည် ကုန်းမြေနှင့် ပေါင်းစည်းသွားသောအခါ ဤသည်မှာ တိုင်းနိုင်ငံတစ်ခုစီကို ငါ အစိတ်စိတ်အမွှာမွှာ ရိုက်ချိုးမည့် အချိန်ဖြစ်လိမ့်မည်ဟု ငါ ပရောဖက်ပြုခဲ့ပြီး ဖြစ်သည်။ ဤအချိန်တွင် ငါသည် အရာခပ်သိမ်းကို အသစ်တစ်ဖန်ပြုလုပ်ပြီး ပြောင်းလဲမည်ဖြစ်ကာ စကြဝဠာ တစ်ခုလုံးကို ပြန်လည်ခွဲဝေမည်ဖြစ်ပြီး ထိုသို့ဖြင့် စကြဝဠာကို စည်းစနစ်ကျစေကာ အဟောင်းကို အသစ်အဖြစ်သို့ ပြောင်းလဲမည်၊ ဤသည်မှာ ငါ၏ အစီအစဉ်ဖြစ်ပြီး ဤအရာများသည် ငါ၏ လုပ်ဆောင်မှုများ ဖြစ်သည်။ တိုင်းနိုင်ငံတစ်ခုစီနှင့် ငါ ရွေးချယ်ထားသောလူများထဲမှ တစ်ဦးစီသည် ငါ၏ ပလ္လင်ရှေ့မှောက်သို့ ပြန်လာသောအခါ ငါသည် ကောင်းကင်ဘုံ၏ ကြွယ်ဝမှု အားလုံးကို လူ့လောကသို့ ချီးမြှင့်မည်ဖြစ်ပြီး ထိုသို့ဖြင့် ငါ့ကျေးဇူးကြောင့် ထိုလောကသည် ပြိုင်ဘက်ကင်းသော ပေါများကြွယ်ဝမှုဖြင့် ပြည့်လျှံနေလိမ့်မည်။ ကမ္ဘာလောကဟောင်း တည်ရှိစဉ်တွင် နိုင်ငံတစ်နိုင်ငံချင်းစီအပေါ် ငါ၏အမျက်ဒေါသကို လွှတ်ထုတ်ကာ စီမံအုပ်ချုပ်ရေးဆိုင်ရာ အမိန့်များကို စကြဝဠာတစ်ခုလုံးထံ လူသိရှင်ကြား ထုတ်ပြန်ကြေညာမည်ဖြစ်သည့်အပြင် ယင်းတို့ကို ချိုးဖောက်သည့်သူ မည်သူမဆိုသည် ပြစ်တင်ဆုံးမခြင်းခံရလိမ့်မည်။

စကြဝဠာတစ်ခုလုံးကို ငါစကားပြောသည့်အခါတွင် လူအားလုံးသည် ငါ၏ အသံတော်ကို ကြားကြသည်၊ ဆိုလိုသည်မှာ လူအားလုံးသည် စကြဝဠာတစ်ခုလုံးတွင် ငါဆောင်ရွက်ပြီးဖြစ်သည့် လုပ်ဆောင်ချက်များအားလုံးကို မြင်ကြလေသည်။ ငါ၏ ရည်ရွယ်ချက်များကို ဆန့်ကျင်သည့်သူများ၊ ဆိုလိုသည်မှာ ငါ့အား လူ၏ လုပ်ဆောင်ချက်များဖြင့် ဆန့်ကျင်သောသူများသည် ငါ၏ ပြစ်တင်ဆုံးမခြင်းအလယ်တွင် ပြိုလဲလိမ့်မည်။ ကောင်းကင်ယံရှိ ‌မြောက်မြားလှစွာသော ကြယ်များကို ငါ အသစ်လဲမည်။ ငါ့ကြောင့် နေနှင့် လတို့သည် အသစ်လဲခြင်း ခံရလိမ့်မည်၊ ကောင်းကင်သည် ယခင်ကဲ့သို့ ဖြစ်တော့မည် မဟုတ်။ ကမ္ဘာပေါ်ရှိ အရာခပ်သိမ်းသည် အသစ်လဲခြင်း ခံရလိမ့်မည်။ ဤအရာအားလုံးသည် ငါ၏နှုတ်ကပတ်တော်များကြောင့် ဖြစ်မြောက်လိမ့်မည်။ စကြဝဠာအတွင်းရှိ နိုင်ငံအားလုံးသည် အသစ်တစ်ဖန် ပိုင်းခြားကန့်သတ်ခြင်းခံရမည် ဖြစ်ပြီး ငါ့နိုင်ငံတော်၏ အစားထိုးခြင်းကို ခံရလိမ့်မည်၊ ဤသို့ဖြင့် ကမ္ဘာပေါ်ရှိ နိုင်ငံများသည် ထာဝရ ကွယ်ပျောက်သွားမည်ဖြစ်ပြီး ငါ့ကို ကိုးကွယ်သည့် နိုင်ငံတော်တစ်ခုတည်းသာ ရှိလိမ့်မည်။ ကမ္ဘာ၏ နိုင်ငံများအားလုံးသည် ဖျက်ဆီးခြင်း ခံရမည်ဖြစ်ကာ တည်ရှိတော့မည်မဟုတ်ပေ။ စကြဝဠာအတွင်းရှိ လူသားများတွင် နတ်ဆိုးများနှင့်ဆိုင်သောသူ အားလုံးတို့သည် ရှင်းလင်းသုတ်သင်ခြင်းကို ခံရလိမ့်မည် ဖြစ်သည်။ စာတန်ကို ကိုးကွယ်သောသူ အားလုံးတို့သည် ငါ၏လောင်မြိုက်သောမီးအလယ်တွင် ပြိုလဲကြလိမ့်မည်။ ဆိုလိုသည်မှာ ယခု ရေစီးကြောင်း အတွင်း၌ရှိသော သူများမှလွဲ၍ ကျန်သောသူ အားလုံးတို့သည် ပြာအဖြစ်သို့ ပြောင်းလဲခြင်း ခံရလိမ့်မည်။ လူတစ်ဦးချင်းစီကို ငါပြစ်တင်ဆုံးမသောအခါ ဘာသာရေးအသိုင်းအဝိုင်း၌ ရှိသော သူတို့သည် အတိုင်းအတာ အမျိုးမျိုးဖြင့် ငါ၏နိုင်ငံတော်သို့ ပြန်လာကြမည် ဖြစ်ပြီး ငါ၏ လုပ်ဆောင်ချက်များအားဖြင့် သိမ်းပိုက်ခြင်းကို ခံကြရလိမ့်မည်၊ အကြောင်းမှာ “ဖြူသောမိုးတိမ်ကို စီးလျက်ရှိသော သန့်ရှင်းသောသူ” သည် ရောက်ရှိလာပြီးဖြစ်ကြောင်းကို ထိုသူတို့ မြင်ခဲ့ပြီးဖြစ်လိမ့်မည် ဖြစ်သောကြောင့်ပင်တည်း။ လူအားလုံးသည် မိမိတို့၏ အမျိုးအစားနှင့်အညီ ခွဲခြားသတ်မှတ်ခြင်းခံရမည် ဖြစ်ပြီး သူတို့၏ လုပ်ဆောင်ချက်များနှင့်ညီမျှသော ပြစ်တင်ဆုံးမခြင်းအမျိုးမျိုးကို ခံကြရမည်။ ငါ့ကို အတိုက်အခံလုပ်ခဲ့ကြသော သူများအားလုံးတို့သည် ပျက်စီးခြင်းသို့ရောက်ကြလိမ့်မည် ဖြစ်ပြီး ကမ္ဘာမြေကြီးပေါ်ရှိ ၎င်းတို့၏ အပြုအမူများတွင် ငါနှင့်ဆက်နွှယ်မှု မရှိသည့်သူများကမူ ၎င်းတို့ ပြုမူခဲ့ပြီးဖြစ်သည့်ပုံကြောင့် ကမ္ဘာမြေကြီးပေါ်၌ ငါ၏သားများနှင့် ငါ့လူများ၏ အုပ်စိုးမှုအောက်တွင် ဆက်လက် ရှိနေကြလိမ့်မည်။ ငါသည် တိုင်းနိုင်ငံအသင်္ချေနှင့် လူအသင်္ချေတို့ထံသို့ ငါ ပေါ်ထွန်းမည် ဖြစ်ပြီး ကမ္ဘာပေါ်တွင် ငါ၏ကြီးမြတ်သောအမှုတော် ပြည့်စုံသွားခြင်းကို ကြွေးကြော်ရင်း လူတို့အားလုံး ဤအရာကို သူတို့ကိုယ်တိုင်၏မျက်စိများနှင့် မြင်နိုင်ကြဖို့ ခွင့်ပြုလျက် ငါကိုယ်တော်တိုင်၏ အသံတော်ကို ဖော်ပြမည်ဖြစ်သည်။

ငါ၏ မိန့်မြွက်ချက်များ ပိုမိုနက်နဲလာသည်နှင့်အမျှ ငါသည် စကြဝဠာ၏ အခြေအနေကိုလည်း စောင့်ကြည့်လေ့လာ၏။ ငါ၏နှုတ်ကပတ်တော်များအားဖြင့် အရာခပ်သိမ်းတို့သည် အသစ်ပြုလုပ်ခြင်းကို ခံရသည်။ ကောင်းကင်သည် ပြောင်းလဲသကဲ့သို့ ကမ္ဘာမြေကြီးသည်လည်း ပြောင်းလဲသည်။ လူသားသည် ၎င်း၏ မူလပုံစံ၌ ဖော်ထုတ်ခံရပြီး လူများသည် ၎င်းတို့၏ အမျိုးအစားနှင့်အညီ ဖြည်းဖြည်းချင်း အားလုံး ခွဲခြားသတ်မှတ်ခြင်းခံရကာ ၎င်းတို့၏ “မိသားစုများ” ထံသို့ အမှုမဲ့အမှတ်မဲ့ ပြန်လည်ရောက်ရှိသွားကြသည်။ ယင်းသည် ငါ့အား ကြီးစွာ ဝမ်းမြောက်ကျေနပ်စေသည်။ ငါသည် အနှောင့်အယှက်မှ ကင်းလွတ်ပြီး အမှုမဲ့အမှတ်မဲ့ဆိုသလို ငါ၏ ကြီးမြတ်သောအမှုသည် ပြီးမြောက်ကာ အရာခပ်သိမ်းသည် ပြောင်းလဲကုန်ကြသည်။ ဤကမ္ဘာလောကကြီးကို ငါဖန်ဆင်းခဲ့သောအခါ ပုံသဏ္ဌာန်ရှိသော အရာအားလုံးကို အမျိုးအစားခွဲခြားလျက် အရာခပ်သိမ်းတို့ကို ငါသည် ယင်းတို့၏ အမျိုးအစားနှင့်အညီ ခွဲခြားသတ်မှတ်ခဲ့သည်။ ငါ့စီမံခန့်ခွဲမှု အစီအစဉ်၏နိဂုံး နီးကပ်လာသည်နှင့်အမျှ ငါသည် ဖန်ဆင်းခြင်း၏ ယခင်အခြေအနေကို ပြန်လည်ဖြစ်ပေါ်စေမည်။ အရာခပ်သိမ်းကို နဂိုမူလအတိုင်း ပြန်ဖြစ်စေကာ အရာခပ်သိမ်းကို စေ့စေ့စပ်စပ် ပြောင်းလဲပစ်ပြီး အရာခပ်သိမ်းကို ငါ၏ အစီအစဉ်ထဲသို့ ကျရောက်စေမည်။ အချိန်ကျလေပြီ။ ငါ့အစီအစဉ်၏ နောက်ဆုံးအဆင့်သည် ပြီးမြောက် အောင်မြင်လုနီးပြီ ဖြစ်သည်။ အို၊ ညစ်ညမ်းသော လောကဟောင်း။ ယင်းသည် ငါ့နှုတ်ကပတ်တော်များ အတွင်းတွင် ဧကန်အမှန်ပင် ကျဆင်းလိမ့်မည်။ ငါ၏အစီအစဉ်အားဖြင့် ယင်းသည် ဗလာနတ္ထိ အဖြစ်သို့ ဧကန်အမှန်ပင် ရောက်သွားမည် ဖြစ်သည်။ အိုး၊ အရာခပ်သိမ်းတို့။ ယင်းတို့အားလုံးသည် ငါ့နှုတ်ကပတ်တော်များအတွင်းတွင် အသစ်သောအသက်ကို ရကြလိမ့်မည်၊ ယင်းတို့၏ အချုပ်အခြာအာဏာရှင် ရှိလာကြမည်ဖြစ်သည်။ အိုး၊ သန့်ရှင်း၍ အပြစ်အနာအဆာမဲ့သော လောကသစ်ကြီး။ ယင်းသည် ငါ၏ ဘုန်းကျက်သရေ အလင်းအလယ်တွင် ဧကန်အမှန်ပင် ပြန်လည်နိုးထလိမ့်မည်။ အိုး၊ ဇိအုန်တောင်။ တိတ်ဆိတ်၍မနေတော့နှင့်။ ငါသည် အောင်မြင်ခြင်းနှင့် ပြန်ကြွလာပြီ။ ငါသည် အရာခပ်သိမ်း၏ အလယ်တွင် တစ်ကမ္ဘာလုံးကို စောင့်ကြည့်လေ့လာသည်။ ကမ္ဘာမြေကြီးပေါ်ရှိ လူများသည် အသစ်သော အသက်ကို စတင်ခဲ့ပြီး မျှော်လင့်ခြင်းအသစ်တို့ ရှိကြသည်။ အိုး၊ ငါ၏လူများတို့။ သင်တို့သည် ငါ၏ အလင်းရောင်အတွင်း၌ မည်သို့ ပြန်လည်မရှင်သန်နိုင်ရသနည်း။ သင်တို့သည် ငါ၏လမ်းပြပို့ဆောင်မှု အောက်၌ ဝမ်းမြောက်ခြင်းဖြင့် မကခုန်ဘဲ အဘယ်သို့နေနိုင်သနည်း။ ကုန်းမြေတို့သည် ဝမ်းမြောက်ဝမ်းသာ ကြွေးကြော်နေသည်၊ ရေတို့သည် အားရရွှင်လန်းသော ရယ်မောခြင်းနှင့် သောင်းသောင်းဖြဖြ ကျယ်လောင်နေကြပါတကား။ အိုး၊ ရှင်ပြန်ထမြောက်သော ဣသရေလ။ သင်သည် ငါ၏ ကြိုတင်သတ်မှတ်ခြင်းများကြောင့် ဂုဏ်မယူဘဲ အဘယ်သို့ နေနိုင်ရသနည်း။ မည်သူသည် ငိုကြွေးခဲ့ပြီးသနည်း။ မည်သူသည် ငိုကြွေးမြည်တမ်းခဲ့သနည်း။ ဣသရေလပြည်ဟောင်းသည် မတည်ရှိတော့ဘဲ ယနေ့ကာလ၏ ဣသရေလပြည်သည် လောကကြီးတွင် မားမားမတ်မတ်နှင့် မြင့်မြင့်မားမားရှိကာ ထမြောက်လေပြီ၊ ပြီးလျှင် လူသားမျိုးနွယ် အားလုံးတို့၏ နှလုံးသားများထဲတွင် ရပ်တည်လျက်ရှိသည်။ ယနေ့ကာလ၏ ဣသရေလပြည်သည် ငါ၏လူများမှတစ်ဆင့် ဖြစ်တည်ရာအခြေခံအုတ်မြစ်ကို ဧကန်အမှန်ပင် ရရှိလိမ့်မည်။ အိုး၊ မုန်းတီးဖွယ် အဲဂုတ္တု။ သင်သည် အမှန်ပင် ငါ့အား အတိုက်အခံလုပ်နေဆဲလော။ သင်သည် ငါ၏သနားကရုဏာကို အခွင့်ကောင်းယူလျက် ငါ၏ပြစ်တင်ဆုံးမခြင်းမှ လွတ်မြောက်ရန် မည်သို့ ကြိုးစားနိုင်သနည်း။ သင်သည် ငါ၏ပြစ်တင်ဆုံးမခြင်း အတွင်း၌ အဘယ်သို့ အသက်မရှင်ဘဲ နေထိုင်နိုင်သနည်း။ ငါချစ်သောသူ အားလုံးသည် ဧကန်အမှန် ထာဝစဉ် တည်ရှိကြလိမ့်မည် ဖြစ်ပြီး၊ ငါ့အား အတိုက်အခံလုပ်သောသူ အားလုံးတို့မူကား ဧကန်အမှန်ပင် ငါ၏ ပြစ်တင်ဆုံးမခြင်းကို ထာဝရ ခံကြရပေလိမ့်မည်။ အကြောင်းမူကား ငါသည် အပြစ်ရှိသည်ဟု ယုံလွယ်သော ဘုရားသခင်ဖြစ်ပြီး ငါသည် လူများအားလုံးကို သူတို့ပြုခဲ့သော အရာများအတွက် ပေါ့တန်စွာ ချမ်းသာပေးလိမ့်မည် မဟုတ်။ ငါသည် ကမ္ဘာမြေကြီးတစ်ခုလုံးကို စေ့စေ့စပ်စပ် ကြည့်ရှုစစ်ဆေးမည် ဖြစ်ပြီး လောကကြီး၏ အရှေ့အရပ်တွင် ဖြောင့်မတ်ခြင်း၊ ဘုန်းအာနုဘော်၊ အမျက်တော်၊ ပြစ်တင်ဆုံးမခြင်းတို့နှင့် ပေါ်လာလျက် လူအမြောက်အမြားအပေါ် ငါ့ကိုယ်ငါ ထုတ်ဖော်ပြမည်။

၁၉၉၂ ခုနှစ်၊ မတ်လ ၂၉ ရက်