နောင်တရရှိရေး ဧဝံဂေလိတရားကို ကျေးဇူးတော်ခေတ်၌ ဟောကြားခဲ့ပြီး၊ လူသားသည် ယုံကြည်ပါက ကယ်တင်ခြင်း ခံရမည်ဟု ထောက်ပံ့ပေးခဲ့သည်။ ယနေ့တွင် ကယ်တင်ခြင်းအစား သိမ်းပိုက်ခြင်းနှင့် စုံလင်ခြင်းအကြောင်းများကို ပြောဆိုခြင်းသာ ရှိသည်။ လူတစ်ဦးက ယုံကြည်လျှင် သူ၏မိသားစု တစ်စုလုံး ကောင်းချီးပေးခံရမည် သို့မဟုတ် တစ်ခါ ကယ်တင်ခံရပြီးပါက အစဉ်ကယ်တင်ခံရမည်ဟု မည်သည့်အခါမျှ မပြောဆိုခဲ့ဖူးပါ။ ယနေ့ခေတ်မှာ မည်သူမျှ ထိုစကားလုံးများကို ပြောဆိုမနေကြပေ၊ ထို့အပြင် ယင်းကဲ့သို့သော အရာများသည် ခေတ်မမီတော့ပေ။ ထိုအချိန်က ယေရှု၏ အမှုမှာ လူသားမျိုးနွယ်တစ်ရပ်လုံးကို ရွေးနှုတ်ရန် ဖြစ်သည်။ သူ့ကို ယုံကြည်သူအားလုံးတို့၏ အပြစ်များသည် ခွင့်လွှတ်ခြင်း ခံခဲ့ရသည်၊ သူ့ကို ယုံကြည်နေသရွေ့ သူက သင့်ကို ရွေးနှုတ်မည်၊ သင်သည် သူ့ကို ယုံကြည်ပါက သင်သည် အပြစ်နှင့်မသက်ဆိုင်တော့ဘဲ၊ သင်၏အပြစ်များ အားလုံး ဖြေလွှတ်ခြင်းခံရသည်။ ဤသည်မှာ ကယ်တင်ခံရခြင်းနှင့် ယုံကြည်ခြင်းအားဖြင့် လျော်ကန်စေခြင်းဟူသည့် အဓိပ္ပာယ်ဖြစ်သည်။ သို့သော် ယုံကြည်ခဲ့ကြသည့် သူများအတွင်း၌ ဘုရားသခင်ကို ပုန်ကန်၍ ဆန့်ကျင်သည့်အရာ ကျန်နေသေးပြီး၊ ၎င်းကို တဖြည်းဖြည်းချင်း ဖယ်ရှားပစ်ရန် လိုခဲ့ပါသေးသည်။ ကယ်တင်ခြင်းဟူသည်မှာ လူသားသည် ယေရှု၏ ရယူခြင်းကို အပြည့်အဝ ခံခဲ့ပြီးပြီဟု ဆိုလိုခြင်းမဟုတ်ဘဲ၊ လူသားသည် သူသည်အပြစ်တရားနှင့် မသက်ဆိုင်တော့ဘဲ၊ သူ၏ အပြစ်များခွင့်လွှတ်ခံရခြင်းကို ဆိုလိုသည်။ သင်ယုံကြည်ပြီဆိုပါက အပြစ်တရားနှင့် နောက်တစ်ဖန် မည်သည့်အခါမျှ သက်ဆိုင်တော့မည် မဟုတ်ချေ။ ထိုအချိန်က ယေရှုသည် သူ၏တပည့်များ နားလည်နိုင်စွမ်းမရှိသည့် အမှုများစွာကို လုပ်ဆောင်ခဲ့ပြီး၊ လူများ နားမလည်သည့် အရာများစွာက မိန့်ကြားခဲ့သည်။ ယင်းသည် ထိုစဉ်တုန်းက သူသည် မည်သည့် ရှင်းပြချက်မျှ မပေးခဲ့၍ ထိုသို့ဖြစ်ခဲ့ရခြင်း ဖြစ်သည်။ သို့ဖြစ်၍ သူခွဲခွာသွားခဲ့သည့်နောက် နှစ်အချို့အကြာတွင် မဿဲက သူ၏ ဆွေစဉ်မျိုးဆက်စာရင်းကို ပြုစုခဲ့ပြီး အခြားသူများကလည်း လူသား၏ဆန္ဒအလျောက် အလုပ်များစွာ လုပ်ဆောင်ခဲ့ကြသည်။ ယေရှုသည် လူသားကို စုံလင်စေရန်နှင့် ရယူရန် လာခဲ့ခြင်းမဟုတ်ဘဲ၊ အမှု၏ အဆင့်တစ်ဆင့်ကို လုပ်ဆောင်ရန် လာခဲ့ခြင်းဖြစ်သည်- ယင်းသည် ကောင်းကင်နိုင်ငံတော်၏ ဧဝံဂေလိတရားကို ယူဆောင်လာရန်နှင့် လက်ဝါးကပ်တိုင်ပေါ် အသက်စွန်သည့်အမှုကို ပြီးဆုံးအောင်လုပ်ဆောင်ရန် ဖြစ်သည်။ ထို့ကြောင့် ယေရှု ကားစင်တင်သတ်ခြင်းခံခဲ့ရပြီးသည်နှင့် သူ၏အမှုမှာ လုံးဝ အဆုံးသတ်သွားခဲ့သည်။ သို့သော် လက်ရှိအဆင့်ဖြစ်သည့် သိမ်းပိုက်ခြင်းအလုပ်တွင် သာ၍များသော နှုတ်ကပတ်တော်များကို ပြောကြားရပေမည်၊ သာ၍များသော အလုပ်ကို လုပ်ကိုင်ရပေမည်ဖြစ်ပြီး လုပ်ငန်းစဉ်များ မြောက်မြားစွာ ရှိရမည်ဖြစ်သည်။ ယေရှုနှင့် ယေဟောဝါတို့၏ အမှု၏ နက်နဲရာများကိုလည်း ထုတ်ဖော်ရပေမည်၊ သို့မှသာ လူသားအားလုံးတို့သည် သူတို့၏ ယုံကြည်မှုတွင် နားလည်မှုနှင့် ရှင်းလင်းမှု ရှိနိုင်ကြမည်ဖြစ်သည်၊ အကြောင်းမှာ ဤအရာသည် နောက်ဆုံးသောကာလ၏ အလုပ်ဖြစ်ပြီး နောက်ဆုံးသောကာလသည် ဘုရားသခင်၏အလုပ်၏အဆုံး၊ ဤအလုပ်၏ နိဂုံးကာလ ဖြစ်သောကြောင့် ဖြစ်သည်။ အမှု၏ ဤအဆင့်က သင့်အား ယေဟောဝါ၏ ပညတ်တရားနှင့် ယေရှု၏ ရွေးနှုတ်ခြင်းတို့ကို ရှင်းပြပေးမည်ဖြစ်ပြီး၊ အဓိကအားဖြင့် သင်သည် ဘုရားသခင်၏ အနှစ်ခြောက်ထောင် စီမံခန့်ခွဲမှုအစီအစဉ်၏ လုပ်ငန်းတစ်ခုလုံးကို နားလည်လျက် ဤအနှစ်ခြောက်ထောင် စီမံခန့်ခွဲမှုအစီအစဉ်၏ အရေးပါမှုနှင့် အနှစ်သာရအလုံးစုံကို တန်ဖိုးထားရန်၊ ယေရှုလုပ်ဆောင်ခဲ့သည့် အမှုနှင့် သူပြောဆိုခဲ့သည့် နှုတ်ကပတ်တော်များ အားလုံး၏ ရည်ရွယ်ချက်ကို နားလည်ရန်နှင့် သင်၏ သမ္မာကျမ်းစာအပေါ် မျက်ကန်းယုံကြည်လက်ခံမှုနှင့် ကြည်ညိုမှုကိုပင်လျှင် နားလည်ရန် ဖြစ်သည်။ ၎င်းက သင့်အား ထိုအချက်များ အားလုံးကိုစေ့စပ်သေချာစွာ နားလည်လာစေလိမ့်မည်။ သင်သည် ယေရှုလုပ်ဆောင်ခဲ့သည့် အလုပ်ကိုရော ဘုရားသခင်၏ ယနေ့ အလုပ်ကိုပါ နားလည်လာလိမ့်မည်ဖြစ်သည်၊ သင်သည် သမ္မာတရား၊ အသက်နှင့် လမ်းခရီး အားလုံးတို့ကို သိနားလည်လျက် မြင်လိမ့်မည် ဖြစ်သည်။ ယေရှု လုပ်ဆောင်ခဲ့သည့် အလုပ်အဆင့်တွင် ယေရှုသည် အဘယ်ကြောင့် အဆုံးသတ်သည့် အလုပ်ကို မလုပ်ဘဲ ထွက်ခွာသွားခဲ့သနည်း။ အဘယ်ကြောင့်ဆိုသော် ယေရှုအလုပ်၏အဆင့်သည် အဆုံးသတ်ခြင်းအလုပ် မဟုတ်ခဲ့၍ ဖြစ်သည်။ သူသည် ကားတိုင်ပေါ် သံမှိုစွဲနှက်ခံရသည့်အချိန်တွင် သူ၏ နှုတ်ကပတ်တော်များသည်လည်း အဆုံးသတ်ခဲ့သည်၊ ကားတိုင်ပေါ် အသက်စွန့်ခဲ့ပြီးသည့်နောက် သူ၏ အလုပ်မှာ လုံးလုံးလျားလျား ပြီးဆုံးသွားခဲ့သည်။ လက်ရှိအဆင့်မှာ ကွဲပြားခြားနားသည်- နှုတ်ကပတ်တော်များကို အဆုံးတိုင်အောင် မိန့်ကြားပြီးသွားလျက် ဘုရားသခင်၏ လုပ်ဆောင်ချက် တစ်ရပ်လုံး ပြီးဆုံးသွားမှသာ သူ၏အလုပ်သည် ပြီးဆုံးလိမ့်မည်ဖြစ်သည်။ ယေရှု၏ လုပ်ဆောင်ချက်အဆင့်တွင် ထုတ်မပြောခဲ့သည့် သို့မဟုတ် အပြည့်အဝ မမိန့်ကြားခဲ့ဘဲ ကျန်ရစ်ခဲ့သည့် နှုတ်ကပတ်တော်များ မြောက်မြားစွာ ရှိခဲ့သည်။ သို့သော် ယေရှု၏ သာသနာမှာ နှုတ်ကပတ်တော်များနှင့် သက်ဆိုင်သည့်သာသနာ မဟုတ်သည့်အတွက် သူသည် မိန့်ကြားပြီးခဲ့သည့်အရာများ သို့မဟုတ် မမိန့်ကြားခဲ့သည့်အရာများကို အမှုမထားဘဲ၊ ကားတိုင်ပေါ် သံမှိုစွဲနှက်ခံရပြီးနောက်တွင် ထွက်ခွာသွားခဲ့ခြင်း ဖြစ်သည်။ အမှု၏ ထိုအဆင့်မှာ အဓိကအားဖြင့် ကားတိုင်ပေါ် အသက်စွန့်ဖို့ရန်အတွက်ဖြစ်ပြီး ယနေ့အဆင့်နှင့် မတူချေ။ အလုပ်၏ လက်ရှိဤအဆင့်မှာ အဓိကအားဖြင့် ပြီးဆုံးစေရန်၊ အားလုံး ဖြေရှင်းရန်နှင့် အလုပ်အားလုံးကို နိဂုံးချုပ်ရန် ဖြစ်သည်။ အမှု၏ ဤအဆင့်မှာ အလုပ်အားလုံးကို အဆုံးသတ်ပြီး နှုတ်ကပတ်တော်များကို အသုံးပြုခြင်းဖြင့် အထမြောက်ပြီး ဖြစ်သည့်အတွက်၊ နှုတ်ကပတ်တော်များကို ၎င်းတို့၏အဆုံးထိ မြွက်ကြားမပေးလျှင် ဤအမှုနိဂုံးချုပ်ရန် ဖြစ်နိုင်လိမ့်မည်မဟုတ်ပေ။ ထိုအချိန်က ယေရှုသည် လူသားနားလည်နိုင်စွမ်းမရှိသည့် အမှုများစွာကို ဆောင်ရွက်ခဲ့သည်။ သူသည် တိတ်တဆိတ် ထွက်ခွာသွားခဲ့ပြီး ယနေ့တွင် သူ၏ နှုတ်ကပတ်တော်များကို နားမလည်ကြသူ၊ သူတို့၏ နားလည်ခြင်းသည် မှားနေသော်ငြားလည်း သူတို့က မှန်ကန်သည်ဟု ယုံကြည်နေကြပြီး သူတို့ မှားနေကြောင်းကို မသိရှိကြသောသူ အများအပြား ရှိနေကြဆဲပင် ဖြစ်သည်။ နောက်ဆုံးအဆင့်သည် ဘုရားသခင်၏ အမှုကို စုံလင်သော အဆုံးသတ်တစ်ခုသို့ ဆောင်ကြဉ်းပေးမည် ဖြစ်ပြီး ယင်း၏နိဂုံးကို စီစဉ်ပေးလိမ့်မည်ဖြစ်သည်။ အားလုံးက ဘုရားသခင်၏ စီမံခန့်ခွဲမှုအစီအစဉ်ကို နားလည်လျက် သိရှိလာလိမ့်မည်ဖြစ်သည်။ လူသားအတွင်းရှိ အယူအဆများ၊ သူ၏ ရည်ရွယ်ချက်များ၊ သူ၏ ယွင်းမှားပြီး အဓိပ္ပာယ်မဲ့သည့် နားလည်မှု၊ ယေဟောဝါနှင့် ယေရှုတို့၏ အမှုအပေါ် သူ၏အယူအဆများ၊ တစ်ပါးအမျိုးသားများအပေါ် သူ၏ အမြင်များနှင့် သူ၏ အခြားလွဲချော်မှုများနှင့် အမှားများမှာ အမှားပြင်ပေးခြင်း ခံရလိမ့်မည်ဖြစ်သည်။ ထို့နောက် လူသားသည် အသက်တာ၏ မှန်ကန်သောလမ်းကြောင်းများအားလုံး၊ ဘုရားသခင် လုပ်ဆောင်ခဲ့သည့် အမှုအားလုံးနှင့် သမ္မာတရားတစ်ခုလုံးကို နားလည်လာလိမ့်မည်။ ထို့သို့ဖြစ်သည့်အခါ အမှု၏ လက်ရှိအဆင့်မှာ အဆုံးသတ်လိမ့်မည်။ ယေဟောဝါ၏အမှုမှာ ကမ္ဘာကို ဖန်ဆင်းခြင်းဖြစ်ပြီး ယင်းမှာ အစအဦး ဖြစ်သည်၊ အမှု၏ ယခုအဆင့်မှာမူ အမှု၏ အဆုံးဖြစ်ပြီး နိဂုံးဖြစ်သည်။ အစပိုင်းမှာ ဘုရားသခင်၏အမှုကို ဣသရေလ၏ ရွေးချယ်ခံရသည့် သူများကြားတွင် ဆောင်ရွက်ခဲ့ပြီး ထိုအရာမှာ နေရာအားလုံးထဲက အသန့်ရှင်းဆုံးနေရာ၌ ခေတ်သစ်တစ်ခု၏အစ ဖြစ်ခဲ့သည်။ အမှု၏ နောက်ဆုံးအဆင့်ကို နိုင်ငံများအားလုံးထဲမှ မသန့်ရှင်းဆုံးနိုင်ငံတွင် ဆောင်ရွက်ပြီး လောကကို တရားစီရင်လျက် ခေတ်ကြီးကို အဆုံးသတ်ရန် ဖြစ်သည်။ ပထမအဆင့်တွင် ဘုရားသခင်၏အမှုကို နေရာအားလုံးထဲမှ အတောက်ပဆုံးနေရာတွင် ဆောင်ရွက်ခဲ့ပြီး၊ နောက်ဆုံးအဆင့်ကိုမူ နေရာအားလုံးထဲမှ အမှောင်မိုက်ဆုံးနေရာတွင် ဆောင်ရွက်ခြင်းဖြစ်လျက် ဤအမှောင်ထုကို မောင်းထုတ်ပစ်ကာ အလင်းရောင်ကို ယူဆောင်ပေးပြီး လူအားလုံးကို သိမ်းပိုက်မည်ဖြစ်သည်။ နေရာအားလုံးထဲမှ မသန့်ရှင်းဆုံးနှင့် အမည်းမိုက်ဆုံးဖြစ်သော ဤနေရာမှ လူတို့ကို သိမ်းပိုက်ပြီး၍၊ လူထုတစ်ရပ်လုံးက စစ်မှန်သောဘုရားဖြစ်သည့် ဘုရားသခင်ရှိသည်ကို အသိအမှတ်ပြုပြီး လူတိုင်းသည် အကြွင်းမဲ့ လက်ခံယုံကြည်လာပြီးသောအခါ စကြဝဠာတစ်ခုလုံး၌ သိမ်းပိုက်ခြင်းအလုပ်ကို ဆောင်ရွက်ရန် ဤအချက်ကို အသုံးပြုမည်ဖြစ်သည်။ အမှု၏ ဤအဆင့်မှာ သင်္ကေတသဘောဆောင်သည်- ဤခေတ်၏အမှုကို ဆောင်ရွက်ပြီးသည်နှင့်၊ နှစ်ပေါင်း ၆၀၀၀ ကြာခဲ့သည့် စီမံခန့်ခွဲမှုအလုပ်သည် လုံးဝ အဆုံးသတ်လိမ့်မည်။ နေရာများ အားလုံးထဲမှ အမှောင်မိုက်ဆုံးနေရာ၌ ရှိသောသူတို့ကို သိမ်းပိုက်ပြီးသည်နှင့် အခြားနေရာတိုင်းတွင် အလားတူဖြစ်လာမည်မှာ ပြောစရာမလိုတော့ပေ။ သို့ဖြစ်၍ တရုတ်နိုင်ငံရှိ သိမ်းပိုက်ခြင်းအလုပ်ကသာလျှင် အဓိပ္ပာယ်ပြည့်ဝသည့် သင်္ကေတဖြင့်သရုပ်ဖော်မှု ပါရှိသည်။ တရုတ်နိုင်ငံသည် အမှောင်စွမ်းအားများအားလုံးကို ပုံဖော်နေပြီး တရုတ်နိုင်ငံမှ လူတို့သည် ဇာတိပကတိ၊ စာတန်နှင့် အသွေးအသားတို့နှင့် စပ်ဆိုင်သောသူများအားလုံးကို ကိုယ်စားပြုသည်။ တရုတ်ပြည်သူတို့သည် အဆင်းနီသော နဂါးကြီး၏ အများဆုံး ဖျက်ဆီးခြင်းကို ခံရသောသူများ၊ ဘုရားသခင်အပေါ် အပြင်းထန်ဆုံးသော ဆန့်ကျင်မှု ပြုသူများဖြစ်ပြီး၊ သူတို့၏ လူ့သဘာဝမှာ အနိမ့်ကျဆုံးနှင့် မသန့်စင်ဆုံး ဖြစ်သောကြောင့် သူတို့သည် ဖောက်ပြန်ပျက်စီးသော လူသားမျိုးနွယ်အားလုံး၏ နမူနာပုံစံ ဖြစ်သည်။ ထိုသို့ပြောလိုက်၍ အခြားနိုင်ငံများ၌ ပြဿနာများ လုံးဝမရှိဟု မဆိုလိုပါ၊ လူသား၏ အယူအဆများမှာ အားလုံးအတူတူပင်ဖြစ်သည်၊ ဤနိုင်ငံများမှ လူများသည် အရည်အသွေးကောင်းသူများ ဖြစ်ကောင်းဖြစ်နိုင်ကြသော်လည်း သူတို့သည် ဘုရားသခင်ကို မသိရှိကြပါက သူတို့သည် ဘုရားသခင်ကို ဆန့်ကျင်သူများ ဖြစ်ကြရပေမည်။ ဂျူးလူမျိုးများသည်လည်း ဘုရားသခင်ကို ဆန့်ကျင်ဖီဆန်ခဲ့ကြသည်မှာ အဘယ်ကြောင့်နည်း။ ဖာရိရှဲတို့သည်လည်း အဘယ့်ကြောင့် သူ့ကို ဆန့်ကျင်ခဲ့ကြသနည်း။ ယုဒက ယေရှုကို အဘယ့်ကြောင့် သစ္စာဖောက်ခဲ့သနည်း။ ထိုစဉ်က တပည့်တော်အများအပြားတို့သည် ယေရှုကို မသိကျွမ်းခဲ့ကြပေ။ ယေရှုသည် အဆုံးစီရင်ခံရပြီး ပြန်လည်ထမြောက်ခဲ့သည့် နောက်တွင် လူများသည် သူ့ကို မယုံကြည်ခဲ့ကြသေးသည်မှာ အဘယ်ကြောင့်နည်း။ လူသား၏ မနာခံခြင်းမှာ အားလုံးအတူတူပင် မဟုတ်လော။ တရုတ်ပြည်သူတို့ကို သာဓကတစ်ခုအဖြစ် ယူလိုက်ခြင်းမျှသာဖြစ်ပြီး၊ သူတို့ကို သိမ်းပိုက်ပြီးသည့် အချိန်တွင် သူတို့သည် စံပြပုံစံနှင့် နမူနာဖြစ်လာပြီး အခြားသူများအတွက် ကိုးကားမှီငြမ်းစရာ ဖြစ်လာမည်ဖြစ်သည်။ သင်တို့သည် ငါ့စီမံခန့်ခွဲမှုအစီအစဉ်၏ အဖြည့်တစ်ခု ဖြစ်သည်ဟု အဘယ့်ကြောင့် ငါအစဉ်တစိုက် ပြောလာခဲ့သနည်း။ ဖောက်ပြန်ပျက်စီးခြင်း၊ မစင်ကြယ်ခြင်း၊ မဖြောင့်မတ်ခြင်း၊ ဆန့်ကျင်ခြင်းနှင့် ပုန်ကန်ခြင်းများကို အပြည့်ဝဆုံး ပေါ်လွင်အောင်ပြသပြီး ၎င်းတို့၏ ပုံစံမျိုးစုံထဲတွင် ထုတ်ဖော်ထားသည်မှာ တရုတ်နိုင်ငံ၏ပြည်သူများ အတွင်း၌ဖြစ်သည်။ တစ်ဖက်တွင် သူတို့၏ အစွမ်းအစမှာ နိမ့်ကျနေလျက်၊ အခြားတစ်ဖက်တွင် သူတို့၏ အသက်တာများနှင့် စိတ်ဓာတ်မှာ ခေတ်နောက်ကျန်ရစ်နေပြီး သူတို့၏ အကျင့်များ၊ လူမှုဝန်းကျင်၊ မွေးဖွားရာမိသားစု၊ အားလုံးတို့မှာ နိမ့်ကျနေလျက် ခေတ်နောက်အကျဆုံး ဖြစ်နေသည်။ သူတို့၏ အဆင့်အတန်းသည်လည်း နိမ့်ကျသည်။ ဤနေရာ၌ အမှုသည် သင်္ကေတသဘောဆောင်ပြီး၊ ဤစမ်းသပ်ခြင်းအမှုကို အလုံးစုံ ဆောင်ရွက်ပြီးသည့်နောက်တွင် ဘုရားသခင်၏ နောက်ဆက်တွဲ အမှုသည် များစွာ ပိုမို လွယ်ကူလာမည်ဖြစ်သည်။ အလုပ်၏ ဤအဆင့်ကို အပြီးသတ်နိုင်လျှင် နောက်ဆက်တွဲအလုပ်မှာ ပြောစရာလိုအပ်မည်မဟုတ်ပါ။ အလုပ်၏ ဤအဆင့်ကို အထမြောက်အောင် ဆောင်ရွက်ပြီးသည်နှင့် ကြီးမားသောအောင်မြင်မှုကို အပြည့်အဝ ရယူပြီးလျက် စကြဝဠာတစ်ခုလုံးရှိ သိမ်းပိုက်ခြင်းအလုပ်သည် လုံးဝ အဆုံးသတ်လိမ့်မည်။ အမှန်အားဖြင့် သင်တို့အကြားရှိအမှုမှာ အောင်မြင်သည်နှင့် ယင်းသည် စကြဝဠာတစ်ခုလုံး၌ အောင်မြင်သည့်သဘောနှင့် အတူတူပင် ဖြစ်လိမ့်မည်။ ဤသည်မှာ ငါသည် သင်တို့ကို စံပြပုံစံနှင့် နမူနာအဖြစ် ဆောင်ရွက်စေခြင်းအကြောင်းရင်း၏ ရည်ရွယ်ချက်ပင်ဖြစ်သည်။ ဤလူများအထဲ၌ ပုန်ကန်မှု၊ ဆန့်ကျင်မှု၊ မစင်ကြယ်ခြင်း၊ မဖြောင့်မတ်ခြင်း အားလုံးတို့ကို မြင်တွေ့ရပြီး၊ လူသားမျိုးနွယ်၏ ပုန်ကန်လိုစိတ်ရှိသမျှကို သူတို့အထဲတွင် ကိုယ်စားပြုထားလေသည်။ သူတို့သည် အမှန်ပင် မှတ်သားလောက်ပေသည်။ ဤအကြောင်းကြောင့် သူတို့ကို့ သိမ်းပိုက်ခြင်း၏ နမူနာအဖြစ် စံပြုထားပြီး၊ သူတို့ကို သိမ်းပိုက်လိုက်သည်နှင့် သူတို့သည် အခြားသောသူများအတွက် အလိုအလျောက် စံပြနမူနာ ဖြစ်လာလိမ့်မည်ဖြစ်သည်။ ဣသရေလ နိုင်ငံ၌ လုပ်ကိုင်ခဲ့သည့် ပထမအဆင့်ထက် ပိုပြီး အရေးပါသည်ဟူ၍ ဘာတစ်ခုမျှ မရှိခဲ့ပေ- ဣသရေလ အမျိုးသားများသည် လူသားများ အားလုံးအနက် အသန့်ရှင်းဆုံးနှင့် ဖောက်ပြန်ပျက်စီးမှု အနည်းဆုံး ဖြစ်ခဲ့ကြ၍ ထိုတိုင်းပြည်မှာ စတင်ခဲ့သည့် ခေတ်သစ် အရုဏ်ဦးမှာ အရေးတကာ့ အရေးပါဆုံး ဖြစ်သည်။ လူသား၏ ဘိုးဘေးများသည် ဣသရေလမှ လာခဲ့ကြပြီး၊ ဣသရေလသည် ဘုရားသခင်၏အမှု စတင်မွေးဖွားရာနေရာ ဖြစ်သည်ဟု ပြောဆိုနိုင်သည်။ အစပိုင်းတွင် ယင်းလူမျိုးများသည် အသန့်ရှင်းဆုံး ဖြစ်ပြီး သူတို့ အားလုံးသည် ယေဟောဝါကို ကိုးကွယ်ခဲ့ကြလျက်၊ ၎င်းတို့အတွင်း၌ရှိသော ဘုရားသခင်၏ အမှုသည် အကြီးမားဆုံးသော ရလဒ်များကို ဖြစ်ထွန်းစေနိုင်ခဲ့သည်။ သမ္မာကျမ်း တစ်စောင်လုံးသည် ခေတ်နှစ်ခေတ်၏ အလုပ်ကို မှတ်တမ်းတင်ထား၏- တစ်ခုမှာ ပညတ်တရားခေတ်၏ အလုပ်နှင့် နောက်တစ်ခုမှာ ကျေးဇူးတော်ခေတ်၏ အလုပ် ဖြစ်သည်။ ဓမ္မဟောင်းကျမ်းက ဣသရေလ အမျိုးသားများအတွက် ယေဟောဝါ၏ နှုတ်ကပတ်တော်များနှင့် ဣသရေလနိုင်ငံ၌ သူ၏ လုပ်ဆောင်ချက်များကို မှတ်တမ်းတင်လျက်၊ ဓမ္မသစ်ကျမ်းက ယုဒပြည်ရှိ ယေရှု၏ လုပ်ဆောင်ချက်ကို မှတ်တမ်းတင်ထားသည်။ သို့ရာတွင် သမ္မာကျမ်းစာထဲ၌ တရုတ်အမည်များ တစ်ခုမျှ မပါခြင်းမှာ အဘယ်ကြောင့်နည်း။ အဘယ်ကြောင့်ဆိုသော် ဘုရားသခင်၏ အမှု၏ ပထမအပိုင်းနှစ်ပိုင်းတို့ကို ဣသရေလနိုင်ငံမှာ လုပ်ဆောင်ခဲ့ပြီး ဣသရေလ ပြည်သူတို့သည် ရွေးချယ်ခြင်းခံရသည့် လူမျိုးများ ဖြစ်ခဲ့ကြသည်- ၎င်းတို့သည် ယေဟောဝါ၏ အမှုကို လက်ခံခဲ့ကြသည့် ပထမဦးဆုံး လူမျိုးများ ဖြစ်ခဲ့ကြသည်ဟု ဆိုလိုသည်။ သူတို့သည် လူသားမျိုးနွယ်အားလုံးတို့ထဲမှ ဖောက်ပြန်ပျက်စီးမှု အနည်းဆုံးသူများ ဖြစ်ခဲ့ကြပြီး၊ အစပိုင်းတွင် သူတို့သည် ဘုရားသခင်ကို ကြည်ညိုလိုသူများ၊ ဘုရားသခင်ကို ရိုသေလေးမြတ်လိုသူများ ဖြစ်ခဲ့ကြသည်။ သူတို့သည် ယေဟောဝါ၏ နှုတ်ကပတ်တော်များကို နာခံခဲ့ကြပြီး၊ ဗိမာန်တော်တွင် အမြဲတမ်း အစေခံခဲ့ကြလျက် ယဇ်ပုရောဟိတ်များ၏ ဝတ်ရုံများ သို့မဟုတ် သရဖူများကို ဆင်ယင်ခဲ့ကြသည်။ သူတို့သည် ဘုရားသခင်ကို ဝတ်ပြုကိုးကွယ်ခဲ့ကြသည့် ပထမဦးဆုံးသော လူမျိုးများ ဖြစ်ခဲ့ကြပြီး ဘုရားသခင်၏ လုပ်ဆောင်ချက်ကို ခံစားခဲ့ရသည့် အစောဆုံး လူမျိုးများလည်း ဖြစ်ခဲ့ကြသည်။ ထိုလူများသည် လူသားတစ်ရပ်လုံး၏ နမူနာနှင့် စံပြပုံစံ ဖြစ်ခဲ့ကြသည်။ သူတို့သည် သန့်ရှင်းမှု၊ ဖြောင့်မတ်သောလူတို့၏ နမူနာနှင့် စံပြပုံစံလည်း ဖြစ်ခဲ့ကြသည်။ ယောဘ၊ အာဗြဟံ၊ လောတ သို့မဟုတ် ပေတရုနှင့် တိမောသေ ကဲ့သို့သော ပုဂ္ဂိုလ်များ အားလုံးမှာ ဣသရေလ အမျိုးသားများ ဖြစ်ခဲ့ကြပြီး နမူနာများနှင့် စံပြပုံစံ အားလုံးတို့ အထဲက အသန့်ရှင်းဆုံးသူများ ဖြစ်ခဲ့ကြသည်။ ဣသရေလသည် လူသားမျိုးနွယ်အထဲမှာ ဘုရားသခင်ကို ကိုးကွယ်သည့် အစောဆုံး နိုင်ငံဖြစ်ခဲ့ပြီး ထိုနိုင်ငံမှနေပြီး ထွက်ပေါ်လာခဲ့ကြသည့် ဖြောင့်မတ်သည့် ပုဂ္ဂိုလ်များမှာ မည်သည့်ဒေသထက်မဆို ပိုများခဲ့သည်။ အနာဂတ်တွင် ဤဒေသတစ်ဝန်းလုံးရှိ လူသားမျိုးနွယ်ကို ပိုမိုကောင်းမွန်စွာ စီမံခန့်ခွဲပေးနိုင်ရန်အတွက် ဘုရားသခင်သည် သူတို့အပေါ် လုပ်ဆောင်ခဲ့ခြင်း ဖြစ်သည်။ ကျေးဇူးတော်ခေတ်ထဲတွင် ဣသရေလ ပြင်ပရှိ လူသားတို့အတွက် နမူနာနှင့် စံပြအဖြစ် အစေခံနိုင်ရန် သူတို့၏ အောင်မြင်မှုများနှင့် ယေဟောဝါကို ကိုးကွယ်ရာတွင် သူတို့၏ ဖြောင့်မတ်သော လုပ်ဆောင်ချက်များကို မှတ်တမ်းတင်ခဲ့သည်၊ ထို့အပြင် သူတို့၏ လုပ်ဆောင်ချက်များသည် နှစ်ထောင်ပေါင်းအချို့၏ အလုပ်ကို ထိန်းသိမ်းနိုင်ခဲ့ပြီး၊ ယနေ့ အထိပင်ဖြစ်သည်။

ကမ္ဘာကြီးကို အုတ်မြစ်ချပေးခဲ့သည့် နောက်တွင် ဘုရားသခင်အမှု၏ ပထမဆင့်ကို ဣသရေလ နိုင်ငံ၌ လုပ်ဆောင်ခဲ့ခြင်း ဖြစ်သည်၊ ထို့ကြောင့် ဣသရေလသည် ကမ္ဘာပေါ်၌ ဘုရားသခင်၏ အမှု စတင်မွေးဖွားရာဒေသ ဖြစ်ပြီး ကမ္ဘာပေါ်က ဘုရားသခင် အမှု၏ အခြေခံရာ နေရာပင်ဖြစ်သည်။ ယေရှု၏ အမှုနယ်ပယ်ထဲတွင် ယုဒပြည် တစ်ခုလုံး ပါဝင်သည်။ သူ၏အလုပ်ကာလတွင်၊ သူသည် ယုဒပြည် အပြင်ဘက်တွင် မည်သည့်အမှုကိုမျှ မလုပ်ဆောင်ခဲ့သည့်အတွက် ထိုအကြောင်းကို ယုဒပြည် ပြင်ပတွင် သိရှိသူ နည်းပါးခဲ့သည်။ ယနေ့တွင်၊ ဘုရားသခင်၏ အမှုကို တရုတ်နိုင်ငံဆီသို့ ယူဆောင်လာခဲ့ပြီ ဖြစ်ပြီး ယင်းနယ်ပယ်သက်သက် အတွင်းမှာသာ ဆောင်ရွက်သည်။ ဤအဆင့်အတွင်းတွင် မည်သည့်အလုပ်ကိုမျှ တရုတ်နိုင်ငံ၏ ပြင်ပတွင် အစပျိုးခြင်း မရှိပေ။ တရုတ်နိုင်ငံ၏ အပြင်သို့ ထိုအလုပ် ပျံ့နှံ့မှုမှာ နောက်ပိုင်းတွင် ဖြစ်လာပေမည်။ အလုပ်၏ ဤအဆင့်မှာ ယေရှုအမှု၏ အဆင့်နောက်မှ လိုက်လာခြင်း ဖြစ်သည်။ ယေရှုသည် ရွေးနှုတ်ခြင်း အလုပ်ကို လုပ်ဆောင်ခဲ့ပြီး၊ ဤအဆင့်သည် ၎င်း၏ နောက်မှ လိုက်လာသည့်အလုပ် ဖြစ်သည်၊ ရွေးနှုတ်ခြင်းအမှုသည် ပြီးဆုံးသွားပြီဖြစ်ပြီး၊ ဤအဆင့်မှာ သန့်ရှင်းသော ဝိညာဉ်တော်မှ သန္ဓေတည်ပေးရန် မလိုအပ်တော့ပါ၊ အကြောင်းမှာ အလုပ်၏ ဤအဆင့်သည် ပြီးခဲ့သည့်အဆင့်နှင့် မတူသောကြောင့်၊ ထို့အပြင်၊ တရုတ်နိုင်ငံသည် ဣသရေလနိုင်ငံနှင့် မတူသည့်အတွက်ကြောင့် ဖြစ်သည်။ ယေရှုသည် ရွေးနုတ်ခြင်း အမှု၏ အဆင့်တစ်ခုကို လုပ်ဆောင်ခဲ့သည်။ လူသားသည် ယေရှုကို တွေ့မြင်ပြီးသည့်နောက် များမကြာမီမှာ ယေရှု၏ အလုပ်သည် တစ်ပါးအမျိုးသားများသို့ ပျံ့နှံ့လာခဲ့သည်။ ယနေ့တွင် ဘုရားသခင်ကို ယုံကြည်သူများသည် အမေရိက၊ ယူကေနှင့် ရုရှားနိုင်ငံများမှာ အများအပြား ရှိကြသည်။ သို့ဖြစ်၍ တရုတ်နိုင်ငံမှာ ယုံကြည်သူများ ပိုနည်းနေရသည်မှာ အဘယ်ကြောင့်နည်း။ တရုတ်နိုင်ငံသည် အပိတ်ခံထားရဆုံး နိုင်ငံဖြစ်နေသောကြောင့် ဖြစ်သည်။ ယင်းအတွက်ကြောင့်၊ ဘုရားသခင်၏လမ်းခရီးကို လက်ခံရာတွင် တရုတ်နိုင်ငံသည် နောက်ဆုံးဖြစ်ခဲ့ပြီး၊ ထိုသို့ လက်ခံခဲ့သည်မှာ အမေရိကနှင့် ယူကေတို့ထက် များစွာမှ နောက်ကျခဲ့လျက်၊ ယခုတွင် နှစ်တစ်ရာပင် မပြည့်သေးပေ။ ဘုရားသခင်၏ အလုပ် ပြီးဆုံးသွားစေရန်နှင့် ဘုရားသခင်၏ အလုပ် အားလုံး ပြီးစီးပြီးဆုံး သွားစေရေးအတွက်၊ ဘုရားသခင် အလုပ်၏ နောက်ဆုံးအဆင့်ကို တရုတ်နိုင်ငံထဲတွင် ဆောင်ရွက်သည်။ ဣသရေလနိုင်ငံက ပြည်သူအားလုံးတို့သည် ယေဟောဝါကို သူတို့၏ သခင်ဟူ၍ ခေါ်ဆိုခဲ့ကြသည်။ ထိုစဉ်တုန်းက သူတို့သည် သူ့ကို သူတို့မိသားစု၏ ဦးစည်းအဖြစ် ခံယူခဲ့ကြပြီး၊ ဣသရေလသည် ဧရာမ မိသားစုကြီး ဖြစ်လာခဲ့ကာ၊ ထိုမိသားစုထဲက လူတိုင်းသည် သူတို့၏ သခင် ယေဟောဝါကို ကိုးကွယ်ခဲ့ကြသည်။ ယေဟောဝါ၏ ဝိညာဉ်တော်သည် သူတို့ရှေ့မှာ မကြာခဏ ပေါ်လာလျက် သူသည် သူတို့အား မြွက်ကြားပြီး အသံထွက်ပြောဆိုခဲ့သည်၊ သူတို့၏ ဘဝများကို လမ်းညွှန်ပေးရန် မိုးတိမ်တိုင်နှင့် အသံကို အသုံးပြုခဲ့သည်။ ထိုအချိန်က၊ ဝိညာဉ်တော်သည် သူ၏ လမ်းညွှန်ချက်များကို ဣသရေလ နိုင်ငံထဲတွင် မိမိပြောလိုသည်ကို အသံထွက်ပေးခဲ့၍၊ သူတို့က မိုးတိမ်များကို မြင်ခဲ့ကြရပြီး မိုးချုန်းသံများကို ကြားခဲ့သည်၊ ဤနည်းဖြင့် ယေဟောဝါက သူတို့၏ ဘဝကို နှစ်ထောင်ပေါင်းအချို့ လမ်းညွှန်ပေးခဲ့သည်။ သို့ဖြစ်၍၊ ဣသရေလ ပြည်သူတို့သာလျှင် ယေဟောဝါကို အစဉ်ပင် ဝတ်ပြုကိုးကွယ်လာခဲ့ကြသည်။ ယေဟောဝါသည် သူတို့၏ ဘုရားသခင် ဖြစ်သည်၊ သူသည် တစ်ပါးအမျိုးသားတို့၏ ဘုရားသခင် မဟုတ်ဟု ယုံကြည်ခဲ့ကြသည်။ ယင်းအချက်မှာ အံ့အားသင့်စရာ မဟုတ်ပေ၊ ယေဟောဝါသည် သူတို့ အကြား၌ နှစ်ပေါင်း ၄၀၀၀ နီးနီး လုပ်ဆောင်ခဲ့သည်မှာ အမှန်ပင် ဖြစ်သည်။ တရုတ်နိုင်ငံထဲတွင်မူ နှစ်ပေါင်းထောင်ချီ ထုံထိုင်းလေးကန်သော အိပ်စက်ခြင်းနောက်တွင် ယိုယွင်းသောသူတို့သည် ယခုအခါကျမှ မိုးကောင်းကင်နှင့် မြေကြီးနှင့် အရာခပ်သိမ်းတို့သည် သဘာဝအလျောက် ပေါ်ပေါက်လာခဲ့ကြခြင်း မဟုတ်ဘဲ၊ ဖန်ဆင်းရှင်မှ ဖန်ဆင်းပေးခဲ့ခြင်း ဖြစ်သည်ကို သိရှိလာကြသည်။ ထိုဧဝံဂေလိတရားမှာ နိုင်ငံခြားမှ ရောက်ရှိလာခဲ့၍၊ အလွန်ခေတ်နောက်ကျ၍ တိုးတက်မှုကို မလိုလားသည့်စိတ် ရှိသော သူတို့က ထိုဧဝံဂေလိတရားကို လက်ခံကြသူ အားလုံးတို့သည် စိတ်မချရပေ၊ သူတို့သည် သူတို့၏ ဘိုးအေဖြစ်သည့် ဗုဒ္ဓကို သစ္စာဖောက်သည့် အမျိုးမစစ်သောခွေးများ ဖြစ်သည်ဟု ယုံကြည်ခဲ့ကြသည်။ ထို့အပြင်၊ ယင်းကဲ့သို့ ခေတ်နောက်ကျသည့်စိတ် ရှိသူ အများအပြားတို့က “တရုတ်လူမျိုးများသည် နိုင်ငံခြားသားများ၏ ဘုရားသခင်ကို မည်ကဲ့သို့ ယုံကြည်နိုင်ကြသနည်း၊ ထိုသူတို့သည် ကိုယ့်ဘိုးဘွားများကို သစ္စာဖောက်သည် မဟုတ်လော၊ သူတို့သည် မကောင်းမှုကို ကျူးလွန်နေကြခြင်းပင် မဟုတ်လော” ဟူ၍ မေးခွန်းထုတ်ကြသည်။ ယနေ့တွင် ယေဟောဝါသည် ၎င်းတို့၏ ဘုရားသခင် ဖြစ်သည်ကို လူများမေ့သွားကြပေပြီ။ သူတို့သည် ဖန်ဆင်းရှင်ကို သိပ်မစဉ်းစားတော့ဘဲ၊ ယင်းအစား လူသားသည် မျောက်များမှ ဆင့်ကဲဖြစ်ပေါ်လာခဲ့ပြီး၊ သဘာဝလောကကြီးသည် သဘာဝအတိုင်း ပေါ်ပေါက်လာခဲ့သည်ဟူသော ဆင့်ကဲဖြစ်စဉ်ကို ယုံကြည်နေကြသည်။ လူသားတို့ စားသုံးနေကြသည့် အစားအစာကောင်းများကို သဘာဝမှ ထောက်ပံ့ပေးသည်၊ လူသား၏ အသက်ရှင်ခြင်းနှင့် သေဆုံးရခြင်းတွင် စီစဉ်တကျရှိသည်၊ ထို့အပြင် ယင်းတို့အားလုံးကို စီမံအုပ်ချုပ်နေသည့် ဘုရားသခင်မရှိဟူ၍ ယုံကြည်နေကြသည်။ ထို့အပြင် အရာခပ်သိမ်းကို ဘုရားသခင်မှ အုပ်စိုးနေခြင်းမှာ အယူသည်းမှုဖြစ်၍ သိပ္ပံနည်းမကျဟု ယုံကြည်နေကြသည့် ဘုရားမဲ့ဝါဒီ အများအပြား ရှိကြသေးသည်။ သို့သော် ဘုရားသခင်၏ အမှုကို သိပ္ပံပညာက အစားထိုးပြီး နေရာယူနိုင်မည်လော။ သိပ္ပံပညာသည် လူသားများကို စီမံအုပ်ချုပ်နိုင်မည်လော။ ဘုရားမဲ့ဝါဒအုပ်ချုပ်သော နိုင်ငံတစ်နိုင်ငံတွင် ဧဝံဂေလိတရားကို ဟောကြားရသည်မှာ လွယ်ကူသည့်တာဝန် မဟုတ်သကဲ့သို့ ဧရာမအခက်အခဲများ ပါဝင်နေသည်။ ယနေ့တွင် ဘုရားသခင်ကို ယင်းကဲ့သို့သော ပုံစံမျိုးဖြင့် ဆန့်ကျင်နေသူ အများအပြား ရှိနေကြသည် မဟုတ်လော။

ယေရှုက သူ၏အမှုကို လုပ်ဆောင်ရန် လာသောအခါ၊ လူများစွာတို့သည် သူ၏ လုပ်ဆောင်ချက်ကို ယေဟောဝါ၏ လုပ်ဆောင်ချက်နှင့် နှိုင်းယှဥ်ကြည့်ပြီး ၎င်းတို့ကို ကွဲလွဲသည်ဟု တွေ့မြင်ကြသည့်အခါ သူတို့သည် ယေရှုကို လက်ဝါးကပ်တိုင်ပေါ်သို့တင်ပြီး သံမှိုနှင့် ရိုက်ကပ်ခဲ့ကြသည်။ သူတို့သည် သူတို့နှစ်ဦး၏ လုပ်ဆောင်ချက်များအကြားတွင် အဘယ့်ကြောင့် ညီညွတ်မှုများကို မတွေ့ရှိခဲ့ကြသနည်း။ တစ်စိတ်တစ်ဒေသအားဖြင့် ၎င်းမှာ ယေရှု လုပ်ဆောင်ခဲ့သည်မှာ အမှုအသစ် ဖြစ်ခဲ့သောကြောင့် ဖြစ်ပြီး၊ ယေရှုသည် သူ၏အလုပ်ကို မစတင်ခဲ့မီတွင် မည်သူကမျှ ယေရှု၏ သားစဉ်မြေးဆက်စာရင်းကို မရေးခဲ့ခြင်းကြောင့် ဖြစ်သည်။ တစ်ယောက်ယောက်က ရေးသားခဲ့မည်ဆိုလျှင် ယင်းမှာ ကောင်းခဲ့လိမ့်မည်- သို့ဆိုလျှင် မည်သူက ယေရှုကို လက်ဝါးကပ်တိုင်ပေါ်သို့ သံမှိုဆွဲနှက်ခဲ့ကြလိမ့်မည်နည်း။ မဿဲကသာ ယေရှု၏ သားစဉ်မြေးဆက်စာရင်းကို ဆယ်စုနှစ် အနည်းငယ်စောပြီး ရေးခဲ့မည်ဆိုပါက၊ ယေရှုသည် ထိုကဲ့သို့ ကြီးစွာသောညဉ်းပန်းနှိပ်စက်မှုကို ခံစားခဲ့ရမည် မဟုတ်ပေ။ ဟုတ်သည် မဟုတ်လော။ လူများက ယေရှု၏ သားစဉ်မြေးဆက်စာရင်းကို ဖတ်ရှုလိုက်ရသည်နှင့် ယေရှုသည် အာဗြဟံ၏ သားနှင့် ဒါဝိဒ်၏ ဆွေစဉ်မျိုးဆက်ဖြစ်သည်ကို သိလိုက်ရသည်နှင့် သူတို့သည် ယေရှုအား ကွပ်မျက်ခြင်းကို ရပ်စဲပစ်ခဲ့ကြမည် ဖြစ်သည်။ သို့ဖြစ်သောကြောင့်၊ ယေရှု၏ သားစဉ် မြေးဆက်စာရင်းကို အလွန်နောက်ကျပြီးမှ ရေးခဲ့ခြင်းမှာ ဝမ်းနည်းစရာ မကောင်းပေဘူးလော။ ထို့အပြင် သမ္မာကျမ်းစာထဲ၌ ဘုရားသခင် အလုပ်၏ အဆင့်နှစ်ဆင့်ကိုသာ မှတ်တမ်းတင်ထားခြင်းမှာလည်း ဝမ်းနည်းစရာ ကောင်းလှသည်၊ ပညတ်တော်ခေတ်၏ အလုပ်က အဆင့်တစ်ဆင့် ဖြစ်ပြီး ကျေးဇူးတော်ခေတ်၏ အလုပ်က တစ်ဆင့် ဖြစ်သည်၊ တစ်ဆင့်က ယေဟောဝါ၏ အလုပ်ဖြစ်ပြီး၊ တစ်ဆင့်က ယေရှု၏ အလုပ်ဖြစ်သည်။ မဟာပရောဖက် တစ်ပါးပါးက ယနေ့၏ အလုပ်အကြောင်းကို ကြိုတင်၍ ပြောခဲ့မည်ဆိုလျှင် မည်မျှကောင်းလိုက်လိမ့်မည်နည်း။ သမ္မာကျမ်းစာထဲမှာ “နောက်ဆုံးသောကာလ၏ အလုပ်” ဟူသည့် အခန်းပိုကို ထည့်ရေးပေးခဲ့လျှင် ပိုကောင်းခဲ့မည် မဟုတ်လော။ လူသားသည် ယနေ့တွင် ထိုကဲ့သို့သော အခက်အခဲကို အဘယ်ကြောင့် ခံနေရသနည်း။ သင်တို့၌ ထိုသို့သော ခက်ခဲသည့် အချိန်များ ရှိခဲ့သည်။ အမုန်းခံထိုက်သည့်သူ တစ်ဦးဦးရှိသည်ဆိုပါက၊ နောက်ဆုံးသောကာလ၏ အလုပ်ကို ကြိုတင်ဟောမပေးခဲ့ကြသည့် ဟေရှာယနှင့် ဒံယလေတို့ ဖြစ်ကြသကဲ့သို့၊ တစ်စုံတစ်ယောက်ကို အပြစ်ဖို့ရမည့် ဆိုလျှင်၊ ဘုရားသခင်၏ ဒုတိယအကြိမ် လူ့ဇာတိခံယူခြင်း၏ သားစဉ်မြေးဆက်စာရင်းကို စောပြီး ရေးမပေးခဲ့ကြသည့် ဓမ္မသစ်ကျမ်း၏ တမန်တော်များပင် ဖြစ်သည်။ ယင်းအချက်မှာ မည်မျှ စိတ်ပျက်စရာ ကောင်းလိုက်သနည်း။ သင်တို့သည် နေရာအနှံ့ အထောက်အထားကို လိုက်ရှာကြရပြီး၊ နှုတ်ကပတ်တော်လေး တစ်ချို့တို့၏ အပိုင်းအစလေးများကို ရှာတွေ့ရလျှင်ပင် သင်တို့သည် ၎င်းတို့မှာ သက်သေထူပြချက် အမှန်ဟုတ်သည် ဆိုခြင်းအား မပြောနိုင်ကြသေး။ ရှက်စရာ ကောင်းလိုက်လေခြင်း။ ဘုရားသခင်သည် သူ၏ လုပ်ဆောင်ချက်များကို အဘယ်ကြောင့် အလွန်လျှို့ဝှက်ထားခဲ့သနည်း။ ယနေ့တွင်၊ လူများစွာတို့သည် ခိုင်လုံသည့် အထောက်အထားများကို ရှာတွေ့ရန် လိုနေဆဲဖြစ်သော်လည်း သူတို့သည် ထိုအချက်ကို ငြင်းဆန်နိုင်စွမ်းလည်း မရှိကြပေ။ သို့ဖြစ်လျှင်၊ သူတို့ ဘာလုပ်သင့်သနည်း။ သူတို့သည် ဘုရားသခင်၏ နောက်ကို ပြတ်ပြတ်သားသား မလိုက်နိုင်ကြသကဲ့သို့၊ ထိုကဲ့သို့ သံသယစိတ်များနှင့်လည်း ရှေ့ကို မသွားနိုင်ကြ။ သို့ဖြစ်၍ “ပါးနပ်၍ အထုံပါရမီရှိသော” လူအများအပြားတို့က “စမ်းကြည့်ရေး” သဘောထားကို စွဲကိုင်ထားကြသည်။ ထိုအချက်မှာ အလွန်ပင် ကရိကထများလှသည်။ မဿဲ၊ မာကု၊ လုကာနှင့် ယောဟန်တို့က အနာဂတ်ကို ဟောကိန်းထုတ်နိုင်ခဲ့ကြလျှင် အမှုအရာများသည် များစွာမှ သာ၍လွယ်ကူခဲ့မည် မဟုတ်လော။ ယောဟန်သည် နိုင်ငံတော်ထဲရှိ အသက်တာ၏ အတွင်းကျသော သမ္မာတရားကို မြင်တွေ့ခဲ့ရလျှင် ပိုကောင်းခဲ့ပေလိမ့်မည်၊ သူသည် ရူပါရုံများသာ မြင်ခဲ့ရပြီး ကမ္ဘာမြေကြီးပေါ်ရှိ စစ်မှန်ပြီး ဒြပ်ထည်ရှိသော အလုပ်ကို မမြင်ခဲ့ရခြင်းမှာ ဝမ်းနည်းစရာပင်။ ယင်းအချက်မှာ အထူးပင် စိတ်ပျက်စရာ ဖြစ်သည်။ ဘုရားသခင်က ဘာများလွဲမှားနေသနည်း။ ဘုရားသခင်၏ လုပ်ဆောင်ချက်မှာ ဣသရေလနိုင်ငံတွင် အထူးကောင်းမွန်ခဲ့သည့် နောက်မှာ၊ ဘုရားသခင်သည် ယခု တရုတ်နိုင်ငံကို အဘယ်ကြောင့်ရောက်လာခဲ့ပြီး၊ လူ့ဇာတိခံယူလျက် ကိုယ်တိုင်ကိုယ်ကျ လုပ်ကိုင်ရင်း လူများအကြားမှာ အဘယ့်ကြောင့် နေထိုင်ရနည်း။ ဘုရားသခင်သည် လူသားအပေါ် စာနာမှုမရှိလွန်းလေစွ။ ဘုရားသခင်သည် လူများကို ကြိုတင်ပြီး မပြောခဲ့သည့်အပြင်၊ ရုတ်တရက် သူ၏ ပြစ်တင်ဆုံးမမှုနှင့် တရားစီရင်ချက်ကို ယူဆောင်လာခဲ့သည်။ ထိုအချက်ကို တကယ့်ကို နားလည်မရနိုင်ပေ။ ဘုရားသခင် ပထမအကြိမ် လူ့ဇာတိ ခံယူခဲ့စဉ်တွင်၊ သမ္မာတရား၏ အတွင်းပိုင်းအားလုံးကို လူသားတို့အား ကြိုတင်မပြောကြားခဲ့၍ သူသည် အခက်အခဲများစွာကို ရင်ဆိုင်ခဲ့ရသည်။ ဘုရားသခင်သည် ထိုအဖြစ်ကို မေ့မသွားသည်မှာ သေချာသည် မဟုတ်လော။ သို့ဆိုလျှင် ယခုတစ်ကြိမ်မှာရော လူသားကို ယခုထိ မပြောရသေးသည်မှာ အဘယ်ကြောင့်နည်း။ ယနေ့တွင် သမ္မာကျမ်းစာထဲ၌ ကျမ်းပေါင်း ခြောက်ဆယ့်ခြောက်ကျမ်းသာ ရှိနေခြင်းမှာ သိပ်ကို ကံဆိုးလှသည်။ နောက်ဆုံးသော ကာလ၏ အလုပ်အကြောင်းကို ဟောပေးထားသည့် အနာဂတ္တိကျမ်း တစ်ကျမ်း လိုနေသေးသည်။ သင်တို့ရော ထိုသို့ မထင်ကြဘူးလော။ ယေဟောဝါ၊ ဟေရှာယနှင့် ဒါဝိဒ်တို့ပင် ယနေ့ကာလ၏ အလုပ်ကို မပြောပြခဲ့ကြပေ။ သူတို့သည် ပစ္စုပန်ကာလနှင့် သာ၍ဝေးသွားပြီ ဖြစ်လျက် အချိန်ကွာဟချက်မှာ နှစ်ပေါင်း ၄၀၀၀ ထက်ပင် ပိုသည်။ ယေရှုသည်လည်း ယနေ့ခေတ် အလုပ်အကြောင်းကို အပြည့်အဝ မဟောကြားခဲ့သည့်အပြင်၊ ပြောကြားခဲ့သည့် အနည်းငယ်ထဲတွင်လည်း လူသားတို့ ရှာတွေ့ခဲ့ကြသည့် အထောက်အထားများမှာ မလုံလောက်ပေ။ အကယ်၍ သင်သည် ယနေ့ကာလ၏အလုပ်ကို ယခင်အလုပ်နှင့် နှိုင်းယှဉ်ကြည့်လျှင် ယင်းနှစ်ခုကို တစ်ခုနှင့်တစ်ခု မည်ကဲ့သို့ ချိတ်ဆက်ရနိုင်မည်နည်း။ ယေဟောဝါ၏ အဆင့်တုန်းက လုပ်ဆောင်ခဲ့မှုမှာ ဣသရေလကို ဦးတည်ခဲ့သည် ဖြစ်၍၊ သင်သည် ယနေ့ကာလ၏ အလုပ်ကို ၎င်းနှင့် ယှဉ်ကြည့်မည်ဆိုလျှင်၊ ကွဲလွဲချက်များမှာ ပို၍ပင် ကြီးမား ပေလိမ့်မည်၊ ၎င်းတို့နှစ်ခုကို ယှဉ်ကြည့်၍ မရနိုင်ပေ။ သင်တို့က ဣသရေလနိုင်ငံမှလည်း မဟုတ်၊ ယုဒ လူမျိုးလည်း မဟုတ်- သင်၏ အရည်အချင်းနှင့် သင်နှင့်ဆိုင်သည့် အရာရာတိုင်းမှာ နိမ့်ကျနေသည်။ သင်သည် ကိုယ့်ကိုယ်ကိုယ် သူတို့နှင့်သွား၍ မည်ကဲ့သို့ ယှဉ်ကြည့်၍ ရနိုင်မည်နည်း။ ယှဉ်ကြည့်ရန်မှာ ဖြစ်နိုင်ပါသလော။ ယနေ့သည် နိုင်ငံတော်ခေတ် ဖြစ်သည်ကို သိ၍၊ ၎င်းမှာ ပညတ်တော်ခေတ်နှင့် ကျေးဇူးတော်ခေတ်တို့နှင့် ခြားနားသည်ကို သိလော့။ မည်သို့ပင်ဖြစ်စေကာမူ၊ ပုံသေနည်းကို အသုံးပြုဖို့ မကြိုးစားလေနှင့်။ ဘုရားသခင်ကို ယင်းကဲ့သို့သော ပုံသေနည်းဖြင့် ရှာ၍မရနိုင်ပေ။

ယေရှုသည် သူမွေးဖွားခဲ့သည့် နောက်ပိုင်း ၂၉ နှစ်အတွင်း မည်ကဲ့သို့ နေထိုင်ခဲ့သနည်း။ သမ္မာကျမ်းစာ ထဲတွင် ယေရှု၏ ကလေးဘဝနှင့် လူငယ်ဘဝ အကြောင်း ဘာကိုမျှ ရေးမှတ်မပေးထားပေ၊ ထိုဘဝများမှာ မည်သို့ဖြစ်ခဲ့မည်ဟု သင်သိသလော။ ယေရှု၌ ကလေးဘဝ သို့မဟုတ် လူငယ်ဘဝ မရှိခဲ့ဘဲ၊ သူမွေးလိုက်ချိန်တွင်ပင် အသက် ၃၀ ရှိလာခဲ့သည်များလော။ သင်သိသည်မှာ အထူးကိုနည်းနေ၍၊ ကိုယ့်အမြင်များကို ပြောရာတွင် ဂရုမစိုက်လွန်းဘဲ မနေနှင့်။ ထိုသို့ပြုလုပ်မှုမှာ သင့်အတွက် ဘာမျှမကောင်းနိုင်ပေ။ သမ္မာကျမ်းစာထဲတွင် မှတ်တမ်းတင် ရေးထားမှုအရ ယေရှု၏ နှစ် ၃၀ ပြည့် မွေးနေ့ မတိုင်မီတွင်၊ သူသည် ဗတ္တိဇံခံခဲ့ပြီး မာရ်နတ်၏ သွေးဆောင်မှုကို ရင်ဆိုင်စေရန်အတွက်ရေး သန့်ရှင်းသော ဝိညာဉ်တော်က တောနက်ကြီးထဲသို့ ခေါ်ဆောင်သွားခဲ့သည်ဆို၍ ပါသည်။ ထို့အပြင် ခရစ်ဝင်ကျမ်း လေးကျမ်းတို့က ယေရှု၏ သုံးနှစ်ခွဲကြာခဲ့သည့် အလုပ်ကို မှတ်တမ်းတင် ထားကြသည်။ ၎င်းထဲတွင် ယေရှု၏ ကလေးဘဝနှင့် လူငယ်ဘဝ ဆိုင်ရာမှတ်တမ်း မရှိသော်လည်း၊ ထိုအချက်က သူ့ထံ၌ ကလေးဘဝနှင့် လူငယ်ဘဝ မရှိခဲ့ခြင်းကို သက်သေထူမပေးပေ။ အစပိုင်းတွင် သူသည် ဘာမျှမလုပ်ဆောင်ခဲ့ဘဲ ပုံမှန်လူတယောက် ဖြစ်ခဲ့ခြင်းသာ ဖြစ်သည်။ သို့ဆိုလျှင် သူသည် ၃၃ နှစ်တိုင်တိုင် လူငယ်ဘဝ သို့မဟုတ် ကလေးဘဝမရှိဘဲ နေထိုင်ခဲ့သည်ဟု သင်ပြောနိုင်သလော။ သူသည် ရုတ်တရက် ၃၃ နှစ်ခွဲအရွယ်သို့ ရောက်လာနိုင်သလော။ ယေရှုအကြောင်း လူတို့စဉ်းစားသည့် ဤအရာဟူသမျှမှာ သဘာဝလွန်ပြီး လက်တွေ့မကျပေ။ လူ့ဇာတိခံယူသော ဘုရားသခင်သည် သာမန် ပုံမှန် လူ့သဘာဝရှိခြင်းမှာ ယုံမှားဖွယ်ရာ မဟုတ်သော်လည်း၊ သူသည် သူ၏ အလုပ်ကို ဆောင်ရွက်သည့်အခါ ၎င်းသည် သူ၏ မပြည့်စုံသော လူ့သဘာဝနှင့် ပြည့်စုံသော ဘုရားသဘောသဘာဝတို့ဖြင့် တိုက်ရိုက် ဆောင်ရွက်သည်။ ယင်းကြောင့် လူများက ယနေ့ခေတ်၏ အလုပ်နှင့် ယေရှု၏ အလုပ်ကိုပင်၊ သံသယ ဖြစ်နေကြခြင်း ဖြစ်သည်။ ဘုရားသခင်က လူ့ဇာတိခံယူသည့် နှစ်ကြိမ်ကြား သူ၏ အလုပ်များမှာ ကွဲပြားခြားနားကြသော်လည်း၊ သူ၏ အနှစ်သာရသည် မကွဲပြားပေ။ မှန်ပါသည်၊ သင် ခရစ်ဝင်ကျမ်း လေးကျမ်း၏ မှတ်တမ်းများကို ဖတ်ကြည့်မည် ဆိုလျှင်၊ ခြားနားချက်များမှာ ကြီးမားလှသည်။ ယေရှု၏ ကလေးဘဝနှင့် လူငယ်ဘဝ နှစ်များဆီကို သင်မည်ကဲ့သို့ ပြန်သွားနိုင်မည်နည်း။ သင်သည် ယေရှု၏ ပုံမှန် လူ့သဘာဝကို မည်ကဲ့သို့ နားလည် နိုင်မည်နည်း။ သင်သည် ယနေ့ခေတ် ဘုရားသခင်၏ လူ့သဘာဝနှင့် ပတ်သက်သည့် ခိုင်မာသော နားလည်မှုတစ်ခု ရှိကောင်း ရှိနိုင်သော်လည်း၊ ယေရှု၏ လူ့သဘာဝကို သင်လုံးဝ သဘောမပေါက်ဘဲ၊ သာ၍ပင် နားမလည်ချေ။ မဿဲကသာ မှတ်တမ်းမတင်ခဲ့ပါက၊ သင်သည် ယေရှု၏ လူ့သဘာဝ အကြောင်း အရိပ်အခြည်ကိုပင်လျှင် သိနိုင်စရာမရှိပေ။ ငါက သင့်ကို ယေရှု ဘဝဆိုင်ရာ အဖြစ်အပျက်များ၊ ယေရှု၏ ကလေးဘဝနှင့် လူငယ်ဘဝထဲက အတွင်းကျသော အမှန်တရားများကို ပြောပြသောအခါ၊ သင်က ခေါင်းခါလျက် “မဖြစ်နိုင်ဘူး။ ယေရှုဟာ အဲဒါမျိုး မဖြစ်နိုင်ခဲ့ဘူး။ သူ့ဆီမှာ လူ့သဘာဝ တစ်စုံတစ်ရာရှိဖို့မပြောနဲ့၊ အားနည်းချက် တစ်ခုမှ မရှိနိုင်ဘူး” ဟု ပြောဆိုမည် ဖြစ်သည်။ သင်သည် အော်ဟစ်ခြင်းပင် ပြုမည်ဖြစ်သည်။ သင်သည် ယေရှုကို နားမလည်သောကြောင့် ငါနှင့်ပတ်သက်သည့် အယူအဆများ သင်၌ ရှိရခြင်း ဖြစ်သည်။ ယေရှုသည် ဘုန်းတန်ခိုး အထူးရှိသည်၊ သူနှင့် ပတ်သက်လာလျှင် ဇာတိပကတိ တစ်ခုမျှ မပါဟု သင်က ယုံကြည်နေသည်။ သို့သော် အမှန်တရားမှာ အမှန်တရားပင် ဖြစ်သည်။ မည်သူကမျှ ဖြစ်ရပ်မှန်များ၏ သမ္မာတရားကို ဖီဆန်လျက် ပြောဆိုချင်မည် မဟုတ်ပေ၊ အကြောင်းမှာ ငါပြောသည့်အခါ ထိုအရာသည် သမ္မာတရားနှင့် ဆက်စပ်နေပြီး၊ မှန်းဆထင်ကြေး ပေးနေခြင်းမျိုး မဟုတ်သကဲ့သို့၊ ဟောကိန်းထုတ်မှုလည်း မဟုတ်ပေ။ ဘုရားသခင်သည် အလွန်မြင့်သည့် နေရာဆီသို့ တက်လှမ်းနိုင်သည်၊ ထို့အပြင်၊ ဘုရားသခင်သည် မဟာနက်ရှိုင်းသည့် နေရာတွင်လည်း ပုန်းကွယ်လျက် နေနိုင်သည်ဆိုခြင်းကို သိမှတ်လော့။ သူသည် သင်၏စိတ်ထဲတွင် လုပ်ကြံဖန်တီးယူ၍ရသည့် အရာတစ်ခု မဟုတ်ချေ- သူသည် သီးသန့်ပုဂ္ဂိုလ်တစ်ဦးက စိတ်ကူးရသည့် ကိုယ်ပိုင် ဘုရားသခင် မဟုတ်ဘဲ သက်ရှိ သတ္တဝါအားလုံးတို့၏ ဘုရားသခင်ဖြစ်သည်။