ယနေ့ ကျွန်ုပ်တို့သည် အန္တိခရစ်တို့၏ အမျိုးမျိုးသော သရုပ်သကန်များထဲမှ အချက် ၁၀ ဖြစ်သည့် ၎င်းတို့သည် သမ္မာတရားကို စက်ဆုပ်ရွံရှာသည်၊ စည်းမျဉ်းများကို မျက်နှာပြောင်တိုက်၍ မထီမဲ့မြင်ပြုပြီး ဘုရားအိမ်တော်၏ စီစဉ်မှုများကို လျစ်လျူရှုကြသည် ဟူသည်နှင့် စပ်လျဉ်း၍ ဆက်လက်၍ မိတ်သဟာယပြုကြသည်။ ပြီးခဲ့သည့်အခေါက်က သမ္မာတရားကို စက်ဆုပ်ရွံရှာခြင်းနှင့် ပတ်သက်၍ သီးသန့် မိတ်သဟာယအချို့ ပြုခဲ့ကြပြီး ဖြစ်သောကြောင့် ယင်းကို ဦးစွာ ပြန်လည်သုံးသပ်ကြည့်ကြစို့။ ပြီးခဲ့သည့်အခါက “စက်ဆုပ်ရွံရှာခြင်း” နှင့်ပတ်သက်သော သင်တို့၏ ရှင်းပြချက်မှာ အဘယ်နည်း။ (ကျွန်ုပ်တို့က ယင်းကို သမ္မာတရားအပေါ် အရေးမထားခြင်း၊ အထင်သေးခြင်း၊ ဘေးချိတ်ထားခြင်းနှင့် သမ္မာတရားအပေါ် အလေးအနက် မထားခြင်းအပြင် သမ္မာတရားအပေါ် မထီမဲ့မြင်ပြုခြင်းအဖြစ် ရှင်းပြခဲ့ပါသည်။) ဤစကားလုံး၏ အနှစ်သာရကို လက်တွေ့ကျသော အသုံးအနှုန်းများဖြင့် သင်တို့ အသေအချာ ရှင်းပြခဲ့ကြပြီးပြီလော။ (ကျွန်ုပ်တို့၏ ရှင်းလင်းချက်သည် စက်ဆုပ်ရွံရှာခြင်း၏ အနက်တူ ဝေါဟာရများနှင့်သာ ညီမျှပါသည်။ ယင်းသည် အပေါ်ယံသာဖြစ်ပြီး သမ္မာတရားကို စက်ဆုပ်ရွံရှာခြင်း၏ အသေးစိတ် အချက်အလက်များကိုဖြစ်စေ၊ သမ္မာတရားကို ကျွန်ုပ်တို့ ဆက်ဆံရာတွင် ကျွန်ုပ်တို့၏ သဘောထားနှင့် သရုပ်သကန်များကိုဖြစ်စေ ရှင်းလင်းစွာ မဖော်ပြခဲ့ပါ။ ကျွန်ုပ်တို့သည် ယင်း၏ အနှစ်သာရကို ရှင်းပြရန် ပျက်ကွက်ခဲ့ပါသည်။) ထိုသို့သော ရှင်းလင်းချက်၏ သဘောသဘာဝမှာ အဘယ်နည်း။ ယင်းသည် မည်သည့်အမျိုးအစားအောက်တွင် ရှိသနည်း။ (စကားလုံးများနှင့် အယူဝါဒများ ဖြစ်ပါသည်။) အခြား ရှိသေးသလော။ ယင်းသည် အသိပညာနှင့် သက်ဆိုင်သလော။ (သက်ဆိုင်ပါသည်။) ဤအသိပညာကို မည်သို့ ရရှိခဲ့သနည်း။ ယင်းကို ကျောင်းများမှ၊ ဆရာများထံမှ၊ အဘိဓာန်များနှင့် စာအုပ်များမှလည်း ရရှိခဲ့သည်။ သို့ဆိုလျှင် ငါ၏ ရှင်းလင်းချက်နှင့် သင်တို့၏ ရှင်းလင်းချက်အကြား ကွာခြားချက်မှာ အဘယ်နည်း။ (ဘုရားသခင်၏ မိတ်သဟာယသည် လူတစ်ဦးချင်းစီ၏ သမ္မာတရားအပေါ် သဘောထားနှင့် သက်ဆိုင်ပါသည်။ ဆိုလိုသည်မှာ လူတို့သည် ၎င်းတို့၏ စိတ်နှလုံးများ၏ နက်ရှိုင်းရာမှ သမ္မာတရားကို အတိုက်အခံပြုကြသည်၊ ယင်းကို ပစ်ပစ်ခါခါငြင်းပြီး စက်ဆုပ်ရွံရှာကြသည်၊ လက်မခံကြပေ။ ယင်းကို ပြစ်တင်ရှုတ်ချသည်အထိပင်ဖြစ်ကာ မလိုမုန်းထားစွာဖြင့် ဝေဖန်ပြီး အသရေဖျက်ကြသည်အထိပင် ဖြစ်သည်။ ဘုရားသခင်၏ ရှင်းလင်းချက်သည် လူတို့၏ သမ္မာတရားအပေါ် သဘောထားနှင့်ဆိုင်သော အနှစ်သာရမှ လာပါသည်။) ကျွန်ုပ်သည် “စက်ဆုပ်ရွံရှာခြင်း” ဟူသော စကားလုံး၏ အနှစ်သာရကို အမျိုးမျိုးသော အနှစ်သာရပိုင်းဆိုင်ရာ အပြုအမူများ၊ ကျင့်ကြံမှုများ၊ သဘောထားများနှင့် အမြင်များ၏ ရှုထောင့်မှ ရှင်းပြသည်။ မည်သည့်ရှင်းလင်းချက်က အမှန်တကယ်တွင် သမ္မာတရား ဖြစ်သနည်း။ (ဘုရားသခင်၏ ရှင်းလင်းချက်သည် သမ္မာတရား ဖြစ်ပါသည်။) သို့ဆိုလျှင် သင်တို့၏ ရှင်းလင်းချက်သည် မည်သည့်နေရာတွင် လိုအပ်နေသနည်း။ (ကျွန်ုပ်တို့သည် သမ္မာတရားကို နားမလည်ကြပါ။ ငါတို့သည် အမှုအရာများ၏ အပေါ်ယံကိုသာ ကြည့်ပြီး ယင်းတို့ကို တိုက်ရိုက် အဓိပ္ပာယ်ဖွင့်ဆိုကြကာ ပြဿနာများကို ရှုမြင်ရန် အသိပညာနှင့် အယူဝါဒများအပေါ် မှီခိုကြပါသည်။) သင်တို့သည် ဤစကားလုံးကို မိမိတို့ သိနားလည်ထားသော အသိပညာအပေါ် အခြေခံ၍၊ တိုက်ရိုက်အဓိပ္ပာယ်ကို မိမိတို့ နားလည်သဘောပေါက်မှုအတိုင်း အဓိပ္ပာယ် ဖွင့်ဆိုကြသော်လည်း ဤစကားလုံးသည် လူတစ်ဦး၏ သဘာဝအနှစ်သာရနှင့်လည်းကောင်း၊ ဖောက်ပြန်ပျက်စီးသော စိတ်သဘောထားတို့နှင့်လညးကောင်း မည်သို့ဆက်စပ်နေသည်ကို သင်တို့ လုံးဝ မသိကြချေ။ ဤသည်မှာ အသိပညာနှင့် အယူဝါဒများ၊ နှင့် သမ္မာတရားတို့ကြား ကွာခြားချက်ဖြစ်သည်။ သင်တို့သည် ဘုရားနှုတ်ကပတ်တော်များကို ဖတ်ရှုပြီး သမ္မာတရားကို မိတ်သဟာယပြုသည့်အခါတွင်လည်း ဤနည်းလမ်းနှင့် ဤရှုထောင့်ကို ပုံမှန်အားဖြင့် အသုံးပြုကြသလော။ (အသုံးပြုပါသည်။) လူအများစုသည် ဘုရားနှုတ်ကပတ်တော်များကို မည်သို့ပင် ဖတ်ရှုပါစေ၊ နှုတ်ကပတ်တော်များထဲရှိ သမ္မာတရားသည် အမှန်တကယ် မည်သည့်အရာဖြစ်သည်ကို နားမလည်နိုင်ကြသည်မှာ မဆန်းပေ။ သို့ဖြစ်၍ လူများစွာတို့သည် ဘုရားသခင်ကို နှစ်ပေါင်းများစွာ ယုံကြည်ခဲ့ကြသော်လည်း သမ္မာတရား လက်တွေ့ကျမှုကို နားလည်ခြင်း သို့မဟုတ် ဝင်ရောက်ခြင်း မရှိကြပေ။ “လူတို့သည် သမ္မာတရားကို နားမလည်ကြသကဲ့သို့ ယင်းကို သဘောပေါက်နားလည်နိုင်စွမ်းလည်း မပိုင်ဆိုင်ကြပေ” ဟု အစဉ် ပြောရခြင်းမှာ ဤအကြောင်းကြောင့် ဖြစ်သည်။

ငါတို့သည် အန္တိခရစ်တို့၏ သရုပ်သကန်များ၏ အချက် ၁၀ ဖြစ်သည့် ၎င်းတို့သည် သမ္မာတရားကို စက်ဆုပ်ရွံရှာသည်၊ စည်းမျဉ်းများကို မျက်နှာပြောင်တိုက်၍ မထီမဲ့မြင်ပြုပြီး ဘုရားအိမ်တော်၏ စီစဉ်မှုများကို လျစ်လျူရှုကြသည် ဟူသည့်အကြောင်းကို ဆက်လက်၍ မိတ်သဟာယပြုကြမည်။ ပြီးခဲ့သည့်စုဝေးပွဲတွင် ငါတို့သည် သမ္မာတရားအပေါ် စက်ဆုပ်ရွံရှာခြင်းကို အချက်သုံးချက်အဖြစ် ခွဲခြားခဲ့သည်။ ထိုသုံးချက်မှာ အဘယ်နည်း။ (ပထမဦးစွာ ဘုရားသခင်၏ ပင်ကိုလက္ခဏာနှင့် အနှစ်သာရကို စက်ဆုပ်ရွံရှာခြင်း၊ ဒုတိယအနေဖြင့် ဘုရားသခင် လူ့ဇာတိခံယူထားသော ဇာတိပကတိကို စက်ဆုပ်ရွံရှာခြင်း၊ တတိယအနေဖြင့် ဘုရားသခင်၏ နှုတ်ကပတ်တော်များကို စက်ဆုပ်ရွံရှာခြင်း တို့ဖြစ်ပါသည်။) ဤအချက်သုံးချက်ကို အခြေခံ၍ “အန္တိခရစ်တို့သည် သမ္မာတရားကို စက်ဆုပ်ရွံရှာသည်၊ စည်းမျဉ်းများကို မျက်နှာပြောင်တိုက်၍ မထီမဲ့မြင်ပြုပြီး ဘုရားအိမ်တော်၏ စီစဉ်မှုများကို လျစ်လျူရှုကြသည်” ဟူသော အကြောင်းအရာကို စိတ်ဖြာလေ့လာဆွေးနွေးကြစို့။ ပြီးခဲ့သည့်တစ်ခေါက်က ငါတို့သည် ပထမအချက်နှင့်ပတ်သက်၍ အခြေခံအားဖြင့် အတော်အတန် ဆွေးနွေးပြောဆိုပြီးဖြစ်သော်လည်း ဘုရားသခင်၏ အနှစ်သာရ၏ သန့်ရှင်းခြင်းနှင့် အတုမရှိခြင်းတို့အကြောင်း အလွန်အသေးစိတ် မိတ်သဟာယမပြုခဲ့ပါ။ ယင်းမှာ သင်တို့ချင့်ချိန်စဉ်းစားစရာ ပေးရန်နှင့် ငါ မိတ်သဟာယပြုခဲ့သော ဘုရားသခင်၏ ဖြောင့်မတ်ခြင်း၊ အနန္တတန်ခိုးတို့နှင့်ဆိုင်သော ရှုထောင့်များအပေါ် အခြေခံ၍ သင်တို့ ပို၍ တိကျစွာ မိတ်သဟာယပြုစေရန် ရည်ရွယ်ပေသည်။ ယနေ့ ငါတို့သည် အန္တိခရစ်တို့က သမ္မာတရားကို စက်ဆုပ်ရွံရှာသည်၊ စည်းမျဉ်းများကို မျက်နှာပြောင်တိုက်၍ မထီမဲ့မြင်ပြုပြီး ဘုရားအိမ်တော်၏ စီစဉ်မှုများကို လျစ်လျူရှုကြပုံနှင့်ပတ်သက်သော အဓိကအကြောင်းအရာကို စိတ်ဖြာလေ့လာဆွေးနွေးရန်အတွက် အန္တိခရစ်တို့သည် ဘုရားသခင် လူ့ဇာတိခံယူထားသော ဇာတိပကတိအား မည်သို့ဆက်ဆံပုံကို ဆွေးနွေးဖော်ပြသည့် ဒုတိယအချက်နှင့်ပတ်သက်၍ မိတ်သဟာယပြုကြမည်။

၂။ ဘုရားသခင်လူ့ဇာတိခံယူထားသော ဇာတိပကတိကို စက်ဆုပ်ရွံရှာခြင်း

လူ့ဇာတိခံဘုရားသခင်၊ ဆိုလိုသည်မှာ ခရစ်တော်နှင့်ပတ်သက်သော အန္တိခရစ်တို့၏ ရှုထောင့်များ၊ အမြင်များနှင့် ၎င်းတို့၏ ဆက်ဆံရေးများတွင်လည်း တိကျသော သရုပ်သကန်အချို့နှင့် အနှစ်သာရပိုင်းဆိုင်ရာ ထုတ်ဖော်ခြင်းများ ရှိလေသည်။ လူတို့၏ တိကျသော သရုပ်သကန်အချို့ကိုဖြစ်စေ၊ လူအချို့၏ တိကျသော ကျင့်ကြံပြုမူမှုများကိုဖြစ်စေ ရိုးရှင်းစွာ တင်ပြရုံသာ တင်ပြမည်ဆိုလျှင် သင်တို့အနေဖြင့် ထိုတင်ပြမှုကို အနည်းငယ် မရှင်းလင်းဟု မြင်ကောင်းမြင်နိုင်သည်။ ထိုအစား ယင်းတို့မှနေ၍ ဘုရားသခင် လူ့ဇာတိခံယူသော ဇာတိပကတိအပေါ် အန္တိခရစ်တို့၏ သဘောထားသည် အတိအကျ မည်သည့်အရာဖြစ်သည်ကို နားလည်ရန်နှင့် အန္တိခရစ်တို့သည် သမ္မာတရားကို မည်သို့ စက်ဆုပ်ရွံရှာသည်ကို မှန်မမှန်စစ်ဆေးပြီး စိတ်ဖြာလေ့လာဆွေးနွေးရန် ယင်းကို အချက်အနည်းငယ် ခွဲခြားကြပါစို့။ ပထမအချက်မှာ မျက်နှာလိုမျက်နှာရလုပ်ခြင်း၊ မြှောက်ပင့်ခြင်းနှင့် နားဝင်ချိုသော စကားများ ဖြစ်သည်။ ဒုတိယအချက်မှာ စေ့စေ့စပ်စပ် ကြည့်ရှုစစ်ဆေးခြင်းနှင့် ဆန်းစစ်ခြင်းတို့အပြင် သိချင်စိတ်ပြင်းပြခြင်း ဖြစ်သည်။ တတိယအချက်မှာ ၎င်းတို့ ခရစ်တော်ကို ဆက်ဆံပုံမှာ ၎င်းတို့၏ စိတ်နေစိတ်ထားအပေါ် မူတည်ခြင်း ဖြစ်သည်။ စတုတ္ထအချက်မှာ ခရစ်တော် ပြောဆိုသည့်အရာကို နားထောင်ရုံသာ နားထောင်သော်လည်း မနာခံသကဲ့သို့ ကျိုးနွံနာခံမှု မရှိခြင်း ဖြစ်သည်။ ဤအချက်တစ်ခုစီ၏ ဖော်ပြချက်များအပြင် ယင်းတို့၏ တိုက်ရိုက်အဓိပ္ပာယ်များမှ သင်တို့ နားလည်နိုင်သော အမြင်များနှင့် သရုပ်သကန်များကို အကဲဖြတ်ရလျှင် ၎င်းတို့တစ်ခုစီသည် အပြုသဘောဆောင်သလော။ ပို၍ ဟုတ်မှန်ကြောင်းပြသော သို့မဟုတ် အပြုသဘောဆောင်ပုံရသော အချက်တစ်ခုတလေ ရှိပါသလော။ “ဟုတ်မှန်ကြောင်းပြသော” နှင့် “အပြုသဘောဆောင်သော” ဟူသည်မှာ အဘယ်အရာကို ရည်ညွှန်းသနည်း။ အနည်းဆုံးအနေဖြင့် ၎င်းတို့သည် လူ့သဘာဝနှင့် ဆင်ခြင်တုံတရား ရှိခြင်းကို ရည်ညွှန်းသည်။ ဤသည်မှာ ကျိုးနွံနာခံခြင်းဖြစ်စေ၊ ဖန်ဆင်းခံတစ်ဦး၌ ရှိသင့်သော သဘောထားနှင့် ရပ်တည်ချက်ရှိခြင်းဟူသည့် အဆင့်သို့ မြှင့်တင်ရန် မလိုအပ်ပေ။ လူသား၏ ဆင်ခြင်တုံတရား အကဲဖြတ်ချက်ကို အသုံးပြုရုံမျှဖြင့် ဤအရာများထဲမှ မည်သည့်အရာက စံမီသနည်း။

ပထမဦးစွာ ပထမအချက်ဖြစ်သည့် မျက်နှာလိုမျက်နှာရလုပ်ခြင်း၊ မြှောက်ပင့်ခြင်းနှင့် နားဝင်ချိုသော စကားများကို ကြည့်ကြစို့။ ဤအသုံးအနှုန်းသုံးခုကို လူ့ဘာသာစကားတွင် အသိအမှတ်ပြုသော၊ အပြုသဘောဆောင်သော၊ သို့မဟုတ် အတည်ပြုသော အသုံးအနှုန်းများအဖြစ် မှတ်ယူပါသလော။ (မယူပါ။) ပုံမှန်အားဖြင့် ဤစကားလုံးများသည် မည်သည့်လူစားမျိုး၏ စကားပြောခြင်းနှင့် အပြုအမူကို သရုပ်ဖော်သနည်း။ (လှည့်ဖြားသော လူများ၊ သစ္စာဖောက်များ၊ ယုတ်ညံ့သော လူများ၊ ဖော်လံဖားများ ဖြစ်ပါသည်။) သစ္စာဖောက်များ၊ ယုတ်ညံ့သော လူများနှင့် သာကူးများဖြစ်သည့် လှည့်ဖြားခြင်း၊ ယုတ်ညံ့ခြင်းနှင့် ကောက်ကျစ်ဆိုးယုတ်ခြင်းတို့နှင့် ဆက်စပ်နေသော လူစားမျိုးတို့ ဖြစ်သည်။ ထိုသို့သော လူများ၏ လုပ်ဆောင်ချက်များကို အခြားသူများ၏ အမြင်တွင် အများအားဖြင့် စက်ဆုပ်ပြီး ယုတ်ညံ့သည်ဟုလည်းကောင်း၊ လူတို့အပေါ် ရိုးသားမှု မရှိဟုလည်းကောင်း၊ ကြင်နာမှု မရှိဟုလည်းကောင်း မြင်ကြသည်။ ၎င်းတို့သည် ဩဇာအာဏာသုံးသော သို့မဟုတ် အဆင့်အတန်း မြင့်သောသူများကို မျက်နှာလိုမျက်နှာရလုပ်လျက်၊ မြှောက်ပင့်လျက် မကြာခဏ မျက်နှာလိုမျက်နှာရလုပ်ကာ မြှောက်ပင့်ပြီး နားဝင်ချိုသော စကားများ ပြောကြသည်။ ဤလူစားမျိုးကို အခြားသူများက အထင်အမြင်သေးကြပြီး အများအားဖြင့် အပျက်သဘောဆောင်သော ပုဂ္ဂိုလ်အဖြစ် ရှုမြင်ကြသည်။

ဒုတိယအချက်ဖြစ်သည့် စေ့စေ့စပ်စပ် ကြည့်ရှုစစ်ဆေးခြင်းနှင့် ဆန်းစစ်ခြင်းတို့အပြင် သိချင်စိတ်ပြင်းပြခြင်းတို့ကို ကြည့်ကြပါစို့။ ဤစကားလုံးများကို အသိအမှတ်ပြုသော စကားလုံးများအဖြစ်ဖြစ်စေ၊ အသရေပျက်စေသော စကားလုံးများအဖြစ်ဖြစ်စေ မှတ်ယူသလော။ (အသရေပျက်စေသော စကားလုံးများအဖြစ် မှတ်ယူပါသည်။) အသရေပျက်စေသော စကားလုံးများအဖြစ် မှတ်ယူသလော။ ယင်းတို့ကို အသရေပျက်စေသော စကားလုံးများအဖြစ် သင်တို့ အဘယ်ကြောင့် အမျိုးအစားခွဲခြားမည်ကို ငါ့အား ရှင်းပြလော့။ ဆက်စပ်အခြေအနေမပါလျှင် ဤစကားလုံးများသည် ကြားနေဖြစ်ပြီး အသိအမှတ်ပြုသော သို့မဟုတ် အသရေပျက်စေသော စကားများအဖြစ် ခေါ်ဆို၍မရပါ။ ဥပမာအားဖြင့် သိပ္ပံဆိုင်ရာ စီမံကိန်းတစ်ခုအပေါ် စေ့စေ့စပ်စပ် ကြည့်ရှုစစ်ဆေးခြင်းကို ခံယူခြင်း၊ ပြဿနာတစ်ခု၏ အနှစ်သာရကို ဆန်းစစ်ခြင်း၊ အချို့သော အမှုအရာများအပေါ် သိချင်စိတ်ပြင်းပြခြင်း ဟူသည့် ဤသရုပ်သကန်များကို အခြေခံအားဖြင့် အပြုသဘောဆောင်သော သရုပ်သကန်များ သို့မဟုတ် အပျက်သဘောဆောင်သော သရုပ်သကန်များဟု ခေါ်ဆို၍မရဘဲ ယင်းတို့မှာ အတော်အတန် ကြားနေဖြစ်ပါသည်။ သို့ရာတွင် ဤနေရာ၌ ဆက်စပ်အခြေအနေတစ်ခု ရှိသည်။ လူတို့၏ စေ့စေ့စပ်စပ် ကြည့်ရှုစစ်ဆေးခြင်း၊ ဆန်းစစ်ခြင်းနှင့် သိချင်စိတ်ပြင်းပြခြင်းတို့ကို ခံရသည့်အရာသည် လူသားတို့ သုတေသနပြုရန် သင့်လျော်သော အကြောင်းအရာတစ်ခုခု မဟုတ်ဘဲ ဘုရားသခင် လူ့ဇာတိခံယူထားသော ဇာတိပကတိ ဖြစ်နေသည်။ သို့ဖြစ်၍ ဤထပ်ဖြည့်ထားသော ဆက်စပ်အခြေအနေနှင့်အတူ ဤလူစားမျိုးက လုပ်ဆောင်သော ဤအမှုအရာများအပြင် ၎င်းတို့၏ သရုပ်သကန်များနှင့် အပြုအမူများအပေါ် အခြေခံ၍ ဤစကားလုံးများသည် ဤနေရာတွင် ယုတ်ညံ့ရိုင်းစိုင်းသော စကားလုံးများ ဖြစ်လာသည်မှာ သိသာထင်ရှားပေသည်။ မည်သည့်လူစားမျိုးသည် ဘုရားသခင် လူ့ဇာတိခံယူထားသော ဇာတိပကတိကို ပုံမှန်အားဖြင့် စေ့စေ့စပ်စပ် ကြည့်ရှုစစ်ဆေးပြီး ဆန်းစစ်သနည်း။ သမ္မာတရားကို လိုက်စားသောသူများလော၊ သို့မဟုတ် မလိုက်စားသောသူများလော။ ခရစ်တော်ကို ၎င်းတို့၏ စိတ်နှလုံးများမှ အမှန်တကယ် ယုံကြည်သောသူများလော သို့မဟုတ် ခရစ်တော်အပေါ် သံသယရှိသော သဘောထား ရှိသောသူများလော။ သိသာထင်ရှားစွာပင် သံသယရှိသော သဘောထားရှိသောသူများ ဖြစ်သည်။ ၎င်းတို့သည် ခရစ်တော်ကို စစ်မှန်သော ယုံကြည်ခြင်း မရှိကြသည့်အပြင် စေ့စေ့စပ်စပ် ကြည့်ရှုစစ်ဆေးခြင်းနှင့် ဆန်းစစ်ခြင်းအပြင် ၎င်းတို့သည် အထူးသဖြင့်လည်း သိချင်စိတ် ပြင်းပြကြပါသည်။ ၎င်းတို့သည် အတိအကျ မည်သည့်အရာကို သိချင်စိတ်ပြင်းပြကြသနည်း။ ဤသရုပ်သကန်များနှင့် အနှစ်သာရများ၏ အသေးစိတ် အချက်အလက်များကို မကြာမီ ငါတို့ သီးသန့် မိတ်သဟာယပြုကြမည်။

ဆက်လက်၍ တတိယအချက်ကို ကြည့်ကြစို့။ ၎င်းတို့သည် ခရစ်တော်ကို ဆက်ဆံပုံမှာ ၎င်းတို့၏ စိတ်နေစိတ်ထားအပေါ် မူတည်သည်။ ဤအချက်တွင် ယင်းတို့၏ အသိအမှတ်ပြုသော သို့မဟုတ် အသရေပျက်စေသော အဓိပ္ပာယ်အတွက် ဆန်းစစ်ရန် တိကျသော စကားလုံးများ မပါဝင်ပေ။ ထိုသို့သော လူများ၏ ဤကဲ့သို့သော သရုပ်သကန်နှင့် တိကျသော အလေ့အကျင့်တို့ဖြင့် မည်သည့်အမှန်တရားကို ထုတ်ဖော်သနည်း။ ထိုသို့သော အမှုအရာများကို လုပ်ဆောင်ပြီး ထိုသို့သော သရုပ်သကန်များကို ပြသသော လူတစ်ဦး၌ မည်သည့်စိတ်သဘောထားမျိုး ရှိသနည်း။ ပထမဦးစွာ ၎င်းတို့သည် အခြားသူများကို ဆက်ဆံရာတွင် သမာသမတ်ကျသလော။ (မကျပါ။) ဤအရာကို မည်သည့်စကားရပ်မှ ကောက်ချက်ချနိုင်သနည်း။ (“စိတ်နေစိတ်ထားအပေါ် မူတည်သည်။” ဟူ၍ဖြစ်သည်။) ဤစကားရပ်က ဤလူစားမျိုးသည် စည်းမျဉ်းများ မရှိဘဲ၊ အခြေခံစည်းမရှိဘဲ၊ အထူးသဖြင့် မည်သည့်အသိစိတ် သို့မဟုတ် ဆင်ခြင်တုံတရားမျှ မရှိဘဲ ပြုမူကာ အခြားသူများ သို့မဟုတ် ကိစ္စရပ်များကို ဆက်ဆံသည်၊ ၎င်းတို့သည် မိမိတို့၏ စိတ်နေစိတ်ထားဖြင့် လုံးလုံး လမ်းညွှန်ခြင်း ခံရသည်ကို ဆိုလိုပါသည်။ တစ်စုံတစ်ဦးသည် သာမန်လူတစ်ဦးကို ၎င်းတို့၏ စိတ်နေစိတ်ထားအပေါ် အခြေခံ၍ ဆက်ဆံပါက ယင်းသည် အဓိကပြဿနာတစ်ခု ဖြစ်ချင်မှဖြစ်မည်။ ယင်းသည် အုပ်ချုပ်ရေးဆိုင်ရာ အမိန့်များကို ချိုးဖောက်မည် မဟုတ်သကဲ့သို့ ဘုရားသခင်၏ စိတ်သဘောထားကိုလည်း ပုန်ကန်ပြစ်မှားမည် မဟုတ်ဘဲ ဤလူသည် တစ်ဇွတ်ထိုးနိုင်သည်၊ သမ္မာတရားကို မလိုက်စား၊ စည်းမျဉ်းများမရှိဘဲ ပြုမူသည်၊ ပြီးလျှင် ၎င်းတို့၏ စိတ်နေစိတ်ထားနှင့် နှစ်သက်မှုများကို အခြေခံ၍ မိမိတို့နှစ်သက်သမျှကို လုပ်ဆောင်ကာ မိမိတို့၏ ဇာတိပကတိဆိုင်ရာ လိုအင်ဆန္ဒများနှင့် ခံစားချက်များကိုသာ အလေးထားပြီး အခြားသူများ၏ ခံစားချက်များကို ထည့်သွင်းမစဉ်းစားဘဲ အခြားသူများကို လေးစားမှု မပြသည်ကိုသာ သရုပ်ဖော်ပါသည်။ ဤသည်မှာ သာမန်လူတစ်ဦးကို ၎င်းတို့ ဆက်ဆံပုံအပေါ် အခြေခံသော ရှင်းလင်းချက်ဖြစ်သည်။ သို့သော် ဤနေရာတွင် ၎င်းတို့၏ စိတ်နေစိတ်ထားကိုအခြေခံသော ဆက်ဆံမှုကို လက်ခံသူမှာ မည်သူနည်း။ ၎င်းသည် သာမန်လူတစ်ဦးမဟုတ်ဘဲ ဘုရားသခင် လူ့ဇာတိခံယူထားသော ဇာတိပကတိ ဖြစ်သည့်ခရစ်တော် ဖြစ်သည်။ သင်သည် ခရစ်တော်ကို သင်၏ စိတ်နေစိတ်ထားအပေါ် အခြေခံ၍ ဆက်ဆံပါက ဤသည်မှာ ဆိုးရွားသော ပြဿနာတစ်ခုဖြစ်ပြီး ယင်း၏အတိုင်းအတာကို ယခု ငါတို့ ဆွေးနွေးမည်မဟုတ်ပေ။

ယခု စတုတ္ထအချက်ကို ကြည့်ကြစို့။ ခရစ်တော် ပြောဆိုသည့်အရာကို နားထောင်ရုံသာ နားထောင်သော်လည်း နာခံခြင်း သို့မဟုတ် ကျိုးနွံနာခံခြင်း မရှိပေ။ ဤသည်မှာ အတိအကျ မည်သည့်အရာဖြစ်သည်ကို သတ်မှတ်ရန် တိကျသော အသုံးအနှုန်းများ ဤနေရာတွင် မရှိပါ။ ယင်းသည် သရုပ်သကန်တစ်မျိုး၊ လူတို့က အမှုအရာများကို ပြုမူဆက်ဆံပုံရှိ အလေ့အထဖြစ်နေသော အခြေအနေနှင့် တိကျသော သဘောထားတစ်ခု ဖြစ်သော်လည်း ယင်းတွင် လူတစ်ဦး၏ စိတ်သဘောထား ပါဝင်ပတ်သက်နေသည်။ ထိုသို့သော လူများ၏ စိတ်သဘောထားမှာ အဘယ်နည်း။ ၎င်းတို့သည် နားထောင်သော်လည်း နာခံခြင်း သို့မဟုတ် ကျိုးနွံနာခံခြင်း မရှိပေ။ အပြင်ပန်းအားဖြင့် ၎င်းတို့သည် နားထောင်နိုင်သေးသော်လည်း ၎င်းတို့ အပြင်ပန်းတွင် ပြသသည့်အရာသည် ၎င်းတို့ စိတ်ထဲတွင် တွေးထင်သည့်အရာ သို့မဟုတ် ၎င်းတို့၏ စစ်မှန်သော အတွင်းသဘောထားနှင့် တူညီသလော။ (မတူညီပါ။) အပြင်ပန်းတွင် ၎င်းတို့သည် အမူအကျင့် ကောင်းမွန်နိုင်ပုံရပြီး နားထောင်နေပုံရနိုင်သော်လည်း စိတ်ထဲတွင်မူ ဤသို့မဟုတ်ပေ။ အတွင်းစိတ်တွင် မနာခံလိုသော စိတ်အခြေအနေနှင့် သဘောထားအပြင် အတိုက်အခံပြုလိုသော စိတ်အခြေအနေနှင့် သဘောထားတို့ ရှိနေသည်။ ၎င်းတို့က ဤသို့ တွေးကြသည်။ “ငါသည် သင့်ကို စိတ်နှလုံးထဲတွင် မနာခံပေ။ ငါမနာခံကြောင်းကို သင့်အား မည်သို့ ထင်ရှားစေနိုင်မည်နည်း။ သင်ပြောသော စကားများကို ငါသည် နားဖြင့် နားထောင်ရုံသာ နားထောင်သော်လည်း ယင်းတို့ကို လုံးဝ အလေးမထားပေ သို့မဟုတ် လက်တွေ့အကောင်အထည်ဖော်ခြင်း မရှိပေ။ ငါသည် သင့်ကို ဆန့်ကျင်ပြီး အတိုက်အခံလုပ်မည်” ဟူ၍ဖြစ်သည်။ ဤသည်မှာ နာခံခြင်း သို့မဟုတ် ကျိုးနွံနာခံခြင်း မရှိဟု အဓိပ္ပာယ်ရသည်။ ထိုသို့သော လူများသည် သာမန်လူများနှင့် ထိတွေ့ဆက်ဆံပြီး ပေါင်းသင်းမိပါက သာမန်လူများ ပြောဆိုသည့်အရာကို ဤကဲ့သို့သော စိတ်အခြေအနေ၊ အမြင်ရှုထောင့်နှင့် သဘောထားတို့ဖြင့် ဆက်ဆံပါက ယင်းသည် သိသာထင်ရှားသော သို့မဟုတ် သိရှိနိုင်သော သရုပ်သကန် ဟုတ်သည်ဖြစ်စေ၊ မဟုတ်သည်ဖြစ်စေ ထိုသို့သော လူများ၏ စိတ်သဘောထားမှာ အဘယ်နည်း။ ၎င်းတို့ကို အခြားသူများက လူ့သဘာဝနှင့် ဆင်ခြင်တုံတရားရှိသော လူကောင်းများဟု ခေါ်သည့်အရာအဖြစ် မှတ်ယူသလော။ ၎င်းတို့ကို အပြုသဘောဆောင်သော ပုဂ္ဂိုလ်များအဖြစ် ရှုမြင်သလော။ မဟုတ်သည်မှာ သိသာထင်ရှားပေသည်။ “နားထောင်ရုံသာ နားထောင်ပြီး နာခံခြင်း သို့မဟုတ် ကျိုးနွံနာခံခြင်း မရှိ” ဟူသော စကားရပ်မှ အကဲဖြတ်ရုံမျှဖြင့် ဤလူများသည် မာနထောင်လွှားသူများ ဖြစ်ကြသည်။ ၎င်းတို့သည် မည်မျှမာနထောင်လွှားကြသနည်း။ အလွန်အမင်း မာနထောင်လွှားကြသည်မှာ ဆင်ခြင်တုံတရား ကင်းမဲ့သည့်အထိ၊ လုံးလုံး ရူးသွပ်သည့်အထိ၊ မည်သူ့ကိုမျှမနာခံဘဲ မည်သူ့ကိုမျှ အရေးမထားသည့်အထိ ဖြစ်သည်။ အခြားသူများနှင့် ထိတွေ့ဆက်ဆံသောအခါ ၎င်းတို့၏ သဘောထားမှာ “ကျွန်ုပ်သည် သင်နှင့် စကားပြောနိုင်သည်၊ ကျွန်ုပ်သည် သင်နှင့် ပေါင်းသင်းနိုင်သည်၊ သို့သော် မည်သူ၏စကားမျှ ကျွန်ုပ်၏စိတ်နှလုံးထဲသို့ မဝင်နိုင်သကဲ့သို့ မည်သူ၏စကားမျှ ကျွန်ုပ်၏ လုပ်ဆောင်ချက်များအတွက် စည်းမျဉ်းများနှင့် လမ်းညွှန်မှု ဖြစ်မလာနိုင်ပေ” ဟူ၍ဖြစ်သည်။ ၎င်းတို့သည် စိတ်ထဲတွင် မိမိတို့၏ ကိုယ်ပိုင် အတွေးများကိုသာ ထားရှိကြပြီး မိမိတို့၏စိတ်တွင်းမှ အသံကိုသာ အလေးဂရုပြုကြသည်။ ၎င်းတို့သည် မည်သည့်မှန်ကန်သော၊ အတည်ပြုသော သို့မဟုတ် အပြုသဘောဆောင်သော စကားများနှင့် စည်းမျဉ်းများကိုမျှ နားမထောင်သကဲ့သို့ လက်မခံဘဲ ထိုအစား ယင်းတို့ကို မိမိတို့၏ စိတ်နှလုံးထဲတွင် အတိုက်အခံလုပ်ကြသည်။ လူထုအကြားတွင် ထိုသို့သော လူများ ရှိသလော။ အုပ်စုတစ်ခုတွင် ထိုသို့သော လူများကို ဆင်ခြင်တုံတရားရှိသူများ မှတ်ယူသလော သို့မဟုတ် ဆင်ခြင်တုံတရား မရှိသူများအဖြစ် မှတ်ယူသလော။ ၎င်းတို့ကို အပြုသဘောဆောင်သော ပုဂ္ဂိုလ်များအဖြစ် သို့မဟုတ် အပျက်သဘောဆောင်သော ပုဂ္ဂိုလ်များအဖြစ် ရှုမြင်ပါသလော။ (အပျက်သဘောဆောင်သော ပုဂ္ဂိုလ်များအဖြစ် ရှုမြင်ပါသည်။) သို့ဆိုလျှင် အုပ်စုတစ်စုရှိ လူအများစုသည် ၎င်းတို့ကို ပုံမှန်အားဖြင့် မည်သို့ ရှုမြင်ဆက်ဆံကြသနည်း။ ၎င်းတို့ကို ဆက်ဆံရာတွင် မည်သည့်နည်းလမ်းမျိုးတို့ကို အသုံးပြုကြသနည်း။ လူအများစုသည် ထိုသို့သော လူပုဂ္ဂိုလ်များနှင့် ထိတွေ့ဆက်ဆံပြီး ပေါင်းသင်းရန် ဆန္ဒရှိကြသလော။ (မရှိကြပါ။) အသင်းတော်တွင် လူအများစုသည် ထိုသို့သော လူပုဂ္ဂိုလ်များနှင့် သဟဇာတ မဖြစ်နိုင်ကြပေ။ အကြောင်းရင်းမှာ အဘယ်နည်း။ လူတိုင်းက ထိုသို့သော လူများကို အဘယ်ကြောင့် မနှစ်သက်ကြဘဲ စက်ဆုပ်ကြသနည်း။ စာကြောင်းနှစ်ကြောင်းက ဤပြဿနာကို ရှင်းပြနိုင်သည်။ ပထမဦးစွာ ဤလူများသည် မည်သူနှင့်မျှ ပူးပေါင်းဆောင်ရွက်ခြင်း မရှိဘဲ အဆုံးအဖြတ်ပေးလိုကြပြီး မည်သူ့ကိုမျှ နားမထောင်ကြပေ။ ၎င်းတို့အား အခြားသူတစ်ဦး၏ စကားများကို အလေးဂရုပြုစေရန်မှာ အလွန်အမင်း ခက်ခဲပြီး ၎င်းတို့အနေဖြင့် အခြားသူများ၏ အမြင်များနှင့် အတွေးအခေါ်များကို ရှာဖွေရန်၊ သို့မဟုတ် အခြားသူများ ပြောဆိုသည်ကို နားထောင်ရန်မှာ မဖြစ်နိုင်ပေ။ ဒုတိယအနေဖြင့် ၎င်းတို့သည် မည်သူနှင့်မျှ ပူးပေါင်းဆောင်ရွက်နိုင်ခြင်း မရှိကြပေ။ ဤစာကြောင်းနှစ်ကြောင်းသည် ဤလူစားမျိုး၏ အတိကျဆုံးသော သရုပ်သကန်များ မဟုတ်လော။ ယင်းတို့သည် ထိုသို့သော လူတစ်ဦး၏ အနှစ်သာရ မဟုတ်လော။ (ဟုတ်ပါသည်။) ပထမဦးစွာ ၎င်းတို့၏ စိတ်သဘောထားကို ထည့်သွင်းစဉ်းစားသော် ၎င်းတို့သည် မည်သူ့ကိုမျှ နားမထောင်သကဲ့သို့ မည်သူ့ကိုမျှ ကျိုးနွံနာခံခြင်း မရှိကြပေ။ ၎င်းတို့သည် အဆုံးအဖြတ်ပေးလိုကြပြီး အခြားသူများကို နားမထောင်လိုကြဘဲ ထိုသူတို့နှင့် ပူးပေါင်းဆောင်ရွက်ခြင်း မရှိကြပေ။ ၎င်းတို့၏ စိတ်နှလုံးများတွင် အခြားသူများအတွက် နေရာမရှိသကဲ့သို့ သမ္မာတရား သို့မဟုတ် အသင်းတော်၏ စည်းမျဉ်းများအတွက်လည်း နေရာမရှိပေ။ ဤသည်မှာ ဤလူစားမျိုးတို့၏ အန္တိခရစ် စိတ်သဘောထား ဖြစ်သည်။ ထို့အပြင် ၎င်းတို့သည် မည်သူနှင့်မျှ ပူးပေါင်းဆောင်ရွက်နိုင်ခြင်း သို့မဟုတ် သင့်မြတ်ခြင်း မရှိကြဘဲ စိတ်နှလုံးထဲတွင် အင်တင်တင်ဖြင့် လိုလားနေသည်ဟု ခံစားရလျှင်ပင် အချိန်ကျလာသောအခါတွင် အခြားသူများနှင့် ပူးပေါင်းဆောင်ရွက်နိုင်ခြင်း မရှိကြသေးပေ။ ဤနေရာတွင် မည်သည့်အရာ ဖြစ်ပျက်နေသနည်း။ အချို့သော စိတ်အခြေအနေတစ်ခု ပါဝင်ပတ်သက်နေသည် မဟုတ်လော။ ၎င်းတို့သည် အခြားသူများကို အထင်သေးကြပြီး ၎င်းတို့ကို နားမထောင်ကြသကဲ့သို့ အခြားသူများ၏ စကားများသည် စည်းမျဉ်းများနှင့် မည်မျှပင် ကိုက်ညီနေပါစေ ၎င်းတို့ လက်မခံကြပေ။ အခြားသူများနှင့် ပူးပေါင်းဆောင်ရွက်ခြင်းနှင့် ပတ်သက်လာလျှင် ၎င်းတို့၏ နည်းလမ်းဖြင့်သာ လုပ်ဆောင်နိုင်သည်။ ဤသည်မှာ သဟဇာတဖြစ်သော ပူးပေါင်းဆောင်ရွက်မှု ဟုတ်သလော။ ဤသည်မှာ ပူးပေါင်းဆောင်ရွက်မှု မဟုတ်ပေ။ ယင်းမှာ လူတစ်ဦးက အဆုံးအဖြတ်ပေးသည့် ထင်ရာမြင်ရာ လုပ်ဆောင်ခြင်း ဖြစ်သည်။ ဤသည်မှာ ထိုသို့သော လူများသည် အခြားသူများနှင့် ထိတွေ့ဆက်ဆံခြင်းများတွင် ရှိသည့် စိတ်သဘောထားမျိုးဖြစ်ပြီး ၎င်းတို့သည် ခရစ်တော်ကိုလည်း ထိုနည်းအတိုင်းပင် ဆက်ဆံကြသည်။ ဤသည်မှာ စိတ်ဖြာလေ့လာဆွေးနွေးရန် ထိုက်တန်သလော။ ဤနေရာရှိ ပြဿနာသည် ဆိုးရွားပြီး စိတ်ဖြာလေ့လာဆွေးနွေးရန် ထိုက်တန်ပေသည်။ ဆက်လက်၍ အချက်တစ်ခုစီရှိ အန္တိခရစ်တို့၏ တိကျသော သရုပ်သကန်များနှင့် ကျင့်ကြံပြုမူမှုများအကြောင်း ပြောကြပါစို့။ ပြီးလျှင် ဤတိကျသော သရုပ်သကန်များနှင့် ကျင့်ကြံပြုမူမှုများမှတစ်ဆင့် အန္တိခရစ်တို့၏ အနှစ်သာရ ဖြစ်သော သမ္မာတရားကို စက်ဆုပ်ရွံရှာခြင်း၊ စည်းမျဉ်းများကို မျက်နှာပြောင်တိုက်၍ မထီမဲ့မြင်ပြုခြင်းနှင့် ဘုရားအိမ်တော်၏ စီစဉ်မှုများကို လျစ်လျူရှုခြင်းတို့ကို နားလည်ကြစို့။ ပထမအချက်မှ စတင်၍ စိတ်ဖြာလေ့လာဆွေးနွေးကြစို့။

က။ မျက်နှာလို မျက်နှာရလုပ်ခြင်း၊ မြှောက်ပင့်ပြောခြင်းနှင့် နားဝင်ချိုသော စကားများ

မျက်နှာလို မျက်နှာရလုပ်ခြင်း၊ မြှောက်ပင့်ပြောခြင်းနှင့် နားဝင်ချိုသော စကားများဟူသည့် ဤအသုံးအနှုန်းများသည် မည်သည့်အဓိပ္ပာယ်ရှိသည်ကို အပေါ်ယံအားဖြင့် လူတိုင်းသိသင့်ကြပြီး ယင်းတို့ကို သရုပ်ထင်စေသည့် လူပုဂ္ဂိုလ်များကို တွေ့နေမြင်နေကျ ဖြစ်သည်။ မျက်နှာလို မျက်နှာရလုပ်ခြင်း၊ မြှောက်ပင့်ပြောခြင်းနှင့် နားဝင်ချိုသော စကားများ ပြောဆိုခြင်းတို့သည် အများအားဖြင့် အခြားသူများထံမှ မျက်နှာသာရမှု၊ ချီးမွမ်းမှု၊ သို့မဟုတ် အကျိုးအမြတ် တစ်မျိုးမျိုးကို ရရှိရန် ခံယူကျင့်သုံးသော ပြောဆိုနည်းများ ဖြစ်ကြသည်။ ဤသည်မှာ မြှောက်ပင့်ပြောဆိုခြင်းနှင့် ဖော်လံဖားခြင်းတို့ကို လုပ်ဆောင်သူများ၌ အတွေ့ရအများဆုံးသော ပြောပုံဆိုပုံဖြစ်သည်။ ဖောက်ပြန်ပျက်စီးသော လူသားအားလုံးသည် အတိုင်းအတာတစ်ခုအထိ စာတန်ဆန်သော အတွေးအခေါ်နှင့် သက်ဆိုင်သည့် ပြောဆိုပုံစံဖြစ်သော ဤသရုပ်သကန်ကို ပြသကြသည်ဟု ဆိုနိုင်ပါသည်။ သို့ဆိုလျှင် လူတို့သည် လူ့ဇာတိခံ ဘုရားသခင်၏ ရှေ့မှောက်တွင်လည်း အကျိုးအမြတ်အချို့ ရရှိရန်အတွက် အလားတူ သရုပ်သကန်များနှင့် ကျင့်ကြံပြုမူမှုများကို ပြသကြပါသလော။ ဟုတ်ပေသည်၊ ယင်းမှာ ထိုမျှ မရိုးရှင်းပေ။ လူတို့သည် လူ့ဇာတိခံ ဘုရားသခင်ခံယူထားသည့် ဇာတိပကတိအား မျက်နှာလို မျက်နှာရလုပ်ခြင်းနှင့် မြှောက်ပင့်ပြောခြင်းတို့ကို လုပ်ဆောင်သောအခါတွင် ၎င်းတို့၏ စိတ်နှလုံးအတွင်းရှိ ခရစ်တော်နှင့်ပတ်သက်သော မည်သည့်အမြင်ရှုထောင့်မျိုးက သို့မဟုတ် မည်သည့်အတွေးအခေါ်မျိုးက ထိုသို့သော အပြုအမူကို ဖြစ်စေသနည်း။ ထိုသို့သော အပြုအမူသည် အများအားဖြင့် လူတို့က အခြားလူများအပေါ် ပြသသည့် အပြုအမူ ဖြစ်သည်။ လူတို့သည် လူ့ဇာတိခံ ဘုရားသခင်အပေါ်တွင်လည်း ဤနည်းအတိုင်း ပြုမူပါက ယင်းသည် ပြဿနာတစ်ခုကို သွယ်ဝိုက်၍ ထုတ်ဖော်ပြသသည်။ ၎င်းတို့သည် လူ့ဇာတိခံ ဘုရားသခင်ဖြစ်သည့် ခရစ်တော်ကို ဖောက်ပြန်ပျက်စီးသော လူသားမျိုးနွယ်ထဲမှ သာမန်လူတစ်ဦးအဖြစ်သာ မှတ်ယူကြခြင်း ဖြစ်သည်။ ပြင်ပရှုထောင့်မှကြည့်လျှင် ခရစ်တော်၌ အရိုးအသားများရှိပြီး လူသားတစ်ဦး၏ အသွင်အပြင်ကို ဆောင်ထားသည်။ ဤသည်မှာ လူတို့အား ခရစ်တော်သည် လူသားမျှသာဖြစ်သည်ဟု ယုံကြည်စေကာ လူသားများကို ဆက်ဆံသည့် ယုတ္တိဗေဒနှင့် အတွေးအခေါ်တို့ကို အခြေခံ၍ ခရစ်တော်ကို ဗြောင်ကျကျ ဆက်ဆံခွင့်ပြုသော ထင်ယောင်ထင်မှားမှုတစ်ခုကို ပေးသည်။ လူသားများကို ဆက်ဆံသည့် ယုတ္တိဗေဒနှင့် အတွေးအခေါ်တို့အရ အများအားဖြင့် အဆင့်အတန်းနှင့် ကျော်ကြားမှုရှိသော တစ်စုံတစ်ဦးကို ဆက်ဆံရာတွင် အကျိုးအမြတ်များ သို့မဟုတ် အနာဂတ်ရာထူးတိုးခြင်းတို့ကို ချောချောမွေ့မွေ့ ရရှိရန်အလို့ငှာ အကောင်းမြင်သွားစေရန် အကောင်းဆုံးသော နည်းဗျူဟာမှာ လူတစ်ဦး၏ စကားများကို နှစ်လိုဖွယ်ဖြစ်ပြီး ပါးနပ်အောင် ပြုလုပ်ခြင်း၊ နားထောင်သူက သက်သောင့်သက်သာရှိပြီး ပျော်ရွှင်သည်ဟု ခံစားရကြောင်း သေချာစေခြင်း ဖြစ်သည်။ လူတစ်ဦးသည် နူးညံ့သော မျက်နှာအမူအရာကို ထားရှိရမည်ဖြစ်ပြီး ကြမ်းတမ်းသော မျက်နှာကိုဖြစ်စေ၊ ခက်ထန်သော မျက်နှာကိုဖြစ်စေ မပြသရ။ ပြီးလျှင် ဘာသာစကားတွင် ပြင်းထန်သော၊ မလိုမုန်းထားသော သို့မဟုတ် ကြမ်းတမ်းသော စကားလုံးများ၊ သို့မဟုတ် လူတစ်ဦး၏ မာနကို ထိခိုက်စေနိုင်သော စကားလုံးများ မရှိသင့်ချေ။ ထိုသို့သော သရုပ်သကန်များနှင့် စကားလုံးများဖြင့်သာ လူတစ်ဦးသည် ထိုသို့သော ပုဂ္ဂိုလ်တစ်ဦး၏ ရှေ့တွင် မိမိအား အကောင်းမြင်သွားအောင် လုပ်နိုင်ပြီး ထိုသူက ပစ်ပစ်ခါခါငြင်းမည် မဟုတ်ချေ။ နှစ်လိုဖွယ် ပြောဆိုခြင်း၊ မြှောက်ပင့်ပြောဆိုခြင်းနှင့် ဖော်လံဖားခြင်းတို့ကို လုပ်ဆောင်ခြင်းသည် အခြားသူများအပေါ် အစစ်မှန်ဆုံးသော လေးစားမှုပုံစံအဖြစ် မှတ်ယူကြပုံရသည်။ အလားတူပင် ခရစ်တော်အား လေးစားမှုပြရန်နှင့် သဟဇာတဖြစ်မှုကို ထိန်းသိမ်းရန်၊ ၎င်းတို့၏ စကားများတွင် ထိခိုက်စေသော ဘာသာစကား သို့မဟုတ် အကြောင်းအရာ မပါဝင်ကြောင်းနှင့် စော်ကားသည့် မည်သည့်အရာမျှ လုံးဝမပါဝင်ကြောင်း သေချာစေလျက် ထိုသို့သော အပြုအမူကို ပြသရန် အစွမ်းကုန် ကြိုးစားရမည်ဟု လူတို့က ယုံကြည်ကြသည်။ ဤသည်မှာ ခရစ်တော်နှင့် အပြန်အလှန်ဆက်ဆံရန်နှင့် စကားပြောဆိုရန် အကောင်းဆုံးသော နည်းလမ်းဖြစ်သည်ဟု လူတို့က ထင်ကြသည်။ ၎င်းတို့သည် ဘုရားသခင် လူ့ဇာတိခံယူထားသော ဇာတိပကတိအား သာမန် ဖောက်ပြန်ပျက်စီးသော စိတ်သဘောထားရှိသည့် သာမန်အကျဆုံးသော လူသားတစ်ဦးအဖြစ် ဆက်ဆံကြပြီး သူ့အား အခြားနည်းဖြင့် ပြုမူရန်ဖြစ်စေ၊ ဆက်ဆံရန်ဖြစ်စေ ပိုကောင်းသော နည်းလမ်းမရှိဟု ထင်ကြသည်။ ထို့ကြောင့် အန္တိခရစ်တစ်ဦးသည် ခရစ်တော်၏ ရှေ့မှောက်သို့ လာသောအခါ ၎င်းတို့၏ စိတ်နှလုံးတွင် ထားရှိသည့်အရာသည် ကြောက်ရွံ့ခြင်း၊ လေးစားခြင်း သို့မဟုတ် စစ်မှန်သော ရိုးသားမှု မဟုတ်ဘဲ ဘုရားသခင် လူ့ဇာတိခံယူထားသည့် ဇာတိပကတိအား ပေါ်ပေါ်ထင်ထင် မျက်နှာလို မျက်နှာရလုပ်ခြင်းနှင့် မြှောက်ပင့်ပြောခြင်းတို့ကို လုပ်ဆောင်ရန်အတွက် နှစ်လိုဖွယ်ဖြစ်ပြီး ပါးနပ်သော ဘာသာစကားကို အသုံးပြုရန်၊ အထင်မှားစေခြင်းကိုပင် အားကိုးရန် လိုအင်ဆန္ဒတစ်ခုသာ ဖြစ်သည်။ လူသားအားလုံးသည် ဤလုပ်နည်းကိုင်နည်း ခံနိုင်ရည် မရှိဟုလည်းကောင်း၊ ဘုရားသခင် လူ့ဇာတိခံယူထားသော ဇာတိပကတိသည်လည်း လူသားဖြစ်သည့်အတွက်၊ သူသည်လည်း ဤလုပ်နည်းကိုင်နည်းကို တုံ့ပြန်ပြီး ယင်းကို မျက်နှာသာပေးလိမ့်မည်ဟုလည်းကောင်း ယုံကြည်ကြသည်။ ထို့ကြောင့် ဘုရားသခင် လူ့ဇာတိခံယူထားသော ခရစ်တော်ဖြစ်သည့် ဇာတိပကတိအား ဆက်ဆံရာတွင် အန္တိခရစ်တို့သည် ၎င်းတို့၏ စိတ်နှလုံးများထဲ၌ ခရစ်တော်၌ ဘုရားသခင်၏ အနှစ်သာရ ရှိသည်ဟူသော အချက်ကို လက်မခံကြပေ။ ထိုအစား ၎င်းတို့သည် ဘုရားသခင် လူ့ဇာတိခံယူထားသည့် ဇာတိပကတိအား ဆက်ဆံရန် လူသားနည်းဗျူဟာအချို့၊ လောကီဆိုင်ရာ ဆက်ဆံမှုများအတွက် လူသားအတွေးအခေါ်များနှင့် အခြားသူများကို ဆက်ဆံခြင်းနှင့် ကြိုးကိုင်ညွှန်ကြားခြင်းဆိုင်ရာ သာမန်လူသား လှည့်ကွက်များကို အသုံးပြုကြသည်။ ဤအပြုအမူများ၏ အနှစ်သာရသည် အန္တိခရစ်တို့က ဘုရားသခင် လူ့ဇာတိခံယူထားသော ဇာတိပကတိအား စက်ဆုပ်ရွံရှာသည်ဟူသော အချက်ကို သရုပ်ပြသလော။ (ပြပါသည်။)

အန္တိခရစ်တို့သည် ခရစ်တော်ကို ဖောက်ပြန်ပျက်စီးသော လူသားများကို ဆက်ဆံသည့် ပုံစံအတိုင်း ဆက်ဆံကြပြီး ခရစ်တော်ကို တွေ့သည့်အခါ မျက်နှာလို မျက်နှာရလုပ်ခြင်းနှင့် မြှောက်ပင့်ပြောခြင်း စကားများကိုသာ ပြောဆိုကာ ထို့နောက် ခရစ်တော်၏ တုံ့ပြန်မှုများကို စောင့်ကြည့်လေ့လာပြီး သူ၏အကြိုက်များကို လိုက်ရန် ကြိုးစားကြသည်။ အချို့လူများက ခရစ်တော်ကို တွေ့သောအခါ ဤသို့ပြောကြသည်။ “ကျွန်ုပ်သည် ကိုယ်တော့်ကို အဝေးမှ မြင်ပါသည်။ ကိုယ်တော်သည် လူအုပ်ထဲတွင် ထင်ပေါ်ပါသည်။ ရောင်ခြည်များ မရှိကြသော အခြားသူများနှင့် မတူဘဲ ကိုယ်တော့်ဦးခေါင်းအထက်တွင် ရောင်ခြည်တစ်ခု ရှိပါသည်။ ကိုယ်တော်သည် သာမန်လူတစ်ဦး မဟုတ်ကြောင်း ကျွန်ုပ် ချက်ချင်း သိပါသည်။ ဘုရားအိမ်တော်တွင် ခရစ်တော်မှလွဲ၍ အခြားမည်သူသည် သာမန်မဟုတ်သနည်း။ ကိုယ်တော့်ကို မြင်လိုက်သည့်အခိုက်အတန့်မှာပင် ကျွန်ုပ် ပိုင်းခြားသိမြင်သည်၊ ယင်းမှာ သိသိသာသာကို မှန်ကန်ပါသည်။ ဘုရားလူ့ဇာတိခံယူထားသော ဇာတိပကတိသည် အမှန်ပင် အခြားသူများနှင့် ကွဲပြားခြားနားပါသည်”ဟူ၍ဖြစ်သည်။ ဤသည်မှာ ဗြောင်ကျသော အဓိပ္ပာယ်မဲ့စကား မဟုတ်လော။ ငါ၏ အသွင်အပြင်သည် သာမန်ဖြစ်ပြီး ရိုးရိုးရှင်းရှင်း ဖြစ်သည်။ မည်သည့်လူအုပ်ထဲ၌မဆို ငါသည် တစ်စုံတစ်ရာ မလုပ်ဆောင်လျှင် သို့မဟုတ် စကားမပြောလျှင် တစ်နှစ် သို့မဟုတ် နှစ်နှစ်ကြာပြီးနောက်မှာပင် ငါမည်သူဖြစ်သည်ကို သတိပြုမိသူ တစ်ယောက်မျှ ရှိချင်မှ ရှိပေမည်။ မည်သည့်အုပ်စု၌မဆို ငါသည် သာမန်အဖွဲ့ဝင်တစ်ဦးသာ ဖြစ်သည်၊ မည်သူကမျှ ငါ့အကြောင်း ထူးခြားသည့်အရာ တစ်ခုတလေကို မမြင်နိုင်ပေ။ ယခု ငါသည် အသင်းတော်၌ အလုပ်လုပ်နေပြီး ဘုရားသခင်၏ သက်သေခံချက်ကြောင့် သင်တို့အလယ်၌ ငါစကားပြောသောအခါ သင်တို့ နားထောင်ကြသည်။ သို့သော် ဘုရားသခင်၏ သက်သေခံချက်မရှိဘဲ မည်မျှသောသူတို့သည် ငါ့စကားကို နားထောင်မည်နည်း သို့မဟုတ် အာရုံစိုက်မည်နည်း။ ယင်းမှာ မေးခွန်းတစ်ခု၊ မသိနိုင်သောအရာတစ်ခုအဖြစ် ကျန်ရှိနေသည်။ အချို့လူများက ဤသို့ပြောကြသည်။ “သူသည် ကျွန်ုပ်အမြင်တွင် ဘုရားသခင်နှင့် တစ်ပုံစံတည်း တူပါသည်။ သူသည် သာမန်ထက် ထူးကဲပြီး အခြားသူများနှင့် ကွဲပြားသည်ဟု ကျွန်ုပ် အစဉ်သဖြင့် ခံစားရသည်” ဟူ၍ဖြစ်သည်။ ငါသည် မည်သို့ ကွဲပြားသနည်း။ ငါ၌ ဦးခေါင်းသုံးလုံးနှင့် လက်ခြောက်ချောင်း ရှိသလော။ သင်တို့သည် ခြားနားချက်ကို မည်သို့ သိနိုင်သနည်း။ ဘုရားသခင်သည် တစ်ခါက ဤသို့ မိန့်တော်မူခဲ့သည်။ ငါသည် လူတို့အား ငါ၌ ဘုရား၏သဘောသဘာဝ အရိပ်အမြွက်မျှပင် သိမြင်ခွင့်ကို တမင်တကာ မပေးပေ။ ဘုရားသခင်သည် လူတို့အား သူ၏ ဘုရား၏သဘောသဘာဝကို သိမြင်ခွင့်မပေးလျှင် သင်တို့သည် ယင်းကို မည်သို့ မြင်နိုင်မည်နည်း။ ဤလူများ ပြောဆိုသည့်အရာသည် ပြဿနာရှိသည် မဟုတ်လော။ ယင်းမှာ စကားလုံးများတွင် အခြေအမြစ် လုံးဝကင်းမဲ့သော စက်ဆုပ်ဖွယ် ဖော်လံဖားများ၏ အဓိပ္ပာယ်မဲ့သော စကားသက်သက်သာဖြစ်သည်မှာ ရှင်းပါသည်။ လူ့ဇာတိခံ ဘုရားသခင်၏ ပြင်ပအသွင်အပြင်သည် သာမန်လူတစ်ဦး၏ အသွင်အပြင် ဖြစ်သည်။ လူ့မျက်စိများသည် ခရစ်တော်၏ ဘုရား၏သဘောသဘာဝကို မည်သို့ ပိုင်းခြားသိမြင်နိုင်မည်နည်း။ ခရစ်တော်သည် အမှုမပြုဘဲ စကားမပြောခဲ့လျှင် မည်သူကမျှ သူ့ကို သတိပြုမိနိုင်မည် မဟုတ် သို့မဟုတ် သူ၏ ပင်ကိုလက္ခဏာနှင့် အနှစ်သာရကို သိနိုင်မည်မဟုတ်ပေ။ ဤသည်မှာ အမှန်တရား ဖြစ်သည်။ သို့ဆိုလျှင် “ကိုယ်တော်သည် အခြားသူများနှင့် ကွဲပြားပြီး ဘုရားသခင် လူ့ဇာတိခံယူထားသော ဇာတိပကတိ ဖြစ်ကြောင်း ကျွန်ုပ် တစ်ချက်ကြည့်လိုက်ရုံဖြင့် ပိုင်းခြားသိမြင်နိုင်သည်” သို့မဟုတ် “ကိုယ်တော့်ကို မြင်လိုက်သည်နှင့် ကိုယ်တော်သည် ကြီးမြတ်သောအမှုများကို လုပ်ဆောင်နိုင်ကြောင်း ကျွန်ုပ်သိသည်” ဟု ပြောဆိုကြသောသူများနှင့် ပတ်သက်၍မူ မည်သို့နည်း။ ဤစကားများသည် အဘယ်အရာများ ဖြစ်သနည်း။ ၎င်းတို့သည် လုံးလုံး အဓိပ္ပာယ်မဲ့သော စကားများ ဖြစ်သည်။ ဘုရားသခင်သည် သူ၏သက်သေခံချက်ကို မပေးခဲ့သည့်အချိန်က သင်တို့သည် အကြိမ်မည်မျှ ကြည့်သည်ဖြစ်စေ ယင်းကို အဘယ်သို့ ပိုင်းခြားသိမြင်နိုင်ခြင်း မရှိဘဲ ဖြစ်နိုင်ရသနည်း။ ဘုရားသခင်၏ သက်သေခံချက်ပြီးနောက် ငါသည် ငါ၏အမှုကို စတင်ခဲ့သောအခါ သင်တို့သည် ယင်းကို တစ်ချက်ကြည့်လိုက်ရုံဖြင့် ရုတ်တရက် မည်သို့ မြင်နိုင်ခဲ့သနည်း။ ဤသည်တို့မှာ ရှင်းလင်းစွာ လှည့်ဖြားသောစကားများ၊ လုံးလုံး ရူးသွပ်မှုပင် ဖြစ်သည်။

အချို့သောသူတို့သည် ငါနှင့်တွေ့ဆုံသောအခါ သို့မဟုတ် ငါနှင့် ထိတွေ့ဆက်ဆံသောအခါ ကိုယ့်ဂုဏ်ကိုယ် ဖော်လိုကြသည်။ ၎င်းတို့က ဤသို့တွေးကြသည်။ “လူ့ဇာတိခံ ဘုရားသခင်နှင့် တွေ့ရသည်မှာ ကြုံတောင့်ကြုံခဲ အခွင့်အရေး ဖြစ်သည်၊ ဤသည်မှာ တစ်သက်မှာ တစ်ခါသာရသည့် အခွင့်အရေးတစ်ခု ဖြစ်သည်။ ငါသည် ကောင်းစွာ စွမ်းပကားပြရမည်၊ ဘုရားကို ယုံကြည်ခဲ့သည့် နှစ်များစွာ၏ ရလဒ်ကို ဖော်ပြရမည်၊ ပြီးလျှင် ဘုရား၏ လက်ရှိအမှုအဆင့်ကို လက်ခံပြီးကတည်းက ငါပြုခဲ့သည့် ကောင်းမွန်သော အောင်မြင်မှုများကို ဘုရားကို အသိပေးရမည်” ဟူ၍ဖြစ်သည်။ ငါ့ကို အသိပေးရမည်ဟု ဆိုရာတွင် ၎င်းတို့ဆိုလိုသည်မှာ အဘယ်နည်း။ ၎င်းတို့သည် ရာထူးတိုးမြှင့်ခံရဖို့ အခွင့်အရေးတစ်ခုကို မျှော်လင့်နေကြခြင်း ဖြစ်သည်။ အကယ်၍သာ ယင်းက အသင်းတော်ထဲ၌ဖြစ်လျှင် ၎င်းတို့သည် မိမိတို့တစ်သက်တာတွင် ပေါ်လွင်ဖို့ သို့မဟုတ် ရာထူးတိုးမြှင့်ခံရဖို့ အခွင့်အရေးကို မည်သည့်အခါမျှ ရနိုင်မည် မဟုတ်ပေ။ မည်သူကမျှ ၎င်းတို့ကို ရွေးကောက် တင်မြှောက်မည် မဟုတ်။ ယခု အခွင့်အရေး ရောက်လာပြီဟု ၎င်းတို့က ထင်ကြသဖြင့် မည်သည့်ပြဿနာမျှ မထုတ်ဖော်ဘဲ ကိုယ့်ဂုဏ်ကိုယ်ဖော်ရန် ကြိုးစားနေပုံကိုလည်း မပြဘဲ မည်သို့ပြောဆိုရမည်ကို တွေးဆကြသည်။ ၎င်းတို့သည် ပို၍ ပါးနပ်ပြီး ကျွမ်းကျင်လိမ္မာရမည်ဖြစ်ကာ အချို့သော ပရိယာယ်များနှင့် လှည့်ကွက်တို့ကို သုံးလျက် သိမ်ဖျင်းသော ဉာဏ်နီဉာဏ်နက်များကို အားကိုးရမည်ဖြစ်သည်။ ၎င်းတို့က ဤသို့ပြောဆိုကြသည်။ “ဘုရား၊ ဤနှစ်များအတွင်း ကိုယ်တော့်ကို ယုံကြည်ခြင်းမှ ကျွန်ုပ်တို့ အကျိုးကျေးဇူးများစွာ သေချာပေါက် ရရှိခဲ့ပါသည်။ ကျွန်ုပ်တို့ မိသားစုတစ်ခုလုံး ယုံကြည်ကြပြီး အားလုံးက ဘုရားအတွက် အသုံးခံဖို့ အရာအားလုံးကို စွန့်လွှတ်ခဲ့ပြီး ဖြစ်ပါသည်။ သို့သော် ဤသည်မှာ အရေးအကြီးဆုံးအရာ မဟုတ်ပါ။ အရေးအကြီးဆုံးမှာ ကိုယ်တော့်နှုတ်ကပတ်တော်များက အလွန်ကောင်းမွန်ပြီး ကိုယ်တော်က အမှုအလွန်များစွာ လုပ်ဆောင်ခဲ့ပြီးဖြစ်ခြင်း ဖြစ်ပါသည်။ ကျွန်ုပ်တို့အားလုံး မိမိတို့၏ တာဝန်ကိုထမ်းဆောင်ပြီး ဘုရားအတွက် အသုံးခံလိုကြပါသည်” ဟူ၍ ဖြစ်သည်။ ထိုအခါ ငါက “သို့သော် ဤအထဲတွင် အမှန်တကယ် အကျိုးကျေးဇူး တစ်စုံတစ်ရာ မရှိ” ဟု ပြောဆိုခဲ့သည်။ “ရှိပါသည်။ ဘုရားပေးသနားသည့် ကျေးဇူးတော်သည် များပြားလှပါသည်။ ဘုရား နှုတ်ကပတ်တော်များထဲတွင် ကျွန်ုပ်တို့သည် အလင်းသစ်များ၊ ထိုးထွင်းသိမြင်မှုများနှင့် နားလည်မှုများစွာ ရရှိခဲ့ကြပါသည်။ ညီအစ်ကိုမောင်နှမများ အားလုံး အလွန်ထကြွလုံ့လရှိနေကြပြီး အားလုံးက ဘုရားအတွက် အသုံးခံလိုကြပါသည်” “အားနည်းပြီး အပျက်သဘောဆောင်သူ တစ်ဦးတစ်ယောက် ရှိသလော။ နှောင့်ယှက်ခြင်းများနှင့် အဖျက်အမှောင့်လုပ်ခြင်းများကို ဖြစ်စေသူ တစ်ဦးတစ်ယောက် ရှိသလော” “မရှိပါ၊ ကျွန်ုပ်တို့၏ အသင်းတော်အသက်တာသည် အလွန်ကောင်းမွန်ပါသည်။ ညီအစ်ကိုမောင်နှမများအားလုံး ဘုရားကို ချစ်ရန် လိုက်စားကြပြီး ဧဝံဂေလိတရားကို ဖြန့်ဝေရန် အရာအားလုံးကို စွန့်လွှတ်ကြပါသည်။ ဘုရား မိန့်တော်မူသမျှ အရာအားလုံးသည် ကောင်းမြတ်ပါသည်။ ကျွန်ုပ်တို့အားလုံး စိတ်အားထက်သန်နေကြပြီး ယခင်ကဲ့သို့ ကျေးဇူးတော်ကို ရှာဖွေပြီး မုန့်ကို အဝစားရန် လိုက်စားခြင်းဖြင့် မယုံကြည်နိုင်ကြတော့ပါ။ ကျွန်ုပ်တို့ ဘုရားအတွက် အရာအားလုံးကို စွန့်လွှတ်ရမည်၊ ဘုရားထံ မိမိတို့ကိုယ်ကို ဆက်ကပ်ရမည်၊ ဘုရားအတွက် အသုံးခံရမည်” “သို့ဆိုလျှင် ဤလွန်ခဲ့သည့် နှစ်အနည်းငယ်အတွင်း သင်တို့ ဘုရားနှုတ်ကပတ်တော်များအပေါ် နားလည်မှု တစ်စုံတစ်ရာ ရရှိခဲ့ကြသလော” “ဟုတ်ကဲ့၊ ရရှိခဲ့ပါသည်။ ဘုရား၊ ကိုယ်တော့်နှုတ်ကပတ်တော်များမှာ အလွန် ကောင်းမွန်လှပါသည်၊ စာကြောင်းတိုင်းသည် ကျွန်ုပ်တို့၏ အဓိကကျသော ပြဿနာများကို တည့်တည့် ထိမှန်ပြီး ကျွန်ုပ်တို့၏ သဘာဝ အနှစ်သာရများကို ဖော်ထုတ်ပါသည်။ ကျွန်ုပ်တို့သည် ကိုယ်တော့်နှုတ်ကပတ်တော်များထဲတွင် မိမိကိုယ်ကို နားလည်ခြင်းနှင့် ကြီးမားသော ဉာဏ်အလင်း ရရှိခဲ့ကြပါသည်။ ဘုရား၊ ကိုယ်တော်သည် ကျွန်ုပ်တို့ မိသားစုတစ်ခုလုံး၊ ကျွန်ုပ်တို့ အသင်းတော်တစ်ခုလုံးအတွက် အသက်ကယ်ရှင် ဖြစ်ပါသည်။ ကိုယ်တော်သာ မရှိလျှင် ကျွန်ုပ်တို့ ကြာမြင့်သောအချိန်ကတည်းက မည်သည့်နေရာတွင် ပျက်စီးသွားမည်ကို မည်သူသိမည်နည်း။ ကိုယ်တော်သာ မရှိလျှင် ကျွန်ုပ်တို့ မည်သို့ ဆက်လက် လုပ်ဆောင်ရမည်ကို သိကြမည် မဟုတ်ပါ။ ကျွန်ုပ်တို့ အသင်းတော်မှ လူတိုင်း ကိုယ်တော့်ကို တွေ့မြင်ရန် တောင့်တကြပြီး ကိုယ်တော့်ကို သူတို့၏ အိပ်မက်ထဲတွင် ဆုံတွေ့ရန် နေ့စဉ် ဆုတောင်းနေကြကာ ကိုယ်တော်နှင့် နေ့စဉ် အတူရှိရန် မျှော်လင့်နေကြပါသည်” ဟူ၍ ဖြစ်သည်။ သူတို့၏ စကားတွင် အနှစ်သာရအားဖြင့် စိတ်ရင်းမှန်သော သို့မဟုတ် ရိုးသားသောစကား တစ်ခုတလေ ပါရှိသလော။ (မပါရှိပါ။) သို့ဆိုလျှင် ဤစကားများမှာ အဘယ်အရာများနည်း။ ယင်းတို့သည် ကြောင်သူတော်ဆန်သော၊ အနှစ်မဲ့သော၊ အသုံးမဝင်သော စကားများ ဖြစ်ကြသည်။ မိမိကိုယ်ကို သိကျွမ်းခြင်းအကြောင်း ပြောဆိုရန် ငါက သူတို့ကို တောင်းဆိုသည့်အခါ ၎င်းတို့က “ဘုရား၏ အမှုကို လက်ခံပြီးသည့်နောက် ကျွန်ုပ်သည် လူ့သဘာဝကင်းမဲ့သည့် နတ်ဆိုးတစ်ကောင်နှင့် စာတန်တစ်ကောင် ဖြစ်သည်ဟု ခံစားရပါသည်” ဟု ပြောဆိုကြသည်။ “သင်သည် မည်သို့ လူ့သဘာဝ ကင်းမဲ့သနည်း” “ကျွန်ုပ်သည် စည်းမျဉ်းမဲ့ ပြုမူပါသည်” “မည်သည့် လုပ်ဆောင်ချက်များတွင် သင်သည် စည်းမျဉ်းမဲ့သနည်း” “ကျွန်ုပ်သည် အခြားသူများနှင့် သဟဇာတရှိစွာ ပူးပေါင်းဆောင်ရွက်နိုင်ခြင်း မရှိပါ၊ အခြားသူများနှင့် ကျွန်ုပ်၏ ပေါင်းသင်းဆက်ဆံမှုတွင် စည်းမျဉ်းများ ကင်းမဲ့ပါသည်၊ လူများနှင့် ဆက်ဆံရာတွင် စည်းမျဉ်းများ ကင်းမဲ့ပါသည်။ ကျွန်ုပ်သည် နတ်ဆိုးတစ်ကောင်နှင့် စာတန်တစ်ကောင်ဖြစ်ပါသည်၊ ကျွန်ုပ်သည် စာတန်ထံမှ အစပြုလာပါသည်၊ စာတန်၏ ပြင်းပြင်းထန်ထန် ဖောက်ပြန်ဖျက်ဆီးခြင်းကို ခံရပါသည်။ ကျွန်ုပ်သည် ဘုရားသခင်ကို အချိန်တိုင်း အတိုက်အခံလုပ်ပြီး ဘုရားသခင်ကို အဆက်မပြတ် ဆန့်ကျင်ကာ ထိပ်တိုက် ရင်ဆိုင်ဖြေရှင်းပါသည်” ဟူ၍ ဖြစ်သည်။ ဤစကားများသည် အပေါ်ယံတွင် ကောင်းမွန်ပုံရသည်။ ငါက သူတို့ကို “သင်တို့အသင်းတော်မှ မည်သူမည်ဝါသည် ယခု မည်သို့ရှိသနည်း” ဟု မေးမြန်းသောအခါ ၎င်းတို့က “ယခု သူ အဆင်ပြေနေပါသည်။ သူသည် ယခင်က အသင်းတော် ခေါင်းဆောင်ရာထူးမှ အစားထိုးခံခဲ့ရသော်လည်း နောက်ပိုင်းတွင် နောင်တရခဲ့ပြီး ညီအစ်ကိုမောင်နှမများက သူ့ကို ထပ်မံရွေးကောက်တင်မြှောက်ခဲ့ကြပါသည်” ဟု ပြောဆိုကြသည်။ “ထိုသူသည် သမ္မာတရားကို လိုက်စားသူတစ်ဦးလော” “ဘုရားက သူ သမ္မာတရားကို လိုက်စားသည်ဟု မိန့်တော်မူလျှင် သူ လိုက်စားပါသည်။ ဘုရားက သူ မလိုက်စားဟု မိန့်တော်မူလျှင် သူ မလိုက်စားပါ” “ဤသူသည် စိတ်အားထက်သန်ပုံ ပေါက်သော်လည်း သူ၏အရည်အချင်းမှာ အတော်လေး ညံ့ဖျင်းသည် မဟုတ်လော” “ညံ့ဖျင်းပါသလော။ ဟုတ်ကဲ့၊ အနည်းငယ် ညံ့ဖျင်းပါသည်။ သို့မဟုတ်လျှင် ညီအစ်ကိုမောင်နှမများက ယခင်တစ်ကြိမ်က သူ့ကို အဘယ်ကြောင့် လူစားထိုးခဲ့မည်နည်း” “သူ၏အရည်အချင်းသည် ညံ့ဖျင်းပါက သူသည် တိကျခိုင်မာသောအလုပ်ကို လုပ်ဆောင်နိုင်မည်လော။ အသင်းတော်ခေါင်းဆောင်မှု တာဝန်ကို သူ ကောင်းမွန်စွာ ဖြည့်ဆည်းနိုင်မည်လော” ဟူ၍ဖြစ်လေသည်။ ငါ၏ စကားများကို ကြားပြီးသည့်နောက်တွင် အရည်အချင်းညံ့ဖျင်းသူတစ်ဦးသည် တာဝန်ကို ကောင်းမွန်စွာ မဖြည့်ဆည်းနိုင်ကြောင်း ငါ၏ စကားများက ဆိုလိုသည်ဟု ၎င်းတို့ အဓိပ္ပာယ်ကောက်ပြီး “သို့ဆိုလျှင် သူ ကောင်းမွန်စွာ မဖြည့်ဆည်းနိုင်ပါ။ ညီအစ်ကိုမောင်နှမများက သူ့ကို အဆိုးဆုံးထဲမှ အကောင်းဆုံးအဖြစ် ရွေးချယ်ခဲ့ခြင်း ဖြစ်ပါသည်။ ပိုမိုကောင်းမွန်သူ မရှိသောကြောင့် သူ့ကို ရွေးချယ်ခဲ့ခြင်း ဖြစ်ပါသည်။ ညီအစ်ကိုမောင်နှမများ အားလုံးက သူ၏အရည်အချင်းသည် သာမန်ဖြစ်သည်ဟု ပြောဆိုကြသော်လည်း သူသည် ကျွန်ုပ်တို့ကို ဦးဆောင်နိုင်ပါသေးသည်။ သူ၏အရည်အချင်းသည် ညံ့ဖျင်းပါက နောက်တစ်ကြိမ်တွင် ညီအစ်ကိုမောင်နှမများ သူ့ကို ရွေးချယ်ကြမည် မဟုတ်ဟု ကျွန်ုပ်ထင်ပါသည်။ ဘုရား၊ ကျွန်ုပ်သည် ညီအစ်ကိုမောင်နှမများကို လွှမ်းမိုးရန် ကြိုးပမ်းသင့်ပါသလော” ဟု ပြောလေသည်။ “ဤကိစ္စသည် သင်တို့ အသင်းတော်၏ ညီအစ်ကိုမောင်နှမများ၏ ဝိညာဉ်ရင့်ကျက်မှုအပေါ် မူတည်သည်။ သူတို့သည် ကောင်းမွန်သည်ဟု ထင်သောသူတစ်ဦးကို စည်းမျဉ်းများအပေါ် အခြေခံ၍ ရွေးချယ်သည်။ ဤလုပ်ငန်းစဉ်သည် မှန်ကန်သည်၊ သို့သော် အချို့လူများသည် မိုက်မဲပြီး လူများ သို့မဟုတ် ကိစ္စရပ်များကို ရှင်းရှင်းလင်းလင်း သိမြင်နိုင်ခြင်း မရှိကြ။ ပြီးလျှင် သူတို့သည် တစ်ခါတစ်ရံ လူမှားရွေးချယ်တတ်ကြသည်” ဟု ငါပြောဆိုခဲ့သည်။ ဤသို့ပြောဆိုခြင်းအားဖြင့် ငါဆိုလိုသည်မှာ အဘယ်နည်း။ ငါသည် ဤသူကို လူစားထိုးရန် တမင်ရည်ရွယ်နေခြင်း မဟုတ်ဘဲ အဖြစ်မှန်တစ်ခုကို ရိုးရှင်းစွာ ဖော်ပြနေခြင်းသာ ဖြစ်သည်။ သို့သော် ထိုအန္တိခရစ်သည် ဤသည်ကို ကြားပြီးနောက် မည်သို့ သဘောပေါက်နားလည်ခဲ့သနည်း။ ၎င်းက ထုတ်ဖော်ပြောဆိုခဲ့ခြင်း မရှိသော်လည်း မိမိဘာသာ ဤသို့တွေးတောခဲ့ကြသည်။ “ဤသည်မှာ ဤသူကို လူစားထိုးရန် ဘုရားထံမှ အရိပ်အမြွက်ပေးခြင်းလော။ ကောင်းပြီလေ၊ ဘုရားသခင် အမှန်တကယ် အဘယ်အရာကို ဆိုလိုသည်ကို ငါ ထပ်မံစုံစမ်းကြည့်သင့်သည်။ ဤသူသာ လူစားထိုးခံရလျှင် အသင်းတော်ကို အခြားမည်သူက ဦးဆောင်နိုင်မည်နည်း၊ ဤအလုပ်ကို အခြားမည်သူက လုပ်ဆောင်နိုင်မည်နည်း” ဟူ၍ ဖြစ်လေသည်။ အန္တိခရစ်များသည် ဘုရားသခင်ကို မမြင်နိုင်ပေ။ ၎င်းတို့၏ စိတ်နှလုံးတွင် ဘုရားသခင်အတွက် နေရာမရှိပေ။ ခရစ်တော်ကို ၎င်းတို့ ကြုံတွေ့သောအခါ သာမန်လူတစ်ယောက်နှင့်မခြား ဆက်ဆံကြသည်။ အစဉ်သဖြင့် သူ၏ အမူအရာနှင့်လေသံမှ အရိပ်နိမိတ် ယူကြသည်။ အခြေအနေနှင့် သင့်တော်သလို ၎င်းတို့၏ လေသံကို ပြောင်းကြသည်။ အမှန်တကယ် ဖြစ်ပျက်နေသည့်အရာကို မည်သည့်အခါမျှ မပြောပေ။ ရိုးသားစစ်မှန်သည့် အရာတစ်ခုမှ မပြောပေ။ အနှစ်မရှိသည့် စကားများနှင့် အယူဝါဒကို ပြောသည်။ ၎င်းတို့ မျက်စိရှေ့တွင် ရပ်နေသော လက်တွေ့ကျသည့်ဘုရားကို လှည့်စားပြီး တစ်ပတ်ရိုက်ဖို့ ကြိုးစားကြသည်။ ၎င်းတို့တွင် ဘုရားသခင်ကို ကြောက်ရွံ့သော စိတ်နှလုံး လုံးဝ မရှိပေ။ ၎င်းတို့သည် ဘုရားသခင်ကို စိတ်အရင်းခံအတိုင်း စကားပြောနိုင်စွမ်း၊ စစ်မှန်သောအရာတစ်ခုတလေကို ပြောနိုင်စွမ်းပင် မရှိကြပေ။ ၎င်းတို့သည် မြွေတစ်ကောင် တွန့်လိမ်သွားသကဲ့သို့ အကွေ့အဝိုက်များပြီး သွယ်ဝိုက်သော နည်းလမ်းဖြင့် စကားပြောကြသည်။ ၎င်းတို့ စကားများ၏ ဟန်ပန်နှင့် ဦးတည်ရာတို့သည် ဖရဲသီးအနွယ်တစ်ခုက တိုင်ပေါ် တက်နေသကဲ့သို့ ဖြစ်သည်။ ဥပမာအားဖြင့် တစ်စုံတစ်ဦးသည် ကောင်းသော အစွမ်းအစရှိပြီး ရာထူးတိုးခြင်း ခံရနိုင်သည်ဟု သင်ပြောသည့်အခါ၊ ၎င်းတို့က ၎င်းတို့မည်မျှ တော်ကြောင်းနှင့် ၎င်းတို့ထဲ၌ ထင်ရှားသည့်အရာနှင့် ပေါ်လွင်သည့်အရာကို ချက်ချင်းပြောကြသည်။ ပြီးလျှင် သင်က တစ်စုံတစ်ဦးသည် ဆိုးသည်ဟု ပြောသည့်အခါ၊ ၎င်းတို့သည် မည်မျှ ဆိုးပြီး မကောင်းကြောင်း၊ ၎င်းတို့သည် အသင်းတော်၌ မည်မျှ အဖျက်အမှောင့်များနှင့် အနှောင့်အယှက်များ ဖြစ်စေကြောင်းတို့ကို အလျင်အမြန် ပြောပေသည်။ သင်သည် တစ်စုံတစ်ခုနှင့်ပတ်သက်ပြီး သမ္မာတရားကို သင်ယူလိုသည့်အခါ ၎င်းတို့၌ ပြောစရာ တစ်စုံတစ်ခုမျှ မရှိပေ။ ၎င်းတို့သည် သင် ကောက်ချက်ချဖို့ကို စောင့်ဆိုင်းရင်း၊ သင်၏ စကားများရှိ အဓိပ္ပာယ်ကို အာရုံစိုက် နားစွင့်ရင်း မလိမ့်တပတ်လုပ်သည်။ ဤသို့ဖြင့် ၎င်းတို့၏ စကားလုံးများကို သင်၏အတွေးများနှင့် ကိုက်ညီစေရန် ဖြစ်သည်။ ၎င်းတို့ပြောဆိုသမျှသည် နားထောင်ကောင်းသည့် စကားများ၊ မြှောက်ပင့်ခြင်းနှင့် မျက်နှာလိုမျက်နှာရ လုပ်ခြင်းဖြစ်ကာ ရိုးသားစစ်မှန်သော စကားတစ်လုံးမျှ ၎င်းတို့၏ ပါးစပ်မှ မထွက်လာကြချေ။ ဤသည်မှာ ၎င်းတို့၏ လူတို့နှင့် ဆက်ဆံပုံဖြစ်ပြီး ဘုရားသခင်နှင့် ဆက်ဆံပုံဖြစ်သည်။ ၎င်းတို့သည် ထိုမျှ လှည့်စားတတ်ခြင်းပင် ဖြစ်သည်။ ဤသည်မှာ အန္တိခရစ် စိတ်သဘောထားဖြစ်သည်။

အချို့သောသူတို့သည် ငါ့အနေဖြင့် မည်သို့သော စကားအမျိုးအစားကို သို့မဟုတ် မည်သို့သော ကိစ္စရပ်များကို ကြားနာလိုသည်ကို သူတို့ မသိရှိကြဘဲ ငါနှင့် ထိတွေ့ဆက်ဆံလာကြသည်။ သို့တိုင်အောင် မသိရှိလျှင်ပင် သူတို့သည် နည်းလမ်းတစ်ခုကို ရှာကြံကြသည်။ သူတို့သည် ငါနှင့် ဆွေးနွေးရန် အကြောင်းအရာ အချို့ကို ရွေးချယ်ကြပြီး “ဤအကြောင်းအရာများကို ကိုယ်တော် စိတ်ဝင်စားကောင်း စိတ်ဝင်စားနိုင်သည်။ ယင်းမှာ ကိုယ်တော် သိရှိလိုသော်လည်း သို့မဟုတ် ကြားနာလိုသော်လည်း မေးမြန်းရန် အားနာနေသည့် အရာများ ဖြစ်ကောင်းဖြစ်နိုင်သည်။ ထို့ကြောင့် ကျွန်ုပ်ကပင် ကိုယ်တော့်ထံ အလျင်ဦးအောင် တင်ပြပါမည်” ဟု တွေးတောကြသည်။ ငါတို့ တွေ့ဆုံသောအခါ ၎င်းက “မကြာသေးမီက ကျွန်ုပ်တို့၏ ဒေသတွင် မိုးသည်းထန်စွာ ရွာသွန်းခဲ့သဖြင့် မြို့တစ်ခုလုံး ရေကြီးရေလျှံမှု ဖြစ်သွားခဲ့ပါသည်။ ပြည်သူ့လုံခြုံရေး အခြေအနေမှာလည်း ယိုယွင်းလာပြီး ယခုအခါ သူခိုးများ အလွန်ပေါများနေပါသည်။ အပြင်ထွက်သည့်အခါ ခိုးယူခံရခြင်း သို့မဟုတ် လုယက်ခံရခြင်း၏ အန္တရာယ်လည်း ရှိနေပါသည်။ အချို့သော နေရာများတွင် ကလေးသူငယ်အများအပြား ပြန်ပေးဆွဲခံခဲ့ရသည်ဟု ကြားသိရသဖြင့် လူအများမှာ စိုးရိမ်ထိတ်လန့်သော အခြေအနေတွင် ရှိနေကြပါသည်။ လူ့အဖွဲ့အစည်းသည် အလွန်တရာ ကမောက်ကမဖြစ်နေပြီး လုံးဝ ပုံမှန်မဟုတ်တော့ကြောင်း ဘာသာတရားမရှိသူတို့က ပြောဆိုကြပါသည်။ ဘာသာတရား လိုက်စားသူတို့မှာမူ သမ္မာကျမ်းစာကို ဆက်လက်ဆုပ်ကိုင်လျက် ဧဝံဂေလိတရား ဟောပြောနေကြဆဲဖြစ်ကာ နောက်ဆုံးသောကာလ ရောက်ရှိလာပြီ ဖြစ်ကြောင်း၊ ဘုရား ကြွဆင်းလာတော့မည် ဖြစ်ကြောင်း၊ ကြီးမားသော ဘေးအန္တရာယ်များနှင့် ကပ်ဘေးများ ကျရောက်နေပြီဖြစ်ကြောင်း ပြောဆိုလျက် ရှိကြပါသည်” ဟု ပြောကြ၏။ အချို့သောသူများကမူ ငါနှင့် တွေ့ဆုံသည့်အခါ ချက်ချင်းပင် “လွန်ခဲ့သော ရက်အနည်းငယ်ခန့်က နေရာတစ်ခု၏ ကောင်းကင်ယံတွင် လသုံးစင်း ပေါ်ထွန်းခဲ့ရာ လူများစွာက ဓာတ်ပုံရိုက်ကူးခဲ့ကြပါသည်။ မကြာမီ ကောင်းကင်၌ ကြီးကျယ်သော ရူပါရုံများ ပေါ်ထွန်းလာတော့မည် ဖြစ်ကြောင်း၊ စစ်မှန်သော သခင် ပေါ်ထွန်းလာပြီဖြစ်ကြောင်း အချို့သော ရိုးရာနက္ခတ်ဗေဒင်ပညာရှင်များက ဟောကိန်းထုတ်ကြပါသည်” ဟု ပြောကြသည်။ သူတို့သည် ဤကဲ့သို့သော အကြောင်းအရာများကို ပြောဆိုကြသည်။ သူတို့သည် ဤသို့သော လူမှုရေးဆိုင်ရာ ပရမ်းပတာဖြစ်ခြင်းများ၊ ဘေးအန္တရာယ်များ၊ အမျိုးမျိုးသော ထူးခြားသည့် ဖြစ်ရပ်များနှင့် နက္ခတ်ဆိုင်ရာ ဖြစ်စဉ်များ ပေါ်ပေါက်ခြင်းကို အထူးပင် စိတ်ဝင်စားကာ သတင်းအချက်အလက်များ စုဆောင်းကြသည်။ သူတို့သည် ငါနှင့် တွေ့ဆုံသည့်အခါ ဤအကြောင်းအရာများကို ငါနှင့် ပိုမိုရင်းနှီးသော ဆက်ဆံရေးတစ်ခု တည်ဆောက်ရန်အတွက် စကားစမြည် ပြောဆိုစရာအဖြစ် အသုံးပြုကြသည်။ အချို့ကမူ ဤသို့ ယုံကြည်ကြသည်။ “လူ့ဇာတိခံ ဘုရားသခင်သည် သာမန်လူသားတစ်ဦးသာ ဖြစ်သည်။ ကိုယ်တော်နှင့် အခြားသူများအကြား ခြားနားချက်မှာ ကိုယ်တော်သည် ဘုရား၏ အမှုတော်ကို ဆောင်ရွက်ပြီး ဘုရားအား ကိုယ်စားပြုသည်ဟူသော အချက်၌ တည်ရှိသည်။ သို့ဖြစ်၍ လူအများစုသည် ကမ္ဘာ့ငြိမ်းချမ်းရေးကို၊ လူသားများ သဟဇာတရှိစွာနှင့် စိတ်ကျေနပ်စွာ အသက်ရှင်နေထိုင်ရေးကို မျှော်လင့်ကြသော်လည်း၊ လူ့ဇာတိကို ခံယူထားသော ခရစ်တော်သည် သာမန်လူများနှင့် မတူညီပေ။ ကိုယ်တော်သည် လောက၌ ကြီးစွာသော ပရမ်းပတာဖြစ်ခြင်းများ ဖြစ်ပွားစေဖို့အတွက်၊ ရူပါရုံများနှင့် ကြီးမားသော ဘေးအန္တရာယ်များ ကျရောက်စေဖို့အတွက်၊ ဘုရား၏ ကြီးမြတ်သော အမှုတော် လျင်မြန်စွာ ပြီးမြောက်အောင်မြင်စေဖို့အတွက်၊ မိမိမိန့်မြွက်ခဲ့သော နှုတ်ကပတ်တော်များ ပြည့်စုံစေရန်အလို့ငှာ ဘုရားသခင်၏ စီမံခန့်ခွဲမှုအလုပ် လျင်မြန်စွာ အဆုံးသတ်စေဖို့အတွက် မျှော်လင့်တော်မူသည်။ ဤသည်တို့သာလျှင် ကိုယ်တော် ဂရုပြုလျက် စိတ်ဝင်စားတော်မူသော အကြောင်းအရာများ ဖြစ်ပေသည်။ သို့ဖြစ်ရာ ကိုယ်တော်နှင့် တွေ့ဆုံသည့်အခါ ကျွန်ုပ်သည် ဤအကြောင်းအရာများကို ပြောလျှင် ကိုယ်တော်သည် အထူးပင် နှစ်ထောင်းအားရ ဖြစ်တော်မူလိမ့်မည်။ ဤသို့ နှစ်ထောင်းအားရ ဖြစ်မှုမှတစ်ဆင့် ကျွန်ုပ်သည် ရာထူးတိုးမြှင့်ခြင်း ခံရကောင်း ခံရနိုင်ပြီး ကိုယ်တော်၏ အပါးတော်၌ ရက်များစွာ ပိုမိုခစားခွင့် ရရှိနိုင်ဖွယ် ရှိပါသည်” ဟူ၍ဖြစ်သည်။ ဤသို့သော လူများ ရှိသလော။ ငါသည် တစ်ချိန်က ချိုသာစွာ ပြောဆိုတတ်သော၊ စကားပြောကောင်းလျက် ဉာဏ်ပညာထက်မြက်ကာ မည်သူ့ကို မည်သည့်စကားပြောဆိုရမည်ကို တိကျစွာ သိရှိသော၊ လူကြိုက်များအောင် ထူးခြားစွာ ပြုမူလျက် နေရာတိုင်း၌ ထင်ပေါ်အောင် နေတတ်သော၊ အထူးသဖြင့် အာဏာနှင့် အဆင့်အတန်း ရှိသူများနှင့် ဆက်ဆံရာတွင် ကျွမ်းကျင်သော မိန်းကလေးငယ်တစ်ဦးကို တွေ့ဆုံခဲ့ဖူးသည်။ သူသည် ငါနှင့် ဆက်ဆံသည့်အခါ “ထိုနေရာတွင် မြေအောက်လောကသည် သောင်းကျန်းလျက်ရှိပြီး ဒေသဆိုင်ရာ ရဲတပ်ဖွဲ့တွင်ပင် ဂိုဏ်းသမားများ ရှိနေပါသည်။ ထိုအရပ်၌ မကောင်းမှုများစွာကို ပြုလုပ်ခဲ့သော ဂိုဏ်းခေါင်းဆောင်တစ်ဦး ရှိခဲ့သည်။ တစ်နေ့သ၌ သူသည် လမ်းခရီးတွင် အဆင့်မြင့် အရာရှိကြီးတစ်ဦး၊ မကောင်းဆိုးဝါးကြီးတစ်ဦးနှင့် တွေ့ဆုံခဲ့၏။ သူ၏ မော်တော်ယာဉ်သည် မကောင်းဆိုးဝါးကြီး၏ မော်တော်ယာဉ်ကို ကျော်တက်သွားခဲ့ရာ မကောင်းဆိုးဝါးကြီးက သူ၏ ကိုယ်ရံတော်အား ‘ဤသည်မှာ မည်သူ၏ မော်တော်ယာဉ် ဖြစ်သနည်း။ သူ့ကို နောက်တစ်ဖန် ငါ မမြင်လိုတော့’ ဟု ပြောကြားခဲ့ပါသည်။ နောက်တစ်နေ့တွင် ထိုသူသည် ရှင်းလင်းသုတ်သင်ခြင်း ခံခဲ့ရပါသည်” ဟူ၍ ချက်ချင်း ပြောလေသည်။ လူ့အဖွဲ့အစည်းတွင် ဤကဲ့သို့သော အမှုအရာများ ရှိသလော။ (ရှိပါသည်)။ ထိုသို့သော အမှုအရာများ အမှန်ပင် ရှိသည်၊ သို့သော် ယင်းတို့ကို ငါနှင့် တွေ့ဆုံသောအခါတွင် ပြောဆိုရမည့် အဓိကအကြောင်းအရာအဖြစ် သတ်မှတ်ခြင်းသည် အကျိုးရှိသလော။ ဤသည်တို့မှာ ငါအလေးထားသော သို့မဟုတ် ကြားနာလိုသော အကြောင်းအရာများ မဟုတ်ချေ။ သို့သော် သူသည် ယင်းကို မသိခဲ့ပေ။ သူသည် ငါက ဤစိတ်လှုပ်ရှားဖွယ်ရာ ဇာတ်လမ်းများကို ကြားနာလိုသည်ဟု ထင်မှတ်ခဲ့သည်။ ဘေးအန္တရာယ်များ၊ ရူပါရုံများ၊ သဘာဝဘေးနှင့် လူလုပ်သော ဘေးဒုက္ခများသည် ငါ အလေးထားသော၊ ငါ ကြားနာလိုသော အကြောင်းအရာများ ဟုတ်မဟုတ်ဟူသည်ကို ငါ့ကို ပြောလော့။ (မဟုတ်ပါ)။ အချိန်ကုန်လွန်စေရန် ဤအရာများကို နားထောင်ခြင်းမှာ ကိစ္စမရှိသော်လည်း သင်တို့က ငါသည် ယင်းတို့ကို အမှန်တကယ် ကြားနာလိုသည်ဟု ထင်မှတ်ပါက သင်တို့ မှားလေသည်။ ငါသည် ဤအရာများကို စိတ်ဝင်စားခြင်း မရှိ၊ ထိုအကြောင်းကို ကြားလိုစိတ်မရှိ။ အချို့သောသူများက “လူများက ဤအကြောင်းအရာများကို ပြောဆိုသည့်အခါ ကိုယ်တော် နားထောင်ပါသလော” ဟု မေးကြသည်။ နားထောင်သည်ကို ငါ မဆန့်ကျင်ပေ၊ သို့သော် ထိုသို့ဆိုခြင်းက ငါ နားထောင်လိုသည်ဟု မဆိုလိုသကဲ့သို့ ငါသည် ဤသတင်းအချက်အလက်များ၊ ဤဇာတ်လမ်းများကို စုဆောင်းလိုသည်ဟုလည်း မဆိုလိုပေ။ ဤသည်မှာ အဘယ်အရာကို ဆိုလိုသနည်း။ ဤသည်မှာ ငါ၏ စိတ်နှလုံး နက်ရှိုင်းရာ၌ ဤကိစ္စရပ်များအပေါ် သိလိုစိတ် မရှိကြောင်း၊ လုံးဝ စိတ်ဝင်စားမှု မရှိကြောင်း ဆိုလိုခြင်း ဖြစ်သည်။ အချို့သောသူများကပင် ဤသို့ တွေးထင်ကြသည်။ “ကိုယ်တော့်စိတ်နှလုံးထဲ၌ အဆင်းနီသော နဂါးကြီးကို အထူးသဖြင့် မုန်းတီးတော်မူသည် မဟုတ်လော။ ကိုယ်တော်က အဆင်းနီသော နဂါးကြီးကို မုန်းတီးလျှင် အဆင်းနီသော နဂါးကြီးအပေါ် ကျရောက်ခဲ့သည့် ပြစ်ဒဏ်ခတ်ခြင်းတစ်ခုအကြောင်း ကျွန်တော် ပြောပြပါမည်။ အဆင်းနီသော နဂါးကြီး၏ အတွင်း၌ အဆင့်မြင့် အရာရှိများ အချင်းချင်း တိုက်ခိုက်ကြပြီး ဂိုဏ်းကွဲအများအပြား အချင်းချင်း တိုက်ခိုက်ကြရာ အကြီးအကဲ မကောင်းဆိုးဝါးတစ်ဦးကို သတ်လုနီးပါး ဖြစ်ခဲ့ပါသည်။ ဤအကြီးအကဲ မကောင်းဆိုးဝါးများသည် လုပ်ကြံသတ်ဖြတ်ရန် ကြိုးပမ်းမှု အကြိမ်ပေါင်းများစွာမှ လွတ်မြောက်ခဲ့ကြရသည်မှာ အမှန်တကယ် အန္တရာယ် ကြီးမားလှပါသည်။ ကိုယ်တော် ဤသတင်းကို ကြားသိရလျှင် ဝမ်းမြောက်တော်မူမည်လော” ဟူ၍ ဖြစ်သည်။ သင်တို့အားလုံး ထိုသို့သော အမှုအရာများအကြောင်း ကြားသိရလျှင် ဝမ်းမြောက်ကြမည်လော။ သင်တို့ ဝမ်းမြောက်လျှင် ဝမ်းမြောက်ကြလော့၊ သင်တို့ နားမထောင်လိုလျှင် နားမထောင်ဘဲ နေကြလော့။ ယင်းမှာ ငါနှင့် သက်ဆိုင်ခြင်း မရှိပေ။ အတိုချုပ်အားဖြင့် ဤကိစ္စရပ်များနှင့် စပ်လျဉ်း၍ နိုင်ငံတစ်ခုခုတွင် ကပ်ရောဂါ ဖြစ်ပွားသည်ဖြစ်စေ၊ ကပ်ရောဂါ မည်သို့ ဖြစ်ပေါ်လာသည်ဖြစ်စေ၊ လူဦးရေ မည်မျှ သေဆုံးသည်ဖြစ်စေ၊ မည်သည့်နိုင်ငံ၌ ကြီးမားသော ဘေးအန္တရာယ် ကြုံတွေ့ရသည်ဖြစ်စေ၊ နိုင်ငံတစ်ခုခု၌ အစိုးရ အခြေအနေ မည်သို့ရှိသည်ဖြစ်စေ၊ နိုင်ငံတစ်ခုခု၏ အထက်အလွှာများ၌ အတွင်းပိုင်း တိုက်ပွဲများ မည်မျှ ရက်စက်ကြမ်းကြုတ်သည်ဖြစ်စေ၊ သို့မဟုတ် လူမှုရေး မငြိမ်မသက်မှုများ ဖြစ်ပေါ်သည်ဖြစ်စေ ငါ မတော်တဆ ကြားသိခဲ့လျှင် နားထောင်ကောင်း နားထောင်မည်၊ သို့သော် ငါသည် ဤအဖြစ်အပျက်များအကြောင်း အတိအကျ မသိသောကြောင့် ယင်းတို့၏ အသေးစိတ် အချက်အလက်များကို ရှာဖွေရန်၊ သတင်းနားထောင်ရန်၊ သတင်းစာဖတ်ရှုရန်၊ သို့မဟုတ် ဤအဖြစ်အပျက်များနှင့် သက်ဆိုင်သော အကြောင်းအရာများကို အွန်လိုင်း၌ ရှာဖွေရန် ကြိုးပမ်းအားထုတ်မည် မဟုတ်ပေ။ ငါသည် လုံးဝ ထိုသို့ ပြုလုပ်မည် မဟုတ်သကဲ့သို့ ငါသည် ထိုသို့သော အမှုအရာများကို မည်သည့်အခါမျှ ပြုလုပ်ခြင်း မရှိပေ။ ကျွန်ုပ်သည် ဤကိစ္စရပ်များကို စိတ်ဝင်စားခြင်း မရှိပေ။ အချို့သောသူများက ဤသို့ ပြောဆိုကြသည်။ “ဤအရာအားလုံးသည် ကိုယ်တော်၏ ချုပ်ကိုင်မှုအောက်၌ ရှိပါသည်၊ ၎င်းတို့အားလုံးမှာ ကိုယ်တော်၏ ပြုတော်မူခြင်းများ ဖြစ်ပါသည်။ ထို့ကြောင့် ကိုယ်တော် စိတ်မဝင်စားခြင်း ဖြစ်ပါသည်” ဟူ၍ ဖြစ်သည်။ ဤစကားသည် မှန်ကန်သလော။ အယူဝါဒ ရှုထောင့်မှကြည့်လျှင် မှန်ကန်သော်လည်း အနှစ်သာရအားဖြင့် ယင်းမှာ မမှန်ကန်ပေ။ ဘုရားသခင်သည် လူသားတို့၏ ကံကြမ္မာ၊ လူမျိုးနွယ်တိုင်း၊ လူအုပ်စုတိုင်း၊ ခေတ်ကာလတိုင်းအပေါ် အချုပ်အခြာအာဏာကို ကိုင်စွဲထားတော်မူသည်။ ခေတ်တစ်ခုစီတွင် အချို့သော ဘေးအန္တရာယ်များနှင့် ပုံမှန်မဟုတ်သော ဖြစ်ရပ်များ ပေါ်ပေါက်လာခြင်းသည် အလွန်တရာ ပုံမှန်ဖြစ်ပါသည်။ ဤအရာအားလုံးသည် ဘုရားသခင်၏ လက်တော်ထဲ၌ ရှိသည်။ မည်သည့်ခေတ်ဖြစ်ပါစေ၊ ထူးခြားသော သို့မဟုတ် အသေးအဖွဲဖြစ်သော ဖြစ်ရပ်များ ပေါ်ပေါက်သည်ဖြစ်စေ၊ ခေတ်တစ်ခု ပြောင်းလဲရန် အချိန်တန်သောအခါ မြက်တစ်ပင် သို့မဟုတ် သစ်တစ်ပင်မျှ မပြောင်းလဲလျှင်ပင် ထိုခေတ်ကာလသည် မုချ ကုန်ဆုံးရမည်။ ဤသည်မှာ ဘုရားသခင်၏ အချုပ်အခြာအာဏာနှင့် သက်ဆိုင်သော ကိစ္စရပ် ဖြစ်သည်။ ခေတ်ကာလတစ်ခုသည် အဆုံးသတ်ရန် မရည်ရွယ်ထားပါက ကောင်းကင်ဆိုင်ရာ ဖြစ်စဉ်များ သို့မဟုတ် မြေကြီးပေါ်ရှိ အရာခပ်သိမ်း၌ ကြီးမားသော ပြောင်းလဲမှုများ ရှိနေလျှင်ပင် ၎င်းသည် အဆုံးသတ်မသင့်ပေ။ ဤအရာအားလုံးသည် ဘုရားသခင်၏ ကိစ္စရပ်များဖြစ်ပြီး လူသားတို့၏ ကြားဝင်စွက်ဖက်ခြင်း သို့မဟုတ် အကူအညီပေးခြင်းတို့ထက် ကျော်လွန်သည်။ လူတို့ အဓိက လုပ်ဆောင်သင့်သည်မှာ ဤကိစ္စရပ်များကို ပါဝင်ပတ်သက်ခြင်း မရှိဘဲ မိမိတို့၏ သိလိုစိတ်ကို ဖြည့်ဆည်းရန် ဤဖြစ်ရပ်များအကြောင်း သက်သေအထောက်အထားနှင့် သတင်းအချက်အလက်များကို စုဆောင်းခြင်း မဟုတ်ပေ။ ဘုရားသခင် ပြုတော်မူသော အမှုအရာများနှင့် ပတ်သက်၍ သင်တို့သည် တတ်နိုင်သမျှ နားလည်သဘောပေါက်သင့်ပြီး နားလည်ရန် မဖြစ်နိုင်သည့်အခါ အတင်းအကျပ် နားလည်ရန် မကြိုးစားသင့်ပေ။ ဖောက်ပြန်ပျက်စီးသော လူသားမျိုးနွယ်အကြားတွင် ဤကိစ္စရပ်များသည် အလွန်တရာ ပုံမှန်ဖြစ်လျက် အလွန်တရာ တွေ့မြင်နေကျ ဖြစ်သည်။ ခေတ်များ ပြောင်းလဲခြင်း၊ ကမ္ဘာ့စနစ်၊ လူမျိုးတစ်မျိုး၏ ကံကြမ္မာ၊ အစိုးရတစ်ရပ်၏ အုပ်ချုပ်မှုနှင့် အဆင့်အတန်းစသည့် ဤကိစ္စရပ်များအားလုံးသည် ဘုရားသခင်၏ လက်တော်ထဲ၌ ရှိကြပြီး ကိုယ်တော်၏ အချုပ်အခြာအာဏာတော်အောက်၌ ရှိကြသည်။ လူတို့သည် ယုံကြည်ရန်၊ လက်ခံရန်၊ ကျိုးနွံနာခံရန်သာ လိုအပ်သည်၊ ယင်းမှာ လုံလောက်သည်။ ပိုမိုများပြားသော နက်နဲမှုများကို နားလည်သဘောပေါက်ရန် အတွေးကို မထားရှိနှင့်၊ ဘုရားသခင်ကို ယုံကြည်ခြင်းအားဖြင့် သင်တို့၌ ကြီးမြတ်သော ဝိညာဉ်ရင့်ကျက်မှုနှင့် ဝိညာဉ်ရေးရာပြည့်ဝမှု ရှိသည့်အလား သင့်သည် နက်နဲမှုများကို ပိုမို နားလည်လေ၊ ပိုမိုခေတ်မီပုံရသည်ဟု မထင်မှတ်နှင့်။ ထိုသို့သော စိတ်ဓာတ်ကို ထားရှိခြင်းသည် ဘုရားသခင်ကို ယုံကြည်ခြင်းအပေါ် သင်တို့၏ အမြင် မှားယွင်းနေကြောင်း ဆိုလိုလေသည်။ ဤကိစ္စရပ်များသည် ထူးခြားမှု မရှိပေ။ အမှန်တကယ် ထူးခြားသော ကိစ္စရပ်၊ လူတို့ အများဆုံး အာရုံစိုက်သင့်သည့်အရာမှာ ဘုရားသခင်၏ စီမံခန့်ခွဲမှုအစီအစဉ်၏ အဓိကအချက်ဖြစ်သော လူသားမျိုးနွယ်၏ ကယ်တင်ခြင်း၊ ဘုရားသခင်၏ စီမံခန့်ခွဲမှုအစီအစဉ်၏ အမှုတော်အတွင်း၌ လူသားမျိုးနွယ်အား ကယ်တင်ခြင်း ခံရစေရန် ဖြစ်သည်။ ဤသည်မှာ အကြီးမြတ်ဆုံးနှင့် အဓိကအကျဆုံးသော ကိစ္စရပ် ဖြစ်သည်။ သင်တို့သည် ဤကိစ္စရပ်နှင့် သက်ဆိုင်သော သမ္မာတရားများနှင့် ရူပါရုံများကို နားလည်သဘောပေါက်ပါက သင်တို့၌ ဘုရားသခင် ပြုတော်မူသောအရာနှင့် သင့်အား သူ ပေးအပ်သည့် သမ္မာတရားကို လက်ခံကြလော့၊ ပြုပြင်ခြင်း၊ တရားစီရင်ခြင်းနှင့် ပြစ်တင်ဆုံးမခြင်း ခံရသည့် အကြိမ်တိုင်းကို လက်ခံကြလော့၊ သင်တို့သည် ဤအရာအားလုံးကို လက်ခံပါက ဤသည်မှာ ကောင်းကင်ဆိုင်ရာ ဖြစ်စဉ်များ၊ နက်နဲမှုများ၊ ဘေးအန္တရာယ်များ၊ သို့မဟုတ် နိုင်ငံရေးကို သုတေသနပြုခြင်းထက် များစွာ ပိုမို တန်ဖိုးရှိလေသည်။

အချို့သောသူတို့သည် သမိုင်းကို အနည်းငယ် လေ့လာထားကာ နိုင်ငံရေးအချို့ကို နားလည်သဘောပေါက်ကြပြီး တစ်ဖက်တွင် သူတို့သည် မိမိကိုယ်ကို ကြွားဝါလိုကြသည်၊ အခြားတစ်ဖက်တွင် သူတို့သည် ဤသို့ တွေးထင်ကြသည်။ “လူ့ဇာတိခံ ဘုရားသည် ဘုရား၏ အနှစ်သာရနှင့် သမ္မာတရားကို ပိုင်ဆိုင်တော်မူသည်။ ဘုရားသခင်သည် အရာခပ်သိမ်းအပေါ် အချုပ်အခြာအာဏာ ကိုင်စွဲထားတော်မူသည်ဟူသော အချက်ကို သူသိရှိပြီး ထိုအတွင်းမှ အသေးစိတ်အချက်အလက်များကို နားလည်တော်မူသည်။ သို့ဖြစ်လျှင် ကျွန်ုပ်သည် နိုင်ငံရေးနှင့် သမိုင်းကို နားလည်ပါက ကိုယ်တော်၏ လိုအပ်ချက်များကို ဖြည့်ဆည်းပေးနိုင်မည်လော။ ဤအရာခပ်သိမ်းနှင့်ပတ်သက်သော ကိုယ်တော်၏ သိလိုစိတ်ကို ဖြည့်ဆည်းပေးနိုင်မည်လော” သင့်ကို ငါပြောမည်၊ သင် မှားသည်။ ငါ အထူးသဖြင့် စက်ဆုပ်ရွံရှာဆုံးသော အရာမှာ ပထမဦးစွာ နိုင်ငံရေးဖြစ်ပြီး ဒုတိယအနေဖြင့် သမိုင်းဖြစ်သည်။ သင် သမိုင်းအကြောင်း ပြောဆိုလျှင် ဟာသမြောက်လျက် ပုံတိုပတ်စသဖွယ်ဖြစ်သော အဖြစ်အပျက်များကို မျှဝေလျှင် သို့မဟုတ် အချိန်ကုန်လွန်စေရန် ပေါ့ပေါ့ပါးပါး စကားစမြည် ပြောဆိုလျှင် ယင်းမှာ ကိစ္စမရှိပေ။ သို့သော် သင်သည် ဤစကားများ၊ ဤကိစ္စရပ်များကို ငါနှင့် ဆွေးနွေးရန်၊ မျက်နှာလိုမျက်နှာရ လုပ်ရန်၊ ဆက်ဆံရေးတစ်ခု တည်ဆောက်ရန်အတွက် အလေးအနက်ထားရမည့် အရာများအဖြစ် မှတ်ယူပါက သင် မှားသည်၊ ငါသည် ဤအရာများကို နားထောင်ရန် လုံးဝ ဆန္ဒမရှိပေ။ အချို့သောသူများက “ကိုယ်တော်သည် မဖြစ်မနေ ပြုလုပ်ရမည်ဖြစ်သောကြောင့် လူတို့အတွက် သမ္မာတရားကို မိတ်သဟာယဖွဲ့ပြီး စုဝေးပွဲများကို ပြုလုပ်ပေးလေသည်။ စိတ်ထဲ၌ ကိုယ်တော် အနှစ်သက်ဆုံးသောအရာမှာ လောကတွင် ကြီးစွာသော ပရမ်းပတာဖြစ်ခြင်း ဖြစ်သည်။ ကိုယ်တော်သည် လောကကြီး အတော်အတန် ပရမ်းပတာ မဖြစ်မည်ကို စိုးရိမ်တော်မူသည်။ ဘေးအန္တရာယ်တစ်ခု ကျရောက်သည့်အခါတိုင်း ကိုယ်တော်သည် နောက်ကွယ်၌ မည်မျှ ဝမ်းမြောက်နေနိုင်သည်ကို မည်သူမျှ မသိပါ၊ မီးရှူးမီးပန်းများပင် ပစ်ဖောက်လျက် အောင်ပွဲခံနေနိုင်ဖွယ်ရှိသည်” ဟု တလွဲတွေးထင်ကြသည်။ သင့်ကို ငါပြောမည်၊ ထိုသို့ မဟုတ်ပေ။ အဆင်းနီသော နဂါးကြီး ပျက်စီးပြီး ပြိုလဲသွားလျှင်ပင် ငါသည် ငါ၏ မူလအခြေအနေအတိုင်း ဆက်လက်တည်ရှိနေမည်။ အချို့သောသူများက မေးကြသည်။ “အဆင်းနီသော နဂါးကြီး ပြိုလဲကျပါက ကိုယ်တော် ဝမ်းမြောက်တော်မူမည် မဟုတ်လော။ အဆင်းနီသော နဂါးကြီး ဖျက်ဆီးခံရပြီး ပြစ်ဒဏ်ခတ်ခံရသည့်အခါ ကိုယ်တော်သည် မီးရှူးမီးပန်းများ ဖောက်လုပ်ခြင်း မပြုသင့်သလော။ ဘုရားသခင် ရွေးချယ်ထားသော လူများနှင့်အတူ ကြီးကျယ်သော ပွဲတော်ကို ကျင်းပလျက် အတူတကွ ဂုဏ်ပြုခြင်း မပြုသင့်သလော။” ငါ့ကို ပြောလော့၊ ဤသည်မှာ ငါ လုပ်ဆောင်သင့်သည့် အရာလော။ ထိုသို့ ပြုလုပ်ခြင်းသည် မှန်ကန်သလော သို့မဟုတ် မှားယွင်းသလော။ ဤသည်မှာ သမ္မာတရားနှင့် ကိုက်ညီမှု ရှိသလော။ အချို့က ဤသို့ ဆိုကြသည်။ “အဆင်းနီသော နဂါးကြီးသည် ဘုရားသခင် ရွေးချယ်ထားသော လူများကို အလွန်အမင်း ညှဉ်းပန်းနှိပ်စက်ခဲ့သည်။ ဘုရားသခင်အကြောင်း ကောလာဟလများ ဖြန့်ဝေခဲ့ပြီး ကိုယ်တော်၏ နာမတော်ကို အသရေဖျက်ခဲ့သည်၊ ဘုရားသခင်ကို ပြစ်မှားစော်ကားလျက် တရားစီရင်ခဲ့သည်။ ၎င်းသည် ၎င်းအား ဒဏ်ခတ်သည်ကို ခံရသည့်အခါ ကျွန်ုပ်တို့ အနည်းငယ် အောင်ပွဲခံခြင်း မပြုသင့်သလော” ဟု ဆိုကြသည်။ သင်တို့ အောင်ပွဲခံလျှင် ငါခွင့်ပြုသည်။ အကြောင်းမှာ သင်တို့၌ သင်တို့၏ စိတ်ခံစားချက်များ ရှိသောကြောင့် ဖြစ်သည်။ သင်တို့အားလုံးသည် ဝမ်းမြောက်ကြကာ သုံးရက်သုံးည မအိပ်ဘဲနေပြီး ဘုရားနှုတ်ကပတ်တော်များကို ဖတ်ရှုဖို့၊ ဓမ္မသီချင်းများကို သီဆိုဖို့နှင့် ဘုရားသခင်၏ ဖြောင့်မတ်ခြင်းကို ချီးမွမ်းရန် ကခုန်ဖို့ အတူတကွ စုဝေးကြလျှင်၊ ဘုရားသခင်သည် ရန်သူတော်ဖြစ်သော အဆင်းနီသော နဂါးကြီးကို နောက်ဆုံးတွင် ဖျက်ဆီးပြီးဖြစ်ကာ ခြေအောက်တွင် နင်းချေပြီးဖြစ်သည့်အပြင် ဘုရားသခင် ရွေးချယ်ထားသောလူများသည် ၎င်း၏ နှိပ်ကွပ်ခြင်းနှင့် ညှဉ်းပန်းခြင်းကို လုံးဝ မခံစားရတော့မည် မဟုတ်ဘဲ၊ အိမ်ပြန်နိုင်ခြင်း မရှိတော့မည် မဟုတ်ဘဲ သူတို့၏ မိသားစုများထံ နောက်ဆုံးတွင် ပြန်နိုင်ကြသဖြင့် ဝမ်းမြောက်ဝမ်းသာဖြစ်ကြလျှင် လူတိုင်း၏ စိတ်နေစိတ်ထားသည် နားလည်ဖွယ်ရာဖြစ်သည်။ သင်တို့သည် ဤနည်းလမ်းဖြင့် အောင်ပွဲခံလျက် စိတ်အပန်းဖြေလိုလျှင် ငါ သဘောတူညီသည်။ သို့သော် ငါ့အဖို့မူကား ငါ လုပ်ဆောင်သင့်သည့် အရာကိုသာ လုပ်ဆောင်မည် ဖြစ်သည်။ ငါသည် ဤလုပ်ဆောင်မှုများတွင် ပါဝင်မည်မဟုတ်။ အချို့သောသူများက မေးကြသည်။ “ကိုယ်တော်သည် အဘယ်ကြောင့် ဤသို့သော သဘောထားမျိုး ရှိရပါသနည်း။ ဤသည်မှာ လူတို့၏ စိတ်ဓာတ်ကို ထိုင်းမှိုင်းစေသည် မဟုတ်လော။ ကိုယ်တော်သည် အဘယ်ကြောင့် စိတ်အားထက်သန်မှု အနည်းငယ်ကိုမျှ မပြသရသနည်း။ အရေးကြီးဆုံးသော အခိုက်အတန့်တွင် ကိုယ်တော် ရှိမနေပါက ကျွန်ုပ်တို့သည် မည်သို့ အောင်ပွဲခံနိုင်မည်နည်း” ဟူ၍ ဖြစ်သည်။ အောင်ပွဲခံခြင်းသည် မမှားယွင်းပေ။ သို့သော် ငါတို့ ရှင်းရှင်းလင်းလင်း မိတ်သဟာယဖွဲ့ရန် လိုအပ်သည့် အချက်တစ်ချက် ရှိသည်။ အဆင်းနီသော နဂါးကြီးသည် ပြစ်ဒဏ်ပေးခြင်း ခံရပြီး ဘုရားသခင်က ၎င်းကို ဖယ်ရှားရှင်းလင်းခဲ့သည်ဟု ဆိုကြပါစို့။ တစ်ချိန်က ဘုရားသခင် ရွေးချယ်ထားသော လူများကို စုံလင်အောင်ပြုရန် အစေခံခဲ့သော ဤမကောင်းဆိုးဝါးဘုရင်သည် ဖျက်ဆီးခြင်းခံရလျက် အမြစ်ပြတ် ချေမှုန်းခြင်း ခံခဲ့ရသည်။ သို့ဆိုလျှင် ဘုရားသခင် ရွေးချယ်ထားသော လူများ၏ ဝိညာဉ်ရင့်ကျက်မှုသည် မည်သို့ ရှိသနည်း။ သင်တို့သည် သမ္မာတရားကို မည်မျှ နားလည်သဘောပေါက်ပြီးပြီနည်း။ သင်တို့အားလုံးသည် သင်တို့၏ တာဝန်များကို ပြည့်မီစွာ ထမ်းဆောင်နိုင်ကြလျှင်၊ အားလုံးက အရည်အချင်းပြည့်မီသော ဖန်ဆင်းခံများ ဖြစ်ကြလျှင်၊ ဘုရားသခင်ကို ကြောက်ရွံ့ပြီး မကောင်းမှုကို ရှောင်နိုင်ကြလျှင်၊ လူတစ်ဦးစီသည် ယောဘနှင့် ပေတရုတို့၏ ဝိညာဉ်ရင့်ကျက်မှုကို ပိုင်ဆိုင်ကြလျှင် ကယ်တင်ခြင်းခံရပြီးသူများအားလုံး ဖြစ်ကြလျှင် ယင်းမှာ အမှန်ပင် ဝမ်းမြောက်ဖွယ်ရာ အခိုက်အတန့်ဖြစ်ပြီး အောင်ပွဲခံထိုက်သည့် အရာ ဖြစ်ပေသည်။ သို့ရာတွင် တစ်နေ့သောအခါ၌ အဆင်းနီသော နဂါးကြီးသည် ပြိုလဲကျပြီး သင်တို့၏ ဝိညာဉ်ရင့်ကျက်မှုသည် သင်တို့၏ တာဝန်များကို သစ္စာစောင့်သိစွာ ထမ်းဆောင်သည့် အဆင့်သို့ မရောက်ရှိသေးပါက၊ သင်တို့၌ ဘုရားသခင်ကို ကြောက်ရွံ့ခြင်း မရှိသေးလျှင်၊ မကောင်းမှုကို မရှောင်နိုင်လျှင်၊ ယောဘနှင့် ပေတရုတို့၏ ဝိညာဉ်ရင့်ကျက်မှုမှ အလွန်တရာ ကွာဝေးနေလျှင်၊ ဘုရားသခင်၏ အချုပ်အခြာအာဏာကို အမှန်တကယ် ကျိုးနွံနာခံနိုင်ခြင်း မရှိဘဲ အရည်အချင်းပြည့်မီသော ဖန်ဆင်းခံများအဖြစ် မှတ်ယူ၍ မရနိုင်သေးလျှင် သင်တို့အတွက် ဝမ်းမြောက်စရာ အဘယ်အရာ ရှိသေးသနည်း။ ဤသည်မှာ အချည်းနှီးသော ပျော်ရွှင်မှု၌ ပျော်မွေ့ခြင်းမျှသာ မဟုတ်လော။ ထိုသို့သော အောင်ပွဲခံခြင်းသည် အဓိပ္ပာယ်မဲ့ပြီး တန်ဖိုးကင်းမဲ့ပေလိမ့်မည်။ အချို့သောသူများက ဤသို့ ပြောကြသည်။ “အဆင်းနီသော နဂါးကြီးသည် ကျွန်ုပ်တို့ကို အလွန်အမင်း ညှဉ်းပန်းနှိပ်စက်ပါသည်။ ကျွန်ုပ်တို့ ၎င်းကို မုန်းတီးခြင်းမှာ သင့်လျော်သည် မဟုတ်ပါလော။ ၎င်း၏ အနှစ်သာရကို အသိအမှတ်ပြုခြင်းမှာလည်း သင့်လျော်သည် မဟုတ်ပါလော။ ၎င်းသည် ကျွန်ုပ်တို့ကို အလွန်အမင်း ညှဉ်းပန်းနှိပ်စက်ခဲ့ပါသည်၊ ၎င်း ဖယ်ရှားရှင်းလင်းခြင်း ခံရသည့်အခါ ကျွန်ုပ်တို့ အဘယ်ကြောင့် ဝမ်းမြောက်၍မရနိုင်ရမည်နည်း” ဟု ဆိုကြသည်။ ဝမ်းမြောက်ခြင်းမှာ အဆင်ပေသည်၊ သင်တို့၏ စိတ်ခံစားချက်များကို ဖော်ပြခြင်းမှာ အဆင်ပြေသည်။ သို့ရာတွင် သင်က အဆင်းနီသော နဂါးကြီး၏ ပျက်စီးခြင်းသည် ဘုရားသခင်၏ စီမံခန့်ခွဲမှုအစီအစဉ် အဆုံးသတ်ခြင်းကို ဆိုလိုသည်ဟုလည်းကောင်း၊ လူသားမျိုးနွယ်သည် ကယ်တင်ခြင်း ခံရပြီးဖြစ်သည်ဟုလည်းကောင်း သင်တွေးထင်လျှင် အဆင်းနီသော နဂါးကြီး၏ ပျက်စီးခြင်းကို ဘုရားသခင်၏ စီမံခန့်ခွဲမှုအစီအစဉ် ပြီးမြောက်ခြင်းအပြင် သင်၏ ကိုယ်ပိုင် ကယ်တင်ခြင်းနှင့် စုံလင်ခြင်းနှင့် တူညီသည်ဟု ထင်မှတ်ခြင်းဖြစ်သည့် ဤနားလည်သဘောပေါက်မှုသည် မှားယွင်းသည် မဟုတ်လော။ (မှားယွင်းပါသည်)။ သို့ဆိုလျှင် သင်တို့သည် ယခုအခါ အဘယ်အရာကို နားလည်သဘောပေါက်ကြသနည်း။ ဘုရားသခင်၏ ရန်သူဖြစ်သော အဆင်းနီသော နဂါးကြီးနှင့် ပတ်သက်၍ ၎င်း၏ ကံကြမ္မာနှင့် ၎င်း၏ အခြေအနေသည် ဘုရားသခင်၏ ကိစ္စရပ်များသာ ဖြစ်ကြပြီး ၎င်းတို့သည် သင်၏ စိတ်သဘောထား ပြောင်းလဲခြင်းကို သို့မဟုတ် ကယ်တင်ခြင်းကို လိုက်စားခြင်းနှင့် လုံးဝ သက်ဆိုင်ခြင်း မရှိချေ။ အဆင်းနီသော နဂါးကြီးသည် အဖြည့်ခံတစ်ခု၊ ဝန်ဆောင်မှုပေးသည့် အရာတစ်ခုမျှသာ ဖြစ်သည်၊ ၎င်းသည် ဘုရားသခင်၏ စီစဉ်ညွှန်ကြားခြင်းများကို ခံရသည်။ ၎င်းသည် မည်သည့်အရာကို လုပ်ဆောင်သည်၊ အစေခံမှုပေးရန် ဘုရားသခင်က ၎င်းအား မည်သို့ အသုံးပြုတော်မူသည်မှာ ဘုရားသခင်၏ ကိစ္စရပ်ဖြစ်ပြီး လူသားများနှင့် သက်ဆိုင်ခြင်း မရှိချေ။ ထို့ကြောင့် သင်သည် ၎င်း၏ ကံကြမ္မာကို အလွန်အကျွံ အရေးစိုက်ကာ ၎င်းက သင်၏ စိတ်နှလုံးကို အာရုံထွေပြားသွားစေပါက ဒုက္ခ၊ ပြဿနာတစ်ရပ် ရှိနေသည်။ ဘုရားသခင်သည် အဆင်းနီသော နဂါးကြီး၊ နတ်ဆိုးများအားလုံးနှင့် စာတန်များအားလုံး အပါအဝင် အရာခပ်သိမ်းအပေါ် အချုပ်အခြာအာဏာ ကိုင်စွဲထားတော်မူသည်၊ ထို့ကြောင့် နတ်ဆိုးများနှင့် စာတန်များ မည်သည့်အရာကို လုပ်ဆောင်သည်ဖြစ်စေ၊ ၎င်းတို့ မည်သို့ပင် ရှိနေသည်ဖြစ်စေ သင်၏ အသက်ဝင်ရောက်မှု သို့မဟုတ် စိတ်သဘောထားဆိုင်ရာ ပြောင်းလဲခြင်းနှင့် လုံးဝ သက်ဆိုင်ခြင်း မရှိပေ။ သင်နှင့် အဘယ်အရာက သက်ဆိုင်သနည်း။ သင်သည် ဘုရားသခင်ကို ၎င်း၏ အတိုက်အခံပြုခြင်းနှင့်ပတ်သက်သော ကောက်ကျစ်ဆိုးယုတ်သော၊ ရက်စက်ကြမ်းကြုတ်သော အနှစ်သာရကိုလည်းကောင်း၊ ဘုရားသခင်အား ရန်လိုခြင်းနှင့် ဘုရားသခင်၏ ရန်သူဖြစ်ခြင်းဟူသော ၎င်း၏ အနှစ်သာရကို အသိအမှတ်ပြုရန်ကိုလည်းကောင်း လိုအပ်လေသည်။ ဤသည်သာလျှင် သင် နားလည်ရန် လိုအပ်သည့်အရာ ဖြစ်သည်။ ကျန်ရှိသော အကြောင်းအရာများအတွက်မူ ဘုရားသခင်သည် ၎င်းအပေါ် မည်သို့သော ဘေးအန္တရာယ်များ ကျရောက်စေသည်၊ ဘုရားသခင်သည် ၎င်း၏ ကံကြမ္မာကို မည်သို့ စီစဉ်ညွှန်ကြားတော်မူသည်မှာ သင်နှင့် လုံးဝ သက်ဆိုင်ခြင်း မရှိ၊ ပြီးလျှင် ယင်းကို သိရှိခြင်းသည်လည်း အသုံးဝင်မည် မဟုတ်ပေ။ အဘယ်ကြောင့် အသုံးမဝင်သနည်း။ အကြောင်းမှာ သင် သိရှိလျှင်ပင် ဘုရားသခင်သည် ထိုသို့သော နည်းလမ်းဖြင့် အဘယ်ကြောင့် ပြုမူဆောင်ရွက်သည်ကို သင် နားလည်မည်မဟုတ်ချေ။ ယင်း၏ နောက်ကွယ်မှ သမ္မာတရားကို သင်သည် လုံးလုံးလျားလျား သိမြင်နိုင်မည် မဟုတ်။ ငါသည် ဤအကြောင်းအရာကို ဤအတိုချုပ် မှတ်ချက်များဖြင့် ဤနေရာ၌ အဆုံးသတ်မည်။

အန္တိခရစ်တို့၏ မျက်နှာလို မျက်နှာရလုပ်ခြင်း၊ မြှောက်ပင့်ပြောဆိုခြင်းနှင့် နားဝင်ချိုသော စကားများကို အသုံးပြုသည့် သရုပ်သကန်များသည် သာမန် ဖောက်ပြန်ပျက်စီးသော လူများ၌လည်း တွေ့ရသည်မှာ မှန်ပေသည်၊ သို့သော် အန္တိခရစ်တို့နှင့် သာမန် ဖောက်ပြန်ပျက်စီးသော လူတို့ကြား ခြားနားချက်မှာ မည်သို့နည်း။ သူတို့၏ မျက်နှာလို မျက်နှာရလုပ်ခြင်း၊ မြှောက်ပင့်ပြောဆိုခြင်းနှင့် နားဝင်ချိုသော စကားများတွင် လေးစားမှု မရှိ၊ စစ်မှန်မှု မရှိပေ။ ထိုအစား သူတို့သည် လူ့ဇာတိခံ ဘုရားသခင်ကို လှည့်စားရန်၊ စမ်းသပ်ရန်နှင့် အသုံးချရန် ရည်ရွယ်ကြသဖြင့် ဤကျင့်ကြံပြုမူမှုများ ဖြစ်လာစေသည်။ သူတို့၌ ကိုယ်ပိုင် ရည်ရွယ်ချက်များ ရှိကြသည်။ သူတို့သည် မိမိတို့ မျက်မှောက်၌ မြင်တွေ့နေရသော သာမန်လူပုဂ္ဂိုလ်အား မျက်နှာလို မျက်နှာရလုပ်ခြင်း၊ မြှောက်ပင့်ပြောဆိုခြင်းနှင့် နားဝင်ချိုသော စကားများမှတစ်ဆင့် လှည့်စားရန်၊ ခရစ်တော်ကို လှည့်ဖြားရန်၊ သူတို့၏ စစ်မှန်သော ပကတိအခြေအနေကိုလည်းကောင်း၊ ၎င်းတို့၌ မည်သည့် ဖောက်ပြန်ပျက်စီးသည့် စိတ်သဘောထားများ ရှိသည်၊ မည်သည့်တည်ကြည်မှုမျိုး၊ မည်သည့်အနှစ်သာရမျိုးကို ပိုင်ဆိုင်ကြသည်၊ မည်သည့် လူအမျိုးအစားအောက်တွင် ပါဝင်သည်ကို ခရစ်တော် ပိုင်းခြားသိမြင်နိုင်စွမ်း မရှိစေရန် ကြိုးပမ်းကြသည်။ သူတို့သည် လှည့်ဖြားလိုကြပြီး လိမ်လည်လိုကြသည်၊ မဟုတ်လော။ (ဟုတ်ပါသည်)။ သူတို့၏ မျက်နှာလို မျက်နှာရလုပ်ခြင်း၊ မြှောက်ပင့်ပြောဆိုခြင်းနှင့် နားဝင်ချိုသော စကားများတွင် စစ်မှန်သော စကားတစ်ခွန်းတလေ ပါရှိသလော။ တစ်ခွန်းတလေမျှ မပါရှိချေ။ အန္တိခရစ်တို့၏ ကြံရွယ်ချက်နှင့် ရည်ရွယ်ချက်မှာ လိမ်ညာရန်၊ လှည့်စားရန်နှင့် လှည့်ဖြားရန် ဖြစ်သည်။ ဤကျင့်ကြံပြုမူမှုများသည် အန္တိခရစ်တို့ သမ္မာတရားကို စက်ဆုပ်ရွံရှာခြင်း၏ အနှစ်သာရပင် မဟုတ်လော။ (ဟုတ်ပါသည်)။ သူတို့က သာမန်လူသားအားလုံးသည် နှစ်လိုဖွယ်သော စကားများကို ကြားနာလိုကြသည်၊ မြှောက်ပင့်ပြောဆိုခြင်းကို နှစ်သက်ကြသည်၊ အခြားသူများ မိမိတို့ရှေ့၌ ခယဝပ်တွားသည်ကို နှစ်သက်ကြသည်၊ ဤသည်က သူတို့အား အရေးပါသည့် စိတ်ခံစားချက်ကို ပေးပြီး သူတို့၏ အဆင့်အတန်းကို သာမန်လူများထက် ပိုမို လေးစားဖွယ်ကောင်းလျက် ကြီးမြတ်ပုံပေါက်စေသည်ဟု ထင်မှတ်ကြသည်။ ဆန့်ကျင်ဘက်အနေဖြင့် အကယ်၍ တစ်စုံတစ်ဦးသည် ခရစ်တော်၏ ရှေ့တော်မှောက်၌ အလွန်အကျွံ ကျွန်သဖွယ် ပြုမူကျင့်ကြံလျှင်၊ တည်ကြည်မှုနှင့် သိက္ခာ ကင်းမဲ့လျှင်၊ ဝေ့လည်ကြောင်ပတ် စကားပြောဆိုလျှင်၊ အစဉ်သဖြင့် လိမ်လည်လှည့်ဖြားရန် ကြိုးပမ်းလျှင်၊ အဖြစ်မှန်များကို အစဉ်သဖြင့် ဖုံးကွယ်ရန် ကြိုးပမ်းလျှင်၊ ဟန်ဆောင်ခြင်းနှင့် မမှန်မကန်ပြုခြင်းဖြင့် ခရစ်တော်ကို ဆက်ဆံလျှင် ခရစ်တော်သည် ဤအရာ တစ်ခုတလေကိုမျှ လက်ခံမည် မဟုတ်သည်သာမက ကိုယ်တော်သည် စိတ်နှလုံးထဲ၌ သင်နှင့်ပတ်သက်၍ စိတ်အနှောင့်အယှက် ဖြစ်လိမ့်မည်။ မည်သည့်အတိုင်းအတာအထိ ဖြစ်မည်နည်း။ ဘုရားသခင်က ဤပုဂ္ဂိုလ်သည် ရွံရှာဖွယ်ကောင်းလှသည်၊ အမှန်တရား တစ်စုံတစ်ရာကိုမျှ မမြွက်ဟဘဲ မည်သို့မျက်နှာလိုမျက်နှာရ လုပ်ရမည်ကိုသာ စဉ်းစားနေတတ်သည်၊ တစ်စက်မျှမကောင်းဘဲ အပြုသဘောဆောင်သော ပုဂ္ဂိုလ် မဟုတ်ပေ။ ထိုသို့သော သူသည် ယုံကြည်အားကိုး၍ မရနိုင်၊ စိတ်ချယုံကြည်ထိုက်သူ မဟုတ်ဟု မိန့်တော်မူလိမ့်မည်။ ယုံကြည်အားကိုး၍ မရနိုင်၊ စိတ်ချယုံကြည်ထိုက်သူ မဟုတ်၊ ဤသည်မှာ ထိုသို့သော လူများအတွက် ပေးထားသော အဓိပ္ပာယ်ဖွင့်ဆိုချက် ဖြစ်သည်။ အပေါ်ယံအားဖြင့် ကြည့်လျှင် ယင်းမှာ ဤစကားစုနှစ်ခုမျှသာ ဖြစ်သည်၊ သို့သော် လက်တွေ့၌မူ ထိုသို့သော ပုဂ္ဂိုလ်သည် သမ္မာတရားကို မချစ်မြတ်နိုးပေ၊ သမ္မာတရားကို မရရှိနိုင်ပေ၊ ကယ်တင်ခြင်း ခံရဖွယ်လည်း မရှိပေ။ အကယ်၍ ထိုသူသည် သမ္မာတရားကို မရရှိနိုင်ဘဲ ကယ်တင်ခြင်း ခံရဖွယ် မရှိပါက ထိုသို့သော ပုဂ္ဂိုလ်တစ်ဦး ဘုရားသခင်ကို ယုံကြည်ခြင်း၏ အရေးပါမှုနှင့် တန်ဖိုးသည် အဘယ်သို့ ရှိမည်နည်း။ အကယ်၍ သူတို့သည် နှောင့်ယှက်ခြင်းများ သို့မဟုတ် အဖျက်အမှောင့် လုပ်ခြင်းများကို မပြုလုပ်ပါက သူတို့သည် အဆင်းနီသော နဂါးကြီးကဲ့သို့ပင် ဘုရားသခင်၏ အိမ်တော်၌ အဖြည့်ခံ သို့မဟုတ် ဝန်ဆောင်မှုပေးသည့်အရာ၏ အခန်းကဏ္ဍမှသာ ပါဝင်နိုင်ကြသည်။ တစ်စုံတစ်ခု၏ အခန်းကဏ္ဍမှ ပါဝင်ခြင်းဟူသည် အဘယ်အရာကို ဆိုလိုသနည်း။ ယင်းမှာ ယာယီအားဖြင့် သူတို့ တတ်နိုင်သမျှ အတိုင်းအတာအထိ သွားခြင်း၊ လှည်းဆွဲသည့်အလား လှည်းမမှောက်သရွေ့ ဆက်လက်ဆွဲနေခြင်းကို ဆိုလိုပေသည်။ အဘယ်ကြောင့် သူတို့ကို အခန်းကဏ္ဍတစ်ခုမှ ပါဝင်စေရသနည်း။ အကြောင်းမှာ ထိုသို့သော လူများသည် သမ္မာတရားကို မလိုက်စားသောကြောင့် ဖြစ်သည်။ သူတို့သည် စိတ်နှလုံးထဲ၌ သမ္မာတရားကို အလွန်တရာ စက်ဆုပ်ရွံရှာပြီး မထီမဲ့မြင် ပြုကြသည်၊ သမ္မာတရားကို အလွန်တရာ လှောင်ပြောင်ပြီး လှည့်စားကြသဖြင့် သူတို့၏ နောက်ဆုံးသော အဆုံးသတ်သည် အဆုံးတိုင် မရောက်ရှိနိုင်ကြဘဲ ပေါလုကဲ့သို့ ဖြစ်မည်မှာ အသေအချာဖြစ်သည်။ ထို့ကြောင့် ဤလူအမျိုးအစားသည် ဘုရားအိမ်တော်၌ ယာယီ အစေခံသူများအဖြစ်သာ ပါဝင်နိုင်ကြသည်။ ရှုထောင့်တစ်ခုမှ ကြည့်လျှင် သူတို့သည် သမ္မာတရားကို အမှန်တကယ် လိုက်စားသောသူများအား ပိုင်းခြားသိမြင်နိုင်သွမ်းနှင့် နားလည်သဘောပေါက်မှု တိုးပွားလာစေသည်။ အခြား ရှုထောင့်တစ်ခုမှ ကြည့်လျှင် သူတို့သည် ဘုရားအိမ်တော်၌ မိမိတို့ တတ်စွမ်းနိုင်သမျှသော အလုပ်ကို လုပ်ဆောင်ကြပြီး တတ်နိုင်သမျှ အစေခံကြသည်၊ အကြောင်းမှာ ထိုသို့သော လူများသည် လမ်းခရီး၏ အဆုံးသို့ ရောက်ရှိနိုင်ကြမည် မဟုတ်သောကြောင့် ဖြစ်သည်။

တစ်နေ့သ၌ ငါ အပြင်ထွက်သွားစဉ် အသိမိတ်ဆွေတစ်ဦးနှင့် ကြုံဆုံခဲ့သည်။ ငါ စကားမစနိုင်မီတွင်ပင် သူက ငါ့အား ဦးစွာ မေးမြန်းခဲ့သည်။ “ကျွန်ုပ်တို့ နောက်ဆုံး တွေ့ဆုံခဲ့ပြီးသည့်နောက် အချိန်ကာလ အတန်ကြာခဲ့ပြီဖြစ်သည်။ ကျွန်ုပ်သည် ကိုယ်တော့်ကို ဤနေရာ၌ နေ့စဉ်နေ့တိုင်း စောင့်မျှော်ခဲ့ပါသည်၊ ကိုယ်တော့်ကို အလွန်တရာ သတိရလွမ်းဆွတ်နေသဖြင့် အိမ်၌ပင် မနေနိုင်တော့ပါ။ ဤနေရာ၌ သွားလာနေကြသော လူအုပ်များကြားတွင် ကိုယ်တော့်ကိုသာ အစဉ်သဖြင့် ရှာဖွေနေခဲ့မိပါသည်” ဟု ဆိုသည်။ ငါ့ စိတ်ထဲ၌ တွေးလိုက်မိသည်မှာ ဤပုဂ္ဂိုလ်သည် စိတ်ပိုင်းဆိုင်ရာ အနည်းငယ် ချို့ယွင်းနေဖွယ်ရှိသည်။ ငါသည် သင်နှင့် ကြိုတင်ချိန်းဆိုထားခဲ့သလော။ အဘယ်ကြောင့် သင်သည် ငါ့ကို ဤနေရာ၌ နေ့စဉ်နေ့တိုင်း စောင့်မျှော်နေရမည်နည်း။ ငါတို့ ကြုံဆုံမိခဲ့ကြပြီ ဖြစ်သောကြောင့် အရေးပါသော အကြောင်းအရာတစ်ခုခုကို ပြောဆိုကြပါစို့။ ငါက သူ့ကို မေးခဲ့သည်။ “ယခုတလောတွင် မည်သို့ရှိနေခဲ့သနည်း” ဟူ၍ ဖြစ်သည်။ သူက “အို၊ ပြောကိုမပြောချင်ပါဘူး။ ကျွန်ုပ်တို့ နောက်ဆုံး တွေ့ဆုံခဲ့ပြီးသည့်နောက်ပိုင်း ကိုယ်တော့်အကြောင်းကိုသာ အစဉ်တစိုက် စွဲလမ်းနေသဖြင့် စားမဝင် အိပ်မပျော် ဖြစ်ခဲ့ရပါသည်။ တစ်နေ့သောအခါ၌ ကိုယ်တော့်ကို တွေ့မြင်ခွင့်ရရန်သာ မျှော်လင့်တကြီး စောင့်စားနေခဲ့ခြင်း ဖြစ်ပါသည်” ဟု ပြန်လည်ဖြေကြားခဲ့သည်။ ငါက “အရေးပါသော အကြောင်းအရာတစ်ခုခုကို ပြောဆိုကြပါစို့။ ဤကာလအပိုင်းအခြားအတွင်း သင်၏ အခြေအနေမှာ မည်သို့ရှိသနည်း” ဟု ပြောခဲ့သည်။ “အတော်အတန် ကောင်းမွန်ပါသည်။ အဆင်ပြေပါသည်” “သင်တို့၏ အသင်းတော်၌ ရွေးကောက်ပွဲများ ကျင်းပပြီးပြီလော။ ယခင် ခေါင်းဆောင်ပင်လော။” “မဟုတ်ပါ၊ သူတို့သည် မည်သူမည်ဝါကို ရွေးချယ်တင်မြှောက်လိုက်ကြပါသည်” “သူသည် အဘယ်သို့ရှိသနည်း” “သူ အဆင်ပြေပါသည်” “သို့ဆိုလျှင် ယခင် အသင်းတော်ခေါင်းဆောင်ကို အဘယ်ကြောင့် အစားထိုးလိုက်ရသနည်း” “အတိအကျ မပြောနိုင်ပါ၊ သူလည်း အဆင်ပြေပါသည်” “ပို၍ တိတိကျကျ ပြောဆိုလော့၊ ‘အဆင်ပြေပါသည်’ ဟုသာ ထပ်ခါတလဲလဲ မဆိုနှင့်။ သူသည် တိကျခိုင်မာသော အလုပ်ကို မလုပ်ဆောင်နိုင်ခြင်းကြောင့် ဖြစ်သလော” “သူအဆင်ပြေသည်ဟု ကျွန်ုပ် ထင်ခဲ့သည်” “အသစ် ရွေးချယ်တင်မြှောက်လိုက်သော ခေါင်းဆောင်၏ လူ့သဘာဝနှင့် ပတ်သက်၍မူ မည်သို့နည်း။ သူ၏ သမ္မာတရားကို သဘောပေါက်နားလည်နိုင်စွမ်းက မည်သို့ရှိသနည်း။ သူသည် တိကျခိုင်မာသော အလုပ်ကို လုပ်ဆောင်နိုင်မည်လော။” “သူ အဆင်ပြေပါသည်” ငါ သူ့ကို မည်သည့်အရာကို မေးမြန်းသည်ဖြစ်စေ သူ၏ အဖြေမှာ အစဉ်သဖြင့် “အဆင်ပြေပါသည်” ဟူ၍သာ ဖြစ်နေခဲ့သည်၊ ဤသည်က စကား်စမြည်ပြောဆိုရန် မဖြစ်နိုင်အောင် ပြုလုပ်ခဲ့သည်။ ထို့ကြောင့် ငါ ထွက်ခွာသွားခဲ့သည်။ ဤဇာတ်လမ်းနှင့်ပတ်သက်၍ သင်တို့ မည်သို့ ထင်မြင်ကြသနည်း။ ဤဇာတ်လမ်းကို မည်သို့သော ခေါင်းစဉ် တပ်သင့်သနည်း။ (“အဆင်ပြေပါသည်။”) ဤဇာတ်လမ်း၏ ခေါင်းစဉ်မှာ “အဆင်ပြေပါသည်” ဖြစ်သည်။ ငါသည် လူအများနှင့် ထိတွေ့ဆက်ဆံမှုများ ပြုလုပ်ရာ၌ လူ့ဆင်ခြင်တုံတရားမှ စကားပြောဆိုသူမှာ အနည်းငယ်မျှသာ ရှိပြီး သမ္မာတရား စည်းမျဉ်းများနှင့်အညီ ပြောဆိုခြင်းကိုမူ ဆိုဖွယ်ရာပင် မရှိချေ။ လူအများစု၏ နှုတ်ဖျားတွင် လိမ်လည်လှည့်ဖြားသော စကားများ၊ အဓိပ္ပာယ်မဲ့သော စကားများ၊ မှားယွင်းပြီး အဓိပ္ပာယ်မဲ့သော စကားများနှင့် မိမိကိုယ်ကို ယုံကြည်မှုလွန်ကဲသော စကားများဖြင့်သာ ပြည့်နှက်နေကြသည်၊ မှန်ကန်သော စကားတစ်ခွန်းမျှ မရှိပေ။ သင် ပြောဆိုသည့် ဝါကျတိုင်းသည် သမ္မာတရားနှင့် ကိုက်ညီရန် သို့မဟုတ် သမ္မာတရား လက်တွေ့ကျမှု ရှိရန် ငါ တောင်းဆိုနေခြင်းပင် မဟုတ်ပေ၊ သို့သော် အနည်းဆုံးအားဖြင့် သင်သည် လူသားတစ်ဦးကဲ့သို့ စကားပြောဆိုတတ်သင့်သည်၊ စိတ်ရင်းမှန် အနည်းငယ်ကို ပြသသင့်သည်၊ စစ်မှန်သော ခံစားချက် အနည်းငယ်ကို ပြသသင့်သည်။ ဤအရာများ မရှိပါက ဆွေးနွေးမှုတစ်ခု ်ရှိနိုင်မည်လော။ မရှိနိုင်ချေ။ သင်သည် အစဉ်သဖြင့် အနှစ်သာရကင်းမဲ့သော စကားများကို ပြောဆိုလျက် လိမ်လည်လှည့်ဖြားသော စကားများကို ဆိုသည်၊ အခြေအနေများနှင့် ရင်ဆိုင်ရသောအခါ ပေါက်ကရ စကားများ၊ မှားယွင်းပြီး အဓိပ္ပာယ်မဲ့သော စကားများ၊ စော်ကားသော စကားများနှင့် မိမိကိုယ်ကို ယုံကြည်မှုလွန်ကဲသော စကားများအားလုံး ထွက်ပေါ်လာကြသည်၊ ထို့ပြင် မှန်ကြောင်းရှင်းချက်ထုတ်ခြင်းနှင့် ခုခံကာကွယ်ခြင်း စကားများအားလုံးလည်း ပေါ်ထွက်လာကြသည်၊ ဤသည်က သင့်မြတ်ရန် သို့မဟုတ် ဆက်သွယ်ပြောဆိုရန် မဖြစ်နိုင်အောင် ပြုလုပ်သည်၊ မှန်သည် မဟုတ်လော။ (ဟုတ်ပါသည်)။

လူများစွာတို့သည် ဘုရားသခင်၏ နှုတ်ကပတ်တော်များကို စားသောက်ကြပြီး ဤနှုတ်ကပတ်တော်များသည် ကောင်းကင်ဘုံရှိ ဘုရားသခင်နှင့်သာ သက်ဆိုင်သည်၊ ဘုရားသခင်၏ ဝိညာဉ်တော်နှင့်သာ သက်ဆိုင်သည်၊ လူတို့ မမြင်နိုင် မထိတွေ့နိုင်သော ထိုဘုရားသခင်တစ်ပါးတည်းနှင့်သာ သက်ဆိုင်သည်ဟု ယုံကြည်ကြသည်။ အကြောင်းမှာ ထိုဘုရားသခင်သည် အလွန်တရာ ဝေးကွာတော်မူသောကြောင့် သူ၏ နှုတ်ကပတ်တော်များသည် သမ္မာတရားဟု ခေါ်ဆိုနိုင်လောက်အောင် အတော်အတန် နက်နဲသည်ဟု မှတ်ယူကြခြင်း ဖြစ်သည်။ သို့သော်လည်း သူတို့၏ ရှေ့တွင်ရှိသော ဤသာမန်ပုဂ္ဂိုလ်၊ စကားပြောသည့်အခါ မြင်နိုင်ကြားနိုင်သော ပုဂ္ဂိုလ်သည် သမ္မာတရားနှင့်၊ ဘုရားသခင်နှင့်၊ သို့မဟုတ် ဘုရားသခင်၏ အနှစ်သာရနှင့် အနည်းငယ်သာ သက်ဆိုင်ခြင်းရှိသည်ဟု ထင်မှတ်ကြသည်။ အကြောင်းမှာ သူသည် မြင်နိုင်ပြီး လူတို့နှင့် အလွန် နီးကပ်သောကြောင့် သူတို့၏ စိတ်နှလုံးများကိုဖြစ်စေ၊ မျက်စိများကိုဖြစ်စေ မည်သည့်နည်းနှင့်မျှ သက်ရောက်မှု မရှိသောကြောင့်၊ သူသည် သူတို့အား မည်သည့်ပဟေဠိဆန်သော သိလိုစိတ်ကိုမျှ မဖြစ်စေသောကြောင့် ဖြစ်သည်။ ဤသာမန်ဖြစ်သော၊ လက်ဆုပ်လက်ကိုင်ပြနိုင်သော၊ စကားပြောဆိုနိုင်သော ပုဂ္ဂိုလ်သည် နားလည်သဘောပေါက်ရန် အလွန် လွယ်ကူလွန်းပြီး အလွန် ပွင့်လင်းမြင်သာ ရှိလွန်းသည်ဟု လူတို့က ခံစားကြရသည်။ သူတို့သည် သူ့ကို တစ်ချက်ကြည့်ရုံဖြင့် ထွင်းဖောက်မြင်နိုင်သည်၊ ရှင်းလင်းစွာ သိမြင်နိုင်သည်ဟုပင် ထင်မှတ်ကြသည်။ ရလဒ်အနေဖြင့် လူတို့သည် ခရစ်တော်ကို လူသားတစ်ဦးအား ဆက်ဆံသည့်နည်းအတိုင်း၊ အဆင့်အတန်း သို့မဟုတ် အာဏာရှိသော မည်သည့်ပုဂ္ဂိုလ်ကိုမဆို ဆက်ဆံသည့်နည်းအတိုင်း အမှုမဲ့အမှတ်မဲ့ ဆက်ဆံကြသည်။ ဤသည်မှာ သမ္မာတရား စည်းမျဉ်းများနှင့် ကိုက်ညီသလော။ ခရစ်တော်ကို အဆင့်အတန်းနှင့် အာဏာရှိသော ဖောက်ပြန်ပျက်စီးသည့် လူသားများနှင့် မည်သို့လျှင် တန်းတူထား၍ရနိုင်မည်နည်း။ လူတို့သည် အဆင့်အတန်းနှင့် အာဏာရှိသော ဖောက်ပြန်ပျက်စီးသည့် လူပုဂ္ဂိုလ်တစ်ဦးချင်းစီကို မျက်နှာလိုမျက်နှာရလုပ်ပြီး မြှောက်ပင့်ပြောဆိုသောအခါ သူတို့သည် အကျိုးအမြတ်များနှင့် ထိုသူတို့၏ နှစ်သက်မှုကို ရရှိကြသည်။ ဖောက်ပြန်ပျက်စီးသူတို့သည် ဤအရာကို နှစ်သက်ကြသည်၊ သူတို့သည် အခြားသူများ၏ မျက်နှာလိုမျက်နှာရ လုပ်ခြင်း၊ မြှောက်ပင့်ပြောဆိုခြင်းနှင့် ဖော်လံဖားခြင်းတို့ကို တောင့်တကြသည်၊ ယင်းမှာ သူတို့ကို ပို၍ မြင့်မြတ်ပြီး သာလွန်ပုံပေါက်စေကာ သူတို့၏ ကိုယ်ပိုင် အဆင့်အတန်းနှင့် အာဏာ တည်ရှိမှုကို ပို၍ သိသာထင်ရှားစေသောကြောင့် ဖြစ်သည်။ သို့သော်လည်း ဘုရားသခင်၏ အနှစ်သာရကို ပိုင်ဆိုင်သော ခရစ်တော်မူကား လုံးဝ ဆန့်ကျင်ဘက်ဖြစ်သည်။ လူတစ်ဦးတွင် အဆင့်အတန်းနှင့် ကျော်ကြားမှု ရှိသောအခါ ယင်းမှာ သူတို့သည် မြင့်မြတ်သော အနှစ်သာရ သို့မဟုတ် စရိုက်ကို ပိုင်ဆိုင်သောကြောင့် မဟုတ်ပေ။ ထို့ကြောင့် သူတို့သည် မိမိတို့၏ ကျော်ကြားမှုနှင့် အဆင့်အတန်းကို ထုတ်ဖော်ပြသနိုင်ရန်အလို့ငှာ အခြားသူများက မိမိတို့ကို ရိုသေကိုးကွယ်ပြီး မြှောက်ပင့်ပြောဆိုစေရန် နည်းလမ်းမျိုးစုံကို အသုံးပြုရပေမည်။ ဆန့်ကျင်ဘက်အားဖြင့် ဘုရားသခင်၏ အနှစ်သာရကို ပိုင်ဆိုင်သော ခရစ်တော်သည် မည်သည့်ဖန်ဆင်းခံ၏ အနှစ်သာရနှင့် အဆင့်အတန်းထက်မဆို မြင့်မားသော ဘုရားသခင်၏ ပင်ကိုလက္ခဏာနှင့် အဆင့်အတန်းကို ပင်ကိုအားဖြင့် ပိုင်ဆိုင်တော်မူသည်။ သူ၏ ပင်ကိုလက္ခဏာနှင့် အနှစ်သာရသည် ဓမ္မဓိဋ္ဌာန်ကျကျ တည်ရှိပြီး အသိအမှတ်ပြုမှုအတွက် မည်သည့်ဖန်ဆင်းခံ၏ မြှောက်ပင့်ချီးမွှမ်းခြင်းကိုမျှ မလိုအပ်ပေ။ ထို့အတူ သူ၏ ပင်ကိုလက္ခဏာ၊ အနှစ်သာရ၊ သို့မဟုတ် သူ၏ မြင့်မြတ်သော အဆင့်အတန်းကို ဖော်ပြရန်အတွက် မည်သည့်ဖန်ဆင်းခံ၏ မျက်နှာလိုမျက်နှာရ လုပ်ခြင်း သို့မဟုတ် မြှောက်ပင့်ပြောဆိုခြင်းကိုမျှလည်း သူ လိုအပ်တော်မူသည် မဟုတ်ပေ။ အကြောင်းမှာ ခရစ်တော်သည် ဘုရားသခင်၏ အနှစ်သာရကို ပိုင်ဆိုင်သည်ဆိုခြင်းမှာ ပင်ကိုအားဖြင့် အမှန်တရားတစ်ခု ဖြစ်သောကြောင့် ဖြစ်သည်၊ ယင်းကို လူသားမျိုးနွယ်အလယ်၌ နှစ်ပေါင်းများစွာသော အတွေ့အကြုံမှတစ်ဆင့် ရယူခဲ့ခြင်း ဖြစ်ဖို့ရန် မဆိုထားနှင့်၊ မည်သည့် လူပုဂ္ဂိုလ်တစ်ဦးတစ်ယောက်ကမျှ သူ့အား ပေးအပ်ထားခြင်း မဟုတ်ချေ။ ဆိုလိုသည်မှာ ဖန်ဆင်းခံတစ်ဦးမျှ မရှိလျှင်ပင် ဘုရားသခင်၏ ပင်ကိုလက္ခဏာနှင့် အနှစ်သာရသည် ရှိရင်းစွဲအတိုင်း ဆက်လက်တည်ရှိနေမည် ဖြစ်သည်၊ မည်သည့် ဖန်ဆင်းခံကမျှ ဘုရားသခင်ကို ကိုးကွယ်ခြင်း သို့မဟုတ် နောက်လိုက်ခြင်း မရှိလျှင်ပင် ဘုရားသခင်၏ အနှစ်သာရသည် မပြောင်းမလဲ တည်ရှိနေမည် ဖြစ်သည်။ ဤသည်မှာ မပြောင်းလဲသော အမှန်တရားတစ်ခု ဖြစ်သည်။ အန္တိခရစ်တို့သည် ခရစ်တော် မည်သည့်အရာကို ပြောဆိုသည် သို့မဟုတ် လုပ်ဆောင်သည်ဖြစ်စေ၊ လူတို့သည် နားဝင်ချိုသော စကားများကို အသုံးပြုရမည်၊ အားပေးရမည်၊ နောက်လိုက်ရမည်၊ သူ၏ စိတ်ကြိုက်ဖြစ်စေရန် ဖော်လံဖားရမည် ဖြစ်ပြီး သူ၏ ရည်ရွယ်ချက်များကို မဆန့်ကျင်ရဟု တလွဲ ယုံကြည်ကြသည်၊ ဤသည်က ခရစ်တော်အား သူ၏ ပင်ကိုလက္ခဏာနှင့် အဆင့်အတန်း တည်ရှိမှုကို ခံစားရစေနိုင်ဖွယ်ရှိသည်ဟု ထင်မှတ်ကြသည်။ ဤသည်မှာ ကြီးမားသော အမှားတစ်ခု ဖြစ်သည်။ ဖောက်ပြန်ပျက်စီးသော လူသားမျိုးနွယ်အလယ်မှ ကျော်ကြားမှု၊ အာဏာနှင့် အဆင့်အတန်း ရှိသောသူ မည်သူမဆိုသည် သူတို့၏ ကျော်ကြားမှုနှင့် အာဏာကို မည်သို့ရရှိကြသနည်း။ (မျက်နှာလိုမျက်နှာရ လုပ်ခြင်းနှင့် မြှောက်ပင့်ခြင်းအားဖြင့် ဖြစ်ပါသည်။) ဤသည်မှာ ရှုထောင့်တစ်ရပ် ဖြစ်သည်။ ထို့အပြင် ယင်းမှာ အဓိကအားဖြင့် လူအများကြားမှ သူတို့၏ ရုန်းကန်ကြိုးပမ်းမှုများနှင့် ကြိုးစားအားထုတ်မှုများမှတစ်ဆင့်၊ ကြိုးကိုင်ညွှန်ကြားခြင်းမှတစ်ဆင့် ဖြစ်သည့်အပြင် နည်းလမ်းအမျိုးမျိုးမှတစ်ဆင့် ရယူခြင်း သို့မဟုတ် လုယူခြင်းအားဖြင့်လည်း ဖြစ်သည်။ ယင်းမှာ လူအများကြားမှ ဂုဏ်သတင်းတစ်ခု၊ မြင့်မားသော ရာထူး သို့မဟုတ် အဆင့်အတန်းတစ်ခုမျှသာ ဖြစ်သည်။ ဤမြင့်မားသော ဂုဏ်သတင်း၊ မြင့်မားသော ရာထူးနှင့် မြင့်မားသော အဆင့်အတန်းတို့သည် လူတစ်ဦးအား လူအုပ်ကြားတွင် ထင်ပေါ်စေကာ ခေါင်းဆောင်တစ်ဦး၊ စီမံခန့်ခွဲပိုင်ခွင့်ရှိသော ဆုံးဖြတ်ချက်ချမှတ်သူတစ်ဦး ဖြစ်လာစေသည်။ သို့သော် လူအများကြားတွင် အခြားသူတို့အထက်၌ ရပ်တည်နေသော အဆင့်အတန်းနှင့် ကျော်ကြားမှုရှိသည့် ဤပုဂ္ဂိုလ်၏ အနှစ်သာရမှာ အဘယ်နည်း။ ထိုသူနှင့် အခြားသူများကြား မည်သည့် ခြားနားချက် ရှိသနည်း။ ထိုသူ၏ ပင်ကိုလက္ခဏာနှင့် အနှစ်သာရသည် မည်သည့် သာမန် ဖောက်ပြန်ပျက်စီးသော လူသားတစ်ဦးနှင့်မဆို တစ်ထပ်တည်း တူညီသည်၊ သူတို့သည် စာတန်၏ အာဏာအောက်၌ ဖောက်ပြန်ပျက်စီးခြင်းခံရသော သာမန်ဖန်ဆင်းခံတစ်ဦးဖြစ်ပြီး သမ္မာတရားနှင့် အပြုသဘောဆောင်သော အမှုအရာများကို သစ္စာဖောက်ဖျက်နိုင်စွမ်းရှိကာ အမှားအမှန်ကို ပြောင်းပြန်လှန်နိုင်စွမ်းရှိပြီး အဖြစ်မှန်များကို ဆန့်ကျင်၍ မကောင်းမှုကို ပြုကျင့်လျက် ဘုရားသခင်ကို အတိုက်အခံပြုကာ ကောင်းကင်ဘုံကို အာခံပြီး ကျိန်ဆဲနိုင်စွမ်း ရှိကြသည်။ သူတို့၏ စစ်မှန်သော ပင်ကိုလက္ခဏာနှင့် အနှစ်သာရမှာ စာတန်၏ ဖောက်ပြန်ဖျက်ဆီးခြင်းကို ခံရသော ပုဂ္ဂိုလ်၊ ဘုရားသခင်ကို အတိုက်အခံပြုနိုင်သော သူတစ်ဦး၏ ပင်ကိုလက္ခဏာနှင့် အနှစ်သာရတို့ ဖြစ်သည်၊ ဤသည်က သူတို့၏ ကျော်ကြားမှုနှင့် အဆင့်အတန်းကို အနှစ်မဲ့သော ဂုဏ်ပုဒ်များမျှသာ ဖြစ်စေသည်။ အတော်အတန် ရက်စက်သော၊ ကြမ်းကြုတ်သော၊ မလိုမုန်းထားစိတ် ရှိသော သူတို့၊ အဆင့်အတန်းနှင့် ကျော်ကြားမှုအတွက် အခြားသူတို့ကို သတ်ဖြတ်နိုင်သော သို့မဟုတ် ဒုက္ခပေးနိုင်သော သူတို့သည် မြင့်မားသော ရာထူးများကို ရရှိကြသည်။ ပရိယာယ်သုံးနိုင်သော၊ နည်းလမ်းများ ရှိသော၊ လျှို့ဝှက်ကြံစည်မှုများကို ကြံစည်နိုင်သော သူတို့သည် အခြားသူတို့အပေါ် ခေါင်းဆောင်များ ဖြစ်လာကြသည်။ ဤပုဂ္ဂိုလ်တစ်ဦးချင်းစီသည် သာမန် ဖောက်ပြန်ပျက်စီးသော လူတို့ထက် ပို၍ မလိုမုန်းထားစိတ်ရှိကာ ပို၍ ကြမ်းကြုတ်ပြီး ပို၍ ကောက်ကျစ်ဆိုးယုတ်ကြသည်။ သူတို့သည် မိမိတို့အား နားဝင်ချိုသော စကားများ၊ ဖော်လံဖားခြင်း၊ မျက်နှာလိုမျက်နှာရ လုပ်ခြင်းနှင့် မြှောက်ပင့်ပြောဆိုခြင်းတို့ဖြင့် ဆက်ဆံသည်ကိုသာ နှစ်သက်ကြ၏။ အကယ်၍ သင်သည် သူတို့အား သမ္မာတရားကို ပြောဆိုပါက သင်၏ အသက်သည် အန္တရာယ်ရှိပေမည်။ အန္တိခရစ်တို့သည် ဤလောကီဆိုင်ရာ ကစားပွဲ စည်းမျဉ်းများနှင့် လောကီဆိုင်ရာ ဆက်ဆံမှုများအတွက် အတွေးအခေါ်များကို ဘုရားသခင်၏ အိမ်တော်ထဲသို့ ယူဆောင်လာကြပြီး ခရစ်တော်နှင့် သူတို့၏ ပေါင်းသင်းဆက်ဆံမှုများတွင် ယင်းတို့ကို အသုံးချကြသည်။ ခရစ်တော်သည် အခြေခိုင်လိုလျှင် သူသည်လည်း မျက်နှာလိုမျက်နှာရ လုပ်ခြင်း၊ မြှောက်ပင့်ပြောဆိုခြင်း၊ နားဝင်ချိုသော စကားများဖြင့် ပြောဆိုခြင်းတို့ကို နှစ်သက်ရမည်ဟု သူတို့က ယူဆကြသည်။ ဤသို့ ပြုလုပ်ခြင်းအားဖြင့် သူတို့သည် ဘုရားသခင် လူ့ဇာတိခံယူသော ဇာတိပကတိကို ဖောက်ပြန်ပျက်စီးသော လူသားမျိုးနွယ်ထဲမှ အဖွဲ့ဝင်တစ်ဦးအဖြစ်သာ မသိမသာ ဆက်ဆံကြသည်၊ ဤသည်မှာ အန္တိခရစ်တို့၏ လုပ်နည်းကိုင်နည်းဖြစ်သည်။ ထို့ကြောင့် ခရစ်တော်နှင့် သူတို့၏ ပေါင်းသင်းဆက်ဆံမှုများတွင် အန္တိခရစ်တို့မှ ပြသသော စိတ်သဘောထားသည် ဆိုးညစ်သည်မှာ သံသယဖြစ်ဖွယ် မရှိပေ။ သူတို့သည် ဆိုးညစ်သော စိတ်သဘောထား ရှိကြပြီး လူတို့၏ အတွေးများကို မှန်းဆသုံးသပ်ကာ စဉ်းစားဆင်ခြင်ရန် နှစ်သက်ကြသည်၊ အခြားသူတို့၏ စကားများနှင့် အမူအရာများကို အကဲခတ်ရန် နှစ်သက်ကြသည်၊ ပြီးလျှင် ခရစ်တော်အား ဆက်ဆံရာတွင်လည်းကောင်း၊ သူနှင့် သူတို့၏ ပေါင်းသင်းဆက်ဆံမှုများနှင့် သက်ဆိုင်သော ကိစ္စရပ်များတွင်လည်းကောင်း အချို့သော နည်းလမ်းများ၊ လောကီလူများ အသုံးပြုသော ကစားပွဲ စည်းမျဉ်းအချို့ကို အသုံးပြုရန် နှစ်သက်ကြသည်။ သူတို့ ကျူးလွန်သော အပြင်းထန်ဆုံးသော အမှားမှာ အဘယ်နည်း။ သူတို့သည် အဘယ်ကြောင့် ဤနည်းလမ်းအတိုင်း ပြုမူနိုင်ကြသနည်း။ အရင်းအမြစ်သည် အဘယ်မှာ တည်ရှိသနည်း။ လူ့ဇာတိခံ ဘုရားသခင်သည် သာမန် ပုဂ္ဂိုလ်တစ်ဦးဖြစ်သည်ဟု ဘုရားသခင် မိန့်တော်မူသည်။ အန္တိခရစ်တို့သည် ဤသည်ကို ကြားသောအခါ ဝမ်းမြောက်ဝမ်းသာ ဖြစ်ကြလျက် ဤသို့ ဆိုကြသည်။ “ကောင်းပြီလေ၊ သို့ဆိုလျှင် ကျွန်ုပ်သည် သင့်ကို သာမန်ပုဂ္ဂိုလ်တစ်ဦးအဖြစ် ဆက်ဆံမည်၊ ယခု သင့်ကို မည်သို့ဆက်ဆံရမည်ဆိုသည်အတွက် ကျွန်ုပ်၌ အခြေခံအကြောင်းရင်း ရှိပြီ” ဟူ၍ ဖြစ်သည်။ ဘုရားသခင် လူ့ဇာတိခံယူသော ဇာတိပကတိသည် ဘုရားသခင်၏ အနှစ်သာရ ရှိသည်ဟု ဘုရားသခင် မိန့်တော်မူသောအခါ အန္တိခရစ်တို့သည် ဤသို့ တုံ့ပြန်ကြသည်။ “ဘုရားအနှစ်သာရလော။ ကျွန်ုပ် အဘယ်ကြောင့် မမြင်ရသနည်း။ ယင်းသည် အဘယ်မှာ ရှိသနည်း။ ယင်းကို မည်သို့ ထင်ရှားစေသနည်း။ သူ၌ ဘုရားအနှစ်သာရ ရှိကြောင်း သက်သေပြရန် သူသည် အဘယ်အရာကို ထုတ်ဖော်ပြသနည်း။ ကျွန်ုပ်သည် အဆင့်အတန်း ရှိသောသူတို့ကို မျက်နှာလိုမျက်နှာရ လုပ်ရန်နှင့် မြှောက်ပင့်ပြောဆိုရန်သာ သိသည်။ လူတို့အား မျက်နှာလိုမျက်နှာရ လုပ်ခြင်းနှင့် မြှောက်ပင့်ပြောဆိုခြင်းတို့ဖြင့် ကျွန်ုပ်သည် မည်သည့်အခါမျှ မှားနိုင်မည် မဟုတ်ပေ၊ ယင်းသည် အစဉ်သဖြင့် လုပ်ဆောင်ရမည့် နည်းလမ်းဖြစ်သည်။ မည်သို့ပင်ဖြစ်စေ ယင်းသည် သမ္မာတရားကို ပြောဆိုခြင်းထက် သာ၍ ကောင်းပါသည်” ဟူ၍ ဖြစ်လေသည်။ ဤသည်မှာ အန္တိခရစ်တို့၏ ကောက်ကျစ်ဆိုးယုတ်မှုဖြစ်၏။ ဤသည်မှာ အန္တိခရစ်တို့ သမ္မာတရားကို မယုံကြည်ပုံ သို့မဟုတ် လက်မခံပုံ ဖြစ်ပြီး စာတန်၏ အတွေးအခေါ်အားဖြင့်သာ အသက်ရှင်ကြပုံ ဖြစ်သည်။

အချို့သောသူများက ဤသို့ ဆိုကြသည်။ “လူတိုင်းသည် မျက်နှာလိုမျက်နှာရ လုပ်တတ်သူ၊ မြှောက်ပင့်ပြောဆိုတတ်သူ၊ နားဝင်ချိုသော စကားများ ပြောဆိုတတ်သူတို့ကို နှစ်သက်ကြသည်၊ ဘုရားသခင် တစ်ပါးတည်းသာလျှင် ထိုသို့သော လူစားမျိုးကို မနှစ်သက်ပေ။ သို့ဆိုလျှင် ဘုရားသခင်သည် စင်စစ်အားဖြင့် မည်သို့သောပုဂ္ဂိုလ်မျိုးကို နှစ်သက်တော်မူသနည်း။ လူတစ်ဦးသည် ဘုရားသခင်၏ နှစ်သက်မှုကို ခံရရန် သူနှင့် မည်သို့ပေါင်းသင်းဆက်ဆံသင့်သနည်း” ဟု ဆိုကြသည်။ သင်တို့ သိကြသလော။ (ဘုရားသခင်သည် ရိုးသားသောသူတို့ကို နှစ်သက်တော်မူသည်၊ ဘုရားသခင်ထံ မိမိတို့၏ စိတ်ရင်းအတိုင်း ပြောဆိုသောသူတို့ကို နှစ်သက်တော်မူသည်၊ လှည့်ဖြားခြင်းမရှိဘဲ ဘုရားသခင်နှင့် မိမိတို့၏ စိတ်နှလုံးများကို ဖွင့်ဟလျက် မိတ်သဟာယဖွဲ့သော သူတို့ကို နှစ်သက်တော်မူသည်။) အခြားရှိသေးသလော။ (ဘုရားသခင်ကို ကြောက်ရွံ့သော စိတ်နှလုံး ရှိသူများ၊ ဘုရားနှုတ်ကပတ်တော်များကို နားထောင်ပြီး လက်ခံနိုင်စွမ်းရှိသူများ ဖြစ်ကြသည်။) (ဘုရားသခင်၏ အိမ်တော်ဘက်သို့ လှည့်သော စိတ်နှလုံး ရှိသူများ၊ ဘုရားသခင်၏ စိတ်တော်နှင့် တညီတညွတ်တည်းဖြစ်သောသူများ ဖြစ်ကြသည်။) သင်တို့အားလုံးသည် ရိုးသားသောသူတစ်ဦး ဖြစ်ခြင်းနှင့်ပတ်သက်၍ လက်တွေ့လုပ်ဆောင်သင့်သော သွင်ပြင်လက္ခဏာများစွာကို ဖော်ပြခဲ့ကြပြီးဖြစ်သည်။ ရိုးသားသောသူတစ်ဦး ဖြစ်ခြင်းသည် လူတို့အပေါ် ဘုရားသခင် ထားရှိသော တောင်းဆိုချက် ဖြစ်သည်။ ယင်းသည် လူတို့ လက်တွေ့လုပ်ဆောင်ရမည့် သမ္မာတရား ဖြစ်သည်။ သို့ဆိုလျှင် ဘုရားသခင်နှင့် ဆက်ဆံရာတွင် လူတို့ လိုက်နာစောင့်ထိန်းသင့်သော စည်းမျဉ်းများမှာ အဘယ်နည်း။ ရိုးသားစစ်မှန်မှု ရှိလော့။ ဤသည်မှာ ဘုရားသခင်နှင့် ပေါင်းသင်းဆက်ဆံသည့်အခါ လိုက်နာသင့်သော စည်းမျဉ်း ဖြစ်သည်။ ဘာသာတရားမရှိသူတို့၏ မျက်နှာလိုမျက်နှာရ လုပ်ခြင်း သို့မဟုတ် မြှောက်ပင့်ပြောဆိုခြင်း ကျင့်ကြံပြုမူမှုကို မလုပ်ဆောင်ကြနှင့်။ ဘုရားသခင်သည် လူသား၏ မျက်နှာလိုမျက်နှာရ လုပ်ခြင်းနှင့် မြှောက်ပင့်ပြောဆိုခြင်းကို မလိုအပ်ပေ။ ရိုးသားစစ်မှန်ခြင်းသည် လုံလောက်ပေသည်။ ရိုးသားစစ်မှန်ခြင်းဟူသည် အဘယ်အရာကို ဆိုလိုသနည်း။ ဤသည်ကို မည်သို့ လက်တွေ့လုပ်ဆောင်သင့်သနည်း။ (ဘုရားသခင်ထံ ရိုးရိုးရှင်းရှင်း ဖွင့်ဟခြင်း၊ ဟန်ဆောင်ခြင်း သို့မဟုတ် မည်သည့်အရာကိုမျှ ဖုံးကွယ်ခြင်း သို့မဟုတ် လျှို့ဝှက်ချက်များ ထားရှိခြင်း မရှိဘဲ ရိုးသားသော စိတ်နှလုံးဖြင့် ဘုရားသခင်နှင့် ပေါင်းသင်းဆက်ဆံခြင်း၊ မည်သည့်မသမာသောရည်ရွယ်ချက်မျှဖြစ်စေ၊ မည်သည့်လှည့်ဖြားခြင်းမျှဖြစ်စေ မရှိဘဲ ရိုးသားဖြောင့်မတ်ခြင်း ဖြစ်ပါသည်။) မှန်ပေ၏။ ရိုးသားစစ်မှန်ရန် သင်သည် ဦးစွာ သင်၏ ပုဂ္ဂိုလ်ရေးဆိုင်ရာ အလိုဆန္ဒများကို ဘေးဖယ်ထားရမည်။ ဘုရားသခင်က သင့်အား မည်သို့ ဆက်ဆံသည်ကို အာရုံစိုက်မည့်အစား သင်သည် မိမိကိုယ်ကို ဘုရားသခင်ထံ အရှိအတိုင်း ဖော်ပြသင့်ပြီး သင်၏ စိတ်နှလုံးထဲ၌ ရှိသော မည်သည့်အရာကိုမဆို ပြောဆိုလော့။ သင့်စကားများ၏ နောက်ဆက်တွဲအကျိုးဆက်များက မည်သည့်အရာဖြစ်မည်ကို စဉ်းစားဆင်ခြင်ခြင်း သို့မဟုတ် ထည့်သွင်းစဉ်းစားခြင်း မပြုနှင့်။ သင် စဉ်းစားမိသော မည်သည့်အရာကိုမဆို ပြောဆိုလော့။ သင်၏ စေ့ဆော်မှုများကို ဘေးဖယ်ထားလော့။ ပြီးလျှင် ရည်ရွယ်ချက်တစ်ခုခုကို ဖြစ်မြောက်အောင်မြင်စေရန်အတွက်သာ အမှုအရာများကို မပြောဆိုနှင့်။ သင့်တွင် ကိုယ်ပိုင် ရည်ရွယ်ချက်များနှင့် မသန့်စင်မှုများ အလွန် များပြားသည်၊ သင်သည် စကားပြောဆိုပုံ၌ အစဉ်သဖြင့် အကွက်ချစီမံသည်၊ ဤသို့ စဉ်းစားသည်။ “ငါသည် ဤအကြောင်းကို ပြောသင့်ပြီး ထိုအကြောင်းကို မပြောသင့်ပေ၊ ငါ ပြောဆိုမည့်အရာကို သတိထားရမည်။ ငါ့အတွက် အကျိုးရှိစေမည့် နည်းလမ်းဖြင့်၊ ငါ့၏ ချို့ယွင်းချက်များကို ဖုံးကွယ်ပေးမည့် နည်းလမ်းဖြင့်၊ ဘုရားက ငါ့အပေါ် အကောင်းမြင်စေမည့် နည်းလမ်းဖြင့် ပြောဆိုမည်” ဟူ၍ ဖြစ်လေသည်။ ဤသည်မှာ ရည်ရွယ်ချက်များ ထားရှိခြင်း မဟုတ်သလော။ သင် ပါးစပ်မဟမီတွင် သင်၏ စိတ်သည် ကောက်ကျစ်သော အတွေးအခေါ်များဖြင့် ပြည့်နှက်နေသည်၊ သင် ပြောဆိုလိုသောအရာကို အကြိမ်ပေါင်းများစွာ ပြုပြင်သည်၊ ဤသို့ဖြင့် စကားလုံးများ သင်၏ ပါးစပ်မှ ထွက်လာသောအခါ ယင်းတို့သည် စင်ကြယ်လွန်းခြင်း မရှိတော့ဘဲ၊ အနည်းငယ်မျှပင် မစစ်မှန်တော့ဘဲ သင်၏ ကိုယ်ပိုင် စေ့ဆော်မှုများနှင့် စာတန်၏ အကြံအစည်များ ပါဝင်နေသည်။ ဤသည်မှာ ရိုးသားစစ်မှန်ခြင်း မဟုတ်ပေ၊ ဤသည်မှာ ယုတ်မာသော ကြံရွယ်မှုများနှင့် မကောင်းသော ရည်ရွယ်ချက်များ ထားရှိခြင်း ဖြစ်သည်။ ထို့ထက်မက သင် စကားပြောဆိုသောအခါ သင်သည် လူတို့၏ မျက်နှာအမူအရာများနှင့် သူတို့၏ မျက်လုံးအကြည့်တို့မှ အရိပ်နိမိတ်များကို အစဉ်သဖြင့် ရယူသည်။ အကယ်၍ သူတို့၏ မျက်နှာပေါ်၌ အပြုသဘောဆောင်သော အမူအရာ ရှိပါက သင်သည် ဆက်လက်ပြောဆိုသည်၊ မရှိပါက သင်သည် ချုပ်တည်းထားပြီး မည်သည့်အရာမျှ မပြောဆိုပေ၊ အကယ်၍ သူတို့၏ မျက်လုံးအကြည့် မကောင်းပါက၊ သူတို့ ကြားနေရသောအရာကို မနှစ်သက်သကဲ့သို့ ဖြစ်နေပုံရပါက သင်သည် ထပ်မံစဉ်းစားပြီး သင့်ကိုယ်သင် ဤသို့ ပြောဆိုသည်။ “ကောင်းပြီလေ၊ သင် စိတ်ဝင်စားမည့် အရာတစ်ခုခု၊ သင့်အား ပျော်ရွှင်စေမည့် အရာတစ်ခုခု၊ သင် နှစ်သက်မည့် အရာတစ်ခုခု၊ သင့်အနေဖြင့် ငါ့အပေါ် အကောင်းမြင်စေမည့် အရာတစ်ခုခုကို ငါ ပြောဆိုမည်” ဟူ၍တည်း။ ဤသည်မှာ ရိုးသားစစ်မှန်ခြင်း ဖြစ်သလော။ မဟုတ်ပေ။ အချို့သောသူတို့သည် တစ်စုံတစ်ဦးက မကောင်းမှု ပြုလုပ်ပြီး အသင်းတော်၌ အဖျက်အမှောင့်များ ပြုလုပ်နေသည်ကို မြင်တွေ့သည့်အခါ တိုင်ကြားခြင်း မပြုကြပေ။ သူတို့သည် ဤသို့ တွေးထင်ကြသည်။ “ဤအမှုကိစ္စကို ငါသာ အလျင်ဦးစွာ တိုင်ကြားခဲ့မည်ဆိုလျှင် လူတို့ကို စိတ်ခုစေမည်ဖြစ်ပြီး အကယ်၍ ယင်းက မတော်တဆ အမှားဖြစ်ခဲ့လျှင် ပြုပြင်ခြင်းကို ခံရပေဦးမည်။ အခြားသူများ တိုင်ကြားသည်အထိ စောင့်ပြီးမှ လူအများနှင့်အတူ လိုက်တိုင်ကြားမည်၊ ငါတို့ မှားသွားလျှင်ပင် ပြဿနာကြီး မဟုတ်ပေ။ အမှန်တော့ လူအများကို အပြစ်တင်၍မရနိုင်ဘူး မဟုတ်လော။ ‘ထီးထီးကြီး ထင်ပေါ်နေသည့်ငှက်သည် သေနတ်ဖြင့် အပစ်ခံရသည့်ငှက်ဖြစ်သည်’ ဟူသည့် ဆိုရိုးစကား ရှိသကဲ့သို့ပင် ဖြစ်သည်။ ငါသည် ထိုငှက် အဖြစ်ခံမည် မဟုတ်ပါ။ မရမက ထီးထီးကြီး ထင်ပေါ်အောင် လုပ်ဆောင်သည်မှာ လူမိုက်တစ်ဦး ဖြစ်ရပေမည်” ဟူ၍ပင်။ ဤသည်မှာ ရိုးသားစစ်မှန်ခြင်း ဖြစ်သလော။ လုံးဝ မဟုတ်ပေ။ ထိုသို့သော ပုဂ္ဂိုလ်သည် အမှန်ပင် ကောက်ကျစ်စဉ်းလဲသည်၊ အကယ်၍ ထိုသူသည် အသင်းတော်၌ ခေါင်းဆောင်တစ်ဦး၊ တာဝန်ခံတစ်ဦး ဖြစ်လာပါက သူတို့သည် အသင်းတော်၏ အမှုတော်အတွက် ဆုံးရှုံးမှုတစ်ခုကို ဖြစ်ပေါ်စေမည် မဟုတ်လော။ သူတို့သည် သေချာပေါက် ဖြစ်ပေါ်စေလိမ့်မည်။ ထိုသို့သော ပုဂ္ဂိုလ်ကို လုံးဝ အသုံးမပြုရပေ။ သင်တို့သည် ဤသို့သော ပုဂ္ဂိုလ်မျိုးကို ပိုင်းခြားသိမြင်နိုင်ကြသလော။ ဥပမာအားဖြင့် ဆိုကြပါစို့ ခေါင်းဆောင်တစ်ဦးသည် မကောင်းသော အမှုအရာအချို့ကို ပြုလုပ်ခဲ့ပြီး အသင်းတော်၏ အမှုတော်ကို နှောင့်ယှက်ခဲ့သည့်တိုင် ဤပုဂ္ဂိုလ်နှင့်ပတ်သက်၍ အမှန်တကယ် မည်သည့်အရာ ဖြစ်ပျက်နေသည်ကို မည်သူမျှ နားလည်ခြင်း မရှိသကဲ့သို့ အထက်မှလည်း သူတို့ မည်သို့သောသူ ဖြစ်သည်ကို မသိရှိပေ။ သင်တစ်ဦးတည်းသာလျှင် သူတို့နှင့်ပတ်သက်၍ အမှန်တကယ် မည်သည့်အရာဖြစ်ပျက်နေသည်ကို သိရှိသည်။ ထိုသို့သော အခြေအနေများတွင် သင်သည် ပြဿနာကို အထက်သို့ ရိုးသားစွာ တင်ပြမည်လော။ ဤပြဿနာသည် လူကို အများဆုံး ဖော်ထုတ်သောအရာ ဖြစ်သည်။ အကယ်၍ သင်သည် ကိစ္စရပ်ကို ဖုံးကွယ်ထားပြီး မည်သူ့ကိုမျှ၊ ဘုရားသခင်ကိုပင် မပြောဆိုဘဲ ထိုခေါင်းဆောင်သည် အသင်းတော်၏ အမှုတော်ကို ကမောက်ကမဖြစ်သွားသည်အထိ များစွာသော မကောင်းမှုကို ပြုလုပ်ခဲ့ပြီး လူတိုင်းက သူ့ကို ဖော်ထုတ်ပြီး ကိုင်တွယ်ပြီးဖြစ်သည့် နေ့ရက်ရောက်သည်အထိ စောင့်ဆိုင်းနေခဲ့ပြီးမှ ရင်ဆိုင်၍ “သူသည် လူကောင်းတစ်ဦး မဟုတ်ကြောင်း ကျွန်ုပ် အစကတည်းက သိရှိခဲ့ပါသည်။ အချို့သောသူတို့က သူ့အား လူကောင်းဟု ထင်မှတ်ခဲ့ခြင်းသာ ဖြစ်သည်၊ အကယ်၍ ကျွန်ုပ် တစ်စုံတစ်ရာ ပြောဆိုခဲ့ပါက မည်သူမျှ ကျွန်ုပ်ကို ယုံကြည်ကြမည် မဟုတ်ပါ။ ထို့ကြောင့် ကျွန်ုပ်သည် ထုတ်ဖော်မပြောဆိုခဲ့ခြင်း ဖြစ်သည်။ ယခု ထိုသူသည် မကောင်းသော အမှုအရာအချို့ကို ပြုလုပ်ခဲ့ပြီး လူတိုင်းက သူ မည်သူဖြစ်သည်ကို ပိုင်းခြားသိမြင်နိုင်ကြသည့်အတွက် ထိုသူနှင့်ပတ်သက်၍ အမှန်တကယ် ဖြစ်ပျက်နေသောအရာကို ကျွန်ုပ် ထုတ်ဖော်ပြောဆိုနိုင်ပါသည်” ဟု ပြောလျှင် ယင်းမှာ ရိုးသားစစ်မှန်ခြင်း ဖြစ်သလော။ (မဟုတ်ပါ)။ အကယ်၍ တစ်စုံတစ်ဦး၏ ပြဿနာများ ဖော်ထုတ်ခံရသည့်အခါတိုင်း သို့မဟုတ် ပြဿနာတစ်ခုကို တိုင်ကြားသည့်အခါတိုင်း သင်သည် လူအုပ်နှင့်အတူ ထိုလူကို ရင်ဆိုင်ကာ ဖော်ထုတ်ရန်ဖြစ်စေ၊ တိုင်ကြားရန်ဖြစ်စေ နောက်ဆုံးမှ လုပ်ဆောင်ပါက သင်သည် ရိုးသားစစ်မှန်ခြင်း ဖြစ်သလော။ ဤသည်တို့အားလုံးသည် ရိုးသားစစ်မှန်ခြင်း မဟုတ်ကြပေ။ အကယ်၍ သင်သည် တစ်စုံတစ်ဦးကို မနှစ်သက်ပါက၊ သို့မဟုတ် တစ်စုံတစ်ဦးက သင့်ကို စိတ်အနှောင့်အယှက် ဖြစ်စေခဲ့ပါက ထို့ပြင် ထိုသူသည် ဆိုးယုတ်သောသူတစ်ဦး မဟုတ်ကြောင်း သင် သိရှိသော်လည်း သင်သည် စိတ်သဘောထား သေးသိမ်သောကြောင့်၊ ထိုသူကို မုန်းတီးလာပြီး သူ့အပေါ် လက်စားချေလိုကာ ထိုသူကို အရူးလုပ်လိုပါက သင်သည် အထက်သို့ သူ၏အကြောင်း မကောင်းသော အမှုအရာအချို့ကို ပြောဆိုရန် နည်းလမ်းများကို စဉ်းစားပြီး အခွင့်အလမ်းများကို ရှာဖွေကောင်း ရှာဖွေနိုင်သည်။ သင်သည် အဖြစ်မှန်များကိုသာ ဖော်ပြနေခြင်း ဖြစ်နိုင်ပြီး ထိုပုဂ္ဂိုလ်ကို ပြစ်တင်ရှုတ်ချနေခြင်း မဟုတ်သော်လည်း ထိုအဖြစ်မှန်များကို ဖော်ပြသောအခါ သင်၏ ကြံရွယ်ချက်မှာ ထုတ်ဖော်ပြပြီး ဖြစ်နေသည်။ သင်သည် သူတို့ကို ကိုင်တွယ်ရန်အလို့ငှာ အထက်မှ ပါဝင်ပတ်သက်မှုကို အသုံးချလိုခြင်း သို့မဟုတ် ဘုရားသခင်အား တစ်စုံတစ်ရာ ပြောဆိုစေလိုခြင်း ဖြစ်သည်။ အထက်သို့ ပြဿနာများကို တိုင်ကြားခြင်းအားဖြင့် သင်သည် သင်၏ ပန်းတိုင်ကို ဖြစ်မြောက်အောင်မြင်စေရန် ကြိုးပမ်းနေခြင်း ဖြစ်သည်။ ဤသည်မှာ သိသာထင်ရှားသော မသန့်ရှင်းမှုများက ကိုယ်ပိုင် ရည်ရွယ်ချက်များဖြင့် ရောနှောနေပြီး ယင်းသည် ရိုးသားစစ်မှန်ခြင်း လုံးဝ မဟုတ်သည်မှာ သေချာသည်။ အကယ်၍ သူတို့သည် အသင်းတော်၏ အမှုတော်ကို အဖျက်အမှောင့်လုပ်နေသော ဆိုးယုတ်သောသူတစ်ဦး ဖြစ်ပြီး သင်သည် ထိုအမှုတော်ကို ကာကွယ်စောင့်ရှောက်ရန်အလို့ငှာ အထက်သို့ တိုင်ကြားပါက၊ ထို့အပြင် သင် တိုင်ကြားသော ပြဿနာများသည် လုံးဝ အချက်အလက်မှန်များ ဖြစ်ပါက ယင်းသည် စာတန်ဆန်သော အတွေးအခေါ်များနည်းလမ်းအားဖြင့် အမှုအရာများကို ကိုင်တွယ်ခြင်းနှင့် ကွဲပြားသည်။ ယင်းသည် တရားမျှတစိတ်နှင့် တာဝန်သိတတ်မှုတို့မှ ဖြစ်ပေါ်လာပြီး သင်၏ သစ္စာစောင့်သိခြင်းကို ပြည့်စုံစေခြင်း ဖြစ်သည်၊ ဤသည်သာလျှင် ရိုးသားစစ်မှန်ခြင်းက ထင်ရှားပေါ်လွင်ပုံ ဖြစ်သည်။

ဘုရားသခင်သည် မျက်နှာလိုမျက်နှာရ လုပ်တတ်သူ၊ မြှောက်ပင့်ပြောဆိုတတ်သူ၊ သို့မဟုတ် နားဝင်ချိုသော စကားများ ပြောဆိုတတ်သူတို့ကို မနှစ်သက်ပေ။ သို့ဆိုလျှင် ဘုရားသခင်သည် မည်သို့သော ပုဂ္ဂိုလ်မျိုးကို နှစ်သက်တော်မူသနည်း။ ဘုရားသခင်သည် လူတို့အနေဖြင့် ကိုယ်တော်နှင့် မည်သို့ ပေါင်းသင်းဆက်ဆံပြီး မိတ်သဟာယဖွဲ့သည်ကို နှစ်သက်တော်မူသနည်း။ ဘုရားသခင်သည် ရိုးသားသောလူများ၊ ကိုယ်တော်အပေါ် ရိုးသားစစ်မှန်သော သူများကို နှစ်သက်တော်မူသည်။ သင်သည် သူ၏ လေသံနှင့် အမူအရာကို ထည့်သွင်းစဉ်းစားရန် သို့မဟုတ် သူ့ကို မျက်နှာလိုမျက်နှာရလုပ်ရန် မလိုအပ်ပေ။ သင်သည် ရိုးသားစစ်မှန်ရန်သာ လိုအပ်သည်၊ ရိုးသားစစ်မှန်သော စိတ်နှလုံး ရှိရန်၊ ဖုံးကွယ်ခြင်း၊ အရံအတား သို့မဟုတ် ဟန်ဆောင်ခြင်း ကင်းမဲ့သော စိတ်နှလုံး ရှိရန် လိုအပ်ပြီး သင်၏ ပြင်ပအသွင်အပြင်သည် သင်၏ စိတ်နှလုံးနှင့် ကိုက်ညီစေရန်သာ လိုအပ်သည်။ ဆိုလိုသည်မှာ သင်သည် ခရစ်တော်ကို ဆက်ဆံပြီး ပေါင်းသင်းဆက်ဆံသောအခါ သင်သည် မည်သည့်ကြိုးပမ်းအားထုတ်မှုမျှ ပြုလုပ်ရန် မလိုအပ်၊ မည်သည့် “ကြိုတင်ပြင်ဆင်ချက်” မျှ လုပ်ရန် မလိုအပ်၊ သို့မဟုတ် ကြိုတင်၍ မည်သည့်အရာကိုမျှ အသင့်ပြင်ထားရန်ဖြစ်စေ၊ လုပ်ဆောင်ရန်ဖြစ်စေ မလိုအပ်ပေ၊ ဤအရာများ တစ်ခုမျှ မလိုအပ်ပေ။ ဘုရားသခင်သည် ရိုးသားစစ်မှန်ခြင်းကို နှစ်သက်တော်မူသည်။ ရင်းနှီးပွင့်လင်းသော၊ ပုံမှန်ဖြစ်သော၊ သဘာဝကျသော စကားပြောဆိုခြင်းနှင့် ပေါင်းသင်းဆက်ဆံခြင်း ဖြစ်သည့် ရိုးသားစစ်မှန်ခြင်းကို နှစ်သက်တော်မူသည်။ သင်သည် မှားယွင်းသော တစ်စုံတစ်ရာကို ပြောဆိုမိလျှင် သို့မဟုတ် မသင့်လျော်သော စကားလုံးများကို အသုံးပြုမိလျှင်ပင် ယင်းသည် ပြဿနာ မဟုတ်ပေ။ ဥပမာအားဖြင့် ငါသည် နေရာတစ်ခုသို့ သွားပြီး ထမင်းချက်က “ကိုယ်တော်၌ အစားအစာဆိုင်ရာ ကန့်သတ်ချက်များ တစ်စုံတစ်ရာ ရှိပါသလော။ ကိုယ်တော် စားသုံးသော အစားအစာများနှင့် မစားသုံးသော အစားအစာများမှာ အဘယ်နည်း။ ကျွန်ုပ် ဘာကို ပြင်ဆင်သင့်ပါသနည်း” ဟု မေးသည် ဆိုကြပါစို့။ ငါက “အငန်လွန်ခြင်း မရှိစေနှင့်၊ စပ်သော အစားအစာ မဖြစ်စေနှင့်၊ ထို့ပြင် အဆီများလွန်းခြင်း မရှိစေဘဲ ကြော်ထားသော အစားအစာများ မဖြစ်စေနှင့်။ အဓိက အစားအစာအတွက်မူ ထမင်းဖြစ်စေ၊ ခေါက်ဆွဲ ဖြစ်စေ အဆင်ပြေသည်” ဟု ပြောသည်။ ဤညွှန်ကြားချက်များသည် နက်နဲပါသလော။ (မနက်နဲပါ။) ထမင်းဟင်းချက်ပြုတ်တတ်သော မည်သူမဆိုသည် မှန်းဆသုံးသပ်ခြင်း၊ စဉ်းစားဆင်ခြင်ခြင်း၊ သို့မဟုတ် တိကျသော လမ်းညွှန်မှု သို့မဟုတ် ရှင်းလင်းချက်တို့ကို မလိုအပ်ဘဲ ချက်ချင်း နားလည်ပေလိမ့်မည်။ သင်၏ အတွေ့အကြုံအတိုင်းသာ ချက်ပြုတ်လော့၊ ယင်းသည် ရိုးရှင်းသော ကိစ္စရပ်တစ်ခု ဖြစ်သည်။ သို့သော် အရိုးရှင်းဆုံးသော အမှုအရာသည်ပင် လူတို့အတွက် မအောင်မြင်နိုင်သောအရာ ဖြစ်သည်၊ အကြောင်းမှာ သူတို့၌ ဖောက်ပြန်ပျက်စီးသော စိတ်သဘောထားများနှင့် တစ်ကိုယ်ကောင်းဆန်မှု ရှိသောကြောင့် ဖြစ်သည်။ ငါက အဆီမများလွန်းစေနှင့်ဟု ပြောသော်လည်း ချက်ပြုတ်စဉ်အတွင်း သူတို့သည် ဟင်းသီးဟင်းရွက် ပွဲသေးတစ်ပွဲစာအတွက် ဆီ ဇွန်းကြီးတစ်ဇွန်းအပြည့်ကို အသုံးပြုကြသည်၊ စင်စစ်အားဖြင့် ယင်းကို ဆီကြော်ကြော်ကာ အလွန် ဆီများသော အရသာကို ဖြစ်စေလေသည်။ ငါက အငန်များလွန်းခြင်း မရှိစေနှင့်ဟု ပြောလျှင် သူတို့သည် ဆား အနည်းငယ်မျှသာ ထည့်သဖြင့် ယင်းသည် အရသာမရှိလုနီးပါး ဖြစ်သွားသည်။ ထိုမျှများပြားသော ဆီနှင့် ထိုမျှပေါ့ပျက်သော အရသာဖြင့် ယင်းသည် စားချင်စဖွယ် ဖြစ်နေနိုင်ဦးမည်လော။ ထမင်းချက်သည် ဤသေးငယ်သော အမှုအရာကိုပင် မှန်ကန်စွာ မလုပ်ဆောင်နိုင်ဘဲ “ဘုရား၏ ရည်ရွယ်ချက်များကို နားလည်ရန် ခက်ခဲလှပါသည်။ ဘုရားမိန့်တော်မူသော စကားလုံးတိုင်းသည် သမ္မာတရား ဖြစ်သည်၊ လူတို့အတွက် လက်တွေ့လုပ်ဆောင်ရန် ခက်ခဲလှပါသည်” ဟုပင် ဆိုသည်။ “လက်တွေ့လုပ်ဆောင်ရန် ခက်ခဲသည်” ဟူသည် အဘယ်အရာကို ဆိုလိုသနည်း။ ယင်းမှာ လက်တွေ့လုပ်ဆောင်ရန် ခက်ခဲခြင်း မဟုတ်ဘဲ သင်က လက်တွေ့မလုပ်ဆောင်ခြင်း ဖြစ်သည်။ သင်၏ တစ်ကိုယ်ကောင်းဆန်မှုသည် အလွန် ကြီးမားသည်၊ သင့်၌ သင်၏ ကိုယ်ပိုင် ရည်ရွယ်ချက်များနှင့် ပုဂ္ဂိုလ်ရေးဆိုင်ရာ မသန့်စင်မှု အစဉ်သဖြင့် ရှိသည်။ သင်သည် သင်၏ ကိုယ်ပိုင် အလိုဆန္ဒအတိုင်း အမှုအရာများကို လုပ်ဆောင်ရန် အစဉ်သဖြင့် လိုလားပြီး အရာခပ်သိမ်းကို သင့်အကြိုက်သင် လုပ်ဆောင်သည်။ ငါက “ချက်ပြုတ်သည့်အခါ စပ်သော ဟင်းလျာများကို မချက်နှင့်။ အကယ်၍ သင်တို့အားလုံး စပ်သော အစားအစာကို ကြိုက်နှစ်သက်ပါက ငါ့အတွက် မစပ်သော ဟင်းလျာအချို့ကို ချက်ပြုတ်လော့” ဟု ပြောသည်။ သို့သော် ချက်ပြုတ်သောအခါ သူတို့သည် ယင်းကို မရမက စပ်အောင် ချက်ပြုတ်ကြသည်။ သူတို့သည် စိတ်အားထက်သန်စွာ စားသုံးပြီး ယင်းသည် ကောင်းသည်ဟု ထင်မှတ်ကြသည်။ ငါက “ယင်းကို စပ်အောင် မချက်ရန် သင့်ကို ငါ ပြောခဲ့သည်။ အဘယ်ကြောင့် သင် စပ်အောင် ချက်ခဲ့သနည်း” ဟု ပြောသည်။ “ဤဟင်းလျာသည် စပ်ရန် လိုအပ်ပါသည်။ အစပ်မပါဘဲ ယင်းသည် အရသာနှင့်မပြည့်စုံပါ၊ အစပ်မပါလျှင် ယင်း၏ အရသာကို ဆုံးရှုံးစေပါသည်” ဤသည်မှာ မည်သို့သော ပုဂ္ဂိုလ်မျိုး ဖြစ်သနည်း။ ထိုသူ၌ ကောင်းသော ရည်ရွယ်ချက်များ ရှိပါသလော။ အချို့သောသူတို့သည် အသားစားသုံးရန် နှစ်သက်ကြသည်၊ ငါက “အကယ်၍ သင်သည် အသားကို ကြိုက်နှစ်သက်ပါက သင့်အတွက်သင် အသားများသော ဟင်းလျာတစ်ခုကို ချက်ပြုတ်လော့။ ငါ့အတွက် သင် ချက်ပြုတ်သော ဟင်းလျာများတွင် အသားကို လျှော့ထည့်ပါ၊ သို့မဟုတ် ငါ့အတွက် ဟင်းသီးဟင်းရွက် ဟင်းလျာတစ်ခုသာ ချက်ပေးပါ” ဟု ပြောသည်။ သူတို့သည် အလွယ်တကူ သဘောတူကြသော်လည်း ချက်ပြုတ်သောအခါ ငါ့တောင်းဆိုချက်ကို ဂရုမစိုက်ဘဲ အိုးထဲသို့ အသားတုံးကြီးများကို ထည့်ကြကာ ငရုတ်သီးများကိုပင် ထည့်ကြသည်။ အသားသည် အဆီများပြီးသား ဖြစ်နေသော်လည်း သူတို့သည် ယင်းကို ကြော်နေဆဲဖြစ်ကာ အရာခပ်သိမ်းကို သူတို့နှစ်သက်သည့် အလွန်ပြင်းထန်သော အနံ့အရသာအတိုင်း ပြုလုပ်ကြသည်။ အကယ်၍ ငါသည် သူတို့ကို ဤသို့ လုပ်ဆောင်ခွင့်မပေးပါက ယင်းသည် သူတို့အတွက် လက်ခံနိုင်ဖွယ် မရှိပေ၊ သူတို့က “ကိုယ်တော့်ကို စိတ်ကျေနပ်အောင် လုပ်ရသည်မှာ အလွန် ခက်ခဲလွန်းပါသည်။ ဤသည်မှာ အရသာရှိလှသည်။ အခြားသူတိုင်း ယင်းကို စားသုံးကြသည်၊ အဘယ်ကြောင့် ကိုယ်တော် မစားသုံးသနည်း။ ကျွန်ုပ်သည် ဤသည်ကို ကိုယ်တော့်အတွက် ချက်ပြုတ်ပေးနေခြင်း မဟုတ်ပါလော။ ပို၍ စားသုံးခြင်းသည် ကိုယ်တော်၏ ကျန်းမာရေးအတွက် ကောင်းပါသည်၊ ယင်းသည် စွမ်းအင်ကို ပေးပါသည်။ ကိုယ်တော် ကျန်းမာပါက တရားဒေသနာများကို ပို၍ မဟောကြားနိုင်ပေဘူးလော။ ကျွန်ုပ်သည် ကိုယ်တော့်အတွက်ကိုလည်းကောင်း၊ အသင်းတော်ရှိ ညီအစ်ကိုမောင်နှမများအတွက်ကိုလည်းကောင်း ထည့်သွင်းစဉ်းစားနေခြင်း ဖြစ်ပါသည်” ဟုပင် ဆိုကြသည်။ ဤပုဂ္ဂိုလ်သည် အလွန် ဒုက္ခပေးသောသူ မဟုတ်လော။ သူတို့သည် အရာခပ်သိမ်း၌ ပြင်းပြသော လိုအင်ဆန္ဒများ ရှိကြသည်၊ အရာခပ်သိမ်း၌ သူတို့၏ ကိုယ်ပိုင် ထင်မြင်ယူဆချက်များနှင့် စိတ်ကူးများ ရှိကြသည်။ သူတို့၌ သမ္မာတရား တစ်စုံတစ်ရာ ရှိသည် မရှိသည်ကို မဆိုထားနှင့်ဦး၊ သူတို့၌ အခြေခံအကျဆုံးသော လူ့သဘာဝပင် မရှိကြပေ။ ဤသည်မှာ ရိုးသားစစ်မှန်ခြင်း ဖြစ်သလော။ (မဟုတ်ပါ)။ အစပိုင်းတွင် ဤပုဂ္ဂိုလ်က ငါ့ကို မေးမြန်းသောအခါ သူသည် သင့်တင့်လျောက်ပတ်သူ ဖြစ်ပုံရသည်၊ သူသည် အတော်အတန် ကောင်းမွန်စွာ ချက်ပြုတ်နိုင်လောက်သည်ဟု ခံစားခဲ့ရသည်။ သို့သော် အစားအစာကို တည်ခင်းပြီးသည်နှင့် ငါ သိပြီ။ သူသည် ကောင်းမွန်စွာ စကားပြောဆိုသည်၊ ထိုသူသည် ငါ့အပေါ် ကောင်းမွန်ပုံရသည်၊ သို့သော် အမှန်တကယ်တွင် ထိုသူသည် တစ်ကိုယ်ကောင်းဆန်ပြီး စက်ဆုပ်ဖွယ်ကောင်းသော သူတစ်ဦးမျှသာ ဖြစ်သည်။

ငါ မကြာခဏ တွေ့မြင်ရသော ဤကဲ့သို့သော ပုဂ္ဂိုလ်တစ်ဦး ရှိသည်၊ သူသည် ပင်ကိုအားဖြင့် တွက်ချက်တတ်ပြီး ဉာဏ်ထက်မြက်သည်။ သူသည် ငါနှင့် ပေါင်းသင်းဆက်ဆံသောအခါ ငါ ဆေးသောက်မည်ပြုသည်နှင့် သူက ရေကို ယူဆောင်လာပြီး ဖြစ်သည်။ ငါ အပြင်ထွက်တော့မည်ဆိုလျှင် သူသည် ချက်ချင်းပင် ငါ့အိတ်ကို ဆွဲယူလိုက်သည်၊ ပြီးလျှင် အပြင်၌ အေးသည်ကို မြင်လျှင် သူသည် ပဝါနှင့် လက်အိတ်တို့ကိုလည်း ယူဆောင်လာပေးသည်။ ငါ စိတ်ထဲ၌ တွေးနေသည်။ သူသည် လျင်မြန်ပါသည်၊ သို့သော် အဘယ်ကြောင့် ဤမျှ အနေရခက်သည်ဟု ခံစားရသနည်း။ ငါ အပြင်သွားသည်ဖြစ်စေ၊ အိမ်ထဲဝင်သည်ဖြစ်စေ၊ အဝတ်အစားများဝတ်သည်ဖြစ်စေ၊ ဖိနပ်များစီးသည်ဖြစ်စေ၊ ဦးထုပ်ဆောင်းသည်ဖြစ်စေ ငါ့ထက် ပို၍ လျင်မြန်သော တစ်စုံတစ်ဦး အစဉ်သဖြင့် ရှိနေသည်။ ငါ၏ စိတ်ခံစားချက်သည် အဘယ်အရာ ဖြစ်မည်ဟု သင်တို့ ထင်ကြသနည်း။ ငါ ပျော်ရွှင်သင့်သလော သို့မဟုတ် စိတ်အနှောင့်အယှက် ဖြစ်သင့်သလော။ (စိတ်အနှောင့်အယှက် ဖြစ်သင့်ပါသည်။) သင်တို့သည် ဤသို့သော အပြုအမူကြောင့် စိတ်အနှောင့်အယှက် ဖြစ်ကြမည်လော။ (ဖြစ်ကြပါမည်။) အကယ်၍ သင်တို့အားလုံး စိတ်အနှောင့်အယှက် ဖြစ်မည်ဆိုလျှင် ငါ စိတ်အနှောင့်အယှက် ဖြစ်သည်ဟု သင်တို့ ထင်ပါသလော။ (ထင်ပါသည်။) အချို့သောသူတို့သည် ငါ့အတွက် ဤအရာအားလုံးကို လုပ်ဆောင်ပြီးသည့်နောက် မိမိတို့ကိုယ်ကို အတော်ပင် ကျေနပ်လျက် ဂုဏ်ယူသည်ဟု ခံစားကြကာ ဤသို့ ဆိုကြသည်။ “ကျွန်ုပ် အလုပ်လုပ်နေစဉ်အခါက ကျွန်ုပ်၏ အထက်အရာရှိသည် ကျွန်ုပ်ကို နှစ်သက်ခဲ့သည်။ ကျွန်ုပ် သွားလေရာရာ၌ လူတို့သည် ကျွန်ုပ်ကို နှစ်သက်ကြသည်၊ အကြောင်းမှာ ကျွန်ုပ်သည် လျင်မြန်စွာနှင့် ထိရောက်စွာ တွေးနိုင်သောကြောင့် ဖြစ်သည်” ဟူ၍ ဖြစ်လေသည်။ ဆိုလိုရင်းမှာ သူတို့သည် ဖော်လံဖားပုံ၊ မျက်နှာလိုမျက်နှာရလုပ်ပုံနှင့် မြှောက်ပင့်ပြောဆိုပုံတို့ကို သိရှိကြသည်၊ သူတို့သည် ထိုင်းမှိုင်းခြင်း၊ နှေးကွေးခြင်း၊ သို့မဟုတ် မိုက်မဲခြင်း မရှိကြ၊ သူတို့သည် လျင်မြန်စွာ လှုပ်ရှားပြီး ဉာဏ်ထက်မြက်ကြသည်၊ ထို့ကြောင့် သူတို့ သွားလေရာရာ၌ နှစ်သက်ခြင်း ခံကြရသည် ဟူ၍ ဖြစ်သည်။ သူတို့က လူတိုင်း သူတို့ကို နှစ်သက်သည်ဟု ဆိုသည်၊ ဆိုလိုရင်းမှာ ငါလည်း သူတို့ကို နှစ်သက်သင့်သည် ဟူ၍ ဖြစ်သည်။ ငါ သူတို့ကို နှစ်သက်သလော။ ငါသည် သူတို့ကြောင့် လုံးလုံးလျားလျား စိတ်အနှောင့်အယှက် ဖြစ်ရသည်။ ငါသည် ထိုသို့သော လူတို့ကို မြင်သည့်အခါတိုင်း ရှောင်ရှားသည်။ အခြားသောသူများလည်း ရှိကြသည်၊ သူတို့သည် လောက၌ မြေအောက်လောက ခေါင်းဆောင်များနှင့် လူဆိုးကြီးများ၏ ကိုယ်ရံတော်များနှင့် ဖော်လံဖားသော လက်ပါးစေများက ကားတံခါးများကို ဖွင့်ပေးပုံနှင့် သူတို့၏ ခေါင်းဆောင်များ၏ ဦးခေါင်းကို ကာကွယ်ပေးပုံတို့ကို မြင်တွေ့သည့်အခါ ငါ့အပေါ်၌လည်း ထိုနည်းအတိုင်း ပြုလုပ်ကြသည်။ ငါ ကားထဲသို့ မဝင်ရသေးမီပင် သူတို့သည် တံခါးဖွင့်ရန် လက်လှမ်းကြပြီး ထို့နောက် သူတို့၏ လက်ဖြင့် ငါ့ဦးခေါင်းကို ကာကွယ်ပေးကြကာ ဘာသာတရားမရှိသူတို့က ခေါင်းဆောင်ကြီးတစ်ဦးကို ဆက်ဆံသည့်နည်းအတိုင်း ငါ့ကို ဆက်ဆံကြသည်။ ငါသည် ဤလူတို့ကို ရွံရှာမုန်းတီးသည်။ သမ္မာတရားကို စိုးစဉ်းမျှပင် မလိုက်စားသော ဤလူတို့၌ တစ်ကိုယ်ကောင်းဆန်သော၊ စက်ဆုပ်ဖွယ်ဖြစ်သော၊ ညစ်ညမ်းသော လူ့သဘာဝ ရှိကြပြီး သူတို့သည် ရှက်ကြောက်စိတ် တစ်စက်မျှ မရှိကြချေ။ သင်သည် အခြားသူများနှင့် ပေါင်းသင်းဆက်ဆံသောအခါ အဆင့်အတန်းနှင့် ကျော်ကြားမှု ရှိသောသူတို့ကို မျက်နှာလိုမျက်နှာရ လုပ်ပြီး မြှောက်ပင့်ပြောဆိုကာ မရပ်မနား ဖော်လံဖားပါက ဖြောင့်မတ်သောသူ အချို့ပင်လျှင် ယင်းကို ရွံရှာဖွယ်ဟု မြင်ကြပြီး ထိုသို့သော လူတို့ကို အထင်အမြင်သေးကြသည်။ အကယ်၍ သင်သည် ငါ့အပေါ် ဤသို့ ဆက်ဆံပါက ငါသည် ယင်းကို ရွံရှာဖွယ်ဟု သာ၍ပင် မြင်လေသည်။ ဤနည်းအတိုင်း ငါ့အပေါ် ဘယ်တော့မျှ မဆက်ဆံနှင့်။ ငါ ယင်းကို မလိုအပ်၊ ယင်းသည် ငါ့ကို ရွံရှာစေသည်။ ငါ လိုအပ်သောအရာမှာ သင်၏ မျက်နှာလိုမျက်နှာရ လုပ်ခြင်း၊ မြှောက်ပင့်ပြောဆိုခြင်း၊ သို့မဟုတ် ဖော်လံဖားခြင်းတို့ မဟုတ်ပေ။ ငါ လိုအပ်သည်မှာ သင်သည် ငါ့အပေါ် ရိုးသားစစ်မှန်စေရန်၊ ငါတို့ တွေ့ဆုံသောအခါ စိတ်ရင်းအတိုင်း ပြောဆိုရန်၊ သင်၏ နားလည်မှု၊ အတွေ့အကြုံများနှင့် ချို့ယွင်းချက်များကို ပြောဆိုရန်၊ သင်၏ တာဝန်ကို ထမ်းဆောင်ခြင်းဖြစ်စဉ်အတွင်း သင် ဖော်ထုတ်သော ဖောက်ပြန်ပျက်စီးမှုကို ဆွေးနွေးရန်နှင့် သင်၏ အတွေ့အကြုံများ၌ သင် မမီဟု ခံစားရသော အမှုအရာများကို ဆွေးနွေးရန် ဖြစ်သည်။ သင်သည် ဤအမှုအရာအားလုံးနှင့်ပတ်သက်၍ ရှာဖွေခြင်းနှင့် မိတ်သဟာယဖွဲ့ခြင်းတို့၌ ပါဝင်ဆောင်ရွက်နိုင်ပြီး ယင်းတို့ကို စူးစမ်းလေ့လာမှုလည်း ပြုနိုင်သည်။ ငါတို့ မည်သည့်အကြောင်းအရာကို မိတ်သဟာယဖွဲ့သည်ဖြစ်စေ၊ စကားပြောဆိုသည်ဖြစ်စေ၊ သင်သည် ရိုးသားစစ်မှန်ရန် လိုအပ်ပြီး ဤသို့သော စိတ်နှလုံးနှင့် သဘောထား ရှိရန် လိုအပ်သည်။ မျက်နှာလိုမျက်နှာရ လုပ်ခြင်း၊ ဖော်လံဖားခြင်း၊ မြှောက်ပင့်ပြောဆိုခြင်း၊ သို့မဟုတ် မျက်နှာချိုသွေးခြင်းတို့ဖြင့် သင်သည် အကောင်းမြင် ခံရနိုင်သည်ဟု မထင်မှတ်နှင့်။ ယင်းမှာ လုံးဝ အကျိုးမရှိပေ။ ဆန့်ကျင်ဘက်အားဖြင့် ထိုသို့သော အပြုအမူသည် မည်သည့်အကျိုးကျေးဇူးမျှ မဆောင်ကြဉ်းနိုင်ရုံသာမက သင့်အား ကြီးစွာသော အရှက်ရခြင်းကို ဖြစ်စေနိုင်ပြီး သင်၏ မိုက်မဲမှုကို ဖော်ထုတ်နိုင်ဖွယ်လည်း ရှိသည်။

ခရစ်တော်အပေါ်၌ပင် ရိုးသားစစ်မှန်စွာ မဆက်ဆံနိုင်သောသူတို့သည် မည်သည့်လူစားမျိုး ဖြစ်ကြသနည်း။ အကယ်၍ သင်သည် အခြားသူတို့ကို ဆက်ဆံရာ၌ ရိုးသားစစ်မှန်ပါက သူတို့သည် သင်၏ စစ်မှန်သော အခြေအနေကို သိရှိသွားပြီး သင့်ကို ဒုက္ခပေးမည်ကို သင် စိုးရိမ်သည်၊ သူတို့သည် သင့်ကို လှည့်ဖြားမည်၊ အသုံးချမည်၊ သရော်မည်၊ သို့မဟုတ် အထင်အမြင်သေးမည်ကို သင် စိုးရိမ်သည်။ သို့သော်လည်း ခရစ်တော်အပေါ် ရိုးသားစစ်မှန်ခြင်း၌ သင်သည် အဘယ်အရာကို ကြောက်ရွံ့နေသနည်း။ အကယ်၍ သင်၏ စိတ်နှလုံးထဲ၌ ဤသံသယများ ရှိနေပါက ယင်းသည် ပြဿနာတစ်ရပ် ဖြစ်သည်။ အကယ်၍ သင်သည် ရိုးသားစစ်မှန်နိုင်ခြင်း မရှိပါက ရိုးသားပွင့်လင်းစွာ မဆက်ဆံနိုင်ပါက၊ ယင်းသည်လည်း သင်၏ ပြဿနာ ဖြစ်သည်၊ ယင်းသည် သင် သမ္မာတရားကို လိုက်စားပြီး ပြောင်းလဲရန် ကြိုးပမ်းအားထုတ်သင့်သော ကဏ္ဍတစ်ခု ဖြစ်သည်။ အကယ်၍ သင်သည် သင်၏ ရှေ့မှောက်ရှိ ပုဂ္ဂိုလ်မှာ သင် ယုံကြည်သော ဘုရားသခင်၊ သင် နောက်လိုက်သော ဘုရားသခင် ဖြစ်သည်ဟု အမှန်တကယ် ယုံကြည်ပြီး အသိအမှတ်ပြုပါက သင်သည် သူ့အပေါ် မျက်နှာလိုမျက်နှာရ လုပ်ခြင်း၊ မြှောက်ပင့်ပြောဆိုခြင်း၊ နှင့် နားဝင်ချိုသော စကားများ ပြောဆိုခြင်းတို့ဖြင့် ပေါင်းသင်းဆက်ဆံခြင်း မရှိသည်မှာ သာ၍ ကောင်းပေသည်။ ထိုအစား ရိုးသားစစ်မှန်လော့၊ သင်၏ စိတ်ရင်းအတိုင်း ပြောဆိုပြီး အချက်အလက်မှန် စကားများကို ပြောဆိုလော့။ အမှန်တရားကို ဖုံးကွယ်စေသော စကားများကို မပြောနှင့်၊ သို့မဟုတ် မုသားများဖြစ်စေ၊ ဖုံးဖိထားသော စကားများဖြစ်စေ မပြောနှင့်၊ သို့မဟုတ် လှည့်ကွက်များလုပ်ခြင်း သို့မဟုတ် လျှို့ဝှက်ကြံစည်ခြင်းများကို မလုပ်ဆောင်နှင့်။ ဤသည်မှာ ခရစ်တော်နှင့် ပေါင်းသင်းဆက်ဆံရန် အကောင်းဆုံးသော နည်းလမ်းဖြစ်သည်။ သင်တို့သည် ဤသည်ကို လုပ်ဆောင်နိုင်ကြမည်လော။ မည်သည့်အရာက အပြုသဘောဆောင်သနည်း၊ ရိုးသားစစ်မှန်ခြင်းလော သို့မဟုတ် မျက်နှာလိုမျက်နှာရ လုပ်ခြင်းနှင့် မြှောက်ပင့်ပြောဆိုခြင်းလော။ (ရိုးသားစစ်မှန်ခြင်း ဖြစ်ပါသည်။) ရိုးသားစစ်မှန်ခြင်းသည် အပြုသဘောဆောင်သည်၊ တစ်ချိန်တည်းတွင် မျက်နှာလိုမျက်နှာရ လုပ်ခြင်းနှင့် မြှောက်ပင့်ပြောဆိုခြင်းတို့သည် အပျက်သဘောဆောင်သည်။ အကယ်၍ လူတို့သည် ရိုးသားစစ်မှန်ခြင်းကဲ့သို့သော အပြုသဘောဆောင်သည့် အမှုအရာတစ်ခုကို မဖြစ်မြောက်နိုင်ပါက ယင်းသည် သူတို့ထဲရှိ ပြဿနာတစ်ရပ်၊ ဖောက်ပြန်ပျက်စီးသော စိတ်သဘောထားတစ်ခုကို ဖော်ပြသည်။ ငါ၏ ဤတောင်းဆိုချက်သည် လွန်ကဲပါသလော။ အကယ်၍ သင်တို့က ယင်းသည် လွန်ကဲသည်ဟု ထင်မှတ်ပါက၊ အကယ်၍ ငါသည် ထိုသို့သော ဆက်ဆံမှုကို မခံထိုက်ဟု၊ သင်တို့သည် ငါ့ကို ထိုသို့သောရိုးသားစစ်မှန်သော နည်းလမ်းဖြင့်လည်းကောင်း၊ ထိုသို့သော ရိုးသားစစ်မှန်သော သဘောထားဖြင့်လည်းကောင်း ပေါင်းသင်းဆက်ဆံရန် မထိုက်တန်ဟု သင်တို့ ထင်မှတ်ပါက သင်တို့၌ သာ၍ ကောင်းသော နည်းစနစ်၊ သာ၍ ကောင်းသော နည်းလမ်းတစ်ခု ရှိသလော။ (မရှိပါ။) သို့ဆိုလျှင် ဤလုပ်နည်းကိုင်နည်းကို လက်တွေ့လုပ်ဆောင်ကြလော့။ ဤအချက်နှင့်ပတ်သက်၍ ငါတို့၏ မိတ်သဟာယကို ဤနေရာ၌ အဆုံးသတ်ကြပါစို့။

ခ။ သိလိုစိတ် ပြင်းပြမှုနှင့်အတူ စေ့စေ့စပ်စပ် ကြည့်ရှုစစ်ဆေးကာ ခွဲခြမ်းစိတ်ဖြာခြင်း

ဆက်လက်၍ ဒုတိယအချက်ဖြစ်သည့် သိလိုစိတ် ပြင်းပြမှုနှင့်အတူ စေ့စေ့စပ်စပ် ကြည့်ရှုစစ်ဆေးကာ ခွဲခြမ်းစိတ်ဖြာခြင်းကို ပြောကြမည်။ ဤအချက်သည် နားလည်ရန် လွယ်ကူသလော။ လူ့ဇာတိခံ ဘုရားသခင်၏ လုပ်ဆောင်ချက်များနှင့် နှုတ်ကပတ်တော်များအပေါ်၌ဖြစ်စေ၊ ကိုယ်တော်၏ စကားတစ်လုံးချင်းနှင့် အပြုအမူတိုင်းတွင် ဖော်ပြသော ပင်ကိုစရိုက် သို့မဟုတ် စိတ်သဘောထားအပေါ်၌ဖြစ်စေ၊ ကိုယ်တော်၏ နှစ်သက်မှုများအပေါ်၌ပင်ဖြစ်စေ သာမန် လူများသည် ဤအရာများကို မှန်ကန်စွာ သဘောထားပြုမူသင့်သည်။ ဘုရားသခင်နောက်ကို အမှန်တကယ် လိုက်လျှောက်ပြီး သမ္မာတရားကို လိုက်စားသောသူတို့သည် ခရစ်တော်၏ ဤပြင်ပ ထုတ်ဖော်ပြချက်များကို ကိုယ်တော်၏ ဇာတိပကတိ၏ သာမန်ဘက်ခြမ်းအဖြစ် မှတ်ယူကြသည်။ ခရစ်တော် မိန့်ကြားသော နှုတ်ကပတ်တော်များနှင့်ပတ်သက်၍ သူတို့သည် ယင်းတို့ကို သမ္မာတရားအဖြစ် မှတ်ယူသော သဘောထားဖြင့် နားထောင်ပြီး နားလည်သဘောပေါက်နိုင်ကြသည်၊ ဤနှုတ်ကပတ်တော်များမှ ဘုရားသခင်၏ ရည်ရွယ်ချက်များကို နားလည်ကြသည်၊ လက်တွေ့လုပ်ဆောင်ခြင်း စည်းမျဉ်းများကို နားလည်ကြသည်၊ ပြီးလျှင် သမ္မာတရား လက်တွေ့ကျမှုသို့ ဝင်ရောက်ရန် လက်တွေ့လုပ်ဆောင်ခြင်း လမ်းကြောင်းတစ်ခုကို ရှာတွေ့ကြသည်။ သို့သော် အန္တိခရစ်များမှာမူ ကွဲပြားစွာ ပြုမူကြသည်။ သူတို့သည် ခရစ်တော် စကားပြောဆိုခြင်းနှင့် ပြုမူဆောင်ရွက်ခြင်းကို စောင့်ကြည့်လေ့လာသောအခါ သူတို့၏ စိတ်နှလုံးထဲ၌ ပါရှိသောအရာမှာ လက်ခံခြင်း သို့မဟုတ် ကျိုးနွံနာခံခြင်း မဟုတ်ဘဲ စေ့စေ့စပ်စပ် ကြည့်ရှုစစ်ဆေးခြင်း ဖြစ်သည် “ဤနှုတ်ကပတ်တော်များသည် အဘယ်မှ လာသနည်း။ ယင်းတို့ကို မည်သို့ ပြောဆိုသနည်း။ တစ်ကြောင်းပြီးတစ်ကြောင်း ပြောဆိုခြင်းဖြစ်သည်၊ ယင်းတို့သည် ကြိုတင်ကြံစည်ထားခြင်းလော သို့မဟုတ် သန့်ရှင်းသော ဝိညာဉ်တော်၏ တိုက်တွန်းနှိုးဆော်မှုကြောင့်လော။ ဤနှုတ်ကပတ်တော်များသည် ကြိုတင် သင်ယူထားခြင်းလော သို့မဟုတ် ကြိုတင် ပြင်ဆင်ထားခြင်းလော။ အဘယ်ကြောင့် ကျွန်ုပ် မသိရသနည်း။ ဤနှုတ်ကပတ်တော်အချို့သည် အတော်ပင် သာမန်ဖြစ်ပုံရသည်၊ ရိုးရိုးစကားမျှသာ ဖြစ်ပုံရသည်။ ဤသည်မှာ ဘုရား မဟုတ်သည့်ပုံစံဟု ထင်ရသည်၊ ဘုရားသခင်သည် အမှန်တကယ် ဤမျှ သာမန်အားဖြင့်၊ ဤမျှ ပုံမှန်အားဖြင့် စကားပြောဆိုသလော။ စေ့စေ့စပ်စပ် ကြည့်ရှုစစ်ဆေးခြင်းမှတစ်ဆင့် ကျွန်ုပ် နားမလည်နိုင်ပါ၊ ထို့ကြောင့် သူ နောက်ကွယ်၌ အဘယ်အရာ လုပ်ဆောင်သည်ကို ကျွန်ုပ် စောင့်ကြည့်လေ့လာမည်။ သူ သတင်းစာများ ဖတ်သလော။ သူသည် ကျော်ကြားသော စာအုပ်များ တစ်စုံတစ်ရာကို ဖတ်ဖူးသလော။ သူသည် သဒ္ဒါကို လေ့လာသလော။ သူသည် အများအားဖြင့် မည်သို့သော လူအမျိုးအစားများနှင့် ထိတွေ့ဆက်ဆံသနည်း” ဟု သူတို့က လေ့လာစူးစမ်းကြသည်။ သူတို့သည် သမ္မာတရားကို ကျိုးနွံနာခံခြင်း သို့မဟုတ် လက်ခံခြင်း သဘောထားကို မကိုင်စွဲကြဘဲ သိပ္ပံဆိုင်ရာ သုတေသန ပြုလုပ်သော သို့မဟုတ် ပညာရပ်ဆိုင်ရာ ဘာသာရပ်များကို လေ့လာသော ပညာရှင်တစ်ဦး၏ သဘောထားဖြင့် ခရစ်တော်ကို စေ့စေ့စပ်စပ် ကြည့်ရှုစစ်ဆေးကြသည်။ သူတို့သည် ခရစ်တော်၏ နှုတ်ကပတ်တော်များ၏ အကြောင်းအရာနှင့် သူ၏ ပြောဆိုပုံ၊ ခရစ်တော် ပြောဆိုသောစကားကို နားထောင်သူများ၊ ထို့အတူ ကိုယ်တော် စကားပြောဆိုသည့် အခေါက်စီတိုင်းတွင် ကိုယ်တော်၏ သဘောထားနှင့် ရည်ရွယ်ချက်တို့ကို စေ့စေ့စပ်စပ် ကြည့်ရှုစစ်ဆေးကြသည်။ ခရစ်တော် စကားပြောဆိုသည့်အခါတိုင်း သို့မဟုတ် ပြုမူဆောင်ရွက်သည့်အခါတိုင်း သူတို့၏ နားများသို့ ရောက်ရှိသမျှသော အရာတိုင်း၊ သူတို့ မြင်တွေ့နိုင်သမျှသော အရာတိုင်းနှင့် သူတို့ ကြားသိသမျှသော အရာတိုင်းသည် သူတို့၏ စေ့စေ့စပ်စပ် ကြည့်ရှုစစ်ဆေးခြင်း ခံရသောအရာများ ဖြစ်လာကြသည်။ သူတို့သည် ခရစ်တော်မှ မိန့်ကြားသော စကားလုံးတိုင်းနှင့် ဝါကျတိုင်း၊ သူ ပြုလုပ်သော လုပ်ဆောင်ချက်တိုင်း၊ သူ ကိုင်တွယ်သော ပုဂ္ဂိုလ်တစ်ဦးချင်းစီတိုင်း၊ လူတို့ကို သူ ဆက်ဆံပုံ၊ သူ၏ အပြောအဆိုနှင့် အမူအရာ၊ အကြည့်နှင့် မျက်နှာ အမူအရာများ၊ သူ၏ နေထိုင်မှု အလေ့အကျင့်များနှင့် လုပ်ရိုးလုပ်စဉ်များအပြင် အခြားသူတို့နှင့် ပေါင်းသင်းဆက်ဆံပုံနှင့် အခြားသူတို့အပေါ် ထားရှိသော သဘောထားများ စသည့် ဤအရာအားလုံးကို သူတို့သည် စေ့စေ့စပ်စပ် ကြည့်ရှုစစ်ဆေးကြသည်။ ဤသို့ စေ့စေ့စပ်စပ် ကြည့်ရှုစစ်ဆေးခြင်းမှတစ်ဆင့် ခရစ်တော်ကို ငါ မည်သို့ပင် ကြည့်ပါစေ၊ သူသည် ပုံမှန် လူ့သဘာဝကို ပိုင်ဆိုင်ပုံရသည်၊ သူသည် အတော်ပင် သာမန်ဖြစ်ပြီး သမ္မာတရားကို ဖော်ပြနိုင်စွမ်းမှလွဲ၍ အထူးသဖြင့် ထူးခြားသော အရာတစ်ခုမျှ သူ၌ မရှိပေ။ ဤသည်မှာ အမှန်တကယ် လူ့ဇာတိခံ ဘုရား ဖြစ်နိုင်မည်လော ဟူ၍ အန္တိခရစ်တို့က ကောက်ချက်ချကြသည်။ သူတို့ မည်မျှပင် စေ့စေ့စပ်စပ် ကြည့်ရှုစစ်ဆေးစေကာမူ သူတို့သည် တိကျသော ကောက်ချက်တစ်ခုကို မရရှိနိုင်ကြချေ။ သူတို့ မည်မျှပင် စေ့စေ့စပ်စပ် ကြည့်ရှုစစ်ဆေးစေကာမူ ခရစ်တော်သည် သူတို့၏ စိတ်နှလုံးထဲ၌ သူတို့ အသိအမှတ်ပြုသော ဘုရားသခင် ဟုတ်မဟုတ်ကို သူတို့ သေချာအောင် လေ့လာစိစစ်နိုင်ခြင်း မရှိကြ။ သူတို့သည် ခရစ်တော်ကို စေ့စေ့စပ်စပ် ကြည့်ရှုစစ်ဆေးသောသူများ ဖြစ်ကြသည်၊ ဘုရားသခင်၏ အမှုကို တွေ့ကြုံခံစားသောသူများ မဟုတ်ကြပေ။ သူတို့သည် ဘုရားသခင်နှင့် ပတ်သက်သော အသိပညာကို မည်သို့ ရရှိနိုင်မည်နည်း။

အန္တိခရစ်တို့သည် ခရစ်တော်ကို စေ့စေ့စပ်စပ် ကြည့်ရှုစစ်ဆေးရာ၌ ဘုရားသခင်၏ ကြီးကျယ်ခမ်းနားခြင်းကို မမြင်နိုင်ကြပေ၊ ဘုရားသခင်၏ ဖြောင့်မတ်ခြင်း၊ အနန္တတန်ခိုးနှင့် အာဏာစက်တို့ကို မမြင်နိုင်ကြပေ။ သူတို့ မည်သို့ပင် စေ့စေ့စပ်စပ် ကြည့်ရှုစစ်ဆေးစေကာမူ ခရစ်တော်သည် ဘုရားသခင်၏ အနှစ်သာရကို ပိုင်ဆိုင်သည်ဟူသော ကောက်ချက်ကို သူတို့ မရရှိနိုင်ကြပေ။ သူတို့သည် ဤသည်ကို ထွင်းဖောက်မြင်နိုင်စွမ်းနှင့် နားလည်နိုင်စွမ်း မရှိကြပေ။ အချို့သောသူများက “သင် ထွင်းဖောက်မြင်နိုင်ခြင်း သို့မဟုတ် နားလည်နိုင်ခြင်း မရှိသည့်နေရာ၌ ရှာဖွေရန် သမ္မာတရား ရှိသည်” ဟု ဆိုကြသည်။ ထိုအခါ အန္တိခရစ်သည် “ကျွန်ုပ်သည် ဤနေရာ၌ ရှာဖွေရန် မည်သည့်သမ္မာတရားကိုမျှ မမြင်ပါ၊ နက်နက်ရှိုင်းရှိုင်း စေ့စေ့စပ်စပ် ကြည့်ရှုစစ်ဆေးရန် ထိုက်တန်သော သံသယဖြစ်ဖွယ် အသေးစိတ်အချက်များသာ ရှိပါသည်” ဟု တုံ့ပြန်ပေမည်။ သူတို့၏ စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်းပြီးနောက် “ဤခရစ်တော်သည် နှုတ်ကပတ်တော်အချို့ကိုသာ ပြောဆိုနိုင်ပြီး ထိုထက်ပို၍ သာမန်လူများနှင့် ခြားနားသောအရာ တစ်ခုမျှ မရှိပေ။ သူ၌ ထူးခြားသော ဆုကျေးဇူးများ ကင်းမဲ့သည်၊ ထူးခြားသော စွမ်းရည်များ မရှိပေ၊ ယေရှု ပြုလုပ်ခဲ့သကဲ့သို့ နိမိတ်လက္ခဏာများနှင့် အံ့ဖွယ်အမှုများကို ပြုလုပ်ရန် သဘာဝလွန် တန်ခိုးများကိုပင် ပိုင်ဆိုင်ခြင်း မရှိပေ။ သူ ပြောဆိုသမျှ အရာအားလုံးသည် သေမျိုးတစ်ဦး၏ စကားများ ဖြစ်သည်။ သို့ဆိုလျှင် သူသည် အမှန်တကယ် ခရစ်တော် ဟုတ်သလော။ ဤရလဒ်သည် နောက်ထပ် ခွဲခြမ်းစိတ်ဖြာခြင်းနှင့် စေ့စေ့စပ်စပ် ကြည့်ရှုစစ်ဆေးခြင်းကို စောင့်ဆိုင်းနေပါသည်” ဟု သူတို့ ကောက်ချက်ချကြသည်။ သူတို့ မည်သို့ပင် ကြည့်စေကာမူ သူတို့သည် ခရစ်တော်၌ ဘုရားသခင်၏ အနှစ်သာရကို မမြင်နိုင်ကြပေ၊ သူတို့ မည်မျှပင် စေ့စေ့စပ်စပ် ကြည့်ရှုစစ်ဆေးစေကာမူ ခရစ်တော်၌ ဘုရားသခင်၏ ပင်ကိုလက္ခဏာ ရှိသည်ဟု သူတို့ ကောက်ချက်မချနိုင်ကြပေ။ အန္တိခရစ်တစ်ဦး၏ အမြင်တွင် ဘုရား လူ့ဇာတိခံယူသော ဇာတိပကတိသည် ထူးကဲသော တန်ခိုးများ၊ ထူးခြားသော ဆုကျေးဇူးများ၊ အံ့ဖွယ်အမှုများကို ပြသနိုင်စွမ်းနှင့် ဘုရား၏ အာဏာကို ထင်ရှားစေပြီး ကျင့်သုံးနိုင်သည့် အနှစ်သာရနှင့် စွမ်းဆောင်နိုင်ရည်တို့ကို ပိုင်ဆိုင်သင့်သည်။ သို့သော်လည်း သူတို့၏ ရှေ့မှောက်ရှိ ဤသာမန်ပုဂ္ဂိုလ်မူကား ဤအရည်အသွေးအားလုံး ကင်းမဲ့သည့်အပြင် သူ၏ အပြောအဆိုသည် အလွန် စကားပြောကောင်းခြင်း မရှိပေ၊ အမှုအရာများစွာကို ဖော်ပြသည့်အခါ၌ပင် သူသည် လူ့အယူအဆများနှင့် မကိုက်ညီသော အရပ်သုံးစကားကိုသာ အသုံးပြုသည်၊ တက္ကသိုလ် ပါမောက္ခတစ်ဦး၏ အဆင့်သို့ပင် မရောက်ရှိပေ။ အန္တိခရစ်တို့သည် ခရစ်တော်၏ စကားကို မည်သို့ပင် စေ့စေ့စပ်စပ် ကြည့်ရှုစစ်ဆေးစေကာမူ ခရစ်တော်၏ လုပ်ဆောင်ချက်များအပြင် အမှုအရာများကို လုပ်ဆောင်ရာတွင် သူ၏ သဘောထားနှင့် နည်းလမ်းတို့ကို မည်သို့ပင် စေ့စေ့စပ်စပ် ကြည့်ရှုစစ်ဆေးစေကာမူ ခရစ်တော်တည်းဟူသော ဤသာမန်ပုဂ္ဂိုလ်သည် ဘုရားသခင်၏ အနှစ်သာရကို ပိုင်ဆိုင်သည်ကို သူတို့ မမြင်နိုင်ကြပေ။ ထို့ကြောင့် အန္တိခရစ်တို့၏ စိတ်နှလုံးထဲ၌ ဤသာမန်ပုဂ္ဂိုလ်ကို လိုက်အလျှောက်ထိုက်ဆုံး ဖြစ်စေသောအရာများမှာ သူတို့ ထွင်းဖောက်မြင်နိုင်ခြင်း မရှိသော များစွာသော အမှုအရာများ၊ နှုတ်ကပတ်တော်များနှင့် ဖြစ်စဉ်များ ဖြစ်သည်။ ဤသည်သာလျှင် သူတို့၏ စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်းအတွက် ထိုက်တန်သောအရာ၊ ဤပုဂ္ဂိုလ်ကို လိုက်လျှောက်ရန် သူတို့၏ အကြီးမားဆုံးသော စေ့ဆော်မှု ဖြစ်သည်။ သူတို့၏ စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်းအတွက် ထိုက်တန်သော အကြောင်းအရာနှင့် ခေါင်းစဉ်များမှာ အဘယ်နည်း။ ယင်းမှာ ခရစ်တော်မှ မိန့်ကြားသော ဤအသက် ဝင်ရောက်မှုနှင့်ပတ်သက်သည့် နှုတ်ကပတ်တော်များ ဖြစ်သည်၊ သာမန်လူတို့သည် ထိုသို့သော အမှုအရာများကို အမှန်တကယ် မပြောဆိုနိုင်ကြပေ၊ သူတို့၌ ယင်းတို့ အမှန်တကယ် မရှိကြပေ၊ ထို့ပြင် ထိုသို့သော နှုတ်ကပတ်တော်များသည် လူသားမျိုးနွယ်အကြားမှ အခြားလူတစ်ဦးထံ၌ အမှန်ပင် မတွေ့ရှိရပေ။ ယင်းတို့ အဘယ်မှ လာသည်ကို မသိရှိရပေ။ အန္တိခရစ်တို့သည် အကြိမ်ကြိမ်အခါခါ စေ့စေ့စပ်စပ် ကြည့်ရှုစစ်ဆေးကြသော်လည်း ဤအရာနှင့်ပတ်သက်၍ ကောက်ချက်တစ်ခုကို မည်သည့်အခါမျှ မရရှိနိုင်ကြပေ။ ဥပမာအားဖြင့် တစ်စုံတစ်ဦး၏ ပကတိအခြေအနေ၊ သူတို့၏ အနှစ်သာရနှင့် စိတ်သဘောထားတို့မှာ မည်သည့်အရာ ဖြစ်သည်ကို ငါ ပြောဆိုသောအခါ သာမန်လူတို့သည် ဤအသေးစိတ်အချက်အလက်များကို တကယ့်ပုဂ္ဂိုလ်နှင့် စေ့စေ့စပ်စပ် ကိုက်ညီစစ်ဆေးပြီး ကိစ္စရပ်ကို အတည်ပြုကြပေမည်။ အန္တိခရစ်တို့သည် ဤနှုတ်ကပတ်တော်များကို ကြားသောအခါ သူတို့သည် ကိစ္စရပ်ကို ကိုက်ညီစစ်ဆေးပြီး နားလည်ရန် လက်ခံခြင်း သဘောထားကို မခံယူကြဘဲ ခွဲခြမ်းစိတ်ဖြာကြသည်။ သူတို့သည် အဘယ်အရာကို ခွဲခြမ်းစိတ်ဖြာကြသနည်း။ “သင်သည် ဤပုဂ္ဂိုလ်၏ အခြေအနေအကြောင်း မည်သို့ သိရှိသနည်း။ သူတို့၌ ထိုသို့သော စိတ်သဘောထား ရှိသည်ဟု သင် မည်သို့ သိရှိသနည်း။ ယင်းကို အဓိပ္ပာယ်ဖွင့်ဆိုရန် သင်၏ အခြေခံအကြောင်းရင်းမှာ အဘယ်နည်း။ သင်သည် သူတို့နှင့် များစွာ ထိတွေ့ဆက်ဆံမှု မရှိခဲ့ပါ၊ သို့ဖြစ်ပါလျက် သင်သည် သူတို့ကို မည်သို့ နားလည်သနည်း။ ကျွန်ုပ်တို့သည် သူတို့နှင့် ကြာမြင့်စွာ ထိတွေ့ဆက်ဆံခဲ့ပါသည်၊ အဘယ်ကြောင့် ကျွန်ုပ်တို့ သူတို့ကို ထွင်းဖောက်မြင်နိုင်ခြင်း သို့မဟုတ် နားလည်နိုင်ခြင်း မရှိရသနည်း။ ကျွန်ုပ်သည် စောင့်ကြည့်လေ့လာရန် လိုအပ်ပြီး သင်၏ စကားကိုသာ လက်ခံ၍ မဖြစ်ပါ။ သင် ဆိုသောစကားသည် တိကျခြင်း သို့မဟုတ် မှန်ကန်ခြင်း ရှိကောင်းရှိနိုင်မည် မဟုတ်ပါ” ဟူ၍ ဖြစ်လေသည်။ အချို့သောသူတို့ ငါနှင့် ပေါင်းသင်းဆက်ဆံခြင်းများ ပြုလုပ်ခဲ့ချိန်တစ်လျှောက်တွင် ငါသည် သူတို့ကို အချို့သော အလုပ် သို့မဟုတ် အသက်မွေးဝမ်းကျောင်းမှုတစ်ခု၌ လမ်းညွှန်ကောင်း လမ်းညွှန်ပေးနိုင်သည်။ အကယ်၍ ဤလမ်းညွှန်မှု၏ နည်းလမ်းနှင့် စည်းစနစ်သည် သူတို့၌ ရှိသော နည်းပညာဆိုင်ရာ အသိပညာနှင့် ကိုက်ညီပြီး သူတို့ကို ကျေနပ်စေပါက သူတို့သည် ယင်းကို အင်တင်တင်ဖြင့် လုပ်ဆောင်ကြပေမည်။ သို့သော် ယင်းသည် သူတို့ကို မကျေနပ်စေပါက သူတို့သည် မိမိတို့၏ စိတ်နှလုံးထဲ၌ အတိုက်အခံပြုပြီး ဤသို့ တွေးတောကြမည်။ “သင်သည် ဤနည်းလမ်းအတိုင်း အဘယ်ကြောင့် လုပ်ဆောင်သနည်း။ ဤသည်မှာ ဤနယ်ပယ်နှင့် ဆန့်ကျင်ဘက် မဟုတ်ပါလော။ ကျွန်ုပ်သည် အဘယ်ကြောင့် သင့်စကားကို နားထောင်သင့်သနည်း။ သင် ဆိုသောအရာ မှားယွင်းပါက ကျွန်ုပ်သည် သင့်စကားကို နားမထောင်နိုင်ပါ၊ ကျွန်ုပ်သည် ကိုယ့်နည်းကိုယ့်ဟန်ဖြင့် လုပ်ဆောင်ရပေမည်။ အကယ်၍ သင် မှန်ကန်ပါက သင် မည်သို့ မှန်ကန်သည်၊ သင်သည် ဤသည်ကို မည်သို့ သိရှိလာသည်ကို ကျွန်ုပ် နားလည်ရန် လိုအပ်ပါသည်။ သင်သည် ယင်းကို သင်ယူခဲ့သလော။ အကယ်၍ သင် မသင်ယူခဲ့ပါက သင်သည် မည်သို့ သိရှိနိုင်မည်နည်း။ အကယ်၍ သင်သည် ယင်းကို မသင်ယူခဲ့ပါက သင်သည် ယင်းကို နားလည်သင့်သည် မဟုတ်၊ အကယ်၍ သင် အမှန်တကယ် နားလည်ပါက ယင်းမှာ ပုံမှန်မဟုတ်ပေ။ သင်သည် ယင်းကို မည်သို့ နားလည်သနည်း။ သင့်ကို မည်သူ ပြောပြခဲ့သနည်း၊ သို့မဟုတ် သင်သည် သင့်ဘာသာ လျှို့ဝှက်စွာ သင်ယူခဲ့သလော” ဟူ၍ ဖြစ်လေသည်။ သူတို့သည် စိတ်ထဲမှနေ၍ ခွဲခြမ်းစိတ်ဖြာပြီး စေ့စေ့စပ်စပ် ကြည့်ရှုစစ်ဆေးကြသည်။ ငါ ပြောဆိုသော ဝါကျတိုင်း၊ ငါ ကိုင်တွယ်သော ကိစ္စရပ်တိုင်းသည် အန္တိခရစ်တို့၏ စိစစ်ခြင်းမှတစ်ဆင့် ဖြတ်သန်းရမည်၊ သူတို့၏ သုံးသပ်စစ်ဆေးခြင်းကို ခံယူရမည်။ ယင်းသည် သူတို့၏ သုံးသပ်စစ်ဆေးခြင်းကို အောင်မြင်မှသာလျှင် သူတို့သည် ယင်းကို လက်ခံကြလိမ့်မည်၊ အောင်မြင်ခြင်း မရှိပါက သူတို့သည် ဝေဖန်မည်၊ အကဲဖြတ်ချက်များ ချမှတ်မည်၊ ပြီးလျှင် အတိုက်အခံပြုခြင်းကို ဖြစ်ပေါ်စေကြလိမ့်မည်။

ဘုရားသခင် လူ့ဇာတိခံယူသော ဇာတိပကတိသည် လူအားလုံးအတွက် အကြီးမားဆုံးသော နက်နဲမှု ဖြစ်သည်။ ဤကိစ္စရပ်၌ အမှန်တကယ် အဘယ်အရာ ဖြစ်ပျက်နေသည်ကို မည်သူမျှ သဘောပေါက်နားလည်နိုင်ခြင်း မရှိသကဲ့သို့ ဘုရားသခင်သည် လူတစ်ဦး မည်သို့ ဖြစ်လာခဲ့သည်၊ ဤပုဂ္ဂိုလ်သည် ဘုရားသခင်၏ နှုတ်တော်မှ နှုတ်ကပတ်တော်များကို မည်သို့ ပြောဆိုနိုင်ပြီး ဘုရားသခင်၏ အမှုကို မည်သို့ ဆောင်ရွက်နိုင်သည်၊ ပြီးလျှင် ဘုရားသခင်၏ ဝိညာဉ်တော်သည် ဤပုဂ္ဂိုလ်ကို မည်သို့ တိတိကျကျ လမ်းညွှန်ပြီး ကွပ်ကဲသည် စသည်တို့ကဲ့သို့သော ဘုရားသခင်၏ အနှစ်သာရသည် ဤဇာတိပကတိထဲ၌ မည်သို့ အမှန်တကယ် ဖြစ်လာသည်ကိုလည်း မည်သူမျှ သိနားလည်နိုင်ခြင်း မရှိပေ။ ဤအမှုတော်အားလုံး၌ လူတို့သည် ကြီးကျယ်သော ရူပါရုံများကို မြင်တွေ့ခဲ့ရခြင်း မရှိသကဲ့သို့ ဤဇာတိပကတိထံမှ မည်သည့် ထူးခြားသော လှုပ်ရှားမှုများကိုမျှလည်း စောင့်ကြည့်လေ့လာခဲ့ရခြင်း မရှိပေ။ အဖြစ်အပျက်တွင် မည်သည့်အရာမျှ ထူးထူးခြားခြား ရှိပုံမပေါ်ပေ၊ အရာခပ်သိမ်းသည် ပုံမှန်ဖြစ်ပုံရသည်။ ဘုရားသခင်သည် ဣသရေလ၌ ရှိခဲ့သော ဘုန်းအသရေကို အရှေ့အရပ်သို့ မသိမသာ ဆောင်ကြဉ်းခဲ့ပြီး ဖြစ်သည်။ ဤပုဂ္ဂိုလ်၏ စကားပြောခြင်းနှင့် အမှုပြုခြင်းမှတစ်ဆင့် ခေတ်သစ်တစ်ခုသည် ဤသို့ စတင်ခဲ့ပြီးဖြစ်ကာ ခေတ်ဟောင်းတစ်ခုသည် မည်သို့ ဖြစ်ပျက်ခဲ့သည်ကို မည်သူမျှ သဘောမပေါက်လိုက်ဘဲ ယင်းမှာ အဆုံးသတ်ခဲ့ပြီး ဖြစ်သည်။ သို့သော်လည်း ဘုရားသခင်ကို အမှန်တကယ် ယုံကြည်သောသူတို့၊ ရိုးရှင်းပြီး ပွင့်လင်းကြင်နာသောသူတို့၊ လူ့သဘာဝနှင့် ဆင်ခြင်တုံတရားကို ပိုင်ဆိုင်သောသူတို့သည် ဤကိစ္စရပ်များကို စေ့စေ့စပ်စပ် ကြည့်ရှုစစ်ဆေးခြင်း မပြုကြပေ။ အကယ်၍ သူတို့သည် စေ့စေ့စပ်စပ် ကြည့်ရှုစစ်ဆေးခြင်း မပြုပါက အဘယ်အရာကို လုပ်ဆောင်ကြသနည်း။ မလှုပ်မယှက် စောင့်ဆိုင်းနေရုံသာလော။ မဟုတ်ပါ။ သူတို့က ဤနှုတ်ကပတ်တော်များသည် သမ္မာတရား ဖြစ်ကြောင်း မြင်ကြသည်၊ ဤနှုတ်ကပတ်တော်အားလုံး၏ အရင်းအမြစ်မှာ ဘုရားသခင်ဖြစ်သည်ဟု ယုံကြည်ကြသည်၊ ထို့ကြောင့် ဤသာမန်ပုဂ္ဂိုလ်သည် ခရစ်တော်ဖြစ်သည်ဟူသော အချက်ကို အသိအမှတ်ပြုကြပြီး အခြားမည်သည့်အရာကိုမျှ ထည့်သွင်းစဉ်းစားခြင်း မရှိဘဲ ကိုယ်တော့်ကို သူတို့၏ သခင်နှင့် ဘုရားသခင်အဖြစ် လက်ခံကြသည်။ အခြားတစ်ဖက်တွင်မူ အန္တိခရစ်တို့သည် ဤနှုတ်ကပတ်တော်အားလုံးနှင့် ဤအမှုတော်အားလုံးသည် ဘုရားသခင်ထံမှ လာသည်ကိုလည်းကောင်း၊ ဤပြောဆိုခြင်းနှင့် အမှုပြုခြင်းအားလုံး၏ အရင်းအမြစ်မှာ ဘုရားသခင် ဖြစ်သည်ကိုလည်းကောင်း မမြင်နိုင်ကြပေ၊ ထို့ကြောင့် ဤသာမန် ပုဂ္ဂိုလ်ကို သူတို့၏ သခင်နှင့် ဘုရားသခင်အဖြစ် လက်မခံကြပေ။ ထိုအစား သူတို့သည် သူတို့၏ စေ့စေ့စပ်စပ် ကြည့်ရှုစစ်ဆေးခြင်းကို ပြင်းထန်စေပြီး သူတို့၏ စိတ်နှလုံးထဲ၌ အတိုက်အခံပြုကြသည်။ သူတို့သည် အဘယ်အရာကို အတိုက်အခံပြုကြသနည်း။ “သင် မည်မျှပင် ပြောဆိုစေကာမူ၊ သင် မည်မျှပင် ကြီးမြတ်သော အမှုတော်ကို ပြုလုပ်စေကာမူ၊ သင်၏ အရင်းအမြစ်မှာ မည်သူပင် ဖြစ်စေကာမူ သင်သည် သာမန် ပုဂ္ဂိုလ်တစ်ဦး ဖြစ်နေသမျှ ကာလပတ်လုံး၊ သင်၏ ပြောဆိုပုံနည်းလမ်းသည် ကျွန်ုပ်၏ အယူအဆများနှင့် မကိုက်ညီသမျှ ကာလပတ်လုံး၊ သင်၏ အသွင်အပြင်သည် ကျွန်ုပ်၏ မျက်စိကို ဖမ်းစားရန် သို့မဟုတ် ကျွန်ုပ်၏ လေးစားမှုကို ရရှိရန် အတော်အတန် ကြီးမြတ်ခြင်း မရှိသမျှ ကာလပတ်လုံး ကျွန်ုပ်သည် သင့်ကို စေ့စေ့စပ်စပ် ကြည့်ရှုစစ်ဆေးပြီး ခွဲခြမ်းစိတ်ဖြာမည်။ သင်သည် ကျွန်ုပ်၏ စေ့စေ့စပ်စပ် ကြည့်ရှုစစ်ဆေးခြင်း ခံရသည့်အရာ ဖြစ်သည်၊ ကျွန်ုပ်သည် သင့်ကို ကျွန်ုပ်၏ သခင်အဖြစ်၊ ကျွန်ုပ်၏ ဘုရားသခင်အဖြစ် လက်မခံနိုင်ပါ” ဟူ၍ ဖြစ်လေသည်။ သူတို့၏ စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်း ဖြစ်စဉ်တွင် အန္တိခရစ်တို့သည် သူတို့၏ အယူအဆများ၊ ပုန်ကန်ခြင်းနှင့် သူတို့၏ ဖောက်ပြန်ပျက်စီးသော စိတ်သဘောထားများကို ဖြေရှင်းရန် ပျက်ကွက်ရုံသာမက သူတို့၏ အယူအဆများသည် တစ်နေ့တခြား ကြီးထွားလာပြီး တိုး၍တိုး၍ ပြင်းထန်လာကြသည်။ ဥပမာအားဖြင့် အသင်းတော် ခေါင်းဆောင်တစ်ဦးသည် အန္တိခရစ်တစ်ဦးအဖြစ် ထုတ်ဖော်ခံရပြီး ထိုအသင်းတော်၌ အဖျက်အမှောင့်လုပ်ခြင်းများနှင့် ပျက်စီးခြင်းတို့ကို ဖြစ်ပေါ်စေသည့်အခါ ထိုသို့သော အဖြစ်အပျက်တစ်ခု ဖြစ်ပျက်သော် အန္တိခရစ်တို့၏ ပထမဆုံး တုံ့ပြန်မှုမှာ ဤသို့ မေးမြန်းခြင်း ဖြစ်သည်။ “ခရစ်တော် ဤအကြောင်းကို သိပါသလော။ ဤအသင်းတော် ခေါင်းဆောင်ကို မည်သူ ခန့်အပ်ခဲ့သနည်း။ ဤအရာအပေါ် ခရစ်တော်၏ တုံ့ပြန်မှုမှာ အဘယ်နည်း။ သူ ယင်းကို မည်သို့ ကိုင်တွယ်နေသနည်း။ ခရစ်တော် ဤပုဂ္ဂိုလ်ကို သိပါသလော။ ခရစ်တော်သည် ဤပုဂ္ဂိုလ်မှာ အန္တိခရစ်တစ်ဦးဖြစ်သည်ဟု ယခင်က ပြောဆိုခဲ့ဖူးပါသလော၊ သို့မဟုတ် ဤအဖြစ်အပျက်ကို ပရောဖက်ပြုခဲ့ဖူးပါသလော။ ယခု ဤအသင်းတော်၌ ထိုသို့သော အဓိက ပြဿနာတစ်ရပ် ပေါ်ပေါက်ခဲ့ပြီးဖြစ်ရာ ခရစ်တော်သည် ဦးဆုံး သိရှိခဲ့သောသူလော” ဟု မေးကြသည်။ ငါ မသိခဲ့ပါ၊ ငါလည်း ယင်းနှင့်ပတ်သက်၍ ယခုလေးတင် သိရှိခြင်း ဖြစ်သည်ဟု ငါက ဆိုလေသည်။ “ယင်းမှာ မမှန်ကန်ပါ။ သင်သည် ဘုရား ဖြစ်သည်၊ သင်သည် ခရစ်တော် ဖြစ်သည်၊ အဘယ်ကြောင့် သင် မသိရသနည်း။ သင် သိသင့်သည်” ဟု ဆိုကြသည်။ ငါသည် ခရစ်တော်၊ သာမန် ပုဂ္ဂိုလ်တစ်ဦး ဖြစ်သောကြောင့် အတိအကျပင် ငါ သိရှိရန် မလိုအပ်ခြင်း ဖြစ်သည်။ အသင်းတော်၌ ယင်း၏ စီမံအုပ်ချုပ်ရေးဆိုင်ရာ အမိန့်များနှင့် လူတို့ကို ကိုင်တွယ်ရန် စည်းမျဉ်းများ ရှိသည်။ အန္တိခရစ်များ ပေါ်ပေါက်လာသောအခါ သူတို့ကို အသင်းတော်၏ စည်းမျဉ်းများအတိုင်း ဖယ်ထုတ်ပစ်ပြီး နှင်ထုတ်နိုင်သည်။ ဤသည်မှာ ဘုရားသခင် အာဏာကိုင်စွဲထားခြင်းကို ထင်ဟပ်သည်၊ ယင်းသည် သမ္မာတရားက အာဏာကိုင်စွဲထားခြင်းကို ထင်ဟပ်သည်။ ငါသည် အရာခပ်သိမ်းကို သိရှိရန် မလိုအပ်ပေ။ အကယ်၍ အသင်းတော်သည် ကိစ္စရပ်များကို ယင်း၏ စီမံအုပ်ချုပ်ရေးဆိုင်ရာ အမိန့်များနှင့် လူတို့ကို ကိုင်တွယ်ရန် စည်းမျဉ်းများအတိုင်း ကိုင်တွယ်ရန် ပျက်ကွက်ပါက ထိုအခါ ငါ ကြားဝင်ဆောင်ရွက်မည်။ သို့သော်လည်း အကယ်၍ ညီအစ်ကိုမောင်နှမများသည် လူတို့ကို ဖယ်ထုတ်ပစ်ခြင်းနှင့် နှင်ထုတ်ခြင်း၌ ဘုရားသခင်၏ အိမ်တော်မှ စည်းမျဉ်းများကို နားလည်ပါက ငါ ပါဝင်ပတ်သက်ရန် မလိုအပ်ပေ။ သမ္မာတရား အာဏာကိုင်စွဲထားသည့်နေရာ၌ ငါ ကြားဝင်စွက်ဖက်ရန် မလိုအပ်ပေ။ ဤသည်မှာ အလွန် ပုံမှန်မဟုတ်သလော။ (ဟုတ်ပါသည်)။ သို့သော် အန္တိခရစ်တို့သည် ဤကိစ္စရပ်နှင့်ပတ်သက်၍ ပြဿနာများ ဖန်တီးနိုင်ပြီး အယူအဆများ ဖြစ်ပေါ်နိုင်သည်၊ ခရစ်တော်ကို ငြင်းပယ်ရန်နှင့် ခရစ်တော်သည် ဘုရားသခင်၏ အနှစ်သာရကို ပိုင်ဆိုင်သည်ဟူသော အချက်ကို ပြစ်တင်ရှုတ်ချရန် ဤအယူအဆများကိုပင် အသုံးပြုနိုင်ကြသည်။ ဤသည်မှာ အန္တိခရစ်တို့ ပြုလုပ်သည့်အရာပင် ဖြစ်လေသည်။ အကြောင်းမှာ တစ်စုံတစ်ရာသည် သူတို့၏ အယူအဆများ၊ စိတ်ကူးစိတ်သန်းများ၊ သို့မဟုတ် မျှော်လင့်ချက်များနှင့် မကိုက်ညီသောကြောင့် သူတို့သည် ခရစ်တော်၏ အနှစ်သာရကို ငြင်းပယ်နိုင်သည်။ ခရစ်တော်၏ သွင်ပြင်လက္ခဏာ အသီးသီးကို သူတို့၏ စေ့စေ့စပ်စပ် ကြည့်ရှုစစ်ဆေးခြင်းသည် ဤကောက်ချက်သို့ ဦးတည်စေသည်။ သူတို့သည် ခရစ်တော်၌ ဘုရားသခင်၏ အနှစ်သာရကို မမြင်ကြပေ၊ ထို့ကြောင့် သူတို့သည် ဤပုဂ္ဂိုလ်ကို ဘုရားသခင်၏ အနှစ်သာရနှင့် ပင်ကိုလက္ခဏာ ရှိသည်ဟု အဓိပ္ပာယ်မဖွင့်ဆိုနိုင်ကြပေ။ ဤသည်မှာ မည်သည့်အရာမျှ မဖြစ်ပျက်သည့်အခါတွင် ကောင်းသော်လည်း တစ်စုံတစ်ရာ ဖြစ်ပေါ်သည်နှင့် တစ်ပြိုင်နက် အန္တိခရစ်တို့သည် ခရစ်တော်၏ ပင်ကိုလက္ခဏာကို ငြင်းပယ်ရန်နှင့် ခရစ်တော်ကို ပြစ်တင်ရှုတ်ချရန် ဦးဆုံး ထွက်ပေါ်လာသောသူများ ဖြစ်ကြသည်ဟူသော အခြေအနေသို့ ဦးတည်စေသည်။ သို့ဆိုလျှင် အန္တိခရစ်တို့၏ စေ့စေ့စပ်စပ် ကြည့်ရှုစစ်ဆေးခြင်း၏ ရည်ရွယ်ချက်မှာ အမှန်စင်စစ် အဘယ်နည်း။ သူတို့၏ စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်းတို့သည် သမ္မာတရားကို သာ၍ ကောင်းစွာ နားလည်ရန် မဟုတ်ဘဲ သက်သေအထောက်အထားကို ရှာဖွေရန်နှင့် နိုင်ကွက်ကို မလွှတ်တမ်း ဆုပ်ကိုင်ရန်၊ ဘုရားသခင် ဇာတိပကတိ၌ လူ့ဇာတိခံယူခြင်းဟူသော အချက်ကို ငြင်းပယ်ရန်၊ ဘုရားသခင် လူ့ဇာတိခံယူသော ဇာတိပကတိသည် ခရစ်တော်ဖြစ်သည်၊ ဘုရားသခင် ဖြစ်သည်ဟူသော အချက်ကို ငြင်းပယ်ရန် ဖြစ်သည်။ ဤသည်မှာ အန္တိခရစ်တို့ ခရစ်တော်ကို စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်း၏ နောက်ကွယ်မှ စေ့ဆော်မှုနှင့် ပန်းတိုင် ဖြစ်သည်။

အန္တိခရစ်တို့သည် ခရစ်တော်နောက် လိုက်နေပြီး နောက်လိုက်များအဖြစ် ဟန်ဆောင်နေစဉ်တွင် စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်း သဘောထားကို သယ်ဆောင်ကြကာ အဆုံးစွန်၌ သမ္မာတရားကို နားလည်ရန် သို့မဟုတ် ခရစ်တော်သည် သခင်ဖြစ်သည်၊ ဘုရားသခင် ဖြစ်သည်ဟူသော အချက်ကို အတည်ပြုရန် ပျက်ကွက်ကြသည်။ သို့သော် အဘယ်ကြောင့် သူတို့သည် ဤမျှ အင်တင်တင်ဖြင့် ဤမျှ လိုလားမှုမရှိဘဲ လိုက်နေကြဆဲ ဖြစ်ပြီး အဘယ်ကြောင့် ဘုရားသခင်၏ အိမ်တော်အတွင်း၌ နေထိုင်ကြသနည်း။ ကျွန်ုပ်တို့ ယခင်က ဆွေးနွေးခဲ့ပြီးဖြစ်သော အချက်တစ်ချက်မှာ သူတို့သည် ကောင်းချီးမင်္ဂလာများကို လက်ခံရရှိရန် ရည်ရွယ်ချက်ကို သိုထားကြသည်၊ သူတို့သည် ရည်မှန်းချက်ကြီးကြသည်။ နောက်အချက်တစ်ချက်မှာ အန္တိခရစ်တို့သည် သာမန်လူများ၌ မတွေ့ရှိရသော သိလိုစိတ် ပြင်းပြမှုကို ပိုင်ဆိုင်ကြသည်။ မည်သို့သော သိလိုစိတ် ပြင်းပြမှုမျိုးနည်း။ ယင်းမှာ ထူးဆန်းပြီး သာမန်မဟုတ်သော အဖြစ်အပျက်များအပေါ် သူတို့၏ စွဲလမ်းမှု ဖြစ်သည်။ အန္တိခရစ်တို့သည် လောက၌ရှိသော ထူးဆန်းပြီး သာမန်မဟုတ်သော အဖြစ်အပျက်အားလုံး၊ သဘာဝတရား၏ နိယာမများကို ကျော်လွန်သော အဖြစ်အပျက်အားလုံးအပေါ် အထူးသဖြင့် သိလိုစိတ် ပြင်းပြကြသည်။ သူတို့၌ များစွာသော အမှုအရာများကို နှိုက်နှိုက်ချွတ်ချွတ် စူးစမ်းလေ့လာပြီး ယင်းတို့၏ ဖြစ်ကြောင်းရင်းမြစ်ကို သိရှိရန် လိုအင်ဆန္ဒတစ်ခု ရှိကြသည်။ ဤစူးစမ်းလေ့လာခြင်း၏ အနှစ်သာရမှာ အဘယ်နည်း။ ယင်းမှာ သူတို့ အရည်အချင်း မပြည့်မီသည့်ပုံ ပေါက်မည်ကို စိုးရွံ့သဖြင့် အရာခပ်သိမ်းကို နားလည်လိုခြင်း၊ အရာခပ်သိမ်း၏ နောက်ကွယ်မှ အမှန်တရားကို သိရှိလိုခြင်းဟူသော မာနထောင်လွှားမှုသက်သက် ဖြစ်သည်။ ကိစ္စရပ် မည်သို့ပင်ဖြစ်စေ သူတို့သည် ဦးဆုံး သိရှိသောသူ၊ ဤကိစ္စရပ်၏ အသေးစိတ်ကို အသိဆုံးနှင့် အနှံ့စပ်ဆုံးသောသူ ဖြစ်လိုကြသည်။ သူတို့သည် ရှုထောင့်တိုင်း၌ “အသာဆုံး” ဖြစ်သောသူ ဖြစ်လိုကြသည်။ သို့ဖြစ်၍ သူတို့သည် ဘုရားသခင် ဇာတိပကတိ၌ လူ့ဇာတိခံယူခြင်း ကိစ္စရပ်ကိုလည်း လျစ်လျူရှုခြင်း သို့မဟုတ် လက်လွတ်ခံခြင်း မရှိကြပေ။ သူတို့က “ဘုရားသခင် လူ့ဇာတိခံယူခြင်းသည် လူ့လောက၌ အကြီးမားဆုံးသော နက်နဲမှု ဖြစ်သည်။ ဤအကြီးမားဆုံးသော နက်နဲမှု၊ ဤအံ့ဩဖွယ်အကောင်းဆုံးသော အမှုအရာနှင့် ပတ်သက်၍ အတိအကျ အဘယ်အရာ ဖြစ်ပျက်နေသနည်း။ ယင်းသည် သာမန် မျှော်လင့်ချက်များကို ကျော်လွန်ပြီး ဤဇာတိပကတိသည် သာမန်လူသားများနှင့် ကွဲပြားသောကြောင့် ခြားနားချက်သည် အဘယ်မှာ တည်ရှိသနည်း။ ကျွန်ုပ်သည် ကိုယ်တိုင်ကိုယ်ကျ တွေ့မြင်ပြီး နားလည်ရမည်” ဟု ဆိုကြသည်။ “ကိုယ်တိုင်ကိုယ်ကျ တွေ့မြင်ပြီး နားလည်” ဟု သူတို့ ဆိုသောအခါ သူတို့ အဘယ်အရာကို ဆိုလိုသနည်း။ သူတို့ ဆိုလိုသည်မှာ “ကျွန်ုပ်သည် လောကရှိ အမျိုးမျိုးသော နိုင်ငံများသို့ ခရီးသွားခဲ့ပြီးဖြစ်သည်၊ ကျော်ကြားသော တောင်များနှင့် သမိုင်းဝင် နေရာများကို လည်ပတ်ခဲ့ပြီးဖြစ်သည်၊ ကျော်ကြားပြီး ဉာဏ်ပညာရှိသော ပုဂ္ဂိုလ်များကို အင်တာဗျူးခဲ့ပြီးဖြစ်သည်၊ သူတို့အားလုံးသည် သာမန်လူများမျှသာ ဖြစ်ကြသည်။ ကျွန်ုပ် မတွေ့ဆုံဖူးသော သို့မဟုတ် မသင်ယူဖူးသော တစ်ဦးတည်းသောသူမှာ ဤခရစ်တော် ဖြစ်သည်။ ဤခရစ်တော်၏ အနှစ်သာရမှာ အတိအကျ အဘယ်နည်း။ ကျွန်ုပ်သည် ကိုယ်တိုင်ကိုယ်ကျ တွေ့မြင်ပြီး နားလည်ရမည်” ဟူ၍ ဖြစ်သည်။ သူတို့သည် အတိအကျ အဘယ်အရာကို တွေ့မြင်ပြီး နားလည်လိုကြသနည်း။ “ဘုရားသည် နိမိတ်လက္ခဏာများနှင့် အံ့ဖွယ်အမှုများကို ပြုလုပ်နိုင်သည်ဟု ကျွန်ုပ် ကြားဖူးသည်။ သူတို့က ယေရှုသည် သခင်ဖြစ်သည်၊ ခရစ်တော် ဖြစ်သည်ဟု ဆိုကြသည်၊ လူတို့၏ သိလိုစိတ် ပြင်းပြမှုကို ကျေနပ်စေရန် သူသည် မည်သည့် နိမိတ်လက္ခဏာများနှင့် အံ့ဖွယ်အမှုများကို ပြုလုပ်ခဲ့သနည်း။ သခင်ယေရှုသည် သင်္ဘောသဖန်းပင်တစ်ပင်ကို ကျိန်ပြီးနောက် ယင်းသည် ညှိုးနွမ်းသွားသည့် အဖြစ်အပျက်တစ်ခုကို ကျွန်ုပ် မှတ်မိသည်။ ဤခရစ်တော်သည် ယခု ထိုနည်းအတိုင်း ပြုလုပ်နိုင်မည်လော။ ကျွန်ုပ်သည် တွေ့မြင်ပြီး နားလည်ရမည်၊ အကယ်၍ ကျွန်ုပ် အခွင့်အရေး ရခဲ့ပါက သူသည် ထိုသို့သော အပြုအမူများကို လုပ်ဆောင်နိုင်ခြင်း ရှိမရှိ သိရှိရန် သူ့ကို စမ်းသပ်ရမည်။ လူ့ဇာတိခံ ဘုရားသည် လက်ခြေသေသောလူများကို လမ်းလျှောက်နိုင်စေခြင်း၊ မျက်မမြင်များ မြင်နိုင်စေခြင်း၊ နားမကြားသူများ ကြားနိုင်စေခြင်းနှင့် နာမကျန်းသူများ အနာငြိမ်းခြင်းတို့ကို ဖြစ်မြောက်စေလျက် ဘုရား၏ ဩဇာအာဏာကို ပိုင်ဆိုင်သည်ဟု ဆိုကြသည်။ ဤသည်တို့မှာ အံ့ဖွယ်ဖြစ်ပြီး အသစ်အဆန်းဖြစ်သော အဖြစ်အပျက်များ ဖြစ်ကြသည်၊ လူ့လောက၌ ယင်းတို့သည် သာမန်လူများ မပိုင်ဆိုင်ကြသော ထူးကဲသည့် စွမ်းရည်များဟု မှတ်ယူကြသည်။ ဤသည်မှာ ကျွန်ုပ် ကိုယ်တိုင် မြင်တွေ့ရမည့် အရာတစ်ခု ဖြစ်သည်” ဟု တွေးကြသည်။ ထို့အပြင် သူတို့၏ စိတ်ကို စွဲလမ်းနေသော အခြား အရေးအကြီးဆုံးသော ကိစ္စရပ်တစ်ခု ရှိသေးသည်။ သူတို့က “ဤလူ့လောကရှိ အတိတ်ဘဝများနှင့် ပစ္စုပ္ပန်ဘဝများ၊ လူဝင်စားမှု သံသရာလည်ခြင်းတို့နှင့် ပတ်သက်၍ အတိအကျ အခြေအနေမှာ အဘယ်နည်း။ သာမန်လူတို့သည် ဤသည်ကို ရှင်းလင်းစွာ မရှင်းပြနိုင်ကြပေ။ ဘုရားသည် ဇာတိပကတိကို ခံယူပြီးဖြစ်သောကြောင့်လည်းကောင်း၊ ဘုရားသည် အရာခပ်သိမ်းကို အုပ်စိုးတော်မူသောကြောင့်လည်းကောင်း ခရစ်တော်သည် ဤအကြောင်းကို သိပါသလော။ အခွင့်အရေး ရှိသည့်အခါ ကျွန်ုပ်သည် သူ့ကို မေးမြန်းပြီး ဤကိစ္စရပ်အကြောင်း စုံစမ်းရမည်၊ ကျွန်ုပ်၏ ရုပ်သွင်ကို သူအား ဆန်းစစ်စေပြီး ကျွန်ုပ်၏ ကံကြမ္မာ ကောင်းမွန်ခြင်း ရှိမရှိ၊ ကျွန်ုပ်၏ အတိတ်ဘဝ၌ အဘယ်အရာ ဖြစ်ခဲ့သည်၊ ကျွန်ုပ်သည် တိရစ္ဆာန်လော သို့မဟုတ် လူသားလောကို ကြည့်ရှုစေမည်။ အကယ်၍ သူသည် ဤအမှုအရာများကို သိရှိပါက ကျွန်ုပ် အထင်ကြီးမိပေမည်၊ ယင်းက သူ့ကို သာမန်ထက် ထူးကဲစေမည်၊ သာမန်လူတို့ထက် သာလွန်စေမည်၊ ခရစ်တော် ဖြစ်ကောင်း ဖြစ်နိုင်ပေသည်။ ထို့ပြင် ကောင်းကင်ဘုံ၌ ဘုရားသခင်၏ ပလ္လင်တော်နှင့် စံမြန်းရာအရပ် ရှိသည်ဟု သူတို့ ဆိုကြသည်၊ သို့ဆိုလျှင် ဤလူ့ဇာတိခံ ဘုရားသည် ဘုရား၏ စံမြန်းရာအရပ်နှင့် ကောင်းကင်နိုင်ငံတော်တို့ အဘယ်မှာ ရှိသည်ကို သိသလော။ ကောင်းကင်နိုင်ငံတော်၌ ရွှေခင်းသော လမ်းများ ရှိသည်၊ တောက်ပထွန်းလင်းပြီး ခမ်းနားထည်ဝါသည်ဟု ဆိုကြသည်၊ အကယ်၍ ဤလူ့ဇာတိခံ ဘုရားသည် ကျွန်ုပ်တို့ကို လှည့်လည်ကြည့်ရှုရန် ခေါ်ဆောင်သွားနိုင်မည်ဆိုလျှင် ကျွန်ုပ်တို့၏ ဘဝတစ်ခုလုံးသည် အကျိုးရှိခဲ့မည် မဟုတ်လော၊ ကျွန်ုပ်တို့၏ ယုံကြည်ခြင်းသည် အချည်းနှီး မဟုတ်မည် မဟုတ်လော။ ထို့ထက်မက ကျွန်ုပ်တို့သည် လယ်ယာစိုက်ပျိုးရန် လိုအပ်မည် မဟုတ်ပေ၊ ဆာလောင်သောအခါ ခရစ်တော်သည် စကားတစ်ခွန်းတည်းဖြင့် ကျောက်ခဲများကို အစာအဖြစ်သို့ ရိုးရှင်းစွာ ပြောင်းလဲနိုင်ပေမည်။ မုန့်ငါးလုံးနှင့် ငါးနှစ်ကောင်ဖြင့် သူသည် လူငါးထောင်ကို ကျွေးမွေးခဲ့သည်၊ ယင်းသည် ကျွန်ုပ်တို့အတွက် ကြီးမားသော အကျိုးကျေးဇူး ဖြစ်မည် မဟုတ်လော။ ခရစ်တော် စကားပြောဆိုသည့်အခါနှင့် ပတ်သက်၍ကော အဘယ်သို့နည်း။ သူသည် အသက်စမ်းရေကို ပေးသည်ဟု သူတို့ ဆိုကြသည်၊ သို့သော် ဤအသက်စမ်းရေသည် အဘယ်မှာ ရှိသနည်း။ ယင်းကို မည်သို့ ပံ့ပိုးပေးသနည်း၊ ယင်းသည် မည်သို့ စီးဆင်းသနည်း။ ဤသည်တို့အားလုံးမှာ စူးစမ်းလေ့လာရန် ထိုက်တန်သော ကိစ္စရပ်များ ဖြစ်ကြပြီး တစ်ခုချင်းစီမှာ အတော်ပင် အသစ်အဆန်း ဖြစ်သည်။ အကယ်၍ ကျွန်ုပ်သည် ဤအရာများထဲမှ တစ်ခုတည်းကို ကျွန်ုပ်၏ မျက်စိများဖြင့် တပ်အပ်တွေ့နိုင်ခဲ့မည်ဆိုလျှင် ကျွန်ုပ်သည် ဤဘဝတစ်သက်တာ၌ ထိုးထွင်းအမြင်ရှိသော ပုဂ္ဂိုလ်တစ်ဦး ဖြစ်လာပေမည်၊ သာမန် ပုဂ္ဂိုလ်တစ်ဦးမျှသာ မဟုတ်တော့ပေ” ဟု ဆိုကြသည်။ ဤသည်မှာ သိလိုစိတ် ပြင်းပြမှု လွှမ်းမိုးနေခြင်း မဟုတ်ပါလော။ (ဟုတ်ပါသည်)။

အချို့သောသူတို့သည် ဘုရားသခင်ကို ယုံကြည်လာကြသည်မှာ၊ ခရစ်တော်ကို လက်ခံလာကြသည်မှာ၊ ပြီးလျှင် ခရစ်တော်နောက် လိုက်လာကြသည်မှာ သမ္မာတရားကို ရယူရန် မဟုတ်ဘဲ စိတ်ထဲ၌ အခြားသော စိတ်ကူးများဖြင့် ဖြစ်သည်။ အချို့သောသူတို့သည် ငါနှင့် တွေ့ဆုံသည်နှင့်တစ်ပြိုင်နက် ဤသို့ မေးကြသည်။ “ဗျာဒိတ်ကျမ်းထဲမှ ကပ်ရောဂါ ခုနစ်ပါးနှင့် ဖလားခုနစ်လုံးတို့သည် အဘယ်အရာကို ဆိုလိုပါသနည်း။ မြင်းဖြူသည် အဘယ်အရာကို ဆိုလိုပါသနည်း။ သုံးနှစ်ခွဲကာလ ကပ်ဘေးသည် ရောက်ရှိလာပြီးပြီလော” ဟူ၍ ဖြစ်သည်။ ငါက “သင်သည် အဘယ်အရာအကြောင်း မေးမြန်းနေသနည်း။ ဗျာဒိတ်ကျမ်းဆိုသည်မှာ အဘယ်နည်း” ဟု တုံ့ပြန်သည်။ သူတို့က “သင်သည် ဗျာဒိတ်ကျမ်းအကြောင်းပင် မသိပါတကား။ သူတို့က သင်သည် ဘုရားဖြစ်သည်ဟု ဆိုကြသည်၊ သို့သော် ကျွန်ုပ် ထိုမျှ မသေချာပါ” ဟု ခွန်းတုံ့ပြန်ကြသည်။ အခြားသူများက “ဧဝံဂေလိတရားကို ဖြန့်ဝေခြင်း ဖြစ်စဉ်အတွင်း၊ ကျွန်ုပ်တို့သည် နက်နဲသော ကိစ္စရပ်များအကြောင်း မေးမြန်းသော လူတို့နှင့် ကြုံတွေ့ရပါသည်။ ကျွန်ုပ်တို့ အဘယ်အရာ လုပ်ဆောင်သင့်သနည်း” ဟု မေးကြသည်။ ငါသည် သူတို့ စကားဆုံးသည်အထိပင် မစောင့်ဘဲ ဤသို့ ဆိုသည်။ “သမ္မာတရားကို ရှာဖွေမည့်အစား နက်နဲမှုများအကြောင်း အစဉ်သဖြင့် မေးမြန်းသော မည်သူမဆိုသည် သမ္မာတရားကို လက်ခံသောသူတစ်ဦး မဟုတ်ပေ၊ သူတို့သည် အနာဂတ်၌ ကယ်တင်ခြင်း မခံရနိုင်ပေ။ နက်နဲမှုများကို အစဉ်သဖြင့် ရှာဖွေသောသူတို့သည် မကောင်းပေ၊ ထိုသို့သော လူတို့အား ဧဝံဂေလိတရားကို မဖြန့်ဝေနှင့်” ဟူ၍ ဖြစ်လေသည်။ ငါ အဘယ်ကြောင့် ဤသို့ ဆိုရသနည်း။ စင်စစ်အားဖြင့် ဤမေးခွန်းများကို မေးမြန်းနေသောသူမှာ မည်သူနည်း။ ယင်းမှာ အခြားတစ်စုံတစ်ဦး မဟုတ်ပေ၊ သူတို့ကိုယ်တိုင် ဖြစ်သည်။ သူတို့သည် ဤမေးခွန်းများကို မေးမြန်းလိုပြီး ယင်းတို့၏ အဖြေများကို သိရှိလိုကြသည်၊ ထို့ပြင် မည်သူက မေးမြန်းနေသည်ကို ငါ မသိဟု သူတို့ ထင်ကြသည်၊ ယင်းမှာ ငါသည် သူတို့ကို ထွင်းဖောက် မမြင်နိုင်သည့်အလားပင် ဖြစ်သည်။ ငါ ဤသို့ ဆိုပြီးသည့်နောက် သူတို့သည် ယင်းကို ကြားပြီး “ဘုရားသခင်က ကျွန်ုပ် မကောင်းဟု ဆိုသည်၊ ထို့ကြောင့် ကျွန်ုပ် နောက်တစ်ဖန် မေးမြန်းတော့မည် မဟုတ်ပါ” ဟု တွေးကြလေသည်။ ငါ၏ လုပ်နည်းကိုင်နည်းနှင့် ပတ်သက်၍ အဘယ်သို့ရှိသနည်း။ ယင်းသည် သူတို့ကို ထိထိရောက်ရောက် ပါးစပ်ပိတ်စေခဲ့သည် မဟုတ်လော။ အကယ်၍ ငါသည် သူတို့ကို အဖြေပေးခဲ့မည်ဆိုလျှင် ယင်းသည် သူတို့၏ ပရိယာယ်ထဲသို့ တည့်တည့် ကျရောက်သွားမည် မဟုတ်လော။ သူတို့သည် ထို့နောက် ရလေလိုလေ အိုတစ္ဆေဖြစ်ကြမည် ဖြစ်ပြီး မေးခွန်းများကို အဆုံးမရှိ မေးမြန်းကြပေမည်။ ဤအမှုအရာများကို သူတို့အား ရှင်းပြရန် ငါ့တွင် တာဝန်ဝတ္တရား ရှိသလော။ သင်သည် ဤသိမြင်မှုဖြင့် အဘယ်အရာကိုပင် လုပ်ဆောင်နိုင်မည်နည်း။ ငါ သိရှိလျှင်ပင် ငါသည် သင့်ကို ပြောပြမည် မဟုတ်ပေ။ ငါသည် အဘယ်ကြောင့် သင့်ကို ပြောပြသင့်သနည်း။ ငါသည် ကျမ်းစာ အနက်ဖွင့်ဆိုသူတစ်ဦးလော။ သင်သည် ဤနေရာသို့ ဓမ္မပညာ လေ့လာမှုများအတွက် လာခဲ့ပါသလော။ သင်သည် ငါ့ကို စေ့စေ့စပ်စပ် ကြည့်ရှုစစ်ဆေးရန် လာသည်၊ သင်၏ စေ့စေ့စပ်စပ် ကြည့်ရှုစစ်ဆေးခြင်းအတွက် ငါသည် ငါ့စိတ်နှလုံးကို ဖွင့်ရုံဖွင့်ပြလိုက်သင့်သလော။ ယင်းသည် သင့်လျော်သလော။ သင်သည် ငါ့ကို စမ်းသပ်ရန် လာသည်၊ ငါသည် သင့်ကို ငါ့ကို စမ်းသပ်ရန် ခွင့်ပြုသင့်သလော။ ယင်းသည် သင့်လျော်သလော။ သင်သည် သမ္မာတရားကို လက်ခံရန် ဤနေရာ၌ ရှိနေခြင်း မဟုတ်ပေ၊ သင်သည် ရန်လိုမှု၊ သံသယနှင့် စုံစမ်းမေးမြန်းခြင်း သဘောထားဖြင့် မေးခွန်းများ လာမေးမြန်းခြင်း ဖြစ်သည်။ ငါသည် သင့်ကို အဖြေများ ပေးနိုင်ဖွယ် လုံးဝ မရှိပေ။ အချို့သောသူများက “မည်သည့်မေးခွန်းကိုမဆို အဖြေပေးရန် လိုအပ်သည် မဟုတ်လော” ဟု ဆိုကြသည်။ ယင်းမှာ ကိစ္စရပ်အပေါ် မူတည်သည်။ သမ္မာတရား၊ အသင်းတော်၏ အလုပ်တို့နှင့် ပတ်သက်လာသည့်အခါတွင် ငါသည် အခြေအနေကို ထည့်သွင်းစဉ်းစားရဆဲ ဖြစ်သည်။ အကယ်၍ ငါသည် သင့်ကို ယခင်က ပြောပြပြီးဖြစ်ပြီး သင်သည် မသိဟန်ဆောင်နေဆဲ ဖြစ်ပါက၊ နှိမ့်ချစွာဖြင့် စုံစမ်းမေးမြန်းဟန်ဆောင်နေပါက ငါသည် သင့်ကို တုံ့ပြန်မည် မဟုတ်ပေ။ ငါသည် သင့်ကို ပြုပြင်မည်၊ ထို့နောက်တွင် သင် နားလည်သွားလိမ့်မည်။ အန္တိခရစ်တို့သည် ခရစ်တော်ကို မည်သို့ စေ့စေ့စပ်စပ် ကြည့်ရှုစစ်ဆေးပြီး ခွဲခြမ်းစိတ်ဖြာပုံ၊ ခရစ်တော်နှင့် ဘုရားသခင်၏ အနှစ်သာရအပေါ် သူတို့၏ သိလိုစိတ် ပြင်းပြမှု ရှုထောင့်မှကြည့်လျှင် အန္တိခရစ်တို့သည် အတိအကျ အဘယ်အရာကို စေ့စေ့စပ်စပ် ကြည့်ရှုစစ်ဆေးနေကြသနည်း။ သူတို့သည် သမ္မာတရားကို စေ့စေ့စပ်စပ် ကြည့်ရှုစစ်ဆေးနေကြခြင်း ဖြစ်သည်။ သူတို့သည် ဘုရားသခင် ပြုလုပ်သမျှ အရာတိုင်းကို သူတို့၏ စေ့စေ့စပ်စပ် ကြည့်ရှုစစ်ဆေးခြင်းနှင့် ခွဲခြမ်းစိတ်ဖြာခြင်း ခံရသည့်အရာများအဖြစ် သဘောထားပြုမူကြပြီး ဤသည်ကို အချိန်ဖြုန်းသည့် နည်းလမ်းတစ်ခုအဖြစ် အသုံးပြုကြသည်။ သူတို့သည် ဘုရားသခင်နောက်ကို လိုက်ကြသည်မှာ သူတို့သည် နယ်ပယ်တစ်ခုခု သို့မဟုတ် အသိပညာ နယ်ပယ်တစ်ခုခုကို လေ့လာနေသော ပညာရှင်များ ဖြစ်သည့်အလား ဓမ္မပညာကျောင်းတစ်ကျောင်းသို့ တက်ရောက်နေသော မယုံကြည်သူများကဲ့သို့ပင် ဖြစ်သည်။ ထိုသို့သော လူများသည် ဘုရားသခင်၏ အသိဉာဏ်ပွင့်လင်းစေခြင်းကို လက်ခံရရှိနိုင်မည်လော။ သူတို့သည် အလင်းကို လက်ခံရရှိနိုင်မည်လော။ သူတို့သည် သမ္မာတရားကို နားလည်နိုင်မည်လော။ (မရနိုင်ပါ)။

အသင်းတော်၌ ယခင်က မကြုံတွေ့ဖူးသော အချို့သော အလုပ်တာဝန်များ ရှိပြီး အချို့မှာ အသက်မွေးဝမ်းကျောင်းဆိုင်ရာ အမှုကို ပါဝင်စေသည်။ ငါသည် ထိုသို့သော အမှုကို လမ်းညွှန်သောအခါ အချို့သောသူတို့သည် စိတ်အားထက်သန်စွာနှင့် နှိမ့်ချစွာ နားထောင်ကြပြီး ဤတာဝန်များကို ထမ်းဆောင်ရာ၌ စောင့်ထိန်းသင့်သော စည်းမျဉ်းများနှင့် လက်တွေ့လုပ်ဆောင်ပြီး ဝင်ရောက်သင့်သော သမ္မာတရား လက်တွေ့ကျမှုတို့ကို သဘောပေါက်ကြသည်။ သို့သော်လည်း အချို့သောသူတို့သည် မိမိတို့၏ စိတ်နှလုံးထဲ၌ စေ့စေ့စပ်စပ် ကြည့်ရှုစစ်ဆေးလျက် ဦးနှောက်ခြောက်အောင် စဉ်းစားကြသည်၊ “သင်သည် ဤနယ်ပယ်များကို မလေ့လာခဲ့ဖူးပါ။ ထို့အပြင် သင်သည် ဤမျှ များပြားသော နယ်ပယ်များကို အမှန်တကယ် သင်ယူနိုင်ပါမည်လော။ မည်သူက အရာခပ်သိမ်းကို နားလည်ပြီး သိရှိနိုင်မည်နည်း။ သင်သည် အဘယ်အရာကို အခြေခံ၍ ကျွန်ုပ်တို့ကို လမ်းညွှန်သနည်း။ အဘယ်ကြောင့် ကျွန်ုပ်တို့သည် သင့်စကားကို နားထောင်သင့်သနည်း။ သင်သည် ကျွန်ုပ်တို့ကို လမ်းညွှန်သည့်အခါ သင် ဆိုသောစကားသည် တစ်ခါတစ်ရံ အမှန်ပင် ကျိုးကြောင်းဆီလျော်သော်လည်း သင်သည် ဤသည်ကို မည်သို့ သိရှိသနည်း။ အကယ်၍ ကျွန်ုပ်သည် တစ်စုံတစ်ရာကို မလေ့လာပါက ကျွန်ုပ်သည် ယင်းအကြောင်း သိရှိမည် မဟုတ်ပါ။ ကျွန်ုပ်သည် စဉ်းစားဆင်ခြင်ရန်၊ ပို၍ သင်ယူရန်၊ ပို၍ မြင်တွေ့ရန်၊ ပို၍ ကြားနာရန် ကြိုးပမ်းအားထုတ်ဖို့ လိုအပ်ပြီး ကျွန်ုပ်သည် သင်၏ လမ်းညွှန်မှုကို မလိုအပ်ဘဲ ကျွန်ုပ်ကိုယ်တိုင် လုပ်ဆောင်နိုင်သည့် အဆင့်သို့ ရောက်ရှိရန် ကြိုးစားရမည်။ သင်သည်လည်း သင် လုပ်ဆောင်ရင်းဖြင့် သင်ယူနေပုံရသည်၊ ယင်းကို တစ်စတစ်စ ကျွမ်းကျင်လာပုံရသည်” ဟု သူတို့ တွေးထင်ကြသည်။ ၎င်းတို့သည် အပြင်ပန်းအသွင်အပြင်များကိုသာ ကြည့်ကြပြီး တစ်ဖက်တွင် ဤပုဂ္ဂိုလ် မည်သည့်အရာကို ပြောသည်ဖြစ်စေ၊ လုပ်ဆောင်သည်ဖြစ်စေ ယင်း၌ စည်းမျဉ်းများရှိသည်ကို မမြင်ကြချေ။ မည်သည့်အလုပ်က လမ်းညွှန်ခြင်းခံရသည်ဖြစ်စေ ယင်းကို စည်းမျဉ်းများနှင့်အညီ လုပ်ဆောင်ခြင်းဖြစ်ပြီး ဤစည်းမျဉ်းသည် လူတို့၏ တကယ့်လိုအပ်ချက်များနှင့်လည်းကောင်း၊ တကယ့်အလုပ်၏ လိုလားအပ်သော ရလဒ်များနှင့်လည်းကောင်း ဆက်စပ်နေလေသည်။ အခြားတစ်ဖက်တွင် အရေးအကြီးဆုံးမှာ ဤပုဂ္ဂိုလ်သည် မည်သည့်အရာမျှ မသင်ယူခဲ့ပေ။ သူ၏ အသိပညာ၊ သင်ယူမှု၊ ထိုးထွင်းသိမြင်မှုနှင့် အတွေ့အကြုံတို့သည် ထူးခြားထင်ရှားခြင်း မရှိပေ။ သို့သော် လူတို့ မမေ့လျော့သင့်သော အချက်တစ်ချက် ရှိသည်။ ယင်းမှာ သူ၏ ထိုးထွင်းသိမြင်မှု၊ အသိပညာ၊ အတွေ့အကြုံနှင့် ကျွမ်းကျင်မှုတို့သည် ကြွယ်ဝသည်ဖြစ်စေ၊ မှတ်သားဖွယ်ရာဖြစ်သည်ဖြစ်စေ လက်ရှိ အမှုကို ဆောင်ရွက်ရန် တာဝန်ရှိသော အရင်းအမြစ်သည် ဤပြင်ပ ဇာတိပကတိ မဟုတ်ဘဲ ဤဇာတိပကတိ၏ အနှစ်သာရတည်းဟူသော ဘုရားသခင် ကိုယ်တော်တိုင် ဖြစ်သည်။ ထို့ကြောင့် အကယ်၍ သင်သည် ဤဇာတိပကတိ၏ အသွင်အပြင်ဖြစ်သော သူ၏ အရပ်အမောင်းနှင့် ရုပ်ရည်၊ ပြောဆိုပုံ လေသံ၊ အသံအနိမ့်အမြင့်နှင့် စကားပြောပုံတို့ကို အခြေခံ၍ အကဲဖြတ်ဆုံးဖြတ်ပါက သူသည် ဤအလုပ်တာဝန်များကို အဘယ်ကြောင့် တာဝန်ယူနိုင်ပြီး အရည်အချင်းရှိသည်ကို သင် ရှင်းပြနိုင်မည် သို့မဟုတ် နားလည်သဘောပေါက်နိုင်မည် မဟုတ်ပေ၊ သင်သည် ယင်းကို ထွင်းဖောက်မြင်နိုင်လိမ့်မည် မဟုတ်ပေ။ ယင်းကို ထွင်းဖောက်မြင်နိုင်ခြင်း မရှိခြင်းသည် ယင်းမှာ မဖြေရှင်းနိုင်သော ကိစ္စရပ်တစ်ခု ဖြစ်သည်ဟု ဆိုလိုသလော။ မဟုတ်ပါ၊ ယင်းကို ဖြေရှင်းနိုင်ပါသည်။ သင်သည် ယင်းကို ထွင်းဖောက်မြင်ရန် မလိုအပ်ပေ၊ သင်သည် အချက်တစ်ချက်ကို သိရှိရန်၊ သတိရရန်နှင့် အသိအမှတ်ပြုရန်သာ လိုအပ်သည်။ ယင်းမှာ ခရစ်တော်သည် ဘုရားသခင် လူ့ဇာတိခံယူသော ဇာတိပကတိ ဖြစ်သည်။ လူတို့သည် ခရစ်တော်အပေါ် ထားရှိသင့်သော စည်းမျဉ်းများ၊ ရပ်တည်ချက်နှင့် သဘောထားတို့သည် စေ့စေ့စပ်စပ် ကြည့်ရှုစစ်ဆေးရန်၊ ခွဲခြမ်းစိတ်ဖြာရန်၊ သို့မဟုတ် သူတို့၏ သိလိုစိတ် ပြင်းပြမှုကို ဖြည့်ဆည်းရန် မဟုတ်ဘဲ အသိအမှတ်ပြုရန်၊ လက်ခံရန်၊ နားထောင်ရန်နှင့် ကျိုးနွံနာခံရန်သာ ဖြစ်သည်။ အကယ်၍ သင်သည် စေ့စေ့စပ်စပ် ကြည့်ရှုစစ်ဆေးပြီး ခွဲခြမ်းစိတ်ဖြာပါက ယင်းသည် အဆုံးစွန်၌ သင့်အား ဘုရားသခင်၏ အနှစ်သာရကို မြင်တွေ့စေမည်လော။ မြင်တွေ့စေမည် မဟုတ်။ ဘုရားသခင်သည် မည်သူ့ကိုမျှ ကိုယ်တော်အား ခွဲခြမ်းစိတ်ဖြာရန် သို့မဟုတ် စေ့စေ့စပ်စပ် ကြည့်ရှုစစ်ဆေးရန် ခွင့်ပြုတော်မမူပေ၊ သင် စေ့စေ့စပ်စပ် ကြည့်ရှုစစ်ဆေးပြီး ခွဲခြမ်းစိတ်ဖြာလေ၊ ဘုရားသခင်သည် သင့်ထံမှ ပို၍ ပုန်းကွယ်တော်မူလေ ဖြစ်မည်။ ဘုရားသခင် ပုန်းကွယ်တော်မူသောအခါ လူတို့သည် အဘယ်အရာကို ခံစားကြရသနည်း။ ယင်းမှာ သူတို့၏ စိတ်နှလုံးထဲရှိ ဘုရားသခင်နှင့်ပတ်သက်သော အယူအဆသည် မရေမရာ ဖြစ်လာသည်၊ သူတို့၏ သမ္မာတရားဆိုင်ရာ အယူအဆသည် မရှင်းမလင်း ဖြစ်လာပြီး သူတို့ လိုက်လျှောက်သင့်သော လမ်းခရီးနှင့်ပတ်သက်သည့် အရာခပ်သိမ်းသည် ဝေဝါးသွားခြင်း ဖြစ်သည်။ ယင်းမှာ သင်၏ အမြင်ကို ပိတ်ဆို့နေသော နံရံတစ်ချပ် ရှိနေသကဲ့သို့ ဖြစ်သည်၊ သင်သည် ရှေ့ဆက်ရမည့် ဦးတည်ချက်ကို မမြင်နိုင်ပေ၊ အားလုံးသည် မှုန်ဝါးနေသည်။ ဘုရားသခင် အဘယ်မှာ ရှိသနည်း။ ဘုရားသခင်သည် မည်သူနည်း။ ဘုရားသခင် အမှန်တကယ် တည်ရှိပါသလော။ ဤမေးခွန်းများသည် သင်၏ ရှေ့မှောက်၌ ရပ်တည်နေသော နံရံနက်ကြီးတစ်ခုကဲ့သို့ ဖြစ်သည်၊ ယင်းမှာ ဘုရားသခင်သည် သင့်ထံမှ သူ၏ မျက်နှာတော်ကို ကွယ်ထားတော်မူခြင်း ဖြစ်ကာ သင်သည် သူ့ကို မမြင်နိုင်အောင် ဖြစ်စေသည်။ ဤရူပါရုံအားလုံးသည် သင့်အတွက် မရေမရာ ဖြစ်လာကြသည်၊ ယင်းတို့သည် ပျောက်ဆုံးသွားကြပြီး မှောင်မိုက်ခြင်းသည် သင်၏ စိတ်နှလုံးကို ပြည့်စေသည်။ သင်၏ စိတ်နှလုံးသည် မှောင်မိုက်သွားသောအခါ သင်၌ ရှေ့ဆက်ရန် လမ်းခရီးတစ်ခု ရှိနေသေးသလော။ သင်သည် အဘယ်အရာ လုပ်ဆောင်ရမည်ကို သိရှိနေသေးသလော။ သင် မသိတော့ပေ။ သင်၏ မူလ ဦးတည်ချက်နှင့် ပန်းတိုင်များ မည်မျှပင် ရှင်းလင်းခဲ့စေကာမူ သင်သည် ဘုရားသခင်ကို စေ့စေ့စပ်စပ် ကြည့်ရှုစစ်ဆေးပြီး ခွဲခြမ်းစိတ်ဖြာသောအခါ ယင်းတို့သည် မရေမရာနှင့် မှောင်မိုက်သွားကြပေမည်။ လူတို့သည် ထိုသို့သော အခြေအနေ၊ ထိုသို့သော အနေအထားသို့ ကျရောက်သောအခါ သူတို့သည် အန္တရာယ် ရှိပြီဖြစ်သည်။ ဤသည်မှာ ဘုရားသခင်ကို စေ့စေ့စပ်စပ် ကြည့်ရှုစစ်ဆေးခြင်းအပေါ် အာရုံစိုက်သော သူတို့အတွက် ဖြစ်ပျက်သောအရာ ဖြစ်သည်။ အန္တိခရစ်တို့သည် အစဉ်သဖြင့် ထိုသို့သော အခြေအနေမျိုး၌ ရှိနေကြပြီး ရှေ့၌ မှောင်မိုက်အတိ ဖြစ်နေကာ အပြုသဘောဆောင်သော အမှုအရာများမှာ အဘယ်အရာဖြစ်သည်၊ သမ္မာတရားမှာ အဘယ်အရာ ဖြစ်သည်ကို ပိုင်းခြားသိမြင်နိုင်ခြင်း မရှိကြပေ။ ဘုရားသခင် မည်သည့်အရာကိုပင် လုပ်ဆောင်စေကာမူ သူတို့သည် ယင်းမှာ အမှန်ပင် ဘုရားသခင် ဖြစ်သည်၊ ဘုရားသခင် ကိုယ်တော်တိုင် ဖြစ်သည်ဟု အတည်မပြုနိုင်ကြပေ၊ သူတို့ မည်သို့ပင် ကြည့်စေကာမူ သူတို့သည် လူ့ဇာတိခံယူခြင်းကို လူပုဂ္ဂိုလ်တစ်ဦးအဖြစ်သာ မြင်ကြသည်၊ အကြောင်းမှာ သူတို့သည် အစဉ်သဖြင့် စေ့စေ့စပ်စပ် ကြည့်ရှုစစ်ဆေးပြီး ခွဲခြမ်းစိတ်ဖြာနေသောကြောင့် ဘုရားသခင်သည်လည်း သူတို့၏ မျက်စိများကို ဆက်လက် ကွယ်ထားတော်မူသောကြောင့် ဖြစ်သည်။ သင်သည် သူတို့၏ မျက်လုံးများ ကျယ်စွာ ပွင့်နေသည်၊ တောက်ပပြီး ကြီးမားသည်ကို မြင်ရသည်၊ သို့သော် သူတို့သည် မျက်မမြင်များ ဖြစ်နေဆဲ ဖြစ်သည်။ ဘုရားသခင်သည် လူတို့ထံမှ သူ၏ မျက်နှာတော်ကို ကွယ်ထားတော်မူသောအခါ ယင်းမှာ သူတို့၏ စိတ်နှလုံးများသည် မာကျောသွားသကဲ့သို့ အစွန်းရောက် မှောင်မိုက်ခြင်းထဲသို့ ထိုးကျသွားသကဲ့သို့ ဖြစ်သည်။ သူတို့သည် အပေါ်ယံ ဖြစ်စဉ်များကိုသာ မြင်ကြပြီး အတွင်း၌ တည်ရှိသော လမ်းကြောင်းကို မသိမြင်နိုင်ကြ၊ တိမ်မြုပ်နေသော သမ္မာတရားကို နားလည်ရန် ပျက်ကွက်ကြသည်။ ထို့ထက်မက သူတို့သည် ဘုရားသခင်၏ အနှစ်သာရ သို့မဟုတ် သူ၏ စိတ်သဘောထားကို မမြင်နိုင်ကြပေ။

ဘုရားသခင်၏ ပေါ်ထွန်းခြင်းနှင့် အမှုတော်ကို ခွဲခြမ်းစိတ်ဖြာခြင်းနှင့် စေ့စေ့စပ်စပ် ကြည့်ရှုစစ်ဆေးခြင်းတို့အားဖြင့် မည်သည့်ရလဒ်မျှ ရရှိမည် မဟုတ်ပေ။ ခွဲခြမ်းစိတ်ဖြာခြင်းနှင့် စေ့စေ့စပ်စပ် ကြည့်ရှုစစ်ဆေးခြင်း အခြေအနေသို့ မကျရောက်ရန် အလွန်အရေးကြီးသည်၊ ဤသည်မှာ အပျက်သဘောဆောင်သော လမ်းခရီး ဖြစ်သည်။ သို့ဆိုလျှင် အပြုသဘောဆောင်သော လမ်းခရီးမှာ အဘယ်နည်း။ ယင်းမှာ သင့်အနေဖြင့် ဤသည်မှာ ဘုရားသခင်၏ အမှုတော်ဖြစ်သည်၊ ဤသာမန်ပုဂ္ဂိုလ်သည် ဘုရားသခင် လူ့ဇာတိခံယူသော ဇာတိပကတိဖြစ်ပြီး ဘုရားသခင်၏ အနှစ်သာရ ရှိသည်ဟု ခိုင်မာစွာ ယုံကြည်သည်နှင့်တစ်ပြိုင်နက် သင်သည် အကြွင်းမဲ့ လက်ခံပြီး ကျိုးနွံနာခံသင့်သည်ဟူ၍ ဖြစ်သည်။ ဤဇာတိပကတိ၌ မနှစ်သက်စရာ သွင်ပြင်လက္ခဏာများစွာ၊ လူ့အယူအဆများ၊ စိတ်ကူးစိတ်သန်းများနှင့် ဆန့်ကျင်ဘက်ဖြစ်သော သွင်ပြင်လက္ခဏာများစွာ ရှိသည်ဟု လူတို့က ခံစားကြရသည်၊ ယင်းမှာ လူတို့နှင့်ဆိုင်သော ပြဿနာတစ်ရပ် ဖြစ်သည်။ ဘုရားသခင်သည် ဤနည်းလမ်းဖြင့် အမှုပြုတော်မူသည်၊ ပြောင်းလဲရန် လိုအပ်သောအရာများမှာ လူတို့၏ အယူအဆများ၊ သူတို့၏ ဖောက်ပြန်ပျက်စီးသော စိတ်သဘောထားများနှင့် ဘုရားသခင်အပေါ် သူတို့၏ သဘောထားများ ဖြစ်ကြသည်၊ ဘုရားသခင် လူ့ဇာတိခံယူသော ဇာတိပကတိ မဟုတ်ပေ။ လူတို့သည် သူ့အား ဘုရားသခင်အဖြစ် အသိအမှတ်ပြုပြီး မည်သို့ပင်ဖြစ်စေ သူ့ကို စေ့စေ့စပ်စပ် ကြည့်ရှုစစ်ဆေးလိုဆဲ ဖြစ်ခြင်း သို့မဟုတ် သူ ပြုလုပ်သောအရာနှင့် ပြောဆိုသောအရာကို ခွဲခြမ်းစိတ်ဖြာပြီး ဆွေးနွေးလိုဆဲ ဖြစ်ခြင်းတို့ထက် ဤနေရာ၌ သမ္မာတရားကို ရှာဖွေရန်၊ ဘုရားသခင်၏ ရည်ရွယ်ချက်များကို ရှာဖွေရန်နှင့် သူတို့၏ သင့်လျော်သော ရှုမြင်ပုံနှင့် ရပ်တည်ချက်ကို ခံယူရန် လိုအပ်သည်၊ ယင်းသည် အဓိက ပြဿနာတစ်ရပ် ဖြစ်ပေမည်။ သင်၏ ရပ်တည်ချက်နှင့် သင်၏ သမ္မာတရားကို လက်ခံသည့် ရှုထောင့်တို့ မှားယွင်းသောအခါ သင် အရာခပ်သိမ်းကို ရှုမြင်ပုံ၏ အကျိုးရလဒ်သည်လည်း ပြောင်းလဲသွားမည်ဖြစ်ပြီး သင်၏ လိုက်စားမှု လမ်းကြောင်းနှင့် ဦးတည်ချက်တို့ကို သက်ရောက်မှု ရှိစေသည်။ ဘုရားသခင် ပြုလုပ်သော သို့မဟုတ် ပြောဆိုသော မည်သည့်အရာ၌မဆို ယင်းသည် လူ့အယူအဆများနှင့် ကိုက်ညီသည်ဖြစ်စေ မကိုက်ညီသည်ဖြစ်စေ ဆိုသည်မှာ ယာယီ ပြဿနာတစ်ခုမျှသာ ဖြစ်သည်။ ဘုရားသခင်သည် လူသားမျိုးနွယ်အတွက် ပြုလုပ်တော်မူသော အရာခပ်သိမ်း၏ ပံ့ပိုးမှုနှင့် တန်ဖိုး၊ ယင်းက လူ့အသက်တာသို့ ဆောင်ကြဉ်းပေးသော တန်ဖိုးတို့သည် ထာဝရ ဖြစ်ကြသည်။ ယင်းတို့ကို မည်သည့် လူပုဂ္ဂိုလ်တစ်ဦးတစ်ယောက်၊ မည်သည့် ပညာရပ်ဆိုင်ရာ နယ်ပယ်၊ မည်သည့် အကြောင်းပြချက် သို့မဟုတ် သီအိုရီ၊ သို့မဟုတ် မည်သည့် ခေတ်ရေစီးကြောင်းဖြင့်မျှ မပြောင်းလဲနိုင်ပေ။ ဤသည်မှာ သမ္မာတရား၏ တန်ဖိုး ဖြစ်သည်။ လက်ရှိအချိန်၌ ဤသာမန်ပုဂ္ဂိုလ်၏ နှုတ်ကပတ်တော်များနှင့် လုပ်ဆောင်ချက်များသည် သင်၏ သိလိုစိတ် ပြင်းပြမှု သို့မဟုတ် ဝင့်ဝါမှုတို့ကို မကျေနပ်စေနိုင်သကဲ့သို့ သင့်အား စိတ်နှလုံးထဲ၌ရော နှုတ်အားဖြင့်ပါ အပြည့်အဝ လက်ခံယုံကြည်စေခြင်း သို့မဟုတ် စည်းရုံးသိမ်းသွင်းနိုင်ခြင်းတို့ကို မပြုနိုင်သည်မှာ ဖြစ်ကောင်းဖြစ်နိုင်သည်၊ သို့သော်လည်း လူသားမျိုးနွယ်တစ်ရပ်လုံးအပေါ်၊ ခေတ်တစ်ခုလုံးအပေါ်၊ ပြီးလျှင် ဘုရားသခင်၏ စီမံခန့်ခွဲမှုအစီအစဉ် တစ်ခုလုံးအပေါ် သူ ယနေ့ မိန့်တော်မူသော နှုတ်ကပတ်တော်အားလုံးနှင့် ကိုယ်တော် ဤခေတ်၌နှင့် ဤကာလအတွင်း၌ ပြုလုပ်တော်မူသော အမှုတော်အားလုံး၏ ပံ့ပိုးမှုများမှာ ထာဝရ မပြောင်းလဲနိုင်ပေ။ ဤသည်မှာ အမှန်တရားတစ်ခု ဖြစ်သည်။ ထို့ကြောင့် တစ်နေ့သောအခါ၌ “လွန်ခဲ့သော အနှစ်နှစ်ဆယ် သို့မဟုတ် သုံးဆယ်က ကျွန်ုပ်သည် ဤသာမန်ပုဂ္ဂိုလ် ပြုလုပ်ခဲ့သော အချို့သော ပြောဆိုချက်တစ်ခုကို စေ့စေ့စပ်စပ် ကြည့်ရှုစစ်ဆေးခဲ့သည်၊ နားလည်မှုလွဲခဲ့သည်၊ အတိုက်အခံပြုခဲ့သည်၊ ပြီးလျှင် ဝေဖန်သုံးသပ်ပြီး ပြစ်တင်ရှုတ်ချခဲ့သည်ပင် ဖြစ်သည်။ အနှစ်နှစ်ဆယ် သို့မဟုတ် သုံးဆယ်အကြာတွင် ကျွန်ုပ်သည် ထိုပြောဆိုချက်ကို ပြန်လည်ကြည့်ရှုသောအခါ ကျွန်ုပ်၏ စိတ်နှလုံးသည် ကျေးဇူးတင်ရှိခြင်းနှင့် မိမိကိုယ်ကို ပြစ်တင်ရှုတ်ချခြင်းတို့ဖြင့် ပြည့်နှက်နေပါသည်” ဟု သင် နားလည်လာလိမ့်မည်။ ဖောက်ပြန်ပျက်စီးသော လူသားများသည် ဘုရားသခင်၏ ရှေ့မှောက်၌ နိမ့်ကျပြီး အရေးမပါကြပေ၊ သူတို့သည် ထာဝစဉ် နို့စို့သူငယ်များ ဖြစ်ကြသည်၊ ဖော်ပြရန် မထိုက်တန်ပေ။ လူတစ်ဦးသည် မည်မျှ အမှုတော်ကို ဆောင်ရွက်သည်ဖြစ်စေ၊ မည်သည့် ကာလ၌လည်းကောင်း၊ မည်သည့်အခြေအနေအောက်တွင်လည်းကောင်း ဘုရားသခင် မိန့်တော်မူခဲ့သော စကားလုံးတိုင်း၏ လူသားမျိုးနွယ်တစ်ရပ်လုံးအပေါ် ပံ့ပိုးမှုနှင့် နှိုင်းယှဉ်ပါက ခြားနားချက်မှာ ကောင်းကင်နှင့် မြေကြီးကဲ့သို့ ဖြစ်သည်တကား။ သို့ဖြစ်၍ ဘုရားသခင်သည် လူတို့ စေ့စေ့စပ်စပ် ကြည့်ရှုစစ်ဆေးခြင်း၊ ခွဲခြမ်းစိတ်ဖြာခြင်းနှင့် သံသယဖြစ်ခြင်း ခံရရန် မဟုတ်ကြောင်း သင့်အနေဖြင့် နားလည်ရမည်။ ဘုရားသခင်၏ အမှုတော်နှင့် ဘုရားသခင် လူ့ဇာတိခံယူသော ဇာတိပကတိသည် လူတို့၏ သိလိုစိတ် ပြင်းပြမှုကို ဖြည့်ဆည်းပေးရန် ဤနေရာ၌ ရှိနေခြင်း မဟုတ်ပေ။ သူသည် ဤအမှုတော်အားလုံးကို အချိန်ဖြုန်းရန် သို့မဟုတ် နေ့ရက်များကို အေးအေးဆေးဆေး ကုန်လွန်စေရန် ပြုလုပ်တော်မူခြင်း မဟုတ်ပေ။ သူ၏ ရည်ရွယ်ချက်မှာ ခေတ်တစ်ခေတ်၏ လူတို့ကို ကယ်တင်ရန်၊ လူသားမျိုးနွယ်တစ်ရပ်လုံးကို ကယ်တင်ရန် ဖြစ်ပြီး သူ ပြီးမြောက်အောင်မြင်ရန် ရည်ရွယ်သော အမှုတော်၏ ရလဒ်များမှာ ထာဝစဉ် တည်တံ့ရန် ဖြစ်သည်။ အန္တိခရစ်တို့သည် စေ့စေ့စပ်စပ် ကြည့်ရှုစစ်ဆေးပြီး ခွဲခြမ်းစိတ်ဖြာရန်၊ သူတို့၏ သိလိုစိတ် ပြင်းပြမှုကို ဖြည့်ဆည်းရန် ခရစ်တော်အား သာမန် ပုဂ္ဂိုလ်တစ်ဦးအဖြစ် ဆက်ဆံကြသည်။ ဤသည်၏ သဘာဝမှာ အဘယ်နည်း။ ယင်းကို နားလည်နိုင်သလော သို့မဟုတ် ခွင့်လွှတ်နိုင်သလော။ သူတို့သည် အစဉ်အမြဲ အပြစ်ပြုသောသူများ၊ ကျိန်ခြင်းခံရသောသူများနှင့် ထာဝရ ခွင့်လွှတ်ခြင်းမခံရနိုင်သောသူများ ဖြစ်ကြသည်။ အကယ်၍ လူတစ်ဦးသည် လူ့သဘာဝ ရှိပြီး သမ္မာတရားကို နားလည်ကာ သမ္မာတရား လက်တွေ့ကျမှုကို ပိုင်ဆိုင်ပါက သူတို့ကို စေ့စေ့စပ်စပ် ကြည့်ရှုစစ်ဆေးခြင်းသည်ပင် အတော်ပင် ရွံရှာဖွယ် ဖြစ်သည်။ အချို့သောသူတို့ပင်လျှင် ငါ့ကို မြင်သောအခါ “သမ္မာတရားအချို့ကို ထပ်မံ မိတ်သဟာယဖွဲ့ပါ၊ တတိယကောင်းကင်၏ ဘာသာစကားအကြောင်း ပိုမို မိတ်သဟာယဖွဲ့ပါ၊ ကျွန်ုပ်တို့ မသိသော အမှုအရာများကို ပိုမို ပြောဆိုပါ” ဟု ဆိုကြလျက် ခရစ်တော်အား သာမန် ပုဂ္ဂိုလ်တစ်ဦးအဖြစ် ဆက်ဆံခြင်းနှင့် သူ့ကို စိတ်ထဲမှ စေ့စေ့စပ်စပ် ကြည့်ရှုစစ်ဆေးခြင်း၊ သူပြုလုပ်သမျှ အရာတိုင်းကို ရန်လိုမှုနှင့် အသရေဖျက်မှုတို့ဖြင့် ဆက်ဆံပြုမူခြင်းနှင့် သူ မိန့်တော်မူသော နှုတ်ကပတ်တော်များနှင့် ပတ်သက်၍ သင်၏ သိလိုစိတ် ပြင်းပြမှုကို ဖြည့်ဆည်းရန်သာ ရှာဖွေခြင်းတို့ဖြင့် သူတို့သည် ဤပုဂ္ဂိုလ်ကို အဘယ်အရာအဖြစ်များ မှတ်ယူကြသနည်း။ သူတို့၏ ငြီးငွေ့မှုကို သက်သာစေဖို့ လူတစ်ဦး အဖြစ်လော။ ဘုရားသခင်သည် ဤကိစ္စရပ်ကို မည်သို့ အဓိပ္ပာယ်ဖွင့်ဆိုသနည်း။ ဤသည်မှာ ဘုရားသခင်ကို ပြစ်မှားစော်ကားခြင်း မဟုတ်လော။ အကယ်၍ ယင်းသည် လူတို့ကို ဦးတည်ပါက ယင်းကို လှောင်ပြောင်ခြင်းနှင့် သရော်ခြင်းဟု ခေါ်သည်၊ အကယ်၍ ယင်းသည် ဘုရားသခင်ကို ဦးတည်ပါက ယင်းသည် ဘုရားသခင်ကို ပြစ်မှားစော်ကားခြင်း ဖြစ်သည်။

စေ့စေ့စပ်စပ် ကြည့်ရှုစစ်ဆေးခြင်း၊ ခွဲခြမ်းစိတ်ဖြာခြင်း၊ နှင့် သိလိုစိတ် ပြင်းပြမှုဟူသော ဤသရုပ်သကန်၏ အကြောင်းအရာအတွင်း၌ အန္တိခရစ်တို့၏ သဘာဝ အနှစ်သာရသည် ကောက်ကျစ်ဆိုးယုတ်မှုအဖြစ်၊ သမ္မာတရားကို အလွန်အမင်း မနှစ်မြို့ခြင်းအဖြစ် ယင်းဘာသာ ဖော်ပြလေသည်။ သူတို့သည် အပြုသဘောဆောင်သော အမှုအရာ အားလုံးကို လျစ်လျူရှုကြသည်၊ သူတို့သည် ယင်းတို့ကို မထီမဲ့မြင်ပြုကြပြီး အထင်အမြင်သေးသော သဘောထားဖြင့် ဆက်ဆံကြကာ ဘုရားသခင် လူ့ဇာတိခံယူသော ဇာတိပကတိကိုပင် ချန်လှပ်မထားကြပေ။ သူတို့သည် အမှုကိစ္စအားလုံး၌ သူတို့၏ သိလိုစိတ် ပြင်းပြမှုကို ကျေနပ်စေရန် လိုအပ်သည်၊ အရာခပ်သိမ်းကို သူတို့ စေ့စေ့စပ်စပ် ကြည့်ရှုစစ်ဆေးကာ ကောက်ချက်များ ဆွဲရန်နှင့် အရာခပ်သိမ်း၏ ဖြစ်ကြောင်းရင်းမြစ်ကို သိရှိရန်၊ အဘယ်အရာ ဖြစ်ပျက်နေသည်ကို နားလည်ရန် လိုလားကြပြီး ဤသို့ဖြင့် သူတို့သည် အသိပညာကြွယ်ဝပြီး ဉာဏ်ပညာရှိပုံပေါက်လေသည်။ ဤသည်မှာ လူသားတို့၏ ဖောက်ပြန်ပျက်စီးသော စိတ်သဘောထား ဖြစ်သည်။ အရာခပ်သိမ်းကို စေ့စေ့စပ်စပ် ကြည့်ရှုစစ်ဆေးခြင်းကို အလေ့အကျင့်ဖြစ်လာပြီးနောက် သူတို့သည် ယခုအခါ သူတို့၏ စေ့စေ့စပ်စပ် ကြည့်ရှုစစ်ဆေးခြင်းကို ဘုရားသခင်ဘက်သို့ လှည့်ကြသည်။ ဤသည်က သူတို့ထံ အဘယ်အရာကို ဆောင်ကြဉ်းပေးသနည်း။ စုံလင်ခြင်း နှင့် ကယ်တင်ခြင်းလော။ မဟုတ်ပါ၊ ယင်းသည် သူတို့ထံသို့ ပျက်စီးခြင်းနှင့် ပျက်စီးရာပျက်စီးကြောင်းကိုသာ ဆောင်ကြဉ်းပေးသည်တကား။ ဤသည်မှာ အန္တိခရစ်များကို အဓိပ္ပာယ်ဖွင့်ဆိုပုံ ဖြစ်သည်။ သူတို့သည် ကျိန်ခြင်းခံရသောသူများနှင့် ပြစ်တင်ရှုတ်ချဖွယ်သောသူများ ဖြစ်ကြသည်။ ဘုရားသခင် လူ့ဇာတိခံယူသော ဇာတိပကတိအပေါ် သူတို့၏ ချဉ်းကပ်ပုံ၌ သူတို့သည် သူ့ကို လက်ခံရန်နှင့် ရှုမြင်ရန် နောက်လိုက်များ သို့မဟုတ် ဖန်ဆင်းခံများ၏ ရပ်တည်ချက်ကို မည်သည့်အခါမျှ မခံယူကြပေ၊ ထိုအစား သူတို့သည် သူ့ကို ပညာရှင်တစ်ဦး၏၊ အရာရာတတ်သိသူတစ်ဦး၏၊ သိလိုစိတ် ပြင်းပြမှုဖြင့် ပြည့်လျှမ်းနေသော တစ်စုံတစ်ဦး၏၊ သမ္မာတရားကို သဘောပေါက်နားလည်နိုင်စွမ်းမရှိသကဲ့သို့ အပြုသဘောဆောင်သော အရာများကို စက်ဆုပ်ရွံရှာသော မာနထောင်လွှားသော ပုဂ္ဂိုလ်တစ်ဦး၏ ရှုထောင့်နှင့် ရပ်တည်မှုတို့မှ ခံစားသိမြင်ပြီး မှတ်ယူကြသည်။ ထိုသို့သော လူများသည် ကယ်တင်ခြင်း မခံရနိုင်သည်မှာ အတော်ပင် ရှင်းလင်းပါသည်။

၂၀၂၀ ခုနှစ်၊ ဇွန်လ ၆ ရက်