ဖြည့်စွက်ချက်- ကနေဒါနိုင်ငံ၌ အန္တိခရစ်ဖြစ်ရပ်ကို ကိုင်တွယ်ခြင်း

ကနေဒါအသင်းတော်ရှိ မိမိတို့၏တာဝန်များကို ထမ်းဆောင်နေကြသည့် လူများနှင့်ပတ်သက်၍ ယခုအခါတွင် အခြေအနေမှာ အဘယ်သို့နည်း။ အန္တိခရစ်ဖြစ်သည့် ယန်အပေါ် သင်တို့ ချင့်ချိန်နိုင်စွမ်း ရှိကြသလော။ ယန် စကားပြောပြီး ပြုမူဆောင်ရွက်ပုံတွင် ပြဿနာတစ်ခုတလေ သင်တို့ မြင်နိုင်ကြသလော။ (ထိုအချိန်က မည်သည့်ပြဿနာကိုမျှ ကျွန်ုပ် မမြင်ခဲ့ပါ။ သူက အလုပ်ကို နောက်ဆက်တွဲမလုပ်ခြင်းသာ ဖြစ်သည်ဟု ကျွန်ုပ် တွေးထင်ခဲ့သည်။ အခြား မည်သည့်အရာကိုမျှ ကျွန်ုပ် တကယ် သိပ်မသိခဲ့ပါ။) နောက်တစ်ယောက်က ဆက်ပြောနိုင်သည်။ (ယန်နှင့် ကျွန်ုပ် သိပ်အဆက်အသွယ် မရှိခဲ့ပါ။ လွန်ခဲ့သည့် နှစ်နှစ်တွင် သူနှင့်အတူ စုဝေးပွဲ အနည်းငယ် ကျွန်ုပ် တက်ရောက်ခဲ့သော်လည်း၊ ထို့နောက်တွင် သူနှင့် ကျွန်ုပ် အဆက်အသွယ်မရှိခဲ့ပါ။) ယန်သည် သင်တို့ အသင်းတော်၏ ခေါင်းဆောင်တစ်ဦး ဖြစ်ခဲ့သည်။ သို့ဖြစ်၍ အဘယ်သို့ဖြစ်ပြီး သင်တို့ အဖွဲ့များထဲမှ တစ်ဖွဲ့ကမျှ သူနှင့် အဆက်အသွယ် တစ်ခုတလေ မရှိခဲ့ရသနည်း။ အဘယ်ကြောင့်ဆိုသော် ယခုတွင် သူ၌ ပြဿနာများရှိသည်ကို တွေ့ရှိရပြီး သင်တို့က မိမိတို့ယူရမည့်တာဝန်များကို ရှောင်လွှဲရန် ကြိုးစားနေကြသောကြောင့် ဖြစ်သည်။ သို့မဟုတ် သူနှင့် အမှန်တကယ် သင်တို့ အဆက်အသွယ် မရှိခဲ့ကြခြင်းလော။ တစ်စုံတစ်ဦးက ယန်နှင့် လျော်ကန်မှုမရှိသည့် ဆက်ဆံရေးတစ်ခု ရှိခဲ့ကြောင်းကို ငါ ကြားရသည်။ ဤသည်မှာ မှန်သလော။ (မှန်ပါသည်။) ဤအရာကို သင်တို့ သိမြင်ခဲ့သလော။ (မသိမြင်ခဲ့ပါ။) သို့ဆိုလျှင် သင်တို့ အလွန် ကြောင်းကျိုးမမြင်ကြပေ။ အခြားတစ်စုံတစ်ဦးက ဆက်ပြောနိုင်သည်။ (ကျွန်ုပ်သည် ယန်နှင့် အဆက်အသွယ် များစွာရှိခဲ့သည်။ ထိုအချိန်က သူသည် အတော်အသင့် မာနထောင်လွှားပြီး မိမိကိုယ်ကို မှန်သည်ဟု မှတ်ယူကာ မိမိကိုယ်ကို ချီးမြှောက်ကာ ကြွားဝါရန် နှစ်သက်သည်ဟုသာ ကျွန်ုပ် ထင်ခဲ့သည်။ သို့သော် သူ့ထံတွင် အန္တိခရစ်တစ်ဦး၏ အနှစ်သာရရှိခဲ့သည်ကိုမူ ကျွန်ုပ် လုံးဝ ပိုင်းခြားသိမြင်ခဲ့ခြင်း မရှိပါ။) သူက အမျိုးသမီးများကို သွေးဆောင်ဖြားယောင်းရသည်ကို နှစ်သက်သည်။ ယင်းကို သင်တို့ သိခဲ့ကြသလော။ (မသိခဲ့ပါ။ အမျိုးသားများနှင့် အမျိုးသမီးများအတွက် လိင်ကိစ္စများတွင် ကိုယ်ကျင့်သိက္ခာကင်းမဲ့ခြင်းက အထူးသဖြင့် မကောင်းကြောင်း မိတ်သဟာယတွင် သူ ပြတ်သားစွာ အမြဲ ပြောဆိုခဲ့ပြီး ထိုသို့သော အပြုအမူကို ကျွန်ုပ်တို့ ရပ်တန်းက ရပ်ရမည်ဟု မကြာခဏ မိတ်သဟာယပြုခဲ့သည်။ သူသည် မမြင်ကွယ်ရာတွင်မူ ထိုသို့ဖြစ်နိုင်မည်ကို ကျွန်ုပ် လုံးဝ မထင်ခဲ့ပါ။) နောက်တစ်ဦးက ဆက်ပြောနိုင်သည်။ (ယန်နှင့် ကျွန်ုပ် တစ်နှစ်ကြာ ပေါင်းသင်းဆက်ဆံခဲ့ပါသည်။ သို့သော် ကျွန်ုပ်တွင် သူနှင့် အလွန်ကောင်းမွန်သည့် ဆက်ဆံရေး မရှိခဲ့သကဲ့သို့ စိတ်သဘောတူညီသည့် ပူးပေါင်းလုပ်ဆောင်မှု မရှိခဲ့ပါ။ အလုပ်အကြောင်း ဆက်သွယ်ပြောဆိုသည့်အခါတွင်သာ သူနှင့် ဆက်သွယ်ခဲ့ပြီး ယင်းမှလွဲ၍ သူနှင့် များများစားစား အဆက်အသွယ် မရှိခဲ့ပါ။ ထို့ကြောင့် ကျွန်ုပ်သည် သူနှင့်ပတ်သက်၍ များစွာ ပိုင်းခြားသိမြင်နိုင်စွမ်း မရှိခြင်း ဖြစ်သည်။) သင်တို့သည် သူ့အပေါ် ချင့်ချိန်နိုင်စွမ်း သိပ်မရှိခဲ့ကြသလော။ ဖြစ်နေသည့်အရာကို သင်တို့ မမြင်ခဲ့ခြင်းလော၊ သို့မဟုတ် ထိုအရာကို သင်တို့ ပိုင်းခြားသိမြင်မှု မရှိခဲ့ခြင်းလော။ အဘယ်သို့ဖြစ်ပြီး သူ့အပေါ် ချင့်ချိန်နိုင်စွမ်း သိပ်မရှိနိုင်ခဲ့ကြသနည်း။ ဤရလဒ် အဘယ်သို့ ဖြစ်လာခဲ့သနည်း။ (အဘယ်ကြောင့်ဆိုသော် ကျွန်ုပ် လျှောက်လှမ်းခဲ့သည့် လမ်းကြောင်းသည် မှားယွင်းပြီး ဆုကျေးဇူးရှိသည့် လူတစ်ဦးကို ကျွန်ုပ် ပုဂ္ဂိုလ်ရေးကိုးကွယ်ကာ အထင်ကြီးခဲ့သောကြောင့် ဖြစ်သည်။ ယန်သည် အလွန်စကားပြောကောင်းသူတစ်ဦးဖြစ်ပြီး၊ မိတ်သဟာယတိုင်းတွင် သူသည် ဘုရားနှုတ်ကပတ်တော်များကိုလည်းကောင်း၊ အထက်မှ တရားဒေသနာများနှင့် မိတ်သဟာယများကိုလည်းကောင်း ကိုးကားခဲ့သည်။ ပြဿနာများအား မည်သို့ ဖြေရှင်းရမည်ကို သူ သိပုံပေါ်ခဲ့ပြီး အသင်းတော်တွင် ပြဿနာတစ်ခု ရှိသည့်အခါတိုင်း ဖြေရှင်းရန် သူ ကြိုးစားခဲ့သည်။) ပြဿနာများ ဖြေရှင်းရမည့်ပုံကို သူ သိခဲ့လျှင် အဘယ်သို့ဖြစ်ပြီး ကနေဒါ အသင်းတော်၏ ရုပ်ရှင်ထုတ်လုပ်ရေး အဖွဲ့တွင် ယခုချိန်ထိတိုင်း ပြေလည်မသွားသေးသည့် ပြဿနာများ အလွန်များစွာ ရှိနေခဲ့သေးသနည်း။ ပြဿနာများ ဖြေရှင်းရမည့်ပုံကို သူ အမှန်ကယ် သိသည်ဟု သင် ပြောသော်လည်း ယင်းမှာ အဓိပ္ပာယ်မဲ့သည် မဟုတ်လော။ လှည့်ဖြားတတ်သည် မဟုတ်လော။ (ဟုတ်ပါသည်။) တရားဒေသနာများကို သင်တို့ နားထောင်ကြသလော။ အပတ်တိုင်း စုဝေးပွဲများကို သင်တို့ တက်ရောက်ကြသလော။ (တက်ရောက်ကြပါသည်။) သို့ဆိုလျှင် အန္တိခရစ်များကို ပိုင်းခြားသိမြင်ခြင်းအကြောင်း တရားဒေသနာများ ငါ ဟောပြောချိန်တွင် ငါ့ကို သင်တို့ နားထောင်ကြသလော။ (နားထောင်ပါသည်။) ငါ့ကို နားထောင်ပြီးနောက်တွင် သင်တို့သည် ယန်အပေါ် ချင့်ချိန်နိုင်စွမ်း ရှိလာကြသလော။ အမှုကိစ္စများကို ယန် လုပ်ဆောင်သည့် နည်းလမ်းတွင် ပြဿနာတစ်ခုတလေကို သင်တို့ မြင်နိုင်ကြသလော။ သင်တို့သည် အန္တိခရစ်ကဲ့သို့ပင် တရားဒေသနာများကို နားထောင်ပြီး တစ်နေရာတည်းတွင် အတူတကွ စုဝေးနေခဲ့ကြသည်။ သို့တိုင်အောင် ထိုမျှသိသာထင်ရှားသော အန္တိခရစ်တစ်ဦးကို သင်တို့ မမြင်နိုင်ခဲ့ချေ။ ဤတွင် ပြဿနာမှာ အဘယ်နည်း။ ယန်သည် နှစ်နှစ်နှင့် ငါးလကြာ ခေါင်းဆောင်တစ်ဦး ဖြစ်ခဲ့သည်။ အဘယ်သူသည် သူနှင့် အဆက်အသွယ်အရှိဆုံး ဖြစ်လာသနည်း။ မည်သည့် အဖွဲ့တွင် သူ အချိန်အကြာဆုံး ကုန်ဆုံးခဲ့သနည်း။ ထိုအဖွဲ့ထဲတွင် လူမည်မျှက သူ့အပေါ် ချင့်ချိန်နိုင်စွမ်း ရှိခဲ့ကြသနည်း။ မည်မျှက သူ့တွင် ပြဿနာတစ်ခုရှိကြောင်းကို သိရှိပြီး ထိုအရာကို လူအများအား သိရှိအောင် မလုပ်ခဲ့သနည်း။ သူ့တွင် ပြဿနာရှိကြောင်းကို မည်သူက ရှာဖွေတွေ့ရှိပြီး ထိုအရာကို လူအများသိအောင် ပြောခဲ့သနည်း။ ဤမေးခွန်းများအတွက် အဖြေများကို သင်တို့ သိကြသလော။ (မည်သူကမျှ သူ အမှန်တကယ် မည်သည့်အရာကဲ့သို့ဖြစ်သည်ကို ပိုင်းခြားသိမြင်ခဲ့ခြင်း မရှိကြပါ။) သို့ဆိုလျှင် သူ အန္တိခရစ်တစ်ဦးဖြစ်ကြောင်း နောက်ပိုင်းတွင် သင်တို့ အဘယ်သို့ ရှာဖွေတွေ့ရှိခဲ့ကြသနည်း။ (သူနှင့် ဆက်ဆံရေးများရှိခဲ့သည့် ညီအစ်မတစ်ဦးက သူမသည် မကောင်းသည့် အခြေအနေတွင် ရှိကြောင်းကို ပြောခဲ့ပြီး အခြေအနေကို ကျွန်ုပ်တို့ ပိုသိဖို့ ကြိုးစားခဲ့ကြသည့်အခါ အမျိုးသမီးများနှင့်စပ်လျဉ်း၍ ယန်၏ ပြဿနာကို ကျွန်ုပ်တို့ သိခဲ့ရသည်။) ထိုညီအစ်မက ပြဿနာကို ဖော်ထုတ်ခဲ့သည်။ သို့ဆိုလျှင် အခြားတစ်ဦးတလေက ထိုပြဿနာကို တိုင်ကြားခဲ့သလော။ (မတိုင်ကြားခဲ့ပါ။)

အန္တိခရစ်များ၏ အမျိုးမျိုးသော သရုပ်သကန်များကို မိတ်သဟာယပြုကာ စိတ်ဖြာလေ့လာဆွေးနွေးခြင်းဖြင့် ငါတို့ ကုန်ဆုံးကြပြီးဖြစ်သည့် ဤအချိန်အတာအတွင်းတွင် ယန်နှင့်ပတ်သက်၍ အခြားပြဿနာတစ်ခုတလေကို သင်တို့ သိရပြီလော။ (အန္တိခရစ်များကို ပိုင်းခြားသိမြင်ခြင်းနှင့်ပတ်သက်၍ မိတ်သဟာယပြုခြင်းအားဖြင့် ယန်သည် လူတို့ကြား သဘောကွဲလွဲမှုများဖြစ်စေရာတွင် အလွန်တော်သည်ကို ကျွန်ုပ် သိခဲ့ရသည်။ သူသည် ကျွန်ုပ်ရှေ့တွင် အချို့သော ညီအစ်ကို မောင်နှမများကို မကြာခဏ ဝေဖန်အပြစ်တင်ကာ ကျွန်ုပ်နှင့် အလုပ်လုပ်သည့် ညီအစ်မနှင့် ကျွန်ုပ်၏ ဆက်ဆံရေးတွင် သဘောကွဲလွဲစေရန် သွေးထိုးဖို့ ကြိုးစားပြီး၊ ထိုညီအစ်မသည် သမ္မာတရားကို လက်တွေ့မလုပ်ဆောင်သည့် လူ့အကြိုက်လိုက်သူတစ်ဦးသာ ဖြစ်ကြောင်း စသည်တို့ကို ပြောဆိုသည်။ ဤအရာက ထိုညီအစ်မနှင့်ပတ်သက်၍ ကျွန်ုပ်ကို ထင်မြင်ချက်အချို့ ရှိစေခဲ့ပြီး အချိန်ကြာလာသည်နှင့်အမျှ သူနှင့် ကျွန်ုပ် ကောင်းကောင်း အလုပ်မလုပ်နိုင်ခဲ့ပါ။) အမှန်တွင် သင်တို့အားလုံးတွင် ယန်နှင့်ပတ်သက်၍ သင်တို့၏ ထင်မြင်ချက်များ ရှိကြသော်လည်း မည်သူကမျှ ထိုထင်မြင်ချက်များကို အသိမပေးခဲ့ပေ၊ သို့မဟုတ် သူ့ကို မတိုင်ကြားခဲ့ပေ။ သင်တို့အားလုံးသည် အသင်းတော် အလုပ်ကိုသာ နှောင့်နှေးစေလိုပြီး လုံးဝ အရေးမစိုက်သည့် လူ့အကြိုက်လိုက်သူများ ဖြစ်ကြသည်။ သူသည် အထက်က သူ့အတွက် စီစဉ်ပေးသည့် အလုပ်ကို မလုပ်ခဲ့ပေ။ ပြီးလျှင် ဤအရာကို မြင်လျက်ဖြင့် သင်တို့သည် သူ့ကို မတိုင်ကြားခဲ့ကြဘဲ၊ ထိုအစား ဤအန္တိခရစ်ကို ကာကွယ်ပေးခဲ့ကာ အလိုလိုက်ခဲ့သည်။ အဘယ်ကြောင့် သူ့ကို သင်တို့ မတိုင်ကြားခဲ့သနည်း။ သူ့အား စိတ်အနှောင့်အယှက်ဖြစ်စေမည်ကို သင်တို့ စိုးရွံ့ခဲ့ကြသလော၊ သို့မဟုတ် အမှုအရာများကို အကုန်အစင် သင်တို့ နားမလည်ခဲ့ကြသလော။ (ကျွန်ုပ်သည် အမှုအရာများကို အကုန်အစင် နားမလည်ခဲ့ပါ။ ကျွန်ုပ်တွင် ရံဖန်ရံခါ ပြဿနာအချို့ရှိခဲ့ချိန် သူ့ကို မြင်ရသည်မှလွဲ၍ သူနှင့် မူလက မပေါင်းသင်းမဆက်ဆံခဲ့ပါ။ သူသည် အလုပ်လုပ်ခြင်းဖြင့် အလုပ်များသည်ဟု ပြောခဲ့သော်လည်း သူ အမှန်တရားကို ပြောခဲ့ခြင်း ရှိမရှိဟူသည်ကို ကျွန်ုပ်တို့ မသိပါ။) မမြင်ကွယ်ရာတွင် မည်သည့်အရာ သူ လုပ်ဆောင်နေသည်ကို စုံစမ်းစစ်ဆေးရန် မလိုအပ်ပေ။ သင့်ရှေ့တည့်တည့်တွင် သူ လုပ်ဆောင်နေသည့် အရာအချို့ကို သင်က ရိပ်စားမိနိုင်ခဲ့သင့်သည်။ အန္တိခရစ်များက အမှုအရာများကို လုပ်ဆောင်သည့်အခါ သရုပ်သကန်အချို့ ရှိသည်။ သူသည် မမြင်ကွယ်ရာတွင် အမှုအရာများကို လုပ်ဆောင်ရုံမျှသာ မဟုတ်ပေ။ ထိုသရုပ်သကန်များကို လူကိုယ်တိုင် သင် သတိပြုမိနိုင်သည်။ ထိုသရုပ်သကန်များကို သင်တို့ မမြင်နိုင်ခဲ့လျှင် သင်တို့ မျက်ကန်းဖြစ်ကြသည် မဟုတ်လော။ (ဟုတ်ပါသည်။) ထို့ကြောင့် ဤသို့သော လူတစ်ဦး ယခုအခါ ထပ်ပေါ်လာခဲ့လျှင် ၎င်းကို သင်တို့ သိမြင်နိုင်ကြမည်လော။ ယန်ကဲ့သို့သော လူတစ်ဦးသည် တကယ့်အလုပ်ကို လုပ်ဆောင်နိုင်သလော။ ၎င်းတို့သည် သမ္မာတရားနှင့်ပတ်သက်၍ မိတ်သဟာယပြုကာ ပြဿနာများကို ဖြေရှင်းနိုင်သလော။ (မဖြေရှင်းနိုင်ပါ။) မဖြေရှင်းနိုင်ဟု အဘယ်ကြောင့် သင်တို့ ပြောကြသနည်း။ (အလုပ်ရလဒ်များအရ အသင်းတော်တွင် အချိန်ကြာမြင့်စွာ မပြေလည်ဘဲ ရှိနေခဲ့သည့် ပြဿနာများစွာ ရှိခဲ့သည်။ အလုပ်အားလုံး၏ တိုးတက်မှုက အလွန့်အလွန် နှေးကွေးပြီး ကျွန်ုပ်တို့ ရိုက်ကူးခဲ့သည့် ရုပ်ရှင်ဇာတ်ကားများက ဘုရားအိမ်တော်၏ သတ်မှတ်ချက်များကို မပြည့်မီခဲ့ပါ။) ယန်ကို မထိန်းထားမီတွင် ဤအရာက ပြဿနာတစ်ခုဖြစ်သည်ကို သင်တို့ မြင်ခဲ့ကြသလော။ (မမြင်ခဲ့ကြပါ။) သို့ဆိုလျှင် တရား​ဒေသနာများကို နားထောင်ပြီးနောက်တွင် သင်တို့ မည်သည့်အရာကို နားလည်ကြသနည်း။ ထိုသို့သော ဆိုးရွားသည့် ပြဿနာများကို သင်တို့ မမြင်နိုင်ကြပေ။ ထို့နောက် သင်တို့သည် “သူနှင့် ကျွန်ုပ်တို့ အပေါင်းအသင်း မလုပ်ခဲ့ကြပါ။ မမြင်ကွယ်ရာတွင် သူ လုပ်ဆောင်နေခဲ့သည့် အရာများကို ကျွန်ုပ်တို့ အဘယ်သို့ သိနိုင်မည်နည်း။ ကျွန်ုပ်တို့သည် သာမန်ယုံကြည်သူများသာ ဖြစ်သည်။ သူသည် ခေါင်းဆောင်တစ်ဦး ဖြစ်သည်။ သူ့နောက်ကို ဟိုဟိုသည်သည် ကျွန်ုပ်တို့ အမြဲ မလိုက်နိုင်သောကြောင့် သူ့ကို ကျွန်ုပ်တို့ မရိပ်စားမိနိုင်သကဲ့သို့ သူ့ကို မတိုင်ကြားခဲ့သည်မှာ ကျိုးကြောင်းဆီလျော်ပါသည်”ဟု ပြောလျက် ဆင်ခြေများကိုသာ အမြဲရှာကြလေသည်။ ဤသည်မှာ သင်တို့ ဆိုလိုသည့်အရာ ဖြစ်သည် မဟုတ်လော။ (ဟုတ်ပါသည်။) ဤအရာ၏ သဘာဝမှာ အဘယ်နည်း။ (ကျွန်ုပ်တို့ယူရမည့် တာဝန်များကို ရှောင်လွှဲရန် ကျွန်ုပ်တို့ ကြိုးစားနေခြင်း ဖြစ်သည်။) သို့ဆိုလျှင် ဤသို့သော လူတစ်ဦးကို အနာဂတ်တွင် သင် ကြုံရလျှင် ကိစ္စရပ်ကို ဤနည်းဖြင့် သင်တို့ ချဉ်းကပ်ကြလိမ့်မည်လော။ (မချဉ်းကပ်ပါ။ ကိစ္စရပ်ကို ဤကဲ့သို့တစ်ဖန် ကျွန်ုပ် ချဉ်းကပ်မည် မဟုတ်ပါ။ ၎င်းတို့ကို ကျွန်ုပ် ရှာဖွေတွေ့ရှိသည်နှင့်တစ်ပြိုင်နက် တိုင်ကြားသင့်သည်။) ယင်းကို သင် လုပ်ဆောင်လိမ့်မည် ဟုတ်မဟုတ်ကို ငါ သိပ်မသေချာပေ။ အသင်းတော်များစွာတွင် အယောင်ဆောင် ခေါင်းဆောင်များနှင့် အန္တိခရစ်များကို တိုင်ကြားကြသည့် လူများရှိသော်လည်း ကနေဒါ အသင်းတော်တွင် တစ်ယောက်မျှ မရှိလေပြီ။ ဤအန္တိခရစ်သည် ထိုမျှ အချိန်ကြာမြင့်စွာ လည်ပတ်လှုပ်ရှားနေခဲ့ပြီး မည်သူကမျှ သူ့ကို မတိုင်ကြားခဲ့ပေ။ တစ်ယောက်မျှ မတိုင်ကြားခဲ့ကြချေ။ လတ်တလောတွင် အမေရိကရှိ ရုပ်ရှင်ထုတ်လုပ်ရေး အဖွဲ့က တစ်စုံတစ်ဦးကို တိုင်ကြားသည့် စာတစ်စောင် ပို့ခဲ့သည်။ ထိုစာကို စနစ်ကျပြီး အခြေအမြစ်ရှိသော ပုံစံတစ်ခုဖြင့် ရေးသားထားကာ အလွန်လည်း တိကျပြီး မှန်ကန်လေသည်။ အခြေခံအားဖြင့် အဖြစ်မှန် အခြေခံအကြောင်းရင်းတစ်ခုအပေါ် ရေးသားထားခြင်း ဖြစ်သည်။ ဤအရာက အသင်းတော်တိုင်းတွင် အယောင်ဆောင် ခေါင်းဆောင်များနှင့် အန္တိခရစ်များကို သိမြင်နိုင်သည့်သူအချို့ ရှိသည်ကို ပြသည်။ ဤသည်မှာ ကောင်းသောအရာတစ်ခု ဖြစ်သည်။ တစ်ခါတစ်ရံ အယောင်ဆောင် ခေါင်းဆောင်များနှင့် အန္တိခရစ်များသည် တစ်ခဏကြာ ထမ်းဆောင်ကြပြီး ပြဿနာအချို့ကို ထုတ်ဖော်ပြကြသည်။ လူအချို့က ပြဿနာများရှိသည်ကို မြင်ရုံသာမြင်နိုင်သော်လည်း ဤပြဿနာများ၏ အနှစ်သာရနှင့် အမှန်တရားကို မရိပ်စားမိနိုင်ကြသကဲ့သို့ မည်သို့ ဖြေရှင်းရမည်ကိုလည်း မသိကြပေ။ ဤသည်မှာလည်း ချင့်ချိန်နိုင်စွမ်းမရှိခြင်းနှင့် ဆက်စပ်သည်။ ထိုသို့သော အခြေအနေများတွင် မည်သည့်အရာကို သင်တို့ လုပ်ဆောင်သင့်သနည်း။ ဤသို့သော အချိန်များတွင် ယင်းတို့ကို ပိုင်းခြားသိမြင်ရန် သမ္မာတရားကို နားလည်သည့် လူတစ်ဦးကို သင်တို့ ရှာသင့်သည်။ ထိုကိစ္စရပ်ကို လူတိုင်းက အတူတကွ ရှာဖွေ၊ မိတ်သဟာယပြုကာ ဆွေးနွေးခြင်းဖြင့် တာဝန်ယူနိုင်သည့် လူအချို့ရှိလျှင် သင်တို့အားလုံး သဘောတူညီချက်တစ်ခု ရရှိနိုင်ပြီး ပြဿနာ၏ အနှစ်သာရကို ရိပ်စားမိနိုင်ကာ ထို့နောက်တွင် ၎င်းတို့က အယောင်ဆောင် ခေါင်းဆောင်များနှင့် အန္တိခရစ်များ ဟုတ်မဟုတ်ဟူသည်ကို ပိုင်းခြားသိမြင်နိုင်ကြလိမ့်မည် ဖြစ်သည်။ အယောင်ဆောင် ခေါင်းဆောင်များနှင့် အန္တိခရစ်များ၏ ပြဿနာကို ဖြေရှင်းရန် သိပ်မခက်ပေ။ အယောင်ဆောင် ခေါင်းဆောင်များသည် တကယ့်အလုပ်ကို မဆောင်ရွက်ကြသကဲ့သို့ ၎င်းတို့ကို ရှာဖွေတွေ့ရှိပြီး ရှင်းလင်းစွာ သိမြင်ရန် လွယ်သည်။ အန္တိခရစ်များက အသင်းတော်အလုပ်ကို နှောင့်ယှက်ကာ အဖျက်အမှောင့်လုပ်ကြပြီး ၎င်းတို့ကိုလည်း ရှာဖွေတွေ့ရှိကာ ရှင်းလင်းစွာ သိမြင်ရန် လွယ်ကူသည်။ ဤအရာအားလုံးက ဘုရားသခင် ရွေးချယ်ထားသော လူများ မိမိတို့၏ တာဝန်များ ထမ်းဆောင်ခြင်းအား နှောင့်ယှက်ခြင်း ပြဿနာနှင့် ဆက်စပ်ပြီး ထိုသို့သော လူများကို သင် တိုင်ကြားကာ ဖော်ထုတ်သင့်သည်။ ယင်းကို လုပ်ဆောင်ခြင်းအားဖြင့်သာ အသင်းတော်အလုပ်ကို နှောင့်နှေးသွားခြင်းမှ သင် တားဆီးနိုင်သည်။ အယောင်ဆောင် ခေါင်းဆောင်များနှင့် အန္တိခရစ်များကို တိုင်ကြားခြင်းနှင့် ဖော်ထုတ်ခြင်းသည် ဘုရားသခင်၏ ရွေးချယ်ထားသော လူတို့က မိမိတို့၏ တာဝန်များကို ကောင်းစွာ ထမ်းဆောင်နိုင်စေရန် အာမခံသည့် အလွန်အရေးပါသော အလုပ်ဖြစ်ပြီး ဘုရားသခင်၏ ရွေးချယ်ထားသော လူအားလုံးက ဤတာဝန်ကို ခံယူကြသည်။ မည်သူပင်ဖြစ်ပါစေ အယောင်ဆောင် ခေါင်းဆောင် သို့မဟုတ် အန္တိခရစ်ဖြစ်သရွေ့ ဘုရားသခင် ရွေးချယ်ထားသော လူတို့က ထိုသူတို့ကို ဖော်ထုတ်ကာ ပေါ်လွင်အောင် လုပ်ဆောင်သင့်ပြီး ဤနည်းဖြင့် သင်၏ တာဝန်ကို သင် ကောင်းမွန်စွာ ဖြည့်ဆည်းလိမ့်မည် ဖြစ်သည်။ တိုင်ကြားထားသည့် ပြဿနာက မှန်ကန်ပြီး အယောင်ဆောင် ခေါင်းဆောင် သို့မဟုတ် အန္တိခရစ် ဖြစ်ရပ်တစ်ခု အမှန်တကယ် ရှိသရွေ့ ဘုရားအိမ်တော်က ထိုအရာကို အချိန်မီပုံစံဖြင့် စည်းမျဉ်းများနှင့်အညီ အမြဲ ကိုင်တွယ်လိမ့်မည် ဖြစ်သည်။ ထို့ကြောင့် အန္တိခရစ်ဖြစ်သည့် ယန်နှင့်ပတ်သက်သည့် ပြဿနာကို သင်တို့ လူအများ သိရှိစေခဲ့သလော။ သင်တို့ သိရှိအောင် မလုပ်ဆောင်ခဲ့ပေ။ သင်တို့သည် အသိမရှိခဲ့သည့်အလား ဤနတ်ဆိုး၏ အထင်အမြင်မှားစေခြင်းနှင့် ကစားခြင်းကို အချိန်ကြာမြင့်စွာ ခံခဲ့ရသည်။ ထိုသို့သော သိသာထင်ရှားသည့် အန္တိခရစ်တစ်ဦး သင်တို့ဘေးတွင် ဤတစ်ချိန်လုံး အကြောင်းမဲ့သက်သက် ပြုမူဆောင်ရွက်နေပြီး သင်တို့သည် ထိုအရာကို အစစ်အမေးမရှိဘဲ ဆက်ဖြစ်ခွင့်သာ ပေးနေခြင်းဖြင့် သင်တို့တွင် အမှန်တကယ် အသိတရား လုံးဝ မရှိကြသလော။ အသင်းတော် အသက်တာကို ပုံမှန် သင်တို့ အသက်ရှင်ကြသလော။ သန့်ရှင်းသော ဝိညာဉ်တော်၏ အလုပ်ကို သင်တို့ မွေ့လျော်ခံစားနိုင်ကြသလော။ စုဝေးပွဲတစ်ခု တက်သည့်အခါတိုင်း သင်တို့ အကျိုးကျေးဇူးခံစားကြရသလော။ ဤအရာအားလုံးကို သင်တို့ ခံစားရသင့်ကြသည်။ အရေးအကြီးဆုံး အနေဖြင့် အန္တိခရစ်ဖြစ်သည့် ယန်သည် တကယ့်အလုပ်တစ်ခုကိုမျှ လုံးဝ မဆောင်ရွက်ခဲ့ပေ။ သူသည် ရုပ်ရှင်ထုတ်လုပ်ရေးအလုပ်ကို နှောင့်နှေးမှုများ ဖြစ်စေခဲ့ပြီး အသင်းတော် အလုပ်ကို လုံးဝ အရှုပ်အထွေးတစ်ခု ဖြစ်စေခဲ့သည်။ စိတ်နှလုံးရှိသည့် မည်သူမဆို ဤအရာများကို သိမြင်နိုင်ခဲ့သင့်သော်လည်း သင်တို့ထဲတွင် မည်သူကမျှ ဤအန္တိခရစ်ကို ဖော်ထုတ်ခြင်း၊ သို့မဟုတ် တိုင်ကြားခြင်း မရှိခဲ့ပေ။ ထိုအရာမှာ သင်တို့သည် ညစ်ညမ်းသော နတ်ဆိုးများ၊ ဆိုးယုတ်သော ဝိညာဉ်များနှင့် ရောနှောရသည်ကို နှစ်သက်သည့်အလား ထင်ရပြီး သမ္မာတရားအတွက် သင်တို့တွင် ချစ်ခြင်းမေတ္တာ မရှိဟု ထင်ရသည်။ ဤအရာကို သင်တို့ အသိအမှတ်ပြုဖို့ မလိုလားကောင်း မလိုလားနိုင်သော်လည်း အမှန်တရားတစ်ခု ဖြစ်သည်။ သင်တို့သည် နတ်ဆိုးများနှင့် ရောနှောကြသည့်တိုင် ဤသည်မှာ အလွန်ကောင်းသည်ဟု သင်တို့ ထင်ကြသည်။ ဘုရားနှုတ်ကပတ်တော်များကို ဖတ်ရန် သို့မဟုတ် သမ္မာတရားကို လိုက်စားရန် မလိုအပ်တော့ဟုလည်းကောင်း၊ သင်၏ တာဝန်ကို ထမ်းဆောင်ရာတွင် လုပ်ရိုးလုပ်စဉ်များအတိုင်းသာ လုပ်နိုင်သည်ဟုလည်းကောင်း တွေးထင်သည်။ ကယ်တင်ခြင်း ရရှိခြင်း၊ သမ္မာတရားကို လက်တွေ့လုပ်ဆောင်ခြင်း၊ ဘုရားသခင်၏ စီစဉ်ညွှန်ကြားမှုများနှင့် အစီအစဉ်များကို ကျိုးနွံနာခံခြင်း သို့မဟုတ် သင်၏ တာဝန်ကို ကောင်းစွာ ထမ်းဆောင်ခြင်းတို့နှင့်ပတ်သက်၍ ဒုက္ခခံရန် မလိုအပ်တော့ဟု သင် တွေးထင်သည်။ မည်သူကမျှ တာဝန်ယူခြင်းမရှိသကဲ့သို့ ထိုအန္တိခရစ်ကို မည်သူကမျှ ဖော်ထုတ်ခြင်း၊ တိုင်ကြားခြင်းမရှိဘဲ၊ ယခင်အချိန်တုန်းက စားသောက်၊ ပျော်ပါးပြီး မည်သည့် လျော်ကန်သည့် အလုပ်မျှ မလုပ်သည့် သောဒုံမြို့သားများကဲ့သို့ပင် သင်၏ ဇာတိပကတိကို လိုက်လျောကာ လွတ်လွတ်ကင်းကင်းဖြစ်ပြီး အနှောင်အဖွဲ့မရှိဘဲ နေနိုင်သည်ဟု သင် ယုံကြည်လေသည်။ ဤအရာက အသင်းတော်အား အချိန်ကြာမြင့်စွာ သန့်ရှင်းသော ဝိညာဉ်တော်၏ အလုပ်မရှိခြင်းအဖြစ်သို့ ဆိုက်ရောက်စေသည်။ ပြီးလျှင် သင်တို့က အရေးမစိုက်ကြ၊ သင်တို့သည် အကျင့်ပျက်ခြင်းအဖြစ်သို့ ကျဆင်းသွားကြပြီးသားဖြစ်သည်။ ယုံကြည်ခြင်းမရှိသူများနှင့်လည်းကောင်း၊ ဘာသာတရားမရှိသူများနှင့်လည်းကောင်း မကွာခြားပေ။ သင်တို့သည် တရားဒေသနာများကို နှစ်ချီ နားထောင်နေခဲ့ကြပြီး ယခုတွင်ပင်လျှင် အယောင်ဆောင် ခေါင်းဆောင်များနှင့် အန္တိခရစ်များကို သင်တို့ မသိမြင်နိုင်ကြသေးပေ။ ထိုအစား အန္တိခရစ်များနှင့် ရောနှောကာ မည်သည့်အရာကိုမျှ အလေးအနက် လုံးဝ မထားဘဲ တစ်နေ့လုံး စားဖို့ရန် လိုလားနေကြသည်။ ထိုသို့သော အပြုအမူသည် သင်တို့အနေဖြင့် ဘုရားသခင်ကို စစ်မှန်သည့် ယုံကြည်သူများ မဟုတ်ကြောင်းကို ပြသရန် လုံလောက်သည်။ ဦးစွာပထမ သင်တို့သည် သမ္မာတရားကို မချစ်ကြပေ သို့မဟုတ် သမ္မာတရားကို လက်မခံကြပေ။ ဒုတိယအနေဖြင့် သင်၏ တာဝန်ကို သစ္စာစောင့်သိစွာ သင်တို့ ထမ်းဆောင်သည်ဟု ပြောနိုင်ရန်မဆိုထားနှင့်၊ ထိုတာဝန်အတွက် တာဝန်ယူသည့်စိတ် သင်တို့တွင် မရှိကြသကဲ့သို့ အသင်းတော်အလုပ်ကို သင်တို့ ဤအတိုင်း လျစ်လျူရှုကြသည်။ သင်တို့၏ တာဝန်ကို သင်တို့ ထမ်းဆောင်ပုံ ပေါ်သော်လည်း မည်သည့် ရလဒ်မျှ မရရှိကြပေ။ သင်တို့သည် လုပ်ရိုးလုပ်စဉ်များကိုသာ လုပ်ဆောင်နေကြခြင်း ဖြစ်သည်။ အယောင်ဆောင် ခေါင်းဆောင်များနှင့် အန္တိခရစ်များက အသင်းတော်အလုပ်ကို မည်မျှ နှောင့်ယှက်ကာ ထိခိုက်နစ်နာစေသည်ဖြစ်စေ ထိုအရာကို သင်တို့ လုံးဝ မသိကြသကဲ့သို့ ထိုအရာကလည်း သင်တို့ကို လုံးဝ အနှောင့်အယှက် မဖြစ်စေပေ။ အန္တိခရစ်တစ်ဦးက လုံးဝ ထုတ်ဖော်ခံရသည့်အခါတွင်သာ သင်တို့တွင် ချင့်ချိန်နိုင်စွမ်းမရှိကြောင်းကို သင်တို့ အသိအမှတ်ပြုကြသည်။ အသေးစိတ်အချက်များကို ငါ မေးသည့်အခါ သင်တို့က “ကျွန်ုပ်မသိပါ၊ ကျွန်ုပ် တာဝန်မရှိပါ”ဟု ပြောကြသည်။ ဤကိစ္စရပ်အပေါ် သင်တို့ လုံးဝ လက်ရှောင်ကြသည်။ ဤသို့ပြောခြင်းအားဖြင့် ကိစ္စရပ်က ပြီးစီးသွားကာ သင်တို့အနေဖြင့် သင်တို့၏တာဝန်ကို ရှောင်ရှားနိုင်လိမ့်မည်ဟု သင်တို့ ထင်သလော။ ဘုရားအိမ်တော်က ထိုအရာကို စစ်ဆေးလိမ့်မည် မဟုတ်တော့သလော။ ဘုရားအိမ်တော်က သင်တို့ကို ဤတစ်ချိန်လုံး ရေလောင်းပေးပြီးဖြစ်ကာ သင်တို့သည် တရားဒေသနာများစွာကို နားထောင်ပြီးဖြစ်သည်။ ပြီးလျှင် ရလဒ်မှာ အဘယ်နည်း။ အသင်းတော်တွင် အန္တိခရစ်တစ်ဦး ပေါ်ထွက်နေခြင်းနှင့်ဆိုင်သည့် ဤစိုးရိမ်ရသော ပြဿနာရှိနေသော်လည်း သင်တို့က မသိကြပေ။ ဤအရာက သင်တို့သည် လုံးဝ တိုးတက်ခြင်း မရှိသေးကြောင်း၊ ထုံထိုင်းကာ နုံအကြကြောင်းနှင့် သင်တို့၏ ဇာတိပကတိကို လိုက်လျောကြကြောင်း ပြသပေသည်။ သင်တို့သည် အသက်ရှင်သူ တစ်ဦးမျှ မရှိသည့်၊ သမ္မာတရား လိုက်စားသူ တစ်ဦးမျှ မရှိ၊ လူသေပုံကြီးတစ်ခု ဖြစ်သည်။ အလွန်ဆုံးအနေဖြင့် အလုပ်လုပ်ပေးသူများ အနည်းငယ်သာ ရှိသည်။ ဤတစ်ချိန်လုံး ဘုရားသခင်ကို ယုံကြည်ပြီး တရားဒေသနာများကို နားထောင်ပြီးနောက် အန္တိခရစ်နှင့် ရောနှောခြင်း၊ သူ့ကို မဖော်ထုတ်ဘဲနေခြင်း သို့မဟုတ် မတိုင်ကြားဘဲနေခြင်းဖြင့် သင်တို့နှင့် ဘုရားသခင်ကို မယုံကြည်သောသူတစ်ဦးတို့ကြား ခြားနားချက်မှာ အဘယ်နည်း။ သင်တို့သည် အန္တိခရစ်များ၏ ဘက်တော်သားများဖြစ်သည်။ ဘုရားသခင်၏ လူများ မဟုတ်ကြ။ အန္တိခရစ်များနောက်သို့ သင်တို့ လိုက်ကြသည်၊ စာတန်နောက်သို့ လိုက်ကြပြီး ဘုရားသခင်၏ နောက်လိုက်များ လုံးဝ မဟုတ်ကြပေ။ သင်တို့က အန္တိခရစ် လုပ်ဆောင်ခဲ့သည့် ဆိုးယုတ်သောအရာများကို မလုပ်ဆောင်ခဲ့သော်လည်း သူ့နောက်သို့လိုက်ကြပြီး သူ့ကို ကာကွယ်ပေးခဲ့ကြသည်။ အဘယ်ကြောင့်ဆိုသော် သင်တို့သည် သူ့ကို မဖော်ထုတ်ခဲ့ကြ သို့မဟုတ် မတိုင်ကြားခဲ့ကြသကဲ့သို့ အန္တိခရစ်နှင့် ထိုမျှ အပေါင်းအသင်း မလုပ်ခဲ့ကြောင်းနှင့် သူ မည်သည့်အရာ လုပ်ဆောင်နေသည်ကို မသိကြောင်း တတွတ်တွတ်ပြောခဲ့သောကြောင့် ဖြစ်သည်။ ဤအရာကို လုပ်ဆောင်ခြင်းအားဖြင့် သင်တို့သည် အခြေအနေကို အပြည့်အဝ သိလျက်သားနှင့် အန္တိခရစ်ကို ကာကွယ်ပေးနေခဲ့ခြင်း မဟုတ်လော။ အန္တိခရစ်သည် အလွန်များသည့် ဆိုးယုတ်မှုကို လုပ်ဆောင်ခဲ့ပြီး အသင်းတော်အလုပ်ကို တုံ့ဆိုင်းရပ်တန့်သွားစေခဲ့သည်။ အသင်းတော် အသက်တာကို လုံးဝ အရှုပ်အထွေးတစ်ခုအဖြစ်သို့ ရောက်အောင် နှောင့်ယှက်ခဲ့ပြီးသည့်တိုင် အန္တိခရစ်က မည်သည့်အရာ လုပ်ဆောင်နေသည်ကို သင်တို့ မသိကြောင်း ပြောဆိုသည်။ ယင်းကို အဘယ်သူ ယုံမည်နည်း။ အန္တိခရစ်က အသင်းတော် အလုပ်ကို နှောင့်ယှက်ကာ ထိခိုက်နစ်နာနေစေသည်ကို သင်တို့ မျက်စိတပ်အပ် မြင်ခဲ့ကြပြီးသည့်တိုင် အလျှင်း ဂရုမစိုက်သကဲ့သို့ လုံးဝ မတုံ့ပြန်ခဲ့ပေ။ သူ့ကို မည်သူကမျှ မဖော်ထုတ်ခဲ့ကြပေ၊ သို့မဟုတ် မတိုင်ကြားခဲ့ပေ။ သင်တို့အားလုံးသည် ဤသေးငယ်သော တာဝန်လေးကိုပင် ထမ်းဆောင်ရန် ပျက်ကွက်ခဲ့ကြပြီး သင်တို့သည် အသိစိတ်နှင့် ဆင်ခြင်တုံတရား အလွန်မဲ့ကြပေသည်။ အသင်းတော်အားလုံးက လတ်တလောတွင် အယောင်ဆောင် ခေါင်းဆောင်များနှင့် အန္တိခရစ်များကို တိုင်ကြားသည့် တိုင်ကြားစာများကို မကြာမကြာ ပေးပို့နေကြသည်။ ဤသည်ကို သင်တို့ မမြင်ဖူးကြသလော။ ကနေဒါ အသင်းတော်တစ်ခုတည်းသာ မိမိ၏ အခြေအနေနှင့်ပတ်သက်၍ အစီရင်ခံချက်တစ်ခုပေးရန် အထက်နှင့် လုံးဝ အဆက်အသွယ် မလုပ်သေးသည့် ရပ်တန့်နေသောရေအိုင်တစ်ခု ဖြစ်သည်။ သင်တို့သည် တစ်ဦးမျှ လုံးဝ အသက်မရှင်သည့် လူသေတစ်သိုက်သာ ဖြစ်သည်။ ထိုသို့သော အသင်းတော်တစ်ပါးကို ဘုရားသခင်က အသိအမှတ်ပြုလိမ့်မည် မဟုတ်သကဲ့သို့ သင်တို့ နောင်တမရလျှင် သင်တို့ လုံးဝ အဆုံးသတ်မည်ဖြစ်ပြီး အားလုံး ဖယ်ရှားရှင်းလင်းခြင်း ခံရကြလိမ့်မည်။

ယနေ့သည် ၂၀၁၉ ခုနှစ်၊ ဇူလိုင်လ ၁၀ ရက်ဖြစ်သည်။ ယနေ့မှစ၍ ကနေဒါ ရုပ်ရှင်ထုတ်လုပ်ရေးအဖွဲ့သည် တစ်နှစ်ကြာ သီးခြားနေကာ ဆင်ခြင်သုံးသပ်သည့် ကာလတစ်ခုကို တရားဝင် ကြုံရလိမ့်မည်။ ရုပ်ရှင်ထုတ်လုပ်ရေးအဖွဲ့တွင် လူမည်မျှ ရှိသနည်း။ (ဘုရားသခင်၊ ရုပ်ရှင်ထုတ်လုပ်ရေး အဖွဲ့တွင် လူ ၃၄ယောက် ရှိပါသည်။) ပြီးလျှင် ခေါင်းဆောင် မည်မျှရှိသနည်း။ (နှစ်ယောက်ရှိပါသည်။) ကောင်းပြီ၊ သို့ဆိုလျှင် သင်တို့ နှစ်ဦး ထလော့၊ သင်တို့ကို ငါ ကြည့်မည်။ ရုပ်ရှင်ထုတ်လုပ်ရေးအဖွဲ့တွင် ရှိသော အသင် လူတို့၊ ဇူလိုင် ၁၀ ရက်နေ့ဖြစ်သည့် ဤနေ့ရက်ကို အောက်မေ့ကြလော့။ ယနေ့မှစ၍ ကနေဒါ ရုပ်ရှင်ထုတ်လုပ်ရေးအဖွဲ့သည် တစ်နှစ်တာ ကာလကြာ အဖွဲ့ဘီအနေဖြင့် တရားဝင် အတန်းအစားသတ်မှတ်ခံရလိမ့်မည်ဖြစ်သည်။ သင်တို့ နောင်တရလျှင် ပုံမှန် အသင်းတော်ဆီသို့ ပြန်သွားနိုင်သည်။ ဤတစ်နှစ်အတွင်း သင်တို့၏ အပြုအမူက မည်သို့ဖြစ်သည်ကို ငါတို့ ကြည့်မည်။ သင်တို့၏ တာဝန်ကို သင်တို့ ဆက်လက်ထမ်းဆောင်နိုင်ပြီး နောင်တရကြောင်း ပြလျှင် အသင်းတော် အသက်တာ အသက်ရှင်ခြင်းကို ပြန်စနိုင်သည်။ သင်တို့ နားလည်ကြသလော။ (နားလည်ပါသည်။) ဤကာလအတောအတွင်းတွင် သင်တို့၏ တာဝန်များက မပြောင်းမလဲ ရှိနေမည်ဖြစ်သည်။ သင်တို့ထဲမှ အချို့က ရှင်းလင်းပစ်ခြင်းခံရကာ နှင်ထုတ်ခြင်းမခံလိုလျှင် ဤသီးခြားနေခြင်းနှင့် ဆင်ခြင်သုံးသပ်ခြင်း နည်းလမ်းအား ခံယူခြင်းကို အဘယ်သို့ ထင်ကြသနည်း။ ထိုအရာနှင့်ပတ်သက်၍ သင်တို့ စိတ်ကျေနပ်ကြသလော။ (ကျေနပ်ပါသည်။) အဘယ်ကြောင့် သင်တို့ကို ငါ တစ်နှစ် အချိန်ပေးသနည်း။ (နောင်တရရန် အခွင့်အရေးကို ကျွန်ုပ်တို့အား ပေးရန်ဖြစ်သည်။) သင်တို့ကို နောင်တရရန် အခွင့်အရေးပေးဖို့ ဖြစ်သည်။ တစ်နှစ်ကြာပြီးနောက် သင်တို့၏ ပြုမူကျင့်ကြံမှုသည် ရှက်ဖွယ်ဖြစ်နေဆဲဖြစ်လျှင်၊ သင်တို့၏ အလုပ်ကျွမ်းကျင်မှုက အဆင့်မမီသေးလျှင်၊ သင်တို့၏တာဝန်ကို ထမ်းဆောင်နေချိန် အချိန်ဆွဲနေပြီး သင်တို့၏ တာဝန်သည် ယခင်ကကဲ့သို့ ပရမ်းပတာဖြစ်နေဆဲဖြစ်လျှင်၊ သင်တို့၏ အတတ်ပညာပိုင်းဆိုင်ရာ အလုပ်နှင့် အသက်ဝင်ရောက်မှုတွင် တိုးတက်မှုတစ်ခုမျှ ဖြစ်အောင် မလုပ်ရသေးသကဲ့သို့ မည်သည့်ရလဒ်မျှ လုံးဝ မရရှိသေးလျှင် နောက်ထပ်တစ်နှစ်တာကာလကြာ သင်တို့ ဆက်လက် သီးခြားထားခြင်း ခံရလိမ့်မည်ဖြစ်ပြီး၊ ဤသို့ဖြင့် အချိန်ကာလသည် တစ်နှစ်ပြီးတစ်နှစ် တိုးခံရလိမ့်မည် ဖြစ်သည်။ သင်တို့အနေဖြင့် တိုးတက်မှုဖြစ်စေခဲ့သည့်အခါ ဆိုလိုသည်မှာ အတွေ့အကြုံဆိုင်ရာ သက်သေခံချက် ဆောင်းပါးအချို့ကို သင်တို့ ရေးသားနိုင်ပြီး သင်တို့၏ အပြုအမူ၊ နားလည်ခြင်းနှင့် အလုပ်ရလဒ်များအားလုံးက ဧကန်အမှန် အဆင့်မီသည့်အခါ အသင်းတော် အသက်တာ အသက်ရှင်ခြင်းကို သင် ပြန်လည်အစပြုနိုင်သည်။ ကနေဒါ အသင်းတော်ရှိ အခြားအဖွဲ့များအနေဖြင့် အသင်းတော် အသက်တာကို ဆက်လက် အသက်ရှင်နိုင်သည်။ အနာဂတ်တွင် သင်တို့၏ တာဝန် ထမ်းဆောင်မှုအပေါ် သင်တို့၏ သဘောထားက မည်ကဲ့သို့ဖြစ်သည်ကို ငါတို့ ကြည့်မည်။ သင်တို့က ရှက်ဖွယ်ကောင်းစွာ ပြုမူနေထိုင်ဆဲဖြစ်လျှင် ကနေဒါ အသင်းတော်ရှိ လူတိုင်း သီးခြားနေရလိမ့်မည်။ သင်တို့ နားလည်ကြသလော။ (နားလည်ပါသည်။) ကိစ္စရပ်ကို ကိုင်တွယ်ခြင်း၏ ဤရလဒ်အပေါ် သင်တို့ အဘယ်သို့ တွေးထင်ကြသနည်း။ (ကောင်းပါသည်။) သင်တို့ ကောင်းသည်ဟု အမှန်တကယ် ဆိုလိုသလော သို့မဟုတ် ယင်းကို ပြောရုံမျှပြောခြင်းလော။ (အမှန်တကယ် ကောင်းပါသည်။) ကောင်းပြီ၊ သင်တို့သည် ဤအရာနှင့်ပတ်သက်၍ စိတ်ကျေနပ်ကြသည်။ ထို့ကြောင့် ယနေ့ ဤဒေသနာသည် သင်တို့ နောက်ဆုံး ကြားရမည့်ဒေသနာ ဖြစ်သည်။ ငါ၏ မူလ ရည်ရွယ်ချက်မှာ သင်တို့ကို လုံးဝ သီးခြားထားကာ ဖယ်ရှားရှင်းလင်းရန်ဖြစ်ပြီး တရားဒေသနာများကို နောက်တစ်ကြိမ် နားထောင်ခွင့်မပေးရန် ဖြစ်၏။ ဤနှစ်ကာလများတစ်လျှောက်လုံး သင်တို့ နားထောင်ပြီးဖြစ်သည့် တရားဒေသနာများသည် အချည်းနှီးဖြစ်ပြီး အမှုအရာတစ်ခုမျှ သင်တို့ မရရှိလေပြီ။ ထို့ကြောင့် အဘယ်ကြောင့် နားထောင်နေကြသေးသနည်း။ သင်တို့ကို ကြည့်ရသည်မှာ ငါ နာကျင်လွန်းလှသည်။ သင်တို့အားလုံး အလွန် ထုံထိုင်းကာ နုံအပုံပေါ်ကြသည်။

ယခင်က ကနေဒါ အသင်းတော်ရှိ ညီအစ်မတစ်ဦးနှင့် ငါ စကားစမြည်ပြောခဲ့ချိန်တွင် ထိုနေရာရှိ အခြေအနေမှာ မိုက်မဲသည့် ရယ်မောခြင်းနှင့် အစွန်းရောက် သောက်စားပျော်ပါးမှုသာ ဖြစ်သည်ကို ငါ ကြားခဲ့ရသည်။ အလွန် ဆူညံသည်မှာ သူမအနေဖြင့် စည်ကားသော မြို့လယ်နေရာတစ်ခုတွင် ရှိခဲ့သည့်အလား စာပင်မရိုက်နိုင်ခဲ့ပေ။ ထိုအခါ ငါသည် ထိုအသင်းတော်ကို စတင်မနှစ်မသက်ဖြစ်လာပြီး ကနေဒါ အသင်းတော်မှ လူများသည် ဘုရားတရားကိုင်းရှိုင်းခြင်းမရှိဘဲ အားလုံးက မယုံကြည်သူများကဲ့သို့ သောက်စားပျော်ပါးကြကြောင်းနှင့် သမ္မာတရားကို မလိုက်စားကြကြောင်း ငါ ပြောခဲ့သည်။ နောက်ပိုင်းတွင် ရုပ်ရှင်ထုတ်လုပ်ရေး ကိစ္စနှင့်ပတ်သက်၍ ဤလူများနှင့် ငါ မိတ်သဟာယပြုခဲ့ပြီး ၎င်းတို့သည် လုံးဝ ထုံထိုင်းကြသည်။ “ထုံထိုင်းသည်”ဟူသည်မှာ မည်သည့်အရာကို ဆိုလိုသနည်း။ ၎င်းတို့နှင့် ငါ စကားပြောနေချိန်တွင် ၎င်းတို့သည် ဝိညာဉ်ဆိုးများ၏ ဝင်ပူးခြင်းခံရကြသည့်အလား မျက်လုံးများ တစ်နေရာတွင် မျက်တောင်မခတ် စူးစိုက်လျက်၊ တုံ့ပြန်မှု သို့မဟုတ် မျက်နှာအမူအရာ ဘာဆိုဘာမျှ မပြကြပေ။ မည်သည့်အရာနှင့်ပတ်သက်၍မျှ တုံ့ပြန်မှု သို့မဟုတ် သဘောထား မရှိကြချေ။ ဤသည်မှာ စက်ဆုပ်ဖွယ် ဖြစ်သည် မဟုတ်လော။ ဤလူများ၏ စိတ်အခြေအနေနှင့် ပုံပန်းများအားဖြင့် အကဲဖြတ်ကြည့်ရခြင်းအားဖြင့် မည်သည့်အဖွဲ့မျှ ကောင်းသည့်အရာတစ်ခုမျှ မရှိပေ။ ၎င်းတို့အားလုံးက ပရမ်းပတာဖြစ်နေကြပြီး အထူးသဖြင့် ရုပ်ရှင်ထုတ်လုပ်ရေးအဖွဲ့တွင် လူတကာနှင့် သောင်းပြောင်း လိင်ဆက်ဆံသည့် ဖြစ်ရပ်တစ်ခု ဖြစ်ပျက်ခဲ့ကာ ၎င်းတို့က မည်သည့်အရာကိုမျှ မသိဟု ပြောနေကြဆဲ ဖြစ်သည်။ ၎င်းတို့ ပြောဆိုသည့်အရာက မှန်ကန်တိကျသလော။ ထိုအရာသည် လှည့်ဖြားတတ်သည် မဟုတ်လော။ အမှန်တွင် အန္တိခရစ်ဖြစ်သည့် ယန်နှင့်သက်ဆိုင်သည့် ဤကိစ္စရပ်ကို ခေါင်းဆောင်များနှင့် အမှုဆောင်များက ကိုင်တွယ်ပြီးသားဖြစ်သော်လည်း ထိုအရာသည် အလွန် ဆိုးရွားကာ မနှစ်မြို့စရာဖြစ်သောကြောင့် ငါသည် ကိုယ်တိုင်ကိုယ်ကျ ကြားဝင်လုပ်ဆောင်ခဲ့ရသည်။ အဘယ်ကြောင့် ငါ ကြားဝင်ခဲ့ရသနည်း။ အဘယ်ကြောင့်ဆိုသော် ၎င်းတို့က ထိုအရာကို မှန်ကန်စွာ မကိုင်တွယ်ခဲ့ကြသောကြောင့် ဖြစ်သည်။ ၎င်းတို့သည် လျှော့တွက်သည့် အရာတစ်ခု၊ နှစ်ခုကိုသာ ပြောခဲ့ကြသည်။ မည်သည့် ပြဿနာကိုမျှ ၎င်းတို့ မဖြေရှင်းနိုင်ခဲ့ကြသကဲ့သို့ ကိစ္စရပ်ကို လုံးဝ စိတ်ဖြာလေ့လာဆွေးနွေးနိုင်ခဲ့ကြခြင်း မရှိပေ။ သင်တို့သည် ယခု အဘယ်မျှ ထုံထိုင်းလိုက်ကြသနည်း။ သင်တို့သည် မျက်နှာကို အပ်ဖြင့် ထိုး၍ရနိုင်ပြီး သွေးမထွက်ဘဲရှိနိုင်သည်။ သင်တို့သည် မည်သည့်အရာကိုမျှ လုံးဝ မခံစားနိုင်ကြပေ။ ခေါင်းဆောင်များနှင့် အမှုဆောင်များအားလုံး ပြုပြင်ခံရပြီးဖြစ်သော်လည်း နောက်ပိုင်းတွင် ၎င်းတို့ အတူတူပင်ဖြစ်ကာ မပြောင်းလဲခဲ့ကြပေ။ ထို့ကြောင့် ငါသည် ကြားဝင်ကာ သင်တို့၏ “ဆက်ဆံမှု”ကို ပြောင်းလဲခဲ့ရသည်။ ဤကိစ္စရပ်မှတစ်ဆင့် မည်သည့် သင်ခန်းစာများကို သင်တို့ သင်ယူပြီးပြီနည်း။ သင်တို့ စိတ်နှလုံးများတွင် ဝမ်းနည်းမှု ခံစားရသည်၊ မှန်သလော။ အမှုအရာများကို ငါ ဤသို့ ကိုင်တွယ်ခြင်းက မျှတသည်ဟု သင်တို့ ထင်သလော။ (ထင်ပါသည်။) အဘယ်သို့ဖြစ်၍များ မျှတရသနည်း။ ငါ ပွင့်လင်းစွာ စကားပြောမည်။ သင်သည် မှန်ကန်သည့် လမ်းကြောင်းကို မလိုက်လျှောက်လျှင် သို့မဟုတ် သမ္မာတရားကို လက်တွေ့မလုပ်ဆောင်လျှင်၊ ဘုရားသခင်ကို ယုံကြည်ခြင်း အောင်လံအား သင် ဝှေ့ယမ်းသော်လည်း ဘာသာတရားမရှိသူများကဲ့သို့သာ အသက်ရှင်လိုပြီး လက်လွတ်စပယ် ပြုမူလိုလျှင် ဘုရားသခင်ကို သင်၏ ယုံကြည်ခြင်းက အဓိပ္ပာယ်မဲ့ပေသည်။ အဓိပ္ပာယ်မဲ့သည်ဟု အဘယ်ကြောင့် ငါ ပြောသနည်း။ ဘုရားသခင်ကို ယုံကြည်ခြင်း၏ အဓိပ္ပာယ်သည် မည်သည့်နေရာတွင် တည်ရှိသနည်း။ လူတို့ လျှောက်လှမ်းသည့် လမ်းကြောင်း၊ ဘဝနှင့်ပတ်သက်၍ ၎င်းတို့၏ သဘောထားအမြင်နှင့် ဘုရားသခင်ကို ယုံကြည်လာပြီးနောက် ၎င်းတို့၏ ဘဝ ဦးတည်ချက်နှင့် ရည်မှန်းချက်တို့ လုံးဝ ပြောင်းလဲခြင်း၊ ဤအရာများတွင် ဘုရားသခင်ကို မယုံကြည်သောသူများနှင့် ကွဲပြားလာခြင်း၊ လောကီဆန်သော လူများနှင့်လည်းကောင်း၊ နတ်ဆိုးများနှင့်လည်းကောင်း လုံးဝ ကွဲပြားလာခြင်းနှင့် ယုံကြည်သူများ လျှောက်လှမ်းသည့် လမ်းကြောင်းက ထိုသူများ၏ လမ်းကြောင်းနှင့် လုံးဝ ဆန့်ကျင်ဘက်ဖြစ်ခြင်းတို့တွင် တည်ရှိပေသည်။ ဤဆန့်ကျင်ဘက်ဖြစ်သော ဦးတည်ချက်မှာ အဘယ်အရာနည်း။ သင့်အနေဖြင့် လူကောင်းတစ်ဦး ဖြစ်ရန်လည်းကောင်း၊ ဘုရားသခင်ကို ကျိုးနွံနာခံပြီး၊ လူသား ပုံသဏ္ဌာန်ရှိသူတစ်ဦး ဖြစ်ရန်လည်းကောင်း အလိုရှိခြင်းဖြစ်သည်။ သို့ဆိုလျှင် ဤအရာကို သင် မည်သို့ စွမ်းဆောင်ရရှိနိုင်သနည်း။ သမ္မာတရားအတွက် ကြိုးပမ်းခြင်းအပေါ် သင် အာရုံစိုက်သင့်ပြီး ထို့နောက်တွင်မှ သင် ပြောင်းလဲနိုင်လိမ့်မည်။ သင်သည် သမ္မာတရားကို မလိုက်စားလျှင်၊ သို့မဟုတ် လက်တွေ့လုပ်ဆောင်ခြင်း မရှိလျှင်၊ ဘုရားသခင်ကို သင်၏ ယုံကြည်ခြင်းသည် အဓိပ္ပာယ် သို့မဟုတ် တန်ဖိုးမရှိပေ။ သင်၏ ယုံကြည်ခြင်းသည် မည်သည့် အကျိုးတရားမှုမျှရှိဘဲ အနှစ်မဲ့သော အခွံတစ်ခု၊ လှည့်စားရန် ရည်ရွယ်သည့် နတ်ဆိုးဆန်သော စကားများ၊ အနှစ်မဲ့သော စကားများသာ ဖြစ်သည်။ ဤနေရာ၌ ငါ ပြောသည့်အရာကို သင်တို့ စဉ်းစားချင့်ချိန်သင့်ကြသည်။ ဤစကားများသည် အရိုးရှင်းဆုံးနှင့် အခြေခံအကျဆုံး သမ္မာတရားများဖြစ်ပြီး သင်တို့သည် ယခင်က ချင့်ချိန်စဉ်းစားရခြင်း မရှိသေးဘဲဖြစ်နိုင်သည်။ ထိုသို့ ဖြစ်သလော။ သင်က “ဘုရားသခင်ကို ကျွန်ုပ် ယုံကြည်သည်။ ကျွန်ုပ် လုပ်သင့်သည့်အရာကို လုပ်မည်။ ကျွန်ုပ် လုပ်ချင်သည့်အရာကို လုပ်မည်ဖြစ်ပြီး ဘုရားသခင်ကို ကျိုးနွံနာခံခြင်း၊ ဘုရားသခင်၏ စီစဉ်ညွှန်ကြားမှုများနှင့် အစီအစဉ်များကို ကျိုးနွံနာခံခြင်း၊ ဘုရားသခင်ကို သစ္စာစောင့်သိခြင်းနှင့် လူ့သဘာဝရှိသော လူတစ်ဦးဖြစ်ခြင်းတို့အတွက်မူ ထိုအရာများသည် ကျွန်ုပ်နှင့် ဘာမျှ မပတ်သက်ပါ”ဟု ပြောလျှင်၊ ဤအရာများက သင်နှင့် မည်သည့် ပတ်သက်မှုမျှမရှိလျှင် သင် ဘုရားသခင်ကို ယုံကြည်နေခြင်းအားဖြင့် မည်သည့်အဓိပ္ပာယ် ရှိသနည်း။ သင်သည် သူ့ကို အဘယ်ကြောင့် ယုံကြည်သနည်း။ သူ့ကို သင် မည်သို့ ယုံကြည်ချင်သနည်း။ ဘုရားသခင်ကို သင်၏ ယုံကြည်မှုတွင် မည်သည့် လူစားမျိုး သင် ဖြစ်လိုသနည်း။ ဤအရာများက သင်နှင့် မည်သည့် ပတ်သက်မှုမျှမရှိလျှင် ဘုရားသခင်ကို သင်၏ ယုံကြည်ခြင်းသည် တကယ်ကို အဓိပ္ပာယ်မရှိပေ။ သင်၏ အယူအဆများနှင့် စိတ်ကူးများအပေါ် မှီခိုရင်း ဘုရားသခင်ကို သင် အမြဲ ယုံကြည်လျှင်၊ သင်၏ နှစ်သက်မှုများအတိုင်း အမှုအရာများကို သင် အမြဲ လုပ်ဆောင်လျှင်၊ သင် လုပ်ဆောင်လိုသည့် မည်သည့်အရာကိုမဆို လုပ်ဆောင်ပြီး သင်၏ ဇာတိပကတိကို လိုက်လျောလျှင် သင်၏ အတွေးများနှင့် အမြင်များသည်လည်းကောင်း၊ သင်လုပ်ဆောင်သည့် အရာများသည်လည်းကောင်း၊ သမ္မာတရားနှင့် မည်သည့် ပတ်သက်မှုမျှ မရှိသကဲ့သို့ ဘုရားသခင် တောင်းဆိုသည့်အရာနှင့်လည်း မည်သည့် ပတ်သက်မှုမျှ မရှိပေ။ ဘုရားသခင်ကို သင်၏ ယုံကြည်ခြင်းသည် ထိုအခါ အဓိပ္ပာယ်မဲ့ပြီး သင့်အတွက် ဆက်ယုံကြည်ရန် မလိုအပ်ပေ။ သင့်အနေဖြင့် ဆက်ယုံကြည်လျှင်ပင် အချည်းနှီး အားထုတ်မှု ဖြစ်မည်ဖြစ်ကာ ဘုရားသခင်က သင့်ကို ကယ်တင်မည် မဟုတ်ပေ။

ဤအကြောင်းအရာသည် အလွန် ကြီးလေးသော အကြောင်းအရာတစ်ခုဖြစ်ပြီး ဤကိစ္စရပ်ကို ကိုင်တွယ်ခြင်းနှင့် ပတ်သက်၍ သင်တို့အားလုံး စိတ်ပျက်ကြသည်။ ထိုအရာသည် အနည်းငယ် မျှော်လင့်မထားသောအရာ ဖြစ်သည်။ မည်သို့ဆိုစေ အနာဂတ်တွင် ဤဖြစ်ရပ်များ တစ်ဖန် ရှိလိမ့်မည် ဖြစ်သည်။ ယခု ဤကိစ္စရပ်ကို ငါတို့ ဤသို့ ကိုင်တွယ်ပြီဖြစ်သဖြင့် အနာဂတ်တွင် ဤအရာမျိုး ထပ်ဖြစ်လျှင် ယင်းကို ဤသို့ ကိုင်တွယ်လိမ့်မည် မဟုတ်ဘဲ သာ၍ တင်းကျပ်စွာ ကိုင်တွယ်ကောင်း ကိုင်တွယ်ခံနိုင်မည်ဖြစ်သည်။ ငါ့ကို ပြောလော့၊ ဤသည်မှာ သင့်လျော်သလော။ (သင့်လျော်ပါသည်။)

ဆက်လက်၍၊ အတော်လေး ပိုလွယ်သည့် အကြောင်းအရာတစ်ခုအပေါ် ငါတို့ မိတ်သဟာယပြုမည်။ ပုံပြင်များ နားထောင်ရခြင်းကို သင်တို့ နှစ်သက်ကြသလော။ (နှစ်သက်ပါသည်။) သို့ဆိုလျှင် သင်တို့ကို ပုံပြင်တစ်ခု ငါ ပြောမည်။ သင်တို့အား မည်သည့်ပုံပြင် ပြောပြအပ်သနည်း။ မည်သည့် အကြောင်းအရာမျိုးကို သင်တို့ ကြားလိုကြမည်နည်း။ ပုံပြောခြင်းကို နှစ်သက်သလော၊ သို့မဟုတ် လက်ရှိ အရေးကိစ္စများ၊ နိုင်ငံရေးကို ဆွေးနွေးခြင်းကို နှစ်သက်သလော၊ သို့မဟုတ် သမိုင်းအကြောင်းကို နားထောင်ခြင်းအား သင်တို့နှစ်သက်ကြသလော။ ထိုအရာများအကြောင်း ပြောခြင်းသည် အဓိပ္ပာယ်မဲ့သဖြင့် ယင်းတို့အကြောင်းကို ငါတို့ ပြောမည်မဟုတ်။ ဘုရားသခင်ကို ယုံကြည်သည့် လူများ၏ အပြုအမူအကြောင်း ပုံပြင်ဇာတ်လမ်းတစ်ပုဒ်၊ လူတို့၏ စိတ်သဘောထားများနှင့် နေ့စဉ်ဘဝတွင် လူတို့ တွေ့ကြုံသည့် အမျိုးမျိုးသော အခြေအနေများအကြောင်းကို သင်တို့အား ငါ ပြောပြမည်။

ဖြည့်စွက်ချက်-

အရင်းအနှီးအကြောင်း ဆွေးနွေးချက်တစ်ခု-
“ထားသာထားလိုက်ပါ”

လူငါးဦး အတူတကွ စကားစမြည်ပြောဆိုနေခဲ့ကြပြီး သူတို့ထဲမှ မောင်တက္ကသိုလ်ဟု ခေါ်သော သူတစ်ဦးက “ကျွန်ုပ် တက္ကသိုလ်တက်သည့်အချိန်က ကျောင်းဝင်းထဲ ကျင်လည်ရသော ဘဝသည် ကျွန်ုပ် အလွမ်းဆွတ်ရဆုံးသောအရာ ဖြစ်သည်။ ကျောင်းဝင်းသည် အပင်အမျိုးမျိုးဖြင့် ပြည့်နှက်နေပြီး နွေဦးနှင့် ဆောင်းဦးရာသီများအတွင်း ရှုခင်းမှာ အလွန် လှပသဖြင့် ယင်းက ကျွန်ုပ်ကို စိတ်အေးချမ်းပြီး ပျော်ရွှင်စေခဲ့သည်။ ထိုအချိန်က ကျွန်ုပ်သည် ငယ်ရွယ်ပြီး စိတ်ကူးယဉ်မှုများနှင့် ပြည့်ကာ အပြစ်ကင်းစင်ပြီး ဖိအားများစွာလည်း မရှိခဲ့ပါ။ တက္ကသိုလ်၌ ကျွန်ုပ်၏ သုံးနှစ်တာကာလအတွင်း ဘဝသည် အလွန် လွယ်ကူခဲ့သည်။ အကယ်၍ ကျွန်ုပ်သည် ဆယ်နှစ် သို့မဟုတ် အနှစ်နှစ်ဆယ် နောက်ပြန်သွားနိုင်ပြီး ကျောင်းဝင်းထဲ ကျင်လည်ရသော ဘဝသို့ ပြန်သွားနိုင်မည်ဆိုလျှင် ဤဘဝ၌ ဝမ်းမြောက်ပျော်ရွှင်ဖွယ် အကောင်းဆုံးအရာဖြစ်လိမ့်မည်ဟု ကျွန်ုပ် ထင်ပါသည်…” ဟု ဆိုသည်။ ဤသည်မှာ ပထမဆုံး ပုဂ္ဂိုလ်ဖြစ်ပြီး သူ့အမည်မှာ မောင်တက္ကသိုလ် ဖြစ်သည်။ တက္ကသိုလ်က ဘာအဓိပ္ပာယ်ရှိသနည်း။ ၎င်းမှာ တက္ကသိုလ်ကျောင်းသားဟု အဓိပ္ပာယ်ရသည်၊ ဤသည်မှာ မောင်တက္ကသိုလ်ဟူသောအမည် ဖြစ်လာပုံဖြစ်သည်။ မောင်တက္ကသိုလ်၏ ဝမ်းမြောက်ပျော်ရွှင်ဖွယ်ဘဝကို အပြည့်အဝ ပြန်လည်အမှတ်ရပြီး မခံစားရသေးမီတွင် မောင်ဘွဲ့ရက “သုံးနှစ်တာ သင်တန်းတစ်ခုကို တက္ကသိုလ်သင်ရိုးဟု မှတ်ယူနိုင်မည်လော။ ယင်းမှာ သက်မွေးပညာသင်တန်းတစ်ခု ဖြစ်သည်။ တက္ကသိုလ်၌ ဘွဲ့တစ်ခုသည် အများအားဖြင့် လေးနှစ် ကြာမြင့်သည်၊ ထိုသည်ကိုသာ တက္ကသိုလ်သင်ရိုးဟု မှတ်ယူနိုင်ပါသည်။ ကျွန်ုပ်သည် တက္ကသိုလ်၌ လေးနှစ် တက်ခဲ့သည်။ ကျွန်ုပ်၏ တက္ကသိုလ်တက်ခဲ့သည့် နှစ်များအတွင်း အရည်အချင်းရှိသူဈေးကွက်၌ တက္ကသိုလ်ကျောင်းသားများစွာ ရှိနေခဲ့ပြီး အလုပ်တစ်ခု ရှာဖွေရန် ခက်ခဲသည်ကို ကျွန်ုပ် တွေ့ခဲ့ရသည်။ ထို့ကြောင့် ကျွန်ုပ် ဘွဲ့မရမီတွင် ကျွန်ုပ်သည် ထိုအကြောင်း စဉ်းစားတွေးတောခဲ့ပြီး ဘွဲ့လွန်သင်တန်းတစ်ခုကို ဆည်းပူးရန် ဆုံးဖြတ်ခဲ့သည်။ ထိုအချိန်က ဘွဲ့လွန်ကျောင်းသားများစွာ မရှိခဲ့သဖြင့် အလုပ်တစ်ခု ရှာဖွေခြင်းမှာ လွယ်ကူလိမ့်မည်။ မျှော်လင့်ထားသည့်အတိုင်း ကျွန်ုပ်၏ ဘွဲ့လွန်သင်တန်းမှ ဘွဲ့ရပြီးသည့်နောက် ကျွန်ုပ်သည် ဝင်ငွေကောင်းသော အလုပ်ကောင်းတစ်ခုကို ရှာဖွေတွေ့ရှိခဲ့ပြီး အလွန်ကောင်းမွန်စွာ နေထိုင်ခဲ့သည်။ ဤသည်မှာ ဘွဲ့လွန်ကျောင်းသားတစ်ဦး ဖြစ်ခြင်း၏ အကျိုးရလဒ် ဖြစ်သည်” ဟူ၍ ထုတ်ပြောလာလေသည်။ ဤသည်ကို ကြားခြင်းမှ သင် မည်သည့်သတင်းစကားကို ရရှိသနည်း။ မောင်တက္ကသိုလ်သည် သက်မွေးပညာသင်တန်းမှ ဘွဲ့ရခဲ့ပြီး မောင်ဘွဲ့ရမှာမူ ဘွဲ့လွန်သင်တန်းမှ ဘွဲ့ရခဲ့ကာ ကြွယ်ဝသော ဝင်ငွေကို ရရှိခဲ့ပြီး လူ့အဖွဲ့အစည်း၌ အဆင့်အတန်းနှင့် လေးစားမှုကို ရရှိခဲ့သည်။ မောင်ဘွဲ့ရသည် ပျော်ရွှင်စွာ စကားပြောဆိုနေခဲ့ပြီး ထို့နောက် မောင်မန်နေဂျာက “ချာတိတ်၊ သင်သည် ငယ်ရွယ်သေးသည်။ သင်သည် လူ့အဖွဲ့အစည်းတွင် မည်သည့် အတွေ့အကြုံမျှ မရှိသေးပေ။ သင်သည် မဟာဘွဲ့တစ်ခုအတွက် သင်ယူသည်ဖြစ်စေ၊ ပါရဂူဘွဲ့တစ်ခုအတွက် သင်ယူသည်ဖြစ်စေ အရေးမပါပေ၊ တက္ကသိုလ်၌ အဓိက ဘာသာရပ်ကောင်းတစ်ခုကို ရွေးချယ်ခြင်းကို မည်သည့်အရာကမျှ မယှဉ်နိုင်ပေ။ ကျွန်ုပ် တက္ကသိုလ် စမတက်မီက ဈေးကွက်ကို သုတေသနပြုခဲ့ပြီး အရွယ်အစားမျိုးစုံရှိသော စီးပွားရေးလုပ်ငန်းများသည် စီမံခန့်ခွဲရေး ကျွမ်းကျင်မှုများ ရှိသောသူတို့ကို လိုအပ်နေသည်ကို တွေ့ရှိခဲ့သည်၊ ထို့ကြောင့် ကျွန်ုပ် တက္ကသိုလ်တက်သောအခါ ဈေးကွက် စီမံခန့်ခွဲမှုကို သင်ယူရန် ရွေးချယ်ခဲ့ပြီး ကျွန်ုပ် ဘွဲ့ရသောအခါ ကျွန်ုပ်သည် ကုမ္ပဏီတစ်ခု၏ ထိပ်တန်း မန်နေဂျာများထဲမှ တစ်ဦး၊ တစ်နည်းအားဖြင့် စီအီးအိုဟု သိကြသောသူ ဖြစ်လာပေမည်။ ကျွန်ုပ် ဘွဲ့ရသောအခါ အရွယ်အစားမျိုးစုံရှိသော အမျိုးမျိုးသော စီးပွားရေးလုပ်ငန်းများသည် ကျွန်ုပ်ကဲ့သို့ အရည်အချင်းရှိသူများကို လိုအပ်နေသည့် အချိန်ဖြစ်ခဲ့သည်။ ဈေးကွက်သည် အလွန် ကြီးမားခဲ့ပြီး ကျွန်ုပ် အလုပ်များ စတင်လျှောက်ထားသောအခါ ကုမ္ပဏီအချို့သည် ကျွန်ုပ်ကို ချက်ချင်းလုယူရန် ကြိုးစားခဲ့ကြသည်။ အဆုံးတွင် ကျွန်ုပ်သည် ၎င်းတို့ထဲမှ စိတ်ကြိုက်ရွေးချယ်ခဲ့သည်။ ကျွန်ုပ်သည် အကောင်းဆုံးသော နိုင်ငံခြား ကုမ္ပဏီတစ်ခုကို ရွေးချယ်ခဲ့ပြီး ဝင်ငွေများပြားသော မန်နေဂျာတစ်ဦး ချက်ချင်း ဖြစ်လာခဲ့သည်။ ငါးနှစ်အတွင်း ကျွန်ုပ်သည် ကိုယ်ပိုင်ကားကို ဝယ်ယူခဲ့ပြီး ဖြစ်သည်။ အလွန်လိမ္မာပါးနပ်သည် မဟုတ်လော။ ကျွန်ုပ်၏ ရွေးချယ်မှုများ ကောင်းမွန်လှပေသည်၊ မဟုတ်လော” ဟု ဆိုသည်။ မောင်မန်နေဂျာ စကားပြောဆိုနေစဉ်တွင် သူ၏ရှေ့မှ ပြောသွားသော လူနှစ်ဦးသည် အတော်အတန် အတိုက်အခံဖြစ်သော်လည်း သူတို့သည် မည်သည့်အရာမျှ မပြောဆိုခဲ့ကြပေ။ သူတို့၏ စိတ်နှလုံးထဲ၌ “သူသည် ထိပ်တန်း မန်နေဂျာတစ်ဦးဖြစ်ပြီး အမြော်အမြင် ရှိသည်။ သူသည် ကျွန်ုပ်တို့ထက် များစွာသာလွန်သော အရင်းအနှီး ရှိသည်။ ကျွန်ုပ်တို့ အတော်အတန် အတိုက်အခံ ဖြစ်သော်ငြားလည်း မည်သည့်အရာမျှ ပြောဆိုမည် မဟုတ်ပေ။ ကျွန်ုပ်တို့ အရှုံးပေးလိုက်မည်” ဟု တွေးကြသည်။ မောင်မန်နေဂျာ စကားပြောပြီးသောအခါ သူသည် မိမိကိုယ်ကို အလွန် ကျေနပ်နေခဲ့ပြီး ဤလူငယ်များသည် သူ့လောက် အတွေ့အကြုံ မရှိကြဟု တွေးထင်နေခဲ့သည်။ သူ ထိုသို့ အလွန် ကျေနပ်နေစဉ်မှာပင် မောင်အရာရှိ ဆိုသောသူတစ်ဦးက စတင်၍ စကားပြောသည်။ အခြားသုံးယောက်က ပြောခဲ့သည့်အရာကို မောင်အရာရှိက များစွာတွေးတောခြင်းမရှိ။ သူသည် သူ၏ ရေနွေးကြမ်းခွက်ကို စိမ်ပြေနပြေကိုင်ပြီး တစ်ငုံသောက်ကာ ဘေးဘီသို့ကြည့်၍ “ယနေ့ခေတ်တွင် လူတိုင်းသည် တက္ကသိုလ်ကျောင်းသားများ ဖြစ်နေကြသည်။ တက္ကသိုလ်သို့ မတက်ရောက်နိုင်သည့်သူ မည်သူရှိသနည်း။ တက္ကသိုလ်သို့ တက်ရုံမျှဖြင့် မလုံလောက်သကဲ့သို့ စီးပွားရေးလုပ်ငန်းထဲသို့ ဝင်ရုံမျှဖြင့်လည်း မလုံလောက်ပေ။ သင်သည် ထိပ်တန်း မန်နေဂျာတစ်ဦး ဖြစ်လျှင်ပင် ယင်းသည် တစ်သက်တာ အလုပ်အကိုင် မဟုတ်ပေ၊ ယင်းသည် မတည်ငြိမ်ပေ။ အဓိကအချက်မှာ လုံခြုံသော အလုပ်အကိုင်တစ်ခုကို ရှာဖွေရန်ဖြစ်ပြီး ထို့နောက်တွင် သင်သည် ဘဝအတွက် အာမခံချက်ရှိပြီ ဖြစ်သည်” ဟု ဆိုသည်။ အခြားသူများ ဤသည်ကို ကြားသောအခါ သူတို့က “တစ်သက်တာ အလုပ်အကိုင်လော။ ယနေ့ခေတ်တွင် ထိုသို့သောအရာမျိုးကို မည်သူ ပြောဆိုကြသေးသနည်း။ ယင်းမှာ အတိတ်တွင် ကျန်ခဲ့ပြီဖြစ်သည်” ဟု ဆိုကြသည်။ မောင်အရာရှိက “အတိတ်တွင် ကျန်ခဲ့ပြီဟုဆိုသလော။ ဟွန်း၊ သင်တို့အားလုံးသည် အမြော်အမြင်မရှိဖြစ်ပြီး အသိအမြင် ကင်းမဲ့သောကြောင့်သာ ထိုသို့ ဆိုကြခြင်း ဖြစ်သည်။ သင်သည် တစ်သက်တာ အလုပ်အကိုင်တစ်ခုကို ရရှိသောအခါ သင်၏ ဝင်ငွေသည် အနည်းငယ် နည်းပါးသော်ငြားလည်း ယင်းသည် တည်ငြိမ်သော ဘဝကို အာမခံပြီး သင့်၌ အာဏာ ရှိကာ နေရာတိုင်းတွင် ဩဇာရှိနိုင်ပေသည်။ ကျွန်ုပ် အစိုးရဝန်ထမ်းတစ်ဦး ဖြစ်ရန် စာမေးပွဲ ဖြေဆိုသောအခါ လူအများစု နားမလည်ခဲ့ကြဘဲ အဘယ်ကြောင့် ဤမျှ ငယ်ရွယ်သော လူတစ်ဦးက အစိုးရဌာနများတွင် အလုပ်လုပ်လိုရသနည်းဟု မေးမြန်းခဲ့ကြသည်။ ကျွန်ုပ် အစိုးရဝန်ထမ်းတစ်ဦး ဖြစ်ရန် စာမေးပွဲ အောင်မြင်ပြီးသည့်နောက် အလုပ်တစ်ခု လိုအပ်သော သို့မဟုတ် တရားစွဲဆိုမှုတွင် ပါဝင်ပတ်သက်သော မိတ်ဆွေများနှင့် ဆွေမျိုးများက ကျွန်ုပ်ကို တကူးတက ရှာဖွေခဲ့ကြသည်။ ယခု ယင်းမှာ များစွာသော အာဏာပင် မဟုတ်လော။ ဝင်ငွေသည် မများပြားသော်ငြားလည်း ကျွန်ုပ်အား အိမ်ရာနှင့် ကားတစ်စီးကို ပံ့ပိုးပေးခဲ့သည်။ ကျွန်ုပ်၏ အကျိုးခံစားခွင့်များသည် သင်တို့၏ အကျိုးခံစားခွင့်များထက် သာ၍ ကောင်းမွန်ပါသည်။ ထို့အပြင် ကျွန်ုပ် အပြင်ထွက် စားသောက်ပြီး ဈေးဝယ်ထွက်သည့်အခါ ကျွန်ုပ်၏ အသုံးစရိတ်များအတွက်လည်း ပြန်တောင်းလို့ရသည့်အပြင် ကျွန်ုပ်သည် တက္ကစီ သို့မဟုတ် လေယာဉ်ဖြင့်လည်း အခမဲ့ ခရီးသွားနိုင်သည်။ သင်တို့၏ အလုပ်များသည် ထိုမျှ မကောင်းမွန်ပေ၊ သင်တို့အားလုံး၏ အလုပ်အကိုင်များသည် မလုံခြုံကြပေ။ ကျွန်ုပ်သည် သင်တို့ထက် များစွာ သာလွန်အောင် လုပ်ဆောင်ပြီးဖြစ်သည်” ဟု ဆိုသည်။ အခြားသူတို့သည် သူ ဤသို့ပြောသည်ကို ကြားပြီးသည့်နောက် စိတ်မသက်မသာ ခံစားခဲ့ကြရပြီး သူတို့က “သင်၏ အကျိုးခံစားခွင့်များသည် အတော်အတန် ကောင်းမွန်သော်ငြားလည်း သင်၏ ဂုဏ်သတင်း မကောင်းပေ။ သင်သည် နေရာတိုင်း၌ တရားမဝင်သောအလုပ်များကို ပြုလုပ်ပြီး အာဏာရှင်ကဲ့သို့ ပြုမူကာ ပြည်သူကို အစေမခံပေ။ သင်သည် လူတို့ကို ဒုက္ခပေးပြီး မကောင်းမှုအမျိုးမျိုးကိုသာ ပြုလုပ်သည်” ဟု ဆိုကြသည်။ မောင်အရာရှိက “ကျွန်ုပ် ဂုဏ်သတင်း မကောင်းတော့ရော ဘာဖြစ်သနည်း။ ကျွန်ုပ်သည် ယင်းမှ အကျိုးအမြတ်များစွာ ရရှိသည်” ဟု ပြန်လည်ဖြေကြားခဲ့သည်။ လူတိုင်း ဤကိစ္စရပ်ကို ဆွေးနွေးနေကြသည်မှာ အဆုံး၌ နောက်ဆုံး ပုဂ္ဂိုလ်သည် မိမိကိုယ်ကို မထိန်းချုပ်နိုင်တော့ဘဲ ထရပ်ကာ “ဤနေရာတွင် ကြည့်လော့၊ သင်တို့သည် တက္ကသိုလ် တက်ခဲ့ကြပြီး သင်သည် ဘွဲ့လွန်ဘွဲ့တစ်ခုကို သင်ယူခဲ့ကြကာ သင်သည် ထိပ်တန်း စီးပွားရေး မန်နေဂျာတစ်ဦး ဖြစ်သည်၊ သင်သည် အရာရှိတစ်ဦး ဖြစ်သည်၊ ကျွန်ုပ်၌မူ သင်တို့ ရှိသော အတွေ့အကြုံများ မရှိခဲ့ပေ။ ကျွန်ုပ်သည် အရေးမပါသော ပုဂ္ဂိုလ်တစ်ဦးမျှသာ ဖြစ်သော်ငြားလည်း ကျွန်ုပ်၏ အတွေ့အကြုံများကို သင်တို့အား မျှဝေရပေမည်။ ကျွန်ုပ် ‘မိခင်’ ထံ ပြန်သွားသောအခါ…” ဟု ဆိုသည်။ အခြားသူတို့သည် အံ့အားသင့်သွားကြပြီး “ဤ ‘မိခင်’ မှာ အဘယ်နည်း။ အစိုးရဌာန စာမေးပွဲကို အောင်မြင်ခြင်းသည် မိမိကို အစိုးရဝန်ထမ်းတစ်ဦး ဖြစ်စေသည်၊ ဘွဲ့လွန်ဘွဲ့တစ်ခုအတွက် သင်ယူခြင်းသည် မိမိကို ဘွဲ့လွန်ဘွဲ့ရတစ်ဦး ဖြစ်စေသည်၊ ကုမ္ပဏီတစ်ခု၏ ထိပ်တန်း မန်နေဂျာ ဖြစ်ခြင်းသည် မိမိကို စီအီးအိုတစ်ဦး ဖြစ်စေသည်၊ သို့ဆိုလျှင် ဤ ‘မိခင်’ မှာ အဘယ်အရာကို ဆိုလိုသနည်း။ သင် ဤသည်ကို ရှင်းပြနိုင်ပါသလော” ဟု မေးကြသည်။ ဤပုဂ္ဂိုလ်က “သို့ဆိုလျှင် သင်တို့သည် တက္ကသိုလ်သို့ သွားနိုင်သည်၊ ဘွဲ့လွန်ဘွဲ့တစ်ခုအတွက် သင်ယူနိုင်သည်၊ ထိပ်တန်း စီးပွားရေး မန်နေဂျာတစ်ဦး ဖြစ်နိုင်ပြီး အစိုးရဝန်ထမ်းတစ်ဦး ဖြစ်လာနိုင်သည်၊ သို့သော် ကျွန်ုပ်သည် ကျွန်ုပ်၏ မိခင်ကျောင်းတော်သို့ လှည့်ပတ်ကြည့်ရှုရန် ပြန်သွား၍ မရနိုင်သလော” ဟု ဆိုသည်။ သင် မြင်သလော။ သူ ဒေါသထွက်သွားသည်။ ဤအရေးမပါသော ပုဂ္ဂိုလ်သည် ထိုမျှ ပညာမတတ်သော်လည်း မာနထောင်လွှားနေဆဲ ဖြစ်သည်။ အခြားသူတို့က “မိခင်ကျောင်းသို့ ပြန်သွားခြင်းမှာ မည်သည့်အရာဖြစ်သည်ကို ကျွန်ုပ်တို့အားလုံး သိရှိပါသည်။ သင်သည် ‘မိခင်’ ထံ ပြန်သွားသည်ဟု ပြောဆိုရန် မလိုအပ်ပါ။ သင်၏ မိခင်ကျောင်းသို့ ပြန်သွားသည်ဟုသာ ပြောဆိုပါ” ဟု ဆိုကြသည်။ ထို့နောက် အခြားသူတို့က သူ၏ မိခင်ကျောင်းသည် မည်သည့် ပညာရေးအဆင့်တွင် ရှိသည်၊ ယင်းမှာ အထက်တန်းကျောင်းလော၊ စက်မှုသိပ္ပံလော၊ တက္ကသိုလ်လော၊ သို့မဟုတ် ဘွဲ့လွန်ကျောင်းလောဟု သူ့ကို မေးမြန်းခဲ့ကြသည်။ သူက “ကျွန်ုပ်သည် မည်သည့်အခါကမျှ တက္ကသိုလ် မတက်ခဲ့ဘူးပါ၊ ကျွန်ုပ်သည် ဘွဲ့လွန်ဘွဲ့တစ်ခုအတွက် မည်သည့်အခါမျှ မသင်ယူခဲ့ပါ၊ ပြီးလျှင် ကျွန်ုပ်သည် အစိုးရဝန်ထမ်းတစ်ဦး ဖြစ်ရန် စာမေးပွဲကို မည်သည့်အခါမျှ မဖြေဆိုခဲ့ပါ။ မူလတန်းကျောင်းသာ တက်ရောက်ခဲ့သည်၊ မရနိုင်သလော။ ထားသာထားလိုက်ပါ” ဟု ပြန်လည်ဖြေကြားခဲ့သည်။ သူသည် အရှက်ရသွားသည်၊ သူသည် သူ၏ နောက်ကြောင်းကို ဖော်ထုတ်ခဲ့ပြီးဖြစ်၍ ယင်းကို ဖုံးကွယ်၍ မရနိုင်တော့ပေ။ သူသည် အစကတည်းက ဟန်ဆောင်နေခဲ့ခြင်း ဖြစ်သည်။ အခြားသူများနှင့် ပေါင်းသင်းဆက်ဆံရာတွင် သူသည် သူ၏ ပညာအရည်အချင်း အဆင့်ကို သူတို့အား မည်သည့်အခါကမျှ ထုတ်ဖော်ပြောဆိုခြင်း မရှိခဲ့ပေ။ ယခုမူ အားလုံး ပေါ်သွားခဲ့ပြီဖြစ်၍ သူသည် သိက္ခာကျခဲ့ရပြီး တံခါးဆီသို့ ကမန်းကတန်းသွားကာ ထွက်ပြေးသွားလေတော့သည်။ အခြားသူတို့သည် သူ အဘယ်ကြောင့် ထွက်ပြေးသွားသည်ကို နားမလည်ခဲ့ကြဘဲ “သင်သည် မူလတန်းကျောင်းဖြင့်သာ ကျောင်းပြီးခဲ့သည် မဟုတ်လော။ သင် အဘယ်အရာအတွက် ပြေးနေရသနည်း။ ပြီးလျှင် သင်သည် ထိုအတွက် အလွန် ဂုဏ်ယူနေခဲ့ပါတကား” ဟု သူတို့အားလုံး အတူတကွ ပြောဆိုကြသည်။ ငါသည် ဇာတ်လမ်းကို ဤနေရာ၌ အဆုံးသတ်မည်၊ ဤသည်မှာအကြောင်းအရာကို အနည်းနှင့်အများဆိုသလို ပေါင်းရုံးဖော်ပြပြီးဖြစ်လေသည်။

ဤဇာတ်လမ်းတွင် လူငါးဦး ပါဝင်သည်။ ၎င်းတို့ ဆွေးနွေးနေကြသည့် အကြောင်းအရာမှာ အဘယ်နည်း။ (သူတို့၏ ပညာရေးဆိုင်ရာ နောက်ခံများအကြောင်းဖြစ်သည်။) လူတို့အတွက် ပညာရေးဆိုင်ရာ နောက်ခံသည် အမှန်တကယ် အဘယ်အရာကို ဆိုလိုသနည်း။ (ထိုအရာသည် ၎င်းတို့၏လူမှုအဆင့်အတန်း ဖြစ်ပါသည်။) လူတစ်ဦး၏ ပညာရေးဆိုင်ရာ နောက်ခံသည် လူတစ်ဦး၏ လူမှုအဆင့်အတန်းနှင့် ဆက်စပ်သည်။ ဤသည်မှာ ဓမ္မဓိဋ္ဌာန်ကျသော အမှန်တရားတစ်ခု ဖြစ်သည်။ သို့ဆိုလျှင် လူတို့သည် အဘယ်ကြောင့် သူတို့၏ လူမှုအဆင့်အတန်းကို ဆွေးနွေးလိုကြသနည်း။ အဘယ်ကြောင့် ၎င်းတို့သည် မိမိတို့၏ လူမှုအဆင့်အတန်းနှင့် ပင်ကိုလက္ခဏာကို ဆွေးနွေးရန် အကြောင်းအရာတစ်ခုအဖြစ် ထုတ်ဖော်ပြသလိုကြသနည်း။ ၎င်းတို့သည် အဘယ်အရာကို လုပ်ဆောင်နေကြသနည်း။ (သူတို့သည် မိမိတို့ကိုယ်ကို ကြွားဝါနေခြင်း ဖြစ်ပါသည်။) သို့ဆိုလျှင် ဤဇာတ်လမ်း၏ ခေါင်းစဉ်မှာ အဘယ်အရာ ဖြစ်သင့်သနည်း။ (ပညာရေးဆိုင်ရာ နောက်ခံများကို နှိုင်းယှဉ်ခြင်းဖြစ်သင့်ပါသည်။) အကယ်၍ ဇာတ်လမ်းကို “ပညာရေးဆိုင်ရာ နောက်ခံများကို နှိုင်းယှဉ်ခြင်း” ဟု ခေါင်းစဉ်တပ်ခဲ့ပါက ၎င်းသည် အလွန်တရာ တဲ့တိုးဖြစ်လွန်းမည် မဟုတ်လော။ (ဟုတ်ပါသည်။ ထိုသို့ ဖြစ်ပါမည်။ “အဆင့်အတန်းကို ကြွားလုံးထုတ်ခြင်း” ဆိုလျှင်ကော အဘယ်သို့နည်း။) ယင်းမှာ အနည်းငယ် တိုက်ရိုက်ကျလွန်းသည်၊ သွယ်ဝိုက်ခြင်း မရှိ၊ ပြီးလျှင် ယင်းသည် ထိုမျှ နက်နဲခြင်း မရှိပေ။ အကယ်၍ ကျွန်ုပ်တို့က အဓိကခေါင်းစဉ်မှာ “အရင်းအနှီးအကြောင်း ဆွေးနွေးချက်တစ်ခု” ဖြစ်ပြီး ဒုတိယခေါင်းစဉ်မှာ “ထားသာထားလိုက်ပါ” ဖြစ်သည်ဟု ဆိုလျှင်ကော။ ယင်းသည် အနည်းငယ် သရော်လှောင်ပြောင်သည့်သဘောဖြစ်သည် မဟုတ်လော။ “အရင်းအနှီးအကြောင်း ဆွေးနွေးချက်တစ်ခု”မှာ လူတိုင်းသည် မိမိတို့၏ ပညာရေးဆိုင်ရာ နောက်ခံများနှင့် လူမှုအဆင့်အတန်းတို့ အပါအဝင် ၎င်းတို့၏ ကိုယ်ပိုင် အရင်းအနှီးကို ဆွေးနွေးနေကြသည်ဟု ဆိုလိုသည်။ “ထားသာထားလိုက်ပါ”ဟူသည်မှာ အဘယ်အရာကို ဆိုလိုသနည်း။ (အခြား မည်သူမျှ ပိုတော်သည်ဟု ဝန်မခံခြင်းဖြစ်သည်။) မှန်ပေသည်၊ ဤနေရာ၌ စိတ်သဘောထားတစ်မျိုး ရှိနေသည်။ “ကောင်းပြီ၊ သင်သည် ဘွဲ့ရကျောင်းသားတစ်ဦး ဖြစ်လျှင်ရော ဘာဖြစ်သနည်း။ ကောင်းပါပြီ၊ သင်သည် ကျွန်ုပ်ထက် သာ၍မြင့်မားသောအဆင့်အထိ ပညာသင်ကြားခဲ့ပြီးလျှင်ရော ဘာဖြစ်သနည်း” ဟူသော စိတ်သဘောထားမျိုး ဖြစ်သည်။ အခြားမည်သူမဆိုသည် မိမိတို့ထက် ပိုတော်သည်ဟု မည်သူမျှ ဝန်မခံကြပေ။ ဤသည်မှာ အရင်းအနှီးကို ဆွေးနွေးခြင်းဟု ဆိုလိုသည့်အရာ ဖြစ်သည်။ ဤသို့သော စကားပြောဆိုမှုမျိုးကို အခြားသူတို့နှင့်အတူ ရှိနေသည့်အခါ မကြာခဏ ကြားရသည် မဟုတ်လော။ မိမိတို့ မိသားစု၏ ကြွယ်ဝချမ်းသာမှုကို ကြွားဝါသောသူများ၊ မိမိတို့ မိသားစု၏ ဂုဏ်သတင်းကြီးသော နောက်ခံကို ကြွားဝါသောသူများ၊ အချို့သော ဧကရာဇ်များနှင့် ကျော်ကြားသူများသည် မိမိတို့၏ မျိုးရိုးနာမည်ကို သယ်ဆောင်သည်ဟူသောအချက်ကို ကြွားဝါသောသူများ ရှိကြပြီး အချို့သောသူတို့သည် မိမိတို့ မည်သည့်တက္ကသိုလ်မှ ဘွဲ့ရခဲ့သည်၊ မိမိတို့ မည်မျှ ဂုဏ်ဝင့်ဖွယ်ဖြစ်ခဲ့သည်တို့ကို ပြောဆိုကြကာ အလှပြင်ဆိုင်မှ အနှိပ်သည် မိန်းကလေးတစ်ဦးပင်လျှင် ဤသို့ ဆိုသည်။ “ကျွန်ုပ်သည် ကျော်ကြားသော ဆရာတစ်ဦးထံမှ ကျွမ်းကျင်သူ၏ ပြင်ဆင်ပေးမှုနှင့် ကိုယ်တိုင်စစ်ဆေးညွှန်ပြမှုတို့ဖြင့် အနှိပ်ပညာကို သင်ယူခဲ့ပါသည်။ အဆုံးတွင် ကျွန်ုပ်သည် ပထမတန်းစား အနှိပ်ကုထုံးပညာရှင်တစ်ဦး ဖြစ်လာခဲ့ပြီး ၂၀၀၀ခုနှစ်ဝန်ကျင်သည် ကျွန်ုပ်၏ ဂုဏ်ဝင့်ဖွယ်အဖြစ်ဆုံးသော အချိန် ဖြစ်ခဲ့ပါသည်…” ဟူ၍ ဖြစ်သည်။ ဤ “ဂုဏ်ဝင့်ဖွယ်ဖြစ်သော” ဟူသည်မှာ နေရာလွဲနေသည်။ ဝန်ဆောင်မှုလုပ်ငန်းရှိ အနှိပ်သည် မိန်းကလေးတစ်ဦးပင်လျှင် သူမ၏ “ဂုဏ်ဝင့်ဖွယ်အဖြစ်ဆုံးသော အချိန်” အကြောင်း ပြောဆိုနေခဲ့သည်။ ဤသည်မှာ အမှန်ပင် သူမ၏ ကြွားဝါခြင်းနှင့် ကိုယ်ရည်သွေးခြင်း ဖြစ်ခဲ့သည်။ ဤအကြောင်းအရာဖြင့် ငါတို့ အဓိက ပြောဆိုနေသောအရာမှာ လက်တွေ့ဘဝ၌ လူတို့အနီးဝန်းကျင်တွင် ရှိနေသည့်အခါ မကြာခဏ ကြားရသည့် အချို့သော စကားပြောဆိုမှုများ၊ မကြာခဏ မြင်တွေ့ရသော အပြုအမူနှင့် မကြာခဏ ထုတ်ဖော်ပြသည့် စိတ်သဘောထားများ ဖြစ်ကြသည်။ လူတို့သည် အဘယ်ကြောင့် ထိုသို့သော အရင်းအနှီးအကြောင်း ပြောဆိုကြသနည်း။ ဤနေရာ၌ မည်သည့် စိတ်သဘောထား သို့မဟုတ် စေ့ဆော်မှုက အလုပ်လုပ်နေသနည်း။ ဆွေးနွေးပြောဆိုကြသည့် ဤအမှုအရာများကို ဂုဏ်ဝင့်ဖွယ်ဖြစ်သည်ဟု မှတ်ယူ၍ရနိုင်သလော။ ဂုဏ်အသရေသည် ထိုအရာနှင့် မည်သို့မျှ မသက်ဆိုင်ပေ။ သို့ဆိုလျှင် လူတို့သည် ထိုသို့သော အမှုအရာများအကြောင်း ပြောဆိုခြင်းမှ အကျိုးကျေးဇူး ရရှိကြသလော။ (မရရှိကြပါ)။ သင်တို့သည်လည်း ဤအရာများအကြောင်း ပြောဆိုကြသလော။ (ပြောဆိုကြပါသည်)။ ယင်းတို့သည် အကျိုးကျေးဇူး မရှိကြောင်း သင်တို့ သိရှိကြသည်၊ သို့ဆိုလျှင် အဘယ်ကြောင့် ယင်းတို့အကြောင်း ပြောဆိုကြသနည်း။ လူတို့သည် အဘယ်ကြောင့် ထိုသို့သော အမှုအရာများအကြောင်း ပြောဆိုခြင်းကို နှစ်သက်ကြသနည်း။ (ဤအရာများသည် လူတို့ ကြွားဝါသော အရင်းအနှီး ဖြစ်ပါသည်။) ယင်းတို့ကို ကြွားဝါခြင်း၏ ရည်ရွယ်ချက်မှာ အဘယ်နည်း။ (အခြားသူတို့၏ အထင်ကြီးလေးစားခြင်းကို ခံရရန်ဖြစ်သည်။) အကြောင်းမှာ မည်သူမျှ သာမန်၊ ရိုးရိုးလူတစ်ဦး ဖြစ်ရန် မလိုလားသောကြောင့် ဖြစ်သည်။ မူလတန်းကျောင်းပြီးသော လူတစ်ဦးပင်လျှင် ၎င်း၏ “မိခင်”ထံ ပြန်သွား၍ လှည့်ပတ်ကြည့်ရှုခြင်းအကြောင်း ပြောဆိုခဲ့ပြီး အခြားသူတို့က သူ့ကို အထင်ကြီးလေးစားကြစေရန်အလို့ငှာ အခြားသူတို့ကို အရူးလုပ်ပြီး တွေဝေစေရန် ဤသို့သော စာပေဆန်သည့် ဘာသာစကားကို အသုံးပြုဖို့ ဆန္ဒရှိနေခဲ့သည်။ အခြားသူတို့က ၎င်းကို အထင်ကြီးလေးစားစေခြင်း၏ ရည်ရွယ်ချက်မှာ အဘယ်နည်း။ သူသည် အခြားသူတို့ထက် သာလွန်နိုင်ရန်၊ အခြားသူတို့အလယ်၌ နေရာတစ်ခုနှင့် ရာထူးတစ်ခု ရှိနိုင်ရန်၊ အခြားသူများ၏ ကြည်ညိုလေးစားမှုကို ခံရနိုင်ရန်၊ သူ ပြောဆိုသော အမှုအရာများက သြဇာအာဏာ သက်ရောက်နိုင်ရန်၊ အခြားသူတို့၏ ထောက်ခံမှုကို ရရှိရန်နှင့် ဂုဏ်သိက္ခာ ရှိနိုင်ရန် ဖြစ်သည်။ အကယ်၍ သင်သည် ဤအမှုအရာများကို စွန့်ပစ်ပြီး သာမန်ဖြစ်သော၊ ရိုးရိုးလူတစ်ဦး ဖြစ်မည်ဆိုလျှင်၊ သင်သည် အဘယ်အရာကို ပိုင်ဆိုင်သင့်သနည်း။ ပထမဦးစွာ သင်၌ မှန်ကန်သော ရှုထောင့်အမြင် ရှိသင့်သည်။ ဤမှန်ကန်သော ရှုထောင့်အမြင်သည် မည်သို့ ဖြစ်ပေါ်လာသနည်း။ ယင်းသည် ဘုရားသခင်၏ နှုတ်ကပတ်တော်များကို ဖတ်ရှုခြင်းအားဖြင့် ဖြစ်ပေါ်လာပြီး ဘုရားသခင်၏ ရည်ရွယ်ချက်များနှင့် ကိုက်ညီကာ လူတို့က မိမိတို့၏ ပုံမှန် လူ့သဘာဝဖြင့် ပိုင်ဆိုင်သင့်သော အရာအချို့အပေါ် မည်သည့်သဘောထား သင် ရှိသင့်သည်ဟူသည်ကို သိနားလည်ခြင်းအားဖြင့် ဖြစ်ပေါ်လာပေသည်။ ဤသည်မှာ မှန်ကန်သော ရှုထောင့်အမြင် ဖြစ်သည်။ သို့ဆိုလျှင် သာမန်၊ ရိုးရိုးနှင့် ပုံမှန် လူတစ်ဦးအနေဖြင့် ဤအမှုအရာအားလုံးအပေါ်၊ လူမှုအဆင့်အတန်း၊ လူမှုအရင်းအနှီး သို့မဟုတ် မိသားစု နောက်ခံ စသည်တို့အပေါ်၌ ထားရှိရန် အသင့်လျော်ဆုံးနှင့် အမှန်ကန်ဆုံးသော ရှုထောင့်အမြင်မှာ အဘယ်နည်း။ သင်တို့ သိကြသလော။ ဘုရားသခင်ကို နှစ်ပေါင်းများစွာ ယုံကြည်ခဲ့သောသူ၊ မိမိကိုယ်ကို သမ္မာတရားများစွာကို နားလည်ပြီးဖြစ်သည်ဟု ယုံကြည်သည့်သူ၊ မိမိသည် ဘုရားသခင်၏ လမ်းခရီးကို လိုက်လျှောက်ပြီး ဘုရားသခင်နှင့် မိမိ၏ တာဝန်အပေါ် သစ္စာစောင့်သိသည်ဟု ယုံကြည်သည့်သူတစ်ဦးရှိသည် ဆိုကြပါစို့၊ သို့တိုင်အောင် ၎င်းသည် လူ့အဖွဲ့အစည်းတွင်လည်းကောင်း၊ လူအများကြားတွင်လည်းကောင်း မိမိ၏ အဆင့်အတန်းနှင့် မိမိ၏ တန်ဖိုးကို အလွန် အရေးကြီးသောအရာအဖြစ် မှတ်ယူလျက် ဤအရာများကို အလွန် တန်ဖိုးထားသည့်အပြင် ၎င်းသည် မိမိ၏ အရင်းအနှီး၊ မိမိ၏ ဂုဏ်ဝင့်ဖွယ်ဖြစ်သော နောက်ခံနှင့် မိမိ၏ တန်ဖိုးတို့ကို မကြာခဏ ကြွားဝါကြသည် ဆိုကြပါစို့၊ ထိုသို့သော ပုဂ္ဂိုလ်သည် သမ္မာတရားကို နားလည်သောသူ အမှန်တကယ် ဟုတ်သလော။ မဟုတ်သည်မှာ သိသာပေသည်။ သို့ဆိုလျှင် သမ္မာတရားကို နားမလည်သော လူတစ်ဦးသည် သမ္မာတရားကို ချစ်မြတ်နိုးသော ပုဂ္ဂိုလ်တစ်ဦး ဟုတ်ပါသလော။ (မဟုတ်ပါ။) မဟုတ်ပေ။ အရင်းအနှီးကို ဆွေးနွေးခြင်းနှင့် လူတစ်ဦး သမ္မာတရားကို နားလည်ပြီး ချစ်မြတ်နိုးခြင်း ရှိမရှိတို့ကြား ဆက်နွှယ်မှုမှာ အဘယ်နည်း။ မိမိ၏ တန်ဖိုးကို မြတ်နိုးတန်ဖိုးထားပြီး မိမိ၏ အရင်းအနှီးကို ကြွားဝါသော လူတစ်ဦးသည် သမ္မာတရားကို ချစ်မြတ်နိုးပြီး နားလည်သောသူ မဟုတ်ဟု ငါ အဘယ်ကြောင့် ဆိုရသနည်း။ သမ္မာတရားကို အမှန်တကယ် ချစ်မြတ်နိုးပြီး နားလည်သော လူတစ်ဦးသည် ဤလူမှုအဆင့်အတန်း၊ ကိုယ်ရေးကိုယ်တာ အရင်းအနှီး၊ တန်ဖိုးတို့နှင့်သက်ဆိုင်သော ကိစ္စရပ်များကို မည်သို့ကိုင်တွယ်သင့်သနည်း။ လူမှုအဆင့်အတန်း၌ မည်သည့်အရာများ ပါဝင်သနည်း။ မိသားစု နောက်ခံ၊ ပညာအရည်အချင်း၊ ဂုဏ်သတင်း၊ လူ့အဖွဲ့အစည်းထဲမှ အောင်မြင်မှုများ၊ ပုဂ္ဂိုလ်ရေး အရည်အချင်းများနှင့် သင်၏ လူမျိုးတို့ ဖြစ်ကြသည်။ သို့ဆိုလျှင် သင်သည် သမ္မာတရားကို နားလည်သောသူတစ်ဦးဖြစ်ကြောင်း အတည်ပြုရန် ဤအရာများကို သင် မည်သို့ကိုင်တွယ်သနည်း။ ဤမေးခွန်းသည် ဖြေဆိုရန် လွယ်ကူသင့်သည် မဟုတ်လော။ သင်တို့သည် ဤရှုထောင့်နှင့်ပတ်သက်၍ သဘောတရားအနေဖြင့် များစွာ နားလည်သင့်သည်။ သင်တို့ စဉ်းစားမိသမျှကို ပြောဆိုကြလော့။ “အို၊ ကျွန်ုပ်သည် ထိုအရာကို စေ့စေ့စပ်စပ် မစဉ်းစားရသေးပါ၊ ထို့ကြောင့် ကျွန်ုပ် မည်သည့်အရာမျှ မပြောဆိုနိုင်ပါ”ဟု မတွေးလေနှင့်။ အကယ်၍ သင်သည် စေ့စေ့စပ်စပ် မစဉ်းစားရသေးပါက ယခု သင် ထင်မြင်သောအရာကိုသာ ပြောဆိုလော့။ သင်သည် တစ်စုံတစ်ရာကို စေ့စေ့စပ်စပ် စဉ်းစားပြီးမှသာ ပြောဆိုနိုင်လျှင် ယင်းကိုဆောင်းပါးများ ရေးသားခြင်းဟု ခေါ်သည်။ ငါတို့သည် ယခုအချိန်၌ စကားစမြည် ပြောဆိုနေခြင်းသာ ဖြစ်သည်၊ ငါသည် သင့်အား ဆောင်းပါးတစ်ပုဒ် ရေးသားရန် တောင်းဆိုနေခြင်း မဟုတ်ပေ။ ဦးစွာ သဘောတရား ရှုထောင့်မှ ပြောဆိုကြလော့။ (ဘုရားသခင်သည် တစ်စုံတစ်ဦး မည်မျှ အဆင့်မြင့် ပညာတတ်သည် သို့မဟုတ် သူတို့၏ လူမှုအဆင့်အတန်းမှာ အဘယ်အရာဖြစ်သည်ကို ကြည့်တော်မမူဘဲ သူတို့သည် သမ္မာတရားကို လိုက်စားခြင်း ရှိမရှိ၊ သူတို့သည် သမ္မာတရားကို လက်တွေ့လုပ်ဆောင်နိုင်ခြင်း ရှိမရှိဟူသည်နှင့် သူတို့သည် ဘုရားသခင်ကို အမှန်တကယ် ကျိုးနွံနာခံပြီး သူတို့၏ တာဝန်ကို စံမီအောင် ထမ်းဆောင်ခြင်း ရှိမရှိဟူသည်တို့ကိုသာ အဓိက ကြည့်ရှုတော်မူသည်ဟု ဘုရားသခင်၏ နှုတ်ကပတ်တော်များမှ ကျွန်ုပ် နားလည်ပါသည်။ အကယ်၍ တစ်စုံတစ်ဦးသည် မြင့်မားသော လူမှုအဆင့်အတန်း ရှိပြီး အဆင့်မြင့် ပညာတတ်ဖြစ်သော်လည်း သူတို့သည် ဝိညာဉ်ရေးရာ နားလည်သဘောပေါက်မှုမရှိပါက သမ္မာတရားကို လိုက်စားခြင်း လမ်းစဉ်ကို သူတို့မလျှောက်လှမ်းသည့်အပြင် ဘုရားသခင်ကို မကြောက်ရွံ့ သို့မဟုတ် မကောင်းမှုကို မရှောင်ကြဉ်ကြပါက သူတို့သည် အဆုံး၌ ဖယ်ရှားရှင်းလင်းခြင်းကို ခံရလိမ့်ဦးမည်ဖြစ်ပြီး ဘုရားသခင်၏ အိမ်တော်၌ ခိုင်မာစွာ ရပ်တည်နိုင်မည် မဟုတ်ပေ။ ထို့ကြောင့် လူတစ်ဦး၏ ပညာရေးဆိုင်ရာ နောက်ခံနှင့် အဆင့်အတန်းတို့သည် အရေးမကြီးပေ။ အရေးကြီးသောအရာမှာ လူတစ်ဦးသည် သမ္မာတရားကို လိုက်စားခြင်း ရှိမရှိ ဖြစ်ပါသည်။) အလွန်ကောင်းပေ၏၊ ဤသည်မှာ အခြေခံအကျဆုံးသော အယူအဆတစ်ခု ဖြစ်သည်။ ထိုအရာသည် အခြေခံအကျဆုံးဖြစ်သည်ဟု ငါ အဘယ်ကြောင့် ဆိုရသနည်း။ အကြောင်းမှာ ဤခေါင်းစဉ်များနှင့် ဤအကြောင်းအရာတို့သည် အခြေခံအားဖြင့် လူတို့ သာမန်အားဖြင့် ပြောဆိုကြသောအရာများ ဖြစ်သောကြောင့် ဖြစ်သည်။ အခြားတစ်ဦးတလေတွင် ကွဲပြားသော နားလည်မှုတစ်ခု ရှိသလော။ ပြောဆိုပြီးဖြစ်သောအရာကို တစ်စုံတစ်ဦးက ဖြည့်စွက်ပြောဆိုလော့။ (အကယ်၍ တစ်စုံတစ်ဦးသည် သမ္မာတရားကို လိုက်စားနိုင်ပါက ကျော်ကြားမှု၊ အကျိုးအမြတ်နှင့် အဆင့်အတန်းတို့ကို လိုက်စားခြင်းသည် အမှန်တကယ် ချည်နှောင်ခြင်းတစ်မျိုး၊ သူတို့ ဝတ်ဆင်သော သံခြေကျင်းတစ်မျိုး ဖြစ်ကြောင်း သူတို့ သိမြင်နိုင်ကြသည်၊ ထို့ပြင် သူတို့သည် ဤအရာများကို လိုက်စားလေ ပို၍ အနှစ်မဲ့သည်ဟု ခံစားရလေ ဖြစ်လိမ့်မည်ဖြစ်ပြီး ကျော်ကြားမှု၊ အကျိုးအမြတ်နှင့် အဆင့်အတန်းတို့က လူတို့အား ဖြစ်စေသော ထိခိုက်မှုနှင့် နာကျင်မှုတို့ကို သူတို့ ပို၍ သဘောပေါက်လာကြလေ ဖြစ်လိမ့်မည်။ သူတို့သည် ဤအရာကို နားလည်ပြီး ဤအရာများကို အရင်းအနှီးအဖြစ် မှတ်ယူသော တစ်စုံတစ်ဦးကို မြင်တွေ့သောအခါ ထိုသို့သော ပုဂ္ဂိုလ်သည် အမှန်တကယ် သနားစရာကောင်းသည်ဟု သူတို့ ထင်မှတ်ကြပေလိမ့်မည်။) (သမ္မာတရားကို အမှန်တကယ် ချစ်မြတ်နိုးပြီး နားလည်သော လူတစ်ဦးသည် ဘုရားသခင်၏ နှုတ်ကပတ်တော်များကို အသုံးပြု၍ လူမှုအဆင့်အတန်းနှင့် ဂုဏ်သတင်းကို တိုင်းတာလိမ့်မည်၊ ဘုရားသခင် အဘယ်အရာကို ပြောဆိုပြီး တောင်းဆိုသည်၊ ဘုရားသခင်သည် လူတို့အား အဘယ်အရာကို လိုက်စားစေလိုသည်၊ ဤအရာများကို လိုက်စားခြင်းအားဖြင့် အဆုံးစွန်၌ အဘယ်အရာကို လူတို့ ရရှိမည်ဆိုသည်နှင့် သူတို့ ရရှိသောအရာသည် လူတို့၌ ဘုရားသခင် မြင်တွေ့ရန် မျှော်လင့်သော ရလဒ်များနှင့် ကိုက်ညီခြင်း ရှိမရှိဆိုသည်တို့ကို သူတို့ ကြည့်ကြလိမ့်မည်။) သင်တို့သည် ဤနေရာ၌ ယင်းကို ထည့်သွင်းစဉ်းစားမိကြသော်လည်း သင်တို့ ပြောဆိုသောအရာသည် သမ္မာတရားနှင့် များစွာ ပတ်သက်သလော။ သင်တို့သည် ဤသည်နှင့်ပတ်သက်၍ အကဲဖြတ်မှုတစ်ခုကို ပြုလုပ်နိုင်စွမ်း ရှိကြသလော။ လူအများစု၌ အချို့သော အာရုံခံ သိမြင်မှု ရှိကြပြီး အကယ်၍ ငါသည် သင်တို့အား တရားဒေသနာတစ်ခုကို ဟောကြားရန် တောင်းဆိုခဲ့ပါက ယင်းသည် တိုက်တွန်းအားပေးခြင်း တရားဒေသနာတစ်ခု ဖြစ်ပေမည်။ ထိုအရာက တိုက်တွန်းအားပေးခြင်း တရားဒေသနာတစ်ခု ဖြစ်မည်ဟု ငါ အဘယ်ကြောင့် ဆိုရသနည်း။ တိုက်တွန်းအားပေးခြင်း တရားဒေသနာတစ်ခု ဆိုသည်မှာ သင်သည် လူတို့အား အကြံဉာဏ်နှင့် အားပေးမှုတို့ကို ပေးသော အမှုအရာများကို ပြောဆိုသည့် တရားဒေသနာတစ်ခု ဖြစ်သည်။ ထိုဒေသနာသည် လက်တွေ့ပြဿနာများကို မဖြေရှင်းနိုင်ပေ။ ဝါကျတိုင်းသည် မှန်ကန်ပြီး ကျိုးကြောင်းဆီလျော်သည်၊ လူ့ဆင်ခြင်တုံတရားနှင့်လည်းကောင်း ကျိုးကြောင်းဆီလျော်သော တောင်းဆိုချက်များနှင့်လည်းကောင်း ကိုက်ညီသည်ဟု ထင်ရကောင်း ထင်ရနိုင်သော်ငြားလည်း ၎င်းသည် သမ္မာတရားနှင့် အနည်းငယ်သာ သက်ဆိုင်ပြီး လူတို့၌ ရှိသော အပေါ်ယံနှင့် အာရုံခံ သိမြင်မှု အနည်းငယ်မျှသာ ဖြစ်သည်။ အကယ်၍ သင်သည် ဤနှုတ်ကပတ်တော်များကို အခြားသူတို့နှင့် မိတ်သဟာယဖွဲ့မည် ဆိုလျှင် သင်သည် လူတို့၏ ပြဿနာများနှင့် အခက်အခဲများကို အရင်းအမြစ်မှ ဖြေရှင်းနိုင်မည်လော။ သင် ဖြေရှင်းနိုင်မည် မဟုတ်။ ထို့ကြောင့် ထိုအရာသည် တိုက်တွန်းအားပေးခြင်း တရားဒေသနာတစ်ခု ဖြစ်မည်ဟု ငါ ဆိုရခြင်း ဖြစ်သည်။ အကယ်၍ သင်သည် လူတို့၏ အခက်အခဲများနှင့် ပြဿနာများကို ၎င်းတို့၏ အရင်းအမြစ်မှ မဖြေရှင်းနိုင်ပါက သင်သည် သမ္မာတရားကို အသုံးပြု၍ လူတို့၏ ပြဿနာများကို ဖြေရှင်းနေခြင်း မဟုတ်ပေ။ သမ္မာတရားကို နားမလည်သောသူတို့သည် အသိပညာ၊ ဂုဏ်သတင်းနှင့် အဆင့်အတန်းတို့ကို အစဉ်သဖြင့် ထောက်ခံအားပေးကြမည်ဖြစ်ပြီး ဤအရာတို့၏ ဘောင်ခတ်ခြင်းများနှင့် ချည်နှောင်ခြင်းတို့မှ လွတ်မြောက်နိုင်စွမ်း ရှိကြမည် မဟုတ်ပေ။

သင်တို့ စဉ်းစားဆင်ခြင်ကြလော့။ သင်တို့သည် လူ၏ တန်ဖိုး၊ လူမှုအဆင့်အတန်းနှင့် မိသားစု နောက်ခံတို့ကို မည်သို့ ကိုင်တွယ်သင့်သနည်း။ သင်တို့၌ ရှိသင့်သော မှန်ကန်သော သဘောထားမှာ အဘယ်နည်း။ ဦးစွာပထမအနေဖြင့် ဘုရားသခင်သည် ဤကိစ္စရပ်ကို မည်သို့ကိုင်တွယ်သည်ကို သူ၏ နှုတ်ကပတ်တော်များမှ သင် ရှုမြင်သင့်သည်၊ ဤနည်းလမ်းဖြင့်သာ သင်သည် သမ္မာတရားကို နားလည်လာမည်ဖြစ်ပြီး သမ္မာတရားကို ဆန့်ကျင်သော မည်သည့်အရာကိုမျှ လုပ်ဆောင်မည် မဟုတ်ပေ။ သို့ဆိုလျှင် ဘုရားသခင်သည် တစ်စုံတစ်ဦး၏ မိသားစု နောက်ခံ၊ လူမှုအဆင့်အတန်း၊ သူတို့ ရရှိခဲ့သော ပညာအရည်အချင်းနှင့် သူတို့ လူ့အဖွဲ့အစည်း၌ ပိုင်ဆိုင်သော ကြွယ်ဝချမ်းသာမှုတို့ကို မည်သို့မှတ်ယူသနည်း။ အကယ်၍ သင်သည် ဘုရားသခင်၏ နှုတ်ကပတ်တော်များကို အခြေခံ၍ အမှုအရာများကို မရှုမြင်ဘဲ ဘုရားသခင်၏ ဘက်၌ မရပ်တည်နိုင်သည့်အပြင် ဘုရားသခင်ထံမှ အမှုအရာများကို လက်မခံနိုင်ပါက သင် အမှုအရာများကို ရှုမြင်ပုံသည် ဘုရားသခင် ရည်ရွယ်သောအရာနှင့် အမှန်ပင် အနည်းငယ် ကွာဝေးနေပေလိမ့်မည်။ အကယ်၍ ယင်းသည် များစွာ မကွာဝေးဘဲ ကွဲလွဲချက် အနည်းငယ်သာ ရှိပါက ယင်းမှာ ပြဿနာ မဟုတ်ပေ၊ အကယ်၍ အမှုအရာများကို သင် ရှုမြင်ပုံသည် ဘုရားသခင် ရည်ရွယ်သောအရာကို လုံးဝ ဆန့်ကျင်ပါက ယင်းသည် သမ္မာတရားနှင့် ဆန့်ကျင်ပေသည်။ ဘုရားသခင်၏ အမြင်တွင် သူသည် လူတို့ကို အဘယ်အရာပေးသည်နှင့် မည်မျှပေးသည်မှာ သူအပေါ်၌သာ မူတည်ပြီး လူတို့ လူ့အဖွဲ့အစည်း၌ ရှိသော အဆင့်အတန်းသည်လည်း ဘုရားသခင်၏ ကြိုတင်စီမံမှု ဖြစ်ပြီး မည်သည့်လူပုဂ္ဂိုလ်တစ်ဦးတစ်ယောက်ကမျှ ဖန်တီးထားခြင်း လုံးဝ မဟုတ်ပေ။ အကယ်၍ ဘုရားသခင်သည် တစ်စုံတစ်ဦးအား နာကျင်မှုနှင့် ဆင်းရဲမွဲတေမှုကို ခံစားစေပါက ယင်းမှာ သူတို့သည် ကယ်တင်ခြင်း ခံရရန် မျှော်လင့်ချက် မရှိဟု ဆိုလိုသလော။ အကယ်၍ သူတို့သည် တန်ဖိုးနည်းပြီး လူမှုအဆင့်အတန်း နိမ့်ကျပါက ဘုရားသခင်သည် သူတို့ကို မကယ်တင်ဘဲ နေမည်လော။ အကယ်၍ သူတို့သည် လူ့အဖွဲ့အစည်း၌ အဆင့်အတန်း နိမ့်ကျပါက သူတို့သည် ဘုရားသခင်၏ အမြင်၌ အဆင့်အတန်း နိမ့်ကျသလော။ ဖြစ်ချင်မှ ဖြစ်ပေမည်။ ဤသည်မှာ အဘယ်အရာအပေါ် မူတည်သနည်း။ ယင်းမှာ ဤပုဂ္ဂိုလ် လျှောက်လှမ်းသော လမ်းခရီးအပေါ်၊ သူတို့၏ လိုက်စားမှုအပေါ်၊ သမ္မာတရားနှင့် ဘုရားသခင်အပေါ် သူတို့၏ သဘောထားအပေါ်၌ မူတည်သည်။ အကယ်၍ တစ်စုံတစ်ဦး၏ လူမှုအဆင့်အတန်းသည် အလွန် နိမ့်ကျပြီး သူတို့၏ မိသားစုသည် အလွန် ဆင်းရဲကာ သူတို့၌ ပညာအရည်အချင်း အဆင့်အတန်း နိမ့်ပါးသည့်တိုင် သူတို့သည် လက်တွေ့ကျသော နည်းလမ်းဖြင့် ဘုရားသခင်ကို ယုံကြည်ကြပြီး သမ္မာတရားနှင့် အပြုသဘောဆောင်သော အမှုအရာများကို ချစ်မြတ်နိုးကြပါက ဘုရားသခင်၏ အမြင်၌ သူတို့၏ တန်ဖိုးသည် မြင့်သလော သို့မဟုတ် နိမ့်သလော၊ ယင်းသည် မြင့်မြတ်သလော သို့မဟုတ် နိမ့်ကျသလော။ သူတို့သည် တန်ဖိုးရှိကြသည်။ ဤရှုထောင့်မှ ကြည့်လျှင် တစ်စုံတစ်ဦး၏ တန်ဖိုးသည် မြင့်သည်ဖြစ်စေ၊ နိမ့်သည်ဖြစ်စေ အဘယ်အရာအပေါ် မူတည်သနည်း။ ယင်းမှာ ဘုရားသခင်သည် သင့်ကို ရှုမြင်သည့်ပုံစံအပေါ်၌ မူတည်သည်။ အကယ်၍ ဘုရားသခင်သည် သင့်ကို သမ္မာတရားကို လိုက်စားသောသူတစ်ဦးအဖြစ် ရှုမြင်ပါက သင်သည် တန်ဖိုး ရှိပြီး အဖိုးတန်သည်။ သင်သည် တန်ဖိုးရှိသော တန်ဆာတစ်ခု ဖြစ်သည်။ အကယ်၍ ဘုရားသခင်သည် သင် သမ္မာတရားကို မလိုက်စားသည်ကိုလည်းကောင်း၊ သင်သည် သူ့အတွက် စိတ်ရင်းမှန်ဖြင့် အသုံးမခံသည်ကိုလည်းကောင်း ရှုမြင်ပါက သင်သည် တန်ဖိုးမရှိသူဖြစ်ပြီး အဖိုးမတန်ပေ။ သင်သည် နိမ့်ကျသော တန်ဆာတစ်ရပ် ဖြစ်သည်။ သင်သည် မည်မျှပင်အဆင့်မြင့်ပညာတတ်ဖြစ်စေကာမူ သို့မဟုတ် သင်၏ လူ့အဖွဲ့အစည်းအတွင်းမှ အဆင့်အတန်းသည် မည်မျှပင် မြင့်မားစေကာမူ အကယ်၍ သင်သည် သမ္မာတရားကို မလိုက်စားပါက သို့မဟုတ် နားမလည်ပါက သင်၏ တန်ဖိုးသည် မည်သည့်အခါမျှ မြင့်မားနိုင်မည် မဟုတ်ပေ။ လူများစွာတို့သည် သင့်ကို ထောက်ခံကြလျှင်ပင်၊ သင့်ကို ချီးမြှောက်ကြလျှင်ပင်၊ သင့်ကို ကြည်ညိုကြလျှင်ပင် သင်သည် စက်ဆုပ်ရွံရှာဖွယ် သတ္တဝါတစ်ဦးသာ ဖြစ်နေဆဲ ဖြစ်သည်။ သို့ဆိုလျှင် ဘုရားသခင်သည် အဘယ်ကြောင့် လူတို့ကို ဤနည်းလမ်းအတိုင်း ရှုမြင်သနည်း။ ထိုသို့သော “မြင့်မြတ်သည့်” ပုဂ္ဂိုလ်၊ လူ့အဖွဲ့အစည်း၌ ထိုမျှ မြင့်မားသော အဆင့်အတန်း ရှိသောသူ၊ များပြားသော လူတို့ ချီးမွမ်းခြင်းနှင့် အံ့ဩခြင်းတို့ကို ခံရသောသူ၊ အလွန်မြင့်မားသော ဂုဏ်သိက္ခာပင် ရှိသောသူသည် ဘုရားသခင်၏ အမြင်၌ နိမ့်ကျသည်ဟု အဘယ်ကြောင့် ရှုမြင်ခြင်း ခံရသနည်း။ အဘယ်ကြောင့် ဘုရားသခင် လူတို့ကို ရှုမြင်ပုံသည် လူတို့ အခြားသူများကို ထားရှိသော အမြင်များနှင့် လုံးဝ ဆန့်ကျင်ဘက် ဖြစ်ရသနည်း။ ဘုရားသခင်သည် လူတို့အား ရည်ရွယ်ချက်ရှိရှိ ဆန့်ကျင်ဘက်ပြုနေခြင်းလော။ လုံးဝ မဟုတ်ပေ။ အကြောင်းမှာ ဘုရားသခင်သည် သမ္မာတရား ဖြစ်သည်၊ ဘုရားသခင်သည် ဖြောင့်မတ်ခြင်း ဖြစ်သည်၊ လူသားမှာမူ ဖောက်ပြန်ပျက်စီးပြီး မည်သည့်သမ္မာတရား သို့မဟုတ် မည်သည့်ဖြောင့်မတ်ခြင်းမျှ မရှိပေ။ ပြီးလျှင် ဘုရားသခင်သည် လူသားကို သူ၏ ကိုယ်ပိုင် စံနှုန်းဖြင့် တိုင်းတာပြီး သူ၏ တိုင်းတာခြင်း စံနှုန်းမှာ သမ္မာတရား ဖြစ်သည်။ ထိုသို့ ပြောဆိုလျှင် အနည်းငယ် သဘောတရားသက်သက် ဖြစ်သည်ဟု ထင်ရနိုင်သည်။ ထို့ကြောင့် အခြားနည်းလမ်းတစ်ခုဖြင့် ဆိုရလျှင် ဘုရားသခင်၏ တိုင်းတာခြင်း စံနှုန်းသည် ဘုရားသခင်အပေါ် လူတစ်ဦး၏ သဘောထား၊ သမ္မာတရားအပေါ် သူတို့၏ သဘောထားနှင့် အပြုသဘောဆောင်သော အမှုအရာများအပေါ် သူတို့၏ သဘောထားတို့ကို အခြေခံသည်။ ဤသည်မှာ သဘောတရားသက်သက် မဟုတ်တော့ပေ။ တစ်စုံတစ်ဦးသည် လူ့အဖွဲ့အစည်း၌ အဆင့်အတန်းမြင့်သည်၊ ပညာအရည်အချင်း အဆင့်အတန်း မြင့်သည်၊ အလွန် ပညာတတ်ပြီး ယဉ်ကျေးသည်၊ ထို့ပြင် သူတို့၌ အထူးသဖြင့် ဘုန်းကျက်သရေရှိပြီး ခမ်းနားသော မျိုးရိုးသမိုင်း ရှိသည် ဆိုကြပါစို့၊ သို့တိုင်အောင် ပြဿနာတစ်ရပ် ရှိသည်။ သူတို့သည် အပြုသဘောဆောင်သော အမှုအရာများကို မချစ်မြတ်နိုးကြပေ၊ သူတို့သည် ဘုရားသခင်အပေါ် စက်ဆုပ်ရွံရှာခြင်း၊ မုန်းတီးခြင်းတို့ကို လှိုက်လှိုက်လှဲလှဲ ခံစားကြရသည်၊ ဘုရားသခင်နှင့် သက်ဆိုင်သော၊ ဘုရားသခင် သို့မဟုတ် ဘုရားသခင်၏ အမှုတော် အကြောင်းအရာများနှင့် သက်ဆိုင်သော မည်သည့်အရာမဆို ပေါ်ပေါက်လာသည့်အခါ သူတို့သည် မုန်းတီးမှုဖြင့် အံခဲကြသည်၊ သူတို့၏ မျက်လုံးများသည် ဝင်းလက်တောက်ပြောင်လာသည်၊ ပြီးလျှင် သူတို့သည် အခြားသူတို့ကို ထိုးနှက်ရန်ပင် လိုလားကြသည်။ တစ်စုံတစ်ဦးက ဘုရားသခင် သို့မဟုတ် သမ္မာတရားနှင့် သက်ဆိုင်သော အကြောင်းအရာတစ်ခုကို ဖော်ပြသည့်အခါတိုင်း သူတို့သည် စက်ဆုပ်ရွံရှာမှုနှင့် ရန်လိုမှုတို့ကို ခံစားကြရပြီး သူတို့၏ တိရစ္ဆာန် သဘာဝသည် ပေါက်ကွဲထွက်လာသည်။ ထိုသို့သော ပုဂ္ဂိုလ်သည် တန်ဖိုးရှိသလော သို့မဟုတ် တန်ဖိုးမရှိသလော။ သူတို့၏ ပညာရေးဆိုင်ရာ နောက်ခံနှင့် သူတို့၏ လူမှုအဆင့်အတန်းနှင့် လူမှုဂုဏ်သိက္ခာ ဆိုသောအရာတို့သည် ဘုရားသခင်၏ အမြင်၌ မည်မျှ တန်ဖိုးရှိသနည်း။ လုံးဝ တန်ဖိုးမရှိပေ။ ဘုရားသခင်သည် ထိုသို့သော လူတို့ကို မည်သို့ ရှုမြင်​ေသနည်း။ ဘုရားသခင်သည် ထိုသို့သော လူတို့ကို မည်သို့ သတ်မှတ်​ေသနည်း။ ထိုသို့သော လူတို့သည် နတ်ဆိုးများနှင့် စာတန်များ ဖြစ်ကြပြီး သူတို့သည် အသုံးမကျဆုံးသော စက်ဆုပ်ရွံရှာဖွယ် အကောင်ယုတ်များ ဖြစ်ကြသည်။ ယခု ကြည့်လျှင် တစ်စုံတစ်ဦး၏ တန်ဖိုးကို မြင့်မြတ်သည် သို့မဟုတ် နိမ့်ကျသည်ဟု အဓိပ္ပာယ်ဖွင့်ဆိုရန် အခြေခံအကြောင်းရင်းမှာ အဘယ်နည်း။ (ယင်းမှာ ဘုရားသခင်၊ သမ္မာတရားနှင့် အပြုသဘောဆောင်သော အမှုအရာများအပေါ် သူတို့၏ သဘောထား ဖြစ်ပါသည်။) မှန်ပေသည်။ ဦးစွာပထမအနေဖြင့် ဘုရားသခင်၏ သဘောထားမှာ အဘယ်အရာဖြစ်သည်ကို နားလည်ရမည်။ ဘုရားသခင်၏ သဘောထားကို နားလည်ခြင်းနှင့် ဘုရားသခင် လူတို့ကို အမျိုးအစားခွဲသည့် စည်းမျဉ်းများနှင့် စံနှုန်းများကို နားလည်ခြင်း၊ ထို့နောက် ဘုရားသခင် လူတို့ကို ဆက်ဆံသည့် စည်းမျဉ်းများနှင့် စံနှုန်းများအပေါ် အခြေခံ၍ လူတို့ကို တိုင်းတာခြင်း ဖြစ်သည်။ ဤသည်သာလျှင် အတိကျဆုံး၊ အသင့်လျော်ဆုံးနှင့် တရားအမျှတဆုံး ဖြစ်သည်။ ကျွန်ုပ်တို့၌ ယခု လူတို့ကို တိုင်းတာရန် အခြေခံအကြောင်းရင်း ရှိပြီ၊ သို့ဆိုလျှင် ကျွန်ုပ်တို့သည် ယင်းကို တိတိကျကျ မည်သို့ လက်တွေ့လုပ်ဆောင်သင့်သနည်း။ ဥပမာအားဖြင့် တစ်စုံတစ်ဦးသည် အလွန် အဆင့်မြင့် ပညာတတ်ဖြစ်ပြီး သူတို့ သွားလေရာရာ၌ လူကြိုက်များကာ လူတိုင်းက သူတို့ကို အကောင်းမြင်ကြပြီး သူတို့သည် အခြားသူတို့ထံတွင် အလွန်ကြီးမားသော အလားအလာများ ရှိသည့်ပုံပေါက်သည်။ ထိုသူသည် ထိုအခါ ဘုရားသခင်၏ အမြင်၌ မြင့်မြတ်သည်ဟု မုချ ရှုမြင်ခြင်း ခံရမည်လော။ (ဖြစ်ချင်မှ ဖြစ်ပေမည်။) သို့ဆိုလျှင် ကျွန်ုပ်တို့သည် ဤပုဂ္ဂိုလ်၏ အတိုင်းအတာကို မည်သို့ ယူသင့်သနည်း။ ပုဂ္ဂိုလ်တစ်ဦး၏ မြင့်မြတ်ခြင်းနှင့် နိမ့်ကျခြင်းသည် သူတို့၏ လူမျိုးအပေါ်၌ အခြေခံဖို့ရန် မဆိုထားနှင့်၊ သူတို့၏ လူ့အဖွဲ့အစည်းအတွင်းမှ အဆင့်အတန်းအပေါ် အခြေမခံသကဲ့သို့ သူတို့၏ ပညာရေးဆိုင်ရာ နောက်ခံအပေါ်၌လည်း အခြေမခံပေ။ ထို့ပြင် ယင်းသည် သူတို့၏ နိုင်ငံသားဖြစ်မှုအပေါ်၌လည်း အခြေမခံသည်မှာ သေချာသည်၊ သို့ဆိုလျှင် ယင်းသည် အဘယ်အရာအပေါ်၌ အခြေခံရမည်နည်း။ (ယင်းသည် ဘုရားနှုတ်ကပတ်တော်များအပေါ်တွင်လည်းကောင်း၊ သမ္မာတရားနှင့် ဘုရားသခင်အပေါ် ထိုလူ၏ သဘောထားအပေါ်တွင်လည်းကောင်း အခြေခံရပေမည်။) မှန်ပေသည်။ ဥပမာအားဖြင့် သင်တို့သည် တရုတ်ပြည်မကြီးမှ အမေရိကန်ပြည်ထောင်စုသို့ လာခဲ့ကြပြီး သင်တို့ တစ်နေ့တွင် အမေရိကန် နိုင်ငံသားတစ်ဦး ဖြစ်လာလျှင်ပင် သင်တို့၏ တန်ဖိုးနှင့် အဆင့်အတန်းသည် ပြောင်းလဲသွားမည်လော။ (မဟုတ်ပါ)။ မဟုတ်ပါ၊ ပြောင်းလဲသွားမည် မဟုတ်ပေ၊ သင်သည် သင်သာ ဖြစ်နေဆဲ ဖြစ်ပေမည်။ အကယ်၍ သင်သည် ဘုရားသခင်ကို ယုံကြည်သော်လည်း သမ္မာတရားကို မရရှိနိုင်ပါက သင်သည် ပျက်စီးမည့် အမျိုးအစား ဖြစ်နေဆဲ ဖြစ်သည်။ အချို့သော အပေါ်ယံဆန်သော လူတို့သည် ဘုရားသခင်ကို အမှန်တကယ် မယုံကြည် သို့မဟုတ် သမ္မာတရားကို မလိုက်စားကြပေ၊ သူတို့သည် လောကီကို လိုက်လျှောက်ကြပြီး အမေရိကန် နိုင်ငံသားများ ဖြစ်လာပြီးသည့်နောက်တွင် သူတို့သည် “သင်တို့ တရုတ်လူမျိုးများ” နှင့် “သင်တို့ တရုတ်ပြည်မကြီးမှ လူများ” ဟု ဆိုကြသည်။ ငါ့ကို ပြောလော့၊ ထိုသို့သော လူများသည် မြင့်မြတ်သလော သို့မဟုတ် နိမ့်ကျသလော။ (နိမ့်ကျပါသည်)။ သူတို့သည် အလွန် နိမ့်ကျသည်တကား။ သူတို့သည် အမေရိကန် နိုင်ငံသားတစ်ဦး ဖြစ်လာခြင်းအားဖြင့် သူတို့သည် မြင့်မြတ်လာဘိသကဲ့သို့ ပြုမူကြသည်။ သူတို့သည် အလွန် အပေါ်ယံ မဆန်ကြသလော။ သူတို့သည် အလွန် အပေါ်ယံဆန်ကြသည်။ အကယ်၍ လူတစ်ဦးသည် ကျော်ကြားမှုနှင့် အကျိုးအမြတ်၊ လူမှုအဆင့်အတန်း၊ ကြွယ်ဝချမ်းသာမှုနှင့် ပညာရေးဆိုင်ရာ အောင်မြင်မှုများကို သာမန်စိတ်နှလုံးဖြင့် ကိုင်တွယ် နိုင်ပါက ဤသာမန်စိတ်နှလုံး ဆိုသည်မှာ သင်သည် ဤအမှုအရာများကို ကြုံတွေ့ပြီးဖြစ်၍ ခံစားမှုကင်းမဲ့သွားပြီဟု ဆိုလိုခြင်း မဟုတ်ဘဲ သင်၌ တိုင်းတာခြင်း စံနှုန်းတစ်ခု ရှိပြီး သင်သည် ဤအမှုအရာများကို သင်၏ အသက်တာ၌ အရေးအကြီးဆုံးသော အမှုအရာများအဖြစ် မမှတ်ယူတော့ဘဲ သင် ဤအမှုအရာများကို တိုင်းတာပြီး ရှုမြင်သည့် စံနှုန်းများနှင့် စည်းမျဉ်းများအပြင် သင်၏ စံသတ်မှတ်ချက်များသည် ပြောင်းလဲမှုတစ်ခုကို ကြုံတွေ့ခဲ့ပြီးဖြစ်၍ သင်သည် ဤအမှုအရာများကို မှန်ကန်စွာ ကိုင်တွယ်နိုင်ပြီး ယင်းတို့ကို သာမန်စိတ်နှလုံးဖြင့် ရှုမြင်နိုင်သည်ဟု ဆိုလိုခြင်း ဖြစ်သည်မှာ ပြောစရာမလိုပေ။ ဤသည်မှာ အဘယ်အရာကို သက်သေပြသနည်း။ ယင်းသည် သင့်အနေဖြင့် လူမှုအဆင့်အတန်း ဆိုသောအရာ၊ လူ၏ တန်ဖိုး စသည်တို့ကဲ့သို့သော အပြင်ပန်း အရာများမှ လွတ်မြောက်ပြီးဖြစ်ကြောင်း သက်သေပြသည်။ သင်တို့သည် ယခုအချိန်တွင် ဤသည်ကို ဖြစ်မြောက်အောင်မြင်နိုင်ခြင်း မရှိသေးသည်မှာ ဖြစ်ကောင်းဖြစ်နိုင်သည်၊ သို့သော် သင်တို့သည် သမ္မာတရားကို အမှန်တကယ် နားလည်နိုင်သောအခါ ဤအမှုအရာများကို ထွင်းဖောက်မြင်နိုင်ကြပေလိမ့်မည်။ သင့်အား ဥပမာတစ်ခု ငါ ပေးမည်။ လူတစ်ဦးသည် ကြွယ်ဝသော ညီအစ်ကိုမောင်နှမများနှင့် ကြုံတွေ့ပြီး သူတို့ ဝတ်ဆင်ထားသမျှသည် နာမည်ကြီးတံဆိပ်များ ဖြစ်သည်ကိုလည်းကောင်း၊ သူတို့သည် ချမ်းသာကြွယ်ဝပုံ ပေါက်သည်ကိုလည်းကောင်း မြင်တွေ့သောအခါ သူသည် ထိုလူတို့နှင့် မည်သို့ စကားပြောဆိုရမည် သို့မဟုတ် မည်သို့ ပေါင်းသင်းဆက်ဆံရမည်ကို မသိရှိတော့သောကြောင့် သူသည် မိမိတို့ကိုယ်ကို နှိမ့်ချကာ ကြွယ်ဝသော ညီအစ်ကိုမောင်နှမများကို မျက်နှာလိုမျက်နှာရ လုပ်ပြီး မြှောက်ပင့်ပြောဆိုသည့်အပြင် မနှစ်မြို့ဖွယ် နည်းလမ်းဖြင့် ပြုမူသည်။ ဤသည်မှာ သူသည် မိမိကိုယ်ကို တန်ဖိုးဖျက်ခြင်း မဟုတ်လော။ ဤနေရာ၌ သူ့ကို စိုးမိုးခြယ်လှယ်နေသော အရာတစ်ခု ရှိသည်။ အချို့သောသူတို့သည် ကြွယ်ဝသော အမျိုးသမီးတစ်ဦးနှင့် တွေ့ဆုံသောအခါ “အစ်မကြီး” ဟု ခေါ်ကြပြီး ကြွယ်ဝသော အမျိုးသားတစ်ဦးနှင့် တွေ့ဆုံသောအခါ “အစ်ကိုကြီး” ဟု ခေါ်ကြသည်။ သူတို့သည် ဤလူတို့ကို မျက်နှာလိုမျက်နှာရ လုပ်ပြီး အတည်ပြုထောက်ခံချက်ရရန် မိမိတို့ကိုယ်ကို ဂုဏ်တင်ဖို့ အစဉ်သဖြင့် လိုလားကြသည်။ သူတို့သည် ဆင်းရဲပြီး ‌ပြောပလောက်စရာမရှိသော၊ ပညာအရည်အချင်း အဆင့်အတန်း နိမ့်ပါးစွာဖြင့် ကျေးလက်မှ လာသော တစ်စုံတစ်ဦးကို မြင်တွေ့သောအခါ ထိုသူတို့ကို အထင်သေးပြီး ဂရုပြုမှုတစ်ခုခု ပေးရန် ငြင်းဆိုကြကာ သူတို့၏ သဘောထားသည် ပြောင်းလဲသွားသည်။ ထိုသို့သော သာမန် ကျင့်ကြံပြုမူမှုများသည် အသင်းတော်၌ ဖြစ်ပေါ်သလော။ ဖြစ်ပေါ်သည်၊ သင်တို့သည် ယင်းကို မငြင်းဆိုနိုင်ကြပေ၊ အကြောင်းမှာ သင်တို့အလယ်၌ အချို့သောသူတို့သည် ထိုသို့သော အပြုအမူမျိုးကို ဖော်ထုတ်ပြသခဲ့ပြီးဖြစ်သောကြောင့် ဖြစ်သည်။ အချို့က “အစ်ကိုကြီး” ဟု ခေါ်ကြသည်၊ အချို့က “အစ်မကြီး” ဟု ခေါ်ကြသည်၊ အချို့က “အဒေါ်” ဟု ခေါ်ကြသည်။ ဤလူမှုရေး ကျင့်ကြံပြုမူမှုများသည် ဆိုးရွားသည်။ ဤလူတို့၏ အပြုအမူအားဖြင့် အကဲဖြတ်လျှင် သူတို့သည် သမ္မာတရားကို လိုက်စားသောသူများ မဟုတ်ကြဘဲ သူတို့၌ အနည်းငယ်မျှသော သမ္မာတရား လက်တွေ့ကျမှုပင် မရှိကြပေ။ ဤသို့သော လူအမျိုးအစားသည် သင်တို့အလယ်၌ အများစု ဖြစ်ကြပြီး အကယ်၍ မပြောင်းလဲပါက သူတို့အားလုံးသည် အဆုံး၌ ဖယ်ရှားရှင်းလင်းခြင်း ခံရကြလိမ့်မည်။ ဤမှားယွင်းသော အမြင်များသည် လူတို့ သမ္မာတရား လမ်းခရီးကို လက်ခံခြင်းအပေါ် သက်ရောက်မှု မရှိသော်ငြားလည်း ယင်းတို့သည် လူတို့၏ အသက်ဝင်ရောက်မှုနှင့် သူတို့၏ တာဝန်များ ထမ်းဆောင်ခြင်းအပေါ် သက်ရောက်မှု ရှိနိုင်သည်၊ အကယ်၍ သူတို့သည် သမ္မာတရားကို လက်ခံသော လူတစ်ဦး မဟုတ်ပါက အသင်းတော်၌ အနှောင့်အယှက်များကို ဖြစ်စေနိုင်ဖွယ် ရှိသည်။ အကယ်၍ သင်သည် ဘုရားသခင်၏ ရည်ရွယ်ချက်ကို နားလည်နိုင်ပါက ဤအမှုအရာများကို အကဲဖြတ်သည့် စည်းမျဉ်းများနှင့် စံနှုန်းများကို သဘောပေါက်နိုင်ပေမည်။ အခြား ရှုထောင့်တစ်ရပ်လည်း ရှိသေးသည်၊ ယင်းမှာ လူတစ်ဦးသည် မည်သို့သော လူမှုအဆင့်အတန်း သို့မဟုတ် ပညာရေးဆိုင်ရာ နောက်ခံ ရှိသည်ဖြစ်စေ၊ သို့မဟုတ် သူတို့သည် မည်သို့သော မိသားစု နောက်ခံမှ လာသည်ဖြစ်စေ သင် အသိအမှတ်ပြုရမည့် အချက်တစ်ချက် ရှိသည်။ သင်၏ ပညာရေးဆိုင်ရာ အောင်မြင်မှုများနှင့် မိသားစု နောက်ခံသည် သင်၏ စရိုက်ကို မပြောင်းလဲနိုင်သကဲ့သို့ ယင်းတို့သည် သင်၏ စိတ်သဘောထားကိုလည်း လွှမ်းမိုးမှု မရှိနိုင်ပေ။ ထိုသို့ မဟုတ်လော။ (ဟုတ်ပါသည်)။ ငါ အဘယ်ကြောင့် ဤသို့ ဆိုရသနည်း။ လူတစ်ဦးသည် မည်သို့သော မိသားစုမျိုး၌ မွေးဖွားသည်ဖြစ်စေ သို့မဟုတ် သူတို့ ဆက်လက်ရရှိသော ပညာရေးအမျိုးအစားသည် မည်သို့ဖြစ်သည်ဖြစ်စေ၊ သူတို့သည် အလွန်ပင် ပညာတတ်ဖြစ်လာသည်ဖြစ်စေ မတတ်လာသည်ဖြစ်စေ မွေးဖွားလာသော လူမှုနောက်ခံအမျိုးအစားသည် မည်သို့ဖြစ်စေ၊ သူတို့၏ လူမှုအဆင့်အတန်းသည် မြင့်သည်ဖြစ်စေ၊ နိမ့်သည်ဖြစ်စေ သူတို့၏ ဖောက်ပြန်ပျက်စီးသော စိတ်သဘောထားများသည် အခြားမည်သူ့ထံ၌မဆို ရှိသည့်အတိုင်းပင် ဖြစ်သည်။ လူတိုင်းသည် အတူတူပင် ဖြစ်သည်။ ဤသည်မှာ ရှောင်လွှဲ၍မရပေ။ သင်၏ လူမှုအဆင့်အတန်းနှင့် တန်ဖိုးသည် သင်သည် စာတန်၏ ဖျက်ဆီးခြင်းကို ခံခဲ့ရသော လူသားမျိုးနွယ်ဝင်တစ်ဦး ဖြစ်သည်ဟူသော အချက်ကို မပြောင်းလဲနိုင်သကဲ့သို့ ယင်းတို့က သင်သည် ဘုရားသခင်ကို ဆန့်ကျင်သော ဖောက်ပြန်ပျက်စီးသည့် စိတ်သဘောထားများ ရှိသော ဖောက်ပြန်ပျက်စီးသည့် လူသားတစ်ဦး ဖြစ်သည်ဟူသောအချက်ကိုလည်း မပြောင်းလဲနိုင်ပေ။ ဤအရာအားဖြင့် ငါသည် မည်သည့်အရာကို ဆိုလိုသနည်း။ ငါ ဆိုလိုသည်မှာ သင်သည် မည်မျှပင် ကြွယ်ဝသော မိသားစု၌ မွေးဖွားသည်ဖြစ်စေ သို့မဟုတ် သင်သည် မည်မျှပင် ပညာတတ်ဖြစ်စေကာမူ၊ သင့်၌ ဖောက်ပြန်ပျက်စီးသော စိတ်သဘောထားများ ရှိနေဆဲ ဖြစ်သည်၊ သင်သည် မြင့်မြတ်သည်ဖြစ်စေ၊ နိမ့်ကျသည်ဖြစ်စေ၊ ချမ်းသာသည်ဖြစ်စေ၊ ဆင်းရဲသည်ဖြစ်စေ၊ အဆင့်အတန်း မြင့်သည်ဖြစ်စေ၊ နိမ့်သည်ဖြစ်စေ သင်သည် ဖောက်ပြန်ပျက်စီးသည့် လူသားတစ်ဦး ဖြစ်နေဆဲ ဖြစ်သည်။ ထို့ကြောင့် သင်သည် ဘုရားသခင်၏ အမှုတော်ကို လက်ခံပြီးသည့်နောက် သင်တို့အားလုံးသည် တန်းတူညီမျှကြပြီး ဘုရားသခင်သည် အားလုံးအပေါ် တရားမျှတပြီး ဖြောင့်မတ်သည်။ ဤသည်မှာ လူတို့ ရှိသင့်သော နားလည်မှုတစ်ခု မဟုတ်လော။ (ဟုတ်ပါသည်)။ မည်သည့်ပုဂ္ဂိုလ်သည် လူ့အဖွဲ့အစည်း၌ မြင့်မားသော အဆင့်အတန်း ရှိ၍ လူသားမျိုးနွယ်အားလုံးထဲမှ အမြင့်မြတ်ဆုံးသော လူမျိုး၌ မွေးဖွားသောကြောင့် စာတန်၏ ဖောက်ပြန်ဖျက်ဆီးခြင်းကို မခံရဘဲ ဖောက်ပြန်ပျက်စီးသော စိတ်သဘောထားများ ကင်းမဲ့သနည်း။ ဤသည်မှာ ယုတ္တိတန်သော ပြောဆိုချက်တစ်ခုလော။ ဤအချက်သည် လူသားမျိုးနွယ်၏ သမိုင်းတစ်လျှောက်၌ ဖြစ်ပေါ်ခဲ့ဖူးသလော။ (မရှိပါ)။ မဟုတ်ပါ၊ ဖြစ်ပေါ်ခဲ့ခြင်း မရှိပါ။ အမှန်တကယ်တွင် ယောဘ၊ အာဗြဟံ၊ ထိုပရောဖက်များနှင့် ရှေးခေတ် သူတော်စင်များအပြင် ဣသရေလလူမျိုးများ အပါအဝင် မည်သည့်လူသားမျှ ဤငြင်းမရသော အမှန်တရားဖြင့် အသက်ရှင်ခြင်းကို မရှောင်လွှဲနိုင်ခဲ့ပေ။ ဤလောက၌ အသက်ရှင်ရာတွင် လူသားမျိုးနွယ်အားလုံးသည် စာတန်၏ ဖောက်ပြန်ဖျက်ဆီးခြင်းကို ခံခဲ့ရပြီးဖြစ်သည်။ စာတန်၏ လူသားကို ဖျက်ဆီးခြင်း၌ သင်သည် ပညာအလွန်တတ်သည်ဖြစ်စေ၊ မတတ်သည်ဖြစ်စေ၊ သင်၏ မိသားစု သမိုင်းမှာ မည်သည့်အရာဖြစ်သည်၊ သင်၏ မျိုးရိုးနာမည်မှာ အဘယ်အရာဖြစ်သည်၊ သို့မဟုတ် သင်၏ ဆွေစဉ်မျိုးဆက်မှာ မည်မျှ ကြီးမားသည်တို့ကို ၎င်းက ဂရုမစိုက်ပေ။ နောက်ဆုံးရလဒ်မှာ သင်သည် လူသားမျိုးနွယ်အကြား၌ အသက်ရှင်ပါက စာတန်၏ ဖျက်ဆီးခြင်းကို ခံခဲ့ရပြီးဖြစ်သည်။ ထို့ကြောင့် သင့်၌ စာတန်၏ ဖောက်ပြန်ပျက်စီးသော စိတ်သဘောထားများ ရှိသည်ဟူသောအချက်နှင့် သင်သည် သင်၏ စာတန်ဆန်သော ဖောက်ပြန်ပျက်စီးသော စိတ်သဘောထားများဖြင့် အသက်ရှင်သည်ဟူသောအချက်ကို သင်၏ တန်ဖိုးနှင့် ပညာရေးဆိုင်ရာ နောက်ခံတို့ဖြင့် မပြောင်းလဲနိုင်ပေ။ ဤသည်မှာ လူတို့ ရှိသင့်သော နားလည်မှုတစ်ခု မဟုတ်လော။ (ဟုတ်ပါသည်။) သင်တို့သည် ဤအမှုအရာများကို နားလည်ပြီးသည်နှင့်တစ်ပြိုင်နက် အနာဂတ်၌ လူတစ်ဦးသည် မိမိ၏ ဆုကျေးဇူးများနှင့် အရင်းအနှီးတို့ကို ကြွားဝါသောအခါ သို့မဟုတ် သင်တို့အလယ်၌ “သာလွန်သော” လူတစ်ဦးကို သင်တို့ ထပ်မံ တွေ့ရှိသောအခါ သင်တို့သည် ထိုသူကို မည်သို့ ဆက်ဆံကြမည်နည်း။ (ကျွန်ုပ်သည် ထိုသူကို ဘုရားသခင်၏ နှုတ်ကပတ်တော်များအတိုင်း ဆက်ဆံပါမည်။) မှန်သည်။ သင်သည် သူတို့ကို ဘုရားသခင်၏ နှုတ်ကပတ်တော်များအတိုင်း မည်သို့ဆက်ဆံမည်နည်း။ အကယ်၍ သင်သည် အားလပ်နေပြီး သူတို့ကို နှိမ့်ချကာ သရော်လျက် “သင်သည် မည်မျှ ပညာတတ်သည်ကို ကြည့်ပါ၊ သင်သည် အဘယ်အရာအတွက် ကြွားဝါနေသနည်း။ သင်သည် သင်၏ အရင်းအနှီးအကြောင်း ထပ်မံ ပြောဆိုနေသည်၊ သို့သော် သင်သည် သင်၏ တာဝန်ကို ကောင်းစွာ ထမ်းဆောင်နိုင်သလော။ သင်သည် မည်မျှပင် ပညာတတ်စေကာမူ သင်သည် စာတန်၏ ဖောက်ပြန်ဖျက်ဆီးခြင်းကို ခံခဲ့ရသည် မဟုတ်လော” ဟု ဆိုပါက ယင်းသည် ထိုသူကို ဆက်ဆံရန် နည်းလမ်းကောင်းတစ်ခု ဟုတ်သလော။ ဤသည်မှာ စည်းမျဉ်းများနှင့် မကိုက်ညီပေ၊ ယင်းသည် ပုံမှန် လူ့သဘာဝ ရှိသော လူတစ်ဦး လုပ်ဆောင်သင့်သည့်အရာ မဟုတ်ပေ။ သို့ဆိုလျှင် သင်သည် သူတို့ကို စည်းမျဉ်းများနှင့် ကိုက်ညီသော နည်းလမ်းဖြင့် မည်သို့ ဆက်ဆံသင့်သနည်း။ သင်သည် သူတို့ကို အထင်မကြီးသင့်သကဲ့သို့ သူတို့ကို သိမ်ငယ်အောင်လည်း မပြုသင့်ပေ။ ဤသည်မှာ အပေးအယူလုပ်ခြင်း မဟုတ်လော။ (ဟုတ်ပါသည်)။ အပေးအယူလုပ်ခြင်းသည် မှန်ကန်သလော။ မမှန်ကန်ပါ၊ သင်သည် သူတို့ကို မှန်ကန်စွာ ဆက်ဆံသင့်သည်၊ ပြီးလျှင် အကယ်၍ သင်သည် သင် နားလည်သော သမ္မာတရားကို အသုံးပြု၍ သူတို့ကို ကူညီနိုင်ပါက သူတို့ကို ကူညီလော့။ အကယ်၍ သင် သူတို့ကို မကူညီနိုင်ပါက သင်သည် ခေါင်းဆောင်တစ်ဦး ဖြစ်ပြီး သူတို့သည် သီးခြား တာဝန်တစ်ခုနှင့် သင့်လျော်သည်ဟု သင် မြင်ပါက သူတို့ကို ထိုတာဝန်ကို ထမ်းဆောင်စေလော့။ သူတို့၌ အချို့သော အဆင့်မြင့် ပညာအရည်အချင်း ရှိသောကြောင့် “ဟွန်း၊ ပညာအလွန်တတ်ခြင်းသည် အဘယ်အသုံးဝင်သနည်း။ သင်သည် သမ္မာတရားကို နားလည်သလော။ ကျွန်ုပ်သည် ပညာအလွန်မတတ်သော်လည်း ခေါင်းဆောင်တစ်ဦး ဖြစ်နေဆဲ ဖြစ်သည်။ ကျွန်ုပ်သည် အစွမ်းအစ ကောင်းမွန်သည်၊ သင့်ထက် သာ၍ တော်သည်၊ ထို့ကြောင့် ကျွန်ုပ်သည် သင့်ကို နှိမ့်ချပြီး အရှက်ခွဲမည်” ဟူ၍ တွေးလျက် ၎င်းတို့ကို အထင်မသေးနှင့်။ ဤသည်မှာ ယုတ်မာခြင်းနှင့် လူ့သဘာဝ ကင်းမဲ့ခြင်းဖြစ်သည်။ “သူတို့ကို မှန်ကန်စွာ ဆက်ဆံလော့” ဟူသည် အဘယ်အရာကို ဆိုလိုသနည်း။ ယင်းမှာ သမ္မာတရား စည်းမျဉ်းများအတိုင်း အမှုအရာများကို ကိုင်တွယ်ရန်ဟု ဆိုလိုသည်။ ဤနေရာရှိ သမ္မာတရား စည်းမျဉ်းမှာ အဘယ်နည်း။ ယင်းမှာ လူတို့ကို တရားမျှတစွာ ဆက်ဆံရန် ဖြစ်သည်။ လူတို့ကို လေးစားကြည်ညိုခြင်း မရှိနှင့်။ ပြီးလျှင် သူတို့ကို အထင်မကြီးနှင့်၊ သင်သည် အဆင့်နိမ့်သူတစ်ဦး ဖြစ်သည်ဟု ခံစားလျက် သူတို့၏ ရှေ့မှောက်၌ သင့်ကိုယ်သင် မနှိမ့်ချနှင့်၊ သူတို့ကို မြှောက်ပင့်ပြောဆိုခြင်းလည်း မပြုနှင့်၊ သူတို့ကို မနင်းချေနှင့်၊ သူတို့ကို မသေးသိမ်စေနှင့်၊ သူတို့သည် သူတို့၏ ကိုယ်ပိုင် တန်ဖိုးကို အလွန် မြင့်သည်ဟု ထင်မှတ်ခြင်း မရှိကောင်း မရှိနိုင်ဘဲ မိမိတို့ကိုယ်ကို ကြွားလုံးထုတ်ခြင်း မရှိကောင်း မရှိနိုင်ပေ။ သူတို့သည် မိမိတို့ကိုယ်ကို ကြွားလုံးထုတ်လိမ့်မည်ဟု သင် အစဉ်သဖြင့် စိုးရိမ်သောကြောင့် သူတို့ကို အစဉ်သဖြင့် နင်းချေနေပါက ယင်းသည် မှန်ကန်သလော။ မမှန်ကန်ပေ။ ဤသည်မှာ ယုတ်မာခြင်းနှင့် လူ့သဘာဝ ကင်းမဲ့ခြင်းဟု ခေါ်သည်။ သင်သည် တစ်ဖက်သို့ အလွန်အကျွံ မတိမ်းစောင်းပါက သင်သည် အခြားတစ်ဖက်သို့ အလွန်အကျွံ တိမ်းစောင်းနေခြင်း ဖြစ်သည်။ လူတို့ကို မှန်ကန်စွာ ဆက်ဆံရန်၊ လူတို့ကို တရားမျှတစွာ ဆက်ဆံရန် ဖြစ်သည်။ ဤသည်မှာ စည်းမျဉ်း ဖြစ်သည်။ ဤစည်းမျဉ်းသည် ရိုးရှင်းပုံရသော်လည်း ယင်းကို လက်တွေ့လုပ်ဆောင်ရန် မလွယ်ကူပေ။

ယခင်က ခေါင်းဆောင်တစ်ဦးသည် နေရာတစ်ခုသို့ ပြောင်းရွှေ့နေထိုင်မည် ဖြစ်သည်။ သက်ဆိုင်ရာ အဖွဲ့ခေါင်းဆောင်များနှင့် အဖွဲ့သားများကို သူနှင့်အတူ ခေါ်သွားနိုင်ကြောင်း ငါပြောခဲ့သည်။ အကြောင်းမှာ ဤသို့ဖြင့် သူတို့အတူတကွ အလုပ်ကို ဆွေးနွေးသည်မှာ အဆင်ပြေမည် ဖြစ်သောကြောင့် ဖြစ်သည်။ ငါ ပြောခဲ့သောအရာသည် နားလည်ရန် မခက်ခဲပေ။ ယင်းကို ကြားသည်နှင့်တစ်ပြိုင်နက် နားလည်သည်။ အဆုံး၌ သူနှင့်အတူ ခေါ်ဆောင်သွားခဲ့သော သက်ဆိုင်ရာ ဝန်ထမ်းများ၌ အတော်ပင် “အရည်အချင်းများ” ရှိခဲ့သည်။ အချို့က သူ့ထံ လက်ဖက်ရည် ယူဆောင်လာပေးကြသည်၊ အချို့က သူ၏ ခြေထောက်များကို ဆေးကြောပေးပြီး သူ၏ ကျောကို ပွတ်တိုက်ပေးကြသည်။ သူတို့အားလုံးသည် မြှောက်ပင့်ဖားယားသူ တစ်သိုက် ဖြစ်ကြသည်။ ဤခေါင်းဆောင်သည် မည်မျှ ရွံရှာဖွယ် ဖြစ်ခဲ့သနည်း။ သူ့ကို နေ့စဉ် မျက်နှာလိုမျက်နှာရ လုပ်ပြီး မြှောက်ပင့်ပြောဆိုကာ သူ့နောက်သို့ လိုက်လျက် သူ့ကို အစေခံခဲ့သည့် ကူးစက်ရောဂါရှိသောသူတစ်ဦး ရှိလေသည်။ သူသည် မြှောက်ပင့်ပြောဆိုခြင်း ခံရသည့် ခံစားချက်ကို ပျော်မွေ့ခံစားနိုင်ရန်အလို့ငှာ ဤရောဂါ ကူးစက်ခံရမည့် အန္တရာယ်ကိုပင် စွန့်စားလိုခဲ့သည်။ နောက်ဆုံးတွင် ဤကူးစက်ရောဂါ ရှိသော ပုဂ္ဂိုလ်သည် သူတို့ ပြောင်းရွှေ့ပြီးနောက် သူ၏ ရောဂါ ပြန်ထလာခဲ့သဖြင့် ဤအယောင်ဆောင်ခေါင်းဆောင်သည်လည်း ဖော်ထုတ်ခံခဲ့ရသည်။ ထို့ကြောင့် လူတို့သည် သမ္မာတရားကို နားလည်သည်ဖြစ်စေ၊ မနားလည်သည်ဖြစ်စေ သူတို့သည် မကောင်းမှုများကို လုံးဝ မပြုလုပ်ရပေ၊ သူတို့၏ ရည်မှန်းချက်များနှင့် လိုအင်ဆန္ဒများကို အားကိုးအားထားပြုလျက် အမှုအရာများကို မပြုလုပ်ရပေ။ ပြီးလျှင် အရဲစွန့်သော စိတ်သဘောထားမျိုး မထားရှိရပေ၊ အကြောင်းမှာ ဘုရားသခင်သည် လူ၏ စိတ်နှလုံးများကို စေ့စေ့စပ်စပ် ကြည့်ရှုစစ်ဆေးပြီး မြေကြီးတစ်ခုလုံးကို စေ့စေ့စပ်စပ် ကြည့်ရှုစစ်ဆေးသောကြောင့် ဖြစ်သည်။ “မြေကြီးတစ်ခုလုံး” တွင် အဘယ်အရာ ပါဝင်သနည်း။ ယင်းတွင် ရုပ်ပိုင်းဆိုင်ရာနှင့် ရုပ်ပိုင်းဆိုင်ရာ မဟုတ်သော အရာများ နှစ်မျိုးလုံး ပါဝင်သည်။ သင်၏ ကိုယ်ပိုင် ဦးနှောက်ကို အသုံးပြုလျက် ဘုရားသခင်ကို၊ ဘုရားသခင်၏ ဩဇာအာဏာကို သို့မဟုတ် ဘုရားသခင်၏ အနန္တတန်ခိုးကို အကဲဖြတ်ရန် မကြိုးစားနှင့်။ လူတို့သည် ဖန်ဆင်းခံများ ဖြစ်ကြပြီး သူတို့၏ အသက်တာများသည် အလွန် အရေးမပါလှပေ။ သူတို့သည် ဖန်ဆင်းရှင်၏ ကြီးမြတ်မှုကို မည်သို့အကဲဖြတ်နိုင်မည်နည်း။ သူတို့သည် အရာခပ်သိမ်းကို သူ၏ ဖန်ဆင်းခြင်းနှင့် အရာခပ်သိမ်းအပေါ် အချုပ်အခြာအာဏာကိုင်စွဲခြင်းရှိ ဖန်ဆင်းရှင်၏ အနန္တတန်ခိုးနှင့် ဉာဏ်ပညာကို မည်သို့ တိုင်းတာနိုင်မည်နည်း။ သင်တို့သည် အသိဉာဏ်ကင်းမဲ့သော အမှုအရာများကို လုံးဝ မပြုလုပ်ရ၊ သို့မဟုတ် မကောင်းမှုကို မပြုလုပ်ရပေ။ မကောင်းမှုကို ပြုလုပ်ခြင်းသည် မလွဲမသွေ ဒဏ်ခတ်ခြင်းကို ခံရလိမ့်မည်၊ ပြီးလျှင် တစ်နေ့သောအခါ ဘုရားသခင်သည် သင့်ကို ထုတ်ဖော်သည့်အခါ သင်သည် သင် မျှော်မှန်းထားသည်ထက် ပို၍ ရရှိလိမ့်မည်၊ ထိုနေ့၌ သင်သည် ငိုကြွေးလျက် အံသွားခဲကြိတ်ရလိမ့်မည်။ သင်သည် မိမိကိုယ်ကို သိကျွမ်းခြင်းဖြင့် ကျင့်ကြံပြုမူရမည်။ အချို့သော ကိစ္စရပ်များ၌ ဘုရားသခင် သင့်ကို မဖော်ထုတ်မီတွင် သင်သည် မိမိကိုယ်ကို ဘုရားသခင်၏ နှုတ်ကပတ်တော်များဖြင့် နှိုင်းယှဉ်ခြင်း၊ မိမိကိုယ်ကို ပြန်လည်သုံးသပ်ပြီး ဖုံးကွယ်ထားသော အမှုအရာများကို အလင်းသို့ ဆောင်ကြဉ်းခြင်း၊ သင်၏ ကိုယ်ပိုင် ပြဿနာများကို ရှာဖွေတွေ့ရှိခြင်း၊ ထို့နောက် ယင်းတို့ကို ဖြေရှင်းရန် သမ္မာတရားကို ရှာဖွေခြင်းတို့ကို ပြုလုပ်သည်မှာ သာ၍ ကောင်းပေမည်။ ဘုရားသခင်က သင့်ကို ထုတ်ဖော်သည်ကို မစောင့်ဆိုင်းနှင့်။ ဘုရားသခင် သင့်ကို ထုတ်ဖော်ပြီးသည်နှင့်တစ်ပြိုင်နက် သင်သည် မထုံတက်သေး ဖြစ်သွားသည် မဟုတ်လော။ ထိုအချိန်၌ သင်သည် ပြစ်မှားခြင်းတစ်ခုကို ကျူးလွန်ပြီး ဖြစ်နေလိမ့်မည်။ ဘုရားသခင် သင့်ကို စေ့စေ့စပ်စပ် ကြည့်ရှုစစ်ဆေးခြင်းမှ သင် ထုတ်ဖော်ခံရသည်အထိ သင်၏ တန်ဖိုးနှင့် သင့်အပေါ် ဘုရားသခင်၏ ထင်မြင်ယူဆချက်သည် ကြီးမားသော ပြောင်းလဲမှုတစ်ခုကို ကြုံတွေ့ရဖွယ် ရှိသည်။ ဤသည်မှာ ဘုရားသခင်သည် သင့်ကို စေ့စေ့စပ်စပ် ကြည့်ရှုစစ်ဆေးနေစဉ်အတွင်း သင် ထုတ်ဖော်ခြင်းခံရသည့် အခိုက်အတန့်အထိ သူသည် သင့်အား အခွင့်အရေးများကို ပေးနေပြီး သူ၏ မျှော်လင့်ချက်များကို သင့်အပေါ် အပ်နှံနေခြင်းကြောင့် ဖြစ်သည်။ ဘုရားသခင်သည် တစ်စုံတစ်ဦးအပေါ် သူ၏ မျှော်လင့်ချက်များကို အပ်နှံခြင်းမှနေ၍ အဆုံး၌ သူ၏ မျှော်လင့်ချက်များ အချည်းနှီး ဖြစ်သွားသည်အထိ ဘုရားသခင်၏ စိတ်နေစိတ်ထားသည် မည်သို့ ရှိမည်နည်း။ ယင်းသည် အလွန်ကြီးမားသော ကျဆင်းမှုတစ်ခုကို ကြုံတွေ့ရသည်။ ထို့ပြင် သင့်အတွက် အကျိုးဆက်မှာ အဘယ်အရာ ဖြစ်မည်နည်း။ ထိုမျှ မပြင်းထန်သော ကိစ္စများတွင် သင်သည် ဘုရားသခင် စက်ဆုပ်ရွံရှာခြင်းကို ခံရကောင်း ခံရနိုင်လာပြီး ဘေးဖယ်ထားခြင်း ခံရပေမည်။ “ဘေးဖယ်ထားသည်” ဆိုသည်မှာ အဘယ်အရာကို ဆိုလိုသနည်း။ ယင်းမှာ သင်သည် ဆက်လက်ထိန်းသိမ်းထားပြီး စောင့်ကြည့်လေ့လာခြင်းကို ခံရမည်ဟု ဆိုလိုသည်။ ထို့ပြင် ပို၍ ဆိုးရွားသော ကိစ္စများတွင် အကျိုးဆက်မှာ အဘယ်အရာ ဖြစ်မည်နည်း။ ဘုရားသခင်က “ဤပုဂ္ဂိုလ်သည် ဘေးဥပဒ်တစ်ခု ဖြစ်ပြီး အစေခံရန်ပင် မထိုက်တန်ပေ။ ငါသည် ဤပုဂ္ဂိုလ်ကို လုံးဝ ကယ်တင်မည် မဟုတ်” ဟု မိန့်ပေမည်။ ဘုရားသခင်သည် ဤစိတ်ကူးကို ဖြစ်ပေါ်စေပြီးသည်နှင့်တစ်ပြိုင်နက် သင့်၌ မည်သည့်အဆုံးသတ်မျှ လုံးဝ ရှိတော့မည် မဟုတ်ပေ၊ ပြီးလျှင် ထိုသို့ ဖြစ်ပျက်ပြီးသည်နှင့် သင်သည် ဦးတိုက်တောင်းပန်ပြီး သွေးထွက်နိုင်စေကာမူ ယင်းသည် သင့်အတွက် မည်သည့်ကောင်းကျိုးမျှ ပြုမည် မဟုတ်ပေ၊ အကြောင်းမှာ ဘုရားသခင်သည် သင့်အား လုံလောက်သော အခွင့်အရေးများကို ပေးပြီးဖြစ်သော်လည်း သင်သည် မည်သည့်အခါမျှ နောင်တမရခဲ့ဘဲ သင်သည် လွန်ကျူးခဲ့ပြီးသောကြောင့် ဖြစ်သည်။ ထို့ကြောင့် သင့်၌ မည်သည့်ပြဿနာများ ရှိသည်ဖြစ်စေ၊ သင်သည် မည်သည့် ဖောက်ပြန်ပျက်စီးမှုကို ထုတ်ဖော်ပြသည်ဖြစ်စေ သင်သည် ဘုရားသခင်၏ နှုတ်ကပတ်တော်များအရ မိမိကိုယ်ကို အစဉ်သဖြင့် ဆင်ခြင်သုံးသပ်ပြီး သိကျွမ်းသင့်သည် သို့မဟုတ် ညီအစ်ကိုမောင်နှမများအား ဤအမှုအရာများကို သင့်အား ထောက်ပြပါရန် တောင်းဆိုသင့်သည်။ အရေးအကြီးဆုံးမှာ သင်သည် ဘုရားသခင်၏ စေ့စေ့စပ်စပ် ကြည့်ရှုစစ်ဆေးခြင်းကို လက်ခံသင့်သည်၊ ဘုရားသခင်၏ ရှေ့မှောက်သို့ လာသင့်သည်၊ ပြီးလျှင် သင့်ကို အသိဉာဏ်ပွင့်လင်းစေပြီး အလင်းပြပါရန် သူ့အား တောင်းလျှောက်သင့်သည် ဟူ၍ ဖြစ်သည်။ သင် မည်သို့သော နည်းလမ်းကို အသုံးပြုသည်ဖြစ်စေ ပြဿနာများကို စောစီးစွာ ရှာဖွေတွေ့ရှိပြီးနောက် ယင်းတို့ကို ဖြေရှင်းခြင်းသည် မိမိကိုယ်ကို ပြန်လည်သုံးသပ်ခြင်းမှ ရရှိသော အကျိုးသက်ရောက်မှု ဖြစ်ပြီး ဤသည်မှာ သင် လုပ်ဆောင်နိုင်သော အကောင်းဆုံးအရာ ဖြစ်သည်။ သင်သည် နောင်တမရမီ ဘုရားသခင်က သင့်ကို ထုတ်ဖော်ပြီး ဖယ်ရှားရှင်းလင်းသည့် အချိန်အထိ မစောင့်ဆိုင်းသင့်ပေ၊ ထိုသို့ဖြစ်သောအခါ နောင်တရရန် အလွန် နောက်ကျသွားလိမ့်မည်။ ဘုရားသခင် တစ်စုံတစ်ဦးကို ဖော်ထုတ်သောအခါ သူသည် အလွန် ပြင်းထန်စွာ အမျက်ထွက်သလော သို့မဟုတ် အတိုင်းအဆမဲ့ သနားကရုဏာ ထားရှိသလော။ ဤသည်မှာ ပြောဆိုရန် ခက်ခဲသည်၊ ယင်းမှာ မသိရှိရသောအရာ ဖြစ်ပြီး ငါသည် သင့်အား ဤအာမခံချက်ကို ပေးမည် မဟုတ်ပေ။ သင် လျှောက်လှမ်းသော လမ်းခရီးသည် သင်ကိုယ်တိုင်အပေါ်၌သာ မူတည်သည်။ ငါ၏ တာဝန်မှာ အဘယ်အရာဖြစ်သည်ကို သင်တို့ သိကြသလော။ ငါသည် ငါ ပြောဆိုရမည့်အရာအားလုံး၊ ငါ ပြောဆိုသင့်သော စကားလုံးတိုင်းကို၊ စကားလုံးတစ်လုံးမျှ မချန်လှပ်ဘဲ သင်တို့အား ပြောပြနေခြင်း ဖြစ်သည်။ ငါသည် မည်သည့်နည်းလမ်းကို အသုံးပြုသည်ဖြစ်စေ ယင်းသည် ရေးသားထားသော စကားလုံးများ၊ ပုံပြင်ပြောခြင်း၊ သို့မဟုတ် အစီအစဉ်ငယ်များကို ထုတ်လုပ်ခြင်း နည်းလမ်း ဖြစ်သည်ဖြစ်စေ၊ မည်သို့ပင်ဖြစ်စေ ငါသည် ဘုရားသခင် သင်တို့အား နားလည်စေလိုသော သမ္မာတရားကို နည်းလမ်းအမျိုးမျိုးမှတစ်ဆင့် အသိပေးနေခြင်း ဖြစ်ပြီး တစ်ချိန်တည်းတွင် ငါ မြင်တွေ့နိုင်သော ပြဿနာများကို သင်တို့အား အသိပေးနေခြင်း ဖြစ်သည်။ ငါသည် သင်တို့အား သတိပေးနေသည်၊ အမှတ်ရစေနေသည်၊ ပြီးလျှင်တိုက်တွန်းနှိုးဆော်နေသည်၊ ထို့ပြင် သင်တို့အား အချို့သော ထောက်ပံ့မှု၊ အကူအညီနှင့် ဖေးမမှုတို့ကို ပေးနေခြင်း ဖြစ်သည်။ တစ်ခါတစ်ရံ ငါသည် ပြင်းထန်သော စကားများကိုလည်း ပြောဆိုသည်။ ဤသည်မှာ ငါ၏ တာဝန် ဖြစ်ပြီး လမ်းခရီး၏ ကျန်ရှိသောအပိုင်းကို မည်သို့ သွားရမည်မှာ သင်ကိုယ်တိုင်အပေါ်၌ မူတည်သည်။ သင်သည် ငါ၏ အပြောအဆိုနှင့် မျက်နှာအမူအရာကို ဆန်းစစ်ရန် မလိုအပ်သကဲ့သို့ သင်သည် ငါ၏ သင့်အပေါ် ထားရှိသော ထင်မြင်ယူဆချက်မှာ အဘယ်အရာဖြစ်သည်ကို စူးစိုက်စွာ စောင့်ကြည့်လေ့လာရန်လည်း မလိုအပ်ပေ။ သင်သည် ဤအရာများကို လုပ်ဆောင်ရန် မလိုအပ်ပေ။ အနာဂတ်၌ သင်၏ အဆုံးသတ်က မည်သည့်အရာဖြစ်မည်ဟူသည်မှာ ငါနှင့် မည်သို့မျှ မသက်ဆိုင်ပေ၊ ယင်းသည် သင်ကိုယ်တိုင် လိုက်စားသောအရာနှင့်သာ သက်ဆိုင်သည်။ ယနေ့ ငါသည် ပြတင်းပေါက်ကို ဖွင့်လျက် ပွင့်လင်းစွာ ပြောဆိုနေသည်၊ ငါသည် လုံးဝ ရှင်းလင်းစွာ ပြောဆိုနေသည်။ ငါ ပြောဆိုခဲ့သော စကားလုံးတိုင်းနှင့် ဝါကျတိုင်းအပြင် ငါ ပြောဆိုရမည့်အရာ၊ ငါ ပြောဆိုသင့်သောအရာနှင့် ငါ အတိတ်က ပြောဆိုခဲ့ပြီးဖြစ်သောအရာတို့ကို သင်တို့ ကြားသိပြီး နားလည်ခဲ့ကြပြီးပြီလော။ ငါ ဆိုသောအရာ၌ သဘောတရားသက်သက် ဖြစ်သောအရာတစ်ခုမျှ မပါရှိ၊ သင်တို့ နားမလည်သော အရာတစ်ခုမျှ မပါရှိ၊ သင်တို့အားလုံး နားလည်ခဲ့ကြပြီးဖြစ်သည်၊ ထို့ကြောင့် ငါ၏ တာဝန်သည် ပြည့်စုံခဲ့ပြီး ဖြစ်သည်။ ငါ စကားပြောဆိုပြီးသည့်နောက်တွင် ငါသည် သင်တို့ကို ဆက်လက်၍ စောင့်ကြည့်နေရဦးမည်၊ သင်တို့အတွက် လက်တွဲလျက် အဆုံးတိုင်အောင် တာဝန်ယူနေရဦးမည်ဟု မထင်မှတ်နှင့်။ သင်တို့အားလုံး ဘုရားသခင်ကို နှစ်အတန်ကြာ ယုံကြည်ခဲ့ကြပြီးဖြစ်သည်၊ သင်တို့အားလုံးသည် အရွယ်ရောက်ပြီးသူများ ဖြစ်ကြပြီး ကလေးငယ်များ မဟုတ်ကြပေ။ သင်တို့ အမှုအရာများကို လုပ်ဆောင်သောအခါ သင်တို့အတွက် တာဝန်ရှိသော ခေါင်းဆောင်များ ရှိကြသည်၊ ယင်းမှာ ငါ၏ တာဝန် မဟုတ်ပေ။ ငါ၌ ငါ၏ ကိုယ်ပိုင် အမှုတော် နယ်ပယ်၊ ငါ၏ ကိုယ်ပိုင် တာဝန်ဝတ္တရားများ နယ်ပယ် ရှိသည်၊ ငါသည် သင်တို့ တစ်ဦးချင်းစီတိုင်း၏ နောက်မှ လိုက်လျက် သင်တို့ကို ဆက်လက် ကြီးကြပ်ပြီး တိုက်တွန်းနေရန် မလိုအပ်သကဲ့သို့ ဖြစ်နိုင်ချေလည်း မရှိပေ။ ငါ၌ ထိုသို့ လုပ်ဆောင်ရန် တာဝန်ဝတ္တရား မရှိပေ။ သင်တို့ လိုက်စားသောအရာ၊ သင်တို့ သီးသန့် ပြောဆိုပြီး လုပ်ဆောင်သောအရာနှင့် သင်တို့ လိုက်လျှောက်သော လမ်းခရီးတို့အတွက်မူ ဤအမှုအရာများ တစ်ခုမျှ ငါနှင့် မည်သို့မျှ မသက်ဆိုင်ပေ။ အဘယ်ကြောင့် ယင်းတို့ ငါနှင့် မည်သို့မျှ မသက်ဆိုင်ဟု ငါ ဆိုရသနည်း။ အကယ်၍ သင်တို့သည် ဘုရားသခင်၏ အိမ်တော်၌ သင်တို့၏ တာဝန်များကို သင့်လျော်ပြီး မှန်ကန်သော နည်းလမ်းဖြင့် ထမ်းဆောင်နိုင်ပါက ဘုရားသခင်၏ အိမ်တော်သည် သင်တို့အတွက် အဆုံးတိုင်အောင် တာဝန်ရှိပေမည်။ အကယ်၍ သင်တို့သည် သင်တို့၏ တာဝန်ကို ထမ်းဆောင်ရန်၊ အဖိုးအခကို ပေးဆပ်ရန်၊ သမ္မာတရားကို လက်ခံရန်နှင့် စည်းမျဉ်းအတိုင်း ပြုမူရန် ဆန္ဒရှိပါက ဘုရားသခင်၏ အိမ်တော်သည် သင်တို့ကို ဦးဆောင်မည်၊ သင်တို့အတွက် ပံ့ပိုးပေးမည်၊ ပြီးလျှင် သင်တို့ကို ထောက်ပံ့ပေးမည်၊ အကယ်၍ သင်တို့သည် သင်တို့၏ တာဝန်ကို ထမ်းဆောင်ရန် ဆန္ဒမရှိဘဲ အပြင်ထွက် အလုပ်လုပ်ပြီး ငွေရှာရန် ဆန္ဒရှိပါက ဘုရားသခင်၏ အိမ်တော် တံခါးများသည် ခပ်ကျယ်ကျယ် ပွင့်လျက်ရှိပြီး သင်တို့သည် လှိုက်လှဲသော နှုတ်ဆက်ခြင်းကို လက်ခံရရှိပေမည်။ သို့သော်လည်း အကယ်၍ သင်တို့သည် ဘုရားသခင်၏ အိမ်တော်၌ အဖျက်အမှောင့်လုပ်ခြင်းများကို ဖြစ်စေပါက၊ မကောင်းမှုကို ပြုလုပ်ပါက၊ ပြဿနာရှာပါက မည်သူက မကောင်းမှုကို ပြုလုပ်သည်ဖြစ်စေ ဘုရားသခင်၏ အိမ်တော်၌ စီမံအုပ်ချုပ်ရေးဆိုင်ရာ အမိန့်များနှင့် အလုပ်အစီအစဉ်များရှိပြီး သင်တို့သည် ဤစည်းမျဉ်းများအတိုင်း ကိုင်တွယ်ခြင်း ခံရပေမည်။ သင်တို့ နားလည်သလော။ သင်တို့အားလုံး ဘုရားသခင်ကို နှစ်ပေါင်းများစွာ ယုံကြည်ခဲ့ကြပြီးဖြစ်သည်၊ သင်တို့သည် ဘုရားသခင်၏ နှုတ်ကပတ်တော်များစွာကို ဖတ်ရှုခဲ့ကြပြီးဖြစ်သည်၊ ပြီးလျှင် ဤနှစ်များအားလုံးတွင် စုဝေးပွဲများကို တက်ရောက်ပြီး တရားဒေသနာများကို နားထောင်ခဲ့ကြပြီးဖြစ်သည်၊ သို့ဖြစ်ပါလျက် အဘယ်ကြောင့် သင်တို့သည် စိုးစဉ်းမျှပင် နောင်တရခြင်း သို့မဟုတ် ပြောင်းလဲခြင်း မရှိခဲ့ကြသနည်း။ နှစ်ပေါင်းများစွာ တရားဒေသနာများကို နားထောင်ခဲ့ပြီး အချို့သော သမ္မာတရားများကို နားလည်ခဲ့သော လူများစွာ ရှိကြသည်၊ သို့တိုင်အောင် သူတို့သည် နောင်တရခြင်း မရှိကြသေးပေ၊ သူတို့သည် သူတို့၏ တာဝန်များကို ဝတ်ကျေတမ်းကျေ နည်းလမ်းဖြင့် ထမ်းဆောင်နေကြဆဲ ဖြစ်ပြီး ဤသည်တို့မှာ အန္တရာယ်ကျရောက်နေသော လူများ ဖြစ်ကြသည်။ ငါသည် သင်တို့အား စစ်မှန်သော အရာတစ်ခုကို ပြောပြမည်။ သင်တို့အနေဖြင့် လက်တွေ့ကျပြီး ထိရောက်သော တစ်စုံတစ်ရာကို လုပ်ဆောင်နိုင်ရန်အလို့ငှာ ငါ သင်တို့ကို စောင့်ကြည့်နေဖို့၊ သင်တို့ကို ဂရုစိုက်ဖို့၊ ငါ သင်တို့၏ လက်ကို ကိုင်ထား၍ သင်တို့ကို သင်ကြားပေးဖို့ အစဉ်သဖြင့် မမျှော်လင့်နှင့်။ အကယ်၍ ငါသည် သင်တို့ကို မကြည့်ရှု သို့မဟုတ် သင်တို့ကို မကြီးကြပ်ဘဲ သင်တို့ကို မတိုက်တွန်းပါက၊ သင်တို့သည် ဝတ်ကျေတမ်းကျေ ဖြစ်လာပြီး အမှုတော် တိုးတက်မှု နှေးကွေးသွားပါက သင်တို့သည် အဆုံးသတ်သွားပေမည်။ ဤသည်မှာ သင်တို့သည် မည်သည့် သစ္စာစောင့်သိခြင်းမျှ မရှိဘဲ သင်တို့၏ တာဝန်ကို ထမ်းဆောင်ကြပြီး အားလုံးမှာ အလုပ်လုပ်ပေးသူများ ဖြစ်ကြကြောင်း ပြသသည်။ ငါ သင်တို့အား ပြောမည်၊ ငါ၏ အမှုတော်သည် ဆောင်ရွက်ပြီး ဖြစ်သည်၊ ငါသည် သင်တို့ကို ဂရုစိုက်ရန် တာဝန်ဝတ္တရား မရှိပေ။ အကြောင်းမှာ သန့်ရှင်းသော ဝိညာဉ်တော်သည် ဤကိစ္စရပ်များ၌ အမှုပြုနေပြီး သင်တို့ကို စေ့စေ့စပ်စပ် ကြည့်ရှုစစ်ဆေးနေသောကြောင့် ဖြစ်သည်၊ ငါ လုပ်ဆောင်သင့်သောအရာကို လုပ်ဆောင်ခဲ့ပြီး ဖြစ်သည်၊ ငါ ပြောဆိုသင့်သောအရာကို ပြောဆိုခဲ့ပြီး ဖြစ်သည်၊ ငါသည် ငါ၏ အမှုတော်ကို စွဲစွဲမြဲမြဲ ဆောင်ရွက်ပြီးဖြစ်သည်။ ငါသည် ငါ၏ တာဝန်ကို ပြည့်စုံစေခဲ့ပြီး ဖြစ်သည်။ ကျန်ရှိသောအရာမှာ သင်တို့၏ ကိုယ်ပိုင် လုပ်ဆောင်ချက်များနှင့် အပြုအမူအတွက် တာဝန်ယူရန်သာ ဖြစ်လေသည်။ အကယ်၍ သင်တို့သည် သမ္မာတရားကို လက်မခံဘဲ အစဉ်မပြတ် ဝတ်ကျေတမ်းကျေ ဖြစ်ကာ နောင်တရရန် မည်သည့်အခါမျှ မစဉ်းစားပါက သင်တို့၏ ပြစ်ဒဏ်ခတ်ခြင်းနှင့် သင်တို့ ဖယ်ရှားရှင်းလင်းခြင်း ခံရခြင်းတို့သည် ငါနှင့် မည်သို့မျှ သက်ဆိုင်လိမ့်မည် မဟုတ်ပေ။

ငါ ခုလေးတင် ပြောပြခဲ့သော ဇာတ်လမ်း၏ ရှုထောင့်တစ်ရပ်မှာ လူတို့၏ လူမှုအဆင့်အတန်း၊ တန်ဖိုး၊ မိသားစု နောက်ခံနှင့် ပညာရေးဆိုင်ရာ နောက်ခံ စသည်တို့ကို မည်သို့ မှတ်ယူရမည်ဟူသည်နှင့် ဤအမှုအရာများကို မှတ်ယူရန် စံနှုန်းများနှင့် စည်းမျဉ်းများမှာ အဘယ်အရာဖြစ်သည်တို့ကို ပြောဆိုနေခြင်း ဖြစ်သည်။ အခြား ရှုထောင့်တစ်ရပ်မှာ ဤအမှုအရာများကို မည်သို့ ကိုင်တွယ်ရမည်ဟူသည်နှင့် ယင်းတို့၏ အနှစ်သာရကို မည်သို့ ထွင်းဖောက်မြင်ရမည်ဟူသည်တို့ ဖြစ်သည်။ သင်သည် ဤအမှုအရာများ၏ အနှစ်သာရကို ထွင်းဖောက်မြင်ပြီးသည်နှင့်တစ်ပြိုင်နက် ယင်းတို့သည် သင်၏ စိတ်နှလုံးထဲ၌ ရှိနေဆဲ ဖြစ်နိုင်သော်လည်း သင်သည် ယင်းတို့အားဖြင့် ဘောင်ခတ်ခြင်း ခံရမည် မဟုတ်ဘဲ ယင်းတို့အားဖြင့် အသက်ရှင်တော့မည် မဟုတ်ပေ။ သင်သည် ဘာသာတရားမရှိသူတစ်ဦး တက္ကသိုလ်သို့ သွားခဲ့ခြင်းနှင့် မဟာဘွဲ့ သို့မဟုတ် ပါရဂူဘွဲ့အတွက် သင်ယူခဲ့ခြင်းဟူသော သူတို့၏ ဘုန်းကျက်သရေရှိသော အတိတ်ကို ကြွားဝါနေသည်ကို မြင်တွေ့သောအခါ ထိုအချိန်ရှိ သင်၏ ရှုမြင်ပုံနှင့် သဘောထားမှာ အဘယ်နည်း။ အကယ်၍ သင်က “တက္ကသိုလ်၌ ဘွဲ့တစ်ခုအတွက် သင်ယူခြင်းသည် ဘာမျှမဟုတ်ပါ။ ကျွန်ုပ်သည် လွန်ခဲ့သောနှစ်များက ကျွန်ုပ်၏ ဘွဲ့လွန်သင်တန်းမှ ဘွဲ့ရခဲ့ပြီးဖြစ်သည်” ဟု ဆိုပါက၊ အကယ်၍ သင်၌ ဤစိတ်နေစိတ်ထား ရှိပါက ယင်းသည် သင့်အတွက် ပြဿနာများလိမ့်မည်ဖြစ်ပြီး ယင်းက သင်သည် ဘုရားသခင်အပေါ် သင်၏ ယုံကြည်ခြင်း၌ များစွာ ပြောင်းလဲခြင်း မရှိသေးကြောင်း ပြသသည်။ အကယ်၍ သူတို့က သင့်အား သင်၏ ပညာရေးဆိုင်ရာ နောက်ခံမှာ အဘယ်အရာဖြစ်သည်ဟု မေးမြန်းပြီး သင်က “ကျွန်ုပ်သည် မူလတန်းကျောင်းပင် မပြီးခဲ့ဘဲ စာစီစာကုံးတစ်ပုဒ်ပင် မရေးနိုင်ပါ” ဟု ဆိုသဖြင့် သူတို့က သင့်အား အညတရတစ်ဦးအဖြစ် ရှုမြင်ပြီး သင့်ကို လျစ်လျူရှုလာပါက ယင်းသည် ပြီးပြည့်စုံသည် မဟုတ်ပါလော။ သင်သည် ဘုရားသခင်၏ နှုတ်ကပတ်တော်များကို ပိုမို ဖတ်ရှုရန်နှင့် သင်၏ တာဝန်ကို ပိုမို ထမ်းဆောင်ရန် အချိန်ကို ဖယ်ထားနိုင်ပြီး ဤသည်မှာ မှန်ကန်သော လုပ်ဆောင်မှု ဖြစ်သည်။ ဘာသာတရားမရှိသူတို့၊ မယုံကြည်သူတို့နှင့် အတင်းအဖျင်းပြောဆိုခြင်း၌ အဘယ်အကျိုး ရှိသနည်း။ အကယ်၍ သင်သည် သင့်၌ ပညာအရည်အချင်း အဆင့်အတန်း နိမ့်ပါးပြီး လူ့အဖွဲ့အစည်း၌ အဆင့်အတန်း မရှိဟု ဆိုပါက၊ ထို့ပြင် တစ်စုံတစ်ဦးက သင့်ကို သေးသိမ်စေပါက သင်သည် အဘယ်အရာ လုပ်ဆောင်မည်နည်း။ ယင်းကို စိတ်ထဲ၌ မထားနှင့်၊ ဘောင်ခတ်ခြင်း ခံရသည်ဟု မခံစားရနှင့်၊ သူတို့ကို စကားပြောဆိုခွင့် ပြုလော့။ သူတို့ ပြောလိုသော မည်သည့်အရာကိုမဆို သူတို့ကို ပြောဆိုခွင့် ပြုလော့။ ယင်းသည် သင့်အတွက် ဘာမျှမဟုတ်ပေ။ ယင်းသည် ဘုရားသခင်အပေါ် သင်၏ ယုံကြည်ခြင်း၌ သမ္မာတရားကို လိုက်စားခြင်းမှ သင့်ကို နှောင့်နှေးကြန့်ကြာစေခြင်း မရှိသမျှ ကာလပတ်လုံး အဆင်ပြေသည်။ ဤသည်မှာ အမှန်စင်စစ် အသေးအဖွဲဖြစ်သော အကြောင်းအရာ ဖြစ်သည်၊ သို့သော် နေ့စဉ် အသက်တာ၌ လူတို့ ဖော်ပြသော အမှုအရာများမှတစ်ဆင့် လူတို့သည် အရင်းအနှီးနှင့်ဆိုင်သော ဤအမှုအရာများကို အလွန်ပင် အလေးထားကြပြီး ယင်းတို့ကို သူတို့၏ စိတ်နှလုံးထဲ၌ အစဉ်သဖြင့် သယ်ဆောင်ထားကြသည်ကို မြင်တွေ့နိုင်သည်။ ဤသည်မှာ လူတို့၏ အပြောအဆိုနှင့် အပြုအမူကို သက်ရောက်မှု ရှိနိုင်ရုံသာမက ယင်းသည် သူတို့၏ အသက်ဝင်ရောက်မှုနှင့် ဘုရားသခင်အပေါ် ယုံကြည်ခြင်း၏ မှန်ကန်သော လမ်းကြောင်းအား ရွေးချယ်ခြင်းတို့ကိုလည်း သက်ရောက်မှု ရှိနိုင်သည်။ ကောင်းပြီ၊ ငါသည် ဤသို့သော အကြောင်းအရာမျိုးကို နောက်တစ်ဖန် ပြောဆိုမည် မဟုတ်ချေ။ ကျွန်ုပ်တို့ နောက်ဆုံးတစ်ကြိမ်က မိတ်သဟာယဖွဲ့နေခဲ့သော အကြောင်းအရာကို ပြန်ပြောကြပြီး အန္တိခရစ်များ၏ အမျိုးမျိုးသော သရုပ်သကန်များကို ဆက်လက်၍ မိတ်သဟာယဖွဲ့ပြီး ခွဲခြမ်းစိတ်ဖြာကြစို့။

အန္တိခရစ်များက မည်သို့ကောက်ကျစ်ဆိုးယုတ်ပုံ၊ အန္တရာယ်ပေးပုံနှင့် လှည့်ဖြားပုံတို့ကို စိတ်ဖြာလေ့လာဆွေးနွေးခြင်း

၁။ အပြုသဘောဆောင်သောအရာများနှင့် သမ္မာတရားအပေါ် အန္တိခရစ်များ၏ ရန်လိုခြင်းနှင့် စက်ဆုပ်ရွံရှာခြင်းကို စိတ်ဖြာလေ့လာဆွေးနွေးခြင်း

ငါတို့သည် အန္တိခရစ်တို့၏ ဆဋ္ဌမမြောက် သရုပ်သကန်ကို စိတ်ဖြာလေ့လာဆွေးနွေးပြီးဖြစ်၍ ယခု သတ္တမမြောက် သရုပ်သကန်ဖြစ်သည့် အန္တိခရစ်များက မည်သို့ ကောက်ကျစ်ဆိုးယုတ်၊ အန္တရာယ်ပေးတတ်ပြီး လှည့်ဖြားတတ်ကြသည်ကို စတင်၍ စိတ်ဖြာလေ့လာဆွေးနွေးကြမည်။ လူအချို့က ၊“ကျွန်ုပ်တို့သည် အန္တိခရစ်တို့ကို စိတ်ဖြာလေ့လာဆွေးနွေးပြီး ဖော်ထုတ်နေသည်ကို ကြည့်ခြင်းအားဖြင့် သူတို့ကို ကောက်ကျစ်ဆိုးယုတ်သည်၊ အန္တရာယ်ပေးတတ်သည်၊ လှည့်ဖြားတတ်သည်ဟု ဆိုခြင်းသည် အလွန် ညင်သာလွန်းသည် မဟုတ်လော။ မည်သူသည် ကောက်ကျစ်ဆိုးယုတ်သော သို့မဟုတ် လှည့်ဖြားတတ်သော စိတ်သဘောထား အနည်းငယ်မျှ မရှိဘဲ နေမည်နည်း။ သာမန်လူအားလုံးတွင် ဤဖောက်ပြန်ပျက်စီးသော စိတ်သဘောထားများ ရှိကြသည်၊ ထို့ကြောင့် အကယ်၍ ကျွန်ုပ်တို့သည် အန္တိခရစ်တို့ကို ဤနည်းလမ်းဖြင့် ဖော်ထုတ်ပြီး စိတ်ဖြာလေ့လာဆွေးနွေးမည်ဆိုလျှင်၊ လူတိုင်းသည် အန္တိခရစ်ဖြစ်သည်ဟု ဆိုလိုရာ ရောက်မည် မဟုတ်လော”ဟု ဆိုကြသည်။ သင်တို့ထဲမှ တစ်ဦးတလေက ဤသို့ တွေးသလော။ သင်တို့ထဲမှ တစ်ဦးတလေက ဤသို့ အမှန်တကယ် တွေးပါက သင်တို့ မှားယွင်းပေသည်။ အန္တိခရစ်တို့၏ ကောက်ကျစ်ဆိုးယုတ်မှု၊ အန္တရာယ်ပေးတတ်မှုနှင့် လှည့်ဖြားတတ်မှုတို့နှင့် သာမန်လူများအတွင်းရှိ ဤဖောက်ပြန်ပျက်စီးသော စိတ်သဘောထားများ၏ ထုတ်ဖော်ပြချက်များကြား ကွာခြားချက် ရှိသလော။ ကွာခြားချက် ရှိသည်မှာ အလွန်သေချာသည်။ သို့မဟုတ်ပါက ငါတို့သည် ဤစိတ်သဘောထားများကို အန္တိခရစ်တို့၏ သရုပ်သကန်များတွင် ထည့်သွင်းမည် မဟုတ်ပေ။ ယနေ့ ငါသည် ရှေးဦးစွာ ဤကွာခြားချက်ကို အဓိကအားဖြင့် မိတ်သဟာယဖွဲ့မည်ဖြစ်ပြီး၊ ထို့နောက်တွင် အန္တိခရစ်တို့၏ ကောက်ကျစ်ဆိုးယုတ်သော၊ အန္တရာယ်ပေးတတ်သော၊ နှင့် လှည့်ဖြားတတ်သော စိတ်သဘောထားများ၏ လက်တွေ့ ဥပမာအချို့နှင့် တိကျသော သရုပ်သကန်များအကြောင်းကို ဆက်လက်ပြောဆိုသွားမည်။ “ကောက်ကျစ်ဆိုးယုတ်သော” “အန္တရာယ်ပေးတတ်သော”ဟူသည်နှင့် “လှည့်ဖြားသော” ဟူသည့် စကားလုံးများ၏ တိုက်ရိုက် အဓိပ္ပာယ်ကို နားလည်ရန် လွယ်ကူသည်။ အခက်အခဲမှာ အန္တိခရစ်များနှင့် သာမန်လူများတွင်ရှိသည့် ဤအမျိုးအစား သရုပ်သကန်များအကြား အနှစ်သာရ ကွာခြားချက်ကို ပိုင်းခြားသိမြင်ခြင်း၊ ငါတို့သည် ဤဖောက်ပြန်ပျက်စီးသော စိတ်သဘောထားများနှင့် အနှစ်သာရများကို ပိုင်ဆိုင်သည့် လူစားမျိုးကို အန္တိခရစ်အဖြစ် အဘယ်ကြောင့် သရုပ်ဖော်ကြသနည်း ဆိုသည့်အချက်နှင့် အန္တိခရစ်များနှင့် သာမန် ဖောက်ပြန်ပျက်စီးသော လူသားမျိုးနွယ်အကြား အနှစ်သာရ၌ ကွာခြားချက်သည် အဘယ်အရာဖြစ်သနည်း ဆိုသည့်အချက်၌ တည်ရှိသည်။ ဦးစွာပထမ၊ အန္တိခရစ်တို့သည် သမ္မာတရားနှင့် ဘုရားသခင်ကို ပွင့်လင်းစွာ ဆန့်ကျင်လိုကြသည်၊ ၎င်းတို့သည် ဘုရားသခင်၏ ရွေးချယ်ထားသောလူများ၊ ဘုရားသခင်၏ နေရာနှင့် လူတို့၏ စိတ်နှလုံးများအတွက် ဘုရားသခင်နှင့် ယှဉ်ပြိုင်ကြပြီး၊ သူတို့သည် လူတို့၏ စိတ်နှလုံးများကို စည်းရုံးသိမ်းသွင်းရန်အပြင် သူတို့ကို အထင်အမြင်မှားစေရန်နှင့် တုံ့ဆိုင်းရပ်တန့်စေရန်အလို့ငှာ ဘုရားသခင်၏ ရွေးချယ်ထားသောလူများအကြား အမျိုးမျိုးသောအမှုများကိုပင် ပြုလုပ်ကြသည်။ အတိုချုပ်အားဖြင့်၊ အန္တိခရစ်တို့၏ လုပ်ဆောင်ချက်များနှင့် အပြုအမူတို့၏ သဘာဝသည် ပွင့်လင်းသည်ဖြစ်စေ လျှို့ဝှက်သည်ဖြစ်စေ ဘုရားသခင်ကို အစဉ် ဆန့်ကျင်ဘက်ပြုခြင်း ဖြစ်သည်။ အဘယ်ကြောင့် ယင်းသည် ဘုရားသခင်ကို ဆန့်ကျင်လိုသည်ဟု ငါ ဆိုရသနည်း။ အကြောင်းမှာ ၎င်းတို့သည် ဘုရားသခင်၏ နှုတ်ကပတ်တော်များက သမ္မာတရားဖြစ်ကြောင်းနှင့် ကိုယ်တော်သည် ဘုရားသခင်ဖြစ်ကြောင်း အပြည့်အဝ ကောင်းစွာ သိကြပါလျက်နှင့်ကိုယ်တော်ကို ဆက်လက် ဆန့်ကျင်ကြဆဲဖြစ်ပြီး မည်သို့ပင် မိတ်သဟာယဖွဲ့စေကာမူ သမ္မာတရားကို လက်မခံကြသောကြောင့် ဖြစ်သည်။ ဥပမာအနေနှင့်၊ အန္တိခရစ်အချို့သည် လူအချို့ကို စည်းရုံးသိမ်းသွင်းပြီး ထိုသူတို့ကို အထင်အမြင်မှားစေကာ ထိန်းချုပ်ကြသည်။ ၎င်းတို့သည် ဤလူတို့ကို ၎င်းတို့အား နာခံစေပြီး ၎င်းတို့နောက်လိုက်စေကာ၊ ထို့နောက် အသင်းတော်မှ စာအုပ်အမျိုးမျိုးနှင့် အချက်အလက်များကို လိမ်လည်လှည့်ဖြား၍ ရယူကြပြီး၊ မိမိတို့၏ ကိုယ်ပိုင် အသင်းတော်များကို တည်ထောင်ကာ မိမိတို့၏ ကိုယ်ပိုင် နယ်ပယ်များကို တည်ထောင်ကြသည်၊ သို့မှသာ ၎င်းတို့အနေဖြင့် မိမိတို့နောက်လိုက်များ၏ နောက်လိုက်ခြင်းနှင့် ကိုးကွယ်ခြင်းကို ခံစားနိုင်ကြမည်ဖြစ်သည်။ ထို့နောက်တွင် ၎င်းတို့သည် အသင်းတော်ကို မှီခိုကပ်ရပ်နေကြတော့သည်။ ဤအပြုအမူမျိုးသည် ဘုရားသခင်၏ ရွေးချယ်ထားသောလူများအတွက် ဘုရားသခင်နှင့် ၎င်းတို့ ယှဉ်ပြိုင်နေခြင်းဖြစ်သည်မှာ ရှင်းလင်းသည်။ ဤသည်မှာ အန္တိခရစ်တို့၏ ထူးခြားသောလက္ခဏာရပ်တစ်ခု မဟုတ်လော။ ဤသိသာထင်ရှားသော လက္ခဏာရပ်အပေါ် အခြေခံ၍ ဤလူတို့ကို အန္တိခရစ်များအဖြစ် သရုပ်ဖော်ခြင်းသည် မတရားခြင်း ဖြစ်သလော။ လုံးဝ မတရားခြင်း မဟုတ်ပေ။ ဤသို့ သရုပ်ဖော်ခြင်းသည် အလွန် တိကျလှပေသည်။ အသင်းတော်အတွင်း၌ အုပ်စုဖွဲ့ပြီး အသင်းတော်ကို ဖြိုဖျက်သည့် အန္တိခရစ်အချို့လည်း ရှိသေးသည်။ ၎င်းတို့သည် အသင်းတော်အတွင်း၌ မိမိတို့၏ အင်အားစုများကို အစဉ်မပြတ် ပျိုးထောင်ကြပြီး၊ ၎င်းတို့နှင့် သဘောမတူသူများကို ဖယ်ကြဉ်ကြသည်။ ထို့နောက် ၎င်းတို့သည် မိမိတို့၏ ကိုယ်ပိုင် အင်အားစုများကို ဖွဲ့စည်းပြီး လူတိုင်းအား ၎င်းတို့ပြောသည့်အရာကို လုပ်ဆောင်စေရန်အတွက် မိမိတို့ကို နားထောင်ပြီး နောက်လိုက်သည့်သူများကို မိမိတို့အနားတွင် ထားရှိ သည်။ ဤသည်မှာ ၎င်းတို့က ကိုယ်ပိုင် နယ်ပယ်များ ထူထောင်နေခြင်း မဟုတ်လော။ အထက်၌ မည်သည့် အလုပ်အစီအစဉ်များ သို့မဟုတ် သတ်မှတ်ချက်များ ရှိသည်ဖြစ်စေ၊ ၎င်းတို့သည် ထိုအရာများကိုလိုက်နာဆောင်ရွက်ရန် ငြင်းပယ်ကြပြီး ယင်းအစား မိမိတို့၏ သဘောအတိုင်း ပြုမူကာ မိမိတို့၏ နောက်လိုက်များကို အထက်အား ပွင့်လင်းစွာ ဆန့်ကျင်ရန် ဦးဆောင်ကြသည်။ ဥပမာအနေနှင့်၊ ဘုရားအိမ်တော်က အမှန်တကယ်ဖြစ်သောအလုပ်ကို လုပ်ဆောင်နိုင်စွမ်းမရှိသည့် ခေါင်းဆောင်များနှင့် အမှုဆောင်များကို ချက်ချင်း ထုတ်ပယ်ရန် တောင်းဆိုသည်။ သို့ရာတွင် အန္တိခရစ်တစ်ဦးကမူ၊ “ခေါင်းဆောင်နှင့် အမှုဆောင်အချို့သည် အမှန်တကယ်ဖြစ်သောအလုပ်ကို လုပ်ဆောင်နိုင်စွမ်းမရှိသော်လည်း၊ သူတို့က ငါ့ကို ထောက်ခံကြသည်၊ အသိအမှတ်ပြုသည်၊ ပြီးလျှင် ငါက သူတို့ကို ပျိုးထောင်ပေးနေခဲ့ခြင်းဖြစ်သည်။ အထက်က ငါ့ကို ဦးစွာ မဖယ်ရှားမချင်း ဤလူများကို ထုတ်ပယ်ဖို့ဆိုသည်မှာ မဖြစ်နိုင်ပါ” ဟု တွေးကြလိမ့်မည်။ ငါ့အား ပြောလော့၊ ထိုအသင်းတော်သည် ထိုအန္တိခရစ်၏ ထိန်းချုပ်မှုအောက်တွင် ရှိသည် မဟုတ်လော။ ဘုရားအိမ်တော်၏ အလုပ်အစီအစဉ်များသည် အန္တိခရစ်ကို မကျော်ဖြတ်နိုင်သကဲ့သို့ ဆောင်ရွက်၍ မရနိုင်ပေ။ အလုပ်အစီအစဉ်များကို ထုတ်ပြန်ထားသည်မှာ အချိန်ကြာမြင့်နေပြီဖြစ်ပြီး၊ အသင်းတော်တိုင်းက ၎င်းတို့ကို မည်သို့ ဆောင်ရွက်ခဲ့ကြောင်း၊ ဥပမာ၊ မည်သူက မည်သည့် အခြေအနေများကြောင့် မိမိတို့၏တာဝန်ပြင်ပေးခြင်းခံရသည် သို့မဟုတ် ထုတ်ပယ်ခြင်း ခံခဲ့ရသည်ဟူသည်တို့ကို ပြန်လည်သတင်းပို့ပြီးဖြစ်ချိန်တွင် အန္တိခရစ်မှာမူ မည်သည့်အရာကိုမျှ လုံးဝ ပြန်လည်သတင်းပို့ခြင်းမရှိဘဲ မည်သူတစ်ဦးတစ်ယောက်၏ တာဝန်ခန့်အပ်ခံရမှုကိုမျှ လုံးဝ ပြင်ပေးခြင်းမရှိပေ။ လူအချို့သည် မိမိတို့၏ တာဝန်များတွင် အစဉ် ဝတ်ကျေတမ်းကျေ လုပ်ဆောင်ကြရာ၊ ယင်းက အသင်းတော်၏ အလုပ်ကို ပြင်းထန်စွာ ထိခိုက်စေသော်လည်း၊ အန္တိခရစ်သည် ထိုသူတို့၏ တာဝန်ခန့်အပ်ခံရမှုကို ပြင်ပေးခြင်းမရှိပေ။ အထက်က ထိုအန္တိခရစ်အား ဤလူတို့ကို ထုတ်ပယ်ရန် တိုက်ရိုက်ပြောသည့်အခါ၌ပင်၊ ၎င်းတို့ထံမှ မည်သည့်တုံ့ပြန်ချက်မျှမရှိဘဲ အချိန်ကြာမြင့်စွာ ကုန်လွန်သွားသည်။ ဤနေရာတွင် ပြဿနာတစ်ခု ရှိသည် မဟုတ်လော။ အထက်က ၎င်းတို့ကို အလုပ်အစီအစဉ်များ အကောင်အထည်ဖော်ရန် တောင်းဆိုသည့်အခါ သို့မဟုတ် တစ်စုံတစ်ခုကို စုံစမ်းမေးမြန်းရန် ကြိုးစားသည့်အခါ၊ အန္တိခရစ်နှင့်ပတ်သက်၍ ရှေ့ဆက်မရ ဖြစ်သွားသည်။ အသင်းတော်ရှိ ညီအစ်ကိုမောင်နှမများသည် ထိုအကြောင်းကို ဘာမျှ မသိကြပေ။ ၎င်းတို့သည် မည်သည့် သတင်းစကားကိုမျှ မရရှိကြသကဲ့သို့ အထက်နှင့် အဆက်အသွယ်ပြတ်နေသည်။ အသင်းတော်သည် ထိုလူတစ်ဦး၏ ထိန်းချုပ်မှုအောက်တွင် လုံးဝ ရှိနေသည်။ ဤနည်းအတိုင်း ပြုမူသော အန္တိခရစ်တစ်ဦး၏ သဘာဝသည် အဘယ်နည်း။ ဤသည်မှာ အန္တိခရစ်က အသင်းတော်တစ်ခုကို အာဏာသိမ်းခြင်း ဖြစ်သည်။ အန္တိခရစ်တို့သည် အသင်းတော်ထဲတွင် အုပ်စုဖွဲ့ကြသည်၊ ၎င်းတို့သည် မိမိတို့၏ ကိုယ်ပိုင် နယ်ပယ်များကို တည်ထောင်ကြသည်၊ ဘုရားအိမ်တော်ကို ဆန့်ကျင်ကြပြီး၊ ဘုရားသခင်၏ ရွေးချယ်ထားသောလူများကို ထိခိုက်နစ်နာစေကြသည်။ လူတို့သည် သန့်ရှင်းသော ဝိညာဉ်တော်၏ အလုပ်ကို ဆုံးရှုံးကြသည်၊ ဘုရားသခင်၏ မျက်မှောက်တော်ကို မခံစားရကြ၊ ငြိမ်သက်ခြင်း သို့မဟုတ် ဝမ်းမြောက်ခြင်း မရှိ၊ ဘုရားသခင်၌ ယုံကြည်ခြင်း ပျောက်ဆုံးကြပြီး၊ မိမိတို့၏ တာဝန်များကို တက်ကြွစွာ ၎င်းတို့ မထမ်းဆောင်နိုင်ကြတော့ပေ။ ၎င်းတို့သည် အပျက်သဘောဆောင်ပြီး အကျင့်ပျက်ခြင်းပင်ဖြစ်လာကြကာ၊ ၎င်းတို့၏ အသက်တာများ ရပ်တန့်သွားကြသည်။ ဤအရာအားလုံးသည် အန္တိခရစ်များက လူတို့ကို အထင်အမြင်မှားစေခြင်းနှင့် ထိန်းချုပ်ခြင်း၏ အကျိုးဆက်များ ဖြစ်ကြသည်။ ယခုတွင်၊ တရုတ်ပြည်မကြီးရှိ သင်းအုပ်နယ်မြေအားလုံးတွင်၊ ခေါင်းဆောင်အတုအယောင်များနှင့် အန္တိခရစ်များ အမြောက်အမြား ဖော်ထုတ်ခံရပြီး ထုတ်ပယ်ခြင်း ခံခဲ့ရပြီးဖြစ်သည်။ ၎င်းတို့ထဲတွင်၊ အမှန်တကယ်ဖြစ်သောအလုပ်ကို မလုပ်ဆောင်ခဲ့သည့် ခေါင်းဆောင်အတုအယောင်များနှင့် အမှုဆောင်အတုအယောင်အချို့ ရှိသည်။ ၎င်းတို့အားလုံးသည် အန္တိခရစ်တို့၏ သရုပ်သကန်များကို ပိုင်ဆိုင်ခဲ့ကြပြီး၊ ၎င်းတို့အားလုံးတွင် အန္တိခရစ်တို့၏ စိတ်သဘောထားများ ရှိခဲ့ကြသော်လည်း၊ အန္တိခရစ်များ ဖြစ်သည့်အဆင့်သို့ လုံးလုံးလျားလျားမရောက်ရှိခဲ့ကြသဖြင့်၊ ၎င်းတို့သည် ထုတ်ပယ်ရုံမျှထုတ်ပယ်ခံခဲ့ကြရခြင်း ဖြစ်သည်။ သို့ရာတွင်၊ လူအချို့မှာမူ ထင်ရာစိုင်းကြသည်၊ ၎င်းတို့သည် အရာရာတိုင်းတွင် အဆုံးအဖြတ်ပေးကြသည်၊ ၎င်းတို့သည် အလုပ်အစီအစဉ်များကို လုံးဝ ချိုးဖောက်ပြီး မိမိတို့၏ သဘောအတိုင်း ပြုမူခဲ့ကြသဖြင့်၊ အန္တိခရစ်များအဖြစ် သရုပ်ဖော်ခြင်းခံရကာ နှင်ထုတ်ခြင်းခံခဲ့ရသည်။ ခေါင်းဆောင်အတုအယောင်များနှင့် အန္တိခရစ်များကို ဤနည်းဖြင့် ဖော်ထုတ် ကိုင်တွယ်ဖြေရှင်းခြင်းသည် အလွန်ကောင်းပေသည်။ ငါသည် ဤအစီရင်ခံစာများကို မြင်တွေ့ရသည့်အခါ အလွန် ဝမ်းမြောက်ဝမ်းသာဖြစ်မိသည်၊ အကြောင်းမှာ ယင်းက ဘုရားသခင်၏ ရွေးချယ်ထားသောလူအချို့သည် နှစ်ပေါင်းများစွာ တရားဒေသနာများကို နားထောင်ပြီးနောက် သမ္မာတရား အနည်းငယ်ကို နားလည်သဘောပေါက်လာကြပြီဖြစ်ကြောင်း ပြသသောကြောင့် ဖြစ်သည်။ အဘယ်ကြောင့် ၎င်းတို့က သမ္မာတရား အနည်းငယ်ကို နားလည်သဘောပေါက်လာကြပြီဟု ငါ ဆိုရသနည်း။ အကြောင်းမှာ ၎င်းတို့သည် ဤတရားဒေသနာများကို နားထောင်ပြီးနောက်၊ ၎င်းတို့ကို ဘဝ၌ ကြုံတွေ့ရသော ကိစ္စရပ်အချို့နှင့် ဆက်စပ်ပြီး ကျင့်သုံးနိုင်ကြသောကြောင့် ဖြစ်သည်။ ၎င်းတို့သည် ဤသမ္မာတရားများကို နားထောင်ပြီးသည့်နောက်တွင်၊ ထိုအချိန်၌ ထိုသမ္မာတရားများကို အမှန်တကယ် နားလည်ခြင်းမရှိကောင်းမရှိနိုင်ကြသော်လည်း၊ နောက်ပိုင်းတွင် လူများနှင့် ဖြစ်ရပ်များအပေါ် ပိုင်းခြားသိမြင်မှု ရရှိလာကြသည်။ ၎င်းတို့သည် ထင်ရာစိုင်းသူများ၊ အမှန်တကယ်ဖြစ်သောအလုပ်ကို မလုပ်ဆောင်သူများ၊ အမှန်တကယ်ဖြစ်သော ပြဿနာများကို မဖြေရှင်းနိုင်သူများ၊ မိမိတို့၏ တာဝန်များတွင် ဝတ်ကျေတမ်းကျေ လုပ်ဆောင်ပြီး ဝန်ကို မထမ်းသူများနှင့် တာဝန်သိစိတ် မရှိသူများကို တိုင်းတာနိုင်သည့် စည်းမျဉ်းများနှင့် စံနှုန်းများ ရှိလာကြသည်။ ဤသည်မှာ တိုးတက်မှု မဟုတ်လော။ ဤသည်မှာ တိုးတက်မှု ဖြစ်သည်။ ၎င်းတို့သည် ဝိညာဉ်ရင့်ကျက်မှုကို ပိုင်ဆိုင်ပြီဟု ဆို၍မရနိုင်ပေ။ ၎င်းတို့အနေဖြင့် သမ္မာတရား အနည်းငယ်ကို နားလည်သဘောပေါက်လာခြင်းမျှသာ ဖြစ်သည်။ ဘုရားသခင်၏ ရွေးချယ်ထားသောလူများသည် ခေါင်းဆောင်အတုအယောင်များ၊ အန္တိခရစ်များနှင့် အမှန်တကယ်ဖြစ်သောအလုပ်ကို မဆောင်ရွက်သူများနှင့် မိမိတို့၏ အလုပ်တွင် အရည်အချင်းမပြည့်မီသူအချို့ကို အနည်းငယ် ပိုင်းခြားသိမြင်မှု ရှိလာကြသည်။ ဤသည်မှာ ကောင်းသောအရာ မဟုတ်လော။ ဤသည်မှာ ကောင်းသောအရာ ဖြစ်သည်၊ ဘုရားသခင်၏ ရွေးချယ်ထားသောလူများက သမ္မာတရားကို နားလည်ပြီး ပိုင်းခြားသိမြင်မှု ရှိသည်ကိုလည်းကောင်း၊ ၎င်းတို့သည် ဘုရားသခင်၏ ဘက်၌ ရပ်တည်နိုင်ပြီး အသင်းတော်၏ အလုပ်ကို ကာကွယ်စောင့်ရှောက်နိုင်သည်ကိုလည်းကောင်း ထိုအရာက ပြသသည်။ ဤသည်မှာ ဂုဏ်ပြုထိုက်သော အရာတစ်ခု ဖြစ်သည်။ သမ္မာတရားကို နားလည်သူများအား အန္တိခရစ်များက အထင်အမြင်မှားစေရန် မဖြစ်နိုင်ပေ။ ၎င်းတို့သည် သမ္မာတရားအား နားမလည်သူများနှင့် ပိုင်းခြားသိမြင်မှု မရှိသူများကို အချိန်တစ်ခုအထိ အထင်အမြင်မှားစေနိုင်သော်လည်း၊ အချိန်မည်မျှ ကြာသနည်း။ လူတို့သည် သမ္မာတရားကို ပို၍ နားလည်လာပြီး ဘုရားသခင်၌ သူတို့၏ ယုံကြည်ခြင်း ပို၍ ရှိလာလေ၊ ၎င်းတို့သည် အန္တိခရစ်တို့၏ ချည်နှောင်မှုများနှင့် ဘောင်ခတ်မှုများကို ငြင်းပယ်ပြီး ဖယ်ရှားရန် အချိန် ပို၍ တိုတောင်းလေဖြစ်လိမ့်မည်ဟု ငါ ယုံကြည်သည်။ ထို့ကြောင့်၊ ငါတို့သည် အန္တိခရစ်တို့၏ အမျိုးမျိုးသော အသေးစိတ် သရုပ်သကန်များအပေါ် မိတ်သဟာယဖွဲ့ရန်မှာ လိုအပ်နေဆဲ ဖြစ်သည်၊ သို့မဟုတ်ပါက အကယ်၍ လူတို့သည် အန္တိခရစ်များ၏ အထင်အမြင်မှားစေခြင်းနှင့် ထိန်းချုပ်ခြင်းကို ခံရလျှင်၊ ၎င်းတို့အတွက် ကယ်တင်ခြင်းကို ရရှိရန် အလွန် ခက်ခဲလိမ့်မည်။

ငါသည် အန္တိခရစ်တို့၏ သရုပ်သကန်များနှင့် ထိုသို့သော လူများကို အန္တိခရစ်များအဖြစ် သရုပ်ဖော်ရသည့် အကြောင်းရင်းများကို ရိုးရှင်းသော ဝေါဟာရများဖြင့် ယခုတင် ရှင်းပြခဲ့သည်။ သို့ဆိုလျှင်၊ အန္တိခရစ်တို့၏ ကောက်ကျစ်ဆိုးယုတ်မှု၊ အန္တရာယ်ပေးတတ်မှု၊ နှင့် လှည့်ဖြားတတ်မှုတို့၏ သရုပ်သကန်များနှင့် သာမန်လူများ၏ ဖောက်ပြန်ပျက်စီးသော စိတ်သဘောထားများအကြား ကွာခြားချက်ကား အဘယ်နည်း။ သင်သည် ဤအကြောင်းကို နားလည်သဘောပေါက်မှု တစ်ခုတလေ ရှိသလော။ ငါသည် သင်တို့အား အဖြစ်အပျက်တစ်ခု ပြောပြမည်။ ဤအဖြစ်အပျက်သည် ကောက်ကျစ်ဆိုးယုတ်မှု၊ အန္တရာယ်ပေးတတ်မှု၊ လှည့်ဖြားတတ်မှုတို့နှင့် မုချ ဆက်စပ်နေသည်။ သမ္မာကျမ်းစာတွင်ရှိသည့် ယောဘဝတ္ထုက ဘုရားသခင်နှင့် စာတန်အကြား စကားပြောဆိုမှုတစ်ခုကို မှတ်တမ်းတင်ထားသည်။ ဘုရားသခင်က စာတန်အား “သင်သည်အဘယ်အရပ်က လာသနည်း” (ယောဘ ၁:၇) ဟု မေးတော်မူသည်။ စာတန်က မည်သို့ ပြန်လည်ဖြေကြားသနည်း။ (“မြေကြီးပေါ်မှာ လှည့်လည်၍ အရပ်ရပ်သွားလာခြင်း အမှုထဲက လာပါသည်။” (ယောဘ ဝတ္ထု ၁:၇) ဟူ၍ ဖြစ်ပါသည်။) ယခုအချိန်အထိ၊ လူများသည် ဤစကားဖြင့် စာတန်က မည်သည့်အရာ ဆိုလိုသည်ကို နားမလည်ကြသေးပေ။ ဤသည်ကို စိတ်သဘောထားဟု ခေါ်သည်။ အဘယ်ကြောင့် လူများသည် စာတန် ဆိုလိုသည့်အရာကို နားမလည်ကြသနည်း။ အကြောင်းမှာ စာတန်က အတိအကျ မည်သည့်အရပ်က လာသည်ကို သင် နားလည်သဘောပေါက်ခြင်း မရှိသေးသောကြောင့် ဖြစ်သည်။ စာတန်ပြောခဲ့သည့်အရာနှင့် ပတ်သက်၍ ပြဿနာကား အဘယ်နည်း။ ဤနေရာတွင် စိတ်သဘောထားတစ်မျိုး ရှိနေပြီး၊ ယင်းမှာကောက်ကျစ်ဆိုးယုတ်သော စိတ်သဘောထား ဖြစ်သည်။ ထိုစာကြောင်းအကြောင်း ပြောဆိုခြင်းကို ယခု အပြီးသတ်ပြီး နောက်တွင်ဖြစ်လာသည့်အရာကို စိစစ်ကြပါစို့။ စာတန်သည် ဘုရားသခင်၏ ရှေ့မှောက်သို့ ရောက်လာပြီး၊ ကိုယ်တော်၏ မေးခွန်းကို ၎င်းက ပြန်လည်ဖြေကြားပြီးနောက်၊ ဘုရားသခင်က စာတန်အား၊“ငါ့ကျွန်ယောဘကိုဆင်ခြင်ပြီလော။ မြေကြီးပေါ်မှာသူနှင့် တူသောသူ တယောက်မျှမရှိ။ စုံလင်ဖြောင့်မတ်ပေ၏။ ဘုရားသခင်ကို ကြောက်ရွံ့သောသူ၊ မကောင်းသောအကျင့်ကို ရှောင်သောသူဖြစ်သည်။”(ယောဘ ၁:၈)ဟု ပြောသည်။ ဘုရားသခင် ဤသို့ မိန့်တော်မူသည်ကို ကြားရသည့်အခါ သာမန်လူတစ်ဦးသည် အများအားဖြင့် မည်သို့ တုံ့ပြန်မှု ရှိမည်နည်း။ (သသည် ယောဘ မည်သို့ ပြုမူခဲ့သည်ကို သိမြင်လိုမည်ဖြစ်သည်။) လူများက၊ “ယောဘသည် ဘုရားသခင်ကို ကြောက်ရွံ့ပြီး မကောင်းမှုကို ရှောင်ကြဉ်ကာ သူသည် စုံလင်သောသူ ဖြစ်ခဲ့သည်။ ငါ သူ့ကို အမှန်တကယ် လေးစားကြည်ညိုသည်” ဟု ချက်ချင်း တွေးကြမည်ဖြစ်သည်။ ဤလေးစားကြည်ညိုမှုသည် မည်သည့်နေရာမှ လာသနည်း။ ယင်းသည် ပုံမှန် လူ့သဘာဝအတွင်းရှိ အပြုသဘောဆောင်သောအရာများအတွက် တောင့်တခြင်း၊ ချစ်ခြင်းမေတ္တာ၊ နှင့် တမ်းတခြင်း တစ်မျိုးမှ ပေါ်ပေါက်လာသည်။ သို့ရာတွင်၊ သင်သည် သမ္မာတရားကို မချစ်မြတ်နိုးပါက၊ ဤစကားများကို ကြားရသည့်အခါ အဘယ်အရာကို သင် ပြလိမ့်မည်နည်း။ (မထီမဲ့မြင်ပြုခြင်းဖြစ်သည်။) သင်သည် ဤစကားများကို မထီမဲ့မြင်ပြုပြီး လျစ်လျူရှုလိမ့်မည်။ ထို့နောက် လူအချို့က၊ “ဘုရားသခင်ကို ကြောက်ရွံ့ပြီး မကောင်းမှုကို ရှောင်ကြဉ်ခြင်းလော။ ဤကြောက်ရွံ့ခြင်းသည် မည်သည့်အရာဖြစ်သနည်း။‘မကောင်းမှုကို ရှောင်ကြဉ်ခြင်း’ သည်မှာ မည်သည့်အရာကို ဆိုလိုသနည်း။ ယနေ့ခေတ်တွင် စုံလင်သောလူကို မည်သည့်နေရာတွင် ရှာတွေ့နိုင်မည်နည်း”ဟု တွေးကြသည်။ ၎င်းတို့သည် ဤစကားများကို ကြားပြီးနောက် ဘာမျှ မခံစားရဟု ထင်ရသည်။ သို့ဆိုလျှင် ၎င်းတို့၌ ဤအရာများကို တမ်းတပြီး တောင့်တသော စိတ်နှလုံးများ ရှိသလော။ (မရှိပါ။) ၎င်းတို့သည် ဤအရာများကို ဆန္ဒရှိကြသလော။ (ဆန္ဒမရှိကြပါ။) ၎င်းတို့သည် ဤအတွင်းရှိ အသေးစိတ်အချက်များက မည်သည့်အရာများဖြစ်သည်ကို အတိအကျ နားလည်ရန် ရှာဖွေဖို့ ဆန္ဒရှိကြသလော။ ၎င်းတို့၌ ဤဆန္ဒ ရှိသလော။ မရှိပေ။ ၎င်းတို့၏ စိတ်နှလုံးများထဲတွင်၊ ၎င်းတို့ မသိချင်ကြပေ။ ယောဘသည် ဘုရားသခင်ကို ကြောက်ရွံ့၍ မကောင်းမှုကို ရှောင်ကြဉ်သည်၊ စုံလင်သောသူ ဖြစ်သည်ဟု ဘုရားသခင် မိန့်တော်မူသည်ကို ကြားရသည့်အခါ ပုံမှန်မဟုတ်သော တုံ့ပြန်မှုပြုသည့် နောက်ထပ် လူတစ်မျိုးရှိသည်။ ၎င်းတို့က “်အလို၊ ယောဘသည် ဘုရားသခင်ကို ကြောက်ရွံ့၍ မကောင်းမှုကို ရှောင်ကြဉ်သည်၊ စုံလင်သောသူ ဖြစ်သည်လော၊ ထိုသို့သော လူတစ်ဦး ရှိသလော။ သူ မည်သို့ စုံလင်သွားခဲ့သည်ကို ငါ့အား ပြပါလော့။ ထိုအရာကို ငါ မယုံပါ” ဟု ဆိုကြသည်။ ဤသို့သော အတွေးအခေါ်များနှင့် သရုပ်သကန်များ ရှိသည့် ဤကဲ့သို့သော လူများအနေဖြင့် ဘုရားသခင် မိန့်တော်မူခဲ့သော စကားများကို အမှန်တကယ် ယုံကြည်ပြီး အသိအမှတ်ပြုကြသလော။ (မပြုကြပါ။) ၎င်းတို့သည် ထိုအရာများကို အမှန်တကယ် မယုံကြည် သို့မဟုတ် အသိအမှတ်မပြုကြပေ။ ပထမဦးစွာ၊ သေချာသော အချက်တစ်ချက် ရှိသည်၊ ဘုရားသခင် မိန့်တော်မူသည့်အရာက မှန်ကန်ကြောင်း၊ ယုံကြည်စိတ်ချရကြောင်း၊ နှင့် တိကျမှန်ကန်ကြောင်းကို ၎င်းတို့ အသိအမှတ်မပြုကြပေ။ ၎င်းတို့သည် ဘုရားသခင်၏ နှုတ်ကပတ်တော်များကို သမ္မာတရားအဖြစ်လည်းကောင်း၊ ဖန်ဆင်းရှင်၏ နှုတ်ကပတ်တော်များအဖြစ်လည်းကောင်း၊ လူသားမျိုးနွယ်အားလုံးအတွက် အထွတ်အထိပ် သမ္မာတရားအဖြစ်လည်းကောင်း မမှတ်ယူကြပေ။ ၎င်းတို့သည် ဘုရားသခင်၏ နှုတ်ကပတ်တော်များကို သမ္မာတရားအဖြစ် မမှတ်ယူကြသည့်အတွက်၊ ၊ ဘုရားသခင်ကို မည်သို့ မှတ်ယူကြသနည်း။ ၎င်းတို့သည် ဘုရားသခင်၏ နှုတ်ကပတ်တော်များကို ငြင်းပယ်ကြသည့်အတွက်၊ ဘုရားသခင်သည် ဘုရားသခင်ဖြစ်ကြောင်းကို အသိအမှတ်ပြုဖို့ ဖြစ်နိုင်မည်လော။ သေချာပေါက် အသိအမှတ်မပြုနိုင်ကြပေ။ အဘယ်ကြောင့်ဆိုသော်၎င်းတို့သည် ဘုရားသခင်၏ နှုတ်ကပတ်တော်များကို ငြင်းပယ်ကြသောကြောင့်၊ ဘုရားသခင်၏ ရှုထောင့်အမြင်ကို ငြင်းပယ်ကြပြီး ဘုရားသခင်၏ မိန့်မြွက်ချက်များကို ငြင်းပယ်ကြသောကြောင့် ဖြစ်ပြီး၊ ယင်း၏ ဆိုလိုရင်းမှာ ၎င်းတို့အနေဖြင့် ဘုရားသခင်၏ တည်ရှိမှုကို ငြင်းပယ်ကြပြီး ကိုယ်တော်သည် အပြုသဘောဆောင်သော အရာအားလုံး၏ လက်တွေ့ကျမှုဖြစ်သည်ကို ငြင်းပယ်ကြခြင်း ဖြစ်သည်။ ဤသည်မှာ သေချာပေသည်။ အခြားအချက်တစ်ချက် ရှိသေးသည်၊ ဤကဲ့သို့သော လူများအနေဖြင့် ဘုရားသခင် ဖော်ပြသည့် သမ္မာတရားများအပေါ်တွင်လည်းကောင်း၊ အပြုသဘောဆောင်သောနှင့် အပျက်သဘောဆောင်သော အရာများအပေါ်တွင်လည်းကောင်း မည်သို့သော သဘောထား ရှိကြသနည်း။ ပြီးလျှင် ၎င်းတို့၏ သဘောထားနောက်ကွယ်တွင် မည်သည့် စိတ်သဘောထား တည်ရှိနေသနည်း။ ယောဘအပေါ် ၎င်းတို့၏ အမြင်ကား အဘယ်နည်း။ “ယင်းမှာ မဖြစ်နိုင်ပါ။ လောကတွင် ထိုသို့သော လူတစ်ဦးတလေ ရှိနိုင်ဦးမည်လော။ ဤသည်မှာ သမိုင်းဝင် အမွေအနှစ်တစ်ခုသက်သက်ဖြစ်သည်။ ထိုကဲ့သို့သော လူတစ်ဦးသည် ဤလောကတွင် အသက်မရှင်သင့်ပါ။ သစ္စာဖောက်ပြီး မကောင်းသောသူများ၊ ဆိုးယုတ်ပြီး ကောက်ကျစ်ဆိုးယုတ်သောသများသာ အသက်ရှင်သင့်သည်။ ယောဘကဲ့သို့သော လူများက သေသင့်သည်၊ အသက်မရှင်သင့်ပါ။” ဤသည်မှာ မည်သည့် စိတ်သဘောထားနည်း။ (ကောက်ကျစ်ဆိုးယုတ်မှုဖြစ်သည်။) ဤသည်မှာ စာတန်၏ ကောက်ကျစ်ဆိုးယုတ်မှု ဖြစ်သည်။ ယခု လူသားမျိုးနွယ်ထဲတွင် စာတန်နှင့် တစ်ထပ်တည်းတူညီသော ကောက်ကျစ်ဆိုးယုတ်သည့် စိတ်သဘောထား ရှိသည့် လူများတစ်ဦးတလေ ရှိသလော။ ဘုရားသခင်က “ယောဘသည် ဘုရားသခင်ကို ကြောက်ရွံ့၍ မကောင်းမှုကို ရှောင်ကြဉ်သည်၊ စုံလင်သောသူ ဖြစ်သည်” ဟု မိန့်တော်မူသည်ကို ကြားသည့်အခါ၊ မည်သည့် လူစားမျိုးတို့သည် ယုံကြည်လက်ခံခြင်းမရှိဘဲ၊ လက်ခံရန်ငြင်းပယ်ကာ ရွံရှာခြင်းနှင့် စက်ဆုပ်ခြင်းကို ခံစားရပြီး၊ မိမိတို့၏ စိတ်နှလုံးထဲ၌ ကျိန်ဆဲခြင်းများပင် ပေါ်ပေါက်လာကြသနည်း။ ထိုသို့သော အရာများ ဖြစ်ပေါ်သည့် လူများသည် စာတန်၏ အမျိုးအစားဖြစ်သည်ဟု ကျွန်ုပ်တို့ ဆိုနိုင်သလော။ (ဆိုနိုင်ပါသည်။) သို့ဆိုလျှင်၊ ဤလူတို့ကို အန္တိခရစ်များအဖြစ် သရုပ်ဖော်ခြင်းသည် လွန်ကဲရာကျပါသလော။ (မကျပါ။) ဘုရားသခင်သည် စာတန်အား “ယောဘသည် ဘုရားသခင်ကို ကြောက်ရွံ့၍ မကောင်းမှုကို ရှောင်ကြဉ်သည်၊ စုံလင်သောသူ ဖြစ်သည်” ဟု ရှင်းလင်းစွာနှင့် လေးနက်တည်ကြည်စွာ မိန့်တော်မူခဲ့ချိန်တွင်၊ စာတန်၏ သဘောထားကား အဘယ်နည်း။ ၎င်းသည် ဤအမှန်တရားကို သံသယဝင်ခဲ့သည်။ ဤအရာ၏ ရှုထောင့်တစ်ခုမှာ စာတန်က ယောဘအား ထိုသို့သော လူစားမျိုးဖြစ်သည်ကို သံသယဝင်ပြီး ယင်းမှာ ဖြစ်နိုင်သည်ဟု မထင်ခဲ့ခြင်း ဖြစ်သည်။ ဤသည်မှာ စာတန်သည် ကောက်ကျစ်ဆိုးယုတ်ပြီး အရာခပ်သိမ်းသည် ကောက်ကျစ်ဆိုးယုတ်သည်ဟု ယုံကြည်သောကြောင့် ဖြစ်သည်။ ၎င်းသည် လူသားမျိုးနွယ်အကြားတွင် အလွန် အံ့သြဖွယ်ကောင်းသောလူတစ်ဦး၊ ဘုရားသခင်က အမှန်တကယ် စုံလင်သည်ဟု ရှုမြင်နိုင်သည့် လူတစ်ဦး ရှိနိုင်သည်ကို မယုံကြည်ခဲ့ပေ။ စာတန်သည် ဤအမှန်တရားကို မယုံကြည်ခဲ့ပေ။ အခြားရှုထောင့်တစ်ခုမှာ ဘုရားသခင်သည် ယောဘကဲ့သို့သော လူကောင်းတစ်ဦးကို တွေ့ရှိခဲ့သည့်အခါ၊ စာတန်သည် ၎င်း၏ စိတ်နှလုံးထဲ၌ မည်သည့်အရာကို ခံစားခဲ့ရသနည်း။ ပထမဦးစွာ၊ အပေါ်ယံအဆန်ဆုံးအဆင့်အားတွင်၊ ၎င်းက၊ “စုံလင်သောလူတစ်ဦး အဘယ်သို့ ရှိနိုင်မည်နည်း။ ငါသည် လူသားမျိုးနွယ်အားလုံးကို ဖောက်ပြန်ပျက်စီးစေခဲ့ပြီးပြီ မဟုတ်လော။ လူတို့သည် ငါနှင့် အတူတူချည်းသာ ဖြစ်သည်။ သူတို့အားလုံးက သင့်ကို သစ္စာဖောက်ကြပြီးဖြစ်သည်။ အဘယ်သို့ဖြစ်ပြီး သူတို့သည် သင့်နောက်သို့ လိုက်နိုင်မည်နည်း”ဟု တွေးလျက် မနာလိုဖြစ်သည်။ အကယ်၍ ကျွန်ုပ်တို့သည် ယင်းကို လူ့ဘာသာစကားဖြင့် ပြန်ဆိုမည်ဆိုလျှင်၊ ဤသည်မှာ ၎င်း၏ စိတ်နေစိတ်ထား ဖြစ်ခဲ့သည်။ ထိုအရာ ဖြစ်နိုင်သည်ဟု စာတန်က မယုံကြည်ခဲ့ပေ။ ဤအရာ ဖြစ်နိုင်သည်ကို ၎င်း၏ မယုံကြည်ခြင်းတွင် အပိုင်းနှစ်ပိုင်း ရှိသည်၊ ပထမမှာ စာတန်သည် ယောဘ မတည်ရှိစေရန် ဆန္ဒရှိခဲ့ခြင်း ဖြစ်ပြီး၊ ဒုတိယမှာ စာတန်က “သူ တကယ်တည်ရှိနေလျှင်ပင် ငါ သူ့ကို အမြစ်ဖြတ်သုတ်သင်မည်” ဟု တွေးခဲ့ခြင်း ဖြစ်သည်။ ဤသည်မှာ စာတန်၏ ကောက်ကျစ်ဆိုးယုတ်မှု ဖြစ်ခဲ့သည် မဟုတ်လော။ (ဟုတ်ပါသည်။) ဤသည်မှာ စာတန်၏ ကောက်ကျစ်ဆိုးယုတ်မှု ဖြစ်ခဲ့သည်။ ၎င်းသည် စစ်မှန်သည့် လူကောင်းတစ်ဦး၊ ဘုရားသခင်ကို ကြောက်ရွံ့ပြီး မကောင်းမှုကို ရှောင်ကြဉ်သူတစ်ဦး ဘုရားသခင်၏ ရှေ့မှောက်သို့ ရောက်လာရန် မလိုလားခဲ့ပေ။ ယောဘကဲ့သို့သော လူတစ်ဦးကို လောက၌ အသက်မရှင်စေချင်ခဲ့ပေ။ ၎င်းသည် ဤကဲ့သို့သော လူတစ်ဦး ထွက်ပေါ်စေချင်ရန် မဆိုထားနှင့်၊ တည်ပင်မတည်ရှိစေချင်ခဲ့ပေ။ ဤသည်မှာ စာတန်၏ ကောက်ကျစ်ဆိုးယုတ်မှု ဖြစ်ခဲ့သည်။ စာတန်၏ ကောက်ကျစ်ဆိုးယုတ်မှု ရင်းမြစ်မှာ အဘယ်နည်း။ ၎င်း၏ စိတ်သဘောထား အနှစ်သာရသည် ကောက်ကျစ်ဆိုးယုတ်၏။ ထို့အပြင်၊ စာတန်သည် အပြုသဘောဆောင်သော အရာအားလုံးအပေါ်လည်း ရန်လိုပေသည်။ “အပြုသဘောဆောင်သော အရာအားလုံး” တွင် အဘယ်အရာ ပါဝင်သနည်း။ ဘုရားသခင်ကို ကြောက်ရွံ့ပြီး မကောင်းမှုကို ရှောင်ကြဉ်ကာ စုံလင်သောသူများ ပါဝင်သည်။ ယောဘအပေါ် ရန်လိုခြင်းအားဖြင့်၊ စာတန်သည် ဘုရားသခင်ကို ရန်လိုနေခဲ့ခြင်း မဟုတ်လော။ (ဟုတ်ပါသည်။) ဤသည်မှာ အမှုအရာများ အမှန်တကယ် ဖြစ်ခဲ့ပုံဖြစ်သည်။ စာတန်သည် ယောဘအပေါ် ရန်လိုနေစဉ်၊ ဘုရားသခင်ကိုလည်း မုန်းတီးနေခဲ့သည်။ ၎င်းသည် မည်သူ့ကိုမျှ ဘုရားသခင်အား မကိုးကွယ်စေလိုခဲ့ပေ။ ဤအရာက ၎င်းအား အပျော်ရွှင်ဆုံး ဖြစ်စေမည်ဖြစ်ပြီး ဤသည်မှာ ၎င်း၏ အကြီးမားဆုံး ဆန္ဒ ဖြစ်ခဲ့သည်။ ထို့နောက်၊ ဤအမှန်တရားအားလုံးသည် ၎င်း မျှော်လင့်ခဲ့သည့်အရာနှင့် လည်းကောင်း၊ ၎င်း မြင်လိုခဲ့သည့်အရာနှင့်လည်းကောင်း၊ ၎င်း တောင့်တခဲ့သည့်အရာတို့နှင့်လည်းကောင်း လုံးဝ ဆန့်ကျင်ဘက် ဖြစ်လာခဲ့သည်။ ထိုသို့သော အံ့သြဖွယ်ကောင်းသည့်အရာသည် ၎င်း၏ မျက်စိရှေ့၌ပင် ဖြစ်ပျက်ခဲ့ပြီး၊ သို့တိုင် ၎င်း၏ ကောက်ကျစ်ဆိုးယုတ်မှု၊ ၎င်း၏ ရက်စက်ကြမ်းကြုတ်မှုတို့က ၎င်းကို ဘုရားသခင်၏ ရှေ့မှောက်၌ နောက်ထပ် စကားပြောဆိုမှုတစ်ခု ပြုလုပ်စေခဲ့သည်။ ယင်းမှာ ၎င်းနှင့် ဘုရားသခင်အကြား အောက်ပါ အပြန်အလှန်ဆွေးနွေးမှု ဖြစ်သည်။ မူရင်းစာသားကို တစ်ဦးတလေက သိရှိသလော။ (“ယောဘသည် အကျိုးမရဘဲ ဘုရားဝတ်ကို ပြုသလော။” (ယောဘ ဝတ္ထု ၁:၉)) စာတန်သည် တိုက်ရိုက် စကားမပြောခဲ့ပေ၊ ၎င်း၏ စကားများထဲတွင် ထောင်ချောက်တစ်ခု ကွယ်ဝှက်ထားခဲ့သည်။ သင့်အနေဖြင့် ထိုအကြောင်းကို စဉ်းစားရန်အလို့ငှာ ၎င်းက “ယောဘသည် အကျိုးမရဘဲ ဘုရားဝတ်ကို ပြုသလော။”ဟု ဆိုခဲ့သည်။ ငါ့အား ပြောလော့၊ ဘုရားသခင်သည် ဤစကားဖြင့် စာတန်က မည်သည့်အရာဆိုလိုသည်ကို သိရှိခဲ့သလော။ (သိရှိခဲ့ပါသည်။) ဘုရားသခင် သိရှိခဲ့သည်။ ဘုရားသခင်သည် စာတန်ကို လုံးလုံးလျားလျား သိခဲ့ပြီး အမှုကိစ္စကို လုံးဝ ရှင်းလင်းပြတ်သားစွာ သိမြင်နိုင်ခဲ့သည်။ ၎င်းက “ယောဘသည် အကျိုးမရဘဲ ဘုရားဝတ်ကို ပြုသလော။” ဟု ဆိုသည်နှင့် တပြိုင်နက်၊ မည်သည့်အရာ လုပ်ဆောင်မည်ကို ဘုရားသခင် သိရှိခဲ့သည်။ ၎င်းက တစ်စုံတစ်ခု လုပ်ဆောင်ချင်သည်ကို ဘုရားသခင် မြင်သည့်အခါ၊ အခွင့်အရေးတစ်ခု ရောက်လာပြီဖြစ်ကြောင်း၊ ယောဘကို စစ်ကြောရန် စာတန်ကို အသုံးပြုရမည့် အချိန် ရောက်လာပြီဖြစ်ကြောင်း သူ သိရှိခဲ့သည်။ သို့ဆိုလျှင်၊ ၎င်းတို့ထဲတွင် မည်သူ အမြော်အမြင်ရှိသနည်း။ (ဘုရားသခင်ဖြစ်သည်။) စာတန်သည် ဤအရာကို မသိခဲ့ဘဲ၊ “ဘုရားသခင်က ငါ့ကို ယောဘအား ထိတွေ့ခွင့်မပေးဘဲ နေခဲ့သည်မဟုတ်လော။ သူသည် ယခု သဘောတူညီလိမ့်မည်ကို ငါ လုံးဝမမျှော်လင့်ခဲ့ပါ” ဟု တွေးခဲ့သည်။ အဖြစ်အပျက်ကို ဤနေရာတွင် ငါတို့ ရပ်ထားကြမည်။ ဆက်လက်၍ မည်သည့်အရာဖြစ်ပျက်ခဲ့သည်ကို အခြေခံအားဖြင့် လူတိုင်း သိရှိကြပေသည်။

ယခုတွင် စာတန် ပြောခဲ့သည့်အရာတွင် သူ၏ သရုပ်သကန်များနှင့် စိတ်သဘောထားအပြင်၊ ဤသို့ပြောရာတွင် ၎င်း၏ အရင်းခံအကြောင်းအရင်းနှင့် ရည်ရွယ်ချက်များက အတိအကျ မည်သည့်အရာများဖြစ်သည်ကို စိစစ်ကြပါစို့။ ပထမဦးစွာ၊ စာတန်သည် ဘုရားသခင် ပြောခဲ့သည့်အရာကို မယုံကြည်ခဲ့ပေ၊ ဆိုလိုသည်မှာ၊ ၎င်းသည် ဘုရားသခင် ပြောခဲ့သော စကားများ၏ ပါဝင်သည့်အကြောင်းအရာနှင့် အချက်များအပေါ် သံသယဖြစ်သော သဘောထားကို စိတ်တွင်ထားရှိခဲ့သည်။ ဘုရားသခင် ပြောခဲ့သည့်အရာကို သံသယဝင်နေသည့် တစ်ချိန်တည်းမှာပင်၊ ၎င်းသည် ဘုရားသခင် ပြောခဲ့သည့်အရာကို ငြင်းပယ်ရန် နည်းလမ်းတစ်ခုခုကို အသုံးပြုလိုခဲ့သော်လည်း၊ ၎င်းက တိုက်ရိုက် မငြင်းပယ်နိုင်ခဲ့ပေ။ စာတန်၏ ကောက်ကျစ်ဆိုးယုတ်မှုသည် မည်သည့်နေရာတွင် တည်ရှိခဲ့သနည်း။ ယင်းသည် ၎င်းက သူ၏စိတ်နှလုံးထဲတွင် “ငါသည် ကိုယ်တော့်ကို တိုက်ရိုက် ငြင်းပယ်မည် မဟုတ်။ ငါသည် ယောဘကို ညှဉ်းပန်းနှိပ်စက်ရန် ကိုယ်တော်အားခွင့်ပြုစေမည်ဖြစ်ပြီး၊ ထို့နောက် သူ့ကို ကိုယ်တော့်အား ငြင်းပယ်စေမည်။ ဤသည်မှာ အကောင်းဆုံးသော အဆုံးသတ် ဖြစ်ပေမည်။ ထိုအခါ ကိုယ်တော် ရှုံးနိမ့်ပြီးဖြစ်မည် မဟုတ်လော”ဟူ၍ ဆိုလျက်၊ သာ၍ပင် လှည့်ဖြားသော နည်းလမ်းတစ်ခုကို ခံယူကျင့်သုံးရာတွင် တည်ရှိပေသည်။ ဤသည်မှာ ၎င်း၏ ရည်မှန်းချက် ဖြစ်ခဲ့သည်။ စာတန်သည် ဘုရားသခင်နှင့် ၎င်း၏ စကားပြောဆိုမှုတွင်လည်းကောင်း၊ ၎င်း၏ အတွေးအခေါ်များတွင်လည်းကောင်း မည်သည့် စိတ်သဘောထားကို ထုတ်ဖော်ခဲ့သနည်း။ ထိုစိတ်သဘောထားမှာ သိသာထင်ရှားစွာပင် ကောက်ကျစ်ဆိုးယုတ်ခဲ့သည်။ စာတန်၏ ကောက်ကျစ်ဆိုးယုတ်မှုနှင့် သာမန် ဖောက်ပြန်ပျက်စီးသော လူသားမျိုးနွယ်၏ ကောက်ကျစ်ဆိုးယုတ်မှုအကြား ကွာခြားချက်မှာ အဘယ်နည်း။ စာတန်သည် ဤနေရာတွင် မည်သည့် အခန်းကဏ္ဍ၌ ပါဝင်နေခဲ့သနည်း။ ၎င်းသည် ယောဘအား ဘုရားသခင်ကို ငြင်းပယ်စေရန် တိုက်ရိုက် သွားရောက်ရှာဖွေခြင်း မပြုခဲ့ပေ။ အကယ်၍ ယောဘက ပြန်လည်တိုက်ခိုက်ခဲ့မည်ဆိုလျှင် ၎င်းသည် အရှက်ရလိမ့်မည်ဖြစ်သောကြောင့်၊ စာတန်သည် ထိုနည်းအတိုင်း မပြုမူခဲ့ပေ။ သို့ဆိုလျှင်၊ စာတန်သည် မည်သည့်အရာကို လုပ်ဆောင်ခဲ့သနည်း။ စာတန်က ိ၎င်းလုပ်ဆောင်ခဲ့သည့်အရာကို လုပ်ဆောင်ရာတွင် ၎င်း၏ အရင်းခံအကြောင်းရင်း၊ ၎င်း၏ နည်းလမ်းများနှင့် နည်းဗျူဟာများ အတိအကျမှာ အဘယ်နည်း။ (အခြားသူအားဖြင့် တိုက်ခိုက်ခြင်းဖြစ်သည်။) သင်သည် စာတန်ကို အမှန်ပင် လျှော့တွက်ပေသည်၊ ၎င်း၏ ကောက်ကျစ်ဆိုးယုတ်မှုကို လူသားများက နားလည်သဘောပေါက်နိုင်ခြင်း မရှိပေ။ လောကရှိ တရားမျှတပြီး နှစ်သက်ဖွယ်ဖြစ်သော အပြုသဘောဆောင်သည့် အရာအားလုံးသည် စာတန်အတွက် နှစ်သက်ဖွယ် မဟုတ်ပေ။ ၎င်းသည် ဤအရာအားလုံးကို ကောက်ကျစ်ဆိုးယုတ်ပြီး မစင်ကြယ်သောအရာများ ဖြစ်စေလိုသည်။ စာတန်နှင့် ဖောက်ပြန်ပျက်စီးသော လူသားများအကြား အကြီးမားဆုံး ကွာခြားချက်မှာ အဘယ်နည်း။ အကြီးမားဆုံး ကွာခြားချက်မှာ ဘုရားသခင်က သမ္မာတရားဖြစ်ကြောင်း၊ ဘုရားသခင်၌ ဉာဏ်ပညာနှင့် သြဇာအာဏာ ရှိကြောင်းနှင့် ဘုရားသခင်သည် အပြုသဘောဆောင်သော အရာအားလုံး၏ ရင်းမြစ်ဖြစ်ကြောင်း ၎င်းက ကောင်းစွာ သိရှိသော်လည်း၊ ဤအရာများကို အသိအမှတ်မပြုဘဲ၊ ထိုအစား ဤအရာအားလုံးကို ရွံရှာသည်၊ မုန်းတီးသည်၊ ကျိန်ဆဲပင် ကျိန်ဆဲသည်ဟူသော အချက်ဖြစ်သည်။ သို့ရာတွင်၊ ဖောက်ပြန်ပျက်စီးသော လူသားများမှာမူ စာတန်၏ အထင်အမြင်မှားစေခြင်းကို မကြာခဏ ခံကြရပြီး၊ သမ္မာတရားက မည်သည့်အရာဖြစ်သည် သို့မဟုတ် ဘုရားသခင် တောင်းဆိုသည့်အရာက မည်သည့်အရာဖြစ်သည်ကို မဆိုထားနှင့်၊ အပြုသဘောဆောင်သော အရာများက အဘယ်အရာဖြစ်သည် သို့မဟုတ် မည်သည့်အရာများက တရားမျှတသည်ကိုပင် မသိကြပေ။၎င်းတို့သည် ဖောက်ပြန်ပျက်စီးသော စိတ်သဘောထားအချို့ကို ထုတ်ဖော်ပြကြသော်လည်း၊ ဤကောက်ကျစ်ဆိုးယုတ်ပြီး လှည့်ဖြားသော ဖောက်ပြန်ပျက်စီးသည့် စိတ်သဘောထားများသည် လူတို့ မိုက်မဲနေစဉ်၊ မသိနားမလည်ဖြစ်နေစဉ်၊ ထုံထိုင်းနေစဉ်၊ ကြောင်းကျိုးမမြင်ဖြစ်နေစဉ်၊လှည့်စားခံနေရစဉ်နှင့် သမ္မာတရားကို နားမလည်ကြစဉ်တွင် ပေါ်လွင်ပြီး၊ စာတန်မှာမူ သိလျက်နှင့် အမှားပြုလုပ်ခြင်း ဖြစ်သည်။ အဘယ်ကြောင့် ထိုအရာကို စာတန်ဟု ငါတို့ ခေါ်ကြသနည်း။ အကြောင်းမှာ ၎င်းသည် ဝိညာဉ်ရေးရာနယ်ပယ်တွင်လည်းကောင်း၊ စကြဝဠာတစ်ခုလုံးအနှံ့တွင်လည်းကောင်း ဘုရားသခင် လုပ်ဆောင်သမျှအားလုံးကို မြင်နိုင်ပြီး၊ ဤအရာအားလုံးကို မျက်မြင်တွေ့ကြုံနေစဉ်တွင်ပင်၊ ၎င်းသည် ဘုရားသခင် တည်ရှိကြောင်း၊ ဘုရားသခင်သည် သမ္မာတရားဖြစ်ကြောင်း နှင့် ဘုရားသခင်သည် လူသားမျိုးနွယ်အားလုံးအပေါ် အချုပ်အခြာအာဏာ ကိုင်စွဲထားကြောင်း အမှန်တရားကို ငြင်းပယ်နေဆဲ ဖြစ်သောကြောင့်တည်း။ လူမည်မျှက ဘုရားသခင်နောက် လိုက်သည်ဖြစ်စေ၊ ဘုရားသခင် လုပ်ဆောင်သည့် အမှုက မည်မျှ ကြီးမြတ်သည်ဖြစ်စေ၊ မည်မျှ ကြီးမြတ်သော ဩဇာအာဏာကို ဘုရားသခင် ကိုင်စွဲသည်ဖြစ်စေ၊ သို့မဟုတ် ဘုရားသခင် မည်မျှ အနန္တတန်ခိုးရှိသည်ဖြစ်စေ၊ စာတန်သည် ဤအရာအားလုံးကို ငြင်းပယ်နေဆဲဖြစ်ပြီး အရှက်တရားရော ဂုဏ်သိက္ခာပါမရှိဘဲ ၎င်းသည် လူသားမျိုးနွယ်ကို တုံ့ဆိုင်းရပ်တန့်စေသည်၊ ကြောင်းကျိုးမမြင်ဖြစ်စေပြီး လူသားမျိုးနွယ်ကို ဖောက်ပြန်ပျက်စီးစေကာ လူသားမျိုးနွယ်ကို အထင်အမြင်မှားစေရန်နှင့် ၎င်းနောက်သို့ လိုက်စေရန် နည်းလမ်းမျိုးစုံကို အသုံးပြုသည်။ စာတန်၏ ကောက်ကျစ်ဆိုးယုတ်မှုနှင့်ဆိုင်သည့် အဓိက သရုပ်သကန်များကား အဘယ်အရာဖြစ်သည်ကို ငါ ယခုပြောခဲ့သနည်း။ ၎င်းသည် ဘုရားသခင်ကို ဆန့်ကျင်လုပ်ဆောင်ရာ၌ အထူးပြုသည်၊ ကိုယ်တော်၏ နှုတ်ကပတ်တော်များက မည်မျှပင် မှန်ကန်စေကာမူ ၎င်းသည် ဘုရားသခင် ပြောသည့်အရာကို အသိအမှတ်မပြုပေ၊ ကိုယ်တော်၏ နှုတ်ကပတ်တော်များက အပြုသဘောဆောင်သော အရာများနှင့် သမ္မာတရားဖြစ်သည်ကို ၎င်းက အသိအမှတ်မပြုသကဲ့သို့ အမှားအမှန်ကို ပြောင်းပြန်လှန်သည်။ ဥပမာအနေနှင့်၊ ဘုရားသခင်သည် လူတို့အား သူ၏ လူသားဖန်ဆင်းခြင်း သမိုင်းကို မှတ်တမ်းတင်စေခဲ့ပြီး ဘုရားသခင်၏ လူသားဖန်ဆင်းခြင်း အမှန်တရားများ၏ မှတ်တမ်းများအပြင်၊ ရှာဖွေတွေ့ရှိနိုင်သော သက်သေအထောက်အထား လက္ခဏာများလည်း ရှိသေးသည်။ ပြီးလျှင် စာတန်က မည်သည့်အရာ လုပ်ဆောင်ခဲ့သနည်း။ ၎င်းသည် “ဒါဝင်ဝါဒ” ကို လုပ်ကြံဖန်တီးပြီး လူသည် မျောက်ဝံများမှ ဆင့်ကဲပြောင်းလဲလာသည်ဟု ဆိုခဲ့သည်၊ ၎င်းသည် ခြေလေးချောင်း သတ္တဝါများမှ မတ်မတ် လမ်းလျှောက်သော ခြေနှစ်ချောင်း လူသားများအဖြစ်သို့ မျောက်ဝံများ တဖြည်းဖြည်း ဆင့်ကဲပြောင်းလဲသွားသည်ကို ပြသသည့် ပုံတစ်ပုံကို ရေးဆွဲခဲ့ကာ၊ ဤမိစ္ဆာဒိဋ္ဌိ အယူဝါဒနှင့် မှားယွင်းပြီး အဓိပ္ပာယ်မဲ့သောအရာကို လုပ်ကြံဖန်တီးခဲ့သည်။ အကျိုးဆက်အားဖြင့်၊ ယခုတွင် လူအချို့က ဆင့်ကဲပြောင်းလဲမှုဖြစ်စဉ်ကို ငြင်းပယ်ကြသော်လည်း၊ လူအများစုက လူသည် ဘုရားသခင်ထံမှ လာသည်ကို မယုံကြည်ကြသေးပေ။ ဤသည်မှာ စာတန်၏ ကောက်ကျစ်ဆိုးယုတ်မှု မဟုတ်လော။ (ဟုတ်ပါသည်။) ဤသည်မှာ စာတန်၏ ကောက်ကျစ်ဆိုးယုတ်မှု ဖြစ်သည်။ မည်မျှ ကြီးမားသည့်အမှုအား ဘုရားသခင် ပြုနေသည်ကို ၎င်းကိုယ်တိုင် မျက်မြင်တွေ့ကြုံစေကာမူ၊ စာတန်သည် ဘုရားသခင်ကို အဆုံးတိုင်အောင် ရန်လိုကာ ဆန့်ကျင်နေဆဲ ဖြစ်သည်။ ဘုရားသခင်က စာတန်ကို မဖျက်ဆီးသော သို့မဟုတ် မဖြေရှင်းသော နေ့ရက်တိုင်းတွင်၊ ၎င်းသည် သူ့ကို စဉ်ဆက်မပြတ် ဆန့်ကျင်သည်။ ဤသည်မှာ စာတန်၏ ကောက်ကျစ်ဆိုးယုတ်မှု တည်ရှိရာဖြစ်ပြီး၊ ဤအရာ၏ အရင်းခံအကြောင်းရင်းမှာ ၎င်း၏ အနှစ်သာရက ကောက်ကျစ်ဆိုးယုတ်ခြင်း ဖြစ်သည်။

ယောဘဝတ္ထုတွင်ပါရှိသည့် စာတန်နှင့် ဘုရားသခင်အကြား စကားပြောဆိုမှုတွင်၊ စာတန်၏ သရုပ်သကန်များနှင့် အန္တိခရစ်တို့၏ သရုပ်သကန်များအကြား ဆက်စပ်မှု တစ်စုံတစ်ရာ ရှိသလော။ (ရှိပါသည်။) မည်သည့် ဆက်စပ်မှုနည်း။ အဘယ်ကြောင့် ငါသည် ဤကျမ်းပိုဒ်ကို ဆက်စပ်ဖော်ပြနေရသနည်း။ အန္တိခရစ်တို့၏ ကောက်ကျစ်ဆိုးယုတ်မှု၊ အန္တရာယ်ပေးတတ်မှုနှင့် လှည့်ဖြားတတ်မှုသည် သင်တို့ မကြာခဏ ကြုံရသော အကြောင်းအရာတစ်ခု ဖြစ်ပြီး၊ ဤအရာများသည် သင်တို့ မကြာခဏ မြင်တွေ့ရသော လက်တွေ့ကျသည့် သရုပ်သကန်များလည်း ဖြစ်သည်၊ သို့ဖြစ်ပါ၍ အဘယ်ကြောင့် ငါသည် အန္တိခရစ်တို့၏ ဤသရုပ်သကန်များကို စိတ်ဖြာလေ့လာဆွေးနွေးရန်အတွက် အချက်တစ်ချက်အဖြစ် သီးခြား စာရင်းပြုစုနေရသနည်း။ စာတန်၏ ကောက်ကျစ်ဆိုးယုတ်မှုနှင့် ၎င်းသည် ဘုရားသခင်ကို အတိအကျ မည်သို့ ဆန့်ကျင်ရပ်တည်သည်ကို ငါတို့ ယခု် ပြောဆိုခဲ့ပြီးဖြစ်သည်။ သို့ဆိုလျှင် အန္တိခရစ်တို့သည်လည်း ဤအရာကို လုပ်ဆောင်ကြသည် မဟုတ်လော။ (လုပ်ဆောင်ကြပါသည်။) အန္တိခရစ်တို့၏ သရုပ်သကန်များကား အဘယ်နည်း။ အန္တိခရစ်တစ်ဦးသည် တရားဒေသနာတစ်ခုကို နားထောင်ပြီးနောက်၊ ထိုတရားဒေသနာ ကောင်းကြောင်း သိရှိပြီး ထိုစကားများကို နားလည်နိုင်ကြသည်။ ထို့အပြင်၊ ၎င်းတို့၌ အစွမ်းအစ အနည်းငယ် ရှိကြပြီး၊ ထိုစကားများကို ၎င်းတို့ နားလည်သည်နှင့်တစ်ပြိုင်နက်၊ မှတ်မိရန် ကြိုးစားအားထုတ်ကြပြီး၊ ၎င်းတို့ နှစ်သက်သည့်အရာများနှင့် ၎င်းတို့၏ ကိုယ်ပိုင် အယူအဆများနှင့် ကိုက်ညီသည့်အရာများကို အလွတ်ကျက်မှတ်ရန် ကြိုးစားကြသည်။ ထို့နောက်၊ ဤအခြေခံအကြောင်းရင်းအရ၊ ၎င်းတို့သည် မိမိတို့၏ ကိုယ်ပိုင် တရားဒေသနာကို ပြုပြင်စီရင်ပြီး ဖန်တီးကြသည်။ ယင်းကို အခြားလူများက ကြားသည့်အခါ အလွန် ကောင်းသည်ဟု ထင်ကြသည်။ သို့ရာတွင်၊ ဤသည်မှာ အန္တိခရစ်တစ်ဦး၏ ကောက်ကျစ်ဆိုးယုတ်မှုနှင့်ဆိုင်သည့် အဓိက သရုပ်သကန် မဟုတ်ပေ။ ၎င်းတို့၏ အဓိက သရုပ်သကန်ကား အဘယ်နည်း။ ဤကဲ့သို့သော လူများအနေဖြင့် သမ္မာတရားကို နားလည်နိုင်ကြသည်၊ သို့ဆိုလျှင် ငါ့အား ပြောလော့၊ ၎င်းတို့၌ အမှားနှင့်အမှန်ကို ခွဲခြားသိမြင်နိုင်သည့် အစွမ်းအစ ရှိကြသလော။ (ရှိပါသည်။) ရှိပေသည်။ ၎င်းတို့သည် မိုက်မဲကြသည် မဟုတ်။ ဥပမာအနေနှင့်၊ ၎င်းတို့သည် ညီအစ်ကိုမောင်နှမများနှင့် မကြာခဏ ထိတွေ့ဆက်ဆံကြပြီး၊ မည်သည့်လူများက သမ္မာတရားကို လိုက်စားပြီး မည်သည့်လူများက မလိုက်စားသည်ကို ၎င်းတို့၏ စိတ်နှလုံးထဲ၌ သိရှိကြသည်။ မည်သူက မိမိကိုယ်ကို ဆက်ကပ်အပ်နှံနိုင်ပြီး အမှုအရာများအား စွန့်လွှတ်နိုင်သည်၊ မည်သူက မိမိတို့၏ တာဝန်ကို သစ္စာရှိစွာ ထမ်းဆောင်နိုင်သည်ဆိုသည်နှင့် သာမန် ကိစ္စရပ်များကို ကြုံတွေ့သည့်အခါ မည်သူက သမ္မာတရားကို လက်တွေ့လုပ်ဆောင်ပြီး စည်းမျဉ်းများအတိုင်း ပြုမူရန် သေချာပေါက် ရွေးချယ်နိုင်သည်ကို ၎င်းတို့၏ စိတ်နှလုံးထဲ၌ သိရှိကြသည်။ သို့သော် ၎င်းတို့သည် ထိုသို့သော လူများကို မျှတစွာ ဆက်ဆံနိုင်ကြပါသလော။ (မဆက်ဆံနိုင်ကြပါ။) အန္တိခရစ်တို့၏ သရုပ်သကန်များနှင့် သက်ဆိုင်သော နည်းလမ်းဖြင့် ၎င်းတို့သည် လူများကို မည်သို့ ဆက်ဆံကြသနည်း။ ဥပမာအနေနှင့်၊ တစ်စုံတစ်ဦးသည် ၎င်းတို့ကို မည်သည့် ခြိမ်းခြောက်မှုမျှ မပေးဘဲ ၎င်းတို့က “သင်သည် သမ္မာတရားကို လိုက်စားပြီး သင့်အစွမ်းအစက ငါ့ထက် ပိုကောင်းသည်၊ သို့သော် ငါ သင့်ကို ရာထူးတိုးပေးမည် မဟုတ်ပါ။ ငါ သင့်ကို ရာထူးမတိုးပေးခြင်းက ငါသည် သင့်ကို လျစ်လျူရှုမည်ဟု မဆိုလိုပေ။ အကယ်၍ သင် ငါ့ကို မျက်နှာလိုမျက်နှာရလုပ်လျှင် ငါ သင့်ကို ငါ့အနားတွင် ဆက်ထားမည်။ အကယ်၍ သင် ငါ့ကို မည်သည့်အခါတွင်မျှ မျက်နှာလိုမျက်နှာရမလုပ်ဘဲ အစဉ် အလွန် တည်ကြည်နေမည်၊ အစဉ် ဘက်မလိုက်သောနည်းလမ်းဖြင့် အမှုများကို လုပ်ဆောင်ပြီး စည်းမျဉ်းများကို စွဲကိုင်နေမည်ဆိုလျှင်၊ သင်သည် ငါ လုပ်ဆောင်သည့် မည်သည့် ဆိုးညစ်မှုကိုမဆို ပိုင်းခြားသိမြင်နိုင်ပြီး ငါ့ကို ရိပ်စားမိနိုင်လိမ့်မည်ဖြစ်ကာ ငါ့ကို နောင်တရစေရန် ငါနှင့်အတူ သမ္မာတရားကို မိတ်သဟာယဖွဲ့လိမ့်မည်ဖြစ်ပြီးထိုအရာက ငါ့ကို အလွန်အမင်း အရှက်ရစေလိမ့်မည်။ အကယ်၍ သင်သည် ငါ့ကို ဝင်ရောက်စွက်ဖက်ခြင်း မပြုလျှင်၊ ကိစ္စမရှိပါ။ အကယ်၍ သင် ငါ့ကို အစဉ် ဝင်ရောက်စွက်ဖက်မည်ဆိုလျှင်မူ၊ ငါ သင့်ကို ဖယ်ရှားပစ်မည်ဖြစ်သည်”ဟု တွေးကြလေသည်။ ဤသည်မှာ ၎င်းတို့၌ ရှိသော အစီအစဉ်မျိုးဖြစ်ပြီး၊ ၎င်းတို့သည် ၎င်းတို့၏ စိတ်နှလုံးထဲ၌ ဤသို့ တွက်ချက်ကြသည်။ ဤသည်မှာ မည်သည့် စိတ်သဘောထားဖြစ်သနည်း။ ၎င်းတို့၌ စိတ်သဘောထား နှစ်မျိုးရှိသည်။ ရက်စက်ကြမ်းကြုတ်ခြင်းနှင့် ကောက်ကျစ်ဆိုးယုတ်ခြင်းတို့ ဖြစ်သည်။ ဤသည်မှာ ၎င်းတို့အနေဖြင့် ထိုသို့သော လုပ်ရပ်ကို ကျူးလွန်ပြီး ဤလူကို ဒုက္ခမခံစားရစေမီ ၎င်းတို့ တွေးသည့်ပုံစံဖြစ်သည်။ ဤသည်မှာ ကောက်ကျစ်ဆိုးယုတ်မှု ဖြစ်သည်။ ဤလူက သမ္မာတရားကို လိုက်စားပြီး တရားမျှတစိတ် ရှိသည်ကို ၎င်းတို့ လုံးဝ ကောင်းစွာ သိကြသော်လည်း၊ ရာထူးမတိုးပေးကြပေ။ ၎င်းတို့သည် ထိုသူနှင့် မရင်းနှီးကြသကဲ့သို့ ၎င်းတို့၏ စိတ်နှလုံးထဲ၌ ဤလူအပေါ် သတိထားဆက်ဆံပြီး စက်ဆုပ်ရွံရှာကြသည်။ ဤသည်မှာ မည်သည့် စိတ်သဘောထားဖြစ်သနည်း။ ဤသည်မှာ ကောက်ကျစ်ဆိုးယုတ်မှု ဖြစ်သည်။ ဤကောက်ကျစ်ဆိုးယုတ်မှုက မည်သည့်အရာကို ရည်ညွှန်းသနည်း။ အန္တိခရစ်တို့က အပြုသဘောဆောင်သော အရာများ မည်သည့်အရာဖြစ်ပြီး အပျက်သဘောဆောင်သော အရာများက မည်သည့်အရာဖြစ်သည်ကို နားမလည်ကြခြင်း မဟုတ်၊ မှန်ကန်သော လမ်းကြောင်းက မည်သည့်အရာဖြစ်သည်ကို ၎င်းတို့ သိကြသည်၊ ထိုလမ်းကြောင်းကို ၎င်းတို့ မလိုက်လျှောက်ကြခြင်းသာ ဖြစ်သည်။ ၎င်းတို့သည် သမ္မာတရားကို လက်တွေ့မလုပ်ဆောင်ကြ၊ မည်သူ့စကားကိုမျှ နားမထောင်ကြဘဲ၊ ၎င်းတို့သည် ကောက်ကျစ်ဆိုးယုတ်မှု၏ လမ်းကြောင်းကို ရွေးချယ်ကြသည်။ ဥပမာအနေနှင့်၊ အချို့သော အမျိုးသမီးများသည် ကိုယ်ကျင့်တရားကောင်းသော အမျိုးသမီးများ ဖြစ်လိုစိတ်မရှိဘဲ သင့်တော်လျောက်ပတ်သော ဘဝများဖြင့် အသက်မရှင်လိုကြဘဲ၊ ယင်းအစား ပြည့်တန်ဆာအိမ်သို့ ထွက်ပြေးကြရမည်။ ယနေ့ခေတ်တွင် ၎င်းတို့ကို ပြည့်တန်ဆာလုပ်ခိုင်းသူ သို့မဟုတ် အတင်းအကျပ်ခိုင်းစေသူ တစ်ဦးတစ်ယောက်မျှ မရှိပေ၊ သို့ဆိုလျှင် အဘယ်ကြောင့် ပြည့်တန်ဆာအိမ်သို့ ထွက်ပြေးကြရသနည်း။ အကြောင်းမှာ ၎င်းတို့သည် ကောက်ကျစ်ဆိုးယုတ်ပြီး ထိုသို့သောအရာများ ဖြစ်ရန် မွေးဖွားလာသောကြောင့် ဖြစ်သည်။ အန္တိခရစ်တို့သည် ဤအမှိုက်မျိုးဖြစ်ပြီး ငါတို့သည် ၎င်းတို့ကို စိတ်ဖြာလေ့လာဆွေးနွေးကာ အန္တိခရစ်များအဖြစ် သရုပ်ဖော်ကြသည်၊ အဘယ်ကြောင့်ဆိုသော် အန္တိခရစ်တို့၏ ကောက်ကျစ်ဆိုးယုတ်မှုသည် သာမန်လူတို့၏ တည်ကြည်မှုနှင့် ကောင်းမြတ်ခြင်းအဖြစ် ဘယ်သောအခါမျှ မဖြစ်လာနိုင်သောကြောင့် ဖြစ်သည်။ ဤသည်မှာ ၎င်းတို့နှင့် ဖောက်ပြန်ပျက်စီးသော စိတ်သဘောထားများ ရှိသည့် သာမန်လူတို့အကြား ကွာခြားချက် ဖြစ်သည်။ ၎င်းတို့ ပြုပြင်ခြင်းခံရသည်ဖြစ်စေ၊ အသင်းတော်က ၎င်းတို့ကို အပြစ်ဒဏ်ပေးရန် စီမံအုပ်ချုပ်ရေးဆိုင်ရာ စီမံချက်များကို အသုံးပြုသည်ဖြစ်စေ၊ သို့မဟုတ် ညီအစ်ကိုမောင်နှမများက ၎င်းတို့ကို ဆန့်ကျင်ပြီး ဖော်ထုတ်ရန် ထကြွကြသည်ဖြစ်စေ၊ မည်သည့်အရာကမျှ ၎င်းတို့ ပြုမူဆောင်ရွက်သည့် မူလ ရည်ရွယ်ချက်နှင့် စည်းမျဉ်းများကို မပြောင်းလဲစေနိုင်ပေ။ ဤအရာ လုံးဝ မဖြစ်နိုင်ပေ။ မည်သူမျှ ၎င်းတို့ကို မပြောင်းလဲနိုင်၊ မည်သူမျှ ၎င်းတို့၏ စိတ်နှလုံးများကို မတို့ထိနိုင်သကဲ့သို့၊ ၎င်းတို့၏ အမြင်များ သို့မဟုတ် ကိုယ်တိုင်ကျင်ကြံပြုမူခြင်း၏ စည်းမျဉ်းများကို ၎င်းတို့အား စွန့်လွှတ်စေရန် မပြုလုပ်နိုင်ပေ။ သင်သည် ၎င်းတို့ကို မပြောင်းလဲနိုင်ပေ။ ၎င်းတို့သည် အန္တိခရစ်များ ဖြစ်ကြသည်။ အန္တိခရစ်တို့သည် အလွန် ကောက်ကျစ်ဆိုးယုတ်သဖြင့် အဘယ်အရာ ကောင်းမြတ်ပြီး အဘယ်အရာက ဆိုးသည်ကို မသိကြဟု သင် ထင်မှတ်ခဲ့ပါသလော။ ၎င်းတို့ သိကြသည်။ အန္တိခရစ်တစ်ဦးသည် အထက်သို့ ပြဿနာများကို သတင်းပို့သည့်အခါ သို့မဟုတ် အလုပ်နှင့်ပတ်သက်သည့် အစီရင်ခံစာများ ပြုလုပ်သည့်အခါ၊ ၎င်းတို့သည် ထိုသို့ နားကြားကောင်းသော စကားများကို ရေးသားကြပြီး၊ သင်သည် ဤအစီရင်ခံစာများကို ဖတ်သည့်အခါ ဤလူအနေဖြင့် အလွန် ကောင်းမွန်သော အစွမ်းအစရှိရမည်ဟု သင် ထင်မှတ်ပေမည်။ သို့ရာတွင်၊ သင်သည် လက်တွေ့မြေပြင်ပေါ်ရှိ အမှန်တကယ် အခြေအနေကို သိရှိလာသည့်အခါ၊ ၎င်းတို့သည် ၎င်းတို့၏ အလုပ်တွင် အလုပ်အစီအစဉ်များကို အစဉ် ချိုးဖောက်ကြကြောင်း၊ သမ္မာတရား လိုက်စားသူများကို ဖိနှိပ်ကြကြောင်းနှင့် အသင်းတော်အလုပ်အား အနှောင့်အယှက်ပေးကြကြောင်းတို့ကို သင် ရှာဖွေတွေ့ရှိရပေသည်။ ၎င်းတို့သည် အန္တိခရစ်တစ်ဦး ဖြစ်သည်။ အန္တိခရစ်အချို့သည် ငါတို့ အသင်းတော်၏ ဝက်ဘ်ဆိုက်တွင် မှတ်ချက်များ ချန်ထားခဲ့ကြပြီး၊ သင်သည် ၎င်းတို့၏ နောက်ခံအကြောင်းအရာ သို့မဟုတ် မူလဇာစ်မြစ်များကို မသိသည့်အခါ၊ ၎င်းတို့၏ မှတ်ချက်များသည် အထူးသဖြင့် ရှင်းလင်းစွာ ရေးသားထားသော စာကြောင်းများနှင့် ကောင်းမွန်သော အရေးအသားဟန်တို့ဖြင့် မည်မျှ ကျွမ်းကျင်စွာ ဖော်ပြထားသည်ကို သင် မြင်တွေ့ရပြီး၊ ဤလူသည် ကောင်းမွန်သော အစွမ်းအစရှိသည်ဟု သင် တွေးထင်ပေသည်။ သင်သည် ၎င်းတို့အကြောင်း သိရှိလာပြီးနောက်မှသာ ၎င်းတို့က အန္တိခရစ်တစ်ဦး ဖြစ်ကြောင်း၊ မကောင်းမှုများစွာ ပြုလုပ်ခဲ့ကြပြီး လွန်ခဲ့သော သုံးနှစ်က အသင်းတော်မှ နှင်ထုတ်ခြင်းခံခဲ့ရကြောင်း သင် သိရှိလာရသည်။ ၎င်းတို့ အနေဖြင့် ရာထူးတိုးခံရပြီး ပြန်လည်ပြင်ဆင်ရန် အခွင့်အရေးတစ်ခု ပေးအပ်ခြင်းခံရဖို့အလို့ငှာ အထက်က သတိပြုမိစေရန် ဘုရားအိမ်တော် ဝက်ဘ်ဆိုက်တွင် သတင်းစကားများကို ၎င်းတို့ အဆက်မပြတ် တင်ခဲ့ကြသည်။ ဖြစ်ပုံမှာ ဤသို့ ဖြစ်၏။ ငါ့အား ပြောလော့၊ အန္တိခရစ်တို့သည် ကောင်းချီးခံစားလိုကြသလော။ (ကောင်းချီးခံစားလိုကြပါသည်။) ၎င်းတို့သည် အမှန်တကယ် ကောင်းချီးခံစားလိုကြသည်၊ ၎င်းတို့သည် သေခြင်းကို ကြောက်ရွံ့ပြီး ပျက်စီးခြင်းသို့ရောက်မည်ကို ကြောက်ရွံ့ကြသည်။

အန္တိခရစ်တစ်ဦး၏ ကောက်ကျစ်ဆိုးယုတ်မှုနှင့်ဆိုင်သော အဓိက သရုပ်သကန်မှာ အဘယ်နည်း။ ၎င်းတို့သည် မည်သည့်အရာက မှန်ကန်ပြီး မည်သည့်အရာက သမ္မာတရားနှင့် ကိုက်ညီသည်ကို ရှင်းလင်းစွာ သိကြသော်လည်း၊ တစ်စုံတစ်ရာ လုပ်ဆောင်ခြင်းနှင့် ပတ်သက်လာသည့်အခါ၊ ၎င်းတို့သည် စည်းမျဉ်းများကို ချိုးဖောက်ပြီး သမ္မာတရားကို ဆန့်ကျင်သည့်အရာကိုသာလည်းကောင်း၊ မိမိတို့၏ ကိုယ်ပိုင်အကျိုးစီးပွားနှင့် အဆင့်အတန်းကို ဖြည့်ဆည်းသည့်အရာကိုသာလည်းကောင်း အစဉ်ရွေးချယ်ကြလိမ့်မည်။ ဤသည်မှာ အန္တိခရစ်တစ်ဦး၏ ကောက်ကျစ်ဆိုးယုတ်သော စိတ်သဘောထားနှင့်ဆိုင်သည့် အဓိက သရုပ်သကန် ဖြစ်သည်။ ၎င်းတို့သည် စကားလုံးများနှင့် အယူဝါဒများ မည်မျှပင် နားလည်သည်ဖြစ်စေ၊ တရားဒေသနာများတွင် ၎င်းတို့အသုံးပြုသော ဘာသာစကားက မည်မျှပင် သာယာနာပျော်ဖွယ်ကောင်းသည်ဖြစ်စေ၊ သို့မဟုတ် အခြားသူများအတွက် ၎င်းတို့သည် ဝိညာဉ်ရေးရာ နားလည်သဘောပေါက်မှု မည်မျှပင် ရှိပုံရသည်ဖြစ်စေ၊ အမှုအရာများကို ၎င်းတို့ လုပ်ဆောင်သည့်အခါ၊ စည်းမျဉ်းတစ်ခုနှင့် နည်းလမ်းတစ်ခုတည်းကိုသာ ရွေးချယ်ကြသည်။ ထိုအရာမှာ ရာနှုန်းပြည့် သမ္မာတရားကို ဆန့်ကျင်ရန်၊ မိမိတို့၏ ကိုယ်ပိုင်အကျိုးစီးပွားများကို ကာကွယ်ရန်နှင့် အဆုံးတိုင်အောင် သမ္မာတရားကို အတိုက်အခံလုပ်ရန် ဖြစ်သည်။ ဤသည်မှာ ၎င်းတို့ ပြုမူဆောင်ရွက်ရန် ရွေးချယ်သည့် စည်းမျဉ်းနှင့် နည်းလမ်း ဖြစ်သည်။ ဤအရာအပြင်၊ ၎င်းတို့၏စိတ်နှလုံးထဲ၌ ၎င်းတို့စိတ်ကူးသည့် ဘုရားနှင့် သမ္မာတရားသည် အတိအကျအားဖြင့် အဘယ်အရာဖြစ်သနည်း။ သမ္မာတရားအပေါ် ၎င်းတို့၏သဘောထားမှာ သမ္မာတရားနှင့်ပတ်သက်၍ ပြောဆိုကာ ဟောပြောနိုင်လိုခြင်းမျှသာဖြစ်ပြီး လက်တွေ့လုပ်ဆောင်လိုခြင်း မဟုတ်ပေ။ ၎င်းတို့သည် ဘုရားသခင် ရွေးချယ်ထားသောလူများ၏ အထင်ကြီးလေးစားခြင်းကို ခံလိုပြီး၊ ထို့နောက် အသင်းတော်ခေါင်းဆောင်နေရာကို သိမ်းပိုက်ကာ ဘုရားသခင်၏ ရွေးချယ်ထားသောလူများအပေါ် သြဇာအာဏာသက်ရောက်စေရန် ရည်ရွယ်ချက်ကို အထမြောက်စေရန်အတွက် ယင်းကို အသုံးချလိုလျက် ထိုသမ္မာတရားအကြောင်းကို ပြောဆိုရုံမျှသာ ပြောဆိုကြသည်။၎င်းတို့သည် မိမိတို့၏ ရည်မှန်းချက်များကို စွမ်းဆောင်ရရှိရန် အယူဝါဒများကို ဟောပြောခြင်းအား အသုံးပြုကြသည်။ ဤသည်မှာ ၎င်းတို့က သမ္မာတရားကို မထီမဲ့မြင်ပြုခြင်း၊ သမ္မာတရားနှင့်ကစားခြင်း၊ သမ္မာတရားကို နင်းချေခြင်းတို့ဖြစ်သည် မဟုတ်လော။ သမ္မာတရားကို ဤသို့ ဆက်ဆံခြင်းဖြင့် ၎င်းတို့သည် ဘုရားသခင်၏ စိတ်သဘောထားကို ပုန်ကန်ပြစ်မှားကြသည် မဟုတ်လော။ ၎င်းတို့သည် သမ္မာတရားကို အသုံးချရုံမျှသာ အသုံးချကြသည်။ ၎င်းတို့၏ စိတ်နှလုံးများတွင်၊ သမ္မာတရားသည် ကြွေးကြော်သံတစ်ခု၊ အဆင့်မြင့်သောစကားအချို့၊ လူတို့ကို အထင်အမြင်မှားစေရန်နှင့် စည်းရုံးသိမ်းသွင်းရန် အသုံးပြုနိုင်သည့် အဆင့်မြင့်သောစကားများ၊ အံ့သြဖွယ်သော အမှုအရာများကို လူတို့၏ တောင့်တမှုအား ပြေပျောက်စေနိုင်သည့်အရာ ဖြစ်သည်။ ဤလောက၌ သမ္မာတရားကို လက်တွေ့လုပ်ဆောင်နိုင်သူ သို့မဟုတ် သမ္မာတရားအတိုင်း အသက်ရှင်နေထိုင်နိုင်သူ တစ်ဦးတစ်ယောက်မျှမရှိ၊ ဤသည်မှာ အလုပ်မဖြစ်၊ မဖြစ်နိုင်သည့်အရာဖြစ်ပြီး လူတိုင်းအသိအမှတ်ပြုပြီး အလုပ်ဖြစ်နိုင်သည့်အရာသာလျှင် သမ္မာတရားဖြစ်သည်ဟု ၎င်းတို့က တွေးထင်ကြသည်။ ၎င်းတို့သည် သမ္မာတရားအကြောင်းကို ပြောဆိုကြသော်လည်း၊ ၎င်းတို့၏စိတ်နှလုံးထဲ၌မူ သမ္မာတရားဖြစ်ကြောင်းကို အသိအမှတ်မပြုကြပေ။ ဤကိစ္စကို ငါတို့ မည်သို့စစ်ဆေးနိုင်သနည်း။ (သူတို့သည် သမ္မာတရားကို လက်တွေ့မလုပ်ဆောင်ကြပါ။) ၎င်းတို့သည် သမ္မာတရားကို မည်သည့်အခါမျှ လက်တွေ့လုပ်ဆောင်ခြင်း မရှိကြပေ။ ဤသည်မှာ သွင်ပြင်လက္ခဏာတစ်ခုဖြစ်သည်။ နောက်ထပ် အရေးကြီးသော သွင်ပြင်လက္ခဏာမှာ အဘယ်နည်း။ ၎င်းတို့သည် လက်တွေ့ဘဝတွင် အမှုအရာများကို ကြုံရသည့်အခါ၊ ၎င်းတို့နားလည်ထားသော အယူဝါဒသည် မည်သည့်အခါမျှ အလုပ်မဖြစ်နိုင်ပေ။ ၎င်းတို့အနေဖြင့်အမှန်တကယ် ဝိညာဉ်ရေးရာ သိနားလည်မှုရှိသည့်အလား ထင်ရသည်၊ အယူဝါဒတစ်ခုပြီးတစ်ခု ဟောပြောကြသော်လည်း၊ ပြဿနာများနှင့် ကြုံရသည့်အခါ ၎င်းတို့၏နည်းလမ်းများသည် လွဲချော်နေသည်။ ၎င်းတို့သည် သမ္မာတရားကို လက်တွေ့မလုပ်ဆောင်နိုင်သော်လည်း၊ ၎င်းတို့လုပ်ဆောင်သည့်အရာသည် အနည်းဆုံးအနေဖြင့် လူ့အယူအဆများ၊ စိတ်ကူးစိတ်သန်းများနှင့် ကိုက်ညီရမည်၊ လူ့စံနှုန်းများ၊ ကြိုက်နှစ်သက်မှုများနှင့် ကိုက်ညီရမည်ဖြစ်ပြီး အနည်းဆုံးအနေဖြင့် အခြားသူများ၏ စိစစ်ခြင်းကို ခံနိုင်ရမည်ဖြစ်သည်။ ဤနည်းဖြင့် ၎င်းတို့၏ရာထူးနေရာက တည်ငြိမ်မြဲတည်ငြိမ်နေလိမ့်မည်ဖြစ်သည်။ သို့သော် လက်တွေ့ဘဝတွင်မူ၊ ၎င်းတို့လုပ်ဆောင်သည့် အမှုအရာများသည် မယုံနိုင်လောက်အောင် လွဲချော်နေပြီး၊ သမ္မာတရားကို ၎င်းတို့ နားမလည်ကြောင်း တစ်ချက်ကြည့်ရုံဖြင့် သိနိုင်သည်။ ၎င်းတို့သည် အဘယ်ကြောင့် သမ္မာတရားကို နားမလည်ကြသနည်း။ ၎င်းတို့၏စိတ်နှလုံးထဲ၌၊ ၎င်းတို့သည် သမ္မာတရားကို အလွန်အမင်း မနှစ်မြို့ကြ၊ သမ္မာတရားကို အသိအမှတ်မပြုကြ၊ စာတန်ဆန်သော အတွေးအခေါ်များအတိုင်း အမှုအရာများကို လုပ်ဆောင်ခြင်း၌ ပျော်မွေ့ကြသည်၊ ၎င်းတို့သည် လူ့နည်းလမ်းများ အသုံးပြုလျက် ကိစ္စရပ်များကို အမြဲကိုင်တွယ်လိုကြပြီး၊ ဤကိစ္စရပ်များကို ကိုင်တွယ်ခြင်းဖြင့် အခြားသူများကို လက်ခံယုံကြည်စေနိုင်ကာ ဂုဏ်သိက္ခာရရှိနိုင်မည်ဆိုလျှင်၊ ယင်းမှာ ၎င်းတို့အတွက် လုံလောက်ပေသည်။ အကယ်၍ အန္တိခရစ်တစ်ဦးသည် နေရာတစ်ခုကို သွားချိန်တွင် တစ်စုံတစ်ဦးက အနှစ်မဲ့ သဘောတရားအား ဟောပြောနေသည်ကို ကြားလျှင်၊ ၎င်းတို့အလွန်စိတ်လှုပ်ရှားသွားကြသော်လည်း၊ တစ်စုံတစ်ဦးက သမ္မာတရား လက်တွေ့ကျမှုကို ဟောပြောပြီး လူတို့၏ အမျိုးမျိုးသော အခြေအနေများကဲ့သို့ အသေးစိတ်အချက်အလက်များအထိ ပြောဆိုနေလျှင်မူ၊ ထိုဟောပြောသူသည် မိမိတို့အား ဝေဖန်နေသည်၊ မိမိတို့၏စိတ်နှလုံးကို ထိုးနှက်နေသည်ဟု အစဉ်ခံစားရသဖြင့်၊ ၎င်းတို့သည် ထိုအရာကို စက်ဆုပ်ရွံရှာပြီး နားမထောင်လိုကြတော့ပေ။ အကယ်၍ ၎င်းတို့အနေဖြင့် မကြာသေးမီက ၎င်းတို့၏အခြေအနေ မည်သို့ရှိသည်၊ တိုးတက်မှုတစ်စုံတစ်ရာ ရှိမရှိဆိုသည်နှင့် ၎င်းတို့၏တာဝန်ကို ထမ်းဆောင်ရာတွင် အခက်အခဲတစ်စုံတစ်ရာ ကြုံတွေ့ခဲ့ရခြင်း ရှိမရှိ ဟူသည်တို့ကို မိတ်သဟာယဖွဲ့ရန် တောင်းဆိုခြင်းခံရလျှင်၊ ၎င်းတို့၌ ပြောစရာ မည်သည့်အရာမျှမရှိပေ။ သင်သည် ဤသမ္မာတရား၏ အသွင်အပြင်နှင့်ပတ်သက်၍ ဆက်လက်မိတ်သဟာယဖွဲ့ပါက၊ ၎င်းတို့သည် အိပ်ပျော်သွားကြသည်။ ၎င်းတို့သည် ထိုအကြောင်းကို နားထောင်ခြင်း၌ မပျော်မွေ့ကြပေ။ သင်သည် ၎င်းတို့နှင့် စကားစမြည်ပြောဆိုမှုများ ပြုလုပ်သည့်အခါ ၎င်းတို့သည် ရှေ့သို့တိုးလာကြသော်လည်း၊ တစ်စုံတစ်ဦးက သမ္မာတရားနှင့်ပတ်သက်၍ မိတ်သဟာယဖွဲ့နေသည်ကို ကြားသည့်အခိုက်တွင်မူ၊ ထောင့်တစ်နေရာသို့ သွားပုန်းပြီး ငိုက်မျဉ်းကြသည်။ ၎င်းတို့၌ သမ္မာတရားကို ချစ်မြတ်နိုးမှု လုံးဝမရှိပေ။ ၎င်းတို့သည် မည်သည့်အတိုင်းအတာအထိ သမ္မာတရားကို ချစ်မြတ်နိုးမှု မရှိကြသနည်း။ လျှော့ပြောရလျှင်၊ ၎င်းတို့သည် ထိုသမ္မာတရားကို စိတ်မဝင်စားကြဘဲ၊ အလုပ်လုပ်ပေးသူများ ဖြစ်နေရုံနှင့် ၎င်းတို့အတွက် လုံလောက်ပေသည်။ ပြင်းပြင်းထန်ထန် ပြောရလျှင်၊ ၎င်းတို့သည် သမ္မာတရားကို အလွန်အမင်း မနှစ်မြို့ကြ၊ သမ္မာတရားကို အထူးသဖြင့် ပစ်ပစ်ခါခါငြင်းကြပြီး၊ လက်မခံနိုင်ကြပေ။ ဤလူစားမျိုးသည် ခေါင်းဆောင်ဖြစ်ပါက၊ အန္တိခရစ်တစ်ဦး ဖြစ်သည်။ သာမန်နောက်လိုက်ဖြစ်ပါက၊ ၎င်းတို့သည် အန္တိခရစ်များ၏လမ်းကြောင်းကို လျှောက်လှမ်းနေဆဲဖြစ်ပြီး၊ အန္တိခရစ်များ၏ အရိုက်အရာကို ဆက်ခံသူများ ဖြစ်ကြသည်။ အပြင်ပန်းအားဖြင့်၊ ၎င်းတို့သည် ကောင်းမွန်သောအလားအလာအချို့နှင့်အတူ ဉာဏ်ရည်ဉာဏ်စွမ်းရှိပြီး ဆုကျေးဇူးရှိပုံရသော်လည်း ၎င်းတို့၏ သဘာဝ အနှစ်သာရမှာ အန္တိခရစ်တစ်ဦး၏ သဘာဝ အနှစ်သာရ ဖြစ်သည်။ ဤပုံစံပင်ဖြစ်သည်။ ဤအကဲဖြတ်ချက်များသည် အဘယ်အရာအပေါ် အခြေခံသနည်း။ ယင်းတို့အားလုံးသည် သမ္မာတရားအပေါ် ဤလူတို့၏ သဘောထားနှင့် အပြုသဘောဆောင်သော အရာများအပေါ်ထားသော ၎င်းတို့၏သဘောထားတို့အပေါ် အခြေခံသည်။ ဤသည်မှာ လူတို့၏ သမ္မာတရားအပေါ်ချဉ်းကပ်ပုံနှင့် သက်ဆိုင်သော သွင်ပြင်လက္ခဏာဖြစ်သည်။ အခြားသော သွင်ပြင်လက္ခဏာမှာ အချိန်များစွာတွင်၊ လူတို့သည် သမ္မာတရားကို တိုက်ရိုက် ရင်ဆိုင်ခြင်းမရှိကြ။ အချို့အမှုအရာများသည် သမ္မာတရားနှင့် ပတ်သက်ခြင်းမရှိ၊ လူတို့သည် သမ္မာတရား၏ မည်သည့် သွင်ပြင်လက္ခဏာ ပါဝင်ပတ်သက်သည်ကို စဉ်းစား၍မရနိုင်ကြပေ။ သို့ဆိုလျှင် လူတို့တိုက်ရိုက်ရင်ဆိုင်ရသူမှာ မည်သူနည်း။ ၎င်းတို့ တိုက်ရိုက်ရင်ဆိုင်ရသူမှာ ဘုရားသခင် ဖြစ်သည်။ ပြီးလျှင် ဤလူတို့သည် ဘုရားသခင်ကို မည်သို့ဆက်ဆံကြသနည်း။ ၎င်းတို့သည် မိမိတို့၏ ကောက်ကျစ်ဆိုးယုတ်သော စိတ်သဘောထားများကို မည်သည့်သရုပ်သကန်များတွင် ပြသကြသနည်း။ ၎င်းတို့သည် စစ်မှန်သော ဆုတောင်းခြင်းကိုလည်းကောင်း၊ ဘုရားသခင်နှင့် စစ်မှန်သော မိတ်သဟာယဖွဲ့ခြင်းကိုလည်းကောင်း လုပ်ဆောင်ကြသလော။ ၎င်းတို့တွင် ရိုးသားသော သဘောထား ရှိသလော။ စစ်မှန်သော ယုံကြည်ခြင်း ရှိသလော။ (မရှိပါ။) ၎င်းတို့သည် ဘုရားသခင်ကို အမှန်တကယ် အမှီပြုပြီး ဘုရားသခင်ထံ မိမိတို့ကိုယ်ကို အမှန်တကယ် အပ်နှံကြသလော။ ၎င်းတို့သည် ဘုရားသခင်ကို အမှန်တကယ် ကြောက်ရွံ့ကြသလော။ (မကြောက်ရွံ့ပါ။) ဤအရာအားလုံးသည် လက်တွေ့ကျသော ကိစ္စရပ်များဖြစ်ပြီး အနှစ်မဲ့ အလာပသလ္လာပစကားများ သို့မဟုတ် ဖန်တစ်ရာတေနေသည့်စကားများ လုံးဝမဟုတ်ပေ။ ဤစကားများက လက်တွေ့ကျသည်ကို သင် နားမလည်ပါက၊ သင်၌ ဝိညာဉ်ရေးရာ နားလည်သဘောပေါက်မှု မရှိပေ။ ဤသို့သောလူများ၏ သရုပ်သကန်များနှင့်ပတ်သက်၍ သင်တို့အား ငါ ဥပမာတစ်ခု ပေးမည်။ အချို့လူများသည် စုဝေးပွဲများ၌ လက်သီးဆုပ်ကာ “ကျွန်ုပ်သည် အသက်ရှင်သရွေ့ အိမ်ထောင်ပြုမည်မဟုတ်ပါ။ ကျွန်ုပ် အလုပ်ထွက်မည်ဖြစ်ပြီး အရာအားလုံးကို စွန့်လွှတ်ကာ အဆုံးတိုင်အောင် ဘုရားသခင်နောက် လိုက်မည်” ဟုဆိုလျက် သစ္စာကျိန်ဆိုကြသည်။ ၎င်းတို့အနေဖြင့် ကြွေးကြော်ခြင်းပြီးဆုံးကာ ဘုရားသခင်အတွက် မိမိတို့ကိုယ်ကို အသုံးခံတော့မည့်အချိန်တွင်၊ ၎င်းတို့က “ငါသည် ဘုရားသခင်ထံမှ ပိုများသည့် ကောင်းချီးမင်္ဂလာများကို မည်သို့ရရှိနိုင်မည်နည်း။ ဘုရားသခင်မြင်ရန် တစ်စုံတစ်ရာကို ငါ လုပ်ဆောင်ရမည်” ဟု စဉ်းစားကြသည်။ သို့သော်၊ ဘုရားသခင်က ၎င်းတို့ကဲ့သို့သော လူများကို မချစ်ကြောင်း ပြောသည်ကို ၎င်းတို့ကြားရသည့်အခါ၊ ၎င်းတို့က “ယခုတွင် ငါ မည်သည့်အရာကို လုပ်ဆောင်ရမည်နည်း။ ဘုရားသခင် ငါ့ကိုမမြင်ရန်အလို့ငှာ ဘုရားသခင်နှင့် ငါ ခပ်ကင်းကင်းနေမည်”ဟု စဉ်းစားကြသည်။ ဤသည်မှာ မည်သို့သော အခြေအနေမျိုးဖြစ်သနည်း။ (သတထားခြင်းဖြစ်သည်။) ၎င်းတို့သည် ဘုရားသခင်ကို သတိထားရန်အလို့ငှာ ဘုရားသခင်ကို ရှောင်ကြဉ်ကြသည်။ ၎င်းတို့၏ သတိထားခြင်းတွင် မည်သည့်စိတ်သဘောထား တည်ရှိသနည်း။ ကောက်ကျစ်ဆိုးယုတ်မှု ဖြစ်သည်။ ၎င်းတို့သည် အမှုအရာများကို လုပ်ဆောင်သည့်အခါ ဘုရားသခင်ကို အမြဲ သတိဖြင့်ဆက်ဆံကြသည်။ ဘုရားသခင်က ၎င်းတို့အား ရိပ်စားမိမည်ကို ကြောက်ရွံ့ကြပြီး၊ ဘုရားသခင်၏ စေ့စေ့စပ်စပ်ကြည့်ရှုစစ်ဆေးခြင်းကို လက်မခံကြပေ။ ဤသည်မှာ ဘုရားသခင်ကို ယုံကြည်ခြင်း ဖြစ်သလော။ ဤသည်မှာ ၎င်းတို့က ဘုရားသခင်ကို အတိုက်အခံလုပ်ခြင်း မဟုတ်လော။ ဤသည်မှာ အလွန်အပျက်သဘောဆောင်သော အခြေအနေဖြစ်သည်။ ပုံမှန်မဟုတ်ပေ။ ၎င်းတို့သည် ဘုရားသခင်၏ နှုတ်ကပတ်တော်များကို စားသောက်ခြင်းအား လက်ခံနိုင်ကြသေးသော်လည်း၊ ဘုရားသခင်က လူတို့အား တရားစီရင်ပြီး ဖော်ထုတ်သည့် နှုတ်ကပတ်တော်များကို ကြားသည့်အခိုက်တွင်၊ ၎င်းတို့ ထွက်ပြေးကြသည်၊ သို့မဟုတ်လျှင် ဟန်ဆောင်မှုတစ်ခုကို အလျင်အမြန်ပြုလုပ်ပြီး မိမိတို့ကိုယ်ကို ဖုံးကွယ်ရန် အပေးအယူလုပ်သည့် နည်းလမ်းတစ်ခုကို ရှာဖွေကြသည်။ ၎င်းတို့သည် မိမိတို့ကိုယ်ကို ဖုံးကွယ်ရန် ကြိုးစားလုပ်ဆောင်ကြပြီး၊ ရှောင်တိမ်းရန်နှင့် သတိထားရန် ဖြစ်နိုင်သမျှအရာအားလုံးကို လုပ်ဆောင်ကြစဉ်၊ တစ်ချိန်တည်းမှာပင် မိမိတို့၏စိတ်နှလုံးထဲ၌ ဘုရားသခင်နှင့် အဆက်မပြတ် တိုက်ခိုက်နေကြသည်။ ၎င်းတို့လုပ်ဆောင်သော အမှုအရာများ၌ ၎င်းတို့သည် ဘုရားသခင်၏ ရည်ရွယ်ချက်များကို မရှာဖွေကြသကဲ့သို့၊ သမ္မာတရားကိုလည်း မရှာဖွေကြပေ။ ထိုအစား၊ ၎င်းတို့အနေဖြင့် ဟန်ဆောင်မှုနှင့် မမှန်ကန်မှုတို့မှတစ်ဆင့် လူတိုင်း၏ အသိအမှတ်ပြုခြင်းကို ရရှိရန် ကြိုးစားကြလျက်၊ မည်သည့် မကျေနပ်ချက်များမျှမရှိဘဲ သမ္မာတရားကို လက်ခံနိုင်ပြီး ဘုရားသခင်ကို ကျိုးနွံနာခံနိုင်ကြောင်း ပို၍ပင်ပြသလိုကြသည်။ ဘုရားသခင် မိန့်တော်မူသည့်အရာ၊ ထိုသို့သောလူများထံမှ သူတောင်းဆိုသည့်အရာနှင့် ထိုသို့သောလူများကို သူမည်သို့ အကဲဖြတ်ပြီး သတ်မှတ်သည်ဟူသည်တို့နှင့်ပတ်သက်၍မူ၊ ၎င်းတို့သည် ထိုသို့သောအမှုအရာများကို ဂရုမစိုက်ကြသကဲ့သို့ သိလည်းမသိလိုကြပေ။ ၎င်းတို့၏စိတ်နှလုံးထဲ၌ ဘုရားသခင်သည် အတိအကျအားဖြင့် မည်သူဖြစ်သည်ကို အမှန်တကယ် ရှင်းလင်းစွာမသိကြဘဲ၊ ထိုအစား ရှိသမျှမှာစိတ်ကူးစိတ်သန်းနှင့် ဝေဖန်မှုသာဖြစ်သည်။ ဘုရားသခင်သည် ၎င်းတို့၏အယူအဆများနှင့် ဆန့်ကျင်ဘက်ဖြစ်သော တစ်စုံတစ်ရာကို လုပ်ဆောင်သည့်အခါ၊ ၎င်းတို့သည် ထိုအရာကို မိမိတို့၏စိတ်နှလုံးထဲ၌ ရှုတ်ချကြသည်။ ဘုရားသခင်ကို ၎င်းတို့ယုံကြည်သည်ဟု ဆိုကြသော်လည်း၊ ၎င်းတို့၏စိတ်နှလုံးများသည် သံသယများနှင့် ပြည့်နှက်နေသည်။ ဤသည်မှာ လူတို့၏ ကောက်ကျစ်ဆိုးယုတ်သော စိတ်သဘောထား ဖြစ်သည်။

အန္တိခရစ်အချို့သည် ဘုရားသခင်ကို မကြာခဏ စမ်းသပ်ရန် ကြိုးစားကြသည်။ ၎င်းတို့သည် ရှေ့သို့တစ်လှမ်းတိုးသည်၊ အခြေအနေကိုအကဲခတ်သည်၊ ထို့နောက် နောက်ထပ်တစ်လှမ်းတိုးသည်။ ရိုးရိုးရှင်းရှင်းပြောရလျှင် ၎င်းတို့၌ “စောင့်ကြည့်နေမည့်” သဘောထားရှိသည်ဟု ဆိုနိုင်သည်။ “စောင့်ကြည့်နေခြင်း”ဟူသည် အဘယ်အရာကို ဆိုလိုသနည်း။ ငါသည် သင်တို့အား ဥပမာတစ်ခု ပေးမည်။ ဥပမာအားဖြင့်၊ တစ်စုံတစ်ယောက်သည် မိမိအလုပ်မှထွက်ပြီးနောက် ဘုရားသခင်ရှေ့၌၊ “အို ဘုရား၊ ကျွန်ုပ်မှာ အလုပ်မရှိတော့ပါ။ အနာဂတ်တွင် ကိုယ်တော် ကျွန်ုပ်ကို ထောက်ပံ့မည်ဟု မျှော်လင့်ပါသည်။ အရာအားလုံးကို ကိုယ်တော်၏လက်တော်ထဲသို့ ကျွန်ုပ်အပ်နှံပါသည်။ ကျွန်ုပ်၏ဘဝကို ကိုယ်တော့်ထံ ရည်စူးဆက်ကပ်ပါသည်” ဟူဆိုလျက် ဆုတောင်းသည်။ ဆုတောင်းပြီးသည့်အခါ၊ ဘုရားသခင်က ၎င်းတို့အား တစ်ခုတလေနှင့် ကောင်းချီးမင်္ဂလာများ ပေးမပေး၊ ၎င်းတို့အား သဘာဝလွန် ထုတ်ဖော်ပြချက် သို့မဟုတ် ပိုကြီးမြတ်သော ကျေးဇူးတော်တစ်ခုခု ပေးမပေး၊ အနည်းဆုံးအနေဖြင့် ၎င်းတို့သည် လောက၌ မိမိတို့အလုပ်လုပ်စဉ်ကထက် ပို၍ရရှိပြီး ပိုကောင်းသော သာယာဝပြောမှုကို ခံစားရခြင်းရှိမရှိဟူသည်တို့ကို စောင့်ကြည့်ကြသည်။ ဤသည်မှာ ၎င်းတို့က ဘုရားသခင်ကို စမ်းသပ်ခြင်း ဖြစ်သည်။ ဤဆုတောင်းခြင်းနှင့် ဤဆက်ကပ်ခြင်းကား အဘယ်နည်း။ (အပေးအယူတစ်ခုဖြစ်ပါသည်။) ဤအပေးအယူအတွင်း၌ ကောက်ကျစ်ဆိုးယုတ်သော စိတ်သဘောထားတစ်ခု ရှိသည် မဟုတ်လော။ (ရှိပါသည်။) ၎င်းတို့၏လုပ်နည်းကိုင်နည်းမှာ ဘုရားသခင်ထံမှ ကျေးဇူးတော်နှင့် ကောင်းချီးမင်္ဂလာများကို တောင်းလျှောကလျက်၊ တန်ဖိုးပို၍ကြီးမားသော ကူညီပံ့ပိုးမှုတစ်စုံတစ်ရာကို ဆွဲဆောင်နိုင်ရန်အလို့ငှာ မဖြစ်စလောက်သော မက်လုံးတစ်ခုပေးခြင်းဖြင့် အစပျိုးခြင်း ဖြစ်သည်။ ဤသည်မှာ ၎င်းတို့၏ ရည်မှန်းချက်ဖြစ်သည်။ တစ်စုံတစ်ယောက်က၊ “တရုတ်ပြည်တွင် အခြေအနေက အလွန်ဆိုးရွားလှသည်။ အဆင်းနီသော နဂါးကြီးက လူများကို ဖမ်းဆီးနေသည့် အခြေအနေမှာ ပိုဆိုးသည်ထက်ဆိုးလာနေသည်။ လူနှစ်ယောက် အတူတကွ စုဝေးရန်ပင် အန္တရာယ်ရှိသည်၊ မိသားစုလေးယောက် အတူတကွ စုဝေးရန်ပင် အန္တရာယ်ရှိသည်။ တရုတ်ပြည်တွင် ဤအခြေအနေ၌ ဘုရားသခင်ကို ယုံကြည်ခြင်းသည် အလွန်အန္တရာယ်များလှသည်။ အကယ်၍ တစ်စုံတစ်ခု အမှန်တကယ် လွဲချော်သွားခဲ့လျှင်၊ ကျွန်ုပ်တို့ ကယ်တင်ခြင်းခံရဦးမည်လော။ ကျွန်ုပ်တို့ အချည်းနှီး ယုံကြည်ကြရမည် မဟုတ်လော” ဟူ၍ပြောသည်။ ၎င်းတို့က၊ “ငါ နိုင်ငံကို စွန့်ခွာရန် နည်းလမ်းတစ်ခု စဉ်းစားရမည်။ အရင်က အခြေအနေကောင်းခဲ့ချိန်တွင်၊ငါသည် သက်သောင့်သက်သာရှိမှုနှင့် ကိုယ်စိတ်ချမ်းသာမှုကို တပ်မက်ခဲ့ပြီး တရုတ်ပြည်မှ ထွက်ခွာရန် မလိုလားခဲ့ပါ။ ငါ့မိသားစုနှင့်အတူ စုစည်းနေထိုင်ရသည်မှာ အလွန်ကောင်းပြီး၊ ငါသည် ဘုရားသခင်ကိုလည်း ယုံကြည်နိုင်ကာ ကောင်းချီးမင်္ဂလာများလည်း လက်ခံရရှိနိုင်ခဲ့သည်၊ ထိုအရာသည် နှစ်ဦးနှစ်ဖက်အကျိုးရှိသော အခြေအနေဖြစ်ခဲ့သည်။ ယခုတွင်မူ အခြေအနေများ ဆိုးရွားလာသည်၊ ဘေးအန္တရာယ်များ ကျရောက်လာပြီဖြစ်ပြီး၊ ငါ အမြန်လုပ်ပြီး တရုတ်ပြည်မှ ထွက်ခွာရမည်။ နိုင်ငံမှထွက်ခွာပြီးသည်နှင့် ငါ၏တာဝန်ကို ငါထမ်းဆောင်နိုင်သေးသည်၊ ငါ၏တာဝန်ကို ထမ်းဆောင်ခြင်းဖြင့် ကောင်းချီးမင်္ဂလာများ ရရှိရန် အခွင့်အလမ်းရှိလိမ့်မည်” ဟူ၍ စဉ်းစားမိသွားကြသည်။ အဆုံးတွင်၊ ၎င်းတို့သည် နိုင်ငံမှ ထွက်ပြေးကြသည်။ ဤသည်ကား အဘယ်နည်း။ ဤသည်မှာ အချောင်သမားဝါဒ ဖြစ်သည်။ လူတိုင်းသည် တွက်ချက်တတ်ကြပြီး၊ လူတိုင်း၌ အပေးအယူဆန်သော စိတ်နေစိတ်ထား ရှိကြသည်။ ဤသည်မှာ ကောက်ကျစ်ဆိုးယုတ်သည် မဟုတ်လော။ သင်တို့ထဲတွင် ဤသို့သောလူများ ရှိသလော။ ၎င်းတို့၏စိတ်နှလုံးထဲ၌ ၎င်းတို့က၊ “အကယ်၍ ငါသည် လောက၌ အနိုင်ကျင့်ခံရလျှင်၊ ငါ့မိဘများနှင့် မိသားစုက ငါ့ကို ကာကွယ်ပေးနိုင်သည်။ အကယ်၍ ငါသည် ဘုရားသခင်ကို ယုံကြည်ခြင်းကြောင့် အဖမ်းခံရလျှင်၊ ဘုရားသခင်က ငါ့ကို ဘေးကင်းအောင် စောင့်ရှောက်မည်လော။ သေချာစွာ သိရန် ခက်ခဲပုံရသည်။ သို့ဆိုလျှင်၊ အကယ်၍ ငါ သေချာစွာ မသိနိုင်ပါက၊ ငါ ဘာလုပ်သင့်သနည်း။ ငါ့မိဘများသည် ငါ့ကို သေချာပေါက် ကာကွယ်ပေးနိုင်မည် မဟုတ်ပေ။ တစ်စုံတစ်ယောက်သည် ဘုရားသခင်ကို ယုံကြည်ခြင်းကြောင့် အဖမ်းခံရသည့်အခါ၊ သာမန်လူများက ထိုသူတို့ကို မကယ်တင်နိုင်ကြပေ၊ အကယ်၍ ငါသည် အဆင်းနီသော နဂါးကြီး၏ လက်ထဲတွင် ကြမ်းကြုတ်သော ညှဉ်းပန်းနှိပ်စက်မှုများနှင့် ပြင်းပြသောဝေဒနာများကို မခံနိုင်ဘဲ ယုဒဖြစ်သွားပါက၊ ငါ၏ဘဝလေး ပျက်စီးသွားမည်မဟုတ်လော။ ငါသည် နိုင်ငံမှထွက်ခွာပြီး ပြည်ပတွင် ဘုရားသခင်ကို သွားယုံကြည်ခြင်းသည် အကောင်းဆုံးဖြစ်ပေမည်” ဟူ၍ ဆိုကြသည်။ ဤသို့ တွေးသူ တစ်စုံတစ်ယောက် ရှိသလော။ ရှိရပေမည်၊ မှန်ပါသလော။။ သို့ဖြစ်၍၊ “သင်သည် ကျွန်ုပ်တို့ကို သားပုပ်လေလွင့်ပြောသည်။ ကျွန်ုပ်တို့ ထိုသို့မတွေးခဲ့ပါ”ဟု ပြောသူ တစ်ဦးတလေ ရှိသလော။ ဤသို့သောလူများသည် အနည်းစုမဟုတ်သည်မှာသေချာပြီး၊ အချိန်တန်သည့်အခါ သင်သည် မြင်တွေ့နားလည်ရလိမ့်မည်။

အန္တိခရစ်တို့၏ ကောက်ကျစ်ဆိုးယုတ်မှုနှင့်ဆိုင်သည့် အဓိက လက္ခဏာရပ်များမှာ အဘယ်နည်း။ ပထမအချက်မှာ ၎င်းတို့သည် အပြုသဘောဆောင်သောအရာများကို အသိအမှတ်မပြု၊ သမ္မာတရားကဲ့သို့သောအရာ ရှိသည်ကို အသိအမှတ်မပြုသကဲ့သို့ ၎င်းတို့၏ မှားယွင်းသော မိစ္ဆာအယူဝါဒများနှင့် ကောက်ကျစ်ဆိုးယုတ်သော အပျက်သဘောဆောင်သည့်အရာများမှာ သမ္မာတရားဖြစ်သည်ဟု ထင်မြင်ကြခြင်းဖြစ်သည်။ ဤသည်မှာ အန္တိခရစ်တို့၏ ကောက်ကျစ်ဆိုးယုတ်မှုနှင့်ဆိုင်သည့် သရုပ်သကန်တစ်ခု ဖြစ်သည်။ ဥပမာအားဖြင့်၊ အချို့လူများက “မိမိကိုယ်တိုင်၏ ပျော်ရွှင်မှုက မိမိလက်ထဲတွင်ရှိသည်”ဟူသည်နှင့် “အာဏာရှိမှသာ အရာအားလုံးကို ပိုင်ဆိုင်နိုင်သည်”ဟူသည်တို့ကိုဆိုကြသည်။ ဤသည်မှာ အန္တိခရစ်တို့၏ ဆင်ခြင်တွေးခေါ်မှုစနစ် ဖြစ်သည်။ အာဏာနှင့်အတူ မိမိတို့အား ဖော်လံဖားပြီး မြှောက်ပင့်ပြောဆိုသူများ၊ လက်ဆောင်များပေးပြီး တွယ်ကပ်ဖားယားလုပ်သူများအပြင် အဆင့်အတန်း၏ အကျိုးအမြတ်မျိုးစုံနှင့် သာယာပျော်ရွှင်မှုမျိုးစုံတို့ ပါလာသည်ဟု ၎င်းတို့က ယုံကြည်ကြသည်။ ၎င်းတို့သည် မည်သူတစ်ဦးတစ်ယောက်၏ ဩဇာပေးခြင်း သို့မဟုတ် ဦးဆောင်ခြင်းကိုမျှ ခံစရာမလိုတော့ကြောင်းနှင့် အခြားသူများကို ၎င်းတို့ ဦးဆောင်နိုင်ကြောင်း ယုံကြည်ကြသည်။ ဤသည်မှာ ၎င်းတို့၏ ထိပ်တန်းဦးစားပေးအရာ ဖြစ်သည်။ ဤကဲ့သို့ ၎င်းတို့ တွက်ချက်သည့်အပေါ် သင်တို့ မည်သို့ထင်မြင်သနည်း။ ကောက်ကျစ်ဆိုးယုတ်သည် မဟုတ်လော။ (ကောက်ကျစ်ဆိုးယုတ်ပါသည်။) အန္တိခရစ်တို့သည် သမ္မာတရားအစား ၎င်းတို့၏ စာတန်ဆန်သော ဆင်ခြင်တွေးခေါ်မှုစနစ်နှင့် မှားယွင်းသော မိစ္ဆာအယူဝါဒများကို အသုံးပြုကြသည်။ ဤသည်မှာ ၎င်းတို့၏ ကောက်ကျစ်ဆိုးယုတ်မှုနှင့်ဆိုင်သည့် သွင်ပြင်လက္ခဏာတစ်ခု ဖြစ်သည်။ ပထမဦးစွာ၊ ၎င်းတို့သည် သမ္မာတရားကို အသိအမှတ်မပြု၊ အပြုသဘောဆောင်သောအရာများ ရှိသည်ကို အသိအမှတ်မပြု၊ အပြုသဘောဆောင်သောအရာများ၏ မှန်ကန်မှုကိုလည်း အသိအမှတ်မပြုကြပေ။ ထို့အပြင်၊ အချို့လူများသည် ဤလောက၌ အပြုသဘောဆောင်သောအရာများနှင့် အပျက်သဘောဆောင်သောအရာများ ရှိကြောင်းကို အသိအမှတ်ပြုကြသော်လည်း၊ ၎င်းတို့သည် အပြုသဘောဆောင်သောအရာများနှင့် သမ္မာတရားတည်ရှိမှုကို မည်သို့ချဉ်းကပ်ကြသနည်း။ ၎င်းတို့သည် ထိုအရာကို ချစ်မြတ်နိုးခြင်းမရှိသေးပေ၊ ဘုရားသခင်ကို ၎င်းတို့၏ ယုံကြည်မှုတွင် ၎င်းတို့ရွေးချယ်သောဘဝနှင့် လျှောက်လှမ်းသောလမ်းကြောင်းတို့သည် အပျက်သဘောဆောင်နေဆဲဖြစ်ပြီး သမ္မာတရားနှင့် ဆန့်ကျင်ဘက်ဖြစ်သည်။ ၎င်းတို့သည် မိမိတို့၏ ကိုယ်ပိုင်အကျိုးစီးပွားများကိုသာ ကာကွယ်စောင့်ရှောက်ကြသည်။ အပြုသဘောဆောင်သော အရာဖြစ်စေ၊ အပျက်သဘောဆောင်သော အရာဖြစ်စေ၊ ထိုအရာက မိမိတို့၏ ကိုယ်ပိုင်အကျိုးစီးပွားများကို ကာကွယ်စောင့်ရှောက်နိုင်သမျှ ကာလပတ်လုံး၊ ယင်းက အဆင်ပြေသည်၊ အထွတ်အထိပ်ဖြစ်သည်။ ဤသည်မှာ ကောက်ကျစ်ဆိုးယုတ်သော စိတ်သဘောထား မဟုတ်လော။ နောက်ထပ် သွင်ပြင်လက္ခဏာတစ်ခု ရှိသည်၊ ကောက်ကျစ်ဆိုးယုတ်သော အနှစ်သာရကို ပိုင်ဆိုင်သည့် ဤသို့သောလူများသည် ဘုရားသခင်၏ နှိမ့်ချမှုနှင့် ကွယ်ဝှက်မှု၊ ဘုရားသခင်၏ သစ္စာစောင့်သိခြင်းနှင့် ကောင်းမြတ်ခြင်းတို့ကို ပင်ကိုအားဖြင့် မထီမဲ့မြင်ပြုတတ်ကြသည်။ ၎င်းတို့သည် ဤအပြုသဘောဆောင်သောအရာများကို ပင်ကိုအားဖြင့် မထီမဲ့မြင်ပြုတတ်ကြသည်။ ဥပမာအားဖြင့်၊ ငါ့ကိုကြည့်လော့၊ ငါသည် အလွန်သာမန်ဖြစ်သည် မဟုတ်လော။ ငါသည် သာမန်ဖြစ်သည်၊ အဘယ်ကြောင့် သင် မပြောရဲသနည်း။ ငါသာမန်ဖြစ်ကြောင်း ငါ ကိုယ်တိုင် အသိအမှတ်ပြုသည်။ ငါသည် မိမိကိုယ်ကို သာမန်ထက်ထူးခြားသောသူ သို့မဟုတ် ကြီးမြတ်သောသူဟု မည်သည့်အခါမျှ မတွေးထင်ခဲ့ဖူးပေ။ ငါသည် သာမန်လူတစ်ဦးသာ ဖြစ်သည်။ ငါသည် ဤအချက်ကို အစဉ်အမြဲ အသိအမှတ်ပြုခဲ့ပြီး၊ ဤအချက်ကို ရင်ဆိုင်ဝံ့သည်။ ငါသည် ထိပ်တန်းလူတစ်ဦး သို့မဟုတ် ကြီးမြတ်သော ပုဂ္ဂိုလ်တစ်ဦးဦး မဖြစ်လိုပေ။ ယင်းမှာ မည်မျှပင်ပန်းလိုက်မည်နည်း။ လူအချို့သည် ငါဖြစ်သော ဤသာမန်လူကို အထင်သေးကြပြီး ငါနှင့်ပတ်သက်သည့် အယူအဆများ အစဉ်ထားရှိကြသည်။ ဘုရားသခင်ကို အမှန်တကယ် ယုံကြည်သူများက ငါ့ရှေ့မှောက်သို့ ရောက်လာသည့်အခါ၊ အပြင်ပန်းအားဖြင့် မည်သည့်အရာနှင့် ငါ တူသည်ဖြစ်စေ၊ ၎င်းတို့သည် ရိုသေကိုင်းရှိုင်းမှုတစ်ခုခုဖြင့် လာကြဆဲဖြစ်သည်။ ထို့နောက် ငါ့အား အလွန်ယဉ်ကျေးစွာ စကားပြောဆိုကြသော်လည်း၊ ၎င်းတို့၏စိတ်နှလုံးထဲ၌ ငါ့အပေါ် မထီမဲ့မြင်ပြုသော သဘောထားကို ထားရှိကြသည့်လူအချို့ရှိပြီး ၎င်းတို့၏လေသံနှင့် ကိုယ်အမူအရာတို့မှတစ်ဆင့် ဤအရာကို ငါ ခွဲခြားနိုင်သည်။ တစ်ခါတစ်ရံ ၎င်းတို့သည် အလွန်ရိုသေပုံရသော်လည်း၊ ၎င်းတို့ထံ ငါပြောဆိုသမျှကို ၎င်းတို့က “မဟုတ်ပါ” ဟုအစဉ်တုံ့ပြန်ကြပြီး ငါပြောသည့်အရာကို အစဉ်ငြင်းပယ်ကြသည်။ ဥပမာအားဖြင့်၊ ယနေ့ရာသီဥတု အလွန်ပူသည်ဟု ငါပြောလျှင်၊ ၎င်းတို့က “မဟုတ်ပါ၊ မနေ့က အရမ်းပူသည်” ဟု ပြောကြသည်။ ၎င်းတို့က ငါပြောသည့်အရာကို ငြင်းပယ်သည်၊ မှန်သလော။ သင်သည် ၎င်းတို့ကို မည်သည့်အရာပြောသည်ဖြစ်စေ၊ ၎င်းတို့က အမြဲငြင်းပယ်ကြသည်။ ပတ်ဝန်းကျင်တွင် ဤသို့သောလူများ မရှိပါသလော။ (ရှိပါသည်။) ငါက “ယနေ့ အစားအစာက ငန်သည်။ ၊ ဆားများသွားသည်လော သို့မဟုတ် ပဲငံပြာရည် များသွားသည်လော” ဟု ပြောလျှင်၊ ၎င်းတို့က “နှစ်ခုလုံးမဟုတ်ပါ၊ သကြားများသွားခြင်းဖြစ်သည်” ဟု ပြောကြသည်။ မည်သည့်အရာကို ငါ ပြောသည်ဖြစ်စေ၊ ၎င်းတို့က ငြင်းပယ်ကြသောကြောင့် ငါသည် အခြားမည်သည့်အရာမျှ မပြောတော့ပေ။ ငါတို့သည် သဘောထားချင်း တိုက်ဆိုင်ခြင်း မရှိကြသကဲ့သို့၊ မတူညီသည့် အသုံးအနှုန်းများကို ပြောဆိုနေကြသည်။ ထို့နောက် ဘုရားသခင်ကို ယုံကြည်ခြင်းအကြောင်း ငါ ပြောဆိုနေသည်ကို ကြားသည့်အခါ၊ “သင်က ဤအကြောင်းကို ပြောရာတွင် ကျွမ်းကျင်သည်။ထို့ကြောင့် ကျွန်ုပ် နားထောင်မည်” ဟု ဆိုသော သူအချို့ရှိသည်။ အကယ်၍ ငါက ပြင်ပအရာတစ်ခုခုအကြောင်း အနည်းငယ်ပြောလျှင်၊ ၎င်းတို့က ငါသည် ပြင်ပအရာများအကြောင်း မည်သည့်အရာမျှ မသိသည့်အလား နားမထောင်လိုကြတော့ပေ။ ၎င်းတို့က ငါ့ကို အာရုံမစိုက်ခြင်းသည် ကိစ္စမရှိပေ၊ ငါသည် တိတ်တိတ်ဆိတ်ဆိတ်နေချင်သည်။။ ငါ့ကို မည်သူမျှ အာရုံစိုက်ရန် မလိုအပ်ပေ၊ ငါလုပ်သင့်သည့်အရာကိုသာ ငါလုပ်ဆောင်သည်။ ငါ၌ ငါ၏တာဝန်များရှိပြီး၊ ငါ၌ ငါ၏ဘဝနေထိုင်မှုပုံစံ ရှိသည်။ ငါ့အားပြောလော့၊ လူတို့၏ ဤသဘောထားများသည် အဘယ်အရာကို ဖော်ပြသနည်း။ ငါ့အနေဖြင့်ကြီးမြတ်သောသူ သို့မဟုတ် တတ်စွမ်းနိုင်သော လူတစ်ဦးနှင့် မတူသည်ကိုလည်းကောင်း၊ ငါသည် သာမန်လူတစ်ဦးကဲ့သို့ ပြောဆိုပြုမူသည်ကိုလည်းကောင်း ၎င်းမြင်ကြသောကြောင့်၊ ၎င်းတို့က “သင်သည် အဘယ်သို့ဖြစ်ပြီး ဘုရားနှင့် မတူရသနည်း။ ငါ့ကိုကြည့်ပါလော့။ အကယ်၍ ငါက ဘုရားဖြစ်ခဲ့လျှင်၊ ငါသည်သူနှင့် အတူဆုံး ဖြစ်မည်ဖြစ်သည်” ဟု စဉ်းစားကြသည်။ ဤသည်မှာ ဘုရားသခင်နှင့်တူခြင်း၊ မတူခြင်းကိစ္စမဟုတ်ပေ။ ငါ ဘုရားသခင်နှင့်တူဖို့ရန် တောင်းဆိုနေသူမှာ သင်ဖြစ်သည်။ ငါသည် သူနှင့်တူသည်ဟု မည်သည့်အခါမျှ မပြောခဲ့ဖူးသကဲ့သို့၊ သူနှင့်တူရန်လည်း မည်သည့်အခါမျှ အလိုမရှိခဲ့ပေ။။ ငါလုပ်သင့်သည့်အရာကိုသာ ငါလုပ်ဆောင်သည်။ အကယ်၍ ငါတစ်နေရာရာသို့သွားပြီး လူအချို့က ငါ့ကိုမမှတ်မိလျှင်၊ ယင်းမှာ ငါ့ကို ဒုက္ခသက်သာစေသောကြောင့် အလွန်ကောင်းပေသည်။ သင်တို့ သိသလော၊ သခင်ယေရှုသည် ထိုအချိန်က ယုဒပြည်၌ များစွာသောစကားများပြောဆိုကာ အမှုပြုခပြီး သူ့နောက်လိုက်သော တပည့်တော်များ၌ မည်သည့် ဖောက်ပြန်ပျက်စီးသော စိတ်သဘောထားများ ရှိစေကာမူ၊ သူ့အပေါ် ၎င်းတို့၏သဘောထားမှာ လူတစ်ဦးက ဘုရားသခင်အပေါ်ထားသော သဘောထားဖြစ်ခဲ့သည်။ ပုံမှန်ဆက်ဆံရေးတစ်ခု ရှိခဲ့သည်။ သို့သော် သခင်ယေရှုအား “သူသည် လက်သမား၏သား မဟုတ်လော”ဟု ဆိုခဲ့ကြသည့် သူအချို့ရှိခဲ့ပြီး၊ သူ့နောက် အချိန်ကြာမြင့်စွာ လိုက်ခဲ့သူအချို့ပင်လျှင် ဤသဘောထားကို အစဉ်တစိုက် ထားရှိခဲ့ကြသည်။ ဤသည်မှာ လူ့ဇာတိခံယူထားသော ဘုရားသခင်က သာမန်၊ ပုံမှန်လူသားတစ်ဦးအဖြစ် ဖြစ်လာရာ၌ မကြာခဏ ရင်ဆိုင်ရသော အရာတစ်ခုဖြစ်ပြီး၊ သာမန်အဖြစ်အပျက်တစ်ခုလည်း ဖြစ်သည်။ အချို့လူများသည် ငါနှင့် ပထမဆုံးတွေ့ဆုံသည့်အခါ အလွန်စိတ်အားထက်သန်ကြပြီး၊ ငါထွက်ခွာသွားသည့်အခါ ၎င်းတို့သည် ပျပ်ဝပ်ကာ ငိုကြွေးကြသည်။ သို့သော် လက်တွေ့ပေါင်းသင်းဆက်ဆံသည့်အတောအတွင်းတွင် ဤအရာက အလုပ်မဖြစ်တော့ဘဲ အချိန်များစွာ၌ ငါသည်းခံရသည်။ အဘယ်ကြောင့် ငါသည်းခံရသနည်း။ အဘယ်ကြောင့်ဆိုသော် လူအချို့သည် မိုက်မဲကြသောကြောင့်ဖြစ်သည်၊ အချို့မှာ မယဉ်ကျေးနိုင်ကြသောကြောင့်၊ လူအချို့မှာ အစေခံသူများအဖြစ် လိုအပ်ပြီး၊ အချို့မှာ ကျိုးကြောင်းဆင်ခြင်မှု လုံးဝမရှိသောကြောင့် ဖြစ်သည်။ ထို့ကြောင့် တစ်ခါတစ်ရံ ငါသည်းခံရပြီး၊ တစ်ခါတစ်ရံ ငါနှင့် ရင်းနှီးခွင့်ကို ငါ မပေးနိုင်သည့် လူအချို့ရှိသည်။ ဤလူများသည် အလွန်စက်ဆုပ်ဖွယ်ကောင်းပြီး ၎င်းတို့၌ ဆန့်ကျင်လိုသော စိတ်သဘောထား ရှိသည်။ မည်သို့ ဆန့်ကျင်လိုကြသနည်း။ ဥပမာအားဖြင့်၊ ငါသည် အလွန်ချစ်စရာကောင်းသော ခွေးငယ်တစ်ကောင်ကိုမြင်ပြီး “သူ့ကို ဟွားမောင်လို့ခေါ်ကြစို့” ဟု ပြောလိုက်သည်။ ဤအမည်အပေါ် လူအများစုက မည်သို့သဘောထားကြသနည်း။ ထိုအရာသည် အမည်တစ်ခုမျှသာဖြစ်ပြီး၊ ငါက ထိုအမည်ကို ပထမဆုံး စိတ်ကူးရသည်ကို မြင်သောကြောင့် ထိုခွေးကို ထိုအမည်ဖြင့် ခေါ်ဝေါ်ကြရမည်ဖြစ်သည်။ ထိုအရာမှာ အလွန်သာမန်ကိစ္စတစ်ခု ဖြစ်သည်။ ဆန့်ကျင်လိုသော စိတ်သဘောထားရှိသည့် လူအချို့ကမူ ထိုအမည်ကို ခေါ်မည်မဟုတ်ဘဲ၊ ၎င်းတို့က “ဟွားမောင်ဆိုသည်မှာ မည်သည့်အမည်မျိုးဖြစ်သနည်း။ ခွေးကို ဟွားမောင်လို့ခေါ်ခြင်းကို ယခင်က တစ်ခါမျှမကြားဖူးပါ။ ထိုအမည်ဖြင့် မခေါ်ကြစို့နှင့်၊ သူ့ကို အင်္ဂလိပ်နာမည်ပေးသင့်သည်”ဟု ဆိုကြသည်။ ငါက “ငါသည် အင်္ဂလိပ်အမည်များကို စိတ်ကူးရာတွင် သိပ်မတော်ပါ။ ထို့ကြောင့် ထိုခွေးကို သင်တို့ ခေါ်ချင်သည့်အတိုင်း ခေါ်ကြကြလော့၊ သင်တို့၏ဆုံးဖြတ်ချက်ကို ငါ လိုက်လျောမည်”ဟု ပြောလိုက်သည်။ အဘယ်ကြောင့် ငါသည် ၎င်းတို့၏ဆုံးဖြတ်ချက်ကို လိုက်လျောသနည်း။ ဤသည်မှာ သေးငယ်သောကိစ္စဖြစ်သည်။ ထို့ကြောင့် အဘယ်ကြောင့် ငြင်းခုံနေရမည်နည်း။ လူအချို့မှာမူ အလျှော့မပေးဘဲ ထိုသို့သောအရာများအတွက် ငြင်းခုံရမည်သာ ဖြစ်သည်။ ငါအလျှော့ပေးလိုက်ခြင်းကြောင့်သက်သက်ဖြင့် ငါမှားကြောင်း ငါယုံကြည်သည်ဟု မဆိုလိုပေ။ ထိုအရာသည် ငါကျင့်ကြံပြုမူပြီး လုပ်ဆောင်သည့် စည်းမျဉ်းသာဖြစ်သည်။ ငါသည် သင်နှင့်မငြင်းခုံသောကြောင့်သက်သက်ဖြင့် ငါသည် သင့်ကိုကြောက်သည်ဟု မဆိုလိုပေ။ ငါမငြင်းခုံသော်လည်း သင်သည် မယုံကြည်သူတစ်ဦးဖြစ်ကြောင်း ငါ့စိတ်နှလုံးထဲ၌ ငါသိသည်၊ ငါသည် သင်ကဲ့သို့သော လူစားမျိုးနှင့် ပေါင်းသင်းဆက်ဆံရမည့်အစား ခွေးတစ်ကောင်နှင့်သာ ပေါင်းသင်းဆက်ဆံလိုက်မည်။ ငါ အသက်ရှင်နေထိုင်သည့် အသိုင်းအဝိုင်း နယ်ပယ်အတွင်းရှိ မဖြစ်မနေ ပေါင်းသင်းဆက်ဆံရမည့် လူအနည်းငယ်မှလွဲ၍၊ ငါပေါင်းသင်းဆက်ဆံမည့်သူများမှာ ညီအစ်ကိုမောင်နှမများ၊ ဘုရားအိမ်တော်မှလူများ ဖြစ်ကြသည်။ ဤသည်မှာ ငါ၏စည်းမျဉ်း ဖြစ်သည်။ ငါသည် ဘာသာတရားမရှိသူ တစ်ဦးတစ်ယောက်နှင့်မျှပင် ပေါင်းသင်းဆက်ဆံခြင်းမပြု။ ငါသည် ဤသို့ပြုလုပ်ရန် မလိုအပ်ပေ။ သို့သော်၊ ဘုရားအိမ်တော်၌ ဘုရားအိမ်တော်နှင့် ချစ်ကြည်ရင်းနှီးသော မယုံကြည်သူများရှိပါက၊ ၎င်းတို့သည် အသင်းတော်၏မိတ်ဆွေများ ဖြစ်နိုင်သည်။ ၎င်းတို့သည် အသင်းတော်ကို ကူညီသည်ဖြစ်စေ၊ အသင်းတော်အတွက် အားထုတ်မှုအချို့ပြုလုပ်၍ ကိစ္စအချို့ကို ကိုင်တွယ်ဖြေရှင်းပေးသည်ဖြစ်စေ၊ အသင်းတော်သည် ၎င်းတို့ကို လက်ခံနိုင်သော်လည်း၊ ငါသည် ညီအစ်ကိုမောင်နှမများကဲ့သို့ ၎င်းတို့နှင့် ပေါင်းသင်းဆက်ဆံမည်မဟုတ်ပေ။ ငါသည် ငါ၏အလုပ်နှင့် အလွန်အလုပ်များပြီး ထိုသို့သောကိစ္စရပ်များကို ကိုင်တွယ်ဖြေရှင်းရန် အချိန်မရှိပေ။ ဘုရားသခင်ကို နှစ်အချို့ကြာ ယုံကြည်ခဲ့ပြီးသော အချို့လူများသည် ဘုရားသခင်၏အမှုတော်၊ လူ့ဇာတိခံ ဘုရားသခင်နှင့် လူတို့ကို ဘုရားသခင်၏ကယ်တင်ခြင်းတို့နှင့်ပတ်သက်၍ အယူအဆအချို့ ရှိသင့်သည့်တိုင်၊ ၎င်းတို့တွင် ဘုရားသခင်ကို ကြောက်ရွံ့သော စိတ်နှလုံး လုံးဝမရှိကြပေ။ ၎င်းတို့သည် ဘာသာတရားမရှိသူများနှင့် အတူတူပင်ဖြစ်ပြီး လုံးဝပြောင်းလဲခြင်းမရှိကြပေ။ ငါ့အားပြောလော့၊ ဤလူများသည် အဘယ်အရာများ ဖြစ်ကြသနည်း။ ၎င်းတို့သည် မွေးရာပါ နတ်ဆိုးများ၊ ဘုရားသခင်၏ ရန်သူများ ဖြစ်ကြသည်။ နတ်ဆိုးများနှင့် စာတန်များဖြစ်ကြသော ထိုသူတို့နှင့် ပေါင်းသင်းဆက်ဆံမှု နက်ရှိုင်းလာသည့်အခါ၊ အားလုံးသည် ဘေးဒုက္ခနှင့် ဘေးအန္တရာယ်များသာ ဖြစ်လာသည်။

သင်သည် မည်သည့်လူအုပ်စုတွင် ပါဝင်သည်ဖြစ်စေ၊ သင့်ကိုမကြိုက်မည့်သူတစ်ယောက် အမြဲရှိလိမ့်မည်ဖြစ်ပြီး ၎င်းတို့အား ဒေါသထွက်အောင်ဆွပေးခြင်း သို့မဟုတ် စိတ်မကျေနပ်အောင်လုပ်ခြင်းမရှိဘဲပင်၊ ၎င်းတို့သည် သင့်အကြောင်း မကောင်းပြောမည်၊ သင့်ကို ဝေဖန်မည်၊ သင့်ကို အသရေဖျက်ကြလိမ့်မည်ဟူသည်ကို သင်တို့၏နေ့စဉ်ဘဝများမှ သင်တို့အားလုံး တွေ့ကြုံခံစားကောင်းခံစားရနိုင်သည်။ သင်သည် မည်သည့်အရာဖြစ်ခဲ့သည်ကို မသိသော်လည်း၊ ၎င်းတို့က သင့်ကိုမကြိုက်ကြ၊ ၎င်းတို့သည် သင်နှင့်အဆင်မပြေကြဘဲ သင့်ကို အနိုင်ကျင့်လိုကြသည်။ ဤနေရာတွင် အခြေအနေမှာ အဘယ်နည်း။ သင်သည် ၎င်းတို့ကို စိတ်မကျေနပ်စေဖို့ လုပ်မိသည့်အရာကို သင်မသိသော်လည်း၊ အမည်မသိအကြောင်းပြချက်တစ်ခုခုကြောင့် သင်သည် ၎င်းတို့၏အနိုင်ကျင့်ခြင်းကို ခံရသည်။ ဤသို့သော ဆိုးယုတ်သောလူများ ရှိသလော။ (ရှိပါသည်။) ၎င်းတို့သည် သင်၏ရန်ဘက်များဖြစ်ကြပြီး၊ ထိုသို့သာ ရှင်းပြ၍ရနိုင်သည်။ သင်သည် ၎င်းတို့နှင့် မဆက်ဆံခင်ကပင်၊ ၎င်းတို့သည် သင့်ကို ချက်ချင်း မကြိုက်ဖြစ်သွားပြီး သင့်ကို မည်သို့အန္တရာယ်ပေးနိုင်မည်ကို စဉ်းစားကြသည်။ ၎င်းတို့သည် သင်၏ခါးသီးသော ရန်ဘက်များဖြစ်သည် မဟုတ်လော။ (ဟုတ်ပါသည်။) သင်သည် ခါးသီးသော ရန်ဘက်တစ်ဦးနှင့် ကောင်းမွန်စွာ အဆင်ပြေနိုင်သလော။ လမ်းကြောင်းတစ်ခုတည်းကို သင်တို့ လျှောက်လှမ်းနိုင်သလော။ သေချာပေါက် မလျှောက်လှမ်းနိုင်ပေ။ သို့ဖြစ်လျှင် သင်သည် ထိုသို့သောလူများနှင့် ထိပ်တိုက်တွေ့ပြီး ငြင်းခုံမည်လော။ (မဟုတ်ပါ၊ ကျွန်ုပ် သူတို့နှင့် ငြင်းခုံမည်မဟုတ်ပါ။) အဘယ်ကြောင့် မငြင်းခုံသနည်း။ အကြောင်းမှာ ၎င်းတို့သည် ကျိုးကြောင်းဆင်ခြင်မှု လုံးဝမရှိသောကြောင့် ဖြစ်သည်။ လူအချို့သည် အပြုသဘောဆောင်သောအရာများ၊ မှန်ကန်သောအရာများ၊ လူသားမျိုးနွယ်ကြားတွင် နှိုင်းယှဉ်လျှင် ကောင်းမွန်သောအရာများ၊ ဆိုလိုသည်မှာ လူတို့အတော်အတန် တောင့်တပြီး နှစ်သက်ကြသည့် အပြုသဘောဆောင်သောအရာများကို ပင်ကိုအားဖြင့် အလွန်အမင်း မနှစ်မြို့ဘဲ ပစ်ပစ်ခါခါငြင်းကြသည်။ ဤသို့သောလူများ ပိုင်ဆိုင်သည့် သိသာသော စိတ်သဘောထားတစ်ခုမှာ ကောက်ကျစ်ဆိုးယုတ်မှု ဖြစ်သည်။ ၎င်းတို့သည် ကောက်ကျစ်ဆိုးယုတ်သောလူများ ဖြစ်ကြသည်။ ဥပမာအားဖြင့်၊ အမျိုးသားတစ်ဦးသည် ရည်းစားရှာဖွေပြီး “သူမ ရုပ်ဆိုးသည်ဖြစ်စေ၊ လှပသည်ဖြစ်စေ၊ အကျင့်သီလကောင်းမွန်ပြီး ကောင်းမြတ်ကာ ဘဝကို ကောင်းမွန်စွာ ဖြတ်သန်းနိုင်သရွေ့၊ ယင်းမှာ လုံလောက်ပေသည်။ အထူးသဖြင့် လူ့သဘာဝနှင့် ယုံကြည်ခြင်းရှိသော အမျိုးသမီးတစ်ဦးဆိုလျှင်၊ ငါသည် ဆင်းရဲသည်ဖြစ်စေ၊ ချမ်းသာသည်ဖြစ်စေ၊ ရုပ်ဆိုးသည်ဖြစ်စေ၊ ချောမောသည်ဖြစ်စေ၊ သို့မဟုတ် နာမကျန်းဖြစ်လျှင်ဖြစ်စေ၊ သူမသည် ငါနှင့်အတူ သစ္စာရှိရှိနေလိမ့်မည်” ဟူ၍ဖြစ်သည်။ ရည်မွန်သောသူတို့သည် ပုံမှန်အားဖြင့် ဤအမြင်ကို စွဲကိုင်ထားကြသည်။ မည်သည့်လူစားမျိုးများက ဤအမြင်မျိုးကို မနှစ်သက်ကြသနည်း သို့မဟုတ် အတည်မပြုကြသနည်း။ (ကောက်ကျစ်ဆိုးယုတ်သောလူများဖြစ်သည်။) သို့ဖြစ်လျှင် ငါ့အားပြောလော့၊ ကောက်ကျစ်ဆိုးယုတ်သောလူများသည် မည်သည့်အမြင်ကို စွဲကိုင်ထားကြသနည်း။ ဤစကားများကို ကြားသည့်အခါ ၎င်းတို့သည် မည်သို့တုံ့ပြန်ကြသနည်း။ ၎င်းတို့က “လူအ။ငါတို့ မည်သည့်ခေတ်တွင် ရှိကြသနည်း။ပြီးလျှင် သင်သည် ထိုသို့သောသူတစ်ဦးကို ရှာနေသည်လော။ သင့်အနေဖြင့် ချမ်းသာပြီး လှပသည့် မိန်းမတစ်ယောက်ကို ရှာသင့်သည်”ဟုပြောလျက် သင့်ကို လှောင်ကြသည်။ သာမန်အမျိုးသားများသည် ရည်မွန်ပြီး အကျင့်သီလရှိသော အမျိုးသမီးများနှင့် လက်ထပ်ကြပြီး၊ စည်းလုံးပျော်ရွှင်သော မိသားစုနှင့်အတူ သင့်တင့်မျှတသော ဘဝကို အတူတကွ နေထိုင်အသက်ရှင်ကြသည်။ ၎င်းတို့သည် ဘဝ၌ မိမိတို့ကိုယ်ကို သန့်ရှင်းစင်ကြယ်စွာ ကျင့်ကြံပြုမူကြသည်။ ကောက်ကျစ်ဆိုးယုတ်သောလူများသည် ဤသို့တွေးကြသလော။ (မတွေးကြပါ။) ၎င်းတို့က၊ “အခု ဤကမ္ဘာလောကတွင်၊ ယောက်ျားတစ်ယောက်က ရည်းစား ဆယ်ယောက်ခန့်နှင့် ဇနီးမယားများစွာ မရှိခဲ့လျှင် ယောက်ျားဟု ခေါ်၍ရနိုင်သေးသလော။ သူ့တွင်မရှိလျှင်၊ ယင်းမှာ အချည်းနှီးဖြစ်သောဘဝတစ်ခု ဖြစ်သည်” ဟု ပြောကြသည်။ ၎င်းတို့အားလုံးက ဤအမြင်ကိုစွဲကိုင်ထားကြသည်။ သင်က ၎င်းတို့အား “ရည်မွန်သည့်၊ အကျင့်သီလရှိပြီး စိတ်ကောင်းရှိသည့် အမျိုးသမီး၊ အထူးသဖြင့် လူ့သဘာဝနှင့် ယုံကြည်ခြင်းရှိသည့် အမျိုးသမီးတစ်ယောက်ကို ရှာလော့” ဟု ပြောလျှင်၊ ထိုအရာသည် ၎င်းတို့အတွက် လက်ခံနိုင်ဖွယ်ဖြစ်သလော။ (လက်ခံနိုင်ဖွယ် မဟုတ်ပါ။) ၎င်းတို့က သင့်ကို ပြက်ရယ်ပြုကာ၊ “သင် စဉ်းစားဉာဏ်ကင်းမဲ့ပေသည်။ ယခုတွင် လောက၌ မည်သူကမျှ အခြားသူတို့၏ အရေးကိစ္စကို အရေးမစိုက်ကြပါ။ လူတိုင်းက လွတ်လပ်ပေါ့ပါးစွာ နေထိုင်ကြသည်။ အထူးသဖြင့် တရုတ်ပြည်ကို သင် စွန့်ခွာပြီး အနောက်တိုင်းသို့သွားလျှင် သင့်ကို အနီးကပ်နောက်ယောင်ခံလိုက်မည့်သူ မည်သူမျှမရှိဘဲ ပို၍ပင် လွတ်လပ်ပေသည်။ သင်သည် အဘယ်ကြောင့် သင့်ကိုယ်သင် အခက်တွေ့အောင်လုပ်ရသနည်း။ သင် အလွန် မိုက်မဲပေသည်” ဟု ပြောကြသည်။ ဤသည်မှာ ၎င်းတို့ စွဲကိုင်သော အမြင်ဖြစ်သည်။ သို့ဖြစ်လျှင်၊ သင်က ၎င်းတို့အား အပြုသဘောဆောင်သောအရာများ၊ သမ္မာတရား၊ တရားမျှတမှုတို့နှင့်ဆိုင်သော လူသား၏ အံ့သြဖွယ်အကောင်းဆုံး အပြုသဘောဆောင်သည့်အရာများအကြောင်း ပြောသည့်အခါ ၎င်းတို့သည် မည်သို့ခံစားရသနည်း။ သူတို့က စက်ဆုပ်ရွံရှာမှုကို ခံစားရပြီး ၎င်းတို့၏စိတ်နှလုံးထဲ၌ သင့်ကို ကျိန်ဆဲကြသည်။ သင်သည် ဤသို့သောလူစားမျိုးဖြစ်ကြောင်း ၎င်းတို့သိသွားသည်နှင့်တစ်ပြိုင်နက်၊ ၎င်းတို့၏စိတ်နှလုံးများသည် သင့်အပေါ် သတထားလာကြပြီး၊ သင့်ကို ရှောင်ကြဉ်ကြလိမ့်မည်။ လူအမျိုးအစားချင်းမတူသူများသည် လမ်းကြောင်းတစ်ခုတည်းကို မလိုက်လျှောက်ကြပေ။ သင်သည် ၎င်းတို့ကဲ့သို့သောလူများအပေါ် စက်ဆုပ်ရွံရှာကြောင်း ၎င်းတို့သိကြပြီး၊ ၎င်းတို့သည်လည်း သင့်ကဲ့သို့သောလူများကို မိမိတို့၏စိတ်နှလုံးထဲ၌ အထင်သေးကြသည်။ ၎င်းတို့က မိမိတို့ကိုယ်ကို မည်မျှအလှဆင်ကြသည်၊ အခြားသူများနှင့် မည်သို့ နောက်ပြောင်ကျီစယ်ကြသည်ကို သင့်အား မပြောလိုကြပေ။ သင်က သူတို့နှင့်အတူ သမ္မာတရားကို မိတ်သဟာယဖွဲ့ပြီး မှန်ကန်သောလမ်းကြောင်းအား လိုက်လျှောက်စေမည်ကို ၎င်းတို့ကြောက်ကြပြီး၊ လုံးဝ ပစ်ပစ်ခါခါငြင်းကြသည်။ တစ်နည်းအားဖြင့်၊ ၎င်းတို့၏အတွင်းကျကျ စိတ်နှလုံးများ၌၊ အပြုသဘောဆောင်သော အရာအားလုံးကို ၎င်းတို့ အထင်သေးကြသည်။ ထို့ကြောင့် သင်တို့သည် ဧဝံဂေလိတရားကို ဟောပြောသည့်အခါ ထိုသို့သောလူများနှင့် ကြုံတွေ့ရပါက၊ သင်သည် သူတို့ထံ ထိုဧဝံဂေလိကို ဟော၍မရပေ။ သင်တို့ဟောပြောပြီး ၎င်းတို့ယုံကြည်လာလျှင်ပင်၊ ၎င်းတို့သည် အန္တိခရစ်များဖြစ်နေကြဆဲဖြစ်ပြီး ကယ်တင်ခြင်းမခံရနိုင်ပေ။ အဘယ်ကြောင့် သင်တို့သည် ဤနေရာတွင်ထိုင်ပြီး ငါ၏တရားဒေသနာကို နားထောင်နိုင်ကြသနည်း။ သင်တို့၌ သမ္မာတရားကို ချစ်မြတ်နိုးသော စိတ်နှလုံးအနည်းငယ် ရှိသောကြောင့်ဖြစ်သည် မဟုတ်လော။ ငါသည် သင်တို့အား စကားပြောနေစဉ် သင်၌ သန့်ရှင်းသော ဝိညာဉ်တော်၏ လုပ်ဆောင်မှုရှိနေသမျှကာလပတ်လုံး၊ သင်၏စိတ်နှလုံးထဲ၌ တို့ထိခံရပြီး ခွန်အားရလိမ့်မည်ဖြစ်သည်။ သင်သည် တရားမျှတမှု၊ သမ္မာတရားနှင့် ကယ်တင်ခြင်းတို့ကို လိုက်စားရာတွင် မိမိကိုယ်ကို ဆက်ကပ်ခြင်း၊ ဆင်းရဲဒုက္ခခံခြင်းနှင့် မိမိကိုယ်ကို အသုံးခံခြင်းတို့ကို ပြုလုပ်လိုစိတ် ရှိလိမ့်မည်။ တရားမျှတမှုအတွက်၊ သမ္မာတရားအတွက်နှင့် ဘုရားသခင်အတွက် တစ်စုံတစ်ဦးက မိမိကိုယ်ကို အသုံးခံခြင်းအကြောင်း ပြောဆိုသည်ကို ထိုကောက်ကျစ်ဆိုးယုတ်သောသူတို့က ကြားသည့်အခိုက်တွင်၊ ဤစကားများသည် အနှစ်မဲ့သည်၊ ဆောင်ပုဒ်များသာဖြစ်သည်၊ နားလည်၍မရနိုင်ဟု ၎င်းတို့ ခံစားရပြီး၊ ထိုသို့သောလူများကို ခွဲခြားဆက်ဆံကြသည်။ ထို့ကြောင့် သင်တို့သည် ဤကောက်ကျစ်ဆိုးယုတ်သောလူများနှင့် အမှတ်မထင်ဆုံရသည့်အခါ၊ ၎င်းတို့နှင့် မည်သည့်အရာကိုမျှ မိတ်သဟာယမဖွဲ့ပါနှင့်၊ သင်တို့သည် ထိုသူတို့နှင့် လူစားချင်းမတူသောကြောင့် ခပ်ကင်းကင်းနေလော့။ ငါသည် ထိုသို့သောလူများနှင့် အမှတ်မထင်ဆုံရပြီး ငါ့အပေါ် ဤသို့သောသဘောထား ၎င်းတို့ရှိပြီး ဤသို့သောလေသံဖြင့် စကားပြောဆိုသည်ကို မြင်သည့်အခါ၊ ငါသည် ၎င်းတို့ကို ပြုပြင်ပြီး ဩဝါဒပေးသင့်သလော။ (မပေးသင့်ပါ၊ ယင်းမှာ မလိုအပ်ပါ။) မလိုအပ်ပေ။ ၎င်းတို့ကို သတိပြုရန် မလိုအပ်၊ ၎င်းတို့ကို တုံ့ပြန်ရန် မလိုအပ်ပေ။ သင်သည် ၎င်းတို့အား တုံ့ပြန်ခြင်းဖြင့် ၎င်းတို့ကို ပြောင်းလဲနိုင်သလော။ သင်သည် ၎င်းတို့ကို မပြောင်းလဲစေနိုင်ပေ။ ၎င်းတို့ကို ဘေးသာဖယ်ပြီး ထိုအတိုင်းထားလိုက်လော့။ ဤသို့သောလူများသည် ဘုရားသခင်ကို ယုံကြည်ခြင်း၌ ကြာရှည်ခံမည်မဟုတ်ပေ။ တစ်အနေဖြင့်၊ ၎င်းတို့သည် သမ္မာတရားကို မချစ်မြတ်နိုးကြ၊ နှစ်အနေဖြင့်၊ ၎င်းတို့သည် အပြုသဘောဆောင်သောအရာများကို ပစ်ပစ်ခါခါငြင်းကြသည်။ သုံးအနေဖြင့်၊ ၎င်းတို့က ဘုရားသခင်ကို ခွဲခြားဆက်ဆံကြသည်။ ၎င်းတို့သည် ဘုရားသခင်၏စိတ်သဘောထားနှင့် ဘုရားသခင်နှင့်ပတ်သက်သည့် ချစ်ခင်နှစ်လိုဖွယ်အရာအားလုံးကို အနိမ့်ဆုံးအဆင့်၌ ထားရှိပြီး အထင်အမြင်အသေးဆုံးဖြစ်သည်။ ဤအရာများက ၎င်းတို့အနေဖြင့် ဘုရားသခင်၏ ကယ်တင်ခြင်း လုံးဝ ခံရလိမ့်မည်မဟုတ်သည်ကို ဆုံးဖြတ်ပေးသည်။ ဤသို့သောလူများသည် မည်သည့်နေရာတွင်ပင်ရှိစေကာမူ၊ မာယာကင်းသည်ဖြစ်စေ၊ ကောက်ကျစ်စဉ်းလဲတတ်သည်ဖြစ်စေ၊ ၎င်းတို့၌ ဤသရုပ်သကန်များရှိခြင်းက ၎င်းတို့၏စိတ်သဘောထားများတွင် ကောက်ကျစ်ဆိုးယုတ်မှုတစ်ခုခု သေချာပေါက်ရှိကြောင်းကို ဆုံးဖြတ်ပေးသည်။

အန္တိခရစ်တစ်ဦး ဩဇာလွှမ်းမိုးသည့်နေရာတိုင်းတွင်၊ အသင်းတော်အသက်တာနှင့် ဘုရားသခင်၏ ရွေးချယ်ထားသောလူများက မိမိတို့တာဝန်များကို ထမ်းဆောင်ခြင်းကြောင့် စွမ်းဆောင်ရရှိသည့် အကျိုးတရားများမှာ ကောင်းမွန်လိမ့်မည် မဟုတ်သကဲ့သို့၊ ဘုရားအိမ်တော်၏အလုပ်သည်လည်း အဟန့်အတားဖြစ်လိမ့်မည်။ ထို့ကြောင့် အန္တိခရစ်များကို ရှင်းလင်းဖယ်ရှားပြီး နှင်ထုတ်ခြင်းမပြုပါက၊ အသင်းတော်အလုပ်သည် ကြီးမားသောဆုံးရှုံးမှုများ ခံစားရလိမ့်မည်ဖြစ်ပြီး ဘုရားသခင်၏ ရွေးချယ်ထားသောလူများစွာတို့သည်လည်း ထိခိုက်နစ်နာကြလိမ့်မည်။ ခေါင်းဆောင်အတုအယောင်များသည် အဓိကအားဖြင့် စစ်မှန်သော အလုပ်ကို မလုပ်ဆောင်နိုင်ကြသကဲ့သို့၊ အထွေထွေကိစ္စအချို့ကို ကိုင်တွယ်သည့်အခါတွင်၊ ၎င်းတို့သည် တိုးတက်မှုနှေးကွေးကာ အကျိုးသက်ရောက်မှုမရှိကြပေ။ ထို့အပြင်၊ ၎င်းတို့သည် သမ္မာတရား လိုက်စားသော အစွမ်းအစကောင်းရှိသည့် လူကောင်းများအား မည်သို့ပျိုးထောင်အသုံးပြုရမည်ကို မသိကြပေ။ အန္တိခရစ်များဆိုလျှင် အဘယ်သို့နည်း။ အန္တိခရစ်တစ်ဦး ဩဇာလွှမ်းမိုးသည့်အခါ၊ သူသည် မိမိတို့၏ ကိုယ်ပိုင် ကျော်ကြားမှု၊ အကျိုးအမြတ်နှင့် အဆင့်အတန်းတို့အတွက်သာ အမှုအရာများကို လုပ်ဆောင်ကြသည်၊ ၎င်းတို့သည် စစ်မှန်သည့် မည်သည့်အလုပ်ကိုမျှ လုံးဝမလုပ်ဆောင်ကြသကဲ့သို့၊ အသင်းတော်အလုပ်ကို တိုက်ရိုက် နှောင့်ယှက်ပြီး အဖျက်အမှောင့်လုပ်ကြသည်။ အန္တိခရစ်တို့သည် အထူးသဖြင့် ဖျက်ဆီးခြင်း၌ ပါဝင်လုပ်ဆောင်ကြပြီး စာတန်နှင့် လုံးဝ မခြားနားကြပေ။ အကယ်၍ အန္တိခရစ်တစ်ဦးသည် သမ္မာတရားကို ချစ်မြတ်နိုးပြီး လိုက်စားသော လူအချို့ကို မြင်တွေ့ပါက၊ စိတ်မသက်မသာ ခံစားကြရသည်။ ဤစိတ်မသက်မသာဖြစ်မှုသည် အဘယ်မှလာသနည်း။ ၎င်းတို့၏ ကောက်ကျစ်ဆိုးယုတ်သော စိတ်သဘောထားမှ လာသည်၊ ဆိုလိုသည်မှာ၊ ၎င်းတို့၏သဘာဝအတွင်း၌ တရားမျှတမှုကိုမုန်းတီးသော၊ အပြုသဘောဆောင်သောအရာများကို မုန်းတီးသော၊ သမ္မာတရားကို မုန်းတီးပြီး ဘုရားသခင်ကိုဆန့်ကျင်သော ကောက်ကျစ်ဆိုးယုတ်သည့် စိတ်သဘောထားတစ်ခု ရှိနေသည်။ ထို့ကြောင့်၊ တစ်စုံတစ်ယောက်က သမ္မာတရား လိုက်စားနေသည်ကို မြင်သည့်အခါ၊ ၎င်းတို့က “သင်သည် ပညာသိပ်မတတ်သကဲ့သို့ ရုပ်ရည်ကလည်း သိပ်ကြည့်လို့မကောင်းပါ။ သို့သော် သမ္မာတရားကို သင် တကယ် လိုက်စားနေဆဲဖြစ်သည်” ဟု ဆိုကြသည်။ ဤအရာက မည်သည့် သဘောထားကို ပြသသနည်း။ ဤသည်မှာ မထီမဲ့မြင်ပြုခြင်း ဖြစ်သည်။ ဥပမာအနေဖြင့်၊ အချို့ညီအစ်ကိုမောင်နှမများတွင် ဆုကျေးဇူးတစ်ခုခု သို့မဟုတ် အထူးကျွမ်းကျင်မှုတစ်ခုခုရှိပြီး ဆက်စပ်မှုရှိသည့်တာဝန်တစ်ခုကို ထမ်းဆောင်လိုကြသည်။ အမှန်တွင်၊ ၎င်းတို့၏အခြေအနေအမျိုးမျိုးအရ ဤသည်မှာ သင့်လျော်သော်လည်း၊ အန္တိခရစ်တို့သည် ထိုသို့သော ညီအစ်ကိုမောင်နှမများကို မည်သို့ဆက်ဆံကြသနည်း။ ၎င်းတို့၏စိတ်နှလုံးထဲ၌ ၎င်းတို့က၊ “အကယ်၍ ဤတာဝန်ကို သင် ထမ်းဆောင်ချင်လျှင်၊ ဦးစွာပထမ ကျွန်ုပ်ကို လာပြီးကပ်ဖားရပ်ဖားလုပ်ကာ ကျွန်ုပ်၏ အဖွဲ့ဝင် ဖြစ်ရမည်။ ထို့နောက်တွင်မှ သင့်ကို ကျွန်ုပ် ဤတာဝန်ထမ်းဆောင်ခွင့်ပေးမည်ဖြစ်သည်။ မဟုတ်လျှင်၊ ဆက်သာအိပ်မက်မက်နေပါ” ဟူ၍ဖြစ်သည်။ ဤသည်မှာ အန္တိခရစ်များ ပြုမူဆောင်ရွက်ကြပုံ မဟုတ်လော။ ဘုရားသခင်ကို ရိုးသားစွာယုံကြည်သည့်သူများ၊ တရားမျှတစိတ်နှင့် လူ့သဘာဝအချို့ရှိသူများနှင့် သမ္မာတရားကို လိုက်စားရန် အားထုတ်မှုအချို့ပြုလုပ်သူများကို အန္တိခရစ်တို့က အဘယ်ကြောင့် အလွန်စက်ဆုပ်ရွံရှာကြသနည်း။ အဘယ်ကြောင့် ၎င်းတို့သည်ထိုသို့သောလူများနှင့် အစဉ်သဘောထားကွဲလွဲနေကြသနည်း။ သမ္မာတရားကိုလိုက်စားပြီး ကောင်းမွန်စွာပြုမူသူများ၊ မည်သည့်အခါမျှ အပျက်သဘောမဆောင်ဘဲ နှစလိုဖွယ်ရှိသော ရည်ရွယ်ချက်များရှိသူများကို မြင်သည့်အခါ၊ ၎င်းတို့ စိတ်မသက်မသာ ခံစားကြရသည်။ အန္တိခရစ်တို့သည် သမာသမတ်ကျစွာ ပြုမူသူများ၊ မိမိတို့၏တာဝန်ကို စည်းမျဉ်းများအတိုင်း ထမ်းဆောင်နိုင်သူများ၊ သမ္မာတရားကိုနားလည်သည်နှင့်တစ်ပြိုင်နက် လက်တွေ့လုပ်ဆောင်နိုင်သူများကို မြင်သည့်အခါ၊ အမှန်တကယ် ဒေါသထွက်ကြသည်၊ ထိုလူများကို ညှဉ်းပန်းနှိပ်စက်ရမည့် နည်းလမ်းရှာရန် ဦးနှောက်ခြောက်အောင်စဉ်းစားကြပြီး၊ ထိုသူတို့အတွက် အခက်အခဲဖြစ်အောင် အမှုအရာများကို ဖန်တီးဖို့ ကြိုးစားကြသည်။ အကယ်၍ တစ်စုံတစ်ယောက်သည် အန္တိခရစ်တစ်ဦး၏ သဘာဝအနှစ်သာရကို ရိပ်စားမိလျှင်၊ အန္တိခရစ်၏ အန္တရာယ်ပေးတတ်မှုနှင့် ကောက်ကျစ်ဆိုးယုတ်မှုတို့ကို ရိပ်စားမိပြီး ၎င်းကို ဖော်ထုတ်တိုင်ကြားလိုလျှင်၊ အန္တိခရစ်သည် အဘယ်အရာလုပ်ဆောင်လိမ့်မည်နည်း။ အန္တိခရစ်သည် မိမိမျက်စိထဲက ဆူးချွန်နှင့် အသားထဲက ဆူးဖြစ်သော ဤသူကို ဖယ်ရှားရန် တတ်နိုင်သမျှနည်းလမ်းတိုင်းကို စဉ်းစားလိမ့်မည်ဖြစ်ပြီး၊ ညီအစ်ကိုမောင်နှမများအား ဤသူကို ငြင်းပယ်ရန် လှုံ့ဆော်လိမ့်မည်။ သာမန်ညီအစ်ကိုတစ်ဦး သို့မဟုတ် ညီအစ်မတစ်ဦးသည် အသင်းတော်၌ ဂုဏ်သိက္ခာနှင့် အဆင့်အတန်းမရှိပေ။ ၎င်း၌ ဤအန္တိခရစ်အပေါ် ပိုင်းခြားသိမြင်မှုအချို့သာရှိပြီး ဤအန္တိခရစ်အတွက် မည်သည့်ခြိမ်းခြောက်မှုမျှ မဖြစ်စေပေ။ သို့ဖြစ်လျှင် အဘယ်ကြောင့် အန္တိခရစ်သည် ထိုသကို အစဉ်မနှစ်မသက်ဖြစ်နေပြီး ဤသူအား မိမိမျက်စိထဲက ဆူးချွန်၊ အသားထဲက ဆူးကဲ့သို့ ဆက်ဆံသနည်း။ ဤသူသည် အန္တိခရစ်အတွက် မည်သို့ အတားအဆီးဖြစ်နေသနည်း။ အဘယ်ကြောင့် အန္တိခရစ်သည် ထိုသို့သောလူများကို လက်မခံနိုင်သနည်း။ အကြောင်းမှာ အန္တိခရစ်အတွင်း၌ ကောက်ကျစ်ဆိုးယုတ်သော စိတ်သဘောထားတစ်ခု ရှိသောကြောင့်ဖြစ်သည်။ ၎င်းတို့သည် လူတို့ သမ္မာတရားကို လိုက်စားခြင်း သို့မဟုတ် မှန်သောလမ်းကြောင်းကို လိုက်လျှောက်ခြင်းအား သည်းမခံနိုင်ကြပေ။ ၎င်းတို့သည် မှန်ကန်သောလမ်းကြောင်းကို လိုက်လျှောက်လိုသူမည်သူ့ကိုမဆို ဆန့်ကျင်ဘက်ပြုကြပြီး သင့်ကို တမင်အခက်တွေ့အောင်လုပ်ကြကာ သင့်ကို ဖယ်ရှားရမည့် နည်းလမ်းရှာရန် ဦးနှောက်ခြောက်အောင်စဉ်းစားကြလိမ့်မည်၊ သို့မဟုတ် သင် အပျက်သဘောဆောင်ပြီး အားနည်းသွားစေရန် သင့်ကို ဖိနှိပ်ကြလိမ့်မည်၊ သို့မဟုတ် အခြားသူများ သင့်ကို ငြင်းပယ်ကြစေရန် သင့်အပေါ် နိုင်ကွက်ကိုရှာပြီး နေရာအနှံ့ဖြန့်ကြလိမ့်မည်၊ ထို့နောက်တွင် ၎င်းတို့ပျော်ရွှင်ကြသည်။ အကယ်၍ သင်သည် ၎င်းတို့စကားကို နားမထောင်လျှင် သို့မဟုတ်သူတို့ပြောသည့်အရာကို မလိုက်နာဘဲ၊ သမ္မာတရားကို ဆက်လက်လိုက်စားလျှင်၊ မှန်ကန်သောလမ်းကြောင်းကို လိုက်လျှောက်ပြီး၊ လူကောင်းတစ်ဦးဖြစ်နေလျှင်၊ ၎င်းတို့သည် မိမိတို့စိတ်နှလုံးထဲ၌ မသက်မသာခံစားရပြီး၊ သင် တာဝန်ထမ်းဆောင်နေသည်ကို မြင်ရသည့်အခါ စိတ်ပျက်ကာ အနေခက်ကြသည်။ ဤသည်မှာ အဘယ်အရာဖြစ်သနည်း။ သင်သည် ၎င်းတို့ကို စိတ်မကျေနပ်အောင် လုပ်လေပြီလော။ မလုပ်ခဲ့ပေ။ သင်က ၎င်းတို့အပေါ် မည်သည့်အရာမျှ မလုပ်ခဲ့ချိန် သို့မဟုတ် ၎င်းတို့၏အကျိုးစီးပွားကိုလည်း မည်သို့မျှ မထိခိုက်ခဲ့ချိန်တွင်၊ ၎င်းတို့သည် အဘယ်ကြောင့် သင့်ကို ထိုသို့ဆက်ဆံနိုင်ရသနည်း။ ဤအရာက ဤသို့သောအရာမျိုးဖြစ်သည့် အန္တိခရစ်တို့၏သဘာဝမှာ ကောက်ကျစ်ဆိုးယုတ်ကြောင်းနှင့် ၎င်းတို့သည် တရားမျှတမှု၊ အပြုသဘောဆောင်သောအရာများနှင့် သမ္မာတရားတို့ကို ပင်ကိုအားဖြင့် ဆန့်ကျင်ဘက်ပြုကြောင်းကိုသာ ပြသပေသည်။ အကယ်၍ သင်က ၎င်းတို့အား အတိအကျ မည်သည့်အရာဖြစ်နေသည်ကို မေးလျှင်၊ ၎င်းတို့ သိပင်မသိကြပေ။ ၎င်းတို့သည် သင့်ကို တမင်အခက်တွေ့အောင်လုပ်ခြင်းသာ ဖြစ်သည်။ အကယ်၍ သင်က တစ်နည်းတစ်ဖုံလုပ်ဆောင်ရန် ပြောလျှင်၊ ၎င်းတို့က အခြားနည်းဖြင့် လုပ်ဆောင်ရမည်သာဖြစ်သည်။ အကယ်၍ သင်က တစ်စုံတစ်ယောက်သောသူသည် သိပ်မတော်ပါဟု ပြောလျှင်၊ ၎င်းတို့က ထိုသူ အလွန်တော်သည်ဟု ပြောကြသည်။ အကယ်၍ သင်က ဤသည်မှာ ဧဝံဂေလိတရားဟောပြောရန် အလွန်ကောင်းသည့် နည်းလမ်းတစ်ခုဖြစ်သည်ဟု ပြောလျှင်၊ ၎င်းတို့က မကောင်းဟု ပြောကြသည်။ အကယ်၍ သင်က ဘုရားသခင်ကို တစ်နှစ် သို့မဟုတ် နှစ်နှစ်သာ ယုံကြည်သေးသော ညီအစ်မတစ်ဦး အပျက်သဘောဆောင်ပြီး အားနည်းနေသဖြင့် အားပေးသင့်သည်ဟု ပြောလျှင်၊ ၎င်းတို့က “မလိုအပ်ပါ၊ သူက သင့်ထက် ပိုသန်မာသည်” ဟု ပြောကြသည်။ တိုတိုပြောရလျှင်၊ ၎င်းတို့သည် သင်နှင့် အစဉ်သဘောကွဲလွဲပြီး သင့်ကို တမင်ဆန့်ကျင်ဘက်ပြုကြသည်။ သင်နှင့် သဘောကွဲလွဲခြင်းအတွက် ၎င်းတို့၏စည်းမျဉ်းကား အဘယ်နည်း။ သင်မှန်သည်ဟုဆိုသောအရာမှန်သမျှကို ၎င်းတို့က မှားသည်ဟုဆိုပြီး၊ သင်မှားသည်ဟုဆိုသောအရာမှန်သမျှကို ၎င်းတို့က မှန်သည်ဟုဆိုခြင်း ဖြစ်သည်။ ၎င်းတို့၏လုပ်ဆောင်ချက်များတွင် သမ္မာတရားစည်းမျဉ်း တစ်ခုတလေ ရှိသလော။ ဘာဆိုဘာမျှမရှိပေ။ ၎င်းတို့သည် သင့်ကိုယ်သင် အရူးလုပ်စေလိုကြသည်၊ သင့်ကို အရှက်ရစေလိုကြသည်၊ သင့်ကို ပြိုလဲစေလိုကြသည်၊ ၊ သင်ခေါင်းမဖော်နိုင်ရန်၊ သမ္မာတရားကို မလိုက်စားတော့ရန်၊ သင်အားနည်းသွားပြီး၊ မယုံကြည်တော့ရန်အလို့ငှာ သင့်ကို သင့်ကို ချိုးနှိမ်လိုကြပြီး ထို့နောက်တွင် ၎င်းတို့၏ရည်မှန်းချက် အထမြောက်ကာ ၎င်းတို့စိတ်နှလုံးထဲ၌ ဝမ်းမြောက်ကြသည်။ ဤနေရာတွင် အဘယ်အရာဖြစ်ပျက်နေသနည်း။ ဤသည်မှာ အန္တိခရစ်ဖြစ်ကြသော လူစားမျိုးတို့၏ ကောက်ကျစ်ဆိုးယုတ်သော အနှစ်သာရ ဖြစ်သည်။ အကယ်၍ ၎င်းတို့သည် ညီအစ်ကိုမောင်နှမများက ဘုရားသခင်ကို ချီးမွမ်းပြီး ဘုရားသခင်အတွက် သက်သေခံနေကြကာ မိမိတို့ကို အာရုံစိုက်ခြင်း မရှိကြသည်ကို မြင်လျှင်၊ ၎င်းတို့ ဝမ်းသာကြသလော။ ဝမ်းမသာကြပေ။ ၎င်းတို့မည်သို့ခံစားရသနည်း။ မနာလိုဖြစ်ကြသည်။ သာမန်အားဖြင့်၊ လူတို့သည် တစ်စုံတစ်ယောက်က အခြားတစ်ယောက်အား ချီးမွမ်းသည်ကို ကြားသည့်အခါ၊ ၎င်းတို့၏ပုံမှန်တုံ့ပြန်မှုမှာ “ကျွန်ုပ်လည်း အတော်လေး တော်ပါသည်။ အဘယ်ကြောင့် ကျွန်ုပ်ကိုလည်း မချီးမွမ်းကြသနည်း” ဟူ၍ဖြစ်သည်။ ၎င်းတို့၌ ဤသေးနုတ်သော စိတ်ကူးရှိကြသော်လည်း၊ တစ်စုံတစ်ယောက်က ဘုရားသခင်အတွက် သက်သေခံနေသည်ကို ကြားသည့်အခါ၊ ၎င်းတို့က “သူတို့တွင် ထိုသို့သောအတွေ့အကြုံရှိပြီး ထိုသို့သော သက်သေခံချက်ကို သက်သေခံနိုင်သည်၊ လူတိုင်းက သူတို့ကို အသိအမှတ်ပြုကြသည်။ သူတို့တွင် ဤသိနားလည်မှုရှိကြသည်။ ကျွန်ုပ်တွင် အဘယ်ကြောင့် ဤသိနားလည်မှုမရှိရသနည်း” ဟု တွေးကြသည်။ ၎င်းတို့သည် ဤလူကို မနာလိုဖြစ်ကာ အားကျလေးစားကြသည်။ အန္တိခရစ်တို့၌ ထူးခြားသောလက္ခဏာတစ်ခုခုရှိသည်၊ တစ်စုံတစ်ယောက်က၊ “ဤသည်မှာ ဘုရားသခင်၏ လုပ်ဆောင်ခြင်းဖြစ်သည်၊ ဤသည်မှာ ဘုရားသခင်၏ဆုံးမပဲ့ပြင်ခြင်းဖြစ်သည်၊ ဤအရာများသည် ဘုရားသခင်၏ လုပ်ဆောင်ချက်များ၊ ဘုရားသခင်၏အစီအစဉ်များဖြစ်ပြီး၊ ကျိုးနွံနာခံရန် ကျွန်ုပ် လိုလားနေပါသည်” ဟု ပြောလျက် ဘုရားသခင်အတွက် သက်သေခံနေသည်ကိုကြားသည့်အခါ၊ အန္တိခရစ်တို့သည် စိတ်မချမ်းမြေ့ဖြစ်ပြီး၊ “အရာအားလုံးက ဘုရား၏ လုပ်ဆောင်ခြင်းဖြစ်သည်ဟု သင်ကပြောသည်။ ဘုရားက အရာခပ်သိမ်းအား မည်သို့အုပ်စိုးသည်ကို သင်မြင်ဖူးသလော။ ဘုရားက အမှုအရာတစ်ခုတလေအား မည်သို့ စီစဉ်သည်ကို သင်ခံစားဖူးသလော။ ကျွန်ုပ်သည် ထိုအရာနှင့်သက်ဆိုင်၍ မည်သည့်အရာကိုမျှ မသိရသည်မှာ အဘယ်သို့ဖြစ်သနည်း”ဟု တွေးကြလေသည်။ သွင်ပြင်လက္ခဏာတစ်ခုမှာ ၎င်းတို့သည် ယောဘအပေါ် ဘုရားသခင်အသိအမှတ်ပြုခြင်းကို စာတန်ဆက်ဆံခဲ့သည့်ပုံစံတွင် စာတန်နှင့် အတူတူပင် ဖြစ်ကြသည်။ ဘုရားသခင်က လူတစ်ဦးကို ရရှိသည့်အခါ စာတန်၌ရှိသော အလားတူ စိတ်နေစိတ်ထားမျိုး အန္တိခရစ်တို့၌လည်း ရှိကြသည်။ ၎င်းတို့တွင် စာတန်၏ စိတ်သဘောထား ရှိသည်။ နောက်ထပ်သွင်ပြင်လက္ခဏာတစ်ခုမှာ၊ အကယ်၍ တစ်စုံတစ်ယောက်သည် သမ္မာတရားကိုနားလည်ပြီး အန္တိခရစ်များအပေါ် ပိုင်းခြားသိမြင်မှုရှိပြီး အန္တိခရစ်များနောက်မလိုက်ဘဲ ထိုအစား ၎င်းတို့ကို ငြင်းပယ်လျှင်၊ အန္တိခရစ်တို့၌ ထိန်းမနိုင်သိမ်းမရဖြစ်သော စိတ်နေစိတ်ထားတစ်ခုရှိကြပြီး၊ “ဤလူကို ငါ လုံးဝမရနိုင်ပါ၊ ထို့ကြောင့် သူ့ကို ငါ အမြစ်ဖြတ်ချေမှုန်းမည်” ဟု တွေးကြသည်။ ထို့ကြောင့်၊ ယောဘက စမ်းသပ်မှုများနှင့် ကြုံခဲ့ရချိန်တွင်၊ ဘုရားသခင်သည် စာတန်ထံ၊ “သူသည် သင်လက်ထဲ၌ ရှိ၏၊ သို့ရာတွင် သူ၏ အသက်ကို ချန်ထားလော့” (ယောဘ ဝတ္ထု ၂:၆)ဟု ပြောခဲ့သည်။ ဘုရားသခင်သာ ဤသို့မပြောခဲ့ပါက၊ စာတန်သည် သနားညှာတာမှု ပြမည်လော။ (ပြမည်မဟုတ်ပါ) ဤသည်မှာ သေချာသည်။ ၎င်းသည် လုံးဝ သနားညှာတာမှု ပြမည်မဟုတ်ပေ။

သမ္မာတရားကို လိုက်စားပြီး ချစ်မြတ်နိုးသော ညီအစ်ကိုမောင်နှမများအပေါ်၊ ယုံကြည်ခြင်းအချို့ရှိပြီး မိမိတို့၏တာဝန်ကို သစ္စာစောင့်သိမှုအချို့ဖြင့် ထမ်းဆောင်သောသူများအပေါ် အန္တိခရစ်တို့သည် မည်သို့သောသဘောထား ရှိကြသနည်း။ ဘုရားသခင်အတွက် သက်သေခံရန် အသက်တာဆိုင်ရာအတွေ့အကြုံများအကြောင်း ပြောဆိုပြီး ညီအစ်ကိုမောင်နှမများနှင့်အတူ သမ္မာတရားကို မကြာခဏ မိတ်သဟာယဖွဲ့သော အချို့လူတို့အပေါ် ၎င်းတို့သည် မည်သည့်သဘောထား ရှိကြသနည်း။ (သူတို့က မနာလိုခြင်းနှင့် မုန်းတီးခြင်းကို ခံစားရသည်။) ၎င်းတို့၏သဘောထားသည် အဘယ်အရာပေါ်တွင် မူတည်သနည်း။ ၎င်းတို့၏ ကောက်ကျစ်ဆိုးယုတ်သော စိတ်သဘောထားပေါ်တွင် မူတည်သည်။ ထို့ကြောင့်၊ ၎င်းတို့က တစ်စုံတစ်ယောက်ကို မတွေးတတ်အောင် ဖိနှိပ်နေခြင်း၊ တစ်စုံတစ်ယောက်ကို မုန်းတီးနေခြင်းနှင့် အချို့လူများကို ဆင်းရဲဒုက္ခခံစားစေခြင်းတို့အား သင် မကြာခဏ မြင်တွေ့သည့်အခါ၊ အန္တိခရစ်တစ်ဦး၏ ကောက်ကျစ်ဆိုးယုတ်သော စိတ်သဘောထားကို မည်သူမျှ မပြောင်းလဲစေနိုင်ကြောင်းကိုလည်းကောင်း၊ ထိုစိတ်သဘောထားသည် နက်ရှိုင်းစွာ အမြစ်တွယ်နေပြီး မွေးရာပါဖြစ်ကြောင်းကိုလည်းကောင်း သင်သိရှိရပေသည်။ ဤအချက်မှနေ၍၊ အန္တိခရစ်ဖြစ်ကြသော ဤလူများသည် ကယ်တင်ခြင်းကို မည်သို့မျှ ရရှိနိုင်မည်မဟုတ်ကြောင်း မြင်တွေ့နိုင်ပေသည်။ ၎င်းတို့သည် ညီအစ်ကိုမောင်နှမများကို ဘုရားသခင်အတွက် သက်သေခံခွင့်မပြုကြပေ၊ သို့ဆိုလျှင် ၎င်းတို့ကိုယ်တိုင် ဘုရားသခင်အတွက် သက်သေခံနိုင်ကြသလော။ (သက်သေမခံနိုင်ကြပါ။) အခြားသူများက ဘုရားသခင်အတွက် သက်သေခံသည့်အခါ ၎င်းတို့သည် အလွန်မုန်းတီးသဖြင့် အံကြိတ်ကြသည်။ သို့ဖြစ်၍ ငါ့အားပြောလော့၊ ၎င်းတို့သည် ဘုရားသခင်အတွက် သက်သေခံနိုင်ကြသလော။ ၎င်းတို့သည် ဘုရားသခင်အတွက် လုံးဝ သက်သေခံနိုင်စွမ်းမရှိကြပေ။ အချို့လူများက “ယင်းမှာ မမှန်ပါ၊ အချို့သော အန္တိခရစ်များသည် ဘုရားသခင်အတွက် အလွန်ကောင်းသော သက်သေခံချက်ပေးကြပြီး ထိုသက်သေခံချက်ကို ညီအစ်ကိုမောင်နှမများက ကြားသည့်အခါ မျက်ရည်ကျကြသည်”ဟု ဆိုကြသည်။ ဤသည်မှာ မည်သည့် သက်သေခံချက်မျိုးဖြစ်သနည်း။ သင်တို့သည် ဤသို့သော “သက်သေခံချက်” မျိုးကို စစ်မှန်သောသက်သေခံချက် ဟုတ်မဟုတ် ဆုံးဖြတ်ရန် နားထောင်ရမည်ဖြစ်သည်။ ကောင်းမွန်သော အလုပ်နှင့် ကောင်းမွန်သော မိသားစုတစ်စုရှိသည့် တစ်စုံတစ်ယောက်ရှိသည်ဆိုပါစို့။ သူသည် ဘုရားသခင်၏ တို့ထိခြင်းခံရသဖြင့်၊ မိမ၏အလုပ်ကောင်းနှင့် မိသားစုကို စွန့်လွှတ်ပြီး မိမိတို့၏ကိုယ်စိတ်နှစ်ဖြာကို ဘုရားသခင်အတွက် အသုံးခံကြသည်။ သူ၏စိတ်နှလုံးထဲ၌ ဝမ်းနည်းပူဆွေးမှုကို ခံစားရသော်လည်း၊ အရာအားလုံးကို မည်သို့ပင်ဖြစ်စေ စွန့်လွှတ်ခဲ့သည်။ ညီအစ်ကိုမောင်နှမများက ၎င်းတို့အား “သင့်အနေဖြင့် အနည်းငယ်လေးမျှပင် အားမနည်းဘူးလော”ဟု ဆိုကြသည်။ ၎င်းက “အနည်းငယ် အားနည်းပါသည်။ သို့သော် ကျွန်ုပ်အတွက်မူ ကျွန်ုပ်မိသားစုနှင့် အလုပ်ကို စွန့်လွှတ်နိုင်ခြင်းသည် ဘုရား လုပ်ဆောင်နေသည့်အရာချည်းသာ ဖြစ်သည် မဟုတ်လော။ ကျွန်ုပ်သည် တစ်နေ့ဝင်ငွေ နှစ်ထောင်သုံးထောင်ရလေ့ရှိခဲ့ပြီး၊ တစ်လကို သောင်းချီဝင်လေ့ရှိခဲ့သည်၊ ကျွန်ုပ်တွင် အဖိုးတန် ပစ္စည်းများစွာ ပိုင်ဆိုင်ခဲ့သည်။ ဘုရားကိုယုံကြည်လာပြီးနောက်၊ ကျွန်ုပ်၏ တာဝန်ထမ်းဆောင်ရန်အလို့ငှာ၊ ကျွန်ုပ်၏ အဖိုးတန်ပစ္စည်းများကို အခြားတစ်စုံတစ်ဦးထံ ကြည့်ရှုစောင့်ရှောက်ဖို့ လွှဲအပ်ခဲ့သည်” ဟု ပြန်ပြောသည်။ အခြားသူများက “သင်၏ အဖိုးတန်ပစ္စည်းများကို အခြားတစ်စုံတစ်ဦးထံ လွှဲအပ်ပြီးသည့်နောက်တွင် သင်လုံးဝ စီမံခန့်ခွဲခြင်းမရှိခဲ့သလော။ ထိုပစ္စည်းများ၏ မည်သည့် အစိတ်အပိုင်းကိုမျှ သင် ယခု မပိုင်တော့သည်လော။ သင်၏ အဖိုးတန်ပစ္စည်းများကို သင် အဘယ်သို့ဖြစ်ပြီး လက်လွှတ်ခဲ့သနည်း” ဟု မေးကြသည်။ ၎င်းတို့က “ဤသည်မှာ ဘုရား၏ လုပ်ဆောငခြင်း ဖြစ်သည်” ဟု ပြန်ပြောသည်။ ဤသည်မှာ အလွန်မရေမရာ မဖြစ်လွန်းသလော။ (ဟုတ်ပါသည်။) ယင်းတို့သည် အနှစ်မဲ့သောစကားများသာ ဖြစ်သည်။ ထို့အပြင်၊ ၎င်းတို့၏ဝင်ငွေ မည်မျှ မြင့်မားကြောင်း ၎င်းတို့ ပြောဆိုခြင်းသည် ၎င်းတို့ကကြွားဝါခြင်းမဟုတ်လော။ အဘယ်ကြောင့် ဤအရာကို ၎င်းတို့ ပြောဆိုကြသနည်း။ ၎င်းတို့က မိမိတို့ မည်မျှစွန့်လွှတ်ခဲ့ကြောင်း သက်သေခံနေခြင်းဖြစ်သည်။ ၎င်းတို့သည် ဘုရားသခင်အတွက် သက်သေခံနေခြင်းဖြစ်သလော။ ၎င်းတို့သည် မိမိတို့၏ “ဂုဏ်ကျက်သရေရှိသော” သမိုင်းအနည်းငယ်၊ ၎င်းတို့ပေးဆပ်ခဲ့ရသော အဖိုးအခနှင့် အတိတ်တွင် ၎င်းတို့အသုံးခံခဲ့သည့်အရာ၊ ၎င်းတို့မည်မျှဆက်ကပ်အပ်နှံခဲ့သည်ဟူသည်နှင့် ဘုရားသခင်နှင့်ပတ်သက်၍ ၎င်းတို့၌ မကျေနပ်ချက်များမရှိကြောင်းတို့ကို သက်သေခံနေခြင်းဖြစ်သည်။ ဤအထဲတွင် ဘုရားသခင်အတွက် သက်သေခံသည့်အပိုင်း တစ်ခုတလေ ရှိသလော။ ဤအရာအားလုံး၌ ဘုရားသခင် လုပ်ဆောင်ခဲ့သည့်အရာ တစ်စုံတစ်ရာကို သင်တွေ့မြင်ပြီးခြင်း မရှိသည်မဟုတ်လော။ ဘုရားသခင်အတွက် ၎င်းတို့ သက်သေခံသည်ဆိုခြင်းမှာ မမှန်ပေ။ ရှင်းရှင်းလင်းလင်းပင် ၎င်းတို့သည် မိမိတို့ကိုယ်ကို သက်သေခံနေခြင်းဖြစ်သော်လည်း၊ ဘုရားသခင်အတွက် သက်သေခံနေသည်ဟု ဆိုကြသည်။ ဤသည်မှာ လှည့်ဖြားခြင်းမဟုတ်လော။ ၎င်းတို့သည် မိမိတို့ကိုယ်ကို သက်သေခံရန်အလို့ငှာ ဘုရားသခင်အတွက် သက်သေခံသယောင်ဟန်ဆောင်ကြသည်။ ဤသည်မှာ သူတော်ကောင်းယောင်ဆောင်ခြင်း မဟုတ်လော။ သို့ဆိုလျှင် အဘယ်ကြောင့် လူအချို့က ကြားသည့်အခါ အလွန်တို့ထိခံရပြီး အဆက်မပြတ် ငိုကြွေးကြသနည်း။ အရူးအမျိုးမျိုး ရှိကြသည်တကား။ တစ်ဦးတစ်ယောက် ဘုရားသခင်အတွက် သက်သေခံခြင်းအကြောင်း ပြောသည့်အခါ၊ အန္တိခရစ်တို့သည် မိမိတို့ပြုပြီးသော အမှုအရာအနည်းငယ်၊ မိမိတို့ဆက်ကပ်ပြီးသော အမှုအရာအနည်းငယ်နှင့် မိမိတို့ကိုယ်ကို အသုံးခံလျက် ၎င်းတို့ ကုန်ဆုံးခဲ့သော အချိန်အနည်းငယ်တို့အကြောင်းကို ပြောဆိုရမည်သာဖြစ်ပြီး၊ အချိန်ကုန်လွန်သည်နှင့်အမျှ၊ လူတို့ အာရုံမစိုက်တော့သဖြင့်၊ ၎င်းတို့သည် အသစ်သောအကြောင်းအရာများကို စိတ်ကူးရကြပြီး ဤသို့ဖြင့် မိမိတို့ကိုယ်ကိုအတွက် သက်သေခံကြလေသည်။ အကယ်၍ တစ်ဦးတလေက ၎င်းတို့ထက် ပိုတော်ပြီး ၊ ၎င်းတို့ထက် သာ၍ကောင်းစွာ မိတ်သဟာယဖွဲ့နိုင်ကာ သမ္မာတရားနှင့်ဆိုင်သည့် သိနားလည်မှုအချို့ကို ထုတ်ဖော်လျှင် ၎င်းတို့သည် စိတ်မသက်မသာ ခံစားကြရသည်။ ၎င်းတို့သည် သမ္မာတရားနှင့်ပတ်သက်၍ ၎င်းတို့၏အားထုတ်မှုများက အခြားသူများထက် နိမ့်ကျပြီး ထူးချွန်ရန် စိတ်အားထက်သန်ကြသောကြောင့် စိတ်မသက်မသာ ခံစားရခြင်းဖြစ်သလော။ မဟုတ်ပေ၊ ၎င်းတို့သည် မည်သူတစ်ဦးတစ်ယောက်ကိုမျှ မိမိတို့ထက်ပိုတော်ခွင့်မပြုကြပေ၊ ၎င်းတို့သည် အခြားသူများ မိမိတို့ထက်တော်သည်ကို မခံနိုင်ကြသကဲ့သို့ ၎င်းတို့က အခြားသူများထက်တော်သည့်အခါမှသာ ပျော်ရွှင်ကြသည်။ ဤသည်မှာ ကောက်ကျစ်ဆိုးယုတ်သည် မဟုတ်လော။ အကယ်၍ အခြားတစ်စုံတစ်ယောက်သည် သင့်ထက်တော်ပြီး သမ္မာတရားကို သင့်ထက်ပို၍နားလည်လျှင်၊ သင်သည် ၎င်းတို့ထံမှ သင်ယူသင့်သည်။ ဤသည်မှာ ကောင်းသောအရာတစ်ခု မဟုတ်လော။ ဤသည်မှာ လူတိုင်း ဝမ်းမြောက်သင့်သော အရာတစ်ခုဖြစ်သည်။ ဥပမာအားဖြင့်၊ လူ့သမိုင်းတွင်ရှိသည့် ဘုရားသခင်၏ နောက်လိုက်များထဲတွင် ယောဘဆိုသူ ရှိခဲ့သည်။ ဤသည်မှာ ဘုရားသခင်၏ အနှစ်ခြောက်ထောင် စီမံခန့်ခွဲမှုအလုပ်တွင် ဖြစ်ပျက်ခဲ့သော ဂုဏ်ကျက်သရေရှိသည့် အရာတစ်ခုလော၊ သို့မဟုတ် အရှက်ရဖွယ်သောအရာတစ်ခု ဖြစ်သလော။ (ဂုဏ်ကျက်သရေရှိသောအရာတစ်ခု ဖြစ်ခဲ့သည်။) ဂုဏ်ကျက်သရေရှိသောအရာတစ်ခု ဖြစ်ခဲ့သည်။ ဤကိစ္စအပေါ် သင်မည်သည့်သဘောထား ခံယူသင့်သနည်း။ မည်သည့် ရှုထောင့်အမြင် သင်ရှိသင့်သနည်း။ သင်သည် ဘုရားသခင်အတွက် ပျော်ရွှင်ပြီး သူ့ကို ဂုဏ်ပြုသင့်သည်၊ ဘုရားသခင်၏တန်ခိုးကို ချီးမွမ်းသင့်သည်၊ ဘုရားသခင် ဘုန်းအသရေရရှိပြီဖြစ်ကြောင်း ချီးမွမ်းသင့်သည်။ ဤသည်မှာ ကောင်းသောအရာတစ်ခု ဖြစ်သည်။ ထိုသို့သော ကောင်းမွန်သောအရာတစ်ခုဖြစ်ခဲ့သော်လည်း၊ လူအချို့သည် ထိုအရာကို ပစ်ပစ်ခါခါငြင်းပြီး မုန်းတီးကြပေသည်။ ဤသည်မှာ ၎င်းတို့က ကောက်ကျစ်ဆိုးယုတ်ခြင်းဖြစ်သည် မဟုတ်လော။ ပွင့်ပွင့်လင်းလင်းပြောရလျှင်၊ ၎င်းတို့ ကောက်ကျစ်ဆိုးယုတ်ခြင်းဖြစ်ပြီး၊ ဤအရာကို ၎င်းတို့၏ ကောက်ကျစ်ဆိုးယုတ်သော စိတ်သဘောထားက ဖြစ်ပေါ်စေခြင်းဖြစ်သည်။

အန္တိခရစ်တို့၏ စိတ်သဘောထားက ကောက်ကျစ်ဆိုးယုတ်၏။ ၎င်းတို့သည် သမ္မာတရားကို လက်မခံရုံမက ဘုရားသခင်ကိုလည်း အတိုက်အခံလုပ်နိုင်သည်၊ မိမိတို့၏ကိုယ်ပိုငနယ်ပယ်များကိုလည်း ထူထောင်နိုင်ပြီး၊ ဘုရားသခင်ကို အလျှော့မပေးဘဲ ဆန့်ကျင်ကြသည်။ ဤသည်မှာ ကောက်ကျစ်ဆိုးယုတ်သော စိတ်သဘောထား ဖြစ်သည်။ သင်တို့သည် ကောက်ကျစ်ဆိုးယုတ်သော စိတ်သဘောထားများအပေါ် နားလည်မှုတစ်ခုတလေ ရှိသလော။ လူအများစုသည် ၎င်းတို့အား မည်သို့ပိုင်းခြားသိမြင်ရမည်ကို မသိကြပေ၊ ထို့ကြောင့် ဥပမာတစ်ခုကို ကြည့်ကြစို့။ အချို့လူများသည် ပုံမှန်အခြေအနေများတွင် အလွန်ပုံမှန်အတိုင်း ပြုမူကြသည်၊ ၎င်းတို့သည် အလွန် ပုံမှန်အတိုင်း အခြားသူများကို စကားပြောပြီး ဆက်ဆံကြသည်။ ၎င်းတို့သည် ပုံမှန်လူများထင်ရပြီး မကောင်းသောအရာတစ်ခုတလေမျှ မလုပ်ဆောင်ကြပေ။ သို့သော်၊ စုဝေးပွဲများသို့ ၎င်းတို့ ရောက်လာပြီး ဘုရားသခင်၏နှုတ်ကပတ်တော်များကို ဖတ်ရှုကာ သမ္မာတရားကို မိတ်သဟာယဖွဲ့သည့်အခါ၊ ၎င်းတို့ထဲမှ အချို့မှာ နားမထောင်လိုကြ၊ အချို့မှာ ငိုက်မျဉ်းကြသည်၊ အချို့မှာ ထိုအရာကို အလွန်အမင်းမနှစ်မြို့ဘဲ သည်းခံရန်ခက်ခဲသည်ဟု ခံစားရကာ နားမထောင်ချင်ကြသကဲ့သို့ အချို့မှာ မသိလိုက်ဘဲ အိပ်ပျော်သွားပြီး လုံးဝသတိမမူဖြစ်သွားကြသည်။ ဤနေရာတွင် အဘယ်အရာဖြစ်ပျက်နေသနည်း။ တစ်စုံတစ်ယောက်က သမ္မာတရားကို မိတ်သဟာယဖွဲ့သည့်အခါ အဘယ်ကြောင့် အလွန်မူမမှန်သော ဖြစ်စဉ်များစွာ ထင်ရှားလာရသနည်း။ ဤလူများထဲမှအချို့မှာ မူမမှန်သောအခြေအနေ၌ ရှိနေကြသော်လည်း၊ အချို့မှာမူ ကောက်ကျစ်ဆိုးယုတ်ကြခြင်း ဖြစ်သည်။ ၎င်းတို့အနေဖြင့် နတ်ဆိုးများစွဲကပ်ခြင်းခံရသည့် ဖြစ်နိုင်ခြေကို ထည့်မတွက်ဘဲ ချန်ထား၍မရနိုင်သကဲ့သို့ တစ်ခါတစ်ရံ လူတို့သည် ဤအရာကို အပြည့်အဝ နားလည်သဘောပေါက်နိုင်ခြင်းမရှိ သို့မဟုတ် ရှင်းလင်းစွာ ပိုင်းခြားသိမြင်နိုင်ခြင်း မရှိကြပေ။ အန္တိခရစ်တို့၏ အတွင်း၌ နတ်ဆိုးများ ရှိကြသည်။ အကယ်၍ သင်က ၎င်းတို့အနေဖြင့် အဘယ်ကြောင့် သမ္မာတရားကို ရန်လိုသည်ကို မေးလျှင်၊ ၎င်းတို့က သမ္မာတရားအပေါ် ရန်လိုခြင်းမရှိဟုဆိုပြီး ဝန်ခံရန် ခေါင်းမာစွာ ငြင်းပယ်ကြသည်။ အမှန်တကယ်တွင်မူ ၎င်းတို့က သမ္မာတရားကို မချစ်မြတ်နိုးကြောင်း မိမိတို့စိတ်နှလုံးထဲ၌ သိကြသည်။ ဘုရားနှုတ်ကပတ်တော်များကို မည်သူကမျှ မဖတ်ရှုသည့်အခါ၊ ၎င်းတို့သည် ပုံမှန်လူများကဲ့သို့ အခြားသူများနှင့် အဆင်ပြေကြပြီး ၎င်းတို့အတွင်း၌ အဘယ်အရာ တည်ရှိသည်ကို သင်သတိမမူမိပေ။ သို့သော်၊ တစ်စုံတစ်ယောက်က ဘုရားနှုတ်ကပတ်တော်များကို ဖတ်ရှုသည့်အခါ၊ ၎င်းတို့သည် နားမထောင်လိုကြသည့်အပြင် ၎င်းတို့၏စိတ်နှလုံးများထဲ၌ စက်ဆုပ်ရွံရှာမှု ဖြစ်ပေါ်လာသည်။ ဤသည်မှာ ၎င်းတို့၏သဘာဝကို ချပြနေခြင်းဖြစ်သည်။ ၎င်းတို့သည် နတ်ဆိုးများဖြစ်ကြသည်၊ ဤအရာမျိုး ဖြစ်ကြသည်။ ဘုရားနှုတ်ကပတ်တော်များက ဤလူတို့၏အနှစ်သာရကို ဖော်ထုတ်လေပြီလော သို့မဟုတ် အထိနာစေပြီလော။ နှစ်ခုလုံးမဟုတ်ပေ။ ၎င်းတို့သည် စုဝေးပွဲများတက်ရောက်သည့်အခါ၊ ဘုရားနှုတ်ကပတ်တော်များကို ဖတ်ရှုနေသည့် မည်သူ့ကိုမျှ နားမထောင်လိုကြပေ။ ဤသည်မှာ ၎င်းတို့အနေဖြင့် ကောက်ကျစ်ဆိုးယုတ်ကြခြင်း ဖြစ်သည် မဟုတ်လော။ “ကောက်ကျစ်ဆိုးယုတ်ခြင်း”ဟူသည်မှာ အဘယ်အရာကို ဆိုလိုသနည်း။ အကြောင်းပြချက်မရှိဘဲ သမ္မာတရားအပေါ်၊ အပြုသဘောဆောင်သောအရာများနှင့် အပြုသဘောဆောင်သောလူများအပေါ် ရန်လိုခြင်းကို ဆိုလိုသည်။ အကြောင်းရင်းက မည်သည့်အရာဖြစ်သည်ကို ၎င်းတို့တို့ကိုယ်တိုင်ပင် မသိကြ။ ၎င်းတို့အနေဖြင့် ထိုသို့ပြုမူရမည်သာ ဖြစ်သည်။ ဤသည်မှာ ကောက်ကျစ်ဆိုးယုတ်ခြင်း ဟု ဆိုလိုသည့်အရာဖြစ်ပြီး၊ ရိုးရှင်းသည့် စကားဖြင့်ဆိုရသော်၊ ဆိုးယုတ်ခြင်းသာ ဖြစ်သည်။ အန္တိခရစ်အချို့က၊ “တစ်စုံတစ်ယောက်က ဘုရားနှုတ်ကပတ်တော်များကို စတင် ဖတ်ရှုရန်သာ လိုအပ်ပြီး ကျွန်ုပ်နားမထောင်ချင်ပါ။ တစ်စုံတစ်ယောက်က ဘုရားအတွက် သက်သေခံနေသည်ကို ကျွန်ုပ် ကြားရန်သာလိုအပ်ပြီး ကျွန်ုပ်စက်ဆုပ်ရွံရှာမိသည်၊ အဘယ်ကြောင့်ဖြစ်သည်ကို ကျွန်ုပ်ပင်မသိပါ။ သမ္မာတရားကို တစ်စုံတစ်ဦးက ချစ်မြတ်နိုးပြီး လိုက်စားနေသည်ကို ကျွန်ုပ် မြင်သည့်အခါ၊ သူတို့နှင့် ကျွန်ုပ် အဆင်မပြေနိုင်ပါ၊ သူတို့ကို ကျွန်ုပ် ဆန့်ကျင်ချင်သည်၊ သူတို့ကို အမြဲကျိန်ဆဲချင်သည်၊ သူတို့၏နောက်ကွယ်တွင် ထိခိုက်နစ်နာစေပြီး သေသည်အထိ ညှဉ်းဆဲချင်သည်” ဟု ဆိုကြသည်။ ၎င်းတို့အနေဖြင့် အဘယ်ကြောင့် ဤသို့ ခံစားရသည်ကို ၎င်းတို့ကိုယ်တိုင်ပင် မသိကြပေ။ ဤသည်မှာ ၎င်းတို့ ကောက်ကျစ်ဆိုးယုတ်ခြင်း ဖြစ်သည်။ ဤအတွက် တကယ့်အကြောင်းရင်းမှာ အဘယ်နည်း။ အန္တိခရစ်တို့သည် မိမိတို့အတွင်း၌ ပုံမှန်လူတစ်ဦး၏ စိတ်ဓာတ် မရှိကြခြင်းသာ ဖြစ်သည်။ ၎င်းတို့တွင် ပုံမှန်လူ့သဘာဝ မရှိကြခြင်းသာ ဖြစ်သည်။ ဤသည်မှာ နောက်ဆုံး စိစစ်မှုတွင် ဖြစ်သည့်ပုံစံ ဖြစ်သည်။ အကယ်၍ ပုံမှန်လူတစ်ဦးသည် သမ္မာတရား၏ အမျိုးမျိုးသော သွင်ပြင်လက္ခဏာများနှင့်ပတ်သက်၍ ဘုရားသခင်က အလွန်ရှင်းလင်းစွာနှင့် ပြတ်သားစွာ ပြောဆိုနေသည်ကိုကြားလျှင်၊ ထိုသူက “အမှားအမှန် ခွဲခြား၍မရနိုင်သည့်အပြင် အကောင်းအဆိုး ရောထွေးနေသည့်၊ ဤမျှကောက်ကျစ်ဆိုးယုတ်ပြီး ကာမဂုဏ်လိုက်စားသောခေတ်ကြီးထဲတွင်၊ အလွန်များသော သမ္မာတရားနှင့် အလွန်ကောင်းမွန်သော စကားများကိုကြားနိုင်ခြင်းသည် အလွန်တန်ဖိုးရှိပြီး အလွန်ရှားပါးလှပေသည်” ဟု တွေးကြလိမ့်မည်ဖြစ်သည်။ အဘယ်ကြောင့် ထိုအရာသည် တန်ဖိုးရှိသနည်း။ ဘုရားနှုတ်ကပတ်တော်များသည် စိတ်နှလုံးနှင့်ဝိညာဉ် နှစ်ခုလုံးရှိသူတို့၏ ဆန္ဒများနှင့် စိတ်အားထက်သန်မှုတို့ကို နိုးကြားစေသည်။ မည်သို့သော စိတ်အားထက်သန်မှုနည်း။ ၎င်းတို့သည် တရားမျှတမှုနှင့် အပြုသဘောဆောင်သောအရာများကို တောင့်တကြသည်၊ ဘုရားသခင်ရှေ့မှောက်၌ အသက်ရှင်ရန်၊ လောက၌ တရားမျှတမှုနှင့် ဖြောင့်မတ်မှန်ကန်မှုရှိရန်နှင့် ဘုရားသခင် ကြွလာပြီး လောကကို အုပ်စိုးရန်အတွက် တောင့်တကြသည်။ ဤသည်မှာ သမ္မာတရားကို ချစ်မြတ်နိုးသူအားလုံး၏ ပန်ကြားချက် ဖြစ်သည်။ သို့သော်၊ အန္တိခရစ်တို့သည် ဤအရာများကို တောင့်တကြသလော။ (မတောင့်တကြပါ။) အန္တိခရစ်တို့သည် အဘယ်အရာကို တောင့်တကြသနည်း။ “အကယ်၍ ငါအာဏာရခဲ့လျှင်၊ ငါမကြိုက်သူအားလုံးကို ငါဖျက်ဆီးမည်။ တစ်စုံတစ်ယောက်က ခရစ်တော်သည် ဘုရားပေါ်ထွန်းပြီး အမှုပြုခြင်းဖြစ်ကြောင်း သက်သေခံသည့်အခါ၊ ဘုရားသည် လူသားမျိုးနွယ်၏ အချုပ်အခြာအာဏာပိုင်ဖြစ်ကြောင်း သက်သေခံပြီး၊ ဘုရားနှုတ်ကပတ်တော်များက သမ္မာတရားဖြစ်ကြောင်း၊ လူသားမျိုးနွယ်၏အမြင့်မြတ်ဆုံးသော ဘဝဆောင်ပုဒ်ဖြစ်ပြီး လူသားရှင်သန်ရေးအတွက် အခြေခံအုတ်မြစ်ဖြစ်ကြောင်း သက်သေခံသည့်အခါ၊ ငါသည် စက်ဆုပ်ရွံရှာမှု၊ မုန်းတီးမှုကို ခံစားရပြီး ထိုအရာကို မကြားချင်ပါ” ဟူ၍ဖြစ်သည်။ ဤသည်မှာ အန္တိခရစ်တို့၏ အတွင်းစိတ်ထဲ၌ နက်ရှိုင်းစွာတည်ရှိသော အရာတစ်ခုဖြစ်သည်။ အန္တိခရစ်တို့၌ ဤစိတ်သဘောထား ရှိသည် မဟုတ်လော။ တစ်စုံတစ်ယောက်က ၎င်းတို့ကို ကိုးကွယ်သရွေ့၊ ၎င်းတို့ကို ကြည်ညိုပြီး ၎င်းတို့နောက်လိုက်နေသရွေ့၊ ၎င်းတို့သည် မိတ်ဆွေရင်းချာများ၊ တစ်ဖွဲ့တည်းသားများ ဖြစ်ကြသည်။ အကယ်၍ တစ်စုံတစ်ယောက်သည် သမ္မာတရားကို အစဉ်မိတ်သဟာယဖွဲ့ပြီး ဘုရားသခင်အတွက် သက်သေခံနေပါက၊ အန္တိခရစ်တို့သည်ထိုသူကို ရှောင်ကြဉ်ပြီး ထိုသူ့အပေါ် စက်ဆုပ်ရွံရှာမှုခံစားရကာ၊ တိုက်ခိုက်၊ ဖယ်ကြဉ်ကာညှဉ်းဆဲခြင်းပင် ပြုကြသည်။ ဤသည်မှာ ကောက်ကျစ်ဆိုးယုတ်မှု ဖြစ်၏။ ကောက်ကျစ်ဆိုးယုတ်မှုအကြောင်းကို ငါတို့ ပြောသည့်အခါ၊ ထိုအရာသည် စာတန်၏ ဉာဏ်များသော အကြံအစည်များကို အစဉ်ရည်ညွှန်းသည်။ စာတန်လုပ်ဆောင်သောအရာများက ကောက်ကျစ်ဆိုးယုတ်သည်၊ အဆင်းနီသော နဂါးကြီးလုပ်ဆောင်သောအရာများက ကောက်ကျစ်ဆိုးယုတ်သည်၊ အန္တိခရစ်တို့ လုပ်ဆောင်သောအရာများက ကောက်ကျစ်ဆိုးယုတ်သည်။ ၎င်းတို့ ကောက်ကျစ်ဆိုးယုတ်ကြသည်ဟု ငါတို့ပြောသည့်အခါ၊ အဓိကအားဖြင့် အပြုသဘောဆောင်သောအရာအားလုံးအပေါ် ၎င်းတို့ ရန်လိုခြင်း၊ သမ္မာတရားနှင့် ဘုရားသခင်ကို အထူးသဖြင့် ဆန့်ကျင်ခြင်းတို့ကို ရည်ညွှန်းသည်။ ဤသည်မှာ ကောက်ကျစ်ဆိုးယုတ်မှုဖြစ်ပြီး၊ ဤသည်မှာ အန္တိခရစ်တို့၏ စိတ်သဘောထား ဖြစ်သည်။

သင်တို့အနေဖြင့် မည်သည့် အန္တိခရစ်များကို ကြုံရပြီးဖြစ်ကာ မည်သူက ထိုသို့သော ကောက်ကျစ်ဆိုးယုတ်သည့် စိတ်သဘောထားတစ်ခု ပြသသည့်အကြောင်း သင်ယူခဲ့ရသည်ကို စဉ်းစားကြည့်လော့။ ငါသည် တစ်ချိန်က အလွန့်အလွန် မလိုမုန်းထားစိတ်ရှိသော လူ့သဘာဝ ရှိသည့် အပေါက်ဆိုးသော အမျိုးသမီးတစ်ယောက်နှင့် ကြုံတွေ့ခဲ့ဖူးသည်။ ဘုရားအိမ်တော်က ကြီးမားသော ကပ်ဘေးများ မကြာမီကျရောက်တော့မည်ဖြစ်ကြောင်း၊ အချိန်များစွာမရှိတော့ကြောင်း၊ ညီအစ်ကိုမောင်နှမများက ကောင်းမှုများကို ပြင်ဆင်သင့်ကြပုံ၊ သမ္မာတရားကို လိုက်စားရန် မည်သို့ အားထုတ်သင့်ပုံ၊ ဘုရားသခင်၏ ရည်ရွယ်ချက်များကို ဖြည့်ဆည်းရန်မိမိတို့၏တာဝန်များကို ကောင်းစွာ ထမ်းဆောင်သင့်ပုံနှင့် မိမိတို့ကိုယ်တိုင် မည်သည့်နောင်တမျှ မရစေသင့်ပုံတို့ကို ဟောပြောသည့်အခါတိုင်း၊ ဘုရားအိမ်တော်က ဤအရာများကို ဟောပြောသည့်အခါတိုင်းတွင်၊ ဤအမျိုးသမီးသည် မိမိစိတ်နှလုံးထဲ၌ ကျိန်ဆဲပြီး၊ “ကမ္ဘာလောက အဆုံးသတ်ခြင်းလော။ ဘဝက သာယာနေသည်။ သင့်အတွက်တော့ ကမ္ဘာပျက်ခြင်းဖြစ်ကောင်းဖြစ်နိုင်သော်လည်း၊ ငါ့အတွက်တော့ ကမ္ဘာပျက်ခြင်းမဟုတ်ပါ။ ကြီးမားသည့် ကပ်ဘေးများ ကျရောက်လာလျှင်ပင် ငါအသက်ရှင်သင့်သေးသည်။ တစ်ဦးတစ်ယောက်သေရမည်ဆိုလျှင် သင်တို့ သေနိုင်သည်”ဟု တွေးလေသည်။ ဤအမျိုးသမီးသည် ကြောင်းကျိုးမသင့်ဖြစ်သလော သို့မဟုတ် မည်သည့်အရာနည်း။ မည်သူမဆိုက သမ္မာတရားနှင့်ဆိုင်သည့် ဤသွင်ပြင်လက္ခဏာအကြောင်း မိတ်သဟာယဖွဲ့သည့်အခါတိုင်းတွင်၊ သူမသည် ကြောင်းကျိုးမသင့်ဖြစ်လာပြီး သူမ၏စိတ်နှလုံးထဲ၌ စက်ဆုပ်ရွံရှာမှု ဖြစ်ပေါ်လာကာ “ငါ့ဘဝက ယခုအတိုင်း အဆင်ပြေသည်။ငါ့တွင် ငွေများစွာရှိသည်၊ ကားများ၊ အိမ်များ ပိုင်သည်၊ ဝင်ငွေလည်းကောင်းသည်။ ငါ့ဒေသတွင် ငါသည် အရေးပါသောသူတစ်ဦး ဖြစ်သည်။ မည်သူမျှ ငါ့ကို ပုန်ကန်ပြစ်မှားဝံ့ခြင်း ရှိမည်မဟုတ်ပါ။ ငါ၏ အသက်ရှင်နေထိုင်မှုအခြေအနေများက အလွန်ကောင်းသည်။ ကြီးမားသည့် ကပ်ဘေးများ ကျရောက်လာလျှင် ဆုံးရှုံးမှုကို ငါ ခံစားရမည် မဟုတ်လော။ ငါသေဖို့ အဆင်သင့်မဖြစ်သေးပါ”ဟု တွေးလေသည်။ ဘုရားသခင်၏အမှုတော်ပေါ်တွင်လည်းကောင်း၊ ဤကောက်ကျစ်ဆိုးယုတ်သောလောကနှင့် ကောက်ကျစ်ဆိုးယုတ်သောလူသားမျိုးနွယ်ကို ဘုရားသခင် ဖျက်ဆီးလိုခြင်းအပေါ်တွင်လည်းကောင်း သူမ၏ရှုထောင့်အမြင်ကား အဘယ်နည်း။ (သူမသည် ထိုအရာများကို ရန်လိုသည်။) ဘုရားသခင်က မည်သည့်အရာကို လုပ်ဆောင်ခဲ့သည်ဖြစ်စေ၊ ထိုအရာက သူမ၏အကျိုးစီးပွားနှင့် သက်ဆိုင်လျှင်၊ သူမ၏အကျိုးစီးပွားကို ထိခိုက်လျှင်၊ သူမသည် ထိုအရာကို မုန်းတီးပြီး ရန်လိုမည်ဖြစ်ကာ၊ “သင်လုပ်ဆောင်နေသည့်အရာ မှားယွင်းသည်” ဟု တွေးလျက် ထိုအရာကို သဘောတူမည် မဟုတ်သကဲ့သို့ ဘုရားသခင်၏ လုပ်ဆောင်ချက်များကို ချက်ချင်း ငြင်းပယ်လိမ့်မည်။ ထို့အပြင်၊ သူမနှင့်ပတ်သက်၍ အကောက်ကျစ်အဆိုးယုတ်ဆုံးအရာမှာ သူမသည် တရားမျှတမှုနှင့် ဖြောင့်မတ်မှန်ကန်မှုတို့ ဩဇာလွှမ်းမိုးသည်ကို မနှစ်သက်ခြင်းပင်ဖြစ်သည်။ မည်သူက အာဏာစွဲကိုင်သည်ဖြစ်စေ၊ ဘုရားသခင်ကပင်လျှင် အာဏာစွဲကိုင်ပြီး တရားမျှတမှုနှင့် ဖြောင့်မတ်ခြင်းတရားရှိနေလျှင်ပင်၊ ထိုအရာက သူမ၏အကျိုးစီးပွားကို ထိခိုက်လျှင်၊ ယင်းက အလုပ်ဖြစ်မည်မဟုတ်။ သူမအဖို့ သူမ၏အကျိုးစီးပွားများသည် ဘုရားသခင်ထက် ပိုအရေးကြီး၏။ သူမ၏လုပ်ရပ်များသည် မကောင်းဆိုးဝါးဆန်သော သဘာဝရှိသည် မဟုတ်လော။ မကောင်းဆိုးဝါးဆန်သော သဘာဝတစ်ခု ထကြွသောင်းကျန်းသည့်အခါ၊ တစ်စုံတစ်ဦးကို နတ်ဆိုးစွဲကပ်ပြီး ထိုသူက ဘုရားနှုတ်ကပတ်တော်များ မကြားလိုကြောင်း ပြောသည့်အချိန်ကဲ့သို့ သဘာဝအတူတူပင် ဖြစ်သည် မဟုတ်လော။ (ဟုတ်ပါသည်။) ဘုရားသခင်၏နှုတ်ကပတ်တော်များကို မည်သူမဆို ဖတ်သည့်အခါတိုင်းတွင်၊ ထိုနတ်ဆိုးက နားမထောင်လိုကြောင်း ပြောလိမ့်မည်။ ညီအစ်ကို သို့မဟုတ် ညီအစ်မ တစ်ဦးတလေက ဘုရားသခင်၏နေ့ရက် မကြာမီကျရောက်တော့မည် သို့မဟုတ် ကြီးမားသောကပ်ဘေးများ မကြာမီကျရောက်တော့မည်ဟု မိတ်သဟာယဖွဲ့သည့်အခါတိုင်း၊ ဤအပေါက်ဆိုးသော အမျိုးသမီးက မိမိစိတ်နှလုံးထဲ၌ ထိုအရာကို မုန်းတီးပြီး ကျိန်ဆဲလိမ့်မည်။ အဘယ်ကြောင့် ထိုအရာကို သူမ ကျိန်ဆဲသနည်း။ အကယ်၍ ဘုရားသခင်သည် ကမ္ဘာလောကကိုဖျက်ဆီးရန် ကြွလာလျှင်၊ သူမ၏ပိုင်ဆိုင်မှုအားလုံး ဆုံးရှုံးမည်ဖြစ်သည်။ တစ်ခုတလေက သူမ၏အကျိုးစီးပွားကို ထိခိုက်သည့်အခါ၊ သူမ ကျိန်ဆဲလိမ့်မည်။ ထို့ကြောင့်၊ သူမ၏ကျိန်ဆဲခြင်းသည် ဝိညာဉ်ဆိုးတစ်ခုက ဘုရားသခင်၏နှုတ်ကပတ်တော်များကို နားမထောင်ချင်ဟုဆိုခြင်းနှင့် သဘာဝအတူတူပင် ဖြစ်သည်။ ၎င်းတို့တွင်တွေ့နေကျ လက္ခဏာတစ်ရပ်ရှိသည်၊ ယင်းမှာ သမ္မာတရားကို တစ်ဦးတလေက ဖော်ပြပြောဆိုသည့်အခါ၊ ၎င်းစိတ်ဝိညာဉ်၏ အတွင်းနက်နက်နေရာများကို ဖော်ထုတ်ပြသည့်အခါ၊ ၎င်း၏ အကျည်းတန်မှု၊ ၎င်း၏ကောက်ကျစ်ဆိုးယုတ်မှုနှင့် ၎င်း၏အန္တရာယ်ပေးတတ်မှုတို့ကို ဖော်ထုတ်ပြသည့်အခါ၊ မုန်းတီးမှု၊ အတိုက်အခံဖြစ်ခြင်း နှင့် ဆန့်ကျင်မှုတို့က ၎င်းတို့၏စိတ်နှလုံးထဲ၌ ဖြစ်ပေါ်လာပြီးနောက် ကျိန်ဆဲကြလေသည်။ ဤသည်မှာ ဝိညာဉ်ဆိုးတစ်ခုနှင့် တူသည့်အရာ ဖြစ်သည်။ အပြင်ပန်းမှကြည့်လျှင်၊ ဤအပေါက်ဆိုးသော အမျိုးသမီးသည် သာမန်လူတစ်ဦးကဲ့သို့သာ စကားပြောဆိုပြုမူပြီး၊ မကောင်းဆိုးဝါးစွဲကပ်နေပုံမရသော်လည်း၊ သူမလုပ်ရပ်များ၏သဘာဝမှာ ထိုမကောင်းဆိုးဝါးနှင့် အတူတူသာ ဖြစ်သည်။ သင်တို့ အခွင့်အရေးရသည့်အခါ၊ အသင်းတော်ရှိ ချမ်းသာသောသူများကို၊ “ဘုရားသခင်၏နေ့ရက် ရောက်ရှိပြီး ကြီးမားသောကပ်ဘေးများ ကျရောက်သည့်အခါ၊ သင်၏မိသားစုပိုင်ဆိုင်မှုအားလုံး ဆုံးရှုံးသွားလျှင်၊ သင်စိတ်မကောင်းဖြစ်မည်လော။ ဘုရားသခင်၏နေ့ရက် ရောက်ရှိခြင်းကို သင်မျှော်လင့်စောင့်စားသလော။ ဘုရားသခင်က အာဏာရယူပြီး တရားမျှတမှုနှင့် ဖြောင့်မတ်ခြင်းတရားတို့က ဩဇာလွှမ်းမိုးခြင်းကို သင်မျှော်လင့်စောင့်စားသလော။ သင်လည်း အမြစ်ဖြတ်ချေမှုန်းခံရမည်ဖြစ်သော်လည်း၊ ဤကောက်ကျစ်ဆိုးယုတ်သော လူသားမျိုးနွယ်ကို ဘုရားသခင် အလျင်အမြန် ချေမှုန်းဖျက်ဆီးရန် သင်မျှော်လင့်စောင့်စားသလော။ ဤအရာ ဖြစ်ပျက်ရန် သင်လိုလားနေပါသလော”ဟု သင် မေးမြန်းနိုင်သည်။ ၎င်းတို့၏ သဘောထားက အဘယ်အရာဖြစ်သည်ကို ကြည့်လော့။ အချို့မှာ ဤအရာဖြစ်ပျက်ရန် လိုလားနေမည်ဖြစ်ပြီးအချို့က လိုလားမည် မဟုတ်။ လောကတစ်ခုလုံး၊ စကြဝဠာတစ်ခုလုံး၊ ဘုရားသခင်အုပ်စိုးသော ရုပ်ဝတ္ထုပစ္စည်းအားလုံးကို ကြည့်သည့်အခါ၊ ငါတို့သည် ဤနေရာတွင် ရုပ်ဝတ္ထုမဟုတ်သောအရာများအကြောင်း ပြောနေခြင်းမဟုတ်၊ ရုပ်ဝတ္ထုနယ်ပယ်အတွင်းရှိ အရာများသာဖြစ်သည့် မိသားစုပိုင်ဆိုင်မှု၊ ကားများ၊ အိမ်များ၊ ငွေကြေးစသည်တို့ကိုသာ ပြောနေခြင်းဖြစ်သည်။ ဤအရာအားလုံးကို စုပေါင်းလိုက်လျှင်၊ ၎င်းတို့သည် ဘုရားသခင်၏လက်ထဲရှိ သဲတစ်ပွင့်မျှလောက်နှင့် ညီမျှသလော။ (မညီမျှပါ) သို့သော်၊ လူတို့သည် ဤအရာများကို ရရှိသည့်အခါ၊ လက်မလွှတ်လိုကြဘဲ ဘုရားသခင်နှင့် ယှဉ်ပြိုင်ရန် အရင်းအနှီးရှိသည်ဟု ခံစားကြရပြီး “အကယ်၍ သင်က ကျွန်ုပ်၏မိသားစုပိုင်ဆိုင်မှုများကို ယူသွားလျှင် သင့်ကို ကျွန်ုပ်မုန်းမည်၊ သင့်ကို ကျွန်ုပ်ဆန့်ကျင်မည်၊ သင် ဘုရားဖြစ်ကြောင်းကို ကျွန်ုပ်အသိအမှတ်ပြုမည်မဟုတ်”ဟု ဆိုကြလေသည်။ ဘုရားသခင် ဘုရားဟုတ်မဟုတ်ဟူသည်မှာ သင်၏အသိအမှတ်ပြုခြင်းအပေါ် မူတည်သလော။ (မမူတည်ပါ။) သင်သည် ထိုမိသားစုပိုင်ဆိုင်မှု အနည်းငယ်မျှဖြင့် ဘုရားသခင်နှင့် ယှဉ်ပြိုင်ရန် အရင်းအနှီးရှိပြီလော။ သင်သည် အလွန်မသိနားမလည်ဖြစ်သည်တကား။ စိန်များသည် ကမ္ဘာမြေပေါ်တွင် အတန်ဖိုးအရှိဆုံးသောအရာများ ဖြစ်သည်။ သာမန်လူများသည် တစ်ကာရက်စိန်ပွင့်ကို မြင်သည့်အခါ၊အံ့အားသင့်ပြီး၊ “အင်မတန်ကြီးမားသည့် စိန်ပါတကား။ အမေရိကန်ဒေါ်လာ တစ်သောင်း သို့မဟုတ် နှစ်သောင်းလောက် တန်ဖိုးရှိရပေမည်”ဟု ဆိုကြသည်။ ၎င်းတို့သည် စိန်များ အလွန်တန်ဖိုးရှိသည်ဟု ထင်ကြသည်။ သို့သော် ထို့နောက်တွင် ကမ္ဘာနှင့် အလှမ်းမဝေးသည့် ဂြိုဟ်တစ်လုံးသည် တစ်ဂြိုဟ်လုံး ​စိန်ဖြင့် ဖွဲ့စည်းထားသည်ဟု ဆိုသော သတင်းပေးပို့ချက်တစ်ခုကို ငါ ကြားရပြီး တစ်စုံတစ်ရာကို ရုတ်တရက်သဘောပေါက်သွားသည်။ ယင်းမှာ လူတို့သည် အလွန်အမြင်ကျဉ်းမြောင်းကြသည်ဟူ၍ ဖြစ်၏။ သင်သည် စိန်ပွင့် တောက်ပနေသည်ကို မြင်သည့်အခါ၊ အလွန်ကြိုက်နှစ်သက်ပြီး ၎င်းသည် အလွန်ကောင်းသောအရာတစ်ခုဟု ထင်မြင်သော်လည်း၊ စိန်ဖြင့် လုံးလုံးလျားလျား ဖွဲ့စည်းထားသော ဂြိုဟ်တစ်လုံးရှိသည်ဟု သင်ကြားသည့်အခါ၊ သင်၏ရှုထောင့်အမြင်မှာ အဘယ်အရာဖြစ်သနည်း။ စိန်များအပေါ် သင်၏ရှုထောင့်အမြင် ပြောင်းလဲသွားပေသည်။ ဆိုလိုသည်မှာ၊ သင်သည် အခြားသတင်းအချက်အလက်အချို့ကို ကြားသိရသည်နှင့် တစ်ပြိုင်နက်၊ သင်၏အမြင်က ရုတ်တရက်ကျယ်ပြန့်လာသည်။ သင်၏ရှေ့မှောက်တွင်ရှိသည့် သေးငယ်သောနေရာလေးကိုသာ သင်မမြင်တော့ပေ။ သင်သည် ရေတွင်းထဲက ဖားသူငယ်ကဲ့သို့ မဟုတ်တော့ပေ။ အကြောင်းမှာ သင်ရရှိသော သတင်းအချက်အလက်ပမာဏ တိုးပွားလာပြီး၊ သင်၏သိမြင်မှု ပြောင်းလဲကာ ကြီးထွားလာပြီဖြစ်သောကြောင့် ဖြစ်သည်။ ဤလောက၌အသက်ရှင်နေချိန်တွင်၊ လူတို့သည် မိမိတို့ထံ ဖြစ်ပျက်သည့် အရာတစ်ခုစီတိုင်းနှင့် မတူညီသောပတ်ဝန်းကျင်များကို စဉ်ဆက်မပြတ် ကြုံရနေစဉ်တွင်၊ ၎င်းတို့၏အမြင်များမှာ စဉ်ဆက်မပြတ်ပြောင်းလဲနေပြီး၊ တစ်ချိန်တည်းမှာပင် ၎င်းတို့၏ရှုထောင့်အမြင်များမှာလည်း စဉ်ဆက်မပြတ် အသစ်ဖြစ်နေသင့်သည်။ ဤသည်မှာ ပုံမှန်ဖြစ်ပြီး၊ ဘုရားသခင်က လူတို့အား ဤဘဝတွင် တဖြည်းဖြည်းတိုးတက်စေရန်နှင့် ထိုးထွင်းသိမြင်မှု၊ ရှုထောင့်၊ လောကတစ်ခုလုံးနှင့် ဘုရားသခင်၏အမှုတော်များအပေါ် နားလည်မှုတို့တွင် အဆက်မပြတ်တိုးတက်စေရန် ဖြစ်ပေါ်စေသည့် ဖြစ်စဉ်ဖြစ်သည်။ သို့ဖြစ်၍၊ ယခု သင်တို့သည် ဤကိစ္စရပ်အား ငါ ပြန်ပြောပြနေသည်ကို နားထောင်ပြီးသည့်နောက်၊ ဤအရာကို မည်သို့သဘောထားသင့်သနည်း။ သင်တို့က “အို၊ ကမ္ဘာပေါ်ရှိလူများသည် အလွန်မသိနားမလည်ဖြစ်ကြသည်၊ သူတို့၌ ထိုးထွင်းသိမြင်မှုမရှိသကဲ့သို့သူတို့သိသောအရာ အလွန်နည်းပါးလှသည်”ဟု တွေးသင့်သလော။ ဆိုလိုသည်မှာ၊ စကြဝဠာတစ်ခုလုံး၊ လူသားမျိုးနွယ်တစ်ခုလုံး၊ ဘုရားသခင်အုပ်စိုးသော အရာခပ်သိမ်း၊ ဘုရားသခင်အုပ်စိုးသော အရာရာတိုင်းနှင့်ပတ်သက်သည့် သင်၏အမြင်များနှင့် ထိုးထွင်းသိမြင်မှုများသည် ဂြိုဟ်တစ်လုံးနှင့်နှိုင်းယှဉ်လျှင် သေးငယ်သော စိန်ပွင့်တစ်ပွင့်၏တန်ဖိုးကို သင်နားလည်သကဲ့သို့ပင် ဖြစ်နိုင်သည်၊ မှန်သလော။ (မှန်ပါသည်။) ဤအရာမှနေ၍ မည်သည့်ကောက်ချက်ကို ငါတို့ ချနိုင်သနည်း။ ကမ္ဘာဂြိုဟ်ပေါ်တွင်၊ တစ်စုံတစ်ဦးက မည်သည့်အောင်မြင်မှုများ ပြုလုပ်ပြီးသည်ဖြစ်စေ၊ မည်သည့်ကျော်ကြားမှုများ ရှိကြပြီးဖြစ်သည်ဖြစ်စေ၊ မည်မျှပင်ခမ်းနားထည်ဝါစွာ ၎င်းတို့ ဆောင်ရွက်ကြပြီးသည်ဖြစ်စေ၊ လူသားများသည် အလွန်အရေးမပါသကဲ့သို့ တန်ဖိုးလုံးဝမရှိသောကြောင့် ၎င်းတို့အနေဖြင့် မကြွားဝါရပေ။ ဘုရားသခင်သည် ကမ္ဘာမြေပေါ်၌ စိန်အချို့ကို ပြင်ဆင်ပေးခဲ့ပြီး လူတို့သည် ထိုအရာများအတွက် တိုက်ခိုက်ကြပြီးဖြစ်သည်။ စိန်များထက်ပင် ပိုကောင်းသောအရာများပါဝင်သော ဂြိုဟ်မည်မျှ ဘုရားသခင်၏လက်ထဲ၌ ရှိသည်ကို လူတို့မသိကြသလော။ လူတို့သည် သနားစရာမကောင်းသလော။ (ကောင်းပါသည်။) ဤသည်မှာ လူတို့သနားစရာကောင်းပုံဖြစ်သည်၊ လူတို့သည် အလွန်မသိနားမလည်ဖြစ်ကြသည်။

အန္တိခရစ်တို့သည် ဘုရားသခင်ကို အတိုက်အခံမလုပ်ဘဲမနေနိုင်ကြပေ။ ၎င်းတို့သည် သမ္မာတရားနှင့် အပြုသဘောဆောင်သောအရာများကို ပင်ကိုအားဖြင့် မုန်းတီးကြပြီး၊ သမ္မာတရားကိုလိုက်စားကာ အပြုသဘောဆောင်သောအရာများကို ချစ်မြတ်နိုးသောသူများကိုပင် အနှောင့်အယှက်မပေးဘဲမနေနိုင်ဘဲ၊ ထိုသို့သောလူများကို ရှုတ်ချ၊ ဖိနှိပ်ကာဖယ်ကြဉ်ကြသည်။ ၎င်းတို့နှင့် ပူးပေါင်းကြံစည်သူများကိုမူ၊ ၎င်းတို့သည် အချင်းချင်းကာကွယ်ပေးလျက်၊ အချင်းချင်းကာရံပေးကာ အချင်းချင်း ဖော်လံဖားမြှောက်ပင့်လျက် အလိုအလျောက် အတူတကွ ပေါင်းဖက်မိကြလေသည်။ ဤအရာမှ၊ အန္တိခရစ်ဖြစ်ကြသော ဤလူများသည် လူဝင်စားသော ဝိညာဉ်ဆိုးများနှင့် ညစ်ညူးသော မကောင်းဆိုးဝါးများဖြစ်ကြပြီး၊ ပုံမှန်လူ့သဘာဝ မရှိကြသည်ကို ငါတို့မြင်တွေ့နိုင်သည်။ ၎င်းတို့ကြားရသောသမ္မာတရားကို ၎င်းတို့မည်မျှပင်နားလည်သည်ဖြစ်စေ၊ သို့မဟုတ် စကားများနှင့် အယူဝါဒများကို ၎င်းတို့ မည်မျှပင် ရှင်းလင်းစွာဟောပြောသည်ဖြစ်စေ၊ လက်တွေ့လုပ်ဆောင်ရမည့်အချိန်ရောက်သည့်အခါ၊ ၎င်းတို့ရွေးချယ်လုပ်ဆောင်သည့် တစ်ခုတည်းသောအရာမှာ သမ္မာတရားကို ဆန့်ကျင်ပြီး ဘုရားသခင်ကို အတိုက်အခံလုပ်ရန်နှင့် မိမိတို့၏ ကိုယ်ပိုင်အဆင့်အတန်းနှင့် အကျိုးစီးပွားများကို ကာကွယ်စောင့်ရှောက်ရန် ဖြစ်သည်။ ဤသည်မှာ ၎င်းတို့၏ကောက်ကျစ်ဆိုးယုတ်မှု ဖြစ်သည်။ ၎င်းတို့သည် မည်သည့်နည်းလမ်းဖြင့် အကောက်ကျစ်အဆိုးယုတ်ဆုံးဖြစ်သနည်း။ သမ္မာတရားကို ၎င်းတို့ မုန်းတီးခြင်းပင်ဖြစ်သည်။ ၎င်းတို့သည် သမ္မာတရားကို ဖြေရှင်းချက် သို့မဟုတ် အကြောင်းရင်း မရှိဘဲ မုန်းတီးကြသည်။ အကယ်၍ သင်က ၎င်းတို့အား အဘယ်ကြောင့် သမ္မာတရားအား မုန်းတီးသည်ကို မေးလျှင်၊ ၎င်းတို့သည် ရှင်းမပြနိုင်ခြင်းဖြစ်ကောင်းဖြစ်နိုင်သော်လည်း၊ ၎င်းတို့၏လုပ်ရပ်တိုင်းက အန္တိခရစ်တို့၏စိတ်သဘောထားနှင့် နည်းလမ်းများ ပါရှိပြီး၊၊ ၎င်းတို့၏လုပ်ရပ်တိုင်းက လူတို့ကို အထင်အမြင်မှားစေကာ ပိတ်မိစေသည်။ ၊ ဘုရားအိမ်တော်၏အလုပ်ကို နှောင့်ယှက်ပြီး အဖျက်အမှောင့်လုပ်သည်။ ဤသည်မှာ ၎င်းတို့လုပ်ရပ်တိုင်း၏ အကျိုးဆက်ဖြစ်သည်။ ၎င်းတို့ထဲတွင် သမ္မာတရားကိုလိုက်စားသော ညီအစ်ကိုမောင်နှမများကို အကြောင်းရင်းမရှိဘဲ မုန်းတီးပြီး ဤလူများကို အစဉ်တိုက်ခိုက်ကာ ဖယ်ကြဉ်လိုသူ တစ်ဦးတလေရှိမရှိဟူသည်ကို သိမြင်ရန်အတွက် သင်တို့ အနီးဝန်းကျင်ရှိ၊ သင်တို့သိကျွမ်းပြီး ထိတွေ့ဆက်ဆံဖူးသော အဆင့်တိုင်းတွင်ရှိသည့် ခေါင်းဆောင်များနှင့် အမှုဆောင်များ သို့မဟုတ် သာမန်ညီအစ်ကိုမောင်နှမများကို နှိုင်းယှဉ်ကာ ကြည့်လော့။ ၎င်းတို့သည် ဤညီအစ်ကိုမောင်နှမများ၏ ရှေ့တွင် သာယာနာပျော်ဖွယ်ကောင်းသောစကားများပြောဆိုသော်လည်း ၎င်းတို့ကွယ်ရာတွင် အတော်လေး ကွဲပြားခြားနားစွာ လုပ်ဆောင်လျက်၊ ၎င်းတို့၏ ဘီလူးသရဲစီးသော ရုပ်သွင်ကို ထုတ်ဖော်ပြကာ ၎င်းတို့ကို စတင်ဆန့်ကျင်လျက် ၎င်းတို့ကိုယ်တိုင်က ထိုအရာ မမှန်သည်ကို သိသော်လည်း မတတ်နိုင်ကြပေ။ ဤသည်မှာ ကောက်ကျစ်ဆိုးယုတ်မှုမဟုတ်လျှင် အဘယ်အရာ ဖြစ်သနည်း။ အန္တိခရစ်တို့နှင့်ပတ်သက်၍ အလွန်စက်ဆုပ်ဖွယ် အကောင်းဆုံးသောအရာမှာ အဘယ်နည်း။ ၎င်းတို့သည် ဘုရားသခင်၏ ရွေးချယ်ထားသောလူများနှင့် မိမိတို့ပတ်ဝန်းကျင်ရှိသူများကို အထင်အမြင်မှားစေရန်၊ အထက်ကိုပင် လိမ်လည်ကာ လှည့်ဖြားရန် မှန်ကန်သောအရာများကို မကြာခဏပြောဆိုကြပြီး၊ ထို့ထက်ပင်ပို၍၊ ၎င်းတို့သည် ကွန့်လွန်းသောစကားလုံးများကို သုံးလျက် ဘုရားသခင်ကို လှည့်ဖြားကာ လူတို့၏ယုံကြည်မှုကိုရရှိလိုကြပြီး၊ ထို့နောက်တွင် ဘုရားအိမ်တော်၌ ရမ်းကားသောင်းကျန်းလိုကြသည်၊ မဆင်မခြင်ပြုမူကာမိမိတို့အလိုရှိသမျှကို လုပ်ဆောင်လိုကြလေသည်။ ၎င်းတို့သည် မည်သို့မှန်ကန်စွာ စကားပြောဆိုရမည်၊ မည်သို့ မမှန်မကန် ပြောဆိုရမည်ကို သိကြပြီး၊ မည်သို့ပြုမူသင့်သည်၊ မည်သို့မပြုမူသင့်သည်၊ အဘယ်အရာက စည်းမျဉ်းများဖြစ်သည်၊ အဘယ်အရာက စည်းမျဉ်းများမဟုတ်၊ စည်းမျဉ်းကိုဆန့်ကျင်ခြင်းက အဘယ်အရာဖြစ်ပြီး စည်းမျဉ်းများနှင့်အညီ လုပ်ဆောင်ခြင်းက အဘယ်အရာဖြစ်သည်ဟူသည်တို့ကိုလည်း သိရှိကြသည်။ ၎င်းတို့၏စိတ်နှလုံးထဲ၌ ဤအရာများကို မရှင်းလင်းခြင်းမဟုတ်ဘဲ၊ အချို့မှာ ဤအရာများကို အလွန်ရှင်းလင်းစွာနှင့် ပြတ်သားစွာပင် သိကြသည်။ သို့သော် ၎င်းတို့အနေဖြင့် စည်းမျဉ်းများကို မည်မျှပင်ကောင်းစွာနားလည်ပြီး ရှင်းလင်းစွာသိရှိသည်ဖြစ်စေ၊ အမှုအရာများကို လုပ်ဆောင်သည့်အခါ သမ္မာတရားကို လုံးဝ လက်တွေ့လုပ်ဆောင်ခြင်း မရှိကြသကဲ့သို့ မိမိတို့၏ကိုယ်ပိုင်ဆန္ဒများနှင့်အညီ မကောင်းသည့်အရာများကို မခြွင်းမချန် လုပ်ဆောင်ကြသည်။ ဤအချက်က ၎င်းတို့၏သဘာဝမှာ စာတန်ဆန်ကြောင်း၊ အန္တိခရစ်သဘာဝဖြစ်ကြောင်း ဆုံးဖြတ်ပေးသည်။ ၎င်းတို့သည် သမ္မာတရားကို အလွန်အမင်းမနှစ်မြို့သကဲ့သို့ သမ္မာတရားကို မုန်းတီးရုံသာမက၊ အပြုသဘောဆောင်သောအရာများကိုလည်း မကြာခဏ မုန်းတီးပြီး ရှုတ်ချကြသည်။ အဆင်းနီသောနဂါးကြီးသည် အဘယ်ကြောင့် သမ္မာတရားနှင့် ဘုရားသခင်ကို မုန်းတီးသနည်း။ ဤအရာကို သူ၏စာတန်ဆန်သော သဘာဝက လုံးဝဆုံးဖြတ်ပေးခြင်း ဖြစ်သည်။ အချို့သော ညီအစ်ကိုမောင်နှမများသည် အလွန် ညှဉ်းပန်းနှိပ်စက်ခြင်းနှင့် လိုက်လံဖမ်းဆီးခြင်းခံရသဖြင့် အိမ်သို့ မပြန်နိုင်ကြသကဲ့သို့ ထိုနတ်ဆိုးများနှင့် စာတန်များက “ဤလူများသည် ပုံမှန်အတိုင်း အသက်မရှင်ကြတော့ပါ၊ သူတို့မိသားစုများကို သူတို့ စွန့်ပစ်ကြလေပြီ” ဟု ဆိုကြသည်။ အမှန်မှာ၊ ၎င်းတို့သည် အဆင်းနီသောနဂါးကြီး၏ ညှဉ်းပန်းနှိပ်စက်ခြင်းခံရသောကြောင့် အိမ်မပြန်နိုင်ကြခြင်း ဖြစ်သည်။ ဤသို့သောအဖြစ်အပျက်မျိုး များစွာ ဖြစ်ပွားတတ်သည်။ အခြားမည်သည့်အရာကို သင်တို့ ကြားဖူးသေးသနည်း။ (လူတို့သည် ဘုရားသခင်၏နှုတ်ကပတ်တော်များကို အလွန်အကျွံဖတ်ရှုလျှင် ဦးနှောက်ဆေးကြောခြင်းခံလာရသည်ဟု အဆင်းနီသောနဂါးကြီးက ဆိုသည်။) အဆင်းနီသောနဂါးကြီးက၊ “လူတို့သည် ဘုရားနှုတ်ကပတ်တော်များ၏ ဦးနှောက်ဆေးကြောခြင်းခံရသည်။ ၎င်းတို့သည်ဘုရားရူးရူးသူများ ဖြစ်နေကြပေပြီ”ဟု ပြောလေသည်။ ဤသည်မှာ အမှန်တရားကို ပြောင်းပြန်လှန်ခြင်း ဖြစ်သည်။ ရှင်းရှင်းလင်းလင်းပင် လူတို့ကို ဖောက်ပြန်ပျက်စီးစေပြီး ဦးနှောက်ဆေးကြောသည်မှာ အဆင်းနီသော နဂါးကြီးဖြစ်သော်လည်း၊ ၎င်းက ထိုအရာကို လှည့်ပြီး ဘုရားသခင်၏နှုတ်ကပတ်တော်များက လူတို့ကို ဦးနှောက်ဆေးကြောသည်ဟု ပြောဆိုသည်။ ဤမကောင်းဆိုးဝါးများက အလွန်ကောက်ကျစ်ဆိုးယုတ်လှသည်။ အဆင်းနီသောနဂါးကြီးသည် အခြားသူများလုပ်ဆောင်သော ကောင်းမှုအားလုံးကို မိမိကိုယ်တိုင်အတွက် တောင်းဆိုပြီး မိမိလုပ်ဆောင်သော မကောင်းမှုများကိုမူ အခြားသူများအပေါ် ပုံချသည်။ အန္တိခရစ်တို့သည်လည်း ထိုနည်းလည်းကောင်းပင် ပြုမူကြသည်။ ၎င်းတို့၏နည်းလမ်းများသည် အဆင်းနီသောနဂါးကြီးနှင့် စာတန်တို့၏နည်းလမ်းများနှင့် တစ်ထပ်တည်းတူညီသည်။ ၎င်းတို့သည် အမှန်ပင် စာတန်၏ အစေခံများ ဖြစ်ကြသည်။

ငါတို့သည် အန္တိခရစ်တို့၏ ကောက်ကျစ်ဆိုးယုတ်သော၊ အန္တရာယ်ပေးတတ်ပြီး လှည့်ဖြားတတ်သော သရုပ်သကန်များအပေါ် မိတ်သဟာယဖွဲ့ခြင်းကို ယခု တော်တော်လေး ပြီးစီးကြပြီလော။ ယနေ့ ငါ မိတ်သဟာယဖွဲ့ပြီးသည့်အရာသည် သင်တို့ တိုက်ရိုက် နားလည်နိုင်သည့်အရာထက် ကွဲပြားပြီး ပို၍ စစ်မှန်သည် မဟုတ်လော။ ဘုရားအိမ်တော်သည် မကြာသေးမီနှစ်များတွင် ဗီဒီယိုများစွာ ထုတ်လုပ်ခဲ့ပြီး၊ အချို့သော ဓမ္မတေးများနှင့် ရုပ်ရှင်များ အစရှိသည်တို့အပါအဝင်၊ ထိုဗီဒီယိုများအားလုံးကို အွန်လိုင်းပေါ်တွင် တင်ထားပြီးဖြစ်သည်။ တရုတ်ပြည်မကြီးရှိ အန္တိခရစ်တစ်ဦးသည် ဤအရာများကို အွန်လိုင်းတွင် မြင်တွေ့ခဲ့ပြီး “သင်တို့သည် ဤအစီအစဉ်များကို ပြည်ပတွင် ထုတ်လုပ်ခဲ့ပြီး ငါတို့လည်း တရုတ်ပြည်တွင် ဤသို့ လုပ်ဆောင်နိုင်သည်”ဟု ဆိုခဲ့သည်။ ထို့နောက် သူသည် လူသစ်စုဆောင်းမှုတစ်ခု ပြုလုပ်ခဲ့ပြီး၊ လူတစ်စုကို ရှာဖွေကာ၊ အဆင်းနီသော နဂါးကြီး၏ နိုင်ငံ၌ သံစုံသီချင်းဆိုသောအဖွဲ့တစ်ဖွဲ့ကို စတင်ခဲ့သည်။ အဆုံးတွင်၊ ဤလူများ အဖမ်းခံခဲ့ရသည်။ အန္တိခရစ်သည် အဘယ်ကြောင့် ဤသို့ လုပ်ဆောင်ခဲ့ရသနည်း။ သူ့တွင် ရည်မှန်းချက်တစ်ခု ရှိခဲ့သလော။ (ရှိခဲ့ပါသည်။) သူ၏ ရည်မှန်းချက်ကား အဘယ်နည်း။ (လူတို့ကို ထိန်းချုပ်ခြင်း ဖြစ်သည်။) သူက လူတို့ကို ထိန်းချုပ်လိုခြင်းလောက် ရိုးရှင်းခဲ့သည်မဟုတ်ပေ။ သူသည် မိမိ၏ ကိုယ်ပိုင်အုပ်စုကို တည်ထောင်လိုခဲ့ခြင်း ဖြစ်သည်။ သူ၏ စိတ်ကူးမှာ၊ “ဘုရားအိမ်တော်တွင် သံစုံသီချင်းဆိုသောအဖွဲ့ ရှိနိုင်သဖြင့် ငါ့မှာလည်း ရှိနိုင်ပေသည်။ အကယ်၍ ငါ အောင်မြင်လျှင်၊ ငါ့မှာ ကိုယ်ပိုင်အုပ်စု ရှိလိမ့်မည်။ ငါ့လက်မောင်းကို တစ်ချက် ဝှေ့ယမ်းလိုက်ရုံဖြင့် လူများစွာ ရောက်လာလိမ့်မည်” ဟူ၍ ဖြစ်သည်။ ဤနည်းအားဖြင့်၊ သူသည် ဘုရားသခင်၏ အသင်းတော်ကို အစားထိုးနိုင်မည်ဖြစ်သည်။ ဤသည်မှာ သူ စွမ်းဆောင်ရရှိလိုသော ရည်မှန်းချက် မဟုတ်လော။ သို့သော် အကျိုးဆက်မှာ အဆင်းနီသော နဂါးကြီးက နှိမ်နင်းခဲ့ပြီး သူ၏ ဖြစ်လိုသည့် အတွေးမှာ အချည်းနှီးဖြစ်လာခဲ့သည်။ ဘုရားအိမ်တော်သည် ဤအလုပ်ကို လုံခြုံရေးသေချာမှုရှိသောအခြေအနေအောက်တွင် လုပ်ဆောင်သည်။ အဆင်းနီသော နဂါးကြီး အုပ်စိုးသောနိုင်ငံတွင် သူ့အတွက် ဤအခြေအနေ ရှိခဲ့သလော။ သူ့အတွက် ဤအခြေအနေ မရှိခဲ့သော်လည်း၊ သူသည် ကြွားဝါလိုနေဆဲ ဖြစ်သည်။ သူသည် မိမိကိုယ်ကို ကောင်းစွာ မကြွားဝါနိုင်ခဲ့သည့်အပြင် အဆုံးတွင် သူ့အတွက် အမှုအရာများက မှားယွင်းသွားခဲ့သည်။ လွန်ခဲ့သောနှစ်အနည်းငယ်က၊ အခြားလူတစ်စုသည် အစီအစဉ်တစ်ခုကို ထုတ်လုပ်ပြီး အွန်လိုင်းတွင် တင်ခဲ့ကြသည်။ ၎င်းတို့သည် အကများနှင့်တွဲဖက်၍ တေးသီချင်းအဟောင်းများကို သီဆိုခဲ့ကြပြီး တိုင်းရင်းသားလူနည်းစုပုံစံ ပန်းအလှဆင်ထားသော ဂါဝန်များကို ဝတ်ဆင်ခဲ့ကြသည်။ ထိုအရာသည် အလွန် သမားရိုးကျဖြစ်ပြီး ခေတ်မမီတော့ပေ။ ငါ့အား ပြောလော့၊ ဤအန္တိခရစ်များသည် အဖျက်အမှောင့်များကိုသာ ဖြစ်စေခဲ့သည် မဟုတ်လော။ (ဟုတ်ပါသည်။) ဘာသာတရားမရှိသူများနှင့် ဘာသာရေးသမားများသည် တကယ့်အခြေအနေကို မသိရှိခဲ့ကြဘဲ ဤအရာများကို အသင်းတော်က အမှန်တကယ် လုပ်ဆောင်ခဲ့သည်ဟု ယုံကြည်ခဲ့ကြသည်။ အန္တိခရစ်များသည် မိုက်မဲသောအရာများကို အမြဲလုပ်ဆောင်ကြသည်။ ၎င်းတို့သည် ကောက်ကျစ်ဆိုးယုတ်သည်သာမက မိုက်မဲလည်းမိုက်မဲကြသည်။ အဘယ်ကြောင့် ၎င်းတို့ မိုက်မဲကြသနည်း။ ၎င်းတို့အနေဖြင့် အလွန် ကောက်ကျစ်ဆိုးယုတ်သဖြင့် ကောက်ကျစ်ဆိုးယုတ်မှုနှင့်အတူ မိုက်မဲသွားကြခြင်းကြောင့် ဖြစ်သလော။ မဟုတ်ပေ။ လူတစ်ဦးတွင် မည်သည့် အစွမ်းအစရှိသည်ဖြစ်စေ၊ အကယ်၍ သူသည် သမ္မာတရားအချို့ကို နားလည်ပါက၊ အမှုအရာများကို လုပ်ဆောင်ပြီး လုပ်ဆောင်ရန် မိမိတို့အတွက် မည်သည့်အရာက သင့်လျော်သည် သို့မဟုတ် မသင့်လျော်သည်ကို မသိသညအခါ၌၊ ၎င်းတို့တွင် ရှေ့ဆက်ရန်နည်းလမ်းမရှိလျှင်ပင် ၎င်းတို့၏စိတ်နှလုံးထဲတွင် အဓိကအချက်တစ်ခုရှိသည်။ ၎င်းတို့သည် မဆင်မခြင် သို့မဟုတ် ကြောင်းကျိုးမမြင်ဘဲ ပြုမူကြမည်မဟုတ်ပေ။ ဤသည်မှာ မှန်သည် မဟုတ်လော။ (မှန်ပါသည်။) သို့သော်၊ သမ္မာတရားကို နားမလည်သူများနှင့် ဆင်ခြင်တုံတရားကင်းမဲ့လောက်အောင် မာနထောင်လွှားသူများသည် အကြောင်းမဲ့ ပြုမူကြသည်။ ၎င်းတို့အတွက် အကြောင်းမဲ့ ပြုမူခြင်းမှာ အဘယ်အရာကို ဆိုလိုသနည်း။ ဤသို့သောလူများတွင် ဆင်ခြင်တုံတရားနှင့်ဆိုင်သည့် အသိစိတ် မရှိကြသကဲ့သို့ ဆင်ခြင်တုံတရားနှင့်ဆိုင်သည့် အသိစိတ်မရှိသောသူများသည် ကိစ္စရပ်များကို မစဉ်းစားနိုင်ကြပေ။ “စဉ်းစားသည်”ဟူခြင်းအားဖြင့် ငါ မည်သည့်အရာကို ဆိုလိုသနည်း။ အစောပိုင်းအဆင့်များတွင် မည်သည့်အရာကို လုပ်ဆောင်ရမည်၊ မည်သည့်အရာကို ပြင်ဆင်ရမည်၊ အရေးယူဆောင်ရွက်သည့်အခါ မည်သည့်အရာများ လိုအပ်သည်၊ အဘယ်ကြောင့် ဤအစီအစဉ်ကို ပြုလုပ်ရမည်ဟူသည်နှင့် အစီအစဉ်ကို ထုတ်လုပ်ပြီးနောက်၊ လူမည်မျှအပေါ် သက်ရောက်မှုရှိနိုင်မည်၊ လူမည်မျှက တည်ဆောက်စရာဖြစ်စေနိုင်ပြီး ၊ အကျိုးဆက်များ သို့မဟုတ် အားနည်းချက်များ တစ်ခုတလေ ရှိမရှိဟူသည်တို့ကို ငါဆိုလိုသည်။ဤအရာအားလုံးကို ချင့်တွက်ရန် လိုအပ်သည်။ ဤချင့်တွက်ခြင်း လုပ်ငန်းစဉ်ကို “စဉ်းစားခြင်း”ဟု ခေါ်သည်။ ဤမိုက်မဲသောလူများသည် အမှုအရာများကို စဉ်းစားနိုင်ကြသလော။ (မစဉ်းစားနိုင်ကြပါ။) ကိစ္စရပ်များကို မစဉ်းစားနိုင်သောသူများသည် ဆင်ခြင်တုံတရားမရှိကြပေ၊ ၎င်းတို့အနေဖြင့် သမ္မာတရားကို သိနားလည်မှု တစ်ခုတလေ ရှိသလော။ သေချာပေါက်မရှိပေ။ အကယ်၍ တစ်စုံတစ်ဦးသည် သမ္မာတရားအချို့ကို အမှန်တကယ် နားလည်ပါက၊ ၎င်း၏ ဆင်ခြင်တုံတရားနှင့်ဆိုင်သော အသိစိတ်သည် ပို၍ ရှင်းလင်းပြီး ပို၍ ခိုင်မာလာလိမ့်မည်။ မည်သည့်အရာက အပြုသဘောဆောင်သည်၊ မည်သည့်အရာက အပျက်သဘောဆောင်သည်၊ မည်သည့်အရာက မှန်ကန်သည်၊ မည်သည့်အရာက မှားယွင်းသည်၊ ထထိုသော စည်းမျဉ်းတစ်ခုသည် မည်သည့်နယ်ပယ်အတွင်း တည်ရှိသည်ဟူသည်တို့ကို ၎င်းက ပို၍ ရှင်းလင်းစွာ သိမြင်လာနိုင်သည်။ ဆိုလိုသည်မှာ၊ ၎င်းတို့ မည်သည့်အရာကို လုပ်ဆောင်သည်ဖြစ်စေ၊ ကောင်းသောအရာ သို့မဟုတ် ဆိုးသောအရာ တစ်စုံတစ်ခုကို လုပ်ဆောင်သည်ဖြစ်စေ၊ ၎င်းတို့၏စိတ်နှလုံးထဲတွင် စံနှုန်းတစ်ခု ရှိလေသည်။ ဥပမာအနေနှင့်၊ အကယ်၍ တစ်စုံတစ်ဦးက သင့်အား လမ်းတစ်လျှောက် ကိုယ်လုံးတီး ပြေးရန် ပြောခဲ့ပါက၊ သင် သွားလုပ်မည်လော။ (လုပ်မည်မဟုတ်ပါ။) အကယ်၍ တစ်စုံတစ်ဦးက သင့်ကို ရိုက်နှက်ပါက သင် သွားလုပ်မည်လော။ အကယ်၍ တစ်စုံတစ်ဦးက သင့်အား ယွမ်တစ်သောင်း ပေးခဲ့ပါက သင် သွားလုပ်မည်လော။ (ယင်းမှာ လုပ်ဆောင်ရန် ရှက်ဖွယ်ကောင်းသော အရာတစ်ခုဖြစ်ပေမည်။ ကျွန်ုပ် လုပ်နိုင်မည် မဟုတ်ပါ။) ဤသည်မှာ လုပ်ဆောင်ရန် ရှက်ဖွယ်ကောင်းသော အရာတစ်ခုဖြစ်မည်ကို သိရှိသည့်အခါ၊ဤသည်မှာ ဆင်ခြင်တုံတရားမှ ပေါ်ထွက်လာသော အတွေးတစ်မျိုး၊ အဆုံးအဖြတ်တစ်မျိုးနှင့် သဘောထားတစ်မျိုး ဖြစ်သည်။ ဆိုလိုသည်မှာ၊ ဤဆင်ခြင်တုံတရားဖြင့်သာ သင်သည် ထိုသို့သော အတွေးအခေါ်နှင့် ထိုသို့သော သဘောထားကို ရှိနိုင်ပေသည်။ ထို့ကြောင့်၊ သင်သည် ငွေဖြင့် မက်လုံးပေးခံရသည်ဖြစ်စေ သို့မဟုတ် ရက်စက်ကြမ်းကြုတ်စွာ ညှဉ်းပန်းနှိပ်စက်ခံရသည်ဖြစ်စေ၊ သင့်ကို မည်သို့ပင် အတင်းအကျပ်ခိုင်းစေသည်ဖြစ်စေ၊ သင် သွားလုပ်ဦးမည်မဟုတ်ပေ၊ ထိုအခါ သင်သည် လုံးဝ ထိခိုက်ခံရမည် မဟုတ်ဘဲ၊ ခိုင်မာစွာ ရပ်တည်မည်ဖြစ်သည်။ အန္တိခရစ်များသည် သမ္မာတရားကို နားမလည်ကြပေ။ ထို့ကြောင့် ၎င်းတို့လုပ်ဆောင်သည့် မည်သည့်အရာမဆိုအပေါ် အယူအဆ မရှိကြပေ။ ဤနေရာတွင် “အယူအဆ” ဟူသည်မှာ အဘယ်အရာကို ဆိုလိုသနည်း။ ဘုရားသခင်အတွက် သက်သေခံရန် မည်သည့်အရာ လုပ်ဆောင်ရမည်ကို ၎င်းတို့ မသိရှိကြဟု ဆိုလိုသည်။ ဤအန္တိခရစ်သည် မိမိ၌ အလွန့်အလွန် ချစ်ခင်တတ်သည့် စိတ်နှလုံးရှိသည်ဟု ယုံကြည်ခဲ့သည်၊ သူသည် သံစုံသီချင်း ဗီဒီယိုတစ်ခု ပြုလုပ်ရန် လူတစ်စုကို စုစည်းခဲ့ပြီး ငွေများစွာ သုံးစွဲကာ မိမိကိုယ်ကို အန္တရာယ်တွင်းသို့ ကျရောက်စေသည့်အဖြစ်သို့ ရောက်ရှိသွားခဲ့သည်။ တရုတ်ပြည်မကြီးရှိ အခြေအနေသည် ပြည်ပထက် ပိုဆိုးသည်၊ သို့ဆိုလျှင် တစ်စုံတစ်ခု မှားယွင်းသွားပါက မည်သို့ဖြစ်မည်နည်း။ သူသည် ဤအရာကို စဉ်းစားခဲ့သလော။ သူသည် အခြေအနေကို အတိုင်းအတာတစ်ခုအထိ စဉ်းစားကောင်း စဉ်းစားခဲ့နိုင်သော်လည်း၊ မည်သည့် အစီအစဉ်များကို ပြုလုပ်ရမည် သို့မဟုတ် မည်သည့် ရလဒ်များကို စွမ်းဆောင်ရရှိမည်ကို သူ မသိခဲ့ပေ။ သူ လုံးဝ နားမလည်ခဲ့ပေ။ အဘယ်ကြောင့် သူ နားမလည်ခဲ့သနည်း။ သူ၌ ဤဆင်ခြင်တုံတရား မရှိခဲ့ပေ။ ဆင်ခြင်တုံတရားသည် မည်သို့ ဖြစ်ပေါ်လာသနည်း။ သမ္မာတရားကို နားလည်ခြင်းမှတစ်ဆင့်သာ လူ၏ ဆင်ခြင်တုံတရားသည် တဖြည်းဖြည်း ရှင်းလင်းပြီး ခိုင်မာလာနိုင်သည်။ အန္တိခရစ်များ၌ သမ္မာတရားကို မုန်းတီးသော သဘာဝရှိသည်၊ ၎င်းတို့သည် အပြုသဘောဆောင်သောအရာများကို ပင်ကိုအားဖြင့် ဆန့်ကျင်ကြပြီး၊ ၎င်းတို့၏ အတွင်းအကျဆုံးသော စိတ်နှလုံးထဲ၌ သမ္မာတရားကို လုံးဝ မချစ်နိုင်ကြ။ သို့ဆိုလျှင် ၎င်းတို့သည်သမ္မာတရားကို နားလည်နိုင်ကြသလော။ (နားမလည်နိုင်ပါ။) အကယ်၍ သမ္မာတရားကို ၎င်းတို့ နားမလည်နိုင်ပါက၊ ပုံမှန် လူ့သဘာဝ၏ အတွေးအခေါ်ကို ၎င်းတို့ ပိုင်ဆိုင်နိုင်ကြသလော။ ဤအရာကို ၎င်းတို့ လုံးဝ မပိုင်ဆိုင်နိုင်ပေ။ ပုံမှန် လူ့သဘာဝ၏ အတွေးအခေါ် မရှိသောလူများတွင် ဆင်ခြင်တုံတရား ရှိသလော။ မရှိပေ။ အန္တိခရစ်များက တစ်စုံတစ်ခုကို လုပ်ဆောင်ပြီး ပြောဆိုသည့်အခါ၊ သူတို့၏ အမြင်ရှုထောင့်များနှင့် သူတို့လုပ်ဆောင်သမျှ ထိုအမှုအရာအားလုံးသည် နတ်ဆိုးများနှင့် ဝိညာဉ်ဆိုးများ လုပ်ဆောင်သည့်အရာများနှင့် ခြားနားခြင်းမရှိပေ။ အဘယ်ကြောင့် ခြားနားခြင်းမရှိဟု ငါဆိုရသနည်း။ ဥပမာအနေနှင့်၊ တစ်စုံတစ်ဦးသည် တရားဟောရန်နှင့် မိမိကိုယ်ကို ကြွားဝါရန် တကယ်ကိုနှစ်သက်သဖြင့်၊ သူ တရားဒေသနာများ ဟောကြားသည်ကို နားထောင်မည့် လူများကို အမြဲ ရှာဖွေနေသည်။ လူတို့က သူ့ကို နားမထောင်ချင်သည့်တိုင်၊ သူ ဟောပြောနေဆဲ ဖြစ်သည်၊ အခြားလူများ သူ့အပေါ် ထိုသို့သော စက်ဆုပ်ရွံရှာမှုကို ခံစားရသည့်အခါ၊ သူက မခွဲခြားနိုင်သကဲ့သို့ ထိုသူတို့ကို စောင့်ကြည့်လေ့လာရန် မကြိုးစားပေ။ အခြားသူများ လိုအပ်သည့်အရာကို သူ မမြင်သည့်အပြင်၊ မိမိကိုယ်ကိုသာ ကျေနပ်စေသည်။ ဤသည်မှာ အလွန်ဆိုးဝါးသည် မဟုတ်လော။ အလွန်ဆိုးဝါးပြီး သူသည် ဆင်ခြင်တုံတရား မရှိပေ။ ဤဆင်ခြင်တုံတရား ကင်းမဲ့ခြင်းနှင့် စာတန်နှင့် ဝိညာဉ်ဆိုးများ ဖမ်းစားခံထားရသူတစ်ဦး၏ ကြုံရာကျပန်းဖြစ်ပြီး အကြောင်းမဲ့ဖြစ်သော ပြောဆိုပြုမူမှုများအကြား ခြားနားမှု တစ်စုံတစ်ရာ ရှိသလော။ သူသည် လမ်းတစ်လျှောက် ကိုယ်လုံးတီးဖြင့် အရူးအမူး ပြေးလွှားနေသည့် စိတ်ရောဂါသည်တစ်ဦးကဲ့သို့ ဖြစ်သည့်ပုံမပေါ်သည့်တိုင်၊ သူသည် ဆင်ခြင်တုံတရားမရှိဘဲ ပြုမူသည်ကို သင် မြင်တွေ့နိုင်သည်။ သူ့အား ညီအစ်ကိုမောင်နှမအချို့ကို ရေလောင်းပေးရန်၊ သို့မဟုတ် ဧဝံဂေလိတရား ဟောပြောရန်၊ သို့မဟုတ် တာဝန်တစ်ခုခု ထမ်းဆောင်ရန် စေခိုင်းသည့်အခါ၊ သူသည် လုံးဝ စည်းမျဉ်းများမရှိသကဲ့သို့ မိမိအလိုရှိသည့် မည်သည့်ပုံစံဖြင့်မဆို မဆင်မခြင်သာ ပြုမူသည်။ လူတစ်ဦးတလေကိုမျှ ရရှိခြင်းမရှိဘဲ နှစ်ပေါင်း ၂၀ ကြာ ဧဝံဂေလိတရားကို ဟောပြောပြီးဖြစ်သည့်တိုင် ခေါင်းဆောင်များ ဖြစ်ချင်သေးသည့် လူအချို့ ရှိသည်။ ထိုသို့သောလူများ ရှိသလော။ ရှိပေသည်။ ၎င်းတို့တွင် မည်သည့် စည်းမျဉ်း လုံးဝမရှိပေ၊ ၎င်းတို့သည် မိမိတို့ လုပ်ဆောင်သမျှတိုင်းကို ကမောက်ကမဖြစ်စေသည်။ သို့တိုင် ၎င်းတို့သည် ခေါင်းဆောင်များဖြစ်လိုပြီး အခြားလူများကို ဦးဆောင်လိုကြသည်။ ဤသို့သောလူများ အများအပြား ရှိသည်မှာ သေချာပါသည်။ ၎င်းတို့သည် ဘုရားသခင်ကို နှစ်ပေါင်းများစွာ ယုံကြည်ကြပြီးဖြစ်သည်၊ ဘုရား နှုတ်ကပတ်တော်များစွာကို ဖတ်ရှုကြပြီးဖြစ်ကာ တရားဒေသနာများစွာကို နားထောင်ကြပြီးဖြစ်သော်လည်း၊ မည်သည့်သမ္မာတရားကိုမျှ နားမလည်ကြပေ။ သို့ဆိုလျှင်၊ ၎င်းတို့၏ နားလည်မှုကင်းမဲ့ခြင်းသည် မည်သည့်အရာနှင့် ဆက်စပ်သနည်း။ မည်သည့်အကြောင်းရင်းက ၎င်းတို့ကို နားမလည်စေခဲ့သနည်း။ ၎င်းတို့သည် အစွမ်းအစနှင့် သဘောပေါက်နားလည်နိုင်စွမ်းတွင် အလွန် ချို့တဲ့နေခြင်းကြောင့်လော၊ သို့မဟုတ် သူတို့၏ အကျင့်စရိုက်သည် ဆိုးပြီး သမ္မာတရားကို မချစ်မြတ်နိုးခြင်းကြောင့်လော။ (သူတို့၏ အနှစ်သာရနှင့် ဆက်စပ်ပါသည်။) အဘယ်ကြောင့် ၎င်းတို့၏ အနှစ်သာရနှင့် ဆက်စပ်သနည်း။ (အကြောင်းမှာ သူတို့၏ အနှစ်သာရသည် ကောက်ကျစ်ဆိုးယုတ်သောကြောင့်ဖြစ်သည်၊ သူတို့သည် သန့်ရှင်းသောဝိညာဉ်တော်၏ အလုပ်ကို မခံယူနိုင်ကြ၊ ဘုရားသခင်သည် ထိုသို့သောလူများအပေါ် အလုပ်မလုပ်သောကြောင့်၊ ဘုရားနှုတ်ကပတ်တော်များကို သူတို့ မည်သို့ပင် စားသောက်သည်ဖြစ်စေ၊ သမ္မာတရားကို လုံးဝနားလည်ကြလိမ့်မည်မဟုတ်ပါ။) ဤသည်မှာ ဓမ္မဓိဋ္ဌာန်ကျသော အကြောင်းရင်း ဖြစ်သည်။ ဓမ္မဓိဋ္ဌာန်ကျသော အကြောင်းရင်းမှာ သန့်ရှင်းသောဝိညာဉ်တော်သည် ၎င်းတို့အပေါ် အလုပ်မလုပ်သောကြောင့် ၎င်းတို့သည် မည်သည့်အရာကိုမျှ မုချ နားလည်နိုင်မည်မဟုတ်သည်မှာ အမှန်ပင် ဖြစ်သည်။ ဤသည်မှာ မည်သူ့နှင့်မဆို သက်ဆိုင်သည်။ ပုဂ္ဂလဓိဋ္ဌာန်ကျသော အကြောင်းရင်းလည်း ရှိပြီး ယင်းမှာ အဘယ်အရာဖြစ်သနည်း။ (ထိုသို့သောလူများသည် သမ္မာတရားကို မုန်းတီးကြသည်။) သမ္မာတရားကို မုန်းတီးသောသူများသည် သမ္မာတရားကို မည်သို့ သဘောထားကြသနည်း။ (သူတို့၏ ဆန့်ကျင်ဘက်အဖြစ် သဘောထားကြသည်။) ၎င်းတို့သည် ထိုသမ္မာတရားကို မိမိတို့၏ ဆန့်ကျင်ဘက်အဖြစ် သဘောထားကြသည်၊ ဤသည်မှာ ရှုထောင့်တစ်ခု ဖြစ်သည်။ အခြားအဘယ်အရာ ရှိသေးသနည်း။ ၎င်းတို့သည် သမ္မာတရား၏ လက်တွေ့ကျသောဘက်ကို သဘောပေါက်နိုင်ကြသလော။ လုံးဝ သဘောမပေါက်နိုင်ကြပေ။ အကယ်၍ ၎င်းတို့သည် ဤအဆင့်ကိုပင် နားမလည်နိုင်ပါက၊ ငါ့အား ပြောလော့၊ ၎င်းတို့အနေဖြင့် သမ္မာတရားကို နားလည်နိုင်စွမ်း ရှိကြသလော။ လုံးဝ မရှိပေ၊ သမ္မာတရားကို ၎င်းတို့ နားမလည်နိုင်ပေ။ ဓမ္မဓိဋ္ဌာန်ကျသော အကြောင်းရင်းမှာ ထိုသို့သောလူများသည် သန့်ရှင်းသောဝိညာဉ်တော်၏ အလုပ်ကို မရရှိနိုင်ကြသကဲ့သို့ ဘုရားသခင်က ၎င်းတို့ကို အသိဉာဏ်ပွင့်လင်းစေခြင်း မရှိပေ။ ပုဂ္ဂလဓိဋ္ဌာန်ကျသော အကြောင်းရင်းမှာ ၎င်းတို့သည် ဘုရားသခင်၊ သမ္မာတရားနှင့် အပြုသဘောဆောင်သောအရာများကို ရန်လိုကြခြင်း၊ ၎င်းတို့နှင့်ပတ်သက်သရွေ့၊ မည်သည့် အပြုသဘောဆောင်သောအရာမျှ အပြုသဘောဆောင်သောအရာ မဟုတ်ခြင်း ဖြစ်သည်။ သို့ဆိုလျှင် ၎င်းတို့သည် မိမိတို့၏စိတ်နှလုံးထဲ၌ မည်သည့်အရာက အပြုသဘောဆောင်သည်ဟု ယုံကြည်ကြသနည်း။ ယင်းတို့သည် စာတန်က အားပေးအားမြှောက်ပြုသော အရာအမျိုးအစားများ ဖြစ်သည်။ ကောက်ကျစ်ဆိုးယုတ်သော၊ အနှစ်မဲ့ပြီး မရေရာသော အရာများချည်းသာ ဖြစ်ကြသည်။ သို့ဆိုလျှင်၊ သမ္မာတရားကို မုန်းတီးသော ဤကောက်ကျစ်ဆိုးယုတ်သည့်လူများသည် သမ္မာတရားကို နားလည်နိုင်စွမ်း ရှိကြသလော။ ၎င်းတို့အနေဖြင့် ထိုသမ္မာတရားကို လက်မခံကြသောကြောင့် လုံးဝ နားမလည်နိုင်ကြပေ။ ယခု၊ ငါ့အား ပြောလော့၊ ထိုသို့သောလူများနှင့် သမ္မာတရားကို မိတ်သဟာယဖွဲ့ရာ၌ အကျိုးတစ်စုံတစ်ရာ ရှိသလော။ သင်သည် ၎င်းတို့ထံ ဘုရား နှုတ်ကပတ်တော်များကို ဖတ်ပြသည့်အခါ ၎င်းတို့နားထောင်ရန် လိုလားနိုင်ကြသလော။ ၎င်းတို့အားလုံးသည် ဘာသာတရားမရှိသူများနှင့် မကောင်းဆိုးဝါးများ ဖြစ်ကြသည်၊ သို့ဖြစ်လျှင် ဘုရားသခင်၏ နှုတ်ကပတ်တော်များကို ၎င်းတို့ မည်သို့ နားထောင်နိုင်မည်နည်း။ လူအချို့သည် ဤကိစ္စရပ်ကို ထိုးထွင်းသိမြင်နိုင်ခြင်းမရှိဘဲ၊ “သူတို့နှင့် သမ္မာတရားကို ကျွန်ုပ် မိတ်သဟာယဖွဲ့သည့်အခါ သူတို့သည် အဘယ်ကြောင့် နားမလည်ကြသနည်း။ သူတို့သည် လူသားများ မဟုတ်ကြသလော” ဟု ဆိုကြသည်။ သင်သည် အကြံအိုက်ပြီး ၎င်းတို့နှင့် ဆက်သွယ်ပြောဆို၍မရနိုင်ပေ။ လူအချို့၏ စကားများကို သင် တကယ်ကိုပင် နားမထောင်နိုင်သကဲ့သို့ ၎င်းတို့လုပ်ဆောင်သည့်အရာများမှာ တကယ်ကို ယုတ္တိမရှိပေ။ ဤသူတို့သည် ဘာသာတရားမရှိသူများ၊ မကောင်းဆိုးဝါးများ ဖြစ်ကြပြီး၊ ကျိုးကြောင်းဆင်ခြင်မှု လုံးဝမရှိကြပေ။ အဘယ်ကြောင့် ငါသည် “ကျိုးကြောင်းဆင်ခြင်မှု လုံးဝမရှိ”ဟူသည့်ဤစကားလုံးကိုးလုံးကို ပြောဆိုရသနည်း။ ဘုရားသခင် တည်ရှိကြောင်းနှင့် ဘုရားသခင်က အရာခပ်သိမ်းအပေါ် အချုပ်အခြာအာဏာ ကိုင်စွဲထားကြောင်း သင် ယုံကြည်သည်။ ဤအရာများသည် အပြုသဘောဆောင်သော အရာများ မဟုတ်လော။ (ဟုတ်ပါသည်။) ဤလူများကမူ မည်သည့်အရာကို ယုံကြည်ကြသနည်း။ “ဤသည်မှာ အရာခပ်သိမ်းအပေါ် ဘုရားသခင် အချုပ်အခြာအာဏာ ကိုင်စွဲထားပုံဖြစ်သလော။ သူသည် ဘာမျှဟုတ်တိပတ်တိ မဟုတ်ပါတကား”ဟူ၍ ဖြစ်သည်။ ၎င်းတို့အနေဖြင့် ကျိုးကြောင်းဆင်ခြင်မှု လုံးဝမရှိဖြစ်ကြသည် မဟုတ်လော။ (ဟုတ်ပါသည်။) ထိုသို့သောလူများနှင့် ဆက်သွယ်ပြောဆိုရန် နည်းလမ်းမရှိပေ။ ၎င်းတို့သည် သီးခြားအမျိုးအစားတစ်ခု၊ သားရဲတိရစ္ဆာန်များ၊ ကျိုးကြောင်းဆင်ခြင်မှု လုံးဝမရှိသူများ ဖြစ်ကြသည်။ သားရဲတိရစ္ဆာန်များသည် အပြုသဘောဆောင်သောအရာများက အဘယ်အရာဖြစ်သည် သို့မဟုတ် သမ္မာတရားက အဘယ်အရာဖြစ်သည်ဟူသည်ကို လုံးဝနားမလည်ကြပေ။ ထို့ကြောင့် ၎င်းတို့နှင့် ဆက်သွယ်ပြောဆိုရန် နည်းလမ်းမရှိပေ။ သင့်အနေဖြင့် ၎င်းတို့နှင့် ဆက်သွယ်ပြောဆို၍ မရနိုင်ဟူသောအချက်သည် အချိန်ကာလနှင့်ဆိုင်သည့် ပြဿနာမဟုတ်၊ သို့မဟုတ် သင့်အနေဖြင့် အားသွန်ခွန်စိုက် ကြိုးပမ်းအားထုတ်မှု ပြုလုပ်ခြင်းမရှိမရှိ သို့မဟုတ် သင် မည်မျှ အားထုတ်မှု ပြုလုပ်သည်ဟူသည်တို့နှင့်ဆိုင်သော ပြဿနာလည်းမဟုတ်ဘဲ၊ ထို့ထက် ၎င်းတို့က တကယ်ကို နားလည်နိုင်စွမ်းမရှိခြင်းသာ ဖြစ်သည်။ သို့ဆိုလျှင် ၎င်းတို့ကို အခြားအဘယ်အရာ ပြောစရာ ရှိသေးသနည်း။ ဤလူများအတွင်း၌ အတိအကျ အဘယ်အရာ ရှိနေသနည်း။ ၎င်းတို့၏စိတ်နှလုံးများထဲ၌ ရိုးသားမှု၊ တည်ကြည်မှုနှင့် ကောင်းမြတ်ခြင်းတို့ မရှိပေ။ ကောက်ကျစ်ဆိုးယုတ်မှုသာ ရှိသည်။ ၎င်းတို့သည် ကောက်ကျစ်ဆိုးယုတ်မှုနှင့် ပြည့်နှက်နေသည်။ ဤသည်မှာ ဤလူများက ကျိုးကြောင်းဆင်ခြင်မှု လုံးဝမရှိသည့်အပြင် ကယ်တင်မခံရနိုင်သည့် အကြောင်းရင်း ဖြစ်သည်။

လှည့်ဖြားတတ်ခြင်းနှင့် အန္တရာယ်ပြုတတ်ခြင်းတို့ကို ကောက်ကျစ်ဆိုးယုတ်သော စိတ်သဘောထားနှင့် နှိုင်းယှဉ်ကြည့်သည့်အခါ၊ ၎င်းတို့၏ အတိုင်းအတာသည် အတော်အတန် ပိုမိုပေါ့ပါးပြီး ပိုမိုပေါ့တန်သည်။ အကယ်၍ အတိုင်းအတာသည် ပေါ့တန်ပါက၊ အဘယ်ကြောင့် ယင်းတို့ကို ဤနေရာတွင် ငါ ဖော်ပြရသနည်း။ အန္တိခရစ်များသည် နားလည်ရခက်ခဲပြီး မရှင်းမလင်းသောနည်းဖြင့် လှည့်ဖြားစွာ ပြုမူပြောဆိုတတ်ကြရာ၊ ၎င်းတို့အနေဖြင့် အန္တရာယ်ပြုတတ်ပြီး လှည့်ဖြားတတ်သည်ဟု အခြားသူတို့အား ခံစားရစေပြီး၊ သာမန်လူများသည် ၎င်းတို့အကြောင်း အမှန်တရားတစ်ခုလုံးကို သဘောမပေါက်နိုင်ကြပေ။ ၎င်းတို့သည် လှည့်ဖြားစွာ ပြုမူပြောဆိုတတ်ကြပြီး မာယာကင်းသော၊ ရိုးသားပြီး သမ္မာတရားကို လိုက်စားသောသူများနှင့် ပေါင်းသင်းဆက်ဆံ၍မရနိုင်ကြပေ။ ထိုအစား၊ ၎င်းတို့သည် ထိုသို့သောလူများကို မကြာခဏ ကစားပြီး အသုံးချတတ်ကြသည်။ ဤလူများသည် လုံးဝ သတိမထားမိဘဲ အန္တိခရစ်များ၏ ကစားခြင်းနှင့် လှည့်ဖြားခြင်းကို ခံကြရပြီး၊ ၎င်းတို့၏ အသုံးချခြင်းကိုပင် ခံကြရသည်။ အန္တိခရစ်များ အသုံးပြုသော ဤအပြုအမူနှင့် ဤနည်းလမ်းများသည် လူတို့ကို အလွန် အန္တရာယ်မဖြစ်စေသည်မှာ အမှန်ဖြစ်၏။ လူတို့ကို အလွန်အန္တရာယ်ဖြစ်စေသည့်အရာမှာ အဘယ်နည်း။ အန္တိခရစ်တို့၏ ကောက်ကျစ်ဆိုးယုတ်သော စိတ်သဘောထားဖြစ်ပြီး၊ သာ၍ပင် ပြင်းထန်သည်မှာ ဤကောက်ကျစ်ဆိုးယုတ်သော စိတ်သဘောထားမှ ပေါ်ထွက်လာသော လူတို့ကို အထင်အမြင်မှားစေခြင်း၊ ထိန်းချုပ်ခြင်းနှင့် ဖိနှိပ်ခြင်းတို့ ဖြစ်သည်။ အန္တိခရစ်များသည် ၎င်းတို့၏ လုပ်ရပ်များနှင့်ပတ်သက်လာသည့်အခါ အခြားသူများကို မပြောပြနိုင်သော အရင်းခံအကြောင်းနှင့် ရည်ရွယ်ချက်တစ်ခု အမြဲရှိတတ်ကြသည်။ ၎င်းတို့သည် အကြောင်းရင်းမရှိဘဲ မည်သည့်အရာကိုမျှ ဆက်ကပ်ခြင်း သို့မဟုတ် အသုံးခံခြင်း ပြုလုပ်လိမ့်မည်မဟုတ်သကဲ့သို့၊ မည်သူအတွက်မျှ သို့မဟုတ် ဘုရားအိမ်တော်အတွက် အကြောင်းရင်း သို့မဟုတ် နစ်နာကြေးမရှိဘဲ မည်သည့်အရာကိုမျှ လုပ်ဆောင်လိမ့်မည်မဟုတ်ပေ။ ၎င်းတို့၏ လုပ်ဆောင်ချက်နှင့် စကားလုံးတိုင်း၏ နောက်ကွယ်တွင် အရင်းခံအကြောင်းတစ်ခု၊ ကြံရွယ်ချက်တစ်ခု ရှိနေပြီး၊ ၎င်းတို့၏ ကြံရွယ်ချက်နှင့် အရင်းခံအကြောင်းတို့ ချပြခြင်းခံရသည့်အခိုက်၊ သို့မဟုတ် ၎င်းတို့၏ ရည်မှန်းချက်များနှင့် လိုအင်ဆန္ဒများ ပျက်စီးသွားသည့်အခိုက်တွင်၊ ဆုတ်ခွာရန် အခွင့်အရေးတစ်ခုကို ၎င်းတို့ ရှာဖွေကြသည်။ ၎င်းတို့၏စိတ်နှလုံးထဲ၌၊ ၎င်းတို့က “အကြောင်းရင်းမရှိဘဲ ကိုယ့်ကိုယ်ကိုယ် ဆက်ကပ်ခြင်း၊ အသုံးခံခြင်းသည် အလွန်မတန်ပါ။ ကိုယ့်အတွက် အကျိုးမရှိပါ။ ဘုရားသခင်ကို ယုံကြည်ခြင်းမှနေ၍တစ်စုံတစ်ရာကို ရရှိရပေမည်။ ဆုလာဘ်မတောင်းဘဲ ဘုရားသခင်အတွက် ကိုယ့်ကိုယ်ကိုယ် အသုံးခံလျှင်၊ ယင်းသည် စဉ်းစားဉာဏ်ကင်းမဲ့သောသူသာဖြစ်သည်” ဟု တွေးကြသည်။ ၎င်းတို့၏ ဆင်ခြင်တွေးခေါ်မှုစနစ်မှာ “အခမဲ့ ကျွေးသော နေ့လည်စာဟူသည်မှာ မရှိပါ” ဟူ၍ ဖြစ်သည်။ ၎င်းတို့သည် သာမန်လူများ ပိုင်ဆိုင်သင့်ပြီး လုပ်ဆောင်သင့်သော အသိစိတ်နှင့် ဆင်ခြင်တုံတရား၊ အပြုအမူနှင့် ကောင်းမွန်သော လုပ်ဆောင်ချက်များကို မိုက်မဲသည်၊ စဉ်းစားဉာဏ်မရှိဟု သရုပ်ဖော်ကြသည်။ ဤသည်မှာ ကောက်ကျစ်ဆိုးယုတ်သည် မဟုတ်လော။ (ဟုတ်ပါသည်။) ဤသည်မှာ အလွန့်အလွန် ကောက်ကျစ်ဆိုးယုတ်ခြင်း ဖြစ်သည်။ ဥပမာအနေနှင့်၊ ဘုရားအိမ်တော်သည် အလုပ်အစီအစဉ်အချို့ကို ပြုလုပ်ပြီး မိမိတို့၏တာဝန်များကို ထမ်းဆောင်သော ညီအစ်ကိုမောင်နှမများ၏ ဘဝများအတွက် စောင့်ရှောက်မှုအချို့ကို ထောက်ပံ့ပေးသော်လည်း၊ အန္တိခရစ်များသည် အတွင်းမှနေ၍ ထိုအရာများကို တားဆီးနှောင့်ယှက်ကြသည်။ ယင်းတို့ကို တားဆီးနှောင့်ယှက်ရာ၌ အန္တိခရစ်တစ်ဦး၏ ရည်ရွယ်ချက်မှာ အဘယ်နည်း။ အကယ်၍ အလုပ်အစီအစဉ်များသည် အန္တိခရစ်ထံမှ လာခဲ့ပြီး၊ ဤသည်ကို သိရှိသည့်အခါ၊ ညီအစ်ကိုမောင်နှမများသည် ထိုအန္တိခရစ်အပေါ် ကျေးဇူးတင်စိတ် ခံစားရမည်ဖြစ်သည်။ ထို့နောက်တွင် အန္တိခရစ်က ဦးဆောင်သွားပေမည်။ အလုပ်အစီအစဉ်များအား မည်သူပြုလုပ်ခဲ့သည်ကို ညီအစ်ကို မောင်နှမများက မသိရှိဘဲ ဘုရားအိမ်တော်က ပြုလုပ်ခဲ့သည်ဟု ထင်မြင်ပြီး၊ ဘုရားသခင်ကို ကျေးဇူးတင်ပါက၊ အန္တိခရစ်သည် ထိုအရာများကို ဆောင်ရွက်မည်လော။ လုံးဝ ဆောင်ရွက်မည် မဟုတ်ပေ။ အန္တိခရစ်ကြောင့် အလုပ်အစီအစဉ်များ ရပ်တန့်သွားမည်ဖြစ်ပြီး အကောင်အထည်ဖော်ခြင်း ခံရမည်မဟုတ်ပေ။ ဘုရားအိမ်တော်က ဤအလုပ်အစီအစဉ်များကို ထုတ်ပြန်ခြင်းသည် ညီအစ်ကိုမောင်နှမများအတွက် အကျိုးရှိပြီး၊ ဧဝံဂေလိအလုပ်သည် ပိုမိုကောင်းမွန်စွာ ပျံ့နှံ့မည်ဖြစ်သည်။ ဤသည်မှာ ဘုရားသခင်၏ အမှုတော်နှင့်ဆက်စပ်သည့် ကြီးမားသောအရာဖြစ်သည်၊ သို့ဖြစ်လျှင် ခေါင်းဆောင်များအဖြစ် ပြုမူဆောင်ရွက်သောသူများသည် ဤအလုပ်အစီအစဉ်များကို မည်သို့ အကောင်အထည်ဖော်သင့်သနည်း။ ယင်းတို့ကို ကောင်းမွန်စွာ ဆောင်ရွက်ကာ အကောင်အထည်ဖော်ရန် ၎င်းတို့အနေဖြင့် တတ်နိုင်သမျှ အရာအားလုံးကို လုပ်ဆောင်သင့်သည်။ သို့သော်၊ အချို့အန္တိခရစ်များသည် အတွင်းမှနေ၍ ယင်းကို တားဆီးနှောင့်ယှက်ပြီး နှစ်နှစ်ကြာသည်အထိ အလုပ်ကို အကောင်အထည်မဖော်ကြပေ။ ဤအတွက် အကြောင်းရင်းမှာ အဘယ်နည်း။ ဤသည်မှာ စာတန်က အတားအဆီးများနှင့် အဖျက်အမှောင့်များ ဖြစ်ပေါ်စေခြင်း ဖြစ်သည်။ အချို့အသင်းတော်များသည် အန္တိခရစ်များနှင့် ဆိုးယုတ်သောလူများ၏ အနှောင့်အယှက်ပေးခြင်းနှင့် ထိန်းချုပ်ခြင်းကို ခံကြရပြီး၊ မိမိတို့၏တာဝန်များကို ထမ်းဆောင်သော ညီအစ်ကိုမောင်နှမများက စောင့်ရှောက်ခြင်းမခံကြရပေ။ ဤအရာက အန္တိခရစ်များကို ဝမ်းသာစေပြီး၎င်းတို့၏စိတ်နှလုံးထဲ၌ ၎င်းတို့က၊ “အင်မတန် အံ့သြဖွယ်ကောင်းတဲ့အရာနှင့် အင်မတန်ကြီးမားသော အကျိုးကျေးဇူးများကို ခံစားခွင့်ရသူဖြစ်ခြင်းက ငါ့အတွက် လုံလောက်ပေသည်။ ညီအစ်ကိုမောင်နှမအားလုံးသည် အဘယ်သို့ဖြစ်ပြီး အကျိုးကျေးဇူးခံစားခွင့်ရှိသူတွေ ဖြစ်နိုင်မည်နည်း” ဟု တွေးကြသည်။ ညီအစ်ကိုမောင်နှမများက အကျိုးကျေးဇူးခံစားရခြင်းက အန္တိခရစ်များကို မည်သို့ သက်ရောက်မှုရှိမည်နည်း။ ၎င်းတို့ကို လုံးဝ သက်ရောက်မှုရှိမည်မဟုတ်ပေ။ ၎င်းတို့ အကျိုးကျေးဇူးခံစားရမည်၊ လူတိုင်း အကျိုးကျေးဇူးခံစားရမည်ဖြစ်ပြီး ယင်းကအလွန်ကောင်းပေမည်။ အလုံးစုံသောအခြေအနေကို စဉ်းစားကြည့်လော့။ သင်သည် ဤအရာကို မပိတ်ပင်မတားဆီးသင့်သကဲ့သို့၊ မထိန်ချန်ထားသင့်ဘဲ၊ ဝမ်းသာစွာဖြင့် အကောင်အထည်ဖော်သင့်သည်။ ဤသည်မှာ ပုံမှန်ဖြစ်သည် မဟုတ်လော။ (ပုံမှန်ဖြစ်ပါသည်။) ဤသည်မှာ လူတစ်ဦး ထမ်းဆောင်သင့်သော တာဝန်ဖြစ်ပြီး၊ သင်၏ တာဝန်လည်း ဖြစ်သည်။ ရှုထောင့်တစ်ခုမှာ ထိုအရာက သင့်ကို ဘာမျှ မဆုံးရှုံးမနစ်နာစေစဉ်တွင်၊ အခြားရှုထောင့်တစ်ခုမှာ ဤသို့ဖြစ်သည်၊ လူတိုင်းက ဧဝံဂေလိအလုပ် ပျံ့နှံ့စေလိုကြသည် မဟုတ်လော။ (ကျွန်ုပ်တို့ ပျံ့နှံ့စေလိုကြပါသည်။) ညီအစ်ကိုမောင်နှမများက ဘုရားသခင်၏ ကျေးဇူးတော်အား မွေ့လျော်ခံစားနေကြသည်ကို ၎င်းတို့ မြင်သည့်အခါ၊ မနာလိုဖြစ်လာကြသလော။ မည်သည့်အရာကို ၎င်းတို့ မနာလိုဖြစ်ကြသနည်း။ အန္တိခရစ်များသည် မကောင်းဆိုးဝါးများဖြစ်သည် မဟုတ်လော။ သို့ဆိုလျှင်၊ အန္တိခရစ်များသည် အလုပ်ကို အဘယ်ကြောင့် အကောင်အထည်မဖော်ကြသနည်း။ အကြောင်းမှာ ၎င်းတို့က မနာလိုဖြစ်သောကြောင့် ဖြစ်သည်။ အလုပ်ကို အကောင်အထည်ဖော်ခြင်းသည် ဧဝံဂေလိအလုပ် ပျံ့နှံ့ရေးအတွက် အကျိုးရှိမည်ကို ၎င်းတို့ စဉ်းစားကြသလော။ (မစဉ်းစားကြပါ။) ထိုအရာသည် ၎င်းတို့၏ အကျိုးစီးပွားများကို သက်ရောက်မှုရှိသလော။ ထိုအရာသည် ၎င်းတို့နှင့် မည်သည့် ပတ်သက်မှုရှိသနည်း။ ၎င်းတို့နှင့် လုံးဝ ပတ်သက်မှုမရှိပေ၊ သို့တိုင် ထိုအရာကို ၎င်းတို့ အကောင်အထည်မဖော်ကြသကဲ့သို့ ဤသည်မှာ ၎င်းတို့ ကောက်ကျစ်ဆိုးယုတ်ခြင်း ဖြစ်သည်။ ၎င်းတို့သည် အသက်ရှင်နေသော နတ်ဆိုးများဖြစ်ပြီး ကျိန်ခြင်းခံရသင့်သည်။ ဘုရားအိမ်တော်၏ အလုပ်နှင့်လည်းကောင်း၊ မိမိတို့၏တာဝန်များကို ထမ်းဆောင်သော လူများစွာတို့နှင့်လည်းကောင်း သက်ဆိုင်သည့် ထိုသို့သောကိစ္စရပ်တစ်ခုနှင့်ပတ်သက်၍၊ ၎င်းတို့သည် အကျိုးဆက်များကို လုံးဝ မစဉ်းစားကြပေ။ အကယ်၍ ၎င်းတို့၌ ကောင်းမွန်သည့် ကြံရွယ်ချက် အစအနလေးတစ်ခု ရှိခဲ့ပါက၊ ယင်းကို အားတင်းလုပ်ဆောင်နိုင်မည်မဟုတ်ပေ။ ၎င်းတို့အနေဖြင့် အဘယ်ကြောင့် ဤပုံစံဖြင့် ပြုမူကြသနည်း။ ဤသည်မှာ ယုတ်မာမှုဖြစ်ပြီး၊ ကောက်ကျစ်ဆိုးယုတ်မှု ဖြစ်သည်။ သင်တို့သည် ထိုသို့သောအရာများကို လုပ်ဆောင်ကြသလော။ ထိုသို့သောအရာများကို သင်တို့ လုပ်ဆောင်နိုင်စွမ်းရှိပါက၊ သင်တို့သည် အန္တိခရစ်များနှင့် ခြားနားခြင်းမရှိသကဲ့သို့၊ သင်တို့သည်လည်း အသက်ရှင်နေသော နတ်ဆိုးများ ဖြစ်ကြသည်။ ထိုသို့သောအရာများကို သင်တို့ မလုပ်ဆောင်သင့်ပေ။ မကြာခဏ အသင်းတော်အလုပ်ကို အနှောင့်အယှက်ပေးသော၊ အသင်းတော်၌ သောင်းကျန်းသော ဆိုးယုတ်သောလူများ အသင်းတော်တွင်ရှိသည်ကို မြင်တွေ့သော်လည်း၊ လျစ်လျူရှုသော အန္တိခရစ်အချို့လည်း ရှိသည်။ ထိုသို့သောလူများကို ကိုင်တွယ်ရန် ၎င်းတို့ စေခိုင်းခြင်းခံရသည့်အခါ၊ တွန့်ဆုတ်ပြီး ထိုသူတို့ကို ကိုင်တွယ်ခြင်းအား ရွှေ့ဆိုင်းထားကြသည်။ ၎င်းတို့သည် ညီအစ်ကိုမောင်နှမများ၏ အကျိုးစီးပွားများကို မစဉ်းစားကြပေ၊ ၎င်းတို့၏ ကိုယ်ပိုင်ဂုဏ်သတင်း မထိခိုက်ရေးကိုသာ ၎င်းတို့ စဉ်းစားကြပြီး ထိုမျှသာ ဖြစ်သည်။ ၎င်းတို့က၊ “ငါ့ကို ခေါင်းဆောင်လုပ်စေသဖြင့် ငါက အဆုံးအဖြတ်ပေးရမည်ဖြစ်သည်။ ငါသည် အကြွင်းမဲ့အာဏာနှင့် သြဇာအာဏာရှိသည်။ သင်က နှင်ထုတ်ဖို့ပြောသောသူမည်သူကိုမဆို ငါ နှင်ထုတ်ရမည်ဆိုလျှင်၊ ယင်းက ငါ့ကို လုံးဝ အာဏာမဲ့သွားသကဲ့သို့ ပေါ်လွင်သွားစေလိမ့်မည်။ ဤလူများက ငါ၏စောင့်ရှောက်မှုအောက်တွင် ရှိပြီး ငါ၏ လက်အောက်ငယ်သားများဖြစ်သည်ကို ညီအစ်ကိုမောင်နှမများသိဖို့ ငါ သေချာလုပ်ဆောင်ရမည်”ဟု တွေးကြသည်။ ၎င်းတို့က မည်သူ့ကို အတိုက်အခံလုပ်နေကြသနည်း။ (ဘုရားသခင်ကို ဖြစ်သည်။) ဘုရားသခင်ကို အတိုက်အခံလုပ်ခြင်းသည် ကောက်ကျစ်ဆိုးယုတ်ခြင်း မဟုတ်လော။ ဤသည်မှာ ကောက်ကျစ်ဆိုးယုတ်မှု ဖြစ်သည်။ လူသားတစ်ဦးက မည်သည့်အရာမျိုးဖြစ်သည်ကို သင်တို့ သိကြသလော။ ဘုရားသခင်က သင့်အား သင်၏ ထွက်သက်ဝင်သက်ကို ပေးခဲ့ပြီး၊ သင်က ထိုသို့သော အရေးကြီးသည့်အရာကို မသိပါက၊ ယင်းသည် သင့်ကို စဉ်းစားဉာဏ်ကင်းမဲ့စေသည် မဟုတ်လော။ ဘုရားသခင်သည် သင့်အသက်ကို အချိန်မရွေး အဆုံးသတ်စေနိုင်သည်၊ သို့တိုင် သင်သည် ဘုရားသခင်ကို အသည်းအသန် ဆန့်ကျင်နေဆဲဖြစ်သည်။ ဤသည်မှာ ကောက်ကျစ်ဆိုးယုတ်ပြီး၊ သင်သည် အသက်ရှင်နေသော နတ်ဆိုးတစ်ကောင် ဖြစ်သည်။ ထို့ကြောင့်၊ ရှုထောင့်တစ်ခုမှာ သင်တို့သည် သမ္မာတရားကို လိုက်စားရမည်ဖြစ်ပြီး အန္တိခရစ်တစ်ဦး၏ လမ်းကြောင်းကို မလိုက်လျှောက်ရပေ၊ ဤအရာအပြင်၊ အန္တိခရစ်များကို မည်သို့ ပိုင်းခြားသိမြင်ရမည်ကို သင်တို့ သိရမည်။ အကယ်၍ သင်တို့သည် အန္တိခရစ်တစ်ဦးနှင့် ကြုံတွေ့ပါက၊ ထိုသူကို အနီးကပ် စောင့်ကြည့်သင့်ပြီး၊ ထိုသူက မကောင်းသည့်အရာတစ်ခု ပြုလုပ်တော့မည်ကို သင်တို့ မြင်တွေ့ပါက၊ ချက်ချင်း တားဆီးသင့်ကာ၊ ညီအစ်ကိုမောင်နှမများနှင့်အတူ ပူးပေါင်း၍ ထိုသူကို ဖော်ထုတ်ကာ၊ စိတ်ဖြာလေ့လာဆွေးနွေးသင့်သည်၊ ငြင်းပယ်ပြီးနှင်ထုတ်သင့်သည်။ အသင်းတော်တစ်ခုရှိ လူငယ်ညီအစ်ကိုမောင်နှမအချို့ ပူးပေါင်း၍ ခေါင်းဆောင်အတုအယောင်တစ်ဦးကို ဖြုတ်ချခဲ့ကြောင်း လတ်တလောတွင် ငါ ကြားသိခဲ့ရသည်။ ဤလူငယ်များသည် တိုးတက်မှု ဖြစ်စေကြပြီးဖြစ်ကြောင်း၊ စာတန်ဆန်သော အတွေးအခေါ်များဖြင့် ၎င်းတို့ အသက်မရှင်ကြကြောင်း၊ သမ္မာတရားကို ၎င်းတို့ လက်တွေ့လုပ်ဆောင်နိုင်ပြီး စည်းမျဉ်းများအတိုင်း ပြုမူဆောင်ရွက်နိုင်ကြကာ လူအများစုထက် များစွာ ၎င်းတို့သာလွန်ကြောင်း ငါ ပြောဆိုသည်။ လူအများစုသည် လောကီဆိုင်ရာ ဆက်ဆံမှုများအတွက် အတွေးအခေါ်များ ရှိကြပြီး၊ စာတန်၏ အဆိပ်ခတ်ခြင်းကို အလွန်အမင်း ခံထားရကာ၊ စာတန်၏ သြဇာလွှမ်းမိုးမှုမှ လွတ်မြောက်ခြင်း မရှိကြသေးပေ။ ခေါင်းဆောင်အတုအယောင်တစ်ဦးကို ဖယ်ရှားနိုင်ခြင်းသည် သမ္မာတရားအချို့ကို နားလည်ပြီး ဘုရားအိမ်တော်၏ အလုပ်ကို ကာကွယ်စောင့်ရှောက်နိုင်ကြောင်း ပြသသည်။ ဤသည်မှာကောင်းသောအရာတစ်ခု ဖြစ်သည်။ ဤအရာက အသက်တာတွင် ရင့်ကျက်လာပြီး မိမိ၏တာဝန်ကို ကောင်းမွန်စွာ ထမ်းဆောင်နိုင်ကြောင်း ပြသသည်။

ကောက်ကျစ်ဆိုးယုတ်မှု၊ အန္တရာယ်ပြုတတ်ခြင်း၊ နှင့် လှည့်ဖြားတတ်ခြင်းဟူသော အန္တိခရစ်၏ အနှစ်သာရနှင့်ဆိုင်သည့် သွင်ပြင်လက္ခဏာများအပြင်၊ ၎င်းတို့၏ အမျိုးမျိုးသော သရုပ်သကန်အားလုံးကို ယနေ့တွင် မိတ်သဟာယဖွဲ့ခြင်းနှင့် ဖော်ထုတ်ခြင်းအားဖြင့်၊ အန္တိခရစ်များက ဘုရားသခင်ကို ပင်ကိုအားဖြင့် ဆန့်ကျင်ကြသည်ကို ငါတို့ မြင်တွေ့ရသည်။ အချို့လူများက၊ “ကျွန်ုပ်တွင်အန္တိခရစ်တစ်ဦး၏ စိတ်သဘောထား ရှိသော်လည်း၊ အန္တိခရစ်တစ်ဦး၏ သဘာဝ အနှစ်သာရ မရှိပါ။ ကျွန်ုပ်သည် မည်သည့်အခါတွင်မျှ အန္တိခရစ်တစ်ဦးဖြစ်သွားမည်မဟုတ်ပါ” ဟု ဆိုကြသည်။ ဤသဘောထားအပေါ် သင်တို့ မည်သို့ ထင်မြင်ပါသနည်း။ သင့်တွင် အန္တိခရစ်တစ်ဦး၏ အနှစ်သာရ မရှိသော်လည်း၊ အန္တိခရစ်တစ်ဦး၏ ဤသရုပ်သကန်များနှင့် ထုတ်ဖော်ပြချက်များ ရှိနေသည်။ သင်သည် အန္တိခရစ်တစ်ဦး အသက်ရှင်နေထိုင်သည့်အရာကို အသက်ရှင်နေထိုင်ပြီး၊ သင့်တွင် အန္တိခရစ်တစ်ဦး၏ စိတ်သဘောထား ရှိပေသည်။ ထို့ကြောင့် သင်သည် အန္တိခရစ်တစ်ဦး၏ လမ်းကြောင်းကို လိုက်လျှောက်မည့် အန္တရာယ်၌ ရှိနေသည်။ အဆင့်အတန်း၊ သြဇာလွှမ်းမိုးမှု၊ အရင်းအနှီးများဖြင့်၊ သင် အန္တိခရစ်တစ်ဦး ဖြစ်လာရန်မှာ အချိန်နှင့်သာ ဆိုင်ပေသည်။ ယင်းမှာ အမှန်တရား ဖြစ်သည်။ ဤသို့ ငါ ဆိုရာ၌ ငါ၏ ရည်ရွယ်ချက်မှာ အဘယ်နည်း။ ငါသည် သင်တို့အား သတိပေးရန်နှင့် အမှန်တရားတစ်ခုကို ပြောပြရန် ထိုအရာကို ပြောဆိုခြင်း ဖြစ်သည်။ တစ်စုံတစ်ဦးသည် အန္တိခရစ်တစ်ဦး၏ လမ်းကြောင်းကို စတင်လိုက်လျှောက်သည်နှင့်တပြိုင်နက်၊ ဖြစ်နိုင်ခြေနှစ်ခု ရှိသည်။ တစ်ခုမှာ ထိုအရာကို သင် အချိန်မီ ရှာဖွေတွေ့ရှိပြီး၊ ဦးတည်ချက်ပြောင်းနိုင်လိမ့်မည်ဖြစ်ကာ ၊ မိမိကိုယ်ကို ဆင်ခြင်သုံးသပ်၊ နောင်တရပြီး ဘုရားသခင်၏ စီစဉ်ညွှန်ကြားခြင်းများနှင့် စီမံခန့်ခွဲမှုများကို ကျိုးနွံနာခံနိုင်လာလိမ့်မည် ဖြစ်သည်။ ဤသည်မှာ အကောင်းဆုံးသော ဖြစ်နိုင်ခြေဖြစ်ပြီး၊ သင်သည် ကယ်တင်ခြင်းကို ရရှိမည့် မျှော်လင့်ချက် ရှိလိမ့်မည်။ သို့သော်၊ သင်သည် သမ္မာတရားကို လိုက်စားခြင်းလမ်းကြောင်းအား မလိုက်လျှောက်နိုင်ပါက၊ မကောင်းမှုများစွာကို သင် ကျူးလွန်ပြီး အန္တိခရစ်တစ်ဦးအဖြစ် သရုပ်ဖော်ခြင်းခံရသည်နှင့်တပြိုင်နက်၊ အကျိုးဆက်များက မစဉ်းစားရက်စရာ ဖြစ်သည်။ သင်တို့ နားလည်ကြသလော။ (နားလည်ပါသည်။) သင်တို့ နားလည်သည်မှာ ကောင်းပေ၏။။ ဤအရာအားဖြင့် ငါ မည်သည့်အရာကို ဆိုလိုသနည်း။ ငါ ဆိုလိုသည်မှာ၊ အကယ်၍ သင့်တွင် အန္တိခရစ်တစ်ဦး၏ သရုပ်သကန်များ ရှိလျှင်၊၊ သင့်အနေဖြင့်လှည့်သာ ပြင်သာရှိသေးပြီး နောင်တရရန် အခွင့်အလမ်း ရှိနေဆဲဖြစ်သည်၊ သို့သော် သင်သည် အန္တိခရစ်တစ်ဦး ဖြစ်လာသည်နှင့်တပြိုင်နက်၊ သင် အန္တရာယ်ရှိပေသည်။ ထို့ကြောင့်၊ သင်၌ အန္တိခရစ်တစ်ဦး၏ သရုပ်သကန်များ ရှိသည်ကို သင် ရှာဖွေတွေ့ရှိသည့်အခါ၊ လမ်းကြောင်းပြောင်းသင့်သည်၊ သမ္မာတရားကို ရှာဖွေပြီး ဤပြဿနာကို ဖြေရှင်းသင့်သည်။ ဤကိစ္စရပ်ကို ပေါ့ပေါ့တန်တန် သဘောမထားနှင့်။ သို့မဟုတ်ပါက၊ သင်သည် အာဏာနှင့် အခွင့်အလမ်းများ ရှိလာသည့်အခါ၊ ဆိုးယုတ်သော လုပ်ဆောင်ချက်များကို မဆင်မခြင် ကျူးလွန်လိမ့်မည်ဖြစ်ပြီး အသင်းတော်အလုပ်ကို အနှောင့်အယှက်များနှင့် အဖျက်အမှောင့်များ ဖြစ်ပေါ်စေလိမ့်မည်။ အကျိုးဆက်များကို သင် ခံနိုင်ရည်ရှိလိမ့်မည်မဟုတ်သကဲ့သို့ ထိုအရာက သင်၏အဆုံးသတ်နှင့် ခရီးပန်းတိုင်အပေါ် သက်ရောက်ရန် အလားအလာ အလွန်ရှိနေပေသည်။

ယနေ့ ငါတို့သည် အန္တိခရစ်တို့၏ ကောက်ကျစ်ဆိုးယုတ်သော စိတ်သဘောထားနှင့် သာမန်လူတို့၏ ကောက်ကျစ်ဆိုးယုတ်သော စိတ်သဘောထားတို့ကြား ပဓာနကျသော ကွာခြားချက်ကို ရှင်းလင်းစွာ ရှင်းပြပြီးဖြစ်သည်။ ယခု သင်တို့ နားလည်ကြပြီလော။ ဖောက်ပြန်ပျက်စီးသော လူသားအားလုံးသည် ကောက်ကျစ်ဆိုးယုတ်သော စိတ်သဘောထားကို ပိုင်ဆိုင်ကြပြီး၊ ၎င်းတို့အားလုံး၌ ကောက်ကျစ်ဆိုးယုတ်သော စိတ်သဘောထား၏ ထုတ်ဖော်ပြချက်များနှင့် သရုပ်သကန်များ ရှိကြသည်။ သို့ရာတွင် သာမန်လူတို့၏ ကောက်ကျစ်ဆိုးယုတ်သော စိတ်သဘောထားနှင့် အန္တိခရစ်တို့၏ ကောက်ကျစ်ဆိုးယုတ်သော စိတ်သဘောထားတို့မှာမူ ကွဲပြားခြားနားသည်။ သာမန်လူတို့၌ ကောက်ကျစ်ဆိုးယုတ်သော စိတ်သဘောထား ရှိကြသော်လည်း၊ ၎င်းတို့၏စိတ်နှလုံးထဲများ၌မူ သမ္မာတရားကို တမ်းတပြီး သမ္မာတရားကို ချစ်မြတ်နိုးကြသည်။ ဘုရားသခင်ကို ၎င်းတို့၏ယုံကြည်ခြင်းနှင့် မိမိတို့တာဝန်များကို ထမ်းဆောင်သည့်ဖြစ်စဉ်တွင် ၎င်းတို့က သမ္မာတရားကို လက်ခံနိုင်ကြသည်။ ၎င်းတို့ လက်တွေ့လုပ်ဆောင်နိုင်သည့် သမ္မာတရားက အကန့်အသတ်ရှိသော်ငြားလည်း၊ အချို့ကိုမူ လက်တွေ့လုပ်ဆောင်နိုင်ကြဆဲဖြစ်သည်။ သို့ဖြစ်၍ ၎င်းတို့၏ ဖောက်ပြန်ပျက်စီးသော စိတ်သဘောထားတို့သည် တဖြည်းဖြည်း သန့်စင်ခြင်းခံရနိုင်ပြီး အမှန်တကယ် ပြောင်းလဲနိုင်ကာ၊ နောက်ဆုံး၌ ဘုရားသခင်ကို အခြေခံအားဖြင့် ကျိုးနွံနာခံနိုင်ကာ ကယ်တင်ခြင်းကို ရရှိနိုင်ကြပေသည်။ အခြားတစ်ဖက်တွင်မူ အန္တိခရစ်တို့သည် သမ္မာတရားကို လုံးဝမချစ်မြတ်နိုးကြပေ။ ၎င်းတို့သည် သမ္မာတရားကို လုံးဝ လက်မခံကြသကဲ့သို့၊ လုံးဝ လက်တွေ့မလုပ်ဆောင်ကြပေ။ သင်တို့အနေဖြင့် ဤနေရာ၌ ငါပြောသည့်အရာအတိုင်း စောင့်ကြည့်လေ့လာပြီး ပိုင်းခြားသိမြင်ရန် ကြိုးစားသင့်သည်။ အသင်းတော်ခေါင်းဆောင် သို့မဟုတ် အမှုဆောင်ဖြစ်စေ၊ သာမန်ညီအစ်ကို သို့မဟုတ် ညီအစ်မတစ်ဦးဖြစ်စေ၊ ၎င်းတို့နားလည်နိုင်သည့် အတိုင်းအတာအတွင်းရှိ သမ္မာတရားများကို ၎င်းတို့ လက်တွေ့လုပ်ဆောင်နိုင်ခြင်း ရှိမရှိဟူသည်တို့ကို မြင်ရန်ကြည့်ရှုလော့။ ဥပမာအားဖြင့် တစ်စုံတစ်ဦးက သမ္မာတရား စည်းမျဉ်းတစ်ခုကို နားလည်သော်လည်း၊ လက်တွေ့လုပ်ဆောင်ရမည့်အချိန်ရောက်လာသည့်အခါ၊ လုံးဝ လက်တွေ့မလုပ်ဆောင်သကဲ့သို့၊ မိမိအလိုရှိသည့်အရာကို လုပ်ဆောင်ပြီး အကြောင်းမဲ့ ပြုမူသည်ဆိုပါစို့။ ဤသည်မှာ ကောက်ကျစ်ဆိုးယုတ်ခြင်းဖြစ်ပြီး ထိုသို့သောလူတစ်ဦးကို ကယ်တင်ရန် ခက်ခဲသည်။ လူအချို့သည် သမ္မာတရားကို အမှန်တကယ် နားမလည်ကြသော်လည်း၊ ၎င်းတို့၏စိတ်နှလုံးထဲ၌မူ ဘုရားသခင်၏ ရည်ရွယ်ချက်များနှင့် ကိုက်ညီပြီး သမ္မာတရားနှင့် ညီညွတ်သည့် မည်သည့်အရာအား အတိအကျ လုပ်ဆောင်ရမည်ကို ရှာဖွေလိုကြသည်။ ၎င်းတို့၏ အတွင်းအကျဆုံးသော စိတ်နှလုံးထဲ၌ သမ္မာတရားကို မဆန့်ကျင်လိုကြပေ။ သမ္မာတရားကို နားမလည်သောကြောင့်သာ ၎င်းတို့သည် စည်းမျဉ်းများကို ချိုးဖောက်လျက် ပြောဆိုပြုမူကြခြင်းဖြစ်သည်၊ အမှားများ ပြုလုပ်ကြခြင်းဖြစ်ပြီး၊ အနှောင့်အယှက်များနှင့် အဖျက်အမှောင့်များ ဖြစ်စေသည့်အရာများကိုပင် လုပ်ဆောင်မိကြခြင်းဖြစ်သည်။ ဤအရာ၏ သဘာဝသည် အဘယ်နည်း။ ဤအရာ၏ သဘာဝသည် မကောင်းမှုပြုခြင်းနှင့် မသက်ဆိုင်ပေ။ ထိုအရာကို မိုက်မဲခြင်းနှင့် မသိနားမလည်ခြင်းတို့က ဖြစ်ပေါ်စေခြင်း ဖြစ်သည်။ ၎င်းတို့သည် သမ္မာတရားကို နားမလည်သောကြောင့်၊ သမ္မာတရား စည်းမျဉ်းများကို မရရှိနိုင်သောကြောင့်နှင့် ၎င်းတို့၏ အယူအဆများနှင့် စိတ်ကူးစိတ်သန်းများအရ ထိုအရာများကို လုပ်ဆောင်ခြင်းသည် မှန်ကန်သည်ဟု ထင်မှတ်ကြသောကြောင့်သက်သက်ဖြင့် ဤအမှုအရာများကို ပြုလုပ်ကြခြင်းဖြစ်ရာ ၎င်းတို့သည် ထိုနည်းလမ်းဖြင့် ပြုမူကြလေသည်။ ထို့ကြောင့် ဘုရားသခင်သည် ၎င်းတို့ကို အစွမ်းအစ ကင်းမဲ့နေသည့် မိုက်မဲပြီး မသိနားမလည်သူအဖြစ် သတ်မှတ်သည်။ ၎င်းတို့အနေဖြင့် သမ္မာတရားကို နားလည်ပြီး ထိုသမ္မာတရားကို တမင်တကာ ဆန့်ကျင်ကြခြင်းတော့ မဟုတ်ပေ။ သမ္မာတရားကို နားမလည်သောကြောင့် မိမိတို့၏ အယူအဆများနှင့် စိတ်ကူးစိတ်သန်းများဖြင့် အမှုအရာများကို အစဉ်လုပ်ဆောင်ပြီး ဘုရားအိမ်တော်၏အလုပ်ကို မကြာခဏ နှောင့်ယှက်တတ်သော ခေါင်းဆောင်များ၊ အမှုဆောင်များနှင့် ပတ်သက်၍မူ၊ သင်တို့သည် ကြီးကြပ်မှုနှင့် ကန့်သတ်ချက်များကို လက်တွေ့အကောင်အထည်ဖော်ခြင်းအား လက်တွေ့လုပ်ဆောင်ရမည်ဖြစ်ပြီး ပြဿနာများဖြေရှင်းရန် သမ္မာတရားကို ပို၍မိတ်သဟာယဖွဲ့ခြင်းအား လက်တွေ့လုပ်ဆောင်ရမည်။ တစ်စုံတစ်ဦး၏ အစွမ်းအစသည် အလွန်ချို့တဲ့ပြီး သမ္မာတရား စည်းမျဉ်းများကို နားမလည်နိုင်လျှင်၊ ထိုသကို ခေါင်းဆောင်အတုအယောင်အဖြစ် ထုတ်ပယ်ရမည့် အချိန်ကျပြီဖြစ်သည်။ ၎င်းတို့သည် သမ္မာတရားကို နားလည်သော်လည်း ထိုသမ္မာတရားကို တမင်တကာ ဆန့်ကျင်လျှင်၊ ပြုပြင်ခြင်းခံရမည်။ ၎င်းတို့သည် အမြဲတစေ သမ္မာတရားကို လက်မခံနိုင်ဘဲ ရှိနေကာ နောင်တတရားကို ဖော်ပြခြင်းမရှိလျှင်၊ ၎င်းတို့သည် ဆိုးယုတ်သောသူအဖြစ် ကိုင်တွယ်ခံရမည်ဖြစ်ပြီး၊ ရှင်းလင်းပစ်ခံရသင့်သည်။ သို့ရာတွင် အန္တိခရစ်တို့၏ သဘာဝသည် ဆိုးယုတ်သောသူများ သို့မဟုတ် အယောင်ဆောင် ခေါင်းဆောင်များ၏ သဘာဝထက် များစွာ ပို၍ဆိုးရွားသည်။ အကြောင်းမှာ အန္တိခရစ်တို့သည် အသင်းတော်အလုပ်ကို တမင်တကာ အနှောင့်အယှက်ပေးသောကြောင့် ဖြစ်သည်။ ၎င်းတို့အနေဖြင့် သမ္မာတရားကို နားလည်လျှင်ပင် လက်တွေ့မလုပ်ဆောင်ကြ၊ မည်သူ့ကိုမျှ နားမထောင်ကြ၊ နားထောင်လျှင်လည်း ကြားသည့်အရာကို လက်မခံကြပေ။ အပေါ်ယံအားဖြင့် ထိုအရာကို လက်ခံသည့်ပုံပေါ်လျှင်ပင်၊ ၎င်းတို့၏ အတွင်းအကျဆုံးသော စိတ်နှလုံးထဲ၌ အတိုက်အခံလုပ်ကြပြီး၊ ပြုမူဆောင်ရွက်ရမည့် အချိန်ရောက်သည့်အခါ၊ ဘုရားအိမ်တော်၏ အကျိုးစီးပွားများကို လုံးဝထည့်မစဉ်းစားဘဲ မိမိတို့၏ နှစ်သက်မှုများနှင့်အညီ ပြုမူဆောင်ရွက်ကြဆဲဖြစ်သည်။ အခြားသူများအနီးဝန်းကျင်တွင် ရှိသည့်အခါ၊ ၎င်းတို့သည် လူ့စကားအချို့ကို ပြောဆိုကြပြီး လူသားပုံသဏ္ဌာန်အချို့ ရှိကြသော်လည်း၊ လူများ၏ကွယ်ရာ၌ ပြုမူကြသည့်အခါ၊ ၎င်းတို့၏ နတ်ဆိုးဆန်သော သဘာဝသည် ပေါ်ထွက်လာသည်။ ဤသူတို့သည် အန္တိခရစ်များ ဖြစ်ကြသည်။ လူအချို့သည် အဆင့်အတန်းကို ရရှိသည့်အခါ၊ မကောင်းမှုမျိုးစုံကို လုပ်ဆောင်ကြပြီး အန္တိခရစ်များ ဖြစ်လာကြသည်။ အချို့လူများမှာ အဆင့်အတန်း မရှိကြသော်လည်း၊ ၎င်းတို့၏ သဘာဝ အနှစ်သာရသည် အန္တိခရစ်တို့၏ သဘာဝ အနှစ်သာရနှင့် အတူတူပင်ဖြစ်သည်။ သူတို့ကို လူကောင်းများဟု သင် ပြောနိုင်သလော။ အဆင့်အတန်းကို ၎င်းတို့ ရရှိသည့်အခိုက်အတန့်၌ပင်၊ ၎င်းတို့သည် မကောင်းမှုမျိုးစုံ လုပ်ဆောင်ကြသည်။ ၎င်းတို့သည် အန္တိခရစ်များ ဖြစ်ကြ၏။

မိမိကိုယ်တိုင်က အန္တိခရစ်အဖြစ် ကြီးထွားလာနေသောသူတစ်ဦးဖြစ်ကြောင်း တွေ့ရှိရပြီး၊ အဆင့်အတန်းတစ်ခုရရှိသည်နှင့်တစ်ပြိုင်နက် ရာနှုန်းပြည့် အန္တိခရစ်တစ်ဦးဖြစ်ဖို့ သေချာသည်ဟု ခံစားရသူ တစ်ဦးတလေ သင်တို့ထဲတွင် ရှိသလော။ ထိုသို့ဖြစ်လျှင်၊ အခြားသူများက သင့်ကို ခေါင်းဆောင်အဖြစ် ရွေးချယ်သည့်အခါ၊ သင်သည် ၎င်းတို့အား သငကို ရွေးကောက်ခွင့် လုံးဝမပေးရဘဲ၊ “ကျွန်ုပ် ကြဉ်ရှောင်ပါသည်။ ကျွန်ုပ်ကို မရွေးချယ်ပါနှင့်။ အကယ်၍ သင်တို့ ရွေးချယ်ခဲ့လျှင်၊ ကျွန်ုပ်အတွက်တော့ အဆုံးသတ်သွားပါပြီ” ဟု ပြောသင့်သည်။ ဤသည်ကို မိမိကိုယ်ကို သိခြင်းရှိသည်ဟု ခေါ်သည်။ အဆင့်အတန်းမရှိခြင်းသည် သင်၏ အကာအကွယ် ဖြစ်သည်။ သာမန်နောက်လိုက်တစ်ဦးအနေဖြင့်၊ သင်သည် ကြီးမားသောမကောင်းမှုကို ပြုလုပ်ရန် အခွင့်အလမ်း လုံးဝ မရှိကောင်းမရှိနိုင်သကဲ့သို့ သင် အပြစ်ဒဏ်ပေးခံရနိုင်ခြေမှာလည်း သုညဖြစ်နိုင်ပေသည်။ သို့ရာတွင်၊ သင် အဆင့်အတန်းရရှိသည့်အခိုက်အတန့်၌ပင်၊ သင် မကောင်းမှုကျူးလွန်နိုင်ခြေသည် ရာနှုန်းပြည့်ဖြစ်သကဲ့သို့၊ သင် အပြစ်ဒဏ်ပေးခံရနိုင်ခြေမှာလည်း ရာနှုန်းပြည့်ဖြစ်ပြီး၊ ထို့နောက်တွင် သင့်အတွက် အားလုံးအဆုံးသတ်ပြီဖြစ်ကာ၊ သင်သည် ကယ်တင်ခြင်းရရှိရန် သင့်၌ ရှိကောင်းရှိနိုင်သည့် မည်သည့်အခွင့်အလမ်းကိုမဆို လုံးဝ ဖျက်ဆီးမိပြီး ဖြစ်သွားလိမ့်မည်။ အကယ်၍ သင်သည် ရည်မှန်းချက်များနှင့် လိုအင်ဆန္ဒများရှိနေပါက၊ အမြန်လုပ်ပြီး ဘုရားသခင်ထံ ဆုတောင်းသင့်သည်။ ပြဿနာကိုဖြေရှင်းရန် သမ္မာတရားကိုရှာဖွေသင့်သည်။ ၊ ဘုရားသခင်ကိုမှီခိုပြီး မိမိကိုယ်ကိုချုပ်တည်းခြင်းအား လက်တွေ့လုပ်ဆောင်သင့်ပြီး၊ သင်၏အဆင့်အတန်းကို အခိုင်အမာမပြသင့်ပေ။ ထိုအခါ သင်သည် သင်၏တာဝန်ကို ပုံမှန်ထမ်းဆောင်နိုင်လိမ့်မည်ဖြစ်သည်။ အကယ်၍ သင်သည် ရာထူးဂုဏ်ပုဒ်များကို အမြဲအာရုံစိုက်ပြီး သင်၏အဆင့်အတန်းကို အခိုင်အမာပြကာ၊ သင်၏တာဝန်ကိုထမ်းဆောင်ရန် အာရုံမစိုက်ပါက၊ သင်သည် လူလိမ်တစ်ဦးဖြစ်ပြီး ဖယ်ရှားရှင်းလင်းခြင်းခံရမည်။ သင်သည် တာဝန်တစ်ခုကို လက်ခံသည့်အခါ၊ အဆင့်အတန်းကို အာရုံမစိုက်နှင့်။ သင်၏တာဝန်ကိုသာ ကောင်းစွာ ထမ်းဆောင်သင့်သည်။ ကိစ္စရပ်များကို ကောင်းစွာကိုင်တွယ်ခြင်းသည် အခြားမည်သည့်အရာမဆိုထက် ပို၍ စစ်မှန်ဖြစ်သည်။ အကယ်၍ သင့်အနေဖြင့် သင်၏တာဝန်ကို ကောင်းစွာထမ်းဆောင်နိုင်ပါက၊ ဘုရားသခင်ကို သင် စိတ်ကျေနပ်စေပြီးဖြစ်မည် မဟုတ်လော။ သင်တို့နှင့်ပတ်သက်သရွေ့၊ ဤသည်မှာ မကောင်းမှု လုပ်ဆောင်ခြင်းကို သင်တို့ ရှောင်ရှားနိုင်သည့် နောက်ဆုံးနည်းလမ်းဖြစ်သည်။ သင်တို့ကို အမြဲတစေ ချုပ်ထိန်းထားပြီး အဆင့်အတန်း ရရှိခွင့်မပေးခြင်းသည် ကောင်းသောအရာလော သို့မဟုတ် မကောင်းသောအရာလော။ (ကောင်းသောအရာတစ်ခု ဖြစ်ပါသည်။) သို့ဆိုလျှင် အချို့လူများသည် ရွေးကောက်ပွဲများအတွင်းတွင် အဆင့်အတန်းအတွက် အဘယ်ကြောင့် အလွန်ကြိုးစားပြိုင်ဆိုင်နေကြသေးသနည်း။ ထိုသို့သောလူများ၌ ရည်မှန်းချက် အလွန်များလွန်းလှသည်။ လူတို့အတွက် ရည်မှန်းချက် အလွန်များလွန်းခြင်းသည် ပုံမှန်မဟုတ်ပေ။ ၎င်းတို့က ကောက်ကျစ်ဆိုးယုတ်နေကြခြင်း ဖြစ်သည်။ တရားဝင်ရာထူးတစ်ခုရလိုကြကာ အဆင့်အတန်းကို အလွန်အမင်း နှစ်သက်ကြသည့် အသက်နှစ်ဆယ်ကျော်အရွယ် ညီမငယ်များစွာရှိသည်။ အကယ်၍ ၎င်းတို့သည် ခေါင်းဆောင်များအဖြစ် ရွေးချယ်မခံရလျှင်၊ စိတ်ကောက်ပြီး အစာမစားဘဲနေကြသည်။ ၎င်းတို့သည် အနည်းငယ် ကလေးဆန်သည့်ပုံပေါ်သော်လည်း၊ ၎င်းတို့၏စိတ်ပိုင်းဖြတ်မှုအရမူ၊ အမှုအရာများသည် ၎င်းတို့ အသက်ကြီးလာသည်နှင့်အမျှ အလွန်အမင်း ဆိုးရွားလာလိမ့်မည်ဖြစ်ပြီး၊ ၎င်းတို့အနေဖြင့် ကျွမ်းကျင်သူများ ဖြစ်လာကြလိမ့်မည်၊ မှန်ပါသလော။ အချို့အမျိုးသမီးများသည် ရှေးအခါက အမျိုးသမီးတစ်ဦးက ဧကရီဘုရင်မဖြစ်လာခဲ့ကြောင်း ကြားသိပြီး ၎င်းတို့အနေဖြင့် ထိုအမျိုးသမီးဖြစ်နိုင်ဖို့ ဆန္ဒပြုလျက် အလွန့်အလွန် အားကျမိကြလေသည်။ ၎င်းတို့သည် သာမန် မဖြစ်လိုကြသကဲ့သို့ ဘုရားသခင်ကို ၎င်းတို့၏ယုံကြည်ခြင်း၌ သာမန်နောက်လိုက်များသာ မဖြစ်လိုကြပေ။ ၎င်းတို့၏စိတ်နှလုံးထဲ၌ ၎င်းတို့၏လိုအင်ဆန္ဒများ အဆက်မပြတ် တောက်လောင်နေပြီး၊ မိမိတို့ကိုယ်ကို ပြသရန် အခွင့်အလမ်းတစ်ခု ပေါ်လာသည်နှင့်တစ်ပြိုင်နက်၊ ထိုအခွင့်အလမ်းကို ရယူကြသည်။ ၎င်းတို့သည် မိမိတို့၏တာဝန်များကို ကောင်းမွန်သည့် ပုံစံဖြင့် ထမ်းဆောင်လိုခြင်းမရှိကြ၊ မိမိတို့၏တာဝန်ဝတ္တရားများကို ဖြည့်ဆည်းလိုခြင်း မရှိကြ၊ သမ္မာတရားကို လိုက်စားရာ၌ မိမိတို့၏စိတ်နှလုံးကို နှစ်မြှုပ်လိုခြင်း သို့မဟုတ် ဘုရားသခင်၏ စီစဉ်ညွှန်ကြားခြင်းများနှင့် အစီအစဉ်များကို ကျိုးနွံနာခံလိုခြင်း မရှိကြပေ။ ၎င်းတို့သည် ဤနည်းလမ်းဖြင့် သမ္မာတရားကိုလိုက်စားပြီး မိမိတို့၏တာဝန်များအား ထမ်းဆောင်ခြင်းကို မနှစ်သက်ကြသကဲ့သို့၊ ထိုသို့သော ရိုးရှင်းသည့်ဘဝမျိုးကို အသက်ရှင်လိုခြင်းမရှိကြပေ။ ဤသည်မှာ ၎င်းတို့အတွက် ဒုက္ခဖြစ်စေသည်။ သင်တို့ထဲတွင် ဤကဲ့သို့သောသူ တစ်ဦးတလေ ရှိသလော။ ဥပမာအနေနှင့် လူတကာနှင့်သောင်းပြောင်းလိင်ဆက်ဆံရန် နှစ်သက်သည့် အမျိုးသမီးတစ်ဦးကို ကြည့်လော့။ သူမ၏ခင်ပွန်းသည် သူမအပေါ် မည်မျှပင်ကောင်းနေပါစေ သို့မဟုတ် သူ၌ငွေမည်မျှပင်ရှိနေပါစေ၊ သူသည် သူမ၏စိတ်နှလုံးကို ဘယ်သောအခါမျှ မထိန်းသိမ်းထားနိုင်ပေ။ အချို့အမျိုးသမီးများသည် ကလေးများစွာရှိပြီး အမျိုးသားများအား မဆင်မခြင် သွေးဆောင်ဖြားယောင်းရန် ကြိုးစားကြဆဲဖြစ်ကာ၊ မည်သည့်အမျိုးသားမျှ ၎င်းတို့ကို စောင့်ကြည့်ထိန်းသိမ်းထားနိုင်ခြင်းမရှိပေ။ ဤသည်မှာ ကောက်ကျစ်ဆိုးယုတ်ခြင်းပင်ဖြစ်သည်။ ဤကောက်ကျစ်ဆိုးယုတ်သော စွမ်းအင်သည် အဘယ်မှလာသနည်း။ (၎င်းတို့၏ သဘာဝအတွင်းမှ လာပါသည်။) ၎င်းတို့၏သဘာဝသည် မည်သို့ဖြစ်ပေါ်လာသနည်း။ ၎င်းတို့ထဲတွင် ညစ်ညူးသောဝိညာဉ်များ အသက်ရှင်ကြပြီး၊ ၎င်းတို့သည် ညစ်ညူးသော ဝိညာဉ်များ ပြန်ဝင်စားသူများ ဖြစ်ကြသည်။ ဝိညာဉ်ရေးရာနယ်ပယ်ရှိ ကိစ္စရပ်များသည် ရှုပ်ထွေးသော်လည်း၊ မည်မျှပင် ရှုပ်ထွေးနေပါစေ၊ လူတစ်ဦးသည် သမ္မာတရားကိုနားလည်ပြီး ဤကိစ္စရပ်များကို ဘုရားသခင်၏နှုတ်ကပတ်တော်များအတိုင်း သဘောထားနိုင်သမျှကာလပတ်လုံး၊ ပိုင်းခြားသိမြင်ခြင်းရှိနိုင်ပြီး၊ ဤသည်ကို ဝိညာဉ်ရေးရာနယ်ပယ်ထဲသို့ တိုက်ရိုက်ထိုးထွင်းသိမြင်ခြင်းဟု သိကြသည်။ သမ္မာတရားကို သင်နားလည်သည့်အခါ၊ သင်သည် အမှုအရာများကို ထက်မြက်တိကျစွာ မြင်နိုင်ပြီး၊ သင်၏အတွေးအခေါ်သည်လည်း လျင်မြန်သွက်လက်ကာ ရှင်းလင်းလာပြီး၊ သင်၏စိတ်နှလုံးက လင်းလက်လာသည်။ အကယ်၍ သင် သမ္မာတရားကို နားမလည်ပါက၊ သင်၏စိတ်နှလုံးသည် အမြဲတစေ နားဝေတိမ်တောင်ဖြစ်လိမ့်မည်ဖြစ်ပြီး၊ သင်လုပ်နေသည့်အရာတွင် သင့်စိတ်နှလုံးထဲ၌ မည်သည့်အရာမျှသိမည်မဟုတ်ဘဲ၊ သင်သည် ငတုံးတစ်ယောက်ကဲ့သို့ မည်သည့်ဘက်သို့လှည့်ရမည်ကို ကြောက်ရွံ့နေမည်။ သင် ပို၍လုပ်ဆောင်မိပါက မိမိကိုယ်ကို ကြွားဝါမိမည်ကို ကြောက်ရွံ့မည်ဖြစ်ပြီး၊ မလုပ်ဆောင်ပါက သင်၏တာဝန်ဝတ္တရားများကို မဖြည့်ဆည်းမိမည်ကို ကြောက်ရွံ့နေမည်။ သင်သည် အမြဲတစေ ထိုသို့သော အခြေအနေတွင် ရှိနေလိမ့်မည်။ ဤသည်မှာ အဘယ်ကြောင့်ဆိုသော် သင့်တွင် သမ္မာတရားအပေါ် သိနားလည်မှု အလွန် နည်းပါးသောကြောင့် ဖြစ်သည်။ သမ္မာတရားကို အလွန် နားလည်မှုနည်းပါးသောသူတစ်ဦး၏ ပထမဆုံးသရုပ်သကန်သည် အဘယ်နည်း။ ၎င်းတို့သည် ယုတ်ညံ့ပြီး အသုံးမကျသောဘဝဖြင့် အသက်ရှင်ကြသည်။ အန္တိခရစ်တို့၏ ကစားခံရခြင်း၊ အနိုင်ကျင့်ခံရခြင်းနှင့် ဟိုဟိုသည်သည် လှည့်စားခံရပြီးနောက်၊ ၎င်းတို့ သတိဝင်လာသည့်နေ့တွင်၊ ၎င်းတို့သည် အန္တိခရစ်များအတွက် အစေခံကာ အလုပ်လုပ်ပေးလျက် ထိုအန္တိခရစ်နှင့်အတူ အလုပ်လုပ်ခဲ့သော်လည်း အန္တိခရစ်တို့က ဘုရားသခင်ကို ချစ်မြတ်နိုးပြီး သစ္စာစောင့်သိသည်ဟု ပြောဆိုနေကြဆဲဖြစ်ပုံကို သဘောပေါက်သွားကြသည်။ ယခုမှသာ ၎င်းတို့သည် ဤစကားများအားလုံးကို မမှန်မကန် အသုံးပြုမိခဲ့ကြကြောင်း မြင်တွေ့ကြသည်။ ဤသည်မှာ အလွန်အသုံးမကျခြင်းဖြစ်သည် မဟုတ်လော။ (ဟုတ်ပါသည်။) အဘယ်ကြောင့် အသုံးမကျသနည်း။ ဤသည်မှာ သမ္မာတရားကို ၎င်းတို့နားမလည်ခြင်းကြောင့် ဖြစ်ပေါ်လာခြင်းဖြစ်ပြီး ၎င်းတို့နှင့် ထိုက်တန်သည့်အရာကို ၎င်းတို့ ရရှိကြခြင်းဖြစ်သည်။ အကယ်၍ သင်သည် သမ္မာတရားကို နားလည်ပါက၊ အန္တိခရစ်တို့ကို ပိုင်းခြားသိမြင်နိုင်ပြီး ၎င်းတို့ကို ရိပ်စားမိနိုင်သည်။ ထို့နောက်တွင် သင်သည် ၎င်းတို့ကို ဖော်ထုတ်ပြီး နှင်ထုတ်နိုင်ပေသည်။ ထို့နောက်တွင် သင်သည် ၎င်းတို့၏အထင်အမြင်မှားစေခြင်းကို ဆက်လက်ခံရပြီး ၎င်းတို့နောက်လိုက်နေဦးမည်လော။ သေချာပေါက် လိုက်မည်မဟုတ်။ ထို့ပြင်၊ သင်သည် တရားဒေသနာများစွာကို နားထောင်ပြီးဖြစ်သည်။ ဘုရားအိမ်တော်က သင့်ကို နှစ်ပေါင်းများစွာ ရေလောင်းပေးပြီး ပျိုးထောင်ပေးပြီးဖြစ်သည်။ ထို့ကြောင့် အကယ်၍ သင်သည် မည်သည့်သမ္မာတရားကိုမျှ နားမလည်ပါက၊ အန္တိခရစ်တို့ကို မပိုင်းခြားနိုင်သကဲ့သို့ သင်ဖြည့်ဆည်းသင့်သော တာဝန်ဝတ္တရားများကိုပင် မဖြည့်ဆည်းဘဲ၊ အဆုံး၌ အန္တိခရစ်များနှင့်အတူ ပူးပေါင်းကာ ၎င်းတို့၏ ကြံရာပါ ဖြစ်သွားပါက၊ ယင်းသည် သင့်ကို အသုံးမကျသူ ဖြစ်သွားစေသည် မဟုတ်လော။ ဤကဲ့သို့သောလူများသည် သနားစရာကောင်းသည် မဟုတ်လော။ အကယ်၍ သင်သည် ဘုရားသခင်နောက်သို့ အမည်ခံအနေဖြင့်လိုက်သော်လည်း အန္တိခရစ်များ၏ အထင်အမြင်မှားစေခြင်းနှင့် ဆွဲသွင်းခြင်းတို့ကိုခံရကာ၊ အန္တိခရစ်တစ်ဦး၏လမ်းကြောင်းကို နှစ်ပေါင်းများစွာ လိုက်ခဲ့ပြီး၊ ပြန်လာလိုသော်လည်း သင်၏ညီအစ်ကိုမောင်နှမများကို ရင်ဆိုင်ရန် သတ္တိမရှိပါက၊ ယင်းသည် အသုံးမကျသော အသက်ရှင်နည်းတစ်ခု မဟုတ်လော။ သင် မည်မျှပင် ဝမ်းနည်းနေပါစေ၊ အသုံးမဝင်ပေ။ သမ္မာတရားကို သင် နားမလည်ခြင်းသည် မည်သူ၏ အပြစ်ဖြစ်သနည်း။ သင်မှလွဲ၍ အခြားမည်သူ့ကိုမျှ အပြစ်တင်၍မရပေ။

ငါတို့သည် အန္တိခရစ်တို့၏ အမျိုးမျိုးသော သရုပ်သကန် ခုနစ်မျိုးလုံးကို မိတ်သဟာယဖွဲ့ပြီးဖြစ်သည်။ တစ်မျိုးချင်းစီအတွက် ငါတို့ပြောဆိုပြီးဖြစ်သော အသေးစိတ်သရုပ်သကန်များအတွက်၊ ငါတို့ စိတ်ဖြာလေ့လာဆွေးနွေးခဲ့သော အနှစ်သာရအပြင်၊ ငါတို့ပြောဆိုခဲ့သော အခြေအနေအမျိုးမျိုးနှင့်ပတ်သက်၍၊ ဤအရာများထဲမှ တစ်ခုမျှ အခြေအမြစ်မရှိဘဲ လုပ်ကြံဖန်တီးထားခြင်းမဟုတ်ဘဲ၊ ခိုင်မာသောအခြေခံရှိပြီး အချက်အလက်များပေါ်တွင် အခြေခံထားသည်။ သို့ရာတွင် အချက်တစ်ချက်ရှိသည်။ ဤအရာများကို သင်တို့နားထောင်ပြီးသည့်နောက် စစ်မှန်သော အမှုအရာများနှင့် ကြုံတွေ့သည့်အခါ သင်တို့သည် ထိုအရာများနှင့် တိုက်ဆိုင်ချိန်ညှိနိုင်ခြင်းမရှိပါက၊ ဤအရာက မည်သည့်အရာကို ပြသနေသနည်း။ ပထမဦးစွာ၊ သင်တို့၌ ဝိညာဉ်ရေးရာ နားလည်သဘောပေါက်မှု ကင်းမဲ့နေကြောင်း ပြသပြီး၊ တစ်ခါတစ်ရံ သင်တို့၌ ဝိညာဉ်ရေးရာ နားလည်သဘောပေါက်မှုအချို့ ရှိလျှင်ပင်၊ ယင်းသည် တစ်ဝက်တစ်ပျက် နားလည်ခြင်းမျှသာဖြစ်မည်ဖြစ်ပြီး၊ ပြည့်စုံသောဝိညာဉ်ရေးရာ နားလည်သဘောပေါက်မှု မဟုတ်ပေ။ ဒုတိယအနေနှင့်၊ ထိုအရာက သင်တို့အနေဖြင့် သမ္မာတရားကို မချစ်မြတ်နိုးသကဲ့သို့ သမ္မာတရားကို အလေးအနက်မထားကြောင်း ပြသသည်။ တတိယအနေနှင့်၊ သင်တို့သည် အစွမ်းအစ အလွန် ကင်းမဲ့ပြီး သဘောပေါက်နားလည်နိုင်စွမ်း လုံးဝ ကင်းမဲ့နေကြောင်း ပြသသည်။ ငါသည် အန္တိခရစ်တို့အား ဖော်ထုတ်ခြင်းကို များစွာပြောဆိုခဲ့ပြီးဖြစ်သော်လည်း၊ သင်သည် ထိုအရာများထဲမှတစ်ခုမျှ နားလည်ခြင်းမရှိသေးပေ။ သင်သည် ထိုအချိန်က နားလည်သည်ဟု ထင်ကောင်းထင်နိုင်သော်လည်း၊ နောက်ပိုင်းတွင်မူ ယင်းသည် ဝေဝါးသွားပြီး၊ ဤအရာက သင်သည် ထိုအရာကို နားမလည်သေးကြောင်း ပြသနေသည်။ အဘယ်ကြောင့် သင်နားမလည်သနည်း။ ဤအရာသည် နားလည်သဘောပေါက်မှုနှင့် ဆက်စပ်မှုတစ်ခုတလေ ရှိသလော။ ငါသည် ဤအဆင့်အထိ အမှုအရာများကို ရှင်းပြပြီးဖြစ်ကာ သင် နားမလည်သေးသည့်အခါ၊ ဤသည်မှာ သင်သည် သဘောပေါက်နားလည်နိုင်စွမ်း အလွန်ကင်းမဲ့ကြောင်းနှင့် သမ္မာတရားကို သဘောပေါက်နားလည်နိုင်စွမ်း တစ်ခုတလေမျှ အမှန်တကယ် မပိုင်ဆိုင်ကြောင်းတို့ကို ဆိုလိုပေသည်။ ငါပြောသည့်အရာ တိကျသလော။ ဤသဘောပင်ဖြစ်သည်။ တရားဒေသနာများကို ၁၀ နှစ် သို့မဟုတ် အနှစ် ၂၀ ကြာ နားထောင်ခဲ့ပြီးဖြစ်ကာ သမ္မာတရားကို နားမလည်သေးသောသူ အချို့ သင်တို့ထဲတွင်ရှိသည်။ ဤသည်ကို ငါတို့ မည်သို့ရှင်းပြသနည်း။ ဖြစ်နိုင်ခြေနှစ်ခုသာရှိသည်။ တစ်ခုမှာ သင်တို့၌ ဝိညာဉ်ရေးရာ နားလည်သဘောပေါက်မှုမရှိ၊ အစွမ်းအစ ကင်းမဲ့ပြီး၊ သမ္မာတရားကို နားလည်နိုင်စွမ်းမရှိခြင်း ဖြစ်သည်။ အခြားတစ်ခုမှာ သင်တို့၌ ဝိညာဉ်ရေးရာ သိနားလည်မှုရှိသော်လည်း၊ သမ္မာတရားကို မချစ်မြတ်နိုးသကဲ့သို့ သမ္မာတရားကို စိတ်မဝင်စားခြင်း ဖြစ်သည်။ အကယ်၍ ဤဖြစ်နိုင်ခြေနှစ်ခုထဲမှ တစ်ခုသည် သင်နှင့်သက်ဆိုင်နေပါက၊ သင်သည် သမ္မာတရားကိုနားလည်နိုင်စွမ်းမရှိပေ။ အကယ်၍ ဖြစ်နိုင်ခြေနှစ်ခုလုံးက သင်နှင့်သက်ဆိုင်နေပါက၊ သင်သည် မျက်စိရောဂါခံစားနေရသော မျက်မမြင်တစ်ဦးကဲ့သို့ပင် ဖြစ်သည်။ ကုရာနတ္တိဆေးမရှိပေ။ ငါ မိတ်သဟာယဖွဲ့ပြီးသည်နှင့်တစ်ပြိုင်နက် သင်တို့ကိုယ်သင်တို့နှင့် သင့်လျော်သောနှိုင်းယှဉ်မှုတစ်ခု မပြုလုပ်နိုင်သေးသကဲ့သို့ ငါဆိုလိုသည့်အရာကို နားမလည်ပါက၊ သင်တို့၏သဘောပေါက်နားလည်နိုင်စွမ်းနှင့်ပတ်သက်၍ ယင်းက မည်သည့်အရာကို ပြောဆိုသနည်း။ ထိုအရာသည် အလွန် ချို့တဲ့နေသည်မဟုတ်လော။ အကယ်၍ သင်တို့သည် ပို၍ပျင်းရိလျှင်၊ သက်သောင့်သက်သာရှိမှုကို တပ်မက်လျှင်၊ သမ္မာတရားကို မချစ်မြတ်နိုးလျှင်၊ ပုဂ္ဂိုလ်ရေးနှစ်သက်မှုများရှိပြီး၊ ပြင်ပကိစ္စရပ်များကြောင့် အာရုံပျံ့လွင့်နေပါက၊ ဤစကားများသည် သင်တို့အပေါ်၌ အကျိုးသက်ရောက်မှု နည်းသည်ထက် နည်းပါးလာမည်ဖြစ်ပြီး၊ ယင်းတို့၏အကျိုးသက်ရောက်မှုမှာ အလွန် လျော့နည်းသွားမည်ဖြစ်သည်။ ဤသဘောပင်ဖြစ်သည်။ အမှန်တကယ်တွင်မူ၊ အန္တိခရစ်တို့ကို ပိုင်းခြားသိမြင်ရန် အလွန်လွယ်ကူသည်။ ရှုထောင့်တစ်ခုမှာ အမှုအရာများကို လုပ်ဆောင်ရန် ၎င်းတို့ အသုံးပြုသည့် နည်းလမ်းများကို ရှင်းလင်းစွာသိရှိရန်ဖြစ်စဉ်တွင်၊ အခြားရှုထောင့်တစ်ခုမှာ ၎င်းတို့၏စိတ်သဘောထားက မည်သည့်အရာဖြစ်သည်၊ ဘဝတွင် ၎င်းတို့၏ ဦးတည်ချက်နှင့် ဖြစ်တည်မှုအပေါ် ရှုမြင်ချက်များက အဘယ်အရာဖြစ်သည်၊ ညီအစ်ကိုမောင်နှမများအပေါ်၊ တာဝန်အပေါ်၊ ဘုရားအိမ်တော်၏အကျိုးစီးပွားများအပေါ်၊ ဘုရားသခင်အပေါ်၊ သမ္မာတရားအပေါ်နှင့် အပြုသဘောဆောင်သောအရာများအပေါ် ၎င်းတို့၏သဘောထားများမှာ အဘယ်အရာဖြစ်သည်ဟူသည်နှင့်၊ လုပ်ရပ်များအတွက် ၎င်းတို့၏ စည်းမျဉ်းများက အဘယ်အရာဖြစ်သည်ဟူသည်တို့ကို ကြည့်ရှုရန်ဖြစ်သည်။ ဤရှုထောင့်များကို အသုံးပြုခြင်းအားဖြင့် သင်တို့သည် ၎င်းတို့ကို အခြေခံအားဖြင့် သရုပ်ဖော်နိုင်မည်ဖြစ်သည်။ ၎င်းတို့ကို ပိုမိုအချိန်ကြာမြင့်စွာ စောင့်ကြည့်လေ့လာပြီး သင်ယူရန် လိုအပ်ဦးမည်လော။ လိုအပ်မည်မဟုတ်ပါ။ အန္တိခရစ်တို့သည် အကျင့်ပျက်ပြားမှုတွင်သာ ပါဝင်ခြင်းမဟုတ်သကဲ့သို့၊ လူတို့ကို ဖိနှိပ်ရုံဖိနှိပ်ခြင်းလည်းမဟုတ်ပေ။ ၎င်းတို့၌ စာတန်ဆန်သောသဘာဝရှိပြီး မည်သည့်အရာကိုမဆို လုပ်ဆောင်နိုင်စွမ်းရှိကြသည်။ အကယ်၍ ဤတရားဒေသနာများကို နားထောင်ပြီးသည့်နောက်၊ သင်သည် အန္တိခရစ်တစ်ဦး၏စိတ်သဘောထားကို ပိုင်းခြားသိမြင်နိုင်ခြင်းမရှိသကဲ့သို့၊ ၎င်းတို့ဖော်ထုတ်ပြနေသည့်အရာမှာ အန္တိခရစ်တစ်ဦး၏ စိတ်သဘောထားဖြစ်ကြောင်း မပိုင်းခြားနိုင်ပါက၊ သင်သည် ယင်းတို့ထဲမှ တစခုတလေကို နားလည်ပြီးဖြစ်သလော။ သင်သည် အယူဝါဒကို မှတ်မိသော်လည်း၊ ယင်းကို မည်သည့်အရာနှင့်မျှ တိုက်ဆိုင်ချိန်ညှိနိုင်ခြင်းမရှိသကဲ့သို့ အချက်အလက်များနှင့် ရင်ဆိုင်ရသည့်အခါ သင်၏အယူဝါဒသည် အားနည်းပြီး အကျိုးသက်ရောက်မှုမရှိဖြစ်ကာ၊ ဤသည်က သင်နားမလည်သေးကြောင်း သက်သေပြနေသည်။ သင်သည် ထိုအချိန်၌ နားလည်ပြီး နောက်ပိုင်းတွင် ဆုတောင်း ဖတ်ရှုခြင်းအချို့ပြုလုပ်ကာ၊ ဤအရာများနှင့်ပတ်သက်၍ ညီအစ်ကိုမောင်နှမများနှင့်အတူ မကြာခဏ မိတ်သဟာယဖွဲ့လျှင်၊ ဤသမ္မာတရားများကို မှတ်သားပြီး ဆင်ခြင်သုံးသပ်ကာ၊ ဘုရားသခင်ရှေ့မှောက်တွင် မကြာခဏ ဆုတောင်းလျှင်၊ သင်သည် ပို၍ရရှိပေလိမ့်မည်။ သို့ရာတွင်၊ အကယ်၍ သင်သည် သင်၏တာဝန်၌ သက်သောင့်သက်သာရှိမှုကို တပ်မက်လျှင်၊ ပေါ့လျော့လျှင်၊ သင်သည် ဝန်ထုပ်ဝန်ပိုးမရှိသကဲ့သို့၊ ပုဂ္ဂိုလ်ရေးနှစ်သက်မှုများရှိပြီး၊ စိတ်မတည်ငြိမ်ဖြစ်ကာ၊ သမ္မာတရားကို အမှန်တကယ် မချစ်မြတ်နိုးဘဲ၊ လောကီရေစီးကြောင်းနောက်လိုက်ပြီး၊ ပြင်ပကိစ္စရပ်များ၏ ဆွဲဆောင်ခြင်းကို ခံရပါက၊ သင်သည် သင်၏တာဝန်ကို ကောင်းစွာထမ်းဆောင်နိုင်လိမ့်မည်မဟုတ်ပေ။ အဆုံး၌၊ ငါတို့မိတ်သဟာယဖွဲ့ခဲ့သော ဤသမ္မာတရားများသည် သင့်အတွက် အချည်းနှီးဖြစ်လာလိမ့်မည်ဖြစ်ပြီး၊ ကျန်ရှိသမျှမှာ စကားလုံးများနှင့် အယူဝါဒများသာ ဖြစ်လိမ့်မည်ဖြစ်ကာ၊ ယင်းက သင်သည် ထိုအရာအားလုံးကို အချည်းနှီး နားထောင်ခဲ့ကြောင်း ဆိုလိုပေမည်။ သင်တို့သည် ဤမိတ်သဟာယဖွဲ့ခြင်းများကို နောက်ပိုင်းတွင် ထပ်မံနားထောင်ကြသလော။ (နားထောင်ပါသည်။) သင်တို့သည် အကြိမ်မည်မျှ နားထောင်နိုင်ကြသနည်း။ သင်တို့နားထောင်သည့်အခါတိုင်း မတူညီသော အကျိုးသက်ရောက်မှု ရှိသလော။ နောက်ပိုင်းတွင် ယင်းတို့ကို သင်တို့ ဆင်ခြင်စဉ်းစားကြသလော။ ယင်းတို့ကို ဆင်ခြင်စဉ်းစားပြီးနောက် သင်တို့၌ မည်သို့သော ထင်မြင်ချက်များ ကျန်ရစ်သနည်း။ သင်နှင့်ပတ်သက်သရွေ့၊ ဤတရားဒေသနာများသည် သင်၏အသက်တာ၌ လူပုဂ္ဂိုလ်များနှင့် အမှုအရာများကို ပိုင်းခြားသိမြင်ရန်အတွက် သင့်အတွက် လက်တွေ့လုပ်ဆောင်ခြင်းစည်းမျဉ်းများနှင့် စံသတ်မှတ်ချက်များ ဖြစ်လာနိုင်သလော။ (အန္တိခရစ်တို့၏ ထင်ရှားသည့် စိတ်သဘောထားအချို့နှင့် သရုပ်သကန်များကို ကျွန်ုပ်ကိုယ်တိုင်နှင့် နှိုင်းယှဉ်နိုင်သည်၊ ဆိုလိုသည်မှာ၊ အခြားသူများ၏စိတ်နှလုံးကို ထောင်ချောက်ဆင်ရန် ရှင်းလင်းစွာ ရည်ရွယ်ထားသည့် ကျွန်ုပ် ပြောဆိုပြုမူသည့်အရာများဖြစ်ပြီး၊ ဘုရားသခင်၏ ဖော်ထုတ်သည့် နှုတ်ကပတ်တော်များကို ကျွန်ုပ်စဉ်းစားမိမည်ဖြစ်ကာ၊ ကျွန်ုပ်လုပ်ဆောင်ချက်များ၏ သဘာဝသည် အခြားသူများ၏စိတ်နှလုံးကို ထောင်ချောက်ဆင်ရန်ဖြစ်ပြီး ရည်ရွယ်ချက်အချို့ကို ကျွန်ုပ် စွမ်းဆောင်ရရှိလိုသည်ကို သိရှိလိမ့်မည်။ သို့ရာတွင်၊ လူပုဂ္ဂိုလ်များကို ပိုင်းခြားသိမြင်ခြင်းနှင့်ပတ်သက်လာသည့်အခါ၊ ကျွန်ုပ်သည် အတော်အတန် ချို့တဲ့နေဆဲဖြစ်ကာ၊ ကျွန်ုပ်၏ ပတ်ဝန်းကျင်ရှိလူများနှင့် ဘုရားနှုတ်ကပတ်တော်များကို ကျွန်ုပ် ရည်ရွယ်ချက်ရှိရှိ နှိုင်းယှဉ်ခြင်းမပြုပါ။) ငါ့ကိုပြောလော့၊ အကယ်၍ သင်သည် သင့်ကိုယ်သင် ရှင်းလင်းစွာမြင်လိုပါက၊ မှန်ကိုအသုံးပြုသလော သို့မဟုတ် ရွှံ့ရေအိုင်ကို အသုံးပြုသလော။ (မှန်ကို အသုံးပြုပါသည်။) မှန်ကြည့်ခြင်း၏အကျိုးကျေးဇူးကား အဘယ်နည်း။ သင့်ကိုယ်သင် ပို၍ရှင်းလင်းစွာ မြင်နိုင်ပေသည်။ ထို့ကြောင့်၊ သင့်ကိုယ်သင်သာ ပိုင်းခြားသိမြင်နိုင်ပါက၊ ယင်းသည် အလွန်အကန့်အသတ်ရှိသည်။ သင်သည် အခြားသူများကိုလည်း ပိုင်းခြားသိမြင်တတ်ရန် သင်ယူရမည်။ အခြားသူများကို ပိုင်းခြားသိမြင်ခြင်းသည် သူတို့ကို အန္တိခရစ်များအဖြစ် တမင်တကာ သတ်မှတ်ရန်မဟုတ်ဘဲ၊ လူအမျိုးမျိုးတို့၏ ပြောဆိုပြုမူမှုများကို တိုင်းတာခြင်းနှင့် ပိုင်းခြားသိမြင်ခြင်းတို့အတွက် စည်းမျဉ်းများရှိရန် ဖြစ်သည်။ ဤသည်မှာ မိမိကိုယ်တိုင်အတွက် အကျိုးရှိပြီး၊ ဤအရာကို လုပ်ဆောင်ရာတွင် လူတစ်ဦးသည် လူများကို စည်းမျဉ်းများအတိုင်း မှန်ကန်စွာ ဆက်ဆံနိုင်ပေသည်။ ယင်းမှာ အခြားသူများနှင့်အတူ မိမိ၏တာဝန်ကိုထမ်းဆောင်သည့်အခါ သဟဇာတဖြစ်သောပူးပေါင်းဆောင်ရွက်မှုကို ရရှိရန်အတွက် အကျိုးရှိသည်။ သို့ရာတွင်၊ မိမိကိုယ်ကိုသိရှိခြင်းအပေါ်၌သာ အဓိက မှီခိုအားထားလျက် လူတစ်ဦးက စွမ်းဆောင်ရရှိနိုင်သည့်အရာမှာ အကန့်အသတ်ရှိသောရလဒ်များသာ ဖြစ်သည်။ သမ္မာတရားကို သင်လိုက်စားသည့်အခါ သင့်ကိုယ်သင်သိရှိခြင်းအပေါ်၌သာ အာရုံစိုက်၍မရပေ။ ဘုရားသခင်ကို ကျိုးနွံနာခံခြင်းနှင့်ဆိုင်သည့် အကျိုးတရားအား စွမ်းဆောင်ရရှိရန် သမ္မာတရားကို လက်တွေ့လုပ်ဆောင်ခြင်းအပေါ်၌လည်း သင် အာရုံစိုက်ရမည်။ ရှုထောင့်တစ်ခုတည်းအပေါ်၌သာ အာရုံစိုက်ခြင်းအားဖြင့်၊ သင်သည် သမ္မာတရားအပေါ် ပြည့်စုံသော သိနားလည်မှု သို့မဟုတ် သမ္မာတရားလက်တွေ့ကျမှုထဲသို့ ဝင်ရောက်ခြင်းကို ဘယ်သောအခါမျှ ရရှိမည်မဟုတ်သကဲ့သို့၊ ဘဝတွင်လည်း ကြီးထွားလိမ့်မည်မဟုတ်ပေ။ ဤသည်မှာ စကားလုံးများနှင့် အယူဝါဒများကိုသာ သိနားလည်ခြင်းနှင့် အတော်လေး တူညီပြီး၊ သင်သည် ဘုရားသခင်ကို သိရှိနိုင်လိမ့်မည်မဟုတ်ပေ။ သမ္မာတရားကို အမှန်တကယ်နားလည်သူများသည် အရာခပ်သိမ်းကို ရိပ်စားမိနိုင်သည်။ ၎င်းတို့သည် မိမိတို့ကိုယ်ကို သိရှိရုံသာမက၊ အခြားသူများကိုလည်း ပိုင်းခြားသိမြင်နိုင်ပြီး၊ အမျိုးမျိုးသောလူပုဂ္ဂိုလ်များ၊ ဖြစ်ရပ်များနှင့် အမှုအရာများကို ရိပ်စားမိနိုင်သည်။ ဤနည်းလမ်းဖြင့်သာ လူတစ်ဦးသည် မိမိ၏တာဝန်ကို စံနှုန်းပြည့်မီအောင် ထမ်းဆောင်နိုင်ပြီး ဘုရားသခင်၏အသုံးပြုခြင်းကို ခံရနိုင်သည်။

အန္တိခရစ်တို့၏ ကောက်ကျစ်ဆိုးယုတ်သော စိတ်သဘောထားနှင့်ဆိုင်သည့် သရုပ်သကန်များအပေါ် ယနေ့ မိတ်သဟာယဖွဲ့ခြင်းမှတစ်ဆင့်၊ ကောက်ကျစ်ဆိုးယုတ်သော စိတ်သဘောထားနှင့်စပ်လျဉ်း၍ သင်တို့သည် ပို၍နက်ရှိုင်းပြီး ပို၍သစ်လွင်သော မည်သည့်နားလည်မှုများကို ရရှိကြပြီးဖြစ်သနည်း။ ဤအရာနှင့်ပတ်သက်၍ မိတ်သဟာယပြုလော့။ (ဘုရားသခင်၊ ယနေ့တွင် ကျွန်ုပ်ကို အလှုံ့ဆော်ဆုံးသောအရာမှာ ကျွန်ုပ်တို့သည် အန္တိခရစ်များကဲ့သို့ ပြုမူပြီး ဘုရားအိမ်တော်၏အလုပ်ကို တမင်တကာ တားဆီးကာ အဖျက်အမှောင့်လုပ်လျှင်၊ကျွန်ုပ်တို့သည် အသက်ရှင်လျက်ရှိသော နတ်ဆိုးများဖြစ်သည်ဟု ဘုရားသခင် ပြောခြင်း ဖြစ်ပါသည်။ ဘုရားသခင်သည် မိမိတို့ထက်သာသော မည်သူ့ကိုမျှ သည်းမခံနိုင်သော အချို့လူများအကြောင်း ပြောဆိုခဲ့ပြီး၊ ကျွန်ုပ်သည် မိမိကိုယ်ကို ဆင်ခြင်သုံးသပ်ခဲ့ကာ ကျွန်ုပ်၌ အလွန်ပြင်းထန်သော ပြိုင်ဆိုင်လိုစိတ်ရှိကြောင်း သိရှိခဲ့ပါသည်။ကျွန်ုပ်နှင့်အတူ တာဝန်ထမ်းဆောင်သူတစ်ဦးဦးတွင် ကျွန်ုပ်ထက် အားသာချက်များ ပိုရှိသည်ကို မြင်သည့်အခါ၊ ကျွန်ုပ် စိတ်မချမ်းမသာဖြစ်ပြီး၊ သူတို့ထက် ကျွန်ုပ် အမြဲသာချင်ခဲ့သည်။ ။ ကျွန်ုပ်၏ အခြေအနေမှာ ဘုရားသခင် ဖော်ထုတ်ခဲ့သော အသက်ရှင်နေသည့် နတ်ဆိုးများကဲ့သို့ ဖြစ်သည်ဟု ကျွန်ုပ်ခံစားရပြီး၊ ဤကိစ္စရပ်၏သဘာဝသည် ကျွန်ုပ်ထင်ထားသည်ထက် ပို၍ဆိုးရွားသည်ကို ကျွန်ုပ်မြင်တွေ့ရကာ၊ ကျွန်ုပ်ကို ကြောက်လန့်စေပါသည်။ ကျွန်ုပ်သည် ဤအရာကို မည်သည့်အခါမျှ အလွန် နက်ရှိုင်းစွာ နားမလည်ခဲ့သကဲ့သို့၊ယခု ကျွန်ုပ်၏ဤဖောက်ပြန်ပျက်စီးသော စိတ်သဘောထား မည်မျှဆိုးရွားသည်ကို မြင်တွေ့ရသဖြင့်၊ ကျွန်ုပ် အလွန်စိတ်မကောင်းဖြစ်ရပါသည်။) ထိုအရာကို သင် ယခု သတိပြုမိပေပြီ။ လူတို့၏ဖောက်ပြန်ပျက်စီးသော စိတ်သဘောထားများသည် ခဏတာဖြစ်သော ထုတ်ဖော်ပြချက်တစ်ခုလောက် မရိုးရှင်းပေ။ ယင်းတို့တွင် ယင်းတို့ကို ဖယ်ရှားရန် သင့်အား ခက်ခဲစေပြီး သင့်ကို အစဉ်ထိန်းချုပ်နေသော၊ သင့်ကို ဖောက်ပြန်ပျက်စီးမှုများစွာ ထုတ်ဖော်စေပြီး သင့်ကိုယ်သင် မထိန်းချုပ်နိုင်စေသော အကြောင်းရင်းတစ်ခုနှင့် အမှုအရာများရှိသည်။ လူတို့သည် အဘယ်ကြောင့် ၎င်းတို ဤသို့ဖြစ်ရသည်ကို ရှင်းလင်းစွာ မရှင်းပြနိုင်သကဲ့သို့၊ ထိုအရာကို မထိန်းချုပ်နိုင်ကြပေ။ ဤသည်တို့မှာ လူတို့၏စိတ်သဘောထားများ ဖြစ်သည်။ တစ်စုံတစ်ဦးအနေဖြင့် ဤကဲ့သို့သော ဖောက်ပြန်ပျက်စီးသည့် စိတ်သဘောထားကို ရှင်းလင်းစွာ နားလည်နိုင်ခြင်းသည် တိုးတက်မှု၏ သွင်ပြင်လက္ခဏာတစ်ရပ် ဖြစ်သည်။ ဤ ဖောက်ပြန်ပျက်စီးသော စိတ်သဘောထားမျိုးနှင့်ပတ်သက်လာသည့်အခါ၊ သင်သည် သမ္မာတရားကိုရှာဖွေပြီး ၎င်း၏အနှစ်သာရကို ရိပ်စားမိနိုင်ပါက၊ အကယ်၍ သင်သည် ဘုရားသခင်၏ တရားစီရင်ခြင်း၊ စမ်းသပ်မှုများနှင့် စစ်ဆေးခြင်းတို့ကို လက်ခံနိုင်ပါက၊ ထိုသို့ပြုလုပ်ခြင်းဖြင့် သင်သည် သမ္မာတရားကို လက်တွေ့လုပ်ဆောင်ပြီး ဘုရားသခင်ကို အမှန်တကယ် ကျိုးနွံနာခံသည့် အခြေအနေတစ်ခုကို ရရှိနိုင်ပါက၊ ဤဖောက်ပြန်ပျက်စီးသော စိတ်သဘောထား ပြောင်းလဲနိုင်ပေသည်။ ဤသည်မှာ သမ္မာတရားကိုနားလည်ခြင်းအပေါ် အခြေခံ၍ သမ္မာတရားကို လက်တွေ့လုပ်ဆောင်ရန် သင် စတင်နေခြင်း ဖြစ်သည်။ သင်တို့အများစုသည် သင်တို့၏ဖောက်ပြန်ပျက်စီးသော စိတ်သဘောထားများကို ဖော်ထုတ်သည့်အခါ မိမိကိုယ်ကိုချုပ်တည်းရန် ယခုအခါ အလွန်ခက်ခဲနေပြီး၊ ဤသည်မှာ သင်တို့သည် သမ္မာတရားကို လက်တွေ့လုပ်ဆောင်ရန် မစတင်သေးကြောင်း ဆိုလိုသည်။ သင်တို့၏ တာဝန်ကို ထမ်းဆောင်ရာ၌ သင်တို့ လုပ်ဆောင်သည့် အနည်းငယ်သောအရာသည် များသောအားဖြင့် ပုဂ္ဂိုလ်ရေးအကျိုးစီးပွား၊ နှစ်သက်မှုနှင့်၊ စိတ်မြန်လက်မြန်ဖြစ်ခြင်းတို့အပေါ်တွင်ပင် အခြေခံနေပြီး၊ ဤသည်မှာ စိတ်သဘောထားပြောင်းလဲခြင်းနှင့် အနည်းငယ်သာ ဆက်စပ်မှုရှိသည်။ မှန်ပါသလော။ (မှန်ပါသည်။) အလွန်ကောင်းပေသည်။ သင် လှုံ့ဆော်ခြင်းခံခဲ့ရသည်။ အခြားမည်သူ ပြောလိုသေးသနည်း။ (ယနေ့ ဘုရားသခင်၏မိတ်သဟာယကို နားထောင်ပြီးနောက်၊ ကျွန်ုပ် အလွန်လှုံ့ဆော်ခြင်းခံရပါသည်။ ကျွန်ုပ်သည် ယခင်က ကောက်ကျစ်ဆိုးယုတ်ခြင်းဆိုသည်မှာ အတော်အတန် လှည့်ဖြားစွာပြောဆိုခြင်း၊ ပွင့်ပွင့်လင်းလင်းမပြောဆိုဘဲ အမြဲဟန်ဆောင်ခြင်းနှင့် အခြားသူများကို လှည့်ဖြားခြင်းဟု ထင်ခဲ့သည်။ သို့ရာတွင်၊ ကောက်ကျစ်ဆိုးယုတ်သော စိတ်သဘောထားက မည်သည့်အရာဖြစ်သည်ကို ဘုရားသခင်က ယနေ့ စိတ်ဖြာလေ့လာဆွေးနွေးပေးခြင်းအား နားထောင်ပြီးနောက်၊ ကောက်ကျစ်ဆိုးယုတ်ခြင်းဆိုသည်မှာ သမ္မာတရားနှင့် အပြုသဘောဆောင်သောအရာများကို အတိုက်အခံလုပ်ပြီး ဆန့်ကျင်ခြင်းဖြစ်ကြောင်းကိုလည်းကောင်း၊ အကယ်၍ တစ်စုံတစ်ယောက်သည် သမ္မာတရားနှင့် အပြုသဘောဆောင်သောအရာများကို ဆန့်ကျင်အတိုက်အခံလုပ်ပါက၊ ယင်းမှာ သူ၏ကောက်ကျစ်ဆိုးယုတ်သော စိတ်သဘောထားဖြစ်ကြောင်းကိုလည်းကောင်း ကျွန်ုပ်သိရှိပြီဖြစ်သည်။ ကျွန်ုပ်သည် ယခင်က ကောက်ကျစ်ဆိုးယုတ်သော စိတ်သဘောထားအပေါ် ထိုသို့သော ပေါ့တန်သည့် နားလည်မှုသာရှိခဲ့သော်လည်း၊ ယခုတွင် ဘုရားသခင်၏မိတ်သဟာယဖွဲ့ခြင်းကို ကြားသိပြီးနောက်၊ ကျွန်ုပ်၌ နားလည်မှုအသစ်တစ်ခု ရရှိပြီဖြစ်သည်။ ထို့ပြင်၊ ကျွန်ုပ်ကို အတော်အတန် တုန်လှုပ်စေခဲ့သည့်အရာမှာ ကနေဒါရုပ်ရှင်ထုတ်လုပ်ရေးအဖွဲ့ကို တစ်နှစ်တာအတွက် ဘီအုပ်စုထဲသို့ ထားရှိမည်ဟု ဘုရားသခင် ပြောဆိုခြင်း ဖြစ်သည်။ ဤအရာကိုကြားရ၍ ကျွန်ုပ် အမှန်တကယ် တုန်လှုပ်သွားခဲ့ပြီး၊ ဤကိစ္စကို ဘုရားသခင်ကိုင်တွယ်ဖြေရှင်းခြင်းမှနေ၍ ဘုရားသခင်၏ဖြောင့်မတ်သော စိတ်နေသဘောထားကို ကျွန်ုပ်မြင်တွေ့နိုင်သည်။ ထိုအဖွဲ့ထဲမှ လူတစ်ဦးတစ်ယောက်မျှ သမ္မာတရားကို လက်တွေ့လုပ်ဆောင်နေခြင်းမရှိသကဲ့သို့ဤအရာက ဘုရားအိမ်တော်၏အလုပ်ကို အလွန်ကြီးမားသော အတားအဆီးများ ဖြစ်စေခဲ့သည်ကို ကျွန်ုပ်မြင်ရပြီး၊ ထိုအရာက ကျွန်ုပ်ကို အမှန်တကယ် ဒေါသထွက်စေပါသည်။ ကျွန်ုပ်တို့အဖွဲ့မှလူများသည် လတ်တလောတွင် အလားတူအခြေအနေမျိုး၌ ရှိနေကြသည်၊ ဆိုလိုသည်မှာ၊ ကျွန်ုပ်တို့၏တာဝန်အတွက် ဝန်ထုပ်ဝန်ပိုးထမ်းရွက်မှုမရှိခြင်း ဖြစ်သည်။ ကျွန်ုပ်တို့၏အလုပ်ပမာဏသည် ယခင်ကထက် ပေါ့ပါးသွားသည့်အခါ၊ ကျွန်ုပ်တို့သည် ကျွန်ုပ်တို့၏တာဝန်အတွက် ရှင်းလင်းသောအစီအစဉ်များ မချမှတ်ခဲ့ကြဘဲ၊ နေ့ရက်များကို အလဟဿကုန်ဆုံးစေလျက် ကျွန်ုပ်တို့၏တာဝန်၌ ပေါ့လျော့ကြသည်။ ယနေ့ ဘုရားသခင်၏မိတ်သဟာယကို နားထောင်ခြင်းမှတစ်ဆင့်၊ လူတစ်ဦးသည် သမ္မာတရားကို လက်တွေ့မလုပ်ဆောင်ပါက သို့မဟုတ် မိမိ၏တာဝန်၌ တိုးတက်မှုကို မလိုက်စားပါက၊ အကယ်၍ လူတစ်ဦးသည် သမ္မာတရားနှင့်ပတ်သက်၍ အလေးအနက်မထားပါက၊ မိမိတာဝန် ထမ်းဆောင်ခြင်းအပေါ် ဤသဘောထားမျိုးကို ဘုရားသခင် စက်ဆုပ်ရွံရှာကြောင်းကို ကျွန်ုပ်မြင်တွေ့ရသည်။ ကျွန်ုပ်တို့သည် တာဝန်ထမ်းဆောင်ရန် အချိန်နှင့်အခွင့်အရေးကို တန်ဖိုးထားရမည်ဖြစ်ကြောင်းလည်း သတိပြုမိပါသည်။ အကယ်၍ ကျွန်ုပ်တို့သည် ကျွန်ုပ်တို့၏တာဝန်ကို တန်ဖိုးမထားပါက၊ ကျွန်ုပ်တို့ကို ဘုရားသခင် စောင့်ဆိုင်းသည့်အချိန်နှင့် သူ ပေးသည့် အခွင့်အရေးများ ဖြုန်းတီးခြင်းခံရသည့်အခါ၊ ဘုရားသခင်၏အမျက်ဒေါသသည် လူတို့အပေါ် ကျရောက်လာမည်ဖြစ်ပြီး၊ နောင်တရရန် အလွန်နောက်ကျသွားမည်ဖြစ်သည်။) သင်တို့ကို ဖိအားတစ်ခုခုအောက်တွင် ထားရှိရန် လိုအပ်ပုံရသည်။ မှန်ပါသလော။ (မှန်ပါသည်။) အလွန်ကောင်းပေ၏။ ဤသည်မှာ အမှန်တကယ်ဖြစ်သော ပြဿနာတစ်ခုဖြစ်ပြီး၊ သင်တို့စုဝေးကြသည့်အခါ ဤပြဿနာအား မည်သို့ဖြေရှင်းရမည်ကို မိတ်သဟာယဖွဲ့ရမည်။ သင်တို့သည် ပုံမှန်ကြားကာလများတွင် အတူတကွမိတ်သဟာယဖွဲ့ပြီး အကျဉ်းချုပ်တစ်ခုထုတ်ကာ အစီအစဉ်အသစ်တစ်ခု ရှာဖွေရမည်။ ဤအသက်တာတွင် ငါအပါအဝင် လူတစ်ဦးစီတိုင်း၌ အထူးတာဝန်တစ်ခုရှိပြီး မိမိတို့၏ အထူးတာဝန်အတွက် ၎င်းတို့၏ အသက်မရှင်လျှင် ဤအသက်တာကို ၎င်းတို့ အသက်ရှင်ခြင်းက တန်ဖိုးမရှိပေ။ အသက်တာကို သင် အသက်ရှင်ခြင်းအတွက် တန်ဖိုးမရှိလျှင် သင်၏ အသက်တာက သုံးမရပေ။ သုံးမရဟု အဘယ်ကြောင့် ငါ ပြောရသနည်း။ သင်သည် အသက်တာကို လမ်းလျှောက်နေသည့် အလောင်းကောင်တစ်ကောင်ကဲ့သို့ အသက်ရှင်လိမ့်မည်။ အသက်ရှင်ဖို့ ထိုက်တန်လိမ့်မည် မဟုတ်။ သင်၏ တာဝန်များကို သင် ကောင်းမွန်စွာ မဖြည့်ဆည်းသကဲ့သို့ သင်၏ အထူးတာဝန်ကို မပြီးမြောက်လျှင် သင့်ကို ဘုရားသခင် ပေးသည့် အရာရာတိုင်းကို မွေ့လျော်ခံစားရန် သင် မထိုက်တန်ပေ။ ဤအရာက မည်သည့်အရာကို ညွှန်ပြသနည်း။ ဘုရားသခင်က သင့်ထံမှ အရာရာကို အချိန်မရွေး သိမ်းယူသွားနိုင်သည်ကို ညွှန်ပြပေသည်။ ဘုရားသခင် ပေးနိုင်ပြီး ဘုရားသခင် သိမ်းယူသွားနိုင်သည်။ ဤသည်မှာ ပကတိအခြေအနေဖြစ်သည်။ အမှန်တွင် ဤနေရာတွင်ရှိသည့် လူတိုင်း၌ အထူးတာဝန်တစ်ခုရှိသည်။ သင်တို့အားလုံးတွင် ထမ်းဆောင်ရမည့် မတူကွဲပြားသော လုပ်ငန်းဆောင်တာများ ရှိကြခြင်းသာ ဖြစ်သည်။ ဘာသာတရားမရှိသူများတွင်လည်း အထူးတာဝန်တစ်ခု ရှိသည်။ ၎င်းတို့၏ အထူးတာဝန်မှာ လူတို့အနေဖြင့် ကပ်ဘေးများအလယ်တွင် ပိုပိုပြီး စိတ်ဆင်းရဲစွာ အသက်ရှင်ကာ သေဆုံးကြရန်အလို့ငှာ ဤလောက၏ အခြေအနေကို ရှုပ်ထွေးစေရန်နှင့် လူ့အဖွဲ့အစည်းကို ကစဉ့်ကလျားဖြစ်စေရန်ဖြစ်သည်။ သင်တို့၏ အထူးတာဝန်မှာ ဘုရားသခင်၏ အမှုတော်နှင့်အတူ ပူးပေါင်းဆောင်ရွက်ရန်၊ ဘုရားသခင်၏ ဧဝံဂေလိတရားနှင့် အမှုသစ်ကို ဖြန့်ဝေရန်ဖြစ်ပြီး တစ်ချိန်တည်းတွင် သမ္မာတရားကို နားလည်ကာ ကယ်တင်ခြင်း ရရှိရန်ဖြစ်သည်။ ဤသည်မှာ အလွန့်အလွန်ပျော်ရွှင်ဖွယ်အကောင်းဆုံးဖြစ်၏။ လူသား သမိုင်းတွင်ရှိသည့် မည်သည့်အရာကမျှ ဤအရာထက် ပို၍ အလွန့်အလွန်ပျော်ရွှင်ဖွယ်ဖြစ်ခြင်း သို့မဟုတ် ပို၍ ကံအကြောင်းလှခြင်း မရှိပေ။ ဤအရာထက် မည်သည့်အရာမျှ သာ၍ အရေးမကြီးပေ။ ဤသည်မှာ အသက်တာတွင် အကြီးမားဆုံးသောအရာဖြစ်ပြီး လူသား သမိုင်းတွင် အကြီးမားဆုံးသောအရာဖြစ်သည်။ သင်၏ အထူးတာဝန်ကို သင် ဖယ်ရှားပြီး သင်၏ တာဝန်နှင့် ဝတ္တရားများကို ဘေးချိတ်လျှင် သင်၏အသက်တာသည် တန်ဖိုးမရှိဖြစ်လိမ့်မည်ဖြစ်ကာ အသက်ရှင်ခြင်းက သင့်အတွက် အဓိပ္ပာယ်ရှိလိမ့်မည် မဟုတ်ပေ။ သင့်အနေဖြင့် မသေသေးသကဲ့သို့ ဤလောကတွင် သင့်အသက်တာ၏ ကျန်သည့်အချိန်ကို အသက်ရှင်နေထိုင်ရလိမ့်မည် ဖြစ်သော်လည်း အသက်ရှင်ခြင်းက သင့်အတွက် အဓိပ္ပာယ် သို့မဟုတ် တန်ဖိုး ရှိလိမ့်မည် မဟုတ်ပေ။ သမ္မာတရား သို့မဟုတ် ဘုရားသခင်၏ လမ်းခရီးကို မကြားဖူးသည့်လူတစ်ဦးနှင့် ဘုရားသခင်၏ စီမံခန့်ခွဲမှုအစီအစဉ်က မည်သည့်အရာဖြစ်သည်ကို တစ်ချိန်က သိခဲ့ပြီး ဘုရားသခင်၏ လမ်းခရီးကို နားလည်ခဲ့သော်လည်း အဆုံးတွင် သမ္မာတရား သို့မဟုတ် အသက် ရရှိခဲ့သည့် လူတစ်ဦးရှိသည်ဆိုပါစို့။ ငါ့ကို ပြောလော့၊ လောကတွင် ထိုလူနှစ်ဦးလုံး အသက်ရှင်ရင်း ၎င်းတို့၏ စိတ်နှလုံး အတွင်းပိုင်း၌ ခံစားချက် တစ်ထပ်တည်း ဖြစ်ကြမည်လော။ (ဖြစ်မည် မဟုတ်ပါ။) ဘာသာတရားမရှိသူများက ၎င်းတို့၏ အထူးတာဝန်ကို မသိကြပေ။ ၎င်းတို့တွင် အထူးတာဝန်နှင့် ပတ်သက်သော သိနားလည်မှု မရှိကြချေ။ သင်၏ အထူးတာဝန်က မည်သည့်နေရာမှလာသည်ကို သင် သိသည်။ ဘုရားသခင်က ဖန်ဆင်းရှင်၊ အရာခပ်သိမ်း၏ အချုပ်အခြာအာဏာ ရှိသောသူ ဖြစ်သည်ကို သင် သိသည်။ လူတို့က ဘုရားသခင်ထံမှလာပြီး သူ့ထံ ပြန်သွားသင့်သည်ကို သင် သိသည်။ ဤအရာအားလုံးကို သိလျက်ဖြင့် ဤလောကတွင် စိတ်အေးချမ်းစွာ သင် အသက်ရှင်နိုင်သေးသလော။ သင်သည် အသက်တာကို စိတ်အေးလက်အေးဖြင့် ကြုံရာကျပန်း ဖြတ်သန်းနေနိုင်သေးသလော။ သင် မနေနိုင်ပေ။ ဘုရားသခင်က သင့်ကို ဤအထူးတာဝန်ပေးခဲ့သဖြင့် ဧဝံဂေလိ ဟောပြောခြင်းအတွက် တာဝန်ကို သင် ထမ်းဆောင်သင့်သည်၊ အခြားသူများထံ ဘုရားသခင်အတွက် သက်သေခံသင့်သည်၊ လူက ဖြည့်ဆည်းသင့်သည် တာဝန်များအားလုံးကို ကောင်းမွန်စွာ ဖြည့်ဆည်းသင့်သည်၊ လူတိုင်း အကျိုးခံစားနိုင်ပြီးနောက် ဘုရားသခင်က စိတ်ကျေနပ်ဖို့အလို့ငှာ သင် နားလည်သည့် သမ္မာတရားနှင့် သင်၏ အတွေ့အကြုံဆိုင်ရာ သက်သေခံချက်တို့ကို ဆက်ကပ်အပ်နှံသင့်သည်။ လူတို့ တတ်စွမ်းနိုင်သည့်အရာများမှာ အမှန်တွင် ဤအရာများသာဖြစ်သည်။ သင့်အနေဖြင့် အနည်းငယ် ဆင်းရဲဒုက္ခခံစားနိုင်သရွေ့၊ အဖိုးအခပေးနိုင်ပြီး ဇိမ်ခံစရာများကို မွေ့လျော်ခြင်းအား အနည်းငယ်လျှော့နိုင်သရွေ့ ဤအရာများကို သင် စွမ်းဆောင်ရရှိနိုင်လိမ့်မည်။ ဤနည်းဖြင့် သင်၏ အဆုံးသတ်သည် ဘာသာတရားမရှိသူများ၏ အဆုံးသတ်နှင့် ကွဲပြားလိမ့်မည်ဖြစ်ပြီး သင်သည် ဘုရားသခင်၏ မတူကွဲပြားစွာ အကဲဖြတ်ခြင်းကို ခံရလိမ့်မည်။ ဤသည်မှာ အလွန် ဖြစ်ခေါင့်ဖြစ်ခဲဖြစ်၏။ ဘုရားသခင်က သင့်ကို ဤကောင်းချီးမင်္ဂလာပေးပြီး သင်က တန်ဖိုးထားရမှန်း မသိလျှင် သင်သည် အလွန်အမင်း ပုန်ကန်တတ်ပေသည်။ သင်သည် ဘုရားသခင်ကို ယုံကြည်ခြင်းနှင့်ဆိုင်သည့် ဤလမ်းကြောင်းကို ရွေးချယ်ပြီး ဖြစ်သည့်အတွက် ထိုအရာနှင့်ပတ်သက်၍ စိတ်မတင်မကျမဖြစ်ဘဲ ထိုအစား သင်၏ စိတ်နှလုံးကို စွဲစွဲမြဲမြဲ ငြိမ်သက်စေပြီး သင်၏ တာဝန်ကို ကောင်းစွာ ထမ်းဆောင်လော့။ နောင်တများဖြင့် ရှိမနေရစ်နှင့်။ ယခုအချိန်တွင် ပေတရု၏ ဝိညာဉ်ရင့်ကျက်မှုကို သင် မရရှိနိုင်သည့်အပြင် ယောဘ၏ ဖြောင့်မတ်သော လုပ်ဆောင်ချက်များကို မဆောင်ရွက်နိုင်လျှင်ပင် သင်၏တာဝန်ကို စံနှုန်းပြည့်မီသည့် နည်းလမ်းတစ်ခုဖြင့် ထမ်းဆောင်ရန် ကြိုးပမ်းလော့။ “သင်၏တာဝန်ကို စံနှုန်းပြည့်မီသည့် နည်းလမ်းတစ်ခုဖြင့် ထမ်းဆောင်ခြင်း”သည် မည်သည့်အရာကို ဆိုလိုသနည်း။ မယုံရခြင်းမရှိ၊ ခိုကပ်ခြင်းမရှိဘဲ၊ ကွယ်ဝှက်ထားသည့် ရည်ရွယ်ချက်များ တစ်ခုတလေ မထားရှိဘဲ သို့မဟုတ် မည်သည့်အရာကိုမျှ မချုပ်ထိန်းထားဘဲ ထို့ထက် သင် လုပ်ဆောင်နိုင်သမျှတိုင်းကို လုပ်ဆောင်လျက် သမ္မာတရား စည်းမျဉ်းများ၊ ဘုရားအိမ်တော်၏ အလုပ်အစီအစဉ်များနှင့်အညီ သင်၏ တာဝန်ကို ထမ်းဆောင်ခြင်းအား ဆိုလိုပေသည်။ ထိုအခါ သင်သည် သင်၏တာဝန်ကို စံနှုန်းပြည့်မီသည့် နည်းလမ်းတစ်ခုဖြင့် ဆောင်ရွက်နေလိမ့်မည် ဖြစ်သည်။ ဘုရားသခင်သည် လူတို့ထံမှ များစွာ တောင်းဆိုခြင်းမရှိသည်မှာ မှန်သလော။ (မှန်ပါသည်။) ဤသည်မှာ စွမ်းဆောင်ရရှိရန် လွယ်ကူသလော။ ဤသည်မှာ လူ့သဘာဝ၏ နယ်ပယ်အတွင်းတွင်ရှိသည့် အရာတစ်ခုဖြစ်ပြီး သင့်အနေဖြင့် စွမ်းဆောင်ရရှိနိုင်သင့်ပေသည်။ နောက်ထပ် မေးခွန်းတစ်ခုတလေ ရှိသလော။ မရှိလျှင် ယနေ့အတွက် ဤမိတ်သဟာယကို ဤနေရာတွင် ငါတို့ အဆုံးသတ်နိုင်သည်။

၂၀၁၉ ခုနှစ်၊ စက်တင်ဘာလ ၁၀ ရက်