၂။ အန္တိခရစ်တို့၏ အကျိုးစီးပွားများ

ပြီးခဲ့သည့်အခေါက်တွင် အန္တိခရစ်များ၏ အမျိုးမျိုးသော သရုပ်သကန်များနှင့်ဆိုင်သည့် နဝမမြောက် အချက်ကို ငါတို့ မိတ်သဟာယပြုခဲ့ကြသည်။ ၎င်းတို့သည် မိမိတို့ကိုယ်တိုင် ထင်ရှားကျော်ကြားမှု ရစေဖို့နှင့် ၎င်းတို့ကိုယ်တိုင်၏ အကျိုးစီးပွားများနှင့် ရည်မှန်းချက်များကို ပြည့်ဝစေဖို့သာ ၎င်းတို့၏တာဝန်ကို ထမ်းဆောင်ခြင်း ဖြစ်သည်။ ၎င်းတို့သည် ဘုရားအိမ်တော်၏ အကျိုးစီးပွားများကို မည်သည့်အခါမျှ အရေးမထားသကဲ့သို့ တစ်ကိုယ်ရေ ထင်ပေါ်ကျော်ကြားမှုအတွက် ဖလှယ်လျက် ထိုအကျိုးစီးပွားများကို သစ္စာပင် ဖောက်ကြသည် ဟူ၍ ဖြစ်၏။ ထို့နောက် ငါတို့သည် အန္တိခရစ်များ၏ အကျိုးစီးပွားများကို အချက်အနည်းငယ် ခွဲခဲ့ကြသည်။ ပထမအချက်မှာ သူတို့၏ တစ်ကိုယ်ရေ ဘေးကင်းရေးဖြစ်သည်၊ ဒုတိယမှာ သူတို့၏ တစ်ကိုယ်ရေ ဂုဏ်သတင်းနှင့် အဆင့်အတန်းဖြစ်ပြီး တတိယမှာ အကျိုးအမြတ်များဖြစ်သည်။ ဤအကျိုးအမြတ်များတွင် မည်သည့်အရာ ပါဝင်သနည်း။ (ပထမအချက်မှာ ဘုရားအိမ်တော်၏ ပစ္စည်းဥစ္စာများကို အလွဲသုံးစားပြုခြင်းဖြစ်သည်။ ဒုတိယမှာ ၎င်းတို့ကို အစေခံစေရန်နှင့် ၎င်းတို့အတွက် အလုပ်လုပ်ပေးစေရန် ညီအစ်ကိုမောင်နှမများကို အသုံးချခြင်း ဖြစ်ပြီး တတိယမှာ ဘုရားသခင်ကို ယုံကြည်ခြင်းနှင့်ဆိုင်သည့် ဟန်ဆောင်သောအသွင်ဖြင့် စားစရာ၊ သောက်စရာနှင့် အခြားသော တပ်မက်ဖွယ်ကောင်းသော အရာများကို လိမ်လည်၍ ရယူရန် မိမိတို့၏ ရာထူးဂုဏ်သိမ်ကို အသုံးချခြင်း ဖြစ်သည်။ ဤ “အခြားအရာများ”တွင် အထူးအကျိုးခံစားခွင့်၊ ၎င်းတို့၏ ကိုယ်ရေးကိုယ်တာ အရေးကိစ္စများကို ကိုင်တွယ်ခြင်း စသည်တို့ ပါဝင်သည်၊ ဟုတ်သလော။ (ဟုတ်ပါသည်။) ဤသို့ မိတ်သဟာယပြုခြင်း၊ ဆက်လက်မိတ်သဟာယပြုရန် အဓိက ခေါင်းစီးများကို ခေါင်းစီးခွဲများအဖြစ်သို့လည်းကောင်း၊ ခေါင်းစီးခွဲများကို အမျိုးမျိုးသော ကဏ္ဍများအဖြစ်သို့လည်းကောင်း ခွဲခြင်းသည် သင်တို့အား စိတ်ရှုပ်ထွေးစေသလော။ (စိတ်မရှုပ်ထွေးစေပါ။) အမှန်တွင် မိတ်သဟာယကို ဤသို့ သာ၍ ဆောင်ရွက်လေ၊ အမှုအရာများက သာ၍ ရှင်းလင်းလာလေဖြစ်သင့်ပေသည်။ ငါတို့သည် အန္တိခရစ်တို့၏ အကျိုးစီးပွားများနှင့်ဆိုင်သည့် အချက် သုံးချက်အပေါ် မိတ်သဟာယပြုပြီး ဖြစ်သော်လည်း အခြားတစ်ခုလည်း ရှိသေးသည်၊ ယင်းမှာ အန္တိခရစ်တို့၏ အကျိုးစီးပွားများအနက် အရေးအကြီးဆုံးဖြစ်သော စတုတ္ထမြောက်အချက်ဖြစ်သည့် ၎င်းတို့၏ အလားအလာများနှင့် ကံကြမ္မာပင် ဖြစ်သည်။ အလားအလာများနှင့် ကံကြမ္မာတို့သည် ဘုရားသခင်ကို ၎င်းတို့၏ယုံကြည်မှုတွင် အန္တိခရစ်များ ထားရှိကြသည့် အဓိကရည်မှန်းချက်ဖြစ်နိုင်သည်။ ယင်းတို့သည် ၎င်းတို့၏ စိတ်နှလုံးများတွင် စွဲကိုင်ထားသော အကြီးမားဆုံး အိမ်မက်များလည်း ဖြစ်ပြီး ၎င်းတို့၏ နက်ရှိုင်းသော အတွင်း စိတ်နှလုံးများတွင် လိုက်စားသည့် အမြင့်မားဆုံးသော အရာများလည်း ဖြစ်သည်။ အလားအလာများနှင့် ကံကြမ္မာဆိုသည့် အကြောင်းအရာကို သင်တို့ ရင်းနှီးရန် ဖြစ်နိုင်ချေအရှိဆုံးဖြစ်၏။ ထိုအရာက လူတို့အနေဖြင့် မည်သည့်နေရာတွင် အဆုံးသတ်မည်၊ မည်သည့်နေရာသို့ သွားမည်၊ အနာဂတ် သို့မဟုတ် နောက်လာမည့်ခေတ်တွင် မည်သည့်နေရာသို့ ဦးတည်နေကြသည်ဆိုသည်တို့နှင့် သက်ဆိုင်သည်။ တိုတိုပြောရလျှင် ၎င်းတို့၏ အနာဂတ် ခရီးပန်းတိုင်ပင် ဖြစ်သည်။ ဤသည်မှာ ဘုရားသခင်၏ ယုံကြည်သူတစ်ဦးချင်းစီတိုင်း၏ စိတ်နှလုံးတွင် အကြီးမားဆုံးနှင့် အရေးအကြီးဆုံးသော အရာ ဖြစ်သည် မဟုတ်လော။ (ဟုတ်ပါသည်။) အလားအလာများနှင့် ကံကြမ္မာသည် ဘုရားသခင်ကို ယုံကြည်သူအားလုံးအတွက် အလွန့်အလွန် အရေးကြီးပေသည်။ ထို့ကြောင့် အန္တိခရစ်များအတွက် ၎င်းတို့၏ အကျိုးစီးပွားနှင့် ဆက်စပ်နေသည့် အရေးကြီးဆုံးသော ကဏ္ဍမှာ ၎င်းတို့၏ အလားအလာများနှင့် ကံကြမ္မာ၊ ဆိုလိုသည်မှာ ၎င်းတို့၏ ခရီးပန်းတိုင်ပင် ဖြစ်ရမည်မှာ သိသာထင်ရှားပေသည်။

ဃ။ ၎င်းတို့၏ အလားအလာများနှင့် ကံကြမ္မာ

အမှုအရာများ အတော်အတန် ရှင်းလင်းသွားဖို့အလို့ငှာ အန္တိခရစ်များ၏ အကျိုးစီးပွားများအတွင်းတွင်ရှိသော အလားအလာများနှင့် ကံကြမ္မာတို့ကိုလည်း အမျိုးမျိုးသော ရှုထောင့်များနှင့် သွင်ပြင်လက္ခဏာများမှ မိတ်သဟာယပြုကြစို့။ ယခင်က ငါတို့ မိတ်သဟာယပြုခဲ့ကြသည့် အန္တိခရစ်များ၏ အမျိုးမျိုးသော အကျိုးစီးပွားများတွင် ရုပ်ပိုင်းဆိုင်ရာ အကျိုးစီးပွားများနှင့် ရုပ်ပိုင်းဆိုင်ရာမဟုတ်သော အကျိုးစီးပွားများ နှစ်ခုလုံး ပါဝင်သည်။ ဥပမာအားဖြင့် မိမိ၏ တစ်ကိုယ်ရေ ဘေးကင်းလုံခြုံရေး၊ ဂုဏ်သတင်းနှင့် အဆင့်အတန်းတို့သည် ရုပ်ပိုင်းဆိုင်ရာမဟုတ်သော အကျိုးစီးပွားများချည်းသာ ဖြစ်သည်။ ယင်းတို့သည် ၎င်းတို့၏ ဝိညာဉ်ရေးရာ နယ်ပယ်များရှိ လက်ဆုပ်လက်ကိုင် မပြနိုင်သောအရာများသာ ဖြစ်သည်။ ရုပ်ပိုင်းဆိုင်ရာ အကျိုးစီးပွားများတွင် အဖိုးတန်ပစ္စည်းများ၊ စားစရာနှင့် သောက်စရာအပြင် အထူးအကျိုးခံစားခွင့်များ၊ ရုပ်ပိုင်းဆိုင်ရာ ပျော်ရွှင်မှုများ စသည်တို့ ပါဝင်သည်။ သို့ဆိုလျှင် ယနေ့ မိတ်သဟာယနှင့်ဆိုင်သည့် အလားအလာများနှင့် ကံကြမ္မာတို့တွင် မည်သည့်အရာများ ပါဝင်သနည်း။ လူသား အယူအဆများ၏ ရှုထောင့်အမြင်မှကြည့်လျှင်၊ ဤအရာများသည် လက်ဆုပ်လက်ကိုင် ပြနိုင်သည့် အရာများလော၊ သို့မဟုတ် လက်ဆုပ်လက်ကိုင် မပြနိုင်သည့်အရာများလော။ (လက်ဆုပ်လက်ကိုင် မပြနိုင်သော အရာများဖြစ်သည်။) ထို့ကြောင့် ယင်းတို့သည် လူတို့၏ ဝိညာဉ်ရေးရာ နယ်ပယ်များတွင် ရှိသောအရာများ၊ ၎င်းတို့၏ အယူအဆများနှင့် စိတ်ကူးများ၊ ၎င်းတို့၏ စိတ်များတွင် ရှိသောအရာများဖြစ်ရမည်။ လူတို့အတွက် ဤအရာများသည် မျှော်လင့်ချက်နှင့် ခွန်အားတစ်မျိုး ဖြစ်ပြီး လူတို့က မိမိတို့ တစ်ဘဝလုံး လိုက်စားရင်း အချိန်ကုန်ဆုံးကြသည့် အရာများဖြစ်သည်။ ဤအရာများသည် လူတို့အတွက် မြင်၍မရနိုင်သကဲ့သို့ လက်ဆုပ်လက်ကိုင် ပြ၍မရသော်လည်း လူတို့၏ စိတ်နှလုံးများတွင် စိုးမိုးသော နေရာတစ်ခုကို ယူထားကြသည်၊ လူတို့၏ ဘဝတစ်ခုလုံးကို စိုးမိုးပြီး ၎င်းတို့၏ အတွေးအခေါ်များနှင့် လုပ်ရပ်များ၊ ၎င်းတို့၏ ကြံရွယ်ချက်များနှင့် ၎င်းတို့ လိုက်စားမှု၏ ဦးတည်ချက်ကို ထိန်းချုပ်လေသည်။ ထို့ကြောင့် အလားအလာများနှင့် ကံကြမ္မာတို့သည် လူတိုင်းအတွက် အလွန့်အလွန် အရေးကြီး၏။ အလားအလာများနှင့် ကံကြမ္မာတို့သည် အရေးကြီးသော်လည်း အန္တိခရစ်များက ထိုအရာများကို ပုံမှန်ဖြစ်သော၊ သာမန်လူများနှင့် လုံးဝ ကွဲပြားသည့် နည်းလမ်းတစ်ခုဖြင့် လိုက်စားကြသည်။ ကွာခြားချက် အတိအကျမှာ မည်သည့်အရာ ဖြစ်သနည်း။ မည်သည့်သွင်ပြင်လက္ခဏာများက ဤအရာကို ဖော်ပြပြီး ယင်းမှာ အန္တိခရစ်၏ လိုက်စားမှုနည်းလမ်းဖြစ်ကြောင်းနှင့် အန္တိခရစ်တစ်ဦး၏ ထုးခြားသောလက္ခဏာဖြစ်ကြောင်းကို လူတို့အား ရှင်းလင်းစွာ မြင်စေပြီး သတိပြုမိစေရန် ထောက်ကူပေးသနည်း။ ဤသည်မှာ ဆွေးနွေးကာ မိတ်သဟာယပြုဖို့ ထိုက်တန်သည် မဟုတ်လော။ လူများစွာ၏ သရုပ်သကန်များသည် စစ်မှန်သော အန္တိခရစ်များ၏ သရုပ်သကန်များနှင့်လည်းကောင်း၊ အန္တိခရစ်များ၏ အနှစ်သာရရှိသူတို့နှင့်လည်းကောင်း နည်းလမ်းများစွာဖြင့် ဆင်တူသည်မှာ အမှန်ဖြစ်၏။ သို့သော် ၎င်းတို့၏ သရုပ်သကန်များနှင့် စိတ်သဘောထားများက တူညီနေသည့်အခါတွင်ပင် ၎င်းတို့၏ အနှစ်သာရက ကွဲပြားပေသည်။ အန္တိခရစ်များ၏ အကျိုးစီးပွားများထဲမှ စတုတ္ထမြောက်ဖြစ်သော ၎င်းတို့၏ အလားအလာနှင့် ကံကြမ္မာအကြောင်းကို အမျိုးမျိုးသော ရှုထောင့်များမှ ဆွေးနွေးကြစို့။

အလားအလာများနှင့် ကံကြမ္မာကို ငါတို့ အဘယ်သို့ စိစစ်နိုင်သနည်း။ အန္တိခရစ်များ၏ အကျိုးစီးပွားများတွင်ရှိသည့် အလားအလာများနှင့် ကံကြမ္မာက သမ္မာတရားနှင့် မကိုက်ညီကြောင်းကိုလည်းကောင်း၊ ယင်းတို့သည် အန္တိခရစ်များ၏ အနှစ်သာရ ထုတ်ဖော်ပြချက်များဖြစ်ကြောင်းကိုလည်းကောင်း စိစစ်ရန် မည်သည့် နည်းလမ်းနှင့် ဥပမာများကို ငါတို့ အသုံးပြုနိုင်သနည်း။ မည်သည့် ရှုထောင့်များမှ ယင်းတို့ကို စိစစ်၍ရနိုင်သနည်း။ ဤအရာက စေ့စပ်သေချာသော စုံစမ်းစစ်ဆေးခြင်း လိုအပ်သည်။ လူတို့အနေဖြင့် အန္တိခရစ်များ၏ အနှစ်သာရကို သာ၍ တိကျစွာနှင့် ရှင်းလင်းစွာ နားလည်နိုင်ရန်အလို့ငှာ ဤအရာကို ကျယ်ပြန့်သော အမျိုးအစားအချို့အဖြစ်သို့ ခွဲခြားကြစို့။ ပထမမှာ အန္တိခရစ်များက ဘုရားသခင်၏ နှုတ်ကပတ်တော်များကို မည်သို့သဘောထားပုံဖြစ်သည်။ ဒုတိယမှာ အန္တိခရစ်များက မိမိတို့၏တာဝန်ကို မည်သို့သဘောထားပုံ ဖြစ်သည်။ တတိယမှာ အန္တိခရစ်များက ပြုပြင်ခံရခြင်းကို မည်သို့သဘောထားပုံ ဖြစ်သည်။ စတုတ္ထမှာ အန္တိခရစ်များက “အစေခံသူ” ဟူသည့် အမည်နာမကို မည်သို့မှတ်ယူပုံဖြစ်ပြီး ပဉ္စမမှာ အန္တိခရစ်များက အသင်းတော်ထဲရှိ မိမိတို့၏ရာထူးဂုဏ်ဒြပ်ကို မည်သို့ချဉ်းကပ်ပုံဖြစ်သည်။ အဘယ်ကြောင့် ဤအမျိုးအစားငါးခု ဖြစ်ရသနည်း။ နားလည်ရန် ကြိုးစားလော့။ တစ်ခုစီအပေါ် သိနားလည်မှု အနည်းငယ် သင်တို့ ရနိုင်ကြသလော။ အန္တိခရစ်များနှင့် သက်ဆိုင်သည့် အချို့သော အလားတူ လိုက်လျောညီထွေဖြစ်သည့် သရုပ်သကန်များ သို့မဟုတ် စိတ်သဘောထားများကို သင်တို့ ရှာတွေ့နိုင်ကြသလော။ ဤအမျိုးအစား ငါးခု၏ အခြေခံအုတ်မြစ်ပေါ်တွင် မည်သည့်အရာကို တိကျစွာ စိစစ်သင့်သနည်း။ ဤအမျိုးအစားများနှင့် စပ်လျဉ်း၍ အန္တိခရစ်များ၏ အဓိက ထူးခြားသော လက္ခဏာများနှင့် ၎င်းတို့ ပြသသည့် အဓိကကျသော စိတ်သဘောထားများမှာ အဘယ်အရာဖြစ်ပြီး သမ္မာတရားကို ပုံမှန် လိုက်စားသူများနှင့် သာမန် ဖောက်ပြန်ပျက်စီးသော လူတို့၏ သရုပ်သကန်များမှာ မည်သည့်အရာများ ဖြစ်သနည်း။ အန္တိခရစ်များနှင့် သာမန် ဖောက်ပြန်ပျက်စီးသော လူတို့ကြားမှ ခြားနားမှုမှာ အဘယ်နည်း။ ဤခြားနားမှုများသည် မည်သည့်နေရာတွင် တည်ရှိသနည်း။ ၎င်းတို့ ရွေးချယ်ပြီးဖြစ်သည့် လမ်းကြောင်းများကြား ခြားနားချက်မှာ အဘယ်နည်း။ ၎င်းတို့၏ သရုပ်သကန်များတွင် ခြားနားချက်မှာ အဘယ်နည်း။ သင်တို့သည် ဤအမျိုးအစားများအပေါ် သိနားလည်မှုတစ်ခုခု ရှိကြသလော။ (ဤအမျိုးအစားငါးခုတွင် အန္တိခရစ်များသည် အမှုအရာများကို ဘုရားနှုတ်ကပတ်တော်များတွင် ရှိသည့် သမ္မာတရားကို အခြေခံ၍ အဓိက မရှုမြင်ကြပါ။ ၎င်းတို့သည် မိမိတို့ကိုယ်ပိုင် အယူအဆများနှင့် စိတ်ကူးများပေါ် အခြေခံ၍ ဘုရားသခင်၏ ရည်ရွယ်ချက်များကို မှန်းဆရန်၊ ၎င်းတို့တွင် အလားအလာနှင့် ကံကြမ္မာ တစ်ခုတလေ ရှိမရှိဟူသည်ကို ကြည့်ရန် အချို့သော အရာများ၏ အပေါ်ယံ သွင်ပြင် သို့မဟုတ် ၎င်းတို့၏ ကိုယ်ပိုင် အခြေအနေကို အမြဲ အသုံးပြုကြသည်။ ဥပမာအနေဖြင့် ၎င်းတို့၏ တာဝန်နှင့် ပတ်သက်လာသည့်အခါ ၎င်းတို့အနေဖြင့် ထင်ရှားကျော်ကြားမှု ရနိုင်ပြီး မိမိတို့ အလိုဆန္ဒများ၊ ဝင့်ဝါမှုနှင့် ဂုဏ်သိက္ခာတို့ကို ဖြည့်ဆည်းနိုင်လျှင် ဘုရားအိမ်တော်၌ ၎င်းတို့သည် အသုံးဝင်သော လူများဖြစ်ကာ ၎င်းတို့တွင် အလားအလာများနှင့် ကံကြမ္မာ ရှိကြသည့်အလား ခံစားကြလိမ့်မည်။ ၎င်းတို့ ပြုပြင်ခံရသည်နှင့်တစ်ပြိုင်နက် ဘုရားသခင်က ၎င်းတို့ကို သဘောမကျ ဖြစ်ကြောင်း၊ ၎င်းတို့နှင့်ပတ်သက်၍ ဘုရားသခင်က စိတ်ကျေနပ်ခြင်း မရှိကြောင်းတို့ကို ၎င်းတို့ ခံစားရလိမ့်မည်ဖြစ်ပြီး ဘုရားသခင်ကို ယုံကြည်မှုနှင့်ပတ်သက်၍ ၎င်းတို့ စိတ်ဓာတ်ကျလာလိမ့်မည်ဖြစ်ကာ စိတ်ပျက်လာကြလိမ့်မည်ဖြစ်ပြီး ၎င်းတို့အတွင်းတွင် အပျက်သဘောဆောင်ခြင်းနှင့် ဆန့်ကျင်မှုတို့ ဖြစ်ပေါ်လိမ့်မည်ဖြစ်သည်။) ဤအကျဉ်းချုပ်သည် သိနားလည်မှုတစ်ခုခုကို ပေးပြီး ဤကိစ္စရပ်အတွင်းရှိ သမ္မာတရားကို အနည်းငယ် ထည့်သွင်းစဉ်းစားထားသည်။ သင်တို့ ပြောပြီးသည့် ယေဘုယျအဓိပ္ပာယ်မှ အကဲဖြတ်ရလျှင် သင်တို့၌ ဤအမျိုးအစားငါးခုနှင့်ဆိုင်သည့် အခြေခံ သိနားလည်မှုတစ်ခု ရှိသည်မှာ သေချာသလောက်ဖြစ်သည်။ ဆက်လက်၍ ယင်းတို့ကို ငါတို့ တစ်ခုပြီးတစ်ခု မိတ်သဟာယပြုကြမည်ဖြစ်သည်။

၁။ အန္တိခရစ်များက ဘုရားသခင်၏ နှုတ်ကပတ်တော်များကို မည်သို့သဘောထားပုံ

ပထမ အမျိုးအစားမှာ အန္တိခရစ်များက ဘုရားသခင်၏ နှုတ်ကပတ်တော်များကို မည်သို့ သဘောထားပုံဖြစ်သည်။ အန္တိခရစ်များသည် ဘုရားသခင်ကို ယုံကြည်ပြီး ဘုရားသခင် နောက်လိုက်သည့် လူများလည်း ဖြစ်ကြ၏။ ၎င်းတို့သည်လည်း မိမိတို့၏ လက်ထဲတွင် ဘုရားနှုတ်ကပတ်တော်များကို ပိုင်ဆိုင်ကြသည်၊ တရားဒေသနာများကို နားထောင်ကြသည်၊ စုဝေးပွဲများကို တက်ရောက်ကြပြီး ပုံမှန် ဝိညာဉ်ရေးရာ အသက်တာများရှိကြသည်။ အန္တိခရစ်များအတွက် ဘုရားနှုတ်ကပတ်တော်များကို ဖတ်ရှုခြင်းသည် ၎င်းတို့ ဘဝများ၏ တစ်စိတ်တစ်ပိုင်းလည်းဖြစ်ပြီး ဤအရာကို ၎င်းတို့က မကြာခဏ လုပ်ဆောင်ကြသည်။ နှစ်ဦးလုံးက ဘုရားနှုတ်ကပတ်တော်များကို ဖတ်ရှုကြသော်လည်း အန္တိခရစ်များသည် သမ္မာတရားကို လိုက်စားသူများနှင့် ကွာခြားသည်။ ၎င်းတို့သည် ဘုရားနှုတ်ကပတ်တော်များအပေါ် လုံးဝ ကွဲပြားသည့် သဘောထားတစ်ခု ရှိကြသည်။ သို့ဆိုလျှင် အန္တိခရစ်များက ဘုရားနှုတ်ကပတ်တော်များကို မည်သို့ သဘောထားကြသနည်း။ ပထမဆုံးအနေဖြင့် ၎င်းတို့က ဘုရားနှုတ်ကပတ်တော်များကို ထူးဆန်းသည့် ရှုထောင့်အမြင်နှင့် သဘောထားတစ်ခုမှ လေ့လာရင်း သုတေသနပြုကာ စိစစ်ကြသည်။ ထိုအရာကို “လေ့လာခြင်း”ဟု ငါ အဘယ်ကြောင့် ခေါ်ဆိုသနည်း။ ဓမ္မဓိဋ္ဌာန်ကျသော အခြေအနေအရ၊ အန္တိခရစ်များက ဤအရာများသည် ဘုရားနှုတ်ကပတ်တော်များ ဖြစ်ကြောင်းကို ဝန်ခံရမည်ဖြစ်ကာ သာမန်လူများက မဖော်ပြနိုင်အောင်ပင် ဘုရားနှုတ်ကပတ်တော်များက အလွန် မြင့်မားကြောင်းနှင့် ဤနှုတ်ကပတ်တော်များကို အခြားမည်သည့်နေရာတွင်မျှ ရှာတွေ့နိုင်မည်မဟုတ်ကြောင်းကိုလည်း ၎င်းတို့၏ စိတ်နှလုံးများတွင် ခံစားကြရသည်။ ဤအခြေခံအကြောင်းရင်းပေါ်တွင် ၎င်းတို့အနေဖြင့် ဤအရာများက ဘုရားနှုတ်ကပတ်တော်များ ဖြစ်ကြောင်း ဝန်ခံရုံမှလွဲ၍ ရွေးချယ်စရာ မရှိသော်လည်း ဘုရားနှုတ်ကပတ်တော်များကို သမ္မာတရားအဖြစ် ၎င်းတို့က လက်ခံကြသလော။ လက်မခံကြပေ။ သို့ဆိုလျှင် အန္တိခရစ်များက ဘုရားနှုတ်ကပတ်တော်များကို အဘယ်ကြောင့် ဖတ်ရှုကြသေးသနည်း။ အဘယ်ကြောင့်ဆိုသော် ဘုရားနှုတ်ကပတ်တော်များတွင် ၎င်းတို့ လိုအပ်သည့်အရာများ၊ ၎င်းတို့ သိရှိလိုသည့်အရာများနှင့် ၎င်းတို့၏ ဝိညာဉ်ရေးရာ လောကတွင် ၎င်းတို့ကို အကျိုးပြုသည့်အရာများ ရှိသောကြောင့် ဖြစ်သည်။ ဤအရာများက မည်သည့်အရာများ ဖြစ်သနည်း။ ယင်းတို့သည် အန္တိခရစ်များ၏ အလားအလာများ၊ ကံကြမ္မာတို့နှင့် နီးကပ်စွာ ဆက်စပ်သည်မှာ အမှန်ဖြစ်၏။ အန္တိခရစ်များက ဘုရားနှုတ်ကပတ်တော်များကို လေ့လာသည့်အခါ ၎င်းတို့သည် ခရီးပန်းတိုင်များ၊ အဆုံးသတ်များ၊ အနာဂတ်တွင် လူတို့ အဆုံးသတ်ကြမည့်နေရာ၊ စသည်တို့နှင့် ဆက်စပ်သည့် စကားများကို စဉ်ဆက်မပြတ် ရှာဖွေနေကြသည်။ ထို့ကြောင့် ဘုရားနှုတ်ကပတ်တော်များကို အန္တိခရစ်များ၏ ဖတ်ရှုခြင်းကို “လေ့လာခြင်း”ဟု ခေါ်သည်။ ၎င်းတို့သည် ဘုရားနှုတ်ကပတ်တော်များကို ဖတ်ရှုနေစဉ် ယင်းတို့ကို သုတေသနပြုနေကြသည်၊ စိစစ်နေကြပြီး အကဲဖြတ်မှုများ ပြုလုပ်နေကြပေသည်။ ၎င်းတို့သည် သူ၏ နှုတ်ကပတ်တော်များကို ဖတ်ရှုနေစဉ် သုတေသနပြုနေကြသည်။ “ဘုရား၏ လေယူလေသိမ်းမှကြည့်ရလျှင် သူသည် ဤလူစားမျိုးများကို မနှစ်သက်သည့်ပုံရသည်။ ငါက ထိုသူတို့ထဲမှ တစ်ဦးကဲ့သို့ အဘယ်ကြောင့် ခံစားရသနည်း။ ဘုရားက ဤလူများအား မည်သည့် ခရီးပန်းတိုင်ပေးသည်ကို ငါ သိအောင်လုပ်သင့်သည်”ဟူ၍ ဖြစ်၏။ ဘုရားသခင်က ထိုသို့သောလူများကို အနက်ဆုံးသောတွင်းထဲသို့ ကန်ချခြင်းအကြောင်း ပြောသည်ကို ၎င်းတို့မြင်သောအခါ “ဤသည်မှာ မကောင်းပါ။ အနက်ဆုံးသောတွင်းထဲသို့ ကန်ချခံရခြင်းသည် အဆုံးသတ်ခြင်းကို ဆိုလိုသည် မဟုတ်လော။ ဤလူစားမျိုးများတွင် အလားအလားများမရှိသကဲ့သို့ ကောင်းမွန်သည့် ခရီးပန်းတိုင်တစ်ခု မရှိပါ။ ထို့ကြောင့် မည်သည့်အရာကို ငါ လုပ်ဆောင်သင့်သနည်း” ဟု မိမိတို့ဘာသာတွေးမိကြသည်။ ၎င်းတို့သည် မိမိတို့၏စိတ်နှလုံးထဲတွင် စူးသော နာကျင်မှု၊ စိုးရိမ်ပူပန်မှုနှင့် စိတ်မသက်မသာဖြစ်ခြင်းတို့ ခံစားရသည်။ “ဤသည်မှာ ဘုရားက ဤကဲ့သို့သော လူတို့ကို အမှန်တကယ် ဆက်ဆံပုံဖြစ်သလော။ မဖြစ်ပါ၊ ငါ လက်လျှော့၍မဖြစ်ပါ”ဟူ၍ ဖြစ်သည်။ ဤသို့ဖြင့် ၎င်းတို့သည် ဘုရားသခင်၏ နှုတ်ကပတ်တော်များကို ဆက်လက်၍ သုတေသနပြုကြသည်။ ဘုရားနှုတ်ကပတ်တော်များက “ငါ့သားတို့၊ ငါသည် သင်တို့အတွက် ဤအရာ၊ ထိုအရာကို လုပ်ဆောင်ပေးမည်ဖြစ်ပြီး သင်တို့ထံ ထိုအရာ ဖြစ်ပျက်လိမ့်မည်”ဟု ပြောသည်ကို မြင်သည့်အခါ ၎င်းတို့ စိတ်မကောင်းမဖြစ်တော့ပေ။ “ဘုရားနှုတ်ကပတ်တော်များက ကျွန်ုပ် စိတ်နှလုံးကို နွေးထွေးစေသည်။ ယင်းတို့သည် အလွန်နှစ်သက်ဖွယ်ဖြစ်သည်။ ကျွန်ုပ်သည် ဘုရားပြောသည့် “သားများ”ထဲမှတစ်ဦးဖြစ်သည်”ဟူ၍ဖြစ်၏။ ထို့နောက် ၎င်းတို့က ဘုရားနှုတ်ကပတ်တော်များတွင် “သားဦးများ” နှင့် “ရှင်ဘုရင်များကဲ့သို့ စိုးစံ”ဟူသည့်အရာ ဖော်ပြထားသည်ကို မြင်ပြီး “အလွန်ကောင်းပေ၏။ ဘုရားကို ယုံကြည်ခြင်းအတွက် အကျိုးကျေးဇူးများနှင့် အလားအလာကောင်းသော အနာဂတ်တစ်ခုရှိပေသည်။ မှန်သော လမ်းကြောင်းကို ငါ ရွေးချယ်ပြီးဖြစ်သည်။ မှန်ကန်သည့် အလောင်းအစားကို ငါ ပြုလုပ်ပြီးဖြစ်သည်။ ငါ၏ ယုံကြည်မှုတွင် ငါ လုံ့လရှိရမည်ဖြစ်ပြီး ဘုရား၏ ဝတ်ရုံကို ငါ ကိုင်ထားရမည်။ နောက်ဆုံး အခိုက်အတန့်တွင်ပင် ငါ လက်လျှော့ရမည်မဟုတ်”ဟု တွေးကြလေသည်။ ၎င်းတို့ ဆက်လက်ဖတ်ရှုနေချိန်တွင် ဘုရားနှုတ်ကပတ်တော်များက “အဆုံးတိုင်အောင် လိုက်လျှောက်သောသူသည် ဧကန်မုချ ကယ်တင်ခံရလိမ့်မည်”ဟူ၍ ဖော်ပြသည်ကို မြင်ကြသည်။ အန္တိခရစ်များအတွက် ဤအရာကို ဖတ်ရှုခြင်းသည် အသက်ကယ်ကြိုးကို ဖမ်းဆုပ်မိခြင်းကဲ့သို့ ဖြစ်သည်။ “ဤစကားများအတိုင်း ငါ လက်တွေ့လုပ်ဆောင်မည်။ မည်သည့်အချိန်၊ မည်သည့်နေရာတွင်ဖြစ်စေ၊ မည်သည့်အရာဖြစ်ပျက်သည်ဖြစ်စေ၊ ပင်လယ်များ ခမ်းခြောက်ပြီး ကျောက်ဆောင်များက မြေမှုန့်များဖြစ်သွားလျှင်ပင်၊ ပင်လယ်ပြာများက အစိမ်းရောင် ကွင်းပြင်များအဖြစ်သို့ ပြောင်းသွားလျှင်ပင် ဤစကားများက ပြောင်းလဲလိမ့်မည် မဟုတ်ပေ။ ကောင်းကင်နှင့် မြေကြီး ဆိတ်သုဉ်းသွားလျှင်ပင် ဤစကားများ ဆိတ်သုဉ်းသွားလိမ့်မည်မဟုတ်ပါ။ ဤစကားများကို ငါ ထိန်းသိမ်းသရွေ့၊ ငါ့အနေဖြင့် ကောင်းမွန်သည့် အဆုံးသတ်တစ်ခု၊ ကောင်းမွန်သည့် ခရီးပန်းတိုင်တစ်ခု ရှိမည် မဟုတ်လော။ ငါ၏ အလားအလာများနှင့် ကံကြမ္မာက အတည်တကျ ဖြစ်မည်မဟုတ်လော။ အလွန်ကောင်းပေသည်။ ငါသည် အဆုံးထိ လိုက်လျှောက်သောသူတစ်ဦး ဖြစ်ရမည်”ဟူ၍ ဖြစ်သည်။ အကြိမ်ကြိမ် ရှာဖွေခြင်း၊ ဤသို့ သုတေသနပြုခြင်းနှင့် ထိုသို့ စိစစ်ခြင်းဖြင့် ၎င်းတို့သည် နောက်ဆုံးတွင် ဘုရားနှုတ်ကပတ်တော်များ၌ အသက်ကယ်ကြိုးတစ်ခုကို ရှာတွေ့သွားကြပြီး အကြီးမားဆုံးသော “လျှို့ဝှက်ချက်”ကို ရှာဖွေတွေ့ရှိသွားကြသည်။ ၎င်းတို့က “နောက်ဆုံးတွင် ငါသည် ဖယ်ရှားရှင်းလင်းခံရမည့်အကြောင်းကို စိုးရိမ်ရန်မလိုပေါ။ မီးအိုင်နှင့် ကန့်ဆီသို့ သွားရမည့်အကြောင်းကို ငါ စိုးရိမ်ရန် မလိုအပ်ပါ။ ငရဲသို့ သွားရမည့်အကြောင်းကို ငါ စိုးရိမ်ရန် မလိုအပ်ပါ။ နောက်ဆုံးတွင် ငါ၏ ခရီးပန်းတိုင်ကို ငါ ရှာတွေ့ပြီဖြစ်ပြီး ကောင်းကင်ဘုံသို့ သွားသည့် လမ်းကြောင်းတစ်ခု၊ လူသားမျိုးနွယ်၏ လှပသော ခရီးပန်းတိုင်ကို နောက်ဆုံးတွင် ငါ ရှာတွေ့လေပြီ။ နှစ်သက်ဖွယ် ဖြစ်လိုက်လေခြင်းပါတကား”ဟူ၍ ဝမ်းမြောက်ခြင်းဖြင့် ပြည့်သွားကြသည်။ သို့သော် ဤသည်မှာ ကြာရှည်မခံသကဲ့သို “ခရီးပန်းတိုင်နှင့် ပတ်သက်၍”ဟူသည့် ဘုရားနှုတ်ကပတ်တော် အခန်းကြီးကို ၎င်းတို့က ဖတ်ရှုသည့်အခါ ၎င်းတို့က “ဤစကားများက ခရီးပန်းတိုင်များနှင့်ပတ်သက်၍ မည်သည့်အရာကို ပြောဆိုသနည်း။ လူအမျိုးအစား အမျိုးမျိုး၏ ခရီးပန်းတိုင်များနှင့်ပတ်သက်၍ ဘုရားက အလွန်တိကျစွာ ပြောဆိုပုံမရပါ။ ဘုရားက မည်သည့်အရာကို အတိအကျ ဆိုလိုသနည်း။ မည်သည့်အရာကို ငါ လုပ်ဆောင်သင့်သနည်း။ ငါ မစိုးရိမ်သင့်ပါ။ ငါ ဆက်ဖတ်ရှုဖို့ လိုအပ်သည်”ဟု စဉ်းစားကြသည်။ ထို့နောက်တွင် ဘုရားက “သင်၏ ပန်းတိုင်အတွက် လုံလောက်သော ကောင်းမှုများကို ပြင်ဆင်”ရန် ပြောသည်ကို မြင်သည့်အခါ ၎င်းတို့က ထိုအကြောင်းကို နောက်ထပ်အနည်းငယ် စဉ်းစားကြသည်။ “ငါ့အနေဖြင့် လှပသည့် ခရီးပန်းတိုင်တစ်ခု ရှိလိုလျှင် လုံလောက်သည့် ကောင်းမှုများကို ပြင်ဆင်ရန်လိုအပ်သည်။ ယခုတွင် ဘုရားက သတ်မှတ်ချက်များကို ချပြပြီးဖြစ်သဖြင့် ဤအရာက အမှုအရာများကို သာ၍ လွယ်ကူသွားစေသည်။ ငါသည် အဓိပ္ပာယ်မဲ့သော ကြိုးပမ်းအားထုတ်မှုများကို ဆက်လုပ်ဆောင်ရန် မလိုသကဲ့သို့ အချည်းနှီး ကြိုးစားရန် မလိုပါ။ ယခုတွင် ငါ၏ အားထုတ်မှုများကို မည်သည့်နေရာတွင် အသုံးပြုရမည်ကို ငါ သိသည်”ဟူ၍ ဖြစ်သည်။ မိတ်သဟာယမှတစ်ဆင့် ကောင်းမှုများက မည်သည့်အရာဖြစ်သည်ကို အန္တိခရစ်များက သင်ယူကြသည်၊ “နည်းလမ်း”တစ်ခုကို ရှာကြပြီး ဖြေရှင်းချက်တစ်ခု ရှိကြသည်။ “လက်စသတ်တော့၊ ထိုအရာ အလွန်ရိုးရှင်ပေသည်။ ပေးကမ်းစွန့်ကြဲခြင်းနှင့် လှူဒါန်းပူဇော်ခြင်းတို့သည် ကောင်းမှုများဖြစ်သည်။ ဧဝံဂေလိ ဟောခြင်းနှင့် ပိုများသော လူတို့ကို ရရှိခြင်းသည် ကောင်းမှုများဖြစ်သည်။ ညီအစ်ကို မောင်နှမများကို ထောက်ပံ့ခြင်းသည် ကောင်းမှုတစ်ခုဖြစ်သည်။ ငါ တန်ဖိုးထားသည့် အရာများကို လှူဒါန်းခြင်းသည် ကောင်းမှုတစ်ခု ဖြစ်သည်။ ငါ၏ ခရီးပန်းတိုင်အတွက် ထိုအရာအားလုံးကို ငါ စွန့်မည်။ ဤအရာများအားလုံးကို ငါ လှူဒါန်းမည်”ဟူ၍ ဖြစ်သည်။ သို့သော်ငြားလည်း ၎င်းတို့က “မဟုတ်ပါ။ ငါ့ငွေနှင့် ရုပ်ဝတ္ထု ပိုင်ဆိုင်မှုများအားလုံးကို ငါ လှူဒါန်းလိုက်လျှင် အနာဂတ်၌ ငါ အဘယ်သို့ အသက်ရှင်မည်နည်း။ ဘုရား၏ အမှုတော် အဆုံးသတ်မည့်အချိန်နှင့် လူတို့က ကမ္ဘာပေါ်ရှိ ၎င်းတို့၏ ဘဝအတွက် ဤအရာများကို မလိုအပ်တော့မည့်အချိန်ကို သိမြင်ရန် ဘုရားနှုတ်ကပတ်တော်များကို ပထမဆုံး ငါ ဖတ်ရှုသင့်သည်။ ငါ မလောသင့်ပါ။ သို့သော် ဤအရာများကို ငါ ပူဇော်ပေးလှူခြင်းမရှိလျှင် ကောင်းမှုများကို အဘယ်သို့ ပြင်ဆင်နိုင်မည်နည်း။ ညီအစ်ကို မောင်နှမအချို့ကို ဧည့်ခံခြင်းနှင့် လူတို့ကို ရရှိရန် ဧဝံဂေလိ ဟောခြင်းတို့သည် လုပ်ဆောင်ရန် လွယ်ကူသည့်အရာများ ဖြစ်သည်။ ဤအရာများကို ငါ စွမ်းဆောင်ရရှိနိုင်သည်”ဟူ၍ ဖြစ်သည်။ ကောင်းမှုများကို ပြင်ဆင်နေစဉ် ကောင်းမှုမည်မျှကို ၎င်းတို့ ပြင်ဆင်ပြီးဖြစ်သည်ဆိုသည်နှင့် ကောင်းမွန်သည့် ခရီးပန်းတိုင်တစ်ခုရှိဖို့ မည်သို့ အလားအလာ ရှိသည်ဟူသည်တို့ကို ၎င်းတို့၏ စိတ်နှလုံးများတွင် စဉ်ဆက်မပြတ် ်တွက်ချက်နေကြသည်။ “အလွန်များသည့် ကောင်းမှုများကို ငါ ပြင်ဆင်ပြီးဖြစ်သော်လည်း အဘယ်ကြောင့် ဘုရားက ဆုံးဖြတ်ချက်နှင့် စကားကို ငါ့အား မပြောသနည်း။ ဘုရား၏ အမှုတော် အဆုံးမသတ်သေးပါ။ ထို့ကြောင့် မည်သည့်အရာကို ငါ လုပ်ဆောင်သင့်သနည်း။ မဖြစ်ပါ၊ အလားအလာများနှင့် ကံကြမ္မာအကြောင်းကို ဘုရားနှုတ်ကပတ်တော်များက အခြားမည်သည့်အရာ ပြောသည်ဆိုသည်နှင့် ထိုနှုတ်ကပတ်တော်များတွင် အခြား တိကျသော မည်သည့်ရှင်းပြချက်များ ပါဝင်သည်ဟူသည်တို့ကို ငါ ကြည့်ရမည်”ဟူ၍ ဖြစ်သည်။ ၎င်းတို့သည် ဘုရားနှုတ်ကပတ်တော်များကို အကြိမ်ကြိမ် ဆက်လက် ရှာဖွေကြသည်။ ၎င်းတို့၏ အလားအလာများနှင့် ကံကြမ္မာကို အကျိုးပြုသည့် တစ်စုံတစ်ရာကို ၎င်းတို့ ရှာတွေ့လျှင် ဝမ်းသာကြသည်။ ၎င်းတို့၏ အလားအလာများ၊ ကံကြမ္မာတို့နှင့် ကွဲလွဲသည့် တစ်စုံတစ်ရာကို ရှာတွေ့လျှင် ၎င်းတို့ ဝမ်းနည်းရသည်။ ဤပုံစံဖြင့် ဘုရားနှုတ်ကပတ်တော်များကို ဖတ်ရှုသည့် နှစ်ကာလများအတောအတွင်းတွင် ၎င်းတို့သည် ဘုရားနှုတ်ကပတ်တော်များကြောင့် ထပ်တလဲလဲ အပျက်သဘောဆောင်ကာ အားနည်းကြပြီး သူ၏ နှုတ်ကပတ်တော်များကြောင့်ပင် ထပ်တလဲလဲ အပြုသဘောဆောင်ကြသည်၊ ဝမ်းသာပြီး ပီတိဖြစ်ကြလေသည်။ သို့သော် မည်သည့် အခြေအနေများ သို့မဟုတ် စိတ်ခံစားမှုများ ၎င်းတို့တွင် ဖြစ်ပေါ်သည်ဖြစ်စေ၊ ၎င်းတို့၏ ခရီးပန်းတိုင်၊ အလားအလာများနှင့် ကံကြမ္မာတို့အား ၎င်းတို့စွဲလမ်းမှုကို တကယ် ရှောင်လွှဲ၍ မရနိုင်ကြသကဲ့သို့ လူအမျိုးအစား အမျိုးမျိုး၏ အဆုံးသတ်များနှင့် စပ်လျဉ်း၍ စူးစမ်းတွက်ချက်မှုများနှင့် ထုတ်ပြန်ချက်များကို ဆက်လက်ရှာဖွေကြသည်။ တိုတိုပြာရလျှင် ၎င်းတို့သည် ဘုရားနှုတ်ကပတ်တော်များကို တတ်နိုင်သမျှ အားထုတ်ကြိုးပမ်းကြလေသည်။ ဘုရားနှုတ်ကပတ်တော်များကို ၎င်းတို့ မည်မျှ ဖတ်ရှုသည်ဖြစ်စေ၊ ဘုရားနှုတ်ကပတ်တော်များ၌ သမ္မာတရား၊ လမ်းခရီးနှင့် အသက်ရှိသည်ကို ၎င်းတို့ သိကိုမသိကြပေ။ ဘုရားနှုတ်ကပတ်တော်များတွင် ၎င်းတို့၏ ခရီးပန်းတိုင်၊ လူသားမျိုးနွယ်၏ ခရီးပန်းတိုင်နှင့် ငရဲသွားခြင်းနှင့် မိမိတို့၏ ခရီးပန်းတိုင် ဆုံးရှုံးခြင်းကို ရှောင်ရှားဖို့ နည်းလမ်းတစ်ခုရှိသည်ကိုသာ ၎င်းတို့ သိကြသည်။ ထို့ကြောင့် ဤနည်းဖြင့် ဘုရားနှုတ်ကပတ်တော်များကို နှစ်ပေါင်းများစွာ ဖတ်ရှုပြီးနောက်တွင် မည်သည့်အရာကို ၎င်းတို့ ရရှိကြလေပြီနည်း။ မှန်ကန်သည့် အယူဝါဒများနှင့် ဝိညာဉ်ရေးရာ သဘောတရားများစွာအကြောင်းကို ၎င်းတို့ ပြောဆိုဆွေးနွေးနိုင်သော်လည်း ဘုရားနှုတ်ကပတ်တော်များကို ဘုရားသခင်ကို ဆန့်ကျင်ခြင်း၊ ဘုရားကို ပုန်ကန်ခြင်း၊ သမ္မာတရားကို မလိုက်စားခြင်း၊ သမ္မာတရားကို လုံးဝ မနှစ်သက်ခြင်းနှင့်ဆိုင်သော ၎င်းတို့၏ အနှစ်သာရနှင့် လုံးဝ ဆက်စပ်၍မရနိုင်ကြပေ။

အန္တိခရစ်များသည် နက်နဲသောအရာများနှင့်ပတ်သက်၍ ဘုရားသခင်၏ ဖွင့်ပြချက်များအတွက် ဘုရားနှုတ်ကပတ်တော်များကို မကြာခဏ သုတေသနပြုကာ ရှာဖွေကြသည်။ ၎င်းတို့သည် ဘုရားသခင်၏ နှုတ်ကပတ်တော်များထဲမှ ဝေါဟာရသစ်များ၊ အသစ်သောအရာများနှင့် ထုတ်ပြန်ချက်အသစ်များကို ရှာဖွေကြသည်။ သင်္ဘောသဖန်းပင်ဆိုသည်မှာ အဘယ်အရာဖြစ်သည်၊ ကလေးငယ် ယောက်ျားလေး ၁၄၄၀၀၀ ဦးရေဆိုသည့်အရာ၏ အဓိပ္ပာယ်မှာ အဘယ်အရာဖြစ်သည်ဆိုသည်နှင့် အောင်မြင်သူဆိုသည်မှာ အဘယ်အရာဖြစ်သည်ဆိုသည့်အရာအပြင် လူတို့က သိနားလည်မှုမရှိဘဲ နှစ်ပေါင်းများစွာ သုတေသနပြုခဲ့ကြသည့် ဗျာဒိတ်ကျမ်းထဲမှ အချို့သော ထုတ်ပြန်ချက်များနှင့် ဝေါဟာရများကဲ့သို့သော ဝိညာဉ်ရေးရာဆန်သည့်သူဖြစ်စေ၊ မဆန်သည့်သူဖြစ်စေ မည်သည့်လူတစ်ဦးမျှ မသိရှိသေးသည့် နက်နဲသောအရာအချို့ကိုပင် ရှာဖွေစူးစမ်းသည်အထိ လုပ်ဆောင်ကြလေသည်။ ၎င်းတို့သည် အထူးသဖြင့် ဤအရာများအပေါ် ကြိုးစားကြပြီး ဤစကားများတွင် လူတို့၏ ခရီးပန်းတိုင်များနှင့် ပတ်သက်သည့် ထုတ်ပြန်ချက်တစ်ခုတလေ ရှိမရှိဆိုသည်နှင့် လူတို့၏ ခရီးပန်းတိုင်များနှင့်ပတ်သက်၍ ရှင်းလင်းသော ရှင်းပြချက်များ တစ်ခုတလေ ရှိမရှိဟူသည်တို့ကို စဉ်ဆက်မပြတ် ရှာဖွေကာ သုတေသနပြုနေကြသည်။ သို့သော် ၎င်းတို့ မည်သို့ ကြိုးစားကြည့်ရှုကြသည်ဖြစ်စေ၊ ၎င်းတို့၏ အားထုတ်မှုများက အမြဲ အချည်းနှီးဖြစ်သည်။ ထို့ကြောင့် အန္တိခရစ်များက ဘုရားနှုတ်ကပတ်တော်များကို ဖတ်ရှုနေစဉ်၊ ဘုရားသခင်နောက် လိုက်နေပြီး အသင်းတော်တွင် အလိုက်သင့်နေကြစဉ်၊ ၎င်းတို့၏ အတွင်းစိတ်နှလုံးတွင် အမြဲ မသက်မသာခံစားကြသည်။ ၎င်းတို့က “ကောင်းချီးများကို ငါ ရရှိနိုင်သလော။ ငါ၏ အလားအလာများနှင့် ကံကြမ္မာသည် မည်သည့်အရာများသာ ဖြစ်သနည်း။ ဘုရား၏ နိုင်ငံတော်တွင် ငါ့အတွက် နေရာတစ်ခု ရှိလိမ့်မည်လော။ ငါ၏ ခရီးပန်းတိုင် ရောက်ရှိသည့်အခါ ငါသည် ကောင်းကင်ပြာကို ငေးကြည့်နေရလိမ့်မည်လော သို့မဟုတ် ငါသည် ကိုယ့်လက်ကိုယ်ပင် မမြင်နိုင်ရလောက်အောင် အလွန် မှောင်မိုက်သည့် လောကတစ်ခုတွင် ငါ ရောက်နေလိမ့်မည်လော။ ငါ၏ ခရီးပန်းတိုင်က မည်သည့်အရာသာ ဖြစ်သနည်း”ဟု မိမိတို့ဘာသာ မကြာခဏ မေးမိကြသည်။ ၎င်းတို့သည် မိမိတို့ စိတ်နှလုံးများတွင် ဤကဲ့သို့ မိမိတို့ကိုယ်ကို မေးခွန်း ဆက်ထုတ်နေမိချိန်တွင် ၎င်းတို့၏ စိတ်နှလုံး အတွင်းနက်နက်နေရာများ၌ ဘုရားသခင်ကိုလည်း တိတ်တဆိတ် မေးခွန်းထုတ်နေကြပေသည်။ “ကောင်းကင်နိုင်ငံတော်ထဲသို့ ဝင်ရောက်ရန် ငါ အရည်အချင်း ပြည့်မီသလော။ ငရဲသို့သွားခြင်းကို ငါ ရှောင်ရှားနိုင်သလော။ ဤကဲ့သို့ လိုက်စားခြင်းဖြင့် ကောင်းကင်နိုင်ငံထဲသို့ ငါ ဝင်ရောက်နိုင်သလော။ အနာဂတ် ကောင်းချီးများကို ငါ ရရှိနိုင်သလော။ နောင်ဘဝထဲသို့ ငါ ဝင်ရောက်လိမ့်မည်လော။ ဘုရား၏ သဘောထားမှာ အဘယ်နည်း။ ငါသည် စိတ်၏ ငြိမ်သက်ခြင်း ရှိနိုင်ရန်အလို့ငှာ ဘုရားက အဘယ်ကြောင့် ငါ့ကို ဤကိစ္စရပ်နှင့်ပတ်သက်သည့် မှန်ကန်တိကျပြီး သတ်သတ်မှတ်မှတ် ဖြစ်သော စကားတစ်ခွန်းကို မပြောသနည်း။ ငါ၏ အဆုံးသတ်က မည်သည့်အရာသာ ဖြစ်သနည်း”ဟူ၍ ဖြစ်သည်။ ဤသည်မှာ အန္တိခရစ်များက ဘုရားနှုတ်ကပတ်တော်များကို လေ့လာနေစဉ်တွင်လည်းကောင်း၊ အလိုက်သင့်နေကာ ရှေ့ဆက်ရုံမှတစ်ပါး ရွေးချယ်စရာ မရှိကြစဉ်တွင် ၎င်းတို့၏ အတွင်းစိတ်နှလုံးများ၌ စဉ်းစားကြသည့်အရာ ဖြစ်သည် မဟုတ်လော။ ဤသည်မှာ ၎င်းတို့၏ စိတ်နှလုံး အတွင်းနက်နက်နေရာများ၌ ၎င်းတို့၏ အလားအလာများနှင့် ကံကြမ္မာအပေါ် ၎င်းတို့ ထားရှိသည့် သဘောထားဖြစ်သည်။ ၎င်းတို့၏ စိတ်များသည် ဤအရာများထံသို့ စဉ်ဆက်မပြတ် အာရုံရောက်နေကြသည်၊ ၎င်းတို့က ယင်းတို့ကို အသည်းအသန် ဖမ်းဆုပ်ကာ လက်လွှတ်ဖို့ ငြင်းဆန်ကြလေသည်။

အန္တိခရစ်များက ဘုရားနှုတ်ကပတ်တော်ကို လေ့လာသည့်အခါ ၎င်းတို့၏ ခရီးပန်းတိုင်များကို ရှာဖွေခြင်းနှင့် နက်နဲသောအရာများကို သုတေသနပြုခြင်းတို့ထက် သာ၍ ၎င်းတို့ကို စိတ်ဝင်စားစေသည့်အရာတစ်ခု ရှိသည်။ ယင်းမှာ လူ့ဇာတိခံ ဘုရားသခင်က ကမ္ဘာမြေကို စွန့်ခွာမည့်အချိန်၊ သူ၏ သာသနာလုပ်ငန်းကို သူ အဆုံးသတ်မည့်အချိန်၊ သူ၏ ကြီးမားသော စီမံကိန်းကို အပြီးသတ်မည့်အချိန်၊ သူ၏ အမှုတော် အဆုံးသတ်မည့်အချိန်၊ သူ့နောက်လိုက်သည့်သူများက ကြီးမားသော ကောင်းချီးများကို မွေ့လျော်ခံစားပြီး သူ၏ စစ်မှန်သော ဇာတိအဖြစ်တော်ကို မြင်တွေ့မည့်အချိန် ဖြစ်သည်။ ဘုရားက ကမ္ဘာမြေအား စွန့်ခွာသည်ကို ၎င်းတို့ မြင်နိုင်ခြင်း ရှိမရှိဆိုသည်မှာလည်း ၎င်းတို့၏ အကြီးမားဆုံးသော အမှုထားစရာကိစ္စ ဖြစ်သည်။ ဘုရားသခင်၏ စီမံခန့်ခွဲမှု အစီအစဉ် အောင်မြင်စွာ အပြီးသတ်မည့် နေ့ရက်အပြင် ခရစ်တော်က မည်သည့်အချိန်တွင် ကမ္ဘာမြေကို စွန့်ခွာမည်၊ ခရစ်တော်က ကမ္ဘာမြေကို စွန့်ခွာမည့်အချိန်တွင် မည်သည့်ပုံစံရှိမည်၊ ယခု ၎င်းတို့ အသက်အရွယ်မည်မျှ ရှိသည်၊ ၁၀နှစ် သို့မဟုတ် အနှစ် ၂၀ တွင် ကမ္ဘာမြေကို ခရစ်တော် စွန့်ခွာခြင်းကို မြင်တွေ့ဖို့ ၎င်းတို့ အသက်ရှင်လိမ့်ဦးမည်လော၊ ထိုအရာကို ၎င်းတို့ တွေ့မြင်လျှင် မည်သည့်အရာ ဖြစ်ပျက်လိမ့်မည်ဆိုသည်နှင့် မမြင်တွေ့နိုင်လျှင် မည်သည့်အရာ ဖြစ်လိမ့်မည်ဟူသည်တို့အကြောင်းကို ၎င်းတို့က ပိုမိုအလေးထားကြသည်။ ယင်းတို့သည် ၎င်းတို့၏ စိတ်များထဲမှ တွက်ချက်မှုများဖြစ်သည်။ အချို့က “ငါသည် အသက် ၆၀ ရှိနှင့်လေပြီ။ ၁၀ နှစ်တွင် ကျွန်ုပ် အသက်ရှင်ဦးမည်ဆိုလျှင် ခရစ်တော်က ကမ္ဘာမြေအား စွန့်ခွာသည်ကို ငါ မြင်တွေ့နိုင်မည်ဖြစ်သော်လည်း ဘုရားအမှုတော်က ၁၀ နှစ်အတွင်း အဆုံးသတ်ချိန်တွင် ငါ သေဆုံးနှင့်ပြီးသားဖြစ်လျှင် ဘုရားကို ငါ၏ ယုံကြည်မှုက အဘယ်အဓိပ္ပာယ်ရှိသနည်း။ ဤခေတ်တွင် မွေးရန် ဘုရားက ငါ့ကို စီမံထားပြီးဖြစ်သော်လည်း ဘုရား၏ နောက်လိုက်တစ်ဦးဖြစ်သည့် ငါက ထိုသို့သော ကြီးမြတ်ကာ ကြီးမားသည့် ဖြစ်ရပ်တစ်ခုကို မျက်မြင်ကြုံတွေ့ရမည့် အခွင့်အရေးအား လွဲချော်သွားလျှင် ငါသည် ကောင်းချီးခံစားရသည့် လူတစ်ဦးအဖြစ် ယူဆ၍ မရနိုင်သကဲ့သို့ မည်သည့် ကြီးမားသည့် ကောင်းချီးမင်္ဂလာကိုမျှ ငါ ရရှိပြီးဖြစ်မည် မဟုတ်ပါ”ဟူ၍ မိမိတို့ဘာသာ တွေးဆကြလေသည်။ ထိုသို့သော အတွေးများသည် ၎င်းတို့ထဲတွင် မပျော်ရွှင်ခြင်းနှင့် မကျေနပ်မှုကို ဖြစ်ပေါ်စေသည်။ ၎င်းတို့သည် မည်သည့်အတိုင်းအတာအထိ မကျေနပ်မှုဖြစ်ကြသနည်း။ “ငါသည် အသက်အရွယ် အိုမင်းနှင့်နေပြီဖြစ်သည်။ ဘုရားက ကမ္ဘာမြေကို အဘယ်ကြောင့် မစွန့်ခွာသေးသနည်း။ ဘုရား၏အလုပ်သည် အဘယ်ကြောင့် ယခုတိုင် အဆုံးမသတ်သေးသနည်း။ ငါတို့သည် မည်သည့်အချိန်တွင် ဧဝံဂေလိဖြန့်ဝေခြင်းကို ပြီးစီးကြလိမ့်မည်နည်း။ ဘုရား၏ အမှုတော် အမြန်အဆုံးသတ်ပါစေ၊ ဘုရားက သူ၏ ကြီးမားသော စီမံကိန်းကို အမြန် အပြီးသတ်ပါစေ၊ ကပ်ဘေးများ အလျင်အမြန် ကျရောက်ပါစေ၊ ဘုရားက စာတန်ကို ဖျက်ဆီးပြီး ဆိုးယုတ်သည့် လူများကို အပြစ်ပေးဖို့ လောဆော်ပါစေ”ဟူ၍ ဖြစ်သည်။ ၎င်းတို့သည် မည်သည့်အရာကို လုပ်ဆောင်နေကြသနည်း။ ၎င်းတို့သည် ဘုရားသခင်အား ၎င်းတို့၏ အလိုဆန္ဒအတိုင်း ပြုမူဆောင်ရွက်စေဖို့ မျှော်လင့်လျက် ၎င်းတို့၏ ကိုယ်ရေးကိုယ်တာ အလိုဆန္ဒပေါ် အခြေခံ၍ ဘုရားသခင်အပေါ် တောင်းဆိုချက်များ ပြုလုပ်နေကြသည် မဟုတ်လော။ ၎င်းတို့၏ ဤအလိုဆန္ဒအတွင်းတွင် ၎င်းတို့၏ ကိုယ်ရေးကိုယ်တာ အကျိုးစီးပွားများ ပါရှိသည် မဟုတ်လော။ ၎င်းတို့၏ ကိုယ်ကျိုးစီးပွားများကြောင့်၊ ဘုရားသခင်က သူ၏ ကြီးမြတ်သော စီမံကိန်းကို အပြီးသတ်ဖို့အတွက်လည်းကောင်း၊ ဘေးဒုက္ခများ အလျင်အမြန် ကျရောက်ဖို့အတွက်လည်းကောင်း၊ ဘုရားသခင်က လောဆော်ပြီး ဆိုးယုတ်သူကို အပြစ်ပေးကာ ကောင်းသောသူကို ဆုချီးမြှင့်ရန်အတွက်လည်းကောင်း၊ ဘုရားသခင်က သူ၏ ဘုန်းအသရေကို ရရှိရန်အတွက်လည်းကောင်း ၎င်းတို့ စိတ်ထက်သန်စွာ မျှော်လင့်ကြသည်။ ၎င်းတို့၏ စိတ်နှလုံးများတွင် မည်သည့် ရည်ရွယ်ချက်များကို ထားရှိနေကြသနည်း။ ဘုရားသခင်၏ ရည်ရွယ်ချက်များကို ၎င်းတို့ ထည့်သွင်းစဉ်းစားနေကြသလော။ (မဟုတ်ပါ။) မည်သည့်အရာကို ၎င်းတို့ လုပ်ဆောင်နေကြသနည်း။ (၎င်းတို့သည် ကောင်းချီးများ ရရှိဖို့ မျှော်လင့်နေကြပေသည်။) ၎င်းတို့သည် ၎င်းတို့၏ ကိုယ်ပိုင် အကျိုးစီးပွားများနှင့် ခရီးပန်းတိုင်တို့အတွက် ဘုရားသခင်၏ စီမံခန့်ခွဲမှု အစီအစဉ်နှင့်ဆိုင်သည့် အမှုတော်ကို ၎င်းတို့၏ ခရီးပန်းတိုင်များအား ဗဟိုပြုစေချင်ကြသည်။ ဤသည်မှာ စက်ဆုပ်ဖွယ်ဖြစ်ပြီး အရှက်မဲ့သည် မဟုတ်လော။ ကိစ္စရပ်များအားလုံးတွင် အန္တိခရစ်များ ပြသသည့် အနှစ်သာရမှာ အဘယ်နည်း။ အခြားအရာအားလုံးထက် မိမိတို့၏ အကျိုးစီးပွားများကို ဦးစားပေးခြင်းနှင့် ၎င်းတို့၏ အကျိုးစီးပွားများကို အထွတ်အထိပ် စိုးမိုးခွင့်ခြင်း ဖြစ်သည်။ ဆိုလိုသည်မှာ ၎င်းတို့သည် ဘုရားသခင်၏ စီမံအုပ်ချုပ်မှုအစီအစဉ်ပင် ဖြစ်စေကာမူ မည်သည့်အရာကိုမျှ မိမိတို့၏ အကျိုးစီးပွားနှင့် ဆန့်ကျင်ကွဲလွဲခွင့် မပေးကြပေ။ ဘုရားသခင်၏ အမှုတော် အဆုံးသတ်မည့်အချိန်တွင်၊ သူ၏ ကြီးမြတ်သည့် စီမံကိန်း အပြီးသတ်မည့်အချိန်တွင်၊ ဘုန်းအသရေကို သူ ရရှိမည့်အချိန်နှင့် လူသားမျိုးနွယ်ကို သူ ဖျက်ဆီးမည့်အချိန်တွင် ဤအရာအားလုံးက ၎င်းတို့၏ အကျိုးစီးပွားများနှင့် ခရီးပန်းတိုင်များကို ဗဟိုပြုရမည်ဖြစ်သည်။ ဤအရာအားလုံးက ၎င်းတို့၏ ခရီးပန်းတိုင်များနှင့် ဆက်စပ်မှုရှိရမည် ဖြစ်သည်။ သို့မဟုတ်လျှင် ဘုရားသခင်ကို ၎င်းတို့ ငြင်းပယ်ကြလိမ့်မည်၊ သူ့ကို၎င်းတို့ ယုံကြည်လက်ခံမှုအား စွန့်လွှတ်ကြလိမ့်မည်ဖြစ်ပြီး သူ့ကို ကျိန်ပင်ကျိန်ဆဲကြလိမ့်မည်။

အန္တိခရစ်များက ဘုရားနှုတ်ကပတ်တော်အား သဘောထားပုံနှင့်ဆိုင်သည့် အဓိက သရုပ်သကန်များထဲမှ တစ်ခုမှာ လေ့လာခြင်းဖြစ်သည်။ ဤသည်မှာ မယုံကြည်သူသဖွယ် ဖြစ်သောသူတစ်ဦးက ဘုရားနှုတ်ကပတ်တော်ကို ပြုမူသည့် သဘောထားဖြစ်သည်။ ၎င်းတို့ လေ့လာသည်မှာ မည်သည့်အရာနည်း။ ၎င်းတို့သည် သမ္မာတရားကိုဖြစ်စေ၊ လူသားမျိုးနွယ်အပေါ် ဘုရားသခင် တောင်းဆိုသည့်အရာကိုဖြစ်စေ၊ လူသားမျိုးနွယ်ကို ဖော်ထုတ်သည့် သူ၏ နှုတ်ကပတ်တော်များကိုဖြစ်စေ၊ လူသားမျိုးနွယ်ကို တရားစီရင်သည့် သူ၏ နှုတ်ကပတ်တော်များကိုဖြစ်စေ မလေ့လာကြသကဲ့သို့ သူ၏ ရည်ရွယ်ချက်များကို ဧကန်မုချ မလေ့လာကြပေ။ ၎င်းတို့က ၎င်းတို့ကိုယ်ပိုင် အလားအလာများနှင့် ကံကြမ္မာကို လေ့လာကြသည်။ ဘုရားနှုတ်ကပတ်တော်၏ မည်သည့်အပိုင်းကို ၎င်းတို့ ဖတ်ရှုသည်ဖြစ်စေ ထိုအရာက ၎င်းတို့ အလေးထားဆုံးသောအရာဖြစ်သည့် ၎င်းတို့၏ အလားအလာများ၊ ကံကြမ္မာနှင့် ဆက်စပ်သည့် စကားများပါရှိလျှင် ထိုသို့သော အပိုင်းများကို ဂရုတစိုက် လေ့လာကြလိမ့်မည်ဖြစ်ပြီး အရေးကြီးသောအရာအဖြစ် မှတ်သားကြလိမ့်မည်။ ဥပမာအနေဖြင့် ၎င်းတို့ကဲ့သို့သော လူများကို ဖော်ထုတ်ကာ စိစစ်သည့် ဘုရားနှုတ်ကပတ်တော်များ သို့မဟုတ် ၎င်းတို့ကဲ့သို့သော လူများနှင့်ပတ်သက်သည့် သရုပ်ဖော်ချက်များ သို့မဟုတ် စကားများကို ၎င်းတို့ မြင်သည့်အခါ ထိုသို့သော စကားများကို ဒုက္ခခံ၍ လေ့လာကြလိမ့်မည်ဖြစ်ပြီး အကြိမ်ကြိမ် ဖတ်ရှုကြလိမ့်မည်။ မည်သည့်အရာကို ၎င်းတို့ ရှာဖွေနေကြသနည်း။ ဘုရားသခင်၏ ရည်ရွယ်ချက်များကို မည်သို့ ၎င်းတို့ နားလည်ပြီး လက်တွေ့လုပ်ဆောင်မှု စည်းမျဉ်းများ ရှာတွေ့နိုင်သည်ဟူသည်ကို သိမြင်ရန် ၎င်းတို့ ကြည့်ရှုကြသလော။ ဘုရားနှုတ်ကပတ်တော်မှတစ်ဆင့် မိမိတို့ကိုယ်ကို မည်သို့ နားလည်နိုင်သည်ကို သိမြင်ရန် ကြည့်ရှုနေကြသလော။ မဟုတ်ပေ။ ၎င်းတို့အနေဖြင့် ဤစကားများနောက်ကွယ်ရှိ ၎င်းတို့ကဲ့သို့သော လူများအပေါ် ဘုရားသခင် ထားရှိသည့် သဘောထား၊ ဘုရားသခင်က ၎င်းတို့ကို မုန်းတီးကာ စက်ဆုပ်ခြင်းရှိမရှိ၊ သို့မဟုတ် ၎င်းတို့ကို သူ ကယ်တင်လိမ့်မည်လောဟူသည်တို့ကို ရှင်းလင်းစွာ သိမြင်နိုင်ရန် သွယ်ဝိုက်ညွှန်းဆိုချက်များကို သုံးသပ်ဖော်ထုတ်ဖို့ ကြိုးစားကြပေသည်။ ၎င်းတို့သည် ဤဘုရားနှုတ်ကပတ်တော်များ၏ အကြောင်းအရာသာမက၊ ဘုရားနှုတ်ကပတ်တော်များ၏ သဘောသွားနှင့် သဘောထားအပြင် ယင်းတို့နောက်ကွယ်ရှိ အတွေးအခေါ်များကိုလည်း စေ့စေ့စပ်စပ် ကြည့်ရှုစစ်ဆေးကြသည်။ ၎င်းတို့အနေဖြင့် မိမိတို့ကဲ့သို့သောသူများ၏ ခရီးဆုံးပန်းတိုင်နှင့် ဆက်စပ်သည့် ဘုရားနှုတ်ကပတ်တော်၏ အစိတ်အပိုင်းများအားလုံးကို စုစည်းခဲ့ပြီး ၎င်းတို့အပေါ် ဘုရားသခင်၏ သဘောထားမှာ ပစ်ပစ်ခါခါငြင်းခြင်းဖြစ်ပြီး ကယ်တင်ခြင်း မဟုတ်သည်ကို သိရပြီးသည်နှင့်တစ်ပြိုင်နက် သူ့ကို ယုံကြည်မှုအပေါ် ၎င်းတို့၏ သဘောထားက ၈၀ မှ ၉၀ ရာခိုင်နှုန်းအထိ ချက်ချင်းပင် အေးစက်သွားလိမ့်မည်။ မယုံကြည်မှုက ၎င်းတို့၏ စိတ်နှလုံးများတွင် ချက်ချင်း ဖြစ်ပေါ်လိမ့်မည်ဖြစ်ပြီး ၎င်းတို့၏ သဘောထားက လုံးလုံးလျားလျား ပြောင်းလဲမှုတစ်ခုကို ကြုံရလိမ့်မည်။ ဤအပြောင်းအလဲ၏ အတိုင်းအတာမှာ အဘယ်နည်း။ ၎င်းတို့သည် မိမိတို့ ထမ်းဆောင်ရန် စီစဉ်ထားသည့် တာဝန်များကို ထမ်းဆောင်လိုစိတ် ရှိတော့မည်မဟုတ် သို့မဟုတ် ၎င်းတို့ စွန့်လွှတ်ရန် စီစဉ်ထားသည့်အရာကို စွန့်လွှတ်လိုစိတ်ရှိတော့မည် မဟုတ်ပေ။ ၎င်းတို့အနေဖြင့် မိမိတို့၏ မိသားစုများကို မူလက ဧဝံဂေလိတရား ဟောကြားဖို့ အလိုရှိခဲ့ကြသော်လည်း ၎င်းတို့ မယုံကြည်ကြတော့သည့်အတွက် ယင်းကို လုပ်ဆောင်မည်မဟုတ်တော့သကဲ့သို့ ၎င်းတို့၏ မိသားစုများတွင်ရှိသည့် လူတို့၏ ယုံကြည်ခြင်းသည်လည်း မေးခွန်းထုတ်စရာ မရှိပေ။ အကျဉ်းရုံးဖော်ပြရလျှင် ၎င်းတို့၏ မူလ အစီအစဉ်များအားလုံးကို ၎င်းတို့ ဖျက်ဆီးကာ လက်လျှော့ကြလိမ့်မည် ဖြစ်သည်။ ဤသည်မှာ ဘုရားနှုတ်ကပတ်တော်အပေါ် အန္တိခရစ်များထားရှိသည့် အခြေခံကျသော သဘောထားတစ်ခု ဖြစ်သည် မဟုတ်လော။ ဘုရားနှုတ်ကပတ်တော်ကို လေ့လာရာတွင် ၎င်းတို့၏ ရည်မှန်းချက်မှာ ၎င်းတို့အနေဖြင့် သူ၏ ရည်ရွယ်ချက်များကို နားလည်နိုင်ရန်နှင့် သူ့ကို သစ္စာစောင့်သိနိုင်ရန်အလို့ငှာ သမ္မာတရားကို လိုက်စားရန် မဟုတ်သကဲ့သို့ သမ္မာတရားကို လက်တွေ့လုပ်ဆောင်ခြင်း စည်းမျဉ်းများ ရှာရန် မဟုတ်ပေ။ ၎င်းတို့၏ ရည်မှန်းချက်မှာ ၎င်းတို့ကဲ့သို့သော လူတို့အတွက် အဆုံးသတ်များနှင့် ခရီးပန်းတိုင်များအား ဘုရားသခင် ဆုံးဖြတ်ပုံနှင့်ပတ်သက်သည့် တိကျသော ထုတ်ပြန်ချက်တစ်ခုကို ရှာတွေ့ရန် ဖြစ်သည်။ ၎င်းတို့သည် မျှော်လင့်ချက် ရေးရေးမျှ ရှာတွေ့ကြသည့်အခါ ထိုမျှော်လင့်ချက်ကို တင်းတင်းကျပ်ကျပ် ဖက်တွယ်ထားလိမ့်မည်။ ဤမျှော်လင့်ချက် ရေးရေးအတွက် အရာရာကို ၎င်းတို့ စွန့်လွှတ်နိုင်ကြလိမ့်မည်ဖြစ်ပြီး ၎င်းတို့၏ သဘောထားက အလွန်ကြီးမားစွာ ပြောင်းလဲသွားလိမ့်မည်။ သို့သော် ၎င်းတို့ ကောင်းချီးများရရှိမည့် မျှော်လင့်ချက်အားလုံး တစ်စစီပြိုကွဲသွားသည့်အခါ ၎င်းတို့၏ ယုံကြည်မှု ပျောက်ဆုံးကာ သစ္စာဖောက်ခြင်းကို ကျင့်သုံးရပြီး ဘုရားသခင်ကို ၎င်းတို့၏ စိတ်နှလုံးများတွင် ကျိန်ပင်ကျိန်ဆဲကြသည့်အဆင့်ထိ ၎င်းတို့၏ သဘောထားက တစ်ဖန် အလွန်ကြီးမားစွာ ပြောင်းလဲလိမ့်မည်။ ဤသည်တို့မှာ အန္တိခရစ်တို့၏ သရုပ်သကန်များ ဖြစ်သည်။

အန္တိခရစ်များက ဘုရားနှုတ်ကပတ်တော်များကို လေ့လာနေစဉ် ကိုယ်ရေးကိုယ်တာ အကျိုးအမြတ်ကို ရှာဖွေဖို့ ထိုနှုတ်ကပတ်တော်များကို အသုံးပြုလိမ့်မည်မှာလည်း အမှန်ပင်ဖြစ်၏။ မည်သည့် အကျိုးအမြတ်မျိုးနည်း။ ဘုရားနှုတ်ကပတ်တော်များကို လေ့လာနေစဉ် ဘုရားသခင်၏ စကားနှင့်ဆိုင်သည့် စည်းမျဉ်းများက မည်သည့်အရာများ ဖြစ်သည်၊ လူတို့ကို ပြုပြင်သည့်အခါ သူ၏ လေသံက မည်သည့်အရာ ဖြစ်သည်၊ လူသားမျိုးနွယ်ကို ဖော်ထုတ်သည့်အခါ သူ၏ စကားပြောဆိုပုံက မည်သည့်အရာဖြစ်သည်၊ လူတို့ကို သူ မည်သို့ နှစ်သိမ့်ကာ တိုက်တွန်းသည်၊ မည်သည့် နည်းလမ်းများ သူ အသုံးပြုသည်ဆိုသည်နှင့် မည်သည့် ဉာဏ်ပညာ သူ့တွင် ရှိသည်ဟူသည်တို့ကို ၎င်းတို့က အကျဉ်းချုပ်သည်။ ဘုရားသခင် စကားပြောပြီး အမှုပြုပုံကို သင်ယူခြင်းနှင့် အတုခိုးခြင်းတွင် အန္တိခရစ်များက ကျွမ်းကျင်ကြသည်။ တစ်ချိန်တည်းတွင် ၎င်းတို့သည် အခြားသူများကို စကားပြောကာ မိတ်သဟာယပြုရန် ဘုရားသခင် ပြောလေ့ပြောထရှိသည့် စကားများကိုလည်း အသုံးပြုကြသည်။ ဘုရားနှုတ်ကပတ်တော်များကို လေ့လာစဉ်တွင် ၎င်းတို့သည် အမျိုးမျိုးသော သမ္မာတရားများပါရှိသည့် နှုတ်ကပတ်တော်များဖြင့် မိမိတို့ကိုယ်ကိုလည်း ပြင်ဆင်ကြသည်၊ ယင်းတို့ကို မိမိတို့ကိုယ်ပိုင် အမှုအရာများအဖြစ် ပြောင်းလဲစေကြသည်၊ အလုပ်လုပ်ရန်နှင့် အရင်းအနှီးကို စုဆောင်းရန် ဤဘုရားနှုတ်ကပတ်တော်များကို အသုံးပြုကြလေသည်။ ဤအရင်းအနှီးက မည်သည့်အရာကို ရည်ညွှန်းသနည်း။ ဥပမာအနေဖြင့် စုဝေးပွဲတစ်ခုတွင် မှန်ကန်သည့် စကားများနှင့် အယူဝါဒများကို ပြောဆိုနိုင်စွမ်းရှိသူ မည်သူမဆို၊ ပိုများသည့် ဘုရားနှုတ်ကပတ်တော်များကို အလွတ်ကျက်နိုင်သူ၊ ပိုများသည့် ဘုရားနှုတ်ကပတ်တော်များကို ကိုးကားနိုင်ပြီး ပိုများသည့် ဘုရားနှုတ်ကပတ်တော်များကို ရှင်းပြနိုင်သူမည်သူမဆိုသည် အသင်းတော်တွင် ကယ်တင်ခြင်း အရရှိနိုင်ဆုံးသော လူစားမျိုး ဖြစ်ကောင်းဖြစ်နိုင်သည်ဟု ၎င်းတို့က ယုံကြည်ကြသည်^(က)။ အန္တိခရစ်များက မည်သည့်အရာကို လုပ်ဆောင်သည်ဖြစ်စေ၊ ထိုအရာသည် ၎င်းတို့၏ အလားအလာများ၊ ကံကြမ္မာတို့နှင့် ဆက်စပ်ပေသည်။ ၎င်းတို့သည် ဘုရားနှုတ်ကပတ်တော်များကို သမ္မာတရားအဖြစ် ရိုးရှင်းစွာ လုံးဝ လက်တွေ့လုပ်ဆောင်ကြလိမ့်မည် မဟုတ်သကဲ့သို့ ဘုရားနှုတ်ကပတ်တော်များကို လက်တွေ့လုပ်ဆောင်ခြင်းအတွက် ဆင်းရဲဒုက္ခခံကြလိမ့်မည် မဟုတ်၊ သို့မဟုတ် အဖိုးအခပေးကြလိမ့်မည် မဟုတ်ပေ။ ထို့ထက် ၎င်းတို့သည် လူတို့ကို အထင်အမြင်မှားစေရန် ဘုရားနှုတ်ကပတ်တော်များကို အသုံးပြုကြလိမ့်မည်။ ၎င်းတို့၏ ကိုယ်ပိုင် ဂုဏ်သတင်းကို မြှင့်တင်ရန် အသုံးပြုကြလိမ့်မည်ဖြစ်ပြီး ၎င်းတို့၏ ကယ်တင်ခြင်းအတွက် လုံလောက်သော အခြေအနေများကို ပြင်ဆင်ရန် အသုံးပြုကြလိမ့်မည်။ ထို့ကြောင့် ဘုရားနှုတ်ကပတ်တော်ကို အန္တိခရစ်များ သဘောထားပုံ၏ အနှစ်သာရမှာ မည်သည့်အချိန်တွင်ဖြစ်စေ ၎င်းတို့က ဘုရားနှုတ်ကပတ်တော်ကို သမ္မာတရားအဖြစ် သို့မဟုတ် လူတို့ လိုက်လျှောက်သင့်သည့် နည်းလမ်းတစ်ခုအဖြစ် လုံးဝ သဘောမထားကြခြင်း ဖြစ်သည်။ အန္တိခရစ်များက ဘုရားနှုတ်ကပတ်တော်များကို ထိန်းသိမ်းပြီး နေ့စဉ် ဖတ်ရှုကြသော်လည်း၊ သူ၏ နှုတ်ကပတ်တော်များ ဖတ်ရွတ်ခြင်းများကို နားထောင်ကြသော်လည်း ကိစ္စတစ်ခုက သေချာ၏။ ဘုရားနှုတ်ကပတ်တော်များကို ၎င်းတို့ လက်တွေ့မလုပ်ဆောင်ကြပေ။ သူ၏ နှုတ်ကပတ်တော်များကို လက်တွေ့လုပ်ဆောင်ဖို့ အချိန်ရောက်လာသည့်အခါတိုင်းတွင် ၎င်းတို့ စစ်မှန်ရိုးသားမှု ပျောက်ကွယ်သွားသည်။ ၎င်းတို့၏ ကိုယ်ပိုင် အလားအလာများနှင့် ကံကြမ္မာအတွက်သာ ၎င်းတို့က ကြံစည်ကြသည်။ အပြင်ပန်းတွင် ဘုရားနှုတ်ကပတ်တော်များကို ချစ်ပြီး တမ်းတသည့် အသွင်အပြင်ကို ဆောင်ကြသည်။ သို့သော် လက်တွေ့တွင် ဘုရားနှုတ်ကပတ်တော်များကို နေ့စဉ် ဖတ်ရှုခြင်းနှင့် အဆင့်ဆင့်ဆည်းပူးခြင်းတွင် ၎င်းတို့၏ ရည်မှန်းချက်မှာ မိမိတို့၏ ကယ်တင်ခြင်းအတွက် အခြေအနေများ စွမ်းဆောင်ရရှိရန် ဖြစ်သည်။ အပြန်အလှန်အနေဖြင့် ဘုရားသခင်ကို အကောင်းမြင်စေခြင်းနှင့်ဆိုင်သည့် မျှော်လင့်ချက်များဖြင့် ဤအရာကို ၎င်းတို့ လုပ်ဆောင်ကြသည်။ လူတို့၏စိတ်နှလုံးများကို ဘုရားသခင် စေ့စေ့စပ်စပ် ကြည့်ရှုစစ်ဆေးသည်ကို ၎င်းတို့ မယုံကြည်ကြ။ လူတို့က အပြင်ပန်း သွင်ပြင်များကိုသာ ကြည့်ကြသောကြောင့် ဘုရားသခင်ကလည်း အပြင်ပန်း သွင်ပြင်များကိုသာ ကြည့်ရမည်ဟုသာ ၎င်းတို့ သိကြသည်။ ထို့ကြောင့် ဤကိစ္စရပ်များတွင် လိမ်လည်လှည့်စားမှုကို ကျင့်သုံးလျက် ၎င်းတို့က ဟန်ဆောင်မှုနှင့် လှည့်ဖြားမှုတို့ ဆောင်ရွက်ကြသည်။ ၎င်းတို့က “ဤအရာကို အပြင်ပန်းဖြင့်သာ ငါ လုပ်ဆောင်ရန် လိုအပ်သည်။ ငါ့စိတ်နှလုံးတွင် မည်သည့်အရာ စဉ်းစားသည်ဟူသည်မှာ အရေးမကြီးပါ။ လူတို့က ထိုအရာကို မမြင်နိုင်သကဲ့သို့ ဘုရားကလည်း မမြင်နိုင်ပါ။ အမှန်တွင် ဘုရားနှုတ်ကပတ်တော်များကို ငါအဘယ်သို့ ဖတ်ရှုသည်ဖြစ်စေ၊ စစ်မှန်သည့် ဖန်ဆင်းခံတစ်မျိုးမျိုး ဖြစ်လာဖို့အတွက် ထိုအရာကို ငါ လုပ်ဆောင်နေခြင်း မဟုတ်ပါ။ ငါ၏ အလားအလာများနှင့် ကံကြမ္မာ ပါဝင်ပတ်သက်ခြင်းမရှိလျှင် ဤအခက်အခဲကို ငါ ခါးစည်းခံမည် မဟုတ်သကဲ့သို့ ဤမကျေမချမ်းမှုကို ငါ သည်းခံမည်မဟုတ်ပါ”ဟူ၍ စဉ်းစားကြသည်။ ၎င်းတို့၏ စိတ်များတွင် ဘုရားနှုတ်ကပတ်တော်များက မည်သို့ ကောင်းမွန်ပုံရသည်ဖြစ်စေ ယင်းတို့ကို အမှန်တကယ် နားလည်သဘောပေါက်၍မရနိုင်သကဲ့သို့ လူတို့က ယင်းတို့ကို တကယ် လက်တွေ့လုပ်ဆောင်နိုင်မည်မဟုတ်ချေ။ လက်တစ်ဆုပ်စာ လူတို့က ဘုရားနှုတ်ကပတ်တော်များကို အနည်းငယ် အသက်ရှင်နေထိုင်လျှင်ပင် ထိုသို့ လုပ်ဆောင်ရခြင်းမှာ ၎င်းတို့၏ကိုယ်ပိုင် ရည်မှန်းချက်များအတွက်လည်း ဖြစ်ရမည်။ ဘာသာတရားမရှိသူတို့က “အခမဲ့ နေ့လည်စာဟူသကဲ့သို့သော အရာမျိုး မရှိပါ”ဟု ပြောကြသည့်အတိုင်းပင်ဖြစ်သည်။ ၎င်းတို့က “ဘုရားကို ငါတို့၏ ယုံကြည်မှုအတွက် သူ၏ နှုတ်ကပတ်တော်များကို နေ့စဉ် ဖတ်ရှု၊ နားထောင်ရင်း၊ သူ၏ နှုတ်ကပတ်တော်များအတိုင်း အသက်ရှင်ရင်း ထိုသို့သော အခက်အခဲများကို ငါတို့ ခါးစည်းခံကြသည်။ ထိုအရာအားလုံးက အဘယ်အတွက်ဖြစ်သနည်း။ ထိုရည်ရွယ်ချက်တစ်ခုသာ ဖြစ်သည် မဟုတ်လော။ ထိုအရာက ၎င်းတို့၏ အလားအလားများနှင့် ကံကြမ္မာအတွက်ချည်းသာ ဖြစ်သည်ကို လူတိုင်းက ၎င်းတို့ စိတ်နှလုံးများတွင် ကောင်းစွာ သိရှိကြသည်။ သို့မဟုတ်လျှင် ဤနေရာတွင် ဆင်းရဲဒုက္ခခံဖို့သက်သက်အတွက် လောကီကို လိုက်စားခြင်းနှင့်ဆိုင်သည့် နှစ်သက်ပျော်ရွှင်ဖွယ်ကောင်းသော အချိန်ကာလများကို ငါတို့ အဘယ်ကြောင့် စွန့်လွှတ်ကြမည်နည်း”ဟု မိမိတို့ဘာသာ တွေးကြသည်။ ဤကိစ္စရပ်တွင် မည်သည့် အမှန်တရားကို ၎င်းတို့ ငြင်းပယ်လေပြီနည်း။ ဘုရားနှုတ်ကပတ်တော်က သမ္မာတရားဖြစ်ပြီး သမ္မာတရားက လူတို့ကို ကယ်တင်နိုင်သည်၊ လူတို့ကို ပြောင်းလဲစေနိုင်ပြီး ၎င်းတို့၏ ဖောက်ပြန်ပျက်စီးသော စိတ်သဘောထားများကို ဖယ်ရှားဖို့ ကူညီနိုင်သည်။ ဤသည်မှာ ဘုရားနှုတ်ကပတ်တော်က ဖြစ်စေနိုင်သည့် ရလဒ် မဟုတ်လော။ (ဟုတ်ပါသည်။) အန္တိခရစ်များက ဤအမှန်တရားကို ဝန်ခံကြသလော။ ၎င်းတို့က “ဘုရားနှုတ်ကပတ်တော်များက လူတို့ကို ကယ်တင်နိုင်သည်ဟု လူတိုင်းက အခိုင်အမာပြောကြသော်လည်း မည်သူ့ကို ထိုအရာက ကယ်တင်ပြီနည်း။ ထိုအရာ ဖြစ်ပျက်သည်ကို မည်သူ မြင်ပြီနည်း။ ဤအရာကို ငါ မယုံကြည်ပါ”ဟု ပြောလျက် ငြင်းပယ်ကြသည်။ ဘုရားနှုတ်ကပတ်တော်က လူတို့ကို ကယ်တင်နိုင်သည်၊ လူတို့ကို ပြောင်းလဲစေနိုင်ပြီး လူတို့ကို စာတန်၏ ဖောက်ပြန်ပျက်စီးသော စိတ်သဘောထားများမှ ရုန်းထွက်လွတ်မြောက်ဖို့ ကူညီနိုင်သည်ဟု အဘယ်ကြောင့် ပြောထားသနည်း။ အဘယ်ကြောင့်ဆိုသော် ဘုရားနှုတ်ကပတ်တော်က သမ္မာတရားဖြစ်ပြီး လူတို့၏ အသက်ဖြစ်နိုင်သောကြောင့် ဖြစ်သည်။ လူတို့က ဘုရားနှုတ်ကပတ်တော်ကို မိမိတို့၏ အသက်အဖြစ် ရှိကြသည့်အခါ ၎င်းတို့ ကယ်တင်ခံရနိုင်ပေသည်။ ၎င်းတို့သည် ကယ်တင်ခံရသောသူများ ဖြစ်လာကြသည်။ အန္တိခရစ်များက ဤအချက်ကို အသိအမှတ်မပြုကြပေ။ လူတို့က ယခုရှိသည့်နေရာတွင် ရောက်ရှိကြခြင်းမှာ ကောင်းချီးမင်္ဂလာများနှင့် ကောင်းမွန်သော ခရီးပန်းတိုင်တစ်ခု ရရှိခြင်းအတွက်သာ ဖြစ်သည်ဟူ၍လည်းကောင်း၊ ဤသည်မှာ ဘုရားအိမ်တော်တွင် လူတို့က မိမိတို့တာဝန်ကို ထမ်းဆောင်ကြသည့် တစ်ခုတည်းသော အကြောင်းရင်း ဖြစ်သည်ဟူ၍လည်းကောင်း ၎င်းတို့က ယုံကြည်ကြလေသည်။ ဘုရားနှုတ်ကပတ်တော်၏ အသီးအပွင့်များကို ၎င်းတို့က ငြင်းပယ်ကြသည်။ လူတို့၌ သမ္မာတရားက စွမ်းဆောင်ရရှိသည့် ရလဒ်များကို ၎င်းတို့က ငြင်းပယ်ကြပြီး သမ္မာတရားက လူတို့ကို သိမ်းပိုက်နိုင်သည်၊ လူတို့ကို ပြောင်းလဲစေနိုင်ပြီး ကယ်တင်နိုင်သည်ကို ငြင်းပယ်ကြသည်။ လူတို့က မိမိတို့ကိုယ်ပိုင် အလားအလာများနှင့် ကံကြမ္မာအတွက် ပူပန်မှုကြောင့်သာလည်းကောင်း၊ လိုက်စားခြင်းဖြင့်သာလည်းကောင်း ဘုရားသခင်နောက်လိုက်ကြသည်ဟု ၎င်းတို့က ယုံကြည်ကြသည်။ ဘုရားနှုတ်ကပတ်တော်က လူတို့ကို ပြောင်းလဲစေနိုင်ကြောင်း၊ ၎င်းတို့အား ဘုရားသခင်အပေါ် သစ္စာစောင့်သိစေနိုင်ကြောင်း၊ ၎င်းတို့အား ဘုရားသခင်ကို အကြွင်းမဲ့ ကျိုးနွံနာခံစေနိုင်ကြောင်း သို့မဟုတ် ဘုရားအိမ်တော်၌ ဖန်ဆင်းခံများအဖြစ် မိမိတို့၏ တာဝန်များကို ထမ်းဆောင်စေနိုင်ကြောင်း ၎င်းတို့က မယုံကြည်ကြပေ။ ဤအရာတစ်ခုကိုမျှ ၎င်းတို့ မယုံကြည်ကြပေ။ ထို့ကြောင့် မိမိတို့၏ အကျိုးစီးပွားများကို ဦးစားပေးသည့် အန္တိခရစ်များသည် မိမိတို့ကိုယ်တိုင် သမ္မာတရားကို မလိုက်စားကြပေ။ ဘုရားနှုတ်ကပတ်တော်များကို လေလုံးတစ်မျိုး၊ ထုတ်ပြန်ချက်တစ်မျိုးအဖြစ် သဘောထားကြစဉ်တွင် ဤဘုရားနှုတ်ကပတ်တော်များက လူတို့အား ကယ်တင်နိုင်သည်ကို ၎င်းတို့ မယုံကြည်ကြပေ။ ရိုးသားစစ်မှန်ပြီး ဘုရားသခင်ကို သစ္စာစောင့်သိသော သူအားလုံးက အတုအယောင်ဖြစ်ပြီး ၎င်းတို့ကိုယ်ပိုင် အကျိုးစီးပွားများ ပါဝင်ပတ်သက်နေသည်ဟု ၎င်းတို့က ယုံကြည်ကြသည်။ ဘုရားနှုတ်ကပတ်တော်မည်မျှကို ၎င်းတို့ ကြားသည်ဖြစ်စေ၊ ဘုရားသခင်၏ တရားဒေသနာ မည်မျှကို ၎င်းတို့ ကြားရသည်ဖြစ်စေ၊ ၎င်းတို့၏ စိတ်နှလုံးများ၌ နောက်ဆုံးတွင် ရှိနေသည့်အရာမှာ အလားအလာများနှင့် ကံကြမ္မာတည်းဟူသော စကားနှစ်လုံးသာ ဖြစ်သည်။ ဆိုလိုသည်မှာ ဘုရားနှုတ်ကပတ်တော်များ၊ ဘုရားသခင်၏ အမှုတော်နှင့် ဘုရားသခင်၏ စီမံခန့်ခွဲမှု အစီအစဉ်တို့က လူတို့အတွက် ကောင်းမွန်သော အလားအလာများနှင့် ကံကြမ္မာကို ဖြစ်စေနိုင်ပြီး ၎င်းတို့အတွက် ကောင်းမွန်သော ခရီးပန်းတိုင်တစ်ခု ဖြစ်စေနိုင်သည်ဟူ၍ ဖြစ်၏။ အန္တိခရစ်များအတွက် ဤသည်မှာ အစစ်မှန်ဆုံးသောအရာဖြစ်သည်၊ အထွတ်အထိပ်အဖြစ်ဆုံးသော သမ္မာတရားဖြစ်သည်။ ဤအရာအတွက် မဟုတ်ခဲ့လျှင် ပထမဆုံးအနေဖြင့် ဘုရားသခင်ကို ၎င်းတို့ ယုံကြည်ကြမည်မဟုတ်။ ဒုတိယအနေဖြင့် ဘုရားအိမ်တော်၌နေရန် ထိုသို့သော နာကြည်းချက်ကို ၎င်းတို့ သည်းညည်းခံမည်မဟုတ်။ တတိယအနေဖြင့် ဘုရားအိမ်တော်၌ မည်သည့်တာဝန်ကိုမျှ ၎င်းတို့ ထမ်းဆောင်မည်မဟုတ်။ စတုတ္ထအနေဖြင့် ဘုရားအိမ်တော်၌ မည်သည့် ဆင်းရဲဒုက္ခများကိုမျှ ၎င်းတို့ ခါးစည်းခံမည်မဟုတ်။ ပြီးလျှင် ပဉ္စမအနေဖြင့် ချမ်းသာကြွယ်ဝမှုနှင့် ဂုဏ်သရေတွင် မွေ့လျော်ရန်၊ လောကီကို လိုက်စားရန်၊ ကျော်ကြားမှုနှင့် အကျိုးအမြတ်ကို လိုက်စားရန် ငွေကို လိုက်စားရန်နှင့် ကောက်ကျစ်ဆိုးယုတ်သည့် ရေပန်းစားမှုများကို လိုက်စားရန်အတွက် လောကီဘဝဆီသို့ အချိန်ကြာမြင့်စွာကတည်းက ၎င်းတို့ ပြန်သွားပြီးဖြစ်ပေမည်။ ၎င်းတို့၏ အလားအလာများနှင့် ကံကြမ္မာ ပါဝင်ပတ်သက်သောကြောင့်သာ ၎င်းတို့က ယခုတွင် ဘုရားအိမ်တော်၌ ယာယီနေထိုင်နေကြခြင်း ဖြစ်သည်။ ၎င်းတို့သည် မိမိတို့၏ အလားအလာများနှင့် ကံကြမ္မာကို လုံခြုံစိတ်ချစေဖို့အတွက် စိတ်ပိုင်းဖြတ်ထားသည့် သဘောထားတစ်ခု ရှိကြစဉ်တွင် ဘုရားသခင်၏ အမှုတော် အဆုံးသတ်သည့်အခါ ၎င်းတို့အနေဖြင့် ကောင်းကင်နိုင်ငံထဲသို့ ဝင်ရောက်ပြီး ကြီးမားသည့် ကောင်းချီးများရရှိသော သူတို့အလယ်တွင် ရှိလိမ့်မည်ဟု မျှော်လင့်လျက် အခွင့်အရေးတစ်ခုကို ရယူသည့် စိတ်နေစိတ်ထားတစ်ခုကိုလည်း ထားရှိကြသည်။ ဤသည်မှာ မည်သည့် စိတ်နေစိတ်ထားမျိုး ဖြစ်သနည်း။ ၎င်းတို့သည် ၎င်းတို့၏ ရည်မှန်းချက်များကို စွမ်းဆောင်ရရှိရန် ဘုရားသခင်ထံမှ အကျိုးအမြတ်များကို ရှာဖွေဖို့ အလိုရှိကြသော်လည်း သူ့ကို ကျိုးနွံနာခံလိုစိတ် မရှိကြပေ။ ထို့အပြင် ဘုရားသခင် ပြောပြီးသည့် စကားများအားလုံးကိုပင် ၎င်းတို့ မယုံကြည်ကြသကဲ့သို့ ဘုရားသခင်က အရာခပ်သိမ်းအပေါ် အချုပ်အခြာအာဏာရှိသည်ကိုလည်း မယုံကြည်ကြပေ။ ဤသည်မှာ အနည်းငယ် ကောက်ကျစ်ဆိုးယုတ်သည် မဟုတ်လော။ ဘုရားနှုတ်ကပတ်တော်များကို လေ့လာခြင်းနှင့်ဆိုင်သည့် ၎င်းတို့၏ သဘောထားနှင့်ပတ်သက်လာသည့်အခါ ၎င်းတို့က မယုံကြည်သူများဖြစ်သည်။ အန္တိခရစ်များက ဘုရားနှုတ်ကပတ်တော်များကို သုတေသနပြုရန်၊ ဖတ်ရှုရန်နှင့် ဆက်ဆံရန် ထိုသို့သော သဘောထားတစ်ခုကို အသုံးပြုနိုင်ခြင်းက ၎င်းတို့သည် စံပြ မယုံကြည်သူများ၊ လုံးလုံးလျားလျား မယုံကြည်သူများ စစ်စစ်ဖြစ်သည်ကို ပြပေသည်။ သို့ဆိုလျှင် ၎င်းတို့သည် စွန့်ခွာခြင်း မရှိဘဲ ဘုရားအိမ်တော်တွင် အပေါ်ယံဆန်သော အလုပ်တစ်ခုခုကို ဆောင်ရွက်ကာ ဆက်လက် လိုက်လျှောက်နိုင်ကြသေးသနည်း။ ၎င်းတို့ မည်မျှ ပြုပြင်ခံရသည်ဖြစ်စေ၊ အဘယ်ကြောင့် နေထိုင်ပြီး အသင်းတော် အသက်တာကိုပင် ပါဝင်လုပ်ဆောင်ကာ ဘုရားနှုတ်ကပတ်တော်များ ဆက်လက် နားထောင်၊ ဖတ်ရှုနေနိုင်ကြသနည်း။ ဤသည်မှာ အဘယ်ကြောင့်နည်း။ (၎င်းတို့က ကောင်းချီးများကို ရရှိချင်ကြသည်။) အဘယ်ကြောင့်ဆိုသော် ၎င်းတို့က ကောင်းချီးများကို ရရှိလိုကြသောကြောင့် ဖြစ်သည်။ ဘာသာတရားမရှိသူများက “ကျွန်ုပ်ကို ကျွေးမွေးသောသူ မည်သူမဆို ကျွန်ုပ်၏ မိခင်ဖြစ်ပြီး ကျွန်ုပ်ကို ငွေပေးသောသူ မည်သူမဆို ကျွန်ုပ်၏ ဖခင်ဖြစ်သည်”ဟု ပြောသကဲ့သို့ပင် ဖြစ်သည်။ ဤသည်မှာ မည်သည့် ဆင်ခြင်တွေးခေါ်မှုစနစ်မျိုး ဖြစ်သနည်း။ ဤဆင်ခြင်တွေးခေါ်မှုစနစ်သည် လောကီဆက်ဆံရေးများအတွက် စာတန်၏ အတွေးအခေါ်နှင့် ပြည့်နေသည် မဟုတ်လော။ ၎င်းတို့က ဘုရားသခင်ကို ယုံကြည်ကြသည်မှာ “သင် မည်သည့် သဘာဝလွန် အလုပ်မျိုး လုပ်ဆောင်ပြီးဖြစ်သည်ကို ကျွန်ုပ် ဂရုမစိုက်ပါ။ သင်၏ စိတ်သဘောထား သို့မဟုတ် အနှစ်သာရက မည်သည့်အရာဖြစ်နိုင်သည်ဖြစ်စေ၊ ကျွန်ုပ်ကို ကောင်းချီးများ၊ ကောင်းမွန်သည့် ခရီးပန်းတိုင်တစ်ခုနှင့် ကောင်းမွန်သည့် အနာဂတ်တစ်ခု ပေးနိုင်ကာ ကြီးမားသည့် ကောင်းချီးများကို ရှိခွင့်ပေးသရွေ့ သင့်နောက် ကျွန်ုပ် လိုက်မည်ဖြစ်ပြီး ယခု သင့်ကို ဘုရားအဖြစ် ကျွန်ုပ် သဘောထားမည်”ဟူသော စာတန်ဆန်သည့် အတွေးအခေါ်၏ စိုးမိုးခြယ်လှယ်မှုအောက်တွင် ဖြစ်ပေသည်။ ဤနေရာတွင် စစ်မှန်သော ယုံကြည်ခြင်းနှင့်ဆိုင်သည့်အရာ တစ်ခုတလေ ရှိသလော။ (မရှိပါ။) ထို့ကြောင့် ဘုရားနှုတ်ကပတ်တော်များကို ၎င်းတို့ သဘောထားပုံအရ၊ ထိုသို့သော လူတို့ကို အန္တိခရစ်များနှင့် မယုံကြည်သူများအဖြစ် သရုပ်ဖော်ခြင်းက မှန်ကန်တိကျလွန်းသည်ချည်းသာ ဖြစ်သည်။

ဘုရားနှုတ်ကပတ်တော်များအပေါ် အန္တိခရစ်များ၏ သဘောထားမှာ လေ့လာသည့် သဘောထားတစ်ခု ဖြစ်သည်။ ၎င်းတို့သည် ဘုရားနှုတ်ကပတ်တော်ကို ဘုရားနှုတ်ကပတ်တော်အဖြစ် မည်သည့်အခါမျှ သဘောမထားကြပေ။ မည်သည့်အရာအဖြစ် သဘောထားကြသနည်း။ နက်နဲသောအရာများ စုစည်းမှု တစ်ခုလော။ စိတ်ကူးယဉ်ဆန်သော ဇာတ်လမ်းတစ်ပုဒ်လော။ မရှင်းလင်းသကဲ့သို့ နားလည်၍မရနိုင်သော စာများလော။ ဘုရားနှုတ်ကပတ်တော်များကို ၎င်းတို့ ဖတ်ရှုသည့်အခါ သူ၏ ရည်ရွယ်ချက်များကို ရှာဖွေနေကြခြင်း မဟုတ်သကဲ့သို့ သူ၏ ရည်ရွယ်ချက်များ သို့မဟုတ် စိတ်သဘောထားကို နားလည်ရန် ကြိုးစားနေကြခြင်းလည်း မဟုတ်ပေ။ သို့တင်မက ၎င်းတို့သည် ဘုရားသခင်၏ ရည်ရွယ်ချက်များကို အလေးထားရန် မဆိုထားနှင့်၊ ဘုရားသခင်ကိုပင် မသိလိုကြပေ။ “လက်ရှိအချိန်တွင် ငါ၏ အရေးပေါ် လိုအင်ဆန္ဒမှာ ငါ၏ ရည်ရွယ်ချက်များကို အပြည့်အဝ အလေးထားနိုင်စွမ်းရှိသည့် လူတစ်စုကို ရှာဖွေရန်ဖြစ်၏။”ဟူသည့် ဘုရားနှုတ်ကပတ်တော်များကို ၎င်းတို့ ဖတ်ရှုသည့်အခါ ၎င်းတို့ တို့ထိခံရကြသလော။ ၎င်းတို့က “ဘုရား၏ ရည်ရွယ်ချက်များကို အလေးထားသော သူများကို ရှာဖွေခြင်းနှင့် ပတ်သက်သည့် ဤအကြောင်းအရာအားလုံးက အဘယ်အရာ ဖြစ်သနည်း။ သင်၏ ရည်ရွယ်ချက်များကို အလေးထားခြင်းသည် အဘယ်အကျိုးရှိသနည်း။ ဤအရာကို လုပ်ဆောင်ခြင်းက ကျွန်ုပ်ကို မပြတ် ကျွေးမွေးမည်လော သို့မဟုတ် ငွေရှာခွင့်ပေးမည်လော။ ဘုရား၏ ရည်ရွယ်ချက်များကို အလေးထားခြင်းသည် ကောင်းမွန်သည့် ခရီးပန်းတိုင်တစ်ခုသို့ ဆိုက်ရောက်စေသလော။ ထိုအရာက ငါ့ကို ကြီးမားသည့် ကောင်းချီးများ ဆောင်ကြဉ်းပေးနိုင်သလော။ ဤအရာများကို မလုပ်ဆောင်နိုင်လျှင် ထားလိုက်ပါ။ ကျွန်ုပ် အလေးထားရန် မလိုအပ်ပါ။ ကျွန်ုပ်သည် ငရဲထဲသို့ ပစ်ချခံရခြင်းကို ရှောင်ရှားဖို့နှင့် ကောင်းမွန်သည့် ခရီးပန်းတိုင်တစ်ခုကို ရရှိအောင် သေချာဖို့အတွက် လမ်းကြောင်းတစ်ခုကို ရှာဖွေနေသည်။ သင်၏ ရည်ရွယ်ချက်များကို အလေးထားခြင်းက ကျွန်ုပ်ကို ကောင်းချီးများ ဆောင်ကြဉ်းပေးနိုင်လျှင် ကျွန်ုပ် အလေးထားမည်ဖြစ်သည်။ အဘယ်သို့ပြုရမည်ကိုသာ ကျွန်ုပ်ကို ပြောပါ”ဟု ဆိုကြသည်။ ဘုရားသခင် ချမှတ်သည့် သတ်မှတ်ချက်များကို ၎င်းတို့ ပြည့်မီနိုင်သည်ဟု သင်တို့ ထင်သလော။ (မထင်ပါ။) ဘုရားသခင်က တစ်ခုကိုသာ အဆိုပြုသည်။ ဘုရားသခင်၏ အလိုတော်ကို လိုက်လျှောက်ရန်၊ ဘုရားသခင်ကို ကြောက်ရွံ့ပြီး မကောင်းမှုကို ရှောင်ကြဉ်ရန်ဖြစ်သည်။ ဤအရာကို လုပ်ဆောင်ရာတွင် သင်သည် ဘုရားသခင်၏ ရည်ရွယ်ချက်များကို အလေးထားနေခြင်းဖြစ်ပြီး ကြီးမားသည့် ကောင်းချီးများကို ရရှိနိုင်သည်။ အန္တိခရစ်များက ဤအရာကို ကြားသည့်အခါ ၎င်းတို့က “ငါ စိတ်စောနေမိခဲ့သည်၊ ငါ့ကို အလေးအနက် သဘောမထားခဲ့ကြသင့်ပါ။ ငါသည် ဘုရား၏ ရည်ရွယ်ချက်များကို အလေးထားနိုင်စွမ်းမရှိခဲ့ပါ၊ ထိုအရာကို မေ့ထားလိုက်ပါ။ ဤနည်းလမ်းက အလုပ်ဖြစ်မည်မဟုတ်၊ အခြားတစ်ခုကို ငါရှာမည်”ဟု တွေးကြသည်။ ထို့နောက် ၎င်းတို့သည် ဘုရားနှုတ်ကပတ်တော်များ၏ အခြားသွင်ပြင်လက္ခဏာများကို စတင်၍ အားထုတ်ကြသည်။ အခြားသော သွင်ပြင်လက္ခဏာများအား သုတေသနပြုခြင်းနှင့် စိစစ်ခြင်းကို ၎င်းတို့ အားထုတ်ကြသော်လည်း စိစစ်မှုအားလုံး ပြီးသွားသည့်နောက် ထိုအရာမှ ၎င်းတို့ ရရှိသမျှမှာ အနည်းငယ်သော စကားများနှင့် အယူဝါဒများသာ ဖြစ်သည်။ ၎င်းတို့က သမ္မာတရားကို မချစ်သောကြောင့်လည်းကောင်း၊ ၎င်းတို့၏ ကိုယ်ကျိုးစီးပွားများ၊ ရှေ့ရေးများနှင့် ကံကြမ္မာတို့ကို ၎င်းတို့လိုက်စားသည့် ရာသက်ပန် ရည်မှန်းချက်များအဖြစ် သဘောထားကြသောကြောင့်လည်းကောင်း၊ ဘုရားနှုတ်ကပတ်တော်များသည် ၎င်းတို့အတွက် ပေါ်ပင်ရေပန်းစားသော စကားများသာ ဖြစ်လာပြီဖြစ်သည်။ ဘုရားအမှုတော်မှဖြစ်စေ၊ သန့်ရှင်းသော ဝိညာဉ်တော်၏ လမ်းပြမှုမှဖြစ်စေ မည်သည့် ပျော်ရွှင်မှုကိုမျှ ၎င်းတို့ လုံးဝ မတွေ့ကြုံကြရလေပြီ။ ဘုရားနှုတ်ကပတ်တော်များကို ၎င်းတို့ ဖတ်ရှုသည့်အခါ မည်သည့် အလင်းကိုမျှ မမြင်ကြသကဲ့သို့ မည်သည့် ဉာဏ်အလင်းပေးခြင်း သို့မဟုတ် အာဟာရကိုမျှ မရရှိကြပေ။ ၎င်းတို့ ရရှိသမျှမှာ အနည်းငယ်သော စကားများနှင့် အယူဝါဒများ၊ ပြီးလျှင် နက်နဲသောအရာများနှင့် ခရီးပန်းတိုင်များအကြောင်း ဖြစ်သည့် အချို့သော ဖွင့်ပြချက်များနှင့် ဆိုရိုးများဖြစ်သည်။ ဤဆိုရိုးများနှင့် အယူဝါဒများကို အရင်းအနှီးအဖြစ် ၎င်းတို့ သဘောထားကြသည့်အခါ ၎င်းတို့အနေဖြင့် မိမိတို့ကိုယ်ပိုင် ခရီးပန်းတိုင်များကို ထိန်းချုပ်ပြီးခြင်းဖြစ်ကြောင်း၊ မိမိတို့ကိုယ်ပိုင် ခရီးပန်းတိုင်များကို အသေအချာ ရယူနိုင်ပြီးဖြစ်ကြောင်း ခံစားကြရပုံပေါ်ကြသည်။ သို့သော် ဘုရားနှုတ်ကပတ်တော်များ၏ အဆက်မပြတ် ဖော်ထုတ်ခြင်း၊ တရားစီရင်ခြင်းနှင့် ပြစ်တင်ဆုံးမခြင်းတို့အလယ်တွင် သို့မဟုတ် မတူကွဲပြားသော အဆင့်များတွင် လူသားအတွက် ဘုရားသခင်၏ သတ်မှတ်ချက်များအလယ်တွင် ၎င်းတို့က မိမိတို့၏ ခရီးပန်းတိုင် ပျောက်ဆုံးကာ ကယ်တင်မခံရနိုင်သည့်အလား ခံစားကြသည်။ ဤကာလအတောအတွင်းတွင် ၎င်းတို့သည် စိတ်ထဲတွင် အမြဲ နေမထိထိုင်မသာ ခံစားကြသည်။ ကောင်းမွန်သည့် ခရီးပန်းတိုင်တစ်ခုကို အသေအချာ ရယူခြင်းအတွက် မိမိတို့ကိုယ်တိုင်၏ စိတ်ထဲတွင် စိတ်ပိုင်းဆိုင်ရာ ရုန်းကန်မှုများ စဉ်ဆက်မပြတ် ရှိကြသည်။ ဘုရား၏ စာကြောင်းများထဲမှ တစ်ခုကြောင့် ၎င်းတို့ ရုန်းကန်ကြလိမ့်မည်။ ဘုရား၏ စာကြောင်းများထဲမှ နောက်တစ်ကြောင်းကြောင့် ၎င်းတို့ အပျက်သဘောဆောင်လာကြလိမ့်မည်ဖြစ်ပြီး နောက်တစ်ကြောင်းကြောင့်ပင် ၎င်းတို့ ပျော်ရွှင်ကြလိမ့်မည်ဖြစ်သည်။ သို့သော် ၎င်းတို့ ပျော်ရွှင်နေကြသည်ဖြစ်စေ၊ အသက်ကယ် ကောက်ရိုးတစ်မျှင်ကို ဖမ်းဆုပ်နေကြသည်ဖြစ်စေ ထိုသို့သော လူတို့အတွက် ဤသည်မှာ ခဏတစ်ဖြုတ်သာ ဖြစ်သည်။ ထို့ကြောင့် အဆုံးတွင် အချို့သော အန္တိခရစ်များက ၎င်းတို့ကဲ့သို့ လူတို့အနေဖြင့် ကယ်တင်မခံရနိုင်ကြသည့်အလား ခံစားမိကြသည်။ ၎င်းတို့ကဲ့သို့သော လူများကို ဘုရားသခင်က မနှစ်သက်သည့်ပုံပေါ်သည်ကို သူ၏ နှုတ်ကပတ်တော်များမှ ၎င်းတို့ တွေ့မြင်ကြသည်။ ၎င်းတို့သည် ကောင်းချီးများကို ရရှိနိုင်ကြသလော၊ သို့မဟုတ် မရရှိနိုင်ကြသလော။ ၎င်းတို့၏ ရှေ့ရေးများနှင့် ကံကြမ္မာတို့သည် မည်သည့်အရာသာ ဖြစ်သနည်း။ ဤအရာများက မသိရသောအရာများ ဖြစ်သည်ဟု ၎င်းတို့ ခံစားရသည်။ ယင်းတို့နှင့် ပတ်သက်၍ ၎င်းတို့ မသေမချာ ဖြစ်ကြသည်။ ဤအချိန်တွင် မည်သည့်အရာကို ၎င်းတို့ လုပ်ဆောင်ကြလိမ့်မည်နည်း။ ၎င်းတို့ နောင်တရနိုင်ကြသလော။ နိနေဝေမြို့သားများကဲ့သို့ ၎င်းတို့၏ လက်များတွင်ရှိသည့် မကောင်းမှုကို စွန့်ပစ်နိုင်ကြသလော၊ ဘုရားသခင်ထံ ဝန်ချပြီး နောင်တရရန် လှည့်ပြန်နိုင်ကြသလော၊ ဘုရားနှုတ်ကပတ်တော်များကို မိမိတို့၏ အသက်အဖြစ် လက်ခံကာ ဘုရားနှုတ်ကပတ်တော်များကို ၎င်းတို့ ဖြစ်တည်မှု၏ အခြေခံအုတ်မြစ်အဖြစ် လက်ခံနိုင်ကြသလော။ လက်မခံနိုင်ကြပေ။ ထို့ကြောင့် နှစ်ပေါင်းများစွာ လိုက်စားပြီးနောက်တွင်၊ နှစ်ပေါင်းများစွာ မျှော်လင့်ပြီး ဘုရားနှုတ်ကပတ်တော်များကို နှစ်ပေါင်းများစွာ လေ့လာပြီးနောက်တွင် ၎င်းတို့ကဲ့သို့သော သူများအနေဖြင့် ကောင်းချီးများ တကယ်ကို မရရှိနိုင်ကြောင်း၊ မျှော်လင့်ချက် လုံးဝမရှိကြောင်း၊ ဘုရားသခင် ကယ်တင်မည့်သူများ လုံးဝ မဟုတ်ကြောင်းနှင့် မိမိတို့ အလိုရှိသည့်အရာကို မရရှိနိုင်ကြောင်းကို ၎င်းတို့ ကောက်ချက်ချမိလျှင် မည်သည့်အရာကို ၎င်းတို့ လုပ်ဆောင်ကြလိမ့်မည်နည်း။ (ဘုရားသခင်ကို ၎င်းတို့ စွန့်ခွာကြလိမ့်မည်။)

“ဘုရားသခင်ကို ချစ်မြတ်နိုးရန် ကျွန်ုပ်၏ ကတိသစ္စာကို ကျွန်ုပ် အသစ်ဖြစ်စေသည်။ ကျွန်ုပ်၏ ကိုယ်ခန္ဓာနှင့် စိတ်နှလုံးကို သူ့အား ဆပ်ကပ်အပ်နှံပါ၏”ဟူသည့် ဝိညာဉ်ရေးရာ ဆိုရိုးတစ်ခုရှိသည်။ ဤဆိုရိုးက အလွန် “ကြီးကျယ်ခမ်းနား”၏။ ဤစကားများကို ငါ ပထမဆုံးကြားသည့်အခါ ငါ့စိတ်နှလုံးတွင် လူသားဘာသာစကား၏ “ကြီးကျယ်ခမ်းနားမှု”ကို နက်ရှိုင်းစွာ ခံစားလိုက်ရသည်။ လူတို့က ၎င်းတို့၏ ကတိသစ္စာများကို အလွန် အဖိုးတန်၊ အလွန်ဖြူစင်ပြီး အပြစ်အနာအဆာ ကင်းသကဲ့သို့ သဘောထားကြသည်။ ၎င်းတို့သည် မိမိတို့၏ ချစ်ခြင်းမေတ္တာ ဆက်ကပ်အပ်နှံမှုကို အလွန် စင်ကြယ်သန့်ရှင်းပြီး မြင့်မြတ်သောအရာအဖြစ် မှတ်ယူကြသည်။ အန္တိခရစ်များသည် ဘုရားသခင်ကို ချစ်မြတ်နိုးရန် ၎င်းတို့၏ ကတိသစ္စာများကို ထပ်လောင်းအတည်ပြုကာ မိမိတို့၏ ကိုယ်ခန္ဓာနှင့် စိတ်နှလုံးကို ဘုရားသခင်အား ဆက်ကပ်အပ်နှံနိုင်ကြသလော။ (မအပ်နှံနိုင်ကြပါ။) အဘယ်ကြောင့် မအပ်နှံနိုင်ကြသနည်း။ လူအချို့က “အလွန်များသည့် ဘုရားနှုတ်ကပတ်တော်များကို ဖတ်ရှုပြီးနောက်တွင် ကျွန်ုပ်၏ စဉ်းစားတွေးခေါ်သည့် နည်းလမ်းက အလုပ်မဖြစ်ကြောင်း သို့မဟုတ် ရလဒ်များ မရရှိကြောင်းကို မြင်သည့်အခါ ဘုရားသခင်ကို ချစ်ဖို့ဖြစ်သော ကျွန်ုပ်၏ ကတိသစ္စာကို ကျွန်ုပ် အသစ်ဖြစ်စေပြီး ကျွန်ုပ် သူ့ထံ မူလက ပြုခဲ့သည့် ကတိသစ္စာကို ထပ်ပြောဆိုသည်။ ဤသည်မှာ လှည့်ပြန်ခြင်းဖြစ်သည် မဟုတ်လော။ မခက်ခဲပါ”ဟု ပြောကြသည်။ အန္တိခရစ်များက ထိုသို့သောအရာတစ်ခုကို လုပ်ဆောင်နိုင်ကြသလော။ (မလုပ်ဆောင်နိုင်ကြပါ။) အဘယ်ကြောင့် မလုပ်ဆောင်နိုင်ကြသနည်း။ “ဘုရားသခင်ကို ချစ်မြတ်နိုးရန် ကျွန်ုပ်၏ ကတိသစ္စာကို ကျွန်ုပ် အသစ်ဖြစ်စေသည်”ဟူသည်မှာ လူ၏ အမြော်အမြင်အရှိဆုံးသော ပြောဆိုချက်ဖြစ်သည် မဟုတ်လော။ လူ၏ အကြီးမားဆုံးနှင့် အဖြူစင်ဆုံးသော ချစ်ခြင်းမေတ္တာ ဖြစ်သည် မဟုတ်လော။ သို့ဆိုလျှင် အန္တိခရစ်များက ဤအရာကို အဘယ်ကြောင့် မစီမံနိုင်ကြသနည်း။ (အန္တိခရစ်များတွင် စစ်မှန်သော ချစ်ခြင်းမေတ္တာ ရှိရန် မဆိုထားနှင့်၊ ဘုရားသခင်အပေါ် သိနားလည်မှုပင် မရှိပါ။ ၎င်းတို့၏ ချစ်ခြင်းမေတ္တာသည် အယောင်ဆောင်ချည်းသာဖြစ်ပြီး ၎င်းတို့၏ အကျိုးစီးပွားများပေါ် အခြေပြုသည်။ ၎င်းတို့အတွက် ရရှိဖို့ အကျိုးအမြတ်များ ရှိသည်နှင့်တစ်ပြိုင်နက် ၎င်းတို့ ကျောခိုင်းကာ ထွက်ခွာကြမည်ဖြစ်သည်။) အန္တိခရစ်များက ဤအခြေအနေကို ရောက်ရှိသည့်အခါ တစ်စုံတစ်ရာ မှားယွင်းပြီးဖြစ်ကြောင်းနှင့် မှားယွင်းသည့် အလောင်းအစားကို ၎င်းတို့ ပြုမိပြီဖြစ်ကြောင်း ခံစားကြရသည်။ မိမိတို့၏ စိတ်ဓာတ်များကို မြှင့်တင်ရန်အတွက် ၎င်းတို့၏ ဝိညာဉ်ရေးရာ နယ်ပယ်များကို ထောက်ပံ့ပေးမည့် ဆောင်ပုဒ် သို့မဟုတ် သဘောထားတစ်ခုကို ၎င်းတို့ အသုံးပြုဖို့ လိုအပ်သည်။ မည်သည့် ဆောင်ပုဒ်မျိုးနည်း။ “ဘုရားသခင်ကို ချစ်မြတ်နိုးရန် ကျွန်ုပ်၏ ကတိသစ္စာကို ကျွန်ုပ် အသစ်ဖြစ်စေသည်။ ကျွန်ုပ်၏ ကိုယ်ခန္ဓာနှင့် စိတ်နှလုံးကို သူ့အား ဆပ်ကပ်အပ်နှံပါ၏”ဟူ၍ ဖြစ်သည်။ ဤသည်မှာ ၎င်းတို့က တစ်ဖန် အစပြုမည့်သဘောဖြစ်သည်။ သို့မဟုတ်လျှင် ၎င်းတို့ ဆက်လက် အသက်ရှင်နိုင်မည် မဟုတ်သကဲ့သို့ ၎င်းတို့၏ ဘုရားသခင်ကို ယုံကြည်မှု အဆုံးသတ်လိမ့်မည်ဖြစ်သည်။ ဘုရားသခင်သည် သူ၏ အမှုတော်အတွင်းတွင် နေ့တိုင်း စကားပြောပြီး သူ စကားပြောသည့်အကြိမ်တိုင်းတွင် သူ၏ နှုတ်ကပတ်တော်များက သမ္မာတရားအကြောင်းချည်းသာ ဖြစ်သည်။ ယင်းတို့သည် လူ၏ ဖောက်ပြန်ပျက်စီးသော စိတ်သဘောထားများကို ဖော်ထုတ်သည့် စကားများ၊ လူတို့အား သမ္မာတရား စစ်မှန်မှုများထဲသို့ မည်သို့ ဝင်ရောက်သင့်ပြီး သမ္မာတရား စည်းမျဉ်းများအား နားလည်သင့်သည်ဟူသည်ကို တောင်းဆိုသည့် စကားများချည်းသာ ဖြစ်သည်။ ယင်းတို့သည် ဤစကားများချည်းသာဖြစ်သည်။ ထို့ကြောင့် အန္တိခရစ်များက “ဤစကားများထဲမှ တစ်ခုကမျှ ခရီးပန်းတိုင်များအကြောင်း မပြောသနည်း သို့မဟုတ် ကောင်းချီးများ ရရှိခြင်းနှင့်ပတ်သက်သည့် ကိစ္စရပ်များကို မဖော်ပြသနည်း။ ဤသည်မှာ ငါတို့၏ ရှေ့ရေးများနှင့် ကံကြမ္မာတို့က ဘုရားလက်ထဲတွင် အချည်းနှီးဖြစ်လာသည့်သဘော မဟုတ်လော။ ဘုရား၏ ကတိတော်သည် ငါတို့အတွက် မဟုတ်တော့သလော။ ဘုရားက ဤအရာများကို လုံးဝ မဖော်ပြလျှင် ငါတို့၏ မျှော်လင့်ချက်များ ပျက်သုဉ်းသွားနိုင်သည်။ ငါတို့၏ မျှော်လင့်ချက်များ ပျက်သုဉ်းသွားလျှင် မည်သည့်အရာကို ငါတို့ လုပ်ဆောင်သင့်သနည်း။ ယင်းမှာ လွယ်ပေသည်။ ဘုရားနှုတ်ကပတ်တော်များက ဤအရာများအကြောင်းကို ဘာတစ်ခုမျှ မပြောလျှင် လူသား နည်းလမ်းတစ်ခုကို သုံးကြစို့။ ဘုရားကို ချစ်မြတ်နိုးဖို့ရန် ငါတို့၏ ကတိသစ္စာများကို အသစ်ဖြစ်စေကြစို့”ဟု စဉ်းစားကြသည်။ လူတို့သည် ဘုရားသခင်ကို ပထမဆုံး ယုံကြည်လာကြသည့်အချိန်တွင် ထိုသို့သော ကြီးမားသည့် စိတ်ထက်သန်မှု၊ ထိုသို့သော ကြီးမားသည့် ချစ်ခြင်းမေတ္တာနှင့် ယုံကြည်ခြင်းတို့ကို အဘယ်သို့ ရှိခဲ့ကြသနည်း။ ဤအရာများက အထွတ်အထိပ်သို့ ရောက်သည့်အခါ လူတို့သည် “ကျွန်ုပ်သည် ဤဘဝတွင် မည်သည့်အချိန်၊ မည်သည့်နေရာတွင် ရှိသည်ဖြစ်စေ၊ ဘုရားအတွက် မိမိကိုယ်ကို အသုံးခံမည်ဖြစ်ပြီး ညည်းညူချက်များ သို့မဟုတ် နောင်တများ တစ်ခုမျှမရှိဘဲ မိမိကိုယ်ကို သူ့ကို ဆက်ကပ်အပ်နှံပါမည်။ မိုးရွာသည်ဖြစ်စေ၊ နေသာသည်ဖြစ်စေ အနိမ့်အမြင့် အတက်အကျများတွင်ဖြစ်စေ၊ ကျွန်ုပ် နေမကောင်းလျှင်ဖြစ်စေ၊ အခက်အခဲဒုက္ခများ ရှိသည်ဖြစ်စေ၊ ပင်လယ်များ ခမ်းခြောက်ပြီး ကျောက်ဆောင်များက မြေမှုန့်အဖြစ်သို့ ပြောင်းလဲသွားသည်ထိတိုင် သူ့နောက်သို့ အဆုံးထိ ကျွန်ုပ် လိုက်လျှောက်ပါမည်။ ဤကတိသစ္စာကို ကျွန်ုပ် ချိုးဖောက်မိလျှင် ကောင်းကင်မှ မိုးကြိုးပစ်ချခြင်းကို ခံရမည်ဖြစ်ပြီး ကောင်းမွန်သည့် ခရီးပန်းတိုင်တစ်ခု ကျွန်ုပ်တွင် ရှိမည်မဟုတ်ပါ”ဟု ဆိုလျက် ဘုရားသခင်ရှေ့မှောက်တွင် သန္နိဋ္ဌာန်များ ပြုကြပြီး ကတိသစ္စာများ ကျိန်ဆိုကြသည်။ ၎င်းတို့၏ ကတိသစ္စာများသည် ယခုတွင် အဘယ်ကြောင့် မရှိတော့သနည်း။ အချိန်များစွာ ကုန်ဆုံးသွားပြီး ထိုအရာက ၎င်းတို့၏ ယုံကြည်ခြင်းနှင့် ချစ်ခြင်းမေတ္တာကို ပျက်ပြယ်သွားစေပြီးဖြစ်သည်ဟု ၎င်းတို့ ခံစားကြသည်။ ၎င်းတို့၏ စိတ်နှလုံးများတွင် ၎င်းတို့က “မဟုတ်ပါ၊ ငါ့စိတ်ဓာတ်ကို ငါ မြှင့်တင်ရမည်။ ငါသည် လန်းဆန်းကာ တက်ကြွပြီး ယခင်က ရှိခဲ့သလောက် ယုံကြည်ခြင်းနှင့် စိတ်အားထက်သန်မှုတို့ဖြင့် ရှိနေရမည်။ ငါ၏ စံထားရာများ၊ ငါ၏ ခရီးပန်းတိုင်နှင့် ကောင်းချီးမင်္ဂလာများကို ရရှိဖို့ ငါ၏ လိုအင်ဆန္ဒတို့ကို ပြန်လည်ရယူရမည်။ ထိုသို့ဖြင့် ဘုရားအပေါ် ငါ၏ ယုံကြည်ခြင်းနှင့် သူ့အား ချစ်ခင်ခြင်းတို့သည် ယခင်လောက် ကြီးမားနေမည် မဟုတ်လော။ သူ့အား ငါ၏ စစ်မှန်သော ဆက်ကပ်အပ်နှံမှုသည်လည်း ယခင်ကကဲ့သို့ပင် ရှိနေမည် မဟုတ်လော”ဟု တွေးကြသည်။ သို့သော် သမ္မာတရားကို လုံးဝ မလိုက်စားသည့် လူတစ်ဦးသည် မိမိ၏ စိတ်နှလုံးတွင် မည်မျှ ရုန်းကန်သည်ဖြစ်စေ သို့မဟုတ် ဘုရားသခင်အပေါ် ၎င်းတို့၏ မူလယုံကြည်ခြင်းနှင့် စိတ်ထက်သန်မှုကို ၎င်းတို့ မည်မျှ ပြန်အမှတ်ရသည်ဖြစ်စေ ဤအရာက ၎င်းတို့၏ လက်ရှိ အခြေအနေကို မပြောင်းလဲစေနိုင်ပေ။ ဤအခြေအနေမှာ အဘယ်နည်း။ ၎င်းတို့၏ ရှေ့ရေးများနှင့် ကံကြမ္မာတို့က အချည်းနှီး ဖြစ်လာသည့်အခါ၊ ၎င်းတို့၏ အလားအလာများနှင့် ကံကြမ္မာတို့က ၎င်းတို့ထံမှ ဝေးသည်ထက် ဝေးလွင့်သွားသည့်အခါ၊ ကောင်းချီးမင်္ဂလာများ ရရှိလိုသော ၎င်းတို့၏ လိုအင်ဆန္ဒက တစ်စစီပြိုကွဲလုနီးပါး ဖြစ်သည့်အခါနှင့် ၎င်းတို့၏ မျှော်လင့်ချက် အပြည့်ရှိသော အတွေးများနှင့် ၎င်းတို့၏ လိုအင်ဆန္ဒများအားလုံး အကောင်အထည်မပေါ်နိုင်သည့်အခါ မလျှော့တမ်းလုပ်ဆောင်ရန် ၎င်းတို့အတွက် အလွန် ခက်ခဲလာလေသည်။ ဤပုံစံဖြင့် မလျှော့တမ်း လုပ်ဆောင်ရန်မှာ ၎င်းတို့၏ စိတ်နှလုံး အတွင်းနက်နက်နေရာများတွင် ၎င်းတို့အတွက် အလွန်နာကျင်စရာဖြစ်သည်။ ဆက်လက် မထိန်းနိုင်တော့သည့်အလား ထင်ရသည့် အခြေအနေနှင့် စိတ်တစ်ခုကို ၎င်းတို့ မကြာခဏ တွေ့ကြုံခံစားရသည်။ ၎င်းတို့အနေဖြင့် ကောင်းကင်နိုင်ငံတော်နှင့်ဆိုင်သော ကောင်းချီးများကို မွေ့လျော်ခံစားနိုင်ရန်အလို့ငှာ ဘုရားသခင်၏ အမှုတော် အပြီးသတ်မည့်အချိန်ကို မကြာခဏ မျှော်လင့်စောင့်စားကြသည်။ လူအချို့က “ဘုရား၏ အမှုတော် အလျင်အမြန် အဆုံးသတ်ပါစေ၊ ကြီးမားသော ကပ်ဘေးများ အလျင်အမြန် ကျရောက်ပါစေ ကောင်းကင် ပြိုလျှင် လူတိုင်း သေဆုံးလိမ့်မည်၊ မည်သူကမျှ ကောင်းသည့် ရလဒ်များကို မမျှော်လင့်သင့်ပါ။ ကောင်းချီးများကို ငါ မရရှိနိုင်လျှင် မည်သူမျှ မရသင့်ပါ”ဟုပင် မျှော်လင့်ကြသည်။ ၎င်းတို့၏ စိတ်နှလုံးအတွင်းတွင် ဘုရားသခင်၏ နိုင်ငံတော် တည်ဖို့အတွက် မမျှော်လင့်ကြပေ။ ဘုရားသခင်၏ ကြီးမြတ်သော စီမံကိန်း အပြီးသတ်ဖို့အတွက် မမျှော်လင့်ကြသကဲ့သို့ ဘုရားသခင်၏ အနှစ်ခြောက်ထောင် စီမံခန့်ခွဲမှု အစီအစဉ် နောက်ဆုံးတွင် ဘုန်းထင်ရှားခြင်း ရှိဖို့အတွက် သို့မဟုတ် ဘုရားသခင်က လူသားမျိုးနွယ်ထဲတွင် အောင်မြင်သောသူများရရှိကာ လူသားမျိုးနွယ်အား လှပသော ခရီးပန်းတိုင်တစ်ခုဆီသို့ ဦးဆောင်ဖို့အတွက် မမျှော်လင့်ကြပေ။ ဤအရာများကို ၎င်းတို့ မမျှော်လင့်ကြ။ ဆန့်ကျင်ဘက်အနေဖြင့် ကောင်းချီးမင်္ဂလာများအတွက် ဖြစ်သော ၎င်းတို့၏ လိုအင်ဆန္ဒများအားလုံးက ပျက်စီးခြင်းကို ရင်ဆိုင်နေရချိန်တွင်၊ ၎င်းတို့၏ စိတ်နှလုံးအတွင်းနက်နက်တွင် ဘုရားသခင်၏ အမှုတော်ကို ကျိန်ဆဲကြသည်၊ ဘုရားသခင်၏ အမှုတော်ကို အလွန်အမင်း မနှစ်မြို့ကြသည့်အပြင် သူ၏ နှုတ်ကပတ်တော်များကို သာ၍ပင် အလွန်အမင်း မနှစ်မြို့ကြပေ။

ယခုအခါတွင် လူအချို့အတွက် တရားဒေသနာများကို နှစ်ပေါင်းများစွာ နားထောင်ပြီးနောက်တွင် ၎င်းတို့က နားထောင်လေ၊ နားလည်လေဖြစ်သည်၊ ၎င်းတို့၏ စိတ်နှလုံးများက သာ၍ ရှင်းလင်းလာလေဖြစ်ပြီး သာ၍ ကြားချင်လေဖြစ်ကြသည်။ ဆန့်ကျင်ဘက်အနေဖြင့် အခြားသူတို့သည် တရားဒေသနာများကို နားထောင်လေ ပစ်ပစ်ခါခါငြင်းပယ်လေ ဖြစ်ကြသည်။ ဘုရားနှုတ်ကပတ်တော်များကို ၎င်းတို့ ကြားသည်နှင့်တစ်ပြိုင်နက် ၎င်းတို့၏ မကောင်းဆိုးဝါးဆန်သော ဘက်ခြမ်းက သူ့ဘာသာ ထုတ်ဖော်သည်။ ဘုရားသခင်က သမ္မာတရားအပေါ် မိတ်သဟာယ ပြုသည်ကို ၎င်းတို့ နားထောင်ပြီး ထိုအရာက လူ၏ ဖောက်ပြန်ပျက်စီးသော စိတ်သဘောထားများကို ထုတ်ဖော်ပြောဆိုသည်နှင့်တစ်ပြိုင်နက် ၎င်းတို့၏ ပုန်ကန်တတ်သော စိတ်နေစိတ်ထားက ပေါ်လွင်ထင်ရှားလာပြီး ၎င်းတို့၏ ပစ်ပစ်ခါခါငြင်းဆန်မှုက တစ်ခုမကျန် ပေါ်ထွက်လာတော့သည်။ ဤအရာကို မည်မျှထိ ၎င်းတို့ လုပ်ဆောင်ကြသနည်။ အချို့က မိမိတို့ စိတ်နှလုံးများတွင် ကျိန်ဆဲကြသည်။ ၎င်းတို့သည် ဘုရားသခင်ကို ကျိန်ဆဲကြသည်၊ သမ္မာတရားကို ကျိန်ဆဲကြသည်၊ အသင်းတော် ခေါင်းဆောင်များနှင့် အမှုဆောင်များကို ကျိန်ဆဲကြပြီး သမ္မာတရား လိုက်စားသောသူတို့ကို သာ၍ ကျိန်ဆဲကြသည်။ ထိုလူစားမျိုးများကို ၎င်းတို့ မြင်သည့်အခါ မနှစ်သက်ကြသကဲ့သို့ တိုက်ခိုက်ရန် ဆန္ဒရှိကြသည်။ ထိုသို့သော လူများက ဘုရားနှုတ်ကပတ်တော်များအား ဟောကြသည့်အခါ၊ ဘုရားနှုတ်ကပတ်တော်များကို တွေးဆပြီး ဘုရားနှုတ်ကပတ်တော်များကို မိတ်သဟာယပြုကြသည့်အခါ ၎င်းတို့၏ စိတ်နှလုံးထဲတွင် မိမိတို့ ပင်ပန်းပြီး အိပ်ချင်သည်ထိတိုင် ကျိန်ဆဲကြသည်။ ထို့ကြောင့် ဘုရားနှုတ်ကပတ်တော်များနှင့် ပတ်သက်သည့် မိတ်သဟာယကို ကြားသည်နှင့်တစ်ပြိုင်နက် အချို့၏ မျက်လုံးများ ဝင်းလက်သွားပြီး အခြားသူများမှာမူ ဘုရားနှုတ်ကပတ်တော်နှင့်ပတ်သက်သည့် မိတ်သဟာယကို ကြားသည့်အခါ သို့မဟုတ် တစ်စုံတစ်ဦးက ဘုရားနှုတ်ကပတ်တော်များမှ အလင်းတစ်မျိုးမျိုးကို ရရှိပြီးဖြစ်ကြောင်း ပြောသည်ကို ကြားသည့်အခါ ၎င်းတို့၏ စိတ်များက မရှင်းမလင်းဖြစ်လာကာ ၎င်းတို့၏ အတွေးများသည် မကြည်လင်တော့ဘဲ ၎င်းတို့၏ စိတ်ဓာတ်များ ကျဆင်းသွားသည်။ ၎င်းတို့၏ စိတ်နှလုံးများက အလွန် မွန်းကျပ်သည်မှာ အသက်မရှူနိုင်ဖြစ်ကြပြီး လတ်ဆတ်သည့် လေတစ်ရှိုက်ကို ရဖို့ အပြင်ထွက်ရန် အမြဲ တမ်းတကြသည်။ သို့သော် ရှေ့ရေးများနှင့် ကံကြမ္မာများ၊ ဘုရားသခင်၏ ကောင်းချီးမင်္ဂလာများ၊ ဘုရားသခင်၏ အမှုတော် အဆုံးသတ်မည့်အချိန်နှင့် နက်နဲသောအရာများကဲ့သို့သော အရာများအကြောင်း သင် မိတ်သဟာယပြုသည့်အခါ အခန်းက မည်မျှ ကျဉ်းသည်ဖြစ်စေ၊ သို့မဟုတ် လေမည်မျှ မကောင်းသည်ဖြစ်စေ ၎င်းတို့သည် လေအတွက် အပြင်မထွက်ကြ သို့မဟုတ် တစ်မှေးမအိပ်ကြချေ။ မိမိတို့နားများကို နားစွင့်ကာ နားထောင်ကြသည်။ သင် မည်မျှကြာအောင် ပြောဆိုသည်ဖြစ်စေ ၎င်းတို့အနေဖြင့် မအိပ်၊ မစားဘဲ နေရလျှင်ပင် ကိစ္စမရှိပေ။ ယုံကြည်သူသစ်အချို့က ငါနှင့် ဆက်သွယ်လာသည့်အခါ လူတို့၏ အခြေအနေများနှင့် သမ္မာတရားအား လူတို့ လိုက်စားသင့်ပုံအပေါ် ၎င်းတို့နှင့် ငါ မိတ်သဟာယပြုခဲ့သော်လည်း ၎င်းတို့က နားမလည်ကြသကဲ့သို့ နက်နဲသောအရာအချို့အကြောင်းကို ငါ ပြောပေးနိုင်မည်လောဟု ငါ့ကို မေးကြသည်။ ငါက “နက်နဲသောအရာများအကြောင်းကို သင် ကြားချင်သလော။ သို့ဆိုလျှင် အမှန်တရားတစ်ခုကို ပထမဆုံး ငါ သင့်ကို ပြောပြပါရစေ။ နက်နဲသောအရာများအကြောင်းကို စဉ်ဆက်မပြတ် မေးမြန်းပြီး ဘုရားနှုတ်ကပတ်တော်များတွင် ဤအရာများအား သုတေသနပြုခြင်းကို အမြဲ အာရုံစိုက်သောသူတို့သည် မကောင်းပေ။ ၎င်းတို့သည် မယုံကြည်သူများနှင့် ဖာရိရှဲများချည်းသာဖြစ်သည်”ဟု ပြောခဲ့သည်။ ယုံကြည်သူသစ်များသည် ငါ၏ တုံ့ပြန်မှုကို အံ့ဩမှင်တက်ပြီး နောက်ထပ် မေးမြန်းဖို့အတွက် အလွန် ရှက်ကြသည်။ သို့သော် နောက်ပိုင်းတွင် တစ်ဖန် မေးမြန်းဖို့ အခွင့်အရေးကို ၎င်းတို့ ရှာတွေ့ကြပြီး ၎င်းတို့ကို ယခင်ပုံစံအတိုင်း ငါ တုံ့ပြန်ခဲ့သည်။ ၎င်းတို့ကို ငါ အဖြေပေးခဲ့ပုံနှင့်ပတ်သက်၍ သင်တို့ အဘယ်အရာကို တွေးထင်ကြသနည်း။ (ကောင်းပါသည်။ ထိုအရာက သူတို့အား မိမိတို့ကိုယ်ကို ပြန်သုံးသပ်ဖို့ ကူညီပေးနိုင်မည်ဖြစ်သည်။) ၎င်းတို့ ပြန်သုံးသပ်ကြမည်လော။ ပြန်သုံးသပ်ကြမည်မဟုတ်။ ထို့နောက် သင်သည် ၎င်းတို့ကို မည်သို့ ကူညီနိုင်သနည်း။ ၎င်းတို့အား “နက်နဲသောအရာများသည် အသက် သို့မဟုတ် သမ္မာတရား မဟုတ်ပါ။ နက်နဲသောအရာမည်မျှကို သင် နားလည်သည်ဖြစ်စေ၊ ထိုအရာသည် သမ္မာတရားကို သင် နားလည်ခြင်းနှင့် ညီမျှမည် မဟုတ်ပါ။ နက်နဲသောအရာတိုင်းကို နားလည်သဘောပေါက်ခြင်းသည်ပင်လျှင် သင် ကောင်းကင်ဘုံသို့ သွားနိုင်ခြင်း သို့မဟုတ် ကောင်းမွန်သည့် ခရီးပန်းတိုင်တစ်ခုရှိခြင်းနှင့် ညီမျှမည် မဟုတ်ပါ”ဟုသာ ၎င်းတို့ကို ပြောလော့။ ၎င်းတို့ကို ဤစကားများနှင့် ကူညီခြင်းနှင့်ပတ်သက်၍ သင်တို့ အဘယ်အရာ စဉ်းစားကြသနည်း။ ဤအရာက အမှုကိစ္စကို အပြည့်အဝ ရှင်းပြသည် မဟုတ်လော။ ဝိညာဉ်ရေးရာ သိနားလည်မှုရှိသောသူများ၊ သမ္မာတရားကို ချစ်ပြီး သမ္မာတရားကို လိုက်စားသောလူတို့က ဤစကားများကို ကြားသည့်အခါ “နက်နဲသောအရာများက အသက်ဖြစ်သည်ဟု ကျွန်ုပ် ထင်ခဲ့သော်လည်း မဟုတ်သည်ကို ယခု ငါ သိလေပြီ။ ယင်းတို့ကို ငါ သုတေသနပြုတော့မည် မဟုတ်ပါ။ သို့ဆိုလျှင် အသက်မှာ မည်သည့်အရာဖြစ်သနည်း”ဟု ပြောကြသည်။ ဤအရာက ၎င်းတို့အနေဖြင့် အနည်းငယ် နားလည်ပြီးဖြစ်ကြောင်း ပြသည်။ ထို့ကြောင့် အန္တိခရစ်များသည် ဤစကားများကို နားထောင်ပြီးနောက်တွင် အထောက်အကူဖြစ်ကြသလော။ ၎င်းတို့ ပြောင်းလဲကြသလော။ ၎င်းတို့ မပြောင်းလဲနိုင်ကြပေ။ ဤစကားများ၌ မည်သည့် အကျိုးအမြတ်ကိုမျှ ၎င်းတို့ ရှာမတွေ့ကြ။ ဤစကားများတွင် ကောင်းချီးမင်္ဂလာများမရှိကြောင်း၊ ၎င်းတို့၏ ရှေ့ရေးများနှင့် ကံကြမ္မာမပါဝင်ကြောင်း၊ ၎င်းတို့၏ ရှေ့ရေးများ၊ ကံကြမ္မာတို့နှင့် မဆက်စပ်သကဲ့သို့ ဆက်နွှယ်ခြင်းလည်း မရှိကြောင်းနှင့် ယင်းတို့သည် အချည်းနှီး ဖြစ်ကြောင်း ယုံကြည်ကြသည်။ ထို့ကြောင့် ၎င်းတို့က ထိုစကားများကို လက်မခံနိုင်ကြပေ။ သို့ဆိုလျှင် မည်သည့် မိတ်သဟာယသည် ၎င်းတို့၏ ရှေ့ရေးများ၊ ကံကြမ္မာတို့နှင့် ဆက်စပ်မှုရှိသနည်း။ ဥပမာအနေဖြင့် “ယနေ့ခေတ်တွင် လောက၌ ဖြစ်ပေါ်နေသည့် ထူးဆန်းသည့် ဖြစ်ရပ်များရှိသည်။ အချို့သော နေရာများတွင် လလေးလုံး ပေါ်ထွန်းခဲ့ပြီး သွေးလကိုလည်း အကြိမ်ကြိမ် မြင်တွေ့ခဲ့ရသည်။ ထူးဆန်းသော အာကာသဖြစ်စဉ်များလည်း မကြာခဏ ဖြစ်ပေါ်လျက် ရှိသည်။ လူ့လောကတွင် ကပ်ဘေးအမျိုးမျိုး၊ ဘေးဒုက္ခအဖုံဖုံတို့လည်း ပေါ်ပေါက်လျက်ရှိပြီး အချို့နေရာဒေသများ၌ လူတို့သည် လူသားစားဝါဒကိုပင် ပါဝင်လုပ်ဆောင်နေကြပြီဖြစ်သည်။ ထိုအခြေအနေကို ကြည့်သည့်အခါ ဗျာဒိတ်ကျမ်းတွင် ပရောဖက်ပြုထားသည့် ဖလားများနှင့် ကပ်ဆိုးများ၏ အချိန်ကာလသို့ ကျွန်ုပ်တို့ ရောက်ရှိနှင့်နေပြီဖြစ်သည်”ဟု သင် ပြောနိုင်သည်။ အန္တိခရစ်များက ဤစကားများကို ကြားသည့်အခါ ၎င်းတို့၏ မျက်လုံးများ ဝင်းလက်သွားပြီး နားစိုက်ထောင်ကြသည်။ ၎င်းတို့က “ဤခေတ်တွင် ကျွန်ုပ် မွေးဖွားခဲ့ခြင်းက ကောင်းပေသည်။ ကြီးမားသည့် ကောင်းချီးများကို ကျွန်ုပ် ရရှိနိုင်သည်။ ကျွန်ုပ် တကယ်ကို တော်ပေသည်။ လောကီအရာများကို လိုက်စားရန် ကျွန်ုပ် မရွေးချယ်ခဲ့ပါ။ ဘုရား၏ ဤအမှုတော်အဆင့်ကို လိုက်လျှောက်ရန် ကျွန်ုပ်၏ လောကီ ရှေ့ရေးများနှင့် ကျွန်ုပ်၏ မိသားစုကို စွန့်ခဲ့သည်။ ယခုချိန်ထိတိုင် လိုက်လျှောက်နိုင်သဖြင့် ကျွန်ုပ် အလွန် ဝမ်းသာပါသည်။ ဘုရားသခင်၏ နေ့ရက် ရောက်လုနီးပြီဖြစ်သည်။ အခြေအနေအရ ကျွန်ုပ် မသေဆုံးမီတွင် ဘုရား၏ အမှုတော် အပြီးသတ်သည့်နေ့ရက်ကို ကျွန်ုပ် ရောက်ရှိနိုင်မည့်ပုံပေါ်သည်။ ထိုနေ့ရက်တွင် သူ၏ ကယ်တင်ခြင်းခံရမည့်သူတစ်ဦးဖြစ်ဖို့ ကျွန်ုပ် သေချာသည်။ အံ့ဩဝမ်းမြောက်ဖွယ် ကောင်းလိုက်လေခြင်းပါတကား”ဟု ဝမ်းမြောက်ဝမ်းသာ ဖြစ်ကြလေသည်။ ၎င်းတို့၏ စိတ်နှလုံးများတွင် ၎င်းတို့က မှန်ကန်သည့် လမ်းကြောင်းကို ရွေးချယ်ပြီးဖြစ်သဖြင့်၊ မှန်ကန်သည့် တံခါးကို ရှာတွေ့ကာ အဖိုးအခအချို့ပေးပြီဖြစ်သဖြင့် တိတ်တဆိတ် ဝမ်းမြောက်ဝမ်းသာဖြစ်ကြသည်။ ၎င်းတို့အနေဖြင့် လက်လျှော့ခြင်း မရှိဘဲ ဤအချိန်ထိ လိုက်လျှောက်ပြီးဖြစ်သဖြင့်၊ ဘုရားအိမ်တော်တွင် ၎င်းတို့ ရှိနေဆဲဖြစ်ကာ မည်သည့် ဒုက္ခပြဿနာကိုမျှ မဖြစ်စေသေးသဖြင့် သို့မဟုတ် ရှင်းလင်းပစ်ခြင်းဖြစ်စေ နှင်ထုတ်ခြင်းဖြစ်စေ မခံရသေးသဖြင့်လည်း ဝမ်းမြောက်ဝမ်းသာ ဖြစ်ကြသည်။ ထို့ကြောင့် ထိုအချိန်မှစ၍ ၎င်းတို့သည် သမ္မာတရားကို လက်တွေ့လုပ်ဆောင်ကြလိမ့်မည်လော သို့မဟုတ် ထိုမျှော်လင့်ချက်များကိုပင် ဆက်လက် ထိန်းသိမ်းကြလိမ့်မည်လော။ ၎င်းတို့၏ အတွင်းကျကျ သဘောထားက ပြောင်းလဲလိမ့်မည် မဟုတ်။ ထို့ကြောင့် ၎င်းတို့ ယုံကြည်သည့် ဘုရားနှုတ်ကပတ်တော်များ၏ တစ်စိတ်တစ်ပိုင်းက ပြီးပြည့်စုံပြီးဖြစ်သည်ကို ၎င်းတို့ တွေ့မြင်သည့်အခါ ရတနာတစ်ခုကို ရှာတွေ့ပြီးဖြစ်သည့်အလား ခံစားကြသည်။ ၎င်းတို့ ကံအကြောင်းလှကြသည်၊ မှန်ကန်သည့် လမ်းကြောင်းကို ရွေးချယ်ကြပြီးဖြစ်သည်၊ မှန်ကန်သည့် တံခါးထဲသို့ ဝင်ရောက်ပြီးဖြစ်ကာ မှန်ကန်သည့် ဘုရားကို ရွေးချယ်ပြီး ဖြစ်သည့်အပြင် ၎င်းတို့သည် ဉာဏ်ပညာရှိသည့် လူများနှင့် ပညာရှိသတို့သမီးများ ဖြစ်သည်ဟု ချက်ချင်း ခံစားကြသည်။ “ထိုအချိန်က ကျွန်ုပ်၏ အလုပ်ကို ကျွန်ုပ် စွန့်လွှတ်မိခဲ့သဖြင့် တော်သေးသည်။ မှန်ကန်သည့် ရွေးချယ်မှုကို ကျွန်ုပ် ပြုလုပ်ခဲ့သည်။ ကျွန်ုပ်သည် မည်သို့ဖြစ်၍များ အလွန် တော်လိုက်သနည်း။ ထိုစဉ်အချိန်က ကျွန်ုပ် အလွန် ဂရုမစိုက်ခဲ့လျှင် ယခုတွင် ကောင်းချီးမင်္ဂလာများကို ကျွန်ုပ် လွဲချော်ခဲ့ပြီး ဖြစ်ကောင်း ဖြစ်နိုင်သည်။ အနာဂတ်တွင် ကျွန်ုပ် ဆက်လက်၍ ဂရုစိုက်ရမည်ဖြစ်ပြီး ကျွန်ုပ်၏ ရှေ့ရေးများနှင့် ကံကြမ္မာအတွက် ရုန်းကန်ကြိုးစားဖို့ ကျွန်ုပ်၏ ဘဝကို ဆက်ကပ်အပ်နှံရမည်”ဟူ၍ ဖြစ်သည်။ ဤကိစ္စရပ်တွင် အန္တိခရစ်များ၏ မည်သည့်အနှစ်သာရကို သင်တို့ မြင်သနည်း။ ဤလူများသည် အခွင့်အရေးသမားများ ဖြစ်သည် မဟုတ်လော။ ၎င်းတို့သည် ဘုရားသခင်၊ သူ၏ နှုတ်ကပတ်တော်များ သို့မဟုတ် သူ၏ အမှုတော်၌ စစ်မှန်သည့် ယုံကြည်မှု မရှိကြပေ။ ၎င်းတို့သည် အခွင့်အရေးသမားများ၊ ဘုရားအိမ်တော်ထဲသို့ ခိုးကြောင်ခိုးဝှက်ဝင်လာသည့် လူများဖြစ်သည်။ ထို့ကြောင့် ဘုရားအိမ်တော်၌ ဤလူများသည် အမြဲတမ်း ထိုင်ခုံဖြည့်သူများသာ ဖြစ်ကြပြီး ၎င်းတို့၏ နေ့ရက်များကို ရေစုန်မျှောလျက် ဖြတ်သန်းသွားလာကြသည်။ ၎င်းတို့သည် ဘုရားသခင်နောက်သို့ မိမိတို့ နှစ်ပေါင်းမည်မျှလိုက်ခဲ့ကြသည်၊ ၎င်းတို့ ပေးခဲ့သည့် အဖိုးအခများ၊ လုပ်ဆောင်ခဲ့သည့် ကြီးမားသောအရာများ၊ မိမိတို့ကိုယ်တိုင်ကိုယ်ကျ ကြုံတွေ့ခဲ့ရသည့် ဘုရားသခင်၏ အမှုတော်နှင့် ၎င်းတို့ နားလည်မှုအချို့ရှိခဲ့သည့် ဘုရားအမှုတော်၏ အဆင့်များကို မိမိတို့ လက်ချောင်းများဖြင့် ရေတွက်ကြလေသည်။ ၎င်းတို့သည် သမ္မာတရား၊ အသက်နှင့်ဆိုင်သည့် အရေးအကြီးဆုံးသော အရာများကို ချန်ထားလျက် ဤအရာများကို ၎င်းတို့၏ စိတ်နှလုံးများတွင် တစ်နေ့လုံး အကြိမ်ကြိမ် ရေတွက်ကြလေသည်။ ၎င်းတို့သည် ကောင်းချီးများရရှိဖို့အတွက်သာ ဘုရားသခင်ကို ယုံကြည်ကြသည်။ ဤသည်မှာ အချောင်သမားဝါဒ ဖြစ်သည်။ ဘုရားနှုတ်ကပတ်တော်များတစ်ခုကမျှ၊ သို့မဟုတ် တစ်ဦးတလေ၏ အတွေ့အကြုံဆိုင်ရာ အသိပညာကမျှ ၎င်းတို့၏ ကိုယ်ကျိုးကြည့်ငေါ သဘောထားကို တစ်ကြိမ်တစ်ခါမျှ မပြောင်းလဲပေးနိုင်ပေ။ ဤသည်မှာ အန္တိခရစ်များ၏ ပကတိအခြေအနေ ဖြစ်သည်။ ၎င်းတို့၏ ကိုယ်ကျိုးစီးပွားများနှင့် ပတ်သက်လာသည့်အခါ ၎င်းတို့သည် မည်သည့် လိုက်လျောမှုကိုမျှ လုံးဝ ပြုလုပ်ကြလိမ့်မည်မဟုတ်။ ၎င်းတို့၏ အမြင်များကို ၎င်းတို့ လုံးဝ ပြောင်းလဲကြလိမ့်မည် မဟုတ်၊ ၎င်းတို့ လျှောက်လှမ်းနေသည့် လမ်းကြောင်း၏ ဦးတည်ချက်နှင့် ရည်မှန်းချက်ပန်းတိုင်တို့ကို လုံး​ဝ ပြောင်းလဲကြလိမ့်မည် မဟုတ်၊ သို့မဟုတ် ၎င်းတို့၏ ရှေ့ရေးများနှင့် ကံကြမ္မာတို့အတွက် ၎င်းတို့၏ ကျင့်ကြံပြုမူခြင်း စည်းမျဉ်းများကို လုံးဝ ပြောင်းလဲကြလိမ့်မည် မဟုတ်ပေ။ ၎င်းတို့သည် ၎င်းတို့၏ ရှေ့ရေးများနှင့် ကံကြမ္မာအတွက် ဘုရားနှုတ်ကပတ်တော်များ တစ်ခုကိုမျှ၊ တစ်လုံးတစ်လေမျှ လက်တွေ့လုပ်ဆောင်ကြလိမ့်မည် မဟုတ်ပေ။ အချို့က “သူတို့သည် အမှုအရာများကို စွန့်လွှတ်ခြင်းကဲ့သို့သော သို့မဟုတ် မိမိတို့ကိုယ်ကို အသုံးခံခြင်းကဲ့သို့သော အရာအားဖြင့် နှုတ်ကပတ်တော်အချို့ကို ရံဖန်ရံခါ လက်တွေ့လုပ်ဆောင်ပါသည်”ဟု ပြောကြသည်။ မည်သည့်အရာကို ၎င်းတို့ လက်တွေ့လုပ်ဆောင်သည်ဖြစ်စေ ၎င်းတို့က ရှေ့ရေးများနှင့် ကံကြမ္မာရှိပြီး ကောင်းချီးများ ရရှိနိုင်သည်ဟူသည့် အကြောင်းပြချက်အပေါ် ထိုသို့ လုပ်ဆောင်ကြခြင်း ဖြစ်သည်။ မည်သည့် သမ္မာတရားကို ၎င်းတို့ လက်တွေ့လုပ်ဆောင်သည်ဖြစ်စေ မသန့်စင်သကဲ့သို့ ကြံရွယ်ချက်နှင့် ရည်မှန်းချက်တို့ဖြင့် လုပ်ဆောင်ခြင်း ဖြစ်သည်။ ဤသည်မှာ ဘုရားသခင် တောင်းဆိုသည့် လက်တွေ့လုပ်ဆောင်မှုနှင့် လုံးဝ ကွဲပြားခြားနားပေသည်။

အန္တိခရစ်များက ဘုရားနှုတ်ကပတ်တော်များကို ဖတ်ရှုသည့်အခါ ဘုရားသခင်၏ အမှုတော်နှင့် စီမံခန့်ခွဲမှု အစီအစဉ် အဆုံးသတ်မည့်အချိန်နှင့် ကပ်ဘေးများ ကျရောက်မည့်အချိန် စသည်တို့နှင့် ဆက်စပ်သည့် အကြောင်းအရာနှင့်အတူ ၎င်းတို့၏ ခရီးပန်းတိုင်နှင့် နက်နဲသောအရာများကို ရှာဖွေရန် သူ၏ နှုတ်ကပတ်တော်များကို အဓိက အသုံးပြုကြသည်။ ၎င်းတို့၏ ကိုယ်ပိုင် ခရီးပန်းတိုင်အတွက်၊ ၎င်းတို့သည် များစွာ အားထုတ်ပြီး အမှုအရာများစွာ လုပ်ဆောင်နိုင်ကြသည်။ ထို့ကြောင့် ဘုရားသခင်၏ အမှုတော် အဆုံးသတ်ကာ ကြီးမားသော ကပ်ဘေးများ ကျရောက်သည့်အခါ ၎င်းတို့လုပ်ဆောင်သည့်အရာများ၊ ပေးခဲ့သည့် အဖိုးအခများနှင့် စွန့်လွှတ်ခဲ့သည့်အရာများကို ၎င်းတို့ လိုအင်ဆန္ဒရှိသည့် ကောင်းချီးများနှင့် အလဲအလှယ်လုပ်နိုင်ခြင်း ရှိမရှိဆိုသည်နှင့် ကပ်ဘေးများနှင့်ဆိုင်သည့် ဆင်းရဲဒုက္ခကို ၎င်းတို့ ရှောင်ရှားနိုင်ခြင်း ရှိမရှိဟူသည့် ဤအရာမှာ ၎င်းတို့ သိရှိလိုပြီး အရေးထားသည့်အရာ ဖြစ်သည်။ ဘုရားနှုတ်ကပတ်တော်များကို ၎င်းတို့ လေ့လာသည့် ဖြစ်စဉ်တစ်ခုလုံးတစ်လျှောက် နှစ်ပေါင်းမည်မျှ ကြာသည်ဖြစ်စေ၊ ၎င်းတို့၏ ရှေ့ရေးများနှင့် ကံကြမ္မာကိုသာ ၎င်းတို့ ဂရုစိုက်ကြသည်။ ထို့ကြောင့် ဘုရားနှုတ်ကပတ်တော်များကို ဖတ်ရှုနေစဉ် ၎င်းတို့၏ အာရုံစိုက်မှုနှင့် ဘုရားနှုတ်ကပတ်တော်များ၌ ၎င်းတို့ ရှာဖွေကြသည့် အကြောင်းအရာအားလုံးတွင် အထူးနိမိတ်များနှင့် ထူးခြားသော လက္ခဏာများ ရှိလေသည်။ ယေဘုယျအားဖြင့် ပထမခြောက်လ သို့မဟုတ် တစ်နှစ်တွင် ယုံကြည်သူသစ်များသည် ထိုသို့သော အကြောင်းအရာများကို ဘုရားနှုတ်ကပတ်တော်များ၌ ရှာဖွေကြသည်။ သို့သော ခြောက်လ သို့မဟုတ် တစ်နှစ်ကုန်သွားပြီးနောက်တွင် လူအချို့က ဤအပိုင်းများအားလုံးကို ယခင်က ၎င်းတို့ ဖတ်ရှုပြီးဖြစ်သည်ကို မြင်ကြပြီး ယင်းတို့ကို နောက်ထပ် သုတေသနပြုရန်မှာ အဓိပ္ပာယ်မဲ့ကြောင်း၊ ယင်းတို့က လူတို့အား သမ္မာတရားထဲသို့ ဝင်ရောက်စေရန် ထောက်ကူ မပေးနိုင်ကြောင်းနှင့် သမ္မာတရားထဲသို့ ဝင်ရောက်ခြင်း မရှိအောင်ပင် ယင်းတို့က ၎င်းတို့ကို သက်ရောက်မှုရှိကာ အဖျက်အမှောင့်လုပ်ကြောင်း တွေ့မြင်ကြသည်။ ထို့ကြောင့် ဤအပိုင်းများကို ၎င်းတို့ မဖတ်ကြတော့ပေ။ ၎င်းတို့အတွက်မူ ယင်းတို့ကို ရံဖန်ရံခါ တစ်ချက်မျှကြည့်ရန်နှင့် နားလည်ရန်မျှက လုံလောက်ပေသည်။ ကျန်သည့်အချိန်တွင် ၎င်းတို့က “သမ္မာတရားထဲသို့ ငါ အဘယ်သို့ ဝင်ရောက်နိုင်မည်နည်း။ လူသားမျိုးနွယ်ကို ဖော်ထုတ်သည့် ဘုရားနှုတ်ကပတ်တော်များစွာ ရှိသည်။ ယင်းတို့က လူတို့၏ လှည့်စားမှု၊ ပုန်ကန်မှုနှင့် မာနထောင်လွှားသော စိတ်သဘောထားတို့ကို ဖော်ထုတ်သည်။ ဘုရားသခင်အပေါ် လူတို့၏ အမျိုးမျိုးသော အယူအဆများနှင့် သဘောထားများကို ဖော်ထုတ်သည်။ ထို့ထက်ပို၍ပင် လူတို့၏ မူမမှန်သော လူ့သဘာဝနှင့်ဆိုင်သည့် အမျိုးမျိုးသော သရုပ်သကန်များကို ဖော်ထုတ်သည်။ ထို့ကြောင့် လူတို့ လက်တွေ့လုပ်ဆောင်သင့်သည့်အရာကို ဘုရားနှုတ်ကပတ်တော်များမှ ငါ အဘယ်သို့ ရှာတွေ့နိုင်မည်နည်း”ဟု တွေးဆကြလေသည်။ သမ္မာတရားကို ချစ်ပြီး လိုက်စားသော လူတို့သည် ဤအရာများအတွက် မိမိတို့၏ အားထုတ်မှုများကို ဆက်ကပ်အပ်နှံကြသည်။ ၎င်းတို့သည် “နောက်ထပ် မည်သည့်အရာကို ကျွန်ုပ်တို့ လုပ်ဆောင်သင့်ပြီး မည်သို့ လက်တွေ့လုပ်ဆောင်သင့်သနည်း။ ဘုရားသခင်ကို ယုံကြည်ပြီးနောက်တွင် ဘာသာတရားမရှိသူများနှင့်လည်းကောင်း၊ ဘာသာရေး ခံယူချက်များရှိသည့် လူတို့နှင့်လည်းကောင်း ကျွန်ုပ်တို့ ကွဲပြားရမည်မှာ သေချာသည်။ သို့ဆိုလျှင် ကျွန်ုပ်တို့ဘဝ၌ မည်သည့် အရည်အသွေးဆိုင်ရာ အပြောင်းအလဲများ ဖြစ်ပေါ်သင့်သနည်း။ ပြုမူကျင့်ကြံခြင်းနှင့် လောကီနှင့်ဆက်ဆံခြင်းနှင့်ပတ်သက်၍ ကျွန်ုပ်တို့ မည်သို့ ပြောဆို၊ ပြုမူသင့်သနည်း၊ အခြားသူများနှင့် မည်သို့ ဆက်ဆံသင့်ပြီး သမ္မာတရားကို မည်သို့ လက်တွေ့လုပ်ဆောင်သင့်သနည်း”ဟူသကဲ့သို့သော ၎င်းတို့ နားလည်ကာ မိမိတို့၏ လက်တွေ့ဘဝများထဲသို့ ဝင်ရောက်ရန် လိုအပ်သည့် တကယ့် ပြဿနာများအကြောင်းကို မကြာခဏ မေးမြန်းကြလေသည်။ သို့သော် အန္တိခရစ်များက ၁၀ နှစ်၊ အနှစ် ၂၀ သို့မဟုတ် အနှစ် ၃၀ ကြာ ယုံကြည်လျှင်ပင် ဤမေးခွန်းများကို လုံးဝ မေးကြလိမ့်မည် မဟုတ်ပေ။ ၎င်းတို့က ဘုရားနှုတ်ကပတ်တော်များကို လေ့လာကြပြီး ဘုရားနှုတ်ကပတ်တော်များ၌ ကောင်းချီးများ ရရှိမည့် မျှော်လင့်ချက်နှင့် ၎င်းတို့၏ ခရီးပန်းတိုင်ကို ရှာဖွေကြကာ အနှစ် ၂၀ သို့မဟုတ် ၃၀ ကြာ ရှာဖွေလျှင်ပင် ဤသို့ လုပ်ဆောင်ရမည်ကို ငြီးငွေ့ကြမည် မဟုတ်ပေ။ ဒုက္ခပြဿနာနှင့်ဆိုင်သည့် လက္ခဏာအနည်းငယ်မျှ ရှိသည်နှင့်တစ်ပြိုင်နက် ၎င်းတို့သည် ဘုရားနှုတ်ကပတ်တော်များ၌ ၎င်းတို့၏ ခရီးပန်းတိုင်နှင့် ဆက်စပ်သည့် အကြောင်းအရာကို အလျင်အမြန် ရှာဖွေကြသည်။ ထို့နောက် ၎င်းတို့အပေါ် ဘုရားသခင်၏ မည်သည့် သဘောထားက ၎င်းတို့၏ လက်ရှိ ယုံကြည်မှုအပေါ် အခြေခံကောင်း အခြေခံနိုင်သည်ကို ဆန်းစစ်ကြသည်။ ၎င်းတို့အနေဖြင့် မိမိတို့၏ ခရီးပန်းတိုင်များကို သံသရာစက်ဝန်းများနှင့် အချိန်ကာလများအရ အကဲဖြတ်ကြသည်ဟု ထင်ရသည်။ ၎င်းတို့သည် ဘုရားသခင်၏ အမှုပြုသည့် နည်းလမ်းရှိ အပြောင်းအလဲများကြောင့်ဖြစ်စေ၊ လူသားမျိုးနွယ်အပေါ် သူ၏ အလျင်စလိုဖြစ်သော ရည်ရွယ်ချက်နှင့်ဆိုင်သည့် ဖော်ပြချက်တွင်ရှိသော အပြောင်းအလဲများကြောင့်ဖြစ်စေ မိမိတို့၏ အတွေးအခေါ်များနှင့် သဘောထားများကို လုံးဝ ပြောင်းလဲလိမ့်မည် မဟုတ်သကဲ့သို့ သမ္မတရားကို လိုက်စားလာကြလိမ့်မည် မဟုတ်ပေ။ ထိုသို့သောအရာတစ်ခုကို ၎င်းတို့ လုံးဝ လုပ်ဆောင်ကြလိမ့်မည် မဟုတ်ပေ။ ထို့ကြောင့် အနှစ် ၂၀ သို့မဟုတ် ၃၀ ကြာ ယုံကြည်ပြီးဖြစ်သည့် လူအချို့သည် လူသားမျိုးနွယ်၏ ကံကြမ္မာနှင့် ခရီးပန်းတိုင်ပါဝင်သည့် ဘုရားသခင် ဖော်ပြထားသော ထိုနက်နဲသည့်အရာများနှင့် ထိုအကြောင်းအရာများအတွက် မိမိတို့၏ အားထုတ်မှုများကို ဆက်ကပ်အပ်နှံနေကြဆဲဖြစ်သည်။ လူအချို့က မည်သည့်အတိုင်းအတာထိ မိမိတို့၏ အားထုတ်မှုများကို ဆက်ကပ်အပ်နှံကြသနည်း။ ၎င်းတို့က “ဘုရားနှုတ်ကပတ်တော်များ၏ အစိတ်အပိုင်းတစ်ခုစီကို ကျွန်ုပ် နှိုင်းယှဉ်ကြည့်သည့်အခါ အကြီးမားဆုံးသော နက်နဲမှုကို ရှာဖွေတွေ့ရှိခဲ့သည်။ ခရစ်တော်က ကမ္ဘာမြေကို စွန့်ခွာချိန်တွင် နွေဦးရာသီ၌ ဖြစ်လိမ့်မည်”ဟု ပြောကြသည်။ ဤအရာကို ကြားပြီးနောက်တွင် ငါ မည်သို့ ခံစားရသည်ဟု သင်တို့ ထင်သနည်း။ ငါ ဝမ်းသာသလော၊ သို့မဟုတ် ဝမ်းနည်းသလော။ ဝမ်းသာခြင်းဖြစ်စေ၊ ဝမ်းနည်းခြင်းဖြစ်စေ ငါ မခံစားရပေ။ ထိုအရာက ရယ်ဖွယ်ရာဖြစ်သည်ဟု ငါ ထင်သည်။ ဤအတွက် သတ်သတ်မှတ်မှတ်ဖြစ်သော အချိန်ရာသီကို သိသည့်အဆင့်ထိ မိမိတို့၏ အားထုတ်မှုများကို ဆက်ကပ်အပ်နှံကြသည့်လူများ အမှန်တကယ် ရှိကြပေသည်။ ၎င်းတို့ ဆက်လက်လုပ်ဆောင်နိုင်ကာ မိနစ်နှင့် စက္ကန့်တို့ တိကျမှန်ကန်သည့်အဆင့်ထိ သတ်သတ်မှတ်မှတ်ဖြစ်သော အချိန်ကာလကို သိရှိနိုင်လျှင် ၎င်းတို့သည် အမှန်တကယ် “ဉာဏ်ကြီးရှင်များ” ဖြစ်ကြပေမည်။ ထိုသို့သော “ဉာဏ်ကြီးရှင်”များက ငါကိုယ်တိုင်ပင် တကယ် မသိသည့် တစ်စုံတစ်ရာကို ရှာဖွေတွေ့ရှိနိုင်ခြင်းသည် ရယ်ဖွယ်ရာလည်း ကောင်းသည့်အပြင် စိတ်ကုန်စရာလည်း ကောင်းပေသည်။ အဘယ်ကြောင့် ရယ်ဖွယ်ရာဖြစ်သနည်း။ ဘုရားသခင် လူ့ဇာတိခံယူသည့် အချိန်ကာလ အတိအကျကို မည်သူမျှ မသိ၊ စာတန်ပင် ဤအရာကို မသိပေ။ စာတန်ပင် မသိသည့် တစ်စုံတစ်ရာကို ဘုရားသခင်က လူတစ်ဦးတလေအား သိခွင့်ပေးမည်လော။ ပေးမည်မဟုတ်သည်မှာ အမှန်ဖြစ်၏။ ထိုနည်းတူစွာပင် ဘုရားသခင်က သူ၏ ကြီးမြတ်သော စီမံကိန်းကို အပြီးသတ်မည့် အချိန်နှင့်ပတ်သက်လာသည့်အခါတွင်လည်းကောင်း၊ သူ၏ လူ့ဇာတိက ကမ္ဘာမြေပေါ်တွင် အမှုတော်ကို ပြီးစီးကာ စွန့်ခွာမည့်အချိန်နှင့် ပတ်သက်လာသည့်အခါတွင်လည်းကောင်း ဤသည်မှာ ဘုရားသခင်က လူတစ်ဦးတလေကို ပြောပြမည့်အရာတစ်ခု ဖြစ်သလော။ ဤအရာကို သိရှိဖို့ လူတိုင်းအတွက် အကြောင်းပြချက်တစ်ခု ရှိသလော။ (မရှိပါ။) ဘုရားသခင်က သူစကားပြောသည့်အချိန်တွင် လူတို့အား သိခွင့်မပေးလိုသည့် အရာတစ်ခုတလေကို လွှတ်ခနဲ ပြောမိမည်လော။ လုံးဝ ပြောမိမည်မဟုတ်ပေ။ သို့တိုင် လူအချို့က ကမ္ဘာမြေကို ဘုရားသခင် စွန့်ခွာမည့်အချိန်အား သူ၏ နှုတ်ကပတ်တော်များတွင် ရှာတွေ့လေပြီဟု အမှန်တကယ် ပြောကြသည်။ ထိုအချိန်က နွေဦးရာသီဖြစ်လိမ့်မည်ဟုပင် ပြောကြသည်။ ဤသည်မှာ ထူးဆန်းသည် မဟုတ်လော။ ရယ်ဖွယ်ရာဖြစ်သည် မဟုတ်လော။ လူတို့က ဤပြောဆိုချက်ကို မည်သည့် ဘုရားနှုတ်ကပတ်တော်များပေါ်တွင် အခြေခံသနည်း။ ဘုရားသခင်က နွေဦးရာသီတွင် တစ်စုံတစ်ရာ လုပ်ဆောင်ခြင်းအကြောင်း ပြောသည့်အခါ အခြားတစ်စုံတစ်ရာကို သူ ရည်ညွှန်းခဲ့ခြင်း ဖြစ်နိုင်သည်။ သူသည် ဤအရာကို ရည်ညွှန်းခြင်း ဖြစ်နိုင်မည်လော။ ၎င်းတို့က ထိုအရာကို ဤအရာအပေါ် လွှဲချနိုင်ရသနည်း။ ဘုရားသခင်သည် လူတို့အား သူ သိရှိစေလိုသည့်အရာကို ရှင်းလင်းစွာနှင့် တိကျစွာ ပြောပြလိမ့်မည်ဖြစ်သည်။ သူ မသိစေလိုသည့်အရာကို လူတို့က မည်မျှ သုတေသနပြုသည်ဖြစ်စေ နားလည်နိုင်ကြမည်မဟုတ်ပေ။ ထိုသို့သောအရာများသည် လူသားမျိုးနွယ်အတွက် သိရှိရန် မဖြစ်နိုင်ပေ။ ဤလူများက ၎င်းတို့ သိရှိကြသည်ဟုလည်းကောင်း၊ ၎င်းတို့၏ သုတေသနက ရလဒ်များ ရရှိပြီးဖြစ်သည်ဟုလည်းကောင်း ပြောဆိုကြသည်။ တိကျသည့် အချိန်ကာလတစ်ခုကိုပင် ပေးကြသည်။ ဤသည်မှာ အဓိပ္ပာယ် မရှိသောအရာကို ပြောဆိုခြင်း မဟုတ်လော။ ဤသည်မှာ လူတို့ကို အထင်အမြင်မှားစေခြင်း၊ ၎င်းတို့၏ စိတ်များကို အဖျက်အမှောင့် လုပ်ခြင်းနှင့် ၎င်းတို့၏ အမြင်အာရုံကို နှောင့်ယှက်ခြင်းဖြစ်သည်။ ဤအရာသည် စာတန်ထံမှလာပြီး ဘုရားသခင်ထံမှဖြစ်သော ဉာဏ်အလင်းပေးမှု လုံးဝ မဟုတ်ပေ။ သူသည် လူတို့ကို ဤအရာနှင့်ပတ်သက်၍ ဉာဏ်အလင်းပေးမည် မဟုတ်။ ဤအရာကိုသိရှိရန်မှာ ၎င်းတို့အတွက် အချည်းနှီးဖြစ်သည်။ ဘုရားသခင်သည် လူတို့အား သူ မသိစေလိုသည့် မည်သည့်အရာကိုမျှ သေချာပေါက် မည်သည့်အခါတွင်မျှ မတော်တဆ လွှတ်ခနဲ ပြောမိမည် မဟုတ်ပေ။ ထို့ကြောင့် ထိုအရာက ရယ်ဖွယ်ရာဖြစ်သည်ဟု ငါ ပြောရခြင်းဖြစ်သည်။ သို့ဆိုလျှင် ထိုအရာသည် အဘယ်ကြောင့် စိတ်ကုန်စရာကောင်းသနည်း။ (လူတို့အနေဖြင့် ဤနှုတ်ကပတ်တော်များမှတစ်ဆင့် မိမိတို့၏ ဖောက်ပြန်ပျက်စီးသော စိတ်သဘောထားများကို ပြောင်းလဲနိုင်ရန်နှင့် သမ္မာတရားကို လိုက်စားကာ ရရှိစေရန် လူတို့အား ထောက်ကူပေးရန် ဘုရားသခင်သည် သမ္မာတရားကို ဖော်ပြသော်လည်း အန္တိခရစ်များက ခရီးပန်းတိုင်များနှင့် နက်နဲသောအရာများကို သုတေသနပြုရန် သူ၏ နှုတ်ကပတ်တော်များကို အသုံးပြုကြသည်။) ဤသည်မှာလည်း အနည်းငယ် စိတ်ကုန်စရာကောင်းသော်လည်း ငါ၏ စိတ်ကုန်ခြင်းအတွက် စစ်မှန်သော အကြောင်းရင်းမှာ အဘယ်နည်း။ ဥပမာအနေဖြင့် ချမ်းသာကြွယ်ဝသော မိဘက မိမိတို့သားသမီးများအတွက် ငွေများစွာ ရှာပြီး ၎င်းတို့၏ သားသမီးများက ငယ်ရွယ်သေးကာ ၎င်းတို့ကို ပြုစုပျိုးထောင်ဖို့ ၎င်းတို့၏ မိဘအပေါ် မှီခိုအားကိုးရသည့်အပြင် ၎င်းတို့၏ စားဝတ်နေရေးက ထိုမိဘအပေါ် လုံးဝ မူတည်လျှင် ထိုကလေးများက မိမိတို့၏ မိဘများ အလျင်အမြန် ဆုံးပါးဖို့အတွက် မျှော်လင့်ကြလိမ့်မည်လော။ ၎င်းတို့၏မိဘများ သေဆုံးမည့်အချိန်ကို အလျင်အမြန် တွက်ချက်ပေးရန် ဗေဒင်ဆရာတစ်ဦးကို ရှာကြလိမ့်မည်လော။ တစ်ဦးတလေက ဤသို့ ပြုမူဆောင်ရွက်သလော။ (ပြုမူဆောင်ရွက်ခြင်းမရှိပါ။) ၎င်းတို့ ပြုမူဆောင်ရွက်လျှင် ထိုအရာသည် စိတ်ကုန်စရာကောင်းမည် မဟုတ်လော။ စိတ်ကုန်စရာကောင်းပေမည်။ ထိုသို့သော လူများသည် မုန်းတီးဖွယ်ဖြစ်ပေသည်။ ယခု ဘုရားသခင်က ကမ္ဘာမြေသို့ ကြွလာပြီဖြစ်သဖြင့် သူ၏ လူ့ဇာတိက အနှစ်တစ်ရာကျော် အသက်ရှင်နေထိုင်နိုင်ကာ အနှစ်တစ်ရာကြာ အလုပ်လုပ်နိုင်လျှင်ပင် လူတို့ နားလည်နိုင်သည့် သမ္မာတရားက အကန့်အသတ်ရှိပေသည်။ တွေ့ကြည့်လော့၊ သခင်ယေရှု၏လူ့ဇာတိခံခြင်းမှသည် ဘုရားအမှုတော်၏ လက်ရှိအဆင့်ထိ ဤအနှစ်နှစ်ထောင်အတွင်းတွင် လူသားမျိုးနွယ်သည် သမ္မာတရားမည်မျှကို ရရှိပြီးပြီနည်း။ လူသားမျိုးနွယ်သည် အခြေခံအားဖြင့် သမ္မာတရားကို နားမလည်ပေ။ ဤအဆင့်တွင် ဘုရားသခင်သည် အနှစ် ၃၀ကြာ အမှုပြုနေပြီးဖြစ်ကာ အနှစ် ၃၀ နီးပါး စကားပြောနေပြီးဖြစ်သည်။ ပြီးလျှင် ဘုရားနှုတ်ကပတ်တော်များကို အများဆုံးဖတ်ပြီးသောသူတို့သည် အနှစ် ၃၀ကြာ ဖတ်နေခဲ့ကြပြီးဖြစ်သည်။ လူတို့သည် သမ္မာတရား မည်မျှကို နားလည်လာကြပြီနည်း။ ၎င်းတို့၏ သိနားလည်မှုက အလွန် နည်းပါးပေသည်။ သမ္မာတရားထဲသို့ လူသားမျိုးနွယ် ဝင်ရောက်သည့် အရှိန်မှာ နှေးကွေး၏။ ဆိုလိုသည်မှာ လူတို့ထဲတွင် သမ္မာတရား အမှုပြုစေကာ ထိုသမ္မာတရားကို ၎င်းတို့၏ အသက်ဖြစ်စေဖို့မှာ အတော်ပင် ခက်ခဲပြီး အလွန်နှေးကွေးပေသည်။ သို့တိုင် ထိုအရာ နှေးကွေးပုံဖြင့်ပင် လူအချို့က “ဘုရားသည် မည်သည့်အချိန်တွင် ကမ္ဘာမြေကို စွန့်ခွာလိမ့်မည်နည်း။ ဘုရားသခင်၏ အမှုတော် မည်သည့်အချိန်တွင် အဆုံးသတ်လိမ့်မည်နည်း”ဟု မျှော်လင့်ကြဆဲဖြစ်သည်။ ကမ္ဘာမြေကို ဘုရားသခင် စွန့်ခွာခြင်းနှင့် သူ၏ အမှုတော် အဆုံးသတ်ခြင်းက ၎င်းတို့ကို အကျိုးပြုမည်လော။ ကမ္ဘာမြေကို ဘုရားသခင် စွန့်ခွာမည့်နေ့တွင် ၎င်းတို့ သေဆုံးကြလိမ့်မည်။ ၎င်းတို့ သေမိန့်ချခြင်း ခံကြရမည်ဖြစ်သည်။ ၎င်းတို့ ဝမ်းသာစရာ မည်သည့်အကြောင်းရှိသနည်း။ ဤသည်မှာ မည်သည့် လူစားမျိုး ဖြစ်သနည်း။ ၎င်းတို့သည် ကိုယ်ကျင့်တရား ကင်းမဲ့နေကြသည် မဟုတ်လော။ ၎င်းတို့သည် လောကီလူတို့ထဲတွင် သားသမီးဝတ်မကျေပွန်သော သားများအဖြစ် ခေါ်ဆိုခြင်းခံရကြသည်။ ငါတို့က ၎င်းတို့ကို မယုံကြည်သူများနှင့် အန္တိခရစ်များဟု ခေါ်ကြပြီး ၎င်းတို့သည် အသုံးမကျသောသူများဖြစ်သည်။

နှုတ်ကပတ်တော်သည် လူ့ဇာတိ၌ ပေါ်လာ၏နှင့်ဆိုင်သော အကြောင်းအရာကို ဖော်ပြသည့်အခါ လူများစွာတို့က “လူ့ဇာတိခံဘုရားသည် အမှုတော်ကို လုပ်ဆောင်နေခြင်းသာ ဖြစ်သည်။ သူသည် အမှုတော်၏ အဆင့်အနည်းငယ်ကို ဆောင်ရွက်နေသည်။ သူ့ထံတွင် အမှုပြုသည့် နည်းလမ်းအချို့နှင့် စကားပြောဆိုသည့် နည်းလမ်းအချို့ရှိပြီး ထိုမျှသာဖြစ်သည်။ ယင်းနောက်တွင် သူ၏ အမှုတော် ပြီးမြောက်သွားလိမ့်မည်။ သူ၏ အမှုတော် ပြီးမြောက်သည့်နောက်တွင် လူ့ဇာတိသည် နောက်ထပ် အသုံးဝင်မှု ရှိတော့မည်မဟုတ်ဘဲ စကားပြောရန်လည်း သူ့အတွက် လိုအပ်တော့မည်မဟုတ်ပေ။ ကျွန်ုပ်တို့သည် တစ်စုံတစ်ရာကို ရရှိပြီးဖြစ်လိမ့်မည်ဖြစ်ကာ ဘုရား၏ အမှုတော် အပြီးသတ်သည့် နေ့ရက်ကို မျှော်လင့်စောင့်စားဖို့သာ လိုအပ်လိမ့်မည်ဖြစ်သည်။ ကျွန်ုပ်တို့အနေဖြင့် ဤဘုရားနှုတ်ကပတ်တော်များအကြောင်းကို ပြောဆိုကာ ဟောပြောနိုင်သည်နှင့်တစ်ပြိုင်နက် ခရီးပန်းတိုင်တစ်ခု ရှိကာ ကြီးမားသည့် ကောင်းချီးမင်္ဂလာများ ရရှိလိမ့်မည်ဖြစ်သည်”ဟု ယုံကြည်ကြသည်။ လူအချို့သည် ဤသဘောထားကို ထားရှိကြသည်။ ထို့နောက် ငါသည် နောက်ထပ် နှုတ်ကပတ်တော်များစွာ မိတ်သဟာယပြုခဲ့သည်။ တိတိကျကျပြောရလျှင် ဘုရားသခင်ကို သိကျွမ်းခြင်းနှင့် စပ်လျဉ်း၍ဟူသည့် နှုတ်ကပတ်တော်များအပြင် ဤအချိန်ကာလအတောအတွင်း ငါ မိတ်သဟာယပြုခဲ့သည့် နှုတ်ကပတ်တော်များဖြစ်သည်။ လူအချို့က ဤအရာကို မြင်သည့်အခါ “ဘုရားနှုတ်ကပတ်တော်များအားလုံးသည် နှုတ်ကပတ်တော်သည် လူ့ဇာတိ၌ ပေါ်လာ၏တွင် ပါရှိသည် မဟုတ်လော။ ယခုတွင် ဘုရားသခင်ကို သိကျွမ်းခြင်းနှင့် စပ်လျဉ်း၍ အတွဲကို သူ အဘယ်ကြောင့် ဖော်ပြနေပြီနည်း။ ဘုရားသည် အဘယ်ကြောင့် ပို၍များသော နှုတ်ကပတ်တော်များကို ဖော်ပြမြဲဖော်ပြနေသနည်း။ ယခုမှစ၍ သူသည် နက်နဲသောအရာအချို့၊ ကောင်းကင်နိုင်ငံတော်နှင့်ဆိုင်သော ကိစ္စရပ်အချို့နှင့် အနာဂတ်တွင် လူတို့အနေဖြင့် ကောင်းကင်နိုင်ငံတော်၌ ဘုရားနှင့် မည်သို့ လျှောက်လှမ်းရမည်ဆိုသည်တို့ကို ပြောဆိုသင့်သည်။ ဤအရာများအကြောင်းကို ပြောဆိုဆွေးနွေးခြင်းသည် ကျွန်ုပ်တို့၏ စိတ်ဓာတ်များကို မြင့်တက်လာစေသည်”ဟု တွေးကြလေသည်။ မည်သည့် လူစားမျိုးများသည် ဤအတွေးများ ရှိကြသနည်း။ (အန္တိခရစ်များဖြစ်သည်)။ ၎င်းတို့သည် အဘယ်ကြောင့် ဤအတွေးများ ဖြစ်ပေါ်ခဲ့ကြသနည်း။ အဘယ်ကြောင့်ဆိုသော် ၎င်းတို့သည် သမ္မာတရားကို လုံးဝစိတ်ဝင်စားခြင်း မရှိသောကြောင့်ဖြစ်သည်။ ၎င်းတို့က "ကျွန်ုပ်တို့သည် ဘုရားနောက်သို့ နှစ်ပေါင်းများစွာ လိုက်နေကြပြီးဖြစ်သည်။ အစကတည်းက ဘုရား မည်သို့အမှုပြုခဲ့သည်ကို ကျွန်ုပ်တို့သိသည်။ ဘုရားအမှုတော်၏ အဆင့်အချို့ကို ကျွန်ုပ်တို့ ကိုယ်တိုင်ကိုယ်ကျ ကြုံတွေ့ခံစားခဲ့ရသည်။ ဘုရားသခင် စကားပြောသည့် နည်းလမ်းများကိုလည်း ကျွန်ုပ်တို့ ကိုယ်တိုင်ကိုယ်ကျ တွေ့ကြုံပြီးဖြစ်ကာ ကျွန်ုပ်တို့ကိုယ်တိုင် မျက်လုံးများဖြင့် ဤအရာကို မြင်ရပြီးဖြစ်သည်။ ကျွန်ုပ်တို့သည် ဘုရားသခင်၏ သက်သေများဖြစ်ပြီး ကောင်းချီးမင်္ဂလာများ ရရှိရန် အထိုက်တန်ဆုံးသော မျိုးဆက်ဖြစ်သည်"ဟု တွေးထင်ကြလေသည်။ ၎င်းတို့သည် ဘုရားသခင်က စကားပြောကာ သမ္မာတရားကို ဖော်ပြခဲ့သောကြောင့် သူ့နောက်သို့ လိုက်ခဲ့ကြခြင်းမဟုတ်ဘဲ ဘုရားသခင်၏ ကြိုတင်ပြဋ္ဌန်းချက်ကြောင့် လိုက်ခဲ့ခြင်းဖြစ်သည်။ ဘုရားသခင်သည် ၎င်းတို့အား အမှုတော်၏ အဆင့်အချို့ကို ကြုံတွေ့စေရန် ဦးဆောင်ခဲ့ပြီး ၎င်းတို့သည် ဘုရားသခင်နောက်သို့ မတက်မကြွ လိုက်ခဲ့ကြသည်။ နောက်ပိုင်းတွင် ဘုရားသခင်၏ အမှုတော် ဆက်လက်တိုးတက်သည်နှင့်အမျှ သူသည် သူ့အမှုတော်၏ လက်ရှိအဆင့်ကို အမီလိုက်နိုင်မည့် ပို၍ များသောလူတို့ကို ရွေးချယ်ခဲ့သည်။ ဘုရားသခင်၏ အမှုတော်ကို အဓိက လက်ခံသူများသည် စဉ်ဆက်မပြတ် တိုးပွားပြီး ပြောင်းလဲလာခဲ့သည်။ အစတွင် ဘုရားသခင်နောက်လိုက်ခဲ့ကြသည့် လူအချို့သည် သမ္မာတရားကို မလိုက်စားခဲ့ကြသောကြောင့်လည်းကောင်း၊ ဘုရားသခင်နှင့်ပတ်သက်၍ အမျိုးမျိုးသော အယူအဆများနှင့် အထင်လွဲမှုများ စွဲကိုင်လာခဲ့ကြသောကြောင့်လည်းကောင်း၊ ဘုရားသခင်နှင့်စပ်လျဉ်း၍ အမျိုးမျိုးသော မနာခံမှုနှင့် မကျေနပ်မှုတို့က ၎င်းတို့ထဲတွင် ပေါ်ထွက်လာခဲ့သောကြောင့်လည်းကောင်း တဖြည်းဖြည်း ဖယ်ရှားရှင်းလင်းခြင်းခံခဲ့ကြရသည်။ ဤလူများကို ဖယ်ရှားရှင်းလင်းရခြင်းအတွက် ဓမ္မဓိဋ္ဌာန်မကျသည့် အကြောင်းရင်းနှင့် ဓမ္မဓိဋ္ဌာန်ကျသည့်အကြောင်းရင်း နှစ်မျိုးလုံးရှိခဲ့သည်။ ဓမ္မဓိဋ္ဌာန်မကျသည့် အကြောင်းရင်းအရ ၎င်းတို့က သမ္မာတရားကို မလိုက်စားခဲ့ကြသကဲ့သို့ ဘုရားနှုတ်ကပတ်တော်များကို အယူဝါဒများအဖြစ် သဘောထားကာ ဖာရိရှဲများကဲ့သို့ နေရာအနှံ့ ဟောပြောခဲ့ကြသောကြောင့် ဖြစ်သည်။ ယခုအချိန်ထိ လူအချို့သည် သမ္မာတရား လက်တွေ့ကျမှုများက မည်သည့်အရာဖြစ်သည်ကို နားမလည်ကြသေးပေ။ ၎င်းတို့သည် လူသေများကဲ့သို့ ဖြစ်သည်။ ဓမ္မဓိဋ္ဌာန်ကျကျပြောရလျှင် ဖယ်ရှားရှင်းလင်းခြင်း ခံခဲ့ရသည့်လူများသည် ဘုရားသခင်၏ အသစ်သောအမှုတော် အစပြုခြင်းကို ကိုယ်တိုင်ကိုယ်ကျ ကြုံတွေ့ခဲ့ရသည့်လူများ ဖြစ်သော်လည်း ၎င်းတို့၏ စရိုက်လက္ခဏာ၊ လိုက်စားမှုနှင့် အစွမ်းအစတို့ကြောင့် ဘုရားသခင်၏ နောက်ပိုင်း၊ သာ၍သစ်လွင်သော အမှုတော်အတွက် အရည်အချင်းမပြည့်မီကြပေ။ ထိုသို့ဖြင့် ဤလူများသည် ဘုရားသခင့်အမှုတော် အဆင့်များ၏ လျင်မြန်စွာ ဖယ်ရှားရှင်းလင်းကာ စွန့်ပစ်ခြင်းခံခဲ့ကြရပေသည်။ ဘုရားသခင်ကို သိကျွမ်းခြင်းနှင့် စပ်လျဉ်း၍နှင့်ဆိုင်သော နှုတ်ကပတ်တော်များကို မဖော်ပြမီ အချိန်ကာလတစ်ခုကြာ လူတို့သည် "ငါဆန့်ကျင်ခဲ့သူနှင့် ရှုတ်ချခဲ့သူသည် နောက်ဆုံးတွင် ပြောစရာမရှိတော့ပါ။ သူ၏ အမှုတော်အဆင့်များ နောက်ဆုံးတွင် အပြီးသတ်သွားလေပြီ။ အတိတ်ကာလတွင် ငါသည် သူနှင့်ပတ်သက်၍ အယူအဆများ ရှိခဲ့သည်။ သူ့ကို ငါ မနာခံခဲ့သကဲ့သို့ သူနှင့်ပတ်သက်၍ စိတ်ကျေနပ်ခြင်း မရှိခဲ့သည့်အပြင် သူ့ကို ရှုတ်လည်းရှုတ်ချခဲ့ပြီး ဆန့်ကျင်ခဲ့သည်။ ငါမှန်ကန်ခဲ့သည်မှာ သေချာသည်။ သူသည် ဘုရားမဟုတ်ပါ၊ ခရစ်တော်မဟုတ်ပါ။ သူသည် ဘုရားမဟုတ်သောကြောင့် သူ့ကို ငါ မည်သို့ဆက်ဆံသည်မှာ ကိစ္စမရှိပါ။ သူသည် ဘုရား၏ လမ်းကြောင်းတစ်ခုသာဖြစ်ပြီး ဘုရား၏ ပြောရေးဆိုခွင့်ရှိသူတစ်ဦးသာ ဖြစ်သည်"ဟု ဆိုလျက် မိမိတို့စိတ်နှလုံးအတွင်းတွင် တိတ်တဆိတ် ဝမ်းမြောက်ခဲ့ကြသည်ဟု ဆိုနိုင်သည်။ ထို့အပြင် အချို့ကမူ "ဤဇာတိပကတိသည် ငါတို့နှင့် မည်သို့မျှ မကွာခြားပါ။ စကားပြောပြီး အမှုပြုသည်မှာ သူ့အတွင်းရှိ ဝိညာဉ် ဖြစ်သည်။ ဤလူ့ဇာတိနှင့် မည်သို့မျှ မသက်ဆိုင်ပါ" ဟုပင် ပြောဆိုခဲ့ကြသည်။ လူအချို့သည် ခရစ်တော်ကို ဤသို့ရဲတင်းသောနည်းလမ်းဖြင့် တိတ်တဆိတ် ရှုတ်ချပြီး ပြစ်မှားစော်ကားခဲ့ကြသည်။ နှုတ်ကပတ်တော်သည် လူ့ဇာတိ၌ ပေါ်လာ၏၊ အတွဲ (၂)၊ ဘုရားသခင်ကို သိကျွမ်းခြင်းနှင့် စပ်လျဉ်း၍ ၏ သမ္မာတရားများကို ဖော်ပြသည့်အခါ ခရစ်တော်ကို ရှုတ်ချကာ ပြစ်မှားစော်ကားခဲ့ကြသည့် ဤလူများသည် မိမိတို့ စိတ်နှလုံးများ၌ စိတ်မသက်မသာ ခံစားခဲ့ကြရသည်။ ဤစိတ်မသက်မသာဖြစ်မှုအတွက် အကြောင်းရင်းမှာ အဘယ်နည်း။ တစ်နည်းအားဖြင့် ၎င်းတို့သည် မိမိတို့ စိတ်နှလုံးများတွင် ကြာရှည်စွာ စွဲကိုင်ထားသည့် အယူအဆများ ရှိခဲ့ကြသည်။ သမ္မာတရား ဖော်ပြခဲ့သည့် ထိုလူကို ဆန့်ကျင်ရန် စိတ်ပိုင်းဖြတ်ထားခဲ့ကြသည်။ ၎င်းတို့သည် ဤလူကို မနာခံခဲ့သည့်အပြင် မကျေမနပ်ဖြစ်ခဲ့ကြပြီး သူ့ကို ပြစ်တင်ရှုတ်ချ၍ပင် ကဲ့ရဲ့ခဲ့ကြသည်။ နောက်တစ်နည်းအားဖြင့် ၂၀၁၃ ခုနှစ်နောက်ပိုင်း ဘုရားသခင် ဖော်ပြခဲ့သည့် နှုတ်ကပတ်တော်များသည် လူသားမျိုးနွယ်က ယခင်က မသိရှိခဲ့ဖူးသော နက်နဲသည့်အရာများစွာကို ထုတ်ဖော်ပြသခဲ့သည်။ ဤနက်နဲသောအရာများသည် ခိုင်မာသော အခြေခံအုတ်မြစ် မချရသေးသည့် ယုံကြည်သူအသစ်များ၏ ယုံကြည်ခြင်းကို အားကောင်းစေသည့် အကျိုးတရားတစ်ခုခု ရှိခဲ့ပြီး သံသယဝင်နေသော စိတ်နှလုံးများကို ခဏချင်းအတွင်း သေချာမှုတစ်ရပ် ဖြစ်ပေါ်စေခဲ့သည်။ ဘုရားသခင်ကို နှစ်ပေါင်းများစွာ ယုံကြည်ခဲ့ပြီးဖြစ်သော်လည်း ယခင်က ခရစ်တော်ကို ဆန့်ကျင်၊ ရှုတ်ချကာ ပြစ်မှားစော်ကားခဲ့ကြသော သူများအတွက်မူ ထိုနက်နဲသောအရာများသည် ၎င်းတို့အား ပို၍ပင် စိတ်မသက်မသာဖြစ်စေလျက် တိုက်ရိုက်ထိခိုက်စေခဲ့သည်။ ၎င်းတို့က “ယခု ငါတို့ လုံးဝ သွားပေပြီ။ ဘုရား၏ ဖယ်ရှားရှင်းလင်းခြင်းကို ငါတို့ ခံရလေပြီ။ သူသည် ငါတို့ကို မလိုချင်ပါ။ ဘုရားသည် ယခင်က နှုတ်ကပတ်တော်များစွာကို ဖော်ပြခဲ့သော်လည်း ငါတို့သည် သူ့ကို လူသားတစ်ဦးအဖြစ်သာ အမြဲမှတ်ယူခဲ့ကြသည်။ သူ၏အမှုတော် အဆင့်များ ပြီးဆုံးသွားပြီးနောက် ကျန်သည့်အရာများက သူနှင့်မည်သို့မျှ မသက်ဆိုင်တော့ကြောင်း၊ ဤလူသည် သူ၏အစေခံမှုကို ပြီးစီးသွားပြီဖြစ်ကြောင်းနှင့် ထိုအချိန်မှစ၍ ငါတို့သည် ကောင်းကင်ဘုံရှိ ဘုရားနှင့် ဆက်ဆံပြီး ကောင်းကင်ဘုံရှိ ဘုရားကို ယုံကြည်ကြမည်ဖြစ်ကြောင်း ငါတို့ထင်မှတ်ခဲ့ကြသည်။ ငါတို့သည် မြေကြီးပေါ်တွင်ရှိသော ဘုရားနှင့်ပတ်သက်၍ အယူအဆများ ရှိခဲ့ကြသည်။ သူ့ကို ငါတို့ မနာခံသကဲ့သို့ မထီမဲ့မြင်ပြုခဲ့ကြသည်”ဟု တွေးခဲ့ကြသည်။ ၂၀၁၃ ခုနှစ်ကာလအတွင်း ဖော်ပြခဲ့သော နှုတ်ကပတ်တော်များမှတစ်ဆင့် ဤလူများ၏ ရဲတင်းမှုများစွာ ကွယ်ပျောက်သွားခဲ့သည်။ ဤအရာမတိုင်မီတွင် လူအချို့သည် ဘုရားသခင်၏ အမှုတော်နှင့်ပတ်သက်၍ သံသယများ ဖြစ်ပေါ်ခဲ့ကြသည်။ ၎င်းတို့သည် ဘုရားသခင်၏ လူ့ဇာတိခံယူသည့် ဇာတိပကတိကို အတိုက်အခံလုပ်ကာ ပြစ်မှားစော်ကားခဲ့ကြပြီး အချို့မှာ မိမိတို့၏ ယုံကြည်မှုကိုပင် စွန့်လွှတ်ခဲ့ကြသည်။ အဘယ်ကြောင့် ဤသို့ဖြစ်ရသနည်း။ အဘယ်ကြောင့်ဆိုသော် ၎င်းတို့က အယူအဆများ ဖြစ်ပေါ်ခဲ့ကြသောကြောင့် ဖြစ်သည်။ ၎င်းတို့သည် လူ့ဇာတိခံ ဘုရားသခင်နှင့် ဘုရားသခင်၏ အမှုတော်ကို ငြင်းပယ်ခဲ့သည်သာမက ဘုရားသခင်၏ တည်ရှိမှုကိုလည်း ငြင်းပယ်ခဲ့ကြသည်။ ဘုရားသခင်အပေါ် ဤလူများ၏ သဘောထားအရ မည်သည့်အဆုံးသတ်ကို ၎င်းတို့ ရှိသင့်ကြသနည်း။ ဘုရားသခင်အပေါ် ၎င်းတို့၏ သဘောထားနှင့် အမြင်အရ ၎င်းတို့၏ အနှစ်သာရမှာ အဘယ်နည်း။ (မယုံကြည်သူတစ်ဦး၏ အနှစ်သာရပင်ဖြစ်သည်။) မယုံကြည်သူများ၏ ပထမဦးဆုံး အဓိက ထူးခြားသောလက္ခဏာမှာ အချောင်သမားဝါဒဖြစ်သည်။ ၎င်းတို့သည် ဘုရားသခင်၏ နှုတ်ကပတ်တော်၌ မိမိတို့၏ ကိုယ်ကျိုးစီးပွားကို ရှာတွေ့သည်နှင့် တစ်ပြိုင်နက် ဖမ်းဆုပ်ကြလိမ့်မည်၊ လက်လွှတ်ဖို့ ငြင်းဆန်ကြလိမ့်မည်ဖြစ်ပြီး သူ၏ နှုတ်ကပတ်တော်များမှ အကျိုးကျေးဇူး ရရှိရန် ကြိုးစားကြလိမ့်မည်။ ဒုတိယအချက်မှာ ၎င်းတို့သည် ဘုရားသခင်ကို အချိန်မရွေး၊ နေရာမရွေး ပြစ်မှားစော်ကားနိုင်စွမ်းရှိကြသည်။ ဘုရားသခင်နှင့်ပတ်သက်၍ အချိန်မရွေး နေရာမရွေး အယူအဆများ ဖြစ်ပေါ်နိုင်စွမ်းရှိကြပြီး သေးငယ်သော အရာတစ်ခုက ၎င်းတို့၏ အယူအဆများနှင့် မကိုက်ညီသည့်အခါ ဘုရားသခင်ကို ဝေဖန်၊ ရှုတ်ချကာ ဆန့်ကျင်နိုင်စွမ်း ရှိကြလေသည်။ ၎င်းတို့သည် ဘုရားသခင်ကို လုံးဝ မကြောက်ရွံ့ကြပေ။ ဤလူများအားလုံးတွင် အန္တိခရစ်များ၏ အနှစ်သာရ ရှိကြသည်။ ၎င်းတို့သည် အန္တိခရစ်များချည်းသာ ဖြစ်သည်။ ၎င်းတို့၏ အခြားသော ထူးခြားသည့် လက္ခဏာမှာ အဘယ်နည်း။ ဤလူများသည် သမ္မာတရားအတွက် ချစ်ခြင်းမေတ္တာ လုံးဝ မရှိကြပေ။ ၎င်းတို့သည် ဘုရားနှုတ်ကပတ်တော်များကို ပထမဆုံး ရရှိကြသူများ ဖြစ်ကြကာ ဘုရားနှုတ်ကပတ်တော်များကို ပထမဆုံး ကြားသိရသူများဖြစ်ပြီး ဘုရားအမှုတော်၏ အဆင့်များနှင့် နည်းလမ်းများကို ကိုယ်တိုင်ကိုယ်ကျ တွေ့ကြုံခဲ့ကြသူများလည်း ဖြစ်ကြသည်။ ဤလူများသည် ယခုတွင် အနှစ် ၃၀ ကြာ ယုံကြည်နေပြီး ဖြစ်သော်လည်း ၎င်းတို့ထဲမှ အများစုသည် ဘုရားအိမ်တော်၌ မည်သည့် တာဝန်ကိုမျှ ထမ်းဆောင်နိုင်ခြင်း မရှိကြသကဲ့သို့ ပြောစရာ အတွေ့အကြုံတစ်ခုမျှ မရှိကြပေ။ ၎င်းတို့ သွားသည့်နေရာတိုင်းတွင် အသက်မရှိသည့် စကားများနှင့် အယူဝါဒများအကြောင်းသာ ၎င်းတို့ ပြောဆိုကြသည်။ ၎င်းတို့၏ အသိသာဆုံးသော ထူးခြားသည့် လက္ခဏာမှာ အဘယ်နည်း။ ၎င်းတို့အနေဖြင့် ဘုရားသခင်ကို အနှစ် ၃၀ ကြာ ယုံကြည်ပြီးဖြစ်သော်လည်း ၎င်းတို့၏ စိတ်သဘောထားများက လုံးဝမပြောင်းလဲသေးသကဲ့သို့ ဘုရားသခင်ကို ကြောက်ရွံ့ခြင်း သို့မဟုတ် သိနားလည်ခြင်း မရှိကြပေ။ ၎င်းတို့သည် ဘုရားသခင်၏ လူ့ဇာတိခံသော ဇာတိပကတိကို တိတ်တဆိတ် ပေါ့ပေါ့တန်တန် ဝေဖန်နိုင်စွမ်းရှိကြပြီး စိုးရိမ်ထိတ်လန့်မှု သို့မဟုတ် ကြောက်ရွံ့မှု စိုးစဉ်းမျှမရှိဘဲ ရေးကြီးခွင့်ကျယ်လုပ်နိုင်စွမ်းပင် ရှိကာ ဘုရားသခင်ကို ရှုတ်ချနိုင်စွမ်းပင် ရှိကြသည်။ ၎င်းတို့သည် သမ္မာတရားကို မချစ်ကြ၊ သမ္မာတရားကို အလွန်အမင်း မနှစ်မြို့ကြသကဲ့သို့ သမ္မာတရားကို ဆန့်ကျင်ကြသည်။ လူ့ဇာတိခံဘုရားသခင်နှင့် ပတ်သက်လာသည့်အခါ မည်သည့်အရာကိုမဆို ပြောဝံ့ကြသည်။ အရာရာကို ဆန်းစစ်ကာ ဝေဖန်ဝံ့ကြပြီး အယူအဆများ ဖြစ်ပေါ်သည့်အခါတိုင်းတွင် ယင်းတို့ကို ဖြန့်ဖြူးဝံ့ကြသည်။ ဤလူများသည် စက်ဆုပ်စရာ ဖြစ်သည် မဟုတ်လော။ (ဟုတ်ပါသည်။) ၎င်းတို့သည် ဘုရားသခင်၏ လူများ ဖြစ်သလော။ ၎င်းတို့သည် ဘုရားသခင်ကို အနှစ် ၃၀ ကြာ ယုံကြည်ပြီးဖြစ်သော်လည်း မည်သည့် လက်တွေ့ကျမှုမျှ မပိုင်ဆိုင်ကြသကဲ့သို့ ၎င်းတို့၏ စိတ်သဘောထားများက လုံးဝ မပြောင်းလဲသေးပေ။ ဤလူများသည် လူသေများဖြစ်သည် မဟုတ်လော။ သမ္မာတရားကို အမှန်တကယ် လိုက်စားပြီး ပုံမှန်လူ့သဘာဝကို အမှန်တကယ် ပိုင်ဆိုင်သည့်သူများသည် ဘုရားသခင်ကို ၃ နှစ်ကြာမျှ ယုံကြည်ပြီးနောက် သမ္မာတရားအချို့အား သိနားလည်ကာ ဝင်ရောက်နိုင်ကြသည် မဟုတ်လော။ (ဝင်ရောက်နိုင်ကြပါသည်။) သို့သော် မည်သည့် အတွေ့အကြုံမျှ လုံးဝ မရှိဘဲ ဘုရားသခင်ကို အနှစ် ၃၀ ကြာ ယုံကြည်ခဲ့ကြသည့်လူများ ရှိ၏။ ၎င်းတို့၏ အတွေ့အကြုံများအကြောင်း ပြောဆိုဆွေးနွေးရန် ၎င်းတို့အား သင် စေခိုင်းပါက ၎င်းတို့သည် အယူဝါဒများ၊ ဆောင်ပုဒ်များနှင့် စကားများကို ဟောပြောပို့ချခြင်းအကြောင်းသာ ပြောကြလိမ့်မည်။ သို့ဆိုလျှင် လွန်ခဲ့သည့် အနှစ် ၃၀ တွင် ၎င်းတို့သည် ဘုရားနှုတ်ကပတ်တော်များ၌ မည်သည့် အားထုတ်မှု ပြုလုပ်ခဲ့ကြပြီနည်း။ မည်သည့်အရာကို ၎င်းတို့ ရရှိကြလေပြီနည်း။ ဘုရားနှုတ်ကပတ်တော်များကို ၎င်းတို့ လက်မခံကြသည်မှာ သိသာထင်ရှား၏။ ၎င်းတို့သည် လူသားမျိုးနွယ်ကို ကောင်းချီးမင်္ဂလာများနှင့် ကတိတော်များပေးခြင်းနှင့်ပတ်သက်သည့် ဘုရားနှုတ်ကပတ်တော်များ၊ သူ၏ နားကြားကောင်းသည့် နှုတ်ကပတ်တော်များ၊ သူ၏ နှစ်သိမ့်ပေးပြီး တိုက်တွန်းခွန်အားပေးသည့် နှုတ်ကပတ်တော်များနှင့် နားဝင်ချိုသည့် နှုတ်ကပတ်တော်များအား လက်ခံကြသော်လည်း ဘုရားသခင် ဖော်ပြသည့် မည်သည့် သမ္မာတရားကိုမျှ သို့မဟုတ် လူသားမျိုးနွယ်အတွက်ဖြစ်သော သူ၏ မည်သည့် သတ်မှတ်ချက်ကိုမျှ လက်မခံကြပေ။ တစ်ခုတလေကိုမျှ ၎င်းတို့ လက်မခံကြပေ။ ဤလူများသည် ဖယ်ရှားရှင်းလင်းခံရသင့်သည် မဟုတ်လော။ (ဖယ်ရှားရှင်းလင်းခံရသင့်ပါသည်။) ထိုသို့သော လူများကို ဖယ်ရှားရှင်းလင်းခြင်းသည် မတရားမှုတစ်ခုဖြစ်သလော။ (မဟုတ်ပါ။) ယင်းမှာ အဘယ့်ကြောင့်ဆိုသော် ၎င်းတို့သည် သမ္မာတရားကို ရှင်းလင်းစွာ သိရှိလင့်ကစား တမင်တကာ အပြစ်ပြုကြသောကြောင့် ဖြစ်သည်။

ဘုရားသခင်သည် နောက်ဆုံးသောကာလ၌ အလွန်များသော အမှုကို လုပ်ဆောင်ကာ အလွန်များသော နှုတ်ကပတ်တော်များ ပြောဆိုပြီးဖြစ်သည့်အပြင် လူတို့သည် ထိုအရာကို တွေ့ကြုံပြီး ဘုရားအမှုတော်၏ အဆင့်တစ်ခုစီကို မိမိတို့ကိုယ်ပိုင် မျက်လုံးများဖြင့် မျက်မြင်ကြုတွေ့ကြပြီးဖြစ်သည်။ ထိုအရာကို မည်သည့် ရှုထောင့်အမြင်မှ ရှုမြင်သည်ဖြစ်စေ၊ ဘုရားသခင်က အလွန်များသည့် သမ္မာတရားများကို ဖော်ပြပြီး အလွန်များသည့် လူတို့ကို ကယ်တင်ခြင်းမှာ ငြင်းမရနိုင်သကဲ့သို့ မည်သူမျှ မေးခွန်းမထုတ်သင့်ပေ။ လူ့ဇာခံဘုရားသခင်က မည်သို့မည်ပုံ သာမန်ဖြစ်ပြီး ပုံမှန်ဖြစ်သည်ဖြစ်စေ၊ လူသားအတွက် သူသည် အရေးမကြီးဟန် မည်သို့ရှိသည်ဖြစ်စေ လူတို့သည် သူ၏ နှုတ်ကပတ်တော်များကို သမ္မာတရားအဖြစ် လက်ခံသင့်ဆဲဖြစ်သည်။ အချို့က “လူ့ဇာတိခံဘုရားသည် အလွန် အရေးမပါသကဲ့သို့ အလွန်သာမန်ဖြစ်ကာ လုံးဝ မကြီးမြတ်ပါ။ ကျွန်ုပ်တို့အား သူ့ကို လေးစားအောင် မည်သို့များခိုင်းစေ၍ ရနိုင်မည်နည်း။ ထိုသို့သော သာမန်ဇာတိပကတိသည် ကြီးမြတ်သော အမှုတစ်ခုတလေကို လုပ်ဆောင်နိုင်စွမ်းရှိနိုင်မည်လော။ သူ့ထံမှ ကြီးမြတ်သည့် ကောင်းချီးမင်္ဂလာများကို ကျွန်ုပ်တို့ အမှန်တကယ် ရရှိနိုင်သလော။ ကျွန်ုပ်တို့ မသိပါ။ ကျွန်ုပ်တို့ လုပ်ဆောင်နိုင်သမျှမှာ သူ့ကို သာမန်လူတစ်ဦးကဲ့သို့ သဘောထားခြင်း ဖြစ်သည်”ဟု ပြောကြသည်။ အခြားသူများက “ကိုယ်တော်လုပ်ဆောင်ပြီးဖြစ်သည့် အရာများထဲမှ အချို့သည် ကျွန်ုပ်တို့ကို လက်ခံယုံကြည်ခြင်းမရှိ ဖြစ်စေရစ်သည်၊ ပြီးလျှင် အချို့က ကျွန်ုပ်တို့ကို အယူအဆများ ပေးထားပြီးဖြစ်ကာ အချို့မှာ ကျွန်ုပ်တို့အဖို့ နားမလည်နိုင်စရာ ဖြစ်သည်၊ ကျွန်ုပ်တို့အဖို့ လက်မခံနိုင်ဖွယ်ဖြစ်သော အရာများအချို့ ကိုယ်တော် ပြောဆိုထားသောကြောင့် ကိုယ်တော်သည် ကောင်းကင်ဘုံရှိ ဘုရားသခင်ကို ကိုယ်စားမပြုနိုင်ပေ။ ထို့ကြောင့် ကိုယ်တော့်ကို ကျွန်ုပ်တို့ အဆုံးထိတိုင် တိုက်ခိုက်ရမည်။ ဧဝံဂေလိတရားကို ဖြန့်ဝေဖို့ ကျွန်ုပ်တို့ကို ကိုယ်တော်စေခိုင်းပါက ကျွန်ုပ်တို့ဖြန့်ဝေမည်မဟုတ်။ ကျွန်ုပ်တို့၏ တာဝန်ကို ထမ်းဆောင်ဖို့ ကျွန်ုပ်တို့ကို ကိုယ်တော်စေခိုင်းပါက ကျွန်ုပ်တို့ ထမ်းဆောင်မည် မဟုတ်သကဲ့သို့ သမ္မာတရားကို လက်ခံဖို့ ကျွန်ုပ်တို့ကို ကိုယ်တော်တောင်းဆိုပါက ကျွန်ုပ်တို့ လက်ခံမည်မဟုတ်ပါ။ ကိုယ်တော်ဖြစ်သည့် ဇာတိအဖြစ်တော်ကို ကျွန်ုပ်တို့ အဆုံးထိတိုင် တိုက်ခိုက်ရမည်။ ကိုယ်တော့်အနေဖြင့် ကျွန်ုပ်တို့ကို မည်သည့်အရာ လုပ်ဆောင်နိုင်သည်ကို ကြည့်စို့” ဟု ပြောကြသည်။ သမ္မာတရားကို လုံးဝလက်မခံသော ဤလူများ၏ စိတ်နှလုံးများထဲတွင် ဘုရားသခင်၏အမှုကို ငြင်းပယ်ဖို့၊ ဘုရားသခင်၏ နှုတ်ကပတ်တော်များက သမ္မာတရားဖြစ်သည်ကို ငြင်းပယ်ဖို့နှင့် သူ၏လူ့ဇာတိခံ ခန္ဓာကို ငြင်းပယ်ဖို့ ထောင်ချီသော၊ သောင်းချီသော အကြောင်းပြချက်များ ရှိလေသည်။ သို့သော် ၎င်းတို့အဖို့ သိပ်ရှင်းလင်းမည် မဟုတ်သည့် အရာတစ်ခုရှိ၏။ ၎င်းတို့၌ မည်သည့် အကြောင်းပြချက်များစွာ ရှိသည်ဖြစ်စေ ဤသမ္မာတရားများကို ၎င်းတို့ လက်မခံကြပါက ၎င်းတို့ ကယ်တင်ခံရလိမ့်မည်မဟုတ်။ ငါ၏ဖြစ်ခြင်း ဖြစ်သည့် ဇာတိအဖြစ်တော်ကို သင်လက်မခံလျှင်ဖြစ်စေ၊ ဘုရားသခင်၏ အမှုတော်ကို ကျိုးနွံနာခံခြင်း မရှိလျှင်ဖြစ်စေ ယင်းမှာ ကိစ္စမရှိပေ။ ငါသည် သင့်ကို တွန်းအားပေးမည် မဟုတ်။ သို့ရာတွင် ဘုရားသခင်၏ ဤနှုတ်ကပတ်တော်များက သမ္မာတရားဖြစ်ကြောင်း သင် အသိအမှတ်မပြုသကဲ့သို့ ယင်းတို့ကို သမ္မာတရားအဖြစ် လက်တွေ့လုပ်ဆောင်ခြင်း မရှိပါက ဤအရာကို သင့်အား လုံးလုံး ရိုးသားမှုဖြင့် ငါပြောမည်။ သင်သည် မည်သည့်အခါတွင်မျှ ကယ်တင်ခံရလိမ့်မည်မဟုတ်သကဲ့သို့ ကောင်းကင်နိုင်ငံတော်၏ တံခါးကို တစ်ကြိမ်တစ်ခါမျှ ဖြတ်သန်းရလိမ့်မည်မဟုတ်။ သင်သည် ဘုရားသခင်၏ ဤနှုတ်ကပတ်တော်များကိုလည်းကောင်း၊ ဤသမ္မာတရားများကိုလည်းကောင်း၊ အမှုပြုပြီး လူသားမျိုးနွယ်ကို ကယ်တင်သော ဤခရစ်တော်ကိုလည်းကောင်း တိမ်း‌ရှောင်ပါက အယူဝါဒမည်မျှကို သင်နားလည်သည်ဖြစ်စေ၊ ဆင်းရဲဒုက္ခမည်မျှကို သင် ခါးစည်းခံသည်ဖြစ်စေ သင်သည် သမ္မာတရားကို ရရှိလိမ့်မည်မဟုတ်။ သင်သည် အမှိုက်တစ်စသာ ဖြစ်သည်။ ဘုရားသခင်ကို ယုံကြည်ခြင်းအတွက် သင်၏ အကြောင်းပြချက်က မည်သည့်အရာဖြစ်စေ၊ သင်၏ တာဝန်ကို ထမ်းဆောင်ရာတွင် သင်၏ ရည်မှန်းချက်က မည်သည့်အရာဖြစ်စေ သင်ကယ်တင်မခံရနိုင်ပေ။ သင့်အနေဖြင့် ကယ်တင်မခံရနိုင်ပါက၊ မည်သည့်ကောင်းချီးမင်္ဂလာများကို သင်ရရှိနိုင်သနည်း။ လူအချို့သည် ကောင်းကင်ဘုံရှိ ဘုရားသခင်နှင့် ယှဉ်ပြိုင်ကြသည်၊ အချို့က ကမ္ဘာပေါ်ရှိ ဘုရားသခင်နှင့် ယှဉ်ပြိုင်ကြပြီး ဘုရားနှုတ်ကပတ်တော်များနှင့် သမ္မာတရားတို့ကို ယှဉ်ပြိုင်ဝံ့ကြသည်မှာ မိမိတို့၏ အဆုံးသတ်နှင့် ပန်းတိုင်သည် မည်သည့်ပုံစံရှိသည်ကိုပင် ၎င်းတို့ ဂရုမစိုက်ကြချေ။ ဤသည်မှာ ဆိုးညစ်သည် မဟုတ်လော။ ဤကိုယ်ကျင့်တရားပျက်သူများသည် အလွန် ကောက်ကျစ်ဆိုးယုတ်ကြသည်။ ၎င်းတို့ထဲမှ အယောက်စီတိုင်းသည် ဆိုးယုတ်သည့်သူတစ်ဦးဖြစ်သည်။ ၎င်းတို့အားလုံးသည် မယုံကြည်သူများ၊ အခွင့်ရေးသမားများ၊ အရှက်မဲ့သည့်လူများဖြစ်ပြီး ဤသည်မှာ အန္တိခရစ်တို့၏ အနှစ်သာရဖြစ်လေသည်။

ဘုရားနှုတ်ကပတ်တော်များအပေါ် အန္တိခရစ်များ၏ သဘောထားနှင့်ပတ်သက်၍ ငါ ယခုတင် မိတ်သဟာယပြုခဲ့သည်။ အန္တိခရစ်များက ဘုရားနှုတ်ကပတ်တော်များကို ချဉ်းကပ်သည့်အခါ ထိုနှုတ်ကပတ်တော်များအတွင်းတွင်ရှိသော သမ္မာတရား သို့မဟုတ် လက်တွေ့လုပ်ဆောင်မှု စည်းမျဉ်းများကို မရှာဖွေကြပေ။ ဘုရားသခင်ကို ကြောက်ရွံ့ကာ မကောင်းမှုကို ရှောင်ကြဉ်ရမည့် နည်းလမ်းအား မည်သို့ ရရှိရမည်ဟူသည်ကို ဘုရားနှုတ်ကပတ်တော်များမှ နားလည်ရန် ၎င်းတို့ မကြိုးစားကြသကဲ့သို့ ၎င်းတို့အနေဖြင့် ဘုရားသခင်၏ ရည်ရွယ်ချက်များကို အထမြောက်အောင် ဆောင်ရွက်သည့် လူတစ်ဦး ဖြစ်လာနိုင်ရန်အလို့ငှာ ဘုရားသခင်၏ ရည်ရွယ်ချက်များကို နားလည်ဖို့ သေချာပေါက် မကြိုးစားကြပေ။ ထို့ထက် ၎င်းတို့သည် ဘုရားနှုတ်ကပတ်တော်များတွင် မိမိတို့ အလိုရှိသည့် ခရီးပန်းတိုင်အပြင် ကောင်းချီးမင်္ဂလာများကို ၎င်းတို့ ရရှိနိုင်ခြင်း ရှိမရှိဆိုသည်နှင့် ဤဘဝတွင် သာ၍များသော ကျေးဇူးတော်အား ၎င်းတို့ မည်သို့ ရရှိနိုင်သည်ဆိုသည့်အပြင် နောင်ဘဝတွင် အဆတစ်ရာမျှလောက် ၎င်းတို့ ရရှိနိုင်ခြင်း ရှိမရှိ စသည်တို့အပါအဝင် ၎င်းတို့ အလိုရှိသည့် အမျိုးမျိုးသော အကျိုးကျေးဇူးများကို ရှာတွေ့လိုကြသည်။ ဤသည်တို့မှာ ဘုရားနှုတ်ကပတ်တော်များ၌ ၎င်းတို့ ရှာဖွေနေကြသည့် အရာများဖြစ်သည်။ ထို့ကြောင့် ထိုအရာကို မည်သည့် ရှုထောင့်အမြင်မှ သင် ကြည့်သည်ဖြစ်စေ အန္တိခရစ်များသည် ဘုရားနှုတ်ကပတ်တော်များကို သမ္မာတရားအဖြစ် မည်သည့်အခါတွင်မျှ သဘောမထားသကဲ့သို့ ဘုရားနှုတ်ကပတ်တော်များက သမ္မာတရားဖြစ်ကာ လူသားမျိုးနွယ်က လက်ခံသင်သည်ဟူ၍လည်း မတွေးကြပေ။ ဘုရားနှုတ်ကပတ်တော်များအပေါ် ၎င်းတို့၏ သဘောထားမှာ ၎င်းတို့အနေဖြင့် မိမိတို့ လိုချင်သည့် ကောင်းချီးများနှင့် ခရီးပန်းတိုင်ကို ရရှိရန် ဘုရားနှုတ်ကပတ်တော်များကို အသုံးပြုလိုကြခြင်း ဖြစ်သည်။ ၎င်းတို့သည် မိမိတို့ လိုက်စားသည့် အရာများကို ရရှိရန်နှင့် ၎င်းတို့၏ ရည်မှန်းချက်များကို စွမ်းဆောင်ရရှိရန် စတင်တက်လှမ်းရာအဖြစ် ဘုရားနှုတ်ကပတ်တော်များကို အသုံးပြုချင်ကြလေသည်။ ၎င်းတို့၏ လိုက်စားမှု၊ ၎င်းတို့ လျှောက်သည့် လမ်းကြောင်းနှင့် ဘုရားနှုတ်ကပတ်တော်များအပေါ် ၎င်းတို့၏ သဘောထားအရ၊ ဤလူများသည် မယုံကြည်သူတစ်သိုက်၊ အချောင်သမားတစ်သိုက် ဖြစ်သည်။ အန္တိခရစ်များက ဘုရားနှုတ်ကပတ်တော်များတွင် မိမိတို့ လိုချင်သည့် အကျိုးအမြတ်များနှင့် ခရီးပန်းတိုင်ကို ရှာမတွေ့နိုင်သည့်အခါ သို့မဟုတ် ဘုရားနှုတ်ကပတ်တော်များကို လေ့လာသည့် ဖြစ်စဉ်တွင် ရှေ့ရေးများ၊ ကံကြမ္မာများ သို့မဟုတ် လူသားမျိုးနွယ်အတွက် ဘုရားသခင်၏ ကတိတော်များနှင့်ပတ်သက်သော ဘုရားနှုတ်ကပတ်တော်များက ၎င်းတို့ကို စိတ်ပျက်စေပြီး ၎င်းတို့၏ လိုအင်ဆန္ဒများ မပြည့်နိုင်သည့်အခါ ၎င်းတို့သည် မိမိတို့လက်တွင် ကိုင်ထားသည့် ဘုရားနှုတ်ကပတ်တော်များကို မပြောမဆို၊ တုံ့ဆိုင်းခြင်းမရှိဘဲ ဘေးဖယ်ထားလိုက်ကြသည်။ ဘုရားသခင်ကို ၎င်းတို့ စွန့်လွှတ်ကာ စွန့်ပစ်လိုက်ကြပြီး ၎င်းတို့ လိုချင်သည့် ဘဝကို လိုက်စားကြလေသည်။ ၎င်းတို့သည် ဘုရားသခင်၏ ကယ်တင်ခြင်းကို လက်ခံရန် သူ့ရှေ့မှောက်သို့ မလာကြပေ။ ဘုရားနှုတ်ကပတ်တော်များကို ၎င်းတို့ ဖတ်ရှုသည့်အခါ ယင်းတို့ကို သမ္မာတရားအဖြစ် ၎င်းတို့ သဘောမထားကြဘဲ ထိုအစား ၎င်းတို့၏ တစ်ကိုယ်ရေ ရည်မှန်းချက်များကို ရရှိရန်နှင့် ၎င်းတို့၏ တစ်ကိုယ်ရေ အလိုဆန္ဒများနှင့် ရည်မှန်းချက်တို့ကို ဖြည့်ဆည်းရန် ဘုရားနှုတ်ကပတ်တော်များကို အသုံးပြုချင်ကြလေသည်။ ထိုသို့ဖြင့် ၎င်းတို့၏ အဆုံးသတ်နှင့် ခရီးပန်းတိုင်အတွက် ဘုရားနှုတ်ကပတ်တော်များကို မမောနိုင်မပန်းနိုင် ရှာဖွေကြသည်။ ၎င်းတို့သည် ကပ်ဘေးများနှင့်ပတ်သက်၍ ဘုရားသခင် ပြောသည့်အရာ၊ နက်နဲသောအရာများနှင့်ပတ်သက်၍ သူ၏ ထုတ်ဖော်ချက်များ၊ လူသားမျိုးနွယ်၏ ဖွံဖြိုးတိုးတက်မှုနှင့်ပတ်သက်၍ သူ၏ ထုတ်ဖော်ချက်များအပြင် သူ၏ အလုပ်နှင့်ပတ်သက်သော နောက်ကွယ်က သတင်းအချက်အလက်အချို့ကို ရှာဖွေကြလေသည်။ ဤသည်မှာ ၎င်းတို့ အရေးစိုက်ကြသည့် အကြောင်းအရာ ဖြစ်သည်။ ဤနယ်ပယ် ပြင်ပရှိ မည်သည့်အရာကိုမျှ ၎င်းတို့ စိတ်မဝင်စားကြပေ။ ၎င်းတို့သည် ဖောက်ပြန်ပျက်စီးသော လူသားမျိုးနွယ်အတွက်ဖြစ်သည့် ဘုရားသခင်၏ သတ်မှတ်ချက်အချို့ကိုပင် မကြာခဏ မထီမဲ့မြင်ပြုကာ အတိုက်အခံလုပ်ကြသည်။ ဖောက်ပြန်ပျက်စီးသော လူသားမျိုးနွယ်အပေါ် ဘုရားသခင်၏ ဖော်ထုတ်မှုအပေါ် အလွန်အမင်း မနှစ်မြို့ခြင်းပင် ဖြစ်ကြသည်။ ဘုရားနှုတ်ကပတ်တော်များ၌ အသုံးပြုသည့် စကားထားသိုရာနှင့် စကားပြောသည့်လေသံကို မကြာခဏ အပြစ်ရှာကြပြီး ဘုရားသခင်အပေါ် တိုက်ခိုက်ရာတွင် အသုံးပြုနိုင်မည့် တစ်စုံတစ်ရာကို ရှာဖွေရန် ကြိုးစားကြသည်။ ဥပမာအနေဖြင့် ဘုရားသခင်က လူသားမျိုးနွယ်ကို “မိန်းမပျက်များ” နှင့် “ပြည့်တန်ဆာ” များအဖြစ် ဖော်ထုတ်သည့်အခါ ၎င်းတို့က “ဤအရာများသည် အဘယ်သို့ဖြစ်ပြီး ဘုရားနှုတ်ကပတ်တော်များ ဖြစ်နိုင်သနည်း။ ဘုရားက ဤကဲ့သို့ ပြောမည်မဟုတ်ပါ။ ဘုရားသခင်က ယဉ်ကျေး၊ နူးညံ့ပြီး ထောက်ထားသည့် ပုံစံတစ်ခုဖြင့် စကားပြောသင့်သည်”ဟု ပြောကြသည်။ လူသားအယူအဆများနှင့် မကိုက်ညီသည့်၊ လူသား သဒ္ဒါနှင့် မကိုက်ညီသည့်၊ ဖောက်ပြန်ပျက်စီးသော လူသားများ၏ သမားရိုးကျဖြစ်သော တွေးခေါ်မြော်မြင်မှုနှင့် မကိုက်သည့် ဘုရားနှုတ်ကပတ်တော်အချို့နှင့် ပတ်သက်လာသည့်အခါ ၎င်းတို့က “ဤသည်တို့မှာ ဘုရားနှုတ်ကပတ်တော်များ မဟုတ်ပါ။ ဘုရားက ဤကဲ့သို့ စကားပြောမည် မဟုတ်ပါ။ ဘုရားသခင်သည် အလွန် အထွတ်အထိတ်ဖြစ်သည်၊ ကြီးမြတ်ပြီး ဉာဏ်မမီနိုင်ဖွယ် ဖြစ်သည်။ ထို့ကြောင့် သူ၏ စကားများသည် အဘယ်သို့ဖြစ်ပြီး အလွန် သာမန် ဖြစ်နိုင်မည်နည်း။ ယင်းတို့သည် အဘယ်သို့ဖြစ်ပြီး သမားရိုးကျ တွေးခေါ်မြော်မြင်မှုနှင့် အလွန် ကွဲလွဲနိုင်ရမည်နည်း။ ဘုရားစကားများက သမ္မာတရားဖြစ်လျှင် လူတိုင်းက အလွန်လေးစားသမှုရှိသည့်၊ ကိုးကွယ်ပြီး ကြည်ညိုသည့် နည်းလမ်းတစ်ခုဖြင့် ပြောဆိုထားသင့်သည်။ အားလုံးက ဉာဏ်မမီနိုင်ဖွယ်ဖြစ်သင့်သည်။ ယင်းမှာ ဘုရားနှုတ်ကပတ်တော်များ ဖြစ်သင့်သည့်ပုံစံဖြစ်သည်”ဟု စဉ်းစားကြသည်။ ဘုရားနှုတ်ကပတ်တော်များနှင့် ပတ်သက်လာသည့်အခါ ၎င်းတို့တွင် အမျိုးမျိုးသော အယူအဆများ၊ အမျိုးမျိုးသော ဘောင်ခတ်မှုများနှင့် အမျိုးမျိုးသော သတ်မှတ်ချက်များပင် ရှိလေသည်။ ၎င်းတို့၏ သတ်မှတ်ချက်များနှင့် ဘောင်ခတ်မှုများအရ အန္တိခရစ်များ၏ အနှစ်သာရသည် စာတန်၏ အနှစ်သာရဖြစ်သည်ကို မြင်နိုင်သည်။ ဘုရားသခင်နှင့် ဘုရားနှုတ်ကပတ်တော်များအပေါ် ၎င်းတို့၏ သဘောထားမှာ သုတေသနပြုရန်၊ အတိုက်အခံလုပ်ရန်၊ ဝေဖန်ရန်၊ ဘုရားသခင်အပေါ် တိုက်ခိုက်ရာတွင် အသုံးပြုဖို့ တစ်စုံတစ်ရာကို ရှာဖွေရန်နှင့် အပြစ်ရှာရန် ဖြစ်သည်။ ၎င်းတို့သည် ဘုရားနှုတ်ကပတ်တော်များတွင် သမ္မာတရားအပေါ် မည်သည့် အားထုတ်မှုမျှ မပြုကြသကဲ့သို့ ယင်းကို ကျိုးနွံနာခံခြင်း၊ လက်ခံခြင်း သို့မဟုတ် လက်တွေ့လုပ်ဆောင်ခြင်းလည်း မရှိပေ။ ထို့ကြောင့် အန္တိခရစ်များ၏ အနှစ်သာရမှာ စာတန်နှင့် ဝိညာဉ်ဆိုးများ၏ အနှစ်သာရ ဖြစ်သည်။ ဘုရားနှုတ်ကပတ်တော်များကို အန္တိခရစ်များ သဘောထားပုံသည်လည်း ဘုရားသခင်ကို ၎င်းတို့ သဘောထားပုံ ဖြစ်သည်။ ဘုရားနှုတ်ကပတ်တော်များက ဘုရားသခင် ကိုယ်တော်တိုင်ကို ကိုယ်စားပြုသည်။ ဘုရားသခင် ဖော်ပြသည့် သမ္မာတရားအားလုံးသည် သူ၏ စိတ်သဘောထား၊ သူ၏ အနှစ်သာရနှင့် ထို့ထက်ပို၍ပင် သူ၏ ပင်ကိုလက္ခဏာနှင့် အဆင့်အတန်းတို့ကို ကိုယ်စားပြုသည်။ ဤနှုတ်ကပတ်တော်များကို ဘုရားသခင်၏ ဇာတိပကတိက ဖော်ပြလျှင်ဖြစ်စေ၊ ဘုရားသခင်၏ ဝိညာဉ်တော်က ဖော်ပြလျှင်ဖြစ်စေ၊ မည်သည့် အကြောင်းအရာကို သူ ဖော်ပြလျှင်ဖြစ်စေ ဤနှုတ်ကပတ်တော်များသည် ဘုရားသခင်ကို ဧကန်မုချ ကိုယ်စားပြုပေသည်။ ထို့ကြောင့် အန္တိခရစ်များက ဘုရားနှုတ်ကပတ်တော်များကို သုတေသနပြုခြင်းနှင့် စိစစ်ခြင်းအပြင် ယင်းတို့နှင့်ပတ်သက်၍ အယူအဆများ ဖြစ်ပေါ်ခြင်းသည် ဘုရားသခင်နှင့်ပတ်သက်၍ အယူအဆများ ဖြစ်ပေါ်ခြင်းနှင့် ညီမျှသည်။ ၎င်းတို့သည် ဘုရားသခင်ကို စေ့စေ့စပ်စပ်ကြည်ရှုစစ်ဆေးနေကြသည်။ ၎င်းတို့သည် ဘုရားနှုတ်ကပတ်တော်များကို မယုံကြည်ကြသကဲ့သို့ ဘုရားနှုတ်ကပတ်တော်များကို လက်မခံကြပေ။ ယင်းမှာ ၎င်းတို့က ဘုရားသခင်၏တည်ရှိခြင်းကို မယုံကြည်ကြသည့် သဘောဖြစ်သည်။ ၎င်းတို့အနေဖြင့် ဘုရားနှုတ်ကပတ်တော်များက သမ္မာတရား ဖြစ်ကြောင်းကို မုချ မယုံကြည်ကြသကဲ့သို့ ဘုရားသခင်ကို သာ၍ပင် ကျိုးနွံနာခံနိုင်စွမ်း မရှိကြပေ။ ဤသည်မှာ အန္တိခရစ်များ၏ အနှစ်သာရ ဖြစ်သည်။

အချို့က “လူ့ဇာတိခံ ဘုရားသည် အလွန် အရေးမပါလွန်းလှသကဲ့သို့ အလွန် သာမန်ဖြစ်လွန်းသည်။ သူ၏ စကားများနှင့် လုပ်ရပ်များက ကျွန်ုပ်ကို မကြာခဏ အယူအဆများ ဖြစ်ပေါ်စေပြီး ကျွန်ုပ်၏ စိတ်ကူးစိတ်သန်းများနှင့် လုံးဝ မကိုက်ညီပါ။ လူ့ဇာတိခံ ဘုရားက သာမန်လူတစ်ဦးမျှသာဖြစ်သည်ကို ကျွန်ုပ် မြင်သည်။ သူသည် ဘုရားကို ကိုယ်စားမပြုပါ။ ထို့ကြောင့် သူ၏ စကားများနှင့် အလုပ်တွင် သမ္မာတရားကို မည်မျှ သူ ဖော်ပြသည်ဖြစ်စေ သူသည် ဘုရားကဲ့သို့ မဟုတ်ပါ”ဟု ပြောကြသည်။ ဤစကားများသည် မည်သည့်နေရာမှ လာသနည်း။ ယင်းတို့သည် မည်သည့်အရာကို ကိုယ်စားပြုသနည်း။ ယင်းတို့သည် စာတန်ကို ကိုယ်စားပြုသည် မဟုတ်လော။ အစမှ အဆုံးထိ စာတန်သည် ဘုရားသခင်၏ ပင်ကိုလက္ခဏာနှင့် အဆင့်အတန်းကို လုံးဝ အသိအမှတ်ပြုခြင်း မရှိခဲ့ပေ။ ဘုရားနှုတ်ကပတ်တော်များက သမ္မာတရားဖြစ်ကြောင်း ၎င်းက လုံးဝ မယုံကြည်ခဲ့သကဲ့သို့ ဘုရားနှုတ်ကပတ်တော်များကို မည်သည့်အခါမျှ ဧကန်မုချ လက်မခံခဲ့ပေ။ ထိုသို့ဖြင့် စာတန်က ဘုရားသခင်ကို စကားပြောသည့်အခါ တန်းတူညီမျှသော အဆင့်အတန်းဖြင့် ထိုသို့ ပြောဆိုချင်သည်။ ၎င်း စကားပြောသည့် နည်းလမ်းမှာ ဘုရားသခင်ကို သရော်ကာ လှောင်ပြောင်ရန်၊ ဘုရားသခင်ကို လှည့်စားရန်ဖြစ်ပြီး သူ၏ စိတ်နှလုံးတွင် ဘုရားသခင်အတွက် နေရာမရှိပေ။ ပြီးလျှင် အန္တိခရစ်များ လုပ်ဆောင်သည့် အရာများနှင့် အန္တိခရစ်များ ပြောဆိုသည့် စကားများသည် စာတန်၏ လုပ်ဆောင်သည့်အရာများ၊ ပြောဆိုသည့် စကားများနှင့် အတိအကျ တူညီပေသည်။ အန္တိခရစ်များက မြင်၍ရနိုင်ပြီး အထည်ကိုယ်ဒြပ်ရှိသော်လည်း စာတန်ကမူ လူသားမျိုးနွယ်အတွက် မြင်၍မရနိုင်သည်မှလွဲ၍ ၎င်းတို့၏ အနှစ်သာရမှာ အတူတူပင် ဖြစ်သည်။ ၎င်းတို့သည် လူအရေခြုံထားသည့် စာတန်များ ဖြစ်သည်။ ၎င်းတို့ စာတန်မဟုတ်လျှင် ထိုသို့သောအရာများကို လုပ်ဆောင်ကာ ပြောဆိုနိုင်ကြမည် မဟုတ်။ စာတန်က မကြာခဏ လိမ်ညာပြီး ဘုရားနှုတ်ကပတ်တော်များသည်လည်း အလိမ်အညာများဖြစ်သည်ဟု ယုံကြည်သည်။ စာတန်သည် လူတို့ကို မကြာခဏ လှည့်စားပြီး သူသည် မရိုးဖြောင့်၊ လှည့်ဖြားတတ်ပြီး ကောက်ကျစ်ဆိုးယုတ်ကာ ဘုရားသခင်က အလားတူပုံစံဖြင့် စကားပြောသည်ဟု ယုံကြည်လေသည်။ ဘုရားသခင် မည်သည့်အရာကို ပြောဆိုသည်ဖြစ်စေ အန္တိခရစ်တို့သည် မိမိတို့ကိုယ်ပိုင် အဓိပ္ပာယ်ကို ချိတ်ဆက်ကာ ထင်ရာမြင်ရာ ရှင်းပြချက်များ ပြုလုပ်လျက် ဘုရားနှုတ်ကပတ်တော်များကို တစ်စုံတစ်ရာ အမြဲ ဖြည့်စွက်ကြလေသည်။ ထို့အပြင် ၎င်းတို့က ဘုရားနှုတ်ကပတ်တော်များထဲမှ အချို့မှာ ၎င်းတို့၏ စကားများလောက် ထူးခြားပြောင်မြောက်ခြင်းမရှိ၊ ၎င်းတို့၏ အဆင့်နှင့် မြင့်မားသော စံနှုန်းများကို မှီခြင်းမရှိသကဲ့သို့ ဖောက်ပြန်ပျက်စီးသော လူသားမျိုးနွယ်ကို သိမ်းပိုက်ရန် မလုံလောက်ဟုပင် ထင်မြင်ကြသည်။ ထို့ကြောင့် ၎င်းတို့သည် စိစစ်ကာ အကဲဖြတ်ဖို့ရန်နှင့် ထို့ထက်ပင်ပို၍ ဝေဖန်ကာ ရှုတ်ချရန်ပင် ဘုရားနှုတ်ကပတ်တော်များ၏ နည်းလမ်း၊ လေသံ၊ အနှစ်သာရတို့ကို လူအချို့ရှေ့မှောက်သို့ ယူဆောင်ချင်ကြသည်။ ဤအရာကို လုပ်ဆောင်ရာတွင် ၎င်းတို့၏ ရည်ရွယ်ချက်မှာ အဘယ်နည်း။ ဘုရားသခင်နောက်သို့လိုက်နေစဉ်တွင် ၎င်းတို့သည် ဤဘုရားသခင်ထံမှ ၎င်းတို့ အလိုရှိသည့် ရှေ့ရေးများနှင့် ကံကြမ္မာတို့ကို ရရှိဖို့ မျှော်လင့်စောင့်စားကြပြီး ဤဘုရားသခင်ထံမှ ၎င်းတို့အလိုရှိသည့် ခရီးပန်းတိုင်ကို ရရှိဖို့ စောင့်ဆိုင်းကြသည်။ သို့ဆိုလျှင် ၎င်းတို့သည် အဘယ်ကြောင့် ဤကဲ့သို့ ပြုမူနေကြသေးသနည်း။ ဤသည်မှာ ကိုယ့်စကားနှင့်ကိုယ် ရှေ့နောက်မညီခြင်း ဖြစ်သည်မဟုတ်လော။ အကြောင်းရင်း တစ်ခုသာရှိ၏။ ယင်းမှာ ၎င်းတို့၏ အမြင်တွင် ထိုသို့သော ဘုရားသခင် ပြောဆိုသည့် စကားများသည် အလွန် အဆင့်အတန်းမရှိသကဲ့သို့ သာမန်ဖြစ်နေပေသည်။ သူ၏ လုပ်ရပ်များကလည်း သာမန် ဖြစ်လွန်း၏။ ထိုသို့သော ဘုရားသခင်သည် ၎င်းတို့ ကြည်ညိုလိုသည့်ဘုရား သို့မဟုတ် ၎င်းတို့၏ စိတ်ကူးစိတ်သန်းများတွင် ရှိသည့် ဘုရားမဟုတ်သကဲ့သို့ သူသည် ၎င်းတို့နှင့် သဟဇာတမဖြစ်ပေ။ ထိုသို့သော ဘုရားသခင်တစ်ပါးနောက်သို့ ၎င်းတို့ လိုက်လျှင် ၎င်းတို့၏ ခရီးပန်းတိုင်၊ ရှေ့ရေးနှင့် ကံကြမ္မာတို့သည် ပျက်ပြားသွားသည်ချည်းသာ ဖြစ်ကောင်းဖြစ်နိုင်သည်။ ထို့ကြောင့် ၎င်းတို့သည် ထိုသို့သော ဘုရားသခင်တစ်ပါးကို ပြင်းပြင်းထန်ထန် အာခံကြလေသည်။ ၎င်းတို့က သူ့ကို ဝေဖန်ကြသည်၊ လျှော့တွက်ကြပြီး သူ၏ အမှုတော်ကို သူ့အနေဖြင့် မလုပ်ဆောင်နိုင်ရန်အလို့ငှာ တမင်ဖျက်ဆီးကြသည်၊ အဖျက်အမှောင့်လုပ်ပြီး ပျက်စီးစေကြလေသည်။ ထို့နောက် ၎င်းတို့၏ ရည်ရွယ်ချက်ကို စွမ်းဆောင်ရရှိကြလိမ့်မည်ဖြစ်သည်။ အချို့က “၎င်းတို့၏ ရည်ရွယ်ချက်ကို ၎င်းတို့ စွမ်းဆောင်ရရှိကြလျှင် ၎င်းတို့၏ ခရီးပန်းတိုင် ပျောက်ကွယ်သွားမည် မဟုတ်လော”ဟု ဆိုကြသည်။ ဤလူစားမျိုးသည် ဘုရားသခင်၏ တည်ရှိခြင်းကို တကယ် အသိအမှတ်မပြုသကဲ့သို့ လူသားမျိုးနွယ်ကို ကယ်တင်သည့် သူ၏ စီမံခန့်ခွဲခြင်း အမှုတော်နှင့်ဆိုင်သော အမှန်တရားကို မဆိုထားနှင့်၊ ဘုရားသခင်၏ လူ့ဇာတိခံ ဇာတိပကတိကိုပင် အသိအမှတ်မပြုပေ။ ၎င်းတို့သည် အလောင်းအစားလုပ်ကာ အရဲစွန့်နေကြခြင်း သက်သက် ဖြစ်သည်။ ဤဘုရားသခင်သည် အမှန်တကယ် ဖြုတ်ချခံရလျှင် ၎င်းတို့အနေဖြင့် မိမိတို့ အလိုရှိသည့် မည်သည့်အရာကိုမဆို လုပ်ဆောင်နိုင်ပြီး ဘုရားအိမ်တော်၌ ထိုသို့သော အခက်အခဲများကို ခံစားရန် လိုတော့မည် မဟုတ်ပေ။ ထိုအခါ ၎င်းတို့အနေဖြင့် ကမ္ဘာလောကဆီသို့၊ ကောက်ကျစ်ဆိုးယုတ်သော ရေပန်းစားမှုများဆီသို့လည်းကောင်း၊ ပုံမှန်ဘဝတစ်ခုဟု ၎င်းတို့ ခေါ်ဆိုသောအရာဆီသို့လည်းကောင်း စိတ်အေးလက်အေး ပြန်လာနိုင်ကြပေသည်။ မည်သည့် ကပ်ဘေးများကိုမျှ ၎င်းတို့ ခါးစည်းခံရန် လိုအပ်မည်မဟုတ်၊ မည်သည့် စစ်ဆေးခြင်းမျိုးကိုမျှ ၎င်းတို့ ကြုံရန် လိုအပ်မည်မဟုတ်သကဲ့သို့ ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းကို သည်းညည်းခံရန် သေချာပေါက် လိုအပ်မည် မဟုတ်ပေ။ ဤအရာအားလုံးသည် တည်ရှိတော့မည်မဟုတ်ဘဲ ကမ္ဘာကြီးမှာမူ ပုံမှန်အတိုင်း ဆက်လက်တည်ရှိနေလိမ့်မည် ဖြစ်သည်။ ဤသည်မှာ ၎င်းတို့၏ အိမ်မက်များတွင် ၎င်းတို့ တောင့်တသည့်အရာ ဖြစ်သည်။ ဤလူများသည် ဆိုးရွားသည် မဟုတ်လော။ ၎င်းတို့ အလွန်ဆိုးရခြင်း၏ အရင်းအမြစ်မှာ အဘယ်နည်း။ (၎င်းတို့၏ အနှစ်သာရက စာတန်ဖြစ်သောကြောင့် ဘုရားသခင်ကို ၎င်းတို့ မုန်းတီးကြ၍ ဖြစ်ပါသည်။) အမှန်တွင် ဤအန္တိခရစ် မကောင်းဆိုးဝါးများ၏ စိတ်နှလုံးများအတွင်းတွင်၊ ၎င်းတို့၏ ဝိညာဉ်များတွင် ၎င်းတို့က ထိုအရာကို ခံစားနိုင်ကြသည်။ ၎င်းတို့ကဲ့သို့သော လူတို့အား ဘုရားသခင် မည်သို့မြင်သည်ကို ၎င်းတို့ သိကြသည်။ ဘုရားသခင်က ၎င်းတို့ကဲ့သို့သော လူများကို မုန်းသည်။ ၎င်းတို့သည် ဘုရားသခင်နှင့် သဟဇာတမဖြစ်ကြပေ။ ၎င်းတို့၏ လူ့သဘာဝနှင့် သဘာဝ အနှစ်သာရတို့ကို ဘုရားသခင်က စက်ဆုပ်မုန်းတီးသည်။ ထို့ကြောင့် ၎င်းတို့ မည်သို့ ကြိုးစားအလုပ်လုပ်သည်ဖြစ်စေ၊ ကောင်းချီးမင်္ဂလာများ ရရှိဖို့ ၎င်းတို့ မည်မျှ အလိုဆန္ဒရှိသည်ဖြစ်စေ ၎င်းတို့၏ နောက်ဆုံးရလဒ်က ၎င်းတို့ လိုအင်ဆန္ဒအပေါ် တည်လိမ့်မည် မဟုတ်ပေ။ ၎င်းတို့အနေဖြင့် မည်သည့် အမှန်တရားကိုမျှ မပြောင်းလဲနိုင်ပေ။ ၎င်းတို့သည် ဘုရားသခင်နှင့် သဟဇာတမဖြစ်။ ဘုရားနှုတ်ကပတ်တော်များနှင့် သဟဇာတမဖြစ်။ ခရစ်တော်နှင့် သဟဇာတမဖြစ်ကြပေ။ ထို့ကြောင့် နောက်ဆုံးတွင် ၎င်းတို့ မည်သို့ အဆုံးသတ်ကြလိမ့်မည်နည်း။ ၎င်းတို့အားလုံး ပျက်စီးဆုံးရှုံးဖို့ သေချာသည်။ ၎င်းတို့အနေဖြင့် မိမိတို့ စိတ်နှလုံးများတွင် ဤရလဒ်နှင့်ဆိုင်သည့် သိနားလည်မှု ရေးရေးမျှ ရှိကြသည်။ သို့ဆိုလျှင် ဘုရားအိမ်တော်၌ ၎င်းတို့ အဘယ်ကြောင့် ရှိနေကြသေးသနည်း။ ၎င်းတို့သည် ကောင်းချီးမင်္ဂလာများ ရရှိဖို့ ထိုမျှကောင်းမွန်သော အခွင့်အရေးကို စွန့်လွှတ်ဖို့ တကယ်ပင် မလိုမလားဖြစ်နေကြသည်။ ထို့ကြောင့် “ဤသို့သော အလောင်းအစားတစ်ခုကို ငါပြုလုပ်ပါက ကောင်းချီးမင်္ဂလာများ ရနိုင်ဦးမည်ထင်သည်။ ငါသည် မသိမသာ ရုန်းထွက်လွတ်မြောက်ပြီး အသက်ရှင်နိုင်ဦးမည် ထင်သည်။ ဘုရားက ဂရုမစိုက်သည့်အပြင် အာရုံမစိုက်လျှင် ငါသည် ကောင်းကင်နိုင်ငံတော်၏ တံခါးကို မသိမသာ ဖြတ်သန်းနိုင်မည်ထင်သည်”ဟူ၍ အလောင်းအစားတစ်ခု ပြုလုပ်လိုကြလေသည်။ ဤ “ထင်သည်”ဟူသည့်အရာ၏ ဤဆန္ဒ အတွေးဖြင့်၊ ၎င်းတို့သည် ဘုရားအိမ်တော်တွင် ဆက်လက် လေလွင့်နေကြသော်လည်း ဘုရားသခင်အပေါ် ၎င်းတို့၏ အမြင်နှင့် သဘောထားမှာမူ ဘယ်သောအခါမျှ ပြောင်းလဲခြင်း မရှိပေ။ ၎င်းတို့က ဘုရားနှုတ်ကပတ်တော်များကို အထင်အမြင်သေးကြသည်၊ သမ္မာတရားကို အထင်အမြင်သေးကြပြီး အပြုသဘောဆောင်သည့် အရာများအားလုံးကို အထင်အမြင်သေးကြလေသည်။

ဘုရားသခင်သည် လူတို့အား ရိုးသားရန် တောင်းဆိုသည်။ ဤအရာကို ကြားရသည့်အခါ အချို့က “ဤသည်မှာ အလွန် နိမ့်ကျသည့် စံနှုန်းတစ်ခု မဟုတ်လော။ ငါတို့သည် ယခုတွင် ဘုရားကို နှစ်အတော်များများ ယုံကြည်ပြီးဖြစ်သည်။ ယခုအခါ၌ သူသည် အဘယ်ကြောင့် "ရိုးသားရန်" ငါတို့ကို ပြောနေသနည်း။ ဤသည်မှာ ဘုရား၏ စကားဖြစ်လျှင် အလွန်နက်နဲသင့်သည်၊ ယခင်ထက်သာ၍ အဆင့်မြင့်သင့်သည်၊ ယခင်ထက်သာ၍ နားမလည်နိုင်ဖွယ် ဖြစ်သင့်သည်၊ ယခင်ထက်သာ၍ လူက လက်လှမ်းမမီနိုင်သောအရာ ဖြစ်သင့်ပေသည်။ ငါတို့ လိုအပ်သောအရာမှာ သာ၍ မြင့်မားသော သတ်မှတ်ချက်ဆိုင်ရာ စံနှုန်းများဖြစ်သည်၊ ဤသာမန်ဖြစ်သည့်၊ မည်မည်ရရ မဟုတ်သည့်၊ နိမ့်ကျသော စံနှုန်းရှိသည့် သတ်မှတ်ချက်များ မဟုတ်ပါ”ဟု တွေးကြသည်။ ထိုသို့သောလူများသည် သမ္မာတရား လက်တွေ့ကျမှုက မည်သည့်အရာ ဖြစ်သည်ကို နားမလည်ကြပေ။ သမ္မာတရားကို နားမလည်သည့်သူများက ဤတရားဟောချက်ကို ကြားသည့်အခါ စိတ်ပျက်ကြသော်လည်း မိတ်သဟာယ၊ အတွေ့အကြုံနှင့် ဤအရာကို အချိန်ကာလတစ်ခုကြာ ဖြတ်သန်းရခြင်းဖြင့် ၎င်းတို့သည် ဘုရားသခင်ထံမှ လာသည့် ဤစကားများက လူသားများလိုအပ်သည့် စကားများဖြစ်ကြောင်း သဘောပေါက်လာကြလေသည်။ ယင်းတို့သည် အဘယ်ကြောင့် လူသားများလိုအပ်သည့်အရာ ဖြစ်သနည်း။ လူသည် အနက်ရှိုင်းဆုံး အတိုင်းအတာထိ စာတန်၏ ဖောက်ပြန်ပျက်စီးစေခြင်း ခံရသောကြောင့် မည်သည့်လူမျှ ရိုးသားခြင်း မရှိပေ။ ဤလောကသည် မုသားများဖြင့် ပြည့်နေပြီး ဤသည်မှာ ဘုရားသခင်ကို ယုံကြည်သူတို့နှင့်ပတ်သက်၍လည်း မှန်ကန်ပေသည်။ နေ့တိုင်း လူတို့က မုသား တစ်ခုပြီး နောက်ထပ်တစ်ခု ပြောကြသည်။ ၎င်းတို့၏ စကားက စာတန်၏ မုသားများ၊ လှည့်ဖြားမှုတို့ဖြင့် စိမ့်ဝင်ပြည့်လျှံနေသည်။ ထို့ကြောင့် ဘုရားသခင်က ရိုးသားလော့ဟူသည့် ဤအရိုးရှင်းဆုံးနှင့် ရိုးရိုးတန်းတန်း အဖြစ်ဆုံးသော သတ်မှတ်ချက်ကို လူအတွက် အဆိုပြုထားခြင်း ဖြစ်သည်။ အချိန်နှင့် အတွေ့အကြုံတို့ဖြင့် လူတို့သည် ဘုရားနှုတ်ကပတ်တော်များအပေါ် သိနားလည်မှုတစ်ခုနှင့် သူ၏ တောင်းဆိုချက်များ၊ ရည်ရွယ်ချက်များနှင့်ဆိုင်သည့် သဘောပေါက်နားလည်မှုတစ်ခု ဖြစ်ပေါ်ကြသည်။ သူ့နှုတ်ကပတ်တော်များ၏ လမ်းပြမှုနှင့် လမ်းညွှန်မှုအောက်တွင် ၎င်းတို့သည် သူ၏ နှုတ်ကပတ်တော်များက မည်မျှလက်တွေ့ကျသည်၊ သူ့နှုတ်ကပတ်တော်တစ်ခုစီတိုင်းကို မည်သို့ နားလည်ကာ ဝင်ရောက်သင့်သည်၊ သူ၏ နှုတ်ကပတ်တော်တစ်ခုမျှ အနှစ်မဲ့ခြင်း မရှိပုံ၊ သူ၏နှုတ်ကပတ်တော်အားလုံးက လူသားမျိုးနွယ် လိုအပ်သည့်အရာ ဖြစ်ပုံ၊ ဘုရားသခင်က လူတို့အား လုံးလုံးလျားလျား သဘောပေါက်နားလည်ကာ ရိပ်စားမိနိုင်ပြီး ၎င်းတို့၏ ဖောက်ပြန်ပျက်စီးခြင်းကို အလွန်ကောင်းစွာ သိနားလည်ပုံတို့ကို တဖြည်းဖြည်း သဘောပေါက်လာကြသည်။ ဤသည်မှာ သာမန်လူတစ်ဦး ကြုံရသည့် လမ်းကြောင်းဖြစ်သည်။ သို့တိုင် ဘုရားသခင်က လူတို့ကို ရိုးသားရန် တောင်းဆိုသည့် ဤစကားရပ်ကို အန္တိခရစ်များက မြင်သည့်အခါ ၎င်းတို့သည် အထင်သေးခြင်း၊ ပြက်ရယ်ပြုခြင်း၊ ထေ့ငေါ့ခြင်းနှင့် အတိုက်အခံလုပ်ခြင်း သဘောထားဖြင့်ပင် ကြည့်ကြသည်။ ဤစကားရပ်နှင့် ပတ်သက်၍ အယူအဆတစ်ခု ဖြစ်ပေါ်ပြီးနောက်တွင် ၎င်းတို့သည် ထိုစကားရပ်ကို လျစ်လျူရှုလိုက်ကြသည်။ ဘုရားသခင်အတွက် ၎င်းတို့၏ အထင်သေးမှုက တိုးလာပြီး သူ၏ နှုတ်ကပတ်တော်ကိုပင် မလေ့လာတော့သည့်အဆင့်ထိတိုင် သူနှင့် သူ၏ နှုတ်ကပတ်တော်ကို တိုး၍ မထီမဲ့မြင်ပြုခြင်းဖြင့် ကြည့်နေကြသည်။ လူအချို့က မိမိတို့၏ လှည့်ဖြားတတ်သော စိတ်သဘောထားအား ထုတ်ဖော်ပြခဲ့ပုံ၊ ၎င်းတို့ နောင်တရကာ ရိုးသားဖို့ ကြိုးစားခဲ့ကြပုံတို့နှင့် စပ်လျဉ်းသည့် ၎င်းတို့၏ အတွေ့အကြုံများကို ပြောသည့်အခါ ဤအန္တိခရစ်များ၏ စိတ်များတွင် အတိုက်အခံဖြစ်ခြင်း၊ စက်ဆုပ်မှုနှင့် အထင်သေးမှုတို့ ထွက်ပေါ်လေသည်။ လူတို့ ပြောဆိုသည့်အရာကို လက်ခံရန် ၎င်းတို့ ငြင်းဆန်ရုံတင်မက သာ၍ မိတ်သဟာယပြုပြီး သာ၍ကောင်းသော သိမြင်မှုရှိသည့်သူတို့အတွက် အမုန်းတရားနှင့် အထင်သေးမှုတို့ ခံစားကြသည့်အတိုင်းအတာထိ ညီအစ်ကို မောင်နှမများ မိတ်သဟာယပြုနေသည့် အတွေ့အကြုံနှင့် သိမြင်မှုတို့အပေါ် အတိုက်အခံဖြစ်ကာ ပစ်ပစ်ခါခါငြင်းကြလေသည်။ ၎င်းတို့က “သင်တို့သည် လူနုံလူအများဖြစ်ကြသည်။ ဘုရားက သင်တို့ကို ရိုးသားရန် ပြောဆိုပြီး သင်တို့က ထိုအရာကို ရိုးသားလိုက်ကြသည်။ သင်တို့သည် အဘယ်သို့ဖြစ်ပြီး အလွန် နာခံနိုင်ရသနည်း။ ငါ ပြောသည့် စကားများကို အဘယ်ကြောင့် သင်တို့ အလေးဂရု မပြုကြသနည်း။ ငါ့ကို ကြည့်လော့။ သင်တို့ထဲမှ မည်သူကမျှ ငါ၏ စစ်မှန်သော အခြေအနေက မည်သည့်အရာဖြစ်သည်ကို မသိပါ။ ငါ မည်သို့ လှည့်ဖြားတတ်ပြီး လိမ္မာပါးနပ်သည်ကို မည်သူမျှ မသိပါ။ ပြီးလျှင် ဤအရာများအကြောင်းကို သင်တို့အား ငါ ပြောပြမည်။ ယင်းတို့ကို သင်တို့ ကြားထိုက်သည်ဟု ထင်သလော”ဟု တွေးလေသည်။ ဤသည်မှာ ဘုရားသခင်၏ သတ်မှတ်ချက်အပေါ် ၎င်းတို့ ထားရှိသည့် သဘောထားဖြစ်သည်။ ထိုအရာကို ၎င်းတို့ ငြင်းပယ်ရုံတင်မက ထိုအရာအပေါ် အတိုက်အခံဖြစ်ပြီး ရှုတ်ချကြသည်။ ဤသည်တို့မှာ မယုံကြည်သူများ၏ သရုပ်သကန်များ ဖြစ်သည် မဟုတ်လော။ ဤသည်တို့မှာ ပုံမှန်မယုံကြည်သူများ ဖြစ်သည်။ အပေါ်ယံတွင် ၎င်းတို့သည် ဘုရားနှုတ်ကပတ်တော်ကို ပွင့်ပွင့်လင်းလင်း မရှုတ်ချကြ။ သူ၏ နှုတ်ကပတ်တော် စာအုပ်များကို မီးဖိုထဲတွင် မီးရှို့ရန် မပစ်လိုက်ကြပေ။ အပြင်ပန်းတွင် ၎င်းတို့သည် ဘုရားနှုတ်ကပတ်တော်ကို ဖတ်ရှုပြီး နေ့တိုင်း တရားဒေသနာများကို နားထောင်ကြကာ စုဝေးပွဲများအတောအတွင်းတွင် မိတ်သဟာယ ပြုကြသော်လည်း တကယ့် အမှန်တရားတွင် ၎င်းတို့၏ စိတ်နှလုံး အတွင်းနက်နက်နေရာများ၌ ဘုရားနှုတ်ကပတ်တော်အပေါ် အကြီးအကျယ် ရွံရှာခြင်း၊ အတိုက်အခံဖြစ်ခြင်းနှင့် ငြင်းပယ်ခြင်းတို့ ဖြစ်ပေါ်လေသည်။ တစ်နည်းအားဖြင့် ဘုရားနှုတ်ကပတ်တော်နှင့် ပတ်သက်၍ ၎င်းတို့ အယူအဆများ ဖြစ်ပေါ်သည့် အခိုက်အတန့်တွင်ပင် ထိုနှုတ်ကပတ်တော်ကို ၎င်းတို့ ငြင်းပယ်ပြီးသား ဖြစ်သည်။ “ဘုရားက ထိုအရာများကို မပြောမီတွင် ထိုအန္တိခရစ်များက ဘုရားနှုတ်ကပတ်တော်များကို ငြင်းပယ်ပြီးသားဖြစ်သည် မဟုတ်လော”ဟု ပြောသည့်သူအချို့ ရှိသည်။ ထိုအချိန်တွင် ထိုနှုတ်ကပတ်တော်ကို ၎င်းတို့ မငြင်းပယ်သေးချေ။ ယင်းမှာ အဘယ်ကြောင့်နည်း။ အဘယ်ကြောင့်ဆိုသော် ၎င်းတို့သည် ဘုရားသခင်နှင့် ပတ်သက်၍ များစွာသော အယူအဆများနှင့် စိတ်ကူးစိတ်သန်းများရှိကြပြီး ဤအရာက ၎င်းတို့အား သူ့ကို ရိုသေကြည်ညိုကာ လေးစားစေပြီး ကြီးမြတ်သောလူတစ်ဦးအဖြစ် သူ့ကို သဘောထားစေကြသောကြောင့် ဖြစ်သည်။ သို့သော် ဘုရားသခင်က သူ၏ နှုတ်ကပတ်တော်များကို ဖော်ပြသည့်အခါ သူ့အပေါ် ၎င်းတို့၏ အမြင် လုံးဝ ပြောင်းလဲသွားပြီး “ဘုရားပြောသည့် စကားများက အမှန်တကယ်တွင် အလွန် သာမန်ဖြစ်ပေသည်။ အလွန် ရိုးရှင်းသည်၊ အလွန် ရိုးစင်းသည်၊ အလွန် နားလည်ရလွယ်ကူသည်။ ထိုသို့သော စကားများကို ကျွန်ုပ်ကိုယ်တိုင် ပြောနိုင်သည်။ ဘုရားက ကြီးမြတ်သည်ဟု လူတိုင်း ပြောသည် မဟုတ်လော။ သို့ဆိုလျှင် သူသည် ကျွန်ုပ်တို့အား ရိုးသားရန် အဘယ်ကြောင့် ပြောမည်နည်း။ ဘုရားက အလွန်ကြီးမြတ်လျှင် သူ အမှန်တကယ် အထွတ်အထိပ် ဖြစ်လျှင် ထိုသို့သော သေးငယ်ပြီး အောက်တန်းကျသည့် သတ်မှတ်ချက်များကို လူတို့အား သူ မပေးသင့်ပါ”ဟု ပြောကြသည်။ ဘုရားနှုတ်ကပတ်တော်ကို ၎င်းတို့ ဖတ်ရှုပြီး ပေါ့တန်သည်ဟု ခံစားရကာ လူတို့၏ အယူအဆများနှင့် မကိုက် သို့မဟုတ် ဘုရားသခင်၏ ကြီးကျယ်ခမ်းနားသော ပုံရိပ်၊ ပင်ကိုလက္ခဏာတို့နှင့် ကိုက်ညီခြင်းမရှိဟု ခံစားရသည့်အခါ ဘုရားနှုတ်ကပတ်တော်များနှင့် ပတ်သက်၍ အယူအဆများ ဖြစ်ပေါ်ကြသည်။ ၎င်းတို့၏ ဤအယူအဆများ ဖြစ်ပေါ်ခြင်း၏ နောက်ကွယ်တွင် ၎င်းတို့အတွင်း၌ ဘုရားနှုတ်ကပတ်တော်များအပေါ် နက်ရှိုင်းသော ရွံရှာမှုတစ်ခု ဖြစ်ပေါ်ပြီး နောက်ပိုင်းတွင် ဘုရားသခင်နှင့်ပတ်သက်သည့် ၎င်းတို့၏ စိတ်ကူးများနှင့် အယူအဆများကို ကိုင်စွဲထားခဲ့သည့် ၎င်းတို့ စိတ်နှလုံး အတွင်းနက်နက်နေရာများ၌ ရှိသောအကာအရံက လုံးဝ ပြိုလဲသွားလေတော့သည်။ ဤပြိုလဲခြင်း၏ ရလဒ်မှာ အဘယ်နည်း။ ၎င်းတို့ စိတ်နှလုံးများ၏ တကယ့် အတွင်းနက်နက်နေရာများမှနေ၍ ၎င်းတို့သည် ဘုရားနှုတ်ကပတ်တော်ကို ငြင်းပယ်ကာ ပြစ်တင်ရှုတ်ချကြသည်။ ထို့ကြောင့် လူတို့က ဘုရားနှုတ်ကပတ်တော်ကို ဟောပြောသည့်အခါ အန္တိခရစ်များ၏ စိတ်များက မည်သည့်အရာများ ဖြစ်ပေါ်နေသနည်း။ ၎င်းတို့သည် ဘေးထွက်ရပ်ရင်း ကြည့်ရှုနေသည့် ပွဲကြည့်ပရိသတ်များကဲ့သို့ ဖြစ်ကြသည်။ တစ်စုံတစ်ဦးက ဘုရားနှုတ်ကပတ်တော်များအား ချီးမွမ်းသည်ကို သို့မဟုတ် ဘုရားနှုတ်ကပတ်တော်များနှင့်ဆိုင်သည့် ၎င်းတို့၏ အတွေ့အကြုံအပေါ် မိတ်သဟာယပြုနေသည်ကို ကြားသည့်အခါ ဤအန္တိခရစ်များသည် ဘေးထွက်ရပ်ရင်း စောင့်ကြည့်နေသည့် ပွဲကြည့်ပရိသတ်များလည်းဖြစ်ကြပြီး ၎င်းတို့၏ စိတ်နှလုံး အတွင်းနက်နက် နေရာများ၌ “အာမင်”ဟု လုံးဝ မပြောကြပေ။ တစ်ခါတစ်ရံ ၎င်းတို့က “ရိုးသားခြင်းမှ မည်သည့်အရာကို သင် ရရှိလေပြီနည်း။ သင်သည် ရိုးသားရန် ကြိုးစားသော်လည်း ဘုရားက သေချာပေါက် သင့်ကို ကယ်တင်မည် မဟုတ်သကဲ့သို့ သင်သည် သေချာပေါက် ကောင်းချီးခံစားရမည်လည်း မဟုတ်ပါ။ အလွန်နည်းပါးသည့် လူများက ကောင်းချီးမင်္ဂလာများ ရရှိကြလိမ့်မည်။ မည်သည့် ကောင်းချီးမင်္ဂလာများကိုမျှ ကျွန်ုပ် မရလျှင် သင်တို့ထဲမှ မည်သူကမျှလည်း ကောင်းချီးတစ်ခုမျှ ရမည်မဟုတ်ပါ”ဟု ပြောလျက် လူတို့ကိုပင် လှောင်ကြလေသည်။ အန္တိခရစ်တစ်ဦး၏ သဘာဝ အနှစ်သာရမှာ ဘုရားနှုတ်ကပတ်တော်နှင့် ဘုရားသခင် ကိုယ်တိုင်အပေါ် ဆန့်ကျင်လိုပြီး ဤအရာကြောင့် အန္တိခရစ်များသည် ဘုရားနှုတ်ကပတ်တော်ကို လက်မခံနိုင်ကြသကဲ့သို့ သာ၍ပင် ကျိုးနွံနာခံနိုင်ခြင်း မရှိကြပေ။ ၎င်းတို့သည် ဘုရားနှုတ်ကပတ်တော်ကို လက်မခံသကဲ့သို့ ကျိုးနွံနာခံခြင်းမရှိလျှင် ထိုနှုတ်ကပတ်တော်နှင့် ဆိုင်သည့် အတွေ့အကြုံကို ရရှိနိုင်ကြသလော။ မရရှိနိုင်ကြပေ။ သို့ဆိုလျှင် ၎င်းတို့ ပြောဆိုသည့် ကိုယ်ပိုင် သိမြင်မှုဆိုသည်မှာ အဘယ်နည်း။ ထိုအရာသည် စိတ်ကူးများ၊ ကောက်ချက်များ၊ အယူဝါဒများ သို့မဟုတ် သဘောတရားများချည်းသာဖြစ်သည်၊ သို့မဟုတ် တစ်ခါတစ်ရံ အခြားလူများထံမှ ၎င်းတို့ သံယောင်လိုက်သည့် ကြားကောင်းသော စကားအချို့သက်သက်ပင် ဖြစ်သည်။ ထိုသို့ဖြင့် ၎င်းတို့ထဲတွင် ဘုရားနှုတ်ကပတ်တော်များနှင့် ဆိုင်သည့် အတွေ့အကြုံနှင့် သိမြင်မှု တစ်ခုတလေ ဖြစ်ပေါ်ရန် မဖြစ်နိုင်ပေ။ ထို့ကြောင့် ဘုရားသခင်နှင့် သူ၏ နှုတ်ကပတ်တော်အပေါ် အန္တိခရစ်များ ထားရှိသည့် အမျိုးမျိုးသော သဘောထားများကြောင့်လည်းကောင်း၊ ၎င်းတို့၏ သဘာဝ အနှစ်သာရကြောင့်လည်းကောင်း၊ ၎င်းတို့အနေဖြင့် ဘုရားသခင်ကို ၁၀ နှစ်၊ အနှစ် ၂၀ဖြစ်စေ၊ ထို့ထက်ပင် ရှည်ကြာစွာ ယနေ့ထိတိုင်ဖြစ်စေ ယုံကြည်ပြီးဖြစ်လင့်ကစား ဘုရားနှုတ်ကပတ်တော်နှင့်ဆိုင်သည့် မည်သည့်အတွေ့အကြုံကိုမျှ ၎င်းတို့ထံမှ ကြားရလိမ့်မည် မဟုတ်၊ သို့မဟုတ် ၎င်းတို့ထဲ၌ မြင်ရလိမ့်မည် မဟုတ်သကဲ့သို့ ဘုရားသခင်နှင့်ဆိုင်သည့် သိမြင်မှု စိုးစဉ်းမျှကို သာ၍ပင် သင် မြင်ရလိမ့်မည် မဟုတ်ပေ။ ၎င်းတို့၏ စကားတွင် ၎င်းတို့အနေဖြင့် ဘုရားသခင်နှင့်ပတ်သက်၍ အယူအဆများနှင့် အထင်လွဲမှုများ ရှိခြင်းနှင့် ဘုရားသခင်၏ ဖော်ထုတ်မှုမှတစ်ဆင့် ဉာဏ်အလင်းပွင့်ကာ နောက်ဆုံးတွင် ဘုရားသခင်ကို အထင်မလွဲတော့သည့် သို့မဟုတ် သူနှင့်ပတ်သက်၍ အယူအဆများ မထားရှိတော့သည့် အဆင့်ထိ ရောက်လာခြင်းအကြောင်းတို့ကို သင် ကြားရမည် မဟုတ်ပေ။ ၎င်းတို့တွင် ဤအတွေ့အကြုံမရှိသကဲ့သို့ ဤသိမြင်မှုလည်း မရှိပေ။ ဤသည်မှာ အန္တိခရစ်များက ဘုရားနှုတ်ကပတ်တော်များကို လေ့လာရာတွင် မည်မျှ အားထုတ်ကြသည်ဖြစ်စေ သမ္မာတရားကို မရရှိနိုင်ကြသည့် အကြောင်းရင်း သို့မဟုတ် ကိုယ်ပိုင် အတွေ့အကြုံ သို့မဟုတ် သိမြင်မှုတစ်ခုတလေအကြောင်း လုံးဝ မပြောကြသည့် အကြောင်းရင်း ဖြစ်သည်။ ၎င်းတို့အနေဖြင့် ညီအစ်ကို မောင်နှမများက မကြာခဏ ကိုးကားကြသည့် ဘုရားနှုတ်ကပတ်တော်မှ ကျော်ကြားသော စာပိုဒ်အချို့ကို ဖတ်ရှုခြင်းနှင့် အာဂုံဆောင်ခြင်းတွင်သာ လိုက်လုပ်ကြသည်။ ၎င်းတို့သည် ဟန်ဆောင်လုပ်ပြကြပြီး အလိုက်သင့်နေကြကာ ထို့နောက်တွင် ၎င်းတို့ အမြဲစဉ်းစားကြသည့် မပြောင်းလဲသော ပုံစံဖြင့် ဆက်လက် စဉ်းစားကြသည်။ ဘုရားသခင်နှင့်ပတ်သက်၍ ၎င်းတို့၌ ဖြစ်ပေါ်သည့် အယူအဆများ သို့မဟုတ် ၎င်းတို့နှင့် ဘုရားသခင်ကြားတွင် ဖြစ်ပေါ်သည့် ကွဲလွဲမှုများနှင့် ပြဿနာများက မည်သို့ သိသာထင်ရှားနေသည်ဖြစ်စေ မဖြေရှင်းကြပေ။ ဤအယူအဆများနှင့် ပြဿနာများက ၎င်းတို့နောက် အမြဲလိုက်ကြသည်။ ၎င်းတို့က ပြဿနာများကို မဖြေရှင်းခြင်း၏ အကျိုးဆက်များမှာ အဘယ်နည်း။ ၎င်းတို့ စိတ်နှလုံးများတွင်ရှိသော မကျေမချမ်းဖြစ်ခြင်းက သာ၍ နက်ရှိုင်းသည်ထက် နက်ရှိုင်းသွားပြီး ဘုရားသခင်အပေါ် ၎င်းတို့၏ အမုန်းတရားက ကြီးသည်ထက် ကြီးမားလာခဲ့သည်။ ဤနည်းဖြင့် လုပ်ဆောင်သည့်အခါ ဘုရားသခင်ကို ၎င်းတို့ ကြာရှည်စွာ ယုံကြည်လေ အကျိုးဆက်များက မည်သည့်အရာ ဖြစ်လိမ့်မည်နည်း။ ဤစုပုံလာသော မကျေမချမ်းဖြစ်ခြင်းနှင့် အယူအဆများက ၎င်းတို့၏ ရှေ့ရေးများနှင့် ကံကြမ္မာအပြင် ကောင်းချီးများရရှိဖို့ဖြစ်သော ကြံရွယ်ချက်တို့ကို လက်လွှတ်စေနိုင်သလော။ (လက်မလွှတ်စေနိုင်ပါ။) ဤပြဿနာများကို မဖြေရှင်းလျှင် နောက်ဆုံးရလဒ်က မည်သည့်အရာ ဖြစ်လိမ့်မည်နည်း။ (၎င်းတို့ ပေါက်ကွဲထွက်ကြလိမ့်မည်။) “ပေါက်ကွဲထွက်”ဟူသည့် စကားလုံးသည် အတော်ပင် ရိုးစင်းပေသည်။ ၎င်းတို့ မည်သို့ ပေါက်ကွဲထွက်ကြလိမ့်မည်နည်း။ နည်းလမ်းမည်မျှ ရှိသနည်း။ (“တစ်ညတာ အချိန်လေးတွင်ပင်၊ ၎င်းတို့သည် ပြုံးရွှင်နေသည့်၊ ‘စိတ်နှလုံးကောင်း’ ရှိသည့် ပုဂ္ဂိုလ်အဖြစ်မှ ကြည့်ရဆိုးပြီး ရက်စက်ကြမ်းကြုတ်သည့် လူသတ်သမားအဖြစ်သို့ ပြောင်းလဲသွားနိုင်လေသည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ ဘုရားသခင်၏ အမှုနှင့် လူ၏လက်တွေ့လုပ်ဆောင်မှု)ဟူသည့် ယခင်က ကျွန်ုပ် ဖတ်ခဲ့သော ဘုရားနှုတ်ကပတ်တော်အချို့ကို ကျွန်ုပ် သတိရမိပါသည်။) ၎င်းတို့ လူသတ်သမားများ ဖြစ်လာခြင်း၏ နောက်ခံအကြောင်းမှာ အဘယ်နည်း။ ကောင်းချီးများ ရရှိဖို့ဖြစ်သည့် ၎င်းတို့၏ လိုအင်ဆန္ဒသည် တစ်စစီပြိုကွဲသွားသည့်အခါ ကြမ်းတမ်းစွာ ပြုမူပြောဆိုရန်အသင့်ဖြစ်ကြပြီး ၎င်းတို့က “ကျွန်ုပ်တို့ တစ်ဦးမျှ အေးဆေးနေရမည် မဟုတ်ပါ။ ထို့ကြောင့် ဤအရာကို ကျွန်ုပ် ဖုံးကွယ်ရန် သို့မဟုတ် ကွယ်ဝှက်ရန် မလိုပါ။ ကောင်းချီးများ ရရှိဖို့အတွက်သာ ဘုရားကို ကျွန်ုပ် ယုံကြည်သည်။ ကောင်းချီးများ ရမည်မဟုတ်သည်ကို ကျွန်ုပ် သိခဲ့မည်ဆိုလျှင် အချိန်ကြာမြင့်စွာက ကျွန်ုပ် စွန့်ခွာပြီးဖြစ်မည်”ဟု ပြောကြသည်။ ၎င်းတို့၏ စိတ်နှလုံးများတွင် ရှိသည့် စကားများအားလုံးကို ၎င်းတို့ ပြောဆိုကြပြီး ပြစ်တင်ရှုတ်ချခံရမည်ကို မကြောက်ကြပေ။ ပြစ်တင်ရှုတ်ချခံရခြင်းကို ၎င်းတို့ အဘယ်ကြောင့် မကြောက်ကြသနည်း။ ၎င်းတို့သည် အဘယ်ကြောင့် ယဉ်ကျေးဟန်ဆောင်ခြင်းကို စွန့်ပစ်ကာ ပေါက်ကွဲထွက်နိုင်ရသနည်း။ အဘယ်ကြောင့်ဆိုသော် ၎င်းတို့ မယုံကြည်ချင်တော့သည့်အပြင် စွန့်ခွာဖို့ အလိုဆန္ဒရှိကြသောကြောင့် ဖြစ်သည်။ ၎င်းတို့သည် ဤနှစ်ကာလများတစ်လျှောက်လုံး ၎င်းတို့၏ ရည်မှန်းချက်ပန်းတိုင်များအတွက် အရှက်ရခြင်းနှင့် ဆင်းရဲဒုက္ခတို့ကို ခါးစည်းခံနေခဲ့ရပြီး ဤနည်းဗျူဟာများအတိုင်း ၎င်းတို့ လက်တွေ့လုပ်ဆောင်ကာ မိမိတို့၏ ဝိညာဉ်ရေးရာ အထောက်အပံ့အဖြစ် ဤနည်းဗျူဟာများကို အသုံးပြုကြလေသည်။ ယနေ့တွင် ၎င်းတို့ ကောင်းချီးများရရှိမည့် မျှော်လင့်ချက် မရှိသည်ကို မြင်သည့်အခါ ၎င်းတို့အနေဖြင့်လည်း ယဉ်ကျေးဟန်ဆောင်မှု အားလုံးကို စွန့်ပစ်ကာ “ကျွန်ုပ်သည် မယုံကြည်သူတစ်ဦးသာ ဖြစ်သည်။ အပြုသဘောဆောင်သည့်အရာများကို ကျွန်ုပ် မနှစ်သက်ပါ။ လောကီအရာများကို လိုက်စားခြင်းအား ကျွန်ုပ် နှစ်သက်ပြီး ကောက်ကျစ်ဆိုးယုတ်သည့် ရေပန်းစားမှုများကို နှစ်သက်သည်။ ဘုရားနှုတ်ကပတ်တော်များက သမ္မာတရားဖြစ်ကြောင်းနှင့် ဘုရားနှုတ်ကပတ်တော်များက လူတို့ကို ပြောင်းလဲနိုင်ကာ ကယ်တင်နိုင်ကြောင်း သူတို့ ပြောကြသည်။ ယင်းကို ကျွန်ုပ် အဘယ်ကြောင့် မမြင်ရသေးသနည်း။ ထိုအရာကို ငါ အဘယ်ကြောင့် မတွေ့ကြုံနိုင်၊ သို့မဟုတ် မခံစားနိုင်သနည်း။ လူတို့နှင့်ပတ်သက်၍ မည်သည့်အရာကို ဘုရားနှုတ်ကပတ်တော်က ပြောင်းလဲစေပြီးပြီနည်း။ ဘုရားနှုတ်ကပတ်တော်များက ဘာမျှမဟုတ်ဟု ကျွန်ုပ် ထင်သည်။ လက်ဆုပ်လက်ကိုင်ပြ၍ အရနိုင်ဆုံးသာ အကျိုးအမြတ်များရှိသည့် အရာတစ်ခုသာရှိပြီး ယင်းမှာ ဘုရားနောက်လိုက်သောသူတို့သည် ကောင်းချီးခံစားရမည်ဖြစ်ပြီး ကောင်းကင်နိုင်ငံတော်ထဲသို့ ဝင်ရလိမ့်မည်ဟူသည့်အရာ ဖြစ်သည်။ ဤစကားများက မှန်ကန်သည်။ ကောင်းချီးမင်္ဂလာများ ရရှိဖို့အတွက် မဟုတ်ခဲ့လျှင် ဘုရားကို ကျွန်ုပ် ယုံကြည်ခဲ့မည် မဟုတ်ပါ။ ဘုရားက အဘယ်မှာနည်း။ ဘုရားကလူတို့ကို ကယ်တင်နိုင်မည်ဆိုလျှင် အဘယ်ကြောင့် ကားစင်တင်သတ်ခံခဲ့ရသနည်း။ သူသည် သူ့ကိုယ်သူပင် မကယ်တင်နိုင်ခဲ့ပါ”ဟု ပွင့်ပွင့်လင်းလင်း ပြောလိုက်ခြင်းကမှ ကောင်းပေဦးမည်ဟု ခံစားကြရလေသည်။ ၎င်းတို့က မိမိတို့ အမှန်တကယ် တွေးထင်သည့်အရာကို ပြောကြသည်။ ဤအရာတွင် ၎င်းတို့၏ မကောင်းဆိုးဝါးဆန်သော ဘက်ခြမ်းက ထုတ်ဖော်ခြင်း ခံရသည် မဟုတ်လော။ နှစ်ကာလများတစ်လျှောက် စုပုံလာခဲ့သည့် အယူအဆများနှင့် မကျေမချမ်းဖြစ်ခြင်းတို့က ၎င်းတို့ထံမှ ပေါက်ကွဲထွက်သွားခဲ့သည်။ ဤသည်မှာ အန္တိခရစ်များက နောက်ဆုံးတွင် မိမိတို့၏ စစ်မှန်သော စရိုက်များကို ပြသခြင်းဖြစ်သည်။

“ကျွန်ုပ်သည် ကျွန်ုပ်၏ မိသားစုနှင့် အလုပ်အကိုင်ကို စွန့်လွှတ်ခဲ့သည်၊ အလွန်များစွာ အားထုတ်ကြိုးပမ်းခဲ့ပြီး ဘုရားကို ကျွန်ုပ်၏ ယုံကြည်မှုတွင် အလွန်များစွာ ဆင်းရဲဒုက္ခခံခဲ့ကာ ထိုအရာက မည်သည့်အရာကို ရရှိစေခဲ့သနည်။ ဘုရားက လူတို့ကို ကောင်းချီးပေးသည့် ဘုရားမဟုတ်လော။ ဘုရားက လူတို့ကို ကျေးဇူးတော်ပေးသည့် ဘုရားမဟုတ်လော။ သို့ဆိုလျှင် မည်သည့်အရာကို ကျွန်ုပ် ရခဲ့သနည်း”ဟူသကဲ့သို့သော အရာများကို မကြာခဏ ပြောသည့် အန္တိခရစ်အချို့ ရှိသည်။ ဘုရားသခင်သည် လူကို အလွန်များသည့် သမ္မာတရားများစွာ ထောက်ပံ့ပေးခဲ့ပြီး မည်သည့်အရာကိုမျှ တောင်းဆိုခြင်းမရှိဘဲ အလွန်များစွာ ပေးထားပြီးဖြစ်သည်။ လူတို့က ဘုရားသခင်ကို အလွန်များစွာ ဆန့်ကျင်ကာ ပုန်ကန်ခဲ့သော်လည်း သူသည် ဤအရာကို မအောက်မေ့သကဲ့သို့ လူကို ကယ်တင်ရန် ကြွလာဆဲဖြစ်သည်။ လူသည် ဘုရားသခင်ထံမှ မည်မျှ ရရှိပြီးဖြစ်သည်ကို အန္တိခရစ်များက မမြင်နိုင်ကြပေ။ ၎င်းတို့က “မည်သည့်အရာကို ကျွန်ုပ် ရခဲ့သနည်း”ဟု ပြောသည့်အခါ မည်သည့်အရာကို အမှန်တကယ် ဆိုလိုကြသနည်း။ (ကောင်းချီးများဖြစ်သည်။) အန္တိခရစ်များက အရာရာကို လိုချင်ကြသည်။ ဘုရားသခင်ကို ယုံကြည်ကာ ဘုရားသခင်နောက် လိုက်ရန် အရာရာကို ၎င်းတို့ စွန့်လွှတ်နိုင်ကြပြီး ဤသို့လုပ်ဆောင်ခြင်းအားဖြင့် ၎င်းတို့အနေဖြင့် အောင်မြင်ဖို့ အခွင့်အရေးရှိလိမ့်မည်ဖြစ်ကာ ယင်းက လုပ်ရကျိုးနပ်လိမ့်မည်ဟု တွေးထင်ကြသည်။ ၎င်းတို့သည် လောကကြီးနှင့် ၎င်းတို့၏ ရှေ့ရေးများကို စွန့်လွှတ်ကြပြီး အနာဂတ်တွင် တစ်လောကလုံးကို ပိုင်ချင်ကြသည်။ အပြန်အလှန်အနေဖြင့် ၎င်းတို့ လိုချင်သည့်အရာမှာ ၎င်းတို့ စွန့်လွှတ်ပြီးသည့်အရာထက် များစွာ ပိုရမည်ဖြစ်သည်။ ထိုအရာများထက် ပိုတန်ဖိုးရှိရမည်ဖြစ်ပြီး ၎င်းတို့ကို သာ၍ ကြီးမားသော အကျိုးများပေးရမည်ဖြစ်သည်။ ထိုအခါမှသာ ၎င်းတို့က အလဲအလှယ်လုပ်ကြလိမ့်မည်။ အန္တိခရစ်များက ၎င်းတို့ ပေါက်ကွဲထွက်သည့် အချိန်အတောအတွင်း ဒေါသထွက်သည့် အခိုက်အတန့်တွင် ဤစကားများကို ပြောသည်ဟု သင်တို့ ထင်သလော။ (မထင်ပါ။) ၎င်းတို့သည် ဤစကားများကို နောက်ဆုံးတွင် မိမိတို့ထံမှ ပေါက်ကွဲမထွက်လာမီ အချိန်အတော်ကြာ မုချ ထိန်းထားခဲ့ကြပေသည်။ ဤအရာပြီးသည့်နောက်တွင် နှစ်ကာလများတစ်လျှောက် အန္တိခရစ်များ စဉ်းစားကာ လိုက်စားနေခဲ့သည့်အရာအားလုံး ဖော်ထုတ်ခံရသည်။ ၎င်းတို့၏ ဟန်ဆောင်မှုများအားလုံး ဖယ်ရှားခံလိုက်ရသည်။ ၎င်းတို့ ပြောသည့်အရာ၏ အဓိက အချက်မှာ အဘယ်နည်း။ “ကျွန်ုပ်သည် ဤနှစ်ကာလများတစ်လျှောက်လုံးတွင် ဘုရားကို ယုံကြည်ကာ သူ့နောက်လိုက်ခဲ့ပြီး မည်သည့်အရာကို ကျွန်ုပ် ရခဲ့သနည်း”ဟူ၍ ဖြစ်သည်။ ၎င်းတို့ ရရှိလိုသည့်အရာမှာ သမ္မာတရား မဟုတ်။ သမ္မာတရားကို ၎င်းတို့ မလိုချင်ကြပေ။ အသက်ကို မလိုချင်ကြ၊ စိတ်သဘောထားဆိုင်ရာ ပြောင်းလဲမှုကို မလိုချင်ကြ၊ ဘုရားသခင်၏ ကယ်တင်ခြင်းကို မလိုချင်ကြပေ။ ၎င်းတို့က ပြီးပြည့်စုံသည့် လူများဖြစ်သည်ဟု ၎င်းတို့က တွေးထင်ကြပြီး ဤအရာများကို မရရှိချင်ကြပေ။ ၎င်းတို့က ပုံမှန်ထက်ပိုသော အရာတစ်ခု၊ ဤလောကတွင် ရရှိနိုင်သည့်အရာများထက် သာ၍ ကြီးမြတ်သော ကောင်းချီးအချို့ကို ရရှိချင်ကြသည်။ ဆိုလိုသည်မှာ ၎င်းတို့သည် မိမိတို့ စွန့်လွှတ်ခဲ့သည့် လောကီ၏ အရာများနှင့် ဘုရားသခင် ကတိပေးထားသည့် ကောင်းချီးများကို လဲလှယ်ချင်ကြသည်။ ဘုရားသခင်ထံမှ အကြီးမားဆုံးသော ကောင်းချီးမင်္ဂလာကို ရရှိချင်ကြသည်။ မိမိတို့၏ လိုအင်ဆန္ဒများအား မရရှိနိုင်သကဲ့သို့ မျှော်လင့်ချက်အားလုံး ဆုံးရှုံးသွားသည်ကို ၎င်းတို့ မြင်သည့်အခါ ၎င်းတို့ လက်လျှော့ရမည်ဖြစ်သည်။ သို့သော် ထိုသို့လုပ်ဆောင်ရမည့် အချိန်ရောက်လာသည့်အခါ ၎င်းတို့၏ စိတ်သဘောထားကို ထည့်သွင်းစဉ်းစာသော် ထိုအရာ၌ ၎င်းတို့ ရပ်တန့်နိုင်ကြလိမ့်မည်လော။ ရပ်တန့်ကြလိမ့်မည် မဟုတ်။ မိသားစုဝင်တိုင်း ယုံကြည်သူဖြစ်သည့် မိသားစုအချို့ရှိပြီး အန္တိခရစ်များက ထိုမိသားစုထဲတွင် ပေါ်ထွက်ကြသည်။ ဤအန္တိခရစ်များက ၎င်းတို့အနေဖြင့် ကောင်းချီးများ ရရှိလိမ့်မည် မဟုတ်သည်ကို မြင်သည့်အခါ မိမိတို့၏ မိသားစုများအား ယုံကြည်ခြင်းမှ တားဆီးရန်အတွက် စတင်၍ အဖျက်အမှောင့် လုပ်ကြသည်။ ဤသည်တို့မှာ မိသားစုများ ဖြစ်ကြသေးသလော။ အပြင်ပန်း ရုပ်ပိုင်းဆိုင်ရာ သို့မဟုတ် သွေးဆက်နွှယ်မှုများအရ ၎င်းတို့သည် ရင်းနှီးသော မိသားများစု ဖြစ်ကြသည်။ သို့သော် မိသားစုဝင်အသီးသီးက လိုက်လျှောက်သည့် လမ်းကြောင်းကို ငါတို့ ကြည့်သည့်အခါ ၎င်းတို့အားလုံး ဘုရားသခင်ကို ဆယ်နှစ်အတွင်းတွင် ယုံကြည်ပြီးဖြစ်သော်လည်း အချို့သည် အန္တိခရစ်များအဖြစ် ထုတ်ဖော်ခြင်းခံရသည်။ အချို့မှာ သမ္မာတရားကို လိုက်စားကာ မိမိတို့တာဝန်များကို အတော်လေး ကောင်းမွန်စွာ ထမ်းဆောင်နေကြပြီး သာမန်စံနှုန်းတစ်ခုထိ အချို့က သမ္မာတရားကို လိုက်စားနေကြသည်။ ထိုသို့ဖြင့် ၎င်းတို့၏ သဘာဝ အနှစ်သာရများက ထုတ်ဖော်ခြင်းခံရလေသည်။ ၎င်းတို့ထဲမှ အဆိုးဆုံးမှာ လူ၏ ငြင်းပယ်ခြင်းခံရကာ ဘုရားအိမ်တော်၏ နှင်ထုတ်ခြင်းခံရသင့်သည့် အန္တိခရစ်များဖြစ်သည်မှာ အမှန်ဖြစ်၏။ ထို့ကြောင့် ဤသည်တို့မှာ မိသားစုများဖြစ်သလော။ စစ်မှန်သော မိသားစုများသည် ဤကဲ့သို့ ဖြစ်ကြသလော။ ဤသည်တို့မှာ လူတစ်မျိုးတစ်စားအချို့ပင် မဟုတ်ပေ။ လူအချို့သည် နတ်ဆိုးများနှင့်အတူ နှစ်များစွာကြာ အသက်ရှင်ပြီးဖြစ်ကာ ထိုနတ်ဆိုးများကို မိသားစုဝင်များအဖြစ် သဘောထားကြဆဲဖြစ်သည်။ ၎င်းတို့က ထိုသူများအပေါ် လက်မလျှော့နိုင်ကြသကဲ့သို့ ထိုနတ်ဆိုးများအား မိမိတို့၏ ချစ်ခင်ရသူများအဖြစ်ပင် မိုက်မဲစွာ ယုံကြည်ကြလေသည်။ ဤသည်တို့မှာ မည်သည့် ချစ်ခင်ရသူမျိုးများ ဖြစ်ကြသနည်း။ အန္တိခရစ်များက မိမိတို့ကိုယ်ကို ပြသပြီးနောက် မကောင်းမှုမျိုးစုံကို လုပ်ဆောင်ကြသည်။ ၎င်းတို့သည် မိမိတို့ မိသားစုများတွင်ရှိသည့် စစ်မှန်သော ယုံကြည်သူများကိုပင် နှိပ်စက်ညှဉ်းပန်းနိုင်သည်။ သာ၍ပင် ဆိုးသည်မှာ ၎င်းတို့သည် မိမိတို့၏ မိသားစုဝင်များကို ကောက်ကျစ်ဆိုးယုတ်သော အစိုးရများထံ လွှဲအပ်နေနိုင်ကြသည်။ အချို့သော မိဘများက မိမိတို့၏ သားသမီးများကို သစ္စာဖောက်ကြပြီး အချို့သော သားသမီးများက မိမိတို့၏ မိဘများကို သစ္စာဖောက်ကြသည်။ ၎င်းတို့၏ ဆက်ဆံရေးက မည်မျှ နီးစပ်သည်ဖြစ်စေ၊ ရင်းနှီးအကျွမ်းဝင်သည်ဖြစ်စေ၊ အန္တိခရစ်များ မလုပ်ဆောင်မည့်အရာ ဘာမျှမရှိပေ။ အန္တိခရစ်များက မိမိတို့ မိသားစုများတွင်ရှိသည့် စစ်မှန်သော ယုံကြည်သူများကို သစ္စာဖောက်ကာ နှိပ်စက်ညှဉ်းပန်းနိုင်ကြသည့်အတွက် ဤသည်မှာ ၎င်းတို့က ရန်သူများဖြစ်သည်ဟု ဆိုလိုသည် မဟုတ်လော။ (ဟုတ်ပါသည်။) အသင်းတော်တွင် အန္တိခရစ်တစ်ဦး သို့မဟုတ် နှစ်ဦး ပေါ်ထွက်ခြင်းသည် ညီအစ်ကို မောင်နှမများအတွက် အန္တရာယ်ဖြစ်သည့် သဘောဖြစ်သည်။ မိမိတို့အနေဖြင့် ကောင်းချီးများ ရရှိလိမ့်မည် မဟုတ်သည်ကို အန္တိခရစ်များက မြင်သည့်အခါ မိမိတို့ကိုယ်ကို မအောင်မြင်သူအဖြစ် သဘောထားလိုက်ကြသည်။ ဂရုမစိုက်ဘဲ ဇွတ်လုပ်သည်၊ ကြမ်းတမ်းစွာ ပြုမူပြောဆိုရန် အသင့်ဖြစ်ကြပြီး အခြား ညီအစ်ကို မောင်နှမများကို အဖျက်အမှောင့်လုပ်ဖို့ပင် စတင်စဉ်းစားကြသည်။ အချို့သော ညီအစ်ကို မောင်နှမများက အားနည်းကြသည်၊ ဝိညာဉ်ရင့်ကျက်မှု သေးငယ်ပြီး သမ္မာတရားကို နားမလည်ကြပေ။ အန္တိခရစ်များက ဤညီအစ်ကို မောင်နှမများကို အင်တာနက်ပေါ်မှ ကောလာဟလအချို့အား ပြသပြီးနောက် မိမိတို့ ကိုယ်ပိုင် တန်ဆာဆင်ထားသော ရှင်းပြချက်များကို ဖြည့်စွက်ခြင်းအားဖြင့် မီးလောင်ရာလေပင့်ပေးကာ ထိုသို့ဖြင့် ထိုညီအစ်ကိုမောင်နှမများကို အဖျက်အမှောင့်လုပ်ကာ အထင်အမြင်မှားစေပြီး နောက်ဆုံးတွင် ပျက်စီးစေလေသည်။ အချို့သော ညီအစ်ကို မောင်နှမများတွင် ထိုးထွင်းသိမြင်မှုရှိပြီး အန္တိခရစ်များကို ချက်ချင်း သတိပြုမိကြသည်မှာ အမှန်ဖြစ်၏။ ၎င်းတို့အနေဖြင့် အန္တိခရစ်များကို လူသိရှင်ကြား ကိုင်တွယ်ဖြေရှင်းလျှင် ပြဿနာဖြစ်စေလိမ့်မည်ဖြစ်သည်။ ထို့ကြောင့် ထိုသူတို့က အခြားသူများကို အဖျက်အမှောင့်မလုပ်နိုင်ရန် သို့မဟုတ် ဒုက္ခမပေးနိုင်ရန်အလို့ငှာ ထိုသူတို့ကို သီးခြားခွဲထားဖို့ အမြော်အမြင်ရှိသည့် နည်းလမ်းတစ်ခုကိုသာ ၎င်းတို့ ရှာတွေ့လျှင် လုံလောက်ပေသည်။ စာတန်များကို ကိုင်တွယ်ဖြေရှင်းသည့်အခါ လူတို့က အမြော်အမြင်ရှိစွာ ပြုမူဆောင်ရွက်ရမည် ဖြစ်သည်။

အန္တိခရစ်များက ၎င်းတို့၏ ရှေ့ရေးများနှင့် ကံကြမ္မာအတွက် ဘုရားသခင်ကို ယုံကြည်ပြီး ဘုရားသခင်နောက် လိုက်ကြသည်။ ၎င်းတို့သည် ကောင်းချီးများအတွက် မိမိတို့၏ လိုအင်ဆန္ဒကို ဖမ်းဆုပ်ကာ ဘုရားအိမ်တော်ထဲသို့ ဝင်ရောက်သည့်အခါ ၎င်းတို့၏ ရည်မှန်းချက်များကို ၎င်းတို့နှင့်အတူ ယူဆောင်လာပြီး ဘုရားနှုတ်ကပတ်တော်ကို ဖတ်ရှု၊ လက်ခံကာ ဟောပြောကြသည်။ ၎င်းတို့သည် ၎င်းတို့၏ ရှေ့ရေးများနှင့် ကံကြမ္မာအတွက် ဘုရားအိမ်တော်တွင် လိုက်လျောချက်များ ပြုလုပ်သည်၊ အရှက်ရခြင်းကို ခံကာ ဆင်းရဲဒုက္ခမျိုးစုံကို ခါးစည်းခံကြလေသည်။ နှစ်ပေါင်းများစွာ စောင့်ဆိုင်းကာ စောင့်ကြည့်ပြီးနောက်တွင် ၎င်းတို့၏ မျှော်လင့်ချက်များက တစ်စစီပြိုကွဲသွားသည့်အခါ ၎င်းတို့သည်လည်း ၎င်းတို့၏ ရှေ့ရေးများနှင့် ကံကြမ္မာကြောင့်၊ ကောင်းချီးများ ရရှိဖို့ဖြစ်သော ၎င်းတို့၏ လိုအင်ဆန္ဒနှင့် ကြံရွယ်ချက်တို့ အကောင်အထည်မပေါ်နိုင်သောကြောင့် အသင်းတော်နှင့် ဘုရားအိမ်တော်ကိုလည်း စွန့်ခွာကြလေသည်။ ထိုသို့သော လူတို့၏ အဆုံးသတ်မှာ အဘယ်နည်း။ ၎င်းတို့ ဖယ်ရှားရှင်းလင်းခြင်း ခံရလိမ့်မည်ဖြစ်သည်။ ပြီးလျှင် ၎င်းတို့သည် အဘယ်ကြောင့် ဖယ်ရှားရှင်းလင်းခြင်း ခံရကြမည်နည်း။ ဘုရားသခင်က သူ၏ အိမ်တော်ထဲသို့ ၎င်းတို့ ဝင်ရောက်သည့် အခိုက်အတန့်မှစ၍ ၎င်းတို့ကို မကယ်တင်ရန် ဆုံးဖြတ်သလော သို့မဟုတ် ၎င်းတို့ကိုယ်ပိုင် ပြဿနာအချို့ ရှိကြခြင်း ဖြစ်သလော။ (၎င်းတို့ကိုယ်ပိုင် ပြဿနာအချို့ ရှိကြခြင်းဖြစ်သည်။) အန္တိခရစ်များက ဘုရားအိမ်တော်ထဲသို့ ဝင်ရောက်သည့်အခါ ၎င်းတို့သည် ဂျုံစပါးများထဲမှ တောပင်များကဲ့သို့ ရောနှောနေကြသည်။ လူအချို့က “သို့သော် ဤအကြောင်းကို ဘုရားသခင် မသိဘူးလား”ဟု ဆိုကြသည်။ ဘုရားသခင်က ထိုအကြောင်းကို သိပေသည်။ ဤအရာအားလုံးကို ဘုရားသခင်က စေ့စေ့စပ်စပ် ကြည့်ရှုစစ်ဆေးသည်။ ဤကဲ့သို့သောလူများက မပြောင်းလဲနိုင်ပေ။ ဘုရားနှုတ်ကပတ်တော်များအားလုံးကို ၎င်းတို့ ဖတ်ရှုပြီးလျှင်ပင် နက်နဲသောအရာများ၊ လူ၏ ခရီးပန်းတိုင်နှင့် ဘုရားသခင် ထုတ်ဖော်ပြသည့် လူ၏ အမျိုးမျိုးသော ဖောက်ပြန်ပျက်စီးသည့် စိတ်သဘောထားများအကြောင်းနှင့် ထိုသို့သော အခြားစာများကို ၎င်းတို့ ဖတ်ရှုပြီးလျှင်ပင် ၎င်းတို့က သမ္မာတရားကို လက်မခံကြသောကြောင့် အသုံးမဝင်ပေ။ ဘုရားသခင် ပြောဆိုသည့် စကားများသည် လူသားမျိုးနွယ်အားလုံးအား ရည်ညွှန်းခြင်းဖြစ်သည်။ ယင်းတို့ကို တစ်ဦးတလေထံမှ ကွယ်ဝှက်ထားခြင်းမရှိသကဲ့သို့ အားလုံးထံ တန်းတူညီမျှ ပေးထားပေသည်။ လူတိုင်းက ဘုရားနှုတ်ကပတ်တော်များကို ဖတ်ရှုကာ ကြားသိနိုင်သော်လည်း အဆုံးတွင် အန္တိခရစ်များက ယင်းတို့ကို လုံးဝ ရရှိလိမ့်မည် မဟုတ်။ အဘယ်ကြောင့်ဆိုသော် ၎င်းတို့သည် အန္တိခရစ်များ၊ နတ်ဆိုးများနှင့် စာတန်များဖြစ်ကြသောကြောင့် ဖြစ်သည်။ ဘုရားသခင်၏ ဘေးတွင် နှစ်ပေါင်းများစွာရှိပြီးနောက် စာတန် မပြောင်းလဲခဲ့ပေ။ ထို့ကြောင့် အန္တိခရစ်များအတွက်လည်း အလားတူဖြစ်မည် မဟုတ်လော။ သင်က ၎င်းတို့ကို နေ့စဉ် ဘုရားနှုတ်ကပတ်တော် ဖတ်ရှုစေလျှင်ပင် ထိုအရာကို ၎င်းတို့က ရရှိလိမ့်မည် မဟုတ်၊ အဘယ်ကြောင့်ဆိုသော် ၎င်းတို့သည် အန္တိခရစ်များဖြစ်ကြပြီး အန္တိခရစ်၏ အနှစ်သာရ ရှိကြ​သောကြောင့် ဖြစ်သည်။ အန္တိခရစ်များအား ၎င်းတို့၏ ကိုယ်ကျိုးစီးပွားများ သို့မဟုတ် ၎င်းတို့၏ ရှေ့ရေးများနှင့် ်ကံကြမ္မာတို့ကို စွန့်လွှတ်အောင်လုပ်ဖို့က မဖြစ်နိုင်ပေ။ ထိုအရာသည် ဝက်တစ်ကောင်ကို သစ်ပင်ပေါ်တက်အောင်လုပ်ခြင်းနှင့် တူသည်။ မဖြစ်နိုင်သော လုပ်ငန်းဆောင်တာတစ်ခု ဖြစ်သည်။ အန္တိခရစ်များက လက်ငင်း အကျိုးအမြတ်များကို မြင်လိုပြီး အနာဂတ်တွင် ထာဝရတည်သော အကျိုးအမြတ်များကိုလည်း မြင်လိုကြသည်။ ဤအရာများထဲမှတစ်ခုကို ၎င်းတို့ မရရှိနိုင်လျှင် သို့မဟုတ် မဖြည့်ဆည်းနိုင်လျှင် ၎င်းတို့ ချက်ချင်း ရန်လိုလာကြလိမ့်မည်ဖြစ်ပြီး အချိန်မရွေး စွန့်ခွာကြမည်ဖြစ်သည်။ အန္တိခရစ်များက ၎င်းတို့ အရေးစိုက်ပြီး ရရှိရန်ဆန္ဒရှိကြသည့် အမျိုးမျိုးသော အကျိုးအမြတ်များကို တိုင်းတာရန်အလို့ငှာ ဘုရားနှုတ်ကပတ်တော်များ၏ လေသံနှင့် အသံအနိမ့်အမြင့်ကို နားထောင်လျက် သူ့နှုတ်ကပတ်တော်များ၏ အဓိပ္ပာယ်နှင့် ကြံရွယ်ချက်တို့ကို ခန့်မှန်းဖို့ ကြိုးစားရင်း ဘုရားနှုတ်ကပတ်တော်များ၏ အတိအလင်း ဖော်ပြမထားသော ဆိုလိုချက်ကို သုံးသပ်ဖော်ထုတ်ကြသည်။ ဘုရားနှုတ်ကပတ်တော်များကို ဤသဘောထားဖြင့် ချဉ်းကပ်သည့်အခါ သမ္မာတရားကို နားလည်ဖို့ ၎င်းတို့အတွက် ဖြစ်နိုင်လိမ့်မည်လော။ (ဖြစ်နိုင်လိမ့်မည်မဟုတ်ပါ။) ထို့ကြောင့် မည်သို့ဆိုစေ အန္တိခရစ်များသည် ဘုရားသခင်နှင့် သူ၏ နှုတ်ကပတ်တော်ကို ဆန်ကျင်ရာတွင်ရှိပြီး ယင်းတို့၏ အသေအကြေတိုက်မည့် ရန်သူများ ဖြစ်သည်။ လူအချို့က “မည်သူမည်ဝါက တကယ်ကို ကောင်းလေ့ရှိခဲ့သည်။ ယခုတွင် သူတို့သည် အဘယ်ကြောင့် ဤကဲ့သို့ ပြုမူနေကြသနည်း။ သူတို့ထံ ဘုရားနှုတ်ကပတ်တော်ကို မိတ်သဟာယပြုပြီးနောက်တွင် သူတို့က ထိုနှုတ်ကပတ်တော်ကို နားလည်သည်ဟု ပြောပြီး သူတို့၏ တာဝန်များကို လုပ်ဆောင်ဖို့ အလုပ်ကြိုးစားလုပ်ကိုင်ရန် ကတိပေးခဲ့ကြသည်။ သို့ဆိုလျှင် သူတို့ အဘယ်ကြောင့် မပြောင်းလဲနိုင်ကြသနည်း”ဟု ပြောကြသည်။ သင့်ကို ငါ အမှန်တရား ပြောမည်။ ယခုတွင်သာ ၎င်းတို့ မပြောင်းလဲနိုင်ခြင်းမဟုတ်၊ အနာဂတ်တွင်လည်း ၎င်းတို့ ပြောင်းလဲနိုင်မည် မဟုတ်ပါ။ ဤသည်မှာ အဘယ်ကြောင့်နည်း။ အဘယ့်ကြောင့်ဆိုသော် ၎င်းတို့တွင် ပြောင်းလဲရန် ရည်ရွယ်ချက် မရှိကြသောကြောင့် ဖြစ်သည်။ ထိုအကြောင်းကို တွေးလော့။ ဝံပုလွေတစ်ကောင်က စားသောက်ဖို့အတွက် သိုးတစ်ကောင်ကို ရှာမတွေ့နိုင်လျှင် ဆာလောင်မွတ်သိပ်လာသည့်အခါ သူ၏ ဆာလောင်မှုကို သက်သာစေဖို့အတွက် တစ်ခါတစ်ရံ မြက်တစ်လုတ်စာ အနည်းငယ်ကို စားကာ ရေအနည်းငယ် သောက်လိမ့်မည်။ သို့သော် ဤအရာက သူ၏ သဘာဝ ပြောင်းလဲပြီးဖြစ်သည်ဟု ဆိုလိုသလော။ (မဆိုလိုပါ။) သို့ဆိုလျှင် အန္တိခရစ်များက မည်သည့် မကောင်းမှုမျှ မလုပ်ဆောင်သကဲ့သို့ ကောင်းမွန်သည့် အပြုအမူအချို့ကို ယာယီခဏ ပြသသည့်အခါတွင် ၎င်းတို့ ပြောင်းလဲပြီးဖြစ်သည် သို့မဟုတ် သမ္မာတရားကို လက်ခံပြီးဖြစ်သည်ဟု မဆိုလိုပေ။ ၎င်းတို့၏ တန်ခိုးအာဏာနှင့် အဆင့်အတန်း ပါဝင်ပတ်သက်သည့် နည်းလမ်းတစ်ခုဖြင့် ၎င်းတို့ ပြင်းထန်စွာ ပြုပြင်ခံရပြီး ၎င်းတို့ မျှော်လင့်ချက် မရှိကြောင်း၊ ၎င်းတို့ ဖယ်ရှားရှင်းလင်းခံရဖို့ သေချာကြောင်းကို ၎င်းတို့ မြင်ကြသည်နှင့်တစ်ပြိုင်နက် ၎င်းတို့ ချက်ချင်း အပျက်သဘောဆောင် လာကြလိမ့်မည်ဖြစ်ပြီး ၎င်းတို့၏ အလုပ်ကို စွန့်ပစ်ကြလိမ့်မည်ဖြစ်ကာ ၎င်းတို့၏ မူလ၊ စစ်မှန်သော စရိုက်များက ပေါ်လွင်လာလိမ့်မည်ဖြစ်သည်။ ဤကဲ့သို့သော လူများကို မည်သူ ပြောင်းလဲစေနိုင်သနည်း။ ဘုရားသခင်က ၎င်းတို့ကို ကယ်တင်ဖို့ စီစဉ်ခြင်းမရှိပေ။ သူသည် ၎င်းတို့ကို ထုတ်ဖော်ပြကာ ဖယ်ရှားရှင်းလင်းရန် အမှန်တရားများကိုသာ အသုံးပြုသည်။ ထို့ကြောင့် စာတန်၏ ဤအစေခံကျွန်များသည် အားလုံး၏ ထိုးထွင်းသိမြင်ခြင်းခံရကာ ငြင်းပယ်ခြင်းခံကြရမည် ဖြစ်သည်။

အန္တိခရစ်များကို ထိုးထွင်းသိမြင်ခြင်းသည် ဆိုးယုတ်သောလူများနှင့် စာတန်ကို ထိုးထွင်းသိမြင်ခြင်းကဲ့သို့ဖြစ်ပြီး အန္တိခရစ်များကို ထိုးထွင်းသိမြင်ခြင်းသည် မမြင်နိုင်သည့် စာတန်နှင့် နတ်ဆိုးများကို ထိုးထွင်းသိမြင်ခြင်းကဲ့သို့ ဖြစ်သည်။ ငါတို့ ယနေ့ စိစစ်နေသည့် အန္တိခရစ်များကို လူက မြင်နိုင်သည်။ ၎င်းတို့ လုပ်ဆောင်သည့်အရာကို သင် မြင်နိုင်ပြီး ပြောသည့်အရာကို ကြားနိုင်သည်။ ၎င်းတို့၏ သရုပ်သကန်များအားလုံးကို သင် မြင်နိုင်ပြီး ၎င်းတို့၏ ရည်ရွယ်ချက်များကို အဖြေရှာနိုင်သည်။ သင်သည် စာတန် သို့မဟုတ် ဝိညာဉ်ရေးရာ နယ်ပယ်၏ နတ်ဆိုးများကို မမြင်နိုင် သို့မဟုတ် မထိတွေ့နိုင်ပေ။ ထို့ကြောင့် ၎င်းတို့သည် သင့်အဖို့ မှတ်ယူချက်တစ်ခုနှင့် အမည်နာမတစ်ခုသာ အမြဲဖြစ်နေလိမ့်မည်။ သို့သော် ယနေ့ ငါတို့ စိစစ်နေသည့် အန္တိခရစ်များမှာ ကွဲပြားပေသည်။ ဤသည်တို့မှာ အသက်ရှင်နေသော နတ်ဆိုးများနှင့် စာတန်များ ဖြစ်သည်။ ၎င်းတို့သည် အသွေးအသားရှိသည့် လက်ဆုပ်လက်ကိုင် ပြ၍ရသော နတ်ဆိုးများနှင့် စာတန်များဖြစ်သည်။ ဤနတ်ဆိုးများနှင့် စာတန်များသည် ဝိညာဉ်ရေးရာ နယ်ပယ်တွင် ဘုရားသခင်ကို ဆန့်ကျင်ပြီး ငြင်းပယ်ကြကာ ဘုရားသခင် ပြောဆိုပြီးဖြစ်သည့် နှုတ်ကပတ်တော်တိုင်းကို အလွန်အမင်း မနှစ်မြို့ခြင်း ဖြစ်ကြပေသည်။ ၎င်းတို့က အသင်းတော်သို့ လာသည့်အခါ ဤအရာများကို လုပ်ဆောင်ကြဆဲဖြစ်သည်။ ၎င်းတို့သည် ဘုရားနှုတ်ကပတ်တော်များကို ယခင်က လုပ်ဆောင်ခဲ့ကြသည့်အတိုင်း ဆန့်ကျင်ကြဆဲဖြစ်သည်၊ အလွန်အမင်း မနှစ်မြို့ကြဆဲဖြစ်ကာ ငြင်းပယ်ကြဆဲဖြစ်သည်။ မကြာခဏဆိုသလိုပင် ၎င်းတို့သည် ဘုရားနှုတ်ကပတ်တော်များကိုပင် စက်ဆုပ်ရွံရှာကြလေသည်။ ဘုရားသခင်၏ နှုတ်မှ လာသရွေ့ အလွန်သေးငယ်သောအရာတစ်ခုကိုပင် ၎င်းတို့၏ စိတ်နှလုံးများတွင် များစွာ မေးခွန်းထုတ်ကြလိမ့်မည်။ ထိုအရာကို ၎င်းတို့က သုတေသနပြုကြလိမ့်မည်၊ စိစစ်ကာ မိမိတို့ ဉာဏ်များကို အသုံးပြုလျက် စီမံပြုပြင်ကြလိမ့်မည်။ ထို့ကြောင့် အန္တိခရစ်များအတွက် ဘုရားနှုတ်ကပတ်တော်များသည် ၎င်းတို့ယုံကြည်လက်ခံမှု၏ အာရုံစိုက်ရာ မဟုတ်ပေ။ ၎င်းတို့သည် ဘုရားနှုတ်ကပတ်တော်များကို မည်သည့်အခါတွင်မျှ ယုံကြည်ကြလိမ့်မည် မဟုတ်။ ဘုရားနှုတ်ကပတ်တော်များက မည်မျှ လက်တွေ့ကျသည်ဖြစ်စေ၊ မှန်ကန်သည်ဖြစ်စေ၊ သစ္စာရှိသည်ဖြစ်စေ ၎င်းတို့က ယုံကြည်ကြလိမ့်မည်မဟုတ်။ ထို့ကြောင့် ဤအချက်များမှ အကဲဖြတ်သည့်အခါ အန္တိခရစ်များသည် ဘုရားသခင်၏ ရန်သူများဖြစ်သည် မဟုတ်လော။ ၎င်းတို့၏ မွေးရာပါ သဘာဝသည် သမ္မာတရားနှင့် ရန်ဘက်ဖြစ်သည် မဟုတ်လော။ ဤလူစားမျိုးများသည် ဘုရားသခင်၏ ရန်သူများအဖြစ် မွေးဖွားခြင်းဖြစ်သည်။ သမ္မာတရားကို မွေးရာပါပင် အလွန်အမင်း မနှစ်မြို့ကြခြင်း ဖြစ်သည်။ ၎င်းတို့သည် ဘုရားနှုတ်ကပတ်တော်များကို သမ္မာတရားအဖြစ် မည်သည့်အခါတွင်မျှ သဘောထားကြလိမ့်မည် မဟုတ်၊ သို့မဟုတ် စွဲကိုင်ကြလိမ့်မည် မဟုတ်ပေ။ ၎င်းတို့၏ အနှစ်သာရ၊ ဘုရားသခင်အပေါ် ၎င်းတို့၏ အမျိုးမျိုးသော သရုပ်သကန်များနှင့် ဘုရားနှုတ်ကပတ်တော်များအပေါ် ၎င်းတို့၏ အမျိုးမျိုးသော သဘောထားတို့ကြောင့် အဆုံးတွင် ဤလူစားမျိုးများသည် ဘုရားနှုတ်ကပတ်တော်များ၏ ပြစ်တင်ရှုတ်ချခြင်းခံရပြီး ဘုရားသခင်၏ ပစ်ပယ်ခြင်းခံရသည်။ ထို့ကြောင့် ၎င်းတို့သည် မိမိတို့ လိုက်စားသည့် အကြီးမားဆုံးသော အကျိုးအမြတ်ဖြစ်သည့် ၎င်းတို့၏ ရှေ့ရေးများနှင့် ကံကြမ္မာတို့ကို ရရှိနိုင်ကြလိမ့်မည်လော။ လုံးဝ ရရှိနိုင်ကြလိမ့်မည် မဟုတ်။ ထို့ကြောင့် ဘုရားသခင်သည် လူသားမျိုးနွယ်ကို သူ ပေးမည့် ကတိတော်များနှင့် ကောင်းချီးများအပြင် လူသားမျိုးနွယ်အတွက် သူ ပြင်ဆင်ပြီးဖြစ်သည့် ခရီးပန်းတိုင်တို့ကို မည်သူ့ထံ ဘုရားသခင် ပြောဆိုခြင်း ဖြစ်သနည်း။ ဤအရာများတွင် အန္တိခရစ်များအတွက် ဝေစုတစ်ခုတလေ ရှိသလော။ (မရှိပါ။) ဘုရားသခင် ပြောဆိုထားပြီး လူသားမျိုးနွယ်ထံ ကတိပေးထားသည့် နှစ်သက်ပျော်ရွှင်ဖွယ်ဖြစ်သော ခရီးပန်းတိုင်ကို ဘုရားသခင်၏ ကယ်တင်ခြင်းခံရမည့်သူများထံသို့၊ ဘုရားနှုတ်ကပတ်တော်များကို ယုံကြည်ပြီး ဘုရားနှုတ်ကပတ်တော်များကို သမ္မာတရားအဖြစ် လက်ခံသည့် လူများထံသို့ ပေးထားခြင်းဖြစ်သည်။ ဘုရားသခင်အပေါ် ဆန့်ကျင်လိုကာ ဘုရားနှုတ်ကပတ်တော်များကို လူလိမ်တစ်ဦး၏ မုသားများအဖြစ် သဘောထားသည့် အန္တိခရစ်များကို ပေးထားခြင်း မဟုတ်ပေ။

၂၀၂၀ ခုနှစ်၊ ဧပြီလ ၁၁ ရက်

အောက်ခြေမှတ်စု(များ)-

က။ မူရင်းစာသားတွင် “၎င်းတို့ ယုံကြည်ကြသည်”ဟူသည့် စကားရပ် မပါရှိပါ။