ဘုရားသခင်ပေါ်ထွန်းခြင်းသည် အသင်းတော်များအားလုံးတွင် ထွက်ပေါ်နှင့်ပြီး ဖြစ်သည်။ မိန့်တော်မူသူမှာ ဝိညာဉ်တော် ဖြစ်သည်။ ကိုယ်တော်သည် လောင်သောမီးဖြစ်သည်၊ ဘုန်းအာနုဘော်ရှိပြီး၊ တရားစီရင်နေသည်။ ကိုယ်တော်သည် လူသားဖြစ်သည်။ ခြေသို့တိုင်အောင် ဝတ်ခြုံလျက်၊ ရင်တော်၌ ရွှေခါးပန်းကို စည်းလျက်ဖြစ်၏။ ဦးခေါင်းတော်နှင့် ဆံပင်တော်သည် သိုးမွှေးကဲ့သို့ ဖြူ၏။ မျက်စိတော်သည်လည်း မီးလျှံကဲ့သို့ ဖြစ်၏။ ခြေတော်သည်လည်း မီး၌ချွတ်ပြီးသော ကြေးဝါစစ်နှင့်တူ၏။ အသံတော်သည်လည်း သမုဒ္ဒရာသံကဲ့သို့ ဖြစ်၏။ လက်ျာတော်သည်လည်း ကြယ်ခုနစ်လုံးကို ကိုင်၏။ ခံတွင်းတော်ထဲကလည်း ထက်သောသန်လျက်ထွက်၏။ မျက်နှာတော်သည် အရှိန်တန်ခိုးနှင့် ထွန်းတောက်သော နေကဲ့သို့ဖြစ်၏။

လူသားကို သက်သေခံပြီးဖြစ်ပြီး၊ ဘုရားသခင် ကိုယ်တော်တိုင်ကို ပွင့်လင်းစွာ ထုတ်ဖော်ပြီးဖြစ်သည်။ ဘုရားသခင်၏ ဘုန်းတော်သည် တောက်လောင်နေသော နေကဲ့သို့ ပြင်းထန်စွာ တောက်ပလျက် ထုတ်လွှတ်ပြီးဖြစ်သည်။ ကိုယ်တော်၏ ဘုန်းကြီးသောမျက်နှာသည် အလွန်စူးရှတောက်ပသော အလင်းဖြင့် တောက်လောင်သည်၊ မည်သူ၏မျက်လုံးတို့သည် ကိုယ်တော်ကို ခုခံမှုဖြင့် ဆက်ဆံနိုင်သနည်း။ ခုခံမှုသည် သေခြင်းသို့ ဦးတည်သည်။ သင်၏စိတ်နှလုံးထဲတွင် ကြံစည်သည့် မည်သည့်အရာမဆို၊ သင်ပြောဆိုသည့် မည်သည့်စကားကိုမဆို သို့မဟုတ် သင်လုပ်ဆောင်သည့် မည်သည့်အရာမဆို အတွက် အနည်းငယ်ဆုံးသော သနားကရုဏာကို ပြသမည်မဟုတ်ပေ။ သင်တို့အားလုံးသည် သင်တို့ရရှိပြီးသောအရာမှာ ငါ၏စီရင်မှုမှတစ်ပါး အခြား မည်သည်မျှ မရှိကြောင်း နားလည်လာကြ၊ မြင်တွေ့လာကြလိမ့်မည်။ သင်တို့သည် ငါ၏ နှုတ်ကပတ်တော်ကို စားသောက်ရန် အားမထုတ်ဘဲ၊ ၎င်းအစား ငါတည်ဆောက်ထားသောအရာကို စိတ်ကူးပေါက်သည်အတိုင်း ဝင်ရောက် နှောင့်ယှက်ကာ ဖျက်ဆီးသောအခါ၊ ငါသည် ယင်းကို သည်းခံနိုင်မည်လော။ ငါသည် ဤကဲ့သို့သောသူကို သိမ်မွေ့စွာ ဆက်ဆံလိမ့်မည် မဟုတ်ပေ။ သင်၏စရိုက်သည် သာ၍ဆိုးရွားစွာ ယိုယွင်းလာပါလျှင်၊ သင်သည် မီးလောင်ခြင်းကို ခံရလိမ့်မည်။ အနန္တတန်ခိုးရှင် ဘုရားသခင်သည် ဦးခေါင်းမှသည် ခြေဖျားအထိ ဆက်သွယ်ထားသော အသား သို့မဟုတ် အသွေး စိုးစဉ်းမျှ မရှိသော ဝိညာဉ်ခန္ဓာကိုယ်တွင် ကိုယ်ထင်ပြသည်။ ကိုယ်တော်သည် စကြာဝဠာလောကကို ကျော်လွန်သည်၊ တတိယကောင်းကင်ရှိ ဘုန်းကြီးတော်မူသော ပလ္လင်တော်ထက်တွင် ထိုင်တော်မူကာ အရာခပ်သိမ်းကို အုပ်စိုးနေလေသည်။ စကြာဝဠာနှင့် အရာခပ်သိမ်းတို့သည် ငါ၏လက်များအထဲတွင် ရှိကြသည်။ ငါသည် မြွက်တော်မူလျှင် ထိုအတိုင်းဖြစ်သည်။ ငါအမိန့်ဖြင့်ပြဋ္ဌာန်းလျှင်၊ ထိုအတိုင်းဖြစ်လိမ့်မည်။ စာတန်သည် ငါ၏ခြေအောက်တွင်ရှိသည်။ ၎င်းသည် အနက်ဆုံးသောတွင်း အထဲ၌ရှိသည်။ ငါ၏အသံတော် ထွက်သောအခါ၊ ကောင်းကင်နှင့်မြေကြီးသည် တည်ရှိတော့မည် မဟုတ်ဘဲ၊ မည်သည့်အရာမျှ ရှိတော့မည် မဟုတ်ပေ။ အရာခပ်သိမ်းတို့သည် အသစ်ပြုခြင်းကို ခံရကြလိမ့်မည်၊ ၎င်းသည် အကြွင်းမဲ့ မှန်ကန်သော ပြောင်းလဲ၍မရနိုင်သည့် သမ္မာတရား တစ်ခုဖြစ်သည်။ ငါသည် လောကအပြင် ဆိုးယုတ်သောသူများကို အောင်နိုင်ပြီးဖြစ်သည်။ ငါသည် ဤနေရာတွင် ထိုင်တော်မူကာ သင်တို့အား မိန့်မြွက်တော်မူသည်၊ ထို့ကြောင့် နားရှိသောသူအားလုံး ကြားသင့်ပြီး၊ အသက်ရှင်နေသောသူ အားလုံး လက်ခံသင့်သည်။

နေ့ရက်တို့သည် အဆုံးသတ်လိမ့်မည်၊ ဤလောကရှိ အရာခပ်သိမ်းတို့သည် အချည်းနှီးဖြစ်သွားပြီး အရာခပ်သိမ်းတို့သည် အသစ် မွေးဖွားကြလိမ့်မည်။ ဤသည်ကို မှတ်သားလော့။ မှတ်သားလော့။ ဤအရာနှင့်ပတ်သက်၍ သင်တို့သည် ပေါ့ဆ၍မရပေ။ ကောင်းကင်နှင့်မြေကြီး မတည်သော်လည်း ငါ့စကားတည်လိမ့်မည်။ ငါ သင်တို့ကို နောက်တစ်ကြိမ် တိုက်တွန်းနှိုးဆော်မည်။ အကျိုးမရှိဘဲ မပြေးလေနှင့်။ နိုးထလော့။ ပြန်လှည့်လော့။ ကမ်းခြေသို့ ရောက်လုနီးပြီ။ ငါသည် သင်တို့အလယ်တွင် ပေါ်ထွန်းနှင့်ပြီးဖြစ်ပြီး ငါ၏အသံတော်သည် ပေါ်ထွက်ပြီးဖြစ်သည်။ ငါ၏ အသံတော်သည် သင်တို့ မျက်မှောက်တွင် ပေါ်ထွက်ပြီးဖြစ်သည်၊ ယင်းသည် နေ့စဉ်နေ့တိုင်း သင်တို့ကို မျက်နှာချင်းဆိုင် ရင်ဆိုင်ပြီး ယင်းသည် နေ့ရက်အသီးသီးတွင် လန်းဆန်းကာ အသစ်ဖြစ်သည်။ သင်သည် ငါ့ကိုမြင်သည်၊ ငါသည်လည်း သင့်ကို မြင်သည်၊ ငါသည် သင့်အား စဉ်ဆက်မပြတ် ပြောဆိုပြီး သင်နှင့် မျက်နှာချင်းဆိုင် ရှိသည်။ သို့သော်လည်း သင်သည် ငါ့ကို ငြင်းပယ်ပြီး ငါ့ကို မသိပေ။ ငါ့သိုးတို့သည် ငါ့စကားသံကို ကြားနိုင်သည်၊ သို့တိုင်အောင် သင်တို့သည် တွေဝေကြသေးသည်။ သင်တို့သည် တွေဝေကြသည်။ သင်တို့၏ စိတ်နှလုံးတို့သည် မိုက်လျက် သင်တို့၏မျက်လုံးတို့သည် စာတန်၏ ကွယ်စေခြင်းကို ခံရကြသည်၊ ငါ၏ ဘုန်းကြီးသော မျက်နှာတော်ကို မမြင်နိုင်ပေ၊ သင်တို့သည် သနားဖွယ်ကောင်းလိုက်လေခြင်း။ သနားဖွယ်ကောင်းလိုက်လေခြင်း။

ငါ၏ ပလ္လင်တော်ရှေ့မှ ဝိညာဉ်ခုနစ်ပါးတို့သည် မြေကြီးတစ်ပြင်လုံးသို့ စေလွှတ်ခြင်းခံရပြီး ငါသည် ငါ၏ တမန်တော်ကို အသင်းတော်များသို့ စကားပြောရန် စေလွှတ်မည်။ ငါသည် ဖြောင့်မတ်ကာ သစ္စာရှိသည်၊ ငါသည် လူ့နှလုံးသား၏ အနက်ရှိုင်းဆုံးသော အစိတ်အပိုင်းများကို စိစစ်သော ဘုရားသခင်ဖြစ်သည်။ သန့်ရှင်းသော ဝိညာဉ်တော်သည် အသင်းတော်တို့အား မိန့်တော်မူပြီး ငါ၏ သားတော်အတွင်းမှ ထွက်ပေါ်သည်မှာ ငါ၏ နှုတ်ကပတ်တော်များ ဖြစ်သည်၊ နားရှိသောသူအားလုံး ကြားနာသင့်သည်။ အသက်ရှင်နေသောသူအားလုံး လက်ခံသင့်သည်။ ယင်းတို့ကို စားသောက်ခြင်းသာ ပြုလော့၊ သံသယမရှိလေနှင့်။ ငါ၏နှုတ်ကပတ်တော်များကို ကျိုးနွံနာခံ၍ နားထောင်သောသူ အားလုံးတို့သည် ကြီးမားသော ကောင်းချီးမင်္ဂလာများကို ရရှိလိမ့်မည်။ ငါ၏မျက်နှာတော်ကို ရိုးသားစစ်မှန်စွာ ရှာဖွေသော သူအားလုံးတို့သည် အသစ်သောအလင်း၊ အသစ်သော ဉာဏ်အလင်းရခြင်းနှင့် အမြင်သစ်များကို အကယ်စင်စစ် ရရှိလိမ့်မည်၊ အရာခပ်သိမ်းတို့သည် လန်းဆန်းကာ အသစ်ဖြစ်ကြလိမ့်မည်။ ငါ၏ နှုတ်ကပတ်တော်များသည် သင့်ထံသို့ အချိန်မရွေး ပေါ်ထွန်းလာလိမ့်မည်ဖြစ်ပြီး ယင်းတို့သည် သင် ဝိညာဉ်ရေးရာနယ်ပယ်၏ နက်နဲရာများအားလုံးကို မြင်နိုင်ရန် သင်၏ ဝိညာဉ်မျက်လုံးကို ပွင့်စေလိမ့်မည်ဖြစ်သည်။ နိုင်ငံတော်သည် လူတို့အလယ်တွင် ရှိ၏။ ခိုလှုံရာသို့ ဝင်ရောက်လော့၊ ကျေးဇူးတော်နှင့် ကောင်းချီးမင်္ဂလာအပေါင်းတို့သည် သင့်အပေါ်သို့ ကျရောက်လိမ့်မည်။ အစာခေါင်းပါးခြင်းနှင့် ကပ်ရောဂါတို့သည် သင့်အနီးကို လာနိုင်လိမ့်မည် မဟုတ်ပေ၊ ပြီးလျှင် ဝံပုလွေများ၊ မြွေများ၊ ကျားများနှင့် ကျားသစ်များတို့သည် သင့်ကို အန္တရာယ်ပြုနိုင်မည် မဟုတ်ပေ။ သင်သည် ငါနှင့်အတူ သွားလိမ့်မည်၊ ငါနှင့်အတူ လျှောက်လှမ်းလိမ့်မည်၊ ပြီးလျှင် ငါနှင့်အတူ ဘုန်းတော်ဝင်စားလိမ့်မည်။

အနန္တတန်ခိုးရှင် ဘုရားသခင်။ ကိုယ်တော်သည် ကိုယ်တော်၏ ဘုန်းအသရေနှင့်ပြည့်စုံသော ခန္ဓာကို လူသိရှင်ကြား ပေါ်ထွန်းတော်မူပြီဖြစ်ကာ ကိုယ်တော်၏ သန့်ရှင်းသော ဝိညာဉ်ခန္ဓာသည် ပေါ်ထွန်းလာခဲ့ပြီဖြစ်ပြီး ကိုယ်တော်သည် ပြီးပြည့်စုံသော ဘုရားသခင်ကိုယ်တိုင် ဖြစ်တော်မူပေသည်။ လောကနှင့် ကိုယ်တော်၏ ဇာတိပကတိ နှစ်ခုစလုံးသည် ပြောင်းလဲသွားခဲ့ပြီဖြစ်ပြီး တောင်ပေါ်ရှိ ကိုယ်တော်၏ အသွင်ပြောင်းလဲခြင်းသည် ဘုရားသခင်၏ ဇာတိအဖြစ်တော် ဖြစ်ပေသည်။ ကိုယ်တော်သည် ဦးခေါင်းတော်ထက်တွင် ရွှေသရဖူကို ဆောင်းထားတော်မူပြီး ကိုယ်တော်၏ အဝတ်အစားသည် ဖြူစင်ကာ ရင်ဘတ်တော်တွင် ရွှေခါးပန်းကို စည်းထားတော်မူပြီး လောကနှင့် အရာခပ်သိမ်းတို့သည် ကိုယ်တော်၏ ခြေတင်ခုံ ဖြစ်ပေသည်။ ကိုယ်တော်၏ မျက်စိတော်များသည် မီးလျှံများနှင့်တူပြီး ကိုယ်တော်၏ နှုတ်တော်ထဲတွင် နှစ်ဖက်လုံးချွန်ထက်သော သန်လျက် ရှိတော်မူကာ ကိုယ်တော်၏ လက်ယာဘက် လက်တော်တွင် ကြယ်ခုနစ်လုံး ရှိတော်မူသည်။ နိုင်ငံတော်သို့သွားရာ လမ်းခရီးသည် အဆုံးအစမဲ့ လင်းထိန်နေပြီး ကိုယ်တော်၏ ဘုန်းအသရေနှင့်ပြည့်စုံသော အလင်းသည် ပေါ်ထွက်လာကာ ထွန်းလင်းတောက်ပနေသည်။ တောင်များသည် ရွှင်လန်းကြပြီး ရေများသည် ရယ်မောကြကာ နေ၊ လနှင့် ကြယ်များအားလုံးသည် ယင်းတို့၏ စနစ်တကျရှိသော အစီအစဉ်အတိုင်း လည်ပတ်နေကြလျက် ကိုယ်တော်၏ နှစ်ခြောက်ထောင် စီမံခန့်ခွဲမှုအစီအစဉ်ကို ပြီးမြောက်ခဲ့ပြီဖြစ်သော စစ်မှန်သည့် တစ်ပါးတည်းသော ဘုရားသခင်၏ အောင်ပွဲခံ ပြန်လည်ကြွလာခြင်းကို ကြိုဆိုနေကြသည်။ အားလုံးသည် ဝမ်းမြောက်စွာဖြင့် ခုန်ပေါက် ကခုန်နေကြပေသည်။ ရွှင်လန်းဝမ်းမြောက်ကြလော့။ အနန္တတန်ခိုးရှိသော ဘုရားသခင်သည် ကိုယ်တော်၏ ဘုန်းအသရေနှင့်ပြည့်စုံသော ပလ္လင်တော်ပေါ်တွင် ထိုင်တော်မူပေသည်။ သီချင်းဆိုကြလော့။ အနန္တတန်ခိုးရှင်၏ အောင်ပွဲခံ အလံတော်ကို ဘုန်းအာနုဘော်ဖြစ်သော၊ ခမ်းနားထည်ဝါသော ဇိအုန်တောင်ပေါ်တွင် မြင့်မားစွာ လွှင့်ထူထားပေသည်။ နိုင်ငံအသီးသီးသည် ရွှင်လန်းဝမ်းမြောက်နေကြပြီး ဘုရားသခင် ရွေးချယ်ထားသော မြောက်မြားလှသောလူများသည် သီချင်းသီဆိုနေကြကာ ဇိအုန်တောင်သည် ဝမ်းမြောက်စွာ ရယ်မောနေပြီး ဘုရားသခင်၏ ဘုန်းအသရေတော်သည် ပေါ်ထွက်လာခဲ့ပြီဖြစ်သည်။ ဘုရားသခင်၏ မျက်နှာတော်ကို မြင်ရလိမ့်မည်ဟု ကျွန်ုပ် အိပ်မက်ပင် မမက်ခဲ့ဖူးသည့်တိုင် ယနေ့တွင် ထိုမျက်နှာတော်ကို ကျွန်ုပ် မြင်တွေ့ခဲ့ရပြီဖြစ်သည်။ ကိုယ်တော်နှင့် နေ့စဉ် မျက်နှာချင်းဆိုင်လျက် ကျွန်ုပ်သည် ကိုယ်တော်အား စကားပြောပြီး ကျွန်ုပ်၏ စိတ်နှလုံးကို ပွင့်လင်းစွာ ဖွင့်ပြလေသည်။ ကိုယ်တော်သည် စားစရာနှင့် သောက်စရာတို့ကို ကြွယ်ဝစွာ ထောက်ပံ့ပေးတော်မူသည်။ အသက်တာ၊ စကားများ၊ လုပ်ရပ်များ၊ အတွေးအခေါ်များ၊ စိတ်ကူးများတွင် ကိုယ်တော်၏ ဘုန်းအသရေရှိသော အလင်းသည် အလင်းပေးတော်မူပြီး ကိုယ်တော်သည် လမ်းခရီး၏ ခြေလှမ်းတိုင်းကို ဦးဆောင်တော်မူကာ လူတစ်ဦးသည် စိတ်နှလုံးထဲတွင် ပုန်ကန်ပါက ကိုယ်တော်၏ တရားစီရင်မှုသည် လျင်မြန်စွာ ကျရောက်လာလေသည်။

ဘုရားသခင်နှင့်အတူ စားသောက်ခြင်း၊ နေထိုင်ခြင်းနှင့် အသက်ရှင်ခြင်း၊ ကိုယ်တော်နှင့်အတူ ရှိနေခြင်း၊ အတူတကွ လျှောက်လှမ်းခြင်း၊ အတူတကွ ပျော်မွေ့ခံစားခြင်း၊ ဘုန်းအသရေနှင့် ကောင်းချီးများကို အတူတကွ ရရှိခြင်း၊ ဘုရားသခင်နှင့်အတူ ဘုရင်များအဖြစ် အုပ်စိုးခြင်းနှင့် နိုင်ငံတော်ထဲတွင် အတူတကွ ရှိနေခြင်းတို့သည် အလွန် ကြီးမားသော ပျော်ရွှင်မှုတစ်ရပ်ပေတည်း။ ယင်းမှာ အလွန် ချိုမြိန်လှပါတကား။ ကျွန်ုပ်တို့သည် နေ့စဉ်နေ့တိုင်း ကိုယ်တော်နှင့် မျက်နှာချင်းဆိုင် ရှိနေကြသည်၊ ကိုယ်တော်သည် နေ့စဉ်နေ့တိုင်း စကားပြောပြီး ကျွန်ုပ်တို့နှင့် အစဉ်မပြတ် စကားပြောဆိုကာ ကျွန်ုပ်တို့သည် နေ့စဉ်နေ့တိုင်း ဉာဏ်ပွင့်စေခြင်း အသစ်နှင့် ထိုးထွင်းသိမြင်မှု အသစ်များကို ပေးသနားခံရလေသည်။ ကျွန်ုပ်တို့၏ ဝိညာဉ်မျက်စိများ ပွင့်လာပြီး ကျွန်ုပ်တို့သည် အရာအားလုံးကို မြင်တွေ့ကြရသည်၊ ဝိညာဉ်၏ နက်နဲမှုများကို ကျွန်ုပ်တို့အား ထင်ရှားပြသလေသည်။ သန့်ရှင်းသော အသက်တာသည် အမှန်တကယ်ပင် ပူပင်ကြောင့်ကြမှု ကင်းမဲ့သည်၊ လျင်မြန်စွာပြေးပြီး မရပ်နှင့်၊ ပြီးလျှင် ရှေ့သို့ စဉ်ဆက်မပြတ် တိုးသွားလော့။ ရှေ့တွင် သာ၍အံ့သြဖွယ် ဘဝတစ်ခု ရှိသည်။ ချိုမြိန်မှုကို မြည်းစမ်းရရုံဖြင့် ကျေနပ်မနေလေနှင့်၊ ဘုရားသခင်ထံတော်ပါးသို့ တောက်လျှောက် ပြေးဝင်လော့။ ကိုယ်တော်သည် အရာခပ်သိမ်းကို လွှမ်းခြုံကာ ပေါလျှံကြွယ်ဝပြီး ကျွန်ုပ်တို့ ချို့တဲ့သောအရာ အမျိုးမျိုးကို ပိုင်ဆိုင်သည်။ တက်ကြွစွာ ပူးပေါင်းဆောင်ရွက်ပြီး ဘုရားသခင်ထံပါးသို့ ဝင်ရောက်လော့၊ ထိုအခါ အရာအားလုံးသည် ပြောင်းလဲသွားလိမ့်မည်။ ကျွန်ုပ်တို့၏ဘဝများသည် လွတ်မြောက်ကာ မည်သည့်ပုဂ္ဂိုလ်၊ မည်သည့်ဖြစ်ရပ် သို့မဟုတ် မည်သည့်အရာမျှ ကျွန်ုပ်တို့ကို နှောင့်ယှက်နိုင်လိမ့်မည် မဟုတ်ပေ။

ထူးကဲသာလွန်ခြင်း။ ထူးကဲသာလွန်ခြင်း။ စစ်မှန်သော ထူးကဲသာလွန်ခြင်း။ ဘုရားသခင်၏ ထူးကဲသာလွန်သော အသက်သည် အထဲတွင် ရှိပြီး၊ အရာခပ်သိမ်းသည် စစ်မှန်စွာ သက်သောင့်သက်သာ ရှိသွားကြပြီ ဖြစ်သည်။ ငါတို့သည် ခင်ပွန်းများ သို့မဟုတ် သားသမီးများတို့အပေါ် သံယောဇဉ် မရှိဘဲ၊ လောကနှင့် လောကီအရာများတို့ကို ကျော်လွန်သည်။ ဖျားနာခြင်းနှင့် ပတ်ဝန်းကျင်များ၏ ဘောင်ခတ်မှုကို ငါတို့ ကျော်လွန်သည်။ စာတန်သည် ငါတို့ကို မနှောင့်ယှက်ရဲပေ။ ငါတို့သည် ဘေးအန္တရာယ်အလုံးစုံတို့ကို ကျော်လွန်သည်။ ဤသည်မှာ ဘုရားသခင်အား ဘုရင်ဖြစ်ခွင့်ပေးခြင်း ဖြစ်သည်။ ငါတို့သည် စာတန်ကို ခြေဖဝါးအောက် နင်းခြေကြသည်၊ အသင်းတော်အဖို့ သက်သေခံကြပြီး၊ စာတန်၏ အကျည်းတန်သော မျက်နှာကို လုံးလုံးလျားလျား ဖော်ထုတ်ကြသည်။ အသင်းတော်ကို တည်ဆောက်ခြင်းသည် ခရစ်တော်၌ဖြစ်ပြီး၊ ဘုန်းကြီးသော ခန္ဓာတော်သည် ပေါ်ထွက်ပြီးဖြစ်သည်။ ၎င်းသည် ချီဆောင်ခြင်း၌ အသက်ရှင်ခြင်း ဖြစ်သည်။