ငါ့အတွက် မိမိတို့ကိုယ်ကိုယ် ရိုးသားစွာ အသုံးတော်ခံပြီး ပူဇော်ဆက်ကပ်သူမည်သူမဆို၊ ငါသည် သင့်ကို အဆုံးတိုင်အောင် ဧကန်အမှန် အကာအကွယ်ပေးမည်။ သင်သည် အစဉ်အမြဲ ငြိမ်သက်ခြင်းရှိပြီး အစဉ်အမြဲ ဝမ်းမြောက်ဖို့ရန်အလို့ငှာ ငါ့လက်သည် သင့်ကို မုချ ဆွဲကိုင်ထားမည်၊ ထိုသို့ဖြင့် သင်သည် ငါ၏ အလင်းနှင့် ထုတ်ဖော်ချက်တို့ နေ့စဉ် ရရှိလိမ့်မည်။ ငါ၏ အရာအားလုံးကို သင်ရရှိပြီး ငါ၏ဖြစ်ခြင်းကို သင်ပိုင်ဆိုင်ဖို့ရန်အလို့ငှာ၊ သင့်အပေါ် ကောင်းကြီးမင်္ဂလာများ ဧကန်အမှန် ငါနှစ်ဆဖြစ်စေပေးမည်။ သင်အတွင်း၌ ပေးထားသည့်အရာသည် သင်၏ အသက်ဖြစ်ပြီး ယင်းကို သင့်ထံမှ မည်သူမျှ မယူနိုင်ရာ။ သင့်ကိုယ်သင် ဒုက္ခမပေးနှင့် သို့မဟုတ် စိတ်ပျက်ညှိုးငယ်ခြင်း မဖြစ်နှင့်၊ ငါ၏အတွင်း၌ ငြိမ်သက်ခြင်း နှင့် ဝမ်းမြောက်ခြင်းသာ ရှိ၏။ ငါ့ကို ရိုးသားစွာ အလေးထားပြီး ငါ့ကို ကျိုးနွံနာခံသော အသင်၊ ရင်သွေး၊ ငါသည် သင့်ကို အမှန် ချစ်၏။ ငါအမုန်းဆုံးကား သူတော်ကောင်း ယောင်ဆောင်သူများ ဖြစ်သည်။ ၎င်းတို့အား ငါသည် အမှန် သုတ်သင်ဖယ်ရှားမည်။ ငါ၏ အိမ်တော်မှ လူ့လောက အရိပ်အယောင် မှန်သမျှ ငါသုတ်သင်ဖယ်ရှင်းမည်၊ ငါမမြင်လိုသည့်အရာများ အားလုံးကို ငါသုတ်သင်ဖယ်ရှင်းမည်။

ငါ့စိတ်နှလုံးထဲတွင် မည်သူသည် ငါ့အား ရိုးသားစွာ အလိုရှိပြီး မည်သူသည် အလိုမရှိကြောင်း ငါသည် အတိအကျ သိ၏။ သူတို့သည် ကောင်းစွာ အယောင်ဆောင်နိုင်ပြီး ပုံပန်းပီသအောင် နေနိုင်ကြ၏၊ ပြီးလျှင် သူတို့ကို ကမ္ဘာ့အကောင်းဆုံး သရုပ်ဆောင်များဟုပင် ခေါ်ဆိုနိုင်ပေသည်။ သို့သော် သူတို့၏ စိတ်နှလုံးထဲ၌ သိုထားသမျှ အရာအားလုံးကို ငါသည် ရှင်းလင်းစွာ မြင်သည်။ သင့်နှလုံးထဲ၌ အဘယ်အရာရှိသည်ကို ငါမသိဟု မထင်နှင့်၊ လက်တွေ့တွင် ငါ့ထက်ပို၍ ရှင်းရှင်းလင်းလင်း နားလည်နိုင်သောသူ တစ်ယောက်မျှ မရှိ။ သင့်စိတ်နှလုံးထဲ၌ အဘယ်အရာရှိသည်ကို ငါသိ၏၊ သင်သည် ဘုရားသခင်အတွက် သင့်ကိုယ်သင် ဆက်ကပ်ရန်နှင့် အသုံးတော်ခံရန် လိုလားနေ၏၊ အခြားသူများ ဝမ်းမြောက်စေရန် ချိုသာသောစကားများကို သင်မပြောလိုခြင်းသာ ဖြစ်၏။ ရှင်းရှင်းလင်းလင်း သိနားလည်လော့။ ယနေ့ နိုင်ငံတော်သည် လူသား၏ ခွန်အားဖြင့် တည်ဆောက်ထားခြင်းမဟုတ်၊ သို့သော် ငါ၏ ဉာဏ်ပညာအသင်္ချေနှင့် ဒုက္ခခံ ကြိုးစားအားထုတ်မှုတို့ကို လုံးလုံးလျားလျား အသုံးပြုခြင်းဖြင့် အောင်မြင်စွာ တည်ထောင်မည်။ ဉာဏ်ပညာရှိသော မည်သူမဆိုနှင့် ၎င်းတို့အတွင်း ငါ၏ဖြစ်ခြင်းကို ပိုင်ဆိုင်သူတို့သည် နိုင်ငံတော်တည်ထောင်ရာတွင် ဝေစုရလိမ့်မည်။ ထပ်၍ စိတ်ပူပန်ခြင်း မရှိနှင့်။ သင့်အထဲတွင် ငါ၏ရည်ရွယ်ချက်များကို ထုတ်ဖော်ပြခြင်း သို့မဟုတ် အလင်းပေးခြင်းတို့ကို အလေးမထားဘဲ၊ သင်သည် အမြဲ လွန်ကြူးစွာ စိုးရိမ်ပူပန်နေသည်၊ ထိုသို့ ထပ်မံပြုနှင့်။ သင်၏ကိုယ်ပိုင် အပြုအမူများကြောင့်ဖြစ်သော ဆင်းရဲဒုက္ခ ဝေဒနာများကို ရှောင်ကြဉ်နိုင်ရန်အလို့ငှာ၊ မည်သည့် အရေးကိစ္စဖြစ်စေ ငါနှင့် ပိုမို၍ မိတ်သဟာယဖွဲ့လော့။

အပြင်ပန်းတွင် ငါသည် လူတိုင်းအပေါ် ဂရုမစိုက်ပုံ ပေါ်ကောင်းပေါ်နေမည်၊ သို့သော် ငါသည် အတွင်းထဲ၌ အဘယ်အရာကို တွေးတောနေသည်ကို သင်သိပါသလော။ ငါသည် နှိမ့်ချသူများကို အမြဲမြှင့်တင်၍ စိတ်ကြီးဝင်သူ၊ မိမိဘာသာ ကြီးကျယ်နေသူတို့ကို အမြဲကျရှုံးစေသည်။ ငါ၏ရည်ရွယ်ချက်များကို နားမလည်သူတို့သည် ကြီးစွာသော ဆုံးရှုံးမှုတို့ကို ခံစားရမည်။ ဤသည်မှာ ငါ၏ဖြစ်ခြင်းနှင့်၊ ဤသည်မှာ ငါ၏ စိတ်သဘောထား ဖြစ်ကြောင်း သင်သိရမည်။ ယင်းကို မည်သူမျှ မပြောင်းလဲနိုင်၊ မည်သူမျှ စေ့စေ့စပ်စပ် နားမလည်ပေ။ ငါ၏ ထုတ်ဖော်ချက်မှတစ်ဆင့်သာ သင်နားလည်နိုင်မည်၊ သို့မဟုတ်ပါက သင်သည် စေ့စေ့စပ်စပ် နားလည်မည် မဟုတ်ပေ၊ မာနမထောင်လွှားနှင့်။ အချို့လူတို့သည် အပြောကောင်းသော်လည်း၊ သူတို့၏ စိတ်နှလုံးတို့သည် ငါ့ကို ဘယ်သောအခါမျှ သစ္စာမရှိ၊ ငါ့အား အစဉ် တိတ်တဆိတ် ကွဲလွဲဆန့်ကျင်လျက်ရှိသည်၊ ထိုသို့သော လူစားမျိုးကို ငါတရားစီရင်မည်။

အခြားသူများကို အတုယူခြင်းအား အာရုံမပြုနှင့်၊ ငါ၏ ဟန်အမူအရာနှင့် နည်းလမ်းတို့ကိုသာ အထူးဂရုပြုလော့။ ဤနည်းအားဖြင့်သာ သင်သည် ငါ၏ရည်ရွယ်ချက်များကို တဖြည်းဖြည်း နားလည်လာလိမ့်မည်၊ ထို့နောက်တွင် သင်၏ လုပ်ဆောင်မှုတို့သည် ငါ၏ရည်ရွယ်ချက်များနှင့်အညီ ဖြစ်လာလိမ့်မည်၊ သင်သည် အမှားများ ကျူးလွန်မိမည် မဟုတ်ပေ။ ဝမ်းနည်း ငိုကြွေးခြင်း မပြုနှင့်။ သင်လုပ်သမျှအားလုံး၊ သင်၏အပြုအမူအားလုံးနှင့် သင်တွေးသမျှ အားလုံးကို ရှင်းရှင်းလင်းလင်း ငါမြင်ပြီး၊ သင်၏ ရိုးသားသော လိုအင်ဆန္ဒများကိုလည်း ငါသိ၏။ ငါသည် သင့်ကို အသုံးပြုမည်။ ယခုအချိန်သည် အရေးပါလှသောအချိန်ဖြစ်၏၊ သင့်ကို စစ်ဆေးချိန် ရောက်ပေပြီ။ သင်သည် မမြင်သေးသလော။ သင်သည် ယခုတိုင် သဘောမပေါက်သေးသလော။ သင့်အပေါ် အဘယ်ကြောင့် ငါသည် ထိုသို့ သဘောထားသနည်း။ သင်သိပါသလော။ ငါသည် ဤအရာများကို သင့်အား ထုတ်ဖော်ပြပြီး ဖြစ်ပြီး သင်၌ ထိုးထွင်းသိမြင်မှု အနည်းငယ် ရှိ၏။ သို့သော် မရပ်တန့်နှင့်၊ သင်၏ ဝင်ရောက်မှုနှင့်အတူ ရှေ့ဆက်လျှောက်လှမ်းလော့၊ ငါသည် သင့်ကို ဆက်လက်၍ ဉာဏ်ပွင့်လင်းစေမည်။ သင်သည် ငါ့ကို ကျိုးနွံနာခံပြီး အလေးပေးဂရုပြုလေလေ သင်သည် အတွင်းထဲတွင် ပိုမိုအလင်းရပြီး ထုတ်ဖော်ချက်ကို ပိုမိုရရှိလေလေ ဖြစ်သည်ကို သင်သည် တွေ့ကြုံပြီးဖြစ်သလော။ သင်သည် ငါ့ကို ကျိုးနွံနာခံပြီး အလေးပေးဂရုပြုလေလေ၊ သင်သည် ငါနှင့်သက်ဆိုင်သည့် အသိပညာကို ပိုမိုရရှိလေလေ၊ အတွေ့အကြုံကို ပိုမိုရရှိလေလေ ဖြစ်သည်ကို သိရှိနားလည်သလော။ သင်၏ ကိုယ်ပိုင် အယူအဆများကို အမြဲဖက်တွယ် မထားနှင့်။ ဤသည်ကို လုပ်ဆောင်ခြင်းသည် ငါ၏ အသက်ရေ စီးဆင်းမှုကို ပိတ်စေပြီး ငါ၏အလိုတော်ကို အကောင်အထည်ဖော်ရန် အဟန့်အတား ဖြစ်စေလိမ့်မည်။ လူတစ်ဦးကို လုံးလုံးလျားလျား ရရှိဖို့ဆိုသည်မှာ လွယ်ကူသော ကိစ္စတစ်ရပ် မဟုတ်သည်ကို သင်သိရမည်။ ခက်ခဲရှုပ်ထွေးသော နည်းလမ်းဖြင့် မစဉ်းစားပါနှင့်။ ရိုးရိုးပင် လိုက်နာလော့၊ ထပ်မံ မစဉ်းစားနှင့်။