သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

၄၈။ လမ်းမှန်သို့ ပြန်ရောက်ခြင်း

အနန္တတန်ခိုးရှင် ဘုရားသခင် ပြောသည်မှာ- “ဘုရားသခင်ကို အစေခံခြင်းသည် ရိုးစင်းသည့် အလုပ်မဟုတ်ချေ။ မိမိတို့၏ ဖောက်ပြန်ပျက်စီးသော စိတ်သဘောထား မပြောင်းလဲဘဲ ရှိရစ်နေသောသူတို့သည် ဘုရားသခင်ကို မည်သည့်အခါမျှ အစေခံနိုင်မည် မဟုတ်ပေ။ သင့်စိတ်သဘောထားသည် ဘုရားသခင့်နှုတ်ကပတ်တော်၏ တရားစီရင်ခြင်းနှင့် ပြစ်တင်ဆုံးမခြင်းကို မခံရသေးလျှင် သင့်စိတ်သဘောထားသည် စာတန်ကို ကိုယ်စားပြုနေသေးသည်။ ထိုအရာကပင် သင်သည် သင့်ကိုယ်ကျိုးအတွက်သာ ဘုရားသခင်ကို အစေခံခြင်းဖြစ်ကြောင်း သက်သေပြရန် လုံလောက်သည်။ ယင်းသည် ဆိုးယုတ်သော သင်၏သဘာဝအပေါ် အခြေခံထားသည့် အစေခံခြင်းပင် ဖြစ်သည်။ သင်သည် သင့်သဘာဝ ပင်ကိုစရိုက်နှင့် သင့်ပုဂ္ဂိုလ်ရေး အကြိုက်များအရသာ ဘုရားသခင်အား အစေခံခြင်း ဖြစ်သည်၊ ထို့အပြင် သင်လုပ်ချင်သည့် အရာတိုင်း၌ ဘုရားသခင် ကျေနပ်ပြီး သင်လုပ်ချင်စိတ် မရှိသည့် အရာတိုင်းကို မုန်းသည်ဟု တွေးထင်လျက်ရှိနေသည်၊ ထို့အပြင် သင်၏ လုပ်ဆောင်မှုထဲတွင် သင်သည် မိမိကိုယ်ပိုင် ကြိုက်နှစ်သက်မှုများ၏ လုံးလုံးလျားလျား လမ်းညွှန်ခြင်းကို ခံနေရသည်။ ထိုအရာကို ဘုရားသခင်အား အစေခံခြင်းဟု ခေါ်နိုင်မည်လော။ နောက်ဆုံး၌ သင့်အသက်တာ၏ စိတ်သဘောထားသည် ဆံခြည်တစ်မျှင်မျှပင် ပြောင်းလဲလိမ့်မည် မဟုတ်၊ ယင်းအစား သင်သည် ဘုရားသခင်ကို အစေခံနေပြီ ဖြစ်သည့်အတွက် ပို၍ပင် ခေါင်းမာလာလိမ့်မည် ဖြစ်ပြီး ထိုအရာက သင်၏ ယိုယွင်းပျက်စီးသော စိတ်သဘောထားကို နက်ရှိုင်းစွာ အရိုးစွဲသွားစေလိမ့်မည်။ ထိုနည်းအားဖြင့် သင်၏ ကိုယ်ပိုင် ပင်ကိုစရိုက် အပေါ်နှင့် မိမိကိုယ်တိုင်၏ စိတ်သဘောထားနှင့်အညီ အစေခံခြင်းမှ ရရှိလာသည့် အတွေ့အကြုံအပေါ် အဓိကအားဖြင့် အခြေခံထားသည့် ဘုရားသခင်အား အစေခံခြင်းနှင့် ပတ်သက်၍ စည်းမျဉ်းများကို အတွင်းကျိတ် ချမှတ်လိမ့်မည်။ ထိုအရာသည် လူ့အတွေ့အကြုံအားဖြင့် ရလာသော သင်ခန်းစာဖြစ်ပေသည်။ ယင်းသည် လူသား၏ လောကထဲ၌ အသက်ရှင်ခြင်းဆိုင်ရာ ဒဿန ဖြစ်ပေသည်။ ထိုသို့သောသူတို့သည် ဖာရိရှဲနှင့် ဘာသာရေး အမှုဆောင်တို့နှင့် သက်ဆိုင်ကြသည်။ သူတို့သည် မည်သည့်အခါမျှ နိုးထ၍ နောင်တမရလျှင်မူ အဆုံး၌ နောက်ဆုံးသော ကာလတွင် ပေါ်လာမည့် ခရစ်တော်အတုအယောင်များ ဖြစ်သွားကြပြီး၊ လူသားများကို လှည့်ဖြားသောသူများ ဖြစ်သွားကြမည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဘာသာရေးအမှုဆောင်ခြင်းကို သန့်စင်ရမည်”) ဒီ အပိုဒ်ကို ကျွန်တော်ဖတ်တဲ့အခါမှာ “ဘုရားသခင်ကို အစေခံခြင်းသည် ရိုးစင်းသည့် အလုပ်မဟုတ်ချေ။ မိမိတို့၏ ဖောက်ပြန်ပျက်စီးသော စိတ်သဘောထား မပြောင်းလဲဘဲ ရှိရစ်နေသောသူတို့သည် ဘုရားသခင်ကို မည်သည့်အခါမျှ အစေခံနိုင်မည် မဟုတ်ပေ။ သင့်စိတ်သဘောထားသည် ဘုရားသခင့်နှုတ်ကပတ်တော်၏ တရားစီရင်ခြင်းနှင့် ပြစ်တင်ဆုံးမခြင်းကို မခံရသေးလျှင် သင့်စိတ်သဘောထားသည် စာတန်ကို ကိုယ်စားပြုနေသေးသည်။” ကျွန်တော် တကယ်ကို ထိခိုက်ခံစားရတယ်။ အရင်က ကျွန်တော် ရှုံးနိမ့်မှုကို ကြုံတွေ့ခဲ့ရတယ်။ မာနထောင်လွှားတဲ့ စိတ်သဘောထားကို အခြေခံပြီး ကျွန်တော့်တာဝန်ကို ထမ်းဆောင်တယ်။ ပြီးတော့ အရမ်းကြွားဝါတယ်။ လူတွေ ကျွန်တော့်ကို အထင်ကြီးအောင်၊ ကိုးကွယ်အောင် အပေါ်ယံစကားတွေ၊ အယူဝါဒတွေကိုဟောပြီး ကြွားလုံးထုတ်တယ်။ ကျွန်တော်ကိုယ်တိုင် သတိမထားလိုက်မိဘဲ ဘုရားကို ဆန့်ကျင်တဲ့လမ်းကြောင်းပေါ်ကို ခြေချခဲ့မိတယ်။ နောက်ပိုင်းကျမှပဲ ဘုရားနှုတ်ကပတ်တော်တွေရဲ့ တရားစီရင်ခြင်းနဲ့ ထုတ်ဖော်ခြင်းတွေကြောင့်၊ ဘုရားကို ဆန့်ကျင်ခြင်းနဲ့ ကျွန်တော့်ရဲ့ဆိုးယုတ်တဲ့ သဘာဝရဲ့ အရင်းအမြစ်ကို သတိပြုမိလာပြီး ဘုရားသခင်ဆီမှာ နောင်တရလာခဲ့တာပါ။

၂၀၁၃ ခုနှစ်မှာ ကျွန်တော် အသင်းတော်ခေါင်းဆောင်အဖြစ် ရွေးခံခဲ့ရတယ်။ အဲဒီတုန်းက ကျွန်တော် တော်တော် စိတ်အားထက်သန်တယ်။ ညီအစ်ကိုမောင်နှမတွေ အကျပ်အတည်းကြုံရတာကို မြင်တိုင်း သူတို့ပြဿနာတွေကို ကူပြီး ဖြေရှင်းပေးဖို့ သူတို့ကို ကျွန်တော် ဘုရားနှုတ်ကပတ်တော်နဲ့ မိတ်သဟာယပြုပေးပါတယ်။ လူတိုင်းရဲ့ အခက်အခဲတွေ ပြေလည်သွားတာနဲ့ သူတို့တာဝန်တွေကို ပုံမှန်အတိုင်း ထမ်းဆောင်နိုင်ခဲ့ကြတယ်။ သုံးလေးလလောက် ကြာပြီးတဲ့နောက်မှာ ကျွန်တော့်ခေါင်းဆောင်က ကျွန်တော့်ကိုပြောတယ်။ “အသစ်ဝင်လာတဲ့ ညီအစ်ကိုမောင်နှမတွေ တော်တော်များတဲ့ အသင်းတော်တစ်ခုရှိတယ်။ မင်းရဲ့ လုပ်ဖော်ကိုင်ဖက်တွေအားလုံးက မင်းအဲဒီကိုသွားပြီး ခေါင်းဆောင်အဖြစ် ထမ်းဆောင်ဖို့ အကြံပေးကြတယ်။” တဲ့။ ကိုယ့်ကိုယ်ကိုယ် ယုံကြည်မှုအပြည့်နဲ့ ကျွန်တော် လက်ခံခဲ့တယ်။ အဲဒီ ညီအစ်ကိုမောင်နှမတွေကို ကောင်းကောင်းပျိုးထောင်ပေးရမယ်။ ဒါမှ သူတို့တွေလည်း သမ္မာတရားကို တတ်နိုင်သလောက် မြန်မြန် နားလည်နိုင်မယ်၊ လမ်းမှန်ပေါ်မှာ အခြေခံကောင်းတွေ ချနိုင်မယ်ဆိုပြီး ကျွန်တော် တွေးလိုက်တယ်။ အဲဒီအသင်းတော်ကို ရောက်ပြီးတဲ့နောက်မှာ၊ အဲဒီက အခြေအနေတွေအားလုံးကို ကျွန်တော် နားလည်သွားတယ်။ ပြီးတော့ ညီအစ်ကိုမောင်နှမတွေရဲ့ ပြဿနာတွေ၊ အခက်အခဲတွေကို မှတ်စုရေးထားလိုက်တယ်။ သူတို့ပြဿနာတွေကို မိတ်သဟာယပြုပြီး ဖြေရှင်းပေးဖို့၊ ဘုရားနှုတ်ကပတ်တော်တွေထဲက ဆိုင်ရာကျမ်းပိုဒ်တွေကို နောက်တော့မှ ရှာပေးမယ်ဆိုပြီး ရည်ရွယ်တာ။ ကျွန်တော်က အဲဒီမှာ လူသစ်ဆိုတော့ ညီအစ်ကိုမောင်နှမတော်တော်များများက ကျွန်တော့်ကို မသိကြဘူး။ ဒါကြောင့် ပိုပြီး မိတ်သဟာယပြုဖို့အတွက် ကြိုးစားပြီး သူတို့နဲ့အတူ စုဝေးရမယ်လို့ ကျွန်တော် မြင်မိတယ်။ အချိန်တိုအတွင်းမှာ အသင်းတော်အလုပ်ကို ကောင်းကောင်းလုပ်နိုင်ရင် ကျွန်တော်က သမ္မာတရား အစစ်အမှန်ကို ပိုင်ဆိုင်ပြီး ကျွန်တော့်အလုပ်ကို လုပ်နိုင်စွမ်းရှိတယ် လို့ ညီအစ်ကိုမောင်နှမတွေက သေချာပေါက် ခံစားမိကြမှာပဲ အဲဒီလိုဖြစ်တဲ့အခါကျရင် ကျွန်တော့်ခေါင်းဆောင်တွေကလည်း ကျွန်တော့်ကို အထင်ကြီးလာနိုင်တယ်။ နောက်တော့ အသင်းတော်က အသိပေးချက်တစ်ခု ထုတ်ပြန်တယ်။ ကျွန်တော်တို့အဆင့်မှာ မဖြစ်မနေ ဝင်ရောက်ရမယ့် သမ္မာတရားတွေရယ်၊ ပြီးတော့ အဲဒါတွေကို မိတ်သဟာယပြုဖို့၊ ဘုရားနှုတ်ကပတ်တော်တွေထဲမှာ ဆိုင်ရာဆိုင်ရာကျမ်းပိုဒ်တွေကို ရှာရမယ်ဆိုတာပဲ။ ဒါ ကိုယ့်ကိုယ်ကိုယ် သက်သေပြဖို့အတွက် တကယ့် အခွင့်အလမ်းတစ်ခုဖြစ်နေတော့ ကျွန်တော် တော်တော်ပျော်သွားတယ်။ ဒါနဲ့ သမ္မာတရားရဲ့ ဒီ ရှုထောင့်တွေအားလုံးနဲ့ဆိုင်တဲ့ ဘုရားရဲ့မိန့်မြွက်ချက်တချို့ကို ကျွန်တော် ရှာတယ်။ ပြီးတော့ အဲဒါတွေကို စုစုစည်းစည်းဖြစ်အောင် သေချာပြင်ဆင်တယ်။ အဲဒီတစ်ချိန်လုံး စိတ်ထဲမှာလည်း၊ “ဖြစ်ချင်တော့ လုပ်ဖော်ကိုင်ဖက် တွေ့ဆုံပွဲက မနက်ဖြန်လုပ်မှာ။ ဒီ ဘုရားနှုတ်ကပတ်တော်တွေကို ငါ တစ်ညလုံးရှာထားတာ ငါ့ အလုပ်ဖော်တွေက သိမှာပဲ။ ပြီးရင် ငါက တာဝန်သိတတ်ပြီး စိတ်ချယုံကြည်ရတယ်လို့ သေချာပေါက် ပြောကြမှာပဲ။” ဆိုပြီး တွေးနေမိတယ်။ အဲဒီလိုနဲ့ ကျွန်တော် ပြင်ဆင်လို့ မပြီးခင်မှာ မိုးလင်းလုနီးနီး ဖြစ်နေပြီ။ ထင်တဲ့အတိုင်းပဲ၊ စည်းဝေးပွဲအချိန်ရောက်တော့၊ ကျွန်တော် ရှာထားတဲ့ ဘုရားနှုတ်ကပတ်တော်တွေကို မြင်ပြီး၊ ကျွန်တော့်အလုပ်ဖော်တွေအားလုံးက ကျွန်တော့်ကို တလေးတစားနဲ့ ကြည့်ကြတယ်။ တချို့က ပြောတယ်၊ “အစ်ကိုချမ်းကို ကြည့်စမ်းပါဦး။ သူ တော်တော် တာဝန်သိတာပဲ။ ဘုရားနှုတ်ကပတ်တော်တွေထဲက ဒီဆိုင်ရာဆိုင်ရာ ကျမ်းပိုဒ်တွေကို သူ တစ်ညလုံး ရှာထားတာ” ပေါ့။ တချို့ကကျတော့ “တော်တော်မှန်တယ်။ အစ်ကိုချမ်းက ဘုရားနှုတ်ကပတ်တော်တွေကို တော်တော်ဖတ်ပုံရတယ်။” လို့ပြောကြတယ်။ စည်းဝေးပွဲကို ဦးစီးပြီး လုပ်နေတဲ့ အစ်ကိုကဆို စိုးရိမ်ပြီး ပြောတယ်၊ “အစ်ကိုချမ်း၊ ဒီ ဘုရားနှုတ်ကပတ်တော်တွေ အားလုံးကို ရှာဖို့၊ ဘယ်လောက်တောင် အိပ်ရေးပျက်ခံခဲ့လဲဗျာ” တဲ့။ ဒါတွေအားလုံးကို ကြားရတာ ကျွန်တော် ပီတိဖြစ်မိတယ်။ မိုးလင်းတဲ့အထိ ကျွန်တော် မအိပ်ဘဲနေခဲ့တာ အလကားမဖြစ်တော့ဘူး။ ညီအစ်ကိုမောင်နှမတွေကလည်း ကျွန်တော် ဘယ်လောက် ကြိုးစားထားမှန်း မြင်တယ်လေ။ ရင်ထဲမှာ လှုပ်ရှားနေတာကို ဖုံးရင်းနဲ့၊ ကျွန်တော်လည်း ပြောလိုက်တယ်၊ “ဒါတွေကို ရှာပြီးတဲ့အချိန်မှာ မိုးလင်းခါနီးနေပြီ။ ကျွန်တော်က အလုပ်ပြီးဖို့ဆိုရင် တစ်ညလုံးမအိပ်ဘဲ နေတတ်တယ်။ ဒီလိုပဲဖြစ်သင့်တယ်လေ။ ဘာမှ ကြွားစရာမဟုတ်ပါဘူး။ စည်းဝေးပွဲတွေမှာ ညီအစ်ကိုမောင်နှမတွေ မိတ်သဟာယပြုနိုင်ဖို့ နှောင့်နှေးနေတာမျိုး မဖြစ်အောင်လို့ပါ” ပေါ့။ နောက်တော့ ဦးစီးတဲ့အစ်ကိုက ကျွန်တော့်ကို အလုပ်မှာ တာဝန်သိတယ်၊ တစ်ညလုံး မအိပ်ဘဲ ဒုက္ခခံနိုင်တယ်ဆိုပြီး ပြောတယ်။ ကျွန်တော့်ရင်ထဲမှာ အပျော်တွေ ပြည့်သွားတာပေါ့။ ကျွန်တော့်ကို အရည်အချင်းရှိတဲ့ ခေါင်းဆောင်တစ်ယောက်ပါလို့ ညီအစ်ကိုမောင်နှမတွေ အားလုံးက ပြောလာအောင်၊ ကျွန်တော်လည်း ဆက်ပြီး အလုပ်ကြိုးစားခဲ့ရတယ်။

နောက်ပိုင်းမှာ ဧဝံဂေလိတရား ဖြန့်ဝေတဲ့အလုပ်က တိုးတက်လာတော့ နောက်ထပ် အသင်းတော် နှစ်ခု သုံးခုလောက် တည်ထောင်ခဲ့တယ်။ နေ့တိုင်းပဲ ညီအစ်ကို မောင်နှမတွေကို ပျိုးထောင်ဖို့ အသင်းတော်တိုင်းဆီကို လှည့်သွားပြီး မနက်ကနေ ညအထိ ကျွန်တော် လုပ်ခဲ့တယ်။ အခက်အခဲရှိတဲ့ ဘယ်သူကိုမဆို၊ သူတို့ပြဿနာတွေ ပြေလည်အောင် စိတ်ရှည်ရှည်နဲ့ မိတ်သဟာယပြုပေးပြီး၊ ဘုရားနှုတ်ကပတ်တော်တွေကို ဖတ်ပြတယ်။ ကျွန်တော့်အပေါ် လူတွေရဲ့ ထင်မြင်ချက်တွေက ပိုပြီးတော့ ကောင်းလာတယ်။ တစ်ခါတုန်းက ညီအစ်ကိုမောင်နှမတချို့က ဧဝံဂေလိတရား ဖြန့်ဝေနေတုန်းမှာ ပြဿနာတစ်ခုကြုံရပြီး မဖြေရှင်းနိုင်ကြဘူး။ သူတို့က အပျက်သဘောဆောင်လာပြီး အားနည်းလာကြတယ်။ အဲဒါနဲ့ အဲဒီအကြောင်းကို မိတ်သဟာယပြုဖို့ ကျွန်တော့်ဆီကို သူတို့ ရောက်လာကြတယ်။ ကျွန်တော်က ဧဝံဂေလိဖြန့်ဝေတာနဲ့ပတ်သက်ပြီး အရင်တုန်းက ကျွန်တော့် အတွေ့အကြုံကို သူတို့ကို ဝေမျှတယ်။ ကျွန်တော်က ပြောလိုက်တယ်။ “ကျွန်တော် ဧဝံဂေလိ သွားဖြန့်ခဲ့တဲ့ လူတွေဆိုရင် သူတို့မှာ အယူအဆတွေ ရှိကြတော့၊ လက်မခံကြဘူး။ တချို့ဆို ကျွန်တော့်ကို သူတို့အိမ်ထဲကနေ ဆွဲထုတ်ကြတယ်။ အဲဒီအချိန်တုန်းကတော့ ဒါကို တော်တော်ခက်ခဲတယ်လို့ပဲ ထင်မိတယ်။ ဒါနဲ့ ဘုရားသခင်ဆီ မပြတ်တမ်း ဆုတောင်းခဲ့တယ်။ ဘုရားနှုတ်ကပတ်တော်တွေထဲက ဆိုင်ရာဆိုင်ရာ ကျမ်းပိုဒ်တွေကို တစ်ညလုံးမအိပ်ဘဲ ရှာတယ်။ အဲဒီလူတွေရဲ့ ပြဿနာတွေကို ဖြေရှင်းပေးဖို့ သူတို့နဲ့ ခဏခဏ မိတ်သဟာယပြုတယ်။ ဘုရားရဲ့အသံကို သူတို့တွေ ကြားနိုင်ပြီးတော့၊ နောက်ဆုံးသောကာလမှာ ဘုရားရဲ့ကယ်တင်ခြင်းကို ရနိုင်အောင်၊ ကျွန်တော် အဲဒီလိုလုပ်ခဲ့တာပါ။ အရှက်ရတာတွေ၊ အခက်အခဲတွေ ဘယ်လောက်ပဲ ရင်ဆိုင်ရပါစေ ကျွန်တော် အရှုံးမပေးခဲ့ဘူး။ နောက်ဆုံးမှာ သူတို့အားလုံးကို ကျွန်တော် သိမ်းသွင်းနိုင်ခဲ့တယ်...” ဆိုတာမျိုးပေါ့။ ကျွန်တော်ပြောလို့ ပြီးသွားတဲ့အချိန်မှာ အစ်ကိုတစ်ယောက်က တလေးတစားနဲ့ ပြောတယ်။ “ဒီက ငါတို့ အစ်ကိုချမ်းကို ကြည့်စမ်းပါဦး။ ဆင်းရဲဒုက္ခကို ဘယ်လိုသည်းခံရမယ်ဆိုတာ သူ တကယ်သိတယ်။ ဝန်ထုပ်ဝန်ပိုးကို သူ တကယ်ထမ်းရွက်တာပဲ။” တဲ့။ တချို့ကလည်း “ငါတို့အားလုံး ဧဝံဂေလိတရားကို အစ်ကိုချမ်း ဖြန့်ဝေသလို ဖြန့်ဝေသင့်တယ်” ပေါ့လေ။ ဒီ ညီအစ်ကိုမောင်နှမတွေ အထင်ကြီးနေတာကို မြင်ရတော့၊ ကျွန်တော်လည်း တော်တော် ပီတိဖြစ်တာပေါ့။ နောက်ပိုင်းမှာ သူတို့အလုပ်တွေမှာ အခက်အခဲကြုံရတဲ့သူတွေက အကူအညီတောင်းဖို့အတွက် ကျွန်တော့်ကိုလာရှာကြတယ်။ လူနည်းစုကပဲ ကျွန်တော်နဲ့အတူလုပ်နေတဲ့ အစ်ကိုဆီကို သွားတယ်။ ညီအစ်ကို မောင်နှမတွေက သူတို့ တာဝန်တွေကို ထမ်းဆောင်နေချိန်မှာ ကျွန်တော်ခိုင်းတဲ့ဟာ ဘာမဆို တက်တက်ကြွကြွလုပ်ကြတယ်။ သူတို့ ကျွန်တော့်ကို ဘယ်လောက်အထင်ကြီးနေသလဲ ဆိုတာကို မြင်ရတော့ ကျွန်တော် ကိုယ့်ကိုယ်ကိုယ် ပိုပိုပြီး အသိအမှတ်ပြုလာတယ်။ ကျွန်တော်က အသင်းတော်ရဲ့ဒေါက်တိုင်တစ်ခု ဖြစ်လာသလို ခံစားမိတယ်။

တွေ့ဆုံပွဲတစ်ခုမှာ ကျွန်တော်က ကိုယ့်အလုပ်မှာ ဘယ်လောက် ဒုက္ခခံပြီး ဘာတွေ ပေးဆပ်ခဲ့တယ်၊ ဘာရလဒ်တွေ ရခဲ့တယ်ဆိုတာတွေကို ဆက်တိုက်ပြောတယ်။ ရုတ်တရက် ညီမတစ်ယောက်က ကျွန်တော့်ကို ပြောတယ်။ “အစ်ကိုချမ်း အစ်ကို ပြောတာကို ကျွန်မကြားရတာ အများစုက အစ်ကို့တာဝန်ကို ထမ်းဆောင်နေတုန်းမှာ အစ်ကို ဘယ်လောက်ဒုက္ခခံပြီး အသုံးတော်ခံခဲ့သလဲဆိုတာတွေပဲ။ ဒါပေမဲ့ အစ်ကို ဆင်းရဲဒုက္ခကြုံတဲ့အခါ ဘာအားနည်းချက်တွေ ရှိခဲ့တယ်၊ ဘယ်လို ဖောက်ပြန်ပျက်စီးတဲ့ စိတ်သဘောထားတွေ အစ်ကို့မှာ ပေါ်ခဲ့တယ်၊ ပြီးတော့ ကိုယ့်ကိုယ်ကိုယ် ဘယ်လိုအသိမျိုး ရခဲ့တယ်၊ အစ်ကို့အခက်အခဲတွေကို ဖြေရှင်းဖို့ သမ္မာတရားကို ဘယ်လိုရှာခဲ့တယ်ဆိုတာတွေကို မပြောသွားဘူးနော်။ အစ်ကိုက ဘယ်လို ဖောက်ပြန်ပျက်စီးမှုမှ မရှိသလိုဖြစ်နေတယ်”...တဲ့။ သူ ဒီလိုပြောပြီးတဲ့နောက်မှာ တခြားလူတွေက ကျွန်တော့်ကို ကြည့်တယ်။ ကျွန်တော် ဆွံ့အသွားတယ်။ အားလုံးရှေ့မှာ အရှက်ခွဲခံရသလို ခံစားရတယ်။ မျက်နှာလည်း နီရဲသွားတာပေါ့။ စိတ်ထဲမှာလည်း “ငါ့ကို အဲဒီလိုပြောလိုက်တာ၊ ငါတော့ ဒီညီအစ်ကိုမောင်နှမတွေအားလုံးရှေ့မှာ အရူးလိုဖြစ်သွားပြီ။ ငါ့ကို သူတို့ ဘယ်လိုထင်ကြမှာလဲ။” ဆိုပြီး တွေးမိတယ်။ သိက္ခာလေး ပြန်ထိန်းလို့ရအောင်၊ မြန်မြန်ပဲ ပြောချလိုက်တယ်၊ “ညီမ မိတ်သဟာယပြုသွားတာ မှန်ပါတယ်။ အစ်ကို လက်ခံနိုင်ပါတယ်။ ဒါပေမဲ့ အစ်ကိုတို့ ညီအစ်ကိုမောင်နှမတွေက သူတို့တာဝန်တွေမှာ အခက်အခဲတွေကြုံနေရတယ်။ ပြီးတော့ အပျက်သဘောဆောင်ပြီး အားနည်းလာကြတယ်။ အစ်ကိုတို့ ဖောက်ပြန်ပျက်စီးမှုကိုပဲ ပြောမနေသင့်ဘူး။ အပြုသဘောဆောင်တဲ့ လက်တွေ့လုပ်ဆောင်မှုတွေကို ပိုပြီး မိတ်သဟာယပြုရမယ်။ အစ်ကိုတို့ ညီအစ်ကိုမောင်နှမတွေ ရှေ့ဆက်ဖို့ လမ်းတစ်ခု ရပြီး ယုံကြည်ခြင်းကို တွေ့နိုင်ဖို့၊ ဒါက တစ်ခုတည်းသောနည်းလမ်းပါပဲ”...ပေါ့။ နောက်ပိုင်းမှာ တချို့ ညီအစ်ကိုမောင်နှမတွေက ပြောတယ်။ ကျွန်တော့်အတွေ့အကြုံတွေနဲ့ အသိပညာတွေအကြောင်း ပြောပြီဆိုရင်၊ ကျွန်တော်က ကိုယ့်မှာ ပေါ်ခဲ့ဖူးတဲ့ ဖောက်ပြန်ပျက်စီးမှုအများစုကို ထုတ်မပြောဘဲ ထားတယ်တဲ့။ ပြီးတော့ ကျွန်တော် ဘယ်လိုဒုက္ခခံခဲ့တယ်၊ ဘယ်လို အဖိုးအခတွေ ပေးဆပ်တယ်၊ အလုပ်တာဝန်မှာ ကိုယ့်ဇာတိပကတိကို ဘယ်လို စွန့်လွှတ်ခဲ့တယ် ဆိုတာတွေချည်းပဲ အများကြီးပြောနေတော့၊ ကျွန်တော်က သမ္မာတရားကို လက်တွေ့လုပ်ဆောင်ရာမှာ တကယ်ကို ကျွမ်းကျင်သလိုလို ထင်သွားကြတာပေါ့ တဲ့။ ညီအစ်ကိုမောင်နှမတွေဆီက ဒီလို သတိပေးတာတွေကို ကြုံရတော့၊ ကျွန်တော် စိတ်မသက်မသာဖြစ်မိတယ်။ ငါ မိတ်သဟာယပြုနေတဲ့ ဒီအရာတွေက တကယ်ကို မသင့်တော်ဘူးလား ပေါ့။ တစ်ခါတလေမှာ ကျွန်တော် ဘယ်လို မာနထောင်လွှားပြီး တစ်ကိုယ်ကောင်းဆန်တယ်ဆိုတာကို မိတ်သဟာယပြုတာ ရှိတော့ရှိပါတယ်။ နောက်ပြီး ကိုယ့်အလုပ်တာဝန်မှာ တော်တော်ကောင်းတဲ့ ရလဒ်တွေချည်းပဲ အမြဲရခဲ့တယ်။ အသင်းတော်အလုပ်ကိုလည်း အနှောင့်အယှက်မဖြစ်စေခဲ့ဘူး။ ဒါဆိုရင် ကျွန်တော် မိတ်သဟာယပြုတဲ့ပုံစံက တစ်ခုခုမှားတာ မရှိနိုင်ဘူးဆိုတဲ့ သဘောပေါ့။ မဟုတ်ဘူးလား။ အဲဒါနဲ့ ကျွန်တော်လည်း ကိုယ့်ကိုယ်ကိုယ် လေးလေးနက်နက် ဆင်ခြင်တာမျိုး မလုပ်ခဲ့ဘူး။

နောက်ပိုင်းမှာ ကျွန်တော့်တာဝန် လိုအပ်ချက်အရ ကျွန်တော့်အလုပ်ကို ဆက်လုပ်ဖို့ တခြားအသင်းတော်တစ်ခုဆီကို ပြောင်းရွှေ့ခဲ့ရတယ်။ ကျွန်တော့်လုပ်ဖော်ကိုင်ဖက်တွေနဲ့ စည်းဝေးပွဲတစ်ခုမှာ၊ အစ်ကိုကျန်းက အလေးအနက်လေသံမျိုးနဲ့ ပြောတယ်၊ “အစ်ကို ချမ်း ဟိုဘက် အသင်းတော်ကနေ အစ်ကို ထွက်လာကတည်းက၊ အဲဒီက ညီအစ်ကိုမောင်နှမတွေက သူတို့အလုပ်တွေကို စိတ်ဝင်စားမှု မရှိကြတော့ဘူး။ တချို့အခက်အခဲတွေ ကြုံပြီဆိုလည်း၊ သူတို့က ဘုရားနှုတ်ကပတ်တော်တွေ ဖတ်တာမျိုး၊ သမ္မာတရားကို ရှာဖွေတာမျိုး မလုပ်ကြဘူး။ သူတို့ပြဿနာတွေကို အစ်ကို ဖြေရှင်းပေးတာမျိုးပဲ လိုချင်ကြတာ။ တချို့က တွေ့ဆုံပွဲတက်ချင်စိတ်တောင် မရှိကြတော့ဘူး။ အစ်ကိုက ကိုယ့်အလုပ်မှာ ဘုရားကို ချီးမြှောက်တာ၊ ဘုရားအတွက် သက်သေခံတာ မရှိခဲ့ဘူးဆိုတာကို ဒါက ပြပါတယ်။ အစ်ကိုက တခြားလူတွေ အစ်ကို့ကို အထင်ကြီး ကိုးကွယ်လာအောင် ကိုယ်ရည်သွေးပြခဲ့တာပဲ။ ဒါ မကောင်းတဲ့ အပြုအမူတစ်ခုပါ။ ကိုယ့်ကိုယ်ကိုယ် ဆင်ခြင်သုံးသပ်ဖို့ အစ်ကို အချိန်နည်းနည်းယူသင့်တယ်။” တဲ့။ သူ ပြောတာတွေ နားထောင်ပြီးတော့၊ ကျွန်တော် အံ့အားသင့်သွားတယ်။ ဒါ ဘယ်လိုဖြစ်တာလဲ။ ကျွန်တော့် ညီအစ်ကိုမောင်နှမတွေအားလုံးက ကျွန်တော့်ကို ကိုးကွယ်နေကြတုန်းပဲလား။ ဒါ အရေးကြီးတဲ့ပြဿနာပဲ။ ကျွန်တော် တော်တော် စိုးရိမ်သွားတယ်။ နောက်တော့ စည်းဝေးပွဲမှာ မိတ်သဟာယပြုတာတွေကို ကျွန်တော် ဘာတစ်ခုမှ မကြားမိတော့ဘူး။ ကျွန်တော့်ခေါင်းထဲမှာ အကုန်ရောထွေးနေတယ်။ ဒီအခြေအနေကို ကျော်လွှားဖို့ ကျွန်တော် ဘယ်လိုလုပ်ရမလဲဆိုတာ လုံးဝမသိခဲ့ဘူး။ ကျွန်တော် အိမ်ပြန်ရောက်တော့ အစ်ကိုကျန်းရဲ့ စကားတွေကိုပဲ တွေးတောနေမိတယ်။ ကျွန်တော့်အလုပ်မှာ တချို့ရလဒ်တွေ ထွက်ခဲ့တဲ့အပြင်၊ တချို့ပြဿနာတွေကို ဖြေရှင်းဖို့ ကျွန်တော်က သမ္မာတရားနဲ့ မိတ်သဟာယပြုနိုင်ခဲ့တယ်လို့ပဲ အစက ထင်ခဲ့တာ။ ဒါက ဒီလို အကျိုးဆက်မျိုးဖြစ်လာလိမ့်မယ်လို့ ကျွန်တော် လုံးဝ တွေးမိမှာမဟုတ်ဘူး။ တကယ်တော့ ဒီဟာက ကျွန်တော့်ကို တော်တော်ကို စိတ်ညစ်စေခဲ့ပါတယ်။ အကူအညီမဲ့နေရင်းနဲ့ ကျွန်တော် ဘုရားဆီကို ဆုတောင်းခဲ့တယ်။ “ဘုရားသခင်၊ ကျွန်တော့်ပြဿနာရဲ့ ရင်းမြစ်ကို တွေ့ပြီး၊ ကိုယ့်ကိုယ်ကိုယ် တကယ် နားလည်နိုင်အောင်၊ ကျွန်တော့်ကို ဉာဏ်အလင်းဖွင့်ပြတော်မူပါ” ပေါ့။

နောက်ပိုင်းမှာ ဘုရားသခင်ရဲ့ နှုတ်ကပတ်တော်တချို့ကို ကျွန်တော် တွေ့ခဲ့တယ်။ “ယိုယွင်းသောသူအပေါင်းသည် ၎င်းတို့ကိုယ်ကို ချီးမြောက်ပြီး ၎င်းတို့အကြောင်းကို သက်သေခံကြသည်။ ၎င်းတို့သည် မိမိတို့အကြောင်းကို လှည့်ပတ်ကြွားဝါတတ်ကြပြီး မိမိ၏အရှိန်အဝါကို ဖြန့်ကြက်ကြသည့်အပြင် ဘုရားသခင်ကို စိတ်နှလုံးသွင်းခြင်း လုံးဝမရှိပေ။ ငါပြောပြနေသောအရာနှင့် ပတ်သက်ပြီး သင်တို့၌ အတွေ့အကြုံတစ်စုံတစ်ရာ ရှိသလော။ လူများစွာသည် ၎င်းတို့အကြောင်းကို အဆက်မပြတ် သက်သေခံနေကြသည်- ‘ငါသည် ဤပုံစံ ထိုပုံစံဖြင့် ဒုက္ခဆင်းရဲခံခဲ့သည်၊ ငါသည် ဤအလုပ် ထိုအလုပ်ကို လုပ်ဆောင်ခဲ့ပြီ၊ ဘုရားသခင်သည် ငါ့ကို ဤနည်းထိုနည်းဖြင့် ဆက်ဆံခဲ့သည်။ သူသည် ဤသို့ထိုသို့လုပ်ရန် ငါ့ကို စေခိုင်းခဲ့သည်၊ ကိုယ်တော်သည် အထူးသဖြင့် ငါ့ကို အထင်ကြီးသည်။ ယခုအခါ ငါသည် ဤကဲ့သို့ ထိုကဲ့သို့ ဖြစ်သည်။’ ၎င်းတို့သည် အသံနေအသံထားတစ်ခုခုဖြင့် တမင်သက်သက် စကားပြောကြပြီး ဟန်ပန်အမူရာတစ်မျိုးမျိုးကို ရွေးချယ်ကြသည်။ နောက်ဆုံးတွင် လူအချို့က ဤလူတို့သည် ဘုရားသခင်ဖြစ်ကြောင်း ယူဆခြင်းဖြင့်အဆုံးသတ်ကြသည်။ ၎င်းတို့သည် ယင်းအဆင့်သို့ ရောက်သည်နှင့် သန့်ရှင်းသောဝိညာဉ်တော်သည် ၎င်းတို့ကို စွန့်ခွာခဲ့သည်မှာ ကြာမြင့်နေပြီး ဖြစ်လိမ့်မည်။ လောလောဆယ်အချိန်တွင် ၎င်းတို့သည် လျစ်လျူရှုခြင်းကို ခံရပြီး နှင်ထုတ်ခြင်းကို မခံရသော်လည်း ၎င်းတို့၏ကံကြမ္မာကို သတ်မှတ်ပြီးဖြစ်၍ ၎င်းတို့လုပ်နိုင်သောအရာတစ်ခုတည်းမှာ ၎င်းတို့၏ အပြစ်ဒဏ်ပေးခြင်းကို စောင့်ရန်သာဖြစ်၏။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “လူတို့သည် ဘုရားသခင်ကို အလွန်မြောက်မြားစွာ တောင်းဆိုကြသည်”) “အခြားသူများသည် မိမိတို့၏ရာထူးများကိုအသုံးပြုပြီး ထပ်တလဲလဲ သူတို့ကိုယ်သူတို့ သက်သေခံကာ မိမိတို့၏ သြဇာအာဏာကို ချဲ့ကားပြီး လူများနှင့် အဆင့်အတန်းအတွက် ဘုရားသခင်ကို ယှဉ်ပြိုင်နေစဉ်တွင် အချို့မှာ အလှူများကို ခိုးယူခြင်း သို့မဟုတ် ဖြုန်းတီးခြင်းပင်ပြုကြသည်၊ သို့တည်းမဟုတ် ဘုရားသခင်ကို တိတ်တဆိတ် ကျိန်ဆဲကြသည်။ သူတို့ကို လူများကိုးကွယ်လာစေရန် နည်းလမ်းအမျိုးမျိုးနှင့် စီမံချက်အမျိုးမျိုးကို အသုံးပြုကြသည်။ လူတို့ကို အစဉ်ဆက် မပြတ်သိမ်းသွင်းရန်နှင့် ထိန်းချူပ်ရန် အားထုတ်လျက် နေကြသည်။ လူအချို့သည် ဘုရားအဖြစ် ဆက်ဆံခြင်းခံရ စိမ့်သောငှာ မိမိတို့မှာ ဘုရားဖြစ်သည်ဟု ထင်မှတ်ကြစေရန် လူတို့ကိုရည်ရွယ်ချက်ရှိရှိ လှည့်စားကြသည်။ သူတို့သည် ဖျက်ဆီးခြင်းခံခဲ့ရဖူးကြောင်း၊ သူတို့သည်လည်း ပျက်စီးယိုယွင်း ပြီး မောက်မာသောသူများဖြစ်ကြောင်းကို မည်သည့်အခါမျှ ပြောမည်မဟုတ်ပေ၊ သူတို့ကို မကိုးကွယ်ဖို့လည်း ပြောမည် မဟုတ်သည့်အပြင် သူတို့မည်မျှကောင်းအောင်လုပ်သည်ဖြစ်စေ ယင်းတို့အားလုံးမှာ ဘုရားသခင်၏ ချီးမြှောက်ခြင်းကြောင့် ဖြစ်သည့်အပြင် သူတို့လုပ်ဆောင်သင့်သည့်အရာလည်း ဖြစ်သည် ဟု ပြောမည်မဟုတ်ပေ။ အဘယ့်ကြောင့် ထိုသူတို့သည် ထိုအရာများကို မပြောကြသနည်း။ အကြောင်းမှာ လူတို့၏ စိတ်နှလုံးထဲ၌ မိမိတို့၏နေရာ ဆုံးရှုံးသွားမည်ကို သူတို့ ကြောက်ရွံ့စိုးရိမ်သောကြောင့်ဖြစ်သည်။ ဤအကြောင်းကြောင့် ထိုသို့သောလူတို့သည် ဘုရားသခင်ကို သဘောပေါက် နားလည်ရန် မည်သည့်အခါမျှ ကြိုးစားအားထုတ်မှုမရှိ သည်နှင့်အညီ ဘုရားသခင်ကို မည်သည့်အခါမျှ မချီးမြှောက်၍ ဘုရားသခင်ကို မည်သည့်အခါမျှ သက်သေမခံခြင်းဖြစ်သည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဘုရားသခင်၏ အမှုတော်၊ ဘုရားသခင်၏ စိတ်သဘောထားနှင့် ဘုရားသခင် ကိုယ်တော်တိုင် (၁)”) ဘုရားနှုတ်ကပတ်တော်တွေကို ဖတ်ပြီးသွားတော့၊ ကျွန်တော် တော်တော် စိတ်ညစ်သွားတယ်။ ကိုယ့်ကိုယ်ကိုယ် ဆင်ခြင်ကြည့်တော့မှ ကျွန်တော်က အပြင်ပန်းမှာတော့၊ ဒုက္ခတွေခံပြီး အဖိုးအခပေးဆပ်ခဲ့သလို ပုံစံမျိုး ရှိခဲ့တယ်၊ ပြီးတော့ ညီအစ်ကိုမောင်နှမတွေရဲ့ ပြဿနာတွေကို ဖြေရှင်းပေးဖို့၊ သူတို့ကို ဘုရားနှုတ်ကပတ်တော်တွေနဲ့ မိတ်သဟာယပြုပေးခဲ့တယ်ဆိုပေမဲ့၊ တကယ်တမ်းတော့ တခြားလူတွေ ကျွန်တော့်ကို အထင်ကြီး ကိုးကွယ်ကြအောင်လို့၊ ကိုယ့်ကိုယ်ကိုယ် ထင်ပေါ်ဖို့ ကိုယ်ရည်သွေးဖို့သက်သက် လုပ်နေခဲ့မှန်း မြင်မိတာပါ။ ကျွန်တော့် လုပ်ဖော်ကိုင်ဖက်တွေက အဖွဲ့ဝင်အသစ်တွေရှိတဲ့ အသင်းတော်တစ်ခုမှာ ကျွန်တော် ခေါင်းဆောင်လုပ်ဖို့ အကြံပေးခဲ့တဲ့အချိန်ကို ပြန်စဉ်းစားကြည့်ရင်းနဲ့ ညီအစ်ကိုမောင်နှမတွေက ကျွန်တော့်ကို အထင်ကြီးလာအောင်၊ ခေါင်းဆောင်က ကျွန်တော့်ကို အမြင်ကောင်းလာအောင်၊ အောင်မြင်မှုတွေကို ဘယ်လိုလုပ်ယူပြနိုင်မလဲ ဆိုတာတွေကိုပဲ တွေးခဲ့မှန်း နားလည်မိတယ်။ ကျွန်တော်က အဲဒီရည်ရွယ်ချက်အတွက် အချိန်ပိုတွေ လုပ်ခဲ့တယ်။ ဆိုင်ရာဆိုင်ရာ ဘုရားနှုတ်ကပတ်တော်တွေကို တစ်ညလုံး မအိပ်ဘဲရှာတယ်၊ စည်းဝေးပွဲတွေမှာ ဘာတွေ မိတ်သဟာယပြုမယ်ဆိုတာကို စီစဉ်တယ်။ ညီအစ်ကို မောင်နှမတွေက ဧဝံဂေလိ ဖြန့်ဝေစဉ်မှာ အခက်အခဲတွေ ကြုံရတဲ့အခါ သူတို့ကို သမ္မာတရားရဲ့အခြေခံသဘောတွေဆီ လမ်းပြပေးဖို့၊ ဘုရားအလိုတော်ကို မိတ်သဟာယပြုပေးရမဲ့အစား၊ ဧဝံဂေလိ ဖြန့်ဝေနေတုန်းမှာ ကျွန်တော် ဘယ်လောက်ဒုက္ခခံပြီး ဘာအဖိုးအခတွေ ပေးဆပ်ခဲ့တဲ့အကြောင်းကို ကြွားဝါပြောဆိုခဲ့တယ်။ ကျွန်တော့်အလုပ်က တိုးတက်လာတော့၊ ညီအစ်ကိုမောင်နှမတွေက ချီးမွမ်းကြတယ်။ ဒါကို ကျွန်တော်က နှစ်သက်ပြီးတော့၊ သန့်ရှင်းသော ဝိညာဉ်တော်ရဲ့လုပ်ဆောင်မှုကြောင့်ရတဲ့ ရလဒ်တွေကို ကိုယ်က နာမည်ယူခဲ့တယ်။ ကျွန်တော်ကိုယ်တိုင်ရဲ့ အောင်မြင်မှုတွေအဖြစ် အရှက်မရှိ ကြွားလုံးထုတ်ခဲ့တယ်။ တွေ့ဆုံပွဲတွေမှာ မိတ်သဟာယပြုတဲ့အခါ ခဏခဏ ကိုယ့်ကို အများအာရုံစိုက်အောင် လုပ်ခဲ့တယ်။ ကျွန်တော့်မှာ ပေါ်ခဲ့တဲ့ ဖောက်ပြန်ပျက်စီးတဲ့ စိတ်သဘောထားတွေအကြောင်း ပြောတာကို လုံးဝရှောင်ပြီး၊ အပြုသဘောဆောင်တဲ့ ကျင့်ကြံမှုတွေကိုပဲ မိတ်သဟာယပြုခဲ့တယ်။ အဲဒီအကြောင်းက ပေါ်လာခဲ့တယ်ဆိုရင် ဖော့ပြီးတော့ပဲ ပြောလိုက်တယ်။ ကိုယ့်တာဝန်အပေါ် ထားတဲ့ သိမ်ဖျင်းတဲ့ ကိုယ့်ရဲ့ ရည်ရွယ်ချက်တွေကိုလည်း၊ သေချာဆန်းစစ်ဖို့ ထုတ်ဖော်ပြောဖို့ဆိုရင် ပိုပြီးတော့တောင် တွန့်ဆုတ်ခဲ့တာပါ။ ကျွန်တော့်ပြဿနာတွေကို ထုတ်ပြောဖို့ ညီအစ်ကို မောင်နှမတွေကို ဘုရားသခင်က ခဏခဏ အသုံးပြုခဲ့တယ်။ ဒါပေမဲ့ ကျွန်တော့်ရာထူးနဲ့ ပုံရိပ်ကို ကာကွယ်ဖို့အတွက် သူတို့ပြောတဲ့အချက်တွေကို လက်ခံတယ်လို့ပဲ ပါးစပ်က ပြောခဲ့တယ်။ တကယ်တမ်း ကိုယ့်ကိုယ်ကိုယ် ဆင်ခြင်သုံးသပ်တာ နည်းနည်းလေးမှ မရှိခဲ့ဘူး။ မိတ်သဟာယပြုတဲ့အချိန်မှာ ညီအစ်ကို မောင်နှမတွေကို လှည့်စားဖို့ ကြီးကျယ်တဲ့စကားတွေပဲ ဆက်ပြောခဲ့တယ်။ ဒီလိုနည်းနဲ့ ကျွန်တော်က အလုပ်မှာ တာဝန်ခံတတ်ပြီး ဆင်းရဲဒုက္ခကို သည်းခံနိုင်တယ်၊ အဖိုးအခ ပေးဆပ်နိုင်တယ်လို့ ကျွန်တော် ယုံကြည်လာတယ်။ အသင်းတော်မှာ ဘာပြဿနာ၊ အခက်အခဲပဲရှိရှိ ဒါမှမဟုတ် ညီအစ်ကိုမောင်နှမတွေက ဘယ်လိုအခြေအနေမှာပဲ ရောက်နေသည်ဖြစ်စေ သူတို့တွေ အဖြေရှာတွေ့အောင် ကျွန်တော်က အမြဲ နောက်မဆုတ်တမ်း ကူညီပေးတယ်။ အဖြစ်မှန်တွေနဲ့ ဖော်ထုတ်ပြတာကို ခံလိုက်ရတော့မှ၊ ကျွန်တော်က အလုပ်လုပ်တဲ့အခါမှာ သမ္မာတရားကို လုံးဝ လက်တွေ့မလုပ်ဆောင်ခဲ့သလို၊ ဘုရားအလိုတော်ကိုလည်း အလေးမထားခဲ့ဘူးဆိုတာ မြင်ခဲ့တယ်။ တခြားလူတွေ ကျွန်တော့်ကို အထင်ကြီးလာအောင် ကြွားဝါဖို့အတွက်၊ ကိုယ့်တာဝန်ကို လုပ်ဆောင်ခြင်းကနေ ရလာတဲ့ အခွင့်အရေးကို အသုံးချခဲ့တာပါ။ ကျော်ကြားမှုနဲ့ နေရာကောင်းကို လိုချင်တဲ့ ကျွန်တော့်ဆန္ဒကလည်း အဲဒီနည်းနဲ့ ပြည့်သွားတယ်။ ဒီလိုလုပ်တဲ့အခါမှာ ကျွန်တော်က ညီအစ်ကို မောင်နှမတွေကို ဘုရားရှေ့ကို ခေါ်ဆောင်ရမဲ့အစား ကျွန်တော့်ကို ကိုးကွယ်အောင် လုပ်ခဲ့တယ်။ ဒါက လူတွေ ကိုယ့်ဘက်ပါအောင်၊ နေရာကောင်း ရအောင်၊ ဘုရားနဲ့ ယှဉ်ပြိုင်နေတဲ့သဘောပါပဲ။ အဲဒီအခါကျမှ ကျွန်တော်က ဘုရားကို ဆန့်ကျင်တဲ့ လမ်းကြောင်းပေါ်ကို ခြေချပြီး ကြောက်စရာကောင်းတဲ့ ပြစ်မှားမှုတစ်ခုကို ကျူးလွန်မိခဲ့ပြီဆိုတဲ့အချက်ကို သတိပြုမိလာတာပါ။ ကျွန်တော် ကြောက်သွားပြီး တကယ်ကို အပြစ်ရှိသလို ခံစားခဲ့ရတယ်။ အဲဒီနောက်မှာ ကိုယ့်ကိုယ်ကိုယ် မေးတယ်။ ကိုယ်တိုင်မသိလိုက်ဘဲ ဘုရားကို ဆန့်ကျင်တဲ့လမ်းကြောင်းပေါ်ကို ငါ ဘယ်လိုရောက်သွားတာလဲ။

နောက်ပိုင်းမှာ ကျွန်တော် ဘုရားနှုတ်ကပတ်တော် ကျမ်းပိုဒ်တစ်ခုကို ဖတ်တယ်။ “စာတန်က လူသားများကို ဖျက်ဆီးပြီးနောက် သူတို့၏သဘာဝမှာ ဆိုးယုတ်လာခဲ့သည်။ လူတို့သည် လူသား၏နေရာတွင် လူသားများကဲ့သို့ ကျင့်ကြံပြုမူခြင်း မရှိကြတော့ပေ။ ထို့ထက် လူသားဖြစ်ခြင်း၏ အဆင့်အတန်းကို သူတို့ကျော်လွန်ကြပြီးဖြစ်သည်။ သူတို့သည် လူသားဖြစ်ဖို့ ဆန္ဒမရှိကြ။ ပို၍မြင့်မားသော အရာတစ်ခုကို တောင့်တကြသည်။ နောက်ပြီးလျှင် ဤပို၍မြင့်မားသော ဤအရာက အဘယ်နည်း။ သူတို့သည် ဘုရားသခင်ကို ကျော်လွန်ရန်၊ ကောင်းကင်ကို ကျော်လွန်ရန်နှင့် အခြားအရာခပ်သိမ်းကို ကျော်လွန်ရန် ဆန္ဒရှိကြသည်။ လူတို့ အဘယ့်ကြောင့် ဤကဲ့သို့ဖြစ်ရသည် ဟူသည့်အကြောင်းရင်းတွင် အဘယ်အရာရှိသနည်း။ အရာရာကို ခြုံငုံသုံးသပ်ရလျှင် လူသား၏ သဘာဝမှာ အလွန်မာနထောင်လွှားသည်...လူတို့၏သဘာဝနှင့် အနှစ်သာရက မာနထောင်လွှားလာသည်နှင့်အမျှ သူတို့သည် ဘုရားသခင်အား မနာခံဘဲ ဆန့်ကျင်သည့်အရာများ၊ သူ၏ နှုတ်ကပတ်တော်များကို အရေးမစိုက်သည့်အရာများ၊ သူ့အကြောင်း အယူအဆများကို ဖြစ်ပေါ်စေသည့်အရာများ၊ သူ့အား ပုန်ကန်သည့်အရာများနှင့် မိမိတို့ကိုယ်ကိုယ် ချီးမြှောက်ပြီး သက်သေခံသည့် အရာများကို ပြုလုပ်နိုင်စွမ်း ရှိလာကြသည်။ သင်သည် မာနထောင်လွှားခြင်းမရှိဟု ပြောသော်လည်း အသင်းတော်အချို့ကို သင့်အားပေးပြီး ယင်းတို့ကို ဦးဆောင်ရန်အခွင့်ပေးသည် ဆိုကြပါစို့၊ ငါသည် သင့်ကို ကိုင်တွယ်ဖြေရှင်းခြင်း မရှိခဲ့သကဲ့သို့၊ ဘုရားသခင်၏ မိသားစုထဲမှ မည်သူမျှ သင့်ကို ပြုပြင်ခြင်း မရှိခဲ့ဟု ဆိုကြပါစို့- ၎င်းတို့ကို သင် ခဏကြာ ဦးဆောင်ပြီးနောက်တွင် သင်သည် ၎င်းတို့ကို သင့်ခြေရှေ့သို့ ဆိုက်ရောက်စေပြီး သင့်အား နာခံစေတော့မည် ဖြစ်သည်။ ဤသို့ဆိုလျှင် အဘယ့်ကြောင့် သင် ထို့သို့ ပြုမိမည်နည်း။ ဤသည်ကို သင်၏သဘာဝက ဖန်တီးခြင်းပင် ဖြစ်သည်။ ယင်းမှာ သဘာဝအလျောက် ထုတ်ဖော်ခြင်းမှတစ်ပါး အခြားအရာမဟုတ်ပေ။ သင်သည် ဤအရာကိုသင်ယူဖို့ရန် သင့်နည်းလမ်းမှ ထွက်သွားစရာ မလိုသကဲ့သို့ သင့်အား အခြားသူများကို အထူးတလည် သင်ခိုင်းစရာလည်း မလိုအပ်ပေ။ သင်သည် ဤအရာအားလုံးကို တမင်တကာ ပြုလုပ်စရာ မလိုအပ်ပါပေ။ ဤသို့သော အခြေအနေမျိုးသည် သင့်အတွက် အလိုအလျောက် ဖြစ်လာပေသည်- သင်သည် လူတို့ကို သင့်အား ကျိုးနွံနာခံစေသည်၊ သင့်အား ကိုးကွယ်စေသည်၊ သင့်အား ချီးမြှောက်စေသည်၊ သင့်အကြောင်းကို သက်သေခံစေပြီး၊ အရာခပ်သိမ်းတွင် သင့်အား နာခံစေကာ၊ သင်ခွင့်မပြုသော မည်သည့်အရာကိုမဆို သူတို့အား လုပ်ခွင့်မပေးပေ။ သင်၏ ခေါင်းဆောင်မှုအောက်တွင် ထိုကဲ့သို့သော အခြေအနေများမှာ အလိုအလျောက် ဖြစ်ပွားလေသည်။ ဤသို့ဖြစ်လျှင်ဤအခြေအနေများမှာ အဘယ်သို့ဖြစ်လာသနည်း။ ယင်းတို့ကို လူသား၏ မာနထောင်လွှားသော သဘာဝက ချမှတ်ထားခြင်း ဖြစ်သည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “လူသား၏ မာနထောင်လွှားသော သဘာဝသည် ဘုရားသခင်အပေါ် သူဆန့်ကျင်ခြင်း၏ အရင်းအမြစ် ဖြစ်သည်”) ကျွန်တော်က ကိုယ့်အလုပ်မှာ ဘုရားကို စိတ်ကျေနပ်စေချင်ပေမဲ့၊ ဘာဖြစ်လို့ ဘုရားကို ဆန့်ကျင်တဲ့လမ်းကြောင်းပေါ် မရည်ရွယ်ဘဲ ခြေချမိခဲ့သလဲဆိုတာ၊ ဘုရားနှုတ်ကပတ်တော်တွေကို ဖတ်မိတော့မှ နားလည်သွားတယ်။ ဒီဟာရဲ့ အရင်းအမြစ်က ကျွန်တော့်ထဲမှာရှိတဲ့ မာနထောင်လွှားတဲ့ ဆိုးယုတ်တဲ့သဘာဝပါ။ ကျွန်တော့်ရဲ့ မာနထောင်လွှားတဲ့ သဘာဝရဲ့ ထိန်းချုပ်မှုအောက်မှာ ကိုယ့်ကိုယ်ကိုယ် တော်တော်အထင်ကြီးခဲ့တယ်။ တခြားလူတွေက ကျွန်တော့်ကို အထင်ကြီး ကိုးကွယ်လာအောင်၊ အပြောအဆို အပြုအမူ နှစ်မျိုးလုံးမှာ ကိုယ်ရည်သွေးပြဖို့ပဲ အများအားဖြင့် ကြိုးစားခဲ့တယ်။ ညီအစ်ကို မောင်နှမတွေက သူတို့တာဝန်တွေကို ထမ်းဆောင်နေရင်း ပြဿနာတွေ ကြုံရတဲ့အခါမှာ သူတို့တွေ သမ္မာတရားကို နားလည်ပြီး၊ လက်တွေ့လုပ်ဆောင်ဖို့ လမ်းတစ်ခု ရကြအောင်၊ ကျွန်တော်က သမ္မာတရားရဲ့ အခြေခံသဘောတွေကို မိတ်သဟာယမပြုခဲ့ဘူး။ ကိုယ့်ကိုယ်ကိုယ် အမြင်ကောင်းစေဖို့အတွက် အပေါ်ယံစကားတွေနဲ့ အယူဝါဒတွေကိုပဲ ပြောခဲ့တယ်။ ပြီးတော့ ကျွန်တော်ကိုယ်တိုင် ဒုက္ခခံခဲ့တဲ့ အလုပ်လုပ်ခဲ့တဲ့ အတွေ့အကြုံတွေဆိုလည်း ကိုယ်ရည်သွေးပြဖို့ အရင်းအနှီးအနေနဲ့ပဲ အသုံးချတယ်။ ဒါတွေကြောင့် ညီအစ်ကိုမောင်နှမတွေက ကျွန်တော့်ကို သမ္မာတရားကို နားလည်တယ်၊ သူတို့ပြဿနာတွေကို ဖြေရှင်းပေးနိုင်တယ်ဆိုပြီး အထင်ကြီး ယုံကြည်သွားကြတာပါ။ ဘယ်လိုအခက်အခဲဖြစ်ဖြစ် သူတို့တွေ ကြုံပြီဆိုရင်၊ ကျွန်တော့်ဆီပဲ အမြဲတမ်းလာတယ်။ သူတို့ပြဿနာတွေကို ဖြေရှင်းဖို့၊ ဘုရားကို အားကိုးပြီး သမ္မာတရားကို ရှာဖွေသင့်တယ်ဆိုတာ သတိမပြုမိကြတော့ဘူး။ သူတို့ နှလုံးသားထဲမှာ ဘုရားအတွက် နေရာမရှိခဲ့ကြဘူး။ ကျွန်တော် တခြားကို ပြောင်းသွားတဲ့နောက်မှာ၊ ညီအစ်ကိုမောင်နှမတချို့က စည်းဝေးပွဲတွေကို မတက်ချင်တော့တဲ့အထိ ဖြစ်သွားတာလေ။ ဒါက ကျွန်တော့်တာဝန်ကို ထမ်းဆောင်တာလို့ ဘယ်လိုခေါ်နိုင်မလဲ။ ကျွန်တော်က မကောင်းမှုကျူးလွန်ပြီး ဘုရားကိုဆန့်ကျင်နေတာ သက်သက်ပဲ။ ဒီလို မကောင်းမှုကို ကျွန်တော် လုပ်နိုင်တာဟာ ကျွန်တော့်ရဲ့ မာနထောင်လွှားမှုနဲ့ စိတ်ကြီးဝင်မှုတို့ကြောင့်ပါပဲ။ ကျွန်တော် ဖြစ်ချင်ခဲ့တာအားလုံးက လူတွေအပေါ် မင်းမူဖို့ပဲ။ တစ်ဖက်မှာ ကိုယ့်အဆင့်အတန်းနဲ့ ပုံရိပ်ကို ကာကွယ်ရင်း၊ တစ်ဖက်ကလည်း ညီအစ်ကိုမောင်နှမတွေအားလုံး ကိုယ့်ကို ကိုးကွယ်ပြီး အာရုံစိုက်လာအောင် လုပ်ခဲ့တာပါ။ ဂုဏ်အဆင့်အတန်းဆိုတဲ့ ကောင်းချီးကို အငမ်းမရလိုချင်ခဲ့တာ။ တကယ့်စိတ်အတွင်းထဲမှာတော့ ဘုရားသခင်ကို ကြောက်ရွံ့မှုနည်းနည်းလေးမှ မရှိတာကို ကျွန်တော် မြင်နိုင်ခဲ့တယ်။ မာနထောင်လွှားတဲ့ သဘာဝတစ်ခုနဲ့ အသက်ရှင်တဲ့အခါမှာ ဘုရားကို ဆန့်ကျင်တာက အလိုအလျောက်ဖြစ်လာတယ်။ ဒါ တကယ်ကို သိပ် အန္တရာယ်ရှိပါတယ်။ ဘာသာရေးလောကက သင်းအုပ်တွေနဲ့ အကြီးအကဲတွေကို ကျွန်တော် စဉ်းစားကြည့်တယ်။ သူတို့က ဘုရားကို မချီးမြှောက်ဘူး၊ ဘုရားအတွက် သက်သေမခံဘူး။ ယုံကြည်သူတွေ သခင့်နှုတ်ကပတ်တော်ကို လက်တွေ့လုပ်ဆောင်လာအောင်လည်း မပို့ဆောင်ဘူး။ အဲဒီအစား ယုံကြည်သူတွေကို လှည့်စားဖို့အတွက် သမ္မာကျမ်းဆိုင်ရာ အသိပညာနဲ့ ဘာသာရေးပညာဆိုင်ရာ သီအိုရီတွေကို အသေးစိတ်ရှင်းပြတယ်။ ပြီးတော့ သူတို့ ဘယ်လောက် ဒုက္ခခံခဲ့တယ်၊ သူတို့ ဖြန့်ဝေတဲ့ ဧဝံဂေလိကနေ ဘယ်လိုကောင်းကျိုးတွေ ထွက်လာတယ်၊ အသင်းတော်တွေကို ဘယ်နှစ်ခု တည်ထောင်ခဲ့ပြီးပြီဆိုတာတွေကို ကြွားဝါပြတယ်။ ဒါက ယုံကြည်သူတွေ သူတို့ကို ကိုးကွယ်လာစေတယ်။ အထင်ကြီးလာစေတယ်။ သူတို့ပြောတာ ဘာမဆို လုပ်လာစေတယ်။ တချို့က အနန္တတန်ခိုးရှင်ဘုရားသခင်ရဲ့ နှုတ်ကပတ်တော်ကို ဖတ်ပြီး ဘုရားအသံတော်ကို ကြားခဲ့ပြီးပြီ။ ဒါပေမဲ့ ဒါတောင်မှ သင်းအုပ်နဲ့ အကြီးအကဲတွေဆီကို သွားမေးပြီး သူတို့နဲ့အတူ စစ်ကြည့်ကြတယ်။ သင်းအုပ်ဆရာတွေရဲ့ ခွင့်ပြုချက်မပါရင် ဒါ မှန်ကန်တဲ့လမ်းဆိုတာ သူတို့သိနေတာတောင်မှ အနန္တတန်ခိုးရှင်ဘုရားသခင်ရဲ့ အမှုတော်ကို လက်မခံရဲကြဘူး။ ဘာသာရေးလောကက သင်းအုပ်ဆရာတွေနဲ့ အကြီးအကဲတွေက လူတွေကို သူတို့ထိန်းချုပ်မှုအောက်မှာ ခိုင်ခိုင်မာမာကို ထားထားကြတယ်။ သူတို့က အန္တိခရစ်ရဲ့ ဘုရားကို ဆန့်ကျင်တဲ့လမ်းကို လျှောက်တယ်။ အမှီအခိုကင်းတဲ့ နိုင်ငံတော်တစ်ခုကို ဖန်တီးဖို့ ကြိုးစားနေကြတယ်။ ကျွန်တော်ဆိုရင် လူတွေက ကိုယ့်ကို အထင်ကြီးလေးစားကြအောင်၊ ကိုယ့်အလုပ်မှာ အများအားဖြင့် ကိုယ်ရည်သွေးပြခဲ့တယ်။ အဲဒီသင်းအုပ်တွေ၊ အကြီးအကဲတွေနဲ့ ကျွန်တော်က ဘာများ ကွာခြားတော့လို့လဲ။ အဖွဲ့ဝင်အသစ်တွေရှိတဲ့ အဲဒီ အသင်းတော်က ညီအစ်ကို မောင်နှမတွေအကြောင်း ကျွန်တော် စဉ်းစားမိတယ်။ ဘုရားသခင်ရဲ့ နောက်ဆုံးသောကာလ အမှုတော်ကို သူတို့ လက်ခံတာ မကြာသေးဘူး။ သူတို့ နားမလည်သေးတဲ့ သမ္မာတရားတွေ အများကြီးရှိသေးတယ်။ အသင်းတော်ကို ဦးဆောင်တဲ့တာဝန်ကို ထမ်းဆောင်ဖို့ ဘုရားသခင်က ကျွန်တော့်ကို မြှင့်တင်ပေးခဲ့တယ်။ ဒါကြောင့် ကျွန်တော်က သူတို့ကို ဘုရားနှုတ်ကပတ်တော်တွေအကြောင်း ပိုပြီးတော့ မိတ်သဟာယပြုခဲ့သင့်တယ်။ ဘုရားအမှုတော်ကို ပိုပြီး သက်သေခံခဲ့သင့်တယ်။ ဒါမှ သမ္မာတရားကို သူတို့တွေ နားလည်ပြီး၊ ဘုရားသခင်အကြောင်း သိလာမယ်။ လမ်းမှန်ပေါ်မှာ အခြေခံကောင်းတွေ ချမိလိမ့်မယ်။ ဒါပေမဲ့ ကျွန်တော် ဘာလုပ်ခဲ့လဲ။ အဲဒီတာဝန်ကို ထမ်းဆောင်ဖို့ ကျွန်တော် ကြိုးစားတာမှာ ဘာတွေထွက်လာလဲ။ လူတိုင်းကို ကျွန်တော့်ကို ကိုးကွယ်အောင်လုပ်ခဲ့တယ်။ ဘုရားသခင်နဲ့ပတ်သက်တဲ့ အသိပညာတစ်ခုမှ မရရှိစေခဲ့ဘူး။ ဒီလိုလုပ်ရင်းနဲ့ ကျွန်တော့်ကြောင့် ညီအစ်ကိုမောင်နှမတွေ ထိခိုက်ခဲ့ကြတယ်။ အသင်းတော်အလုပ်ကို ကြားဖြတ် နှောင့်ယှက်မိခဲ့တယ်။ ကျွန်တော် လျှောက်နေခဲ့တဲ့လမ်းက တခြားမဟုတ်ဘဲ အန္တိခရစ်ရဲ့ ဘုရားကို ဆန့်ကျင်တဲ့လမ်းကြောင်းပဲ ဖြစ်ပါတယ်။ ကျွန်တော် စဉ်းစားကြည့်လေလေ၊ စိတ်ပူပြီး နေလို့ထိုင်လို့မရဖြစ်လေလေပဲ။ ကျွန်တော် ဘယ်လောက် မာနထောင်လွှားခဲ့လဲ၊ ဘုရားသခင်ကို ကြောက်ရွံ့မှု ဘယ်လောက်ကင်းမဲ့ခဲ့လဲဆိုတာကို မြင်နိုင်ခဲ့တယ်။ ပြီးတော့ ကျွန်တော့်လုပ်ရပ်တွေက ဘုရားရဲ့စိတ်သဘောထားကို အချိန်အကြာကြီး ပုန်ကန်ပြစ်မှားနေခဲ့တာ။ ဘုရားကသာ ကျွန်တော့်ကို ပြုပြင်ဖို့ ကိုင်တွယ်ဖြေရှင်းဖို့၊ ညီအစ်ကိုမောင်နှမတွေကို အဲဒီလိုမျိုး အသုံးမပြုခဲ့ရင်၊ ကျွန်တော့်လုပ်ရပ်တွေ အပေါ် ပြန်ပြီးဆင်ခြင်သုံးသပ်ဖို့ ကျွန်တော် သိခဲ့မှာမဟုတ်ဘူး။ အဲဒီလမ်းအတိုင်း ဆက်သွားမိခဲ့ရင်၊ ဘုရားရဲ့ကျိန်ဆဲခြင်းနဲ့ အပြစ်ဒဏ်ပေးခြင်းတွေကို ခံရတဲ့အထိ ကျွန်တော် ဘယ်လောက်တောင် မကောင်းမှုတွေ လုပ်မိလိမ့်မယ်ဆိုတာ မပြောနိုင်ဘူး။ ကြောက်စိတ်က မပြေသေးဘဲနဲ့ ဘုရားရှေ့မှာ ကျွန်တော် ပျပ်ဝပ် ဆုတောင်းခဲ့တယ်။ “ဘုရားသခင် ကျွန်တော် သိပ်ကို မာနထောင်လွှားခဲ့ပါတယ်။ ကိုယ့်အလုပ်မှာ အမြဲလိုလို ကိုယ်ရည်သွေးပြပါတယ်။ ဒါတွေကြောင့် ညီအစ်ကိုမောင်နှမတွေက ကျွန်တော့်ကို ကိုးကွယ်လာကြတယ်။ သူတို့စိတ်နှလုံးတွေမှာ ကိုယ်တော့်အတွက် နေရာမရှိတော့ပါဘူး။ ကျွန်တော် မကောင်းမှုတွေလုပ်ပြီး ကိုယ်တော့်ကို ဆန့်ကျင်ခဲ့တယ်။ ကိုယ်တော်ရဲ့ အပြစ်ဒဏ်ပေးခြင်းကို ခံထိုက်ပါတယ်။ ဘုရားသခင်၊ သမ္မာတရားကို အလေးအနက် အားထုတ်ဖို့၊ အသစ်တဖန်ပြန်စဖို့ ကိုယ်တော်ရှေ့မှာ ကျွန်တော် နောင်တရလိုပါတယ်။”

အဲဒီနောက်မှာ ဘုရားရဲ့ ဒီနှုတ်ကပတ်တော်တွေကို ကျွန်တော် ဖတ်မိတယ်။ “ဖန်ဆင်းခံ တစ်ခုအနေနှင့် လူသားသည် သူ၏ ကိုယ်ပိုင်အနေအထားကို ထိန်းသိမ်းပြီး အသိဉာဏ်ရှိရှိပြုမူရမည်။ ဖန်ဆင်းရှင်က တာဝန်ပေးစေခိုင်းထားသည့် အရာကို တာဝန်သိတတ်စွာနှင့် စောင့်ရှောက်ရမည်။ လူသားသည် စည်းကျော်၍ မလုပ်ရ။ သို့မဟုတ် သူတတ်နိုင်သည်ထက် ပိုပြီး မလုပ်ရ သို့မဟုတ် ဘုရားသခင် စက်ဆုပ်သည့် အရာများကို မလုပ်ရပေ။ လူသားသည် ကြီးမြတ်ရန် သို့မဟုတ် စွမ်းအားရှင်ဖြစ်ရန် သို့မဟုတ် အခြားလူများထက်ကျော်လွန်ရန် မလုပ်ရသကဲ့သို့ ဘုရားဖြစ်အောင်လည်း မကြိုးစားရ။ ဤသည်မှာ လူများ ဆန္ဒမပြုသင့်သည့် အရာဖြစ်သည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အတုမရှိ ဘုရားသခင်ကိုယ်တော်တိုင် (၁)”) “လူသားတို့ ရှာဖွေသည့်အရာ သို့မဟုတ် သူတို့အလိုရှိသည့်အရာမှာ မည်သည့်အရာဖြစ်ပါစေ၊ ဖန်ဆင်းရှင်ရှေ့မှောက်သို့ ပြန်လာပြီး သူတို့ လုပ်ရမည့်အရာနှင့် သူတို့အား အပ်နှံထားသည့်အရာကို တာဝန်ကျေပွန်စွာ ဆောင်ရွက်ပြီးမြောက်သောသူတို့သာလျှင် မည်သည့်ဒုက္ခဆင်းရဲမျှ မရှိဘဲ အေးငြိမ်းသောအသိစိတ်နှင့် မှန်ကန်သင့်လျော်သည့် နည်းလမ်းဖြင့် နေထိုင်ကြလိမ့်မည်ဖြစ်သည်။ ဤသည်မှာ အသက်ရှင်ရခြင်း၏ အဓိပ္ပာယ်နှင့် တန်ဘိုးပင်ဖြစ်သည်။” (ခရစ်တော်၏ပြောဆိုချက် မှတ်တမ်းများ) ဘုရားနှုတ်ကပတ်တော်တွေကို ဖတ်ပြီးတဲ့နောက်မှာ သူဟာ ဖန်ဆင်းခြင်းသခင်ဖြစ်တယ်၊ လူတွေက သူ့ကို ကိုးကွယ်ပြီး နာခံခြင်းကသာ မှန်ကန်ပြီး သင့်လျော်တယ်၊ သဘာဝကျတယ်ဆိုတာကို ကျွန်တော် နားလည်ခဲ့တယ်။ နောက်ပြီးတော့ ကျွန်တော်က ဖောက်ပြန်ပျက်စီးတဲ့ လူသားတစ်ယောက်၊ သေးငယ်လှတဲ့ ဖန်ဆင်းခံသက်ရှိတစ်ယောက်သာဖြစ်တယ်ဆိုတာကို သိခဲ့တယ်။ ကျွန်တော်က ဆိုးယုတ်တဲ့ စိတ်သဘောထားတွေ ပြည့်နေခဲ့တယ်။ မာနထောင်လွှားတယ်။ လှည့်ဖြားတတ်တယ်။ တစ်ကိုယ်ကောင်းဆန်တယ်။ ပြီးတော့ ရွံဖို့ကောင်းတယ်။ ဒါတောင်မှ ကျွန်တော်က ကြွားဝါပြီး လူတွေရဲ့ စိတ်နှလုံးထဲမှာ နေရာယူဖို့ အမြဲတမ်း ကြိုးစားတယ်။ ကျွန်တော်ဟာ တကယ်ကို အရှက်မရှိဘဲ အသိစိတ်လုံးဝမရှိတဲ့အထိ မာနထောင်လွှားခဲ့တယ်။ ကျွန်တော် စဉ်းစားကြည့်လေလေ ပိုပြီးတော့ ရှက်လေလေပါပဲ။ မျက်ကန်းလို ဖြစ်ပြီး၊ ဘုရားကို မသိခဲ့တာတွေအတွက် ကိုယ့်ကိုယ်ကိုယ် မုန်းတီးမိတယ်။ ကိုယ့်ကိုယ်ကိုယ် ဘယ်လိုလူမှန်း မသိခဲ့ဘူးလေ။ ကျွန်တော့်တာဝန်ကို ထမ်းဆောင်ဖို့ ဒီနေ့ ဒီနေရာကို ရောက်နေနိုင်တာဟာ ဘုရားသခင်ရဲ့ ကျေးဇူးတော်နဲ့ ချီးမြှောက်မှုကြောင့်ပါ။ ကျွန်တော်က ဖန်ဆင်းခံတစ်ယောက်အဖြစ် ကိုယ့်အတွက် သင့်လျော်တဲ့နေရာမှာ နေသင့်တယ်။ ပြီးတော့ သမ္မာတရားကို အားထုတ်တာ၊ ဘုရားကို ချီးမြှောက်တာ၊ ဘုရားကို သက်သေခံတာ၊ တာဝန်တွေကို ကောင်းအောင် လုပ်ဆောင်တာတွေကို အာရုံစိုက်တဲ့၊ ရိုးသားတည်ကြည်သူတစ်ယောက် ဖြစ်သင့်တယ်။ ဒါမှပဲ ကျွန်တော်က ဖန်ဆင်းခံတစ်ယောက်ရှိသင့်တဲ့ စိတ်ဓါတ်နဲ့ အသိတရားရှိမှာပါ။

နောက်ပိုင်းမှာ ဘုရားနှုတ်ကပတ်တော်တွေကတစ်ဆင့်၊ လက်တွေ့လုပ်ဆောင်မှု ဝင်ရောက်မှု လမ်းကြောင်းတစ်ခုကို ကျွန်တော် ရှာခဲ့တယ်။ ကျွန်တော် ဘုရားရဲ့ ဒီ နှုတ်ကပတ်တော်တချို့ကို ဖတ်ခဲ့ပါတယ်။ “ဘုရားသခင်ကို သက်သေခံသောအခါတွင် ဘုရားသခင် လူတို့ကို တရားစီရင်ပြီး ပြစ်တင်ဆုံးမပုံ၊ လူသားများကို စစ်ဆေးရန်နှင့် သူတို့၏ စိတ်သဘောထားများကို ပြောင်းလဲရန် မည်သည့်စမ်းသပ်မှုများအား သူအသုံးပြုသည့်အကြောင်းတို့ကို ပို၍ အဓိက ပြောသင့်သည်။ သင်တို့၏ အတွေ့အကြုံထဲတွင် ဖောက်ပြန်ပျက်စီးခြင်း မည်မျှများများ ထုတ်ဖော်ထားကြောင်း၊ သင်တို့ အဘယ်မျှ ခံစားခဲ့ပြီးကြောင်းနှင့် နောက်ဆုံးတွင် ဘုရားသခင်၏ သိမ်းပိုက်ခြင်းကို အဘယ်သို့ ခံခဲ့ရကြောင်းကိုလည်းကောင်း၊ သင်တို့၌ ဘုရားသခင်၏အမှုအပေါ် စစ်မှန်သောသိခြင်း အဘယ်မျှရှိကြောင်း၊ ထို့ပြင် ဘုရားသခင်အတွက် အဘယ်သို့ သက်သေခံပြီး သူ၏ချစ်ခြင်းမေတ္တာကို အဘယ်သို့ ပြန်ပေးဆပ်သင့်ကြောင်းတို့ကိုလည်း ပြောသင့်သည်။ သင်တို့သည် ဤကဲ့သို့သော ဘာသာစကားမျိုးကို ရိုးရှင်းသောပုံစံဖြင့် ပြောလျက် ပို၍ အနှစ်သာရရှိရှိ ပြောသင့်သည်။ အနှစ်သာရမဲ့သော သီအိုရီများအကြောင်းကို မပြောပါနှင့်။ ပိုမို၍ လက်တွေ့ကျအောင် ပြောလော့။ နှလုံးသားထဲမှ စကားပြောလော့။ ဤသည်မှာ သင်တွေ့ကြုံသင့်ပုံဖြစ်သည်။ ဝါကြွားရန် အားထုတ်သည့်အနေဖြင့် လေးနက်ဟန်ရှိသော၊ အနှစ်သာရမဲ့သော သီအိုရီများနှင့် မိမိကိုယ်ကို လက်နက်မတပ်ဆင်နှင့်။ ဤသို့ပြုခြင်းက သင်တို့ကို အတော်ပင် စိတ်ကြီးဝင်ပြီး အသိတရားမဲ့ဟန် ပေါ်စေမည်။ သင်သည် စစ်မှန်ပြီး နှလုံးသားထဲမှဖြစ်သည့် သင်၏အတွေ့အကြုံမှ အမှန်တကယ်၊ စစ်မှန်သောအရာများကို ပို၍ပြောသင့်သည်။ ဤသည်မှာ အခြားသူများအတွက် အကျိုးပြုဆုံးဖြစ်ပြီး သူတို့တွေ့မြင်ရန် အသင့်လျော်ဆုံးဖြစ်သည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “သင်သည် သမ္မာတရားအား ကြိုးစားလိုက်လျှောက်ခြင်းအားဖြင့်သာ သင်၏စိတ်နေသဘောထား၌ ပြောင်းလဲမှုများကို ရရှိနိုင်သည်”) ဘုရားနှုတ်ကပတ်တော်တွေကို ဖတ်ပြီးတဲ့နောက်မှာ ကျွန်တော့်တာဝန်မှာ ဘုရားသခင်ကို ချီးမြှောက်ခြင်းနဲ့ သက်သေခံခြင်းကို ဘယ်လို လက်တွေ့လုပ်ဆောင်သင့်တယ်ဆိုတာနဲ့ပတ်သက်ပြီး နည်းနည်းနားလည်သွားခဲ့တယ်။ ကျွန်တော့်အနေနဲ့ ဘုရားအမှုတော်ကို ဘယ်လို ကြုံတွေ့ခဲ့ရတယ်၊ ဘယ်လို ဖောက်ပြန်ပျက်စီးတဲ့ စိတ်သဘောထားတွေ ကျွန်တော့်မှာ ပေါ်ခဲ့တယ်၊ ကျွန်တော်က ဘုရားကို ဘယ်လို ပုန်ကန်ဆန့်ကျင်ခဲ့တယ်၊ ကိုယ်တော့်နှုတ်ကပတ်တော်တွေနဲ့ ကိုယ့်ကိုယ်ကိုယ် နှိုင်းယှဉ်ကြည့်ရင်း၊ ကိုယ့်အကြောင်းကိုယ် ဆင်ခြင်မိပြီး ဘယ်လိုသိလာခဲ့တယ်၊ ဘယ်လို နောင်တရပြီး ပြောင်းလဲခဲ့တယ်ဆိုတာတွေကို၊ ဘုရားအတွက် သက်သေခံရာမှာ ပိုပြီး ပြောဆိုသင့်ပါတယ်။ သမ္မာတရားကို မိတ်သဟာယပြုခြင်းကတစ်ဆင့် ဘုရားအလိုတော်နဲ့ ဘုရားရဲ့ တောင်းဆိုမှုတွေကို လူတွေနားလည်အောင် ကျွန်တော် ကူညီသင့်တယ်။ လူတွေကို ကယ်တင်ဖို့ ကိုယ်တော် လုပ်ဆောင်တဲ့အမှုတော်နဲ့ သူ့စိတ်သဘောထားကို နားလည်အောင် ကူညီသင့်တယ်။ ပြီးတော့ ဘုရားသခင်ကို ကြောက်ရွံ့ပြီး နာခံနိုင်အောင်၊ ဖန်ဆင်းခံတွေရဲ့ တာဝန်တွေကို ထမ်းဆောင်နိုင်အောင် ကျွန်တော် ကူညီသင့်ပါတယ်။ ဒီလိုလုပ်ခြင်းအားဖြင့်သာ ဘုရားကို ကျွန်တော် အမှန်တကယ် ချီးမြှောက်ပြီး သက်သေခံနိုင်မှာပါ။ ညီအစ်ကိုမောင်နှမတွေနဲ့ မိတ်သဟာယပြုခဲ့ဖူးတဲ့ အချိန်တွေကို ကျွန်တော် စဉ်းစားကြည့်တယ်။ အချိန်အများစုမှာ ကျွန်တော်က ကျွန်တော် ဘယ်လောက် ဒုက္ခခံခဲ့တာတွေ၊ ဘယ်လိုအဖိုးအခကို ပေးဆပ်ခဲ့တာတွေ ဘုရားရဲ့ဆောင်ရွက်မှုတွေကို ကျွန်တော် ဘယ်လိုမြင်တွေ့ပြီး၊ ဘုရားရဲ့ကောင်းချီးတွေကို ရခဲ့တယ်ဆိုတဲ့အကြောင်းတွေပဲ ပြောခဲ့တယ်။ ကျွန်တော့်မှာ ဘယ်လိုဖောက်ပြန်ပျက်စီးတဲ့ စိတ်သဘောထားတွေ ပေါ်ခဲ့တယ်၊ ဘယ်လိုသိမ်ဖျင်းတဲ့ ရည်ရွယ်ချက်တွေ ရှိခဲ့တယ်ဆိုတာတွေနဲ့ ပတ်သက်ရင်တော့၊ ကျွန်တော်က အဲဒါတွေကို အမြဲတမ်း ဖုံးကွယ်ခဲ့တယ်။ ပြောဖူးတယ်ဆိုတာတောင် ရှားပါတယ်။ ညီအစ်ကို မောင်နှမတွေက ကျွန်တော့် ဖောက်ပြန်ပျက်စီးမှုကို မြင်ရင် ကျွန်တော့်အပေါ် သူတို့ အမြင်တွေက နိမ့်ကျသွားမှာကို ကျွန်တော် ကြောက်လန့်နေခဲ့တယ်။ ကျွန်တော် တကယ်ကို လှည့်ဖြားတတ်တဲ့ သဘာဝရှိခဲ့ပါတယ်။ ဒီအရာတွေကို သတိပြုမိပြီးတဲ့နောက်မှာ ကျွန်တော် အစ်ကိုကျန်းကို ရှာတယ်။ ပြီးတော့ လူတွေကို လှည့်စားဖို့ ကိုယ်ရည်သွေးပြတတ်တဲ့ ကျွန်တော့်ရဲ့ မကောင်းတဲ့လုပ်ရပ်တွေကို ဖွင့်ပြောခဲ့တယ်။ အစ်ကိုကျန်းကို ကျွန်တော် အရင်က အလုပ်လုပ်ခဲ့တဲ့ အသင်းတော်ဆီ သွားခိုင်းပြီး၊ အဲဒီက ညီအစ်ကို မောင်နှမတွေနဲ့ ကျွန်တော့်အပြုအမူကို ဆန်းစစ်ဖို့၊ အဲဒီလိုနဲ့ လူတွေ ပိုပြီး ပိုင်းခြားသိမြင်လာစေဖို့အတွက် ကျွန်တော် တောင်းဆိုခဲ့ပါတယ်။ အစည်းအဝေးမှာ ကျွန်တော့်ရဲ့ မကောင်းတဲ့အပြုအမူတွေကို ညီအစ်ကိုမောင်နှမတွေကိုလည်း ဖွင့်ပြောခဲ့ပါတယ်။ ဘုရားရဲ့ ဖြောင့်မတ်တဲ့ စိတ်သဘောထားကို သက်သေခံခဲ့ပါတယ်။ ပြီးတော့ ကျွန်တော့်လို ဘုရားကို ဆန့်ကျင်တဲ့လမ်းကို မလျှောက်မိဖို့အတွက်၊ ဘာကို မလုပ်သင့်ဘူးဆိုတာကို သိအောင် ကျွန်တော့်ကို ဥပမာယူကြဖို့ လူတိုင်းကို ပြောပြခဲ့တယ်။

အဲဒီနောက်ပိုင်း ကျွန်တော့်တာဝန်တွေကို ထမ်းဆောင်တဲ့အခါမှာ ကျွန်တော်က ပိုပြီးတော့ နှိမ့်ချလာတယ်။ ဘုရားသခင်ကို ကြောက်ရွံ့ခြင်း နည်းနည်းဖြစ်ပေါ်လာတယ်။ ကျွန်တော် သတိရမိတယ်။ အစည်းအဝေးမှာ တစ်ခါတုန်းက အခက်အခဲတစ်ခု ကြုံရတဲ့ ညီအစ်ကိုလူသစ်တစ်ယောက် ရှိတယ်။ ကျွန်တော်က သူ့ပြဿနာကို ကူပြီးဖြေရှင်းဖို့ ဘုရားနှုတ်ကပတ်တော်ကို မိတ်သဟာယပြုတယ်။ ကျွန်တော် ပြောတာကို နားထောင်ပြီးတော့၊ အဲဒီညီအစ်ကိုက ပျော်ပျော်ရွှင်ရွှင်နဲ့ ပြောတယ်၊ “အစ်ကိုချန်း အစ်ကို့ရဲ့ မိတ်သဟာယက တော်တော်ကောင်းတာပဲ။ ဒီပြဿနာက ကျွန်တော့်ကို နှောင့်ယှက်နေတာ တော်တော်ကြာပြီ။ ကျွန်တော် လုံးဝကို မရှင်းနိုင်ခဲ့ဘူး။ အစ်ကိုက သမ္မာတရားကို တကယ်နားလည်တာပဲ။ နောက်ကျရင် ကျွန်တော်တို့ အစည်းအဝေးကို အစ်ကို ခဏခဏလာပြီး မိတ်သဟာယပြုမှ ဖြစ်မယ်။” တဲ့။ နောက်ထပ်အစ်ကိုတစ်ယောက်ကလည်း ဒီအတိုင်းပဲပြောတယ်။ အဲဒီအချိန်တုန်းကတော့ ကျွန်တော် တော်တော်ကို အူမြူးသွားတာ။ ဒါပေမဲ့ အရင်က ကျွန်တော် ကြွားဝါတတ်တဲ့ အမှားက ခေါင်းပြန်ထောင်လာတော့မလိုဖြစ်နေတာကို ကျွန်တော် ချက်ချင်း သတိပြုမိလိုက်တယ်။ အဲဒါနဲ့ ဘုရားသခင်ဆီ အမြန်ဆုတောင်းပြီး၊ ကိုယ့်ကိုယ်ကိုယ် ပစ်ပယ်လိုက်တယ်။ ပြီးတဲ့နောက်မှာ ဘုရားကို အသိရှိရှိနဲ့ သက်သေခံပြီးတော့၊ ညီအစ်ကိုမောင်နှမတွေကို ကိုယ်တော့်ရှေ့ ခေါ်လိုက်တယ်။ ကျွန်တော်က “ဒီနေ့ အစည်းအဝေးပွဲမှာ ကျွန်တော်တို့ မိတ်သဟာယပြုခဲ့တာကနေ လူတိုင်း သင်ယူနိုင်ပါတယ်။ ဒါတွေအားလုံးက သန့်ရှင်းသော ဝိညာဉ်တော်က ကျွန်တော်တို့ကို လမ်းပြပြီး ဉာဏ်အလင်းဖွင့်ပြပေးနေတာပါ။ ဘုရားနှုတ်ကပတ်တော်တွေကို ကျွန်တော်တို့ ပိုပြီးတော့ ဖတ်သင့်ပါတယ်။ အကြောင်းကိစ္စတွေ ကြုံတဲ့အခါ ကိုယ်တော့်နှုတ်ကပတ်တော်တွေထဲမှာ သမ္မာတရားကို ပိုပြီး ရှာဖွေသင့်ပါတယ်။ ပြီးရင် သန့်ရှင်းသောဝိညာဉ်တော်က ကျွန်တော်တို့ကို ဉာဏ်အလင်းဖွင့်ပြပြီး အလင်းပေးမှာပါ။ ဒီလိုလုပ်ခြင်းအားဖြင့် ကျွန်တော်တို့ ပိုပြီးတော့တောင် နားလည်လာမှာပါ” ဆိုပြီး ပြောလိုက်တယ်။ ကျွန်တော် အဲဒီလို ပြောပြီးတဲ့နောက်မှာ စိတ်ထဲမှာ တော်တော်ကို ငြိမ်းချမ်းသွားတယ်။ ကျွန်တော် ဒီ ပြောင်းလဲမှု အသေးစားလေးကို ကြုံတွေ့နိုင်တာ၊ ကျွန်တော့်အလုပ်မှာ ဘုရားကို ချီးမြှောက်ခြင်းနဲ့ သက်သေခံခြင်းကို ဘယ်လို လက်တွေ့လုပ်ဆောင်မလဲဆိုတာကို သိနိုင်တာတွေ အားလုံးက ဘုရားနှုတ်ကပတ်တော်တွေရဲ့ တရားစီရင်မှုနဲ့ ပြစ်တင်ဆုံးမမှုကြောင့်ပါပဲ။

ယခင်က:၄၆။ ဘုရားသခင်၏ ကွယ်ကာခြင်း

နောက်တစ်ခုသို့:၅၀။ ဘုရားသခင်၏ ကယ်တင်ခြင်း

သင်နှစ်သက်နိုင်သည့် အရာများ

နှုတ်ကပတ်တော်သည် လူ့ဇာတိ၌ ပေါ်လာ၏ နောက်ဆုံးသောကာလ ခရစ်တော်၏ မိန့်မြွက်ချက်များ (လက်ရွေးစင်များ) နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှ စံနမူနာ နှုတ်ကပတ်တော်များ အနန္တတန်ခိုးရှင် ဘုရားသခင်၏ နှုတ်ကပတ်တော် လက်ရွေးစင်များ နောက်ဆုံးသောကာလ၏ ခရစ်တော်အတွက် သက်သေများ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ ဘုရားသခင်၏ အသံကို နားထောင်လော့ ဘုရားသခင်၏ ပေါ်လာခြင်းကို ရှုမြင်ကြလော့ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ အောင်မြင်သောသူများ၏ သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ ဘုရားသခင်၏ နေ့စဉ် နှုတ်ကပတ်တော်များ