ကိုးကားရန် သမ္မာကျမ်းပိုဒ်များ-

“အရှင်ထာဝရဘုရား မိန့်တော်မူသည်ကား၊ ငါသည်သိုးထိန်းတို့ တလက်၌နေ၏။ ငါ့သိုးများကို သူတို့၌ငါတောင်း၍ သိုးထိန်းအရာကို နှုတ်မည်။ သိုးထိန်း တို့သည် နောက်တဖန်ကိုယ်ကို မကျွေးမွေးရကြ။ ငါ့သိုးများကို သူတို့ပစပ်မှ ငါနှုတ်၍ နောက်တဖန် မကိုက် မစားရကြ။” (ယေဇကျေလအနာဂတ္တိကျမ်း ၃၄:၁၀)

“အရှင်ထာဝရဘုရားမိန့်တော်မူသည်ကား၊ ငါသည် ကိုယ်တိုင်လိုက်၍ ငါ့သိုးတို့ကိုရှာမည်။ ကွဲပြားလျက်ရှိသော မိမိသိုးတို့တွင် သိုးထိန်း ရောက်သောအခါ ကြိုးစား၍ ရှာသကဲ့သို့၊ ငါသည်လည်း ငါ့သိုးတို့ကိုကြိုးစား၍ ရှာမည်။ မိုဃ်းအုံ၍မိုက်သော နေ့၌ သူတို့ကွဲပြားသော အရပ်ရပ်တို့က ငါနှုတ်ဆောင် မည်။” (ယေဇကျေလအနာဂတ္တိကျမ်း ၃၄:၁၁-၁၂)

“ဤသိုးခြံသို့မဝင်သော အခြားသိုးတို့ကိုလည်း ငါပိုင်သေး၏။ ထိုသိုးတို့ကို ငါဆောင်ခဲ့ရမည်။ သူတို့ သည်လည်း ငါ့စကားသံကို နားထောင်သဖြင့်၊ သိုးခြံတခု သိုးထိန်းတပါးတည်းရှိရလိမ့်မည်။” (ရှင်ယောဟန်ခရစ်ဝင် ၁၀:၁၆)

“ငါ့သိုးတို့သည် ငါ့စကားသံကိုနားထောင်၍ ငါ့နောက်သို့လိုက်ကြ၏။ ထိုသိုးတို့ကို ငါသိ၏။” (ရှင်ယောဟန်ခရစ်ဝင် ၁၀:၂၇)

ဆက်စပ်သော ဘုရားသခင်၏ နှုတ်ကပတ်တော်များ-

ငါတို့သည် ဘာသာရေးအသိုင်းအဝိုင်းများအတွင်းရှိ ခေါင်းဆောင်များစွာအား ဧဝံဂေလိတရားတော်ကို ကြိမ်ဖန်တလဲလဲ ဟောကြားခဲ့ပြီးသော်လည်း သမ္မာတရားအပေါ် ၎င်းတို့နှင့် မည်သို့ပင် မိတ်သဟာယဖွဲ့သည်ဖြစ်စေ ၎င်းတို့လက်မခံကြပေ။ အဘယ်ကြောင့် ဤသို့ဖြစ်သနည်း။ ယင်းမှာ ၎င်းတို့၏ မာနထောင်လွှားမှုသည် ပင်ကိုစရိုက်သဖွယ် ဖြစ်နေကာ ဘုရားသခင်သည် ၎င်းတို့၏စိတ်နှလုံးထဲတွင် မရှိတော့သည့်အတွက်ကြောင့် ဖြစ်သည်။ လူအချို့က “ဘာသာရေးလောကရှိ သင်းအုပ်ဆရာအချို့၏ ဦးဆောင်မှုအောက်တွင် လူတို့သည် အလွန်ပင် စိတ်ဓာတ်ခွန်အား တက်ကြွကြ၏။ ၎င်းတို့အကြားတွင် ဘုရားသခင် ရှိပုံပေါ်၏” ဟု ဆိုကောင်းဆိုနိုင်သည်။ ထိုသင်းအုပ်ဆရာတို့၏ ဒေသနာများသည် မည်မျှပင် မြင့်မြတ်သည်ဖြစ်စေ ဘုရားသခင်ကို ၎င်းတို့သိကြသလော။ ၎င်းတို့သည် ဘုရားသခင်အား ၎င်းတို့၏စိတ်နှလုံးများတွင် အမှန်တကယ် ကြည်ညိုပါက လူတို့အား ၎င်းတို့နောက်သို့ လိုက်စေ၍ ၎င်းတို့အား ချီးမြှောက်စေကြလိမ့်မည်လော။ ၎င်းတို့သည် အခြားသူများအား တစ်ဦးတည်း ချုပ်ကိုင်ထားမည်လော။ သမ္မာတရားကို ရှာဖွေ၍ စစ်မှန်သောလမ်းခရီးကို စုံစမ်းနေသော အခြားသူများအပေါ် ကန့်သတ်ချက်များ ချမှတ်ရဲမည်လော။ ဘုရားသခင်၏သိုးတို့သည် အကယ်စင်စစ်အားဖြင့် ၎င်းတို့၏သိုးများဖြစ်၍ သူ၏သိုးများအားလုံးက ၎င်းတို့ကို နားထောင်သင့်သည်ဟု ၎င်းတို့ကိုယ်တိုင်သည် ဘုရားသခင်အဖြစ် ပြုမူနေခြင်းပင် မဟုတ်ပေလော။ ထိုသို့သောလူတို့သည် ဖာရိရှဲများထက်ပင် သာ၍ ဆိုးရွား၏၊ ၎င်းတို့သည် အန္တိခရစ်များပင် မဟုတ်ကြသလော။ ထို့ကြောင့် ၎င်းတို့၏ မာနထောင်လွှားမှုကို ထောက်ဆလျှင်၊ ယင်းက ဘုရားသခင်ကို သစ္စာဖောက်သည့် အမှုအရာများကို လုပ်ဆောင်ခြင်းအဖြစ်သို့ ၎င်းတို့ကို ထိန်းချုပ်နိုင်ပေသည်။

—နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောချက်များ၊ မာနထောင်လွှားသော သဘာဝတစ်ခုသည် ဘုရားသခင်အပေါ် လူသား၏ခုခံခြင်း၏ အရင်းအမြစ်၌ ရှိသည်

ကိုးကားရန် အတွက် လူ၏ မိတ်သဟာယပြုခြင်း-

ယုံကြည်သူများက ဘုရားသခင်နှင့် သက်ဆိုင်ကြသည်ကို သခင့်ကို ယုံကြည်သောသူများအားလုံးက သိရှိကြသည်။ ၎င်းတို့သည် မည်သည့် ဂိုဏ်းဂဏနှင့်မျှ လုံးဝ မသက်ဆိုင်သကဲ့သို့ ဂိုဏ်းဂဏတစ်ခုတစ်လေ၏ ခေါင်းဆောင်များ၊ သင်းအုပ်ဆရာများ သို့မဟုတ် အကြီးအကဲများနှင့် မသက်ဆိုင်ကြပါ။ ဝတ်ပြုစည်းဝေးပွဲများ၊ လှုပ်ရှားမှုများအတွက် မည်သည့် အသင်းတော်ကို ၎င်းတို့ တက်ရောက်ကြသည်ဖြစ်စေ၊ ပြီးလျှင် ၎င်းတို့ကို မည်သည့် သင်းအုပ်ဆရာများနှင့် အကြီးအကဲများက ဦးဆောင်ကောင်း ဦးဆောင်နိုင်သည်ဖြစ်စေ၊ ဘုရားသခင်ကို ယုံကြည်သည့်လူများအားလုံးက သူ၏ သိုးများဖြစ်ကြပြီး- ဘုရားသခင်၏ သိုးများက ဘုရားသခင်၏ အသံတော်ကို အလေးဂရုပြုကြသည်။ ယင်းမှာ သခင်ယေရှု ပြောသည့်အတိုင်း အတိအကျ ဖြစ်သည်- “ငါသည် ကောင်းသောသိုးထိန်းဖြစ်၏။...ငါသည်လည်း ခမည်း တော်ကို သိုးသကဲ့သို့ ငါ၏သိုးကိုလည်း ငါသိ၏။” (ရှင်ယောဟန်ခရစ်ဝင် ၁၀:၁၄) များစွာသော သင်းအုပ်ဆရာများနှင့် အကြီးအကဲများက ၎င်းတို့၏ အသင်းတော်ထဲရှိ လူများကို ၎င်းတို့၏ သိုးများကဲ့သို့ ရည်ညွှန်းတတ်ကြသော်လည်း၊ ဤသည်မှာ ကြီးလေးသော အမှားတစ်ခု ဖြစ်သည်။ ဘုရားသခင်၏ ယုံကြည်သူများသည် ထိုလူများနှင့် အဘယ်သို့ သက်ဆိုင်နိုင်မည်နည်း။ သိုးစု၏ ပိုင်ရှင်ဖြစ်ခြင်းကို တစ်စုံတစ်ဦးက အခိုင်အမာဆိုဝံ့ပါက၊ ထိုသို့သော လူတစ်ဦးသည် ထိုသိုးစုနှင့် ဘုရားသခင် ရွေးချယ်ထားသူများအတွက် ဘုရားသခင်နှင့် ပြိုင်ဆိုင်ရန် ကြိုးစားနေသည်သာ မဟုတ်ပါလား။ ထိုသို့သော လူတစ်ဦးနှင့် ကျမ်းစာထဲတွင် သခင်ယေရှု ပြောခဲ့သည့် ဆိုးယုတ်သော မြေငှားတို့အကြား ခြားနားချက်မှာ အဘယ်နည်း။ ကျေးဇူးတော်ခေတ်တွင်၊ သခင်ယေရှုသည် နောက်ပိုင်းတွင် ဘုရားသခင်ကို ယုံကြည်ခဲ့ကြသည့် ယုဒလူတို့ထံ နောင်တ လမ်းခရီးကို ဖြန့်ဝေခဲ့သည်။ ကောင်းကင်နိုင်ငံတော်နှင့်ဆိုင်သည့် ဧဝံဂေလိ ဝေမျှဖို့နှင့် ပညတ်တရားအောက် အသက်ရှင်ကြသည့် လူသားများကို စည်းမျဉ်းစည်းကမ်းများ၏ ချုပ်ချယ်မှုနှင့် ချည်နှောင်မှုများမှ ကယ်တင်ဖို့ တပည့်တော်များနှင့် တမန်တော်များကိုလည်း ယုဒပြည်အနှံ့ သူစေလွှတ်ခဲ့သည်။ ဤသည်မှာ လူသားအတွက် ဘုရားသခင်၏ ချစ်ခြင်းမေတ္တာနှင့် ကယ်တင်ခြင်း ဖြစ်သည်။ သို့သော်၊ ယုဒဘာသာ၏ ယဇ်ပရောဟိတ်အကြီးအကဲများ၊ ကျမ်းတတ်ပုဂ္ဂိုလ်များနှင့် ဖာရိရှဲတို့သည် သခင်ယေရှုကို လူသိရှင်ကြား စွပ်စွဲပြီး ဆန့်ကျင်ခဲ့ကာ အခြားသူများအား သူ့ကို လက်ခံခြင်းမှ တားဆီးပြီး၊ နောက်ဆုံးတွင် ဘုရားသခင်၏ စီရင်ခြင်းနှင့် အပြစ်ပေးခြင်းကို ခံခဲ့ရသည်။ ယခု သခင်ယေရှု ပြန်ကြွလာပြီ ဖြစ်သည်။ သူသည် အနန္တတန်ခိုးရှင် ဘုရားသခင် ဖြစ်သည်။ ဘုရားသခင်၏ သိုးများက သူ၏ အသံတော်ကို ကြားကြသည်။ သင်းအုပ်ဆရာများနှင့် အကြီးအကဲများအနေဖြင့် သခင့်၏ သိုးစုများကို လွှဲပြောင်းမပေးနိုင်သည်သာမက၊ ထိုသူတို့ကို အပိုင်စီးသည်အထိ အမှန်တကယ် လုပ်ဆောင်ပါက၊ ၎င်းတို့သည် ဆိုးယုတ်သော အစေခံများသာ ဖြစ်သည်။ ယုဒလူမျိုး ယဇ်ပရောဟိတ် အကြီးအကဲများ၊ ကျမ်းတတ်ပုဂ္ဂိုလ်များနှင့် ဖာရိရှဲတို့အတိုင်းသာ ဘုရားသခင်၏ စီရင်ခြင်းနှင့် အပြစ်ပေးခြင်းတို့ကို ၎င်းတို့ ခံစားကြရလိမ့်မည်ဖြစ်သည်။

ယနေ့တွင်၊ အနန္တတန်ခိုးရှင် ဘုရားသခင်၏ ပေါ်ထွန်းခြင်းနှင့် အမှုတော်တို့သည် ကျမ်းစာဆိုင်ရာ ပရောဖက်ပြုချက်တစ်ခုကို ပြည့်စုံစေပြီး ဖြစ်သည်- “ဘုရားသခင်၏အိမ်တော်သားတို့ကို ရှေ့ဦးစွာစစ်ကြော စီရင်ရသော အချိန်ရှိပြီ။” (ရှင်ပေတရုသြဝါဒစာပဌမစောင် ၄:၁၇) သမ္မာတရားကို ချစ်ပြီး ဘုရားသခင်၏ ပေါ်ထွန်းခြင်းကို တောင့်တသည့် ဂိုဏ်းဂဏ အမျိုးမျိုးမှ ညီအစ်ကို မောင်နှမများစွာတို့သည် တစ်ယောက်ပြီး တစ်ယောက် သူ၏ ပလ္လင်တော်ရှေ့မှောက် ပြန်လာရင်း၊ သူ၏ အသံတော်ကို ကြားကြပြီးဖြစ်ကာ အနန္တတန်ခိုးရှင် ဘုရားသခင်၏ နောက်ဆုံးသော ကာလ အမှုတော်ကို လက်ခံကြပြီး ဖြစ်သည်။ ဤသည်မှာ ဘုရားသခင်၏ သိုးက သူ၏ အသံတော်ကို အရေးစိုက်ကြခြင်း ဖြစ်သည်။ သခင်ယေရှု ပြန်ကြွလာသည့်အခါ၊ သူသည် သူ့ကို စောင့်ဆိုင်းနေကြပြီးဖြစ်သည့်သူများထံ ပထမဆုံး ပေါ်ထွန်းခဲ့ပြီး၊ သူ၏ ပြန်ကြွလာခြင်းကို တောင့်တသူများအနေဖြင့် သူ၏ အသံတော်ကို ကြားပြီး သူ့ထံ ပြန်လာကြဖို့အလို့ငှာ ဘုရားသခင်၏ နောက်ဆုံးသော ကာလ အမှုတော်ကို ဖြန့်ဝေဖို့ ဘာသာရေးလောကထဲသို့ လူတို့ကို စေလွှတ်ခဲ့သည်။ ယင်းမှာ လုပ်ရိုးလုပ်စဉ်အတိုင်း မဟုတ်ပါလား။ သို့သော်၊ ဘာသာရေး လောကထဲက အချို့သော သင်းအုပ်ဆရာများနှင့် အကြီးအကဲများသည် ဘုရားသခင်၏ သိုးများကို သူ့ထံ ပြန်လွှဲမပေးသည်သာမက၊ အခြေအမြစ်မရှိသည့် စွပ်စွဲချက်များဖြင့် တန်ပြန်တိုက်ခိုက်ပြီး မိမိတို့၏ သိုးစုကို ကာကွယ်ခြင်းဟူသည့် အယောင်ဆောင်မှုအောက် မိမိတို့၏ အသင်းတော်များကို ပိတ်ပင်ထားလိုက်ကြသည်။ ၎င်းတို့သည် ယုံကြည်သူများအား စစ်မှန်သော လမ်းခရီးကို ရှာဖွေခွင့် သို့မဟုတ် လေ့လာစုံစမ်းခွင့် မပေးကြဘဲ၊ ထိုအစား အနန္တတန်ခိုးရှင် ဘုရားသခင် အသင်းတော်ကို အဆက်မပြတ်ရှုတ်ချကာ ၎င်းတို့၏ သိုးများ ခိုးသည်ဟု စွပ်စွဲကြသည်။ ၎င်းတို့သည် ဘုရားသခင်၏ သိုးများကို ၎င်းတို့၏ ကိုယ်ပိုင်အဖြစ် အရှက်မရှိ အခိုင်အမာဆိုကြပြီး လူတို့ကို လှောင်ပိတ်ကာ ထိန်းချုပ်ဖို့ဖြစ်သည့် ၎င်းတို့၏ ရည်မှန်းချက်နှင့် ဆန္ဒတို့ကို လုံးဝ မြင်သာအောင် ပြကြလေသည်။ ၎င်းတို့သည် ယုံကြည်သူများအပေါ် တင်းကျပ်စွာ ထိန်းချုပ်မြဲ ထိန်းချုပ်ပြီး ထိုယုံကြည်သူများအား ၎င်းတို့နောက် ဆက်လိုက်စေကာ ကိုးကွယ်စေခြင်း ရည်မှန်းချက်ဖြင့် ဘုရားသခင်၏ သိုးများကို ရသင့်ရထိုက်သည်ဟု ယူဆကြသည်။ ထိုသို့သော ခေါင်းဆောင်များသည် သခင်ယေရှုပြောသည့်သူ၏ သိုးစုကို ထိန်းချုပ်သည့် ဆိုးယုတ်သော အစေခံများ အတိအကျ ဖြစ်ကြသည် မဟုတ်ပါလား။ ၎င်းတို့သည် ဘုရားသခင်ကို ခုခံကာ သူ၏ ရာထူးအတွက် တုပြိုင်သော အန္တိခရစ်များ ဖြစ်ကြသည် မဟုတ်ပါလား။ ဤအရာက အမှုပြုဖို့ သခင်ယေရှု၏ ကြွရောက်ခြင်းကို အမှတ်ရစေသည်။ ယုဒလူမျိုးများစွာ ကိုယ်တော့်နောက်လိုက်ကြသည်ကို မြင်သည့်အခါ ယုဒလူမျိုး ယဇ်ပရောဟိတ် အကြီးအကဲများ၊ ကျမ်းတတ်ပုဂ္ဂိုလ်များနှင့် ဖာရိရှဲတို့သည် ယုံကြည်သူများအားလုံးက သခင်ယေရှုနောက် လိုက်ကြပါက၊ မိမိတို့၏ ရာထူးများနှင့် အသက်မွေးဝမ်းကျောင်းများ မထိန်းသိမ်းနိုင်မည်ကို စိုးရွံ့လျက်၊ မနာလိုမှုနှင့် ကြောက်ရွံ့မှုတို့ကို ခံစားခဲ့ကြသည်။ ထို့နောက် လူတို့အား သူ၏ အမှုကို လက်ခံခြင်းမှ တားဆီးသည့် နည်းလမ်းအတိုင်းပင် သခင်ယေရှုကို ရှုတ်ချခဲ့ကြသည်။ ယင်းမှာ ကျမ်းစာထဲတွင် ရေးထားသည့်အတိုင်း အံကိုက် ဖြစ်ခဲ့သည်- “ထိုအခါ ယဇ်ပုရောဟိတ်အကြီးတို့နှင့် ဖာရိရှဲများသည်လွှတ်အရာရှိတို့ကို စည်းဝေးစေပြီးလျှင်၊ ငါတို့ သည် အဘယ်သို့ပြုလျက်နေကြသနည်း။ ထိုသူသည်များစွာသော နိမိတ်လက္ခဏာကိုပြ၏။ သူ့ကိုဤသို့စေလွတ်ထားလျှင် လူခပ်သိမ်းတို့သည် ယုံကြည်ကြလိမ့်မည်။ ရောမလူတို့သည်လည်း လာ၍ ငါတို့အရပ်ဌာနကို၎င်း၊ ငါတို့အမျိုးကို၎င်း သုတ်သင်ပယ်ရှင်းကြလိမ့်မည်ဟု ပြောဆိုကြ၏။...ထိုနေ့မှစ၍ ကိုယ်တော်၏အသက်ကိုသတ်ခြင်းငှါ တိုင်ပင်ကြံစည်ကြ၏။” (ရှင်ယောဟန်ခရစ်ဝင် ၁၁:၄၇-၄၈၊ ၅၃) ယုဒလူမျိုး ယဇ်ပရောဟိတ် အကြီးအကဲများ၊ ကျမ်းတတ်ပုဂ္ဂိုလ်များနှင့် ဖာရိရှဲတို့သည် ယုဒလူမျိုးတို့ကို ၎င်းတို့၏ ကိုယ်ပိုင် ဥစ္စာပစ္စည်းကဲ့သို့ မြင်ခဲ့ကြပြီး ဘုရားသခင် သိုးများအပေါ် တင်းတင်းကျပ်ကျပ် ဖမ်းဆုပ်မြဲ ဖမ်းဆုပ်ခဲ့ကြသည်။ ဘုရားသခင်က အမှုပြုရန်နှင့် ထိုသိုးများကို ပြန်ရရှိရန် ကြွလာသည့်အခါ၊ ခေါင်းဆောင်များက သူနှင့်ယှဉ်၍ ထိုသိုးများအပေါ် ထိန်းချုပ်ခြင်းအတွက် ယှဉ်ပြိုင် အားထုတ်ခဲ့ကြသည်။ ဤယဇ်ပရောဟိတ် အကြီးအကဲများ၊ ကျမ်းတတ်ပုဂ္ဂိုလ်များနှင့် ဖာရိရှဲတို့သည် ဘုရားသခင်ဆီသို့ မလှည့်ခဲ့ကြသကဲ့သို့ ယုဒလူမျိုးများကိုလည်း သူ့နောက်လိုက်ခွင့် မပေးခဲ့ကြပါ။ သခင်ယေရှုက၊“လျှို့ဝှက်သောကျမ်းပြုဆရာ၊ ဖာရိရှဲတို့၊ သင်တို့သည် အမင်္ဂလာရှိကြ၏။ အကြောင်းမူကား၊ ကောင်းကင်နိုင်ငံတော်၏ တံခါးကိုလူတို့ရှေ့မှာပိတ်ထား၍ မိမိတို့လည်းမဝင်၊ ဝင်လိုသောသူတို့ကိုလည်း ဆီးတား ကြ၏။” (ရှင်မဿဲခရစ်ဝင် ၂၃:၁၃) ဟုဆိုရင်း၊ ၎င်းတို့ကို ပြစ်တင်မောင်းမဲခဲ့သည်။ ဘုရားသခင်၏ ဖြောင့်မတ်သော စိတ်သဘောထားသည် လူတို့၏ ပုန်ကန်ပြစ်မှားမှုများကို သည်းခံလိမ့်မည် မဟုတ်ပါ။ ယုဒလူမျိုး ယဇ်ပရောဟိတ် အကြီးအကဲများ၊ ကျမ်းတတ်ပုဂ္ဂိုလ်များနှင့် ဖာရိရှဲတို့က ဘုရားသခင်ကို ခုခံကာ ရှုတ်ချနေရင်း၊ ဘုရားသခင်နှင့်အတူ သူ ရွေးချယ်ထားသည့်လူများအတွက် တုပြိုင်နေစဉ်တွင်၊ ဤအရာက ဘုရားသခင်၏ စိတ်သဘောထားကို ဒေါသထွက်စေကာ သူ၏ ကျိန်ခြင်းနှင့် အပြစ်ပေးခြင်းတို့ကို ၎င်းတို့ ခံစားခဲ့ရသည်။ ဣသရေလနိုင်ငံသည် အနှစ်နှစ်ထောင်နီးပါး ချေမှုန်းခံခဲ့ရသည်၊ ယုဒလူမျိုးများစွာ သတ်ဖြတ်ခံခဲ့ရပြီး ကွဲပြားသည့် ကမ္ဘာ့နေရာအနှံ့အပြားသို့ အုပ်စုလိုက် မောင်းထုတ်ခံခဲ့ရသည်။ ယနေ့ ဘာသာရေးလောက၏ သင်းအုပ်ဆရာများနှင့် အကြီးအကဲများက ဘုရားသခင်၏ သိုးများအပေါ် ရသင့်ရထိုက်သည်ဟု ဆက်လက် ယူဆကာ ၎င်းတို့အား ဘုရားသခင်ဆီသို့ လှည့်ခြင်းမှ တားဆီးပါက၊ ထိုခေါင်းဆောင်များအတွက် ဖြစ်လာမည့်အရာမှာ ဘုရားသခင်၏ ဖြောင့်မတ်သော အပြစ်ပေးခြင်း ဖြစ်ပေသည်။