“အောင်မြင်မှု သို့မဟုတ် ရှုံးနိမ့်မှုသည် လူလျှောက်သော လမ်းကြောင်းအပေါ်တွင် မူတည်သည်” ဟု အမည်ပေးထားသည့် ဘုရားနှုတ်ကပတ်တော် အခန်းနှင့်ပတ်သက်၍ သင်တို့သည် အလွန်ကြာမြင့်စွာ မိတ်သဟာယပြုပြီး ဖြစ်သည်။ ယင်းက မည်သည့်အမှုကိစ္စများကို ဆွေးနွေးပြီး မည်သည့်သမ္မာတရားများနှင့် သက်ဆိုင်သနည်း။ (ယင်းမှာ လူက ယုံကြည်သူအဖြစ် လျှောက်သည့်လမ်းကြောင်းနှင့် သက်ဆိုင်သည်။) ဤအကြောင်းအရာသည် ပေတရုနှင့် ပေါလုတို့လျှောက်သော လမ်းကြောင်းများကို အဓိကအားဖြင့် ဗဟိုပြုထားသည်။ ငါ မှန်သလော။ အလွန်ကြာမြင့်စွာ မိတ်သဟာယပြုပြီးသည့်နောက် သင်တို့သည် ဤအရာမှ တစ်စုံတစ်ခုကို ရရှိပြီးဖြစ်သည်ဆိုသည်မှာ ငါသေချာသည်။ များစွာသောအရာများကို ရရှိပြီးဖြစ်ဖို့ များသည်။ သင်တို့သည် ဤအချိန်ကာလအတွင်းတွင် သင်တို့နားထောင်ခဲ့သော ဤတရားဒေသနာများ၏ လိုရင်းကို အနှစ်ချုပ်ရမည်။ ထို့နောက်တွင် ဤအရာမှ အဓိကကျသောအရာများကို အမျိုးအစားခွဲထုတ်ပြီး ဤစဉ်းစားပုံမျိုးဖြင့် သင်တို့ အနှစ်ချုပ်ခဲ့သော အရေးကြီးသောအရာများနှင့် အကြောင်းအရာများနှင့်အညီ သွား ဆက်လက်၍ တွေ့ကြုံရမည်။ ဤသည်မှာ ဘုရားအမှုတော်ကို မည်သို့တွေ့ကြုံရမည်၊ သင်တို့တာဝန်ကို မည်သို့ကောင်းစွာ ထမ်းဆောင်ရမည်၊ လက်တွေ့ဘဝ၌ မည်သို့ကောင်းစွာ သက်သေခံရမည်ဆိုသည်တို့နှင့်ပတ်သက်ပြီး သင်တို့ကို ကူညီပေးလိမ့်မည်။ သင်တို့ အနှစ်ချုပ်ပြီးနောက်တွင် သင်တို့၏ အသက်ဝင်ရောက်မှုနှင့် ဝိညာဉ်ရင့်ကျက်မှုတို့သည် ရှေ့သို့ ကြီးသောခြေလှမ်းတစ်ခု လှမ်းလိမ့်မည်ဟု ငါမျှော်လင့်သည်။ ဤသို့ဆိုလျှင် ထိုအခန်းမှ သင်တို့နားလည်ရမည့် သမ္မာတရားစစ်မှန်မှုများကို သင်တို့ အနှစ်ချုပ်သောအခါ ပေါလု၏ အတွေ့အကြုံဖြင့် စတင်မည်လော၊ သို့မဟုတ် ပေတရု၏ အတွေ့အကြုံဖြင့် စတင်မည်လော။ (ပေါလု၏ အတွေ့အကြုံဖြင့် စတင်ပါမည်။) အဘယ်ကြောင့်နည်း။ (ပေါလုကျရှုံးခဲ့သည့် အကြောင်းရင်းများကို အခြေခံ၍ ကျွန်ုပ်တို့ကိုယ်ကို ဆင်ခြင်သုံးသပ်ခြင်းအားဖြင့် ကျွန်ုပ်တို့သည် ပေါလု၏ လမ်းကြောင်းပေါ်၌ ရှိမရှိကို သိလိမ့်မည်။ ထို့နောက်တွင် ကျွန်ုပ်တို့၌ လိုက်စားရမည့်ပန်းတိုင်တစ်ခုနှင့် ဦးတည်ချက်တစ်ခုရှိဖို့ရန်အတွက် မည်သည့်လမ်းကြောင်းမျိုးပေါ်၌ ပေတရုရှိသည်ကို ကျွန်ုပ်တို့ကြည့်မည်။) အမှန်တကယ်တွင် ယင်းသည် ဖြစ်သင့်သည့်ပုံစံ ဖြစ်သည်။ ပေါလုဖြတ်သန်းခဲ့သော အရာရာတိုင်းနှင့် သူလိုက်လျှောက်ခဲ့သောလမ်းမှ သင်ခန်းစာများယူပြီး အတွေ့အကြုံများကို အနှစ်ချုပ်လော့။ သူသည် မည်သည့်လမ်းပေါ်တွင်ရှိသည်၊ ဘုရားသခင်သည် အဘယ်ကြောင့် ယုံကြည်သူများကို မှန်ကန်သောလမ်းကြောင်းအား လိုက်လျှောက်ရန် တောင်းဆိုသည်၊ မှန်ကန်သောလမ်းကြောင်းဆိုသည်မှာ မည်သည့်အရာ ဖြစ်သည်ဆိုသည်တို့ကို နားလည်လော့။ သမ္မာတရားအား လိုက်စားခြင်းလမ်းကြောင်းကို သင်လိုက်လျှောက်နိုင်လျှင် သင်သည် လက်တွေ့ဘဝအခြေအနေများ၌ လမ်းလွဲသွားခြင်းအပြင် သင်၏တာဝန်ထမ်းဆောင်သည့် အချိန်ကာလအတွင်းတွင် ဘုရားအမှုတော်အား တွေ့ကြုံစဉ်၌ လမ်းလွဲသွားခြင်းကိုလည်း ရှောင်ကြဉ်နိုင်လိမ့်မည်။ သင်သည် ဘုရားအမှုတော်ကို နှောင့်ယှက်ကာ မှားသောလမ်းကြောင်းပေါ်သို့ မှားယွင်းစွာ သက်ဆင်းသွားခြင်း၊ သို့မဟုတ် အဆုံး၌ ပေါလုကဲ့သို့ သင့်ကိုယ်သင်အပေါ် အပြစ်ဒဏ်ယူဆောင်မိစေခြင်းကိုလည်း ရှောင်ကြဉ်နိုင်လိမ့်မည်။

ယခုအခါတွင် ပေါလု၏ အတွေ့အကြုံများနှင့်ပတ်သက်ပြီး သူလျှောက်ခဲ့သည့်လမ်း၏ ဝိသေသလက္ခဏာများ၊ ဘုရားသခင်ကို သူယုံကြည်ခဲ့သည့် ပုံစံ၊ သူလိုက်စားခဲ့သည့် ပန်းတိုင်များနှင့် ဉီးတည်ချက်တို့ကို အနှစ်ချုပ်ကြစို့။ ငါတို့သည် ရှေးဦးစွာ ပေါလု၏လူ့သဘာဝအရည်အသွေးနှင့် သူ၏ စိတ်သဘောထားကို ဤရှုထောင့်များမှ ကြည့်မည်။ ပေါလု၏ အသက်တာနှင့် သူ့တွင် ဖြစ်ပျက်ခဲ့သော ဇာတ်လမ်းများကို အကဲဖြတ်လျှင် သူ၏ စိတ်သဘောထားနှင့်ပတ်သက်၍ သွင်ပြင်လက္ခဏာအနည်းငယ်ရှိသည်။ မာနထောင်လွှားခြင်း၊ မိမိကိုယ်ကို မှန်သည်ဟု မှတ်ယူခြင်း၊ လှည့်ဖြားတတ်ခြင်း၊ သမ္မာတရားကို မုန်းတီးခြင်း၊ ကောက်ကျစ်ဆိုးယုတ်ခြင်းနှင့် ရက်စက်ခြင်းတို့ ဖြစ်သည်။ လူတို့သည် ပေါလု၏ စိတ်သဘောထား၏ အဓိကသွင်ပြင်လက္ခဏာ မည်မျှကို မြင်နိုင်သည်ဖြစ်စေ၊ သို့မဟုတ် အနှစ်ချုပ်နိုင်သည်ဖြစ်စေ သူ၏ ဤစိတ်သဘောထားဆိုင်ရာ သွင်ပြင်လက္ခဏာများအကြောင်းကိုသာပြောလျှင် ယင်းသည် အလွန်ပင် အနှစ်မဲ့သည်ဟု သင်ခံစားရဖို့များလိမ့်မည်။ ငါပြောသည်မှာ မှန်သလော။ သူ၏ စိတ်သဘောထားဆိုင်ရာ ဤသွင်ပြင်လက္ခဏာများအကြောင်းကို သင်ပြောသောအခါ ယင်းတို့သည် သူ၏ လိုက်စားမှုများ၊ သူ့အသက်တာ၏ ဦးတည်ချက်၊ ယုံကြည်သူတစ်ဦးအဖြစ် သူလိုက်လျှောက်သည့်လမ်းကြောင်းတို့နှင့် ဆက်နွှယ်သလော။ သူ၏ မာနထောင်လွှားမှုအကြောင်းကို သင်ပြောဆိုသောအခါ ယင်းကို ပံ့ပိုးပေးရန် အချက်အလက်တစ်ခုခုရှိသလော။ သူသည် မာနထောင်လွှားသည်ဟု မည်သည့်အရာက သင့်ကို မြင်စေသနည်း။ သူသည် လှည့်ဖြားတတ်သည်ဟု မည်သည့်အရာက သင့်ကိုမြင်စေသနည်း။ သူသည် သမ္မာတရားအား မုန်းတီးသည်ဟု မည်သည့်အရာက သင့်ကို မြင်စေသနည်း။ သင်သည် သူ၏ စိတ်သဘောထားဆိုင်ရာ ဤသွင်ပြင်လက္ခဏာများ၏ အနှစ်သာရကိုသာ အနှစ်ချုပ်ပြီး သူ၏ လိုက်စားမှုများ၊ သူ့အသက်တာ၏ ဦးတည်ချက်၊ ယုံကြည်သူအဖြစ် သူလိုက်လျှောက်သည့်လမ်းကြောင်းတို့အကြောင်း မပြောပါက ယင်းတို့သည် အနှစ်မရှိသော စကားများဖြစ်ပြီး ယခုတွင် လူတို့အတွက် မည်သည့်အပြုသဘောဆောင်သော၊ သို့မဟုတ် အကျိုးဖြစ်သောအသုံးဝင်မှုမျှ ရှိမည်မဟုတ်ပေ။ ပေါလု၏ လိုက်စားမှုများနှင့် သူ့လမ်းကြောင်း၏ ရှုထောင့်မှ စကားပြောသည်က ပိုကောင်းသည်။ လူတစ်ယောက်၏ အနှစ်သာရကို နားလည်ရန်မှာ ရိုးရှင်းသောကိစ္စတစ်ခုမဟုတ်။ လူတစ်ယောက်သည် မည်သည့်အရာကိုမျှ မလုပ်သောအခါ၊ သို့မဟုတ် အရေးမကြီးသောအရာအနည်းငယ်ကိုသာ လုပ်ဆောင်သောအခါ သူ၏ သဘာဝအနှစ်သာရကို ကောက်ချက်မချနိုင်ပေ။ ၎င်းတို့သည် မိမိကိုယ်ကို မည်သို့ပုံမှန် ထုတ်ဖော်သည်ဆိုသည်နှင့် ၎င်းတို့လုပ်ရပ်များနောက်ကွယ်ရှိ ရည်ရွယ်ချက်နှင့် အရင်းခံအကြောင်းရင်းတို့ကို သင်ကြည့်ရမည်။ ဆိုလိုသည်မှာ ၎င်းတို့၏ လိုက်စားမှုများ၊ ဆန္ဒများနှင့် ၎င်းတို့ လိုက်လျှောက်သည့်လမ်းကြောင်းကို ကြည့်ရမည်။ ပို၍ပင် အရေးကြီးသည့် သွင်ပြင်လက္ခဏာတစ်ခုမှာ လူတစ်ယောက်သည် ဘုရားသခင်က သူ့အတွက် စီမံပေးထားသည့် အခြေအနေတစ်ခုကို ရင်ဆိုင်ရသောအခါ၊ သို့မဟုတ် ထိုသူအား စစ်ကြောခြင်း၊ စစ်ဆေးခြင်း၊ ပြုပြင်ခြင်းကဲ့သို့သော အရာတစ်ခုကို ဘုရားသခင်ကိုယ်တော်တိုင်က လုပ်ဆောင်သောအခါ၊ သို့မဟုတ် ဘုရားသခင်ကိုယ်တော်တိုင်က ထိုသူအား အလင်းပေးပြီး လမ်းပြသောအခါတို့တွင် ထိုသူက မည်သို့ကိုင်တွယ်သည်ဆိုသည်ကို ကြည့်ရန် ဖြစ်သည်။ ဘုရားသခင်သည် အဓိကအားဖြင့် ဤသွင်ပြင်လက္ခဏာများကို ကြည့်သည်။ ဤသွင်ပြင်လက္ခဏာများသည် မည်သည့်အရာနှင့် သက်ဆိုင်သနည်း။ ယင်းတို့သည် လူတစ်ယောက်က လုပ်ဆောင်သည့်၊ အသက်ရှင်သည့်၊ ကျင့်ကြံပြုမူပြီး ကမ္ဘာလောကနှင့် အပြန်အလှန်ဆက်ဆံသည့် စည်းမျဉ်းများနှင့်သက်ဆိုင်သကဲ့သို့ ထိုသူလိုက်စားသည့် ပန်းတိုင်များနှင့် ဦးတည်ချက်၊ လိုက်လျှောက်သည့်လမ်းကြောင်း၊ အသက်ရှင်သည့်ပုံစံ၊ မည်သည့်အရာအတိုင်း အသက်ရှင်သည်ဆိုသည်နှင့် သူ၏ ဖြစ်တည်မှု၏ အခြေခံအုတ်မြစ်တို့နှင့်လည်း သက်ဆိုင်သည်။ ဤသည်မှာ ယင်းတို့နှင့် သက်ဆိုင်သည့်အရာ ဖြစ်သည်။ ဤအတွက်ကြောင့် ငါတို့သည် ဤအရာအားလုံးကို ရှောင်ကြဉ်ပြီး ပေါလု၏ သဘာဝအနှစ်သာရအကြောင်းကိုသာ ပြောလျှင် ငါတို့ မည်မျှပြောသည်ဖြစ်စေ၊ ငါတို့သည် မည်မျှပြည့်စုံသည်ဖြစ်စေ ယင်းတို့သည် အနှစ်မရှိသောစကားများသာဖြစ်သည်ဟု ငါပြောခြင်း ဖြစ်သည်။ ငါတို့သည် ပေါလုအား သူသည်မည်သူဖြစ်သည်ဆိုသည်နှင့်ဆိုင်သော သွင်ပြင်လက္ခဏာတိုင်းမှ သူ၏ အနှစ်သာရကို ကြည့်ပြီး ယနေ့ခေတ်လူများကို ကူညီလျှင်၊ သို့မဟုတ် လူတို့အား မိမိတို့ကိုယ်ကို ကြည့်ရှုရန် မှန်တစ်ချပ်ပေးလျှင် ငါတို့သည် ပေါလုလိုက်လျှောက်သည့်လမ်းကြောင်း၊ သူ လိုက်စားသည့်ပန်းတိုင်များ၊ သူ၏ ဖြစ်တည်မှု၏ အခြေခံအုတ်မြစ်၊ ဘုရားသခင်အပေါ် သူ၏ သဘောထားတို့ကို ဦးစွာ အနှစ်ချုပ်ရမည်။ ဤရှုထောင့်များမှ ချဉ်းကပ်ခြင်းအားဖြင့် သူ၏ စိတ်သဘောထား၏ သွင်ပြင်လက္ခဏာတိုင်းကို ငါတို့ စိစစ်လျှင် ငါတို့၌ အခြေပြုချက်တစ်ခု မရှိသလော။ ဤပုံစံဖြင့် မိတ်သဟာယဖွဲ့ခြင်းနှင့် အနှစ်ချုပ်ခြင်းသည် တစ်စိတ်တစ်ဒေသအားဖြင့် ပေါလုအား သင် ပို၍ရှင်းလင်းစွာ မြင်နိုင်ရန်ဖြစ်သည်။ သို့သော် အဓိကအားဖြင့် ယနေ့ခေတ်လူတို့သည် ဘုရားသခင်၏ ကယ်တင်ခြင်းနှင့် အချုပ်အခြာအာဏာကို ရင်ဆိုင်ရသောအခါ၊ ယင်းကို မည်သို့ချဉ်းကပ်ရမည်၊ သမ္မာတရားကို ၎င်းတို့ မည်သို့ လိုက်စားသင့်သည်ဆိုသည်ကို သိရန် ဖြစ်သည်။ ဤသို့ဖြင့် ၎င်းတို့သည် ပေါလု၏ ခြေလှမ်းများနောက်သို့ လိုက်ခြင်းကို ရှောင်နိုင်ပြီး ပေါလုကဲ့သို့ အပြစ်ဒဏ်ပေးခံရခြင်းဖြင့် အဆုံးသတ်ခြင်းကို ရှောင်နိုင်ရန် ဖြစ်သည်။ ဤသည်မှာ အထိရောက်ဆုံးသော နည်းလမ်းဖြစ်သည်။

ပေါလုက သူ့ကိုယ်သူ အသွင်ဆောင်သည့်ပုံစံအားလုံးကို သင်ကြည့်သည့်အခါတွင် သူ၏သဘာဝအနှစ်သာရကို သင်မြင်နိုင်သင့်သည်။ ပြီးလျှင် သူ၏ လိုက်စားမှုအတွက် ဦးတည်ချက်၊ ပန်းတိုင်များ၊ အရင်းအမြစ်နှင့် အရင်းခံအကြောင်းရင်းတို့သည် မှားယွင်းသည်ကိုလည်းကောင်း၊ ဤအရာများသည် ဘုရားသခင်အပေါ် ပုန်ကန်ပြီး အာခံသည်၊ ဘုရားသခင်ကို သဘောမကျဖြစ်စေသည်၊ ဘုရားသခင်က စက်ဆုပ်ရွံရှာသည်ဆိုသည်ကိုလည်းကောင်း အပြည့်အဝ ကောက်ချက်ချနိုင်စွမ်းရှိသင့်သည်။ ပေါလုက သူ့ကိုယ်သူတင်ပြသည့် ပထမဆုံးအဓိကပုံစံမှာ အဘယ်နည်း။ (သူသည် အပြန်အလှန်အနေဖြင့် သရဖူရဖို့ရန်အတွက် အပင်ပန်းခံပြီး အလုပ်လုပ်သည်။) သူသည် ဤပုံစံဖြင့် သူ့ကိုယ်သူတင်ပြသည်ကို၊ သို့မဟုတ် သူသည် ဤအခြေအနေတွင် ရှိသည်ကို မည်သည့်နေရာတွင် သင်တို့ မြင်ခဲ့သနည်း။ (သူ့စကားများမှတစ်ဆင့် ဖြစ်သည်။) သူ၏ ထင်ရှားသော အဆိုအမိန့်များမှတစ်ဆင့် ဖြစ်သည်။ ပုံမှန်အားဖြင့် ထင်ရှားသော အဆိုအမိန့်များသည် အပြုသဘောဆောင်ပြီး စိတ်ပိုင်းဖြတ်ချက်၊ မျှော်လင့်ချက်၊ ပြင်းပြသောဆန္ဒရှိသည့်သူတို့အတွက် အထောက်အကူဖြစ်ကာ အကျိုးရှိသည်။ ဤသို့သောသူများကို အားပေးပြီး တွန်းအားပေးနိုင်သည်။ သို့သော် ပေါလု၏ ထင်ရှားသောအဆိုအမိန့်များ၏ အသုံးဝင်မှုမှာ အဘယ်နည်း။ သူ့တွင် အဆိုအမိန့်များစွာရှိသည်။ သူ၏ ပို၍ ထင်ရှားသောအဆိုအမိန့်များထဲမှ တစ်ခုကို သင် ရွတ်ဆိုနိုင်သလော။ (“ကောင်းစွာသော တိုက်လှန်ခြင်းကို ငါပြုပြီ။ ပြေးရသောလမ်းကို အဆုံးတိုင်အောင်ပြေးပြီ။ ယုံကြည်ခြင်းတရားကို စောင့်ရှောက်ပြီ။ ယခုမှစ၍ ဓမ္မသရဖူသည် ငါ့အဘို့သိုထားလျက်ရှိ၏။” (တိမောသေ ဩဝါဒစာ ဒုတိယစောင် ၄:၇-၈)) ဤစကားများသည် သူ၏ သဘာဝအနှစ်သာရ၏ မည်သည့်သွင်ပြင်လက္ခဏာကို ကိုယ်စားပြုသနည်း။ ယင်းကို သမ္မာတရားနှင့်အညီ မည်သို့ အဓိပ္ပာယ်ဖွင့်ဆိုသင့်သနည်း။ (မာနထောင်လွှားခြင်း၊ မိမိကိုယ်ကို မှန်သည်ဟု ယူမှတ်ခြင်းနှင့် ဘုရားသခင်နှင့် အပေးအယူပြုလုပ်ခြင်း ဖြစ်သည်။) ဤစကားများကို ပြောဆိုရန် သူ့ကို လှုံ့ဆော်ခဲ့သည်မှာ သူ၏ မာနထောင်လွှားသောသဘာဝဖြစ်သည်။ သူသည် အဆုံး၌ သရဖူမရှိလျှင် ပြေးရသောလမ်းကို ပြေးမည်မဟုတ်။ အလုပ်လုပ်မည်မဟုတ်၊ သို့မဟုတ် ဘုရားသခင်ကိုပင် ယုံကြည်မည်မဟုတ်။ တရားဒေသနာများစွာကို နားထောင်ပြီးနောက်တွင် လူတို့သည် ယခုအခါ၌ ပေါလု ထုတ်ဖော်ခဲ့သည့် ဤသရုပ်သကန်နှင့် ဤအခြေအနေကို သိမြင်နိုင်သင့်သည်။ သို့သော် ယင်းကို သင်တို့ အဓိပ္ပာယ်ဖွင့်ဆိုနိုင်သလော။ “အနှစ်ချုပ်” ဟု ငါတို့ဆိုသောအခါ တစ်စုံတစ်ခုကို အဓိပ္ပာယ်ဖွင့်ဆိုခြင်းကို ဆိုလိုသည်။ တစ်စုံတစ်ခုကို အဓိပ္ပာယ်ဖွင့်ဆိုရန် သင်အသုံးပြုသည့် စကားလုံးများသည် စစ်မှန်သောနားလည်မှုဖြစ်သည်။ သင်သည် တစ်စုံတစ်ခုကို မှန်ကန်တိကျစွာ အဓိပ္ပာယ်ဖွင့်ဆိုနိုင်လျှင် သင်သည် ထိုအမှုကိစ္စကို ရှင်းလင်းစွာမြင်သည်ကို သက်သေပြသည်။ တစ်စုံတစ်ခုကို သင်အဓိပ္ပာယ်မဖွင့်ဆိုနိုင်ဘဲ အခြားလူတို့၏ အဓိပ္ပာယ်ဖွင့်ဆိုချက်များကိုသာ ကူးယူလျှင် သင်သည် အမှန်တကယ် နားမလည်သည်ကို သက်သေပြသည်။ ထိုအချိန်အခိုက်အတန့်တွင် ထိုစကားများကို ပြောရန် ပေါလုကို မည်သည့်စိတ်နေစိတ်ထား၊ သို့မဟုတ် အခြေအနေက လှုံ့ဆော်ခဲ့သနည်း။ မည်သည့်ရည်ရွယ်ချက်က သူ့ကို ထိုသို့ပြုလုပ်စေခဲ့သနည်း။ ဤစကားများက သင့်ကိုပြသည့် သူ့လိုက်စားမှု၏ အနှစ်သာရမှာ အဘယ်နည်း။ (ကောင်းချီးများရရှိရန် ဖြစ်သည်။) သူ၏ ရည်ရွယ်ချက်မှာ ကောင်းချီးများရဖို့ ဖြစ်သောကြောင့် ကြိုးစားပြေးခြင်း၊ သူ့ကိုယ်သူအသုံးခံပြီး သူ့ကိုယ်သူများစွာ ပေးဆပ်ခြင်း ဖြစ်သည်။ ယင်းသည် သူ၏ သဘာဝအနှစ်သာရဖြစ်ပြီး သူ့စိတ်နှလုံး၏ အတွင်းကျဆုံးနေရာ၌ တည်ရှိခဲ့သည့်အရာ ဖြစ်သည်။ ယခုပင် သင်တို့သည် ဤအရေးကိစ္စကို စိစစ်နေစဉ်တွင် ပေါလုသည် ဘုရားသခင်နှင့် အပေးအယူပြုလုပ်နေသည်ဟု သင်တို့ဆိုခဲ့သည်။ ဤအရာသည် ပေါလုရှိ မည်သည့်သဘောထားကို ကိုယ်စားပြုသနည်း။ ယခုအချိန်တွင် ငါတို့သည် သရဖူ၊ ကောင်းချီးရယူခြင်း၊ ဘုရားသခင်အား ယုံကြည်ခြင်းတို့အပေါ် ပေါလု၏ အစစ်မှန်ဆုံးသော သဘောထားကို အနှစ်ချုပ်ရန် ကြိုးစားနေခြင်းဖြစ်သည်။ ပေါလုသည် ဘုရားသခင်နှင့် အပေးအယူပြုလုပ်နေခြင်း ဟုတ်မဟုတ်နှင့် စစ်မှန်သော ယုံကြည်သူဟုတ်မဟုတ်ကို အနှစ်ချုပ်ဖို့ ငါတို့ ကြိုးစားနေခြင်း မဟုတ်။ ငါ့ကို ထပ်၍ပြောလော့။ (သူသည် သမ္မာတရားကို မချစ်ဘဲ မထီမဲ့မြင်ပြုသည်။) ဤသည်မှာ သဘောထားတစ်ခုမဟုတ်။ ဤသည်မှာ သူ့စိတ်သဘောထား၏ တစ်စိတ်တစ်ပိုင်း ဖြစ်သည်။ ယခုအချိန်တွင် ငါတို့သည် သူ့သဘောထားအကြောင်း ပြောဆိုနေခြင်း ဖြစ်သည်။ (သူသည် လောဘကြီးသည်။) ဤသည်မှာ သူ၏ သဘာဝအနှစ်သာရ၏ သွင်ပြင်လက္ခဏာတစ်ခုဖြစ်သည်။ ကောင်းချီးများရရှိရန် သူ၏ ရည်ရွယ်ချက်နှင့် သူ၏ လိုအင်ဆန္ဒကဲ့သို့ပင် ဖြစ်သည်။ သဘောထားတစ်ခုဆိုသည်မှာ အဘယ်နည်း။ ဥပမာ ပူစပ်သောအရာများကို အချိန်ပြည့်စားခြင်းသည် အစာအိမ်အတွက် မကောင်းဟု ငါဆိုပြီး တစ်စုံတစ်ယောက်က “ပူစပ်သောအစားအစာကို စားခြင်းက မကောင်းသည်ကို ကျွန်ုပ်သိသည်။ သို့သော် ပူစပ်သောအစားအစာကို ကျွန်ုပ်စားလိုသည်။ ပူစပ်သောအစားအစာကို မစားလျှင် မည်သည့်အရာကို ကျွန်ုပ်စားနိုင်မည်နည်း” ဟု ပြန်ပြောသည်။ ငါက “သင့်ကျန်းမာရေးအတွက် ပူစပ်သောအရာတစ်ခုခုကို သင်မစားသရွေ့ အစာစားတိုင်း အခြားတစ်စုံတစ်ခုကို စားရန်အတွက် သင့်အား ငါ ငါးဒေါ်လာပေးမည်” ဟု ပြန်ဖြေသည်။ ထို့နောက်တွင် ထိုသူက အလွန်ပျော်ရွှင်ပြီး “ကောင်းပါပြီ။ ပူစပ်သောအစားအစာကို ကျွန်ုပ် စားမည်မဟုတ်ပါ” ဟု ဆိုသည်။ အပေးအယူတစ်ခု ပြုလုပ်ပြီးဖြစ်ကာ ထိုသူက ဤအရာကို ထိန်းသိမ်းသည်။ သို့သော် သူသည် ပူစပ်သောအစားအစာကို စားခြင်းမှ အဘယ်ကြောင့် မိမိကိုယ်ကို ထိန်းသိမ်းနိုင်သနည်း။ အမှန်တကယ်မှာ ပိုက်ဆံကြောင့် ဖြစ်သည်။ ငါသည် သူ့အား ပိုက်ဆံမပေးလျှင် မိမိကိုယ်ကို ထိန်းချုပ်နိုင်မည်မဟုတ်။ ယခင်ကကဲ့သို့ပင် ပူစပ်သောအစားအစာကို ဆက်လက်၍ စားလိမ့်မည်။ တစ်စုံတစ်ခုကို ရရှိရန် ရှိသောကြောင့်သာ ပူစပ်သောအစားအစာကို စားခြင်းအား ရပ်တန့်လိုက်ခြင်း ဖြစ်သည်။ ယင်းမှာ ပိုက်ဆံဖြစ်သည်။ ဤသည်မှာ သူ၏ သဘောထားဖြစ်သည်။ ဤသည်မှာ သူ့စိတ်နှလုံးအတွင်းတွင် ဖုံးကွယ်နေသောအရာ ဖြစ်သည်။ သူသည် သမ္မာတရားကို လက်တွေ့လုပ်ဆောင်သောကြောင့်၊ သူ့ကို ပြောထားသည့်အတိုင်း လုပ်ဆောင်နေသောကြာင့်၊ သို့မဟုတ် ဘုရားသခင်ကျေနပ်စေရန် လုပ်ဆောင်နေသောကြောင့် ပူစပ်သောအစားအစာအား စားခြင်းကို ရပ်တန့်ခဲ့ခြင်း ဖြစ်သလော။ (မဟုတ်ပါ။) မဟုတ်ပေ။ ထိုအကြောင်းပြချက်များထဲမှ တစ်ခုမျှ မဟုတ်။ သူသည် သမ္မာတရားကို လက်တွေ့လုပ်ဆောင်နေသောကြောင့်၊ သို့မဟုတ် သူ၏ ကျန်းမာရေးကို အလေးထားဂရုစိုက်သောကြောင့် ပူစပ်သောအစားအစာအား စားခြင်းမှ မိမိကိုယ်ကို ချုပ်တည်းခြင်း မဟုတ်။ သူ၏ သဘောထားသည် ဝတ်ကျေတမ်းကျေဆန်ပြီး အပေါ်ယံဆန်သည်။ သူသည် ယင်းကို အပေးအယူတစ်ခုအဖြစ် မြင်ပြီး မျက်နှာလိုမျက်နှာရလုပ်ရန် လုပ်ဆောင်နေခြင်း ဖြစ်သည်။ သူသည် သူ၏ ရည်ရွယ်ချက်မပြည့်ဘဲ ပိုက်ဆံကို မရရှိလျှင် သူအလိုရှိသည့်အရာကို ပြန်လည်စားသုံးလိမ့်မည်။ ပြီးလျှင် ယခင်ကထက်ပင်ပို၍ စားကောင်းစားနိုင်သည်။ ဤသည်မှာ အသင့်တော်ဆုံး ဥပမာ မဖြစ်ကောင်းမဖြစ်နိုင်ပေ။ သို့သော် ဤအရာကို ပေါလုနှင့် ယှဉ်သောအခါတွင် မည်သည့်ဆင်တူသောအရာများရှိသနည်း။ (ပေါလုသည် ကောင်းချီးများရရှိခြင်းအားဖြင့် စိတ်နိုးကြွပြီး ဘုရားသခင်နှင့် အပေးအယူလုပ်ခဲ့သည့်ပုံစံနှင့် ဆင်တူပါသည်။) ပေါလုသည် ကောင်းစွာသော တိုက်လှန်ခြင်းကို ပြုခြင်း၊ ပြေးရသောလမ်းကို ပြေးခြင်း၊ အလုပ်လုပ်ခြင်း၊ သူ့ကိုယ်သူ အသုံးခံခြင်းနှင့် အသင်းတော်အား ရေလောင်းခြင်းကိုပင် ဖြောင့်မတ်ခြင်းသရဖူနှင့် လဲလှယ်ရန် သူ အသုံးပြုနိုင်သည့် တိုကင်ပြားများအဖြစ်၊ ယင်းဆီသို့ ဦးတည်သည့် လမ်းကြောင်းများအနေဖြင့် မြင်ခဲ့သည်။ ထို့ကြောင့် သူ ဒုက္ခခံရသည်ဖြစ်စေ၊ သူ့ကိုယ်သူ အသုံးခံသည်ဖြစ်စေ၊ ပြေးရသောလမ်းကို ပြေးသည်ဖြစ်စေ၊ သူမည်မျှ ဒုက္ခခံသည်ဖြစ်စေ သူ့စိတ်တွင်ရှိသော တစ်ခုတည်းသောပန်းတိုင်မှာ ဖြောင့်မတ်ခြင်းသရဖူကို ရရှိရန် ဖြစ်သည်။ သူသည် ဖြောင့်မတ်ခြင်းသရဖူကို လိုက်စားခြင်းနှင့် ကောင်းချီးများအား လိုက်စားခြင်းကို ဘုရားသခင်အပေါ် ယုံကြည်ခြင်း၏ သင့်လျော်သော ရည်ရွယ်ချက်အဖြစ် သဘောထားခဲ့ပြီး ဒုက္ခခံခြင်း၊ သူ့ကိုယ်သူ အသုံးခံခြင်း၊ အလုပ်လုပ်ခြင်း၊ ပြေးရသောလမ်းကို ပြေးခြင်းတို့ကို ယင်းဆီသို့ ဦးတည်သော လမ်းကြောင်းများအဖြစ် သဘောထားခဲ့သည်။ သူ၏ အပြင်ပန်းဖြစ်သော အပြုအမူကောင်းအားလုံးသည် ဟန်ပြအဖြစ် လုပ်ဆောင်ခြင်း ဖြစ်သည်။ သူသည် တကယ့်အဆုံးတွင် အလဲအလှယ်အနေဖြင့် ကောင်းချီးများရရှိရန် လုပ်ဆောင်ခဲ့ခြင်း ဖြစ်သည်။ ဤသည်မှာ ပေါလု၏ ပထမဆုံး အကြီးစားအပြစ်များ ဖြစ်သည်။

ပေါလုပြောခဲ့ပြီး လုပ်ဆောင်ခဲ့သော အရာရာတိုင်း၊ သူ ထုတ်ဖော်ပြခဲ့သည့်အရာ၊ သူ၏ လုပ်ဆောင်မှုနှင့် သူပြေးခဲ့သော ပြေးရသည့်လမ်းတို့နှစ်ခုလုံးအပြင် ထိုနှစ်ခုလုံးအပေါ် သူ၏သဘောထားတို့ဖြစ်သည့် ဤအရာများနှင့်ပတ်သက်၍ သမ္မာတရားနှင့် ကိုက်ညီသောအရာ တစ်စုံတစ်ခုရှိသလော။ (မရှိပါ။) သူ့တွင် သမ္မာတရားနှင့် ကိုက်ညီသောအရာလုံးဝမရှိသကဲ့သို့ သူလုပ်ဆောင်ခဲ့သည့် မည်သည့်အရာကမျှ သခင်ယေရှုက လူတို့ကို လုပ်ဆောင်ရန် ညွှန်ကြားခဲ့သည့်အရာများနှင့် မကိုက်ညီပေ။ သို့သော် သူသည် ဤအရာအပေါ် ဆင်ခြင်သုံးသပ်ခဲ့သလော။ (မဆင်ခြင်မသုံးသပ်ခဲ့ပါ။) သူသည် ဤအရာအပေါ် လုံးဝ မဆင်ခြင်မသုံးသပ်ခဲ့သကဲ့သို့ ရှာဖွေခြင်းလည်း မပြုခဲ့ပေ။ ဤသို့ဆိုလျှင် သူ၏ စဉ်းစားပုံသည် မှန်ကန်သည်ဟု ယူဆခြင်းအတွက် သူ့တွင် မည်သည့်အခြေပြုချက်ရှိခဲ့သနည်း။ (သူ၏ အယူအဆများနှင့် စိတ်ကူးထင်မြင်ချက်များ ဖြစ်သည်။) ဤတွင် ပြဿနာတစ်ခုရှိသည်။ သူစိတ်ကူးထင်မြင်သည့်အရာတစ်ခုကို သူ၏တစ်ဘဝလုံး လိုက်စားမည့်ပန်းတိုင်အဖြစ် သူမည်သို့ပြုလုပ်နိုင်ခဲ့သနည်း။ သူသည် တစ်ခုခုစဉ်းစားဆင်ခြင်ကြည့်ခဲ့သလော၊ သို့မဟုတ် “ငါထင်သည်မှာ မှန်ကန်သလော။ အခြားလူများက ဤသို့မစဉ်းစားပေ။ ငါသာ ဖြစ်သည်။ ဤသည်မှာ ပြဿနာတစ်ခုလော” ဟူ၍ သူ့ကိုယ်သူ မေးမြန်းခဲ့သလော။ သူ့တွင် ဤသံသယများမရှိရုံမကဘဲ လူတိုင်းဖတ်နိုင်ရန်အတွက် သူ၏အတွေးများကို စာဖြင့်ချရေးကာ အသင်းတော်အားလုံးဆီသို့ ပို့ခဲ့သည်။ ဤအပြုအမူ၏ သဘောသဘာဝမှာ အဘယ်နည်း။ ဤတွင် ပြဿနာတစ်ခုရှိသည်။ သူသည် သူ၏စဉ်းစားပုံက သမ္မာတရားနှင့်ညီသလောဟူသည်ကို အဘယ်ကြောင့် လုံးဝ မေးခွန်းမထုတ်ခဲ့သနည်း။ အဘယ်ကြောင့် သမ္မာတရားကို မရှာဖွေခဲ့သနည်း၊ သို့မဟုတ် သခင်ယေရှုပြောခဲ့သည့်အရာနှင့် နှိုင်းယှဉ်မကြည့်ခဲ့သနည်း။ ဤအစား သူစိတ်ကူးထင်မြင်ခဲ့သည့်အရာနှင့် သူ့အယူအဆတွင် မှန်ကန်သည်ဟု သူထင်မြင်ခဲ့သည့်အရာတို့ကို သူလိုက်စားသင့်သည့်ပန်းတိုင်များအဖြစ် သဘောထားခဲ့သည်။ ဤတွင် ပြဿနာသည် အဘယ်နည်း။ သူ စိတ်ကူးထင်မြင်ခဲ့သည့်အရာနှင့် သူတွေးသည့်အရာသည် သမ္မာတရားကဲ့သို့ မှန်ကန်သည်ဟု သဘောထားပြီး လိုက်စားရန် ပန်းတိုင်တစ်ခုအဖြစ် သဘောထားခဲ့သည်။ ဤသည်မှာ အလွန်အကျွံမာနထောင်လွှားပြီး မိမိကိုယ်ကို မှန်သည်ဟု ယူမှတ်ခြင်း မဟုတ်လော။ ဘုရားသခင်သည် သူ၏ စိတ်နှလုံးတွင် နေရာတစ်ခုရှိသေးသလော။ သူသည် ဘုရားနှုတ်ကပတ်တော်များကို သမ္မာတရားအဖြစ် မှတ်ယူနိုင်သေးသလော။ သူသည် ဘုရားနှုတ်ကပတ်တော်များကို သမ္မာတရားအဖြစ် သဘောမထားနိုင်လျှင် ဘုရားသခင်အပေါ် သူ၏သဘောထားမှာ မည်သို့ဖြစ်မည်နည်း။ သူသည်လည်း ဘုရားသခင် ဖြစ်လိုသလော။ ဤသို့မဟုတ်လျှင် သူသည် သူ၏ကိုယ်ပိုင်အတွေးများတွင် သူစိတ်ကူးခဲ့သည့်အရာနှင့် သူ၏အယူအဆများကို သူ လိုက်စားသင့်သည့် ပန်းတိုင်များအဖြစ် သဘောထားမည်မဟုတ်သကဲ့သို့ သူ၏အယူအဆများ၊ သို့မဟုတ် သူစိတ်ကူးထင်မြင်ခဲ့သည့်အရာများကို သမ္မာတရားကဲ့သို့ လိုက်စားမည်လည်း မဟုတ်ပေ။ သူတွေးသည့်အရာသည် သမ္မာတရား ဖြစ်သည်ဟုလည်းကောင်း၊ သမ္မာတရားနှင့် ဘုရားသခင်၏ ရည်ရွယ်ချက်များနှင့် ကိုက်ညီသည်ဟုလည်းကောင်း သူယုံကြည်ခဲ့သည်။ သူက မှန်ကန်သည်ဟု ထင်မြင်ခဲ့သည့်အရာကို အသင်းတော်များရှိ ညီအစ်ကိုမောင်နှမများနှင့်လည်း မျှဝေခဲ့ပြီး ၎င်းတို့အတွင်းသို့ သွတ်သွင်းကာ လူတိုင်းအား သူပြောသည့် အဓိပ္ပာယ်မရှိသောအရာများကို လိုက်နာစေခဲ့သည်။ သခင်ယေရှု၏ စကားများကို သူ့ကိုယ်ပိုင်စကားများဖြင့် အစားထိုးခဲ့ပြီး သူ့အနေဖြင့် အသက်ရှင်ခြင်းသည် ခရစ်တော်ဖြစ်သည်ဆိုသည်ကို သက်သေခံရန် သူ၏ ဤအဓိပ္ပာယ်မရှိသောစကားများအား အသုံးပြုခဲ့သည်။ ဤသည်မှာ ပေါလုတွင်ရှိခဲ့သော ဒုတိယအကြီးစားအပြစ်မဟုတ်လော။ ဤပြဿနာသည် အလွန့်အလွန်ဆိုးဝါးလှပေတကား။

ခေတ်ကာလများတစ်လျှောက်တွင် ပေါလုနှင့် ဆင်တူသည့်လူ များစွာရှိခဲ့သည်။ ဤသို့ဆိုလျှင် ငါတို့သည် အဘယ်ကြောင့် ပေါလုကို အကောင်းဆုံးဥပမာအဖြစ် အသုံးပြုသနည်း။ ကျမ်းစာထဲတွင် သူ့ကို မှတ်တမ်းတင်ထားသောကြောင့် ဖြစ်သည်။ ပြီးလျှင် သူပြောခဲ့သည့် မိစ္ဆာဒိဋ္ဌိအယူများနှင့် မှားယွင်းပြီး အဓိပ္ပာယ်မဲ့သောအရာများတို့အပြင် သူကိုယ်တိုင်သည် ခရစ်ယာန်အားလုံးအပေါ် ကြီးမားသော သက်ရောက်မှုရှိသောကြောင့် ဖြစ်သည်။ သူ ဖြစ်ပေါ်စေခဲ့သော ထိခိုက်မှုမှာ ကြီးမားလွန်းသည်ဟု ဆိုနိုင်သည်။ သူ့ကြောင့် အထင်အမြင်မှားကာ အဆိပ်ခတ်ခံရသောသူများစွာရှိသည်။ သူသည် လူမျိုးဆက်များစွာကို အဆိပ်ခတ်ခဲ့ရုံသာမကဘဲ အဆိပ်သည် နက်ရှိုင်းသောနေရာအထိ သွားသည်။ မည်မျှ နက်ရှိုင်းသနည်း။ (ခရစ်ယာန်အားလုံးက သူ့ကို စံနမူနာတစ်ခုအဖြစ် မြင်ပြီး အတုခိုးသည်။ သူ၏စကားများကို ဘုရားသခင်၏ စကားများကဲ့သို့ လက်တွေ့လုပ်ဆောင်ကြသည်။) သင်က ခရစ်တော်၏ နှုတ်ကပတ်တော်များနှင့် ဘုရားနှုတ်ကပတ်တော်များကို မိတ်သဟာယဖွဲ့လျှင် မည်သူကမျှ အလွန်အရေးတယူမလုပ်။ သို့သော် ပေါလု၏ စကားများကို သင်မိတ်သဟာယဖွဲ့သောအခါ ၎င်းတို့က ရုတ်ချည်းပင် ကိုယ်ခန္ဓာမတ်ကာ နားထောင်ကြသည်။ ဤသည်မှာ မည်သည့်အရာကို ဆိုလိုသနည်း။ (ပေါလုကို ခရစ်တော်ကဲ့သို့ ဆက်ဆံခြင်းကို ဆိုလိုပါသည်။) လူတို့သည် ပေါလုကို ခရစ်တော်ကဲ့သို့ ဆက်ဆံသောအခါ သူသည် လူတို့၏ စိတ်နှလုံးတွင်ရှိသော သခင်ယေရှုခရစ်တော်၏နေရာကို ယူပြီး ဖြစ်သည်။ ဤသည်မှာ အလွန့်အလွန် အတိုင်းအဆများသော အပြစ်တစ်ခု မဟုတ်လော။ (ဟုတ်ပါသည်။) ပေါလုသည် သမိုင်းတွင် အကြီးဆုံးသော အန္တိခရစ်ဖြစ်သည်။ သူ့စကားများ၏ ရည်ရွယ်ချက်သည် အလွန့်အလွန် သိသာသည်။ သူ၏ ပန်းတိုင်များနှင့် မသိမသာ အန္တရာယ်ရှိမှုကို ရှင်းလင်းစွာပင် ပြသထားသည်။ သူ၏ အနှစ်သာရသည် အလွန့်အလွန်ပင် မသိမသာဖြင့် အန္တရာယ်များပြီး အဆိပ်ရှိသည်။ ဤအရာ၏ သဘာဝမှာ လွန်စွာပင် ပြဿနာရှိသည်။ ဤအတွက်ကြောင့် ဤအရာကို ငါထုတ်ပြောပြီး စိစစ်ခြင်း ဖြစ်သည်။ ဤသို့မလုပ်လျှင် လူတို့သည် ဆက်လက်၍ သူ၏ အထင်အမြင်မှားအောင်ပြုလုပ်ခြင်းကို ခံရမည် ဖြစ်သည်။ သို့ရာတွင် ငါသည် ပေါလု၏ ပြဿနာများကို စိစစ်မည်ဆိုလျှင် မလုပ်ဆောင်ရမည့် စံနမူနာတစ်ခုအနေဖြင့် ယနေ့ခေတ်လူတို့အတွက် သူ့အား ပိုမိုကောင်းမွန်သော အသုံးဝင်မှုတစ်ခုဖြစ်အောင် လုပ်ဆောင်ဖို့ လိုအပ်ခဲ့သည်။ ယခုပင် ပေါလု၏ အပြစ်နှစ်ခုကို ငါတို့ အနှစ်ချုပ်ခဲ့သည်။ ပထမအပြစ်မှာ အဘယ်နည်း။ (ပေါလုသည် အလုပ်နှင့် ပြေးရသောလမ်းကို ပြေးခြင်းအား သရဖူအတွက် သူဖလှယ်နိုင်သော တိုကင်ပြားအဖြစ် သဘောထားခဲ့သည်။ ကောင်းချီးများနှင့် သရဖူ ရရှိခြင်းကို သူလိုက်စားသင့်သည့် သင့်လျော်သောပန်းတိုင်အဖြစ် သူမြင်ခဲ့သည်။) ယင်းမှာ မှန်ကန်သည်။ ပေါလု၏ အကြီးမားဆုံး ပြဿနာမှာ ဤအရာများကို သူလိုက်စားသင့်သည့်ပန်းတိုင်များအဖြစ် မှတ်ယူခဲ့ခြင်း ဖြစ်သည်။ အစကတည်းက ယင်းသည် ယင်းနှင့်အတူ ပုန်ကန်မှုနှင့် ကောက်ကျစ်ဆိုးယုတ်သော သဘာဝတစ်ခုကို သယ်ဆောင်သည့် အပေးအယူတစ်ခု ဖြစ်သည်။ သို့သော် ပေါလုက ယင်းကို လိုက်စားရန် သင့်လျော်သောပန်းတိုင်အဖြစ် မှတ်ယူခဲ့သည်။ ဤသည်မှာ အပြင်းထန်ဆုံးသော ပြဿနာ ဖြစ်သည်။ ဒုတိယအပြစ်မှာ အဘယ်နည်း။ (ပေါလုသည် သူစိတ်ကူးထင်မြင်သည့်အရာများနှင့် သူ့အယူအဆတွင် မှန်ကန်သည်ဟု သူထင်သောအရာများကို သမ္မာတရားအဖြစ် မှတ်ယူခဲ့သည်။ ဤအရာအပေါ် လုံးဝ ပြန်လှန်သုံးသပ်ခဲ့ခြင်း မရှိပါ၊ သို့မဟုတ် ဤအရာနှင့်ပတ်သက်ပြီး မရှာဖွေခဲ့ပါ။ ဤအစား လူတို့ကို အထင်အမြင်မှားစေခဲ့သည်။ ပြီးလျှင် သူ၏စကားများနှင့် အဓိပ္ပာယ်မရှိသော သဘောတရားများအား ညီအစ်ကိုမောင်နှမများကို လိုက်နာစေခဲ့သည်။ လူတို့အား သူ့ကို ခရစ်တော်ကဲ့သို့ မှတ်ယူစေခဲ့သည်။) ဤသည်မှာ အထူးပင် ဆိုးရွားသော ပြဿနာတစ်ခု ဖြစ်သည်။ ဤပြဿနာများကို တိကျစွာ မှတ်သားလော့။ ယင်းတို့ကို အနှစ်ချုပ်၍ ပြီးသည့်နောက်တွင် သင်သည် သင့်ကိုယ်သင် ယင်းတို့နှင့် နှိုင်းယှဉ်ကြည့်သင့်သည်။ အကြောင်းအရာတစ်ခုကို ငါတို့ ဆွေးနွေးသည့်အခါ ဦးစွာ သမ္မာတရား၏ ထိုသီးသန့် သွင်ပြင်လက္ခဏာအကြောင်းကို ပြောပြီး ထို့နောက်တွင် နှိုင်းယှဉ်မှုများ ပြုလုပ်ရမည်။ ပေါလုက သူ့ကိုယ်သူ ပြသခဲ့သည့် ပုံစံကို စိစစ်ခြင်းသည် လူတိုင်းအပေါ် သတိပေးချက်တစ်ခုအဖြစ် အသုံးဝင်သည့်အပြင် လူတို့အား မှန်ကန်သောလမ်းကြောင်းကို ၎င်းတို့ ရွေးချယ်သင့်ကြောင်း၊ ထို့နောက်တွင် တိကျမှန်ကန်သည့် လက်တွေ့လုပ်ဆောင်မှုလမ်းကြောင်းကို ရှာကာ ပေါလု၏ ခြေလှမ်းများနောက်သို့ လိုက်ခြင်းအား ရှောင်ကြဉ်သင့်ကြောင်းကိုလည်း ပြောပြသည်။ ဤသို့ဆိုလျှင် သင်သည် အပြည့်အဝပင် ထိရောက်လိမ့်မည်။

ပေါလုတွင် နောက်ထပ် ဆိုးရွာသော အပြစ်တစ်ခုရှိပြီး ယင်းမှာ သူ၏ အလုပ်ကို သူ၏စိတ်ပိုင်းဆိုင်ရာ အစွမ်းအစ၊ ပညာရေးအသိ၊ သဘောတရားဆိုင်ရာအသိအမြင်နှင့် သဘောတရားတို့အပေါ် လုံးလုံး အခြေခံ၍ လုပ်ဆောင်ခဲ့ခြင်းဖြစ်သည်။ ဤသည်မှာ သူ၏ သဘာဝအနှစ်သာရနှင့် သက်ဆိုင်သောအရာတစ်ခုဖြစ်သည်။ ဤအရာကို သင်တို့ အနှစ်ချုပ်သင့်သည်။ ထို့နောက်တွင် ဤအရာများအပေါ် သူ၏သဘောထားကို ဆန်းစစ်သင့်သည်။ ဤသည်မှာ အလွန်အရေးပါပြီး အရေးကြီးသော အပြစ်တစ်ခု ဖြစ်သည်။ ပြီးလျှင် လူတို့နားလည်ရမည့်အရာတစ်ခု ဖြစ်သည်။ ဤအပြစ်သည် ပေါလု၏ မည်သည့်သရုပ်သကန်များတွင် ပါဝင်သည်ကို အချိန်ခဏမျှ ချင့်ချိန်တွေးတောကြည့်လော့။ ဤသရုပ်သကန်များမှတစ်ဆင့် သူ၏ သဘာဝအနှစ်သာရမှာ မည်သည့်အရာဖြစ်သည်ကို ကြည့်ပြီး သူ၏ စိတ်အတွင်းတွင် မည်သည့်အရာကို သူအလေးထားသည်ဆိုသည်နှင့် သူ၏ ပန်းတိုင်များက မည်သည့်အရာဖြစ်သည်ဆိုသည့်အပေါ် ရှင်းလင်းစွာမြင်အောင် လုပ်ဆောင်လော့။ သူ၏ ရည်ရွယ်ချက်နှင့် ပန်းတိုင်များသည် မှားယွင်းသောလမ်းကြောင်းကို သူစတင် လျှောက်လှမ်းခဲ့သည့်အကြောင်းအရင်း၏ အရင်းအမြစ်တွင်ရှိသည်။ ဤသည်တို့မှာ သင့်အနေဖြင့် ရှင်းလင်းစွာ နားလည်ရန် အရေးကြီးဆုံးသောအရာများ ဖြစ်သည်။ ပေါလုတွင် မည်သည့်ဆုကျေးဇူးများရှိခဲ့သနည်း။ (ပေါလုသည် ပညတ်တော်ခေတ်မှ ကျမ်းစာဆိုင်ရာ အသိအမြင်များစွာကို ကောင်းစွာသဘောပေါက်သည်။) ထိုအချိန်တွင် ဓမ္မဟောင်းကျမ်းသာ ရှိသည်။ ပေါလုသည် ဤကျမ်းစာများနှင့် ရင်းနှီးသည်။ ပြီးလျှင် ယခုခေတ် ဓမ္မပညာ ဆရာများ၊ သင်းအုပ်ဆရာများ၊ တရားဟောဆရာများနှင့် ဆရာတော်များကဲ့သို့ပင် ဤကျမ်းစာများအကြောင်းကို အလွန်နှံ့စပ်လေသည်။ သူ၏ ဓမ္မပညာဆိုင်ရာ အသိအမြင်သည် ၎င်းတို့၏ အသိအမြင်ထက်ပင်ပို၍ ကျယ်ပြန့်နိုင်သည်။ သို့သော် သူသည် ဤအရာကို ကမ္ဘာလောက၌ မွေးဖွားလာပြီးနောက်တွင် သင်ယူခဲ့သည်။ ပေါလုသည် မွေးကင်းစမှ မည်သည့်အရာကို ပိုင်ဆိုင်ခဲ့သနည်း။ (သူ၏ မွေးရာပါအရည်အချင်းများ ဖြစ်သည်။) ပေါလုသည် သဘာဝအလျောက် ပါးနပ်သည်။ စကားပြောဆိုရာတွင် ကျွမ်းကျင်သည်။ သူ့ကိုယ်သူ ကောင်းစွာ ဖော်ပြပြီး စင်ပေါ်တွင် ကြောက်ရွံ့တုန်လှုပ်ခြင်း မဖြစ်ပေ။ သူ၏ မွေးရာပါ အရည်အချင်းများ၊ ဆုကျေးဇူးများ၊ အသိဉာဏ်၊ စွမ်းဆောင်နိုင်စွမ်းများအပြင် သူ၏အသက်တာတစ်လျှောက်တွင် သူသင်ယူခဲ့သော အသိအမြင်တို့အကြောင်းအား ပြောခြင်းကို ယခု အာရုံစိုက်ကြစို့။ သူသည် စကားပြောဆိုရာ၌ ကျွမ်းကျင်သည်ဆိုသည့်အချက်က မည်သည့်အရာကို ဆိုလိုသနည်း။ သူသည် မည်သည့်ပုံစံဖြင့် သူ့ကိုယ်သူ ထုတ်ဖောပြီး အသွင်ဆောင်သနည်း။ သူသည် အဆင့်မြင့်သော သဘောတရားများကို တောင်စဉ်ရေမရ ပြောဆိုရခြင်းအား နှစ်သက်သည်။ အလွန်လေးနက်သော ဝိညာဉ်ရေးဆိုင်ရာ အယူဝါဒ၊ သဘောတရားများနှင့် အသိပညာ၊ လူတို့ မကြာခဏပြောဆိုသည့် သူ၏ ထင်ရှားသောစာသားများနှင့် အဆိုအမိန့်များအကြောင်းတို့ကို စဉ်ဆက်မပြတ် ပြောဆိုခဲ့သည်။ ပေါလု၏ စကားများကို အနှစ်ချုပ်သည့် စကားတစ်ခွန်းမှာ အဘယ်နည်း။ (အနှစ်မဲ့ခြင်းဖြစ်သည်။) အနှစ်မဲ့သော စကားများသည် လူတို့အတွက် အပြုသဘောဆောင်သလော။ ထိုစကားများကို ၎င်းတို့ ကြားသောအခါ ၎င်းတို့သည် ရဲတင်းလာကြသော်လည်း အချိန်တစ်ခဏကြာပြီးနောက်တွင် ၎င်းတို့၏ အားမာန်တက်ကြွမှုက လျော့ပါးသွားသည်။ ပေါလုပြောဆိုသည့်အရာများသည် မရေမရာဖြစ်ပြီး အရိပ်ပမာဖြစ်သည်။ ခိုင်လုံသော အသုံးအနှုန်းများဖြင့် အမှန်တကယ် ချမပြနိုင်သောအရာများ ဖြစ်သည်။ သူပြောဆိုသည့် သဘောတရားများတွင် လက်တွေ့လုပ်ဆောင်ရန် မည်သည့်လမ်းကြောင်းကိုမျှ၊ သို့မဟုတ် လက်တွေ့လုပ်ဆောင်ရန် ဦးတည်ချက်ကို သင်ရှာမတွေ့နိုင်ပေ။ လက်တွေ့ဘဝတွင် သင်တိကျမှန်ကန်စွာ အသုံးချနိုင်သည့်အရာတစ်ခုကိုမျှ သင်ရှာမတွေ့နိုင်ပေ။ သဘောတရားများဖြစ်စေ၊ အခြေခံအုတ်မြစ်များဖြစ်စေ မည်သည့်အရာကမျှ လက်တွေ့ဘဝတွင် အသုံးချ၍မရနိုင်ပေ။ ဤအတွက်ကြောင့် သူပြောဆိုသည့် ဘာသာရေးသဘောတရားများနှင့် ဝိညာဉ်ရေးဆိုင်ရာအယူဝါဒသည် အနှစ်မရှိသော၊ လက်တွေ့မကျသော စကားများဖြစ်သည်ဟု ငါဆိုခြင်း ဖြစ်သည်။ ဤအရာများအား ပြောဆိုရာတွင် ပေါလု၏ ရည်မှန်းချက်မှာ အဘယ်နည်း။ လူအချို့က “သူသည် ပို၍များသောလူတို့အား သိမ်းသွင်းလိုသောကြောင့်၊ ၎င်းတို့အား သူ့ကို ကြောက်ရွံ့ပြီး အထင်ကြီးလေးစားစေရန် လုပ်ဆောင်လိုသောကြောင့် ဤအရာများကို အစဉ်ပြောခြင်း ဖြစ်သည်။ သူသည် ကောင်းချီးခံစားရစေရန် သခင်ယေရှု၏ နေရာကို ယူလိုပြီး ပို၍များသောလူတို့အား စည်းရုံးလိုသည်” ဟု ဆိုကြသည်။ ဤသည်မှာ ယနေ့ ငါတို့ပြောလိုသည့် အကြောင်းအရာဟုတ်သလော။ (မဟုတ်ပါ။) ပြုပြင်ခြင်းမခံရသေးသော၊ တရားစီရင်ခြင်း၊ သို့မဟုတ် ပြစ်တင်ဆုံးမခြင်း မခံရသေးသော၊ စမ်းသပ်မှုများ၊ သို့မဟုတ် စစ်ဆေးမှုကို မဖြတ်သန်းရသေးသော၊ သူကဲ့သို့ ဆုကျေးဇူးများရှိပြီး ဤသို့ ကြွားဝါပြီး သူပြသခဲ့သော အပြုအမူကို ပြသသည့် အန္တိခရစ်တစ်ဦး၏ သဘာဝအနှစ်သာရရှိသည်မှာ အလွန့်အလွန်ပင် ပုံမှန်သာဖြစ်သည်။ ထို့ကြောင့် ဤအကြောင်းအရာကို ငါတို့ နှိုက်ချွတ်၍ စူးစမ်းမည်မဟုတ်။ မည်သည့်အရာကို ငါတို့ နှိုက်ချွတ်၍ စူးစမ်းမည်နည်း။ သူ၏ ဤပြဿနာ၏ အနှစ်သာရ၊ ဤအရာများကို သူလုပ်ဆောင်ခြင်းနောက်ကွယ်ရှိ အရင်းအမြစ်နှင့် အရင်းခံအကြောင်းအရင်း၊ ဤပုံစံဖြင့် လုပ်ဆောင်ရန် သူ့ကို လှုံ့ဆော်ခဲ့သည့်အရာတို့ ဖြစ်သည်။ ယနေ့ခေတ် လူတို့သည် သူပြောခဲ့သည့်အရာများအားလုံးကို အယူဝါဒ၊ သဘောတရားများ၊ ဓမ္မပညာဆိုင်ရာ အသိပညာ၊ မွေးရာပါဆုကျေးဇူးများ၊ သို့မဟုတ် အမှုအရာများအပေါ် သူကိုယ်တိုင်၏ အနက်ဖွင့်ဆိုမှုတို့အဖြစ် မြင်မည်ဖြစ်စေ၊ မမြင်မည်ဖြစ်စေ ယေဘုယျအားဖြင့်ဆိုလျှင် ပေါလု၏ အကြီးဆုံးပြဿနာသည် လူသား၏စိတ်မှ လာသည့်အရာများကို သမ္မာတရားအဖြစ် သဘောထားခဲ့ခြင်း ဖြစ်သည်။ ဤအတွက်ကြောင့် သူသည် လူတို့ကို သိမ်းသွင်းပြီး သင်ကြားပေးရန်အတွက် ဤဓမ္မပညာဆိုင်ရာ သဘောတရားများကို ပြတ်သားစွာ၊ ရဲတင်းစွာ၊ ပွင့်လင်းစွာ အသုံးပြုဖို့ သတ္တိရှိခဲ့ခြင်း ဖြစ်သည်။ ဤသည်မှာ ပြဿနာ၏ အနှစ်သာရ ဖြစ်သည်။ ဤသည်မှာ ဆိုးရွားသော ပြဿနာတစ်ခု ဟုတ်သလော။ (ဟုတ်ပါသည်။) သူသည် မည်သည့်အရာများကို သမ္မာတရားအဖြစ် မြင်သနည်း။ သူ၏မွေးရာပါ ဆုကျေးဇူးများအပြင် အသက်တာတစ်လျှောက်တွင် သူသင်ယူခဲ့သော အသိပညာနှင့် ဓမ္မပညာဆိုင်ရာ သဘောတရားများတို့ကို ဖြစ်သည်။ သူ၏ ဓမ္မပညာဆိုင်ရာ သဘောတရားများကို ဆရာများထံမှ၊ ကျမ်းစာများကို ဖတ်ခြင်းမှ သင်ယူခဲ့ခြင်း ဖြစ်ပြီး သူနားလည်ကာ စိတ်ကူးထင်မြင်ခဲ့သည့်အရာမှလည်း ဖြစ်ပေါ်လာခြင်း ဖြစ်သည်။ သူသည် သူ၏လူသားနားလည်မှု၏ အယူအဆများနှင့် စိတ်ကူးထင်မြင်မှုများကို သမ္မာတရားအဖြစ် သဘောထားခဲ့သည်။ သို့သော် ဤသည်မှာ အဆိုးရွားဆုံး ပြဿနာမဟုတ်။ ပို၍ပင် ကြီးသော ပြဿနာတစ်ခုရှိသည်။ သူသည် ထိုအရာများကို သမ္မာတရားအဖြစ် သဘောထားခဲ့သည်။ သို့သော် ထိုအချိန်က ထိုအရာများသည် သမ္မာတရားဖြစ်သည်ဟု သူ ထင်မြင်ခဲ့သလော။ သမ္မာတရားသည် မည်သည့်အရာဖြစ်သည်ဟူသည့် အယူအဆ သူ့တွင်ရှိသလော။ (မရှိခဲ့ပါ။) ဤသို့ဆိုလျှင် သူသည် ထိုအရာများကို မည်သည့်အရာအဖြစ် သဘောထားခဲ့သနည်း။ (အသက်အဖြစ် သဘောထားခဲ့သည်။) သူသည် ထိုအရာများအားလုံးကို အသက်အဖြစ် သဘောထားခဲ့သည်။ တရားဒေသနာများကို သူဟောနိုင်လေလေ၊ သို့မဟုတ် အဆင့်မြင့်လေလေ သူ၏အသက်က ပို၍ ကြီးမြတ်လေလေဖြစ်မည်ဟု သူထင်ခဲ့သည်။ ထိုအရာများကို အသက်အဖြစ် သူ သဘောထားခဲ့သည်။ ဤသည်မှာ အရေးကြီးသောအမှုကိစ္စဟုတ်သလော။ (ဟုတ်သည်။ အရေးကြီးသည်။) ဤအရာသည် မည်သည့်သက်ရောက်မှုရှိသနည်း။ (သူလိုက်လျှောက်သည့် လမ်းကြောင်းပေါ်တွင် သက်ရောက်မှုရှိသည်။) ဤသည်မှာ တစ်ပိုင်းဖြစ်သည်။ အခြားမည်သည့်အရာ ရှိသေးသနည်း။ (ဤအရာများကို ရရှိခြင်းသည် သူ့ကို ကယ်တင်ခြင်းယူဆောင်ပေးမည်ဖြစ်ပြီး ကောင်းကင်နိုင်ငံတော်သို့ ဝင်ရသောအခွင့်ကိုရမည်ဟု သူထင်ခဲ့သည်။) ယင်းသည် ကောင်းချီးများရရှိခြင်းနှင့် သက်ဆိုင်သေးသည်။ သူ၏အသက်က ကြီးမြတ်လေလေ၊ ကောင်းကင်နိုင်ငံတော်သို့ ဝင်ရောက်ပြီး ကောင်းကင်ဘုံသို့ တက်ရန် သူ၏ အခွင့်အရေးက ကြီးမားလေလေဖြစ်သည်ဟု သူထင်ခဲ့သည်။ “ကောင်းကင်ဘုံသို့ တက်ခြင်း” ဟု ပြောသည့် အခြားနည်းလမ်းတစ်ခုမှာ အဘယ်နည်း။ (ဘုရားသခင်နှင့် ယှဉ်တွဲလျက် အုပ်စိုးပြီး အာဏာစွဲကိုင်ခြင်း ဖြစ်သည်။) ကောင်းကင်နိုင်ငံတော်သို့ ဝင်ရောက်ခြင်းတွင် သူ၏ ရည်ရွယ်ချက်မှာ ဘုရားသခင်နှင့် ယှဉ်တွဲလျက် အုပ်စိုးပြီး အာဏာစွဲကိုင်ရန် ဖြစ်သည်။ သို့သော် ဤသည်မှာ သူ၏ အဆုံးစွန်ပန်းတိုင်မဟုတ်။ နောက်တစ်ခုရှိသည်။ ထိုအကြောင်းကို သူပြောခဲ့သည်။ မည်သို့ ပြောခဲ့သနည်း။ (“အသက်ရှင်သည့်အရာမှာ ခရစ်တော်ဖြစ်၏။ သေလျှင်မူကား၊ သာ၍အကျိုးရှိ၏။” (ဖိလိပ္ပိ သြဝါဒစာ ၁:၂၁)) သူ့အနေဖြင့် အသက်ရှင်သည့်အရာမှာ ခရစ်တော်ဖြစ်၏၊ သေလျှင်မူကား သာ၍အကျိုးရှိ၏ဟု သူဆိုခဲ့သည်။ ဤသည်မှာ မည်သည့်အရာကို ဆိုလိုသနည်း။ သူသေဆုံးပြီးနောက်တွင် ဘုရားအဖြစ် ပြောင်းသွားမည်ဟု ဆိုလိုသလော။ သူ၏ ရည်မှန်းချက်သည် အကန့်အသတ်မရှိ။ သူ၏ ပြဿနာသည် အလွန်ဆိုးရွားသည်။ ဤသို့ဆိုလျှင် ပေါလု၏ အမှုကို ငါတို့ စိစစ်ခြင်းသည် မှားယွင်းသလော။ လုံးဝ မမှားယွင်းပေ။ သူ၏ ဆုကျေးဇူးများနှင့် သူသင်ယူခဲ့သော အသိပညာကို အသက်အဖြစ် သူ လုံးဝ သဘောမထားခဲ့သင့်ပေ။ ဤသည်မှာ သူ၏ တတိယအကြီးစား အပြစ်ဖြစ်သည်။ ဤအပြစ်သုံးခုရှိ မည်သည့်အပြစ်မဆိုတွင် ပေါလု၏ သဘာဝအနှစ်သာရကို မြင်နိုင်သည်။ သူ၏ သဘာဝအနှစ်သာရ၏ ဝိသေသလက္ခဏာများသည် အပြစ်တစ်ခုစီတွင် ဖော်ထုတ်ခြင်းခံရသည်။ မည်သည့်အရာမျှ ကွယ်ဝှက်မနေပေ၊ သို့မဟုတ် မကျန်ရှိပေ။ သူ၏ သဘာဝအနှစ်သာရသည် ယင်းတို့အားလုံးတွင် ကိုယ်စားပြုသည်။

နောက်တစ်ခုတွင် ပေါလု၏ အရေးပါဆုံးနှင့် အဆိုးရွားဆုံး ပြဿနာများကို ငါတို့ ကြည့်မည်။ ယင်းတို့သည် သူ၏ သဘောထားကို အထင်ဟပ်ဆုံးဖြစ်သည်။ ပေါလုရေးခဲ့သည့် စာများတွင် မည်သည့်စကားလုံးများကို သူ မကြာခဏ အသုံးပြုသနည်း။ ကျမ်းစာ၏ မူရင်းစာသားက မည်သည့်အရာပြောသည်ကို သွား၍ ကြည့်လော့။ ပြီးလျှင် ယင်းကို ငါတို့ ပိုင်းခြားပြီး စိစစ်မည်။ သူ၏ စိတ်တွင် အမှန်တကယ် မည်သည့်အရာရှိသည်ကို၊ ဘုရားသခင်က သူ့အား အဘယ်ကြောင့် ရွံရှာမုန်းတီးသည်ကို ကြည့်မည်။ ပေါလုကဲ့သို့ ထင်ရှားပြီး အစောပိုင်းအသင်းတော်များ၏ အမှုအတွက် အရေးပါသည့်သူတစ်ယောက်သည် အဘယ်ကြောင့် အပြစ်ဒဏ်ခံရခြင်းနှင့် အဆုံးသတ်ရသနည်း။ ဘုရားသခင်သည် သူ၏ စိတ်တွင် ပေါလုကို မည်သို့အကဲဖြတ်ခဲ့သနည်း။ ဘုရားသခင်က သူ့ကို မည်သို့မြင်ခဲ့သနည်း။ ဘုရားသခင်က သူ့အား အဘယ်ကြောင့်ဤပုံစံဖြင့် အကဲဖြတ်ပြီး ထိုသို့သော ဆုံးဖြတ်ချက်မျိုးကို ချမှတ်ခဲ့သနည်း။ ဘုရားသခင်သည် နောက်ဆုံးတွင် မည်သည့်အရာအပေါ် အခြေခံပြီး ပေါလုကို အဓိပ္ပာယ်သတ်မှတ်ကာ သူ၏ အဆုံးသတ်ကို အဆုံးအဖြတ်ပေးခဲ့သနည်း။ သူသည် ဘုရားသခင်အား မည်သို့အတိုက်အခံလုပ်ခဲ့သည်ဆိုသည့်အချက်ကို လူတို့မြင်နိုင်ရန်အတွက် ဤအရာများအားလုံးကို စာရင်းပြုစုလော့။ ဤသို့ဖြင့် သူသည် မှားယွင်းစွာ စီရင်ခံရသည်ဟု ၎င်းတို့ ထင်လိမ့်မည်မဟုတ်။ လူတို့သည် သမ္မာတရားကို နားမလည်သောအခါ ၎င်းတို့သည် အပေါ်ယံအသွင်အပြင်များကို အခြေခံ၍ လူတို့ကို အဓိပ္ပာယ်သတ်မှတ်လေ့အရှိဆုံးဖြစ်သည်။ အခြားလူများကို ၎င်းတို့၏ အပြင်ပန်းအသွင်အပြင်အရ အဓိပ္ပာယ်သတ်မှတ်ခြင်းအတွက် လူတို့၏ အခြေပြုချက်မှာ အဘယ်နည်း။ တစ်စိတ်တစ်ပိုင်းမှာ ရိုးရာယဉ်ကျေးမှုနှင့် လူ့အဖွဲ့အစည်းဆိုင်ရာ သွန်သင်မှုများဖြစ်သည်။ အခြားအပိုင်းမှာ အိမ်တွင်းပညာရေး၊ အဖြူ၊ အမဲစိတ်ကူးနှင့် အယူအဆများ၊ အမှန်၊ အမှားနှင့်ပတ်သက်သော စိတ်ကူးများနှင့် အယူအဆများတို့ ဖြစ်သည်။ သည့်အပြင် အခြားအပိုင်းမှာ ကျောင်းပညာရေးဖြစ်သည်။ အတူစုပေါင်းလျှင် ဤအရာများသည် စာတန်ဆန်သော ပညာရေးစနစ်တစ်ခုလုံး ပါဝင်သည်။ စာတန်က လူတို့တွင် ဤအရာများကို သွတ်သွင်းသည့် အကျိုးဆက်မှာ လူတို့သည် ၎င်းတို့၏ ကိုယ်ပိုင်အယူအဆများ၊ နှစ်သက်မှုများအတိုင်း ဤအရာကို ကောင်းသည်၊ ထိုအရာကို ဆိုးသည်၊ ဤအရာသည် မှန်သည်၊ ထိုအရာသည် မှားသည်ဟု အဓိပ္ပာယ်သတ်မှတ်ကြခြင်း ဖြစ်သည်။ လူတို့တွင်ရှိသော ဤအဓိပ္ပာယ်ဖွင့်ဆိုချက်များအားလုံးအတွက် အခြေပြုချက်မှာ အဘယ်နည်း။ အမှန်တကယ်တွင် ယင်းတို့သည် စာတန်ဆန်သော သဘောတရားများနှင့် အတွေးအခေါ်များအပေါ်တွင် အခြေခံသည်။ လူတို့တွင်ရှိသည့် ဤအခြေပြုချက်များသည် ဘုရားသခင်ထံမှဖြစ်စေ၊ သမ္မာတရားထံမှဖြစ်စေ လာခြင်း လုံးဝ မဟုတ်ပေ။ ဤအတွက်ကြောင့် ဖောက်ပြန်ပျက်စီးသော လူသားများသည် လူတစ်ယောက်၊ သို့မဟုတ် ဖြစ်ရပ်တစ်ခုကို မည်သို့ အဓိပ္ပာယ်ဖွင့်ဆိုပါစေ မှားယွင်းခြင်း ဖြစ်သည်။ ယင်းသည် သမ္မာတရားနှင့် ဆက်စပ်မှုမရှိသကဲ့သို့ ဘုရားသခင်၏ ရည်ရွယ်ချက်များနှင့် မညီပေ။ ဘုရားသခင်၊ သို့မဟုတ် ဘုရားနှုတ်ကပတ်တော်များနှင့် လုံးဝ မသက်ဆိုင်ပေ။ ဘုရားသခင်သည် သူ၏စိတ်သဘောထားနှင့် အနှစ်သာရနှင့်အညီ လူများနှင့် ဖြစ်ရပ်များအပေါ် ဆုံးဖြတ်ချက် ချမှတ်သည်။ ဘုရားသခင်၏ စိတ်သဘောထားနှင့် အနှစ်သာရမှာ အဘယ်နည်း။ သမ္မာတရားဖြစ်သည်။ သမ္မာတရားသည် အပြုသဘောဆောင်သော အရာများအားလုံး၏ ဖော်ပြချက်ဖြစ်ပြီး အပြုသဘောဆောင်သော အရာများအားလုံး၏ စစ်မှန်မှုဖြစ်သည်။ ဘုရားသခင်သည် ဖြစ်တည်နေသော အရာရာတိုင်းကိုလည်းကောင်း၊ လူတို့ ထိတွေ့မှုရှိသော လူများ၊ ဖြစ်ရပ်များနှင့် အမှုအရာများအားလုံးကိုလည်းကောင်း သမ္မာတရားနှင့်အညီ ဆုံးဖြတ်ချက် ချမှတ်သည်။ ဘုရားသခင်သည် လူတို့နှင့်ပတ်သက်ပြီး သူ၏ ဆုံးဖြတ်ချက်ကို ၎င်းတို့၏ သဘာဝအနှစ်သာရ၊ ၎င်းတို့၏ လုပ်ဆောင်မှုများကို မည်သည့်အရာက တွန်းအားပေးသည်၊ ၎င်းတို့လျှောက်နေသည့် လမ်းကြောင်း၊ အပြုသဘောဆောင်သော အရာများနှင့် သမ္မာတရားအပေါ် ၎င်းတို့၏ သဘောထားတို့အပေါ်တွင် အခြေခံသည်။ ဤသည်မှာ ဘုရားသခင်၏ ကောက်ချက်ချခြင်းများအတွက် အခြေပြုချက်ဖြစ်သည်။ အရာအားလုံးအပေါ် ဘုရားသခင်၏ ဆုံးဖြတ်ချက်သည် သမ္မာတရားအပေါ် အခြေခံသည်။ အရာအားလုံးကို သရုပ်ဖော်ဖွင့်ဆိုခြင်းအတွက် စာတန်၏ အခြေပြုချက်မှာ အဘယ်နည်း။ (သူကိုယ်တိုင်၏ တွေးခေါ်မှုနည်းစနစ်ဖြစ်သည်။) သမ္မာတရားနှင့် အတိအကျပင် ဆန့်ကျင်သည့် စာတန်ဆန်သော အတွေးအခေါ်နှင့် တွေးခေါ်မှုစနစ်ဖြစ်သည်။ လူသားမျိုးနွယ်တစ်ရပ်လုံးသည် စာတန်၏ ဖျက်ဆီးခြင်းကို ခံရသည်။ လူသားများတွင် သမ္မာတရားမရှိ။ ၎င်းတို့သည် စာတန်ကို ကိုယ်စားပြုပြီး ပုံဖော်သည်။ ၎င်းတို့သည် အရာအားလုံးကို စာတန်ဆန်သော အတွေးအခေါ်များနှင့် တွေးခေါ်မှုစနစ်အတိုင်း အဓိပ္ပာယ်ဖွင့်ဆိုသည်။ ထို့ကြောင့် ၎င်းတို့သည် အမှုအရာများကို အဓိပ္ပာယ်ဖွင့်ဆိုသောအခါ မည်သည့်ကောက်ချက်များကို ချကြသနည်း။ သမ္မာတရားနှင့် အတိအကျပင် အတိုက်အခံဖြစ်ပြီး ဆန့်ကျင်သော ကောက်ချက်များဖြစ်သည်။ ပေါလုက သူ၏စာများတွင် မကြာခဏအသုံးပြုသော စကားများကို သင်တို့တွေ့ပြီးဖြစ်သလော။ ယင်းတို့ကို ဖတ်ပြပါ။ (“ဘုရားသခင်၏အလိုတော်အားဖြင့် ယေရှုခရစ်၏ တမန်တော်အရာ၌ ခန့်ထားသော ငါပေါလု။” (ကောရိန္သုဩဝါဒစာပဌမစောင် ၁:၁)) မြင်သလော။ ဤသည်မှာ ဘုရားသခင်နှင့် ခရစ်တော်ကို ပေါလုက အဆင့်အတန်းသတ်မှတ်သည့်ပုံစံဖြစ်သည်။ “ဘုရားသခင်၏အလိုတော်အားဖြင့် ယေရှုခရစ်၏ တမန်တော်အရာ၌ ခန့်ထားသော ငါပေါလု။” ဤအဆင့်အတန်းတွင် ပေါလုက မည်သည့်နေရာတွင်ရှိသနည်း။ (တတိယနေရာတွင် ရှိသည်။) ပေါလု၏ စိတ်ထဲတွင် မည်သူက နံပါတ်တစ် ဖြစ်သနည်း။ (ဘုရားသခင် ဖြစ်ပါသည်။) နံပါတ်နှစ်က မည်သူနည်း။ (သခင်ယေရှုဖြစ်ပါသည်။) ယေရှုခရစ်တော် ဖြစ်သည်။ တတိယမှာ မည်သူနည်း။ (ပေါလု ကိုယ်တိုင် ဖြစ်သည်။) သူကိုယ်တိုင်ဖြစ်သည်။ “ဘုရားသခင်၏အလိုတော်အားဖြင့် ယေရှုခရစ်၏ တမန်တော်အရာ၌ ခန့်ထားသော ငါပေါလု။” ပေါလုသည် ဤစကားကို မကြာခဏ အသုံးပြုသည်။ ဤစကားသည် အချက်အလက်များစွာပါဝင်သော စကားဖြစ်သည်။ ပထမအနေဖြင့် ပေါလုသည် သခင်ယေရှုခရစ်တော်၏ တမန်တော်တစ်ပါးဖြစ်သည်ကို ငါတို့သိသည်။ ထို့ကြောင့် ပေါလု၏ ရှုထောင့်တွင် သခင်ယေရှုခရစ်တော်သည် မည်သူဖြစ်သနည်း။ သူသည် လူသားဖြစ်ပြီး ကောင်းကင်ဘုံရှိ ဘုရားသခင်၏ ဒုတိယဖြစ်သည်။ ပေါလုသည် သခင်ယေရှုခရစ်တော်အား အရှင်သခင်ဟု ခေါ်သည်ဖြစ်စေ၊ သခင်ဟု ခေါ်သည်ဖြစ်စေ သူ၏ ရှုထောင့်တွင် ကမ္ဘာပေါ်ရှိ ခရစ်တော်သည် ဘုရားမဟုတ်ဘဲ လူတို့ကို သွန်သင်ပေးကာ သူ့နောက်သို့လိုက်အောင်လုပ်နိုင်သောလူတစ်ယောက်ဖြစ်သည်။ ဤသို့သောသူတစ်ဦး၏ တမန်တော်အဖြစ် ပေါလု၏ အလုပ်သည် အဘယ်နည်း။ ဧဝံဂေလိဝေမျှရန်၊ အသင်းတော်များဆီသို့ သွားရောက်လည်ပတ်ရန်၊ တရားဒေသနာများ ဟောကြားရန်နှင့် စာများရေးရန် ဖြစ်သည်။ သူသည် ဤအရာများကို သခင်ယေရှုခရစ်တော်ကိုယ်စား လုပ်ဆောင်နေသည်ဟု ယုံကြည်ခဲ့သည်။ သူ၏ စိတ်နှလုံးတွင် “ကျွန်ုပ်သည် ကိုယ်တော် မသွားနိုင်သည့်နေရာသို့ သွားခြင်းအားဖြင့် ကိုယ်တော့်ကို ကူညီမည်။ ကိုယ်တော်မသွားလိုသည့်နေရာများတွင် ကိုယ်တော့်ကိုယ်စား ကျွန်ုပ်ကြည့်ပေးမည်” ဟု တွေးသည်။ ဤသည်မှာ ပေါလု၏ တမန်တော်တစ်ပါးနှင့်သက်ဆိုင်သည့် အယူအဆဖြစ်သည်။ သူ့စိတ်ရှိ အဆင့်အတန်းတွင် သူနှင့် သခင်ယေရှုနှစ်ဦးလုံးသည် သာမန်လူများဖြစ်သည်။ သူကိုယ်တိုင်နှင့် သခင်ယေရှုခရစ်တော်ကို တန်းတူညီသည်၊ လူသားများဖြစ်သည်ဟု မြင်ခဲ့သည်။ သူ့စိတ်တွင် ၎င်းတို့၏ နေရာကြားတွင် အခြေခံအားဖြင့် ကွာခြားမှုမရှိသကဲ့သို့ ၎င်းတို့၏ အမှုတော်ဆောင်ခြင်းများကို မဆိုထားနှင့် ၎င်းတို့၏ ပင်ကိုလက္ခဏာများ၌ပင် ကွာခြားမှုမရှိ။ ၎င်းတို့၏ အမည်၊ အသက်၊ မိသားစုအခြေအနေများနှင့် နောက်ခံများသာ ကွာခြားသည်။ ပြီးလျှင် ၎င်းတို့၌ မတူညီသော အပြင်ပန်းဆိုင်ရာ ဆုကျေးဇူးများနှင့် အသိပညာတို့ရှိသည်။ ပေါလု၏ စိတ်တွင် သူသည် အခြားပုံစံတိုင်းတွင် သခင်ယေရှုခရစ်တော်နှင့် တူညီပြီး လူသားဟုလည်း သူ့ကို ခေါ်ဆိုနိုင်သည်ဟူ၍ ဖြစ်သည်။ သူသည် သခင်ယေရှုခရစ်တော်၏ ဒုတိယဖြစ်ရသည့် တစ်ခုတည်းသောအကြောင်းရင်းမှာ သူသည် သခင်ယေရှု၏ တမန်တော်ဖြစ်သောကြောင့် ဖြစ်သည်။ သူသည် သခင်ယေရှုခရစ်တော်၏ တန်ခိုးအာဏာကို အသုံးချခဲ့ပြီး သခင်ယေရှုခရစ်တော်က သူ့အား အသင်းတော်များဆီသို့ လည်ပတ်ကာ အသင်းတော်အလုပ်လုပ်စေရန် စေလွှတ်ခြင်းကို ခံရသည်။ ဤသည်မှာ တမန်တော်အနေဖြင့် သူ၏ နေရာနှင့် ပင်ကိုလက္ခဏာဖြစ်သည်ဟု ပေါလုယုံကြည်ခဲ့သည့်အရာ ဖြစ်သည်။ ဤသည်မှာ သူအနက်အဓိပ္ပာယ်ဖွင့်ဆိုသည့် ပုံစံ ဖြစ်သည်။ ထို့အပြင် “ယေရှုခရစ်၏ တမန်တော်အရာ၌ ခန့်ထားသော ငါပေါလု” ဟူသည့် စကား၏ အဆုံးမတိုင်မီ စကားမှာ “ခန့်ထားသော” ဖြစ်သည်။ ဤစကားမှနေ၍ ပေါလု၏ စိတ်နေစိတ်ထားကို ငါတို့ မြင်နိုင်သည်။ သူသည် အဘယ်ကြောင့် “ဘုရားသခင်၏အလိုတော်အားဖြင့်…ခန့်ထားသော” ဟူသည့် စကားလုံးများကို အသုံးပြုခဲ့သနည်း။ သခင်ယေရှုခရစ်တော်က သူ၏တမန်တော်ဖြစ်ရန် သူ့အား ခန့်ထားသည်ဟု သူမထင်ခဲ့ပေ။ သူက “သခင်ယေရှုသည် ငါ့အား မည်သည့်အရာကိုဆို လုပ်ဆောင်ဖို့ အမိန့်ပေးရန် အာဏာမရှိ။ ငါသည် သူအမိန့်ပေးသည့်အတိုင်း လုပ်ဆောင်မည်မဟုတ်။ သူ့အတွက် မည်သည့်အရာကိုမျှ ငါလုပ်ဆောင်မည်မဟုတ်။ ဤထက် ကောင်းကင်ဘုံရှိ ဘုရားသခင်၏ အလိုတော်မှတစ်ဆင့် ဤအရာများကို ငါလုပ်ဆောင်နေခြင်း ဖြစ်သည်။ ငါသည် သခင်ယေရှုခရစ်တော်နှင့် တူညီသည်” ဟူ၍ တွေးခဲ့သည်။ ဤသည်မှာ အခြားသောအရာတစ်ခုကို ညွှန်ပြသည်။ ပေါလုက သခင်ယေရှုခရစ်တော်သည် သူ့ကဲ့သို့ပင် လူသားဖြစ်သည်ဟု ထင်ခဲ့သည်။ “ဘုရားသခင်၏အလိုတော်အားဖြင့်…ခန့်ထားသော” ဟူသည့် စကားလုံးလုံးများသည် ပေါလုက သူ၏စိတ်နှလုံးအတွင်းထဲရှိ သခင်ယေရှုခရစ်တော်၏ ပင်ကိုလက္ခဏာကို ငြင်းဆန်ပြီး သံသယဖြစ်ပုံကို ထုတ်ဖော်ပြသည်။ ပေါလုက သူသည် ဘုရားသခင်၏ အလိုတော်အားဖြင့် သခင်ယေရှုခရစ်တော်၏ တမန်တစ်ယောက် ဖြစ်သည်ဟုလည်းကောင်း၊ ဘုရားသခင်က သူ့အား စေခိုင်းခဲ့သည်၊ သူ့အား ဘုရားသခင်က စီမံပြီး ချမှတ်ပေးခဲ့သည်ဟုလည်းကောင်း၊ ဘုရားသခင်က သူ့ကို ခန့်ထားပြီး အလိုတော်ရှိသောကြောင့် သူက သခင်ယေရှုခရစ်တော်၏ တမန်တော်ဖြစ်လာခဲ့သည်ဟုလည်းကောင်း ဆိုခဲ့သည်။ ပေါလု၏ စိတ်တွင် ယင်းမှာ သူကိုယ်တိုင်နှင့် သခင်ယေရှုခရစ်တော်ကြားရှိ ဆက်ဆံရေး ဖြစ်သည်။ သို့ရာတွင် ဤသည်မှာ အဆိုးဆုံးအပိုင်းပင် မဟုတ်သေးပေ။ အဆိုးဆုံးအပိုင်းမှာ အဘယ်နည်း။ ပေါလုက သူသည် ဘုရားသခင်၏ အလိုတော်အားဖြင့် သခင်ယေရှုခရစ်တော်၏ တမန်တော်ဖြစ်ခဲ့သည်၊ သခင်ယေရှုခရစ်တော်၏ အလိုတော်အားဖြင့် မဟုတ်ဟုလည်းကောင်း၊ သူ့ကို ခန့်ထားသည်မှာ သခင်ယေရှုမဟုတ်ဘဲ သူ့အား လုပ်ဆောင်ရန်ခိုင်းစေခဲ့သော ကောင်းကင်ဘုံမှ ဘုရားသခင်ဖြစ်သည်ဟုလည်းကောင်း ထင်ခြင်း ဖြစ်သည်။ သူက သူ့အား သခင်ယေရှုခရစ်တော်၏ တမန်တော်တစ်ပါး ဖြစ်အောင်ပြုလုပ်ပေးရန် မည်သူကမျှ တန်ခိုး၊ သို့မဟုတ် အရည်အချင်းများ မရှိဟုလည်းကောင်း၊ ကောင်းကင်ဘုံရှိ ဘုရားသခင်သည်သာ ထိုတန်ခိုး ရှိသည်ဟုလည်းကောင်း၊ သူသည် ကောင်းကင်ဘုံရှိ ဘုရားသခင်က တိုက်ရိုက်လမ်းပြခြင်းကို ခံရခြင်းဖြစ်သည်ဟုလည်းကောင်း ထင်မြင်သည်။ ဤသို့ဆိုလျှင် ဤသည်မှာ မည်သည့်အရာကို ညွှန်ပြသနည်း။ ပေါလု၏ စိတ်နှလုံးအတွင်းထဲတွင် ကောင်းကင်ဘုံရှိ ဘုရားသခင်သည် နံပါတ်တစ်ဖြစ်ပြီး သူကိုယ်တိုင်က နံပါတ်နှစ်ဖြစ်သည်ဟု သူယုံကြည်သည်ကို ညွှန်ပြသည်။ ဤသို့ဆိုလျှင် သခင်ယေရှုကို မည်သည့်နေရာတွင် သူထားသနည်း။ (သူကိုယ်တိုင်နှင့် တူညီသည့်နေရာတွင် ထားသည်။) ဤသည်မှာ ပြဿနာ ဖြစ်သည်။ သူ၏ နှုတ်ဖြင့် သူသည် သခင်ယေရှုက ခရစ်တော်ဖြစ်သည်ဟု ထုတ်ဖော်ပြောသော်လည်း ခရစ်တော်၏ အနှစ်သာရက ဘုရားသခင်၏ အနှစ်သာရဖြစ်သည်ကို မသိမြင်ပေ။ ခရစ်တော်နှင့် ဘုရားသခင်ကြားရှိ ဆက်နွှယ်မှုကို သူ နားမလည်ခဲ့ပေ။ အလွန်ဆိုးရွားသောပြဿနာတစ်ခုကို ဖြစ်စေခဲ့သည်မှာ ဤနားလည်မှု ကင်းမဲ့ခြင်းကြောင့် ဖြစ်သည်။ ယင်းမှာ မည်သည့်ပုံစံဖြင့် ဆိုးရွားသနည်း။ (သခင်ယေရှုက လူ့ဇာတိခံဘုရားသခင်ဖြစ်သည်ကို သူ ဝန်မခံခဲ့ပါ။ သခင်ယေရှုကို သူငြင်းဆန်ခဲ့သည်။) ဟုတ်သည်။ ယင်းသည် အလွန်ပင် ဆိုးရွားသည်။ သခင်ယေရှုခရစ်တော်က ဘုရားသခင် လူ့ဇာတိခံခြင်းဖြစ်သည်ကိုလည်းကောင်း၊ သခင်ယေရှုခရစ်တော်သည် ကောင်းကင်ဘုံမှ ကမ္ဘာမြေသို့ ကြွဆင်းလာသောအခါတွင် ဘုရားသခင်၏ လူ့ဇာတိဖြစ်သည်ကိုလည်းကောင်း၊ သခင်ယေရှုခရစ်တော်သည် ဘုရားသခင်၏ လူ့ဇာတိခံ ဇာတိပကတိဖြစ်သည်ကိုလည်းကောင်း သူ ငြင်းဆန်ခဲ့သည်။ ဤသည်မှာ ပေါလုက ကမ္ဘာမြေပေါ်တွင် ဘုရားသခင်၏ ဖြစ်တည်မှုကို ငြင်းဆန်ခဲ့သည်ဟု သွယ်ဝိုက်မညွှန်းဆိုသလော။ (ညွှန်းဆိုပါသည်။) ကမ္ဘာမြေပေါ်တွင် ဘုရားသခင်၏ ဖြစ်တည်မှုကို သူငြင်းဆန်လျှင် သူသည် သခင်ယေရှု၏စကားများကို အသိအမှတ်ပြုနိုင်သလော။ (အသိအမှတ်မပြုနိုင်ပါ။) သူ၏ စကားများကို အသိအမှတ်မပြုခဲ့လျှင် သူ့ကို လက်ခံနိုင်ခဲ့သလော။ (လက်မခံနိုင်ခဲ့ပါ။) သူသည် သခင်ယေရှုခရစ်တော်၏ စကားများ၊ သွန်သင်မှုများ၊ သို့မဟုတ် ပင်ကိုလက္ခဏာကို လက်မခံခဲ့ပေ။ ထို့ကြောင့် သခင်ယေရှုခရစ်တော်၏ အလုပ်ကို သူ လက်ခံနိုင်ခဲ့သလော။ (လက်မခံနိုင်ခဲ့ပါ။) သခင်ယေရှုခရစ်တော် လုပ်ဆောင်ခဲ့သောအမှုကို သူလက်မခံခဲ့ပေ၊ သို့မဟုတ် သခင်ယေရှုခရစ်တော်က ဘုရားဖြစ်သည်ဆိုသည့်အချက်ကို လက်မခံခဲ့ပေ။ သို့တိုင်အောင် ဤသည်မှာ အဆိုးဆုံးအပိုင်းမဟုတ်။ အဆိုးဆုံးအပိုင်းမှာ အဘယ်နည်း။ လွန်ခဲ့သော နှစ်နှစ်ထောင်က သခင်ယေရှုသည် အားလုံးထဲတွင် အကြီးဆုံးသောအမှုကို လုပ်ဆောင်ရန် ကမ္ဘာမြေသို့ ကြွလာခဲ့သည်။ ကျေးဇူးတော်ခေတ်ရှိ ရွေးနုတ်ခြင်းအမှုဖြစ်သည်။ သူသည်လူ့ဇာတိခံပြီး အပြစ်ရှိသောဇာတိပကတိ၏ ပုံသဏ္ဌာန်ဖြစ်လာကာ လူသားမျိုးနွယ်တစ်ရပ်လုံးအတွက် အပြစ်ဖြေရာယဇ်အဖြစ် လက်ဝါးကပ်တိုင်တွင် သံမှိုစွဲခံခဲ့သည်။ ဤသည်မှာ ကြီးမားသောအမှု ဟုတ်သလော။ (ဟုတ်ပါသည်။) ယင်းသည် လူသားမျိုးနွယ်တစ်ရပ်လုံးကို ရွေးနုတ်ခြင်းအမှုဖြစ်ပြီး ဘုရားသခင်ကိုယ်တော်တိုင် လုပ်ဆောင်ခဲ့ခြင်း ဖြစ်သည့်တိုင်အောင် ပေါလုက ခေါင်းမာစွာဖြင့် ငြင်းဆန်ခဲ့သည်။ သခင်ယေရှုလုပ်ဆောင်ခဲ့သည့် ရွေးနုတ်ခြင်းအမှုသည် ဘုရားသခင်ကိုယ်တော်တိုင် လုပ်ဆောင်ခဲ့သည်ကို သူငြင်းဆန်ခဲ့သည်။ ဤသည်မှာ ဘုရားသခင်သည် ရွေးနုတ်ခြင်းအမှုကို ဖြစ်မြောက်နှင့်ပြီးဖြစ်သည်ဆိုသည့်အချက်ကို ငြင်းဆန်နေခြင်း ဖြစ်သည်။ ဤသည်မှာ ဆိုးရွားသော ပြဿနာတစ်ခု ဖြစ်သလော။ အလွန့်အလွန် ဆိုးရွားသည်။ သခင်ယေရှုခရစ်တော်၏ ကားစင်တင်ခြင်း၏ အမှန်တရားကို ပေါလုက နားလည်ရန် အားမထုတ်ခဲ့ရုံမကဘဲ ဝန်ခံခြင်းလည်းမရှိခဲ့ပေ။ ပြီးလျှင် ဝန်မခံခြင်းသည် ငြင်းဆန်ခြင်း ဖြစ်သည်။ ကားစင်တင်ခံပြီး လူသားမျိုးနွယ်တစ်ရပ်လုံးကို ရွေးနုတ်ခဲ့သည်မှာ ဘုရားသခင်ဖြစ်သည်ကို သူဝန်မခံသကဲ့သို့ ဘုရားသခင်က လူသားမျိုးနွယ်အားလုံးအတွက် အပြစ်ဖြေရာယဇ်အဖြစ် အသုံးတော်ခံခဲ့သည်ကိုလည်း ဝန်မခံခဲ့ပေ။ ဤသည်မှာ ဘုရားသခင်က သူ၏အမှုကိုပြုပြီးနောက်တွင် လူသားမျိုးနွယ်တစ်ရပ်လုံး ရွေးနုတ်ခြင်းခံရသည်ကို ဝန်မခံသည်ကိုဖြစ်စေ၊ ၎င်းတို့၏ အပြစ်များ ခွင့်လွှတ်ခြင်းခံရသည်ကိုဖြစ်စေ ပေါလု ဝန်မခံသည်ကို သွယ်ဝိုက်ညွှန်းဆိုသည်။ တစ်ချိန်တည်းတွင် သူ၏ အပြစ်များ ခွင့်လွှတ်ခြင်းမခံရသေးဟု ထင်ခဲ့သည်။ သခင်ယေရှုက လူသားမျိုးနွယ်အား ရွေးနုတ်ခဲ့သည့်အချက်ကို သူဝန်မခံခဲ့ပေ။ သူ၏ ရပ်တည်ချက်မှကြည့်လျှင် ယင်းတို့အားလုံးသည် ဖျောက်ဖျက်ခြင်းခံရပြီးဖြစ်သည်။ ဤသည်မှာ အဆိုးရွားဆုံးပြဿနာဖြစ်သည်။ ပေါလုသည် လွန်ခဲ့သည့် နှစ်နှစ်ထောင်တွင် အကြီးဆုံးသော အန္တိခရစ်ဖြစ်သည်ဟု ယခုပင် ငါပြောခဲ့သည်။ ဤအချက်ကို ထုတ်ဖော်ပြီး ဖြစ်သည်။ ဤအချက်များသည် ကျမ်းစာတွင် မှတ်တမ်းတင်ထားခြင်းမရှိဘဲ ဘုရားသခင်က ပေါလုသည် ဘုရားကို အာခံပြီး အန္တိခရစ်တစ်ဦးဖြစ်သည်ဟု ဆိုလျှင် လူတို့က ယုံမည်လော။ ၎င်းတို့ လုံးဝ ယုံမည်မဟုတ်။ ကံကောင်းစွာဖြင့် ကျမ်းစာတွင် ပေါလု၏စာများကို မှတ်တမ်းတင်ထားသည်။ ထိုစာများတွင် အဖြစ်မှန်သက်သေရှိသည်။ ဤသို့မဟုတ်လျှင် ငါပြောသည့်အရာကို ပံ့ပိုးပေးရန် မည်သည့်အရာမျှ ရှိမည်မဟုတ်ဘဲ သင်တို့က လက်မခံခြင်း ဖြစ်နိုင်သည်။ ယခုတွင် ပေါလု၏စကားများကို ငါတို့ထုတ်ယူပြီး ဖတ်သောအခါ ပေါလုက သခင်ယေရှုပြောခဲ့သည့်အရာများအားလုံးကို မည်သို့ရှုမြင်ခဲ့သနည်း။ ပေါလုသည် သခင်ယေရှုပြောခဲ့သည့်အရာများက သူ၏ ကိုယ်ပိုင်ဘာသာရေးအယူဝါဒများထဲမှ တစ်ခုဖြင့်ပင် ညီမျှခြင်းမရှိဟု ထင်မြင်သည်။ ထို့ကြောင့် သခင်ယေရှုက ဤကမ္ဘာမှ ထွက်ခွာသွားပြီးနောက်တွင် ပေါလုက ဧဝံဂေလိဖြန့်ခြင်း၊ အမှုပြုခြင်း၊ တရားဟောခြင်းနှင့် အသင်းတော်များကို ထိန်းကျောင်းခြင်းတို့ လုပ်ဆောင်သော်လည်း သခင်ယေရှု၏ စကားများကို လက်တွေ့လုပ်ဆောင်ဖို့၊ သို့မဟုတ် တွေ့ကြုံခံစားဖို့မဆိုထားနှင့်၊ လုံးဝပင် မဟောပြောခဲ့ပေ။ ထိုအစား ဓမ္မဟောင်းကျမ်းအပေါ် သူကိုယ်တိုင်၏ နားလည်မှုကို ဟောကြားသည်။ ယင်းမှာ ခေတ်နောက်ကျပြီး အနှစ်မရှိသော စကားများ ဖြစ်သည်။ လွန်ခဲ့သော နှစ်နှစ်ထောင်တွင် သခင့်ကိုယုံကြည်သူတို့သည် ကျမ်းစာနှင့်အညီ လုပ်ဆောင်ကြသည်။ ပြီးလျှင် ၎င်းတို့လက်ခံသမျှတိုင်းသည် ပေါလု၏ အနှစ်မရှိသော သဘောတရားများ ဖြစ်သည်။ ရလဒ်အနေဖြင့် လူတို့သည် နှစ်နှစ်ထောင်ကြာ မှောင်မိုက်ထဲတွင် ရှိနေခဲ့ကြသည်။ သင်က ပေါလုမှားသည်ဟု ယနေ့ခေတ်ဘာသာရေးသမား အုပ်စုတစ်စုကို ပြောလျှင် ၎င်းတို့က ကန့်ကွက်ပြီး လက်ခံမည်မဟုတ်။ ၎င်းတို့အားလုံးက ပေါလုကို အထင်ကြီးလေးစားသောကြောင့် ဖြစ်သည်။ ပေါလုက ၎င်းတို့ အလွန်လေးစားအားကျရသောသူဖြစ်ပြီး ၎င်းတို့ကို တည်ထောင်ပေးခဲ့သော ဖခင်ကြီးဖြစ်သည်။ ၎င်းတို့က ပေါလု၏ သားသမီးဝတ်ကျေပွန်သောသားများနှင့် သားစဉ်မြေးဆက်များဖြစ်ကြသည်။ ၎င်းတို့သည် မည်သည့်အတိုင်းအတာအထိ အထင်အမြင်မှားအောင် လုပ်ခြင်း ခံရသနည်း။ ၎င်းတို့သည် ဘုရားသခင်အား ဆန့်ကျင်လျက် ပေါလုနှင့် တူညီသောဘက်တွင် ရပ်တည်နေကြပြီဖြစ်သည်။ ၎င်းတို့တွင် ပေါလုကဲ့သို့ တူညီသောအမြင်များ၊ တူညီသောသဘာဝအနှစ်သာရ၊ တူညီသောလိုက်စားမှု နည်းလမ်းတို့ရှိကြသည်။ ၎င်းတို့သည် ပေါလုအားဖြင့် လုံးလုံးလျားလျား လက်သင့်ခံပြီးဖြစ်သည်။ ဤသည်မှာ ပေါလု၏ စတုတ္ထမြောက် အကြီးစားအပြစ်ဖြစ်သည်။ ပေါလုသည် သခင်ယေရှုခရစ်တော်၏ ပင်ကိုလက္ခဏာကို ငြင်းဆန်ခဲ့ပြီး ပညတ်တော်ခေတ်ပြီးနောက် ကျေးဇူးတော်ခေတ်တွင် ဘုရားသခင်လုပ်ဆောင်ခဲ့သော အမှုကို ငြင်းဆန်ခဲ့သည်။ ဤသည်မှာ အဆိုးဆုံးသောအရာ ဖြစ်သည်။ အခြားဆိုးရွားသောအရာမှာ သူသည် သခင်ယေရှုခရစ်တော်နှင့် တူညီသော အဆင့်တွင် သူ့ကိုယ်သူထားရှိခြင်း ဖြစ်သည်။ ပေါလုအသက်ရှင်ခဲ့သော ခေတ်တွင် သခင်ယေရှုခရစ်တော်ကို တွေ့ခဲ့သော်လည်း သူ့ကို ဘုရားသခင်အဖြစ် ပေါလု မမြင်ခဲ့ပေ။ ထိုအစား သူသည် သခင်ယေရှုခရစ်တော်ကို သာမန်လူတစ်ယောက်ကဲ့သို့၊ သူသည် နောက်ထပ် လူသားမျိုးနွယ်ဝင်တစ်ဦးသက်သက်ကဲ့သို့၊ ဖောက်ပြန်ပျက်စီးသော လူသားများကဲ့သို့ တူညီသော သဘာဝအနှစ်သာရရှိသည့်လူတစ်ဦးကဲ့သို့ သဘောထားခဲ့သည်။ ပေါလုသည် သခင်ယေရှုအား ဘုရားသခင်ကဲ့သို့ သဘောထားဖို့မဆိုထားနှင့် ခရစ်တော်အဖြစ်ဖြင့်ပင် မည်သည့်ပုံစံနှင့်မျှ သဘောမထားခဲ့ပေ။ ဤသည်မှာ အလွန်ဆိုးရွားသောကိစ္စဖြစ်သည်။ ဤသို့ဆိုလျှင် ပေါလုသည် အဘယ်ကြောင့် ဤသို့လုပ်ဆောင်သနည်း။ (လူ့ဇာတိခံဘုရားသခင်သည် ဘုရားသခင်၏ အနှစ်သာရအား ပိုင်ဆိုင်သည်ကို သူမသိမြင်ခဲ့ပါ။ ထို့ကြောင့် သခင်ယေရှုခရစ်တော်ကို ဘုရားအဖြစ် သဘောမထားခဲ့ပါ။) (သူသည် သခင်ယေရှု၏စကားများကို သမ္မာတရားအဖြစ် မမြင်သကဲ့သို့ သခင်ယေရှုခရစ်တော်သည် သမ္မာတရား၏ ပြယုဂ်ဖြစ်သည်ကိုလည်း မမြင်ခဲ့ပါ။) (အပေါ်ယံတွင် ပေါလုသည် သခင်ယေရှုကို ယုံကြည်ဟု ဖွင့်ဟခဲ့သော်လည်း သူအမှန်တကယ်ယုံကြည်သည်မှာ ကောင်းကင်ဘုံရှိ မရေရာသော ဘုရားဖြစ်သည်။) (သမ္မာတရားကို သူမရှာဖွေခဲ့ပါ။ ထို့ကြောင့် သူသည် ခရစ်တော်က သမ္မာတရားနှင့် အသက်ဖြစ်သည်ကို သဘောပေါက်နိုင်စွမ်းမရှိပါ။) ဆက်၍ ပြောလော့။ (ပေါလုက သူ့အနေဖြင့် အသက်ရှင်သည့်အရာမှာ ခရစ်တော်ဖြစ်သည်ဟု ပြောခဲ့သည်။ သူသည် ဘုရားသခင်ဖြစ်လိုပြီး သခင်ယေရှုကို အစားထိုးလိုသည်။) သင်တို့ပြောသမျှတိုင်းက အချက်အလက်များနှင့် ကိုက်ညီသည်။ ပေါလုက သူကိုယ်တိုင် ပြခဲ့သည့် ပုံစံတစ်ခုစီသည်၊ သူ၏ အပြစ်တစ်ခုစီသည် ယခင်ထက်ပို၍ ဆိုးရွားသည်။

ပေါလုပြောခဲ့သည့် “ဓမ္မသရဖူသည် ငါ့အဘို့သိုထားလျက်ရှိ၏” ဟူသည့် ဤစကားကို စိစစ်ကြစို့။ ဤစကားများသည် အထင်ကြီးဖွယ်ဖြစ်သော စကားများဖြစ်သည်။ သူရွေးချယ်ခဲ့သည့် စကားများကို ကြည့်လော့။ “ဓမ္မသရဖူ” ပုံမှန်အားဖြင့် “သရဖူ”ဟူသည့် စကားကိုယ်၌ကို သုံးရန်မှာ အလွန်ရဲတင်းသည်။ သို့သော် သရဖူတစ်ခုကို အဓိပ္ပာယ်သတ်မှတ်ရန် အထူးပြုသော ဖော်ပြချက်တစ်ခုအနေဖြင့် “ဓမ္မ”ဆိုသည်ကို မည်သူသုံးရဲသနည်း။ ပေါလုသာ ဤစကားကို သုံးရဲသည်။ သူ အဘယ်ကြောင့် သုံးခဲ့သနည်း။ ဤစကားသည် ဇာစ်မြစ်တစ်ခုရှိပြီး ဂရုတစိုက်ရွေးချယ်ထားခြင်း ဖြစ်သည်။ သူ၏စကားများနောက်ကွယ်တွင် လေးနက်သော သွယ်ဝိုက်ညွှန်းဆိုမှုများရှိသည်။ မည်သည့် သွယ်ဝိုက်ညွှန်းဆိုမှုများနည်း။ (သူသည် ဤစကားဖြင့် ဘုရားသခင်ကို အကျပ်ကိုင်ရန် ကြိုးစားနေခြင်း ဖြစ်သည်။) ဘုရားသခင်ကို အကျပ်ကိုင်လိုခြင်းသည် ဤအရာ၏ သွင်ပြင်လက္ခဏာတစ်ခု ဖြစ်သည်။ သူ၏ ရည်ရွယ်ချက်မှာ အသေအချာပင် အပေးအယူတစ်ခု ပြုလုပ်ရန်ဖြစ်ပြီး ထိုအပေးအယူအပေါ် ဘုရားသခင်နှင့် သတ်မှတ်ချက်များပြုလုပ်ဖို့ ကြိုးစားသည့် အရိပ်အယောင်တစ်ခုလည်း ရှိသည်။ ဤအရာအပြင် သူ့အနေဖြင့် ဤဓမ္မသရဖူအကြောင်းကို အစဉ်ဟောကြားရခြင်း အကြောင်းရင်း၏ နောက်ကွယ်တွင် ရည်ရွယ်ချက်တစ်ခုရှိသလော။ (သူသည် လူတို့ကို လမ်းလွဲအောင်လုပ်ဆောင်လိုသည်။ သူသည် သရဖူမရလျှင် ဘုရားသခင်က ဖြောင့်မတ်ခြင်းမရှိဟု လူတို့က ထင်မြင်အောင်လုပ်ဆောင်လိုသည်။) သူသည် ဤအရာကို တရားဟောခြင်းတွင် လှုံ့ဆော်ပြီး အထင်အမြင်မှားစေသော အရည်အသွေးတစ်ခုရှိသည်။ ပြီးလျှင် ဤအရာသည် ပေါလု၏ ဆန္ဒများနှင့် ရည်မှန်းချက်များဖြင့် ဆက်စပ်နေသည်။ ဓမ္မသရဖူကို ရယူလိုသည့် သူ၏လိုအင်ဆန္ဒကို နောက်ဆုံးတွင် ဖြစ်မြောက်စေပြီး ပြည့်စုံရန်အတွက် ထိုအကြောင်းကို နေရာတကာတွင်ဟောသည့် နည်းဗျူဟာကို အသုံးပြုခဲ့သည်။ တစ်ဖက်တွင် ဤစကားများကို ဟောကြားခြင်း၌ သူ၏ ပန်းတိုင်မှာ လူတို့ကို လှုံ့ဆော်ပြီး အထင်အမြင်မှားစေရန် ဖြစ်သည်။ နားထောင်နေသောသူတို့အထဲသို့ သီးသန့်အတွေးတစ်ခု သွတ်သွင်းရန် ဖြစ်သည်။ အတိအကျဆိုရသော် “မိမိကိုယ်ကို အလွန်အသုံးခံသော၊ အလွန်လှည့်လည်ခရီးသွားသော၊ ငါလုပ်ဆောင်သည့်ပုံစံအတိုင်း လိုက်စားသော ငါကဲ့သို့သောသူတစ်ယောက်သည် ဓမ္မသရဖူကို ရနိုင်လိမ့်မည်” ဟူ၍ ဖြစ်သည်။ ဤအရာကို နားထောင်ပြီးနောက်တွင် ပေါလုကဲ့သို့သောသူတစ်ဦးက သရဖူရရှိလျှင်သာ ဘုရားသခင်က ဖြောင့်မတ်သည်ဟု လူတို့က အလိုအလျောက် ခံစားမိသည်။ ၎င်းတို့သည် ပေါလုကဲ့သို့ လိုက်စားရမည်၊ လှည့်လည်ခရီးသွားရမည်၊ မိမိတို့ကိုယ်ကို အသုံးခံရမည်ဟုလည်းကောင်း၊ သခင်ယေရှုကို နားထောင်၍မရဟုလည်းကောင်း၊ ပေါလုသည် စံဖြစ်သည်၊ သူသည် သခင်ဖြစ်သည်၊ သူသည် လူတို့လျှောက်သင့်သည့် ဦးတည်ချက်နှင့် ပန်းတိုင်ဖြစ်သည်ဟုလည်းကောင်း ခံစားမိကြသည်။ လူတို့သည် ပေါလုလုပ်ဆောင်သည့်ပုံစံအတိုင်း အမှုအရာများကို လုပ်ဆောင်လျှင် ၎င်းတို့သည် သူကဲ့သို့ သရဖူမျိုး၊ အဆုံးသတ်နှင့် ခရီးပန်းတိုင်ကို ရရှိမည်ဟုလည်း ထင်ကြသည်။ တစ်ဖက်တွင် ပေါလုသည် လူတို့အား လှုံ့ဆော်ပြီး အထင်အမြင်မှားစေသည်။ အခြားတစ်ဖက်တွင် သူ့၌ အန္တရာယ်အပေးနိုင်ဆုံး ပန်းတိုင်တစ်ခုရှိသည်။ သူ၏ စိတ်နှလုံးအတွင်းထဲ၌ သူသည် “သရဖူကို ငါမရသည့် ဖြစ်နိုင်ခြေနည်းသော အခြေအနေများတွင်၊ ငါ၏ ကိုယ်ပိုင်စိတ်ကူးထင်မြင်မှုနှင့် ငါ၏ ကိုယ်ပိုင်လိုရာဆွဲတွေးခြင်းသက်သက်သာ ဖြစ်နေသည့် အခြေအနေတွင် ဤသည်မှာ ခရစ်တော်ကို ယုံကြည်သော ငါအပါအဝင် လူတိုင်းသည် ၎င်းတို့၏ ယုံကြည်ခြင်းတွင် လမ်းလွဲခဲ့သည်ဟူသည့် သဘောဖြစ်လိမ့်မည်။ ဤသည်မှာ ကမ္ဘာမြေပေါ်တွင် ဘုရားသခင်မရှိဟူသည့် သဘောဖြစ်လိမ့်မည်။ ဘုရားသခင်၊ ကျွန်ုပ်သည်လည်း ကောင်းကင်ဘုံရှိ ကိုယ်တော်၏ ဖြစ်တည်မှုကို ငြင်းဆန်မည်။ ပြီးလျှင် ဤအရာနှင့်ပတ်သက်ပြီး မည်သည့်အရာကိုမျှ ကိုယ်တော်လုပ်ဆောင်နိုင်မည်မဟုတ်” ဟု တွေးသည်။ သူက သွယ်ဝိုက်၍ ဆိုလိုသည်မှာ “ဤသရဖူကို ကျွန်ုပ်မရလျှင် ညီအစ်ကိုမောင်နှမများက ကိုယ်တော်ကို ငြင်းဆန်လိမ့်မည်သာမက ကျွန်ုပ် လှုံ့ဆော်ခဲ့သော၊ ဤစကားများကို သိသောသူအားလုံးကို ကိုယ်တော်မရရှိစေရန် ကျွန်ုပ်တားဆီးမည်။ ၎င်းတို့ကိုလည်း ကိုယ်တော်ကို မရရှိစေရန် ကျွန်ုပ် တားဆီးမည်။ ပြီးလျှင် တစ်ချိန်တည်းတွင် ကောင်းကင်ဘုံရှိ ဘုရားသခင်အဖြစ် ကိုယ်တော်၏ ဖြစ်တည်မှုကို ကျွန်ုပ် ငြင်းဆန်မည်။ ကိုယ်တော်သည် မဖြောင့်မတ်။ ကျွန်ုပ် ပေါလုသည် သရဖူတစ်ခု မရနိုင်လျှင် မည်သူကမျှ မရသင့်ပေ” ဟူ၍ ဖြစ်သည်။ ဤသည်မှာ ပေါလု၏ အန္တရာယ်ပေးသော အပိုင်းဖြစ်သည်။ ဤသည်မှာ အန္တိခရစ်တစ်ဦး၏ အပြုအမူမဟုတ်သလော။ ဤသည်မှာ အန္တိခရစ် မကောင်းဆိုးဝါးတစ်ကောင်၏ အပြုအမူဖြစ်သည်။ လှုံ့ဆော်ခြင်း၊ အထင်အမြင်မှားစေခြင်း၊ လူတို့ကို သွေးဆောင်ဖြားယောင်းခြင်းအပြင် ဘုရားသခင်ကို ပြောင်ပြောင်တင်းတင်းဖြင့် ဆူညံစွာ တောင်းဆိုခြင်းနှင့် ဘုရားသခင်ကို ဆန့်ကျင်ခြင်းတို့ဖြစ်သည်။ သူ၏ စိတ်နှလုံးအတွင်းထဲတွင် ပေါလုက “ငါသည် သရဖူကို မရလျှင် ဘုရားသခင်သည် မဖြောင့်မတ်။ သရဖူကို ရလျှင် ထိုအခါမှသာ ယင်းသည် ဓမ္မသရဖူဖြစ်ပြီး ထိုအခါမှသာ ဘုရားသခင်၏ ဖြောင့်မတ်ခြင်းက အမှန်ပင် ဖြောင့်မတ်သည်” ဟု တွေးသည်။ ဤသည်မှာ သူ၏ “ဓမ္မသရဖူ” ၏ ဇာစ်မြစ် ဖြစ်သည်။ ဤအရာအားဖြင့် သူသည် မည်သည့်အရာကို လုပ်ဆောင်နေခဲ့သနည်း။ သူသည် ဘုရားသခင်နောက်သို့လိုက်သော သူတို့ကို ပြောင်ပြောင်တင်းတင်း လှုံ့ဆော်ပြီး အထင်အမြင်မှားအောင်ပြုလုပ်နေခြင်း ဖြစ်သည်။ တစ်ချိန်တည်းတွင် သူသည် ဘုရားသခင်ကို ပြောင်ပြောင်တင်းတင်းဖြင့် ဆူညံစွာ တောင်းဆိုပြီး ဆန့်ကျင်ရန် ဤနည်းလမ်းများကို အသုံးပြုနေသည်။ တစ်နည်းအားဖြင့် သူ၏ အပြုအမူသည် ပုန်ကန်မှုတစ်ခုဖြစ်သည်။ ယင်း၏ သဘာဝမှာ အဘယ်နည်း။ အပေါ်ယံတွင် ပေါလုအသုံးပြုသည့် စကားများသည် ရည်မွန်ပြီး သင့်လျော်သည့် ပုံစံရှိသည်။ ယင်းတို့တွင် မှားယွင်းသည့် မည်သည့်အရာမျှ မရှိသည့်ပုံစံရှိသည်။ ဓမ္မသရဖူကို ရယူပြီး ကောင်းချီးခံစားရရန်အတွက် ဘုရားသခင်ကို မည်သူက မယုံကြည်မည်နည်း။ အနည်းဆုံးအနေဖြင့် အစွမ်းအစမရှိသည့် လူတို့သည်ပင် ကောင်းကင်ဘုံသို့ရောက်ရှိရန် ဘုရားသခင်ကို ယုံကြည်ကြသည်။ ၎င်းတို့သည် ထိုနေရာတွင် လမ်းများကို တံမြက်စည်းလှဲရန်၊ သို့မဟုတ် တံခါးဝတွင် စောင့်ရန် ခိုင်းစေခြင်းခံရလျှင်ပင် ပျော်ရွှင်လိမ့်မည်။ ဘုရားသခင်အပေါ် ယုံကြည်မှုတွင် ဤရည်ရွယ်ချက်နှင့် ရည်မှန်းချက်ရှိခြင်းသည် သင့်လျော်ပြီး နားလည်နိုင်ဖွယ်ဖြစ်သည်ဟု သတ်မှတ်နိုင်သည်။ သို့ရာတွင် ဤသည်မှာ ပေါလု၏ တစ်ခုတည်းသော ရည်မှန်းချက်မဟုတ်။ သူသည် သူ၏ဓမ္မသရဖူအကြောင်း ဟောခြင်းနှင့်ပတ်သက်လျှင် များစွာ အားထုတ်သည်။ အားအင်များစွာကို အသုံးချသည်။ အလွန်ပင် ရေးကြီးခွင့်ကျယ်လုပ်သည်။ ပေါလုပြောသည့်အရာများသည် သူ၏ မလိုမုန်းထားသော သဘာဝကို ဖော်ထုတ်ပြသည့်အပြင် သူကိုယ်တိုင်၏ အတွင်းထဲတွင် ပုန်းကွယ်နေသော၊ မှောင်မိုက်သောအရာများကိုပါ ဖော်ထုတ်ပြသည်။ ထိုအချိန်က ပေါလုသည် သူ့ကိုယ်သူ နာမည်ကြီးအောင်လုပ်ခဲ့ပြီး သူ့အား ပုဂ္ဂိုလ်ရေးကိုးကွယ်သောသူများစွာရှိသည်။ သူသည် နေရာတကာသို့သွား၍ ဤသဘောတရားများ၊ အဆင့်မြင့်ပုံရသည့် စိတ်ကူးများ၊ သူ၏ အယူအဆများနှင့် စိတ်ကူးထင်မြင်မှုများအပြင် သူ၏လေ့လာမှုတွင် သင်ယူရရှိခဲ့သောအရာများ၊ သူ၏စိတ်ကို အသုံးပြုလျက် သူကောက်ချက်ချခဲ့သောအရာများကို ဟောသည်။ ပေါလုသည် နေရာတကာတွင် ဤအရာများကို ဟောသောအခါ ထိုအချိန်က လူတို့အပေါ် သက်ရောက်မှုသည် မည်မျှကြီးမည်နည်း။ ပြီးလျှင် ၎င်းတို့၏ စိတ်နှလုံးအတွင်းထဲတွင် မည်မျှပြင်းထန်စွာ ထိခိုက်ပြီး အဆိပ်သင့်မည်နည်း။ နောက်ပြီး သူ၏စာများမှနေ၍ ဤအရာများကို သင်ယူရသော နောက်ပိုင်းမျိုးဆက်များရှိလူများတွင် သက်ရောက်မှု မည်မျှကြီးမည်နည်း။ သူ၏စကားများကို ဖတ်ပြီးသောသူတို့သည် ၎င်းတို့မည်မျှကြိုးစားသည်ဖြစ်စေ ဤအရာများကို မိမိတို့ထံမှ မဖယ်ရှားနိုင်ပေ။ ၎င်းတို့သည် အလွန်နက်နဲစွာ အဆိပ်သင့်ပြီး ဖြစ်သည်။ မည်မျှနက်နဲသနည်း။ ဖြစ်ရပ်တစ်ခု ပေါ်ပေါ်လာခဲ့သည်။ “ပေါလု သက်ရောက်မှု” ဟု ခေါ်သည်။ ပေါလုသက်ရောက်မှုဆိုသည်မှာ အဘယ်နည်း။ လူတို့သည် ပေါလုထုတ်ဖော်ခဲ့သည့် သူ၏ အတွေးများ၊ အမြင်များ၊ ငြင်းခုံမှုများနှင့် ဖောက်ပြန်ပျက်စီးသော စိတ်သဘောထားများ၏ လွှမ်းမိုးခြင်းကိုခံရသည့် ဖြစ်ရပ်တစ်ခုသည် ဘာသာတရားတွင် ရှိသည်။ ဘုရားသခင်ကို မျိုးဆက်အတန်ကြာ ယုံကြည်ခဲ့သော မိသားစုရှိသည့်သူများဖြစ်သည့် ခရစ်တော်နောက်သို့ ဆယ်စုနှစ်များစွာလိုက်ခဲ့သော မိသားစုများတွင် အထူးသဖြင့် သက်ရောက်သည်။ ၎င်းတို့က “ကျွန်ုပ်တို့ မိသားစုသည် သခင့်ကို မျိုးဆက်နှင့်ချီ၍ ယုံကြည်ခဲ့ပြီး လောကီခေတ်ရေစီးကြောင်းများနောက်သို့ မလိုက်ပါ။ ကျွန်ုပ်တို့သည် လောကီနှင့် အဝေးတွင်နေပြီး ဘုရားသခင်အတွက် မိမိတို့ကိုယ်ကို အသုံးခံရန် ကျွန်ုပ်တို့၏ မိသားစုများနှင့် အသက်မွေးအလုပ်များကို စွန့်လွှတ်ခဲ့သည်။ ကျွန်ုပ်တို့ လုပ်ဆောင်သမျှတိုင်းသည် ပေါလုလုပ်ဆောင်ခဲ့သည်နှင့် တူညီသည်။ သရဖူများကို ကျွန်ုပ်တို့ မရလျှင်၊ သို့မဟုတ် ကောင်းကင်ဘုံကိုမရောက်လျှင် ဘုရားသခင် ကြွလာသောအခါ ကျွန်ုပ်တို့သည် ဘုရားသခင်နှင့် စာရင်းရှင်းရလိမ့်မည်” ဟု ဆိုသည်။ ဤငြင်းခုံမှုကို လူတို့မပြုလုပ်သလော။ (ပြုလုပ်ပါသည်။) ဤရေပန်းစားမှုသည် အလွန်ပင် သိသာထင်ရှားသည်။ ဤရေပန်းစားမှုသည် မည်သည့်နေရာကလာသနည်း။ (ပေါလု ဟောကြားခဲ့သည့်အရာမှ လာသည်။) ယင်းသည် ပေါလုထည့်သွင်းခဲ့သည့် အကျိတ်၏ အန္တရာယ်ပေးနိုင်သော ရလဒ်ဖြစ်သည်။ ပေါလုက လူတို့ကို ဤသို့ မလှုံ့ဆော်ခဲ့လျှင်၊ “ဓမ္မသရဖူသည် ငါ့အဘို့သိုထားလျက်ရှိ၏” နှင့် “အသက်ရှင်သည့်အရာမှာ ခရစ်တော်ဖြစ်၏” ဆိုသည်တို့ကို အစဉ်မပြောခဲ့လျှင် ထိုခေတ်ကာလ၏ သမိုင်းနောက်ခံမရှိဘဲ ယခုခေတ် လူတို့၌ ထိုအရာများအား သိမြင်မှုလုံးဝ ရှိမည်မဟုတ်။ ၎င်းတို့တွင် ဤစဉ်းစားပုံရှိလျှင်ပင် ပေါလု၏ ရိုင်းစိုင်းအတင့်ရဲမှုရှိမည်မဟုတ်။ အားလုံးက ပေါလု၏ အားပေးမှုနှင့် လှုံ့ဆော်မှုတို့ကြောင့် ဖြစ်သည်။ ဤလူတို့သည် ကောင်းချီး မခံစားရသည့်နေ့ရောက်လာလျှင် သခင်ယေရှုကို ပြောင်ပြောင်တင်းတင်း စိန်ခေါ်ရန် ရဲတင်းမှုရှိလိမ့်မည်။ ပြီးလျှင် တတိယကောင်းကင်ဘုံသို့ပင် ချီတက်ပြီး ဤအမှုကိစ္စကို သခင်နှင့် အငြင်းပွားလိုလိမ့်မည်။ ဤသည်မှာ ဘာသာရေးလောကက သခင်ယေရှုကို ပုန်ကန်နေခြင်း မဟုတ်လော။ ဘာသာရေးလောကသည် ပေါလု၏ သက်ရောက်ခြင်းကို ပြင်းထန်စွာခံထားရသည်မှာ ရှင်းသည်။ ယခုတွင် ဤအဆင့်အထိ ငါပြောဆိုပြီးဖြစ်သောကြောင့် ပေါလု၏ ပဉ္စမအပြစ်က မည်သည့်အရာဖြစ်သည်ကို သင် ကောက်ချက်ချနိုင်သည် မဟုတ်လော။ ပေါလုပြောဆိုသည့် “ဓမ္မသရဖူ” ၏ ဇာစ်မြစ်ကို အနှစ်ချုပ်ခြင်းနှင့် ပတ်သက်လျှင် အာရုံစိုက်ရမည်မှာ “ဓမ္မ”ဟူသည့် စကားဖြစ်သည်။ သူသည် “ဓမ္မ”ဆိုသည်ကို အဘယ်ကြောင့် ပြောခဲ့သနည်း။ ကမ္ဘာမြေပေါ်တွင် သူသည် ဘုရားသခင်ရွေးချယ်ထားသောလူတို့ကို လှုံ့ဆော်ပြီး အထင်အမြင်မှားစေလိုသောကြောင့် ဖြစ်သည်။ ဤသို့ဖြင့် ၎င်းတို့သည် သူတွေးသည့်ပုံစံအတိုင်း တွေးမည်ဖြစ်သည်။ ကောင်းကင်ဘုံတွင် သူသည် ဤစကားဖြင့် ဘုရားသခင်ကို အကျပ်ကိုင်လိုပြီး ဘုရားသခင်ကို ဆူညံစွာ တောင်းဆိုလိုသည်။ ဤသည်မှာ ပေါလု၏ ပန်းတိုင်ဖြစ်သည်။ သူသည် ဤအရာကို မည်သည့်အခါမျှ ဖွင့်ဟမပြောသော်လည်း “ဓမ္မ”ဟူသည့်စကားသည် ဘုရားသခင်ကို ဆူညံစွာ တောင်းဆိုရန် သူ၏ ပန်းတိုင်နှင့် အလားအလာကို အပြည့်အဝ ပေါ်လွင်စေနှင့်ပြီး ဖြစ်သည်။ ယင်းကို ရှင်းရှင်းလင်းလင်း မြင်နိုင်ပြီး ဖြစ်သည်။ ဤသည်တို့အားလုံးမှာ အမှန်တရားများ ဖြစ်သည်။ ဤအမှန်တရားများကို အခြေခံပြီး ပေါလု၏ သဘာဝအနှစ်သာရကို မာနထောင်လွှားခြင်း၊ မိမိကိုယ်ကို မှန်သည်ဟု ယူမှတ်ခြင်း၊ လှည့်ဖြားတတ်ခြင်း၊ သမ္မာတရားကို မချစ်ခြင်းတို့အဖြစ်ဖြင့်သာ အနှစ်ချုပ်နိုင်သလော။ (မချုပ်နိုင်ပါ။) ဤဝေါဟာရများက အနှစ်မချုပ်နိုင်ပေ။ ငါက ဤအမှန်တရားများကို ထုတ်ပြောပြီး ယင်းတို့ကို စိစစ်ခြင်း၊ ပိုင်းခြားခြင်း၊ အဓိပ္ပာယ်ဖွင့်ဆိုခြင်းအားဖြင့် သင်တို့သည် ပေါလု၏ သဘာဝအနှစ်သာရကို ပို၍ရှင်းလင်းစွာ၊ နှံ့စပ်စွာ မြင်နိုင်သင့်သည်။ ဤသည်မှာ အမှန်တရားများကို အခြေခံ၍ အနှစ်သာရတစ်ခုကို စိစစ်ခြင်းအားဖြင့် ရရှိသည့် သက်ရောက်မှုဖြစ်သည်။ ပေါလုသည် ဘုရားသခင်ကို ဆူညံစွာ တောင်းဆိုသောအခါ သူသည် လူမသိသူမသိ အသေးစား စိတ်ခံစားမှုဆိုင်ရာ အခိုက်အတန့်၊ ပုန်ကန်သော စိတ်သဘောထားအနည်းငယ်၊ သို့မဟုတ် ကျိုးနွံနာခံရန် မတတ်နိုင်ခြင်း ရှိနေခြင်း မဟုတ်ပေ။ ဤသည်မှာ ဖောက်ပြန်ပျက်စီးသော စိတ်သဘောထားကို ထုတ်ဖော်ခြင်းနှင့်သက်ဆိုင်သည့် သာမန်ပြဿနာတစ်ခုမဟုတ်။ ဤထက် ယင်းသည် လူတိုင်းက ဘုရားသခင်ကို ဆန့်ကျင်ပြီး ဆူညံစွာတောင်းဆိုရန် ဒေါသဖြင့် အတူတကွ ထကြွစေရန်အတွက် စာများနှင့် လူအများရှိသည့် ဝန်းကျင်များမှတစ်ဆင့် လူတို့ကို လှုံ့ဆော်ပြီး အထင်အမြင်မှားစေရန် နည်းလမ်းမျိုးစုံကို ပြောင်ပြောင်တင်းတင်း အသုံးပြုခြင်းဆီသို့ မြင့်တက်သွားခဲ့ပြီး ဖြစ်သည်။ ပေါလုသည် ဘုရားသခင်ကို ဆူညံစွာ တောင်းဆိုရုံတင်မကဘဲ အခြားလူတိုင်းကိုလည်း ဘုရားသခင်ကို ဆူညံစွာ တောင်းဆိုရန် လှုံ့ဆော်ခဲ့သည်။ သူသည် မာနထောင်လွှားခြင်းသာ မဟုတ်ဘဲ နတ်ဆိုးတစ်ကောင်ဖြစ်သည်။ ဤအပြစ်သည် ယခင်အပြစ်ထက်ပို၍ ဆိုးသည်။ ပို၍ ဆိုးရွားနေသည့်အပြစ်များအကြောင်းကို ငါတို့ပြောနေခြင်းသည် ကောင်းသောအရာတစ်ခုလော၊ သို့မဟုတ် ဆိုးသောအရာတစ်ခုလော။ (ကောင်းပါသည်။) အဘယ်သို့ ကောင်းသနည်း။ (ကျွန်ုပ်တို့သည် ပေါလုအပေါ် ပို၍ ပိုင်းခြားသိမြင်မှုကို ရရှိနေသောကြောင့် ဖြစ်ပါသည်။) သင့်တွင် ပိုင်းခြားသိမြင်မှု ပို၍ရှိသောအခါ ပေါလု၏ အမျိုးမျိုးသော သရုပ်သကန်များ၊ ဖောက်ပြန်ပျက်စီးမှုကို ထုတ်ဖော်မှုများနှင့် သူ၏သရုပ်မှန်တို့ကို နှံ့နှံ့စပ်စပ်ဖော်ထုတ်နိုင်ပြီး ရှင်းလင်းစွာ မြင်နိုင်လိမ့်မည်။ ဤအရာကို လုပ်ဆောင်ခြင်းအားဖြင့် ငါတို့၏ ပန်းတိုင်ကို သင်ရရှိမည်လော။ (ရရှိမည်မဟုတ်။) ငါတို့ အနှစ်ချုပ်ခဲ့သော ပေါလု၏ သရုပ်သကန်အားလုံးအပြင် ယင်းတို့၏ အဓိကအကြောင်းအရာ၊ အဓိကဆိုလိုရင်း၊ အနှစ်သာရတို့ကိုပါယူပြီး ယင်းတို့ကို သင့်ကိုယ်သင်ဖြင့်လည်းကောင်း၊ သင့်အနီးရှိလူတို့ဖြင့်လည်းကောင်း ဆက်စပ်လော့။ ပေါလုနှင့် ယှဉ်ကြည့်လျှင် သင်လျှောက်သောလမ်းကြောင်းနှင့် သင်၏ ကိုယ်ပိုင်အနှစ်သာရကြားတွင် ကွာခြားမှုမည်မျှကြီးသည်ကို သင်ရှင်းလင်းစွာ အတိအကျ မြင်တွေ့ပြီးဖြစ်သောအခါ သင်သည် ရလဒ်များကို အပြည့်အဝရရှိလိမ့်မည်။ ပြီးလျှင် ပေါလုအား စိစစ်ခြင်းဖြစ်သည့် ငါတို့၏ပန်းတိုင်ကို သင်ရရှိပြီး ဖြစ်လိမ့်မည်။ “ဓမ္မသရဖူကို ပေါလုလိုက်စားခြင်းနှင့်ဆိုင်သော သရုပ်သကန်တစ်ခုမျှ ကျွန်ုပ်တွင် မရှိ” ဟုဆိုသော သူအချို့ရှိသည်။ သင်၏ သရုပ်သကန်များနှင့် သင်၏ အနှစ်သာရသည် ပေါလုမျှ ဆိုးရွားခြင်း မရှိကောင်းမရှိနိုင်ပေ။ သို့သော် သင်၏ အနှစ်သာရနှင့် သူ၏အနှစ်သာရတွင် ထပ်တူကျမှုတစ်ခုခုရှိသည်။ သူသည် ဤကဲ့သို့ သရုပ်သကန်များကို ပိုင်ဆိုင်ခဲ့သည်။ ပြီးလျှင် သင်က ဤကဲ့သို့ အခြေအနေများကို ပိုင်ဆိုင်သည်။ ပေါလု၏ သရုပ်သကန်များသည် အတိုင်းအတာအရ ၁၀၊ သို့မဟုတ် ၁၂ ဟု ဆိုနိုင်သည်။ ဤသို့ဆိုလျှင် သင်က အဘယ်သို့နည်း။ (ကျွန်ုပ်သည် ခုနစ်၊ သို့မဟုတ် ရှစ်ဖြစ်သည်။) ပေါလုသည် ဤအရာများကို အချိန်ပြည့် ထုတ်ဖော်ပြကာ ဤအရာများဖြင့် အချိန်ပြည့် ပြည့်နေသည်။ သင်က ဤအရာများကို အချိန်ပြည့် မထုတ်ဖော်နိုင်သော်လည်း မကြာခဏ ထုတ်ဖော်ပြဆဲ ဖြစ်သည်။ သင်သည် ဤအရာများကို လုပ်ဆောင်လျက်၊ ဤအခြေအနေများတွင် အသက်ရှင်လျက် သင်၏ဘဝတစ်ဝက်ကို အချိန်ကုန်ဖို့များသည်။ အထူးသဖြင့် ဘုရားသခင်က သင့်အား စမ်းသပ်မှုများထဲတွင် ချထားသောအခါ၊ ဘုရားသခင်၏ လုပ်ဆောင်မှုက သင့်အယူအဆများနှင့် မကိုက်သောအခါ၊ သူသည် သင့်ကို ပြုပြင်သောအခါ၊ သင့်အတွက် သူစီစဉ်ညွှန်ကြားသည့် ပတ်ဝန်းကျင်များက သင့်မျှော်မှန်းချက်များနှင့် မကိုက်သောအခါ သင့်အတွင်းတွင် ဤသို့သော အခြေအနေများ ဖြစ်ပေါ်နိုင်သည်။ သင်သည် ဘုရားသခင်ကို ဆူညံစွာ တောင်းဆိုပြီး ဆန့်ကျင်ကောင်း ဆန့်ကျင်နိုင်သည်။ ဤသို့သောအချိန်များတွင် ပေါလုက လူတို့ကို လှုံ့ဆော်ပြီး အထင်အမြင်မှားစေခြင်းအား ငါတို့စိစစ်ခြင်းက သင့်အတွက် အသုံးဝင်နိုင်သည်။ အဘယ်ကြောင့်နည်း။ အဘယ်ကြောင့်ဆိုသော် ယခုတွင် သင့်စိတ်သည် ပေါလု၏ သရုပ်သကန်များသည် သဘောသဘာဝအရ မည်မျှဆိုးရွားသည်ကို သတိပြုမိသောကြောင့် ဖြစ်သည်။ ယင်းတို့သည် ဖောက်ပြန်ပျက်စီးသော စိတ်သဘောထားများကို ရိုးရှင်းစွာ ထုတ်ဖော်ခြင်းများ မဟုတ်ဘဲ ဘုရားသခင်ကို ဆန့်ကျင်သည့် နတ်ဆိုးဆန်သော သဘာဝအနှစ်သာရတစ်ခု ဖြစ်သည်။ သင့်တွင် ဤသို့သော အခြေအနေများ ဖြစ်ပေါ်သောအခါ ဤပြဿနာက မည်မျှဆိုးရွားသည်ကို သင်သိလိမ့်မည်။ ထို့နောက်တွင် သင်သည် နောက်ပြန်လှည့်ကာ နောင်တရပြီး ဤမမှန်ကန်သော အခြေအနေကို စွန့်ပစ်သင့်သည်။ သင်သည် ယင်းထံမှ အဝေးသို့ လျှောက်သွားသင့်သည်။ သမ္မာတရားကို ရှာသင့်သည်။ ဘုရားသခင်အပေါ် ကျိုးနွံနာခံသည့် လမ်းကြောင်းကို ရှာသင့်သည်။ ယင်းသည် လူသားများ လိုက်လျှောက်သင့်သည့် စစ်မှန်သော လမ်းကြောင်းဖြစ်ပြီး ဖန်ဆင်းခံများ ကိုင်စွဲသင့်သည့် ပညတ်ဖြစ်သည်။ ဤမိတ်သဟာယသည် လူတို့အတွက် အကူအညီ ဖြစ်စေသည်။

ပေါလုတွင် နောက်ထပ်ထင်ရှားသော စကားတစ်ခုရှိသည်။ အဘယ်နည်း။ (“အသက်ရှင်သည့်အရာမှာ ခရစ်တော်ဖြစ်၏။ သေလျှင်မူကား၊ သာ၍အကျိုးရှိ၏။” (ဖိလိပ္ပိ သြဝါဒစာ ၁:၂၁) ဖြစ်ပါသည်။) သူသည် သခင်ယေရှုခရစ်တော်၏ ပင်ကိုလက္ခဏာကိုလည်းကောင်း၊ သခင်ယေရှုခရစ်တော်သည် ကမ္ဘာမြေပေါ်တွင် နေထိုင်နေသည့် လူ့ဇာတိခံ ဘုရားသခင် ဖြစ်သည်ကိုလည်းကောင်း၊ သို့မဟုတ် သခင်ယေရှုခရစ်တော်သည် ဘုရားသခင်၏ ပြယုဂ်ဖြစ်သည်ဟူသည့် အမှန်တရားကိုလည်းကောင်း အသိအမှတ်မပြုပေ။ ယှဉ်ကြည့်လျှင် ပေါလုသည် သူ့ကိုယ်သူ ခရစ်တော်အဖြစ် မြင်ခဲ့သည်။ ဤသည်မှာ ရွံစရာကောင်းသည် မဟုတ်လော။ (ဟုတ်ပါသည်။) ရွံစရာကောင်းပြီး ဤပြဿနာ၏ အနှစ်သာရသည် အလွန်ဆိုးရွားသည်။ ပေါလု၏ စိတ်တွင် အတိအကျ မည်သူက ခရစ်တော် ဖြစ်သနည်း။ သူ၏ ပင်ကိုလက္ခဏာမှာ အဘယ်နည်း။ ပေါလုသည် ခရစ်တော်ဖြစ်ခြင်းကို အဘယ်သို့ အလွန်စွဲလမ်းနေသနည်း။ ပေါလု၏ စိတ်တွင် ခရစ်တော်သည် ဖောက်ပြန်ပျက်စီးသော စိတ်သဘောထားရှိသည့် သာမန်လူတစ်ယောက်၊ သို့မဟုတ် ထူးခြားမှုမရှိသော အခန်းကဏ္ဍတွင် ပါဝင်သော ထင်ရှားမှုမရှိသော၊ တန်ခိုးအာဏာမရှိသော၊ မြင့်မြတ်သည့် ပင်ကိုလက္ခဏာမရှိသော၊ သာမန်လူများကို ကျော်လွန်သည့် အရည်အချင်း၊ သို့မဟုတ် ကျွမ်းကျင်မှုများ မရှိသောသူတစ်ယောက်ဖြစ်လျှင် ပေါလုသည် ခရစ်တော်ဖြစ်လိုဦးမည်လော။ (ဖြစ်လိုမည်မဟုတ်ပါ။) အသေအချာပင် ဖြစ်လိုမည်မဟုတ်။ သူသည် သူ့ကိုယ်သူ ပညာတတ်အဖြစ် ထင်မြင်ပြီး သာမန်လူတစ်ဦး မဖြစ်လိုပေ။ သူသည် မဟာလူသား၊ ကြီးမြတ်သောလူဖြစ်လိုသည်။ ပြီးလျှင် အခြားလူတို့ထက် သာလွန်လိုသည်။ အခြားလူများက နှိမ့်ချပြီး ထင်ရှားမှုမရှိဟု သတ်မှတ်သည့် ခရစ်တော်ဖြစ်ရန် သူသည် အဘယ်သို့ ဆန္ဒရှိသနည်း။ ဤအရာကို ထောက်ဆလျှင် ပေါလု၏ စိတ်နှလုံး၌ ခရစ်တော်သည် မည်သည့်အဆင့်အတန်းနှင့် အခန်းကဏ္ဍတွင် ရှိသနည်း။ လူတစ်ယောက်သည် ခရစ်တော်ဖြစ်ရန် မည်သည့်ပင်ကိုလက္ခဏာနှင့် အဆင့်အတန်း ရှိရမည်နည်း။ မည်သည့် ဩဇာအာဏာ၊ တန်ခိုးနှင့် ဟန်ပန်အမူအရာကို ပြသရမည်နည်း။ ဤသည်မှာ ခရစ်တော်၏ဖြစ်ခြင်းကို ပေါလုက စိတ်ကူးသည့်အရာကိုလည်းကောင်း၊ ခရစ်တော်နှင့်ပတ်သက်ပြီး သူသိသည့်အရာကိုလည်းကောင်း၊ ဆိုလိုသည်မှာ ခရစ်တော်ကို သူ အဓိပ္ပာယ် သတ်မှတ်သည့်ပုံစံကိုလည်းကောင်း ဖော်ထုတ်ပြသည်။ ဤအတွက်ကြောင့် ပေါလုက ခရစ်တော်ဖြစ်ရန် ရည်မှန်းချက်နှင့် လိုအင်ဆန္ဒရှိခြင်း ဖြစ်သည်။ ပေါလုက အဘယ်ကြောင့်ခရစ်တော်ဖြစ်လိုသည်ဆိုသည့် အကြောင်းရင်းတစ်ခု ရှိပြီး ယင်းကို သူ၏စာများတွင် တစ်ဝက်တစ်ပျက် ထုတ်ဖော်ပြထားသည်။ အကြောင်းအရာအချို့ကို ငါတို့ စိစစ်ကြစို့။ သခင်ယေရှုက အမှုပြုနေသောအခါတွင် ခရစ်တော်အဖြစ် သူ၏ ပင်ကိုလက္ခဏာကို ကိုယ်စားပြုသည့် အရာအချို့ကို သူလုပ်ဆောင်ခဲ့သည်။ ဤအရာများသည် ခရစ်တော်၏ ပင်ကိုလက္ခဏာက ပိုင်ဆိုင်သည်ဟု ပေါလုမြင်သည့် သင်္ကေတများနှင့် အယူအဆများဖြစ်သည်။ ဤသည်တို့မှာ မည်သည့်အရာများ ဖြစ်သနည်း။ (နိမိတ်လက္ခဏာများနှင့် အံ့ဖွယ်အမှုများကို ပြသခြင်းဖြစ်သည်။) အမှန်ပင်ဖြစ်သည်။ ထိုအရာများမှာ ခရစ်တော်က လူတို့၏ ရောဂါများကို ကုသပေးခြင်း၊ မကောင်းဆိုးဝါးများကို နှင်ထုတ်ခြင်း၊ နိမိတ်လက္ခဏာများ၊ အံ့ဖွယ်အမှုများ၊ ထူးဆန်းသောတန်ခိုးများ ပြသခြင်းတို့ ဖြစ်ကြသည်။ သခင်ယေရှုသည် ခရစ်တော်ဖြစ်သည်ဟု ပေါလုက ဝန်ခံခဲ့သော်လည်း ယင်းမှာ သခင်ယေရှုပြသခဲ့သည့် နိမိတ်လက္ခဏာများနှင့် အံ့ဖွယ်အမှုများကြောင့်သာ ဖြစ်သည်။ ထို့ကြောင့် ပေါလုက သခင်ယေရှု၏ ဧဝံဂေလိကို ဖြန့်သောအခါ သခင်ယေရှုပြောဆိုသည့် စကားများအကြောင်း၊ သို့မဟုတ် သူဟောကြားခဲ့သည့်အရာများကို လုံးဝ မပြောခဲ့ပေ။ မယုံကြည်သူတစ်ဦးဖြစ်သည့် ပေါလု၏ အမြင်တွင် ခရစ်တော်က အမှုအရာများစွာကို ပြောဆိုနိုင်သည့်၊ များစွာ တရားဟောနိုင်သည့်၊ အမှုများစွာကို ပြုနိုင်သည့်၊ လူများစွာကို သူ့နောက်သို့လိုက်စေသည့် အချက်က သခင်ယေရှု၏ ပင်ကိုလက္ခဏာနှင့် အဆင့်အတန်းအပေါ် ဂုဏ်တစ်ခုခု ဖြစ်စေသည်။ သူ့တွင် အကန့်အသတ်မရှိသော ဘုန်းကျက်သရေနှင့် မြင့်မြတ်ခြင်းရှိပြီး ဤသို့ဖြင့် လူများကြားတွင် သခင်ယေရှု၏ အဆင့်အတန်းက အထူးပင်ကြီးမားကာ ထင်ရှားကျော်ကြားမှုရရှိစေသည်။ ဤသည်မှာ ပေါလုမြင်ခဲ့သည့်အရာ ဖြစ်သည်။ အမှုပြုနေစဉ်တွင် သခင်ယေရှု ပြသပြီး ထုတ်ဖော်ခဲ့သည့်အရာမှ၊ ထို့အပြင် သူ၏ ပင်ကိုလက္ခဏာနှင့် အနှစ်သာရမှ ပေါလုမြင်ခဲ့သည့်အရာမှာ ဘုရားသခင်၏ အနှစ်သာရ၊ သမ္မာတရား၊ လမ်းခရီး၊ သို့မဟုတ် အသက် မဟုတ်သကဲ့သို့ ဘုရားသခင်၏ ချစ်ခင်နှစ်လိုဖွယ်ကောင်းခြင်း၊ သို့မဟုတ် ဉာဏ်ပညာလည်း မဟုတ်ပေ။ ပေါလုက မည်သည့်အရာကို မြင်ခဲ့သနည်း။ ခေတ်သစ်စကားအသုံးအနှုန်းကို အသုံးပြုရလျှင် သူမြင်ခဲ့သည့်အရာမှာ လျှမ်းလျှမ်းတောက်အောင်မြင်သော ကျော်ကြားမှုဖြစ်ပြီး သူသည် သခင်ယေရှု၏ အမာခံပရိတ်သတ်ဖြစ်လိုသည်။ သခင်ယေရှုစကားပြောသောအခါ၊ သို့မဟုတ် အမှုပြုသောအခါ လူများစွာ နားထောင်ကြသည်။ ထိုအရာမှာ ဘုန်းကျက်သရေရှိလိုက်လေခြင်းပါတကား။ ဤသည်မှာ ပေါလုက ကြာရှည်စွာ စောင့်ဆိုင်းခဲ့သော အရာတစ်ခု ဖြစ်သည်။ ဤအခိုက်အတန့်ရောက်ရှိလာခြင်းကို သူတပ်မက်ခဲ့သည်။ လူများစွာတို့သည် မမှိတ်မသုန်အာရုံစိုက်လျက်၊ ၎င်းတို့၏မျက်လုံးများတွင် လေးစားမှု၊ တောင့်တမှုများဖြင့် သခင်ယေရှု၏ နောက်သို့လိုက်လိုခြင်းဖြင့် ကြည့်ခြင်းခံရသော သခင်ယေရှုကဲ့သို့ အဆုံးမဲ့ တရားဟောနိုင်သည့်နေ့ရက်ကို သူတောင့်တခဲ့သည်။ ပေါလုသည် သခင်ယေရှု၏ အထင်ကြီးလောက်ဖွယ်ဖြစ်သော ဟန်ပန်အမူအရာကို အလွန့်အလွန် အံ့အားသင့်ခဲ့သည်။ အမှန်တကယ်တွင် သူသည် အမှန်ပင် အလွန့်အလွန် အံ့အားသင့်ခြင်းမဟုတ်ဘဲ လူတို့က အထင်ကြီးလေးစားသည့်၊ အာရုံစိုက်သည့်၊ ပုဂ္ဂိုလ်ရေးကိုးကွယ်သည့်၊ အထင်အမြင်ကြီးသည့် ပင်ကိုလက္ခဏာနှင့် ဟန်ပန်အမူအရာရှိခြင်းကို အားကျခဲ့ခြင်း ဖြစ်သည်။ ဤသည်မှာ သူအားကျခဲ့သည့်အရာ ဖြစ်သည်။ ဤသို့ဆိုလျှင် သူသည် ယင်းကို မည်သို့ရရှိနိုင်သနည်း။ သခင်ယေရှုခရစ်တော်သည် ဤအရာများကို သူ၏ အနှစ်သာရနှင့် ပင်ကိုလက္ခဏာမှတစ်ဆင့် ရရှိခဲ့သည်ဟု သူ မယုံကြည်ဘဲ သူ၏ အမည်ကြောင့်ဖြစ်သည်ဟု ယုံကြည်ခဲ့သည်။ ထို့ကြောင့် ပေါလုသည် ခရစ်တော်၏ အမည်နာမကို သူခံယူနိုင်သည့် အကျော်အမော်ပုဂ္ဂိုလ်ဖြစ်ရန်၊ နေရာတစ်ခုရှိရန်၊ တောင့်တခဲ့သည်။ ပေါလုသည် ဤသို့သောနေရာကို သူရရှိရန် များစွာ အားစိုက်ထုတ်ခဲ့သည် မဟုတ်လော။ (ဟုတ်ပါသည်။) မည်သည့်အားထုတ်မှုများကို လုပ်ဆောင်ခဲ့သနည်း။ သူသည် နေရာတကာတွင် တရားဟောပြီး အံ့ဖွယ်ရာများကိုပင် ပြသသည်။ အဆုံးတွင် သူသည် သူ့ကိုယ်သူ အဓိပ္ပာယ်ဖွင့်ဆိုရန် သူ၏ အတွင်းပိုင်း လိုအင်ဆန္ဒများနှင့် ရည်မှန်းချက်များကို ကျေနပ်စေသည့် စကားတစ်ခွန်းကို အသုံးပြုခဲ့သည်။ သူ့ကိုယ်သူ အဓိပ္ပာယ်ဖွင့်ဆိုရန်အတွက် မည်သည့်စကားကို အသုံးပြုခဲ့သနည်း။ (“အသက်ရှင်သည့်အရာမှာ ခရစ်တော်ဖြစ်၏။ သေလျှင်မူကား၊ သာ၍အကျိုးရှိ၏။”) အသက်ရှင်သည့်အရာမှာ ခရစ်တော်ဖြစ်၏။ ဤသည်မှာ သူဖြစ်မြောက်လိုသည့် အဓိကအရာ ဖြစ်သည်။ သူ၏ အဓိက လိုအင်ဆန္ဒမှာ ခရစ်တော်ဖြစ်ရန် ဖြစ်သည်။ ဤဆန္ဒသည် သူ၏ တစ်ကိုယ်ရေလိုက်စားမှုများနှင့် သူလျှောက်သည့်လမ်းကြောင်းအပေါ်တွင် မည်သည့်ဆက်စပ်မှုရှိသနည်း။ (သူသည် တန်ခိုးအာဏာကို ကြောက်ရွံ့သည်။ ပြီးလျှင် လူတို့အား သူ့ကို အထင်ကြီးလေးစားစေရန် အားထုတ်သည်။) ဤသည်မှာ သဘောတရားတစ်ခု ဖြစ်သည်။ အမှန်တရားအချို့ကို သင်ပြောသင့်သည်။ ပေါလုသည် ခရစ်တော်ဖြစ်ရန် သူ၏လိုအင်ဆန္ဒကို လက်တွေ့ကျသောနည်းလမ်းများဖြင့် ပြခဲ့သည်။ သူ့အပေါ် ငါ၏ အဓိပ္ပာယ်ဖွင့်ဆိုချက်သည် သူပြောခဲ့သည့် စကားတစ်ခွန်းကိုသာ အခြေခံခြင်းမဟုတ်။ သူ့လုပ်ရပ်များ၏ ပုံစံ၊ နည်းလမ်းနှင့် စည်းမျဉ်းများမှနေ၍ သူလုပ်ဆောင်သမျှတိုင်းသည် ခရစ်တော်ဖြစ်ရန် သူ၏ပန်းတိုင်ကို ဗဟိုပြုသည်ကို ငါတို့မြင်နိုင်သည်။ ဤသည်မှာ ပေါလုက အမှုအရာများစွာကို အဘယ်ကြောင့် ပြောဆိုပြီးလုပ်ဆောင်ခဲ့သည်ဆိုသည်၏ အရင်းအမြစ်နှင့် အနှစ်သာရဖြစ်သည်။ ပေါလုသည် ခရစ်တော်ဖြစ်လိုပြီး ဤအရာက သူ၏ လိုက်စားမှုများ၊ အသက်တာတွင်သူ၏လမ်းကြောင်းနှင့် သူ၏ယုံကြည်မှုတို့အပေါ် လွှမ်းမိုးခဲ့သည်။ ဤလွှမ်းမိုးမှုသည် မည်သည့်ပုံစံများဖြင့် ပေါ်လွင်သနည်း။ (ပေါလုသည် သူ၏အလုပ်နှင့် တရားဟောခြင်းအားလုံးတွင် ကြွားဝါပြီး သူ့ကိုယ်သူ သက်သေခံခဲ့သည်။) ဤသည်မှာ တစ်နည်းဖြစ်သည်။ ပေါလုသည် အချိန်တိုင်းတွင် ကြွားဝါသည်။ သူသည် မည်သို့ဒုက္ခခံခဲ့သည်၊ အမှုအရာများကို မည်သို့လုပ်ဆောင်ခဲ့သည်နှင့် သူ၏ ရည်ရွယ်ချက်များက မည်သည့်အရာ ဖြစ်သည်ဆိုသည်တို့ကို လူတို့အား ရှင်းလင်းစွာ သိစေသည်။ ဤသို့ဖြင့် လူတို့က ဤအရာကို ကြားသောအခါ သူသည် ခရစ်တော်နှင့် အတိအကျပင် ဆင်တူသည်ဟု ထင်မြင်ပြီး သူ့အား ခရစ်တော်ဟု အမှန်ပင်ခေါ်လိုရန် ဖြစ်သည်။ ယင်းသည် သူ၏ ပန်းတိုင်ဖြစ်သည်။ လူတို့က သူ့ကို ခရစ်တော်ဟု အမှန်ပင်ခေါ်လျှင် သူသည် ငြင်းဆန်ခဲ့မည်လော။ သူသည် ငြင်းပယ်ခဲ့မည်လော။ (ငြင်းပယ်မည်မဟုတ်ပါ။) အသေအချာပင် ငြင်းပယ်မည်မဟုတ်။ သူသည် အသေအချာပင် ဘဝင်ခိုက်နေလိမ့်မည်။ ဤသည်မှာ သူ၏လိုက်စားမှုအပေါ်တွင်ရှိသည့် လွှမ်းမိုးမှုက ပေါ်လွင်သည့် ပုံစံတစ်ခု ဖြစ်သည်။ အခြားမည်သည့်ပုံစံများရှိသနည်း။ (သူသည် စာများရေးခဲ့သည်။) ဟုတ်သည်။ သူသည် စာအချို့ကို ခေတ်ကာလများတစ်လျှောက် လက်ဆင့်ကမ်းစေရန်အတွက် ရေးခဲ့သည်။ သူ၏စာ၊ အလုပ်နှင့် အသင်းတော်များကို သူထိန်းကျောင်းသည့် လုပ်ငန်းစဉ်တစ်လျှောက်တွင် သခင်ယေရှုခရစ်တော်၏ အမည်နာမကို တစ်ကြိမ်မျှပင် မပြောခဲ့ပေ၊ သို့မဟုတ် သခင်ယေရှုခရစ်တော်၏ အမည်နာမ၌ အမှုအရာများကို မလုပ်ဆောင်ခဲ့ပေ၊ သို့မဟုတ် သခင်ယေရှုခရစ်တော်၏ အမည်နာမကို မချီးမြှောက်ခဲ့ပေ။ သူသည် ဤသို့အစဉ်အလုပ်လုပ်ပြီး စကားပြောခြင်းတွင် မည်သည့်အပျက်သဘောဆောင်သော သက်ရောက်မှု ရှိသနည်း။ ယင်းက သခင်ယေရှုနောက်သို့ လိုက်သောသူများအပေါ် မည်သို့လွှမ်းမိုးခဲ့သနည်း။ ယင်းသည် လူတို့အား သခင်ယေရှုခရစ်တော်ကို ငြင်းပယ်စေပြီး ပေါလုအား သူ၏နေရာကိုယူစေသည်။ သူသည် “သခင်ယေရှုခရစ်တော်သည် မည်သူနည်း။ သူ့အကြောင်းကို ငါတစ်ခါမှ မကြားဖူးပါ။ ပေါလုခရစ်တော်ကို ငါတို့ယုံကြည်သည်” ဟု လူများက မေးသည်ကို တောင့်တသည်။ ဤသို့ဆိုလျှင် သူသည် ပျော်ရွှင်လိမ့်မည်။ ဤသည်မှာ သူ၏ ပန်းတိုင်ဖြစ်ပြီး သူရှာဖွေခဲ့သည့်အရာများထဲမှ တစ်ခုဖြစ်သည်။ ထိုလွှမ်းမိုးမှုက ပေါ်လွင်သည့်ပုံစံတစ်ခုမှာ သူအမှုပြုခဲ့သည့် ပုံစံဖြစ်သည်။ သူသည် အနှစ်မရှိသော အယူအဆများကို တောင်စဉ်ရေမရ ပြောဆိုသည်။ ပြီးလျှင် သူသည် သူ၏အလုပ်တွင် မည်မျှစွမ်းဆောင်နိုင်ပြီး လေးစားအားကျဖွယ် ကောင်းသည်ကိုလည်းကောင်း၊ လူတို့ကို သူမည်မျှ ကူညီခဲ့သည်ကိုလည်းကောင်း၊ သူ့တွင် သခင်ယေရှုခရစ်တော် ပြန်လည်ပေါ်ထွန်းသည့်အလား ဟန်ပန်အမူအရာတစ်ခု ရှိသည်ကိုလည်းကောင်း လူတို့အား မြင်စေရန် အနှစ်မရှိသော သဘောတရားများကို မပြီးမဆုံးနိုင်အောင် ပြောဆိုခဲ့သည်။ လွှမ်းမိုးမှုက ပေါ်လွင်သော အခြားပုံစံတစ်ခုမှာ သူသည် သခင်ယေရှုခရစ်တော်ကို မည်သည့်အခါမျှ မချီးမြှောက်ခဲ့ခြင်း၊ သူ၏ အမည်နာမကို အသေအချာပင် မချီးမြှောက်ခဲ့ခြင်း၊ သို့မဟုတ် သခင်ယေရှုခရစ်တော်၏ စကားများနှင့် အလုပ်၊ သို့မဟုတ် လူတို့သည် ယင်းတို့ထံမှ မည်သို့အကျိုးအမြတ်ရရှိသည်ဆိုသည်တို့ကို သက်သေမခံခဲ့ခြင်းတို့ ဖြစ်ပေသည်။ ပေါလုသည် လူတို့အနေဖြင့် မည်သို့နောင်တရသင့်သည်ဆိုသည်နှင့်ပတ်သက်သော တရားဒေသနာများကို ဟောကြားခဲ့သလော။ ထိုသို့ သေချာပေါက် မလုပ်ဆောင်ခဲ့ပေ။ ပေါလုသည် သခင်ယေရှု လုပ်ဆောင်ခဲ့သောအမှု၊ သူပြောခဲ့သော စကားများ၊ သို့မဟုတ် လူတို့ကို သူသင်ကြားပေးခဲ့သော သမ္မာတရားအားလုံးတို့အကြောင်းကို မည်သည့်အခါမျှ တရားမဟောခဲ့ပေ။ ပေါလုသည် သူ၏ စိတ်နှလုံးတွင် ဤအရာများကို ငြင်းဆန်သည်။ ပေါလုသည် သခင်ယေရှုခရစ်တော် ပြောခဲ့သော စကားများနှင့် လူတို့ကို သွန်သင်ပေးခဲ့သော သမ္မာတရားများကို ငြင်းဆန်ရုံသာမက သူ၏ ကိုယ်ပိုင်စကားများ၊ အလုပ်နှင့် သွန်သင်မှုများကို သမ္မာတရားအဖြစ် သဘောထားခဲ့သည်။ သူသည် သခင်ယေရှု၏ စကားများကို အစားထိုးရန်အတွက် ဤအရာများကို အသုံးပြုခဲ့သည်။ ပြီးလျှင် သူ၏စကားများကို သမ္မာတရားဖြစ်သည့်အလား လူတို့အား လက်တွေ့လုပ်ဆောင်စေပြီး လိုက်နာစေသည်။ ဤသရုပ်သကန်များနှင့် ထုတ်ဖော်ပြမှုများကို မည်သည့်အရာက လှုံ့ဆော်ခဲ့သနည်း။ (ခရစ်တော်ဖြစ်ရန် သူ၏ ဆန္ဒဖြစ်သည်။) ယင်းတို့ကို သူ၏ ခရစ်တော်ဖြစ်ရန် ရည်ရွယ်ချက်၊ လိုအင်ဆန္ဒနှင့် ရည်မှန်းချက်တို့က လှုံ့ဆော်ပေးသည်။ ဤသည်မှာ သူ၏ လက်တွေ့လုပ်ဆောင်မှုနှင့် လိုက်စားမှုများဖြင့် နီးကပ်စွာ ဆက်စပ်နေသည်။ ဤသည်မှာ ပေါလု၏ ဆဋ္ဌမအပြစ်ဖြစ်သည်။ ဤသည်မှာ ဆိုးရွားသော အပြစ်ဟုတ်သလော။ (ဟုတ်ပါသည်။) အမှန်တကယ်တွင် သူ၏ အပြစ်အားလုံးသည် ဆိုးရွားသည်။ အားလုံးက သေခြင်းအဓိပ္ပာယ် သက်ရောက်သည်။

ယခုတွင် ပေါလု၏ သတ္တမမြောက်အပြစ်ကို ငါမိတ်သဟာယပြုမည်။ ဤတစ်ခုသည် ပို၍ပင် ဆိုးရွားသည်။ ပေါလုသည် သခင်၏ ခေါ်ဆိုခြင်းကို မခံရမီတွင် သူသည် ဂျူးဘာသာကို ယုံကြည်သူတစ်ဦး ဖြစ်သည်။ ဂျူးဘာသာသည် ယေဟောဝါဘုရားသခင်အပေါ် ယုံကြည်ခြင်း ဖြစ်သည်။ ယေဟောဝါဘုရားသခင်ကို ယုံကြည်သူများတွင် ဘုရားသခင်နှင့်ပတ်သက်ပြီး မည်သည့်အယူအဆရှိသနည်း။ ယင်းမှာ ယေဟောဝါဘုရားသခင်က ၎င်းတို့၏ ဘိုးဘေးများကို အဲဂုတ္တုပြည်မှနေ၍ ကောင်းမွန်သော ခါနန်ပြည်သို့ ခေါ်ဆောင်သွားသောအခါ၌ ၎င်းတို့၏ ဘိုးဘေးများ ကြုံတွေ့ရသောအရာများ ဖြစ်သည်။ ယေဟောဝါက မောရှေထံ ပေါ်ထွန်းပုံ၊ အဲဂုတ္တုပြည်အပေါ် ကပ်ကြီးဆယ်ပါးကို ဆိုက်ရောက်စေပုံ၊ ဣသရေလလူမျိုးများကို ဦးဆောင်ရန် တိမ်တိုက်များနှင့်မီးကို အသုံးပြုပုံနှင့် ၎င်းတို့ကို ပညတ်တော်များ ချပေးပုံ စသည်တို့ ဖြစ်သည်။ ထိုအချိန်က ဂျူးဘာသာကို ယုံကြည်သောသူတို့က ဤအရာများအားလုံးသည် စိတ်ကူးယဉ်၊ အယူအဆများနှင့် ဒဏ္ဍာရီများသက်သက်ဟု ထင်ခဲ့ကြသလော၊ သို့မဟုတ် အမှန်တရားများဟု ထင်ခဲ့ကြသလော။ ထိုအချိန်က ဘုရားသခင်ရွေးချယ်သောလူများနှင့် စစ်မှန်သောနောက်လိုက်များက ကောင်းကင်ဘုံမှ ဘုရားသခင် တည်ရှိပြီး အမှန်တကယ်ရှိသည်ဟု ယုံကြည်ပြီး အသိအမှတ်ပြုခဲ့ကြသည်။ ၎င်းတို့က “ဘုရားသခင်သည် လူသားမျိုးနွယ်ကို ဖန်ဆင်းခဲ့သည့်အချက်က မှန်သည်။ ရှေးယခင်အချိန်မည်မျှက ဖြစ်ပျက်ခဲ့သည်ဖြစ်စေ ဤအချက်က မှန်ကန်လျက်ရှိသည်။ ငါတို့သည် ယင်းကို ယုံကြည်ရမည်သာမကဘဲ သေချာရမည်။ ဤအချက်ကို ဝေမျှရမည်။ ဤသည်မှာ ငါတို့၏တာဝန်နှင့် ငါတို့၏ ဝတ္တရားဖြစ်သည်” ဟု ထင်မြင်ကြသည်။ သို့ရာတွင် မယုံကြည်သူများဖြစ်သည့် အခြားလူအုပ်စုသည် ဤအရာများက ဒဏ္ဍာရီများသာ ဖြစ်ဖို့များသည်ဟု ခံစားမိကြသည်။ မည်သူကမျှ ဤဇာတ်ကြောင်းများကို မှန်မမှန်စစ်ဆေးရန် မကြိုးစားခဲ့ကြ၊ သို့မဟုတ် ယင်းတို့သည် အစစ်အမှန်လော၊ စိတ်ကူးယဉ်လောဆိုသည်ကို သုတေသန မပြုခဲ့ကြပေ။ ၎င်းတို့က ယင်းတို့ကို မယုံတစ်ဝက်၊ ယုံတစ်ဝက်သာ ဖြစ်ခဲ့သည်။ ဘုရားသခင်ကို ၎င်းတို့ လိုအပ်သောအခါ ဘုရားသခင်သည် စစ်မှန်ပြီး ၎င်းတို့လိုက်စားသည့်၊ ဆုတောင်းသည့်၊ တောင့်တသည့်အရာတို့ကို ၎င်းတို့အားပေးနိုင်ဖို့ မျှော်လင့်ကြသည်။ ၎င်းတို့က တစ်စုံတစ်ခုကို ရဖို့ မျှော်လင့်လျက် ဘုရားသခင်ထံ ဆုတောင်းသောအခါ ဤဘုရားသခင် တည်ရှိဖို့ ၎င်းတို့ မျှော်လင့်ခဲ့ကြသည်။ ဤသို့လုပ်ဆောင်ခြင်းအားဖြင့် ၎င်းတို့သည် ဘုရားသခင်ကို စိတ်ဓာတ်ရေးရာ အထောက်အပံ့တစ်ခုအဖြစ်သာ သဘောထားနေကြခြင်း ဖြစ်သည်။ ဘုရားသခင်က လူကို ကယ်တင်သည်ဆိုသည့်အချက်ကို ၎င်းတို့ မမြင်သကဲ့သို့ ဘုရားသခင်ဖော်ပြသည့် သမ္မာတရားများကိုလည်း လက်မခံကြပေ။ ဤသည်မှာ ဘုရားသခင်အပေါ် အမှန်တကယ် ယုံကြည်ခြင်းမဟုတ်။ ၎င်းတို့သည် မယုံကြည်သူများ ဖြစ်နှင့်ပြီးသား ဖြစ်သည်။ အနိမ့်ကျဆုံးသောလူစားမျိုးသည် မိမိကိုယ်ကို မည်သို့ပေါ်လွင်စေသနည်း။ ၎င်းတို့လုပ်ဆောင်သမျှမှာ အသင်းတော်တွင် ဘုရားသခင်ကို အစေခံခြင်း၊ ဘုရားသခင်ထံ လှူဖွယ်ပစ္စည်းများ ပေးအပ်ခြင်း၊ ကျင့်စဉ်များအားလုံးကို လိုက်နာခြင်း၊ ပြီးလျှင် ဒဏ္ဍာရီမျိုးစုံကိုပင် ယုံကြည်ခြင်းတို့ ဖြစ်သည်။ သို့ရာတွင် ဘုရားသခင်သည် ၎င်းတို့၏ စိတ်နှလုံးတွင် မရှိဘဲ ၎င်းတို့အယူအဆများနှင့် စိတ်ကူးထင်မြင်မှုများမှဖြစ်သည့် ဘုရားသခင်သည် မရေမရာဖြစ်ပြီး အနှစ်မဲ့သည်။ ဤသို့သောသူတစ်ဦးသည် မည်သည့်အရာကို ယုံကြည်သနည်း။ ရုပ်ဝတ္ထုဝါဒဖြစ်သည်။ ၎င်းတို့ မြင်နိုင်သည့်အရာများကိုသာ ၎င်းတို့ ယုံကြည်သည်။ ၎င်းတို့၏ အမြင်တွင် ဒဏ္ဍာရီနှင့်သက်ဆိုင်သောအရာများ၊ မရေရာသောအရာများ၊ ၎င်းတို့၏ လက်နှင့် မထိနိုင်သော၊ မျက်လုံးဖြင့် မမြင်နိုင်သော၊ သို့မဟုတ် နားဖြင့်မကြားနိုင်သော ဝိညာဉ်ရေးရာနယ်ပယ်မှ မည်သည့်အရာမျှ မတည်ရှိပေ။ လူအချို့က “ဤသို့ဆိုလျှင် မမြင်နိုင်လောက်အောင် သေးငယ်သော သက်ရှိများကဲ့သို့ ၎င်းတို့မမြင်နိုင်သည့်အရာများ တည်ရှိမှုကို ၎င်းတို့ ယုံကြည်သလော” ဟု ပြောသည်။ ထိုအရာများကို ၎င်းတို့ လုံးဝ ယုံကြည်သည်။ ၎င်းတို့သည် သိပ္ပံ၊ အီလက်ထရွန်၊ အဏုဇီဝဗေဒနှင့် ဓါတုဗေဒတို့ကို လုံးဝ ယုံကြည်သည်။ မယုံကြည်သူများက ထိုအရာများသည် မည်သည့်အရာမဆိုထက်ပို၍ မှန်ကန်သည်ဟု ယုံကြည်ကြသည်။ ၎င်းတို့သည် ရုပ်ဝါဒီစစ်စစ်များဖြစ်သည်။ ငါတို့သည် ဤလူသုံးမျိုးကို ပိုင်းခြားစိစစ်ရန်အတွက် ဤအကြောင်းကို ပြောဆိုနေခြင်း ဖြစ်သည်။ စစ်မှန်သော ယုံကြည်သူများ၊ တစ်ဝက်တစ်ပျက်ယုံကြည်သူများ၊ ဘုရားသခင်တည်ရှိမှုကို လုံးဝ မယုံကြည်သော ရုပ်ဝါဒီများဖြစ်သည်။ လူအချို့က “အမှန်တကယ်ပင် ဘုရားရှိသလော။ သူသည် ဘယ်မှာနည်း။ မည်သည့်ပုံစံရှိသနည်း။ ဘုရားသည် တတိယကောင်းကင်ဘုံတွင်ရှိသည်ဟု ငါကြားရသည်။ ဤသို့ဆိုလျှင် တတိယကောင်းကင်ဘုံသည် မည်မျှမြင့်သနည်း။ မည်မျှဝေးသနည်း။ မည်မျှကြီးသနည်း။ လူတို့က ကောင်းကင်ဘုံရှိသည်၊ ယင်းသည် ရွှေရောင်အုတ်များနှင့် ကျောက်စိမ်းကြွေပြားများ ခင်းကျင်းထားသည်၊ နံရံများသည်လည်း ရွှေဖြစ်သည်ဟုလည်း ဆိုကြသည်။ ဤသို့သော အံ့ဩဖွယ်နေရာတစ်ခု မည်သို့ရှိနိုင်သနည်း။ အဓိပ္ပာယ်မရှိ။ ပညတ်တော်ခေတ်တွင် ဘုရားသခင်သည် သူရွေးချယ်ထားသောသူများကို သူ၏ ပညတ်တော်များချပေးပြီး ပညတ်တော်ကျောက်ပြားများက တည်ရှိနေသေးသည်ဟု ငါကြားရသည်။ ယင်းတို့အားလုံးမှာ ဒဏ္ဍာရီများ ဖြစ်ဖို့များသည်။ လူထုကို ထိန်းချုပ်ရန်အတွက် အုပ်ချုပ်သူလူတန်းစားက အသုံးပြုသည့် အရာတစ်ခု ဖြစ်သည်” ဟု ဆိုကြသည်။ ဤလူအုပ်စုသည် ဘုရားသခင်အပေါ် စစ်မှန်သော ယုံကြည်မှုရှိသလော။ (မရှိပါ။) ဘုရားသခင်အမှန်တကယ် တည်ရှိသည်ကိုဖြစ်စေ၊ ဘုရားသခင်သည် လူသားများကို ဖန်ဆင်းခဲ့ပြီး လက်ရှိအချိန်အထိ လူသားမျိုးနွယ်ကို ဦးဆောင်ခဲ့သည်ဆိုသည့်အချက်ကိုဖြစ်စေ ၎င်းတို့ မယုံကြည်ပေ။ ဤသို့ဆိုလျှင် ၎င်းတို့သည် အသင်းတော်တွင် အဘယ်ကြောင့်အစေခံနေသေးသနည်း။ (ဘုရားသခင်ကို အစေခံခြင်းသည် အလုပ်တစ်ခုဖြစ်ပြီး ထမင်းစားလက်မှတ်တစ်ခုဖြစ်သည်ဟု ၎င်းတို့ သဘောထားသောကြောင့် ဖြစ်ပါသည်။) မှန်သည်။ ၎င်းတို့သည် အလုပ်တစ်ခုနှင့် ထမင်းစားလက်မှတ်တစ်ခုအဖြစ် မြင်ကြသည်။ ဤသို့ဆိုလျှင် ပေါလုသည် မည်သည့်လူအမျိုးအစား ဖြစ်သနည်း။ (တတိယအမျိုးအစား ဖြစ်သည်။) ဤသည်မှာ သူ၏ သဘာဝအနှစ်သာရနှင့် ဆက်စပ်နေသည်။ ပေါလုသည် အနှစ်မရှိသော သဘောတရားများကို တောင်စဉ်ရေမရ ပြောဆိုလိုသည်။ အနှစ်မရှိသောအရာများ၊ မရေရာသောအရာများနှင့် စိတ်ကူးယဉ်ဖြစ်သော အရာများကို သူနှစ်သက်သည်။ လေးနက်ပြီး သဘောပေါက်ရန် ခက်သောအရာများ၊ ခိုင်လုံသောဝေါဟာရများဖြင့် ချမပြနိုင်သည့်အရာများကို သူနှစ်သက်သည်။ သူသည် အမှုအရာများကို အလွန်အကျွံတွေးလိုသည်။ သူသည် အမြင်စောင်းပြီး ခေါင်းမာသည်။ သူ့တွင် လွဲချော်နေသော နားလည်မှုတစ်ခုရှိသည်။ ဤသို့သောသူများသည် လူသားမဟုတ်။ ဤသည်မှာ သူဖြစ်ခဲ့သော လူအမျိုးအစားဖြစ်သည်။ ပေါလု၏ စိတ်သဘောထားနှင့် သဘာဝအနှစ်သာရအပြင် သူ၏ နှစ်သက်မှုများ၊ မျှော်လင့်ချက်များ၊ လိုက်စားမှုများနှင့် ပြင်းပြသောဆန္ဒများကိုကြည့်လျှင် သူသည် အသင်းတော်တွင် အစေခံခဲ့ပြီး ထင်ရှားသောဆရာတစ်ဦး၏ ကျောင်းသားဖြစ်သော်လည်း သူသင်ယူခဲ့သော အသိပညာသည် သူ၏ကိုယ်ပိုင်ဆန္ဒများ၊ ရည်မှန်းချက်များနှင့် မာန်မာနကို ဖြည့်ဆည်းရန်၊ သူ့အတွက် လူ့အဖွဲ့အစည်း၌ ထမင်းစားလက်မှတ်၊ အဆင့်အတန်း၊ ရပ်တည်မှုရရှိစေရန်အတွက် အသုံးချပစ္စည်းတစ်ခုသာ ဖြစ်သည်။ ပေါလု၏ သဘာအနှစ်သာရနှင့် လိုက်စားမှုများကိုကြည့်လျှင် သူသည် ယေဟောဝါအပေါ်၌ ယုံကြည်ခြင်းမည်မျှရှိခဲ့သနည်း။ သူ၏ ယုံကြည်ခြင်းသည် ကတိတစ်ခုမဟုတ်ဘဲ အနှစ်မရှိသော စကားများသာ ဖြစ်သည်။ သူသည် မယုံကြည်သူတစ်ဦး၊ ဘုရားမဲ့တစ်ဦးနှင့် ရုပ်ဝါဒီတစ်ဦးဖြစ်သည်။ လူအချို့က “ပေါလုသည် မယုံကြည်သူဖြစ်လျှင် သူသည် အဘယ်ကြောင့် သခင်ယေရှုခရစ်တော်၏ တမန်တော်ဖြစ်ပြီး ကျေးဇူးတော်ခေတ် ဧဝံဂေလိတရားကို ဖြန့်ခဲ့သနည်း” ဟု မေးကြသည်။ ငါ့ကို ပြောလော့။ သူသည် ဤလမ်းကြောင်းကို မည်သို့လျှောက်နိုင်ခဲ့သနည်း။ မည်သည့်အရာက သူ့ကို လှုံ့ဆော်ခဲ့သနည်း။ ဤနေရာအား သူ့ကို ယူစေခဲ့သော၊ ဤသို့သောလမ်းကြောင်းကို သူကဲ့သို့ မယုံကြည်သူတစ်ဦးအား လျှောက်နိုင်စေခဲ့ပြီး ပြောင်းလဲမှုတစ်ခုဖြစ်စေခဲ့သော အလှည့်အပြောင်းမှာ အဘယ်နည်း။ “ပြောင်းလဲမှု”အကြောင်းကို ငါပြောဆိုသောအခါတွင် မည်သည့်အရာကို ငါရည်ညွှန်းနေသနည်း။ ယင်းမှာ ပေါလုသည် ဒမာသက်မြို့သို့ သွားသည့်လမ်းတွင် အလင်းထွန်းတောက်ခြင်း ခံရသည့်အချိန်တွင်ဖြစ်သည်။ ယင်းသည် သူ့အသက်တာ၏ ပြောင်းလဲမှုဖြစ်သည်။ ပြောင်းလဲမှုနှစ်မျိုးကို သူတွေ့ကြုံခဲ့ရသည်။ တစ်ခုမှာ အစပိုင်းတွင် သူဖိနှိပ်နေခဲ့သော သခင်ယေရှုသည် ဒမာသက်မြို့သို့သွားသည့်လမ်း၌ သူ့ထံတွင် ပေါ်ထွန်းသောကြောင့် ဘုရားသခင်အား မယုံကြည်ခြင်းမှ ဘုရားသခင် အသေအချာပင် တည်ရှိသည်ဟု ယုံကြည်ခြင်းဆီသို့ ကူးပြောင်းသွားခြင်းဖြစ်သည်။ ပေါလုက “သခင်၊ ကိုယ်တော်သည် အဘယ်သူနည်း” ဟု အံ့အားသင့်စွာပြောသည်။ အမှန်တကယ်တွင် စိတ်အတွင်းထဲတွင် ပေါလုသည် ဤသခင်နှင့် ဘုရားသခင်တည်ရှိသည်ကို မယုံကြည်ခဲ့သော်လည်း “သခင်၊ ကိုယ်တော်သည် အဘယ်သူနည်း” ဟု မမေးမြန်းဘဲ မနေနိုင်ပေ။ သခင်ယေရှုက ဘာပြောခဲ့သနည်း။ (“ငါကား သင် ညှဉ်းဆဲသော ယေရှုဖြစ်သတည်း။” (တမန်တော်ဝတ္ထု ၉:၅)) သခင်ယေရှုက ဤသို့ပြောသည့်အခိုက်အတန့်တွင် ပေါလုသည် အချက်တစ်ချက်ကို လက်ခံယုံကြည်ခဲ့သည်။ သူ ယခင်က တစ်ခါမျှ မမြင်ခဲ့ဖူးသည့်၊ စိတ်ကူး၍ မရနိုင်သည့်၊ သူစိတ်ကူးထင်မြင်နိုင်သည်ထက်ပို၍ တန်ခိုးကြီးသည့် သခင်တစ်ပါး ပေါ်ထွန်းခဲ့သည်။ သခင်သည် သူစိတ်ကူးကြည့်နိုင်သည်ထက် ပို၍ တန်ခိုးကြီးသည်ဟု သူမည်သို့ လက်ခံယုံကြည်ခဲ့သနည်း။ အဘယ်ကြောင့်ဆိုသော် ပေါလုက လုံးဝ မျှော်လင့်မထားသည့်အချိန်တွင် ဘုရားသခင်ဖြစ်သည်ဟု သူလုံးဝ မယုံကြည်ခဲ့သည့် ယေရှုသည် သူ၏ရှေ့တည့်တည့်တွင် ပေါ်ထွက်လာသောကြောင့် ဖြစ်သည်။ သခင်ယေရှုသည် မည်မျှ တန်ခိုးကြီးသနည်း။ ပေါလုသည် သူ၏မျက်လုံးများက သခင်ယေရှု၏ အလင်းကြောင့် မျက်လုံးကန်သွားသောအခါတွင် သခင်ယေရှု၏ တန်ခိုးပမာဏကို လက်ခံယုံကြည်သွားခဲ့သည်။ ဤသို့ဆိုလျှင် သခင်ယေရှုသည် ဘုရားဖြစ်သည်ဟု သူလက်ခံယုံကြည်နိုင်သလော။ (မယုံကြည်နိုင်ပါ။) အဘယ်ကြောင့် မယုံကြည်နိုင်သနည်း။ (ပေါလုသည် ဘုရားသခင်တည်ရှိသည်ဟု အစကတည်းက မယုံကြည်ခဲ့သောကြောင့် ဖြစ်သည်။) မှန်သည်။ သူသည် ဘုရားသခင်တည်ရှိခြင်းကို လုံးဝ မယုံကြည်ခဲ့သောကြောင့် ဖြစ်သည်။ ယခုအချိန်တွင် သင်တို့အားလုံး၏ စိတ်နှလုံးတွင် ယုံကြည်ခြင်းနှင့် အခြေခံအုတ်မြစ်တစ်ခုရှိသည်။ ထို့ကြောင့် ဘုရားသခင်က သင့်ထံတွင် ပေါ်ထွန်းလျှင်၊ သူ၏အသံ၊ သို့မဟုတ် သူ၏နောက်ကျောသာဖြစ်လျှင်ပင်၊ သူသည် သင့်ကို စကားပြောလျှင်၊ သို့မဟုတ် သင်၏အမည်ကို ခေါ်လျှင် သင်သည် “ဤသည်မှာ ငါယုံကြည်သည့် ဘုရားဖြစ်သည်။ ငါသည် သူ့ကို မြင်တွေ့ခဲ့ပြီး ကြားခဲ့ပြီ။ ဘုရားသခင်က ငါ့ထံသို့ ချဉ်းကပ်ခဲ့ပြီ” ဟူသည့် အချက်ကို သင် လက်ခံယုံကြည်လိမ့်မည်။ သင့်စိတ်နှလုံးတွင် ယုံကြည်ခြင်းရှိသောကြောင့်၊ ဤအခိုက်အတန့်ကို သင်အိပ်မက်မက်ခဲ့သောကြောင့်၊ သင်သည် မကြောက်ရွံ့သောကြောင့် လက်ခံယုံကြည်လိမ့်မည်။ သို့သော် ဤသည်မှာ ပေါလုထင်မြင်ခဲ့သည့်အရာလော။ (မဟုတ်ပါ။) သူ၏စိတ်နှလုံးတွင် မည်သည့်အခါမျှ ယုံကြည်ခြင်းမရှိခဲ့။ သူ၏ ပထမဆုံးအတွေးမှာ အဘယ်နည်း။ (ကြောက်ရွံ့မှုဖြစ်သည်။) ဤမျက်မြင်ထင်ရှားဖြစ်တည်နေသောအရာသည် သူ့ကို ရိုက်ချပြီး သတ်နိုင်စွမ်းရှိသောကြောင့် သူကြောက်ရွံ့သည်။ သူမမြင်နိုင်သည့် ဤအရာက သူ့အား ငရဲထက်ပို၍ ကြောက်ရွံ့ထိတ်လန့်စေခဲ့သည်။ သူသည် စိတ်လွတ်သွားသည်အထိ ကြောက်ရွံ့ခဲ့သည်။ သူ၏စိတ်နှလုံးသည် ဘုရားသခင်အပေါ် ယုံကြည်ခြင်းလုံးဝမရှိ။ သူ့တွင် ဘုရားသခင်နှင့်ပတ်သက်၍ အယူအဆမရှိဟု ဆိုနိုင်သည်။ ထို့ကြောင့် သခင်ယေရှုက သူ၏အမှုကို ပြုသောအခါ နိမိတ်လက္ခဏာများနှင့် အံ့ဖွယ်အမှုများကို ပြခြင်းဖြစ်စေ၊ တရားဒေသနာများ ဟောကြားခြင်းဖြစ်စေ၊ လူမည်မျှက သူ့နောက်လိုက်သည်ဖြစ်စေ၊ မည်မျှ အထင်ကြီးလောက်ဖွယ်ဖြစ်စေ၊ မြင်ကွင်းက မည်မျှကြီးကျယ်သည်ဖြစ်စေ ပေါလု၏ စိတ်ထဲတွင် သခင်ယေရှုသည် သာမန်လူတစ်ဦးထက် မပိုပေ။ သူသည် သခင်ယေရှုကို အထင်သေးပြီး လေးစားမှုမရှိပေ။ သို့သော် ယခုတွင် သူအထင်သေးခဲ့သည့် သာမန်လူသားသည် သူ့ရှေ့တည့်တည့်တွင် ရပ်နေသည်။ သာမန်လူတစ်ယောက်၏ ကိုယ်ခန္ဓာမဟုတ်တော့ပေ။ ပြီးလျှင် အသံတစ်ခုသာမဟုတ်ဘဲ အလင်းဖြာကျနေသည်။ သူ့အတွက် ယင်းသည် ကမ္ဘာကုန်သည့်တိုင်အောင် မေ့ပျောက်နိုင်မည်မဟုတ်သည့် အခိုက်အတန့်ဖြစ်သည်။ အလင်းက မျက်စိကို မမြင်နိုင်ဖြစ်စေသည်။ ဘုရားသခင်က ပေါလုကို မည်သို့ရိုက်ချခဲ့သနည်း။ ဘုရားသခင်သည် ပေါလုကို ချဉ်းကပ်သောအခါ ပေါလုသည် ရုတ်ချည်း မျက်လုံးကန်းကာ မြေပေါ်သို့ ကျသွားသည်။ မည်သည့်အရာ ဖြစ်နေသနည်း။ သူသည် လိုလိုလားလားဖြင့်၊ သူ၏ ကိုယ်ပိုင်သဘောဆန္ဒဖြင့် ကျသလော၊ သို့မဟုတ် သူသည် ပြင်ဆင်ထားပြီး ဖြစ်သလော။ (မဟုတ်ပါ။ သူသည် မခံနိုင်ခြင်းသာ ဖြစ်သည်။) လူ၏ ကိုယ်ခန္ဓာသည် အသွေးအသားသက်သက် ဖြစ်သည်။ ဤအရာကို မခံနိုင်ပေ။ ဘုရားသခင်က သင့်ထံသို့ အမှန်တကယ် ချဉ်းကပ်သောအခါ သခင်ယေရှုတွင် သင်မြင်ခဲ့ရသည့် သာမန်ရုပ်ခန္ဓာ ဖြစ်မည်မဟုတ်။ အလွန်နှစ်လိုဖွယ်ဖြစ်ပြီး ဖော်ရွေ‌သော၊ အလွန်နှိမ့်ချပြီး သာမန်ဖြစ်‌သော၊ အသွေးအသားနှင့် တည်ဆောက်ထားသော၊ သင့်အတွက် ထူးခြားမှုမရှိသောသူတစ်ဦး၊ သင် များစွာအာရုံစိုက်မည် မဟုတ်သည့်သူတစ်ဦး ဖြစ်မည်မဟုတ်။ ဘုရားသခင်က သင့်ထံသို့ အမှန်တကယ် ချဉ်းကပ်သောအခါတွင် သူက သင့်ကို ရိုက်မချလျှင်ပင် သင်က ခံနိုင်မည်မဟုတ်ပေ။ ပေါလု၏ စိတ်နှလုံးအတွင်းတွင် သူခံစားရသည့် ပထမဆုံးအရာမှာ “ငါဖိနှိပ်ပြီး အထင်သေးလေ့ရှိသည့် သခင်ယေရှု၏ ချဉ်းကပ်ခြင်းကို ငါခံရသည်။ ဤအလင်းသည် အလွန်တန်ခိုးကြီးသည်” ဟူ၍ ဖြစ်သည်။ ဘုရားသခင်က သူ့အား ဦးညွှတ်ရန် ပြောသလော။ သူက “သင်ဦးညွှတ်သင့်သည်” ဟု ပြောသလော။ (မပြောပါ။) ဤသို့ဆိုလျှင် ပေါလုသည် အဘယ်ကြောင့် မြေကြီးကို မျက်နှာအပ်ထားသနည်း။ (ကြောက်ရွံ့သောကြောင့် ဖြစ်သည်။) မဟုတ်ပေ။ လူသားမျိုးနွယ်ကို ဘုရားသခင်က ဖန်ဆင်းခဲ့သည်။ ပြီးလျှင် ၎င်းတို့သည် အလွန်သေးငယ်ပြီး အားနည်းသောကြောင့် ဘုရားသခင်၏ အလင်းက ၎င်းတို့၏ အသွေးအသားကို ထိသောအခါ ၎င်းတို့သည် မြေပေါ်သို့ မကျဘဲ မနေနိုင်ပေ။ ဘုရားသခင်သည် ကြီးမားလွန်းပြီး အားကြီးလွန်းသည်။ သူသည် ၎င်းတို့ ကိုင်တွယ်နိုင်သည့် အစွမ်းအစ၊ သတ္တိနှင့် ယှဉ်လျှင် အားကြီးလွန်းသည်။ ပေါလုက သခင်ယေရှုကို ဘုရားအဖြစ်၊ သို့မဟုတ် သခင်အဖြစ် အသိအမှတ်မပြုခဲ့ပေ။ ထို့ကြောင့် သူသည် သူ့သဘောအလျောက် အဘယ်ကြောင့် ဦးညွှတ်မည်နည်း။ သူသည် ပြိုလဲပြီး သူ့မျက်နှာဖြင့် ကျသွားသည်။ သူသည် လုံးလုံးပင် မသန်မစွမ်းဖြစ်ကာ တုံ့ဆိုင်းသွားသည်။ သူ၏ နဂိုက မာန၊ မာနထောင်လွှားမှု၊ ဆောင့်ကြွားကြွားဖြစ်မှု၊ မိမိကိုယ်ကို မှန်သည်ဟု ယူမှတ်မှု၊ ခမ်းကြီးနားကြီးနိုင်မှုတို့သည် ရုတ်ချည်းပျောက်ကွယ်သွားသည်။ ဘုရားသခင်သည် သူ၏ တကယ့် ဇာတိအဖြစ်တော်အနေဖြင့်ပင် ပေါလုထံ မပေါ်ထွန်းခဲ့ပေ။ သူ့အပေါ် ထွန်းလင်းသည့် သူ၏အလင်းသာဖြစ်ပြီး ပေါလုက ယင်းကို မြင်သောအခါ ဤသည်မှာ ရလဒ်ဖြစ်သည်။ ဤသည်မှာ သူ့အပေါ်တွင် သက်ရောက်မှုမည်မျှ ရှိပုံဖြစ်သည်။ ယင်းသည် ပေါလု၏ ပြောင်းလဲမှုဖြစ်သည်။ ဤပြောင်းလဲမှုနောက်တွင် တစ်မူထူးခြားသော အခြေအနေတစ်ခုမရှိလျှင်၊ သို့မဟုတ် အထူးဖြစ်ရပ်တစ်ခု မဟုတ်လျှင် လူ့သဘာဝနှင့် အသိစိတ်တစ်ခုရှိသော၊ အပြုသဘောဆောင်သောအရာများကို လိုက်စားပြီး သမ္မာတရားကို လိုက်စားသော သာမန်လူတစ်ယောက်အတွက် ယင်းသည် ကောင်းသောအရာဖြစ်လိမ့်မည်။ အဘယ်ကြောင့်ဆိုသော် လူတစ်ယောက်က ဘုရားသခင်ကို မြင်သောအခါ သူတစ်ဘဝလုံး၏ လိုက်စားမှုအပေါ် လွှမ်းမိုးမှုရှိသောကြောင့် ဖြစ်သည်။ ကျမ်းစာတွင် မှတ်တမ်းတင်ထားသည့်အရာအရ အကဲဖြတ်လျှင် ရာစုနှစ်များတစ်လျှောက်တွင် လူတစ်ယောက်အနေဖြင့် ဘုရားသခင် စကားပြောသည်ကို ကြားသည်မှာ ရှားပါးသည်။ ယောဘသည် ဘုရားသခင်က သူ့ကို စမ်းသပ်ပြီးနောက် လေပွေထဲတွင် ဘုရားသခင်က သူ့အားစကားပြောသည်ကို ကြားခဲ့ရသည်။ ယောဘသည် ဘုရားသခင်၏ အစီအစဉ်များကို ကျိုးနွံနာခံရန်၊ ဘုရားသခင်၏ အချုပ်အခြာအာဏာကို နားလည်ရန် အားထုတ်လျက် သူ၏တစ်ဘဝလုံးကို ကုန်ဆုံးခဲ့သည်။ သို့သော် ယောဘက နှစ် ၇၀ မတိုင်မီအထိ ဘုရားသခင်ကို လုံးဝ မမြင်ခဲ့ပေ။ ဘုရားသခင်၏ အချုပ်အခြာအာဏာကိုသာ သူတွေ့ကြုံခံစားခဲ့ရသည်။ သို့တိုင်အောင် ယောဘတွင် ယုံကြည်ခြင်းရှိခဲ့သည်။ ဘုရားသခင်က သူ့အားစကားပြောသည်ကို သူ၏ နားနှင့်ဆတ်ဆတ် ကြားသောအခါတွင် ယင်းသည် သူ့ယုံကြည်ခြင်းတွင် ကြီးမားသော ပြောင်းလဲမှုတစ်ခု မဟုတ်လော။ (ဟုတ်ပါသည်။) ဤပြောင်းလဲမှုသည် မြင့်တက်မှုတစ်ခုဖြစ်သည်။ သူ၏ ယုံကြည်ခြင်းက ပို၍ပင်တိုးတက်လာသည့် အချိန်ဖြစ်သည်။ သူယုံကြည်ပြီး ကျိုးနွံနာခံခဲ့သော ဘုရားသခင်က လူတို့အပေါ် လုပ်ဆောင်ခဲ့သည့် အမှုအားလုံးသည် မှန်ကန်ပြီး ကောင်းမွန်သည်ကိုလည်းကောင်း၊ လူတို့သည် သူ့အပေါ် ကျိုးနွံနာခံသင့်သည်ကိုလည်းကောင်း သူ့အတွက် ပို၍စွဲမြဲယုံကြည်သွားစေခဲ့သည်။ ယင်းမှာ တဖြည်းဖြည်းချင်းဖြင့် သံသယရှိသော ယုံကြည်ခြင်းမှ သံသယကင်းသော စစ်မှန်သည့် ယုံကြည်ခြင်းသို့ ရွှေ့ပြောင်းသည့် သာမန်လူက ကြုံတွေ့ရသည့် သေးငယ်သော ပြောင်းလဲမှုတစ်ခုမဟုတ်ပေ။ ထိုထက် ယင်းသည် မြှင့်တင်မှုတစ်ခုဖြစ်သည်။ ယင်းမှတစ်ဆင့် သူ၏ ယုံကြည်ခြင်းသည် ပို၍မြင့်သော အဆင့်တစ်ခုသို့ ရောက်ရှိခဲ့သည်။ ပေါလုနှင့်ပတ်သက်လျှင် သူ့အားရိုက်ချသည့် ပုံစံဖြင့် ဘုရားသခင်၏ ပေါ်ထွန်းမှုသည် မည်သည့်ပြောင်းလဲမှုကို ဖြစ်ပေါ်စေသင့်သနည်း။ အသေအချာပင် မြှင့်တင်ခြင်းမဟုတ်ပေ။ ယင်းမတိုင်မီက ဘုရားသခင်ကို သူလုံးဝ မယုံကြည်ခဲ့သောကြောင့် ဖြစ်သည်။ ထို့ကြောင့် ယင်းကို မြှင့်တင်ခြင်းဟု မခေါ်နိုင်ပေ။ ဤသို့ဆိုလျှင် ယင်းသည် သူ့အပေါ်တွင် မည်သည့်သက်ရောက်မှုရှိခဲ့သနည်း။ ဤသည်မှာ သူ၏လိုက်စားမှုများနှင့် ဆက်စပ်နေပြန်သည်။ ငါ့ကို ပြောလော့။ (ပေါလုသည် သူ၏အသက်ကို ထိန်းသိမ်းရန်အတွက် သူ၏အပြစ်များကို ပြေစေရန် ဧဝံဂေလိ ဝေမျှခြင်းအားဖြင့် အလုပ်လုပ်ပေးလိုခဲ့သည်။) အတိအကျပင် မှန်သည်။ သူသည်လည်း သေခြင်းကို ကြောက်ရွံ့ပြီး အလွန်ပင် စိတ်မချရပေ။ သူဖိနှိပ်ခဲ့သည့် ယေရှုသည် အမှန်တကယ်၌ ဘုရားဖြစ်သည်ကို သူတွေ့ရှိသွားသောအခါ ကြောက်ပြီး သတိလက်လွတ်ဖြစ်ကာ “ငါ ဘာလုပ်သင့်သနည်း။ ငါလုပ်နိုင်သမျှမှာ သခင့်အမိန့်များကို နားထောင်ဖို့ဖြစ်သည်။ ဤသို့မဟုတ်လျှင် ငါသေလိမ့်မည်” ဟူ၍ တွေးသည်။ ထိုအချိန်မှစ၍ သူသည် ဘုရားသခင်၏ တာဝန်ပေးစေခိုင်းချက်ကို လက်ခံခဲ့ပြီး သူ့အပြစ်များကို ဖြေရန်အတွက် ဧဝံဂေလိ ဖြန့်ဝေခြင်းအားဖြင့် စတင်အလုပ်လုပ်ပေးခဲ့သည်။ သူက “ငါသည် ဧဝံဂေလိ ဖြန့်ဝေခြင်း၌ အမှန်တကယ် အောင်မြင်ပြီး သခင်ယေရှုက ကျေနပ်သည်ဆိုလျှင် သရဖူနှင့် ဆုလာဘ်ပင် ရကောင်းရနိုင်သည်” ဟု တွေးသည်။ ယင်းတို့သည် သူ့စိတ်နှလုံးအတွင်းထဲရှိ တွက်ချက်မှုများ ဖြစ်သည်။ သူသည် ကောင်းချီးများရရှိရန် ပိုမိုကောင်းမွန်သော အခွင့်အရေးများကို နောက်ဆုံး၌ တွေ့ရှိပြီးဖြစ်သည်ဟု တွေးခဲ့သည်။ ပေါလုသည် သူ၏အပြစ်များကို ဖြေပြီး သူ၏အသက်ကို ကယ်တင်ရန်အတွက် သခင်၏ တာဝန်ပေးစေခိုင်းချက်ကို လက်ခံခဲ့သည်။ ဤသည်မှာ သခင့်ကို သူယုံကြည်ပြီး လက်ခံခြင်း နောက်ကွယ်ရှိ ရည်ရွယ်ချက်နှင့် ပန်းတိုင်ဖြစ်သည်။ ဒမာသက်မြို့သို့သွားရာလမ်းတွင် သခင်ယေရှုကို သူတွေ့ပြီး ရိုက်ချခံရကတည်းက သူသည် သူ၏လိုက်စားမှုများနှင့် ဘုရားသခင်အပေါ် ယုံကြည်ခြင်းအသက်တာအတွက် အသစ်စတင်ခြင်းကို အမှတ်အသားဖြစ်စေခဲ့သည့် ပြောင်းလဲမှုတစ်ခုကို သူပြုလုပ်ခဲ့သည်။ ဤအသစ်သော စတင်ခြင်းသည် အပြုသဘောဆောင်သလော၊ သို့မဟုတ် အပျက်သဘောဆောင်သလော။ (အပျက်သဘောဆောင်ခဲ့သည်။) ဘုရားသခင်၏ ဖြောင့်မတ်ခြင်းကို သူ မသိမြင်ခဲ့ပေ။ ပြီးလျှင် သူသည် ဘုရားသခင်၏ ဘုန်းအာနုဘော်နှင့် ရိုက်ချခံရခြင်းကို ကြောက်ရွံ့ရုံဖြင့် ပို၍ပင် စိတ်မချရသော၊ ပြောမထွက်နိုင်အောင် ဆိုးရွားသော၊ လက်သီးပုန်းထိုးသော အပေးအယူနည်းလမ်းတစ်ခုကို အသုံးပြုလျက် သခင်ယေရှု၏ တာဝန်ပေးစေခိုင်းချက်ကို လက်ခံခဲ့သည်။ ဤသည်မှာ ပို၍ပင် ရွံရှာဖွယ်ဖြစ်သည်။ သို့ရာတွင် ယင်းမှာ ယနေ့ ငါ၏ မိတ်သဟာယ၏ ဆိုလိုရင်းမဟုတ်ပေ။ ဘုရားသခင်၏ ကြီးမြတ်သောအလင်းကို ကြုံတွေ့ပြီးနောက် ပေါလု၏ ပြောင်းလဲမှုနှင့် သူ့ကိုယ်သူ ပေါ်လွင်စေခဲ့သည့် အမျိုးမျိုးသော နည်းလမ်းများမှနေ၍ ပေါလုသည် မည်သည့်လမ်းကြောင်းပေါ်တွင် ရှိသည်ကိုလည်းကောင်း၊ သူ၏သဘာဝအနှစ်သာရက သူမည်သည့်လူစားမျိုး ဖြစ်သည်ဆိုသည်ကို ပြသခဲ့သည်ကိုလည်းကောင်း ငါတို့ ရှင်းလင်းစွာ မြင်နိုင်သည်။ ဤအရာများသည် လုံးဝ ရှင်းလင်းသည်။

ပေါလုသည် ရိုက်ချခြင်းခံရပြီးကတည်းက သခင်ယေရှုခရစ်တော် ရှိခဲ့သည်ဟုလည်းကောင်း၊ သခင်ယေရှုခရစ်တော်သည် ဘုရားသခင် ဖြစ်သည်ဟုလည်းကောင်း ယုံကြည်ခဲ့သည်။ သူယုံကြည်ခဲ့သော ဘုရားသခင်သည် ကောင်းကင်ဘုံမှ ဘုရားသခင်အဖြစ်မှ သခင်ယေရှုခရစ်တော်အဖြစ်သို့ ရုတ်ချည်းပြောင်းသွားခဲ့သည်။ ကမ္ဘာမြေပေါ်ရှိ ဘုရားသခင်အဖြစ်သို့ ပြောင်းသွားခဲ့သည်။ ထိုအချိန်အခိုက်အတန့်မှစ၍ သူသည် သခင်ယေရှု၏ တာဝန်ပေးစေခိုင်းချက်ကို မငြင်းဆန်နိုင်ခဲ့ဘဲ လူ့ဇာတိခံဘုရားသခင်ဖြစ်သည့် သခင်ယေရှုအတွက် စတင်၍ မလျှော့တမ်းအလုပ်လုပ်ပေးခဲ့သည်။ သူအလုပ်လုပ်ပေးရခြင်း၏ ပန်းတိုင်မှာ တစ်စိတ်တစ်ပိုင်းအနေဖြင့် သူ၏အပြစ်များကို လွတ်ငြိမ်းခွင့်ရရန်အတွက်ဖြစ်သည်မှာ မှန်၏။ သို့သော် တစ်စိတ်တစ်ပိုင်းတွင် ကောင်းချီးခံစားလိုသည့် သူ၏လိုအင်ဆန္ဒကို ဖြည့်ဆည်းရန်၊ သူအလိုရှိခဲ့သည့် ခရီးပန်းတိုင်ကို ရရှိရန်လည်း ဖြစ်သည်။ ပေါလုက “ဘုရားသခင်၏ အလိုတော်အားဖြင့်” ဟု ဆိုသောအခါ “ဘုရားသခင်” ဟူသည်မှာ ယေဟောဝါကို ရည်ညွှန်းသလော၊ သို့မဟုတ် ယေရှုကို ရည်ညွှန်းသလော။ သူသည် အနည်းငယ်ရှုပ်ထွေးပြီး “ငါသည် ယေဟောဝါကို ယုံကြည်သည်။ ဤသို့ဆိုလျှင် အဘယ်ကြောင့် ယေရှု၏ ရိုက်ချခြင်းကို ငါခံရသနည်း။ ယေရှုက ငါ့ကို ရိုက်ချသည့်အချိန်တွင် ယေဟောဝါက သူ့ကို အဘယ်ကြောင့် မတားခဲ့သနည်း။ သူတို့ထဲတွင် အတိအကျ မည်သူက ဘုရားဖြစ်သနည်း” ဟု တွေးသည်။ သူ အဖြေမရှာနိုင်ခဲ့ပေ။ မည်သို့ပင်ဖြစ်စေ သူသည် သခင်ယေရှုကို သူ၏ဘုရားအဖြစ် လုံးဝ မြင်မည်မဟုတ်ပေ။ သူသည် သခင်ယေရှုကို နှုတ်ဖြင့် အသိအမှတ်ပြုခဲ့လျှင်ပင် သူ၏ စိတ်နှလုံးတွင် သံသယရှိနေဆဲ ဖြစ်သည်။ အချိန်ကြာလာသည်နှင့်အမျှ သူသည် တဖြည်းဖြည်းချင်းဖြင့် “ယေဟောဝါသည်သာ ဘုရားသခင်ဖြစ်သည်” ဟူသောယုံကြည်ခြင်းဆီသို့ ပြန်လည်ရောက်ရှိသွားသည်။ ထို့ကြောင့် ထို့နောက်တွင် ပေါလု၏ စာများအားလုံး၌ “ဘုရားသခင်၏ အလိုတော်အားဖြင့်” ဟု သူရေးသောအခါတွင် “ဘုရားသခင်” ဟူသည်မှာ အဓိကအားဖြင့် ယေဟောဝါဘုရားသခင်ကို ရည်ညွှန်းခြင်းဖြစ်ဖို့ များသည်။ ပေါလုသည် သခင်ယေရှုက ယေဟောဝါဖြစ်သည်ဟု လုံးဝ ရှင်းလင်းစွာ မဖော်ပြခဲ့သောကြောင့်လည်းကောင်း၊ သခင်ယေရှုကို ဘုရားသခင်၏ သားတော်အဖြစ် အစဉ်မြင်ခဲ့သောကြောင့်လည်းကောင်း၊ သခင်ယေရှုကို သားတော်အဖြစ် ရည်ညွှန်းခဲ့သောကြောင့်လည်းကောင်း၊ “သားတော်နှင့် ခမည်းတော်သည် တစ်လုံးတစ်ဝတည်းဖြစ်သည်” ဟူသကဲ့သို့သော အရာတစ်ခုခုကို လုံးဝမပြောခဲ့သောကြောင့်လည်းကောင်း ယင်းမှာ ပေါလုသည် သခင်ယေရှုကို တစ်ပါးတည်းသော စစ်မှန်သောဘုရားသခင်အဖြစ် လုံးဝ အသိအမှတ်မပြုခဲ့သည်ကို သက်သေပြသည်။ သူသည် သံသယရှိပြီး မယုံတစ်ဝက်၊ ယုံတစ်ဝက်ဖြစ်ခဲ့သည်။ ဘုရားသခင်နှင့်ပတ်သက်၍ ပေါလုတွင်ရှိသော ဤအမြင်နှင့် သူ၏ လိုက်စားပုံနည်းလမ်းကို ကြည့်လျှင် သူသည် သမ္မာတရားကို လိုက်စားခဲ့သောသူတစ်ဦး မဟုတ်ပေ။ သူသည် လူ့ဇာတိခံယူခြင်း၏ နက်နဲမှုကို လုံးဝ နားမလည်ခဲ့ပေ။ ပြီးလျှင် သခင်ယေရှုကို တစ်ပါးတည်းသော စစ်မှန်သောဘုရားသခင်အဖြစ် မည်သည့်အခါမျှ အသိအမှတ်မပြုခဲ့ပေ။ ဤအရာမှနေ၍ ပေါလုသည် တန်ခိုးအာဏာကို ကိုးကွယ်ပြီး မယုံကြည်ရဘဲ ကောက်ကျစ်သူတစ်ဦးဖြစ်သည်ဟု ပြောရန် မခက်ပေ။ ပေါလုက ကောက်ကျစ်ဆိုးယုတ်မှု၊ တန်ခိုးအာဏာ၊ အဆင့်အတန်းတို့ကို ကိုးကွယ်သည် ဆိုသည့်အချက်က သူ၏ ယုံကြည်ခြင်းမှာ မည်သည့်အရာဖြစ်ကြောင်း ငါတို့အား ပြသနည်း။ သူ့တွင် စစ်မှန်သော ယုံကြည်ခြင်း ရှိခဲ့သလော။ (မရှိခဲ့ပါ။) သူ့တွင် စစ်မှန်သော ယုံကြည်ခြင်း မရှိခဲ့သောကြောင့် သူ့စိတ်နှလုံးတွင် သူအဓိပ္ပာယ်ဖွင့်ဆိုခဲ့သော ဘုရားသည် အမှန်တကယ် တည်ရှိသလော။ (မရှိပါ။) ဤသို့ဆိုလျှင် သူသည် အဘယ်ကြောင့် သခင်ယေရှုခရစ်တော်အတွက် ခရီးလှည့်လည်သွားလာနေသေးသနည်း၊ သူ့ကိုယ်သူ အသုံးခံပြီး အမှုပြုနေသေးသနည်း။ (သူသည် ကောင်းချီးရရန် သူ၏ ရည်ရွယ်ချက်က ထိန်းချုပ်ခြင်းကို ခံခဲ့ရသည်။) (သူသည် အပြစ်ဒဏ်ခံရခြင်းကို ကြောက်ရွံ့သည်။) ဤအချက်သို့ ငါတို့ တစ်ဖန်ပြန်လည်ရောက်ရှိလာပြီ ဖြစ်သည်။ အဘယ်ကြောင့်ဆိုသော် သူသည် အပြစ်ဒဏ်ခံရခြင်းကို ကြောက်ရွံ့သောကြောင့် ဖြစ်သည်။ ပြီးလျှင် သူမဖယ်ရှားနိုင်သည့် ဆူးတစ်ချောင်းက သူ၏ဇာတိပကတိတွင် ရှိနေသောကြောင့်ဖြစ်သည်။ ထို့ကြောင့် သူ၏ဇာတိပကတိတွင်ရှိသော ဆူးက သူခံနိုင်သည်ထက်ပို၍ မနာကျင်စေရန် အစဉ်လှည့်လည်ခရီးသွားလာပြီး အမှုပြုခဲ့သည်။ သူ၏ ဤသရုပ်သကန်များမှ တစ်ဆင့် ဒမာသက်မြို့သို့ သွားရာလမ်းပေါ်၌ ဖြစ်ပျက်ခဲ့သည့်အရာအပေါ် သူ၏ တုံ့ပြန်မှုမှတစ်ဆင့်၊ ဒမာသက်မြိုသို့ သွားရာလမ်းပေါ်၌ ရိုက်ချခံရသည့် ထိုဖြစ်ရပ်ပြီးနောက် သူ့အပေါ်ဖြစ်စေခဲ့သည့် သက်ရောက်မှုမှတစ်ဆင့် သူ့စိတ်နှလုံး၌ ယုံကြည်ခြင်းမရှိခဲ့သည်ကို ငါတို့ မြင်နိုင်သည်။ သူသည် မယုံကြည်သူဖြစ်ပြီး ဘုရားမဲ့တစ်ဦးဖြစ်သည်ဟု အနည်းနှင့်အများ သေချာနိုင်သည်။ သူ၏ ရှုထောင့်မှာ “မည်သူက တန်ခိုးအာဏာရှိသည်ဖြစ်စေ သူ့အပေါ်တွင် ငါယုံကြည်မည်။ မည်သူက တန်ခိုးအာဏာရှိပြီး ငါ့ကို နှိပ်ကွပ်နိုင်ပါစေ ထိုသူအတွက် ငါ တောက်တိုမည်ရလုပ်ဆောင်ပြီး အစွမ်းကုန်လုပ်ဆောင်မည်။ ငါ့အား ခရီးပန်းတိုင်၊ သရဖူကို ပေးနိုင်ပြီး ကောင်းချီးခံစားရရန် ငါ၏ လိုအင်ဆန္ဒကို ဖြည့်ဆည်းနိုင်သည့် မည်သူမဆိုဖြစ်စေ ထိုသူသည် ငါလိုက်လျှောက်မည့်သူဖြစ်သည်။ ထိုသူ့နောက်သို့ ငါ အဆုံးတိုင်အောင် လိုက်လျှောက်မည်” ဟူ၍ ဖြစ်ခဲ့သည်။ သူ့စိတ်နှလုံးတွင် မည်သူက ဘုရားဖြစ်သနည်း။ သူ့ထက်ပို၍ တန်ခိုးအာဏာရှိပြီး သူ့အား နှိပ်ကွပ်နိုင်သရွေ့ မည်သူမဆို သူ၏ ဘုရားဖြစ်နိုင်သည်။ ဤသည်မှာ ပေါလု၏ သဘာဝအနှစ်သာရ မဟုတ်လော။ (ဟုတ်ပါသည်။) ဤသို့ဆိုလျှင် ဒမာသက်မြို့သို့သွားရာလမ်းပေါ်တွင် သူ့အား ရိုက်ချနိုင်စွမ်းရှိသော သူ နောက်ဆုံးတွင် ယုံကြည်ခဲ့သော မျက်မြင်ထင်ရှား ဖြစ်တည်နေသောအရာမှာ မည်သူဖြစ်သနည်း။ (သခင်ယေရှု ခရစ်တော်ဖြစ်သည်။) “သခင်ယေရှုခရစ်တော်” ဆိုသည်မှာ သူအသုံးပြုခဲ့သည့် အမည်ဖြစ်သည်။ သို့သော် သူအမှန်တကယ် ယုံကြည်ခဲ့သည့်မျက်မြင်ထင်ရှားဖြစ်တည်နေသောအရာမှာ သူ့စိတ်နှလုံးထဲရှိ ဘုရား ဖြစ်သည်။ သူ၏ ဘုရားက မည်သည့်နေရာတွင်ရှိသနည်း။ သင်က သူ့အား “သင်၏ ဘုရားက အဘယ်မှာရှိသနည်း။ ကောင်းကင်ဘုံတွင်ရှိသလော။ သူသည် ဖန်ဆင်းခံ အရာများအားလုံးကြားတွင် ရှိသလော။ သူသည် လူသားမျိုးနွယ်အားလုံးအပေါ် အချုပ်အခြာအာဏာရှိသောသူဖြစ်သလော” ဟု မေးခဲ့လျှင် သူက “မဟုတ်ပါ။ ငါ၏ ဘုရားသည် ဒမာသက်မြို့သို့သွားရာလမ်းပေါ်တွင် ဖြစ်သည်” ဟု ဆိုလိမ့်မည်။ ဤသည်မှာ အမှန်တကယ် သူ၏ ဘုရားဖြစ်သူ ဖြစ်သည်။ ပေါလုက သခင်ယေရှုခရစ်တော်ကို ဖိနှိပ်ခြင်းမှနေ၍ သခင်ယေရှုခရစ်တော်အတွက် အလုပ်လုပ်ခြင်း၊ သူ့ကိုယ်သူ အသုံးခံခြင်း၊ သူ့အသက်ကိုပင် စတေးခြင်းအဖြစ်သို့ ကူးပြောင်းနိုင်သည့် အကြောင်းရင်းမှာ၊ အလွန်ကြီးသော ပြောင်းလဲမှုကို သူပြုလုပ်နိုင်ခဲ့သည့် အကြောင်းရင်းမှာ သူ၏ ယုံကြည်မှုတွင် ပြောင်းလဲခြင်းတစ်ခု ရှိခဲ့သောကြောင့် ဖြစ်သလော။ သူ၏ အသိတရားက နိုးထလာခဲ့သောကြောင့် ဖြစ်သလော။ (မဟုတ်ပါ။) ဤသိုဆိုလျှင် မည်သည့်အရာက ဖြစ်စေသနည်း။ မည်သည့်အရာ ပြောင်းလဲသွားခဲ့သနည်း။ သူ၏ စိတ်ပိုင်းဆိုင်ရာ အထောက်အပံ့ ပြောင်းလဲသွားခဲ့သည်။ ယခင်က သူ၏ စိတ်ပိုင်းဆိုင်ရာ အထောက်အပံ့မှာ ကောင်းကင်ဘုံတွင် ရှိသည်။ အနှစ်မရှိသော၊ မရေရာသောအရာ ဖြစ်သည်။ ယင်းကို ယေရှုခရစ်တော်နှင့် အစားထိုးလိုက်လျှင် ပေါလုက ယေရှုခရစ်တော်သည် အလွန်ပင် အရေးမပါပေ၊ ယေရှုသည် သာမန်လူတစ်ယောက်သာ ဖြစ်သည်၊ စိတ်ပိုင်းဆိုင်ရာ အထောက်အပံ့ မဖြစ်နိုင်ဟု ထင်မြင်လိမ့်မည်။ ပေါလုသည် ထင်ရှားသောဘာသာရေးပုဂ္ဂိုလ်များကို ပို၍ပင် အလေးထားမှုမရှိပေ။ ပေါလုသည် သူအမှီပြုနိုင်သည့်သူ၊ သူ့ကို နှိပ်ကွပ်ပြီး ကောင်းချီးရစေနိုင်သောသူကိုသာ ရှာဖွေလိုသည်။ ဒမာသက်မြို့သို့ သွားရာလမ်းပေါ်တွင် သူကြုံခဲ့ရသော မျက်မြင်ထင်ရှားဖြစ်တည်နေသောအရာသည် အားအကြီးဆုံးဖြစ်သည်ဟုလည်းကောင်း၊ ယင်းသည် သူယုံကြည်သင့်သူဖြစ်သည်ဟု လည်းကောင်း ထင်မြင်ခဲ့သည်။ သူ၏ စိတ်ပိုင်းဆိုင်ရာ အထောက်အပံ့သည် သူ၏ ယုံကြည်မှုပြောင်းလဲသည့် တစ်ချိန်တည်းမှာပင် ပြောင်းလဲခဲ့သည်။ ဤအရာကို အခြေခံလျှင် ပေါလုသည် ဘုရားသခင်ကို အမှန်တကယ် ယုံကြည်ခဲ့သလော၊ မယုံကြည်ခဲ့သလော။ (မယုံကြည်ခဲ့ပါ။) ပေါလု၏ လိုက်စားမှုများနှင့် သူရောက်ရှိနေသည့် လမ်းကြောင်းကို မည်သည့်အရာက လွှမ်းမိုးခဲ့သည်ကို ယခု စာကြောင်းတစ်ကြောင်းဖြင့် အနှစ်ချုပ်ကြစို့။ (သူ၏ စိတ်ပိုင်းဆိုင်ရာ အထောက်အပံ့ဖြစ်သည်။) ဤသို့ဆိုလျှင် ပေါလု၏ သတ္တမမြောက်အပြစ်ကို ငါတို့ မည်သို့ အဓိပ္ပာယ်ဖွင့်ဆိုသင့်သနည်း။ အချက်အားလုံးတွင် ပေါလု၏ ယုံကြည်မှုသည် စိတ်ပိုင်းဆိုင်ရာ အထောက်အပံ့ဖြစ်သည်။ ယင်းမှာ အနှစ်မဲ့ပြီး မရေရာပေ။ သူသည် လုံးလုံးလျားလျားပင် မယုံကြည်သူတစ်ဦးနှင့် ဘုရားမဲ့တစ်ဦး ဖြစ်သည်။ သူကဲ့သို့ ဘုရားမဲ့သူတစ်ဦးနှင့် မယုံကြည်သူတစ်ဦးသည် အဘယ်ကြောင့် ဘာသာရေးလောကကို နောက်တွင် ချန်မထားခဲ့သနည်း။ တစ်ချက်အနေဖြင့် သူ၏ မရေရာသော စိတ်ကူးထင်မြင်မှုတွင် ခရီးပန်းတိုင်နှင့်သက်ဆိုင်သော ပြဿနာရှိသည်။ အခြားတစ်ချက်တွင် ဘဝတွင် ထမင်းစားလက်မှတ် သူရရှိခြင်းနှင့်ဆိုင်သော ပြဿနာရှိသည်။ ကျော်ကြားမှု၊ အကျိုးအမြတ်၊ အဆင့်အတန်းနှင့် ထမင်းစားလက်မှတ်သည် ဤဘဝတွင် သူ၏ လိုက်စားမှုများဖြစ်သည်။ ပြီးလျှင် နောင်ဘဝတွင် ခရီးပန်းတိုင်တစ်ခုရှိခြင်း အယူအဆသည် သူ့ကို စိတ်သက်သာစေခဲ့သည်။ ဤသို့သောလူများလိုက်စားပြီး ထုတ်ဖော်ပြသည့်၊ ၎င်းတို့လျှောက်သည့်လမ်းကြောင်း၏ နောက်ကွယ်တွင် ဤအရာများ၌ အရင်းအမြစ်နှင့် အထောက်အပံ့တိုင်း ပါဝင်သည်။ ဤရှုထောင့်မှကြည့်လျှင် ပေါလုက မည်သည့်အရာ ဖြစ်သနည်း။ (မယုံကြည်သူဖြစ်သည်။ မရေရာသော ဘုရားကို သူယုံကြည်ခဲ့သည်။) (ဘုရားမဲ့တစ်ဦးဖြစ်သည်။) သူသည် ဘုရားမဲ့ဖြစ်သည်ဟုလည်းကောင်း၊ ခရစ်ယာန်ဘာသာထဲတွင် ပုန်းလျှိုးကွယ်လျှိုးနေနေသော သော မယုံကြည်သူတစ်ဦး၊ အခွင့်အရေးသမားတစ်ဦးဖြစ်သည်ဟုလည်းကောင်း ဆိုလျှင် တိကျမှန်ကန်သည်။ သင်က သူ့ကို ဖာရိရှဲဟုသာ ခေါ်ဆိုလျှင် ယင်းသည် လျှော့ပေါ့ပြောခြင်း မဟုတ်လော။ ပေါလုရေးခဲ့သည့်စာများကို သင်ကြည့်ပြီး အပေါ်ယံ၌ “ဘုရားသခင်၏ အလိုတော်အားဖြင့်” ဟု ဆိုထားသည်ကို မြင်လျှင် ပေါလုက ကောင်းကင်ဘုံရှိ ဘုရားသခင်ကို အမြင့်ဆုံးဟု မြင်သည်ဟုလည်းကောင်း၊ လူတို့၏ အယူအဆများကြောင့်သာ၊ သို့မဟုတ် လူတို့က မသိနားမလည်ဘဲ ဘုရားသခင်ကို နားမလည်ခဲ့သောကြောင့်သာ ၎င်းတို့က ဘုရားသခင်ကို ခမည်းတော်၊ သားတော်၊ သန့်ရှင်းသောဝိညာဉ်တော်ဟူ၍ အဆင့်သုံးဆင့်အဖြစ် ခွဲခြားခဲ့သည်ဟုလည်းကောင်း၊ ယင်းမှာ လူ၏ မိုက်မဲမှုသာဖြစ်ပြီး အလွန်ဆိုးသောပြဿနာတစ်ခု မဟုတ်ဟုလည်းကောင်း၊ အကြောင်းမှာ ဘာသာရေးလောကတစ်ခုလုံးကလည်း ဤသို့ထင်မြင်သောကြောင့်ဖြစ်သည်ဟုလည်းကောင်း သင် ယူဆကောင်း ယူဆနိုင်သည်။ သို့ရာတွင် ယခုအခါ၌ ယင်းကို ပိုင်းခြားစိစစ်ပြီးနောက်တွင် ဤသည်မှာ မှန်ကန်သလော။ (မမှန်ကန်ပါ။) ပေါလုသည် ဘုရားသခင် ဖြစ်တည်မှုကိုပင် အသိအမှတ်မပြုခဲ့ပေ။ ဤသည်မှာ ဘုရားမဲ့တစ်ဦးနှင့် မယုံကြည်သူတစ်ဦး ဖြစ်သည်။ ပြီးလျှင် သူ့ကို ဘုရားမဲ့များ၊ ဘာသာတရားမရှိသူများနှင့် အမျိုးအစားတူအဖြစ် ထားရှိသင့်သည်။

ပေါလု၏ အပြစ်ခုနစ်ခုကို ငါအနှစ်ချုပ်၍ ပြီးပြီဖြစ်သည်။ ယင်းတို့သည် မည်သည့်အရာများဖြစ်သည်ကို ငါ့အား အကျဉ်းချုပ်ပြောလော့။ (ပထမအပြစ်မှာ ပေါလုသည် ဓမ္မသရဖူအား လိုက်စားခြင်းနှင့် ကောင်းချီးများလိုက်စားခြင်းကို သင့်တင့်လျောက်ပတ်သော ရည်ရွယ်ချက်များအဖြစ် သဘောထားခဲ့သည်။ ဒုတိယမှာ ပေါလုသည် သူ၏ စိတ်ကူးထင်မြင်မှုများနှင့် သူ၏ ကိုယ်ပိုင်အယူအဆတွင် သူမှန်ကန်သည်ဟု ထင်သောအရာများကို သမ္မာတရားအဖြစ် သဘောထားခဲ့ပြီး ယင်းတို့ကို နေရာတကာ၌ ဟောကြားကာ လူတို့ကို အထင်အမြင်မှားစေခြင်း ဖြစ်သည်။ တတိယမှာ ပေါလုသည် သူ၏ ဆုကျေးဇူးများနှင့် အသိပညာကို အသက်အဖြစ် သဘောထားခဲ့သည်။ စတုတ္ထမှာ ပေါလုသည် သခင်ယေရှုခရစ်တော်၏ ပင်ကိုလက္ခဏာနှင့် အနှစ်သာရကို ငြင်းဆန်ခဲ့ပြီး သခင်ယေရှု၏ ရွေးနုတ်ခြင်းအမှုကို ငြင်းဆန်ခဲ့သည်။ ပဉ္စမမှာ ပေါလုသည် “ဓမ္မသရဖူသည် ငါ့အဘို့သိုထားလျက်ရှိ၏” ဟု ဟောခဲ့ပြီး လူတို့ကို ပြောင်ပြောင်တင်းတင်း လှုံ့ဆော်ကာ အထင်အမြင်မှားစေလျက် ၎င်းတို့အား ဘုရားသခင်ကိုအကျပ်ကိုင်ရန်၊ ဘုရားသခင်အား ဆူညံစွာတောင်းဆိုရန်၊ ဆန့်ကျင်ရန် ကြိုးစားအောင် လုပ်ဆောင်ခဲ့သည်။ ဆဌမမှာ ပေါလုသည် သူ့အနေဖြင့် အသက်ရှင်သည့်အရာမှာ ခရစ်တော်ဖြစ်၏ဟု ယုံကြည်ခဲ့သည်။ သခင်ယေရှုဖော်ပြခဲ့သည့် သမ္မာတရားများကို သူငြင်းဆန်ခဲ့သည်။ သခင်ယေရှု၏ စကားများကို သူ၏ကိုယ်ပိုင်စကားများဖြင့် အစားထိုးခဲ့သည်။ ပြီးလျှင် လူတို့အား ယင်းတို့ကို လက်တွေ့လုပ်ဆောင်စေပြီး လိုက်နာစေသည်။ ပေါလု၏ သတ္တမမြောက်အပြစ်မှာ သူသည် ဘုရားသခင်ကို စိတ်ပိုင်းဆိုင်ရာ အထောက်အပံ့အဖြစ် သဘောထားခဲ့ပြီး လုံးလုံးလျားလျားပင် ဘုရားမဲ့တစ်ဦးနှင့် မယုံကြည်သူတစ်ဦး ဖြစ်ခဲ့ခြင်း ဖြစ်ပါသည်။) ပေါလုတွင်ရှိသည့် ဤပြဿနာများအပေါ် ငါတို့၏ စိစစ်မှုသည် အလွန်အသေးစိတ်ကျပြီး ပေါလုကို ကိုးကွယ်သည့်သူတိုင်းအား အသိစိတ် ဝင်လာစေနိုင်သည်။ ဤသည်မှာ အဓိပ္ပာယ်ရှိသည်။ ပေါလုထုတ်ဖော်ပြီး ပြခဲ့သည့် ဤစိတ်သဘောထားများ၊ အနှစ်သာရများနှင့် သူ၏ တစ်ကိုယ်ရေ လိုက်စားမှုနည်းလမ်းများထဲတွင် မည်သည့်အရာက သင်တို့နှင့် သိသာစွာ ဆက်စပ်နေသနည်း။ (အားလုံးနှင့် ဆက်စပ်ပါသည်။) ပထမအပြစ်မှာ ဓမ္မသရဖူအား လိုက်စားခြင်းနှင့် ကောင်းချီးများလိုက်စားခြင်းကို သင့်တင့်လျောက်ပတ်သော ရည်ရွယ်ချက်များအဖြစ် သဘောထားခြင်း ဖြစ်သည်။ ဤအရာသည် မှားသည်ဟုလည်းကောင်း၊ လူတို့သည် ဤအရာကို ဆင်ခြင်သုံးသပ်ပြီး ပြောင်းလဲသင့်သည်ဟုလည်းကောင်း ငါအဘယ်ကြောင့်ဆိုသနည်း။ ပေါလုက ဓမ္မသရဖူကို လိုက်စားသောအခါ၊ ကောင်းချီးများကို လိုက်စားသောအခါ၊ ကောင်းကင်နိုင်ငံတော်ကို ဝင်ရောက်ဖို့ ကြိုးစားအားထုတ်သောအခါ ဤအကျိုးအမြတ်များကို လိုက်စားခြင်းက သင့်တင့်လျောက်ပတ်သည်ဟု သူ သတ်မှတ်ခဲ့သည်။ ထို့ကြောင့် လက်တွေ့ဘဝတွင် သင့်၌ ဤအခြေအနေနှင့် ကိုက်ညီသော မည်သည့်ထုတ်ဖော်မှုများနှင့် သရုပ်သကန်များရှိသနည်း။ (တစ်ခါတစ်ရံတွင် ကျွန်ုပ်သည် အရေးကြီးအလုပ်များကို လုပ်ရန် ရှာဖွေပြီး ဘုရားအိမ်တော်အတွက် ပါဝင်ကူညီမှုများပြုလုပ်သည်။ ဤအရာများကို လိုက်စားခြင်းအားဖြင့် ဘုရားသခင်က နောက်ဆုံးတွင် ကျွန်ုပ်ကို စုံလင်အောင်ပြုလုပ်ပေးမည်ဟု ထင်သည်။ ကျွန်ုပ်လုပ်သည့် အလုပ်နှင့် ထမ်းဆောင်သည့် တာဝန်များကို အောင်မြင်မှုစာရင်းတစ်ခုအဖြစ် သဘောထားသည်။) ဤသည်မှာ တစ်စိတ်တစ်ပိုင်းဖြစ်သည်။ သင်ထမ်းဆောင်သည့်တာဝန်များကို အောင်မြင်မှုစာရင်းတစ်ခုအဖြစ် သဘောထားခြင်းသည် ဓမ္မသရဖူအား လိုက်စားခြင်းနှင့် တူညီသည်။ တူညီသောအမျိုးအစားဖြစ်သည်။ တူညီသော အခြေအနေဖြစ်သည်။ ဤသည်မှာ သင်အလုပ်လုပ်ပြီး ဒုက္ခခံသည့်အရာ ဖြစ်သည်။ ဤသည်မှာ သင်၏ ဒုက္ခအရင်းအမြစ်ကို ညွှန်ကြားသောအရာဖြစ်ပြီး သင့်ဒုက္ခအတွက် တွန်းအားဖြစ်သည်။ ဤအရာများက သင့်အား ညွှန်ကြားနေခြင်း မရှိလျှင် သင့်၌ အားအင်တစ်ခုမျှ ရှိမည်မဟုတ်။ သင်သည် လုံးလုံးပင် အားအင်ကုန်ခမ်းနေလိမ့်မည်။ တစ်ယောက်ယောက်တွင် အခြားတစ်ခုခုရှိသလော။ (အမှုအရာများကို ကျွန်ုပ် စွန့်လွှတ်သော၊ ကိုယ့်ကိုယ်ကိုယ် အသုံးခံသော၊ ဒုက္ခခံသော၊ အဖမ်းခံရပြီး ထောင်ကျခံရသောအချိန်က ယခင်က ဖြစ်ရပ်များနှင့် ထိုကဲ့သို့သောအရာများကို တစ်ကိုယ်ရေ အရင်းအနှီးအဖြစ်၊ ကောင်းချီးခံရဖို့အတွက် အခြေပြုချက်နှင့် အကြောင်းရင်းအမြစ် သဘောထားခြင်း ဖြစ်သည်။) ဤသည်မှာ ဖော်ပြချက်တစ်ခုသာ ဖြစ်သည်။ ဤတွင် ဖုံးကွယ်နေသော အခြေအနေမှာ အဘယ်နည်း။ ဤအခြေအနေများသို့ သင့်အား ကျရောက်စေသည်မှာ မည်သည့်အခြေအနေမျိုး ဖြစ်သနည်း။ ဤပုံစံမျိုးကို အကြောင်းပြချက်မရှိဘဲ သင်စဉ်းစားမည်မဟုတ်။ သင်က စားသောအခါ၊ အိပ်သောအခါ၊ သို့မဟုတ် တစ်နေ့ပြီးတစ်နေ့ အမှုအရာများကို လုပ်ဆောင်သောအခါ ဤအရာကို သင် အစဉ်တွေးတောနေဖို့ မဖြစ်နိုင်ပေ။ မည်သည့်နောက်ခံများနှင့် အခြေအနေများက သင့်အား ဤအခြေအနေသို့ ရောက်ရှိစေသည်ကို သင်သိဖို့ လိုသည်။ ငါ့ကို ပြောလော့။ (ကျွန်ုပ်သည် ကျွန်ုပ်၏ တာဝန်များတွင် အနည်းငယ်ထိရောက်မှု ရှိသောအခါ ဘုရားအတွက် လှည့်လည်ခရီးသွားခဲ့သည်၊ ဘုရားအတွက် ကိုယ့်ကိုယ်ကိုယ် အသုံးခံခဲ့သည်၊ ဘုရားအတွက် အားသွန်ခွန်စိုက်ပြီး များစွာလုပ်ဆောင်ခဲ့သည်ဟု ထင်သည်။ ပေါလုကဲ့သို့ပင် ကျွန်ုပ်သည် ဘုရားအတွက် ကောင်းစွာသောတိုက်လှန်ခြင်းကို ပြုပြီး ကူညီပံ့ပိုးမှုတစ်ခု ပြုလုပ်ခဲ့သည်ဟု ထင်သည်။ ဤသည်မှာ ကျွန်ုပ်၏ ရည်မှန်းချက်များနှင့် လိုအင်ဆန္ဒများက ဦးမော့လာသည့်အချိန် ဖြစ်သည်။) အမှန်တကယ်တွင် သင်သည် နဂိုက ရည်မှန်းချက်များနှင့် လိုအင်ဆန္ဒများမရှိခြင်း မဟုတ်။ ယင်းတို့သည် သင့်စိတ်နှလုံးအတွင်းထဲတွင် အစကတည်းက ပုန်းကွယ်နေခြင်းဖြစ်သည်။ ပြီးလျှင် ယခုအခါတွင် ယင်းတို့သည် ထွက်ပေါ်လာပြီး အလိုအလျောက် ထုတ်ဖော်ပြခြင်းဖြစ်သည်။ ဤအရာ ဖြစ်ပျက်သောအခါ သင်သည် မနှိမ့်ချတော့ပေ။ သင့်စကားများက ဝေ့ဝိုက်ခြင်းမရှိတော့ဘဲ သင်သည် ဆောင့်ကြွားကြွား ဖြစ်လာသည်။ ပေါလု၏ မမှန်ကန်သောအမြင်များသည် သူလုပ်ဆောင်သမျှတိုင်း၏ အရင်းအမြစ်ဖြစ်သည်။ ဘုရားသခင်အပေါ် သူ၏ယုံကြည်မှု၌ ဖုံးကွယ်နေသော အမြင်များသည် မှားယွင်းသောကြောင့် သူ့လုပ်ရပ်များ၏ အရင်းအမြစ်က မှားယွင်းဖို့ သေချာစေသည်။ သို့ရာတွင် သူသည် ဤအရာကို သဘောမပေါက်ခဲ့ဘဲ သင့်တင့်လျောက်ပတ်သည်ဟုပင် ထင်ခဲ့သည်။ ထို့ကြောင့် သူသည် မမှန်ကန်သော ဦးတည်ချက်ဖြင့် လိုက်စားခဲ့သည်။ ဤသည်မှာ သူလိုက်စားမှုများ၏ ရလဒ်ကို သူရည်ရွယ်ခဲ့သည့်အရာ၏ ဆန့်ကျင်ဘက် ဖြစ်စေခဲ့သည်။ ယင်းတို့သည် ရလဒ်ကောင်းမရှိခဲ့ဘဲ သမ္မာတရားကို သူမရရှိခဲ့ပေ။ ယခုခေတ် လူများသည် ထို့အတူပင်ဖြစ်သည်။ သင့်လိုက်စားမှုကို လမ်းပြပေးနေသည့် အမြင်များနှင့် ဦးတည်ချက်သည် အစဉ်မှားယွင်းသော်လည်း သင်က ယင်းတို့ကို မှန်ကန်သော လိုက်စားမှုနည်းလမ်းများအဖြစ် သဘောထားဆဲဖြစ်လျှင် အဆုံး၌ မည်သည့်အရာကို သင်ရရှိမည်နည်း။ ယင်းသည် သင့်အား စိတ်ပျက်စေဖို့၊ သို့မဟုတ် သင့်သဘောသဘာဝကို ကြီးကျယ်စေဖို့ ဖြစ်နိုင်ခြေများသည်။ ဥပမာ ဘုရားသခင်က သင့်ကို အထူးပုံစံတစ်ခုဖြင့် ကောင်းချီးပေးလျှင်၊ သို့မဟုတ် သင်တစ်ဦးတည်းအပေါ်သာ တစ်စုံတစ်ခုပေးအပ်လျှင် သင်က “ကြည့်လော့။ ဘုရားသခင်က ငါ့အပေါ် ကျေးဇူးပြုသည်။ ဤသည်မှာ ဘုရားသခင်က ငါလုပ်ဆောင်ပြီးသမျှတိုင်းကို အသိအမှတ်ပြုသည်ကို သက်သေပြသည်။ ဘုရားသခင်က လက်ခံပြီး ဖြစ်သည်။ ငါ၏ အနစ်နာခံမှုများနှင့် အားထုတ်မှုက အချည်းနှီးမဖြစ်။ ဘုရားသခင်က လူတို့ကို မမျှမတ မဆက်ဆံပါ” ဟု တွေးလိမ့်မည်။ ဤသည်မှာ ဘုရားသခင်က လူတို့ကို မမျှမတ မဆက်ဆံဆိုသည်နှင့် သူ၏ကောင်းချီးများ၊ လက်ခံမှုတို့ကို သင်နားလည်ပုံဖြစ်သည်။ သို့သော် ဤနားလည်မှုသည် မှားယွင်းပြီး လွဲချော်နေသည်။ ယခုအခါတွင် အဓိကသော့ချက်မှာ ဤမှားယွင်းသော လွဲချော်နေသော ရည်ရွယ်ချက်များ၊ အမြင်များနှင့် လိုက်စားမှုများကို မှန်ကန်သော၊ သန့်စင်သောအမြင်များနှင့် အတွေးများအဖြစ်သို့ မည်သို့ပြောင်းလဲရမည်ဆိုသည့်အရာဖြစ်သည်။ မှန်ကန်သောအတွေးများ၊ အမြင်များအတိုင်း အမှုအရာများအား လုပ်ဆောင်ခြင်းကသာ သမ္မာတရားအား လက်တွေ့လုပ်ဆောင်ခြင်းနှင့် ညီမျှသည်။ ဤသည်မှာ သမ္မာတရားကို သင်ရရှိနိုင်သည့် တစ်ခုတည်းသောနည်းလမ်း ဖြစ်သည်။ ဤသည်မှာ အဓိကသော့ချက်ဖြစ်သည်။

တရားဒေသနာများကို ကြိမ်ဖန်များစွာ နားထောင်ခြင်းအားဖြင့် လူတို့သည် ယခုတွင် မိမိတို့ကိုယ်ကို စတင်၍ ဆင်ခြင်သုံးသပ်လာကြကာ မိမိတို့ကိုယ်ကို ဘုရားနှုတ်ကပတ်တော်များဖြင့် နှိုင်းယှဉ်ချိန်ဆလာကြသည်။ ၎င်းတို့သည် မိမိတို့၏တာဝန်များထမ်းဆောင်ရာတွင် ၎င်းတို့၌ရှိသော ပြဿနာများကို စတင်သိမြင်လာကြသည်။ ပြီးလျှင် ၎င်းတို့ကိုယ်တိုင်၏ အတွင်းတွင်ရှိသော မူမမှန်သော အခြေအနေများ၊ လွန်ကျူးသော လိုအင်ဆန္ဒများနှင့် ဖောက်ပြန်ပျက်စီးမှုကို ထုတ်ဖော်ခြင်းများကို ရှာဖွေတွေ့ရှိနိုင်ကြသည်။ ၎င်းတို့သည် လုံးဝ ထိုးထွင်းသိမြင်မှု မရှိခြင်း မဟုတ်ပေ။ တစ်ခုတည်းသောပြဿနာမှာ ၎င်းတို့က မှားယွင်းသော အခြေအနေ၌ ရှိသည်ကို၊ သို့မဟုတ် ဖောက်ပြန်ပျက်စီးမှုအား ထုတ်ဖော်နေသည်ကို ရှာဖွေတွေ့ရှိသောအခါ ယင်းကို ချုပ်တည်းရန် အရည်အချင်းမရှိပေ။ ပြီးလျှင် ယင်းကို ဖြေရှင်းရန် သမ္မာတရားကို မရှာဖွေပေ။ တစ်ခါတစ်ရံတွင် ၎င်းတို့သည် စာတန်ဆန်သော အတွေးအခေါ်များအတိုင်း နေထိုင်ကြပြီး မည်သူ့ကိုမျှ စိတ်မကျေမနပ်ဖြစ်အောင် မပြုလုပ်ဘဲ ၎င်းတို့သည်အလွန်ကောင်းမြတ်သည်ဟု ထင်ကြသည်။ သို့ရာတွင် ၎င်းတို့သည် အမှန်တကယ်ပြောင်းလဲခြင်း လုံးဝမရှိပေ။ ၎င်းတို့သည် ၎င်းတို့၏ နေ့ရက်များကို ဖြုန်းတီးလျက် ဖြစ်သလိုနေထိုင်ကြသည်။ ပြီးလျှင် ရလဒ်အနေဖြင့် ဘုရားသခင်ကို ဆယ်စုနှစ်တစ်ခုကြာ ယုံကြည်ပြီးသည့်နောက်တွင်ပင် ပြောစရာ အမှန်တကယ် အတွေ့အကြုံဆိုင်ရာ သက်သေခံချက်မရှိဘဲ ရှက်ရွံ့ကြသည်။ ယခုအခါတွင် ဖြေရှင်းရန် လိုအပ်သည့် အဓိကပြဿနာမှာ သင့်လိုက်စားမှုများ၏ မမှန်ကန်သော ဦးတည်ချက်ကို မည်သို့ပြောင်းလဲရမည်ဆိုသည့်အရာ ဖြစ်သည်။ သမ္မာတရားအား လိုက်စားခြင်း လမ်းကြောင်းသည် မှန်ကန်သည်ဆိုသည်ကို သင်ရှင်းသည်။ သို့တိုင်အောင် သင်သည် ကျော်ကြားမှု၊ အကျိုးအမြတ်နှင့် အဆင့်အတန်းအား လိုက်စားခြင်းကို ဆက်လက်လုပ်ဆောင်သည်။ သမ္မာတရားအား လိုက်စားခြင်းလမ်းကြောင်းပေါ်သို့ သင်ရောက်ရှိနိုင်ရန်အတွက် ဤပြဿနာကို မည်သို့ပြောင်းလဲပစ်နိုင်သနည်း။ ဤသည်မှာ ယုံကြည်သူများ ဖြေရှင်းရမည့် တကယ့်ပြဿနာတစ်ခုဖြစ်သည်။ ဘုရားသခင်၏ လုပ်ဆောင်မှုအား သင်တို့မည်သို့တွေ့ကြုံသည်ကို သင်တို့ မကြာခဏ မိတ်သဟာယပြုသင့်ပြီး မည်သူက သမ္မာတရားအား လိုက်စားခြင်းနှင့်ဆိုင်သည့် အတွေ့အကြုံဆိုင်ရာ သက်သေခံချက်ရှိသည်၊ မည်သူ၏ အတွေ့အကြုံဆိုင်ရာ သက်သေခံချက်က ကောင်းသည်ဆိုသည်ကို ကြည့်သင့်သည်။ ထို့နောက်တွင် ယင်းကို လက်ခံပြီး ယင်းအတိုင်း လိုက်လုပ်သင့်သည်။ ဤသို့ဖြင့် သင်သည် ယင်းထံမှ အကျိုးကျေးဇူးရရှိပြီး သင်၏ ဖောက်ပြန်ပျက်စီးသော စိတ်သဘောထား၏ ဘောင်ခတ်ခြင်းများမှ လွတ်မြောက်သည်။ သမ္မာတရားအား လိုက်စားခြင်းလမ်းကြောင်းကို လျှောက်ရန်မှာ လွယ်ကူသောအရာမဟုတ်။ သင့်ကိုယ်သင် နားလည်ရမည်ဖြစ်ပြီး သင်၏ ပြစ်မှားမှုများကိုသာ နားလည်ရမည်မဟုတ်။ အရေးကြီးဆုံးသောအရာမှာ သင်၏ ဖောက်ပြန်ပျက်စီးသော စိတ်သဘောထားကို နားလည်ရန်၊ သင်၏နှစ်သက်မှုများ၊ လိုက်စားမှုများနှင့်ပတ်သက်၍ မည်သည့်အရာက မှားယွင်းနေသည်နှင့် မည်သည့်အကျိုးဆက်များ ထွက်ပေါ်နိုင်သည်တို့ကို နားလည်ရန် ဖြစ်သည်။ ဤသည်မှာ အရေးပါဆုံးသောအရာ ဖြစ်သည်။ လူအများစုမှာ ကျော်ကြားမှု၊ အကျိုးအမြတ်နှင့် အဆင့်အတန်းတို့ကို လိုက်စားကြသည်။ ၎င်းတို့သည် နေ့စဉ် မည်သို့ခေါင်းဆောင်ဖြစ်အောင်လုပ်ရမည်၊ အခြားလူများကို ၎င်းတို့အား အထင်ကြီးလေးစားအောင် မည်သို့လုပ်ဆောင်ရမည်၊ မည်သို့ ကြွားဝါနိုင်သည်၊ ဂုဏ်ရှိသောဘဝကို မည်သို့နေထိုင်ရမည်ဆိုသည်တို့ကို တွေးကြသည်။ လူတို့သည် ဤအရာများအား ဆင်ခြင်သုံးသပ်နိုင်စွမ်းမရှိလျှင်၊ ဤပုံစံအတိုင်း နေထိုင်ခြင်း၏ အနှစ်သာရကို ရှင်းလင်းစွာ မမြင်နိုင်လျှင်၊ ၎င်းတို့သည် သွားစရာလမ်းမရှိတော့ဘဲ လဲကျကာ နောက်ဆုံးတွင် အသိစိတ်ဝင်လာသည့်အချိန်တွင် နှစ်ပေါင်းမည်မျှကြာမည်ကို မည်သူမျှမသိနိုင်သည့်အချိန်အထိ ကြုံရာကျပန်းနေနေလျှင် ၎င်းတို့၏အသက်တာကြီးထွားမှုနှင့်ဆိုင်သည့် အရေးကြီးကိစ္စကို နှောင့်နှေးစေမည် မဟုတ်လော။ လူတို့သည် ၎င်းတို့၏ ကိုယ်ပိုင်ဖောက်ပြန်ပျက်စီးသော စိတ်သဘောထားနှင့် ၎င်းတို့ရွေးချယ်ပြီးဖြစ်သော လမ်းကြောင်းကို ရှင်းလင်းစွာ ကြည့်ခြင်းအားဖြင့်သာ သမ္မာတရားအား လိုက်စားခြင်းလမ်းကြောင်းပေါ်၌ ခြေချနိုင်သည်။ ဤသည်မှာ ၎င်းတို့ရရှိလိုသည့် သက်ရောက်မှုဖြစ်လျှင် မိမိတို့ကိုယ်ကို နားလည်ရန်မှာ အရေးမပါသလော။ လူအချို့သည် မိမိတို့ကိုယ်ကို အနည်းငယ်မျှပင် နားမလည်ပေ။ သို့တိုင်အောင် အခြားလူများ၏ ပြဿနာများနှင့်ဆိုင်သော အသေးဆုံးအချက်အလက်ကို ကြည်လင်ရှင်းလင်းစွာ သိမြင်မှုရှိပြီး အထူးပင် ပိုင်းခြားသိမြင်သည်။ ဤသို့ဆိုလျှင် ၎င်းတို့သည် သူတစ်ပါးတို့ကို ပိုင်းခြားသိမြင်သောအခါ ယင်းကို မိမိတို့ကိုယ်ကို ဆန်းစစ်ရန် မှန်အဖြစ် အဘယ်ကြောင့် အသုံးမပြုသနည်း။ အခြားလူတို့သည် မာနထောင်လွှားသည်၊ မိမိကိုယ်ကို အမှန်ထင်သည်၊ လှည့်ဖြားတတ်သည်၊ သမ္မာတရားကို မကျိုးနွံမနာခံဟု သင်အစဉ်ပြောပြီး သင်ကလည်း အလားတူပင်ဖြစ်သည်ကို မမြင်နိုင်ပါက သင်သည် ဒုက္ခရောက်ပြီ ဖြစ်သည်။ သင်၏ ကိုယ်ပိုင်ပြဿနာများကို လုံးဝ မသိမြင်လျှင်၊ သမ္မာတရားအပေါ် တရားဒေသနာမည်မျှကို သင်ကြားနာသည်ဖြစ်စေ၊ သင်ကြားသည့်အရာကို နားလည်သော်လည်း သင့်ကိုယ်သင် ယင်းနှင့် နှိုင်းယှဉ်ချိန်ဆမကြည့်လျှင်၊ သင်၏အခြေအနေကို ဆန်းစစ်လိုစိတ်မရှိလျှင်၊ သင်၏ ကိုယ်ပိုင်ပြဿနာများကို အလေးအနက်ကိုင်တွယ်ပြီး ဖြေရှင်းနိုင်စွမ်းမရှိလျှင် သင့်၌ အသက်ဝင်ရောက်မှုရှိမည်မဟုတ်။ လူတို့သည် သမ္မာတရားစစ်မှန်မှုများအတွင်းသို့ ဝင်ရောက်ရန် အစဉ်မစွမ်းဆောင်နိုင်လျှင် ၎င်းတို့၏ စိတ်နှလုံး၌ အနှစ်မရှိသော ခံစားချက်တစ်ခုရှိမည်မဟုတ်လော။ ၎င်းတို့သည် သိမြင်နားလည်မှုမရှိသကဲ့သို့ ၎င်းတို့၌ ဘုရားသခင်က မည်သည့်အမှု ပြုလုပ်ခဲ့သည်ကို ခံစားမိမည်မဟုတ်ပေ။ ၎င်းတို့သည် အစဉ်သဖြင့် ဝေဝါးသောအခြေအနေတွင် ရှိလိမ့်မည်။ ပြီးလျှင် ၎င်းတို့၏ လိုက်စားမှုများက မှန်ကန်သော ရည်ရွယ်ချက်၊ သို့မဟုတ် ဦးတည်ချက်အတွက် ရည်မှန်းခြင်း ဖြစ်လိမ့်မည်မဟုတ်။ ၎င်းတို့သည် ၎င်းတို့၏ ကိုယ်ပိုင်နှစ်သက်မှုများအတိုင်းသာ လိုက်စားလိမ့်မည်ဖြစ်ပြီး ၎င်းတို့၏ ကိုယ်ပိုင်လမ်းကြောင်းကို လျှောက်လိမ့်မည်။ ဤသည်မှာ ပေါလုကဲ့သို့ပင် ဆုလာဘ်များနှင့် သရဖူကို လိုက်စားခြင်းကိုသာ အလေးထားပြီး သမ္မာတရားကို လုံးဝ လက်မခံခြင်း၊ လက်တွေ့မလုပ်ဆောင်ခြင်း ဖြစ်သည်။ သင်၏ စိတ်သည် အစဉ်သဖြင့် မရေရာသည့် အခြေအနေတွင်ရှိနေလျှင်၊ သင့်၌ မှန်ကန်သော လိုက်စားမှုလမ်းကြောင်းမရှိလျှင် သင်သည် တရားဒေသနာများကို နှစ်အတန်ကြာနားထောင်ပြီးနောက် မည်သည့်သက်ရောက်မှုကိုမျှ မရရှိခဲ့ဘဲ မှန်သောလမ်းခရီးသည် သင့်စိတ်နှလုံး၌ လုံးဝ အမြစ်မတွယ်ပေ။ အယူဝါဒများစွာအကြောင်းအား မည်သို့ပြောရမည်ကို သင်သိနိုင်သော်လည်း ယင်းက သင်၏ အပျက်သဘောဆောင်သောအခြေအနေ၊ သို့မဟုတ် ဖောက်ပြန်ပျက်စီးသော စိတ်သဘောထားကို ဖြေရှင်းနိုင်စွမ်းလုံးဝ မရှိပေ။ မည်သည့်အခက်အခဲမျိုးကိုမဆို သင်ကြုံရသောအခါ သင်နားလည်သော အယူဝါဒသည် သင့်အား ယင်းကိုကျော်လွှားဖို့၊ သို့မဟုတ် ချောမွေ့စွာ ဖြတ်သန်းဖို့ ကူညီလိမ့်မည် မဟုတ်ပေ။ သင့်အခြေအနေကို ပြောင်းလဲရန်၊ သို့မဟုတ် ပြုပြင်ရန် ကူညီမည်မဟုတ်။ သင့်အား အသိစိတ်ဖြင့် နေထိုင်စေမည်မဟုတ်။ သင့်အား လွတ်လပ်ခြင်း၊ လွတ်မြောက်ခြင်းပေးမည်မဟုတ်၊ သို့မဟုတ် တစ်စုံတစ်ခု၏ ဘောင်ခတ်ခြင်းအား သင်မခံရရန် တားဆီးပေးမည်မဟုတ်။ သင်သည် ယခင်က ဤသို့သော အခြေအနေတစ်ခု၌ လုံးဝ မရှိခဲ့ဖူးပေ။ ထို့ကြောင့် ယင်းက သင်သည် အခြေခံအားဖြင့် သမ္မာတရားစစ်မှန်မှုများအတွင်းသို့ မဝင်ရောက်ရသေးသည်ကို သက်သေပြသည်။ သမ္မာတရားစစ်မှန်မှုများအတွင်းသို့ သင်ဝင်ရောက်လိုလျှင်၊ ဘုရားနှုတ်ကပတ်တော်များကို နားလည်လိုလျှင်၊ ဘုရားသခင်အပေါ် စစ်မှန်သော ယုံကြည်ခြင်းကို ရရှိလိုလျှင်၊ ဘုရားသခင်အား သိကျွမ်းပြီး ဘုရားသခင် အမှန်တကယ် တည်ရှိသည်ကို သေချာလိုလျှင် သင့်အခြေအနေကို ဘုရားနှုတ်ကပတ်တော်များဖြင့် နှိုင်းယှဉ်ချိန်ဆရမည်ဖြစ်သည်။ ပြီးနောက် ဘုရားနှုတ်ကပတ်တော်များကို လက်တွေ့လုပ်ဆောင်ပြီး ဝင်ရောက်ရန် လမ်းကြောင်းကို ရှာရမည်။ လူအချို့က ဘုရားနှုတ်ကပတ်တော်ကို ဖတ်ပြီး မိမိတို့ကိုယ်ကို ယင်းတို့နှင့် နှိုင်းယှဉ်ချိန်ဆကြည့်လိုသည်။ သို့သော် ၎င်းတို့ မည်မျှကြိုးစားသည်ဖြစ်စေ မလုပ်ဆောင်နိုင်ကြပေ။ ဥပမာ လူ၏ စိတ်သဘောထားက မာနထောင်လွှားလွန်းသည်ဟု ဘုရားသခင်က ဖော်ထုတ်သောအခါ ၎င်းတို့က “ငါသည် အလွန်နှိမ့်ချပြီး အနောက်တွင်နေသည်။ မာနမထောင်လွှားပါ” ဟု တွေးသည်။ ဘုရားသခင်ပြောဆိုသည့် ဤမာနထောင်လွှားခြင်းမှာ အဘယ်နည်း။ ယင်းသည် စိတ်သဘောထား အမျိုးအစား တစ်ခု ဖြစ်သည်။ မောက်မာသော ပင်ကိုစရိုက်၏ သရုပ်သကန်မဟုတ်ပေ၊ သို့မဟုတ် ကျယ်လောင်သောအသံဖြင့် သို့မဟုတ် အထူးပင် ဆောင့်ကြွားကြွားနိုင်သောပုံစံဖြင့် ပြောဆိုခြင်း မဟုတ်ပေ။ ထိုထက် ယင်းသည် သင့်စိတ်သဘောထားရှိ တစ်စုံတစ်ခုကို ရည်ညွှန်းသည်။ ယင်းသည် မည်သည့်အရာကိုမျှ သင်အလျှော့မပေးသည့် စိတ်သဘောထားတစ်ခုဖြစ်ပြီး အရာရာတိုင်းကို မထီမဲ့မြင်ပြုသည့်၊ အထင်သေးသည်၊ လုံးဝ ဂရုမစိုက်သည့် စိတ်သဘောထားဖြစ်သည်။ သင်သည် မာနထောင်လွှားသည်။ စိတ်ကြီးဝင်သည်။ မိမိကိုယ်ကို အမှန်ထင်သည်။ သင်သည် အစွမ်းအစရှိသည်ဟု အစဉ်ထင်ပြီး မည်သူ့ကိုမျှ နားမထောင်ပေ။ သမ္မာတရား စကားများကို သင်ကြားလျှင်ပင် သင်သည် ယင်းတို့ကို လုံးဝ ဂရုမစိုက်ဘဲ သမ္မာတရားကို အရေးမကြီးဟု မြင်သည်။ ဖောက်ပြန်ပျက်စီးသော စိတ်သဘောထားတစ်ခုကို သင်ထုတ်ဖော်သောအခါ ယင်းသည် ပြဿနာတစ်ခုဟု သင်မမြင်ပေ။ ပြီးလျှင် မည်သူကမျှ သင်နှင့် မယှဉ်နိုင်ဟုပင် ထင်ပြီး သင်က အခြားလူတိုင်းထက် သာလွန်သည်ဟု အစဉ်ထင်မြင်ကာ အခြားသူများအား သင့်ကို နားထောင်ရန် တောင်းဆိုသည်။ ဤသည်မှာ မာနထောင်လွှားသော၊ မိမိကိုယ်ကို မှန်ကန်သည်ဟု ယူမှတ်သောသူဖြစ်သည်။ ဤသို့သောလူတို့တွင် အသက်ဝင်ရောက်မှု မရှိသကဲ့သို့ သမ္မာတရားစစ်မှန်မှုများမရှိပေ။

လူတစ်ယောက်တွင် သမ္မာတရား စစ်မှန်မှုများရှိမရှိဟူသည်ကို မည်သို့ အကဲဖြတ်သင့်သနည်း။ ဘုရားနှုတ်ကပတ်တော်နှင့်အညီ တိကျသော ဆန်းစစ်ချက်ကို ပြုလုပ်ရမည်မှာ အမှန်ပင်ဖြစ်၏။ ရှေးဦးစွာ သင့်ကိုယ်သင် အမှန်တကယ် နားလည်ခြင်းရှိမရှိ၊ သင်၏ ဖောက်ပြန်ပျက်စီးသော စိတ်သဘောထားကို အမှန်တကယ် နားလည်ခြင်းရှိမရှိကို ကြည့်လော့။ ဥပမာ သင့်စိတ်သဘောထားက မာနထောင်လွှားသလော။ အမှုအရာများကို လုပ်ဆောင်သောအခါတွင် မာနထောင်လွှားသော စိတ်သဘောထားကို သင်ထုတ်ဖော်ပြသလော။ သင်မသိလျှင် သင်သည် မိမိကိုယ်ကို နားမလည်သောသူတစ်ဦး ဖြစ်သည်။ လူတစ်ဦးသည် သူ၏အခြေအနေကို ရှင်းလင်းစွာ မမြင်နိုင်လျှင်၊ သူထုတ်ဖော်သည့် ဖောက်ပြန်ပျက်စီးမှုကို အနည်းငယ်မျှပင် နားလည်ခြင်းမရှိလျှင်၊ သူ၏စကားများနှင့် လုပ်ရပ်များကို သမ္မာတရားအပေါ်၌ အခြေမခံလျှင်၊ သူကြုံရသည့် အခြေအနေများကို ပိုင်းခြားသိမြင်ခြင်းမရှိလျှင်၊ ပြီးလျှင် အကြောင်းအရာတိုင်းကို ကြည့်သောအခါ၌ စည်းမျဉ်းစည်းကမ်းများကို မဆင်မခြင် အသုံးချသော်လည်း မှန်သည်၊ မှားသည်ကို မသိလျှင် သူသည် သမ္မာတရားအပေါ် နားလည်ခြင်းမရှိသည့်သူတစ်ဦး ဖြစ်သည်။ သမ္မာတရားကို နားလည်လျှင် သင့်ကိုယ်သင် နားလည်နိုင်လိမ့်မည်။ သင့်၌ မာနထောင်လွှားသော စိတ်သဘောထားတစ်ခုရှိသည်ကို သိလိမ့်မည်။ သင်၏ စစ်မှန်သောအခြေအနေကို ပိုင်းခြားသိမြင်နိုင်မည်။ အမှန်တကယ် နောင်တရပြီး ပြောင်းလဲနိုင်မည်။ သမ္မာတရားအား မည်သို့လက်တွေ့လုပ်ဆောင်ရမည်ကို သိနိုင်လိမ့်မည်။ သို့ရာတွင် သမ္မာတရားကို သင်မလိုက်စားလျှင်၊ ဘုရားနှုတ်ကပတ်တော်၏ သမ္မာတရားနှင့်ဆိုင်သော လက်တွေ့ကျသောအပိုင်းကို နားလည်ခြင်းမရှိလျှင်၊ ဘုရားသခင်ဖော်ထုတ်သည့် လူတို့၏ ဖောက်ပြန်ပျက်စီးသော အနှစ်သာရကို ဆင်ခြင်သုံးသပ်ခြင်း မရှိလျှင်၊ သို့မဟုတ် ယင်းတို့ဖြင့် သင့်ကိုယ်သင် နှိုင်းယှဉ်ချိန်ဆမကြည့်လျှင် သင်သည် ထာဝရ နားဝေတိမ်တောင်ဖြစ်သောသူတစ်ဦး ဖြစ်လိမ့်မည်။ သမ္မာတရားကသာ သင့်ကို ပိုင်းခြားသိမြင်တတ်အောင် ပြုလုပ်ပေးနိုင်သည်။ အမှန်နှင့်အမှား၊ အဖြူနှင့်အမဲကို ခွဲခြားသိမြင်နိုင်အောင် ပြုလုပ်ပေးနိုင်သည်။ သမ္မာတရားကသာ သင့်အား ပါးနပ်ပြီး ဆင်ခြင်တုံတရားရှိအောင် ပြုလုပ်ပေးနိုင်သည်။ သင့်အား ဉာဏ်ပညာ ပေးနိုင်သည်။ ပြီးလျှင် အပြုသဘောဆောင်သည့်အရာများက မည်သည့်အရာများဖြစ်သည်၊ အပျက်သဘောဆောင်သည့်အရာများက မည်သည့်အရာများဖြစ်သည်ဆိုသည်တို့ကြား ရှင်းလင်းစွာ ခွဲခြားသိမြင်ရန် အရည်အချင်းကို ပေးနိုင်သည်။ ဤအရာများကို သင်ရှင်းလင်းစွာ ခွဲခြားသိမြင်နိုင်ခြင်းမရှိလျှင် သင်သည် ထာဝရ နားဝေတိမ်တောင် ဖြစ်သောသူတစ်ဦး ဖြစ်မည်။ သင်သည် အစဉ်သဖြင့် မပြတ်သားသော၊ ဘာဆိုဘာမျှမသိသော၊ ရောထွေးနေသော အခြေအနေတွင်ရှိလိမ့်မည်။ ဤသို့သောလူတို့သည် သမ္မာတရားကို နားလည်ဖို့ မဖြစ်နိုင်ဘဲ ဘုရားသခင်ကို ၎င်းတို့ နှစ်မည်မျှယုံကြည်သည်ဖြစ်စေ သမ္မာတရားစစ်မှန်မှုများအတွင်းသို့ မဝင်ရောက်နိုင်သေးပေ။ ၎င်းတို့၏ အလုပ်လုပ်ပေးခြင်းသည် စံမမီလျှင် ၎င်းတို့အတွက် ကျန်ရှိသမျှမှာ ဖယ်ရှားရှင်းလင်းခံရခြင်းသာ ဖြစ်သည်။ ဥပမာ လွန်စွာ ကျော်ကြားသောသူတစ်ဦးက တစ်စုံတစ်ခုကို လုပ်ဆောင်ပြီး လူအများစုက ယင်းကို ကောင်းသောအရာအဖြစ် မြင်သည်။ သို့သော် သမ္မာတရားကို နားလည်သောသူတစ်ဦးက ယင်းကို ကြည့်လျှင် သူ့၌ ပိုင်းခြားသိမြင်မှုရှိလိမ့်မည်ဖြစ်ပြီး ဆိုးယုတ်သော ရည်ရွယ်ချက်များက သူ၏ လုပ်ရပ်များအတွင်း၌ ဖုံးကွယ်နေသည်ဟု သတ်မှတ်လိမ့်မည်။ ယင်းသည် ကောင်းယောင်ဆောင်ခြင်း၊ လှည့်ကွက်များနှင့် လှည့်ဖြားမှုဖြစ်သည်ဟုလည်းကောင်း၊ ဆိုးယုတ်သူ၊ သို့မဟုတ် နတ်ဆိုးဘုရင်တစ်ဦးကသာ ဤသို့သောအရာတစ်ခုကို လုပ်ဆောင်နိုင်သည်ဟုလည်းကောင်း သတ်မှတ်လိမ့်မည်။ ဤသို့ပြောခြင်းအတွက် အခြေပြုချက်မှာ အဘယ်နည်း။ ဤ “ကောင်းသောအရာ” ၏ အနှစ်သာရကို သမ္မာတရားနှင့်အညီ ဆုံးဖြတ်ခြင်းဖြစ်သည်။ အခြားလူများက မည်သို့ပြောသည်ဖြစ်စေ ယင်းကို အကဲဖြတ်ရန် သမ္မာတရားအား အသုံးပြုခြင်းဖြင့်သာ ယင်း၏ အနှစ်သာရကို ရှင်းလင်းစွာ မြင်နိုင်သည်။ ယင်းသည် ကောင်းလျှင် ကောင်းသည်။ ဆိုးလျှင် ဆိုးသည်။ ဘုရားနှုတ်ကပတ်တော်နှင့်အညီ အကဲဖြတ်ခြင်းသည် လုံးဝ တိကျမှန်ကန်သည်။ သို့ရာတွင် သမ္မာတရားအား သင်နားမလည်လျှင် သင်၌ အယူအဆများ ဖြစ်ပေါ်လိမ့်မည်။ သင်က “၎င်းတို့သည် ကောင်းသောအရာတစ်ခုကို လုပ်ဆောင်ခြင်းအတွက် အဘယ်ကြောင့် ဖော်ထုတ်ခံရပြီး ရှုတ်ချခံနေရသနည်း။ ၎င်းတို့သည် မျှတစွာ ဆက်ဆံခြင်းမခံရပါ” ဟု ပြောလိမ့်မည်။ ဤသည်မှာ သင် အကဲဖြတ်မည့် ပုံစံဖြစ်သည်။ ဤအမှုကိစ္စကို အကဲဖြတ်ခြင်းအတွက် သမ္မာတရားသည် သင်၏ အခြေပြုချက်မဟုတ်ဘဲ သင့်စိတ်က စိတ်ကူးထင်မြင်သော အရာများ ဖြစ်သည်။ သင်သည် လူသားအယူအဆများနှင့် စိတ်ကူးထင်မြင်မှုများအရ အမှုအရာများကို အစဉ်ရှုမြင်လျှင် ပြဿနာများ၏ အနှစ်သာရကို လုံးဝ ရှင်းလင်းစွာ မြင်နိုင်မည်မဟုတ်။ အပေါ်ယံ အသွင်အပြင်များ၏ အထင်အမြင်မှားစေခြင်းကိုသာ သင်ခံရမည်။ သင်၌ သမ္မာတရားမရှိသောအခါ မည်သည့်အရာကို သင်ကြည့်သည်ဖြစ်စေ သင်၏ အမြင်က အစဉ် မပြတ်မသားဖြစ်မည်။ မှုန်ဝါးပြီး ဝိုးတိုးဝါးတားဖြစ်ကာ မရှင်းမလင်းဖြစ်လိမ့်မည်။ သို့တိုင်အောင် သင်က သင့်ထံတွင် အသိအမြင်ရှိပြီး အတွေးနက်နဲမှုရှိသည်ဟု ထင်သည်။ ဤသည်မှာ မိမိကိုယ်ကို သိမြင်မှုကင်းမဲ့ခြင်းဖြစ်သည်။ ဥပမာ လူတစ်ဦးသည် ဆိုးယုတ်ပြီး အပြစ်ဒဏ်ပေးခြင်းခံရသင့်သည်ဟု ဘုရားသခင်က ဆိုသော်လည်း သင်က သူသည် လူကောင်းတစ်ယောက်ဖြစ်ပြီး ကောင်းသောအရာများကို လုပ်ဆောင်ခဲ့သည်ဟု ဆိုလျှင် သင့်စကားများက ဘုရားသခင်၏ စကားများနှင့် အတိအကျပင် ဆန့်ကျင်ပြီး ကွဲလွဲနေသည်မဟုတ်လော။ ဤသည်မှာ သမ္မာတရားကို လူတို့နားမလည်သောအခါ၊ ပိုင်းခြားသိမြင်မှုမရှိသောအခါ ဖြစ်ပျက်သောအရာ ဖြစ်သည်။ လူအချို့သည် ဘုရားသခင်ကို နှစ်များစွာ ယုံကြည်ခဲ့သော်လည်း သမ္မာတရားကို နားမလည်ပေ။ ၎င်းတို့သည် မည်သည့်အမှုကိစ္စမဆိုတွင် စေ့စပ်မှုမရှိဘဲ ၎င်းတို့ရှင်းလင်းစွာ မမြင်နိုင်သည့် အမှုကိစ္စများစွာရှိသည်။ ၎င်းတို့သည် အယောင်ဆောင်ခေါင်းဆောင်များ၊ အန္တိခရစ်များ၏ အထင်အမြင်မှားစေခြင်းကို အလွယ်တကူခံရသည်။ မည်သည့်အခြေအနေများ ဖြစ်ပေါ်ပါစေ အနှောင့်အယှက်ဖြစ်စေနေသည့် ဆိုးယုတ်သောသူတစ်ဦး ရှိသရွေ့ ၎င်းတို့က ကိုယ်တိုင်သတိမထားမိဘဲ ရောထွေးကုန်ပြီး ထိုဆိုးယုတ်သောသူကဲ့သို့ ပြောဆိုကြသည်။ ထိုဆိုးယုတ်သောသူက ဖော်ထုတ်ခြင်းနှင့် ထုတ်ဖော်ခြင်းခံရမှသာ ၎င်းတို့က အသိစိတ်ဝင်လာခြင်း ဖြစ်သည်။ ဤသို့သောသူများသည် မကြာခဏ ဘာဆိုဘာမှမသိသော စိတ်နေစိတ်ထားတစ်ခုတွင် နေထိုင်ကြပြီး ၎င်းတို့၏ အနှစ်သာရသည် နားဝေတိမ်တောင်ဖြစ်သောသူတစ်ဦး၏ အနှစ်သာရဖြစ်သည်။ ဤသို့သောလူများတွင် အစွမ်းအစနည်းနည်းမျှမရှိပေ။ ၎င်းတို့သည် သမ္မာတရားကို နားမလည်ရုံသာမက အချိန်မရွေး အထင်အမြင်မှားစေခြင်း ခံရနိုင်သည်။ ထို့ကြောင့် ၎င်းတို့သည် သမ္မာတရားစစ်မှန်မှုများထဲသို့ ဝင်ရောက်ရန် မဖြစ်နိုင်ပေ။ အသင်းတော်တိုင်းတွင် ဤသို့သောလူအချို့ရှိသည်။ အယောင်ဆောင်ခေါင်းဆောင်တစ်ဦးက အလုပ်လုပ်သောအခါ ၎င်းတို့က သူ့နောက်သို့လိုက်ကြသည်။ အန္တိခရစ်တစ်ဦးက လူတို့ကို အထင်အမြင်မှားစေသောအခါ ၎င်းတို့က သူ့နောက်လိုက်ကြသည်။ အတိုချုပ်အားဖြင့် ခေါင်းဆောင်က မည်သူဖြစ်ပါစေ ၎င်းတို့က ထိုသူ့နောက်သို့ လိုက်လိမ့်မည်။ ၎င်းတို့သည် မိမိခင်ပွန်း လုပ်ဆောင်သမျှနောက်သို့လိုက်သော မိန်းမကဲ့သို့ ဖြစ်သည်။ ခေါင်းဆောင်က လူကောင်းတစ်ယောက်ဖြစ်လျှင် ၎င်းတို့က လူကောင်းတစ်ယောက်နောက်သို့ လိုက်သည်။ ခေါင်းဆောင်က လူဆိုးတစ်ယောက် ဖြစ်လျှင် ၎င်းတို့က လူဆိုးတစ်ယောက်နောက်သို့ လိုက်သည်။ ၎င်းတို့တွင် ကိုယ်ပိုင်ထင်မြင်ချက်များ၊ သို့မဟုတ် ရပ်တည်ချက်များမရှိကြ။ ထို့ကြောင့် ဤသို့သောသူမျိုးကို သမ္မာတရားအား နားလည်ဖို့၊ သို့မဟုတ် စစ်မှန်မှုအတွင်းသို့ ဝင်ရောက်ဖို့ မမျှော်လင့်နှင့်။ ၎င်းတို့က အနည်းငယ်အလုပ်လုပ်ပေးနိုင်လျှင် ကောင်းနေပြီ ဖြစ်သည်။ သန့်ရှင်းသောဝိညာဉ်တော်သည် သမ္မာတရားအား ချစ်သောသူတို့တွင် အလုပ်လုပ်သည်။ သမ္မာတရားအား ချစ်သောသူအားလုံးသည် အနည်းဆုံးအနေဖြင့် ဘုရားနှုတ်ကပတ်တော်ကို နားလည်နိုင်ပြီး ဘုရားအိမ်တော်၏ တရားဒေသနာများနှင့် မိတ်သဟာယကို နားလည်နိုင်သော အစွမ်းအစရှိသူများ ဖြစ်ကြသည်။ ဘာသာရေးလောကသည် မည်မျှသော မိစ္ဆာဒိဋ္ဌိအယူများနှင့် မှားယွင်းပြီး အဓိပ္ပာယ်မဲ့သောအရာများ ဖြန့်ဖြူးပြီး ဖြန့်ဝေသည်ဖြစ်စေ၊ အန္တိခရစ်၏ ကောက်ကျစ်ဆိုးယုတ်သော အင်အားစုက အသင်းတော်ကို မည်သို့ အသရေဖျက်ပါစေ၊ ရှုတ်ချပါစေ၊ ဖိနှိပ်ပါစေ၊ သမ္မာတရားကို ချစ်သောသူတို့သည် ဘုရားနှုတ်ကပတ်တော်များက သမ္မာတရားဖြစ်သည်ကို လက်ခံယုံကြည်ကြဆဲဖြစ်သည်။ ပြီးလျှင် ဘုရားအိမ်တော်ရှိ တရားဒေသနာများ၊ မိတ်သဟာယနှင့် အတွေ့အကြုံဆိုင်ရာ သက်သေခံချက်တို့သည် သမ္မာတရားနှင့် ကိုက်ညီပြီး အမှန်တကယ် သက်သေခံချက်များဖြစ်သည်ဟု ယုံကြည်ကြဆဲဖြစ်သည်။ ဤသည်မှာ သဘောပေါက်နားလည်နိုင်စွမ်းရှိခြင်း၏ အဓိပ္ပာယ်ဖြစ်သည်။ ဘုရားသခင်ပြောသည့် နှုတ်ကပတ်တော်များအားလုံးသည် သမ္မာတရားဖြစ်ပြီး လူတို့ပိုင်ဆိုင်သင့်သည့် အသက်စစ်မှန်မှုများဖြစ်ကြောင်းကို သင်သဘောပေါက်လျှင် ဤသဘောပေါက်ခြင်းက သင်က သမ္မာတရား၏ တစ်စိတ်တစ်ပိုင်းကို နားလည်နှင့်ပြီဖြစ်သည်ဆိုသည်ကို သက်သေပြသည်။ ဘုရားသခင်ဖော်ပြသည့် သမ္မာတရားအားလုံးသည် အပြုသဘောဆောင်သောအရာများဖြစ်ပြီး သမ္မာတရားစစ်မှန်မှုများ ဖြစ်သည်ကို သင်သဘောပေါက်နားလည်လျှင်၊ ဤသည်မှာ မှန်သည်ဆိုသည်ကို သင်သေချာပြီး ဤသည်မှာ တစ်ရာရာနှုန်းပြည့် မှန်သည်ဆိုသည်ကို အသိအမှတ်ပြုလျှင် ဘုရားသခင်၏ လုပ်ဆောင်မှုအပေါ် သင်နားလည်မှုရှိသည်။ သမ္မာတရားကို နားလည်ရန်မှာ လွယ်ကူသောအရာ မဟုတ်ပေ။ ယင်းသည် သန့်ရှင်းသောဝိညာဉ်တော်က ဉာဏ်အလင်းဖွင့်ပြပေးခြင်းခံရသော လူများသာ ရရှိနိုင်သောအရာတစ်ခု ဖြစ်သည်။ သမ္မာတရားကို အမှန်တကယ် နားလည်သူတို့သည် ဘုရားသခင် လုပ်ဆောင်သမျှတိုင်းက အပြုသဘောဆောင်သည်ကိုလည်းကောင်း၊ ယင်းတို့အားလုံးက သမ္မာတရားဖြစ်သည်ကိုလည်းကောင်း၊ ယင်းတို့အားလုံးက လူသားမျိုးနွယ်အဖို့ အလွန်တန်ဖိုးရှိသည်ကိုလည်းကောင်း ၎င်းတို့၏ စိတ်နှလုံးအတွင်းတွင် အသိအမှတ်ပြုပြီး ဖြစ်သည်။ သမ္မာတရားကို အမှန်တကယ် နားလည်သူတို့သည် ဘာသာတရားမရှိသူတို့၏ လောကရှိ အရာရာတိုင်းသည် အပျက်သဘောဆောင်ပြီး သမ္မာတရားနှင့် ဆန့်ကျင်သည်ဆိုသည်ကို ရှင်းလင်းစွာ မြင်နိုင်သည်။ ၎င်းတို့၏ သီအိုရီများက မည်မျှကောင်းမွန်သည့်ပုံစံရှိပါစေ ၎င်းတို့က လူတို့ကို အထင်အမြင်မှားစေပြီး ထိခိုက်စေသည်။ ဘုရားသခင် လုပ်ဆောင်သမျှတိုင်းသည် အပြုသဘောဆောင်ပြီး သမ္မာတရားဖြစ်သည်။ လူတို့အတွက် ကယ်တင်ခြင်းဖြစ်သည်။ စာတန်နှင့် နတ်ဆိုးများ လုပ်ဆောင်သမျှတိုင်းသည် အပျက်သဘောဆောင်သည်။ မှားယွင်းသည်။ အဓိပ္ပာယ်မရှိပေ။ ပြီးလျှင် လူတို့ကို အထင်အမြင်မှားစေပြီး ထိခိုက်စေသည်။ ယင်းသည် ဘုရားသခင်လုပ်ဆောင်သည့်အရာနှင့် အတိအကျ ဆန့်ကျင်ဘက်ဖြစ်သည်။ သင်သည် ဤအရာအပေါ်တွင် လုံးဝ ရှင်းလင်းလျှင် သင့်၌ ပိုင်းခြားသိမြင်မှုရှိသည်။ သင်က သမ္မာတရားကိုလည်း လိုက်စားနိုင်လျှင်လည်းကောင်း၊ ဘုရားနှုတ်ကပတ်တော်၏ တရားစီရင်ခြင်းနှင့် ပြစ်တင်ဆုံးမခြင်းကို လက်ခံနိုင်လျှင်လည်းကောင်း၊ ဘုရားနှုတ်ကပတ်တော်မှတစ်ဆင့် သင့်ကိုယ်သင်နားလည်ပြီး ယင်းတို့ဖြင့် သင့်ကိုယ်သင် နှိုင်းယှဉ်ချိန်ဆနိုင်လျှင်လည်းကောင်း၊ သင်၏ ဖောက်ပြန်ပျက်စီးခြင်းကို အမှန်အတိုင်း မြင်နိုင်လျှင်လည်းကောင်း၊ သင့်အတွက် ဘုရားသခင်ဖန်တီးသည့် အခြေအနေတိုင်း၌ သင်ထုတ်ဖော်ပြသော ဖောက်ပြန်ပျက်စီးသည့် စိတ်သဘောထားကို ဖြေရှင်းနိုင်လျှင်လည်းကောင်း၊ နောက်ဆုံးတွင် သင့်ကိုယ်သင် နားလည်နိုင်ရုံသာမက သူတစ်ပါးတို့ကိုလည်း ပိုင်းခြားသိမြင်နိုင်လျှင် လည်းကောင်း၊ ဘုရားသခင်ကို မည်သူက အမှန်တကယ်ယုံကြည်သည်၊ မည်သူက မယုံကြည်သူဖြစ်သည်၊ မည်သူက အယောင်ဆောင်ခေါင်းဆောင်ဖြစ်သည်၊ မည်သူက အန္တိခရစ်ဖြစ်သည်၊ မည်သူက လူတို့ကို အထင်အမြင်မှားစေသည်တို့ကြား ပိုင်းခြားသိမြင်နိုင်လျှင်လည်းကောင်း၊ ဤအရာများကို သင်တိကျမှန်ကန်စွာ အကဲဖြတ်ပြီး ပိုင်းခြားသိမြင်နိုင်လျှင် သမ္မာတရားကို သင်နားလည်ပြီး စစ်မှန်မှုအချို့ရှိသည်ဆိုသည့် အဓိပ္ပာယ်ဖြစ်သည်။ ဥပမာ သင်၏ ဆွေမျိုးများ၊ သို့မဟုတ် မိဘများသည် ဘုရားသခင်ကို ယုံကြည်သူများဖြစ်ကြပြီး မကောင်းမှုပြုသောကြောင့်၊ အဖျက်အမှောင့်များ ဖန်တီးသောကြောင့်၊ သို့မဟုတ် သမ္မာတရားကို လုံးဝ လက်မခံသောကြောင့် ၎င်းတို့သည် ရှင်းလင်းပစ်ခြင်းခံရသည်ဟု ဆိုကြပါစို့။ သို့ရာတွင် သင်သည် ၎င်းတို့အပေါ် ပိုင်းခြားသိမြင်ခြင်းမရှိဘဲ ၎င်းတို့ အဘယ်ကြောင့် ရှင်းလင်းပစ်ခြင်းခံရသည်ကို မသိဘဲ အလွန်အမင်း စိတ်မကောင်းဖြစ်ရလေသည်။ ပြီးလျှင် ဘုရားအိမ်တော်၌ ချစ်ခြင်းမေတ္တာမရှိကြောင်းနှင့် လူများကို တရားမမျှတကြောင်း သင် အစဉ်သဖြင့် ညည်းညူနေသည်။ သင်သည် ဘုရားသခင်ကို ဆုတောင်းပြီး သမ္မာတရားကို ရှာဖွေသင့်သည်။ ထို့နောက်တွင် ဤဆွေမျိုးများသည် မည်သည့်လူစားမျိုးသာ ဖြစ်သည်ကို ဘုရားနှုတ်ကပတ်တော်အပေါ် အခြေခံ၍ အကဲဖြတ်လော့။ သင်သည် သမ္မာတရားကို အမှန်တကယ်နားလည်လျှင် ၎င်းတို့ကို တိကျမှန်ကန်စွာ အဓိပ္ပာယ် သတ်မှတ်နိုင်လိမ့်မည်။ ပြီးလျှင် ဘုရားသခင် လုပ်ဆောင်သမျှသည် မှန်ကန်ကြောင်းနှင့် သူသည် ဖြောင့်မတ်သောဘုရားဖြစ်ကြောင်းကို သင် မြင်လိမ့်မည်။ ဤသို့ဆိုလျှင် သင်သည် စောဒကတက်ခြင်း ရှိမည်မဟုတ်ပေ။ ဘုရားသခင်၏ အစီအစဉ်များကို ကျိုးနွံနာခံနိုင်မည်ဖြစ်ပြီး သင်၏ ဆွေမျိုးများ၊ သို့မဟုတ် မိဘကို ခုခံကာကွယ်ရန် ကြိုးစားလိမ့်မည်မဟုတ်ပေ။ ဤနေရာတွင် အဓိကအချက်မှာ သင်တို့၏ ဆွေမျိုးသားချင်းများကို ဖြတ်ဖို့ မဟုတ်ပေ။ ၎င်းတို့သည် မည်သည့်လူစားမျိုး ဖြစ်သည်ကို အဓိပ္ပာယ်သတ်မှတ်ရန်သာဖြစ်ပြီး ၎င်းတို့အပေါ် သင်ပိုင်းခြားသိမြင်နေစေရန်နှင့် ၎င်းတို့ အဘယ်ကြောင့် ဖယ်ရှားရှင်းလင်းခြင်း ခံရသည်ကို သိရှိစေရန်ဖြစ်သည်။ ဤအရာက သင်၏စိတ်နှလုံးထဲ၌ သင့်အတွက် အမှန်တကယ် ရှင်းလင်းပြီး သင်၏အမြင်ရှုထောင့်သည် မှန်ကန်သကဲ့သို့ သမ္မာတရားနှင့် ကိုက်ညီပါက ဘုရားသခင်နှင့် သင်တစ်ဖက်တည်း ရပ်တည်နိုင်လိမ့်မည်ဖြစ်ပြီး အမှုကိစ္စအပေါ် သင်၏အမြင်များသည် ဘုရားနှုတ်ကပတ်တော်များနှင့် လုံးလုံး သဟဇာတဖြစ်လိမ့်မည်။ သမ္မာတရားကို လက်မခံနိုင်ဘဲ သို့မဟုတ် ဘုရားနှုတ်ကပတ်တော်များနှင့်အညီ လူများကို ရှုမြင်နိုင်စွမ်း မရှိပါက၊ ပြီးလျှင် လူများကို ရှုမြင်သည့်အခါတွင် ဇာတိပကတိ၏ ဆက်ဆံရေးများနှင့် အမြင်ရှုထောင့်များဘက်တွင် ရှိနေသေးပါက ဤဇာတိပကတိဆိုင်ရာ ဆက်ဆံရေးကို သင်မည်သည့်အခါမျှ ဖယ်ရှားနိုင်မည် မဟုတ်ဘဲ ဤလူများကို အသင်းတော်ရှိ ညီအစ်ကိုမောင်နှမများထက်ပင် ပိုရင်းနှီးသည့်အလား မိမိ၏ဆွေမျိုးသားချင်းများကဲ့သို့ ဆက်ဆံနေဦးမည်ဖြစ်သည်။ ထိုအခြေအနေတွင် ဤကိစ္စ၌ သင်၏မိသားစုအပေါ် သင်၏အမြင်များနှင့် ဘုရားနှုတ်ကပတ်တော်များကြားတွင် ဆန့်ကျင်ကွဲလွဲမှုတစ်ခု၊ ပဋိပက္ခတစ်ခုပင် ရှိမည်ဖြစ်သည်။ ပြီးလျှင် ထိုသို့သော အခြေအနေများတွင် ဘုရားသခင်ဘက်၌ ရပ်တည်ဖို့ သင့်အတွက် ဖြစ်နိုင်မည်မဟုတ်သကဲ့သို့ သင့်ထံတွင် ဘုရားသခင်နှင့်ပတ်သက်သော အယူအဆများနှင့် အထင်လွဲမှုများ ရှိပေမည်။ ထို့ကြောင့် လူတို့သည် ဘုရားသခင်နှင့် သဟဇာတဖြစ်ခြင်းကို ရရှိဖို့ဆိုလျှင် ရှေးဦးစွာ အကြောင်းကိစ္စများအပေါ် ၎င်းတို့၏ အမြင်များသည် ဘုရားသခင်၏ နှုတ်ကပတ်တော်များနှင့် ကိုက်ညီရမည်။ လူများနှင့် အမှုအရာများကို ဘုရားနှုတ်ကပတ်တော်အပေါ် အခြေခံပြီး ရှုမြင်နိုင်ရမည်။ ဘုရားနှုတ်ကပတ်တော်များက သမ္မာတရားဖြစ်သည်ကို လက်ခံနိုင်ရမည်ဖြစ်ပြီး လူသား၏ ရိုးရာအယူအဆများကို ဘေးဖယ်ထားနိုင်ရမည်။ သင်သည် မည်သည့်လူ၊ သို့မဟုတ် အမှုကိစ္စကို ရင်ဆိုင်ရပါစေ ဘုရားသခင်နှင့် တူညီသောအမြင်များနှင့် ရှုထောင့်များကို ထားရှိနိုင်ရမည်။ ပြီးလျှင် သင်၏ အမြင်များနှင့် ရှုထောင့်များသည် သမ္မာတရားနှင့် သဟဇာတဖြစ်ရမည်။ ဤနည်းအားဖြင့် သင်၏ အမြင်များနှင့် လူတို့ကို သင်ချဉ်းကပ်သည့်နည်းသည် ဘုရားသခင်အတွက် ရန်လိုခြင်း ရှိမည်မဟုတ်ပေ။ ပြီးလျှင် သင်သည် ဘုရားသခင်အပေါ် ကျိုးနွံနာခံခြင်းနှင့် ဘုရားသခင်နှင့် သဟဇာတဖြစ်ခြင်းကို စွမ်းဆောင်နိုင်လိမ့်မည်။ ဤသို့သောလူတို့သည် ဘုရားသခင်ကို မည်သည့်အခါမျှ ထပ်မံ အာခံနိုင်မည်မဟုတ်ပေ။ ၎င်းတို့သည် ဘုရားသခင်ရယူလိုသည့် လူများပင် ဧကန်ဖြစ်ကြသည်။

သမ္မာတရားစစ်မှန်မှုများအတွင်းသို့ ဝင်ရောက်ရာတွင် ပထမအဆင့်မှာ ဘုရားနှုတ်ကပတ်တော်များအတိုင်း သင့်ကိုယ်သင် ဆင်ခြင်သုံးသပ်ရန်၊ သင်၏ မတူညီသောအခြေအနေများအားလုံးကို ဘုရားနှုတ်ကပတ်တော်ဖြင့် နှိုင်းယှဉ်ရန် ဖြစ်သည်။ သင်သည် ပို၍နက်နဲစွာ ဝင်ရောက်လိုလျှင် သင်၏ ဖောက်ပြန်ပျက်စီးသော စိတ်သဘောထားကို ပို၍နက်နဲစွာ စိစစ်ပြီး နားလည်ရမည်။ နားလည်ပြီးနောက်တွင် မည်သည့်အရာကို လုပ်ဆောင်သင့်သနည်း။ သင်သည် လက်တွေ့လုပ်ဆောင်ပြီး ဝင်ရောက်ရန် နည်းလမ်းတစ်ခု ရှာသင့်သည်။ သမ္မာတရားကို မည်သို့ လက်တွေ့လုပ်ဆောင်ပြီး သင်၏ ဖောက်ပြန်ပျက်စီးသော စိတ်သဘောထားအား ဖယ်ရှားရမည်ဆိုသည်ကို တွေးတောရမည်။ ဤသည်မှာ မှန်ကန်သော လမ်းကြောင်းဖြစ်သည်။ လူအချို့သည် မိမိတို့ကိုယ်ကို နားလည်မှုရရှိပြီးနောက်တွင် အပျက်သဘောဆောင်လာကြသည်။ ၎င်းတို့သည် ဖယ်ရှားရှင်းလင်းခံရပြီး အစေခံသူများနှင့် အဖြည့်ခံများဖြစ်သည်ဟူ၍ ငိုရှိုက်ကြသည်။ ပြီးလျှင် ၎င်းတို့သည် ၎င်းတို့၏ တာဝန်များကိုပင် မလုပ်ဆောင်လိုပေ။ ဤသူတို့မှာ မည်သည့်လူစားမျိုး ဖြစ်သနည်း။ ဤသူတို့မှာ အဓိပ္ပာယ်မရှိသောလူများနှင့် အာရုံစိုက်ခံရအောင် တစ်ဆိတ်ကိုတစ်အိတ်လုပ်သူများ ဖြစ်၏။ ဤသို့ဆိုလျှင် ယင်းကို ပြုပြင်ရန် အကောင်းဆုံးနည်းလမ်းမှာ အဘယ်နည်း။ အနည်းဆုံးအနေဖြင့် ၎င်းတို့သည် မငိုသင့်၊ သို့မဟုတ် ဇာမချဲ့သင့်ပေ။ ထို့အပြင် ၎င်းတို့သည် လက်မလျှော့သင့်၊ သို့မဟုတ် ဘုရားသခင်နှင့်ပတ်သက်ပြီး မညည်းညူသင့်ပေ။ ၎င်းတို့လုပ်ဆောင်သင့်သည့် အရေးကြီးဆုံးသောအရာများမှာ သမ္မာတရားကို ရှာဖွေပြီး ဘုရားသခင်၏ ရည်ရွယ်ချက်က အမှန်တကယ်တွင် မည်သည့်အရာ ဖြစ်သည်ကိုလည်းကောင်း၊ မည်သည့်ဆောင်ရွက်မှုနည်းလမ်းက အသိစိတ်အရှိဆုံး ဖြစ်သည်ကိုလည်းကောင်း၊ မည်သည့်လမ်းကြောင်းကို ၎င်းတို့ ရွေးချယ်သင့်သည်ကိုလည်းကောင်း နားလည်လာရန် ဖြစ်သည်။ ဤသည်တို့မှာ အရေးကြီးဆုံးအရာများဖြစ်သည်။ လူတို့သည် ကောင်းချီးခံစားရရန် ရည်ရွယ်ချက်၏ ထိန်းချုပ်ခြင်းကို စဉ်ဆက်မပြတ် ခံရသောအခါတွင် ၎င်းတို့၏ အသိစိတ်ဆုံးရှုံးရန်မှာ အလွယ်ကူဆုံးဖြစ်သည်။ အသိစိတ်ကင်းမဲ့သောသူများသည် သနားစရာအကောင်းဆုံးဖြစ်သည်။ သို့သော် အရာအားလုံးထဲတွင် ဘုရားသခင်အား ကျိုးနွံနာခံပြီး ဘုရားသခင်ကျေနပ်စေရန်သာ အားထုတ်ဖို့ ရွေးချယ်သည့်သူများသည် အသိစိတ်အရှိဆုံးသူများ၊ အကြီးဆုံးသော အသိတရားရှိသူများ ဖြစ်သည်။ လူတစ်ယောက်သည် ဘုရားသခင်၏ ဖော်ထုတ်ခြင်းကို ခံရသောအခါ မည်သို့ ကိုင်တွယ်သင့်သနည်း။ ပြီးလျှင် မည်သည့်ရွေးချယ်မှုကို လုပ်ဆောင်သင့်သနည်း။ သမ္မာတရားကို ရှာဖွေရမည်။ မည်သည့်အခြေအနေအောက်တွင်မဆို နားဝေတိမ်တောင် မဖြစ်သင့်ပေ။ သင့်အနေဖြင့် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို တွေ့ကြုံခြင်း၊ သင်၏ ဖောက်ပြန်ပျက်စီးခြင်းကို အမှန်အတိုင်း မြင်ခြင်းသည် ကောင်းသည်။ ထို့ကြောင့် အဘယ်ကြောင့် သင်အပျက်သဘောဆောင်သနည်း။ သင့်ကိုယ်သင် နားလည်မှု ရရှိစေရန်အတွက်၊ သင့်အား ကယ်တင်ရန်အတွက် ဘုရားသခင်က သင့်ကို ဖော်ထုတ်သည်။ အမှန်တကယ်တွင် သင်ထုတ်ဖော်သော ဖောက်ပြန်ပျက်စီးသည့် စိတ်သဘောထားသည် သင်၏ သဘာဝမှ အရင်းခံသည်။ ဘုရားသခင်က သင့်ကို ဖော်ထုတ်လိုခြင်းမဟုတ်ပေ။ သို့သော် သူက သင့်ကို မဖော်ထုတ်လျှင် သင်က ထုတ်ဖော်ဆဲ ဖြစ်မည်မဟုတ်လော။ ဘုရားသခင်အား သင်မယုံကြည်စဉ်က သူသည် သင့်အား မဖော်ထုတ်ရသေးပေ။ ထို့ကြောင့် သင်အသက်ရှင်နေထိုင်သည့် အရာရာတိုင်းသည် စာတန်ဆန်သော ဖောက်ပြန်ပျက်စီးသည့် စိတ်သဘောထား မဟုတ်လော။ သင်သည် စာတန်ဆန်သော စိတ်သဘောထားအတိုင်း နေထိုင်သောသူတစ်ဦး ဖြစ်သည်။ သင်သည် ဤအရာများကြောင့် အလွန် အံ့ဩထိတ်လန့်ခြင်း မဖြစ်သင့်ပေ။ ဖောက်ပြန်ပျက်စီးမှု အနည်းငယ်ကို သင်ထုတ်ဖော်သောအခါ သင်သည် သေမတတ်ကြောက်ရွံ့သည်။ သင့်အတွက် ဇာတ်သိမ်းသွားပြီဟုလည်းကောင်း၊ ဘုရားသခင်က သင့်ကို အလိုမရှိဟုလည်းကောင်း၊ သင်လုပ်ဆောင်ခဲ့သမျှတိုင်းက အချည်းနှီး ဖြစ်သည်ဟုလည်းကောင်း သင်ထင်သည်။ အလွန်အကျွံ မတုံ့ပြန်နှင့်။ ဘုရားသခင် ကယ်တင်သည်မှာ ဖောက်ပြန်ပျက်စီးသည့် လူသားများဖြစ်သည်။ စက်ရုပ်များ မဟုတ်။ ဖောက်ပြန်ပျက်စီးသော လူသားများဆိုသည်မှာ မည်သည့်အရာကို ငါဆိုလိုသနည်း။ စာတန်ဆန်သော ဖောက်ပြန်ပျက်စီးသည့် စိတ်သဘောထားကို ထုတ်ဖော်သူများ၊ မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်သောသူများ၊ သမ္မာတရားကို လက်မခံသော၊ ဘုရားသခင်ကို အာခံပြီး ပုန်ကန်နိုင်စွမ်းရှိသော၊ ဘုရားအပေါ် ရန်မူလိုသော၊ ပေါလု၏ ခြေလှမ်းများနောက်သို့ လိုက်နိုင်စွမ်းရှိသောသူများကို ငါဆိုလိုသည်။ ဤသူတို့မှာ ဘုရားသခင် ကယ်တင်သောလူစားမျိုး ဖြစ်သည်။ သင်သည် ဘုရားသခင်၏ ကယ်တင်ခြင်းကို လက်ခံလိုပြီး ကယ်တင်ခြင်းရရှိလိုလျှင် သင့်စိတ်နှလုံး၌ တည်ရှိသော ဖောက်ပြန်ပျက်စီးသည့် စိတ်သဘောထားကို ရင်ဆိုင်ရမည်။ နေ့စဉ် သင်ထုတ်ဖော်သော ဖောက်ပြန်ပျက်စီးသည့် စိတ်သဘောထားကို ရင်ဆိုင်ရမည်။ ပြီးလျှင် နေ့စဉ် သမ္မာတရားကို ရှာဖွေပြီး သင့်ကိုယ်သင် ဆင်ခြင်သုံးသပ်ရမည်။ ဘုရားနှုတ်ကပတ်တော်များနှင့် သင့်ကိုယ်သင် နှိုင်းယှဉ်ရမည်။ သင်ထုတ်ဖော်သည့် ဖောက်ပြန်ပျက်စီးသည့် စိတ်သဘောထားအား ပိုင်းခြားသိမြင်ခြင်းနှင့် စိစစ်ခြင်းကို လက်တွေ့လုပ်ဆောင်ပြီး ယင်းကို ရင်ဆိုင်ရမည်။ လူအချို့သည် ယင်းကို အကြိမ်အတန်ငယ် ရင်ဆိုင်သော်လည်း ရှုံးနိမ့်ကာ “ငါသည် အဘယ်ကြောင့် မာနထောင်လွှားမှုကို အစဉ်ထုတ်ဖော်သနည်း။ အခြားလူများက အဘယ်ကြောင့် မထုတ်ဖော်သနည်း” ဟု ဆိုကြသည်။ အမှန်တွင် လူတိုင်းက မာနထောင်လွှားမှုကို ထုတ်ဖော်သည်။ အခြားလူများက ထုတ်ဖော်သောအခါ သင်မသိသော်လည်း ၎င်းတို့က သိသည်။ သို့မဟုတ် ၎င်းတို့ကိုယ်တိုင်က မည်သည့်အချိန်တွင် မာနထောင်လွှားခြင်းအား ၎င်းတို့ထုတ်ဖော်နေသည်ကို မသိခြင်းဖြစ်နိုင်သည်။ သို့သော် ဘုရားသခင် သိသည်။ ပြီးလျှင် လူတို့မှတ်မိရမည့် အခြားပြဿနာတစ်ခုလည်းရှိသည်။ ဘုရားသခင်က လူတို့၏ ဖောက်ပြန်ပျက်စီးသော စိတ်သဘောထားများကို ပြုပြင်သည်။ ၎င်းတို့၏ အမှုအရာများကို လုပ်ဆောင်သည့်ပုံစံကို သူမပြုပြင်ပေ။ သင်က တစ်စုံတစ်ခုကို လုပ်ဆောင်စဉ်တွင် ထားရှိသော ယာယီရည်ရွယ်ချက်တစ်ခုကို၊ သို့မဟုတ် အမှုအရာများကို လုပ်ဆောင်သည့် ပုံစံတစ်ခုခုကို ဘုရားသခင် မမုန်းတီးပေ၊ သို့မဟုတ် သင်က ရံဖန်ရံခါ ပျင်းရိလျှင်၊ သို့မဟုတ် အဖိုးအခမပေးဆပ်လျှင် မမုန်းတီးပေ။ ဤသည်တို့မှာ ဘုရားသခင် မုန်းတီးသည့်အရာများ မဟုတ်။ ဘုရားသခင် မုန်းတီးသည်မှာ သင်၏ ဖောက်ပြန်ပျက်စီးသော စိတ်သဘောထား ဖြစ်သည်။ သင်သည် ဖောက်ပြန်ပျက်စီးသော စိတ်သဘောထားတစ်ခုအား ထုတ်ဖော်နေသည်ဟု ခံစားရသည့်အချိန်တိုင်းတွင် ဘုရားသခင်က သင့်ကို ပဲ့ပြင်ဆုံးမခြင်း မပြုလုပ်မီတွင် သင့်ဘာသာ သတိပြုမိသင့်သည်။ ဘုရားသခင်က သင့်အား မုန်းတီးသလော၊ သို့မဟုတ် သင့်အား ဖယ်ရှားရှင်းလင်းပြီး ဖြစ်သလောဆိုသည်ကို မခန့်မှန်းသင့်ပေ။ သင့်ပြဿာနာကို သင်သတိပြုမိသင့်သည်။ ထို့နောက်တွင် သင်မည်သို့ နောင်တရသင့်သည်ကိုလည်းကောင်း၊ သမ္မာတရားအား လက်တွေ့လုပ်ဆောင်ခြင်းတွင် မည်သည့်နည်းလမ်းက ပြောင်းလဲမှုဖြစ်စေမည်ကိုလည်းကောင်း ရှာဖွေသင့်သည်။ ဤသည်မှာ ပုံမှန်အသိစိတ်၏ သရုပ်သကန်တစ်ခုဖြစ်သည်။ သင်ဦးစွာ သတိပြုမိသင့်သည်မှာ “ငါ၏ ဤစကားများသည် ကျိုးကြောင်းမသင့်လျော်ဘဲ မာနထောင်လွှားခြင်းကို ထုတ်ဖော်သည်။ ငါသည် ဤတာဝန်ကို လုပ်ဆောင်နိုင်စွမ်းမရှိ။ သို့တိုင်အောင် ကိုယ့်ကိုယ်ကိုယ် အကောင်းပြော၍ လုပ်နိုင်သည်ဟု ဆိုသည်။ ထို့ကြောင့် ဤသည်မှာ ကြီးကြီးကျယ်ကျယ် ပြောဆိုခြင်းများသာ မဟုတ်လော။ ကြီးကျယ်စွာပြောဆိုခြင်းနှင့် ကိုယ့်ကိုယ်ကိုယ်အကောင်းပြောခြင်းဖြင့် ငါသည် မာနထောင်လွှားသော စိတ်သဘောထားရှိသည်ကို ပြသည်” ဟူ၍ ဖြစ်သည်။ ဘုရားသခင်က သင့်အား ကြီးကျယ်စွာစကားပြောဆိုခြင်းအတွက် မရှုတ်ချပေ။ သို့သော် ဤသည်မှာ သင်သည် ဤအရာကို လွှတ်ချလိုက်နိုင်သည်ဟု ဆိုလိုသလော။ မဟုတ်ပေ။ ဤအရာကို သင် လွှတ်မချနိုင်ပေ။ ဤအရာကို သင်စိစစ်ရမည်ဖြစ်ပြီး “ငါသည် ကိုယ့်ကိုယ်ကိုယ် အကောင်းပြောခြင်းနှင့် ကြီးကျယ်စွာပြောဆိုခြင်း၌ အဘယ်ကြောင့် အလွန်ကျွမ်းကျင်သနည်း။ ငါမလုပ်နိုင်သည့်အရာများကို၊ သို့မဟုတ် ငါလုပ်နိုင်သည်ဟု သိခြင်းပင် မရှိသည့်အရာများကို အဘယ်ကြောင့် ငါကြွားဝါသနည်း။ ငါ့တွင် အဘယ်ကြောင့် ဤအားနည်းချက်ရှိသနည်း” ဟု ပြောရမည်။ ဤသည်မှာ အားနည်းချက်တစ်ခုမဟုတ်။ အားနည်းချက်တစ်ခုဆိုသည်မှာ အပေါ်ယံအဆင့် မကောင်းသောအလေ့အကျင့် ဖြစ်သည်။ ကြီးကျယ်စွာပြောဆိုခြင်းသည် မာနထောင်လွှားသော စိတ်သဘောထားက သူ့ဘာသာ ထုတ်ဖော်ပြသည့် နည်းလမ်းများထဲမှ တစ်ခုဖြစ်သည်။ ဤသို့သော အခြေအနေတစ်ခု၌ သင့်အား နေထိုင်စေရန် ညွှန်ကြားသည်မှာ သင်၏ စာတန်ဆန်သော စိတ်သဘောထားဖြစ်သည်။ သင်သည် သင့်စိတ်သဘောထား၏ ညွှန်ကြားခြင်းကို လုံးလုံး ခံရသည်။ သင်က ယင်းကို ချုပ်ထိန်းနိုင်ပြီး မာနထောင်လွှားသော စိတ်သဘောထားတစ်ခုကို မထုတ်ဖော်လျှင် သင့်၌ မာနထောင်လွှားသော စိတ်သဘောထားတစ်ခုမရှိတော့ဟု ဆိုလိုသလော။ ယင်းသည် ပြုပြင်ပြီးဖြစ်သည်ဟု ဆိုလိုသလော။ လုံးဝ ထိုမျှ မရိုးရှင်းပေ။ သင့်အား မာနထောင်လွှားခြင်း မရှိစေသည်မှာ တစ်စုံတစ်ခုကို သင်လုပ်ဆောင်သောနည်းလမ်းအား ပြောင်းလဲခြင်းအားဖြင့်လည်းကောင်း၊ အပေါ်ယံတွင် စည်းကမ်းလိုက်နာပြီး ကောင်းစွာ ပြုမူနေထိုင်ခြင်းဖြင့်လည်းကောင်း၊ ဆောင့်ကြွားကြွား မနေခြင်းအားဖြင့်လည်းကောင်း၊ ယဉ်ကျေးသော ဟန်အမူအရာ ရှိခြင်းအားဖြင့်လည်းကောင်း မဟုတ်ပေ။ ယင်းတို့သည် မျက်နှာဖုံးများသာဖြစ်ပြီး မာနထောင်လွှားခြင်းအပြင် ပြဿနာအသစ်များကို ထပ်ဆောင်းပေးသည်။ ရလဒ်မှာ ပို၍ပင် ဒုက္ခပေးသည်။ သင်၏ မာနထောင်လွှားခြင်းအား ပြုပြင်လိုပြီး ဖောက်ပြန်ပျက်စီးသော စိတ်သဘောထားအမျိုးအစားတိုင်းကို ပြုပြင်လိုလျှင် သင့်တာဝန်များအား ထမ်းဆောင်သောအချိန်၌ ယင်းကို ပြုပြင်ရန် သမ္မာတရားကို ရှာဖွေရမည်။ ဤသည်မှာ မှန်ကန်သောနည်းလမ်းဖြစ်သည်။ ဥပမာ ခေါင်းဆောင်က သင့်အတွက် တာဝန်တစ်ခုကို ထမ်းဆောင်ရန် စီစဉ်ပြီး နားထောင်ပြီးနောက်တွင် သင်က မထီမဲ့မြင်ပြုလျက် “ကျွန်ုပ်သည် ယခင်က ဤသို့သော တာဝန်များကို ထမ်းဆောင်ဖူးသည်။ ဤသည်မှာ အလွယ်လေးပင် ဖြစ်လိမ့်မည်” ဟု ဆိုသည် ဆိုပါစို့။ သို့သော် ထို့နောက်တွင် သင်သည် မာနထောင်လွှားမှုအား ထုတ်ဖော်ခဲ့သည်ကိုလည်းကောင်း၊ ဤစဉ်းစားပုံမှာ မှားယွင်းသည်ကိုလည်းကောင်း ချက်ချင်းပင် သဘောပေါက်ကာ အလျင်အမြန် ဆုတောင်းပြီး သင်၏ စဉ်းစားပုံကို ချိန်ညှိသည်။ “အို ဘုရားသခင်၊ ကျွန်ုပ်သည် မာနထောင်လွှားခြင်းကို တစ်ဖန် ထုတ်ဖော်ခဲ့ပါပြီ။ ကျွန်ုပ်ကို ပြုပြင်တော်မူပါ။ ကျွန်ုပ်သည် တာဝန်ကို ကောင်းစွာ ထမ်းဆောင်လိုစိတ်ရှိပါသည်” ဟု ပြောသည်။ ဤသည်မှာ သင်လုပ်ဆောင်သင့်သည့် ပထမဆုံးအရာတစ်ခု ဖြစ်သည်။ သို့ဆိုလျှင် သင်၏တာဝန်ကို သင်မည်သို့ သဘောထားသင့်သနည်း။ သင်က “ကျွန်ုပ်သည် ဘုရားသခင်အတွက် ဤအရာကို လုပ်ဆောင်နေသည်။ သူ၏ မျက်မှောက်တော်တွင် ငါလုပ်ဆောင်နေသည်။ ထို့ကြောင့် သေသေချာချာ ကိုင်တွယ်ရမည်။ မှား၍ မဖြစ်ပေ။ မှားလျှင် အလွန်ရှက်ဖွယ်ကောင်းလိမ့်မည်” ဟု သင်တွေးသည်။ ထို့နောက်တွင် သင် အချိန်ယူစဉ်းစားပြီး “မဟုတ်ပါ။ ယင်းမှာ မမှန်ပါ။ ကိုယ့်ကိုယ်ကိုယ် အရှက်ရအောင် လုပ်သည်ကို ငါ အဘယ်ကြောင့် ကြောက်သင့်သနည်း” ဟု တွေးလေသည်။ ဤအခြေအနေမှာလည်း မမှန်ကန်ပေ။ သင်သည် လမ်းကြောင်းမှ စတင်လွဲချော်ပြီး ဖြစ်သည်။ သင်သည် ယင်းကို မည်သို့ ပြုပြင်သင့်သနည်း။ မည်သည့်ဦးတည်ချက်ကို သွားခြင်းသည် မှန်ကန်သည့်လမ်းဖြစ်သနည်း။ နောက်တစ်ဖန် ဤသည်မှာ ပြဿနာများကို ပြုပြင်ရန် သမ္မာတရားအား လက်တွေ့လုပ်ဆောင်ခြင်းနှင့် သက်ဆိုင်သည်။ သင်က “ငါသည် ကိုယ့်ကိုယ်ကိုယ် ရှက်အောင်ပြုလုပ်ရန် မကြောက်ပါ။ အဓိကအချက်မှာ ငါကြောင့် အသင်းတော်အလုပ် မထိခိုက်သင့်ပေ” ဟု တွေးသင့်သည်။ ပြီးလျှင် သင်၏ အခြေအနေက ပြောင်းလဲလိမ့်မည်။ သို့သော် ထို့နောက်တွင် သင်က “ငါသည် အသင်းတော်အလုပ်ကို ထိခိုက်စေပြီး ပြုပြင်ခြင်းခံရလျှင် အဘယ်သို့နည်း။ ငါ့တွင် ဂုဏ်ရှိလိမ့်မည်မဟုတ်” ဟု တွေးလျှင် သင်၏ အခြေအနေက နောက်တစ်ဖန် မမှန်မကန် ဖြစ်ပေမည်။ ဤအရာကို မည်သို့ ပြုပြင်နိုင်သနည်း။ သင့်စိတ်နှလုံးတွင် “ငါသည် ငါ့တာဝန်ကို မည်သည့်အခါမျှ အလေးမထားပေ။ လုပ်ဆောင်ရန် ပျင်းရိပြီး မာနထောင်လွှားသည်။ ငါသည် ပြုပြင်ခံရသင့်သည်။ ဘုရားသခင်ကို ငါဆုတောင်းပြီး သူ့အား အလုပ်လုပ်ခွင့်ပေးရမည်။ ငါသည် ဆက်ဆံရခက်ခဲသောသူတစ်ဦး ဖြစ်သည်။ သို့သော် ဘုရားသခင်သည် အနန္တတန်ခိုးရှိပြီး သူ့အတွက် မဖြစ်နိုင်သည့်အရာ မရှိ။ ထို့ကြောင့် ဘုရားသခင်ကို ငါအမှီပြုမည်” ဟု တွေးရမည်။ ဤသည်မှာ မှန်သည်။ ဤသည်မှာ လက်တွေ့လုပ်ဆောင်သင့်သော နည်းလမ်း ဖြစ်သည်။ ဘုရားသခင်သည် သင့်အပေါ် ပင်ကိုစွမ်းရည်အချို့ကို ပေးခဲ့သည်။ ပြီးလျှင် သင့်အား အသိပညာအချို့ကို ရရှိစေသည်။ သို့သော် ဤအသိပညာအား ရရှိခြင်းသည် သင်က သင့်တာဝန်ကို ကောင်းစွာထမ်းဆောင်နိုင်သည်ဟု မလွဲမသွေ ဆိုလိုခြင်းမရှိပေ။ ဤသည်မှာ အမှန်တရားတစ်ခု မဟုတ်လော။ (ဟုတ်ပါသည်။) လူတစ်ဦးသည် ဤကောက်ချက်ကို မည်သို့ချသနည်း။ (အတွေ့အကြုံမှတစ်ဆင့် ဖြစ်သည်။) ဤအတွေ့အကြုံသည် သင့်အား သင်ခန်းစာတစ်ခုပေးခဲ့ပြီး အသိအမြင်ပေးခဲ့သည်။ အတိအကျဆိုရသော် ဘုရားသခင်က လူတို့ကို ပေးသောအရာသည် လူတို့က ပင်ကိုအားဖြင့် ပိုင်ဆိုင်သောအရာတစ်ခု မဟုတ်သကဲ့သို့ လူတို့၏ အရင်းအနှီးလည်း မဟုတ်ပေ။ ဘုရားသခင်က လူတို့အား ပေးပြီးဖြစ်သည့်အရာကို အချိန်မရွေး ယူဆောင်သွားနိုင်သည်။ ဘုရားသခင်က သင့်အား ဖော်ထုတ်လိုသောအခါ သင်က တစ်စုံတစ်ခုတွင် မည်မျှ ပါရမီရှိသည်ဖြစ်စေ ယင်းကို သင်မေ့လျော့မည်ဖြစ်ပြီး အသုံးပြုနိုင်မည်မဟုတ်။ သင်သည် မည်သည့်အရာမျှ ဖြစ်မည်မဟုတ်။ ဤအချိန်တွင် သင်က “ဘုရားသခင်၊ ကျွန်ုပ်သည် မည်သည့်အရာမျှ မဟုတ်ပေ။ ကိုယ်တော်က ကျွန်ုပ်ကိုပေးသောကြောင့်သာ ကျွန်ုပ်၌ ဤအရည်အချင်းရှိခြင်း ဖြစ်သည်။ ကျွန်ုပ်အား ခွန်အားပေးရန် ကိုယ်တော်ကို တောင်းလျှောက်ပါ၏။ ကိုယ်တော်၏ အမှုတော်ကို ကျွန်ုပ် မထိခိုက်စေရန်အတွက် ကျွန်ုပ်ကို ကောင်းချီးပေးပြီး လမ်းပြတော်မူပါ။” ဟု ဆုတောင်းသည်။ ဤသည်မှာ မှန်ကန်သော ဆုတောင်းနည်း ဟုတ်သလော။ (မဟုတ်ပါ။) ဤနေရာတွင် မည်သည့်ပြောင်းလဲမှုများကို သင်လုပ်ဆောင်သင့်သနည်း။ သင်က “အို ဘုရားသခင်၊ ကျွန်ုပ်သည် ကိုယ်တော်၏ အစီအစဉ်များကို ကျိုးနွံနာခံလိုစိတ်ရှိပါသည်။ ကျွန်ုပ်သည် မှန်သည်ဟု အစဉ် ထင်မြင်၍ မရပါ။ ဤအလုပ်နယ်ပယ်အကြောင်းကို ကျွန်ုပ် အနည်းငယ်သိပြီး ကျွမ်းကျင်မှုအချို့ ရှိသော်လည်း ဤသည်မှာ အလုပ်ကို ကျွန်ုပ်ကောင်းစွာလုပ်နိုင်သည်ဟု သေချာပေါက် မဆိုလိုပါ။ ကျွန်ုပ်၏ ဖောက်ပြန်ပျက်စီးသော စိတ်သဘောထားက အနှောင့်အယှက်တစ်ခု ဖြစ်သောကြောင့် ကျွန်ုပ်သည် အမှုအရာများကို ဝတ်ကျေတမ်းကျေနှင့် ဖြစ်ကတတ်ဆန်းပုံစံဖြင့် လုပ်ဆောင်တတ်ပြီး ကျွန်ုပ်၏တာဝန်ကို အလေးအနက်မထားပါ။ ကျွန်ုပ်သည် ကိုယ့်ကိုယ်ကိုယ် ထိန်းချုပ်နိုင်စွမ်းမရှိဘဲ ကိုယ့်ကိုယ်ကိုယ် မထိန်းသိမ်းနိုင်ပါ။ ကျွန်ုပ်ကို ကွယ်ကာပြီး လမ်းပြဖို့ ကိုယ်တော်ကို တောင်းလျှောက်ပါ၏။ ကျွန်ုပ်သည် ကိုယ်တော်ကို ကျိုးနွံနာခံပြီး ကျွန်ုပ်အတတ်နိုင်ဆုံးလုပ်ဆောင်ကာ ကိုယ်တော်ကို ဘုန်းကျက်သရေ ပေးအပ်လိုစိတ်ရှိပါသည်” ဟု ပြောသည်။ သင်သည် သင့်တာဝန်ကို ကောင်းစွာထမ်းဆောင်လျှင် ရှစ်ဆယ်ရာခိုင်နှုန်းအား ဘုရားအပေါ် ချီးမွမ်းဂုဏ်ပြုပြီး နှစ်ဆယ်ရာခိုင်နှုန်းကို မိမိကိုယ်ကို ချီးမွမ်းဂုဏ်ပြုလော့။ ဤသည်မှာ သင့်လျော်သလော။ (မသင့်လျော်ပါ။) အမှုကိစ္စများကို ဤသို့ခွဲခြမ်းခြင်းသည် ကျိုးကြောင်းသင့်သလော။ ဘုရားသခင်က အလုပ်မလုပ်ခဲ့လျှင် သင်သည် သင့်တာဝန်ကို ကောင်းစွာ ထမ်းဆောင်နိုင်သလော။ လုံးဝ မထမ်းဆောင်နိုင်ပေ။ အဘယ်ကြောင့်ဆိုသော် သင်သည် သမ္မာတရား ကင်းမဲ့ရုံသာမကဘဲ ဖောက်ပြန်ပျက်စီးသော စိတ်သဘောထားတစ်ခုလည်း ရှိသောကြောင့် ဖြစ်သည်။ လူတို့၏ စိတ်နှလုံးထဲတွင် မည်သည့်ဖောက်ပြန်ပျက်စီးသည့် အခြေအနေမျိုး တည်ရှိသည်ဖြစ်စေ ၎င်းတို့သည် မိမိတို့ကိုယ်ကို အစဉ် ဆင်ခြင်သုံးသပ်ရမည်။ ပြီးလျှင် ယင်းကို ပြုပြင်ရန် သမ္မာတရားအား ရှာဖွေရမည်။ ၎င်းတို့၏ ဖောက်ပြန်ပျက်စီးသော စိတ်သဘောထား သန့်စင်ခြင်းခံရပြီးသည်နှင့် ၎င်းတို့၏ အခြေအနေသည် ပုံမှန်ဖြစ်လိမ့်မည်။

တစ်ခါတစ်ရံတွင် မှားယွင်းသောအတွေး၊ သို့မဟုတ် အယူအဆတစ်ခုသည် လူတစ်ဦး၏ စိတ်နှလုံးတွင် ပေါ်လာမည်ဖြစ်ပြီး ယင်းက သူ၏ စိတ်နှလုံးကို နှောင့်ယှက်သည်။ သူသည် ထိုအခြေအနေတွင် ပိတ်မိနေပြီး တစ်ရက်၊ နှစ်ရက်ကြာ မလွတ်မြောက်နိုင်ပေ။ ဤသို့သော အချိန်တွင် လူတစ်ဦးသည် မည်သည့်အရာကို လုပ်ဆောင်သင့်သနည်း။ အခြေအနေကို ပြုပြင်ရန်အတွက် သမ္မာတရားကို ရှာဖွေသင့်သည်။ ရှေးဦးစွာ မှားယွင်းသော အတွေး၊ သို့မဟုတ် အယူအဆက မည်သို့ဖြစ်ပေါ်လာသည်၊ ယင်းက သင့်ကို မည်သို့ ချုပ်ကိုင်ထားသည်၊ သင့်အား မည်သို့ အပျက်သဘောဆောင်ပြီး စိတ်ဓာတ်ကျအောင်လုပ်ဆောင်သည်၊ သင့်အား ပုန်ကန်မှုနှင့် မြင်မကောင်းရှုမကောင်းသောပုံစံမျိုးစုံကို ထုတ်ဖော်အောင် မည်သို့လုပ်ဆောင်သည်ဆိုသည်တို့ကို ရှင်းလင်းစွာ သိသင့်သည်။ ထို့နောက်တွင် ဤအရာများကို သင်၏ ဖောက်ပြန်ပျက်စီးသော စိတ်သဘောထားက လမ်းညွှန်စေစားသည်ကိုလည်းကောင်း၊ ဘုရားသခင်က ယင်းကို ရွံ့မုန်းသည်ကိုလည်းကောင်း သင်သဘောပေါက်သောအခါ ဘုရားရှေ့တွင် သင့်ကိုယ်သင် ငြိမ်သက်စေပြီး “ဘုရားသခင်၊ ကျွန်ုပ်ကို ပဲ့ပြင်ဆုံးမပြီး ကျွန်ုပ်သင်ယူဖို့ လိုသည့် သင်ခန်းစာများကို သင်ယူစေပါ။ ကျွန်ုပ်သည် ထုတ်ဖော်ခံရခြင်းကို မကြောက်သကဲ့သို့ အရှက်ရခြင်း၊ သို့မဟုတ် သိက္ခာကျခြင်းကိုလည်း မကြောက်ရွံ့ပါ။ ကျွန်ုပ်ကြောက်ရွံ့သမျှမှာ ကျွန်ုပ်၏ လုပ်ရပ်များက ကိုယ်တော်၏ စီမံအုပ်ချုပ်ရေးဆိုင်ရာ အမိန့်များကို ချိုးဖောက်ပြီး ကိုယ်တော်ကို သဘောမကျဖြစ်စေခြင်းဖြစ်သည်” ဟု သင် ဆုတောင်းသင့်သည်။ ဤသည်မှာ မှန်သောလမ်းကြောင်းဖြစ်သည်။ သို့သော် ယင်းကိုလျှောက်လှမ်းရန် သင့်၌ ဝိညာဉ်ရင့်ကျက်မှုရှိသလော။ (မရှိပါ။) သင့်၌ ဝိညာဉ်ရင့်ကျက်မှု မရှိလျှင် သင်သည် ဤဦးတည်ချက်တွင် ဆုတောင်း၍မရဟု ဆိုလိုသလော။ ယင်းသည် မှန်သောလမ်းကြောင်းဖြစ်သည့်အတွက် ဤဦးတည်ချက်ဖြင့် သင်ဆုတောင်းသင့်သည်။ ယခုတွင် လူတို့၏ ဝိညာဉ်ရင့်ကျက်မှုသည် သေးငယ်သည်။ ၎င်းတို့သည် ဘုရားရှေ့သို့ ကြိမ်ဖန်များစွာလာရမည်။ ဘုရားကို အမှီပြုရမည်။ ဘုရားသခင်အား ၎င်းတို့ကို ပို၍ ကာကွယ်စေပြီး ပို၍ ပဲ့ပြင်ဆုံးမစေရမည်။ ၎င်းတို့၏ ဝိညာဉ်ရင့်ကျက်မှု ကြီးထွားသောအခါ၊ ၎င်းတို့သည် ဝန်တစ်ခုကို ထမ်းနိုင်ပြီး အလုပ်များကို ပို၍ လုပ်နိုင်သောအခါ ဘုရားသခင်က အလွန်စိတ်ပူရန် လိုမည်မဟုတ်။ ပြီးလျှင် ၎င်းတို့ကို စဉ်ဆက်မပြတ် ကာကွယ်ရန်၊ ဆုံးမပဲ့ပြင်ရန်၊ စစ်ကြောရန်၊ သို့မဟုတ် စောင့်ကြည့်ရန် လိုမည်မဟုတ်။ ဤသည်မှာ စိတ်နှလုံးနှင့် ဆိုင်သောကိစ္စဖြစ်ပြီး ဘုရားသခင်က လူတို့၏ စိတ်နှလုံးကို ကြည့်သည်။ သင်က အပြင်ပန်းတွင် မည်မျှ ကောင်းစွာ ပြုမူနေထိုင်သည်ကို၊ သို့မဟုတ် နာခံသည်ကို ဘုရားသခင် ဂရုမစိုက်ပေ။ သင်၏ သဘောထားကို သူကြည့်သည်။ သင်က တစ်နေကုန် မည်သည့်အရာမျှ မပြောခြင်း ဖြစ်နိုင်သည်။ သို့သော် သင့်စိတ်နှလုံးတွင် မည်သည့်သဘောထားရှိသနည်း။ “ငါသည် ဤတာဝန်ပေးအပ်ခြင်းခံရသည်။ ထို့ကြောင့် ကောင်းစွာလုပ်ဆောင်ရန် တာဝန်ရှိသည်။ သို့သော် ငါ့တွင် မထိန်းမသိမ်းနိုင်သည့် အလေ့အကျင့်တစ်ခုရှိပြီး ငါကျေနပ်သလို အစဉ်လုပ်ဆောင်သည်။ ငါ့တွင် ဤပြဿနာရှိသည်ကို ငါသိသည်။ သို့သော် ကိုယ့်ကိုယ်ကိုယ် မထိန်းချုပ်နိုင်ပေ။ ဘုရားသခင်သည် ငါ၏ ပတ်ဝန်းကျင်ကို စီစဉ်ညွှန်ကြားပါစေ၊ ပြီးလျှင် ပြီးလျှင် ငါ့ကို နှောင့်ယှက်နိုင်သော၊ ငါ၏တာဝန်ထမ်းဆောင်ခြင်းအပေါ် သက်ရောက်နိုင်သော၊ သို့မဟုတ် ငါ၏ သမ္မာတရားအား လက်တွေ့လုပ်ဆောင်မှုကို သက်ရောက်နိုင်သော ငါ့အနီးတွင်ရှိသည့် လူများ၊ ဖြစ်ရပ်များနှင့် အမှုအရာများကို ဖယ်ရှားပေးပါစေ။ ဤသို့ဖြင့် ငါသည် စုံစမ်းသွေးဆောင်ခြင်းအတွင်းသို့ မကျရောက်ဘဲ ဘုရားသခင်၏ စမ်းသပ်မှုများကို လက်ခံနိုင်ပြီး သူ၏ ပဲ့ပြင်ဆုံးမခြင်းကို လက်ခံနိုင်သည်” ဟူ၍ ဖြစ်သည်။ သင့်တွင် ကျိုးနွံနာခံစိတ်ရှိသည့် စိတ်နှလုံးရှိရမည်။ သင့်စိတ်နှလုံးတွင် ဤအတွေးများရှိသောအခါ ဘုရားသခင်က မည်သို့ မမြင်ဘဲနေနိုင်မည်နည်း။ သူသည် ယင်းတို့ကို မည်သို့အလေးမထားဘဲ နေနိုင်မည်နည်း။ ထို့ကြောင့် ဘုရားသခင်က လုပ်ဆောင်သည်။ တစ်ခါတစ်ရံတွင် သင်က ဤသို့ တစ်ကြိမ်၊ နှစ်ကြိမ် ဆုတောင်းသောအခါ ဘုရားသခင်က သင့်ကို အရေးမစိုက်ပေ။ သူသည် လူတစ်ဦး၏ အလုပ်နှင့် ရိုးသားစစ်မှန်မှုကို စမ်းသပ်သောအခါ မည်သည့်အရာကိုမျှ သူပြောမည်မဟုတ်။ သို့သော် ဤသည်မှာ သင်လုပ်ဆောင်သည့်အရာက မှားယွင်းသည်ဟု မဆိုလိုပေ။ မည်သည့်အခြေအနေတွင်မဆို ဘုရားသခင်ကို သင်မစမ်းသပ်သင့်ပေ။ သင်သည် ဘုရားသခင်ကို အစဉ်စမ်းသပ်ပြီး “ဤသို့လုပ်ဆောင်ရာတွင် ကျွန်ုပ်မှန်သလော။ ဘုရားသခင်၊ ကိုယ်တော်မြင်ပါသလော” ဟု ပြောလျှင် သင်သည် ဒုက္ခရောက်ပြီ ဖြစ်သည်။ ဤသည်မှာ မမှန်ကန်သော အခြေအနေဖြစ်သည်။ အရေးယူလုပ်ဆောင်ခြင်းအပေါ်သာ အာရုံစိုက်လော့။ ဘုရားသခင်က သင့်အား ပဲ့ပြင်ဆုံးမနေသည်ဖြစ်စေ၊ ဦးဆောင်နေသည်ဖြစ်စေ၊ စစ်ကြောနေသည်ဖြစ်စေ၊ သို့မဟုတ် လမ်းပြနေသည်ဖြစ်စေ အရေးမစိုက်နှင့်။ သင်နားလည်သည့် သမ္မာတရားကို အားစိုက်ထုတ်ခြင်း၊ ဘုရားသခင်၏ ရည်ရွယ်ချက်များနှင့်အညီ လုပ်ဆောင်ခြင်းအပေါ်ကိုသာ အာရုံစိုက်လော့။ ယင်းမှာ လုံလောက်သည်။ ရလဒ်က မည်သည့်အရာဖြစ်မည်ဆိုသည်နှင့်ပတ်သက်ပြီး အချိန်တော်တော်များများတွင် ယင်းက သင့်တာဝန်မဟုတ်ပေ။ မည်သည့်အရာကို သင်တာဝန်ယူသင့်သနည်း။ သင်ထမ်းဆောင်သင့်သည့်တာဝန်ကို ထမ်းဆောင်ခြင်း၊ သင်ကုန်ဆုံးသင့်သည့်အချိန်ကို ကုန်ဆုံးခြင်းနှင့် သင်ပေးဆပ်သင့်သည့် အဖိုးအခကို ပေးဆပ်ခြင်းတို့ဖြစ်သည်။ ယင်းသည် လုံလောက်သည်။ သမ္မာတရားနှင့်သက်ဆိုင်သည့် မည်သည့်အရာကိုမဆို ဆန်းစစ်ရမည်။ ပြီးလျှင် ယင်းကို နားလည်ရန် အားစိုက်ထုတ်ရမည်။ အရေးပါသောအရာမှာ လူတို့အနေဖြင့် ၎င်းတို့ လျှောက်သင့်သည့်လမ်းကို လျှောက်ခြင်း ဖြစ်သည်။ ဤသည်မှာ လုံလောက်သည်။ ဤသည်မှာ လူတို့လုပ်ဆောင်နေသင့်သည့်အရာ ဖြစ်သည်။ သင့်တွင် မည်သည့်ဝိညာဉ်ရင့်ကျက်မှုအဆင့်ရှိသည်၊ မည်သည့်စမ်းသပ်မှုများကို သင်ဖြတ်သန်းသင့်သည်၊ မည်သည့်ပဲ့ပြင်ဆုံးမမှုကို သင်တွေ့ကြုံသင့်သည်၊ မည်သည့်အခြေအနေများကို သင်တွေ့ကြုံသင့်သည်၊ ဘုရားသခင်က မည်သို့ အချုပ်အခြာအာဏာကိုင်စွဲသည်ဆိုသည်တို့အတွက်မူ ဤအရာများကို သင်အရေးစိုက်ဖို့ မလိုပေ။ ဘုရားသခင် လုပ်ဆောင်မည် ဖြစ်သည်။ သင်က “ကျွန်ုပ်သည် ဝိညာဉ်ရင့်ကျက်မှုတွင် သေးငယ်သည်။ မည်သည့်စမ်းသပ်မှုကိုမျှ ကျွန်ုပ်အား မကြုံရပါစေနှင့်၊ ဘုရားသခင်၊ ကျွန်ုပ်ကြောက်ရွံ့သည်” ဟု ပြောသည်။ ဘုရားသခင်က ဤသို့လုပ်ဆောင်မည်လော။ (လုပ်ဆောင်မည်မဟုတ်ပါ။) သင် စိုးရိမ်ပူပန်ရန် မလိုပေ။ သင်က “ကျွန်ုပ်သည် ဝိညာဉ်ရင့်ကျက်မှုတွင် အလွန်ကြီးမားပြီး လုံလောက်သော ယုံကြည်ခြင်းရှိသည်။ ဘုရားသခင် ကျွန်ုပ်အား စမ်းသပ်မှုအနည်းငယ်ကို ဖြတ်သန်းစေပါ။ ယောဘကို ကိုယ်တော်လုပ်ဆောင်ခဲ့သကဲ့သို့ ကျွန်ုပ်ကို စမ်းသပ်ပြီး ကျွန်ုပ်တွင်ရှိသော အရာရာတိုင်းကို ယူဆောင်ပါ” ဟု ပြောသည်။ ဘုရားသခင်က ဤသို့ လုပ်ဆောင်မည်မဟုတ်။ သင်သည် သင်၏ကိုယ်ပိုင်ဝိညာဉ်ရင့်ကျက်မှုကို မသိသော်လည်း ဘုရားသခင်က ကောင်းစွာသိပြီး အလွန်ရှင်းလင်းသည်။ လူတိုင်း၏ စိတ်နှလုံးကို သူမြင်နိုင်သည်။ ဘုရားသခင်၏ စိတ်နှလုံးကို လူတို့ မြင်နိုင်သလော။ (မမြင်နိုင်ပါ။) လူတို့သည် ဘုရားသခင်၏ စိတ်နှလုံးကို မမြင်နိုင်ပေ။ ဤသို့ဆိုလျှင် ဘုရားသခင်ကို ၎င်းတို့ မည်သို့နားလည်ပြီး သူနှင့် ပူးပေါင်းလုပ်ဆောင်နိုင်မည်နည်း။ (သူ၏ နှုတ်ကပတ်တော်များမှ တစ်ဆင့်ဖြစ်သည်။) သူ၏ နှုတ်ကပတ်တော်များကို နားလည်ခြင်း၊ ၎င်းတို့၏ တာဝန်ကို ကောင်းစွာထမ်းဆောင်ခြင်း၊ လူတို့အနေဖြင့် မိမိတို့၏နေရာကို မြဲမြံစွာ ဆုပ်ကိုင်ထားခြင်းတို့မှတစ်ဆင့် ဖြစ်သည်။ လူတို့၏ တာဝန်မှာ အဘယ်နည်း။ ယင်းသည် လူတို့လုပ်ဆောင်သင့်သည့်၊ လုပ်ဆောင်နိုင်စွမ်းရှိသည့် အလုပ်ဖြစ်သည်။ ဤသည်တို့မှာ ဘုရားသခင်က သင့်အားပေးသော အလုပ်များဖြစ်သည်။ သင့်အားပေးပြီးဖြစ်သောအလုပ်များတွင် မည်သည့်အရာများ ပါဝင်သနည်း။ သင်ရင်းနှီးသည့် အလုပ်နယ်ပယ်၊ အသင်းတော်ကပေးသည့် ထိုအလုပ်များ၊ သင်လုပ်ဆောင်သင့်သည့် ထိုအလုပ်များ၊ သင်လုပ်ဆောင်နိုင်သည့် အရည်အချင်းအတွင်းတွင်ရှိသည့် ထိုအလုပ်များဖြစ်သည်။ ဤသည်မှာ တစ်စိတ်တစ်ပိုင်းဖြစ်သည်။ အခြားအပိုင်းမှာ အသက်ဝင်ရောက်မှုကိစ္စနှင့် သက်ဆိုင်သည်။ သင်သည် သမ္မာတရားကို လက်တွေ့လုပ်ဆောင်နိုင်ပြီး ဘုရားသခင်အပေါ် ကျိုးနွံနာခံနိုင်ရမည်။ သမ္မာတရားအား လက်တွေ့လုပ်ဆောင်ခြင်း၊ ဝင်ရောက်ခြင်းကိုသာ အာရုံစိုက်လော့။ သင့်အပေါ် အခြားလူများ၏ အကဲဖြတ်မှု၊ သို့မဟုတ် ဘုရားသခင်က သင့်အား မည်သို့မြင်သည်တို့ကို အရေးမစိုက်နှင့်။ ဤအရာများကို သင်အရေးစိုက်ဖို့ မလိုသကဲ့သို့ ဤအရာများကို သင်အရေးစိုက်ဖို့ မလွဲမသွေ လိုအပ်ခြင်းမရှိပေ။ ဤသည်တို့မှာ သင်စိတ်အနှောင့်အယှက်ခံသင့်သည့် အရာများ မဟုတ်ပေ။ လူတို့သည် ၎င်းတို့၏ ကောင်းသောကံကြမ္မာ၊ ကံဆိုးမှု၊ အသက်ရှည်မှု၊ ၎င်းတို့၏ သက်တမ်းတွင် တွေ့ကြုံရသောအရာများအားလုံး၊ ၎င်းတို့၏ ကံ၊ သို့မဟုတ် ၎င်းတို့၏ဘဝတွင် ဆုံးဖြတ်ပိုင်ခွင့်မရှိပေ။ ဤအရာများကို မည်သူကမျှ မပြောင်းလဲနိုင်ပေ။ ဤအပေါ်တွင် သင်ရှင်းလင်းရမည်။ ဘုရားသခင်သည် ဤအရာများအပေါ် အချုပ်အခြာအာဏာရှိသည်။ လူတို့သည် ဤအရာကို ၎င်းတို့စိတ်နှလုံးတွင် လုံးဝ ရှင်းလင်းစွာ သိမြင်ပြီး နားလည်ရမည်။ ဘုရားသခင်၏ ကိုယ်စား မည်သည့်အရာကိုမျှ သင်မစိုးရိမ်နှင့်၊ ဘုရားသခင်က မည်သည့်အရာကို လုပ်ဆောင်လိုသည်ဆိုသည်ကို ကြိုးစားပြီး မဆုံးဖြတ်နှင့်။ သင်လုပ်ဆောင်သင့်သည့်အရာကို ထိထိရောက်ရောက် ကိုင်တွယ်ခြင်း၊ မည်သည့်အတွင်းသို့ သင်ဝင်ရောက်သင့်သည်၊ သင်လျှောက်သင့်သည့် လမ်းကြောင်းတို့အပေါ်သာ အာရုံစိုက်လော့။ ယင်းသည် လုံလောက်သည်။ သင်၏ အနာဂတ်ခရီးပန်းတိုင်က မည်သည့်အရာဖြစ်မည်ဆိုသည်နှင့်ပတ်သက်ပြီး သင့်တွင် ဆုံးဖြတ်ပိုင်ခွင့်တစ်ခုခုရှိသလော။ (မရှိပါ။) ဤသို့ဆိုလျှင် ဤပြဿနာကို သင်မည်သို့ဖြေရှင်းနိုင်သနည်း။ တစ်စိတ်တစ်ပိုင်းကို နေ့စဉ် သင်လုပ်ဆောင်သင့်သမျှတိုင်းကို ကောင်းစွာလုပ်ဆောင်ခြင်းအားဖြင့်၊ လူတစ်ဦးအနေဖြင့် သင့်တာဝန်ကို ဖြည့်ဆည်းခြင်းအားဖြင့် ဖြစ်သည်။ ဤသည်မှာ ဘုရားသခင်က လူတိုင်းကို ပေးသည် တာဝန်ပေးစေခိုင်းချက်ဖြစ်သည်။ သင်သည် ဤကမ္ဘာထဲသို့ ရောက်လာခဲ့ပြီး ဘုရားသခင်က သင့်အား ဤတစ်ချိန်လုံးတွင် ဦးဆောင်နေခဲ့သည်။ ဘုရားသခင်သည် သင့်အား အမျိုးမျိုးသော ဆုကျေးဇူးများ ပေးအပ်ခဲ့သည်ဖြစ်စေ၊ သင့်အား ပျိုးထောင်ပြီး ပင်ကိုစွမ်းရည်၊ သို့မဟုတ် အရည်အချင်းတစ်ခုခုပေးခဲ့သည်ဖြစ်စေ ဤသည်မှာ ဘုရားသခင်က သင့်အား တာဝန်ပေးစေခိုင်းချက်များ ပေးခဲ့သည်ကို ပြသည်။ ဘုရားသခင်က သင့်အား မည်သည့်တာဝန်ပေးစေခိုင်းချက်ပေးသည်ဆိုသည်မှာ အလွန်သိသာသည်။ ဘုရားသခင်အနေဖြင့် သင့်အား တိုက်ရိုက်ပြောရန် မလိုပေ။ ဥပမာအနေဖြင့် သင်က အင်္ဂလိပ်စကားကို သိလျှင် ဘုရားသခင်က သင့်အတွက် ဤနယ်ပယ်တွင် သေချာပေါက် တောင်းဆိုချက်များရှိသည်။ ဤသည်မှာ သင့်တာဝန်ဖြစ်သည်။ ဘုရားသခင်အနေဖြင့် ကောင်းကင်ဘုံမှ အောက်သို့အော်ခေါ်ပြီး သင့်အား “သင့်တာဝန်သည် ဘာသာပြန်ဖြစ်ပြီး သင်မလုပ်ဆောင်လျှင် ငါ သင့်ကို အပြစ်ဒဏ်ပေးမည်” ဟု တိုက်ရိုက်ပြောဖို့ မလိုပေ။ ဤသို့ပြောရန် မလိုအပ်ပေ။ ဘုရားသခင်သည် သင့်အား ဤဘာသာစကားကို နားလည်ရန် ပုံမှန် ဆင်ခြင်တုံတရား၊ အတွေးစဉ်များနှင့် စဉ်းစားပုံတို့အပြင် အရည်အချင်းကိုပါ ပေးပြီးဖြစ်သောကြောင့် ဤသည်မှာ သင့်အတွက် အလွန်ရှင်းလင်းနှင့်ပြီး ဖြစ်သည်။ ဤသည်မှာ လုံလောက်သည်။ ဘုရားသခင်က သင့်အားပေးပြီးဖြစ်သည့်အရာမှာ သူသည် သင့်အားလုပ်ဆောင်ရန် ပြောနေသည့်အရာ ဖြစ်သည်။ ဤအရာသည် သင့်စိတ်နှလုံးတွင် သင့်အတွက် အလွန်ရှင်းလင်းသည်။ သင့်တာဝန်များကို ထမ်းဆောင်ခြင်း ဖြစ်စဉ်အတွင်းတွင်၊ ဘုရားသခင်၏ တာဝန်ပေးစေခိုင်းချက်ကို လက်ခံခြင်းဖြစ်စဉ်အတွင်းတွင် ဘုရားသခင်က သင့်အပေါ် လုပ်ဆောင်ခဲ့သော အပြုသဘောဆောင်သော လမ်းပြမှု၊ ရေလောင်းမှုနှင့် သင့်အားသူပေးခဲ့သော ပံ့ပိုးမှုတို့အပါအဝင် အရာရာတိုင်းကို လက်ခံရမည်။ ဥပမာအနေဖြင့် ဘုရားနှုတ်ကပတ်တော်ကို ကြိမ်ဖန်များစွာ စားသောက်ခြင်း၊ တရားဒေသနာများကို နားထောင်ခြင်း၊ အသင်းတော်အသက်တာကို နေထိုင်ခြင်း၊ သမ္မာတရားကို မိတ်သဟာယဖွဲ့ခြင်း၊ သင့်တာဝန်ကို ထမ်းဆောင်စဉ်တွင် သူတစ်ပါးတို့နှင့် သဟဇာတဖြစ်စွာ ပူးပေါင်းလုပ်ဆောင်ခြင်းတို့အားဖြင့် ဖြစ်သည်။ အခြားအပိုင်းမှာ လူတစ်ဦးချင်းစီ၏ အသက်ဝင်ရောက်မှုမှတစ်ဆင့်ဖြစ်သည်။ ဤသည်မှာ အရေးကြီးဆုံး ဖြစ်သည်။ လူအချို့သည် ၎င်းတို့၌ အသက်ရှိမရှိနှင့် ထိရောက်မှုရှိမရှိကို အစဉ်သိလိုကြသည်။ ဤအရာများကို ခဏတာ ဆင်ခြင်သုံးသပ်ခြင်းက ကိစ္စမရှိပေ။ သို့သော် ယင်းတို့အပေါ် အာရုံမစိုက်နှင့်။ ဤသည်မှာ နှစ်စဉ် သီးနှံများစိုက်ပျိုးခြင်းကဲ့သို့ ဖြစ်သည်။ မည်သည့်လယ်သမားကမျှ ထိုနှစ်တွင် မည်မျှဖြစ်ထွန်းရမည်၊ ထိုရလဒ်ကို မရလျှင် ၎င်းတို့သေမည်ဟု မပြောပေ။ ၎င်းတို့သည် ဤမျှ မမိုက်မဲပေ။ ၎င်းတို့အားလုံးသည် ရာသီချိန်ကျရောက်သောအခါတွင် အစေ့များ စိုက်ပျိုးကြပြီး ရေလောင်းသည်။ မြေဩဇာတက်စေသည်။ ပုံမှန်အတိုင်း ဂရုစိုက်သည်။ ထို့နောက် ရာသီအချိန် ကျရောက်သောအခါတွင် သေချာပေါက် သီးနှံထွက်သည်။ သင့်တွင် ဤသို့သော ယုံကြည်ခြင်းရှိရမည်။ ဤသည်မှာ ဘုရားသခင်အပေါ် အမှန်တကယ် ယုံကြည်ခြင်းဖြစ်သည်။ ဘုရားသခင်နှင့် အလွန် တွက်ချက်ခြင်းပြုပြီး “အခုတလောတွင် ကျွန်ုပ်သည် အားထုတ်မှုအချို့ရှိသည်။ ဘုရားသခင်က ကျွန်ုပ်ကို ဆုချီးမြှင့်မည်လော” ဟု မပြောနှင့်။ ရုံးအလုပ်သမားတစ်ယောက်က လကုန်တွင် လုပ်အားခတောင်းသကဲ့သို့ အစဉ်သဖြင့် ဆုလာဘ်များ တောင်းခံခြင်းသည် လက်ခံနိုင်ဖွယ်မဟုတ်ပေ။ လုပ်အားခများကို အစဉ်တောင်းခံနေခြင်းသည် လက်ခံနိုင်ဖွယ်မဟုတ်။ လူတို့၏ ယုံကြည်ခြင်းသည် အားနည်းလွန်းသည်။ ဘုရားသခင်အပေါ် အမှန်တကယ် ယုံကြည်ခြင်းမရှိ။ ဘုရားသခင်နောက်သို့ လိုက်လျှောက်ခြင်းသည် ကယ်တင်ခြင်းသို့ သွားရာလမ်းကြောင်းဖြစ်ပြီး အမှန်တကယ် အသက်ဖြစ်သည်ကိုလည်းကောင်း၊ ယင်းသည် လူတို့လိုက်လျှောက်သင့်သည့် မှန်ကန်သောလမ်းကြောင်း ဖြစ်သည်ကိုလည်းကောင်း၊ ပြီးလျှင် ဖန်ဆင်းခံများရှိသင့်သည့် ဘဝကိုလည်းကောင်း သင်ရှင်းလင်းစွာ မြင်သည်နှင့် သမ္မာတရားအား လိုက်စားခြင်းနှင့် စစ်မှန်မှုအတွင်းသို့ ဝင်ရောက်ရန် ရှာဖွေခြင်း၊ ဘုရားနှုတ်ကပတ်တော်အားနားထောင်ခြင်း၊ ဘုရားသခင်က သင့်အားညွှန်ပြသည့် ဦးတည်ရာသို့ လျှောက်လှမ်းခြင်းနှင့် လုပ်ဆောင်ခြင်းတို့ကိုသာ အာရုံစိုက်လော့။ ဤသည်မှာ မှန်သည်။ “ဘုရားသခင်၊ ကိုယ်တော့်နောက်သို့ လမ်းဆုံးအထိ လိုက်လျှောက်ပြီးသည်အထိ မည်မျှကြာဦးမည်နည်း။ မည်သည့်အချိန်တွင် ကယ်တင်ခြင်းခံရမည်နည်း။ မည်သည့်အချိန်တွင် ဆုလာဘ်ချီးမြှင့်ခံရပြီး သရဖူရမည်နည်း။ ဘုရားသခင်၏ နေ့ရက်သည် မည်သည့်အချိန်တွင် ရောက်မည်နည်း” ဟူ၍ ဘုရားသခင်ကို အစဉ် မမေးမြန်းနှင့်။ ဤသည်တို့မှာ လူတို့၌ရှိသော အခြေအနေများအားလုံး ဖြစ်သည်။ သို့သော် ဤသည်မှာ မှန်စေသလော။ (မမှန်စေပါ။) လူအချို့က “အယောက်တိုင်းက ချိုးဖောက်နေချိန်တွင် ဥပဒေ မသက်ရောက်နိုင်” ဟု ဆိုကြသည်။ သို့သော် ဤအဆိုသည် မှားယွင်းပြီး အဓိပ္ပာယ်မရှိသော အရာတစ်ခု ဖြစ်သည်။ ခိုင်လုံမှုမရှိဘဲ သမ္မာတရားနှင့် မကိုက်ညီပေ။ လူတိုင်းတွင် ဤအခြေအနေများရှိခြင်းက လူတိုင်းတွင် ဖောက်ပြန်ပျက်စီးသော စိတ်သဘောထားတစ်ခုရှိသည်ကို သက်သေပြသည်။ ထို့ကြောင့် ၎င်းတို့အားလုံးသည် ဤပြဿနာကို ကုစားပြီး ဤအကျပ်အတည်းကို ကျော်လွှားရမည်။ သင်သည် သင့်စိတ်နှလုံးတွင် သင့်ကိုယ်သင် အစဉ်ဆန်းစစ်ရမည်။ အခြားလူများ မည်သို့လုပ်ဆောင်သည်ကို အာရုံမစိုက်ရ။ ပြီးလျှင် သင့်ကိုယ်သင် ဆန်းစစ်စဉ်တွင် သင့်၌ရှိသော မည်သည့်ဖောက်ပြန်ပျက်စီးသည့် အခြေအနေများကိုမဆို ပြုပြင်ရမည်။ လူတို့၏ စိတ်သည် အင်တိုက်အားတိုက် တက်တက်ကြွကြွရှိပြီး အစဉ်သဖြင့် တက်ကြွစွာ တွေးတောနေသည်။ အချိန်တစ်ခဏ၌ ၎င်းတို့သည် ဘယ်ဘက်သို့ ယိမ်းပြီး အခြားအချိန်တွင် ညာဘက်သို့ ယိမ်းသည်။ ၎င်းတို့၏ စဉ်းစားပုံသည် အစဉ်သဖြင့် အနည်းငယ် လွဲနေသည်။ လမ်းမှန်ကို ၎င်းတို့ မလျှောက်ပေ။ သူတစ်ပါးတို့ နောက်သို့ မလျှော့တမ်း လိုက်လျှောက်ပြီး ကမ္ဘာပေါ်ရှိ ကောက်ကျစ်ဆိုးယုတ်သော ခေတ်ရေစီးကြောင်းများနောက်သို့ လိုက်လျှောက်ကာ လမ်းမှားကို လျှောက်ကြသည်။ ဤသည်မှာ လူတို့၏ သဘာဝအနှစ်သာရဖြစ်ပြီး ၎င်းတို့အလိုရှိလျှင်ပင် ယင်းကို မထိန်းချုပ်နိုင်ပေ။ ယင်းကို သင်မထိန်းချုပ်နိုင်လျှင် မထိန်းချုပ်နှင့်။ မမှန်ကန်သော ရည်ရွယ်ချက်၊ သို့မဟုတ် အမြင်က ထွက်ပေါ်သောအခါ ယင်းကို ပြုပြင်လော့။ ဤသို့ဖြင့် သင်ထုတ်ဖော်သည့် ဖောက်ပြန်ပျက်စီးမှုသည် တဖြည်းဖြည်းချင်းဖြင့် လျော့နည်းလိမ့်မည်။ ဤသို့ဆိုလျှင် ယင်းကို သင်မည်သို့ပြုပြင်နိုင်သနည်း။ ဆုတောင်းခြင်း၊ စဉ်ဆက်မပြတ် နားလည်မှုကို ရရှိခြင်းနှင့် အမှုအရာများကို ပြောင်းလဲခြင်းအားဖြင့် ဖြစ်သည်။ တစ်ခါတစ်ရံတွင် သင်သည် အမှုအရာများကို ပြောင်းလဲရန် မည်သို့ကြိုးစားသည်ဖြစ်စေ ထိုအရာများက ထွက်ပေါ်လာသည်။ ထို့ကြောင့် ယင်းတို့ကို အရေးမစိုက်နှင့်။ သင်လုပ်ဆောင်ရမည့်အရာကိုသာ လုပ်ဆောင်လော့။ ဤသည်မှာ အလွယ်ကူဆုံး နည်းလမ်းဖြစ်သည်။ ဤသို့ဆိုလျှင် လူတို့လုပ်ဆောင်ရမည့်အရာမှာ အဘယ်နည်း။ မိမိတို့၏တာဝန်ကို ကောင်းစွာထမ်းဆောင်ပြီး မိမိတို့၏တာဝန်ကို ထိန်းသိမ်းလော့။ ဘုရားသခင်က သင့်အားပေးသည့် တာဝန်ပေးစေခိုင်းချက်ကို သင်ငြင်းဆန်၍ မရနိုင်ပေ။ ယင်းကို သင်ကောင်းစွာ ပြီးမြောက်ရမည်။ ဤအရာအပြင် လူတစ်ဦးချင်းစီ၏ အသက်ဝင်ရောက်မှုနှင့်ပတ်သက်လျှင် သင့်တာဝန်ကို ထမ်းဆောင်စဉ်တွင် သမ္မာတရားအတွက် ကြိုးပမ်းဖို့ သင်အတတ်နိုင်ဆုံး လုပ်ဆောင်ရမည်ဖြစ်ပြီး သင်ရရှိနိုင်သည့် မည်သည့်ဝင်ရောက်မှုအဆင့်ကိုမဆို ရရှိရန် ကြိုးစားရမည်။ သင်သည် အဆုံးတွင် စံမီခြင်းရှိမရှိကို ဘုရားသခင်က ဆုံးဖြတ်လိမ့်မည်။ လူတို့၏ ကိုယ်ပိုင်ခံစားချက်များနှင့် ထင်မြင်ချက်များက အသုံးမဝင်ပေ။ လူတို့သည် ကိုယ့်ကံကြမ္မာကိုယ် မဆုံးဖြတ်နိုင်သကဲ့သို့ ၎င်းတို့၏ အပြုအမူကို အကဲမဖြတ်နိုင်ပေ၊ သို့မဟုတ် ၎င်းတို့၏ အဆုံးစွန်ရလဒ်က မည်သည့်အရာဖြစ်မည်ကို မဆုံးဖြတ်နိုင်ပေ။ ဘုရားသခင်သာ ဤအရာများကို အကဲဖြတ်နိုင်ပြီး အဆုံးအဖြတ်ပေးနိုင်သည်။ ဘုရားသခင်က ဖြောင့်မတ်သည်ဆိုသည်ကို သင်ယုံကြည်ရမည်။ ဘာသာတရားမရှိသူများ၏ စကားကို ငှား၍ပြောရလျှင် သင်သည် လုပ်ရဲရမည်။ သင့်လုပ်ရပ်များအတွက် တာဝန်ခံယူရဲရမည်။ အမှန်တရားများကို ရင်ဆိုင်ရဲရမည်။ ပြီးလျှင် တာဝန်ခံယူနိုင်ရမည်။ အသိတရားနှင့် အသိစိတ်ရှိသူများသည် ၎င်းတို့တာဝန်ကို ကောင်းစွာထမ်းဆောင်သင့်ပြီး တာဝန်ယူသင့်သည်။

လူတို့အနေဖြင့် မိမိတို့ကိုယ်ကို ကြိမ်ဖန်များစွာ ဆန်းစစ်ခြင်းသည် အရေးပါသည်။ ပြီးလျှင် လူတို့အနေဖြင့် ဘုရားသခင်၏ စိစစ်ခြင်းကို လက်ခံခြင်းသည် အရေးပါသည်။ လူတို့သည် မိမိတို့ကိုယ်ကို ဆန်းစစ်ပြီး မမှန်ကန်သော အခြေအနေများ၊ သို့မဟုတ် အမြင်များရှိသည်ကို တွေ့ရှိသောအခါ၌ သမ္မာတရားကို ရှာဖွေရန်၊ ၎င်းတို့၏ အခြေအနေများနှင့် အမြင်များကို ပြောင်းပြန်လှန်ရန်၊ ယင်းတို့ထံမှ လွတ်မြောက်ရန်သည်လည်း အရေးပါသည်။ ဤသို့ဖြင့် သင်သည် သတိမထားမိဘဲ ပိုပို၍ နည်းသော မမှန်ကန်သည့်အခြေအနေများကို တွေ့ကြုံလိမ့်မည်။ ပြီးလျှင် သင်သည် ယင်းတို့အပေါ် ပိုပို၍ ပိုင်းခြားသိမြင်လာလိမ့်မည်။ သင်၏ မမှန်ကန်သော အခြေအနေများကို ပြောင်းပြန်လှန်ပြီးနောက်တွင် သင့်အတွင်းရှိ အပြုသဘောဆောင်သောအရာများက တိုးပွားလာလိမ့်မည်။ ပြီးလျှင် သင်သည် သင့်တာဝန်ကို ပိုပို၍ ကြီးမားသော သန့်စင်မှုဖြင့် ထမ်းဆောင်လိမ့်မည်။ အပြင်ပန်းတွင် သင်စကားပြောသည့်ပုံစံနှင့် သင်၏ ပင်ကိုစရိုက်သည် ယခင်ကကဲ့သို့ တူညီမည် ဖြစ်သော်လည်း သင်၏ အသက်စိတ်သဘောထားက ပြောင်းလဲပြီး ဖြစ်လိမ့်မည်။ ဤသည်မှာ မည်သည့်ပုံစံဖြင့် ပေါ်လွင်လိမ့်မည်နည်း။ အမှုအရာများကို လုပ်ဆောင်ပြီး သင့်တာဝန်ကို ထမ်းဆောင်သောအခါ၌ သမ္မာတရားစည်းမျဉ်းများကို သင်လိုက်လျှောက်နိုင်လိမ့်မည်။ ဤအရာများတွင် တာဝန်ယူနိုင်လိမ့်မည်။ အခြားလူများက အမှုအရာများကို ဝတ်ကျေတမ်းကျေပုံစံဖြင့် လုပ်ဆောင်သည်ကို သင်မြင်သောအခါ သင်စိတ်ဆိုးလိမ့်မည်။ ပြီးလျှင် သင်က ကောက်ကျစ်ဆိုးယုတ်သော ဖြစ်ရပ်နှင့် ဖောက်ပြန်ပျက်စီးသော စိတ်သဘောထားများကို ထုတ်ဖော်သည့် လှုပ်ရှားတက်ကြွမှုမရှိသော၊ အပျက်သဘောဆောင်သော၊ မသင့်လျော်သော၊ ကောက်ကျစ်ဆိုးယုတ်သော လက်တွေ့လုပ်ဆောင်မှုများကိုပါ မြင်သောအခါတွင် သင်သည် ယင်းတို့ကို အလွန်မုန်းတီးလိမ့်မည်။ ဤအရာများကို သင်ကြည့်လေလေ၊ မနှစ်သက်ခြင်းကို ခံစားရလေလေဖြစ်မည်။ ပြီးလျှင် သင်သည် ယင်းတို့အပေါ် ပို၍ ပိုင်းခြားသိမြင်လာလိမ့်မည်။ ဘုရားသခင်အား အချိန်အလွန်ကြာရှည်စွာ ယုံကြည်ခဲ့ပြီး စကားများနှင့် အယူဝါဒများအကြောင်း အလွန်ရှင်းလင်းစွာ ပြောသော်လည်း မည်သည့်တကယ့်အလုပ်ကိုမျှ မလုပ်ဘဲ စည်းမျဉ်းမရှိသောသူအချို့ကို သင်တွေ့သောအခါ သင်သည် ယင်းကို စိတ်ဆိုးပြီး ရွံရှာလိမ့်မည်။ အထူးသဖြင့် တကယ့်အလုပ်ကို မလုပ်သော၊ စကားများနှင့် အယူဝါဒများအကြောင်း အစဉ်ပြောဆိုသော၊ ဘုရားသခင်အား နှစ်ချီ၍ ယုံကြည်ခဲ့သော်လည်း မပြောင်းလဲသော ခေါင်းဆောင်များနှင့် အမှုဆောင်များကို သင်တွေ့သောအခါ သင်သည် ၎င်းတို့အပေါ် ပိုင်းခြားသိမြင်မှုရှိလိမ့်မည်။ သင်သည် ၎င်းတို့ကို ဖော်ထုတ်ပြီး တိုင်ကြားနိုင်လိမ့်မည်။ ပြီးလျှင် သင်သည် တရားမျှတစိတ်တစ်ခုကို ပိုင်ဆိုင်လိမ့်မည်။ သင်သည် သင့်ကိုယ်သင် မုန်းတီးမည်သာမဟုတ်ဘဲ ဤကောက်ကျစ်ဆိုးယုတ်သော၊ တရားမမျှတသောအရာများ ဖြစ်ပေါ်သောအခါတွင်လည်း မုန်းတီးလိမ့်မည်။ ဤသည်မှာ သင့်အတွင်းတွင် ပြောင်းလဲမှုတစ်ခု ဖြစ်ပြီးဖြစ်သည်ကို သက်သေပြလိမ့်မည်။ သင်သည် သမ္မာတရားရှုထောင့်မှနေ၍၊ ဘုရားသခင်ဘက်မှနေ၍၊ အပြုသဘောဆောင်သောအရာများ၏ ရှုထောင့်မှနေ၍ ပြဿနာများကို ကြည့်နိုင်ပြီး သင့်အနီးရှိ လူများ၊ ဖြစ်ရပ်များနှင့် အမှုအရာများကို သဘောထားနိုင်လိမ့်မည်။ ဤသည်မှာ သင့်တွင် ပြောင်းလဲမှုတစ်ခုရှိပြီးဖြစ်သည်ကို ပြလိမ့်မည်။ ဤသို့ဆိုလျှင် သင်သည် သင့်အား အကဲဖြတ်ရန် ဘုရားသခင်ကို လိုဦးမည်လော။ လိုမည်မဟုတ်။ ဤအရာကို သင့်ဘာသာ မြင်နိုင်လိမ့်မည်။ ဥပမာအနေဖြင့် ယခင်က လူတစ်ယောက်သည် အမှုအရာများကို ဝတ်ကျေတမ်းကျေပုံစံဖြင့် လုပ်ဆောင်နေသည်ကို သင်မြင်သောအခါ သင်က “ယင်းသည် ပုံမှန်ဖြစ်သည်။ ငါသည်လည်း အတူတူဖြစ်သည်။ သူက အမှုအရာများကို ထိုပုံစံအတိုင်း မလုပ်လျှင် ငါသည် အမှုအရာများကို ဝတ်ကျေတမ်းကျေလုပ်ဆောင်နေသည့် ပုံစံဖြစ်လိမ့်မည်” ဟု တွေးသည်။ လူတိုင်းက အမှုအရာများကို ဝတ်ကျေတမ်းကျေပုံစံဖြင့် လုပ်ဆောင်နေကြသည်။ ထို့ကြောင့် သင်က သင်လုပ်ဆောင်သည်မှာ အလွန်ကောင်းသည်ဟု ခံစားမိသည်။ ထိုအချိန်တွင် သင်က ထိုသို့ စဉ်းစားတော့မည် မဟုတ်ပေ။ သင်က “အမှုအရာများကို ဝတ်ကျေတမ်းကျေပုံစံဖြင့် လုပ်ဆောင်ခြင်းသည် လက်ခံနိုင်ဖွယ်မရှိ။ ဘုရားအိမ်တော်၏ အလုပ်သည် အရေးကြီးသည်။ ငါက အမှုအရာများကို ဝတ်ကျေတမ်းကျေပုံစံဖြင့် လုပ်ဆောင်နေခြင်းက ပုန်ကန်ခြင်းဖြစ်နေပြီ ဖြစ်သည်။ သင်တို့သည် အဘယ်ကြောင့် ငါကဲ့သို့ ဖြစ်နေပြီး အမှုအရာများကိုလည်း ထိုပုံစံအတိုင်း လုပ်ဆောင်နေကြသနည်း” ဟု တွေးလိမ့်မည်။ သင်သည် ယခင်က အလွန်မသိနားမလည်ဖြစ်ပြီး မရင့်ကျက်ဟုလည်းကောင်း၊ အမှုအရာများကို သင်မြင်သည့်ပုံစံက အလွန်စက်ဆုပ်ဖွယ်ဖြစ်ပြီး ရှက်ဖွယ် ဖြစ်သည်ဟုလည်းကောင်း၊ ဘုရားသခင်အား သင်ရှင်းလင်းပြနိုင်ဖို့ မဖြစ်နိုင်ဟုလည်းကောင်း သင်တွေးလိမ့်မည်ဖြစ်ပြီး သင်၏ အသိစိတ်က ယင်းကို မေ့ပျောက်နိုင်မည်မဟုတ်ပေ။ သင်သည် ဤသို့သော အတွေးများ၊ ခံစားချက်များ ရှိနိုင်မည်ဆိုသည့်အချက်က သမ္မာတရားနှင့် ဘုရားနှုတ်ကပတ်တော်များသည် သင့်အတွင်းတွင် အမြစ်တွယ်နေပြီး ဖွံ့ဖြိုးဝေဆာနေပြီဖြစ်သည်ကို သက်သေပြလိမ့်မည်။ အမှုအရာများကို သင်မြင်သည့် ရှုထောင့်နှင့် အမှုအရာများကို သင်အကဲဖြတ်သည့် စံနှုန်းများက ပြောင်းလဲပြီး ဖြစ်လိမ့်မည်။ သင်သည် သင်၏ဖောက်ပြန်ပျက်စီးသော စိတ်သဘောထားများအတွင်းတွင် နေထိုင်ခဲ့သည့်အချိန်ဖြစ်သော ယခင်ကနှင့် လုံးဝ ကွဲပြားသည့်သူတစ်ဦး ဖြစ်ပြီးဖြစ်လိမ့်မည်။ သင်သည် စစ်မှန်သော နည်းလမ်းဖြင့် ပြောင်းလဲပြီးဖြစ်လိမ့်မည်။ ယခုတွင် သင်တို့ အနည်းငယ်ပြောင်းလဲပြီး ဖြစ်သလော။ (အနည်းငယ် ပြောင်းလဲပြီး ဖြစ်ပါသည်။) ယခုတွင် သင်တို့ အနည်းငယ်ပြောင်းလဲပြီး ဖြစ်သည်။ ပြီးလျှင် ရံဖန်ရံခါတွင် လူများက အမှုအရာများကို ဝတ်ကျေတမ်းကျေပုံစံဖြင့် လုပ်ဆောင်နေပြီး သမ္မာတရားအား လက်တွေ့မလုပ်ဆောင်သည်ကိုလည်းကောင်း၊ ရုပ်ပိုင်းဆိုင်ရာ သက်သာမှုတွင် အစဉ်မွေ့လျော်နေသည်ကိုလည်းကောင်း သင်မြင်သောအခါ ယင်းသည်ကောင်းသောအရာ ဖြစ်သည်ဟု သင်မထင်ပေ။ သို့ရာတွင် သင့်အား ၎င်းတို့ကို သွားရောက်ကူညီပြီး ပံ့ပိုးပေးရန် တောင်းဆိုခြင်းခံရလျှင် စာတန်ဆန်သော အတွေးအခေါ်များသည် သင့်အား ဘောင်ခတ်ဆဲဖြစ်လိမ့်မည်။ လူတို့၌ ဤပြဿနာကို သင်ရှာဖွေတွေ့ရှိသော်လည်း သင်သည် ၎င်းတို့ စိတ်မကျေမနပ်ဖြစ်မည်စိုးသောကြောင့် မည်သည့်အရာကိုမျှ မပြောရဲဘဲ “မည်သူကမျှ ငါ့ကို အဖွဲ့ခေါင်းဆောင်အဖြစ် မရွေးကောက်ခဲ့ပါ။ ထို့ကြောင့် အခြားလူများ၏ ကိစ္စတွင် ငါဝင်ပါဖို့ မလိုပါ” ဟုပင် တွေးသည်။ ဤမမျှတသော၊ အပျက်သဘောဆောင်သောအရာများကို သင်ကြုံရသောအခါ သင်သည် သင်၏စကားနှင့် လုပ်ရပ်များတွင် သမ္မာတရားဘက်၌ မရပ်တည်နိုင်ပေ၊ သို့မဟုတ် တာဝန်မယူနိုင်ပေ။ သင်သည် မျက်ကွယ်သာပြုပြီး ဤသည်မှာ ကျင့်ကြံပြုမူရန်၊ အချေအတင်ငြင်းခုံခြင်းမှ ခပ်ခွာခွာနေရန် အလွန်ကောင်းသောနည်းတစ်ခုဖြစ်သည်ဟု တွေးသည်။ သင်က “တစ်စုံတစ်ခု လွဲချော်လျှင် ငါနှင့် သက်ဆိုင်မည်မဟုတ်။ ငါသည် ပြဿနာတစ်ခုကို ကြိုရှောင်ထားခြင်း ဖြစ်သည်” ဟု တွေးသည်။ သင့်တွင် ဤသို့သောအမြင်များရှိဆဲ ဖြစ်လျှင် သမ္မာတရားကို သင်လက်တွေ့လုပ်ဆောင်နိုင်မည်လော။ သင့်တွင် အသက်ဝင်ရောက်မှု ရှိမည်လော။ သင့်စိတ်နှလုံး၌ ဤသို့သော အမြင်မျိုးရှိလျှင် သင်သည် မယုံကြည်သူတစ်ယောက်ဖြစ်ပြီး သမ္မာတရားကို လက်မခံနိုင်ပေ။ ဤအတွက်ကြောင့် ဤသို့သောအမြင်များကို မပြုပြင်ဘဲထား၍ မရနိုင်ခြင်းဖြစ်သည်။ တစ်ဖက်တွင် သင်သည် အသက်ဝင်ရောက်မှု ရှိလိုလျှင် သင့်ကိုယ်သင် ကြီးကြပ်နိုင်ရမည်။ အခြားတစ်ဖက်တွင် သင်သည် ဘုရားသခင်၏ စိစစ်ခြင်းကို လက်ခံရန် အဓိကအနေဖြင့် လိုအပ်သည်။ သင့်စိတ်နှလုံး၌ အပြစ်တင်ခြင်းကို သတိထားမိလျှင် သင့်ကိုယ်သင် ဆင်ခြင်သုံးသပ်သင့်သည်။ ပြီးလျှင် ဤအပြစ်တင်ခြင်းက မည်သည့်နေရာမှ လာသည်ကို အဖြေရှာသင့်သည်။ ဘုရားသခင်က သင့်အား စိစစ်နေသည်ဟု သင်ခံစားရနိုင်ပြီး ဘုရားသခင်က သင့်အား စိစစ်နေသည်ဟု သင်ယုံကြည်လျှင် သူ၏ စိစစ်ခြင်းကို သင်လက်ခံသင့်သည်။ ကြိမ်ဖန်များစွာ နောင်တရခြင်း၊ သင့်စိတ်နှလုံး၌ မတင်မကျဖြစ်ခြင်း၊ ထိုအခြေအနေများတွင် ရှိခြင်းကြောင့် ဘုရားသခင်အပေါ် သင်အကြွေးတင်သည်ဟု ခံစားရခြင်းတို့အားဖြင့်သာ သင်သည် သမ္မာတရားကို လက်တွေ့လုပ်ဆောင်ပြီး သမ္မာတရားအတွင်းသို့ ဝင်ရောက်ရန် တွန်းအားရှိလိမ့်မည်။ သမ္မာတရားစစ်မှန်မှုများအတွင်းသို့ ဝင်ရောက်ခြင်းအတွက် စံနှုန်းအချို့နှင့် လက်တွေ့ကျသော သရုပ်သကန်အချို့ရှိသည်။ ယခုတွင် ယင်းတို့အတွင်းသို့ မည်သည့်အတိုင်းအတာအထိ သင်တို့ ဝင်ရောက်ပြီးပြီနည်း။ (အခြေအနေတစ်ခု ဖြစ်ပေါ်သောအခါ ကျွန်ုပ်သည် မိမိတွင် အားနည်းချက်များစွာကို မြင်နိုင်သည်။ သို့သော် ကျွန်ုပ်သည် ထိုအခြေအနေတွင် ပိတ်မိလျက် အချိန်များစွာ ကုန်ဆုံးသည်။ ကျွန်ုပ်တွင် မည်သည့်ပြဿနာများရှိသည်ကို စိစစ်ရန်၊ သို့မဟုတ် နားလည်ရန် သမ္မာတရား၏ ရှုထောင့်အား မည်သို့ခံယူရမည်ကို မသိပါ။ ကျွန်ုပ်သည် မိမိအပေါ် ရှင်းလင်းသော ပိုင်းခြားသိမြင်မှုမရှိ။ ကိုယ့်ကိုယ်ကိုယ် ရှင်းလင်းစွာ မမြင်ရပါ။ အခြားလူတို့၏ အခြေအနေများကိုလည်း မကြာခဏ ရှင်းလင်းစွာ မမြင်နိုင်ပါ။) သင့်ကိုယ်သင် ရှင်းလင်းစွာ မမြင်နိုင်လျှင် သူတစ်ပါးတို့ကို သင်ရှင်းလင်းစွာ မမြင်နိုင်ပေ။ ဤပြောဆိုချက်သည် မှန်ကန်သည်။ အခြားလူများက ပြဿနာတစ်ခုရှိသောအခါ သင်နှင့် လုံးဝ သက်ဆိုင်ခြင်း မရှိဟု သင်ထင်သည်။ သို့သော် အမှန်တကယ်တွင် အခြေအနေများက အပြောင်းအလဲမရှိဘဲ တူညီသည်။ သင်၏ ကိုယ်ပိုင်အခြေအနေကို ရှင်းလင်းစွာ မမြင်နိုင်လျှင် အခြားလူများ၏ ပြဿနာများကို မဆိုထားနှင့်၊ သင်၏ ပြဿနာများကိုပင် ဖြေရှင်းနိုင်မည် မဟုတ်ပေ။ သင်၏ ပြဿနာများကို ဖြေရှင်းပြီးသည်နှင့် အခြားလူများ၏ ပြဿနာများကို သင်အလွန်ရှင်းလင်းစွာ မြင်နိုင်လိမ့်မည်ဖြစ်ပြီး ယင်းတို့ကို ချက်ချင်းပြုပြင်နိုင်လိမ့်မည်။ သင်သည် အသက်ဝင်ရောက်မှုရှိလိုလျှင် အောက်ပါနှစ်ခုကို သင်လိုက်နာရမည်။ တစ်ခုမှာ သင့်တာဝန်ကို ကောင်းစွာ ထမ်းဆောင်ရမည်။ ပြီးလျှင် အခြားတစ်ခုမှာ သင့်တာဝန်အား ထမ်းဆောင်စဉ်တွင် သင့်ကိုယ်သင် ကြိမ်ဖန်များစွာ ဆန်းစစ်ရမည်။ သင်၏ အမျိုးမျိုးသော မမှန်ကန်သော အမြင်များ၊ အတွေးများ၊ ရပ်တည်ချက်များ၊ ရည်ရွယ်ချက်များနှင့် အခြေအနေများကို ပြောင်းပြန်လှန်ရန် သမ္မာတရားကို ရှာဖွေပြီး မမှန်ကန်သော အခြေအနေတိုင်းမှ လွတ်မြောက်ရမည်။ သင်သည် ယင်းတို့ထံမှ လွတ်မြောက်ရန် ခွန်အားရှိလျှင် စာတန်ကို ကျော်လွှားပြီး သင်၏ ဖောက်ပြန်ပျက်စီးသော စိတ်သဘောထားများကို ဖယ်ရှားလိမ့်မည်။ ဤသို့ဆိုလျှင် သင်သည် သင့်ကိုယ်သင် ပြောင်းလဲပြီးဖြစ်လိမ့်မည်။ သင်၏ မတက်မကြွဖြစ်သော၊ အပျက်သဘောဆောင်သော အခြေအနေများမှ လွတ်မြောက်ပြီး ဖြစ်လိမ့်မည်။ ပြီးလျှင် ဤအခြေအနေများ၏ ဘောင်ခတ်ခြင်း၊ သို့မဟုတ် ထိန်းချုပ်ခြင်းကို ခံရမည်မဟုတ်ပေ။ ဤအရာကိုယ်၌က ရှေ့သို့လှမ်းသော ခြေတစ်လှမ်းဖြစ်သည်။ ဤပြဿနာကို သင်တို့ ဦးစွာ ဖြေရှင်းရမည်။ သင်တို့တွင် မည်သည့်အပျက်သဘောဆောင်သော၊ သို့မဟုတ် မတက်မကြွဖြစ်သော အခြေအနေများရှိသနည်း။ လူအချို့က “ယင်းသည် ငါ၏ ပုံစံသာဖြစ်သည်။ ငါ၏ မာနထောင်လွှားသော စိတ်သဘောထားကို ပြုပြင်ရန် ငါတတ်နိုင်သည့်အရာ ဘာမျှမရှိ။ မည်သို့ပင်ဖြစ်စေ ဘုရားသခင်က ဤအကြောင်းကို သိသည်။ သူသည် ငါ့ကို အမျိုးအစား ခွဲခြားပြီးဖြစ်သည်ဟု ငါထင်သည်။ ငါသည် ပြောင်းလဲရန် အကြိမ်များစွာ ကြိုးစားခဲ့သော်လည်း ယခင်ကကဲ့သို့ပင် ဖြစ်နေသေးသည်။ ဤသည်မှာ ငါ၏ ပုံစံသာဖြစ်သည်” ဟု တွေးကြသည်။ သင်သည် သင့်ကိုယ်သင် မကောင်းသောအမြင် ရှိသဖြင့် ဤသည်မှာ အပျက်သဘောဆောင်သော အခြေအနေတစ်ခုဖြစ်သည်။ ယင်းသည် သင့်အနေဖြင့် မျှော်လင့်ချက်ကင်းမဲ့သော ခံစားချက်ကို လက်မြှောက်အရှုံးပေးလိုက်သည့် စိတ်နေစိတ်ထားဖြစ်သည်။ ဤပြဿနာကို ဖြေရှင်းရန် သမ္မာတရားကို သင်မရှာဖွေရသေးပေ။ ထို့ကြောင့် သင်သည် မျှော်လင့်ချက်မရှိဟု အဘယ်ကြောင့် သင်ထင်သနည်း။ လူတို့သည် ဤသို့သောအခြေအနေများတွင် ကြိမ်ဖန်များစွာ အသက်ရှင်ကြသည်။ ဖောက်ပြန်ပျက်စီးမှုတစ်ခုကို ခဏတာ ထုတ်ဖော်ပြီး ၎င်းတို့သည် အမျိုးအစားသတ်မှတ်ခြင်းခံရပြီးဖြစ်သည်ဟုလည်းကောင်း၊ ဤသည်မှာ ၎င်းတို့ဖြစ်သော လူအမျိုးအစား ဖြစ်သည်ဟုလည်းကောင်း ထင်မြင်ကြသည်။ ဤသည်မှာ အပျက်သဘောဆောင်သော အခြေအနေတစ်ခု ဖြစ်သည်။ ယင်းကို ပြောင်းပြန်လှန်သင့်ပြီး ယင်းထံမှ သင်လွတ်မြာက်သင့်သည်။ သင်တို့တွင် အခြားမည်သည့် အပျက်သဘောဆောင်သော၊ သို့မဟုတ် မတက်မကြွဖြစ်သော အခြေအနေများရှိသနည်း။ (ကျွန်ုပ်သည် ကျွန်ုပ်၏ ဆုကျေးဇူးများနှင့် အစွမ်းအစကို အခြေခံပြီး အမှုအရာများကို လုပ်ဆောင်သော အခြေအနေတစ်ခု၌ ကြိမ်ဖန်များစွာအသက်ရှင်ပြီး အသက်ဝင်ရောက်မှု ကင်းမဲ့သည်။ ဤအခြေအနေသည် အလွန်ပြင်းထန်သည်။) လူတို့သည် ၎င်းတို့၏ ဆုကျေးဇူးများနှင့် အစွမ်းအစကို အခြေခံပြီး အမှုအရာများကို လုပ်ဆောင်သောအခါ သူတစ်ပါးတို့နှင့် အစဉ်နှိုင်းယှဉ်လိုကြပြီး “ဤအလုပ်ကို သင်က ပြီးမြောက်နိုင်သော်လည်း ငါက မပြီးမြောက်နိုင်သည်မှာ အဘယ်သို့ဖြစ်ရသနည်း။ ကြိုးစားပြီး သင့်ထက် ပို၍သာအောင် လုပ်ဆောင်ရန်အတွက် ငါသည် အလုပ်ကြိုးစားပြီး ဤအလုပ်၌ အားစိုက်ထုတ်ရသည်” ဟု တွေးကြသည်။ ဤတွင် သင်၏ နတ်ဆိုးဆန်သော သဘာဝက ထွက်ပေါ်လာပြီး ဖြစ်သည်။ ဤအရာနှင့်ပတ်သက်ပြီး မည်သည့်အရာကို လုပ်ဆောင်သင့်သနည်း။ အမှုအရာများအား သင်လုပ်ဆောင်သောအခါ၌ သင့်တွင် ဤတွန်းအား၊ သို့မဟုတ် စမှတ်ရှိသောအခါ၌ အရေးမစိုက်နှင့်။ ယင်းသည် ယာယီထုတ်ဖော်ပြမှု၊ သို့မဟုတ် ခဏတာ မသိနားမလည်သော အတွေးတစ်ခုဖြစ်သည်။ ယင်းအတိုင်းမလုပ်ဆောင်နှင့်။ ဤသို့ဆိုလျှင် သင်သည် အဆင်ပြေလိမ့်မည်။ သင်သည် အမှုအရာများကို လက်တွေ့ကျသည့်ပုံစံဖြင့်၊ လုပ်ဆောင်သင့်သည့် ပုံစံဖြင့် လုပ်ဆောင်ရမည်။ အခက်အခဲတစ်ခုကို သင်ကြုံရလျှင် အခြားလူများက ယင်းကို ကိုင်တွယ်သည့်ပုံစံကို အရင်ကြည့်ရှုလော့။ ၎င်းတို့က ကောင်းစွာ ကိုင်တွယ်ပြီးဖြစ်လျှင် ၎င်းတို့နှင့်စကားပြောပြီး ၎င်းတို့ထံမှ သင်ယူလော့။ ဤသို့အားဖြင့် သင်သည် သင်၏ မမှန်ကန်သော အခြေအနေများကို ပြောင်းပြန်လှန်လိမ့်မည်။ သင့်တွင် ထိုအတွေးများရှိပြီး သင်၏အတွင်းထဲတွင် ဖောက်ပြန်ပျက်စီးမှုအား ထုတ်ဖော်သော်လည်း ထိုပုံစံအတိုင်း မလုပ်ဆောင်လျှင် သင်၏ ဖောက်ပြန်ပျက်စီးသော စိတ်သဘောထားသည် တားဆီးခြင်းခံရလိမ့်မည်။ သို့ရာတွင် သင့်၌ ထိုအတွေးများရှိပြီး ထိုသို့ လုပ်ဆောင်ပါက၊ သင်၏လုပ်ရပ်များသည် သင့်အတွေးများထက်ပို၍ပင် ဆိုးရွားပါက ဤသည်မှာ ဒုက္ခရောက်မည့် သဘောဖြစ်သည်။ ယင်းသည် အမှုအရာများကို ရှုပ်ထွေးစေလိမ့်မည်။ လူတို့၏ ဖောက်ပြန်ပျက်စီးသော စိတ်သဘောထားများသည် ဘုရားသခင် အမုန်းတီးဆုံးသောအရာ ဖြစ်သည်။

သင်၏ ဖောက်ပြန်ပျက်စီးသော စိတ်သဘောထားများအပေါ် ဘုရားသခင်၏ ချဉ်းကပ်မှုသည် ထိုစိတ်သဘောထားများကို သင့်အား ကွယ်ဝှက်စေဖို့၊ ဖုံးကွယ်စေဖို့၊ သို့မဟုတ် အယောင်ဆောင်စေဖို့ မဟုတ်ပေ။ ထိုထက် သူသည် သင့်အား ယင်းတို့ကို ထုတ်ဖော်စေပြီး သင့်ကို ဖော်ထုတ်ကာ ယင်းတို့အကြောင်းကို သင်သိမြင်မှုရရှိရန် လုပ်ဆောင်ပေးခြင်းဖြစ်သည်။ ယင်းတို့အကြောင်းကို သင်သိမြင်မှုရှိသည်နှင့် ပြီးပြီလော။ မပြီးသေးပါ။ သင်သည် ယင်းတို့အကြောင်းကို သိမြင်မှုရှိပြီးနောက်တွင် သင်၏ ဖောက်ပြန်ပျက်စီးသော စိတ်သဘောထားများအတိုင်း အမှုအရာများကို လုပ်ဆောင်သည်မှာ မှားယွင်းသည်ဟုလည်းကောင်း၊ ယင်းသည် လမ်းဆုံးဖြစ်သည်ကိုလည်းကောင်း သိပြီးသည့်နောက်တွင် ဘုရားရှေ့မှောက်သို့ သင်လာရမည်။ ပြီးလျှင် သင်၏ ဖောက်ပြန်ပျက်စီးသော စိတ်သဘောထားများကို ဖြေရှင်းရန်အတွက် ဘုရားထံဆုတောင်းပြီး သမ္မာတရားကို ရှာဖွေရမည်။ ဘုရားသခင်သည် သင့်အား ဉာဏ်အလင်းဖွင့်ပေးလိမ့်မည်။ ပြီးလျှင် မှန်ကန်သော လက်တွေ့လုပ်ဆောင်မှု လမ်းကြောင်းကို သင့်အား ပေးလိမ့်မည်။ ဘုရားနှုတ်ကပတ်တော်များက လူတို့ လုပ်ဆောင်သင့်သည့်အရာအကြောင်းကို ပြောသည်။ သို့သော် လူတို့၌ ဖောက်ပြန်ပျက်စီးသော စိတ်သဘောထားများရှိပြီး တစ်ခါတစ်ရံတွင် ဘုရားသခင် ပြောသည့်တိုင်း မလုပ်ဆောင်လိုကြပေ။ အမှုအရာများကို ၎င်းတို့၏ ကိုယ်ပိုင်နည်းလမ်းအတိုင်း လုပ်ဆောင်လိုကြသည်။ ဤသို့ဆိုလျှင် ဘုရားသခင်က မည်သည့်အရာကို လုပ်ဆောင်သနည်း။ ဘုရားသခင်က သင့်အား လွတ်လပ်ခွင့်ပေးသည်။ လောလောဆယ်တွင် သင့်အား ဤသို့လုပ်ဆောင်ခွင့်ပေးသည်။ သင်သည် ဤသို့ ဆက်လက်လုပ်ဆောင်သွားသောအခါတွင် လမ်းပိတ်ပြီး သင်အမှားလုပ်ခဲ့မိပြီဟု ခံစားရလိမ့်မည်။ ထို့နောက်တွင် သင်သည် ဘုရားသခင်ဆီသို့ ပြန်သွားပြီး မည်သည့်အရာ လုပ်ဆောင်သင့်သည်ကို ရှာဖွေလိမ့်မည်။ ဘုရားသခင်က “သင့်စိတ်နှလုံးတွင် ငါ၏ တောင်းဆိုချက်များကို သင်နားလည်သည်။ ဤသို့ဆိုလျှင် အဘယ်ကြောင့် သင်နားမထောင်သနည်း” ဟု ဆိုလိမ့်မည်။ ပြီးလျှင် သင်က “ဤသို့ဆိုလျှင် ကျွန်ုပ်ကို ပဲ့ပြင်ဆုံးမပါ ဘုရားသခင်” ဟု ဆိုလိမ့်မည်။ ဘုရားသခင်က သင့်အား ပဲ့ပြင်ဆုံးမလိမ့်မည်ဖြစ်ပြီး ယင်းက နာကျင်လိမ့်မည်။ ထို့ကြောင့် သင်က “ဘုရားသခင်က ငါ့ကို မချစ်ပါ။ သူသည် အဘယ်သို့များ ငါ့အပေါ် အလွန်ရက်စက်နိုင်သနည်း။ သူသည် အလွန်ပင် အကြင်နာကင်းမဲ့သည်” ဟု တွေးလိမ့်မည်။ ဘုရားသခင်က “ကောင်းပြီ။ ဤသို့ဆိုလျှင် ဤအရာကို ငါလုပ်ဆောင်တော့မည်မဟုတ်။ သင်ရည်ရွယ်ထားသည့် ပုံစံမှန်သမျှအတိုင်း အမှုအရာများကို ဆက်လက်လုပ်ဆောင်လော့” ဟု ဆိုလိမ့်မည်။ ပြီးလျှင် သင်သည် ယခင်က သင်ရှိနေသည့်လမ်းကြောင်းပေါ်သို့ ပြန်ရောက်လိမ့်မည်။ သင်သည် အမှုအရာများကို လုပ်ဆောင်လိမ့်မည်။ နောက်တစ်ဖန် လမ်းပိတ်ပြီး “ငါလုပ်ဆောင်သည့်အရာတွင် တစ်စုံတစ်ခု မှားယွင်းနေသည်။ နောက်ပြန်ဆုတ်ပြီး ငါ၏ အပြစ်များကို ဝန်ချရမည်။ ငါသည် ဘုရားသခင်အပေါ် အကြွေးတင်သည်” ဟု ချင့်ချိန်တွေးတောလိမ့်မည်။ သင်သည် ဘုရားသခင်ဆီသို့ နောက်တစ်ဖန်ပြန်သွားပြီး ဆုတောင်းကာ ရှာဖွေလိမ့်မည်။ ဘုရားသခင်ပြောသည့်အရာက မှန်သည်ကို နားလည်ပြီး ထို့နောက်တွင် ဘုရားသခင်ပြောသည့်အတိုင်း လုပ်ဆောင်လိမ့်မည်။ သို့သော် သင်က လုပ်ဆောင်နေသောအခါ၌ “ဤအရာကို လုပ်ဆောင်ခြင်းသည် ငါ၏ ဂုဏ်သိက္ခာကို ထိခိုက်မည်။ ငါ၏ ဂုဏ်သိက္ခာကို ဦးစွာ ဂရုစိုက်လျှင် ကောင်းမည်” ဟု တွေးလိမ့်မည်။ ထို့နောက်တွင် သင်သည် နောက်တစ်ဖန် ဒုက္ခရောက်လိမ့်မည်။ နောက်တစ်ဖန် စံမမီဖြစ်မည်။ သင်သည် အချိန်ကြာသည်နှင့်အမျှ ဤသို့ အကြိမ်ကြိမ် ခေါက်တုံ့ခေါက်ပြန် ဖြစ်နေလိမ့်မည်။ လူတို့သည် မိမိတို့ကိုယ်ကို ဆင်ခြင်သုံးသပ်နိုင်လျှင်၊ မိမိတို့အတွင်းတွင်ရှိသော လွဲချော်မှုများကို အစဉ်သိမြင်နိုင်လျှင်၊ မိမိတို့၏ ဖောက်ပြန်ပျက်စီးသော စိတ်သဘောထားများကို ပြန်လည်သုံးသပ်ပြီး နားလည်နိုင်လျှင်၊ ထို့နောက်တွင် ယင်းတို့ကို ဖြေရှင်းရန်အတွက် သမ္မာတရားကို ရှာဖွေနိုင်လျှင် ဤအတွေ့အကြုံတစ်လျှောက်အတွင်းတွင် ၎င်းတို့၏ ဝိညာဉ်ရင့်ကျက်မှုသည် စဉ်ဆက်မပြတ် ကြီးထွားနေလိမ့်မည်။ စိတ်နှလုံးရှိသော၊ သမ္မာတရားကို လက်တွေ့လုပ်ဆောင်ပြီး အပြုသဘောဆောင်သောအရာများကို ချစ်လိုစိတ် ရှိသောသူများအနေဖြင့် တဖြည်းဖြည်းချင်း ပို၍နည်းပါးလာသော အဟန့်အတားများနှင့် ကျရှုံးမှုများကို တွေ့ကြုံရမည်။ ၎င်းတို့၏ ဘုရားသခင်အပေါ် ကျိုးနွံနာခံသည့် အပိုင်းများသည် တိုးပွားလာမည်။ ၎င်းတို့၏ သမ္မာတရားကို ချစ်သည့်အပိုင်းများသည် တိုးပွားလာမည်။ ဤအတွက်ကြောင့် သမ္မာတရားကို သင်တွေ့ကြုံပြီး လက်တွေ့လုပ်ဆောင်စဉ်တွင် ဘုရားသခင်က သင့်အား ကျရှုံးခွင့်နှင့် ပုန်ကန်ခွင့်ကို ပေးခြင်း ဖြစ်သည်။ သူသည် ဤအရာများကို မကြည့်ပေ။ ဘုရားသခင်က သင့်ကို အလိုမရှိတော့မည်ဖြစ်စေ၊ သူသည် သင့်အား ငရဲသို့ စေလွှတ်မည်ဖြစ်စေ၊ ဖြစ်ရပ်တစ်ခုတွင် သူ့အားနားမထောင်သည့်အတွက် သင့်အား သေဒဏ်ချမည်ဖြစ်စေ ထိုကဲ့သို့ မဟုတ်ပေ။ ဘုရားသခင်က ဤသို့ မလုပ်ဆောင်ပေ။ ဘုရားသခင်က လူတို့ကို ကယ်တင်သောအခါတွင် အဘယ်ကြောင့် ဘုရားသခင်၏ ချစ်ခြင်းက အလွန်အကျွံကျယ်ပြန့်သည်ဟု ဆိုသနည်း။ ဤသည်မှာ ဘုရားသခင်၏ ချစ်ခြင်းက ပေါ်လွင်သောနေရာဖြစ်သည်။ ယင်းသည် လူတို့အပေါ် သူ၏ သည်းခံခြင်း၊ စိတ်ရှည်ခြင်းတွင် ပေါ်လွင်သည်။ သူသည် စဉ်ဆက်မပြတ် သင့်ကို သည်းခံနေသော်လည်း သင့်အား အလိုမလိုက်ပေ။ ဘုရားသခင်၏ သည်းခံခြင်းသည် လူတို့၏ ဝိညာဉ်ရင့်ကျက်မှုကို သူသိခြင်း၊ လူတို့၏ မွေးရာပါ လုပ်နိုင်စွမ်းကို သိခြင်း၊ အခြေအနေတစ်ခုခုတွင် မည်သည့်အရာကို လူတို့ ထုတ်ဖော်သည်ကို သိခြင်း၊ ၎င်းတို့၏ ဝိညာဉ်ရင့်ကျက်မှုကို အခြေခံပြီး မည်သည့်အရာကို ၎င်းတို့ ရယူနိုင်သည်ကိုသိခြင်း၊ သင့်အား ဤအရာများကို ထုတ်ဖော်ပြခွင့်ပေးခြင်း၊ သင့်အား လွတ်လပ်မှု အတိုင်းအတာတစ်ခုခုကို ပေးခြင်း၊ သင်က သူ့ထံပြန်လာပြီး ရိုးသားစစ်မှန်စွာ နောင်တရသောအခါ သင့်အား လက်ခံခြင်း၊ ထိုစဉ်အတွင်း သင့်နောင်တ၏ ရိုးသားစစ်မှန်မှုကိုလည်း အသိအမှတ်ပြုခြင်းတို့နှင့် သက်ဆိုင်သည်။ ထို့ကြောင့် သင်က ပြန်လာပြီး ဤသို့ လုပ်ဆောင်သည်မှာ မှန်ကန်သလောဆိုသည်ကို ဘုရားသခင်အား မေးသောအခါ၌ ဘုရားသခင်က သင့်အား ဆက်လက်၍ ပြောပြီး အဖြေတစ်ခုပေးလိမ့်မည်။ ဤသို့လုပ်ဆောင်သည်မှာ မှန်ကန်သည်ဆိုသည်ကို ဘုရားသခင်က သင့်အား စိတ်ရှည်စွာပြောပြီး သင့်အား အတည်ပြုပေးလိမ့်မည်။ သို့သော် သင်က သင့်စိတ်ကို တစ်ဖန်ပြောင်းပြီး “ဘုရားသခင်၊ ဤအရာကို ကျွန်ုပ်မလုပ်ဆောင်လိုပါ။ ကျွန်ုပ်အတွက် အကျိုးမရှိပါ။ ယင်းသည် ကျွန်ုပ်ကို မပျော်မရွှင်ဖြစ်စေပြီး အနေရခက်စေသည်။ အမှုအရာများကို ကျွန်ုပ်၏ နည်းလမ်းအတိုင်း လုပ်ဆောင်သင့်သည်ဟု ကျွန်ုပ်ထင်ဆဲဖြစ်သည်။ ဤသို့ဆိုလျှင် ကျွန်ုပ်သည် သိက္ခာကျမည်မဟုတ်။ ကျွန်ုပ်သည် ပညာသားပါပြီး ပါးနပ်မည်ဖြစ်သည်။ ကိစ္စရပ်တိုင်းတွင် ကိုယ့်ကိုယ်ကိုယ် ကျေနပ်အားရအောင် လုပ်ဆောင်နိုင်လိမ့်မည်။ ကျွန်ုပ်၏ သီးခြားလိုအင်ဆန္ဒများကို ဦးစွာ ဖြည့်ဆည်းမည်” ဟု ပြောသောအခါတွင် ဘုရားသခင်က “သင်သည် မပြည့်ဝဘဲ ဖြစ်သွားနိုင်သည်။ သို့သော် ဤသို့လုပ်ဆောင်ခြင်းအားဖြင့် အဆုံး၌ ဆုံးရှုံးရသည်မှာ သင်ဖြစ်သည်။ ငါမဟုတ်” ဟု ဆိုလိမ့်မည်။ ဘုရားသခင်က သင့်အား ကယ်တင်နေသောအခါတွင် သူသည် သင့်အား ဤသို့ တစ်ဇွတ်ထိုး လုပ်ဆောင်ခွင့်ပေးလိမ့်မည်။ ဤသည်မှာ သူ၏ သည်းခံခြင်းနှင့် လူတို့ကို သူပြသည့် သနားကရုဏာဖြစ်သည်။ သို့ရာတွင် လူတို့သည် သူ၏ သနားကရုဏာကို မြင်သောအခါ စိတ်အလိုလိုက်၍ မရပေ။ ပြီးလျှင် သူ၏ စိတ်ရှည်မှုနှင့် သည်းခံမှုကို အားနည်းချက်တစ်မျိုးအဖြစ် သဘောထား၍မရပေ၊ သို့မဟုတ် သူ့ကို ပုန်ကန်ရန်၊ သူ၏ စကားများကို အရေးမစိုက်ရန် ဆင်ခြေတစ်ခုအဖြစ် မြင်၍မရပေ။ ဤသည်မှာ လူတို့ဘက်မှ ပုန်ကန်ခြင်းနှင့် ကောက်ကျစ်ဆိုးယုတ်ခြင်း ဖြစ်သည်။ လူတို့သည် ဤအရာကို ရှင်းလင်းစွာ မြင်ရမည်။ ဘုရားသခင်က သင့်အားပြသည့် သည်းခံခြင်း၊ စိတ်ရှည်ခြင်းသည် အကန့်အသတ်မရှိ ရှည်လျားသည်။ ဘုရားသခင်၏ အလွန်လေးနက်သော ရည်ရွယ်ချက်များကို သင်ခံစားရနိုင်လျှင် ယင်းသည် ကောင်းသောအရာ ဖြစ်သည်။ ဘုရားသခင်က သင့်ကို ကယ်တင်ရန် အလွန်အကျွံဖြစ်သော ဆောင်ရွက်မှုများအား အသုံးပြုနိုင်စွမ်းမရှိခြင်း မဟုတ်။ ဘုရားသခင်၏ လုပ်ရပ်များနောက်ကွယ်တွင် စည်းမျဉ်းများရှိသည်ကို သင်နားလည်ရမည်။ သူသည် အမှုအရာများကို နည်းလမ်းများစွာဖြင့် လုပ်ဆောင်သော်လည်း အလွန်အကျွံဖြစ်သော ဆောင်ရွက်မှုများကို အသုံးမပြုပေ။ အဘယ်ကြောင့်နည်း။ ဘုရားသခင်သည် သင့်အား အခက်အခဲမျိုးစုံ၊ စိတ်ပျက်ခြင်းနှင့် အတိဒုက္ခများအပြင် များစွာသော ကျရှုံးမှုများ၊ အနှောင့်အယှက်များကို တွေ့ကြုံစေသည်။ အဆုံးတွင် ဤအရာများကို သင့်အားတွေ့ကြုံစေသည့် ဖြစ်စဉ်တစ်လျှောက်တွင် ဘုရားသခင်သည် သင့်အား သူပြောပြီးသမျှသည် မှန်ကန်ပြီး သမ္မာတရားဖြစ်သည်ကို သင့်အား သဘောပေါက်စေလိမ့်မည်။ တစ်ချိန်တည်းတွင် သင်စိတ်ကူးထင်မြင်သည့်အရာ၊ ထို့အပြင် သင်၏ အယူအဆများ၊ အသိပညာ၊ အတွေးအခေါ်ဆိုင်ရာ သီအိုရီများ၊ အတွေးအခေါ်များ၊ လောကီတွင် သင် လေ့လာသင်ယူခဲ့သောအရာများနှင့် သင်၏မိဘများက သင့်ကို သင်ကြားပေးခဲ့သောအရာများအားလုံးက မှားယွင်းသည်ကိုလည်းကောင်း၊ ဤအရာများသည် သင့်ကို ဘဝတွင် မှန်ကန်သောလမ်းကြောင်းပေါ်သို့ လမ်းပြမပေးနိုင်သည်ကိုလည်းကောင်း၊ သင့်ကို သမ္မာတရားကို နားလည်ရန်၊ သို့မဟုတ် ဘုရားသခင်ရှေ့ကို လာရောက်ရန် ဦးဆောင်မပေးနိုင်သည်ကိုလည်းကောင်း ဘုရားသခင်က သင့်အား ပြသလိမ့်မည်။ သင်သည် ဤအရာများဖြင့် အသက်ရှင်နေသေးလျှင် သင်သည် ကျရှုံးသည့်လမ်းကြောင်းအပြင်၊ ဘုရားသခင်ကို အာခံပြီး သစ္စာဖောက်သည့်လမ်းကြောင်းကို လျှောက်နေခြင်းဖြစ်သည်။ အဆုံးတွင် ဘုရားသခင်သည် သင့်အား ဤအရာကို ရှင်းလင်းစွာ မြင်စေလိမ့်မည်။ ဤဖြစ်စဉ်သည် သင် တွေ့ကြုံရမည့် အရာတစ်ခုဖြစ်သည်။ ဤနည်းအားဖြင့်သာ ရလဒ်များကို ရရှိနိုင်သည်။ သို့သော် ဤသည်မှာ ဘုရားသခင်အတွက် မြင်ရသည်မှာ နာကျင်ဖွယ်ရာ ဖြစ်သောအရာလည်းဖြစ်သည်။ လူတို့သည် ပုန်ကန်တတ်ပြီး ဖောက်ပြန်ပျက်စီးသော စိတ်သဘောထားများရှိကြသည်။ ထို့ကြောင့် ၎င်းတို့သည် အနည်းငယ်ဒုက္ခခံရမည်ဖြစ်ပြီး ဤအနှောင့်အယှက်များကို တွေ့ကြုံရမည်။ ဤဆင်းရဲဒုက္ခမရှိဘဲ ၎င်းတို့သည် သန့်စင်ခံရဖို့ ဖြစ်နိုင်မည် မဟုတ်ချေ။ လူတစ်ယောက်သည် သမ္မာတရားကို ချစ်သည့် စိတ်နှလုံး အမှန်တကယ် ရှိပြီး ဘုရားသခင်၏ အမျိုးမျိုးသော ကယ်တင်ခြင်းနည်းလမ်းများကို အမှန်တကယ် လက်ခံလိုစိတ်ရှိကာ အဖိုးအခပေးဆပ်ချင်စိတ်ရှိလျှင် ၎င်းတို့အတွက် အလွန်များစွာ ဒုက္ခခံဖို့ မလိုအပ်ချေ။ ဘုရားသခင်သည် အမှန်တကယ်ပင် လူတို့ကို များစွာ ဒုက္ခမခံစေလိုပေ။ ၎င်းတို့ကို အနှောင့်အယှက်များ၊ ကျရှုံးမှုများကို များစွာ မတွေ့ကြုံစေလိုပေ။ သို့ရာတွင် လူတို့သည် အလွန်အမင်း ပုန်ကန်ကြသည်။ ၎င်းတို့သည် ၎င်းတို့ကို ပြောသည့်အတိုင်း လုပ်ဆောင်လိုခြင်း မရှိသလို နာခံလိုစိတ်မရှိဘဲ၊ မှန်သောလမ်းကို မလျှောက်နိုင်ကြပေ၊ သို့မဟုတ် ဖြတ်လမ်းများကို မလိုက်နိုင်ကြပေ။ ၎င်းတို့၏ ကိုယ်ပိုင်နည်းလမ်းအတိုင်းသာ သွားကြသည်။ ဘုရားသခင်ကို ဆန့်ကျင်ပုန်ကန်ပြီး သူ့ကို ခုခံနိုင်ကြသည်။ လူတို့သည် ဖောက်ပြန်ပျက်စီးသောအရာများဖြစ်သည်။ ဘုရားသခင်လုပ်ဆောင်နိုင်သမျှမှာ ၎င်းတို့ကို စဉ်ဆက်မပြတ် ထိန်းညှိရန် စာတန်ထံသို့ လွှဲပြောင်းပေးပြီး ပတ်ဝန်းကျင်အမျိုးမျိုးတွင် ထားရှိခြင်းဖြစ်သည်။ ဤသို့ဖြင့် ၎င်းတို့ကို အတွေ့အကြုံနှင့် သင်ခန်းစာမျိုးစုံကို ရရှိစေပြီး ကောက်ကျစ်ဆိုးယုတ်သောအရာမျိုးစုံ၏ အနှစ်သာရကို နားလညစေရန်ဖြစ်သည်။ ထို့နောက် လူတို့သည် ပြန်လာပြီး နောက်တစ်ဖန်ကြည့်သောအခါ ဘုရားနှုတ်ကပတ်တော်များသည် သမ္မာတရားဖြစ်သည်ကို သဘောပေါက်ကြပြီး ဘုရားနှုတ်ကပတ်တော်များက သမ္မာတရားဖြစ်သည်ကို ဝန်ခံကြသည်။ ပြီးလျှင် ဘုရားသခင်သည် အပြုသဘောဆောင်သောအရာများအားလုံး၏ လက်တွေ့အရှိတရား ဖြစ်သည်ကိုလည်းကောင်း၊ လူတို့ကို အမှန်တကယ်ချစ်သော၊ စိုးရိမ်သော၊ ကယ်တင်နိုင်သောသူ ဖြစ်သည်ကိုလည်းကောင်း ဝန်ခံကြသည်။ ဘုရားသခင်သည် လူတို့ကို အလွန်အမင်း ဒုက္ခမခံစေလိုပေ။ သို့သော် လူသားများသည် ပုန်ကန်လွန်းသည်။ မှားယွင်းသော လမ်းကြောင်းကို လျှောက်လိုကြသည်။ ဤဆင်းရဲဒုက္ခကို ဖြတ်သန်းချင်ကြသည်။ ဘုရားသခင်သည် လူတို့ကို စဉ်ဆက်မပြတ် ထိန်းညှိရန် အခြေအနေအမျိုးမျိုးတွင် ထားရှိခြင်းမှလွဲ၍ ရွေးချယ်စရာမရှိပေ။ လူတို့သည် နောက်ဆုံးတွင် မည်သည့်အတိုင်းအတာထိ ဖေးမခံရကြသနည်း။ သင်က “ကျွန်ုပ်သည် အခြေအနေမျိုးတိုင်းကို တွေ့ကြုံပြီးဖြစ်ကာ ယခုတွင် နောက်ဆုံး၌ ကျွန်ုပ်သည် ဘုရားသခင်မှ လွဲ၍ ကျွန်ုပ်အား သမ္မာတရားကို သိနားလည်စေသည့်၊ ကျွန်ုပ်အား သမ္မာတရားကို မွေ့လျော်စေနိုင်သည့်၊ သို့မဟုတ် သမ္မာတရားစစ်မှန်မှုများထဲသို့ ကျွန်ုပ်ကို ဝင်ရောက်စေနိုင်သည့် လူ၊ ဖြစ်ရပ် သို့မဟုတ် အရာဝတ္ထုတစ်ခုမျှ မရှိဆိုသည်ကို နားလည်ပြီဖြစ်သည်။ ဘုရားသခင်၏ နှုတ်ကပတ်တော်များအတိုင်းသာ နာခံစွာ ကျွန်ုပ် လက်တွေ့လုပ်ဆောငလျှင်၊ နာခံစွာ လူသား၏ နေရာတွင် နေထိုင်နိုင်လျှင်၊ အဖန်ဆင်းခံ သတ္တဝါတစ်ဦးအနေဖြင့် အဆင့်အတန်းနှင့် တာဝန်တို့ကို ထိန်းသိမ်းလျှင်၊ ဘုရားသခင်၏ အချုပ်အခြာအာဏာနှင့် စီစဉ်မှုတို့ကို နာခံစွာ လက်ခပြီး၊ ဘုရားသခင်အပေါ် ထပ်မံ၍ စောဒကတက်ခြင်း၊ လွန်ကျူးသောအရာများအား ဆန္ဒရှိခြင်းမရှိဘဲ ဖန်ဆင်းရှင်ရှေ့မှောက်တွင် အမှန်တကယ် နာခံနိုင်လျှင်၊ ထိုအခါမှသာ ဘုရားသခင်ကို ကျွန်ုပ် အမှန်တကယ် ကျိုးနွံနာခံသူတစ်ဦး ဖြစ်လိမ့်မည်” ဟု ပြောသည့် အတိုင်းအတာအထိ ဖြစ်သည်။ လူတို့သည် ဤအဆင့်ကို ရောက်ရှိပြီးချိန်တွင်၊ ၎င်းတို့သည် ဘုရားသခင်၏ ရှေ့မှောက်တွင် အမှန်တကယ် ဦးညွှတ်ကြပြီး ဘုရားသခင်သည် ၎င်းတို့အတွက် တွေ့ကြုံဖို့ နောက်ထပ် အခြေအနေများ တစ်ခုတလေမျှ ပြင်ဆင်ရန် မလိုအပ်ပေ။ ထို့ကြောင့် မည်သည့်လမ်းကြောင်းကို သင် လျှောက်ရန် ဆန္ဒရှိသနည်း။ ၎င်းတို့၏ ခံစားချက်အရဖြစ်သော စိတ်ဆန္ဒများတွင် မည်သူမျှ ဒုက္ခခံရန် အလိုမရှိကြသကဲ့သို့ ဆုတ်ဆိုင်းမှုများ၊ ကျရှုံးခြင်း၊ အခက်အခဲများ၊ စိတ်ပျက်မှုများ၊ သို့မဟုတ် ဘေးဒုက္ခဆိုးကို မည်သူမျှ မတွေ့ကြုံချင်ပေ။ သို့သော် အခြားနည်းလမ်း မရှိပေ။ လူများတွင် စာတန်ဆန်သော သဘာဝများရှိကြသည်။ ပုန်ကန်လွန်းသည်။ ၎င်းတို့၏ အတွေးအမြင်များသည် ရှုပ်ထွေးလွန်းသည်။ နေ့စဉ် သင်၏ စိတ်နှလုံးသည် အစဉ် ဆန့်ကျင်ကွဲလွဲပြီး ပဋိပက္ခဖြစ်ကာ ဝရုန်းသုန်းကားဖြစ်နေသည်။ သင်သည် သမ္မာတရားအနည်းငယ်ကိုသာ နားလည်သည်။ သင်၏ အသက်ဝင်ရောက်မှုသည် တိမ်လွန်းသည်။ အယူအဆများ၊ စိတ်ကူးများနှင့်၊ ဇာတိပကတိ၏ ဖောက်ပြန်ပျက်စီးသော စိတ်သဘောထားများကို ကျော်လွှားရန် အစွမ်း ကင်းမဲ့သည်။ သင်လုပ်နိုင်သမျှမှာ ကျရှုံးမှုနှင့် မချင့်မရဲဖြစ်မှုတို့ကို စဉ်ဆက်မပြတ်တွေ့ကြုံရခြင်း၊ စဉ်ဆက်မပြတ် လဲကျခြင်း၊ ဆင်းရဲဒုက္ခ၏ တွန်းတိုက်မှုကို ခံရခြင်း၊ ရွှံ့ထဲတွင် လူးလှိမ့်ခြင်းတို့ဖြစ်သည့် လူ၏ ပုံမှန်နည်းလမ်းကို သုံးခြင်းသာဖြစ်သည်။ “ကျွန်ုပ် ပင်ပန်းပြီ၊ စိတ်ကုန်ပြီ၊ ဤကဲ့သို့ ကျွန်ုပ် အသက်မရှင်ချင်ပါ။ ဤကျရှုံးမှုများကို ကျွန်ုပ် မတွေ့ကြုံချင်ပါ၊ ဖန်ဆင်းရှင်ရှေ့သို့ နာခံလျက် ကျွန်ုပ် လာလိုစိတ်ရှိပါသည်။ ဘုရားသခင်၏ ပြောသည့်အရာကို ကျွန်ုပ် နားထောင်မည်၊ သူ ပြောသည့်အရာကို ကျွန်ုပ် လုပ်မည်။ ဤအရာသည်သာ ဘဝတွင် မှန်ကန်သော လမ်းကြောင်းဖြစ်သည်” ဟူ၍ သင်ပြောသော နေ့သို့ ရောက်လာသည်အထိဖြစ်သည်။ ကျရှုံးမှုကို သင် အပြည့်အဝ လက်ခံယုံကြည်ပြီး ဝန်ခံသည့်နေ့တွင်သာ သင်သည် ဘုရားသခင်၏ ရှေ့မှောက်သို့ လာနိုင်လိမ့်မည်။ ဤအရာမှ ဘုရားသခင်၏ စိတ်သဘောထားနှင့်ဆိုင်သည့် တစ်စုံတစ်ရာကို သင် နားလည်လာပြီးဖြစ်သလော။ လူတို့အပေါ် ဘုရားသခင်၏ သဘောထားမှာ အဘယ်နည်း။ ဘုရားသခင် မည်သည့်အရာကို လုပ်ဆောင်သည်ဖြစ်စေ၊ သူသည် လူတို့အတွက် အကောင်းဆုံး ဖြစ်စေချင်သည်။ မည်သည့် အခြေအနေများကို သူ စီစဉ်ပါစေ၊ သို့မဟုတ် သင်လုပ်ဆောင်ဖို့ မည်သည့်အရာ သူ စေခိုင်းပါစေ၊ အကောင်းဆုံးရလဒ်ကို မြင်ရန် သူ အမြဲ ဆန္ဒရှိပေသည်။ တစ်စုံတစ်ရာကို သင် ဖြတ်သန်းရပြီး ဆုတ်ဆိုင်းမှုများနှင့် ကျရှုံးမှုကို သင် ကြုံရသည်ဆိုပါစို့။ သင်ကျရှုံးသောအခါ၊ သင်ဇာတ်သိမ်းသွားကာ စာတန်၏ဆွဲယူခြင်းခံရပြီးဖြစ်၍ သင်သည် လက်မြှောက်အရှုံးပေးကာ မည်သည့်အခါမျှ ပြန်လည်ရပ်တည်နိုင်မည် မဟုတ်ဟု တွေးထင်သည့်အခါ စိတ်ဓာတ်ကျပြီး စိတ်ပျက်လက်ပျက်ဖြစ်နေသည်ကို ဘုရားသခင်က မမြင်လိုပေ။ ဤရလဒ်ကို ဘုရားသခင် မြင်လိုစိတ်မရှိပေ။ မည်သည့်အရာကို မြင်ရန် ဘုရားသခင် ဆန္ဒရှိသနည်း။ ဤကိစ္စရပ်တွင် သင် ကျရှုံးပြီး ဖြစ်ကောင်း ဖြစ်နိုင်သော်လည်း သင်သည် သမ္မာတရားကို ရှာဖွေပြီး သင့်ကိုယ်သင် ဆင်ခြင်သုံးသပ်နိုင်ခြင်း၊ သင်၏ ကျရှုံးခြင်းအတွက် အကြောင်းရင်းကို ရှာတွေ့နိုင်ခြင်း၊ ဤကျရှုံးခြင်းက သင့်အားသင်ကြားပေးခဲ့သည့် သင်ခန်းစာကို သင်လက်ခံနိုင်ပြီး နောင်တွင် သတိရခြင်း၊ ထိုနည်းဖြင့် ဆောင်ရွက်ဖို့မှာ မှားယွင်းသည်၊ ဘုရားသခင်၏ နှုတ်ကပတ်တော်များအတိုင်း လက်တွေ့လုပ်ဆောင်ခြင်းသည်သာ မှန်ကန်သည်ဆိုသည်ကို သင် သဘောပေါက်ခြင်း၊ သင်က “ကျွန်ုပ်သည် ဆိုးသောသူတစ်ယောက်ဖြစ်သည်။ ဖောက်ပြန်ပျက်စီးသည့် စာတန်ဆန်သော စိတ်သဘောထား ရှိပါသည်။ ကျွန်ုပ်အထဲတွင် ပုန်ကန်လိုမှုရှိသည်၊ ကျွန်ုပ်သည် ဘုရားသခင် ပြောဆိုသည့် ဖြောင့်မတ်သော လူများဖြင့် အလှမ်းဝေးပြီး ဘုရားသခင်ကို ကြောက်ရွံ့သည့် စိတ်နှလုံးတစ်ခု ကျွန်ုပ်၌ မရှိပါ” ဟု သဘောပေါက်လေသည်။ ဤအချက်ကို သင်ရှင်းရှင်းလင်းလင်း မြင်ပြီးဖြစ်သည်။ ဤကိစ္စ၏ အမှန်တရားကို သင်သိမြင်လာပြီးဖြစ်သည်။ ဤအနှောင့်အယှက်၊ ဤကျရှုံးမှုမှတစ်ဆင့် သင်သည် အသိတရားအချို့ ရလာပြီး ရင့်ကျက်လာသည်။ ဤသည်မှာ ဘုရားသခင်က မြင်လိုသောအရာဖြစ်သည်။ ရင့်ကျက်ခြင်းသည် မည်သည့်အရာကို ဆိုလိုသနည်း။ ယင်းသည် ဘုရားသခင်က သင့်ကို ရရှိနိုင်သည်ကိုလည်းကောင်း၊ သင်သည် ကယ်တင်ခြင်း ခံရနိုင်သည်ကိုလည်းကောင်း၊ သင်သည် သမ္မာတရားစစ်မှန်မှုများအတွင်းသို့ ဝင်ရောက်နိုင်သည်ကိုလည်းကောင်း၊ သင်သည် ဘုရားသခင်ကို ကြောက်ရွံ့ပြီး မကောင်းမှုကို ရှောင်ကြဉ်သည့်လမ်းကြောင်းပေါ်တွင် စတင်ပြီးဖြစ်သည်ကိုလည်းကောင်း ဆိုလိုသည်။ ဘုရားသခင်က လူတို့မှန်ကန်သောလမ်းကြောင်း ရွေးသည်ကို မြင်ဖို့ မျှော်လင့်သည်။ ဘုရားသခင်သည် အလွန်လေးနက်သော ရည်ရွယ်ချက်များဖြင့် အမှုအရာများကို လုပ်ဆောင်သည်။ ဤအရာအားလုံးသည် သူ၏ ကွယ်ဝှက်နေသော ချစ်ခြင်းဖြစ်သည်။ သို့သော် လူတို့က ဤအရာကို မကြာခဏ မခံစားမိနိုင်ကြပေ။ လူတို့သည် အမြင်ကျဉ်းမြောင်းပြီး အလွန့်အလွန်သေးနုပ်သည်။ ဘုရားသခင်၏ ကျေးဇူးတော်နှင့် ကောင်းချီးများကို မခံစားရသည့်အချိန်ခဏတွင်ပင် ၎င်းတို့သည် ဘုရားသခင်နှင့်ပတ်သက်ပြီး ညည်းညူသည်။ အပျက်သဘောဆောင်လာသည်။ စိတ်ဆိုးလျက်ပြုမူကြသည်။ သို့သော် ဘုရားသခင်သည် ၎င်းတို့အပေါ် တေးမှတ်မထားပေ။ သူသည် လူတို့ကို မသိနားမလည်သော ကလေးများကဲ့သို့ ဆက်ဆံပြီး ၎င်းတို့အပေါ် အထအနမကောက်ပေ။ သူသည် ကျေးဇူးတော်နှင့် ကောင်းချီးများကို မည်သို့ရသည်ကို လူတို့အား သိစေပြီး ကျေးဇူးတော်ဆိုသည်မှာ လူသားအတွက် မည်သည့်အရာကို ဆိုလိုသည်ကို၊ လူသားသည် ဤအရာမှ မည်သည့်အရာကို ရယူနိုင်သည်ဆိုသည်တို့ကို ၎င်းတို့အားနားလည်စေသည့် အခြေအနေများကို ခင်းကျင်းလေသည်။ အလွန်အကျွံ စားသည့်အခါ သင်၏ ကျန်းမာရေးအတွက် မကောင်းဟု ဘုရားသခင် ပြောသည့် အရာတစ်ခုခုကို သင် စားဖို့ နှစ်သက်သည်ဟု ဆိုပါစို့။ သင်သည် နားမထောင်ဘဲ ယင်းကို မရမက စားနေပြီး ဘုရားသခင်က ထိုရွေးချယ်မှုကို လွတ်လွတ်လပ်လပ် ပြုလုပ်ဖို့ သင့်အား အခွင့်ပေး၏။ အကျိုးဆက်အနေဖြင့် သင် နေမကောင်းဖြစ်လေသည်။ ဤအရာကို အကြိမ်အချို့ တွေ့ကြုံပြီးသည့်နောက်တွင် ဘုရားသခင်ပြောသည့်စကားများမှာ အမှန်တကယ်ပင် မှန်ကန်သည်၊ သူပြောသည့်အရာမှာ မှန်ကန်သည်၊ သူ၏ နှုတ်ကပတ်တော်များအတိုင်း သင် လက်တွေ့လုပ်ဆောင်ရမည်၊ ဤသည်မှာ မှန်ကန်သော လမ်းကြောင်း ဖြစ်သည်ဆိုသည်တို့ကို သင် သဘောပေါက်သည်။ ထို့ကြောင့် သင်တွေ့ကြုံရသည့် ဆုတ်ဆိုင်းမှုများ၊ ကျရှုံးမှုများနှင့် ဆင်းရဲဒုက္ခတို့မှ မည်သည့်အရာ ဖြစ်ပေါ်လာသနည်း။ တစ်ခုအနေဖြင့် ဘုရားသခင်၏ အလွန်လေးနက်သော ရည်ရွယ်ချက်များကို သင်ခံစားသိရှိနိုင်သည်။ အခြားတစ်ခုအနေဖြင့် ဘုရားသခင်၏ နှုတ်ကပတ်တော်များက မှန်ကန်ကြောင်း၊ ဘုရားနှုတ်ကပတ်တော်အားလုံးက လက်တွေ့ကျကြောင်းကို သင် ယုံကြည်ကာ သေချာသည်ဟု ခံစားရသည်။ ဘုရားသခင်၌သင်၏ ယုံကြည်ခြင်း ကြီးထွားလာသည်။ ထို့အပြင် ဤကျရှုံးခြင်းကာလကို တွေ့ကြုံခြင်းအားဖြင့်၊ ဘုရားသခင်၏နှုတ်ကပတ်တော်များ၏ မှန်ကန်ခြင်းနှင့် တိကျခြင်းတို့ကို သင် သိမြင်လာသည်၊ ဘုရားသခင်၏ နှုတ်ကပတ်တော်များက သမ္မာတရားဖြစ်သည်ကို သင် မြင်ပြီး၊ သမ္မာတရားအား လက်တွေ့လုပ်ဆောင်ခြင်းနှင့်ဆိုင်သည့် အခြေခံသဘောတရားကို နားလည်‌လေသည်။ ထို့ကြောင့် ကျရှုံးမှုကို တွေ့ကြုံခြင်းသည် သင့်အတွက် ကောင်းပေသည်၊ သို့သော် ယင်းသည် သင့်အား ဒုက္ခခံရစေသောအရာတစ်ခုလည်း ဖြစ်ပြီး သင့်အား ဖေးမသည့် အရာတစ်ခု ဖြစ်သည်။ သို့သော် ထိုသို့ ဖေးမခံရခြင်းက နောက်ဆုံးတွင် သင့်ကို ဘုရားသခင်၏ ရှေ့မှောက်သို့ ပြန်သွားစေလျှင်လည်းကောင်း၊ သူ၏နှုတ်ကပတ်တော်များကို နားလည်စေပြီး ထိုနှုတ်ကပတ်တော်များကို သင်၏စိတ်နှလုံးထဲတွင် သမ္မာတရားအဖြစ် လက်ခံစေလျှင်လည်းကောင်း၊ သင့်အား ဘုရားသခင်ကို သိကျွမ်းလာစေလျှင်လည်းကောင်း ထိုအခါတွင် သင်တွေ့ကြုံခဲ့သောဖေးမခြင်း၊ ဆုတ်ဆိုင်းမှုများနှင့် ကျရှုံးခြင်းတို့သည် အချည်းနှီးဖြစ်ခဲ့လိမ့်မည် မဟုတ်ချေ။ ဤသည်မှာ ဘုရားသခင် မြင်ရန် ဆန္ဒရှိသည့်ရလဒ် ဖြစ်သည်။ သို့ရာတွင် လူအချို့က “ဘုရားသခင်သည် လူတို့ကို အလွန်သည်းခံသောကြောင့် ငါသည် စိတ်လွတ်ကိုယ်လွတ်သာ နေလိုက်မည်။ ငါကျေနပ်သလို ပြုလုပ်မည်။ ငါအလိုရှိသလို နေထိုင်မည်” ဟု ဆိုကြသည်။ ဤသည်မှာ အဆင်ပြေသလော။ (အဆင်မပြေပါ။) ဖန်ဆင်းခံများ လုပ်ဆောင်သင့်သည့်အရာမှာ ဘုရားသခင်က ၎င်းတို့အား ညွှန်ပြသည့် မှန်ကန်သောလမ်းကြောင်းအတိုင်း လက်တွေ့လုပ်ဆောင်ခြင်းဖြစ်ပြီး ယင်းထံမှ မယိမ်းယိုင်ခြင်း ဖြစ်သည်။ ၎င်းတို့သည် ဘုရားသခင်၏ ရည်ရွယ်ချက်များနှင့် အပြည့်အဝ မကိုက်ညီနိုင်လျှင် ၎င်းတို့သည် သမ္မာတရားကို မဆန့်ကျင်သရွေ့၊ ဘုရားသခင်၏ စိစစ်ခြင်းကို လက်ခံနိုင်သရွေ့ အဆင်ပြေသည်။ ဤသည်မှာ အနည်းဆုံးသော စံနှုန်းဖြစ်သည်။ သင်သည် သမ္မာတရားထံမှ သွေဖည်လျှင်၊ ဆုမတောင်းလျှင်၊ မရှာဖွေလျှင် ဘုရားသခင်ထံမှ အလွန်အမင်း လမ်းလွဲပြီး ဖြစ်သည်။ အန္တရာယ်ရှိသော နယ်မြေသို့ ကူးသွားပြီး ဖြစ်သည်။ သင်သည် ဘုရားသခင်နှင့် အလွန်အလှမ်းဝေးသောအခါ၊ အသင်းတော်တွင် သင့်တာဝန်ကို မထမ်းဆောင်သောအခါ၊ လူတို့ကို ကယ်တင်ရန် ဘုရားသခင်အလုပ်လုပ်သည့် နေရာမှ ထွက်ခွာပြီးဖြစ်သောအခါ သန့်ရှင်းသောဝိညာဉ်တော်သည် သင့်အပေါ်အလုပ်လုပ်ခြင်းကို ရပ်တန့်လိမ့်မည်။ သင့်တွင် အခွင့်အရေးရှိမည်မဟုတ်။ ပြီးလျှင် ပြောစရာ ကယ်တင်ခြင်းရှိမည်မဟုတ်ပေ။ သင့်အတွက် ဘုရားသခင်၏ ချစ်ခြင်းသည် အနှစ်မရှိသော စကားများသာဖြစ်သည်။

ဘုရားသခင်ကို သင်ယုံကြည်သောအခါ ရှေးဦးစွာ ဘုရားသခင်ကို သင်နားလည်ရမည်။ သူ၏ ရည်ရွယ်ချက်များနှင့် လူအပေါ် သူ၏ သဘောထားကို နားလည်ရမည်။ ဤသို့နားလည်ခြင်းအားဖြင့် ဘုရားသခင်က အဆုံးတွင် မည်သည့်သမ္မာတရားကို သင့်အားနားလည်စေလိုကြောင်းနှင့် ဝင်ရောက်စေလိုသည်၊ မည်သည့်လမ်းကြောင်းအား သင်လိုက်လျှောက်သင့်သည်ကို နားလည်စေလိုကြောင်းတို့ကို သင်သိလိမ့်မည်။ ဤအရာများကို သင်သိပြီးနောက်တွင် ဘုရားသခင်လုပ်ဆောင်လိုသည့်အရာနှင့် ဘုရားသခင်က သင့်တွင် ဖြစ်မြောက်စေလိုသည့်အရာဖြင့် ပူးပေါင်းလုပ်ဆောင်ရန် အစွမ်းကုန် ဆောင်ရွက်ရမည်။ သင်သည် အမှန်ပင် ပူးပေါင်းလုပ်ဆောင်နိုင်ခြင်းမရှိဘဲ သင်၏အားအင်နှင့် ခွန်အားတို့က ကုန်ခန်းနေလျှင် ယင်းသည် အရှိတရားသာဖြစ်လေသည်။ ဘုရားသခင်က လူတို့ကို အတင်းစေခိုင်းမည်မဟုတ်။ သို့ရာတွင် ယခုအခါ လူတို့သည် ဤအရာများအပေါ် ၎င်းတို့၏ ခွန်အားအလုံးစုံကို မထည့်ပေ။ သင်သည် သမ္မာတရားကို လက်တွေ့လုပ်ဆောင်ခြင်းသို့ ခွန်အားအပြည့်အဝ မထည့်ဘဲ ကောင်းချီးများနှင့် ဓမ္မသရဖူရရှိခြင်းသို့ ခွန်အားအပြည့်အဝ ထည့်လျှင် သင်သည် လမ်းမှန်မှ သွေဖည်ပြီး ဖြစ်သည်။ သင်သည် သမ္မာတရားအား လက်တွေ့လုပ်ဆောင်ခြင်းထဲသို့၊ ဘုရားသခင်က သင့်အားပေးသည့် အထူးတာဝန်များနှင့် တာဝန်များဖြင့် ပူးပေါင်းလုပ်ဆောင်ခြင်းထဲသို့ အားစိုက်ထုတ်ရမည်။ သင်သည် ဤအရာများအတွက် သင်၏စိတ်နှလုံးအကြွင်းမဲ့ဖြင့် သင့်ကိုယ်သင်ပေးအပ်ပြီး အသုံးခံရမည်။ ဤသို့ဆိုလျှင် သင်သည် ဘုရားသခင်၏ ရည်ရွယ်ချက်များဖြင့် ကိုက်ညီလိမ့်မည်။ ဘုရားသခင်က မိမိတို့၏ တာဝန်များကို ကောင်းစွာ အာရုံမစိုက်သူတို့ကို အရေးမစိုက်ပေ။ သို့သော် အရေးမစိုက်ခြင်းသည် သူ၏လုပ်ရပ်များနောက်ကွယ်တွင် စည်းမျဉ်းများမရှိဟု မဆိုလိုပေ။ ဘုရားသခင်က ၎င်းတို့အား အရေးမစိုက်သောအခါ သူသည် သည်းခံသည်၊ လက်ခံပေးသည်၊ စိတ်ရှည်သည်ဆိုသည်ကို ပြသည်။ လူတို့သည် ၎င်းတို့၏ဘဝများတွင် မည်သည့်အရာများကို ကြုံတွေ့ရမည်၊ ဤဖန်ဆင်းခံများသည် မည်သည့်အရာများကို ဖြစ်မြောက်နိုင်စွမ်းရှိသည်၊ မည်သည့်အရာများကို ဖြစ်မြောက်နိုင်စွမ်းမရှိ၊ မည်သည့်လူအမျိုးအစားအချို့က အသက်အရွယ်တစ်ခုတွင် ဖြစ်မြောက်နိုင်သည်၊ မည်သည့်အရာကို မဖြစ်မြောက်နိုင်သည်ဆိုသည်တို့ကို သူသိသည်။ ဘုရားသခင်သည် ဤအရာများနှင့်ပတ်သက်၍ ရှင်းရှင်းလင်းလင်း သိနားလည်မှု အရှိဆုံး ဖြစ်သည်။ လူတို့ကိုယ်တိုင်ထက်ပင် အလွန်ပို၍ ရှင်းလင်းလေသည်။ သို့ရာတွင် ဘုရားသခင်က ဤအရာများအကြောင်းကို သိနားလည်ရုံဖြင့် သင်က “ကောင်းပြီ။ ဤသို့ဆိုလျှင် ဘုရားသခင်၊ ကိုယ်တော်နှစ်သက်သလိုသာ လုပ်ဆောင်ပါ။ မည်သည့်အရာကိုမျှ ကျွန်ုပ် စဉ်းစားစရာမလိုပါ။ ကျွန်ုပ်သည် တစ်နေကုန် ထိုင်နေပြီး မန္နမုန့် ကောင်းကင်ပေါ်မှ ကျလာရန်သာ စောင့်၍ရသည်။ ဘုရားသခင်အနေဖြင့် အရာရာတိုင်းကို ကိုင်တွယ်ခြင်းက အဆင်ပြေသည်” ဟု ပြောနိုင်သည်ဟု မဆိုလိုပေ။ လူတို့သည် ၎င်းတို့၏တာဝန်များကိုလည်းကောင်း၊ ၎င်းတို့လုပ်ဆောင်သင့်သည့်အရာများကို လည်းကောင်း၊ ၎င်းတို့ ဝင်ရောက်သင့်သည့်အရာများကိုလည်းကောင်း၊ ၎င်းတို့ လက်တွေ့လုပ်ဆောင်သင့်သည့်အရာများကိုလည်းကောင်း၊ လူတို့၏ မွေးရာပါ ဖြစ်မြောက်နိုင်စွမ်းအတွင်းရှိ အရာများကိုလည်းကောင်း ဆောင်ရွက်သောအခါတွင် ပူးပေါင်းလုပ်ဆောင်ရန် အစွမ်းကုန် ပြုလုပ်ရမည်။ ပူးပေါင်းလုပ်ဆောင်ရန် အစွမ်းကုန် ပြုလုပ်ရမည်ဆိုသည်မှာ မည်သည့်အရာကို ဆိုလိုသနည်း။ ဤသည်မှာ သင်သည် သင့်တာဝန်အပေါ် အချိန်နှင့် အားအင်စိုက်ထုတ်ရမည်၊ ဒုက္ခခံပြီး အဖိုးအခ ပေးဆပ်ရမည်ဟု ဆိုလိုသည်။ တစ်ခါတစ်ရံတွင် သင်၏ဂုဏ်သိက္ခာ၊ မာန်မာနနှင့် ကိုယ်ကျိုးကြည့်မှုတို့တွင် ဆုံးရှုံးနစ်နာသည်ကို ခံယူရမည်။ ပြီးလျှင် ခရီးပန်းတိုင်တစ်ခုအား သင် တောင့်တခြင်းနှင့် ကောင်းချီးခံရရန် သင်၏လိုအင်ဆန္ဒတို့ကို အပြည့်အဝလက်လွှတ်ရမည်။ ဤအရာများကို လက်လွှတ်သင့်သည်။ ထို့ကြောင့် ယင်းတို့ကို သင်လက်လွှတ်ရမည်။ ဥပမာအနေဖြင့် ဘုရားသခင်က “ဇာတိပကတိ သက်သာမှုများကို မတပ်မက်နှင့်။ အကြောင်းမှာ ယင်းတို့သည် သင်၏ အသက်ကြီးထွားမှုအတွက် အကျိုးမဖြစ်စေသောကြောင့် ဖြစ်သည်” ဟု ဆိုသည်။ သင်က သူ့ကို ကျိုးနွံနာခံနိုင်ခြင်း မရှိပေ။ ကျရှုံးမှုအချို့ကို တွေ့ကြုံပြီးနောက်တွင် သင်က “ဘုရားသခင်သည် မှန်သည်။ အဘယ်ကြောင့် ငါသည် လက်တွေ့မလုပ်ဆောင်နိုင်သကဲ့သို့ ဇာတိပကတိကို မပုန်ကန်နိုင်သနည်း။ ငါသည် ပြောင်းလဲနိုင်စွမ်း မရှိသလော။ ဤသည်မှာ ဘုရားသခင်က ငါ့အား မြင်သည့်ပုံစံလည်း ဖြစ်သလော။ သူသည် ငါ့ကို မကယ်တင်မည်လော။ ငါသည် မျှော်လင့်ချက်မရှိတော့ပေ။ ထို့ကြောင့် အလုပ်လုပ်ပေးသူသာ လုပ်မည်။ အဆုံးတိုင်အောင် အလုပ်လုပ်ပေးမည်” ဟု တွေးသည်။ ဤသည်မှာ လက်ခံနိုင်ဖွယ် ဟုတ်သလော။ (မဟုတ်ပါ။) လူတို့သည် မကြာခဏ ဤအခြေအနေ၌ ရှိကြသည်။ သူတို့သည် ကောင်းချီးများနှင့် သရဖူတစ်ခုကိုသာ လိုက်စားသည်၊ ဤသို့မဟုတ်လျှင် သူတို့သည် အလုပ်ကိုလုပ်ဖို့ အရည်အချင်းမရှိ၊ ဘုရားသခင်ကလည်း သူတို့အပေါ် ဆုံးဖြတ်ချက်ချပြီးဖြစ်သည်ဟု ထင်ကြသည်။ ဤသည်မှာ မှားသည်။ အကယ်၍ သင်သည် အမှုအရာများကို အချိန်မီ ပြောင်းလဲနိုင်လျှင်လည်းကောင်း၊ သင်၏နှလုံးသားနှင့် စိတ်ကို ပြောင်းလဲနိုင်လျှင်လည်းကောင်း၊ သင့်လက်ဖြင့် ကျူးလွန်ထားသော မကောင်းမှုကို လက်လွှတ်နိုင်လျှင်လည်းကောင်း၊ ဘုရားသခင်ရှေ့မှောက်သို့ လှည့်ပြန်နိုင်လျှင်လည်းကောင်း၊ ဘုရားသခင်ကို ဝန်ချပြီး နောင်တရနိုင်လျှင်လည်းကောင်း၊ သင့်လုပ်ဆောင်ချက်များနှင့် သင်လျှောက်သော လမ်းကြောင်းက မှားသည်ဟု အသိအမှတ်ပြုနိုင်လျှင်လည်းကောင်း၊ ပြီးလျှင် သင်ကိုယ်တိုင်၏ ကျရှုံးမှုများကို ဝန်ခံနိုင်ပြီး သင်မည်မျှစွန်းထင်းပါစေ သမ္မာတရားအားလိုက်စားခြင်းကို အရှုံးမပေးဘဲ သင့်ကို ဘုရားသခင်ညွှန်ပြထားသော လမ်းကြောင်းအတိုင်း လက်တွေ့ကျင့်ကြံနိုင်သည်ဆိုလျှင်လည်းကောင်း သင်သည် မှန်ကန်သောအရာကို သင်ပြုလုပ်နေခြင်းဖြစ်သည်။ လူတို့သည် သူတို့၏ စိတ်သဘောထား၌ အပြောင်းအလဲများကို တွေ့ကြုံပြီး ကယ်တင်ခံနေရစဉ် များစွာသော အခက်အခဲများကို မလွဲမသွေကြုံတွေ့မည် ဖြစ်သည်။ ဥပမာ ဘုရားသခင် ချမှတ်ထားသော အခြေအနေများကို ကျိုးနွံနာခံနိုင်မှုမရှိခြင်း၊ ၎င်းတို့ကိုယ်တိုင်၏ အမျိုးမျိုးသော အတွေးများ၊ အမြင်များ၊ စိတ်ကူးစိတ်သန်းများ၊ ဖောက်ပြန်ပျက်စီးသော စိတ်သဘောထားများ၊ အသိပညာနှင့် ဆုကျေးဇူးများ၊ သို့တည်းမဟုတ် သူတို့ကိုယ်တိုင်၏ အမျိုးမျိုးသောပြဿနာများနှင့် အမှားများ ပါဝင်သည်။ သင်သည် အခက်အခဲမျိုးစုံကို ရင်ဆိုင်ရမည်။ သင်သည် မရေမတွက်နိုင်သော ဤအခက်အခဲများနှင့် အခြေအနေများကို အနိုင်ရပြီး သင့်စိတ်နှလုံးထဲမှ တိုက်ပွဲ အဆုံးသတ်သွားသည်နှင့်တစ်ပြိုင်နက် သင်သည် သမ္မာတရားစစ်မှန်မှုများကို ပိုင်ဆိုင်လိမ့်မည်၊ သင်သည် ဤအရာများ၏ ချည်နှောင်မှုကို ခံရတော့မည်မဟုတ်ဘဲ အနှောင်အဖွဲ့ကင်းမဲ့ပြီး လွတ်မြောက်ပြီးဖြစ်လိမ့်မည်။ ဤဖြစ်စဉ်အတွင်း လူတို့ မကြာခဏ ကြုံတွေ့ရတတ်သော ပြဿနာတစ်ခုမှာ သူတို့သည် မိမိတို့အထဲ၌ ပြဿနာများကို ရှာဖွေတွေ့ရှိခြင်း မရှိမီတွင် အခြားသူတို့ထက် သူတို့ပိုကောင်းသည်၊ မည်သူတစ်ဦးတစ်ယောက်မျှ ကောင်းချီးမခံစားရလျှင်ပင် သူတို့ခံစားရမည်ဟု ပေါလုကဲ့သို့ ထင်မှတ်ကြခြင်း ဖြစ်သည်။ သူတို့သည် သူတို့အခက်အခဲများကို ရှာတွေ့သောအခါ မိမိကိုယ်ကို အလကားဖြစ်သည်၊ သူတို့အတွက် အားလုံးပြီးဆုံးပြီဟု ထင်ကြသည်။ အစွန်းရောက်မှုနှစ်ခု အမြဲတမ်းရှိသည်။ သင်သည် တစ်ဖက်ဖက်သို့ လွဲချော်မသွားစေရန်အတွက် ဤအစွန်းရောက်မှုနှစ်ခုလုံးကို သင်ကျော်လွှားရမည်။ သင်သည် အခက်အခဲတစ်ခုကို ကြုံတွေ့ရသောအခါ ဤပြဿနာမှာ လုံးလုံးလျားလျား ခဲကတ်ပြီး ပြုပြင်ရန် ခက်ခဲလိမ့်မည်ဟု သတိပြုမိပြီး ဖြစ်လျှင်ပင် သင်သည် ယင်းကို ကောင်းမွန်စွာ ရင်ဆိုင်သင့်သည်။ ယင်းကို ပြုပြင်ရာတွင် ဘုရားရှေ့သို့လာပြီး ဘုရား၏ အကူအညီကို တောင်းခံသင့်သည်။ သမ္မာတရားကို ရှာဖွေခြင်းအားဖြင့် ပုရွက်ဆိတ်များက အရိုးကို တစ်ဖြည်းဖြည်းချင်းကိုက်ဖြတ်သကဲ့သို့ ယင်းကို ကိုက်ဖြတ်ကာ ဤအခြေအနေကို ပြောင်းလဲသင့်သည်။ သင်သည် ဘုရားသခင်ထ္ နောင်တရရမည်။ နောင်တရခြင်းဆိုသည်မှာ သင်၌ သမ္မာတရားကိုလက်ခံသော နှလုံးသားနှင့် ကျိုးနွံနာခံတတ်သော သဘောထားရှိကြောင်း သက်သေဖြစ်ပြီး သမ္မာတရားကို သင်ရရှိမည့် မျှော်လင့်ချက်ရှိကြောင်း ဆိုလိုခြင်းဖြစ်သည်။ ထို့ပြင် အကယ်၍ ဤအရာထဲတွင် နောက်ထပ်အခက်အခဲတစ်ခုခု ပေါ်လာလျှင် မကြောက်လေနှင့်။ ဘုရားသခင်ထံ အလျင်အမြန်ဆုတောင်းပြီး အမှီပြုလော့။ ဘုရားသခင်က တိတ်တဆိတ် စောင့်ကြည့်နေပြီး သင့်ကို စောင့်ဆိုင်းနေကာ သင်သည် သူ့စီမံခန့်ခွဲမှုအလုပ်၏ ဝန်းကျင်၊ စီးကြောင်းနှင့် အတိုင်းအတာမှ မသွေဖည်သရွေ့ မျှော်လင့်ချက်ရှိသောကြောင့် သင်လုံးဝအလျှော့မပေးရ။ အကယ်၍ သင်ထုတ်ဖော်သမျှမှာ ပုံမှန်ဖောက်ပြန်ပျက်စီးသော စိတ်သဘောထား ဖြစ်ပါက သင်သည် ယင်းကိုနားလည်ပြီး သမ္မာတရားကို လက်ခံကာ သမ္မာတရားကို လက်တွေ့လုပ်ဆောင်သရွေ့ ဤပြဿနာများပြေလည်သော နေ့တစ်နေ့ ရောက်လာမည်ဖြစ်သည်။ သင်သည် ဤအရာ၌ ယုံကြည်မှုရှိရမည်။ ဘုရားသခင်သည် သမ္မာတရားဖြစ်၏။ သင်၏သေးငယ်သော ဤပြဿနာ မပြေလည်နိုင်မည်ကို သင်အဘယ်ကြောင့်စိုးရိမ်ဖို့လိုသနည်း။ ဤအရာအားလုံးကို ဖြေရှင်းနိုင်၏၊ သို့ဖြစ်၍ အဘယ်ကြောင့် အပျက်သဘောဆောင်မည်နည်း။ ဘုရားသခင်က သင့်ကို လက်လွှတ်မထားချေ၊ သို့ဖြစ်၍ အဘယ်ကြောင့် မိမိကိုယ်ကို အရှုံးပေးမည်နည်း။ သင်သည် လက်မလျှော့သင့်ပေ။ အပျက်သဘောမဆောင်သင့်ပေ။ ပြဿနာကို ကောင်းစွာ ရင်ဆိုင်သင့်သည်။ အသက်ဝင်ရောက်မှုအတွက် ပုံမှန်ဥပဒေသများကို သင်သိရမည်။ ပြီးလျှင် ဖောက်ပြန်ပျက်စီးသော စိတ်သဘောထားတစ်ခု၏ ထုတ်ဖော်ခြင်း၊ သရုပ်သကန်တို့အပြင် ရံဖန်ရံခါ အပျက်သဘောဆောင်မှု၊ အားနည်းမှု၊ ရှုပ်ထွေးမှုတို့ကိုပါ သာမန်အရာများအဖြစ် မြင်နိုင်ရမည်။ မိမိ၏ စိတ်သဘောထား ပြောင်းလဲခြင်းဖြစ်စဉ်သည် ရှည်လျားပြီး ထပ်တလဲလဲဖြစ်သော ဖြစ်စဉ်ဖြစ်သည်။ သင်သည် ဤအချက်ကို သိနားလည်သောအခါတွင် ပြဿနာများကို သင့်လျော်စွာ ရင်ဆိုင်နိုင်လိမ့်မည်။ တစ်ခါတစ်ရံတွင် သင်၏ ဖောက်ပြန်ပျက်စီးသော စိတ်သဘောထားက သူ့ဘာသာ ပြင်းထန်စွာ ထုတ်ဖော်သည်။ ယင်းကိုမြင်သော မည်သူကိုမဆို စက်ဆုပ်ရွံရှာစေပြီး သင်က သင့်ကိုယ်သင် မုန်းတီးသည်။ သို့မဟုတ် တစ်ခါတစ်ရံတွင် သင်သည် အကျင့်သိက္ခာ လျော့ရဲပြီး ဘုရားသခင်၏ ပဲ့ပြင်ဆုံးမခြင်းကို ခံရသည်။ ဤသည်မှာ ကြောက်ရွံရန် မဟုတ်ပေ။ ဘုရားသခင်သည် သင့်ကို ဆုံးမပဲ့ပြင်နေသရွေ့၊ သူသည် သင့်ကို ဂရုစိုက်လျက် ကာကွယ်နေဆဲဖြစ်ပြီး သင့်အထဲ၌ အမှုပြုနေသေးကာ သင်နှင့်အတူ အမြဲပါရှိနေသရွေ့ ဤအရာက ဘုရားသခင်သည် သင့်ကို လက်မလွှတ်သေးကြောင်း သက်သေပြလေသည်။ ဘုရားသခင်က သင့်ကို စွန့်ခွာထားပြီဟု သင်ခံစားရသောအချိန်နှင့် အမှောင်ထဲသို့ သင်ထိုးကျသွားသည့် အချိန်များ ရှိသည့်အခါ၌ပင်လျှင် မကြောက်လေနှင့်။ သင်သည် အသက်ရှင်နေပြီး ငရဲ၌ ရှိမနေသေးသရွေ့ သင်၌ အခွင့်အရေး ရှိသေးသည်။ သို့ရာတွင် သင်သည် အန္တိခရစ်၏လမ်းကြောင်းကို ခေါင်းမာစွာလျှောက်ခဲ့သော၊ မိမိအနေဖြင့် အသက်ရှင်ခြင်းမှာ ခရစ်တော်ဖြစ်သည်ဟု အဆုံးစွန် သက်သေခံခဲ့သော ပေါလုကဲ့သို့ ဖြစ်ပါက သင့်အတွက် အားလုံး အဆုံးသတ်ပြီဖြစ်သည်။ သင်သည် အသိတရားရနိုင်ပါက အခွင့်အရေး ရှိသေးသည်။ သင်၌ရှိသော အခွင့်အရေးက အဘယ်နည်း။ ယင်းမှာ သင်သည် ဘုရားသခင်ရှေ့မှောက်သို့ လာနိုင်ကာ ဘုရားသခင်ထံ ဆုတောင်းပြီး “အို ဘုရားသခင်။ ကျေးဇူးပြု၍ ကျွန်ုပ်အား သမ္မာတရား၏ ဤကဏ္ဍနှင့် လက်တွေ့လုပ်ဆောင်မှုလမ်းကြောင်း၏ ဤကဏ္ဍကို နားလည်ဖို့ ဉာဏ်အလင်းပေးတော်မူပါ” ဟုဆိုကာ သူ့ထံမှ အဖြေရှာနိုင်သေးခြင်းပင် ဖြစ်သည်။ သင်သည် ဘုရားသခင်၏ နောက်လိုက်များထဲမှ တစ်ဦးဖြစ်သရွေ့ သင်၌ ကယ်တင်ခြင်းမျှော်လင့်ချက် ရှိပြီး အဆုံးထိရောက်အောင် သွားနိုင်သည်။ ဤစကားများက အတော်အသင့် ရှင်းလင်း၏လော။ သင်သည် အပျက်သဘော ဆောင်တတ်သေးသလော။ (မဆောင်တတ်တော့ပါ။) လူတို့သည် ဘုရားသခင်၏ ရည်ရွယ်ချက်များကို နားလည်သောအခါ သူတို့၏လမ်းကြောင်းမှာ ကျယ်ပြန့်သောလမ်းကြောင်း ဖြစ်သည်။ အကယ်၍ သူ၏ရည်ရွယ်ချက်များကို သူတို့နားမလည်သောအခါ ယင်းက ကျဉ်းမြောင်းပြီး သူတို့သည် စိတ်ဓာတ်ကျကာ နင်းလျှောက်ရန် လမ်းကြောင်းမရှိပေ။ သမ္မာတရားကို နားမလည်သောသူတို့မှာ အောက်ပါအတိုင်းဖြစ်သည်။ သူတို့သည် သဘောထား ကျဉ်းမြောင်းသည်၊ အမြဲတမ်း ရေးကြီးခွင့်ကျယ် လုပ်ကြသည်၊ ထို့ပြင် ဘုရားသခင်နှင့်ပတ်သက်၍ အမြဲတမ်း မကျေမနပ်ပြောပြီး နားလည်မှုလွဲကာ ပို၍လမ်းလျှောက်လေ၊ သူတို့၏လမ်းကြောင်းက ပို၍ပျောက်ဆုံးလေဟူသော ရလဒ်ရှိလေသည်။ အမှန်အားဖြင့် လူတို့သည် ဘုရားသခင်ကို နားမလည်ကြပေ။ အကယ်၍ ဘုရားသခင်သည် လူတို့ကို သူတို့စိတ်ကူးထင်မြင်သည့်အတိုင်း ဆက်ဆံခဲ့ပါက လူသားမျိုးနွယ်အနေဖြင့် အချိန်ကြာမြင့်စွာကတည်းက ပျက်စီးခဲ့မည်ဖြစ်သည်။

ပေါလု၏ အပြစ်ခုနစ်ခုသည် ဖောက်ပြန်ပျက်စီးသော လူသားမျိုးနွယ်၏ ဖြစ်နေကျပုံစံအား ထုတ်ဖော်ပြခြင်းကို ကိုယ်စားပြုသည်။ သို့သော် ပေါလုသည် အဆိုးရွားဆုံးအမှုသာ ဖြစ်သည်။ သူ၏ သဘာဝအနှစ်သာရသည် ချမှတ်ထားနှင့်ပြီး ဖြစ်သည်။ သူသည် ယခင်က ထိုလူစားမျိုးဖြစ်ခဲ့သည်။ သို့ရာတွင် ဤဖောက်ပြန်ပျက်စီးသော စိတ်သဘောထားများသည် ဖောက်ပြန်ပျက်စီးသော လူသားများအားလုံးတွင် ဖြစ်နေကျဖြစ်သည်။ လူတိုင်း၌ ယင်းတို့ကို မတူညီသော အတိုင်းအတာဖြင့်ရှိသည်။ ဤအခြေအနေများအားလုံးသည် ဖောက်ပြန်ပျက်စီးသော စိတ်သဘောထားတစ်ခုမှ အရင်းခံသည်။ သင်သည် ပေါလုကဲ့သို့ တစ်ပုံစံတည်းသော လူစားမျိုး မဟုတ်သော်လည်း သင်သည်လည်း ဤဖောက်ပြန်ပျက်စီးသော စိတ်သဘောထားများကို ပိုင်ဆိုင်သည်။ သင်က သူ့လောက် ဆိုးရွားစွာ ပေါ်လွင်မှု မရှိခြင်းသာ ဖြစ်သည်။ လက်ရှိအချိန်တွင် သင်တို့အများစု မြင်ခဲ့ပြီးဖြစ်သော ဤအခြေအနေ အမျိုးအစားများကို ဘုရားသခင်က ဖောက်ပြန်ပျက်စီးသော စိတ်သဘောထားများအား ထုတ်ဖော်ခြင်းအဖြစ် မြင်သည်။ သို့ရာတွင် ပေါလုသည် ဖောက်ပြန်ပျက်စီးသော စိတ်သဘောထားတစ်ခုကိုသာ ထုတ်ဖော်ပြခဲ့ခြင်းမဟုတ်ပေ။ သူသည် ဘုရားသခင်အား အတိုက်အခံပြုသည့် လမ်းကြောင်းပေါ်တွင်ရှိပြီး နောင်တရရန် ခေါင်းမာစွာ ငြင်းဆန်သည်။ သူသည် အပြစ်ဒဏ်ကျခံရပြီး စီရင်ခြင်းခံခဲ့ရသည်။ သူ့တွင် ဘီလူးသရဲစီးသော သဘာဝရှိသည်။ သူ၏ ဤသမ္မာတရားကို မုန်းတီးသော ဘီလူးသရဲစီးသောသဘာဝသည် ကူညီ၍မရနိုင်တော့ပေ။ ဤနောက်တွင် ဤဟောပြောချက်အပေါ် သင်တို့ မိတ်သဟာယပြုသင့်သည်။ ဤအရာနှင့် သင်တို့ကိုယ်သင်တို့ ယှဉ်ကြည့်သင့်သည်။ ဤအရာ၏ ပန်းတိုင်မှာ ပေါလုပြုလုပ်ခဲ့သော ဤအမှားများ၏ ဆိုးရွားမှုကို သိမြင်ပြီး ထို့နောက်တွင် သင့်တွင်ရှိသော ပေါလုကဲ့သို့ ဖောက်ပြန်ပျက်စီးသည့် အခြေအနေများအားလုံးကို ဖော်ထုတ်ကာ တစ်ဆင့်ချင်း ပြုပြင်ရန် ဖြစ်သည်။ ဤဖောက်ပြန်ပျက်စီးသော စိတ်သဘောထားများကို ပြုပြင်ရခြင်း၏ ရည်ရွယ်ချက်သည် လူတို့အား လူသားပုံသဏ္ဌာန်တိုးပွားလာခြင်း၊ ဘုရားသခင်နှင့် သဟဇာတဖြစ်မှု တိုးပွားလာခြင်းတို့ဖြင့် နေထိုင်နိုင်စွမ်းရှိစေရန် ဖြစ်သည်။ ဤဖောက်ပြန်ပျက်စီးသော စိတ်သဘောထားများကို ပြုပြင်ခြင်းအားဖြင့်သာ လူတို့သည် ဘုရားရှေ့သို့ အမှန်တကယ်လာနိုင်သည်။ ဘုရားသခင်နှင့် သဟဇာတဖြစ်နိုင်သည်။ စစ်မှန်သော ဖန်ဆင်းခံဖြစ်နိုင်သည်။ ပြီးလျှင် ဘုရားသခင်အား ၎င်းတို့ကို ကျေနပ်မှုဖြင့် ကြည့်အောင် လုပ်ဆောင်နိုင်သည်။ သင်တို့သည် သင်တို့ကိုယ်သင်တို့ နှိုင်းယှဉ်ချိန်ဆမှုများ ပြုလုပ်သလော။ (ကျွန်ုပ်တို့သည် ဤနေရာတွင် အနည်းငယ်ချို့တဲ့သည်။) သင်တို့ အချို့တဲ့ဆုံးသောအရာမှာ သမ္မာတရားဖြစ်သည်။ သမ္မာတရားသည် သင်တို့ ဝင်ရောက်သင့်သည့်အရာဖြစ်သည်။ ယခုတွင် သင်တို့အထဲ၌ အမှုအရာ တော်တော်များများရှိသည်။ သို့သော် ဤအရာများ၏ အများစုမှာ ဖောက်ပြန်ပျက်စီးပြီး မကောင်းပေ။ သင်တို့တွင် အဓိပ္ပာယ်မရှိသော အသိအချို့ရှိသည်။ သင်တို့သည် အလွန်အမင်း သေးသိမ်သည်။ အပေးအယူများနှင့် အလဲအလှယ်များ လုပ်ဆောင်ရန် အစဉ်စဉ်းစားသည်။ အပျက်သဘောဆောင်သောအရာများ အလွန်အကျွံပေါများသည်။ ပြီးလျှင် အလုပ်တစ်ခုကို ကောင်းစွာမလုပ်ဆောင်သောအခါ၊ သို့မဟုတ် အခက်အခဲတစ်ခုကို သိမြင်သောအခါ အပျက်သဘောဆောင်လာသည်။ ဘုရားသခင်၏ အလုပ်သည် သင်၏ ဆန္ဒများနှင့် မကိုက်ညီသည်ကို သင်မြင်သောအခါ အပျက်သဘောဆောင်သော စိတ်ခံစားချက်များက သင့်တွင် ဖြစ်ပေါ်လာသည်။ ပြီးလျှင် သင်သည် သူ၏ အလုပ်ကို ဆန့်ကျင်ပြီး တိုက်ခိုက်သည်။ သင့်အလုပ်၌ ရလဒ်အချို့ကို ဖြစ်မြောက်သောအခါတွင် စိတ်လှုပ်ရှားသွားပြီး သင်သည် ဘဝမေ့သွားသည်။ သင်သည် မာနထောင်လွှားလာပြီး စကြဝဠာတွင် သင်၏နေရာကို မသိပေ။ သင်သည် အခြားသောလူတိုင်းထက် သာသည်ဟု ထင်သည်။ ပြီးလျှင် အလဲအလှယ်အနေဖြင့် ဘုရားသခင်အား သင့်ကို သရဖူနှင့် ဆုလာဘ်ပေးစေလိုသည်။ သင်သည် အများပြည်သူရှေ့တွင်လည်း ချုပ်တည်းမှုမရှိ လုပ်ဆောင်ရဲသည်။ အနှစ်ချုပ်လျှင် ဤအခြေအနေများသည် ပေါလု၏ အခြေအနေများနှင့် ကိုက်ညီသည်။ ယင်းတို့သည် အတူတူဖြစ်ပြီး ဘုရားသခင်က စက်ဆုပ်သည်။

ငါတို့သည် ပေါလု၏ အကြီးစားအပြစ်ခုနစ်ခုကို အနှစ်ချုပ်ပြီး အဓိပ္ပာယ်ဖွင့်ဆိုခဲ့ပြီး ဖြစ်သည်။ ပေါလုသည် အဆုံးတွင် အပြစ်ဒဏ်ခံရသူဖြစ်သွားခဲ့သည်။ ပေါလု၏ အဆုံးသတ်ကို ဘုရားသခင်က ဆုံးဖြတ်သောအခါတွင် သူ၏အပြစ်တစ်ခုကိုသာ ဘုရားသခင်က အခြေခံခဲ့သလော။ (မဟုတ်ပါ။) စုပေါင်း၍ ကြည့်လျှင် ဤသည်မှာ သူရရှိခဲ့သင့်သည့် အဆုံးသတ်ဖြစ်သည်။ ယင်းသည် သူအဆုံးသတ်ခဲ့သင့်သည့် ပုံစံဖြစ်သည်။ အချက်အလက်များက သင့်ရှေ့တည့်တည့်တွင်ရှိနေသည်။ သင်မငြင်းဆန်နိုင်ပေ။ သင်တို့ထဲတွင် အစမှ အဆုံးတိုင်အောင် ပေါလုကဲ့သို့သော လမ်းကို လျှောက်သော၊ ပေါလု၏ အားလုံးသော အပြစ်ခုနစ်ခုကို ပြသော၊ ယင်းတို့ကို ဖြေရှင်းရန် သမ္မာတရားကို မရှာနိုင်သောသူအချို့ရှိလျှင် သင်တို့၏ အဆုံးသတ်သည် မည်သည့်အရာ ဖြစ်မည်နည်း။ (ပေါလုနှင့် အတူတူဖြစ်မည်။) သင်သည် ပေါလုကဲ့သို့ အန္တိခရစ်မကောင်းဆိုးဝါးတစ်ဦးဖြစ်လာမည်ဖြစ်ပြီး အပြစ်ဒဏ်ပေးခြင်း ခံရသင့်သည်။ သင်သည် အပြစ်ဒဏ်ပေးခြင်း ခံရသောအခါ ဘုရားသခင်အား မဖြောင့်မတ်ဟု မစွပ်စွဲနှင့်။ ထိုအစား ဘုရားသခင်၏ ဖြောင့်မတ်ခြင်းကို သင်ချီးမွမ်းသင့်ပြီး “ဘုရားသခင်သည် ဖြောင့်မတ်သည်။ ဘုရားသခင်သည် ပေါလု၏ အပြစ်ခုနစ်ခုကို ဖော်ထုတ်ခဲ့ပြီး သူ၏ နှုတ်ကပတ်တော်များက ယင်းတို့ကို ရှင်းပြခဲ့သည်။ သူ၏နှုတ်ကပတ်တော်များအတွင်းသို့ မဝင်ရောက်သည်မှာ ငါဖြစ်သည်” ဟု ဆိုသင့်သည်။ ယခုအခါတွင် အမှုအရာများသည် လွန်ခဲ့သော နှစ်နှစ်ထောင်ဖြင့် ကွာခြားသည်။ ဘုရားသခင်သည် လူတို့အား သမ္မာတရားတိုင်းကို ရှင်းလင်းစွာနှင့် ပွင့်လင်းမြင်သာစွာ ပြောပြသည်။ ယင်းကို သင့်အတွက် ရေးသားထားသည်။ ဤသို့ဖြင့် သင်ကြားရပြီး နားလည်သည်။ ယင်းသည် လက်တွေ့ဘဝတွင် ဘုရားသခင် အလုပ်လုပ်ပြီး အမှုအရာများကို ပြီးမြောက်အောင်မြင်သည့် ပုံစံလည်း ဖြစ်သည်ဆိုသည်ကို သင်မြင်သည်။ သင်က သမ္မာတရားအတွင်းသို့ မဝင်ရောက်နိုင်သေးလျှင်၊ ဘုရားနှုတ်ကပတ်တော်များအရ သင်၏ ဖောက်ပြန်ပျက်စီးသော စိတ်သဘောထားကို မပြုပြင်နိုင်လျှင် ဘုရားသခင်သည် သူ၏ ဖြောင့်မတ်သော စိတ်သဘောထားအတိုင်း သင့်အား အပြစ်ဒဏ်ပေးခြင်းအတွက် ဘုရားသခင်ကို အပြစ်မဆိုနှင့်။ ဗျာဒိတ်ကျမ်းတွင် ဘုရားသခင်က “ငါသည် အကျိုး အဖြစ်ကို ဆောင်ခဲ့သည်ဖြစ်၍၊ လူအသီးသီးတို့အား မိမိတို့အကျင့်အတိုင်း ဆပ်ပေး မည်” (ဗျာဒိတ်ကျမ်း ၂၂:၁၂) ဟူ၍ ဆိုခဲ့သည်။ ဘုရားသခင်သည် လူတို့အား ၎င်းတို့လုပ်ဆောင်သည့်အရာနှင့်အညီ ပြန်လည်ပေးဆပ်သည်။ ဤသည်မှာ ဘုရားသခင်၏ ဖြောင့်မတ်သော စိတ်သဘောထားဖြစ်သည်။ ဘုရားသခင်ကို ယုံကြည်သူတို့သည် ဘုရားနှုတ်ကပတ်တော်ဖြင့် ယှဉ်လျက်၊ ဘုရားသခင်ဖော်ထုတ်ခဲ့သော ပေါလု၏ အပြစ်ခုနစ်ခုဖြင့် ယှဉ်လျက် မိမိတို့ကိုယ်ကို ပြန်လည်သုံးသပ်ပြီး နားလည်သင့်ကာ စစ်မှန်သော နောင်တကို ရရှိသင့်သည်။ ဤသည်မှာ ဘုရားသခင် အသိအမှတ်ပြုသည့်အရာဖြစ်သည်။

၂၀၁၈ ခုနှစ်၊ ဇွန်လ ၁၄ ရက်