လူတစ်ဦးသည် အသက်ဝင်ရောက်မှုသို့ ပထမခြေလှမ်းကို လှမ်းသောအခါတွင် မည်သည့်နေရာမှ စတင်သင့်သနည်း။ လူတစ်ဦးသည် အသက်ဝင်ရောက်မှုကို ရရှိရန်အတွက် မည်သည့်အရာရှိရန် လိုအပ်သနည်း။ လူတစ်ဦးသည် သမ္မာတရားစစ်မှန်မှုများအတွင်းသို့ ဝင်ရောက်ရန် လိုက်စားပြီး ရရှိသင့်သော အရေးအပါဆုံးနှင့် အရေးအကြီးဆုံးအရာများမှာ အဘယ်နည်း။ ဤမေးခွန်းများကို သင်တို့ စဉ်းစားကြည့်ခဲ့ဖူးသလော။ အသက်ဝင်ရောက်မှုဆိုသည်မှာ အဘယ်နည်း။ အသက်ဝင်ရောက်မှုဆိုသည်မှာ လူတစ်ယောက်၏ နေ့စဉ် အသက်တာ၊ သူ၏အပြုအမူများ၊ သူ၏ဘဝဦးတည်ရာနှင့် သူ၏လိုက်စားခြင်း ရည်မှန်းချက်ပန်းတိုင်တို့က ပြောင်းလဲခြင်းသွားခြင်း ဖြစ်သည်။ အတိတ်တွင် မိုက်မဲပြီး မသိနားမလည် ဖြစ်ခဲ့သော်လည်း၊ ဇာတိပကတိ၏ အတွေးအခေါ်များ၊ အယူအဆများနှင့် စိတ်ကူးအထင်များအတိုင်း အမြဲ ပြုမူခဲ့သော်လည်း ယခုတွင်မူ လူတစ်ဦးသည် ဘုရားသခင်၏ ဖော်ထုတ်ခြင်းများ၊ ရေလောင်းပေးခြင်းနှင့် ထောက်ပံ့ပေးခြင်းတို့မှတစ်ဆင့် ဘုရားသခင်၏ နှုတ်ကပတ်တော်များနှင့်အညီ သူပြုမူသင့်ကြောင်းကို နားလည်လာနိုင်သည်။ ထို့အပြင် ဤလူသည် မိမိ၏အမြင်ရှုထောင့်များနှင့် မိမိပြုမူနေထိုင်သည့် ပုံစံတို့နှင့်စပ်လျဉ်း၍၊ အသက်တာ၌ မိမိ၏ ဦးတည်ချက်နှင့် ရည်မှန်းချက်ပန်းတိုင်များနှင့်စပ်လျဉ်း၍ နေ့စဉ် အသက်တာတွင် ဘုရားနှုတ်ကပတ်တော်များ၏ ရလဒ်အနေဖြင့် ပုံသဏ္ဌာန် ပြောင်းလဲမှုကို ကြုံတွေ့ရပြီး ဖြစ်သည်။ ဤသည်မှာ အသက်ဝင်ရောက်မှုဖြစ်၏။ အသက်ဝင်ရောက်မှု၏ အခြေခံမှာ အဘယ်အရာဖြစ်သနည်း။ (ဘုရားသခင်၏ နှုတ်ကပတ်တော်များ ဖြစ်ပါသည်။) မှန်သည်။ အသက်ဝင်ရောက်မှုကို ဘုရားသခင်၏ နှုတ်ကပတ်တော်များနှင့် ခွဲခြားထား၍ မရနိုင်ပေ။ ယင်းကို သမ္မာတရားနှင့် ခွဲခြားထား၍ မရနိုင်ပေ။ ဘုရားသခင်ပြောသည့် နှုတ်ကပတ်တော်တိုင်းသည် သမ္မာတရားဖြစ်သည်။ အသက်ဝင်ရောက်မှုကို စွမ်းဆောင်ရရှိပြီးသည့် လူများတွင် မည်သည့်အရာက ပေါ်လွင်ထင်ရှားသနည်း။ (၎င်းတို့သည် အသက်ရှင်နေထိုင်ရန်အတွက် ဘုရားနှုတ်ကပတ်တော်များကို အမှီပြုနိုင်သည်။) မှန်သည်။ ၎င်းတို့သည် အသက်ရှင်ဖို့ ဘုရားသခင်၏ နှုတ်ကပတ်တော်များအပေါ် ကိုးစားနိုင်ကြသည်။ ၎င်းတို့၏ လုပ်ဆောင်ချက်များ၊ စကားများ၊ ပြဿနာများနှင့် ပတ်သက်သည့် အတွေးအခေါ်များ၊ ၎င်းတို့၏ အမြင်များ၊ ရပ်တည်ချက်များနှင့် ရှုထောင့်များ အားလုံးတို့သည် ဘုရားသခင်၏ နှုတ်ကပတ်တော်များနှင့် သမ္မာတရားတို့အပေါ်သာ မှီခိုထားလေသည်။ ဤသည်တို့မှာ အသက်ဝင်ရောက်မှုရယူပြီးခြင်း၏ သရုပ်သကန်များဖြစ်သည်။ ထို့ကြောင့် အသက်ဝင်ရောက်မှုသည် အဓိကအားဖြင့် မည်သည့်အရာနှင့် ချိတ်ဆက်နေသနည်း။ (ဘုရားနှုတ်ကပတ်တော်နှင့် ချိတ်ဆက်နေပါသည်။) ယင်းသည် ဘုရားနှုတ်ကပတ်တော်နှင့်လည်းကောင်း၊ သမ္မာတရားနှင့်လည်းကောင်း ချိတ်ဆက်နေ၏။ ဤသို့ဆိုလျှင် ယခု၌ အသက်ဝင်ရောက်မှုရှိသူတစ်ဦးကို သမ္မာတရား လိုက်စားသူအဖြစ်၊ သမ္မာတရားအား အမှန်တကယ် လိုက်စားသူကို အသက်ဝင်ရောက်မှုရှိသူအဖြစ် အဓိပ္ပာယ်သတ်မှတ်နိုင်သလော။ (သတ်မှတ်နိုင်ပါသည်။) အမှုအရာများကို ဤနည်းဖြင့် အဓိပ္ပာယ်သတ်မှတ်ခြင်း၏ ပန်းတိုင်မှာ အဘယ်နည်း။ ငါတို့၏ မိတ်သဟာယတွင် မည်သည့်ဦးတည်ချက်ကို ထားသင့်သနည်း။ (သမ္မာတရားအား လိုက်စားခြင်းကို ဦးတည်ချက်ထားသင့်သည်။) သမ္မာတရားအား လိုက်စားခြင်းသည် ယနေ့ ငါမိတ်သဟာယဖွဲ့လိုသည့် အဓိကအကြောင်းအရာ ဖြစ်သည်။ လက်ရှိအချိန်တွင် သင်တို့သည် အသက်ဝင်ရောက်မှုနှင့် သမ္မာတရားလိုက်စားခြင်းတို့ကြား ဆက်စပ်မှုကို လွန်စွာရှင်းလင်းခြင်း မရှိပေ။ ယင်းသည် သင်တို့အတွက် အလွန်ထင်ရှားမြင်သာခြင်းမရှိ။ ငါသည် အသက်ဝင်ရောက်မှုနှင့် စိတ်သဘောထားဆိုင်ရာ ပြောင်းလဲမှုများကို အစဉ် မိတ်သဟာယဖွဲ့နေပြီး ပေါလု၏ လမ်းကြောင်းကို စိစစ်နေသည်။ ဤအရာများအားလုံးကို အခြေခံသည့် အဓိကအကြောင်းအရာမှာ အဘယ်နည်း။ သမ္မာတရားအား လိုက်စားခြင်းဖြစ်သည်။ ပေါလုလိုက်လျှောက်ခဲ့သည့် လမ်းကြောင်းကို ငါစိစစ်သည်ဖြစ်စေ၊ ပေတရုလိုက်လျှောက်ခဲ့သည့် စုံလင်ခြင်းလမ်းကြောင်း အကြောင်းကို ပြောသည်ဖြစ်စေ၊ မည်သည့်အရာကို ငါပြောသည်ဖြစ်စေ အဆုံးတွင် မည်သည့်လမ်းကြောင်းမျိုးကို လူတိုင်းအား လိုက်လျှောက်စေခြင်းသည် ငါ၏ ပန်းတိုင်ဖြစ်သနည်း။ (သမ္မာတရားအား လိုက်စားခြင်း လမ်းကြောင်းဖြစ်သည်။) လူတို့သည် သမ္မာတရားကို လိုက်စားနိုင်သောအခါ၊ သမ္မာတရားစစ်မှန်မှုများအတွင်းသို့ ဝင်ရောက်နိုင်သောအခါ၊ ဘုရားနှုတ်ကပတ်တော်အတိုင်း အသက်ရှင်ပြီး ဘုရားသခင်၏ ရည်ရွယ်ချက်များကို နားလည်နိုင်သောအခါ၊ ဘုရားနှုတ်ကပတ်တော်၏ စည်းမျဉ်းများနှင့်အညီ အမှုအရာများကို လုပ်ဆောင်သောအခါ လူတို့ လိုက်စားသော ပန်းတိုင်များ၊ လူတို့လိုက်လျှောက်သော လမ်းကြောင်းများသည် မရှင်းလင်းသလော။ (ရှင်းလင်းပါသည်။) သမ္မာတရားအား လိုက်စားခြင်းသည် ဘုရားသခင်ကို လူတို့ ယုံကြည်သောအခါ၊ ၎င်းတို့၏ စိတ်သဘောထားပြောင်းလဲရန် ရှာဖွေသောအခါ၊ ကယ်တင်ခြင်းအား လိုက်စားသောအခါတွင် လူတို့အတွက် ရှောင်ရန် မဖြစ်နိုင်သော အကြောင်းအရာတစ်ခုဖြစ်သည်။ သမ္မာတရားအား လိုက်စားသူတို့သာ စစ်မှန်သောယုံကြည်သူများဖြစ်ပြီး ကယ်တင်ခြင်းကို ရယူနိုင်သည်။ လူအချို့သည် စိတ်ထက်သန်မှုရှိပြီး ဘုရားအတွက် အသုံးခံလိုစိတ်ရှိကြသည်။ သို့သော် ၎င်းတို့သည် သမ္မာတရားကို မလွဲမသွေ လိုက်စားသောသူများမဟုတ်ကြပေ။ လူတိုင်းက သမ္မာတရားကို လိုက်စားလိုစိတ် ရှိသော်လည်း လူအချို့က အစွမ်းအစနည်းသည်။ သဘောပေါက်နားလည်နိုင်စွမ်း ချို့တဲ့ပြီး သမ္မာတရားကို သဘောမပေါက်နိုင်ကြပေ။ လူအချို့တွင် ဝိညာဉ်ရေးရာ နားလည်သဘောပေါက်မှုမရှိ။ တရားဒေသနာများကို မည်သို့နားထောင်သည်ဖြစ်စေ လုံးဝနားမလည်ကြသကဲ့သို့ ဘုရားနှုတ်ကပတ်တော်ကို ဖတ်သည့်အခါတွင်လည်း နားမလည်ကြပေ။ ၎င်းတို့သည် အစဉ်သဖြင့် အကြောင်းအရာများကို လွဲချော်နေသော နည်းဖြင့် သဘောပေါက်နားလည်ကြပြီး စည်းမျဉ်းစည်းကမ်းများကို အသုံးချဖို့ ကြိုးစားသည်။ ဤသည်တို့မှာ ဝိညာဉ်ရေးရာ နားလည်သဘောပေါက်မှု မရှိသောသူများဖြစ်ကြသည်။ အသင်းတော်တွင် ဝိညာဉ်ရေးရာ နားလည်သဘောပေါက်မှု ရှိသူများရှိပြီး ဝိညာဉ်ရေးရာနားလည်သဘောပေါက်မှု မရှိသူများရှိသည်။ သဘောပေါက်နားလည်နိုင်စွမ်း ချို့တဲ့သော အစွမ်းအစ နည်းသောသူများရှိပြီး ဘုရားနှုတ်ကပတ်တော်အပေါ် ရှင်းလင်းစွာ သဘောပေါက်နားလည်ခြင်းရှိသည့် အစွမ်းအစကောင်းသူများရှိသည်။ သမ္မာတရား လိုက်စားသူများရှိပြီး မလိုက်စားသူများလည်းရှိသည်။ ဤမတူညီသော လူအမျိုးအစားများတွင် မတူညီသော အခြေအနေများနှင့် သရုပ်သကန်များရှိသည်။ ပြီးလျှင် သင်သည် ၎င်းတို့ကို ရှင်းလင်းစွာ ပိုင်းခြားသိမြင်နိုင်ရမည်။

ဝိညာဉ်ရေးရာ နားလည်သဘောပေါက်မှု မရှိသည့်လူများဖြစ်သော ပထမလူအမျိုးအစားအကြောင်းကို ဆွေးနွေးခြင်းအားဖြင့် စတင်ကြစို့။ ဥပမာအနေဖြင့် ငါတို့သည် သမ္မာတရား၏ သွင်ပြင်လက္ခဏာတစ်ခုကို မိတ်သဟာယပြုသည်။ ဤသမ္မာတရား၏ သွင်ပြင်လက္ခဏာနှင့် လူတို့၏ အခြေအနေများ၊ သဘောထားများ၊ ရည်ရွယ်ချက်များနှင့် သရုပ်သကန်များ အကြောင်းကို ငါတို့ မိတ်သဟာယဖွဲ့ပြီးနောက်တွင် ပြောခဲ့သည့်အရာကို နားမလည်သော၊ မိတ်သဟာယပြုခဲ့သည့်အရာအပေါ် နားမလည်သော၊ ဤအရာကို မိမိတို့ဖြင့် နှိုင်းယှဉ်ချိန်ဆ မကြည့်နိုင်သော၊ မိတ်သဟာယပြုခဲ့သည့် သမ္မာတရားက မိမိတို့၏ အပြုအမူနှင့်လည်းကောင်း၊ သရုပ်သကန်များနှင့်လည်းကောင်း၊ မိမိတို့၏ ဖောက်ပြန်ပျက်စီးသော စိတ်သဘောထားနှင့်လည်းကောင်း၊ မိမိတို့၏ သဘာဝအနှစ်သာရနှင့်လည်းကောင်း မည်သည့်ဆက်စပ်မှုရှိသည်ကို မသိသောသူအချို့ ရှိသည်။ ဤအရာသည် ၎င်းတို့အသက်တာတွင် ၎င်းတို့လိုက်စားသောအရာများနှင့် မည်သို့သက်ဆိုင်သည်ကိုဖြစ်စေ၊ ဤတရားဒေသနာအား အဘယ်ကြောင့်ဟောပြောရသည်ကိုဖြစ်စေ မသိကြပေ။ ယင်းမှ ၎င်းတို့နားလည်သမျှမှာ အယူဝါဒဖြစ်ပြီး ယင်းတွင်ရှိသော စည်းမျဉ်းစည်းကမ်းများကို အပိုဆောင်းပြီး ကောက်ချက်ချကြသည်။ တစ်စုံတစ်ယောက်က ၎င်းတို့ နားလည်သည့်အရာကို မေးသောအခါတွင် ၎င်းတို့က “ယနေ့တွင် အကြောင်းအရာများစွာကို မိတ်သဟာယဖွဲ့ခဲ့သော်လည်း အဓိကအချက်က တူညီသည်။ တစ်စုံတစ်ခုဖြစ်လျှင် ပို၍ဆုတောင်းဟု ဖြစ်သည်” ဟု ပြောသည်။ အခြားလူများက “ကျွန်ုပ်နားလည်သည်။ ဘုရားသခင်က လူတို့အား ကောင်းစေရန်၊ မကောင်းသောအရာများကို မပြုလုပ်ရန်၊ ကောင်းမှုများစွာကို ပြုလုပ်ရန် လုပ်ဆောင်သည်။ ဘုရားသခင်က ဤအရာကို နှစ်သက်သည်” ဟု ဆိုကြသည်။ “လူတို့သည် ဘုရားအတွက် မိမိကိုယ်ကို အသုံးခံရမည်၊ မိမိကိုယ်ကို များစွာပေးဆပ်ရမည်ဟု ဘုရားသခင်က လူတို့ကို ပြောနေသည်” ဟု ဆိုသော အခြားလူများလည်းရှိသည်။ ဘုရားနှုတ်ကပတ်တော်ကို ၎င်းတို့ နားလည်ပြီးဖြစ်သလော။ (နားမလည်သေးပါ။) ဤလူတို့အားလုံးက ဘုရားနှုတ်ကပတ်တော်များကို ၎င်းတို့နားလည်သည်ဟု ထင်ကြသည်။ သို့သော် ၎င်းတို့သည် အမှန်တကယ်တွင် အမှောင်ထဲ၌ စမ်းတဝါးဝါးဖြစ်နေကြပြီး ဘုရားနှုတ်ကပတ်တော်ထဲမှ ဝါကျတစ်ကြောင်းအပေါ်ကိုသာ တွယ်ကပ်နေသည်။ ၎င်းတို့၏ နားလည်မှုသည် အလွန် တစ်ဖက်သတ်ဆန်လွန်းသည်။ ဘုရားသခင်က ရည်ရွယ်သည့်အရာကို ၎င်းတို့ လုံးဝ နားမလည်ကြပေ။ ဘုရားနှုတ်ကပတ်တော်ကို နားမလည်သော လူတို့အနေဖြင့် ဘုရားသခင်က မည်မျှပြောသည်ဖြစ်စေ ၎င်းတို့မြင်သမျှမှာ စည်းမျဉ်းစည်းကမ်းများ၊ အယူဝါဒ၊ သီအိုရီတစ်မျိုး၊ အမြင်ရှုထောင့်တစ်မျိုး၊ သို့မဟုတ် အဆိုတစ်မျိုးသာ ဖြစ်သည်။ လက်တွေ့လုပ်ဆောင်ခြင်းနှင့် ပတ်သက်လျှင် ၎င်းတို့သည် မည်သို့လက်တွေ့လုပ်ဆောင်သနည်း။ ဥပမာအနေဖြင့် ဘုရားသခင်အား ကျိုးနွံနာခံခြင်းအကြောင်း သမ္မာတရားကို ငါတို့ပြောသောအခါ ၎င်းတို့က နားထောင်ပြီးနောက်တွင် “ဘုရားသခင်က ငါ့အား လုပ်ဆောင်ရန် ပြောသည့်အရာမှန်သမျှကို ငါလုပ်မည်။ ဤသည်မှာ သူ၏ နှုတ်ကပတ်တော်များကို နားထောင်ပြီး သူ့အပေါ် ကျိုးနွံနာခံသည့် အဓိပ္ပာယ်ဖြစ်သည်” ဟု ဆိုကြသည်။ ဤသည်မှာ အလွန့်အလွန် ရိုးရှင်းသယောင်ပြုထားခြင်းမဟုတ်လော။ ၎င်းတို့နားလည်သည်မှာ ယင်းတို့သာဖြစ်သည်။ ၎င်းတို့သည် ဘုရားသခင်ဘက်တွင် မည်သို့ရပ်ပြီး အသင်းတော်အလုပ်အား ကာကွယ်ရမည်ကို နားလည်ဖို့ရန် မဆိုထားနှင့်၊ ဘုရားနှုတ်ကပတ်တော်အား မည်သည့်နည်းလမ်းဖြင့် လက်တွေ့လုပ်ဆောင်ခြင်းသည် ဘုရားအပေါ် စစ်မှန်သော ကျိုးနွံနာခံခြင်း ဖြစ်သည်ကိုလည်းကောင်း၊ ဘုရားသခင်၏ ရည်ရွယ်ချက်များကို မည်သို့ရှာဖွေပြီး ဘုရားသခင်အပေါ် ကျိုးနွံနာခံခြင်းအား မည်သို့ရရှိရမည်ကိုလည်းကောင်း၊ သန့်ရှင်းသောဝိညာဉ်တော်၏ လမ်းပြမှုကို မည်သို့ လိုက်လျှောက်ရမည်ကိုလည်းကောင်း၊ ဘုရားနှုတ်ကပတ်တော်နှင့် အညီ သမ္မာတရားအား မည်သို့လက်တွေ့လုပ်ဆောင်ရမည်ကိုလည်းကောင်း နားမလည်ကြပေ။ တစ်စုံတစ်ခုက ဘုရားသခင်ကို ကျိုးနွံနာခံခြင်းအတွက် သော့ချက်ဖြစ်သော သမ္မာတရားများနှင့် သက်ဆိုင်လေလေ၊ ၎င်းတို့က ယင်းကို သဘောပေါက်နိုင်စွမ်းမရှိလေဖြစ်သည်။ မည်သို့လုပ်ရမည်ဆိုသည်ကို ၎င်းတို့သိသမျှမှာ စည်းမျဉ်းစည်းကမ်းများအား လိုက်နာခြင်းပင်ဖြစ်သည်။ ဤသည်မှာ ဝိညာဉ်ရေးရာ နားလည်သဘောပေါက်မှုမရှိခြင်းကို ဆိုလိုသည်။ ဝိညာဉ်ရေးရာ နားလည်သဘောပေါက်မှု မရှိသောသူတို့သည် စည်းမျဉ်းစည်းကမ်းများအား လိုက်နာခြင်းနှင့် ငြီးငွေ့ဖွယ်ဖြစ်သော ၎င်းတို့၏ ကိုယ်ပိုင်စဉ်းစားပုံထဲတွင် ပိတ်မိနေခြင်းအပြင် အသိခေါက်ခက် အဝင်နက်ကြလေသည်။ ဝိညာဉ်ရေးရာ နားလည်သဘောပေါက်မှုမရှိသော လူတို့၏ အဓိဖော်ပြချက်မှာ အဘယ်နည်း။ ယင်းသည် စည်းမျဉ်းစည်းကမ်းများကို လိုက်လျှောက်ခြင်းဖြစ်သည်။ မကြာခဏပင် ၎င်းတို့သည် ဝါကျတစ်ကြောင်း၊ သို့မဟုတ် ဖြစ်ရပ်တစ်ခုကို ယူပြီး လိုက်နာဖို့ စည်းမျဉ်းစည်းကမ်းတစ်ခု၊ သို့မဟုတ် နည်းလမ်းတစ်ခုအဖြစ် သတ်မှတ်ကြသည်။ သို့ဆိုလျှင် ဤလူများသည် သမ္မာတရားကို တစ်ပုံစံတည်း သဘောထားသလော။ (သဘောထားသည်။) ဝိညာဉ်ရေးရာ နားလည်သဘောပေါက်မှုမရှိသူများသည် သင်ယနေ့ မိတ်သဟာယပြုခဲ့သည့် သမ္မာတရား၏ သရုပ်သကန်များထဲမှ ရှုထောင့်တစ်ခုကို မှတ်မိကြသည်။ ထိုစကားများနှင့် အပြုအမူများ တစ်ခုမကျန်ကို မပျက်မကွက် အမှတ်ရလျက် လက်တွေ့လုပ်ဆောင်သင့်သည့် စည်းမျဉ်းစည်းကမ်းများအဖြစ် ၎င်းတို့က သတ်မှတ်လိုက်ကြသည်။ ထို့နောက် နောက်တစ်ကြိမ်တွင် ကွဲပြားခြားနားသည့် အခြေအနေတစ်ခုကို ကြုံတွေ့ရသည့်အခါ မည်သူကမျှ မိတ်သဟာယမပြုလျှင် ၎င်းတို့သည် ယခင် နည်းစနစ်များနှင့် စည်းမျဉ်းစည်းကမ်းများကို လက်လွတ်စပယ် ကျင့်သုံးကြလိမ့်မည် ဖြစ်ပြီး ယင်းတို့ကို လက်တွေ့လုပ်ဆောင်ကြလိမ့်မည်။ ဤသည်မှာ ဝိညာဉ်ရေးရာ နားလည်သဘောပေါက်မှုမရှိသည့်လူများ၏ ခိုင်လုံသည့် သရုပ်သကန် တစ်ခုဖြစ်သည်။ ထိုသို့သော လူများသည် စည်းမျဉ်းစည်းကမ်းများကို လိုကလျှောက်နေစဉ် မည်သို့ခံစားရသနည်း။ (ပင်ပန်းပါသည်။) ၎င်းတို့မပင်ပန်းပေ။ ၎င်းတို့ပင်ပန်းလျှင် ရပ်လိုက်ကြမည်ပင်။ ၎င်းတို့က မိမိတို့အနေဖြင့် သမ္မာတရားကို လက်တွေ့လုပ်ဆောင်နေခြင်းဖြစ်သည်ဟု ခံစားကြရသည်။ စည်းမျဉ်းစည်ကမ်းတစ်စုံကို လိုက်လျှောက်နေသည်ဟု ၎င်းတို့မခံစားရသကဲ့သို့ ဝိညာဉ်ရေးရာ နားလည်သဘောပေါက်မှုမရှိဟုလည်း ၎င်းတို့ မခံစားကြရပေ။ ၎င်းတို့သည် သမ္မာတရားကို နားမလည်သေးဟုသော်လည်းကောင်း၊ သမ္မာတရား အခြေခံသဘောတရားများက မည်သည့်အရာ ဖြစ်သည်ကို နားလည်ခြင်း မရှိဟုသော်လည်းကောင်း သာ၍ မခံစားရပေ။ ထိုအစား ၎င်းတို့က သမ္မာတရား၏ လက်တွေ့ကျသည့်ဘက်အပြင် သမ္မာတရား၏ ထိုသွင်ပြင်လက္ခဏာနှင့်သက်ဆိုင်သည့် အခြေခံသဘောတရားများကိုပါ နားလည်ပြီးဖြစ်သည်ဟု ထင်မြင်ကြသည်။ တစ်ချိန်တည်းမှာပင် ၎င်းတို့သည် ဘုရားသခင်၏ ရည်ရွယ်ချက်များကို ၎င်းတို့နားလည်ပြီးဖြစ်ကြောင်းနှင့် ၎င်းတို့၏ စည်းမျဉ်းစည်ကမ်းများအတိုင်း ပြုမူပါက ၎င်းတို့သည် သမ္မာတရား စစ်မှန်မှုထဲသို့ ဝင်ရောက်ပြီးဖြစ်လိမ့်မည်ဖြစ်ကြောင်း၊ ဘုရားသခင်၏ ရည်ရွယ်ချက်များကို အထမြောက်စေပြီး သမ္မာတရားကို လက်တွေ့လုပ်ဆောင်လိမ့်မည်ဖြစ်ကြောင်း တွေးထင်ကြသည်။ ဤသည်မှာ ဝိညာဉ်ရေးရာ နားလည်သဘောပေါက်မှု မရှိသောလူများ စဉ်းစားသည့်အရာ မဟုတ်လော။ (ဟုတ်ပါသည်။) ဤစဉ်းစားပုံသည် ဘုရားသခင်က သတ်မှတ်သော စံနှုန်းများနှင့် ညီသလော။ စည်းမျဉ်းစည်းကမ်းများကို လိုက်နာခြင်းဖြင့် လက်တွေ့လုပ်ဆောင်ခြင်းသည် အမှန်တကယ်ပင် သမ္မာတရားအား လိုက်စားခြင်း၏ သရုပ်သကန် ဟုတ်သလော။ (မဟုတ်ပါ။) အဘယ်ကြောင့်နည်း။ (အဘယ်ကြောင့်ဆိုသော် တစ်စုံတစ်ခု ဖြစ်ပျက်သည့်အခါ သမ္မာတရားကို ၎င်းတို့ မရှာဖွေကြဘဲ အကြောင်းအရာကို ချင့်ချိန်စဉ်းစားရန် အားမထုတ်သောကြောင့် ဖြစ်သည်။ ၎င်းတို့သည် အမှုအရာများအား ၎င်းတို့ အစဉ် လုပ်ဆောင်သည့်ပုံစံကိုသာ ခေါင်းမာစွာ ဖက်တွယ်ထားကြသည်။) ဤသည်မှာ ဝိညာဉ်ရေးရာ နားလည်သဘောပေါက်မှု မရှိသောလူအမျိုးအစားများ လုပ်ဆောင်သည့်ပုံစံဖြစ်သည်။ ၎င်းတို့သည် နည်းလမ်းဟောင်းများကို ခေါင်းမာစွာ ဖက်တွယ်ထားသည်။ ပျင်းရိသည်။ အမှုအရာများ ဖြစ်ပျက်သောအခါ သမ္မာတရားကို မရှာဖွေဘဲ အမှုအရာများအကြောင်းကို မစဉ်းစားပေ၊ သို့မဟုတ် မစူးစမ်းပေ။ ပြီးလျှင် ၎င်းတို့က စူးစမ်းလျှင်ပင် မည်သည့်အရာကို ဆိုလိုသည်ကို ၎င်းတို့ နားလည်နိုင်သလော။ (နားမလည်နိုင်ပါ။) အဘယ်ကြောင့် နားမလည်သနည်း။ (ဝိညာဉ်ရေးရာ နားလည်သဘောပေါက်မှုမရှိသောကြောင့် ဖြစ်သည်။) မှန်သည်။ အခြေခံအချက်မှာ ဤသို့သောလူများသည် ဝိညာဉ်ရေးရာ နားလည်သဘောပေါက်မှု မရှိခြင်းဖြစ်ပြီး သမ္မာတရားကို လုံးဝ နားလည်မည်မဟုတ်ပေ။

အမှန်တကယ်တွင် ဝိညာဉ်ရေးရာ နားလည်သဘောပေါက်မှုမရှိသော လူတို့သည် ၎င်းတို၏ စိတ်နှလုံးတွင် သမ္မာတရားကို လိုက်စားလိုစိတ်ရှိသည်။ သို့သော် မှားသောနည်းလမ်းဖြင့် လုပ်ဆောင်ကြသည်။ အတိအကျဆိုရလျှင် ၎င်းတို့သည် အဓိကအားဖြင့် စည်းမျဉ်းစည်းကမ်းများအား လိုက်နာခြင်း၊ ဘောင်ထဲတွင် စဉ်းစားပြုမူခြင်း၊ အယူဝါဒကို လိုက်နာခြင်း၊ သို့မဟုတ် အမှုအရာများကို လုပ်ဆောင်ရာတွင် အခြားလူများ၏ နည်းလမ်းများကို အသုံးပြုခြင်း၊ ၎င်းတို့၏ စကားများကို အတုခိုးခြင်းတို့ကို အားကိုးကြသည်။ ဤသို့ဆိုလျှင် ဤလူအမျိုးအစား၏ အနှစ်သာရမှာ အဘယ်နည်း။ စည်းမျဉ်းစည်းကမ်းများအား လိုက်နာခြင်းကို သမ္မာတရား လိုက်စားခြင်းအဖြစ် အဘယ်ကြောင့် မှတ်ယူကြသနည်း။ ဤသို့ လက်တွေ့လုပ်ဆောင်ခြင်းသည် သမ္မာတရားအား လိုက်စားခြင်းဖြစ်သည်ဟု ထင်ကြသနည်း။ အဘယ်ကြောင့် ဤပြဿနာ ဖြစ်ပေါ်သနည်း။ ဤတွင် အကြောင်းရင်းတစ်ခုရှိသည်။ သင်တို့ မြင်နိုင်သလော။ (၎င်းတို့သည် ၎င်းတို့၏ အမြင်များ၊ အယူအဆများ၊ စိတ်ကူးထင်မြင်မှုများကို သမ္မာတရားအဖြစ် မှတ်ယူကြသည်။ ဘုရားနှုတ်ကပတ်တော်ကို နားမလည်ပေ။ ပြီးလျှင် ဘုရားသခင်၏ ရည်ရွယ်ချက်များကို အမှန်တကယ် သဘောမပေါက်ကြပေ။) ဤသည်မှာ တစ်စိတ်တစ်ပိုင်းဖြစ်သည်။ အခြားမည်သည့်အရာ ရှိသေးသနည်း။ (၎င်းတို့သည် မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်သည်။ တစ်စုံတစ်ခု ဖြစ်ပျက်သောအခါ သမ္မာတရားကို မရှာဖွေကြ။ ၎င်းတို့က မှန်သည်ဟုထင်သောအရာများကို သမ္မာတရားအဖြစ် မှတ်ယူကြသည်။) ဤသည်မှာ ဝိညာဉ်ရေးရာ နားလည်သဘောပေါက်မှုမရှိသောလူများ၏ ပုံစံဖြစ်သည်။ သို့သော် ဤသည်မှာ ပြဿနာ၏ အရင်းအမြစ်မဟုတ်။ ဤသို့သောလူတို့ကို ဤပုံစံပြစေသည်မှာ မည်သည့်အရာဖြစ်သနည်း။ ဝိညာဉ်ရေးရာ နားလည်သဘောပေါက်မှုမရှိဘဲ စည်းမျဉ်းစည်းကမ်းများကို လိုက်နာလိုသူတို့သည် တရားဒေသနာများကို အလွန်အလေးအနက် နားထောင်သည်။ အထူးသဖြင့် ၎င်းတို့၏ လက်တွေ့လုပ်ဆောင်မှုနှင့် သက်ဆိုင်သည့်အခါတွင် ဖြစ်သည်။ ဥပမာအနေဖြင့် ၎င်းတို့၏ တာဝန်များကို မည်သို့ ထမ်းဆောင်ရမည်ဆိုသည်နှင့် ၎င်းတို့လုပ်ဆောင်သင့်သည့် အရာများကို မည်သို့ကောင်းစွာ လုပ်ဆောင်သင့်သည်တို့ ဖြစ်သည်။ ၎င်းတို့သည် အာရုံစိုက်သည်။ သို့သော် အဓိကပြဿနာမှာ ၎င်းတို့သည် ၎င်းတို့၏ အခြေအနေနှင့် တရားဒေသနာတွင် ၎င်းတို့ကြားသည့်အရာကြား၌ နှိုင်းယှဉ်မှုများ မပြုလုပ်နိုင်ပေ။ ဥပမာအနေဖြင့် လူတို့၏ ပုန်ကန်မှုအကြောင်းပြောလျှင် ၎င်းတို့က နားထောင်ပြီးနောက် “ပုန်ကန်ခြင်း ဟူသလော။ ငါကတော့ ပုန်ကန်မည်မဟုတ်။ လူတို့ကို ပုန်ကန်ခွင့်မပြုလျှင် နောင်တွင် ဤသို့သော အခြေအနေကို ငါကြုံရလျှင် ထမပြောသင့်ပေ။ သည်းခံ၍သာ နေသင့်ပြီး လူတို့၏လေသံနှင့် မျက်နှာအမူအရာတို့ကို အကဲခတ်သင့်သည်။ ငါ့အနီးတွင် ရှိသောလူများ ပြောသည့်အရာနှင့် ၎င်းတို့ လုပ်ဆောင်သည့်ပုံစံကို ငါကြည့်ပြီး ထိုအတိုင်းလိုက်လုပ်မည်။ ဤသို့ဆိုလျှင် ငါသည် ပုန်ကန်လိမ့်မည်မဟုတ်။ မှန်သလော” ဟူ၍ စဉ်းစားသည်။ တရားဒေသနာတစ်ခုကို ၎င်းတို့ နားထောင်ပြီးနောက်တွင် ၎င်းတို့ ချမှတ်သည် ကောက်ချက်က ၎င်းတို့၏ ကိုယ်ပိုင် အတွေးအခေါ်ပုံစံနှင့် လက်တွေ့လုပ်ဆောင်မှုနည်းလမ်းအချို့သာ ဖြစ်သည်။ တရားဒေသနာတွင် ဖော်ထုတ်ခဲ့သော အခြေအနေများအားလုံးအပေါ် တုံ့ပြန်မှုမရှိဘဲ ၎င်းတို့ဘာသာ နှိုင်းယှဉ်မှုများ မပြုလုပ်နိုင်ပေ။ ၎င်းတို့၏ စိတ်များသည် မပြတ်သားကြပေ။ “မပြတ်သား” ဆိုသည်မှာ မည်သည့်အရာကို ငါဆိုလိုသနည်း။ တရားဒေသနာက အမှန်တကယ်တွင် မည်သည့်အရာအကြောင်း ပြောဆိုနေသည်ကို ၎င်းတို့ မသိပေ။ စိတ်ထဲတွင် ၎င်းတို့က “မည်သည့်အရာကို မိတ်သဟာယ ပြုနေသနည်း။ ပို၍ ရိုးရှင်းသော ဝေါဟာရများကို အဘယ်ကြောင့် မသုံးသနည်း။ ယနေ့တွင် ဤကိစ္စကို မိတ်သဟာယပြုပြီး မနက်ဖြန်တွင် အခြားကိစ္စတစ်ခုခုဖြစ်မည်” ဟု တွေးကြသည်။ ၎င်းတို့၏ အမြင်ရှုထောင့်၌ သမ္မာတရားအား လက်တွေ့လုပ်ဆောင်ခြင်းက လွယ်ကူသည်။ မိမိကို လုပ်ဆောင်ရန် ပြောသည့်အတိုင်းသာ လုပ်ဆောင်ခြင်း ဖြစ်သည်။ တရားဒေသနာတွင် ဖော်ထုတ်ပြသော အခြေအနေများနှင့် ဖောက်ပြန်ပျက်စီးသော စိတ်သဘောထားများအားလုံးနှင့်ပတ်သက်လျှင် ၎င်းတို့သည် ယင်းတို့နှင့် မိမိတို့ကိုယ်ကို မနှိုင်းယှဉ်ကြည့်နိုင်ပေ။ အသက်ဝင်ရောက်မှုဖြစ်စဉ်အတွင်းတွင် အခြေအနေတစ်မျိုးစီ၌ လူတို့က မည်သည့်အတွေးများ၊ အယူအဆများ၊ အမျိုးမျိုးသော ဖောက်ပြန်ပျက်စီးသည့် စိတ်သဘောထားများအား ထုတ်ဖော်ပြသည်ဆိုသည်နှင့်ပတ်သက်သောအခါတွင် ၎င်းတို့က ဇဝေဇဝါဖြစ်ပြီး အဖြေမရှိပေ။ ၎င်းတို့သည် အသေးစိတ်အချက်အလက်များအတွင်း ခွဲခြားသိမြင်နိုင်ခြင်းမရှိသကဲ့သို့ မိမိတို့နှင့် နှိုင်းယှဉ်ချက်များ မပြုလုပ်နိုင်ပေ။ မိမိတို့နှင့် နှိုင်းယှဉ်ချက်များ မပြုလုပ်နိုင်သည့်သူများသည် သမ္မာတရားကို နားထောင်ပြီးသောအခါတွင် မည်သို့ ခံစားရသနည်း။ (ယင်းသည် အခြားလူများအကြောင်းပြောနေခြင်းဖြစ်ပြီး ၎င်းတို့ကိုယ်တိုင်နှင့် သက်ဆိုင်ခြင်းမရှိဟု ထင်ကြသည်။) မှန်သည်။ ဤသည်မှာ အဓိက လက္ခဏာတစ်ခုဖြစ်သည်။ ၎င်းတို့သည် မိမိတို့နှင့် နှိုင်းယှဉ်ချက်များ မပြုလုပ်နိုင်ပေ။ ၎င်းတို့က လူတို့၏ ဖောက်ပြန်ပျက်စီးသော အခြေအနေများအား ဖော်ထုတ်သောစကားများကို မြင်သောအခါ ဤသည်မှာ အခြားလူများအကြောင်း ပြောနေခြင်းသာဖြစ်သည်ဟု ၎င်းတို့က ထင်ကြသည်။ လူတို့တွင်ရှိသော သာမန်ပြဿနာများ၊ သို့မဟုတ် အဖြစ်များသော ပြဿနာများကို ဖော်ထုတ်သောအခါတွင် ၎င်းတို့က ဝန်ခံနိုင်သော်လည်း ဖောက်ပြန်ပျက်စီးသော စိတ်သဘောထားများ၊ သို့မဟုတ် လူတို့၏ အနှစ်သာရများနှင့် သက်ဆိုင်သောအခါ ၎င်းတို့က တိကျပြတ်သားစွာ လက်မခံပေ။ မည်သည့်အခြေအနေတွင်မဆို ၎င်းတို့ ဝန်ခံမည်မဟုတ်။ ဤသည်မှာ ဝန်ခံခြင်းအားဖြင့် ၎င်းတို့သည် ရှုတ်ချခံရမည့်သဘော ဖြစ်သကဲ့သို့ ဖြစ်သည်။ ဤသည်မှာ ဝိညာဉ်ရေးရာ နားလည်သဘောပေါက်မှု မရှိသောလူများအားလုံး၌ ရှိလေ့ရှိသော ပြဿနာဖြစ်သည်။ ၎င်းတို့သည် လူတို့တွင်ရှိသော အခြေအနေနှင့် သရုပ်သကန်တိုင်းအား ဘုရားသခင်က ဖော်ထုတ်ခြင်းကိုလည်းကောင်း၊ ၎င်းတို့၏ သဘာဝအနှစ်သာရက သူ့ဘာသာ ထုတ်ဖော်ပြသည့် နည်းလမ်းတိုင်းကိုလည်းကောင်း ရင်ဆိုင်ရသောအခါတွင် ယင်းတို့ရှိ မည်သည့်အရာကိုမျှ လက်မခံသကဲ့သို့ ယင်းတို့ဖြင့် မိမိတို့ကိုယ်ကို နှိုင်းယှဉ်ချိန်ဆမကြည့်၊ သို့မဟုတ် ဆင်ခြင်သုံးသပ်မကြည့်ပေ။ ထိုအစား ၎င်းတို့သည် ဤစကားများနှင့် ပြဿနာများကို မကြာခဏ ယူပြီး အခြားလူများအပေါ် လွှဲချကာ ၎င်းတို့ကိုယ်တိုင်နှင့် သက်ဆိုင်ခြင်းမရှိဟု ထင်ကြသည်။ ဤသို့သောလူတို့သည် သမ္မာတရားကို လက်မခံရုံသာမက ၎င်းတို့၌ သာမန်အတွေးဖြစ်စဉ်များလည်းမရှိပေ။ ၎င်းတို့၏ စကားများသည် တိမ်းရှောင်မှုရှိပြီး ဝေ့ဝိုက်သည်။ ၎င်းတို့ဖြေသည့် မေးခွန်းသည် သင်မေးသည့် မေးခွန်းမဟုတ်ပေ။ ဥပမာအနေဖြင့် ၎င်းတို့စားပြီးပြီလောဟု သင်မေးလျှင် ၎င်းတို့က ရေကို မလိုချင်ပါဟု ပြောသည်။ ၎င်းတို့ အိပ်ချင်နေသလောဟု သင်က မေးလျှင် ၎င်းတို့က ရေဆာခြင်းမရှိဟု ပြောသည်။ ၎င်းတို့သည် ဤမပြတ်သားသော အခြေအနေမျိုးနှင့် ရောထွေးနေသော စိတ်အခြေအနေအတွင်းတွင် ရှိနေသည်။ ဤသည်မှာ ဝိညာဉ်ရေးရာ နားလည်သဘောပေါက်မှု မရှိသောလူများက မိမိတို့ကိုယ်ကို ပြသည့်ပုံစံဖြစ်သည်။ အသင်းတော်တိုင်းတွင် ဝိညာဉ်ရေးရာ နားလည်သဘောပေါက်မှု မရှိသောသူများရှိကြသည်။ ၎င်းတို့အချင်းချင်းတွင် တူညီသော ပြဿနာများ ရှိကြသော်လည်း မသိမသာ ခြားနားမှုများလည်းရှိသည်။ ဝိညာဉ်ရေးရာ နားလည်သဘောပေါက်မှုလုံးဝ ကင်းမဲ့သောလူတို့ရှိကြသလော။ (ရှိပါသည်။) ဘုရားသခင်ကို ယုံကြည်ပြီးဖြစ်သည်မှာ သုံးနှစ်မပြည့်သေးသော လူတို့သည် ဘုရားသခင်အားယုံကြည်ခြင်း၊ အသက်ဝင်ရောက်မှု၊ သမ္မာတရားအား လိုက်စားခြင်း၊ ၎င်းတို့၏ စိတ်သဘောထားများ ပြောင်းလဲခြင်းနှင့် စုံလင်အောင်ပြုခြင်းအား လိုက်စားခြင်းတို့ကဲ့သို့သော အမှုကိစ္စများအပေါ်တွင် အလွန် ဇဝေဇဝါဖြစ်ကြသည်။ ၎င်းတို့သည် မိမိတို့တာဝန်ကို ထမ်းဆောင်ရန်အတွက် စိတ်ထက်သန်မှုအပေါ်ကိုသာ အမှီပြုပြီး ဘုရားအတွက် ဟိုဟိုဒီဒီလုပ်ဆောင်ကြကာ အားစိုက်ထုတ်ပြီး အလုပ်လုပ်ပေးသည့် အခြေအနေတွင် ရှိကြသည်။ အသက်ဝင်ရောက်မှုနှင့် သက်ဆိုင်သည့် အမှုကိစ္စများကို နားမလည်ကြပေ။ ပြီးလျှင် အသက်ဝင်ရောက်မှုနှင့် သမ္မာတရားလိုက်စားခြင်းနှင့်ပတ်သက်၍ မည်သည့်အယူအဆမျှ လုံးဝမရှိပေ။ ၎င်းတို့သည် အပြင်ပန်းတွင်သာ အမှုအရာများကို လုပ်ဆောင်လိုကြပြီး ထိုအရာကို လုပ်ဆောင်ရန် စိတ်ထက်သန်မှုကို အမှီပြုကြသည်။ ဤသည်တို့မှာ ဝိညာဉ်ရေးရာ နားလည်သဘောပေါက်မှု လုံးဝ ကင်းမဲ့သည့် လူများဖြစ်ကြသည်။ ဤအခြေအနေတွင် ဝိညာဉ်ရေးရာ နားလည်သဘောပေါက်မှုလုံးဝ ကင်းမဲ့သည့် သူတစ်ယောက်ကို သမ္မာတရားအား မလိုက်စားသော သူတစ်ယောက်အဖြစ် သတ်မှတ်နိုင်သလော။ (မသတ်မှတ်နိုင်ပါ။) ၎င်းတို့သည် ဘုရားသခင်အား ကောင်းစွာ ကြာရှည်သောအချိန်အထိ မယုံကြည်ရသေးသောကြောင့် သတ်မှတ်၍ မရနိုင်သေးပေ။ ၎င်းတို့သည် စိတ်ထက်သန်သော အခြေအနေတွင် ရှိနေဆဲ ဖြစ်သောကြောင့် ၎င်းတို့သည် ဘုရားသခင်၏ စီမံခန့်ခွဲမှုအစီအစဉ်၏ ရည်ရွယ်ချက်များ၊ ကယ်တင်ခြင်းဆီသို့ လူတို့၏ လမ်းကြောင်း၊ သို့မဟုတ် လူအမျိုးအစားတစ်ခုချင်းစီက လိုက်လျှောက်သော မတူညီသော လမ်းကြောင်းများတို့နှင့်ပတ်သက်ပြီး မည်သည့်အရာကိုမျှ နားမလည်ပေ။ ထို့ကြောင့် ၎င်းတို့၏ ဝိညာဉ်ရေးရာ နားလည်သဘောပေါက်မှု ကင်းမဲ့ခြင်းသည် ခွင့်လွှတ်၍ ရနိုင်သည်။ ဤသည်မှာ ပုံမှန်ဖြစ်သောအရာတစ်ခု ဖြစ်သည်။ သို့ရာတွင် အသက်ဝင်ရောက်မှုက မည်သည့်အရာဖြစ်သည်ကို နားလည်ပြီးဖြစ်သောသူများ၊ အသက်ဝင်ရောက်မှုနှင့်လည်းကောင်း၊ စိတ်သဘောထားများ ပြောင်းလဲမှုနှင့်လည်းကောင်း သက်ဆိုင်သော သမ္မာတရားအားလုံးနှင့် စတင်သိကျွမ်းပြီးသားဖြစ်သောသူများနှင့်ပတ်သက်လျှင် ၎င်းတို့အထဲ၌ ဝိညာဉ်ရေးရာနားလည်သဘောပေါက်မှု လုံးဝ ကင်းမဲ့သောသူ တစ်ဦးတလေရှိသလော။ (ရှိပါသည်။) ရှိပါသေးသည်။ ဝိညာဉ်ရေးရာ နားလည်သဘောပေါက်မှု လုံးဝ ကင်းမဲ့သူတစ်ဦးက သူ၏ စိတ်နှလုံး၌ သမ္မာတရားအား လိုက်စားလိုစိတ်ရှိလျှင်ပင် ယင်းကို မရရှိနိုင်ပေ။ ထို့ကြောင့် ဝိညာဉ်ရေးရာ နားလည်သဘောပေါက်မှု လုံးဝ ကင်းမဲ့သူတို့သည် သမ္မာတရားအား လိုက်စားသူများ လုံးဝမဖြစ်နိုင်ဟုလည်းကောင်း၊ ၎င်းတို့၏ သရုပ်သကန်များသည် သမ္မာတရားအားလိုက်စားသူတစ်ဦး၏ သရုပ်သကန်များဖြစ်မည်ဆိုသည်မှာ လုံးဝ မဖြစ်နိုင်ဟုလည်းကောင်း အသေအချာပင် ဆိုနိုင်သည်။

ဝိညာဉ်ရေးရာ နားလည်သဘောပေါက်မှုရှိသောသူများနှင့် ဝိညာဉ်ရေးရာ နားလည်သဘောပေါက်မှု မရှိသောသူများက မိမိတို့ကိုယ်ကို ပေါ်လွင်စေသည့် မတူညီသည့်ပုံစံများမှာ အဘယ်နည်း။ ဝိညာဉ်ရေးရာ နားလည်မှု မရှိသောသူများသည် အခြေခံအားဖြင့် ဘုရားသခင် မိတ်သဟာယဖွဲ့သည့် သမ္မာတရားများနှင့် ဘုရားနှုတ်ကပတ်တော်များ၏ အခြေအနေ၊ ဆက်စပ်အကြောင်းအရာ၊ ညွှန်ပြချက်များကိုပါ သတိမမူမိဘဲ မသိနားမလည်ကြပေ။ ပြီးလျှင် ၎င်းတို့သည် ယင်းတို့ဖြင့် မိမိတို့ကိုယ်ကို နှိုင်းယှဉ်မကြည့်နိုင်ပေ။ ဝိညာဉ်ရေးရာ နားလည်မှုရှိသူများသည် အတိအကျပင် ဆန့်ကျင်ဘက်ဖြစ်သည်။ ဥပမာအနေဖြင့် လူတို့၏ ပုန်ကုန်မှုကိုလည်းကောင်း၊ ပုန်ကန်မှုအတွင်းတွင် စိတ်နှလုံးခိုင်မာမှု၊ တစ်ကိုယ်ကောင်းဆန်မှု၊ ခေါင်းမာသော မိုက်မဲမှုတို့အပြင် ဘုရားသခင်နှင့်ပတ်သက်ပြီး နားလည်မှုလွဲခြင်းများ၊ ဘုရားသခင်အပေါ် ခုခံခြင်း၊ ဆန့်ကျင်ခြင်းတို့ကိုလည်းကောင်း ငါ မိတ်သဟာယဖွဲ့လျှင်၊ ဤအကြောင်းအရာနှင့်သက်ဆိုင်သည့် အခြေအနေများ အကြောင်းကို ငါပြောသောအခါ ဥပမာတစ်ခုကို ငါပေးသည်ဖြစ်စေ၊ သမ္မာတရား၏ သွင်ပြင်လက္ခဏာတစ်ခုကို ပြောသည်ဖြစ်စေ၊ သင့်စိတ်နှလုံးတွင် တည်ရှိသော အခြေအနေတစ်ခုကို အကျဉ်းချုံး ပြောသည်ဖြစ်စေ၊ သို့မဟုတ် သမ္မာတရားစည်းမျဉ်းများနှင့် သက်ဆိုင်သည့် အကြောင်းအရာများကို မိတ်သဟာယဖွဲ့သည်ဖြစ်စေ သင်က သင်ကြားသည့်အရာကို အမှန်တကယ် နားလည်လျှင် သင်သည် ဝိညာဉ်ရေးရာ နားလည်မှု ရှိသောသူတစ်ယောက်ဖြစ်သည်။ သင် ကြားသည့်အရာကို နားလည်ပြီး လက်တွေ့လုပ်ဆောင်နိုင်လျှင် သင်သည် သမ္မာတရားကို လက်တွေ့လုပ်ဆောင်သော သူတစ်ယောက်ဖြစ်သည်။ ဝိညာဉ်ရေးရာ နားလည်သဘောပေါက်မှု ရှိသောလူတို့က ဘုရားနှုတ်ကပတ်တော်ကို ကြားသောအခါ ၎င်းတို့သည် ရှင်းလင်းစွာ သဘောပေါက်နားလည်နိုင်စွမ်းရှိပြီး သမ္မာတရားကိုပင် နားလည်နိုင်သည်။ ဘုရားသခင်က မည်သည့်အရာကို ပြောသည်ဖြစ်စေ ၎င်းတို့က အမီလိုက်နိုင်သည်။ ပြီးလျှင် ၎င်းတို့၏ အခြေအနေနှင့် ဘုရားနှုတ်ကပတ်တော်ကြား နှိုင်းယှဉ်ချိန်ဆကြည့်နိုင်ပြီး လက်တွေ့လုပ်ဆောင်ရန် လမ်းကြောင်းတစ်ခုကို ရှာနိုင်သည်။ ဤသည်မှာ ဝိညာဉ်ရေးရာ နားလည်သဘောပေါက်မှုရှိခြင်း၏ သရုပ်သကန်ဖြစ်သည်။ ဝိညာဉ်ရေးရာ နားလည်သဘောပေါက်မှုရှိသောသူများက ဘုရားနှုတ်ကပတ်တော်ကို ဖတ်ရှုပြီးနောက်တွင် ၎င်းတို့၏ စိတ်နှလုံးသည် လင်းလက်တောက်ပပြီး ယင်းထံမှ တစ်စုံတစ်ခုကို ၎င်းတို့ ရရှိသည်။ ၎င်းတို့၏ ဝိညာဉ်သည် အထူးပင် လွတ်လပ်သည်။ ပြီးလျှင် ၎င်းတို့ လိုက်လျှောက်နိုင်သည့် လမ်းကြောင်းတစ်ခုရှိသည်ဟု ၎င်းတို့ ခံစားရသည်။ ထို့ကြောင့် တရားဒေသနာတစ်ပုဒ်ကို ၎င်းတို့ နားထောင်သည့်အချိန်တိုင်းတွင် ယင်းထံမှ တစ်စုံတစ်ခုကို ၎င်းတို့ ရရှိသည်။ ပြီးလျှင် ဘုရားနှုတ်ကပတ်တော်ကို ၎င်းတို့ ဖတ်တိုင်းတွင် အားပြည့်လာကြသည်။ ဤသည်မှာ ဝိညာဉ်ရေးရာ နားလည်သဘောပေါက်မှုက သူ့ဘာသာ ပေါ်လွင်ပြသသည့် ပုံစံဖြစ်သည်။ ဘုရားသခင်က မည်သည့်အရာကို မိတ်သဟာယပြုသည်ဖြစ်စေ ဝိညာဉ်ရေးရာ နားလည်သဘောပေါက်မှုရှိသူများက ယင်းကိုကြားပြီးနောက်တွင် ပုံရိပ်များက ၎င်းတို့စိတ်တွင် ပေါ်လာလိမ့်မည်။ ပြီးလျှင် လူတို့၏ အခြေအနေများကို ဘုရားသခင် ဖော်ထုတ်သောအခါ ၎င်းတို့က နှိုင်းယှဉ်ချက်များ ချမှတ်နိုင်သည်။ သူသည် ဘုရားသခင်အပေါ် နားလည်မှုလွဲခြင်းအကြောင်း ပြောသောအခါ ၎င်းတို့က ၎င်းတို့၏ အခြေအနေအပေါ် အသုံးချပြီး “ငါ၏ ဤတောင်းဆိုချက်နှင့် ငါ့တွင်ရှိသော ဤစိတ်ကူးထင်မြင်မှုများသည် အမှန်တကယ်တွင် ဘုရားသခင်အပေါ် နားလည်မှုလွဲခြင်းများဖြစ်သည်” ဟု သဘောပေါက်သည်။ ၎င်းတို့က ဆက်စပ်ကြည့်ပြီးဖြစ်သည်။ သူသည် ဘုရားသခင်အပေါ် ခုခံမှုနှင့် ဆန့်ကျင်မှုအကြောင်းပြောသောအခါ ၎င်းတို့တွင် ဤတူညီသော စိတ်ခံစားချက်များ ရှိလျှင်၊ တူညီသော အခြေအနေများ၌ အသက်ရှင်လျှင်၊ စိတ်အတွင်း၌ ဤစိတ်သဘောထားများနှင့် အနှစ်သာရရှိလျှင် ၎င်းတို့သည် ယင်းတို့ကြားတွင် နှိုင်းယှဉ်ချက်များ ချမှတ်နိုင်သည်။ နှိုင်းယှဉ်ချက်များ ချမှတ်နိုင်ရန်အတွက် မည်သည့်အရာမျိုးကို ၎င်းတို့ အသုံးပြုနိုင်သနည်း။ အတွေးများ၊ စိတ်ကူးများ၊ သို့မဟုတ် ၎င်းတို့ ပြသသော လုပ်ရပ်များ၊ အပြုအမူများဖြစ်သည်။ ဤအရာများအားလုံးကို နှိုင်းယှဉ်ချက်များ ချမှတ်နိုင်ရန်အတွက် အသုံးပြုနိုင်သည်။ လူတို့က ဘုရားသခင် ပြောနေသည့်အရာကို နားလည်နိုင်သောအခါ၊ အတိအကျ မည်သည့်အရာအား ပြောနေသည်ကို နားလည်နိုင်ပြီး ၎င်းတို့၏ မည်သည့်အပြုအမူ၊ ထုတ်ဖော်မှုများ၊ သရုပ်သကန်များ၊ အခြေအနေများနှင့် အနှစ်သာရများက ဘုရားသခင် ဖော်ထုတ်ခဲ့သည့် အခြေအနေများနှင့် ကိုက်ညီမှုရှိသည်ကို သိသောအခါ၊ တရားဒေသနာများတွင် မည်သည့်အရာများအကြောင်းပြောသည်ကို သိသောအခါ ၎င်းတို့သည် ဝိညာဉ်ရေးရာ နားလည်သဘောပေါက်မှုကို ပေါ်လွင်စေခဲ့ပြီး ဖြစ်သည်။ သင်တို့တွင် ဝိညာဉ်ရေးရာ နားလည်သဘောပေါက်မှု ရှိမရှိကို ပြောနိုင်သလော။ (တစ်ခါတစ်ရံတွင် ကျွန်ုပ်၌ ရှိပြီး တစ်ခါတစ်ရံတွင် မရှိပါ။) ဤအရာကို ကုသနိုင်သည်။ သို့သော် သင့်တွင် လုံးဝ တစ်ခုမျှမရှိပါက ဒုက္ခရောက်မည့် သဘောဖြစ်သည်။ ဘုရားနှုတ်ကပတ်တော်က မည်သည့်အရာ အကြောင်းပြောနေသည်ကို အချိန်အများစု၌ သင်သိလျှင်လည်းကောင်း၊ သင့်ကိုယ်သင်ဖြင့် မည်သည့်နှိုင်းယှဉ်မှုမျှပင် မချမှတ်နိုင်သော်လည်း သင့်၌ ဤအခြေအနေမျိုးရှိသည်ကို သိလျှင်လည်းကောင်း၊ သို့မဟုတ် ယင်းတို့ကို အခြားလူများ၌ သတိပြုမိပြီး ဤသမ္မာတရား၏ သွင်ပြင်လက္ခဏာကို သိလျှင်လည်းကောင်း၊ မည်သို့ ဝင်ရောက်သင့်သည်ကို သိလျှင်လည်းကောင်း ဤသည်မှာ ဝိညာဉ်ရေးရာ နားလည်သဘောပေါက်မှုရှိသည်ဟု အကျုံးဝင်နေပြီ ဖြစ်သည်။ သို့ရာတွင် ဤသို့သောသူမျိုးသည် တရားဒေသနာတစ်ပုဒ်ကို ကြားသောအခါတိုင်းတွင် ဝိညာဉ်ရေးရာ နားလည်သဘောပေါက်မှုကို ပေါ်လွင်စေနိုင်သလော။ မပေါ်လွင်စေနိုင်ပါ။ တစ်ခါတစ်ရံတွင် ၎င်းတို့၌ ဝိညာဉ်ရေးရာ နားလည်သဘောပေါက်မှုရှိပြီး တစ်ခါတစ်ရံ၌ မရှိပေ။ အဘယ်ကြောင့်ဆိုသော် အသက်ဝင်ရောက်မှုက သမ္မာတရားရှုထောင့်များစွာနှင့် သက်ဆိုင်မှုရှိ၍ဖြစ်သည်။ သင်နားလည်ပြီး ဝင်ရောက်ပြီးဖြစ်သည့် သမ္မာတရားအချို့ ရှိပြီး သင်နားမလည်ဘဲ မဝင်ရောက်ရသေးသည့် အခြားသောအရာများ ရှိသည်။ သင်လုံးဝ မကြုံတွေ့ရသေးသည့်၊ ကြားပင် မကြားဖူးသေးသည့် သမ္မာတရားအချို့ရှိသည်။ ယခုတွင် သင်ကြားဖူးပြီး ဖြစ်သော်လည်း သင်သဘောပေါက်နားလည်နိုင်ခြင်းရှိမရှိကို ပြောဖို့ခက်သည်။ ပြီးလျှင် သင့်၌ ယင်းနှင့်ပတ်သက်ပြီး အယူအဆများ၊ သို့မဟုတ် နားလည်မှုလွဲခြင်းများပင် ရှိနိုင်သည်။ သို့ရာတွင် ဤသည်မှာ ပုံမှန်ဖြစ်သည်။ သင်နားလည်သော သမ္မာတရား သွင်ပြင်လက္ခဏာအချို့ ရှိလျှင် ယင်းတို့မှာ သင်ဝိညာဉ်ရေးရာ နားလည်သဘောပေါက်မှုရှိသော သွင်ပြင်လက္ခဏာများ ဖြစ်သည်။ သင်နားမလည်သည့် သမ္မာတရား၏ သွင်ပြင်လက္ခဏာအချို့ရှိလျှင် ယင်းတို့မှာ သင်ဝိညာဉ်ရေးရာ နားလည်သဘောပေါက်မှုမရှိသည့် သွင်ပြင်လက္ခဏာများ ဖြစ်သည်။ သင်လုံးဝ မကြားဖူးသည့်၊ သင့်အတွက် အလွန်ပင် အသစ်အဆန်း ဖြစ်နေသေးသည့်၊ သို့မဟုတ် သင့်၌ အယူအဆများပင် ရှိသည့် သမ္မာတရား သွင်ပြင်လက္ခဏာအချို့ရှိလျှင် ယင်းတို့မှာ သင့်၌ ပို၍ပင် ဝိညာဉ်ရေးရာ နားလည်သဘောပေါက်မှုကင်းမဲ့သည့် သွင်ပြင်လက္ခဏာများ ဖြစ်သည်။ သင်သည် ထိုသွင်ပြင်လက္ခဏာများ၌ ဝိညာဉ်ရေးရာ နားလည်သဘောပေါက်မှုအား မရယူမီတွင် သမ္မာတရားကို သင်နားလည်သည်အထိ အတွေ့အကြုံကာလတစ်ခုကို ဖြတ်သန်းရမည်။ ဥပမာအနေဖြင့် လူအချို့တွင် ဘုရားသခင်အပေါ် နားလည်မှုလွဲခြင်းများရှိသည်။ သို့သော် ၎င်းတို့က “ငါသည် ဘုရားသခင်ကို နားလည်မှုမလွဲခဲ့ပါ။ ဘုရားသခင်ကို ငါမည်သည့်အခါမျှ နားလည်မှုမလွဲခဲ့ပါ။ ဘုရားသခင်ကို ငါ အလွန်ပင် ချစ်ပါသည်။ ထို့ကြောင့် ငါသည် သူ့အပေါ် အဘယ်သို့ နားလည်မှုလွဲနိုင်မည်နည်း” ဟု တွေးဆဲ ဖြစ်သည်။ ဤသည်တို့မှာ ဝိညာဉ်ရေးရာ နားလည်သဘောပေါက်မှု ကင်းမဲ့သောသူတို့ ပြောသော စကားများဖြစ်သည်။ သင်က “လူတို့သည် ဘုရားသခင်အား မကြာခဏ နားလည်မှုလွဲသော်လည်း ယင်းကို ၎င်းတို့ မထိန်းချုပ်နိုင်ပါ။ နားလည်မှုလွဲခြင်းများက အချိန်မရွေး၊ နေရာမရွေး ထွက်ပေါ်လာသည်။ သို့ရာတွင် ယခုအချိန်၌မူ သိရသလောက်တွင် ဘုရားသခင်ကို ကျွန်ုပ် နားလည်မှုလွဲသော၊ သို့မဟုတ် သူနှင့် ကွဲလွဲဆန့်ကျင်သော မည်သည့်သွင်ပြင်လက္ခဏာများကိုမျှ သတိမမူမိပါ။ ကျွန်ုပ်သည် အမှုအရာများကို အသေးစိတ်ဆန်းစစ်ရန်၊ အတွေ့အကြုံများရှိရန် လိုအပ်ပြီး ကျွန်ုပ်အပေါ် ဤအရာများကို ထုတ်ဖော်ရန်အတွက် အခြေအနေများကို စီစဉ်ညွှန်ကြားပေးဖို့ ဘုရားသခင်ထံ ဆုတောင်းပြီး တောင်းလျှောက်ဖို့ လိုသည်” ဟု ပြောလျှင် ဤသည်မှာ အကောင်းဆုံးဖြစ်သည်။ ဤသည်မှာ သင့်စိတ်တွင် ထားရှိသင့်သည့် ဆန္ဒဖြစ်သည်။ သင်သည် တိုးတက်ရန်အတွက် ဆက်လက်၍ ကြိုးပမ်းနေရမည်။ တစ်စုံတစ်ယောက်က “ကျွန်ုပ်သည် ဘုရားသခင်အပေါ် မည်သည့်အခါမျှ နားလည်မှုမလွဲခဲ့ပါ။ ဤသည်မှာ အခြားလူများအကြောင်း ပြောဆိုနေခြင်း ဖြစ်သည်” ဟု ဆိုလျှင် ထိုသူက အလွန်အဓိပ္ပာယ်မရှိသည့် အရာတစ်ခုကို ပြောဆိုနိုင်သည့် အချက်က သူ့တွင် ဝိညာဉ်ရေးရာ နားလည်သဘောပေါက်မှု မရှိသည်ကို ပြသည်။ ဝိညာဉ်ရေးရာ နားလည်သဘောပေါက်မှု မရှိသည့်လူများက အဓိကအားဖြင့် မည်သည့်စိတ်သဘောထားများကို ထုတ်ဖော်ပြသနည်း။ မာနထောင်လွှားပြီး ခေါင်းမာသော မိုက်မဲမှုဖြစ်သည်။ ခေါင်းမာသော မိုက်မဲမှုဆိုသည်မှာ အဘယ်နည်း။ သင်က မိုက်မဲခြင်း၊ ခေါင်းမာခြင်းနှစ်မျိုးလုံး ရှိသည်ဟူသည့် သဘောဖြစ်သည်။ ခိုင်လုံသော ဝေါဟာရဖြင့်ဆိုလျှင် ယင်းက ယင်းဘာသာ မည်သို့ ပေါ်လွင်စေသနည်း။ (၎င်းတို့သည် အခြားသောလူတိုင်းက မြင်နိုင်သော ဖောက်ပြန်ပျက်စီးသည့် စိတ်သဘောထားများကို သတိမမူနိုင်ဘဲ ၎င်းတို့၌ ဤစိတ်သဘောထားများမရှိဟု ထင်မြင်ကြသည်။ ၎င်းတို့သည် အထူးပင် မိမိကိုယ်ကို မှန်ကန်သည်ဟု ယူမှတ်ခြင်းလည်းရှိပြီး ၎င်းတို့က မှန်သည့်ဘက်တွင် လုံးဝရှိသည်ဟု ထင်ကြသည်။) ၎င်းတို့က ဤဖောက်ပြန်ပျက်စီးခြင်း သွင်ပြင်လက္ခဏာ မရှိဟု ၎င်းတို့ ထင်ရုံသာမက ၎င်းတို့က ကောင်းစွာ ပြုမူလုပ်ဆောင်နေကြသည်ဟုလည်း ထင်ကြသည်။ ၎င်းတို့သည် စိတ်အတွင်းထဲတွင် ၎င်းတို့၏ မာနထောင်လွှားသော စိတ်သဘောထားက ထိန်းချုပ်သည်ကို ခံရပြီး ဤသို့သောအရာတစ်ခုကို ၎င်းတို့ မည်သည့်အခါမျှ လုပ်ဆောင်မည်မဟုတ်ဟု ထင်ကြသည်။ အခြားလူများက မည်သည့်အရာကို ပြောသည်ဖြစ်စေ ၎င်းတို့ကိုယ်တိုင်က သဘောမပေါက်သရွေ့၊ မမြင်သရွေ့၊ သို့မဟုတ် တစ်စုံတစ်ခုကို မတွေ့ကြုံသရွေ့ ဆင်ခြင်သုံးသပ်ပြီး နားလည်ရန်၊ သို့မဟုတ် လက်ခံရန် မလိုအပ်ဟု ၎င်းတို့ ထင်ကြသည်။ ဤသည်မှာ ခေါင်းမာသော မိုက်မဲမှုဖြစ်သည်။ ခေါင်းမာသော မိုက်မဲမှုကို ဖော်ပြရန် အခြားနည်းလမ်းမှာ အဘယ်နည်း။ ဤသည်မှာ သင်က အသိခေါက်ခက် အဝင်နက်သောအခါတွင် ဖြစ်သည်။ အခြားသော ဝေါဟာရတစ်ခုခုရှိသလော။ (တုံးအခြင်းဖြစ်သည်။) ဟုတ်သည်။ ခေါင်းမာသော မိုက်မဲမှုသည် တုံးအခြင်းနှင့် လွန်စွာ ဆက်စပ်နေသည်။ ၎င်းတို့သည် မိုက်မဲခြင်း၊ ခေါင်းမာခြင်း နှစ်မျိုးလုံးရှိသည်။ ဥပမာအနေဖြင့် အခြားလူများက “သင် ဂရုစိုက်သင့်သည်။ ရေအေးကို အစဉ်အမြဲသောက်ခြင်းက အစာချေမှုကို နှေးစေပြီး ဗိုက်နာစေနိုင်သည်” ဟု ဆိုသည်။ ၎င်းတို့က “ကျွန်ုပ်၏ ခန္ဓာကိုယ်သည် ကျန်းမာရေးအလွန်ကောင်းသည်။ ကျွန်ုပ်၌ မည်သည့်အရာမျှ ချွတ်ယွင်းနေခြင်းမရှိ။ သင်က အလဟဿစိတ်ပူနေခြင်း ဖြစ်သည်” ဟု ပြန်ပြောသည်။ ဤသည်မှာ ခေါင်းမာသော မိုက်မဲမှုမဟုတ်လော။ (ဟုတ်ပါသည်။) ၎င်းတို့သည် တစ်စုံတစ်ခုကို မတွေ့ကြုံရသေးသောကြောင့် အလွန်ခေါင်းမာပြီး မိုက်မဲသည့်အသွင်ရှိသည်။ သို့တိုင်အောင် ၎င်းတို့သည် အလွန်ပင် မိမိကိုယ်ကို မှန်ကန်သည်ဟု ယူမှတ်ကြသည်။ ၎င်းတို့သည် ခေါင်းမာပြီး မိုက်မဲသည်ဟု ငါအဘယ်ကြောင့်ဆိုသနည်း။ အဘယ်ကြောင့်ဆိုသော် ၎င်းတို့တွင် အတွေ့အကြုံ မရှိသည့်တိုင် အတွေ့အကြုံရှိသူတစ်ဦးက ပြောသည့်အရာကို ဆန့်ကျင်ရဲသောကြောင့် ဖြစ်သည်။ ၎င်းတို့သည် ဤစကားများ၏ တိကျမှန်ကန်မှုကို မှန်မမှန် စစ်ဆေးခြင်း မရှိပေ၊ သို့မဟုတ် ယင်းတို့ထံမှ သင်ခန်းစာမယူပေ။ ထိုအစား ၎င်းတို့သည် အလွန်မှန်သည်ဟု ထင်ပြီး အခြားလူများပြောသည့်အရာကို လက်မခံပေ။ ဤသည်မှာ ခေါင်းမာပြီး မိုက်မဲသည့်အပြင် မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်ခြင်းဖြစ်သည်။ ပေတရုသည် သူ၏အသက်ဝင်ရောက်မှုတွင် အခြားလူများ၏ ကျရှုံးမှုများမှ သင်ယူနိုင်ခဲ့သည်။ ဘုရားနှုတ်ကပတ်တော်များက မည်သည့်အရာကို ဆိုသနည်း။ (ဘုရားသခင်က ပေတရုကို “ကုန်လွန်ပြီးသည့် အချိန်ကာလများမှ ကောင်းမြတ်သည့်အရာများကို စိတ်တွင်စွဲမှတ်ရင်း၊ မကောင်းသည့်အရာများကို ငြင်းပယ်” ဟု ပြောသည်။ (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ လက်တွေ့အရှိတရားကို သိရှိပုံ)) ခေါင်းမာပြီး မိုက်မဲသောသူတို့သည် ၎င်းတို့မျက်လုံးရှေ့တည့်တည့်တွင် ဖြစ်ပျက်သောအရာများကိုပင် လက်မခံနိုင်ဘဲ ယင်းထံမှ မသင်ယူကြပေ။ လူတို့က ဤအရာကို တုံးအခြင်းအဖြစ် မြင်ကြသည်။ သို့သော် ယင်းသည် အမှန်တကယ်တွင် ၎င်းတို့၏ စိတ်သဘောထား၌ရှိသော ပြဿနာတစ်ခုဖြစ်သည်။ ယင်းသည် မာနထောင်လွှားသော စိတ်သဘောထားတစ်ခုကြောင့် ဖြစ်ခြင်း ဖြစ်သည်။

ဝိညာဉ်ရေးရာ နားလည်သဘောပေါက်မှု ရှိသူများက မိမိတို့ကိုယ်ကို မည်သို့ပေါ်လွင်စေသည်ဆိုသည်နှင့် ဝိညာဉ်ရေးရာ နားလည်သဘောပေါက်မှု မရှိသူများက မိမိတို့ကိုယ်ကို မည်သို့ပေါ်လွင်စေသည်ဆိုသည်နှင့်ပတ်သက်သော အကြောင်းအရာကို ပြန်ပြောကြစို့။ ယခုပင် ငါပြောခဲ့သည့် ဝိညာဉ်ရေးရာ နားလည်သဘောပေါက်မှုရှိသူများက မိမိတို့ကိုယ်ကို ပေါ်လွင်စေသည့် အဓိကနည်းလမ်းမှာ အဘယ်နည်း။ ငါ့ကို ပြောလော့။ (ဘုရားနှုတ်ကပတ်တော်များက မည်သည့်လူသားအခြေအနေများအား ဖော်ထုတ်နေသည်ကို ဝိညာဉ်ရေးရာ နားလည်သဘောပေါက်မှုရှိသူများက နားလည်နိုင်ပြီး ၎င်းတို့နေ့စဉ်အသက်တာတွင်ရှိသော ၎င်းတို့၏ ကိုယ်ပိုင်အတွေးများ၊ အယူအဆများနှင့် လုပ်ရပ်များဖြင့် နှိုင်းယှဉ်ကြည့်နိုင်သည်။ ဘုရားသခင်ပြောနေသည့်အရာကို ၎င်းတို့ နားလည်နိုင်သည်။) အဓိကအချက်ထဲမှ အများစုကို သင်ပြောဆိုသွားသည်။ ဝိညာဉ်ရေးရာ နားလည်သဘောပေါက်မှုရှိသူများက ဘုရားသခင်၏ အမြင်သစ်ပေးနိုင်သော နှုတ်ကပတ်တော်များကို ဖတ်သောအခါ ၎င်းတို့သည် မိမိတို့ကိုယ်ကိုဖြင့် နှိုင်းယှဉ်ချိန်ဆကြည့်နိုင်သည်။ ဘုရားနှုတ်ကပတ်တော်များက မည်သည့်သမ္မာတရားများအကြောင်း ပြောနေသည်ကိုလည်းကောင်း၊ လူတို့သည် မည်သည့်အရာအတွင်းသို့ ဝင်ရောက်သင့်သည်ကိုလည်းကောင်း၊ ဘုရားနှုတ်ကပတ်တော်များက မည်သည့်လူသားစိတ်သဘောထားများကို ဖော်ထုတ်နေသည်ကိုလည်းကောင်း၊ ဘုရားနှုတ်ကပတ်တော်များက မည်သည့်လူသားအခြေအနေများနှင့် သရုပ်သကန်များအား ဖော်ထုတ်နေသည်ကိုလည်းကောင်း သိနိုင်ကြသည်။ ၎င်းတို့သည် ဤအရာများအားလုံးဖြင့် မိမိတို့ကိုယ်ကို နှိုင်းယှဉ်ချိန်ဆကြည့်နိုင်ကြပြီး ယင်းတို့ကို သတိပြုမိကြသည်။ ဤသည်မှာ ဝိညာဉ်ရေးရာ နားလည်သဘောပေါက်မှုက ယင်းဘာသာ ပေါ်လွင်သည့် ပုံစံဖြစ်သည်။ အစောပိုင်းက ဝိညာဉ်ရေးရာ နားလည်သဘောပေါက်မှုရှိသူများသည် မိမိတို့ကိုယ်ကို မည်သို့ပေါ်လွင်စေသည်ကို ငါမိတ်သဟာယပြုနေသောအခါတွင် ငါတို့ မေးခွန်းတစ်ခု ထုတ်ခဲ့သည်။ ၎င်းတို့သည် အမှုအရာအားလုံး၌ ဝိညာဉ်ရေးရာ နားလည်သဘောပေါက်မှု ရှိမရှိဆိုသည့် မေးခွန်းဖြစ်သည်။ ၎င်းတို့ နားလည်သဘောပေါက်မှု ရှိကြသလော။ (မရှိပါ။ အချို့အမှုအရာများတွင် ၎င်းတို့သည် ဘုရားနှုတ်ကပတ်တော်ဖော်ပြသည့် အခြေအနေများဖြင့် မိမိတို့ကိုယ်ကို နှိုင်းယှဉ်ချိန်ဆနိုင်ကြသည်။ ထို့ကြောင့် ၎င်းတို့သည် ဝိညာဉ်ရေးရာ နားလည်သဘောပေါက်မှုကို ပြသည်။ ၎င်းတို့ မတွေ့ကြုံရသေးသည့် အမှုအရာများတွင်မူ ၎င်းတို့သည် မိမိတို့ကိုယ်ကို နှိုင်းယှဉ်ချိန်ဆမကြည့်နိုင်ကြပါ။ ထို့ကြောင့် ၎င်းတို့၌ ဝိညာဉ်ရေးရာ နားလည်သဘောပေါက်မှုမရှိပါ။) ၎င်းတို့သည် တစ်စုံတစ်ခုကို မတွေ့ကြုံရသေးသကဲ့သို့ မိမိတို့ကိုယ်ကို နှိုင်းယှဉ်ချိန်ဆမကြည့်နိုင်လျှင် ၎င်းတို့၌ ဝိညာဉ်ရေးရာ နားလည်သဘောပေါက်မှုမရှိပေ။ ဤသို့ဆိုလျှင် ၎င်းတို့ တွေ့ကြုံပြီးဖြစ်သည့်အရာများ ရှိသော်လည်း ယင်းတို့တွင်ပါဝင်သော သမ္မာတရားများကို နားမလည်သောကြောင့် ၎င်းတို့က ယင်းတို့ကို လက်မခံလျှင်၊ သို့မဟုတ် ယင်းတို့အား သမ္မာတရားအဖြစ် အသိအမှတ်မပြုလျှင် ဤသည်မှာမှာ ဝိညာဉ်ရေးရာ နားလည်သဘောပေါက်မှုရှိခြင်းအဖြစ် အကျုံးဝင်သလော။ (အကျုံးမဝင်ပါ။) ဤသည်မှာလည်း ဝိညာဉ်ရေးရာ နားလည်သဘောပေါက်မှုရှိခြင်း မဟုတ်။ အကယ်၍များ ၎င်းတို့ကြားသည့်အရာများသည် သမ္မာတရားဖြစ်သည်ကို ၎င်းတို့ နားမလည်လျှင် ဤသည်မှာ ဝိညာဉ်ရေးရာ နားလည်သဘောပေါက်မှုရှိခြင်းအဖြစ် အကျုံးဝင်သလော။ (အကျုံးမဝင်ပါ။) သင်တို့ထဲမှ တစ်ဦးတလေက ဤပုံစံများဖြင့် မိမိတို့ကိုယ်ကို ပေါ်လွင်စေသလော။ ဥပမာအနေဖြင့် ကျိုးနွံနာခံခြင်းနှင့်သက်ဆိုင်သည့် သမ္မာတရားများနှင့် ပတ်သက်ပြီး လူအချို့က “ကျွန်ုပ်တို့သည် ဤကိစ္စတွင် ကျိုးနွံနာခံရမည်။ လူတို့သည် ကြွားဝါပြောစရာ တစ်ခုမျှ မရှိ။ ကျိုးနွံနာခံရန်မှာ သူတို့၏ တာဝန်နှင့် ဝတ္တရားဖြစ်သည်” ဟု ဆိုကြသည်။ ဤအရာကို ကြားပြီးနောက်တွင် သင်က “ဤသည်မှာ မည်သည့်သမ္မာတရားမျိုးနည်း။ ဤအမှုကိစ္စတွင်လည်း ကျိုးနွံနာခံရမည်လော။ ကျွန်ုပ်မြင်ရသလောက်မှာ ဤနေရာတွင် ကျိုးနွံနာခံဖို့မလိုပါ” ဟု သင့်ဘာသာ တွေးသည်။ သင်သည် ဤအမှုကိစ္စတွင် ဝိညာဉ်ရေးရာ နားလည်သဘောပေါက်မှု မကင်းမဲ့သလော။ (ကင်းမဲ့ပါသည်။) အမှန်တကယ်တွင် ဤသည်မှာ သင့်အတွေ့အကြုံများက မည်မျှလေးနက်သည်၊ သို့မဟုတ် ပေါ့တန်သည်ဆိုသည်နှင့် လုံးဝ မသက်ဆိုင်ပေ။ ယင်းသည် သင့်၌ ဝိညာဉ်ရေးရာ နားလည်သဘောပေါက်မှု ရှိမရှိနှင့်သာ သက်ဆိုင်သည်။ ငါဥပမာတစ်ခုပေးမည်။ ယောဘသည် စမ်းသပ်ခံရသောအခါ ဘာပြောခဲ့သနည်း။ (“ယေဟောဝါသည် ပေးတော်မူ၏၊ ပြီးလျှင် ယေဟောဝါသည် ပြန်နုတ်သိမ်းတော်မူ၏၊ ယေဟောဝါ၏ နာမတော်သည် မင်္ဂလာရှိပါစေ။” (ယောဘ ၁:၂၁)) လူတို့သည် ဤအရာအား သူပြောသည်ကို ကြားပြီးနောက်တွင် ယင်းတွင်ရှိသော သမ္မာတရားကို ၎င်းတို့ နားလည်နိုင်သလော။ (နားမလည်နိုင်ပါ။) ဤသို့ဆိုလျှင် လူတို့က ဤအမှုကိစ္စနှင့်ပတ်သက်ပြီး ဝိညာဉ်ရေးရာ နားလည်သဘောပေါက်မှု ရှိသလော။ (မရှိပါ။) ၎င်းတို့၌ နားလည်သဘောပေါက်မှု မရှိပေ။ ဘုရားသခင်က ပေးခြင်း၊ ပြန်နုတ်သိမ်းခြင်းဖြစ်သည့် အမှုအရာနှစ်ခုကို လူတိုင်း တွေ့ကြုံနိုင်စွမ်း ရှိသည်မဟုတ်လော။ (ဟုတ်ပါသည်။) သင်သည် ယင်းတို့ကို တွေ့ကြုံပြီးဖြစ်သည်။ သို့သော် ယင်းတွင်ရှိသော သမ္မာတရားကို သင်နားမလည်ပေ။ ထို့ကြောင့် ဤအမှုကိစ္စများနှင့်ပတ်သက်ပြီး သင့်၌ ဝိညာဉ်ရေးရာ နားလည်သဘောပေါက်မှု ရှိသလော။ (မရှိပါ။) သင့်၌ နားလည်သဘောပေါက်မှု မရှိပေ။ ယောဘပြောခဲ့သည့် စကားများတွင် မည်သည့်သမ္မာတရားပါဝင်သနည်း။ (ဘုရားသခင်သည် အချုပ်အခြာအာဏာရှင် ဖြစ်ပြီး အရာခပ်သိမ်းကို အုပ်စိုးသည်ဆိုသည့်အရာ ဖြစ်သည်။) ဤသည်မှာ ဘုရားသခင်သည် အမှုကိစ္စများ၊ အကြောင်းအရာများအားလုံးကို အချုပ်အခြာအာဏာပိုင်သကဲ့သို့ ပေးရန်၊ သို့မဟုတ် နုတ်သိမ်းရန်ဆုံးဖြတ်ချက်သည် သူ့၌ တည်ရှိသည်ဟူ၍ ဖြစ်သည်။ ဤသို့ဆိုလျှင် လူတို့သည် မည်သည့်အရာကို လက်တွေ့လုပ်ဆောင်သင့်သနည်း။ (ကျိုးနွံနာခံခြင်း ဖြစ်ပါသည်။) ယင်းမှာ မှန်ကန်သည်။ ၎င်းတို့သည် ဘုရားသခင်၏ အချုပ်အခြာအာဏာကို ကျိုးနွံနာခံသင့်သည်။ လက်ခံသင့်သည်။ ချီးမွမ်းသင့်သည်။ လူတို့သည် ဤစကားများနှင့် ဤစကားများအတွင်းတွင်ရှိသော သမ္မာတရားကို နားလည်သောအခါ ၎င်းတို့၌ ဤအမှုကိစ္စနှင့်ပတ်သက်ပြီး ဝိညာဉ်ရေးရာ နားလည်သဘောပေါက်မှုရှိသည်။ လူတို့သည် ဤစကားများအတွင်းတွင်ပါဝင်သော သမ္မာတရားကို နားမလည်လျှင် ၎င်းတို့သည် ဤအမှုကိစ္စနှင့်ပတ်သက်၍ ဝိညာဉ်ရေးရာနားလည်မှုမရှိပေ။ ဤအချိန်တွင် သင်တို့သည် ယောဘ၏ စကားများနှင့်ပတ်သက်ပြီး ဝိညာဉ်ရေးရာ နားလည်သဘောပေါက်မှု ရှိကြသလော။ (မရှိပါ။) သင်နားလည်သည့်အရာက အယူဝါဒဖြစ်လျှင် သင်က “ယောဘသည် ကောင်းသောအတွေ့အကြုံရှိခဲ့သည်။ ယောဘသည် ဖြောင့်မတ်သောသူ ဖြစ်သည်ဟု ဘုရားသခင်က ပြောခဲ့သည်။ ထို့ကြောင့် သူလုပ်ဆောင်သမျှတိုင်းက အသေအချာပင် သမ္မာတရားနှင့်ညီပြီး ဘုရားသခင်၏ ရည်ရွယ်ချက်များကို ဖြည့်ဆည်းနိုင်ရမည်” ဟု ဆိုသည်။ အယူဝါဒကို သင်နားလည်သည်။ ထို့ကြောင့် ဤအယူဝါဒသည် မည်သည့်အချိန်၌ သင်၏ သမ္မာတရားစစ်မှန်မှုဖြစ်မည်နည်း။ (အရာဝတ္ထုများကို ကျွန်ုပ်ထံမှ နုတ်ယူသည့် အခြေအနေများကို ဘုရားသခင်က အမှန်တကယ် စီစဉ်ညွှန်ကြားသောအခါတွင်လည်းကောင်း၊ ကျွန်ုပ်သည် ဘုရားသခင်ကို ကျေးဇူးတင်ပြီး ချီးမွမ်းနိုင်သောအခါတွင်လည်းကောင်း၊ ဘုရားသခင်ကို ကျိုးနွံနာခံပြီး စောဒကမတက်ဘဲ ဤသို့ဖြင့် ဤသမ္မာတရားရှုထောင့်ကို လက်တွေ့လုပ်ဆောင်နိုင်သောအခါတွင်လည်းကောင်း ဖြစ်သည်။) သင်သည် ယင်းကို လက်တွေ့လုပ်ဆောင်နိုင်သည်။ သို့သော် သင့်လက်တွေ့လုပ်ဆောင်မှုသည် စည်းမျဉ်းစည်းကမ်းများကို လိုက်နာခြင်းနှင့် အခြားလူများအား အတုခိုးခြင်းဖြစ်သလော၊ သို့မဟုတ် သင့်စိတ်နှလုံးအတွင်းထဲ၌ ဘုရားသခင်၏ အချုပ်အခြာအာဏာကို အမှန်တကယ် နားလည်ခြင်း ဖြစ်သလော။ ဤတွင် ကွာခြားချက်တစ်ခု ရှိသည်မဟုတ်လော။ မည်သည့်တစ်ခုက သမ္မာတရားစစ်မှန်မှုအတွင်းသို့ ဝင်ရောက်နေသနည်း။ ယခုတွင် ယောဘက ပြသခဲ့သော စံနမူနာကို မြင်ပြီးနောက် ယောဘပြောဆိုခဲ့သော အရာများကိုပြောဆိုနိုင်သောသူ များစွာရှိကြသည်။ သို့သော် ဤအရာများကို ၎င်းတို့ ပြောဆိုသောအခါ ၎င်းတို့သည် ယောဘကို အတုခိုးနေခြင်းသက်သက်လော၊ သို့မဟုတ် ၎င်းတို့၏ စကားများက ဆယ်စုနှစ်အနည်းငယ် တွေ့ကြုံပြီးနောက်တွင် ဘုရားသခင်သည် လူသားမျိုးနွယ်အပေါ် အချုပ်အခြာအာဏာ ရှိသည်ဆိုသည့် သမ္မာတရားနှင့် အမှန်တရားကို သဘောပေါက်ပြီးနောက် ပြောဆိုသည့် ယောဘ၏ စကားများကဲ့သို့ ဖြစ်သလော။ ဤအရာများအထဲမှ မည်သည့်အရာက သမ္မာတရားစစ်မှန်မှုဖြစ်သနည်း။ (အတွေ့အကြုံမှလာသည့်အရာက စစ်မှန်မှုဖြစ်သည်။) အတွေ့အကြုံမှတစ်ဆင့် သင်ခံစားပြီး နားလည်သည့်အရာများကသာ သမ္မာတရားစစ်မှန်မှု ဖြစ်သည်။ အခြားလူများပြောသည့်အရာများအား အတုခိုးခြင်းသည် စစ်မှန်မှုမဟုတ်။ ယောဘပြောဆိုခဲ့သည့်စကားများတွင် စစ်မှန်မှု သွင်ပြင်လက္ခဏာတစ်ခုရှိသည်။ သို့သော် သူ၏စကားများကို အတုခိုးသော လူများက ထိုစကားများကိုပင် ပြောဆိုသည့်အခါ၌ ထိုစကားများသည် ဝိညာဉ်ရေးရှိသောလူများအဖြစ် မိမိတို့ကိုယ်ကို ဟန်ဆောင်ပြီး အယောင်ဆောင်ရန် ၎င်းတို့ အသုံးပြုသည့် ဆောင်ပုဒ်တစ်ခု ဖြစ်လာသည်။ ဤလူတို့သည် ဘာသာရေးလူလိမ်များဖြစ်သည်။ အသင်းတော်တွင် ခေါင်းဆောင်များဖြစ်လာရန် ရွေးချယ်ခံရသောလူအချို့နှင့် တာဝန်နှင့် အဆင့်အတန်းရှိသောလူအချို့က ယောဘပြောဆိုခဲ့သည့် “ယေဟောဝါသည် ပေးတော်မူ၏၊ ပြီးလျှင် ယေဟောဝါသည် ပြန်နုတ်သိမ်းတော်မူ၏၊ ယေဟောဝါ၏ နာမတော်သည် မင်္ဂလာရှိပါစေ။” ဟူသည့် ထိုစကားများနှင့်ပတ်သက်ပြီး ညီအစ်ကိုမောင်နှမများနှင့် မကြာခဏ မိတ်သဟာယဖွဲ့ကြသည်။ နားထောင်နေသောလူများက မည်သို့ခံစားရသနည်း။ ၎င်းတို့ ခံစားရသည်မှာ “ဤစကားများသည် ဘုရားသခင်ထံမှ ဖြစ်သည်။ သန့်ရှင်းသောဝိညာဉ်တော်၏ ဉာဏ်အလင်းဖွင့်ပြမှုနှင့် ဘုရားသခင်၏ လမ်းပြမှုမှတစ်ဆင့် ယူဆောင်လာခြင်းဖြစ်သည်။ ဤစကားများသည် အလွန့်အလွန် လက်တွေ့ကျသည်” ဟူ၍ ဖြစ်သည်။ တစ်နှစ်မကြာသည့် အချိန်ပြီးနောက်တွင် ထိုခေါင်းဆောင်များသည် တကယ့်အလုပ်ကို မလုပ်နိုင်သည့်အတွက်၊ ဘုရားသခင်ရွေးချယ်ထားသောသူများ၏ အသက်ဝင်ရောက်မှုကို နှောင့်နှေးစေသည့်အတွက်၊ အသင်းတော်အလုပ်၏ တိုးတက်မှုကို နှောင့်နှေးစေသည့်အတွက် အထုတ်ခံရပြီး ထို့နောက်တွင် ၎င်းတို့သည် အပျက်သဘောဆောင်ကာ စောဒကတက်လာကြသည်။ ဤသို့သောလူတို့သည် ယောဘကဲ့သို့ တစ်ပုံစံတည်းသောစကားမျိုးကို ပြောဆိုခဲ့သော်လည်း ယောဘတွေ့ကြုံခဲ့သောအရာများကို မတွေ့ကြုံခဲ့ရပေ။ ပြီးလျှင် ဤစကားများအပေါ် အလေးအနက်နားလည်မှု၊ အတွေ့အကြုံ၊ သို့မဟုတ် သဘောပေါက်နားလည်မှုမရှိပေ။ ထို့ကြောင့် ၎င်းတို့စကားပြောသောအခါ ၎င်းတို့သည် အတုခိုးနေခြင်းလော၊ သို့မဟုတ် ရိုးသားစစ်မှန်မှုဖြင့် စကားပြောနေခြင်းလော။ (အတုခိုးနေခြင်း ဖြစ်သည်။) ၎င်းတို့ စိတ်အတွင်းထဲတွင် တွေးသည့်အရာနှင့်ပတ်သက်လာသောအခါ ၎င်းတို့ စကားပြောသောအခါတွင် ၎င်းတို့၏ စကားများ၌ ၎င်းတို့၏ တစ်ကိုယ်ရေ ခံစားချက်များပါဝင်ပြီး ရိုးသားစစ်မှန်ကြသည်။ ၎င်းတို့တွင် ဆန္ဒတစ်ခုရှိသည်။ ယင်းမှာ ဘုရားသခင်က ၎င်းတို့အား အရာဝတ္ထုများပေးသောအခါ ၎င်းတို့အနေဖြင့် ဘုရားသခင်က ၎င်းတို့ကို ပေးအပ်သော ကောင်းချီးများနှင့် ဆုကျေးဇူးများအတွက် ဘုရားသခင်ကို အစဉ် ချီးမွမ်းနိုင်ပြီး ကျေးဇူးတင်နိုင်ရန်၊ ဘုရားသခင်က ၎င်းတို့ထံမှ အရာဝတ္ထုများကို နုတ်ယူသောအခါ၌ ၎င်းတို့အနေဖြင့် လုံးဝ စောဒကတက်မည်မဟုတ်ဘဲ ယောဘကဲ့သို့ ဘုရားသခင်ကို ချီးမွမ်းနိုင်မည်ဖြစ်ရန်၊ ဘုရားသခင်၏ လမ်းပြမှုနှင့် အချုပ်အခြာအာဏာအတွက် ဘုရားသခင်ကို ကျေးဇူးတင်ရန်တို့ ဖြစ်သည်။ သို့ရာတွင် ဤသည်မှာ ဆန္ဒတစ်ခုသာဖြစ်သည်။ ၎င်းတို့ တွေ့ကြုံပြီးသည့်အရာတစ်ခု မဟုတ်သေးပေ။ ၎င်းတို့၏ နေရာနှင့် ရာထူးတို့မရှိတော့သောအခါ ၎င်းတို့သည် သာမန်ယုံကြည်သူသာ ဖြစ်သည်။ ၎င်းတို့သည် ပြောသည့်အတိုင်း လုပ်ဆောင်သလော။ (မလုပ်ဆောင်ပါ။) ၎င်းတို့သည် ပြောသည့်အတိုင်း လုံးဝ မလုပ်ဆောင်ဟု ငါမဆိုနိုင်ပေ။ ယင်းမှာ ၎င်းတို့သည် မည်သည့်လူစားမျိုး ဖြစ်သည်ဆိုသည့်အပေါ်တွင် မူတည်သည်။ သမ္မာတရားအား လိုက်စားသူတို့သည် ၎င်းတို့၏ ကိုယ်ပိုင်အပြုအမူကို အကဲဖြတ်ရန်အတွက် ဤစကားများကို အသုံးပြုသည်။ ၎င်းတို့၏ အတွေ့အကြုံအတွက် လမ်းပြအနေဖြင့် အသုံးပြုသည်။ ပြီးလျှင် မိမိတို့ကိုယ်တိုင်ဖြင့် နှိုင်းယှဉ်ချိန်ဆချက်များ ချမှတ်နိုင်ပြီး ယင်းတို့တွင် လက်တွေ့လုပ်ဆောင်ရန် လမ်းကြောင်းတစ်ခု ရှာတွေ့နိုင်သည်။ ၎င်းတို့သည် အလွန် စိတ်မချမ်းမသာဖြစ်ခြင်း၊ သို့မဟုတ် အပျက်သဘောဆောင်ခြင်းမရှိပေ။ ပြီးလျှင် ၎င်းတို့တာဝန်ကို ပုံမှန် ထမ်းဆောင်နိုင်သည်။ နှိုင်းယှဉ်ကြည့်လျှင် သမ္မာတရားအား မလိုက်စားသူတို့နှင့် သမ္မာတရားလိုက်စားမည့်အစား ဆောင်ပုဒ်များအား ရွတ်ဆိုသောသူတို့သည် ဒုက္ခရောက်ရသည်။ ၎င်းတို့သည် မိမိတို့ကိုယ်ကို အခြားနည်းဖြင့် ပြသကြသည်။ ဤလူစားမျိုးက မိမိတို့ကိုယ်ကို ထုတ်ဖော်ပြသည့် သင်တို့မြင်တွေ့ဖူးသော အသိသာဆုံးနည်းများမှာ အဘယ်နည်း။ (အထုတ်ခံရပြီးနောက်တွင် ခေါင်းဆောင်အချို့သည် မိမိတို့ကိုယ်ကို သိဖို့ မကြိုးစားသကဲ့သို့ ကျိုးနွံနာခံခြင်း မရှိကြပါ။ ၎င်းတို့ အထုတ်ခံရခြင်းသည် မျှတမှုမရှိဟု ထင်ကြပြီး အပျက်သဘောဆောင်ကာ စောဒကတက်ကြသည်။ ရွေးကောက်ပွဲရှိသည့် နောက်တစ်ချိန်တွင် ၎င်းတို့က အာဏာကို ပြန်လည်ရယူရန် ရုန်းကန်ကြသည်။ အဆုံး၌ အန္တိခရစ်ဖြစ်ကာ နှင်ထုတ်ခြင်းခံရသည်။) ဤသည်မှာ အဆိုးရွားဆုံးအမှုဖြစ်သည်။ အခြားမည်သည့် သရုပ်သကန်များရှိသနည်း။ (လူအချို့သည် အထုတ်ခံရပြီးနောက်တွင် သာမန်အလုပ်ကိုသာလုပ်ကြပြီး တာဝန်တစ်ခုကို မထမ်းဆောင်ကြပါ။) ဤသည်မှာ မည်သည့်လူစားမျိုးနည်း။ ၎င်းတို့သည် ယခင်က အဘယ်ကြောင့် ကြွားဝါပြောဆိုပြီး ဆောင်ပုဒ်များကို ရွတ်ဆိုသနည်း။ ၎င်းတို့သည် အခြားလူများကြားရန်အတွက် အကြောင်းအရာများကို ရွတ်ဆိုကြပြီး မိမိတို့ကိုယ်ကို အမွှမ်းတင်ရန်၊ လူတို့အား သိမ်းသွင်းစည်းရုံးရန်၊ လူတို့အား ၎င်းတို့ကို ကြည်ညိုအောင်လုပ်ရန်အတွက် ဤဆောင်ပုဒ်များ၊ အယူဝါဒများနှင့် နားဝင်ချိုသာသော စကားများကို အသုံးပြုကြသည်။ ဤသည်မှာ ၎င်းတို့၏ ပန်းတိုင်ဖြစ်သည်။ အခြားမည်သည့် သရုပ်သကန်များရှိသနည်း။ (၎င်းတို့ အထုတ်မခံရမီတွင် အချို့သော ခေါင်းဆောင်များနှင့် အမှုဆောင်များသည် အပြင်ပန်းတွင် ကြိုးစား၍ လိုက်စားသည့်ပုံစံရှိပြီး “ယေဟောဝါသည် ပေးတော်မူ၏၊ ပြီးလျှင် ယေဟောဝါသည် ပြန်နုတ်သိမ်းတော်မူ၏” ဟု ဆိုကြသည်။ သို့သော် ၎င်းတို့ အထုတ်ခံရပြီးနောက်တွင် ၎င်းတို့သည် အပျက်သဘောဆောင်ကာ နာလံမထူနိုင်ကြပါ။ ပြီးလျှင် ဘုရားအိမ်တော်က ၎င်းတို့အပေါ် အကြွေးတင်နေသည့်အလား ယခင်က ၎င်းတို့ မိမိကိုယ်ကို အသုံးခံပြီး ပေးဆပ်ခဲ့သည်တို့အားလုံးမှာ အချည်းနှီးဖြစ်သည်ဟု ထင်မြင်လျက် လူတို့ကိုပင် ဒေါသတကြီးရမ်းကာ စိတ်ဆိုးကြသည်။) ဤအရာများကိုပြောဆိုပြီး ဤသို့ လုပ်ဆောင်သောသူတို့သည် ဆိုးရွားသော ပြဿနာရှိသည်။ ပထမဦးစွာ အကြင်သူသည် ဤအရာများကို ပြောဆိုသည့် ၎င်းတို့၏ သဘာဝကို ပိုင်းခြားသိမြင်ရမည်။ သမ္မာတရားကို ၎င်းတို့ မလိုက်စားကြပေ။ ယောဘ၏ စကားများကို ၎င်းတို့ အတုခိုးသည်။ ၎င်းတို့ခေါင်းတွင် ဝတ်ဆင်ရန်အတွက် လှပသော သရဖူကို လုပ်ကြံဖန်တီးသည်။ ပြီးလျှင် ကြွားဝါပြီး လူတို့ကို အထင်အမြင်မှားစေရန်အတွက် မိမိတို့ကိုယ်ကို ဝိညာဉ်ရေးရာပြည့်ဝသောလူများအဖြစ် ဟန်ဆောင်ကြသည်။ ဤသည်မှာ သမ္မာတရားကို ဆော့ကစားသည့်၊ ဘုရားကို ပြစ်မှားစော်ကားသည့် သရုပ်သကန် မဟုတ်လော။ ငါ့ကို ပြောလော့။ မိမိတို့၏ ကျော်ကြားမှု၊ အကျိုးအမြတ်၊ အဆင့်အတန်း ဆုံးရှုံးသောအခါ မည်သည့်လူစားမျိုးက အထူးတလည် ကြီးမားသော တုံ့ပြန်မှုရှိသနည်း၊ အလွန်အမင်း ဆုတ်ယုတ်ကာ အပျက်သဘောဆောင်ခြင်းအဖြစ်သို့ ရောက်သနည်း၊ မိမိတို့တာဝန်အား ထမ်းဆောင်ခြင်းကို ရပ်တန့်သနည်း၊ မျှော်လင့်ချက်မရှိသူအဖြစ် မိမိတို့ကိုယ်ကို သတ်မှတ်ခြင်းအားဖြင့် ဆိုးသောအခြေအနေကို ပို၍ဆိုးအောင် လုပ်ဆောင်ကာ ယုံကြည်ခြင်းကိုပင် ရပ်တန့်သနည်း။ (ညံ့ဖျင်းသော လူ့သဘာဝရှိသူများနှင့် ဆိုးယုတ်သောလူများဖြစ်ပါသည်။) မှန်သည်။ ညံ့ဖျင်းသောလူ့သဘာဝရှိသူများနှင့် ဆိုးယုတ်သောလူများသည် အသေအချာပင် သမ္မာတရားအား လိုက်စားသူမဟုတ်ကြပေ။ သို့သော် လူ့သဘာဝကောင်းရှိသောသူတို့က သမ္မာတရားအား မလိုက်စားလျှင် ၎င်းတို့ကလည်း မိမိတို့ကိုယ်ကို ဤသို့ ပြသမည်လော။ အသေအချာပင် ပြသမည်ဖြစ်သည်။ ဆိုးယုတ်သောလူများက ဤသို့ မိမိတို့ကိုယ်ကို ပေါ်လွင်စေခြင်းအပြင် လူတို့လိုက်စားသည့်အရာနှင့် ၎င်းတို့လျှောက်သည့်လမ်းကြောင်းဖြင့် တိုက်ရိုက်ဆက်စပ်နေသည့် အခြားအခြေအနေတစ်ခုရှိသည်။ အပြင်ပန်းတွင် သမ္မာတရားကို မချစ်သောသူတို့က လူ့သဘာဝအချို့ရှိသည့်ပုံစံရှိလျှင်ပင် ယင်းထံမှ မည်သည့်ကောင်းကျိုးမျှ ထွက်ပေါ်လိမ့်မည်မဟုတ်။ ပြီးလျှင် ၎င်းတို့အားလုံး၌ ဆိုးယုတ်သော အနှစ်သာရများရှိသည်။ သမ္မာတရားအား ချိုးဖောက်နိုင်စွမ်း၊ ဘုရားသခင်ကို အာခံနိုင်စွမ်းရှိသည်။ ပြီးလျှင် ၎င်းတို့၌ အဆင့်အတန်းရှိလျှင် မကောင်းမှုကို လုပ်ဆောင်နိုင်စွမ်းရှိသည်။ အခြားသော အဆိုးရွားဆုံးသော ပြဿနာတစ်ခုရှိသည်။ ယင်းမှာ ဤသို့သောလူတို့သည် အဆင့်အတန်းအား လိုက်စားခြင်းတွင် အထူးပင် စိတ်အားတက်ကြွသည်။ ၎င်းတို့အား အဆင့်အတန်းရှိခွင့်မပေးလျှင်၊ သို့မဟုတ် ခေါင်းဆောင်ဖြစ်ခွင့်မပေးလျှင် ၎င်းတို့၏ အသက်ကို နုတ်ယူခြင်းခံရသကဲ့သို့ ဖြစ်သည်။ ၎င်းတို့ လက်ခံနိုင်သလော။ ၎င်းတို့သည် အဆင့်အတန်းရှိသောအခါတွင် မည်မျှ ဒုက္ခခံရပါစေ၊ မမှန်မကန် ဆက်ဆံမှုကို မည်မျှတောင့်ခံရပါစေ ၎င်းတို့က လိုလားလျက်ရှိသည်။ သို့ရာတွင် ၎င်းတို့က လိုလားရုံဖြင့် သို့မဟုတ် ဒုက္ခခံပြီး အဖိုးအခပေးဆပ်ရုံဖြင့် သမ္မာတရားအား လိုက်စားသူများဖြစ်သည်ဟု မဆိုနိုင်ပေ။ ဤသည်မှာ မှားယွင်းလိမ့်မည်။ ၎င်းတို့ လိုက်စားသည့်အရာမှာ ကျော်ကြားမှု၊ အကျိုးအမြတ်နှင့် အဆင့်အတန်းဖြစ်သည်။ ၎င်းတို့ လိုက်စားသည့်အရာမှာ အဆင့်အတန်း၏ အကျိုးအမြတ်များဖြစ်သည်။ ဤသည်မှာ ပေါလုနှင့် မည်သည့်ပုံစံဖြင့် တူသနည်း။ (သူသည် သရဖူကို လိုက်စားခဲ့သည်။) မှန်သည်။ သရဖူကို သူလိုက်စားခဲ့ပြီး ယင်းမှာ ဓမ္မသရဖူဖြစ်သည်။ ဤသည်မှာ ပေါလုကဲ့သို့သောလူများ လိုက်စားသည့်အရာဖြစ်သည်။ ၎င်းတို့သည် သရဖူအားလိုက်စားခြင်းကို သင့်လျော်သောလိုက်စားမှုအဖြစ်၊ သမ္မာတရားအား လိုက်စားမှုအဖြစ် မှတ်ယူကြသည်။ ဤအရာပြီးနောက်တွင် သင်တို့သည် ဤသို့သောလူအမျိုးအစားတို့နှင့်ပတ်သက်ပြီး ပိုင်းခြားသိမြင်မှုတစ်ခုခု ရှိမည်လော။ (ရှိပါမည်။) လူတစ်ဦးသည် အထုတ်ခံရပြီး သူ၏ အဆင့်အတန်းဆုံးရှုံးပြီးနောက်တွင် လူတို့အပေါ် ဒေါသတကြီးရမ်းကာ စိတ်ဆိုးသည်၊ သူမြင်တွေ့သည့် ညီအစ်ကိုမောင်နှမများကို အရေးမစိုက်၊ သို့မဟုတ် စကားမပြော၊ ဧဝံဂေလိ ဖြန့်ဝေရန် ခိုင်းစေသောအခါ ထိုသူက “ကျွန်ုပ်သည် ဧဝံဂေလိ ဖြန့်ဝေမည်မဟုတ်။ သင့်အတွက် အစေခံမည်မဟုတ်။ ကျွန်ုပ်ကို လိုအပ်သောအခါ သင် ကျွန်ုပ်ကို သတိရသည်။ သို့သော် မလိုအပ်သောအခါတွင် ကျွန်ုပ်အား ဘေးသို့ ကန်ထုတ်ကာ ထုတ်ပယ်ပစ်လိုက်သည်။ ကျွန်ုပ်သည် ထိုမျှ နုံအခြင်းမရှိ” ဟု ပြောသည် ဆိုပါစို့။ ဤစကားများသည် မည်သည့်စကားမျိုး ဖြစ်သနည်း။ ၎င်းတို့သည် ပိုင်းခြားသိမြင်ရန် လွယ်ကူသလော။ ၎င်းတို့သည် အဘယ်သို့များ ယုံကြည်သူဖြစ်ရသနည်း။ ၎င်းတို့သည် မည်သည့် စစ်မှန်သော ယုံကြည်သူအမျိုးအစားမျှ မဟုတ်၊ သို့မဟုတ် မည်သည့်လူကောင်းမျိုးမျှ မဟုတ်။ အထုတ်ခံရပြီးနောက်တွင် မည်သည့်လူအမျိုးအစားက အကြီးမားဆုံး တုံ့ပြန်မှုရှိသနည်း။ (ကျော်ကြားမှု၊ အကျိုးအမြတ်နှင့် အဆင့်အတန်းကို လိုက်စားသောသူတို့ ဖြစ်သည်။) ဤလူအမျိုးအစားသည် ညံ့ဖျင်းသော လူ့သဘာဝရှိသည်၊ သို့မဟုတ် သမ္မာတရား၊ သို့မဟုတ် အသက်ဝင်ရောက်မှုကို မလိုက်စားဟု ယခုပင် သင်တို့ပြောခဲ့ကြသည်။ ယင်းသည် ဤပြဿနာ၏ အနှစ်သာရနှင့် ဆက်နွှယ်သလော။ (မဆက်နွှယ်ပါ။) သင်တို့ပြောသည့်အရာက အဓိပ္ပာယ်တစ်ခုခုရှိသည့် ပုံစံရှိသည်။ သို့သော် ယင်းက ဤပြဿနာ၏ အနှစ်သာရနှင့် ဆက်စပ်မှုမရှိ။ ဤပြဿနာ၏ အနှစ်သာရမဟုတ်။ လူအချို့က အထုတ်ခံရပြီးနောက်တွင် စောဒကတက်ပြီး မိမိတို့ကိုယ်ကို အလေးမထားရသည့် အကြောင်းရင်းမှာ ၎င်းတို့တွင် ညံ့ဖျင်းသော လူ့သဘာဝရှိသောကြောင့်ဖြစ်သည်ဟု ယခုပင် သင်တို့ပြောခဲ့ကြသည်။ ဤသည်မှာ အယူဝါဒဖြစ်သည်ဟု ငါ အဘယ်ကြောင့်ဆိုသနည်း။ ဤသည်မှာ အဘယ်ကြောင့်ဆိုသော် လူအချို့မှာ အတော်အတန်ကောင်းမွန်သော လူ့သဘာဝရှိပြီး မိမိတို့ကိုယ်ကို ရိုးသားစစ်မှန်စွာ ပေးဆပ်ကာ အသုံးခံသောကြောင့်ဖြစ်သည်။ ၎င်းတို့က သမ္မာတရားကို မလိုက်စားသကဲ့သို့ ဂုဏ်သတင်းနှင့် အဆင့်အတန်းကို အစဉ်လိုက်စားခြင်းသာဖြစ်သည်။ ရလဒ်အနေဖြင့် ၎င်းတို့သည် အဆုံး၌ အထုတ်ခံရသောအခါ ကြီးစွာသော တုံ့ပြန်မှုရှိကြသည်။ ဤသည်မှာ ၎င်းတို့က မိမိတို့ကိုယ်ကို ပေါ်လွင်စေသည့်ပုံစံများမှာ ညံ့ဖျင်းသည့် လူ့သဘာဝ၏ ပြဿနာများသက်သက်မဟုတ်ဘဲ ၎င်းတို့၏ စိတ်သဘောထားနှင့်သက်ဆိုင်သည့် ပြဿနာများဖြစ်သည်၊ ၎င်းတို့၏ စိတ်သဘောထားသည် အလွန်ဆိုးရွားစွာ ပျက်စီးနေသည်ကို ပြသည်။ လူအချို့က ယင်းကို စကားတစ်ခွန်းဖြင့် အနှစ်ချုပ်ကာ “ဤလူသည် သမ္မာတရားကို မလိုက်စားပါ။ ဤသည်မှာ အကြောင်းရင်းဖြစ်သည်” ဟု ဆိုကြသည်။ ဤအဆိုသည် ကျယ်ပြန့်လွန်းသည်။ သမ္မာတရားအား မလိုက်စားခြင်းက ယင်းဘာသာ ပေါ်လွင်စေနိုင်သည့် နည်းလမ်းများစွာရှိသည်။ စောဒကတက်ခြင်း၊ မိမိတာဝန်ကို သစ္စာစောင့်သိစွာ မထမ်းဆောင်ခြင်း စသည်တို့အားလုံးက နမူနာများဖြစ်သည်။ “သမ္မာတရားအား မလိုက်စားကြ” ဟူသည့် စကားတစ်ခွန်းဖြင့် ပြဿနာတိုင်းကို ရှင်းပြ၍မရနိုင်ပေ။ ဤသည်မှာ ကျယ်ပြန့်လွန်းပြီး ခိုင်လုံခြင်းမရှိ။ ဤသည်မှာ အယူဝါဒကို အခြေခံသော ရှင်းပြချက်တစ်ခုဖြစ်သည်။

ယခုတွင် ဝိညာဉ်ရေးရာ နားလည်သဘောပေါက်မှု ကင်းမဲ့ခြင်းက ယင်းဘာသာ ပေါ်လွင်သည့်ပုံစံကို ငါ မိတ်သဟာယဖွဲ့မည်။ ဝိညာဉ်ရေးရာ နားလည်သဘောပေါက်မှု မရှိသောသူများသည် သမ္မာတရားအပေါ်၌ မည်သည့်သဘောထားရှိသနည်း။ ၎င်းတို့သည် မိမိတို့၏ ကိုယ်ပိုင်အခြေအနေ၊ သရုပ်သကန်များနှင့် ၎င်းတို့ထုတ်ဖော်သည့် ဖောက်ပြန်ပျက်စီးမှုကို မည်သို့ ချဉ်းကပ်သနည်း။ ၎င်းတို့သည် သမ္မာတရားအား လိုက်စားသူ၏ သရုပ်သကန်များကို ပိုင်ဆိုင်နိုင်စွမ်းရှိသလော။ (မရှိပါ။) ဤတွင် အကြီးဆုံးသော ပြဿနာသည် အဘယ်နည်း။ (၎င်းတို့သည် ဘုရားနှုတ်ကပတ်တော်က မည်သည့်လူသားအခြေအနေများ၊ သို့မဟုတ် သရုပ်သကန်များအား ဖော်ထုတ်နေသည်ကို နားမလည်ကြသကဲ့သို့ ဤအရာများကို မိမိတို့ကိုယ်ကိုဖြင့် နှိုင်းယှဉ်ချိန်ဆချက်များ ထုတ်ရန် အသုံးမပြုနိုင်ပါ။) အဓိကအားဖြင့် ၎င်းတို့သည် မိမိတို့ကိုယ်ကိုဖြင့် နှိုင်းယှဉ်ချိန်ဆချက်များ မချမှတ်နိုင်ခြင်း ဖြစ်သည်။ ၎င်းတို့သည် မိမိတို့ကိုယ်ကို နှိုင်းယှဉ်ချိန်ဆချက်များ မချမှတ်နိုင်လျှင် သမ္မာတရားကို ၎င်းတို့နားလည်သည်ဟု ဆိုနိုင်သလော။ (မဆိုနိုင်ပါ။) သင်သည် အကြောင်းအရာတစ်ခုကို ပြောဆိုနေသော်လည်း ၎င်းတို့က ယင်းနှင့် လုံးဝဆန့်ကျင်သည့်အရာတစ်ခုကို အစဉ်ပြောဆိုနေသည်။ ၎င်းတို့သည် အစဉ်သင်နှင့် ကွဲလွဲကာ သင်နှင့် ငြင်းခုံဆွေးနွေးသည်။ သင်နှင့် ၎င်းတို့ ငြင်းခုံဆွေးနွေးနေသည့် ပြဿနာတွင် တူညီသော အာရုံစိုက်မှုမရှိ။ တူညီသော ကိစ္စမဟုတ်။ သို့သော် ၎င်းတို့က အလွန်ပင် မှန်ကန်သည်ဟု ထင်မြင်ဆဲဖြစ်သည်။ ဤသည်မှာ ဝိညာဉ်ရေးရာ နားလည်သဘောပေါက်မှုမရှိသောသူများက မိမိတို့ကိုယ်ကို ပေါ်လွင်စေသည့် ပုံစံဖြစ်သည်။ ဝိညာဉ်ရေးရာ နားလည်သဘောပေါက်မှုမရှိသူများသည် သမ္မာတရားကို နားမလည်နိုင်ကြ။ ၎င်းတို့သည် သမ္မာတရားကို လိုက်စားနိုင်စွမ်းရှိသလော။ (မရှိပါ။) ဤသည်မှာ ဒုက္ခပေးတတ်သည်။ ၎င်းတို့သည် သမ္မာတရားအား လိုက်စားနိုင်စွမ်းမရှိလျှင် အသက်ဝင်ရောက်မှုရှိနိုင်သလော။ (မရှိနိုင်ပါ။) သမ္မာတရားအား မလိုက်စားသူတို့သည် အသက်ဝင်ရောက်မှုရှိဖို့ ဖြစ်နိုင်ချေမရှိပါ။ ဤသည်မှာ အကြွင်းမဲ့ဖြစ်သည်။ လူတစ်ဦးသည် ဘုရားသခင်အပေါ် နှစ်အတန်ကြာ ယုံကြည်ခဲ့သော်လည်း သမ္မာတရားကို လုံးဝ နားမလည်လျှင် သူသည် သမ္မာတရားအား လိုက်စားသူတစ်ဦး ဟုတ်သလော။ အသေအချာပင် မဟုတ်ပေ။ လူအချို့က “ဤသည်မှာ အစဉ်သဖြင့် မမှန်ကန်ပေ။ လူအချို့က သမ္မာတရားကို နားမလည်သော်လည်း အလွန်စိတ်ထက်သန်ပြင်းပြပြီး ဘုရားသခင်အတွက် မိမိတို့ကိုယ်ကို အသုံးခံရန် အရာရာတိုင်းကို စွန့်လွှတ်ကြသည်။ ၎င်းတို့သည် အဘယ်သို့ သမ္မာတရားကို မလိုက်စားသောသူ ဖြစ်နိုင်မည်နည်း” ဟု ဆိုသည်။ ဤအမြင်မှာ မှန်ကန်သလော။ လူတစ်ဦးက သမ္မာတရားကို လိုက်စားခြင်းရှိမရှိ အကဲဖြတ်ရာတွင် သူသည် ဘုရားသခင်အတွက် မိမိကိုယ်ကို အသုံးခံရန် အရာရာတိုင်းအား စွန့်ပစ်ခြင်းရှိမရှိကိုသာ ကြည့်၍မရနိုင်ပေ။ ကြည့်ရမည့် အဓိကအချက်မှာ သူ၏ စိတ်နှလုံးကမည်သည့်အရာကို အလေးထားသည်ဆိုသည့်အရာဖြစ်သည်။ သူ၏ စိတ်နှလုံးက အလေးထားသည့်အရာမှာ သမ္မာတရားအား လက်တွေ့လုပ်ဆောင်ခြင်း၊ သမ္မာတရားအတွင်းသို့ ဝင်ရောက်ခြင်း၊ သမ္မာတရားကို ရရှိခြင်းဖြစ်ပြီး သူသည် အသက်ဝင်ရောက်မှု၌ ထိရောက်မှုရှိလျှင် သူသည် သမ္မာတရားအား လိုက်စားသူတစ်ဦးဖြစ်သည်။ သူသည် သရဖူနှင့် ဆုလာဘ်ရရှိရန်အတွက် မိမိကိုယ်ကို စွန့်ပစ်ပြီး အသုံးခံပြီး နှစ်များစွာကြာ မိမိကိုယ်ကို စွန့်ပစ်ပြီး အသုံးခံပြီးဖြစ်ကာ များစွာ ဒုက္ခခံသော်လည်း သမ္မာတရားကို နားမလည်နိုင်သေးလျှင်၊ သို့မဟုတ် စစ်မှန်မှုအတွင်းသို့ မဝင်ရောက်နိုင်သေးသကဲ့သို့ ဘုရားသခင်ကို နားမလည်နိုင်သေးလျှင် သူ၏ စွန့်ပစ်ခြင်းနှင့် အသုံးခံခြင်းသည် အမှန်တကယ်၌ သမ္မာတရားအား လိုက်စားခြင်း ဖြစ်သလော။ သူသည် သမ္မာတရားအား လိုက်စားသူမဟုတ်သည်မှာ သိသာသည်။ အဘယ်ကြောင့်ဆိုသော် သူ၏ စွန့်ပစ်ခြင်းနှင့် အသုံးခံခြင်းမှာ သူတို့တွင် သမ္မာတရားအားနားလည်သည့်၊ သို့မဟုတ် သမ္မာတရားစစ်မှန်မှုများအတွင်းသို့ ဝင်ရောက်သည့် ရလဒ်မရှိသောကြောင့် ဖြစ်သည်။ ထို့ကြောင့် သူသည် စွန့်ပစ်ပြီး အသုံးခံသည်ဆိုသည့်အချက်က သမ္မာတရားကို လိုက်စားသည်ဟု မဆိုလိုပေ။ ဤသို့သောလူများသည် ပေါလုကဲ့သို့ ဖြစ်သည်။ ပေါလုသည် သခင့်အတွက် တရားဟောလျက်၊ အလုပ်လုပ်လျက် သူ၏ဘဝတစ်ဝက်ကို ကုန်ဆုံးခဲ့သော်လည်း သမ္မာတရားကို မရရှိခဲ့သကဲ့သို့ သခင့်ကိုလည်း မရခဲ့ပေ။ ထို့ကြောင့် ပေါလုသည် သမ္မာတရားအားလိုက်စားခဲ့သူဟု သင်ဆိုနိုင်သလော။ လူတစ်ဦးက သမ္မာတရားအား လိုက်စားခြင်းရှိမရှိနှင့်ပတ်သက်လျှင် သူလိုက်စားနေသော ပန်းတိုင်၊ သူ၏ ရည်ရွယ်ချက်သည် သမ္မာတရားအား ရရှိခြင်းကို အလေးထားခြင်းရှိမရှိကြည့်ဖို့မှာ အရေးပါသည်။ သူသည် သမ္မာတရားအတွင်းသို့ အားစိုက်ထုတ်ခြင်းအပေါ် အမှန်တကယ် အလေးထားလျှင်၊ သမ္မာတရားအား လက်တွေ့လုပ်ဆောင်ခြင်း၊ စစ်မှန်မှုအတွင်းသို့ ဝင်ရောက်ခြင်းကဲ့သို့သော အရာများ၌ ထိရောက်နေလျှင် ထိုအခါမှသာ ထိုသူသည် သမ္မာတရားအား လိုက်စားသူဖြစ်သည်။ သမ္မာတရားအား အမှန်တကယ် လိုက်စားသူတိုင်းသည် သမ္မာတရားကို လက်တွေ့လုပ်ဆောင်နိုင်စွမ်းရှိသည်။ သမ္မာတရားအား လက်တွေ့လုပ်ဆောင်သူတို့သာ အသက်ဝင်ရောက်မှုရှိသူများ ဖြစ်သည်။ လူတစ်ယောက်က မိမိသည် သမ္မာတရားအား လိုက်စားသူဖြစ်သည်ဟုဆိုသော်လည်း သမ္မာတရားအား လက်တွေ့မလုပ်ဆောင်လျှင် ဤလူ၌ အသက်ဝင်ရောက်မှုရှိသည်ဟု သင်တို့ ဆိုမည်လော။ အသေအချာပင် မရှိပေ။ သမ္မာတရားအား လက်တွေ့မလုပ်ဆောင်သူတစ်ဦးသည် အဘယ်သို့ အသက်ဝင်ရောက်မှုရှိနိုင်မည်နည်း။ ဤသည်မှာ လုံးဝ မဖြစ်နိုင်ပေ။ သူသည် သမ္မာတရားအား လိုက်စားသူဖြစ်ပြီး အသက်ဝင်ရောက်မှုရှိသည်ဟု သူက ထင်မြင်လျှင် သင်သည် ထိုသူအား “သင်၏ အသက်ဝင်ရောက်မှု၏ သက်သေမှာ အဘယ်နည်း” ဟု မေးသင့်သည်။ သူ၏စကားဖြင့်သာ ယုံကြည်ခြင်းသည် မလုံလောက်ပေ။ သက်သေမရှိလျှင် သူပြောသည့်အရာသည် ခိုင်လုံမှုမရှိ။ သင်က သမ္မာတရားအား လိုက်စားသူတစ်ဦးဖြစ်သည်ဟု သင်ဆိုလျှင် သမ္မာတရားမည်မျှကို သင်နားလည်သနည်း။ သမ္မာတရားမည်မျှကို သင်လက်တွေ့လုပ်ဆောင်ပြီးသနည်း။ သမ္မာတရားစစ်မှန်မှုများ၏ မည်သည့်သွင်ပြင်လက္ခဏာများသို့ သင်ဝင်ရောက်ပြီးသနည်း။ သင်၏ အတွေ့အကြုံဆိုင်ရာ သက်သေခံချက်အကြောင်း သင်ပြောဆိုနိုင်သလော။ သင်၏ အတွေ့အကြုံဆိုင်ရာ သက်သေခံချက်အကြောင်းကို သင်မပြောဆိုနိုင်လျှင် သင်သည် သမ္မာတရားကို လိုက်စားသူဖြစ်သည်ဟု ပြောခြင်းအားဖြင့် လူတို့ကို လှည့်စားကာ အထင်အမြင်မှားစေနေခြင်းဖြစ်သည်။ ပေါလုက သမ္မာတရားကို လိုက်စားသူမဟုတ်ဟု ငါအဘယ်ကြောင့်ဆိုသနည်း။ ဤသည်မှာ အဘယ်ကြောင့်ဆိုသော် ပေါလု ရေးခဲ့သည့်စာများမှာ အသက်အတွေ့အကြုံဆိုင်ရာ သက်သေခံချက်တစ်ခုမျှ မပါဝင်သောကြောင့် ဖြစ်သည်။ သူသည် ချစ်ခြင်း၊ သို့မဟုတ် သခင်ယေရှုအပေါ် ကျိုးနွံနာခံခြင်းအကြောင်း ပြောဖို့မဆိုထားနှင့်၊ ဘုရားသခင်အပေါ် အမှန်တကယ် နားလည်ခြင်းအကြောင်းကိုပင် မပြောနိုင်ခဲ့ပေ။ သူ၏ ကိုယ်ပိုင်ဖောက်ပြန်ပျက်စီးသော စိတ်သဘောထားအပေါ်ပင် နားလည်ခြင်းမရှိခဲ့ပေ။ သူသည် အဆိုးဆုံးသော အပြစ်သားဖြစ်သည်ဟုသာ ပြောခဲ့သည်။ သူသည် သခင်ယေရှုကို အာခံခြင်းအတွက် အပြစ်ပေးခံရသည့်အချက်ကို အခြေခံပြီး ဤအရာကို ပြောခဲ့ခြင်းဖြစ်သည်။ သူသည် အဆိုးဆုံးသော အပြစ်သားဟု ဆိုခြင်းအားဖြင့် သူသည် သခင်ယေရှုကို အရူးအမူးအာခံခြင်းအားဖြင့် အပြစ်ကျူးလွန်ခဲ့သည်ဆိုသည့်အချက်ကို ဝန်ခံနေခြင်းသာဖြစ်သည်။ ဤသည်မှာ သူသည် သူ၏ကိုယ်ပိုင်ဖောက်ပြန်ပျက်စီးသော စိတ်သဘောထားနှင့် အနှစ်သာရကို အမှန်တကယ် နားလည်ခဲ့သည်ဟု ဆိုလိုသလော။ (မဆိုလိုပါ။) ဤအတွက်ကြောင့် သမ္မာတရားအား လိုက်စားခြင်း၌ မည်သည့်အရာ ပါဝင်သည်၊ မည်သည့်လူစားမျိုးက အသက်ဝင်ရောက်မှု ရှိသည်ဆိုသည်နှင့်ပတ်သက်သောအခါတွင် ၎င်းတို့ကိုယ်တိုင်က ပြောသည့်အရာထက် ၎င်းတို့သည် သမ္မာတရားကို နားလည်ပြီး သမ္မာတရားအား လက်တွေ့လုပ်ဆောင်ခြင်းရှိမရှိအပေါ် အခြေခံ၍ ဆုံးဖြတ်သင့်သည်ဟု ငါဆိုခြင်းဖြစ်သည်။ ယခု ငါပြောနေသည့်အရာကို သင်တို့ နားလည်သလော။ အဘယ်ကြောင့် အလွန်အသေးစိတ်ကျစွာ ငါတို့ မိတ်သဟာယဖွဲ့နေသနည်း။ ဤသည်မှာ လိုအပ်သလော။ (လိုအပ်ပါသည်။) အဘယ်ကြောင့် လိုအပ်သနည်း။ ငါသည် သင်တို့၏ မှားယွင်းပြီး အဓိပ္ပာယ်မဲ့သော အမြင်များကို စိစစ်ရန်၊ သင်တို့က မှန်သည်ဟု တလွဲထင်မြင်သောအရာများကို ပြုပြင်ရန်၊ သင်တို့အား ထွက်ပေါက်တစ်ခု ရှာတွေ့ဖို့၊ သင်တို့က မှန်သည်ဟု တလွဲထင်မြင်သောအရာများကို လက်လွှတ်ပြီး ထို့နောက်တွင် သမ္မာတရားအား အမှန်တကယ်လိုက်စားခြင်းလမ်းကြောင်းကို ဝင်ရောက်ဖို့ ကူညီပေးရန်အတွက် ဤသို့ မိတ်သဟာယဖွဲ့နေခြင်း ဖြစ်သည်။ ဤသို့ဆိုလျှင် လူတို့သည် အမှန်တကယ်ပင် အသက်ဝင်ရောက်မှုရှိလိမ့်မည်။ သမ္မာတရားအား အမှန်တကယ် လိုက်စားခြင်းကို ရရှိနိုင်စွမ်းရှိလိမ့်မည်။ ဝိညာဉ်ရေးရာ နားလည်သဘောပေါက်မှု မရှိသူများသည် အသက်ဝင်ရောက်မှု၊ သို့မဟုတ် စိတ်သဘောထားပြောင်းလဲမှု ကိစ္စရပ်များကို နားမလည်ကြပေ။ ၎င်းတို့သည် ၎င်းတို့ကိုယ်တိုင်၏ သွင်ပြင်လက္ခဏာများစွာကို ပြောင်းလဲပြီးဖြစ်ကာ အသက်ဝင်ရောက်မှု ရရှိပြီးဖြစ်သည်ဟု ထင်ကြသည်။ ဥပမာအနေဖြင့် ၎င်းတို့သည် မကောင်းသော အလေ့အကျင့်အချို့ကို ပြောင်းလဲပြီးဖြစ်သည်။ အလွန်အကျွံမစားပေ။ အလွန်အကျွံမအိပ်ပေ။ မပျင်းရိပေ။ ယခင်ကထက်ပို၍ အလုပ်ကြိုးစားသည်။ ထို့ကြောင့် ဤသည်မှာ ၎င်းတို့၌ အသက်ဝင်ရောက်မှုရှိသည့်သဘောဖြစ်သည်ဟု ၎င်းတို့က ထင်ကြသည်။ လူတို့ကို အစဉ်ဆူပူခဲ့လေ့ရှိသော်လည်း ယခုတွင် ဆူပူခြင်းမရှိတော့ပုံကို တွေးမိသည့်သူများရှိသည်။ ၎င်းတို့သည် လူတို့အပေါ် ကောင်းမွန်သောအရာများနှင့် အပြုသဘောဆောင်သောအရာများကို ပြောဆိုနိုင်ကြပြီး တစ်ခါတစ်ရံတွင် လူတို့ကို ကူညီနိုင်သည်။ ဤအရာများကို ၎င်းတို့ လုပ်ဆောင်နိုင်သောကြောင့် ၎င်းတို့သည် သမ္မာတရားကို လက်တွေ့လုပ်ဆောင်နေပြီး ပြောင်းလဲမှုကို ဖြတ်သန်းပြီးဖြစ်သည်ဟု ထင်ကြသည်။ လူအချို့က ကျော်ကြားမှု၊ အကျိုးအမြတ်၊ အဆင့်အတန်းနှင့် ရုပ်ပိုင်းဆိုင်ရာ သာယာမှုတို့အား လိုက်စားခြင်းကို စွန့်လွှတ်နိုင်သောကြောင့် ၎င်းတို့သည် အသက်ဝင်ရောက်မှုရှိသည်ဟု ထင်ကြသည်။ ဤသည်မှာ လူအားလုံးတွင် ဖြစ်လေ့ရှိသည့် ပြဿနာတစ်ခုဖြစ်သည်။ ၎င်းတို့သည် ၎င်းတို့နားလည်သည့်အရာကို လက်တွေ့လုပ်ဆောင်ပြီး ဖြစ်သည်။ ၎င်းတို့၏ အယူအဆများအရ ၎င်းတို့ထင်သည့်အရာမှာ မှန်ပြီး ကောင်းမွန်သည်။ ပြီးလျှင် ၎င်းတို့သည် မကောင်းသောအလေ့အကျင့်များစွာနှင့် ဇာတိပကတိ၏ ပြဿနာဖြစ်စေသော လက္ခဏာများကို ကိုင်တွယ်ပြီးဖြစ်သည်၊ သို့မဟုတ် ဘုရားသခင်ကို ယုံကြည်ခြင်း၊ သမ္မာတရားအား လိုက်စားခြင်းကြောင့် ၎င်းတို့၏ ဘဝနေထိုင်မှုပုံစံနှင့်ပတ်သက်သော စည်းစနစ်ကို ပြောင်းလဲပြီး ဖြစ်သည်။ တစ်ချိန်တည်းတွင် ၎င်းတို့သည် ဇာတိပကတိဆိုင်ရာ အကျိုးအမြတ်များစွာကို စွန့်ပစ်ပြီး ဖြစ်သည်။ ၎င်းတို့၏ မိသားစုနှင့် အလုပ်ကို စွန့်ပစ်ပြီး ဖြစ်သည်။ ၎င်းတို့၏ အိမ်ထောင်နှင့် လောကီကို စွန့်လွှတ်ပြီး ဖြစ်သည်။ ၎င်းတို့က ပြောင်းလဲပြီးဖြစ်ကာ ကယ်တင်ခြင်းခံရပြီးဖြစ်သည်ဟု ထင်ကြပြီး “ကျွန်ုပ်သည် ဘုရားသခင်ကို မယုံကြည်ခဲ့လျှင် ဤအရာအားလုံးကို လက်လွှတ်နိုင်မည်လော။ ဤကဲ့သို့သော ကြီးမားသည့် ပြောင်းလဲမှုရှိနိုင်မည်လော” ဟု ဆိုသည်။ ဤသည်မှာ ယုံကြည်သူများပြုလုပ်သော အကြီးဆုံးသော နားလည်မှုလွဲခြင်း မဟုတ်လော။ (ဟုတ်ပါသည်။) လူတို့တွင် ဝိညာဉ်ရေးရာ နားလည်သဘောပေါက်မှုရှိသည်ဖြစ်စေ၊ မရှိသည်ဖြစ်စေ ၎င်းတို့အားလုံးတွင် ဤနားလည်မှုလွဲခြင်း ရှိသည်။ ဤသည်မှာ နားလည်မှုလွဲခြင်းဟု ငါအဘယ်ကြောင့်ဆိုသနည်း။ ဤနေရာတွင် ဆိုးရွားသော ပြဿနာတစ်ခုရှိသည်ဟု ငါအဘယ်ကြောင့်ဆိုသနည်း။ ဤသည်မှာ အဘယ်ကြောင့်ဆိုသော် အဓိကအားဖြင့် လူတို့သည် ဘုရားသခင်ကို ယုံကြည်သော်လည်း သူ၏ ရည်ရွယ်ချက်ကို နားမလည်သောကြောင့်ဖြစ်သည်။ ဆိုလိုသည်မှာ လူတို့သည် ဘုရားသခင်က ၎င်းတို့အပေါ် အတိအကျမည်သည့်အရာ တောင်းဆိုသည်ကို နားမလည်ခြင်း ဖြစ်သည်။ ဤအစား ၎င်းတို့သည် လူသားအယူအဆများနှင့် စိတ်ကူးများအတိုင်း တွေးပြီး ၎င်းတို့၏ မိသားစု၊ အလုပ်၊ ခံစားချက်များ၊ လောကီ၊ ဇာတိပကတိကို ငြိတွယ်မှု၊ ပြီးလျှင် ၎င်းတို့ပိုင်ဆိုင်သော ပစ္စည်းဥစ္စာများကိုပင် လက်လွှတ်နိုင်ခြင်းက ၎င်းတို့၌ အသက်ဝင်ရောက်မှု ရှိသည့်သဘောဖြစ်သည်ဟု ယုံကြည်ကြသည်။ ဤသည်မှာ နားလည်မှုလွဲခြင်း ဖြစ်သည်။ အမှန်တကယ်တွင် ဘုရားသခင်၏ ရည်ရွယ်ချက်မှာ ဘုရားသခင်ကို လူတို့ ယုံကြည်သောအခါ ၎င်းတို့သည် ၎င်းတို့၏ ဖောက်ပြန်ပျက်စီးသော စိတ်သဘောထားကို ပြုပြင်ရမည်။ ဘုရားသခင်ကို အာခံသည့် ၎င်းတို့၏ ပြဿနာကို ပြုပြင်ပြီး ၎င်းတို့ ကျူးလွန်သည့် အပြစ်များ၏ အရင်းအမြစ်ကို ဖြေရှင်းရမည်။ လူတို့သည် ဤအရာကို လုပ်ဆောင်ရန်အတွက် ၎င်းတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားပြီး ဘုရားသခင်အပေါ် စစ်မှန်သော ကျိုးနွံနာခံခြင်းမရရှိနိုင်မီတွင် သမ္မာတရားကို နားလည်ပြီး ဘုရားသခင်၏ စိတ်သဘောထားကို နားလည်ရမည်ဖြစ်သည်။ ဤသည်မှာ လူတို့အပေါ် ဘုရားသခင် တောင်းဆိုသည့်အရာဖြစ်ပြီး လူတို့ကို ကယ်တင်ခြင်းအတွက် သူလုပ်ဆောင်သောအမှုလည်း ဖြစ်သည်။ လူတို့သည် ဘုရားသခင်၏ အမှုတော်အကြောင်းကို လုံးဝ မသိပေ။ ဤအမှုတော်မှတစ်ဆင့် ဘုရားသခင် ဖြစ်မြောက်လိုသည့် ပန်းတိုင်နှင့် သက်ရောက်မှုကို ၎င်းတို့ မမြင်ပေ။ ထို့ကြောင့် ၎င်းတို့သည် သမ္မာတရားကို လူသားအယူအဆများ၊ စိတ်ကူးထင်မြင်မှုများဖြင့် အစားထိုးပြီး လူတို့၏ လိုက်စားမှုများနှင့် ၎င်းတို့ ဖြစ်မြောက်အောင် လုပ်နိုင်စွမ်းရှိသည့်အရာတို့ကို ဘုရားသခင်၏ ရည်ရွယ်ချက်နှင့် လူတို့အပေါ် ဘုရားသခင်တောင်းဆိုသည့်အရာအဖြစ် မှတ်ယူကြသည်။ ဤသည်မှာ ဘုရားသခင်ကို လူတို့ ယုံကြည်သောအခါတွင် ၎င်းတို့၌ရှိသော နားလည်မှုလွဲခြင်း ဖြစ်သည်။ ၎င်းတို့က ဖြစ်မြောက်အောင် လုပ်နိုင်စွမ်းရှိသည့် ဤအရာများသည် ၎င်းတို့၌ စိတ်ထက်သန်ပြင်းပြမှုရှိသည်ကိုသာ ထင်ရှားစေသည်။ ပြီးလျှင် အမှုအရာများကို ၎င်းတို့ စွန့်ပစ်သောအခါ ၎င်းတို့သည် အမှန်တကယ်တွင် ဘုရားသခင်နှင့် အပေးအယူလုပ်ရန် ကြံရွယ်နေခြင်းဖြစ်သည်။ ယင်းသည် ဆုလာဘ်နှင့် သရဖူတစ်ခုဖြင့် လဲလှယ်ရန် လုပ်ဆောင်ခြင်းဖြစ်သည်။ ၎င်းတို့က ဤသို့သော အပေးအယူတို့သည် ထိုက်တန်ပြီး ၎င်းတို့အတွက် အကျိုးအမြတ်ရှိသည်ဟု ထင်ကြသည်။ ဤသည်မှာ အရာရာတိုင်းကို ၎င်းတို့ စွန့်ပစ်သည့်အကြောင်းရင်း ဖြစ်သည်။ အရာဝတ္ထုများကို စွန့်ပစ်ခြင်းသည် ၎င်းတို့၌ သမ္မာတရားစစ်မှန်မှုများရှိသည်ဟု မဆိုလိုသကဲ့သို့ ၎င်းတို့သည် ဘုရားသခင်အပေါ် ကျိုးနွံနာခံနိုင်သည်ဟု မဆိုလိုပေ။ ၎င်းတို့က စွန့်ပစ်ပြီး အသုံးခံစဉ်တွင် ၎င်းတို့သည် သမ္မာတရားကို အမှန်တကယ် နားလည်သလော။ (နားမလည်ပါ။) သမ္မာတရားကို ၎င်းတို့ နားမလည်လျှင် ၎င်းတို့၏ စွန့်ပစ်ခြင်းနှင့် အသုံးခံခြင်းသည် အစွန်းအထင်း ရှိသလော။ အသေချာဆုံးပင် ဖြစ်သည်။ ဤသို့ဆိုလျှင် ဤသို့ အသုံးခံပြီး ဒုက္ခခံခြင်းအားဖြင့် အတိအကျ မည်သည့်အရာကို ၎င်းတို့ လိုက်စားနေသနည်း။ ဤသို့သောလူတို့သည် သမ္မာတရားက မည်သည့်အရာဖြစ်သည်၊ ဘုရားသခင်၏ တောင်းဆိုချက်များက မည်သည့်အရာဖြစ်သည်ဆိုသည်ကို လုံးဝ ဂရုမစိုက်ခဲ့ပေ။ ၎င်းတို့သည် ယင်းတို့ဖြင့် သက်ဆိုင်ခြင်းလုံးဝမရှိဟု အစဉ် ထင်မြင်ကြသည်။ ၎င်းတို့ စိတ်နှလုံးတွင် ၎င်းတို့ထင်မြင်သမျှက မှန်သည်။ ၎င်းတို့ ထင်မြင်သမျှက ကောင်းသည်။ ၎င်းတို့ ထင်မြင်သမျှက အသက်ဝင်ရောက်မှုဖြစ်သည်။ ၎င်းတို့ထင်မြင်သမျှက ၎င်းတို့ လက်တွေ့လုပ်ဆောင်သည့်အရာဖြစ်ပြီး လက်တွေ့လုပ်ဆောင်ပြီးနောက်တွင် ဘုရားသခင်က အောက်မေ့ဂုဏ်ပြုပြီးဖြစ်သည်ဟု ၎င်းတို့ ထင်ကြသည်။ ၎င်းတို့သည် ဤအရာများကို ရောင်းဝယ်ရန် တိုကင်ပြားများအဖြစ်၊ အရင်းအနှီးအဖြစ် မှတ်ယူကြသည်။ ဤသည်တို့မှာ သမ္မာတရားအား လိုက်စားခြင်း သရုပ်သကန်များ ဟုတ်သလော။ (မဟုတ်ပါ။) ဤသည်မှာ သမ္မာတရားအား မလိုက်စားသူတို့ ပြုလုပ်သော နားလည်မှုလွဲခြင်း ဖြစ်သည်။ ဤသည်မှာ အသက်ဝင်ရောက်မှုကို နားလည်မှုလွဲသောလူများက အမှုအရာများကို အနက်အဓိပ္ပာယ်ကောက်သည့် ပုံစံများထဲမှ တစ်ခုဖြစ်သည်။ ဤသို့ဆိုလျှင် ဤအရာများသည် သမ္မာတရားအား လိုက်စားခြင်း သရုပ်သကန်များမဟုတ်၊ ၎င်းတို့၌ အသက်ဝင်ရောက်မှုမရှိဆိုသည်ကို မည်သို့ အကဲဖြတ်ပြီး သက်သေပြသနည်း။ ၎င်းတို့ပြောသည့် ဤအရာများသည် မှားယွင်းသည်ဆိုသည်ကို အတည်ပြုရန် မည်သည့်အချက်အလက်များကို အသုံးပြုနိုင်သနည်း။ (၎င်းတို့သည် သမ္မာတရားစည်းမျဉ်းများမရှိဘဲ လုပ်ဆောင်ကြသည်။) ဤသည်မှာ တစ်စိတ်တစ်ပိုင်းဖြစ်သည်။ ၎င်းတို့သည် ၎င်းတို့စိတ်ကူးထင်မြင်သည့်အရာအပေါ်တွင် အခြေခံ၍ လုပ်ဆောင်သည်။ အပြင်ပန်းတွင် ၎င်းတို့သည် စစ်မှန်သော ယုံကြည်သူများနှင့် ဆင်တူသည်။ ၎င်းတို့သည် အမှုအရာများကို စွန့်ပစ်နိုင်ပြီး မိမိတို့ကိုယ်ကို အသုံးခံနိုင်သည်။ သို့သော် ၎င်းတို့၏ လုပ်ရပ်များတွင် စည်းမျဉ်းနှင့်မညီပေ။ အဘယ်ကြောင့် စည်းမျဉ်းနှင့် မညီကြသနည်း။ သမ္မာတရားကို ၎င်းတို့ မလိုက်စားသောကြောင့် ဖြစ်သည်။ အမှုအရာများကို ၎င်းတို့ ရှုမြင်သည့်ရှုထောင့်များသည် ၎င်းတို့စတင်ခဲ့သည့် အယူအဆများ၊ စိတ်ကူးများပင် ဖြစ်နေဆဲ ဖြစ်သည်။ ဤသို့သောလူများတွင် အကြီးဆုံးသော ပြဿနာတစ်ခုရှိသည်။ ၎င်းတို့သည် ဘုရားသခင် စီစဉ်ညွှန်ကြားသည့် ပတ်ဝန်းကျင်များကို ကျိုးနွံနာခံသလော။ ဘုရားသခင်က ဤပတ်ဝန်းကျင်များကို အဘယ်ကြောင့် စီစဉ်ညွှန်ကြားခဲ့သည်ကို ၎င်းတို့ နားလည်သလော။ (နားမလည်ပါ။) ဤသည်မှာ ၎င်းတို့၌ စစ်မှန်သော အသက်ဝင်ရောက်မှုမရှိသည်ကို သက်သေပြရန် လုံလောက်သလော။ (လုံလောက်ပါသည်။) ၎င်းတို့သည် ၎င်းတို့၏ မကောင်းသောအလေ့အကျင့်များနှင့် ပြဿနာဖြစ်စေသော လက္ခဏာများ၌ ပြောင်းလဲမှုများစွာ ပြုလုပ်ခဲ့ပြီး စွန့်လွှတ်မှုများစွာကို လုပ်ဆောင်ခဲ့ပြီးဖြစ်သည်။ အဆုံးတွင် ၎င်းတို့သည် စမ်းသပ်ခြင်းခံရသောအခါ ဘုရားသခင်၏ ရည်ရွယ်ချက်ကို ၎င်းတို့ နားမလည်ရုံသာမက စောဒကတက်နိုင်စွမ်းရှိဆဲဖြစ်ပြီး ကျိုးနွံနာခံနိုင်ခြင်း မရှိပေ။ ဤသည်မှာ မည်သည့်ပြဿနာဖြစ်သနည်း။ ဤသည်မှာ ၎င်းတို့တွင် အသက်ဝင်ရောက်မှုမရှိခြင်း ဖြစ်သည်။ အသက်ဝင်ရောက်မှုမရှိသူများတွင် သမ္မာတရား စစ်မှန်မှုများမရှိပေ။ ဤသည်မှာ မမှန်သလော။ (မှန်ပါသည်။) အမှုအရာများ ဖြစ်ပျက်သောအခါတွင် ၎င်းတို့သည် ၎င်းတို့၏ ကိုယ်ပိုင်အယူအဆများ၊ စိတ်ကူးများနှင့် သဘာဝအလျောက် နှစ်သက်မှုများအပေါ်သို့ လုံးလုံးလျားလျား အမှီပြုသည်။ သင်သည် ၎င်းတို့နှင့် အမှန်တကယ် အလေးအနက်လုပ်ဆောင်ပြီး ၎င်းတို့အား ကျိုးနွံနာခံရန် တောင်းဆိုသောအခါတွင် ၎င်းတို့သည် လုံးဝ ကျိုးနွံနာခံခြင်း မရှိပေ။ ၎င်းတို့သည် လူသားအကြောင်းပြချက်များ၊ ဆင်ခြေများနှင့် စိတ်ကူးများအပေါ်တွင်သာ အမှီပြုပြီး မိမိတို့ကိုယ်ကို ခုခံကာကွယ်ရန် နည်းလမ်းမျိုးစုံကို ရှာဖွေသည်။ ပြီးလျှင် ဘုရားသခင်အပေါ် မကျိုးနွံမနာခံခြင်းနှင့် ဘုရားသခင်၏ အမှုတော်ကို ငြင်းပယ်ခြင်းဖြစ်သည့် ၎င်းတို့၏ ပန်းတိုင်ကို ဖြစ်မြောက်အောင်လုပ်ဆောင်သည်။ အလွန်ပင် အစွန်းရောက်ပြီး ၎င်းတို့သည် မကျိုးနွံမနာခံနိုင်ရုံသာမကဘဲ ၎င်းတို့၏ ကိုယ်ပိုင်အယူအဆများနှင့် စိတ်ကူးများက မှန်ကန်သည်ဟုလည်းကောင်း၊ ၎င်းတို့ထင်မြင်သည့် နည်းလမ်းများနှင့် လမ်းကြောင်းများက မှန်သည်ဟုလည်းကောင်း၊ ဘုရားသခင်၏ လုပ်ရပ်များ၊ စီစဉ်ညွှန်ကြားမှုများက မှန်ကန်ခြင်း ရှိချင်မှရှိမည် ဟုလည်းကောင်း သက်သေပြရန် ကြိုးစားပြီး နည်းလမ်းပေါင်းစုံကို ရှာကြံတွေးတောဆဲဖြစ်သော လူအချို့ပင် ရှိသည်။ ဤသည်မှာ ၎င်းတို့တွင် အသက်ဝင်ရောက်မှုမရှိသည်ကို ထုတ်ဖော်ပြသည်။ ၎င်းတို့လုပ်ဆောင်သမျှတိုင်းနှင့် ၎င်းတို့က မိမိတို့ကိုယ်ကိုပေးဆပ်သော၊ သို့မဟုတ် မိမိတို့ကိုယ်ကိုနှင့်ပတ်သက်ပြီး ပြောင်းလဲသောအရာအားလုံးသည် အသက်ဝင်ရောက်မှု မဟုတ်။ ယင်းတို့သည် မတည်ရှိတော့သော ဆိုးယုတ်သည့်အလေ့အကျင့်များသာ ဖြစ်သည်။ တစ်ကိုယ်ရေ အလေ့အကျင့်များ၊ စည်းစနစ်များနှင့် ၎င်းတို့၏ ဘဝနေထိုင်မှုပုံစံတို့သည် အနည်းငယ်ပြောင်းလဲပြီး လူအချို့၏ စိတ်သည် ပြောင်းလဲပြီးခြင်းပင် ဖြစ်နိုင်သည်။ ၎င်းတို့သည် ပို၍ သိမ်မွေ့စွာ ပြောဆိုပြီး ပို၍ ယဉ်ကျေးမှုရှိသော ပုံစံဖြင့် ပြောဆိုသည်။ ပြီးလျှင် ၎င်းတို့၏ အပြင်ပန်းအပြုအမူသည် ပို၍စံမီနိုင်သည်။ သို့သော် အမှုအရာများကို ၎င်းတို့ လုပ်ဆောင်သောအခါ ၎င်းတို့၌ သမ္မာတရားစစ်မှန်မှုမရှိ။ ပြီးလျှင် ဘုရားနှုတ်ကပတ်တော်၊ သို့မဟုတ် သမ္မာတရားအတိုင်း အမှုအရာများကို မည်သည့်အခါမျှ မလုပ်ဆောင်ပေ။ အားလုံးမှာ ၎င်းတို့ကိုယ်တိုင်၏ တစ်ကိုယ်ရေ စိတ်ကူးများနှင့် ဆန္ဒများသာ ဖြစ်သည်။ ဘုရားသခင်ကို အမှန်တကယ် နားလည်မှုမရှိပေ။ ဝိညာဉ်ရေးရာ သဘောတရားအနည်းငယ်အား မည်သို့ပြောရမည်ကိုသာသိပြီး လူသားအယူအဆများ၊ စိတ်ကူးထင်မြင်မှုများနှင့် ခံစားချက်များအတွင်း၌ ပိတ်မိနေသည်။ သင်တို့ မည်သို့ထင်သနည်း။ ဤလူများသည် သနားစဖွယ်ဖြစ်သလော။ (ဖြစ်ပါသည်။) ပြီးလျှင် ဤသို့သောသူများစွာရှိသလော။ (ရှိပါသည်။) များစွာရှိသည်ဟု သင်တို့ အဘယ်သို့ သိသနည်း။ (အဘယ်ကြောင့်ဆိုသော် ကျွန်ုပ်သည် ၎င်းတို့ထဲမှ တစ်ဦးဖြစ်သောကြောင့် ဖြစ်သည်။) ဤသည်မှာ သင်၏ ရင်ကိုထိသည်မဟုတ်လော။ ဤသို့ဆိုလျှင် ဤကိစ္စ၌ သင်တို့၏ အတွေ့အကြုံများကို ပြောလော့။ (အတွေ့အကြုံတစ်ခုကို ကျွန်ုပ် ဝေမျှပါမည်။ ညီအစ်ကိုတစ်ယောက်သည် အခြားညီအစ်ကိုမောင်နှမများစွာရှေ့၌ ကျွန်ုပ်၏ အားနည်းချက်များကို ထောက်ပြခဲ့သည်။ ထိုအချိန်က ကျွန်ုပ်သည် အရှက်ရခဲ့သည်။ ကျွန်ုပ်၏ ဂုဏ်သိက္ခာကို ပြန်လည်ရယူရန်အတွက် ကိုယ့်ကိုယ်ကိုယ် ခုခံပြီး မှန်ကန်ကြောင်း ပြရန် ကြိုးစားသည်။ ညီအစ်ကို၏ ထင်မြင်ချက်များကို ကျွန်ုပ် လက်မခံခဲ့ပါ။) သင်သည် သင့်ဂုဏ်သိက္ခာ၏ ဘောင်ခတ်ခြင်းကို ခံခဲ့ရသည်။ လူတို့သည် အဘယ်ကြောင့် ဂုဏ်သိက္ခာ၏ ဘောင်ခတ်ခြင်းကို အစဉ်ခံရသနည်း။ အဘယ်ကြောင့်ဆိုသော် သိက္ခာရှိသောလူတို့အားလုံးသည် အထိမခံနိုင်ဖြစ်သောကြောင့်လော။ (မဟုတ်ပါ။) အမှန်တကယ်တွင် လူတို့သည် အခြားလူများ၏ အမြင်တွင် ပြည့်စုံမှုရှိသော ပုံရိပ်ကို ထိန်းသိမ်းလိုသောကြောင့် ဤသို့ လုပ်ဆောင်ခြင်း ဖြစ်သည်။ ၎င်းတို့၏ အဆင့်အတန်းကို ဂရုစိုက်သည်။ အားနည်းချက်မရှိသော၊ အထူးပင် ပြည့်စုံသောပုံစံဖြင့် မိမိတို့ကိုယ်ကို တင်ပြလိုကြသည်။ လူတို့၏ စိတ်တွင် ပြည့်စုံမှုရှိသော အမြင်တစ်ခုကို ကျန်ရစ်စေလိုပြီး ၎င်းတို့သည် အမှန်တကယ်တွင် မည်သို့ရှိသည်ဆိုသည့် အမှန်တရားကို လူတို့အား မြင်ခွင့်မပြုလိုပေ။ ဤသည်မှာ မာနထောင်လွှားသော စိတ်သဘောထား၏ အကျိုးဆက်ဖြစ်သည်။ ဤပြဿနာသည် ယခုတွင် ပြေလည်သလော။ (မပြေလည်သေးပါ။ ကျွန်ုပ်သည် ယင်းကို မကြာခဏ ထုတ်ဖော်ဆဲဖြစ်သည်။) လူတစ်ဦးသည် မိမိကိုယ်ကို ဆင်ခြင်သုံးသပ်ပြီး သူ၏ ကိုယ်ပိုင်ဖောက်ပြန်ပျက်စီးသော စိတ်သဘောထားအား သိမြင်နိုင်လျှင် ယင်းသည် ပြောင်းလဲရန် လွယ်ကူလိမ့်မည်။ သူသည် မိမိကိုယ်ကို ဆင်ခြင်သုံးသပ်ခြင်းမရှိလျှင်၊ သူ၏ ကိုယ်ပိုင်ဖောက်ပြန်ပျက်စီးသော စိတ်သဘောထားကို မသိမြင်နိုင်လျှင်၊ သူ့ပြဿနာအပေါ် အာရုံခံစားမှုမရှိ၍ သတိပြုမိခြင်းမရှိလျှင် ပြောင်းလဲရန် ခက်ခဲလိမ့်မည်။ သူသည် သတိပြုမိခြင်း ရှိပြီးဖြစ်လျှင်၊ သူ၏ မာနထောင်လွှားသော စိတ်သဘောထားက ပြင်းထန်သည်ဟုလည်းကောင်း၊ သူ၏ လိုက်စားမှုများက လမ်းကြောင်း မတည့်ဟုလည်းကောင်း၊ သူသည် သမ္မာတရားအား လိုက်စားခြင်းမှ အလှမ်းဝေးနေဆဲဖြစ်သည်ဟုလည်းကောင်း ခံစားရသော်လည်း ပြုပြင်ခြင်းခံရသောအခါ၌ သူသည် ရက်အနည်းငယ်ကြာ အပျက်သဘောဆောင်လျှင်၊ အခြေအနေတိုင်း၌ ဂုဏ်သိက္ခာကို ပြန်လည်ရယူရန် နည်းလမ်းများကို အစဉ် ရှာဖွေလျှင် ဤသို့သောသူတစ်ဦးသည် ပြောင်းလဲနိုင်မည်လော။ ထိုသူအနေဖြင့် ပြောင်းလဲရန် ခက်ခဲသည်။ ဤသို့ဆိုလျှင် ဤပြဿနာကို အဘယ်သို့ ဖြေရှင်းသင့်သနည်း။ သမ္မာတရားကို လက်ခံပြီး မိမိတို့ကိုယ်ကို ဆင်ခြင်သုံးသပ်ခြင်းမျှဖြင့် ၎င်းတို့၌ ပြဿနာကို ပြုပြင်ရန် မျှော်လင့်ချက်ရှိသေးသည်။ သမ္မာတရားကို ၎င်းတို့ လက်မခံနိုင်လျှင် ၎င်းတို့၌ ပြဿနာကို ပြုပြင်ရန် နည်းလမ်းမရှိပေ။ အဓိကသော့ချက်မှာ လူတို့သည် စိတ်ခိုင်မာမှုရှိပြီး သမ္မာတရားအား လိုက်စားလိုစိတ်ရှိရမည်။ ၎င်းတို့၌ သမ္မာရားကို အလွန်အမင်းဆာငတ်သော စိတ်နှလုံးရှိသောအခါ ၎င်းတို့သည် သမ္မာတရားကို ချစ်ပြီး လက်ခံနိုင်သည်။ ၎င်းတို့သည် သမ္မာတရားကို လက်တွေ့လုပ်ဆောင်ပြီး ဇာတိပကတိကို ပုန်ကန်ရန် ခွန်အားရှိလိမ့်မည်။ လူတို့သည် သမ္မာတရားကို လက်ခံခြင်းအားဖြင့်သာ ဖောက်ပြန်ပျက်စီးသော စိတ်သဘောထား၏ ပြဿနာကို နှံ့စပ်စွာ ပြုပြင်နိုင်သည်။ ၎င်းတို့၏ ဖောက်ပြန်ပျက်စီးသော စိတ်သဘောထားက ပြုပြင်ခြင်းခံရပြီးသည်နှင့် တစ်ပြိုင်နက် ၎င်းတို့သည် သမ္မာတရားကို လက်တွေ့လုပ်ဆောင်နိုင်လိမ့်မည်။ ထို့နောက်တွင် အသက်ဝင်ရောက်မှုရှိလိမ့်မည်။

ဝိညာဉ်ရေးရာ နားလည်သဘောပေါက်မှုမရှိသော၊ သမ္မာတရားနှင့် အသက်ဝင်ရောက်မှုကို အစဉ်အနက်အဓိပ္ပာယ်ကောက် လွဲမှားသော ထိုလူများက သမ္မာတရားအား လိုက်စားခြင်းသည် လွယ်ကူသည်ဟုလည်းကောင်း၊ ယင်းမှာ မကောင်းသောအလေ့အကျင့်ကိုဖြစ်စေ၊ ပြဿနာဖြစ်စေသော လက္ခဏာအနည်းငယ်ကိုဖြစ်စေ ပြောင်းလဲခြင်းမျှသာဖြစ်သည်၊ သို့မဟုတ် ၎င်းတို့၏ ကိုယ်ကျိုးကို အကျိုးပြုသောအရာများကို ရံဖန်ရံခါ စွန့်လွှတ်ခြင်း ဖြစ်သည်ဟုလည်းကောင်း၊ မကောင်းမှုကို မလုပ်ဆောင်သရွေ့ အဆုံးထိ ၎င်းတို့ယုံကြည်ခြင်းကို ထိန်းသိမ်းသရွေ့ အသက်ကို ၎င်းတို့ ရရှိပြီးဖြစ်သည်ဟုလည်းကောင်း၊ ဤအရာများကို ဘုရားသခင်၏ ဆုလာဘ်များ၊ ကောင်းချီးများဖြင့် လဲလှယ်နိုင်သည်ဟုလည်းကောင်း ထင်ကြသည်။ ဤလူများကဲ့သို့သော အမြင်များအပေါ်တွင် ဘုရားအပေါ် မိမိတို့၏ ယုံကြည်မှုကို အခြေခံသောသူများသည် သမ္မာတရားကို လိုက်စားသူများဟုတ်သလော။ (မဟုတ်ပါ။) သမ္မာတရားအား မလိုက်စားသူတို့သည် အသက်ဝင်ရောက်မှုကို ရရှိနိုင်သလော။ (မရရှိနိုင်ပါ။) အသက်ဝင်ရောက်မှုဆိုသည်မှာ မည်သည့်အရာဖြစ်သည်ကို လုံးဝ မရှင်းလင်းသည့်သူများစွာရှိသည်။ ၎င်းတို့က အတန်ငယ် အားထုတ်ခြင်း၊ တာဝန်အချို့ကို ထမ်းဆောင်ခြင်း၊ မကောင်းသောအလေ့အကျင့်နှင့် ပြဿနာဖြစ်စေသော လက္ခဏာအချို့ကို ပြောင်းလဲခြင်း၊ ပြောသည့်အတိုင်း လုပ်ဆောင်ခြင်း၊ အနည်းငယ် ကျိုးနွံနာခံခြင်းတို့သက်သက်ဖြင့် အသက်ဝင်ရောက်မှု ရှိသည်ဟု ထင်ကြသည်။ ၎င်းတို့သည် အသက်ဝင်ရောက်မှုကို အလွန့်အလွန် ရိုးရှင်းသောပုံစံဖြင့် မြင်ကြသည်။ ၎င်းတို့သည် ဘုရားသခင်ကို ဤပုံစံဖြင့် ယုံကြည်ခြင်းအားဖြင့် ၎င်းတို့၏ အသက်စိတ်သဘောထားကို ပြောင်းလဲမည်လော။ (ပြောင်းလဲမည်မဟုတ်ပါ။ ၎င်းတို့သည် အပြင်ပန်းတွင်သာ မိမိတို့ကိုယ်ကို ပြောင်းလဲခြင်းဖြစ်ပြီး ၎င်းတို့၏ အနှစ်သာရက မပြောင်းလဲပါ။) သင်တို့သည် ယခုတွင် အနည်းငယ်ပြောင်းလဲပြီး ဖြစ်သည်။ သို့သော် သင်တို့၏ အပြင်ပန်းအပြုအမူတွင် ပြောင်းလဲမှုများရှိသလော၊ သို့မဟုတ် သင်တို့၏ အသက်စိတ်သဘောထားတွင် ပြောင်းလဲမှုအချို့ရှိသလော။ အသက်ဝင်ရောက်မှုနှင့်ပတ်သက်ပြီး သင်တို့၏ မမှန်ကန်သော အမြင်များမှ ထွက်ပေါက်တစ်ခုကို ရှာတွေ့ပြီး အသက်ဝင်ရောက်မှုကို စတင်ရရှိပြီး ဖြစ်သလော။ သင်တို့ ကိုယ်တိုင်၏ မည်သည့်အပိုင်းများက ပြောင်းလဲပြီးဖြစ်ကာ မည်သည့်အပိုင်းများက မပြောင်းလဲသေးဆိုသည်ကို သင်တို့ အကဲဖြတ်နိုင်သလော။ သင်သည် ထမ်းဆောင်ရန် တာဝန်တစ်ခုပေးအပ်ခြင်းခံရပြီး နဂိုမူလက ကျိုးနွံနာခံနိုင်စွမ်းမရှိခဲ့လျှင် ယခု၌ မည်သည့်အတိုင်းအတာအထိ ကျိုးနွံနာခံနိုင်သနည်း။ ဥပမာ သင်သည် ညီအစ်ကိုတစ်ယောက်ဖြစ်ပြီး နေ့စဉ် အခြားသော ညီအစ်ကိုမောင်နှမများအတွက် ထမင်းဟင်း ချက်ပြုတ်ပေးပြီး ပန်းကန်ဆေးပေးရန် ခိုင်းစေခြင်းခံရလျှင် သင် ကျိုးနွံနာခံမည်လော။ (ကျိုးနွံနာခံမည်ဟု ထင်ပါသည်။) သင်သည် အချိန်ခဏတာ လုပ်ဆောင်ကောင်း လုပ်ဆောင်နိုင်လိမ့်မည်။ သို့သော် ဤတာဝန်ကို ရေရှည်ထမ်းဆောင်ရန် ခိုင်းစေခြင်းခံရလျှင် သင်ကျိုးနွံနာခံနိုင်မည်လော။ (ကျွန်ုပ်သည် ရံဖန်ရံခါ ကျိုးနွံနာခံနိုင်သော်လည်း အချိန်ကြာသည်နှင့်အမျှ ကျိုးနွံနာခံနိုင်မှု မရှိခြင်း ဖြစ်ကောင်းဖြစ်နိုင်သည်။) ဤသည်မှာ သင်သည် ကျိုးနွံနာခံခြင်းမရှိဟူသည့် သဘောဖြစ်သည်။ လူတို့အား ကျိုးနွံနာခံခြင်း မရှိစေသည်မှာ မည်သည့်အရာနည်း။ (ဤသည်မှာ အဘယ်ကြောင့်ဆိုသော် လူတို့၏ စိတ်နှလုံးတွင် ရိုးရာအယူအဆများ ရှိသောကြောင့်ဖြစ်သည်။ ၎င်းတို့က ယောက်ျားများသည် အိမ်ပြင်ပတွင် အလုပ်လုပ်သင့်ပြီး မိန်းမများက အိမ်တွင်းအလုပ်ကို ကိုင်တွယ်သင့်သည်ဟုလည်းကောင်း၊ ချက်ပြုတ်ခြင်းသည် မိန်းမ၏ အလုပ်ဖြစ်ပြီး ယောက်ျားက ချက်ပြုတ်ခြင်းဖြင့် သိက္ခာကျသည်ဟု ထင်ကြသည်။ ဤအတွက်ကြောင့် ကျိုးနွံနာခံရန် မလွယ်ကူခြင်းဖြစ်သည်။) မှန်သည်။ အလုပ်ခွဲဝေခြင်းနှင့်ပတ်သက်လျှင် လိင်ပိုင်းဆိုင်ရာ ခွဲခြားဆက်ဆံမှုရှိသည်။ ယောက်ျားများက “ငါတို့ ယောက်ျားများသည် အပြင်တွင် ဝင်ငွေရှာသင့်သည်။ ချက်ပြုတ်ခြင်းနှင့် လျှော်ဖွပ်ခြင်းကဲ့သို့သောအရာများကို မိန်းမများက လုပ်ဆောင်သင့်သည်။ ငါတို့အားလုပ်ဆောင်ရန် မခိုင်းစေသင့်” ဟု တွေးသည်။ သို့သော် ယခုတွင် ဤသည်တို့မှာ အထူးအခြေအနေများဖြစ်ပြီး သင့်အား ယင်းကိုလုပ်ဆောင်ရန် ခိုင်းစေခြင်းခံရသည်။ ဤသို့ဆိုလျှင် မည်သည့်အရာကို သင်လုပ်ဆောင်သနည်း။ သင်သည် ကျိုးနွံနာခံနိုင်ခြင်း မရှိမီတွင် မည်သည့်ပြဿနာများကို ကျော်လွှားရမည်နည်း။ ဤသည်မှာ ပြဿနာ၏ အခရာဖြစ်သည်။ သင်သည် သင်၏ လိင်ပိုင်းဆိုင်ရာ ခွဲခြားဆက်ဆံမှုကို ကျော်လွှားရမည်။ ယောက်ျားများက လုပ်ဆောင်ရမည့် အလုပ်မရှိသကဲ့သို့ မိန်းမများက လုပ်ဆောင်ရမည့် အလုပ်မရှိပေ။ အလုပ်ကို ဤသို့ မခွဲနှင့်။ လူတို့ထမ်းဆောင်သည့်တာဝန်ကို ၎င်းတို့၏လိင်အရ အဆုံးအဖြတ်မပေးသင့်ပေ။ သင်ကိုယ်တိုင်၏အိမ်နှင့် နေ့စဉ်အသက်တာတွင် အလုပ်ကို ဤသို့ ခွဲနိုင်သည်။ သို့သော် ယခုအခါတွင် ယင်းသည် သင့်တာဝန်နှင့် သက်ဆိုင်သည်။ ထို့ကြောင့် သင်သည် ယင်းကို မည်သို့ အဓိပ္ပာယ်ကောက်သင့်သနည်း။ သင်သည် ဤတာဝန်ကို ဘုရားသခင်ဆီမှ ရယူပြီး လက်ခံသင့်သည်။ ပြီးလျှင် သင့်စိတ်အတွင်းတွင်ရှိသော မမှန်ကန်သည့် အမြင်များကို ပြောင်းလဲသင့်သည်။ သင်က “ကျွန်ုပ်သည် ယောက်ျားဖြစ်သည်မှာ မှန်သော်လည်း ဘုရားသခင်၏ အမြင်တွင် ကျွန်ုပ်သည် အသင်းသားတစ်ဦးနှင့် ဖန်ဆင်းခံတစ်ဦးဖြစ်သည်။ အသင်းတော်က ကျွန်ုပ်အား လုပ်ဆောင်ရန် တာဝန်ချပေးသည့် မည်သည့်အရာကိုမဆို ကျွန်ုပ်လုပ်ဆောင်မည်။ အမှုအရာများကို လိင်အရ ခွဲခြားခြင်းမရှိ” ဟု ဆိုသင့်သည်။ ရှေးဦးစွာ သင်၏ မမှန်ကန်သော အမြင်များကို လက်လွှတ်သင့်သည်။ ထို့နောက် သင့်တာဝန်ကို လက်ခံသင့်သည်။ သင့်တာဝန်အား လက်ခံခြင်းသည် မှန်ကန်သော ကျိုးနွံနာခံခြင်း ဟုတ်သလော။ (မဟုတ်ပါ။) နောက်လာမည့် နေ့ရက်များတွင် တစ်စုံတစ်ယောက်က သင်၏အစားအစာသည် ငံလွန်းသည်၊ သို့မဟုတ် အနံ့အရသာကောင်းကောင်းမရှိဟု ဆိုလျှင်ဖြစ်စေ၊ သင်က တစ်စုံတစ်ခုကို ကောင်းစွာမချက်ပြုတ်ခဲ့သဖြင့် ၎င်းတို့က မစားလိုဟု ဆိုလျှင်ဖြစ်စေ၊ သင့်အား တစ်စုံတစ်ခုကို အသစ်ချက်ပြုတ်ပေးရန် ပြောလျှင်ဖြစ်စေ သင်က လက်ခံနိုင်မည်လော။ ဤအခြေအနေတွင် သင်သည် ကသိကအောက်ဖြစ်လိမ့်မည်။ ပြီးလျှင် သင်က “ငါသည် မိမိကိုယ်ကို လေးစားသော ယောက်ျားတစ်ယောက်ဖြစ်သည်။ ဤညီအစ်ကိုမောင်နှမများအားလုံးအတွက် အစားအစာများ ချက်ပြုတ်ပေးရန် ငါသည် မိမိကိုယ်ကို နိမ့်ကျစေပြီးဖြစ်သည်။ သို့တိုင်အောင် ၎င်းတို့က ဤပြဿနာများအားလုံးကို ထောက်ပြဆဲဖြစ်သည်။ ငါ့တွင် မည်သည့်ဂုဏ်သိက္ခာမျှ မကျန်တော့ပါ” ဟု တွေးလိမ့်မည်။ ဤအခြေအနေတွင် သင်သည် ကျိုးနွံနာခံလိုခြင်း မရှိသည် မဟုတ်လော။ (ဟုတ်ပါသည်။) ဤသည်မှာ အခက်အခဲတစ်ခုဖြစ်သည်။ သင် ကျိုးနွံနာခံနိုင်ခြင်း မရှိသည့် အချိန်တိုင်းတွင် ယင်းသည် ဖောက်ပြန်ပျက်စီးသော စိတ်သဘောထားတစ်ခုက သူ့ဘာသာ ထုတ်ဖော်ပြီး ပြဿနာ ဖြစ်စေခြင်းအားဖြင့်လည်းကောင်း၊ သင့်အား သမ္မာတရားကို လက်တွေ့မလုပ်ဆောင်နိုင်စေရန်နှင့် ဘုရားသခင်အပေါ် မကျိုးနွံမနာခံနိုင်စေရန် လုပ်ဆောင်ခြင်းအားဖြင့်လည်းကောင်း ဖြစ်ခြင်းဖြစ်သည်။ ဤအဆင့်တွင် သင်၏ စိတ်နှလုံးသည် ဒွိဟဖြစ်လိမ့်မည်။ သင့်အတွေးများသည် သင့်အား ထိန်းချုပ်နေပြီး သင်က သိက္ခာကျပြီးဖြစ်သည်တွေးရန် လုပ်ဆောင်နေခြင်းဖြစ်သည်။ ပြီးလျှင် သင်သည် စိတ်အတွင်းတွင် စိတ်မချမ်းမသာဖြစ်သည်။ ဤအခြေအနေတွင် မည်သည့်အရာကို လုပ်ဆောင်သင့်သနည်း။ (သမ္မာတရားအား ရှာဖွေခြင်းဖြစ်သည်။) သမ္မာတရားအား မည်သို့ရှာဖွေသနည်း။ သင်ဆုတောင်းရမည်။ “ဘုရားသခင်၊ အခြားလူများက ကျွန်ုပ်အား မည်သည့်အရာကို ခိုင်းစေပါစေ ယင်းကို ကျွန်ုပ်၏တာဝန်အဖြစ် မှတ်ယူမည်။ အပြင်ပန်းတွင် မည်သူ့အတွက် ကျွန်ုပ်က အစေခံနေသည်ဖြစ်စေ၊ အမှုအရာများကို လုပ်ဆောင်ပေးနေသည်ဖြစ်စေ ယင်းတို့အားလုံးကို ဘုရားသခင်ဆီမှနေ၍ ကျွန်ုပ် လက်ခံမည်။ ဤသည်မှာ ကျွန်ုပ်၏ တာဝန်ဖြစ်ပြီး ကျိုးနွံနာခံသင့်သည်။ ကျွန်ုပ်၏ ဂုဏ်သိက္ခာကို မလိုအပ်ပေ။ ဘုရားအိမ်တော်တွင် တာဝန်များသည် အဆင့်မြင့်၊ အဆင့်နိမ့်၊ မြင့်သော အဆင့်အတန်း၊ နိမ့်သောအဆင့်အတန်း၊ ယောက်ျားများအတွက် တာဝန်များ၊ မိန်းမများအတွက် တာဝန်များ၊ အသက်ကြီးသူများအတွက် တာဝန်များ၊ ငယ်သူများအတွက် တာဝန်များဟူ၍ ခွဲခြားမထားပေ။ ကောင်းစွာလုပ်ဆောင်သော တာဝန်များနှင့် ကောင်းစွာလုပ်ဆောင်ခြင်းမရှိသော တာဝန်များ၊ သစ္စာစောင့်သိစွာ လုပ်ဆောင်သော တာဝန်များနှင့် သစ္စာမစောင့်သိစွာ လုပ်ဆောင်သော တာဝန်များသာရှိသည်” ဟူ၍ ဖြစ်သည်။ သင်၏ ဂုဏ်၊ အဆင့်အတန်း၊ နေရာနှင့် သိက္ခာတို့ကို သင်လက်လွှတ်ပြီးနောက်တွင် သင့်ကိုယ်သင် အပြည့်အဝ လက်လွှတ်ပြီးဖြစ်သလော။ (မဟုတ်ပါ။) သင့်တွင် တုံ့ပြန်မှုတစ်ခု ရှိဆဲဖြစ်မည်။ တစ်ခါတစ်ရံတွင် လူတို့သည် သင့်အား မလေးမစားဆက်ဆံမည်။ သင်က နုံအသည်ဟု ထင်မည်။ သင့်အား နိမ့်ကျသူအဖြစ် ဆက်ဆံပြီး “ချက်ပြုတ်ခြင်းကို ထိုမျှ ပျော်ရွှင်သူသည် မည်သည့်အရာတွင်မျှ ဖြစ်ဖြစ်မြောက်မြောက်မရှိ။ ငါသည် ထိုအရာကို လုံးဝ လုပ်ဆောင်မည်မဟုတ်” ဟု ပြောလိမ့်မည်။ ၎င်းတို့သည် သင့်အား မှားယွင်းသော ဦးတည်ချက်သို့ ခေါ်ဆောင်လိမ့်မည်။ သင့်အတွင်းသို့ မမှန်ကန်သော စိတ်ကူးများနှင့် အယူအဆများ သွတ်သွင်းလိမ့်မည်။ ပြီးလျှင် သင်၏ လက်တွေ့လုပ်ဆောင်မှုအပေါ် လွှမ်းမိုးလိမ့်မည်။ ၎င်းတို့က အသက်ဝင်ရောက်မှုအပေါ် သင်အလေးထားခြင်း၊ သာမန်လူတစ်ဦးဖြစ်ခြင်း၊ သင့်တာဝန်အပေါ် သစ္စာစောင့်သိခြင်းကဲ့သို့သော အပြုသဘောဆောင်သော အရာများကို အရှက်ရသည့် ပုံစံအဖြစ် မြင်သည်။ ထို့ကြောင့် ၎င်းတို့က သင့်အား နိမ့်ကျသူအဖြစ် ဆက်ဆံပြီး ဝေဖန်အကဲဖြတ်သည်။ သင်က ယင်းကို မခံနိုင်လျှင် အပျက်သဘောအတွင်းသို့ ရုတ်ခြည်းကျရောက်ပြီး ဤတာဝန်သည် သင့်အား အခြားလူတို့ရှေ့တွင် အစဉ်သိက္ခာကျစေသည်၊ လူတို့အား သင့်ကို နိမ့်ကျသူအဖြစ် ဆက်ဆံပြီး အမိန့်ပေးခိုင်းစေရန် ပြုလုပ်သည်ဟု ထင်လိမ့်မည်။ ဤသို့ဆိုလျှင် သင်သည် နောက်တစ်ဖန် ကျိုးနွံနာခံမည်မဟုတ်၊ မှန်သလော။ မည်သူကမျှ သင့်အားနိမ့်ကျသူအဖြစ် မဆက်ဆံသောအခါ၊ သို့မဟုတ် ဝေဖန်အကဲဖြတ်ခြင်း မရှိသောအခါ သင်သည် ကျိုးနွံနာခံနိုင်ပြီဖြစ်သည်၊ အသက်ဝင်ရောက်မှု ရှိပြီးဖြစ်သည်၊ သမ္မာတရားစစ်မှန်မှုတစ်ခုရှိကာ ဝိညာဉ်ရင့်ကျက်မှုအချို့ ရှိပြီးဖြစ်သည်ဟု ထင်သည်။ ဤစဉ်းစားပုံမှန် မှန်ကန်သလော။ ဤသို့ဆိုလျှင် တစ်စုံတစ်ယောက်က သင့်အား ဝေဖန်အကဲဖြတ်ပြီး သင်၏ ဝိညာဉ်ရင့်ကျက်မှုက စိန်ခေါ်ခြင်းခံရသောအခါတွင် သင်သည် အပျက်သဘောဆောင်လာပြီး “ဤအရာမပြီးဆုံးမီတွင် ငါသည် မည်မျှဆက်လက်၍ ချက်ပြုတ်ဖို့လိုသနည်း။ ဤလူသည် ငါ့အား အစဉ်အထင်သေးသည်။ ငါ့အား သူတို့အထင်သေးသည်မှာ မမှန်ဘဲ ယင်းကို ငါလက်မခံနိုင်ပါ” ဟူ၍ အဘယ်ကြောင့် တွေးသနည်း။ ပြဿနာက နောက်တစ်ဖန် ဖြစ်ပေါ်လာသည်။ သင်က ယင်းကို လက်မခံနိုင်သောအခါ သင်သည် တစ်ချိန်တည်းတွင် စောဒကတက်ပြီး “ခေါင်းဆောင်က ကျွန်ုပ်အပေါ် ဤတာဝန်မျိုးကို အဘယ်သို့ ချပေးနိုင်ရသနည်း။ အခြားတစ်ယောက်ကို ရွေးရမည့်အစား အဘယ်ကြောင့် ကျွန်ုပ်ကို သီးသန့်ရွေးရသနည်း။ ကျွန်ုပ်သည် အနိုင်ကျင့်ရန် လွယ်ကူသည့်ပုံစံရှိသလော။ လူတို့က ကျွန်ုပ်ကို အနိုင်ကျင့်သည်။ ခေါင်းဆောင်က ကျွန်ုပ်ကို မျက်နှာသာမပေး။ ဘုရားသခင်က ကျွန်ုပ်ကို မကာကွယ်” ဟု ဆိုသလော။ သင်၏ ပုန်ကန်တတ်သော စိတ်သဘောထားက နောက်တစ်ဖန် ခေါင်းထောင်လာပြီ ဖြစ်သည်။ ဤတွင် ပြဿနာက အဘယ်နည်း။ သင်၏ဝိညာဉ်ရင့်ကျက်မှုက သေးငယ်လွန်းခြင်း ဖြစ်နိုင်သလော။ ဤသေးငယ်သော စော်ကားမှုကိုပင် သင် တောင့်မခံနိုင်ဘဲ ဤအတွက်ကြောင့် သင်က အပျက်သဘောဆောင်ကာ စောဒကတက်သည်။ ဤသည်မှာ သမ္မာတရားစစ်မှန်မှုများရှိခြင်းကို ဆိုလိုသလော။ သင့်တွင် မည်သည့်သမ္မာတရားစစ်မှန်မှုမျှ မရှိပေ။ ဤပြဿနာကို ဖြေရှင်းရန် အလွန်ရိုးရှင်းသော နည်းလမ်းရှိသည်။ သင့်စိတ်နှလုံး၌ သင်က “ငါ့ကို မည်သူက အထင်သေးသည်ဖြစ်စေ၊ အထင်အမြင်သေးစွာဖြင့် ကြည့်သည်ဖြစ်စေ ငါ့တာဝန်ကို ထမ်းဆောင်သင့်သည်။ ဘုရားသခင်၏ တာဝန်ပေးစေခိုင်းချက်ကို ငါ စွန့်ပစ်၍မရ။ ငါသည် အခြားလူများအတွက် လုပ်ဆောင်နေခြင်း မဟုတ်သကဲ့သို့ အခြားလူများက ငါ့အပေါ် တစ်ခုခုထင်မြင်စေရန်အတွက် လုပ်ဆောင်နေခြင်းလည်း မဟုတ်ပါ။ အခြားလူများက ငါ့အပေါ် တစ်စုံတစ်ခု ထင်မြင်မှုသည် မည်သို့အသုံးဝင်သနည်း။ ဘုရားသခင် ကျေနပ်စေရန်အတွက် ငါ၏တာဝန်ကို ဖြည့်ဆည်းရမည်” ဟု တွေးရမည်။ ဤသည်မှာ သင့်စိတ်နှလုံးတွင် သင်တွေးသင့်သည့်အရာ ဖြစ်သည်။ ယခုတွင် သင်ချက်ပြုတ်သောအခါ မိမိကိုယ်ကို ယုံကြည်သည်ဟု မခံစားရသလော။ ဤသို့ဆိုလျှင် ပြဿနာ ပြေလည်သလော။ အမှန်တကယ်တွင် ယင်းမှာ အပြည့်အဝ ပြေလည်ခြင်းမရှိ။ အဆုံးတွင် သင်သည် အစဉ် ဒွိဟဖြစ်နေသည့် အခြေအနေတွင်ရှိပြီး အားနည်းခြင်းနှင့် အပျက်သဘောဆောင်ခြင်းထဲသို့ စဉ်ဆက်မပြတ် ကျရောက်ကာ ထို့နောက်တွင် သင်သည် ရုန်းထွက်ဖို့ အားထုတ်လျက်ရှိသည်။ သင်သည် စဉ်ဆက်မပြတ် ဖွံ့ဖြိုးအောင် ပြုပြင်မွမ်းမံခြင်းခံရသည်။ သင်သည် အခြေအနေတိုင်းကို ဆန်းစစ်ပြီးဖြစ်ကာ ဤသို့ အလွန်ပင်ပန်းသည့်ပုံစံဖြင့် အစဉ်နေထိုင်လိုစိတ်မရှိပေ။ ဤအခက်အခဲများက သင့်အား အစဉ်ဖိစီးနေခြင်း၊ အဖျက်အမှောင့်လုပ်ခြင်း၊ သို့မဟုတ် ဘောင်ခတ်ခြင်းကို သင်အလိုမရှိ။ သင်သည် သင့်တာဝန်ကို လွယ်ကူစွာ၊ ရိုးရှင်းစွာ ထမ်းဆောင်လိုသည်။ ဤသို့ဆိုလျှင် ဤအရာကို သင်အဘယ်သို့ ဖြစ်မြောက်အောင် လုပ်ဆောင်သနည်း။ သမ္မာတရားကို စဉ်ဆက်မပြတ် ရှာဖွေရမည်။ သင်၏ ခံယူချက်ကို စဉ်ဆက်မပြတ် ဆွဲကိုင်ထားရမည်။ ပြီးလျှင် ဘုရားနှုတ်ကပတ်တော်အတိုင်း လက်တွေ့လုပ်ဆောင်ခြင်းသည် အစဉ်သဖြင့် မှန်ကန်သော လုပ်ဆောင်မှုဖြစ်သည်။ သင်က “မည်သူကမျှ ငါ့ကို အဖျက်အမှောင့်မလုပ်နိုင်။ ဤသည်မှာ ငါ့တာဝန်ဖြစ်သည်။ ဤသည်မှာ ဘုရားသခင်က ငါ့ကို ပေးသည့် တာဝန်ပေးစေခိုင်းချက်ဖြစ်သည်။ ဤသည်မှာ ငါ၏တာဝန်နှင့် ငါ၏ ဝတ္တရားဖြစ်သည်။ မည်သူက ငါ့ကို လှောင်ပြောင်သည်ဖြစ်စေ၊ ထင်ယောင်ထင်မှားဖြစ်အောင် လုပ်သည်ဖြစ်စေ၊ သို့မဟုတ် သွေးဆောင်ဖြားယောင်းသည်ဖြစ်စေ အကြောင်းမထူးပေ။ ငါ့တာဝန်ကို ထမ်းဆောင်နိုင်သည်မှာ ငါ၏ ဂုဏ်ဖြစ်သည်။ ငါက ကိုင်တွယ်နိုင်လျှင် ဘုန်းကျက်သရေကို ဘုရားသခင်က ရရှိသည်။ ငါ မကိုင်တွယ်နိုင်လျှင် ငါသည် မိမိကိုယ်ကို အရှက်ရစေပြီဖြစ်သည်။ ငါ့အား လှောင်ပြောင်ပြီး ဤတာဝန်ကို အထင်သေးသည့် မည်သူမဆိုသည် သမ္မာတရားကို လိုက်စားသူမဟုတ်” ဟု ပြောသည်။ ဤသည်မှာ အမှန်တရားမဟုတ်လော။ (ဟုတ်ပါသည်။) ဤသည်မှာ အမှန်တရားဖြစ်သည်။ ယောဘသည် စမ်းသပ်ခြင်းခံရသောအခါ စာတန်က သူ့ကို အဖျက်အမှောင့်လုပ်ပြီး စုံစမ်းသွေးဆောင်သည်။ သို့သော် ယောဘက သံသယရှိသလော။ (မရှိပါ။) အဘယ်ကြောင့်ဆိုသော် သမ္မာတရား၊ ဘုရားနှုတ်ကပတ်တော်နှင့် ဘုရားသခင်၏ လမ်းခရီးက သူ၏ စိတ်နှလုံး၌ ရှိသောကြောင့် ဖြစ်သည်။ အခြေအနေများ၊ စမ်းသပ်မှုများနှင့် ရင်ဆိုင်ရသောအခါ သင်က သမ္မာတရားကို ထိန်းသိမ်းပြီး ဘုရားသခင်က သင့်ကိုပေးသည့် တာဝန်ပေးစေခိုင်းချက်ကို ထိန်းသိမ်းနိုင်ခြင်းရှိမရှိဆိုသည်မှာ သမ္မာတရားကို သင်သိသော၊ သဘောပေါက်နားလည်သော၊ လက်ခံသော အတိုင်းအတာပေါ်တွင် မူတည်သည်။ လူအချို့မှာ သမ္မာတရားကို အစဉ်သံသယဝင်ပြီး ယင်းနှင့်ပတ်သက်၍ သေချာသည့်နေရာတစ်ခုသို့ မရောက်ရှိနိုင်ပေ၊ သို့မဟုတ် ၎င်းတို့တာဝန်နှင့်ပတ်သက်ပြီး တစ်စုံတစ်ခုကို ၎င်းတို့ မည်သို့လုပ်ဆောင်သင့်သည်ကိုလည်းကောင်း၊ ယင်းမှာ မှန်ကန်သော လုပ်ဆောင်နည်း ဟုတ်မဟုတ်ကိုလည်းကောင်း မည်သည့်အခါမျှ မသေချာပေ။ ၎င်းတို့သည် မှန်သောအရာများကို မည်သည့်အခါမျှ စွဲစွဲမြဲမြဲ မလုပ်နိုင်ပေ။ ၎င်းတို့သည် အချို့သောလူများ၊ ဖြစ်ရပ်များ၊ အမှုအရာများ၏ အဖျက်အမှောင့်လုပ်ခြင်းကို အစဉ်ခံရသည်။ ပြီးလျှင် လူဆိုးများ၊ ဆိုးယုတ်သောလူများ၊ မကောင်းဆိုးဝါးများ၊ သို့မဟုတ် စာတန်များက ၎င်းတို့ထံသို့ ခိုးကြောင်ခိုးဝှက် လျှောက်သွားကာ ၎င်းတို့ကို စုံစမ်းသွေးဆောင်သည့်၊ သို့မဟုတ် အဖျက်အမှောင့်လုပ်သည့်အရာများကို ပြောသောအခါတွင် ၎င်းတို့သည် အားနည်းလာပြီး အထင်အမြင်မှားအောင် ပြုလုပ်ခြင်းခံရသည်။ ဤသည်မှာ ၎င်းတို့သည် ဝိညာဉ်ရင့်ကျက်မှုသေးငယ်သည်ဟု မဆိုလိုသလော။ (ဆိုလိုပါသည်။) သေးငယ်သော ဝိညာဉ်ရင့်ကျက်မှုသည် ပြုပြင်ရန် လွယ်ကူသလော။ သဘောတရားအရ လွယ်ကူသည်။ သင်ရောက်ရှိနေသောလမ်းသည် ဘုရားသခင်က ခေါ်ဆောင်သောလမ်းဖြစ်ကြောင်း သင်သေချာနိုင်ခြင်း ရှိမရှိအပေါ်တွင် မူတည်သည်။ သင့်တာဝန်ကို သင်ထမ်းဆောင်သောအခါ သမ္မာတရားကို လက်တွေ့လုပ်ဆောင်ပြီး ဘုရားသခင်၏ တာဝန်ပေးစေခိုင်းချက်ကို လက်ခံသင့်သည်။ ဤသည်မှာ အရေးပါသည်။ ကြောက်ရမည့် တစ်ခုတည်းသောအရာမှာ သင့်စိတ်နှလုံး၌ သင့်တာဝန်အပေါ် တစ်ဖက်သတ်အမြင်ရှိခြင်း၊ သင့်တာဝန်က သင့်အား သိက္ခာကျစေပြီး မည်သည့်အရာမျှ ဖြစ်ဖြစ်မြောက်မြောက် မရှိအောင်ဖြစ်စေသည်ဟု ထင်မြင်ခြင်းဖြစ်သည်။ သင့်တွင် တစ်ဖက်သတ်အမြင်များရှိသည့်အပြင် အခြားလူများက သင့်ကို အဖျက်အမှောင့်လုပ်သောအခါ ယင်းသည် ပို၍ပင် ဒုက္ခပေးတတ်သည်။ သင့်စိတ်နှလုံးက အားလုံးရောထွေးနေသောအခါ၌ သင့်တာဝန်ကို ကောင်းစွာ မထမ်းဆောင်နိုင်ပေ။ ယောဘက စမ်းသပ်ခြင်းခံရသောအခါ သူ့အနီးတွင် သူ့ကို အဖျက်အမှောင့် လုပ်သောသူများစွာရှိသည်။ သူ၏မိန်းမက ပြောသည့်အရာမှာ အဘယ်နည်း။ (“ဘုရားသခင်ကို စွန့်ပယ်၍ သေလော့” (ယောဘ ၂:၉)ဟူ၍ ဖြစ်ပါသည်။) ဤသည်မှာ သူမက “မယုံကြည်နှင့်။ သင်ယုံကြည်သည့်အရာက အမှန်တကယ် ဘုရားသခင်ဖြစ်လျှင် အဘယ်ကြောင့် ဤအရာများက သင့်အပေါ် ဖြစ်ပျက်သနည်း” ဟု ဆိုလိုခြင်း ဖြစ်သည်။ ယောဘက မည်သည့်အရာကို ဆိုသနည်း။ (“မိန်းမမိုက် ပြောတတ်သကဲ့သို့ သင်သည် ပြော၏။”(ယောဘ ၂:၁၀) ဟု ဆိုပါသည်။) ယောဘက သူ၏ မိန်းမကို ရှုတ်ချခဲ့သည်။ အဘယ်ကြောင့်ဆိုသော် ဘုရားသခင်က စစ်မှန်သော ဘုရားဖြစ်သည်ကိုလည်းကောင်း၊ ဤအရာကို ဘုရားသခင် လုပ်ဆောင်သည်ကိုလည်းကောင်း၊ ဤသည်မှာ ဘုရားသခင်၏ အချုပ်အခြာအာဏာ ဖြစ်သည်ကိုလည်းကောင်း၊ ဘုရားသခင်လက်တော်၏ လုပ်ဆောင်မှု ဖြစ်သည်ကိုလည်းကောင်း ယောဘက သေချာသိပြီးဖြစ်သောကြောင့် ဖြစ်သည်။ ယောဘက အလွန်သေချာခဲ့သည်။ ဤသို့ဆိုလျှင် ယနေ့ခေတ်လူတို့က သမ္မာတရားကို နားလည်သည်နှင့် ၎င်းတို့သည် အဘယ်ကြောင့် မှန်သောလမ်းခရီးကို စွဲစွဲမြဲမြဲလိုက်ပြီး ၎င်းတို့၏ သက်သေခံချက်တွင် ခိုင်မာစွာ မရပ်တည်နိုင်သနည်း။ ဤသည်မှာ အဘယ်ကြောင့်ဆိုသော် လူတို့၏ စိတ်နှလုံးများသည် လွန်စွာ စွန်းထင်းနေသောကြောင့် ဖြစ်သည်။ သမ္မာတရားကို ၎င်းတို့ နားမလည်ရုံသာမက ၎င်းတို့သည် သမ္မာတရားအား ချစ်သောသူ၊ သို့မဟုတ် သမ္မာတရားအား ရှာဖွေသောသူများမဟုတ်ကြပေ။ ထို့ကြောင့် လူတို့သည် စကားများနှင့် အယူဝါဒများ မည်မျှကို ပြောဆိုနိုင်သည်ဖြစ်စေ၊ ထူးကဲသော ဆောင်ပုဒ်မည်မျှကို ၎င်းတို့ ကရားရေလွှတ်ပြောဆိုနိုင်သည်ဖြစ်စေ အဆုံးတွင် ခိုင်မာစွာ မရပ်တည်နိုင်ပေ။ အသင်းတော်ရှိ တစ်စုံတစ်ယောက်က အနည်းငယ်ကွဲပြားသောအရာတစ်ခုကို ပြောသည်နှင့် တစ်ပြိုင်နက်၊ သို့မဟုတ် အဖျက်အမှောင့် လုပ်သောအရာများကိုဖြစ်စေ၊ အထင်အမြင်မှားစေသော အရာများကိုဖြစ်စေ၊ ရှုတ်ချပြီး အရှက်ရစေသော အရာများကိုဖြစ်စေ တစ်စုံတစ်ယောက်က ပြောသည်နှင့်တစ်ပြိုင်နက် ၎င်းတို့သည် လှောင်ပြောင်ခြင်းနှင့် အရှက်ခွဲခြင်းခံရသည်ဟု ထင်မြင်ပြီး လုံးဝပင် ယူကျုံးမရဖြစ်ကြရသည်။ လူတို့သည် ဤပုံစံဖြင့် မိမိတို့ကိုယ်ကို ထင်ရှားစေလျှင်၊ စိတ်အတွင်း၌ စဉ်ဆက်မပြတ် ဒွိဟဖြစ်နေလျှင်၊ ၎င်းတို့အမြင်များကို စဉ်ဆက်မပြတ် ချိန်ညှိနေသော်လည်း တစ်ချိန်တည်းတွင် ဘုရားသခင်၏ အချုပ်အခြာအာဏာနှင့် အစီအစဉ်များကိုလည်း စဉ်ဆက်မပြတ် လက်ခံကာ သမ္မာတရားကို နားလည်ရန် ဆက်လက်လုပ်ဆောင်နေလျှင်၊ မတူညီသော သမ္မာတရားရှုထောင့်များသို့ တဖြည်းဖြည်းချင်း ဝင်ရောက်နေလျှင်၊ သမ္မာတရားအားလုံးဆီသို့ ဝင်ရောက်နေလျှင်၊ အဆုံး၌ မည်သည့်လူ၊ ဖြစ်ရပ်၊ အမှုအရာများမျိုးမဆို၏ အဖျက်အမှောင့်လုပ်ခံရခြင်း၊ ထိခိုက်ခံရခြင်း၊ သို့မဟုတ် ထိန်းချုပ်ခံရခြင်းတို့ကို ရှောင်ကြဉ်နိုင်လျှင်၊ ၎င်းတို့ လက်တွေ့လုပ်ဆောင်သည့် သမ္မာတရားစည်းမျဉ်းများက မှန်ကန်သည်ဟု ခိုင်မာစွာ ယုံကြည်လျှင် ၎င်းတို့သည် ၎င်းတို့၏ စိတ်သဘောထားကို ပြောင်းလဲပြီး ဖြစ်သည်။

လက်ရှိအချိန်တွင် သင်တို့တာဝန်များကို သင်တို့ထမ်းဆောင်သောအခါ လူ၊ ဖြစ်ရပ်၊ အမှုအရာမျိုးစုံတိုင်း၏ ဘောင်ခတ်ခြင်းကို သင်တို့ခံရရန် ဖြစ်နိုင်သေးသလော။ သမ္မာတရားကို သင်တို့ ကိုင်စွဲနိုင်ပြီး အမှုအရာများကို စည်းမျဉ်းများနှင့်အညီ လုပ်ဆောင်နိုင်သလော။ (မလုပ်ဆောင်နိုင်ပါ။) ဤသို့ဆိုလျှင် သင်တို့၌ မည်သည့်အခက်အခဲများ ရှိတတ်သနည်း။ (တစ်ခါတစ်ရံတွင် အခြားသောလူများက ဘုရားအိမ်တော်၏ အကျိုးစီးပွားများအား ထိခိုက်သောအရာများကို လုပ်ဆောင်နေသည်ကို ကျွန်ုပ်မြင်သောအခါ ကျွန်ုပ်က ထောက်ပြသည်။ သို့သော် ၎င်းတို့က လက်မခံသည်ကိုဖြစ်စေ၊ ၎င်းတို့၌ မကောင်းသော သဘောထား ရှိသည်ကိုဖြစ်စေ ကျွန်ုပ် မြင်သောအခါ ကျွန်ုပ်သည် စတင်ငြင်းခုံရမည်ကို ကြောက်ရွံ့သောကြောင့် အလျှော့ပေးလိုက်သည်။) အလျှော့ပေးခြင်းက မှန်သလော၊ သို့မဟုတ် မှားသလော။ (မှားသည်။ သို့သော် ကျွန်ုပ်က ဤအမှုကိစ္စကို ဖိအားပေးလျှင် ငြင်းခုံမှုစတင်ဖြစ်ပွားပြီး ငြိမ်သက်ခြင်းအား ဖျက်ဆီးမိမည်ကို ကြောက်ရွံ့သည်။ ပြီးလျှင် လူတို့က ကျွန်ုပ်အပေါ် အမြင်ကောင်းမည်မဟုတ်။) သင်သည် ငြင်းခုံမှုများကို ရှောင်လိုလျှင် ညှိနှိုင်းခြင်းသည် တစ်ခုတည်းသောနည်းလမ်းဖြစ်သလော။ မည်သည့်အခြေအနေများတွင် သင် ညှိနှိုင်းနိုင်သနည်း။ သင်၏ကိုယ်ကျိုး၊ သို့မဟုတ် သင်၏ ဂုဏ်ကဲ့သို့သော သေးငယ်သောကိစ္စများနှင့်သက်ဆိုင်လျှင် ငြင်းခုံစရာမလိုပေ။ သည်းခံရန်၊ သို့မဟုတ် ညှိနှိုင်းရန် ရွေးချယ်နိုင်သည်။ သို့သော် အသင်းတော်အလုပ်ကို ထိခိုက်နိုင်ပြီး ဘုရားအိမ်တော်၏ အကျိုးစီးပွားများကို နစ်နာစေနိုင်သော ကိစ္စများတွင် စည်းမျဉ်းများကို လိုက်နာရမည်။ ဤစည်းမျဉ်းကို သင် မစောင့်ထိန်းလျှင် သင်သည် ဘုရားသခင်အပေါ် သစ္စာမရှိခြင်းဖြစ်သည်။ သင်သည် သိက္ခာဆည်ရန်၊ သို့မဟုတ် သင်၏ အပြန်အလှန် ပုဂ္ဂိုလ်ရေး ဆက်ဆံမှုများကို ထိန်းသိမ်းရန်အတွက် ညှိနှိုင်းပြီး သမ္မာတရားစည်းမျဉ်းများကို စွန့်လွှတ်ရန် သင်ရွေးချယ်လျှင် ဤသည်မှာ သင်က တစ်ကိုယ်ကောင်းဆန်ပြီး ယုတ်မာခြင်းမဟုတ်လော။ ဤသည်မှာ သင်၏တာဝန်တွင် တာဝန်မသိတတ်သော၊ ဘုရားသခင်အပေါ် သစ္စာမရှိသော လက္ခဏာမဟုတ်လော။ (ဟုတ်ပါသည်။) ထို့ကြောင့် သင်၏တာဝန်လမ်းကြောင်းတွင် လူတိုင်းက သဘောထားကွဲလွဲသော အချိန်ရောက်လာလျှင် မည်သို့ လက်တွေ့လုပ်ဆောင်သင့်သနည်း။ ယင်းနှင့်ပတ်သက်၍ သင်၏ အစွမ်းရှိသမျှ ငြင်းခုံခြင်းက ပြဿနာကို ပြေလည်စေမည်လော။ (မပြေလည်ပါ။) ဤသို့ဆိုလျှင် ပြဿနာကို မည်သို့ ဖြေရှင်းသင့်သနည်း။ ဤအခြေအနေတွင် သမ္မာတရားကို နားလည်သူသည် ပြဿနာကို ဖြေရှင်းရန် ရှေ့ထွက်သင့်သည်။ ရှေးဦးစွာ ပြဿနာကို ရှေ့တွင်ချပြီး နှစ်ဖက်လုံး၏ ထင်မြင်ချက်များကို ပြောခွင့်ပေးသင့်သည်။ ထို့နောက်တွင် လူတိုင်းက သမ္မာတရားကို အတူတကွ ရှာရန်ဖြစ်သည်။ ဘုရားသခင်ထံ ဆုတောင်းပြီးနောက်တွင် ဘုရားနှုတ်ကပတ်တော်ရှိ သက်ဆိုင်မှုရှိသော သမ္မာတရားကို ဆက်လက်၍ မိတ်သဟာယဖွဲ့ရန် ထုတ်ယူဖို့ ဖြစ်သည်။ သမ္မာတရားစည်းမျဉ်းများကို ၎င်းတို့ မိတ်သဟာယဖွဲ့ပြီး ရှင်းလင်းမှုရရှိပြီးသည့်နောက်တွင် နှစ်ဖက်လုံးက ကျိုးနွံနာခံနိုင်လိမ့်မည်။ ၎င်းတို့သည် သမ္မာတရားအပေါ် ကျိုးနွံနာခံရန် သင်ယူရမည်။ လူအများစုက သမ္မာတရားကို ကျိုးနွံနာခံနိုင်သော်လည်း သမ္မာတရားကို ကျိုးနွံနာခံနိုင်ခြင်း မရှိသောသူ၊ သို့မဟုတ် ကျိုးကြောင်းပြပြောဆို၍ မရနိုင်သောသူ အနည်းငယ်ရှိလျှင် ၎င်းတို့သည် သမ္မာတရားကို လက်မခံသောသူများဖြစ်ကြပြီး ၎င်းတို့၏ သဘာဝသည် ဆိုးယုတ်လူတို့၏ သဘာဝဖြစ်သည်။ ပြီးလျှင် ဘုရားသခင် ရွေးချယ်ထားသောသူများက ၎င်းတို့ကို လွယ်ကူစွာ ပိုင်းခြားသိမြင်လိမ့်မည်။ ဤသည်မှာ အသင်းတော်တွင် ငြင်းခုံမှုပြဿနာများကို ဖြေရှင်းရန် အကောင်းဆုံးနည်းလမ်းဖြစ်သည်။ ပြဿနာများကို ဖြေရှင်းရန်အတွက် သမ္မာတရားကို အသုံးပြုခြင်းသည် အရေးကြီးသော စည်းမျဉ်းတစ်ခုဖြစ်ပြီး စည်းမျဉ်းမရှိသော ညှိနှိုင်းမှုများကို မပြုလုပ်နိုင်ပါ။ သင်၏ တစ်ကိုယ်ရေ ဆက်ဆံရေးများ၊ ဂုဏ်သိက္ခာနှင့် ကိုယ်ကျိုးတို့ကို ထိန်းသိမ်းရန်အတွက် သင်သည် ဘုရားအိမ်တော်၏ အကျိုးစီးပွားများကို စွန့်လွှတ်နိုင်လျှင် သင်သည် စာတန်နှင့် အပေးအယူလုပ်နေခြင်းဖြစ်သည်။ ဤသည်မှာ စည်းမျဉ်းနှင့် မညီသကဲ့သို့ ဘုရားသခင်အပေါ် သစ္စာစောင့်သိမှု မရှိခြင်း ဖြစ်သည်။ လူတစ်ဦးချင်းစီက မိမိတို့၏ တစ်ကိုယ်ရေ သိက္ခာဆည်ရန် ကြိုးစားပြီး မိမိတို့၏ ကိုယ်ပိုင်အကြောင်းပြချက်များအပေါ် အလေးထားပါက ဤသည်မှာ သမ္မာတရားအား ရှာဖွေခြင်း သဘောထားဖြစ်သလော။ ဤသည်မှာ မိမိတို့တာဝန်တွင်ရှိသင့်သော သဘောထားဟုတ်သလော။ (မဟုတ်ပါ။) လူတစ်ယောက်အနေဖြင့် သူ၏တာဝန်တွင် သစ္စာစောင့်သိမှုကို ရရှိရန်အတွက် သူသည် ဂုဏ်သတင်း၊ သို့မဟုတ် ကိုယ်ကျိုးအတွက် မယှဉ်ပြိုင်သင့်ပေ။ သူသည် ဘုရားသခင်အား ဩဇာအာဏာ ရှိစေသင့်ပြီး သမ္မာတရားအား သူ၏ အရှင်သခင်ဖြစ်စေသင့်သည်။ ဘုရားအိမ်တော်၏ အကျိုးစီးပွားများသည် အရေးကြီးဆုံးဖြစ်ပြီး ထိရောက်မှုရှိသောအလုပ်သည် အရေးကြီးဆုံးဖြစ်သည်။ ဤစည်းမျဉ်းသည် မမှန်ကန်သလော။ (မှန်ကန်သည်။) သင်တို့အားလုံးသည် ဤစည်းမျဉ်းကို လိုက်နာနိုင်လျှင် လူတို့နှင့် ငြင်းခုံစရာ မည်သည့်အရာကျန်သနည်း။ ငြင်းခုံမှုများ ရှိမည်မဟုတ်ပေ။ မိမိတို့၏ ကိုယ်ပိုင်အကျိုးစီးပွားများကို အစဉ်ကာကွယ်ပြီး သမ္မာတရားအား လုံးဝ လက်တွေ့မလုပ်ဆောင်သူတို့သည် လူကောင်းများမဟုတ်ဘဲ အခြားလူများထံမှ မျက်နှာသာရရန်အတွက် ဘုရားအိမ်တော်၏ အကျိုးစီးပွားများကို အစဉ်သစ္စာဖောက်သောသူများက ပို၍ပင် ဆိုးသည်။ ဤလူတို့အားလုံးသည် မယုံကြည်သူများဖြစ်ကြပြီး ဘုရားသခင်ကို သစ္စာဖောက်သူများဖြစ်သည်။ လူတစ်ယောက်သည် ဘုရားအိမ်တော်၏ အကျိုးစီးပွားများနှင့် အသင်းတော်အလုပ်၏ ထိရောက်မှုကို ကာကွယ်ရန်အတွက် သဘောထားကွဲလွဲပြီး ငြင်းခုံကာ ၎င်းတို့၏ သဘောထားက အနည်းငယ် အလျှော့ပေးခြင်းမရှိလျှင် ဤသည်မှာ ပြဿနာဖြစ်သည်ဟု သင်တို့ ဆိုမလော။ (မဆိုပါ။) ၎င်းတို့၏ ရည်ရွယ်ချက်က မှန်ကန်သောကြောင့်ဖြစ်သည်။ ဘုရားအိမ်တော်၏ အကျိုးစီးပွားကို ကာကွယ်ရန်ဖြစ်သည်။ ဤသည်မှာ ဘုရားဘက်တွင် ရပ်တည်ပြီး သမ္မာတရားစည်းမျဉ်းများကို လိုက်နာသောသူ၊ ဘုရားသခင်က ဝမ်းမြောက်သောသူဖြစ်သည်။ ဘုရားအိမ်တော်၏ အကျိုးစီးပွားများကို ကာကွယ်သောအခါတွင် ပြင်းထန်သော၊ ပြတ်သားသော သဘောထားရှိခြင်းသည် မြဲမြံစွာ ရပ်တည်ခြင်း၊ စည်းမျဉ်းများကို လိုက်နာခြင်း၏ လက္ခဏာဖြစ်ပြီး ဘုရားသခင်က သဘောကျသည်။ ဤသဘောထားတွင် ပြဿနာတစ်ခုရှိသည်ဟု လူများက ခံစားနိုင်သည်။ သို့သော် ဤသည်မှာ ကြီးမားသော အရာမဟုတ်ပေ။ ယင်းသည် ဖောက်ပြန်ပျက်စီးသော စိတ်သဘောထားကို ထုတ်ဖော်ပြခြင်းနှင့် မသက်ဆိုင်ပေ။ သတိရလော့။ သမ္မာတရားစည်းမျဉ်းများကို လိုက်နာခြင်းသည် အရေးကြီးဆုံးအရာဖြစ်သည်။

အသက်ဝင်ရောက်မှုသည် အရေးပါဆုံးသောအရာဖြစ်သည်။ အသက်ဝင်ရောက်မှုက အဓိကအားဖြင့် မည်သည့်အရာနှင့် ဆက်စပ်နေသနည်း။ (သမ္မာတရားအား လိုက်စားခြင်းဖြင့် ဆက်စပ်နေသည်။) မှန်သည်။ အဓိကအားဖြင့် သမ္မာတရားအား လိုက်စားခြင်းနှင့် ဆက်စပ်နေသည်။ သမ္မာတရားအား လိုက်စားသောသူတို့သာ အသက်ဝင်ရောက်မှုရှိသည်။ လူတို့သည် အသက်ဝင်ရောက်မှု ရှိလိုလျှင် ယင်းသည် သမ္မာတရားအား လက်တွေ့လုပ်ဆောင်ခြင်းနှင့် သက်ဆိုင်သည်။ လူတစ်ဦးသည် သမ္မာတရားအား လိုက်စားခြင်းရှိမရှိကို မည်သို့ ပိုင်းခြားသိမြင်သင့်သနည်း။ မည်သည့်လူစားမျိုးက သမ္မာတရားကို မလိုက်စားသနည်း။ သင်သိသလော။ ငါပြောဆိုသည့် ပထမအမျိုးအစားမှာ ဝိညာဉ်ရေးရာ နားလည်သဘောပေါက်မှု မရှိသောသူများဖြစ်သည်။ ဝိညာဉ်ရေးရာ နားလည်သဘောပေါက်မှု မရှိသူတို့၏ အနှစ်သာရမှာ အဘယ်နည်း။ (လူတို့၏ ဖောက်ပြန်ပျက်စီးသော စိတ်သဘောထားများကို ဖော်ထုတ်သော ဘုရားနှုတ်ကပတ်တော်များကို ဖတ်ပြီးနောက်တွင် ၎င်းတို့သည် ဘုရားနှုတ်ကပတ်တော်နှင့် ၎င်းတို့၏ ကိုယ်ပိုင်အခြေအနေများ၊ သရုပ်သကန်များကြား၌ ဆက်စပ်မှုတစ်ခုကို ဆွဲမထုတ်နိုင်ပါ။ ဘုရားသခင်က အခြားလူများအကြောင်းပြောနေသည်ဟု ၎င်းတို့ ထင်မြင်ကြသည်။) အဓိကအားဖြင့် ၎င်းတို့သည် မိမိတို့ကိုယ်ကို ဘုရားနှုတ်ကပတ်တော်များဖြင့် နှိုင်းယှဉ်ချိန်ဆ မကြည့်နိုင်ခြင်းဖြစ်သည်။ သို့သော် ဤအရာကို ၎င်းတို့ သိသလော။ (မသိပါ။) ဝိညာဉ်ရေးရာ နားလည်သဘောပေါက်မှု မရှိသူတို့သည် ဤအရာများကို သဘောပေါက်နိုင်စွမ်းမရှိပေ။ ၎င်းတို့၏ စိတ်နှလုံးများသည် ရွှင်ပျနေဆဲဖြစ်သည်။ ၎င်းတို့က ဘုရားနှုတ်ကပတ်တော်များစွာကို နားလည်သည်ဟု ထင်သည်။ သို့သော် အမှန်တကယ်တွင် နှုတ်ကပတ်တော်တိုင်းသည် ၎င်းတို့အတွက် စည်းမျဉ်းစည်းကမ်းတစ်ခုသာ ဖြစ်သည်။ ၎င်းတို့က “ဘုရားသခင်က ငါ့အား တစ်စုံတစ်ခု လုပ်ဆောင်စေလျှင် ငါ လုပ်ဆောင်မည်။ သူသည် ငါ့အား တစ်စုံတစ်ခုကို စွန့်ပစ်စေလျှင် ငါ စွန့်ပစ်မည်။ သူသည် ငါ့အား ကိုယ့်ကိုယ်ကိုယ် အသုံးခံစေလျှင် ငါ ထိုသို့ လုပ်ဆောင်မည်။ ဘုရားသခင်ကို ဤသို့ ကျိုးနွံနာခံခြင်းအားဖြင့် ငါသည် ကယ်တင်ခြင်းခံရသည်” ဟု ထင်ကြသည်။ နှစ်အတန်ကြာ ဤသို့ ယုံကြည်ပြီးနောက်တွင် “ကောင်းစွာသော တိုက်လှန်ခြင်းကို ငါပြုပြီ။ ပြေးရသောလမ်းကို အဆုံးတိုင်အောင်ပြေးပြီ။ ယုံကြည်ခြင်းတရားကို စောင့်ရှောက်ပြီ။ ယခုမှစ၍ ဓမ္မသရဖူသည် ငါ့အဘို့သိုထားလျက်ရှိ၏။” (တိမောသေသြဝါဒစာဒုတိယစောင် ၄:၇-၈) ဟု ပေါလု ပြောခဲ့သကဲ့သို့ ၎င်းတို့၌ အရင်းအနှီးရှိသည်ဟု ထင်ကြသည်။ မည်သည့်ပုံစံဖြင့် ပြောသည်ဖြစ်စေ ပေါလု၌ ဝိညာဉ်ရေးရာ နားလည်သဘောပေါက်မှု ကင်းမဲ့သည်။ ဤသည်မှာ အမှန်ပင် သနားစဖွယ်ဖြစ်သည်။ သူ့၌ ဝိညာဉ်ရေးရာ သဘောပေါက်နားလည်မှုမရှိသောအခါတွင် ဒုက္ခပေးနေပြီဖြစ်သည်။ သို့သော် ဤအရာအပြင် သူသည် သမ္မာတရားကို မလိုက်စားခဲ့ပေ။ သူသည် သူ၏ ကိုယ်ပိုင်အယူဝါဒ၊ ဆောင်ပုဒ်များ၊ စိတ်ကူးထင်မြင်မှုများ၊ အယူအဆများ၊ အသိပညာနှင့် အတွေးအခေါ်များအားလုံးတို့ကို သမ္မာတရားအဖြစ် မှတ်ယူပြီး သူ၏ ကိုယ်ပိုင်လိုက်စားမှုများကို ချဲ့ထွင်ရန် အခြေခံအုတ်မြစ်အဖြစ် အသုံးပြုခဲ့သည်။ ရလဒ်အနေဖြင့် မည်သည့်အရာကို သူလုပ်ဆောင်သည်ဖြစ်စေ သူသည် သမ္မာတရားစစ်မှန်မှုများကို အသက်ရှင်နေထိုင်နေခြင်းမဟုတ်ဘဲ မည်သည့်အရာကို သူလုပ်ဆောင်သည်ဖြစ်စေ ဘုရားသခင်၏ ရည်ရွယ်ချက်များဖြင့် မကိုက်ညီပေ။ သူ၏ ပြဿနာမှာ ပြင်းထန်သည်။ ပေါလုသည် ဝိညာဉ်ရေးရာ နားလည်မှုကင်းမဲ့ခြင်းနှင့် ပတ်သက်သောအခါ၌ အဆိုးဝါးဆုံးဖြစ်သည်။ မမှန်သလော။ (မှန်ပါသည်။) ဝိညာဉ်ရေးရာ နားလည်သဘောပေါက်မှု ကင်းမဲ့သူတို့သည် သမ္မာတရားကို ချစ်သလော။ လုံးဝ မချစ်ပေ။ အဘယ်ကြောင့်ဆိုသော် ဝိညာဉ်ရေးရာ နားလည်သဘောပေါက်မှုမရှိသောသူများသည် သမ္မာတရားကို သဘောပေါက်နိုင်စွမ်း မရှိသောကြောင့် ဖြစ်သည်။ သမ္မာတရားကို ၎င်းတို့ သဘောမပေါက်လျှင် သမ္မာတရားကို ၎င်းတို့ ချစ်နိုင်ဖို့ မဖြစ်နိုင်ပေ။ ဝိညာဉ်ရေးရာ နားလည်သဘောပေါက်မှု မရှိသူတို့သည် မိမိတို့ကိုယ်ကို မည်သို့ ပေါ်လွင်စေသနည်း။ အဓိက သရုပ်သကန်မှာ လူတို့သည် ဘုရားနှုတ်ကပတ်တော်နှင့် ပတ်သက်ပြီး ၎င်းတို့ကို မည်သို့ မိတ်သဟာယဖွဲ့သည်ဖြစ်စေ ၎င်းတို့က နားမလည်သေးပေ။ ပြီးလျှင် လူတို့က သမ္မာတရားနှင့်ပတ်သက်ပြီး ၎င်းတို့ကို မည်မျှရှင်းလင်းစွာ မိတ်သဟာယဖွဲ့သည်ဖြစ်စေ ၎င်းတို့က သဘောပေါက်နိုင်စွမ်းမရှိဆဲ ဖြစ်သည်။ ဤသည်မှာ အစွမ်းအစနိမ့်ကျလွန်းခြင်းနှင့် တိုက်ရိုက်ဆက်စပ်နေသည်။ ဝိညာဉ်ရေးရာ နားလည်သဘောပေါက်မှုမရှိသောသူတို့သည် သမ္မာတရားကို လိုက်စားနိုင်သလော။ ၎င်းတို့သည် ဆန္ဒရှိလျှင်ပင် မလိုက်စားနိုင်ပေ။ ဝိညာဉ်ရေးရာ နားလည်သဘောပေါက်မှု မရှိသောသူတို့သည် ဘုရားသခင်ပြောဆိုနေသည့်အရာကို နားမလည်နိုင်ပေ။ ဘုရားသခင်က မည်သည့်အခြေအနေများအား ဖော်ထုတ်သည်ကို မသိပေ။ ပြီးလျှင် မိမိတို့နှင့်ပတ်သက်သည့် နှိုင်းယှဉ်ချက်များ မချမှတ်နိုင်ပေ။ ၎င်းတို့သည် ဘုရားနှုတ်ကပတ်တော်များအားလုံးကို စည်းမျဉ်းစည်းကမ်းများ၊ စကားစုများ၊ ဆောင်ပုဒ်များနှင့် အယူဝါဒများအဖြစ် မှတ်ယူပြီး ဘုရားနှုတ်ကပတ်တော်များက သမ္မာတရားဖြစ်သည်ကို လုံးဝ မသိကြပေ။ ဤတွင် ပြဿနာမှာ အဘယ်နည်း။ ၎င်းတို့၏ အစွမ်းအစက နိမ့်လွန်းနေခြင်းဖြစ်သည်။ ၎င်းတို့သည် သဘောပေါက်နားလည်နိုင်စွမ်းကို လုံးဝ မပိုင်ဆိုင်ကြသကဲ့သို့ ဝိညာဉ်ရေးရာ နားလည်သဘောပေါက်မှု ကင်းမဲ့ခြင်းကို ပြသနေသည်။

ဒုတိယအမျိုးအစားမှာ ဝိညာဉ်ရေးရာ နားလည်သဘောပေါက်မှု ရှိသောသူများဖြစ်သည်။ ဝိညာဉ်ရေးရာ နားလည်သဘောပေါက်မှု ရှိသောသူများသည် သမ္မာတရားကို နားလည်နိုင်သည်။ ဘုရားနှုတ်ကပတ်တော်ကို ၎င်းတို့ စားသောက်သောအခါ နှိုင်းယှဉ်ချိန်ဆချက်များ ချမှတ်နိုင်သည်။ ပြီးလျှင် ဘုရားနှုတ်ကပတ်တော်က မည်သည့်အရာကို ဖော်ထုတ်နေသည်ကိုလည်းကောင်း၊ ဘုရားနှုတ်ကပတ်တော်တွင် မည်သည့်သမ္မာတရားများ ရှိသည်ကိုလည်းကောင်း၊ ဘုရားသခင်က မည်သည့်အရာကို တောင်းဆိုသည်ကိုလည်းကောင်း နားလည်နိုင်သည်။ နားလည်နိုင်စွမ်းရှိခြင်းသည် ဝင်ရောက်မှုရှိခြင်းနှင့် ညီမျှသလော။ (မညီမျှပါ။) ဤသို့ဆိုလျှင် ၎င်းတို့က နားလည်နိုင်သည်ဟု ငါဆိုသောအခါ၌ မည်သည့်အရာကို ညွှန်းဆိုနေခြင်း ဖြစ်သနည်း။ မည်သည့်အရာကို ကိုင်တွယ်နေခြင်း ဖြစ်သနည်း။ (၎င်းတို့သည် မိမိတို့ကိုယ်ကို ဘုရားနှုတ်ကပတ်တော်နှင့် နှိုင်းယှဉ်ချိန်ဆချက်များ ချမှတ်နိုင်သည်။) မိမိတို့ဖြင့် နှိုင်းယှဉ်ချိန်ဆချက်များ ချမှတ်နိုင်ခြင်းသည် ယင်း၏ တစ်စိတ်တစ်ပိုင်းဖြစ်သည်။ ၎င်းတို့သည် လူ၏ ဖောက်ပြန်ပျက်စီးသော စိတ်သဘောထားများနှင့် ဘုရားသခင်ဖော်ထုတ်သည့် အခြေအနေအမျိုးအစားတိုင်းကို ဝန်ခံကြသည်။ ဤသို့ဆိုလျှင် ၎င်းတို့သည် ဘုရားသခင်တောင်းဆိုသည့်အရာကို သိနိုင်စွမ်းရှိသလော။ အတိုင်းအတာတစ်ခုအထိ သိသင့်သည်။ ဘုရားသခင်၏ တောင်းဆိုချက်များကို သိသင့်သည်။ ဘုရားနှုတ်ကပတ်တော်တွင် မည်သည့်စည်းမျဉ်းများအကြောင်း ပြောဆိုသည်၊ သူ၏ ရည်ရွယ်ချက်များက မည်သည့်အရာများ ဖြစ်သည်ဆိုသည်တို့ကို သိသင့်သည်။ ၎င်းတို့သည် ဤအရာများနှင့်ပတ်သက်၍ ရှင်းလင်းပြီး နားလည်သည်။ ဤအတွက်ကြောင့် ၎င်းတို့ကို ဝိညာဉ်ရေးရာ နားလည်သဘောပေါက်မှုရှိသူများဟု ခေါ်ခြင်းဖြစ်သည်။ ဝိညာဉ်ရေးရာ နားလည်သဘောပေါက်မှုရှိသူများက ဘုရားနှုတ်ကပတ်တော်ကို စားသောက်သောအခါ၌ မိမိတို့ကိုယ်ကို နှိုင်းယှဉ်ချိန်ဆချက်များ ချမှတ်နိုင်ကြသည်။ ဘုရားနှုတ်ကပတ်တော်က မည်သည့်အရာအား ညွှန်းဆိုနေသည်၊ သူ၏ တောင်းဆိုချက်များက မည်သည့်အရာများ ဖြစ်သည်ဆိုသည်ကို နားလည်နိုင်ကြသည်။ ဤသည်မှာ ဤလူအမျိုးအစားသည် သမ္မာတရားကို သဘောပေါက်နားလည်ရန် အစွမ်းအစနှင့် အရည်အချင်းအား ပိုင်ဆိုင်သည်ကို ပြသည်။ ဤသို့ဆိုလျှင် ဤအစွမ်းအစနှင့် အရည်အချင်းကို ပိုင်ဆိုင်ခြင်းက ၎င်းတို့တွင် အသက်ဝင်ရောက်မှုရှိသည်ဟု သေချာပေါက်ဆိုလိုသလော။ (မဆိုလိုပါ။) မတူညီသော ဖြစ်နိုင်ချေအချို့ရှိသည်။ လူအချို့သည် ဘုရားနှုတ်ကပတ်တော်ကို နားလည်နိုင်ပြီး ဘုရားနှုတ်ကပတ်တော်ကို သဘောပေါက်နားလည်ရန် အစွမ်းအစနှင့် အရည်အချင်းကို ပိုင်ဆိုင်သည်။ သို့သော် မိမိတို့ကိုယ်ကိုဖြင့် မည်သည့်အခါမျှ နှိုင်းယှဉ်ချိန်ဆမကြည့်ဖူးပေ။ ၎င်းတို့သည် ဘုရားနှုတ်ကပတ်တော်နှင့် အခြားလူများကြားတွင်သာ နှိုင်းယှဉ်ချိန်ဆချက်များ ချမှတ်သည်။ အခြားလူများရှိ အားနည်းချက်များကို ရှာဖွေသည်။ ထိုလူတို့အပေါ် အနိုင်ယူရန်အတွက် ထိုလူတို့၏ ချို့ယွင်းချက်များကို အသုံးပြုသည်။ ၎င်းတို့၏ အခြေအနေများအပေါ် အမှားရှာသည်။ စုံစမ်းထောက်လှမ်းသူတစ်ဦးဖြစ်သည့်အလား ၎င်းတို့၏ စိတ်ကို ဖတ်ဖို့ ကြိုးစားသည်။ ၎င်းတို့၌ အခြားမည်သည့်အရာမျှ လုပ်စရာမရှိသောအခါတွင် အခြားလူများတွေးသည့်အရာကို ပြန်ပြောင်းစဉ်းစားသည်။ လူတို့က ၎င်းတို့၏ စိတ်နှလုံးထဲ၌ မည်သည့်အရာတွေးနေသည်ကိုလည်းကောင်း၊ ၎င်းတို့စိတ်နှလုံး၌ မည်သည့်အတွေးများ၊ စိတ်ကူးများရှိသည်ကိုလည်းကောင်း၊ ၎င်းတို့၏ ရည်ရွယ်ချက်က မည်သည့်အရာဖြစ်သည်ကိုလည်းကောင်း၊ ၎င်းတို့ ချိန်ရွယ်ချက်၊ ၎င်းတို့၏ အရင်းအခံအကြောင်း၊ ၎င်းတို့မျှော်လင့်သည့်အရာတို့က မည်သည့်အရာ ဖြစ်သည်ကိုလည်းကောင်း၊ အမှုအရာများအား လုပ်ဆောင်စဉ်တွင် မည်သည့်ဖောက်ပြန်ပျက်စီးသော စိတ်သဘောထားများကို ထုတ်ဖော်သည်ကိုလည်းကောင်း ရှာဖွေတွေ့ရှိဖို့ ကြိုးစားကြသည်။ ဤအရာများအား ရှာဖွေတွေ့ရှိရာ၌ ၎င်းတို့၏ ပန်းတိုင်မှာ အဘယ်နည်း။ အခြားလူများကို ဘုရားနှုတ်ကပတ်တော်နှင့် နှိုင်းယှဉ်ချိန်ဆချက်များချမှတ်ကာ ထို့နောက်တွင် ၎င်းတို့၏ပြဿနာများကို ဖြေရှင်းရန် ဖြစ်သည်။ ဥပမာအနေဖြင့် “မောင်လှ”နေထိုင်သော ပတ်ဝန်းကျင်၊ သူ၏ မိသားစုနောက်ခံက အဘယ်သို့ရှိသည်၊ ဘုရားသခင်ကို သူယုံကြည်ခဲ့သည်မှာ နှစ်မည်မျှရှိသည်၊ သူ့တွင် ပုံမှန်အားဖြင့် မည်သည့်ပြဿနာ ရှိသည်၊ သူ၏ စိတ်သဘောထားပြောင်းလဲခြင်းအား လိုက်စားသောအခါတွင် သူ့၌ မည်သည့်အားနည်းချက်များရှိသည်၊ အမှုအရာများ ဖြစ်ပျက်သောအခါ မည်သည့်အခက်အခဲများ မကြာခဏ ရှိသည်၊ သူ့အတွက် မည်သည့်အခြေအနေတွင် အပျက်သဘောဆောင်လာဖို့ လွယ်ကူသည်၊ သူ၏တာဝန်ကို မည်မျှကောင်းစွာ ထမ်းဆောင်သည်၊ ဘုရားနှုတ်ကပတ်တော်များကို သူမည်သို့ ချဉ်းကပ်သည်၊ ပြီးလျှင် သူ၏ ဝိညာဉ်ရေးရာအသက်တာက ပုံမှန်ဟုတ်မဟုတ်တို့ ဖြစ်သည်။ ၎င်းတို့သည် ဤအရာများအားလုံးကို ရှင်းလင်းစွာ နားလည်သဘောပေါက်မှုရှိသည်။ ၎င်းတို့သည် အလွန်ဉာဏ်ထက်မြက်သည်။ သို့သော် ကံမကောင်းစွာဖြင့် ၎င်းတို့သည် ၎င်းတို့၏ အသိဉာဏ်ကို သင့်တော်သောနေရာ၌ အသုံးမချပေ။ အခြားလူများ၏ ပြဿနာများကို ၎င်းတို့ ဖြေရှင်းသော်လည်း ၎င်းတို့ကိုယ်၌က သမ္မာတရားကို လက်တွေ့မလုပ်ဆောင်ကြပေ။ ဤလူစားမျိုးသည် မကြာခဏပင် ခေါင်းဆောင်၊ သို့မဟုတ် အမှုဆောင်တစ်ဦး၊ သို့မဟုတ် တာဝန်ပမဏတစ်ခုခုရှိသောသူတစ်ဦး ဖြစ်သည်။ ဤလူစားမျိုးတွင်ရှိသော ဤလိုက်စားမှုနည်းလမ်းသည် ပြဿနာဖြစ်စေတတ်သလော။ (ဖြစ်စေတတ်ပါသည်။) ဤလိုက်စားမှုနည်းလမ်းသည် ပြဿနာဖြစ်စေတတ်ပြီး အလွန်ပင် ပြင်းထန်ဆိုးရွားလေသည်။ မည်မျှပြင်းထန်ဆိုးရွားသနည်း။ ဤအရာကို ငါတို့ မိတ်သဟာယဖွဲ့သင့်သည်။ ဤလူစားမျိုးသည် ဝိညာဉ်ရေးရာ နားလည်သဘောပေါက်မှုရှိသည်။ ဘုရားနှုတ်ကပတ်တော်ကို နားလည်သည်။ ဘုရားနှုတ်ကပတ်တော်ဖြင့် မည်သို့ နှိုင်းယှဉ်ချိန်ဆချက်များ ချမှတ်နိုင်သည်ကို သိသည်။ သို့သော် မိမိတို့ကိုယ်ကို ဘုရားနှုတ်ကပတ်တော်ဖြင့် မည်သည့်အခါမျှ နှိုင်းယှဉ်ချိန်ဆ၍ မကြည့်ပေ။ ဤအစား အခြားလူများကို ဘုရားနှုတ်ကပတ်တော်နှင့် နှိုင်းယှဉ်ချိန်ဆချက်များ ချမှတ်သည်။ အခြားလူများဖြင့် နှိုင်းယှဉ်ချိန်ဆချက်များ ချမှတ်ရာတွင် ၎င်းတို့၏ ပန်းတိုင်မှာ အဘယ်နည်း။ (ကြွားဝါရန် ဖြစ်သည်။) မှန်သည်။ ၎င်းတို့သည် ၎င်းတို့၏ ဆန္ဒများနှင့် ရည်မှန်းချက်များကို ဖြည့်ဆည်းရန်၊ ၎င်းတို့၏ အဆင့်အတန်းကို ပို၍ စိတ်ချရစေရန်၊ ၎င်းတို့အနေဖြင့် လူတို့၏ စိတ်နှလုံးကို ပို၍ ဆွဲဆောင်နိုင်စွမ်းရှိစေရန် ကြွားဝါခြင်း ဖြစ်သည်။ ၎င်းတို့က ဤသို့လုပ်ဆောင်နိုင်သည့်အချက်မှာ ၎င်းတို့၏ သဘာဝနှင့် ဆက်စပ်နေပြီး ဘုရားသခင်အား ယုံကြည်သောအခါတွင် ၎င်းတို့လိုက်စားသည့်အရာနှင့် တိုက်ရိုက်ဆက်စပ်နေသည်။ ၎င်းတို့သည် အမှုအရာများအပေါ် အပြည့်အဝစိတ်နှစ်သည်၊ ၎င်းတို့အလုပ်ကို အပြည့်အဝ လုပ်ဆောင်သည်ဆိုသည့် အချက်ဖြင့်လည်းကောင်း၊ အခြားလူများတွင်ရှိသော အမျိုးမျိုးသော အခြေအနေအားလုံးကို ကောင်းစွာ နားလည်သဘောပေါက်နိုင်သည့်အချက်ဖြင့်လည်းကောင်း အကဲဖြတ်ရလျှင် ၎င်းတို့သည် သမ္မာတရားအား လိုက်စားသူများဖြစ်သည်ဟု ဆိုနိုင်သလော။ ဆိုနိုင်ချင်မှ ဆိုနိုင်ပေမည်။ ဤသို့ဆိုလျှင် လူတစ်ယောက်သည် သမ္မာတရားအား လိုက်စားသူ ဟုတ်မဟုတ်ဆိုသည်ကို မည်သို့ပြောနိုင်သနည်း။ သူသည် ညီအစ်ကိုမောင်နှများ၏ အသက်ဝင်ရောက်မှုနှင့် ပတ်သက်သောအခါ၌ အထူးပင် တာဝန်သိတတ်လျှင်၊ အမှုအရာများ၌ အလွန်ပင်စိတ်နှစ်ပြီး အလုပ်လုပ်လျှင်၊ သူ၏အလုပ်ကို ကောင်းစွာလုပ်ဆောင်လျှင်၊ ညီအစ်ကိုမောင်နှမများ၌ ရှိသော အခြေအနေအမျိုးအစားတိုင်းနှင့်ပတ်သက်ပြီး သမ္မာတရားကို မကြာခဏ ရှာဖွေလျှင်၊ ထို့နောက် ပြဿနာများကို ဖြေရှင်းလျှင် သူ၏တာဝန်ကို ဤသို့ ထမ်းဆောင်နိုင်ခြင်းအားဖြင့် သူသည် အရည်အချင်းပြည့်မီသော ခေါင်းဆောင်ဖြစ်သလော။ သူ၏ ဤသရုပ်သကန်များနှင့် ထုတ်ဖော်မှုများအား အကဲဖြတ်ခြင်းဖြင့် သူသည် သမ္မာတရားအား လိုက်စားသူဖြစ်သည်ဆိုသည်ကို သေချာနိုင်သလော။ (မလွဲဧကန် သေချာခြင်းမရှိနိုင်ပါ။) အဘယ်ကြောင့်နည်း။ (အခြားလူများ၏ ပြဿနာများကို ၎င်းတို့ ဖြေရှင်းနိုင်သော်လည်း ၎င်းတို့ကိုယ်တိုင် ဘုရားနှုတ်ကပတ်တော်နှင့် မည်သည့်အခါမျှ နှိုင်းယှဉ်ချိန်ဆ၍ မကြည့်ဖူးပါ။) ၎င်းတို့သည် ၎င်းတို့ကိုယ်တိုင်၏ ပြဿနာများကို မည်သည့်အခါမျှ မဖြေရှင်းခဲ့လျှင် အခြားလူများ၏ ပြဿနာများကို အဘယ်သို့ ဖြေရှင်းသနည်း။ (ယင်းတို့ကို ဖြေရှင်းရန် စကားများနှင့် အယူဝါဒများကို ၎င်းတို့ အမှီပြုသည်။) ၎င်းတို့သည် အချို့သော စကားများနှင့် အယူဝါဒများကို နားလည်သည်။ ပါးနပ်မှုအချို့ရှိသည်။ ကောင်းသော မှတ်ဉာဏ်ရှိသည်။ အမှုအရာများအပေါ် လျင်မြန်စွာ တုံ့ပြန်သည်။ ပြီးလျှင် တရားဒေသနာတစ်ပုဒ်ကို ၎င်းတို့ ကြားသည်နှင့် တစ်ပြိုင်နက် ၎င်းတို့သည် အခြားလူများထံ ချက်ချင်းသွား၍ ကြားဝါပြောဆိုနိုင်သည်။ ဤအရာများကို အကဲဖြတ်ခြင်းဖြင့် ၎င်းတို့၌ အသက်ဝင်ရောက်မှုရှိသလော။ (မရှိပါ။) အခြားလူများ၏ အခက်အခဲများကို ဖြေရှင်းသော်လည်း ၎င်းတို့ကိုယ်တိုင်၏ အခက်အခဲများကို မည်သည့်အခါမျှ မဖြေရှင်းခြင်းသည် သမ္မာတရားအား လိုက်စားခြင်း၏ သရုပ်သကန်တစ်ခုမဟုတ်။ ၎င်းတို့သည် အခြားလူများကို အယုံသွင်းပြီး သိမ်းသွင်းစည်းရုံးရန်အတွက် အယူဝါဒနှင့် ဘုရားနှုတ်ကပတ်တော်များကိုသာ အသုံးပြုသည်၊ သို့မဟုတ် နည်းဗျူဟာနှင့် နည်းလမ်းမျိုးစုံကို အသုံးပြုသည်။ ၎င်းတို့သည် လူတို့အား ဆင်းရဲဒုက္ခမခံရစေရန် ကူညီပေးဖို့အတွက် ၎င်းတို့နားလည်သည့် စကားများ၊ အယူဝါဒများကို အသုံးပြုသည်၊ သို့မဟုတ် ဘဝအတွေ့အကြုံဆိုင်ရာ စကားများကို အတုခိုးပြီး ကူးချသည်။ ၎င်းတို့သည် အခြားလူများ၏ အခက်အခဲများကို ဖြေရှင်းရန်အတွက် ၎င်းတို့ကိုယ်တိုင် ဖြတ်သန်းခဲ့ရသည့်အရာနှင့် ၎င်းတို့၏ အမှန်တကယ် အတွေ့အကြုံများကို အသုံးပြုခြင်းအစား ဤနည်းလမ်းများကို အသုံးပြုသည်။ ဤသည်မှာ ဤလူသည် သမ္မာတရားလိုက်စားသူ မဟုတ်ဆိုသည်ကို သက်သေပြသည်။ အခြားလူများကို ၎င်းတို့ ပံ့ပိုးပေးသည်မှာ အဘယ်အရာနည်း။ (အယူဝါဒဖြစ်သည်။) အယူဝါဒဖြစ်သည်ဟု ငါတို့ အဘယ်ကြောင့်ဆိုသနည်း။ ၎င်းတို့ကိုယ်တိုင်၏ အတွေ့အကြုံများမှ မလာသောကြောင့် ဖြစ်သည်။ ၎င်းတို့ အမှန်တကယ် ဖြတ်သန်းပြီးဖြစ်သည့် အရာတစ်ခုမဟုတ်ဘဲ ၎င်းတို့၏ အမှန်တကယ် နားလည်မှုမဟုတ်သောကြောင့် ဖြစ်သည်။ အခြားလူများကို ၎င်းတို့ အမှန်တကယ် ရေလောင်းပေးသည်မှာ မည်သည့်အရာ ဖြစ်သနည်း။ လူတို့ကို အယုံသွင်းပြီး နှစ်သိမ့်သော အယူဝါဒ၊ စကားစုများနှင့် စကားများဖြစ်သည်။ ၎င်းတို့သည် လူသားနည်းလမ်းများ၊ နည်းဗျူဟာများနှင့် ပါးနပ်မှုများကိုလည်း အသုံးပြုသည်။ မည်သို့ဖြစ်စေ လူတို့၏မေးခွန်းများကို ဖြေခြင်းသည် ပြဿနာများကို ဖြေရှင်းဖြစ်သည်ဟုလည်းကောင်း၊ ဤသည်မှာ အလုပ်လုပ်နေခြင်းဖြစ်သည်ဟုလည်းကောင်း ၎င်းတို့က ထင်ကြသည်။ ၎င်းတို့၏ သရုပ်သကန်များ၊ အခြားလူများအား ၎င်းတို့ ပံ့ပိုးသည့်အရာများ၊ ၎င်းတို့အလုပ်လုပ်သည့် ပုံစံ၊ ၎င်းတို့ လိုက်စားသောလမ်းကြောင်းတို့ကို အကဲဖြတ်လျှင် ဤသူသည် သမ္မာတရားကို လိုက်စားသူဟုတ်သလော။ (မဟုတ်ပါ။) ၎င်းတို့သည် သမ္မာတရားကို လိုက်စားသူမဟုတ်။ ၎င်းတို့ကိုယ်၌က ဝင်ရောက်မှုမရှိသောအခါ၌ ပြဿနာများကို ဖြေရှင်းရန် သမ္မာတရားကို အသုံးပြုခြင်းသည် အနည်းငယ် မရိုးသားခြင်း မဟုတ်လော။ (ဟုတ်ပါသည်။) ယင်းသည် မရိုးသားခြင်း ဖြစ်သည်။ ကြောင်သူတော်ဆန်သည်။ အခြားလူများကို လှည့်စားသည်။ ဤသို့ဆိုလျှင် ဤသို့သောလူတို့သည် ၎င်းတို့တာဝန်များကို ထမ်းဆောင်နိုင်သလော။ (မထမ်းဆောင်နိုင်ပါ။) အဘယ်ကြောင့် မထမ်းဆောင်နိုင်သနည်း။ သမ္မာတရားကို မလိုက်စားသောကြောင့်၊ မိမိတာဝန်ကို ကောင်းစွာထမ်းဆောင်ခြင်းနှင့် သမ္မာတရားအား နားလည်ခြင်းကြား၌ တိုက်ရိုက်ဆက်စပ်မှုတစ်ခုရှိသောကြောင့် ဖြစ်သည်။ ဥပမာအနေဖြင့် အသင်းတော်ကို ရေလောင်းရန် သမ္မာတရားကို နားလည်ရမည်။ ပြဿနာများကို ဖြေရှင်းရန် သမ္မာတရားကို နားလည်ရမည်။ ပြဿနာများကို ကိုင်တွယ်ရန်အတွက်လည်း သမ္မာတရားကို နားလည်ရမည်။ လူတို့အပေါ် ပိုင်းခြားသိမြင်မှုရှိရန်အတွက် သမ္မာတရားကို နားလည်ခြင်းက ပို၍ပင် လိုအပ်သည်။ အသင်းတော်အလုပ်၏ ရှုထောင့်တိုင်းက သမ္မာတရားနှင့် သက်ဆိုင်သည်။ သမ္မာတရားကို နားမလည်လျှင် အသင်းတော်၏ ပဓာနကျသောအလုပ်ကို ကောင်းစွာ လုပ်မည်မဟုတ်ပေ။ ပြီးလျှင် အထွေထွေအလုပ်များ၌ ပြီးစလွယ်သာ လုပ်ဆောင်လိမ့်မည်။ ထို့ကြောင့် ခေါင်းဆောင်တစ်ဦးသည် သမ္မာတရားကို မလိုက်စားလျှင် သူသည် မည်မျှအလုပ်ရှုပ်သည်ဖြစ်စေ၊ မည်မျှအောက်ခြေသိမ်း အလုပ်လုပ်ရသည်ဖြစ်စေ၊ သို့မဟုတ် မည်မျှဒုက္ခခံရသည်ဖြစ်စေ ကောင်းစွာလုပ်ဆောင်လိမ့်မည်မဟုတ်ပေ။ ပြီးလျှင် အလုပ်နှင့် တာဝန်များ၏ အတိုင်းအတာ အပြည့်အဝအထိ ၎င်းတို့တာဝန်ကို ကောင်းမွန်စွာ ဖြည့်ဆည်းနိုင်မည်မဟုတ်ပေ။ ၎င်းတို့သည် အလုပ်လုပ်သောအခါ အကြောင်းမရှိဘဲ တစ်နေရာမှ တစ်နေရာသို့ ပြေးလွှားသွားလာပြီး ပြဿနာများရှိသည့်နေရာကို မြင်တွေ့ပြီးနောက်တွင် ယင်းတို့ကို လွယ်သယောင်ဖြစ်သောနည်းဖြင့် ပြုပြင်ကြသည်။ လူတစ်ယောက်တွင် အခက်အခဲတစ်မျိုးမျိုးရှိသောအခါ အယူဝါဒအနည်းငယ်ကို ၎င်းတို့ မိတ်သဟာယဖွဲ့သည်။ ပြီးလျှင် လူတစ်ယောက်က အပျက်သဘောဆောင်ပြီး အားနည်းသောအခါ ၎င်းတို့က ထိုသူကို အားပေးပြီး တွန်းအားပေးသည်။ ဤသည်တို့မှာ ၎င်းတို့လုပ်ဆောင်သောအရာများ ဖြစ်သည်။ ၎င်းတို့က မိမိတို့ဦးဆောင်သောလူတို့ကို စောင့်ကြည့်နေလျှင် လူတိုင်းက အလုပ်ရှုပ်နေပြီး အလဟဿမနေသရွေ့ ၎င်းတို့၏ အလုပ်ကို ကောင်းစွာလုပ်ဆောင်နေသည်ဟုလည်းကောင်း၊ ၎င်းတို့သည် အလုပ်ကို စစ်ဆေးညွှန်ကြားလျက် နေရာတကာသို့ လှည့်လည်သွားလာနိုင်လျှင်၊ မည်သူကမျှ ၎င်းတို့ကို မတိုင်ကြားလျှင်၊ သို့မဟုတ် မဖော်ထုတ်လျှင်၊ ၎င်းတို့သွားသည့်နေရာတိုင်း၌ တရားဟောပြီး စကားပြောနိုင်လျှင်၊ မည်သည့်အနှောင့်အယှက်မျှမရှိဘဲ အရာရာတိုင်းက အဆင်ပြေချောမွေ့လျှင်လည်းကောင်း ၎င်းတို့၏ အလုပ်နှင့်တာဝန်ကို ကောင်းမွန်စွာ ဖြည့်ဆည်းနေသည်ဟု ထင်ကြသည်။ ဤသည်မှာ အဆင့်အတန်းရှိသည့်နေရာမှနေ၍ အလုပ်လုပ်နေခြင်းဖြစ်ပြီး လက်တွေ့ကျသော သဘောဖြင့် ပြဿနာများကို ဖြေရှင်းရန် သမ္မာတရားကို အသုံးပြုခြင်း မဟုတ်။ ၎င်းတို့သည် အလုပ်လုပ်ခြင်းအပေါ် အရေးစိုက်ပြီး အလုပ်လုပ်ခြင်းအပေါ်၌ အရေးစိုက်စဉ်တွင် ၎င်းတို့၏ အဆင့်အတန်းအတွက် မည်သည့်အရာကိုမျှ မလုပ်ဆောင်ကောင်း မလုပ်ဆောင်နိုင်ပေ။ ၎င်းတို့လုပ်ဆောင်သမျှမှာ ဤလူကို တွန်းအားပေးရန်၊ သို့မဟုတ် ထိုလူကို အားပေးရန် အယူဝါဒနှင့် ဆောင်ပုဒ်များကို တစိုက်မတ်မတ် အသုံးပြုခြင်း၊ ဤအလုပ်ဖြင့် မိမိတို့ကိုယ်ကို တစိုက်မတ်မတ် အလုပ်ရှုပ်နေစေခြင်းဖြစ်သည်။ ၎င်းတို့သည် အလဟဿမနေသရွေ့ အဆင်ပြေသည်ဟု ထင်ကြသည်။ ပထမတစ်ခုမှာ ၎င်းတို့သည် အချောင်ခို၍ မရပေ။ ဒုတိယမှာ အလုပ်ကြိုးစားရမည်။ တတိယမှာ ဒုက္ခကို တောင့်ခံနိုင်ရမည်။ ၎င်းတို့သည် တစ်နေကုန် ပျာယာခတ်နေကြသည်။ တစ်နေရာရာ၌ ပြဿနာတစ်ခုရှိလျှင် အခွင့်အရေးရသည်နှင့် ပြုပြင်ရမည်။ ပြီးလျှင် လူတစ်ယောက်ယောက်၌ ပြဿနာတစ်ခုခုရှိမရှိကို အစဉ် လိုက်လံမေးမြန်းရမည်။ ဤသို့လုပ်ဆောင်ခြင်းသည် သမ္မာတရားအား လိုက်စားခြင်းဖြစ်သည်ဟု ၎င်းတို့ ထင်ကြသည်။ လက်တွေ့တွင် ဤသရုပ်သကန်များရှိခြင်းက သမ္မာတရားကို ၎င်းတို့ လိုက်စားသည်ဟု သေချာပေါက် ဆိုလိုသလော။ ဤသည်မှာ ၎င်းတို့၌ အသက်ဝင်ရောက်မှုရှိသည်ဟု သေချာပေါက် ဆိုလိုသလော။ ဤသည်မှာ အငြင်းပွားဖွယ် ကိစ္စဖြစ်နေဆဲ ဖြစ်သည်။ ဤသည်မှာ ဝိညာဉ်ရေးရာ နားလည်သဘောပေါက်မှုရှိသော်လည်း သမ္မာတရားကို မလိုက်စားသည့်လူတို့၏ ပထမသရုပ်သကန် ဖြစ်သည်။

ဝိညာဉ်ရေးရာ နားလည်သဘောပေါက်မှုရှိသော်လည်း သမ္မာတရားကို မလိုက်စားသည့်လူများ၏ ဒုတိယသရုပ်သကန်မှာ ဘုရားနှုတ်ကပတ်တော်များကို နားလည်နိုင်ခြင်း၊ ဘုရားနှုတ်ကပတ်တော်ကပြောသည့်အရာ၏ လက်တွေ့ကျသောအပိုင်းကို နားလည်နိုင်ခြင်း၊ မိမိကိုယ်ကို ထိုနှုတ်ကပတ်တော်များနှင့် နှိုင်းယှဉ်ချိန်ဆချက်များ ချမှတ်နိုင်ခြင်း၊ သို့သော်လည်း မည်သည့်အခါမျှ လက်တွေ့မလုပ်ဆောင်ခြင်းတို့ ဖြစ်သည်။ ဤလူစားမျိုးသည် အမှုအရာများကို ဘုရားနှုတ်ကပတ်တော်အတိုင်းဖြစ်စေ၊ သမ္မာတရားစည်းမျဉ်းများအတိုင်းဖြစ်စေ မလုပ်ဆောင်သကဲ့သို့ မိမိတို့ကိုယ်ကို ချုပ်တည်းခြင်းမျိုးလည်း မရှိပေ။ တစ်စုံတစ်ခု ဖြစ်ပျက်သောအခါ ၎င်းတို့က လူတို့အား ၎င်းတို့ကို ကျိုးနွံနာခံပြီး နားထောင်စေရန်သာ လုပ်ဆောင်လိုသည်။ သို့သော် ၎င်းတို့ကိုယ်၌က သမ္မာတရားကို ကျိုးနွံနာခံလိုခြင်း မရှိပေ။ ၎င်းတို့က သမ္မာတရားအား လက်တွေ့လုပ်ဆောင်ခြင်းနှင့် သမ္မာတရားအား ကျိုးနွံနာခံခြင်းကို အခြားလူတို့၏ တာဝန်၊ ဝတ္တရား၊ အလုပ်အဖြစ်လည်းကောင်း၊ အခြားလူများ လုပ်ဆောင်သင့်သည့် အရာတစ်ခုအဖြစ်လည်းကောင်း မှတ်ယူကြသည်။ ၎င်းတို့သည် ခွဲခြားထားသကဲ့သို့ မိမိတို့ကိုယ်ကို မှတ်ယူကြသည်။ ၎င်းတို့ မည်မျှနားလည်သည်ဖြစ်စေ၊ ဘုရားနှုတ်ကပတ်တော်မည်မျှကို မိမိတို့ကိုယ်ကိုဖြင့် ဆက်စပ်နိုင်သည်ဖြစ်စေ ဘုရားသခင်ပြောသမျှတိုင်းက အခြားလူများကို ဦးတည်ပြီး ၎င်းတို့ကိုယ်တိုင်ဖြင့် လုံးဝ သက်ဆိုင်ခြင်းမရှိဟု ထင်ကြသည်။ ဤသို့ဆိုလျှင် မည်သည့်အရာကို ၎င်းတို့ လုပ်ဆောင်သနည်း။ ၎င်းတို့သည် အလွန်လည်း အလုပ်ရှုပ်သည်။ အသင်းတော်ဆီသို့သွားပြီး ၎င်းတို့နှင့်ပတ်သက်၍ မည်သူက ဝေဖန်မှုရှိသည်ဆိုသည်ကို ကြည့်ကာ မှတ်သားထားသည်။ ထို့နောက်တွင် ယင်းကို “ပြုပြင်”ရန် နည်းလမ်းများကို ဦးနှောက်ခြောက်ခံ စဉ်းစားသည်။ ၎င်းတို့က “ကျွန်ုပ်တို့သည် ဖွင့်ပြောပြီး မိတ်သဟာယပြုကြစို့။ သင့်စိတ်အတွင်းတွင် မည်သို့တွေးသည်ဖြစ်စေ၊ ကျွန်ုပ်နှင့်ပတ်သက်ပြီး သင့်၌ မည်သည့်ထင်မြင်ချက် ရှိသည်ဖြစ်စေ၊ ကျွန်ုပ်နှင့်ပတ်သက်ပြီး သင့်၌ မည်သည့်ဝေဖန်ချက် ရှိသည်ဖြစ်စေ ကျွန်ုပ်ကို အသိပေးပါ၊ ပြီးလျှင် ပြောင်းလဲရန်၊ အမှုအရာများကို ပြောင်းလဲလုပ်ဆောင်ရန် ကျွန်ုပ် အစွမ်းရှိသမျှ လုပ်ဆောင်ပါမည်” ဟု ပြောကြသည်။ ပြောင်းလဲရာတွင် ၎င်းတို့၏ ပန်းတိုင်မှာ အဘယ်နည်း။ အခြားလူများကို ၎င်းတို့အား နှစ်သက်စေရန် လုပ်ဆောင်ဖို့ ဖြစ်သည်။ ဤအရာအပြင် ၎င်းတို့သည် ၎င်းတို့နှင့်ပတ်သက်ပြီး မည်သူက ဝေန်ဖန်မှုရှိသည်၊ မည်သူက ၎င်းတို့ကို ကျိုးနွံနာခံခြင်း မရှိသည်ကို ကြည့်ပြီး ဤအရာကို “ပြုပြင်”ရန် သက်ဆိုင်မှုရှိသော ဘုရားနှုတ်ကပတ်တော်အပိုဒ်များကို ရှာသည်။ ၎င်းတို့က “ဘုရားအိမ်တော်က ခေါင်းဆောင်များနှင့် အမှုဆောင်များကို ရွေးကောက်သောအခါ၌ ဘုရားသခင်က အရှင်သခင်ဖြစ်သည်။ ဘုရားအိမ်တော်တွင် သမ္မာတရားက ဩဇာအာဏာဖြစ်သည်။ ညီအစ်ကိုမောင်နှမများက မည်သူ့ကို ခေါင်းဆောင်အဖြစ် တင်မြှောက်သည်ဖြစ်စေ ဤသည်မှာ ဘုရားသခင်က ဆန္ဒရှိခဲ့သောအရာ ဖြစ်ပြီး သင်တို့ ကျိုးနွံနာခံသင့်သည်။ သင်သည် ကျွန်ုပ်အား ကျိုးနွံနာခံနေခြင်း မဟုတ်ဘဲ သန့်ရှင်းသောဝိညာဉ်တော်၏ လမ်းပြမှုကို၊ သမ္မာတရားကို ကျိုးနွံနာခံနေခြင်း ဖြစ်သည်။ သင်သည် ကျိုးနွံနာခံခြင်း မရှိပါက အပြစ်ဒဏ်ပေးခြင်းခံရလိမ့်မည်” ဟု ဆိုကြသည်။ လူအချို့သည် နားထောင်ပြီးနောက်တွင် ခေါင်းဆောင်က ဘုရားနှုတ်ကပတ်တော်အား အနက်အဓိပ္ပာယ်ကောက်လွဲနေသည်၊ လူတို့အား အထင်အမြင်မှားစေရန်အတွက် အချက်အလက်များကို မလိမ့်တပတ်လုပ်သည်ဆိုသည်ကို သိပြီး နားမထောင်ကြပေ။ ခေါင်းဆောင်က ဤလူတို့သည် သူ့အပေါ် အတော်အတန်ပင် ကျိုးနွံနာခံခြင်းမရှိသည်ကို မြင်သောအခါ “သင်သည် ငါ့ကိုကျိုးနွံနာခံရန် ငြင်းဆန်သည် မဟုတ်လော။ သင့်ကို ကိုင်တွယ်ဖြေရှင်းရန် ငါ့တွင် အခြားနည်းများရှိသည်။ ငါသည် ကြမ်းကြမ်းတမ်းတမ်း ကိုင်တွယ်တော့မည်ဖြစ်သည်” ဟု တွေးသည်။ ခေါင်းဆောင်က သူ့အား ကျိုးနွံနာခံခြင်း မရှိသောလူတို့ကို “ကျွန်ုပ် သင့်အားပေးခဲ့သော အလုပ် ပြီးပြီလော” ဟု ပြောသည်။ လူတို့က “မပြီးခင်တွင် အနည်းငယ်သာ လုပ်ဆောင်ဖို့ ကျန်သည်။ မည်သည့်နှောင့်နှေးမှုမျှ ဖြစ်မည်မဟုတ်” ဟု ပြောသည်။ ခေါင်းဆောင်က “အနည်းငယ်ကျန်ခြင်းက အဘယ်သို့ နှောင့်နှေးခြင်း မဟုတ်သနည်း။ ဘုရားသခင်၏ အမြင်တွင် အနည်းငယ်က များစွာဖြစ်သည်။ ဤသည်မှာ သစ္စာမဲ့ခြင်း၏ သရုပ်သကန်ဖြစ်သည်။ ဤအရာကို သင်၏တာဝန်ကို ထမ်းဆောင်ခြင်းဟု ခေါ်ဆိုသလော” ဟု ပြောသည်။ အမှန်တကယ်တွင် ဤသည်မှာ ခေါင်းဆောင်က အမှန်တကယ် ပြောလိုသောအရာ ဖြစ်သလော။ သူ၏ စိတ်နှလုံးတွင် မည်သည့်ရည်မှန်းချက်ရှိသနည်း။ ၎င်းတို့သည် အခြားလူတို့ကို ကျိုးနွံနာခံစေရန် အတင်းလုပ်ဆောင်လိုသည်။ လူတို့ကို အနိုင်ယူလိုသည်။ လူတို့အား မာန်စွယ်ချိုးလိုသည်။ သို့သော် ၎င်းတို့သည် ဤသို့တိကျပြတ်သားစွာ မပြောနိုင်ပေ။ ပြောလျှင် ညီအစ်ကိုမောင်နှမတို့က ၎င်းတို့အကြောင်း ပိုင်းခြားသိမြင်ပြီး ၎င်းတို့ကို ဖော်ထုတ်လိမ့်မည်။ ထို့ကြောင့် ၎င်းတို့သည် အမှုအရာများအား လုပ်ဆောင်ခြင်းအတွက် ဖြောင့်မှန်သော အကြောင်းပြချက်နှင့် ဆင်ခြေကို ရှာရသည်။ ၎င်းတို့သည် လူတို့အား “လေးစားဖွယ်ဖြစ်ပြီး ကျိုးကြောင်းသင့်သော” ပုံစံဖြင့် ဖိနှိပ်ရမည်ဖြစ်သည်။ သို့မှသာ ၎င်းတို့က လူတို့ကို ဖိနှိပ်ပြီးနောက်တွင် အခြားလူတို့အတွက် မသိသာပေ။ ပစ်မှတ်ထားထားသောလူတို့အား နာခံစေသည်။ ပြီးလျှင် ခေါင်းဆောင်၏ ပန်းတိုင်ဖြစ်သည့် ၎င်းတို့၏ အဆင့်အတန်းကို အားကောင်းစေခြင်းနှင့် ခိုင်မာစေခြင်းကို ရရှိသည်။ ဤသည်မှာ မည်သည့်စိတ်သဘောထားဖြစ်သနည်း။ (၎င်းတို့သည် မသိမသာ အန္တရာယ်ပေးတတ်ပြီး အကြံသမားဖြစ်သည်။) ၎င်းတို့သည် မသိမသာ အန္တရာယ်ပေးတတ်သည်၊ အကြံသမားဖြစ်သည်၊ အဆိပ်ရှိသည်၊ ပြီးလျှင် အဆင့်အတန်းရဖို့အတွက် အမှုအရာများကို လုပ်ဆောင်သည်။ ၎င်းတို့၏ အဆင့်အတန်းနှင့် မသက်ဆိုင်သောအရာများကို အရေးမစိုက်။ ယင်းတို့အပေါ် လုံးဝ စိတ်မနှစ်ပေ။ သို့သော် ၎င်းတို့၏ ကျော်ကြားမှု၊ အကျိုးအမြတ်၊ အဆင့်အတန်း၊ ဂုဏ်သိက္ခာနှင့် အသင်းတော်ရှိ ၎င်းတို့၏ ရာထူးကို ထိခိုက်သောအရာများနှင့်ပတ်သက်သောအခါ၌ ၎င်းတို့သည် ဤအရာများကို တွယ်ကပ်နေပြီး လက်မလွှတ်ဘဲ စတင်၍ အလေးအနက်ထားလာသည်။ ၎င်းတို့၏ ပုံမှန်စုဝေးပွဲများ၌ သမ္မာတရားကို မိတ်သဟာယဖွဲ့သောအခါ ၎င်းတို့သည် တစ်ခါတစ်ရံတွင် မိမိတို့ကိုယ်ကို သိမြင်လိမ့်မည်။ ဘုရားနှုတ်ကပတ်တော်နှင့် မိမိတို့ကိုယ်ကိုအကြား နှိုင်းယှဉ်ချိန်ဆချက်များ ချမှတ်လိမ့်မည်။ ၎င်းတို့၏ ကိုယ်ပိုင် ဖောက်ပြန်ပျက်စီးသော စိတ်သဘောထားကို ဖော်ထုတ်လိမ့်မည်။ သို့သော် ယင်းနောက်ကွယ်တွင် ရည်မှန်းချက်တစ်ခု၊ ရည်ရွယ်ချက်တစ်ခုရှိသည်။ ယင်းတို့အားလုံးမှာ အခြားလူများအား ၎င်းတို့အပေါ် အထင်ကြီးလေးစားရန်၊ အားကျရန်၊ ကြောက်ရွံ့ရန်နှင့် ၎င်းတို့အဆင့်အတန်းကို ခိုင်မာစေရန် လုပ်ဆောင်ဖို့ ဖြစ်သည်။ ၎င်းတို့တွင် ရည်မှန်းချက်များနှင့် ရည်ရွယ်ချက်တစ်ခုရှိသည်။ ၎င်းတို့၏ အဆင့်အတန်းအတွက်မဟုတ်လျှင် ၎င်းတို့က စကားတစ်ခွန်းမှမဟပေ။ ၎င်းတို့၏ အဆင့်အတန်းကို လုံခြုံစိတ်ချစေရန်အတွက် မဟုတ်လျှင် ၎င်းတို့က မည်သည့်အရာကိုမျှ မလုပ်ဆောင်ပေ။ ၎င်းတို့ လုပ်ဆောင်သမျှတိုင်းက ၎င်းတို့၏ အဆင့်အတန်းအတွက် ဖြစ်သည်။ ၎င်းတို့၏ အဆင့်အတန်းအတွက် အလွန်အပင်ပန်းခံလိမ့်မည်။ သို့သော် အသင်းတော်၏အလုပ်အတွက်ဆိုလျှင် ပြဿနာများကို ၎င်းတို့ ရှာတွေ့သောအခါ ၎င်းတို့က ဖြေရှင်းမည်မဟုတ်။ အခြားလူများက ပြဿနာများကို တိုင်ကြားသောအခါ ၎င်းတို့က ကိုင်တွယ်မည်မဟုတ်။ ပြီးလျှင် မည်သည့်အရာကိုမျှ အာရုံစိုက်ရန် အပင်ပန်းခံမည်မဟုတ်ပေ။ အခြားလူများက မိမိတို့၏တာဝန်များကို ထမ်းဆောင်လျက် အလုပ်ရှုပ်နေသည်ကို ၎င်းတို့ မြင်သော်လည်း မည်သည့်အရာကိုမျှ မလုပ်ဆောင်ပေ။ ဤသည်မှာ မည်သည့်လူစားမျိုး ဖြစ်သနည်း။ (ကျော်ကြားမှု၊ အကျိုးအမြတ်နှင့် အဆင့်အတန်းအတွက် အသက်ရှင်သော ဆိုးယုတ်သော၊ ယုတ်မာသောသူတစ်ဦး ဖြစ်သည်။) အဆင့်အတန်းအတွက်သာ အသက်ရှင်သောသူသည် သမ္မာတရားကို လိုက်စားသောသူ ဖြစ်သလော။ သမ္မာတရားကို လိုက်စားနိုင်စွမ်းရှိသလော။ (မရှိပါ။) ဤသည်မှာ ပြောဖို့ခက်သည်။ ၎င်းတို့သည် အသိတရားကို သတိပြုမိခြင်း အနည်းငယ်ရှိလျှင်၊ ရှက်စိတ်ရှိလျှင်၊ သိက္ခာနှင့် ကိုယ်ကျင့်သိက္ခာရှိလျှင်၊ ပြစ်တင်ဆုံးမမှုနှင့် တရားစီရင်မှုတစ်ခုခုကို တွေ့ကြုံပြီးနောက်၊ ပြုပြင်ခံရခြင်း၊ သို့မဟုတ် စမ်းသပ်ခြင်းနှင့် စစ်ဆေးခြင်းခံရခြင်းကို တွေ့ကြုံပြီးနောက် သမ္မာတရားကို လက်ခံနိုင်လျှင် ၎င်းတို့သည် အမှုအရာများကို ပြောင်းလဲပစ်ဖို့ ဖြစ်နိုင်ချေရှိသည်။ သို့ရာတွင် ၎င်းတို့သည် ထုံထိုင်းလျှင်၊ တုံးအလျှင်၊ စိတ်နှလုံးခိုင်မာလျှင်၊ သမ္မာတရားကို လုံးဝ လက်မခံလျှင် မည်မျှနားလည်သည်ဖြစ်စေ တစ်ခုခုအသုံးဝင်သလော။ (အသုံးမဝင်ပါ။) ၎င်းတို့ မည်မျှနားလည်သည်ဖြစ်စေ ၎င်းတို့၏ စိတ်နှလုံးကို တို့ထိနိုင်မည်မဟုတ်။ အပြင်ပန်းတွင် ၎င်းတို့သည် မည်မျှ အလုပ်ရှုပ်သည့်ပုံရှိပါစေ၊ လမ်းများတွင် အပြေးအလွှားသွားလျက် မည်မျှပင် အချိန်ကုန်ဆုံးပါစေ၊ မည်မျှ အနစ်နာခံ၊ စွန့်လွှတ်ပြီး အသုံးခံပါစေ ဂုဏ်အဆင့်အတန်းအတွက်သာ အစဉ်ပြောဆို ပြုမူသောလူစားမျိုးကို သမ္မာတရားကို လိုက်စားသူအဖြစ် မှတ်ယူနိုင်သလော။ လုံးဝ မမှတ်ယူနိုင်ပေ။ ဂုဏ်အဆင့်အတန်းအတွက် ၎င်းတို့သည် မည်သည့်အဖိုးအခကိုမဆို ပေးဆပ်လိမ့်မည်။ ဂုဏ်အဆင့်အတန်းအတွက် မည်သည့်ဆင်းရဲဒုက္ခကိုမဆို ခံကြလိမ့်မည်။ ဂုဏ်အဆင့်အတန်းအတွက် မည်သည့်အကြောင်းကြောင့်မှ ရပ်တန့်မည်မဟုတ်။ ၎င်းတို့သည် အခြားသူများ၏ အမှားကိုရှာဖို့၊ အကွက်ဆင်ဖို့၊ သို့မဟုတ် အခက်အခဲဖြစ်အောင် လုပ်ဖို့ကြိုးစားပြီး အခြားလူများအား ကြမ်းကြမ်းတမ်းတမ်း ဖိနှိပ်နင်းခြေပစ်သည်။ ၎င်းတို့သည် အပြစ်ပေးခံရခြင်း၊ ဒဏ်ခတ်ခံရခြင်း အန္တရာယ်ကိုပင် မကြောက်ရွံ့ကြပေ။ ၎င်းတို့သည် အကျိုးဆက်များကို တွေးတောခြင်း တစ်ခုတစ်လေမျှ မရှိဘဲ ဂုဏ်အဆင့်အတန်းအတွက် လုပ်ဆောင်ကြသည်။ ဤသို့သော လူတို့သည် မည်သည့်အရာကို လိုက်စားသနည်း။ (ဂုဏ်အဆင့်အတန်းကို လိုက်စားသည်။) ပေါလုနှင့် မည်သည့်နေရာတွင် ဆင်တူသနည်း။ (ဆုသရဖူကို လိုက်စားခြင်းတွင် ဖြစ်သည်။) ၎င်းတို့သည် ဖြောင့်မတ်ခြင်းသရဖူနောက်ကို လိုက်ကြသည်။ ဂုဏ်အဆင့်အတန်း၊ ကျော်ကြားမှုနှင့် အကျိုးအမြတ်ကို လိုက်စားကြသည်။ သမ္မာတရားကို လိုက်စားခြင်းထက် ဂုဏ်အဆင့်အတန်း၊ ကျော်ကြားမှုနှင့် အကျိုးအမြတ်ကို လိုက်စားခြင်းအား သဘာဝကျသော လိုက်စားမှုအဖြစ် မှတ်ယူကြသည်။ ထိုသို့သောလူတို့၏ အထင်ရှားဆုံး စရိုက်လက္ခဏာမှာ အဘယ်နည်း။ ယင်းမှာ ကဏ္ဍအားလုံးတွင် ၎င်းတို့သည် ဂုဏ်အဆင့်အတန်း၊ ကျော်ကြားမှုနှင့် အကျိုးအမြတ်အတွက် လုပ်ဆောင်ကြခြင်းဖြစ်သည်။ ကျော်ကြားမှု၊ အကျိုးအမြတ်နှင့် အဆင့်အတန်းအတွက် အမှုအရာများကို လုပ်ဆောင်သော ဤလူစားမျိုးသည် အခြားလူများကို အထင်အမြင်မှားစေခြင်း၌ အကျွမ်းကျင်ဆုံးဖြစ်သည်။ ၎င်းတို့ကို သင်ပထမဆုံးတွေ့သောအခါ ၎င်းတို့အကြောင်းကို သင်ပိုင်းခြားသိမြင်နိုင်ခြင်း မရှိပေ။ ၎င်းတို့ပြောသည့် အယူဝါဒက ကောင်းသည့်ပုံစံရှိသည်ကိုလည်းကောင်း၊ ၎င်းတို့ပြောသည့်အရာက လက်တွေ့ကျသည်ဟု ထင်ရသည်ကိုလည်းကောင်း၊ ၎င်းတို့ စီစဉ်သည့်အလုပ်က အလွန်သင့်တော်သည်ကိုလည်း သင်မြင်ရသည်။ ပြီးလျှင် ၎င်းတို့၌ အစွမ်းအစတစ်ခုခု ရှိသည့်ပုံစံရှိပြီး သင်က ၎င်းတို့ကို အလွန်ပင် လေးစားသည်။ ဤလူစားမျိုးသည် သူ၏တာဝန်ကို ထမ်းဆောင်သောအခါ အဖိုးအခပေးဆပ်လိုစိတ်လည်း ရှိသည်။ ၎င်းတို့သည် နေ့စဉ်အလုပ်ကြိုးစားပြီး ပင်ပန်းခြင်းနှင့်ပတ်သက်၍ မည်သည့်အခါမျှ မညည်းညူပေ။ ၎င်းတို့၌ နုနယ်ခြင်း တစ်စက်မျှပင် မရှိ။ အခြားလူများက အားနည်းသောအခါ ၎င်းတို့က အားမနည်းပေ။ ၎င်းတို့သည် ဇာတိကပတိ၏ သက်သာမှုများကိုလည်း မတပ်မက်ဘဲ အစားကြေးများသူများ မဟုတ်ပေ။ ၎င်းတို့၏ ဧည့်ခံမိသားစုက ၎င်းတို့အတွက် အထူးတလည်ဖြစ်သောအရာတစ်ခုကို ပြင်ဆင်ပေးသောအခါ ၎င်းတို့က ငြင်းဆန်ပြီး မစားပေ။ နေ့စဉ် အစားအစာများကိုသာ စားသည်။ ဤသို့သောလူကို မြင်တွေ့သူမည်သူမဆိုက ၎င်းတို့ကို လေးစားသည်။ ဤသို့ဆိုလျှင် ၎င်းတို့သည် အဆင့်အတန်းအတွက် အမှုအရာများအား လုပ်ဆောင်ခြင်းရှိမရှိကို မည်သို့ ပိုင်းခြားသိမြင်နိုင်သနည်း။ ပထမဦးစွာ ၎င်းတို့သည် သမ္မာတရားလိုက်စားသူဟုတ်မဟုတ် ကြည့်ရမည်။ ဤသည်မှာ မည်သည့်နေရာတွင် ပေါ်လွင်မည်နည်း။ (အမှုအရာများကို လုပ်ဆောင်သောအခါ၌ ၎င်းတို့၏ ရည်ရွယ်ချက်နှင့် စမှတ်တွင် ဖြစ်သည်။) ဤသည်မှာ တစ်စိတ်တစ်ပိုင်း ဖြစ်သည်။ ယင်းသည် ၎င်းတို့ လိုက်စားသည့် ပန်းတိုင်တွင် အဓိက ပေါ်လွင်လိမ့်မည်။ သမ္မာတရားအား လိုက်စားခြင်းအတွက် ဖြစ်လျှင် ၎င်းတို့သည် ဘုရားနှုတ်ကပတ်တော်ကို မကြာခဏဖတ်ခြင်း၊ ဘုရားနှုတ်ကပတ်တော်မှတစ်ဆင့် သမ္မာတရားအား နားလည်ခြင်းနှင့် မိမိတို့ကိုယ်ကို သိမြင်ခြင်းအား အရေးစိုက်ရမည်။ ၎င်းတို့သည် မိမိတို့ကိုယ်ကို သိကျွမ်းခြင်းအပေါ် မကြာခဏ မိတ်သဟာယဖွဲ့လျှင် ၎င်းတို့၌ များစွာချို့တဲ့သည်ကိုလည်းကောင်း၊ သမ္မာတရား မရှိသည်ကိုလည်းကောင်း ၎င်းတို့ မြင်နိုင်လိမ့်မည်ဖြစ်ပြီး သမ္မာတရားကို လိုက်စားဖို့ အလိုအလျောက် ကြိုးပမ်းလိမ့်မည်။ လူတို့သည် မိမိတို့ကိုယ်ကို သိလေလေ၊ သမ္မာတရားကို လိုက်စားနိုင်လေလေ ဖြစ်သည်။ အဆင့်အတန်းအတွက် အစဉ်ပြောဆိုပြီး အမှုအရာများကို လုပ်ဆောင်သောသူများသည် သိသာစွာပင် သမ္မာတရားကို လိုက်စားသူများမဟုတ်။ ၎င်းတို့သည် ပြုပြင်ခြင်းခံရသောအခါ ယင်းကို လက်မခံပေ။ ၎င်းတို့သည် ၎င်းတို့၏ ဂုဏ်သတင်းထိခိုက်မည်ကို အလွန်ကြောက်သည်။ ဤသို့ဆိုလျှင် ၎င်းတို့သည် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်း နှုတ်ကပတ်တော်များကို လက်ခံပြီး မိမိတို့ကိုယ်ကို ဆင်ခြင်သုံးသပ်နိုင်သလော။ ၎င်းတို့၏ ကိုယ်ပိုင်အတွေ့အကြုံ၌ လမ်းလွဲမှုများကို အမှန်တကယ် နားလည်နိုင်သလော။ ၎င်းတို့၌ ဤသရုပ်သကန်တစ်ခုမျှမရှိလျှင် ၎င်းတို့သည် သမ္မာတရားအား လိုက်စားသူ မဟုတ်ဆိုသည်ကို သေချာနိုင်သည်။ ငါ့ကိုပြောလော့။ သမ္မာတရားအား မချစ်သော၊ အဆင့်အတန်းကို လိုက်စားသောလူတို့တွင် အခြားမည်သည့် သရုပ်သကန်များရှိသနည်း။ (အခြားလူများက ၎င်းတို့ကို ဝေဖန်ချက်ပေးသောအခါ ၎င်းတို့က လက်ခံရမည့်အစား ခုခံကာကွယ်သည်။ မိမိတို့ကိုယ်ကို မှန်ကန်ကြောင်းပြသည်။ ပြီးလျှင် အကြောင်းပြချက်များ ပေးသည်။ ၎င်းတို့၏ ဂုဏ်သိက္ခာကို ထိန်းသိမ်းရန်နှင့် ၎င်းတို့၏ အဆင့်အတန်းကို ထိန်းသိမ်းထားရန်အတွက် ပြောဆိုကြသည်။ လူတစ်ယောက်က ၎င်းတို့ကို မပံ့ပိုးလျှင် ၎င်းတို့က ထိုသူကို တိုက်ခိုက်ပြီး ဝေဖန်အကဲဖြတ်သည်။) လူတို့က အခြားလူများကို တိုက်ခိုက်ပြီး ဝေဖန်အကဲဖြတ်သောအခါ၊ ပြီးလျှင် မိမိတို့၏ ကိုယ်ပိုင်ဂုဏ်သိက္ခာနှင့် အဆင့်အတန်းအတွက် ပြောဆိုပြီး မိမိတို့ကိုယ်ကို ခုခံကာကွယ်သောအခါ ၎င်းတို့လုပ်ရပ်များနောက်ကွယ်ရှိ ရည်ရွယ်ချက်နှင့် ပန်းတိုင်သည် သိသာစွာပင် မှားယွင်းသည်။ ပြီးလျှင် ၎င်းတို့သည် အဆင့်အတန်းအတွက် အလုံးစုံ အသက်ရှင်နေခြင်းဖြစ်သည်။ အဆင့်အတန်းအတွက် အရာရာကို ပြောဆိုပြီး လုပ်ဆောင်သောလူအမျိုးအစားသည် ဘုရားသခင်၏ ရည်ရွယ်ချက်များအတွက် အလေးထားမှုရှိသလော။ သမ္မာတရားကို လက်ခံနိုင်သလော။ လုံးဝ လက်မခံနိုင်ပေ။ ၎င်းတို့သည် ဘုရားသခင်၏ ရည်ရွယ်ချက်များအတွက် အလေးထားမှု ရှိလျှင် သမ္မာတရားကို လက်တွေ့လုပ်ဆောင်ရမည်ဟုလည်းကောင်း၊ သမ္မာတရားကို ၎င်းတို့ လက်တွေ့လုပ်ဆောင်လျှင် ဒုက္ခခံပြီး အဖိုးအခပေးဆပ်ရမည်ဟုလည်းကောင်း ၎င်းတို့က ထင်ကြသည်။ ထို့နောက်တွင် ၎င်းတို့သည် အဆင့်အတန်းဖြင့်ပါလာသော ပျော်ရွှင်မှုကို ဆုံးရှုံးရမည်။ ပြီးလျှင် အဆင့်အတန်း၏ အကျိုးအမြတ်များကို ခံစားနိုင်မည်မဟုတ်။ ထို့ကြောင့် ကျော်ကြားမှု၊ အကျိုးအမြတ်နှင့် အဆင့်အတန်းကိုသာ လိုက်စားဖို့၊ ဆုလာဘ်များရရှိခြင်းကို လိုက်စားဖို့ကို ရွေးချယ်ကြသည်။ အဆင့်အတန်းကို လိုက်စားသောသူတို့သည် အခြားမည်သည့်နည်းများဖြင့် မိမိတို့ကိုယ်ကို ပေါ်လွင်စေကြသနည်း။ အခြားမည်သည့်အရာများကို ၎င်းတို့ လုပ်ဆောင်သနည်း။ (၎င်းတို့အနီးတွင် သမ္မာတရားကို ပို၍လိုက်စားတတ်သော၊ ပျိုးထောင်ပေးဖို့ ထိုက်တန်သော၊ ညီအစ်ကိုမောင်နှမများက ပံ့ပိုးပေးရန် ပို၍ဆန္ဒရှိသော ပါရမီရှိသည့် ပုဂ္ဂိုလ်အချို့ကို ၎င်းတို့မြင်လျှင် ဤလူတို့သည် ထကြွပြီး ၎င်းတို့နေရာအား ဝင်ယူမည်ကိုလည်းကောင်း၊ ၎င်းတို့၏ အဆင့်အတန်းအား ခြိမ်းခြောက်မည်ကိုလည်းကောင်း ကြောက်ရွံ့သောကြောင့် ၎င်းတို့သည် ဤပါရမီရှိသော ပုဂ္ဂိုလ်များကို ဖိနှိပ်ဖို့ နည်းလမ်းများကို စဉ်းစားကြသည်။ ပြီးလျှင် ထိုသူတို့အား နှိပ်ကွပ်ရန်အတွက် အကြောင်းပြချက်နှင့် ဆင်ခြေမျိုးစုံတို့ကို ရှာကြသည်။ အတွေ့ရအများဆုံးနည်းလမ်းမှာ ၎င်းတို့ကို အလွန်အကျွံမာနထောင်လွှားသည်၊ မိမိကိုယ်ကို မှန်ကန်သည်ဟု ယူမှတ်သည်ဟုလည်းကောင်း၊ အခြားလူများကို အစဉ် ဘောင်ခတ်နေသည်ဟုလည်းကောင်း သတ်မှတ်ပြီး ဤသည်တို့မှာ မှန်သည်ဟု လူတို့အား ယုံကြည်စေရန် လုပ်ဆောင်ကာ ဘုရားအိမ်တော်အား ဤပုဂ္ဂိုလ်များကို ရာထူးတိုးမြှင့်ခွင့်၊ သို့မဟုတ် ပျိုးထောင်ခွင့်မပေးခြင်း ဖြစ်သည်။) ဤသည်မှာ အတွေ့ရအများဆုံး သရုပ်သကန်ဖြစ်သည်။ သင်တို့ ဖြည့်စွက်ချင်သော အရာတစ်ခုခုရှိသလော။ (၎င်းတို့သည် အစဉ်မိမိတို့ကိုယ်ကို သက်သေခံလိုပြီး ကြွားဝါလိုကြသည်။ ၎င်းတို့ကိုယ်တိုင်နှင့် ပတ်သက်ပြီး အံ့ဩဖွယ်ကောင်းသောအရာတစ်ခုခုကို အစဉ်ပြောဆိုကြသည်။ ၎င်းတို့၏ အကျည်းတန်သောအပိုင်းကို မည်သည့်အခါမျှ မပြောပေ။ မကောင်းသောအရာတစ်ခုကို ၎င်းတို့ ပြုလုပ်လျှင် ၎င်းတို့သည် ပြန်လည်သုံးသပ်ခြင်းမရှိ၊ သို့မဟုတ် ၎င်းတို့လုပ်ရပ်များကို စိစစ်ခြင်းမရှိ။) ၎င်းတို့သည် မည်သို့ဒုက္ခခံပြီး အဖိုးအခပေးဆပ်သည်၊ ဘုရားသခင်က ၎င်းတို့ကို မည်သို့လမ်းပြသည်ဆိုသည်ကို အစဉ်ပြောဆိုပြီး ၎င်းတို့လုပ်ဆောင်ပြီးသည့်အလုပ်ကို ပြသည်။ ဤသည်မှာ အဆင့်အတန်းကို ကာကွယ်ပြီး ခိုင်မာစေခြင်းက ပေါ်လွင်စေသည့်ပုံစံ၏ တစ်စိတ်တစ်ပိုင်းလည်း ဖြစ်သည်။ အဆင့်အတန်းကို လိုက်စားပြီး အဆင့်အတန်းအတွက် အမှုအရာများကို လုပ်ဆောင်သောသူများ၌ အခြားသော အဓိကအကျဆုံး လက္ခဏာတစ်ခုရှိသည်။ ယင်းမှာ မည်သည့်အရာ ဖြစ်ပျက်ပါစေ ၎င်းတို့၌ အဆုံးအဖြတ်ပေးပိုင်ခွင့်ရှိရမည် ဖြစ်သည်။ ၎င်းတို့သည် အဆုံးအဖြတ်ပေးပိုင်ခွင့် ရှိလိုသောကြောင့် အဆင့်အတန်းကို လိုက်စားခြင်း ဖြစ်သည်။ ၎င်းတို့က အမိန့်ပေးသည့်သူ ဖြစ်လိုသည်။ ပြီးလျှင် ဩဇာအာဏာရှိသည့် တစ်ဦးတည်းသောသူ ဖြစ်လိုသည်။ အခြေအနေက မည်သို့ဖြစ်စေ လူတိုင်းက ၎င်းတို့ကို နားထောင်ရမည်။ မည်သူက ပြဿနာရှိသည်ဖြစ်စေ ရှာဖွေပြီး လမ်းညွှန်ချက်ကို မေးမြန်းဖို့အတွက် ၎င်းတို့ထံ လာရမည်။ ၎င်းတို့ ခံစားလိုသည့်အရာမှာ ဤအဆင့်အတန်း၏ အကျိုးအမြတ်များ ဖြစ်သည်။ အခြေအနေက မည်သို့ဖြစ်စေ ၎င်းတို့သည် အဆုံးအဖြတ်ပေးပိုင်ခွင့်ရှိရမည်။ ၎င်းတို့ပြောသည့်အရာက မှန်သည်ဖြစ်စေ၊ မှားသည်ဖြစ်စေ မှားလျှင်ပင် ၎င်းတို့သည် အဆုံးအဖြတ်ပေးပိုင်ခွင့် ရှိရမည်ဖြစ်ဆဲ ဖြစ်ပြီး အခြားလူများကို ၎င်းတို့အား နားထောင်ပြီး နာခံစေရန် လုပ်ဆောင်ရမည်။ ဤသည်မှာ ဆိုးရွားသော ပြဿနာတစ်ခု ဖြစ်သည်။ အခြေအနေက မည်သို့ဖြစ်စေ ၎င်းတို့သည် အဆုံးအဖြတ်ပေးပိုင်ခွင့်ရှိရမည်။ ၎င်းတို့နားလည်သည့် အခြေအနေဟုတ်သည်ဖြစ်စေ၊ မဟုတ်သည်ဖြစ်စေ ၎င်းတို့သည် ဝင်ပါရမည်ဖြစ်ပြီး အဆုံးအဖြတ်ပေးပိုင်ခွင့်ရှိရမည်။ ခေါင်းဆောင်များနှင့် အမှုဆောင်များက မည်သည့်ပြဿနာကို မိတ်သဟာယဖွဲ့နေသည်ဖြစ်စေ ၎င်းတို့က ဆုံးဖြတ်ချက်ချရမည်။ အခြားလူများအနေဖြင့် စကားပြောဆိုရန် အခွင့်အလမ်းမရှိ။ မည်သည့်ဖြေရှင်းချက်ကို ၎င်းတို့ အကြံပြုသည်ဖြစ်စေ လူတိုင်းကို ၎င်းတို့က လက်ခံအောင် လုပ်ဆောင်ရမည်။ ပြီးလျှင် အခြားလူများက လက်မခံလျှင် ၎င်းတို့သည် စိတ်ဆိုးပြီး ထိုသူတို့ကို ပြုပြင်သည်။ တစ်စုံတစ်ယောက်က ဝေဖန်မှုများ၊ သို့မဟုတ် ထင်မြင်ချက်များရှိလျှင် ယင်းက မှန်ကန်ပြီး သမ္မာတရားနှင့်ပင်ညီလျှင် ၎င်းတို့သည် ယင်းကို ကန့်ကွက်ရန် နည်းလမ်းမျိုးစုံကို စဉ်းစားရသည်။ ၎င်းတို့သည် တစ်ပတ်ရိုက်ရာတွင် အထူးပင်ကျွမ်းကျင်သည်။ အခြားလူကို ချောမွေ့သောစကားလုံးများဖြင့် အယုံသွင်းလိမ့်မည်။ အဆုံးတွင် ထိုသူတို့အား ၎င်းတို့နည်းလမ်းအတိုင်း လုပ်ဆောင်စေရန် ပြုလုပ်လိမ့်မည်။ ၎င်းတို့သည် အရာရာတိုင်း၌ အဆုံးအဖြတ်ပေးပိုင်ခွင့်ရှိရမည်ဖြစ်သည်။ ၎င်းတို့သည် ၎င်းတို့၏ တွဲဖက်အမှုဆောင်များ၊ သို့မဟုတ် တွဲဖက်လုပ်ကိုင်သူများနှင့် မည်သည့်အခါမျှ ဆွေးနွေးညှိနှိုင်းခြင်းမပြုလုပ်ပေ။ ၎င်းတို့သည် ဒီမိုကရေစီဝါဒခံယူသောသူ မဟုတ်ပေ။ ဤသည်မှာ ၎င်းတို့သည် အလွန့်အလွန် မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်‌ကြောင်း၊ သမ္မာတရားကို လုံးဝ လက်မခံနိုင်သကဲ့သို့ သမ္မာတရားကို လုံးဝ ကျိုးနွံနာခံနိုင်ခြင်း မရှိကြောင်းကို သက်သေပြဖို့ လုံလောက်သည်။ ကြီးမားသော တစ်စုံတစ်ခု ဖြစ်ပျက်လျှင်၊ သို့မဟုတ် အရေးပါသောအရာတစ်ခု ဖြစ်ပျက်လျှင် လူတိုင်းအား အကဲဖြတ်စေပြီး ၎င်းတို့၏ ထင်မြင်ချက်ကို ထုတ်ဖော်ပြောခွင့်ပြုနိုင်လျှင်၊ အဆုံး၌ လူအများစု၏ ထင်မြင်ချက်အတိုင်း လက်တွေ့လုပ်ဆောင်မှုနည်းလမ်းတစ်ခုအပေါ် အခြေချနိုင်လျှင်၊ ယင်းသည် ဘုရားအိမ်တော်၏ အလုပ်ကို ထိခိုက်မည်မဟုတ်ဆိုသည်ကို သေချာစေနိုင်လျှင်၊ ယင်းသည် အလုပ်ကို ‌ယေဘုယျအားဖြင့် အကျိုးရှိစေမည်ဆိုသည်ကို သေချာစေနိုင်လျှင်၊ ဤသည်မှာ သူ၏ သဘောထားဖြစ်လျှင် သူသည် ဘုရားအိမ်တော်၏ အလုပ်ကို ကာကွယ်သောသူနှင့် သမ္မာတရားကို လက်ခံနိုင်သောသူ ဖြစ်သည်။ အဘယ်ကြောင့်ဆိုသော် အမှုအရာများကို ဤပုံစံအတိုင်း လုပ်ဆောင်ခြင်းနောက်ကွယ်တွင် စည်းမျဉ်းများရှိသောကြောင့် ဖြစ်သည်။ သို့ရာတွင် အဆင့်အတန်းကို လိုက်စားသောသူတို့က အမှုအရာများအား ဤသို့ လုပ်ဆောင်မည်လော။ (လုပ်ဆောင်မည်မဟုတ်ပါ။) ၎င်းတို့သည် အမှုအရာများကို မည်သို့ လုပ်ဆောင်မည်နည်း။ တစ်စုံတစ်ခု ဖြစ်ပျက်လျှင် အခြားလူများ၌ မည်သည့်အကြံရှိသည်ကို ၎င်းတို့ ဂရုစိုက်မည်မဟုတ်။ လူတို့က မိမိတို့၏ အကြံကို မမျှဝေမီ ကြာမြင့်သောအချိန်ကတည်းက ၎င်းတို့သည် စိတ်ထဲတွင် ဖြေရှင်းချက်၊ သို့မဟုတ် ဆုံးဖြတ်ချက်ရှိနှင့်ပြီး ဖြစ်လိမ့်မည်။ ၎င်းတို့၏ စိတ်နှလုံးထဲတွင် ယင်းသည် ၎င်းတို့လုပ်ဆောင်မည့်အရာ ဖြစ်သည်ဟု ဆုံးဖြတ်နှင့်ပြီး ဖြစ်မည်။ ဤအဆင့်တွင် လူတို့က မည်သည့်အရာကို ပြောသည်ဖြစ်စေ ၎င်းတို့က အရေးစိုက်မည်မဟုတ်ပေ။ လူတစ်ယောက်က ၎င်းတို့ကို အပြစ်ဖော်ဆုံးမခဲ့လျှင်ပင် ၎င်းတို့က လုံးဝ ဂရုစိုက်မည်မဟုတ်။ အသင်းတော်အလုပ်ကို အကျိုးရှိစေသည်ဖြစ်စေ၊ ညီအစ်ကိုမောင်နှမများက လက်ခံနိုင်သည်ဖြစ်စေ ၎င်းတို့သည် သမ္မာတရားစည်းမျဉ်းများကို အလေးထားခြင်းမရှိပေ။ ဤအရာများသည် ၎င်းတို့ အလေးထားသည့် နယ်ပယ်အတွင်းတွင်မရှိ။ မည်သည့်အရာကို ၎င်းတို့ အလေးထားသနည်း။ ၎င်းတို့သ အဆုံးအဖြတ်ပေးပိုင်ခွင့်ရှိရမည်။ ဤအမှုကိစ္စတွင် ၎င်းတို့သည် အဆုံးအဖြတ်ပေးသူ ဖြစ်လိုသည်။ ဤအမှုကိစ္စကို ၎င်းတို့၏ နည်းအတိုင်း လုပ်ဆောင်ရမည်။ ဤအမှုကိစ္စသည် ၎င်းတို့၏ အဆင့်အတန်းအတွက် အကျိုးဖြစ်၊ မဖြစ်ကို ကြည့်ရှုရမည်။ ဤသည်မှာ အမှုအရာများကို ၎င်းတို့ ရှုမြင်သည့် ရှုထောင့်ဖြစ်သည်။ ဤသည်မှာ သမ္မာတရားကို လိုက်စားသူတစ်ဦး ဟုတ်သလော။ (မဟုတ်ပါ။) သမ္မာတရားကို မလိုက်စားသူများက အမှုအရာများကို လုပ်ဆောင်သောအခါ ၎င်းတို့၏ ကိုယ်ပိုင်အဆင့်အတန်း၊ ကျော်ကြားမှုနှင့် အကျိုးအမြတ်ကို အစဉ် အလေးထားသည်။ ၎င်းတို့အား မည်သို့ အကျိုးဖြစ်စေသည်ကို အစဉ် အလေးထားသည်။ ဤသည်မှာ အမှုအရာများကို လုပ်ဆောင်ရာ၌ ၎င်းတို့၏ စမှတ်ဖြစ်သည်။

လူအချို့သည် ဝိညာဉ်ရေးရာ နားလည်သဘောပေါက်မှု ရှိသော်လည်း သမ္မာတရားကို မလိုက်စားကြပေ။ အမှန်ပင် ဤသို့သောလူအချို့ရှိသည်။ ၎င်းတို့၏ အဓိကသရုပ်သကန်များနှင့်ပတ်သက်လျှင် ပထမအမျိုးအစားမှာ အမှုအရာများကို လုပ်ဆောင်ဖို့သက်သက်အတွက် လုပ်ဆောင်နေခြင်း ဖြစ်သည်။ ၎င်းတို့သည် အလုပ်လုပ်ရသည်ကို နှစ်သက်ပြီး အငြိမ်မနေနိုင်ပေ။ ၎င်းတို့သည် တစ်စုံတစ်ခုကို လုပ်ဆောင်လျက် အလုပ်ရှုပ်နေသရွေ့ ပျော်ရွှင်သည်။ ပြီးမြောက်အောင်မြင်သည်ဟူသည့် ခံစားချက်ရှိသည်။ စစ်မှန်သည်ဟု ခံစားရသည်။ ဒုတိယ သရုပ်သကန်အမျိုးအစားမှာ အဆင့်အတန်းအတွက် အမှုအရာများကို လုပ်ဆောင်ခြင်း ဖြစ်သည်။ ဤလူအမျိုးအစားသည် အထူးပင်ပြင်းထန်သော ရည်မှန်းချက်များနှင့် လိုအင်ဆန္ဒများရှိသည်။ ၎င်းတို့သည် အစဉ်သဖြင့် လူတို့ကို ထိန်းချုပ်လိုပြီး သိမ်းသွင်းစည်းရုံးလိုသည်။ အစဉ်သဖြင့် ဘုရားသခင်ကို အစားထိုးရန် ဆန္ဒရှိသည်။ ဘုရားသခင်ကို အစားထိုးရန် ဆန္ဒရှိခြင်းက ပေါလု၏ မည်သည့်လိုက်စားမှုများနှင့် ဆက်နွှယ်သနည်း။ (ခရစ်တော်ဖြစ်ရန် သူ၏ လိုက်စားမှု ဖြစ်ပါသည်။) အဆင့်အတန်းကို လိုက်စားရာတွင် ၎င်းတို့၏ ရည်ရွယ်ချက်သည် မြင့်မြတ်သောသူဖြစ်ရန်၊ အခြားလူများက ကြည်ညိုလေးစားသည့် အဆင့်အတန်းရှိသူတစ်ဦးဖြစ်ရန်သက်သက် မဟုတ်ပေ။ ၎င်းတို့၏ အဆုံးစွန်ပန်းတိုင်မှာ လူတို့ကို သိမ်းသွင်းစည်းရုံးနိုင်ပြီး ထိန်းချုပ်နိုင်ရန်၊ ၎င်းတို့ကို အခြားလူများက ကြည်ညိုလေးစားပြီး ဘုရားကဲ့သို့ ဆက်ဆံအောင် ပြုလုပ်ရန်နှင့် လူတိုင်းအား ၎င်းတို့နောက်သို့လိုက်စေရန်၊ ၎င်းတို့ကို ကျိုးနွံနာခံစေပြီး ယုံကြည်စေရန် ဖြစ်သည်။ ဤအရာအားလုံးက မည်သည့်အရာကို သွယ်ဝိုက်ညွှန်းဆိုသနည်း။ လူတို့၏ စိတ်နှလုံးတွင် ၎င်းတို့သည် ဘုရားဖြစ်လာမည်ဆိုသည်ကို ညွှန်းဆိုသည်။ ဤသည်မှာ သမ္မာတရားကို လိုက်စားခြင်းမဟုတ်ဘဲ စာတန်ကို လိုက်စားခြင်း ဖြစ်သည်။ အဆင့်အတန်းကို လိုက်စားခြင်းသည် သိသာစွာပင် သမ္မာတရားကို လိုက်စားခြင်းမဟုတ်။ ပြီးလျှင် အလုပ်၊ သို့မဟုတ် ဂုဏ်သတင်းကို လိုက်စားခြင်းသည်လည်း သမ္မာတရားအား လိုက်စားခြင်းမဟုတ်။ အခြားမည်သည့် သရုပ်သကန်များရှိသနည်း။ (ကောင်းချီးများကို ၎င်းတို့ လိုက်စားသည်။) မှန်သည်။ ၎င်းတို့သည် အဖိုးအခပေးဆပ်သည်။ မိမိတို့ကိုယ်ကို အသုံးခံသည်။ ဒုက္ခခံသည်။ အမှုကိစ္စအားလုံး၌ ၎င်းတို့၏ ကိုယ်ကျိုးကို စွန့်ပစ်နိုင်သည်။ သို့သော် ၎င်းတို့သည် ကောင်းချီးရရန် ဤသို့ လုပ်ဆောင်ခြင်း ဖြစ်သည်။ ၎င်းတို့သည် ကောင်းချီးခံစားရရန်နှင့် ကောင်းသော ခရီးပန်းတိုင်ရှိရန်အတွက်သာ ဤသို့ မိမိတို့ကိုယ်ကို ပြသခြင်းဖြစ်သည်။ ဤသည်မှာလည်း သမ္မာတရားအား လိုက်စားခြင်းမဟုတ်။ ဤသည်မှာ ဝိညာဉ်ရေးရာ နားလည်သဘောပေါက်မှုရှိသော်လည်း သမ္မာတရားကို မလိုက်စားသောသူတို့က မိမိတို့ကိုယ်ကို ပေါ်လွင်စေသည့် တတိယနည်းလမ်းဖြစ်သည်။ ၎င်းတို့သည် ပေါလုကဲ့သို့ပင် ကောင်းချီးရရန်အတွက်၊ ၎င်းတို့၏ ခရီးပန်းတိုင်အတွက် အမှုအရာများကို လုပ်ဆောင်ပြီး ဒုက္ခခံကာ လုံးဝ အပြည့်အဝအနစ်နာခံသည်။ အမှုအရာများကို လုပ်ဆောင်ရာ၌ ၎င်းတို့၏ ရည်ရွယ်ချက်သည် ရှင်းလင်းသည်။ ကောင်းချီးများရရှိရန်အတွက် အရေးကြီးဆုံးနှင့် မရှိမဖြစ်အလိုအပ်ဆုံးက မည်သည့်အရာဖြစ်စေ ယင်းက ၎င်းတို့ သီးသန့်အာရုံစိုက်ပြီး လုပ်ဆောင်သောအရာ ဖြစ်သည်။ ညီအစ်ကိုမောင်နှမများ၏ အသိအမှတ်ပြုမှုနှင့် ပံ့ပိုးမှုကို ၎င်းတို့ ရရှိသရွေ့ အဆင်ပြေသည်။ လူတိုင်းက ၎င်းတို့ကို မည်သို့မြင်သည်၊ အထက်က ၎င်းတို့ကို မည်သို့မြင်သည်၊ ဘုရားသခင်၏ စိတ်နှလုံးထဲတွင် ၎င်းတို့ရှိမရှိတို့ကိုသာ အာရုံစိုက်သည်။ ၎င်းတို့သည် ကောင်းချီးခံစားရပြီး ဆုလာဘ်ရရှိမည်ဆိုသည်မှာ သေချာသရွေ့ အဆင်ပြေသည်။ သို့ရာတွင် ၎င်းတို့လုပ်ဆောင်သည့်အရာကို အကဲဖြတ်ရန်အတွက် သမ္မာတရားကို မည်သည့်အခါမျှ အသုံးမပြုကြသကဲ့သို့ ကောင်းချီးခံစားရလိုသည့် ဆန္ဒကို မည်သည့်အခါမျှ လက်မလျှော့ကြပေ။ ဘုရားသခင်၏ စီစဉ်ညွှန်ကြားမှုများနှင့် အစီအစဉ်များကို ကျိုးနွံနာခံခြင်း မရှိကြပေ။ ၎င်းတို့က တစ်စုံတစ်ခုကို ညံ့ဖျင်းစွာလုပ်ဆောင်ပြီး ပြုပြင်ခြင်းခံရလျှင်၊ အထက်က ၎င်းတို့အပေါ် ကျေနပ်ခြင်းမရှိလျှင်၊ ကောင်းချီးခံစားရရန် မျှော်လင့်ချက်မရှိသည်ကိုဖြစ်စေ၊ ကောင်းမွန်သော ခရီးပန်းတိုင်အား ရရှိဖို့ မျှော်လင့်ချက်မရှိကောင်း မရှိနိုင်သည်ကိုဖြစ်စေ ၎င်းတို့ မြင်လျှင် ၎င်းတို့သည် အပျက်သဘောဆောင်ပြီး ၎င်းတို့၏ တာဝန်ကို နောက်ထပ် လုပ်ဆောင်လိုစိတ်မရှိတော့ဘဲ စွန့်လွှတ်လိမ့်မည်။ မယုံကြည်လိုခြင်းသက်သက်ဖြစ်သောသူအချို့ပင်ရှိသည်။ ဘုရားသခင်ကို ယုံကြည်ခြင်းက အကျိုးမရှိဟု ၎င်းတို့က ထင်ကြသည်။ အထက်တွင်ရှိသော လိုက်စားမှုနည်းလမ်းသုံးခုမှာ သမ္မာတရားကို မလိုက်စားသူများ လိုက်လျှောက်သည့် လမ်းကြောင်းများ ဖြစ်သည်။ အသင်းတော်တိုင်းတွင် အသင့်အတင့်များပြားသော ဤသို့သောလူအမျိုးအစားများ ရှိသည်။ ပြီးလျှင် ၎င်းတို့အားလုံးမှာ သမ္မာတရားကို မချစ်သောသူများဖြစ်သည်။ မည်သည့်တာဝန်ကို ၎င်းတို့ ထမ်းဆောင်သည်ဖြစ်စေ ၎င်းတို့၏ ကိုယ်ကျိုးဖြင့်၊ ကောင်းချီးများရရှိခြင်းဖြင့်၊ ဆုလာဘ်များ ချီးမြှင့်ခံရခြင်းဖြင့် အစဉ် ဆက်စပ်ပြီး ၎င်းတို့၏ အသက်ဝင်ရောက်မှု၊ သမ္မာတရားအား နားလည်ခြင်း၊ သို့မဟုတ် ၎င်းတို့၏ စိတ်သဘောထား ပြောင်းလဲခြင်းတို့ဖြင့် လုံးဝ မဆက်စပ်ပေ။ ဘုရားသခင်ကို ၎င်းတို့ ယုံကြည်ခဲ့သည်မှာ နှစ်မည်မျှကြာသည်ဖြစ်စေ၊ တာဝန်များကို ထမ်းဆောင်ခဲ့သည်မှာ နှစ်မည်မျှကြာသည်ဖြစ်စေ မိမိကိုယ်ကို သိမြင်မှုကို လုံးဝ မလိုက်စားခဲ့ပေ။ အသက်ဝင်ရောက်မှုကို လုံးဝ မလိုက်စားခဲ့သကဲ့သို့ ဘုရားသခင်အား ချစ်ခြင်း၊ သို့မဟုတ် ဘုရားသခင်အား ကျိုးနွံနာခံခြင်းကို လုံးဝ မလိုက်စားခဲ့ပေ။ ၎င်းတို့က မည်သည့်အရာကို လုပ်ဆောင်နေသည်ဖြစ်စေ သမ္မာတရားကို မရှာဖွေပေ။ မည်သည့်ဖောက်ပြန်ပျက်စီးမှုကို ထုတ်ဖော်ပြသည်ဖြစ်စေ ယင်းနှင့် ဘုရားနှုတ်ကပတ်တော်ရှိ သမ္မာတရားကြား ချိတ်ဆက်မှုများ မပြုလုပ်ပေ။ မည်သည့်အရာကို ၎င်းတို့ လုပ်ဆောင်သည်ဖြစ်စေ ၎င်းတို့၏ ရည်ရွယ်ချက်များက တစ်ကိုယ်ကောင်းဆန်ပြီး ဆိုးယုတ်သည်။ အားလုံးမှာ ကောင်းချီးများနှင့် တစ်ကိုယ်ရေအကျိုးမြတ်ကို ရယူခြင်းအတွက် ရည်ရွယ်ထားသည်။ ၎င်းတို့သည် မည်သို့ပြုပြင်ခြင်းခံရသည်ဖြစ်စေ မိမိတို့ကိုယ်ကို ပြန်လည်သုံးသပ်ခြင်း မပြုဘဲ ၎င်းတို့က မှန်ကန်သည်ဟု ဆက်လက်၍ ထင်မြင်သည်။ ဤလူစားမျိုးသည် အပျက်သဘောဆောင်ခြင်းသိပ်မရှိ။ ကောင်းချီးခံရပြီး နိုင်ငံတော်သို့ ဝင်ရောက်ရမည်ဆိုလျှင် မည်သည့်ဒုက္ခပမာဏကိုမျှ မကြောက်ရွံ့ပေ။ ၎င်းတို့သည် အမှန်ပင် ဇွဲရှိသည်။ သို့သော်လည်း သမ္မာတရားကို လက်ခံရန် ၎င်းတို့အနေဖြင့် အလွန်ခက်ခဲသည်။ ၎င်းတို့သည် မိမိကိုယ်ကို ဆင်ခြင်သုံးသပ်ပြီး မိမိကိုယ်ကိုအကြောင်း သိမြင်မှုရဖို့ထက် သေရခြင်းကို ပို၍နှစ်သက်ပြီး ၎င်းတို့က အလွန်ပင်ကောင်းစွာ လုပ်ဆောင်နေသည်ဟု ထင်ကြသည်။ ဝိညာဉ်ရေးရာ နားလည်သဘောပေါက်မှု ရှိသော်လည်း သမ္မာတရားအား မလိုက်စားသောသူတို့တွင် အခြားသရုပ်သကန်တစ်ခုရှိသည်။ လူအချို့မှာ တရားဒေသနာများစွာကို နားထောင်ပြီးဖြစ်သော်လည်း ဘုရားသခင်ဖော်ပြသည့် သမ္မာတရားများကို၊ သို့မဟုတ် လူတို့၏ အခြေအနေအမျိုးမျိုးအား ဖော်ထုတ်သည့် ဘုရားနှုတ်ကပတ်တော်များကို စိတ်မဝင်စားကြပေ။ ဤအရာများကို ၎င်းတို့ နားလည်လျှင်ပင် စိတ်မဝင်စားကြပေ။ ဤသို့ဆိုလျှင် ၎င်းတို့က စိတ်မဝင်စားလျှင် အဘယ်ကြောင့် ဘုရားသခင်ကို ယုံကြည်ဆဲ ဖြစ်သနည်း။ ၎င်းတို့စိတ်နှလုံးတွင် မရေရာသော၊ လက်တွေ့မကျသော အတွေးမျိုး အသေအချာပင်ရှိသည်။ ၎င်းတို့က “ကမ္ဘာပေါ်တွင်ရှိသော ဘုရားသခင်က မည်သည့်အရာအား လုပ်ဆောင်နိုင်စွမ်းရှိသည်ကို ငါမသိ။ ငါမပြောနိုင်ပါ။ သူသည် အဓိကအားဖြင့် သမ္မာတရားကို မိတ်သဟာဖွဲ့နိုင်သည့် ပုံစံရှိသည်။ ဤသမ္မာတရားဆိုသည့်အရာများကို ငါ သိပ်နားမလည်ပါ။ သို့သော် မည်သို့ပင်ဖြစ်စေ သူပြောသည့်အရာများက အလွန်ကောင်းသည်။ ပြီးလျှင် လူတို့အား လမ်းမှန်ကို လိုက်လျှောက်စေသည်။ သို့ရာတွင် သူသည် အမှန်တကယ်ပင် ဘုရားဖြစ်သည်၊ မဖြစ်သည်ကို ငါမပြောနိုင်” ဟု ဆိုကြသည်။ ၎င်းတို့သည် ဘုရားသခင်ကို အလွန်သံသယဝင်ကြသဖြင့် အဘယ်ကြောင့် ထွက်ခွာခြင်းမရှိဘဲ ဘုရားအိမ်တော်၌ နေကြသနည်း။ အဘယ်ကြောင့်ဆိုသော် ၎င်းတို့၏ စိတ်နှလုံးတွင် မရေရာသော အမြင်နှင့် စိတ်ကူးယဉ်တစ်ခုရှိသောကြောင့် ဖြစ်သည်။ ၎င်းတို့က “ငါသည် ဤနေရာတွင် ဆက်လက်၍ အချိန်ဖြုန်းလျှင် အဆုံး၌ သေခြင်းမှ လွတ်မြောက်ကောင်း လွတ်မြောက်နိုင်သည်။ နောက်ဆုံးတွင် ကောင်းကင်ဘုံသို့ ဝင်ရောက်ပြီး ကြီးမားသောကောင်းချီးများကို ရကောင်းရနိုင်သည်” ဟု တွေးကြသည်။ ထို့ကြောင့် အခြားလူများက စိတ်သဘောထားပြောင်းလဲမှုကို လိုက်စားပြီး ပြုပြင်ခြင်းကို လက်ခံစဉ်တွင် ၎င်းတို့က ထိုနေရာ၌ ကောင်းကင်ဘုံရှိ ဘုရားသခင်ကို ဆုတောင်းကာ “အို ဘုရားသခင်၊ ဤအခက်အခဲများတစ်လျှောက် ကျွန်ုပ်ကို ဦးဆောင်ပါ။ ပြုပြင်ခံရခြင်းအား ကျွန်ုပ်ကို လက်ခံနိုင်စေတော်မူပါ။ ကိုယ်တော်၏ စီစဉ်ညွှန်ကြားမှုများနှင့် အစီအစဉ်များကို ကျွန်ုပ် ကျိုးနွံနာခံလိုစိတ်ရှိပါသည်” ဟု ပြောကြသည်။ ၎င်းတို့ဆုတောင်းသည့် စကားများက မမှားသည်ကို သင်ကြားရသည်။ သို့သော် ၎င်းတို့သည် ဖောက်ပြန်ပျက်စီးသော စိတ်သဘောထားရှိသည်၊ သို့မဟုတ် မှားယွင်းသည်ဆိုသည်ကို မည်သည့်အခါမျှ ဝန်မခံပေ။ ၎င်းတို့၏ စိတ်နှလုံးတွင် ကောင်းကင်ဘုံရှိ ဘုရားသခင်ကိုသာ ၎င်းတို့ အသိအမှတ်ပြုသည်။ ကမ္ဘာမြေပေါ်ရှိ ဘုရားသခင်ဖြစ်သည့် လူ့ဇာတိခံဘုရားသခင်နှင့် ဘုရားသခင်၏ တရားစီရင်ခြင်း နှုတ်ကပတ်တော်များကိုမူ လုံးဝ အရေးမစိုက်ပေ။ ဤအရာများက ၎င်းတို့နှင့် လုံးဝ မသက်ဆိုင်သကဲ့သို့ ဖြစ်သည်။ ဤသည်မှာ ဘုရားသခင်အပေါ် ၎င်းတို့၏ ယုံကြည်မှုက ရိုးရှင်းပြီး အနှစ်မဲ့ပုံဖြစ်သည်။ အခြားလူများက လူသားများ၏ ဖောက်ပြန်ပျက်စီးသော စိတ်သဘောထားနှင့် စိတ်သဘောထားပြောင်းလဲမှုကို လိုက်စားရန် လိုအပ်ခြင်းကို မည်သို့ပြောသည်ဖြစ်စေ ၎င်းတို့က “သင်တို့အားလုံးက အလွန်ဖောက်ပြန်ပျက်စီးပြီး ငါက မပျက်စီးသည်မှာ အဘယ်သို့ဖြစ်သနည်း” ဟူ၍ မိမိဘာသာ တွေးတောကောက်ချက်ချသည်။ ၎င်းတို့သည် ပြည့်စုံမှုရှိပြီး အပြစ်အနာအဆာမရှိ၊ ဖောက်ပြန်ပျက်စီးသော စိတ်သဘောထားမရှိဟု ထင်ကြသည်။ တစ်ခါတစ်ရံတွင် ၎င်းတို့သည် အခြားလူများအပေါ် မလိုမုန်းထားသည်၊ သို့မဟုတ် အထင်သေးသည်။ သို့သော် ၎င်းတို့က ဤအရာကို မကောင်းသောအတွေးတစ်ခုသာဖြစ်ပြီး ချုပ်ထိန်းလိုက်လျှင် ပျောက်သွားလိမ့်မည်ဟု ထင်မြင်လျက် ပုံမန်ဖြစ်သည်ဟု သတ်မှတ်ကြသည်။ သို့မဟုတ် အခြားလူများက ဘုရားသခင်အား ပုန်ကန်သည်ကို ၎င်းတို့ မြင်သောအခါ ၎င်းတို့က “ငါသည် ဘုရားသခင်ကို မည်သည့်အခါမျှ မပုန်ကန်ခဲ့။ ငါ၏ စိတ်နှလုံးတွင် ဘုရားအတွက် ငါ့၌ရှိသောချစ်ခြင်းသည် မည်သည့်အခါမျှ ယိမ်းယိုင်ခြင်းမရှိ” ဟု တွေးသည်။ ၎င်းတို့သည် ဤဝါကျအနည်းငယ်ကိုသာပြောပြီး မိမိတို့ကိုယ်ကို ပြန်လည်သုံးသပ်မကြည့်ပေ၊ သို့မဟုတ် စည်းမျဉ်းများနှင့်အညီ မည်သို့လုပ်ဆောင်ရမည်ကို မသိပေ။ ဤသို့သောလူတို့သည် သမ္မာတရားကို လိုက်စားသူများ ဟုတ်သလော။ (မဟုတ်ပါ။) ဤသို့ဆိုလျှင် အဘယ်ကြောင့် ၎င်းတို့သည် မိမိတို့ကိုယ်ကို အလွန်အကောင်းမြင်ဆဲဖြစ်ပြီး ဘုရားသခင်အား ဤသို့ယုံကြည်ခြင်းသည် မဆိုးပေဟု ထင်သနည်း။ ဤတွင် မည်သည့်အရာ ဖြစ်နေသနည်း။ ဤသည်မှာ သမ္မာတရားအား ၎င်းတို့မချစ်ဆိုသည်ကို ပြသည်။ လူတို့၏ အယူအဆများအရ ၎င်းတို့မှာ မည်သည့်လူအမျိုးအစား ဖြစ်သနည်း။ ၎င်းတို့သည် မိမိတို့ကိုယ်ကို မည်သည့်ပုံစံများဖြင့် ပြသသနည်း။ ၎င်းတို့သည် စကားပြောကောင်းသည်၊ လိမ္မာပါးနပ်သည်၊ သင်လွယ်တတ်လွယ်သည်၊ အမှုအရာများကို နားလည်ရန် ခိုင်မာသော အရည်အချင်းရှိသည်။ သင်၏ ပါးစပ်မှ စကားများထွက်လာသည်နှင့် တစ်ပြိုင်နက် သင်ပြောနေသည့်အရာကို ၎င်းတို့ နားလည်သည်။ ပြီးလျှင် အထူးသဖြင့် အယူဝါဒကို လျင်မြန်စွာ နားလည်သည်။ သို့ရာတွင် မည်သည့်အရာကို ၎င်းတို့ နားလည်သည်ဖြစ်စေ ကောင်းချီးများရရှိရန် ၎င်းတို့၏ ဦးတည်ချက်နှင့် ချိန်ရွယ်ချက်သည် မပြောင်းမလဲဘဲ ကျန်ရှိနေသည်။ ထို့အပြင် ၎င်းတို့နားလည်သည့် သမ္မာတရားများကို ဓမ္မပညာဆိုင်ရာ သဘောတရားများအဖြစ်၊ သို့မဟုတ် မူဝါဒ၊ သို့မဟုတ် သွန်သင်မှုအမျိုးအစားဖြစ် မှတ်ယူကြသည်။ ယင်းတို့သည် သမ္မာတရားဖြစ်သည်ဟု ၎င်းတို့ မထင်ကြပေ။ ထို့ကြောင့် ယင်းတို့ကို ၎င်းတို့၏ ဘဝ၌ အသုံးချဖို့ မဆိုထားနှင့်၊ လက်တွေ့မလုပ်ဆောင်ပေ၊ သို့မဟုတ် မတွေ့ကြုံပေ။ ၎င်းတို့သည် တစ်စုံတစ်ခုကို ၎င်းတို့ ရရှိပြီးဖြစ်သည်ဟု ထင်မြင်လျက် ၎င်းတို့နှစ်သက်ကာ ၎င်းတို့၏ အယူအဆများ၊ စိတ်ကူးများနှင့်ကိုက်ညီသော အယူဝါဒများကိုသာ လက်ခံပြီး ဟောပြောသည်။ အယူဝါဒများကို ဟောပြောနိုင်ပြီး လူများစွာအား အထင်ကြီးအောင်လုပ်နိုင်ခြင်းသည် ဘုရားသခင်ကို ယုံကြည်ခြင်းမှ ၎င်းတို့ ရရှိသည့် အကြီးဆုံးသောအရာ ဖြစ်သည်။ ၎င်းတို့သည် သမ္မာတရားကို လက်တွေ့လုပ်ဆောင်ခြင်း ရှိမရှိ၊ သို့မဟုတ် မိမိကိုယ်ကို သိမြင်မှုရှိမရှိနှင့် ပတ်သက်လျှင် ဤအရာတို့သည် သိပ်အရေးမကြီးသည့် အသေးအဖွဲကိစ္စများ ဖြစ်သည်ဟုလည်းကောင်း၊ ဝိညာဉ်ရေးရာ အယူဝါဒများကို ဟောပြောနိုင်ခြင်း၊ မေးခွန်းများကို ဖြေနိုင်ခြင်း၊ ၎င်းတို့အား လူများလေးစားအောင် လုပ်ဆောင်နိုင်ခြင်းတို့သည် အရေးပါဆုံးဖြစ်ပြီး အဆင့်အတန်း၏ အကျိုးအမြတ်များကို ၎င်းတို့ ခံစားရန် ၎င်းတို့ကို အရည်အချင်းပြည့်မီစေသောအရာဖြစ်သည်ဟုလည်းကောင်း ထင်ကြသည်။ ထို့ကြောင့် သမ္မာတရားအား လက်တွေ့လုပ်ဆောင်ခြင်းကို ၎င်းတို့ အရေးမစိုက်ကြပေ။ မိမိတို့ကိုယ်ကို ပြန်လည်သုံးသပ်ခြင်းမရှိပေ။ ပြီးလျှင် အဆင့်မြင့်သော တရားဒေသနာများကို ဟောကြားနိုင်ခြင်းဖြင့်သာ ကျေနပ်ကြသည်။ ဤပြဿနာသည် အတော်အတန် ဆိုးရွားသည်။ ဝိညာဉ်ရေးရာ နားလည်သဘောပေါက်မှု မရှိသောသူများ၌ရှိသည့် အရာထက်ပင် ပို၍ ဆိုးရွားသည်။ အဘယ်ကြောင့်ဆိုသော် ယင်းသည် သမ္မာတရားဖြစ်သည်ဟု ၎င်းတို့ ရှင်းလင်းစွာ သိသော်လည်း လက်တွေ့မလုပ်ဆောင်သောကြောင့်၊ သို့မဟုတ် မတွေ့ကြုံသောကြောင့် ဖြစ်သည်။ ဤသည်မှာ သမ္မာတရားကို အလွန်အမင်းမနှစ်မြို့သော၊ သမ္မာတရားကို ဆော့ကစားသောသူတစ်ယောက် ဖြစ်သည်။ ဤပြဿနာ၏ သဘာဝမှာ အလွန်မဆိုးရွားသလော။

ယခုတွင် သင်တို့သည် ဝိညာဉ်ရေးရာ နားလည်သဘောပေါက်မှုရှိသော်လည်း သမ္မာတရားအား မလိုက်စားသောသူတို့ကို ပိုင်းခြားသိမြင်နိုင်သည် မဟုတ်လော။ သင်တို့သည် ပုံစံတစ်ခုခုဖြင့် ဤလူစားမျိုးကဲ့သို့ မိမိတို့ကိုယ်ကို ပေါ်လွင်စေသလော။ (ပေါ်လွင်စေပါသည်။ အဓိကအားဖြင့် အဆင့်အတန်းအတွက် ကျွန်ုပ်လုပ်ဆောင်သော အရာများတွင် ဖြစ်သည်။) အဆင့်အတန်းအတွက် အမှုအရာများကို ပြောဆိုခြင်းနှင့် အဆင့်အတန်းအတွက် အမှုအရာများကို လုပ်ဆောင်ခြင်း၊ အရာရာတိုင်းက အဆင့်အတန်းကို ဗဟိုပြုလည်ပတ်နေသည်။ ဤသည်မှာ ဒုက္ခပေးတတ်သည်။ သမ္မာတရားကို ဤသို့ လိုက်စားရန် ဖြစ်နိုင်သလော။ အဆင့်အတန်းအတွက် အမှုအရာများကို လုပ်ဆောင်ခြင်း၏ သရုပ်သကန်များမှာ အဘယ်နည်း။ အဓိကအားဖြင့် ယင်းသည် မိမိကိုယ်တိုင်၏ သိက္ခာ၊ ပုံရိပ်နှင့် ဂုဏ်တို့အပြင် အခြားလူများ၏ စိတ်နှလုံးတွင် ကိုင်စွဲသော အဆင့်အတန်း၊ ၎င်းတို့ကို အထင်ကြီးလေးစားပြီး ကြည်ညိုခြင်းရှိမရှိတို့အား အာရုံစိုက်ခြင်း ပါဝင်သည်။ မည်သည့်အရာကို ၎င်းတို့ လုပ်ဆောင်သည်ဖြစ်စေ ဤသွင်ပြင်လက္ခဏာများကိုသာ ၎င်းတို့ အရေးစိုက်သည်။ မည်သည့်အခါမျှ ဘုရားသခင်ကို မချီးမြှောက်ပေ၊ သို့မဟုတ် သက်သေမခံပေ။ ဥပမာအနေဖြင့် သမ္မာတရားကို မလိုက်စားသူတစ်ဦးက ယုံကြည်သူအသစ်တစ်ယောက်ကို တွေ့သောအခါ သူ၏ စိတ်နှလုံး၌ “သင်သည် နှစ်အနည်းငယ်သာ ဘုရားသခင်ကို ယုံကြည်ပြီးဖြစ်သည်။ မည်သည့်အရာကိုမျှ သင်နားမလည်” ဟု တွေးကာ ထိုသူအား အထင်သေးသည်။ ယုံကြည်သူအသစ်က သမ္မာတရားကို ရှာဖွေလိုလျှင် ၎င်းတို့က ယုံကြည်သူအသစ်၏ အသွင်အပြင်၊ ပြောဆိုသည့် ပုံစံ၊ ထိုသူအား နှစ်သက်ခြင်းရှိမရှိတို့ကို ဦးစွာ စဉ်းစားမည်။ ယုံကြည်သူအသစ်က ညံ့ဖျင်းသော အစွမ်းအစရှိလျှင် သမ္မာတရားကို မိတ်သဟာယဖွဲ့လိုစိတ်ရှိမည်မဟုတ်။ တိုက်တွန်းအားပေးသည့် စကားအနည်းငယ်ကိုသာ ပြောပြီး ထားလိုက်မည်ဖြစ်သည်။ ဤတွင် ပြဿနာမှာ အဘယ်နည်း။ (၎င်းတို့သည် ယုံကြည်သူဖြစ်သည်မှာ နှစ်များစွာကြာပြီး အရင်းအနှီးရှိသည်ဟု ထင်ကြသည်။ ထို့ကြောင့် ၎င်းတို့၏ ဝါရင့်မှုကို အသုံးချကြသည်။) ဤအရင်းအနှီးသည် ၎င်းတို့၏ အဆင့်အတန်းကို အခိုင်အမာပြောဆိုသည့် သရုပ်သကန်ဖြစ်သည်။ အရင်းအနှီးရှိသောကြောင့် ၎င်းတို့သည် မိမိကိုယ်ကို အပ်နှင်းထားသည့် အဆင့်အတန်းတစ်ခုဖြစ်ပြီး အခြားလူများက ပေးအပ်ထားခြင်းမဟုတ်သည့် အဆင့်အတန်းရှိသည့်နေရာမှ ပြောဆိုခွင့်ရှိသည်ဟု ခံစားရသည်။ ဤပုံစံဖြင့် အလုပ်လုပ်ပြီး စကားပြောသော ဤသို့သောလူတို့သည် သမ္မာတရားကို လိုက်စားသူများ ဟုတ်သလော။ (မဟုတ်ပါ။) သင်တို့သည် မိမိတို့ကိုယ်ကို ဤသို့ ပြသသလော။ သင်က “ကျွန်ုပ်သည် ဘုရားသခင်ကို ဆယ်နှစ်ကြာ ယုံကြည်ခဲ့သည်။ နှစ်နှစ်ကြာသာ ယုံကြည်ခဲ့သောသူနှင့် ကျွန်ုပ်အား တွဲဖက်ပေးခြင်းမှာ ကျွန်ုပ်ကို စော်ကားခြင်း မဟုတ်လော။ ကျွန်ုပ်သည် ထိုသူကို စကားပင်မပြောလိုပါ။ စကားတစ်လုံးသည်ပင် ကျွန်ုပ်ကို မောပန်းစေလိမ့်မည်။ သူသည် မည်သည့်အရာကိုမျှ နားမလည်” ဟု ပြောသည်။ ဤသည်မှာ မာနထောင်လွှားသော စိတ်သဘောထား၏ ကြီးစိုးခြင်းခံရခြင်းမှ အရင်းခံသည်။ သင့်၌ အဆင့်အတန်းကို တန်ဖိုးထားသော စိတ်နှလုံးမရှိလျှင်၊ လူတို့အား အတွေ့အကြုံအရ၊ သို့မဟုတ် ဝါအရ အဆင့်မခွဲလျှင်၊ သင့်၌ အရင်းအနှီးရှိသည်ဟု မထင်လျှင် သင်သည် လူတစ်ယောက်အား ဤသို့ ဆက်ဆံမည်လော။ ရှင်းလင်းစွာပင် သင့်အတွင်းတွင် ဖောက်ပြန်ပျက်စီးသော စိတ်သဘောထားရှိသောကြောင့် လူတို့အား သင်ဆက်ဆံသည့် သရုပ်သကန်များသည် အခြားလူတို့အတွက် အကျိုးမရှိပေ။ ဤသည်မှာ သင်၏ ဖောက်ပြန်ပျက်စီးသော စိတ်သဘောထား၊ သင်၏ လိုက်စားမှုများနှင့် သင့်စိတ်နှလုံးအတွင်းပိုင်းထဲတွင် မည်သည့်အရာတည်ရှိသည်ဆိုသည်တို့ကို ဖော်ထုတ်ပြသည်။ အဆင့်အတန်းအတွက် လုပ်ဆောင်ခြင်း၏ အခြားသော သရုပ်သကန်တစ်ခုရှိသည်။ ဥပမာအနေဖြင့် လူအချို့သည် အတတ်ပညာပိုင်းဆိုင်ရာ အသိကို ရရှိပြီးဖြစ်သည်၊ သို့မဟုတ် နယ်ပယ်တစ်ခုခုတွင် ကျွမ်းကျင်သူများ ဖြစ်သည်။ သို့ရာတွင် ဤနယ်ပယ်အကြောင်း ဆွေးနွေးသောအခါ အခြားလူများက ဦးစွာ ပြောဆိုလျှင် ၎င်းတို့က စိတ်မကြည်မလင်ဖြစ်ပြီး “သင်တို့သည် အသိစိတ်မရှိဘဲ အဘယ်သို့ ပြောဆိုနိုင်သနည်း။ ကြီးမြတ်ခြင်းက သင်တို့ရှေ့တည့်တည့်တွင်ရှိနေလျှင် သင်တို့ သိမည်မဟုတ်” ဟု တွေးကြသည်။ ၎င်းတို့က “ကျွန်ုပ်သည် တက္ကသိုလ်တွင် ဤဘာသာရပ်ကို အဓိကဘာသာရပ်အဖြစ် သင်ယူခဲ့ပြီး ကျွန်ုပ်၏ သုတေသနအားလုံးကို ဤပြဿနာများအတွက် ရည်စူးနှစ်မြှုပ်ခဲ့သည်။ ဘွဲ့ရပြီးနောက် ဤနယ်ပယ်တွင် နှစ်အတန်ကြာ အလုပ်လုပ်ခဲ့သည်။ ဘုရားသခင်ကို ယုံကြည်ကတည်းက ဤအသက်မွေးဝမ်းကျောင်းပညာကို ငါ စွန့်လွှတ်ခဲ့သည်မှာ ဆယ်နှစ်ကျော်ပြီ ဖြစ်သည်။ သို့သော် ယင်းနှင့်ပတ်သက်ပြီး အရာရာတိုင်းကို ငါ အလွယ်တကူပင် သတိရနိုင်သည်။ ဤအကြောင်းပြောရခြင်းကို ငါမနှစ်သက်။ ကြွားဝါနေသကဲ့သို့ ဖြစ်သည်” ဟု ဆိုကြသည်။ ဤစကားများကို မည်သို့ထင်သနည်း။ ဤစကားများသည် ဘာသာတရားမရှိသူများ ပညာရှင်များ၏ စကားများသာဖြစ်သည်။ ပြီးလျှင် စာတန်ဆန်သော အတွေးအခေါ်များကို အခြေခံ၍ ပြောခြင်းဖြစ်ကာ ၎င်းတို့အား နှံ့စပ်သည့် ပုံစံဖြစ်စေပြီး လူတိုင်း၏ အသိအမှတ်ပြုခြင်းကို ရရှိစေသည်။ ၎င်းတို့က မကြွားဝါလိုဟု အခိုင်အမာဆိုသော်လည်း ယင်းမှာ အတိအကျပင် ၎င်းတို့လုပ်ဆောင်နေသည့်အရာဖြစ်သည်။ ပို၍ ကျွမ်းကျင်လိမ္မာသော ပုံစံဖြင့်လုပ်ဆောင်နေခြင်းသာ ဖြစ်သည်။ ဤ အသက်မွေးဝမ်းကျောင်းပညာကို ၎င်းတို့လေ့လာခဲ့သည့် နှစ်အရေအတွက်နှင့် ၎င်းတို့ရရှိခဲ့သည့်အရာကဲ့သို့သော ၎င်းတို့တွင်ရှိသည့် အရင်းအနှီးကို ထုတ်ဖော်ပြောပြီး ၎င်းတို့သည် ထိုနယ်ပယ်တွင် ကျွမ်းကျင်သူဖြစ်သည်ဟူသည့် အချက်ကို ပြရန်အတွက် ဤနည်းလမ်းကို အသုံးပြုသည်။ နယ်ပယ်တစ်ခုတွင် ကျွမ်းကျင်သူဖြစ်ခြင်းသည် သင်က ထိုနယ်ပယ်ကို သေချာပေါက်နားလည်သည်ဟု ဆိုလိုသလော။ သင်က ဘုရားအိမ်တော်တွင် အလုပ်လုပ်နေသည့် ကျွမ်းကျင်သူဖြစ်လျှင် ဤသည်မှာ သင်ပြုလုပ်ရမည့် နည်းဖြစ်သလော။ (မဟုတ်ပါ။) ဤသို့ဆိုလျှင် မည်သည့်အရာကို လုပ်ဆောင်သင့်သနည်း။ (သမ္မာတရားကို ရှာဖွေသင့်သည်။ ညီအစ်ကိုမောင်နှမများဖြင့် အတူတကွ ဆွေးနွေးပြီး ရှာဖွေသင့်သည်။) လူတိုင်း အတူတကွ ရှာဖွေသင့်သည်။ သင်က “ကျွန်ုပ်သည် ရိုးသားဖို့ လိုသည်။ ကျွန်ုပ်သည် ဤအသက်မွေးဝမ်းကျောင်းပညာတွင် နှစ်အတန်ကြာ အလုပ်လုပ်ခဲ့ပြီး ယင်းနှင့်ပတ်သက်၍ အနည်းငယ်သိသည်။ သို့သော် ဘုရားအိမ်တော်က ဤအသက်မွေးဝမ်းကျောင်းပညာကို အသုံးပြုပုံနောက်ကွယ်ရှိ စည်းမျဉ်းများကို ကျွန်ုပ်မသိ။ ကျွန်ုပ်တွင်ရှိသော အသိပညာက ဘုရားအိမ်တော်အတွက် အသုံးဝင်သလောဆိုသည်ကို ကျွန်ုပ်မသိပါ။ ဤအရာကို ကျွန်ုပ်တို့ အတူတကွ ဆွေးနွေးနိုင်သည်။ ဤနယ်ပယ်၏ အခြေခံအချက်များကို သင်တို့အား ကျွန်ုပ်အနည်းငယ်ပြောပြမည်” ဟု ဆိုသည်။ ဤသည်မှာ ဆင်ခြင်တုံတရားရှိသော စကားပြောပုံဖြစ်သည်။ ၎င်းတို့သည် ဤအသက်မွေးဝမ်းကျောင်းပညာနှင့်ပတ်သက်၍ ကောင်းစွာတတ်သိနားလည်သော်လည်း နှိမ့်ချပြီး မာနမကြီးပေ။ ဟန်ဆောင်နေခြင်း မဟုတ်ပေ။ အလုပ်ကို အမှန်ပင် ကောင်းစွာလုပ်ဆောင်လိုသည်။ ၎င်းတို့ သင်ယူတတ်မြောက်ခဲ့သောအရာနှင့် ၎င်းတို့သိသည့်အရာတို့ကို လူတိုင်းဖြင့် မျှဝေလိုပြီး မည်သည့်အရာကိုမျှ ထိမ်ချန်မထားပေ။ အခြားလူများက ၎င်းတို့ကို မည်သို့ မြင်သည်ဖြစ်စေ၊ ဆက်ဆံသည်ဖြစ်စေ ၎င်းတို့တာဝန်ကို ကောင်းစွာ ထမ်းဆောင်ရန်အတွက်သက်သက်ဖြင့် ဤအရာကို လုပ်ဆောင်နေခြင်း ဖြစ်သည်။ ၎င်းတို့သည် ဘုရားသခင်အား ကျေနပ်စေရန်အတွက်သက်သက်ဖြင့်၊ သမ္မာတရားကို ရရှိပြီး လူသားပုံသဏ္ဌာန်ဖြင့် အသက်ရှင်နေထိုင်ခြင်းအတွက်သက်သက်ဖြင့် ၎င်းတို့တာဝန်ကို ထမ်းဆောင်နေခြင်း ဖြစ်သည်။ ထို့ကြောင့် ၎င်းတို့၏ တာဝန်ထမ်းဆောင်ခြင်း၏ ကဏ္ဍတိုင်းတွင် ၎င်းတို့သည် ဘုရားအိမ်တော်၏ အကျိုးစီးပွားများကို ထည့်သွင်းစဉ်းစားပြီး ညီအစ်ကိုမောင်နှမများ၏ အသက်ဝင်ရောက်မှုကို အလေးထားသည်။ မည်သည့်အရာကို ၎င်းတို့ လုပ်ဆောင်သည်ဖြစ်စေ လူတိုင်းနှင့် ဦးစွာ မိတ်သဟာယပြုသည်။ ထို့နောက် အများသဘောတူညီချက်တစ်ခု ရရှိရန်အတွက် စုပေါင်းဆွေးနွေးပြီး ညီအစ်ကိုမောင်နှမများအား စိတ်ကူးများနှင့် အားစိုက်ထုတ်မှုများကို ပံ့ပိုးခွင့်ပေးသည်။ အားလုံးက အလုပ်ကို ကောင်းစွာပြီးမြောက်ရာ၌ တစ်စုတစ်စည်းတည်းရှိကြသည်။ ဤနည်းလမ်းကို အဘယ်သို့ထင်သနည်း။ သမ္မာတရားအားလိုက်စားသူတို့သာ ဤသို့ လုပ်ဆောင်မည်ဖြစ်သည်။ ၎င်းတို့သည် ဘုရားသခင်ကို တူညီစွာ ယုံကြည်ကြသော်လည်း သမ္မာတရားကို လိုက်စားသူတို့နှင့် မလိုက်စားသူတို့သည် မတူညီသောပုံစံများဖြင့် မိမိတို့ကိုယ်ကို ပေါ်လွင်စေကြသည်။ မည်သည့်လူစားမျိုးက စက်ဆုပ်ဖွယ်ဖြစ်သနည်း။ (သမ္မာတရားအား မလိုက်စားသူတို့သည် စက်ဆုပ်ဖွယ်ဖြစ်သည်။) အသက်မွေးဝမ်းကျောင်းပညာတစ်ခုခုအကြောင်းကို သင်အနည်းငယ်သိလျှင် ကြွားဝါဖို့မလိုပေ။ အသက်မွေးဝမ်းကျောင်းပညာကို သင်အနည်းငယ်သိလျှင် အခြားလူများကိုလည်း သိမ်ငယ်စေဖို့၊ သို့မဟုတ် ဘောင်ခတ်ဖို့ မလိုပေ။ လူအချို့သည် ခေါင်းဆောင်၊ သို့မဟုတ် အမှုဆောင်ဖြစ်သောအခါ၌ မာန်တက်ကြသည်။ ဟန်များသော ကိုယ်နှုတ်အမူအရာဖြင့် လမ်းလျှောက်ပြီး ပြောဆိုကြကာ အရာရှိပုံစံပင် ဖမ်းကြသည်။ ဤသို့ လုပ်ဆောင်သည့်ပုံစံသည် ပို၍ပင် စက်ဆုပ်ဖွယ်ဖြစ်သည်။ သင့်၌ အဆင့်အတန်းတစ်ခုခုရှိလျှင်ပင် ကြွားလုံးထုတ်ဖို့၊ သို့မဟုတ် မာနကြီးဖို့ မလိုပေ။ ညီအစ်ကိုမောင်နှမများအား ၎င်းတို့တာဝန်ကို ကောင်းစွာထမ်းဆောင်ရန်အတွက် ဦးဆောင်ရန် သင်သည် တာဝန်သိစွာ လုပ်ဆောင်သင့်သည်။ ဤသည်မှာ သင့်တာဝန်နှင့် သင်ဖြစ်မြောက်သင့်သည့်အရာ ဖြစ်သည်။ ထို့အပြင် သင့်၌ လူ့သဘာဝရှိပြီး သစ္စာရှိလျှင် အမှုအရာများကို လုပ်ဆောင်သောအခါ တာဝန်ယူရမည်။ မည်သို့ တာဝန်ယူသင့်သနည်း။ လူတို့နားမလည်သည့် နယ်ပယ်များတွင်၊ လူတို့က အမှားလုပ်တတ်သည့်၊ သို့မဟုတ် အထင်အမြင်မှားအောင် ပြုလုပ်ခြင်းခံရတတ်သည့် နယ်ပယ်များတွင် ရှင်းလင်းစွာ မိတ်သဟာယဖွဲ့ခြင်းအားဖြင့်လည်းကောင်း၊ ဖြစ်ပေါ်လာသော မည်သည့်အမှားများနှင့် လမ်းလွဲမှုများကိုမဆို ပြုပြင်ခြင်းအားဖြင့်လည်းကောင်း ဖြစ်သည်။ လူတိုင်းက မှန်သောနည်းလမ်းကို အသုံးပြုလျက် အမှုအရာများကို လုပ်ဆောင်နိုင်ဖို့ သေချာစေရန် သင်ပြုလုပ်သင့်သည်။ ဤသို့အားဖြင့် ၎င်းတို့သည် အမှားများ မပြုလုပ်တော့ပေ၊ သို့မဟုတ် အခြားလူများ၏ ဘောင်ခတ်ခြင်း မခံရတော့ပေ။ ဤသို့ဖြင့် သင်သည် သင့်တာဝန်ကို ကောင်းမွန်စွာ ဖြည့်ဆည်းပြီး ဖြစ်လိမ့်မည်။ ဤသည်မှာ သင့်တာဝန်၌ တာဝန်သိတတ်ပြီး သစ္စာရှိခြင်း ဖြစ်သည်။ ဤအရာကို သင်ရရှိပြီးသည်နှင့် အဆင့်အတန်းကို သင်လိုက်စားသည်ဟု အခြားလူများက ဆိုနိုင်သေးသလော။ မဆိုနိုင်ပေ။ သင်လက်တွေ့လုပ်ဆောင်သည့် စည်းမျဉ်းများက မှန်ကန်နေပြီဖြစ်ပြီး သင့်လမ်းကြောင်းကလည်း ထို့အတူပင်ဖြစ်သည်။ ဤသည်တို့မှာ သမ္မာတရားကို လိုက်စားသူတို့၏ သရုပ်သကန်များ ဖြစ်သည်။ ဤသည်မှာ သမ္မာတရားကို လိုက်စားသူတို့ လက်တွေ့လုပ်ဆောင်သင့်သည့်နည်းလမ်း ဖြစ်သည်။ ဆန့်ကျင်ဘက်မှာ ဂုဏ်အသရေမရှိသည့် အပြုအမူ အမြောက်အမြားမှလွဲ၍ အခြားမဟုတ်ပေ။ ကြွားဝါလိုပြီး အထင်ကြီးခံလိုခြင်း၊ သို့သော် ၎င်းတို့သိသည့်အရာကိုလည်း ထိမ်ချန်ကာ ဖုံးထားလိုခြင်း၊ ဤအရာများကို အခြားလူများက သိလျှင် ၎င်းတို့သည် မိမိတို့ကိုယ်ကို ထုတ်ဖော်ပြသနိုင်တော့မည်မဟုတ်၊ သို့မဟုတ် အထင်ကြီးခြင်း ခံရတော့မည်မဟုတ်သည်ကို ကြောက်ရွံ့ခြင်းတို့ဖြစ်သည်။ ဤသည်မှာ အလွန်ပင် ပုန်ကန်ခြင်း ဖြစ်သည်။ ၎င်းတို့သည် ဘုရားအိမ်တော်၏ အကျိုးစီးပွားများကို အရေးမစိုက်။ ပြီးလျှင် အတိုင်းသား ရပ်၍ပင်ကြည့်ပြီး “ငါမပြောလျှင် တစ်စုံတစ်ဦးက ဤအမှုကိစ္စကို ရှင်းလင်းစွာ ရှင်းပြနိုင်ခြင်းရှိမရှိကို ကြည့်ကြစို့။ တစ်စုံတစ်ခုကို ငါပြောလျှင်ပင် အရာရာတိုင်းကို ပြောမည်မဟုတ်။ ယနေ့တွင် အနည်းငယ် ဖွင့်ပြောပြီး မနက်ဖြန်တွင် အနည်းငယ် ဖွင့်ပြောမည်။ ပြီးလျှင် သင်တို့အား အမှန်အတိုင်း ပြောပြမည်မဟုတ်သေး။ သင်တို့ဘာသာ ချင့်ချိန်စဉ်းစားခိုင်းမည်။ ငါ့ထံမှ တစ်စုံတစ်ခုကို ရယူရန် အလွန်လွယ်ကူခြင်းမရှိ။ ငါနားလည်သည့်အရာအားလုံးကို သင်တို့အား ပြောပြပြီး နားလည်စေလျှင် ငါ့၌ မည်သည့်အရာမျှ ကျန်မည်မဟုတ်။ ပြီးလျှင် သင်တို့က ငါ့ထက် သာလိမ့်မည်။ ထိုအခါတွင် ငါ့ကို သင်တို့ မည်သို့မြင်မည်နည်း” ဟူ၍ မိမိတို့ဘာသာ တခစ်ခစ်ရယ်မောသည်။ မည်သည့် သတ္တဝါမျိုးက ဤသို့ တွေးမည်နည်း။ ဤလူသည် အဆိပ်ရှိသည်။ ကောင်းသည့်အရာ တစ်ခုမျှ မရှိပေ။ သူသည် ရိုးသားသူတစ်ဦး ဟုတ်သလော။ (မဟုတ်ပါ။) သင်တို့ထဲမှ တစ်ယောက်ယောက်က ဤသို့ လုပ်ဆောင်ဖူးသလော။ (လုပ်ဆောင်ဖူးပါသည်။ အထူးသဖြင့် ကျွန်ုပ်သည် ဧဝံဂေလိကို အချိန်ကြာမြင့်စွာ ဖြန့်ဝေပြီး ရလဒ်အချို့ ရရှိပြီးနောက်တွင် ကျွန်ုပ်၌ အဖိုးတန်အရည်အချင်းအချို့နှင့် အရင်းအနှီးရှိသကဲ့သို့ ခံစားရသည်။ နည်းလမ်းကောင်းတစ်ခုခုကို ကျွန်ုပ်သိသလော၊ သို့မဟုတ် မျှဝေရန် အတွေ့အကြုံကောင်းတစ်ခုခုရှိသလောဆိုသည်ကို အခြားလူများက မေးသောအခါ၌ ကျွန်ုပ် ငြင်းဆန်ခဲ့သည်။ ကျွန်ုပ်သည် “တပည့်ကို ဆရာစားမချန်လျှင် ဆရာသည် မိမိ၏ အသက်မွေးမှုကို ဆုံးရှုံးရလိမ့်မည်” ဟူသည့် စာတန်၏ အဆိပ်ရှိသော အဆိုဖြင့် နေထိုင်ခဲ့သည်။ အခြားလူများက ကျွန်ုပ်ထက်သာလွန်ပြီးနောက်တွင် ကျွန်ုပ်၏ အဆင့်အတန်း ဆုံးရှုံးရမည်ကို ကြောက်ခဲ့သည်။) အခြားလူများက သင်၏ ထင်ပေါ်မှုကို ခိုးယူခြင်းအား ကြောက်ခြင်းသည် ကျော်လွှားရန် လွယ်ကူသောအရာ မဟုတ်ပေ။ ဂုဏ်သတင်းနှင့် ကိုယ်ကျိုးသည် လူတို့က ယှဉ်ပြိုင်ကြိုးစားလျက် ၎င်းတို့၏ တစ်ဘဝလုံးကုန်ဆုံးစေသော ပန်းတိုင်များဖြစ်သည်။ သို့သော် ယင်းတို့သည် နှလုံးတွင်ရှိသော ဓားမြှောင်နှစ်ချောင်းလည်း ဖြစ်သည်။ ယင်းတို့သည် သင့်ကို ဘဝပျက်စေလိမ့်မည်။

အသင်းတော်အလုပ်နှင့် ညီအစ်ကိုမောင်နှမများအတွက် အကျိုးဖြစ်စေသော အရာများကို လုပ်ဆောင်ခဲ့သောလူအချို့သည် ၎င်းတို့က ကူညီထောက်ပံ့မှုတစ်ခု ပြုလုပ်ခဲ့ပြီး အသင်းတော်အတွင်းတွင် အဆင့်အတန်းတစ်ခုရှိသည်ဟု ထင်ကြသည်။ ၎င်းတို့က အခြားလူများ၏ ရှေ့၌ ရှိသောအခါတိုင်းတွင် ၎င်းတို့လုပ်ဆောင်ခဲ့သော ဤကောင်းသည့်အရာများကို ထုတ်ပြောသည်။ ဤသို့ဖြင့် လူတိုင်းက ၎င်းတို့အပေါ် လုံးဝ အသစ်သော သိမြင်မှုနှင့် နားလည်မှုရှိကြသည်။ ယင်းမှာ ၎င်းတို့၏ အရင်းအနှီးနှင့် အဆင့်အတန်းကို နားလည်ခြင်းနှင့် အသင်းတော်အတွင်း ၎င်းတို့၏ ဂုဏ်သတင်းနှင့် နေရာကို နားလည်ခြင်းတို့ ဖြစ်သည်။ ၎င်းတို့သည် အဘယ်ကြောင့် ဤအရာကို လုပ်ဆောင်သနည်း။ (ကြွားဝါပြီး ကြွားလုံးထုတ်ရန် ဖြစ်သည်။) ကြွားလုံးထုတ်ရခြင်း၏ ရည်ရွယ်ချက်မှာ အဘယ်နည်း။ မိမိတို့ကိုယ်ကို သက်သေထူရန် ဖြစ်သည်။ မိမိတို့ကိုယ်ကို သက်သေထူခြင်းအားဖြင့် မည်သည့်အရာကို ၎င်းတို့ လုပ်ဆောင်နိုင်သနည်း။ (အခြားလူများအား ၎င်းတို့ကို အထင်ကြီးလေးစားအောင် လုပ်ဆောင်နိုင်သည်။) လူတို့အား ၎င်းတို့ကို အထင်ကြီးလေးစားအောင် ၎င်းတို့ကို အကောင်းပြောအောင်၊ ၎င်းတို့ကို ကြောက်ရွံ့အောင် လုပ်ဆောင်သည်။ ဤအရာများကို ရရှိပြီးနောက်တွင် ၎င်းတို့သည် စိတ်အတွင်း၌ မည်သို့ခံစားရသနည်း။ (၎င်းတို့ ပျော်မွေ့ပါသည်။) အဆင့်အတန်း၏ အကျိုးအမြတ်များကို ၎င်းတို့ ပျော်မွေ့ကြသည်။ သင်တို့သည်လည်း ဤအရာများကို လိုက်စားသလော။ လူတို့တွင်ရှိသော ဤအတွေးများ၊ အယူအဆများနှင့် တွေးခေါ်ပုံများကို မည်သည့်အရာက ဖြစ်စေသနည်း။ မည်သည့်အရာက ယင်းတို့ကို ပေါ်ပေါက်စေသနည်း။ ယင်းတို့၏ အရင်းအမြစ်မှာ အဘယ်နည်း။ ယင်းတို့၏ အရင်းအမြစ်မှာ လူ၏ ဖောက်ပြန်ပျက်စီးသော စိတ်သဘောထားဖြစ်သည်။ လူတို့အား ဤသို့ မိမိတို့ကိုယ်ကို ထုတ်ဖော်စေပြီး ဤလိုက်စားမှုမျိုးတို့ ဖြစ်ပေါ်စေသည်မှာ လူ၏ ဖောက်ပြန်ပျက်စီးသော စိတ်သဘောထားဖြစ်သည်။ လူအချို့သည် ဘုရားအိမ်တော်တွင် မကြာခဏပင် အခြားလူများထက် သာလွန်သည်ဟု ခံစားရသည်။ မည်သည့်ပုံစံများဖြင့် ဖြစ်သနည်း။ ဤပုံစံတို့ဖြင့် သာလွန်သည်ဟု မည်သည့်အရာက ၎င်းတို့အား ခံစားရစေသနည်း။ ဥပမာ လူအချို့သည် နိုင်ငံခြားဘာသာစကားတစ်ခုအား မည်သို့ပြောရမည်ကို သိသည်။ ပြီးလျှင် ဤသည်မှာ ၎င်းတို့၌ ဆုကျေးဇူးရှိပြီး ကျွမ်းကျင်မှုရှိခြင်း ဖြစ်သည်ဟုလည်းကောင်း၊ ဘုရားအိမ်တော်၌ ၎င်းတို့မရှိလျှင် ဘုရားအိမ်တော်၏ အလုပ်ကို ချဲ့ထွင်ရန် အလွန်ပင်ခက်ခဲဖို့ များလိမ့်မည်ဟုလည်းကောင်း အဓိပ္ပာယ်ရသည်ဟု ၎င်းတို့က ထင်ကြသည်။ ရလဒ်အနေဖြင့် ၎င်းတို့သည် ၎င်းတို့သွားသည့်နေရာတိုင်း၌ လူတို့အား ၎င်းတို့ကို အထင်ကြီးလေးစားအောင် လုပ်ဆောင်လိုသည်။ ဤလူအမျိုးအစားတို့က အခြားလူများကို တွေ့သောအခါ မည်သည့်နည်းလမ်းကို အသုံးချသနည်း။ ၎င်းတို့၏ စိတ်နှလုံးတွင် ၎င်းတို့သည် ဘုရားအိမ်တော်၌ မတူညီသောတာဝန်များအား ထမ်းဆောင်သောလူတို့အပေါ်သို့ မတူညီသောအဆင့်မျိုးစုံကို သတ်မှတ်ပေးထားသည်။ ခေါင်းဆောင်များသည် ထိပ်ဆုံးတွင်ရှိပြီး ထူးခြားသည့် ပင်ကိုစွမ်းရည်များ ရှိသောသူတို့က ဒုတိယလိုက်သည်။ ပြီးလျှင် သာမန်ပင်ကိုစွမ်းရည် ရှိသောသူများရှိသည်။ ပြီးလျှင် အောက်ခြေ၌ ပံ့ပိုးပေးရသည့်တာဝန်မျိုးစုံကို ထမ်းဆောင်သောသူတို့ရှိသည်။ လူအချို့က အရေးကြီးသောတာဝန်များနှင့် အထူးတာဝန်များကို ထမ်းဆောင်ရန် အရည်အချင်းကို အရင်းအနှီးအဖြစ် သဘောထားပြီး ယင်းအား သမ္မာတရားစစ်မှန်မှုများရှိခြင်းအဖြစ် သဘောထားသည်။ ဤတွင် ပြဿနာက အဘယ်နည်း။ ဤသည်မှာ အဓိပ္ပာယ်မရှိ မဖြစ်သလော။ အထူးတာဝန်အချို့ကို ထမ်းဆောင်ရခြင်းက ၎င်းတို့အား မာနထောင်လွှားပြီး မာန်တက်စေသည်။ ပြီးလျှင် လူတိုင်းကို ၎င်းတို့က အထင်သေးသည်။ လူတစ်ယောက်ကို ၎င်းတို့ တွေ့ဆုံသောအခါ ၎င်းတို့အစဉ်လုပ်ဆောင်သည့် ပထမဆုံးအရာမှာ မည်သည့်တာဝန်ကို ထမ်းဆောင်သည်ဆိုသည်ကို မေးခြင်း ဖြစ်သည်။ ထိုသူသည် သာမန်တာဝန်တစ်ခုကို ထမ်းဆောင်သည်ဆိုလျှင် ၎င်းတို့က ထိုသူကို အထင်သေးပြီး ဤလူကို ၎င်းတို့ အာရုံစိုက်ဖို့မထိုက်တန်ဟု ထင်ကြသည်။ ဤလူက ၎င်းတို့နှင့် မိတ်သဟာယဖွဲ့လိုလျှင် ၎င်းတို့သည် အပေါ်ယံ၌ သဘောတူလက်ခံကြသည်။ သို့သော် စိတ်ထဲတွင် ၎င်းတို့သည် “သင်သည် ငါနှင့် မိတ်သဟာယပြုလိုသလော။ သင်သည် သာမန်လူတစ်ဦးသာ ဖြစ်သည်။ သင်ထမ်းဆောင်သည့်တာဝန်ကို ကြည့်ပါ။ သင်သည် အဘယ်သို့ ငါနှင့်စကားပြောဖို့ ထိုက်တန်သနည်း” ဟု တွေးကြသည်။ ထိုသူထမ်းဆောင်သည့် တာဝန်က ၎င်းတို့၏တာဝန်ထက်ပို၍ အရေးကြီးလျှင် ၎င်းတို့က ထိုသူကို မြှောက်ပင့်ပြီး အားကျကြသည်။ ခေါင်းဆောင်၊ သို့မဟုတ် အမှုဆောင်များကို ၎င်းတို့ မြင်သောအခါ ၎င်းတို့သည် မျက်နှာလိုမျက်နှာရလုပ်ပြီး ခယကြသည်။ လူတို့ကို ၎င်းတို့ဆက်ဆံသည့်ပုံစံ၌ စည်းမျဉ်းနှင့်ညီကြသလော။ (မညီပါ။ ၎င်းတို့သည် လူတို့အား သူတို့ထမ်းဆောင်သည့်တာဝန်အရ၊ ၎င်းတို့သတ်မှတ်သည့် အမျိုးမျိုးသော မတူညီသည့် အဆင့်များအရ ဆက်ဆံကြသည်။) ၎င်းတို့သည် လူတို့အား သူတို့၏အတွေ့အကြုံနှင့် ဝါရင့်မှုအရ၊ သူတို့၏ ပင်ကိုစွမ်းရည်များ၊ ဆုကျေးဇူးများအရ အဆင့်ခွဲသည်။ ၎င်းတို့က လူတို့အား ဤသို့ အဆင့်ခွဲခြင်းအားဖြင့် မည်သည့်အချက်ကို ထုတ်ဖော်ပြသနည်း။ ဤသည်မှာ လူတစ်ဦး၏ လိုက်စားမှုများ၊ လူတစ်ဦး၏ အသက်ဝင်ရောက်မှု၊ လူတစ်ဦး၏ သဘာဝအနှစ်သာရနှင့် သူ၏ လူ့သဘာဝအရည်အသွေးတို့ကို ထုတ်ဖော်ပြသည်။ လူအချို့သည် အထက်လူကြီးခေါင်းဆောင်တစ်ဦးကို မြင်သောအခါ ခေါင်းညိတ်ပြီး အနည်းငယ်ဦးညွှတ်ကာ ယဉ်ကျေးကြသည်။ အရည်အချင်းအချို့ရှိသော၊ ပါရမီရှိသော၊ စကားပြောဆိုရာ၌ ကျွမ်းကျင်သော၊ ဘုရားအိမ်တော်တွင် အရေးကြီးတာဝန်များကို ထမ်းဆောင်ခဲ့သော၊ သို့မဟုတ် အထက်က ရာထူးတိုးပေးပြီး အရေးကြီးသည်ဟု မြင်သောသူတစ်ယောက်ကို ၎င်းတို့ မြင်သောအခါ အထူးယဉ်ကျေးသောပုံစံဖြင့် စကားပြောကြသည်။ အစွမ်းအစနိမ့်သူ၊ သို့မဟုတ် သာမန်တာဝန်တစ်ခုကို ထမ်းဆောင်သူကို ၎င်းတို့ မြင်သောအခါ ထိုသူကို ၎င်းတို့ အထင်သေးပြီး ထိုသူကို မမြင်ရသကဲ့သို့ ဆက်ဆံကြသည်။ ထိုသူကို ၎င်းတို့ဆက်ဆံပုံက မတူပေ။ ၎င်းတို့က စိတ်အတွင်းတွင် မည်သည့်အရာကို တွေးနေသနည်း။ “သင်ကဲ့သို့သောသူတစ်ဦးသည် ဘုရားသခင်ကို ယုံကြည်သော်လည်း အဆင့်အတန်းနိမ့်ဆဲဖြစ်သည်။ သို့တိုင်အောင် သင်က ငါနှင့်တူညီသည့်အဆင့်၌ ရှိသကဲ့သို့ စကားပြောလိုဆဲဖြစ်သည်။ ပြီးလျှင် အသက်ဝင်ရောက်မှုနှင့်၊ ရိုးသားသူတစ်ဦးဖြစ်ခြင်းနှင့် ပတ်သက်ပြီး ငါနှင့် မိတ်သဟာယဖွဲ့လိုဆဲဖြစ်သည်။ သင်က ဤသို့လုပ်ဆောင်ရန် မသင့်တော်ပါ” ဟူ၍ ဖြစ်သည်။ ဤသည်မှာ မည်သည့်စိတ်သဘောထားနည်း။ မာနထောင်လွှားခြင်း၊ ကြမ်းတမ်းခြင်းနှင့် ကောက်ကျစ်ဆိုးယုတ်ခြင်း ဖြစ်သည်။ အသင်းတော်တွင် ဤသို့သောလူအမျိုးအစား များစွာရှိသလော။ (ရှိပါသည်။) သင်တို့သည် ဤလူစားမျိုးဟုတ်သလော။ (ဟုတ်ပါသည်။) ၎င်းတို့က မည်သူဖြစ်သည်ဆိုသည့်အပေါ် အခြေခံပြီး လူတို့အား ကွဲပြားစွာ ဆက်ဆံခြင်းဖြစ်သည့် ဤအရာများထဲမှ မည်သည့်အရာကမျှ သမ္မာတရားအား လိုက်စားသူတို့၏ သရုပ်သကန်များ မဟုတ်။ မည်သည့်အရာကို ၎င်းတို့ လိုက်စားနေကြသနည်း။ (အဆင့်အတန်းကို လိုက်စားနေကြသည်။) လူတို့၏ အပြုအမူ၊ ထုတ်ဖော်မှုများ၊ ပုံမှန်ပြသသော သရုပ်သကန်များသည် ၎င်းတို့၌ ရှိသော အတွေးများ၊ အမြင်များ၊ ရည်ရွယ်ချက်များနှင့် လိုက်စားမှုများအပြင် ၎င်းတို့ရောက်ရှိနေသည့်လမ်းကြောင်းကိုပါ ပြသနိုင်သည်။ သင်ထုတ်ဖော်သည့်အရာ၊ သင်ပုံမှန် ပြသသည့်အရာသည် သင်လိုက်စားသည့်အရာ ဖြစ်သည်။ သင်၏ လိုက်စားမှုက ဖော်ထုတ်ခြင်းခံရသည်။ ဤလူအမျိုးအစားတို့တွင် ဝိညာဉ်ရေးရာ နားလည်သဘောပေါက်မှု ရှိသော်လည်း၊ ဘုရားနှုတ်ကပတ်တော်ကို နားလည်နိုင်သော်လည်း၊ ဘုရားနှုတ်ကပတ်တော်ဖြင့် ချိတ်ဆက်မှုများ ပြုလုပ်နိုင်ပြီး ၎င်းတို့၏ ကိုယ်ပိုင်အခြေအနေများကို ဘုရားနှုတ်ကပတ်တော်ဖြင့် နှိုင်းယှဉ်ချိန်ဆကြည့်နိုင်သော်လည်း မည်သည့်အရာ ဖြစ်ပျက်ပါစေ သမ္မာတရားကို မရှာကြသကဲ့သို့ ဘုရားနှုတ်ကပတ်တော်၏ သမ္မာတရားကို ၎င်းတို့၏ စည်းမျဉ်းများအဖြစ် အသုံးပြုလျက် မချဉ်းကပ်ကြပေ။ ထိုထက် ၎င်းတို့၏ ကိုယ်ပိုင်အယူအဆများ၊ စိတ်ကူးများ၊ ရည်ရွယ်ချက်များ၊ ရည်မှန်းချက်များ၊ လိုအင်ဆန္ဒများ၊ ထို့အပြင် ၎င်းတို့၏ ကိုယ်ပိုင်နှစ်သက်မှုများကို အခြေခံပြီး ချဉ်းကပ်ကာ ပြုမူဆောင်ရွက်ကြသည်။ ဤသို့သောလူတို့သည် သမ္မာတရားစစ်မှန်မှုများအတွင်းသို့ ဝင်ရောက်နိုင်သလော။ (မဝင်ရောက်နိုင်ပါ။) ၎င်းတို့သည် ကမ္ဘာလောကကို ကိုင်တွယ်ဖြေရှင်းခြင်းအတွက် မယုံကြည်သူများ၌ရှိသော စည်းမျဉ်းများနှင့် နည်းလမ်းများကို ၎င်းတို့၏စိတ်နှလုံး၌ ထားထားဆဲဖြစ်သည်။ ၎င်းတို့သည် လူတို့အား သူတို့၏အတွေ့အကြုံနှင့် ဝါရင့်မှုအရ အဆင့်ခွဲဆဲဖြစ်သည်။ ပြီးလျှင် ဘုရားအိမ်တော်ရှိ လူတို့အပေါ်တွင် မတူညီသော အဆင့်မျိုးစုံကို သတ်မှတ်ဆဲဖြစ်သည်။ ၎င်းတို့သည် လူတို့ကို အကဲဖြတ်ရန်အတွက် သမ္မာတရားကို အသုံးမပြုပေ။ ထိုထက် မယုံကြည်သောသူတို့၏ အမြင်များနှင့် စံနှုန်းများကို အသုံးပြုလျက် လူတို့ကို အကဲဖြတ်သည်။ ဤသည်မှာ သမ္မာတရားကို လိုက်စားခြင်း ဟုတ်သလော။ (မဟုတ်ပါ။) ၎င်းတို့ စကားပြောပြီး တရားဟောသောအခါတွင် သမ္မာတရားကို နားလည်သည့်သူဖြစ်သည်ဟု ထင်ရသော်လည်း ၎င်းတို့တာဝန်များကို ထမ်းဆောင်သည့်ပုံတွင် အနည်းငယ်သော သမ္မာတရားစစ်မှန်မှုတစ်ခုတလေကို မြင်ရနိုင်သလော။ (မမြင်ရနိုင်ပါ။) ဤသို့ဆိုလျှင် ဤလူတို့သည် အသက်ဝင်ရောက်မှုရှိသူများ ဟုတ်သလော။ (မဟုတ်ပါ။) ၎င်းတို့အတွင်းတွင် ဖောက်ပြန်ပျက်စီးသောအရာ များပြားစွာရှိသဖြင့် ၎င်းတို့သည် ကယ်တင်ခြင်းအတွက် သတ်မှတ်ချက်များ ပြည့်မီရန် အလွန်ပင် စံမမီပေ။ ၎င်းတို့သည် ဤအရာများကို အရင်းအနှီးအဖြစ် အစဉ် သဘောထားလျှင် ၎င်းတို့နားလည်သည့် ဘုရားနှုတ်ကပတ်တော်မည်မျှကို လက်တွေ့လုပ်ဆောင်နိုင်သနည်း။ ၎င်းတို့၏ စိတ်နှလုံးတွင် အမှန်တကယ် သမ္မာတရားပါဝင်သလော၊ သို့မဟုတ် ဘုရားနှုတ်ကပတ်တော်ပါဝင်သလော။ အသက်ဝင်ရောက်မှုနှင့် ၎င်းတို့၏ စိတ်သဘောထားပြောင်းလဲခြင်းက ၎င်းတို့အတွက် မည်သို့အရေးပါသနည်း။ ၎င်းတို့စိတ်နှလုံးတွင် အမြစ်တွယ်ပြီးဖြစ်သည်မှာ အတိအကျမည်သည့်အရာနည်း။ အသေအချာပင် လူထံမှ အမွေဆက်ခံသော စာတန်ဆန်သော အတွေးအခေါ်များနှင့် အမှုအရာများအားလုံးဖြစ်သည့်အပြင် ဘုရားသခင်အပေါ် ယုံကြည်ခြင်းနှင့်ပတ်သက်ပြီး ၎င်းတို့၏ အယူအဆများနှင့် စိတ်ကူးများပါ ဖြစ်သည်။ ဤအရာများသည် လူတို့၏ စိတ်နှလုံး၌ နက်နဲစွာ အမြစ်တွယ်လျှင် ၎င်းတို့အနေဖြင့် သမ္မာတရားကို လက်ခံရန် အလွန့်အလွန် ခက်ခဲလိမ့်မည်။ အထက်က ၎င်းတို့အား မည်သို့မြင်သည်ကိုလည်းကောင်း၊ အထက်က ၎င်းတို့အား အသိအမှတ်ပြုမပြုကိုလည်းကောင်း၊ ဘုရားစိတ်နှလုံး၌ ၎င်းတို့ရှိမရှိကိုလည်းကောင်း၊ ဘုရားသခင်က ၎င်းတို့အား သိမသိကိုလည်းကောင်း ၎င်းတို့ အစဉ်သဖြင့် စဉ်းစားသည်။ ၎င်းတို့သည် အခြားလူများအား အလားတူပင် ရှုမြင်သည်။ အထက်က ထိုသူတို့အား အသိအမှတ်ပြုမပြုကိုလည်းကောင်း၊ ဘုရားသခင်က ၎င်းတို့အပေါ် ကျေနပ်မှု ရှိမရှိကိုလည်းကောင်း ၎င်းတို့ ကြည့်သည်။ ၎င်းတို့သည် လူတို့အား မည်သူဖြစ်သည်ဆိုသည့်အပေါ် အခြေခံ၍ ကွဲပြားစွာ ဆက်ဆံသည်။ ၎င်းတို့စိတ်နှလုံးသည် ဤအရာများအပေါ် အစဉ်အလေးထားသောအခါ သမ္မာတရားက ၎င်းတို့အပေါ် သက်ရောက်မှုမည်မျှရှိနိုင်သနည်း။ ဤအခြေအနေများတွင် အစဉ်နေထိုင်ပြီး ဤလောကီဆိုင်ရာ ဆက်ဆံမှုများအတွက် အတွေးအခေါ်များအားဖြင့် နေထိုင်သောသူများက မည်သည့်အရာကို အမှန်တကယ် လိုက်စားနေကြသနည်း။ သမ္မာတရားစစ်မှန်မှုများသို့ ၎င်းတို့ ဝင်ရောက်နိုင်သလော။ (မဝင်ရောက်နိုင်ပါ။) ဤသို့ဆိုလျှင် ၎င်းတို့သည် မည်သည့်အရာနှင့်အညီ ၎င်းတို့၏ ဘဝများကို နေထိုင်ကြသနည်း။ (လောကီဆိုင်ရာ ဆက်ဆံမှုများအတွက် စာတန်ဆန်သော အတွေးအခေါ်များနှင့်အညီ ၎င်းတို့ နေထိုင်ကြသည်။) စာတန်ဆန်သော အတွေးအခေါ်များနှင့်အညီ ၎င်းတို့ နေထိုင်ကြသည်။ သို့တိုင်အောင် ၎င်းတို့၌ အသိအမြင်ရှိသည်၊ သင်ယူတတ်မြောက်ခြင်းရှိပြီး အမြော်အမြင်ရှိသည်ဟု ထင်ကြပြီး စိတ်အတွင်းတွင် များစွာပျော်မွေ့ကြသည်။ ၎င်းတို့သည် ဘုရားအိမ်တော်ကို မည်သည့်အရာအဖြစ် မြင်သနည်း။ (လူ့အဖွဲ့အစည်းတစ်ခုအဖြစ် မြင်ပါသည်။) လူ့အဖွဲ့အစည်းတစ်ခုအဖြစ် မြင်သည်။ ဤအမြင်ကို ၎င်းတို့ မစွန့်ပစ်ရသေးပေ။ ဤသို့ဆိုလျှင် ဤပြဿနာများကို ၎င်းတို့ မည်သို့ ပြုပြင်သနည်း။ ဤသည်မှာ လူတို့က ဘုရားနှုတ်ကပတ်တော်ဖတ်ပြီး ဘုရားသခင် ဖော်ထုတ်သည့် အမှန်တရားများကို အသိအမှတ်ပြုနိုင်သည့် ကိစ္စသက်သက်မဟုတ်ပေ။ ပြုပြင်ခြင်း၊ စမ်းသပ်ခြင်းများနှင့် စစ်ဆေးခြင်းကိုလည်း ၎င်းတို့ တွေ့ကြုံရမည်။ ၎င်းတို့၏ သဘာဝအနှစ်သာရကို သိရန်၊ အရင်းအနှီး၊ ဆုကျေးဇူးများ၊ အသိပညာနှင့် အရည်အချင်းတို့၏ အနှစ်သာရကို ရှင်းလင်းစွာ မြင်ရန်၊ ဤအရာများကို လက်လွှတ်ရန်၊ ဘုရားနှုတ်ကပတ်တော်ရှိ သမ္မာတရားများကို လက်ခံရန်၊ သမ္မာတရားနှင့်အညီ အသက်ရှင်ရန်တို့လည်း လိုအပ်သည်။ ထိုအခါမှသာ ဖောက်ပြန်ပျက်စီးသော သဘာဝတစ်ခု၏ ပြဿနာကို ပြုပြင်နိုင်သည်။

သမ္မာတရားအား လိုက်စားခြင်းသည် လွယ်ကူသောကိစ္စတစ်ခုမဟုတ်။ လူတို့သည် ဘုရားနှုတ်ကပတ်တော်နှင့်အညီ အမှုအရာများကို မြင်ရန် သင်ယူရမည်။ ယခင်က လူတို့တွင် မှားယွင်းသောအမြင်များစွာရှိခဲ့သည်။ သမ္မာတရားကို ၎င်းတို့ မရှာဖွေလျှင် ထိုအရာများကို ၎င်းတို့ သဘောပေါက်မည်မဟုတ်။ ပြီးလျှင် ၎င်းတို့ မှန်သည်ဟု ထင်မြင်လျက်၊ မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်လျက် ယခင်ကကဲ့သို့ ဆက်၍ လုပ်ဆောင်မည်ဖြစ်သည်။ ထိုအခြေအနေတွင် သင်က ၎င်းတို့ကို ပြုပြင်လျှင်ပင် ၎င်းတို့၏ အမှားကို ဝန်ခံဦးမည်မဟုတ်။ သမ္မာတရားကို မလိုက်စားသောလူတို့၏ အမှုအရာများကိုမြင်သည့် ရှုထောင့်ကို ပြောင်းလဲရန် အလွန်ခက်ခဲသည်။ ဥပမာ အသင်းတော်တွင် ကုမ္ပဏီတစ်ခုကို ဦးဆောင်ခဲ့ဖူးသောသူတစ်ဦးကို လူအချို့က မြင်လျှင် ၎င်းတို့၏ စိတ်နှလုံး၌ လေးစားသည့်၊ အထင်ကြီးသည့်ခံစားချက်များ ဖြစ်ပေါ်လာသည်။ ၎င်းတို့သည် ဤသို့သောလူတို့ကို အားကျသည်။ လေးစားသည်။ အထင်ကြီးသည်။ ကြည်ညိုခြင်းပင်ဖြစ်သည်။ ဤသူသည် ၎င်းတို့၏ စိတ်နှလုံးထဲတွင် အဆင့်အတန်းရှိသည်။ ဤအခြေအနေတွင် မည်သည့်အရာကို လုပ်ဆောင်သင့်သနည်း။ သင်သည် သမ္မာတရားစည်းမျဉ်းများနှင့်အညီ ဤလူကို ပိုင်းခြားသိမြင်သင့်ပြီး ဆက်ဆံသင့်သည်။ သူသည် သမ္မာတရားအား ချစ်ပြီး လိုက်စားသူဟုတ်မဟုတ်၊ လေးစားဖို့ရန် ထိုက်တန်သည့်သူဟုတ်မဟုတ်ကို ကြည့်သင့်သည်။ ထိုသူနှင့် ဆက်ဆံပြီး ထိုသူအား ပိုင်းခြားသိမြင်ပြီးနောက်တွင် သူသည် ဤလူစားမျိုးမဟုတ်သည်ကို သင်ရှာဖွေတွေ့ရှိလျှင် သင့်စိတ်နှလုံး၌ ထိုလူကို အထင်ကြီးလေးစားတော့မည်မဟုတ်။ ပြီးလျှင် ထိုသူအား ရိုသေကြည်ညိုလိမ့်မည်မဟုတ်။ သင်သည် ထိုသူအား ပုံမှန်နည်းဖြင့် ဆက်ဆံပြီး ထိတွေ့သင့်သည်။ ထိုသူအား ပုံမှန်နည်းဖြင့် ဆက်ဆံခြင်းဆိုသည်မှာ မည်သည့်အရာကို ဆိုလိုသနည်း။ ထိုသူအား မှန်ကန်စွာ ဆက်ဆံနိုင်ခြင်း ဖြစ်သည်။ လူတို့၏ စိတ်နှလုံးသည် ၎င်းတို့၏ကိုယ်ပိုင်နှစ်သက်မှုများ၊ ဆန္ဒများ၊ လိုက်စားမှုများနှင့် ပြည့်နေပြီး ၎င်းတို့၏တန်ဖိုးသည် အသေးစိတ်အပြုအမူများစွာတွင် သူ့ဘာသာ ထုတ်ဖော်ပြသည်။ ၎င်းတို့ ကြည်ညိုသောသူတစ်ဦးရှိလျှင် ထိုသူအကြောင်းကို ၎င်းတို့ပြောသောအခါ ၎င်းတို့စကားလုံးများသည် အထူးပင် လိမ္မာပါးနပ်ပြီး ယဉ်ကျေးသည်။ ပြီးလျှင် ထိုသူအား အထူးပင်လေးစားသောပုံစံဖြင့် ညွှန်းဆိုလိမ့်မည်။ ဤသည်မှာ မည်သည့်အရာကို ညွှန်ပြသနည်း။ ဤသူသည် ၎င်းတို့စိတ်နှလုံးတွင် အဆင့်အတန်းရှိသည်ကိုလည်းကောင်း၊ ဤသူကို ၎င်းတို့ အထင်ကြီးလေးစားသည်ကိုလည်းကောင်း ညွှန်ပြသည်။ ဤအရာအပြင် ၎င်းတို့ပြောသည့် အခြားသောအရာများရှိသည်။ ၎င်းတို့က “ဤလူသည် အရာရှိတစ်ဦး ဖြစ်ခဲ့ဖူးသည်။ သူသည် ဘုရားအိမ်တော်သို့လာပြီး သာမန်လူတစ်ဦးကဲ့သို့ ဆက်ဆံခံရလျှင် ယင်းမှာ ထိုသူကို မတရားစွာ ဆက်ဆံခြင်းသာ ဖြစ်လိမ့်မည်”ဟု မကြာခဏပြောကြသည်။ ၎င်းတို့၏ စိတ်တွင် ဘုရားအိမ်တော်သည် ပါရမီရှိသော ပုဂ္ဂိုလ်များကို အလေးမထားဟု ထင်ကြသည်။ ဤသို့ ဩဇာအာဏာရှိသော အကျော်အမော်ပုဂ္ဂိုလ်သည် မိမိကိုယ်ကို နှိမ့်ချနိုင်ပြီး ဘုရားအိမ်တော်ဆီသို့ လာနိုင်သည်။ ယုံကြည်သူတစ်ဦးဖြစ်ပြီး တာဝန်ထမ်းဆောင်နိုင်သည်။ သို့တိုင်အောင် မည်သူကမျှ ထိုသူကို အထင်ကြီးလေးစားခြင်း၊ သို့မဟုတ် ရာထူးတိုးပေးခြင်းမရှိ။ ပြီးလျှင် အထက်က ထိုသူအား ညီအစ်ကိုမောင်နှမများနှင့် မိတ်ဆက်ပေးရန် အထူးအာရုံစိုက် လုပ်ဆောင်ခြင်းမရှိ။ ဤလူ၏ တာဝန်များက မည်သို့အခြေအနေရှိသည်ကို သင်က ၎င်းတို့အားမေးပြီး ၎င်းတို့က “ဤသူသည် ကုမ္ပဏီတစ်ခုကို ပိုင်ခဲ့ဖူးပြီး ထိုသူ့လက်အောက်၌ ထောင်ချီသောလူအချို့ရှိခဲ့သည်။ ဤအလုပ်အနည်းငယ်ကို လုပ်ဆောင်ခြင်းက ထိုသူအတွက် မပြောပလောက်ပါ။ ဘုရားအိမ်တော်တွင် ထိုသူထက်ပို၍ အစွမ်းအစမြင့်သောသူတစ်ဦးမျှ မရှိ။ သူသည် ဩဇာအာဏာ ရှိသောသူဖြစ်သည်။ ဘုရားအိမ်တော်တွင် ဩဇာအာဏာရှိသောသူမရှိ” ဟု ပြောသည်။ ဤသည်မှာ မည်သည့်ပြောဆိုမှုမျိုးဖြစ်သနည်း။ လောကီကမ္ဘာတွင် ဩဇာအာဏာ ရှိသောသူများရှိသော်လည်း ဘုရားအိမ်တော်တွင်မရှိဟု ၎င်းတို့ ထင်ကြသည်။ ဘုရားအိမ်တော်ရှိလူတို့တွင် သမ္မာတရားရှိသည်။ လောကီကမ္ဘာတွင်ရှိသောလူများ၌ သမ္မာတရားရှိသလော။ လောကီကမ္ဘာတွင် ဩဇာအာဏာရှိသောသူများရှိသည်ဟု သင်ဆိုသည်။ ဤသို့ဆိုလျှင် ဩဇာအာဏာရှိသောသူများကို သင်အဘယ်ကြောင့် မယုံကြည်သနည်း။ အဘယ်ကြောင့် ဘုရားသခင်ကို ယုံကြည်ရန် ဤနေရာသို့ လာသနည်း။ သင့်တွင် ဘုရားသခင်နှင့်ပတ်သက်ပြီး အယူအဆများရှိသည်။ ပြီးလျှင် လောကီကမ္ဘာသို့ အလျင်အမြန်ပြန်သွားသင့်သည်။ ၎င်းတို့သည် ဤသို့သောအရာများကို ပြောဆိုနိုင်စွမ်းရှိသည့်အချက်က ယင်းသည် စာတန်၏ အသံဖြစ်သည်ဟု မဆိုလိုသလော။ ယင်းသည် စာတန်၏ အသံဖြစ်သည်။ ၎င်းတို့သည် ဘုရားသခင်ကို ယုံကြည်ပြီး ဘုရားအိမ်တော်သို့လာသော်လည်း စာတန်ကို ချီးမြှောက်သည်။ ၎င်းတို့က “နာမည်ကျော်ကြားသောသူတစ်ဦးဦးက ဘုရားသခင်ကို ယုံကြည်လျှင် သူသည် အမြင့်ဆုံးအစွမ်းအစရှိသူတစ်ဦး ဖြစ်လိမ့်မည်။ သူက စုံလင်ခြင်းမခံရနိုင်လျှင် ကျန်သည့် ကျွန်ုပ်တို့အတွက် မျှော်လင့်ချက်မရှိ။ သူ၏ အမြင်တွင် ကျွန်ုပ်တို့က မည်သည့်အရာမျှ မဟုတ်” ဟု ပြောလုနီးနီးဖြစ်သည်။ ၎င်းတို့၏ စိတ်နှလုံးနှင့် ၎င်းတို့၏ အမြင်တွင် ဘုရားသခင်ကို ယုံကြည်သူတို့သည် နာမည်ကျော်ကြားသောသူများ၊ စီးပွားရေးလုပ်ငန်းရှင်များ၊ လောကီကမ္ဘာရှိ အရာရှိများကဲ့သို့ မတော်ပေ။ ထိုလူများသည်သာ ဩဇာအာဏာရှိသောသူများ၊ ဩဇာညောင်းသောသူများဖြစ်သည်။ ၎င်းတို့ သွယ်ဝိုက်ပြောဆိုသည့်အရာကို သင်ကြည့်လျှင် ၎င်းတို့သည် သမ္မာတရားကို လိုက်စားသူ ဟုတ်သလော။ (မဟုတ်ပါ။) တရားဒေသနာမည်မျှကို ၎င်းတို့ နားထောင်သည်ဖြစ်စေ ၎င်းတို့၏ အတွေးများနှင့် အမြင်များ၊ ကမ္ဘာလောကအပေါ် ၎င်းတို့၏ ထင်မြင်ချက်များ၊ နာမည်ကျော်ကြားသောသူများနှင့် ဩဇာအာဏာရှိသူများအပေါ် ၎င်းတို့၏ အယူအဆများနှင့် အမြင်များသည် မပြောင်းလဲပေ။ သမ္မာတရားကို ၎င်းတို့ ရရှိပြီးဖြစ်သလော။ ၎င်းတို့၌ အသက်ဝင်ရောက်မှုရှိသလော။ (မရှိပါ။) ဤသူမှာ အဘယ်သူနည်း။ (မယုံကြည်သူတစ်ယောက် ဖြစ်သည်။) သူသည် မယုံကြည်သူတစ်ယောက် ဖြစ်သည်။ သူသည် ယုဒဖြစ်ပြီး သစ္စာဖောက်တစ်ယောက်ဖြစ်သည်။ သူ၏ စိတ်တွင် ဘုရားသခင်သည် အမြင့်ဆုံးမဟုတ်သကဲ့သို့ သမ္မာတရားသည် အမြင့်ဆုံးမဟုတ်ပေ။ ထိုထက် လောကီတန်ခိုးအာဏာ၊ ဂုဏ်သိက္ခာ၊ ကျော်ကြားမှုနှင့် အကျိုးအမြတ်တို့က အမြင့်ဆုံး ဖြစ်သည်။ ဤသူသည် သစ္စာဖောက်တစ်ဦးဖြစ်သည်။ ဤသည်တို့မှာ ယုဒ၏ အတွေးများနှင့် အမြင်များဖြစ်သည်။ ယင်းတို့သည် စာတန်၏ အတွေးများနှင့် ယုတ္တိဗေဒဖြစ်သည်။ ဤလူတို့သည် သမ္မာတရားကို နားလည်နိုင်သော်လည်း ၎င်းတို့၏အတွေးများနှင့် အမြင်များက ပြောင်းလဲမည်မဟုတ်။ ၎င်းတို့ လိုက်စားသည့်အရာမှာ ဂုဏ်သတင်း၊ အဆင့်အတန်းနှင့် တန်ခိုးအာဏာဖြစ်သည်။ သင်သည် ဤသို့သောသူတစ်ဦးအနီးတွင် ရှိသောအခါ သင့်အားစကားပြောသောအခါ၌ ထိုသူ၌ရှိသော အမူအရာသည် မမှန်ကန်ပေ။ ပြီးလျှင် သင့်အား ခံစားချက်တစ်ခုခု ဖြစ်စေသည်။ ဤသူသည် ရင်းနှီးဖို့ ခက်သည်၊ သာမန်လူကို သူမမြင်နိုင်ဟု ခံစားရစေသည်။ ဤအတွက်ကြောင့် ၎င်းတို့သည် ဘုရားသခင်နှင့်ပတ်သက်ပြီး အယူအဆများစွာ ထားရှိနိုင်စွမ်းရှိခြင်း ဖြစ်သည်။ ဘုရားသခင်က သမ္မာတရားမည်မျှကို ဖော်ပြနိုင်သည်ဖြစ်စေ ၎င်းတို့၏ စိတ်နှလုံးတွင် ၎င်းတို့နှင့် ဘုရားသခင်ကြား၌ အစဉ်သဖြင့် အတားအဆီးတစ်ခုရှိသည်။ လူ့ဇာတိခံဘုရားသခင်၏ ပုံမှန်လူ့သဘာဝသည် သာမန်ဖြစ်သည်၊ ပြီးလျှင် ကြီးမြတ်ခြင်း၊ သို့မဟုတ် အင်အားကြီးမားခြင်း လုံးဝမရှိဟု ထင်ကြသည်။ ဤအတွက်ကြောင့် ၎င်းတို့က အသိပညာနှင့် ဆုကျေးဇူးများကို ကြည်ညိုနိုင်စွမ်းရှိခြင်းနှင့် ကြီးမြတ်သော အကျော်အမော်ပုဂ္ဂိုလ်များကို ပုဂ္ဂိုလ်ရေး ကိုးကွယ်နိုင်စွမ်းရှိခြင်း ဖြစ်သည်။ စာတန်ဆန်သော စိတ်သဘောထားဖြင့် ပြည့်နေသည့် မာနထောင်လွှားသော၊ ကြီးကျယ်သော၊ စိတ်ကြီးဝင်သောသူတို့က ပုံမှန်လူ့သဘာဝရှိပြီး သမ္မာတရားဖြင့် ပြည့်နေသော ခရစ်တော်ကို မြင်သောအခါ အဘယ်သို့ ခရစ်တော်ကို ဦးညွှတ်ပြီး ကိုးကွယ်နိုင်မည်နည်း။ ၎င်းတို့သည် စိတ်အတွင်းတွင် “သင်သည် ဘုရားဖြစ်သည်။ သင့်၌ သမ္မာတရားသာရှိသည်။ သင့်၌ အသိပညာမရှိ။ ကျွန်ုပ်၌ ဆုကျေးဇူးများ ရှိသည်။ ကျွန်ုပ်၏ အသိပညာသည် သင့်ထက်ပို၍ အဆင့်မြင့်သည်။ ကျွန်ုပ်၏ ပင်ကိုစွမ်းရည်များသည် သင့်ထက်ပို၍ အဆင့်မြင့်သည်။ အမှုအရာများအပေါ် ကျွန်ုပ်၏ ကိုင်တွယ်နိုင်စွမ်းသည် သင့်ထက်ပို၍ သန်မာသည်။ ပြီးလျှင် ပြင်ပလောကနှင့် စကားပြောဆိုရာတွင် ကျွန်ုပ်က သင့်ထက်ပို၍ တော်သည်” ဟု ထင်မြင်ကြသည်။ ၎င်းတို့သည် အသင်းတော်တွင် အလုပ်တစ်ခုခုလုပ်သောအခါ၊ အရင်းအနှီးတစ်ခုခုရှိသောအခါ၊ သို့မဟုတ် ကူညီထောက်ပံ့မှုတစ်ခုခုပြုလုပ်သောအခါ ၎င်းတို့သည် ဘုရားသခင်ကို ပို၍ပင် အရေးမစိုက်ပေ။ ဤသည်မှာ သမ္မာတရားကို လိုက်စားသူဟုတ်သလော။ (မဟုတ်ပါ။) သမ္မာတရားအား မလိုက်စားသူတို့သည် အကျည်းတန်သော အပြုအမူအမြောက်အများကို ပြသပြီး အသိစိတ်တစ်စက်မျှမရှိ။ ထို့ကြောင့် ဤလူတို့သည် လူများ၊ ဖြစ်ရပ်များနှင့် အမှုအရာများ၏ အပြင်ပန်းဖြစ်စဉ်များတွင် မကြာခဏ ပိတ်မိနေကြသည်။ အချိန်တစ်ခဏတွင် ဘုရားသခင်သည် မှန်သည်ဟု ၎င်းတို့ ထင်ကြသည်။ အချိန်တစ်ခဏတွင် ဘုရားသခင်သည် မှားသည်ဟု ၎င်းတို့ ထင်ကြသည်။ အချိန်တစ်ခဏတွင် ဘုရားသခင်ရှိသည်ဟု ၎င်းတို့ ထင်ကြသည်။ အချိန်တစ်ခဏတွင် ဘုရားသခင်မရှိဟု ၎င်းတို့ ထင်ကြသည်။ အချိန်တစ်ခဏတွင် ၎င်းတို့က ဘုရားသခင်သည် ကောင်းကင်၊ မြေကြီးနှင့် အရာခပ်သိမ်းတို့အပေါ် အချုပ်အခြာအာဏာရှိသည်ဟု ထင်မြင်ပြီး အချိန်တစ်ခဏတွင် ဘုရားသခင်သည် ကောင်းကင်၊ မြေကြီးနှင့် အရာခပ်သိမ်းတို့အပေါ် အချုပ်အခြာအာဏာရှိသည်ကို ၎င်းတို့ သံသယဝင်သည်။ ၎င်းတို့စိတ်နှလုံးသည် အစဉ် ဒွိဟဖြစ်နေပြီး တိုက်ပွဲဖြစ်နေသည်။ ဒုတိယလူအမျိုးအစားမှာ ဝိညာဉ်ရေးရာ နားလည်သဘောပေါက်မှုရှိပြီး သမ္မာတရား၏ အဓိပ္ပာယ်ကို အပေါ့တန်ဆုံးသော နားလည်ခံယူတတ်ခြင်းဖြင့် နားလည်သော်လည်း မည်သည့်အရာက စကားများနှင့် အယူဝါဒနှင့်သာ ဆိုင်သည်၊ မည်သည့်အရာက သဘောပေါက်နားလည်နိုင်စွမ်းအချို့ရှိသည်ဟု အကျုံးဝင်ဆဲဖြစ်သည်ဆိုသည်တို့ကို နားလည်သော်လည်း သမ္မာတရားအချို့ကို ၎င်းတို့နားလည်စဉ်တွင် ယင်းတို့ကို မည်သည့်အခါမျှ လက်တွေ့မလုပ်ဆောင်ပေ။ ၎င်းတို့၏ သရုပ်သကန်များမှာ အဘယ်နည်း။ အလုပ်ကို လိုက်စားခြင်း၊ ကောင်းချီးခံစားရခြင်းကို လိုက်စားခြင်း၊ မိမိတို့၏ ကိုယ်ပိုင်မရေရာသော ယုံကြည်ခြင်းနှင့် ဝိညာဉ်ရေးရာပံ့ပိုးမှုအား ဖြည့်ဆည်းခြင်းကို လိုက်စားခြင်း၊ ဂုဏ်နှင့် အဆင့်အတန်းကိုလိုက်စားခြင်းတို့ဖြစ်သည်။ ဤသည်မှာ ဒုတိယလူအမျိုးအစားဖြစ်သည်။

တတိယအမျိုးအစားမှာ ဝိညာဉ်ရေးရာ နားလည်သဘောပေါက်မှုရှိပြီး သမ္မာတရားကို လိုက်စားသောသူတို့ဖြစ်သည်။ ဝိညာဉ်ရေးရာ နားလည်သဘောပေါက်မှုရှိသူတို့သည် ဘုရားနှုတ်ကပတ်တော်က ပြောသည့်အရာကို နားလည်နိုင်သည်။ ဘုရားနှုတ်ကပတ်တော်တွင် ဖော်ထုတ်သော အခြေအနေအမျိုးမျိုးကို ယူပြီး မိမိတို့ကိုယ်ကိုဖြင့် နှိုင်းယှဉ်ချိန်ဆကြည့်နိုင်သည်။ မိမိတို့အခြေအနေနှင့်ပတ်သက်၍ မည်သည့်အရာက ပြဿနာဖြစ်စေသည်ကို သိမြင်နိုင်သည်။ သို့ရာတွင် နှိုင်းယှဉ်ချိန်ဆကြည့်နိုင်ခြင်းက သင်သည် သမ္မာတရားကို လိုက်စားသူဖြစ်သည်ဟု မဆိုလိုပေ။ သင့်ကိုယ်သင်နှင့် နှိုင်းယှဉ်ချိန်ဆကြည့်ပြီးနောက်တွင် သင်သည် လက်တွေ့လုပ်ဆောင်ပြီး ဝင်ရောက်လျှင် ထိုအခါမှသာ သင်သည် သမ္မာတရားကို လိုက်စားသူတစ်ယောက်ဖြစ်သည်။ ဘုရားနှုတ်ကပတ်တော်ကို လူတို့ နားလည်နိုင်လျှင်၊ အမှန်တကယ်ဝင်ရောက်ရန် အခြေခံအုတ်မြစ်အဖြစ် ၎င်းတို့နားလည်သော ဘုရားနှုတ်ကပတ်တော်များ၏ စည်းမျဉ်းများကို အသုံးပြုနိုင်လျှင် ဤသို့သောလူတို့သည် သမ္မာတရားအား လိုက်စားခြင်းနှင့်ပတ်သက်လျှင် မိမိတို့ကိုယ်ကို မည်သို့ ပြသသနည်း။ တစ်ချက်အနေဖြင့် ၎င်းတို့သည် ဘုရားသခင်၏ တာဝန်ပေးစေခိုင်းချက်ကို လက်ခံနိုင်ပြီး ၎င်းတို့တာဝန်ကို ကောင်းစွာထမ်းဆောင်နိုင်သည်။ အခြားတစ်ချက်အနေဖြင့် ဘုရားသခင်စီစဉ်သော အခြေအနေများကို ရင်ဆိုင်ရသောအခါ သမ္မာတရားကို ရှာဖွေနိုင်ပြီး ကျိုးနွံနာခံခြင်းကို ရရှိနိုင်သည်။ အခြားသွင်ပြင်လက္ခဏာမှာ ၎င်းတို့သည် ၎င်းတို့၏နေ့စဉ်အသက်တာတွင် ၎င်းတို့၏ အခြေအနေများနှင့် ထုတ်ဖော်ခြင်းများ၏ သွင်ပြင်လက္ခဏာတိုင်းအား ဆန်းစစ်ခြင်းအပေါ် အလေးထားသည်။ ပြီးလျှင် ဘုရားနှုတ်ကပတ်တော်နှင့်အညီ မိမိတို့ကိုယ်ကို နှိုင်းယှဉ်ချိန်ဆကြည့်နိုင်သည်။ ပြဿနာများကို ဖြေရှင်းနိုင်သည်။ ပြီးလျှင် အမှုကိစ္စမျိုးစုံကို ၎င်းတို့ချဉ်းကပ်သည့်ပုံစံတွင် ၎င်းတို့သည် စည်းမျဉ်းနှင့်ညီသည့်အဆင့်ကို ရောက်ရှိနိုင်ပြီး အမှုကိစ္စမျိုးစုံ၌ လက်တွေ့လုပ်ဆောင်ရန် လမ်းကြောင်း ရှိနိုင်သည်။ ဥပမာအနေဖြင့် ပေါလု၏ အကြီးစားအပြစ်ခုနစ်ခုကို ငါမိတ်သဟာယပြုပြီး စိစစ်သည့် ယခင်အခေါက်တွင် သင်တို့သည် သင်တို့ကိုယ်သင်တို့ နှိုင်းယှဉ်ချိန်ဆကြည့်နိုင်ရမည်။ အမှန်တကယ် နားလည်နိုင်ရမည်။ ပြီးလျှက် လက်တွေ့လုပ်ဆောင်ပြီး ဝင်ရောက်နိုင်ရမည်။ နှိုင်းယှဉ်ချိန်ဆကြည့်ခြင်းနှင့် အသက်ဝင်ရောက်မှုသည် တစ်ခုနှင့်တစ်ခု ရှုပ်ထွေးစွာ ချိတ်ဆက်နေသည်။ သင့်ကိုယ်သင် နှိုင်းယှဉ်ကြည့်နိုင်ခြင်းသည် အသက်ဝင်ရောက်မှုဆီသို့ ဦးတည်သည့် တံခါးပေါက်ဖြစ်သည်။ တံခါးပေါက်ကို ဖြတ်သန်းပြီးနောက် သင်ဝင်ရောက်သည့်ပုံစံသည် ဤသမ္မာတရားသွင်ပြင်လက္ခဏာကို သင်နားလည်ခြင်းရှိမရှိအပေါ်တွင် မူတည်လိမ့်မည်။ သမ္မာတရားသွင်ပြင်လက္ခဏာတစ်ခုကို သင်နားလည်သောအခါ စစ်မှန်မှုသွင်ပြင်လက္ခဏာတစ်ခုဆီသို့ သင်ဝင်ရောက်နိုင်သည်။ သမ္မာတရား သွင်ပြင်လက္ခဏာနှစ်ခုကို သင်နားလည်သောအခါ စစ်မှန်မှုသွင်ပြင်လက္ခဏာနှစ်ခုဆီသို့ သင်ဝင်ရောက်နိုင်သည်။ သင်သည် အယူဝါဒကိုသာ နားလည်ပြီး ဝင်ရောက်မှုစည်းမျဉ်းများမရှိလျှင် စစ်မှန်မှုသို့ ဝင်ရောက်နိုင်မည်မဟုတ်။ ထို့ကြောင့် ဦးစွာ သမ္မာတရားများစွာကို သင်နားလည်ရန်မှာ အဓိကသော့ချက်ဖြစ်သည်။ ယင်းတို့ကို သင်မည်သို့နားလည်နိုင်သနည်း။ ဘုရားနှုတ်ကပတ်တော်များစွာကို ဖတ်ရမည်။ ဘုရားနှုတ်ကပတ်တော်များကို ဆင်ခြင်ရမည်။ ယင်းတို့နှင့် သင်၏လက်တွေ့ဘဝနှင့် သင်ထမ်းဆောင်သောတာဝန်တို့အကြား ချိတ်ဆက်ကြည့်ရမည်။ လက်တွေ့လုပ်ဆောင်မှု စည်းမျဉ်းများကို ရှာဖွေရမည်။ လက်တွေ့လုပ်ဆောင်ရန် လမ်းကြောင်းကို ရှာဖွေရမည်။ ထို့နောက်တွင် စစ်မှန်မှုအတွင်းသို့ ဝင်ရောက်ရန် လွယ်ကူလိမ့်မည်။ အမှန်တကယ်ဖြစ်သော ပြဿနာအချို့ ရှိလျှင် သင်သည် ယင်းတို့ကို ဆက်စပ်မှုရှိသော ဘုရားနှုတ်ကပတ်တော်အပိုဒ်များနှင့် နှိုင်းယှဉ်ချိန်ဆကြည့်ပြီး ဖြေရှင်းရမည်။ သင်သည် ဘုရားသခင်နှင့်ပတ်သက်ပြီး အယူအဆများ၊ သို့မဟုတ် နားလည်မှုလွဲခြင်းများရှိလျှင် ဘုရားနှုတ်ကပတ်တော်နှင့် နှိုင်းယှဉ်ချိန်ဆကြည့်ရန်လည်းကောင်း၊ ဤအယူအဆများ၊ သို့မဟုတ် နားလည်မှုလွဲခြင်းများက မည်သည့်ပုံစံဖြင့် အမှန်တကယ် မှားယွင်းနေသည်ကို၊ ယင်းတို့သည် မည်သည့် ပြဿနာသဘောသဘာဝတို့ဖြစ်သည်ကို ပိုင်းခြားသိမြင်နိုင်ရန်လည်းကောင်း ပို၍ပင် လိုအပ်သည်။ ဤပြဿနာများကို စိစစ်နိုင်ရမည်။ ပြီးလျှင် ယင်းတို့ကို ပြုပြင်ရန် လိုက်လျောညီထွေသော သမ္မာတရားများကို ရှာနိုင်ရမည်။ ဤသည်မှာ အသက်ဝင်ရောက်မှုသို့ လမ်းကြောင်းဖြစ်သည်။ ပေါလုသည် အလုပ်များစွာ လုပ်ခဲ့သော်လည်း အသက်ဝင်ရောက်မှုသို့ လမ်းကြောင်းတစ်ခုရှိခဲ့သလော။ လုံးဝ မရှိခဲ့ပေ။ ပေါလု၏ အကြီးစားအပြစ်ခုနစ်ခု၏ ပထမတစ်ခုမှာ အဘယ်နည်း။ သူသည် သရဖူအား လိုက်စားခြင်းနှင့် ကောင်းချီးများအား လိုက်စားခြင်းကို သင့်လျော်သော ရည်မှန်းချက်များအဖြစ် မှတ်ယူခဲ့သည်။ ကောင်းချီးများအား လိုက်စားခြင်းကို ရည်မှန်းချက်တစ်ခုအဖြစ် မှတ်ယူခြင်းသည် မည်သည့်ပုံစံဖြင့် မှားယွင်းသနည်း။ ယင်းသည် သမ္မာတရားနှင့် လုံးလုံးဆန့်ကျင်ပြီး လူတို့ကို ကယ်တင်ရန် ဘုရားသခင်၏ ရည်ရွယ်ချက်ဖြင့် ထပ်တူညီခြင်းမရှိ။ ကောင်းချီးခံစားရခြင်းသည် လူတို့လိုက်စားရန်အတွက် သင့်တင့်လျောက်ပတ်သည့် ရည်မှန်းချက်တစ်ခု မဟုတ်သောကြောင့် အဘယ်အရာက သင့်တင့်လျောက်ပတ်သည့် ရည်မှန်းချက်တစ်ခု ဖြစ်သနည်း။ သမ္မာတရားကို လိုက်စားခြင်း၊ စိတ်သဘောထားပြောင်းလဲမှုများကို လိုက်စားခြင်း၊ ဘုရားသခင်၏ စီစဉ်ညွှန်ကြားမှုများဖြင့် အစီအစဉ်များအားလုံးကို ကျိုးနွံနာခံနိုင်ခြင်း၊ ဤအရာတို့သည် လူတို့ လိုက်စားသင့်သည့် ရည်မှန်းချက်များဖြစ်သည်။ ဥပမာအားဖြင့် ပြုပြင်ခံရခြင်းက သင့်ကို အယူအဆများ၊ နားလည်မှုလွဲခြင်းများဖြစ်စေပြီး သင်သည် ကျိုးနွံနာခံခြင်းကို မလုပ်ဆောင်နိုင် ဖြစ်လာသည်ဆိုပါစို့။ အဘယ့်ကြောင့် မကျိုးနွံမနာခံနိုင်သနည်း။ အဘယ်ကြောင့်ဆိုသော် ကောင်းချီးခံစားရဖို့ဖြစ်သည့် သင်၏ ခရီးပန်းတိုင်၊ သို့မဟုတ် အိပ်မက်ကို ခက်ခဲသွားစေသည်ဟု သင် ခံစားရခြင်းကြောင့်ဖြစ်သည်။ သင်သည် အပျက်သဘောဆောင်လာပြီး စိတ်တိုလာသည်။ ပြီးလျှင် သင်၏ စွန့်လွှတ်လိုသည်။ ဤအရာအတွက် အကြောင်းပြချက်မှာ အဘယ်နည်း။ သင်၏ အားထုတ်လိုက်စားမှုတွင် ပြဿနာတစ်ခုရှိသည်။ ဤသို့ဆိုလျှင် ဤအရာကို မည်သို့ ဖြေရှင်းသင့်သနည်း။ ဤမှားယွင်းသော စိတ်ကူးများကို သင် ချက်ချင်းစွန့်ပစ်ရန်၊ သင်၏ ဖောက်ပြန်ပျက်စီးသောစိတ်သဘောထား၏ ပြဿနာကို ဖြေရှင်းရန်အတွက် သမ္မာတရားကို ချက်ချင်းရှာဖွေရန် အလွန်အရေးကြီးသည်။ သင်သည် မိမိကိုယ်ကို “ငါ နုတ်ထွက်၍မဖြစ်။ ဖန်ဆင်းခံတစ်ဦး ထမ်းဆောင်သင့်သည့် တာဝန်ကို ငါ ကောင်းစွာထမ်းဆောင်ရဦးမည်ဖြစ်ပြီး ကောင်းချီးခံစားရဖို့ ငါ၏ ဆန္ဒကို ဘေးချထားရမည်” ဟူ၍ ပြောသင့်သည်။ သင်သည် ကောင်းချီးခံစားရဖို့ ဆန္ဒကို စွန့်လွှတ်ပြီး သမ္မာတရားအား လိုက်စားခြင်းလမ်းကြောင်းကို လျှောက်သောအခါတွင် သင်၏ ပခုံး၌ ဝန်တစ်ခုပေါ့သွားသည်။ သင်သည် အပျက်သဘောဆောင်နိုင်စွမ်း ရှိဦးမည်လော။ သင် အပျက်သဘောဆောင်သည့် အချိန်များရှိဆဲဖြစ်သော်လည်း သင်က ဤအရာကို သင့်အား ဘောင်ခတ်ခွင့်မပြုဘဲ သင်၏ စိတ်နှလုံးတွင် ဆက်လက်၍ ဆုတောင်းကာ ကြိုးစားသည်။ သင်၏ လိုက်စားမှု ရည်မှန်းချက်ကို ကောင်းချီးခံရခြင်းနှင့် ခရီးပန်းတိုင်တစ်ခုထားရှိခြင်းမှ သမ္မာတရား လိုက်စားခြင်းအဖြစ်သို့ ပြောင်းလဲပြီး “သမ္မာတရားကို လိုက်စားခြင်းသည် ဖန်ဆင်းခံတစ်ယောက်၏ တာဝန်ဖြစ်သည်။ ယနေ့တွင် သမ္မာတရားအချို့ကို နားလည်ရန်အတွက် ပိုကောင်းသော အကျိုးတရားမရှိ။ ဤသည်မှာ အားလုံးထဲတွင် အကြီးမြတ်ဆုံးကောင်းချီးဖြစ်သည်။ ဘုရားသခင်က ငါ့အား အလိုမရှိလျှင်ပင်၊ ငါသည် ကောင်းမွန်သော ခရီးပန်းတိုင်မရှိဘဲ ငါ၏ ကောင်းချီးခံစားရဖို့ မျှော်လင့်ချက်များ ကြေမွသွားခဲ့လျှင်ပင် ငါ၏တာဝန်ကို မှန်မှန်ကန်ကန် ထမ်းဆောင်ဦးမည်။ ငါ ထိုသို့လုပ်ဆောင်ရန် ဝတ္တရားရှိသည်။ အကြောင်းပြချက်က မည်သို့ဖြစ်စေ ငါ၏တာဝန်ထမ်းဆောင်မှုအပေါ် ထိခိုက်မည်မဟုတ်။ ဘုရားသခင်၏ စေခိုင်းချက်ကို ငါ ပြီးမြောက်ခြင်းအား ထိခိုက်မည်မဟုတ်ပေ။ ဤသည်မှာ ငါပြုမူနေထိုင်သည့် စည်းမျဉ်းဖြစ်သည်” ဟူ၍ သင် စဉ်းစားသည်။ ဤတွင် သင်သည် ဇာတိပကတိ၏ ဘောင်ခတ်မှုများကို ကျော်လွန်ပြီးဖြစ်သည်မဟုတ်လော။ အချို့က “ကောင်းပြီ၊ ငါ အပျက်သဘောဆောင်နေသေးလျှင် အဘယ်သို့ ဖြစ်မည်နည်း”ဟု ဆိုကောင်းဆိုနိုင်သည်။ သို့ဆိုလျှင် ယင်းကို ဖြေရှင်းရန် သမ္မာတရားကို တစ်ဖန်ရှာဖွေလော့။ အပျက်သဘောဆောင်ခြင်းထဲသို့ အကြိမ်မည်မျှ သင် ကျရောက်ပါစေ ယင်းကို ဖြေရှင်းရန် သမ္မာတရားကိုသာ သင် ရှာဖွေမြဲ ရှာဖွေပြီး သမ္မာတရားအတွက် ကြိုးပမ်းမြဲ ကြိုးပမ်းပါက သင်၏ အပျက်သဘောဆောင်ခြင်းမှ တဖြည်းဖြည်း သင် လွတ်လာလိမ့်မည် ဖြစ်သည်။ တစ်နေ့တွင် သင်သည် ကောင်းချီးများရရှိရန် စိတ်ဆန္ဒမရှိဟု ခံစားရလိမ့်မည်ဖြစ်ပြီး သင်၏ ခရီးပန်းတိုင်နှင့် ရလဒ်များ၏ ဘောင်ခတ်ခြင်းကို မခံရတော့သကဲ့သို့ ဤအရာများဖြင့် အသက်မရှင်ဘဲ သင်သည် ပိုမို အေးဆေးကာ ပိုမိုလွတ်လပ်သည်ကို သင် ခံစားရလိမ့်မည်။ ကောင်းချီးများနှင့် သင်၏ ခရီးပန်းတိုင်ကို ရရှိခြင်းနှင့်ဆိုင်သည့် ရည်ရွယ်ချက်အတွက် နေ့တိုင်း သင် အသက်ရှင်ခဲ့သည့် ယခင်က သင်ရှိခဲ့သည့် ဘဝသည် ပင်ပန်းစရာဖြစ်သည်ဟု သင်ခံစားရလိမ့်မည်။ နေ့စဉ် ကောင်းချီးမင်္ဂလာများ ရရှိခြင်းအတွက် စကားပြောရင်း၊ အလုပ်လုပ်ရင်းနှင့် ဦးနှောက်ခြောက်အောင် စဉ်းစားရင်း ယင်းက နောက်ဆုံးတွင် သင့်ကို မည်သည့်အရာ ရရှိစေလိမ့်မည်နည်း။ ထိုသို့သော ဘဝတစ်ခု၏ တန်ဖိုးမှာ အဘယ်နည်း။ သင်သည် သမ္မာတရားကို မလိုက်စားခဲ့ဘဲ အရေးမပါသည့် အရာများအပေါ် သင်၏ အကောင်းဆုံးသော နေ့ရက်များကို ဖြုန်းတီးခဲ့သည်။ အဆုံးတွင် သင်သည် မည်သည့် သမ္မာတရားကိုမျှ မရရှိခဲ့သကဲ့သို့ အတွေ့အကြုံဆိုင်ရာ မည်သည့်သက်သေခံချက်ကိုမျှ သင် မပြောဆိုနိုင်ခဲ့ပေ။ သင်သည် မိမိကိုယ်ကို လှည့်စားခဲ့သည်၊ အလွန်အမင်း အရှက်ရပြီး ကျရှုံးခဲ့သည်။ ပြီးလျှင် ဤအရာ၏ အကြောင်းတရားမှာ အမှန်တကယ် မည်သည့်အရာနည်း။ ယင်းမှာ ကောင်းချီးမင်္ဂလာများ ရရှိဖို့ဖြစ်သော သင်၏ ရည်ရွယ်ချက် အလွန်အားကောင်းခဲ့သောကြောင့်ဖြစ်သည်၊ သင်၏ ရလဒ်နှင့် ခရီးပန်းတိုင်တို့က သင်၏ စိတ်နှလုံးကို နေရာယူခဲ့ပြီး သင့်ကို တင်းကျပ်စွာ ချည်နှောင်ခဲ့သောကြောင့် ဖြစ်သည်။ သို့တိုင် သင်၏ အလားအလာနှင့် ကံကြမ္မာမှ သင် လွတ်လာသည့် နေ့ရက် ရောက်လာသည့်အခါ အရာရာကို သင် နောက်ချန်ပြီး ဘုရားသခင်နောက် လိုက်နိုင်လိမ့်မည်။ သင်သည် ထိုအရာများကို မည်သည့်အချိန်တွင် လုံးဝ လက်လွှတ်နိုင်လိမ့်မည်နည်း။ သင်၏ အသက်ဝင်ရောက်မှုသည် မရပ်မနား ပို၍ပို၍ နက်လာသည်နှင့်အမျှ သင်သည် သင်၏ စိတ်သဘောထား၌ ပြောင်းလဲမှုတစ်ခုကို စွမ်းဆောင်ရရှိလိမ့်မည်ဖြစ်ပြီး ယင်းမှာ ထိုအရာများကို သင် လုံးဝ လက်လွှတ်နိုင်မည့် အချိန်ဖြစ်သည်။ အချို့က “ငါ ဆန္ဒရှိသည့် မည်သည့်အချိန်တွင်မဆို‌ ထိုအရာများကို လက်လွှတ်နိုင်သည်”ဟု ဆိုကြသည်။ ဤသည်မှာ သဘာဝ နိယာမနှင့် ကိုက်ညီသလော။ (မကိုက်ညီပါ။) အခြားသူတို့က “ဤအရာအားလုံးကို ညတွင်းချင်း ငါ နားလည်ခဲ့သည်။ ငါသည် ရိုးရှင်းသော လူတစ်ဦးဖြစ်သည်၊ သင်တို့ကဲ့သို့ မရှုပ်ထွေးပါ၊ သို့မဟုတ် အထိမခံခြင်း မရှိပါ။ သင်တို့၏ ရည်မှန်းချက်များနှင့် လိုအင်ဆန္ဒများက ကြီးမားလွန်းသည်။ ယင်းက သင်တို့သည် ငါ့ထက် ပိုမိုနက်ရှိုင်းစွာ ဖောက်ပြန်ပျက်စီးသည်ကို ပြသည်” ဟု ဆိုကြသည်။ ယင်းမှာ ပြဿနာလော။ မဟုတ်ပေ။ လူသားမျိုးနွယ်အားလုံးသည် နက်ရှိုင်းမှုတွင် မကွဲပြားဘဲ တူညီသည့် ဖောက်ပြန်ပျက်စီးသော သဘာဝရှိကြသည်။ ၎င်းတို့ကြားတွင် တစ်ခုတည်းသော ကွာခြားချက်မှာ ၎င်းတို့က လူ့သဘာဝ ရှိမရှိဆိုသည်နှင့် မည်သည့်လူစားမျိုး ဖြစ်ကြသည်ဆိုသည်တို့တွင် တည်ရှိလေသည်။ သမ္မာတရားကို ချစ်ကာ လက်ခံသောသူတို့သည် မိမိတို့ကိုယ်ပိုင် ဖောက်ပြန်ပျက်စီးသော စိတ်သဘောထားအပေါ် အတော်အတန် နက်ရှိုင်း၊ ရှင်းလင်းသော အသိရှိနိုင်စွမ်းရှိကြပြီး အခြားသူတို့က ထိုသို့သောလူများသည် နက်နဲစွာ ဖောက်ပြန်ပျက်စီးကြသည်ဟု တလွဲ ထင်တတ်ကြသည်။ သမ္မာတရားကို မချစ်၊ သို့မဟုတ် လက်မခံသောသူတို့သည် ၎င်းတို့၌ ဖောက်ပြန်ပျက်စီးခြင်းမရှိ၊ နောက်ထပ် ကောင်းမွန်သော အပြုအမူ အနည်းငယ်ဖြင့် ၎င်းတို့ သန့်ရှင်းသော လူများ ဖြစ်ကြလိမ့်မည်ဟု အမြဲ တွေးထင်နေကြသည်။ ဤရှုထောင့်အမြင်သည် သိသိသာသာ မခိုင်လုံပေ။ အမှန်တွင် ယင်းမှာ ၎င်းတို့၏ ဖောက်ပြန်ပျက်စီးခြင်းက ပေါ့တန်ခြင်း မဟုတ်ဘဲ သမ္မာတရားကို ၎င်းတို့ နားမလည်ကြသကဲ့သို့ မိမိတို့၏ ဖောက်ပြန်ပျက်စီးခြင်းနှင့်ဆိုင်သည့် အနှစ်သာရနှင့် အမှန်တရားအပေါ် ရှင်းလင်းသည့် အသိမရှိကြခြင်း ဖြစ်သည်။ အတိုချုပ်အားဖြင့် ဘုရားသခင်ကို ယုံကြည်ဖို့ရန် သမ္မာတရားကို လက်ခံရမည်ဖြစ်ပြီး သမ္မာတရားကို လက်တွေ့လုပ်ဆောင်ကာ စစ်မှန်မှုထဲသို့ ဝင်ရောက်ရမည်ဖြစ်သည်။ ပြီးလျှင်် မိမိ၏ လိုက်စားမှုနှင့်ဆိုင်သည့် မမှန်သည့် ဦးတည်ချက်နှင့် လမ်းကြောင်းကို မပြောင်းလဲနိုင်မီ၊ ကောင်းချီးများလိုက်စားခြင်းနှင့် အန္တိခရစ်များ၏ လမ်းကြောင်းကို လျှောက်ခြင်းနှင့်ဆိုင်သည့် ပြဿနာကို လုံးဝ မဖြေရှင်းနိုင်မီ မိမိတို့ အသက်စိတ်သဘောထားတွင် ပြောင်းလဲမှုများ စွမ်းဆောင်ရရှိရမည် ဖြစ်သည်။ ဤနည်းဖြင့် ဘုရားသခင်၏ ကယ်တင်ခြင်းနှင့် စုံလင်စေခြင်း ခံရနိုင်ပေသည်။ လူကို တရားစီရင်ကာ သန့်စင်စေရန် ဘုရားသခင် ဖော်ပြသည့် သမ္မာတရားအားလုံးသည် ဤပန်းတိုင်ကို ဦးတည်လုပ်ဆောင်ပေသည်။

ယခုတွင် သင်တို့အထဲ၌ ဘုရားဖြစ်ရန် လိုအင်ဆန္ဒ ရှိသေးသည့်သူ တစ်ဦးတလေရှိသလော။ (မရှိပါ။) သင့်တွင် ဤလိုအင်ဆန္ဒမရှိသည့် အကြောင်းရင်းမှာ သင်မလုပ်ဆောင်ရဲသောကြောင့် ဖြစ်သလော၊ သို့မဟုတ် သင့်တွင် မျှော်လင့်ချက်မရှိသောကြောင့်၊ သို့မဟုတ် သင့်လျော်သော နောက်ခံနှင့် ပတ်ဝန်းကျင်မရှိသောကြောင့် ဖြစ်သလော။ ပြောဖို့ရန် ခက်သည်။ ရှေးဦးစွာ ဘုရားဖြစ်ခြင်းကို တက်ကြွစွာ လိုက်စားလိုသည့်သူ တစ်ဦးမျှမရှိသည်မှာ သေချာသည်။ သို့ရာတွင် အထူးအခြေအနေများ၌ သင့်အား ကြည်ညိုသော၊ သင့်အား ချီးမြှောက်သော၊ မကြာခဏ ချီးမွမ်းပြီး ချီးကျူးသောသူများ ရှိလျှင်လည်းကောင်း၊ ၎င်းတို့၏ စိတ်နှလုံးထဲ၌ သင်က အဆင့်အတန်းရှိပြီး ၎င်းတို့က သင့်အား ပြည့်စုံမှုရှိပြီး အင်အားကြီးမားသောပုံရိပ်မျိုးအဖြစ် မရည်ရွယ်ဘဲ သတ်မှတ်ခဲ့လျှင်လည်းကောင်း၊ သင်က ဘုရားဖြစ်သည်ဟု ၎င်းတို့က သက်သေမခံခဲ့သော်လည်း၊ သင်က လူသားဖြစ်သည်ကို ၎င်းတို့ သိသော်လည်း ၎င်းတို့က သင့်အား ကြည်ညိုဆဲ၊ နာခံဆဲဖြစ်ပြီး သင်က ဘုရားဖြစ်သကဲ့သို့ သင့်ကို ဆက်ဆံခဲ့လျှင်လည်းကောင်း သင်သည် စိတ်အတွင်းတွင် မည်သို့ ခံစားရမည်နည်း။ ထူးခြားသော ပျော်ရွှင်မှုနှင့် ကျေနပ်မှုကို ခံစားရမည် မဟုတ်လော။ (ဟုတ်ပါသည်။) ဤသည်မှာ သင့်တွင် ဤလိုအင်ဆန္ဒ ရှိဆဲဖြစ်သည်ကို သက်သေပြဖို့ လုံလောက်သည်။ ဖောက်ပြန်ပျက်စီးသော စိတ်သဘောထားတစ်ခု ရှိသူတိုင်းတွင် ဘုရားဖြစ်လိုသည့် ဆန္ဒရှိသည်။ သင့်အား မည်သူကမျှ ဘုရားကဲ့သို့ မဆက်ဆံသောအခါ၌ သင်က အရည်အချင်းမပြည့်မီဟု ခံစားရခြင်းသာ ဖြစ်သည်။ သင်က အရည်အချင်း ပြည့်မီသည်ဟု ခံစားရသောအခါ၊ ပတ်ဝန်းကျင်က သင့်တော်သည်၊ အခြေအနေများက လုံလောက်သည်ဟု သင်ခံစားရသောအခါ သင်သည် သင့်ကိုယ်သင် ထိုနေရာသို့ မြှင့်တင်လိမ့်မည်။ သို့တည်းမဟုတ် သင်က သင့်ကိုယ်သင် မြှင့်တင်မည်မဟုတ်ခြင်း ဖြစ်ကောင်းဖြစ်နိုင်သော်လည်း အခြားလူများက သင့်အား တစ်စိုက်မတ်မတ် မြှင့်တင်သောအခါ၌ သင်သည် နှိမ့်ချဦးမည်လော။ သင်သည် မြှင့်တင်မှုကို “သံသယမရှိဘဲ” လက်ခံလိမ့်မည်။ ဤတွင် မည်သည့်အရာ ဖြစ်နေသနည်း။ စာတန်၏ သဘာဝသည် လူတို့၏ အတွင်း၌ ယင်းဘာသာ အမြစ်တွယ်စေပြီးဖြစ်ကာ မဖြေရှင်းရသေးဘဲ ကျန်ရှိနေသည်။ လူတို့သည် မည်သည့်အခါမျှ လူသက်သက် မဖြစ်လိုပေ။ အစဉ်သဖြင့် ဘုရား ဖြစ်လိုသည်။ လူတစ်ဦးက ဆန္ဒရှိရုံသက်သက်ဖြင့် ဘုရားဖြစ်နိုင်သလော။ စာတန်က အစဉ်သဖြင့် ဘုရားဖြစ်လိုပြီး စာတန် အဘယ်သို့ ဖြစ်သွားခဲ့သနည်း။ ကောင်းကင်ဘုံမှ မြေကြီးသို့ နှင်ချခြင်းခံရသည်။ ဤသည်မှာ ဘုရားဖြစ်လိုသည့်အတွက် စာတန်၏ ကံကြမ္မာဖြစ်သည်။ ငါ့ကို ပြောလော့။ ငါ၏ ပင်ကိုလက္ခဏာ၊ အဆင့်အတန်း၊ အနှစ်သာရနှင့်ပတ်သက်ပြီး ငါသည်အဘယ်သို့ ခံစားရသနည်း။ သင်တို့ အသေအချာပင် မသိပေ။ မည်သည့်အရာကိုမျှ ငါမခံစားရ။ အရာရာတိုင်းက အလွန်ပင် ပုံမှန်ဖြစ်သည်။ လူ့ဇာတိခံဘုရားသခင်သည် အထူးလက်တွေ့ကျပြီး ပုံမှန်ဖြစ်သည်။ သူနှင့်ပတ်သက်ပြီး သဘာဝလွန်ဖြစ်သည့်အရာ တစ်ခုမျှ မရှိ။ သူ့တွင် သီးသန့်ခံစားချက်များ မရှိ။ သင်ထင်မြင်သည့်အရာကို သင်သိသည်။ သင်နှစ်သက်သည့်အရာကို သင်သိသည်။ မည်သည့်မိသားစု၌ သင်မွေးဖွားခဲ့သည်ကို သင်သိသည်။ သင်မည်မျှ အသက်ကြီးသည်ကိုလည်းကောင်း၊ ပညာရေးမည်မျှ ရရှိပြီးဖြစ်သည်ကိုလည်းကောင်း သင်သိသည်။ သင်မည်သည့်ပုံစံရှိသည်ကို သင်သိသည်။ သို့သော် သင်၏ အတွင်းပိုင်းအနှစ်သာရကို သိခြင်းက ပုံမှန်ဖြစ်သလော၊ သို့မဟုတ် မသိခြင်းက ပုံမှန်ဖြစ်သလော။ (မသိခြင်းက ပုံမှန်ဖြစ်သည်။) ဤအရာနှင့်ပတ်သက်ပြီး မည်သည့်ခံစားချက်မျှ မရှိခြင်းက ပုံမှန်ဖြစ်သည်။ ဤအရာနှင့်ပတ်သက်ပြီး ခံစားချက်များရှိခြင်းက သဘာဝလွန် ဖြစ်လိမ့်မည်။ ဇာတိပကတိနှင့် သက်ဆိုင်မည်မဟုတ်။ ပြီးလျှင် ပုံမှန်လူ့သဘာဝဖြစ်မည်မဟုတ်။ သဘာဝလွန်ခြင်းသည် ပုံမှန်မဟုတ်ပေ။ ပုံမှန်မဟုတ်သော နည်းများဖြင့် အစဉ်ပြုမူပြီး ပုံမှန်မဟုတ်သော ခံစားချက်များ ရှိသောသူများသည် ဝိညာဉ်ဆိုးများဖြစ်ကာ သေမျိုးဖြစ်သောသူများမဟုတ်။ ငါသည်မည်သူဖြစ်သည်ကို ငါသိသလောဟု လူအချို့က ငါ့ကိုမေးကြသည်။ ငါ့ကို ပြောလော့။ ငါသိမည်လော။ သိသင့်သလော။ ငါ့တွင် ဆင်ခြင်မှုစနစ်ရှိပြီး ပုံမှန်လူ့သဘာဝ၏ တွေးခေါ်ပုံများရှိသည်။ ငါ့တွင် ပုံမှန်အတွေးများနှင့် ဇာတိပကတိ၏ ပုံမှန်လုပ်ရိုးလုပ်စဉ် အသက်တာရှိသည်။ ငါ့တွင် ပုံမှန်လူ့သဘာဝ၏ အသိတရား၊ ဆင်ခြင်တုံတရားနှင့် ဝေဖန်အကဲဖြတ်မှုရှိသည်။ ပြီးလျှင် ငါ့တွင် ကျင့်ကြံပြုမူခြင်း၊ အမှုအရာများကို ကိုင်တွယ်ခြင်း၊ ပုံမှန်လူ့သဘာဝရှိသည့် အခြားလူများနှင့် အပြန်အလှန် ဆက်ဆံခြင်းတို့နှင့်ဆိုင်သော စည်းမျဉ်းများရှိသည်။ ဤအရာများအားလုံးက ရှင်းလင်းသည်။ အမှုအရာများအား မည်သို့လုပ်ဆောင်ရမည်၊ မတူညီသောလူများအား မည်သို့ဆက်ဆံရမည်၊ လူတို့ကို မည်သို့ကူညီရမည်၊ မည်သည့်လူများကို ကူညီရမည်တို့နှင့်ပတ်သက်၍ ငါ့တွင် ဤစည်းမျဉ်းများအားလုံး ရှိသည်။ ပုံမှန်လူ့သဘာဝ၌ နေထိုင်ခြင်းနှင့် ငါလုပ်ဆောင်သင့်သောအရာများအား လုပ်ဆောင်ခြင်းသည် ပုံမှန်လူ့သဘာဝဖြစ်သည်။ ဤအရာနှင့်ပတ်သက်ပြီး သဘာဝလွန်ဖြစ်ခြင်း လုံးဝမရှိ။ သဘာဝလွန် ဖြစ်သောအရာများကို ဘုရားသခင်က မလုပ်ဆောင်ပေ။ ငါမသိသည်မှာ ပုံမှန်ဖြစ်သည်။ သိခဲ့လျှင် ပြဿနာဖြစ်မည့် သဘောသက်ရောက်လိမ့်မည်။ အဘယ်ကြောင့် ပြဿနာဖြစ်မည့် သဘောသက်ရောက်မည်နည်း။ ငါသိခဲ့လျှင် ငါ့၌ ဝန်ထုပ်ဝန်ပိုးတစ်ခုရှိမည်၊ အမှုအရာများစွာ ပါဝင်ပတ်သက်လိမ့်မည်ဖြစ်ပြီး ယင်းတို့သည် တစ်ခုနှင့်တစ်ခု ကွဲလွဲနေလိမ့်မည်၊ အကြောင်းမှာ ငါ သိထားသောအပိုင်းက ဇာတိပကတိ၊ သို့မဟုတ် ရုပ်ဝတ္ထုကမ္ဘာနှင့် သက်ဆိုင်မည် မဟုတ်ဘဲ ယင်းသည် သဘာဝလွန်ဖြစ်လိမ့်မည်ဖြစ်ပြီး ဤကမ္ဘာလောက၏ အမှုအရာများနှင့် ကွဲလွဲလိမ့််မည်။ ဝိညာဉ်ရေးရာနယ်ပယ်တွင်ရှိသော အရာများကို အချို့လူများက မြင်နိုင်သကဲ့သို့ ဖြစ်သည်။ ၎င်းတို့သည် ဇာတိပကတိနှင့် ရုပ်ဝတ္ထုကမ္ဘာတွင် အသက်ရှင်သည်။ သို့တိုင်အောင် လူသားမဟုတ်သော၊ ရုပ်ဝတ္ထုမဟုတ်သော လောကကို မြင်ရသည်။ ကမ္ဘာလောကနှစ်ခုကို ၎င်းတို့မြင်နိုင်ပြီး ထူးဆန်းသောအရာအချို့ကို ပြောနိုင်သည်။ ဤသည်မှာ ပုံမှန်မဟုတ်။ ဤသည်မှာ အခြားလူများ၏ အတွေးနှင့် အလုပ်အပေါ် လွှမ်းမိုးလိမ့်မည်။ ဤအရာအပြင် ဘုရားသခင်ကို ယုံကြည်ပြီး သမ္မာတရားအား လိုက်စားသောသူများအနေဖြင့် ဝိညာဉ်ရေးရာနယ်ပယ်၏ အမှုအရာများနှင့်ပတ်သက်ပြီး တစ်စုံတစ်ခုကို သိရန် လိုအပ်ဆဲဖြစ်သည်။ လူတို့သိဖို့ မဖြစ်နိုင်သောအရာ များစွာရှိသည်။ သို့သော် မသိခြင်းက အမှန်တကယ်တွင် ဆုံးရှုံးခြင်းမဟုတ်။ သိခြင်း၊ သို့မဟုတ် မသိခြင်းတို့နှစ်ခုလုံးက ပြဿနာမရှိ။ ဘုရားသခင်က သေမျိုးဖြစ်သောသူတို့ နားလည်နိုင်သော၊ သိနိုင်သော၊ ခံစားနိုင်သောအရာများ၏ အတိုင်းအတာကို ဘောင်ခတ်ပြီး ဖြစ်သည်။ ဘုရားသခင်က သင့်အား အရာရာတိုင်းကို ပြောပြီး သင်သိရန် လိုအပ်သောအရာထက် တစ်ခွန်းလျှော့၍ စကားမပြောသကဲ့သို့ သင် မသိလိုက်ခြင်းမျိုး ဖြစ်သွားအောင် မလုပ်ပေ။ သို့ရာတွင် သူသည် သင်သိရန် မလိုအပ်သောအရာကိုမူ လုံးလုံးလျားလျား ပိတ်ဆို့ထားသည်။ သူသည် သင့်အား ပြောမည်မဟုတ်။ ပြီးလျှင် သင်၏ အတွေးများနှင့် စိတ်ကို နေမထိထိုင်မထိဖြစ်ရန် လုပ်ဆောင်မည်မဟုတ်။ အခြားသွင်ပြင်လက္ခဏာတစ်ခုမှာ သေမျိုးဖြစ်သော သူများအတွက် ဝိညာဉ်ရေးရာနယ်ပယ်၏ အမှုကိစ္စများသည် နက်နဲမှုအမျိုးအစားတစ်ခု၊ ထူးဆန်းသော သဘာဝဖြစ်စဉ်၊ သို့မဟုတ် မတူညီသောကမ္ဘာလောက၏ အမှုကိစ္စများ ဖြစ်သည်။ လူတို့၏ စိတ်နှလုံးတွင် ယင်းတို့အကြောင်းကို အနည်းငယ်သိလိုကြသည်။ သို့သော် ထိုသို့သော အသိအမြင်ဖြင့် မည်သည့်အရာကို သင်လုပ်ဆောင်နိုင်သနည်း။ သင်သည် ယင်းကို မှန်ကန်ကြောင်း ကြည့်ရှုစစ်ဆေးနိုင်သလော။ သင်သည် ယင်းတွင် တစ်စိတ်တစ်ပိုင်း ပါဝင်နိုင်သလော။ ဝိညာဉ်ရေးရာနယ်ပယ်၏ အမှုကိစ္စများစွာသည် လျှို့ဝှက်ချက်ဖြစ်ပြီး အချိန်မကျမီတွင် ထုတ်ဖော်၍ မရနိုင်ပေ။ ဤသည်မှာ မည်သူကမျှ ပါဝင်မလုပ်ဆောင်နိုင်သည့် အရာတစ်ခု ဖြစ်သည်။ အကန့်အသတ်ရှိသော ပမာဏကို သိခြင်းက လုံလောက်သည်။ ဘုရားသခင်သည် ဤကမ္ဘာလောကနှင့် ဤလူသားမျိုးနွယ်အပေါ် အချုပ်အခြာအာဏာကိုင်စွဲပြီး ယင်း၌ နက်နဲမှုများပြားစွာ ရှိသည်။ ငါတို့နားလည်သင့်သည့်အရာမှာ ဘုရားနှုတ်ကပတ်တော်များနှင့် သမ္မာတရားများအပြင် ဘုရား၏ ရည်ရွယ်ချက်များ ဖြစ်သည်။ သမ္မာတရားစစ်မှန်မှုများအတွင်းသို့ ငါတို့ ဝင်ရောက်သင့်သည်။ လူတို့ ထိတွေ့နိုင်သော၊ နားလည်နိုင်သော၊ သိမြင်နိုင်သော ဘုရားသခင်၏ အချုပ်အခြာအာဏာအလုံးစုံအပေါ် ကျိုးနွံနာခံခြင်းကို ရရှိသင့်ပြီး ထို့နောက်တွင် ဘုရားသခင်ကို ကြောက်ရွံ့လာနိုင်သင့်သည်။ ဘုရားသခင်အား သင်၏ ဖန်ဆင်းရှင်အဖြစ် အသိအမှတ်ပြုသင့်သည်။ ဘုရားသခင်သည် အရာခပ်သိမ်းအပေါ် အချုပ်အခြာအာဏာ ရှိသည်ဆိုသည့်အချက်ကို အသိအမှတ်ပြုသင့်သည်။ နောက်ဆုံးတွင် “ယေဟောဝါသည် ပေးတော်မူ၏၊ ပြီးလျှင် ယေဟောဝါသည် ပြန်နုတ်သိမ်းတော်မူ၏၊ ယေဟောဝါ၏ နာမတော်သည် မင်္ဂလာရှိပါစေ။” (ယောဘ ၁:၂၁) ဟု ယောဘပြောခဲ့သည့် ထိုစကားများကို ပြောဆိုနိုင်သင့်သည်။ ဤရလဒ်ကို ရရှိရန်အတွက် လူတို့သည် မည်သည့်အရာကို တွေ့ကြုံရမည်နည်း။ ၎င်းတို့သည် တရားစီရင်ခြင်းနှင့် ပြစ်တင်ဆုံးမခြင်း၊ ပြုပြင်ခံရခြင်း၊ စမ်းသပ်ခံရခြင်းနှင့် စစ်ဆေးခံရခြင်းကို တွေ့ကြုံရမည်ဖြစ်ပြီး ဘုရားသခင်စီစဉ်သည့် အခြေအနေအမျိုးအစားတိုင်းကို တွေ့ကြုံရမည်။ ပြီးလျှင် ယင်းမှတစ်ဆင့် ဘုရားသခင်၏ လုပ်ဆောင်မှုများကို သိရမည်။ ဘုရားသခင်၏ စိတ်သဘောထားကို သိရမည်။ ဖန်ဆင်းရှင်၏ အနှစ်သာရကို နားလည်ရမည်။ ပြီးလျှင် မိမိတို့ကိုယ်ကိုနှင့် မိမိတို့ဖတ်သော ဘုရားနှုတ်ကပတ်တော်များကြားတွင်ဖြစ်စေ၊ မိမိတို့ကြားခဲ့သော တရားဒေသနာများကြားတွင်ဖြစ်စေ နှိုင်းယှဉ်ချိန်ဆကြည့်နိုင်ရမည်။ နောက်ဆုံးတွင် ဘုရားသခင်က ၎င်းတို့ကို မည်သို့ဆက်ဆံပါစေ၊ ဘုရားသခင်က ပြန်နုတ်သည်ဖြစ်စေ၊ ပေးအပ်သည်ဖြစ်စေ ၎င်းတို့သည် ဘုရားသခင်၏ လုပ်ဆောင်မှုများအပေါ် မျှတပြီး တိကျမှန်ကန်သော နားလည်မှုကို ရရှိသည်။ ပြီးလျှင် ယင်းတို့ကို ဖန်ဆင်းခံများ၏ ဆင်ခြင်တုံတရားနှင့် လိုက်လျောညီထွေဖြစ်သောပုံစံဖြင့် ကျိုးနွံနာခံပြီး လက်ခံကြသည်။ ဤသည်မှာ ဘုရားသခင်က ဖြစ်မြောက်ရန် ရည်ရွယ်သော အရာဖြစ်သည်။

ယနေ့အတွက် ငါတို့၏ မိတ်သဟာယအကြောင်းအရာကို ပြန်ပြောကြစို့။ သမ္မာတရားကို လိုက်စားသောသူတို့၏ သရုပ်သကန်များနှင့် သမ္မာတရားကို မလိုက်စားသောသူတို့၏ သရုပ်သကန်များမှာ အခြေခံအားဖြင့် ဤသုံးမျိုးဖြစ်သည်။ ဤလူသုံးမျိုးကြားတွင် အသေးစိတ်ခြားနားချက်ကို ငါ ပြုလုပ်ခဲ့ပြီး ဖြစ်သည်။ ပထမအမျိုးအစားမှာ ဝိညာဉ်ရေးရာ နားလည်သဘောပေါက်မှု မရှိသောလူတို့ဖြစ်သည်။ ဒုတိယအမျိုးအစားမှာ ဝိညာဉ်ရေးရာ နားလည်သဘောပေါက်မှု ရှိသော်လည်း သမ္မာတရားကို မလိုက်စားသောလူတို့ဖြစ်သည်။ ပြီးလျှင် တတိယအမျိုးအစားမှာ ဝိညာဉ်ရေးရာ နားလည်သဘောပေါက်မှု ရှိပြီး သမ္မာတရားကို လိုက်စားသောသူတို့ဖြစ်သည်။ ဤလူသုံးမျိုးတွင် မည်သည့်လူမျိုးက သမ္မာတရားစစ်မှန်မှုများထဲသို့ ဝင်ရောက်ပြီး ကယ်တင်ခြင်းကို ရရှိနိုင်ဖို့ မျှော်လင့်ချက်ရှိသနည်း။ (တတိယအမျိုးအစား ဖြစ်သည်။) မည်သည့်လူစားမျိုးက သမ္မာတရားစစ်မှန်မှုများထဲသို့ ဝင်ရောက်ဖို့၊ ဆိုလိုသည်မှာ သမ္မာတရားစစ်မှန်မှုများ ရှိသည့်သူတစ်ဦးအဖြစ် ဖြစ်ပေါ်ပြီး ပြောင်းလဲနိုင်ဖို့ မျှော်လင့်ချက်ရှိသနည်း။ (ဒုတိယအမျိုးအစား ဖြစ်ပါသည်။) ဤသို့ဆိုလျှင် ပထမလူအမျိုးအစားသည် သေဖို့ ထိရောက်စွာပင် စီရင်ခံရသလော။ ဝိညာဉ်ရေးရာ နားလည်သဘောပေါက်မှု မရှိသောသူတို့သည် ဝိညာဉ်ရေးရာ နားလည်သဘောပေါက်မှု ရှိသောသူတို့အဖြစ်၊ သို့မဟုတ် တစ်ဝက်တစ်ပျက် နားလည်သဘောပေါက်မှုရှိသောသူတို့အဖြစ် ပြောင်းလဲသွားနိုင်သလော။ နားလည်သဘောပေါက်မှုတစ်ဝက်မျှ ရှိသောသူများသည် မျှော်လင့်ချက် အနည်းငယ်ရှိသည်။ ၎င်းတို့သည် ဝိညာဉ်ရေးရာ နားလည်သဘောပေါက်မှု လုံးဝ မရှိသောသူများထက် အတော်အတန် သာလေသည်။ ဤလူအမျိုးအစားသုံးခုတွင် မည်သည့်အမျိုးအစားက ကယ်တင်ခြင်းခံရရန် ပို၍ကြီးသော မျှော်လင့်ချက်ရှိသနည်း။ (တတိယအမျိုးအစား ဖြစ်ပါသည်။) ဒုတိယလူအမျိုးအစားက အဘယ်သို့ရှိသနည်း။ (၎င်းတို့၏ တစ်ကိုယ်ရေလိုက်စားမှုအပေါ်တွင် မူတည်သည်။ ၎င်းတို့သည် အမှန်တကယ် ပြောင်းလဲနိုင်လျှင်၊ နောင်တရပြီး သမ္မာတရားကို လိုက်စားနိုင်လျှင် ကယ်တင်ခြင်းခံရရန် မျှော်လင့်ချက်ရှိနိုင်သည်။) သင်တို့ကို ငါပွင့်လင်းစွာ ပြောမည်။ သင်တို့သည် ဒုတိယလူအမျိုးအစားအပေါ်တွင် အပြည့်အဝ မရှင်းလင်းသေးပေ။ ဒုတိယလူအမျိုးအစားသည် ဝိညာဉ်ရေးရာ နားလည်သဘောပေါက်မှု ရှိသော်လည်း ၎င်းတို့အားလုံးသည် သမ္မာတရားကို မလိုက်စားသောသူများ ဖြစ်သည်။ ပြီးလျှင် ဤသည်မှာ အလွန်အရေးပါသည်။ ၎င်းတို့တွင် ဝိညာဉ်ရေးရာ နားလည်သဘောပေါက်မှု ရှိသည်ဖြစ်စေ၊ မရှိသည်ဖြစ်စေ သမ္မာတရားကို မလိုက်စားသရွေ့ ကယ်တင်ခြင်းကို လုံးဝ မရရှိနိုင်ပေ။ ဤနေရာတွင် ငါအလေးပေးလိုသောအရာမှာ ဝိညာဉ်ရေးရာ နားလည်သဘောပေါက်မှု မရှိသော ပထမလူအမျိုးအစား ဖြစ်သည်။ ၎င်းတို့သည် ဝိညာဉ်ရေးရာ နားလည်သဘောပေါက်မှု မရှိသော်လည်း လူ့သဘာဝကောင်းရှိပြီး ဘုရားသခင်အတွက် မိမိတို့ကိုယ်ကို လိုလိုလားလားဖြင့် အသုံးခံသည် ဆိုပါစို့။ ဘုရားသခင်ပြောဆိုသမျှတိုင်းကို အရေးစိုက်ပြီး ကျိုးနွံနာခံသော စိတ်နှလုံးရှိသည်ဆိုပါစို့။ ၎င်းတို့သည် သမ္မာတရားနှင့်ပတ်သက်လျှင် သဘောပေါက်နားလည်နိုင်စွမ်း မရှိခြင်းသာ ဖြစ်သော်လည်း ဘုရားနှုတ်ကပတ်တော်အချို့ကို ၎င်းတို့ နားလည်နိုင်ပြီး ထိုနှုတ်ကပတ်တော်တို့နှင့် နှိုင်းယှဉ်ချိန်ဆ၍ မိမိတို့ကိုယ်ကို စစ်ဆေးနိုင်သည်၊ ပြီးလျှင် ယင်းတို့ကို လက်တွေ့လုပ်ဆောင်ပြီး ဝင်ရောက်နိုင်သည်ဆိုပါစို့။ ဤသို့သောလူတို့သည် ကယ်တင်ခြင်းခံရဖို့ မျှော်လင့်ချက်ရှိသည်။ ၎င်းတို့သည် ဤသို့သော အတွေ့အကြုံကို အတန်ကြာကြုံရခြင်းအားဖြင့် ဝိညာဉ်ရေးရာ နားလည်သဘောပေါက်မှုကို တဖြည်းဖြည်းချင်း ရလာနိုင်သည်။ ၎င်းတို့သည် ဘုရားနှုတ်ကပတ်တော်များကို ရည်ရွယ်ချက်ရှိစွာ ဖတ်လေလေ၊ သန့်ရှင်းသောဝိညာဉ်တော်က ၎င်းတို့ကို ဉာဏ်အလင်းဖွင့်ပြလေလေဖြစ်သည်။ ၎င်းတို့သည် ဘုရားနှုတ်ကပတ်တော်အပေါ် ၎င်းတို့နားလည်သည့် မည်သည့်အရာဖြင့်မဆို ၎င်းတို့၏ ကိုယ်ပိုင်အခြေအနေများဖြင့် နှိုင်းယှဉ်ချိန်ဆကြည့်နိုင်သည်။ ဘုရားသခင်၏ ပြုပြင်ခြင်း၊ တရားစီရင်ခြင်း၊ ပြစ်တင်ဆုံးမခြင်း၊ စမ်းသပ်ခြင်းများနှင့် စစ်ဆေးခြင်းတို့ကို လက်ခံနိုင်သည်။ ဤအတွက် အဖိုးအခပေးဆပ်နိုင်သည်။ ပြီးလျှင် အဆုံးတွင် ၎င်းတို့၏ စိတ်သဘောထားတွင် လိုက်လျောညီထွေသော ပြောင်းလဲမှုအချို့ကို ရရှိနိုင်သည်။ ဤသို့သောလူတို့သည် သမ္မာတရားကို လိုက်စားသူများအဖြစ်လည်း အကျုံးဝင်သည်။ ၎င်းတို့ကို သမ္မာတရားကို လိုက်စားသူများအဖြစ် သတ်မှတ်သည့်အတွက် ၎င်းတို့သည် ကယ်တင်ခြင်းရဖို့ မျှော်လင့်ချက်ရှိသလော။ (ရှိပါသည်။) ရှိသည်။ ထို့ကြောင့် ဤသို့သောလူတို့ကို သေခြင်းဆီသို့ လွှဲအပ်၍ မရနိုင်ပေ။ ဆန့်ကျင်ဘက်အနေဖြင့် သမ္မာတရားကို နားလည်နိုင်ပြီး မိမိတို့ကိုယ်ကို သမ္မာတရားဖြင့် နှိုင်းယှဉ်ချိန်ဆ ကြည့်နိုင်သော်လည်း မည်သည့်အခါမျှ သမ္မာတရားထံသို့ မဝင်ရောက်သည့်လူစားမျိုးအတွက်မူ အဆုံးသတ်က မည်သည့်အရာဖြစ်မည်ကို ပြောရန် ခက်သည်။ ဤပြဿနာ၏ အရင်းအမြစ်မှာ အဘယ်နည်း။ (သမ္မာတရားအပေါ် ၎င်းတို့၏ သဘောထားဖြစ်သည်။) ယင်းသည် သမ္မာတရားအပေါ် ၎င်းတို့၏ သဘောထားဖြစ်သည်။ ယင်းမှာ မကြည်ညိုခြင်းနှင့် မထီမဲ့မြင်ပြုခြင်း ဖြစ်သည်။ “မထီမဲ့မြင်ပြုခြင်း”ဆိုသည်မှာ မည်သည့်အရာကို ဆိုလိုသနည်း။ သမ္မာတရားအား လက်မခံခြင်းကို ဆိုလိုသည်။ သမ္မာတရားအား အထင်သေးခြင်းကို ဆိုလိုသည်။ ဘုရားနှုတ်ကပတ်တော်များအား သမ္မာတရားအဖြစ် အသိအမှတ်မပြုခြင်းနှင့် အလေးအနက်မထားခြင်းကို ဆိုလိုသည်။ ၎င်းတို့ကြားသည့်အရာ၏ မည်မျှကို ၎င်းတို့နားလည်သည်ဖြစ်စေ သမ္မာတရားကို လက်တွေ့မလုပ်ဆောင်ပေ။ ပြီးလျှင် သမ္မာတရားဖြင့် မိမိတို့ကိုယ်ကို နှိုင်းယှဉ်ချိန်ဆကြည့်သည့် အတိုင်းအတာက မည်သို့ဖြစ်စေ ၎င်းတို့က မည်သည့်လူအမျိုးအစားဖြစ်သည်ကို ၎င်းတို့သိလျှင်ပင် နောင်တမရသေးပေ။ ဘုရားသခင်အား ယုံကြည်ခြင်း၏ အရေးပါဆုံးသော ကဏ္ဍမှာ သမ္မာတရားအား လက်တွေ့လုပ်ဆောင်ခြင်းဖြစ်သည်ကို ၎င်းတို့ သိသော်လည်း “လက်တွေ့လုပ်ဆောင်ခြင်း” ဆိုသည့် စကားသည် ဤသို့သောလူတို့နှင့် မသက်ဆိုင်ပေ။ ဤသို့သောလူတို့သည် အလွယ်တကူ ကယ်တင်ခြင်းမခံရပေ။

ယခုတွင် သမ္မာတရားအား လိုက်စားခြင်းကို ငါတို့ မည်သို့အဓိပ္ပာယ်သတ်မှတ်သင့်သနည်း။ သမ္မာတရားအား လိုက်စားခြင်းဆိုသည်မှာ အတိအကျဆိုရလျှင် မည်သည့်အရာဖြစ်သနည်း။ ငါ့ကို မည်သူပြောနိုင်သနည်း။ (ဘုရားနှုတ်ကပတ်တော်ကို လက်ခံနိုင်ခြင်း၊ မိမိကိုယ်ကို ဆင်ခြင်သုံးသပ်ပြီး မိမိကိုယ်ကိုဖြင့် နှိုင်းယှဉ်ချိန်ဆကြည့်ရန် ဘုရားနှုတ်ကပတ်တော်ကို အသုံးပြုနိုင်ခြင်းနှင့် အသက်ဝင်ရောက်မှုလည်းရှိခြင်း ဖြစ်သည်။ ဤသည်ကသာ သမ္မာတရားအား လိုက်စားခြင်းအဖြစ် အကျုံးဝင်သည်။) မှန်သည်။ သမ္မာတရားအား လက်ခံနိုင်ခြင်းနှင့် သမ္မာတရားအား လက်တွေ့လုပ်ဆောင်နိုင်ခြင်းအားဖြင့်သာ လူတစ်ယောက်သည် သမ္မာတရားကို လိုက်စားသူဖြစ်သည်။ ဘုရားနှုတ်ကပတ်တော်ကို လက်မခံသကဲ့သို့ မိမိကိုယ်ကို မဆင်ခြင်မသုံးသပ်နိုင်လျှင် ထိုသူ၌ အသက်ဝင်ရောက်မှု ရှိမည်မဟုတ်။ ပြီးလျှင် သမ္မာတရားအား လိုက်စားသူ မဟုတ်ပေ။ ထို့ကြောင့် သမ္မာတရားအား လိုက်စားခြင်းနှင့် အသက်ဝင်ရောက်မှုကြား၌ တိုက်ရိုက်ဆက်စပ်မှုရှိသည်။ လူတစ်ဦးသည် စကားများနှင့် အယူဝါဒများစွာကို ပြောဆိုနိုင်သော်လည်း သမ္မာတရားကို မည်သည့်အခါမျှ လက်တွေ့မလုပ်ဆောင်ခဲ့လျှင်၊ ဘုရားသခင်အပေါ် စစ်မှန်သော ယုံကြည်ခြင်းမရှိလျှင်၊ တစ်စုံတစ်ခုက ဘုရားသခင်၏ အချုပ်အခြာအာဏာနှင့် အစီအစဉ်များဖြစ်ပြီး ဘုရားသခင်ထံမှလာသည်ကို ထိုသူက ရှင်းလင်းစွာ သိလျှင်ပင် ကျိုးနွံနာခံခြင်း မရှိလျှင်၊ သူသည် အာခံပြီး၊ ဝေဖန်အပြစ်တင်ကာ ဆက်လက်၍ ပုန်ကန်နေလျှင်၊ စာတန်ဆန်သော အတွေးအခေါ်များအတိုင်း နေထိုင်ဆဲဖြစ်ပြီး မိမိ၏ ကိုယ်ပိုင်နှစ်သက်မှုများအတိုင်း အမှုအရာများကို လုပ်ဆောင်နေဆဲဖြစ်လျှင် ထိုသူသည် သမ္မာတရားကို လိုက်စားသူမဟုတ်။ လူအချို့တွင် ဝိညာဉ်ရေးရာ နားလည်သဘောပေါက်မှု ရှိပြီး ဘုရားနှုတ်ကပတ်တော်ကို နားလည်နိုင်သော်လည်း သမ္မာတရားကို မချစ်သောကြောင့် သမ္မာတရားကို ၎င်းတို့ လက်တွေ့မလုပ်ဆောင်ပေ။ ဤသို့သောလူတို့သည် သမ္မာတရားကို လိုက်စားသူများ မဟုတ်။ လူအချို့သည် သမ္မာတရားကို လိုက်စားလိုစိတ် ရှိသော်လည်း ၎င်းတို့၏ အစွမ်းအစသည် ညံ့ဖျင်းလွန်းကာ သမ္မာတရားဆီသို့ မရောက်ရှိနိုင်ပေ။ ရလဒ်အနေဖြင့် ၎င်းတို့သည် ဘုရားသခင်ကို နှစ်များစွာ ယုံကြည်သော်လည်း သမ္မာတရားကို နားမလည်နိုင်ကြပေ။ ဤသို့သောလူတို့သည် သမ္မာတရားကို လိုက်စားသူများဟုတ်သလော။ မဟုတ်ပေ။ သမ္မာတရားကို မလိုက်စားသူများတွင် မည်သည့်အကြီးစား သရုပ်သကန်များရှိသနည်း။ အထင်ရှားဆုံး သရုပ်သကန်များမှာ ဘုရားနှုတ်ကပတ်တော်ကို ၎င်းတို့ မဖတ်ခြင်းဖြစ်ပြီး သမ္မာတရားကို မိတ်သဟာယဖွဲ့ဖို့ မဆိုထားနှင့်၊ ဘုရားသခင်ထံ ဆုတောင်းလိုစိတ်ပင်မရှိခြင်း၊ စုဝေးပွဲများသို့ တက်ရောက်ရန်၊ သို့မဟုတ် တရားဒေသနာများကို နားထောင်ရန်ပင် မလိုလားခြင်း ဖြစ်သည်။ တရားဒေသနာများကို ၎င်းတို့နားထောင်သောအခါ စကားလုံးတိုင်းက ၎င်းတို့ကို ဦးတည်နေပြီး ၎င်းတို့ကို ဖော်ထုတ်နေသည်ဟု ၎င်းတို့က ခံစားရသည်။ ထို့ကြောင့် ၎င်းတို့သည် ဖိနှိပ်ခံထားရသည်ဟု ခံစားရပြီး အနေရခက်လေသည်။ ထို့ကြောင့် တရားဒေသနာတစ်ပုဒ်ကို နားထောင်ရမည့်အချိန် ရောက်သည့်အခါတိုင်းတွင် ၎င်းတို့သည် အိပ်ခြင်း၊ သို့မဟုတ် အလဟဿပြောဆိုမှုတွင် ပါဝင်ခြင်းကိုသာ လုပ်ဆောင်လိုသည်။ ဤသို့သောလူများသည် အတော်ပင် များပြားသည်။ ၎င်းတို့သည် ကောင်းချီးခံစားရရန်သာ ဘုရားသခင်ကို ယုံကြည်ပြီး သမ္မာတရားကို လက်ခံရန်၊ သမ္မာတရားကို ရရှိရန်၊ ၎င်းတို့၏ ဖောက်ပြန်ပျက်စီးခြင်းကို ဖယ်ရှားရန်၊ လူသားပုံသဏ္ဌာန်ကို အသက်ရှင်နေထိုင်ရန်၊ သို့မဟုတ် ဘုရားသခင်ထံမှ ကယ်တင်ခြင်းရရှိရန် ဘုရားသခင်ကို ယုံကြည်ခြင်းမဟုတ်။ ပြဿနာ၏ အရင်းအမြစ်မှာ အဓိကအားဖြင့် ၎င်းတို့သည် သမ္မာတရားကို မချစ်သကဲ့သို့ သမ္မာတရား၌ စိတ်မဝင်စားခြင်း ဖြစ်သည်။ ကောင်းချီးများရရန်အတွက်သာ ဘုရားသခင်ကို ၎င်းတို့ ယုံကြည်သည်။ ဤသည်မှာ ၎င်းတို့ပြင်းပြသောစိတ်ဆန္ဒ၏ တစ်ခုတည်းသော အာရုံစိုက်မှုဖြစ်သည်။ ကောင်းချီးများ ရရှိရန်အတွက် ၎င်းတို့သည် အလုပ်လုပ်ပေးနိုင်ပြီး အမှုအရာများကို စွန့်လွှတ်နိုင်သည်။ သို့သော် သမ္မာတရားကို လက်မခံနိုင်သကဲ့သို့ သမ္မာတရားအပေါ် စိတ်မဝင်စားပေ။ ၎င်းတို့က အယူဝါဒများကို နားလည်ခြင်းက လုံလောက်သည်ဟုလည်းကောင်း၊ မကောင်းမှုများကို ပို၍နည်းပါးစွာ လုပ်ဆောင်ခြင်းမှာ ၎င်းတို့သည် ပြောင်းလဲပြီးဖြစ်သည့်သဘော ဖြစ်သည်ဟုလည်းကောင်း၊ အလုပ်လုပ်ပေးခြင်း၊ အမှုအရာများကို စွန့်လွှတ်ခြင်း၊ ထို့အပြင် ဒုက္ခခံခြင်းတို့သည် ၎င်းတို့အား ကောင်းချီးခံစားရစေရန် အရည်အချင်းပြည့်မီစေသည်ဟုလည်းကောင်း ထင်ကြသည်။ ဤသည်မှာ ဘုရားသခင်အပေါ် ၎င်းတို့၏ ယုံကြည်မှုအမြင် ဖြစ်သည်။ ထို့ကြောင့် ၎င်းတို့သည် နှစ်မည်မျှယုံကြည်သည်ဖြစ်စေ၊ အယူဝါဒမည်မျှကို ၎င်းတို့နားလည်ပြီး ဟောပြောနိုင်ပါစေ၊ ၎င်းတို့၏ နှုတ်မှ သမ္မာတရားနှင့်ညီသောစကားမည်မျှ ထွက်ပါစေ သမ္မာတရားကို ၎င်းတို့ မည်သည့်အခါမျှ လက်တွေ့မလုပ်ဆောင်နိုင်ပေ။ ၎င်းတို့ ထုတ်ဖော်သည့် စိတ်သဘောထားများသည် တစ်ဇွတ်ထိုးဆန်လျက်၊ မွေ့လျော်လျက်၊ ထိန်းမနိုင်သိမ်းမရဖြစ်လျက် ရှိနေသည်။ ၎င်းတို့သည် နေရာတိုင်းတွင် ၎င်းတို့၏ ကိုယ်ပိုင်မာနနှင့် အကျိုးစီးပွားများကို ကာကွယ်သည်။ အထူးပင် တစ်ကိုယ်ကောင်းဆန်ပြီး ယုတ်ညံ့သည်။ ပြီးလျှင် ၎င်းတို့သည် အပြစ်ဖော်ဆုံးမခြင်း၊ သို့မဟုတ် ပြုပြင်ခြင်းခံရသောအခါတွင်ပင် လက်မခံနိုင်သကဲ့သို့ ကျိုးနွံနာခံခြင်း အနည်းငယ်မျှပင်မရှိပေ။ ဤသို့သောလူတို့သည် ၎င်းတို့ကျေနပ်သလို လုပ်ဆောင်သည်။ ၎င်းတို့သည် မလုပ်ဆောင်မီတွင် အခြားလူများနှင့် တိုင်ပင်ဆွေးနွေးခြင်းမရှိ။ အခြားလူများနှင့် အမှန်တကယ် တိုင်ပင်ဆွေးနွေးလျှင်ပင် အခြားရွေးချယ်စရာမရှိဘဲ လုပ်ရိုးလုပ်စဉ်ဖြစ်သောအခါ၌သာ ဖြစ်သည်။ ၎င်းတို့သည် ဝေ့ကာဝိုက်ကာဖြင့် သွယ်ဝိုက်၍ ပြောဆိုသည်။ အဆုံးတွင် ၎င်းတို့ပြောသည့်အတိုင်း အခြားလူများလုပ်ဆောင်ရန် ပြုလုပ်ဆဲဖြစ်သည်။ ဤသို့ အမှုအရာများအား လုပ်ဆောင်ပုံ၌ မည်သည့်စိတ်သဘောထားကို ထုတ်ဖော်သနည်း။ (လှည့်ဖြားခြင်း ဖြစ်ပါသည်။) ဤသည်မှာ လှည့်ဖြားခြင်းသက်သက်မဟုတ်။ ပို၍ပင် ဆိုးသောအရာတစ်ခုရှိသည်။ ဤသည်တို့မှာ ဘုရားအိမ်တော်၏ အစီအစဉ်များဖြစ်သည်ဟု ရှင်းပြပြီး အခြားလူများကို ကျိုးနွံနာခံစေလျက် သူတစ်ပါးတို့ကို အကြံပေးသောအခါတွင် ၎င်းတို့၏ စကားများက မည်မျှကျေနပ်ဖွယ် ရှိသည်ဖြစ်စေ ၎င်းတို့ကိုယ်တိုင်နှင့်ပတ်သက်လျှင်မူ ဤသည်မှာ ၎င်းတို့ဆောင်ရွက်သည့် ပုံစံမဟုတ်ပေ။ ဤအစား ၎င်းတို့သည် စိတ်နှလုံးခိုင်မာပြီး ပုန်ကန်သည်။ ကျိုးနွံနာခံခြင်း မရှိပေ။ ပြီးလျှင် ဘုရားသခင်၏ စီစဉ်ညွှန်ကြားမှုများနှင့် အစီအစဉ်များအပေါ် ကျိုးနွံနာခံနိုင်စွမ်းမရှိ။ ဤအရာအပြင် ၎င်းတို့သည် အခြားလူများနှင့် ဆက်ဆံသောအခါ မိမိတို့ကိုယ်ကို မည်သို့ပြသကြသနည်း။ ၎င်းတို့သည် အခြေအနေတိုင်းတွင် အားသာချက်တစ်ခုကိုရှာပြီး ၎င်းတို့၏ တစ်ကိုယ်ရေဆက်ဆံရေးများကို ကာကွယ်လျက် လောကီဆိုင်ရာ ဆက်ဆံမှုများအတွက် အတွေးအခေါ်များနှင့်အညီ လုပ်ဆောင်ကြသည်။ ဤလူအမျိုးအစားတို့တွင် အထူးပင်ဒုက္ခပေးပြီး စဉ်းလဲသော စိတ်သဘောထားတစ်ခုရှိသည်။ ဤဒုက္ခပေးမှု၏ အဓိကအချက်မှာ မည်သည့်အရာဖြစ်သနည်း။ ကောက်ကျစ်ဆိုးယုတ်မှုဖြစ်သည်။ လူတို့အနေဖြင့် ကောက်ကျစ်ဆိုးယုတ်သည့် စိတ်သဘောထားများကို သိမြင်ဖို့ လွယ်ကူလေ့မရှိပေ။ ကောက်ကျစ်ဆိုးယုတ်သော စိတ်သဘောထားများ ရှိသည့်သူများက အခြားလူများနှင့် စကားပြောသောအခါ သတင်းအချက်အလက်ရယူဖို့အတွက် စမ်းသပ်ခြင်း၊ စုံစမ်းစစ်ဆေးခြင်း အရိပ်အယောင်တစ်ခု အမြဲတမ်းရှိသည်။ ၎င်းတို့သည် အမှုအရာများကို တဲ့တိုးမပြောပေ။ ပြီးလျှင် ၎င်းတို့က မိမိတို့ကိုယ်ကို ဖွင့်ပြောလျှင်ပင် ၎င်းတို့၏ ရည်ရွယ်ချက်မှာ သင့်အား စိတ်ထဲရှိသည့်အတိုင်းပြောဆိုရန် လုပ်ဆောင်ဖို့သာဖြစ်သည်။ ၎င်းတို့နှင့်ပတ်သက်၍ အမှန်တကယ် ဖြစ်သောမည်သည့်အရာကိုမျှ လုံးဝ ဖွင့်မပြပေ။ လူအချို့က “သူတို့နှင့်ပတ်သက်ပြီး အမှန်တကယ်ဖြစ်သော မည်သည့်အရာကိုမျှ လုံးဝ ဖွင့်မပြဟု အဘယ်သို့ ကိုယ်တော်ပြောနိုင်သနည်း။ သူတို့သည် သူတို့ ထုတ်ဖော်သော ဖောက်ပြန်ပျက်စီးသည့် စိတ်သဘောထားနှင့်ပတ်သက်၍ လူတို့နှင့် အစဉ်မိတ်သဟာယဖွဲ့နေကြသည်” ဟု ဆိုကြသည်။ ဤမိတ်သဟာယပြုခြင်းအနည်းငယ်က မည်သည့်အရာအတွက် အကျုံးဝင်သနည်း။ ၎င်းတို့စိတ်အတွင်း၌ အမှန်တကယ် ထင်မြင်သည့်အရာကို မည်သူ့ကိုမျှ ပြောမပြပေ။ ပြီးလျှင် ၎င်းတို့သည် ၎င်းတို့မည်သူဖြစ်သည်ဆိုသည်ကို အင်တိုက်အားတိုက် ဖုံးကွယ်ထားပြီး အယောင်ဆောင်ရန်အတွက် မျိုးစုံသော ဗျူဟာများနှင့် နည်းလမ်းများကို အသုံးပြုသည်၊ သို့မဟုတ် စကားလုံးသုံးနှုန်းဖော်ပြချက်မျိုးစုံကို အသုံးပြုကာ လူတို့အား အတုအယောင်ပုံရိပ်ကို တင်ပြသည်။ လူအချို့က ၎င်းတို့သည် အမှန်တကယ်တွင် မည်သို့ဖြစ်သည်ဆိုသည်ကို သိရလျှင်၊ ၎င်းတို့လုပ်ဆောင်ခဲ့သော မကောင်းသောအရာများကို သိလျှင် ၎င်းတို့က ဟန်ဆောင်ပြီး နောင်တရသည့် စကားအနည်းငယ်ကိုပြောကာ ၎င်းတို့သည် နောင်တရပြီး ပြောင်းလဲပြီးဖြစ်သည်ဟု လူတို့ ယုံကြည်စေရန်အတွက် အထင်အမြင်မှားစေသော နည်းလမ်းများကို ကျင့်သုံးကြသည်။ ၎င်းတို့က မကောင်းသောအရာတစ်ခုကို နောက်တစ်ဖန်ပြုလုပ်ပြီး ၎င်းတို့၏ မကောင်းမှုများကို လူသိသွားကာ ၎င်းတို့သည် အမှန်တကယ်ပင် ဆိုးယုတ်သောသူဖြစ်သည်ကို လူတို့အား မြင်စေလျှင် ၎င်းတို့သည် ဤအချက်ကို ဖုံးကွယ်ပြီး လူတို့အား ၎င်းတို့ကို ညီအစ်ကိုမောင်နှမများအဖြစ် ဆက်ဆံနေဆဲဖြစ်ဖို့ လုပ်ဆောင်ရန် ဦးနှောက်ခြောက်ခံစဉ်းစားပြီး တတ်နိုင်သမျှ နည်းလမ်းတိုင်းကို တွေးတောလိမ့်မည်။ ဤသည်မှာ မည်သည့်စိတ်သဘောထားဖြစ်သနည်း။ ကောက်ကျစ်ဆိုးယုတ်သော စိတ်သဘောထားဖြစ်သည်။ ဤသို့သော ကောက်ကျစ်ဆိုးယုတ်သော စိတ်သဘောထားမျိုး ရှိသည့်သူတို့က သမ္မာတရားကို မည်သို့မျှ လက်မခံရုံသာမက ဟန်ဆောင်ရာ၌လည်း ကျွမ်းကျင်ကြသည်။ ပြီးလျှင် မိမိတို့အတွက် ပါးနပ်သော ခုခံမှု၊ သို့မဟုတ် မှန်ကန်ကြောင်းပြဆိုမှုတစ်ခုကို အစဉ် ထုတ်ပြောကြသည်။ ၎င်းတို့သည် ကြောင်သူတော်ဆန်သော ဖာရိရှဲများ ဖြစ်ကြသည်။ ဤသို့သောသူမျိုးက အကြောက်ဆုံးသောအရာမှာ သမ္မာတရားကို မိတ်သဟာယဖွဲ့ခြင်း၊ လူတို့က မိမိတို့ကိုယ်ကို သိမြင်ပြီး စိစစ်ရန် မိမိတို့၏ စိတ်နှလုံးကို ဖွင့်ဟခြင်း၊ သို့မဟုတ် အမှုကိစ္စတစ်ခု၏ မှန်ကန်သော အချက်များကို လူတို့ ဖော်ထုတ်ကာ ဤသို့ဖြင့် ၎င်းတို့ကို ဖော်ထုတ်ခြင်းတို့ ဖြစ်သည်။ တစ်စုံတစ်ယောက်က သမ္မာတရားကို မိတ်သဟာယဖွဲ့သည့်အခါတိုင်းတွင် ၎င်းတို့သည် အထူးပင် စိတ်အနှောင့်အယှက်ဖြစ်ပြီး နားမထောင်လိုပေ။ ၎င်းတို့၏ စိတ်နှလုံးက ယင်းကို ခုခံပြီး နှစ်မြို့ခြင်းမရှိကြချေ။ ဤသည်မှာ သမ္မာတရားကို အလွန်အမင်းမနှစ်မြို့သည့် ၎င်းတို့၏ အကျည်းတန်သောသွင်ပြင်လက္ခဏာကို အပြည့်အဝ ဖော်ထုတ်သည်။ ဤလူစားမျိုး၌ သမ္မာတရားကို နားလည်သော်လည်း လက်တွေ့မလုပ်ဆောင်ခြင်းအပြင် အခြားပြဿနာတစ်ခုရှိသည်။ ယင်းမှာ အပြုသဘောဆောင်သောအရာများနှင့် မှန်ကန်သောအမြင်များအပေါ်၊ အထူးသဖြင့် သမ္မာတရားနှင့်ညီသော စကားများအပေါ် အတိုက်အခံဖြစ်ပြီး မထီမဲ့မြင်ပြုသည့် သဘောထားရှိခြင်းဖြစ်သည်။ အပြုသဘောဆောင်သောအရာ တစ်ခုတလေ၊ သို့မဟုတ် သမ္မာတရားနှင့်ညီသော စကားတစ်ခုတလေနှင့်ပတ်သက်သောအခါတွင် ယင်းသည် ၎င်းတို့က ကောင်းသည်ဟု သတ်မှတ်သောအရာ မဟုတ်သရွေ့၊ သို့မဟုတ် ၎င်းတို့က ပြောခြင်းမဟုတ်ဘဲ အခြားလူတစ်ယောက်ယောက်က ပြောဆိုခြင်းဖြစ်သရွေ့ ၎င်းတို့က လက်ခံမည်မဟုတ်ပေ။ ဤသည်မှာ မည်သည့်စိတ်သဘောထားဖြစ်သနည်း။ မိုက်မဲခြင်း၊ စိတ်နှလုံးခိုင်မာခြင်းနှင့် နုံအခြင်း ဖြစ်သည်။ လူတစ်ယောက်သည် သမ္မာတရားကို လိုက်စားခြင်းရှိမရှိ သင် မည်သို့ အကဲဖြတ်သင့်သနည်း။ အဓိက ကြည့်ရှုရန်မှာ ၎င်းတို့၏ တာဝန်များကို ပုံမှန်ထမ်းဆောင်မှုနှင့် ၎င်းတို့၏ လုပ်ရပ်များတွင် ၎င်းတို့ ထုတ်ဖော်ပြသသည့်အရာဖြစ်သည်။ ဤအရာမှ လူတစ်ယောက်၏ စိတ်သဘောထားကို သင်မြင်နိုင်သည်။ ၎င်းတို့၏ စိတ်သဘောထားမှ ၎င်းတို့သည် ပြောင်းလဲမှုတစ်ခုတလေ စွမ်းဆောင်ရရှိပြီးခြင်း ရှိမရှိ၊ သို့မဟုတ် အသက်ဝင်ရောက်မှု တစ်ခုတလေရရှိခြင်း ရှိမရှိကို သင် မြင်နိုင်သည်။ လူတစ်ယောက်သည် ဆောင်ရွက်ပြုမူသောအခါ ဖောက်ပြန်ပျက်စီးသော စိတ်သဘောထားများမှလွဲ၍ မည်သည့်အရာမျှ မထုတ်ဖော်ဘဲ မည်သည့်သမ္မာတရားစစ်မှန်မှုမျှ လုံးဝ မရှိလျှင် ၎င်းတို့သည် သမ္မာတရားကို လိုက်စားသူ သေချာပေါက်မဟုတ်ပေ။ သမ္မာတရားကို မလိုက်စားသောသူတို့သည် အသက်ဝင်ရောက်မှုရှိသလော။ သေချာပေါက် မရှိပေ။ ၎င်းတို့ နေ့စဉ်လုပ်သောအရာများ၊ လှည့်လည်သွားလာခြင်း၊ အသုံးခံခြင်း၊ ဒုက္ခခံခြင်း၊ ၎င်းတို့ပေးဆပ်သော အဖိုးအခ၊ ၎င်းတို့လုပ်ဆောင်သည့် မည်သည့်အရာဖြစ်စေ အားလုံးက အလုပ်လုပ်ပေးခြင်းဖြစ်သည်။ ၎င်းတို့သည် အလုပ်လုပ်ပေးသူများဖြစ်သည်။ လူတစ်ယောက်သည် ဘုရားသခင်ကို နှစ်မည်မျှကြာ ယုံကြည်ခဲ့သည်ဖြစ်စေ အရေးကြီးဆုံးက သူသည် သမ္မာတရားကို ချစ်မချစ်ပင်ဖြစ်သည်။ လူတစ်ယောက်သည် မည်သည့်အရာကို ချစ်ပြီး လိုက်စားသည်ကို ၎င်းတို့လုပ်ဆောင်ရန် အနှစ်သက်ဆုံးအရာမှ မြင်နိုင်သည်။ လူတစ်ယောက် လုပ်ဆောင်သောအရာအများစုသည် သမ္မာတရားစည်းမျဉ်းများနှင့် ဘုရားသခင်၏ လိုအပ်ချက်များနှင့် ကိုက်ညီလျှင် သူသည် သမ္မာတရားကိုချစ်ပြီး လိုက်စားသောသူဖြစ်သည်။ ၎င်းတို့သည် သမ္မာတရားကို လက်တွေ့လုပ်ဆောင်နိုင်လျှင်၊ ၎င်းတို့ နေ့စဉ်လုပ်ဆောင်သောအရာများသည် ၎င်းတို့တာဝန်ကို ထမ်းဆောင်ခြင်းဖြစ်လျှင် ၎င်းတို့သည် အသက်ဝင်ရောက်မှုရှိပြီး သမ္မာတရား စစ်မှန်မှုများကို ပိုင်ဆိုင်သည်။ ၎င်းတို့လုပ်ရပ်များသည် အချို့ကိစ္စများတွင် မသင့်လျော်ခြင်းရှိနိုင်သည်၊ သို့မဟုတ် သမ္မာတရား စည်းမျဉ်းများကို တိကျစွာ နားမလည်ခြင်းရှိနိုင်သည်၊ သို့မဟုတ် ဤအပိုင်းတွင် ခေါင်းမာသော တစ်ဖက်သတ်အမြင်များရှိနိုင်သည်၊ သို့မဟုတ် တစ်ခါတစ်ရံတွင် မာနထောင်လွှားပြီး မိမိကိုယ်ကို အမှန်ထင်နိုင်သည်၊ ၎င်းတို့၏ ကိုယ်ပိုင်နည်းလမ်းများကို မရမကလုပ်ဆောင်ပြီး သမ္မာတရားကို လက်ခံရန် ပျက်ကွက်နိုင်သည်။ သို့သော် နောက်ပိုင်းတွင် ၎င်းတို့သည် နောင်တရပြီး သမ္မာတရားကို လက်တွေ့လုပ်ဆောင်နိုင်လျှင် ဤသည်မှာ ၎င်းတို့သည် သေချာပေါက် အသက်ဝင်ရောက်မှုရှိပြီး သမ္မာတရားကို လိုက်စားသည်ကို သက်သေပြလေသည်။ တစ်စုံတစ်ဦးသည် မိမိ၏တာဝန်ထမ်းဆောင်မှု လမ်းကြောင်းတွင် ထုတ်ဖော်သည့်အရာသည် ဖောက်ပြန်ပျက်စီးသော စိတ်သဘောထား၊ မုသားများနှင့် ပြည့်သောနှုတ်၊ မာနကြီးခြင်း၊ အလိုလိုက်ခြင်း၊ အလွန့်အလွန် မာန်တက်ခြင်းတို့သာဖြစ်လျှင်၊ ထင်ရာစိုင်းလျှင်၊ ၎င်းသဘောကျလုပ်ဆောင်လျှင် စသည်တို့ဖြစ်လျှင်၊ ဘုရားသခင်ကို ၎င်းယုံကြည်ခဲ့သည်မှာ နှစ်မည်မျှကြာသည်ဖြစ်စေ၊ သို့မဟုတ် တရားဒေသနာမည်မျှကို ၎င်းကြားနာပြီးဖြစ်စေ၊ အဆုံးတွင် ဤဖောက်ပြန်ပျက်စီးသော စိတ်သဘောထားများ၌ ပြောင်းလဲမှု စိုးစဉ်းမျှပင်မရှိလျှင်၊ ဤသည်မှာ သမ္မာတရားကို လိုက်စားသောသူတစ်ဦး သေချာပေါက် မဟုတ်ပေ။ ဘုရားသခင်ကို နှစ်များစွာ ယုံကြည်ခဲ့သော၊ အပြင်ပန်းတွင် ဆိုးယုတ်သောသူများမဟုတ်သော၊ ကောင်းသောအပြုအမူအချို့ပင် ရှိသောသူများစွာ ရှိကြသည်။ ၎င်းတို့သည် ဘုရားသခင်ကို အတော်အတန် စိတ်ပြင်းပြစွာ ယုံကြည်ကြသည်။ သို့သော် ၎င်းတို့၏ အသက်စိတ်သဘောထားများက လုံးဝ မပြောင်းလဲပေ။ ၎င်းတို့တွင် မျှဝေရန်အတွက် အတွေ့အကြုံဆိုင်ရာ သက်သေခံချက် အနည်းငယ်မျှပင် မရှိကြပေ။ ဤသို့သောသူများမှာ သနားစရာမကောင်းသလော။ ဘုရားသခင်ကို နှစ်များစွာ ယုံကြည်ပြီးနောက်တွင် ၎င်းတို့သည် အတွေ့အကြုံဆိုင်ရာ သက်သေခံချက်ကို စိုးစဉ်းမျှပင် မပြောနိုင်ပေ။ ဤသည်မှာ အလုပ်လုပ်ပေးသူသက်သက်သာဖြစ်သည်။ ၎င်းတို့သည် အမှန်တကယ်ပင် သနားဖွယ်ဖြစ်သည်။ အတိုချုပ်အားဖြင့် လူတစ်ဦးသည် သမ္မာတရားကို လိုက်စားပြီး အသက်ဝင်ရောက်မှုရှိမရှိကို အကဲဖြတ်ရန်အတွက် ထိုသူက ထုတ်ဖော်ပြီး ဖော်ပြသောအခါတွင် သူ၏ စိတ်သဘောထားနှင့် အနှစ်သာရကို ကြည့်ရမည်။ ပြီးလျှင် သူ၏ စိတ်သဘောထား၌ ပြောင်းလဲမှုတစ်ခုခုရှိမရှိကို ကြည့်ရမည်။ စကားများနှင့် အယူဝါဒများကို အစဉ်ပြောဆိုခြင်း၊ အယောင်ဆောင်မှုနှင့် လှည့်ဖြားမှုကို ပါဝင်လုပ်ဆောင်ခြင်းတို့သည် ကြာရှည် မတည်တံ့နိုင်ပေ။ သူသည် အခြားလူများကို လှည့်ဖြားခြင်းမရှိဘဲ မိမိကိုယ်ကိုသာ ထိခိုက်စေသည်။ သမ္မာတရားကို လက်မခံသကဲ့သို့ သမ္မာတရားကို မလိုက်စားသောသူတို့သည် အနှေးနှင့်အမြန်ဆိုသလို ထုတ်ဖော်ခံရပြီး ဖယ်ရှားရှင်းလင်းခံရမည်။ သမ္မာတရားကို လက်ခံပြီး လက်တွေ့လုပ်ဆောင်သောသူတို့သည်သာ အသက်ဝင်ရောက်မှုရနိုင်ပြီး စိတ်သဘောထား၌ ပြောင်းလဲမှုရှိနိုင်သည်။

အသက်ဝင်ရောက်မှုဆိုသည်မှာ မည်သည့်အရာဖြစ်သည်၊ သမ္မာတရားအား လိုက်စားခြင်းဆိုသည်မှာ မည်သည့်အရာဖြစ်သည်ဆိုသည်နှင့် သမ္မာတရားအား လိုက်စားသူတို့၏ မတူညီသော သရုပ်သကန်အားလုံးတို့ကို ငါ မိတ်သဟာယဖွဲ့၍ ပြီးဆုံးပြီ ဖြစ်သည်။ လူတို့သည် ဤအရာများနှင့် မိမိတို့ကိုယ်ကို နှိုင်းယှဉ်ချိန်ဆကြည့်သင့်သည်။ ပြီးလျှင် သမ္မာတရားကို ၎င်းတို့ နားလည်သောအခါ လက်တွေ့လုပ်ဆောင်ဖို့လိုသည်။ ဘုရားသခင်ကို ယုံကြည်သောသူအများစုအတွက် အကြီးမားဆုံးအခက်အခဲမှာ အဘယ်နည်း။ ယင်းမှာ သမ္မာတရားကို ၎င်းတို့ နားလည်သော်လည်း လက်တွေ့မလုပ်ဆောင်ခြင်းဖြစ်သည်။ ၎င်းတို့သည် ဘုရားနှုတ်ကပတ်တော်များကို ဖတ်ပြီးနောက်တွင် ဘုရားနှုတ်ကပတ်တော်များဖြင့် မိမိတို့ကိုယ်ကို နှိုင်းယှဉ်ချိန်ဆကြည့်နိုင်ပြီး မိမိတို့ကိုယ်ကိုနှင့်ပတ်သက်၍ သိမြင်မှုအချို့ရရှိနိုင်သော်လည်း အဘယ်ကြောင့် သမ္မာတရားကို လက်တွေ့မလုပ်ဆောင်နိုင်သနည်း။ လူအများစုက အကြောင်းရင်းကို ရှာမတွေ့နိုင်ပေ။ ဥပမာအနေဖြင့် လူအားလုံး၌ မာနထောင်လွှားသော စိတ်သဘောထားများရှိသည်။ ၎င်းတို့အားလုံးသည် အထူးပင် မာနထောင်လွှားပြီး မိမိကိုယ်ကို မှန်ကန်သည်ဟု ယူမှတ်ကြသည်။ လူအများစုက ဤအရာကို သိမြင်နိုင်စွမ်းရှိသော်လည်း ၎င်းတို့၏ မာနထောင်လွှားခြင်းအား ထုတ်ဖော်ခြင်းကို ရှောင်ကြဉ်နိုင်သလော။ ဤသည်မှာ ဖြစ်မြောက်ရန် မလွယ်ကူပေ။ ၎င်းတို့သည် ဘုရားနှုတ်ကပတ်တော်များကို နားထောင်သောအခါ ဘုရားနှုတ်ကပတ်တော်များနှင့် မိမိကိုယ်ကို နှိုင်းယှဉ်ချိန်ဆကြည့်နိုင်သော်လည်း၊ ၎င်းတို့တွင် မာနထောင်လွားသောစိတ်သဘောထားရှိသည်ကို အသိအမှတ်ပြုပြီး လက်တွေ့လုပ်ဆောင်ရန် လမ်းကြောင်းတစ်ခုရှိသော်လည်း ခက်ခဲသောအရာမှာ တစ်စုံတစ်ခုကို ၎င်းတို့လုပ်ဆောင်သည့်အချိန်တိုင်းတွင် ၎င်းတို့၌ ကိုယ်ပိုင်နှစ်သက်ချက်များ၊ ရည်ရွယ်ချက်များ၊ ပန်းတိုင်များ မကြာခဏထားရှိပြီး ဤအရာအားလုံးတို့သည် ၎င်းတို့၏ ဖောက်ပြန်ပျက်စီးသော စိတ်သဘောထားနှင့် ချိတ်ဆက်နေသည်ကို ၎င်းတို့ မမြင်နိုင်ပေ။ ၎င်းတို့သည် ဤအရာများကို ပိုင်းခြားသိမြင်ရန် သင်ယူဖို့လိုပြီး သမ္မာတရားကို နားလည်ရမည်။ ပြုပြင်သင့်သည့်အရာကို ပြုပြင်ရမည်။ လက်လွှတ်သင့်သည့်အရာကို လက်လွှတ်သင့်သည်။ ဆိုလိုသည်မှာ ၎င်းတို့သည် အမှုအရာများကို ၎င်းတို့၏ ရည်ရွယ်ချက်များ၊ လိုအင်ဆန္ဒများ၊ မာန၊ အဆင့်အတန်းနှင့် အကျိုးစီးပွားများအတွက် မလုပ်ဆောင်သင့်တော့ပေ။ ၎င်းတို့၏ မကောင်းမှု လုပ်ဆောင်သည့် လမ်းကြောင်းကို ရပ်နားသင့်သည်။ မိမိတို့၏ ကိုယ်ပိုင်အကျိုးစီးပွားများအတွက် နောက်ထပ်စကားတစ်ခွန်းပြောဆိုခြင်း၊ သို့မဟုတ် နောက်ထပ်အမှုတစ်ခုကို လုပ်ဆောင်ခြင်းအား ရှောင်ကြဉ်သင့်သည်။ ဤသို့လုပ်ဆောင်လျှင် သင်သည် နောင်တစိတ်နှလုံးကို ရရှိနှင့်ပြီး ဖြစ်သည်။ သင်၏အပျက်သဘောဆောင်သည့်အခြမ်း၌ စတင်ပြောင်းလဲပြီး ဖြစ်လိမ့်မည်။ သင်သည် ပို၍ပင် စတင်လုပ်ဆောင်ခြင်းပြုလျှင်၊ သင်၏ကိုယ်ကျိုးအတွက် စကားမပြောခြင်းအပြင် သင့်ကိုယ်သင်လည်း စိစစ်နိုင်လျှင်၊ သင်၏ မာနထောင်လွှားသောစိတ်သဘောထား၏ သရုပ်သကန်အား ညီအစ်ကိုမောင်နှမတို့ကို မြင်ခွင့်ပေးပြီး ဤသို့ဖြင့် ဤအရာထံမှ ၎င်းတို့သင်ယူနိုင်လျှင်၊ ဤအရာထံမှ သင်ခန်းစာအချို့ရကာ အကျိုးအမြတ်ဖြစ်ပြီး လက်တွေ့လုပ်ဆောင်ရန် လမ်းကြောင်းတစ်ခု ရှာတွေ့နိုင်လျှင် ယင်းသည် ပို၍ပင်ကောင်းလိမ့်မည်။ ခက်ခဲသောအရာမှာ အဘယ်နည်း။ ခက်ခဲသောအရာမှာ သင်၏ ရည်ရွယ်ချက်များ၊ ဦးတည်ချက်များ၊ ရည်မှန်းချက်များ၊ လိုအင်ဆန္ဒများနှင့် အကျိုးစီးပွားများအားလုံးကို လက်လွှတ်ခြင်း၊ အမှုအရာများကို သင်၏ကိုယ်ကျိုးအတွက် မလုပ်ဆောင်ခြင်း၊ သင်၏ကိုယ်ကျိုးအတွက် အလုပ်ရှုပ်မနေခြင်း၊ သို့မဟုတ် အပြေးအလွှားသွားလာမှုမရှိခြင်းတို့ ဖြစ်သည်။ ပေါလုက သူ၏လမ်းကြောင်းပြီးဆုံးခဲ့ပြီဟု ဆိုသည်။ မည်သူ့အတွက် ဤလမ်းကြောင်းကို သူပြေးနေခဲ့သနည်း။ (သူသည် ကောင်းချီးခံစားရပြီး သရဖူရရှိနိုင်ရန်အတွက် ပြေးခြင်းဖြစ်သည်။) သို့သော် ပေါလုတွင် ဤနားလည်မှုကင်းမဲ့သည်။ သူသည် ဘုရားသခင်အတွက် လမ်းကြောင်းကို ပြေးနေသည်၊ ဘုရားသခင်၏ တာဝန်ပေးစေခိုင်းချက်ကို ပြီးမြောက်ရန်ဖြစ်ပြီး အသေအချာပင် သူ၏ကိုယ်ကျိုးအတွက်မဟုတ်ဟု သူ ထင်ဆဲဖြစ်ဖို့များသည်။ ဤအတွက်ကြောင့် သူသည် အလွန်ကြွားလုံးထုတ်ပြီး မရှက်မကြောက်ပုံစံဖြင့် ကြွားဝါကာ မိမိကိုယ်ကို သက်သေခံရဲခြင်းဖြစ်သည်။ သူသည် သိသာစွာပင် သူ့ကိုယ်သူခုခံကာ ရှင်းပြနေခြင်း ဖြစ်သည်။ တစ်ချိန်တည်းတွင် ဤသည်မှာ သူ့အတွက် အသက်ရှင်သည့်အရာမှာ ခရစ်တော်ဖြစ်သည်ဟု သူသက်သေခံနေသည်ဆိုသည့် အကောင်းဆုံးသက်သေလည်း ဖြစ်သည်။ သူသည် ပြောင်ပြောင်တင်းတင်းပင် သူ့ကိုယ်သူသက်သေခံကာ သမ္မာတရားကို အာခံနေခြင်းဖြစ်သည်။ သမ္မာတရားကို ပြစ်မှားစော်ကားနေခြင်းဖြစ်သည်။ ယခုတွင် ပေါလုကို ကြည်ညိုသော၊ မိမိစိတ်နှလုံး၌ ရည်မှန်းချက်များနှင့် လိုအင်ဆန္ဒများဖြင့် ပြည့်နေသော၊ မိမိကိုယ်ကိုအတွက်သာ သက်သေခံလိုသောသူများစွာရှိသည်။ “ကောင်းစွာသော တိုက်လှန်ခြင်းကို ငါပြုပြီ။ ပြေးရသောလမ်းကို အဆုံးတိုင်အောင်ပြေးပြီ။ ယုံကြည်ခြင်းတရားကို စောင့်ရှောက်ပြီ။ ယခုမှစ၍ ဓမ္မသရဖူသည် ငါ့အဘို့သိုထားလျက်ရှိ၏။” (တိမောသေသြဝါဒစာဒုတိယစောင် ၄:၇-၈) ဟူ၍ ဖြစ်သည်။ ဤသို့လုပ်ဆောင်ခြင်းအားဖြင့် ၎င်းတို့သည် ၎င်းတို့၏ လိုအင်ဆန္ဒများနှင့် ရည်မှန်းချက်များကို အထိန်းအကွပ်မဲ့လွှတ်ပေးထားခြင်း၊ ယင်းတို့ကို အဆက်မပြတ် တိုးပွားစေခြင်း၊ ယင်းတို့ကို အကောင်အထည်ဖော်ရန်အတွက် အခြေအနေတိုင်းတွင် ထုတ်ဖော်ခြင်း မဟုတ်လော။ သင်၏ လိုအင်ဆန္ဒများကို မကျော်လွှားနိုင်လျှင် သင့်အတွက် လုံးဝ ဇာတ်သိမ်းသွားပြီဖြစ်သည်။ သမ္မာတရားစစ်မှန်မှုများထဲသို့ ဝင်ရောက်နိုင်မည်မဟုတ်။ ဤပြဿနာ၏ အခရာမှာ အဘယ်နည်း။ (ကျွန်ုပ်တို့၏ ရည်ရွယ်ချက်များကို ပုန်ကန်ရမည်။) သင့်ရည်ရွယ်ချက်များကို ပုန်ကန်ခြင်းသည် အပျက်သဘောဆောင်သော လက်တွေ့လုပ်ဆောင်ပုံ ဖြစ်သည်။ သင်သည် အခြားလူများကို ဖော်ထုတ်သကဲ့သို့ပင် ယင်းတို့ကိုလည်း တက်ကြွစွာ ဖော်ထုတ်နိုင်ရမည်။ သင်က “ကျွန်ုပ်အကြောင်းကို သင်တို့အား အမှန်အတိုင်းပြောမည်။ ကျွန်ုပ်တွင် အလွန်ပင် လွန်ကဲသော ရည်မှန်းချက်များရှိသည်။ ပြီးလျှင် သင်တို့အား စည်းရုံးလိုသည်။ ယခုအချိန်တွင် ကျွန်ုပ်သည် သင်တို့အားလုံးထံ ကိုယ့်ကိုယ်ကိုယ် ဖွင့်ပြနေခြင်းဖြစ်သည်။ ကျွန်ုပ်သည် ဇာတိပကတိကို ပုန်ကန်လိုစိတ်ရှိသည်။ စာတန်၏ ကြံရာပါဖြစ်မည်မဟုတ်။ ဤသို့ ကိုယ့်ကိုယ်ကိုယ်ဖော်ထုတ်ခြင်းတွင် ကျွန်ုပ်၏ ရည်ရွယ်ချက်မှာ ကျွန်ုပ်၏ သရုပ်မှန်ကို သင်တို့ ရှင်းလင်းစွာ မြင်စေရန်ဖြစ်သည်။ ဤသို့ဖြင့် သင်တို့သည် ကျွန်ုပ်ကို လေးစားကြည်ညိုမည်မဟုတ်” ဟူသကဲ့သို့သောအရာတစ်ခုကို ဆိုလျှင် ဤသို့ လက်တွေ့လုပ်ဆောင်ခြင်းသည် မည်သည့်သက်ရောက်မှုရှိမည်နည်း။ လူတိုင်းက အသေအချာပင် သင့်ကို လေးစားမည်။ ဤသည်မှာ ယုတ်ညံ့သောနည်းဗျူဟာမျိုးစုံကို အသုံးပြုခြင်းအတွက် အလဲအလှယ်အနေဖြင့် သင်ရရှိမည့် လေးစားကြည်ညိုမှုနှင့် အထင်ကြီးမှုထက် အလွန်ပို၍ ကောင်းလိမ့်မည်မဟုတ်လော။ (ဟုတ်ပါသည်။) အနည်းဆုံးအနေဖြင့် ဤသည်မှာ အပြုသဘောဆောင်သည်။ လူတိုင်းက သင့်အပေါ် လေးစားမှုအချို့ ရှိမည်ဖြစ်သော်လည်း သင့်အား အထင်ကြီးမည်လော။ အချို့က အထင်ကြီးကောင်း ကြီးနိုင်သည်။ သို့သော် ၎င်းတို့အား ဤအပြုအမူကို စွန့်လွှတ်စေရန်အတွက် နည်းလမ်းများကို သင်ရှာရမည်။ အစဉ်သဖြင့် သင့်ကိုယ်သင် ဖော်ထုတ်ကာ “ကျွန်ုပ်သည်လည်း ပုန်ကန်သည်။ ကျွန်ုပ်၏ ပုန်ကန်မှုသည် သင်တို့ထက်ပင် ဆိုးရွားသည်။ ကျွန်ုပ်သည်လည်း လှည့်ဖြားတတ်ပြီး ကောက်ကျစ်ဆိုးယုတ်သည်။ ထိုအချိန်က ကျွန်ုပ် စကားပြောသောအခါ ကျွန်ုပ်၏ စိတ်တွင် ရည်ရွယ်ချက်တစ်ခုရှိသည်။ သင်တို့အား ကျွန်ုပ်ကို အထင်ကြီးလေးစားကာ အထင်မသေးစေရန် လုပ်ဆောင်ဖို့ ဖြစ်သည်” ဟု ပြောလော့။ လူတိုင်းက ဤအရာကို ကြားပြီးနောက်တွင် ၎င်းတို့၏ စိတ်နှလုံး၌ သင့်အား အထင်မသေးမည်သာမကဘဲ ပို၍ပင် လေးစားလိမ့်မည်။ ဤသည်မှာ ရိုးသားသော လက်တွေ့လုပ်ဆောင်နည်းဖြစ်သည်။ သမ္မာတရားကိုချစ်သူတို့သာ ဤသို့လုပ်ဆောင်မည်ဖြစ်သည်။ သမ္မာတရားကို မချစ်သူတို့သည် မည်သို့ပင်ဖြစ်စေ ဤအရာကို လုပ်ဆောင်နိုင်စွမ်းရှိမည်မဟုတ်။ သင့်စိတ်နှလုံး၌ ဤအရာအားလုပ်ဆောင်ခြင်းသည် အလွန်ကောင်းပြီး ကြီးမားသော အထူးအခွင့်အရေး ဖြစ်သည်ဟုလည်းကောင်း၊ ဘုရားသခင်အား ကျေနပ်စေသည်ဟုလည်းကောင်း၊ သင်က ဤသို့လုပ်ဆောင်ရန် ဆန္ဒပြင်းပြလျှင်လည်းကောင်း၊ သင်က ဤသို့လုပ်ဆောင်သင့်ပြီး ဤသည်မှာ သင်ဖြစ်သင့်သည့်လူစားမျိုးဖြစ်သည်၊ စစ်မှန်၊ ရိုးသားပြီး မိမိပြောသည့်အရာတွင် မည်သည့်မုသားကိုမျှ မတွေ့နိုင်သောလူစားမျိုး၊ မိမိ၏ ဖောက်ပြန်ပျက်စီးသော စိတ်သဘောထားနှင့် စာတန်ကို လုံးလုံးလျားလျားပုန်ကန်သောလူစားမျိုး ဖြစ်သည်ဟုလည်းကောင်း ယုံကြည်လျက် သင့်စိတ်နှလုံး၌ ပြင်းပြသောလိုအင်ဆန္ဒရှိလျှင် ထိုအခါမှသာ သင်သည် အလင်းတွင် အမှန်တကယ်နေထိုင်သောသူမျိုး ဖြစ်လိမ့်မည်။ သင်သည် ဤလူစားမျိုးဖြစ်ခြင်းကို စိတ်ပါကာ နှစ်သက်လျှင် သမ္မာတရားကို ချစ်နိုင်ပြီး သမ္မာတရားသို့ ဝင်ရောက်နိုင်မည်။ စာတန်နှင့်သက်ဆိုင်သောထိုအရာများကို လက်လွှတ်နိုင်မည်။ သို့သော် သင်က သင်၏ ရည်ရွယ်ချက်များ၊ ဦးတည်ချက်များ၊ ရည်မှန်းချက်များ၊ လိုအင်ဆန္ဒများနှင့် အကျိုးစီးပွားများကို စိတ်ဝင်စားဆဲဖြစ်ပြီး အသိပညာ၊ ကျော်ကြားမှု၊ အကျိုးအမြတ်နှင့် အဆင့်အတန်းတို့ကို လိုက်စားခြင်းအပေါ် တာရှည်နှစ်သက်မှုရှိဆဲဖြစ်လျှင် ဤအရာများသည် သင့်စိတ်နှလုံး၌ နေရာတစ်ခုရှိနေဆဲ ဖြစ်သည်။ သင်က “ကျွန်ုပ်၌ သင့်တင့်လျောက်ပတ်သော ဝိညာဉ်ရင့်ကျက်မှုရှိသည်အထိ ဖြည်းဖြည်းသာလုပ်ဆောင်လိုသည်။ ပြီးလျှင် အခြေအနေကို ကြည့်မည်” ဟု ဆိုသည်။ ဤသည်မှာ သင့်ကိုယ်သင် အလိုလိုက်ခြင်း၊ သင့်ကိုယ်သင် အပြည့်အဝ မပုန်ကန်နိုင်ခြင်းဟု ခေါ်သည်။ ဤကဲ့သို့ သင့်ကိုယ်သင် အလိုလိုက်ခြင်းအားဖြင့် သင်၏ အသက်ဝင်ရောက်မှုသည် နှေးကွေးသည်။ ပြီးလျှင် ဇာတိပကတိဆိုင်ရာ သာယာမှုများကို တပ်မက်ခြင်းနှင့် အဆင့်အတန်း၏ အကျိုးအမြတ်များအား တပ်မက်ခြင်းဖြစ်သည့် သင်၏ ပြဿနာများ မပြေလည်ရုံမက ယင်းတို့သည် ပို၍ပင် ခေါင်းမာလာသည်။ ဤသို့ဆိုလျှင် သင့်စိတ်နှလုံး၌ရှိသည့် စာတန်နှင့်သက်ဆိုင်သောအရာများကို လုံးလုံးလျားလျားသန့်စင်နိုင်သလော။ သင်၏ ဘဝအတွေ့အကြုံသည် နက်နဲနိုင်သလော။ ပြီးလျှင် သင်၏အသက်သည် ဆက်လက်ကြီးထွားနိုင်သလော။ ဘုရားသခင်က စုံလင်အောင်ပြုလုပ်ပေးခံရခြင်းကို သင်ရရှိနိုင်သေးသလော။ သင်သည် ဇာတိပကတိသာယာမှုများအတွင်းသို့ ကျရောက်ပြီးဖြစ်သည်။ ပြီးလျှင် အဆင့်အတန်း၏ အကျိုးအမြတ်များသည် သင့်အား တင်းကျပ်စွာ ချည်နှောင်ပြီးဖြစ်သည်။ ယင်းတို့မှ သင် ရုန်းထွက်လွတ်မြောက်နိုင်သေးသလော။ သင် ရုန်းထွက်လွတ်မြောက်လိုခြင်း မရှိပေ။ ဖြည်းညှင်းစွာဖြင့် သင်သည် လူတို့ကို အထင်အမြင်မှားစေသော သူတစ်ဦးဖြစ်လာသည်။ ဤသည်မှာ ဒုက္ခပေးလိမ့်မည်ဖြစ်ပြီး သင်၏အပြစ်က ဆိုးရွားလိမ့်မည်။ အမှုအရာများသည် အဘယ်ကြောင့် ပေါလုအတွက် ထိုကဲ့သို့ အဆုံးသတ်ရသနည်း။ ဤသည်မှာ သမ္မာတရားကို သူလုံးဝ မလိုက်စားခဲ့သောကြောင့် ဖြစ်သည်။ သူသည် သူ၏ စံထားရာများနှင့် တောင့်တသည့်အရာများကို အစဉ် လိုက်စားခဲ့သည်။ ပြီးလျှင် ဘုရားသခင်ရွေးချယ်ထားသောလူတို့အား သူ့နောက်လိုက်စေရန်နှင့် သူလုပ်ဆောင်ခဲ့သည့်အတိုင်း လုပ်ဆောင်စေရန်အတွက် ၎င်းတို့ကို ထိန်းချုပ်လိုခဲ့သည်။ အလုပ်ကြိုးစားမှုနှင့် အဖိုးအခပေးဆပ်မှုတို့ကို ဘုရားသခင်နှင့် အပေးအယူပြုလုပ်ရန်၊ ဆုလာဘ်များနှင့် သရဖူတစ်ခုကို ရယူရန် ခုတုံးတစ်ခုအဖြစ်လည်း သူအသုံးပြုလိုခဲ့သည်။ အဆုံးတွင် သူသည် ဘုရားသခင်က အပြစ်ဒဏ်ပေးခြင်းကို ခံခဲ့ရသည်။ လူတစ်ယောက် လိုက်လျှောက်သောလမ်းကြောင်းသည် ပေါလု၏ လမ်းကြောင်းနှင့် အတိအကျပင် တူညီပါက သူသည် ကူညီပေးဖို့ရန် မဖြစ်နိုင်တော့ဘဲ လုံးဝပင် ဇာတ်သိမ်းသွားပြီ ဖြစ်သည်။ ပေါလုနှင့်တူညီသောလူစားမျိုးဖြစ်သူ မည်သူမဆိုသည် မည်သို့ပင်ဖြစ်စေ နောင်တရမည်မဟုတ်သည့် အန္တိခရစ်တစ်ဦးဖြစ်သည်။ သင့်၌ ပေါလုတွင်ရှိသော အခြေအနေအချို့သာ ရှိသော်လည်း သင်လိုက်စားသောပန်းတိုင်က ပေါလုနှင့် အနည်းငယ်ကွဲပြားလျှင် ချက်ချင်းနောင်တရရမည်။ ဤသို့ဆိုလျှင် သင်သည် အချိန်မီကောင်းမီလိမ့်မည်။ သင်က ပေါလုလုပ်ဆောင်ခဲ့သကဲ့သို့ လုပ်ဆောင်လျှင်၊ ပေါလုကို လေးစားကြည်ညိုလျှင်၊ ပေါလုနှင့် အတိအကျပင်တူညီလျှင် သင်က မယုံကြည်သူဖြစ်ရုံမက ဘုရားလည်းဖြစ်လိုပြီး ခရစ်တော်ဖြစ်လိုသည်။ ဤသည်မှာ ဘုရားသခင်နှင့် တန်းတူဖြစ်လိုခြင်းမဟုတ်လော။ သင့်စိတ်နှလုံး၌ ကောင်းကင်ဘုံရှိ မရေရာသောဘုရားကို သင်ကိုးကွယ်သည်။ သင်သည် ခရစ်တော်နှင့် တန်းတူညီလိုသည်။ သင်၏ ဆုကျေးဇူးများနှင့် အသိပညာကိုပင် အသက်အဖြစ် မှတ်ယူလိုသည်။ ပြီးလျှင် မသင့်လျော်သော လိုက်စားမှုများကို သင့်လျော်သောလိုက်စားမှုများအဖြစ် မှတ်ယူလိုသည်။ သင်လိုက်စားသောပန်းတိုင်များနှင့် သင့်လိုက်စားမှု၏ ပုံစံသည် ပေါလုနှင့် ပိုပို၍နီးစပ်လာပြီး ပေါလု၏ လိုက်စားမှုများနှင့် ပိုပို၍ ပြည့်စုံစွာ ကိုက်ညီလာသည်။ ဤသည်မှာ သင့်အတွက် ဒုက္ခရောက်မည့်သဘောဖြစ်သည်။ သင်သည် လုံးဝပင် မျှော်လင့်ချက်မဲ့ပြီး ကယ်တင်ခြင်းမခံရနိုင်။ သင်သည် ပေတရုကဲ့သို့ လုပ်ဆောင်ပြီး သမ္မာတရားအားလိုက်စားခြင်းလမ်းကြောင်းကို လိုက်လျှောက်ရမည်။ ဇာတိပကတိကို လုံးလုံးလျားလျား ပုန်ကန်ရမည်။ ပြီးလျှင် စာတန်နှင့်သက်ဆိုင်သော ထိုအရာများကို ပုန်ကန်ရမည်။ ထိုအခါမှသာ သင်သည် ကယ်တင်ခြင်းခံရရန် မျှော်လင့်ချက်ရှိမည်။ သင်တို့သည် ယခုတွင် ကယ်တင်ခြင်းကို လက်ခံရရှိရန် လမ်းကြောင်းတစ်ခုရှိကြသလော။ (စဉ်ဆက်မပြတ် မိမိတို့ကိုယ်ကို ဖော်ထုတ်ခြင်းနှင့် မိမိတို့ကိုယ်ကို လက်လွှတ်ခြင်းဖြစ်သည်။) ရှေးဦးစွာ သင်၏ တစ်ကိုယ်ရေ ရည်ရွယ်ချက်များ၊ ဦးတည်ချက်များ၊ ရည်မှန်းချက်များနှင့် လိုအင်ဆန္ဒများကို လက်လွှတ်ရမည်။ သင်က တက်ကြွစွာ လိုက်စားသည်ဖြစ်စေ၊ အပျက်သဘောဆောင်သော၊ မတက်ကြွသောပုံစံဖြင့် လိုက်စားသည်ဖြစ်စေ ဤအရာများကို လက်လွှတ်ပြီး ကျိုးနွံနာခံရန် သင်ယူရမည်။ ဤသည်မှာ အရေးကြီးဆုံးဖြစ်သည်။ တစ်စုံတစ်ခုက သင့်အပေါ် ကျရောက်သည့်အခါ နည်းလမ်းတစ်ခုခုဖြင့် လုပ်ဆောင်ရန် သင်ဆုံးဖြတ်လျှင် ဦးစွာ မည်သည့်အတွက် ဤသို့လုပ်ဆောင်နေသည်ကို အကဲဖြတ်ရမည်။ မာနနှင့် အဆင့်အတန်းအတွက် ဖြစ်လျှင် ထိုနေရာ၌ပင် ရပ်လော့။ ပြီးလျှင် သင်က လုပ်ဆောင်ရန်ပြုလုပ်နေသည့် ခြေလှမ်းများကို နှေးစေလော့။ သင်က “ဘုရားသခင်၊ ကျွန်ုပ်သည် ဤသို့ လုပ်ဆောင်လိုစိတ်မရှိ။ ယင်းကို ပုန်ကန်လိုသော်လည်း ခွန်အားမရှိပါ။ ကျွန်ုပ်အား ခွန်အားပေးတော်မူပါ။ ကွယ်ကာတော်မူပါ။ ကျွန်ုပ်၏ မကောင်းမှုလုပ်ဆောင်နေသည့်လမ်းကြောင်းကို တားဆီးတော်မူပါ” ဟူ၍ ဆုတောင်းရမည်။ ထို့နောက်တွင် သင်ကိုယ်တိုင် သတိမထားမိလိုက်ဘဲ သင့်၌ ခွန်အားရှိလိမ့်မည်။ တစ်ခါတစ်ရံတွင် အပြစ်ကို ကျော်လွှားရန်၊ ဇာတိပကတိကို ပုန်ကန်ရန်၊ မိမိတို့၏ ဖောက်ပြန်ပျက်စီးသော စိတ်သဘောထားကို ပုန်ကန်ရန် လူတို့၏စွမ်းရည်သည် ၎င်းတို့၏ ဆန္ဒနှင့် စိတ်စွမ်းအားမှလည်းကောင်း၊ သမ္မာတရားကို ချစ်ရန် ၎င်းတို့၏ ပြင်းပြသည့်ဆန္ဒမှလည်းကောင်း လာသည်။ တစ်ခါတစ်ရံတွင် ယင်းသည် ဘုရားသခင်၏ လုပ်ဆောင်မှုကိုလိုအပ်သည်။ ဘုရားသခင်အပေါ် အမှီပြုခြင်း လိုအပ်သည်။ လူတို့သည် ဘုရားသခင်ကို စွန့်ခွာ၍မရပေ။ တစ်ခါတစ်ရံတွင် သင်သည် သမ္မာတရားကို နားလည်သည်။ သင့်တွင် လိုက်လျှောက်ရန် လမ်းကြောင်းရှိသည်။ ပြီးလျှင် သင်သည် အမှီအခိုကင်းစွာနေထိုင်နိုင်သည်ဟု ထင်သည်။ သို့သော် အခြေအနေအသစ်များကို သင်ရင်ဆိုင်ရသောအခါ၌ မည်သို့လက်တွေ့လုပ်ဆောင်ရမည်ကို သင်မသိ။ သင်သည် ဘုရားသခင်ထံ ဆုတောင်းပြီး ဘုရားသခင်ကို အမှီပြုရမည်။ လူတို့၏ ဘဝများသည် အနိမ့်အမြင့်၊ အတက်အကျတို့ဖြင့် ပြည့်လျက်ရှိသည်။ လူတို့သည် ဘုရားသခင်မရှိဘဲ မည်သည့်အခါမျှ မဖြစ်နိုင်ဟု ဆိုနိုင်သည်။ သမ္မာတရားမည်မျှကို ၎င်းတို့ နားလည်သည်ဖြစ်စေ ဘုရားသခင်ကို ၎င်းတို့ စွန့်ခွာ၍မရပေ။ ၎င်းတို့တွင် အပျက်သဘောဆောင်သည့် အခိုက်အတန့်မည်မျှရှိပါစေ၊ မလှုပ်မယှက်ဖြစ်သည့် အခိုက်အတန့်မည်မျှရှိပါစေ ၎င်းတို့သည် အဆုံး၌ ဘုရားသခင်၏ ခေါင်းဆောင်မှုနှင့် လမ်းပြမှုမှ မထွက်ခွာနိုင်ပေ။ ဘုရားသခင်ကို သင် ကျိုးနွံနာခံသည့်အကြိမ်များလေလေ၊ သင်၏ သမ္မာတရားစစ်မှန်မှုများက တိုးပွားလေလေဖြစ်သည်။ သင်၏ သမ္မာတရားစစ်မှန်မှုများ တိုးပွားသောအခါတွင် ဤသည်မှာ သင်၏ အသက်ဝင်ရောက်မှုက ပိုပို၍ နက်နဲလာသည်ကို သွယ်ဝိုက်ညွှန်းဆိုသည်။ သင်၏ အသက်ဝင်ရောက်မှုက ပို၍နက်နဲလာသောအခါ ဤသည်မှာ သင်၏ စိတ်သဘောထားက ပိုပို၍ ပြောင်းလဲလာသည်ဟု ဆိုလိုသည်။ သင်၏ စိတ်သဘောထားက များစွာ ပြောင်းလဲပြီးဖြစ်သောအခါ သင့်၌ ဝိညာဉ်ရင့်ကျက်မှုရှိပြီးဖြစ်သည်ဟု ဆိုလိုသည်။ သင်၏ ဝိညာဉ်ရင့်ကျက်မှုသည် သင့်အသက်ဝင်ရောက်မှုကို ထင်ဟပ်သည်။ သင့်၌ ဝိညာဉ်ရင့်ကျက်မှုရှိသောအခါ သင်၏ ဖောက်ပြန်ပျက်စီးသော စိတ်သဘောထားက သင့်အပေါ်တွင်ထားရှိသော ထိန်းချုပ်မှုနှင့် ချည်နှောင်မှုကို ကျော်လွှားနိုင်သည်။ အပြစ်ကို ကျော်လွှားရန် သင်၏ စွမ်းရည်သည် ပို၍သန်မာလာလိမ့်မည်ဖြစ်ပြီး သင့်စိတ်နှလုံးက ခွန်အားရှိလိမ့်မည်။ သင့်တွင် စိတ်လှုပ်ရှားထိခိုက်လွယ်သော ဆန္ဒ၊ မျှော်လင့်ချက်နှင့် ပြင်းပြသောရည်မှန်းချက်သာ ရှိမည်မဟုတ်။ သင်သည် ဤအဆင့်၌ ရစ်ဝဲနေမည်မဟုတ်။ ထိုထက် သင်သည် မြင့်တက်လိမ့်မည်။ ပြီးလျှင် အရွယ်ရောက်သူအဖြစ် ကြီးထွားရင့်ကျက်ကာ သမ္မာတရားနှင့် လူ့သဘာဝရှိသည့်သူတစ်ယောက် ဖြစ်လာလိမ့်မည်။ ဤသည်မှာ သမ္မာတရားအား လိုက်စားခြင်းလမ်းကြောင်းဖြစ်သည်။ ပြီးလျှင် သမ္မာတရားအားလိုက်စားခြင်း၏ ရလဒ်လည်းဖြစ်သည်။ ဦးတည်ချက်ကို သင်တို့မြင်နိုင်သလော။ မျှော်လင့်ချက်ကို မြင်နိုင်သလော။ (မြင်နိုင်ပါသည်။) ယင်းသည် ကောင်းသောအရာ ဖြစ်သည်။

အသက်ဝင်ရောက်မှုသည် မည်သည့်အခါမျှ မဆုံးသည့် ဖြစ်စဉ်တစ်ခုဖြစ်သည်။ ယင်းထံမှရရှိပြီး ပြောင်းလဲခြင်းကို ကြုံရရန်အတွက် ဘဝသက်တမ်းတစ်ခုကို သင်တွေ့ကြုံရမည်။ သမ္မာတရားအား လိုက်စားခြင်းလမ်းကြောင်းကို သင်လျှောက်လျှင်ပင် သင်က ဇာတိပကတိသာယာမှုများနှင့် အဆင့်အတန်း၏ အကျိုးအမြတ်များကို တပ်မက်ဆဲဖြစ်ပါက သင်သည် လဲကျပြီး ကျရှုံးဦးမည်သာဖြစ်သည်။ ယခုတွင် သင်၏လမ်းကြောင်းသည် မှန်ကန်သည်။ သင်၏ ဦးတည်ချက်ကို တွေ့ရှိပြီး ဖြစ်သည်။ မမှန်ကန်သော၊ မတက်ကြွသော၊ ဆန့်ကျင်သော၊ အပျက်သဘောဆောင်သော ထိုအရာများကို ရှင်းလင်းစွာ ပိုင်းခြားသိမြင်ပြီး ဖြစ်သည်။ သင်နှင့် ဤအရာများကြား၌ စည်းတစ်ခုရှိသည်။ အပြုသဘောဆောင်သောအရာများနှင့်ပတ်သက်လျှင် သင်သည် နားလည်ခြင်းလည်းရှိပြီး ထိုအရာများထံမှ အလွန်များပြားစွာ ရရှိပြီး ဖြစ်သည်။ ပြီးလျှင် ထိုအရာများစွာကို သဘောပေါက်နားလည်နိုင်ပြီးဖြစ်ကာ လက်ခံနိုင်ပြီး ဖြစ်သည်။ ဤမှားယွင်းသော၊ ကောက်ကျစ်ဆိုးယုတ်သော၊ အပျက်သဘောဆောင်သောအရာများနှင့် လုပ်ရပ်များအပေါ် ပိုင်းခြားသိမြင်မှုရရှိပြီးနောက် ကျန်ရှိသည့်အရာမှာ ဤအရာများကို သင်၏ စိတ်နှလုံးမှ လုံးလုံးလျားလျားထုတ်ပယ်ရန်၊ ထိုအရာများကို လုံးလုံးလျားလျားစွန့်ပစ်ပြီး ပုန်ကန်ရန်၊ ထို့နောက်တွင် သမ္မာတရား၏ စည်းမျဉ်းများနှင့်အညီ လက်တွေ့လုပ်ဆောင်ရန် ဖြစ်သည်။ ဤသို့ဖြင့် သင့်တွင် အသက်ဝင်ရောက်မှုရှိလိမ့်မည်။ အသက်ဝင်ရောက်မှုသည် အမှန်တကယ်တွင် မခက်ခဲပေ။ သမ္မာတရားကို သင်အမှန်တကယ်ချစ်ခြင်းရှိမရှိအပေါ်တွင်သာ မူတည်သည်။ သမ္မာတရားကို သင်အမှန်တကယ်ချစ်လျှင် ဤအပျက်သဘောဆောင်သောအရာများသည် သင့်အား အနိုင်ယူနိုင်မည်မဟုတ်။ သင်သည် အချိန်တစ်ခုကြာ မတက်မကြွဖြစ်ပြီး အားနည်းနိုင်သည်။ သို့သော် ဆက်လက်၍ ရှေ့ဆက်နိုင်ဆဲ ဖြစ်လိမ့်မည်။ သမ္မာတရားကို သင်မချစ်လျှင်၊ သို့မဟုတ် သမ္မာတရားကို သိပ်မချစ်ဘဲ အပြင်ပန်း လုပ်ရိုးလုပ်စဉ်များကိုသာ အာရုံစိုက်လျှင်၊ သင့်ကိုယ်သင်အနည်းငယ်အသုံးခံပြီး သင့်ကိုယ်သင် အနည်းငယ်ပေးဆပ်လျှင်၊ သင့်တာဝန်ကို ထမ်းဆောင်ရန် စောစီးစွာထပြီး နောက်ကျ၍ အိပ်နိုင်လျှင်၊ သင်သည် အလုပ်လုပ်ပေးသည့် အဆင့်တွင်သာ ရစ်ဝဲနေပြီး သမ္မာတရားအား နားလည်ခြင်းကို မရယူလိုလျှင်၊ သို့မဟုတ် စစ်မှန်မှုအတွင်းသို့ မဝင်ရောက်လိုလျှင်၊ ဘုရားသခင်အတွက် သင့်ကိုယ်သင် အသုံးခံကာ ကြီးမားသော ပြစ်မှားမှုများအား မကျူးလွန်ခြင်း၌သာ ကျေနပ်ရောင့်ရဲလျှင်၊ သင်သည် ရပ်တန့်နေပြီး ရှေ့သို့မရွေ့လျှင် ဤအရာအားလုံး၏ အကျိုးဆက်များမှာ မည်သည့်အရာ ဖြစ်မည်နည်း။ ဘုရားသခင်၏ အသိအမှတ်ပြုခြင်းကို လုံးဝ လက်ခံရရှိမည်မဟုတ်။ သင်သည် သင်၏ သမ္မာတရားလိုက်စားခြင်းကို အောင်မြင်စေလိုပြီး အသက်ကို အမှန်တကယ်ရလိုလျှင် ယင်းသည် ရိုးရှင်းသောကိစ္စမဟုတ်။ သင်၏ ကိုယ်ပိုင်အကျိုးစီးပွားများကို လက်လွှတ်ပြီး ကျော်ကြားမှု၊ အကျိုးအမြတ်နှင့် အဆင့်အတန်းအား လိုက်စားခြင်း၊ ကောင်းချီးများအား လိုက်စားခြင်း၊ သို့မဟုတ် သရဖူကိုဖြစ်စေ၊ ဆုလာဘ်များကိုဖြစ်စေ လိုက်စားခြင်းတို့ကဲ့သို့သော မသင့်လျော်သည့် လိုက်စားမှုများအားလုံးကို စွန့်ပစ်ရမည်။ ဤအရာများအားလုံးကို လက်လွှတ်ရမည်။ သမ္မာတရားကို သင်အမှန်တကယ်ချစ်ပြီး ဘုရားနှုတ်ကပတ်တော်အား ဆင်ခြင်ခြင်းကို နှစ်သက်လျှင် အသက်ဝင်ရောက်မှုသည် သင့်အတွက် ခက်ခဲသောအမှုကိစ္စဖြစ်မည်မဟုတ်။ သမ္မာတရားကို သင်နားလည်သရွေ့ သင့်တွင် အလိုအလျောက် လမ်းကြောင်းတစ်ခု ရှိမည်ဖြစ်ပြီး အခက်အခဲများစွာရှိမည်မဟုတ်။

၂၀၁၈ ခုနှစ်၊ ဇွန်လ ၂၁ ရက်