ပြီးခဲ့သည့် စုဝေးပွဲတွင် “သမ္မာတရားကို လိုက်စားရန်နည်းလမ်း” ဟူသည့် အကြောင်းအရာနှင့်ပတ်သက်၍ ငါတို့ ဆက်လက် မိတ်သဟာယဖွဲ့ခဲ့ကြသည်။ မိတ်သဟာယ၏ အဓိကအကြောင်းအရာမှာ အဘယ်အရာဖြစ်သနည်း။ ငါတို့သည် လူတို့၏ ပင်ကိုအခြေအနေများနှင့် ၎င်းတို့၏ ဖောက်ပြန်ပျက်စီးသော စိတ်သဘောထားများကြား ခြားနားချက်များနှင့်ပတ်သက်၍ မိတ်သဟာယဖွဲ့ခဲ့ကြပြီး ဤကဏ္ဍနှစ်ခုနှင့်ပတ်သက်၍လည်း သီးသန့် မိတ်သဟာယဖွဲ့ခဲ့ကြသည်။ မိတ်သဟာယမှတစ်ဆင့် ဘုရားသခင် လုပ်ဆောင်ရန် ရည်ရွယ်သည့် အလုပ်ကိုလည်းကောင်း၊ လူတို့ကို ကယ်တင်ရာတွင် မည်သည့်ကဏ္ဍများကို ဘုရားသခင် ပြောင်းလဲလိုသည်ကိုလည်းကောင်း သင်တို့တွင် အတိုင်းအတာတစ်ခုအထိ နားလည်မှု ရှိကြသလော။ (ရှိပါသည်။ ဘုရားသခင်၏ ပြီးခဲ့သည့် မိတ်သဟာယဖွဲ့ခြင်းမှတစ်ဆင့် ကိုယ်တော်၏အလုပ်ဖြင့် ဘုရားသခင် ပြောင်းလဲရန် ရည်ရွယ်သည့်အရာမှာ လူတို့၏ ဖောက်ပြန်ပျက်စီးသော စိတ်သဘောထားများ ဖြစ်ကြောင်း ကျွန်ုပ်နားလည်ခဲ့ပါသည်။) လူတို့ကို ကယ်တင်ရာတွင် ဘုရားသခင်သည် ၎င်းတို့ကို ၎င်းတို့၏ ဖောက်ပြန်ပျက်စီးသော စိတ်သဘောထားများမှ ကင်းစင်စေရန် ရည်ရွယ်သည်။ သူသည် ၎င်းတို့၏ ပင်ကိုအခြေအနေများကို ပြောင်းလဲရန် ရည်ရွယ်ခြင်း မရှိပေ၊ မှန်သည် မဟုတ်လော။ (မှန်ပါသည်။) ဘုရားသခင်သည် သမ္မာတရားကို ဖော်ပြပြီး လူတို့အား သမ္မာတရားဖြင့် ထောက်ပံ့ပေးကာ အမျိုးမျိုးသော အလုပ်နည်းလမ်းများကို အသုံးပြုသည်။ ဤအရာအားလုံးသည် လူတို့၏ ဖောက်ပြန်ပျက်စီးသော စိတ်သဘောထားများကို ဦးတည်ပေသည်။ သူ၏အလုပ်မှတစ်ဆင့် ဘုရားသခင်သည် လူတို့အား ရှင်သန်မှုအတွက် ၎င်းတို့မှီခိုအားထားရပြီး စာတန်၏ ဖောက်ပြန်ပျက်စီးစေခြင်းကို ခံထားရသည့် စိတ်သဘောထားများကို ဖယ်ရှားနိုင်စေသည်။ ဤနည်းအားဖြင့် ဘုရားသခင်၏ နှုတ်ကပတ်တော်များနှင့် သမ္မာတရားသည် လူတို့ထဲတွင် အလုပ်လုပ်ပြီး ၎င်းတို့၏အသက် ဖြစ်လာသည်။ ဤသည်မှာ ဘုရားသခင်၏အလုပ်က စွမ်းဆောင်ရရှိရန် ရည်ရွယ်သည့် နောက်ဆုံးရလဒ် ဖြစ်သည်။ ဤကဏ္ဍနှင့်ပတ်သက်သည့် မိတ်သဟာယဖွဲ့ခြင်းမှ သင်တို့ အဘယ်အရာကို သဘောပေါက်ခဲ့ကြသနည်း။ မည်သည့်အကြောင်းအရာက သင်တို့အပေါ် အနက်ရှိုင်းဆုံးသော အထင်အမြင်ကို ဖြစ်စေခဲ့သနည်း။ ခေတ္တမျှ စဉ်းစားကြည့်လော့။ (ဘုရားသခင်၏ ပြီးခဲ့သည့် မိတ်သဟာယဖွဲ့ခြင်းက ကျွန်ုပ်ထားရှိခဲ့သော မှားယွင်းပြီး အဓိပ္ပာယ်မဲ့သည့် အမြင်ရှုထောင့်တစ်ခုကို ပြုပြင်ရန် ကူညီပေးခဲ့ပါသည်။ ယခင်က ဘုရားသခင်သည် လူတို့၏ ပင်ကိုယ်အစွမ်းအစ၊ စွမ်းရည်များနှင့် ပင်ကိုစရိုက်ကို ပြောင်းလဲလိမ့်မည်ဟု ကျွန်ုပ်ထင်ခဲ့သော်လည်း ဘုရားသခင်၏ မိတ်သဟာယဖွဲ့ခြင်းမှတစ်ဆင့် ဘုရားသခင်သည် သဘာဝလွန်အလုပ်ကို မလုပ်ဆောင်ကြောင်း ကျွန်ုပ်နားလည်ခဲ့ပါသည်။ ဘုရားသခင်၏အလုပ်မှာ စာတန်၏အရာများဖြစ်ကြသည့် လူတို့၏ ဖောက်ပြန်ပျက်စီးသော စိတ်သဘောထားများနှင့် ၎င်းတို့၏ အမျိုးမျိုးသော မှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများကို ပြောင်းလဲရန် ဖြစ်ပါသည်။ ဘုရားသခင်၏ နှုတ်ကပတ်တော်များကို လက်တွေ့လုပ်ဆောင်ခြင်းအားဖြင့် လူတို့၏ ပုံမှန်လူ့သဘာဝသည် ပြန်လည်ကောင်းမွန်လာပြီး ၎င်းတို့၏ အသိစိတ်နှင့် ဆင်ခြင်တုံတရားတို့သည် တိုး၍ ပုံမှန်ဖြစ်လာပါသည်။ တစ်ချိန်တည်းတွင် သမ္မာတရားကို လိုက်စားခြင်း၏ အရေးပါမှုကိုလည်း ကျွန်ုပ်နားလည်ခဲ့ပါသည်။ သမ္မာတရားကို လိုက်စားပြီး သမ္မာတရားကို လက်တွေ့လုပ်ဆောင်ခြင်းအားဖြင့်သာ ကျွန်ုပ်တို့၏ ဖောက်ပြန်ပျက်စီးသော စိတ်သဘောထားများကို ဖြေရှင်းနိုင်ပါသည်၊ ဘုရားသခင်၏ နှုတ်ကပတ်တော်များ ကျွန်ုပ်တို့၏ အသက် ဖြစ်လာသည့်အခါ ဘုရားသခင်၏ ကယ်တင်ခြင်းကို ကျွန်ုပ်တို့ ခံရပါသည်။ ဘုရားသခင်၏ မိတ်သဟာယဖွဲ့ခြင်းနှင့်ဆိုင်သော ဤကဏ္ဍနှစ်ခုသည် ကျွန်ုပ်အပေါ် အတော်အတန် နက်ရှိုင်းသော အထင်အမြင်ကို ဖြစ်စေခဲ့ပါသည်။) ပြီးခဲ့သည့် မိတ်သဟာယဖွဲ့ခြင်း၏ အကြောင်းအရာတွင် ရူပါရုံများနှင့်သက်ဆိုင်သော သမ္မာတရားတစ်ခု ပါဝင်ခဲ့သည်၊ ယင်းတွင် ဘုရားသခင်၏ အလုပ်နှင့်ဆိုင်သော တိကျသည့် ကဏ္ဍအချို့၊ ဘုရားသခင်၏အလုပ်က ဦးတည်သည့်အရာများနှင့် ယင်းက စွမ်းဆောင်ရရှိရန် ရည်ရွယ်သည့် ရလဒ်များ ပါဝင်ခဲ့သည်။ မိတ်သဟာယဖွဲ့ခဲ့သည့် အကြောင်းအရာကို အခြေခံ၍ တိကျသော မေးခွန်းအချို့ ပေါ်ပေါက်လာခဲ့သည်။ ဤမေးခွန်းများတွင် နေ့စဉ်အသက်တာရှိ မည်သည့်သရုပ်သကန်များကို လူတစ်ဦး၏ ပင်ကိုအခြေအနေများအဖြစ် မှတ်ယူရသည်၊ မည်သည့်သရုပ်သကန်များက လူတစ်ဦး၏ ကိုယ်ကျင့်စရိုက် သို့မဟုတ် ၎င်းတို့၏ လူ့သဘာဝ အနှစ်သာရကို ထင်ဟပ်စေသည်၊ ဆိုလိုသည်မှာ လူတစ်ဦး၏ လူ့သဘာဝသည် ကောင်းမကောင်းဟူသည့် သရုပ်သကန်အချို့ဟု ငါတို့ အများအားဖြင့် ရည်ညွှန်းသည့်အရာနှင့် မည်သည့်သရုပ်သကန်များက ဖောက်ပြန်ပျက်စီးသော စိတ်သဘောထားများ၏ ထုတ်ဖော်ခြင်းများဖြစ်သည်တို့ ပါဝင်သည်။ ဤသည်တို့မှာ တိကျသော မေးခွန်းများ ဖြစ်သည်၊ ဟုတ်သည် မဟုတ်လော။ ယခင်က ဤခေါင်းစဉ်ကို ငါတို့ မိတ်သဟာယဖွဲ့ခဲ့စဉ်က ဥပမာအချို့ကို ပေးခဲ့သော်လည်း ၎င်းတို့သည် သိပ်ပြီး ဦးတည်ချက်မရှိသကဲ့သို့ တိတိကျကျလည်း မရှိခဲ့ပေ။ ယနေ့ ငါတို့သည် လူတို့ဖော်ပြသည့် မည်သည့်သရုပ်သကန်များက ပင်ကိုအခြေအနေများဖြစ်သည်၊ မည်သည့်အရာများက ၎င်းတို့၏ ကိုယ်ကျင့်စရိုက်နှင့် သက်ဆိုင်သည်၊ မည်သည့်အရာများက ဖောက်ပြန်ပျက်စီးသော စိတ်သဘောထားများဟူသည့် အမျိုးအစားထဲသို့ ကျရောက်သည်တို့ကို ခွဲခြားရန်၊ ဤကဏ္ဍသုံးခု၏ တိကျသော သရုပ်သကန်များကို ခွဲခြားရန် ဤပြဿနာနှင့်ပတ်သက်၍ အတိအကျ မိတ်သဟာယဖွဲ့ကြမည်။ ဤသို့ဖြင့် လူတို့သည် မိမိတို့၏ နေ့စဉ်အသက်တာတွင် ကြုံတွေ့ရသော မရေမတွက်နိုင်သော ပြဿနာများကို ဘုရားသခင်၏ နှုတ်ကပတ်တော်များနှင့် သမ္မာတရားအပေါ် အခြေခံ၍ ဤကဏ္ဍသုံးခုနှင့် မည်သို့မှန်ကန်စွာ အမျိုးအစား ခွဲခြားရမည်ကို ပို၍ ရှင်းလင်းလာမည်ဖြစ်သည်။ ဤသည်တွင် လူတို့၏ မည်သည့်ထုတ်ဖော်ခြင်းများက ကိုင်တွယ်ရန် သို့မဟုတ် ချုပ်တည်းရန် မလိုအပ်သည့် ပုံမှန်လူ့သဘာဝ၏ ပင်ကိုကဏ္ဍများဖြစ်သည်၊ မည်သည့်ကဏ္ဍများက လူတို့၏ လူ့သဘာဝနှင့်ဆိုင်သော ပြဿနာများ၏ ထုတ်ဖော်ခြင်းများဖြစ်ပြီး ၎င်းတို့ကို မည်သို့ပြောင်းလဲကာ ပြုပြင်သင့်သည် သို့မဟုတ် သမ္မာတရားကို ရှာဖွေခြင်းမှတစ်ဆင့် ဖြေရှင်းသင့်သည်၊ ပြီးလျှင် မည်သည့်သရုပ်သကန်များက ဖောက်ပြန်ပျက်စီးသော စိတ်သဘောထားများဟူသည့် အမျိုးအစားထဲသို့ ကျရောက်ပြီး လူတို့သည် ဤစိတ်သဘောထားများ၏ အနှစ်သာရကို မည်သို့နားလည်လာသင့်ကာ သမ္မာတရားကို လက်ခံပြီး လက်တွေ့လုပ်ဆောင်ခြင်းမှတစ်ဆင့် ဖြေရှင်းကာ ဖယ်ရှားသင့်သည်တို့ ပါဝင်သည်။ ဤအရာအားလုံးတွင် တိကျသော သရုပ်သကန်များ ရှိကြပြီး ပါဝင်သော လက်တွေ့လုပ်ဆောင်ခြင်း၏ တိကျသော လမ်းကြောင်းများလည်း ရှိသည်မှာ ပြောစရာမလိုချေ။ လူတို့၏ မတူညီသော သရုပ်သကန်များနှင့်အညီ ငါတို့သည် လက်တွေ့လုပ်ဆောင်ခြင်း၏ စည်းမျဉ်းများနှင့် လမ်းကြောင်းများကို မိတ်သဟာယဖွဲ့မည်ဖြစ်ရာ လူတို့သည် ဤပြဿနာများကို မည်သို့ရင်ဆိုင်ကာ ဖြေရှင်းရမည်ကို နားလည်နိုင်မည်ဖြစ်သောကြောင့် အမျိုးမျိုးသော ပြဿနာများအတွက် ပို၍ လက်တွေ့ကျသော သဘောထားများနှင့် လက်တွေ့လုပ်ဆောင်ခြင်း လမ်းကြောင်းများ ရှိနိုင်မည်ဖြစ်သည်။ ဤနည်းလမ်းဖြင့် မိတ်သဟာယဖွဲ့ခြင်းသည် ကောင်းသလော။ (ကောင်းပါသည်။)

ပင်ကိုအခြေအနေများ၊ လူ့သဘာဝနှင့် ဖောက်ပြန်ပျက်စီးသော စိတ်သဘောထားများဟူသည့် ပြဿနာသုံးခုနှင့်ပတ်သက်၍ ငါတို့သည် ယခင်က နှစ်ကြိမ် မိတ်သဟာယဖွဲ့ခဲ့ပြီးဖြစ်သည်။ လူတို့၏ သရုပ်သကန်များနှင့် ထုတ်ဖော်ခြင်းများသည် ဤပြဿနာသုံးခုထဲမှ မည်သည့်အရာနှင့် သက်ဆိုင်သည်ကို ငါတို့သည် ပစ်မှတ်ထား၍ အတိအကျ မရှင်းပြခဲ့သော်လည်း ပြဿနာတစ်ခုစီကို မိတ်သဟာယဖွဲ့သည့်အခါ ဥပမာအချို့ကို ပေးခဲ့သည်။ ယခင်မိတ်သဟာယဖွဲ့ခြင်းများတွင် ဤပြဿနာသုံးခုကို ထိမိသည့်အခါ ဤပြဿနာများ၏ အနှစ်သာရ သို့မဟုတ် ပါဝင်သော လက်တွေ့လုပ်ဆောင်ခြင်း၏ လမ်းကြောင်းများနှင့် စည်းမျဉ်းများကိုလည်း ငါတို့ မိတ်သဟာယဖွဲ့ခဲ့သည်။ ယခု ခုနက ငါဖော်ပြခဲ့သော ပြဿနာသုံးခုနှင့်ပတ်သက်၍ ပင်ကိုအခြေအနေများက မည်သည့်အရာကို ရည်ညွှန်းသည်ကို လူတိုင်းအား ဦးစွာ ဆွေးနွေးစေလိုသည်။ သင်တို့အားလုံးသည် ဦးစွာ အခြေခံသဘောတရားတစ်ခုကို ရရှိရန် ဤအကြောင်းကို အကြမ်းဖျင်း မိတ်သဟာယဖွဲ့နိုင်သည်။ (ပင်ကိုအခြေအနေများဆိုသည်မှာ လူတစ်ဦး၏ အစွမ်းအစ၊ စွမ်းရည်များ၊ ပင်ကိုစရိုက်နှင့် ပင်ကိုအသိစိတ်တို့ကို ရည်ညွှန်းပါသလော။) ဤအကြောင်းအရာကို ငါတို့ ယခင်က မိတ်သဟာယဖွဲ့ခဲ့ပြီးဖြစ်သဖြင့် သင်တို့အားလုံး ယင်းနှင့် ရင်းနှီးသင့်သည်။ နောက်ထပ် ရှိသေးသလော။ အားသာချက်များနှင့် အသွင်အပြင်ကို ပင်ကိုအခြေအနေများအဖြစ် မှတ်ယူပါသလော။ (မှတ်ယူပါသည်။) လူတစ်ဦး၏ မျိုးရိုးနောက်ခံနှင့်ပတ်သက်၍ရော မည်သို့နည်း။ (ယင်းလည်း ပါဝင်ပါသည်။) ပြီးလျှင် လူနေမှုဘဝ လုပ်ရိုးလုပ်စဉ်များနှင့် အလေ့အထများ၊ ဟုတ်သည် မဟုတ်လော။ အခြားအရာ ရှိသေးသလော။ (စိတ်ဝင်စားမှုများနှင့် ဝါသနာများလည်း ပါဝင်ပါသည်။) စိတ်ဝင်စားမှုများနှင့် ဝါသနာများနှင့် အားသာချက်များကြားတွင် အနည်းငယ် ခြားနားမှုရှိသည်။ စိတ်ဝင်စားမှုများနှင့် ဝါသနာများကို ထည့်သွင်းခြင်းက ပို၍ တိကျစေသည်။ ၎င်းတို့ကို အစဉ်လိုက် စာရင်းပြုစုကြစို့။ ပထမမှာ မျိုးရိုးနောက်ခံ ဖြစ်သည်။ ဒုတိယမှာ အသွင်အပြင် ဖြစ်သည်။ တတိယမှာ ပင်ကိုစရိုက် ဖြစ်သည်။ စတုတ္ထမှာ ဗီဇ ဖြစ်သည်။ ပဉ္စမမှာ အစွမ်းအစ ဖြစ်သည်။ ဆဋ္ဌမမှာ အားသာချက်များ ဖြစ်သည်။ သတ္တမမှာ စိတ်ဝင်စားမှုများနှင့် ဝါသနာများ ဖြစ်သည်။ အဋ္ဌမမှာ စွမ်းရည်များ ဖြစ်သည်။ ပြီးလျှင် လူနေမှုဘဝ အလေ့အထများနှင့် လူနေမှုဘဝ လုပ်ရိုးလုပ်စဉ်များ ဖြစ်သည်။ ဤနောက်ဆုံးနှစ်ခုသည် ဆင်တူသော်လည်း တိကျသော ခြားနားချက်အချို့ ရှိသည်။ ဤအရာများသည် စုစုပေါင်း ဆယ်ခုအထိ ရှိသည်။ ရှေ့ဆက်ပြီး ၎င်းတို့ကို ဖတ်ပြလော့။ (တစ်- မျိုးရိုးနောက်ခံ။ နှစ်- အသွင်အပြင်။ သုံး- ပင်ကိုစရိုက်။ လေး- ဗီဇ။ ငါး- အစွမ်းအစ။ ခြောက်- အားသာချက်များ။ ခုနစ်- စိတ်ဝင်စားမှုများနှင့် ဝါသနာများ။ ရှစ်- စွမ်းရည်များ။ ကိုး- လူနေမှုဘဝ အလေ့အထများ။ ဆယ်- လူနေမှုဘဝ လုပ်ရိုးလုပ်စဉ်များ ဖြစ်ပါသည်။) ဤသည်တို့အားလုံးသည် လူတို့၏ ပင်ကိုအခြေအနေများ ဖြစ်ကြသည်။ ငါတို့သည် ပင်ကိုအခြေအနေများအကြောင်းကိုလည်း အတိအကျ မိတ်သဟာယဖွဲ့သင့်သည် မဟုတ်လော။ မိတ်သဟာယဖွဲ့ခြင်းမရှိဘဲ မှန်ကန်သော ခွဲခြားမှုများကို သင်တို့ဘာသာ ပြုလုပ်နိုင်ကြမည်လော။ (မပြုလုပ်နိုင်ပါ။) မည်သည့်အခြေအနေများတွင် သင်တို့သည် ခွဲခြားမှုများကို မပြုလုပ်နိုင်ကြသနည်း။ (တစ်ခါတစ်ရံ လူတစ်ဦး၌ အချို့သော သရုပ်သကန်များကို ငါတို့မြင်သည့်အခါ ၎င်းတို့သည် ထိုသူ၏ ပင်ကိုစရိုက် သို့မဟုတ် ဗီဇကို ထင်ဟပ်စေခြင်းလော သို့မဟုတ် ဖောက်ပြန်ပျက်စီးသော စိတ်သဘောထားများ၏ ထုတ်ဖော်ခြင်းများလောဟု ငါတို့ မပြောနိုင်ပါ။) (လူနေမှုဘဝ အလေ့အထများနှင့် လူနေမှုဘဝ လုပ်ရိုးလုပ်စဉ်များလည်း ပါဝင်ပါသည်၊ ယခင်က ဤအရာများသည် ရရှိလာသော လူနေမှုအခြေအနေများနှင့် နောက်ခံကို အခြေခံ၍ ဖြစ်ပေါ်လာသည်ဟု ကျွန်ုပ်ထင်ခဲ့သည်၊ ယင်းတို့သည် ပင်ကိုအခြေအနေများ ဖြစ်နိုင်သည်ကို ကျွန်ုပ် မသိခဲ့ပါ။) သင်မြင်သလော၊ အဓိကအကြောင်းအရာတစ်ခုအတွင်း အသေးစိတ်ကျပြီး တိကျသော အကြောင်းအရာအချို့ကို ငါတို့ ခွဲခြမ်းလိုက်သည့်အခါ အပေါ်ယံအားဖြင့် သင်သည် ဤတိကျသောအရာများကို သိပုံရသော်လည်း လက်တွေ့အသက်တာတွင် သင်သည် ယင်းတို့ကို အနည်းငယ် ရောထွေးသွားသည်၊ ယင်းတို့ကို မည်သို့ခွဲခြားရမည်ကို သင် သိပ်ပြီး ရှင်းရှင်းလင်းလင်း မသိသေးပေ၊ ဟုတ်သည် မဟုတ်လော။ (ဟုတ်ပါသည်။) ငါတို့သည် ဤပြဿနာနှင့်ပတ်သက်၍ တိကျသော မိတ်သဟာယဖွဲ့ခြင်းအချို့ကို ပြုလုပ်ရန် လိုအပ်နေသေးသည်။

ငါတို့ ခုနက ဖော်ပြခဲ့သော ကဏ္ဍသုံးခုဖြစ်သည့် ပင်ကိုအခြေအနေများ၊ လူ့သဘာဝ၊ ဖောက်ပြန်ပျက်စီးသော စိတ်သဘောထားများတို့နှင့်ပတ်သက်၍ ပင်ကိုအခြေအနေများအတွက် တိကျသော အကြောင်းအရာအချို့ကို စာရင်းပြုစုပြီး ယင်းတို့ကို တစ်ခုချင်း အသေးစိတ် မိတ်သဟာယဖွဲ့ကြစို့။ လူ့သဘာဝနှင့် ဖောက်ပြန်ပျက်စီးသော စိတ်သဘောထားများအတွက်မူ ယင်းတို့ကို ငါတို့ စာရင်းပြုစုမည်မဟုတ်။ ပင်ကိုအခြေအနေများ၏ တိကျသော အကြောင်းအရာများနှင့် သရုပ်သကန်များကို မိတ်သဟာယဖွဲ့နေစဉ်တွင် လူ့သဘာဝ၏ သရုပ်သကန်အချို့နှင့် ဖောက်ပြန်ပျက်စီးသော စိတ်သဘောထားများ၏ ထုတ်ဖော်ခြင်းများကိုလည်း ငါတို့ ဆွေးနွေးသွားမည် ဖြစ်သည်။ ဤအရာများကို ငါတို့ မိတ်သဟာယဖွဲ့သည့်အခါ ယင်းတို့သည် ပြောင်းလဲရန် မလိုအပ်သည့် ပင်ကိုအခြေအနေများနှင့် သက်ဆိုင်ခြင်းဟုတ်မဟုတ်ကိုဖြစ်စေ၊ သမ္မာတရားကို ရှာဖွေခြင်းမှတစ်ဆင့် ဖြေရှင်းရန် လိုအပ်သည့် လူတို့၏ ကိုယ်ကျင့်စရိုက် သို့မဟုတ် ၎င်းတို့၏ ဖောက်ပြန်ပျက်စီးသော စိတ်သဘောထားများနှင့်ဆိုင်သော ပြဿနာများနှင့် သက်ဆိုင်ခြင်း ရှိမရှိကိုဖြစ်စေ သင်တို့ ပိုင်းခြားပြီး ခွဲခြားနိုင်သည်။ တိကျသော ဥပမာများနှင့် ပြဿနာများကို အသုံးပြု၍ တိကျသော မိတ်သဟာယဖွဲ့ခြင်းတွင် ပါဝင်ခြင်းအားဖြင့် ခွဲခြားမှုများသည် ပို၍ ရှင်းလင်းလာမည် ဖြစ်သည်၊ ဟုတ်သည် မဟုတ်လော။ (ဟုတ်ပါသည်။) ဥပမာအားဖြင့် အချို့လူများသည် ဆင်းရဲသော မိသားစုများမှ လာကြပြီး စီးပွားရေးအရ အဆင်မပြေကြပေ။ ၎င်းတို့သည် ငွေကြေးကျပ်တည်းသော အခြေအနေများတွင် နေထိုင်ကြသည်၊ ၎င်းတို့သည် အစဉ်သဖြင့် ငွေရေးကြေးရေးခက်ခဲပြီး အသုံးစရိတ်တိုင်းကို တွက်ချက်ကာ စီစဉ်ရသည်။ ငွေသုံးခြင်းနှင့်ပတ်သက်လာလျှင် ၎င်းတို့၏ လုပ်နည်းကိုင်နည်းမှာ ငွေတစ်ပြားကို တတ်နိုင်သမျှ အသုံးခံအောင် သုံးစွဲရန် ဖြစ်သည်။ ၎င်းတို့သည် ထိုသို့သော မိသားစုများနှင့် ထိုသို့သော အခြေအနေများအောက်တွင် မွေးဖွားလာခဲ့ကြသည်။ ဤသည်မှာ ငါတို့ မိတ်သဟာယဖွဲ့ခဲ့သော ကဏ္ဍသုံးခုထဲမှ မည်သည့်အရာတွင် ပါဝင်သနည်း။ ယင်းသည် ပင်ကိုအခြေအနေလော၊ လူ့သဘာဝလော သို့မဟုတ် ဖောက်ပြန်ပျက်စီးသော စိတ်သဘောထားလော။ ဤသည်မှာ ၎င်းတို့၏ မျိုးရိုးနောက်ခံ၏ ကဏ္ဍတစ်ခုဖြစ်ပြီး ပင်ကိုအခြေအနေတစ်ခု ဖြစ်သည်၊ ဟုတ်သည် မဟုတ်လော။ (ဟုတ်ပါသည်။) ဤမျိုးရိုးနောက်ခံသည် ကောင်းသလော သို့မဟုတ် ဆိုးသလော။ (လူ့ရှုထောင့်မှကြည့်လျှင် ဆိုးပါသည်။) ၎င်းတို့သည် ရပ်တည်ရန် ရုန်းကန်ရသည်၊ ၎င်းတို့၏ မိသားစုများသည် ဆင်းရဲမွဲတေသည်၊ ၎င်းတို့၏ စီးပွားရေးအခြေအနေများသည် မကြွယ်ဝ သို့မဟုတ် မချောင်လည်ပေ၊ ဤသည်တို့မှာ ၎င်းတို့၏ မျိုးရိုးနောက်ခံနှင့် သက်ဆိုင်သော ပြဿနာများ ဖြစ်ကြသည်။ ဤလူအမျိုးအစားသည် ဆင်းရဲသော မိသားစုတွင် မွေးဖွားခဲ့ကာ ငါးဥဆားနယ်ကို မည်သည့်အခါမျှ မစားသုံးဖူးဘဲ၊ နာမည်ကြီးတံဆိပ် အဝတ်အစားများကို မည်သည့်အခါမျှ မဝတ်ဆင်ဖူးဘဲ၊ အမျိုးမျိုးသော ဇိမ်ခံပစ္စည်းများကို မည်သည့်အခါမျှ မခံစားဖူးဘဲ၊ ဈေးကြီးသည့် မည်သည့်အရာနှင့်မျှဖြစ်စေ၊ ကြွယ်ဝသောပုဂ္ဂိုလ် တစ်ဦးတလေနှင့်မျှဖြစ်စေ၊ ကျော်ကြားသူ တစ်ဦးတလေနှင့်မျှဖြစ်စေ မထိတွေ့ဖူးသော်လည်း ၎င်းတို့သည် အသိစိတ်နှင့် ဆင်ခြင်တုံတရားကို ပိုင်ဆိုင်ကြသည်။ အခြားသူများနှင့် ပေါင်းသင်းဆက်ဆံသည့်အခါ ၎င်းတို့သည် မည်သည့်အခါမျှ အခွင့်အရေးမယူကြပေ။ တစ်စုံတစ်ဦး ကောင်းမွန်သောအရာများကို ခံစားနေသည်ကို ၎င်းတို့မြင်သည့်အခါ သို့မဟုတ် တစ်စုံတစ်ဦး ကြွယ်ဝချမ်းသာသည်ကို ၎င်းတို့မြင်သည့်အခါ အားကျစိတ်ကို ခံစားရသော်လည်း အခြားသူများ၏ ပိုင်ဆိုင်မှုများကို ခိုးယူရန် သို့မဟုတ် သိမ်းပိုက်ရန် မည်သည့်အခါမျှ မစဉ်းစားကြပေ။ ဤလူအမျိုးအစား၏ ထုတ်ဖော်ခြင်းသည် မည်သည့်ကဏ္ဍနှင့် သက်ဆိုင်သနည်း။ (ကိုယ်ကျင့်စရိုက်နှင့် လူ့သဘာဝ ဖြစ်ပါသည်။) ယင်းသည် ၎င်းတို့၏ လူ့သဘာဝနှင့် သက်ဆိုင်သည်။ ဤကဏ္ဍတွင် ၎င်းတို့၏ လူ့သဘာဝ၏ သရုပ်သကန်သည် ကောင်းသလော သို့မဟုတ် ဆိုးသလော။ (၎င်းတို့၏ လူ့သဘာဝသည် ကောင်းပြီး ဖြောင့်မတ်ပါသည်။) ဤသည်ကို ဖြောင့်မတ်သည်ဟုေ မှတ်ယူ၍မရသေးပေ၊ ယင်းမှာ ၎င်းတို့သည် သေးငယ်သော အကျိုးအမြတ်များကို အခွင့်အရေး မယူသကဲ့သို့ သူဌေးများကို မျက်နှာချိုမသွေးဟုသာ ဆိုလိုသည်။ ၎င်းတို့သည် ထိုသို့သော ကိစ္စရပ်များကို မှန်ကန်စွာ ဆက်ဆံနိုင်ကြသည်။ ဤလူအမျိုးအစား၏ လူ့သဘာဝသည် မည်သို့ရှိသနည်း။ (၎င်းတို့၏ လူ့သဘာဝသည် အတော်အတန် ကောင်းမွန်ပါသည်။) ဤသည်မှာ ဓမ္မဓိဋ္ဌာန်ကျသော ပြောဆိုချက်ဖြစ်သည်၊ ၎င်းတို့၏ လူ့သဘာဝသည် အတော်အတန် ကောင်းမွန်သည်၊ ဆိုလိုသည်မှာ ၎င်းတို့၏ ကိုယ်ကျင့်စရိုက်အရ ၎င်းတို့တွင် အတော်အတန် တည်ကြည်မှုနှင့် ဂုဏ်သိက္ခာ ရှိကြသည်။ ၎င်းတို့၏ မျိုးရိုးနောက်ခံသည် ဆင်းရဲပြီး မမြင့်မြတ်သော်လည်း ၎င်းတို့သည် ဆင်းရဲသားကို မထီမဲ့မြင်မပြုသကဲ့သို့ သူဌေးကို မျက်နှာသာမပေးသည့်အပြင် အခြားသူများကို အခွင့်အရေးမယူကြပေ။ အခြားလူအမျိုးအစားတစ်ခု ရှိသေးသည်။ ၎င်းတို့သည် ကြွယ်ဝသော မိသားစုတွင် မွေးဖွားခဲ့သည်၊ သို့မဟုတ် ဘာသာတရားမရှိသူများ ပြောသည့်အတိုင်း “ရွှေဇွန်းကိုက်ပြီး မွေးလာသည်” ဟူ၍ဖြစ်သည်။ ၎င်းတို့သည် အစားအသောက် သို့မဟုတ် အဝတ်အစားအတွက် မည်သည့်အခါမျှ စိုးရိမ်ပူပန်စရာ မလိုခဲ့ဘဲ အရာရာသည် ၎င်းတို့အတွက် အဆင်သင့် ရှိနေသည်၊ ၎င်းတို့ စားလိုသည့် မည်သည့်အစားအစာမဆို လက်တစ်ကမ်းတွင် ရှိသည်။ ၎င်းတို့၏ မိသားစုအခြေအနေများသည် အထူးကောင်းမွန်ပြီး ၎င်းတို့၏ မိဘများသည် ၎င်းတို့ကို အလွန်ကောင်းမွန်စွာ ဆက်ဆံကြသည်။ ဤသည်မှာ မည်သည့်ကဏ္ဍနှင့် သက်ဆိုင်သနည်း။ (ဤသည်မှာလည်း ၎င်းတို့၏ မျိုးရိုးနောက်ခံနှင့် သက်ဆိုင်ပါသည်။) လူတစ်ဦး၏ မျိုးရိုးနောက်ခံသည် ပင်ကိုအခြေအနေတစ်ခု ဖြစ်သည်။ ဤလူအမျိုးအစားသည် အထူးကောင်းမွန်သော မျိုးရိုးနောက်ခံ၊ ကောင်းမွန်သော စီးပွားရေးအခြေအနေများ ရှိပြီး အစားအသောက်၊ အဝတ်အစားအတွက် စိုးရိမ်ပူပန်စရာမရှိသကဲ့သို့ ကောင်းမွန်သောအရာများကို မြင်ဖူးပြီး အတွေ့အကြုံကောင်းများစွာ ရှိသော်ငြားလည်း အခြားသူများနှင့် ပေါင်းသင်းဆက်ဆံသည့်အခါ မိမိတို့ထက် ပိုသာပြီး ပိုစွမ်းဆောင်နိုင်သော တစ်စုံတစ်ဦးကို သို့မဟုတ် နယ်ပယ်တစ်ခုခုတွင် ထူးထူးခြားခြား ထူးချွန်သောသူကို သို့မဟုတ် လူတို့ကြားတွင် ဩဇာအရှိန်အဝါရှိသောသူကို ၎င်းတို့မြင်ပါက မနာလိုဝန်တိုစိတ် ခံစားရပြီး ထိုလူတို့ကို သိမ်ငယ်အောင်လုပ်ရန် နည်းလမ်းများအတွက် ဦးနှောက်ခြောက်အောင် စဉ်းစားကြသည်။ ဤသရုပ်သကန်များသည် မည်သည့်ကဏ္ဍနှင့် သက်ဆိုင်သနည်း။ (ကျွန်ုပ်ထင်သည်မှာ ယင်းတို့သည် ဖောက်ပြန်ပျက်စီးသော စိတ်သဘောထားများနှင့် လူ့သဘာဝ နှစ်ခုလုံးနှင့် သက်ဆိုင်ပါသည်။) မှန်ပေသည်။ ဤသရုပ်သကန်များသည် ၎င်းတို့၏ လူ့သဘာဝနှင့် ၎င်းတို့၏ ဖောက်ပြန်ပျက်စီးသော စိတ်သဘောထား နှစ်ခုလုံးနှင့် သက်ဆိုင်သည်။ ဤလူအမျိုးအစားသည် မိမိတို့ထက် ပိုသာသောသူကို မြင်သည့်အခါ မနာလိုဝန်တိုစိတ်၊ မုန်းတီးစိတ် ခံစားရပြီး ထိုသူတို့ကို ဖိနှိပ်ရန်၊ ညှဉ်းပန်းရန်နှင့် ဖယ်ကြဉ်ရန် အလိုရှိသည်၊ ၎င်းတို့သည် ထိုသူတို့ကို ကျော်လွန်လိုကြသည်။ ၎င်းတို့တွင် ဤအတွေးများသာရှိပြီး ယင်းတို့အတိုင်း မလုပ်ဆောင်ပါက ၎င်းတို့သည် လူ့သဘာဝ မကောင်းသောသူ ဖြစ်သည်၊ ၎င်းတို့၏ လူ့သဘာဝသည် ဆိုးယုတ်သလော။ (ဆိုးယုတ်ပါသည်။) ဤဆိုးယုတ်သော လူ့သဘာဝကို အခြေခံ၍ မိမိတို့ထက် ပိုသာသောသူကို မြင်သည့်အခါ အာခံစိတ်ကို ခံစားရလျှင်၊ ထိုသူ၏ နောက်ကွယ်၌ ဝေဖန်သုံးသပ်လျှင်၊ ၎င်းကို ဖိနှိပ်ရန် မသမာသော နည်းလမ်းများတွင်ပင် ပါဝင်ဆောင်ရွက်လျှင် ဤသည်တို့မှာ ဖောက်ပြန်ပျက်စီးသော စိတ်သဘောထား၏ တိကျသော သရုပ်သကန်များ ဖြစ်ကြသည်။ ဤဖောက်ပြန်ပျက်စီးသော စိတ်သဘောထား၏ အနှစ်သာရမှာ အဘယ်နည်း။ ယင်းမှာ ရက်စက်ကြမ်းကြုတ်ခြင်း ဖြစ်သည်။ ဤသရုပ်သကန်များသည် လူ့သဘာဝနှင့် ဖောက်ပြန်ပျက်စီးသော စိတ်သဘောထား နှစ်ခုလုံးနှင့် သက်ဆိုင်သည်။ ဤလူစားမျိုး၏ မိသားစုအခြေအနေများသည် ကောင်းမွန်ပြီး ၎င်းသည် ကောင်းကောင်းစား၊ ကောင်းကောင်းဝတ်ရကာ သင်က ၎င်းကို ထိုးထွင်းအမြင်ရှီပြီး အခြားသူများအပေါ် သည်းခံလိမ့်မည်ဟု မျှော်လင့်နိုင်သော်ငြားလည်း လူများနှင့် ပေါင်းသင်းဆက်ဆံသည့်အခါ ၎င်းသည် အစဉ်သဖြင့် အခွင့်ကောင်းယူလိုပြီး အစဉ်သဖြင့် အလွန်အကျွံ တွက်ချက်တတ်ကြသည်။ ၎င်းသည် အခြားသူများနှင့်အတူ တစ်နေရာရာသို့ အပြင်ထွက်သည့်အခါ မည်သူက ငွေပိုသုံးသည်၊ မည်သူက ခရီးစရိတ်ပေးသည်ကို ကပ်သပ်နေပြီး တစ်ပြားတစ်ချပ်ပို၍ပင် သုံးစွဲရန် မလိုလားကြပေ။ အခြားသူများနှင့် အလုပ်လုပ်သည့်အခါ မည်သူက ပိုလုပ်သည်၊ မည်သူက နည်းနည်းလုပ်သည်ကို အစဉ်သဖြင့် တွက်ချက်ပြီး ခိုကပ်ရန် နည်းလမ်းများကို အစဉ်သဖြင့် စဉ်းစားနေကြသည်။ ဤသည်မှာ မည်သည့်ကဏ္ဍနှင့် သက်ဆိုင်သနည်း။ (ယင်းမှာ ၎င်းတို့၏ လူ့သဘာဝနှင့် သက်ဆိုင်ပါသည်။) လူ့သဘာဝ၏ မည်သည့်ကဏ္ဍနှင့် သက်ဆိုင်သနည်း။ (တစ်ကိုယ်ကောင်းဆန်ခြင်း၊ ယုတ်ညံ့ခြင်းတို့နှင့် သက်ဆိုင်ပါသည်။) တစ်ကိုယ်ကောင်းဆန်ခြင်းနှင့် ယုတ်ညံ့ခြင်း၊ အခြားသူများအပေါ် အခွင့်အရေးယူတတ်ခြင်း၊ တည်ကြည်မှုနှင့် ဂုဏ်သိက္ခာ ကင်းမဲ့ခြင်း၊ ဤသည်မှာ ၎င်းတို့၏ ကိုယ်ကျင့်စရိုက်နှင့် သက်ဆိုင်သည်။ လူများနှင့် ပေါင်းသင်းဆက်ဆံသည့်အခါ ၎င်းတို့သည် တွက်ချက်တတ်ပြီး အခြားသူများကို အခွင့်ကောင်းယူတတ်သည်၊ ရရှိမည့် အကျိုးအမြတ်သည် တစ်ပြားတစ်ချပ်မျှသာ ဖြစ်လျှင်ပင်ဖြစ်ပြီး အခွင့်အရေးရရန် အခွင့်အလမ်းတိုင်းကို ရှာဖွေကြသည်။ ယင်းသည် အများပြည်သူ သို့မဟုတ် ပုဂ္ဂလိက ရင်းမြစ်မှဖြစ်စေ၊ လူငယ် သို့မဟုတ် လူကြီးများထံမှဖြစ်စေ မသက်ဆိုင်ဘဲ လူတိုင်းကို အခွင့်အရေးယူကြသည်။ မည်သူဖြစ်သည်ဖြစ်စေ ၎င်းတို့သည် လက်မနှေးကြဘဲ အခွင့်အရေး ပေါ်လာသည့်အခါတိုင်း အခွင့်အရေးယူကြသည်။ ၎င်းတို့သည် အခြားသူများနှင့် ပေါင်းသင်းဆက်ဆံရာတွင် အထူးသဖြင့် တိကျပြီး တွက်ချက်တတ်ကြသည်။ ဥပမာအားဖြင့် ပြီးခဲ့သည့်တစ်ကြိမ်က သင်သည် ၎င်းတို့ကို အကူအညီတစ်ခု တောင်းခဲ့ပြီး ယခု သင်က ၎င်းတို့အပေါ် အကြွေးတင်သည်ဟု ၎င်းတို့ ခံစားရသည်။ သင်က ထိုကျေးဇူးကို ပြန်ဆပ်လာအောင် ၎င်းတို့က နည်းမျိုးစုံဖြင့် ကြိုးစားလိမ့်မည်ဖြစ်ပြီး ယင်းသည် ၎င်းတို့ သင့်အတွက် လုပ်ပေးခဲ့သော ကျေးဇူးထက်ပင် ပိုကြီးမားသော ကျေးဇူးတစ်ခု ဖြစ်ရမည်၊ သို့မှသာလျှင် အပေးအယူမျှသည်ဟု ၎င်းတို့ ခံစားရသည်။ ဤသည်မှာ အလွန်အကျွံ တွက်ချက်ခြင်း မဟုတ်လော။ (ဟုတ်ပါသည်။) ဤသည်မှာ အလွန်အကျွံ တွက်ချက်ခြင်း၊ အခြားသူများအပေါ် အလွန်အမင်း တောင်းဆိုခြင်းနှင့် အလွန်ပရိယာယ်များခြင်း ဖြစ်သည်။ ၎င်းတို့သည် အစားအသောက်နှင့် အဝတ်အစားပိုင်းတွင် မည်သည့်အရာမျှ မချို့တဲ့သကဲ့သို့ အခြားသူများနှင့် နှိုင်းယှဉ်လျှင် ကဏ္ဍအားလုံးတွင် ပိုကောင်းသောဘဝကို ခံစားရသော်ငြားလည်း တစ်စုံတစ်ဦးထံတွင် မိမိတို့ မမြင်ဖူးသော အရာတစ်ခုကို မြင်သည့်အခါတိုင်း ယင်းကို ခဏအသုံးပြုပြီး စမ်းကြည့်လိုကြသည်။ အခြားသူများ ပိုင်ဆိုင်သမျှကို ပိုင်ဆိုင်ရန် လိုအပ်သည်ဟု ၎င်းတို့ ခံစားရသည်။ ၎င်းတို့ မပိုင်ဆိုင်ပါက စိတ်နှလုံးထဲတွင် မသက်မသာဖြစ်ပြီး ဟန်ချက်မညီဟု ခံစားရကာ အစားအသောက်ပျက်ပြီး အိပ်မပျော်သည့်အထိ ဖြစ်သည်၊ မိမိတို့ကိုယ်တိုင် ပိုင်ဆိုင်မှသာလျှင် ကျေနပ်သည်ဟု ၎င်းတို့ ခံစားရသည်။ ဤသည်မှာ မည်သည့်ပြဿနာမျိုး ဖြစ်သနည်း။ (ဤသည်မှာ လူ့သဘာဝ၏ ပြဿနာတစ်ခု ဖြစ်နေဆဲ ဖြစ်ပါသည်။) ဤတိကျသော သရုပ်သကန်များသည် ၎င်းတို့၏ လူ့သဘာဝ၏ ပြဿနာများဖြစ်ပြီး ၎င်းတို့၏ ပင်ကိုအခြေအနေများ မဟုတ်ပေ။ ပင်ကိုအခြေအနေများသည် ၎င်းတို့၏ မျိုးရိုးနောက်ခံနှင့် ၎င်းတို့ ပျော်မွေ့ခံစားနိုင်သော မိသားစုအခြေအနေများကိုသာ ရည်ညွှန်းသည်၊ သို့သော် ၎င်းတို့၏ ပြုမူကျင့်ကြံပုံနှင့် အမှုအရာများကို ကိုင်တွယ်ပုံနည်းလမ်းများမှာမူ ၎င်းတို့၏ လူ့သဘာဝနှင့် သက်ဆိုင်သည်။ ၎င်းတို့၏ ထုတ်ဖော်ခြင်းများနှင့် သရုပ်သကန်များဖြစ်သည့် ၎င်းတို့၏ သဘောထားများ၊ နည်းလမ်းများနှင့် ပြုမူကျင့်ကြံပုံနှင့် အမှုအရာများကို ကိုင်တွယ်ပုံအတွက် စေ့ဆော်မှုများသည် ၎င်းတို့၏ ကိုယ်ကျင့်စရိုက်၏ ပြဿနာနှင့် သက်ဆိုင်သည်၊ ယင်းသည် ဖောက်ပြန်ပျက်စီးသော စိတ်သဘောထားများ၏ အဆင့်သို့ မရောက်သေးပေ။ ၎င်းတို့သည် တစ်ကိုယ်ကောင်းဆန်သည်၊ တောင်းဆိုလွန်းသည်၊ အလွန်အကျွံ တွက်ချက်တတ်သည်၊ ပရိယာယ်များပြီး အခြားသူများကို အခွင့်အရေးယူတတ်သည်၊ ဤသည်တို့မှာ ကောင်းသောလူ့သဘာဝ၏ သရုပ်သကန်များလော သို့မဟုတ် ဆိုးသော လူ့သဘာဝ၏ သရုပ်သကန်များလော။ (ဤသည်တို့မှာ ဆိုးသောလူ့သဘာဝ၏ သရုပ်သကန်များ ဖြစ်ပါသည်။) ဤအရာအားလုံးသည် နိမ့်ကျသော ကိုယ်ကျင့်စရိုက်နှင့် ဆိုးသောလူ့သဘာဝ၏ သရုပ်သကန်များ ဖြစ်ကြသည်။ ဆိုးသောလူ့သဘာဝ၏ ဤသရုပ်သကန်များကို အခြားသူများ မြင်နိုင်ပြီး သတိထားမိနိုင်သလော။ (မြင်နိုင်ပြီး သတိထားမိနိုင်ပါသည်။)

အချို့လူများသည် ရုပ်ရည်ပြေပြစ်ပြီး လှုပ်ရှားသက်ဝင်ကာ ခံစားချက်ကိုဖော်ပြနိုင်ပုံရသော ကြီးမားတောက်ပ၍ ဉာဏ်ကောင်းသည့် မျက်လုံးများဖြင့် မွေးဖွားလာကြသည်။ ငယ်စဉ်ကတည်းက ၎င်းတို့သည် အတော်လေး ချစ်ခင်နှစ်လိုဖွယ် ကောင်းကြသည်။ ဤသည်မှာ မည်သည့်ကဏ္ဍအောက်သို့ ကျရောက်သနည်း။ (ဤသည်မှာ ၎င်းတို့၏ အသွင်အပြင်နှင့် သက်ဆိုင်ပါသည်။) အသွင်အပြင်သည် ပင်ကိုအခြေအနေများနှင့် သက်ဆိုင်သည်၊ ဟုတ်သည် မဟုတ်လော။ (ဟုတ်ပါသည်။) မျက်လုံးကြီးကြီးနှင့် ရုပ်ရည်ပြေပြစ်ခြင်း၊ ရုပ်ရည်ကောင်းခြင်း၏ အားသာချက်ကို ပင်ကိုအားဖြင့် ပိုင်ဆိုင်ခြင်းဟူသည့် ဤသည်မှာ ဖောက်ပြန်ပျက်စီးသော စိတ်သဘောထားများ၏ ကဏ္ဍတစ်ခုလော။ (မဟုတ်ပါ။) ယင်းသည် လူ့သဘာဝ၏ ပြဿနာများနှင့် သက်ဆိုင်သလော။ (မသက်ဆိုင်ပါ။) ယင်းသည် လူ့သဘာဝ သို့မဟုတ် ဖောက်ပြန်ပျက်စီးသော စိတ်သဘောထားများနှင့် မသက်ဆိုင်ချေ၊ ထို့ကြောင့် မည်သည့်အရာကိုမျှ ပြောင်းလဲရန် မလိုအပ်ပေ။ ပင်ကိုအခြေအနေများသည် မွေးရာပါဖြစ်သည်၊ ၎င်းတို့သည် ဤအသွင်အပြင်ဖြင့် မွေးဖွားလာခဲ့ပြီး လူကဖန်တီးသော ခွဲစိတ်ပြုပြင်မှုမျှဖြစ်စေ၊ ပြောင်းလဲမှုကိုမျှဖြစ်စေ မခံယူခဲ့ကြပေ။ ဤသည်မှာ ၎င်းတို့၏ ပကတိအခြေအနေပင် ဖြစ်၏။ ၎င်းတို့သည် သဘာဝအတိုင်း ရုပ်ရည်ကောင်းမွန်သော်လည်း နေ့စဉ်အသက်တာတွင် ရှုပ်ထွေးသော ပြဿနာများကို ကိုင်တွယ်ဖြေရှင်းသည့်အခါ အစဉ်သဖြင့် နားဝေတိမ်တောင်ဖြစ်နေပြီး ယင်းတို့ကို မည်သို့ကိုင်တွယ်ရမည်ကို မသိကြပေ။ ၎င်းတို့သည် လူများ၊ ဖြစ်ရပ်များနှင့် အမှုအရာများနှင့်ပတ်သက်၍ ပိုင်းခြားသိမြင်မှုလည်း ကင်းမဲ့ကြသည်။ မည်သူနှင့် ပေါင်းသင်းနိုင်ပြီး မည်သူကို ရှောင်ကြဉ်သင့်သည်ကို ၎င်းတို့ ရှင်းရှင်းလင်းလင်း မသိကြပေ။ မည်သူက ဆိုးယုတ်ပြီး မည်သည့်ပေါင်းသင်းဆက်ဆံမှုများက ဒုက္ခဖြစ်စေနိုင်သည်ကို ၎င်းတို့ မသိကြပေ။ အသက်နှစ်ဆယ်ကျော်အရွယ်တွင် ဤအရာများကို ၎င်းတို့ မသိကြသကဲ့သို့ အသက်သုံးဆယ် သို့မဟုတ် လေးဆယ်အရွယ်တွင် အသက်တာအတွေ့အကြုံအချို့ ရှိနေသော်လည်း ၎င်းတို့ မသိကြသေးပေ။ ၎င်းတို့တွင် ကြီးမားပြီး ခံစားချက်ကိုဖော်ပြနိုင်သော မျက်လုံးများ ရှိသော်လည်း ၎င်းတို့၏ စိတ်သည် အတော်လေး နားဝေတိမ်တောင် ဖြစ်နေသည်။ ဤသည်မှာ မည်သို့သော ပြဿနာမျိုး ဖြစ်သနည်း။ (ဤသည်မှာ ၎င်းတို့၏ ပင်ကိုအစွမ်းအစနှင့်ဆိုင်သော ပြဿနာတစ်ခုလော။) ၎င်းတို့၏ ပင်ကိုအစွမ်းအစသည် သိပ်မကောင်းပေ။ အခြားသူများနှင့် ပေါင်းသင်းဆက်ဆံပြီး အမှုအရာများကို ကိုင်တွယ်သည့်အခါ စည်းမျဉ်းများကို မည်သည့်အခါမျှ ရှာမတွေ့နိုင်ကြသကဲ့သို့ လူအမျိုးမျိုးကိုလည်း ထိုးထွင်းမြင်နိုင်ခြင်း မရှိကြချေ။ ၎င်းတို့သည် မကြာခဏ လိမ်လည်လှည့်ဖြားခံရပြီး အခြားသူများ၏ ကစားစရာကဲ့သို့ သဘောထားခြင်းကို ခံကြရသည်။ ဤလူအမျိုးအစား၏ အစွမ်းအစသည် မည်သို့ရှိသနည်း။ (၎င်းတို့၏ အစွမ်းအစသည် အတော်အတန် ညံ့ဖျင်းပါသည်။) ၎င်းတို့၏ အစွမ်းအစသည် မကောင်းပေ။ ခံစားချက်ကိုဖော်ပြနိုင်သော မျက်လုံးများ ရှိခြင်းသည် ပညာရှိသောစိတ်ရှိသည်ဟု မလွဲမသွေ ဆိုလိုခြင်းမဟုတ်ပေ။ ၎င်းတို့၏ ပင်ကိုအခြေအနေအရ ရုပ်ရည်ကောင်းမွန်သော်လည်း ၎င်းတို့၏ အစွမ်းအစသည် မကောင်းမွန်ပေ။ သို့သော် အချက်တစ်ချက်ရှိသည်။ ၎င်းတို့၏ ကျောင်းသားဘဝကာလများအတွင်း ကျောင်းစာအသိပညာများ ဆည်းပူးရာတွင် ထူးချွန်ခဲ့သည်၊ စာပေများကို လျင်မြန်စွာ အလွတ်ကျက်မှတ်နိုင်ခဲ့ပြီး သင်္ချာ၊ ရူပဗေဒနှင့် ဓာတုဗေဒ သို့မဟုတ် ဘာသာစကားအသစ်တစ်ခုကို သင်ယူသည့်အခါ ဘာသာရပ်ကို လျင်မြန်စွာ သဘောပေါက်ခဲ့သည်။ ၎င်းတို့သည် တက္ကသိုလ်သို့ ချောမွေ့စွာ ဝင်ရောက်ခဲ့ပြီး မဟာဘွဲ့ကို ဆက်လက်သင်ယူကာ ပါရဂူဘွဲ့ကို ရရှိခဲ့သည်။ ဤသည်မှာ မည်သည့်အရာအောက်သို့ ကျရောက်သင့်သနည်း။ ယင်းသည် ၎င်းတို့၏ ကောင်းမွန်သော အစွမ်းအစအောက်သို့ ကျရောက်နိုင်သလော။ (မကျရောက်နိုင်ပါ။) သို့ဆိုလျှင် ယင်းသည် မည်သည့်အရာအောက်သို့ ကျရောက်သနည်း။ (ယင်းသည် ၎င်းတို့၏ ပင်ကိုအခြေအနေဖြစ်သည့် ၎င်းတို့၏ အားသာချက်များအောက်သို့ ကျရောက်ပါသည်။) ထိုအချက်သည် တိကျမှန်ကန်သည်။ ဤလူအမျိုးအစားသည် စာသင်ခြင်း၊ အသိပညာဆည်းပူးခြင်းနှင့် ပညာရပ်ဆိုင်ရာ ဘာသာရပ်များတွင် ထူးချွန်သည်။ ၎င်းတို့သည် ကျောင်းစာအသိပညာနှင့် သဘောတရားဆန်ပြီး စည်းမျဉ်းများကို အခြေခံသည့်အရာများဖြစ်သည့် လုပ်ငန်းပိုင်းဆိုင်ရာ ကျွမ်းကျင်မှုများ၊ နည်းပညာ သို့မဟုတ် သင်္ချာ၊ ရူပဗေဒနှင့် ဓာတုဗေဒအတွက် ဖော်မြူလာများအပြင် စည်းမျဉ်းများနှင့် သက်ဆိုင်သော ကဏ္ဍများကို လျင်မြန်စွာ သဘောပေါက်ပြီး ယင်းတို့ကို အလွန်ကောင်းမွန်စွာ မှတ်မိကြသည်။ ဤလူအမျိုးအစားသည် ဤအရာများကို သင်ယူရာတွင် ထူးချွန်ပြီး ၎င်းတို့အတွက် အထုံပါရမီရှိသည်။ ၎င်းတို့သည် ထိုအရာများကို တစ်ချက်ကြည့်ရုံဖြင့် နားလည်နိုင်ပြီး အထူးသဖြင့် စာမေးပွဲများနှင့် မေးခွန်းများဖြေဆိုရာတွင် ထူးချွန်သည်၊ မေးခွန်းများ ဖြေဆိုခြင်းနှင့်ပတ်သက်လာလျှင် ၎င်းတို့သည် လွယ်ကူစွာ ဖြေဆိုကြသည်၊ ဤသည်မှာ ၎င်းတို့၏ အားသာချက်များကို အကောင်းဆုံး အသုံးချနိုင်သည့်နေရာ ဖြစ်သည်။ ဤလူစားမျိုးသည် ကျယ်ပြန့်လှသော အသိပညာနှင့်ပတ်သက်သော် အေးဆေးသက်သာ ရှိသည်ဟု သင်ပြောနိုင်ပေသည်။ ဤသရုပ်သကန်များသည် ၎င်းတို့၏ အစွမ်းအစကို ကိုယ်စားပြုသလော။ (မပြုပါ။) ယင်းတို့က ၎င်းတို့တွင် တိကျသော အားသာချက်တစ်ခုရှိသည်ကိုသာ ကိုယ်စားပြုသည်။ ဤလူစားမျိုးသည် အသိပညာနယ်ပယ်တွင် အထူးကောင်းမွန်သော စွမ်းဆောင်ရည်ကို ပြသပြီး ဤနယ်ပယ်တွင် ၎င်းတို့၏ အားသာချက်သည် ထင်ရှားပေါ်လွင်ကြောင်း လူတို့ကို မြင်စေသည်။ ဤအားသာချက်ကို ၎င်းတို့ ပိုင်ဆိုင်သောကြောင့်လည်းကောင်း၊ မဟာဘွဲ့နှင့် ပါရဂူဘွဲ့ကို ရရှိခြင်းနှင့် အဆင့်မြင့်ပညာရေးကို ရရှိခြင်းဟူသည့် အချို့သော အောင်မြင်မှုများကို စွမ်းဆောင်ရရှိခဲ့သောကြောင့်လည်းကောင်း အခြားလူများအကြားတွင် ၎င်းတို့သည် မိမိတို့ကိုယ်ကို အသိပညာကြွယ်ဝသော ပုဂ္ဂိုလ်များ၊ ပညာရှင်များနှင့် အဆင့်မြင့်ပညာတတ်များအဖြစ် ရှုမြင်ကြသည်။ ၎င်းတို့ စာအုပ်များ ပိုဖတ်လေလေ၊ မိမိတို့သည် ကျော်ကြားသော ပုဂ္ဂိုလ်တစ်ဦး၊ သာလွန်သောသူတစ်ဦးဖြစ်ပြီး အခြားလူတိုင်းသည် သာမန်ဖြစ်ကာ အသိပညာမရှိဘဲ ၎င်းတို့၏စိတ်ကို နားမလည်နိုင် သို့မဟုတ် ထွင်းဖောက်မမြင်နိုင်ဘဲ ၎င်းတို့နှင့် တစ်တန်းတည်း မဟုတ်ဟု ပို၍ ခံစားရလေလေ ဖြစ်သည်။ ရလဒ်အနေဖြင့် ၎င်းတို့သည် အခြားသူများထက် သာလွန်သည်ဟု မကြာခဏ ခံစားရပြီး မိမိတို့ကိုယ်ကို ထူးကဲသာလွန်ပြီး ထူးခြားသည်ဟု မှတ်ယူကြသည်။ ဤသည်မှာ မည်သည့်သရုပ်သကန် ဖြစ်သနည်း။ (ဖောက်ပြန်ပျက်စီးသော စိတ်သဘောထားတစ်ခု ဖြစ်ပါသည်။) ဖောက်ပြန်ပျက်စီးသော စိတ်သဘောထားများ၏ မည်သည့်ကဏ္ဍ ဖြစ်သနည်း။ (မာနထောင်လွှားမှု ဖြစ်ပါသည်။) ၎င်းတို့၏ မာနထောင်လွှားသော ဖောက်ပြန်ပျက်စီးသည့် စိတ်သဘောထားက ၎င်းတို့ကို အဆင့်မြင့်ပညာရေးကို ရရှိပြီးနောက် လူထုနှင့် ဘဝအလွှာပေါင်းစုံမှ လူများကို ပို၍ပင် အထင်သေးစေသည်။ ၎င်းတို့၏ အဆင့်မြင့်ဘွဲ့နှင့် ဒီပလိုမာကြောင့် ဘုရားသခင်ကို ယုံကြည်ပြီးနောက် အသင်းတော်တွင် အဆုံးအဖြတ်စကားကို အစဉ်သဖြင့် ပြောလိုပြီး ခေါင်းဆောင်တစ်ဦးဖြစ်ရန် ကြိုးပမ်းကြသည်။ ရွေးကောက်ပွဲရှိတိုင်း ၎င်းတို့သည် ရွေးကောက်ခံရရန် မျှော်လင့်ကြသည်။ ၎င်းတို့ ရွေးကောက်မခံရပါက အပျက်သဘောဆောင်လာပြီး မိမိတို့ကိုယ်ကို မျှော်လင့်ချက်မဲ့သူအဖြစ် ကျိတ်မှိတ်လက်ခံလိုက်ကြသည်။ ခေါင်းဆောင်များနှင့် အမှုဆောင်များ မည်သို့ပင်ပြောစေကာမူ ၎င်းတို့ နားမထောင်လိုဘဲ ယင်းကို အတိုက်အခံလုပ်လိုကြသည်။ မည်သည့်တာဝန်ကို ၎င်းတို့အား ပေးအပ်သည်ဖြစ်စေ ဤတာဝန်ပေးအပ်မှုကို ၎င်းတို့ စက်ဆုပ်ရွံရှာပြီး နောက်ကွယ်တွင် တရားစီရင်ကြသည်။ ၎င်းတို့၏ စိတ်နှလုံးထဲတွင် ဤသို့ တွေးထင်ကြသည်၊ “သင်သည် အသိပညာများစွာ မရှိပေ။ သင်၏ စကားများသည် ယုတ္တိမတန်ပေ။ ငါ့စိတ်နှလုံးထဲတွင်မူ သင့်ကို အသင်းတော်ခေါင်းဆောင်တစ်ဦးအဖြစ် အထင်သေးသည်။ ငါ သင့်ကို အလျှော့ပေးရန် ငြင်းဆန်သည်။ သင်သည် ငါ့ထက် ပိုသာသည်ဟု မထင်နှင့်။ မည်သူက မည်မျှစွမ်းသည်ဟူသည်ကို နှိုင်းယှဉ်ကြည့်ကြစို့၊ မည်သူက ဘုရားသခင်၏ နှုတ်ကပတ်တော်များကို ပို၍ရွတ်ဆိုနိုင်သည်၊ မည်သူက ပိုကြီးမားသော နားလည်မှုကို မျှဝေနိုင်သည်ကို ကြည့်ကြစို့။ သင်၏ မိတ်သဟာယဖွဲ့ခြင်းသည် ငါ့လောက် မကောင်းပါက ငါ သင့်ကို အလျှော့ပေးရန် ငြင်းဆန်သည်။ သင်သည် ခေါင်းဆောင်တစ်ဦးအဖြစ် ရွေးကောက်ခံခဲ့ရသော်လည်း သင် ငါ့ကို တောင်းဆိုသမျှကို နားထောင်ရန်၊ အကောင်အထည်ဖော်ရန် သို့မဟုတ် နာခံရန် မလိုအပ်ပေ” ဟူ၍ ဖြစ်လေသည်။ ဤသည်မှာ မည်သည့်သရုပ်သကန် ဖြစ်သနည်း။ (ဖောက်ပြန်ပျက်စီးသော စိတ်သဘောထားတစ်ခု ဖြစ်ပါသည်။) ဤသည်မှာ ဖောက်ပြန်ပျက်စီးသော စိတ်သဘောထား၏ တိကျသော ထုတ်ဖော်ခြင်းတစ်ခု ဖြစ်သည်။ ဤသည်မှာ လူ့သဘာဝနှင့် သက်ဆိုင်သလော။ ဤလူစားမျိုးသည် ပင်ကိုအားသာချက်တစ်ခုရှိပြီး ဤအခြေခံအုတ်မြစ်ကို အခြေခံ၍ ကျယ်ကျယ်ပြန့်ပြန့် လေ့လာကာ အသိပညာများစွာ ဆည်းပူးပြီး လူမှုအဆင့်အတန်းကို ရရှိသောကြောင့် အခြားသူများထက် သာလွန်သည်ဟု ခံစားရကာ တစ်မူထူးခြားသည်ဟု ခံစားရပြီး အခြားလူတိုင်းအပေါ် အထက်စီးမှ စကားပြောလိုကာ ဗိုလ်ကျစိုးမိုးလိုသည်၊ လူတို့ကြားတွင် ၎င်းတို့သည် အစဉ်သဖြင့် ခေါင်းဆောင်ဖြစ်လိုပြီး အခြားသူများက ၎င်းတို့ကို နားထောင်စေလိုသည်၊ ဤလူစားမျိုးသည် ၎င်းတို့၏ အသိစိတ်နှင့် ဆင်ခြင်တုံတရားတွင် ပြဿနာရှိသလော။ (ရှိပါသည်။) ဤသည်မှာ မည်သို့သော ပြဿနာမျိုး ဖြစ်သနည်း။ ၎င်းတို့၏ အားသာချက်က စာသင်ခြင်းမှတစ်ဆင့် အဆင့်မြင့်ပညာရေးကို ရရှိရန် အလွန်လွယ်ကူစေခဲ့သည်။ ဤအားသာချက်ကိုယ်တိုင်က ပြဿနာတစ်ခုလော။ အားသာချက်ကိုယ်တိုင်သည် ဖောက်ပြန်ပျက်စီးသော စိတ်သဘောထားများ၏ ကဏ္ဍတစ်ခုလော။ ယင်းသည် ဆိုးသောလူ့သဘာဝ၏ သရုပ်သကန်တစ်ခုလော။ (မဟုတ်ပါ။) သို့သော် ဤအားသာချက်ကို ၎င်းတို့ ပိုင်ဆိုင်သောကြောင့် အသိပညာများစွာ ဆည်းပူးခဲ့ပြီး အဆင့်မြင့်ပညာရေးကို ရရှိခဲ့ကာ အဆင့်အတန်းအတွက် လူ့အဖွဲ့အစည်း၏ အကဲဖြတ်မှု၊ အဓိပ္ပာယ်ဖွင့်ဆိုချက်တို့နှင့် ကိုက်ညီခဲ့သည်။ ဤသည်မှာ ၎င်းတို့ကို အသင်းတော်တွင် အဆုံးအဖြတ်စကား ပြောသင့်သည်၊ မည်သည့်လူအုပ်စုတွင်မဆို ထိပ်တန်းဖြစ်သင့်ပြီး အခြားလူတိုင်းအထက်တွင် ရှိသင့်သည်ဟု ယုံကြည်စေခဲ့သည်။ ထိုသို့သော လူ့သဘာဝတွင် ဆင်ခြင်တုံတရား တစ်ခုခု ရှိပါသလော။ ထိုသို့သော လူ့သဘာဝသည် ကောင်းပါသလော။ (၎င်းတို့၏ လူ့သဘာဝသည် မကောင်းပါ။) မည်သည့်နည်းလမ်းများဖြင့် ၎င်းတို့၏ လူ့သဘာဝသည် မကောင်းသနည်း။ (၎င်းတို့သည် ဆင်ခြင်တုံတရားနှင့် အသိစိတ် ကင်းမဲ့သည်၊ ၎င်းတို့သည် အခြားသူများအထက်တွင် အစဉ်သဖြင့် ရှိလိုပါသည်။) အခြားသူများအထက်တွင် အစဉ်သဖြင့် ရှိလိုခြင်းသည် ဖောက်ပြန်ပျက်စီးသော စိတ်သဘောထားကြောင့် တစ်စိတ်တစ်ပိုင်း ဖြစ်သည်။ အခြားတစ်နည်းအားဖြင့် လူ့သဘာဝ၏ ရှုထောင့်မှကြည့်လျှင် ဤသည်မှာ အနည်းငယ် အရှက်မရှိခြင်း မဟုတ်လော။ (ဟုတ်ပါသည်။) ဘုရားသခင်၏အိမ်တော်သည် လူ့အဖွဲ့အစည်း မဟုတ်ပေ။ ဘုရားသခင်၏ အိမ်တော်သည် ခေါင်းဆောင်များကို ရွေးကောက်သည့်အခါ ပညာရေးဆိုင်ရာ အရည်အချင်းများကို နှိုင်းယှဉ်သလော။ (မနှိုင်းယှဉ်ပါ။) ဘုရားသခင်၏အိမ်တော်သည် ခေါင်းဆောင်များ ရွေးကောက်ခြင်းကို မည်သည့်အရာပေါ်တွင် အခြေခံသနည်း။ ယင်းသည် သမ္မာတရား စည်းမျဉ်းများကို အခြေခံသည် မဟုတ်လော။ (ဟုတ်ပါသည်။) ဘုရားသခင်၏အိမ်တော်တွင် ခေါင်းဆောင်များ ရွေးကောက်ခြင်းသည် မည်သူက ပိုမြင့်သော ပညာရေးဆိုင်ရာ အရည်အချင်းများ ရှိသည်ကို မဟုတ်ဘဲ သမ္မာတရား စည်းမျဉ်းများကို အခြေခံသည်။ ခေါင်းဆောင်များ ရွေးကောက်ခြင်းအတွက် စည်းမျဉ်းများကို ၎င်းတို့ သိပါသလော။ သိပါသည်၊ သို့သော် ၎င်းတို့သည် ဤစည်းမျဉ်းများကို ဗျူရိုကရေစီဆန်သော ပြောဆိုချက်များနှင့် သီအိုရီများအဖြစ်သာ သဘောထားပြီး နေ့စဉ်အသက်တာတွင် မည်သို့လက်တွေ့လုပ်ဆောင်ရမည် သို့မဟုတ် အသုံးချရမည်ကို မသိကြပေ။ အဆင့်မြင့် ပညာရေးဆိုင်ရာ အရည်အချင်းများ ရှိသူများသာလျှင် အစွမ်းအစကောင်းရှိပြီး သမ္မာတရားကို နားလည်နိုင်ကာ အခြားသူများကို ဦးဆောင်နိုင်သည်ဟူသော အတွေးအခေါ်ကို ၎င်းတို့သည် အဆက်မပြတ် ဖြန့်ဝေကြသည်။ ၎င်းတို့တွင် အဆင့်မြင့် ပညာရေးဆိုင်ရာ အရည်အချင်းများ၊ အသိပညာအချို့နှင့် လူမှုအဆင့်အတန်း ရှိသောကြောင့် ဘုရားသခင်၏ အိမ်တော်သည် လူ့အဖွဲ့အစည်းနှင့် တစ်ပုံစံတည်း လည်ပတ်သည်ဟု တွေးထင်ကာ ၎င်းတို့၏ အသိပညာနှင့် အဆင့်မြင့် ပညာရေးဆိုင်ရာ အရည်အချင်းများကို ဘုရားသခင်၏အိမ်တော်တွင် ဆုံးဖြတ်ပိုင်ခွင့်ရှိရန် ကြိုးစားရာ၌ အရင်းအနှီးအဖြစ် အသုံးပြုကြသည်။ ၎င်းတို့သည် ဘုရားသခင်၏ အိမ်တော်တွင် ခေါင်းဆောင်များ ရွေးကောက်ခြင်းအတွက် စည်းမျဉ်းများကို မိမိတို့၏ လူများကို ရှုမြင်ပုံနှင့် အမှုအရာများကို ကိုင်တွယ်ပုံ နည်းလမ်းများ၊ လူမှုရပ်တည်မှုနှင့် အဆင့်အတန်းအပေါ် ထားသည့် မိမိတို့၏ ချဉ်းကပ်ပုံများ၊ ရှုထောင့်များနှင့် ရှုမြင်ပုံများဖြင့် အစားထိုးလိုကြသည်။ ဤသည်မှာ ဆင်ခြင်တုံတရား ကင်းမဲ့ခြင်း မဟုတ်လော။ (ဟုတ်ပါသည်။) ဆင်ခြင်တုံတရား ကင်းမဲ့ခြင်းကို ဖော်ပြရန် အခြားနည်းလမ်းတစ်ခုမှာ အဘယ်နည်း။ (အရှက်မရှိခြင်း ဖြစ်ပါသည်။) ရိုးရိုးရှင်းရှင်းပြောရလျှင် ယင်းမှာ အရှက်မရှိခြင်း ဖြစ်သည်၊ အခြားပြောနည်းတစ်ခုမှာ ဤလူအမျိုးအစားသည် အလွန်ညံ့ဖျင်းသော ဆင်ခြင်တုံတရား ရှိသည်ဟု ဖြစ်သည်။ သင်မြင်သည့်အတိုင်းပင် ၎င်းတို့သည် အဆင့်မြင့်ပညာရေးဟု ခေါ်သောအရာကို ရရှိခဲ့ပြီး စာအုပ်များစွာ ဖတ်ခဲ့သော်လည်း ထိုစာအုပ်များထဲမှ တစ်အုပ်မျှဖြစ်စေ၊ မည်သည့်ဆရာမျှဖြစ်စေ၊ မည်သည့်ပညာပေးသူကမျှဖြစ်စေ ဆင်ခြင်တုံတရားရှိရန် မည်သို့ပြုမူရမည်ကို ၎င်းတို့အား မည်သည့်အခါမျှ မသင်ပေးခဲ့ပေ။ စာအုပ်များမှ အရာများစွာကို သင်ယူပြီးနောက်တွင်ပင် ၎င်းတို့သည် အရင်းအနှီးရရှိခဲ့ပြီး သာမန်လူများထက် သာလွန်သည်ဟု ခံစားရသည်။ ၎င်းတို့၏ အားသာချက်သည် အပျက်သဘောဆောင်သော အရာမဟုတ်ဘဲ ပင်ကိုအခြေအနေတစ်ခု ဖြစ်သော်လည်း ဤအားသာချက်သည် အကျိုးဆက်တစ်ခုကို အလွယ်တကူ ဖြစ်ပေါ်စေနိုင်သည်၊ ယင်းက ၎င်းတို့ကို မာနထောင်လွှားပြီး စိတ်ကြီးဝင်စေကာ ၎င်းတို့၏ ဆင်ခြင်တုံတရားကို ဆုံးရှုံးစေပြီး မျက်နှာပြောင်တိုက်ကာ အရှက်ကင်းမဲ့လာစေသည်။ စာအုပ်များစွာ ဖတ်ပြီး အသိပညာများစွာ ဆည်းပူးခဲ့သော်လည်း အရှက်တရားဆိုသည်မှာ မည်သည့်အရာမှန်းပင်မသိကြပေ။ ထို့ကြောင့် ပညာရေးဆိုင်ရာ အရည်အချင်းအချို့ကို ရရှိပြီးနောက် ၎င်းတို့သည် ဤအရာကို နေရာတိုင်းတွင် ကြွားဝါရန် အရင်းအနှီးအဖြစ် အသုံးပြုပြီး ဘုရားသခင်၏ အိမ်တော်တွင် အဆင့်အတန်းရရှိရန်နှင့် အဆုံးအဖြတ်စကား ပြောရန် ယင်းကို အသုံးပြုလိုကြသည်။ ၎င်းတို့သည် ဤသို့ တွေးထင်ကြသည်၊ “ငါသည် အဆင့်မြင့် ပညာရေးဆိုင်ရာ အရည်အချင်းများ ရှိပြီး အရာများကို လျင်မြန်စွာ သင်ယူနိုင်သည်၊ ဆိုလိုသည်မှာ ငါသည် အစွမ်းအစကောင်း ရှိသည်။ ထို့ထက်မက ငါသည် အသိပညာကြွယ်ဝသည်၊ လောကအတွေ့အကြုံများစွာ ရှိပြီး လျင်မြန်စွာ တွေးခေါ်နိုင်သည်၊ ထို့ကြောင့် ငါသည် အခြားသူများကို ဦးဆောင်ရန် အရည်အချင်း ပြည့်မီသည်” ဟူ၍ဖြစ်သည်။ ဆိုလိုရင်းမှာ ၎င်းတို့၏ အသိပညာနှင့် အားသာချက်များသည် သမ္မာတရား ဖြစ်သည်ဟု ဖြစ်သည်။ ဤအရာအားလုံးသည် ဆင်ခြင်တုံတရား ကင်းမဲ့ခြင်း၏ သရုပ်သကန်များ ဖြစ်ကြသည်။ ဆင်ခြင်တုံတရား ကင်းမဲ့သော ဤကဲ့သို့သော လူတစ်ဦးသည် တည်ကြည်မှု ရှိသလော။ ၎င်းတို့တွင် ဂုဏ်သိက္ခာ ရှိသလော။ (မရှိပါ။) တည်ကြည်မှုနှင့် ဂုဏ်သိက္ခာ ကင်းမဲ့ခြင်းဟူသည့် ဤအရာမှာ ကောင်းသောလူ့သဘာဝ၏ သရုပ်သကန် ဖြစ်သလော သို့မဟုတ် ယုတ်ညံ့သိမ်ဖျင်းသော လူ့သဘာဝ၏ သရုပ်သကန်ဖြစ်သလော။ (ယင်းသည် ယုတ်ညံ့သိမ်ဖျင်းသော လူ့သဘာဝ၏ သရုပ်သကန်တစ်ခု ဖြစ်ပါသည်။) ထိုသို့သော လူများတွင် လူ့သဘာဝကောင်း မရှိပေ။ ၎င်းတို့ အမြတ်နိုးဆုံးအရာများမှာ ၎င်းတို့၏ ပညာရေးဆိုင်ရာ အရည်အချင်းများ၊ လူမှုအဆင့်အတန်း၊ တစ်ကိုယ်ရေတန်ဖိုးနှင့် ရပ်တည်မှုတို့ ဖြစ်ကြသည်။ ဤအရာများကို ၎င်းတို့၏ အရင်းအနှီးအဖြစ်ထား၍ ၎င်းတို့သည် အလွန်အမင်း မာနထောင်လွှားပြီး စိတ်ကြီးဝင်ကာ မိမိတို့ပဲ သြဇာလွှမ်းမိုးချင်ကြသည်။ ဤသည်မှာ ယုတ်ညံ့သိမ်ဖျင်းသော လူ့သဘာဝ၏ သရုပ်သကန်တစ်ခု ဖြစ်သည်။ ဤပြဿနာတွင် ကဏ္ဍနှစ်ခု ပါဝင်သည်။ တစ်ခုမှာ ၎င်းတို့၏ လူ့သဘာဝနှင့် သက်ဆိုင်ပြီး အခြားတစ်ခုမှာ ၎င်းတို့၏ ဖောက်ပြန်ပျက်စီးသော စိတ်သဘောထားနှင့် သက်ဆိုင်သည်။ ပြဿနာများအပေါ် ၎င်းတို့၏ ရှုထောင့်နှင့် ပြဿနာများကို ကိုင်တွယ်ရာတွင် ၎င်းတို့၏ သဘောထားနှင့် ရှုမြင်ပုံများသည် ၎င်းတို့၏ လူ့သဘာဝနှင့် သက်ဆိုင်သည်။ ဤကဲ့သို့သော လူ့သဘာဝက ၎င်းတို့ကို ဖောက်ပြန်ပျက်စီးသော စိတ်သဘောထား၏ ဖော်ပြချက်များဖြစ်သည့် တိကျသော လုပ်ဆောင်ချက်များ၊ သရုပ်သကန်များနှင့် ထုတ်ဖော်ခြင်းများကို ဖြစ်ပေါ်စေသည်။

လူအချို့သည် ပင်ကိုသဘာဝအားဖြင့် စကားနည်းကြသည်၊ ငယ်စဉ်ကတည်းက ၎င်းတို့သည် စကားများများပြောရခြင်းကို မနှစ်သက်ကြပေ။ အခြားသူများနှင့် ပြောဆိုဆက်ဆံသည့်အခါ ၎င်းတို့သည် ရိုးရှင်းပြီး မများပြားသော စကားလုံးများဖြင့် ပြောဆိုကြကာ ၎င်းတို့အပေါ် အမှုအရာများစွာ ဖြစ်ပျက်သည့်အခါတွင်လည်း ၎င်းတို့တွင် အတွေးအခေါ်များစွာ မရှိသကဲ့သို့ ယင်းတို့ကို ဖော်ပြရန် စကားလုံးများစွာလည်း မရှိကြပေ။ ၎င်းတို့ မိမိတို့၏ စိတ်ထဲရှိသည်ကို ဖော်ပြလျှင်ပင် ယင်းမှာ အလွန် ရိုးရှင်းလှသည်။ ဤသည်မှာ မည်သည့်ပြဿနာအမျိုးအစား ဖြစ်သနည်း။ (ဤသည်မှာ ၎င်းတို့၏ ပင်ကိုစရိုက်နှင့်ပတ်သက်သော ပြဿနာတစ်ခု ဖြစ်ပါသည်။) ဤသည်မှာ ၎င်းတို့၏ ပင်ကိုစရိုက်နှင့်ဆိုင်သော ပြဿနာတစ်ခုဖြစ်ပြီး ယင်းမှာ ၎င်းတို့၏ ပင်ကိုအခြေအနေများတွင် ပါဝင်သည်။ ၎င်းတို့၏ ပင်ကိုစရိုက်သည် ပင်ကိုသဘာဝအားဖြင့် စကားနည်းတတ်သည်။ ၎င်းတို့သည် ရိုးရှင်းသောစကားကို အသုံးပြုသည်၊ အလွန်ရှုပ်ထွေးသော အတွေးအခေါ်များ မရှိကြသကဲ့သို့ အခြားသူများနှင့် ပြောဆိုဆက်ဆံသည့်အခါ စကားပြောရန် မလိုလားကြပေ။ စုဝေးပွဲများအတွင်း သမ္မာတရားကို မိတ်သဟာယဖွဲ့သည့်အခါ ၎င်းတို့သည် အခြားသူများ ပြောဆိုသည်ကိုသာ နားထောင်ကြပြီး အခြားသူများ ပြောဆိုပြီးသည့်နောက် ရိုးရှင်းသော တုံ့ပြန်မှုတစ်ခု ပေးနိုင်လျှင်ပင် အတော်လေး ကောင်းမွန်နေပြီဖြစ်သည်။ သင်က ၎င်းတို့ကို “ဤအရာနှင့်ပတ်သက်၍ သင်၏ နားလည်မှုမှာ အဘယ်နည်း” ဟု မေးလျှင် ၎င်းတို့က “ကျွန်ုပ်၏ နားလည်မှုသည် သင်၏ နားလည်မှုနှင့် ဆင်တူပါသည်” ဟု ပြောပေမည်။ သင်က ၎င်းတို့ကို တိတိကျကျပြောရန် တောင်းဆိုလျှင် ၎င်းတို့က “ကျွန်ုပ်သည် သင်နှင့် အတွေးတူပါသည်” ဟု ပြောမည်ဖြစ်ပြီး ထို့နောက်တွင် ၎င်းတို့၌ နောက်ထပ်ပြောစရာ တစ်စုံတစ်ရာ မရှိတော့ပေ။ ဤသည်မှာ ၎င်းတို့၏ ပင်ကိုစရိုက်မျှသာ ဖြစ်သည်၊ သင်က ၎င်းတို့ကို ပို၍ပြောရန် တောင်းဆိုလျှင် ၎င်းတို့၌ ပြောစရာမရှိတော့ပေ။ ဤသည်မှာ ၎င်းတို့၏ ပင်ကိုအခြေအနေများတွင် ပါဝင်သည်။ အခြားလူအမျိုးအစားတစ်မျိုးလည်း ရှိသေးသည်၊ ၎င်းတို့သည် အပြင်ပန်းအားဖြင့် ပြောစရာများများစားစားမရှိဟု ထင်ရပြီး မကြာခဏ စကားနည်းတတ်သော်လည်း “ညီအစ်ကိုညီအစ်မ မည်သူမည်ဝါသည် မည်သည့် သင်းအုပ်နယ်မြေမှ ဖြစ်သနည်း။ ကျွန်ုပ်ကြားသည်မှာ ၎င်းသည် ဘုရားသခင်ကို ရှစ်နှစ်ကြာ ယုံကြည်ခဲ့ပြီးဖြစ်သည်၊ ၎င်းသည် ခေါင်းဆောင်တစ်ဦး ဖြစ်ဖူးသလော။ အသက်ဘယ်လောက်ရှိပြီနည်း။ ၎င်းသည် ကွာရှင်းခဲ့ပြီး ကလေးတစ်ဦးရှိသည်ဆိုသည်မှာ မှန်သလော” ဟု ပြောဆိုလျက် နှစ်ကိုယ်ကြား အတင်းအဖျင်းများအကြောင်း မေးမြန်းရခြင်းကို နှစ်သက်လေသည်။ ဤသည်မှာ မည်သည့်သရုပ်သကန်အမျိုးအစား ဖြစ်သနည်း။ အပေါ်ယံအားဖြင့် ၎င်းတို့သည် စကားများများ မပြောတတ်ကြသကဲ့သို့ လူအများကြားတွင်လည်း စကားပြောရခြင်းကို မနှစ်သက်ကြပေ။ ၎င်းတို့၏ စကားအသုံးအနှုန်းသည် ကြွယ်ဝခြင်းမရှိသကဲ့သို့ အခြားသူများနှင့် ပုံမှန်ဆက်ဆံပြောဆိုရန် စကားလုံးများလည်း မရှိကြပေ။ သို့သော် အခြားကိစ္စရပ်များတွင်မူ ၎င်းတို့၌ ပြောစရာများစွာရှိပြီး အခြားသူများအကြောင်းကို စုံစမ်းမေးမြန်းရခြင်းကို အစဉ်သဖြင့် နှစ်သက်ကာ ဤသို့ ပြောဆိုကြသည်၊ “ထိုလူက မျက်ခွံခွဲစိတ်ထားသလော။ သူ့အသားအရေက ဖြူဖွေးနေသည်၊ သူက အလှပြင်ဆိုင်များကို မကြာခဏ သွားသလော။” သို့မဟုတ် “မည်သူမည်ဝါက နောက်ဆုံးပေါ်ကွန်ပျူတာ အစဉ်သဖြင့် အသုံးပြုသည်ကို ကျွန်ုပ်တွေ့သည်၊ ပြီးလျှင် ၎င်း၏ အဝတ်အထည်များသည် နာမည်ကြီးတံဆိပ်များသာဖြစ်ပြီး အတော်အတန် ဈေးကြီးသည်။ သူ၏ မိသားစုသည် ချမ်းသာကြွယ်ဝသလော။ သူ၏ မိသားစုက မည်သည့်စီးပွားရေးလုပ်ငန်းမျိုး လုပ်ကိုင်သနည်း။ သူ၏ ဖခင်သည် အရာရှိတစ်ဦးဖြစ်သလော” ဟူ၍ ဖြစ်လေသည်။ ဤသရုပ်သကန်များတွင် မည်သည့်ပြဿနာများ ပါဝင်သနည်း။ (၎င်းတို့တွင် ၎င်းတို့၏ လူ့သဘာဝနှင့်ဆိုင်သော ပြဿနာများ ပါဝင်ပါသည်။) အတင်းအဖျင်းများအကြောင်း မေးမြန်းရခြင်းကို နှစ်သက်ခြင်း၊ အသေးအဖွဲ ပုဂ္ဂိုလ်ရေးဆိုင်ရာ ကိစ္စရပ်များအကြောင်း သတင်းအချက်အလက် စုဆောင်းခြင်းနှင့် အခြားသူများ၏ အရေးကိစ္စများအကြောင်း ပြောဆိုရခြင်းကို နှစ်သက်ခြင်းဟူသည့် ဤအရာတို့မှာ လူတစ်ဦး၏ လူ့သဘာဝနှင့် သက်ဆိုင်သော သရုပ်သကန်များ ဖြစ်ကြသည်။ ဤသရုပ်သကန်များသည် ကောင်းသလော။ (မကောင်းပါ။) မည်သည့်နည်းလမ်းများဖြင့် မကောင်းခြင်းဖြစ်သနည်း။ ယင်းတို့တွင် လူ့သဘာဝ၏ မည်သည့်ပြဿနာများ ပါဝင်သနည်း။ ၎င်းတို့သည် မည်သူ့ကိုမျှ အန္တရာယ်မပြုခဲ့ သို့မဟုတ် ညှဉ်းပန်းခြင်း မရှိခဲ့သကဲ့သို့ အခြားသူများ၏ အကျိုးစီးပွားကိုလည်း မထိခိုက်ခဲ့ပေ၊ သို့ဖြစ်လျှင် အဘယ်ကြောင့် ဤသရုပ်သကန်များကို မကောင်းဟု သတ်မှတ်ရသနည်း။ (၎င်းတို့သည် အခြားသူများ၏ အရေးကိစ္စများကို အစဉ်သဖြင့် သိချင်နေကြပြီး ၎င်းတို့၏ နောက်ကွယ်တွင် အခြားသူများ၏ လုပ်ငန်းဆောင်တာများကို အဆက်မပြတ် စပ်စုနေကြသည်။ ၎င်းတို့၏ လူ့သဘာဝနှင့်ဆိုင်သော ဆင်ခြင်တုံတရားတွင် ပြဿနာတစ်ခု ရှိပါသည်။) ယင်းသည် ၎င်းတို့၏ လူ့သဘာဝနှင့်ဆိုင်သော ဆင်ခြင်တုံတရားနှင့် သက်ဆိုင်သည်။ ၎င်းတို့က ပွင့်ပွင့်လင်းလင်းနှင့် တည့်တည့်မတ်မတ် မေးခဲ့ပါက ဥပမာအားဖြင့် “ညီအစ်ကို မည်သူမည်ဝါ၊ သင် အသက်ဘယ်လောက်ရှိပြီနည်း” ဟု မေးလျှင် ဤသည်မှာ လူ့သဘာဝ၏ ပုံမှန်သရုပ်သကန်တစ်ခု ဖြစ်မည်လော။ (ဟုတ်ပါသည်။) ဤနည်းဖြင့် မေးမြန်းခြင်းသည် ပွင့်လင်းပြီး ရိုးသားသည် မဟုတ်လော။ ယင်းမှာ သင့်လျော်သည် မဟုတ်လော။ (သင့်လျော်ပါသည်။) သို့ဆိုလျှင် အဘယ်ကြောင့် လူအချို့သည် သက်ဆိုင်သူများကို တိုက်ရိုက်မေးခွန်းများမေးခြင်း သို့မဟုတ် စကားပြောဆိုခြင်း မပြုကြသနည်း။ အဘယ်ကြောင့် ၎င်းတို့သည် အခြားသူများ၏ နောက်ကွယ်၌ မသမာသည့်အပြုအမူများ ပြုလုပ်ခြင်းကို အားကိုးအားထား ပြုကြသနည်း။ အကြောင်းအရာတစ်ခုကို လူကိုယ်တိုင် မေးမြန်းနိုင်ပါက သို့မဟုတ် ဆွေးနွေးနိုင်ပါက ယင်းကို ပွင့်လင်းစွာ ဖော်ထုတ်ပေးသင့်သည်။ အဘယ်ကြောင့် အခြားသူများ၏ နောက်ကွယ်တွင် တီးတိုးပြောဆိုနေရမည်နည်း။ ဤအရာတွင် ကျင့်ကြံပြုမူခြင်းဆိုင်ရာ၊ အမှုအရာများကို ကိုင်တွယ်ခြင်းဆိုင်ရာ သဘောထားနှင့် နည်းလမ်းတစ်ခု ပါဝင်သည် မဟုတ်လော။ ဤသဘောထားနှင့် နည်းလမ်းသည် ကောင်းသလော။ (မကောင်းပါ။) အဘယ်ကြောင့် ဤသဘောထားနှင့် နည်းလမ်းကို မကောင်းဟု သတ်မှတ်ရသနည်း။ အမှုကိစ္စများကို တိတ်တဆိတ် စုံစမ်းမေးမြန်းရခြင်းကို နှစ်သက်သော ဤလူများသည် အခြားသူများ၏ ကိုယ်ရေးကိုယ်တာကို နှိုက်နှိုက်ချွတ်ချွတ် စုံစမ်းရခြင်းနှင့် လူများကို ၎င်းတို့၏ နောက်ကွယ်တွင် စေ့စေ့စပ်စပ် ကြည့်ရှုစစ်ဆေးရခြင်းကို နှစ်သက်ကြသည် မဟုတ်လော။ (ဟုတ်ပါသည်။) အဘယ်ကြောင့် ၎င်းတို့သည် လူများကို ၎င်းတို့၏ နောက်ကွယ်တွင် စေ့စေ့စပ်စပ် ကြည့်ရှုစစ်ဆေးရခြင်းကို နှစ်သက်ကြသနည်း။ ၎င်းတို့တွင် မေးခွန်းများရှိပါက အဘယ်ကြောင့် တိုက်ရိုက်မမေးကြသနည်း။ မျက်နှာချင်းဆိုင် မေးမြန်းရာတွင် အခက်အခဲတစ်ခု ရှိနေသလော။ ၎င်းတို့သည် တိုက်ရိုက်မေးမြန်းရန် မလွယ်ကူ သို့မဟုတ် မဖြစ်နိုင်ဟု ခံစားရသောကြောင့် အခြားသူများ၏ နောက်ကွယ်တွင် စုံစမ်းမေးမြန်းကြသည်။ ၎င်းတို့ ဤနည်းအတိုင်း ပြုမူကြသည်မှာ ဤအကြောင်းကြောင့် မဟုတ်လော။ (ဟုတ်ပါသည်။) အမှန်တကယ်တွင် အချို့အရာများကို တိုက်ရိုက်မေးမြန်းနိုင်သည်၊ ဥပမာအားဖြင့် တစ်စုံတစ်ဦးကို ဤသို့သော မေးခွန်းများ မေးမြန်းခြင်းဖြစ်သည်။ “သင် ဘုရားသခင်ကို ယုံကြည်သည်မှာ နှစ်မည်မျှရှိပြီနည်း။ သင် ကောလိပ်တက်ဖူးသလော။ သင်၏ ပညာအရည်အချင်း အဆင့်မှာ အဘယ်နည်း။ သင် အသက်မည်မျှရှိပြီနည်း” ဟူ၍ဖြစ်သည်။ ဤအရာအားလုံးကို မျက်နှာချင်းဆိုင် မေးမြန်းနိုင်သည်။ လူအချို့က သင့်ကို ပြောပြရန် မလိုလားပါက မမေးနှင့်၊ ၎င်းတို့၏ နောက်ကွယ်တွင်လည်း မစုံစမ်းနှင့်။ ၎င်းတို့သည် အချို့အရာများကို သင်နှင့် ဝေမျှလိုမည်ဟု သင်ထင်ပါက သို့မဟုတ် သင်တို့နှစ်ဦး ရင်းနှီးပြီး ၎င်းတို့က သင့်ကို အတော်အတန် ယုံကြည်၍ ပြောဆိုပါက ၎င်းတို့ကို တိုက်ရိုက်မေးမြန်းနိုင်သည်။ အဘယ်ကြောင့် ၎င်းတို့၏ နောက်ကွယ်တွင် မရမက လျှောက်စုံစမ်းနေမည်နည်း။ ယင်းမှာ အမှန်တကယ် လိုအပ်သလော။ ယင်းမှာ အတော်ပင် ယုတ်ညံ့ပုံမပေါ်ပေလော။ ဤလူများသည် အခြားသူက ၎င်းတို့ကို ပြောမည်မဟုတ်ဟု ကြောက်ရွံ့သောကြောင့် တိုက်ရိုက်မမေးဝံ့ကြပေ။ သို့သော် ၎င်းတို့သည် ဤအရာများအကြောင်းကို အလွန်အမင်း သိရှိနားလည်လိုကြသည်။ ၎င်းတို့ မသိရှိရပါက စိတ်မသက်မသာ ခံစားရမည်ဖြစ်ပြီး သတင်းအချက်အလက်ကို ရရှိသည်နှင့်တစ်ပြိုင်နက် အဖိုးတန်ရတနာတစ်ခုကို ရရှိခဲ့သည့်အလား စိတ်ထဲတွင် သက်သောင့်သက်သာ ခံစားရသည်။ ၎င်းတို့သည် မည်သို့သောလူစားမျိုးများ ဖြစ်ကြသနည်း။ အခြားသူများ၏ ကိုယ်ရေးကိုယ်တာကိစ္စများ သို့မဟုတ် ပုဂ္ဂိုလ်ရေးဆိုင်ရာ အချက်အလက်များကို မေးမြန်းစုံစမ်းခြင်းနှင့် သိရှိနားလည်ခြင်းတို့၌ ပျော်မွေ့သော ထိုသို့သောလူများသည် အတင်းအဖျင်း ပြောတတ်ပြီး အခြားသူများကို ဝေဖန်သုံးသပ်တတ်ကြသည် မဟုတ်လော။ (ဟုတ်ပါသည်။) အခြားသူက သင်၏ မေးခွန်းများကို ဖြေလိုမည်ဟု သင်ယုံကြည်ပါက ၎င်းကို တိုက်ရိုက်မေးမြန်းပြီး ဤအရာများအကြောင်းကို သိရှိအောင် လုပ်နိုင်သည်။ အခြားသူက သင်၏ မေးခွန်းအချို့သည် လွန်ကျူးပြီး သင်မေးသင့်သည့်အရာကို ကျော်လွန်သည်ဟု ခံစားရကာ သင့်ကို ဖြေဆိုရန် ငြင်းပယ်ပါက အဆင်ပြေပါသည်။ ၎င်းတို့က သင့်ကို မဖြေလိုပါက သို့မဟုတ် အချို့အရာများကို သင်သိရှိရန် မလိုလားပါက ၎င်းတို့၏ နောက်ကွယ်တွင်လည်း မစုံစမ်းနှင့်။ သင်က အခြားတစ်စုံတစ်ဦး၏ သတင်းအချက်အလက် သို့မဟုတ် ကိုယ်ရေးကိုယ်တာကိစ္စများကို သိရှိရန် အတင်းအကျပ်ပြုပါက တစ်ချက်အနေဖြင့် ၎င်းတို့သည် သင့်ကို သံသယဖြင့် သဘောထားလာလိမ့်မည်၊ “အဘယ်ကြောင့် သင်က ဤအရာများကို သိလိုရသနည်း။ အဘယ်ကြောင့် သင်က ကျွန်ုပ်၏ နောက်ကွယ်တွင် ကျွန်ုပ်အကြောင်းကို သိရှိရန် ကြိုးစားနေရသနည်း။ သင်က ကျွန်ုပ်ကို ထိန်းချုပ်ရန်၊ ညှဉ်းပန်းရန် သို့မဟုတ် သစ္စာဖောက်ရန် ကြံစည်နေသလော” ဟူ၍ဖြစ်သည်။ ယင်းမှာ ကဏ္ဍတစ်ခု ဖြစ်သည်။ နောက်တစ်ချက်အနေဖြင့် အခြားသူများအကြောင်းကို သင်သိရှိရန် အဘယ်လိုအပ်ချက် ရှိသနည်း။ ၎င်းတို့အကြောင်း အရာများကို သိရှိရန် သင်တွင် အဘယ်အခွင့်အရေး ရှိသနည်း။ သင်က လူတိုင်းအပေါ် သတင်းအချက်အလက် စုဆောင်းလိုသလော။ သင်က အရာအားလုံးအကြောင်းကို သိရှိရမှဖြစ်မည်၊ သင်သည် သတင်းအချက်အလက် စုဆောင်းရာတွင် အထူးပြုလေ့လာထားသူလော။ ဤသည်မှာ သင်၏ အလုပ်လော။ ဘုရားအိမ်တော်သည် မည်သူ့ကိုမျှ ထိုသို့သော တာဝန်ပေးစေခိုင်းချက်ကို မပေးခဲ့ပေ။ သင်က အခြားသူများ၏ ကိုယ်ရေးကိုယ်တာ အရေးကိစ္စများအကြောင်းကို အဆက်မပြတ် စုံစမ်းရန် ကြိုးစားနေပါက ၎င်းတို့က သင်သိရှိရန် မလိုလားသော အရာများအကြောင်းကို စုံစမ်းနေပါက ယင်းက ၎င်းတို့ကို သင့်အား အလွန် စိတ်အနှောင့်အယှက် ဖြစ်ဖွယ်ကောင်းသည်ဟု ထင်မြင်စေသည်။ အခြားသူများက စိတ်အနှောင့်အယှက် ဖြစ်ဖွယ်ကောင်းသည်ဟု ထင်မြင်ခံရသူတစ်ဦး၏ လူ့သဘာဝသည် မည်သို့ရှိသနည်း။ အနည်းဆုံးအနေဖြင့် ဤလူသည် အရှက်မရှိပေ။ ဘာသာတရား မရှိသူများက ထိုသို့သောလူတစ်ဦးကို အဘယ်သို့ခေါ်သနည်း။ အတင့်ရဲသော လူယုတ်မာတစ်ဦးဟု ခေါ်သည်။ ၎င်းတို့၏ လူ့သဘာဝသည် ယုတ်ညံ့သည်၊ ၎င်းတို့သည် ဂုဏ်သိက္ခာ ကင်းမဲ့ပြီး အရာခပ်သိမ်းကို စုံစမ်းလိုကြကာ မလျော်မကန် ကျင့်ကြံပြုမူကြသည်။ ၎င်းတို့သည် ဤသို့မဟုတ်လော။ (ဟုတ်ပါသည်။) ဤလူအမျိုးအစား၏ လူ့သဘာဝသည် ကောင်းသလော သို့မဟုတ် ဆိုးသလော။ (၎င်းတို့၏ လူ့သဘာဝသည် မကောင်းပါ။) အနည်းဆုံးအနေဖြင့် ၎င်းတို့၏ လူ့သဘာဝသည် မကောင်းပေ။ ဤသည်မှာ ကောင်းသောလူ့သဘာဝမရှိခြင်းဟူသည့် အမျိုးအစားအတွင်းမှ သရုပ်သကန်တစ်ခုဖြစ်သည်၊ မလျော်မကန် ပြုမူခြင်းနှင့် အစဉ်သဖြင့် မသမာသည့်အပြုအမူများ ပြုလုပ်ခြင်း ဖြစ်သည်။ အပေါ်ယံအားဖြင့် ၎င်းတို့သည် သင့်အပေါ် ယဉ်ကျေးပျူငှာပြီး လေးစားကာ ရည်မွန်ပုံရပြီး ကျင့်ကြံပြုမူရာတွင် အမူအကျင့်ကောင်းမွန်ပြီး သင့်လျော်ပုံရသည်။ သို့သော် သင်၏ နောက်ကွယ်တွင်မူ ၎င်းတို့သည် သင်၏ အသက်၊ မျိုးရိုးနောက်ခံနှင့် သင်၏ အခြားသော ကဏ္ဍများအကြောင်းကို စုံစမ်းလျက် သင့်ကို တိုက်ရိုက် ပွင့်ပွင့်လင်းလင်း ဆွေးနွေးခြင်း သို့မဟုတ် မေးမြန်းခြင်းမရှိဘဲ မသမာသည့်အပြုအမူများ ပြုလုပ်ကြသည်။ အခြားသူများနှင့် ပြောဆိုဆက်ဆံပြီး စကားစမြည်ပြောသည့်အခါ ၎င်းတို့သည် ပွင့်လင်းခြင်းဖြစ်စေ၊ ဘွင်းဘွင်းရှင်းရှင်းဖြစ်စေ မရှိပေ၊ ထိုအစား ၎င်းတို့သည် လူများ၏ နောက်ကွယ်တွင် မသမာသည့်အပြုအမူများ အစဉ်သဖြင့် ပြုလုပ်ကြပြီး လူရှေ့မထွက်ဝံ့သော အရာများကို ပြုလုပ်ကြသည်။ ၎င်းတို့သည် အခြားသူများ၏ ကိုယ်ရေးကိုယ်တာ အရေးကိစ္စများနှင့် အခြားသူများ မည်သို့စဉ်းစားနေသည်ကို အဆက်မပြတ် စဉ်းစားသုံးသပ်ကြပြီး ထိုသို့သောကိစ္စရပ်များဖြင့် အစဉ်သဖြင့်အလုပ်ရှုပ်နေကြသည်။ ဤလူအမျိုးအစား၏ လူ့သဘာဝသည် မကောင်းပေ၊ မည်သည့်အုပ်စုတွင်မဆို ထိုသို့သောလူများကို လူတိုင်းက မနှစ်သက်ကြပေ။ လူများက သင့်ကို ပုဂ္ဂိုလ်ရေးဆိုင်ရာ အရာများကို မသိစေချင်၍ သို့မဟုတ် ၎င်းတို့က သင်ထံမှ တစ်စုံတစ်ခုကို ဖုံးကွယ်ထား၍ မဟုတ်ပေ၊ သင်၏ လူ့သဘာဝ၊ သင်၏ ကျင့်ကြံပြုမူခြင်းနှင့် အမှုအရာများကို ကိုင်တွယ်ခြင်းနည်းလမ်းက အခြားသူများကို သင်အား မနှစ်သက်စေခြင်း ဖြစ်သည်။ လူများက သင့်ကို မနှစ်သက်ရသည့်အကြောင်းရင်းမှာ သင်၏ ကျင့်ကြံပြုမူခြင်းနှင့် အမှုအရာများကို ကိုင်တွယ်ခြင်းနည်းလမ်းသည် သင့်လျော်ပြီး ဘွင်းဘွင်းရှင်းရှင်း ဖြစ်မည့်အစား အနည်းငယ် မသမာသောကြောင့် ဖြစ်သည်၊ သင်အသုံးပြုသည့် နည်းဗျူဟာများသည် ယုတ်ညံ့ပြီး ညစ်ညမ်းသောကြောင့် ဖြစ်သည်။ အချို့လူများသည် အခြားသူများနှင့် မျက်နှာချင်းဆိုင် ပြောဆိုဆက်ဆံသည့်အခါ ပြဿနာမရှိဟု ထင်ရသော်လည်း ၎င်းတို့၏ နောက်ကွယ်တွင်မူ ၎င်းတို့သည် အရာများကို ခိုးကြောင်ခိုးဝှက်ပုံစံဖြင့် အစဉ်သဖြင့် လုပ်ဆောင်ကြသည်။ အခြားသူများ ထွက်သွားသည့်အခါ ၎င်းတို့သည် အခြားသူတို့ မည်သူနှင့် စကားပြောခဲ့သည်၊ မည်သည့်အကြောင်း ပြောဆိုခဲ့သည်၊ ၎င်းတို့၏ နေ့စဉ်မှတ်တမ်းများတွင် မည်သည့်အရာများ ရေးသားခဲ့သည်၊ မည်သည့်အတွင်းကျကျ သိမြင်မှုများ ရှိသည်တို့ကို ကြည့်ရှုရန် ၎င်းတို့၏ ကွန်ပျူတာများကို လျင်မြန်စွာ ဖွင့်ကြသည်။ တစ်ခါတစ်ရံ တစ်စုံတစ်ဦး၏ ကွန်ပျူတာတွင် စကားဝှက်တစ်ခုရှိသည့်အခါ ၎င်းတို့က ဤသို့ပြောဆိုခြင်းဖြင့် ယင်းကို ချော့မော့တောင်းယူရန် ကြိုးစားကြသည်၊ “သင်၏ ကွန်ပျူတာစကားဝှက်ကို ပြောင်းလိုက်သလော။ ကျွန်ုပ်၏ စကားဝှက်ကို ၁၂၃၄၅၆၇ အဖြစ်သာ ပြောင်းလိုက်သည်၊ သင်၏ စကားဝှက်ကိုလည်း သင်ပြောင်းလျှင် ပြောင်းသင့်ပေသည်” ဟူ၍ ဖြစ်သည်။ ဤသို့ပြောဆိုခြင်း၏ ရည်ရွယ်ချက်မှာ အဘယ်နည်း။ “ကျွန်ုပ်က သင့်ကို ကျွန်ုပ်၏ စကားဝှက်ကို ပြောပြနေသည်၊ သင်လည်း ကျွန်ုပ်ကို သင်၏ စကားဝှက်ကို ပြောပြသင့်သည်၊ သို့မှသာ ကျွန်ုပ် သင်၏ ကွန်ပျူတာကို စစ်ဆေးရန် အခွင့်အရေးရမည်” ဟူ၍ဖြစ်သည်။ အချို့လူများသည် အခြားသူများ မရှိသည့်အခါ ၎င်းတို့၏ အိတ်များနှင့် ပစ္စည်းများကိုပင် မွှေနှောက်ရှာဖွေဝံ့ကြသည်။ ဥပမာအားဖြင့် ၎င်းတို့က တစ်စုံတစ်ဦး နားကြပ်အသစ်တစ်စုံ တပ်ထားသည်ကို မြင်ပြီး အသံအရည်အသွေး မည်သို့ရှိသည်ကို သိလိုပါက ထိုလူမရှိသည့်အခါ နားကြပ်များကို ယူပြီး နားထောင်ဝံ့ကြပေမည်။ သင်က ထိုလူ၏ နားကြပ်များကို ငှားရန် ပွင့်ပွင့်လင်းလင်း တောင်းဆိုပြီး ၎င်းတို့က သဘောတူပါက သင်သည် ယင်းတို့ကို တရားဝင် စမ်းသပ်နိုင်သည်။ ၎င်းတို့က သဘောမတူပါက သင်မစမ်းသပ်သင့်ပေ။ ယင်းမှာ ကိုင်တွယ်ရန် သင့်လျော်သောနည်းလမ်း မဟုတ်လော။ အခြားသူများ သဘောတူသည်ဖြစ်စေ၊ မတူသည်ဖြစ်စေ သင်သည် အမှုအရာများကို ၎င်းတို့၏ နောက်ကွယ်တွင်မဟုတ်ဘဲ ၎င်းတို့၏ ရှေ့မှောက်တွင် ပွင့်ပွင့်လင်းလင်း ကိုင်တွယ်သင့်သည်။ ဤလူအမျိုးအစားသည် ထိုသို့မလုပ်နိုင်ပေ၊ ၎င်းတို့သည် အစဉ်သဖြင့် မသမာသည့်အပြုအမူများ ပြုလုပ်ကြသည်။ မည်သည့်အတိုင်းအတာအထိ ပြုလုပ်ကြသနနည်း။ သင်ထွက်သွားသည်နှင့်တစ်ပြိုင်နက် ၎င်းတို့သည် သင်၏ ဝိညာဉ်ရေးရာ ဆက်ကပ်ခြင်း မှတ်စုများတွင် သင်ရေးသားထားသည်ကို စစ်ဆေးပြီး တစ်စုံတစ်ရာ လွတ်သွားမည်ကို ကြောက်ရွံ့လျက် ယင်းကို လျင်မြန်စွာ ကူးယူကာ သင်၏ ပစ္စည်းများကို ချက်ချင်း မွှေနှောက်ရှာဖွေကြသည်။ အပေါ်ယံအားဖြင့် ၎င်းတို့သည် သမ္မာတရားကို တောင့်တပုံရသော်လည်း နောက်ကွယ်မှ ၎င်းတို့၏ လုပ်ရပ်များသည် ညစ်ညမ်းလှသည်။ ၎င်းတို့က သင် ကွန်ပျူတာအသစ်တစ်လုံး ဝယ်သည်ကို မြင်သည့်အခါ မနာလိုဖြစ်ကြသည်။ အပြင်ပန်းတွင် ၎င်းတို့က ကွန်ပျူတာအသစ်သည် ကောင်းမွန်ပြီး မြန်သည်ဟု ပြောသော်လည်း စိတ်ထဲတွင်မူ ၎င်းတို့က “မြန်သည်ဟု ဆိုသလော။ တစ်နေ့နေ့တွင် ပျက်သွားပါစေဟု ကျွန်ုပ် မျှော်လင့်သည်” ဟု တွေးတောကြသည်။ တစ်နေ့တွင် သင်က ကွန်ပျူတာအသစ်သည် ကောင်းစွာအလုပ်မလုပ်ဘဲ နှေးကွေးနေသည်ဟု စကားထဲထည့်ပြောသည့်အခါ ၎င်းတို့က “အသစ်သုံးသည့်အတွက် ခံရသည်မှာ နည်းပင်နည်းသေးသည်။ ငါဆိုလျှင် တစ်လုံးပင် သုံးခွင့်မရသေး၊ သို့ဖြစ်၍ သင် မသုံးနိုင်လျှင် ပို၍ ကောင်းလေသည်” ဟု တိတ်တဆိတ် ဝမ်းမြောက်ဝမ်းသာ ခံစားရသည်။ ၎င်းတို့၏ စိတ်သည် လူရှေ့သူရှေ့ ထုတ်မပြဝံ့သော ယုတ်ညံ့ပြီး ညစ်ညမ်းသည့် အတွေးအခေါ်များဖြင့် ပြည့်နေသည်။ အချို့လူများက တစ်စုံတစ်ဦးတွင် လှပသော အဝတ်အစားတစ်ထည်ရှိသည်ကို မြင်ပြီး ၎င်းတို့လည်း ဝတ်ဆင်ကြည့်ချင်ကြသည်။ သို့သော် တိုက်ရိုက်တောင်းဆိုမည့်အစား ထိုလူမရှိသည့်အခါ ခိုး၍ဝတ်ဆင်ရန် အခွင့်အရေးကို စောင့်ဆိုင်းရုံသာ စောင့်ဆိုင်းကြသည်။ ၎င်းတို့သည် မိမိတို့ကိုယ်ကို မှန်ထဲတွင် ကြည့်ကာ အလွန်လှသည်ဟု တွေးထင်ကြသော်လည်း ထိုလူပြန်လာသည့် ခြေသံကို ကြားသည်နှင့်တစ်ပြိုင်နက် အလျင်အမြန် ချွတ်ချပြီး နေရာတကျ ပြန်ထားလိုက်ကြသည်။ ဤလူအမျိုးအစား၏ မသမာသည့်အပြုအမူများနှင့် ၎င်းတို့၏ အမှုအရာများကို ကိုင်တွယ်ပုံနည်းလမ်းများတွင် ဖောက်ပြန်ပျက်စီးသော စိတ်သဘောထားတစ်ခု မပါဝင်နိုင်သကဲ့သို့ ဖောက်ပြန်ပျက်စီးသော စိတ်သဘောထားတစ်ခုကဲ့သို့ မဆိုးရွားနိုင်သော်လည်း ၎င်းတို့၏ ကျင့်ကြံပြုမူခြင်းနှင့် အမှုအရာများကို ကိုင်တွယ်ခြင်းဆိုင်ရာ သဘောထားနှင့် လူများကို ၎င်းတို့ဆက်ဆံပုံနည်းလမ်းသည် အတော်ပင် စက်ဆုပ်ဖွယ်ကောင်းပြီး ရွံရှာဖွယ်ဖြစ်ကာ ဤသည်မှာ အခြားသူများ၏ ပုံမှန်အသက်တာများကို အတိုင်းအတာတစ်ခုအထိ သက်ရောက်မှုရှိသည်။ ထို့ကြောင့် ဤလူအမျိုးအစားသည် ၎င်းတို့၏ လူ့သဘာဝနှင့်ပတ်သက်၍ ဆိုးရွားသော ပြဿနာများရှိသည်ဟု ဆိုနိုင်သည်။ မည်မျှဆိုးရွားသနည်း။ ၎င်းတို့သည် ကျင့်ကြံပြုမူရာတွင် မလျော်ကန်ပေ၊ နောက်ကွယ်တွင် မသမာသည့် အပြုအမူများစွာ ပြုလုပ်ကြပြီး ၎င်းတို့၏ ပြဿနာများကို ကိုင်တွယ်ပုံနည်းလမ်းသည် မသမာသည့်အပြင် ညစ်ညမ်းလှသည်။ ၎င်းတို့သည် အစဉ်သဖြင့် လျှို့ဝှက်တတ်ကြသည်၊ ၎င်းတို့သည် အမှုအရာများကို မည်သည့်အခါမျှ ပွင့်ပွင့်လင်းလင်း မလုပ်ဆောင်ဘဲ လူများ၏ နောက်ကွယ်တွင် အစဉ်သဖြင့် လုပ်ဆောင်ကြသည်။ အခြားသူများ မရှိသည့်အခါတွင်ဖြစ်စေ၊ အာရုံမစိုက်သည့်အခါတွင်ဖြစ်စေ၊ ၎င်းတို့လုပ်ဆောင်နေသည့်အရာကို မည်သူမျှ မမြင်နိုင်သည့်အခါတွင်ဖြစ်စေ၊ မတွေ့ရှိနိုင်သည့်အခါတွင်ဖြစ်စေ ၎င်းတို့သည် ခိုးကြောင်ခိုးဝှက်ဖြင့် အရာများကို လုပ်ဆောင်ကြသည်။ ဤလူအမျိုးအစား၏ လူ့သဘာဝသည် မကောင်းပေ။ ၎င်းတို့သည် အလင်းရောင် သို့မဟုတ် အခြားလူများကို ရင်မဆိုင်နိုင်ဘဲ အမှောင်ထု၏ လေထုထဲတွင် နစ်မြုပ်လျက် မှောင်သောချောင်များတွင် အစဉ်သဖြင့် နေထိုင်ကြသည်။ ၎င်းတို့၏ လူ့သဘာဝသည် ယုတ်ညံ့ပြီး ညစ်ညမ်းလှသည်။ ၎င်းတို့၏ ယုတ်ညံ့သော လူ့သဘာဝနှင့်ဆိုင်သော ဤသရုပ်သကန်များသည် ဗီဇလော။ (မဟုတ်ပါ။) ၎င်းတို့သည် အခြားသူများရှေ့တွင် အမှုအရာများကို လုပ်ဆောင်ရန် ရှက်ရွံ့သည်ဟု ခံစားရသည်၊ ၎င်းတို့သည် အခြားသူများ၏ နောက်ကွယ်တွင် လုပ်ဆောင်ရသည်ကို ပိုနှစ်သက်ကြပြီး အခြားသူများ၏ နောက်ကွယ်တွင် ပြုမူသည့်အခါ လုံးဝ ချုပ်တည်းမှုမရှိကြပေ။ ဤသည်မှာ ၎င်းတို့၏ ပင်ကိုစရိုက်နှင့် တစ်စုံတစ်ရာ သက်ဆိုင်သလော။ (မသက်ဆိုင်ပါ။) သင်က ဤမသမာသည့်အပြုအမူများ သို့မဟုတ် ၎င်းတို့၏ လူ့သဘာဝတွင် ၎င်းတို့ထုတ်ဖော်ပြီး အသက်ရှင်နေထိုင်သည့်အရာသည် ဖောက်ပြန်ပျက်စီးသော စိတ်သဘောထားများ၏ ကဏ္ဍတစ်ခုနှင့် သက်ဆိုင်သည်ဟု ဆိုပါက ယင်းမှာ တိကျမှန်ကန်မည်မဟုတ်ပေ။ သို့သော် ၎င်းတို့၏ မသမာသည့်အပြုအမူများသည် အဆက်မပြတ် ဖြစ်နေသည်။ အပေါ်ယံအားဖြင့် ၎င်းတို့သည် မည်သည့်အမှားကြီးကြီးမားမားကိုမျှ မကျူးလွန်ခဲ့ဟု ထင်ရပြီး အသင်းတော်က ၎င်းတို့ကို တာဝန်တစ်ခု ခန့်အပ်သည့်အခါ အများအားဖြင့် ၎င်းတို့သည် စိတ်နှစ်ထားပြီး နာခံကြသည်၊ ၎င်းတို့သည် အပြင်ပန်းအားဖြင့် အတော်လေး ရည်မွန်ပုံပင် ရလေသည်။ သို့သော် နောက်ကွယ်တွင်မူ အခြေအနေက တစ်မျိုးတစ်ဖုံ ဖြစ်သွားသည်၊ မည်သူမျှ မကြည့်နေသည်နှင့်တစ်ပြိုင်နက် ကြွက်တစ်ကောင်ကဲ့သို့ ၎င်းတို့သည် မသမာသည့်အပြုအမူများ ပြုလုပ်ပြီး ကိစ္စရပ်များကို စတင်လုပ်ဆောင်ကြသည်။ ဤလူများသည် ကြွက်များနှင့်တူသည် မဟုတ်လော။ စဉ်းစားကြည့်လော့၊ ဤသည်မှာ ၎င်းတို့၏ လူ့သဘာဝနှင့် အခြားသူများနှင့် ပြောဆိုဆက်ဆံပြီး အမှုအရာများကို ကိုင်တွယ်ပုံနည်းလမ်းဖြစ်ပါက၊ ၎င်းတို့၏ လူ့သဘာဝနှင့်ဆိုင်သော ကိုယ်ကျင့်တရား စရိုက်လက္ခဏာသည် ဤအမျိုးအစားဖြစ်ပြီး ၎င်းတို့တွင် ဤသို့သော လူ့သဘာဝ အနှစ်သာရရှိပါက ၎င်းတို့သည် ဘုရားသခင်နှင့် သမ္မာတရားကို မည်သို့သဘောထားဆက်ဆံကြမည်နည်း။ ၎င်းတို့သည် ဘုရားသခင်နှင့် သမ္မာတရားကို လူများကို သဘောထားဆက်ဆံသည့်နည်းလမ်းအတိုင်း သဘောထားဆက်ဆံကြသလော။ (သဘောထားဆက်ဆံပါသည်။) ၎င်းတို့သည် နောက်ကွယ်တွင်လည်း မသမာသည့်အပြုအမူများ ပြုလုပ်ကြသည် မဟုတ်လော။ ၎င်းတို့သည် ခေါင်းဆောင်များနှင့် အမှုဆောင်များ၏ ကြီးကြပ်မှုကို ရှောင်ရှားရန် တတ်နိုင်သမျှ ကြိုးစားကြပြီး ထိုလူတို့၏ ရှေ့တွင် တစ်မျိုး၊ ထိုလူတို့၏ နောက်ကွယ်တွင် တစ်မျိုး ပြုမူကြသည်။ ၎င်းတို့သည် ဘုရားသခင်၏ စေ့စေ့စပ်စပ် ကြည့်ရှုစစ်ဆေးခြင်းကို လက်မခံကြသကဲ့သို့ ၎င်းတို့၏ စိတ်နှလုံး နက်ရှိုင်းသောနေရာတွင် သမ္မာတရားကိုလည်း လက်မခံကြပေ။ ဘုရားသခင်၏ နှုတ်ကပတ်တော်များက မည်သို့ပင်ဆိုစေကာမူ ၎င်းတို့သည် မိမိတို့၏ ကိုယ်ပိုင်နည်းလမ်းဖြင့် ချဉ်းကပ်ကြပြီး မသမာသည့်အပြုအမူအချို့ ပြုလုပ်ကာ အချို့အရာများကို အပေါ်ယံပြသရန် လုပ်ဆောင်ကြသောကြောင့် အပြင်ပန်းအားဖြင့် မည်သူမျှ မည်သည့်ပြဿနာ သို့မဟုတ် မှားယွင်းမှုများကိုမျှ မမြင်နိုင်ပေ။ အပြင်ပန်းအားဖြင့် ၎င်းတို့သည် မည်သည့်အမှားမျှ မလုပ်ဆောင်သည့်ပုံပေါက်ပြီး သမ္မာတရားကို လက်တွေ့လုပ်ဆောင်နေပုံရသော်လည်း နောက်ကွယ်တွင်မူ ၎င်းတို့သည် မိမိတို့၏ မသမာသည့်အပြုအမူများကို လုပ်ဆောင်ပြီးဖြစ်ကာ အမှားများကို မည်သူမျှမသိဘဲ တိတ်တဆိတ် ကျူးလွန်ပြီးဖြစ်သည်။ ၎င်းတို့သည် ဘုရားသခင်၏ စေ့စေ့စပ်စပ် ကြည့်ရှုစစ်ဆေးခြင်းကို မယုံကြည် သို့မဟုတ် လက်မခံကြပေ၊ ထို့ကြောင့် ၎င်းတို့သည် သမ္မာတရားကို လက်မခံကြပေ။ ဤသည်မှာ အဘယ်အရာနှင့် သက်ဆိုင်သနည်း။ ယင်းသည် ဖောက်ပြန်ပျက်စီးသော စိတ်သဘောထားများနှင့် သက်ဆိုင်သည်။ ၎င်းတို့သည် ဘုရားသခင်၊ သမ္မာတရားနှင့် ၎င်းတို့၏ တာဝန်ကို ဤသို့သော လူ့သဘာဝနှင့်လည်းကောင်း၊ ဤသို့သော အခြားသူများနှင့် ပြောဆိုဆက်ဆံပြီး အမှုအရာများကို ကိုင်တွယ်ပုံနည်းလမ်းဖြင့်လည်းကောင်း ဆက်ဆံသည့်အခါ ၎င်းတို့ထုတ်ဖော်သည့် ၎င်းတို့၏ လူ့သဘာဝနှင့်ဆိုင်သော တိကျသည့်သရုပ်သကန်များတွင် ဖောက်ပြန်ပျက်စီးသော စိတ်သဘောထားများ ပါဝင်သည်။ ဤဖောက်ပြန်ပျက်စီးသော စိတ်သဘောထားများတွင် အဘယ်အရာများ ပါဝင်သနည်း။ အနည်းဆုံးအနေဖြင့် ၎င်းတို့တွင် လှည့်ဖြားတတ်ခြင်း ပါဝင်သည်။ ၎င်းတို့၏ လုပ်ရပ်များသည် ပို၍ပင် လျှို့ဝှက်ပြီး လှည့်ဖြားတတ်ပါက အဘယ်အရာနှင့် သက်ဆိုင်သနည်း။ (ယင်းသည် ကောက်ကျစ်ဆိုးယုတ်မှုသို့ တိုးမြင့်သွားပါသည်။) ယင်းသည် ၎င်းတို့၏ ဖောက်ပြန်ပျက်စီးသော စိတ်သဘောထားများအတွင်းရှိ လှည့်ဖြားတတ်ခြင်း၊ ကောက်ကျစ်ဆိုးယုတ်မှုတို့နှင့် သက်ဆိုင်သည်။ ထို့အပြင် ၎င်းတို့၏ စိတ်နှလုံး နက်ရှိုင်းသောနေရာတွင် ၎င်းတို့သည် သမ္မာတရားနှင့် ဘုရားသခင်၏ စေ့စေ့စပ်စပ် ကြည့်ရှုစစ်ဆေးခြင်းအပေါ် သံသယများကို အစဉ်သဖြင့် ထားရှိကြသည်။ ဤသည်မှာ ၎င်းတို့တွင် နက်ရှိုင်းစွာ အမြစ်တွယ်နေသည်။ ၎င်းတို့က “ငါ နောက်ကွယ်တွင် လုပ်သည့်အရာကို မည်သူမျှ မသိပေ၊ ငါ ဘုရားသခင်ကို မည်သည့်နေရာတွင်မျှ မမြင်ဖူးပေ၊ ထို့ကြောင့် ဘုရားသခင်လည်း သေချာပေါက် သိမည်မဟုတ်ပေ၊ ငါတစ်ယောက်တည်းသာလျှင် သိသည်” ဟု တွေးထင်ကြသည်။ ဤသည်မှာလည်း ဖောက်ပြန်ပျက်စီးသော စိတ်သဘောထားတစ်ခုနှင့် သက်ဆိုင်သည် မဟုတ်လော။ ဤသည်မှာ ဖောက်ပြန်ပျက်စီးသော စိတ်သဘောထားများ၏ မည်သည့်ကဏ္ဍနှင့် သက်ဆိုင်သနည်း။ (ယင်းသည် စိတ်နှလုံးမာကျောခြင်း ဖြစ်သလော။) ၎င်းတို့၏ အတွင်း၌ စိတ်နှလုံးမာကျောသော စိတ်သဘောထားတစ်ခု ရှိကြသည်။ သို့ဆိုလျှင် ဤအတွေးအခေါ်များ၏ အနှစ်သာရသည် သမ္မာတရားကို အလွန်အမင်း မနှစ်မြို့ခြင်း ဖြစ်သည် မဟုတ်လော။ (ဟုတ်ပါသည်။) သမ္မာတရားအပေါ် ၎င်းတို့၏ သဘောထားသည် အတိုက်အခံလုပ်ခြင်းနှင့် ဆန့်ကျင်ခြင်းတစ်ခု ဖြစ်သည်။ စိတ်နှလုံးခိုင်မာခြင်းအပြင် ၎င်းတို့သည် သမ္မာတရားကို အထူးသဖြင့် အလွန်အမင်း မနှစ်မြို့ကြပေ၊ ယင်းက ဤသည်မှာ ဆိုးရွားသောပြဿနာတစ်ခု ဖြစ်စေသည်။ ယင်းသည် ဖောက်ပြန်ပျက်စီးသော စိတ်သဘောထားတစ်ခုနှင့် သက်ဆိုင်သည်နှင့်တစ်ပြိုင်နက် ယင်းမှာ ညံ့ဖျင်းသော လူ့သဘာဝမျှထက် ပို၍ဆိုးရွားလေသည်။ ယင်းသည် ဘုရားသခင်ကို ပုန်ကန်ခြင်း၊ ဘုရားသခင်ကို ဆန့်ကျင်ခြင်းနှင့် သမ္မာတရားကို ဆန့်ကျင်ခြင်း၏ အနှစ်သာရတို့နှင့် သက်ဆိုင်သည်။ ယင်းသည် ဘုရားသခင်နှင့် သမ္မာတရားအပေါ် လူတစ်ဦး၏ သဘောထားနှင့် သက်ဆိုင်သည်။ ယင်းသည် ဖောက်ပြန်ပျက်စီးသော စိတ်သဘောထားတစ်ခုနှင့် သက်ဆိုင်သည်နှင့်တစ်ပြိုင်နက် သမ္မာတရား စည်းမျဉ်းများနှင့် ဖောက်ပြန်ပျက်စီးသော စိတ်သဘောထားများကို သမ္မာတရားဖြင့် ဖြေရှင်းရန် လိုအပ်ချက်တို့နှင့် သက်ဆိုင်သည်။

လူအချို့သည် ပင်ကိုသဘာဝအားဖြင့် အရပ်ရှည်ပြီး ကျော့ရှင်းသော ကိုယ်ဟန်အနေအထားရှိကြသည်၊ ထို့အပြင် ၎င်းတို့တွင် အခြားသူများ နှစ်သက်ဖွယ်တွေ့ရှိရသော အချိုးကျပြီး သန့်ရှင်းကာ ကျက်သရေရှိသော ရုပ်သွင်များလည်း ရှိကြသည်။ ၎င်းတို့ မည်သည့်အရာကို ဝတ်ဆင်သည်ဖြစ်စေ လူများက ၎င်းတို့ကို အထင်ကြီးလေးစားကြပြီး ဤသို့ပြောဆိုကြသည်၊ “သူတို့က လမ်းလျှောက်နေသော မဂ္ဂဇင်းကြော်ငြာတစ်ခုနှင့်ပင် တူသည်၊ အလွန် ခန့်ညားသည်၊ အလွန်လှပသည်၊ အလွန်ရင်သပ်ရှုမောဖွယ် ကောင်းသည်” ဟူ၍ဖြစ်လေသည်။ ဤသည်မှာ ၎င်းတို့၏ ပင်ကိုအခြေအနေများ၊ ၎င်းတို့၏ လူ့သဘာဝ သို့မဟုတ် ၎င်းတို့၏ ဖောက်ပြန်ပျက်စီးသော စိတ်သဘောထားများအောက်တွင် ကျရောက်သလော။ (ဤသည်မှာ ၎င်းတို့၏ ပင်ကိုအသွင်အပြင် ဖြစ်ပါသည်။) ၎င်းတို့သည် ရုပ်ရည်ကောင်းမွန်စွာဖြင့် မွေးဖွားလာကြသည်။ ၎င်းတို့သည် ပင်ကိုသဘာဝအားဖြင့် ဆွဲဆောင်မှုရှိပြီး ကိုယ်ဟန်အနေအထား ကောင်းမွန်သောကြောင့် ငယ်စဉ်ကတည်းက ၎င်းတို့၏ အကြီးအကဲများက ၎င်းတို့ကို ချီးကျူးကြသည်၊ ၎င်းတို့၏ အတန်းဖော်များက ၎င်းတို့ကို မနာလိုဖြစ်ကြပြီး ၎င်းတို့၏ မိဘများက ၎င်းတို့ကို အထူးသဖြင့် အလွန်အမင်း ချစ်ခင်ကြသည်။ နေ့စဉ်နေ့တိုင်း ၎င်းတို့၏ မိဘများက ၎င်းတို့ကို အဝတ်အစားများ ဆင်ယင်ပေးကြပြီး ၎င်းတို့ အသက်သုံးနှစ် သို့မဟုတ် ငါးနှစ်မတိုင်မီ တစ်နေ့တွင် မိန်းကလေးငယ်တစ်ဦးကဲ့သို့ ဝတ်ဆင်ပေးပြီး နောက်တစ်နေ့တွင် ယောက်ျားလေးငယ်တစ်ဦးကဲ့သို့ ဝတ်ဆင်ပေးကြပြန်သည်။ အတိုချုပ်အနေဖြင့် ၎င်းတို့သည် တန်ဖိုးထားရသော အရုပ်ကလေးတစ်ခုကဲ့သို့ ချစ်ခင်ခြင်းခံခဲ့ရသည်။ ၎င်းတို့ ကြီးပြင်းလာသည်နှင့်အမျှ ရုပ်ရည်ကောင်းမွန်ခြင်းကို အထူးသဖြင့် နှစ်သက်လာကြသည်။ ခေတ်မီပြီး အခွင့်ထူးခံ လူနေမှုပတ်ဝန်းကျင်တွင် ကြီးပြင်းလာသောကြောင့် ၎င်းတို့တွင် အဝတ်အစားများ ဆင်ယင်ခြင်းအလေ့အထ ဖြစ်ပေါ်လာသည်။ အထူးသဖြင့် အမျိုးမျိုးသော ဖက်ရှင်ဆိုင်ရာ ထိုးထွင်းသိမြင်မှုများကို ရရှိပြီးနောက် ၎င်းတို့သည် အရောင်များ၊ အနေတော်ကျမှုများနှင့် ဖက်ရှင်ပုံစံများကို တွဲဖက်ရခြင်းကို နှစ်သက်လာကြသည်၊ ၎င်းတို့သည် အထူးသဖြင့် မျက်စိပသာဒကျအောင် ဝတ်စားဆင်ယင်ကြပြီး ကျက်သရေရှိသော အမူအရာကို ထုတ်ဖော်ပြသကြသည်။ ရိုးရှင်းသော တီရှပ်တစ်ထည်နှင့် ဂျင်းဘောင်းဘီတစ်ထည်ပင် ၎င်းတို့ဝတ်ဆင်ပါက မတူခြားနားနေပြီး လိုက်ဖက်သောအရောင်ရှိသည့် ဖိနပ်တစ်ရန်နှင့် တွဲဖက်လိုက်သည့်အခါ ၎င်းတို့၏ ဖက်ရှင်ပုံစံသည် ပို၍ပင် အထင်ကြီးစရာဖြစ်လာသည်၊ ၎င်းတို့သည် လုံးဝရင်သပ်ရှုမောဖွယ်ကောင်းပြီး မယုံနိုင်လောက်အောင် ခန့်ညားလှသည်။ ၎င်းတို့ကို မြင်ရုံမျှဖြင့် မျက်စိပသာဒဖြစ်စေသည်။ ၎င်းတို့သည် လူမြင်ကွင်းတွင် သို့မဟုတ် လမ်းများပေါ်တွင် ပေါ်လာသည့်အခါတိုင်း လူအများ၏ အာရုံကို ဖမ်းစားနိုင်သည်မှာ သေချာသည်။ ၎င်းတို့သည် ရုပ်ရည်ကောင်းမွန်စွာဖြင့် မွေးဖွားလာပြီး ဤပင်ကိုအခြေအနေရှိသောကြောင့်လည်းကောင်း၊ မည်သို့ပင် ဝတ်စားဆင်ယင်သည်ဖြစ်စေ အထူးသဖြင့် ကျက်သရေရှိသော အမူအရာကို ထုတ်ဖော်ပြသလျက် ကောင်းမွန်စွာ ဝတ်စားဆင်ယင်တတ်သောကြောင့်လည်းကောင်း လိင်တူနှင့် လိင်ကွဲတစ်ဦးချင်း နှစ်မျိုးစလုံးက ၎င်းတို့နှင့် ပြောဆိုဆက်ဆံပေါင်းသင်းရခြင်းကို အထူးသဖြင့် နှစ်သက်ကြသည်။ လူများသည် ၎င်းတို့၏ အလှတရားက မိမိတို့အား ပျော်ရွှင်မှုဆောင်ကြဉ်းပေးနိုင်ရန်အလို့ငှာ ၎င်းတို့နှင့် နီးကပ်စွာထိုင်ပြီး စကားပြောဆိုခြင်း၊ စကားစမြည်ပြောခြင်းနှင့် ရင်းနှီးစွာ ပြောဆိုဆက်ဆံခြင်းတို့ကို ပြုလုပ်ရန် စိတ်အားထက်သန်ကြသည်။ ဤသည်မှာ ၎င်းတို့၏ အမှားလော။ (မဟုတ်ပါ။) ၎င်းတို့၏ ကောင်းမွန်သော ပင်ကိုအခြေအနေကြောင့် လူများသည် ၎င်းတို့တွင်ရှိနိုင်သော မည်သည့်ပြဿနာ၊ အမှား သို့မဟုတ် ချို့ယွင်းချက်များကိုမဆို အစဉ်သဖြင့် သည်းခံကြသည်။ ထို့ကြောင့် ၎င်းတို့ မည်သည့်နေရာသို့ သွားသည်ဖြစ်စေ အထူးသဖြင့် ကောင်းစွာ လက်ခံခြင်းခံရပြီး လူကြိုက်များကြသည်။ ၎င်းတို့က မနှစ်မြို့ဖွယ် တစ်စုံတစ်ခုကို ပြောဆိုသည့်တိုင် အခြားသူများက ကြားရသည်မှာ ပျော်စရာကောင်းသည်ဟု ထင်မြင်နေဆဲဖြစ်သည်။ ၎င်းတို့ ဒေါသပေါက်ကွဲသည့်အခါ သို့မဟုတ် မျက်နှာထား တင်းမာပြသည့်အခါ လူများက စိတ်ထဲမထား သို့မဟုတ် စိတ်မဆိုးကြပေ၊ ၎င်းတို့ထံမှ ဆုလာဘ်တစ်ခုကဲ့သို့ပင် ခံစားရသည်။ ဤအတွေ့အကြုံများ စုပုံလာသည်နှင့်အမျှ ၎င်းတို့၏ ပင်ကိုအခြေအနေက ၎င်းတို့ကို သာလွန်သည်ဟု ခံစားရသောစိတ်ကို ပေးသည်။ ၎င်းတို့က ဤသို့တွေးထင်လာကြသည်။ “ရုပ်ရည်ကောင်းမွန်ခြင်း၊ ကျက်သရေရှိသော အမူအရာရှိခြင်းနှင့် ကောင်းမွန်စွာ ဝတ်စားဆင်ယင်ခြင်းတို့က ငါ့ကို မည်သည့်နေရာသို့သွားသွား လူကြိုက်များစေသည်၊ ဤသည်မှာ အံ့ဩစရာပင်ဖြစ်သည်။ ဤလူ့အဖွဲ့အစည်း၊ ဤလူသားမျိုးနွယ်က ဤအရာကို တကယ်တန်ဖိုးထားသည်။ ငါ့မိဘများက ငါ့ကိုပေးသည့် ဤပင်ကိုအခြေအနေက ငါ၏ အရင်းအနှီးပင် ဖြစ်ပုံရသည်။ အလုပ်ရှာရသည်မှာ ပိုလွယ်သည်၊ စာမေးပွဲများတွင် တစ်စုံတစ်ဦး၏ အဖြေလွှာကို ခိုးချလိုပါက သူတို့ကို တစ်ချက်ကြည့်လိုက်ရုံဖြင့် သူတို့က ငါ့ကို အလိုအလျောက် ကမ်းပေးလိမ့်မည်” ဟူ၍ ဖြစ်လေသည်။ ဆန့်ကျင်ဘက်လိင်မှ လူများစွာက ၎င်းတို့ကို လိုက်ကြသည်၊ လိင်တူများထဲတွင်လည်း ၎င်းတို့ကို ကောင်းစွာဆက်ဆံပြီး ၎င်းတို့၏ အလှတရားနှင့် ရုပ်ရည်ကောင်းမွန်မှုကို အဆက်မပြတ် ချီးကျူးသောသူများစွာ ရှိသည်။ အချိန်ကြာလာသည်နှင့်အမျှ ဤသည်မှာ ၎င်းတို့ကို ဤအားသာချက်ကို တိုး၍နှစ်သက်စေသည်။ ဤအားသာချက်သည် ၎င်းတို့အား သက်သောင့်သက်သာမှုများစွာ၊ အကျိုးကျေးဇူးများစွာနှင့် ဦးစားပေးဆက်ဆံမှုများစွာကို ဆောင်ကြဉ်းပေးပြီး အရာများစွာကို ခံစားစေသည်။ သို့ဖြစ်၍ ဤသို့သော ပတ်ဝန်းကျင်မျိုးတွင် ၎င်းတို့သည် မိမိတို့ကိုယ်တိုင်အတွက် အချို့သော လိုအပ်ချက်များကို ဖြစ်ပေါ်စေသည်။ ၎င်းတို့သည် မိတ်ကပ်မလိမ်းဘဲ အိမ်မှထွက်မည် မဟုတ်သကဲ့သို့ ဝက်ခြံတစ်လုံးလောက် ပေါက်လျှင်ပင် လူရှေ့မထွက်ဝံ့ကြပေ။ ၎င်းတို့သည် မိမိတို့၏ အစားအသောက်ကို သတိထားကြပြီး အစပ်နှင့် ပဲငံပြာရည်များကို ရှောင်ကြဉ်ကာ မိမိတို့ဘာသာ ဤသို့စိုးရိမ်ကြသည်၊ “ဤဝက်ခြံသည် မည်သည့်အခါမျှ ပျောက်မည်နည်း။ ငါညှစ်လို့မရပါ၊ အမာရွတ်ကျန်ခဲ့မည်ကို စိုးရွံ့သည်။ သို့သော်လည်း ငါမညှစ်လျှင် တစ်ချိန်က ငါ့ကို အထင်ကြီးလေးစားခဲ့သည့် ဆန့်ကျင်ဘက်လိင်များသည် ဤအရာကိုမြင်၍ ငါမလှတော့ဘူး၊ သူတို့၏ အိပ်မက်ထဲမှ လူမဟုတ်တော့ဘူးဟု ထင်သွားမလား။ သူတို့ ငါ့အပေါ်မှာ ခပ်စိမ်းစိမ်းဖြစ်သွားမလား။ ငါ မည်သည့်အရာကို လုပ်သင့်သနည်း။ ဝက်ခြံမပျောက်မီ အပြင်မထွက်ဘဲ စောင့်ရမည်ဟု ထင်သည်။ ငါ့ကို ဤပုံစံနှင့် လူများအား အမြင်ခံ၍ လုံးဝမဖြစ်ပါ၊ ဤသည်မှာ သူတို့၏ စိတ်ထဲတွင်ရှိသည့် ငါ၏ ပြီးပြည့်စုံသော ပုံရိပ်ကို ပျက်စီးစေလိမ့်မည်” ဟူ၍ဖြစ်လေသည်။ အချို့လူများက ၎င်းတို့၏ ဝတ်စုံများ၏ အရောင်များ၊ အနေတော်ကျမှုများနှင့် ဖက်ရှင်ပုံစံများကို စုံလင်စွာ တွဲဖက်ရသည်။ အပြင်မထွက်မီ ၎င်းတို့သည် မိမိတို့ကိုယ်ကို မှန်ထဲတွင် ရှုထောင့်ပေါင်းစုံမှ အကြိမ်များစွာ စစ်ဆေးရပြီး အချို့သည် နေရောင်အောက်တွင် သို့မဟုတ် မီးရောင်အောက်တွင် မိမိတို့ ပြီးပြည့်စုံနေသည်ကို သေချာစေရန် ဆယ်လ်ဖီများပင် ရိုက်ကြကာ ၎င်းတို့၏ အသားအရေ၊ အသားအရောင်၊ ဆံပင်ပုံစံ၊ အဝတ်အစားနှင့် အမူအရာကဲ့သို့သော ကဏ္ဍများသည် မျက်စိပသာဒ ဖြစ်စေပြီး အခြားသူများ၏ နှစ်သက်မှုကို ရရှိစေကြောင်း သေချာစေပြီးမှသာ အပြင်ထွက်ရန် အဆင်သင့် ဖြစ်သည်ဟု ခံစားရသည်။ တာဝန်ကို စတင်ထမ်းဆောင်ပြီးသည့်နောက်မှာပင် ၎င်းတို့သည် ဤလူနေမှုပုံစံကို ဆက်လက်ထိန်းသိမ်းကြသည်။ အထူးအခြေအနေများကြောင့် ၎င်းတို့သည် ထိုနေ့တွင် ရေမချိုးရဘဲ ဆန့်ကျင်ဘက်လိင်မှ တစ်စုံတစ်ဦး ချဉ်းကပ်လာပါက ၎င်းတို့သည် အလျင်အမြန် ရှောင်ရှားကြသည်။ ရေမချိုးရပါက လူမြင်မခံနိုင်ဟု ၎င်းတို့ ခံစားရသည်။ ၎င်းတို့သည် မိမိတို့၏ အသွင်အပြင်နှင့် အမူအရာအပေါ် တောင်းဆိုမှုများစွာ ရှိသောကြောင့် ယင်းက ၎င်းတို့၏ နေ့စဉ်အသက်တာကို သက်ရောက်မှုရှိသည်။ ၎င်းတို့သည် ရေမချိုးနိုင်သော တစ်နေရာရာသို့ သွားပါက စိတ်ဆင်းရဲပြီး အလွန်အမင်း ဒုက္ခခံစားရကာ ကောင်းစွာ မစားနိုင် သို့မဟုတ် မအိပ်နိုင်ကြပေ။ ၎င်းတို့က “ငါ ရေမချိုးရလျှင် မည်သို့လုပ်ရမည်နည်း။ ငါ သုံးရက်ထက်ပို၍ ရေမချိုးဘဲ မည်သည့်အခါကမျှ မနေဖူးပါ။ ငါ့ကိုယ်က အနံ့ထွက်လာလျှင် လူများက ငါ့ကို အထင်သေးကြမလား။ ငါ့ပုံရိပ်က မပြည့်စုံတော့ဘူး မဟုတ်လား။ ငါက အခြားသူများ၏ အိပ်မက်ထဲမှလူ မဟုတ်တော့ဘူး မဟုတ်လား။ ငါမည်သို့ လုပ်ဆောင်ရမည်နည်း” ဟု တွေးတောကြသည်။ ၎င်းတို့သည် ညံ့ဖျင်းသော လူနေမှုအခြေအနေများနှင့် အာဟာရမပြည့်ဝသော သို့မဟုတ် မျှတမှုမရှိသော အစားအစာများရှိသည့် နေရာတစ်ခုတွင် မိမိတို့ကိုယ်ကို တွေ့ရှိပါက ဤသို့စိုးရိမ်လာကြသည်၊ “ဤအရာက ငါ့အသားအရေကို သက်ရောက်မှုရှိမလား။ ငါ့အသားအရေက ကြမ်းတမ်းလာမလား သို့မဟုတ် အိုမင်းသွားမလား။ ငါ အရေးအကြောင်းများ ထွက်လာမလား။ ငါ ဤနေရာတွင် မနေနိုင်ပါ၊ ဤနေရာမှ ထွက်သွားမှဖြစ်မည်” ဟူ၍ ဖြစ်သည်။ ၎င်းတို့၏ ပင်ကိုအခြေအနေက ဆောင်ကြဉ်းပေးသော သာလွန်သည်ဟု ခံစားရသောစိတ်သည် ၎င်းတို့၏ ဘဝကို အထူးသဖြင့် ရှုပ်ထွေးစေပြီး အထူးပင် ပင်ပန်းနွမ်းနယ်၍ ချုပ်တည်းသောနည်းလမ်းဖြင့် နေထိုင်စေသည်။ ၎င်းတို့သည် အခြားသူများ၏ ၎င်းတို့အပေါ်ထားရှိသော ထင်မြင်ချက်များ၊ အထူးသဖြင့် အခြားသူများက ၎င်းတို့၏ ဝတ်စားဆင်ယင်မှု၊ အမူအရာနှင့် ဟန်ပန်တို့ကို မည်သို့အကဲဖြတ်သည်ကို အလွန်အမင်း စိုးရိမ်ကြပြီး အခြားသူများက ၎င်းတို့ကို မည်သို့မြင်သည်ကို အလွန်ဂရုစိုက်ကြသည်၊ မည်သည့်အတိုင်းအတာအထိနည်း။ ၎င်းတို့၏ ပုံမှန်အသက်တာ၊ အလုပ်နှင့် တာဝန်ထမ်းဆောင်ခြင်းကို သက်ရောက်မှုရှိသည့် အတိုင်းအတာအထိ ဖြစ်သည်။ ၎င်းတို့၏ အသွင်အပြင်မှ လာသော သာလွန်စိတ်သည် ၎င်းတို့ကို အလွန် အပေါ်ယံဆန်စေသည်၊ ၎င်းတို့၏ ရုပ်ရည်ကို အလွန်စိုးရိမ်စေပြီး အခြားသူများက ၎င်းတို့ကို မည်သို့မြင်သည်ကို အလွန်စိုးရိမ်စေသည်။ ဤသည်မှာ မည်သည့်ပြဿနာအမျိုးအစား ဖြစ်သနည်း။ ဤသရုပ်သကန်အားလုံးသည် နေ့စဉ်အသက်တာတွင် ပြဿနာများကို ကိုင်တွယ်ရန် မှန်ကန်သော သဘောထားတစ်ခုလော။ (မဟုတ်ပါ။) ဤသည်တို့မှာ ၎င်းတို့၏ နေ့စဉ်အသက်တာတစ်လျှောက်လုံးတွင် ၎င်းတို့ဖြစ်ပေါ်လာခဲ့သော လွဲမှားသော အမြင်များလော။ (ဟုတ်ပါသည်။) သို့ဆိုလျှင် ဤသရုပ်သကန်များသည် အဘယ်အရာနှင့် သက်ဆိုင်သနည်း။ (၎င်းတို့သည် ၎င်းတို့၏ လူ့သဘာဝနှင့် သက်ဆိုင်ပါသည်။) ဤသည်မှာ ၎င်းတို့၏ လူ့သဘာဝ၏ မည်သည့်ကဏ္ဍနှင့် သက်ဆိုင်သနည်း။ ၎င်းတို့ ကျင့်ကြံပြုမူပုံနှင့်ပတ်သက်သည့် ပြဿနာမှာ အဘယ်နည်း။ ယင်းသည် အပေါ်ယံဆန်ခြင်းလော။ (ဟုတ်ပါသည်။) အပေါ်ယံဆန်ခြင်းသည် ၎င်းတို့၏ လူ့သဘာဝအတွင်းမှ ပြဿနာတစ်ခု ဖြစ်သည်။ အခြားအဘယ်အရာ ရှိသေးသနည်း။ ဂုဏ်ပကာသန မက်မောခြင်း၊ အခြားသူများက ၎င်းတို့ကို မည်သို့မြင်သည်ကို စိုးရိမ်ခြင်း၊ အခြားသူများ၏ မျက်စိတွင် အပြည့်စုံဆုံးသောလူ ဖြစ်လိုသည့်ဆန္ဒ၊ အထူးပျော့ညံ့ခြင်းနှင့် အခက်အခဲမခံနိုင်ခြင်းတို့ ဖြစ်သည်။ ထို့အပြင် တစ်ကိုယ်ကောင်းဆန်ခြင်းလည်း ရှိသေးသည်။ မိမိတို့၏ ပုံရိပ်ကို ထိန်းသိမ်းရန် ၎င်းတို့သည် အနည်းငယ်မျှသော အခက်အခဲကိုပင် ခံနိုင်ရည်ရှိရန် ငြင်းဆန်နေစဉ် လူတိုင်းကို မိမိတို့အား ပြုစုလုပ်ကျွေးစေသည်။ ၎င်းတို့၏ ပင်ကိုအသွင်အပြင်က ဆောင်ကြဉ်းပေးသော သာလွန်စိတ်သည် လူတိုင်းကို ၎င်းတို့ကို ဝန်းရံစေချင်သည်။ ၎င်းတို့၏ နေ့စဉ်အသက်တာ၏ အဓိကအာရုံစိုက်ရာနှင့် ၎င်းတို့အောင်မြင်ရန် ရည်မှန်းသည့်ပန်းတိုင်မှာ ၎င်းတို့၏ အပြင်ပန်းအသွင်အပြင်ကို ထိန်းသိမ်းရန် ဖြစ်သည်။ ဥပမာအားဖြင့် တစ်ခါက ဓာတ်ပုံရိုက်နေစဉ် တစ်စုံတစ်ဦးက ၎င်းတိပြုံးလိုက်သည့်အခါ သွားတွင် ဆလတ်ရွက်တစ်ရွက် ကပ်နေသည်ကို သတိပြုမိသည်။ ထိုအချိန်မှစ၍ ၎င်းတို့သည် အရွက်စိမ်းများကို စားသုံးခြင်းကို ရပ်တန့်လိုက်သည်။ ယင်းသည် တစ်ခုတည်းသော ရွေးချယ်စရာဖြစ်ပြီး ယင်းကို စားရန်မှလွဲ၍ ရွေးချယ်စရာမရှိလျှင်ပင် ၎င်းတို့သည် စားပြီးနောက် ချက်ချင်း ပလုတ်ကျင်းပြီး အခြားသူများနှင့် တွေ့ဆုံရန် အပြင်မထွက်ဝံ့မီ သွားကြားတွင် တစ်စုံတစ်ရာ ကပ်မနေကြောင်း သေချာစေရန် မှန်ကို မဖြစ်မနေ ကြည့်ရသည်။ ဤသည်မှာ ၎င်းတို့၏ လူ့သဘာဝအတွင်းမှ ပြဿနာတစ်ခုလော။ (ဟုတ်ပါသည်။) နေ့စဉ်အသက်တာရှိ ဤသာမန်ပြဿနာများသည် လူ့သဘာဝ၏ နယ်ပယ်အတွင်း ကျရောက်ပြီး ဖောက်ပြန်ပျက်စီးသော စိတ်သဘောထားတစ်ခု၏ အဆင့်သို့ မမြင့်တက်သေးပေ။ ၎င်းတို့ကိုင်တွယ်သော ပြဿနာများသည် လူ့အသက်တာ၏ ကဏ္ဍများနှင့်သာ သက်ဆိုင်သည်၊ ၎င်းတို့သည် မိမိတို့၏ ရုပ်ပိုင်းဆိုင်ရာ အသွင်အပြင်နှင့် အတွင်းပိုင်းတောင်းဆိုမှုများအပေါ် အာရုံစိုက်ခြင်းဖြင့် မိမိတို့၏ အလှတရားနှင့် အခြားသူများထံမှ မြင့်မားသောအာရုံစိုက်မှုကို ထိန်းသိမ်းရန် ကြိုးစားကြသည်။ ၎င်းတို့ မည်သည့်အရာကို လုပ်ဆောင်သည်ဖြစ်စေ၊ စားသုံးခြင်း၊ ဝတ်စားဆင်ယင်ခြင်း သို့မဟုတ် အခက်အခဲကို ခံနိုင်ရည်ရှိပြီး အဖိုးအခပေးခြင်းဖြစ်စေ၊ ဤပြဿနာများကို ကိုင်တွယ်ရာတွင် ၎င်းတို့၏ ရှုမြင်ပုံများနှင့် သဘောထားအားလုံးသည် ၎င်းတို့၏ အပြင်ပန်းပုံရိပ်ကို ထိန်းသိမ်းရန် ဦးတည်သည်၊ သို့မှသာ ၎င်းတို့သည် အစဉ်သဖြင့် မျက်စိပသာဒဖြစ်စေပုံရပြီး အခြားသူများက ၎င်းတို့အပေါ် အကောင်းမြင်စေရန်နှင့် ၎င်းတို့က မြင့်မားသောအာရုံစိုက်မှုကို ရရှိစေရန် သေချာစေသည်။ ဤသည်မှာ ၎င်းတို့၏ လူ့သဘာဝနှင့် သက်ဆိုင်သလော။ (ဟုတ်ပါသည်။) ဤသရုပ်သကန်အားလုံးသည် ၎င်းတို့၏ လူ့သဘာဝနှင့် သက်ဆိုင်သည်၊ ၎င်းတို့၏ လူ့သဘာဝသည် အလွန်အမင်း အပေါ်ယံဆန်ကြောင်း ၎င်းတို့က ပြသသည်။

အခြားလူအမျိုးအစားတစ်မျိုးလည်း ရှိသေးသည်၊ ၎င်းတို့သည် ဆန့်ကျင်ဘက်လိင်ရှိသူများ အနီးအနားတွင် ရှိသည့်အခါတိုင်း အစွမ်းကုန် ကိုယ်ရည်သွေးကြပြီး ပို၍ထူးခြားသောနည်းလမ်းဖြင့် ဝတ်စားဆင်ယင်ကာ ပို၍ စွဲမက်စရာကောင်းပုံပေါ်ဖို့ မိတ်ကပ်လိမ်းခြယ်ရန် ကြိုးစားကြသည်။ ဥပမာအားဖြင့် ၎င်းတို့ အထူးတလည် ရင်းနှီးသော ညီအစ်ကိုမောင်နှမများနှင့် အတူရှိသည့်အခါ ၎င်းတို့၏ အပြုအမူနှင့် အသွင်အပြင်သည် ပုံမှန်အတိုင်းပင် ဖြစ်သော်လည်း ၎င်းတို့နှင့် အသက်အရွယ်တန်းတူ ဆန့်ကျင်ဘက်လိင်ရှိသူတစ်ဦး ရောက်လာသည်နှင့်တစ်ပြိုင်နက် ၎င်းတို့သည် အလွန်စိတ်လှုပ်ရှားလာကြပြီး ထူးခြားသော ဝတ်စားဆင်ယင်မှုနှင့် အသွင်အပြင်ကို ခံယူရန် ဖိအားပေးခံရသည်ဟု ခံစားကြရသည်။ အချို့အမျိုးသမီးများသည် ၎င်းတို့၏ နှုတ်ခမ်းများကို ပို၍ထင်ရှားပေါ်လွင်စေရန် ချက်ချင်း နှုတ်ခမ်းနီဆိုးကြသည်၊ မျက်ခုံးမွှေးများကို ပြင်ဆင်ကြသည်၊ အချိန်ရပါက ပါးနီအချို့ကိုပင် ထပ်ခြယ်ကြသည်။ ပုံမှန်အားဖြင့် ၎င်းတို့သည် ဆံပင်ကို စည်းထားကြသော်လည်း ၎င်းတို့နှစ်သက်သော သို့မဟုတ် ဆွဲဆောင်မှုရှိသည်ဟု ၎င်းတို့ေမြင်သော ဆန့်ကျင်ဘက်လိင်ရှိသူတစ်ဦးနှင့် ကြုံတွေ့သည်နှင့်တစ်ပြိုင်နက် ၎င်းတို့သည် ဆံပင်ကို ပခုံးအထိ ချထားခြင်းဖြင့် မိမိတို့၏ ပုံရိပ်ကို မြှင့်တင်ကြသည်။ ထိုအချိန်တွင် အချို့အမျိုးသားများမှာမူ ၎င်းတို့၏ ဆံပင်ကို ပို၍တောက်ပြောင်စေသည်၊ ကိုရီးယား၊ ဟောင်ကောင် သို့မဟုတ် အနောက်တိုင်းဆံပင်ပုံစံဖြစ်အောင် ပြင်ဆင်သည်၊ ၎င်းတို့၏ မုတ်ဆိတ်မွှေး၊ နှုတ်ခမ်းမွှေးများကို ညှိသည်၊ မျက်မှန်တစ်လက် တပ်သည်၊ ပိုကောင်းသော အဝတ်အစားများသို့ ပြောင်းဝတ်ဆင်သည်၊ အခါအခွင့်သင့်ပါက ရေမွှေးအချို့ကိုပင် ဖျန်းကြသည်၊ ဤအားလုံးမှာ ဆန့်ကျင်ဘက်လိင်ကို ဆွဲဆောင်ရန် ဖြစ်သည်။ ဆန့်ကျင်ဘက်လိင်များနှင့် စကားပြောသည့်အခါ ၎င်းတို့သည် မိမိတို့၏ ယဉ်ကျေးရည်မွန်မှု၊ ကျက်သရေရှိမှု၊ ဉာဏ်ကောင်းမှုနှင့် ဟာသဉာဏ်ရှိမှုကို ပြသရန် ရည်ရွယ်လျက် ကိုယ်ရည်သွေးရန် စကားလုံးအကြီးကြီးအချို့ကို မကြာခဏ ကြားညှပ်ပြောဆိုကြသည်။ ဤလုပ်ဆောင်ချက်များ အားလုံး၏ နောက်ကွယ်ရှိ ၎င်းတို့၏ ရည်ရွယ်ချက်မှာ အလွန်တရာ ကြံစည်ထားခြင်းဖြစ်သည်၊ ၎င်းတို့သည် ဆန့်ကျင်ဘက်လိင်ကို ဆွဲဆောင်ရန်သက်သက်အတွက်သာ ယင်းကို လုပ်ဆောင်ကြခြင်း ဖြစ်သည်။ အချို့လူများသည် ၎င်းတို့နှစ်သက်သော ဆန့်ကျင်ဘက်လိင်တစ်ဦး သို့မဟုတ် အသက်အရွယ်တူ ဆန့်ကျင်ဘက်လိင်တစ်ဦး၏ အနီးအနားတွင် ရှိသည့်အခါ ပို၍ပင် တက်ကြွလာကြသည်၊ စကားပိုများလာကြသည်၊ မိမိတို့ကိုယ်ကို ပို၍ကောင်းမွန်စွာ ဖော်ပြလာကြသည်၊ ၎င်းတို့၏ မျက်လုံးများသည် ပို၍အသက်ဝင်လာကြပြီး မွဲခြောက်၍ အသက်မဲ့ခြင်းမှ ရပ်တန့်သွားကာ ၎င်းတို့၏ မျက်နှာအမူအရာများသည်လည်း အထူးသဖြင့် အမျိုးမျိုး ပြောင်းလဲလာကြသည်။ ဤနေရာတွင် မည်သည့်အရာ ဖြစ်နေသနည်း။ အဘယ်ကြောင့် ၎င်းတို့သည် ဆန့်ကျင်ဘက်လိင်ကို မြင်သည့်အခါ အထူးသဖြင့် ဟန်ဆောင်ပြီး မူမမှန်ဖြစ်နေပုံ ပေါ်ရသနည်း။ ဆန့်ကျင်ဘက်လိင်များ ပထမဆုံး တွေ့ဆုံသည့်အခါ ၎င်းတို့သည် အများအားဖြင့် အနည်းငယ် ရှက်ကြသော်လည်း အကြိမ်အနည်းငယ် တွေ့ဆုံပြီးနောက် ၎င်းတို့သည် ပို၍ရင်းနှီးလာကြပြီး ပို၍သဘာဝကျစွာ ပြုမူကြသည်။ သို့သော် အချို့လူများသည် ဆန့်ကျင်ဘက်လိင်ကို မြင်သည့်အခါတိုင်း အထူးသဖြင့် တက်ကြွပြီး စိတ်လှုပ်ရှားလာကြသည်။ ဤသည်မှာ မည်သို့သော ပြဿနာမျိုး ဖြစ်သနည်း။ (ယင်းမှာ သွေးဆောင်ဖြားယောင်းခြင်းနှင့် ပတ်သက်ပြီး ဖောက်ပြန်ပျက်စီးသော စိတ်သဘောထား အဆင့်အထိ တက်သွားပါသည်။) ဤသည်မှာ မည်သို့သော ဖောက်ပြန်ပျက်စီးသော စိတ်သဘောထားမျိုး ဖြစ်သနည်း။ (ကောက်ကျစ်ဆိုးယုတ်မှု ဖြစ်ပါသည်။) ၎င်းတို့၏ လူ့သဘာဝတွင် ပြဿနာမရှိသလော။ (ရှိပါသည်။) တိတိကျကျပြောရလျှင် ဤသည်မှာ ထိုသို့သောလူများ၏ လူ့သဘာဝနှင့်ဆိုင်သော ပြဿနာတစ်ခု ဖြစ်သည်။ ဤနေရာတွင် ၎င်းတို့၏ လူ့သဘာဝ၏ မည်သည့်ကဏ္ဍက ပြဿနာရှိနေသနည်း။ ယင်းမှာ ဆန့်ကျင်ဘက်လိင်နှင့် ပေါင်းသင်းဆက်ဆံခြင်းဆိုင်ရာ ပြဿနာတစ်ခု ဖြစ်သည်။ ဘာသာတရားမရှိသူများက ဤအရာကို မည်သို့ သရုပ်ဖော်ကြသနည်း။ ၎င်းတို့က ယင်းကို လူတစ်ဦး၏ လူအချင်းချင်းဆက်ဆံရေးဆိုင်ရာ အပြုအမူနှင့်ဆိုင်သော ပြဿနာတစ်ခုဟု ခေါ်သည် မဟုတ်လော။ (ဟုတ်ပါသည်။) ယင်းတွင် ဖောက်ပြန်ပျက်စီးသော စိတ်သဘောထားတစ်ခု ပါဝင်ပါက ယင်းကို ကောက်ကျစ်ဆိုးယုတ်မှုအဖြစ် အတော်အသင့် အကျဉ်းချုပ်နိုင်သည်၊ သို့သော် ပို၍သင့်လျော်စွာ ဆိုရလျှင် ယင်းမှာ လူတစ်ဦး၏ လူ့သဘာဝနှင့် သက်ဆိုင်သော ကျားမဆက်ဆံရေးဆိုင်ရာ အပြုအမူ၏ ပြဿနာတစ်ခု ဖြစ်သည်။ ဆန့်ကျင်ဘက်လိင်နှင့် ရင်ဆိုင်ရသည့်အခါ အချို့လူများသည် အထူးသဖြင့် တက်ကြွလာကြပြီး အထူးသဖြင့် အပြုသဘောဆောင်ကာ တက်ကြွစွာ ပြုမူလာကြသည်။ ဤ “အထူးသဖြင့်” များက ဖော်ပြသည့်အရာမှာ လူတစ်ဦး၏ လူ့သဘာဝနှင့် သက်ဆိုင်သော လူအချင်းချင်းဆက်ဆံရေးဆိုင်ရာ အပြုအမူ၏ ပြဿနာတစ်ခု ဖြစ်သည်။ ဤလူအချင်းချင်းဆက်ဆံရေးဆိုင်ရာ အပြုအမူသည် ပုံမှန်ဖြစ်သလော သို့မဟုတ် ပုံမှန်မဟုတ်သလော။ (ပုံမှန်မဟုတ်ပါ။) သို့ဆိုလျှင် ယင်းကို ကောက်ကျစ်ဆိုးယုတ်သည်ဟု သရုပ်ဖော်နိုင်သလော။ ယင်းကို ကောက်ကျစ်ဆိုးယုတ်သည်ဟု ဆိုခြင်းသည် သင့်လျော်သလော။ ယင်းမှာ အနည်းငယ် ယုတ်ညံ့သည်ဟု ဆိုလျှင် ရနိုင်သလော။ (ရနိုင်ပါသည်။) ထိုသို့သောလူများသည် အနည်းငယ် ယုတ်ညံ့သည်။ ၎င်းတို့ သဘောကျသော ဆန့်ကျင်ဘက်လိင်တစ်ဦး ရှိသည့် မည်သည့်နေရာတွင်မဆို ၎င်းတို့သည် ထိုသူ၏ အုပ်စုထံသို့ တိမ်းညွတ်ကြသည်၊ ၎င်းတို့၏ ဘေးတွင် မရမက ဝင်ထိုင်သည်၊ ကိုယ်ထိလက်ရောက် ပတ်သက်မှုများ ပြုလုပ်ပြီး မျက်စိမှိတ်ပြ၊ ဖွင့်ပြ လုပ်ကြသည်။ ဤသည်မှာ ၎င်းတို့၏ ကိုယ်ကျင့်စရိုက်နှင့်ဆိုင်သော ပြဿနာတစ်ခုကို ထင်ဟပ်စေသည်၊ ၎င်းတို့သည် စည်းကမ်းမရှိ၊ အကျင့်မကောင်းဘဲ ယုတ်ညံ့ကြသည်။ အကယ်၍ လူတစ်ဦးသည် အပေါ်ယံဆန်ပါက ၎င်းတို့သည် လိင်တူ၏ ရှေ့မှောက်တွင်ဖြစ်စေ၊ ဆန့်ကျင်ဘက်လိင်၏ ရှေ့မှောက်တွင်ဖြစ်စေ ၎င်းတို့၏ သရုပ်သကန်များသည် အတူတူပင် ဖြစ်သင့်သည်၊ ၎င်းတို့သည် ကြည့်ကောင်းလိုရုံသာဖြစ်ပြီး အခြားသူများ၏ နှစ်သက်ခြင်း၊ အားကျခြင်းနှင့် တန်ဖိုးထားခြင်းကို ခံလိုကြသည်။ ဤသည်မှာ ၎င်းတို့၏ လူ့သဘာဝတွင် အပေါ်ယံဆန်ခြင်းနှင့်ဆိုင်သော ပြဿနာတစ်ခု ဖြစ်သည်။ သို့သော် ၎င်းတို့၏ ရည်ရွယ်ချက်မှာ ဆန့်ကျင်ဘက်လိင်ကို ဆွဲဆောင်ပြီး ၎င်းတို့ကို လိုက်ကပ်နေရန်သာ ဖြစ်ပါက ယင်းသည် ဆန့်ကျင်ဘက်လိင်နှင့် ၎င်းတို့၏ လူအချင်းချင်းဆက်ဆံရေးဆိုင်ရာ အပြုအမူ၏ ပြဿနာတစ်ရပ် ဖြစ်လာသည်။ လူတစ်ဦးသည် ၎င်းတို့၏ ပုံမှန်အသက်တာကို ထိခိုက်သည်အထိ အလွန်အမင်း အပေါ်ယံဆန်ပါက ယင်းမှာ ၎င်းတို့၏ လူ့သဘာဝ၏ ကဏ္ဍတစ်ခုရှိ ချို့ယွင်းချက် သို့မဟုတ် ပြဿနာတစ်ခုမျှသာ ဖြစ်သည်။ သို့သော် တစ်စုံတစ်ဦးသည် ဆန့်ကျင်ဘက်လိင်များကို ဆွဲဆောင်ရန်၊ လိင်ပိုင်းဆိုင်ရာ ဆွဲဆောင်မှုရှိပုံ၊ စွဲမက်ဖွယ်ကောင်းပုံ ပေါ်ရန်နှင့် လူအများ၏ အာရုံကို ဖမ်းစားရန် ရည်ရွယ်လျက် သီးသန့် ဝတ်စားဆင်ယင်ပါက ထိုအရာသည် ကောက်ကျစ်ဆိုးယုတ်သည်၊ ယုတ်ညံ့သည်၊ ညံ့ဖျင်းသော လူအချင်းချင်းဆက်ဆံရေးဆိုင်ရာ အပြုအမူကို ညွှန်ပြသည်။ အချို့လူများသည် လူများ ပို၍ရှိလေ၊ ပို၍ပင် ယုတ်ညံ့လာကြလေဖြစ်ပြီး ဆန့်ကျင်ဘက်လိင်နှင့် ထိတွေ့ရန် အစဉ်သဖြင့် ကြိုးစားကာ ၎င်းတို့၏ ရှေ့မှောက်တွင် ကိုယ်ရည်သွေးကြသည်။ ဘာသာတရားမရှိသူများကြားတွင် ခေတ်စားသည့် မည်သည့်အရာကိုမဆို ၎င်းတို့သည် ထိုနည်းအတိုင်း ဝတ်စားဆင်ယင်ကြလိမ့်မည်။ အထူးသဖြင့် စုဝေးပွဲများ တက်ရောက်သည့်အခါ သို့မဟုတ် ကင်မရာရှေ့တွင် ပေါ်လာသည့်အခါ ဆန့်ကျင်ဘက်လိင်များ ပို၍များလေ၊ ၎င်းတို့သည် ပို၍ ဝတ်စားဆင်ယင်လိုလေ ဖြစ်သည်။ အချို့အမျိုးသမီးများသည် စွပ်ကျယ်လက်ပြတ်များကို ဝတ်ဆင်သည်၊ ၎င်းတို့၏ ဆံပင်ကို ချထားသည်၊ ထင်ရှားပေါ်လွင်သော နှုတ်ခမ်းနီကို ဆိုးသည်၊ ပါးနီကို ထပ်ခြယ်ကြသည်။ အချို့သည် ၎င်းတို့၏ နှာတံကိုပင် ပုံဖော်သည်၊ မျက်လုံးခြယ်ဆေး လိမ်းခြယ်သည်၊ လက်ဝတ်ရတနာအမျိုးမျိုးကို ဝတ်ဆင်ကြသည်။ ၎င်းတို့သည် ဆန့်ကျင်ဘက်လိင်ကို ဆွဲဆောင်မည့် မည်သည့်နည်းလမ်းဖြင့်မဆို ဝတ်စားဆင်ယင်ကြသည်။ ဤသည်မှာ အပေါ်ယံဆန်ခြင်းထက် ပို၍ဆိုးရွားသည်။ အပေါ်ယံဆန်ခြင်းသည် လူတစ်ဦး၏ လူ့သဘာဝ၏ ကဏ္ဍတစ်ခုရှိ ချို့ယွင်းချက် သို့မဟုတ် အပြစ်အနာအဆာတစ်ခုဖြစ်ပြီး အသေးအဖွဲ ပြဿနာတစ်ခုဖြစ်ပါက ဆန့်ကျင်ဘက်လိင်နှင့် ဆက်ဆံရေး၏ ကောက်ကျစ်ဆိုးယုတ်ပြီး ယုတ်ညံ့သော ကဏ္ဍများသည် အဓိကပြဿနာတစ်ရပ် ဖြစ်သည်။ အပေါ်ယံဆန်သောသူတစ်ဦးသည် ကာမဂုဏ်လိုက်စားသော အပြုအမူများတွင် ပါဝင်ပတ်သက်ချင်မှ ပတ်သက်မည်ဖြစ်သော်လည်း ကောက်ကျစ်ဆိုးယုတ်ပြီး ယုတ်ညံ့သောသူများထဲတွင်မူ ကိုးဆယ်ရာခိုင်နှုန်းကျော်သည် ကာမဂုဏ်လိုက်စားသော အပြုအမူများတွင် ပါဝင်ပတ်သက်လာဖွယ်ရှိသည်။ အဘယ်ကြောင့် ငါ ထိုသို့ပြောရသနည်း။ အကယ်၍ လူတစ်ဦးသည် ဆန့်ကျင်ဘက်လိင်နှင့် ၎င်းတို့၏ ပေါင်းသင်းဆက်ဆံရေးကို အလွန်အရေးကြီးသည်ဟု သတ်မှတ်ပြီး ဆန့်ကျင်ဘက်လိင်များ၏ ရှေ့မှောက်တွင် မိမိကိုယ်ကို ကိုယ်ရည်သွေးရန်နှင့် ပြသရန် အထူးသဖြင့် နှစ်သက်ပါက ထိုသို့သောသူတစ်ဦးသည် ဆန့်ကျင်ဘက်လိင်များ မိမိတို့အား နှစ်သက်လာအောင် လုပ်ရန် ပို၍ ဖြစ်နိုင်ချေရှိ၏။ ဆန့်ကျင်ဘက်လိင်များက မိမိတို့အား နှစ်သက်လာအောင် လုပ်ဆောင်ခြင်း၏ ရည်ရွယ်ချက်မှာ အဘယ်နည်း။ မသင့်လျော်သော ဆက်ဆံရေးများတွင် ပါဝင်ရန် ဖြစ်သည်။ ၎င်းတို့သည် ဆန့်ကျင်ဘက်လိင်တစ်ဦးကို ပေါ့ပေါ့ဆဆ သွေးဆောင်ဖြားယောင်းနိုင်ပါက ဤသည်မှာ ဆန့်ကျင်ဘက်လိင်နှင့် ဆက်ဆံရေးများနှင့်ပတ်သက်လာလျှင် ၎င်းတို့သည် အလွန် ပေါ့ပေါ့ဆဆနိုင်ကြောင်းကို မညွှန်ပြပေလော။ (ညွှန်ပြပါသည်။) ထိုသို့သောလူများတွင် ဂုဏ်သိက္ခာမရှိပေ၊ ၎င်းတို့သည် အခြားသူများကို ပေါ့ပေါ့ဆဆ ပရောပရည်လုပ်ကြပြီး အလျင်ဦးအောင်ပင် လှုပ်ရှားကြလေသည်။ ၎င်းတို့ ပရောပရည်လုပ်သည့်လူ ပိုများလေ၊ ၎င်းတို့ ပို၍ပျော်ရွှင်လာလေဖြစ်ပြီး ၎င်းတို့ကြိုက်သရွေ့ မည်သူ့ကိုမျှ မည်သည့်အခါမျှ မငြင်းပယ်ကြပေ။ ဤသည်မှာ မည်သို့သောလူစားမျိုး ဖြစ်သနည်း။ ၎င်းတို့တွင် မည်သို့သော ဖောက်ပြန်ပျက်စီးသော စိတ်သဘောထားများ ရှိသည်ကို ယခုလောလောဆယ် ဘေးဖယ်ထားလျက် ဤသို့သော လူ့သဘာဝမျိုးသည် ကောင်းမွန်သလော။ (မကောင်းမွန်ပါ။) ၎င်းတို့၏ လူ့သဘာဝ၏ အခြားကဏ္ဍများတွင် မည်သို့သော အားသာချက်များ သို့မဟုတ် အားနည်းချက်များ ရှိသည်ဖြစ်စေ ဆန့်ကျင်ဘက်လိင်နှင့် ၎င်းတို့၏ လူအချင်းချင်းဆက်ဆံရေးဆိုင်ရာ အပြုအမူပိုင်းတွင် အထူးသဖြင့် ပေါ့ပေါ့တန်တန်ထားပြီး ပေါ့ပျက်ပျက်နိုင်ကာ မွေ့လျော်ခံစားလွန်းပါက ဤတစ်ချက်တည်းကပင် ၎င်းတို့၏ လူ့သဘာဝ မကောင်းကြောင်းကို ပြသရန် လုံလောက်သည်။ ၎င်းတို့သည် မည်သည့်အချိန်၊ မည်သည့်နေရာတွင်မဆို အမှားလုပ်နိုင်သည် သို့မဟုတ် စည်းကျော်နိုင်ပါက ဤသည်မှာ ဆိုးရွားသော ပြဿနာတစ်ခု မဟုတ်လော။ (ဟုတ်ပါသည်။) ထိုသို့သောသူတစ်ဦးသည် ယုံကြည်အားထားရသလော။ (မရပါ။) ၎င်းတို့၏ မယုံကြည်အားထားရခြင်း၏ အရင်းမြစ်မှာ အဘယ်နည်း။ ယင်းမှာ ၎င်းတို့၏ ကောက်ကျစ်ဆိုးယုတ်သော သဘာဝ၌ တည်ရှိသည်။ ၎င်းတို့သည် ကာမရာဂစိတ်များ အချိန်မရွေး၊ နေရာမရွေး ထားရှိနိုင်ပြီး ဆန့်ကျင်ဘက်လိင်ကို အချိန်မရွေး၊ နေရာမရွေး သွေးဆောင်ဖြားယောင်းနိုင်သည်၊ ၎င်းတို့၏ စိတ်များသည် ဤအတွေးအခေါ်များဖြင့်သာ ပြည့်နှက်နေသည်။ အခါအခွင့်မသင့်ပါက သို့မဟုတ် ၎င်းတို့တွင် ဝတ်စားဆင်ယင်ရန် အချိန်အလုံအလောက် မရှိပါက ၎င်းတို့သည် နည်းလမ်းတစ်ခုကို ရှာတွေ့ဆဲဖြစ်သည်၊ ၎င်းတို့သည် ကလက်တက်တက် အကြည့်များကို အသုံးပြုပြီး ၎င်းတို့၏ ခန္ဓာကိုယ် သို့မဟုတ် ၎င်းတို့၏ အမူအရာများကို ကိုယ်ရည်သွေးကာ အခြားသူများကို သွေးဆောင်ဖြားယောင်းရန် ကလူမြူဆွယ်သည့် အကြည့်ဖြင့် ကြည့်ကြ၏။ ထိုသို့သောလူများသည် တန်ဖိုးမရှိပေ၊ ၎င်းတို့သည် အလွန် မယုံကြည်အားထားရပေတကား။ ၎င်းတို့သည် ပေါ့ပျက်ပျက်နိုင်သည်၊ အကျင့်ပျက်သည်၊ ပေါ့ပေါ့ဆဆနိုင်သည်၊ အခြားသူများကို အပြစ်လုပ်ရန် အချိန်မရွေး၊ နေရာမရွေး သွေးဆောင်ဖြားယောင်းနိုင်ပြီး ပြစ်မှားခြင်းများကို ကျူးလွန်နိုင်သည်၊ ထိုသို့သောလူများသည် ၎င်းတို့၏ လူ့သဘာဝတွင် အရှက်တရားသိစိတ်မရှိ၊ ၎င်းတို့သည် ကယ်တင်၍မရနိုင်သောသူများ ဖြစ်ကြသည်။ ထိုသို့သောလူများသည် ကြောက်စရာကောင်းပါသလော။ (ကောင်းပါသည်။) ပြီးလျှင် ၎င်းတို့သည် ဤအရာများမှာ ရှက်ဖွယ်ကောင်းသောအရာများဟု မထင်ကြပေ၊ ပတ်ဝန်းကျင်တွင် လူမည်မျှပင် ရှိသည်ဖြစ်စေ ၎င်းတို့သည် ဤသို့ ပေါ်ပေါ်တင်တင် ဝတ်စားဆင်ယင်ပြီး ကိုယ်ရည်သွေးကာ ဤနည်းလမ်းဖြင့် မွေ့လျော်ခံစား၍ ပြုမူပြီး အခြားသူများကို သွေးဆောင်ဖြားယောင်းကြသည်။ အခြားသူများမှာမူ မည်သို့ဖြစ်နေသည်ကိုပင် မသိကြပေ၊ ၎င်းတို့သည် မိမိတို့၏ ပုံမှန်အလုပ်ကို အာရုံစိုက်နေဆဲ၊ အတူတကွ စကားစမြည်ပြောနေဆဲ သို့မဟုတ် ဆွေးနွေးပြောဆိုနေဆဲဖြစ်စဉ် ဤပုဂ္ဂိုလ်များမှာမူ တစ်စုံတစ်ဦးကို ကလက်တက်တက် အကြည့်များဖြင့် ပရောပရည်လုပ်ခြင်းကို စတင်နှင့်ပြီးဖြစ်သည်။ ထိုသို့သောလူများသည် မည်မျှ စက်ဆုပ်ဖွယ်ကောင်းပြီး ကြောက်မက်ဖွယ်ကောင်းသည်ကို ကြည့်လော့။ ၎င်းတို့တွင် အရှက်တရား တစ်စုံတစ်ရာ မရှိကြပေ၊ ဟုတ်သည်မဟုတ်လော။ အရှက်တရား မရှိသောလူများသည် ပြစ်မှားခြင်းများကို အဆက်မပြတ် ကျူးလွန်ကြပြီး ၎င်းတို့၏ နောက်ဆုံးအဆုံးသတ်မှာ အဘယ်နည်း။ (၎င်းတို့သည် ငရဲတွင် အပြစ်ဒဏ်ပေးခံရခြင်းဖြင့် အဆုံးသတ်ကြလိမ့်မည်။) ဘုရားသခင်၏ နှုတ်ကပတ်တော်များက မည်သို့ဆိုသနည်း။ “ပြစ်မှားခြင်းများက လူသားကိုငရဲသို့ ဦးဆောင်လမ်းပြလိမ့်မည်” ဟူ၍ဖြစ်လေသည်။ ထို့ကြောင့် သင်၏ လူ့သဘာဝနှင့်ဆိုင်သော ပြဿနာများသည် အလွန်ဆိုးရွားပါက သင်သည် ကြီးမားသော အန္တရာယ်၌ ရှိနေသည်။ အချို့သော ကိစ္စရပ်၌ လူတစ်ဦး၏ ညံ့ဖျင်းသော လူ့သဘာဝသည် ချို့ယွင်းချက်တစ်ခုဖြစ်ပါက ယင်းကို ပြုပြင်ရန် အခွင့်အရေးများ ရှိကောင်းရှိနိုင်မည်။ သို့သော် ၎င်းတို့တွင် သဘာဝအားဖြင့် ရှက်စိတ်မရှိသောကြောင့် ၎င်းတို့၏ လူ့သဘာဝ၏ အချို့ကဏ္ဍသည် ညံ့ဖျင်းပြီး အခြားသူများကို အချိန်မရွေး၊ နေရာမရွေး သွေးဆောင်ဖြားယောင်းနိုင်ပါက ၎င်းတို့သည် သိသာထင်ရှားသော ဖောက်ပြန်ပျက်စီးသော စိတ်သဘောထားတစ်ခုကို ထုတ်ဖော်ခြင်း မရှိသေးလျှင်ပင် ဆိုးရွားသော အကျိုးဆက်များဆီသို့ ဦးတည်စေသည့် ကြီးမားသော ပြစ်မှားခြင်းများကို ကျူးလွန်နိုင်ဆဲဖြစ်သည်၊ ထိုအခါ ထိုသို့သောလူများသည် ကျင့်ကြံပြုမူပုံ၌ စည်းများမရှိ၊ ၎င်းတို့၏ ကိုယ်ကျင့်စရိုက်သည် အထူးသဖြင့် ညံ့ဖျင်းသည်၊ ၎င်းတို့သည် ပြစ်မှားခြင်းအနည်းငယ်ကို ကျူးလွန်ပါက ယင်းက ၎င်းတို့ကို ဖျက်ဆီးပစ်နိုင်သည်။ လူ့သဘာဝ၏ ပြဿနာများနှင့်ပတ်သက်၍ ၎င်းတို့သည် မိမိတို့၏ ကိုယ့်ရှေ့ဆက်ရမည့်လမ်းကိုယ် ပိတ်ဆို့လိုက်ကြပြီးဖြစ်သည်။ အကြောင်းမှာ ၎င်းတို့၏ လူ့သဘာဝသည် အလွန်ညံ့ဖျင်းပြီး ၎င်းတို့၏ ပြစ်မှားခြင်းများသည် အလွန်များပြားသောကြောင့် ၎င်းတို့ကို ငရဲသို့ ပို့ဆောင်ရန် လုံလောက်နေပြီး သမ္မာတရားကို လိုက်စားခြင်းနှင့် ကယ်တင်ခြင်းကို စွမ်းဆောင်ရရှိခြင်း၏ လမ်းကြောင်းကို လျှောက်လှမ်းရန် မည်သည့်အခွင့်အရေးမျှ မရရှိမီ ၎င်းတို့အတွက် အရာရာသည် ပြီးဆုံးသွားလိမ့်မည် ဖြစ်သောကြောင့် ဖြစ်သည်။ ရှက်စိတ်ကင်းမဲ့ခြင်းသည် လူတစ်ဦး၏ လူ့သဘာဝနှင့် သက်ဆိုင်သော အလွန်ဆိုးရွားသည့် ပြဿနာတစ်ရပ် ဖြစ်သည်။ တိတိကျကျပြောရလျှင် ယင်းသည် ဖောက်ပြန်ပျက်စီးသော စိတ်သဘောထား အဆင့်အထိ မရောက်ရှိပေ၊ ယင်းမှာ လူတစ်ဦးက ကျင့်ကြံပြုမူရာတွင်လည်းကောင်း၊ အချို့သောကိစ္စရပ်များကို ကိုင်တွယ်ရာတွင်လည်းကောင်း ခံယူသော နည်းလမ်းတစ်ခု၊ သဘောထားတစ်ခုမျှသာ ဖြစ်သည်။ ဤသဘောထားသည် ၎င်းတို့၏ လူ့သဘာဝနှင့် ဆက်စပ်ပြီး ပြစ်မှားခြင်းများဆီသို့ ဦးတည်စေနိုင်ကာ ပြဿနာကို ဆိုးရွားစေသည်။

အချို့လူများသည် ကခုန်ခြင်းကို နှစ်သက်ပြီး အကကွက်များကို အလွန်လျင်မြန်စွာ သင်ယူကြသည်။ ဆရာက သုံးကြိမ် သရုပ်ပြပြီးနောက် ၎င်းတို့သည် အကတစ်ခု၏ စည်းချက်နှင့် လှုပ်ရှားမှုများကို အခြေခံအားဖြင့် ကျွမ်းကျင်သွားပြီး ယင်းကို တိကျမှန်ကန်စွာ ဖျော်ဖြေနိုင်သည်။ ၎င်းတို့သည် ဆုများရရှိထားကာ အတော်အတန် ကောင်းမွန်စွာလည်း ကခုန်ကြသည်၊ ၎င်းတို့သည် အကနှင့်သက်ဆိုင်သော အသက်မွေးဝမ်းကျောင်းတစ်ခုကို လိုက်စားရန် မျှော်လင့်ကြသည်၊ ဖြစ်နိုင်သည်မှာ အကဆရာတစ်ဦး သို့မဟုတ် ဖျော်ဖြေသူတစ်ဦးအဖြစ် ဖြစ်သည်။ ဤသည်မှာ မည်သည့်ကဏ္ဍနှင့် သက်ဆိုင်သနည်း။ (ဤသည်မှာ ၎င်းတို့၏ စိတ်ဝင်စားမှုများ၊ ဝါသနာများနှင့် သက်ဆိုင်ပါသည်။) ဤသည်မှာ ၎င်းတို့၏ အားသာချက်ဖြစ်သည်၊ ယင်းမှာ ၎င်းတို့၏ စိတ်ဝင်စားမှုတစ်ခုနှင့် ဝါသနာတစ်ခု ဖြစ်သည်။ ၎င်းတို့သည် ကခုန်ခြင်းကို အလွန်လျင်မြန်စွာ သင်ယူကြသည်၊ ယင်းက ၎င်းတို့သည် ကခုန်ခြင်း၌ အလွန်တော်ကြောင်းကို ပြသသည်၊ ၎င်းတို့သည် ဤအရာမျိုးကို တိကျစွာဖြင့် သဘာဝအတိုင်း နားလည်သဘောပေါက်ပြီး လွယ်ကူစွာ တတ်မြောက်ကြသည်။ ဤသည်မှာ အားသာချက်တစ်ခု မဟုတ်လော။ (ဟုတ်ပါသည်။) ၎င်းတို့တွင် ဤကိစ္စ၌ အားသာချက်တစ်ခု ရှိသည်။ ကခုန်ခြင်းကို သင်ယူပြီးနောက် ၎င်းတို့သည် ကခုန်ခြင်းကိုလည်း နှစ်သက်ကြသည်၊ ကခုန်ရန် စိတ်အားထက်သန်ကြသည်၊ ထို့ထက်မက ၎င်းတို့သည် အနာဂတ်တွင် အကနှင့်သက်ဆိုင်သော အသက်မွေးဝမ်းကျောင်းတစ်ခုကို လိုက်စားရန် စီစဉ်ကြပြီး အကကို ၎င်းတို့၏ အနာဂတ်အသက်တာနှင့် အနာဂတ်ခရီးစဉ်တွင် အဖော်ပြုခွင့်ပေးရန် ရည်ရွယ်ကြသည်၊ ဤသည်မှာ ၎င်းတို့၏ စိတ်ဝင်စားမှုများနှင့် ဝါသနာများနှင့် သက်ဆိုင်သည်။ အကသည် ၎င်းတို့၏ အားသာချက်ဖြစ်သကဲ့သို့ ၎င်းတို့၏ စိတ်ဝင်စားမှုနှင့် ဝါသနာလည်း ဖြစ်သည်၊ ဤသည်မှာ ၎င်းတို့၏ ပင်ကိုအခြေအနေတစ်ခု ဖြစ်သည်။ အချို့လူများတွင် ဤပင်ကိုအခြေအနေရှိပြီး ၎င်းတို့ ဘုရားသခင်ကို စတင်ယုံကြည်ပြီးနောက် အကဗီဒီယိုများ ကြည့်ရှုခြင်းကိုလည်း နှစ်သက်ကြသည်။ သို့ဖြစ်၍ ၎င်းတို့သည် မိမိတို့ သင်ယူထားသောအရာကို မိမိတို့၏ တာဝန်ကို ထမ်းဆောင်ရာတွင် အသုံးချနိုင်ရန်၊ ဘုရားသခင်၏ အိမ်တော်၌ အသုံးဝင်စေရန်နှင့် ဘုရားသခင်က အမှတ်ရမည့် မိမိတို့၏ ကောင်းမှုများကို ပြင်ဆင်နိုင်ရန် မျှော်လင့်လျက် ဘုရားသခင်၏ အိမ်တော်၌ ကခုန်ခြင်းတာဝန်ကို ထမ်းဆောင်ကြ၏။ ၎င်းတို့တွင် အက၌ ခိုင်မာသော အခြေခံအုတ်မြစ်တစ်ခုရှိပြီး အမျိုးမျိုးသော အကအမျိုးအစားများကိုလည်း လျင်မြန်စွာ သင်ယူကြသည်။ ဘုရားအိမ်တော်၏ သတ်မှတ်ချက်များနှင့်အညီ အကအစီအစဉ်များကို ဖန်တီးနေစဉ် ၎င်းတို့သည် မိမိတို့သင်ယူခဲ့သမျှ အရာအားလုံးကို မည်သည့်အရာမျှ ချန်မထားဘဲ အခြားသူများကို သင်ကြားပေးလိုစိတ် ရှိကြသည်။ ၎င်းတို့သည် အခြားသူများထက် အကအမျိုးအစားများ ပိုမိုသင်ယူခဲ့ပြီးကာ ၎င်းတို့၏ အသက်မွေးဝမ်းကျောင်း၌ ပို၍ကျွမ်းကျင်သော်ငြားလည်း ၎င်းတို့သည် မောက်မာခြင်းမရှိကြပေ။ ၎င်းတို့သည် အခြားသူများနှင့် သင့်မြတ်စွာ ပေါင်းသင်းဆက်ဆံကြပြီး မိမိတို့သင်ယူခဲ့သောအရာကို ညီအစ်ကိုမောင်နှမများအား အလွန်စိတ်ရှည်စွာ သင်ကြားပေးကြသည်။ ဤသည်မှာ မည်သည့်အရာ၏ သရုပ်သကန်တစ်ခု ဖြစ်သနည်း။ (ယင်းမှာ ၎င်းတို့၏ လူ့သဘာဝ၏ သရုပ်သကန်တစ်ခု ဖြစ်ပါသည်။) ၎င်းတို့၏ လူ့သဘာဝသည် ကောင်းမွန်သလော သို့မဟုတ် မကောင်းမွန်သလော။ (၎င်းတို့၏ လူ့သဘာဝသည် ကောင်းမွန်ပါသည်။) မည်သည့်နည်းလမ်းများဖြင့် ကောင်းမွန်သနည်း။ (၎င်းတို့သည် မိမိတို့သိသမျှ အရာအားလုံးကို တစ်ခုမျှ ထိမ်ချန်မထားဘဲ အခြားသူများကို သင်ကြားပေးနိုင်စွမ်းရှိပြီး အခြားသူများကို ၎င်းတို့ရရှိသောအရာကို ရရှိစေသည်၊ ဤသည်မှာ ကောင်းမွန်သော လူ့သဘာဝ ဖြစ်ပါသည်။) ၎င်းတို့သည် မိမိတို့သင်ယူခဲ့သမျှ အရာအားလုံးကို မည်သည့်အရာမျှ ထိမ်ချန်မထားဘဲ အခြားသူများကို သင်ကြားပေးနိုင်စွမ်း ရှိကြသည်။ ၎င်းတို့တွင် အခြားမည်သည့် အရည်အချင်းကောင်းများ ရှိသေးသနည်း။ ၎င်းတို့သည် အမှန်တကယ် ကိုယ်ရည်သွေးခြင်း မရှိကြပေ။ ဤလူအမျိုးအစား၏ လူ့သဘာဝသည် ကောင်းမွန်သည်။ ၎င်းတို့တွင် အက၌ အားသာချက်တစ်ခုရှိသောကြောင့် ဘုရားအိမ်တော်၌ အကနှင့်သက်ဆိုင်သော တာဝန်တစ်ခုကို ယူကြသည်။ သို့သော် အချိန်အနည်းငယ်ကြာပြီးနောက် အလုပ်၏ လိုအပ်ချက်များကြောင့် ဘုရားအိမ်တော်က ၎င်းတို့ကို အခြားသင့်လျော်သော အလုပ်တစ်ခုကို လုပ်ဆောင်ရန် စီစဉ်ပေးသည်။ ၎င်းတို့သည် “ငါ အနှစ်နှစ်ဆယ်ကြာ ကခုန်ခြင်းကို သင်ယူခဲ့ရသည်မှာ အလဟဿ ဖြစ်သွားပြီလော။ ယခု ကခုန်ခြင်းနှင့် မသက်ဆိုင်သော အလုပ်ကို လုပ်ခိုင်းသဖြင့် ငါသည် အလွန် စိတ်တိုင်းမကျ ဖြစ်မိ၏။ ငါ့ကို အဖွဲ့ခေါင်းဆောင် သို့မဟုတ် ကြီးကြပ်ရေးမှူးအဖြစ် ခန့်မည့်အစား ငါ၏ အားသာချက်၊ ငါ၏ ကျွမ်းကျင်မှုများကို အဘယ်ကြောင့် အသုံးမပြုစေရသနည်း။ ဤသည်မှာ ငါ၏ အားသာချက်လည်း မဟုတ်သကဲ့သို့ မည်သို့လုပ်ဆောင်ရမည်ကိုလည်း ငါ မသိပေ။ ဤသည်မှာ ငါ မည်သည့်အခါကမျှ မျှော်လင့်မထားခဲ့သော အရာတစ်ခု ဖြစ်၏” ဟု မိမိတို့ဘာသာ တွေးကြသည်။ အပြင်ပန်းအားဖြင့် ၎င်းတို့က “ဤအရာအားလုံးသည် ဘုရားသခင်၏ အစီအစဉ်များတွင် ပါဝင်ပြီး ကျွန်ုပ်သည် ကျိုးနွံနာခံရန် လိုလားနေပါသည်” ဟု ဆိုသော်လည်း လက်တွေ့တွင်မူ ခေါင်းဆောင်များ မည်သို့ပင်ပြောစေကာမူ ၎င်းတို့သည် ယင်းကို လက်ခံရန် မလိုလားကြဘဲ စိတ်ထဲသို့လည်း မထည့်ကြပေ။ ၎င်းတို့က “သင်တို့သည် လုပ်ငန်းပိုင်းဆိုင်ရာ အသိပညာမရှိသည့်တိုင် ငါတို့ကို ဦးဆောင်ရန် လာခဲ့သည်။ သင်တို့လုပ်သမျှမှာ အယူဝါဒအကြောင်း ပြောခြင်းသာ ဖြစ်သည်။ သင်တို့သည် ငါ့ထက် မသာပါ” ဟု တွေးကြသည်။ ဤသည်မှာ မည်သည့်အရာ၏ သရုပ်သကန်တစ်ခု ဖြစ်သနည်း။ (စိတ်ထဲမှ အာခံခြင်း ဖြစ်ပါသည်။) ဤသည်မှာ မည်သို့သော ပြဿနာမျိုး ဖြစ်သနည်း။ ဤသည်မှာ ဖောက်ပြန်ပျက်စီးသော စိတ်သဘောထားတစ်ခု၏ ထုတ်ဖော်ခြင်းလော။ (ဟုတ်ပါသည်။) ၎င်းတို့၏ လူ့သဘာဝသည် ယေဘုယျအားဖြင့် မဆိုးလှသော်လည်း ၎င်းတို့သည် အခြားသူများနှင့် ပူးပေါင်းဆောင်ရွက်လိုစိတ်ရှိသည်၊ ကြင်နာတတ်သည်၊ လူကောင်းတစ်ဦးဖြစ်လိုသည်၊ အဖျက်အမှောင့်လုပ်ခြင်းနှင့် နှောင့်ယှက်ခြင်း သို့မဟုတ် ဒုက္ခပေးခြင်းနှင့် ပြဿနာရှာခြင်းတို့ကို မပြုလုပ်လိုသော်လည်း ၎င်းတို့၏ ခံစားချက်နှင့်ဆိုင်သော ဆန္ဒအရ ၎င်းတို့သည် ဘုရားအိမ်တော်၏ စီစဉ်မှုများကို ကျိုးနွံနာခံပြီး မိမိတို့၏ တာဝန်ကို ကောင်းမွန်စွာ ထမ်းဆောင်လိုစိတ်ရှိသော်လည်း ၎င်းတို့၏ အဆင့်အတန်းနှင့်ပတ်သက်လာသည့်အခါ သို့မဟုတ် မိမိတို့၏ ကိုယ်ပိုင်အယူအဆများနှင့် ဆန္ဒများနှင့် မကိုက်ညီသော ကိစ္စရပ်များနှင့်ပတ်သက်လာသည့်အခါ ၎င်းတို့တွင် ကျိုးနွံနာခံခြင်း ရှိသလော။ ၎င်းတို့သည် သမ္မာတရားကို ရှာဖွေခြင်း၏ မည်သည့်သရုပ်သကန်များကိုမဆို ပြသသလော။ (မပြသပါ။) သို့ဆိုလျှင် ၎င်းတို့သည် မည်သည့်အရာကို ဖော်ပြသနည်း။ (၎င်းတို့ ဖော်ပြသည့်အရာမှာ အတိုက်အခံလုပ်ခြင်း၊ ညည်းညူခြင်းနှင့် ဘုရားအိမ်တော်၏ စီစဉ်မှုများကို ကျိုးနွံနာခံမှု ကင်းမဲ့ခြင်းတို့ ဖြစ်ပါသည်။) မှန်ပေသည်။ သို့ဆိုလျှင် ဤသရုပ်သကန်များကို မည်သို့သော ပြဿနာမျိုးအဖြစ် အကျဉ်းချုပ်နိုင်သနည်း။ (ဖောက်ပြန်ပျက်စီးသော စိတ်သဘောထားတစ်ခု ဖြစ်ပါသည်။) အပြင်ပန်းအားဖြင့် ၎င်းတို့၏ လူ့သဘာဝသည် ကြင်နာပုံရပြီး ၎င်းတို့သည် ခေါင်းဆောင်များကို ပေါ်ပေါ်တင်တင် ဆန့်ကျင်ခြင်း၊ ပွက်လောရိုက်ခြင်း သို့မဟုတ် ဝေဖန်သုံးသပ်ခြင်းတို့ကို မပြုလုပ်သော်လည်း ဤကိစ္စရပ်များအပေါ် ၎င်းတို့၏ သဘောထားသည် ၎င်းတို့၏ ဖောက်ပြန်ပျက်စီးသော စိတ်သဘောထား၏ ထုတ်ဖော်ခြင်းတစ်ခု ဖြစ်သည်။ ၎င်းတို့သည် မည်သို့သော ဖောက်ပြန်ပျက်စီးသော စိတ်သဘောထားမျိုးကို ထုတ်ဖော်သနည်း။ (မာနထောင်လွှားသော စိတ်သဘောထားတစ်ခု ဖြစ်ပါသည်။) မှန်ပေသည်၊ မာနထောင်လွှားမှု ဖြစ်သည်။ ၎င်းတို့သည် မိမိတို့သည် အချို့သောနယ်ပယ်၌ ကျွမ်းကျင်သည်ဟုလည်းကောင်း၊ မိမိတို့၏ လူ့သဘာဝသည် အတော်အတန် ကောင်းမွန်သည်ဟုလည်းကောင်း တွေးထင်ကြသဖြင့် ၎င်းတို့သည် ဤအရာကို အခွင့်ကောင်းယူ၍ အသင်းတော်ခေါင်းဆောင်များ၏ စီစဉ်မှုများကို ကျိုးနွံနာခံရန် အတိုက်အခံလုပ်ကြသည်။ ၎င်းတို့သည် သမ္မာတရားကို မရှာဖွေဘဲ မိမိတို့နှစ်သက်ရာ မည်သည့်တာဝန်ကိုမဆို ထမ်းဆောင်လိုကြသည်။ အသင်းတော်က ၎င်းတို့ကို သင့်လျော်သော တာဝန်တစ်ခု ခန့်အပ်သည့်အခါတွင်ပင် ၎င်းတို့သည် လက်မခံနိုင်ကြပေ၊ တစ်စုံတစ်ခုသည် ၎င်းတို့၏ အယူအဆများနှင့် စိတ်ကူးများနှင့် မကိုက်ညီပါက ယင်းမှာ ဘုရားအိမ်တော်၏ စီစဉ်မှုတစ်ခုဖြစ်လျှင်ပင် ၎င်းတို့သည် ကျိုးနွံနာခံရန် ငြင်းပယ်ကြသည်။ ဤသည်တို့မှာ ပုန်ကန်ခြင်းနှင့် မာနထောင်လွှားသော စိတ်သဘောထားတစ်ခု၏ ထုတ်ဖော်ခြင်းများ ဖြစ်ကြသည်။ ၎င်းတို့ပြသသော ဤသရုပ်သကန်များ အစဉ်လိုက်ကို ကြည့်လော့။ ၎င်းတို့၏ ပင်ကိုအခြေအနေများ၏ အားသာချက်များမှသည် ၎င်းတို့၏ လူ့သဘာဝ၊ နောက်ဆုံးတွင် ၎င်းတို့၏ ဖောက်ပြန်ပျက်စီးသော စိတ်သဘောထားအထိ ၎င်းတို့၏ သရုပ်သကန်များသည် ဤမတူညီသော ကဏ္ဍသုံးရပ်ကို လွှမ်းခြုံထားသည်။ ၎င်းတို့၏ ပင်ကိုအခြေအနေများ၏ အားသာချက်များသည် ၎င်းတို့ မွေးရာပါအရာတစ်ခုဖြစ်ပြီး ထိုအရာ၌ ဝေဖန်စရာ တစ်ခုမျှမရှိပေ။ ၎င်းတို့ မည်သည့်အရာ၌ ကျွမ်းကျင်သည်ဖြစ်စေ ယင်းက ၎င်းတို့တွင် ဖောက်ပြန်ပျက်စီးသော စိတ်သဘောထားမရှိဟု မဆိုလိုသကဲ့သို့ ၎င်းတို့၏ ကိုယ်ကျင့်စရိုက် ကောင်းသည်ဖြစ်စေ၊ ဆိုးသည်ဖြစ်စေကိုလည်း မပြသနိုင်ပေ။ သို့သော် အချို့သော ပင်ကိုအခြေအနေများကြောင့် ဖြစ်ပေါ်လာသော လူတစ်ဦး၏ သာလွန်စိတ် သို့မဟုတ် လောကီလူထုအမြင်က ၎င်းတို့အပေါ် အတင်းအကျပ် သတ်မှတ်ပေးသော နေရာထားမှုနှင့် သတ်မှတ်ချက်သည် ၎င်းတို့၏ လူ့သဘာဝကို ပုံပျက်စေနိုင်သည်။ ဤပုံပျက်ခြင်းက မည်သည့်အရာကို ဆိုလိုသနည်း။ ယင်းမှာ လူတစ်ဦးသည် အခြားသူများက အတော်အသင့် နှစ်သက်ဖွယ်အဖြစ် ရှုမြင်သော ပင်ကိုအခြေအနေအချို့ကို ပိုင်ဆိုင်သောကြောင့်လည်းကောင်း၊ ၎င်းတို့သည် လူ့အဖွဲ့အစည်းရှိ အချို့လူများထံမှ အားကျခြင်းနှင့် လေးစားခြင်းကို လက်ခံရရှိသောကြောင့်လည်းကောင်း ၎င်းတို့သည် မိမိတို့၏ ကိုယ်ပိုင်တန်ဖိုးနှင့် ရာထူးအပေါ် မမှန်ကန်သော သတ်မှတ်ချက်တစ်ခုကို ဖြစ်ပေါ်လာစေသည်ဟု ဆိုလိုသည်။ ၎င်းတို့က မိမိတို့သည် အတော်အတန် တော်သည်ဟုလည်းကောင်း၊ အခြားသူများထက် သာလွန်သည်ဟုလည်းကောင်း တွေးထင်ကြပြီး လူတို့ကို အထင်သေးစပြုလာကာ မိမိတို့သည် အစဉ်သဖြင့် မှန်ကန်ပြီး မိမိတို့နှင့်ပတ်သက်သည့် အရာအားလုံးသည် ကောင်းသည်ဟု အစဉ်သဖြင့် ယုံကြည်လျက် အခြားသူများက ၎င်းတို့ကို စကားနားထောင်ပြီး ၎င်းတို့နောက်လိုက်ရန် အလိုရှိကြသည်။ ထိုသို့ဖြစ်ပါက အမှုအရာများအပေါ် ၎င်းတို့၏ ရှုမြင်ပုံများနှင့် ရပ်တည်ချက်များသည် အားလုံး မှားယွင်းနေသည်။ ဤမှားယွင်းသော ရှုမြင်ပုံများနှင့် ရပ်တည်ချက်များဖြင့် လူတစ်ဦးသည် လောကနှင့် ဆိုးယုတ်သော လူသားမျိုးနွယ်နောက်သို့ လိုက်လိမ့်မည်။ ဆိုးယုတ်သော လူသားမျိုးနွယ်နှင့် ဆိုးယုတ်သော လောကနောက်သို့ လိုက်ခြင်း၏ သွယ်ဝိုက်သော အဓိပ္ပာယ်မှာ အဘယ်နည်း။ သွယ်ဝိုက်သော အဓိပ္ပာယ်မှာ သင်သည် ဤဆိုးယုတ်သော လောကနှင့် ဆိုးယုတ်သော လူသားမျိုးနွယ်ထံမှ လာသော မှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများအတိုင်း အသက်ရှင်လိမ့်မည်ဖြစ်ပြီး သင်သည် အရာခပ်သိမ်းကို ခွဲခြားရန်နှင့် သတ်မှတ်ရန် ဤမှားယွင်းပြီး အဓိပ္ပာယ်မဲ့သည့် အတွေးအခေါ်များ၊ ရှုမြင်ပုံများနှင့် ဆိုရိုးများကို အသုံးပြုလိမ့်မည် ဖြစ်သည်။ ဥပမာအားဖြင့် သင်သည် အတော်အတန် ရုပ်ရည်ကောင်းမွန်ပြီး မျက်နှာအသွင်အပြင် ပြေပြစ်ကာ ကောင်းမွန်သော ကိုယ်လုံးကိုယ်ပေါက်ရှိသည် ဆိုကြပါစို့၊ ဤသည်တို့မှာ ဘုရားသခင်က ပေးသနားတော်မူသော ပင်ကိုအခြေအနေများ ဖြစ်ကြသည်။ ဤအရာ၌ မှားယွင်းသောအရာ တစ်ခုမျှမရှိပေ၊ ယင်းမှာ အဖြစ်မှန်တစ်ခုမျှသာ ဖြစ်သည်။ သို့သော် ဤလူ့အဖွဲ့အစည်းနှင့် ဤဆိုးယုတ်သော လူသားမျိုးနွယ်၏ မှားယွင်းသော သတ်မှတ်မှုအောက်တွင် ဤအဖြစ်မှန်က သင့်ကို ဘဝင်မြင့်ပြီး အပျော်အပါးလိုက်စားလွန်းသူ၊ အပေါ်ယံဆန်ပြီး မာနကြီးသူ ဖြစ်လာစေနိုင်သည်။ ဆိုလိုသည်မှာ ပင်ကိုအားဖြင့် သာလွန်သော အခြေအနေများကို ပိုင်ဆိုင်ထားခြင်းကြောင့်၊ ထို့အပြင် ဤလူ့အဖွဲ့အစည်းနှင့် လူသားမျိုးနွယ်ထံမှ အမျိုးမျိုးသော မှားယွင်းပြီး အဓိပ္ပာယ်မဲ့သည့် အတွေးအခေါ်များနှင့် ရှုမြင်ပုံများ၏ လေ့ကျင့်ပေးခြင်း၊ သွေးဆောင်ခြင်းနှင့် ပုံသွင်းခြင်းတို့နှင့် ပေါင်းစပ်လိုက်သည့်အခါ သင်၏ လူ့သဘာဝသည် ပုံပျက်သွားသည်။ “ပုံပျက်သည်” ဟူသည်မှာ မည်သည့်အရာကို ရည်ညွှန်းသနည်း။ သင်သည် ဤပင်ကိုအခြေအနေများကို ပိုင်ဆိုင်ခြင်းသည်မှာ ယင်းကိုယ်၌က လုံးဝ ဓမ္မတာပင်ဖြစ်သည်၊ ရုပ်ရည်ကောင်းမွန်ခြင်းသည် ထူးခြားသောအရာ တစ်စက်မျှ မဟုတ်ပေ၊ ယင်းက သင်သည် သမ္မာတရားကို နားလည်သည်ဟု မဆိုလိုသကဲ့သို့ သင်သည် မြင့်မြတ်သည်ဟုလည်း မဆိုလိုပေ။ ယင်းက သင်သည် ရုပ်ရည်ကြည့်ကောင်းသည်၊ သပ်ရပ်သော အသွင်အပြင် ရှိသည်၊ လူများက သင့်ကို အနည်းငယ် ပို၍ လှည့်ကြည့်လိုစိတ် ရှိနိုင်သည်ဟုသာ ဆိုလိုသည်၊ သင်သည် အခြားသူများအတွက် စိတ်အနှောင့်အယှက် ဖြစ်စရာ သို့မဟုတ် မနှစ်မြို့စရာ မဟုတ်ပေ၊ ထိုမျှသာ ဖြစ်သည်။ သို့သော် အလှအပ၊ ဆွဲဆောင်မှုရှိခြင်းနှင့် အဆင့်အတန်းမြင့်ပြီး ခေတ်မီစွဲလမ်းဖွယ်ဖြစ်သော အတွေးအခေါ်များကို အလွန်အမင်း တန်ဖိုးထားသည့် လူမှုပတ်ဝန်းကျင်တစ်ခုတွင် ဤရေစီးကြောင်းက သင့်ကို အစွန်းတစ်ဖက်ဆီသို့ တွန်းပို့ပြီး သင်၏ လူ့သဘာဝကို မာနကြီးသူ၊ အပျော်အပါးလိုက်စားလွန်းသူနှင့် အပေါ်ယံဆန်သူ ဖြစ်လာစေသည်။ ရုပ်ရည်ကောင်းမွန်ခြင်းသည် ပင်ကိုအခြေအနေတစ်ခု ဖြစ်သည်။ ဘုရားသခင်က သင့်ကို ဤပင်ကိုအခြေအနေကို သင့်ကို မာနကြီးသူ၊ အပျော်အပါးလိုက်စားလွန်းသူ သို့မဟုတ် အပေါ်ယံဆန်သူ ဖြစ်လာစေရန် ပေးသနားတော်မူခဲ့ခြင်း မဟုတ်ဘဲ ထိုအစား ကိုယ်တော်က သင်သည် ယင်းကို ပုံမှန်အတိုင်း ရှုမြင်စေရန် အလိုရှိတော်မူသည်။ “ကျွန်ုပ်ကို ဤပင်ကိုအခြေအနေ၊ ဤအသွင်အပြင်ကို ပေးသနားတော်မူသည့်အတွက် ဘုရားသခင်ကို ကျေးဇူးတင်ပါသည်။ ယင်းမှာ ဘုရားသခင်၏ ကျေးဇူးတော်နှင့် ချီးမြှင့်ပေးသနားခြင်း ဖြစ်သည်။ ကျွန်ုပ်သည် ဘုရားသခင်ကို ကျေးဇူးတင်သင့်သည်။ ကျွန်ုပ်၌ ကြွားဝါစရာ တစ်စက်မျှ မရှိပါ” ဟူ၍ဖြစ်၏။ ထိုသို့သော ပင်ကိုအခြေအနေတစ်ခုဖြင့် လူတစ်ဦး လုပ်ဆောင်သင့်သောအရာမှာ လူများနှင့် အမှုအရာများကို ရှုမြင်ရန်နှင့် ဘုရားသခင်၏ သွန်သင်ချက်များအတိုင်း ကျင့်ကြံပြုမူပြီး လုပ်ဆောင်ရန် ဖြစ်သည်။ သို့သော် လူ့အဖွဲ့အစည်းနှင့် စာတန်ထံမှ အမျိုးမျိုးသော အတွေးအခေါ်များနှင့် ရှုမြင်ပုံများကို လက်ခံပြီးနောက် ၎င်းတို့သည် အလှအပနှင့် ဆွဲဆောင်မှုရှိခြင်းကို အရင်းအနှီးပုံစံတစ်မျိုးအဖြစ် ရှုမြင်လာကြသည်။ ထို့နောက် ၎င်းတို့သည် ဤပင်ကိုအားဖြင့် အခြေခံကျသော အခြေအနေကို အခွင့်ကောင်းယူ၍ မိမိတို့အလိုရှိသောအရာကို ရရှိရန် အုပ်စုတိုင်းရှိ လူတိုင်းထံမှ မျက်နှာသာရရန် ဤအရင်းအနှီးကို အသုံးပြုကြသည်။ အချို့သည် ဥပဒေကို ချိုးဖောက်သော၊ ကိုယ်ကျင့်တရားဆိုင်ရာ စည်းများကို ချိုးဖောက်သော သို့မဟုတ် လူ့သဘာဝကို ဆန့်ကျင်သော အမှုအရာများကို လုပ်ဆောင်ရန် ဤပင်ကိုအခြေအနေကိုပင် အသုံးပြုကြသည်။ လူတစ်ဦး၏ လူ့သဘာဝတွင် ပုံပျက်ပြီး အစွန်းရောက်သောအရာအချို့ ပါဝင်ရသည့်အကြောင်းရင်းမှာ လူ့အဖွဲ့အစည်းနှင့် ဆိုးယုတ်သော လူသားမျိုးနွယ်ထံမှ အချို့သော မိစ္ဆာအယူဝါဒများ၊ မှားယွင်းပြီး အဓိပ္ပာယ်မဲ့သော အယူအဆများနှင့် မှားယွင်းသော လူထုအမြင်များ၏ ပိုမိုဆိုးရွားစေသော လွှမ်းမိုးမှုကြောင့် ဖြစ်သည်။ အကြောင်းမှာ လူတို့သည် ပင်ကိုအားဖြင့် သမ္မာတရားနှင့် ပိုင်းခြားသိမြင်နိုင်စွမ်း ကင်းမဲ့သောကြောင့် ၎င်းတို့သည် လူ့အဖွဲ့အစည်းနှင့် ဆိုးယုတ်သော လူသားမျိုးနွယ်ထံမှဖြစ်သော ဤလူထုအမြင်များ၊ အဆိုအမိန့်များနှင့် သီအိုရီများကို သဘာဝအတိုင်း လက်ခံကြသောကြောင့် ဖြစ်သည်။ ၎င်းတို့သည် ဤအပျက်သဘောဆောင်သော အရာများကို မှန်သည့်အလား မှတ်ယူကြပြီး ဤမှားယွင်းပြီး အဓိပ္ပာယ်မဲ့ကာ ဆိုးယုတ်သော အတွေးအခေါ်များနှင့် ရှုမြင်ပုံများ၏ လမ်းညွှန်မှုအောက်တွင် ၎င်းတို့၏ အသိစိတ်နှင့် ဆင်ခြင်တုံတရားသည် မြင့်မားလာခြင်း သို့မဟုတ် သန့်စင်လာခြင်းမရှိဘဲ ထိုအစား ပုံပျက်ကာ ပျက်စီးသွားသည်။ ဤလူ့အဖွဲ့အစည်းသည် ရုပ်ရည်ချောမောသော အမျိုးသားများနှင့် လှပသော အမျိုးသမီးများကို ချီးမွမ်းခြင်း သို့မဟုတ် မြှောက်ပင့်ပြောဆိုခြင်း မရှိခဲ့ပါက၊ သင့်ကို သွေးဆောင်ခြင်း သို့မဟုတ် ပုံသွင်းခြင်းပြုသည့် ပြင်ပအတွေးအခေါ်များ မရှိခဲ့ပါက၊ သင်သွားလေရာ မည်သည့်နေရာတွင်မဆို သင်၏ ရုပ်ရည်ကောင်းမွန်မှုအတွက် သင့်ကို မည်သူမျှ မြှောက်ပင့်ပြောဆိုခြင်း၊ သင့်ကို အထူးဆက်ဆံခြင်း သို့မဟုတ် အမျိုးမျိုးသောအရာများကို လုပ်ဆောင်ရန် သင့်ကို သွေးဆောင်ခြင်း သို့မဟုတ် ဖိအားပေးခြင်းတို့ကို မပြုလုပ်ခဲ့ပါက သင်သည် သဘာဝအားဖြင့် ရုပ်ရည်ကောင်းမွန်ခြင်းသည် လုံးဝ ပုံမှန်ဖြစ်ပြီး ကိုယ်ရည်မသွေးထိုက်ကြောင်းကို ရှုမြင်ရလိမ့်မည်။ ဤသည်မှာ သင်သည် သင်၏ ပင်ကိုအားဖြင့် အခြေခံကျသော အခြေအနေကို အခြေခံ၍ သင်လုပ်ဆောင်သင့်သော အမှုအရာများကို လုပ်ဆောင်လိမ့်မည်ဖြစ်ပြီး သင်သည် ထိုသို့သော သာလွန်သည့် ပင်ကိုအခြေအနေတစ်ခု ရှိရုံမျှဖြင့် သင်မလုပ်ဆောင်သင့်သော အမှုအရာများကို လုပ်ဆောင်မည်မဟုတ်ဟု ဆိုလိုသည်။ သို့သော် ပြင်ပပတ်ဝန်းကျင်၏ သွေးဆောင်ခြင်းနှင့် ဖောက်ပြန်ပျက်စီးစေခြင်းတို့ကြောင့် သင်သည် သဘာဝအားဖြင့် ရုပ်ရည်ကောင်းမွန်ခြင်းသည် ထူးခြားသောအရာတစ်ခုဖြစ်ပြီး ယင်းက သင့်ကို အခြားလူတိုင်းထက် ပို၍ကောင်းမွန်စေသည်ဟု ယုံကြည်လာသည်။ မိမိကိုယ်ကို ချုပ်တည်းနိုင်စွမ်း တစ်စုံတစ်ရာ ကင်းမဲ့လျက် သင်သည် အခြားသူများကို သွေးဆောင်ဖြားယောင်းရန် သင်၏ ဆွဲဆောင်မှုရှိသော ရုပ်ရည်ကို အသုံးပြုပြီး အသိစိတ်နှင့် ဆင်ခြင်တုံတရား၏ ချုပ်တည်းမှုကို ချိုးဖျက်ကာ ကျင့်ကြံပြုမူခြင်း၏ အတားအဆီးများကို ကျော်လွန်သည်။ မတူညီသော ပတ်ဝန်းကျင်များတွင် သင်သည် သင်အလိုရှိသော အကျိုးအမြတ်များကို ရရှိရန် သင်၏ သာလွန်သော ပင်ကိုအခြေအနေကို အသုံးချပြီး အမျိုးမျိုးသော နည်းဗျူဟာများကို အသုံးပြုလျက် အမျိုးမျိုးသော ဖောက်ပြန်ပျက်စီးသော စိတ်သဘောထားများကို ထုတ်ဖော်နိုင်သည်။ ဤသည်မှာ ပင်ကိုအခြေအနေများ၊ လူ့သဘာဝနှင့် ဖောက်ပြန်ပျက်စီးသော စိတ်သဘောထားများ ဤသုံးခုကြားရှိ ဆက်နွှယ်မှု ဖြစ်သည်။ တစ်ခါတစ်ရံတွင် ဤကဏ္ဍသုံးရပ်ကြား၌ အချို့သော ဆက်နွှယ်မှုတစ်ခု ရှိသည်၊ ပြောစရာမလိုသည်မှာ တစ်ခါတစ်ရံတွင် ပထမနှစ်ခု သို့မဟုတ် နောက်ဆုံးနှစ်ခုကြား၌ မလွဲမသွေဖြစ်သော ဆက်နွှယ်မှုတစ်ခု ရှိသည်။ သင် နားလည်ပါသလော။ (ကျွန်ုပ်တို့ အနည်းငယ် ပို၍ နားလည်လာပါသည်။) သင်သည် အနည်းဆုံးအနေဖြင့် မည်သည့်အရာကို သိသင့်သနည်း။ မည်သည့် ပင်ကိုအခြေအနေမဆို ယင်းဘာသာ မှားယွင်းခြင်းမရှိပေ၊ ယင်းမှာ လူတစ်ဦး၏ လူ့သဘာဝ၏ အခြေခံအခြေအနေတစ်ခုမျှသာ ဖြစ်သည်။ လူတို့၏ လူ့သဘာဝများနှင့်ပတ်သက်လာလျှင် ကောင်းသောအရာနှင့် ဆိုးသောအရာ၊ အပြုသဘောဆောင်သောအရာနှင့် အပျက်သဘောဆောင်သောအရာတို့ ရှိကြသည်။ သို့ဆိုလျှင် ဖောက်ပြန်ပျက်စီးသော စိတ်သဘောထားတစ်ခုသည် မည်သို့ ဖြစ်ပေါ်လာသနည်း။ ယင်းမှာ လူတစ်ဦးသည် ၎င်းတို့၏ ပင်ကိုအားဖြင့် မွေးရာပါ အခြေအနေများကို အခြေခံ၍ စာတန်၏ အမျိုးမျိုးသော အကြံအစည်များနှင့် အတွေးအခေါ်များဖြင့် လေ့ကျင့်ပေးခြင်းခံရသည့်အခါ ဖြစ်ပေါ်လာပြီး ဤလေ့ကျင့်ပေးခြင်းက အမျိုးမျိုးသော မှားယွင်းပြီး အဓိပ္ပာယ်မဲ့သည့် ရှုမြင်ပုံများ ဖြစ်ပေါ်လာစေကာ ယင်းတို့က ထို့နောက် လူသည် ရှင်သန်ရန် မှီခိုအားထားရသော အသက်အနှစ်သာရတစ်မျိုး ဖြစ်လာသည်။ ဤသည်မှာ ဖောက်ပြန်ပျက်စီးသော စိတ်သဘောထားတစ်ခု ဖြစ်သည်။

စောစောက ငါတို့သည် ပင်ကိုအခြေအနေများ၊ လူ့သဘာဝနှင့် ဖောက်ပြန်ပျက်စီးသော စိတ်သဘောထားများ၏ မတူညီသော သရုပ်သကန်များအကြောင်းကို မိတ်သဟာယဖွဲ့ခဲ့သည်။ ငါတို့သည် ပင်ကိုအခြေအနေ ဆယ်မျိုးကို စာရင်းပြုစုခဲ့ပြီး လူ့သဘာဝနှင့်သက်ဆိုင်သော အမျိုးမျိုးသော သရုပ်သကန်များအကြောင်းကိုလည်း စောစောကပင် မိတ်သဟာယဖွဲ့ခဲ့သည်။ ယခု အကျဉ်းချုပ်ကြစို့။ ငါတို့သည် လူ့သဘာဝ၏ မည်သို့သော မတူညီသည့် သရုပ်သကန်များအကြောင်းကို မိတ်သဟာယဖွဲ့ခဲ့သနည်း။ (လူ့သဘာဝနှင့်ပတ်သက်၍ ကောင်းမွန်သော လူ့သဘာဝ၏ သရုပ်သကန်များနှင့် မကောင်းသော လူ့သဘာဝ၏ သရုပ်သကန်များ ရှိပါသည်။ ဘုရားသခင်က ဥပမာအချို့ကို စောစောက ပေးခဲ့ပါသည်။ အချို့လူများသည် သဘာဝအလျောက် အချို့သောနယ်ပယ်၌ သီးခြားအားသာချက်တစ်ခု ရှိပြီး အချို့သော နည်းပညာဆိုင်ရာ အသက်မွေးဝမ်းကျောင်း၌ ကျွမ်းကျင်ကြကာ ၎င်းတို့သည် မည်သည့်အရာမျှ ထိမ်ချန်မထားဘဲ အခြားသူများကို သင်ကြားပေးနိုင်စွမ်း ရှိကြသည်။ အခြားသူများကို အခွင့်ကောင်းမယူသော လူအချို့လည်း ရှိပါသည်။ ဤသည်တို့မှာ အတော်အသင့် ကောင်းမွန်သော လူ့သဘာဝ၏ သရုပ်သကန်များ ဖြစ်ကြသည်။ ဘုရားသခင်သည် မကောင်းသော လူ့သဘာဝ၏ သရုပ်သကန်များဆိုင်ရာ ဥပမာများကိုလည်း ပေးခဲ့ပါသည်။ ဥပမာအားဖြင့် ယုတ်ညံ့ပြီး ညစ်ညမ်းသော လူ့သဘာဝရှိခြင်းနှင့် သူတစ်ပါး၏နောက်ကွယ်တွင် အတင်းအဖျင်းစကားများကို စပ်စုရန် အစဉ်မပြတ် နှစ်သက်ခြင်း၊ ဆန့်ကျင်ဘက်လိင်နှင့် လူတစ်ဦး၏ လူအချင်းချင်းဆက်ဆံရေးဆိုင်ရာ အပြုအမူပိုင်းတွင် ပေါ့ပေါ့ဆဆနိုင်ခြင်းနှင့် ဂုဏ်သိက္ခာနှင့် တည်ကြည်မှု ကင်းမဲ့ခြင်း၊ တစ်ကိုယ်ကောင်းဆန်ခြင်း၊ ယုတ်ညံ့ခြင်းနှင့် အခြားသူများကို အခွင့်ကောင်းယူရန် နှစ်သက်ခြင်းအပြင် အခြားသူများနှင့် မိမိ၏ ပေါင်းသင်းဆက်ဆံရေးများတွင် အသိစိတ် သို့မဟုတ် ဆင်ခြင်တုံတရား စိုးစဉ်းမျှမရှိဘဲ အလွန်အမင်း တွက်ချက်တတ်ခြင်းတို့ ဖြစ်သည်၊ ဤသည်တို့အားလုံးမှာ မကောင်းသော လူ့သဘာဝ၏ သရုပ်သကန်များ ဖြစ်ကြပါသည်။) မကောင်းသော လူ့သဘာဝ၏ သရုပ်သကန်များထဲတွင် အဆိုးဆုံးမှာ အဘယ်နည်း။ သင်တို့အတွက် မနှစ်မြို့ဆုံးသော လူအမျိုးအစားမှာ မည်သည့်အမျိုးအစား ဖြစ်သနည်း။ (ရှက်စိတ်မရှိဘဲ ဆန့်ကျင်ဘက်လိင်နှင့် ၎င်းတို့၏ ပေါင်းသင်းဆက်ဆံရေးများတွင် အထူးသဖြင့် ပေါ့ပေါ့တန်တန်နိုင်သောသူများ ဖြစ်ပါသည်။) ပေါ့ပေါ့တန်တန်နိုင်ခြင်း၊ အကျင့်ပျက်ခြင်းနှင့် ရှက်စိတ်ကင်းမဲ့ခြင်းတို့ ဖြစ်သည်။ ယဉ်ကျေးသောနည်းလမ်းဖြင့် ဆိုရလျှင် ဤလူများသည် “ရှက်စိတ်မရှိကြ” ဟူ၍ ဖြစ်သည်။ ရိုးရှင်းသောဘာသာစကားဖြင့် ဆိုရလျှင် ၎င်းတို့သည် “အရှက်မရှိ” ကြပေ၊ သို့မဟုတ် ပို၍တိကျစွာ ဆိုရလျှင် “အရှက်မရှိ မျက်နှာပြောင်တိုက်သော” သူများ ဖြစ်ကြသည်။ ထိုသို့သောလူများကို မည်သူမျှ မနှစ်သက်ပေ။

အချို့လူများသည် ငရုတ်သီးစားခြင်းသည် အလေ့အထဖြစ်သော နေရာတစ်ခုတွင် မွေးဖွားခဲ့ကြသည်၊ ဖြစ်နိုင်သည်မှာ ရာသီဥတုကြောင့် သို့မဟုတ် ၎င်းတို့၏ မိသားစုတွင် အလေ့အထတစ်ခုရှိပြီး ငရုတ်သီးစားခြင်းကို နှစ်သက်သောကြောင့် ၎င်းတို့သည် နေ့စဉ် ငရုတ်သီးစားကြပြီး ၎င်းတို့၏ နေ့စဉ်အစားအစာသည် စပ်သောအရသာများက လွှမ်းမိုးလေ့ရှိသည်။ ဤသည်မှာ ပင်ကိုအခြေအနေတစ်ခု ဖြစ်သည်မှာ သိသာထင်ရှားသည်။ ဤသည်မှာ ပင်ကိုအခြေအနေများထဲမှ မည်သည့်အရာဖြစ်သနည်း။ (လူနေမှုဘဝ အလေ့အထတစ်ခု ဖြစ်ပါသည်။) ၎င်းတို့၏ လူနေမှုဘဝ အလေ့အထမှာ ၎င်းတို့၏ နေ့စဉ်အစားအစာတွင် စပ်သောအရသာများမပါဘဲ မနေနိုင်ခြင်း ဖြစ်သည်၊ ၎င်းတို့စားသမျှ အရာတိုင်းသည် စပ်သောအရသာ ရှိရမည်။ ဤနှစ်သက်မှုသည် မည်မျှအထိ ရောက်ရှိသနည်း။ ၎င်းတို့သည် အချိုပွဲများတွင်ပင် အစပ်ထည့်ကြသည်၊ ဟမ်ဘာဂါနှင့် ပီဇာကို စပ်သောအရသာများဖြင့် စားကြပြီး လက်ဖက်ရည်နှင့် ကော်ဖီတွင်ပင် ငရုတ်သီးများ ထည့်ကြသည်၊ ဤသည်မှာ ၎င်းတို့၏ အစပ် စားသုံးမှု၏ အတိုင်းအတာ ဖြစ်သည်။ ဤသည်မှာ လူနေမှုဘဝ အလေ့အထတစ်ခု ဖြစ်သည်။ ဤအရာ၌ အမှားအမှန် တစ်စုံတစ်ရာ ရှိပါသလော။ (မရှိပါ။) အစပ်ကို နှစ်သက်ခြင်းသည် လူတစ်ဦး၏ နေထိုင်ရာပတ်ဝန်းကျင်နှင့် လူနေမှုဘဝ အလေ့အထများကြောင့် ဖြစ်ပေါ်လာခြင်း ဖြစ်သည်၊ ဤအရာ၌ အမှားအမှန်မရှိပေ။ အချို့လူများသည် အစပ်ကို အလွန်အကျွံအတိုင်းအတာအထိ စားကြသည်၊ အစပ်မရှိပါက ၎င်းတို့သည် အစာမစားကြတော့ပေ။ သင် လက်ခံနိုင်သည်ဖြစ်စေ၊ မခံနိုင်သည်ဖြစ်စေ ၎င်းတို့သည် မရမက အစပ်စားကြပြီး မည်သူမျှ ယင်းကို မပြောင်းလဲနိုင်ပေ။ အတိုချုပ်အားဖြင့် ငရုတ်သီးစားခြင်းကို နှစ်သက်ခြင်းသည် လူနေမှုဘဝ အလေ့အထတစ်ခုဖြစ်ပြီး ယင်းနှင့်ပတ်သက်၍ ပြဿနာ မရှိသကဲ့သို့ ယင်းတွင် သမ္မာတရားလည်း မပါဝင်ပေ။ အချို့လူများက “ဤလူနေမှုဘဝ အလေ့အထသည် အလွန်အစွန်းရောက်သည်၊ ယင်းကို အပျက်သဘောဆောင်သောအရာအဖြစ် မှတ်ယူသင့်သလော။ ယင်းကို ဝေဖန်ခြင်း သို့မဟုတ် စည်းကမ်းသတ်မှတ်ခြင်း ပြုသင့်သလော။ ကျွန်ုပ်တို့သည် ကျန်းမာရေးဆိုင်ရာ အသိပညာအချို့ကို မြှင့်တင်သင့်ပြီး စားသောက်ခြင်းနှင့် လူနေမှုဘဝ အလေ့အထများ၏ စည်းမျဉ်းများသည် ကျန်းမာရေးကို ဦးစားပေးသင့်သည်ဟူသော စိတ်ကူးကို ဖြန့်ဝေသင့်သလော” ဟု ဆိုကြသည်။ သင်သည် ငရုတ်သီးနှင့် အစပ်များ စားခြင်းသည် ကျန်းမာရေးနှင့်မညီညွတ်ကြောင်း သေချာပေါက် ပြောနိုင်သလော။ ၎င်းတို့သည် ဤနည်းအတိုင်း နှစ်ပေါင်းများစွာ၊ မျိုးဆက်များစွာ စားသုံးလာခဲ့ကြပြီး အတော်အတန် ကျန်းမာကြသည်။ အထူးသဖြင့် အချို့နေရာများရှိ လူများသည် ငရုတ်သီးကို အခြားသူများ လက်ခံရန် ခက်ခဲသည့် အတိုင်းအတာတစ်ခုအထိ စားသုံးကြသည်။ လူတို့သည် ၎င်းတို့၏ အစာ မည်မျှစပ်သည်ကို မြင်သည့်အခါ စိတ်မသက်မသာ ခံစားကြရသော်လည်း ဤပုဂ္ဂိုလ်များသည် သန်မာကြသည်၊ ကျန်းမာကြသည်၊ အတော်အတန် ကိုယ်လုံးကိုယ်ပေါက် တောင့်တင်းကြပြီး ကာယအလုပ်လုပ်ရန် ဇွဲနှင့် ခံနိုင်ရည်တို့ ရှိကြသည်။ ဤသည်မှာ ငရုတ်သီးစားခြင်းသည် အန္တရာယ် မရှိကြောင်းနှင့် ကျန်းမာရေးကို မထိခိုက်ကြောင်း သက်သေပြသည်၊ ၎င်းတို့၏ အစပ်များသော အစားအစာသည်လည်း ကျန်းမာရေး စည်းမျဉ်းများနှင့် ကိုက်ညီပုံရသည်။ ငရုတ်သီးစားခြင်းကို နှစ်သက်ခြင်းသည် ပင်ကိုအားဖြင့်ဖြစ်သော လူနေမှုဘဝ အလေ့အထတစ်ခု ဖြစ်သည်။ အခြားသူများ ယင်းကို နှစ်သက်သည်ဖြစ်စေ၊ လက်ခံနိုင်သည်ဖြစ်စေ လူတစ်ဦးက ယင်းကို နှစ်သက်ပြီး အခြားသူများ၏ အသက်တာများ သို့မဟုတ် အစားအစာများကို မထိခိုက်သရွေ့ ထိုအလေ့အထကို ဆက်လက် ထိန်းသိမ်းထားနိုင်သည်။ ဤအရာ၌ အမှားအမှန်မရှိပေ၊ ယင်းမှာ အဓိကပြဿနာတစ်ရပ်မဟုတ်ဘဲ ဘုရားအိမ်တော်က ယင်းနှင့်ပတ်သက်၍ မည်သည့်ဝေဖန်ဆုံးဖြတ်ခြင်းမျှ မပြုလုပ်ပေ။ အချို့လူများက “ငရုတ်သီးစားခြင်းသည် အစာအိမ်အတွက် မကောင်းပါ” ဟု ဆိုကြသည်။ သင်သည် သင်၏ အစာအိမ်အတွက် မကောင်းမည်ကို စိုးရိမ်ပါက သင်သည် ၎င်းတို့ကို မစားရန် ရိုးရှင်းစွာ ရွေးချယ်နိုင်သည်။ အခြားသူများသည် အစပ်ကို အချိန်ကြာမြင့်စွာ စားသုံးလာခဲ့ပြီး ၎င်းတို့၏ အစာအိမ်သည် မသက်မသာဖြစ်လာပါက ၎င်းတို့သည် မိမိတို့ဘာသာ ခံစားသိရှိသဖြင့် မိမိတို့၏ ကိုယ်ပိုင်ရွေးချယ်မှုကို ပြုလုပ်ကြလိမ့်မည်။ သို့ဖြစ်၍ လူတိုင်းတွင် ကိုယ့်အကြိုက်နှင့်ကိုယ် ရှိကြသည်၊ ၎င်းတို့သည် ချို၊ ချဉ်၊ ခါး သို့မဟုတ် စပ်သောအရသာများကို နှစ်သက်သည်ဖြစ်စေ ယင်းမှာ ပုဂ္ဂိုလ်ရေးဆိုင်ရာ ကိစ္စရပ်တစ်ခု ဖြစ်သည်။ သင် မည်သို့စားသည်ဖြစ်စေ၊ မည်သည့်အတိုင်းအတာအထိ စားသည်ဖြစ်စေ အပြစ်ရှိသည်ဟု ခံစားရန် မလိုအပ်ပေ။ အခါအခွင့်သင့်သရွေ့ သင်သည် စိုးရိမ်မှုအားလုံးကို ဘေးဖယ်ထားပြီး စိတ်လွတ်ကိုယ်လွတ် စားသုံးနိုင်သည်။ ငါနှင့်သက်ဆိုင်သလောက်မူ ဤအရာနှင့်ပတ်သက်၍ မည်သည့်သတ်မှတ်ချက်များမျှ မရှိပေ။ မည်သူမဆို ယင်းနှင့်ပတ်သက်၍ တစ်စုံတစ်ရာ ပြောစရာရှိပါက သင်သည် “ဤသည်မှာ ကျွန်ုပ်၏ လွတ်လပ်ခွင့်ဖြစ်သည်၊ ဤသည်မှာ ကျွန်ုပ်၏ အခွင့်အရေးဖြစ်ပြီး သင် ဝင်ရောက်စွက်ဖက်ရန် မလိုအပ်ပေ။ ကျွန်ုပ်သည် ငရုတ်သီးချည်းသက်သက်ပါသော အစာတစ်နပ်ကို စားလျှင်ပင် ယင်းမှာ သင်နှင့်မဆိုင်။ ကျွန်ုပ်၏ အစာအိမ်ကို ထိခိုက်သည်ဖြစ်စေ၊ မထိခိုက်သည်ဖြစ်စေမှာ ကိုယ့်တာဝန်နှင့်ကိုယ်သာ ဖြစ်ပြီး သင်၏ တာဝန်မဟုတ်ပါ” ဟု တုံ့ပြန်နိုင်သည်။ ဤသို့ ပြောဆိုလျှင် ရနိုင်သလော။ (ရနိုင်ပါသည်။) ထိုအရာသည် သင်၏ ကိုယ်ပိုင်ကိစ္စသာ ဖြစ်သည်၊ ယင်းမှာ အခြားသူများနှင့် မသက်ဆိုင်သကဲ့သို့ ငါနှင့်လည်း မသက်ဆိုင်ပေ။ အဘယ်ကြောင့် ငါ ဤသို့ပြောရသနည်း။ အကြောင်းမှာ ဤကိစ္စရပ်သည် သမ္မာတရားနှင့် မသက်ဆိုင်၊ ဖောက်ပြန်ပျက်စီးသော စိတ်သဘောထားနှင့် မသက်ဆိုင်ဘဲ ဘုရားသခင်က လူတို့ကို ကယ်တင်ရာတွင် ဖြေရှင်းရန် ရည်ရွယ်သော ပြဿနာများထဲမှ တစ်ခုမဟုတ်သောကြောင့် ဖြစ်သည်။ ထို့ကြောင့် လူနေမှုဘဝ အလေ့အထများ၏ ပြဿနာများနှင့်ပတ်သက်လာလျှင် ငါတို့သည် ယင်းတို့ကို လျစ်လျူရှုနိုင်သည်။ ဤသည်မှာ အပြုသဘောဆောင်သောအရာတစ်ခု မဟုတ်သော်လည်း အပျက်သဘောဆောင်သောအရာတစ်ခုလည်း မဟုတ်ပေ၊ ယင်းမှာ အချို့လူများ၏ နှစ်သက်မှုတစ်ခုမျှသာ ဖြစ်သည်။

ဧည့်ခံဝတ်ပြုသူအချို့သည် ငရုတ်သီးစားခြင်းကို ကြိုက်နှစ်သက်ကြပြီး တစ်နေ့သုံးနပ်လုံး အစပ် စားလိုကြသည်။ သို့ဖြစ်၍ ၎င်းတို့ ချက်ပြုတ်သည့်အခါ အနပ်တိုင်းအတွက် အစပ်ဟင်းများ ပြင်ဆင်ကြသည်။ ငရုတ်သီး တစ်ခါမျှ မစားဖူးသော အချို့လူများက မစားနိုင်ကြဘဲ အစပ်မပါသော ဟင်းလျာများ ချက်ပြုတ်ပေးရန် အကြံပြုကြသည်။ သို့သော် ချက်ပြုတ်သူက ဤအရာကို လက်မခံလိုဘဲ “ယင်းမှာ အလုပ်ဖြစ်မည်မဟုတ်။ ကျွန်ုပ်သည် အစပ်စားရသည်ကို ကျင့်သားရနေပြီ။ အစပ်မချက်ပါက ကျွန်ုပ်စား၍မကောင်းပါ။ သင်သည် အစပ်စားခြင်းကို လေ့ကျင့်သင့်သည်။ အချိန်အတန်ကြာ စားပြီးသည့်နောက်တွင် သင်သည် ကျင့်သားရပြီး အစပ်ကြောက်တော့မည် မဟုတ်ပါ” ဟု ဆိုသည်။ ဤသည်မှာ အဘယ်ပြဿနာဖြစ်သနည်း။ (၎င်းတို့၏ လူ့သဘာဝ၌ ပြဿနာရှိပါသည်။) ၎င်းတို့၏ လူ့သဘာဝ၌ မည်သို့သော ပြဿနာမျိုး ရှိသနည်း။ (၎င်းတို့သည် အခြားသူများအပေါ် အတင်းအကျပ်ပြုခိုင်းခြင်း ဖြစ်ပါသည်။) အခြားသူများအပေါ် အတင်းအကျပ် ပြုခိုင်းခြင်းသည် မကောင်းပေ။ ဤသည်မှာ အခြားသူများ မလုပ်လိုသည့်အရာကို လုပ်ရန် အတင်းအကျပ်ခိုင်းစေခြင်း မဟုတ်လော။ ထိုသို့သော လူများသည် မိမိတို့ ကြိုက်နှစ်သက်သည့်အရာက အကောင်းဆုံး ဖြစ်သည်ဟုလည်းကောင်း၊ အခြားသူများကလည်း လက်ခံရမည်ဟုလည်းကောင်း ယုံကြည်လျက် မိမိတို့လုပ်ဆောင်သမျှ အရာတိုင်း၏ ဗဟိုတွင် မိမိတို့ကိုယ်ကို ထားရန် ကြိုးပမ်းကြသည်။ ၎င်းတို့က တစ်စုံတစ်ခုကို ကြိုက်နှစ်သက်လျှင် အခြားသူများကိုလည်း ထိုအရာကို ကြိုက်နှစ်သက်စေရန် ကြိုးပမ်းသည်၊ လူတိုင်းက ၎င်းတို့ကို စိတ်ကျေနပ်စေရမည်။ ဤသည်မှာ တစ်ကိုယ်ကောင်းဆန်ပြီး ယုတ်ညံ့ခြင်း မဟုတ်လော။ ၎င်းတို့သည် အခြားသူများအပေါ် အတင်းအကျပ် ပြုခိုင်းသည်သာမက ယင်းထဲတွင် မလိုမုန်းထားခြင်း အနည်းငယ်လည်း ပါရှိသည်။ ဤလူစားမျိုး၏ လူ့သဘာဝသည် ကောင်းမွန်သလော။ (မကောင်းမွန်ပါ။) ညံ့ဖျင်းသော လူ့သဘာဝရှိသည့် လူများသည် အခြားသူများထံ အကျိုးကျေးဇူး မဆောင်ကြဉ်းနိုင်ပေ၊ ၎င်းတို့သည် နာကျင်မှုကိုသာ ဖြစ်စေနိုင်ပြီး ဆိုးရွားသော ကိစ္စများတွင်မူ ဘေးအန္တရာယ်ကိုပင် ဆောင်ကြဉ်းနိုင်သည်။ ထိုသို့သော လူများသည် အလွန်အမင်း တစ်ကိုယ်ကောင်းဆန်ပြီး ယုတ်ညံ့သည့်အပြင် အကျိုးအကြောင်းမရှိ ရိုင်းစိုင်းကြသည်။ ဆင်ခြင်တုံတရားရှိသော လူတစ်ဦးဆိုလျှင် ၎င်းက “ကျွန်ုပ်သည် အစပ်ကို ကြိုက်သော်လည်း အချို့သူတို့မှာမူ မနှစ်သက်ကြပေ။ ထို့ကြောင့် ကျွန်ုပ် ချက်ပြုတ်သောအခါ ကျွန်ုပ်သည် မိမိအတွက်ကိုသာ ထည့်သွင်းစဉ်းစား၍ မဖြစ်ပေ။ ကျွန်ုပ်နှင့် အခြားသူအားလုံးပါ စိတ်ကျေနပ်ကြစေရန်၊ စပ်သောဟင်းလျာများနှင့် မစပ်သောဟင်းလျာများ နှစ်မျိုးစလုံးကို ကျွန်ုပ် ပြင်ဆင်ရန် လိုအပ်၏။ ကျွန်ုပ်၏ တာဝန်ကို ထမ်းဆောင်သည့်အခါတွင် ကျွန်ုပ်လိုက်နာသော စည်းမျဉ်းမှာ လူတိုင်းကို စိတ်ကျေနပ်စေရန်၊ လူတိုင်း ကောင်းစွာ စားသုံးနိုင်ဖို့ သေချာစေရန်နှင့် မိမိကိုယ်ကိုသာ အဓိကမထားရန် ဖြစ်၏။ ကျွန်ုပ်သည် ဤတာဝန်ကို စည်းမျဉ်းများနှင့်အညီ ကောင်းမွန်စွာ ထမ်းဆောင်ရပေမည်” ဟု ပြောပေမည်။ ဤကဲ့သို့သော လူတစ်ဦးကို သင်တို့ မည်သို့ထင်သနည်း။ (၎င်းတို့၏ လူ့သဘာဝသည် အတော်အသင့် ကောင်းမွန်ပါသည်။) မည်သည့်နည်းလမ်းများဖြင့် ကောင်းမွန်ပါသနည်း။ (၎င်းတို့သည် အခြားသူများကို ဂရုစိုက်ရကောင်းမှန်း၊ ကြည့်ရှုစောင့်ရှောက်ရကောင်းမှန်း သိရှိကြသည်။ ၎င်းတို့သည် မိမိတို့ကိုယ်ကိုသာ စိတ်ကျေနပ်စေခြင်း မဟုတ်ပါ။) ၎င်းတို့သည် အတော်အသင့် ကြင်နာတတ်ကြသည် မဟုတ်လော။ ကောင်းမွန်သော လူ့သဘာဝတွင် ကြင်နာမှု၊ အခြားသူများကို ထောက်ထားစာနာခြင်းနှင့် ကြည့်ရှုစောင့်ရှောက်ခြင်းတို့ ပါဝင်သည်။ ဤသည်မှာ လူတစ်ဦး၏ လူ့သဘာဝနှင့် သက်ဆိုင်သလော။ (သက်ဆိုင်ပါသည်။) လူတစ်ဦး၏ အသက်အရွယ်၊ ကျားမ၊ သို့မဟုတ် စိတ်ရင်း မည်သို့ပင်ဖြစ်စေကာမူ ၎င်းတို့၌ ကောင်းမွန်သော လူ့သဘာဝရှိပါက ၎င်းတို့၏ ပတ်ဝန်းကျင်ရှိ လူများနှင့် ၎င်းတို့နှင့် ဆက်ဆံသူများသည် အကျိုးကျေးဇူးရရှိကြလိမ့်မည်။ ပို၍ တိတိကျကျဆိုရလျှင် အချို့လူများသည် ၎င်းတို့ထံမှ ထောက်ပံ့ကူညီမှု ရရှိကြမည်ဖြစ်ပြီး အခြားသူများမှာမူ နေ့စဉ်အသက်တာတွင် ၎င်းတို့၏ ကြည့်ရှုစောင့်ရှောက်ခြင်းကို ခံကြရလိမ့်မည်။ ဤသည်မှာ ကောင်းမွန်သော လူ့သဘာဝ၏ သရုပ်သကန်တစ်ခု ဖြစ်သည်။

အစပ်ကို အလွန်နှစ်သက်သော လူများလည်း ရှိကြသည်မှာ ၎င်းတို့သည် တာဝန်ထမ်းဆောင်ရန် အပြင်သို့ ထွက်သည့်အခါတွင်ပင် စားသောက်ချိန်ရောက်လျှင် အစပ်ဟင်းလျာများ ရနိုင်သည့်နေရာများကို တကူးတက ရှာဖွေကြသည်။ ၎င်းတို့သည် အစပ်မပါသော အစားအစာတစ်နပ် စားရလျှင် စိတ်ထဲ၌ မသက်မသာ ခံစားရကာ “ဤနေရာတွင် အစပ်စာ မစားရသည့်အတွက် တာဝန်ထမ်းဆောင်ရခြင်းသည် အမှန်တကယ် စိတ်ဝင်စားဖွယ်မကောင်းပါ။ အိမ်ပြန်လိုပါသည်၊ အိမ်တွင် အနပ်တိုင်း အစပ်စာ စားသုံးနိုင်ပြီး ထိုသို့မှသာလျှင် အားရကျေနပ်ဖွယ်ဖြစ်မည်။ ငရုတ်သီးမပါလျှင် မည်သည့်အရာမျှ အရသာမရှိပေ၊ ဝက်သားနှပ်ပင်လျှင် ၎င်း၏အရသာ ပျောက်သွားပါသည်။ မည်သို့ပြုလုပ်ရမည်နည်း” ဟု စဉ်းစားကြသည်။ သို့ဖြစ်၍ ၎င်းတို့သည် ငရုတ်သီးစားနိုင်သည့် နေရာများကို ဆက်လက်ရှာဖွေကြသည်။ နောက်ပိုင်းတွင် ၎င်းတို့သည် စပ်သောအစားအစာများကို အထူးပြုရောင်းချသော စားသောက်ဆိုင် တစ်ဆိုင်အကြောင်း သိရှိသွားသည်၊ သို့ရာတွင် ထိုနေရာသည် ကားဖြင့် တစ်နာရီကျော် မောင်းရသည်။ ၎င်းတို့က “မည်မျှပင်ဝေးစေကာမူ သွားရမည်။ ယနေ့ အစပ်မစားရလျှင် တာဝန်မထမ်းဆောင်တော့ပါ။ အစပ်စာမစားရလျှင် ကျွန်ုပ်စိတ်မသက်မသာဖြစ်ပြီး ယနေ့တစ်နေ့တာကို ဖြတ်ကျော်နိုင်မည်မဟုတ်ပါ” ဟု ဆိုကြသည်။ တစ်စုံတစ်ဦးက ၎င်းတို့အား “ယခု အပြင်ဘက်တွင် ပတ်ဝန်းကျင်က အန္တရာယ်များပြီး ဤဒေသသည်လည်း အတော်အတန် မတည်မငြိမ်ဖြစ်နေသည်။ ထိုနေရာသို့ သွားမစားကြစို့နှင့်” ဟု ပြောသည်။ သို့သော် ၎င်းတို့က နားမထောင်ဘဲ “မည်သည့်အရာကို ကြောက်စရာ ရှိသနည်း။ စားသုံးရေးသည် အဓိကသာဖြစ်သည်။ သင်သည်လည်း ပုံမှန် အပြင်ထွက်သည်သာ မဟုတ်လော။ မကြောက်နှင့်၊ မည်သည့်အရာမျှ ဖြစ်မည်မဟုတ်ပါ၊ ဘုရားသခင်သည် ကျွန်ုပ်တို့ကို ကာကွယ်တော်မူလိမ့်မည်” ဟု ဆိုကြသည်။ စားပြီးသည့်နောက်တွင် ၎င်းတို့သည် ကျေနပ်သွားကြသည်။ ၎င်းတို့ ငရုတ်သီးနှင့် မိမိတို့တောင့်တသော အရသာရှိသည့် အစားအစာကို စားရသရွေ့ အရာအားလုံးသည် အဆင်ပြေသွားပြီး အိပ်နေစဉ်မှာပင် ပါးစပ်မစေ့နိုင်အောင် ပြုံးလျက်ရှိကြသည်။ ဤသည်မှာ မည်သို့သော လူ့သဘာဝမျိုးဖြစ်သနည်း။ (တစ်ကိုယ်ကောင်းဆန်ပြီး ယုတ်ညံ့သော လူ့သဘာဝ ဖြစ်ပါသည်။) တစ်ကိုယ်ကောင်းဆန်ပြီး ယုတ်ညံ့သည့်အပြင် အခြားသော လက္ခဏာတစ်ရပ်လည်း ရှိသေးသည်။ ၎င်းတို့သည် တစ်စုံတစ်ခုကို လုပ်ချင်သည့်အခါ ပကတိ ပတ်ဝန်းကျင် သို့မဟုတ် အခြေအနေများကို ထည့်မစဉ်းစားကြပေ။ ၎င်းတို့၏ ကိုယ်ပိုင်လိုအင်ဆန္ဒများနှင့် နှစ်သက်မှုများကို ဖြည့်ဆည်းနိုင်သရွေ့ ကျန်သည့်အရာအားလုံးသည် အရေးမကြီးပေ။ ၎င်းတို့သည် မိမိတို့စားချင်သော အရာတစ်ခုကို တစ်ကိုက်စားရရန်အတွက် မည်သည့်အဖိုးအခကိုမဆို ပေးရန် ဆန္ဒရှိကြသည်၊ ကြီးမားသော အဖိုးအခကို ပေးရမည်ဆိုလျှင်ပင် မိမိတို့၏ပန်းတိုင် ဖြစ်မြောက်အောင်မြင်ရန် မည်သည့်အရာကိုမဆို လုပ်ဆောင်ကြလိမ့်မည်။ ဤသည်မှာ တစ်ကိုယ်ကောင်းဆန်ပြီး ယုတ်ညံ့ခြင်းမျှသာလော။ ဤသည်မှာ တစ်ဇွတ်ထိုးဆန်ခြင်းလည်း ဖြစ်သည်မဟုတ်လော။ (ဟုတ်ပါသည်။) ဤသည်မှာ အလွန်အမင်း တစ်ဇွတ်ထိုးဆန်ခြင်းပင်တည်း။ ၎င်းတို့နှင့် အတူရှိသော မည်သူမဆိုသည် ၎င်းတို့၏ တစ်ဇွတ်ထိုးဆန်ခြင်းအတွက် အဖိုးအခပေးရပြီး ထိုအကြောင်းကြောင့် နစ်နာမှုများကို ခံစားရသည်။ ၎င်းတို့ပြောသမျှသည် အတည်ဖြစ်ပြီး ၎င်းတို့လုပ်ချင်သည့်အရာတိုင်းသည် ဖြစ်မြောက်ရသည်။ ယနေ့ ၎င်းတို့ စိတ်မကြည်သဖြင့် ထမင်းမစားချင်ကြပေ။ အဘယ်ကြောင့် မစားသနည်းဟု မေးသောအခါ ၎င်းတို့က “ကျွန်ုပ် ယနေ့ စိတ်ဆိုးနေပါသည်၊ စိတ်မကြည်ပါ၊ ထို့ကြောင့် ထမင်းမစားချင်ပါ” ဟု ဆိုသည်။ ညနေပိုင်း အနားယူချိန်ရောက်သောအခါတွင်လည်း ၎င်းတို့သည် မအိပ်စက်ကြဘဲ အိပ်မပျော်သောကြောင့် မိမိတို့၏ စိတ်ခံစားချက်များကို ဖော်ပြရန် သီချင်းဆိုချင်သည်ဟု ဆိုကြသည်။ တစ်စုံတစ်ဦးက ၎င်းတို့အား “သင် သီချင်းဆိုလျှင် အခြားသူများ၏ အိပ်စက်ခြင်းကို ထိခိုက်စေလိမ့်မည်” ဟု ဖျောင်းဖျရန် ကြိုးစားသည်။ ၎င်းတို့က “ကျွန်ုပ် အခု စိတ်မကြည်ပါ။ သီချင်းဆိုချင်ပါသည်။ သင်တို့ အိပ်ပျော်နိုင်ခြင်း ရှိမရှိသည် ကျွန်ုပ်နှင့်မဆိုင်ပါ။ ကျွန်ုပ် စိတ်မကြည်သော်လည်း ကျွန်ုပ်ကို နှစ်သိမ့်ပေးသူ၊ ဂရုစိုက်ပေးသူ တစ်ယောက်မျှ မရှိပါ၊ သင်တို့အားလုံး အလွန်ပင် တစ်ကိုယ်ကောင်းဆန်ကြသည်” ဟု တုံ့ပြန်သည်။ ဤသည်မှာ တစ်ဇွတ်ထိုးဆန်ခြင်း မဟုတ်လော။ ၎င်းတို့သည် အလွန်အမင်း တစ်ဇွတ်ထိုးဆန်တတ်ကြသည်၊ မိမိတို့ကိုယ်ကို မထိန်းကျောင်းကြဘဲ စိတ်ရှိတိုင်း ပြုမူကြသည်။ ၎င်းတို့ ပျော်ရွှင်နေသည့်အခါ အခြားသူများပြောသည့် မည်သည့်စကားကမျှ ၎င်းတို့ကို စိတ်အနှောင့်အယှက် မပေးဘဲ “ကျွန်ုပ်က စိတ်သဘောထားကြီးသူတစ်ဦးပါ။ ဇီဇာမကြောင်တတ်ပါ” ဟုပင် ဆိုကြသည်။ သို့သော် ၎င်းတို့ မပျော်ရွှင်သည့်အခါတွင်မူ လူတိုင်းသည် မိမိတို့၏ စကားလုံးများကို အလွန်အမင်း သတိထားရပြီး ၎င်းတို့ကို စိတ်အနှောင့်အယှက်မပေးမိစေရန် ကြိုးစားရသည်၊ အကြောင်းမှာ ထိုသို့ပြုလုပ်မိပါက ကြီးမားသော ပြဿနာဆီသို့ ဦးတည်သွားနိုင်သောကြောင့် ဖြစ်သည်။ ၎င်းတို့သည် ဒေါသထွက်သောင်းကျန်းခြင်း၊ ပစ္စည်းများကို ရိုက်ခွဲခြင်း၊ အစာမစားဘဲ ငြင်းဆန်ခြင်းတို့ကိုပင် ပြုလုပ်ကောင်းပြုလုပ်ပေမည်။ ပို၍ဆိုးရွားသော ကိစ္စများတွင်မူ ၎င်းတို့သည် မိမိတို့၏ တာဝန်ကို စွန့်လွှတ်ကာ အလုပ်ကို ရပ်ပစ်ပြီး အိမ်ပြန်လိုကြမည်ဖြစ်၍ တစ်ချိန်တည်းတွင် “သင်တို့ထဲမှ တစ်ယောက်မျှ ကျွန်ုပ်ကို ကောင်းစွာမဆက်ဆံကြပေ၊ သင်တို့အားလုံး ကျွန်ုပ်ကို အနိုင်ကျင့်နေကြသည်။ လောကတွင် လူကောင်းဟူ၍ မရှိပေ” ဟု ဆိုကြပေမည်။ ဤသည်မှာ တစ်ဇွတ်ထိုးဆန်ခြင်း မဟုတ်လော။ (ဟုတ်ပါသည်။) တစ်ဇွတ်ထိုးဆန်ခြင်းသည် လူတစ်ဦး၏ လူ့သဘာဝအတွင်းရှိ ပြဿနာတစ်ခုလော။ (ဟုတ်ပါသည်။) ၎င်းတို့သည် အလွန်အမင်း တစ်ဇွတ်ထိုးဆန်ကြသည်၊ လူတိုင်းက ၎င်းတို့ကို ဖြည့်ဆည်းပေးရပြီး အမှုအရာများ ၎င်းတို့အလိုအတိုင်း မဖြစ်လာပါက ချက်ချင်းပင် ရန်လိုလာကာ ၎င်းတို့၏ ပေါက်ကွဲလွယ်သော ဒေါသသည် ထွက်ပေါ်လာသည်။ မည်သူမျှ ၎င်းတို့ကို မဆန့်ကျင်နိုင်ဘဲ လူတိုင်းက ၎င်းတို့ကို ချော့မော့ဆက်ဆံရသည်။ ၎င်းတို့သည် အသက်မငယ်တော့သော်လည်း ၎င်းတို့၏ လူ့သဘာဝသည် ကလေးတစ်ဦးကဲ့သို့ မရင့်ကျက်ဘဲ ရှိနေဆဲဖြစ်သည်။ ၎င်းတို့ မည်သည့်နေရာတွင် တာဝန်ထမ်းဆောင်သည်ဖြစ်စေ လူအများဆိုင်ရာ စည်းမျဉ်းများကို ဘယ်သောအခါမျှ မလိုက်နာကြပေ။ ၎င်းတို့ ပျော်ရွှင်ပြီး စကားပြောချင်သည့်အခါ လူတိုင်းက နားထောင်ပေးရပြီး တစ်စုံတစ်ဦးက နားမထောင်ပါက ထိုသူကို ရန်ငြိုးထားသည်။ သင်က ၎င်းတို့နှင့် စကားပြောသည့်အခါ ပြုံးပြရသည်၊ သင်သည် မျက်နှာသေဖြင့် နားထောင်လိုစိတ်မရှိပုံပြပါက ၎င်းတို့သည် ဒေါသထွက်ပြီး စိတ်တိုကြသည်။ အသင်းတော်၌ ၎င်းတို့သည် အခြားသူများ၏ ပုံမှန် လူနေမှုဘဝ လုပ်ရိုးလုပ်စဉ်များကို မည်သို့ထိခိုက်စေသည်ကို ဂရုမစိုက်ဘဲ မိမိတို့လုပ်ချင်သည့်အရာကို လုပ်ချင်သည့်အချိန်တွင် လုပ်ဆောင်ကြသည်။ ၎င်းတို့ သက်သောင့်သက်သာရှိပြီး စိတ်ကြည်သရွေ့ ကျန်သည့်အရာအားလုံးသည် ၎င်းတို့အတွက် အရေးမကြီးဘဲ အခြားသူများကိုလည်း မည်သည့်ကန့်ကွက်ချက်မျှ တင်ပြခွင့်မပြုပေ။ တစ်စုံတစ်ဦးက စက်ဆုပ်ရွံရှာမှု သို့မဟုတ် မပျော်ရွှင်မှုကို ပြသရန် ကန့်ကွက်ချက်တစ်ခု တင်ပြပါက ၎င်းတို့ကို ဒေါသထွက်စေပြီး ထိုကိစ္စကို အဆုံးမသတ်တော့ပေ။ ဤကဲ့သို့သော လူအချို့သည် ငယ်ရွယ်ပြီး မရင့်ကျက်သော လူ့သဘာဝရှိသော်လည်း အချို့မှာမူ အသက်လေးဆယ်၊ ငါးဆယ် သို့မဟုတ် ခုနစ်ဆယ်၊ ရှစ်ဆယ်ပင် ရှိနေကြပြီး အထူးသဖြင့် တစ်ဇွတ်ထိုးဆန်လျက် အသက်ကြီးသည်အထိ ဤသို့သော လူ့သဘာဝမျိုး ရှိနေဆဲဖြစ်သည်။ ပတ်ဝန်းကျင် သို့မဟုတ် အခြေအနေများက ခွင့်ပြုသည်ဖြစ်စေ၊ မပြုသည်ဖြစ်စေ ၎င်းတို့သည် မိမိတို့လုပ်ချင်သည့်အရာကို လုပ်ဆောင်ကြသည်။ ဥပမာအားဖြင့် ၎င်းတို့သည် ရေချိုးရန် အခြေအနေမပေးသော နေရာတစ်ခုသို့ ရောက်ရှိသွားသော်လည်း “ကျွန်ုပ်သည် အိမ်တွင် နေ့တိုင်း ရေချိုးပါသည်၊ ရေမချိုးဘဲ မနေနိုင်ပါ” ဟု ဆိုလျက် မရမက ရေချိုးကြသည်။ သို့သော် ဤနေရာတွင် သင့်လျော်သော အခြေအနေများ မရှိပေ၊ တစ်ပတ်တစ်ခါ ရေချိုးရန်ပင် ခက်ခဲသည်။ သို့ဆိုလျှင် သင် မည်သို့ပြုလုပ်မည်နည်း။ ပုံမှန် လူ့သဘာဝရှိသော လူတစ်ဦးသည် ဤအခြေအနေကို မည်သို့ချဉ်းကပ်ပြီး ကိုင်တွယ်ရမည်ကို သိရှိသည်။ ရာသီဥတုက စိုစွတ်ပြီး အိုက်စပ်နေပါက ညအချိန်တွင် ရေဇလုံတစ်လုံးဖြင့် ကိုယ်ကို အကြမ်းဖျင်း သုတ်လိုက်ရုံဖြင့် အိပ်စက်နိုင်ရန် လုံလောက်သည်၊ ဤသည်မှာ ခံနိုင်ရည်ရှိသော အခက်အခဲတစ်ခု ဖြစ်သည်။ ကျော်လွှားရန် မဖြစ်နိုင်သည်တော့ မဟုတ်ပေ။ သို့သော် ဤလူစားမျိုးသည် ထိုသို့ မကိုင်တွယ်နိုင်ပေ၊ ရေမချိုးရလျှင် ၎င်းတို့သည် အိပ်မပျော်နိုင်၊ စားမဝင်နိုင်ဘဲ ကြီးမားသော အရှက်ရခြင်းကို ခံနေရသည့်အလား အသက်ပင်မရှင်နိုင်ဟု ခံစားရသည်။ ၎င်းတို့သည် မည်မျှအထိ တစ်ဇွတ်ထိုးဆန်ကြသနည်း။ ၎င်းတို့သည် အလွန် တစ်ဇွတ်ထိုးဆန်သောကြောင့် မိမိတို့၏ တာဝန်ကို ပုံမှန်မထမ်းဆောင်နိုင်၊ အခြားသူများနှင့် ပုံမှန် မဆက်ဆံနိုင် သို့မဟုတ် သင့်မြတ်အောင် မနေနိုင်၊ ပုံမှန်လူတစ်ဦးကဲ့သို့ပင် အသက်မရှင်နိုင်ကြပေ။ အခြားသူများအတွက်မူ ဤလူစားမျိုးသည် စိတ်ရောဂါရှိသူတစ်ဦးနှင့် တူသည်။ ၎င်းတို့သည် တစ်စုံတစ်ဦးနှင့် ကောင်းမွန်သော ဆက်ဆံရေးရှိပါက လူတစ်ဦးတည်းဖြစ်သည့်အလား ခွဲခြား၍မရအောင် ရင်းနှီးကြသည်။ သို့သော် ၎င်းတို့သည် တစ်စုံတစ်ဦးနှင့် မကောင်းသော ဆက်ဆံရေးရှိလျှင် သို့မဟုတ် တစ်စုံတစ်ဦးက ၎င်းတို့ကို စော်ကားခဲ့ဖူးလျှင် ထိုသူနှင့် တစ်သက်လုံး စကားမပြောဘဲ နေနိုင်သည်။ ထိုသူကို တွေ့သည့်အခါ ၎င်းတို့သည် မျက်စောင်းထိုးပြီး မျက်နှာသည် ရန်သူတစ်ဦးကို ရင်ဆိုင်နေရသည့်အလား ချက်ချင်း ညှိုးမှောင်သွားသည်၊ အလွန်အမင်း အစွန်းရောက်ကြသည်။ ဤလူစားမျိုး၏ လူ့သဘာဝသည် ပုံမှန်ဖြစ်သလော။ (မဖြစ်ပါ။) ဤလူစားမျိုးသည် အလွန်အမင်း တစ်ဇွတ်ထိုးဆန်ပြီး ၎င်းတို့၏ လူ့သဘာဝသည် ပုံမှန်မဟုတ်ပေ။ ‘ပုံမှန်မဟုတ်’ ဟူသည်မှာ အဘယ်အရာကို ဆိုလိုသနည်း။ ၎င်းတို့၌ ပုံမှန် လူ့သဘာဝ ကင်းမဲ့သည်ဟု ဆိုလိုသည်။ ထိုသို့သော လူများသည် အခြားသူများနှင့် ပုံမှန်ဆက်ဆံရေးနှင့် ပူးပေါင်းဆောင်ရွက်မှုများ ရှိနိုင်သလော။ ၎င်းတို့သည် လူအများကြားတွင် ပုံမှန်နေထိုင်နိုင်သလော။ ၎င်းတို့သည် မိမိတို့၏ တာဝန်ကို ကောင်းမွန်စွာ ထမ်းဆောင်နိုင်သလော။ (မထမ်းဆောင်နိုင်ပါ။) ၎င်းတို့သည် မိမိတို့၏ ပန်းတိုင်ကို ရောက်ရှိလိုသရွေ့ ယင်းမှာ အစားအစာတစ်နပ်စားခြင်းဖြစ်စေ၊ ကောင်းမွန်သော ဆက်ဆံမှုကို ခံစားခြင်းဖြစ်စေ၊ မိမိတို့လုပ်လိုသည့်အရာတစ်ခုကို လုပ်ဆောင်ခြင်းဖြစ်စေ ထိုအရာသည် ဖြည့်ဆည်းခြင်းခံရရမည်။ သို့မဟုတ်ပါက မိုးကောင်းကင် ပြိုကျလာသည့်အလား ၎င်းတို့၏ ကမ္ဘာကြီးသည် အဆုံးသတ်သွားသည့်အလား ခံစားရသည်။ ၎င်းတို့သည် စိတ်အနှောင့်အယှက် ဖြစ်လာပြီး “ဘုရားသခင်သည် ကျွန်ုပ်ကို ဤမျှ ဒုက္ခခံစားစေလျက် မည်သို့သော ပတ်ဝန်းကျင်မျိုးကို စီစဉ်ပေးထားပါသနည်း။ အခြားသူများသည် အဘယ်ကြောင့် ဤသို့သော ပတ်ဝန်းကျင်များနှင့် မကြုံတွေ့ရဘဲ ဤကဲ့သို့ ဒုက္ခမခံစားရပါသနည်း။ ကျွန်ုပ်တစ်ဦးတည်း အဘယ်ကြောင့် ဒုက္ခခံစားနေရပါသနည်း။ ဘုရားသခင်သည် ဘက်လိုက်သည်” ဟု ဆိုလျက် အခြားသူများကို စောဒကတက်ခြင်း၊ ပတ်ဝန်းကျင်ကို စောဒကတက်ခြင်း၊ ဘုရားသခင်ကိုပင် စောဒကတက်ခြင်းတို့ကို စတင်ပြုလုပ်ကြသည်။ သင်တို့ မြင်သည် မဟုတ်လော၊ ၎င်းတို့၏ မကောင်းဆိုးဝါးသဘာဝသည် ပေါ်ထွက်လာပြီ မဟုတ်လော။ ဤသို့သော လူ့သဘာဝမျိုးသည် စံချိန်မီပါသလော။ (မမီပါ။) ထိုသို့သော လူများကို ကိုင်တွယ်ဖြေရှင်းရန် လိုအပ်သည်။ ဤလူစားမျိုးကို မည်သို့ ကိုင်တွယ်ဖြေရှင်းသင့်သနည်း။ (၎င်းတို့ကို သာမန်အသင်းတော်တစ်ခုသို့ ပို့လိုက်ပါ။) ၎င်းတို့သည် မိမိတို့၏ တာဝန်ကို မထမ်းဆောင်နိုင်တော့သည့် အခြေအနေသို့ ရောက်ရှိသွားလျှင်၊ တာဝန်ထမ်းဆောင်သည့်အခါ အဖျက်အမှောင့် လုပ်ခြင်းများနှင့် နှောင့်ယှက်ခြင်းများကိုသာ ဖြစ်စေလျှင်၊ ၎င်းတို့ကို မြင်သောသူတိုင်းက စက်ဆုပ်ရွံရှာပြီး စိတ်အနှောင့်အယှက်ဖြစ်ကာ အခြားသူများကလည်း ၎င်းတို့နှင့် သင့်မြတ်အောင် မနေနိုင်တော့လျှင် ၎င်းတို့ကို ချက်ချင်း ပို့လိုက်သင့်သည်၊ ဤလူစားမျိုးသည် နံစော်သော ခွေးချေးနှင့်တူသည်။ တစ်ဇွတ်ထိုးဆန်ခြင်းတွင် တစ်ကိုယ်ကောင်းဆန်ခြင်း၊ ယုတ်ညံ့ခြင်းနှင့် အကျိုးအကြောင်းမရှိ ရိုင်းစိုင်းခြင်းတို့ ပါဝင်သည်။ တစ်ခါတစ်ရံတွင် အလွန်အမင်း တွက်ချက်တတ်ခြင်း၊ ကြမ်းတမ်းခြင်း၊ ရက်စက်ကြမ်းကြုတ်ခြင်းနှင့် မလိုမုန်းထားခြင်းတို့ပင် ပါဝင်သည်။ ဤလူစားမျိုးသည် အချိန်ကာလတစ်ခုအထိ တာဝန်ထမ်းဆောင်သည့်အခါ လူတိုင်းသည် အလွန်အမင်း နစ်နာကြရပြီး ၎င်းတို့ကို မြင်သော မည်သူမဆိုသည် ကြောက်ရွံ့ကြသည်။ သင်သည် ၎င်းတို့ကို ရှောင်ရှားပြီး ဒေါသမထွက်စေရန် ကြိုးစားပါက ၎င်းတို့က “သူခိုးကို ရှောင်နေသလား။ ကျွန်ုပ်က သင့်အား မည်သို့ စော်ကားမိသောကြောင့် ရှောင်ကြဉ်နေရပါသနည်း” ဟု ပြောစရာစကား ရှိနေဆဲဖြစ်သည်။ သို့သော် သင်သည် ၎င်းတို့ထံ ချဉ်းကပ်ပြီး တစ်စုံတစ်ခု ပြောရန် ကြိုးစားပါက ၎င်းတို့သည် သင်နှင့် ပုံမှန်စကားပြောဆိုခြင်းတွင် ပါဝင်မည်မဟုတ်သေးပေ။ ၎င်းတို့၌ ပုံမှန် လူ့သဘာဝ ကင်းမဲ့ပြီး ၎င်းတို့နှင့် ဆက်ဆံသူများသည် နှုတ်အားဖြင့် ထိခိုက်စေခြင်းကိုသာမက ၎င်းတို့၏ တည်ကြည်မှုကို ထိခိုက်စေခြင်း၊ စိတ်ပိုင်းဆိုင်ရာ ထိခိုက်စေခြင်း၊ ရုပ်ပိုင်းဆိုင်ရာ ထိခိုက်စေခြင်းအချို့ကိုပင် ခံစားကြရသည်။ ထိုသို့သော လူများသည် အမှန်တကယ် စက်ဆုပ်ရွံရှာဖွယ်ကောင်းပါ်တကား။ ၎င်းတို့ကို လူ့သဘာဝ မကောင်းသူများအဖြစ် အမျိုးအစား ခွဲခြားခြင်းသည် သင့်လျော်မည်လော။ (သင့်လျော်ပါမည်။) ဤလူစားမျိုးသည် လူ့သဘာဝမကောင်းဘဲ တစ်ဇွတ်ထိုးဆန်သည်။ တစ်ဇွတ်ထိုးဆန်သော လူတစ်ဦးသည် အခြားသူများကို တည်ဆောက်ပေးရန် ပျက်ကွက်သည်သာမက ၎င်းတို့ကို စိတ်အနှောင့်အယှက်ဖြစ်စေပြီး စက်ဆုပ်ရွံရှာစေကာ မည်သူနှင့်မျှ သင့်မြတ်အောင် မနေနိုင်ပေ။ ငါ့ကို ပြောလော့၊ တစ်ဇွတ်ထိုးဆန်သော လူတစ်ဦးသည် သမ္မာတရားကို လက်ခံနိုင်သလော။ (မလက်ခံနိုင်ပါ။) သို့ဆိုလျှင် ၎င်းတို့အတွင်း၌ မည်သို့သော စိတ်သဘောထားမျိုး ရှိသနည်း။ (စိတ်နှလုံးမာကျောခြင်း ဖြစ်ပါသည်။) ၎င်းတို့၏ စိတ်နှလုံးမာကျောခြင်းသည် သိသာထင်ရှားသော်လည်း အခြားအရာတစ်ခုလည်း ရှိသေးသည်၊ ၎င်းမှာ အဘယ်အရာနည်း။ (သမ္မာတရားကို အလွန်အမင်း မနှစ်မြို့ခြင်း ဖြစ်ပါသည်။) မှန်ပေသည်။ စိတ်နှလုံးမာကျောခြင်းနှင့် သမ္မာတရားကို အလွန်အမင်း မနှစ်မြို့ခြင်းဟူသော ဖောက်ပြန်ပျက်စီးသည့် စိတ်သဘောထားများ ရှိခြင်း၊ ဤသည်တို့မှာ တစ်ဇွတ်ထိုးဆန်သော လူများ၏ လက္ခဏာနှစ်ရပ် ဖြစ်သည်။ ဤလူစားမျိုးသည် တစ်ဇွတ်ထိုးဆန်သည်သာမက တစ်ကိုယ်ကောင်းဆန်ပြီး အကျိုးအကြောင်းမရှိ ရိုင်းစိုင်းကြသည်။ ၎င်းတို့၏ အကျိုးအကြောင်းမရှိ ရိုင်းစိုင်းခြင်းတွင် အခြားသူများကို အကျိုးအကြောင်းမရှိ၊ ထင်သလို နှောင့်ယှက်ခြင်းဟူသော အချက်တစ်ရပ် ပါဝင်သည်။ သင်သည် ၎င်းတို့နှင့် ဆက်ဆံသည့်အခါ ကြင်နာစွာ ပြောဆိုခြင်းသည် အလုပ်မဖြစ်ပေ၊ သင်၌ မသမာသော ရည်ရွယ်ချက်များ ရှိသည်ဟု ၎င်းတို့က တွေးထင်ကြသည်။ သင်သည် တင်းမာစွာ ပြောဆိုပါက သင်က ၎င်းတို့ကို အနိုင်ကျင့်နေသည်ဟု တွေးထင်ကြသော်လည်း ၎င်းတို့၏ တစ်ဇွတ်ထိုးဆန်ခြင်းက အခြားသူများကို နစ်နာစေပြီးနောက်တွင်မူ ၎င်းတို့က “ကျွန်ုပ်က သင့်ကို နာကျင်စေလိုသည့် ရည်ရွယ်ချက်မရှိပါ။ သင် နာကျင်သည်ဟု ခံစားရပါက ကျွန်ုပ် တောင်းပန်ပါသည်” ဟု ဆိုကြဦးမည်။ ဤစကားများသည် ကောင်းမွန်သည်ဟု ထင်ရသော်လည်း နစ်နာခဲ့ရသူက ၎င်းတို့ကို ခွင့်မလွှတ်ဘဲ ၎င်းတို့ကို ဝေဖန်သည့်အခါ တစ်ဇွတ်ထိုးဆန်သောသူသည် ဒေါသထွက်ပြီး “သင်က ဤကိစ္စကို အဆုံးမသတ်နိုင်ပါတကား၊ သင်က ကျွန်ုပ်၏ တောင်းပန်မှုကို အခွင့်ကောင်းယူနေခြင်း မဟုတ်လော။ ကျွန်ုပ် တောင်းပန်သည့်အတွက် ကျွန်ုပ်ကို အနိုင်ကျင့်ရန် လွယ်ကူသည်ဟု သင်ထင်သလော။ ယခု သင်က ကျွန်ုပ်၏ အပြစ်အနာအဆာများကို ထောက်ပြနေပါတကား။ ကျွန်ုပ်၌ အပြစ်အနာအဆာများ ရှိပါသလော။ သင်သည် ၎င်းတို့ကို ထောက်ပြရန် အရည်အချင်းပြည့်မီပါသလော” ဟု ဆိုသည်။ ဤသည်မှာ သမ္မာတရားကို လက်မခံသည့် ကိစ္စတစ်ခု မဟုတ်လော။ (ဟုတ်ပါသည်။) ဤသည်မှာ ၎င်းတို့၏ ဖောက်ပြန်ပျက်စီးသော စိတ်သဘောထားနှင့် သက်ဆိုင်သည်။ ၎င်းတို့၏ လူ့သဘာဝရှိ ဤလက္ခဏာများသည် ဖောက်ပြန်ပျက်စီးသော စိတ်သဘောထားများ၏ အချို့သော လက္ခဏာများအဖြစ် မိမိတို့ဘာသာ သဘာဝကျကျ ထင်ရှားပေါ်လွင်သည်၊ ၎င်းတို့သည် ဆက်စပ်နေသည်။ ဤလူစားမျိုးများရှိ ဖောက်ပြန်ပျက်စီးသော စိတ်သဘောထားများ၏ လက္ခဏာများတွင် စိတ်နှလုံးမာကျောခြင်း၊ သမ္မာတရားကို အလွန်အမင်း မနှစ်မြို့ခြင်းနှင့် ရက်စက်ကြမ်းကြုတ်ခြင်း အနည်းငယ်တို့ ပါဝင်သည်။ ဤကဏ္ဍများသည် ၎င်းတို့၏ ဖောက်ပြန်ပျက်စီးသော စိတ်သဘောထားများ၏ လက္ခဏာများ ဖြစ်ကြသည်။

ပင်ကိုအခြေအနေများတွင် နောက်ထပ် ကဏ္ဍတစ်ခု ပါဝင်သည်၊ ယင်းမှာ လူ့ဗီဇ ဖြစ်သည်။ ဥပမာအနေဖြင့် အချို့သောလူတို့သည် ဘုရားသခင်ကို ယုံကြည်ပြီးနောက် ဘုရားသခင် ရွေးချယ်ထားသောလူများအပေါ် စီစီပီအစိုးရ၏ ရူးသွပ်သော ဖိနှိပ်မှု၊ ဖမ်းဆီးမှုများနှင့် ရက်စက်ကြမ်းကြုတ်စွာ ဆက်ဆံမှုတို့ကို မြင်တွေ့ရသောအခါ ၎င်းတို့သည် ထိတ်လန့်ခြင်း၊ တုန်လှုပ်ခြင်း၊ သတ္တိနည်းခြင်းနှင့် ကြောက်ရွံ့ခြင်းတို့ ဖြစ်လာကြသည်။ တစ်ခါတစ်ရံတွင် ၎င်းတို့၏ ခြေထောက်များပင် အားနည်းလာပြီး အိမ်သာသို့ အဆက်မပြတ် သွားချင်နေကြသည်။ ဤသည်မှာ အဘယ်အရာ၏ သရုပ်သကန်တစ်ခု ဖြစ်သနည်း။ (ဗီဇ ဖြစ်ပါသည်။) ဤသည်မှာ ဗီဇအလျောက် တုံ့ပြန်ခြင်းတစ်ခု ဖြစ်သည်။ ပုံမှန် လူ့သဘာဝအတွင်း၌ အချို့သော ကြောက်မက်ဖွယ်ဖြစ်ရပ်များ၊ လူတို့၏ ကိုယ်ပိုင်အသက်နှင့် သက်ဆိုင်သော အခြေအနေများ သို့မဟုတ် မိမိတို့ကိုယ်ကို အန္တရာယ်ဖြစ်စေနိုင်သည့် ကိစ္စရပ်များနှင့် ပတ်သက်လာလျှင် သတင်းကြားရသည်ဖြစ်စေ၊ လက်တွေ့အရှိတရားနှင့် ရင်ဆိုင်ရသည်ဖြစ်စေ ၎င်းတို့တွင် သတ္တိနည်းပြီး ကြောက်ရွံ့သည်ဟု ခံစားရသည့် ဗီဇအလျောက် တုံ့ပြန်ခြင်းအချို့ ရှိမည်ဖြစ်သည်။ ထိုနည်းတူစွာပင် ၎င်းတို့၏ ခန္ဓာကိုယ်များသည် ရင်တုန်ခြင်း၊ ကြွက်တက်ခြင်း၊ ယာယီ နားမကြားခြင်း သို့မဟုတ် မျက်စိမမြင်ခြင်းတို့အပြင် ပါးစပ်ခြောက်ခြင်း၊ ခြေထောက်များ အားနည်းခြင်း၊ ချွေးထွက်လွန်ခြင်း၊ ဆီးဝမ်းမထိန်းနိုင်ခြင်းတို့ကဲ့သို့သော ပုံမှန်တုံ့ပြန်မှုအချို့ကို သဘာဝအတိုင်း ပြသပေမည်။ ဤတုံ့ပြန်မှုများသည် ဖြစ်ပေါ်နိုင်ဖွယ်ရှိသလော။ (ရှိပါသည်။) ဤတုံ့ပြန်မှုများသည် အာရုံကြောစနစ်၏ ထိန်းချုပ်မှုကြောင့်ဖြစ်စေ၊ အခြားအကြောင်းရင်း တစ်ခုခုကြောင့်ဖြစ်စေ မည်သို့ပင်ဖြစ်စေကာမူ ပြင်ပအကြောင်းတရားတစ်ခုက ဇာတိပကတိ၌ ဖြစ်ပေါ်စေသော တုံ့ပြန်မှုများဖြစ်ပြီး ဤတုံ့ပြန်မှုများကို စုပေါင်း၍ ဗီဇဟု ရည်ညွှန်းသည်။ ခန္ဓာကိုယ်၏ ခံနိုင်ရည်ရှိမှုတွင် ကန့်သတ်ချက်များ ရှိသည်၊ လူတစ်ဦး၏ သတ္တိ၏ ကန့်သတ်ချက်များကို ကျော်လွန်သွားသည်နှင့် တစ်ပြိုင်နက် ခန္ဓာကိုယ်သည် ဗီဇအလျောက် တုံ့ပြန်ခြင်းအချို့ကို ပြသပေမည်။ ဤတုံ့ပြန်မှုများကို အခြားသူများက အားနည်းချက်များအဖြစ် ရှုမြင်နိုင်သည် သို့မဟုတ် ယင်းတို့သည် ရယ်ဖွယ်ကောင်းသည်၊ သနားစရာကောင်းသည် သို့မဟုတ် ကရုဏာ သက်ထိုက်သည်ဟု ထင်ရနိုင်သော်လည်း ဤသည်တို့မှာ လူတစ်ဦး၏ ဗီဇများ၏ သရုပ်သကန်များ ဖြစ်သည်မှာ ငြင်းမရပေ။ အန္တရာယ်နှင့် ရင်ဆိုင်ရသောအခါ မိမိတို့၏ ဦးခေါင်းကိုကိုင်၍ ငိုကြွေးခြင်း၊ မျက်ရည်ကျခြင်း သို့မဟုတ် ကျယ်လောင်စွာ အော်ဟစ်ခြင်းပင် ပြုလုပ်သည့် လူများလည်း ရှိသည်၊ အခြားသူများမှာ မှောင်မိုက်သော ထောင့်တစ်နေရာတွင် ပုန်းအောင်၍ ကွေးကွေးလေးနေကောင်းနေမည်၊ ထိုသို့သော တုံ့ပြန်မှုအားလုံးသည် ဗီဇအလျောက် တုံ့ပြန်ခြင်းများ ဖြစ်ကြသည်။ ဤဗီဇအလျောက် တုံ့ပြန်ခြင်းများတွင် ငိုသည်ဖြစ်စေ၊ ရယ်သည်ဖြစ်စေ သို့မဟုတ် အလွန်အမင်း ကြောက်လန့်သွားသဖြင့် အရှက်ရဖွယ် တစ်စုံတစ်ခုကို လုပ်ဆောင်မိသည်ဖြစ်စေ ဤအရာများ၌ အမှားအမှန် ရှိသလော။ (မရှိပါ။) သို့ဖြစ်၍ အစိုးရက ယုံကြည်သူများကို ဖမ်းဆီးသည့်အကြောင်း ကြားရသောအခါ ကြောက်ရွံ့လာသူများအတွက် ဤလူများသည် သတ္တိကြောင်ပြီး လူ့သဘာဝမရှိဟု ငါတို့ ပြောနိုင်သလော။ (မပြောနိုင်ပါ။) “ဘုရားသခင်ကို ယုံကြည်ခြင်းသည် ယုံကြည်ခြင်းနှင့်အတူ လာသင့်သည်၊ လူတစ်ဦးသည် မကြောက်ရွံ့သင့်” ဟူသော စကားသည် မှန်ကန်သလော။ (မမှန်ကန်ပါ။) “ဤသည်မှာ အားနည်းခြင်း၊ သတ္တိကြောင်ခြင်းနှင့် အရည်အချင်းမရှိခြင်း၏ သရုပ်သကန်တစ်ခု ဖြစ်သည်။ ယင်းက ဘုရားသခင်ကို ယုံကြည်ခြင်း ကင်းမဲ့ကြောင်း ပြပြီး ၎င်းတို့သည် ဘုရားသခင်ကို အားကိုးရကောင်းမှန်း မသိကြောင်း ပြသည်။ ထိုသို့သောသူသည် အောင်နိုင်သူတစ်ဦး မဟုတ်ပါတကား” ဟု ငါတို့ ပြောနိုင်သလော။ (မပြောနိုင်ပါ။) အဘယ်ကြောင့် မပြောနိုင်သနည်း။ (ယင်းမှာ လူတစ်ဦးသည် ပြင်ပအခြေအနေများကို ရင်ဆိုင်ရသောအခါ ဖြစ်ပေါ်သည့် ရုပ်ပိုင်းဆိုင်ရာ တုံ့ပြန်မှုတစ်ခုမျှသာ ဖြစ်ပါသည်။) ဤသည်မှာ ပုံမှန်ဖြစ်သော ရုပ်ပိုင်းဆိုင်ရာ တုံ့ပြန်မှုတစ်ခုဖြစ်ပြီး ဖောက်ပြန်ပျက်စီးသော စိတ်သဘောထားက တွန်းအားပေးသော သရုပ်သကန်တစ်ခု မဟုတ်ပေ။ ဆိုလိုသည်မှာ လူတို့တွင် ထိုသို့သော အခြေအနေများ၌ ဤသရုပ်သကန်များနှင့် ထုတ်ဖော်မှုများ ရှိနေသောအခါ ယင်းမှာ ဖောက်ပြန်ပျက်စီးသော စိတ်သဘောထား၏ လွှမ်းမိုးမှုကြောင့် မဟုတ်သကဲ့သို့ ၎င်းတို့၏ လူ့သဘာဝအတွင်းရှိ အတွေးအခေါ် သို့မဟုတ် ရှုမြင်ပုံတစ်ခုခု၏ စိုးမိုးခြင်းခံရသောကြောင့်လည်း မဟုတ်ပေ။ ဤတုံ့ပြန်မှုများသည် သင် ကြိုတင်တွေးတောထားသည့် အရာတစ်ခုမဟုတ်ပေ၊ ထိုသို့သော အခြေအနေများနှင့် ရင်ဆိုင်ရသောအခါ သင်သည် ရုတ်တရက် အထိန်းအကွပ်မဲ့သော အတွေးများ ရှိလာပြီးနောက် သင်က ထိုအကြောင်းကို ပို၍တွေးတောလေလေ သင်ထိတ်လန့်လာကာ သင့်ခန္ဓာကိုယ် တုန်တက်သွားခြင်း သို့မဟုတ် သင်၏ ဆီးကိုပင်ဖြစ်စေ၊ ဝမ်းကိုပင်ဖြစ်စေ မထိန်းနိုင်တော့ခြင်းမျိုး မဟုတ်ပေ။ ဤတုံ့ပြန်မှုများ၏ နောက်ကွယ်မှ အကြောင်းရင်းမှာ ထိုအရာမဟုတ်ပေ။ ထိုအစား ဤဖြစ်ရပ်များ သို့မဟုတ် ဤသတင်းအကြောင်း ကြားသိပြီးနောက်တွင် မည်သည့် တမင်ရည်ရွယ်သော အတွေးအခေါ်မျှမရှိဘဲ၊ မည်သည့် စိတ်ပိုင်းဆိုင်ရာ စိစစ်ခြင်း သို့မဟုတ် ပြုပြင်ခြင်းမျှမရှိဘဲ သင်၏ ခန္ဓာကိုယ်သည် အလွန်သဘာဝကျစွာဖြင့် ဗီဇအလျောက် ရုပ်ပိုင်းဆိုင်ရာ တုံ့ပြန်မှုအချို့ကို ဖြစ်ပေါ်စေသောကြောင့် ဖြစ်သည်။ သို့ဖြစ်၍ ဤကဲ့သို့သော သဘာဝကျသည့် တုံ့ပြန်မှုသည် ဇာတိပကတိ၏ မွေးရာပါ ဗီဇများကြောင့် ဖြစ်ပေါ်လာခြင်း ဖြစ်သည်။ ယင်း၌ အမှားအမှန် မရှိ၊ အားကြီးခြင်းနှင့် အားနည်းခြင်းဟူ၍ ခွဲခြားမှုမရှိသကဲ့သို့ အပြုသဘောဆောင်ခြင်းနှင့် အပျက်သဘောဆောင်ခြင်းဟူ၍ ခြားနားမှုလည်း မရှိသည်မှာ သေချာသည်။ အချို့လူများက “အစိုးရက မည်သည့်ဖမ်းဆီးမှုများ လုပ်ဆောင်နေပါစေ၊ ကျွန်ုပ် မကြောက်ပါ” ဟု ပြောကြသည်။ သို့ဆိုလျှင် သင်သည် ငတုံးတစ်ဦး ဖြစ်သွားသည်ဟု ငါပြောမည်။ အဆင်းနီသော နဂါးကြီးက သင့်ကို ညှဉ်းပန်းနှိပ်စက်သောအခါ သင် ကြောက်မကြောက်ကို ကြည့်ကြစို့၊ ထိုအချိန်တွင် သင် မအော်ဟစ်ဘဲ နေရန် မဖြစ်နိုင်ပေ။ နာကျင်မှု အထွတ်အထိပ်သို့ ရောက်သောအခါ သင် မည်သို့ တွေးမည်နည်း။ “ကျွန်ုပ် သေသည်ကမှ ကောင်းဦးမည်။ ကျွန်ုပ် သေသွားလျှင် လွတ်မြောက်သွားမည်၊ နောက်ထပ် နာကျင်ရတော့မည် မဟုတ်ပါ” ဟူ၍ ဖြစ်သည်။ ဤသည်တို့အားလုံးသည် ဇာတိပကတိ၏ ဗီဇအလျောက် တုံ့ပြန်ခြင်းများဖြစ်ပြီး ဤအရာများထဲမှ တစ်ခုမျှ ပြဿနာမဟုတ်ပေ။ အချို့လူများက “ကျွန်ုပ် မကြောက်ပါ၊ တစ်စုံတစ်ယောက်က ကျွန်ုပ်ကို ရိုက်လျှင် ကျွန်ုပ် ပြန်ရိုက်မည်၊ ကျွန်ုပ် မနိုင်လျှင် ထွက်ပြေးမည်” ဟု ပြောကောင်းပြောပေမည်။ သို့သော် သင်ထွက်ပြေးပြီး တစ်စုံတစ်ယောက်က သင့်ကို သေနတ်ဖြင့် ချိန်သောအခါ သင်၏ ခြေထောက်များ အားနည်းသွားမည်၊ သင်၏ စိတ်နှလုံးသည် သတ္တိနည်းလာမည်ဖြစ်ပြီး သင်သည် “ကျွန်ုပ် မကြောက်ပါ” ဟု နောက်ထပ် အော်ဟစ်တော့မည် မဟုတ်ပေ။ သင်၏ အသက် အန္တရာယ်ရှိလာသောအခါ သင်သည်လည်း သေခြင်းကို ကြောက်ရွံ့လိမ့်မည်၊ ဤသည်မှာ သင်၏ ဗီဇအလျောက် တုံ့ပြန်ခြင်း ဖြစ်သည်။ ဤသည်တို့မှာ ဗီဇအလျောက် တုံ့ပြန်ခြင်းများ ဖြစ်သောကြောင့် လူတစ်ဦးတွင် မည်သည့် သရုပ်သကန်များ ရှိသည်ဖြစ်စေ၊ လူ့သဘာဝ အားနည်းခြင်း၏ မည်သည့် ထုတ်ဖော်မှုများ ရှိသည်ဖြစ်စေ ယင်းကို အမှားဟု မမှတ်ယူသကဲ့သို့ ရှက်ဖွယ်ရာလည်း မဟုတ်ဘဲ ဘုရားသခင်က ပြစ်တင်ရှုတ်ချခြင်း မပြုပေ။ သဘာဝအတိုင်းပင် သင်သည် ဤတုံ့ပြန်မှုများကို တားဆီးရန် မကြိုးစားသင့်သကဲ့သို့ ကြည့်ရှုနေသူများကလည်း ၎င်းတို့ကို မလှောင်ပြောင်သင့်ပေ၊ အကြောင်းမှာ လူတိုင်းသည် အတူတူပင်ဖြစ်သည်၊ အားလုံးသည် အသွေးနှင့်ကိုယ်၊ အသားနှင့်ကိုယ် ဖြစ်သောကြောင့် ဖြစ်သည်။ အသွေးအသား၏ ဗီဇအလျောက် တုံ့ပြန်ခြင်းများသည် ဤကဲ့သို့ ဖြစ်သည်၊ သင်သည် ဤကဲ့သို့ဖြစ်သည်၊ ၎င်းတို့သည် ဤကဲ့သို့ဖြစ်သည်၊ လူတိုင်းသည် ဤကဲ့သို့ ဖြစ်သည်။ ယင်းမှာ လူတစ်ဦးသည် ဝံပုလွေတစ်ကောင်နှင့် ကြုံတွေ့ရသည့်အခါနှင့် တူသည်၊ ၎င်း၏ ပထမဆုံး ဗီဇအလျောက် တုံ့ပြန်ခြင်းမှာ အဘယ်အရာဖြစ်သနည်း။ “ပြေး။ တတ်နိုင်သမျှ မြန်မြန်ပြေး” ဟူ၍ ဖြစ်သည်။ ပြီးလျှင် ပြေးနေစဉ်တွင် ၎င်းတို့က ဝံပုလွေ အမီလိုက်လာခြင်း ရှိမရှိကို ကြည့်ကာ “ဤအရာက ငါ့ကို အမီလိုက်လာလျှင် မည်သို့များ လုပ်ဆောင်မည်နည်း။ ငါ၏ လည်ပင်းကို ကိုက်လိုက်ပါက ငါသေသွားမလား။ ငါ့ထံတွင် သေနတ် သို့မဟုတ် သံတုတ်တစ်ချောင်းလောက် ရှိလျှင် သိပ်ကောင်းမည် ဖြစ်သည်” ဟု စိုးရိမ်ကြသည်။ ၎င်းတို့သည် ပြေးနေစဉ်တွင်သာ ဤအရာများကို တွေးတောကြသည်။ သို့သော် သင် မည်သည့်အရာကိုပင် တွေးတောနေပါစေ၊ သင်၏ ပထမဆုံး ဗီဇအလျောက် တုံ့ပြန်ခြင်းမှာ ၎င်း၏ လိုက်လံဖမ်းဆီးခြင်းမှ လျင်မြန်စွာ လွတ်မြောက်ရန်၊ အဖမ်းမခံရဘဲ အစားမခံရစေရန် တတ်နိုင်သမျှ မြန်မြန်နှင့် ဝေးဝေးသို့ ပြေးရန်ဖြစ်သည်မှာ သေချာသည်။ ဤသည်တို့အားလုံးသည် ဗီဇအလျောက် တုံ့ပြန်ခြင်းများ ဖြစ်ကြသည်။ သင်၏ ဗီဇအလျောက် တုံ့ပြန်ခြင်းမှာ အဘယ်အရာဖြစ်သနည်း။ ယင်းမှာ သင်၏ အသက်ကို အန္တရာယ်မကျရောက်စေရန် သေချာစေလျက် မိမိကိုယ်ကို ကယ်တင်ခြင်း၊ မိမိ၏ အသက်ကို ကာကွယ်ခြင်းပင် ဖြစ်သည်။ ဤဗီဇအလျောက် တုံ့ပြန်ခြင်းများသည် ကြည့်ရှုသူတစ်ဦးအတွက် သတ္တိကြောင်သည်၊ မသင့်တော် သို့မဟုတ် ရှက်ဖွယ်ရာဖြစ်သည်ဟု ထင်ရပါစေ ယင်းတို့သည် အမှန်တကယ်တွင် ရှက်ဖွယ်ရာမဟုတ်ပေ၊ အကြောင်းမှာ ယင်းတို့သည် အသွေးအသားနှင့် လူသားများ၏ ပုံမှန်သရုပ်သကန်များဖြစ်သောကြောင့် ဖြစ်သည်၊ ယင်းတို့သည် သဘာဝကျသော ထုတ်ဖော်မှုများ ဖြစ်ကြသည်။ ဗီဇအလျောက် တုံ့ပြန်ခြင်းတစ်ခုသည် သဘာဝကျသော ထုတ်ဖော်မှုတစ်ခုမျှသာဖြစ်ပြီး ယင်းနှင့်ပတ်သက်၍ ရှက်ဖွယ်ရာ တစ်စုံတစ်ရာ မရှိပေ။ ဥပမာအနေဖြင့် သင်သည် ဟာသတစ်ခုကို ကြားသောအခါ ရယ်လိမ့်မည်။ သင်၏ ပါးစပ်ထဲတွင် အစာ သို့မဟုတ် ရေ ရှိနေလျှင်ပင် သင်သည် မည်သို့ပင်ဖြစ်စေ ရယ်လိမ့်မည်၊ အကြောင်းမှာ ဤသည်မှာ ဗီဇအလျောက် တုံ့ပြန်ခြင်းတစ်ခု ဖြစ်သောကြောင့် ဖြစ်သည်။ ဗီဇအလျောက် တုံ့ပြန်ခြင်းတစ်ခုသည် ဘုရားသခင် ပေးသနားတော်မူသော၊ မွေးရာပါ စွမ်းဆောင်ရည် တစ်ခုဖြစ်ပြီး အခါအခွင့်သင့်သောအခါ သဘာဝအတိုင်း ဖြစ်ပေါ်ပြီး လုပ်ဆောင်ပေလိမ့်မည်။ သို့ဖြစ်၍ ဗီဇအလျောက် တုံ့ပြန်ခြင်းများနှင့် ပတ်သက်လာလျှင် ယင်းတို့သည် သဘာဝကျသော ထုတ်ဖော်မှုများ ဖြစ်ကြသည်။ ယင်းတို့သည် လူ့သဘာဝ၏ အားနည်းချက် သို့မဟုတ် ချို့ယွင်းချက်တစ်ခု၏ ထုတ်ဖော်မှုများ ဖြစ်နိုင်သည် သို့မဟုတ် သင်၏ ဇာတိပကတိ၏ သဘာဝကျသော သရုပ်သကန်တစ်ခု၏ ထုတ်ဖော်မှုများ ဖြစ်နိုင်သည်။ မည်သို့ပင်ဖြစ်စေ ယင်းမှာ ဗီဇအလျောက် တုံ့ပြန်ခြင်းတစ်ခု ဖြစ်သောကြောင့် အမှား သို့မဟုတ် အမှန် မရှိပေ။ သင်သည် ရှက်သည်ဟု ခံစားရပါက ယင်းက သင်သည် ထိုးထွင်းသိမြင်မှု ကင်းမဲ့ကြောင်းနှင့် သင်၏ လူ့သဘာဝသည် အတော်ပင် အပေါ်ယံဆန်ကြောင်းကို ပြသည်၊ သင်သည် အခြားသူများ၏ အကောင်းမြင်မှုကို လိုချင်သည်။ သင်သည် သင်၏ ဗီဇအလျောက် တုံ့ပြန်ခြင်းများကို တားဆီးရန် ကြိုးစားပါက ယင်းက သင်သည် မိုက်မဲသူဖြစ်ကြောင်းနှင့် သင်၏ ဆင်ခြင်တုံတရားတွင် ပြဿနာတစ်ခု ရှိနေကြောင်းကို သက်သေပြသည်။ အထူးအန္တရာယ်ရှိသော ပတ်ဝန်းကျင်များနှင့် အခြေအနေများတွင် သင်သည် ကြောက်လန့်လွန်းသဖြင့် ဘောင်းဘီထဲတွင် ဆီးထွက်ကျသွားလျှင်ပင် ယင်းကို ရှက်ဖွယ်ရာအရာတစ်ခုအဖြစ် သင်မမြင်သင့်ပေ။ အမှန်တွင် ဤသည်မှာ ပုံမှန် လူ့သဘာဝ၏ သရုပ်သကန်တစ်ခု ဖြစ်သည်။ မည်သူမဆို ထိုသို့သော အခြေအနေများတွင် ဤသရုပ်သကန်များ ရှိမည်ဖြစ်သည်၊ ကျော်ကြားသူများ သို့မဟုတ် ကြီးမြတ်သူများပင် ချွင်းချက်မရှိပေ။ ကြမ်းတမ်းသော အခြေအနေများတွင် စွမ်းအားရှင်များ မရှိပေ၊ သင်သည် သာမန်လူတစ်ဦးမျှသာ ဖြစ်ပြီး ထူးခြားမှု မရှိသကဲ့သို့ ကြွားဝါစရာလည်း တစ်စုံတစ်ရာ မရှိပေ။ သင်သည် ကြောက်လန့်လွန်းသဖြင့် ဘောင်းဘီထဲတွင် ဆီးထွက်ကျသွားပြီး အခြားသူများ သိရှိသွားလျှင်ပင် ယင်းမှာ ဂုဏ်သိက္ခာကျဖွယ်အရာတစ်ခု မဟုတ်ပေ၊ ဤသို့ဖြင့် လူတို့သည် သင့်ကို အထင်ကြီးခြင်း သို့မဟုတ် အားကျကြည်ညိုခြင်း ပြုတော့မည်မဟုတ်ပေ၊ အနည်းဆုံးအနေဖြင့် သင်သည် ဘေးကင်းလုံခြုံလိမ့်မည်။ ဤအရာသည် ယခု ရှင်းလင်းသင့်ပြီ မဟုတ်လော။ လူ၏ ဗီဇအလျောက် တုံ့ပြန်ခြင်းများသည် အလွန်ပုံမှန်ကျပြီး ဓမ္မတာပင်ဖြစ်သည်။ ဥပမာအနေဖြင့် သင်၏ ဆံပင် ညစ်ပတ်ပြီး သင်၏ ဦးရေပြား ယားယံသောအခါ သင်သည် ဗီဇအလျောက် ကုတ်လိမ့်မည်။ ထို့နောက် သင်၏ လက်သည်းခွံများ အညစ်အကြေးများဖြင့် ပြည့်သွားပြီး လူတို့က သင့်ကို မသတီစရာ သို့မဟုတ် တစ်ကိုယ်ရေသန့်ရှင်းမှုမရှိဟု ထင်လျှင်ပင် သင် မည်သည့်အရာ လုပ်နိုင်မည်နည်း။ သင်၏ ဆံပင် ညစ်ပတ်သောအခါ အညစ်အကြေးများ ရှိလိမ့်မည်၊ အကြောင်းမှာ သင်သည် အသွေးနှင့်ကိုယ်၊ အသားနှင့်ကိုယ် ဖြစ်ပြီး မြေမှုန့်ဖြင့် ပြုလုပ်ထားသောကြောင့်ဖြစ်ကာ သင်သည် ဤအဖြစ်မှန်ကို အသိအမှတ်ပြုသင့်သည်။ ဤအခြေအနေသည် သင်၏ ဆံပင် ညစ်ပတ်နေပြီး ခေါင်းလျှော်ရန် လိုအပ်နေကြောင်းကို သင့်အား ပြောပြနေခြင်းမျှသာ ဖြစ်သည်။ သင်၏ ဦးရေပြား ယားယံသောအခါ ကုတ်ခြင်းသည် ဗီဇအလျောက် တုံ့ပြန်ခြင်းတစ်ခု ဖြစ်သည်။ ဗီဇအလျောက် တုံ့ပြန်ခြင်းတစ်ခုသည် သဘာဝကျသော၊ ပုံမှန်ဖြစ်သော တုံ့ပြန်မှုတစ်ခု၊ ဘုရားသခင် ဖန်ဆင်းခဲ့သော ပင်ကိုအခြေအနေများနှင့် အာရုံကြောစနစ်အောက်ရှိ ပုံမှန်သရုပ်သကန်တစ်ခု ဖြစ်သည်။ တစ်ခါတစ်ရံတွင် ထိုသရုပ်သကန်များသည် သင့်ကို ရှက်ဖွယ်၊ မသတီစရာ သို့မဟုတ် ဂုဏ်သိက္ခာမရှိဟု ခံစားရစေနိုင်သော်လည်း သင်သည် ၎င်းတို့ကို ပြောင်းလဲရန် သို့မဟုတ် တားဆီးရန် မကြိုးစားသင့်ပေ။ တစ်ဖက်တွင် ထိုသို့ပြုလုပ်ခြင်းက သင့်ကို လူ့ဗီဇများကို မှန်ကန်စွာ ဆက်ဆံရန် ကူညီပေးသည်၊ အခြားတစ်ဖက်တွင် ယင်းမှာ သင်၏ ကျင့်ကြံပြုမူပုံအတွက် တည်ဆောက်ပေးပြီး အကျိုးရှိစေသည်။ သင်သည် ဤကဏ္ဍနှင့်ပတ်သက်၍ အချို့သော နားလည်မှုနှင့် သိနားလည်မှုကို ရရှိပြီးသည်နှင့်တစ်ပြိုင်နက် အခြားသူများနှင့် အပြန်အလှန်ဆက်ဆံပြီး ဆက်ဆံရေးပြုလုပ်သည့်အခါ လူ့ဇာတိပကတိဆိုင်ရာ ဗီဇ၏ အချို့သော ကဏ္ဍများ သဘာဝအတိုင်း ပေါ်လွင်ထင်ရှားပြီး ထုတ်ဖော်ခံရပါက သင်သည် ၎င်းတို့ကို တမင်တကာ ဖုံးကွယ်ရန် လိုအပ်မည်မဟုတ်ပေ။ ပြီးလျှင် တစ်ခါတစ်ရံတွင် ရှက်ဖွယ်ကောင်းသော အခြေအနေတစ်ခု အမှန်တကယ် ဖြစ်ပေါ်လာပါက ရှင်းပြရန် သို့မဟုတ် ယင်းကို ဖုံးကွယ်ရန် သို့မဟုတ် ဟန်ဆောင်ရန် မလိုအပ်ပေ၊ အကြောင်းမှာ ယင်းမှာ ပုံမှန် လူ့သဘာဝ၏ ထုတ်ဖော်မှုတစ်ခုဖြစ်ပြီး လူ၏ ဗီဇအလျောက် တုံ့ပြန်ခြင်းတစ်ခုလည်း ဖြစ်သောကြောင့် ဖြစ်သည်၊ ဤအရာအားလုံးသည် ပုံမှန်လူတစ်ဦး လက်ခံနိုင်သော အတိုင်းအတာအတွင်း၌ ရှိသည်။ ဥပမာအနေဖြင့် လူတို့သည် ပဲစားသောအခါ ၎င်းတို့၏ ခန္ဓာကိုယ်များသည် သဘာဝအတိုင်း ဓာတ်ငွေ့အချို့ကို ထုတ်လုပ်ပြီး ဗီဇအလျောက် လေတက်ခြင်း သို့မဟုတ် လေလည်ခြင်းတို့ ဖြစ်ပေါ်လိမ့်မည်။ ဤသည်မှာ တကယ်ကို ဓမ္မတာဖြစ်လေသည်။ အမျိုးသားငယ်များနှင့် အမျိုးသမီးငယ်များသည် ထိုသို့သော သရုပ်သကန်များကို ရှက်ဖွယ်ဖြစ်သည်ဟု မကြာခဏ ခံစားရသော်လည်း ယင်းနှင့်ပတ်သက်၍ အမှန်တကယ်တွင် ရှက်ဖွယ်ရာ တစ်စုံတစ်ရာ မရှိပေ။ ဤသည်မှာ ခန္ဓာကိုယ်၏ ပုံမှန်ဖြစ်သော ဗီဇအလျောက် တုံ့ပြန်မှုတစ်ခုမျှသာဖြစ်ပြီး ကျင့်ကြံပြုမူပုံ သို့မဟုတ် လုပ်ဆောင်ပုံနှင့်ဆိုင်သော စည်းမျဉ်းများနှင့် မည်သို့မျှ မသက်ဆိုင်ပေ။ အချို့လူများက နားမလည်နိုင် သို့မဟုတ် ယင်းကို မကျေနပ် ဖြစ်နိုင်သော်လည်း ယင်းမှာ မိမိ၏ ကျင့်ကြံပြုမူခြင်းအတွက် စည်းမရှိခြင်း၊ ကြီးပြင်းလာပုံညံ့ဖျင်းခြင်း၊ ထိန်းမနိုင်သိမ်းမရခြင်း၊ တစ်ဇွတ်ထိုးဆန်ခြင်း၊ တစ်ကိုယ်ကောင်းဆန်ခြင်း သို့မဟုတ် မကောင်းသော သို့မဟုတ် ဆိုးယုတ်သော လူ့သဘာဝ ရှိခြင်းဟူသည့် အဆင့်သို့ မုချ မရောက်ရှိပေ၊ ဤအဆင့်အထိ ချဲ့ကားပြောဆိုရန် မလိုအပ်ပေ။ ဤပြဿနာသည် ကျင့်ကြံပြုမူခြင်းနှင့် မသက်ဆိုင်သကဲ့သို့ ဖောက်ပြန်ပျက်စီးသော စိတ်သဘောထားနှင့်လည်း မည်သို့မျှ မသက်ဆိုင်သည်မှာ သေချာသည်။ ထိုကိစ္စကို ချဲ့ကားပြောဆိုရန် မလိုအပ်ပေ။ ဤအရာများကို မှန်ကန်စွာ ချဉ်းကပ်သင့်သည်။

အချို့သောလူတို့သည် ဖွံ့ဖြိုးမှုနောက်ကျသော နိုင်ငံများ သို့မဟုတ် ပတ်ဝန်းကျင်များတွင် သို့မဟုတ် အခြေအနေဆိုးသော မိသားစုများတွင် မွေးဖွားခဲ့သောကြောင့် ၎င်းတို့၏ အသက်တာများရှိ အမှုအရာများနှင့်ပတ်သက်၍ သိပ်ပြီး ဂရုတစိုက် မရှိကြပေ။ ၎င်းတို့သည် အစားအစာသန့်ရှင်းရေးကို စေ့စေ့စပ်စပ် မလုပ်ဆောင်နိုင်ပေ၊ အဝတ်အထည် တစ်စုံတည်းကို အချိန်ကြာမြင့်စွာ မလျှော်ဘဲ ဝတ်ဆင်နိုင်ပြီး ၎င်းတို့၏ အဝတ်အစားများ ချွေးနံ့နံနေလျှင်ပင် သတိမပြုမိဘဲ နေနိုင်သည်။ ဤသည်မှာ မည်သို့သော သရုပ်သကန်မျိုး ဖြစ်သနည်း။ (ယင်းမှာ လူတစ်ဦး၏ ဘဝနေထိုင်မှု အလေ့အထများ၏ သရုပ်သကန်တစ်ခု ဖြစ်ပါသည်။) ဤသည်မှာ ဘဝနေထိုင်မှု အလေ့အထများနှင့်ဆိုင်သော ကိစ္စရပ်တစ်ခု ဖြစ်သည်၊ ယင်းမှာ တစ်ကိုယ်ရေသန့်ရှင်းရေးကို များစွာ အာရုံမစိုက်ခြင်း ဖြစ်သည်။ အချို့လူများသည် မျက်နှာသစ်ရန်နှင့် ခြေထောက်ဆေးရန် တဘက်တစ်ထည်တည်းကို အသုံးပြုပြီးနောက် နေ့ခင်းပိုင်း အလုပ်လုပ်ရန် အပြင်ထွက်သောအခါ ချွေးသုတ်ရန် ယင်းကို အသုံးပြုကြသည်။ တစ်ခါတစ်ရံတွင် တစ်စုံတစ်ယောက် ဒဏ်ရာရသည်ကို မြင်ပါက ဒဏ်ရာကို ဖုံးအုပ်ရန် ထိုတဘက်ကိုပင် အသုံးပြုကြသည်။ ၎င်းတို့သည် တစ်ကိုယ်ရေသန့်ရှင်းရေးကို လုံးဝ ဂရုမစိုက်ကြောင်း ပြသသည်။ ဤသည်မှာ မည်သည့်ပြဿနာဖြစ်သနည်း။ ဤသည်မှာ ၎င်းတို့ မွေးဖွားလာခဲ့သော မိသားစု၏ အခြေအနေများနှင့် အချို့သော ဆက်စပ်မှုရှိသည်။ အချို့လူများသည် ကောင်းမွန်သော နေထိုင်မှု အခြေအနေများရှိသည့် မိသားစုများမှ လာကြပြီး ထိုမိသားစုများတွင် လူတစ်ဦးစီ၌ မျက်နှာအတွက်လည်းကောင်း၊ ခြေထောက်အတွက်လည်းကောင်း အသုံးပြုရန် ရှင်းလင်းစွာ ခွဲခြားထားသော တဘက်များနှင့် ရေချိုးတဘက်များစွာ ကိုယ်စီရှိကြသည်။ ၎င်းတို့သည် နေ့စဉ် ရေချိုးပြီး မျက်နှာသစ်ကြကာ တဘက်များနှင့် ရေချိုးတဘက်များကိုလည်း နေ့စဉ် လျှော်ဖွပ်ကြသဖြင့် ၎င်းတို့သည် အထူးသဖြင့် ဇီဇာကြောင်ပုံရသည်။ ထိုသို့သော အလေ့အထများသည် မည်သို့ ဖွဲ့စည်းဖြစ်ပေါ်လာသနည်း။ ၎င်းတို့သည် မိသားစုတွင် အချို့သော စီးပွားရေးအခြေခံအုတ်မြစ်နှင့် ငွေကြေးအခြေအနေများ ရှိခြင်း၏ အကျိုးဆက်ဖြစ်ပြီး ယင်းက ဤသန့်စင်ပြီးသော ဘဝနေထိုင်မှု အလေ့အထများကို ဖြစ်ပေါ်စေသည်။ ဤသည်က လူတစ်ဦးကို တစ်ကိုယ်ရေသန့်ရှင်းရေးကို အလွန်ဂရုစိုက်ပြီး လေးစားဖွယ်ဖြစ်သည်ဟု ထင်ရစေသည်။ အပေါ်ယံအားဖြင့် ၎င်းတို့သည် အလွန် ဇီဇာကြောင်ပုံရသော်လည်း အမှန်တကယ်တွင် ဤအရာအားလုံး၏ နောက်ကွယ်၌ ယင်းသို့ဖြစ်ပေါ်စေခဲ့သော ပင်ကိုအခြေအနေများ ရှိနေသည်။ သို့ဆိုလျှင် အချို့လူများသည် ဤအရာများကို အဘယ်ကြောင့် ဂရုမစိုက်ကြသနည်း။ အချို့လူများသည် ထိုသို့သော ကိစ္စရပ်များကို များစွာ အာရုံစိုက်ရန် ပင်ကိုအားဖြင့် စိတ်မပါကြဘဲ ၎င်းတို့တွင် နည်းလမ်းများ ရှိလျှင်ပင် ဤအရာများကို အလွန်အလေးအနက် မထားကြပေ၊ ဤသည်မှာ သိသာထင်ရှားသော ပြဿနာတစ်ခု မဟုတ်ပေ။ အခြားသူများအတွက်မူ ယင်းမှာ ၎င်းတို့၏ မိသားစုအခြေအနေများနှင့် ပတ်ဝန်းကျင်ကြောင့် ဖြစ်သည်။ လူခုနစ်ဦး သို့မဟုတ် ရှစ်ဦးရှိသော မိသားစုတစ်စုတွင် ၎င်းတို့အားလုံးသည် မျက်နှာသစ်ရန်နှင့် ခြေထောက်ဆေးရန် တဘက်တစ်ထည်တည်းကို အသုံးပြုကောင်းပြုနိုင်ပြီး တစ်ဦးပြီးတစ်ဦး အသုံးပြုကြသည်။ အချို့လူများသည် ခြေထောက်မဆေးဘဲ အိပ်ရာဝင်ပြီး နှစ်ခြိုက်စွာ အိပ်ပျော်နေဆဲ ဖြစ်သည်။ ဤသည်မှာ ၎င်းတို့၏ နေ့စဉ်အသက်တာ သို့မဟုတ် ၎င်းတို့၏ ကျင့်ကြံပြုမူခြင်းကို မထိခိုက်ပေ။ ဇီဇာကြောင်သော သူများက “သို့ရာတွင် သင်၏ ခြေထောက်များတွင် ပိုးမွှားများရှိသည်၊ အလွန်ပင် ညစ်ပတ်လေသည်” ဟု ပြောကောင်းပြောပေမည်။ ထိုအခါ အခြားသူများက “ခြေထောက်များက မညစ်ပတ်ပါ။ ယင်းတို့ကို တစ်နေကုန် ဖုံးအုပ်ထားပြီး အပြင်လောကနှင့်လည်း မထိတွေ့ရသဖြင့် ပိုးမွှားတစ်စက်မျှ မရှိပါ၊ ခြေထောက်ချွေးအနည်းငယ်သာ ရှိပါသည်။ လူများက ခြေထောက်ချွေးသည် ညစ်ပတ်သည်ဟု ထင်ကြသည်၊ သို့သော် စင်စစ်အားဖြင့် မဟုတ်ပါ။ အချို့သော နေရာများတွင် ခြေထောက်များသည် အစားအသောက် ထုတ်လုပ်ရန်အတွက်ပင် အသုံးပြုကြသည်။ သင် ဈေးမှ ဝယ်ယူသော အစားအစာများသည် လူတို့၏ ခြေထောက်များဖြင့် ဂျုံနယ်ထားခြင်းအားဖြင့် ပြုလုပ်ထားကောင်း ပြုလုပ်ထားနိုင်သည်ကို အဘယ်သူသိမည်နည်း။ ယင်းကို သင်မမြင်ရဘဲ သင်စားသည်။ သို့တိုင်အောင် သင့်ကိုယ်သင် အလွန် ဇီဇာကြောင်သည်ဟုပင် ထင်နေသေးသည်” ဟု တုံ့ပြန်ကောင်း တုံ့ပြန်နိုင်သည်။ တစ်စုံတစ်ဦးသည် အလေးထားသည်ဖြစ်စေ၊ မထားသည်ဖြစ်စေ ဤအရာအားလုံးသည် ပင်ကိုအခြေအနေများက ပုံသွင်းသော ဘဝနေထိုင်မှု အလေ့အထများ သို့မဟုတ် နေထိုင်မှုပုံစံများ ဖြစ်ကြသည်။ ဤသည်မှာ ၎င်းတို့ ကျင့်ကြံပြုမူပုံနှင့် မည်သို့မျှ မသက်ဆိုင်ပေ။ သို့ဆိုလျှင် မည်သို့သော သရုပ်သကန်မျိုးများသည် လူတစ်ဦး၏ ကျင့်ကြံပြုမူခြင်းနှင့် သက်ဆိုင်သနည်း။ ဥပမာအနေဖြင့် အန္တရာယ်ရှိသော အခြေအနေတစ်ခုနှင့် ရင်ဆိုင်ရသောအခါ၊ အဆင်းနီသော နဂါးကြီး၏ လိုက်လံဖမ်းဆီးခြင်းကို ခံရသောအခါ လူတိုင်းသည် စိတ်တင်းကျပ်ပြီး ကြောက်လန့်သည်ဟု ခံစားရကာ ၎င်းတို့တွင် ဗီဇအလျောက် တုံ့ပြန်ခြင်းအချို့ ရှိမည်ဖြစ်သည်။ သို့သော် အချို့လူများက “ကျွန်ုပ်တို့အားလုံးသည် မည်မျှစိတ်တင်းကျပ်ပြီး ကြောက်လန့်နေပါစေ စိတ်တည်ငြိမ်အောငထားပြီး အခြေအနေ၏ ပြဿနာများကို ကိုင်တွယ်ဖြေရှင်းရမည်။ ခေါင်းဆောင်များနှင့် အမှုဆောင်များအပြင် အခြားဒေသများမှ ညီအစ်ကိုမောင်နှမများ အမြန်ထွက်သွားနိုင်အောင် ကျွန်ုပ်က ၎င်းတို့အတွက် ဦးစွာ ဖုံးဖိဖာထေးပေးရမည်” ဟု ပြောကောင်းပြောပေမည်။ သို့သော် အခြားသူများကမူ “သူတို့အတွက် ဖုံးဖိဖာထေးပေးရမည် ဟုတ်လော။ ငါ့အတွက်မှာမူ အဘယ်နည်း။ အဆုံးတွင် ငါ ရုန်းထွက်လွတ်မြောက်နိုင်ခြင်း မရှိလျှင် မည်သို့လုပ်ဆောင်မည်နည်း။ ကျွန်ုပ် ဦးစွာ ပြေးဖို့လိုအပ်သည်။ ဦးစွာပြေးသည့်သူ မည်သူမဆိုသည် အဖမ်းခံရမည် မဟုတ်သကဲ့သို့ အပြစ်ဒဏ်ချမှတ်ခံရခြင်း သို့မဟုတ် ညှဉ်းပန်းနှိပ်စက်ခံရခြင်း ရှိမည်မဟုတ်” ဟု ကွဲပြားစွာ တွေးထင်ကောင်း တွေးထင်ပေမည်။ သင်မြင်သည့်အတိုင်း အန္တရာယ်နှင့် ရင်ဆိုင်ရသောအခါ လူတိုင်းတွင် ကြောက်လန့်ခြင်းဟူသော တူညီသည့် ဗီဇအလျောက် တုံ့ပြန်ခြင်း ရှိသော်လည်း အချို့လူများသည် အခြားသူများကို ကာကွယ်ရန် ဦးစားပေးပြီး မိမိတို့၏ အသက်ဘေးကင်းရေးကို နောက်တွင် ထားရှိသည်၊ ထိုသို့သောလူများသည် ချစ်ခြင်းမေတ္တာနှင့် ကြင်နာမှုကို ပြသသည်။ သို့သော် အခြားသူများမှာမူ သူတစ်ပါးကို ပစ်ထားပြီး ထွက်ပြေးလျက် မိမိတို့ကိုယ်ကိုသာ ဦးစွာ တွေးတောကြသည်၊ ဤသည်မှာ တစ်ကိုယ်ကောင်းဆန်ခြင်း ဖြစ်သည်။ အမှန်တွင် လူ့သဘာဝ၏ အသိတရားအရ ဤဒုတိယအုပ်စုသည် ခေါင်းဆောင်များနှင့် အမှုဆောင်များ၊ အခြားဒေသများမှ ညီအစ်ကိုမောင်နှမများကို ဦးစွာ ကာကွယ်သင့်သည်ကို သိသလော။ သဘောတရားအရ ၎င်းတို့ ဤသည်ကို နားလည်သလော။ (နားလည်ပါသည်။) လူတိုင်းသည် ဤသဘောတရားကို တန်းတူညီမျှ နားလည်ပြီး ဗီဇအလျောက် တုံ့ပြန်ခြင်းများ ရှိသောအခါ လူတို့သည် ၎င်းတို့၏ သရုပ်သကန်များအရ ကွဲပြားကြသည်။ ဤသည်မှာ တစ်ဦးချင်းစီကြားရှိ လူ့သဘာဝ ကွဲပြားမှုများကို ထင်ဟပ်စေသည်။ အချို့လူများသည် မိမိတို့ကိုယ်ကိုသာ ကြည့်ပြီး အခြားသူများကို လျစ်လျူရှုလျက် တစ်ကိုယ်ကောင်းဆန်ပြီး ယုတ်ညံ့ကြသည်၊ အခြားသူများမှာမူ စိတ်ကောင်းရှိကြပြီး မိမိတို့ကိုယ်ကို မငဲ့ကွက်ဘဲ အခြားသူများကို ထည့်သွင်းစဉ်းစားနိုင်ကာ ၎င်းတို့၏ ကာကွယ်မှုကို ဦးစားပေးပြီး တစ်ကိုယ်ကောင်းမဆန်စွာ ပြုမူကြသည်။ ဤသည်မှာ မတူညီသော လူ့သဘာဝ အမျိုးအစားများကို ထင်ဟပ်စေသလော။ (ထင်ဟပ်စေပါသည်။) ဤသည်က ခြားနားချက်ကို ရှင်းလင်းစေသည်။ သို့ဆိုလျှင် ဤလူအမျိုးအစားများထဲမှ မတူညီသော လူ့သဘာဝ နှစ်မျိုးရှိသည့်အနက် မည်သည့်လူအမျိုးအစားသည် သမ္မာတရားကို လက်ခံနိုင်ပြီး ၎င်းတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားနိုင်မည်နည်း။ (လူ့သဘာဝကောင်းရှိသော လူအမျိုးအစားသည် သမ္မာတရားကို လက်ခံနိုင်ပြီး ၎င်းတို့၏ ဖောက်ပြန်ပျက်စီးသော စိတ်သဘောထားကို အလွယ်တကူ ဖယ်ရှားနိုင်ပါသည်။) တစ်ကိုယ်ကောင်းဆန်သော လူများကော အသို့နည်း။ (၎င်းတို့အတွက် သမ္မာတရားကို လက်တွေ့လုပ်ဆောင်ရန် မလွယ်ကူပါ၊ ၎င်းတို့ နားလည်လျှင်ပင် လက်တွေ့မလုပ်ဆောင်နိုင်သောကြောင့် ၎င်းတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားရန် ခက်ခဲပါသည်။) မှန်ပေသည်။ သို့ဖြစ်၍ လူတိုင်းသည် ဖောက်ပြန်ပျက်စီးသော စိတ်သဘောထားကို ထုတ်ဖော်နိုင်သော်လည်း လူတို့၏ လူ့သဘာဝများ ကွဲပြားပါက ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားနိုင်ခြင်း ရှိမရှိနှင့်ပတ်သက်၍ ထိုနည်းတူစွာ ကွဲပြားကြလိမ့်မည်။ လူတို့တွင် မတူညီသော လူ့သဘာဝ အမျိုးအစားများ ရှိသောအခါ ၎င်းတို့သည် တူညီသော အခြေအနေကို မတူညီသော သဘောထားများနှင့် လုပ်နည်းကိုင်နည်းများဖြင့် တုံ့ပြန်ကြသည်။ ဤသည်က လူတစ်ဦးသည် သမ္မာတရားနှင့် အပြုသဘောဆောင်သော အရာများကို နောက်ဆုံး၌ လက်ခံနိုင်ခြင်း ရှိမရှိ၊ ၎င်းတို့သည် သမ္မာတရားကို လိုက်စားခြင်း လမ်းကြောင်းကို လျှောက်လှမ်းနိုင်ခြင်း ရှိမရှိနှင့် ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားနိုင်ခြင်း ရှိမရှိတို့ကို ဆုံးဖြတ်ပေးသည်။ လူတစ်ဦး၏ လူ့သဘာဝသည် အလွန်အရေးကြီးသည် မဟုတ်လော။ အန္တရာယ်နှင့် ကြုံတွေ့ရသောအခါ လူတိုင်းတွင် ဗီဇအလျောက် တုံ့ပြန်ခြင်းများအချို့ ရှိမည်ဖြစ်သည်၊ ၎င်းတို့အားလုံးသည် ထိတ်လန့်ခြင်း၊ တုန်လှုပ်ခြင်းနှင့် ကြောက်မက်ခြင်းတို့ကို ခံစားရသည်၊ ၎င်းတို့သည် မသေချာမရေရာဖြစ်ကြသည်၊ သေခြင်းကို ကြောက်ရွံ့ကြပြီး ထွက်ပြေးလိုကြသည်။ ထိုသို့သော အရေးကြီးသည့် အခြေအနေတွင် ကောင်းမွန်ပြီး ကြင်နာတတ်သော လူ့သဘာဝရှိသည့် လူတစ်ဦးသည် ခေါင်းဆောင်များနှင့် အမှုဆောင်များ၊ အခြားဒေသများမှ ညီအစ်ကိုမောင်နှမများကို ကာကွယ်ရန် ဦးစွာ တွေးတောမည်ဖြစ်သည်၊ ၎င်းတို့ ဦးစွာ တွေးတောသည့်အရာမှာ အခြားသူများ၏ ဘေးကင်းလုံခြုံရေး ဖြစ်သည်။ ၎င်းတို့တွင်လည်း ထိတ်လန့်ခြင်း၊ တုန်လှုပ်ခြင်း၊ ကြောက်မက်ခြင်းဟူသော ဗီဇအလျောက် တုံ့ပြန်ခြင်းများ ရှိပြီး မိမိကိုယ်ကို ကာကွယ်ခြင်းဗီဇကို ပင်ကိုအားဖြင့် ပိုင်ဆိုင်သော်လည်း ၎င်းတို့ အခြေအနေကို ကိုင်တွယ်ပုံမှာ မိမိတို့ကိုယ်ကို ဦးစွာ ကာကွယ်ခြင်းမဟုတ်ဘဲ အခြားသူများကို ကာကွယ်ခြင်း ဖြစ်သည်။ ဤသည်မှာ ကြင်နာတတ်သော လူ့သဘာဝရှိသည့် လူတစ်ဦး ကျင့်ကြံပြုမူပုံ ဖြစ်သည်။ တစ်ကိုယ်ကောင်းဆန်သောသူတစ်ဦး ကျင့်ကြံပြုမူပုံမှာကော အသို့နည်း။ ၎င်းတို့သည် အခြားသူများကို ထည့်တွက်တွေးတောကောင်း တွေးတောနိုင်သော်လည်း ၎င်းတို့ကို မကာကွယ်ပေ၊ ၎င်းတို့သည် မိမိတို့ကိုယ်ကိုသာ ဦးစွာ ကာကွယ်သည်။ ထို့ကြောင့် အခြားသူများကို စာနာနားလည်ပြီး ကာကွယ်နိုင်သည့် ကြင်နာတတ်သော လူ့သဘာဝရှိသူများသည် သမ္မာတရားကို လက်ခံနိုင်ဖွယ်ရှိသည်။ ၎င်းတို့၏ လူ့သဘာဝ၏ အသိတရားနှင့် ဆင်ခြင်တုံတရားသည် သမ္မာတရားကို လက်ခံရန်နှင့် ဖောက်ပြန်ပျက်စီးသော စိတ်သဘောထားကို ဖယ်ရှားရန် လိုအပ်သော အခြေအနေများနှင့် ကိုက်ညီသည်။ တစ်ကိုယ်ကောင်းဆန်သော လူအမျိုးအစားအတွက်မူ ၎င်းတို့သည် သမ္မာတရားကို နားလည်လျှင်ပင် လက်မခံသကဲ့သို့ လက်တွေ့လည်း မလုပ်ဆောင်ပေ။ အန္တရာယ်နှင့် ရင်ဆိုင်ရသောအခါ ၎င်းတို့၏ လူ့သဘာဝသည် မိမိကိုယ်ကို ကာကွယ်ခြင်းနှင့် တစ်ကိုယ်ကောင်းဆန်ခြင်းကို ဖော်ပြသည်။ ထို့ကြောင့် ၎င်းတို့ ဖော်ပြသည့် ဤလူ့သဘာဝကို အကဲဖြတ်ကြည့်လျှင် ၎င်းတို့တွင် သမ္မာတရားကို လက်ခံရန်နှင့် ဖောက်ပြန်ပျက်စီးသော စိတ်သဘောထားကို ဖယ်ရှားရန် လိုအပ်သော အခြေခံအခြေအနေများ ကင်းမဲ့နေသည်မှာ ထင်ရှားသည်။ ဆိုလိုသည်မှာ သမ္မာတရားကို လက်တွေ့လုပ်ဆောင်ရန် လိုအပ်သော အခြေအနေများတွင် ၎င်းတို့၏ အသိတရားနှင့် ဆင်ခြင်တုံတရားသည် ၎င်းတို့၏ လုပ်ဆောင်နိုင်စွမ်းကို ဆုံးရှုံးသွားသည်။ ၎င်းတို့သည် မိမိတို့၏ အသိတရားနှင့် ဆင်ခြင်တုံတရားကို ဆန့်ကျင်၍ ပြုမူကြသည်။ ၎င်းတို့သည် သမ္မာတရားကို ရှာဖွေရန်နှင့် မိမိတို့ လုပ်ဆောင်သင့်သော တရားမျှတသည့် အမှုအရာများကို လုပ်ဆောင်ရန် မရွေးချယ်ဘဲ ထိုအစား မိမိတို့ကိုယ်ကို ကာကွယ်ရန်နှင့် မိမိတို့၏ အကျိုးစီးပွားအားလုံးကို ထိန်းသိမ်းရန် မိမိတို့၏ တစ်ကိုယ်ကောင်းဆန်သော အလိုဆန္ဒများနှင့် အကျိုးစီးပွား လိုအပ်ချက်များကို အပြည့်အဝ ဖြည့်ဆည်းလျက် မိမိတို့၏ အသိတရားနှင့် ဆင်ခြင်တုံတရားကို ဆန့်ကျင်၍၊ ကိုယ်ကျင့်တရားဆိုင်ရာ တရားမျှတမှုကို ဆန့်ကျင်၍၊ သမ္မာတရားကို ဆန့်ကျင်၍ပင် ပြုမူရန် ရွေးချယ်ကြသည်။ ထို့ကြောင့် ဤလူစားမျိုးအနေဖြင့် သမ္မာတရားကို လိုက်စားခြင်းလမ်းကြောင်း သို့မဟုတ် ကယ်တင်ခြင်း လမ်းကြောင်းကို လျှောက်လှမ်းရန် လွယ်ကူမည် မဟုတ်ပေ။ ဆိုလိုသည်မှာ ၎င်းတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားရန် အလွန်ခက်ခဲခြင်း ဖြစ်သည်။ နှိုင်းနှိုင်းချိန်ချိန်ပြောရလျှင် ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားကို မဖယ်ရှားနိုင်ဟု ပြောမည့်အစား ထိုသို့ပြုလုပ်ရန် အလွန်ခက်ခဲသည်ဟု ငါတို့ ပြောမည်။ သို့ဆိုလျှင် ယခု ဤပြဿနာကို ကြည့်လျှင် လူတစ်ဦးသည် မိမိ၏ ဖောက်ပြန်ပျက်စီးသော စိတ်သဘောထားကို ဖယ်ရှားပြီး ကယ်တင်ခြင်းကို ရရှိနိုင်ခြင်း ရှိမရှိသည် ၎င်း၏ ပင်ကိုအခြေအနေများအပေါ် လုံးဝ မူတည်သလော။ (မမူတည်ပါ။) မည်သည့်အရာအပေါ် မူတည်သနည်း။ (၎င်းတို့၏ လူ့သဘာဝအပေါ် မူတည်ပါသည်။) ယင်းမှာ ၎င်းတို့၏ လူ့သဘာဝ၏ အရည်အသွေးနှင့် ၎င်းတို့သည် အမျိုးမျိုးသော လူများ၊ ဖြစ်ရပ်များနှင့် အမှုအရာများကို ရင်ဆိုင်ရသောအခါ ၎င်းတို့၏ လူ့သဘာဝ၏ အသိတရားနှင့် ဆင်ခြင်တုံတရားသည် လုပ်ဆောင်နိုင်ခြင်း ရှိမရှိအပေါ် မူတည်သည်။ တစ်နည်းအားဖြင့်ဆိုသော် ယင်းမှာ အမှုအရာများ ဖြစ်ပျက်သောအခါ ၎င်းတို့သည် မိမိတို့၏ အသိတရားနှင့် ဆင်ခြင်တုံတရားအတိုင်း ပြုမူခြင်း ရှိမရှိအပေါ် မူတည်သည်။ လူတစ်ဦးသည် မိမိ၏ အသိတရားနှင့် ဆင်ခြင်တုံတရား၏ ညွှန်ကြားမှုအောက်တွင် ပြုမူပါက ၎င်းတို့သည် အပြုသဘောဆောင်သော အရာများကို ရွေးချယ်ပြီး သမ္မာတရားကို ရွေးချယ်လိမ့်မည်။ သို့သော် ၎င်းတို့သည် မိမိတို့၏ အသိတရားနှင့် ဆင်ခြင်တုံတရားကို ဆန့်ကျင်၍ ပြုမူပါက ၎င်းတို့သည် သမ္မာတရားကို မည်မျှ နားလည်သည်ဖြစ်စေ သို့မဟုတ် ၎င်းတို့၏ အရည်အသွေး မြင့်သည်ဖြစ်စေ၊ နိမ့်သည်ဖြစ်စေ ကိုယ်ကျင့်တရားဆိုင်ရာ တရားမျှတမှုကို ဆန့်ကျင်မည်၊ သမ္မာတရား စည်းမျဉ်းများကို ဆန့်ကျင်မည်ဖြစ်ပြီး ၎င်းတို့၏ လူ့သဘာဝကိုပင် စွန့်လွှတ်လိမ့်မည်။ ဤသည်က သင့်ကို အဘယ်အရာ ရှင်းလင်းစေသနည်း။ လူ့သဘာဝသည် အလွန်အရေးကြီးသလော။ (အရေးကြီးပါသည်။) လူတစ်ဦးသည် အခြေအနေ မည်သို့ပင်ဖြစ်စေ ၎င်း၏ အကျိုးစီးပွားများနှင့် သက်ဆိုင်သည့်အခါတိုင်း မိမိ၏ အသိတရားနှင့် ဆင်ခြင်တုံတရားကို ဆန့်ကျင်၍၊ ကိုယ်ကျင့်တရားဆိုင်ရာ တရားမျှတမှုကို ဆန့်ကျင်၍ ပြုမူပါက ၎င်းတို့သည် မိမိတို့၏ လူ့သဘာဝကို စွန့်လွှတ်လိမ့်မည်။ ၎င်းတို့သည် မိမိတို့၏ ကိုယ်ကျိုးစီးပွားများကို လုံခြုံစေရန်နှင့် ကာကွယ်ရန် မည်သည့်အရာကိုမဆို လုပ်ဆောင်လိမ့်မည်။ သို့ဖြစ်၍ အခြေအနေတစ်ခုနှင့် ရင်ဆိုင်ရသောအခါ ၎င်းတို့သည် မိမိတို့၏ အသိတရားနှင့် ဆင်ခြင်တုံတရားအတိုင်း ပြုမူရန် ရွေးချယ်မည် မဟုတ်ပေ။ ထိုအစား ၎င်းတို့သည် မိမိတို့၏ ရည်မှန်းချက်များကို စွမ်းဆောင်ရရှိရန် မိမိတို့၏ တည်ကြည်မှုနှင့် ဂုဏ်သိက္ခာကို စတေးလျက် မိမိတို့၏ ကိုယ်ကျိုးစီးပွားများအတွက် ယင်းတို့ကို ဆန့်ကျင်လိမ့်မည်။ ဤရှုထောင့်မှ ကြည့်လျှင် ဤလူစားမျိုး ပုံမှန်အားဖြင့် မည်မျှ ကောင်းမွန်စွာ ပြုမူသည်ဖြစ်စေ ၎င်းတို့သည် မိမိတို့၏ ကိုယ်ကျိုးစီးပွားမှလွဲ၍ မည်သည့်အရာကိုမျှ မလိုက်စားပေ၊ ၎င်းတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားရန် အလွန်ခက်ခဲသည်။ ၎င်းတို့သည် သမ္မာတရားကို လက်မခံပေ၊ အခိုက်အတန့်က ပို၍အရေးကြီးလေ၊ ၎င်းတို့ လက်တွေ့အရှိတရားနှင့် ပို၍ရင်ဆိုင်ရလေ ၎င်းတို့သည် မိမိတို့၏ အသိတရား၊ ဆင်ခြင်တုံတရားနှင့် သမ္မာတရားကို ဆန့်ကျင်ရန် ပို၍ရွေးချယ်လေဖြစ်သည်၊ အခိုက်အတန့်က ပို၍အရေးကြီးလေ ၎င်းတို့သည် သမ္မာတရားကို အလွန်အမင်း မနှစ်မြို့ခြင်းဟူသော မိမိတို့၏ ဖောက်ပြန်ပျက်စီးသော စိတ်သဘောထားနှင့် မိမိတို့၏ တစ်ကိုယ်ကောင်းဆန်ပြီး ယုတ်ညံ့သော လူ့သဘာဝကို ပို၍ထုတ်ဖော်လေ ဖြစ်သည်။ ထို့ကြောင့် ဤလူအမျိုးအစားအတွက် ၎င်းတို့၏ ဖောက်ပြန်ပျက်စီးသော စိတ်သဘောထားကို ဖယ်ရှားရန် အလွန်ခက်ခဲသည်။ ယခုအချိန်တွင် လူတစ်ဦး၏ လူ့သဘာဝသည် ဖောက်ပြန်ပျက်စီးသော စိတ်သဘောထားကို ဖယ်ရှားရန်အတွက် အခြေခံကျသော အခြေအနေတစ်ခုဖြစ်သည်မှာ ရှင်းလင်းပြီ မဟုတ်လော။ လူတစ်ဦးတွင် မည်သို့သော လူ့သဘာဝမျိုး ရှိသည်က ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားကို နောက်ဆုံးတွင် ဖယ်ရှားနိုင်ခြင်း ရှိမရှိ၊ ၎င်းတို့သည် သမ္မာတရား လိုက်စားခြင်း လမ်းကြောင်းကို နောက်ဆုံးတွင် လျှောက်လှမ်းနိုင်ခြင်း ရှိမရှိနှင့် ၎င်းတို့သည် နောက်ဆုံးတွင် ကယ်တင်ခြင်းကို ရရှိနိုင်ခြင်း ရှိမရှိတို့ကို ဆုံးဖြတ်ပေးသည်။

အချို့လူများသည် ပင်ကိုအားဖြင့် စကားနည်းကြပြီး နူးညံ့ကာ သည်းခံတတ်သော ပင်ကိုစရိုက်တစ်ခု ရှိသည်။ ၎င်းတို့သည် အမှုအရာများနှင့်ပတ်သက်၍ ဇာချဲ့ခြင်း သို့မဟုတ် အခြားသူများနှင့် အငြင်းအခုံပြုခြင်း မရှိသလောက် နည်းသကဲ့သို့ အလွန်အကျံ ရုန့်ရင်းကြမ်းတမ်းခြင်း မရှိကြပေ။ ၎င်းတို့၏ ပြောဆိုပုံသည် ပကာသနမပါဘဲ ၎င်းတို့၏ အသံများမှာ နူးညံ့သည်။ အပြင်ပန်းအားဖြင့် ၎င်းတို့သည် အထူးနူးညံ့ပုံရပြီး အမှုအရာများကို စနစ်တကျနှင့် အလျင်မလိုသည့်ဟန်ပန်ဖြင့် လုပ်ဆောင်ကြသည်။ အခြားသူများနှင့် နှုတ်ဖြင့်ပြောဆိုဆက်ဆံမှုများစွာ ပြုလုပ်ခြင်းကို မကြိုက်သော၊ လူများနှင့် အလွန်အကျံ ပေါင်းသင်းဆက်ဆံရန် မလိုလားသော အရှက်အကြောက်ကြီးသည့် လူအချို့ပင် ရှိသေးသည်။ ၎င်းတို့ မည်သည့်နေရာသို့ သွားသည်ဖြစ်စေ အခြေခံအားဖြင့် ၎င်းတို့ ရှိနေသည်ကိုပင် အခြားသူများက သတိမထားမိကြပေ။ ဤသရုပ်သကန်များသည် မည်သည့်ပြဿနာအမျိုးအစားနှင့် သက်ဆိုင်သနည်း။ (ဤသည်မှာ ၎င်းတို့၏ ပင်ကိုစရိုက်နှင့်ဆိုင်သော ပြဿနာတစ်ခု ဖြစ်ပါသည်။) ဤသည်မှာ ၎င်းတို့၏ မွေးရာပါ ပင်ကိုစရိုက်နှင့်ဆိုင်သော ပြဿနာတစ်ခု ဖြစ်သည်။ ဤလူများသည် အပြင်ပန်း၌ ဤပင်ကိုစရိုက်မျိုး ရှိကြပြီး အတွင်း၌လည်း ၎င်းတို့၏ အတွေးအခေါ်များသည် အလွန်ရိုးရှင်းပါသည်။ ၎င်းတို့သည် အခြားသူများအပေါ် အတော်အတန် ကောင်းမွန်ကြသည်၊ အခြားသူများနှင့် အတော်အတန် မျှတစွာ ပေါင်းသင်းဆက်ဆံကြသည်၊ အခြားသူများကို အခွင့်ကောင်းမယူကြပေ၊ ပြီးလျှင် ၎င်းတို့သည် အခြားသူများထံမှ မျက်နှာသာပေးမှု သို့မဟုတ် အကူအညီကို လက်ခံရရှိသောအခါ ပြန်လည်ပေးဆပ်ကြပြီး အခြားသူများ၏ ကျေးဇူးတရားကိုလည်း ၎င်းတို့၏ စိတ်နှလုံးထဲ၌ အောက်မေ့ကြသည်။ ဤလူများသည် အပြင်ပန်းအားဖြင့် ကောင်းသော လူ့သဘာဝရှိပုံရသည်။ ၎င်းတို့သည် လူနှင့် တိရစ္ဆာန်နှစ်မျိုးလုံးကို အန္တရာယ်မပြုကြပေ။ ၎င်းတို့သည် သည်းခံတတ်ကြသည်၊ အခြားသူများအပေါ် ထောက်ထားစာနာတတ်ကြပြီး အခြားသူများနှင့် အမှုအရာများကို ဇာမချဲ့ကြပေ။ ၎င်းတို့သည် အငြင်းပွားမှုများတွင် ပါဝင်ပတ်သက်ခြင်းမရှိသကဲ့သို့ အခြားသူများအကြောင်း အတင်းအဖျင်းလည်း မပြောကြပေ။ ၎င်းတို့သည် လူတို့၏ နောက်ကွယ်တွင် ဝေဖန်သုံးသပ်ခြင်း မပြုကြသကဲ့သို့ အခြားသူများကို အလျင်ဦးအောင် တိုက်ခိုက်ခြင်း သို့မဟုတ် ထိခိုက်နစ်နာစေခြင်းကို မည်သည့်အခါမျှ မပြုကြပေ။ တစ်စုံတစ်ဦး အခက်အခဲကြုံတွေ့ရသောအခါ ၎င်းတို့ ကူညီနိုင်သမျှ ကူညီကြပြီး မည်သည့်အခါမျှ ငြင်းပယ်မည် မဟုတ်သကဲ့သို့ အပြန်အလှန်အားဖြင့် မည်သည့်အရာကိုမျှလည်း တောင်းဆိုခြင်းမရှိပေ။ လူအများစုက ဤပုဂ္ဂိုလ်များသည် အတော်လေး ဖော်ရွေပေါင်းသင်းလွယ်သည်ဟု ပြောဆိုကြပေမည်။ သို့ဆိုလျှင် ဤလူများသည် အပြင်ပန်းအားဖြင့် ကောင်းသော လူ့သဘာဝရှိပုံရသလော။ (ဟုတ်ပါသည်။) သို့သော် တစ်ကြိမ်တွင် ဘုရားအိမ်တော်က ၎င်းတို့အား အခြေအနေများနှင့်ပတ်သက်၍ ဤသို့မေးသည်။ “သင်တို့၏ အသင်းတော်ခေါင်းဆောင်များ၏ အလုပ်သည် မည်သို့ရှိသနည်း။ ညီအစ်ကိုမောင်နှမများက ၎င်းတို့အပေါ် မည်သို့ထင်မြင်ကြသနည်း။ ဤကာလအတွင်း ဧဝံဂေလိအလုပ်တွင် မည်သည့်အကျိုးရလဒ်များ ရှိခဲ့သနည်း။ အသင်းတော်အလုပ်ကို အဖျက်အမှောင့်လုပ်သူ သို့မဟုတ် နှောင့်ယှက်သူ တစ်စုံတစ်ဦး ရှိခဲ့သလော” ဟူ၍ဖြစ်သည်။ ၎င်းတို့က ဤသို့ စဉ်းစားကြလေသည်၊ “၎င်းတို့က ဤအကြောင်းကို ကျွန်ုပ်အား အဘယ်ကြောင့် မေးရသနည်း။ ၎င်းတို့ မည်သည့်အရာကို ဆိုလိုနေသနည်း။ ခေါင်းဆောင်များ ကောင်းစွာမလုပ်ဆောင်ဟု ကျွန်ုပ်ပြောသင့်ကြောင်း သွယ်ဝိုက်ပြောနေခြင်းလော။ ကျွန်ုပ်တို့၏ ခေါင်းဆောင်များကို ဖြုတ်ချရန် စစ်ဆေးနေခြင်းလော။ ၎င်းတို့သည် ကျွန်ုပ်ကို စကားအစ်အောက်ပြီး ကျွန်ုပ်ထံမှ အတည်ပြုချက်ရရန် ကြိုးစားနေခြင်းသာ ဖြစ်သည်။ ကောင်းပြီ၊ ကျွန်ုပ် မည်သည့်အရာမျှ ပြောမည်မဟုတ်ပါ။ တစ်နေ့တွင် ခေါင်းဆောင်များ ဖြုတ်ချခံရပြီး ၎င်းတို့၏ ပြဿနာများကို ကျွန်ုပ်တိုင်ကြားခဲ့မှန်း သူတို့သိသွားလျှင် ကျွန်ုပ်ကို ရန်ငြိုးဖွဲ့မည် မဟုတ်လော” ဟူ၍ဖြစ်သည်။ သို့ဖြစ်၍ ၎င်းတို့က “ခေါင်းဆောင်များသည် လတ်တလောတွင် အတော်လေး ကောင်းမွန်စွာ လုပ်ဆောင်နေခဲ့ပါသည်။ ကျွန်ုပ် မည်သည့်ပြဿနာကိုမျှ သတိမပြုမိခဲ့ပါ” ဟု ပြန်ဖြေသည်။ ၎င်းတို့ ပြောသည်မှာ ထိုမျှသာ ဖြစ်သည်။ ၎င်းတို့အား “သင် အမှန်တကယ် မည်သည့်ပြဿနာကိုမျှ သတိမပြုမိခဲ့ဘူးလော” ဟု ထပ်မေးသောအခါ ၎င်းတို့က “၎င်းတို့က “ညီအစ်မ မည်သူမည်ဝါ ကို ပြောခိုင်းကြည့်ပါလော့၊ သူက ခေါင်းဆောင်များနှင့် မကြာခဏ ထိတွေ့ဆက်ဆံပါသည်။ ၎င်းတို့ မကြာခဏ ပေါင်းသင်းကြပြီး သူက သူတို့ကို ကောင်းကောင်းသိပါသည်။ ကျွန်ုပ်မှာမူ သူတို့ကို သိပ်မသိပါ” ဟု ပြန်ဖြေသည်။ သို့သော် အမှန်တကယ်တွင် ၎င်းတို့က မိမိတို့ဘာသာ ဤသို့တွေးနေသည်။ “ကျွန်ုပ်သိလျှင်ပင် မည်သည့်အရာမျှပြော၍မဖြစ်ပါ။ ကျွန်ုပ်ပြောလိုက်၍ နောက်ပိုင်းတွင် ခေါင်းဆောင်များ ဖြုတ်ချခံရလျှင် ၎င်းတို့က ကျွန်ုပ်ကို ရန်ငြိုးဖွဲ့မည် မဟုတ်လော။ သူတို့ ဖြုတ်ချမခံရလျှင်ပင် သူတို့အကြောင်း မကောင်းပြောခဲ့မှန်း သူတို့သိသွားလျှင် ကျွန်ုပ်ကို အခက်တွေ့အောင်လုပ်မည် မဟုတ်လော။ သူတို့ ကျွန်ုပ်ကို ညှဉ်းများ ညှဉ်းပန်းနိုင်သလော။ ကျွန်ုပ်၏တာဝန် ဖယ်ရှားခံရမည်လော။ ကျွန်ုပ် မည်သည့်အရာမျ ှပြော၍မဖြစ်ပါ” ဟူ၍ ဖြစ်လေသည်။ ဤသည်မှာ မည်သည့်သရုပ်သကန်အမျိုးအစား ဖြစ်သနည်း။ (ဤသည်မှာ လှည့်ဖြားတတ်ခြင်း၏ သရုပ်သကန်တစ်ခု ဖြစ်ပါသည်။) ပြီးလျှင် ဤသည်မှာ မည်သည့်ပြဿနာအမျိုးအစားနှင့် သက်ဆိုင်သနည်း။ ဖောက်ပြန်ပျက်စီးသော စိတ်သဘောထား ဖြစ်သည်။ ဤလူစားမျိုးသည် အပြင်ပန်း၌ ပင်ကိုအားဖြင့် ကောင်းမွန်သော ပင်ကိုစရိုက်နှင့် ကောင်းမွန်သော လူ့သဘာဝရှိပုံရသော်လည်း အခြားသူများကို အကဲဖြတ်ခြင်း သို့မဟုတ် ပြဿနာများကို တိုင်ကြားခြင်းနှင့်ပတ်သက်လာသည့်အခါတိုင်း ၎င်းတို့က မိမိတို့သည် ယုံကြည်သူဖြစ်သည်မှာ အချိန်တိုသေးပြီး သမ္မာတရားကို နားမလည်ကြောင်း၊ အမှုအရာများကို ထွင်းဖောက်မမြင်နိုင်လောက်အောင် အလွန်မိုက်မဲကြောင်း ပြောဆိုလျက် မိမိတို့မသိဟု အခိုင်အမာဆိုကြသည်။ မည်သူ၏ ပြဿနာများကို တွေ့သည်ဖြစ်စေ ၎င်းတို့သည် မည်သည့်အခါမျှ တိုင်ကြားခြင်း သို့မဟုတ် ထုတ်ပြောခြင်း မပြုပေ။ တစ်စုံတစ်ဦးက ခေါင်းဆောင်များကို နောက်ကွယ်တွင် ဝေဖန်သုံးသပ်သည့်အခါ သို့မဟုတ် မိမိတို့၏ တာဝန်ကို ဝတ်ကျေတမ်းကျေ ထမ်းဆောင်သည့်အခါ ၎င်းတို့က မတွေ့သလို၊ သို့မဟုတ် မသိသလို ဟန်ဆောင်ပြီး မည်သည့်အရာကိုမျှ မည်သည့်အခါမျှ မတိုင်ကြားပေ။ ခေါင်းဆောင်များက “သင် မည်သူမည်ဝါနှင့် အချိန်များစွာ အတူရှိခဲ့သည်၊ သူ၏ တာဝန်ထမ်းဆောင်မှုက ပုံမှန်အားဖြင့် မည်သို့ရှိသနည်း။ သူသည် အခက်အခဲကို ခံနိုင်ပြီး အဖိုးအခပေးနိုင်စွမ်း ရှိသလော” ဟု မေးသောအခါ ၎င်းတို့က “အင်း၊ သူက မနက်စောစောထပြီး ညအတော်မိုးချုပ်မှ အိပ်ရာဝင်သည်ကို ကျွန်ုပ်တွေ့ပါသည်” ဟု ပြန်ဖြေသည်။ အမှန်တကယ်တွင် ဤလူသည် ဘာသာတရားမရှိသော လောက၏ ဗီဒီယိုများကို မကြာခဏ ကြည့်ရှုပြီး မိမိ၏ တာဝန်ကို ထမ်းဆောင်ရာတွင် အဖိုးအခမပေးကြောင်း ၎င်းတို့က ရှေးမဆွကပင် သတိပြုမိခဲ့သော်လည်း အမှန်တရားကို မပြောဆိုပေ၊ ၎င်းတို့သည် လူတိုင်းနှင့် အပေါ်ယံ သဟဇာတဖြစ်မှုကို အစဉ်သဖြင့် ထိန်းသိမ်းထားသည်။ အပြင်ပန်းအားဖြင့် ၎င်းတို့၏ မွေးရာပါ ပင်ကိုစရိုက်သည် ကောင်းမွန်ပုံရပြီး ၎င်းတို့၏ လူ့သဘာဝသည်လည်း ကောင်းမွန်ပုံရသော်လည်း ဤကောင်းသော လူ့သဘာဝ၏ အသွင်အပြင်အောက်တွင် မည်သည့်အရာက ဖုံးကွယ်နေသနည်း။ ၎င်းတို့သည် လူ့အကြိုက်လိုက်သူများ ဖြစ်ကြသည်၊ ၎င်းတို့သည် မည်သူ့ကိုမျှ မစော်ကားသော၊ မည်သူ့ကိုမျှ ဒုက္ခမပေးသော၊ မည်သူ့ကိုမျှ အခွင့်ကောင်းမယူသော၊ ရန်သူများမဖြစ်စေသော လူ့အကြိုက်လိုက်သူများ ဖြစ်ကြသည်။ မိမိတို့ကိုယ်ကို ကျင့်ကြံပြုမူခြင်းအတွက် ၎င်းတို့၏ စည်းမျဉ်းမှာ အဘယ်နည်း။ (မည်သူ့ကိုမျှ မစော်ကားမိရန် ဖြစ်ပါသည်။) ၎င်းတို့သည် မည်သူ့ကိုမျှ မစော်ကားမိစေဘဲ၊ မည်သူ့ကိုမျှ ဒုက္ခမပေးဘဲ မိမိတို့ကိုယ်ကို ကာကွယ်ရန်သာ ကြိုးစားကြသည်။ ဤသည်မှာ ယုံကြည်၍မရခြင်း ဖြစ်သလော။ (ဟုတ်ပါသည်။) တစ်စုံတစ်ဦးက ၎င်းတို့နှင့် ရိုးသားစွာ မိတ်သဟာယဖွဲ့လျက် “ကျွန်ုပ်တို့ တာဝန်များကို အတူတကွ ထမ်းဆောင်ခဲ့သည်မှာ အချိန်အကြာဆုံး ဖြစ်သည်။ ကျွန်ုပ်၌ သင်တွေ့မြင်သည့် မည်သည့်ပြဿနာမဆို ထောက်ပြပေးပါ။ ကျွန်ုပ် လက်ခံပြီး ပြောင်းလဲမည်ဟု ကတိပေးပါသည်။ ဤကိစ္စနှင့်ပတ်သက်၍ လက်တွေ့လုပ်ဆောင်ခြင်း စည်းမျဉ်းများအကြောင်းကိုလည်း ကျွန်ုပ်နှင့် မိတ်သဟာယဖွဲ့ပေးပါ” ဟု ပြောဆိုသည့်အခါမျိုးတွင်ပင်၊ အခြားတစ်ဦးက ဤမျှ စိတ်ရင်းမှနသည့်အခါတွင်ပင် ၎င်းတို့သည် အမှန်တရားကို မပြောဆိုကြသေးပေ။ ထိုအစား ၎င်းတို့က “သင်သည် ကျွန်ုပ်ထက် များစွာ ပိုသာပါသည်။ အမှန်တကယ်တွင် ကျွန်ုပ် ပျော့ညံ့သည်ကို သင်တို့တစ်ယောက်မျှ သတိမထားမိကြပါ။ ကျွန်ုပ်သည် အပျက်သဘောဆောင်လာပြီး ပုန်ကန်တတ်သူလည်း ဖြစ်သည်” ဟု မရိုးမသား ပြောဆိုသည်။ အခြားသူများက မည်မျှပင် ရိုးသားစွာ တောင်းဆိုပါစေ ၎င်းတို့သည် မည်သည့်အရာကိုမျှ ပြောဆိုမည်မဟုတ်သေးပေ။ ၎င်းတို့သည် မည်သူ့ကိုမဆို စော်ကားရန် လုံးဝငြင်းပယ်ပြီး မှန်ကန်သော ပြောဆိုချက် တစ်ခုတလေကိုမျှ မည်သည့်အခါမျှ ပြုလုပ်မည် မဟုတ်ပေ။ ၎င်းတို့သည် မည်သူ့ကိုမျှ အမှန်တရားကို ပြောဆိုမည်မဟုတ်ဘဲ အရာအားလုံးကို ၎င်းတို့၏ စိတ်နှလုံးထဲ၌သာ မြှုပ်နှံထားသည်။ ဤအချက်မှ ကြည့်လျှင် ၎င်းတို့တွင် အတွေးအခေါ်များ မရှိသည်တော့ မဟုတ်ပေ၊ အကြောင်းမှာ ၎င်းတို့သည် စက်ရုပ်များမဟုတ်သကဲ့သို့ လက်တွေ့ဘဝနှင့် ကင်းကွာနေခြင်းလည်း မဟုတ်သောကြောင့် ဖြစ်သည်။ ၎င်းတို့တွင် မတူညီသော လူများနှင့် ကိစ္စရပ်များအပေါ် အမြင်များ ရှိကြသော်လည်း ၎င်းတို့သည် ထိုအမြင်များကို မည်သည့်အခါမျှ ထုတ်ဖော်ပြောဆိုခြင်း သို့မဟုတ် မည်သူ့ကိုမျှ ဝေမျှခြင်း သို့မဟုတ် ဖော်ပြခြင်း မပြုကြပေ။ ၎င်းတို့သည် အရာအားလုံးကို မိမိတို့ဘာသာ သိမ်းဆည်းထားကြသည်မှာ တစ်စိတ်တစ်ပိုင်းအားဖြင့် အခြားသူများက ၎င်းတို့ကို ထွင်းဖောက်မမြင်စေလိုသောကြောင့်ဖြစ်ပြီး တစ်စိတ်တစ်ပိုင်းအားဖြင့် မည်သူ့ကိုမျှ မစော်ကားလိုသောကြောင့် ဖြစ်သည်။ သို့ဖြစ်၍ ကျင့်ကြံပြုမူခြင်းအတွက် ၎င်းတို့၏ စည်းမျဉ်းမှာ အဘယ်နည်း။ ၎င်းတို့တွင် စည်းမျဉ်းများ မရှိသလော။ (ဟုတ်ပါသည်။) ၎င်းတို့တွင် စည်းမျဉ်းများ မရှိပေ။ ၎င်းတို့သည် သမ္မာတရားကို မည်သည့်အခါမျှ မရှာဖွေသကဲ့သို့ စည်းမျဉ်းများကိုလည်း မစောင့်ထိန်းကြပေ။ ၎င်းတို့သည် မိမိတို့ကိုယ်ကို ကာကွယ်ခြင်းနှင့် စောင့်ရှောက်ခြင်းကိုသာ အာရုံစိုက်ကြသည်။ ၎င်းတို့ မထိခိုက်သမျှ ကာလပတ်လုံး ဘုရားသခင် မည်သို့တောင်းဆိုသည်ကို ဂရုမစိုက်ကြပေ။ ၎င်းတို့သည် ကျင့်ကြံပြုမူပုံ၌ မည်သည့်စည်းမျဉ်းများ သို့မဟုတ် စည်းများမျှ မရှိသကဲ့သို့ မည်သူ့ကိုမျှ မစော်ကားပေ၊ ၎င်းတို့သည် လူ့အကြိုက်လိုက်သူများသာ ဖြစ်ကြသည်။ ထို့ကြောင့် အခြားသူများ၏ အမြင်တွင် ၎င်းတို့သည် လူကောင်းများအဖြစ်လည်း ရှုမြင်ခံရသည်၊ အကြောင်းမှာ ၎င်းတို့နှင့် ထိတွေ့ဆက်ဆံသူများသည် ၎င်းတို့၏ အကူအညီကို မကြာခဏ ရရှိကြပြီး အခြားသူများက ၎င်းတို့ထံမှ မည်သည့်အရာကိုမဆို တောင်းဆိုသည့်အခါတိုင်း ၎င်းတို့သည် မည်သည့်အခါမျှ မငြင်းပယ်သောကြောင့် လူတို့က ၎င်းတို့ကို လူကောင်းများဟု ယုံကြည်စေသည်။ သို့သော် ၎င်းတို့ ကျင့်ကြံပြုမူသည့် စည်းမျဉ်းများကို သင် အနီးကပ် ဆန်းစစ်ကြည့်မည်ဆိုလျှင် ၎င်းတို့တွင် ကျင့်ကြံပြုမူရန် မည်သည့်စည်းမျဉ်းမျှ မရှိကြောင်း သင်တွေ့ရှိလိမ့်မည်။ ဖောက်ပြန်ပျက်စီးသော စိတ်သဘောထားများနှင့် သက်ဆိုင်သော ပြဿနာများနှင့်ပတ်သက်လာလျှင် ၎င်းတို့သည် ထိုပြဿနာများကို ဖြေရှင်းရန် သမ္မာတရားကို ရှာဖွေမည်လော။ ၎င်းတို့သည် သမ္မာတရား စည်းမျဉ်းများအတိုင်း လက်တွေ့လုပ်ဆောင်မည်လော။ (မဟုတ်ပါ။) အဖြေမှာ မဟုတ်သည်မှာ သေချာပါသည်။ ဤလူများသည် မိမိတို့တွင် ကောင်းသော လူ့သဘာဝနှင့် ကြင်နာသော စိတ်နှလုံးများရှိသည်ဟု ယုံကြည်လျက် မိမိတို့၏ ကိုယ်ပိုင် ခံစားချက်အရဖြစ်သော နားလည်မှုကို စွဲကိုင်ထားကြသည်။ ၎င်းတို့သည် အခြားသူများအပေါ် မကောင်းသော ရည်ရွယ်ချက်များကို မည်သည့်အခါမျှ မထားရှိဟုဖြစ်စေ၊ အနည်းဆုံးအနေဖြင့် အခြားသူများကို တက်ကြွစွာ ထိခိုက်နစ်နာစေခြင်း သို့မဟုတ် ၎င်းတို့၏ အကျိုးစီးပွားများကို ပျက်စီးစေခြင်း မပြုဟုဖြစ်စေ တွေးထင်ကြသည်။ အခြားသူများက တောင်းဆိုမှု သို့မဟုတ် လိုအပ်ချက် တစ်ခုတလေ ရှိသည့်အခါတိုင်း ၎င်းတို့သည် အစဉ်သဖြင့် တုံ့ပြန်ကြသည်။ ၎င်းတို့၏ နားလည်မှုတွင် မည်သူ့ကိုမျှ မစော်ကားခြင်း သို့မဟုတ် မထိခိုက်စေခြင်းသည် ၎င်းတို့ကို လူကောင်းများ ဖြစ်စေသည်ဟု ၎င်းတို့က ယုံကြည်ကြသည်။ ရန်သူတစ်ဦးတယောက်မျှ မထားခြင်းအားဖြင့် ၎င်းတို့သည် မိမိတို့ကိုယ်ကို မည်သည့်အန္တရာယ်ရှိသော အခြေအနေတွင်မျှ ရောက်စေမည်မဟုတ်ဟုလည်းကောင်း၊ မည်သူကမျှ ၎င်းတို့ကို ရန်သူအဖြစ် ရှုမြင်မည်မဟုတ်ဟုလည်းကောင်း တွေးထင်ကြသည်။ ဤနည်းအားဖြင့် ၎င်းတို့သည် ထိခိုက်နာကျင်မည်မဟုတ်ဘဲ ဘေးကင်းလုံခြုံနေဦးမည် ဖြစ်သည်။ ဤလူစားမျိုးသည် ကျင့်ကြံပြုမူပုံ၌ မည်သည့်ပန်းတိုင် ရှိသနည်း။ ၎င်းတို့၏ တစ်ခုတည်းသော ရည်ရွယ်ချက်မှာ မိမိကိုယ်ကို ကာကွယ်ခြင်း ဖြစ်သည်၊ ၎င်းတို့အတွက်မူ အသက်သာဆုံးနှင့် အလုံခြုံဆုံး ခိုလှုံရာနှင့် သက်သောင့်သက်သာဖြစ်သည့် နေရာဟု ၎င်းတို့ယုံကြည်သည့်အရာတွင် နေထိုင်ရန် လုံလောက်ပေပြီ။ ၎င်းတို့တွင် ကျင့်ကြံပြုမူပုံ၌ စည်းမျဉ်းများနှင့် စည်းများကို ပြောင်းလဲရန် သို့မဟုတ် မိမိတို့၏ အကျင့်အကြံ လားရာကို ပြောင်းလဲရန် ရည်ရွယ်ချက်မရှိသကဲ့သို့ ၎င်းတို့၏ ဖောက်ပြန်ပျက်စီးသော စိတ်သဘောထားများကို ဖယ်ရှားရန် ရည်ရွယ်ချက်လည်း မရှိသည်မှာ သေချာပါသည်။ ဤလူများသည် လူ့အကြိုက်လိုက်သူများနှင့် ပြဿနာရှောင်သူများ ဖြစ်ကြသည်။ အခြားသူများက သမ္မာတရား စည်းမျဉ်းများအကြောင်း သို့မဟုတ် ကျင့်ကြံပြုမူပုံ၏ စည်းများနှင့် စည်းမျဉ်းများအကြောင်း မည်သို့ပင် မိတ်သဟာယဖွဲ့ပါစေ ၎င်းတို့သည် ကျင့်ကြံပြုမူသည့် နည်းလမ်းကို ပြောင်းလဲမည်မဟုတ်ပေ။ သို့ဆိုလျှင် ဤလူများတွင် ကောင်းသော လူ့သဘာဝ ရှိသလော။ (မရှိပါ။) ဤလူများသည် သမ္မာတရားကို လက်ခံနိုင်သလော သို့မဟုတ် စည်းမျဉ်းများကို စောင့်ထိန်းနိုင်သလော။ (မစောင့်ထိန်းနိုင်ပါ။) အဘယ်ကြောင့် ၎င်းတို့သည် သမ္မာတရား စည်းမျဉ်းများကို မစောင့်ထိန်းနိုင်ကြသနည်း။ အကြောင်းမှာ ၎င်းတို့၏ စိတ်ထဲတွင် ကျင့်ကြံပြုမူခြင်းအတွက် ၎င်းတို့၏ စံနှုန်းမှာ လူ့အကြိုက်လိုက်သူများ ဖြစ်ရန် ဖြစ်သောကြောင့် ဖြစ်သည်။ အမြင်တစ်ခုရှိရန် သို့မဟုတ် ရပ်တည်ချက်တစ်ခု ယူရန် လိုအပ်သော မည်သည့်ကိစ္စနှင့်ပတ်သက်၍မဆို ၎င်းတို့သည် တိတ်ဆိတ်စွာနေကြသည်၊ လျစ်လျူရှုသော သဘောထားကို ထိန်းသိမ်းထားကြပြီး မိမိတို့နှင့် မသက်ဆိုင်သကဲ့သို့ စိုးရိမ်ပူပန်မှုကင်းမဲ့ပြီး ခပ်ကင်းကင်းနေလျက် လက်ရှောင်သော လုပ်နည်းကိုင်နည်းကို ကျင့်သုံးကြသည်။ အကျိုးဆက်အနေဖြင့် ၎င်းတို့သည် ကျင့်ကြံပြုမူပုံနှင့် လုပ်ဆောင်ပုံ၌ မည်သည့်ထူးခြားချက်မျှ မရှိပေ၊ ၎င်းတို့သည် ကိုင်တွယ်ရခက်သော ငါးရှဉ့်တစ်ကောင်နှင့်တူသည်။ ၎င်းတို့သည် မိမိတို့ပတ်ဝန်းကျင်ရှိ လူများနှင့် ဖြစ်ရပ်များကို ဂရုမစိုက်ကြပေ။ မည်သည့်ပတ်ဝန်းကျင်တွင် သို့မဟုတ် မည်သည့်လူနှင့်မဆို ပြဿနာများ မည်မျှပင် သိသာထင်ရှားပါစေ ၎င်းတို့သည် ထိုအရာများကို ဂရုစိုက်ရန်၊ စုံစမ်းရန် သို့မဟုတ် သိရှိရန် စိတ်ဝင်စားမှုမရှိကြပေ။ ၎င်းတို့နှင့် မသက်ဆိုင်သမျှ ကာလပတ်လုံး စိုးရိမ်ပူပန်ရန် မလိုအပ်ဟု ၎င်းတို့က ယုံကြည်ကြသည်။ ဤအတွက် ဆိုရိုးစကားတစ်ခု ရှိသည်၊ မည်သို့ဆိုသနည်း။ “အကျိုးကျေးဇူးကို မရှာနှင့်၊ သို့သော် အပြစ်တင်ခံရခြင်းကို ရှောင်ကြဉ်လော့။” ဟူ၍ဖြစ်သည်။ ဤသည်မှာလည်း လူ့အကြိုက်လိုက်သူများ ကျင့်ကြံပြုမူသည့် စည်းမျဉ်းတစ်ခု ဖြစ်သည်။ ထိုသို့သော လူများ၏ ဖောက်ပြန်ပျက်စီးသော စိတ်သဘောထားများ၏ လက္ခဏာများမှာ အဘယ်နည်း။ လှည့်ဖြားတတ်ခြင်း၊ ကောက်ကျစ်ဆိုးယုတ်ခြင်း၊ စိတ်နှလုံးခိုင်မာခြင်း၊ သမ္မာတရားကို လက်ခံရန် ငြင်းပယ်ခြင်းဖြစ်သည်။ ၎င်းတို့သည် ဖောက်ပြန်ပျက်စီးသော စိတ်သဘောထားများ၏ လက္ခဏာအားလုံးနီးပါးကို ပိုင်ဆိုင်ကြသည်။ အပြင်ပန်းအားဖြင့် ၎င်းတို့သည် မကောင်းမှုကို မပြုလုပ်ကောင်း မပြုလုပ်နိုင်သကဲ့သို့ ပြစ်မှားခြင်းများကိုလည်း ရှားရှားပါးပါးသာ ကျူးလွန်ကြသော်လည်း သင်သည် ၎င်းတို့ ကျင့်ကြံပြုမူသည့် စည်းမျဉ်းများနှင့် နည်းလမ်းများကို လေ့လာမည်ဆိုလျှင် အထင်ရှားဆုံးသော အသွင်အပြင်မှာ ၎င်းတို့သည် သမ္မာတရား စည်းမျဉ်းများကို မည်သည့်အခါမျှ မစောင့်ထိန်းကြသကဲ့သို့ ကျင့်ကြံပြုမူပုံ၌ စည်းများလည်း မရှိခြင်း ဖြစ်သည်။ တစ်စုံတစ်ဦးက ၎င်းတို့ကို စော်ကားသည့်အခါပင်ဖြစ်စေ၊ ၎င်းတို့၏ ဂုဏ်သိက္ခာကို ထိခိုက်စေသည့်အခါပင်ဖြစ်စေ ၎င်းတို့သည် ထိုအရာကို သည်းခံနိုင်ပြီး မိမိတို့၏ အတွင်းစိတ်အတွေးများကို မည်သည့်အခါမျှ ထုတ်ဖော်ခြင်း သို့မဟုတ် ပေါ်လွင်စေခြင်း မရှိဘဲ ရယ်မောပစ်လိုက်နိုင်သည်။ အပြင်ပန်းအားဖြင့် ၎င်းတို့သည် ကြင်နာသော လူ့သဘာဝနှင့်အတူ အလွန်သည်းခံတတ်ပုံရပြီး တိုက်ခိုက်ရန် သို့မဟုတ် လက်စားချေရန် ရည်ရွယ်ချက်မရှိကြောင်း ပြသသည်။ သို့သော် ၎င်းတို့တွင် အတွေးအခေါ်များ မရှိသည်တော့ မဟုတ်ပေ။ သင်ပြုလုပ်ခဲ့သည့်အရာကို ၎င်းတို့က အမှတ်ရကြပြီး အခါအခွင့်သင့်သည့်အချိန်တွင် ၎င်းတို့သည် ထွက်လာကာ မိမိတို့ကိုယ်ကို ကာကွယ်ပြီး ခုခံကြမည်ဖြစ်ပြီး သင်သတိပင်မပြုမိနိုင်သော အချို့သော တန်ပြန်တိုက်ခိုက်မှုကို သင့်အား ပေးကြလိမ့်မည်။ ၎င်းတို့သည် သမ္မာတရား စည်းမျဉ်းများကို စောင့်ထိန်းနေခြင်း မဟုတ်ပေ။ ကျင့်ကြံပြုမူပုံ၌ စည်းမျဉ်းများနှင့် စည်းများသည် ၎င်းတို့၏ ကိုယ်ပိုင်အကျိုးစီးပွားများ၊ ဘေးကင်းလုံခြုံမှုနှင့် ဂုဏ်သတင်းကို ကာကွယ်ရန်သက်သက်သာ ဖြစ်သည်။ ဤကဲ့သို့သော လူများအတွက် ၎င်းတို့ကို ကောက်ကျစ်ဆိုးယုတ်သူများအဖြစ်လည်းကောင်း၊ စိတ်နှလုံးခိုင်မာသူများ၊ လှည့်ဖြားတတ်သူများနှင့် သမ္မာတရားကို အလွန်အမင်း မနှစ်မြို့သူများအဖြစ်လည်းကောင်း ဖော်ပြခြင်းသည် မှန်ကန်ပါသည်။ အချို့လူများက “၎င်းတို့သည် အခြားသူများ၏ အကျိုးစီးပွားများကို မထိခိုက်စေခဲ့ပါ သို့မဟုတ် မည်သည့်မကောင်းမှုကိုမျှ မပြုလုပ်ခဲ့ပါ၊ သို့ဖြစ်၍ သင်သည် ၎င်းတို့တွင် ဤဖောက်ပြန်ပျက်စီးသော စိတ်သဘောထားများရှိသည်ဟု မည်သို့ပြောနိုင်သနည်း။ သင်သည် ဤအရာကို မည်သည့်အရာအပေါ် အခြေခံနေသနည်း” ဟု ပြောကောင်းပြောနိုင်ပါသည်။ ၎င်းမှာ ၎င်းတို့သည် လူများနှင့် အမှုအရာများကို ရှုမြင်ပုံ၊ ကျင့်ကြံပြုမူပုံ၊ လုပ်ဆောင်ပုံတို့နှင့်ပတ်သက်လာလျှင် ၎င်းတို့၏ အတွေးအခေါ်များ၊ ရှုမြင်ပုံများနှင့် သဘောထားများအပေါ် အခြေခံထားခြင်း ဖြစ်သည်။ သင်တို့ ဤအရာကို သတိပြုမိပြီလော။ (ယခု ကျွန်ုပ်တို့ မြင်ပါပြီ။) ယခင်က သင်တို့ မမြင်နိုင်ခဲ့ကြသည်မှာ အဘယ်ကြောင့်နည်း။ ၎င်းတို့နှင့်ပတ်သက်၍ မည်သည့်အရာက သင့်ကို အထင်အမြင်မှားစေခဲ့သနည်း။ (၎င်းတို့သည် မိမိတို့၏ ပြောဆိုပုံနှင့် လုပ်ဆောင်ပုံများတွင်လည်းကောင်း၊ အခြားသူများနှင့် ထိတွေ့ဆက်ဆံပုံနှင့် ပူးပေါင်းဆောင်ရွက်ပုံများတွင်လည်းကောင်း အတော်လေး ဖော်ရွေပေါင်းသင်းလွယ်သည်ဟု ကျွန်ုပ်တို့ တွေးထင်ခဲ့ကြပြီး ၎င်းတို့သည် မည်သူ့ကိုမျှ မထိခိုက်စေခဲ့သောကြောင့် ၎င်းတို့တွင် ကောင်းသော လူ့သဘာဝရှိသည်ဟု ကျွန်ုပ်တို့ ယူဆခဲ့ကြပါသည်။ ကျွန်ုပ်တို့သည် ၎င်းတို့၏ အပြင်ပန်း ဟန်ဆောင်မှု၏ အထင်အမြင်မှားစေခြင်းကို ခံခဲ့ရပါသည်။) အပြင်ပန်းအားဖြင့် နူးညံ့သော ပင်ကိုစရိုက်ရှိပြီး လူများကို မည်သည့်အခါမျှ မတိုက်ခိုက်ခြင်းနှင့် တိရစ္ဆာန်များကို ဒုက္ခမပေးခြင်းသည် တစ်စုံတစ်ဦးတွင် ကောင်းသော လူ့သဘာဝရှိသည်ဟု မဆိုလိုပေ။ မည်သို့သော လူ့သဘာဝ၏ ထုတ်ဖော်မှုများသည် အမှန်တကယ် ကောင်းသော လူ့သဘာဝကို ကိုယ်စားပြုသနည်း။ (တစ်ခုအနေဖြင့် အခြားသူများကို ဒုက္ခမပေးခြင်း သို့မဟုတ် အခွင့်ကောင်းမယူခြင်း ဖြစ်ပါသည်။ ထို့အပြင် အန္တရာယ်ပေါ်ပေါက်လာသောအခါ လူတစ်ဦး၏ ပထမဆုံးအတွေးမှာ မိမိ၏ ကိုယ်ပိုင်ဘေးကင်းလုံခြုံမှုကို ထည့်မစဉ်းစားဘဲ ခေါင်းဆောင်များနှင့် အမှုဆောင်များအပြင် သမ္မာတရားကို လိုက်စားသော ညီအစ်ကိုမောင်နှမများကို ကာကွယ်ရန်ဖြစ်ပြီး အခြေအနေတိုင်းတွင် ဘုရားအိမ်တော်၏ အကျိုးစီးပွားများကို ဦးစားပေးနိုင်ခြင်း ဖြစ်ပါသည်။ ဤသည်တို့အားလုံးမှာ ကောင်းသော လူ့သဘာဝ၏ သရုပ်သကန်များ ဖြစ်ကြပါသည်။) စိတ်ကောင်းရှိခြင်း၊ ချစ်ခင်တတ်ခြင်း၊ စိတ်ရှည်ပြီး သည်းခံတတ်ခြင်း၊ အခြားသူများကို လေးစားခြင်း၊ အခြားသူများကို ထည့်သွင်းစဉ်းစားလိုစိတ်ရှိခြင်း၊ လူများကို အခွင့်ကောင်း မယူခြင်း၊ အတော်အတန် ရိုးသားဖြောင့်မတ်ခြင်းအပြင် နှိမ့်ချခြင်း၊ မထင်မရှားနေခြင်းနှင့် မောက်မာမှုမရှိခြင်းဟူသည့် လူ့သဘာဝ၏ ဤအရည်အသွေးများကို ပိုင်ဆိုင်ခြင်းသည် သမ္မာတရား စည်းမျဉ်းများကို စောင့်ထိန်းနိုင်စွမ်းနှင့် ဘုရားအိမ်တော်၏ အကျိုးစီးပွားများကို ကာကွယ်စောင့်ရှောက်နိုင်စွမ်းတို့နှင့် ပေါင်းစပ်လိုက်လျှင် ဤသည်မှာ ကောင်းသော လူ့သဘာဝ ဖြစ်သည်။ တစ်စုံတစ်ဦးသည် အပြင်ပန်းအားဖြင့် သည်းခံခြင်း၊ စိတ်ရှည်ခြင်း၊ ကြင်နာခြင်း၊ အခြားသူများကို အခွင့်ကောင်းမယူခြင်း၊ အခြားသူများအပေါ် ထောက်ထားစာနာတတ်ခြင်း၊ အခြားသူများကို ဂရုစိုက်ခြင်းကဲ့သို့သော လူ့သဘာဝ၏ အရည်အသွေးများကို ပိုင်ဆိုင်သော်လည်း ဘုရားအိမ်တော်၏ အကျိုးစီးပွားများနှင့် ပတ်သက်လာလျှင် ၎င်းတို့သည် ယင်းတို့ကို အလွယ်တကူ လက်လွှဲပေးပြီး တက်ကြွစွာ သစ္စာပင်ဖောက်လျှင် ၎င်းတို့တွင် ကောင်းသော လူ့သဘာဝ ရှိသလော။ (မရှိပါ။) ဤသည်မှာ ၎င်းတို့၏ လူ့သဘာဝ မကောင်းကြောင်း ဆိုလိုသည်။ ကောင်းသော လူ့သဘာဝကို မည်သို့ တိုင်းတာသနည်း။ အနည်းဆုံး လိုအပ်ချက်မှာ အဘယ်နည်း။ (အနည်းဆုံးအားဖြင့် ဘုရားအိမ်တော်၏ အကျိုးစီးပွားများကို ကာကွယ်စောင့်ရှောက်နိုင်ခြင်း ဖြစ်ပါသည်။) ဘုရားအိမ်တော်၏ အကျိုးစီးပွားများကို ကာကွယ်စောင့်ရှောက်နိုင်ခြင်း၊ ပြီးလျှင် ဤအခြေခံအုတ်မြစ်အပေါ်တွင် အခြားသူများနှင့် သဟဇာတရှိစွာ ပူးပေါင်းဆောင်ရွက်နိုင်ခြင်း၊ စိတ်ကောင်းရှိပြီး သည်းခံတတ်ခြင်း၊ အခြားသူများကို အခွင့်ကောင်းမယူခြင်း၊ စိတ်ရှည်နိုင်ပြီး အခြားသူများ၏ အားနည်းချက်များကို နားလည်နိုင်ခြင်း၊ အခြားသူများအပေါ် ထောက်ထားစာနာတတ်ခြင်း၊ ချစ်ခင်တတ်ခြင်း၊ အခြားသူများကို ကူညီပြီး ထောက်ပံ့နိုင်ခြင်း၊ အားနည်းသူများကို ဂရုစိုက်ခြင်း စသည်တို့ဖြစ်သည့် ဤသည်တို့အားလုံးမှာ ကောင်းသော လူ့သဘာဝ၏ လက္ခဏာများ ဖြစ်ကြသည်။ ဆန့်ကျင်ဘက်အနေဖြင့် တစ်ကိုယ်ကောင်းဆန်ခြင်း၊ အောက်တန်းကျခြင်း၊ လောဘကြီးခြင်း၊ အခြားသူများနှင့်ပတ်သက်၍ ကြမ်းတမ်းပြီး အလွန်အကျွံ တွက်ချက်တတ်ခြင်း၊ အတင်းအဖျင်းပြောခြင်းနှင့် လူများကို ဖိနှိပ်ရသည်ကို နှစ်သက်ခြင်း၊ ခေါင်းမာခြင်း၊ ပေါ်ပင်လုပ်ခြင်း၊ အထူးသဖြင့် အပေါ်ယံဖြစ်ခြင်း၊ ကောက်ကျစ်ဆိုးယုတ်ခြင်း၊ အကျင့်ပျက်ခြင်း၊ မျက်နှာပြောင်တိုက်ခြင်းနှင့် ရှက်စိတ်မရှိခြင်းတို့ ဖြစ်ကြသည်။ ဤသည်တို့မှာ မည်သို့သော သရုပ်သကန်အမျိုးအစားများ ဖြစ်ကြသနည်း။ (ဤသည်တို့မှာ မကောင်းသော လူ့သဘာဝ၏ သရုပ်သကန်များ ဖြစ်ကြပါသည်။) ဤသရုပ်သကန်များရှိသော တစ်စုံတစ်ဦးသည် ဘုရားအိမ်တော်၏ အကျိုးစီးပွားများကို ကာကွယ်စောင့်ရှောက်နိုင်သေးသလော။ (မစောင့်ရှောက်နိုင်ပါ။) ကောင်းသော လူ့သဘာဝ၏ သရုပ်သကန်များကို ပိုင်ဆိုင်ခြင်းနှင့်အတူ ဘုရားအိမ်တော်၏ အကျိုးစီးပွားများကို ကာကွယ်စောင့်ရှောက်နိုင်စွမ်း ရှိခြင်းဟူသည့် ဤသည်မှာ အမှန်တကယ် ကောင်းသော လူ့သဘာဝ ဖြစ်သည်။

အချို့လူများသည် အပြင်ပန်းအားဖြင့် အလွန်ကြင်နာတတ်ပုံရသည်၊ ၎င်းတို့သည် အခြားသူများအပေါ် စိတ်ရှည်ပြီး သည်းခံနိုင်စွမ်းရှိကာ ကောင်းသော လူ့သဘာဝ၏ လက္ခဏာအားလုံးကို ပိုင်ဆိုင်ကြသည်။ သို့သော် အသင်းတော်၏ အလုပ်၊ ဘုရားသခင်၏ ပူဇော်သကာများ သို့မဟုတ် ဘုရားအိမ်တော်၏ အကျိုးစီးပွားများနှင့် ပတ်သက်လာလျှင် ၎င်းတို့သည် ဤအရာအားလုံးကို သစ္စာဖောက်နိုင်သည်။ ဤလူစားမျိုးတွင် ကောင်းသော လူ့သဘာဝရှိသည်ဟု သင်တို့ ပြောမည်လော။ (မပြောပါ။) ဥပမာအားဖြင့် ညီအစ်ကိုမောင်နှမများအတွက် ပစ္စည်းများဝယ်သောအခါ အချို့လူများသည် အရည်အသွေးကောင်းပြီး ဈေးပေါကာ လက်တွေ့ကျသော ပစ္စည်းများကို ရွေးချယ်ကြသည်။ သို့သော် ပူဇော်သကာများကို သုံးစွဲ၍ ပစ္စည်းများဝယ်ရန် ကိစ္စနှင့်ပတ်သက်လာလျှင် ၎င်းတို့သည် ဈေးကြီးသော ကုန်ပစ္စည်းများကို ရွေးချယ်ကြသည်။ ထိုအရာသည် ထွန်စက်တစ်စီးမျှသာ ဖြစ်လျှင်ပင် လမ်းညွှန်စနစ်ပါသော တစ်စီးကိုပင် ရလိုကြမည်ဖြစ်သည်။ ၎င်းတို့ မည်သည့်အရာကို ဝယ်သည်ဖြစ်စေ ဈေးသက်သာသော မည်သည့်အရာကိုမဆို ထည့်သွင်းစဉ်းစားရန် ငြင်းပယ်လျက် အကောင်းဆုံး၊ ဈေးအကြီးဆုံးနှင့် နည်းပညာမြင့်သော ရွေးချယ်စရာများကို အစဉ်သဖြင့် ရှာဖွေကြသည်။ ပုံမှန်အားဖြင့် ၎င်းတို့သည် အခြားသူများနှင့် ပုံမှန်ဆက်ဆံနိုင်ပုံရသည်၊ ၎င်းတို့သည် လူများကို အခွင့်ကောင်းမယူကြ၊ အတော်လေး သည်းခံတတ်ကြပြီး အခြားသူများကို နည်းလမ်းပေါင်းစုံဖြင့် ကောင်းစွာဆက်ဆံကြသည်။ သို့သော် ပူဇော်သကာများကို သုံးစွဲခြင်းနှင့် ပတ်သက်လာလျှင် ၎င်းတို့၏ အကြင်နာတရား ကင်းမဲ့သောစိတ် ပေါ်လာပြီး ၎င်းတို့၏ မကောင်းဆိုးဝါးမျက်နှာ ထွက်ပေါ်လာသည်။ ၎င်းတို့ကို ကောင်းသော လူ့သဘာဝရှိသည်ဟု မှတ်ယူနိုင်သလော။ (မမှတ်ယူနိုင်ပါ။) ၎င်းတို့၏ ကောင်းသော လူ့သဘာဝသည် အမှန်တကယ် စစ်မှန်သလော။ ယင်းမှာ အပြင်ပန်း ဟန်ဆောင်မှုနှင့် အမူအရာလုပ်ခြင်းမျှသာ ဖြစ်ပြီး အားလုံးမှာ မျက်နှာဖုံးတစ်ခုသာ ဖြစ်သည်။ ဘုရားအိမ်တော်၏ အကျိုးစီးပွားများနှင့်သက်ဆိုင်သော ကိစ္စရပ်များ၊ အထူးသဖြင့် ပူဇော်သကာများကို သုံးစွဲခြင်းနှင့်ပတ်သက်လာလျှင် ၎င်းတို့၏ လောဘသည် ပေါ်လာပြီး ၎င်းတို့၏ မကောင်းဆိုးဝါးမျက်နှာ၊ နတ်ဆိုးရုပ်သွင်နှင့် ကြမ်းတမ်းသော အမူအရာတို့သည် ဖော်ထုတ်ခြင်းခံရသည်။ ဤသည်မှာ ကောင်းသော လူ့သဘာဝလော။ (မဟုတ်ပါ။) ဥပမာအားဖြင့် တစ်စုံတစ်ဦးသည် “နှုတ်ကပတ်တော်သည် လူ့ဇာတိ၌ ပေါ်လာ၏” စာအုပ်အတွက် မူပိုင်ခွင့် လျှောက်ထားနေပြီး ၎င်းတို့က ဤသို့ပြောသည်၊ “ကျွန်ုပ်တို့ အဖွဲ့အစည်းတစ်ခုအနေဖြင့် အသင်းတော်၏ အမည်ဖြင့် လျှောက်ထားလျှင် ငွေများစွာ သက်သာလိမ့်မည်။ သို့သော် လူ့ဇာတိခံ ခရစ်တော်၏ အမည်ဖြင့် လျှောက်ထားလျှင်မူ များစွာ ပိုကုန်ကျလိမ့်မည်။ ကျွန်ုပ်တို့ ဤကိစ္စတွင် ငွေချွေတာသင့်သည်၊ ပူဇော်သကာများကို ဖြစ်ကတတ်ဆန်း မသုံးစွဲသင့်ပါ” ဟူ၍ဖြစ်သည်။ ဤပြောဆိုချက်သည် မှန်ကန်သလော။ ဤမျှအရေးကြီးသော ကိစ္စကို ကိုင်တွယ်ရာတွင် ၎င်းတို့၌ စည်းမျဉ်းများ ရှိသလော။ ဤနှုတ်ကပတ်တော်များကို မည်သူက ဖော်ပြခဲ့သနည်း၊ ဘုရားသခင်လော သို့မဟုတ် အသင်းတော်လော။ (ဘုရားသခင်က ဖော်ပြခဲ့ပါသည်။) သို့ဆိုလျှင် မူပိုင်ခွင့်သည် မည်သူနှင့် သက်ဆိုင်သင့်သနည်း။ ယင်းသည် ဘုရားသခင်နှင့် သက်ဆိုင်ခြင်းက ပိုသင့်တော်သလော သို့မဟုတ် အသင်းတော်နှင့် သက်ဆိုင်ခြင်းက ပိုသင့်တော်သလော။ (ဘုရားသခင်နှင့် သက်ဆိုင်ခြင်းက ပိုသင့်တော်ပါသည်။) ဤသည်မှာ အလွန်အရေးကြီးသော ပြဿနာတစ်ခု ဖြစ်သည်။ ဤမျှအရေးကြီးသော ကိစ္စတွင် ငွေချွေတာရန် အာရုံစိုက်ခြင်း၏ အကျိုးဆက်များမှာ အဘယ်နည်း။ မည်သည့်ပြဿနာများ ပေါ်ပေါက်လာနိုင်သနည်း။ အကျိုးဆက်များမှာ စဉ်းစား၍မရနိုင်လောက်အောင် ဖြစ်နိုင်ပေသည်။ သင်သည် ဘုရားအိမ်တော်၏ အကျိုးစီးပွားများကို လျစ်လျူရှုပြီး ငွေချွေတာရန်သာ စဉ်းစားလျှင် ထိုအရာက သင့်ကို မည်သို့သော လူစားမျိုးဖြစ်စေသနည်း။ ထိုသို့သော လူများတွင် အသိတရား သို့မဟုတ် လူ့သဘာဝ ရှိသလော။ (၎င်းတို့တွင် လူ့သဘာဝ မရှိပါ။) ထိုသို့သော လူများသည် အပြင်ပန်း၌ မည်မျှပင် ကြင်နာတတ်သည် သို့မဟုတ် သည်းခံတတ်သည်ဟု ထင်ရပါစေ ၎င်းတို့တွင် အမှန်တကယ် လူ့သဘာဝ ရှိသလော။ (မရှိပါ။) အသင်းတော်တွင် စားသောက်ဖွယ်ရာနှင့် နေ့စဉ်လိုအပ်ချက်များအတွက် အသုံးစရိတ်အားလုံးကို ဘုရားသခင်၏ ပူဇော်သကာများမှ အပြည့်အဝ ကာမိပါသည်။ ငါသည် ဤအသုံးစရိတ်များနှင့်ပတ်သက်၍ သင်တို့အပေါ် တစ်ခါမျှ စေ့စေ့စပ်စပ် ဖြစ်ခဲ့ဖူးသလော။ တစ်ခုတည်းသော တောင်းဆိုချက်မှာ သင်တို့ ဖြုန်းတီးခြင်းကို ရှောင်ကြဉ်ရန်ဖြစ်သော်လည်း သင်တို့၏ ပုံမှန်အသုံးစရိတ်များကို ငါ တစ်ခါမျှ စေ့စေ့စပ်စပ် စစ်ဆေးခဲ့ဖူးသလော။ (မစစ်ဆေးဖူးပါ။) ကဏ္ဍအားလုံးတွင် ငါသည် သင်တို့ကို အလေးထားခဲ့ပြီး သင်တို့၏ အသုံးစရိတ်များကို မည်သည့်အခါမျှ စေ့စေ့စပ်စပ် မစစ်ဆေးခဲ့ပေ၊ သို့တိုင် သင်တို့သည် ငါ့အပေါ်တွင် ကပ်စေးနဲကြသည်။ ဤသည်မှာ လူ့သဘာဝ ကင်းမဲ့ခြင်းမဟုတ်လော။ (ဟုတ်ပါသည်၊ ဖြစ်ပါသည်။) လူ့သဘာဝမရှိသော တစ်စုံတစ်ဦးသည် လူများအပေါ် မည်မျှပင် ကြင်နာတတ်သည် သို့မဟုတ် သည်းခံတတ်သည်ဟု ထင်ရပါစေ ယင်းမှာ ဟန်ဆောင်မှုတစ်ခုမျှသာ ဖြစ်သည်။ အသိတရားနှင့် ဆင်ခြင်တုံတရားတို့ ဝင်ရောက်လုပ်ဆောင်သင့်သည့် အခိုက်အတန့်များသို့ အမှန်တကယ် ရောက်လာသောအခါ ၎င်းတို့သည် လူ့သဘာဝအားလုံး ကင်းမဲ့သူများအဖြစ် ဖော်ထုတ်ခြင်းခံရသည်။ ၎င်းတို့သည် လူပင် ဟုတ်သေးသလော။ (မဟုတ်ပါ။) ၎င်းတို့ကို လူဟု ခေါ်ဆို၍မရနိုင်ပေ။ ငါ ပစ္စည်းများဝယ်ယူသောအခါ ငါသည်လည်း ဂရုတစိုက်နှင့် ခြိုးခြံစွာ ဈေးဝယ်သည်၊ ပစ္စည်းများ မည်သည့်အချိန်တွင် လျှော့ဈေးရှိသည်နှင့် ၎င်းတို့ကို ဝယ်ရန် သင့်တော်သော နည်းလမ်းများကို ထည့်သွင်းစဉ်းစားပြီး တစ်စုံတစ်ခုသည် လက်တွေ့ကျလျှင်၊ သင့်တော်လျှင်၊ ဈေးနှုန်းသင့်တင့်လျှင် ငါ ဝယ်ယူလိမ့်မည်။ သို့သော် ငါသည် မဆင်မခြင် မဝယ်ပေ၊ မထိုက်တန်သော ဝယ်ယူမှုများအတွက် ငွေမသုံးပေ။ သို့ရာတွင် ရှောင်လွှဲ၍မရသော၊ သုံးစွဲရမည့် အချို့သော အသုံးစရိတ်များ ရှိပြီး ထိုအခြေအနေများတွင် ငါသည် စည်းမျဉ်းများအတိုင်း သုံးစွဲသည်။ ငါသည်လည်း ငါ၏ ကိုယ်ပိုင်အစားအသောက်၊ အဝတ်အစားနှင့် နေ့စဉ်လိုအပ်ချက်များတွင် ခြိုးခြံရန် ကြိုးစားသည်။ ယင်းမှာ ငါအလိုရှိသမျှကို ဝယ်ခြင်းနှင့်မဆိုင်ပေ၊ ငါ၏ ဝယ်ယူမှုများကို ဂရုတစိုက် စဉ်းစားရသည်။ သင်မြင်သည့်အတိုင်း ငါသည် ရိုးရှင်းစွာ၊ သင့်တော်စွာနှင့် ကြည့်ကောင်းအောင် ဝတ်စားသည်။ ငါ၏ သုံးစွဲမှုသည် စည်းမျဉ်းများကို လိုက်နာသည်။ လိုအပ်ပြီး လက်တွေ့ကျသည့်အရာကို ငါဝယ်သည်၊ မဟုတ်သည့်အရာကို မဝယ်ပေ။ မဖြုန်းတီးနှင့်၊ မသုံးသင့်သောငွေကို မသုံးနှင့်၊ ချွေတာသင့်သည့်နေရာတွင် ချွေတာပြီး မလိုအပ်သော အသုံးစရိတ်များကို ရှောင်ကြဉ်လော့။ ဤသည်တို့မှာ စည်းမျဉ်းများ ဖြစ်ကြသည်။ သို့သော် လူ့သဘာဝမရှိသော အချို့လူများသည် ဘုရားသခင်၏ ပူဇော်သကာများကို သုံးစွဲရန် အခွင့်အရေးကို မြင်သောအခါ လောဘတက်လာကြသည်။ ယင်းသည် လူတို့၏ အစားအသောက်၊ အဝတ်အထည်၊ အိမ်ရာ သို့မဟုတ် သယ်ယူပို့ဆောင်ရေးအတွက် သုံးစွဲခြင်းနှင့် သက်ဆိုင်သမျှ ကာလပတ်လုံး ၎င်းတို့သည် တစ်စုံတစ်ရာကို အလျင်စလို လုပ်ဆောင်ကြသည်။ အထူးသဖြင့် အခြားသူများအတွက် အဝတ်အထည်များ ဝယ်ပေးခြင်း သို့မဟုတ် နေထိုင်စရိတ်များ ခွဲဝေပေးခြင်းနှင့်ပတ်သက်လာလျှင် ၎င်းတို့သည် အလွန်အကျွံ စိတ်အားထက်သန်လာပြီး အလွန် ရက်ရောလာကြသည်။ ၎င်းတို့၏ စိတ်နှလုံးထဲတွင် ၎င်းတို့က “အင်း၊ သုံးစွဲနေသည်မှာ ငါ့ပိုက်ဆံ မဟုတ်ပါ။ ဤသည်မှာ ဘုရားသခင်၏ ပိုက်ဆံဖြစ်ပြီး ဤအရာက ငါ၏ ဂုဏ်သတင်းကို အထောက်အကူပြုသည်၊ သို့ဖြစ်၍ အဘယ်ကြောင့် မလုပ်ဆောင်ရမည်နည်း” ဟု တွေးထင်ကြသည်။ သို့ဖြစ်၍ ၎င်းတို့သည် ဖြုန်းတီးရန် အခွင့်အရေးကို ယူကြသည်။ ၎င်းတို့၏ စိတ်နှလုံးထဲတွင် ၎င်းတို့သည် မကောင်းသော ရည်ရွယ်ချက်များကို ထားရှိကြပြီး ဘုရားအိမ်တော်ကို ထိခိုက်နစ်နာစေရန်ထက် ပို၍ ဘာကိုမျှ မလိုလားကြပေ။ သို့သော် ယင်းမှာ ၎င်းတို့၏ ကိုယ်ပိုင်ငွေဖြစ်ပါက ၎င်းတို့သည် အရာအားလုံးကို တွက်ချက်မည်ဖြစ်ပြီး လိုအပ်သည်ထက် တစ်ပြားတစ်ချပ်မျှ ပိုသုံးရန် ငြင်းပယ်မည်ဖြစ်သည်။ ၎င်းတို့သည် ပုံမှန်အားဖြင့် မည်မျှပင် ကြင်နာတတ်ပုံရပါစေ ထိုသို့သော လူများတွင် ကောင်းသော လူ့သဘာဝ မရှိပေ။ ငါ၏ အမြင်တွင် ဘုရားသခင်၏ ပူဇော်သကာများအပေါ် ၎င်းတို့၏ သဘောထားသည် များစွာ ဖော်ပြနေသည်။ ၎င်းတို့သည် ပူဇော်သကာများကို ဖြုန်းတီးနိုင်ပြီး ဘုရားသခင်ကို ကြောက်ရွံ့သော စိတ်နှလုံး လုံးဝကင်းမဲ့သည်ဟူသော အချက်က အနည်းဆုံးအားဖြင့် ၎င်းတို့သည် မကြင်နာတတ်ကြောင်း၊ အောက်တန်းကျကြောင်းနှင့် ညံ့ဖျင်းသော လူ့သဘာဝရှိကြောင်း ပြသသည်။ ဤသည်မှာ မမှန်ကန်သလော။ (မှန်ကန်ပါသည်။)

လူတစ်ဦး၏ ပင်ကိုအခြေအနေများ၊ လူ့သဘာဝ၊ ဖောက်ပြန်ပျက်စီးသော စိတ်သဘောထားများနှင့် သက်ဆိုင်သော သရုပ်သကန်များစွာ ရှိသည်။ ယနေ့ ငါတို့သည် ၎င်းတို့ထဲမှ အစိတ်အပိုင်းတစ်ခုကို အကြမ်းဖျင်း ဆွေးနွေးခဲ့ပြီးဖြစ်သည်၊ နောက်ထပ် သရုပ်သကန်များလည်း ရှိနိုင်ဖွယ်ရှိပြီး ယင်းတို့ကို နောင်မိတ်သဟာယဖွဲ့ခြင်းများတွင် ငါတို့ ဆက်လက်ဆွေးနွေးနိုင်ပါသည်။ ယနေ့အတွက် ငါတို့၏ မိတ်သဟာယဖွဲ့ခြင်းကို ဤတွင် အဆုံးသတ်ကြပါစို့။ နှုတ်ဆက်ပါသည်။

၂၀၂၃ ခုနှစ်၊ စက်တင်ဘာလ ၂၃ ရက်