မယ်လ်ဗင်၊ တောင်ကိုရီးယား

အသင်းတော်မှာ ကျွန်တော် ဗီဒီယိုတွေ လုပ်ခဲ့တယ်။ များသောအားဖြင့် ကျွန်တော်လုပ်တဲ့ ဗီဒီယိုတွေမှာ အသစ်အဆန်းလေးတွေ ပါလေ့ရှိတယ်။ ညီအစ်ကိုမောင်နှမတွေက ဒီဗီဒီယိုတွေကို ကြည့်တဲ့အခါ အရမ်းအားပေးကြတယ်။ ပြဿနာတွေ ကြုံရတဲ့အခါလည်း အကူအညီတောင်းဖို့ ကျွန်တော့်ဆီ ခဏခဏ လာကြတယ်။ ကျွန်တော် အလုပ်ကောင်းကောင်း လုပ်နေတယ်၊ ပြီးတော့ ကျွန်တော့်မှာ အစွမ်းအစနဲ့ ဆုကျေးဇူးတချို့ ရှိတယ်လို့ ခံစားခဲ့ရတယ်။ ၂၀၁၆ ခုနှစ်မှာ ကျွန်တော် ကြီးကြပ်ရေးမှူးအနေနဲ့ ရွေးချယ်ခံရတော့ တော်တော်လေး ပျော်သွားတာပေါ့။ ကြီးကြပ်ရေးမှူး ဖြစ်လာတာဟာ ကျွန်တော့်မှာ နည်းပညာပိုင်းဆိုင်ရာ ကျွမ်းကျင်မှုကောင်းတွေရှိတဲ့၊ ပြီးတော့ ညီအစ်ကိုမောင်နှမတွေထက် နည်းနည်းပိုသာတဲ့ သဘောပဲလို့ တွေးမိတယ်။ အလုပ်ကို နိုင်နိုင်နင်းနင်း လုပ်နိုင်တယ်ဆိုတာ လူတိုင်းကို ပြချင်လို့ ပညာရပ်ဆိုင်ရာ ဗဟုသုတတွေကို ကျွန်တော် ပိုပြီး ကြိုးကြိုးစားစား လေ့လာခဲ့တယ်။ နောက်ပိုင်းမှာ ခေါင်းဆောင်က အစ်မဒိုင်ယန်းကို ကျွန်တော်နဲ့ တွဲလုပ်ဖို့ စီစဉ်ပေးခဲ့တယ်။ သူ့မှာ အစွမ်းအစကောင်းရှိပြီး နည်းပညာပိုင်းမှာလည်း တော်တော်လေး ကျွမ်းကျင်တော့ သူနဲ့ တွဲလုပ်ရတာကို ကျွန်တော် သဘောကျခဲ့တယ်။ ကျွန်တော်တို့က ဗီဒီယိုပိုင်း ဆန်းသစ်တီထွင်မှုနဲ့ နည်းပညာတွေကို ဘယ်လို အတူတူ တိုးတက်အောင် လုပ်မလဲဆိုတာကို ခဏခဏ ဆွေးနွေးကြတယ်။ အဲဒီလို ဖလှယ်ဆွေးနွေးတာတွေကနေတစ်ဆင့် ကျွန်တော်တို့ အလင်းတချို့ အမြဲရခဲ့တယ်။ ဒီလောက်တော်တဲ့ အစ်မတစ်ယောက်ကို တွဲဖက်အနေနဲ့ ရထားတာ အရမ်းကောင်းတယ်လို့ ခံစားရတယ်။ အချိန်အတိုင်းအတာတစ်ခု ကြာလာတော့ ကျွန်တော်တို့ ထုတ်လုပ်တဲ့ ဗီဒီယိုတွေရဲ့ အရည်အသွေးက သိသိသာသာကို တိုးတက်လာတယ်။ ဒိုင်ယန်းက နည်းပညာ ကျွမ်းကျင်မှုတွေ သင်ယူဖို့အတွက် လူတိုင်းကို ခဏခဏ စုစည်းပေးတတ်တယ်။ ညီအစ်ကိုမောင်နှမတွေ အခက်အခဲကြုံရတဲ့အခါမှာလည်း သူက ဘုရားနှုတ်ကပတ်တော်တွေအပေါ် အခြေခံပြီး မိတ်သဟာယပြုပေးပြီး ဖြေရှင်းပေးနိုင်တယ်။ တဖြည်းဖြည်းနဲ့ သူ့ကို ကျွန်တော် နည်းနည်း မနာလိုဖြစ်လာတယ်။ အထူးသဖြင့် အလုပ်အကြောင်း ဆွေးနွေးတဲ့အခါ ညီအစ်ကိုမောင်နှမတွေက သူ့နားဝိုင်းအုံပြီး မေးခွန်းတွေမေးကြရင် ကျွန်တော် အရမ်းစိတ်အနှောင့်အယှက်ဖြစ်ရပြီး ကျွန်တော် လျစ်လျူရှုခံနေရတယ်လို့ တွေးမိတယ်။ “ကိစ္စတွေ ဒီလိုသာ ဆက်ဖြစ်နေရင် ငါက အမည်ခံ ကြီးကြပ်ရေးမှူးသက်သက် ဖြစ်သွားတော့မှာ မဟုတ်ဘူးလား။ အဲဒီအခါကျရင် ညီအစ်ကိုမောင်နှမတွေက ငါ့ကို ဘယ်လိုမြင်ကြမလဲ။ ငါက ဒိုင်ယန်းလောက် မတော်ဘူးလို့ ထင်သွားကြမလား” ဆိုပြီး တွေးမိတယ်။ အဲဒါနဲ့ ကျွန်တော်က တိတ်တဆိတ်ပဲ ကိုယ့်ကိုယ်ကိုယ် ဖိအားပေးလိုက်တယ်၊ “ဒီလိုတော့ မဖြစ်သေးဘူး၊ ငါ နှစ်ဆပိုကြိုးစားမှ ဖြစ်မယ်၊ သူ့ထက် နောက်ကောက်ကျသွားလို့ မဖြစ်ဘူး” လို့ပေါ့။

အဲဒီနောက်မှာ စုဝေးပွဲတွေလုပ်တဲ့အခါ တခြားသူတွေ မရသေးတဲ့ အသိအမြင်တွေကို မိတ်သဟာယပြုပေးနိုင်ဖို့၊ အလင်းတချို့ ရလိုရငြားဆိုပြီး ဘုရားနှုတ်ကပတ်တော်တွေကို ဆင်ခြင်သုံးသပ်ဖို့ အချိန်ပိုပေးခဲ့တယ်။ ကျွန်တော်က ဒိုင်ယန်းထက် ကိစ္စတွေကို ပိုနားလည်တယ်ဆိုတာကို လူတိုင်းကို ပြချင်ခဲ့တာလေ။ ပညာရပ်ဆိုင်ရာ ကျွမ်းကျင်မှုတွေကို သင်ယူရာမှာလည်း ကျွန်တော် ကြိုးကြိုးစားစား လေ့လာခဲ့တယ်၊ သတင်းအချက်အလက်တွေ ရှာဖွေဖို့အတွက် အချိန်ပိုတွေဆင်းပြီး ညဉ့်နက်တဲ့အထိ နေခဲ့တယ်။ ဒါပေမဲ့ ရလဒ်တွေက သိပ်မကောင်းခဲ့ဘူး၊ နည်းပညာပိုင်းဆိုင်ရာ အခက်အခဲတချို့ကလည်း မပြေလည်သေးဘူး။ တကယ်တော့ နည်းပညာ ကျွမ်းကျင်မှုတွေ လေ့လာတဲ့နေရာမှာ ဒိုင်ယန်းဆီမှာ နည်းလမ်းကောင်းတချို့ ရှိတယ်ဆိုတာ ကျွန်တော် သိတယ်၊ ဒါပေမဲ့ သူ့ကို မမေးချင်ခဲ့ဘူး။ ဒီလိုတွေးမိတယ်၊ “သူမလာခင်တုန်းက ညီအစ်ကိုမောင်နှမတွေကို စုစည်းပြီး သင်ယူအောင် လုပ်ပေးခဲ့တာ ငါလေ၊ ရလဒ်တွေကလည်း တော်တော်လေး ကောင်းခဲ့တာပဲ။ ငါက သူ့ဆီသွားပြီး မေးလိုက်ရင် ငါက သူ့လောက်မတော်ဘူးဆိုတာကို ပြလိုက်သလို ဖြစ်မသွားဘူးလား။ ညီအစ်ကိုမောင်နှမတွေသာ သိသွားရင်၊ ငါက တာဝန်ထမ်းဆောင်နေတာ ဒီလောက်ကြာနေပြီဖြစ်ပေမဲ့ ငါ့ရဲ့ အစွမ်းအစက အခုမှရောက်လာတဲ့ ညီအစ်မလောက် မကောင်းဘူးလို့ သေချာပေါက် ပြောကြမှာပဲ” လို့ပေါ့။ ဒီလိုတွေးမိတော့ သူ့ဆီက အကူအညီတောင်းဖို့ ပိုတောင် ဝန်လေးသွားတယ်။ ရက်အတော်ကြာ ဆက်တိုက်ဆိုသလို ကျွန်တော် ဘာမှ မသင်ယူခဲ့တဲ့အပြင် အချိန်တွေ၊ ခွန်အားတွေ အများကြီး အလဟဿ ဖြစ်ခဲ့ရတယ်။ ရင်ထဲမှာ ကျောက်တုံးကြီးတစ်ခု ဖိထားသလိုပဲ၊ အရမ်းကို ပင်ပန်းတယ်လို့ ခံစားခဲ့ရတယ်။ နောက်ပိုင်းမှာ ကျွန်တော့်ရဲ့ မနာလိုတဲ့စိတ်က ပိုပိုပြင်းထန်လာတယ်။ စုဝေးပွဲတစ်ခုမှာဆိုရင်၊ ဒီစုဝေးပွဲမှာ ငါ အလင်းသစ်တချို့ကို မိတ်သဟာယဖွဲ့ပေးရမယ်လို့ တွေးပြီး ဘုရားနှုတ်ကပတ်တော်တွေကို ကြိုတင် စဉ်းစားသုံးသပ်ထားတာကို ကျွန်တော် မှတ်မိသေးတယ်။ ဒါပေမဲ့ ကျွန်တော် မိတ်သဟာယပြုရမယ့် အလှည့်လည်းရောက်ရော၊ ကျွန်တော့်ခေါင်းထဲမှာ ဘာမှမရှိတော့ဘဲ ကြိုတင်ပြင်ဆင်ထားတာတွေကို မိတ်သဟာယ မပြုပေးနိုင်ခဲ့ဘူး။ ဒိုင်ယန်းက ရှင်းရှင်းလင်းလင်းနဲ့ လက်တွေ့ကျကျ မိတ်သဟာယပြုပေးနေတာကို ညီအစ်ကိုမောင်နှမတွေက ခေါင်းညိတ် သဘောတူနေကြတာကို မြင်တော့ ကျွန်တော် အရမ်းကို စိတ်အနှောင့်အယှက် ဖြစ်သွားတယ်။ တွေးမိတယ်။ “ငါ သိက္ခာမကျသွားအောင် နည်းနည်းပါးပါး လျှော့ပြောလို့မရဘူးလား။ မင်း မိတ်သဟာယပြုပြီးသွားရင် လူတိုင်းက ငါ့ကို ဘယ်လို မြင်ကြတော့မလဲ။ ငါက မင်းလောက် မတော်ဘူးလို့ ထင်သွားကြမလား” လို့ပေါ့။ ဒီလိုတွေးလေလေ၊ ဒိုင်ယန်းအပေါ် ကျွန်တော် အမြင်မကြည်တာတွေ ပိုကြီးထွားလာလေလေပါပဲ။ သူနဲ့ တွဲလုပ်ရတာ ကျွန်တော့်ကို အသုံးမကျတဲ့သူလို ဖြစ်စေတယ်လို့ ခံစားရတယ်။ ကျွန်တော် တကယ်ကို အရှက်ကွဲတယ်လို့ ခံစားခဲ့ရတယ်။ သူ မိတ်သဟာယပြုပြီးတဲ့နောက်မှာ ကျွန်တော့်ရဲ့ အနေခက်နေတဲ့ မျက်နှာထားကို ညီအစ်ကိုမောင်နှမတွေ မြင်သွားမှာစိုးလို့ ကျွန်တော် စကားတစ်ခွန်းမှ မပြောချင်တော့ဘူး၊ ခေါင်းတောင် မမော့ရဲခဲ့ဘူး။ အဲဒီအချိန်မှာ ဒိုင်ယန်းက “အစ်ကို ထပ်ဖြည့်စရာ တစ်ခုခု ရှိသေးလား” လို့ မေးတယ်။ အဲဒီတော့မှ ကျွန်တော် သတိဝင်လာပြီး ဟန်လုပ်ထားတဲ့ တည်ငြိမ်မှုနဲ့ “မရှိပါဘူး” လို့ ပြောလိုက်တယ်။ စုဝေးပွဲကို မြန်မြန် ပြီးသွားစေချင်တာပဲ သိတယ်။ အဲဒီနောက်ပိုင်း ကျွန်တော်တို့ အတူတူ ပူးပေါင်းဆောင်ရွက်နေချိန်တွေမှာ သူ့ကို ရှောင်ဖို့ အမြဲတမ်း ဆင်ခြေတွေ ရှာခဲ့တယ်။ တစ်ခါတလေ အလုပ်အကြောင်း ဆွေးနွေးတိုင်ပင်ဖို့ သူ စာပို့တဲ့အခါ စာကို မြင်ပေမဲ့ ပြန်မပို့ချင်ဘူး။ တစ်ခါတလေ သူ့အမြင်တွေကို ကျွန်တော့်စိတ်ထဲကနေ သဘောတူနေရင်တောင် “မင်းပြောတာက တစ်ဖက်တည်းကိုပဲ ပြောနေတာ” လို့ အေးတိအေးစက်နဲ့ ပြောတတ်သေးတယ်။ “မင်းပြောတာ ပြည့်စုံမှုမရှိဘူး၊ ဒါကြောင့် ဆရာကြီး လာမလုပ်နဲ့” လို့ အရိပ်အမြွက် ပြောချင်တာလေ။ ညီအစ်ကိုမောင်နှမတွေ လုပ်ထားတဲ့ ဗီဒီယိုတွေကို ကျွန်တော်တို့ စစ်ဆေးတဲ့အခါ သူက အကြံပြုချက်တချို့ ပေးတယ်။ အဲဒါတွေက သင့်တော်တယ်လို့ ကျွန်တော်ထင်ပေမဲ့ ချစ်တီးခေါင်းသန်းရှာပြီး ပြဿနာတွေကို ထောက်ပြနေတုန်းပဲ။ အဲဒီနောက်ပိုင်း ဒိုင်ယန်းက ကျွန်တော်နဲ့ စကားပြောတဲ့အခါ တစ်ခုခု မှားပြောမိမှာကို ကြောက်နေသလိုမျိုး တော်တော်လေး သတိထားလာတယ်။ အလုပ်အကြောင်း ဆွေးနွေးတဲ့အခါမှာလည်း တုံ့ဆိုင်းဆိုင်း ဖြစ်လာပြီး “ဒါလေး အဆင်ပြေလား။ ဟိုဟာလေးရော ဘယ်လိုနေလဲ” လို့ ကျွန်တော့်ကို ခဏခဏ မေးလာတယ်။ စုဝေးပွဲတွေမှာ မိတ်သဟာယပြုနေတုန်း သူက ကျွန်တော့်ကို တစ်ချက်တစ်ချက် လှမ်းကြည့်တတ်တယ်။ ကျွန်တော်က ညီအစ်မကို ဘောင်ခတ်နေမိပြီဆိုတာ သတိထားမိပြီး နည်းနည်းတော့ အပြစ်ရှိသလို ခံစားရတယ်။ သူ့ကို ဒီလိုဆက်ဆံတာ မသင့်တော်ဘူးလို့ ခံစားရပေမဲ့ သူ့ကို ဘယ်လို မျက်နှာပြရမှန်း မသိခဲ့ဘူး။ တစ်ခါတလေဆို “သူ ဒီအဖွဲ့ကို မရောက်လာခဲ့ရင် ကောင်းမှာပဲ၊ ဒါဆိုရင် ငါ ဆက်ပြီး ဦးဆောင်နေလို့ ရတာပေါ့” လို့ တွေးမိတယ်။

ဒီအချိန်တွေမှာ ကျွန်တော်က မနာလိုတဲ့စိတ်နဲ့ပဲ အသက်ရှင်နေခဲ့ပြီး ဒိုင်ယန်းကို ဘယ်လို ကျော်တက်ရမလဲဆိုတာကိုပဲ အမြဲတမ်း တွေးနေတော့ ကျွန်တော့်စိတ်က ကိုယ့်တာဝန်တွေအပေါ်မှာ လုံးဝ မရှိတော့ဘူး။ ညီအစ်ကိုမောင်နှမတွေ လုပ်ထားတဲ့ ဗီဒီယိုတွေကို စစ်ဆေးတဲ့အခါ ပြဿနာတွေကိုတောင် မရှာနိုင်တော့ဘူး။ တစ်နေ့တော့ ခေါင်းဆောင်က ကျွန်တော့်ဆီလာပြီး ကျွန်တော်ဟာ ဂုဏ်သတင်းနဲ့ အကျိုးအမြတ်အတွက် ယှဉ်ပြိုင်နေတယ်၊ ပင်ကိုစွမ်းရည်ရှိသူတွေကို မနာလိုဖြစ်နေတယ်၊ ပြီးတော့ တခြားသူတွေနဲ့ သဟဇာတဖြစ်ဖြစ် ပူးပေါင်းဆောင်ရွက်တာမျိုး မရှိဘူး၊ ဒါတွေက ဗီဒီယိုအလုပ်ကို ထိခိုက်စေတဲ့အတွက် ကျွန်တော့်ကို ဖြုတ်ချပြီး ကိုယ့်ကိုယ်ကိုယ် သေချာ ဆင်ခြင်သုံးသပ်ရမယ်လို့ ပြောတယ်။ ခေါင်းဆောင်က ဒီလိုပြောလိုက်တဲ့အခါ ကျွန်တော် ကြက်သေသေသွားပြီး ခေါင်းထဲမှာ ဘာမှမရှိတော့ဘူး။ ခေါင်းဆောင် ဆက်ပြီး မိတ်သဟာယပြုသွားတာတွေကိုလည်း ဘာမှ မကြားတော့ဘူး။ နောက်နေ့မှာ ခေါင်းဆောင်က ကျွန်တော့်မှာ ပန်းချီဆွဲတာ ကျွမ်းကျင်လို့ ဂရပ်ဖစ်ဒီဇိုင်းလုပ်ဖို့ စီစဉ်ပေးချင်ပေမဲ့ အနုပညာအဖွဲ့ကို တာဝန်ယူထားတဲ့ ညီအစ်မက သူတို့အဖွဲ့မှာ လူပြည့်နေပြီ၊ တခြားဘယ်သူ့ကိုမှ မလိုတော့ဘူးလို့ ပြောတယ်။ ဒါက ကျွန်တော့်အတွက် တကယ့်ကို ထိုးနှက်ချက်တစ်ခုလို ခံစားလိုက်ရပြီး ဘယ်သူကမှ အလိုမရှိတဲ့ အသုံးမကျတဲ့ လူတစ်ယောက်လို ခံစားရတယ်။ ကျွန်တော်က လုံးဝကို ဖော်ထုတ်ခံရပြီး ဖယ်ရှားရှင်းလင်းခံလိုက်ရပြီလို့ ခံစားရတယ်။ ကျွန်တော် ကိုယ့်ကိုယ်ကိုယ် လက်မြှောက်အရှုံးပေးလိုက်တဲ့ အခြေအနေမှာပဲ နေထိုင်နေခဲ့တယ်။ ဆုမတောင်းချင်ဘူး၊ ဘုရားနှုတ်ကပတ်တော်တွေကိုလည်း မဖတ်ချင်ဘူး၊ ပြီးတော့ ညီအစ်ကိုမောင်နှမတွေကိုလည်း မျက်နှာမပြရဲတော့ဘူး။ ကျွန်တော် အရမ်းကို နာကျင်ခဲ့ရတယ်။ တစ်ညမှာတော့ ကျွန်တော် အိပ်မက်ဆိုးမက်ပြီး လန့်နိုးလာတယ်။ တစ်ကိုယ်လုံးလည်း ချွေးတွေရွှဲနေပြီး ကြောက်ရွံ့မှုတွေ၊ စိုးရိမ်မကင်းဖြစ်မှုတွေနဲ့ ပြည့်နှက်နေခဲ့တယ်။ ငါ ဒီလိုမျိုး ဆက်ပြီး စိတ်မချမ်းမသာဖြစ်ပြီး အကျင့်ပျက်ရင် တကယ်ကို ဖော်ထုတ်ပြီး ဖယ်ရှားရှင်းလင်းခံရတော့မှာပဲလို့ ကျွန်တော် သဘောပေါက်လိုက်တယ်။ အဲဒါနဲ့ ကျွန်တော် ဒူးထောက်ပြီး ဘုရားသခင်ဆီကို ဆုတောင်းခဲ့တယ်၊ “ဘုရားသခင်၊ ကျွန်တော့်ရဲ့ ပြဿနာတွေကို ဖြေရှင်းချင်ပါတယ်။ ကျွန်တော် ကိုယ့်ကိုယ်ကိုယ် နားလည်ပြီး မှားယွင်းနေတဲ့ အခြေအနေကနေ ပြန်လှည့်နိုင်ဖို့ ကျွန်တော့်ကို ဉာဏ်ပွင့်စေပါ၊ အလင်းပေးတော်မူပါ” လို့ပေါ့။

အဲဒီနောက်မှာ ဘုရားနှုတ်ကပတ်တော် တစ်ပိုဒ်ကို ကျွန်တော် ဖတ်ခဲ့ရတယ်။ “အသင်းတော်ခေါင်းဆောင်တစ်ဦးအနေဖြင့် ပြဿနာများကို ဖြေရှင်းဖို့ သမ္မာတရားကို အသုံးပြုရန် သင်ယူဖို့ လိုအပ်ရုံမျှသာမကဘဲ ပင်ကိုစွမ်းရည်ရှိသူများကို ရှာဖွေပြီး ပျိုးထောင်ပေးဖို့လည်း လိုအပ်လေသည်။ ၎င်းတို့ကို သင်သည် လုံးဝ မနာလိုခြင်း၊ သို့မဟုတ် ဖိနှိပ်ခြင်းမရှိရပေ။ ဤနည်းဖြင့် လက်တွေ့လုပ်ဆောင်ခြင်းသည် အသင်းတော်အလုပ်အတွက် အကျိုးရှိစေသည်။ သင်နှင့် ပူးပေါင်းဆောင်ရွက်ရန်၊ အလုပ်ကိစ္စတစ်ခုချင်းစီကို ကောင်းစွာ လုပ်ဆောင်ရန်တို့အတွက် သမ္မာတရားကို လိုက်စားသူအချို့အား ပျိုးထောင်နိုင်ပြီး အဆုံး၌ ၎င်းတို့အားလုံးသည် အတွေ့အကြုံဆိုင်ရာ သက်သေခံချက်များ ရှိလျှင် သင်သည် စံနှုန်းပြည့်မီသည့် ခေါင်းဆောင်တစ်ယောက်၊ သို့မဟုတ် အမှုဆောင်တစ်ယောက် ဖြစ်သည်။ သင်သည် အရာအားလုံးကို စည်းမျဉ်းများအတိုင်း ကိုင်တွယ်နိုင်ပါက သင်သည် မိမိ၏ သစ္စာစောင့်သိခြင်း ဖြစ်သည်။ လူအချို့သည် အခြားသူများက မိမိတို့ထက် ပို၍ သာလွန်သည်ကိုဖြစ်စေ၊ မိမိတို့ထက် ပို၍ မြင့်မားသည်ကိုဖြစ်စေ၊ မိမိတို့က လျစ်လျူရှုခြင်း ခံရစဉ် အခြားသူများက အသိအမှတ်ပြုခြင်း ခံရမည်ကိုဖြစ်စေ အစဉ် စိုးရွံ့ကြသဖြင့် ၎င်းတို့သည် အခြားလူများအား တိုက်ခိုက်ပြီး ဖယ်ကြဉ်ကြလေသည်။ ဤသည်မှာ ပင်ကိုစွမ်းရည်ရှိသူများအား မနာလိုဖြစ်ခြင်း မဟုတ်လော။ ယင်းမှာ တစ်ကိုယ်ကောင်းဆန်ပြီး စက်ဆုပ်ဖွယ် ဖြစ်သည် မဟုတ်လော။ ဤသည်မှာ မည်သည့် စိတ်သဘောထားမျိုး ဖြစ်ပါသနည်း။ ယင်းမှာ ရက်စက်ကြမ်းကြုတ်သော စိတ်သဘောထားဖြစ်၏။ အခြားသူများအတွက် မတွေးဘဲ၊ သို့မဟုတ် ဘုရားအိမ်တော်၏ အကျိုးစီးပွားများကို ထည့်မတွက်ဘဲ ကိုယ်ကျိုးအတွက်ကိုသာ စဉ်းစားသည့်သူများ၊ မိမိ၏ကိုယ်ပိုင် တစ်ကိုယ်ကောင်းဆန်သော လိုအင်ဆန္ဒများကိုသာ ဖြည့်ဆည်းသည့်သူများတွင် ဆိုးသော စိတ်သဘောထားတစ်ခု ရှိပြီး သူတို့ကို ဘုရားသခင် မနှစ်သက်ပါ။ ဘုရားသခင်၏ ရည်ရွယ်ချက်များကို အလေးထားခြင်းအား သင် အမှန်တကယ် ပြနိုင်စွမ်းရှိပါက အခြားလူတို့ကို မျှမျှတတ သင်ဆက်ဆံနိုင်လိမ့်မည်။ သင်သည် လူကောင်းတစ်ယောက်ကို အကြံပြုထောက်ခံပေးပြီး လေ့ကျင့်စေကာ တာဝန်တစ်ခုကို ထမ်းဆောင်စေ၍ ဤနည်းအားဖြင့် ဘုရားအိမ်တော်တွင် ပင်ကိုစွမ်းရည်ရှိသူတစ်ယောက်ကို ဖြည့်သွင်းပါက သင်၏အလုပ်ကို ပို၍ မလွယ်ကူစေသလော။ သို့ဆိုလျှင် သင်သည် သင်၏တာဝန်၌ သစ္စာစောင့်သိသည် မဟုတ်လော။ ဤသည်မှာ ဘုရားသခင် ရှေ့မှောက်၌ ကောင်းမှုတစ်ခုဖြစ်သည်။ ယင်းသည် ခေါင်းဆောင်များအဖြစ် အစေခံသည့်သူများ အနည်းဆုံးအနေဖြင့် ပိုင်ဆိုင်သင့်သည့် အသိစိတ်နှင့် ဆင်ခြင်တုံတရား ဖြစ်ပေသည်။ သမ္မာတရားကို လက်တွေ့လုပ်ဆောင်နိုင်သော သူများသည် ၎င်းတို့ လုပ်ဆောင်သည့် အမှုအရာများတွင် ဘုရားသခင်၏ စိစစ်ခြင်းကို လက်ခံနိုင်ကြသည်။ သင်သည် ဘုရားသခင်၏စိစစ်ခြင်းကို လက်ခံသောအခါ သင်၏နှလုံးသည် တည့်မတ်လာလိမ့်မည် ဖြစ်သည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ မိမိ၏ ဖောက်ပြန်ပျက်စီးသော စိတ်သဘောထားများအား ဖယ်ရှားခြင်းအားဖြင့်သာ လွတ်လပ်ခြင်းနှင့် လွတ်မြောက်ခြင်းကို ရရှိနိုင်သည်) လူတွေက တခြားသူတွေဟာ သူတို့ထက် ပိုသာနေမှာ၊ ဒါမှမဟုတ် သူတို့ထက် ပိုမြင့်မားနေမှာကို အမြဲကြောက်နေတတ်ပြီး၊ အဲဒီလိုကြောက်တဲ့စိတ်က သူများတွေကို တိုက်ခိုက်ဖို့နဲ့ ဖယ်ကြဉ်ဖို့ ဖြစ်စေတယ်လို့ ဘုရားသခင်က ဖော်ထုတ်ထားတယ်။ ဒီလိုလူတွေဟာ ပင်ကိုစွမ်းရည်ရှိသူတွေကို မနာလိုဖြစ်တတ်ပြီး မလိုမုန်းထားတဲ့ စိတ်သဘောထား ရှိကြတယ်။ ကျွန်တော်က အဲဒီလို အခြေအနေမျိုး ဖြစ်နေခဲ့တာ။ ဒိုင်ယန်းမှာ အစွမ်းအစကောင်းနဲ့ နည်းပညာပိုင်း ကျွမ်းကျင်မှုတွေ ရှိတာကို မြင်ရပြီး၊ ညီအစ်ကိုမောင်နှမတွေက သူ့ကို လေးစားအားကျတဲ့အပြင် မေးခွန်းတွေ သွားမေးကြတာကို မြင်တော့ ကျွန်တော့်မှာ အကျပ်အတည်းတစ်ခုလို ခံစားရပြီး သူ့နောက် ကောက်ကောက်ပါအောင် ကျန်ခဲ့မှာကို ကြောက်နေခဲ့တယ်။ ကိုယ့်နေရာကို ခိုင်မာအောင်လို့ ပညာရပ်ဆိုင်ရာ ဗဟုသုတတွေကို ကြိုးကြိုးစားစား လေ့လာတယ်၊ ဘုရားနှုတ်ကပတ်တော်တွေကို ဆင်ခြင်သုံးသပ်တယ်၊ စုဝေးပွဲတွေမှာတောင် သူ့ထက်သာအောင် ဘယ်လို မိတ်သဟာယပြုရမလဲဆိုတာကိုပဲ စဉ်းစားနေခဲ့တာလေ။ ဒိုင်ယန်းက လက်တွေ့ကျကျ မိတ်သဟာယပြုနေတာကို မြင်တော့ မနာလိုဖြစ်ပြီး နာကြည်းခဲ့တယ်၊ ညီအစ်ကိုမောင်နှမတွေ သူ့ကို ဆက်မလေးစားတော့အောင် သူ အမှားတစ်ခုခု လုပ်မိပါစေလို့တောင် မျှော်လင့်နေမိတယ်။ ကျွန်တော် တွေးခဲ့သမျှက ကိုယ့်ရဲ့ ဂုဏ်သတင်းနဲ့ အဆင့်အတန်းကို ကာကွယ်ဖို့ချည်းပဲ။ ဒါဟာ တကယ်ကို တစ်ကိုယ်ကောင်းဆန်ပြီး စက်ဆုပ်ဖွယ်ကောင်းတဲ့ လုပ်ရပ်ပဲ။ တကယ်တော့ ဒိုင်ယန်းမှာ အစွမ်းအစကောင်းရှိပြီး သူ့အလုပ်က ရလဒ်ကောင်းတွေ ထွက်တာဟာ ညီအစ်ကိုမောင်နှမတွေကို ကူညီပေးခဲ့တဲ့အပြင် အသင်းတော်အလုပ်အတွက်လည်း အကျိုးရှိစေတဲ့ ကောင်းမွန်တဲ့အရာပါ။ ဒါဟာ ဘုရားသခင်အတွက် နှစ်သိမ့်မှုဖြစ်စေလို့ ကျွန်တော် ဝမ်းသာသင့်တာပေါ့။ ဒါပေမဲ့ ဒီအရာတွေကို ကျွန်တော် ထည့်မစဉ်းစားခဲ့ဘဲ သူ့ကို ဘယ်လို ကျော်တက်ရမလဲ ဆိုတာကိုပဲ အမြဲ တွေးနေခဲ့တယ်။ သူ့ကို တမင်တကာ ဖယ်ကြဉ်တယ်၊ အပြစ်ရှာတယ်၊ သဘောထားမကောင်းတာတွေ ပြပြီး သူ့ကို ဘောင်ခတ်ပြီး ဒုက္ခပေးစေခဲ့တယ်။ ကျွန်တော့်မှာ လူ့သဘာဝ ကင်းမဲ့နေပြီး ကျွန်တော့်ရဲ့ စိတ်သဘောထားက မလိုမုန်းထားမှုတွေနဲ့ ပြည့်နေမှန်း မြင်လိုက်ရတယ်။ ဒါကို သဘောပေါက်လိုက်တော့ ရှက်လွန်းလို့ မျက်နှာတွေတောင် ပူထူလာတယ်။ ငါက ဒီလိုလူမျိုး ဖြစ်နေလိမ့်မယ်လို့ ဘယ်တုန်းကမှ မထင်ထားခဲ့မိဘူး။

နောက်ပိုင်းမှာ ကျွန်တော် ဒါကို ထပ်ပြီး စဉ်းစားကြည့်တယ်။ ငါက အစ်မကို အမြဲတမ်း မနာလိုဖြစ်နေခဲ့တာ၊ ငါ ဘယ်လို စိတ်သဘောထားကို ထုတ်ဖော်နေခဲ့တာလဲ။ ဘာက အဲဒီလို ဖြစ်စေတာလဲပေါ့။ ဘုရားနှုတ်ကပတ်တော်တွေကို ကျွန်တော် ဖတ်လိုက်တယ်။ “ဩဇာအာဏာနှင့် အဆင့်အတန်းကို ရရှိရန်အလို့ငှာ အသင်းတော်တွင် အန္တိခရစ်များ လုပ်ဆောင်သည့် ပထမဆုံးသောအရာမှာ အခြားလူတို့၏ ယုံကြည်ကိုးစားမှုနှင့် လေးစားမှုတို့ကို ကြိုးစားရယူဖို့ ဖြစ်သည်။ ထိုသို့ဖြင့် ၎င်းတို့သည် ပိုများသည့် လူတို့ကို သိမ်းသွင်းစည်းရုံးနိုင်မည်ဖြစ်ပြီး ပိုများသည့်လူတို့အား ၎င်းတို့ကို ကြည်ညိုလေးစားအောင်၊ ကိုးကွယ်အောင် လုပ်နိုင်မည်ဖြစ်သည့်အပြင် ထိုသို့ဖြင့် အသင်းတော်တွင် အဆုံးအဖြတ် ပေးပိုင်ခွင့်ရရှိခြင်းနှင့် ဩဇာအာဏာ ကိုင်စွဲခြင်းတည်းဟူသော ၎င်းတို့၏ ရည်မှန်းချက်ကို စွမ်းဆောင်ရရှိနိုင်မည် ဖြစ်သည်။ ဩဇာအာဏာကို ရရှိခြင်းနှင့် ပတ်သက်လာသည့်အခါ ၎င်းတို့သည် အခြားလူများနှင့် ပြိုင်ဆိုင်ခြင်းနှင့် ယှဉ်ပြိုင်တိုက်ခိုက်ခြင်းတွင် အကျွမ်းကျင်ဆုံး ဖြစ်ကြသည်။ သမ္မာတရားကို လိုက်စားသောလူများ၊ အသင်းတော်တွင် ဂုဏ်သိက္ခာ ရှိသောသူများနှင့် ညီအစ်ကို မောင်နှမများ၏ ချစ်ခြင်းကို ခံရသောသူများသည် ၎င်းတို့၏ အဓိက ရန်ဘက်ဖြစ်သည်။ ၎င်းတို့၏ အဆင့်အတန်းကို ခြိမ်းခြောက်မှုတစ်ခု ဖြစ်စေသည့် မည်သူမဆိုသည် ၎င်းတို့၏ ရန်ဘက်ဖြစ်သည်။ ၎င်းတို့သည် ၎င်းတို့ထက် အားကောင်းသော သူတို့နဲ့ မတွန့်မဆုတ်ဘဲ ယှဉ်ပြိုင်ကြပြီး ၎င်းတို့ထက် အားနည်းသောသူတို့ကို မည်သည့် သနားစိတ်မျှ လုံးဝ မခံစားရဘဲ ယှဉ်ပြိုင်ကြသည်။ ၎င်းတို့၏ စိတ်နှလုံးများက ယှဉ်ပြိုင်ခြင်း၊ တိုက်ခိုက်ခြင်း အတွေးအခေါ်များနှင့် ပြည့်နေသည်။ လူတို့က ယှဉ်ပြိုင်ကာ တိုက်ခိုက်ခြင်း မရှိလျှင် မည်သည့် အကျိုးကျေးဇူးမျှ ရရှိနိုင်ကြမည် မဟုတ်သကဲ့သို့ ယှဉ်ပြိုင်ခြင်းနှင့် တိုက်ခိုက်ခြင်းတို့အားဖြင့်သာ ၎င်းတို့ အလိုရှိသည့်အရာများကို ၎င်းတို့ ရရှိနိုင်ကြသည်ဟု ၎င်းတို့က ယုံကြည်ကြသည်။ အဆင့်အတန်းကို ရရှိရန်နှင့် လူတစ်စုအတွင်းတွင် ပြိုင်ဘက်ကင်းသော နေရာတစ်ခုကို ရယူရန်အလို့ငှာ မည်သူနှင့်မဆို ယှဉ်ပြိုင်ရန် လိုအပ်သည့် မည်သည့်အရာကိုမဆို ၎င်းတို့ လုပ်ဆောင်ကြပြီး ၎င်းတို့၏ အဆင့်အတန်းကို ခြိမ်းခြောက်မှုတစ်ခုဖြစ်စေသည့် လူတစ်ဦးကိုမျှ ၎င်းတို့ ချမ်းသာမပေးကြပေ။ မည်သူနှင့် ၎င်းတို့ ဆက်ဆံရသည်ဖြစ်စေ ဤဆက်ဆံရေးများသည် ယှဉ်ပြိုင်မှုများ၊ တိုက်ခိုက်မှုများနှင့် ပြည့်နေပြီး ၎င်းတို့ အသက်ကြီးသည်အထိ ဆက်လက်၍ ယှဉ်ပြိုင်ပြီး တိုက်ခိုက်နေကြသည်။ ၎င်းတို့က ‘ထိုလူကို ငါ တိုက်ခိုက်လျှင် အနိုင်ရနိုင်မည်လော’ဟု မကြာခဏ ဆိုကြသည်။ စကားပြောကောင်းပြီး ကျိုးကြောင်းဆီလျော်သော၊ အဆီအငေါ် တည့်သော၊ စနစ်ကျသော ပုံစံတစ်ခုဖြင့် စကားပြောနိုင်သူ မည်သူမဆိုသည် ၎င်းတို့ မနာလိုဖြစ်ကာ အတုခိုးသည့် ပစ်မှတ်ဖြစ်လာသည်။ ထို့ထက်ပင်ပို၍ ထိုသူတို့သည် ၎င်းတို့၏ ရန်ဘက်ဖြစ်လာသည်။ သမ္မာတရားကို လိုက်စားပြီး ယုံကြည်ခြင်း ရှိကာ ညီအစ်ကို မောင်နှမများကို မကြာခဏ ကူညီပြီး ပံ့ပိုးပေးနိုင်သည့်အပြင် ထိုသူတို့ အပျက်သဘောဆောင်ခြင်းနှင့် အားနည်းခြင်းတို့မှ လွတ်မြောက်လာရန် ထောက်ကူပေးနိုင်သည့်သူ မည်သူမဆိုအပြင် အလုပ်အကိုင်တစ်ခုခုတွင် ကျွမ်းကျင်ပြီး ညီအစ်ကို မောင်နှမများ၏ လေးစားမှု အတော်အတန် ရသောသူ မည်သူမဆိုသည်လည်း ၎င်းတို့၏ ရန်ဘက်ဖြစ်လာကြလေသည်။ ၎င်းတို့၏ အလုပ်တွင် ရလဒ်များရကာ အထက်၏ အသိအမှတ်ပြုခြင်း ရရှိသူမည်သူမဆိုသည် ၎င်းတို့အတွက် သာ၍ပင် ကြီးမားသော ရန်ဘက်တစ်ခု အလိုအလျောက် ဖြစ်လာသည်။ မည်သည့်အဖွဲ့တွင် ရှိသည်ဖြစ်စေ အန္တိခရစ်များ၏ ဆောင်ပုဒ်မှာ အဘယ်နည်း။ သင်တို့၏ အတွေးများကို ဝေမျှကြလော့။ (အခြားသူများနှင့်လည်းကောင်း၊ ကောင်းကင်ဘုံနှင့်လည်းကောင်း ယှဉ်ပြိုင်တိုက်ခိုက်ခြင်းသည် အဆုံးမဲ့ ပျော်စရာရင်းမြစ်တစ်ခု ဖြစ်သည်။) ဤသည်မှာ ရူးကြောင်ကြောင်ဖြစ်သည် မဟုတ်လော။ ဤသည်မှာ ရူးကြောင်ကြောင်ဖြစ်ပေသည်။ အခြားတစ်ခုတလေ ရှိသလော။ (ဘုရားသခင်၊ ၎င်းတို့က ‘ကောင်းကင်နှင့်မြေကြီး တစ်လျှောက်လုံးတွင် ငါသည်သာ ငါ၏အရှင်သခင်ဖြစ်၏’ဟု တွေးထင်ကြသည် မဟုတ်လော။ ဆိုလိုသည်မှာ ၎င်းတို့သည် အမြင့်ဆုံးဖြစ်ချင်ကြပြီး မည်သူနှင့် ၎င်းတို့ ရှိသည်ဖြစ်စေ ထိုသူတို့ထက် သာအောင်လုပ်ချင်ကြသည်။) ဤသည်မှာ ၎င်းတို့၏ စိတ်ကူးများထဲမှတစ်ခုဖြစ်သည်။ အခြားတစ်ခုခု ရှိသေးသလော။ (ဘုရားသခင်၊ စကားလုံးအချို့ကို ကျွန်ုပ် စဉ်းစားမိပါသည်။ ‘အနိုင်ရသူ ဘုရင် ဖြစ်သည်’ဟူ၍ ဖြစ်သည်။ ၎င်းတို့သည် မည်သည့်နေရာတွင် ရှိသည်ဖြစ်စေ အခြားသူများထက် အမြဲ သာလွန်ချင်ကြပြီး ထင်ပေါ်ချင်ကြကာ အမြင့်ဆုံးဖြစ်ဖို့ ကြိုးပမ်းကြသည်ဟု ကျွန်ုပ် ထင်ပါသည်။) သင်တို့ ပြောပြီးသည့်အရာ အများစုမှာ စိတ်ကူးအမျိုးအစားများ ဖြစ်သည်။ ယင်းတို့ကို ဖော်ပြရန် အပြုအမူတစ်မျိုးကို ကြိုးစားအသုံးပြုကြည့်လော့။ အန္တိခရစ်များသည် မည်သည့်နေရာတွင် ၎င်းတို့ ရှိသည်ဖြစ်စေ အမြင့်ဆုံးသော နေရာကို မလွဲမသွေ ယူလိုခြင်းမျိုး မဟုတ်ပေ။ နေရာတစ်ခုကို ၎င်းတို့ သွားသည့်အခါတိုင်းတွင် ၎င်းတို့ကို ပြုမူဆောင်ရွက်ရန် တွန်းအားပေးနေသော စိတ်သဘောထားတစ်ခုနှင့် စိတ်နေစိတ်ထားတစ်ခု ရှိကြသည်။ ဤစိတ်နေစိတ်ထားက အဘယ်နည်း။ ယင်းက ‘ငါ ပြိုင်ရမည်။ ပြိုင်ရမည်။ ပြိုင်ရမည်’ ဟူ၍ဖြစ်သည်။ အဘယ်ကြောင့် ‘ပြိုင်ရမည်’ သုံးခု ဖြစ်သနည်း။ အဘယ်ကြောင့် ‘ပြိုင်ရမည်’ တစ်ခုတည်း မဖြစ်သနည်း။ (ယှဉ်ပြိုင်ခြင်းက သူတို့၏ ဘဝဖြစ်လာပေပြီ။ သူတို့ ရှင်သန်သည့်အရာ ဖြစ်သည်။) ဤသည်မှာ ၎င်းတို့၏ စိတ်သဘောထား ဖြစ်သည်။ ၎င်းတို့သည် လွန်ကဲစွာ မာနထောင်လွှားပြီး ထိန်းရန်ခက်သော စိတ်သဘောထားတစ်ခုဖြင့် မွေးလာခဲ့ကြသည်။ ဆိုလိုသည်မှာ မိမိတို့ကိုယ်ကို ပြိုင်ဖက်ကင်းအဖြစ် မြင်ခြင်းနှင့် ငါဟူသော အတ္တဆန်ခြင်း အလွန်အမင်း ရှိခြင်းဖြစ်သည်။ ၎င်းတို့၏ ဤအလွန့်အလွန် မာနထောင်လွှားသော စိတ်သဘောထားကို မည်သူကမျှ မကန့်သတ်နိုင်ပေ။ ၎င်းတို့ကိုယ်တိုင်လည်း မထိန်းချုပ်နိုင်ပေ။ ထို့ကြောင့် ၎င်းတို့၏ ဘဝသည် တိုက်ခိုက်ခြင်း၊ ယှဉ်ပြိုင်ခြင်းအကြောင်းသာ ဖြစ်သည်။ မည်သည့်အရာကို တိုက်ခိုက်၊ ယှဉ်ပြိုင်ကြသနည်း။ သဘောသဘာဝအားဖြင့် ၎င်းတို့သည် ကျော်ကြားမှု၊ အကျိုးအမြတ်၊ အဆင့်အတန်း၊ ဂုဏ်သိက္ခာနှင့် ကိုယ့်အကျိုးစီးပွားတို့အတွက် ယှဉ်ပြိုင်ကြသည်။ မည်သည့်နည်းလမ်းများကို ၎င်းတို့ အသုံးပြုရမည်ဖြစ်စေ၊ လူတိုင်းက ၎င်းတို့ကို နာခံသရွေ့၊ ၎င်းတို့ကိုယ်တိုင်အတွက် အကျိုးအမြတ်နှင့် အဆင့်အတန်းကို ရရှိသရွေ့ ၎င်းတို့၏ ပန်းတိုင်ကို ရရှိပြီးဖြစ်သည်။ ယှဉ်ပြိုင်ရန် ၎င်းတို့၏ စိတ်ဆန္ဒသည် ယာယီ ဖျော်ဖြေမှုတစ်ခုမဟုတ်ပေ။ ယင်းသည် ဆိုးယုတ်သော သဘာဝမှလာသည့် စိတ်သဘောထားမျိုးဖြစ်သည်။ ယင်းသည် ကောင်းကင်ဘုံနှင့် တိုက်ခိုက်သော၊ ကမ္ဘာမြေကြီးနှင့် တိုက်ခိုက်သော၊ လူတို့နှင့် တိုက်ခိုက်သော အဆင်းနီသော နဂါးကြီး၏ စိတ်သဘောထားကဲ့သို့ ဖြစ်သည်။ ယခုတွင် အန္တိခရစ်များက အသင်းတော်၌ အခြားလူများနှင့် တိုက်ခိုက်၊ ယှဉ်ပြိုင်သောအခါ မည်သည့်အရာကို ၎င်းတို့ အလိုရှိသနည်း။ ၎င်းတို့သည် ဂုဏ်သတင်းနှင့် အဆင့်အတန်းအတွက် ယှဉ်ပြိုင်ကြသည်မှာ သံသယရှိစရာမလိုပေ။” (နှုတ်ကပတ်တော်၊ အတွဲ (၄)၊ အန္တိခရစ်တို့ကို ဖော်ထုတ်ခြင်း၊ အချက် ၉ (အပိုင်း ၃)) အန္တိခရစ်တွေမှာ “ယှဉ်ပြိုင်၊ ယှဉ်ပြိုင်၊ ယှဉ်ပြိုင်” ဆိုတဲ့ စိတ်သဘောထား ရှိတယ်ဆိုတာ ဘုရားနှုတ်ကပတ်တော်တွေကတစ်ဆင့် ကျွန်တော် နားလည်လာတယ်။ သူတို့က ယှဉ်ပြိုင်တိုက်ခိုက်ရင်းနဲ့ပဲ သူတို့လိုအင်ဆန္ဒရှိတာ မှန်သမျှကို ရနိုင်တယ်လို့ ယုံကြည်ကြတယ်။ ဒါကြောင့် သူတို့ဟာ ဘယ်လို လူအုပ်စုထဲမှာပဲ ရှိနေပါစေ၊ ထိပ်ဆုံးကို ရောက်ဖို့ အသေအလဲ တိုက်ခိုက်ကြမှာပဲ။ ဒါဟာ အန္တိခရစ်တစ်ယောက်ရဲ့ သဘာဝ အနှစ်သာရပဲ။ ဘုရားနှုတ်ကပတ်တော်တွေအပေါ် အခြေခံပြီး ကိုယ့်ကိုယ်ကိုယ် ဆင်ခြင်သုံးသပ်ကြည့်တော့ ကျွန်တော်လည်း ဒီလို စိတ်သဘောထားမျိုးကို ထုတ်ဖော်ခဲ့မှန်း သတိပြုမိသွားတယ်။ ဒိုင်ယန်းက ညီအစ်ကိုမောင်နှမတွေရဲ့ အသိအမှတ်ပြုမှုနဲ့ လေးစားမှုကို ရနေတာကို မြင်ရတော့ ကျွန်တော့်ရင်ထဲမှာ နာကြည်းမှုတွေနဲ့ ပြည့်နှက်သွားခဲ့တယ်။ ကျွန်တော်က ဗီဒီယိုတွေ လုပ်လာခဲ့တာဖြစ်ပြီး အတွေ့အကြုံနဲ့ ပညာရပ်ပိုင်းဆိုင်ရာ ကျွမ်းကျင်မှုတချို့ ရှိထားလို့ သူ့ထက် မညံ့ဘူးလို့ ခံစားခဲ့ရတယ်။ သူမလာခင်တုန်းကဆို ညီအစ်ကိုမောင်နှမတွေဟာ သူတို့ရဲ့ ပြဿနာတွေ၊ အခက်အခဲတွေ အားလုံးကို ကျွန်တော်နဲ့ လာဆွေးနွေးကြပြီး အားလုံးက ကျွန်တော့်ကို အထင်ကြီးခဲ့ကြတာလေ။ ဒါပေမဲ့ အခုတော့ လူတိုင်းက သူ့နားကို ဝိုင်းအုံပြီး မေးခွန်းတွေ မေးနေကြတာဟာ ကျွန်တော် လက်မခံနိုင်တဲ့ အရာတစ်ခု ဖြစ်လာခဲ့တယ်။ သူက ငါ့နေရာကို လုယူသွားပြီလို့ ခံစားရပြီး ငါ့ရဲ့ အရှိန်အဝါကို ပြန်ယူချင်ခဲ့တယ်။ ဒါနဲ့ နောက်ကွယ်မှာ ကြိုးကြိုးစားစားနဲ့ နည်းပညာတွေ သင်ယူဖို့ အချိန်ပိုတွေ လုပ်ခဲ့တယ်၊ ဘုရားနှုတ်ကပတ်တော်တွေကို ဖတ်တဲ့အခါမှာတောင် ကိုယ့်ပြဿနာတွေကို ဖြေရှင်းဖို့ သမ္မာတရားကို နားလည်ချင်လို့ မဟုတ်ဘဲ၊ ကြွားဝါဖို့နဲ့ တခြားသူတွေရဲ့ လေးစားမှုကို ရဖို့အတွက် နက်နဲတဲ့ သီအိုရီတွေကို ဆုပ်ကိုင်ထားချင်လို့ပဲ ဖြစ်နေခဲ့တယ်။ ကျွန်တော့်စိတ်ထဲမှာ ဒိုင်ယန်းကို ဘယ်လို ကျော်တက်ရမလဲ၊ သူ့ကို ဘယ်လို နှိမ့်ချရမလဲ၊ ပြီးတော့ ငါ့နေရာကို ဘယ်လို ခိုင်မာအောင် လုပ်ရမလဲ ဆိုတာကိုပဲ အမြဲ တွေးနေခဲ့တယ်။ ကိုယ့်ရဲ့ အတိတ်က အတွေ့အကြုံတွေကိုလည်း အရင်းအနှီးတစ်ခုလို သဘောထားပြီး၊ ငါ့မှာ ပညာရပ်ဆိုင်ရာ ဗဟုသုတတချို့ ရှိထားလို့ ငါက ထူးချွန်တယ်လို့ တွေးခဲ့တယ်၊ ပြီးတော့ ငါက တခြားသူတွေထက် ပိုသာနေရမယ်၊ နောက်ကောက်ကျကျန်ခဲ့လို့ မဖြစ်ဘူးလို့ကို တွေးထားခဲ့တာလေ။ ဒါကြောင့် ကိုယ့်ထက်သာတဲ့သူကို မြင်တဲ့အခါ နာကြည်းမိပြီး သူတို့နဲ့ ယှဉ်ပြိုင် တိုက်ခိုက်ချင်ခဲ့တာပေါ့။ ကျွန်တော်ဟာ တကယ်ကို မာနထောင်လွှားပြီး ဆင်ခြင်တုံတရား ကင်းမဲ့နေခဲ့ပြီပဲ။ “ယှဉ်ပြိုင်၊ ယှဉ်ပြိုင်၊ ယှဉ်ပြိုင်” ဆိုတာက ကျွန်တော့်ရဲ့ သဘာဝ ဖြစ်နေပြီဆိုတာကို မြင်လိုက်ရတယ်။ ကျွန်တော် ထုတ်ဖော်နေခဲ့တာဟာ အန္တိခရစ်တစ်ယောက်ရဲ့ စိတ်သဘောထားပဲ။ ဒါကို သဘောပေါက်လိုက်တော့ ကျွန်တော့်ရင်ထဲမှာ နက်နဲတဲ့ နောင်တနဲ့ အပြစ်ရှိသလို ခံစားရမှုတွေ ပြည့်နှက်သွားတယ်။ ကိုယ့်နေရာကို ခိုင်မာအောင် လုပ်ဖို့အတွက် အသင်းတော်အလုပ်ကို အဖျက်အမှောင့်လုပ်ပြီး နှောင့်ယှက်တာတွေ၊ ညီအစ်ကိုမောင်နှမတွေကို ထိခိုက်စေတာတွေအပြင်၊ ဂုဏ်သတင်းနဲ့ အဆင့်အတန်းအပေါ် အရမ်းကို ကြီးမားလွန်းတဲ့ လိုအင်ဆန္ဒတွေ ရှိနေတဲ့ ကိုယ့်ကိုယ်ကိုယ်လည်း အရမ်းမုန်းတီးမိတယ်။ ကျွန်တော့်မှာ တကယ်ကို လူ့သဘာဝ ကင်းမဲ့နေခဲ့တာပါ။

နောက်တော့ ဘုရားနှုတ်ကပတ်တော်ကို ကျွန်တော် ဖတ်ခဲ့တယ်။ “စာတန်သည် လူတို့၏ အတွေးများကို ထိန်းချုပ်ရန်အတွက် ကျော်ကြားမှုနှင့် အကျိုးအမြတ်ကို အသုံးပြုပြီး လူတို့အား ဤအရာနှစ်ခုမှလွဲ၍ အခြားမည်သည့်အရာကိုမျှ မတွေးစေရန် လုပ်ဆောင်သည်။ ပြီးလျှင် ကျော်ကြားမှုနှင့် အကျိုးအမြတ်အတွက် ရုန်းကန်စေသည်။ ကျော်ကြားမှုနှင့် အကျိုးအမြတ်အတွက် ဒုက္ခခံစေသည်။ ကျော်ကြားမှုနှင့် အကျိုးအမြတ်အတွက် အရှက်ရခြင်းကို သည်းခံပြီး လေးလံသော ဝန်ထုပ်ဝန်ပိုးများကို ခံယူစေသည်။ ကျော်ကြားမှုနှင့် အကျိုးအမြတ်အတွက် အရာရာတိုင်းကို စတေးစေသည်။ အကဲဖြတ်ချက် သို့မဟုတ် ဆုံးဖြတ်ချက်တိုင်းကို ကျော်ကြားမှုနှင့် အကျိုးအမြတ်အတွက် ပြုလုပ်စေသည်။ ဤသို့ဖြင့် စာတန်သည် လူတို့အပေါ် မမြင်ရသော အချုပ်အနှောင်များထားရှိသည်။ လူတို့အပေါ်တွင် ဤအချုပ်အနှောင်များရှိသဖြင့် ၎င်းတို့သည် ချိုးဖျက်လွတ်မြောက်နိုင်စွမ်း မရှိသလို သတ္တိလည်းမရှိပေ။ ၎င်းတို့သည် သတိမထားမိဘဲ ကြီးမားသော အခက်အခဲဖြင့် တစ်ဆင့်ချင်း လေးလံစွာ လျှောက်လှမ်းလျက် ဤအချုပ်အနှောင်များကို ထမ်းပိုးထားရသည်။ ဤကျော်ကြားမှုနှင့် အကျိုးအမြတ်အတွက် အလို့ငှာ လူသားမျိုးနွယ်သည် ဘုရားသခင်ထံမှ သွေဖည်၍ ကိုယ်တော်အား သစ္စာဖောက်ပြီး တိုး၍ ကောက်ကျစ်ဆိုးယုတ် လာကြသည်။ ဤနည်းဖြင့် မျိုးဆက်တစ်ခုပြီး တစ်ခုသည် စာတန်၏ ကျော်ကြားမှုနှင့် အကျိုးအမြတ် အကြားတွင် ဖျက်ဆီးခံကြရ၏။ စာတန်၏ လုပ်ဆောင်မှုတို့ကို ယခု ကြည့်သည့်အခါ ၎င်း၏ မသိမသာဖြင့် ဒုက္ခပေးသော ရည်ရွယ်ချက်တို့သည် လုံးဝ မုန်းတီးဖွယ်ကောင်းသည် မဟုတ်လော။ သင်တို့သည် ကျော်ကြားမှုနှင့် အကျိုးအမြတ် မပါလျှင် ဘဝသည် အဓိပ္ပာယ်ရှိမည် မဟုတ်ဟုလည်းကောင်း၊ လူတို့သည် ရှေ့ဆက်လမ်းခရီးကို မြင်နိုင်တော့မည် မဟုတ်ဟုလည်းကောင်း၊ မိမိတို့၏ ပန်းတိုင်ကို မြင်နိုင်တော့မည် မဟုတ်ဟုလည်းကောင်း၊ ၎င်းတို့၏ အနာဂတ်သည် မှောင်မိုက်ကာ မှေးမှိန်ပြီး သုန်မှုန်နေမည်ဟုလည်းကောင်း ထင်သည့်အတွက်ကြောင့် စာတန်၏ ကောက်ကျစ်စဉ်းလဲသော ရည်ရွယ်ချက်များကို ယနေ့တွင် ထိုးထွင်းသိမြင်နိုင်ခြင်း မရှိသေးသည်မှာ ဖြစ်ကောင်းဖြစ်နိုင်သည်။ သို့သော် ကျော်ကြားမှုနှင့် အကျိုးအမြတ်တို့သည် စာတန်က လူတို့အပေါ် ထားရှိသည့် ကြီးမားသော အချုပ်အနှောင်များဖြစ်သည်ကို တစ်နေ့တွင် သင်တို့အားလုံးသည် ဖြည်းဖြည်းချင်း သတိပြုမိလာကြလိမ့်မည်။ ထိုနေ့ရက်ရောက်သောအခါတွင် စာတန်၏ ထိန်းချုပ်မှုကို သင် လုံးလုံးလျားလျား အတိုက်အခံလုပ်မည် ဖြစ်ပြီး သင့်ထံသို့ စာတန် ဆောင်ကြဉ်းလာသည့် အချုပ်အနှောင်များကို လုံးလုံးလျားလျား အတိုက်အခံလုပ်လိမ့်မည်။ စာတန်က သင်၌ သွတ်သွင်းထားသော ဤအရာအားလုံးမှ သင့်ကိုယ်သင် ရုန်းထွက်လွတ်မြောက်ရန် ဆန္ဒရှိသည့်အခါတွင် သင်သည် စာတန်နှင့် ပြတ်ပြတ်သားသား လမ်းခွဲလိမ့်မည်ဖြစ်ကာ စာတန်က သင့်ထံသို့ ယူဆောင်လာသော အရာအားလုံးကိုလည်း အမှန်ပင် မုန်းတီးလိမ့်မည် ဖြစ်သည်။ ထိုအချိန်တွင်မှ သင်သည် ဘုရားသခင်အပေါ် စစ်မှန်သည့် ချစ်ခြင်းနှင့် တမ်းတခြင်း ရှိလိမ့်မည်။” (နှုတ်ကပတ်တော်၊ အတွဲ (၂)၊ ဘုရားသခင်ကို သိကျွမ်းခြင်းနှင့် စပ်လျဉ်း၍၊ အတုမရှိ ဘုရားသခင်ကိုယ်တော်တိုင် (၆)) တခြားသူတွေအပေါ် ကျွန်တော် မနာလိုဖြစ်ရတဲ့ အရင်းခံအကြောင်းရင်းဟာ အဆင့်အတန်းအတွက် ကျွန်တော့်ရဲ့ လိုအင်ဆန္ဒတွေက ချည်နှောင်ထားလို့ပဲ ဆိုတာကို ဘုရားနှုတ်ကပတ်တော်တွေကနေတစ်ဆင့် သဘောပေါက်လိုက်တယ်။ စိတ်ထဲမှာ “ထင်ပေါ်ကျော်ကြားပြီး ထူးချွန်အောင် ကြိုးစားပါ”၊ “ငန်းတစ်ကောင်သည် ၎င်းပျံသန်းသည့်နေရာတိုင်းတွင် အော်မြည်သကဲ့သို့ လူတစ်ဦးသည်လည်း ရောက်ရှိသည့်နေရာတိုင်းတွင် သူ့အမည်ကို ချန်ထားခဲ့၏”၊ “အသက်ရှင်နေတုန်း လူတွေကြားမှာ သူရဲကောင်းဖြစ်ရမယ်၊ သေသွားရင်တောင် သရဲတွေကြားမှာ စွမ်းအားကြီးတဲ့ ဝိညာဉ်ဖြစ်ရမယ်” စတဲ့ အယူအဆတွေကို ဆုပ်ကိုင်ထားခဲ့တယ်။ ဒီလို စာတန်ဆန်တဲ့ အဆိပ်အတောက်တွေက ကျွန်တော့်ရဲ့ သဘာဝ ဖြစ်လာပြီး၊ ကျွန်တော့်ရဲ့ စိတ်သဘောထားကို ပိုပိုပြီး မာနထောင်လွှားလာစေတယ်။ လူအများကြားမှာ အမြဲတမ်း ထင်ပေါ်ချင်ပြီး တခြားသူတွေရဲ့ လေးစားမှုကို ရဖို့ အလုအယက် ယှဉ်ပြိုင်ချင်ခဲ့တယ်။ အထူးသဖြင့် ကျွန်တော့်မှာ ဆုကျေးဇူးတွေနဲ့ အစွမ်းအစတချို့ ရှိတယ်လို့ ယုံကြည်ထားတဲ့အတွက် ပိုပြီးတော့တောင် ကိုယ့်ကိုယ်ကိုယ် မှန်ကန်တယ်လို့ ယူမှတ်လာပြီး ဆရာကြီးလုပ်ချင်ခဲ့တာလေ။ ကျွန်တော့်ထက် ပိုတော်တဲ့သူတွေကို မြင်ရင် မနာလိုဖြစ်ပြီး တခြားသူတွေနဲ့ ယှဉ်ပြိုင်ပြီး နှိုင်းယှဉ်နေမိတာကို မထိန်းနိုင်ခဲ့ဘူး။ သူတို့ထက် မသာနိုင်တဲ့အခါမှာတော့ စိတ်မချမ်းမသာဖြစ်ခြင်းနဲ့ နာကျင်မှုတွေထဲကို နစ်မြုပ်သွားတော့တာပါပဲ။ ကျော်ကြားမှု၊ အကျိုးအမြတ်နဲ့ အဆင့်အတန်းတွေဟာ ကျွန်တော့်အပေါ် မမြင်ရတဲ့ သံကြိုးတွေလို ဖြစ်လာပြီး၊ ထိန်းမရနိုင်လောက်အောင် ပိတ်လှောင်ပြီး ချည်နှောင်ခံထားရတယ်။ ကျော်ကြားမှုနဲ့ အကျိုးအမြတ်ကို မရှာဖွေရင် အသက်ရှင်ရတာ အဓိပ္ပာယ်မရှိသလို၊ တန်ဖိုးမရှိသလိုပါပဲ။ ကျောင်းသားဘဝတုန်းကတည်းက ကျော်ကြားမှု၊ အကျိုးအမြတ်နဲ့ အဆင့်အတန်းကို ရှာဖွေချင်တဲ့ အတွေးက ကျွန်တော့်ရဲ့ ငယ်ရွယ်တဲ့ စိတ်နှလုံးထဲမှာ အမြစ်တွယ်နေခဲ့တယ်။ ဒါကြောင့် ကျွန်တော် ဘာလုပ်လုပ် ပထမဆုံးပဲ ဖြစ်ချင်ခဲ့တယ်။ အမှတ်ကောင်းကောင်းရဖို့နဲ့ ထင်ပေါ်ဖို့အတွက် ရည်မှန်းချက်ရောက်ဖို့ နောက်ကွယ်မှာ ဘယ်လို အခက်အခဲမျိုးကိုမဆို သည်းခံဖို့ အသင့်ဖြစ်နေခဲ့တယ်။ အလုပ်ခွင်ထဲ ရောက်လာတဲ့အခါမှာလည်း တခြားသူတွေ အထင်ကြီးလေးစားတာကို ခံရအောင် ကိုယ့်ကျန်းမာရေးကိုတောင် ရင်းပြီး ငွေအတွက် ကြိုးကြိုးစားစား အလုပ်လုပ်ဖို့ ဝန်မလေးခဲ့ဘူး။ ရလဒ်အနေနဲ့ ငယ်ငယ်ရွယ်ရွယ်နဲ့ပဲ ကျန်းမာရေးတွေ ပျက်စီးခဲ့ပြီး အသက်တောင် ဆုံးရှုံးရမလို ဖြစ်ခဲ့ရတယ်။ ဘုရားသခင်ကို ယုံကြည်ပြီးတဲ့နောက်မှာတောင် ကျွန်တော်က ကျော်ကြားမှု၊ အကျိုးအမြတ်နဲ့ အဆင့်အတန်းတွေရဲ့ ချည်နှောင်မှုကို ခံနေရတုန်းပဲ၊ ကိုယ့်ထက် ပိုတော်တဲ့သူတွေကို မနာလိုမဖြစ်ဘဲ၊ သူတို့နဲ့ မယှဉ်ပြိုင်ဘဲ မနေနိုင်ခဲ့ဘူး၊ ဘာလို့လဲဆိုတော့ သူတို့ထက် ငါက ပိုတော်တယ်ဆိုတာကို သက်သေပြချင်လို့လေ။ ဘယ်ညီအစ်ကိုမောင်နှမမဆို ရာထူးတိုးခံရတာ၊ အရေးကြီးတဲ့ အခန်းကဏ္ဍပေးခံရတာ၊ ဒါမှမဟုတ် သမ္မာတရားကို လက်တွေ့ကျကျ မိတ်သဟာယပြုနေတာတွေကို မြင်ရရင် ကျွန်တော့်ရင်ထဲမှာ အရမ်းကို မနာလိုဖြစ်ခဲ့တယ်။ ဒိုင်ယန်းနဲ့ ပူးပေါင်းဆောင်ရွက်ရတဲ့ အချိန်တုန်းကလိုမျိုးပေါ့၊ သူက ကျွန်တော့်ထက် ပိုတော်နေတာကို မြင်တော့ ကျွန်တော့်ကို မနာလိုမှုနဲ့ နာကြည်းမှုတွေ ဖြစ်စေခဲ့တယ်။ တစ်ခါတလေဆို သူ့ကို ယှဉ်ပြိုင်ဖို့၊ ပြိုင်ဆိုင်ဖို့ အိပ်မက်တောင် မက်ခဲ့သေးတယ်။ ကျွန်တော် အရမ်းကို သောကတွေနဲ့ အသက်ရှင်နေခဲ့ရတာပါ။ ကျွန်တော့်ရဲ့ အတွေးတွေ၊ ခွန်အားတွေ အားလုံးနီးပါးကို ကျော်ကြားမှုနဲ့ အကျိုးအမြတ် ရှာဖွေတဲ့နေရာမှာပဲ မြှုပ်နှံထားခဲ့ပြီး၊ သမ္မာတရားကို ရှာဖွေဖို့၊ စိတ်ကို ငြိမ်ငြိမ်ထားဖို့၊ ကိုယ့်တာဝန်တွေကို ဘယ်လို ကောင်းကောင်းလုပ်ရမလဲ ဆိုတာကို တွေးဖို့ လိုအင်ဆန္ဒ တစ်စက်မှ မရှိခဲ့ဘူး။ ကျွန်တော်က ကိုယ့်ရဲ့ လုပ်သင့်လုပ်ထိုက်တဲ့ တာဝန်တွေကို ပစ်ထားပြီး ဘုရားသခင်ရဲ့ တောင်းဆိုချက်တွေကို ဆန့်ကျင်နေခဲ့တာ။ ကျော်ကြားမှု၊ အကျိုးအမြတ်နဲ့ အဆင့်အတန်းကို ကျွန်တော် ရှာဖွေနေတာဟာ ကျွန်တော့်ဘဝကို နာကျင်စေရုံသာမကဘဲ အစ်မကိုပါ ထိခိုက်စေပြီး ဗီဒီယိုအလုပ်ရဲ့ တိုးတက်မှုကိုလည်း နှောင့်နှေးစေခဲ့တယ်။ ငါသာ နောင်တမရရင် ဘုရားသခင်ရဲ့ ဖော်ထုတ်ပြီး ဖယ်ရှားရှင်းလင်းတာကို ခံရဖို့ပဲ ရှိတော့တယ်လို့ တွေးမိတယ်။ ဒါကို သဘောပေါက်လိုက်တော့ ကျွန်တော် အရမ်း ကြောက်သွားတယ်။ ဒါနဲ့ ဖောက်ပြန်ပျက်စီးတဲ့ စိတ်သဘောထားနဲ့ ဆက်ပြီး အသက်မရှင်ချင်တော့လို့ နောင်တရဖို့ ဘုရားသခင်ဆီ အမြန်ဆုတောင်းခဲ့တယ်။

တစ်နေ့မှာ ကျွန်တော် ဝတ်ပြုနေတုန်း ဘုရားနှုတ်ကပတ်တော်ကို ဖတ်ခဲ့ရတယ်။ “ဘုရားသခင်က သင့်အား မိုက်မဲစေခဲ့ပါက သင်၏ မိုက်မဲမှုတွင် အဓိပ္ပာယ် ရှိပေသည်၊ သူက သင့်အား ဉာဏ်ရည်ဉာဏ်စွမ်း ရှိစေခဲ့ပါက သင်၏ ဉာဏ်ရည်ဉာဏ်စွမ်း ရှိခြင်းတွင် အဓိပ္ပာယ် ရှိပေသည်။ ဘုရားသခင်က သင့်အား မည်သည့် အားသာချက်များ ပေးခဲ့သည်ဖြစ်စေ၊ သင်သည် မည်သည့်အရာတွင် တော်သည်ဖြစ်စေ၊ သင်၏ ဉာဏ်ရည် မည်မျှပင် မြင့်မားသည်ဖြစ်စေ ထိုသို့ ဖန်တီးခြင်းအတွက် ဘုရားသခင်တွင် သူ့ရည်ရွယ်ချက်နှင့်သူ ရှိလေသည်။ ဤအရာအားလုံးကို ဘုရားသခင်က ကြိုတင်ပြဋ္ဌာန်းထားခဲ့ခြင်း ဖြစ်သည်။ သင်၏ ဘဝတွင် သင် ပါဝင်ရသည့် အခန်းကဏ္ဍနှင့် သင် ထမ်းဆောင်နိုင်သော တာဝန်တို့ကိုလည်း ဘုရားသခင်က လွန်ခဲ့သော အချိန်ကြာမြင့်စွာကတည်းက ကြိုတင်ပြဋ္ဌာန်းထားခဲ့ခြင်း ဖြစ်သည်။ အချို့လူများသည် မိမိတို့တွင် မရှိသော ကောင်းကွက်များ အခြားသူများတွင် ရှိသည်ကို မြင်ပြီး မကျေမနပ် ဖြစ်ကြလေသည်။ ၎င်းတို့သည် ပို၍ သင်ယူခြင်း၊ ပို၍ မြင်တွေ့ခြင်းနှင့် ပို၍ လုံ့လဝီရိယရှိခြင်းတို့အားဖြင့် အမှုအရာများကို ပြောင်းလဲလိုကြသည်။ သို့ရာတွင် ၎င်းတို့ မည်မျှပင် လုံ့လဝီရိယရှိပါစေ ၎င်းတို့ ဖြစ်မြောက်အောင်မြင်နိုင်သည့် အရာအတွက် ကန့်သတ်ချက်တစ်ခု ရှိပြီး ၎င်းတို့သည် ဆုကျေးဇူးများနှင့် အားသာချက်များ ရှိသောသူများကို မကျော်လွန်နိုင်ကြပေ။ သင် မည်မျှပင် အားထုတ်ကြိုးပမ်းပါစေ ယင်းမှာ အချည်းနှီး ဖြစ်သည်။ ဘုရားသခင်က သင့်အား မည်သည့်အရာဖြစ်ရန် ကြိုတင်ပြဋ္ဌာန်းထားခဲ့သည်ဖြစ်စေ သင်သည် ထိုအရာပင် ဖြစ်လေသည်။ ကိုယ်တော်သည် လူတိုင်းကို မတူညီသော ဆုကျေးဇူးများနှင့် အားသာချက်များ ပေးထားပြီး ဤအရာကို ပြောင်းလဲရန် မည်သူမျှ လုပ်ဆောင်နိုင်သည့်အရာ မရှိပေ။ သင် မည်သည့်အရာတွင် တော်သည်ဖြစ်စေ ထိုနေရာတွင် သင် ပို၍ အားထုတ်ကြိုးပမ်းသင့်ပေသည်။ သင်နှင့် သင့်လျော်သော မည်သည့် တာဝန်ဖြစ်စေ ယင်းမှာ သင် ထမ်းဆောင်သင့်သည့် တာဝန် ဖြစ်ပေသည်။ သင် မတော်သည့် အရာများထဲသို့ ဝင်ရောက်ပတ်သက်ရန် အတင်းအကျပ် မကြိုးစားနှင့်၊ ပြီးလျှင် အခြားသူများကို မနာလို မဖြစ်နှင့်။ လူတိုင်းတွင် ကိုယ့်လုပ်ဆောင်ချက်နှင့်ကိုယ် ရှိကြသည်။ သင်သည် အရာအားလုံးကို ကောင်းမွန်စွာ လုပ်ဆောင်နိုင်သည်ဟုဖြစ်စေ၊ သင်သည် စုံလင်ပြီး အခြားသူများထက် သာလွန်သည်ဟုဖြစ်စေ မတွေးနှင့်။ အခြားသူများကို အစားထိုးရန်နှင့် မိမိကိုယ်ကို ကိုယ်ရည်သွေးရန် အစဉ်သဖြင့် မလိုလားနှင့်။ ဤသည်မှာ ဖောက်ပြန်ပျက်စီးသော စိတ်သဘောထားတစ်ခု ဖြစ်သည်။ ၎င်းတို့သည် မည်သည့်အရာကိုမျှ ကောင်းမွန်စွာ မလုပ်ဆောင်နိုင်ဟု တွေးပြီး ၎င်းတို့တွင် အားသာချက်များ လုံးဝမရှိဟု တွေးသော သူများ ရှိလေသည်။ ထိုသို့ဖြစ်ပါက သင်သည် နားထောင်ပြီး လက်တွေ့ကျကျ ကျိုးနွံနာခံသော သူတစ်ဦးသာ ဖြစ်သင့်ပေသည်။ သင် လုပ်ဆောင်နိုင်စွမ်းရှိသည့် အရာများကို ကောင်းမွန်စွာ လုပ်ဆောင်ပြီး သင် တတ်နိုင်သမျှ အားလုံးကို ပေးဆပ်လော့။ ယင်းမှာ လုံလောက်ပေသည်။ ဘုရားသခင်သည် ကျေနပ်လိမ့်မည် ဖြစ်သည်။ လူတိုင်းကို ကျော်လွန်ရန်၊ အရာအားလုံးကို အခြားသူများထက် ပို၍ ကောင်းမွန်စွာ လုပ်ဆောင်ရန်နှင့် လူအများကြား၌ အဘက်ဘက်မှ ထင်ပေါ်နေရန် အစဉ်သဖြင့် မတွေးနှင့်။ ယင်းမှာ မည်သည့် စိတ်သဘောထားမျိုး ဖြစ်သနည်း။ (မာနထောင်လွှားသော စိတ်သဘောထားတစ်ခု ဖြစ်ပေသည်။) လူတို့သည် မာနထောင်လွှားသော စိတ်သဘောထားတစ်ခုကို အစဉ်သဖြင့် ပိုင်ဆိုင်ကြပြီး ၎င်းတို့သည် သမ္မာတရားဆီသို့ ကြိုးပမ်းကာ ဘုရားသခင်ကို ကျေနပ်စေလိုလျှင်ပင် ၎င်းတို့သည် စံမမီကြပေ။ မာနထောင်လွှားသော စိတ်သဘောထားတစ်ခု၏ ထိန်းချုပ်ခံရခြင်းက လူတို့ကို လမ်းလွဲခြင်းများ ဖြစ်ပေါ်စေနိုင်ဆုံး ဖြစ်သည်။...သင့်တွင် ထိုသို့သော စိတ်သဘောထားတစ်ခု ရှိသည့်အခါ အခြားသူများကို အောက်သို့ဖိထားရန် အစဉ်သဖြင့် ကြိုးစားနေသည်၊ ၎င်းတို့၏ ရှေ့သို့ရောက်ရန် အစဉ်သဖြင့် ကြိုးစားနေသည်၊ အစဉ်သဖြင့် အပြိုင်အဆိုင်လုပ်နေပြီး လူတို့ထံမှ ယူရန် အစဉ်သဖြင့် ကြိုးစားနေလေသည်။ သင်သည် အလွန်အမင်း မနာလိုဖြစ်တတ်သည်၊ သင်သည် မည်သူ့ကိုမျှ အရှုံးပေးအပ်နှံခြင်း မရှိဘဲ လူအများကြားတွင် မိမိကိုယ်ကို ထင်ပေါ်စေရန် အစဉ်သဖြင့် ကြိုးစားနေလေသည်။ ဤသည်မှာ ပြဿနာကို ဖြစ်စေသည်၊ ဤသည်မှာ စာတန် ပြုမူသည့်ပုံစံ ဖြစ်သည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ကျင့်ကြံပြုမူခြင်းတွင် လမ်းပြသင့်သည့် စည်းမျဉ်းများ) လူတစ်ယောက်မှာရှိတဲ့ အစွမ်းအစဆိုတာ ဘုရားသခင် ကြိုတင်ပြဋ္ဌာန်းထားတာဖြစ်ပြီး ဘုရားသခင်ရဲ့ ရည်ရွယ်ချက်တွေ ပါဝင်တယ်ဆိုတာ ဘုရားနှုတ်ကပတ်တော်တွေကနေတစ်ဆင့် ကျွန်တော် နားလည်လာတယ်။ လူတွေဟာ ဖန်ဆင်းခံတွေအနေနဲ့ ကျိုးနွံနာခံတတ်ဖို့နဲ့ ကိုယ့်ရဲ့ မှန်ကန်တဲ့ နေရာမှာ နေတတ်ဖို့ သင်ယူသင့်ပြီး၊ ကိုယ့်တာဝန်တွေကို ကောင်းကောင်းလုပ်ဖို့ ကိုယ့်ရဲ့ အားသာချက်တွေကို အသုံးချသင့်တယ်။ ကိုယ် မကျွမ်းကျင်တဲ့ နေရာတွေမှာ ကိုယ့်ကိုယ်ကိုယ် အတင်းအကျပ် မလုပ်သင့်တဲ့အပြင် တခြားသူတွေနဲ့လည်း မယှဉ်ပြိုင်သင့်ဘူး။ အဲဒီအစား ဘုရားသခင်ရဲ့ စီစဉ်ညွှန်ကြားမှုတွေနဲ့ အစီအစဉ်တွေကို ကျိုးနွံနာခံနိုင်ရမယ်၊ ပြီးတော့ ညီအစ်ကိုမောင်နှမတွေနဲ့ တစ်ယောက်ကိုတစ်ယောက် အပြန်အလှန် ဖြည့်ဆည်းပေးဖို့ သဟဇာတဖြစ်ဖြစ် ပူးပေါင်းဆောင်ရွက်သင့်တယ်။ ဒါဟာ ဆင်ခြင်တုံတရားရှိတဲ့ လူတွေရဲ့ သရုပ်သကန်ပါပဲ။ ဒိုင်ယန်းနဲ့ ကျွန်တော့်ရဲ့ ဆက်ဆံရေးကို ပြန်ကြည့်ရင်၊ အစပိုင်းမှာတော့ သူ့ရဲ့ အားသာချက်တွေကို ကျွန်တော် မြင်နိုင်ခဲ့တယ်၊ ဒါပေမဲ့ ကျွန်တော့်ရဲ့ မနာလိုတဲ့စိတ်က ကြီးထွားလာတာနဲ့အမျှ ကိုယ့်လိုအင်ဆန္ဒတွေက ထိန်းချုပ်တာကို ခံလိုက်ရပြီး မျက်ကန်းတစ်ယောက်လို ဘာကိုမှ ရှင်းရှင်းလင်းလင်း မမြင်နိုင်တော့ဘူး။ ဒါကြောင့် ကျွန်တော့်ရဲ့ မနာလိုတဲ့စိတ်က ပိုပိုပြီး ပြင်းထန်လာခဲ့တာပေါ့။ တကယ်တော့ ဒိုင်ယန်းက အတော်လေး သေချာစေ့စပ်ပြီး ပြဿနာတွေကို ပြည့်ပြည့်စုံစုံ စဉ်းစားတတ်တယ်၊ အထူးသဖြင့် စည်းမျဉ်းဆိုင်ရာ ပြဿနာတချို့နဲ့ ပတ်သက်လာရင် သူက အရမ်းကို သတိထားတတ်တယ်။ ကျွန်တော်ကတော့ ရိုးရိုးရှင်းရှင်းပဲ တွေးတတ်လို့ အလုပ်တွေကို ပြန်လုပ်ရတာမျိုး ခဏခဏ ဖြစ်တတ်တဲ့အပြင် စည်းမျဉ်းဆိုင်ရာ ပြဿနာတွေကိုလည်း မကိုင်တွယ်နိုင်ခဲ့ဘူး။ ဒါ့အပြင် ဒိုင်ယန်းက လူတိုင်းကို စုစည်းပြီး သင်ယူအောင် လုပ်ပေးတဲ့နေရာမှာ တော်တယ်၊ လေ့လာတဲ့အခါမှာလည်း အဓိကအချက်တွေကို ဆုပ်ကိုင်ထားနိုင်ပြီး၊ ရှင်းလင်းတဲ့ အတွေးတွေနဲ့ စနစ်တကျ ဆက်သွယ်ပြောဆိုတတ်တယ်။ အလုပ်အကြောင်း ဆွေးနွေးတဲ့အခါတိုင်း ကျွန်တော် လွတ်သွားနိုင်တဲ့ အချက်တွေကို သူ့ရဲ့ မိတ်သဟာယက ဖြည့်စွက်ပေးလို့ ကျွန်တော်တို့ရဲ့ ဆွေးနွေးမှုတွေကို ပိုပြီး ပြည့်စုံသွားစေတယ်။ သူ့ရဲ့ အားသာချက်တွေက ကျွန်တော့်ရဲ့ အားနည်းချက်တွေကို ဖြည့်ဆည်းပေးပြီး၊ ဒီလို ပူးပေါင်းဆောင်ရွက်မှုက ကျွန်တော်တို့ရဲ့ တာဝန်တွေမှာ ပိုကောင်းတဲ့ ရလဒ်တွေ ထွက်ပေါ်စေခဲ့တယ်။ ဒါကို သဘောပေါက်လိုက်တော့ ကျွန်တော့်ရင်ထဲမှာ လွတ်မြောက်သွားသလို ခံစားလိုက်ရတယ်။

အဲဒီနောက် ကျွန်တော်က ဒိုင်ယန်းဆီကို အရင် စသွားပြီး၊ မကြာသေးခင်က မနာလိုတဲ့စိတ်နဲ့ အသက်ရှင်နေခဲ့တဲ့ ကျွန်တော့်ရဲ့ အခြေအနေကို ပွင့်ပွင့်လင်းလင်း မိတ်သဟာယပြုပြီး သူ့ကို တောင်းပန်ခဲ့တယ်။ ကျွန်တော် ရရှိခဲ့တဲ့ နားလည်မှုကို မြင်ရတော့ ဒိုင်ယန်းကလည်း ဝမ်းသာသွားပြီး၊ သူထုတ်ဖော်ခဲ့တဲ့ ဖောက်ပြန်ပျက်စီးမှုတွေနဲ့ သူသင်ယူခဲ့ရတဲ့ သင်ခန်းစာတွေကိုလည်း ကျွန်တော့်ကို ပွင့်ပွင့်လင်းလင်း ပြန်ပြောပြခဲ့တယ်။ ဒီလို လက်တွေ့လုပ်ဆောင်လိုက်ရတာက ကျွန်တော့်အတွက် လွတ်မြောက်မှုတစ်ခုကို ယူဆောင်လာပေးတယ်။ နောက်ပိုင်းမှာ အသင်းတော်က ကျွန်တော့်ကို အလုပ်တချို့လုပ်ဖို့ လိုအပ်လာတိုင်း တက်တက်ကြွကြွ ပူးပေါင်းဆောင်ရွက်ခဲ့ပြီး ကျွန်တော့်ရဲ့ အခြေအနေလည်း အများကြီး တိုးတက်လာခဲ့တယ်။ အချိန်အတိုင်းအတာတစ်ခု ကြာပြီးနောက်မှာ ခေါင်းဆောင်တွေက ဗီဒီယိုအလုပ်ကို ကြီးကြပ်ဖို့ ကျွန်တော့်ကို ပြန်ပြီး တာဝန်ပေးခဲ့လို့ ဘုရားသခင်ကို လှိုက်လှိုက်လှဲလှဲ ကျေးဇူးတင်ခဲ့တယ်။ တစ်ခါတုန်းက ဗီဒီယိုတစ်ခုအတွက် ဒိုင်ယန်းနဲ့ ကျွန်တော် ပူးပေါင်းဆောင်ရွက်ခဲ့တယ်၊ အဲဒီမှာ ဒိုင်ယန်းက အဓိကအားဖြင့် အလုပ်တိုးတက်မှု အခြေအနေကို အစီရင်ခံတာနဲ့ ခေါင်းဆောင်တွေကို ပြဿနာတွေ တင်ပြတာမျိုး လုပ်ခဲ့တယ်။ တစ်ခါတလေ ခေါင်းဆောင်တွေက ဒိုင်ယန်းကို နောက်ဆုံးအခြေအနေတွေ မေးတဲ့အခါ ကျွန်တော် နည်းနည်းတော့ စိတ်မကြည်မလင် ဖြစ်မိတယ်၊ “ဒီဗီဒီယိုကို လုပ်ဖို့ နောက်ကွယ်ကနေ ငါ အများကြီး ကြိုးစားခဲ့ရတာ၊ ဒါပေမဲ့ နောက်ဆုံးမှာ အစီရင်ခံပြီး ထင်ပေါ်သွားတာက ဒိုင်ယန်း ဖြစ်နေတယ်၊ ငါက သူ့လောက် မတော်ဘူးလို့ ခေါင်းဆောင်တွေက ထင်သွားကြမလား” လို့ တွေးမိတယ်။ အဲဒီအချိန်မှာ ကျွန်တော့်ရဲ့ မနာလိုတဲ့စိတ်က ပြန်ပေါ်လာပြီဆိုတာ သတိထားမိလိုက်လို့၊ ကိုယ့်ကိုယ်ကိုယ် ပုန်ကန်ဖို့ ကြိုးစားရင်း စိတ်ထဲကနေ ဘုရားသခင်ဆီ အမြန်ဆုတောင်းခဲ့တယ်။ ဘုရားနှုတ်ကပတ်တော်တွေကို ကျွန်တော် တွေးမိတယ်။ “သင်သည် ဤအရာများကို စွန့်လွှတ်ရန်နှင့် လက်လွှတ်ရန် သင်ယူရမည်၊ အခြားသူများကို ထောက်ခံရန်နှင့် ကောင်းမွန်သော အခွင့်အရေးများရှိသည့်အခါ အခြားသူများကို ထင်ပေါ်ကျော်ကြားခွင့်ပြုရန် သင်ယူရမည်။ သင်သည် ထင်ပေါ်ကျော်ကြားရန်နှင့် ထွန်းလင်းတောက်ပရန် အခွင့်အရေးများကို ကြုံတွေ့သည့်အခါတိုင်း ယှဉ်ပြိုင်ခြင်း သို့မဟုတ် ပြိုင်ဆိုင်ခြင်း မပြုရပေ။ သင်သည် သင်၏ကိုယ်ပိုင်အကျိုးစီးပွားများကို စွန့်လွှတ်နိုင်ရမည်ဖြစ်သော်လည်း သင်၏တာဝန်ထမ်းဆောင်မှုကိုမူ မထိခိုက်စေရ။ မထင်မရှား အလုပ်လုပ်သော၊ မိမိကိုယ်ကို မကြွားဝါသော၊ မိမိ၏တာဝန်ကိုလည်း သစ္စာစောင့်သိစွာ ထမ်းဆောင်သောသူတစ်ဦး ဖြစ်ပါစေ။ သင်သည် သင်၏မာနနှင့် အဆင့်အတန်းကို စွန့်လွှတ်လေလေ၊ သင်၏အကျိုးစီးပွားများကို ပို၍ စွန့်လွှတ်လေလေ၊ သင်သည် ပို၍ ငြိမ်းချမ်းမှုကို ခံစားရလေလေ ဖြစ်မည်၊ သင်၏စိတ်နှလုံးထဲတွင် အလင်း ပို၍ရှိလာမည်ဖြစ်ပြီး သင်၏အခြေအနေသည် ပို၍ ကောင်းမွန်လာလိမ့်မည်။ သင်သည် ပို၍ ယှဉ်ပြိုင်ပြီး ပြိုင်ဆိုင်လေလေ၊ သင်၏အခြေအနေသည် ပို၍ မှောင်မိုက်လာလေလေ ဖြစ်မည်။ သင်သည် ငါ့ကိုမယုံကြည်ပါက စမ်းကြည့်လိုက်။ သင်သည် ဤသို့သော ဖောက်ပြန်ပျက်စီးသည့် အခြေအနေကို ပြုပြင်ပြောင်းလဲလိုပါက၊ ကျော်ကြားမှု၊ အကျိုးအမြတ်နှင့် အဆင့်အတန်း၏ ထိန်းချုပ်မှုကို မခံလိုပါက သင်သည် သမ္မာတရားကို ရှာဖွေရမည်၊ ကျော်ကြားမှု၊ အကျိုးအမြတ်နှင့် အဆင့်အတန်း၏ အနှစ်သာရကို ထိုးထွင်းသိမြင်ရမည်၊ ထို့နောက် ယင်းတို့ကို လက်လွှတ်ပြီး စွန့်လွှတ်ရမည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ မိမိ၏ ဖောက်ပြန်ပျက်စီးသော စိတ်သဘောထားများအား ဖယ်ရှားခြင်းအားဖြင့်သာ လွတ်လပ်ခြင်းနှင့် လွတ်မြောက်ခြင်းကို ရရှိနိုင်သည်) ဘုရားနှုတ်ကပတ်တော်တွေက ကျွန်တော့်အတွက် လက်တွေ့လုပ်ဆောင်ခြင်း စည်းမျဉ်းတွေကို ပေးခဲ့တယ်။ ထင်ပေါ်တာ၊ ဒါမှမဟုတ် အာရုံစိုက်ခံရတာတွေနဲ့ ပတ်သက်တဲ့ အခြေအနေမျိုး ကြုံလာရရင် ကျွန်တော့်ရဲ့ လိုအင်ဆန္ဒတွေကို စွန့်လွှတ်ပြီး ဘေးဖယ်ထားဖို့ သင်ယူရမယ်။ ဒါဟာ ဘုရားသခင် တောင်းဆိုထားတဲ့အရာဖြစ်ပြီး လူတွေ လက်တွေ့လုပ်ဆောင်သင့်တဲ့ အရာပါပဲ။ ဒီတစ်ကြိမ်မှာတော့ ဒီကိစ္စနဲ့ပတ်သက်ပြီး ဘုရားသခင်ကို ကျေနပ်စေချင်တယ်၊ ဒါကြောင့် ခေါင်းဆောင်တွေက ကျွန်တော့်ကို ဘယ်လိုပဲမြင်မြင်၊ ဒါမှမဟုတ် ညီအစ်ကိုမောင်နှမတွေက ကျွန်တော့်ကို ဘယ်လိုပဲတွေးတွေး၊ ကိုယ့်တာဝန်တွေကို ကောင်းကောင်း ဖြည့်ဆည်းဖို့ အစွမ်းကုန် ကြိုးစားရမယ်။ တခြားသူတွေ မမြင်ရင်တောင်မှ ဘုရားသခင် စိစစ်တာကို ခံယူပြီး ကိုယ့်တာဝန်တွေကို ကောင်းကောင်းထမ်းဆောင်ရမယ်လေ။ ဒါ့အပြင် ဒိုင်ယန်းက ခေါင်းဆောင်တွေဆီကို တက်တက်ကြွကြွ အလုပ်အစီရင်ခံတာဟာ မမှားပါဘူး၊ ဒါဟာ အလုပ်အပေါ်ထားတဲ့ သူ့ရဲ့ စိတ်အားထက်သန်မှုနဲ့ တာဝန်ယူမှုရှိတဲ့ သဘောထားကို ပြသတာပဲ။ ဒိုင်ယန်းက အတော်လေး ရှင်းရှင်းလင်းလင်း ပြောတတ်တယ်၊ ဒါက သူ့ရဲ့ အားသာချက်ပဲ၊ ပြီးတော့ အလုပ်ကို ရှင်းရှင်းလင်းလင်း အစီရင်ခံနိုင်တာဟာ အလုပ်အတွက်လည်း အကျိုးရှိစေတယ်။ ဒီလို နားလည်လိုက်တာနဲ့ ကျွန်တော် အရမ်းကို ပေါ့ပါးသွားတယ်။

အဲဒီနောက်မှာ ဒိုင်ယန်းနဲ့ ကျွန်တော် ပုံမှန်အတိုင်း ပူးပေါင်းဆောင်ရွက်နိုင်ခဲ့တယ်။ ကျွန်တော်တို့ အလုပ်အကြောင်း ခဏခဏ ဆွေးနွေးပြီး ပြဿနာတွေကို အတူတူ အနှစ်ချုပ်ကြတယ်၊ နည်းပညာပိုင်းဆိုင်ရာ ပြဿနာတွေနဲ့ ပတ်သက်ပြီး သူ့ဆီက အကြံဉာဏ်တွေကို ခဏခဏ တောင်းခဲ့သလို သူ့ဆီကနေ အများကြီးလည်း သင်ယူခဲ့ရတယ်။ သဟဇာတဖြစ်ဖြစ် ပူးပေါင်းဆောင်ရွက်တာဟာ ကျွန်တော်တို့ရဲ့ တာဝန်တွေကို ကောင်းကောင်းလုပ်ဖို့ အရမ်းအကျိုးရှိတယ်ဆိုတာကို ကျွန်တော် သဘောပေါက်ခဲ့ပါတယ်။ ဘုရားသခင် ကျေးဇူးတော်ကို ချီးမွမ်းပါတယ်။