ဘုရားသခင်၌ ယုံကြည်ခြင်းနှင့်ပတ်သက်လာလျှင် သင်၏ တာဝန်ကို သင့်တင့်လျောက်ပတ်စွာ ထမ်းဆောင်ခြင်းအပြင် အဓိကသော့ချက်ကျသည့်အရာမှာ သမ္မာတရားကို နားလည်ခြင်း၊ သမ္မာတရား စစ်မှန်မှုသို့ ဝင်ရောက်ကာ အသက် ဝင်ရောက်ခြင်းနှင့်ပတ်သက်၍ ပိုမို အားစိုက်ထုတ်ခြင်းတို့ ဖြစ်သည်။ မည်သည့်အရာဖြစ်ပျက်သည်ဖြစ်စေ သင်ယူရန် သင်ခန်းစာများရှိသည်။ ထို့ကြောင့် ခပ်ပေါ့ပေါ့ဖြင့် သင့်ကို ဖြတ်ကျော်သွားခွင့်မပြုနှင့်။ သင်သည် ဤအရာနှင့်ပတ်သက်ပြီး အချင်းချင်း မိတ်သဟာယပြုသင့်သည်။ ထို့နောက် သင်သည် သန့်ရှင်းသောဝိညာဉ်တော်၏ ဉာဏ်အလင်းဖွင့်ပြခြင်းနှင့် အလင်းပေးခြင်းကို ခံရမည်ဖြစ်ပြီး သမ္မာတရားကို နားလည်နိုင်လိမ့်မည်။ မိတ်သဟာယမှတစ်ဆင့် သင်သည် လက်တွေ့လုပ်ဆောင်မှုလမ်းကြောင်းတစ်ခု ရှိလိမ့်မည်ဖြစ်ပြီး ဘုရားသခင်၏ အမှုတော်ကို မည်သို့ တွေ့ကြုံရမည်ကို သိလိမ့်မည်။ ပြီးလျှင် သင်သတိမထားမိလိုက်ဘဲ သင်၏ အချို့ပြဿနာများသည် ပြေလည်သွားလိမ့်မည်။ သင်ရှင်းလင်းစွာ မမြင်နိုင်သည့်အရာများ ပိုပို၍ နည်းလာလိမ့်မည်။ သမ္မာတရားကို ပိုပို၍ နားလည်လိမ့်မည်။ ဤနည်းအားဖြင့် သင် သတိမထားမိလိုက်ဘဲ သင်၏ ဝိညာဉ်ရင့်ကျက်မှုက ကြီးထွားလိမ့်မည်။ သမ္မာတရားအတွက် ကြိုးပမ်းရန် စတင်ပြုလုပ်ပြီး သမ္မာတရားကို စိတ်နှစ်ထားရမည်။ လူအချို့က “ကျွန်ုပ်သည် ဘုရားသခင်ကို ယုံကြည်လာသည်မှာ နှစ်အချို့ရှိနေပြီး အယူဝါဒများစွာကို နားလည်ပြီးဖြစ်သည်။ ယခုအခါ ကျွန်ုပ်၌ အခြေခံအုတ်မြစ်တစ်ခု ရှိပြီဖြစ်သည်။ ယခုအခါ ပင်လယ်ရပ်ခြားရှိ ကျွန်ုပ်တို့၏အသင်းတော်ရှိ အသက်တာသည် ကောင်းမွန်၏၊ ညီအစ်ကိုမောင်နှမများသည် ဘုရားသခင်၌ ယုံကြည်ခြင်းနှင့်သက်ဆိုင်သည့် အရေးကိစ္စများကို တစ်နေ့လုံး မိတ်သဟာယပြုဖို့ စုဝေးကြပြီး ထိုသို့ဖြင့် ကျွန်ုပ်သည် မြင်ရ၊ ကြားရသည့်အရာဖြင့် လွှမ်းမိုးခြင်းခံရကာ အားဖြည့်ခံရသည်။ ယင်းက လုံလောက်ပါသည်။ ကျွန်ုပ်ကိုယ်တိုင်၏ အသက်ဝင်ရောက်ခြင်းနှင့်သက်ဆိုင်သည့် ပြဿနာများ၊ သို့မဟုတ် ကျွန်ုပ်ကိုယ်တိုင်၏ ပုန်ကန်လိုခြင်းနှင့် သက်ဆိုင်သည့် ပြဿနာများကို ဖြေရှင်းခြင်း၌ ကျွန်ုပ် အားထုတ်ကြိုးပမ်းဖို့ မလိုအပ်ပါ။ ငါသည် ဆုတောင်းရန်၊ ဘုရားနှုတ်ကပတ်တော်ကို စားသောက်ရန်၊ ဓမ္မတေးသီချင်းများဆိုပြီး တာဝန်ထမ်းဆောင်ရန်၊ ငါဖြည့်ဆည်းရမည့်တာဝန်ကို ဖြည့်ဆည်းရန် ငါ၏ လုပ်ငန်းစဉ်ကို နေ့စဉ် လိုက်နာလျှင် ငါသည် အသက်တာတွင် အလိုအလျောက်ကြီးထွားလိမ့်မည်” ဟူ၍ ပြောကြသည်။ ဤသည်မှာ ထိုမရှင်းမလင်းဖြစ်နေသော ယုံကြည်သူများ ထင်မြင်သည့်အရာဖြစ်သည်။ ဤလူတို့သည် သမ္မာတရားကို လုံးဝ လက်မခံကြပေ။ ၎င်းတို့သည် ဘာသာရေး ရိုးရာဓလေ့များတွင်ပါဝင်ခြင်း၊ အပြောကောင်းစွာ ပြောဆိုခြင်း၊ အနှစ်မရှိသော ဆောင်ပုဒ်များကို အော်ဟစ်ခြင်း၊ စကားများနှင့် အယူဝါဒများကို ပြောဆိုခြင်းသာ ပြုလုပ်ပြီး ၎င်းတို့က ကောင်းစွာလုပ်ဆောင်ခဲ့သည်ဟု ခံစားမိကြသည်။ ရလဒ်အနေဖြင့် အခြားလူတို့က သမ္မာတရားအချို့ကို လက်တွေ့လုပ်ဆောင်နိုင်ပြီး ပြောင်းလဲမှုအချို့ကို ရရှိနိုင်စဉ်တွင် ဤမရှင်းမလင်းဖြစ်နေသော ယုံကြည်သူများက အတွေ့အကြုံဆိုင်ရာ သက်သေခံချက် လုံးဝ မရှိပေ။ ၎င်းတို့သည် မိမိတို့နှင့်သက်ဆိုင်သော မည်သည့် အသိပညာကိုမျှပင် မပြောဆိုနိုင်ပေ။ ၎င်းတို့သည် လက်ဗလာဖြစ်သွားပြီး မည်သည့်အရာကိုမျှ မရရှိဘဲ အဆုံးသတ်ရသည်။ ၎င်းတို့သည် ချွတ်ခြုံကျပြီး သနားဖွယ်မဟုတ်သလော။ ကယ်တင်ခြင်းကို ရရှိသောလမ်းကြောင်းတွင် သမ္မာတရားကို လက်ခံပြီး လိုက်စားခြင်းထက် ပို၍ စစ်မှန်သော၊ သို့မဟုတ် လက်တွေ့ကျသောလမ်းကြောင်းမရှိပေ။ သင်သည် သမ္မာတရားကို မရရှိနိုင်လျှင် ဘုရားသခင်အပေါ် သင်၏ ယုံကြည်မှုသည် အနှစ်မရှိပေ။ အနှစ်သာရမရှိသော စကားများနှင့် အယူဝါဒများကို ပြောသူများ၊ ဆောင်ပုဒ်များကို အမြဲသံယောင်လိုက်သူများ၊ စကားကြီး စကားကျယ်များကိုပြောသူများ၊ စည်းမျဉ်းစည်းကမ်းများကို လိုက်နာပြီး သမ္မာတရားကို လက်တွေ့လုပ်ဆောင်ခြင်းတွင် မည်သည့်အခါမျှ အာရုံမစိုက်သူများသည် နှစ်မည်မျှ ယုံကြည်ပါစေ မည်သည့်အရာကိုမျှ မရရှိပေ။ တစ်စုံတစ်ခုကို ရရှိသောသူများသည် မည်သူဖြစ်သနည်း။ မိမိတို့၏ တာဝန်ကို ရိုးသားစစ်မှန်စွာ ထမ်းဆောင်ပြီး သမ္မာတရားကို လက်တွေ့လုပ်ဆောင်ရန် လိုလားသူများ၊ ဘုရားသခင်က ၎င်းတို့ထံ ပေးအပ်ထားသောအရာကို ၎င်းတို့၏ တာဝန်အဖြစ် ဆက်ဆံသူများ၊ ဘုရားသခင်အတွက် အသုံးခံလျက် ၎င်းတို့၏ တစ်ဘဝလုံးကို ဝမ်းမြောက်စွာ ကုန်ဆုံးစေပြီး မိမိတို့အကျိုးအတွက် မကြံစည်သူများ၊ အသိတရားနှင့် လက်တွေ့ကျသော စိတ်သဘောရှိပြီး ဘုရားသခင်၏ စီစဉ်ညွှန်ကြားမှုများကို နာခံသူများဖြစ်ကြသည်။ ၎င်းတို့သည် တာဝန်ထမ်းဆောင်စဉ်တွင် သမ္မာတရား စည်းမျဉ်းများကို နားလည်သဘောပေါက်နိုင်ကြပြီး အရာရာကို မှန်ကန်စွာ လုပ်ဆောင်ရန် ကြိုးစားကြသောကြောင့် ဘုရားသခင်အပေါ် သက်သေခံသည့် အကျိုးကို ရရှိပြီး ဘုရားသခင်၏ ရည်ရွယ်ချက်များ အထမြောက်အောင် လုပ်ဆောင်ခွင့်ကို ရရှိသည်။ ၎င်းတို့၏ တာဝန်ကို ထမ်းဆောင်စဉ်တွင် အခက်အခဲများကို ကြုံရသောအခါ ၎င်းတို့သည် ဘုရားသခင်ထံ ဆုတောင်းပြီး ဘုရားသခင်၏ ရည်ရွယ်ချက်များကို နားလည်သဘောပေါက်ရန် ကြိုးစားကြသည်။ ၎င်းတို့သည် ဘုရားသခင်ထံမှလာသည့် စီစဉ်ညွှန်ကြားမှုများနှင့် အစီအစဉ်များကို နာခံနိုင်ကြပြီး ၎င်းတို့ လုပ်ဆောင်သမျှ အားလုံးတွင် သမ္မာတရားကို ရှာဖွေကာ လက်တွေ့လုပ်ဆောင်ကြသည်။ ၎င်းတို့သည် ဆောင်ပုဒ်များကို သံယောင်လိုက်ခြင်း၊ သို့မဟုတ် စကားကြီးစကားကျယ်များ ပြောဆိုခြင်းမရှိကြဘဲ အသိတရားရှိရှိနှင့် လက်တွေ့ကျသော စိတ်နေသဘောထားဖြင့် အမှုအရာများကို လုပ်ဆောင်ခြင်း၊ စည်းမျဉ်းများကို စေ့စပ်တိကျစွာ လိုက်နာခြင်းတို့ကိုသာ အာရုံစိုက်သည်။ ၎င်းတို့သည် ၎င်းတို့လုပ်ဆောင်သမျှ အရာရာတိုင်းတွင် စိတ်နှစ်ထားကြပြီး၊ မိမိတို့၏ စိတ်နှလုံးအကြွင်းမဲ့ဖြင့် အရာရာကို အသိအမှတ်ပြုရန် သင်ယူကြသည်။ အကြောင်းကိစ္စများစွာတွင် ၎င်းတို့သည် သမ္မာတရားကို လက်တွေ့လုပ်ဆောင်နိုင်ကြသည်။ ထို့နောက်တွင် အသိပညာနှင့် နားလည်မှုကို ရရှိကြသည်။ ပြီးလျှင် ၎င်းတို့သည် သင်ခန်းစာများကို သင်ယူနိုင်ပြီး အမှန်တကယ် တစ်စုံတစ်ခုကို ရရှိကြသည်။ ၎င်းတို့က မမှန်ကန်သည့် အတွေးများ၊ သို့မဟုတ် မှားယွင်းသော အခြေအနေများ ရှိသောအခါ ယင်းတို့ကို ဖြေရှင်းရန် ဘုရားသခင်ကို ဆုတောင်းပြီး သမ္မာတရားကို ရှာဖွေကြသည်။ မည်သည့်သမ္မာတရားများကို ၎င်းတို့ နားလည်ပါစေ ၎င်းတို့၏ စိတ်နှလုံးထဲတွင် ယင်းတို့ကို တန်ဖိုးထားမှုရှိကြပြီး ၎င်းတို့၏ အတွေ့အကြုံဆိုင်ရာ သက်သေခံချက်ကို ပြောဆိုနိုင်ကြသည်။ ဤသို့သောလူများသည် အဆုံးတွင် သမ္မာတရားကို ရရှိကြသည်။ ထိုအမှုမဲ့အမှတ်မဲ့ဖြစ်ပြီး ပေါ့တန်သောလူတို့ကမူ သမ္မာတရားကို မည်သို့ လက်တွေ့လုပ်ဆောင်ရမည်ကို လုံးဝ မတွေးကြပေ။ အားစိုက်ထုတ်ပြီး အမှုအရာများကို လုပ်ဆောင်ခြင်း၊ မိမိတို့ကိုယ်ကို ခင်းကျင်းပြသပြီး ကြွားဝါခြင်းတို့တွင်သာ အာရုံစိုက်ကြသည်။ သို့သော် ၎င်းတို့သည် သမ္မာတရားကို မည်သို့လက်တွေ့လုပ်ဆောင်ရမည်ကို လုံးဝ မရှာဖွေကြပေ။ ဤသည်မှာ သမ္မာတရားကို ရရှိရန် ၎င်းတို့အတွက် ခက်ခဲစေသည်။ စဉ်းစားကြည့်လော့။ မည်သို့သောလူအမျိုးအစားသည် သမ္မာတရား စစ်မှန်မှုများထဲသို့ ဝင်ရောက်နိုင်သနည်း။ (အသိတရားရှိရှိနှင့် လက်တွေ့ကျသော စိတ်သဘောထားရှိသူများ၊ လက်တွေ့ဆန်ပြီး အမှုကိစ္စများ၌ စိတ်နှစ်ဆောင်ရွက်သူများဖြစ်သည်။) အသိတရားရှိရှိနှင့် လက်တွေ့ကျသော စိတ်သဘောထားရှိသောလူများ၊ အမှုကိစ္စများ၌ စိတ်နှစ်ဆောင်ရွက်သောလူများနှင့် စိတ်နှလုံး ရှိသောလူများ ထိုသို့သောသူများသည် ပြုမူဆောင်ရွက်သည့်အခါ လက်တွေ့အရှိတရားအပေါ်၊ သမ္မာတရား စည်းမျဉ်းများကို အသုံးပြုပုံအပေါ် ပို၍ အရေးထားကြသည်။ ထို့အပြင် လက်တွေ့ကျမှုများကို ၎င်းတို့ အာရုံစိုက်သော အရာများအားလုံးတွင် ၎င်းတို့သည် လက်တွေ့ဆန်သည်။ အပြုသဘောဆောင်သောအရာများ၊ သမ္မာတရားနှင့် လက်တွေ့ကျသောအရာများကို နှစ်သက်သည်။ နောက်ဆုံးတွင် သမ္မာတရားကို နားလည်ပြီး ရရှိသူများမှာ ဤသို့သောလူများဖြစ်သည်။ သင်တို့သည် မည်သည့်လူစားမျိုး ဖြစ်သနည်း။ (လက်တွေ့မကျသည့်၊ သွင်ပြင်များအတွက် အမှုအရာများကို အမြဲ လုပ်ဆောင်လိုပြီး မာယာသုံးလိုသော သူတစ်ဦးဖြစ်ပါသည်။) ဤအရာကို လုပ်ဆောင်ခြင်းအားဖြင့် တစ်ခုတလေကို ရရှိနိုင်သလော။ (မရရှိနိုင်ပါ။) သင်၏ ပြဿနာများကို ဖြေရှင်းရန် နည်းလမ်းတစ်ခု သင် ရှာတွေ့ပြီလော။ ထိုအရာကို သင်သဘောပေါက်နိုင်ပြီး အမှုအရာများကို စတင်ပြောင်းလဲနိုင်ပါက အမှုအရာများအပေါ် သင်၏ အယူအဆများ၊ စိတ်ကူးများနှင့် ရှုထောင့်အမြင်များ ပြောင်းလဲပြီးခြင်း ရှိမရှိဆိုသည်ကို သင်တို့ သိမည်လော။ (ထိုအရာများ အတော်အတန် ပြောင်းလဲပြီးဖြစ်သည်ဟု ကျွန်ုပ် ခံစားရပါသည်။) ရလဒ်များနှင့် တိုးတက်မှုရှိသရွေ့၊ ထိုအရာနှင့်ပတ်သက်၍ သင် မိတ်သဟာယပြုသင့်ပြီး အခြားသူများ တည်ဆောက်ခံရခွင့် ပေးသင့်၏။ သင်၏ အတွေ့အကြုံသည် အကန့်အသတ် ရှိသော်လည်း ယင်းမှာ ဘဝတွင် ကြီးထွားမှု အတွေ့အကြုံတစ်ခု ဖြစ်နေဆဲဖြစ်သည်။ ဘဝတွင် ကြီးထွားမှု ဖြစ်စဉ်မှာ ဘုရားသခင်ကို သင်၏ ယုံကြည်ခြင်း အတွေ့အကြုံ၊ ဘုရားနှုတ်ကပတ်တော်ကို တွေ့ကြုံခြင်းမှတစ်ဆင့် သင့်ဘဝ ကြီးထွားခြင်း အတွေ့အကြုံ ဖြစ်သည်။ ဤအတွေ့အကြုံများသည် တန်ဖိုးအရှိဆုံး ဖြစ်သည်။

၎င်းတို့အားလုံးသည် ဘုရားသခင်ကို ယုံကြည်သည့်အတွက် ဘုရားနှုတ်ကပတ်တော် ဖတ်ပြီး မိမိတို့တာဝန်များကို ထမ်းဆောင်သည့်အတွက် နှစ်အနည်းငယ် ကြာပြီးနောက်တွင် တစ်ဦးနှင့်တစ်ဦး မတူကွဲပြား ဖြစ်လာသည်မှာ အမြင့်နှင့် အနိမ့်များ ပေါ်ထွက်ပြီး၊ လူတို့၏ စစ်မှန်သည့် စရိုက်များ ထုတ်ဖော်ပြခံရသည်မှာ အဘယ်ကြောင့်နည်း။ အမှန်ပင် အသီးသီးသည် မိမိအမျိုးအစားအလိုက် ခွဲခြားခြင်းခံလာရ၏။ လူအချို့သည် မိမိတို့၏ အတွေ့အကြုံဆိုင်ရာ သက်သေခံချက် ပြောဆိုနိုင်သော်လည်း အခြားသူတို့မှာ မည်သည့် အတွေ့အကြုံဆိုင်ရာ သက်သေခံချက်မျှ လုံးဝ မရှိကြချေ။ လူအချို့သည် သမ္မာတရား များစွာ နားလည်နိုင်ပြီး စစ်မှန်မှုထဲသို့ ဝင်ရောက်နိုင်ကြသော်လည်း အခြားသူတို့မှာ မည်သည့် သမ္မာတရားကိုမျှ ရရှိခြင်း၊ သို့မဟုတ် မိမိတို့၏ စိတ်သဘောထား အနည်းငယ်မျှ ပြောင်းလဲခြင်း မရှိကြသေးချေ။ လူအချို့သည် မိမိတို့၏ တာဝန်များတွင် ရလဒ်များ ရရှိကြ၏၊ ပြဿနာများကို ဖြေရှင်းရန် သမ္မာတရားကို ရှာဖွေနိုင်ကြပြီး မိမိတို့၏ တာဝန်များကို တဖြည်းဖြည်း ပြည့်ပြည့်ဝဝ ထမ်းဆောင်ကြ၏။ လူအချို့သည် မိမိတို့ တာဝန်များကို ထမ်းဆောင်စဉ်တွင် ဟန်ဆောင်လုပ်ပြရုံမျှလုပ်ပြကာ သမ္မာတရားကို နားလည်လျှင်ပင် လက်တွေ့လုပ်ဆောင်ခြင်းမရှိဘဲ စိတ်မချရသကဲ့သို့ အချောင်ခိုကြလေသည်။ ၎င်းတို့အားလုံးသည် စုဝေးပွဲများ တက်ရောက်ကြသည့်အတွက် ဘုရားနှုတ်ကပတ်တော်များကို ဖတ်ရှုကာ မိမိတို့တာဝန်များကို ထမ်းဆောင်သည့်အတွက် ရလဒ်များက အဘယ်ကြောင့် ကွဲပြားကြသနည်း။ လူအချို့သည် သမ္မာတရား လိုက်စားခြင်း လမ်းကြောင်းပေါ် စတင်နိုင်စဉ်တွင် အခြားသူများသည် အဘယ်ကြောင့် မိမိတို့သဘောအတိုင်း လုပ်ဆောင်ကြသနည်း။ လူအချို့သည် သမ္မာတရားကို လက်ခံနိုင်ကြစဉ်တွင် အခြားသူများသည် အဘယ်ကြောင့် လက်မခံနိုင်ကြသနည်း။ ဤသည်မှာ အဘယ်သို့ ဖြစ်ရသနည်း။ လူအချို့သည် ပြုပြင်ခြင်းကို ရင်ဆိုင်ရချိန်တွင် လက်ခံကာ နာခံနိုင်သော်လည်း အခြားသူများသည် အဘယ်ကြောင့် အတိုက်အခံလုပ်၊ ငြင်းခုံ၊ ပုန်ကန်ပြီး ဆူပူလှုပ်ရှားမှု ဖြစ်စေကြသနည်း။ ၎င်းတို့အားလုံးသည် စုဝေးပွဲများတွင် ဘုရားနှုတ်ကပတ်တော်များကို စားသောက်ကြသည်၊ တရားဒေသနာများနှင့် မိတ်သဟာယကို နားထောင်ကြသည်၊ အသင်းတော် အသက်တာကို အသက်ရှင်ကြပြီး မိမိတို့ တာဝန်များကို ထမ်းဆောင်ကြသည်။ သို့ဆိုလျှင် ၎င်းတို့ကြားတွင် အဘယ်ကြောင့် ထိုသို့သော ကြီးမားသည့် ကွာခြားချက်တစ်ခု ရှိသနည်း။ ဤပြဿနာကို သင်ရိပ်စားမိနိုင်သလော။ ဤသည်မှာ ကောင်းသည့် လူ့သဘာဝနှင့် မကောင်းသည့် လူ့သဘာဝကြား ခြားနားချက်ဖြစ်ပြီး လူတို့က သမ္မာတရားကို ချစ်ခြင်း ရှိမရှိဆိုသည့်အရာနှင့် တိုက်ရိုက် ဆက်နွှယ်၏။ အမှန်တွင် လူတစ်ဦး၏ အစွမ်းအစက မည်သို့ဖြစ်စေ၊ သမ္မာတရားကို ၎င်းတို့ လက်ခံနိုင်သရွေ့ မိမိတို့တာဝန်များကို ဝီရိယရှိရှိ ထမ်းဆောင်နိုင်ပြီး မိမိတို့ကိုယ်ကို သုံးသပ်ကာ သိရှိနိုင်သရွေ့ အသက်ဝင်ရောက်မှု ရှိကြလိမ့်မည်၊ စစ်မှန်သည့် ပြောင်းလဲမှုကို တွေ့ကြုံကြလိမ့်မည်ဖြစ်ပြီး မိမိတို့ တာဝန်များကို ပြည့်ပြည့်ဝဝ ထမ်းဆောင်နိုင်ကြလိမ့်မည်။ သင်သည် ဘုရားနှုတ်ကပတ်တော်ဖတ်ရာတွင် လုံ့လဝီရိယမရှိလျှင်၊ သမ္မာတရားကို နားမလည်လျှင် သင့်ကိုယ်သင် ဆင်ခြင်မကြည့်နိုင်ပေ။ ဖြစ်ရုံမျှလောက်သာ လုပ်ဆောင်ခြင်း၊ မကောင်းမှုများ သို့မဟုတ် ပြစ်မှားမှုများ မကျူးလွန်ခြင်းမျှဖြင့်သာ သင် ကျေနပ်လိမ့်မည်ဖြစ်ပြီး ဤအရာကို အရင်းအနှီးအဖြစ် အသုံးပြုလိမ့်မည်။ သင်သည် နေ့စဉ် ကမောက်ကမဖြစ်လျက် ဖြတ်သန်းလိမ့်မည်။ စိတ်ရှုပ်ထွေးသည့်အခြေအနေတွင် အသက်ရှင်လိမ့်မည်။ အမှုအရာများကို စီစဉ်ထားသည့်အတိုင်းသာ လုပ်ဆောင်လိမ့်မည်။ သင့်ကိုယ်သင် ဆန်းစစ်ရန် သင်၏ စိတ်နှလုံးကို မည်သည့်အခါမျှ အသုံးချမည်မဟုတ်၊ သို့မဟုတ် သင့်ကိုယ်သင် သိရှိခြင်းတွင် အားထုတ်လိမ့်မည် မဟုတ်။ အစဉ်သဖြင့် ဝတ်ကျေတမ်းကျေဖြစ်လိမ့်မည်။ ဤနည်းအားဖြင့် သင်သည် သင်၏တာဝန်ကို လက်ခံနိုင်ဖွယ်စံနှုန်းဖြင့် မည်သည့်အခါမျှ ထမ်းဆောင်မည်မဟုတ်ပေ။ တစ်စုံတစ်ခုအပေါ်သို့ အားစိုက်ထုတ်ရန် သင်သည် ရှေးဦးစွာ ယင်းအပေါ်သို့ စိတ်နှလုံးကို အပြည့်အဝ ထည့်ရမည်။ ရှေးဦးစွာ တစ်စုံတစ်ခုအပေါ်သို့ စိတ်နှလုံးအပြည့်အဝထည့်မှသာ သင်သည် အပြည့်အဝ အားစိုက်ထုတ်နိုင်ပြီး အကောင်းဆုံး လုပ်ဆောင်နိုင်သည်။ ယနေ့တွင် မိမိတို့၏ တာဝန်ကိုထမ်းဆောင်ရာတွင် စတင်ပြီး စေ့စေ့စပ်စပ် ကြိုးစားပမ်းစား လုပ်သူများရှိသည်။ ၎င်းတို့သည် ဘုရားသခင်၏ စိတ်နှလုံးကို ကျေနပ်စေရန် ဖန်ဆင်းခံတစ်ယောက်၏ တာဝန်ကို မည်သို့ မှန်မှန်ကန်ကန် ထမ်းဆောင်ရမည်ကို စတင် စဉ်းစားကြပြီးဖြစ်သည်။ ၎င်းတို့သည် အပျက်သဘောဆောင်ပြီး ပျင်းရိခြင်းမရှိပေ။ အထက်မှ အမိန့်များထုတ်သည်အထိ မထုံတက်သေးဖြင့် စောင့်မနေဘဲ အချို့အရာများကို ကိုယ်တိုင်စတင်ပြုလုပ်သည်။ သင်တို့၏ တာဝန်ထမ်းဆောင်မှုကို အကဲဖြတ်လျှင် သင်တို့သည် ယခင်ကထက် အနည်းငယ်ပို၍ ထိရောက်မှုရှိသည်။ စံနှုန်း၏အောက်တွင် ရှိနေသေးသော်လည်း အနည်းငယ်တိုးတက်မှုရှိသည်။ ဤသည်မှာ ကောင်းမွန်ပေသည်။ သို့သော် သင်တို့သည် ရှိရင်းစွဲဖြင့် မကျေနပ်ရပေ။ ဆက်လက်၍ ရှာဖွေရမည်။ ဆက်လက်၍ ကြီးထွားရမည်။ သို့မှသာ သင်တို့၏တာဝန်ကို ပိုမိုကောင်းမွန်စွာ ထမ်းဆောင်ပြီး လက်ခံနိုင်ဖွယ်ဖြစ်သော စံနှုန်းကို ရောက်ရှိလိမ့်မည်။ သို့ရာတွင် လူအချို့သည် မိမိတို့တာဝန်ကို ထမ်းဆောင်သောအခါ မည်သည့်အခါမျှ အလွန်အမင်း အားကုန်စိုက်ထုတ်ပြီး အစွမ်းကုန်လုပ်ဆောင်ခြင်းမရှိပေ။ ၎င်းတို့အားစိုက်ထုတ်မှု၏ ၅၀ မှ ၆၀ ရာခိုင်နှုန်းကိုသာ ပေးဆပ်ကြပြီး ၎င်းတို့လုပ်ဆောင်သည့်အရာ ပြီးဆုံးသည်အထိ ဖြစ်သလိုသာ ပြုလုပ်ကြသည်။ ၎င်းတို့သည် မည်သည့်အခါမျှ ပုံမှန် အခြေအနေကို မထိန်းသိမ်းနိုင်ကြပေ။ ၎င်းတို့ကို စောင့်ကြည့်ရန်၊ သို့မဟုတ် ပံ့ပိုးမှုပေးရန် မည်သူမျှမရှိသောအခါ ၎င်းတို့သည် အားလျော့ပြီး စိတ်မပါကြတော့ပေ။ သမ္မာတရားကို မိတ်သဟာယဖွဲ့ရန် တစ်စုံတစ်ယောက်ရှိသောအခါတွင် ၎င်းတို့သည် လန်းဆန်းရွှင်ပျလာကြသည်။ သို့သော် ၎င်းတို့အား အချိန်အနည်းငယ်ကြာ သမ္မာတရားကို မိတ်သဟာယမဖွဲ့လျှင် ၎င်းတို့သည် စိတ်မဝင်စားကြတော့ပေ။ ၎င်းတို့သည် ဤသို့ ရှုံ့ချည်နှပ်ချည် အမြဲ ဖြစ်နေသောအခါတွင် ပြဿနာက အဘယ်နည်း။ ဤသည်မှာ လူတို့သည် သမ္မာတရားကို မရရှိသောအခါ ဖြစ်သည့်ပုံစံဖြစ်သည်။ ၎င်းတို့အားလုံးသည် ထိန်းသိမ်းရန် အလွန့်အလွန်ခက်ခဲသော စိတ်ထက်သန်ပြင်းပြမှုဖြင့် အသက်ရှင်ကြသည်။ ၎င်းတို့သည် ၎င်းတို့အား နေ့စဉ်တရားဟောပြီး မိတ်သဟာယပြုပေးသည့်သူရှိမှဖြစ်သည်။ ၎င်းတို့ကို ရေလောင်းပြီး ပံ့ပိုးပေးသည့်သူ တစ်ယောက်မျှ မရှိသည်နှင့်၊ ၎င်းတို့ကို ထောက်ပံ့ရန် မည်သူမျှမရှိသည်နှင့်၊ ၎င်းတို့၏ စိတ်နှလုံးသည် တစ်ဖန် အေးစက်သွားသည်။ နောက်တစ်ဖန် အားလျော့လာကြသည်။ ၎င်းတို့၏ စိတ်နှလုံးက အားလျော့သောအခါ ၎င်းတို့၏ တာဝန်တွင် ထိရောက်မှုနည်းလာကြသည်။ ၎င်းတို့သည် အလုပ်ပိုကြိုးစားလျှင် ထိရောက်မှုတိုးလာသည်။ ၎င်းတို့၏ တာဝန်များကို ထမ်းဆောင်ရာတွင် ၎င်းတို့၏ ရလဒ်များက ပို၍ ကောင်းမွန်လာပြီး ၎င်းတို့သည် ပို၍ ရရှိကြသည်။ ဤသည်မှာ သင်တို့၏ အတွေ့အကြုံဖြစ်သလော။ သင်တို့က “ကျွန်ုပ်တို့သည် ကျွန်ုပ်တို့၏တာဝန်ကို ထမ်းဆောင်ရာတွင် အဘယ်ကြောင့် အစဉ်ပြဿနာတက်နေသနည်း။ ဤပြဿနာများ ပြေလည်သောအခါတွင် ကျွန်ုပ်တို့သည် အားတက်ကြသည်။ မပြေလည်သောအခါ စိတ်မပါကြတော့ပေ။ ကျွန်ုပ်တို့သည် တာဝန်ထမ်းဆောင်သည့်အချိန်တွင် ရလဒ်အချို့ရှိသောအခါ၊ ကျွန်ုပ်တို့၏ ကြီးထွားမှုအတွက် ဘုရားသခင်က ကျွန်ုပ်တို့ကို အသိအမှတ်ပြုသောအခါ ကျွန်ုပ်တို့က ဝမ်းမြောက်ကြသည်။ နောက်ဆုံး၌ ကျွန်ုပ်တို့သည် ကြီးထွားလာကြပြီဟု ခံစားရသည်။ သို့သော် မကြာမီတွင် အခက်အခဲတစ်ခုကို ကျွန်ုပ်တို့ ကြုံရသောအခါ တစ်ဖန် အပျက်သဘောဆောင်လာပြန်သည်။ ကျွန်ုပ်တို့၏ အခြေအနေသည် အဘယ်ကြောင့် အစဉ် တစ်သမတ်တည်းမရှိသနည်း” ဟူ၍ ပြောဆိုကောင်း ပြောဆိုနိုင်သည်။ အမှန်တကယ်တွင် အဓိကအကြောင်းပြချက်များမှာ သင်တို့သည် အလွန်နည်းပါးသော သမ္မာတရားကို နားလည်သောကြောင့်၊ အတွေ့အကြုံနှင့် ဝင်ရောက်မှုတွင် နက်နဲမှု ကင်းမဲ့သောကြောင့်၊ သမ္မာတရားများစွာကို နားမလည်သေးသောကြောင့်၊ စိတ်စွမ်းအား ကင်းမဲ့သောကြောင့်၊ မိမိတာဝန်ကို ထမ်းဆောင်နိုင်ခြင်းဖြင့်သာ ကျေနပ်နေသောကြောင့်ဖြစ်သည်။ သမ္မာတရားကို နားမလည်လျှင် သင်တို့၏တာဝန်ကို မည်သို့ ပြည့်ပြည့်ဝဝ ထမ်းဆောင်နိုင်မည်နည်း။ အမှန်မှာမူ လူတို့အပေါ် ဘုရားသခင် တောင်းဆိုသောအရာအားလုံးသည် လူတို့ရယူနိုင်သောအရာများဖြစ်သည်။ သင်တို့၏ အသိတရားကို အသုံးချသရွေ့၊ သင်တို့တာဝန်ကို ထမ်းဆောင်ရာတွင် သင်တို့၏ အသိတရားနောက်ကို လိုက်နိုင်သရွေ့ သမ္မာတရားကို လက်ခံရန် လွယ်ကူလိမ့်မည်။ သမ္မာတရားကို လက်ခံနိုင်လျှင် သင်သည် သင့်တာဝန်ကို ပြည့်ပြည့်ဝဝ ထမ်းဆောင်နိုင်သည်။ သင်တို့သည် ဤသို့ စဉ်းစားရမည်။ “ဤနှစ်များတွင် ဘုရားသခင်ကို ယုံကြည်လျက်၊ ဤနှစ်များတွင် ဘုရားသခင်၏ နှုတ်ကပတ်တော်ကို စားသောက်လျက် ကျွန်ုပ်သည် ကြီးစွာသော ပမာဏကို ရရှိပြီးဖြစ်သည်။ ဘုရားသခင်သည် ကြီးမြတ်သော ကျေးဇူးတော်များနှင့် ကောင်းချီးများကို ကျွန်ုပ်ပေါ်သို့ ချပေးခဲ့သည်။ ဘုရားသခင်၏ လက်ထဲတွင် ကျွန်ုပ် အသက်ရှင်သည်။ သူ၏ အုပ်စိုးမှုနှင့် အချုပ်အခြာအာဏာအောက်တွင် ကျွန်ုပ်အသက်ရှင်သည်။ သူသည် ဤဇီဝအသက်ကို ကျွန်ုပ်အား ပေးခဲ့သည်။ ထို့ကြောင့် ကျွန်ုပ်၏ စိတ်ကို အသုံးချသင့်သည်။ ကျွန်ုပ်၏ တာဝန်ကို ကျွန်ုပ်၏ ခွန်အားအကြွင်းမဲ့ဖြင့် ကောင်းစွာ ထမ်းဆောင်ရန် ကြိုးပမ်းသင့်သည်။ ဤသည်မှာ အဓိကသော့ချက်ဖြစ်သည်။” ဟူ၍ ဖြစ်သည်။ လူတို့တွင် စိတ်ဆန္ဒတစ်ခုရှိရမည်။ စိတ်ဆန္ဒရှိသောသူတို့သည်သာ သမ္မာတရားအတွက် အမှန်တကယ် ကြိုးပမ်းနိုင်သည်။ သမ္မာတရားကို နားလည်ပြီးသည့်အခါမှသာ ၎င်းတို့သည် မိမိတို့၏ တာဝန်ကို မှန်ကန်စွာ ထမ်းဆောင်နိုင်သည်။ ဘုရားသခင်ကို ကျေနပ်စေနိုင်ပြီး စာတန်ကို အရှက်ရစေနိုင်သည်။ သင့်တွင် ဤရိုးသားစစ်မှန်မှုမျိုး ရှိကာ၊ သင့်ကိုယ်ကျိုးအတွက် မစီစဉ်ဘဲ သမ္မာတရားကိုရရှိပြီး သင့်တာဝန်ကို မှန်ကန်စွာထမ်းဆောင်ရန်သာ စီစဉ်လျှင်၊ သင်၏ တာဝန်ထမ်းဆောင်ခြင်းသည် ပုံမှန်ဖြစ်လာလိမ့်မည်။ တစ်လျှောက်လုံးတွင် မပြောင်းမလဲ တည်ရှိနေလိမ့်မည်။ မည်သည့်အခြေအနေကို သင်ကြုံရသည်ဖြစ်စေ သင့်တာဝန်ကို ထမ်းဆောင်ရာတွင် ဇွဲရှိနိုင်လိမ့်မည်။ သင့်အား လှည့်စားရန်၊ သို့မဟုတ် နှောင့်ယှက်ရန် မည်သူလာနိုင်သည်ဖြစ်စေ၊ ပြီးလျှင် သင်၏ စိတ်အခြေအနေသည် ကောင်းသည်ဖြစ်စေ၊ ဆိုးသည်ဖြစ်စေ သင်သည် သင်၏ တာဝန်ကို ပုံမှန်ထမ်းဆောင်နိုင်ဆဲဖြစ်လိမ့်မည်။ ဤနည်းအားဖြင့် ဘုရားသခင်သည် သင်နှင့်ပတ်သက်ပြီး စိတ်ငြိမ်းအေးနိုင်သည်။ ပြီးလျှင် သန့်ရှင်းသောဝိညာဉ်တော်သည် သမ္မာတရား စည်းမျဉ်းများကို နားလည်ခြင်းတွင် သင့်ကို ဉာဏ်အလင်းဖွင့်ပြနိုင်မည်ဖြစ်ပြီး သမ္မာတရား စစ်မှန်မှုသို့ဝင်ရောက်ရာတွင် သင့်အား လမ်းပြနိုင်လိမ့်မည်။ ရလဒ်အနေဖြင့် သင်၏ တာဝန်ထမ်းဆောင်ခြင်းသည် စံနှုန်းနှင့်ညီဖို့ သေချာလိမ့်မည်။ သင်သည် ဘုရားသခင်အတွက် ရိုးသားစစ်မှန်စွာ အသုံးခံသရွေ့၊ သင့်တာဝန်ကို လက်တွေ့ကျသောနည်းဖြင့် ထမ်းဆောင်သရွေ့၊ မယုံကြည်ရသည့်နည်းဖြင့် မဆောင်ရွက်သရွေ့၊ သို့မဟုတ် လှည့်ကွက်များ အသုံးမချသရွေ့ သင်သည် ဘုရားသခင်၏ လက်ခံခြင်းကို ခံရလိမ့်မည်။ ဘုရားသခင်သည် လူတို့၏ စိတ်၊ အတွေးများနှင့် ရည်ရွယ်ချက်များကို စိစစ်သည်။ သင်၏ စိတ်နှလုံးသည် သမ္မာတရားကို တောင့်တပြီး သင်သည် သမ္မာတရားကို ရှာဖွေနိုင်လျှင် ဘုရားသခင်သည် သင့်အား ဉာဏ်အလင်းဖွင့်ပြပြီး အလင်းပေးလိမ့်မည်။ မည်သည့်ကိစ္စတွင်မဆို သင် သမ္မာတရားကို ရှာဖွေသရွေ့ ဘုရားသခင်က သင့်ကို ဉာဏ်အလင်းပေးလိမ့်မည်။ သူသည် သင်၏ စိတ်နှလုံးကို အလင်းဆီသို့ ဖွင့်ဟစေမည်ဖြစ်ပြီး လက်တွေ့လုပ်ဆောင်မှု လမ်းကြောင်းတစ်ခု အခွင့်ပေးလိမ့်မည်ဖြစ်ကာ ထိုအခါ သင်၏ တာဝန် ထမ်းဆောင်ခြင်းသည် အကျိုးဖြစ်ထွန်းလိမ့်မည်။ ဘုရားသခင်၏ ဉာဏ်အလင်းပေးခြင်းသည် သူ၏ ကျေးဇူးတော်နှင့် ကောင်းချီးမင်္ဂလာဖြစ်သည်။ အသေးအဖွဲ့ ကိစ္စရပ်များအတွက်ပင် ဘုရားသခင်သည် ဉာဏ်အလင်းမပေးပါက လူတို့သည် ဉာဏ်ကွန့်မြူးမှု လုံးဝ ရှိကြလိမ့်မည် မဟုတ်။ ဉာဏ်ကွန့်မြူးမှုမရှိဘဲနှင့် မိမိတို့ ပြဿနာများကို ဖြေရှင်းရန် လူတို့အတွက် ခက်ခဲပြီး မိမိတို့တာဝန်တွင် ရလဒ်များ ရရှိကြလိမ့်မည် မဟုတ်။ လူသား အသိဉာဏ်၊ ဉာဏ်ပညာနှင့် အစွမ်းအစဖြင့်သာ နှစ်များစွာ လေ့လာမှုနောက်တွင်ပင် လူတို့ မကျော်လွှားနိုင်သည့် အရာများစွာရှိ၏။ အဘယ်ကြောင့် မကျော်လွှားနိုင်သနည်း။ အဘယ်ကြောင့်ဆိုသော် ဘုရားသခင် သတ်မှတ်ထားသည့် အချိန်မဟုတ်သေးသောကြောင့် ဖြစ်သည်။ ဘုရားသခင် မဆောင်ရွက်ပါက လူတစ်ဦး မည်မျှ စွမ်းဆောင်နိုင်သည်ဖြစ်စေ၊ အသုံးမဝင်ပေ။ ဤအရာကို ရှင်းလင်းစွာ နားလည်ရမည်။ အရာရာသည် ဘုရားသခင်၏ လက်တွင်ရှိကြောင်းနှင့် လူတို့သည် ပူးပေါင်းဆောင်ရွက်ကြခြင်းသာဖြစ်ကြောင်း သင်ယုံကြည်ရမည်။ သင် ရိုးသားစစ်မှန်ပါက ဘုရားသခင်က မြင်လိမ့်မည်ဖြစ်ပြီး သင့်အတွက် အခြေအနေတိုင်းတွင် ထွက်ပေါက်တစ်ခု ဖွင့်ပေးလိမ့်မည်။ မည်သည့် အခက်အခဲမျှ မကျော်လွှားနိုင်စရာ မရှိပေ။ သင်သည် ဤယုံကြည်ခြင်း ရှိရမည်။ ထို့ကြောင့် သင်တို့၏ တာဝန်များကို ထမ်းဆောင်သည့်အခါ သံသယများရှိရန် မလိုအပ်ပေ။ စိတ်နှလုံးအကြွင်းမဲ့ဖြင့် သင် အစွမ်းကုန် ပေးဆပ်သရွေ့ ဘုရားသခင်သည် သင့်ကို အခက်အခဲများ ပေးလိမ့်မည် မဟုတ်သကဲ့သို့ သင် ကိုင်တွယ်နိုင်သည်ထက်ပို၍ ပေးလိမ့်မည် မဟုတ်။ မရည်ရွယ်ဘဲ အမှုအရာများကို သင်ပြောဆိုကာ အပြောသာရှိပြီး လုပ်ဆောင်ချက်မရှိသကဲ့သို့ နားကြားကောင်းသည့် အရာများကို ပြောသော်လည်း မိမိတာဝန်များကို မှန်ကန်စွာ ထမ်းဆောင်ခြင်းမရှိလျှင် သင်စိုးရိမ်သင့်၏။ ထိုအချိန်တွင် ဇာတ်သိမ်းသွားပြီဖြစ်သည်။ ဤသည်မှာ သင်၏ တာဝန်များနှင့် ဘုရားသခင်အပေါ် သင်ရှိသည့် သဘောထားဖြစ်ပါက ဘုရားသခင်၏ ကောင်းချီးများကို သင် ရရှိလိမ့်မည်လော။ လုံးဝ ရလိမ့်မည်မဟုတ်။ သင်သည် ဟန်ဆောင်လုပ်ပြရုံလုပ်ပြပြီး ဘုရားသခင်ကို လှည့်ဖြားပါက ဘုရားသခင်သည် သင့်ကို မည်သို့မျှ အလေးထားလိမ့်မည် မဟုတ်သကဲ့သို့ သင့်ကို ဖယ်ရှားရှင်းလင်းလိမ့်မည်။ ယင်းသည် ရလဒ်ဖြစ်လိမ့်မည်။ သင်သည် ဘုရားသခင်ကို လှည့်ဖြားပါက သင့်ကိုယ်သင် လှည့်ဖြားခြင်းသာဖြစ်၏။ ဘုရားသခင်က “ဤလူ၏ စိတ်နှလုံးသည် အလွန် လှည့်ဖြားတတ်ပြီး ရိုးသားမှု အရိပ်အယောင်မရှိပါ။ ၎င်းတို့ကို ယုံကြည်ကိုးစား၍ မရသကဲ့သို့ မည်သည့်အရာကိုမျှ ပေးအပ်၍မရပါ။ ၎င်းတို့ ဘေးဖယ်ကြပါစေ”ဟု ပြောလိမ့်မည်။ ယင်းမှာ မည်သည့်အရာကို ဆိုလိုသနည်း။ သင်သည် တစ်ဦးတည်း ချန်ထားခံရပြီး လျစ်လျူရှုခံရမည်ဟု ဆိုလိုပေသည်။ နောင်တမရှိပါက သင်သည် လုံးဝ စွန့်ပစ်ခံရလိမ့်မည်။ သင်သည် စာတန်၊ ဝိညာဉ်ဆိုးများနှင့် ဆိုးညစ်သော ဝိညာဉ်များထံသို့ အပြစ်ဒဏ်အတွက် လွှဲပြောင်းခံရလိမ့်မည်။ အကြင်သူသည် တစ်ဦးတည်း ချန်ထားခံရကာ လျစ်လျူရှုခံရချိန်တွင် မည်သည့်အခြေအနေမျိုး၌ ရှိသနည်း။ ယင်းမှာ သန့်ရှင်းသော ဝိညာဉ်တော်သည် သင့်အထဲတွင် အလုပ်မလုပ်တော့ဟု ဆိုလိုပေသည်။ သင်သည် မည်သည့်အရာကိုမျှ ရှင်းလင်းစွာ မြင်လိမ့်မည်မဟုတ်သကဲ့သို့ အခြားသူများက အမြဲ ဉာဏ်အလင်းပေးခံရကာ အလင်းပြခံရစဉ်တွင် သင်သည် ထိုသို့ဖြစ်လိမ့်မည်မဟုတ်။ သင်သည် ထုံအနေလိမ့်မည်။ တစ်စုံတစ်ဦးက သမ္မာတရားနှင့် အသက်ဝင်ရောက်မှုအပေါ် မိတ်သဟာယပြုချိန်တွင် သင်သည် အမြဲ အိပ်ချင်ကာ ငိုက်မျဉ်းလိမ့်မည်။ ဤသည်မှာ မည်သည့် ဖြစ်စဉ်မျိုး ဖြစ်သနည်း။ ဘုရားသခင် အလုပ်လုပ်မနေသည့် ဖြစ်စဉ်တစ်ခု ဖြစ်သည်။ ဘုရားသခင် အလုပ်လုပ်နေခြင်းမရှိပါက လူတစ်ဦးသည် လမ်းလျှောက်နေသည့် အလောင်းကောင်တစ်ကောင် ဖြစ်မည်မဟုတ်လော။ ဘုရားသခင်ကို ယုံကြည်သော်လည်း သူ၏ မျက်မှောက်တော်ကို မခံစားရန်မှာ အလွန် ထိတ်လန့်ဖွယ်ဖြစ်၏။ ထိုသို့သော လူတစ်ဦးသည် အသက်ရှင်ရန် မိမိတို့၏ ယုံကြည်စိတ်ချမှု၊ မိမိတို့၏ စိတ်လှုံ့ဆော်မှု ဆုံးရှုံးလေသည်။ ၎င်းတို့သည် အသက်ရှင်ခြင်းအတွက် မိမိတို့၏ အရင်းအနှီးရှိသမျှ ဆုံးရှုံးလေသည်။ ထိုသို့သော ဘဝတစ်ခုသည် မည်သည့်တန်ဖိုး ရှိပါသနည်း။ သင်တို့သည် ဝက်များနှင့် ခွေးများထက် သာ၍ ဆိုးရွားသည် မဟုတ်လော။ သင်၏ လုပ်ရပ်များနှင့် အပြုအမူကြောင့် သင်သည် အားမကိုးရသကဲ့သို့ မယုံကြည်ထိုက်ကြောင်း ဘုရားသခင် မြင်၏။ ဘုရားသခင်သည် သင့်ကို အူထဲအသည်းထဲမှ စက်ဆုပ်ပြီး ထိုသို့ဖြင့် သင့်ကို စွန့်ပစ်သည်၊ သို့မဟုတ် ယာယီ ဘေးဖယ်ထား၏။ ထိုသို့သော လူတစ်ဦးသည် မိမိတို့၏ စိတ်နှလုံးတွင် အဘယ်ကြောင့် နာကျင်မှုနှင့် မသက်မသာဖြစ်ခြင်းအား မသိကြသနည်းဟု ငါ တွေးမိ၏။ ၎င်းတို့၏ စိတ်နှလုံးနှင့် ပတ်သက်၍ မည်သည့်အရာ မှားယွင်းသနည်း။ အသိစိတ် ခံစားချက်တစ်ခု ရှိသလော။ ဘုရားသခင်ကို သင် နှစ်ပေါင်းမည်မျှ ယုံကြည်ပြီးသည်ဖြစ်စေ၊ သို့မဟုတ် သင်၏ ယုံကြည်ခြင်းသည် စစ်မှန်သည်ဖြစ်စေ၊ ဟန်ဆောင်ထားသည်ဖြစ်စေ၊ သင်သည် အပြုအမူနှင့်ဆိုင်သည့် အယူဝါဒအချို့ကို သိနားလည်နှင့်ပြီးသားဖြစ်ကာ မည်သူ့အပေါ်မျှ မှီခိုခြင်းမရှိဘဲ အသက်ရှင်ကာ ရှင်သန်နိုင်သော်လည်း သင် ထုတ်ဖော်ခံရပြီဖြစ်ကြောင်း၊ ဘုရားသခင်က သင့်ကို စွန့်ပစ်ပြီးဖြစ်ကြောင်း သင်သိပါက ရှေ့ဆက် အသက်ရှင်နိုင်သေးသလော။ သင်၏ ဘဝသည် အဓိပ္ပာယ် ရှိသေးသလော။ ထိုအချိန်တွင် သင်သည် အမှောင်ထဲတွင် ငိုကြွေးကာ အံသွားခဲကြိတ်လိမ့်မည်။ အသင်းတော်တွင် ထုတ်ဖော်ခံရာကာ ဖယ်ရှားရှင်းလင်းခံရပြီးသည့်နောက် အသင်းတော်က ၎င်းတို့ကို အဝေးပို့တော့မည့်၊ ရှေ့ဆက် အသက်ရှင်လိုစိတ်မရှိဘဲ မျက်လုံးများ နီရဲနေအောင် ငိုကြွေးကာ သေလိုစိတ်ပင်ရှိကြသည့် လူများကို ငါတို့ မကြာခဏ မြင်ရသည်။ ငိုကြွေးလျက် နောင်တရပါမည်ဟု ၎င်းတို့ ကျိန်ဆိုကြသော်လည်း ထိုအချိန်တွင် အလွန်နောက်ကျသွားလေပြီ။ ဤသည်မှာ အခေါင်းကို မမြင်မချင်း မျက်ရည်မကျသည့် ကိစ္စတစ်ခု ဖြစ်သည်။ ထို့ကြောင့် သင်သည် နောင်တရလိုစိတ်ရှိပါက ယခု ထိုသို့လုပ်ဆောင်ရမည်။ သင်၏တာဝန်ကို ထမ်းဆောင်ရာတွင် မည်သည့် ပြဿနာများ ကျန်ရှိနေသည်၊ သင်သည် ဝတ်ကျေတမ်းကျေ ဖြစ်မဖြစ်၊ သင် တာဝန်မဲ့သည့် နယ်ပယ်တစ်ခုတလေ ရှိမရှိဆိုသည်တို့အပေါ် အမြန် သုံးသပ်လော့။ သင်၏ တာဝန်ကို ထမ်းဆောင်ရာတွင် သင်သည် ရလဒ်များ အမှန်တကယ် စွမ်းဆောင်ရရှိပြီးခြင်း ရှိမရှိဆိုသည်ကို သုံးသပ်လော့။ ရှိပါက အဘယ်ကြောင့် ထိုရလဒ်များ သင် စွမ်းဆောင်ရရှိသည်ကို သုံးသပ်လော့။ မရှိပါက အဘယ်ကြောင့် သင် မရရှိသည်ကို သုံးသပ်လော့။ သုံးသပ်ခြင်းမှတစ်ဆင့် ဤအရာများအပေါ် ရှင်းလင်းမှုကို ရရှိကာ ပြဿနာများ ကျန်ရှိပါက၊ ဖြေရှင်းရန် သမ္မာတရားကို ရှာဖွေလော့။ ထိုသို့လုပ်ဆောင်ရာတွင် သင်၏ တာဝန်ထမ်းဆောင်ရာ၌ မည်သည့် အခက်အခဲများမျှ ရှိလိမ့်မည် မဟုတ်။ ပြဿနာများရှိသည့်အချိန်တွင် ဖြေရှင်းရန် သမ္မာတရားအား ရှာဖွေနိုင်သောသူအားလုံးအတွက် မိမိတို့တာဝန်များ ထမ်းဆောင်ရာတွင် အခက်အခဲများ တိုး၍ လျော့နည်းလိမ့်မည်သာမက ထိုအချိန်အတောအတွင်းတွင် အသက်ဝင်ရောက်မှုကို ရရှိလျက် ထိုတာဝန်များကို ထမ်းဆောင်ရာတွင် တိုး၍လည်း ထိရောက်ကြလိမ့်မည်။ ဥပမာပေးသည့် နည်းလမ်းအနေဖြင့် လူအချို့သည် ပြုပြင်ခြင်း အလှည့်အတော်များများကို ဖြတ်သန်းရပြီးနောက်တွင် သမ္မာတရားကို စတင် နားလည်လာကြ၏။ ၎င်းတို့သည် မိမိတို့ကိုယ်ကို မကြာခဏ သုံးသပ်နိုင်ကြပြီး တစ်စုံတစ်ရာ အမှားလုပ်မိပြီးဖြစ်သည်ကို ၎င်းတို့ သိရှိသည့်အခါတိုင်းတွင် သမ္မာတရား စည်းမျဉ်းများကို ၎င်းတို့ ချိုးဖောက်မိပြီဖြစ်ကြောင်း သိကာ ဘုရားသခင်ထံ ဆုတောင်းပြီး အထူးသဖြင့် ဝမ်းပန်းတနည်း ဖြစ်ကြလေသည်။ ကြိမ်ဖန်များစွာ ၎င်းတို့သည် မိမိတို့ကိုယ်ကိုပင် မုန်းတီးကြပြီး “ကျွန်ုပ်သည် အဘယ်သို့ မှားယွင်းသည့်အရာတစ်ခုကို တစ်ဖန်လုပ်မိပြီး ဘုရားသခင်ကို နာကျင်စေနိုင်ရသနည်း။ ကျွန်ုပ်သည် အလွန်ရက်စက်သည်တကား။ ဘုရားသခင်က အလွန်များစွာ ပြောဆိုပြီးဖြစ်သည်။ အဘယ်ကြောင့် ကျွန်ုပ်သည် အချိန်ကြာမြင့်စွာ မမှတ်မိဘဲဖြစ်ရသနည်း။ အဘယ်ကြောင့် ကျွန်ုပ်သည် ဘုရားသခင်ကို ကျိုးနွံနာခံမှု မရရှိနိုင်သကဲ့သို့ သူ့ကို စိတ်မကျေနပ်စေနိုင်သနည်း။ ကျွန်ုပ်သည် အမှန်တကယ် စာတန်၏ အလွန်အမင်း ဖောက်ပြန်ပျက်စီးစေခြင်း ခံရပြီး ဖြစ်သည်။ ကျွန်ုပ်၏ စိတ်နှလုံးတွင် ဘုရားသခင်အတွက် နေရာမရှိသကဲ့သို့ သမ္မာတရားကို ကျွန်ုပ် တန်ဖိုးမထားပါ။ ဆိုးယုတ်သော အတွေးအခေါ်များဖြင့် ကျွန်ုပ် အမြဲအသက်ရှင်နေပြီး ဘုရားသခင်၏ ရည်ရွယ်ချက်များကို အလေးမထားပါ။ ကျွန်ုပ်သည် အမှန်တကယ်ကို အသိစိတ်၊ သို့မဟုတ် ဆင်ခြင်တုံတရား မရှိပါ။ ကျွန်ုပ်သည် ဘုရားသခင်ကို အလွန် ဆန့်ကျင်ပုန်ကန်တတ်ပါသည်” ဟုဆိုလျက် မိမိကိုယ်ကို မျက်နှာကို ဖြတ်ရိုက်ကြလေသည်။ ထိုသို့ဖြင့် ၎င်းတို့သည် နောင်တရရန် စိတ်ပိုင်းဖြတ်ချက်ချကာ သမ္မာတရားကို လက်တွေ့လုပ်ဆောင်ရန်၊ မိမိတို့တာဝန်ကို ကောင်းစွာ ထမ်းဆောင်ရန်နှင့် ဘုရားသခင်ကို စိတ်ကျေနပ်စေရန် သန္နိဋ္ဌာန်ချကြသည်။ ၎င်းတို့သည် ဧကန်အမှန် နောင်တရသည့် စိတ်နှလုံးရှိကြသော်လည်း ဖောက်ပြန်ပျက်စီးသော စိတ်သဘောထားကို စွန့်ပယ်ခြင်းသည် လုပ်ဆောင်ရန် လွယ်ကူသည့်အရာ မဟုတ်ချေ။ အကြင်သူသည် အနည်းငယ် ပြောင်းလဲနိုင်ခြင်း မရှိမီ စမ်းသပ်မှုနှင့် စစ်ဆေးမှုအချို့ကို ကြုံရမည်။ ယခုတွင် သမ္မာတရားအပေါ် စတင် အာရုံစိုက်သည့်၊ သမ္မာတရား စစ်မှန်မှုထဲသို့ ဝင်ရောက်ပြီး ဘုရားသခင်ကို ကျိုးနွံနာခံသည့် လူများဖြစ်ရန် လိုလားလျက်ရှိကြသည့် လူများစွာ ရှိကြသည်။ သို့ဆိုလျှင် အမှန်တကယ် နောင်တရသည့် စိတ်နှလုံး ရှိသူတစ်ဦးသည် မည်သို့ လက်တွေ့လုပ်ဆောင်သင့်သနည်း။ ထိုအရာ၏ တစ်စိတ်တစ်ပိုင်းမှာ ၎င်းတို့သည် မိမိတို့၌ ရှိသည့် ပြဿနာများကို ဖြေရှင်းကာ မိမိတို့တာဝန်ကို ထမ်းဆောင်ရာတွင် လက်တွေ့လုပ်ဆောင်ခြင်း လမ်းကြောင်းတစ်ခုကို ရှာဖွေလျက် ဘုရားသခင်ထံ ၎င်းတို့ ဆုတောင်းပြီး သမ္မာတရားကို သာ၍ ရှာဖွေရမည်ဖြစ်သည်။ အခြားသော အပိုင်းမှာ ၎င်းတို့သည် မိမိတို့ကိုယ်ပိုင် ပုန်ကန်မှု၊ ၎င်းတို့၏ သဘာဝ အနှစ်သာရနှင့် ဘုရားသခင်ကို ၎င်းတို့ အတိုက်အခံလုပ်သည့် နယ်ပယ်များကို စိတ်ဖြာလေ့လာဆွေးနွေးလျက် သမ္မာတရားကို နားလည်ပြီး ၎င်းတို့နှင့်အတူ မိတ်သဟာယဖွဲ့နိုင်သည့် တစ်စုံတစ်ဦးကို ရှာဖွေရမည်။ ၎င်းတို့သည် ဤပြဿနာများကို ရှင်းလင်းစွာ သိရမည်၊ ထို့နောက်တွင် ဘုရားနှုတ်ကပတ်တော်များကို စေ့စေ့စပ်စပ် စဉ်းစားကာ မိမိတို့အတွက် အဘယ်သို့ အသုံးပြုသည်ကို ကြည့်ရမည်။ နောက်တစ်ဖန် အလွန်အရေးပါသည့် ထိုဘုရားနှုတ်ကပတ်တော်များကို ၎င်းတို့ စဉ်းစားကာ စစ်မှန်သည့် သိမြင်မှု မရမချင်း ၎င်းတို့၏ ကိုယ်ပိုင်ပြဿနာများ၊ ၎င်းတို့၏ ကိုယ်ပိုင်သဘာဝ အနှစ်သာရတို့ကို ရည်ရွယ်၍ မိမိတို့ကိုယ်ကို သုံးသပ်ရမည်ဖြစ်သည်။ ဤသို့ဖြင့် စစ်မှန်သည့် နောင်တကို ၎င်းတို့ စွမ်းဆောင်ရရှိနိုင်ပြီး မိမိတို့ကိုယ်ကို မုန်းတီးနိုင်ကြသည်။ ထို့နောက်တွင် မိမိတို့တာဝန်ကို ထမ်းဆောင်ရာတွင် မိမိတို့၏ အခက်အခဲများကို ဆက်လက်ထုတ်ဖော်ပြောပြီး ယင်းတို့ကို ဖြေရှင်းရန် သမ္မာတရားကို အသုံးပြုသင့်သည်။ ထိုသို့ဖြင့် ၎င်းတို့၏ တာဝန်ကို ထမ်းဆောင်ရာတွင် ၎င်းတို့၏ ပြဿနာများ တိုး၍ လျော့နည်းသွားပြီး အကျိုးသက်ရောက်မှုတစ်ခုကို စွမ်းဆောင်ရရှိပြီး ဖြစ်သည်။ အကြင်သူသည် အမှန်တကယ် နောင်တရလိုပါက ဤသည်မှာ ၎င်းတို့ လက်တွေ့လုပ်ဆောင်ရမည့်ပုံ ဖြစ်သည်။ ဤသည်မှာ စစ်မှန်သည့် နောင်တဆီသို့သွားသည့် တစ်ခုတည်းသော လမ်းကြောင်း ဖြစ်သည်။

သမ္မာတရားကို လိုက်စားခြင်းမှ မည်သည့် အကျိုးတရား ရလာလိမ့်မည်နည်း။ ထိုအရာ၏ တစ်စိတ်တစ်ပိုင်းမှာ သမ္မာတရားကို လိုက်စားခြင်းသည် မိမိ၏ ဖောက်ပြန်ပျက်စီးသော စိတ်သဘောထားကို စွန့်ပယ်ရန် ရည်ရွယ်ပေသည်။ နောက်တစ်ပိုင်းမှာ ထိုသို့လုပ်ဆောင်ခြင်းသည် မိမိတို့တာဝန်ကို ထမ်းဆောင်သည်နှင့်အမျှ အကြင်သူအား သမ္မာတရားကို လက်တွေ့လုပ်ဆောင်ခွင့်ပေးရန်နှင့် ဘုရားသခင်ကို အမှန်တကယ် ကျိုးနွံနာခံသည့်လူတစ်ဦး ဖြစ်လာခွင့်ပေးရန် ရည်ရွယ်ပေသည်။ ဤသည်မှာ စစ်မှန်သည့် နောင်တနှင့်ဆိုင်သော သက်သေခံချက်ဖြစ်သည်။ အမှန်တကယ် နောင်တရရန်၊ အကြင်သူသည် သမ္မာတရားကို နားလည်ပြီး အကျိုးတရားမရရှိမှီ ထိုသမ္မာတရားကို လက်တွေ့လုပ်ဆောင်ရမည်။ သင်သည် ပြဿနာကို ဖြေရှင်းရန် သမ္မာတရား မရှာဖွေသကဲ့သို့ သင်၏ နောင်တသည် သင်ပြောသည့်အရာတစ်ခုမျှသာ ဖြစ်ပါက ထိုအရာက အကျိုးတရား မရရှိနိုင်ပေ။ သင်သည် ဤနည်းဖြင့် စိတ်အေးချမ်းကာ တည်ငြိမ်မှု ခံစားရလိမ့်မည် မဟုတ်။ သင် လုပ်ဆောင်သမျှသည် သင် အမှန်တကယ် နောင်တရလိုသည်ဟု ဆုတောင်းခြင်းဖြင့် ပြောဆိုခြင်း ဖြစ်သော်လည်း သင်၏တာဝန်ထမ်းဆောင်မှုတွင် သင်၏ ပြဿနာကို ဖြေရှင်းပြီး လက်သင့်ခံနိုင်သည့် တာဝန်ထမ်းဆောင်မှု စွမ်းဆောင်ရရှိရန် သမ္မာတရားကို သင် မရှာဖွေပါက သင်သည် ဘုရားသခင်ကို လှည့်စားရန် ကြိုးစားနေခြင်း ဖြစ်သည်။ စစ်မှန်သော နောင်တသည် အဓိကအားဖြင့် သစ္စာစောင့်သိမှုအဖြစ်လည်းကောင်း၊ စည်းမျဉ်းများအတိုင်း ပြုမူဆောင်ရွက်ခြင်းအဖြစ်လည်းကောင်း၊ သမ္မာတရားကို လက်တွေ့လုပ်ဆောင်ခြင်းအဖြစ်လည်းကောင်း၊ ပြီးလျှင် မိမိ၏ တာဝန်ကို ထမ်းဆောင်ရာတွင် စစ်မှန်သော သက်သေခံချက်ကို သက်သေခံခြင်းအဖြစ်လည်းကောင်း ထင်ရှားလေသည်။ ဤသည်တို့မှာ စစ်မှန်သော နောင်တ၏ လက္ခဏာများဖြစ်ပြီး ယင်းတို့သည် စစ်မှန်သော နောင်တ၏ သက်သေခံချက်လည်း ဖြစ်၏။ အကြင်သူ လုပ်ဆောင်သမျှသည် မိမိတို့တာဝန်ကို ကောင်းစွာ လုပ်ဆောင်ခြင်းမရှိဘဲ ဆုတောင်းခြင်းတွင် ဘုရားသခင်ထံ နောင်တရကြောင်း ပြောဆိုခြင်းဖြစ်ပါက ၎င်းတို့သည် ဘုရားသခင်ကို လှည့်စားရန် ကြိုးစားနေခြင်း မဟုတ်လော။ တစ်စုံတစ်ခုကို အနည်းဆုံးအနေဖြင့် မိမိ၏ ကိုယ်ပိုင် အသိစိတ်တွင်ပင် လိပ်ပြာမသန့်ပါက ယင်းကို ဘုရားသခင်က မည်သို့လက်သင့်ခံနိုင်မည်နည်း။ သင်၏ လက်ရှိအခြေအနေသည် မည်သည့်အရာဖြစ်ပါစေ ဘုရားသခင်အတွက် သင်၏ တာဝန်ကို စစ်မှန်ရိုးသားစွာ ထမ်းဆောင်နိုင်ခြင်းမရှိသရွေ့၊ ပြီးလျှင် သင်၏ တာဝန်ကို ထမ်းဆောင်မှုတွင် ပြဿနာများစွာ ကျန်ရှိနေသရွေ့၊ ထိုပြဿနာများကို ဖြေရှင်းရန် သမ္မာတရားကို သင် မရှာဖွေသရွေ့ သင်သည် ကြီးမားသည့် ပြဿနာတစ်ခုရှိပြီး ထိုအရာနှင့်ပတ်သက်၍ လေးနက်စွာ ဆုတောင်းကာ မိမိကိုယ်ကို သုံးသပ်သင့်သည်။ သင်သည် အမှန်တကယ် နောင်တ မရနိုင်သကဲ့သို့ သင်၏ တာဝန်ကို အမြဲ ညံ့ဖျင်းစွာ ထမ်းဆောင်နေပါက ဖယ်ရှားရှင်းလင်းခြင်းခံရမည့် အန္တရာယ်ကို သင်သေသေချာချာ ရင်ဆိုင်ရပေသည်။ ဘုရားသခင်ကို နှစ်ပေါင်းမည်မျှ သင် ယုံကြည်ပြီးဖြစ်သည်မှာ အရေးမကြီးပေ။ သင်သည် မိမိတာဝန်ကို ထမ်းဆောင်ရာတွင် အမြဲ ဝတ်ကျေတမ်းကျေဖြစ်ပါက ဘုရားအိမ်တော်ကို အမြဲ အခွင့်အရေးယူလျက်၊ သမ္မာတရားကို အနည်းငယ်မျှ လက်ခံခြင်း၊ သို့မဟုတ် လက်တွေ့လုပ်ဆောင်ခြင်း မရှိဘဲ သင်ကိုယ်တိုင်အတွက် အကျိုးအမြတ်များနောက် အမြဲလိုက်ပါက သင်သည် ဘုရားသခင်ကို စစ်မှန်သော ယုံကြည်သူတစ်ဦး မဟုတ်ပေ။ သင်သည် သမ္မာတရားကို အလွန်အမင်း မနှစ်မြို့သည့်သူတစ်ဦး၊ မိမိ၏ ဗိုက်အပြည့်စားရန်သာ ရည်ရွယ်သည့် မယုံကြည်သူတစ်ဦး ဖြစ်သည်။ သင်သည် ဘုရားအိမ်တော်တွင် အသက်ရှင်နေထိုင်ကောင်း နေထိုင်နိုင်ပြီး ဘုရားသခင်ကို ယုံကြည်သူတစ်ဦးဖြစ်သည်ဟု ပြောကောင်းပြောနိုင်သော်လည်း အမှန်တရားမှာ သင်သည် ဘုရားသခင်နှင့် ဆက်ဆံရေး မရှိတော့ပေ။ ဘုရားသခင်သည် သင့်ကို အချိန်ကြာမြင့်စွာကတည်းက ဘေးဖယ်ထားပြီး သင်သည် အသက်မပါသည့် အခွံတစ်ခု၊ လမ်းလျှောက်နေသည့် အလောင်းကောင်တစ်ကောင် ဖြစ်လာပြီး ဖြစ်သည်။ သို့ဆိုလျှင် အသက်ရှင်ရခြင်း၏ အဓိပ္ပာယ်မှာ အဘယ်နည်း။ ဤအဆင့်သို့ ရောက်နှင့်ပြီးသည့် မည်သူမဆိုသည် ပြောစရာ ခရီးပန်းတိုင်မရှိပေ။ ၎င်းတို့၏ တစ်ခုတည်းသော ထွက်ပေါက်မှာ ဝန်ခံရန် ဘုရားသခင်၏ ရှေ့မှောက်သို့ အလျင်အမြန် ရောက်လာဖို့ ဖြစ်သည်။ သင်သည် အမှန်တကယ် စစ်မှန်ရိုးသားပြီး စိတ်ရင်းအတိုင်း နောင်တရပါက သင်၏ ပြစ်မှားမှုများကို ဘုရားသခင် ခွင့်လွှတ်လိမ့်မည်။ သို့ရာတွင် သင် သတိရရမည့်အရာတစ်ခု ရှိ၏။ မည်သည့် အချိန်တွင်ဖြစ်စေ၊ ပြီးလျှင် သင်သည် ဘုရားသခင်နှင့်ဆိုင်သည့် သိကျွမ်းခြင်း ရှိသည်ဖြစ်စေ၊ သို့မဟုတ် သူနှင့် ပတ်သက်သည့် အယူအဆများ၊ သို့မဟုတ် နားလည်မှုလွဲခြင်းများ ရှိသည်ဖြစ်စေ သူ့ကို သင် မည်သည့်အခါတွင်မျှ မတိုက်ခိုက်သင့်၊ သို့မဟုတ် အာမခံသင့်ပေ။ သို့မဟုတ်လျှင် သင်သည် ဒဏ်ခတ်ခံရခြင်းကို လုံးဝ ခံစားရလိမ့်မည်။ သင်၏ စိတ်နှလုံး မာကျောပြီး “ကျွန်ုပ်သည် ဤသို့ လုပ်ဆောင်မည်၊ ဘုရားသခင်က ကျွန်ုပ်ကို မည်သည့်အရာ လုပ်ဆောင်နိုင်သည်ကို ကြည့်ကြစို့။ မည်သူကိုမျှ ကျွန်ုပ် မကြောက်ပါ။ ကျွန်ုပ်သည် ယခင်က ဤသို့ အမြဲ လုပ်ဆောင်ပြီးဖြစ်သည်”ဟု ပြောသည့် အခြေအနေတွင် သင် ရှိသည်ကို တွေ့ရှိရပါက သင်သည် ဒုက္ခရောက်ပေပြီ။ ဤသည်မှာ ဆိုးယုတ်သော သဘာဝ ပွင့်ထွက်ခြင်းတစ်ခု ဖြစ်သည်။ ဤသည်မှာ ခေါင်းမာခြင်း ဖြစ်သည်။ သင်လုပ်ဆောင်နေသည့်အရာသည် မှားယွင်းကြောင်း၊ အန္တရာယ်များနှင့်ပြီးဖြစ်ကြောင်း သင် လုံးဝ ကောင်းစွာ သိနှင့်သော်လည်း ထိုအရာကို သင် အလေးအနက် မထားပေ။ သင်၏ စိတ်နှလုံးသည် စိုးရွံ့မှုမရှိ၊ မည်သည့် စွပ်စွဲမှု၊ သို့မဟုတ် ပြစ်တင်မှုကိုမျှ အသိအမှတ်မပြုသကဲ့သို့ စိုးရိမ်ခြင်းမရှိ၊ သို့မဟုတ် ဝမ်းနည်းခြင်း မရှိပေ။ နောင်တရရန်ပင် သင် မသိပေ။ ဤသည်မှာ ခေါင်းမာခြင်း အဆင့်တစ်ခုဖြစ်ပြီး သင့်ကို ဒုက္ခဖြစ်စေလိမ့်မည်။ ထိုအရာက ဘုရားသခင်၏ ဘေးဖယ်ခြင်းခံရရန် သင့်အတွက် လွယ်ကူစေသည်။ လူတစ်ဦးသည် ဤအဆင့်သို့ရောက်ကာ အလွန် ထုံအနေဆဲဖြစ်ပြီး နောက်ပြန်လှည့်သင့်သည်ကို မသိပါက ဘုရားသခင်နှင့် ၎င်းတို့၏ ဆက်ဆံရေးသည် နဂိုအတိုင်း ပြန်ဖြစ်နိုင်သလော။ နဂိုအတိုင်း အလွယ်တကူ ပြန်ဖြစ်လိမ့်မည် မဟုတ်။ သို့ဆိုလျှင် ဘုရားသခင်ကို ချဉ်းကပ်ခြင်းသည် သင့်အတွက် လုံးဝ သဘာဝကျပြီး ကျိုးကြောင်းခိုင်လုံမျှတသည်ဟု ခံစားစေသည့် ဘုရားသခင်နှင့် ပုံမှန်ဆက်ဆံရေးတစ်ခု သင် မည်သို့ ပြန်လည်ထိန်းသိမ်းနိုင်သနည်း။ မည်သည့်နေရာတွင် သင်သည် ကျိုးနွံနာခံ၊ ဦးညွှတ်ကာ သူ့ထံ သင်၌ ရှိသမျှကို ပူဇော်ဆက်ကပ်၍ သူ့ကို ကြောက်ရွံ့ပြီး သင်နားလည်သည်ဖြစ်စေ၊ နားမလည်သည်ဖြစ်စေ သူ၏ နှုတ်ကပတ်တော်များကို သမ္မာတရားအဖြစ် လက်ခံပြီးနောက် သမ္မာတရားကို ရှာဖွေကာ ကျိုးနွံနာခံမှုကို လက်တွေ့လုပ်ဆောင်နိုင်သနည်း။ ဤအခြေအနေကို သင် မည်သည့်အချိန်တွင် နဂိုအတိုင်းပြန်ဖြစ်စေနိုင်သနည်း။ ဤအခြေအနေကို နဂိုအတိုင်း ပြန်ဖြစ်စေရန် သင် မည်သည့်အတိုင်းအတာအထိ လုပ်ဆောင်ရမည်နည်း။ ယင်းသည် အချိန်၊ သို့မဟုတ် ခရီးရှည်လျားမှု၊ သို့မဟုတ် သင် ခရီးနှင်သည့် အကွာအဝေး ကိစ္စမဟုတ်သောကြောင့် သေချာပေါက် ခက်ခဲမည်ကို ငါ စိုးရွံ့မိ၏။ ယင်းသည် သင့်ဘဝ၏ အခြေအနေ၊ သမ္မာတရား စစ်မှန်မှုထဲသို့ သင် အမှန်တကယ် ဝင်ရောက်ပြီးခြင်း ရှိမရှိဆိုသည်နှင့် သက်ဆိုင်သော ကိစ္စ ဖြစ်သည်။ သင်သည် ဘုရားသခင်ကို နှစ်များစွာ ယုံကြည်ပြီးဖြစ်သည့်တိုင် သင့်အတွင်း၌ တည်ရှိသည့် ပြဿနာများကို ဖြေရှင်းရန် သမ္မာတရားကို လုံးဝ အသုံးမပြုနိုင်သကဲ့သို့ မည်သည့် သတိမျှမရှိဘဲ ပုန်ကန်တတ်သော အခြေအနေတွင် ဝမ်းမြောက်ဝမ်းသာ မကြာခဏ အသက်ရှင်လျက်၊ မှားယွင်းသည့် အရာများကို လုပ်ဆောင်လျက်၊ မှားယွင်းသည့် စကားများကို ပြောဆိုလျက်၊ ဘုရားသခင်ကို မာကျောသည့် စိတ်နှလုံးဖြင့် ဆန့်ကျင်၊ အတိုက်အခံလုပ်ကာ ပုန်ကန်ပြီး လုံးဝ မသိလိုက်ဘဲနှင့် သင်၏ ကိုယ်ပိုင် အယူအဆများ၊ စိတ်ကူးများ၊ အတွေးများနှင့် အမြင်များကို ထိန်းသိမ်းလျက် ဤပြဿနာများ၏ ဆိုးရွားမှုကို သတိမပြုပါက သင်သည် သမ္မာတရား စစ်မှန်မှု တစ်ခုမျှမရှိ၊ ဘုရားသခင်ကို ကျိုးနွံနာခံသောလူတစ်ဦး မဟုတ်သကဲ့သို့ ဘုရားသခင်၏ သတ်မှတ်ချက်များကို ပြည့်မီခြင်းမှ ဝေးကွာနေဆဲ ဖြစ်သည်။ သင်၏ စိတ်နှလုံးတွင် ဤအရာနှင့် ပတ်သက်၍ ရှင်းလင်းနေသင့်သည်။ သင်၏ စစ်မှန်သည့် အခြေအနေကို ရှင်းလင်းစွာ သင် မမြင်နိုင်သကဲ့သို့ သင် ယုံကြည်သည့် နည်းလမ်းသည် အဆင်ပြေကြောင်း၊ ဘုရားသခင်အတွက် သင့်ကိုယ်သင် အသုံးခံနိုင်စွမ်းရှိကြောင်း၊ သင်သည် ဆင်းရဲဒုက္ခခံကာ အဖိုးအခပေးပြီးဖြစ်ကြောင်း အမြဲ ယူဆကာ သင်သည် ကောင်းကင်နိုင်ငံတော်ထဲသို့ ဝင်ရောက်ရန် အာမခံချက်ရှိကြောင်း ယုံကြည်ပါက သင်သည် အသိစိတ် ဘာဆိုဘာမျှမရှိပေ။ သင်သည် သမ္မာတရား စစ်မှန်မှု တစ်ခုမျှ မပိုင်ဆိုင်ဘဲ ထိုအရာကို သိပင်မသိပေ။ ဤသည်မှာ သင်သည် မရှင်းလင်းသည့် စိတ်တစ်ခုရှိသည်၊ သင်သည် စိတ်ရှုပ်ထွေးသည်၊ နားဝေတိမ်တောင်ဖြစ်သည့် လူတစ်ဦးဖြစ်ကာ သမ္မာတရားကို နားလည်ရန်၊ သို့မဟုတ် မိမိကိုယ်ကို သိရန် လုံလောက်သည့် အစွမ်းအစ မရှိသောကြောင့် ဘုရားသခင်၏ ကယ်တင်ခြင်း မခံရနိုင်ဟု ဆိုလိုပေသည်။

ဘုရားသခင်သည် မည်သည့်လူစားမျိုးအပေါ် နောက်ဆုံးတွင် လက်လျှော့သည်ကို သင်တို့ သိပါသလော။ (မရပ်မနား ခေါင်းမာပြီး ဘုရားသခင်ရှေ့တွင် နောင်တမရသောသူများ ဖြစ်ပါသည်။) ဤလူစားမျိုးများ၏ တိကျသည့် အခြေအနေမှာ အဘယ်နည်း။ (မိမိတို့၏တာဝန်များကို ထမ်းဆောင်နေချိန်တွင် ၎င်းတို့သည် အမြဲ ဝတ်ကျေတမ်းကျေဖြစ်ပြီး ပြဿနာများနှင့် ရင်ဆိုင်ရသည့်အခါ ဖြေရှင်းချက်တစ်ခုရှာရန် သမ္မာတရားကို မရှာဖွေကြပါ။ သမ္မာတရားကို လက်တွေ့လုပ်ဆောင်သင့်ပုံနှင့်ပတ်သက်၍ ၎င်းတို့ အလေးအနက် မထားကြသကဲ့သို့ အရာရာကို ဖြစ်ကတတ်ဆန်းပုံစံဖြင့် ကိုင်တွယ်ကြသည်။ ဆိုးယုတ်မှု၊ သို့မဟုတ် မကောင်းမှုများကို လုပ်ဆောင်ခြင်းဖြင့်သာ ၎င်းတို့ စိတ်ကျေနပ်ကြပြီး သမ္မာတရားအတွက် မကြိုးပမ်းကြပါ။) ဝတ်ကျေတမ်းကျေဖြစ်သော အပြုအမူသည် အခြေအနေအပေါ် မူတည်၏။ လူအချို့သည် သမ္မာတရားကို နားမလည်သောကြောင့် ထိုသို့လုပ်ဆောင်ကြပြီး ဝတ်ကျေတမ်းကျေဖြစ်ခြင်းသည် ပုံမှန်ဖြစ်သည်ဟုပင် ၎င်းတို့ တွေးထင်ကြသည်။ လူအချို့သည် ထိုသို့သော နည်းလမ်းတစ်ခုဖြင့် ပြုမူရန် တမင်သက်သက် ရွေးချယ်လျက် တမင် ဝတ်ကျေတမ်းကျေဖြစ်ကြလေသည်။ ၎င်းတို့သည် သမ္မာတရားကို နားလည်သည့်အခါ ဤသို့ ပြုမူကြပြီး ၎င်းတို့ နားလည်သည့်နောက်တွင်ပင် မိမိတို့၏ အပြုအမူကို မတိုးတက်စေကြချေ။ ၎င်းတို့သည် ပြောင်းလဲမှု ပမာဏ စိုးစဉ်းမျှမရှိဘဲ စဉ်ဆက်မပြတ် ဤသို့ ပြုမူလျက် သမ္မာတရားကို လက်တွေ့မလုပ်ဆောင်ကြချေ။ တစ်ဦးတလေက ၎င်းတို့ကို ဝေဖန်သည့်အခါ နားမထောင်ကြသကဲ့သို့ ပြုပြင်ခြင်းကို လက်မခံကြချေ။ ထိုအစား ခေါင်းမာမာဖြင့် အဆုံးထိ ရပ်တည်ကြသည်။ ဤအရာကို မည်သို့ခေါ်သနည်း။ ဤအရာကို ခေါင်းမာခြင်းဟု ခေါ်၏။ “ခေါင်းမာခြင်း” သည် အပျက်သဘောဆောင်သော ဝေါဟာရတစ်ခု၊ ယုတ်ညံ့သော ဝေါဟာရတစ်ခုဖြစ်သည်ကို လူတိုင်း သိကြသည်။ ယင်းသည် ကောင်းမွန်သော စကားလုံးတစ်ခု မဟုတ်ပေ။ ထို့ကြောင့် လူတစ်ဦးကို “ခေါင်းမာသော” ဟူသည့် ဝေါဟာရဖြင့် အမည်တပ်ပြီး ထိုသူသည် ထိုသရုပ်ဖော်ချက်နှင့် သင့်တော်ပါက ထိုသူ၏ ရလဒ်သည် မည်သည့်အရာ ဖြစ်မည်ဟု သင်တို့ ပြောမည်နည်း။ (၎င်းတို့သည် ဘုရားသခင်၏ ပစ်ပစ်ခါခါငြင်းခြင်းနှင့် ဘေးဖယ်ထားခြင်း ခံရကြပါသည်။) သင်တို့ကို ငါ ပြောမည်။ ဘုရားသခင် အစက်ဆုပ်ဆုံးနှင့် လက်အလျှော့ချင်ဆုံးသောအရာမှာ ဤခေါင်းမာသော လူစားမျိုးများ ဖြစ်သည်။ ၎င်းတို့သည် မိမိတို့၏ အမှားများကို အပြည့်အဝ သိသော်လည်း နောင်တမရကြ၊ မိမိတို့၏ အပြစ်များကို မည်သည့်အခါတွင်မျှ ဝန်မခံကြသကဲ့သို့ မိမိတို့ကိုယ်ကို မှန်ကြောင်းပြရန် ဆင်ခြေများနှင့် အကြောင်းပြချက်များကို အမြဲ ဖန်တီးကာ အပြစ်တင်မှုကို လွှဲဖည်ကြပြီး အခြားသူများ၏ အမြင်မှ မိမိတို့၏ လုပ်ရပ်များကို ကာရင်းနှင့် မိမိတို့စိတ်နှလုံးများတွင် နောင်တ၊ သို့မဟုတ် ဝန်ခံခြင်း အတိုင်းအတာ အနည်းငယ်မျှမရှိဘဲ မပြတ်သော အမှားများကို ပြုလုပ်ရင်း ပြဿနာကို ကွေ့ဝိုက်လျက် အဆင်ချောပြီး ဝေ့လည်ကြောင်ပတ် နည်းလမ်းများကို ရှာတွေ့ရန် ကြိုးစားကြလေသည်။ ထိုသို့သော လူတစ်ဦးသည် အလွန် ဒုက္ခပေးတတ်ပြီး ကယ်တင်ခြင်း ရရှိရန် ၎င်းတို့အတွက် မလွယ်ကူပေ။ ၎င်းတို့သည် စင်စစ် ဘုရားသခင် စွန့်ပစ်လိုသည့် လူများ ဖြစ်ကြသည်။ ထိုသို့သော လူတို့ကို အဘယ်ကြောင့် ဘုရားသခင်က စွန့်ပစ်မည်နည်း။ (အဘယ်ကြောင့်ဆိုသော် ၎င်းတို့သည် သမ္မာတရားကို လုံးဝ လက်မခံကြသကဲ့သို့ ၎င်းတို့၏ အသိစိတ်သည် ထုံထိုင်းလာပြီးဖြစ်သောကြောင့် ဖြစ်သည်။) ထိုသို့သော လူများသည် ကယ်တင်မခံရနိုင်ပေ။ ဘုရားသခင်သည် ဤလူများကို မကယ်တင်ပေ။ ထိုသို့သော အသုံးမကျသည့် အမှုကို သူ မပြုပေ။ အပြင်ပန်းအားဖြင့် ဘုရားသခင်က ၎င်းတို့ကို မကယ်တင်သကဲ့သို့ မလိုချင်သည့်ပုံပေါ်သော်လည်း အမှန်တွင် လက်တွေ့ကျသည့် အကြောင်းရင်းတစ်ခု ရှိ၏။ ယင်းမှာ ဤလူများသည် ဘုရားသခင်၏ ကယ်တင်ခြင်းကို လက်မခံကြခြင်း ဖြစ်သည်။ ၎င်းတို့သည် ဘုရားသခင်၏ ကယ်တင်ခြင်းကို ငြင်းပယ်ကာ အတိုက်အခံ လုပ်ကြသည်။ ၎င်းတို့က “ကိုယ်တော်ကို ကျိုးနွံနာခံခြင်း၊ သမ္မာတရားကို လက်ခံခြင်းနှင့် သမ္မာတရားကို လက်တွေ့လုပ်ဆောင်ခြင်းမှ မည်သည့်အရာကို ကျွန်ုပ် ရရှိသနည်း။ မည်သည့် အကျိုးအမြတ်ရှိပါသနည်း။ ကျွန်ုပ်အတွက် အကျိုးကျေးဇူးတစ်ခု ရှိမှသာ ကျွန်ုပ် လုပ်ဆောင်ပါမည်။ အကျိုးကျေးဇူး မရှိပါက လုပ်မည်မဟုတ်ပါ”ဟု တွေးကြသည်။ ဤလူများသည် မည်သည့်လူစားမျိုး ဖြစ်သနည်း။ ၎င်းတို့သည် မိမိကိုယ်ကျိုးစီးပွားဖြင့် စေ့ဆော်ခံရသည့်လူများဖြစ်ပြီး သမ္မာတရားကို မချစ်သောသူများအားလုံးသည် ကိုယ်ကျိုးစီးပွား၏ စေ့ဆော်ခြင်းခံရကြလေသည်။ ကိုယ်ကျိုးစီးပွား၏ စေ့ဆော်ခြင်းခံရသည့် လူများသည် သမ္မာတရားကို လက်မခံနိုင်ကြချေ။ ကိုယ်ကျိုးစီးပွား၏ စေ့ဆော်ခြင်းခံရသော တစ်စုံတစ်ဦးကို မိတ်သဟာယပြုရန် သင် ကြိုးစားပြီး ၎င်းတို့အား မိမိတို့ကိုယ်ကို သိရှိရန်၊ မိမိတို့၏ အမှားများကို ဝန်ခံရန် သင် စေခိုင်းပါက ၎င်းတို့ မည်သို့ တုံ့ပြန်ကြမည်နည်း။ “ကျွန်ုပ်၏ အမှားများကို ဝန်ခံခြင်းမှ မည်သည့် အကျိုးကျေးဇူးများကို ကျွန်ုပ် ရရှိပါသနည်း။ တစ်စုံတစ်ရာ ကျွန်ုပ် အမှားလုပ်ခဲ့သည်ဟု သင် ကျွန်ုပ်ကို ဝန်ခံစေပြီး ကျွန်ုပ်၏ အပြစ်များကို ဝန်ချကာ နောင်တရစေလျှင် မည်သည့် ကောင်းချီးမင်္ဂလာများကို ကျွန်ုပ် ရလိမ့်မည်နည်း။ ကျွန်ုပ်၏ နာမည်ဂုဏ်သတင်းနှင့် အကျိုးစီးပွားများ ထိခိုက်လိမ့်မည်။ ဆုံးရှုံးမှုများ ကျွန်ုပ် ခံစားရလိမ့်မည်။ မည်သူက ကျွန်ုပ်ကို အလျော်ပေးလိမ့်မည်နည်း”ဟူ၍ ဖြစ်သည်။ ဤသည်မှာ ၎င်းတို့၏ စိတ်နေစိတ်ထား ဖြစ်သည်။ ကိုယ်ရေးကိုယ်တာ အကျိုးအမြတ်ကိုသာ ၎င်းတို့ ရှာဖွေကြပြီး ဘုရားသခင်၏ ကောင်းချီးများကို ရရှိရန်အလို့ငှာ နည်းလမ်းတစ်ခုခုဖြင့် ပြုမူခြင်းသည် အလွန်မရေမရာဖြစ်သည်ဟု ၎င်းတို့ ခံစားကြသည်။ ထိုအရာ ဖြစ်နိုင်သည်ဟု ၎င်းတို့ တကယ်ကို မယုံကြည်ကြချေ။ မိမိတို့ မျက်စိဖြင့်တပ်အပ် မြင်သည့်အရာကိုသာ ယုံကြည်ကြသည်။ ထိုသို့သော လူများသည် ကိုယ်ကျိုးစီးပွား၏ စေ့ဆော်ခြင်းခံရကာ “ကိုယ့်အတွက်ပဲ ကိုယ်ကြည့်။ ဘယ်သူသေသေ ငတေမာပြီးရော” ဟူသည့် ဆိုးယုတ်သော အတွေးအခေါ်ဖြင့် အသက်ရှင်ကြ၏။ ယင်းမှာ ၎င်းတို့ သဘာဝ အနှစ်သာရ ဖြစ်သည်။ ၎င်းတို့ စိတ်နှလုံးများထဲတွင် ဘုရားသခင်ကို အသိအမှတ်ပြုခြင်းနှင့် သမ္မာတရားကို အသိအမှတ်ပြုခြင်းတို့သည် ဘုရားသခင်ကို ၎င်းတို့ ယုံကြည်သည်ဟု ဆိုလိုပေသည်။ မကောင်းမှုကို မလုပ်ဆောင်ခြင်းသည် ၎င်းတို့အဖို့ လက်သင့်ခံဖွယ် ဖြစ်သော်လည်း ၎င်းတို့အနေဖြင့် အကျိုးအမြတ်များ ရရှိရမည်ဖြစ်ပြီး ဆုံးရှုံးမှုကို လုံးဝ ခံစား၍ မဖြစ်ပေ။ ၎င်းတို့၏ အကျိုးအမြတ်များ မထိခိုက်သည့်အခါမှသာ သမ္မာတရားကို လက်တွေ့လုပ်ဆောင်ခြင်းနှင့် ဘုရားသခင်ကို ကျိုးနွံနာခံခြင်းအကြောင်း ပြောဆိုကြလိမ့်မည်။ ၎င်းတို့၏ အကျိုးစီးပွားများ ပျက်စီးပါက သမ္မာတရားကို ၎င်းတို့ လက်တွေ့မလုပ်နိုင်၊ သို့မဟုတ် ဘုရားသခင်ကို ကျိုးနွံနာခံနိုင်ခြင်း မရှိကြပေ။ ဘုရားသခင်အတွက် မိမိတို့ကိုယ်ကို အသုံးခံရန်၊ ဆင်းရဲဒုက္ခခံရန်၊ သို့မဟုတ် အဖိုးအခပေးရန် တောင်းဆိုခြင်းသည် သာ၍ပင် မဖြစ်နိုင်ပေ။ ဤသို့သော လူများသည် စစ်မှန်သည့် ယုံကြည်သူများ မဟုတ်။ ၎င်းတို့သည် ကောင်းချီးများနှင့် အကျိုးအမြတ်များကိုသာ ရှာလျက် မိမိတို့ကိုယ်ပိုင် အကျိုးစီးပွားအတွက်သာ အသက်ရှင်ကြပြီး ဆင်းရဲဒုက္ခကို သည်းညည်းခံရန်၊ သို့မဟုတ် အဖိုးအခပေးရန် လိုလားခြင်းမရှိကြသည့်တိုင် သေခြင်းတရား၏ ရလဒ်ကို ရှောင်ရှားရန် ဘုရားအိမ်တော်တွင် နေရာတစ်ခု လိုချင်ကြဆဲ ဖြစ်သည်။ ထိုသို့သော လူများသည် သမ္မာတရား အနည်းငယ်မျှ လက်မခံကြသကဲ့သို့ ဘုရားသခင်၏ ကယ်တင်ခြင်း မခံရနိုင်ပေ။ ဘုရားသခင်သည် ၎င်းတို့ကို ကယ်တင်နိုင်သေးသလော။ ဘုရားသခင်သည် ၎င်းတို့ကို မုချ ပစ်ပစ်ခါခါငြင်းကာ ဖယ်ရှားရှင်းလင်းလိမ့်မည်။ ယင်းမှာ ၎င်းတို့ကို ဘုရားသခင် မကယ်တင်ဟု ဆိုလိုသလော။ ၎င်းတို့သည် မိမိတို့ကိုယ်ကို စွန့်ပစ်ကြပြီး ဖြစ်သည်။ ၎င်းတို့သည် သမ္မာတရားအတွက် မကြိုးပမ်း၊ ဘုရားသခင်ထံ ဆုမတောင်း၊ သို့မဟုတ် ဘုရားသခင်အပေါ် မမှီခိုကြချေ။ ထို့ကြောင့် ဘုရားသခင်သည် ၎င်းတို့ကို ကယ်တင်နိုင်သလော။ တစ်ခုတည်းသော လမ်းကြောင်းမှာ ၎င်းတို့အပေါ် လက်လျှော့ရန်၊ ဘေးဖယ်ထားပြီး မိမိတို့ကိုယ်ကို သုံးသပ်ခွင့်ပေးရန် ဖြစ်သည်။ လူတို့သည် ကယ်တင်ခံရလိုပါက တစ်ခုတည်းသော နည်းလမ်းမှာ ၎င်းတို့အတွက် သမ္မာတရားကို လက်ခံရန်၊ မိမိတို့ကိုယ်ကို သိရှိရန်၊ နောင်တတရားကို လက်တွေ့လုပ်ဆောင်ပြီး သမ္မာတရား စစ်မှန်မှုကို အသက်ရှင်နေထိုင်ရန် ဖြစ်သည်။ ဤသို့ဖြင့် ဘုရားသခင်၏ လက်ခံမှုကို ၎င်းတို့ ရရှိနိုင်ပေသည်။ ဘုရားသခင်ကို ကျိုးနွံနာခံကာ ကြောက်ရွံ့နိုင်ရန်အလို့ငှာ သမ္မာတရားကို ၎င်းတို့ လက်တွေ့လုပ်ဆောင်ရမည်။ ယင်းမှာ ကယ်တင်ခြင်း၏ နောက်ဆုံး ရည်မှန်းချက် ဖြစ်သည်။ ဘုရားသခင်ကို ကျိုးနွံနာခံခြင်းနှင့် ကြောက်ရွံ့ခြင်းသည် လူများတွင် သရုပ်ထင်ရမည်ဖြစ်ကာ ယင်းအားဖြင့် ၎င်းတို့ အသက်ရှင်နေထိုင်ရမည်ဖြစ်သည်။ သင်သည် သမ္မာတရား လိုက်စားသည့် လမ်းကြောင်းကို မလျှောက်လှမ်းပါက သင် ရွေးချယ်နိုင်သည့် ဒုတိယလမ်းကြောင်း မရှိပေ။ လူတစ်ဦးသည် ဤလမ်းကြောင်းကို မလျှောက်ပါက သမ္မာတရားက ၎င်းတို့အား ကယ်တင်နိုင်သည်ကို ၎င်းတို့ မယုံကြည်ဟုသာ ဆိုနိုင်ပေသည်။ ဘုရားသခင် ပြောဆိုသည့် နှုတ်ကပတ်တော်အားလုံးသည် ၎င်းတို့ကို ပြောင်းလဲစေနိုင်ကာ စစ်မှန်သော လူတစ်ဦးဖြစ်လာနိုင်စေသည်ဟု ၎င်းတို့ မယုံကြည်ကြချေ။ ထို့အပြင် ဘုရားသခင်သည် သမ္မာတရားဖြစ်ကြောင်း အခြေခံအားဖြင့် ၎င်းတို့ မယုံကြည်ကြသကဲ့သို့ သမ္မာတရားက လူတို့ကို ပြောင်းလဲကာ ကယ်တင်နိုင်သည်ဆိုသည့် အချက်ကိုလည်း မယုံကြည်ကြချေ။ ထို့ကြောင့် ထိုအရာကို သင် မည်သို့ စိတ်ဖြာလေ့လာဆွေးနွေးသည်ဖြစ်စေ၊ ထိုသို့သော လူတစ်ဦး၏ စိတ်နှလုံးသည် အလွန် ခေါင်းမာ၏။ ၎င်းတို့သည် မည်သို့ပင်ဆိုစေ သမ္မာတရားကို လက်ခံရန် ငြင်းပယ်ကြပြီး ကယ်တင်မခံရနိုင်ကြပေ။

သင်တို့ထဲမှ တစ်ဦးတလေသည် ခေါင်းမာသော အခြေအနေတစ်ခု ရှိသလော။ (ရှိပါသည်။) သို့ဆိုလျှင် သင်တို့အားလုံးသည် ခေါင်းမာသော လူများသာ ဖြစ်သလော။ ခေါင်းမာသည့် အခြေအနေတစ်ခု ရှိခြင်းနှင့် ခေါင်းမာသော လူတစ်ဦး ဖြစ်ခြင်းတို့ကြား ခြားနားချက်မှာ အဘယ်နည်း။ နှစ်ခုသောအရာတို့သည် ကွဲပြားသော ကိစ္စရပ်များ ဖြစ်သည်နှင့်အမျှ ယင်းတို့ကို ပိုင်းခြားသင့်ပေသည်။ ခေါင်းမာသော အခြေအနေတစ်ခု ရှိခြင်းသည် ဤဖောက်ပြန်ပျက်စီးသော စိတ်သဘောထားမျိုး ရှိခြင်းဟု ဆိုလိုပေသည်။ သင်သည် သမ္မာတရားကို လက်ခံနိုင်ပါက ကယ်တင်ခြင်း ရရှိနိုင်သော်လည်း သင်သည် ခေါင်းမာသော လူတစ်ဦးဖြစ်ပါက ပြဿနာရှိလိမ့်မည်။ ခေါင်းမာသော လူတို့သည် သမ္မာတရားကို လုံးဝ လက်မခံကြချေ။ ၎င်းတို့သည် ကယ်တင်ခြင်းကို မရရှိနိုင်ကြချေ။ ယင်းမှာ ဤလူနှစ်မျိုးနှစ်စားကြား ခြားနားချက်ဖြစ်သည်။ ခေါင်းမာသော အခြေအနေတစ်ခု ရှိသူတို့သည် ပုန်ကန်တတ်သော အပြုအမူအချို့ကို ပြပြီး မိမိတို့ကိုယ်၌က ဖောက်ပြန်ပျက်စီးမှုအချို့ကို ထုတ်ဖော်ပြကြသည်။ သို့ရာတွင် ဖောက်ပြန်ပျက်စီးခြင်းကို ထုတ်ဖော်ပြသည့် ဖြစ်စဉ်အတွင်းတွင် ၎င်းတို့သည် မိမိတို့၏ အပြစ်များကို အဆက်မပြတ် ဝန်ချကာ ဘုရားသခင်ရှေ့တွင် နောင်တရကြပြီး ဘုရားသခင်၏ တရားစီရင်ခြင်း၊ ပြစ်တင်ဆုံးမခြင်းနှင့် ရိုက်နှက်ဆုံးမခြင်းတို့ကို မရပ်မနား လက်ခံကြ၏။ ကျရှုံးမှုကို ၎င်းတို့ မည်မျှ တွေ့ကြုံပါစေ၊ သို့မဟုတ် မည်မျှမှောက်မှားကြပါစေ ၎င်းတို့သည် မိမိတို့ကိုယ်ကို သုံးသပ်နိုင်ကြသည်၊ ပြဿနာများကို ဖြေရှင်းနိုင်ကြသည်၊ ပြန်ထနိုင်ကြပြီး ဘုရားသခင်နောက် ဆက်လိုက်နိုင်ကြသည်။ ဤခရီးမှတစ်ဆင့် ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားအပေါ် စစ်မှန်သည့် သိနားလည်မှု ရရှိကြပြီး ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို တွေ့ကြုံခြင်းသည် ဧကန်အမှန် ကယ်တင်ခြင်း ပုံစံတစ်ခုဖြစ်ကြောင်း၊ ပြီးလျှင် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်း မရှိဘဲနှင့် ၎င်းတို့ မလုပ်ဆောင်နိုင်ကြောင်းတို့ကို သဘောပေါက်ကြလေသည်။ မပြောင်းလဲသော နောင်တတရား၊ မစဲသော ဝန်ချခြင်းနှင့် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို မရပ်မနား လက်ခံခြင်းတို့မှတစ်ဆင့်၊ ၎င်းတို့၏ ဘဝများသည် အဆင့်ဆင့် ကြီးထွားကြပြီး ၎င်းတို့၏ ဝိညာဉ်ရေးရာ အခြေအနေ အဆက်မပြတ် ပြောင်းလဲသည်။ ဤဖြစ်စဉ်တွင် လူတစ်ဦး၏ ဖောက်ပြန်ပျက်စီးသော စိတ်သဘောထားကို တဖြည်းဖြည်း ဖယ်ရှားနိုင်သကဲ့သို့ ကြီးထွားမှုနှင့် ပြောင်းလဲမှုကို ၎င်းတို့ တွေ့ကြုံကြသည်။ ၎င်းတို့၏ ပုန်ကန်တတ်သော အပြုအမူမှ အကဲဖြတ်သည့်အခါ ထိုသို့သော လူများသည် အတော်လည်း ခေါင်းမာပုံရနိုင်ပြီး တစ်ခါတစ်ရံ ခေါင်းမာသည့် အခြေအနေတစ်ခု ရှိသော်လည်း ၎င်းတို့သည် ထိုသို့သော လူစားမျိုးမဟုတ်ကြပေ။ ၎င်းတို့သည် ထိုသို့သော လူစားမျိုး မဟုတ်ကြသည့်အတွက် အပြုသဘောဆောင်သော အပြုအမူများနှင့် တိုးတက်မှုကို ဧကန်မုချ ပြကြလေသည်။ ထိုသို့သော လူများသည် ကယ်တင်ခံရနိုင်ပေသည်။ သင်တို့သည် မည်သည့် လူစားမျိုးဖြစ်ကြသနည်း။ (ကျွန်ုပ်တို့ အမှားလုပ်မိသည့်အခါ ကျွန်ုပ်တို့ အသိအမှတ်ပြုကြပြီး ဘုရားသခင်ထံ နောင်တရကာ မိမိတို့အမှားများကို ပြုပြင်ရန် လိုလားနေကြပါသည်။) သင်တို့သည် သင်တို့၏ အမှားများ၊ သင်တို့၏ ပုန်ကန်မှုနှင့် သင်တို့ ထုတ်ဖော်သည့် ဖောက်ပြန်ပျက်စီးသော စိတ်သဘောထားတို့ကို သတိပြုမိပြီး သင်၏ စိတ်နှလုံးတွင် နောင်တနှင့် ဝမ်းနည်းမှုကို ခံစားရပါက ဤသည်မှာ ကောင်းမွန်ပြီး ကယ်တင်ခြင်းအတွက် မျှော်လင့်ချက်ရှိပေသည်။ သို့ရာတွင် သင်သည် သင်၏ ပုန်ကန်မှု၊ သို့မဟုတ် ဖောက်ပြန်ပျက်စီးခြင်းအပေါ် သင်ကိုယ်တိုင်က စိုးစဉ်းမျှ သိမြင်ခြင်း မရှိသကဲ့သို့ တစ်စုံတစ်ဦးက ထိုအရာကို ထောက်ပြသည့်အခါ သင်သည် ခေါင်းမာကာ လက်မခံတတ်မြဲရှိပါက၊ တစ်ပတ်ရိုက်ပြီး မိမိကိုယ်ကို မှန်ကြောင်းပြဖို့ကိုပင် ရွေးချယ်ပါက သင်သည် ဒုက္ခရောက်လိမ့်မည်ဖြစ်ပြီး သင့်အတွက် ကယ်တင်ခံရရန် လွယ်ကူလိမ့်မည် မဟုတ်ပေ။ သင်သည် ဘုရားသခင်ကို ယုံကြည်သည့်အချိန်မှာ တိုတောင်းကာ သုံးနှစ်မှ ငါးနှစ်တာ ကာလမျှသာ ရှိပြီး ယုံကြည်ခြင်းနှင့်ပတ်သက်၍ များစွာ သင်နားမလည်သေးပါက ယင်းမှာ သင်၏ ဝိညာဉ်ရင့်ကျက်မှုက အလွန်နည်းပါးသောကြောင့် ဖြစ်သည်။ သို့ရာတွင် သင်သည် ဆယ်နှစ်ကျော် ယုံကြည်သူတစ်ဦး ဖြစ်ပြီးဖြစ်ကာ သင့်ကိုယ်သင် မသိရှိသေးပါက၊ သို့မဟုတ် ပြုပြင်ခြင်းကို လက်မခံသေးပါက သင်သည် ဒုက္ခရောက်ပေပြီ။ ဤသည်မှာ သမ္မာတရားကို လက်ခံရန် ငြင်းပယ်သည့် ခေါင်းမာသော စိတ်သဘောထားရှိသည့် လူတစ်ဦး ဖြစ်သည်။ သမ္မာတရားကို နားမလည်သကဲ့သို့ စစ်မှန်မှု ချို့တဲ့သည့်သူများနှင့် ပတ်သက်လာသည့်အခါ ၎င်းတို့အနေဖြင့် မည်သည့် အချိန်တစ်ခုတွင် ရှိကြသည်ကို သင် ကြည့်ရမည်။ လူအချို့သည် ကောင်းမွန်သည့် အစွမ်းအစ ရှိကြသည်၊ သမ္မာတရားထဲသို့ လျင်မြန်စွာ ဝင်ရောက်ပြီး တစ်နှစ်၊ သို့မဟုတ် နှစ်နှစ်မျှသာ ယုံကြည်ပြီးနောက်တွင် အသက် ဝင်ရောက်ခြင်းက မည်သည့်အရာဖြစ်သည်ကို နားလည်ကြပြီးသားဖြစ်လေသည်။ ၎င်းတို့အနေဖြင့် အသက်ဝင်ရောက်မှုနှင့်ပတ်သက်၍ ကောင်းစွာ လုပ်ဆောင်ခဲ့သည့်၊ သမ္မာတရား၏ စစ်မှန်မှု ရှိကာ သမ္မာတရားများစွာကို နားလည်သည့် လူများနှင့် ထိတွေဆက်ဆံပြီးဖြစ်သည်မှာလည်း ဖြစ်နိုင်ပေသည်။ ယုံကြည်သူသစ်များသည် ဤအရာများကိုလည်း တမ်းတကြသောကြောင့် များစွာ နားထောင်ကြပြီး များစွာ ရရှိကြသဖြင့် အသက်ထဲသို့ လျင်မြန်စွာ ဝင်ရောက်ကြလေသည်။ လူအချို့သည် ညံ့ဖျင်းသည့် အစွမ်းအစရှိကြပြီး ၎င်းတို့အနေဖြင့် ကောင်းမွန်သော အစွမ်းအစရှိသူတို့နှင့် ထိတွေ့ဆက်ဆံရလျှင်ပင် ၎င်းတို့၏ တိုးတက်မှုသည် နှေးကွေး၏။ လူအချို့သည် သမ္မာတရားအပေါ် ရှိရင်းစွဲ မနှစ်သက်မှုတစ်ခု ရှိပြီး နှစ်ပေါင်းမည်မျှ ၎င်းတို့ ယုံကြည်သည်ဖြစ်စေ သမ္မာတရားကို လက်တွေ့လုပ်ဆောင်ကြလိမ့်မည် မဟုတ်သကဲ့သို့ ၎င်းတို့ဘဝတွင် တိုးတက်မှု ဖြစ်စေကြလိမ့်မည် မဟုတ်။ လူအချို့သည် အမှုအရာများကို လုပ်ဆောင်ဖို့ကိုသာ နှစ်သက်ကြပြီး အလွန် စိတ်ထက်သန်ကြသော်လည်း သမ္မာတရားအတွက် ကြိုးပမ်းရန် လိုလားခြင်း မရှိကြချေ။ ၎င်းတို့သည် နေ့စဉ် အလုပ်များကြသော်လည်း ဘဝတွင် တိုးတက်မှု မဖြစ်စေကြ။ ဘုရားသခင်ကို ယုံကြည်သည့်လူများသည် အခြေအနေမျိုးစုံတွင် ရှိနိုင်သည်။ သို့ရာတွင သမ္မာတရားကို ချစ်သောသူတို့သာ သမ္မာတရားကို လက်တွေ့လုပ်ဆောင်နိုင်ကြသည်၊ သမ္မာတရားကို ရရှိနိုင်ကြပြီး ကယ်တင်ခြင်း ရရှိနိုင်ကြသည်။ ယုံကြည်သူများအတွက် အကြီးမားဆုံးသော အလေးထားစရာမှာ ခေါင်းမာသော စိတ်သဘောထားတစ်ခု ရှိခြင်းနှင့် သမ္မာတရားကို လက်မခံခြင်း ဖြစ်သည်။ ထိုသို့သော လူတို့သည် ဒုက္ခအပေးဆုံးဖြစ်ပြီး ယင်းမှာ ၎င်းတို့ သဘာဝနှင့် ပတ်သက်သည့် ပြဿနာတစ်ခု ဖြစ်သည်။ ၎င်းတို့အနေဖြင့် အယူဝါဒကို လက်ခံနိုင်သော်လည်း သမ္မာတရားကို လက်ခံရန် ငြင်းပယ်ကြလေသည်။ ဤလူများသည် ကယ်တင်ခြင်းရရှိရန် ဖြစ်နိုင်ဖွယ် အနည်းဆုံးသောလူများ ဖြစ်သည်။ သမ္မာတရားကို အလွန်အမင်း မနှစ်မြို့သကဲ့သို့ သမ္မာတရားကို စိတ်ကုန်သော လူတို့နှင့်ပတ်သက်၍ လုပ်ဆောင်၍ရသည့် တစ်ခုတည်းသောအရာမှာ ၎င်းတို့ကို စွန့်ပစ်ခြင်း ဖြစ်သည်။

လိမ်ညာခြင်းနှင့်ဆိုင်သည့် ဥပမာနှစ်ခု ငါပေးမည်။ လိမ်ညာနိုင်စွမ်းရှိသည့် လူနှစ်မျိုးနှစ်စား ရှိ၏။ မည်သည့် လူများက ခေါင်းမာပြီး ကယ်နုတ်မရနိုင်သည်ကို သင်တို့ ပိုင်းခြားရန် လိုအပ်သည်။ မည်သူကို ကယ်တင်၍ ရနိုင်သည်ကိုလည်း သင် ပိုင်းခြားရန် လိုအပ်သည်။ ကယ်တင်ခံရနိုင်သည့်သူများသည် ဖောက်ပြန်ပျက်စီးခြင်းကို မကြာခဏ ထုတ်ဖော်ပြသော်လည်း သမ္မာတရားကို ၎င်းတို့ လက်ခံပြီး မိမိတို့ကိုယ်ကို သုံးသပ်ကာ သိရှိနိုင်သရွေ့ မျှော်လင့်ချက်ရှိသေး၏။ ပထမဆုံး ဥပမာအနေဖြင့် မကြာခဏ အလိမ်အညာများ ပြောသည့် လူတစ်ဦး ရှိသည်။ သို့ရာတွင် သမ္မာတရားကို သိနားလည်သည့်နောက်တွင် ၎င်းတို့ နောက်တစ်ကြိမ် အလိမ်အညာ ပြောသည့်အခါ၌ ၎င်းတို့၏ တုံ့ပြန်မှုသည် ကွဲပြားသွားသည်။ ၎င်းတို့သည် နက်ရှိုင်းသည့် စိတ်ဆင်းရဲမှုနှင့် ညှဉ်းဆဲမှုကို ခံစားခဲ့ရပြီး “ကျွန်ုပ် ပြန်လိမ်မိခဲ့သည်။ အဘယ်ကြောင့် ကျွန်ုပ် မပြောင်းလဲနိုင်ရသနည်း။ မည်သို့ပင်ဆိုစေ ဤတစ်ကြိမ်တွင် ကျွန်ုပ်သည် မိမိ၏ ဖြစ်တည်မှု အစစ်အမှန်ကို ထုတ်ဖော်ပြကာ စိတ်ဖြာလေ့လာဆွေးနွေးရန် မိမိကိုယ်ကို များစွာ ဖွင့်ချလျက် ဤကိစ္စရပ်ကို ကျွန်ုပ် ဖော်ထုတ်ရမည်။ သိက္ခာဆယ်ရန်အတွက် ကျွန်ုပ် လိမ်ညာနေမိခဲ့သည်ဆိုသည့် အချက်နှင့်ပတ်သက်၍ ကျွန်ုပ် ရှင်းလင်းရန် လိုအပ်သည်”ဟု ၎င်းတို့ တွေးဆခဲ့ကြသည်။ ဖွင့်ဟပြီး မိတ်သဟာယပြုပြီးနောက်တွင် ၎င်းတို့သည် စိတ်အေးလက်အေး ခံစားရပြီး “လက်စသတ်တော့ ရိုးသားသော လူတစ်ဦးဖြစ်ခြင်းသည် အလွန် သက်သောင့်သက်သာဖြစ်ပြီး ကောင်းသော်ငြားလည်း လိမ်ညာခြင်းသည် အလွန် နာကျင်စရာကောင်းပေသည်။ ဘုရားသခင်က လူတို့ကို ရိုးသားရန် တောင်းဆိုသည်။ ဤသည်မှာ လူတို့ ရှိသင့်သည့် ပုံသဏ္ဌာန်ဖြစ်ပါသည်”ဟု သဘောပေါက်သွားကြသည်။ ဤသုခကို အနည်းငယ် တွေ့ကြုံပြီးနောက်တွင် ထိုအချိန်မှစ၍ ၎င်းတို့သည် လိမ်ညာခြင်းကို လျော့နည်းစေခြင်း၊ တတ်နိုင်သမျှ အလိမ်အညာများ မပြောဆိုခြင်း၊ တစ်စုံတစ်ရာ ပြောစရာရှိသည့်အခါ ပြောဆိုခြင်း၊ ရိုးသားစွာ ပြောဆိုခြင်း၊ ရိုးသားသော လုပ်ဆောင်ချက်များကို လုပ်ဆောင်ခြင်းနှင့် ရိုးသားသော လူတစ်ဦး ဖြစ်ခြင်းတို့ကို အလေးဂရုပြုခဲ့ကြသည်။ သို့ရာတွင် မိမိတို့ မာနပါဝင်ပတ်သက်သည့် အခြေအနေတစ်ခုကို ရင်ဆိုင်ရသည့်အခါ အလိုအလျောက် လိမ်ညာကာ နောက်ပိုင်းတွင် ထိုအရာကို နောင်တရကြလေသည်။ ထို့နောက်တွင် မိမိတို့ အကောင်းမြင်ခံရနိုင်မည့် အခြေအနေတစ်ခုတွင် ရှိကြသည်ကို ၎င်းတို့ တွေ့သည့်အခါ တစ်ဖန် လိမ်ညာကြ၏။ ၎င်းတို့သည် “အဘယ်ကြောင့် ငါ၏ နှုတ်ကို ငါ မထိန်းချုပ်နိုင်သနည်း။ ဤသည်မှာ ငါ၏ သဘာဝနှင့်ပတ်သက်သည့် ပြဿနာတစ်ခု ဖြစ်နိုင်မည်လား။ ငါသည် လှည့်ဖြားတတ်လွန်းသလား”ဟု တွေးလျက် စိတ်ထဲတွင် မိမိတို့ကိုယ်ကို မုန်းတီးကြလေသည်။ ဤပြဿနာအား ဖြေရှင်းရမည်ကို ၎င်းတို့ သဘောပေါက်ကြလေသည်။ သို့မဟုတ်ပါက ဘုရားသခင်သည် ၎င်းတို့ကို ပစ်ပစ်ခါခါငြင်းကာ ဖယ်ရှားရှင်းလင်းမည်ဖြစ်သည်။ ၎င်းတို့သည် တစ်ဖန် လိမ်ညာမိပါက ပဲ့ပြင်ဆုံးမရန် တောင်းဆိုလျက် ဘုရားသခင်ထံ ဆုတောင်းကြပြီး အပြစ်ဒဏ်ကို လက်ခံရန် လိုလားလျက်ရှိကြသည်။ စုဝေးပွဲများတွင် မိမိတို့ကိုယ်ကို စိတ်ဖြာလေ့လာဆွေးနွေးရန် သတ္တိမွေးကြပြီး “ဤအခြေအနေများတွင် အလိမ်အညာများကို ကျွန်ုပ် ပြောသည့်အခါ ကျွန်ုပ်တွင် တစ်ကိုယ်ကောင်းဆန်သော ရည်ရွယ်ချက်များရှိပြီး ကျွန်ုပ်၏ ကြံရွယ်ချက်များအားဖြင့် ထိန်းချုပ်ခံခဲ့ရသောကြောင့် ဖြစ်ပါသည်။ ကျွန်ုပ်ကိုယ်ကျွန်ုပ် သုံးသပ်သည့်အခါ ကျွန်ုပ် လိမ်ညာသည့်အခါတိုင်းတွင် ယင်းမှာ ဝင့်ဝါမှု၊ သို့မဟုတ် ကျွန်ုပ် ကိုယ်ရေးကိုယ်တာ အကျိုးအမြတ်အတွက် ဖြစ်သည်ကို သဘောပေါက်ခဲ့သည်။ ယခုတွင် ထိုအရာကို ရှင်းလင်းစွာ ကျွန်ုပ် မြင်လေပြီ။ ကျွန်ုပ်သည် ကျွန်ုပ်၏ မာနနှင့် ကိုယ်ရေးကိုယ်တာ အကျိုးအမြတ်များအတွက် အသက်ရှင်ပါသည်။ ထိုအရာမှာ အရာရာနှင့်ပတ်သက်၍ ကျွန်ုပ်ကို တစ်ချိန်လုံး လိမ်ညာစေသောအရာ ဖြစ်သည်”ဟု ပြောကြလေသည်။ မိမိတို့ကိုယ်ပိုင် အလိမ်အညာများကို စိတ်ဖြာလေ့လာ ဆွေးနွေးနေစဉ်တွင် ၎င်းတို့၏ ကြံရွယ်ချက်များကိုလည်း ၎င်းတို့ ဖော်ထုတ်ကြပြီး ၎င်းတို့၏ ဖောက်ပြန်ပျက်စီးသော စိတ်သဘောထားနှင့်ဆိုင်သည့် ပြဿနာကို ရှာဖွေတွေ့ရှိကြသည်။ ထိုအရာမှာ နှစ်ဦးနှစ်ဖက် အကျိုးခံစားသည့် အခြေအနေတစ်ခု ဖြစ်သည်။ ၎င်းတို့သည် ရိုးသားသော လူတစ်ဦးဖြစ်ခြင်းကို လက်တွေ့လုပ်ဆောင်နိုင်ကြပြီး တစ်ချိန်တည်းတွင် ဉာဏ်အလင်းပေးမှုကို ရရှိကာ မိမိတို့၏ ဖောက်ပြန်ပျက်စီးသော စိတ်သဘောထားကို သတိပြုမိနိုင်ကြသည်။ ထို့နောက်တွင် ၎င်းတို့က “ငါပြောင်းလဲရန် လိုအပ်သည်။ ဤပြဿနာ ငါ၌ ရှိသည်ကို ငါယခုတင် ရှာဖွေတွေ့ရှိသည်။ ယင်းသည် ဘုရားသခင်ထံမှ စစ်မှန်သော ဉာဏ်အလင်းပေးခြင်း ဖြစ်သည်။ သမ္မာတရားကို လက်တွေ့လုပ်ဆောင်သော လူတို့သည် ဘုရားသခင်၏ ကောင်းချီးပေးခြင်း ခံရသည်”ဟု ချင့်ချိန်စဉ်းစားကြလေသည်။ ၎င်းတို့သည် သမ္မာတရားကို လက်တွေ့လုပ်ဆောင်ခြင်း၏ ချိုမြိန်သော အရသာအနည်းငယ်ကိုလည်း တွေ့ကြုံကြရသည်။ သို့ရာတွင် တစ်နေ့တွင် ထိုလူသည် အမှတ်တမဲ့ အလိမ်အညာတစ်ခုကို တစ်ဖန် ပြောမိ၏။ ၎င်းတို့သည် ဘုရားသခင်၏ ပဲ့ပြင်ဆုံးမမှုကို ရှာဖွေလျက် တစ်ဖန် ဘုရားသခင်ထံ ဆုတောင်းကြသည်။ ထို့အပြင် ၎င်းတို့ စကားပြောသည့်အခါ အဘယ်ကြောင့် ကွယ်ဝှက်ထားသည့် ကြံရွယ်ချက်အမြဲရှိကြသည်ဆိုသည်နှင့် ဘုရားသခင်၏ ရည်ရွယ်ချက်များအစား မိမိတို့ကိုယ်ပိုင် ဝင့်ဝါမှုနှင့် မာနကို အဘယ်ကြောင့် ၎င်းတို့ အမြဲစဉ်းစားကြသည်ဆိုသည်တို့ကို ၎င်းတို့ သုံးသပ်ကြလေသည်။ သုံးသပ်ပြီးနောက်တွင် မိမိတို့၏ ဖောက်ပြန်ပျက်စီးသော စိတ်သဘောထားအပေါ် သိနားလည်မှုအချို့ ရရှိကြပြီး မိမိတို့ကိုယ်ကို စတင် စက်ဆုပ်လာကြလေသည်။ ၎င်းတို့သည် သမ္မာတရားကို ရှာဖွေပြီး ကြိုးပမ်းရန်အတွက် ဤသို့ဆက်လက် လုပ်ဆောင်ကြသည်။ သုံးနှစ်မှ ငါးနှစ်ထိကြာပြီးနောက်တွင် ၎င်းတို့၏ အလိမ်အညာများသည် ဧကန်အမှန် နည်းသည်ထက်နည်းပါးလာပြီး ၎င်းတို့တွေးသည့်အရာကို ၎င်းတို့ ပြောဆိုပြီး ရိုးသားစွာ ပြုမူနေထိုင်သည့် အကြိမ်အရေအတွက် တိုးလာခဲ့သည်။ ၎င်းတို့၏ စိတ်နှလုံးသည် တဖြည်းဖြည်း သာ၍ ဖြူစင်လာကာ ငြိမ်သက်ခြင်းနှင့် ဝမ်းမြောက်ခြင်း တိုး၍ ပါရှိလာလေသည်။ ဘုရားသခင်၏ မျက်မှောက်တွင် အသက်ရှင်ရင်း အချိန်သာ၍ သာ၍ ကုန်ဆုံးကြပြီး ၎င်းတို့၏ အခြေအနေသည် သာ၍ သာ၍ ပုံမှန် ဖြစ်လာကြသည်။ ဤသည်မှာ ရိုးသားသော လူတစ်ဦး ဖြစ်ခြင်းကို တွေ့ကြုံရသည့်အခါ မကြာခဏ လိမ်ညာသူတစ်ဦး၏ စစ်မှန်သော အခြေအနေ ဖြစ်သည်။ သို့ဆိုလျှင် ဤလူသည် ယခုတွင် လိမ်ညာနေသေးသလော။ ၎င်းတို့သည် လိမ်ညာနိုင်စွမ်း ရှိကြသေးသလော။ ၎င်းတို့သည် ရိုးသားသော လူတစ်ဦး အမှန်တကယ် ဖြစ်ကြသလော။ ရိုးသားသော လူတစ်ဦးဖြစ်သည်ဟု ဆို၍ မရနိုင်ပေ။ ၎င်းတို့သည် ရိုးသားသော လူတစ်ဦးဖြစ်ခြင်းနှင့်ဆိုင်သည့် သမ္မာတရားကို လက်တွေ့လုပ်ဆောင်နိုင်ပြီး ရိုးသားသော လူတစ်ဦး ဖြစ်ခြင်းအား လက်တွေ့လုပ်ဆောင်သည့် ဖြစ်စဉ်တွင် ရှိကြသော်လည်း ရိုးသားသော လူတစ်ဦးအဖြစ်သို့ လုံးဝ ပြောင်းလဲခြင်း မရှိကြသေးဟုသာ ဆိုနိုင်ပေသည်။ တစ်နည်းအားဖြင့် ဤသည်မှာ သမ္မာတရားကို လက်တွေ့လုပ်ဆောင်ရန် လိုလားနေသည့် လူတစ်ဦး ဖြစ်သည်။ သမ္မာတရားကို လက်တွေ့လုပ်ဆောင်ရန် လိုလားနေသည့် လူတစ်ဦးကို သမ္မာတရားကို ချစ်သော လူတစ်ဦးအဖြစ် ပြော၍ရနိုင်သလော။ ၎င်းတို့သည် သမ္မာတရားကို လက်တွေ့လုပ်ဆောင်ကြပြီးဖြစ်ကာ အမှန်တရားများ ထုတ်ဖော်ပြခံရပြီးဖြစ်သည်။ ထို့ကြောင့် ၎င်းတို့ကို သမ္မာတရား ချစ်သောလူတစ်ဦးအဖြစ် သတ်မှတ်ရန်မှာ သဘာဝကျသည် မဟုတ်လော။ ရိုးသားသော လူတစ်ဦးဖြစ်ခြင်းအား လက်တွေ့လုပ်ဆောင်နေခဲ့စဉ်တွင် ၎င်းတို့သည် ရိုးသားစစ်မှန်ပြီး ပွင့်လင်းသည့် မိတ်သဟာယကို ချက်ချင်း လက်တွေ့မလုပ်ဆောင်နိုင်ကြပေ၊ သို့မဟုတ် ၎င်းတို့အတွင်းရှိ ကွယ်ဝှက်ထားသည့် အရာရာကို သံသယကင်းမဲ့စွာ မဖော်ထုတ်နိုင်ကြချေ။ ၎င်းတို့သည် အချို့သော အရာများကို ထိန်ချန်ထားကြဆဲဖြစ်ပြီး သတိရှိစွာ ရှေ့ဆက်တိုးရန် ကြိုးစားကြ၏။ သို့ရာတွင် ၎င်းတို့၏ ကြိုးပမ်းမှုများနှင့် အတွေ့အကြုံများမှတစ်ဆင့် ရိုးသားစွာ ၎င်းတို့ အသက်ရှင်လေ၊ ၎င်းတို့ သာ၍ စိတ်ချမ်းသာလေဖြစ်ကြောင်း၊ စိတ်၏ အေးချမ်းမှု ၎င်းတို့ရှိလေဖြစ်ကြောင်း၊ ကြီးမားသည့် အခက်အခဲများ မရှိဘဲ သမ္မာတရားကို လက်တွေ့လုပ်ဆောင်ရန် သာ၍ လွယ်ကူလေ ဖြစ်ကြောင်းကို ၎င်းတို့ သဘောပေါက်ကြလေသည်။ ထိုအခါမှသာ ၎င်းတို့သည် ရိုးသားသော လူတစ်ဦး ဖြစ်ခြင်း၏ ချိုမြိန်မှုကို မြည်းစမ်းရပြီး ဘုရားသခင်၌ ၎င်းတို့၏ ယုံကြည်ခြင်း တိုးပွားခြင်း ဖြစ်သည်။ ရိုးသားသော လူတစ်ဦးဖြစ်ခြင်းက မည်သည့်အရာဖြစ်သည်ကို တွေ့ကြုံခြင်းအားဖြင့် ၎င်းတို့သည် သမ္မာတရားကို လက်တွေ့လုပ်ဆောင်လာနိုင်ရုံသာမက ၎င်းတို့၏ စိတ်နှလုံးတွင် ငြိမ်သက်ခြင်းနှင့် ဝမ်းမြောက်ခြင်းကိုလည်း တွေ့ကြုံကြလေသည်။ တစ်ချိန်တည်းတွင် ရိုးသားမှုကို လက်တွေ့လုပ်ဆောင်ခြင်း လမ်းကြောင်းအပေါ် သာ၍ ရှင်းလင်းသည့် သိနားလည်မှုတစ်ခု ရရှိကြလေသည်။ ရိုးသားသော လူတစ်ဦး ဖြစ်ခြင်းသည် ခက်ခဲလွန်းခြင်း မရှိသည်ကို ၎င်းတို့ ခံစားမိကြသည်။ လူတို့အတွက် ဘုရားသခင်၏ သတ်မှတ်ချက်များမှာ ယုတ္တိတန်ပြီး ရယူနိုင်သောအရာဖြစ်သည်ကို ၎င်းတို့ မြင်ကြကာ ဘုရားသခင်၏ အမှုတော်အပေါ် သိနားလည်မှုအချို့ ရရှိကြသည်။ ဤအရာအားလုံးသည် အပို အကျိုးကျေးဇူးတစ်ခု မဟုတ်ဘဲ ထို့ထက် လူတစ်ဦးက ၎င်းတို့၏ အသက်ဝင်ရာက်မှု ခရီးစဉ်တွင် ရရှိသင့်သောအရာတစ်ခု ဖြစ်ပြီး ထိုအရာကို ၎င်းတို့ ရရှိနိုင်စွမ်း ရှိကြလေသည်။

ဒုတိယဥပမာမှာ လိမ်ညာရသည်ကို နှစ်သက်သည့် လူတစ်ဦးအကြောင်း ဖြစ်သည်။ ထိုအရာမှာ ၎င်းတို့၏ သဘာဝတွင် ရှိ၏။ ၎င်းတို့ စကားမပြောသည့်အခါ အဆင်ပြေသော်လည်း ၎င်းတို့၏ နှုတ်ကို ဖွင့်လိုက်သည်နှင့်တစ်ပြိုင်နက် ၎င်းတို့၏ စကားက မသမာမှုများနှင့် ပြည့်နေ၏။ ဤအရာကို ၎င်းတို့ တမင်တကာ လုပ်ဆောင်သည်ဖြစ်စေ၊ မလုပ်ဆောင်သည်ဖြစ်စေ အတိုချုပ်ပြောရလျှင် ၎င်းတို့ ပြောသည့်အရာ အများစုကို ယုံကြည်၍မရပေ။ တစ်နေ့တွင် အလိမ်အညာတစ်ခု ပြောဆိုပြီးနောက် ၎င်းတို့က “အလိမ်အညာပြောဆိုခြင်းသည် မှားယွင်းပြီး ထိုအရာကို ဘုရားသခင် မနှစ်သက်ပါ။ ငါလိမ်သည်ကို လူတို့ သိသွားပါက ငါ သိက္ခာကျမည်။ သို့ရာတွင် တစ်စုံတစ်ဦးက ငါ လိမ်ညာသည်ကို သတိပြုမိခဲ့သည့်အလား ထင်ရသည်။ ကောင်းပြီ၊ ယင်းကို ငါ အလွယ်တကူ စီမံနိုင်သည်။ သူတို့၏ သတိထားမှု လျော့စေရန်၊ သူတို့ကို အထင်အမြင်မှားစေပြီး ငါ၏ အလိမ်အညာများကို မရိပ်စားမိနိုင်စေရန်အလို့ငှာ နောက်ထပ် အကြောင်းအရာတစ်ခုကို ရှာပြီး မတူကွဲပြားသည့် အသုံးအနှုန်းကို သုံးလိုက်မည်။ ယခု ယင်းသည် သာ၍ပင် လိမ္မာပါးနပ်သည် မဟုတ်ပါလား”ဟု တွေးဆကြသည်။ ထို့နောက် ၎င်းတို့၏ ယခင် အလိမ်အညာကို ဖုံးဖိပြီး ဟာကွက်များကို ဖာထေးရန် သာ၍ ကြီးမားသည့် အလိမ်အညာတစ်ခုကို ပြောဆိုကြလေသည်။ ယင်းက လူတို့ကို အောင်မြင်စွာ အထင်အမြင်မှားစေ၏။ ၎င်းတို့က “ငါ တော်လိုက်ပုံများ။ ဟာကွက်တစ်ခုမျှမရှိသည့် အလိမ်အညာတစ်ခု ငါ ပြောခဲ့ပြီး ဟာကွက်အချို့ ရှိလျှင်ပင် ထိုဟာကွက်တို့ကို ဖုံးဖိရန် ငါ တစ်ဖန် အလိမ်အညာ ပြော၍ရသည်။ လူအများစုက ငါ့ကို မရိပ်စားမိနိုင်ပါ။ အလိမ်အညာများ ပြောဆိုခြင်းသည် ကျွမ်းကျင်မှုလိုအပ်သည်”ဟု တွေးလျက် မိမိတို့ကိုယ်ကို ဟုတ်လှပြီဟု ဘဝခိုက်ကာ စိတ်ကျေနပ်ကြလေသည်။ လူအချို့က “အလိမ်အညာများ ပြောဆိုခြင်းသည် ကြိုးစားအလုပ်လုပ်ရသည်။ အလိမ်အညာတစ်ခု ပြောပြီးနောက်တွင် ထိုအလိမ်အညာကို ဖုံးဖိရန် နောက်ထပ် အလိမ်အညာများစွာ ပြောရသည်။ အတွေးနှင့် အားထုတ်မှု များစွာ လိုအပ်သည်”ဟု ဆိုကြသည်။ သို့ရာတွင် ဤဆရာတစ်ဆူ လိမ်ညာသူက ထိုသို့ မခံစားရပေ။ ဤဖြစ်ရပ်တွင် ၎င်းတို့၏ အလိမ်အညာများက ဖော်ထုတ်မခံရပေ။ အခြားသူများကို လှည့်ဖြားရန် အလိမ်အညာတစ်ခုကို အောင်မြင်စွာ ၎င်းတို့ ပြောဆိုပြီးနောက်တွင် အဖော်ထုတ်ခံမည်ကို ၎င်းတို့ စိုးရွံ့သည့်အခါ ယခင် အလိမ်အညာကို ဖုံးဖိရန် တစ်ဖန် လိမ်ညာကြပြန်သည်။ ၎င်းတို့သည် ဂုဏ်ယူကြပြီး ၎င်းတို့ စိတ်နှလုံးတွင် အပြစ်ရှိသည့် စိတ်၊ သို့မဟုတ် မိမိကိုယ်ကို အပြစ်တင်မှု မရှိပေ။ ၎င်းတို့၏ အသိစိတ်သည် ထိခိုက်ခြင်းမရှိ။ ယင်းမှာ အဘယ်သို့ ဖြစ်နိုင်ရသနည်း။ လိမ်ညာခြင်းက ၎င်းတို့အတွက် မည်မျှအန္တရာယ်ရှိသည်ကို ၎င်းတို့ မသိကြချေ။ ၎င်းတို့က ယခင်အလိမ်အညာများကို ဖုံးဖိရန် အလိမ်အညာများကို အသုံးပြုခြင်းသည် ၎င်းတို့၏ ပုံရိပ်ကို တိုးတက်ခွင့်ပေးပြီး အကျိုးကျေးဇူးများ ရရှိခွင့်ပေးသည်ဟု ယုံကြည်ကြသည်။ အခက်အခဲနှင့် ပင်ပန်းနွမ်းလျမှုရှိလင့်ကစား ထိုက်တန်သည်ဟု တွေးကြသည်။ ယင်းသည် သမ္မာတရားကို သိနားလည်ခြင်းနှင့် လက်တွေ့လုပ်ဆောင်ခြင်းထက် သာ၍ အရေးပါသည်ဟု ၎င်းတို့ ယုံကြည်ကြသည်။ ၎င်းတို့သည် အပြစ်ရှိသည့်စိတ် မခံစားရဘဲ အဘယ်ကြောင့် မကြာခဏ လိမ်ညာကြသနည်း။ အဘယ်ကြောင့်ဆိုသော် ၎င်းတို့သည် မိမိတို့ စိတ်နှလုံးတွင် သမ္မာတရားအတွက် ခုံမင်မြတ်နိုးခြင်း မရှိသောကြောင့် ဖြစ်သည်။ ၎င်းတို့၏ ဝင့်ဝါမှု၊ နာမည်ဂုဏ်သတင်းနှင့် အဆင့်အတန်းတို့ကို ၎င်းတို့ တန်ဖိုးထားကြသည်။ အခြားသူများနှင့် မိတ်သဟာယတွင် မိမိတို့ စိတ်နှလုံးကို မည်သည့်အခါတွင်မျှ မဖွင့်ဟကြချေ။ ထိုအစား မိမိတို့၏ အလိမ်အညာများကို ဖုံးဖိရန် အယောင်ဆောင်သည့် သွင်ပြင်နှင့် တုပထားသောအသွင်ကို အသုံးပြုကြသည်။ ယင်းမှာ လူတို့နှင့် ၎င်းတို့ ဆက်ဆံပြီး ပါဝင်ပတ်သက်ကြပုံ ဖြစ်သည်။ အလိမ်အညာမည်မျှကို ၎င်းတို့ ပြောသည်ဖြစ်စေ၊ အလိမ်အညာမည်မျှကို ဖုံးဖိကြသည်ဖြစ်စေ၊ သို့မဟုတ် တစ်ကိုယ်ကောင်းဆန်ပြီး ယုတ်ညံ့သည့် ရည်ရွယ်ချက်များကို ၎င်းတို့ မည်မျှ ကွယ်ဝှက်ထားကြသည်ဖြစ်စေ ၎င်းတို့၏ စိတ်နှလုံးတွင် အပြစ်ရှိသည့်စိတ်၊ သို့မဟုတ် မသက်မသာဖြစ်ခြင်းကို မခံစားကြရပေ။ ယေဘုယျအားဖြင့် ပြောရလျှင် အသိစိတ်အချို့နှင့် လူ့သဘာဝအချို့ရှိသော လူတို့သည် အလိမ်အညာတစ်ခု ပြောပြီးနောက်တွင် စိတ်မသက်မသာ ဖြစ်ခြင်းကို ခံစားရမည်ဖြစ်ပြီး ထိုအရာကို စိတ်လျှော့လိုက်ရန် ခက်ခဲကြပေမည်။ အရှက်ရသည့် ခံစားချက်တစ်ခု ၎င်းတို့ ရှိကြမည်။ သို့ရာတွင် ဤလူသည် ဤသို့ မတွေးပေ။ အလိမ်အညာတစ်ခု ပြောပြီးနောက်တွင် ၎င်းက “ယနေ့တွင် နောက်ထပ် အလိမ်အညာတစ်ခုပြောပြီး ထိုလူအကို ငါ လှည့်စားခဲ့သည်။ ငါ အလွန် စိုးရိမ်ခဲ့သော်လည်း ၎င်းက ဘာကြောင့်မှန်းမသိ သတိပင်မထားမိကြပါ”ဟု ဆိုလျက် မိမိကိုယ်ကို ကျေနပ်နေလေသည်။ စဉ်ဆက်မပြတ် လိမ်ညာပြီး အလိမ်အညာများကို ဖုံးဖိရသည့် ဤဘဝကို ၎င်းတို့ မငြီးငွေ့ကြသလော။ ဤသည်မှာ မည်သည့် သဘာဝမျိုးဖြစ်သနည်း။ ယင်းမှာ နတ်ဆိုး၏ သဘာဝ ဖြစ်သည်။ နတ်ဆိုးများသည် နေ့တိုင်း လိမ်ညာကြ၏။ ၎င်းတို့သည် မသက်မသာဖြစ်သည့် ခံစားချက်၊ သို့မဟုတ် စိတ်ဆင်းရဲမှု တစ်ခုမျှမရှိဘဲ အလိမ်အညာများနှင့် ဘဝတစ်ခုကို အသက်ရှင်ကြ၏။ ၎င်းတို့အနေဖြင့် မသက်မသာဖြစ်ခြင်း၊ သို့မဟုတ် စိတ်ဆင်းရဲမှုကို ခံစားရပါက ၎င်းတို့ ပြောင်းလဲကြမည်ဖြစ်သော်လည်း လိမ်ညာခြင်းသည် ၎င်းတို့၏ သဘာဝဖြစ်သောကြောင့် စိတ်ဆင်းရဲမှုကို ၎င်းတို့ မခံစားရကြပေ။ ယင်းသည် ၎င်းတို့၏ သဘာဝတွင် ရှိ၏။ ၎င်းတို့သည် မိမိတို့ကိုယ်ကို အလိုအလျောက် ဖော်ပြသည့်အခါ ၎င်းတို့သည် ချုပ်တည်းမှု မပြသကဲ့သို့ မိမိကိုယ်ကို သုံးသပ်မှုတစ်ခုတလေမျှ မလုပ်ဆောင်ကြချေ။ အလိမ်အညာ မည်မျှ ၎င်းတို့ ပြောဆိုသည်ဖြစ်စေ၊ သို့မဟုတ် လှည့်ဖြားမှု မည်မျှ ကျူးလွန်သည်ဖြစ်စေ ၎င်းတို့၏ စိတ်နှလုံးတွင် အပြစ်ရှိသည့်စိတ် မခံစားရသကဲ့သို့ လိပ်ပြာမသန့် မဖြစ်ကြချေ။ ဘုရားသခင်က လူတို့စိတ်နှလုံး၏ အတွင်းကျကျ နေရာများကို စိစစ်ကြောင်း ၎င်းတို့ မသိကြချေ။ ၎င်းတို့ ယူထားသည့် တာဝန်ကိုလည်းကောင်း၊ အလိမ်အညာများ ပြောကာ လိမ်လည်လှည့်ဖြားစွာ ပြုမူပြီးနောက် ၎င်းတို့ ရရှိမည့် အပြစ်ဒဏ်ကိုလည်းကောင်း သဘောပေါက်ရန် ၎င်းတို့ ပျက်ကွက်ကြ၏။ ၎င်းတို့၏ အကြီးမားဆုံးသော အကြောက်တရားမှာ တစ်စုံတစ်ဦးက ၎င်းတို့၏ လှည့်ဖြားတတ်သည့် အကြံများကို ဖော်လိမ့်မည်ကိုဖြစ်သည်။ ထို့ကြောင့် ၎င်းတို့သည် မိမိတို့၏ အကြံများကို ဖုံးဖိရန် သာ၍ပင်များသည့် အလိမ်အညာများကို အားကိုးအားထား ပြုကြပြီး တစ်ချိန်တည်းတွင် မိမိတို့၏ အလိမ်အညာများနှင့် မိမိတို့ အဘယ်သူဖြစ်ကြောင်း အမှန်တရားကို ဖုံးကွယ်ရန် နည်းလမ်းအချို့၊ နည်းစနစ်အချို့ကို ရှာတွေ့ရန် ကြိုးစားရင်း မိမိတို့ကိုယ်ကို ခြေကုန်လက်ပန်းကျစေကြသည်။ ထိုသို့သောလူတစ်ဦးသည် ဖြစ်စဉ်တစ်ခုလုံးအတွင်းတွင် နောင်တလုံးဝ ရလေပြီလော။ အပြစ်တင်မှု၊ သို့မဟုတ် ဝမ်းနည်းမှု တစ်ခုတလေ ၎င်းတို့ ရှိကြသလော။ ၎င်းတို့သည် မိမိတို့ကိုယ်ကို ပြောင်းလဲရန် စိတ်ဆန္ဒတစ်ခုတလေ ရှိကြသလော။ မရှိကြပါ။ အလိမ်အညာများ ပြောရန်၊ သို့မဟုတ် အလိမ်အညာများကို ဖုံးဖိရန်မှာ အပြစ်တစ်ခုမဟုတ်ကြောင်း၊ လူအများစုက ဤသို့ အသက်ရှင်ကြကြောင်း ၎င်းတို့ တွေးထင်ကြပြီး ပြောင်းလဲရန် ရည်ရွယ်ချက်မရှိကြချေ။ ရိုးသားသောလူတစ်ဦး ဖြစ်ခြင်းအတွက်မူ ၎င်းတို့က “ငါသည် စိတ်နှလုံးထဲမှ စကားပြောကာ အမှန်တရားကို ပြောရင်း ရိုးသားသော လူတစ်ဦး အဘယ်ကြောင့် ဖြစ်သင့်သနည်း၊ ယင်းကို ငါ မလုပ်။ ယင်းမှာ မိုက်မဲသူတို့အတွက်ဖြစ်ပြီး ငါသည် ထိုမျှ မမိုက်ပါ။ ငါသည် လိမ်ညာပြီး အဖော်ခံရမည်စိုးလျှင် ထိုအရာကို ဖုံးဖိရန် အခြား အကြောင်းပြချက်များနှင့် ဆင်ခြေများကိုသာ ရှာလိုက်မည်။ ငါသည် ရိုးသားစွာ စကားပြောနိုင်သည့် လူစားမျိုး မဟုတ်ပါ။ ထိုသို့ပြောပါက ငါသည် ငအတစ်ယောက် လုံးလုံး ဖြစ်မည်”ဟု မိမိတို့ စိတ်နှလုံးတွင် တွေးထင်ကြသည်။ ၎င်းတို့သည် သမ္မာတရားကို လက်မခံ၊ အသိအမှတ် မပြုကြချေ။ သမ္မာတရားကို အသိအမှတ်မပြုသော လူတို့သည် သမ္မာတရားကို မချစ်နိုင်ကြချေ။ ထိုသို့သော လူတစ်ဦး၏ အခြေအနေသည် အစမှသည် အဆုံးထိ မည်သည့်အရာ ဖြစ်သနည်း။ (၎င်းတို့သည် မိမိတို့ကိုယ်ကို ပြောင်းလဲရန် လိုလားခြင်းမရှိကြချေ။) အမှုအရာများကို ပြောင်းလဲရန် ၎င်းတို့၏ မလိုလားမှုသည် ဓမ္မဓိဋ္ဌာန်ကျသော ရှုထောင့်မှ ထင်ရှားမြင်သာသော်လည်း ၎င်းတို့၏ စစ်မှန်သော အခြေအနေမှာ အဘယ်နည်း။ ရိုးသားသော လူတစ်ဦးဖြစ်ခြင်းသည် ဘဝတွင် မှန်ကန်သည့် လမ်းကြောင်းဖြစ်သည်ကို အခြေခံအားဖြင့် ၎င်းတို့ ငြင်းပယ်ကြသည်။ သမ္မာတရား၏ တည်ရှိခြင်း၊ နောက်ဆုံးသော ကာလတွင် လူသားမျိုးနွယ်အပေါ် ဘုရားသခင်၏ တရားစီရင်ခြင်းနှင့် လူ၏ အဆုံးသတ်နှင့် အကြင်သူ၏ လုပ်ဆောင်ချက်များအတွက် အပြစ်ဒဏ်တစ်ခုစီအား ဘုရားသခင် ဆုံးဖြတ်ကြောင်းကိုလည်း ၎င်းတို့ ငြင်းပယ်ကြလေသည်။ ဤသည်မှာ မမြော်မြင်တတ်ခြင်း၊ မိုက်မဲခြင်းနှင့် ခေါင်းမာခြင်း ဖြစ်သည်။ ထိုသို့သော အတွေးသည် ၎င်းတို့၏ ခေါင်းမာသည့် အခြေအနေ၊ လုပ်ရပ်များနှင့် အပြုအမူများကို ဖြစ်စေသည်။ ဤအရာများသည် အကြင်သူ၏ သဘာဝ အနှစ်သာရမှ ထွက်ပေါ်လေသည်။ ယင်းမှာ ၎င်းတို့သည် အမှန်ပင် လှည့်ဖြားတတ်သော လူစားမျိုး ဖြစ်ပြီး ၎င်းတို့ မပြောင်းလဲနိုင်ကြပေ။ ထိုသို့သော လူများက သမ္မာတရားကို လက်ခံရန် ငြင်းပယ်ကြပြီး ထိုသမ္မာတရားအား နားမလည်နိုင်ကြသည့်အခါ လူအချို့က မယုံကြည်နိုင်လောက်အောင် ဖြစ်ကောင်းဖြစ်နိုင်သည်။ အဖြစ် အမှန်တွင် ဤသို့သော လူများသည် ပုံမှန် လူ့သဘာဝကင်းမဲ့ပြီး ၎င်းတို့၏ အသိစိတ်သည် အလုပ်လုပ်ခြင်း မရှိပေ။ ထို့အပြင် ၎င်းတို့သည် ပုံမှန် လူ့သဘာဝ၏ အသိစိတ် ကင်းမဲ့ကြ၏။ သမ္မာတရားနှင့် တရားစီရင်ခြင်း နှုတ်ကပတ်တော်များကို ကြားသည်နှင့် ပုံမှန် လူ့သဘာဝနှင့် အသိစိတ်ရှိသည့် လူတစ်ဦးသည် အနည်းဆုံး မိမိကိုယ်ကို သုံးသပ်ကာ အမှန်ပင် နောင်တရမည်ဖြစ်သော်လည်း ဤလူသည် မှန်သော လမ်းခရီးကို ကြားပြီးနောက်တွင် မည်သည့် တုံ့ပြန်မှုမျှ မပြချေ။ ၎င်းသည် နှစ်ကာလများတစ်လျှောက် ဘုရားသခင်ကို ၎င်းတို့၏ ယုံကြည်ခြင်းတွင် ပြောင်းလဲမှု အနည်းငယ်မျှမရှိဘဲ စာတန်၏ အတွေးအခေါ်အတိုင်း မလျှော့တမ်း အသက်ရှင်နေဆဲ ဖြစ်သည်။ ထိုသို့သော လူတစ်ဦးသည် ပုံမှန်လူ့သဘာဝ၏ အသိစိတ် ကင်းမဲ့သည်။ ထိုသို့သော လူတစ်ဦးအတွက် ကယ်တင်ခံရရန် ခက်ခဲ၏။

ဤလူနှစ်မျိုးနှစ်စားထဲမှ မည်သည့်လူစားမျိုးကို ဘုရားသခင် ကယ်တင်သည်ဟု သင်တို့ ထင်သနည်း။ (ပထမအမျိုးအစားဖြစ်သည်။ အဘယ်ကြောင့်ဆိုသော် ၎င်းတို့ လိမ်ညာသော်လည်း သမ္မာတရားကို လက်ခံနိုင်ပြီး ရိုးသားသောကြောင့် ဖြစ်သည်။) လူတို့က ဤအရာကို မြင်ပြီး “ဘုရားသခင် ကယ်တင်သည့် လူတို့သည် မည်သို့များ အမြဲ လိမ်ညာကာ မှားယွင်းသည့်အရာကို လုပ်ဆောင်နိုင်နေဆဲ ဖြစ်သနည်း။ သူတို့သည် ဖောက်ပြန်ပျက်စီးသော လူများ ဖြစ်နေကြဆဲ မဟုတ်ပါလား။ သူတို့သည် ခြောက်ပြစ်ကင်းသဲလဲစင် မဟုတ်ပါ”ဟု ဆိုကောင်းဆိုနိုင်သည်။ ၎င်းတို့သည် “ခြောက်ပြစ်ကင်းသဲလဲစင်” ဟူသော စကားလုံးကို ဤနေရာတွင် သုံးကြ၏။ ယင်းနှင့် ပတ်သက်၍ မည်သည့်အရာကို သင် တွေးထင်ပါသနည်း။ ဤသည်တို့မှာ ဘဝ၏ ပုံမှန်ကြီးထွားမှု ဖြစ်စဉ်ကို နားမလည်သည့် လူတစ်ဦး၏ စကားများ ဖြစ်သည်။ ဘုရားသခင်သည် အပြစ်အနာအဆာ မရှိသည့်လူများ၊ သို့မဟုတ် လက်တွေ့ဘဝနှင့် ကင်းကွာလျက် အသက်ရှင်သောသူများကို မဟုတ်ဘဲ စာတန်၏ ဖောက်ပြန်ပျက်စီးစေခြင်းခံခဲ့ရပြီး ဖောက်ပြန်ပျက်စီးသော စိတ်သဘောထားများရှိသည့် လူများကို ကယ်တင်သည်။ လူအချို့သည် ဖောက်ပြန်ပျက်စီးခြင်း အနည်းငယ်ကို ထုတ်ဖော်သည့်အခါ “ငါသည် ဘုရားသခင်ကို တစ်ဖန် အတိုက်အခံလုပ်မိပြီ။ ဘုရားသခင်ကို နှစ်များစွာ ငါယုံကြည်ပြီးဖြစ်ကာ မပြောင်းမလဲရှိနေဆဲဖြစ်သည်။ ဘုရားသခင်သည် မုချ ငါ့ကို မည်သို့မျှ အလိုမရှိတော့ပါ”ဟု တွေးကြသည်။ ထို့နောက် ၎င်းတို့သည် မျှော်လင့်ချက်မဲ့မှုကို ကျိတ်မှိတ်လက်ခံကာ သမ္မာတရားကို လိုက်စားရန် မလိုမလား ဖြစ်လာကြသည်။ ဤသဘောထားကို သင် မည်သို့ တွေးထင်သနည်း။ ၎င်းတို့ကိုယ်တိုင်သည် သမ္မာတရားအပေါ် လက်လျှော့ထားကြပြီး ဘုရားသခင်သည် ၎င်းတို့ကို အလိုမရှိတော့ဟု ယုံကြည်ကြသည်။ ဤသည်မှာ ဘုရားသခင်အပေါ် အထင်လွဲခြင်းတစ်ခု မဟုတ်လော။ ထိုသို့သော အပျက်သဘောဆောင်ခြင်းသည် စာတန်၏ အသုံးချခြင်းခံရရန် အလွယ်ကူဆုံးသော နည်းလမ်း ဖြစ်သည်။ စာတန်က “အသင် ငမိုက်သား။ ဘုရားသခင်သည် သင့်ကို ကယ်တင်လိုသော်လည်း သင်သည် ဤကဲ့သို့ ဆင်းရဲဒုက္ခ ခံစားနေဆဲပါတကား။ ထို့ကြောင့် လက်သာလျှော့လိုက်ပါ။ သင်လက်လျှော့ပါက ဘုရားသခင် သင့်ကို ဖယ်ရှားရှင်းလင်းလိမ့်မည်၊ ယင်းမှာ သင့်ကို ငါ့ထံ လက်လွှဲပေးလိုက်ခြင်းနှင့် အတူတူပင် ဖြစ်သည်။ ငါသည် သင့်ကို သေသည်အထိ ညှဉ်းဆဲမည်”ဟု ဆိုလျက် ၎င်းတို့ကို လှောင်ပြောင်၏။ စာတန် အောင်မြင်သွားသည်နှင့်တစ်ပြိုင်နက် အကျိုးဆက်များက မတွေ့ဝံ့စရာဖြစ်လိမ့်မည်။ ထို့ကြောင့် လူတစ်ဦးသည် မည်သည့် အခက်အခဲများ၊ သို့မဟုတ် အပျက်သဘောကို ရင်ဆိုင်ရသည်ဖြစ်စေ ၎င်းတို့ လက်လျှော့၍ မဖြစ်ပေ။ ဖြေရှင်းချက်များအတွက် သမ္မာတရားကို ၎င်းတို့ ရှာဖွေရမည်ဖြစ်ပြီး မလှုပ်မယှက် မစောင့်ဆိုင်းရ။ ဘဝ၏ ကြီးထွားမှု ဖြစ်စဉ်နှင့် လူသား ကယ်တင်ခြင်း လမ်းကြောင်းအတွင်းတွင် လူတို့သည် တစ်ခါတစ်ရံ မှားယွင်းသည့် လမ်းကြောင်းကို လျှောက်ကောင်း လျှောက်နိုင်သည်၊ သွေဖည်နိုင်သည်၊ သို့မဟုတ် ဘဝတွင် မရင့်ကျက်သည့် အခြေအနေနှင့် အပြုအမူများကို ထုတ်ဖော်ပြကောင်းပြနိုင်သည်။ ၎င်းတို့တွင် အားနည်းပြီး အပျက်သဘောဆောင်သည့် အချိန်များ၊ မှားယွင်းသည့်အရာများကို ပြောဆိုမိသည့်၊ မှောက်မှားမိသည့် အချိန်များ၊ သို့မဟုတ် ကျရှုံးမှုကို တွေ့ကြုံရသည့် အချိန်များ ရှိကောင်းရှိနိုင်သည်။ ဤအရာအားလုံးသည် ဘုရားသခင်၏ အမြင်တွင် ပုံမှန်ဖြစ်၏။ သူသည် ထိုအရာကြောင့် ၎င်းတို့အား ဗွေမယူပေ။ လူအချို့က မိမိတို့၏ ဖောက်ပြန်ပျက်စီးမှု အလွန် နက်ရှိုင်းပြီး ဘုရားသခင်ကို မည်သည့်အခါတွင်မျှ စိတ်မကျေနပ်စေနိုင်ဟု တွေးထင်ကြသောကြောင့် ဝမ်းနည်းပူဆွေးကာ မိမိတို့ကိုယ်ကို စက်ဆုပ်ရွံ့ရှာကြသည်။ ဤကဲ့သို့ နောင်တရသော စိတ်နှလုံးရှိသူများသည် ဘုရားသခင် ကယ်တင်သည့်သူများ အတိအကျဖြစ်လေသည်။ တစ်ဖက်တွင်မူ ဘုရားသခင်၏ ကယ်တင်ခြင်းကို ၎င်းတို့ မလိုအပ်ဟု ယုံကြည်သူများ၊ ၎င်းတို့သည် လူကောင်းများဖြစ်ပြီး ၎င်းတို့နှင့် ပတ်သက်၍ မည်သည့်အရာမျှ မမှားယွင်းဟု တွေးထင်သူများသည် ဘုရားသခင် ကယ်တင်နေကျဖြစ်သည့် သူများမဟုတ်ပေ။ ငါ သင်တို့ကို ပြောပြနေသည့်အရာ၏ နောက်ကွယ်ရှိ အဓိပ္ပာယ်မှာ အဘယ်နည်း။ နားလည်သည့်သူမည်သူမဆို ထုတ်ပြောကြလော့။ (သင်၏ ကိုယ်ပိုင် ဖောက်ပြန်ပျက်စီးခြင်း ထုတ်ဖော်ခြင်းများကို ကောင်းမွန်စွာ ကိုင်တွယ်ရန်၊ သမ္မာတရားကို လက်တွေ့လုပ်ဆောင်ခြင်းအပေါ် အာရုံစိုက်လော့။ ပြီးလျှင် သင်သည် ဘုရားသခင်၏ ကယ်တင်ခြင်းကို ရရှိလိမ့်မည်။ သင်သည် ဘုရားသခင်ကို တစ်စိုက်မတ်မတ် အထင်လွဲပါက မျှော်လင့်ချက်မဲ့ခြင်းကို အလွယ်တကူ လက်ခံမိလိမ့်မည်။) သင်သည် ယုံကြည်ချက်ရှိရမည်ဖြစ်ပြီး “ယခုအချိန်တွင် ကျွန်ုပ် အားနည်းပြီး မှောက်မှားကာ ကျရှုံးသော်ငြားလည်း ငါကြီးထွားလိမ့်မည်ဖြစ်ပြီး တစ်နေ့တွင် သမ္မာတရားကို နားလည်လိမ့်မည်၊ ဘုရားသခင်ကို စိတ်ကျေနပ်စေလိမ့်မည် ဖြစ်ပြီး ကယ်တင်ခြင်းကို ရရှိလိမ့်မည်”ဟု ပြောရမည်။ သင်သည် ဤဆုံးဖြတ်ချက် ရှိရမည်။ မည်သည့် ဆုတ်ဆိုင်းမှုများ၊ အခက်အခဲများ၊ ကျရှုံးမှုများ၊ သို့မဟုတ် ချွတ်ချော်မှုများကို သင်ကြုံရသည်ဖြစ်စေ အပျက်သဘောမဆောင်ရ။ မည်သည့်လူစားမျိုးကို ဘုရားသခင် ကယ်တင်ကြောင်း သင်သိရမည်။ ထို့အပြင် သင်သည် ဘုရားသခင်၏ ကယ်တင်ခြင်းခံရရန် အရည်အချင်းမပြည့်မီသေးကြောင်း ခံစားရပါက၊ သို့မဟုတ် ဘုရားသခင် စက်ဆုပ်သည့် အခြေအနေများတွင်ဖြစ်စေ၊ မနှစ်သက်သည့် အခြေအနေများတွင်ဖြစ်စေ သင် ရှိနေသည့် ဖြစ်ရပ်များရှိပါက၊ သို့မဟုတ် ညံ့ဖျင်းစွာ သင် ပြုမူသကဲ့သို့ ဘုရားသခင်က သင့်ကို လက်မခံသည့်အချိန်များဖြစ်စေ၊ သင့်ကို ပစ်ပစ်ခါခါငြင်းသည့် အချိန်များဖြစ်စေ ရှိပါက ကိစ္စမရှိပါ။ ယခုတွင် သင် သိပြီဖြစ်ပြီး ယင်းမှာ အလွန်နောက်မကျချေ။ သင်နောင်တရသရွေ့ ဘုရားသခင်က သင့်ကို အခွင့်အရေးတစ်ခု ပေးလိမ့်မည်။

ဘုရားသခင်ကို ယုံကြည်သည့်အခါ မည်သည့်အရာ အရေးကြီးဆုံး ဖြစ်သနည်း။ (သမ္မာတရားကို သိနားလည်ခြင်းနှင့် အသက် ဝင်ရောက်မှု ရှိခြင်း ဖြစ်သည်။) မှန်၏၊ အသက် ဝင်ရောက်ခြင်းသည် အရေးအကြီးဆုံးသော အရာဖြစ်သည်။ ဦးစားပေးဖြစ်၏။ သင် မည်သည့်တာဝန်များကို ထမ်းဆောင်သည်ဖြစ်စေ၊ သင် မည်မျှ အသက်အရွယ် အိုမင်းသည်ဖြစ်စေ၊ ဘုရားသခင်ကို အချိန်မည်မျှကြာ သင်ယုံကြည်ခဲ့သည်ဖြစ်စေ၊ ပြီးလျှင် သမ္မာတရား မည်မျှကို သင်နားလည်သည်ဖြစ်စေ၊ အသက် ဝင်ရောက်ခြင်းသည် ဦးစားပေးဖြစ်၏။ “လူအချို့သည် ဘုရားသခင်ကို အနှစ်နှစ်ဆယ်ကြာ ယုံကြည်ပြီးဖြစ်သော်လည်း ငါသည် ငါးနှစ်ကြာသာ ယုံကြည်ပြီးလေပြီ။ ငါသည် သူတို့နောက်တွင် အတော်ဝေးဝေးကျန်လေပြီ။ ကယ်တင်ခံရဖို့ ငါ့အတွက် မျှော်လင့်ချက် ရှိပါသေးသလား။ ငါသည် အတော်ဝေးဝေး နောက်ကျကျန်နေပြီလား”ဟု မတွေးနှင့်။ နှစ်အနည်းငယ် နောက်ကျပြီးမှ ယုံကြည်ခြင်းသည် ပြဿနာကြီးတစ်ခု မဟုတ်။ သင်သည် သမ္မာတရားကို လိုက်စားသူတစ်ဦး ဖြစ်ပါက ဘုရားသခင်ကို စောစော ယုံကြည်ခဲ့သူများကို သင်အမီလိုက်နိုင်ဆဲ ဖြစ်သည်။ ကျမ်းစာက “နောက်ကျသောသူအများတို့သည် အရင်ကျကြလိမ့်မည်။ အရင်ကျသောသူအများတို့သည် နောက်ကျ ကြလိမ့်မည်။” (ရှင်မဿဲခရစ်ဝင် ၁၉:၃၀) ဟု ပြောသည် မဟုတ်လော။ လူတစ်ဦးသည် သမ္မာတရား မလိုက်စားခြင်းအတွက် အကြောင်းပြချက်များကို အမြဲရှာပါက ၎င်းတို့ တစ်ဘဝလုံး ယုံကြည်လျှင်ပင် အချည်းနှီးဖြစ်လိမ့်မည်ဖြစ်ပြီး မည်သည့်အရာမျှ ရရှိကြလိမ့်မည် မဟုတ်။ ဘုရားသခင်၏ အိမ်တော်တွင် ဘုရားသခင်ကို အနှစ်နှစ်ဆယ်၊ သို့မဟုတ် သုံးဆယ်ကြာ ယုံကြည်ခဲ့ကြသော်လည်း ၎င်းတို့၏ တာဝန်များကို စံနှုန်းပြည့်မီအောင် မထမ်းဆောင်ခဲ့ကြသကဲ့သို့ ဖယ်ရှားရှင်းလင်းခြင်းခံခဲ့ကြရသည့် လူများစွာရှိသည်။ ကျော်ကြားမှု၊ အကျိုးအမြတ်နှင့် အဆင့်အတန်းကိုသာ အမြဲ လိုက်စားပြီး၊ အယောင်ဆောင်များနှင့် အန္တိခရစ်များဖြစ်လာကြကာ ဖယ်ရှားရှင်းလင်းခံရသည့် လူများစွာရှိ၏။ သမ္မာတရားကို လက်ခံရန် ခေါင်းမာစွာ ငြင်းပယ်ပြီး အားလုံးဖယ်ရှားရှင်းလင်းခံရသည့် မယုံကြည်သူများစွာရှိ၏။ ဤသည်မှာ အမှန်တရားတစ်ခုလော။ (ဟုတ်ပါသည်။) ထို့အပြင် သုံးနှစ်မှ ငါးနှစ်ထိသာ ယုံကြည်ပြီးနောက် မိမိတို့၏ အတွေ့အကြုံဆိုင်ရာ သက်သေခံချက်များကို ပြောဆိုနိုင်သည့် သူအချို့ရှိ၏။ ၎င်းတို့၏ သက်သေခံချက်များနှင့် ယုံကြည်ခြင်းတို့သည် ဘုရားသခင်ကို နှစ်များစွာ ယုံကြည်ပြီးသူများထက် အလွန်သာလွန်လေသည်။ ဤလူများသည် ဘုရားသခင်၏ ကောင်းချီးများကို ရရှိကြပြီး ဖြစ်သည်။ ဘုရားသခင်ကို နှစ်များစွာ ယုံကြည်ပြီး သမ္မာတရားကို လုံးဝ မလိုက်စားသကဲ့သို့ ဖယ်ရှားရှင်းလင်းခံရပြီးဖြစ်သည့် လူများစွာရှိ၏။ ဤအရာက အချက်တစ်ချက်ကို လူတို့အဖို့ ရှင်းသွားစေသည်။ ဘုရားသခင်သည် လူတိုင်းအဖို့ ဖြောင့်မတ်ကာ တရားမျှတခြင်း ဖြစ်သည်။ ဘုရားသခင်သည် ယခင်က သင် မည်သို့ဖြစ်ခဲ့သည်၊ သို့မဟုတ် သင်၏ လက်ရှိ ဝိညာဉ်ရင့်ကျက်မှုကို မကြည့်ပေ။ သူသည် သမ္မာတရားကို သင် လိုက်စားခြင်း ရှိမရှိနှင့် သမ္မာတရားကို လိုက်စားသည့် လမ်းကြောင်းကို သင် လျှောက်လှမ်းခြင်း ရှိမရှိဆိုသည်တို့ကို ကြည့်သည်။ သင်သည် ဘုရားသခင်ကို မည်သည့်အခါတွင်မျှ အထင်လွဲ၍မဖြစ်သကဲ့သို့ “ဘုရားသခင်၏ ကယ်တင်ခြင်း ခံရနိုင်သူတို့သည် အဘယ်ကြောင့် လိမ်ညာကာ ဖောက်ပြန်ပျက်စီးခြင်းကို ထုတ်ဖော်နိုင်သေးသနည်း။ မလိမ်ညာသောသူတို့ကို ဘုရားသခင် ကယ်တင်သင့်သည်”ဟု မပြောရပေ။ ဤသည်မှာ အတွေးမှားတစ်ခု မဟုတ်လော။ ဖောက်ပြန်ပျက်စီးသော လူသားမျိုးနွယ်ထဲတွင် မလိမ်ညာသောသူ တစ်ဦးတလေ ရှိသလော။ မလိမ်ညာသည့် လူတို့သည် ဘုရားသခင်၏ ကယ်တင်ခြင်း လိုအပ်သေးသလော။ စာတန်၏ ဖောက်ပြန်ပျက်စီးစေခြင်းခံရပြီးဖြစ်သည့် လူသားမျိုးနွယ်သည် ဘုရားသခင် ကယ်တင်သောသူများ ဖြစ်၏။ ဤအချက်ကိုပင် ရှင်းလင်းစွာ သင် နားမလည်နိုင်ပါက သင်သည် မသိနားမလည်ဖြစ်ကာ မိုက်မဲလေသည်။ ဘုရားသခင်က “ဤမြေကြီးပေါ်တွင် ဖြောင့်မတ်သောသူမရှိ၊ ဖြောင့်မတ်သူများ ဤလောကထဲတွင်မရှိ”ဟူ ဆိုခဲ့သည့်အတိုင်းသာ ဖြစ်သည်။ ဘုရားသခင်သည် ဤဖောက်ပြန်သည့် လူသားများကို ကယ်တင်ရန် ကမ္ဘာမြေပေါ် လူ့ဇာတိခံခဲ့သည်မှာ လူသားမျိုးနွယ်သည် စာတန်၏ ဖောက်ပြန်ပျက်စီးစေခြင်း ခံရပြီးသောကြောင့် အတိအကျဖြစ်ပေသည်။ ဘုရားသခင်သည် အဘယ်ကြောင့် ကောင်းကင်တမန်များကို ကယ်တင်ခြင်းနှင့် ပတ်သက်၍ မည်သည့်အရာမျှ မပြောဆိုသနည်း။ ယင်းမှာ ကောင်းကင်တမန်များသည် ကောင်းကင်ဘုံတွင်ရှိကြပြီး စာတန်၏ ဖောက်ပြန်ပျက်စီးစေခြင်း မခံရကြရလေသောကြောင့် ဖြစ်သည်။ ဘုရားသခင်က “ငါ ကယ်တင်သည့် လူသားမျိုးနွယ်သည် စာတန်၏ ဖောက်ပြန်ပျက်စီးစေခြင်း ခံရပြီးဖြစ်သည့် လူသားမျိုးနွယ်၊ စာတန်၏ လက်မှ ပြန်လည်ရယူခြင်းခံရပြီးဖြစ်သည့် လူသားမျိုးနွယ်၊ စာတန်၏ ဖောက်ပြန်ပျက်စီးသော စိတ်သဘောထားကို ပိုင်ဆိုင်သည့် လူသားမျိုးနွယ်၊ ငါ့ကို ဆန့်ကျင်သည့်၊ ငါ့ကို အတိုက်အခံလုပ်ပြီး ပုန်ကန်သည့် လူသားမျိုးနွယ် ဖြစ်၏”ဟု အစကတည်းမှ အမြဲ ပြောဆိုပြီးဖြစ်သည်။ သို့ဆိုလျှင် အဘယ်ကြောင့် လူတို့သည် ဤအမှန်တရားကို မရင်ဆိုင်ကြသနည်း။ ၎င်းတို့သည် ဘုရားသခင်ကို အထင်လွဲကြသည် မဟုတ်လော။ ဘုရားသခင်ကို အထင်လွဲခြင်းသည် သူ့ကို အတိုက်အခံလုပ်ရန် အလွယ်ကူဆုံး လမ်းကြောင်းဖြစ်ပြီး ချက်ချင်း ဖြေရှင်းရမည်။ ဤပြဿနာကို ဖြေရှင်းရန် ပျက်ကွက်ခြင်းသည် သင့်အပေါ်ကို ဘုရားသခင်၏ ဘေးဖယ်ထားခြင်းခံရသည့် အကျိုးဆက် အလွယ်တကူ ဖြစ်ပေါ်နိုင်သည်နှင့်အမျှ အလွန်အန္တရာယ်များပေသည်။ လူတို့၏ အထင်လွဲမှုများသည် ၎င်းတို့၏ အယူအဆများနှင့် စိတ်ကူးများတွင် အမြစ်တွယ်၏။ ၎င်းတို့သည် မိမိတို့၏ အယူအဆများနှင့် စိတ်ကူးများကို အမြဲ ဖက်တွယ်ပါက သမ္မာတရားကို လက်ခံရန် ငြင်းပယ်ဖို့ ဖြစ်နိုင်ဖွယ်အများဆုံး ဖြစ်သည်။ သင်သည် ဘုရားသခင်ကို အထင်လွဲသည့်အခါ ဖြေရှင်းချက်အတွက် သမ္မာတရားကို မရှာဖွေပါက အကျိုးဆက်များကို သင်တို့ သိပေသည်။ ဘုရားသခင်က သင့်ကို မှောက်မှားခွင့်ပေးသည်၊ ကျရှုံးခွင့်ပေးပြီး အမှားများ ပြုလုပ်ခွင့်ပေးသည်။ သမ္မာတရားကို နားလည်ရန်၊ သမ္မာတရားကို လက်တွေ့လုပ်ဆောင်ရန်၊ သူ၏ ရည်ရွယ်ချက်များကို တဖြည်းဖြည်း နားလည်ရန်၊ သူ၏ ရည်ရွယ်ချက်များနှင့်အညီ အရာရာကို လုပ်ဆောင်ရန်၊ ဘုရားသခင်ကို အမှန်တကယ် ကျိုးနွံနာခံပြီး လူတို့ ပိုင်ဆိုင်ရန် ဘုရားသခင် တောင်းဆိုသည့် သမ္မာတရား စစ်မှန်မှုကို စွမ်းဆောင်ရရှိရန် ဘုရားသခင်သည် သင့်အား အခွင့်အရေးများနှင့် အချိန်ကာလကို ပေးလိမ့်မည်။ သို့ရာတွင် ဘုရားသခင် အစက်ဆုပ်ဆုံးသော လူမှာ မည်သူနည်း။ မိမိတို့ စိတ်နှလုံးတွင် သမ္မာတရားကို သိလင့်ကစား လက်တွေ့လုပ်ဆောင်ဖို့ ဝေးစွ ထိုသမ္မာတရားကို လက်ခံရန် ငြင်းပယ်သည့်သူ ဖြစ်သည်။ ထိုအစား ၎င်းတို့သည် စာတန်၏ အတွေးအခေါ်များဖြင့် အသက်ရှင်နေကြဆဲဖြစ်သည့်တိုင် အခြားသူများကို အထင်အမြင်မှားစေပြီး ဘုရားအိမ်တော်တွင် ရာထူးတစ်ခု ရရှိရန်လည်း ကြိုးစားနေစဉ်တွင် မိမိတို့ကိုယ်ကို အတော် ကောင်းမြတ်ပြီး ဘုရားသခင်ကို ကျိုးနွံနာခံတတ်သည်ဟု ယူဆကြလေသည်။ ဘုရားသခင်သည် ဤလူစားမျိုးကို အစက်ဆုပ်ဆုံးဖြစ်သည်၊ ၎င်းတို့သည် အန္တိခရစ်များ ဖြစ်သည်။ လူတိုင်းတွင် ဖောက်ပြန်ပျက်စီးသော စိတ်သဘောထား ရှိသော်လည်း ဤလုပ်ရပ်များသည် မတူကွဲပြားသည့် သဘာဝတစ်ခုနှင့် သက်ဆိုင်ပေသည်။ ယင်းသည် သာမန် ဖောက်ပြန်ပျက်စီးသော စိတ်သဘောထား မဟုတ်သကဲ့သို့ ဖောက်ပြန်ပျက်စီးခြင်း၏ ပုံမှန် ထုတ်ဖော်ပြခြင်းတစ်ခု မဟုတ်ပေ။ ထို့ထက် သင်သည် သတိရှိစွာနှင့် ခေါင်းမာစွာ အဆုံးထိ ဘုရားသခင်ကို အတိုက်အခံလုပ်လေသည်။ ဘုရားသခင် တည်ရှိကြောင်း သင် သိသည်၊ ဘုရားသခင်ကို သင်ယုံကြည်သည့်တိုင် သူ့ကို အတိုက်အခံလုပ်ရန် တမင်သက်သက် သင် ရွေးချယ်၏။ ဤသည်မှာ ဘုရားသခင်နှင့် ပတ်သက်၍ အယူအဆများနှင့် အထင်လွဲခြင်း ပြဿနာတစ်ခု ရှိခြင်း မဟုတ်ပေ။ ထိုအစား သင်သည် အဆုံးထိ ဘုရားသခင်ကို တမင် အတိုက်အခံလုပ်လေသည်။ ဘုရားသခင်သည် ဤကဲ့သို့သော တစ်စုံတစ်ဦးကို ကယ်တင်နိုင်သလော။ ဘုရားသခင်သည် သင့်ကို မကယ်တင်ပေ။ သင်သည် ဘုရားသခင်၏ ရန်သူဖြစ်၏၊ ထို့ကြောင့် သင်သည် နတ်ဆိုးဖြစ်သည်။ နတ်ဆိုးများကို ဘုရားသခင် ကယ်တင်နိုင်သေးသလော။

ယနေ့ ငါ၏ မိတ်သဟာယနှင့် ပတ်သက်၍ သင်တို့ မည်သို့ ခံစားရသနည်း။ သင်တို့ နားလည်ကြသလော။ (ဟုတ်ကဲ့၊ နားလည်ပါသည်။) တစ်စုံတစ်ရာကို သင် နားလည်ပါက တစ်စုံတစ်ရာ သင် ရရှိလိမ့်မည်ဖြစ်ပြီး သမ္မာတရားထဲသို့ ဝင်ရောက်မှုအချို့ကို သင် ရရှိလိမ့်မည်။ သမ္မာတရားထဲသို့ သင်ဝင်ရောက်ပါက သင့်အသက်တာ ကြီးထွားလိမ့်မည် ဖြစ်သော်လည်း သမ္မာတရားထဲသို့ မဝင်ရောက်ပါက သင်၏ အသက်တာ ကြီးထွားလိမ့်မည် မဟုတ်။ ယင်းမှာ ရေလောင်းပေးရန်၊ မြေဩဇာကျွေးရန်နှင့် နေရောင်ထိတွေ့စေရန် လိုအပ်သည့် အစို့အညှောင့်ထွက်သော မျိုးစေ့တစ်စေ့ကဲ့သို့ ဖြစ်သည်။ သေချာစွာ ပြုစုပျိုးထောင်ခြင်း မရှိပါက ကြီးထွားမည် မဟုတ်သကဲ့သို့ နောက်ဆုံးတွင် ခြောက်သွေ့ညှိုးနွမ်းကာ သေဆုံးသွားလိမ့်မည်။ ဤအရာကို ငါ ပြောသည့်အခါ မည်သည့်အရာကို ဆိုလိုသနည်း။ ဘုရားသခင်၏ လူ့ဇာတိခံယူခြင်းကို နှုတ်ဖြင့် ဝန်ခံခြင်းနှင့် သင်၏ စိတ်နှလုံးတွင် ယုံကြည်ခြင်းမျှသည် ဘုရားသခင်ကို သိရှိရန်နှင့် သူ၏ နိုင်ငံတော်ထဲသို့ ဝင်ရောက်ဖို့ အရည်အချင်းပြည့်မီရန် မလုံလောက်ဟူ၍ ဖြစ်သည်။ ယင်းမှာ မသေချာပေ။ ယင်းသည် အခြေခံအဆင့်တစ်ခုသာ ဖြစ်သည်။ သင်သည် ကယ်တင်ခြင်း မရရှိသေး၊ မပြောင်းလဲသေးသကဲ့သို့ သွားရမည့် ခရီးဝေးနေဆဲ ဖြစ်သည်။ နောက်ဆုံးသော ကာလတွင် ဘုရားသခင်သည် လူသားမျိုးနွယ်ကို လုံးဝ ကယ်တင်ရန် သမ္မာတရားများ ကြေညာသည်။ သင်သည် ဘုရားသခင်ကို ယုံကြည်ခြင်း လမ်းကြောင်းပေါ် စတင်ချိန်တွင် တကယ့် အစကတည်းမှ ဘုရားသခင်၏ ကယ်တင်ခံရမည့် အခွင့်အရေး ရှိနှင့်ပြီးသား ဖြစ်သည်။ ဤသည်မှာ ကြီးမားသော ကောင်းချီးမင်္ဂလာတစ်ခု ဖြစ်သည်။ ဤအရာကို လက်လျှော့၍ မရပေ။ နောက်ဆုံးသော ကာလတွင် လူသားမျိုးနွယ်ကို ဘုရားသခင် ကယ်တင်ခြင်းနှင့် စုံလင်စေခြင်းသည် အလွန့်အလွန် ရှားပါးသည့် အခွင့်အရေးတစ်ခု ဖြစ်သည်။ လူသားမျိုးနွယ်သည် မျိုးဆက်ထောင်ချီ အသက်ရှင်ပြီးဖြစ်သော်လည်း ယခင်က မည်သူမျှ ဤအခွင့်အရေးကို မရလေပြီ။ ကယ်တင်ခံရခြင်းသည် ကြီးမားသော ကိစ္စတစ်ခု ဖြစ်၏။ ဤအခွင့်အရေးကို သင်လွဲချော်၍ မရပေ။ သင်တို့၏ မျိုးဆက်သည် လူ့ဇာတိခံ ဘုရားသခင်ကို ကြုံကြရလေပြီ။ ဤသည်မှာ ကောင်းချီးတစ်ခု ဖြစ်သည်။ ဤကောင်းချီးသည် လောကီကမ္ဘာအဖို့ မမြင်နိုင်သော်လည်း သင်တို့သည် မြင်ကြပြီးဖြစ်ကာ မွေ့လျော်ကြပြီးဖြစ်သကဲ့သို့ ဤသည်မှာ ဘုရားသခင်၏ ကောင်းချီးမင်္ဂလာဖြစ်၏။ လူအချို့သည် အမြင်များနှင့်ပတ်သက်၍ မရှင်းမလင်း ဖြစ်နေနိုင်သေး၏။ ၎င်းတို့သည် အယူဝါဒအချို့ကိုသာ သိနားလည်ကြသော်လည်း စစ်မှန်သည့် ယုံကြည်ခြင်း မရှိကြချေ။ ဘုရားသခင်ကို ယုံကြည်ခြင်းသည် ကောင်းမွန်ပြီး ဘုရားနှုတ်ကပတ်တော်များကို ဖတ်ရွတ်ခြင်းက ၎င်းတို့ စိတ်နှလုံးများကို ဉာဏ်အလင်းပွင့်စေသည်ဟုသာ ခံစားကြသောကြောင့် ယင်းသည် ဘဝတွင် မှန်ကန်သည့် လမ်းကြောင်းဖြစ်သည်ဟု ယုံကြည်ကာ ၎င်းတို့၏ စိတ်နှလုံးများက ခွန်အားရှိကြလေသည်။ ၎င်းတို့သည် ဘာသာတရားမရှိသူများ၏ ပျက်စီးခြင်း လမ်းကြောင်းဖြစ်စေ၊ ဘုရားသခင်ကို အတိုက်အခံလုပ်သည့် ဘာသာရေးသမားများ၏လမ်းကြောင်း ဖြစ်စေ မလျှောက်ရန် စိတ်ပိုင်းဖြတ်ထားကြသည်။ ဘုရားသခင်နောက်သို့သာ လိုက်ရန်၊ သမ္မာတရားကို လိုက်စားရန်၊ ဖြူစင်မှုကို ရယူရန်၊ ကယ်တင်ခြင်းကို ရရှိပြီး ဘုရားသခင်နောက်လိုက်ခြင်း လမ်းကြောင်းကိုသာ လျှောက်ရန် စိတ်ပိုင်းဖြတ်ထားကြသည်။ ထိုသို့သော စိတ်ဆုံးဖြတ်ချက်ရှိခြင်းသည် လူတို့အတွက် ကောင်းမွန်ပြီး မျှော်လင့်ချက်ရှိသည်ဟု ဆိုလိုပေသည်။ ဘုရားသခင်နောက်လိုက်ခြင်းသည် ဘုရားသခင်၏ ကွယ်ကာမှုနှင့်အတူ လာ၏။ အနည်းဆုံးအနေဖြင့် ယခုအချိန်၊ ဤဘဝတွင် ၎င်းတို့ ပျော်ရွှင်ကြလိမ့်မည်။ ၎င်းတို့သည် စာတန်၊ လူမှုအဖွဲ့အစည်း၊ သို့မဟုတ် လူသားမျိုးနွယ်၏ ထိခိုက်နစ်နာစေခြင်း ခံရတော့မည် မဟုတ်သကဲ့သို့ ဘုရားသခင်၏ အုပ်စိုးမှုအောက်တွင် လုံးလုံးနှင့် စစ်မှန်စွာ အသက်ရှင်ကြလိမ့်မည်။ ဤသည်မှာ ဤတစ်သက်တာတွင် ခံစားရနိုင်သည့် ဂုဏ်ယူဖွယ် ကိစ္စတစ်ခ့်ဖြစ်ပြီး ပျော်ရွှင်မှုတစ်ခု ဖြစ်သည်။ ယခုတွင် နောင်ဘဝနှင့်ပတ်သက်၍ အဘယ်သို့ ရှိသနည်း။ ဘုရားသခင်သည် ကတိတစ်ခု ပြုထားပြီး ဖြစ်သည်။ သင့်အား ကယ်တင်ခြင်း ပေးအပ်ခြင်းနှင့် သမ္မာတရားနှင့် အသက်ဖြင့် ထောက်ပံ့ပေးခြင်းအပြင် ဤဘဝတွင် အဆတစ်ရာ ပေးရန်နှင့် နောင်ဘဝတွင် ထာဝရအသက် ပေးရန်လည်း သင့်ကို သူ ကတိပေးသည်။ ထို့ကြောင့် ဤကိစ္စရပ်ကို လျှော့မတွက်နှင့်။ သမ္မာတရားကို ရရှိပြီး ကယ်တင်ခြင်းကို ရရှိရန် သင် ပေးသည့် အဖိုးအခနှင့် သင် သည်းညည်းခံသည့် ဆင်းရဲဒုက္ခတို့သည် ခဏတာ ဖြစ်၏။ အနာဂတ်တွင် သမ္မာတရားကို လူတို့ သိနားလည်ပြီး ပိုင်ဆိုင်ကြသည့်အခါ ၎င်းတို့ မွေ့လျော်ခံစားသည့် ပျော်ရွှင်ခြင်း၊ ဝမ်းမြောက်ခြင်းနှင့် ကောင်းချီးများသည် ပြောမပြနိုင်လောက်အောင် ဖြစ်နိုင်ပေသည်။ ဆိုလိုသည်မှာ သမ္မာတရားကို သင် နားလည်ပြီး ရရှိသည့်အခါတွင်သာ ဘုရားသခင်၏ ကတိတော်ကို ရရှိရန် အရည်အချင်း ပြည့်မီလိမ့်မည်။ ဘုရားသခင်သည် သင့်ကို သမ္မာတရားနှင့် အသက်၏ အထောက်အပံ့အားလုံးကို အခမဲ့ ပေးနေသည်။ ဘုရားသခင်က သင့်ကို ကယ်တင်နိုင်သည်မှာ မှန်သော်လည်း နောက်ဆုံးတွင် သမ္မာတရားနှင့် အသက်ကို သင် ရရှိခြင်း ရှိမရှိမှာ သမ္မာတရား လိုက်စားခြင်း လမ်းကြောင်းအား သင်ရွေးချယ်ခြင်းရှိမရှိအပေါ် မူတည်ပေသည်။ ဤရွေးချယ်မှုကို ပြုလုပ်ရန်မှာ သင်၏ လက်တွင်ရှိသလော။ (ရှိပါသည်။) တစ်နည်းအားဖြင့် အသက်နှင့် သမ္မာတရားကို သင် ရရှိနိုင်ခြင်း ရှိမရှိ၊ ဘုရားသခင်၏ ကတိတော်ကို ရရှိရန် သင် အရည်အချင်း ပြည့်မီခြင်းရှိမရှိနှင့် ကောင်းချီးမင်္ဂလာ၊ “ဤဘဝတွင် အဆတစ်ရာနှင့် နောင်ဘဝတွင် ထာဝရအသက်” နှင့်ဆိုင်သည့် ဤကောင်းချီးပေးခြင်းကို သင် ရရှိနိုင်ခြင်း ရှိမရှိသည် သင်၏ လက်တွင်ရှိသည့် အခွင့်အရေးတစ်ခု ဖြစ်သည်။ အခြားမည်သူမျှက သင့်ကို လွှမ်းမိုး၍မရနိုင်၊ သင့်ကို ကူညီ၍မရနိုင်၊ သို့မဟုတ် သင့်ကို ဘောင်ခတ်၍မရနိုင်ပေ။ သင့်ထံတွင် ဤလုပ်ပိုင်ခွင့်ရှိ၏။ ဘုရားသခင်က သင့်ကို ပေးအပ်နှင့်ပြီး ဖြစ်သည်။ ယင်းသည် နောက်ဆုံးတွင် သမ္မာတရား လိုက်စားခြင်း လမ်းကြောင်းကို လျှောက်လှမ်းရန် သင် ရွေးချယ်ခြင်း ရှိမရှိဆိုသည့်အပေါ် မူတည်သည်။ ဤသည်မှာ အရေးအပါဆုံးသော ကိစ္စရပ်ဖြစ်သည်။

၂၀၁၆ ခုနှစ်၊ နိုဝင်ဘာလ ၉ ရက်