လူမင်၊ တရုတ်နိုင်ငံ

၂၀၂၃ ခုနှစ်၊ မေလ တစ်နေ့မှာ ညီအစ်မကျောက်ဖေးက သခင့်ကို ယုံကြည်တဲ့ ညီအစ်မတစ်ယောက်ဆီ ဘုရားသခင်ရဲ့ နောက်ဆုံးသောကာလ ဧဝံဂေလိတရားကို သူ့နဲ့အတူ သွားဖြန့်ဝေဖို့ ကျွန်မကို ဖိတ်ခေါ်ခဲ့တယ်။ အဲဒီယုံကြည်သူရဲ့နာမည်က လီဟောင်ပါ။ သူဟာ အရင်က အသင်းတော်တစ်ခုမှာ လူငယ်စုဝေးပွဲတွေကို ဦးဆောင်ခဲ့ပေမဲ့ ဒီနှစ်ပိုင်းတွေမှာ ဘုရားကျောင်းတက်တဲ့သူ သိပ်မရှိတော့ဘဲ လူငယ်တွေက ရုပ်ဝတ္ထုပစ္စည်းတွေနဲ့ ငွေကြေးတွေရဲ့ ဆွဲဆောင်မှုကို ခံခဲ့ရပြီး လောကီရေစီးကြောင်းတွေနောက်ကို လိုက်သွားကြတယ်။ အသင်းတော်မှာ သက်ကြီးပိုင်းယုံကြည်သူတွေပဲ ကျန်ခဲ့တော့တယ်။ လီဟောင်ရဲ့ ယုံကြည်ခြင်းကလည်း အေးစက်လာပါတယ်။ သူ စုဝေးပွဲတွေမတက်တော့ဘဲ အိမ်မှာပဲ ကျမ်းစာဖတ်နေခဲ့တယ်။ ဘေးအန္တရာယ်တွေ ဖြစ်ပွားနှုန်း တိုးလာတာက သခင် မကြာခင် ကြွလာတော့မယ်ဆိုတဲ့ ရှင်းလင်းတဲ့ လက္ခဏာဖြစ်တယ်ဆိုတာကို သူသိခဲ့ပြီး ကိုယ်တော်ရဲ့ ပြန်ကြွလာခြင်းကို ဆက်ပြီးစောင့်မျှော်နေခဲ့တယ်။ လီဟောင်ဟာ စစ်မှန်တဲ့ယုံကြည်သူတစ်ယောက်ဖြစ်ပြီး သခင့်ရဲ့ပြန်ကြွလာခြင်းကို တောင့်တနေမှန်း သိလိုက်ရတော့ သူ့ကို ဧဝံဂေလိတရား ဖြန့်ဝေဖို့ ကျွန်မ ပိုပြီးစိတ်အားထက်သန်လာခဲ့တယ်။

တွေ့တဲ့အခါမှာတော့ ကျွန်မတို့ဟာ ယုံကြည်ခြင်းမှာရှိတဲ့ ကိုယ့်ရဲ့အတွေ့အကြုံတွေနဲ့ ယုံကြည်ခြင်းမှာရှိတဲ့ ကိုယ့်မျှော်လင့်ချက်တွေကို ဆွေးနွေးခဲ့ကြတယ်။ လက်ရှိကမ္ဘာလောကကြီးမှာရှိတဲ့ အမျိုးစုံတဲ့ ဆိုးယုတ်ပြီး အမှောင်ဖုံးနေတဲ့ ဖြစ်စဉ်တွေ၊ လူသားမျိုးနွယ်ရဲ့ ဖောက်ပြန်ပျက်စီးခြင်းနဲ့ ယိုယွင်းပျက်စီးခြင်း၊ ဘုရားသခင်ရဲ့ ကယ်တင်ခြင်းမရှိဘဲ လူသားတွေ ဘာဖြစ်သွားမလဲ စတာတွေကိုလည်း ပြောဖြစ်ကြတယ်။ လီဟောင်က သဘောတူပြီး ပြောတယ်၊ “အခုခေတ်လူတွေက တကယ်ကို ဖောက်ပြန်ပျက်စီးလွန်းတယ်၊ ကိုယ်ကျိုးနဲ့ အကျိုးအမြတ်အတွက်ဆို ဘာမဆို လုပ်ကြမှာပဲ။ ဘုရားသခင်က လူသားမျိုးနွယ်ကို ကယ်တင်ဖို့ ကြွမလာဘူးဆိုရင်တော့ သူတို့တွေ ဖျက်ဆီးခံရတော့မှာပဲ” လို့ပေါ့။ အဲဒီနောက်မှာ၊ ဘုရားသခင်ရဲ့ အမှုတော် အဆင့်သုံးဆင့်နဲ့ပတ်သက်ပြီး သူ့ကို ကျွန်မ သက်သေခံခဲ့တယ်။ ပညတ်တော်ခေတ်နှောင်းပိုင်းမှာ လူတွေဟာ အပြစ်ကို ခဏခဏပိုလုပ်လာကြပြီး ပူဇော်ဖို့ အပြစ်ဖြေရာယဇ်တွေ လုံလုံလောက်လောက် မရှိတော့ဘဲ အားလုံးဟာ ပညတ်တရားရဲ့ ပြစ်တင်ရှုတ်ချခြင်းနဲ့ ကျိန်ခြင်းကို ခံရမယ့်အန္တရာယ်အောက်မှာ ရှိခဲ့ကြတယ်ဆိုတာကို ကျွန်မ ပြောပြခဲ့တယ်။ အဲဒီနောက်မှာ ဘုရားသခင်ဟာ ကျေးဇူးတော်ခေတ်မှာ ရွေးနုတ်ခြင်းအမှုကို ဆောင်ရွက်ဖို့ လူ့ဇာတိခံခဲ့တယ်။ သခင်ယေရှုဟာ လူသားမျိုးနွယ်အတွက် အပြစ်ဖြေရာယဇ်အနေနဲ့ လက်ဝါးကပ်တိုင်မှာ အသေခံခဲ့ပြီး လူကို စာတန်ရဲ့ချုပ်ကိုင်မှုကနေ ရွေးနုတ်ခဲ့တယ်၊ သူတို့ကို ဆက်ပြီး ရှင်သန်နိုင်အောင် သေချာစေခဲ့တယ်။ ကျွန်မတို့ ပြောခဲ့ကြသေးတယ်၊ လူတွေက ယုံကြည်သူတွေအနေနဲ့ သူတို့ရဲ့ အပြစ်တွေအတွက် ခွင့်လွှတ်ခြင်းခံရပြီး ကောင်းချီးမင်္ဂလာတွေနဲ့ ကျေးဇူးတော်တွေ အများကြီး ခံစားခဲ့ကြရပေမဲ့ ဘယ်သူမှ မငြင်းနိုင်တဲ့အချက်တစ်ခုကတော့ သူတို့ဟာ အပြစ်ရဲ့ချည်နှောင်မှုတွေကနေ မလွတ်မြောက်သေးဘူးဆိုတာပါပဲ၊ အားလုံးက အပြစ်လုပ်လိုက်၊ ဝန်ခံလိုက်ဆိုတဲ့ အဆက်မပြတ်တဲ့ သံသရာထဲမှာ နေထိုင်နေကြပြီး သခင့်ရဲ့ နှုတ်ကပတ်တော်တွေကို လက်တွေ့မလုပ်ဆောင်နိုင်ကြဘူး။ တခြားသူတွေအပေါ် သည်းခံတာမျိုး၊ စိတ်ရှည်တာမျိုး မရှိတာ၊ လိမ်ညာတာ၊ လှည့်ဖြားတာ၊ တစ်ကိုယ်ကောင်းဆန်တာ၊ ကောက်ကျစ်ဆိုးယုတ်တာနဲ့ လောဘကြီးတာတွေပေါ့၊ ဒီဖောက်ပြန်ပျက်စီးမှုတွေကို မဖယ်ရှားနိုင်ကြဘူး။ ညီအစ်ကိုမောင်နှမတွေက အချင်းချင်း မနာလိုဖြစ်ပြီး ယှဉ်ပြိုင်ကြတယ်၊ ဂိုဏ်းဂဏတွေ ဖွဲ့ကြတယ်၊ ပြီးတော့ ကိုယ်ကျိုးစီးပွားနဲ့ ပတ်သက်လာရင် သူတို့က အချင်းချင်း ကွယ်ရာမှာ ဝေဖန်ကဲ့ရဲ့ပြီး အချင်းချင်း တိုက်ခိုက်ကြတယ်။ ဘုရားသခင်က ပြောသည် “ငါသည် သန့်ရှင်းသောကြောင့်၊ သင်တို့သည် သန့်ရှင်းခြင်း ရှိရကြမည်။” (ဝတ်ပြုရာကျမ်း ၁၁:၄၅-၄၆) “ဖောက်ပြန်ပျက်စီးမှုတွေနဲ့ ပြည့်နေတဲ့လူတွေက ကောင်းကင်နိုင်ငံတော်ထဲ ဝင်လို့ရပါ့မလား” လို့ ကျွန်မ မေးလိုက်တယ်။ လီဟောင်က ပြောတယ်၊ “မစင်ကြယ်တဲ့လူတွေက ကောင်းကင်နိုင်ငံတော်ထဲကို မဝင်နိုင်ဘူး၊ ဒါပေမဲ့ ငါတို့က ဘယ်လို စင်ကြယ်လာနိုင်မလဲ” တဲ့။ ကျွန်မက ပြန်ပြောလိုက်တယ်၊ “ကျွန်မတို့ဟာ ကိုယ့်ကိုယ်ကိုယ် မသန့်စင်နိုင်ဘူး၊ ဘုရားသခင်ရဲ့ ကယ်တင်ခြင်းကို ခံရမယ်။ ဘုရားသခင်က ကျွန်မတို့ကို ကယ်တင်ဖို့ ကြွမလာဘူးဆိုရင် ကိုယ့်ဘာသာကိုယ် အပြစ်ကနေ လွတ်မြောက်နိုင်မှာ မဟုတ်ဘူး။ သခင့်ကို ယုံကြည်လို့ ကျွန်မတို့ရဲ့အပြစ်တွေက ခွင့်လွှတ်ခြင်းခံခဲ့ရပေမဲ့ ကျွန်မတို့ရဲ့ အပြစ်ရှိတဲ့သဘာဝကတော့ အတွင်းထဲမှာ နက်နက်ရှိုင်းရှိုင်း အမြစ်စွဲနေတုန်းပဲ။ ပေါင်းပင်တစ်ပင်ကို ရိတ်လိုက်တဲ့နောက်မှာ ပြန်ပေါက်လာသလိုပဲ၊ အရင်းခံပြဿနာကို မဖြေရှင်းဘူးဆိုရင် ကျွန်မတို့ဟာ အပြစ် ဆက်လုပ်နေဦးမှာပဲ။ ဒါက ကျွန်မတို့ဟာ စာတန်ရဲ့အာဏာအောက်မှာ အသက်ရှင်နေကြတုန်းဖြစ်ပြီး ဘုရားသခင်ရဲ့ ရယူခြင်းကို အမှန်တကယ် မခံရသေးဘူးဆိုတာကို ပြနေတယ်။ လူသားမျိုးနွယ်ကို အပြစ်ကနေ လုံးလုံးလျားလျား ကယ်တင်ဖို့၊ သူတို့ကို စာတန်ရဲ့ အမှောင်စွမ်းအား လက်ထဲကနေ ဆွဲထုတ်ဖို့၊ ကယ်တင်ခြင်းခံရပြီး ကောင်းကင်နိုင်ငံတော်ထဲ ဝင်ခွင့်ပြုဖို့အတွက် နောက်ဆုံးသောကာလမှာ သခင်ယေရှုဟာ ပြန်ကြွလာခဲ့ပြီး ရွေးနုတ်ခြင်းအမှုရဲ့အခြေခံပေါ်မှာ နှုတ်ကပတ်တော်တွေကတစ်ဆင့် တရားစီရင်ခြင်းနဲ့ သန့်စင်ခြင်းအမှုကို ဆောင်ရွက်နေပါတယ်။ ကိုယ်တော်ဟာ လူရဲ့အပြစ်တွေရဲ့ အရင်းခံအကြောင်းတရားဖြစ်တဲ့ လူရဲ့ဖောက်ပြန်ပျက်စီးတဲ့ စိတ်သဘောထားနဲ့ အနှစ်သာရကို ဖော်ထုတ်ပြီး တရားစီရင်ဖို့ သမ္မာတရားကို ဖော်ပြနေပါတယ်။ ကိုယ်တော့်နှုတ်ကပတ်တော်တွေရဲ့ တရားစီရင်ခြင်းကနေ ကျွန်မတို့ဟာ စာတန်ရဲ့ နက်နက်ရှိုင်းရှိုင်း ဖျက်ဆီးခြင်းခံထားရပြီး လူသားပုံသဏ္ဌာန် ကင်းမဲ့နေတယ်ဆိုတာကို သဘောပေါက်လာကြတယ်။ အဲဒီအခါကျမှသာ ကိုယ့်ကိုယ်ကိုယ် မုန်းတီးလာပြီး ပုန်ကန်လာကြမှာပဲ။ ပြီးတော့ သမ္မာတရားကို လိုက်စားဖို့၊ စစ်မှန်တဲ့ လူသားပုံသဏ္ဌာန်အတိုင်း အသက်ရှင်နေထိုင်ပြီး ကယ်တင်ခြင်းခံရအောင် ရှာဖွေဖို့ ဆန္ဒရှိလာကြမှာဖြစ်တယ်။ ဒါက သခင့်ရဲ့ နှုတ်ကပတ်တော်တွေကို ပြည့်စုံစေတယ်။ ‘သင်တို့အား ငါပြောစရာစကားအများရှိသော်လည်း၊ သင်တို့သည် ယခုမခံနိုင်ကြ။ သမ္မာတရားနှင့်ပြည့်စုံသော ထိုဝိညာဉ်တော်သည် ရောက်လာသောအခါ၊ သမ္မာတရားကို သင်တို့အား အကြွင်းမဲ့ သွန်သင်ပြလိမ့်မည်။’ (ရှင်ယောဟန်ခရစ်ဝင် ၁၆:၁၂-၁၃)” အဲဒီအခါ လီဟောင်က ပြောတယ်၊ “ကျွန်မ နားလည်သွားပြီ၊ သခင့်ကို ယုံကြည်ရုံနဲ့ ကျွန်မတို့ အပြစ်ကနေ မလွတ်မြောက်သေးဘူး၊ ကောင်းကင်နိုင်ငံတော်ထဲ ဝင်ဖို့ မထိုက်တန်သေးဘူးပေါ့။ သန့်စင်ခြင်းခံရဖို့ ဘုရားသခင်ရဲ့ တရားစီရင်ခြင်းနဲ့ ကယ်တင်ခြင်းကို ကျွန်မတို့ လက်ခံဖို့လိုတုန်းပဲ” တဲ့။ ကျွန်မက သူ့ကို ပြောလိုက်တယ်၊ “ဟုတ်တယ်၊ လူသားမျိုးနွယ်ကို ကယ်တင်ဖို့ ဘုရားသခင်က အမှုတော် အဆင့်သုံးဆင့်ကို ပညတ်တော်ခေတ်၊ ကျေးဇူးတော်ခေတ်နဲ့ နိုင်ငံတော်ခေတ်တွေမှာ ဆောင်ရွက်ခဲ့တယ်။ လယ်ယာစိုက်ပျိုးရေးမှာ ထွန်ယက်၊ စိုက်ပျိုးပြီး ရိတ်သိမ်းရသလိုပဲ၊ အမှုတော်က အဆင့်သုံးဆင့်ပြီးမှသာ ပြည့်စုံတာဖြစ်ပြီး တစ်ဆင့်မှ ချန်ထားလို့မရဘူး။ သခင်ယေရှုရဲ့ ရွေးနုတ်ခြင်းကို ခံရရုံနဲ့ မလုံလောက်သေးဘူး။ နောက်ဆုံးသောကာလမှာ တရားစီရင်ခြင်းအမှုကို လက်ခံမှသာ ကျွန်မတို့ရဲ့ ဖောက်ပြန်ပျက်စီးတဲ့ စိတ်သဘောထားတွေက သန့်စင်ခြင်းခံရပြီး ရှင်သန်ကျန်ရစ်မယ်၊ ဘုရားသခင်ရဲ့ နိုင်ငံတော်ထဲကို ဝင်ရောက်နိုင်မယ်” လို့ပေါ့။ ကျွန်မတို့ သူ့ကို သက်သေခံခဲ့ကြတယ်၊ အမှုတော်အဆင့်သုံးဆင့်လုံးကို ဘုရားတစ်ပါးတည်းကသာ ဆောင်ရွက်ခဲ့ပုံ၊ အဆင့်တစ်ခုစီဟာ အရင်အဆင့်ရဲ့အမှုတော်ပေါ်မှာ တည်ဆောက်ပြီး ပိုမိုနက်ရှိုင်းစေပုံနဲ့ အဆင့်အားလုံးရဲ့ပန်းတိုင်က လူသားကို ကယ်တင်ပြီး ဘုရားသခင်ရဲ့ နိုင်ငံတော်ထဲကို လမ်းပြဖို့ဖြစ်တဲ့အကြောင်းကိုပေါ့။ လီဟောင်က ဒါတွေအားလုံးကို နားလည်သွားပြီး တက်တက်ကြွကြွနဲ့ ပြောခဲ့တယ်၊ “သခင်ယေရှုက ကျွန်မတို့ကို ကယ်တင်ဖို့ ပြန်ကြွလာပြီလား။ ကောင်းလိုက်တဲ့သတင်းပဲ” တဲ့။

သုံးလေးရက် ကြာပြီးနောက် တစ်ညမှာတော့ ကျွန်မတို့ လီဟောင်ရဲ့အိမ်ကို နောက်တစ်ကြိမ် သွားလည်ခဲ့ကြတယ်။ ဒါပေမဲ့ ကျွန်မတို့ ဝင်သွားတာနဲ့ သူမက ထိတ်လန့်တကြားနဲ့ ကျွန်မတို့ကို ပြောခဲ့တယ်၊ “ရှင်တို့ ချက်ချင်းပြန်ကြတော့။ ကျွန်မ ရှင်တို့ကို ဒီမှာ ဧည့်မခံနိုင်ဘူး” တဲ့။ ကျွန်မ နားမလည်တာနဲ့ ဘာဖြစ်တာလဲလို့ သူ့ကို မေးလိုက်တယ်။ သူက စိုးရိမ်တကြီးနဲ့ ပြန်ဖြေတယ်၊ “ကျွန်မ ကိုဗစ်ဖြစ်နေတယ်၊ ဘာအစားအသောက်မှ စားမဝင်ဘူး၊ ဝမ်းလျှောပြီး အားနည်းနေတယ်။ ကျွန်မ သိပ်နေရတော့မှာ မဟုတ်ဘူးထင်တယ်။ ရှင်တို့ ချက်ချင်းပြန်ကြပါ၊ ကျွန်မ ရှင်တို့ကို မကူးစေချင်ဘူး” တဲ့။ သူ ပိန်ချုံးပြီး အားနည်းနေတာကို မြင်တော့ ဒီအခြေအနေမှာ ဘယ်လိုတွေ့ကြုံရမလဲဆိုတာကို သူနဲ့အတူနေပြီး မိတ်သဟာယဖွဲ့ပေးချင်ခဲ့တယ်၊ ဒါပေမဲ့ စိုးရိမ်မိတယ်၊ ကျွန်မနေခဲ့ရင် ကူးစက်ခံရမှာကိုပေါ့။ မကြာသေးခင်က လူတော်တော်များများ ကိုဗစ်နဲ့ သေဆုံးခဲ့ကြပြီး သူနဲ့ နီးနီးကပ်ကပ်ထိတွေ့ရင် ကူးစက်ခံရမှာကို ကျွန်မ ကြောက်ခဲ့တယ်။ ငါ ဒီမှာ ဆက်နေသင့်လား၊ ဒါမှမဟုတ် ပြန်သွားသင့်လား။ ကျွန်မ ချီတုံချတုံ ဖြစ်နေခဲ့တယ်။ ကျွန်မ စိတ်ထဲမှာ ဘုရားသခင်ကို တိတ်တဆိတ်ဆုတောင်းပြီး ကိုယ်တော့်နှုတ်ကပတ်တော်တစ်ပိုဒ်ကို ပြန်အမှတ်ရလိုက်တယ်။ “ဘုရားသခင်က အရာအားလုံးကို ဖန်ဆင်းခဲ့ပြီး ယင်းကို ဖန်ဆင်းလျက် အရာခပ်သိမ်းအပေါ် အုပ်စိုးမှု ရှိလေသည်။ အရာခပ်သိမ်းအပေါ် အုပ်စိုးခြင်းအပြင် သူသည် အရာအားလုံးကို ထိန်းချုပ်ထား၏။ ‘ဘုရားသခင်က အရာအားလုံးကို ထိန်းချုပ်ထားသည်’ ဆိုသည့် အယူအဆက မည်သည်ကို ဆိုလိုသနည်း။ မည်သို့ရှင်းပြ၍ ရနိုင်သနည်း။ ယင်းသည် လက်တွေ့ဘဝနှင့် အဘယ်သို့ သက်ဆိုင်သနည်း။ ဘုရားသခင်က အရာအားလုံးကို ထိန်းချုပ်ထားသည်ဆိုသည့် အချက်ကို သိနားလည်ခြင်းက ဘုရားသခင်၏ သြဇာအာဏာကို သိနားလည်မှုဆီသို့ အဘယ်သို့ ဆိုက်ရောက်စေသနည်း။ ‘ဘုရားသခင်က အရာအားလုံးကို ထိန်းချုပ်ထားသည်’ ဆိုသည့် တကယ့်စကားရပ်မှ၊ ဘုရားသခင် ထိန်းချုပ်သည့်အရာမှာ လူသားမျိုးနွယ် တစ်စိတ်တစ်ပိုင်း မပြောနှင့်၊ ဂြိုဟ်များ၏ တစ်စိတ်တစ်ပိုင်း မဟုတ်သကဲ့သို့ ဖန်ဆင်းခြင်း၏ တစ်စိတ်တစ်ဒေသမဟုတ်ဘဲ အရာအားလုံးဖြစ်သည်ကို ငါတို့ သိသင့်၏။ ထူးကဲကြီးမားသည်မှ သေးငယ်မှုန်မွှားသည့်အရာအထိ၊ မြင်နိုင်သည့်အရာများမှ မမြင်နိုင်သည့်အရာအထိ၊ စကြဝဠာအတွင်းက ကြယ်များမှ ကမ္ဘာမြေကြီးပေါ်က သက်ရှိများအထိအပြင် ပကတိမျက်စိနှင့် မမြင်နိုင်သည့် အဏုဇီဝရုပ်များနှင့် တစ်ခြားပုံသဏ္ဌာန်များဖြင့် တည်ရှိနေသည့် သတ္တဝါများအထိဖြစ်ပေသည်။ ဤကား ဘုရားသခင်က ‘ထိန်းချုပ်ထားသည်’ ဆိုသည့် ‘အရာအားလုံး’ ၏ တိကျသည့် ဖွင့်ဆိုချက်ဖြစ်၏၊ ယင်းသည် သူ၏ သြဇာအာဏာနှင့်ဆိုင်သော နယ်ပယ်၊ သူ၏ အချုပ်အခြာအာဏာနှင့် အုပ်စိုးမှုတို့၏ အတိုင်းအတာ ဖြစ်သည်။” (နှုတ်ကပတ်တော်၊ အတွဲ (၂)၊ ဘုရားသခင်ကို သိကျွမ်းခြင်းနှင့် စပ်လျဉ်း၍၊ အတုမရှိ ဘုရားသခင်ကိုယ်တော်တိုင် (၃)) ဘုရားသခင်က ကပ်ရောဂါတွေနဲ့ ဗိုင်းရပ်စ်တွေလည်း အပါအဝင် အရာခပ်သိမ်းကို အုပ်စိုးတယ်။ လီဟောင်ဟာ စစ်မှန်တဲ့ယုံကြည်သူတစ်ယောက်ဖြစ်ပြီး စင်ကြယ်ပြီး မရောနှောတဲ့ နားလည်မှုရှိလို့ သူ ကိုဗစ်ဖြစ်နေချိန်မှာ သူ့အတွက် ဘုရားသခင်ရဲ့ နှုတ်ကပတ်တော်တွေကို ကျွန်မ သက်သေခံပေးရမယ်။ ဘုရားနှုတ်ကပတ်တော်တွေဟာ သမ္မာတရား၊ လမ်းခရီးနဲ့ အသက်ပဲ။ ဘုရားနှုတ်ကပတ်တော်တွေနဲ့သာ ကျွန်မတို့ဟာ မှန်ကန်တဲ့ အထောက်အပံ့ကို ရှာတွေ့နိုင်တယ်။ နှုတ်ကပတ်တော်တွေမရှိရင် သူ ဘယ်လိုတွေ့ကြုံရမလဲဆိုတာကို သိမှာမဟုတ်ဘဲ ဘေးအန္တရာယ်တွေထဲမှာ လမ်းပျောက်နေမှာပဲ။ ကျွန်မ ကူးစက်ခံရမလား၊ မခံရဘူးလားဆိုတာကတော့ ဘုရားသခင်အပေါ်မှာပဲ မူတည်တယ်။ ကူးစက်ခံရရင်တောင် ဘုရားသခင်ရဲ့ ခွင့်ပြုချက်မရှိဘဲ ကျွန်မ သေမှာမဟုတ်ဘူး။ ကျွန်မအသက်က ဘုရားသခင်ရဲ့ လက်ထဲမှာပဲ ရှိတယ်၊ ပြီးတော့ ညီအစ်မကို မှန်တဲ့လမ်းခရီး လက်ခံစေဖို့ ကိုဗစ်ကူးစက်ခံခဲ့ရရင်တောင် ကျွန်မ ကျိုးနွံနာခံမှာပဲ။ ကျွန်မက လီဟောင်ကို ပြောလိုက်တယ်၊ “မစိုးရိမ်ပါနဲ့၊ ဘုရားသခင်က အရာခပ်သိမ်းအပေါ် အချုပ်အခြာအာဏာ ကိုင်စွဲတယ်။ အခု ကျွန်မတို့အတွက် အရေးကြီးဆုံးက ဘုရားသခင်ကို အားကိုးပြီး ကိုယ်တော့်နှုတ်ကပတ်တော်တွေကို ဖတ်ဖို့ပဲ။ ဘုရားသခင်ကလွဲရင် ဘယ်သူမှ ကျွန်မတို့ကို မကယ်တင်နိုင်ဘူး” လို့ပေါ့။ ကျွန်မက သူနဲ့ ဘုရားသခင်ရဲ့ သြဇာအာဏာအကြောင်းကို မိတ်သဟာယဖွဲ့ခဲ့တယ်၊ ကမ္ဘာ့ကပ်ရောဂါနဲ့ အဏုဇီဝပိုးမွှားတွေတောင် ဘုရားသခင်ရဲ့ အုပ်စိုးမှုအောက်မှာရှိပြီး ဘုရားသခင် ခွင့်မပြုဘဲ စာတန်က ကျွန်မတို့ရဲ့အသက်ကို မထိခိုက်နိုင်ဘူးဆိုတာကိုပေါ့။ ဘုရားသခင်က ပြောသည် “ဘုရားသခင်၏ ခွင့်ပြုချက်မပါဘဲ စာတန်သည် ကုန်းမြေပေါ်မှ ရေတစ်စက်၊ သို့မဟုတ် သဲတစ်ပွင့်ကိုပင် အလွယ်တကူ မထိနိုင်ပေ။ ဘုရားသခင်၏ ခွင့်ပြုချက်မပါဘဲ ဘုရားသခင်ဖန်ဆင်းခဲ့သည့် လူသားမျိုးနွယ်ကိုမဆိုထားနှင့်၊ စာတန်သည် ကုန်းမြေပေါ်က ပုရွက်ဆိတ်များကိုပင်လျှင် ထိပါးပိုင်ခွင့်မရှိပေ။” (နှုတ်ကပတ်တော်၊ အတွဲ (၂)၊ ဘုရားသခင်ကို သိကျွမ်းခြင်းနှင့် စပ်လျဉ်း၍၊ အတုမရှိ ဘုရားသခင်ကိုယ်တော်တိုင် (၁)) ကျွန်မရဲ့မိတ်သဟာယကို ကြားပြီးနောက်မှာ သူက ကျွန်မတို့ကို အိမ်ထဲဝင်ဖို့ ဖိတ်ခေါ်ခဲ့တယ်။

ကျွန်မတို့က သူနဲ့ ဆက်ပြီး မိတ်သဟာယဖွဲ့ခဲ့တယ်၊ “သခင်ယေရှုက ကိုယ်တော်ကြွလာတဲ့အခါ ကြီးမားတဲ့ကပ်ဘေးတွေ ရှိလိမ့်မယ်လို့ ကျမ်းစာထဲမှာ ပရောဖက်ပြုခဲ့တယ်။ ဗျာဒိတ်ကျမ်းမှာလည်း ကမ္ဘာကုန်ဆုံးချိန်မှာ ကြီးမားတဲ့ကပ်ဘေးတွေ ရှိလိမ့်မယ်လို့ ပရောဖက်ပြုထားတယ်။ အခု ကပ်ဘေးတွေက ကြီးသည်ထက်ကြီးလာတော့ ဘုရားသခင်ရဲ့ ရည်ရွယ်ချက်က ဘာလဲ” လို့ ပြောခဲ့တယ်။ လီဟောင်က ပြန်ဖြေတယ်၊ “ကမ္ဘာပျက်တော့မှာပဲ၊ ဘုရားသခင်က လူသားမျိုးနွယ်ကို ဖျက်ဆီးတော့မယ်” တဲ့။ ကျွန်မက ပြောတယ်၊ “ဘေးအန္တရာယ်တွေရဲ့ တစ်ခုတည်းသောရည်ရွယ်ချက်က လူသားမျိုးနွယ်ကို ဖျက်ဆီးဖို့ပဲလား။ ဒီအပေါ်မှာ ဘုရားနှုတ်ကပတ်တော်တွေက ဘာပြောထားလဲ ကြည့်ကြရအောင်။ ဘုရားသခင်က ပြောသည် ‘ဘုရားသခင်သည် လူသားတို့အနေဖြင့် ဘုရားသခင်၏ ရှေ့မှောက်၌ရှိဖို့ ပြန်လည်တစ်လိမ့်လိမ့် ဝင်လာနိုင်ဖို့အလို့ငှာ ဘုရားသခင်ကို ဖွေရှာဖို့ ၎င်းတို့အား လှုံ့ဆော်ရင်း၊ လူသားများကို အထိတ်တလန့်ဖြစ်စေရန်၊ ကမ္ဘာလောကတစ်လျှောက် လတ်တလော အဖြစ်အပျက်များကို အခွင့်အလမ်းများအဖြစ် အသုံးပြုလေသည်။ ထို့ကြောင့်၊ ဘုရားသခင်က၊ “ဤသည်မှာ ငါအလုပ်လုပ်သော နည်းလမ်းများထဲမှ တစ်ခုဖြစ်ပြီး လူသားကို ကယ်တင်ရန်အတွက် လုပ်ဆောင်မှုတစ်ခု ဖြစ်ကြောင်း သံသယဖြစ်စရာ မရှိသည့်အပြင် ငါမှ သူ့အား ကမ်းလှမ်းသည့် အရာမှာ ချစ်ခြင်းမေတ္တာ တစ်မျိုးပင် ဖြစ်နေသေးသည်။” ဟု ပြောပေသည်။’ (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ “စကြဝဠာတစ်ခုလုံးထံ ဘုရားသခင်၏ နှုတ်ကပတ်တော်များ” နှင့်သက်ဆိုင်သော နက်နဲမှုများကို ထုတ်ဖော်ချက်များ၊ အခန်း (၁၀)) ဒီကနေ ကျွန်မတို့ မြင်ရတာက ဘုရားသခင်ဟာ လူတွေကို မှန်တဲ့လမ်းခရီးကို ရှာဖွေစေဖို့ ဘေးအန္တရာယ်တွေကို အသုံးပြုပြီး သူတို့ နိုးထလာပြီး သခင့်ကို အမြန်ကြိုဆိုနိုင်ဖို့အတွက် ကိုယ်တော် ကြွရောက်လာပြီဆိုတာကို သူတို့ဆီ ပြသတယ်။ မကောင်းမှုပြုသူတွေအတွက်တော့ ဘေးအန္တရာယ်တွေဟာ အပြစ်ဒဏ်ပေးခြင်းနဲ့ ဖျက်ဆီးခြင်းဖြစ်ပေမဲ့ ရှာဖွေလိုစိတ်ရှိတဲ့ စစ်မှန်တဲ့ယုံကြည်သူတွေအတွက်တော့ သတိပေးချက်နဲ့ ကယ်တင်ခြင်းဖြစ်တယ်” လို့ပေါ့။ လီဟောင်က ပြန်ပြောတယ်၊ “ကျွန်မ နားလည်သွားပြီ။ လူတွေက အခက်အခဲတွေနဲ့ ကြုံရမှပဲ ဘုရားသခင်ကို ရှာဖွေကြတာကိုး။ ဒါတွေအားလုံးမှာ ဘုရားသခင်ရဲ့ အပင်ပန်းခံရတဲ့ ရည်ရွယ်ချက်တွေ ထင်ဟပ်နေတာပဲ” လို့ပေါ့။ ကျွန်မက “ဟုတ်တယ်၊ ဒါပေမဲ့ ဘာသာရေးလောကမှာရှိတဲ့ လူတော်တော်များများက သခင် ပြန်ကြွလာပြီဆိုတဲ့ သတင်းကိုကြားတဲ့အခါ ရှာဖွေဖို့ အာရုံမစိုက်ကြဘူး၊ သူတို့က ကြီးမားတဲ့ကပ်ဘေးတွေကျရောက်လာရင်တောင် သခင်က သူတို့ကို ကာကွယ်မှာဖြစ်ပြီး သူတို့ ချမ်းသာရာရမယ်လို့ ထင်ကြတယ်။ သခင် ကြွလာတာနဲ့ သူတို့က ကောင်းကင်နိုင်ငံတော်ထဲကို တိုက်ရိုက်ခေါ်ဆောင်ခံရမယ်လို့ ထင်ကြတယ်။ ဒါတွေအားလုံးဟာ သူတို့ရဲ့ အယူအဆတွေနဲ့ စိတ်ကူးတွေပဲ။ ဘုရားသခင်က ဘုရားရဲ့အိမ်တော်ကနေအစပြုတဲ့ တရားစီရင်ခြင်းအမှုကို လုပ်ဆောင်ခဲ့ပြီ။ အသင်းတော်ထဲမှာပဲ စောင့်နေရုံနဲ့ သခင့်ကို တကယ်ကြိုဆိုနိုင်ပါ့မလား။ ဒါက သခင်ယေရှု ကြွလာခဲ့တဲ့အချိန်တုန်းကလိုပဲ၊ လူတော်တော်များများက ဗိမာန်တော်ထဲမှာပဲနေပြီး ယေဟောဝါကို ကိုးကွယ်ခဲ့ကြတယ်၊ ပြီးတော့ သခင်ယေရှု ဟောကြားတဲ့ တရားဒေသနာတွေကို သွားနားမထောင်ခဲ့ကြဘူး။ ဒီလိုဆိုရင် သူတို့က နောင်တရခြင်းရဲ့လမ်းခရီးနဲ့ သခင့်ရဲ့ကျေးဇူးတော်ကို ဘယ်လိုရနိုင်မှာလဲ။ အဲဒီအချိန်က သခင်ယေရှုဟာ ဗိမာန်တော်ထဲမှာ အမှုမပြုခဲ့ဘူး။ ကိုယ်တော်က တောင်ထိပ်တွေပေါ်မှာနဲ့ တောကန္တာရထဲမှာ ကိုယ်တော့်နောက်လိုက်တွေကို တရားဟောခဲ့တယ်။ အဲဒီအချိန်က သခင့်နောက်ကိုလိုက်ခဲ့တဲ့ ပေတရု၊ ယောဟန်နဲ့ တခြားလူ သုံးလေးယောက်ကလွဲရင် ဗိမာန်တော်ထဲက လူအများစုဟာ ယဇ်ပုရောဟိတ်အကြီးတွေနဲ့ ဖာရိရှဲတွေနောက်ကိုလိုက်ပြီး သခင်ယေရှုကို အတိုက်အခံလုပ်ပြီး ပြစ်တင်ရှုတ်ချခဲ့ကြတယ်။ သူတို့အားလုံးဟာ ဘုရားသခင်ရဲ့ စွန့်ပစ်ခြင်းနဲ့ ဖယ်ရှားရှင်းလင်းခြင်းကို ခံခဲ့ရပြီး နောက်ဆုံးမှာ ကိုယ်တော့်ရဲ့အပြစ်ဒဏ်ပေးခြင်းနဲ့ ကျိန်ခြင်းတွေကို ရင်ဆိုင်ခဲ့ရတယ်။ အခုလည်း ဒီလိုပဲဖြစ်နေတယ်။ အနန္တတန်ခိုးရှင် ဘုရားသခင်က နောက်ဆုံးသောကာလမှာ တရားစီရင်ခြင်းအမှုကို လုပ်ဆောင်နေချိန်မှာ ဘာသာရေးလောကက လူတော်တော်များများဟာ အနန္တတန်ခိုးရှင် ဘုရားသခင်ရဲ့ နှုတ်ကပတ်တော်တွေကို ကြားပေမဲ့ သခင့်ကို မရှာဖွေကြဘူး၊ မကြိုဆိုကြဘူး။ တချို့ကဆို အနန္တတန်ခိုးရှင် ဘုရားသခင်ကို အပြင်းအထန် အတိုက်အခံလုပ်ပြီး ပြစ်တင်ရှုတ်ချကြသေးတယ်။ သူတို့က ဘုရားသခင်ကို ယုံကြည်ပေမဲ့ ဘုရားသခင်ရဲ့ အသံတော်ကို နားမထောင်ဘူး၊ သမ္မာတရားကို လက်မခံတာတောင်မှ ကောင်းကင်ဘုံကို သွားချင်ကြသေးတယ်။ သူတို့က အိပ်မက်မက်နေတာပဲ ဖြစ်ရမယ်။ ဘေးအန္တရာယ်တွေက ဆိုးသည်ထက် ဆိုးလာနေပြီ၊ အချိန်မီ နောင်တမရဘူးဆိုရင် ကျွန်မတို့လည်း မယုံကြည်သူတွေလိုပဲ ကြီးမားတဲ့ကပ်ဘေးတွေထဲမှာ ဖျက်ဆီးခံရမှာပဲ။ ကျေးဇူးတော်ရဲ့တံခါးက မကြာခင် ပိတ်တော့မှာဖြစ်ပေမဲ့ ဘုရားသခင်က ကျွန်မတို့ကို နောင်တရဖို့ အခွင့်အရေးပေးထားတုန်းပဲ။ သခင့်ကို ကြိုဆိုပြီး နောက်ဆုံးသောကာလမှာ ဘုရားသခင်ရဲ့အမှုကို လက်ခံတဲ့အပြင် ဖောက်ပြန်ပျက်စီးတဲ့ စိတ်သဘောထားတွေကနေ သန့်စင်ခြင်းခံရသူအားလုံးဟာ ဘေးအန္တရာယ်တွေအတွင်းမှာ ဘုရားသခင်ရဲ့ ကာကွယ်စောင့်ရှောက်ခြင်းကို ခံရမှာ” လို့ ပြောခဲ့တယ်။ ပြီးတော့ ညီအစ်ကိုမောင်နှမတွေက ဘုရားသခင်ရဲ့အသံတော်ကို ဘယ်လို ရှာဖွေနားထောင်ပြီး သခင့်ကို ကြိုဆိုကြသလဲဆိုတာကို သရုပ်ပြသတဲ့ ဧဝံဂေလိသက်သေခံချက် ဗီဒီယိုတချို့ကို ကျွန်မတို့ ကြည့်ခဲ့ကြတယ်။ လီဟောင်က တော်တော်လေး အားနည်းပြီး နေမကောင်းဖြစ်နေပေမဲ့ ဖန်သားပြင်ကို မျက်တောင်မခတ်တမ်း စိုက်ကြည့်နေခဲ့ပြီး ဆက်ပြီး စုံစမ်းစစ်ဆေးဖို့ ဆန္ဒရှိခဲ့တယ်။ အဲဒီနေ့မှာ သူနဲ့ မိတ်သဟာယပြုပြီးတဲ့နောက်မှာ သူ့ကို ဧဝံဂေလိတရား ဟောပြောဖို့ ကျွန်မ ပေးဆပ်ခဲ့ရတဲ့ အဖိုးအခမှန်သမျှက တန်တယ်လို့ ကျွန်မ ခံစားခဲ့ရတယ်။

သုံးလေးရက်ကြာတော့ လီဟောင်နဲ့ သွားတွေ့ပြီး မိတ်သဟာယဖွဲ့ရမယ့်အချိန်ကို နောက်တစ်ခေါက် ရောက်လာတယ်။ ကျောက်ဖေးက ကျွန်မကို ပြောတာက လီဟောင်ရော၊ သူ့ယောက်ျားပါ အရမ်းနေမကောင်းဖြစ်ပြီး ဆေးသွင်းထားရတယ်တဲ့၊ ပြီးတော့ လီဟောင်ရဲ့ယောက်ျားက ကျွန်မတို့ဖြန့်ဝေနေတာဟာ အနန္တတန်ခိုးရှင် ဘုရားသခင်ရဲ့ နောက်ဆုံးသောကာလအမှုတော်ဖြစ်မှန်းသိပြီး သူ့မိန်းမကို လက်မခံဖို့ တားမြစ်ခဲ့တယ်တဲ့။ သူက လမ်းပေါ်ထွက်ပြီး အိမ်နီးချင်းတချို့ကို ကျွန်မတို့က သူတို့ကို ကိုဗစ်ကူးအောင်လုပ်တာလို့ ပြောခဲ့တယ်။ ဒါကိုကြားလိုက်တာနဲ့ ကျွန်မက တွေးမိတယ်၊ “သူက ဘယ်လိုဖြစ်လို့ ဒီလိုပြောနိုင်ရတာလဲ။ ငါ့မှာ ကိုဗစ်မှမရှိတာ၊ ငါ့ဆီက သူတို့ ဘယ်လိုကူးမှာလဲ။ လီဟောင်က အဲဒီလောက် နေမကောင်းဖြစ်နေတာတောင် ငါ့ကို မကူးစက်ခဲ့ဘူး၊ အခု သူ့ယောက်ျားက ဒီလိုပြောနေတယ်။ တကယ်ကို မျက်နှာပြောင်တိုက်ပြီး လိမ်ညာတာပဲ၊ အခြေအမြစ်မရှိတဲ့ စွပ်စွဲချက်ပဲ” လို့ပေါ့။ ပြီးတော့ ကျွန်မက ဒီလိုလည်း တွေးမိတယ်၊ “အခု လီဟောင်ရဲ့ယောက်ျားက ငါ့ကြောင့် သူတို့ ကိုဗစ်ကူးတယ်လို့ ပြောတယ်ဆိုတော့ တခြားရွာသားတွေက ငါ့ကိုတွေ့ရင် ရဲကိုဖုန်းဆက်ပြီး ဖမ်းခိုင်းမှာလား။ ငါက ဧဝံဂေလိတရား ဖြန့်ဝေလို့ အရင်က တစ်ခါအဖမ်းခံရဖူးတယ်၊ ဒီတစ်ခါ ထပ်အဖမ်းခံရရင် ကွန်မြူနစ်ပါတီက ငါ့ကို တကယ်ပဲ လွယ်လွယ်နဲ့ လွှတ်ပေးပါ့မလား” လို့ပေါ့။ ဒါတွေအားလုံးကို စဉ်းစားပြီးတော့ လီဟောင်ကို ဧဝံဂေလိတရား ဖြန့်ဝေဖို့ ကျွန်မမှာ ယုံကြည်စိတ်ချမှု မရှိတော့ဘူး၊ ပြီးတော့ အခြေအနေကို စောင့်ကြည့်ပြီးမှ သွားလို့ရရင်သွားမယ်လို့ ကျောက်ဖေးကို ပြောလိုက်တယ်။ ဒါပေမဲ့ အဲဒီနောက်မှာ ကျွန်မ အပြစ်ရှိသလို ခံစားခဲ့ရတယ်၊ “လီဟောင်က ဘုရားနှုတ်ကပတ်တော်တွေ ဒီလောက် မဖတ်ရသေးဘူး။ ကောလာဟလတွေကို ယုံပြီး လှည့်ဖြားခံရရင် ဘယ်လိုလုပ်မလဲ။ သူက နေပြန်မကောင်းသေးတော့ အခုအချိန်မှာ မိတ်သဟာယ၊ အားပေးကူညီမှုနဲ့ ဘုရားနှုတ်ကပတ်တော်တွေကို စားသောက်ဖို့ အရင်ကထက်ပိုပြီး လိုအပ်နေတယ်။ ငါ မသွားတာက မသင့်တော်ဘူးလေ၊ ဒါပေမဲ့လည်း ဒီကိစ္စကို ဘယ်လိုလုပ်ရမလဲ” လို့ တွေးမိတယ်။ နောက်ပိုင်းမှာ ဘုရားသခင်ရဲ့ နှုတ်ကပတ်တော်တစ်ပိုဒ်ကို ကျွန်မ တွေ့ခဲ့တယ်။ “လူတစ်ဦးသည် ဧဝံဂေလိတရားဟောနေစဉ် ထိုသို့သော လှောင်ပြောင်သရော်မှု၊ ပြက်ရယ်ပြုခြင်း၊ အထင်သေးသည့် အကြည့်များနှင့် အသရေဖျက်ခြင်းတို့ကို မကြာခဏ ကြုံတွေ့ရမည် သို့မဟုတ် သူ့ကိုယ်သူ အန္တရာယ်ရှိသော အခြေအနေများထဲ၌ပင် မိမိကိုယ်ကို တွေ့ရလိမ့်မည်။ သာဓကအားဖြင့် ညီအစ်ကို မောင်နှမအချို့သည် ဆိုးယုတ်သောလူတို့၏ လူသိရှင်ကြား စွပ်စွဲရှုတ်ချခြင်း သို့မဟုတ် အဓမ္မခေါ်ဆောင်သွားခြင်း ခံရပြီး အခြားသူများမှာမူ ရဲများထံ အတိုင်ခံရကာ ထိုသူတို့မှာ အစိုးရထံ လွှဲပြောင်းအပ်နှံခြင်းခံရလေသည်။ အချို့မှာ အဖမ်းခံရပြီး အကျဉ်းချခံရစဉ် အခြားသူများမှာ သေသည်အထိပင် အရိုက်ခံရကောင်း ခံရမည်ဖြစ်သည်။ ဤအရာအားလုံးမှာ ဖြစ်ပျက်နေသော အရာများပင်ဖြစ်၏။ သို့သော် ယခုအခါတွင် ဤအရာများအကြောင်းကို ငါတို့ သိလာသဖြင့် ဧဝံဂေလိတရားဟောခြင်းအလုပ်အပေါ် ငါတို့၏ သဘောထားကို ပြောင်းသင့်သလော။ (မပြောင်းသင့်ပါ။) ဧဝံဂေလိတရားဟောခြင်းသည် လူတိုင်း၏ တာဝန်နှင့် ဝတ္တရားဖြစ်သည်။ မည်သည့်အချိန်၌မဆို၊ ငါတို့ကြားသည့်အရာ၊ သို့မဟုတ် မြင်သည့်အရာက မည်သည့်အရာဖြစ်စေ၊ သို့မဟုတ် မည်သည့်ဆက်ဆံမှုမျိုးကို ငါတို့ကြုံတွေ့သည်ဖြစ်စေ ဧဝံဂေလိတရားဟောခြင်း ဟူသည့် ဤတာဝန်ကို ငါတို့ အမြဲတမ်း ထိန်းသိမ်းရမည်။ မည်သည့်အခြေအနေ၌ဖြစ်စေ ငါတို့သည် အပျက်သဘောဆောင်ခြင်း သို့မဟုတ် အားနည်းချက်ကြောင့် ဤတာဝန်ကို စွန့်လွှတ်၍မရပေ။ ဧဝံဂေလိတရားဟောရမည့် တာဝန်သည် ချောမွေ့သောခရီး မဟုတ်ဘဲ အန္တရာယ်နှင့် အတိပြီး၏။ သင်တို့သည် ဧဝံဂေလိတရားဟောသောအခါ ကောင်းကင်တမန်များ၊ သို့မဟုတ် ဂြိုဟ်သားများ၊ သို့မဟုတ် စက်ရုပ်များကို ရင်ဆိုင်ရမည် မဟုတ်ပေ။ သင်တို့သည် ဆိုးယုတ်ပြီး ဖောက်ပြန်ပျက်စီးသော လူသားများ၊ အသက်ရှိသော နတ်ဆိုးများ၊ လူ့တိရစ္ဆာန်များကိုသာ ရင်ဆိုင်ရမည်ဖြစ်ပြီး ၎င်းတို့အားလုံးသည် ဆိုးယုတ်သော ဤနေရာ၊ ဆိုးယုတ်သော ဤကမ္ဘာ၌ ရှင်သန်နေသည့်၊ စာတန်၏ နက်ရှိုင်းစွာ ဖောက်ပြန်ပျက်စီးခြင်းကို ခံထားရသော လူသားများဖြစ်ကြပြီး ဘုရားသခင်ကို ခုခံကြသည်။ ထို့ကြောင့် ဧဝံဂေလိတရားဟောခြင်း လုပ်ငန်းစဉ်၌ တွေ့နေကျ ဖြစ်စဉ်များဖြစ်သည့် အသေးအဖွဲမျှသော အသရေဖျက်မှု၊ လှောင်ပြောင်ခြင်းများနှင့် နားလည်မှုလွဲမှားခြင်းများကို မဆိုနှင့်၊ အန္တရာယ်မျိုးပေါင်းစုံ ရှိနေသည်မှာ အသေအချာပင် ဖြစ်သည်။ အကယ်၍ သင်သည် ဧဝံဂေလိတရားဟောခြင်းကို တာဝန်တစ်ခုအဖြစ်၊ ဝတ္တရားတစ်ခုအဖြစ်သာမက သင်၏တာဝန်အဖြစ် အမှန်တကယ် သဘောထားပါက သင်သည် ဤအရာများကို မှန်ကန်စွာ သဘောထားနိုင်ပြီး ယင်းတို့ကို မှန်ကန်စွာပင် ကိုင်တွယ်နိုင်မည် ဖြစ်သည်။ သင်သည် တာဝန်နှင့် ဝတ္တရားကို စွန့်လွှတ်မည် မဟုတ်သကဲ့သို့ သင်သည် ဤအရာများကြောင့် ဧဝံဂေလိတရားဟောပြီး ဘုရားသခင်အား သက်သေခံမည့် သင်၏ နဂိုမူလ ရည်ရွယ်ချက်မှ လမ်းလွဲသွားမည် မဟုတ်သည့်အပြင် ဤသည်မှာ သင့်တာဝန်ဖြစ်သည့်အတွက် ဤတာဝန်ကို မည်သည့်အခါမျှ သင် လက်လျှော့မည် မဟုတ်ပေ။ ဤတာဝန်ကို မည်ကဲ့သို့ နားလည်သင့်သနည်း။ ယင်းသည် လူ့ဘဝ၏ တန်ဖိုးနှင့် အခြေခံဝတ္တရား ဖြစ်၏။ နောက်ဆုံးသောကာလ ဘုရားသခင်၏ အမှုတော်နှင့်ဆိုင်သည့် သတင်းကောင်းနှင့် ဘုရားသခင်၏ အမှုတော်နှင့်ဆိုင်သည့် ဧဝံဂေလိတရားအား တရားဟောခြင်းသည် လူ့ဘဝ၏တန်ဖိုးပင် ဖြစ်သည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ဧဝံဂေလိတရားဟောခြင်းသည် ယုံကြည်သူများအားလုံး ကောင်းမွန်စွာ ဖြည့်ဆည်းရမည့် တာဝန်ဖြစ်သည်) မှန်တဲ့လမ်းခရီးဟာ အမြဲတမ်း ညှဉ်းပန်းနှိပ်စက်ခံရတယ်ဆိုတာကို ဘုရားသခင်ရဲ့ နှုတ်ကပတ်တော်တွေက ကျွန်မကို သဘောပေါက်စေခဲ့တယ်။ ဧဝံဂေလိတရားကို ဖြန့်ဝေတဲ့အခါ အန္တရာယ်တွေနဲ့ အခက်အခဲတွေ အမြဲရှိနေမှာပဲ။ သခင်ယေရှုရဲ့ တပည့်တော်တွေက ကိုယ်တော်ရဲ့ ဧဝံဂေလိတရားကို ဖြန့်ဝေတဲ့အခါ တချို့က ကျောက်တုံးတွေနဲ့ ပစ်ပေါက်ခံရပြီး သေဆုံးခဲ့ကြတယ်၊ တချို့က လွှနဲ့ အတိုက်ခံခဲ့ကြရတယ်၊ တချို့က မြင်းတွေနဲ့ ဆွဲဖြဲခံခဲ့ကြရပြီး တခြားသူတွေကတော့ လက်ဝါးကပ်တိုင်မှာ အသေခံခဲ့ကြရတယ်။ သူတို့ဟာ ကြောက်မက်ဖွယ်ကောင်းတဲ့ သေခြင်းတရားမျိုးစုံကို တွေ့ကြုံခဲ့ရပေမဲ့ သူတို့က ဘုရားသခင်အတွက် သက်သေခံခဲ့ပြီး စာတန်ကို အရှက်ခွဲခဲ့တယ်။ နောက်ဆုံးသောကာလမှာ ဘုရားသခင်က နောက်တစ်ကြိမ် လူဇာတိခံယူပြီး လူသားမျိုးနွယ်ကို ကယ်တင်ဖို့ လူသားတွေကြားထဲကို ကြွလာခဲ့တယ်၊ လူတွေကို တရားစီရင်ပြီး သန့်စင်ဖို့ သမ္မာတရားကို ဖော်ပြခဲ့တယ်။ လူတိုင်း ဘုရားသခင်နောက်လိုက်ပြီး ကယ်တင်ခြင်းခံရတာကို မြင်တော့ စာတန်က မကျေနပ်တဲ့အတွက် ဘုရားသခင်ရဲ့အမှုကိ ပိတ်ပင်နှောင့်ယှက်ဖို့ အပြင်းအထန် ကြိုးစားခဲ့တယ်။ အစိုးရတင်မကဘဲ ဘာသာရေးလောကတစ်ခုလုံးက ဘုရားသခင်ရဲ့ အမှုကို အတိုက်အခံလုပ်ဖို့ ကြိုးစားကြတယ်၊ ဘုရားသခင်ကို အသရေဖျက်ပြီး ရှုတ်ချဖို့ ကောလာဟလအမျိုးမျိုးကို ဖန်တီးခဲ့ကြတယ်။ ဒါ့အပြင် ကျွန်မတို့ရဲ့မိသားစုတွေနဲ့ အိမ်နီးချင်းတွေက စာတန်အစိုးရရဲ့ နတ်ဆိုးဆန်တဲ့ စကားတွေရဲ့ လွှမ်းမိုးမှုကို ခံရပြီး ဘုရားသခင်ကို ငြင်းပယ်ကြတယ်၊ အတိုက်အခံလုပ်ကြတယ်၊ ကျွန်မတို့ကို လှောင်ပြောင်ပြီး အသရေဖျက်ကြတယ်၊ တချို့ကဆို ကျွန်မတို့ကို တိုင်ပြီး ဖမ်းခိုင်းကြသေးတယ်။ ဒါတွေအားလုံးဟာ ဧဝံဂေလိတရား ဖြန့်ဝေခြင်းအတွက် အဓိကအတားအဆီးတစ်ခုပဲ။ လီဟောင်ရဲ့ယောက်ျားကိုပဲကြည့်လေ၊ သူက စီစီပီက ဖြန့်ဝေတဲ့ ကောလာဟလတွေကို ကြားပြီး သူ့မိန်းမကို ဧဝံဂေလိတရား ဖြန့်ဝေခွင့် ကျွန်မတို့ကို မပေးခဲ့ဘူး။ ကျွန်မက သတင်းပို့ခံရမှာနဲ့ အဖမ်းခံရမှာကို စိုးရိမ်ပြီး သူ့ကို ဧဝံဂေလိတရား မဖြန့်ဝေရဲတော့ဘူး။ အခက်အခဲနဲ့ ကြုံရတဲ့အခါ ကျွန်မ ကြောက်ရွံ့ နောက်ဆုတ်သွားပြီး ဘုရားသခင်ရဲ့ ရည်ရွယ်ချက်တွေကို အလေးမထားခဲ့ဘူးဆိုတာကို ကျွန်မ မြင်ခဲ့ရတယ်။ ကျွန်မက ကိုယ့်ကိုယ်ကိုယ် ကာကွယ်ဖို့ပဲ စိုးရိမ်ခဲ့တယ်၊ လီဟောင်ရဲ့ အသက်အတွက် ဘာတာဝန်ယူမှုမှ မပြခဲ့ဘဲ ကျွန်မရဲ့ တာဝန်ကို အလေးအနက် မထားခဲ့ဘူး။ ဖန်ဆင်းခံတစ်ယောက်အနေနဲ့ ကျွန်မရဲ့ လုပ်ဆောင်ချက်ကို ကျွန်မ ဆုံးရှုံးသွားခဲ့တာ မဟုတ်ဘူးလား။ ဧဝံဂေလိတရား ဖြန့်ဝေခြင်းဟာ ကျွန်မရဲ့တာဝန်နဲ့ ကျွန်မရဲ့အထူးတာဝန်ပဲ။ ဖန်ဆင်းရှင်အတွက် သက်သေခံဖို့ အသက်ရှင်နေထိုင်ခြင်းဟာ အဓိပ္ပာယ်အရှိဆုံး လိုက်စားမှုဖြစ်တယ်။ ဘယ်လောက်ပဲ ခက်ခဲနေပါစေ၊ ကိုယ့်တာဝန်ကို စွန့်ပစ်လို့ မဖြစ်ဘူး။ လီဟောင် ဘုရားနှုတ်ကပတ်တော်တွေကို ဖတ်နိုင်ဖို့ နည်းလမ်းရှာတွေ့အောင် ဘုရားသခင်ကို အားကိုးခဲ့ရတယ်။ ကျွန်မ ဘုရားသခင်ဆီကို ဆုတောင်းခဲ့တယ်၊ ကျွန်မကို လမ်းပြပေးပြီး ဉာဏ်ပညာနဲ့ ဉာဏ်ရည်ဉာဏ်သွေး ပေးသနားတော်မူပါလို့ တောင်းလျှောက်ခဲ့တယ်၊ ဒါမှ ကျွန်မရဲ့တာဝန်ကို ကောင်းကောင်း ထမ်းဆောင်နိုင်မှာပေါ့။ ဆုတောင်းပြီးတဲ့နောက်မှာ လီဟောင်ရဲ့အိမ်ကို သွားလို့မရပေမဲ့ ဘုရားနှုတ်ကပတ်တော်ကို ချရေးပြီး တခြားတစ်ယောက်ယောက်ကနေ သူ့ဆီကို ပေးခိုင်းလို့ရတယ်ဆိုတာကို ကျွန်မ သဘောပေါက်ခဲ့တယ်။

ခဏကြာတော့ ကျွန်မ လီဟောင်ကို သွားတွေ့ချင်တယ်လို့ ပြောလိုက်တယ်၊ ဒါပေမဲ့ ကျောက်ဖေးက ကျွန်မကို ထိတ်လန့်တကြားနဲ့ ပြောတယ်၊ “အခု ကိုဗစ်က တကယ်ဆိုးနေတယ်၊ လီဟောင်ရဲ့မိသားစုဝင်လေးယောက်က တစ်ယောက်ပြီးတစ်ယောက် ဆုံးသွားတယ်၊ သူ့အမေအရင်းလည်း ဆုံးသွားပြီ။ သူ အခု ဘယ်သူနဲ့မှ မတွေ့ချင်ဘူး” တဲ့။ အဲဒီအချိန်မှာ ဘာလုပ်ရမှန်း ကျွန်မ မသိတော့ဘူး။ ကျွန်မကို သူတို့အိမ်ကို မသွားစေချင်တာ လီဟောင်ရဲ့ယောက်ျားပဲမဟုတ်ဘူး၊ လီဟောင်ကိုယ်တိုင်ကလည်း ကျွန်မကို မတွေ့ချင်ဘူး။ ကျွန်မ ဘာလုပ်ရမှာလဲ။ ဒါ့အပြင် ကိုဗစ်က ဒီလောက်ဆိုးနေတော့ ရွာသားတွေက ကျွန်မကို သတင်းပို့မှာ ကြောက်လို့ သွားဖို့စိတ်ကူးကို ကျွန်မ လက်လျှော့လိုက်တယ်။ သုံးလေးရက်နေတော့ ကျွန်မအပေါ်မှာ နက်နက်ရှိုင်းရှိုင်း သက်ရောက်မှုရှိခဲ့တဲ့ “ရှေ့တန်းတွင် တရားဟောခဲ့သည့် ကျွန်ုပ်၏ နေ့ရက်များ” လို့ခေါ်တဲ့ အတွေ့အကြုံသက်သေခံချက် ဆောင်းပါးတစ်ပုဒ်ကို ကျွန်မ တွေ့ခဲ့တယ်။ ဆောင်းပါးရေးသားသူ ညီအစ်ကိုဟာ နောက်ဆုံးသောကာလမှာ ဘုရားသခင်ရဲ့အမှုကို လက်ခံပြီး မကြာခင်မှာပဲ စစ်ဖြစ်နေတဲ့ရှေ့တန်းက ရွာတစ်ရွာမှာ ဧဝံဂေလိတရား ဖြန့်ဝေဖို့ သူ့အသက်ကို စွန့်စားသွားခဲ့တယ်။ အန္တရာယ်နဲ့ ကြုံရတဲ့အခါ အားနည်းမှုတချို့ကို ဖော်ပြခဲ့ပေမဲ့ ညီအစ်ကိုဟာ ဧဝံဂေလိတရားကို ဆက်ပြီးဖြန့်ဝေဖို့ ဘုရားသခင်ကို အားကိုးခဲ့တယ်။ အဲဒီအတွေ့အကြုံကနေတစ်ဆင့် သူက ဘုရားသခင်ရဲ့ ကာကွယ်စောင့်ရှောက်မှုနဲ့ ကိုယ်တော်ရဲ့ လုပ်ဆောင်ချက်တွေကို လူတွေအများကြီးကို ဘုရားသခင်ရှေ့ကို ပြန်ခေါ်ဆောင်ရာမှာ မျက်မြင်တွေ့ခဲ့ရတယ်။ အဲဒီညီအစ်ကိုရဲ့အတွေ့အကြုံနဲ့ ကိုယ့်အတွေ့အကြုံကို နှိုင်းယှဉ်လိုက်တဲ့အခါ ကျွန်မ အရမ်းကို ရှက်မိတယ်။ ဘုရားသခင်ကို နှစ်တွေအများကြီး ယုံကြည်ပြီး ဘုရားနှုတ်ကပတ်တော်တွေ အများကြီးကို စားသောက်ခဲ့ပေမဲ့ ကျွန်မရဲ့ ဧဝံဂေလိတရား ဖြန့်ဝေခြင်း တာဝန်ကို ကျွန်မက ကောင်းကောင်း မဖြည့်ဆည်းနိုင်ခဲ့ဘူး။ လီဟောင်ရဲ့ယောက်ျားက ကြမ်းတမ်းတဲ့စကားတွေပြောပြီး သူတို့အိမ်ကို မသွားဖို့ တားမြစ်တာကို ကြားပြီးနောက်မှာ၊ ပြီးတော့ လီဟောင်ကိုယ်တိုင်ကလည်း ကျွန်မကို မတွေ့ချင်ဘူးဆိုတာကို သိပြီးနောက်မှာ ကျွန်မက သူ့ကို ဧဝံဂေလိတရား ဖြန့်ဝေဖို့ ဆန္ဒမရှိခဲ့ဘူး။ ကျွန်မရဲ့ ယုံကြည်ခြင်းက အရမ်းအားနည်းတယ်ဆိုတာကို ကျွန်မ တွေ့ခဲ့တယ်။

ကျွန်မ ဘုရားနှုတ်ကပတ်တော် နောက်တစ်ပိုဒ်ကို တွေ့ခဲ့တယ်။ “သို့ဆိုလျှင် မှန်သောလမ်းခရီးအား စုံစမ်းမေးမြန်းသော လူတစ်ဦးကို မည်ကဲ့သို့ ဆက်ဆံသင့်သနည်း။ သူသည် ဧဝံဂေလိတရားဟောပြော၍ ရနိုင်သည့်သူများအတွက် ဘုရားအိမ်တော်သတ်မှတ်ထားသော စည်းမျဉ်းများနှင့် ကိုက်ညီသရွေ့ ထိုသူတို့အား ဟောပြောရန် ငါတို့တွင် ဝတ္တရားရှိသည်။ ထို့ပြင် သူ၏ လက်ရှိ သဘောထားက ညံ့ဖျင်းပြီး ဧဝံဂေလိကို လက်မခံလျှင်ပင် ငါတို့သည် စိတ်ရှည်သည်းခံခြင်းကို ကျင့်သုံးရမည်။ ငါတို့သည် မည်မျှကြာကြာနှင့် မည်သည့်အတိုင်းအတာအထိ စိတ်ရှည်ရမည်နည်း။ သူက သင့်ကို ငြင်းပယ်ပြီး သူ့အိမ်ထဲသို့ ဝင်ခွင့်မပြု၊ ပြီးလျှင် သင်သည် ၎င်းတို့နှင့် မည်မျှပင်ဆွေးနွေးရန် ကြိုးစားပါစေ အလုပ်မဖြစ်သကဲ့သို့ ၎င်းတို့ကို ဖုန်းခေါ်ဆိုမှုလည်း အလုပ်မဖြစ်၊ သို့မဟုတ် အခြားတစ်ယောက်ယောက်အား သူ့ကို သွား၍ ဖိတ်ခေါ်စေခြင်းလည်း အလုပ်မဖြစ်သည့်အပြင် သူက သင့်ကို လျစ်လျူရှုသည့်အချိန်အထိ စိတ်ရှည်ရမည် ဖြစ်သည်။ ဤကိစ္စရပ်တွင် သူ့အား ဧဝံဂေလိတရားဟောဖို့ မဖြစ်နိုင်တော့ပေ။ ယင်းသည် တာဝန်ဝတ္တရားကို သင် ဖြည့်ဆည်းပြီးသား ဖြစ်မည့်အချိန်ပင်ဖြစ်သည်။ ယင်းသည် သင်၏တာဝန်ကို ထမ်းဆောင်ခြင်း၏ ဆိုလိုရင်းဖြစ်သည်။ သို့ဖြစ်၍ မျှော်လင့်ချက်အနည်းငယ် ရှိနေသရွေ့ သင်သည် တတ်နိုင်သည့် နည်းလမ်းတိုင်းကို စဉ်းစားပြီး ဘုရားသခင်၏ နှုတ်ကပတ်တော်များကို ဖတ်ရှုရန်နှင့် ဘုရားသခင်၏ အလုပ်ကို ထိုသူအား သက်သေခံရန်အတွက် အစွမ်းကုန် လုပ်ဆောင်သင့်ပေသည်။ သာဓကအနေဖြင့် သင်သည် လူတစ်ဦးနှင့် နှစ်နှစ်မှ သုံးနှစှအထိ အဆက်အသွယ် ရှိလာသည် ဆိုပါစို့။ သင်သည် ထိုသူအား ဧဝံဂေလိတရားဟောရန်နှင့် ဘုရားသခင်အား သက်သေခံရန် ကြိမ်ဖန်များစွာ ကြိုးစားခဲ့ပြီးဖြစ်သော်လည်း သူ၌ ယင်းကို လက်ခံရန် ရည်ရွယ်ချက်မရှိပေ။ သို့ဖြစ်စေကာမူ သူ၏ သဘောပေါက်နားလည်မှုက အတော်ပင် ကောင်းမွန်ပြီး သူသည် အမှန်တကယ်ပင် ဧဝံဂေလိ တရားဟော၍ရနိုင်သည့် သူတစ်ဦး ဖြစ်သည်။ သင် မည်သည့်အရာ ပြုလုပ်သင့်သနည်း။ ပထမဦးစွာ သင်သည် ထိုသူကို လုံးဝ လက်မလျှော့ရ၊ ထိုအစား သူနှင့် ပုံမှန် အပြန်အလှန် ဆက်ဆံရေးကို ထိန်းသိမ်းထားသင့်ကာ ဘုရားသခင်၏ နှုတ်ကပတ်တော်အား ဖတ်ပြမြဲဖတ်ပြပြီး ကိုယ်တော်၏ အမှုတော်အတွက် သက်သေခံသင့်ပေသည်။ ထိုသူကို လက်မလျှော့လေနှင့်။ အဆုံးတိုင်အောင် စိတ်ရှည်သည်းခံလော့။ တစ်ချိန်ချိန်တွင် သူသည် အသိတရားရလာပြီး မှန်သော လမ်းခရီးကို စတင်၍ စုံစမ်းလေ့လာလိမ့်မည်။ ထို့အတွက်ကြောင့် စိတ်ရှည်သည်းခံခြင်းကို လက်တွေ့လုပ်ဆောင်ပြီး အဆုံးတိုင်အောင် လုံ့လစိုက်ထုတ်ခြင်းသည် ဧဝံဂေလိတရားဟောခြင်း၏ အလွန် အရေးကြီးသော သွင်ပြင်လက္ခဏာ ဖြစ်ရခြင်းဖြစ်သည်။ သို့ဆိုလျှင် ဤအရာကို အဘယ့်ကြောင့် ပြုလုပ်ရသနည်း။ အဘယ့်ကြောင့်ဆိုသော် ယင်းသည် ဖန်ဆင်းခံလူသားတစ်ဦး၏ တာဝန်ပင်ဖြစ်၏။ သင်သည် ထိုသူနှင့် အဆက်အသွယ် ရှိသည်ဖြစ်၍ သင်သည် သူ့ကို ဘုရားသခင်၏ ဧဝံဂေလိတရား ဟောပြောရန် တာဝန်ဝတ္တရားတစ်ခု ရှိသည်။ ဘုရားသခင်၏ နှုတ်ကပတ်တော်များနှင့် ဧဝံဂေလိတရားကို ကို ပထမဆုံး ကြားနာဖူးသည့်အချိန်မှသည် မိမိကိုယ်ကို ပြောင်းလဲသွားသည်အထိ အဆင့်များစွာ ရှိပြီး ဤအရာက အချိန်ယူရလေသည်။ သူ့ဘာသာသူ ပြောင်းလဲလာပြီးနောက် သူ့အား ဘုရားသခင်ရှေ့မှောက်၊ ဘုရားသခင်၏အိမ်တော်သို့ သင် ပြန်၍ ခေါ်ဆောင်လာသင့်သည့် ထိုနေ့ရက်ရောက်ရှိသည်အထိ ဤကာလအပိုင်းအခြားက သင့်ကို စိတ်ရှည်ရန်နှင့် စောင့်ဆိုင်းရန် တောင်းဆိုလေသည်။ ဤသည်မှာ သင်၏ ဝတ္တရားဖြစ်သည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ဧဝံဂေလိတရားဟောခြင်းသည် ယုံကြည်သူများအားလုံး ကောင်းမွန်စွာ ဖြည့်ဆည်းရမည့် တာဝန်ဖြစ်သည်) ဘုရားနှုတ်ကပတ်တော်တွေကတစ်ဆင့် ကျွန်မ သိလာရတာက တစ်စုံတစ်ယောက်ဟာ ဧဝံဂေလိတရား လက်ခံခြင်းစည်းမျဉ်းတွေနဲ့ ကိုက်ညီပြီး သမ္မာတရားကို သဘောပေါက်နားလည်နိုင်သရွေ့ သူတို့ ဘယ်လိုအခက်အခဲတွေပဲ ကြုံရပါစေ၊ ကျွန်မတို့အပေါ် ဘယ်လိုသဘောထားမျိုးပဲ ရှိပါစေ၊ သူတို့ကို ပေါ့ပေါ့ဆဆ စွန့်ပစ်မထားသင့်ဘူးဆိုတာပါပဲ။ ကျွန်မတို့က သူတို့ကို မေတ္တာနဲ့ ဧဝံဂေလိတရား ဖြန့်ဝေဖို့ တတ်နိုင်သမျှ အရာအားလုံးကို လုပ်ရမယ်။ ဒါဟာ ဘုရားသခင်ရဲ့ ရည်ရွယ်ချက်ဖြစ်ပြီး ကျွန်မတို့ရဲ့ တာဝန်လည်း ဖြစ်တယ်။ လီဟောင်က ဘုရားသခင်ကို အမှန်တကယ်ယုံကြည်တယ်၊ သမ္မာတရားကို သဘောပေါက်နားလည်နိုင်ပြီး လူ့သဘာဝလည်း ကောင်းတယ်၊ ဒါတွေအားလုံးက သူ့ကို ဧဝံဂေလိ လက်ခံဖို့ အလားအလာရှိသူအနေနဲ့ အရည်အချင်းပြည့်မီစေခဲ့တယ်။ သူ့ယောက်ျားရဲ့ တားဆီးမှု၊ သူ့မိသားစုဝင်တွေရဲ့ သေဆုံးမှုနဲ့ စီစီပီက ဖြန့်တဲ့ကောလာဟလတွေကြောင့်သာ သူ့စိတ်ထဲမှာ အားနည်းသွားခဲ့တာ။ သူ့ကို မိတ်သဟာယဖွဲ့ပြီး အားပေးကူညီဖို့ ကျွန်မ တတ်နိုင်တာအားလုံးကို လုပ်ခဲ့ရမှာ။ ဒါပေမဲ့ သူ့ယောက်ျားက သတင်းပို့မှာကို ကြောက်ပြီး သူ့ကို ဧဝံဂေလိတရား မဖြန့်ဝေချင်ခဲ့ဘူး။ ကျွန်မရဲ့ တာဝန်သိစိတ်က ဘယ်မှာလဲ။ ကျွန်မ ဘုရားနှုတ်ကပတ်တော်တွေကို တွေးမိတယ်။ “ယခု အလွန်ရိုးစင်းသည်။ သင်၏ နှလုံးသားဖြင့် ငါ့အား မျှော်ကြည့်လော့၊ သို့ဖြစ်လျှင် သင်၏ စိတ်ဝိညာဉ်သည် ချက်ချင်း တိုး၍ သန်မာလိမ့်မည်။ သင်သည် လက်တွေ့လုပ်ဆောင်ရန် လမ်းကြောင်း တစ်ခု ရှိလိမ့်မည် ဖြစ်ပြီး၊ သင်၏ ခြေလှမ်းတိုင်းကို ငါ ဦးဆောင်လမ်းပြမည်။ ငါ၏ နှုတ်ကပတ်တော်ကို သင့်အား အချိန်တိုင်း နှင့် နေရာတိုင်းတွင် ထုတ်ဖော်ပြ လိမ့်မည်ဖြစ်သည်။ မည်သည့်နေရာ မည်သည့်အချိန်တွင် ဖြစ်စေ၊ သို့မဟုတ် ပတ်ဝန်းကျင် မည်မျှ ဆိုးရွားသည်ဖြစ်စေ၊ အကယ်၍ သင်၏ နှလုံးသားဖြင့် ငါ့အား အားထားပါက၊ ငါသည် သင့်အား ရှင်းလင်းစွာ မြင်စေမည်ဖြစ်ပြီး ငါ့နှလုံးသားကို သင့်အား ထုတ်ဖော်ပြမည်။ ဤပုံစံဖြင့်၊ သင်သည် ရှေ့တွင်ရှိသော လမ်းတွင် ပြေးသွားလိမ့်မည်ဖြစ်ပြီး ဘယ်သောအခါမျှ လမ်းပျောက်လိမ့်မည် မဟုတ်ပေ။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အစအဦး၌ ခရစ်တော်၏ မိန့်မြွက်ချက်များ၊ အခန်း (၁၃)) ဘုရားသခင်ရဲ့ နှုတ်ကပတ်တော်တွေက ကျွန်မကို လက်တွေ့လုပ်ဆောင်ရမယ့် လမ်းကြောင်းတစ်ခု ပေးခဲ့တယ်။ ကျွန်မရဲ့တာဝန်မှာ ဘုရားသခင်ကို ဆုတောင်းပြီး အားကိုးခဲ့ရမယ်။ လီဟောင်က အရမ်းနေမကောင်းဖြစ်ခဲ့ပေမဲ့ ကျွန်မ သူ့ဆီကနေ ကိုဗစ် မကူးစက်ခဲ့ဘူး။ သူ့ယောက်ျားရဲ့အတွေးအခေါ်တွေကလည်း ဘုရားသခင်ရဲ့ လက်ထဲမှာပဲ မဟုတ်ဘူးလား။ ဘုရားသခင်ရဲ့ ခွင့်ပြုချက်မရှိဘဲ သူ ကျွန်မကို ဘာမှလုပ်လို့မရဘူး။ လီဟောင်ကို ဧဝံဂေလိတရား ဖြန့်ဝေဖို့နဲ့ ကျွန်မရဲ့တာဝန်ကို ကောင်းကောင်း ဖြည့်ဆည်းဖို့အတွက် ဘုရားသခင်ကို အားကိုးဖို့ လိုအပ်ခဲ့တယ်။ ဒါကို သဘောပေါက်သွားတော့ ကျွန်မရဲ့တာဝန်ကို ထမ်းဆောင်ဖို့ ယုံကြည်ခြင်းနဲ့ ခွန်အားတွေ ပြန်ရခဲ့တယ်။

ကျွန်မ အံ့ဩသွားတာကတော့ လီဟောင်ရဲ့ယောက်ျားက ကျွန်မတို့ကို မြင်တဲ့အခါ ဘာမှမပြောဘဲ လီဟောင်က ကျွန်မတို့ကို ဝမ်းပန်းတသာ ကြိုဆိုခဲ့တာပါပဲ။ ဒါကြောင့် ကျွန်မ ဘုရားနှုတ်ကပတ်တော်တွေကို သတိရသွားတယ်။ “လူသား၏ စိတ်နှလုံးနှင့် ဝိညာဉ်ကို ဘုရားသခင်သည် လက်၌ ကိုင်ဆောင်ထားပြီး သူ၏ ဘဝတစ်ခုလုံးကို ဘုရားသခင်သည် သူ၏မျက်လုံးများဖြင့် ကြည့်ရှုလျက်ရှိသည်။ သင်သည် ဤအရာအားလုံးကို ယုံသည်ဖြစ်စေ၊ မယုံသည်ဖြစ်စေ၊ သက်ရှိဖြစ်ဖြစ်၊ သက်မဲ့ဖြစ်ဖြစ် အရာအားလုံးသည် ဘုရားသခင်၏ အကြံအစည်များနှင့်အညီ ရွေ့လျား၊ ပြောင်းလဲကာ အသစ်ပြန်ဖြစ်ပြီး ကွယ်ပျောက်သွားမည်ဖြစ်သည်။ ဤသည်မှာ အရာအားလုံးအပေါ် ဘုရားသခင် အချုပ်အခြာအာဏာ ကိုင်စွဲသည့်ပုံစံဖြစ်သည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ ဘုရားသခင်သည် လူ့အသက်၏ အရင်းအမြစ်ဖြစ်သည်) ကျမ်းစာထဲမှာလည်း ဒီလိုပြောထားတယ်။ “ရှင်ဘုရင်၏ နှလုံးသားသည် မြစ်ရေကဲ့သို့ ယေဟောဝါ၏ လက်တော်တွင် ရှိ၏။ ယင်းကို သူ အလိုရှိသည့်နေရာတိုင်းသို့ လှည့်တော်မူသည်။” (သုတ္တံကျမ်း ၂၁:၁) ဒီထက်ပိုပြီး မှန်နိုင်ဦးမလား။ ဘုရားသခင်က အရာခပ်သိမ်းအပေါ် အချုပ်အခြာအာဏာ ကိုင်စွဲထားတယ်၊ သက်ရှိဖြစ်စေ၊ သက်မဲ့ဖြစ်စေ အရာအားလုံးက ကိုယ်တော်ရဲ့လက်ထဲမှာပဲ ရှိတယ်။ ကျွန်မက ပူးပေါင်းဆောင်ရွက်ဖို့ ဆန္ဒရှိလာတာနဲ့ အခြေအနေတစ်ခုလုံးက ပြောင်းလဲသွားခဲ့တယ်။ ကျွန်မ အရမ်းပျော်သွားပြီး သူ့ကို မေးလိုက်တယ်၊ “ကျွန်မ ကူးပေးတဲ့ ဘုရားနှုတ်ကပတ်တော်တွေကို ဖတ်ပြီးပြီလား” လို့ပေါ့။ သူက ပြန်ဖြေတယ်၊ “ဟုတ်ကဲ့၊ ဖတ်ပြီးပါပြီ။ ကျွန်မ တကယ်ပဲ သေတော့မယ်လို့ ထင်ခဲ့တာ။ ဒါပေမဲ့ အဲဒီနောက်မှာ ကျွန်မ ဘုရားနှုတ်ကပတ်တော်တွေကို ဖတ်လိုက်တယ်၊ ‘ဘုရားသခင်၏ နှုတ်ကပတ်တော်သည် ထိရောက်သောဆေးဝါး ဖြစ်ပေသည်တကား။’ ‘အနန္တတန်ခိုးရှင် ဘုရားသခင်သည် အရာခပ်သိမ်း တတ်စွမ်းနိုင်သော သမားတော်တစ်ဦး‌ ပေတကား။’ (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အစအဦး၌ ခရစ်တော်၏ မိန့်မြွက်ချက်များ၊ အခန်း (၆)) ဒါက ကျွန်မကို ယုံကြည်ခြင်းနဲ့ ခွန်အား ပေးခဲ့တယ်။ ဘုရားနှုတ်ကပတ်တော်တွေက ကျွန်မကို ကယ်တင်ခဲ့တယ်” တဲ့။ အဲဒီတွေ့ဆုံမှုအတွင်းမှာ အဆင်းနီသော နဂါးကြီးနဲ့ ဘာသာရေးလောကက ဖြန့်တဲ့ကောလာဟလတွေနဲ့ စပ်ဆက်ပြီး ဝိညာဉ်ရေးရာတိုက်ပွဲအကြောင်းကို ကျွန်မ ပြောခဲ့တယ်။ စာတန်ရဲ့ အနှောင့်အယှက်ပေးမှုနဲ့ နှိပ်စက်ညှဉ်းပန်းမှုက ဘုရားသခင်ရဲ့ အမှုတော် သွားလေရာတိုင်းကို လိုက်ပါသွားတယ်။ သခင်ယေရှု အမှုပြုတဲ့အချိန်ကလည်း လူတွေက ကိုယ်တော်အကြောင်းကို ကောလာဟလတွေ ဖြန့်ခဲ့ကြတယ်၊ ပြစ်တင်ရှုတ်ချခဲ့ကြတယ်၊ နောက်ဆုံးမှာ ကားစင်တင်ပြီးတောင် သတ်ခဲ့ကြတယ်။ နောက်ဆုံးသောကာလမှာ ဘုရားသခင် အမှုပြုတဲ့အခါ ခံရတဲ့ညှဉ်းပန်းနှိပ်စက်မှုက ပိုလို့တောင် ဆိုးဝါးခဲ့တယ်။ ဒါက သခင်ယေရှုရဲ့ ပရောဖက်ပြုချက်ကို ပြည့်စုံစေတာပဲ- “ထိုသို့မဖြစ်မီ သူသည် များစွာသောဆင်းရဲဒုက္ခကိုလည်းကောင်း၊ ယခုလူမျိုး (ဒီမျိုးဆက်) ၏ ငြင်းပယ်ခြင်းကိုလည်းကောင်း ခံရမည်။” (ရှင်လုကာခရစ်ဝင် ၁၇:၂၅) နောက်ဆုံးသောကာလမှာ ကိုယ်တော့်နှုတ်ကပတ်တော်တွေကို ဖော်ပြဖို့နဲ့ တရားစီရင်ခြင်းအမှုကို လုပ်ဆောင်ဖို့ ပြန်ကြွလာတဲ့အခါမှာ သခင်က ဘာသာရေးလောကနဲ့ စာတန်ဆန်တဲ့ စီစီပီအစိုးရရဲ့ နှိပ်စက်ညှဉ်းပန်းမှုကို အဆက်မပြတ် ခံခဲ့ရတယ်၊ ဒါပေမဲ့ စာတန်ရဲ့ပရိယာယ်တွေအရ ဘုရားသခင်ရဲ့ ဉာဏ်ပညာကို အသုံးပြုတာဖြစ်ပြီး ကိုယ်တော်က စာတန်ရဲ့ညှဉ်းပန်းနှိပ်စက်မှုကို ကိုယ်တော်ရဲ့အမှုတော်အတွက် အစေခံဖို့ အသုံးပြုခဲ့တယ်။ ကိုယ်တော်က စစ်မှန်တဲ့ ယုံကြည်သူတွေထဲကနေ အယောင်ဆောင် ယုံကြည်သူတွေကို ထုတ်ဖော်ခဲ့တယ်၊ ပြီးတော့ သူရဲဘောကြောင်သူတွေနဲ့ မုန့်ကို အဝစားချင်ရုံပဲ စားချင်တဲ့သူတွေကိုလည်း ထုတ်ဖော်ခဲ့တယ်။ သမ္မာတရားကို အမှန်တကယ်ချစ်မြတ်နိုးတဲ့ စစ်မှန်တဲ့ယုံကြည်ခြင်းရှိသူတွေအားလုံးဟာ အနန္တတန်ခိုးရှင် ဘုရားသခင်နောက်ကို အနီးကပ်လိုက်လျှောက်ကြတယ်၊ ကိုယ်တော်ရဲ့နှုတ်ကပတ်တော်တွေကို စားသောက်ပြီး သမ္မာတရားကို လိုက်စားကြတယ်၊ ဘယ်လိုအခက်အခဲနဲ့ ညှဉ်းပန်းနှိပ်စက်မှုကိုပဲ ကြုံရပါစေ မှန်တဲ့လမ်းခရီးကို ဘယ်တော့မှ မစွန့်လွှတ်ကြဘူး၊ ပြီးတော့ ဘုရားနှုတ်ကပတ်တော်တွေရဲ့ တရားစီရင်ခြင်း၊ ပြစ်တင်ဆုံးမခြင်း၊ စမ်းသပ်မှုတွေနဲ့ စစ်ဆေးခြင်းတွေကို တွေ့ကြုံခြင်းကတစ်ဆင့် သူတို့ဟာ နောက်ဆုံးမှာ သူတို့ရဲ့ ဖောက်ပြန်ပျက်စီးတဲ့ စိတ်သဘောထားတွေကို ဖယ်ရှားပြီး ဘုရားသခင်ရဲ့ စုံလင်အောင်ပြုခြင်းနဲ့ ရယူခြင်းကို ခံကြရတယ်။ ဗျာဒိတ်ကျမ်းက သူတို့ကို ဒီလို စရိုက်လက္ခဏာ သရုပ်ဖော်ထားတယ်။ “ဤသူတို့သည် ကြီးစွာသော ဆင်းရဲဒုက္ခအထဲက ထွက်မြောက်၍၊ မိမိတို့ဝတ်လုံကို သိုးသငယ်၏ အသွေး၌လျှော်၍ ဖြူစေသောသူ ဖြစ်ကြသတည်း။” (ဗျာဒိတ်ကျမ်း ၇:၁၄) သူရဲဘောင်ကြောင်ပြီး ကြောက်တတ်တဲ့ အယောင်ဆောင် ယုံကြည်သူတွေ ထုတ်ဖော်ခံရပြီး ဖယ်ရှားရှင်းလင်းခံခဲ့ရတယ်။ ညှဉ်းပန်းနှိပ်စက်မှုနဲ့ အခက်အခဲမရှိဘဲ ယုံကြည်သူအစစ်အမှန်တွေနဲ့ အယောင်ဆောင်တွေကို ခွဲခြားဖို့ မဖြစ်နိုင်ဘူး။ လီဟောင်က ပြောခဲ့တယ်၊ “ဘုရားသခင်က တကယ်ကို ဉာဏ်ပညာရှိတာပဲ။ သခင်က ကိုယ်တော်ရဲ့အမှုကို လုပ်ဆောင်ဖို့ ပြန်ကြွလာတဲ့အခါ လူတစ်ဦးစီကို ဒီနည်းနဲ့ အမျိုးအစားအလိုက် ခွဲခြားလိမ့်မယ်လို့ ကျွန်မ မသိခဲ့ဘူး” တဲ့။

အဲဒီနောက် နောက်ဆုံးသောကာလမှာ ဘုရားသခင်ရဲ့ တရားစီရင်ခြင်းအမှုနဲ့ပတ်သက်တဲ့ ကျမ်းပိုဒ်တချို့ကို ကျွန်မတို့ အတူတူဖတ်ခဲ့ကြတယ်။ ဒါက အဲဒီကျမ်းပိုဒ်တွေထဲက တစ်ခုဖြစ်ပါတယ်။ “သူ၏တရားစီရင်ခြင်းအမှုကို ဆောင်ရွက်ရာတွင်၊ ဘုရားသခင်သည် လူသား၏သဘာဝကို စကားလုံးအနည်းငယ်မျှဖြင့် အပြည့်အဝ မရှင်းလင်းပေ။ သူသည် ရေရှည်နှင့်ပတ်သက်၍ ဖော်ထုတ်ပြီး ပြုပြင်လေသည်။ ဤကွဲပြားခြားနားသော ဖော်ထုတ်ခြင်းနှင့် ပြုပြင်ပေးခြင်း နည်းစနစ်အားလုံးကို သာမန်စကားလုံးများဖြင့် အစားထိုး၍မရနိုင်ဘဲ၊ ထိုထက် လူက လုံးဝ ပိုင်ဆိုင်ခြင်းမရှိသည့် သမ္မာတရားကို ဤဖော်ထုတ်ခြင်းနှင့် ပြုပြင်ခြင်းအမှုအား ဆောင်ရွက်ရန်အတွက် အသုံးပြုသည်။ ဤသို့သော နည်းလမ်းများကိုသာ တရားစီရင်မှုဟု ခေါ်ဆိုနိုင်သည်။ ဤတရားစီရင်မှုမျိုးမှတစ်ဆင့်သာ လူသားသည် ချိုးနှိမ်ခံရနိုင်ပြီး၊ ဘုရားသခင်နှင့်ပတ်သက်၍ စိတ်နှလုံးအကြွင်းမဲ့ လက်ခံလာစေနိုင်သည့်အပြင်၊ ဘုရားသခင်နှင့် ပတ်သက်သည့် စစ်မှန်သော အသိပညာကို ရရှိနိုင်ပေသည်။ တရားစီရင်ခြင်းအမှု က ဖြစ်ပေါ်စေသည့်အရာမှာ ဘုရားသခင်၏သဘောသဘာဝအမှန်နှင့် သူကိုယ်တိုင်၏ ပုန်ကန်မှုနှင့်ပတ်သက်သည့် အမှန်တရားကို လူသားက သိနားလည်ခြင်း ဖြစ်သည်။ တရားစီရင်ခြင်းအမှုသည် ဘုရားသခင်၏ ရည်ရွယ်ချက်များ၊ ဘုရားသခင်အမှု၏ ရည်ရွယ်ချက်နှင့် လူသား နားမလည်နိုင်သော နက်နဲမှုများတို့နှင့် ပတ်သက်သည့် များပြားလှသော သိနားလည်မှုကို လူသားအား ရရှိနိုင်စေသည်။ ယင်းသည် လူသားကို သူ၏ ဖောက်ပြန်ပျက်စီးသော အနှစ်သာရနှင့် သူ၏ ဖောက်ပြန်ပျက်စီးမှု အရင်းအမြစ်ကို နားလည်ကာ သိရှိနိုင်စေသည့်အပြင် သူ၏ အကျည်းတန်သော မျက်နှာကို သိရခွင့် ပေးလေသည်။ ဤအကျိုးသက်ရောက်မှုအားလုံးတို့ကို တရားစီရင်ခြင်း အမှုက ဖြစ်ပေါ်စေခြင်းဖြစ်သည်၊ အကြောင်းမှာ ဤအမှု၏ အနှစ်သာရသည် ဘုရားသခင်၌ ယုံကြည်ခြင်းရှိသူများ အားလုံးထံသို့ ဘုရားသခင်၏သမ္မာတရား၊ လမ်းခရီးနှင့် အသက်တို့ကို အမှန်တကယ် ဖွင့်ပြပေးသည့် အမှု ဖြစ်သောကြောင့် ဖြစ်သည်။ ဤအမှုသည် ဘုရားသခင် လုပ်ဆောင်သော တရားစီရင်ခြင်းအမှု ဖြစ်၏။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ ခရစ်တော်သည် တရားစီရင်ခြင်း အမှုကို သမ္မာတရားဖြင့် ဆောင်ရွက်၏) ဘုရားနှုတ်ကပတ်တော်တွေကို ဖတ်ပြီးနောက်မှာ ကျွန်မက ထပ်ပြီး မိတ်သဟာယဖွဲ့ခဲ့တယ်၊ “နောက်ဆုံးသောကာလမှာ အနန္တတန်ခိုးရှင် ဘုရားသခင်က တရားစီရင်ခြင်းအမှုကို လုပ်ဆောင်ဖို့ သမ္မာတရားအများကြီးကို ဖော်ပြခဲ့တယ်။ ကိုယ်တော်က ဘုရားသခင်ရဲ့ စီမံခန့်ခွဲမှုအစီအစဉ်ရဲ့ နက်နဲမှု၊ အမှုတော်အဆင့်သုံးဆင့်ရဲ့ အတွင်းဇာတ်လမ်း၊ လူ့ဇာတိခံယူခြင်းရဲ့ နက်နဲမှု၊ ဘုရားသခင်ရဲ့နာမတော်ရဲ့ အဓိပ္ပာယ် စတာတွေကို ရှင်းရှင်းလင်းလင်း ရှင်းပြခဲ့တယ်။ ကိုယ်တော်က စာတန်က လူတွေကို ဘယ်လိုဖောက်ပြန်ပျက်စီးစေတယ်၊ ဘုရားသခင်က လူသားမျိုးနွယ်ကို ဘယ်လိုကယ်တင်တယ်၊ ပြီးတော့ လူက အပြစ်ရဲ့ချည်နှောင်မှုတွေကနေ လွတ်မြောက်ဖို့၊ ကယ်တင်ခြင်းခံရပြီး ကောင်းကင်နိုင်ငံတော်ထဲ ဝင်ရောက်ဖို့ ဘယ်လိုလိုက်စားသင့်သလဲဆိုတာကိုလည်း ရှင်းရှင်းလင်းလင်း ရှင်းပြခဲ့တယ်။ အနန္တတန်ခိုးရှင် ဘုရားသခင်က လူသား အပြစ်ရှိခြင်းရဲ့ အရင်းခံ၊ လူ့သဘာဝရဲ့ ဘုရားသခင်ကို အတိုက်အခံလုပ်တဲ့ အသွင်အပြင်တွေ၊ လူရဲ့ဖောက်ပြန်ပျက်စီးတဲ့ စိတ်သဘောထားနဲ့ စာတန်ဆန်တဲ့အဆိပ်အတောက်အားလုံးကိုလည်း ဖော်ထုတ်ခဲ့တယ်။ ဘုရားသခင်က သမ္မာတရားကို ဖော်ပြဖို့ မကြွလာခဲ့ဘူးဆိုရင် ကျွန်မတို့ရဲ့ ဖောက်ပြန်ပျက်စီးမှုရဲ့ အရင်းခံအကြောင်းကို ဘယ်တော့မှ သိလာမှာမဟုတ်ဘူး။ ဘာသာရေးလောကမှာ တစ်သက်လုံး ယုံကြည်ခြင်းကို လက်တွေ့လုပ်ဆောင်ရင်တောင်မှ ကျွန်မတို့ ဘယ်တော့မှ သန့်စင်ခြင်းခံရမှာ မဟုတ်ဘူး။ တရားစီရင်ခြင်းအမှုဟာ ဘုရားသခင်ရဲ့ စီမံခန့်ခွဲမှုအစီအစဉ်မှာ နောက်ဆုံးအဆင့်အမှုဖြစ်တယ်၊ လူသားမျိုးနွယ်ကို ဘုရားသခင်ကယ်တင်ခြင်းမှာ နောက်ဆုံးအမှုဖြစ်တယ်၊ ဒါကြောင့် ဘုရားသခင်ရဲ့ နောက်ဆုံးသောကာလ တရားစီရင်ခြင်းကို လက်ခံတာဟာ လူသားမျိုးနွယ်က သန့်စင်ခြင်းနဲ့ ကယ်တင်ခြင်းကို ရရှိနိုင်ပြီး ဘုရားသခင်ရဲ့နိုင်ငံတော်ထဲကို ဝင်ရောက်နိုင်ဖို့ တစ်ခုတည်းသော နည်းလမ်းဖြစ်တယ်။ နောက်ဆုံးသောကာလမှာ ဘုရားသခင်ဖော်ပြတဲ့ သမ္မာတရားကို လက်မခံဘဲ ဘုရားသခင်ရဲ့အမှုကို အတိုက်အခံလုပ်ပြီး ပြစ်တင်ရှုတ်ချတဲ့သူတွေ၊ သခင့်ကို နှစ်တွေအများကြီး ယုံကြည်ခဲ့ပေမဲ့ အပြစ်ထဲမှာ နေထိုင်နေတုန်းပဲဖြစ်တဲ့သူတွေ၊ ဖောက်ပြန်ပျက်စီးတဲ့ စိတ်သဘောထားတွေက သန့်စင်ခြင်းနဲ့ ပြောင်းလဲခြင်း မခံရတဲ့သူတွေအပါအဝင်ပေါ့၊ အဲဒီသူတွေဟာ ကယ်တင်ခြင်းခံရမှာမဟုတ်ဘဲ နောက်ဆုံးသောကာလရဲ့ ကြီးမားတဲ့ကပ်ဘေးတွေထဲမှာ ဖျက်ဆီးခံကြရမှာပဲ။ ဘုရားသခင်ရဲ့ အနှစ်ခြောက်ထောင် စီမံခန့်ခွဲမှုအလုပ်က ပြီးဆုံးတော့မှာဖြစ်ပြီး ကပ်ဘေးအမျိုးမျိုးကလည်း ကျရောက်နေပြီ။ နောက်ဆုံးသောကာလမှာ သခင့်ကို မကြိုဆိုဘဲ ကိုယ်တော်ရဲ့တရားစီရင်ခြင်းနဲ့ သန့်စင်ခြင်းကို လက်မခံတဲ့သူတွေဟာ ဘုရားသခင်ရဲ့နိုင်ငံတော်ထဲကို ဝင်ရောက်ဖို့ အခွင့်အရေးရှိမှာ မဟုတ်ဘူး။ ကျေးဇူးတော်ရဲ့ တံခါးက ပိတ်တော့မှာပဲ။ ဘုရားသခင်ရဲ့ နောက်ဆုံးသောကာလအလုပ်ကို အမီလိုက်နိုင်ခဲ့တာ ကျွန်မတို့ အရမ်းကံကောင်းတာပဲ။ ဒါက ဘုရားသခင်ရဲ့ ကျေးဇူးတော်ပဲ” လို့ပေါ့။ လီဟောင်က တက်တက်ကြွကြွနဲ့ ပြန်ဖြေခဲ့တယ်၊ “ကျွန်မကို မစွန့်ပစ်ဘဲ ကျွန်မ သခင့်ကို ကြိုဆိုနိုင်အောင်လို့ နောက်ဆုံးသောကာလ ဧဝံဂေလိတရားကို ကျွန်မဆီကို ဖြန့်ဝေဖို့ ညီအစ်မတို့ကနေတစ်ဆင့် ဆောင်ရွက်ပေးခဲ့တဲ့ ဘုရားသခင်ကို ကျေးဇူးတင်ပါတယ်။ ဘုရားသခင်ရဲ့ အမှုတော်ကို အမီလိုက်နိုင်ခဲ့တာ အရမ်းမင်္ဂလာရှိတာပဲ။ ကျွန်မ ဘုရားနှုတ်ကပတ်တော်ကို ကြိုးစားပမ်းစားနဲ့ တကယ် ဖတ်ရမယ်” တဲ့။

လီဟောင်နဲ့ ဧဝံဂေလိတရား မျှဝေနေချိန်မှာ ဘုရားသခင်ရဲ့ အနန္တတန်ခိုးနဲ့ အချုပ်အခြာအာဏာအပြင် ကိုယ်တော်ရဲ့ အံ့ဩဖွယ်ရာ ကာကွယ်စောင့်ရှောက်မှုကို ကျွန်မ တွေ့ခဲ့ရတယ်။ လီဟောင်နဲ့ နှစ်နာရီကြာအောင် မျက်နှာချင်းဆိုင် စကားပြောပြီးတာတောင် ကျွန်မ ကိုဗစ် မကူးစက်ခဲ့ဘူး။ ဒါက အရာအားလုံးဟာ ဘုရားသခင်ရဲ့ လက်ထဲမှာ ရှိတယ်ဆိုတာကို ကျွန်မကို ပိုပြီးတော့တောင် ပြသခဲ့ပြီး ကျွန်မရဲ့ ဧဝံဂေလိတရားကို ဖြန့်ဝေခြင်းမှာ ပိုပြီးတော့တောင် ယုံကြည်ခြင်းကို ပေးခဲ့ပါတယ်။