ဖလော်ရာ၊ အမေရိကန်ပြည်ထောင်စု

၂၀၂၁ ခုနှစ်၊ ဇွန်လမှာ ကျွန်မကို အသင်းတော်ခေါင်းဆောင်တစ်ယောက်အနေနဲ့ ရွေးကောက်တင်မြှောက်ခဲ့တယ်။ အမှန်အတိုင်းပြောရရင် အဲဒီအချိန်တုန်းက ဒါက တော်တော်လေး မမျှော်လင့်ထားတဲ့ကိစ္စပါ၊ ဘာဖြစ်လို့လဲဆိုတော့ တခြားခေါင်းဆောင်တွေနဲ့ယှဉ်ရင် ကျွန်မက အတော်လေးငယ်တယ်၊ ပြီးတော့ ကျွန်မရဲ့အသက်ဝင်ရောက်မှုကလည်း တော်တော်ပေါ့တန်တယ်၊ ဒီတာဝန်ကို ကျွန်မ ကိုင်တွယ်နိုင်ပါ့မလားဆိုတာ မသိခဲ့ဘူး။ ဒါပေမဲ့ ညီအစ်ကိုမောင်နှမတွေ ဘယ်လောက်များများက ကျွန်မကို မဲပေးခဲ့ကြလဲဆိုတာကို တွေ့လိုက်ရတော့၊ လူတိုင်းက ကျွန်မကို အသိအမှတ်ပြုကြတယ်လို့ ခံစားခဲ့ရပြီး၊ ဒါကြောင့် ဒီတာဝန်ကို ကျွန်မ လက်ခံခဲ့တယ်။ ကျွန်မက ကိုယ့်ကိုယ်ကိုယ် သမ္မာတရားစည်းမျဉ်းတွေနဲ့ တက်တက်ကြွကြွ ပြင်ဆင်ခဲ့တယ်၊ နားမလည်တဲ့ပြဿနာတွေကြုံရတဲ့အခါ တခြားသူတွေဆီက အကူအညီကို အမြန်ရှာဖွေခဲ့တယ်၊ ဒီလိုနဲ့ အသင်းတော်အလုပ်ကို ဘယ်လိုလုပ်ရမလဲဆိုတာကို ကျွန်မ တဖြည်းဖြည်းနဲ့ ပိုပြီးနားလည်လာခဲ့တယ်။ တစ်နေ့မှာ ကျွန်မနဲ့တွဲဖက်အလုပ်လုပ်တဲ့ ညီအစ်မတစ်ယောက်က ကျွန်မကို ပြောတယ်၊ “အထက်ခေါင်းဆောင်က အစ်မက တိုးတက်မှုကိုဦးတည်ပြီး အခက်အခဲတွေကို တက်တက်ကြွကြွ ကျော်လွှားနိုင်တယ်လို့ ပြောတယ်။ တော်တော်လေး ကောင်းတာပဲ” တဲ့။ ဒါကိုကြားရတော့ ကျွန်မ အရမ်းပျော်သွားတယ်၊ ခေါင်းဆောင်ပိုင်းဆီကနေ ဒီလိုချီးမွမ်းစကားမျိုး ရလိမ့်မယ်လို့ မမျှော်လင့်ထားခဲ့ဘူး၊ သူတို့အမြင်မှာတော့ ကျွန်မက သမ္မာတရားကို လိုက်စားပြီး ရှေ့ကိုမျှော်ကြည့်တဲ့သူတစ်ယောက် ဖြစ်ပုံရတယ်၊ ကျွန်မ ဆက်ပြီး ကြိုးစားလုပ်ဆောင်ဖို့ စိတ်ပိုင်းဖြတ်ခဲ့တယ်။ ဒါပေမဲ့ ဒီနောက် မကြာခင်မှာပဲ ကျွန်မအလုပ်မှာ ပြဿနာတွေ တစ်ခုပြီးတစ်ခု ပေါ်လာစပြုခဲ့တယ်။ ကျွန်မရွေးချယ်ခဲ့တဲ့ ကြီးကြပ်ရေးမှူးတွေက တကယ့်အလုပ်ကို မလုပ်ကြဘူး၊ သူတို့အလုပ်ကိုလည်း ကျွန်မက အဆက်မပြတ် နောက်ဆက်တွဲလိုက်လုပ်တာ၊ ဒါမှမဟုတ် ကြီးကြပ်တာမျိုး မလုပ်ခဲ့ဘူး၊ အဲဒါက အလုပ်ကို ဆိုးရွားတဲ့ဆုံးရှုံးမှုတွေ ဖြစ်စေခဲ့တယ်။ ခေါင်းဆောင်က ကျွန်မတာဝန်မှာ တာဝန်မဲ့တဲ့အတွက် ကျွန်မကို ပြုပြင်ခဲ့တယ်၊ ကျွန်မကို အသင်းတော်အလုပ်ကို မကာကွယ်ဘဲ လက်တွေ့အလုပ်မလုပ်တဲ့ အရာရှိလိုလူစားလို့ ခေါ်ခဲ့တယ်။ ကျွန်မရဲ့ပေါ့ဆမှုအတွက် အပြစ်ရှိသလို ခံစားခဲ့ရပြီး ခေါင်းဆောင်က ကျွန်မကို ဘယ်လိုထင်မလဲ၊ ကျွန်မက လူရွေးချယ်ရာမှာ စည်းမျဉ်းတွေကို မလိုက်နာခဲ့ဘူးလို့ သူထင်မှာမျိုး၊ ခေါင်းဆောင်လုပ်ဖို့ မသင့်တော်လို့ ကျွန်မကို ဖြုတ်ချမှာမျိုး ရှိမရှိ ဆိုတာတွေကို စိုးရိမ်ခဲ့တယ်။ ကျွန်မသာ တကယ်ဖြုတ်ချခံရရင် ညီအစ်ကိုမောင်နှမတွေက ကျွန်မကို ဘယ်လိုထင်ကြမလဲ။ သူတို့က ကျွန်မကို ခေါင်းဆောင်အဖြစ် ရွေးချယ်ခဲ့တာ မှားသွားတယ်လို့ ပြောကြမလား။ ကျွန်မ တကယ်ကို စိတ်မချမ်းမသာဖြစ်ခဲ့ရတယ်။ ခေါင်းဆောင်က ကျွန်မကို တာဝန်မှာ တာဝန်မဲ့တဲ့ လက်တွေ့အလုပ်မလုပ်တဲ့ အရာရှိလိုလူစားတစ်ယောက်လို့ ခေါ်ခဲ့တာကို ကျွန်မ စဉ်းစားမိတယ်။ ကျွန်မ ဒီနာမည်ကြီး စွဲမနေချင်ခဲ့ဘူး၊ ဒါကြောင့် ရှေ့ဆက်ပြီး ကျွန်မ ကောင်းကောင်းလုပ်ဆောင်ရင်၊ ခေါင်းဆောင်ရဲ့ ကျွန်မအပေါ်အကဲဖြတ်မှုက ပြောင်းလဲသွားနိုင်တယ်၊ ညီအစ်ကိုမောင်နှမတွေကလည်း ကျွန်မကို လုံးဝအထင်ကြီးလေးစားမှုအဆင့်အသစ်တစ်ခု ရလာနိုင်တယ်လို့ ကျွန်မ ထင်ခဲ့တယ်။ သူတို့က ကျွန်မ ပြုပြင်ခံရပြီးတဲ့နောက်မှာတောင် အပျက်သဘောနဲ့ အရှုံးမပေးဘဲ၊ အဲဒီအစား ကိုယ့်တာဝန်ကို ပုံမှန်အတိုင်း ဆက်လုပ်ခဲ့တယ်၊ ဒါက ကျွန်မက သမ္မာတရားကို လိုက်စားတဲ့သူတစ်ယောက်ဖြစ်ကြောင်း ပြသတယ်လို့ ပြောကြနိုင်တယ်။ ဒီနည်းနဲ့ တိုးတက်မှုကိုဦးတည်ပြီး စိတ်အားထက်သန်တဲ့ ကျွန်မရဲ့ဂုဏ်သတင်းကို ထိန်းသိမ်းနိုင်မှာပဲ။ ဒီအရာတွေကို စိတ်ထဲမှာထားပြီး ကျွန်မအလုပ်မှာရှိတဲ့ပြဿနာတွေကို အမြန်ဆုံးဖြေရှင်းဖို့ ကျွန်မ ကြိုးစားခဲ့တယ်။

နောက်ပိုင်းမှာ အထက်ခေါင်းဆောင်က ကျွန်မအလုပ်အကြောင်းကို ခဏခဏ မေးမြန်းလေ့ရှိတယ်၊ ဒါပေမဲ့ ကျွန်မက အရင်ကလို ရိုးရိုးရှင်းရှင်း လုပ်မနေတော့ဘူး။ ပြဿနာတွေ၊ အခက်အခဲတွေ ကြုံရရင် ခေါင်းဆောင်ဆီ ချက်ချင်းသွားရှာမဲ့အစား၊ အခုတော့ ကျွန်မ ကောင်းကောင်းမလုပ်ခဲ့တဲ့ တခြားအရာတစ်ခုခုကို သူ ရှာတွေ့သွားမှာကို ကျွန်မ ကြောက်နေခဲ့တယ်။ တစ်ခါက ကျွန်မတို့ အထွေထွေအလုပ်တွေကို ကြီးကြပ်ဖို့ လူတစ်ယောက်ရှာဖို့ လိုအပ်ခဲ့တယ်။ ကျွန်မရဲ့ပထမဆုံးအတွေးက ညီအစ်မခလိုအီဆီကို ရောက်သွားတယ်၊ သူက အထွေထွေအလုပ်တွေကို ကိုင်တွယ်ရာမှာ တော်တော်လေးကျွမ်းကျင်တယ်၊ ကိစ္စတွေဖြစ်လာတဲ့အခါ အသင်းတော်ရဲ့အကျိုးစီးပွားတွေကို ကာကွယ်နိုင်တယ်၊ သူ့တာဝန်တွေမှာ ပင်ပန်းမှာမကြောက်ဘဲ ဒုက္ခခံလိုစိတ်လည်း ရှိတယ်။ ဒါပေမဲ့ သူက အရင်က ကြီးကြပ်ရေးမှူးအဖြစ်ကနေ ဖြုတ်ချခံခဲ့ရတာကို ကျွန်မ သတိရလိုက်တယ်၊ သူ့မှာ မာနထောင်လွှားတဲ့စိတ်သဘောထားရှိပြီး တခြားသူတွေနဲ့ အလုပ်မလုပ်နိုင်လို့ပဲ။ ကျွန်မသာ သူ့ကို ထပ်ပြီးရာထူးတိုးပေးလိုက်ပြီး သူက အရင်လိုပဲ ပြုမူနေဦးမယ်ဆိုရင်၊ ခေါင်းဆောင်က ကျွန်မကို ပိုင်းခြားသိမြင်နိုင်စွမ်းမရှိဘူး၊ လူတွေကို အပေါ်ယံပဲကြည့်တယ်လို့ ထင်မှာလား။ ခလိုအီက ကြီးကြပ်ရေးမှူးရာထူးကို ထပ်ပြီးတာဝန်ယူနိုင်မလားဆိုတာကို ကျွန်မ မသေမချာဖြစ်နေခဲ့တယ်၊ ဒါပေမဲ့ ခေါင်းဆောင်ဆီက လမ်းညွှန်မှုတောင်းဖို့ ကျွန်မ အရမ်းကြောက်နေခဲ့ပြီး၊ ကြီးကြပ်ရေးမှူးရွေးချယ်တဲ့လုပ်ငန်းစဉ်ကလည်း မပြီးမပြတ်ဖြစ်နေခဲ့တယ်။ အသင်းတော်ခေါင်းဆောင် ဟာလိုရဲ့ကိစ္စလည်း ရှိသေးတယ်။ ညီအစ်ကိုမောင်နှမခြောက်ယောက်က သူက အရမ်းကို မာနထောင်လွှားတယ်၊ သူ့ရာထူးကိုသုံးပြီး လူတွေကို အထက်စီးကနေပြောပြီး ဖိနှိပ်တယ်လို့ အတူပေါင်းပြီး တိုင်ကြတယ်။ ကျွန်မ အဖွဲ့ခေါင်းဆောင်တွေနဲ့ ကြီးကြပ်ရေးမှူးတွေဆီကို ဒီကိစ္စကို စုံစမ်းဖို့ သွားခဲ့တယ်။ ဟာလိုက တကယ်ကို တော်တော်မာနကြီးပြီး တခြားသူတွေကို ဩဝါဒပေးရတာကြိုက်တယ်ဆိုတာ ကျွန်မ သိခဲ့ရတယ်၊ ဒါပေမဲ့ ညီအစ်ကိုမောင်နှမတွေက စည်းမျဉ်းတွေကို ချိုးဖောက်နေလို့ သူက ဒီလိုမျိုး လုပ်ရတာပါလို့လည်း တချို့က ပြောကြတယ်။ ဒီလို ကွဲပြားတဲ့အကဲဖြတ်မှုတွေကို တွေ့ရတော့ ကျွန်မ ကိစ္စတွေကို ရှင်းရှင်းလင်းလင်း မမြင်နိုင်ခဲ့ဘူး။ ကျွန်မ အထက်ခေါင်းဆောင်ဆီက လမ်းညွှန်မှုတောင်းဖို့ စဉ်းစားခဲ့တယ်၊ ဒါပေမဲ့ နောက်တော့ ကျွန်မက လူတွေကို ပိုင်းခြားသိမြင်ရာမှာ အမှားတွေ ဆက်တိုက်လုပ်ခဲ့ပုံ၊ ခေါင်းဆောင်က ကျွန်မကို စည်းမျဉ်းတွေအများကြီး မိတ်သဟာယဖွဲ့ခဲ့ပုံ၊ အခု အခြေအနေတစ်ခုနဲ့ ရင်ဆိုင်ရတာတောင် ကျွန်မက လူတွေကို ပိုင်းခြားသိမြင်နိုင်စွမ်းမရှိသေးဘူးဆိုတာကို ကျွန်မ စဉ်းစားမိတယ်၊ ပြီးတော့ သူက ကျွန်မကို ဒီလို ထင်မှာမျိုး ရှိမရှိ ကျွန်မ တွေးမိတယ်။ အစွမ်းအစညံ့တယ်၊ ဘယ်လောက်ပဲ မိတ်သဟာယဖွဲ့ဖွဲ့ စည်းမျဉ်းတွေကို နားမလည်နိုင်ဘူး၊ ခေါင်းဆောင်လုပ်ဖို့ မသင့်တော်ဘူးလို့ပေါ့။ ကျွန်မ ချီတုံချတုံဖြစ်နေခဲ့ပြီး၊ အရင်ဆုံး ပိုပြီးလေ့လာသင့်တယ်၊ အခြေအနေကို အပြည့်အဝနားလည်မှပဲ သူ့ကို ဖြုတ်ချသင့်တယ်လို့ တွေးခဲ့တယ်။

တစ်နေ့မှာ ခေါင်းဆောင်က အထွေထွေအလုပ်တွေကို ကြီးကြပ်မဲ့သူကို ကျွန်မရွေးချယ်ရာမှာ ပြဿနာတွေရှိတာကို ရှာဖွေတွေ့ရှိခဲ့ပြီး ဒီလိုကိစ္စတွေကို ကိုင်တွယ်ဖြေရှင်းခြင်းရဲ့ စည်းမျဉ်းတွေကို မိတ်သဟာယဖွဲ့ခဲ့တယ်။ သူက ပြောတယ်၊ “အရင်က ဖြုတ်ချခံခဲ့ရတာက နောက်တစ်ခါ ကြီးကြပ်ရေးမှူးပြန်မဖြစ်နိုင်ဘူးလို့ မဆိုလိုဘူး၊ ဒါက လူတစ်ယောက်ရဲ့နောင်တအပေါ်မှာ မူတည်တယ်။ ပြီးတော့ အထွေထွေအလုပ်တွေရဲ့ ကြီးကြပ်ရေးမှူးရွေးချယ်တာက အသင်းတော်ခေါင်းဆောင်ရွေးချယ်တာနဲ့ မတူဘူး။ သူတို့ရဲ့သမ္မာတရားလိုက်စားမှုအပေါ်မှာ အာရုံမစိုက်ဘဲ သူတို့က အသင်းတော်အလုပ်ကို ထိန်းသိမ်းနိုင်တဲ့ မှန်ကန်တဲ့လူဟုတ်မဟုတ်အပေါ်မှာပဲ အာရုံစိုက်ရမှာပါ။ ဒါ့အပြင် လူအများစုက သူတို့မှာ ဒီအတွက် အရည်အချင်းရှိတယ်လို့ ထင်ရင် သူတို့ လေ့ကျင့်နိုင်တယ်။ မသေချာရင် တခြားညီအစ်ကိုမောင်နှမတွေကို သူနဲ့အတူ ပူးပေါင်းလုပ်ဆောင်ခိုင်းလို့ရတယ်” တဲ့။ သူ့ရဲ့မိတ်သဟာယဖွဲ့ပြီးတဲ့နောက်မှာ သူက ကျွန်မကို ဒီကိစ္စကို ဖြေရှင်းချက်တွေမရှာဘဲ ဒီလောက်ကြာအောင် နှောင့်နှေးစေခဲ့တဲ့အတွက်လည်း ပြုပြင်ခဲ့တယ်၊ ကျွန်မက အရမ်းတစ်ကိုယ်ကောင်းဆန်ပြီး အသင်းတော်အလုပ်ကို မကာကွယ်ဘူးလို့ ပြောခဲ့တယ်။ ဟန်ဆောင်ပြီး ကိစ္စတွေကို ဖုံးကွယ်ဖို့ ကျွန်မ ပိုကြိုးစားလေလေ၊ ပြဿနာတွေ ပိုပြီးဖော်ထုတ်ခံရလေလေပဲဆိုတာကို ကျွန်မ မမျှော်လင့်ထားခဲ့ဘူး။ မသိစိတ်ကနေ ကျွန်မက လူတွေရဲ့လေသံနဲ့ အမူအရာတွေကို ပိုပြီးအာရုံစိုက်လာစပြုခဲ့တယ်။ ခေါင်းဆောင်က ကျွန်မနဲ့စကားပြောတဲ့အခါ၊ သူ့ရဲ့လေသံကနေ ကျွန်မအပေါ်ထားတဲ့သူ့ရဲ့အထင်အမြင်က ပိုဆိုးလာသလား၊ သူက ခေါင်းဆောင်တစ်ယောက်အနေနဲ့ ကျွန်မရဲ့သင့်တော်မှုကို အကဲဖြတ်နေသလား၊ ပြီးတော့ သူက ကျွန်မကို တာဝန်တွေပေးတာကို ရပ်လိုက်တော့မလားဆိုတာကို ကျွန်မ ခန့်မှန်းဖို့ကြိုးစားခဲ့တယ်။ တစ်လအကြာမှာ ခေါင်းဆောင်က ကျွန်မကို ဗီဒီယိုအလုပ်ကို ကြီးကြပ်ဖို့ တာဝန်ပေးလိုက်တော့ ကျွန်မ အံ့ဩသွားခဲ့ရတယ်။ ကျွန်မ တွေးမိတယ်၊ “ဒီတစ်ခါ ငါ ကောင်းကောင်းမလုပ်ရင် တကယ်ပဲ ဖြုတ်ချခံရနိုင်တယ်။ ဒီအခွင့်အရေးကို ငါ အရယူပြီး ကောင်းကောင်းလုပ်ဆောင်ရမယ်” လို့ပေါ့။ ဒါပေမဲ့ ကျွန်မက ဗီဒီယိုအလုပ်နဲ့ မရင်းနှီးဘူး၊ ပြဿနာတွေပေါ်လာတဲ့အခါ ဘယ်လိုဖြေရှင်းရမလဲဆိုတာ မသိခဲ့ဘူး။ ခေါင်းဆောင်က အလုပ်ရဲ့အခြေအနေကို မေးတဲ့အခါ ကျွန်မ အရမ်း ထိတ်လန့်တုန်လှုပ်ခဲ့တယ်၊ ကျွန်မ ကောင်းကောင်းမလုပ်ခဲ့တဲ့အရာတစ်ခုခုကို သူ သတိပြုမိသွားမှာကို ကြောက်ခဲ့တယ်။ ဒါကြောင့် အလုပ်အကြောင်း သတင်းပို့တဲ့အခါ သတင်းကောင်းပဲပို့ပြီး သတင်းဆိုးကို မပို့ခဲ့ဘူး၊ တိုးတက်မှုရှိတဲ့အပိုင်းတွေကိုပဲ မီးမောင်းထိုးပြပြီး၊ တိုးတက်မှုမရှိတဲ့အပိုင်းတွေအတွက်တော့ ဖြေရှင်းနည်းတွေကို ကြိုးစားရှာဖွေနေတယ်လို့ပဲ ပြောခဲ့တယ်။ အဲဒီအချိန်အတောအတွင်းမှာ ကျွန်မ ဖိအားအရမ်းများခဲ့တယ်။ အကြိမ်တော်တော်များများမှာ ဒီအလုပ်ကို ကျွန်မ မကိုင်တွယ်နိုင်ဘူးလို့ ခေါင်းဆောင်ကို ဝန်ခံဖို့ စဉ်းစားခဲ့တယ်၊ ဒါပေမဲ့ ကျွန်မသာ ဒီလိုလုပ်လိုက်ရင်၊ တခြားသူတွေရဲ့အမြင်မှာ ကျွန်မရဲ့တစ်ခုတည်းသော အကောင်းမြင်စရာအရည်အသွေးဖြစ်တဲ့ တိုးတက်မှုကိုဦးတည်တဲ့စိတ်က အပြီးတိုင် ပျောက်ဆုံးသွားမှာကို ကျွန်မ စိုးရိမ်ခဲ့တယ်။ ကျွန်မ မသိလိုက်ခင်မှာပဲ ခြောက်လကုန်သွားခဲ့ပြီး၊ တစ်လနဲ့ပြီးသင့်တဲ့အလုပ်က နှစ်ဝက်လောက် နှောင့်နှေးသွားခဲ့တယ်။ ကျွန်မရဲ့အခြေအနေက ပိုပိုပြီး ဆိုးရွားလာခဲ့တယ်။ ဘုရားနှုတ်ကပတ်တော်တွေကို စားသောက်တဲ့အခါ ဘာအလင်းမှမရဘဲ အမြဲတမ်း ငိုက်မျဉ်းနေခဲ့တယ်၊ ကျွန်မရဲ့ဆုတောင်းချက်တွေကလည်း ဘုရားသခင်နဲ့ အဆက်အသွယ်ပြတ်နေသလို ခံစားခဲ့ရတယ်။ ကျွန်မစိတ်ထဲမှာ စိုးရိမ်ပူပန်မှုနဲ့ မတည်ငြိမ်မှုတွေကို အမြဲတမ်း ခံစားနေခဲ့ရတယ်။

တစ်ခါမှာ ခေါင်းဆောင်က ကျွန်မကို နည်းနည်းပို လုံးစေ့ပတ်စေ့ မေးမြန်းရင်းနဲ့ ဒီပြဿနာတွေကို သိသွားပြီး ကျွန်မကို ဖြုတ်ချခဲ့တယ်။ သူက ပြောတယ်၊ “မင်းက သမ္မာတရားကို မလိုက်စားဘူး၊ ပြီးတော့ မင်းက အပေါ်ယံဂုဏ်ဒြပ်ကိုပဲ မက်မောလွန်းတယ်။ မင်းက ကိုယ့်တာဝန်ကို တစ်ယောက်တည်းလုပ်ရတာကို ပိုကြိုက်တယ်၊ တခြားသူတွေနဲ့ ဘယ်တော့မှ မတိုင်ပင်ဘူး၊ မရှာဖွေဘူး၊ မင်းရဲ့ဂုဏ်သတင်းနဲ့ အဆင့်အတန်းကို အရမ်းဂရုစိုက်လွန်းတယ်။ မင်းအမြဲတမ်း ဒီလိုချည်းပဲ ပြုမူနေတဲ့အတွက် ခေါင်းဆောင်ဆက်လုပ်လို့ မရတော့ဘူး” တဲ့။ ကျွန်မ ဖြုတ်ချခံရတဲ့အချိန်မှာ၊ ဘုရားသခင်ရဲ့ဖြောင့်မတ်တဲ့စိတ်သဘောထားက ကျွန်မအပေါ် ကျရောက်နေမှန်း၊ ကျွန်မစိတ်ထဲမှာ ရှင်းရှင်းလင်းလင်းသိခဲ့ပြီး ကျွန်မမှာ ကိုယ့်ကိုယ်ကိုယ်ပဲ အပြစ်တင်စရာရှိမှန်း ကျွန်မစိတ်ထဲမှာ ရှင်းရှင်းလင်းလင်းသိခဲ့တယ်။ မကြာခင်မှာပဲ ဟာလိုက အသင်းတော်မှာ ရမ်းကားနေပြီး၊ ဂိုဏ်းဂဏတွေဖွဲ့တယ်၊ သူ့ကိုမလိုက်နာတဲ့သူတွေကို ဖိနှိပ်ပြီး ညှဉ်းပန်းနှိပ်စက်နေတယ်ဆိုတာကို ကျွန်မ သိခဲ့ရတယ်။ အသင်းတော်က ကမောက်ကမဖြစ်နေခဲ့တယ်၊ လူတွေက စည်းလုံးမှုမရှိဖြစ်လာခဲ့ပြီး၊ သူမရဲ့ဆိုးယုတ်တဲ့လူ့သဘာဝကြောင့် နောက်ဆုံးမှာ သူမကို သီးသန့်ခွဲထားခြင်းခံခဲ့ရတယ်။ ဒီရလဒ်ကို ရင်ဆိုင်ရတော့ ကျွန်မ အရမ်းကို စိတ်မသက်မသာဖြစ်ခဲ့တယ်။ သူမရဲ့ပြဿနာတွေကို ရှင်းရှင်းလင်းလင်းမမြင်နိုင်ခဲ့ဘဲ အချိန်မီ လမ်းညွှန်မှုမရှာဖွေခဲ့တဲ့ ကျွန်မရဲ့ပျက်ကွက်မှုက ဆိုးယုတ်တဲ့သူတစ်ယောက်ကို ခေါင်းဆောင်နေရာမှာထားပြီး ညီအစ်ကိုမောင်နှမတွေကို အချိန်အကြာကြီး ထိခိုက်စေခဲ့တယ်၊ အသင်းတော်အလုပ်ကိုလည်း ဆိုးဆိုးရွားရွား အဖျက်အမှောင့်လုပ်ခဲ့တယ်။ ကျွန်မတာဝန်တွေကို ဘယ်လောက်ဆိုးဆိုးရွားရွား ထမ်းဆောင်ခဲ့လဲဆိုတာကို ပြန်သုံးသပ်ရင်း၊ ကျွန်မ အပြစ်ရှိသလို ခံစားချက်တွေနဲ့ ပြည့်နှက်နေခဲ့ပြီး ညီအစ်ကိုမောင်နှမတွေကို မျက်နှာချင်းဆိုင်ဖို့ အရမ်းရှက်ခဲ့တယ်။ ကျွန်မ ကိုယ့်ကိုယ်ကိုယ် အကြိမ်ကြိမ် မေးခွန်းထုတ်ခဲ့တယ်၊ ငါ ဘယ်လိုလုပ် ဒီလိုအခြေအနေမျိုးကို ရောက်သွားခဲ့တာလဲ။ ကျွန်မ ဘုရားသခင်ရှေ့မှာ ဒူးထောက်ပြီး ဆုတောင်းခဲ့တယ်၊ ကျွန်မလုပ်ခဲ့သမျှ အားလုံးအပေါ်မှာ အမှန်တကယ် ဆင်ခြင်သုံးသပ်ပြီး နားလည်ဖို့ နည်းလမ်းအတွက် ကျွန်မကို အသိဉာဏ်ပွင့်စေပြီး လမ်းပြတော်မူပါလို့ တောင်းလျှောက်ခဲ့တယ်။

နောက်ပိုင်းမှာ ဘုရားနှုတ်ကပတ်တော်တချို့ကို ကျွန်မ ဖတ်ရင်းနဲ့၊ ကျွန်မရဲ့အခြေအနေအပေါ် နားလည်မှုတချို့ကို ကျွန်မ စတင်ရရှိခဲ့တယ်။ အနန္တတန်ခိုးရှင် ဘုရားသခင် ပြောသည်မှာ “သင်တို့သည် ခေါင်းဆောင်တစ်ဦး၊ သို့မဟုတ် အမှုဆောင်တစ်ဦးဖြစ်လျှင်၊ ဘုရားအိမ်တော်က သင်တို့၏အလုပ်နှင့်ပတ်သက်၍ မေးမြန်းစုံစမ်းပြီး ကြီးကြပ်သည်ကို သင်တို့ ကြောက်သလော။ ဘုရားအိမ်တော်သည် သင်တို့၏အလုပ်၌ ပျက်ယွင်းခြင်းများနှင့် အမှားများကို ရှာဖွေတွေ့ရှိပြီး သင်တို့အား ပြုပြင်မည်ကို သင်တို့ ကြောက်သလော။ အထက်က သင်တို့၏ စစ်မှန်သော အစွမ်းအစနှင့် ဝိညာဉ်ရင့်ကျက်မှုတို့ကို သိကျွမ်းသွားပြီးသည့်နောက် ၎င်းတို့သည် သင်တို့ကို ကွဲပြားသည့် အမြင်ဖြင့် မြင်ကာ သင်တို့ကို ရာထူးတိုးခြင်းအတွက် မစဉ်းစားမည်ကို ကြောက်သလော။ သင့်တွင် ဤကြောက်ရွံ့မှုများရှိလျှင် သင်၏ စိတ်ပါဝင်စားမှုများသည် အသင်းတော်အလုပ်အတွက် မဟုတ်သည်ကို သက်သေပြသည်။ သင်သည် ဂုဏ်သတင်းနှင့် အဆင့်အတန်းအတွက် အလုပ်လုပ်နေခြင်းဖြစ်သည်။ ဤသည်မှာ သင့်တွင် အန္တိခရစ်၏ စိတ်သဘောထားရှိသည်ကို သက်သေပြသည်။ သင်သည် အန္တိခရစ်၏ စိတ်သဘောထားရှိလျှင် အန္တိခရစ်၏ လမ်းကြောင်းကို လျှောက်နိုင်ချေ ရှိသည်။ အန္တိခရစ်များက ဖြစ်ပေါ်စေသည့် မကောင်းမှုအားလုံးကို ကျူးလွန်တတ်သည်။ သင်၏ စိတ်နှလုံးတွင် သင်၏အလုပ်ကို ကြီးကြပ်နေသော ဘုရားအိမ်တော်ကို ကြောက်ရွံ့ခြင်းမရှိလျှင်၊ အထက်မှ မေးခွန်းများ၊ စုံစမ်းမှုများအပေါ် စစ်မှန်သော အဖြေများကို ပံ့ပိုးပေးနိုင်လျှင်၊ မည်သည့်အရာကိုမျှ မဖုံးကွယ်ထားဘဲ သင်သိသမျှပြောနိုင်လျှင်၊ သင်ပြောသည့်အရာက မှန်သည်ဖြစ်စေ၊ မှားသည်ဖြစ်စေ၊ သင်ထုတ်ဖော်ပြသည့် ဖောက်ပြန်ပျက်စီးခြင်းက မည်သို့ဖြစ်စေ၊ သင်က အန္တိခရစ်တစ်ဦး စိတ်သဘောထားကို ထုတ်ဖော်ပြသည်ဆိုလျှင်ပင် သင်က အန္တိခရစ်တစ်ယောက်အဖြစ် လုံးဝ သတ်မှတ်ခံရမည်မဟုတ်ပေ။ အဓိကအချက်သည် သင်က သင်ကိုယ်တိုင်၏ အန္တိခရစ်စိတ်သဘောထားကို သိနိုင်ခြင်းရှိမရှိ၊ ဤပြဿနာကို ဖြေရှင်းရန် သမ္မာတရားကို ရှာဖွေနိုင်ခြင်း ရှိမရှိပင်ဖြစ်သည်။ သင်သည် သမ္မာတရားကို လက်ခံနိုင်သူဖြစ်လျှင် သင်၏ အန္တိခရစ်စိတ်သဘောထားကို ပြုပြင်နိုင်သည်။ သင်က အန္တိခရစ်၏ စိတ်သဘောထားရှိသည်ကို ကောင်းစွာသိသည့်တိုင် ယင်းကို ဖြေရှင်းရန်အတွက် သမ္မာတရားကို မရှာဖွေလျှင်၊ ဖြစ်ပေါ်လာသော ပြဿနာများကို ဖုံးကွယ်ဖို့ပင်ဖြစ်စေ၊ လိမ်ညာဖို့ပင်ဖြစ်စေ၊ တာဝန်ကို ခေါင်းရှောင်ဖို့ပင်ဖြစ်စေ ကြိုးစားလျှင်၊ ပြီးလျှင် ပြုပြင်ခြင်းကို ခံရသောအခါ သမ္မာတရားကို လက်မခံလျှင် ဤသည်မှာ ကြီးလေးသော ပြဿနာတစ်ခုဖြစ်သည်။ သင်က အန္တိခရစ်နှင့် မခြားနားပေ။ သင်က အန္တိခရစ် စိတ်သဘောထားရှိသည်ကို သိလျက် အဘယ်ကြောင့် ယင်းကို ရင်မဆိုင်ရဲသနည်း။ သင်သည် ယင်းကို အဘယ်ကြောင့် ပွင့်လင်းစွာ ချဉ်းကပ်၍ ‘အထက်က ကျွန်ုပ်၏ အလုပ်အကြောင်း မေးမြန်ပါက၊ ကျွန်ုပ်သိသမျှကို ပြောမည်။ ပြီးလျှင် ကျွန်ုပ်ပြုခဲ့သည့် ဆိုးသောအရာများထင်ရှားလာကာ၊ ၎င်းတို့သိသွားသည်နှင့် တစ်ပြိုင်နက် အထက်က ကျွန်ုပ်ကို မသုံးတော့ဘဲ ကျွန်ုပ်၏ ဂုဏ်အဆင့်အတန်း ဆုံးရှုံးရပါက ကျွန်ုပ်ပြောစရာရှိသည့်အရာကို ကျွန်ုပ် ရှင်းရှင်းလင်းလင်း ပြောဦးမည်’ဟု မပြောနိုင်ရသနည်း။ သင်၏အလုပ်ကို ဘုရားအိမ်တော်က ကြီးကြပ်ပြီး မေးခွန်းထုတ်မည်ကို ကြောက်ခြင်းက သင်သည် သမ္မာတရားထက် သင်၏ ဂုဏ်အဆင့်အတန်းကို သင်ပို၍ တန်ဖိုးထားကြောင်း သက်သေပြလေသည်။ ဤသည်မှာ အန္တိခရစ်တစ်ဦး၏ စိတ်သဘောထား မဟုတ်သလော။ အရာအားလုံးထက် ဂုဏ်အဆင့်အတန်းကို ချစ်မြတ်နိုးခြင်းသည် အန္တိခရစ်တစ်ဦး၏ စိတ်သဘောထားဖြစ်သည်။” (နှုတ်ကပတ်တော်၊ အတွဲ (၄)၊ အန္တိခရစ်တို့ကို ဖော်ထုတ်ခြင်း၊ အချက် ၈- ၎င်းတို့သည် အခြားသူများအား သမ္မာတရား သို့မဟုတ် ဘုရားသခင်ကို မနာခံစေဘဲ၊ ၎င်းတို့ကိုသာ နာခံစေသည် (အပိုင်း ၂)) ဘုရားနှုတ်ကပတ်တော်က ကျွန်မရဲ့အခြေအနေကို ဖော်ထုတ်ခဲ့တယ်။ ခေါင်းဆောင်က ကျွန်မအလုပ်ကို ကြီးကြပ်ပြီး မေးမြန်းမှာကို ကျွန်မကြောက်ခဲ့တာဟာ အဓိကအားဖြင့် ဂုဏ်သတင်းနဲ့ ရာထူးအပေါ်ထားတဲ့စိုးရိမ်မှုတွေက ကျွန်မကို တွန်းအားပေးနေလို့ပဲ။ ခေါင်းဆောင်က ကျွန်မအလုပ်မှာရှိတဲ့ပြဿနာတွေကို ရှာဖွေတွေ့ရှိပြီး ကျွန်မကို ဖြုတ်ချမှာကို ကျွန်မကြောက်တယ်၊ ကျွန်မရာထူးကို ဆုံးရှုံးမှာကို ကြောက်ခဲ့တယ်။ ဒါကြောင့် အလုပ်မှာ လမ်းလွဲမှုတွေ၊ ပြဿနာတွေနဲ့ ရင်ဆိုင်ရတဲ့အခါ၊ ကျွန်မ အစွမ်းကုန် ဖုံးကွယ်ခဲ့တယ်၊ ကျွန်မရာထူးကို ထိန်းသိမ်းထားနိုင်သရွေ့၊ လှည့်စားမှုကိုအားကိုးပြီး အလုပ်ကို နှောင့်နှေးစေတာကိုတောင် ပိုပြီးနှစ်သက်ခဲ့တယ်။ ကျွန်မရဲ့ရာထူးကို ဒီလောက်အထိ ချစ်မြတ်နိုးတာက ကျွန်မရဲ့အန္တိခရစ်စိတ်သဘောထားကို ထုတ်ဖော်ခဲ့တာပဲ။ ညီအစ်ကိုမောင်နှမတွေနဲ့ ခေါင်းဆောင်က ကျွန်မအပေါ် အကောင်းမြင်တယ်လို့ ကျွန်မ ခံစားခဲ့ရတယ်၊ ဒါကြောင့် ခေါင်းဆောင်တစ်ယောက်အနေနဲ့ ကျွန်မရာထူးကို ထိန်းသိမ်းဖို့ ကဏ္ဍအားလုံးမှာ ကောင်းကောင်းလုပ်ဆောင်ချင်ခဲ့တယ်။ ကျွန်မကိုယ့်တာဝန်မှာ တာဝန်မဲ့မှု၊ လူရွေးချယ်ရာမှာ စည်းမျဉ်းမရှိမှုတွေကြောင့် ကျွန်မ သုံးလေးကြိမ် ပြုပြင်ခံခဲ့ရတယ်။ အဲဒီနောက်မှာ ခေါင်းဆောင်က ကျွန်မရဲ့အစွမ်းအစက မလုံလောက်ဘူးလို့ပြောပြီး ကျွန်မကို ဖြုတ်ချနိုင်တာမျိုး ရှိမရှိကို ကျွန်မ စပြီး မှန်းဆခဲ့တယ်၊ အဲဒါက ကျွန်မရာထူးကို ဆုံးရှုံးစေမှာပဲ။ ဒါက ကျွန်မကြောက်ရွံ့ခြင်းရဲ့ အရင်းခံအကြောင်းရင်းပဲ။ ဒါကြောင့် ကျွန်မ ဟန်ဆောင်ပြီးဖုံးကွယ်စပြုခဲ့တယ်။ ခေါင်းဆောင်က အလုပ်ကို နောက်ဆက်တွဲလိုက်လုပ်ပြီး မေးခွန်းတချို့မေးတဲ့အခါ၊ ကျွန်မ အဖြေမပေးခင် သုံးလေးကြိမ် စဉ်းစားခဲ့တယ်၊ ပြဿနာတွေ လူသိသွားတာမျိုးကို နည်းနိုင်သမျှနည်းအောင် ကြိုးစားခဲ့တယ်။ ကျွန်မအလုပ်မှာ တိုးတက်မှုတွေကိုပဲ သတင်းပို့ပြီး ပြဿနာတွေကိုတော့ ဖုံးကွယ်ထားခဲ့တယ်။ ကျွန်မ မရှင်းလင်းတဲ့လူတွေ၊ ကိစ္စတွေနဲ့ ကြုံရတဲ့အခါ၊ လမ်းညွှန်မှုမရှာဖွေဘဲ၊ အဲဒီအစား ခေါင်းဆောင်က ကျွန်မက တကယ့်ကိစ္စတွေကို ကိုင်တွယ်ဖြေရှင်းနိုင်တယ်လို့ ထင်အောင် ဟန်ဆောင်ခဲ့တယ်။ တချို့အလုပ်တွေက ရပ်တန့်နေပြီး ရှေ့ဆက်လို့မရတော့တဲ့အခါမှာတောင်၊ ကျွန်မက ကိုယ့်အဆင့်အတန်းကို ကာကွယ်ဖို့အတွက်သက်သက်ဟန်ဆောင်ပြီး လမ်းညွှန်မှုမရှာဘဲ နေခဲ့တယ်။ ဂုဏ်သတင်းနဲ့ အဆင့်အတန်းအတွက် စိုးရိမ်မှုကြောင့် မျက်စိကန်းပြီး ကျွန်မ အမှားတွေ ဆက်တိုက်လုပ်ခဲ့တယ်၊ အလုပ်တွေအများကြီးကို နှောင့်နှေးစေပြီး ပုံမှန်အတိုင်း ရှေ့မဆက်နိုင်အောင် ဖြစ်စေခဲ့တယ်။ ကျွန်မ ဘုရားနှုတ်ကပတ်တော်တွေကို သတိရလိုက်တယ်။ “သင်သည် ယင်းကို အဘယ်ကြောင့် ပွင့်လင်းစွာ ချဉ်းကပ်၍ ‘အထက်က ကျွန်ုပ်၏ အလုပ်အကြောင်း မေးမြန်ပါက၊ ကျွန်ုပ်သိသမျှကို ပြောမည်။ ပြီးလျှင် ကျွန်ုပ်ပြုခဲ့သည့် ဆိုးသောအရာများထင်ရှားလာကာ၊ ၎င်းတို့သိသွားသည်နှင့် တစ်ပြိုင်နက် အထက်က ကျွန်ုပ်ကို မသုံးတော့ဘဲ ကျွန်ုပ်၏ ဂုဏ်အဆင့်အတန်း ဆုံးရှုံးရပါက ကျွန်ုပ်ပြောစရာရှိသည့်အရာကို ကျွန်ုပ် ရှင်းရှင်းလင်းလင်း ပြောဦးမည်’ဟု မပြောနိုင်ရသနည်း။ သင်၏အလုပ်ကို ဘုရားအိမ်တော်က ကြီးကြပ်ပြီး မေးခွန်းထုတ်မည်ကို ကြောက်ခြင်းက သင်သည် သမ္မာတရားထက် သင်၏ ဂုဏ်အဆင့်အတန်းကို သင်ပို၍ တန်ဖိုးထားကြောင်း သက်သေပြလေသည်။ ဤသည်မှာ အန္တိခရစ်တစ်ဦး၏ စိတ်သဘောထား မဟုတ်သလော။ အရာအားလုံးထက် ဂုဏ်အဆင့်အတန်းကို ချစ်မြတ်နိုးခြင်းသည် အန္တိခရစ်တစ်ဦး၏ စိတ်သဘောထားဖြစ်သည်။” ဘုရားနှုတ်ကပတ်တော်တွေရဲ့ဖော်ထုတ်မှုကို ရင်ဆိုင်ရတော့ ကျွန်မစိတ်ထဲမှာ အကြီးအကျယ် ပြစ်တင်ရှုတ်ချခံရသလို ခံစားခဲ့ရတယ်။ ဘုရားသခင်က ကျွန်မတို့ကို အလုပ်အကြောင်း သတင်းပို့တဲ့အခါ ရိုးရိုးသားသားပြောရမယ်၊ ပြဿနာတွေ ရှိပါစေ။ အဆင့်အတန်းဆုံးရှုံးရမှာဖြစ်ရင်တောင် ကိစ္စတွေကို ရှင်းရှင်းလင်းလင်းပြောပြီး မဖုံးကွယ်ရဘူး၊ ပြဿနာတွေကို ရိုးရိုးသားသား သတင်းပို့ရမယ်လို့ သင်ပေးတယ်။ ဒါပေမဲ့ ကျွန်မရဲ့လုပ်ရပ်တွေက လုံးဝဆန့်ကျင်ဘက်ဖြစ်နေခဲ့တယ်။ ကိုယ့်ရဲ့ဂုဏ်သတင်းနဲ့ အဆင့်အတန်းကို ကာကွယ်ဖို့ ကိုယ့်ရဲ့တည်ကြည်မှုကို စတေးပြီး ကျွန်မက လိမ်ညာ၊ အယောင်ဆောင်၊ လှည့်စားတာကိုပဲ ပိုပြီးနှစ်သက်ခဲ့တယ်။ ဘုရားနှုတ်ကပတ်တော်တွေက ကျွန်မကို လုံးလုံးလျားလျား ယုံကြည်သွားစေခဲ့ပြီး၊ ကျွန်မ တကယ်လိုက်စားပြီး တန်ဖိုးထားခဲ့တာက ဂုဏ်သတင်းနဲ့ အဆင့်အတန်းသက်သက်ပဲဆိုတာကို ပြသခဲ့တယ်။

နောက်ပိုင်းမှာ ဘုရားနှုတ်ကပတ်တော် နောက်တစ်ပိုဒ်ကို ကျွန်မ ဖတ်ခဲ့တယ်။ “အန္တိခရစ်များသည် ပင်ကိုအားဖြင့် ကောက်ကျစ်ဆိုးယုတ်ကြသည်။ ၎င်းတို့သည် ရိုးသားသည့် စိတ်နှလုံး၊ သမ္မာတရားကို ချစ်သည့် စိတ်နှလုံး သို့မဟုတ် အပြုသဘောဆောင်သည့် အရာများအတွက် ချစ်ခြင်းစိတ်နှလုံး မပိုင်ဆိုင်ကြပေ။ ၎င်းတို့သည် မှောင်မိုက်သည့် ချောင်များတွင် မကြာခဏ အသက်ရှင်နေကြသည်။ ရိုးသားသည့် သဘောထားဖြင့် မပြုမူကြ၊ မှန်ကန်စွာ ပြောဆိုခြင်းမရှိကြသကဲ့သို့ အခြားသူများအပေါ်ကိုရော၊ ဘုရားသခင်အပေါ်ကိုပါ ကောက်ကျစ်ဆိုးယုတ်ပြီး လှည့်ဖြားတတ်သည့် စိတ်နှလုံးများ ထားရှိကြသည်။ ၎င်းတို့သည် အခြားသူတို့ကို လှည့်ဖြားချင်ကြပြီး ဘုရားသခင်ကိုလည်း လှည့်ဖြားချင်ကြသည်။ ဘုရားသခင်၏ စေ့စေ့ကြည့်ရှုစစ်ဆေးခြင်းကို မဆိုထားနှင့်၊ အခြားသူတို့၏ ကြီးကြပ်မှုကို ၎င်းတို့ လက်ခံကြလိမ့်မည် မဟုတ်။...ထိုသို့သော တစ်စုံတစ်ဦးက အဆင့်အတန်းရရှိသွားသည့်နောက် အခြားလူတို့ အနီးဝန်းကျင်တွင် ၎င်းတို့၏ အပြုအမူမှာ သာ၍ပင် ခိုးကြောင်ခိုးဝှက်ဖြစ်လာကြသည်။ ၎င်းတို့သည် မိမိတို့၏ ရည်မှန်းချက်များ၊ မိမိတို့၏ ဂုဏ်သတင်း၊ မိမိတို့၏ ပုံရိပ်နှင့် မိမိတို့၏ နာမည်၊ မိမိတို့၏ အဆင့်အတန်းနှင့် ဂုဏ်သိက္ခာ စသည်တို့ကို ကာကွယ်ချင်ကြလေသည်။ ထို့ကြောင့် ၎င်းတို့သည် အမှုအရာများကို ၎င်းတို့ လုပ်ဆောင်ပုံ သို့မဟုတ် အမှုအရာများ လုပ်ဆောင်ခြင်းအတွက် ၎င်းတို့၏ ကြံရွယ်ချက်များနှင့်ပတ်သက်၍ ပွင့်ပွင့်လင်းလင်း မပြောချင်ကြပေ။ ၎င်းတို့အနေဖြင့် အမှားတစ်ခုကို ပြုလုပ်မိသည့်အခါတွင်ပင်၊ ဖောက်ပြန်ပျက်စီးသော စိတ်သဘောထားတစ်ခုကို ထုတ်ဖော်ပြမိသည့်အခါတွင်ပင် သို့မဟုတ် ၎င်းတို့ လုပ်ရပ်များနောက်ကွယ်ရှိ ရည်ရွယ်ချက်များနှင့် ကြံရွယ်ချက်များက မှားယွင်းသည့်အခါတွင်ပင် ၎င်းတို့သည် မဖွင့်ဟချင်ကြသကဲ့သို့ ထိုအကြောင်းကို အခြားသူတို့အား သိခွင့်မပေးချင်ကြသည့်အပြင် ညီအစ်ကို မောင်နှမများကို လှည့်စားဖို့အတွက် အပြစ်ကင်းပြီး စုံလင်သည့် အသွင်အပြင်ကို အမြဲထားရှိကြသည်။ အထက်နှင့်ပတ်သက်၍လည်းကောင်း၊ ဘုရားသခင်နှင့် ပတ်သက်၍လည်းကောင်း ၎င်းတို့သည် နားကြားကောင်းသည့် အရာများကိုသာ ပြောဆိုကြပြီး အထက်နှင့် ၎င်းတို့၏ ဆက်ဆံရေးကို ထိန်းသိမ်းရန်အတွက် လှည့်ဖြားတတ်သည့် နည်းစနစ်များနှင့် အလိမ်အညာများကို မကြာခဏ အသုံးပြုကြသည်။ ၎င်းတို့၏ အလုပ်နှင့်ပတ်သက်၍ အထက်ကို အစီရင်ခံပြီး အထက်ကို စကားပြောသည့်အခါ ၎င်းတို့၏ အားနည်းချက်တစ်ခုတလေကိုမျှ မည်သူမျှ မသိရှိနိုင်ရန်အလို့ငှာ မကောင်းသည့် မည်သည့်အရာကိုမျှ ၎င်းတို့ လုံးဝ မပြောကြပေ။ ၎င်းတို့သည် အောက်ပိုင်းအဆင့်များတွင် ၎င်းတို့ လုပ်ဆောင်ပြီးသည့်အရာကိုဖြစ်စေ၊ အသင်းတော်တွင် ဖြစ်ပေါ်သည့် ပြဿနာများ တစ်ခုတလေကိုမျှဖြစ်စေ၊ ၎င်းတို့အလုပ်တွင်ရှိသည့် ပြဿနာများ သို့မဟုတ် အပြစ်အနာအဆာများကိုဖြစ်စေ၊ ၎င်းတို့ နားမလည်နိုင် သို့မဟုတ် ရှင်းရှင်းလင်းလင်း မမြင်နိုင်သည့်အရာများကိုဖြစ်စေ လုံးဝ ထုတ်ပြောကြလိမ့်မည် မဟုတ်။ ၎င်းတို့သည် ဤကိစ္စများနှင့်ပတ်သက်၍ အထက်ကို မည်သည့်အခါမျှ မမေးမြန်းဘဲ သို့မဟုတ် မရှာဖွေဘဲ ထိုအစား ၎င်းတို့၏ အလုပ်တွင် စွမ်းဆောင်နိုင်သည့်၊ ၎င်းတို့၏ အလုပ်ကို လုံးလုံးလျားလျား တာဝန်ယူဆောင်ရွက်နိုင်စွမ်း ရှိသည့် ပုံရိပ်တစ်ခုနှင့် အသွင်အပြင်တစ်ခုကိုသာ ပြသလေသည်။ ၎င်းတို့သည် အသင်းတော်တွင် တည်ရှိသည့် မည်သည့်ပြဿနာများကိုမဆို အထက်သို့ အစီရင်မခံကြသကဲ့သို့ အသင်းတော်တွင် အမှုအရာများက မည်သို့ ပရမ်းပတာဖြစ်နေသည်ဖြစ်စေ၊ ၎င်းတို့အလုပ်တွင် ဖြစ်ပေါ်သည့် အပြစ်အနာအဆာများ၏ အတိုင်းအတာ မည်သို့ဖြစ်စေ၊ သို့မဟုတ် အောက်ပိုင်းအဆင့်များတွင် ၎င်းတို့ အတိအကျ မည်သည့်အရာ လုပ်ဆောင်ကြပြီးသည်ဖြစ်စေ ဤအရာအားလုံးနှင့်ပတ်သက်၍ အထက်အား မတော်တဆ ကြားခွင့်မပေးရန် သို့မဟုတ် မည်သည့်သတင်းကိုမျှ ကြားခွင့်မပေးရန် ကြိုးပမ်းရင်း၊ ပကတိအခြေအနေကို ဖုံးကွယ်ရန် အားထုတ်မှုတစ်ခုအနေဖြင့် ဤကိစ္စရပ်များနှင့် ဆက်စပ်သည့် လူများ သို့မဟုတ် ၎င်းတို့အကြောင်း အမှန်တရားကို သိရှိသည့်လူများအား ဝေးကွာသော နေရာများကို ပြောင်းရွှေ့သည်အထိပင် လုပ်ဆောင်ရင်း ထိုအရာအားလုံးကို ထပ်တလဲလဲ ဖုံးဖိကြလေသည်။ ဤသည်တို့မှာ မည်သည့် အလေ့အထများ ဖြစ်သနည်း။ ဤသည်မှာ မည်သည့် အပြုအမူမျိုး ဖြစ်သနည်း။ သမ္မာတရားကို လိုက်စားသည့် လူတစ်ဦး ရှိသင့်သည့် သရုပ်သကန်မျိုး ဖြစ်သလော။ အလွန် သိသာစွာပင် မဟုတ်ပေ။ ဤသည်မှာ မကောင်းဆိုးဝါးတစ်ကောင်၏ အပြုအမူ ဖြစ်သည်။ အန္တိခရစ်များသည် အခြားလူများနှင့် ဘုရားသခင်ထံမှ ဤအမှုအရာများကို ထိမ်ချန်ထားရင်း မိမိတို့၏ အဆင့်အတန်း သို့မဟုတ် နာမည်ဂုဏ်သတင်းအပေါ် သက်ရောက်မှုတစ်ခု ရှိနိုင်မည့် မည်သည့်အရာကိုမဆို ဖုံးကွယ်ရန်၊ ဖုံးဖိရန် အစွမ်းကုန် လုပ်ဆောင်ကြလိမ့်မည် ဖြစ်သည်။ ဤသည်မှာ ၎င်းတို့၏ အထက်နှင့် အောက်တွင်ရှိသူများကို လှည့်ဖြားခြင်း ဖြစ်သည်။” (နှုတ်ကပတ်တော်၊ အတွဲ (၄)၊ အန္တိခရစ်တို့ကို ဖော်ထုတ်ခြင်း၊ အချက် ၁၁) ဘုရားသခင်က အန္တိခရစ်တွေရဲ့ ဆိုးယုတ်တဲ့သဘာဝကို စိတ်ဖြာလေ့လာဆွေးနွေးတယ်။ သူတို့ရဲ့ကိုယ်ပိုင်အဆင့်အတန်းနဲ့ ဂုဏ်သတင်းနဲ့ပတ်သက်လာရင်၊ အန္တိခရစ်တွေက အမှားတွေလုပ်ခဲ့တာ၊ ဒါမှမဟုတ် မကောင်းမှုတွေလုပ်ခဲ့တာတွေရှိနေပေမဲ့လည်း၊ သူတို့က တခြားသူတွေအတွက် ဟန်ဆောင်ဖို့၊ လှည့်စားဖို့၊ အတုအယောင်ပုံပန်းသဏ္ဌာန်တွေ ဖန်တီးဖို့ အစွမ်းကုန်ကြိုးစားကြတုန်းပဲ။ သူတို့က အထက်လူကြီးတွေရော၊ သူတို့အောက်ကလူတွေကိုပါ လှည့်စားတယ်၊ ကိစ္စတွေကို ဖြေရှင်းဖို့ ဒါမှမဟုတ် ပြုပြင်ဖို့ သမ္မာတရားကို ဘယ်တော့မှ မရှာဖွေဘူး၊ သူတို့က ပြန်လည်းမသုံးသပ်ဘူး၊ နောင်တလည်းမရဘူး။ ကျွန်မ ပြုပြင်ခံရတဲ့အချိန်ကစပြီး၊ ခေါင်းဆောင်က ကျွန်မအပေါ် အကောင်းမမြင်တော့ဘူးလို့ ကျွန်မ သံသယဝင်စပြုခဲ့တယ်။ အဲဒီနောက်မှာတော့ ကျွန်မ စကားပြောတာပဲဖြစ်ဖြစ်၊ ပြုမူတာပဲဖြစ်ဖြစ်၊ အလုပ်အကြောင်း သတင်းပို့တာပဲဖြစ်ဖြစ်၊ ကျွန်မရဲ့အဓိကစိုးရိမ်မှုက ကျွန်မရဲ့ဂုဏ်သတင်းနဲ့ အဆင့်အတန်းကို ဘယ်လိုထိန်းသိမ်းမလဲဆိုတာပဲ။ လူတွေကို ရှင်းရှင်းလင်းလင်းမမြင်နိုင်ဘဲ အခြေအနေတွေကို ဘယ်လိုသင့်တော်အောင် ကိုင်တွယ်ရမလဲဆိုတာ မသိတဲ့အခါ၊ ကျွန်မ အကူအညီမတောင်းခဲ့ဘူး၊ ခေါင်းဆောင်ကိုလည်း သတင်းမပို့ခဲ့ဘူး၊ အဲဒီအစား ပြဿနာတွေကို လျစ်လျူရှုပြီး ဘေးဖယ်ထားခဲ့တယ်၊ အဲဒါက အလုပ်ကို နှောင့်နှေးစေခဲ့တယ်။ ဗီဒီယိုအလုပ်မှာ အခက်အခဲတွေကြုံရပြီး ဘယ်လိုရှေ့ဆက်ရမလဲဆိုတာ ကျွန်မမသိတဲ့အခါ၊ ကျွန်မ လမ်းညွှန်မှုမရှာဖွေခဲ့ဘူး၊ ဒါမှမဟုတ် ပြဿနာတွေ၊ တကယ့်အခြေအနေကို ခေါင်းဆောင်ဆီ ရိုးရိုးသားသား သတင်းမပို့ခဲ့ဘူး။ ကျွန်မခေါင်းထဲမှာ အများဆုံးပြေးနေတဲ့အတွေးကတော့၊ ခေါင်းဆောင်တစ်ယောက်အနေနဲ့ ဒီပြဿနာတွေကို ငါမဖြေရှင်းနိုင်ရင်၊ ငါ ဖြုတ်ချခံရနိုင်တယ်ဆိုတာပဲ။ ဒါကြောင့် အလုပ်က ဘယ်လောက်ပဲအရေးကြီးပါစေ၊ ကျွန်မရဲ့ဂုဏ်သတင်းနဲ့ အဆင့်အတန်းကို ဆက်ပြီးကာကွယ်ခဲ့တယ်၊ ပြဿနာတွေကို ဖြေရှင်းနိုင်စွမ်းရှိတဲ့သူအဖြစ် ကိုယ့်ကိုယ်ကိုယ်ပြသဖို့ လှည့်စားမှုအမျိုးမျိုးကို အသုံးပြုခဲ့တယ်၊ အဲဒါက ဗီဒီယိုအလုပ်ကို ခြောက်လလောက်အထိ နှောင့်နှေးစေခဲ့တယ်။ အနှစ်သာရအားဖြင့်၊ ကျွန်မက ပေါ်တင်လိမ်ညာပြီး အထက်အောက်အားလုံးကို လှည့်စားနေခဲ့တာပဲ။ ကျွန်မရဲ့စိတ်သဘောထားက တကယ်ကို ကောက်ကျစ်ဆိုးယုတ်ပြီး လှည့်ဖြားတတ်တယ်ဆိုတာကို ကျွန်မ တွေ့ခဲ့ရတယ်။ ကျွန်မ လောကမှာ အလုပ်လုပ်ခဲ့တဲ့ အတိတ်ကအတွေ့အကြုံတွေကို ပြန်သုံးသပ်မိတယ်။ ခေါင်းဆောင်တွေက အလုပ်ကို စစ်ဆေးပြီး ထူးချွန်တဲ့ဌာနတွေကို အကဲဖြတ်ဖို့ လာတဲ့အခါတိုင်း၊ ဘာတွေကို စစ်ဆေးမလဲဆိုတာကို ကျွန်မတို့ သိလိုက်တာနဲ့၊ စစ်ဆေးမှုကို ရင်ဆိုင်ဖို့ အတုအယောင်အချက်အလက်အမျိုးမျိုးကို ထပ်ထည့်ဖို့ အချိန်ပိုလုပ်ခဲ့ကြတယ်၊ ပြီးတော့ စွမ်းဆောင်ရည်ညံ့ဖျင်းတဲ့အပိုင်းတွေ၊ ဒါမှမဟုတ် အစီရင်ခံထားတဲ့ကိစ္စတွေရဲ့ သဲလွန်စအားလုံးကို ဖျက်ပစ်ခဲ့ကြတယ်။ ဒီနည်းနဲ့၊ ကျွန်မတို့က များသောအားဖြင့် စစ်ဆေးမှုတွေကို လှည့်စားကျော်ဖြတ်နိုင်ခဲ့ပြီး “ထူးချွန်ဌာန” ဆိုတဲ့ဘွဲ့ကို ရရှိခဲ့ကြတယ်။ ဒီလိုဆိုးယုတ်တဲ့ရေစီးကြောင်းရဲ့ လွှမ်းမိုးမှုအောက်မှာ၊ လူတွေက ရိုးရိုးသားသားပြောဆိုလုပ်ဆောင်ဖို့ကို အာရုံမစိုက်ကြတော့ဘူး၊ သူတို့က တစ်ယောက်ကိုတစ်ယောက် လှည့်စားကြပြီး၊ သူတို့ရဲ့ပန်းတိုင်တွေကို ရောက်ဖို့အတွက် ဘယ်နည်းလမ်းကိုမဆို အသုံးပြုကြတယ်။ နောက်ဆုံးသောကာလ ဘုရားသခင်ရဲ့အလုပ်ကို မလက်ခံခင်က ကျွန်မ အပြုသဘောဆောင်တဲ့အရာတွေနဲ့ အပျက်သဘောဆောင်တဲ့အရာတွေကို မခွဲခြားနိုင်ခဲ့ဘူး။ လောကရဲ့ဆိုးယုတ်တဲ့ရေစီးကြောင်းတွေအတိုင်း လိုက်လျောညီထွေနေခဲ့ပြီး လူသားပုံသဏ္ဌာန်မရှိဘဲ အသက်ရှင်ခဲ့တယ်။ အခုတော့ နောက်ဆုံးသောကာလ ဘုရားသခင်ရဲ့အလုပ်ကို လက်ခံပြီး နှစ်ပေါင်းများစွာကြာခဲ့ပြီးတဲ့နောက်၊ ဘုရားနှုတ်ကပတ်တော်တွေအများကြီးကို စားသောက်ပြီး၊ လူဖြစ်ခြင်းရဲ့အခြေခံတချို့ကို နားလည်ပြီးတဲ့နောက်မှာတောင်၊ ကျွန်မရဲ့ဂုဏ်သတင်းနဲ့ အဆင့်အတန်းကို ထိန်းသိမ်းဖို့အတွက် ကျွန်မတာဝန်တွေမှာ လှည့်စားမှုနဲ့ အယောင်ဆောင် အသွင်အပြင်ကို အားကိုးနေတုန်းပဲ၊ ကောင်းတဲ့အရာတွေကိုပဲ သတင်းပို့ပြီး မကောင်းတာတွေကိုတော့ ချန်လှပ်ထားခဲ့တယ်၊ ဒါက သိလျက်နဲ့ ပြစ်မှားကျူးလွန်နေတာ၊ ဘုရားသခင်ကို လှည့်စားပြီး အတိုက်အခံလုပ်နေတာပဲ။ ဒါကို ပြန်သုံးသပ်ရင်း ကျွန်မ ကြောက်စိတ်တွေနဲ့ ပြည့်နှက်သွားခဲ့တယ်။ အတိတ်တုန်းက ဘုရားသခင်က အန္တိခရစ်တွေရဲ့အပြုအမူကို ဖော်ထုတ်တာကို ကြားတဲ့အခါ၊ ကျွန်မက သူတို့ကို မကောင်းမှုတွေအများကြီးလုပ်ပြီး သိသိသာသာ အန္တိခရစ်ဖြစ်တဲ့သူတွေနဲ့ပဲ အမြဲတမ်း ဆက်စပ်ခဲ့တယ်၊ ဒီစကားလုံးတွေနဲ့ ကိုယ့်ကိုယ်ကိုယ် ဘယ်တော့မှ အလေးအနက်ထားပြီး မသုံးသပ်ခဲ့ဘူး။ အခုတော့ ဘုရားနှုတ်ကပတ်တော်တွေရဲ့ဖော်ထုတ်မှုနဲ့ အဖြစ်မှန်တွေရဲ့ ထုတ်ဖော်မှုကနေတစ်ဆင့်၊ ကျွန်မမှာ တကယ်ပဲ အန္တိခရစ်ရဲ့စိတ်သဘောထားနဲ့ အပြုအမူတွေရှိတယ်ဆိုတာကို ကျွန်မ တွေ့ခဲ့ရတယ်။ ကျွန်မစိတ်ထဲမှာ ဘုရားသခင်ကို အရေးတကြီး ဆုတောင်းခဲ့တယ်၊ နောင်တရပြီး ပြောင်းလဲချင်တယ်၊ ဒီလိုမျိုး ဆက်ပြီး မကျင့်ကြံမပြုမူချင်တော့ဘူးလို့ ဆန္ဒပြုခဲ့တယ်။

နောက်ပိုင်းမှာ ဘုရားနှုတ်ကပတ်တော်အပိုဒ်နည်းနည်းကို ကျွန်မ ဖတ်ခဲ့တယ်၊ အဲဒါတွေက ကျွန်မရဲ့ပြဿနာတွေအပေါ် နောက်ထပ်နားလည်မှုတချို့နဲ့ လက်တွေ့လုပ်ဆောင်ဖို့ လမ်းကြောင်းတစ်ခုကို ပေးခဲ့တယ်။ အနန္တတန်ခိုးရှင် ဘုရားသခင် ပြောသည်မှာ “လူအချို့သည် အသင်းတော်က မြှင့်တင်ပေးပြီး ပျိုးထောင်ပေခြင်း ခံရကာ လေ့ကျင့်ဖို့ ကောင်းမွန်သည့် အခွင့်အရေးကို လက်ခံရရှိကြသည်။ ဤသည်မှာ ကောင်းသောအရာတစ်ခု ဖြစ်သည်။ ၎င်းတို့သည် ဘုရားသခင်၏ ချီးမြှောက်ခြင်းနှင့် ကျေးဇူးပြုခြင်းတို့ကို ခံခဲ့ရသည်ဟု ပြောနိုင်သည်။ သို့ဆိုလျှင် ၎င်းတို့သည် မိမိတို့၏တာဝန်ကို မည်သို့ ထမ်းဆောင်သင့်သနည်း။ ၎င်းတို့ လိုက်နာသင့်သည့် ပထမဆုံး အခြေခံသဘောတရားသည် သမ္မာတရားကို နားလည်ဖို့ဖြစ်သည်၊ ၎င်းတို့က သမ္မာတရားကို နားမလည်သည့်အခါ၊ ၎င်းတို့ သမ္မာတရားကို ရှာဖွေရမည်ဖြစ်ပြီး မိမိတို့ဘာသာ ရှာဖွေပြီးသည့်နောက်တွင် ၎င်းတို့ နားမလည်သေးပါက အတူတကွ မိတ်သဟာယပြုကာ ရှာဖွေဖို့ သမ္မာတရား နားလည်သူတစ်ဦးကို ၎င်းတို့ ရှာဖွေနိုင်သည်။ ယင်းက ပြဿနာဖြေရှင်းခြင်းကို ပို၍ မြန်ဆန်စေပြီး ပို၍ အချိန်ကိုက်ဖြစ်စေလိမ့်မည်။ သင်သည် သမ္မာတရားကို သိနားလည်မှု ရရှိရန်နှင့် ပြဿနာကို ဖြေရှင်းရန်အလို့ငှာ၊ ဘုရားသခင်၏ နှုတ်ကပတ်တော်များကို သင့်ဘာသာ ဖတ်ရှုခြင်း၌ အချိန်ပိုသုံးဖို့ကိုလည်းကောင်း၊ ဤနှုတ်ကပတ်တော်များကို စဉ်းစားချင့်ချိန်ခြင်းဖြင့် အချိန်ပိုသုံးဖို့ကိုလည်းကောင်း အာရုံစိုက်ပါက၊ ဤသည်မှာ အလွန် နှေးကွေးသည်။ “ဖြည်းဖြည်းချင်း ကုစားမှုသည် အရေးပေါ်လိုအပ်ချက်များကို မဖြေရှင်းနိုင်” ဟူသည့် ဆိုရိုးရှိသည့်အတိုင်းပင် ဖြစ်သည်။ သမ္မာတရားနှင့် ပတ်သက်လာသည့်အခါ၊ သင်သည် မြန်မြန်ဆန်ဆန် တိုးတက်လိုပါက၊ အခြားသူများနှင့် သဟဇာတကျကျ ပူးပေါင်းလုပ်ဆောင်ဖို့ နည်းလမ်း၊ ပို၍များသော မေးခွန်းများမေးဖို့ နည်းလမ်းနှင့် ပို၍ ရှာဖွေဖို့နည်းလမ်းတို့ကို သင်ယူလေ့လာရမည်။ သို့မှသာလျှင် မည်သည့်နှောင့်နှေးမှုမျှ မရှိဘဲ၊ သင်၏အသက်တာက လျင်မြန်စွာ ကြီးထွားမည် ဖြစ်ပြီး သင်သည် ပြဿနာများကို အချိန်မီ ဖြေရှင်းနိုင်လိမ့်မည် ဖြစ်သည်။ သင်သည် ရာထူးတိုးခံရစဖြစ်ပြီး အစမ်းခန့်ကာလတွင်သာ ရှိသေးကာ၊ သမ္မာတရားကို အမှန်တကယ် နားမလည်သောကြောင့်၊ သို့မဟုတ် သမ္မာတရား၏ စစ်မှန်မှုကို မပိုင်ဆိုင်သောကြောင့်၊ သင်သည် ဤဝိညာဉ်ရင့်ကျက်မှု မရှိသေးသောကြောင့်၊ သင်၏ ရာထူးတိုးခြင်းက သင်သည် သမ္မာတရား လက်တွေ့ကျမှုကို ပိုင်ဆိုင်သည့်သဘောဖြစ်သည်ဟု မတွေးလေနှင့်။ ဤသည်မှာ မမှန်ကန်ပေ။ သင်သည် အလုပ်အပေါ် ဝန်တာစိတ်ရှိပြီး ခေါင်းဆောင်တစ်ဦး၏ အစွမ်းအစကို ပိုင်ဆိုင်ရုံသက်သက်ကြောင့်၊ သင်သည် ရာထူးတိုးခြင်းနှင့် ပျိုးထောင်ပေးခြင်းတို့အတွက် ရွေးချယ်ခံရခြင်း ဖြစ်သည်။ သင်၌ ဤဆင်ခြင်တုံတရား ရှိသင့်သည်။ ရာထူးတိုးခံရပြီး ခေါင်းဆောင် သို့မဟုတ် အမှုဆောင်တစ်ဦး ဖြစ်လာပြီးသည့်နောက်တွင် သင်သည် သင်၏ ရာထူးကို အခိုင်အမာစွဲကိုင်ကာ သင်သည် သမ္မာတရားကို လိုက်စားသူတစ်ဦးဖြစ်ကြောင်းနှင့် သမ္မာတရား လက်တွေ့ကျမှုကို ပိုင်ဆိုင်ကြောင်း ယုံကြည်လာလျှင်၊ ညီအစ်ကိုမောင်နှမများ၌ မည်သည့်ပြဿနာများ ရှိပါစေ၊ သင်က နားလည်သယောင်၊ ဝိညာဉ်ရေးဆန်သယောင် ဟန်ဆောင်လျှင် ဤသည်မှာ မိုက်မဲသည့် နည်းလမ်းဖြစ်ပြီး ယင်းက သူတော်ကောင်း အယောင်ဆောင်ဖာရိရှဲများကဲ့သို့ တူညီသောနည်းလမ်းပင် ဖြစ်သည်။ သင်သည် မှန်မှန်ကန်ကန် စကားပြောဆိုပြီး ပြုမူလုပ်ဆောင်ရမည်။ သင် နားမလည်သည့်အခါတွင် အခြားသူများကို မေးနိုင်သည်၊ သို့မဟုတ် အထက်မှ အဖြေများကို ရှာနိုင်သည်၊ အထက်မှ မိတ်သဟာယကို ရှာဖွေနိုင်သည်။ ဤအရာတစ်ခုမျှ ရှက်စရာအကြောင်း မရှိပေ။ သင် မမေးလျှင်ပင်၊ သင်၏ စစ်မှန်သော ဝိညာဉ်ရင့်ကျက်မှုကို အထက်က သိဦးမည် ဖြစ်ပြီး၊ သင်၌ သမ္မာတရား လက်တွေ့ကျမှု မရှိသည်ကို သိလိမ့်မည်။ ရှာဖွေခြင်းနှင့် မိတ်သဟာယပြုခြင်းတို့သည် သင်လုပ်သင့်သည့် အရာဖြစ်သည်။ ဤသည်မှာ သာမန်လူ့သဘာဝတွင် တွေ့ရှိသင့်သည့် ဆင်ခြင်တုံတရား ဖြစ်ပြီး ခေါင်းဆောင်များနှင့် အမှုဆောင်များ လိုက်နာသင့်သည် စည်းမျဉ်းဖြစ်သည်။ ယင်းသည် အရှက်ရစရာတစ်ခု မဟုတ်ပေ။ သင်သည် ခေါင်းဆောင်တစ်ဦးဖြစ်သည်နှင့် စည်းမျဉ်းများကို နားမလည်ခြင်းဖြစ်စေ၊ အခြားလူများကို သို့မဟုတ် အထက်ကို အစဉ်မပြတ် မေးခွန်းများမေးခြင်းဖြစ်စေ ရှက်စရာကောင်းသည်ဟု ထင်မြင်ပြီး အခြားသူများက သင့်အား အထင်သေးမည်ကို စိုးရွံ့နေလျှင် သင်သည် ရလဒ်အနေဖြင့် အရာရာကို နားလည်သည်၊ အရာရာကို သိမြင်သည်၊ အလုပ်ကို လုပ်ဆောင်နိုင်စွမ်းရှိသည်၊ မည်သည့်အသင်းတော်အလုပ်ကိုမဆို လုပ်ဆောင်နိုင်သည်၊ သင့်အား သတိပေးရန်ဖြစ်စေ၊ မိတ်သဟာယဖွဲ့ရန်ဖြစ်စေ၊ သင့်အတွက် ထောက်ကူရန်ဖြစ်စေ၊ သင့်ကို ပံ့ပိုးရန်ဖြစ်စေ မည်သူ့ကိုမျှမလိုအပ်ဟု ဟန်ဆောင်လျက် အယောင်ဆောင်လျှင် ဤသည်မှာ အန္တရာယ်ရှိကာ သင်သည် မာနထောင်လွှားလွန်းပြီး မိမိကိုယ်ကို မှန်သည်ဟု ယူမှတ်လွန်းခြင်း၊ ဆင်ခြင်တုံတရား ကင်းမဲ့လွန်းခြင်းဖြစ်သည်။ သင်သည် ကိုယ့်အတိုင်းအဆပင်ကိုယ် မသိပေ။ ဤသည်မှာ သင့်ကို နားဝေတိမ်တောင်ဖြစ်သော လူတစ်ဦး မဖြစ်စေသလော။ ဤသို့သောလူများသည် ဘုရားအိမ်တော်အားဖြင့် ရာထူးတိုးပေးခြင်း၊ ပျိုးထောင်ပေးခြင်းအတွက် စံသတ်မှတ်ချက်နှင့် အမှန်တကယ် မကိုက်ညီပေ။ ၎င်းတို့သည် အနှေးနှင့် အမြန်ဆိုသလို ဖြုတ်ချခြင်းနှင့် ဖယ်ရှားရှင်းလင်းခြင်း ခံရလိမ့်မည်။” (နှုတ်ကပတ်တော်၊ အတွဲ (၅)၊ ခေါင်းဆောင်များနှင့် အမှုဆောင်များ၏ တာဝန်များ၊ ခေါင်းဆောင်များနှင့် အမှုဆောင်များ၏ တာဝန်များ (၅)) “အချို့ကလည်း ‘ကျွန်ုပ်တို့သည် အခက်အခဲများ သို့မဟုတ် ပြဿနာများနှင့် ကြုံတွေ့ရသည့်အခါ ဦးစွာ ရက်အနည်းငယ် တွေးတောကြံဆရန် လိုအပ်ပြီး အမှန်တကယ် ဖြေရှင်းချက် မရှာနိုင်မှသာ ယင်းကို တင်ပြသင့်သည်’ ဟု ဆိုကြသည်။ ဤသို့ပြောသောသူတို့၌ အကြောင်းပြချက်အချို့ ရှိသည်ဟု ထင်ရနိုင်သော်လည်း ဤသို့ တွေးတောကြံဆနေသည့် ရက်များက ကြန့်ကြာမှုများကို ဖြစ်စေနိုင်ချေရှိသည် မဟုတ်လော။ ရက်အနည်းငယ် တွေးတောကြံဆခြင်းက ပြဿနာကို ဖြေရှင်းပေးလိမ့်မည်ဟု သင်သည် သေချာနိုင်သလော။ ယင်းက နောက်ထပ်ကြန့်ကြာမှုကို မဖြစ်စေဟု သင် အာမခံနိုင်သလော။ အခြားသူများက ‘ကျွန်ုပ်တို့က ပြဿနာတစ်ခုကို ချက်ချင်းတင်ပြလျှင် ဤသေးငယ်သော ပြဿနာကိုပင် ကျွန်ုပ်တို့ ထိုးထွင်းသိမြင်ခြင်း မရှိဟု အထက်က ထင်မည် မဟုတ်လော။ ၎င်းတို့က ကျွန်ုပ်တို့ကို မိုက်မဲပြီး အသိဉာဏ်မဲ့သည်ဟု ခေါ်ကာ ပြုပြင်မည် မဟုတ်လော’ ဟု ဆိုကြသည်။ ၎င်းတို့ ဤသို့ပြောဆိုခြင်းမှာ မှားပေသည်။ သင်သည် ပြဿနာကို တင်ပြသည်ဖြစ်စေ၊ မတင်ပြသည်ဖြစ်စေ သင်၏ အစွမ်းအစမှာ ထင်ရှားပြီးသားဖြစ်သည်၊ အထက်က အားလုံးကို သိပေသည်။ သင်က ပြဿနာတစ်ခုခုကို မတင်ပြလျှင် အထက်က သင့်ကို အထင်ကြီးမည်ဟု သင်ထင်သလော။ သင်က ပြဿနာကို တင်ပြပြီး ယင်းက အရေးကြီးသောကိစ္စရပ်များကို ကြန့်ကြာမှုများ မဖြစ်စေခဲ့လျှင် ဘုရားအိမ်တော်က သင့်ကို တာဝန်ခံခိုင်းမည် မဟုတ်ပေ။ သို့သော်လည်း သင်က ယင်းကို မတင်ပြဘဲ ကြန့်ကြာမှုများ ဖြစ်သွားစေပါက သင့်ကို တိုက်ရိုက် တာဝန်ခံခိုင်းမည်ဖြစ်ပြီး သင့်ကို ချက်ချင်း ဖြုတ်ချကာ နောက်တစ်ကြိမ် မည်သည့်အခါမျှ အသုံးပြုတော့မည် မဟုတ်ပေ။ ဘုရားသခင် ရွေးချယ်ထားသောလူများကလည်း သင့်ကို အသိဉာဏ်မဲ့သူ၊ မိုက်မဲသူ၊ ဉာဏ်ရည်မမီသူနှင့် စိတ်မမှန်သူအဖြစ် မြင်ကြမည်ဖြစ်ပြီး ၎င်းတို့က သင့်ကို မုန်းတီးကာ ထာဝရ စက်ဆုပ်ရွံရှာကြလိမ့်မည်။...ယခုအချိနဆိုလျှင် ဤသို့သော ပြဿနာမျိုးများကို သင်တို့အားလုံး ထိုးထွင်းသိမြင်နိုင်သင့်ပြီ မဟုတ်လော။ သင် မကိုင်တွယ်နိုင်သော ပြဿနာများနှင့် ကြုံတွေ့ရသည့်အခါ ယင်းတို့ကို ဆုံးဖြတ်ချက်ချသည့်အဖွဲ့ထံ အမြန်တင်ပြပြီး ဖြေရှင်းနည်းများအတွက် မိတ်သဟာယဖွဲ့လော့။ အကယ်၍ ဆုံးဖြတ်ချက်ချသည့်အဖွဲ့က ယင်းတို့ကို မကိုင်တွယ်နိုင်ပါက ယင်းတို့ကို အထက်သို့ ချက်ချင်းတင်ပြလော့။ ဤအရာ၊ သို့မဟုတ် ထိုအရာအတွက် မစိုးရိမ်နှင့်၊ ပြဿနာကို ချက်ချင်းဖြေရှင်းနိုင်ခြင်းသည် အရေးအကြီးဆုံးသော အရာဖြစ်ပေသည်။” (နှုတ်ကပတ်တော်၊ အတွဲ (၅)၊ ခေါင်းဆောင်များနှင့် အမှုဆောင်များ၏ တာဝန်များ၊ ခေါင်းဆောင်များနှင့် အမှုဆောင်များ၏ တာဝန်များ (၇)) ဘုရားနှုတ်ကပတ်တော်တွေက ကျွန်မကို နိုးထစေခဲ့တယ်။ ဘုရားအိမ်တော်မှာ ခေါင်းဆောင်တစ်ယောက်ဖြစ်ရတာဟာ လေ့ကျင့်မှုနဲ့ ပျိုးထောင်ခံရခြင်းသက်သက်ပဲ။ ဒါကြောင့် ကိုယ့်တာဝန်တွေမှာ ရှုပ်ထွေးမှုတွေ၊ အခက်အခဲတွေကြုံရတဲ့အခါ၊ အလုပ်ကို မနှောင့်နှေးစေဖို့အတွက် တခြားသူတွေနဲ့ ပူးပေါင်းပြီး ဆွေးနွေးဖို့၊ အထက်လူကြီးတွေဆီက အကူအညီရှာဖို့ လိုအပ်တယ်။ လူတစ်ယောက်က ကိုယ့်ကိုယ်ကိုယ် အမြဲတမ်း အထင်ကြီးနေမယ်၊ ခေါင်းဆောင်အဖြစ် ရွေးချယ်ခံရတာက သမ္မာတရားစည်းမျဉ်းတွေကို နားလည်သင့်ပြီး ပြဿနာတွေကို ဖြေရှင်းနိုင်စွမ်းရှိသင့်တယ်လို့ ထင်နေမယ်၊ ပြီးတော့ နားမလည်တဲ့ကိစ္စတွေကြုံရရင်တောင် ဟန်ဆောင်ပြီး ရှာဖွေဖို့ငြင်းဆန်နေမယ်ဆိုရင်၊ ဒီလိုလူမျိုးက ဆင်ခြင်တုံတရားမရှိဘူး၊ ကိုယ့်ရဲ့ဂုဏ်သတင်းနဲ့ အဆင့်အတန်းကို အလွန်အကျွံကာကွယ်နေပြီး၊ သူတို့က အသင်းတော်အလုပ်ကို အလွယ်တကူ နှောင့်နှေးစေနိုင်တယ်။ ကျွန်မက ဒါရဲ့ သက်ရှိဥပမာတစ်ခုပဲ။ ကျွန်မရဲ့သမ္မာတရားနားလည်မှုက ပေါ့တန်တယ်၊ ကျွန်မမှာ အများကြီးချို့တဲ့နေမှန်း ကျွန်မစိတ်ထဲမှာ သိခဲ့တယ်၊ ဒါပေမဲ့ ကျွန်မက ခေါင်းဆောင်အဖြစ် ရွေးချယ်ခံခဲ့ရတာကြောင့်၊ ညီအစ်ကိုမောင်နှမတွေထက် သမ္မာတရားစည်းမျဉ်းတွေကို ပိုပြီးနားလည်သင့်တယ်၊ ပြဿနာတွေကို ဖြေရှင်းရာမှာ သူတို့ထက် ပိုပြီးကြီးမားတဲ့စွမ်းရည်တွေ ရှိသင့်တယ်၊ ဒီနည်းနဲ့ ညီအစ်ကိုမောင်နှမတွေက ကျွန်မကို ယုံကြည်လက်ခံလာနိုင်ပြီး အထက်ခေါင်းဆောင်ကလည်း ကျွန်မကို အသိအမှတ်ပြုနိုင်မှာပဲလို့ ကျွန်မ ထင်ခဲ့တယ်။ ကျွန်မ ဒီမှားယွင်းတဲ့အမြင်ကို စွဲကိုင်ထားတဲ့အခါ၊ ဟန်ဆောင်ချင်စိတ်ကို မထိန်းနိုင်ခဲ့ဘူး။ ကျွန်မတာဝန်တွေမှာ ကျွန်မမဖြေရှင်းနိုင်တဲ့ပြဿနာတွေ ပေါ်လာတဲ့အခါ၊ ကျွန်မက ဘယ်တော့မှ ထုတ်ပြောပြီး အကူအညီမတောင်းနိုင်ခဲ့ဘူး၊ အဲဒါက ကျွန်မကို အရည်အချင်းမရှိသလိုဖြစ်စေပြီး ရှက်စရာကောင်းမှာကို ကြောက်ခဲ့တယ်၊ ဒါကြောင့် ကျွန်မက ပြဿနာတွေကို ကိုယ့်ဘာသာကိုယ်ပဲ အမြဲတမ်း ဖြေရှင်းဖို့ကြိုးစားခဲ့တယ်။ ကျွန်မ ဂုဏ်သတင်းနဲ့ အဆင့်အတန်းဆိုတဲ့ လှုပ်လေနစ်လေနွံထဲမှာ နစ်နေခဲ့တယ်၊ ကျွန်မစိတ်က တိမ်ဖုံးနေသလိုပဲ။ ကျွန်မ ဆက်ပြီး ဟန်ဆောင်၊ လှည့်စားခဲ့တယ်၊ အဲဒါက အသင်းတော်အလုပ်ကို ဆိုးဆိုးရွားရွား နှောင့်နှေးစေခဲ့တယ်။ ဒါကို ဆင်ခြင်သုံးသပ်ရင်း၊ ကျွန်မ ကိုယ့်ပါးကိုယ် ပြန်ရိုက်ပြီး စိတ်ထဲမှာ အကြီးအကျယ် နောင်တရပြီး အပြစ်ရှိသလို ခံစားခဲ့ရတယ်။ အဲဒီနောက်မှာတော့ ကျွန်မ ဒီဘုရားနှုတ်ကပတ်တော်တစ်ပိုဒ်ကို ဖတ်ခဲ့တယ်။ “သင်၏ အလုပ်အတောအတွင်းတွင် သင် ကြုံရသည့် စိတ်ရှုပ်စေသော ပြဿနာ၊ သို့မဟုတ် အခက်အခဲတစ်ခုတလေသည် ဘုရားရွေးချယ်ထားသူများက မိမိတို့၏တာဝန်ကို ထမ်းဆောင်ပုံအား ထိခိုက်နိုင်သရွေ့၊ သို့မဟုတ် အသင်းတော်အလုပ်၏ ပုံမှန်တိုးတက်မှုကို ဟန့်တားနိုင်သရွေ့ အချိန်မီ ဖြေရှင်းသင့်ပေသည်။ ထိုအရာကို သင့်ဘာသာ မဖြေရှင်းနိုင်ပါက ဖြေရှင်းရာတွင် သင်နှင့်အတူ တွဲဖက်ရန် သမ္မာတရား နားလည်သောလူအချို့ကို ရှာဖွေသင့်သည်။ ပြဿနာကို ဤနည်းဖြင့် ဖြေရှင်း၍မရနိုင်သေးပါက၊ သင်သည် ပြဿနာကိုယူပြီး အထက်သို့ အကြောင်းကြားကာ သူ၏ လမ်းပြမှုကို ရှာဖွေရမည်။ ဤသည်မှာ ခေါင်းဆောင်များနှင့် အမှုဆောင်များ၏ တာဝန်နှင့် ဝတ္တရား ဖြစ်သည်။” (နှုတ်ကပတ်တော်၊ အတွဲ (၅)၊ ခေါင်းဆောင်များနှင့် အမှုဆောင်များ၏ တာဝန်များ၊ ခေါင်းဆောင်များနှင့် အမှုဆောင်များ၏ တာဝန်များ (၇)) ဘုရားနှုတ်ကပတ်တော်တွေကနေ ကျွန်မ စည်းမျဉ်းတစ်ခုကို နားလည်ခဲ့တယ်။ အသင်းတော်အလုပ်နဲ့ တာဝန်တွေနဲ့ပတ်သက်တဲ့ကိစ္စတွေမှာ၊ အခြေအနေ ဘယ်လိုပဲဖြစ်နေပါစေ၊ ပြဿနာတစ်ခုက ဘုရားသခင်ရွေးချယ်ထားတဲ့လူတွေရဲ့တာဝန်တွေကို ထိခိုက်နေသရွေ့၊ ဒါမှမဟုတ် အသင်းတော်အလုပ်ရဲ့ပုံမှန်တိုးတက်မှုကို အဟန့်အတားဖြစ်စေသရွေ့၊ အဲဒါကို အချိန်မီ ဖြေရှင်းသင့်တယ်။ ကျွန်မတို့ နားမလည်တဲ့အရာတွေအတွက်၊ နှံ့စပ်တဲ့လူတွေကို တိုင်ပင်ပြီး ဖြေရှင်းနည်းတွေကို အမြန်ဆုံးရှာဖွေသင့်တယ်။ ဒါပေမဲ့ ကျွန်မက ဒီပြဿနာတွေကို ရင်ဆိုင်နေရတဲ့အခါ ကျွန်မက စုံစမ်းစစ်ဆေးပြီး တက်တက်ကြွကြွ ဖြေရှင်းနေတယ်လို့ အမြဲတမ်း ယုံကြည်ခဲ့တယ်၊ ဒါပေမဲ့ ကျွန်မက အဲဒါတွေကို တကယ်ဖြေရှင်းနိုင်မလား၊ ဖြေရှင်းနိုင်ရင်တောင် ဘယ်လောက်ကြာမလဲ၊ ဒါမှမဟုတ် အလုပ်ကို နှောင့်နှေးစေမလားဆိုတာကို ကျွန်မ ဘယ်တော့မှ မစဉ်းစားခဲ့ဘူး။ ကျွန်မ ဒီအချက်တွေကို ထည့်မစဉ်းစားခဲ့ဘဲ ကိစ္စတွေကို ဖြေရှင်းဖို့ အကောင်းဆုံးအချိန်နဲ့ အမှုမဲ့အမှတ်မဲ့ လွဲချော်ခဲ့ရတယ်။ ဒါက အလုပ်ကို တက်တက်ကြွကြွ လုပ်ဆောင်နေတာမဟုတ်ဘူး၊ အခက်အခဲတွေကို ထိပ်တိုက်ရင်ဆိုင်နေတာမျိုး ပိုလို့တောင် မဟုတ်သေးတယ်။ ဒါက တစ်ယောက်တည်း မဆင်မခြင် အလုပ်လုပ်နေတာဖြစ်ပြီး အလုပ်အပေါ် တာဝန်မရှိတာ၊ အသင်းတော်အလုပ်ကို ဆိုးဆိုးရွားရွား နှောင့်နှေးစေတာပဲ။ ကျွန်မ တကယ်ကို အဓိပ္ပာယ်မရှိဘဲ မိုက်မဲခဲ့တယ်။ တကယ်တော့၊ ခေါင်းဆောင်တွေက အလုပ်အကြောင်း မေးမြန်းတဲ့အခါ၊ ဒါမှမဟုတ် ကျွန်မတို့မှာ ပြဿနာတစ်ခုခုရှိသလားလို့ မေးတဲ့အခါ၊ ကျွန်မတို့က တကယ့်ပြဿနာတွေကို ထုတ်ဖော်ပြီး မိတ်သဟာယရှာဖွေဖို့ မျှော်လင့်ပြီး မေးတာပါ။ ဒါက ကျွန်မတို့ကို သမ္မာတရားကို နားလည်ဖို့၊ စည်းမျဉ်းတွေကို နားလည်သဘောပေါက်ဖို့၊ တကယ့်အလုပ်ကို ကိုင်တွယ်ဖို့ တဖြည်းဖြည်း သင်ယူနိုင်အောင် ကူညီပေးလိမ့်မယ်။ ဒါက အရမ်းကို အပြုသဘောဆောင်တဲ့အရာပဲ။ ကျွန်မ အဲဒီအကြောင်းကို စဉ်းစားလေလေ၊ ကျွန်မလုပ်ခဲ့တဲ့အရာတွေအတွက် ပိုပြီး နောင်တရလေလေပဲ။ ကျွန်မသာ ကိုယ့်ကိုယ်ကိုယ် ဟန်ဆောင်တာရဲ့အနှစ်သာရနဲ့ အကျိုးဆက်တွေကို အသိအမှတ်ပြုပြီး ဒီအခြေအနေကို စောစောစီးစီး ပြောင်းပြန်လှန်ခဲ့မယ်ဆိုရင်၊ အလုပ်ကို ဒီလောက်ကြီးမားတဲ့ဆုံးရှုံးမှုတွေ ဖြစ်စေခဲ့မှာမဟုတ်သလို၊ သမ္မာတရားကို ရရှိဖို့ အခွင့်အရေးတွေအများကြီးကိုလည်း ကျွန်မ လွဲချော်ခဲ့မှာမဟုတ်ဘူး။

တစ်ခါက ခေါင်းဆောင်က ကျွန်မကို ပန်းချီအလုပ်ကို ကြီးကြပ်ဖို့ တာဝန်ပေးခဲ့ပြီး၊ စည်းမျဉ်းတွေနဲ့ သတ်မှတ်ချက်တွေအပေါ်မှာ အကြိမ်ပေါင်းများစွာ မိတ်သဟာယဖွဲ့ခဲ့တယ်။ အဲဒီအချိန်တုန်းက အဲဒီအရာတွေကို ကျွန်မ ကောင်းကောင်းနားလည်တယ်လို့ ခံစားခဲ့ရတယ်၊ ဒါပေမဲ့ တကယ်တမ်း အလုပ်စလုပ်တဲ့အခါ၊ အသေးစိတ်အချက်တချို့ကို ကျွန်မ နားမလည်ဘူးဆိုတာကို သဘောပေါက်ခဲ့ပြီး၊ ဘယ်လိုရှေ့ဆက်ရမလဲဆိုတာ မသိခဲ့ဘူး။ ကျွန်မ ထပ်ပြီး စိုးရိမ်လာခဲ့တယ်။ ခေါင်းဆောင်က ကျွန်မနဲ့မိတ်သဟာယဖွဲ့တုန်းက၊ ကျွန်မရဲ့နားလည်မှုကို အခိုင်အမာ အတည်ပြုခဲ့တယ်၊ ဒါပေမဲ့ အခု တကယ်တမ်းအလုပ်လုပ်နေတော့၊ ကျွန်မ ဘာလုပ်နေမှန်း မသိတော့ဘူး။ ကျွန်မ ဘာလုပ်ရမလဲ။ ခေါင်းဆောင်ကို ထပ်မေးချင်ခဲ့တယ်၊ ဒါပေမဲ့ နောက်တော့ ကျွန်မတွေးမိတယ်၊ ခေါင်းဆောင်က ဒီလို ပြောမှာမျိုး ရှိမရှိကိုပေါ့၊ “ငါ ဒီလောက်အသေးစိတ် မိတ်သဟာယဖွဲ့ပြီး အကြိမ်ပေါင်းများစွာ ထပ်ခါထပ်ခါပြောခဲ့တာတောင် မင်း ဘယ်လိုဖြစ်လို့ ခုထိ နားမလည်သေးတာလဲ။ မင်းရဲ့အစွမ်းအစက တကယ်ကို ချို့တဲ့နေပုံပဲ” ဒါကြောင့် နောက်တစ်ခါ ကျွန်မ ခေါင်းဆောင်ကို အကူအညီတောင်းဖို့ မရဲခဲ့ဘူး။ သုံးရက်ကုန်သွားပြီး ကျွန်မ အရမ်းစိုးရိမ်နေခဲ့တယ်၊ ဒါကြောင့် ကျွန်မ ဒူးထောက်ပြီး ဘုရားသခင်ကို ဆုတောင်းပြီး ကျွန်မရဲ့အခြေအနေအကြောင်းကို သူ့ကို ပြောပြခဲ့တယ်။ ဆုတောင်းပြီးတဲ့နောက်မှာ၊ ကျွန်မ အရင်က ကျရှုံးခဲ့တဲ့အတွေ့အကြုံတွေကို စဉ်းစားမိပြီး၊ ဒီဘုရားနှုတ်ကပတ်တော်တွေကို သတိရလိုက်တယ်။ “သင်၏ အလုပ်အတောအတွင်းတွင် သင် ကြုံရသည့် စိတ်ရှုပ်စေသော ပြဿနာ၊ သို့မဟုတ် အခက်အခဲတစ်ခုတလေသည် ဘုရားရွေးချယ်ထားသူများက မိမိတို့၏တာဝန်ကို ထမ်းဆောင်ပုံအား ထိခိုက်နိုင်သရွေ့၊ သို့မဟုတ် အသင်းတော်အလုပ်၏ ပုံမှန်တိုးတက်မှုကို ဟန့်တားနိုင်သရွေ့ အချိန်မီ ဖြေရှင်းသင့်ပေသည်။ ထိုအရာကို သင့်ဘာသာ မဖြေရှင်းနိုင်ပါက ဖြေရှင်းရာတွင် သင်နှင့်အတူ တွဲဖက်ရန် သမ္မာတရား နားလည်သောလူအချို့ကို ရှာဖွေသင့်သည်။ ပြဿနာကို ဤနည်းဖြင့် ဖြေရှင်း၍မရနိုင်သေးပါက၊ သင်သည် ပြဿနာကိုယူပြီး အထက်သို့ အကြောင်းကြားကာ သူ၏ လမ်းပြမှုကို ရှာဖွေရမည်။ ဤသည်မှာ ခေါင်းဆောင်များနှင့် အမှုဆောင်များ၏ တာဝန်နှင့် ဝတ္တရား ဖြစ်သည်။” (နှုတ်ကပတ်တော်၊ အတွဲ (၅)၊ ခေါင်းဆောင်များနှင့် အမှုဆောင်များ၏ တာဝန်များ၊ ခေါင်းဆောင်များနှင့် အမှုဆောင်များ၏ တာဝန်များ (၇)) ဘုရားနှုတ်ကပတ်တော်တွေက ကျွန်မကို သတိပေးခဲ့တယ်၊ ကျွန်မသာ နားလည်မှုကို အမြန်မရှာဖွေရင်၊ ရက်တွေကုန်လွန်သွားတာနဲ့အမျှ၊ အလုပ်က အချိန်မီမပြီးစီးရင်၊ တိုးတက်မှုက နှောင့်နှေးသွားလိမ့်မယ်။ ဒါကို သဘောပေါက်တော့ ကျွန်မ ရိုးသားဖို့ ဆုံးဖြတ်ခဲ့ပြီး၊ ခေါင်းဆောင်က ကျွန်မကို ဘယ်လိုပဲမြင်ပါစေ၊ ဖုံးကွယ်တာ၊ ဟန်ဆောင်တာတွေ မလုပ်တော့ဖို့ ဆုံးဖြတ်ခဲ့တယ်။ အဲဒီနောက်မှာ ကျွန်မ ခေါင်းဆောင်ဆီက အကူအညီတောင်းခဲ့တယ်၊ သူက အရာရာတိုင်းကို ထပ်ပြီး မိတ်သဟာယဖွဲ့ခဲ့တယ်၊ ပြဿနာက ချက်ချင်းပဲ ပြေလည်သွားခဲ့တယ်။ ကျွန်မ ဘုရားသခင်ကို ကျေးဇူးတော်ချီးမွမ်းခြင်းနဲ့ ချီးမွမ်းခြင်းဆုတောင်းကို ပူဇော်ဆက်ကပ်ခဲ့တယ်။ ဒီလို လက်တွေ့လုပ်ဆောင်ရတာက တကယ်ကို ချိုမြိန်ပြီး လွတ်မြောက်စေတယ်။

ဒီအတွေ့အကြုံကို ဆင်ခြင်သုံးသပ်ရင်း၊ ကျွန်မ ကြုံတွေ့ဖို့အတွက် အခြေအနေတွေအများကြီးကို စီစဉ်ပေးခဲ့တဲ့ ဘုရားသခင်ကို ကျွန်မ အကြီးအကျယ် ကျေးဇူးတင်မိတယ်။ ဒါတွေက ကျွန်မရဲ့ဖောက်ပြန်ပျက်စီးမှုတွေအများကြီးကို ဖော်ထုတ်ခဲ့ပေမဲ့၊ အဲဒါတွေက ကျွန်မကိုယ့်ကိုယ်ကိုယ် နားလည်ဖို့ အကောင်းဆုံးအခွင့်အရေးတွေပဲ။ ဘုရားနှုတ်ကပတ်တော်တွေရဲ့ဖော်ထုတ်မှု၊ အသိဉာဏ်ပွင့်လင်းစေမှုနဲ့ လမ်းညွှန်မှုကနေတစ်ဆင့်၊ ကျွန်မ ကိုယ့်ကိုယ်ကိုယ် ပိုပြီးနားလည်မှုရရှိခဲ့တယ်၊ သင်ခန်းစာတချို့ သင်ယူခဲ့တယ်၊ ကိုယ့်တာဝန်တွေကို ကောင်းကောင်းဖြည့်ဆည်းဖို့ နည်းလမ်းတချို့ကိုလည်း ရှာတွေ့ခဲ့တယ်။ ကျွန်မ ဘုရားသခင်ကို လှိုက်လှိုက်လှဲလှဲ ကျေးဇူးတင်ပါတယ်။