သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

၃၆။ ကျော်ကြားမှုနှင့် အကျိုးအမြတ်ကို ရှာဖွေခြင်း နေ့ရက်များ

သူ့အသက်တာတွင် လူသားသည် သန့်ရှင်းစေခြင်း ခံရလိုပြီး သူ၏ စိတ်သဘောထား အပြောင်းအလဲများကို ရရှိလိုသည့်အပြင်၊ အဓိပ္ပာယ်ရှိသော အသက်တာဖြင့် ရှင်သန်လိုကာ သတ္တဝါ တစ်ဦးအနေဖြင့် သူ၏တာဝန်ကို ကျေပွန်လိုလျှင်၊ သူသည် ဘုရားသခင်၏ ပြစ်တင်ဆုံးမခြင်းနှင့် တရားစီရင်ခြင်းတို့ကို လက်ခံရမည်ဖြစ်ပြီး၊ ဘုရားသခင်၏ ဆုံးမပဲ့ပြင်ခြင်းနှင့် ဘုရားသခင်၏ ရိုက်နှက်ခြင်းများတို့ကို သူ့ထံမှ မခွဲခွာစေရပါ။ ယင်းကား သူသည် စာတန်၏ ကြိုးကိုင်ခြယ်လှယ်ခြင်းနှင့် သြဇာလွှမ်းမိုးခြင်းတို့မှ သူ့ကိုယ်သူ လွတ်အောင်ရုန်းနိုင်ပြီး ဘုရားသခင်၏ အလင်းအောက်တွင် နေထိုင်နိုင်ရန် ဖြစ်သည်။ ဘုရားသခင်၏ ပြစ်တင်ဆုံးမခြင်းနှင့် တရားစီရင်ခြင်းတို့သည် အလင်းဖြစ်ကြောင်း၊ လူသား၏ ကယ်တင်ခြင်းအလင်းဖြစ်ကြောင်းနှင့် လူသားအတွက် ထို့ထက်သာသော ကောင်းချီးမင်္ဂလာ၊ ကျေးဇူးတော် သို့မဟုတ် အကာအကွယ် မရှိကြောင်းကို သိနားလည်လော့။ ဘုရားသခင်၏ ပြစ်တင်ဆုံးမခြင်းနှင့် တရားစီရင်ခြင်းတို့သည် အလင်းဖြစ်ကြောင်း၊ လူသား၏ ကယ်တင်ခြင်းအလင်းဖြစ်ကြောင်းနှင့် လူသားအတွက် ထို့ထက်သာသော ကောင်းချီးမင်္ဂလာ၊ ကျေးဇူးတော် သို့မဟုတ် အကာအကွယ် မရှိကြောင်းကို သိနားလည်လော့။” (သိုးသငယ်နောက်လိုက်ပြီး သီချင်းအသစ်များကိုသီဆိုပါ “ဘုရား၏ ပြစ်တင်ဆုံးမခြင်းနှင့် တရားစီရင်ခြင်းသည် လူတို့၏ ကယ်တင်ခြင်းအတွက် အလင်းဖြစ်၏ကျူး”) ဘုရားရဲ့ ဒီ နှုတ်ကပတ်တော်ဓမ္မတေးကို ဆိုရတာ ကျွန်တော်တော့ နက်နက်နဲနဲ ခံစားရပါတယ်။ ကျွန်တော်က စာတန်ရဲ့အဆိပ်တွေနဲ့ ရှင်သန်ခဲ့ဖူးတယ်။ “ထင်ရှားကျော်ကြားမှုရရှိခြင်း သည် သူ၏ဘိုးဘေးများအတွက် ဂုဏ်အသရေ ယူဆောင်လာသည်” တို့၊ “လူသားသည် အထက်သို့ ရုန်းကန်ဆန်တက်သည်၊ ရေသည် နိမ့်ရာသို့ စီးဆင်း၏” ဆိုတာမျိုးတွေပေါ့။ စာတန်ရဲ့လှည့်စားတာတွေ ဖျက်ဆီးတာတွေကြောင့်၊ ကျွန်တော်က ကျော်ကြားမှုနဲ့ ဂုဏ်ဒြပ်ကိုပဲ အမြဲတမ်း ရှာခဲ့တယ်။ ကျွန်တော့်အတွက် နာမည်ကောင်းတစ်ခုရဖို့၊ အကျိုးအမြတ်ရခြင်း၊ ဆုံးရှုံးခြင်းတွေအပေါ်မှာ သောကရောက်နေတော့တာပဲ။ စိတ်မချမ်းသာစရာကောင်းတဲ့ ရှင်သန်နေထိုင်ပုံမျိုးပါ။ ဘုရားနှုတ်ကပတ်တော်တွေရဲ့ တရားစီရင်မှု၊ ပြစ်တင်ဆုံးမမှုနဲ့ ဆုံးမပဲ့ပြင်မှုကို တွေ့ကြုံလိုက်ရတော့မှ၊ ဖောက်ပြန်ပျက်စီးတဲ့ ကျွန်တော့်သဘာဝကို နည်းနည်းလေး နားလည်လာခဲ့တာပါ။ ပြီးတော့ ကျော်ကြားမှုနဲ့ ဂုဏ်ဒြပ်ကို ရှာဖွေခြင်းရဲ့ အနှစ်သာရနဲ့ အကျိုးဆက်တွေအပေါ် ရှင်းရှင်းလင်းလင်း နားလည်နိုင်စွမ်းကို နည်းနည်းလောက် ရခဲ့တာပါ။ နောက်ဆုံးကျမှ ကျွန်တော် စသဘောပေါက်လာပြီးတော့၊ နောင်တရလာခဲ့တာပါ။ အဲဒီပုံစံအတိုင်း ဆက်ပြီး မရှင်သန်ချင်တော့ဘူး။ ဘုရားသခင် ကျေနပ်အောင်၊ သမ္မာတရားကို လိုက်စားဖို့၊ ကျွန်တော့်တာဝန်ကို ကောင်းအောင်လုပ်ဖို့ပဲ ဆန္ဒရှိတော့တယ်။

ကျွန်တော် မှတ်မိတယ် ၂၀၁၆ စက်တင်ဘာလတုန်းကပါ ကျွန်တော့်တာဝန်ကို ဖြည့်ဆည်းဖို့ ဓမ္မတေးအဖွဲ့ထဲကို ဝင်ခဲ့တယ် အဲဒီနောက် မကြာဘူး၊ ကျွန်တော်တို့ခေါင်းဆောင်က အဖွဲ့ခေါင်းဆောင်တစ်ယောက် ရွေးဖို့ ဆွေးနွေးရအောင်ဆိုပြီး၊ ကျွန်တော်တို့ဆီကို ရောက်လာတယ်။ ဒါကို ကျွန်တော် ကြားကြားချင်း စိတ်လှုပ်ရှားသွားတယ်ဗျ။ အလားအလာရှိသူတွေကို ကျွန်တော့်ခေါင်းထဲမှာ ချိန်ဆကြည့်လာမိတယ်။ ကျွန်တော့်အဖွဲ့ထဲက တခြားညီအစ်ကိုမောင်နှမတွေက ငယ်လွန်းသေးတာတွေ၊ အရည်အသွေးမပြည့်သေးတာတွေချည်းပဲ။ ညီအစ်ကိုလီဆိုတဲ့တစ်ယောက်တော့ ရှိတယ်။ သမ္မာတရားကို သူ မိတ်သဟာယပြုတာ တော်တော် လက်တွေ့ကျတယ်။ သူက အလုပ်နဲ့ပတ်သက်တာတချို့လည်း နားလည်တယ်။ ပြီးတော့ အပြောအဆို အနေအထိုင်ကလည်း တည်ငြိမ်တယ်။ သူ အရွေးခံရဖို့များတယ်လို့ ကျွန်တော် ထင်လိုက်မိတယ်။ ဒါပေမဲ့ ကျွန်တော် မိတ်သဟာယပြုတာလည်း အညံ့ကြီးမဟုတ်ဘူးလေ။ ကျွန်တော်က စေ့စေ့စပ်စပ် သင်ယူတတ်တယ်။ အကြောင်းအရာအသစ်တွေ သင်ယူတဲ့အခါ နည်းနည်း ရလွယ်တယ်။ အကြောင်းအရာတစ်ခုလုံးကို သေချာ ခြုံပြီးမြင်တတ်တယ်။ ဒါကြောင့် ကျွန်တော် အရွေးခံရဖို့ အလားအလာက သူ့ထက် ပိုများသင့်တယ်လို့ စဉ်းစားမိတယ်။ ဒါပေမဲ့ အဖွဲ့ထဲမှာရှိတဲ့လူတိုင်းက အဲဒီတာဝန်ကို အစိမ်းသက်သက်တွေချည်းပဲ။ အလုပ်အတူလုပ်ကြတာလည်း မကြာသေးဘူးဆိုတော့၊ အချင်းချင်း သိပ်ပြီး မသိခဲ့ကြဘူး။ သူတို့တွေ ကျွန်တော့်ကိုရွေးပါ့မလားဆိုတာ မသိနိုင်ဘူးလေ။ ဒါနဲ့ ကျွန်တော်က ခေါင်းဆောင်ကို အကြံပေးတယ်။ ကျွန်တော်တို့တစ်ယောက်ချင်းစီ လုပ်ထားတဲ့ အလုပ်တွေကို ချိန်ကိုက်ကြည့်ဖို့၊ ပြီးတော့မှ အဖွဲ့ကို ဦးဆောင်မယ့် တစ်ယောက်ယောက်ကို ယာယီ ရွေးချယ်ဖို့ပေါ့။ အားလုံးက သဘောတူကြတယ်။ ကျွန်တော်ကတော့ တိတ်တိတ်လေး ကျေနပ်မိတာပေါ့။ ကျွန်တော့်မှာ အလုပ်ကောင်းကောင်းလုပ်ထားတဲ့ မှတ်တမ်း ရှိတယ်လို့ ထင်တယ် ဒါကြောင့် ဒီ လူရွေးပွဲမှာ ကျွန်တော်က ကျိန်းသေသလောက် ဖြစ်နေပြီလို့ ထင်မိတယ်လေ။ နောက်နေ့ကျတော့ စည်းဝေးပွဲကို ယုံကြည်မှုအပြည့်နဲ့ သွားတယ်။ ဒါပေမဲ့ ကျွန်တော် အံ့ဩခဲ့ရပါတယ်။ ညီအစ်ကိုလီ အရွေးခံရတယ်။ အဲဒီအချိန်မှာ ကျွန်တော် တကယ် စိတ်ပျက်သွားတယ်။ ဒါပေမဲ့ က္ကုန္ဒြေမပျက်အောင်လို့ ဘာမှမဖြစ်သလိုဟန်ဆောင်ပြီး “ဘုရားရဲ့ကျေးဇူးတော်ပါပဲ။ အခုကစပြီး ကျွန်တော်တို့တာဝန်တွေ ကျေပွန်အောင် အားလုံးအတူတူ အလုပ်လုပ်ကြတာပေါ့” လို့ပြောခဲ့တယ်။ ဒါပေမဲ့ ရင်ထဲမှာတော့ ကျွန်တော် လုံး၀ လက်မခံနိုင်ခဲ့ဘူး။ အိမ်ကို လမ်းလျှောက်ပြန်လာရင်း အားတွေ ကုန်ခန်းသလို ခံစားရတယ်။ အဲဒီကိစ္စကိုပဲ တလည်လည် တွေးမိနေတယ်။ ညီအစ်ကိုလီက ကျွန်တော့်ထက်သာတာ ဘာရှိလို့လဲပေါ့။ ကျွန်တော် လက်မခံနိုင်ဘူးဖြစ်နေတာ။ ကျွန်တော့်မှာ သိသိသာသာကြီးကို အရည်အချင်းတွေအများကြီး ရှိတယ်လို့ ထင်မိတယ်။ ဒါကြောင့် ကျွန်တော့်ကို မရွေးဘူးဆိုရင်၊ အားလုံး အလကားမဖြစ်ကုန်ဘူးလား။ ဒါကြောင့် ကျွန်တော့်ကိုယ်ကျွန်တော် လုံး၀ သက်သေပြရမယ်၊ ကျွန်တော် ဘာလဲဆိုတာ သူများတွေကို ပြရမယ်ဆိုပြီး စဉ်းစားမိတယ်။ အဲဒီကိစ္စနောက်ပိုင်း ကျွန်တော်က အပြင်ပန်းမှာတော့ အေးအေးဆေးဆေး ထင်ရပေမဲ့၊ ကျွန်တော့်ကိုယ်ကျွန်တော် ညီအစ်ကိုလီနဲ့ တိတ်တိတ်လေး လိုက်ပြိုင်နေမိတယ်။ သူ့ထက်သာအောင်ဆိုပြီး၊ ကျွန်တော့်အရည်အချင်းတွေကို တိုးတက်အောင် သင်ယူဖို့ပဲ စိတ်နှစ်ထားလိုက်တယ်။ သူက သင်ယူတာတွေမှာ နှေးကွေးမှန်း မြင်လာရတော့၊ ကျွန်တော်လည်း တိတ်တိတ်လေး ပျော်မိတာပေါ့။ စိတ်ထဲမှာလည်း၊ “ကဲ အမှန်တရားတော့ ပေါ်လာပြီ။ ခင်ဗျားက တကယ်တော့ သိပ်တော်တာ မဟုတ်ပါဘူး။ အချိန်တန်ရင်၊ ညီအစ်ကိုမောင်နှမတွေအားလုံးကလည်း ဘယ်သူ ပိုတော်လဲဆိုတာ မြင်ကြလိမ့်မယ်” ဆိုပြီး တွေးထားတယ်။ သူ လုပ်တဲ့ အမှားလေးတွေတိုင်းကို ကျွန်တော် ဝမ်းသာမိတယ်။ ကိုယ့်ကိုယ်ကိုယ်လည်း စဉ်းစားကြည့်တယ်၊ “လိုအပ်တဲ့အစွမ်းအစ မင်းမှာ ရှိရဲ့လား။ အခု သူတို့က မင်း ဘယ်လိုလူလဲဆိုတာ မြင်လာကြတော့မယ်” ပေါ့။ ညီအစ်ကိုလီက တခြားလူတွေရဲ့ပြဿနာတွေ ဖြေရှင်းပေးတာကို မြင်မိရင်တော့၊ ကျွန်တော် မနာလိုဖြစ်မိတယ်။ အဲဒီလို လက်တွေ့ကျကျ အတွေ့အကြုံမျိုး ကျွန်တော့်မှာလည်း ရှိတယ်လို့ ခံစားရတယ်၊ ကျွန်တော်သာ အဖွဲ့ခေါင်းဆောင်ဆိုရင်၊ မိတ်သဟာယမှာလည်း တော်တဲ့လူ ဖြစ်နေဦးမှာလို့ ထင်မိတယ်။ အထူးသဖြင့် အလုပ်ကိစ္စ ဆွေးနွေးနေချိန်မျိုးမှာ၊ ညီအစ်ကိုလီက ဘာကိုပဲ အကြံပြုပြု၊ ကျွန်တော်က ပိုပြီး ပြည့်စုံတဲ့ ထိုးထွင်းအမြင်ရှိတဲ့ဟာမျိုးကို ပြောနိုင်အောင် ကြိုးစားတယ်။

အစည်းအဝေးတစ်ခုကို ကျွန်တော် မှတ်မိသေးတယ်။ ဓမ္မတေးတစ်ခုအတွက် စိတ်ကူးတွေ ဆွေးနွေးနေကြတုန်းမှာ၊ ညီအစ်ကိုလီက တော်တော်ကိုကောင်းတဲ့ အကြံဉာဏ်တစ်ခု ပေးတယ်။ ဒါပေမဲ့ ကျွန်တော် အဲဒါကို လက်ခံလိုက်ရင်၊ သူက ကျွန်တော့်ထက် ပိုတော်တဲ့သဘောမျိုး ဖြစ်မသွားဘူးလားဆိုပြီး စဉ်းစားမိတယ်။ အဲဒါဆို ကျွန်တော် ဘယ်လိုလုပ် ခေါင်းမော့နိုင်တော့မလဲ။ ကျွန်တော်လည်း ချေပချက်တစ်ခုကို ရုတ်တရက် ပြောချလိုက်တယ်။ မတူတဲ့အကြံဉာဏ်တစ်ခုလည်း ပေးလိုက်တယ်။ ဒါပေမဲ့ အဖွဲ့က သူ့စိတ်ကူးကိုပဲ နောက်ဆုံး အတည်ယူလိုက်ကြတယ်။ ပါးကို ဖြတ်ရိုက်ခံလိုက်ရသလိုပါပဲ။ ညီအစ်ကိုမောင်နှမတွေက သူ့စိတ်ကူးကို တက်တက်ကြွကြွ ဆွေးနွေးကြတာ မြင်ရတော့၊ ညီအစ်ကိုလီကို ပိုပြီးတော့တောင် ဆန့်ကျင်မိသလို ခံစားခဲ့ရတယ်။ ဆက်ပြီး နားထောင်ချင်စိတ်လည်း မရှိတော့ဘူး။ ကျွန်တော် လုပ်ခဲ့တဲ့ ဟိုအရင်တာဝန်ကိုပဲ ပြန်သတိရမိတယ်။ ဘာပဲပြောပြော ကျွန်တော်က အဖွဲ့ခေါင်းဆောင် ဖြစ်ခဲ့ဖူးတယ်လေ။ ညီအစ်ကိုမောင်နှမတွေ အားလုံးကလည်း ကျွန်တော့်ကို လေးစားခဲ့ကြတယ်။ ဒါပေမဲ့ အခုတော့၊ ကျွန်တော်က အဖွဲ့ခေါင်းဆောင် မဟုတ်တော့ဘူး။ နေရာတိုင်းမှာ သူက ကျွန်တော့်ထက် ပိုတော်သလို ဖြစ်နေတယ်။ ဒီလို ဖြစ်လာမယ်မှန်း သိခဲ့ရင်၊ ဒီနေရာ အလုပ်လုပ်ဖို့ ကျွန်တော် လာခဲ့မိမှာ မဟုတ်ဘူးလေ။ စည်းဝေးပွဲ ပြီးသွားတော့၊ ကျွန်တော့်အတွေးတွေ ယောက်ယက်ခတ်နေတာပေါ့။ စိတ်ထဲမှာ တကယ်ကို ဝမ်းနည်းနေမိတယ်။ ကျွန်တော့်အခြေအနေ ပုံမှန်မဟုတ်မှန်း ရေးတေးတေး သိနေတော့၊ ဘုရားသခင်ဆီ ဆုတောင်းမိတယ်။ ပြီးတော့ သူ့နှုတ်ကပတ်တော်တွေထဲက ဒီကျမ်းပိုဒ်က ခေါင်းထဲ ရောက်လာတယ်လေ၊ “သင်တို့ကို မဖန်ဆင်းမီ လူ့စိတ်နှလုံးများထဲ နက်နက်ရှိုင်းရှိုင်း တည်ခဲ့သော မတရားမှုကို ငါသိနှင့်ပြီးဖြစ်သလို လူ့စိတ်နှလုံးများထဲက လှည့်စားခြင်းနှင့် ကောက်သော သဘောအားလုံးကို ငါသိခဲ့သည်။ ထို့ကြောင့် လူတို့က မတရားသော အမှုတို့ကို ပြုသည့်အခါ ခြေရာလက်ရာပင် လုံးဝမရှိသော်လည် းသင်တို့၏ စိတ်နှလုံးများထဲ ထိန်းသိမ်းထားသော မတရားမှုသည် ငါဖန်ဆင်းခဲ့သော အရာအားလုံး၏ ပေါများကြွယ်ဝမှုထက် ကျော်လွန်ကြောင်းကို ငါသိနေဆဲဖြစ်၏။ သင်တို့ အယောက်တိုင်းသည် လူအမြောက်အများ၏ အမြင့်ဆုံးသော အထွဋ်များဆီသို့ တက်ခဲ့ကြပြီးဖြစ်သည်၊ လူအမြောက်အများ၏ ဘိုးဘေးအပေါင်းတို့ ဖြစ်ဖို့ရန် သင်တို့ တက်ခဲ့ကြပြီးဖြစ်သည်။ သင်တို့သည် ထင်တိုင်းကြဲကြကာ ငြိမ်းအေးသော နေရာတစ်ခုကို ရှာဖွေနေသော လောက်များအကြား ဒေါသတကြီး လျှောက်ရမ်းနေရင်း၊ သင်တို့ထက် ပိုသေးငယ်သော လောက်များကို ဝါးမျိုရန် ကြိုးစားနေကြ၏။ သင်တို့သည် သမုဒ္ဒရာအောက်ဆုံး၌ နှစ်မြုပ်ကြသော ထိုသရဲတစ္ဆေများထက် သာလွန်ပြီး သင်တို့ မလိုမုန်းထားကြကာ စိတ်နှလုံးများထဲ၌ ရက်စက်ယုတ်မာတတ်ကြသည်။ သင်တို့သည် အချင်းချင်း တစ်ခဏမျှ တိုက်ခိုက်ကြ ပြီးနောက် ပြန်တည်ငြိမ်သွားကြရင်း လောက်များကို ငြိမ်းချမ်းခြင်းလုံးဝမရစေဖို့ ထိပ်မှ အောက်ခြေသို့တိုင် နှောင့်ယှက်ကြရင်း နောက်ချေး၏ အောက်ခြေတွင် သင်တို့နေထိုင်ကြသည်။ သင်တို့၏ အဆင့်အတန်းကို သင်တို့မသိကြ၊ သို့သော် နောက်ချေးထဲ၌ သင်တို့ အချင်းချင်း တိုက်ခိုက်နေကြဆဲဖြစ်၏။ ယင်း ထိုးကြိတ် သတ်ပုတ်ခြင်းမှ သင်တို့ မည်သည့်အရာ ရရှိကြမည်နည်း။ သင်တို့သည် ငါ့အဘို့ ရိုသေလေးမြတ်စိတ် အမှန်စင်စစ် ရှိခဲ့သည်ဆိုလျှင် ငါ၏ကွယ်ရာတွင် သင်တို့အချင်းချင်း အဘယ်ကြောင့် တိုက်ခိုက်နိုင်ကြသနည်း။ သင့်အဆင့်အတန်း အဘယ်မျှပင် မြင့်မားပါလေ့စေ သင်သည် နောက်ချေးထဲက နံဟောင်နေသော တီကောင်ငယ်လေး ဖြစ်နေဆဲ မဟုတ်လော။ သင်သည် အတောင်ပေါက်ကာ ကောင်းကင်၌ ချိုးငှက်တစ်ကောင် ဖြစ်လာနိုင်သလော။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ရွက်ကြွေများ ၎င်းတို့အမြစ်များဆီ ပြန်သွားကြချိန် ပြုခဲ့သမျှ မကောင်းမှုအားလုံးကို သင်နောင်တရလတ္တံ့”) နာမည်ကောင်းနဲ့ အကျိုးအမြတ်အတွက် ကျွန်တော် ယှဉ်ပြိုင်နေတာတွေရဲ့ ရုပ်ဆိုးအကျည်းတန်ခြင်း အားလုံးကို ဘုရားနှုတ်ကပတ်တော်တွေက ထုတ်ဖော်ပြလိုက်တာပါ။ ဓမ္မတေးအဖွဲ့ထဲ ဝင်လာကတည်းက၊ ကျွန်တော်က အောင်မြင်လိုစိတ်နဲ့ ပူလောင်နေခဲ့တာလေ။ ညီအစ်ကိုမောင်နှမတွေအားလုံးက ကျွန်တော့်ကို အထင်ကြီးလေးစားအောင်၊ အဖွဲ့ထဲမှာ ကျွန်တော် နေရာကောင်းကောင်းတစ်ခု ရအောင်ဆိုပြီး၊ တစ်ခုခုကို အရမ်း ဖြစ်မြောက်ချင်ခဲ့တာပါ။ လူရွေးတဲ့ကိစ္စမှာလည်း၊ ကျွန်တော် အသာရအောင် ဉာဏ်သုံးဖို့ ကြိုးစားခဲ့သေးတယ်။ အရင်က ကျွန်တော်တို့လုပ်ထားတဲ့ အလုပ်တွေပေါ် အခြေခံပြီး ကြားဖြတ်ရွေးချယ်ပွဲလေး လုပ်ဖို့ ခေါင်းဆောင်ကို ပြောခဲ့တာလေ။ ညီအစ်ကိုလီ အရွေးခံရတော့ ကျွန်တော် မနာလိုဖြစ်လာတဲ့အပြင်၊ သူ့ကို ပြိုင်ချင်တဲ့စိတ်လည်း တေးထားခဲ့တယ်။ သူ့အလုပ်မှာ ပြဿနာနည်းနည်းရှိတာကို မြင်ရင်လည်း၊ အသင်းတော်အကျိုးကို ထိန်းသိမ်းဖို့၊ သူ့ကို ကူညီပေးဖို့ဆိုတာမျိုး မရှိခဲ့ဘူး။ သူ အရည်အချင်းမရှိလို့၊ သူ့နေရာ အစားထိုးခံရဖို့ကိုပဲ အရမ်းဖြစ်စေချင်နေခဲ့တာပါ။ သူ့နေရာမှာ ကျွန်တော် ကြိုးစားကြည့်ခွင့် ရမယ်လေ။ နာမည်ကောင်းနဲ့ အကျိုးအမြတ်ကို ရှာဖွေတာ၊ ကျိတ်ကြံတာဆိုတဲ့ ဆိုးယုတ်တဲ့ စိတ်သဘောထားတွေထဲ ကျွန်တော် နစ်မြုပ်ခဲ့တာပါ။ ကျွန်တော့်လုပ်ရပ်တွေက အသိစိတ်၊ အသိတရားဆိုတာ လုံး၀ မရှိခဲ့ဘူး။ တကယ်ကို စက်ဆုပ်စရာ၊ အဆိပ်အတောက်တွေပါပဲ။ ဒါကို နားလည်သွားတော့၊ ကျွန်တော် တော်တော် ဝမ်းနည်းပြီး၊ ကိုယ့်ကိုယ်ကိုယ် အပြစ်တင်ခဲ့မိတယ်။ ဖောက်ပြန်ပျက်စီးတဲ့ ဆိုးယုတ်တဲ့ ကျွန်တော့်စိတ်သဘောထားနဲ့ ထပ်ပြီး ချုပ်နှောင်မခံရအောင်၊ ဘုရားသခင်ဆီ ဆုတောင်းလိုက်တယ်။ သမ္မာတရားကို လက်တွေ့လုပ်ဆောင်ဖြစ်အောင် လမ်းပြဖို့ တောင်းလျှောက်မိတယ်။

တစ်ရက်မှာ ဘုရားနှုတ်ကပတ်တော်တွေထဲက ဒီကျမ်းပိုဒ်ကို ကျွန်တော် ဖတ်မိတယ်။ “သင်တို့၏ တာဝန်ကို ဖြည့်ဆည်းနေသည့် သင်တို့ အသီးသီးအတွက်၊ သမ္မာတရားကို သင် မည်သို့ နက်နက်နဲနဲ နားလည်ပါစေ၊ သမ္မာတရား၏ လက်တွေ့အရှိတရားထဲသို့ သင်တို့ ဝင်ရောက်လိုလျှင်၊ လက်တွေ့လုပ်ဆောင်ဖို့ အရိုးရှင်းဆုံးသော နည်းလမ်းမှာ သင်တို့ လုပ်ဆောင်သမျှတိုင်းတွင် ဘုရားသခင့် အိမ်တော်၏ အကျိုးများကို တွေးဖို့ရန်နှင့် သင်၏ တစ်ကိုယ်ကောင်းဆန်သော စိတ်ဆန္ဒများ၊ သင်၏ တစ်ဦးချင်း အကြံ၊ ရည်မှန်းချက်များ၊ မျက်နှာပန်းနှင့် ရာထူးဂုဏ်ဒြပ်တို့ကို လက်လွှတ်ဖို့ ဖြစ်သည်။ ဘုရားသခင့် အိမ်တော်၏ အကျိုးများကို ဦးစားပေးလော့- ဤသည်မှာ သင် အနည်းဆုံး လုပ်ဆောင်သင့်သည့် အရာဖြစ်၏။ ၎င်းတို့၏ တာဝန်ကို ဆောင်ရွက်နေသည့် လူတစ်ဦးသည် ဤမျှလောက်ပင် မလုပ်ဆောင်နိုင်လျှင်၊ သူတို့၏ တာဝန်ကို လုပ်ဆောင်နေပါသည်ဟု သူတို့ကို အဘယ်သို့ ပြောနိုင်မည်နည်း။ ဤသည်မှာ လူတစ်ဦး၏ တာဝန်ကို လုပ်ဆောင်နေခြင်း မဟုတ်ပေ။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “သင်၏စစ်မှန်သောစိတ်နှလုံးကို ဘုရားသခင်ထံလှည့်ပြီးသည့်အခါမှ သမ္မာတရားကို သင်ရနိုင်မည်”) ကျွန်တော့်တာဝန်ကို လုပ်ဆောင်တာနဲ့ပတ်သက်လို့၊ အခြေခံစည်းမျဉ်းနဲ့ ဦးတည်ချက်ကို ဘုရားရဲ့နှုတ်ကပတ်တော်တွေက ညွှန်ပြလိုက်တာပဲ။ နာမည်ကောင်းနဲ့ ဂုဏ်ဒြပ်ကို လိုချင်စိတ် စွန့်လွှတ်ဖို့၊ ဘယ်လိုအကြောင်းပဲရှိရှိ အသင်းတော်ရဲ့အလုပ်ကို ဦးစားပေးဖို့နဲ့၊ ကျွန်တော့်တာဝန်ကို အရည်အချင်းရှိသလောက် အစွမ်းကုန်လုပ်ဆောင်ဖို့ဆိုတာတွေပေါ့။ အဲဒီတော့မှပဲ ကျွန်တော်က ဖန်ဆင်းခံတစ်ယောက်ရဲ့တာဝန်ကို ကျေပွန်ရာရောက်သလို၊ လူသားပုံသဏ္ဌာန်လည်း နည်းနည်းလောက် ရှိလာလိမ့်မယ်။ ကျွန်တော်က နာမည်ကောင်းနဲ့ ဂုဏ်ဒြပ် ရဖို့ကြိုးစားပြီး၊ အဓိကအလုပ်ကို လျစ်လျူရှုတယ်ဆိုရင်၊ ကျွန်တော့်တာဝန်ကို ကျေပွန်ရာရောက်မှာ မဟုတ်ဘူး။ ဘုရားကို ခုခံမိနေတာ၊ မကောင်းမှုလုပ်နေတာပဲ ဖြစ်လိမ့်မယ်။ အဲဒီနောက်ပိုင်းမှာ ဒီအကြောင်းတွေအားလုံးကို စည်းဝေးပွဲတစ်ခုမှာ ညီအစ်ကိုမောင်နှမတွေကို ဖွင့်ပြောမိပါတယ်။ ကျွန်တော့်ဖောက်ပြန်ပျက်စီးမှုကို ထုတ်ပြလိုက်တယ်။ သူတို့က ကျွန်တော့်ကို အထင်မသေးသွားကြဘူး။ ပြီးတော့ ညီအစ်ကိုလီနဲ့ ကျွန်တော့်ကြားက အဲဒီတံတိုင်းကြီးလည်း ပျောက်ကွယ်သွားတယ်။ အဲဒီနောက်ပိုင်း သူ ကမကထပြုနေတဲ့ စည်းဝေးပွဲတွေမှာ ကျွန်တော် တက်တက်ကြွကြွနဲ့ ပါဝင် မိတ်သဟာယပြုတယ်။ သူ့အလုပ်မှာ ချို့ယွင်းချက်တွေ မြင်ရင်လည်း၊ ကျိတ်ပြီး မရယ်မိတော့ဘူး။ အဲဒီအစား၊ အကြံပြုချက်တွေ၊ အထောက်အပံ့တွေကို ကျွန်တော် ပေးတယ်။ သူက ညီအစ်ကိုမောင်နှမတွေကို ပြဿနာတွေ ဖြေရှင်းပေးတာ မြင်တဲ့အခါတိုင်းလည်း၊ ကျွန်တော် အရင်ကလို မနာလိုဖြစ်မလာတော့ဘူး။ ဘုရားရဲ့အိမ်တော်မှာ အမျိုးမျိုးကွဲပြားနေတာက ကျွန်တော်တို့ရဲ့ကဏ္ဍတွေပါ၊ ကျွန်တော်တို့ရဲ့ အဆင့်အတန်းတွေ မဟုတ်ဘူးဆိုတာကို ခံစားမိခဲ့တယ်။ ကျွန်တော်တို့တာဝန်တွေကို ကောင်းအောင်လုပ်ဖို့ အတူလက်တွဲပြီးပဲ လုပ်ချင်တော့တယ်။ အဲဒါကို လက်တွေ့လုပ်ဆောင်ကြည့်တဲ့အခါ၊ ပိုပြီးငြိမ်းအေးတာကို ကျွန်တော် ခံစားခဲ့ရတယ်။ နောက်ပိုင်းမှာ ဘုရားရဲ့ကောင်းချီးတွေကိုလည်း ကျွန်တော် မြင်ခဲ့တယ်။ ကျွန်တော်တို့အဖွဲ့က ဟိုအရင်ကဆို အညံ့ဆုံး ဂီတအဖွဲ့ ဖြစ်ခဲ့တယ်ဆိုပေမဲ့၊ ပထမဆုံး စပိန်သီချင်းတစ်ပုဒ်ကို အချိန်သိပ်မယူလိုက်ရဘဲ ရေးနိုင်ခဲ့တယ်ဗျ။ တခြားညီအစ်ကိုမောင်နှမတွေကလည်း တော်တော် အသိအမှတ်ပြုခဲ့ကြပါတယ်။

နှစ်ဝက်လောက်အကြာမှာ ကျွန်တော်လည်း အလုပ်ကို ပိုပြီး ကျွမ်းကျွမ်းကျင်ကျင် ရှိလာတယ်။ အလုပ်အတွက် ဆွေးနွေးကြပြီဆိုရင်၊ ညီအစ်ကိုမောင်နှမတွေက ကျွန်တော့်စိတ်ကူးတွေကို လက်ခံလာ ကြတယ်။ ပြီးတော့ ကျွန်တော်တို့အဖွဲ့ရဲ့ လစဉ်တာဝန်အပြောင်းအလဲတွေကို ကျွန်တော်ပဲ အမြဲဦးဆောင်ခဲ့တယ်။ နာမည်ကောင်းနဲ့ ဂုဏ်ဒြပ်ကို လိုချင်တဲ့ဆန္ဒက တော်တော်ကြီး ပြေသွားသလို ခံစားရတယ်။ ပြီးတော့ အဲဒီအချိန်လောက်မှာပဲ၊ ကျွန်တော့်ကို ကျွန်တော်တို့ခေါင်းဆောင်က အဖွဲ့ရဲ့အလုပ်မှာ ပိုပြီးတွန်းအားပေးခိုင်းတယ်။ ခေါင်းဆောင်က အဲဒီလောက် အထင်ကြီးတယ်ဆိုတော့၊ ကျွန်တော့်ကိုယ်ကျွန်တော် တန်ဖိုးရှိသူတစ်ယောက်လို့ ပိုပြီး ထင်မိတာပေါ့။ တစ်ခါတော့ တာဝန်အပိုတစ်ခုအတွက် လူတစ်ယောက် လိုလာတယ်ဗျ။ အဲဒီတာဝန်က ကျွန်တော်နဲ့ တော်တော်သင့်တော်တယ်ဆိုပေမဲ့၊ ကျွန်တော်က စိတ်ထဲမှာ နည်းနည်း တွက်ချက်လိုက်တယ်၊ အဲဒီတာဝန်က ငါ့ကို လူသိများစေမှာ မဟုတ်ဘူး။ ငါ့အချိန်တွေ ကုန်လိမ့်မယ်။ ဒီတော့ အဲဒါကို ငါ လုပ်မယ်ဆိုရင်၊ ငါ ရထားတဲ့ အလေးထားခံရတာလေးတွေကို ဆုံးရှုံးသွားနိုင်တယ်။ ဒါပေမဲ့ ညီအစ်ကိုလီ လုပ်မယ်ဆိုရင်တော့၊ ငါက အဖွဲ့ထဲမှာ နေရာပိုရအောင် ကြိုးစားနိုင်မယ်ပေါ့။ ကျွန်တော်က အဲဒီတာဝန်ကို ငြင်းဖို့ ရနိုင်သမျှ ဆင်ခြေတွေ ရှာတယ်။ အဲဒီတာဝန်ကို ညီအစ်ကိုလီပဲ လုပ်ဖို့ အကြံပေးလိုက်တယ်။ တကယ်တော့ အဲဒီအချိန်မှာ ကျွန်တော် အပြစ်မလုံသလိုလို၊ စိတ်မကောင်းဖြစ်သလိုလို ခံစားခဲ့ရတယ်။ ဒါပေမဲ့ ကျွန်တော့်နေရာကို ကာကွယ်ချင်နေတော့၊ ဆက်ပြီး ခေါင်းမာခဲ့တာပါ။ ညီအစ်ကိုလီကတော့ အဲဒီ မကျွမ်းကျင်တဲ့တာဝန်ကို ယူလိုက်တယ်။ အခက်အခဲတွေ တော်တော်လေး တွေ့ပြီးတဲ့နောက်မှာ သူ အနုတ်လက္ခဏာပြလာတယ်။ သူ့အလုပ်ကိုလည်း ထိခိုက်လာတာပေါ့။ ဒါတွေကို ကြားရပြီးတဲ့အထိ၊ ကျွန်တော့်ကိုယ်ကျွန်တော် မဆင်ခြင်မိသေးပါဘူး။ ညီအစ်ကိုလီက ကျွန်တော်တို့အဖွဲ့ရဲ့အလုပ်မှာ မပါဝင်နိုင်တာတွေ ခဏခဏ ဖြစ်လာတယ်။ ဒီတော့ ကိစ္စတွေအများစုက ကြီးကြီးငယ်ငယ် ကျွန်တော့်တာဝန် ဖြစ်လာတာပေါ့။ ရလဒ်ကတော့ နာမည်ကောင်းနဲ့ ဂုဏ်ဒြပ်ကို လိုချင်တဲ့ ကျွန်တော့်ဆန္ဒက ပိုပြီး ကြီးလာတာပါ။ ညီအစ်ကိုမောင်နှမတွေရဲ့လုပ်ဆောင်ချက်တွေမှာ ကျွန်တော်တို့အလုပ်ကို မတိုးတက်အောင် အဟန့်အတားဖြစ်နေတဲ့ လမ်းလွဲတာတွေ၊ အားနည်းချက်တွေ တချို့ကိုလည်း ကျွန်တော် မြင်မိတယ်။ ဒီတော့ တော်တော်လေး ပူပန်မိတာပေါ့။ ကျွန်တော်က ဒီအလုပ်ရဲ့ခေါင်းဆောင်လေ။ တစ်ခုခု မှားယွင်းသွားရင်၊ ခေါင်းဆောင်က ကျွန်တော့်ကို ဘယ်လိုထင်မလဲဆိုတာ ကျွန်တော် မသိဘူး။ ကျွန်တော့်ကို အရည်အချင်းမပြည့်သူလို့ မြင်မှာလားပေါ့။ ကျွန်တော်လည်း ဒေါသထွက်ပြီး၊ ညီအစ်ကိုမောင်နှမတွေကို မဆူဘဲမနေနိုင်တော့ဘူး၊ “ဒါက မင်းတို့တာဝန်ကို လုပ်နေတာတဲ့လား။ အာရုံမစိုက်နိုင်ကြဘူးလား။ တာဝန်ကျေအောင် မလုပ်နိုင်ကြဘူးလား” ဆိုတာမျိုးတွေပေါ့။ သူတို့အားလုံးက ကျွန်တော့်ကြောင့် တကယ်ကို မလုပ်ချင်ဘဲ လုပ်ရတာမျိုးတွေ ဖြစ်ကုန်ကြတယ်။ တစ်ကြိမ်မှာဆို ကျွန်တော်က တာဝန်နဲ့ တစ်ရက်နှစ်ရက်လောက် ခရီးထွက်သွားတယ်။ ပြန်ရောက်လာတော့၊ ညီမတစ်ယောက်က အလုပ်အစီအစဉ်တစ်ခုကို ကျွန်တော်နဲ့ အရင်မဆွေးနွေးဘဲ လုပ်ထားတာကို တွေ့ရော။ ကျွန်တော် တကယ်ကို ဒေါသထွက်သွားတယ်။ စိတ်ထဲမှာလည်း၊ “ဒါတော့ လွန်လွန်းသွားပြီ။ မင်းက ငါ့ကို နည်းနည်းမှ မလေးစားတာပဲ” ဆိုပြီး တွေးလိုက်တယ်။ ကျွန်တော် သူ့ကို လုံးလုံး ကြိမ်းမောင်းတော့တာပဲ။ အဲဒီလိုအချိန်မှာ ပြဿနာတွေက အဖွဲ့ထဲမှာ တစ်ခုပြီးတစ်ခု စပေါ်လာတယ်ဗျ။ ကျွန်တော့်စိတ်ကူးတွေကို ညီအစ်ကိုမောင်နှမတွေက လက်မခံကြဘူး။ သူတို့က တုံ့ပြန်ပြောတာတွေတောင် လုပ်လာကြတယ်။ ကျွန်တော့်ကို စော်ကားတာလို့ပဲ ခံစားမိတော့၊ ဒေါသက ထောင်းခနဲ ထွက်တယ်၊ “မင်းတို့အားလုံးက တခြားနည်းလမ်း မြင်တယ်ဆိုတော့လည်း၊ မင်းတို့ အဆင်ပြေသလိုသာ လုပ်ကြတော့။ ပြီးသွားလို့ အမှားတွေ ဖြစ်လာရင်၊ မင်းတို့ဘာသာ တာဝန်ယူနော်” ပေါ့။ အဲဒီလိုတွေ ပြောပစ်ပြီးတော့၊ ကြောက်သလိုလို ကိုယ့်ကိုယ်ကိုယ် အပြစ်တင်မိသလိုလို နားလည်ရခက်တဲ့ ခံစားမှုမျိုး ဖြစ်တယ်။ ကျွန်တော်က ညီအစ်ကိုမောင်နှမတွေပေါ်မှာ အမြဲတမ်း ဒေါသထွက်ရင်း၊ မာနထောင်လွှားတဲ့ စိတ်သဘောထားတစ်ခုနဲ့ ရှင်သန်နေခဲ့ပါလားဆိုတာကို တွေးလိုက်မိတယ်။ ဘုရားသခင်က အဲဒါကို လက်ခံပါ့မလား။ ဒါပေမဲ့ နောက်တော့ ကျွန်တော် တွေးပြန်တယ်။ အဲဒါက ငါ့တာဝန်အတွက် လုပ်နေတာ မဟုတ်ဘူးလား။ ပြီးတော့ ငါတို့ထဲမှာ ဖောက်ပြန်ပျက်စီးမှု နည်းနည်းလောက်ကို မထုတ်ပြဖူးသူ ရှိလို့လားပေါ့။ ကျွန်တော်က ကိုယ့်ကိုယ်ကိုယ် အမှန်တကယ် မဆင်ခြင်မိသေးတာလေ။ နောက်နေ့ကျတော့ ဘတ်စကက်ဘော ကစားရင်း၊ ကျွန်တော့်ခြေကျင်းဝတ် အဆစ်လွဲသွားရော။ ပူဖောင်းလို ဖောင်းကားလာပြီး တော်တော်ကို နာလာတယ်။ ကျွန်တော် လမ်းလည်း မလျှောက်နိုင်ဘူး၊ အလုပ်လည်း မလုပ်နိုင်ဘူး။ ဒါက ဘုရားရဲ့ဆုံးမပဲ့ပြင်မှုပဲဆိုတာ ကျွန်တော် တော်တော်လေး သတိမူမိလာတယ်။ အဲဒီတော့မှပဲ ကျွန်တော့်ကိုယ်ကျွန်တော် စပြီး ဆင်ခြင်မိခဲ့တာပါ။ ကျွန်တော်က မာနထောင်လွှားရင်း၊ ညီအစ်ကိုမောင်နှမတွေကို အပြစ်တင်ရင်းနဲ့၊ နာမည်ကောင်းနဲ့ ဂုဏ်ဒြပ်ကို တစ်ချိန်လုံး ရှာဖွေနေခဲ့တာပဲ။ အဲဒါတွေက ကျွန်တော့်ခေါင်းထဲမှာ ရုပ်ရှင်လိုပဲ တစ်ကွက်ချင်း ပြန်ပေါ်လာတယ်။ ကျွန်တော့်ကိုယ်ကျွန်တော် မုန်းမိတယ်။ ပြီးတော့၊ ငါ ဘာလို့ မပြောင်းလဲသေးတာလဲ။ ဘုရားကို ပုန်ကန်ခုခံတာတွေ မဖြစ်အောင် ငါ့ကိုယ်ငါ ဘာလို့ မထိန်းနိုင်တာလဲ ဆိုပြီး စဉ်းစားကြည့်တယ်။

တစ်ရက်နှစ်လောက်ကြာတော့၊ ညီအစ်ကိုမောင်နှမတချို့က ကျွန်တော့်ကို လာကြည့်တယ်။ ဘုရားအလိုတော်အကြောင်းကိုလည်း မိတ်သဟာယပြုကြတယ်။ အထူးသဖြင့် ကျွန်တော့်အခြေအနေနဲ့ဆိုင်တဲ့ ကိုယ်တော့်နှုတ်ကပတ်တော် ကျမ်းပိုဒ်တစ်ခုကို ဖတ်ပြကြတယ်၊ “မိမိတို့ထက် ပိုတော်သည့် တစ်စုံတစ်ဦးကို သူတို့တွေ့လျှင်၊ ၎င်းတို့ကို သူတို့ ဖိနှိပ်ကြသည်၊ ၎င်းတို့အကြောင်း ကောလဟလတစ်ခုကို စတင်ကြသည်၊ သို့မဟုတ် အခြားလူတို့က ထိုသူတို့အပေါ် အထင်မကြီးကြစေဖို့နှင့် မည်သူမျှ အခြားတစ်ဦးတစ်ယောက်မျှထက် မတော်ဖို့ရန်အလို့ငှာ မသမာသော နည်းလမ်းအချို့ကို အသုံးပြုကြသည်၊ သို့ဆိုလျှင် ဤသည်မှာ မာနထောင်လွှားခြင်းနှင့် မိမိကိုယ်ကိုယ်မှန်သည်ဟု ထင်မှတ်ခြင်းအပြင်၊ ကောက်ကျစ်ခြင်း၊ လှည့်ဖြားတတ်ခြင်းနှင့် အန္တရာယ်များခြင်းတို့နှင့်ဆိုင်သည့် ဖောက်ပြန်ပျက်စီးသော စိတ်သဘောထား ဖြစ်ပြီး၊ ဤလူများသည် မိမိတို့၏ ရည်မှန်းချက်များ မရမချင်း မရပ်တန့်ကြပေ။ ဤသို့ သူတို့ အသက်ရှင်ကြသော်လည်း သူတို့သည် ကြီးမြတ်ပြီး ကောင်းမြတ်သည့်လူများဖြစ်သည်ဟု ထင်မှတ်ကြသေး၏။ သို့သော် သူတို့သည် ဘုရားသခင်ကို ကြောက်ရွံ့သည့် နှလုံးသားများ ရှိကြပါသလော။ ပထမဦးစွာ၊ ဤကိစ္စရပ်များ၏ သဘောသဘာဝများနှင့်ဆိုင်သည့် ရှုထောင့်အမြင်မှနေ၍ ပြောရ လျှင်၊ ဤနည်းဖြင့် ပြုမူသည့် လူများသည် မိမိတို့ နှစ်သက်သည်အတိုင်း လုပ်ဆောင်နေကြခြင်းသက်သက် မဟုတ်လော။ ဘုရားသခင့် မိသားစု၏ အကျိုးများကို ၎င်းတို့ စဉ်းစားကြပါသလော။ ဘုရားသခင်၏ မိသားစု၏အမှုတော်က ဆုံးရှုံးမှု ခံစားရပါစေ၊ မိမိတို့၏ ခံစားချက်များကိုသာ ၎င်းတို့ စဉ်းစားကြပြီး မိမိတို့၏ ကိုယ်ပိုင်ရည်မှန်းချက်များကိုသာ ရရှိလိုကြသည်။ ဤသို့သော လူများသည် မာနထောင်လွှားပြီး မိမိကိုယ်ကိုယ်မှန်သည်ဟု ထင်မှတ်ကြရုံသာမက၊ တစ်ကိုယ်ကောင်းဆန်ကြပြီး စက်ဆုပ်စရာလည်း ဖြစ်ကြ၏၊ ဘုရားသခင်၏ ရည်ရွယ်ချက်ကို ၎င်းတို့ လုံးဝအရေးမထားကြသလို၊ ဤကဲ့သို့သော လူတို့သည် ဧကန်မုချ ဘုရားသခင်ကို ကြောက်ရွံ့သော စိတ်နှလုံးများ မပိုင်ဆိုင်ကြပေ။ ဤသည်မှာ အပြစ်ကိုသိခြင်း မရှိဘဲ၊ စိုးရိမ်ပူပင်ခြင်းတစ်ခုတစ်လေ မရှိဘဲ၊ စိုးရိမ်ကြောင့်ကြမှု သို့မဟုတ် ပူပန်မှု မရှိသလို အကျိုးဆက်များကို ထည့်သွင်းစဉ်းစားခြင်းမရှိဘဲ သူတို့လုပ်ချင်သည့်အရာတိုင်းကို လုပ်ဆောင်ပြီး လက်လွတ်စပယ် ပြုမူကြသည့် အကြောင်းရင်း ဖြစ်သည်။ ဘုရားသခင်ကို သူတို့ မကြောက်ပါ၊ မိမိတို့ကိုယ်ကိုယ် အရေးပါဆုံးအဖြစ် ယုံကြည်ကြပြီး၊ မိမိတို့ကိုယ်ကိုယ်၏ လက္ခဏာသွင်ပြင်တိုင်းကို ဘုရားသခင်ထက် ပိုမြင့်ပြီး သမ္မာတရားထက် ပိုမြင့်သည်ဟု သူတို့မှတ်ယူကြသည်။ သူတို့၏ စိတ်နှလုံးများထဲတွင်၊ ဘုရားသခင်သည် ဖော်ပြဖို့ မထိုက်တန်ဆုံးဖြစ်ပြီး အရေးမပါဆုံးဖြစ်ကာ၊ သူတို့၏ စိတ်နှလုံးများထဲတွင် ဘုရားသခင်သည် လုံးဝ အဆင့်အတန်း တစ်ခုတစ်လေမျှ မရှိပါ။... ၎င်းတို့၏နှလုံးသားများထဲတွင် ဘုရားသခင်အတွက် နေရာမရှိသောသူများနှင့် ဘုရားသခင်ကို မကြောက်ရွံ့သောသူများက သမ္မာတရားထဲသို့ ဝင်ရောက်ခြင်းကို ရရှိထားကြသလော။ (မရရှိထားကြပါ။) ထို့ကြောင့် သူတို့သည် ထုံးစံအတိုင်း အလုပ်ရှုပ်ပြီး အားအင်အတော်များများ အသုံးပြုကြကာ ပျော်ရွှင်မြူးထူးစွာ သွားလာကြသောအခါ သူတို့ မည်သည့်အရာ ပြုလုပ်နေကြသနည်း။ ထိုကဲ့သို့သောလူတို့က ဘုရားသခင်အတွက် အသုံးတော်ခံရန် အရာရာတိုင်းကို စွန့်လွှတ်ပြီး များစွာဒုက္ခခံခဲ့ကြပြီဟုပင် ကြွေးကြော်ကြ၏၊ သို့သော်လည်း အမှန်မှာမူ သူတို့လုပ်ဆောင်ချက်များအားလုံး၏ စေ့ဆော်မှု၊ အခြေခံသဘောတရားနှင့် ရည်ရွယ်ချက်တို့မှာ ကိုယ်ကျိုးအတွက် ဖြစ်သည်။ သူတို့သည် မိမိတို့ကိုယ်တိုင်၏ အကျိုးအမြတ်များအားလုံးကို ကာကွယ်ရန် ကြိုးစားနေကြခြင်းသာ ဖြစ်သည်။ ဤသို့သောလူမျိုးကို ဆိုးဝါးသည်ဟု သင်တို့ ဆိုမည်လော၊ မဆိုမည်လော။ မည်သို့သောလူမျိုးသည် ဘုရားသခင်ကို ကြောက်ရွံ့ခြင်းမရှိဟု သင်ဆိုမည်လော။ သူသည် မာနထောင်လွှားသလော။ ထိုကဲ့သို့သောလူက စာတန်လော။ မည်ကဲ့သို့သော အရာများက ဘုရားသခင်ကို ကြောက်ရွံ့ခြင်းမရှိသလော။ တိရစ္ဆာန်များမှအပ ဘုရားသခင်ကို မရှိသောသူများ အားလုံးတွင် နတ်ဆိုးများ၊ စာတန်၊ ကောင်းကင်တမန်မင်း နှင့် ဘုရားသခင်ကို ဖက်ပြိုင်သောသူများ ပါဝင်သည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “ဘုရားသခင်ကို ယုံကြည်သောလမ်းမှန်သို့ မဝင်ရောက်မီ လူတို့၌ရှိသော သတ်မှတ်ချက်ငါးချက်”) ဘုရားရဲ့ ပြင်းထန်တဲ့ စကားလုံးတွေက ကျွန်တော့်ကို တကယ်ပဲ ထိုးနှက်ပါတယ်။ ကျွန်တော်က ဘုရားကို ကြောက်ရွံ့ခြင်း လုံး၀ မရှိဘဲ၊ တော်တော်လေး မာနထောင်လွှားခဲ့တာ၊ တစ်ကိုယ်ကောင်းဆန်ခဲ့တာ၊ ကောက်ကျစ်ခဲ့တာတွေကို ကျွန်တော် မြင်မိတယ်။ အသင်းတော်အလုပ်မှာ ပူးပေါင်းဆောင်ရွက်မှု လိုပြီဆိုရင်၊ အဲဒီအလုပ်မှာ ကျွန်တော်ပဲ အသင့်တော်ဆုံးဖြစ်မှန်း ကောင်းကောင်း သိပေမဲ့၊ ကျွန်တော့်နာမည်ကောင်းနဲ့ ဂုဏ်ဒြပ်ကို ထိန်းဖို့ဆိုပြီး၊ ဟိုကိစ္စ ဒီကိစ္စတွေ လျှောက်လုပ်ဖို့ မစဉ်းစားခဲ့ဘူး။ အဲဒါက ဘုရားအိမ်တော်ရဲ့အလုပ်ကို ထိခိုက်စေခဲ့ပါတယ်။ ညီအစ်ကိုမောင်နှမတွေရဲ့လုပ်ဆောင်ချက်တွေမှာ ကျွန်တော်တို့အလုပ်ကို အဟန့်အတားဖြစ်စေတဲ့ ကိစ္စတွေ မြင်ရင်လည်း၊ ကျွန်တော်က သူတို့နဲ့ပူးပေါင်းပြီး မဖြေရှင်းခဲ့ဘူး။ အဲဒီအစား ကျွန်တော့်ကို သူတို့က တန်ဖိုးကျအောင် လုပ်နေတာ၊ ကျွန်တော် ထင်ပေါ်ဖို့အခွင့်အရေးကို နှောင့်ယှက်နေတာလို့ပဲ ထင်ခဲ့တယ်။ ဒါကြောင့် ကျွန်တော့်ရာထူးကြီးတာကို အသုံးချပြီး သူတို့ကို ကြိမ်းမောင်းခဲ့တယ်။ သူတို့အားလုံးလည်း တင်းကျပ်ခံရသလို ဖြစ်ကြတယ်။ စိတ်ဆင်းရဲပြီး နေခဲ့ကြရတယ်။ သူတို့အကြံပေးတာတွေကိုလည်း ကျွန်တော်က လက်ခံမှာ မဟုတ်ဘူးလေ။ ကျွန်တော်က သုန်သုန်မှုန်မှုန်နဲ့ ဒေါသတွေ ထွက်ခဲ့တယ်။ ထွက်ပေါက်ရှာဖို့အတွက် ကျွန်တော့်တာဝန်ကို အသုံးချတယ်။ အသင်းတော်ရဲ့အလုပ်ကို ဘယ်လို ထိခိုက်သွားနိုင်တယ်ဆိုတာမျိုး လုံး၀ ထည့်မစဉ်းစားခဲ့ဘူး။ တကယ်တော့ ကျွန်တော်က စစ်မှန်တဲ့အရည်အချင်း ဘာမှမရှိခဲ့ပါဘူး။ ကျွန်တော့်မှာ ရှိခဲ့တာဆိုလို့ ဂီတကို နည်းနည်းစိတ်ဝင်စားမှုလေးရယ်၊ စိတ်အားထက်သန်မှုနည်းနည်းရယ်ပါပဲ။ ဒါပေမဲ့ ကျွန်တော် အတတ်ပညာရှင်တစ်ယောက်လို တိုးတက်လာနိုင်အောင်၊ သမ္မာတရားကို လိုက်စားရာမှာ တိုးတက်နိုင်အောင်ဆိုပြီး၊ ဘုရားသခင်က သနားကရုဏာအပြည့်နဲ့ ဒီအခွင့်အရေးကို ပေးထားခဲ့တယ်။ ဒါပေမဲ့ အဲဒါကို တန်ဖိုးထားရမယ့်အစား၊ ကျွန်တော်က အဆင့်အတန်းနဲ့ ဂုဏ်ဒြပ်အတွက်ပဲ ခေါင်းမာမာနဲ့ ကြိုးပမ်းခဲ့တယ်။ ကျွန်တော့်တာဝန်ကို လုပ်နေတယ်ဆိုတာ အများ မြင်အောင် ပြတယ်ဆိုပေမဲ့၊ ကျွန်တော် ရှေ့တန်းရောက်ဖို့ ညီအစ်ကိုမောင်နှမတွေကို အသုံးချရင်း၊ ကျွန်တော့်ကိုယ်ပိုင်အကျိုးအတွက်ပဲ လုပ်ခဲ့တာပါ။ ကျွန်တော်က လူ့သဘာဝမှာ လုံး၀ ချို့တဲ့ခဲ့တာပါ။ ကျွန်တော့်လုပ်ရပ်တွေအားလုံးက မကောင်းမှု လုပ်ခဲ့တာတွေ၊ ဘုရားရဲ့စိတ်သဘောထားကို ပုန်ကန်ပြစ်မှားခဲ့တာတွေပါ။ ဘုရားသခင်အတွက်တော့ မနှစ်သက်စရာ၊ စက်ဆုပ်စရာပါပဲ။ အဲဒါကို နားလည်မိတော့၊ ကျွန်တော် ကြောက်လန့်သွားတယ်။ ကိုယ့်ကိုယ်ကိုယ်လည်း အများကြီး အပြစ်တင်မိတယ်။ မျက်ရည်တွေ ကျပြီး၊ ဘုရားသခင်ဆီ အခုလို ဆုတောင်းမိခဲ့တယ်၊ “အို ဘုရားသခင်၊ ကျွန်တော် တော်တော် မှားခဲ့ပါပြီ။ ကိုယ်တော့်ကို ပုန်ကန်နေတာတွေ၊ ဖက်ပြိုင်မိနေတာတွေ ဆက်ပြီး မဖြစ်ချင်ပါဘူး။ တစ်ကိုယ်ရေ ရလိုမှုအတွက်လည်း ကျွန်တော် ဆက်ပြီး မကြိုးပမ်းချင်ပါဘူး။ ကျွန်တော် နောင်တရဖို့ အသင့်ပါပဲ။”

နောက်တော့မှ ဘုရားသခင်ဆီက ဒီ နှုတ်ကပတ်တော်တွေကို ကျွန်တော် ဖတ်မိပါတယ်၊ “ထို့ကြောင့် လူတို့သည် ကျော်ကြားမှုနှင့် အမြတ်အစွန်းအတွက်သာ စဉ်းစားတတ်တော့သည် အထိဖြစ်အောင်၊ ၎င်းတို့၏အတွေးများကို ထိန်းချုပ်ရန်အတွက် စာတန်သည် ကျော်ကြားမှုနှင့် အမြတ်အစွန်းကို အသုံးပြု၏။ ၎င်းတို့သည် ကျော်ကြားမှုနှင့် အမြတ်အစွန်းအတွက် ရုန်းကန်လှုပ်ရှားကြ၏၊ ကျော်ကြားမှုနှင့် အမြတ်အစွန်း အတွက် အခက်အခဲများကို ခံကြ၏၊ ကျော်ကြားမှုနှင့် အမြတ်အစွန်းအတွက် အရှက်ရခြင်းများကို ကြံ့ကြံ့ခံကြ၏၊ ကျော်ကြားမှုနှင့် အမြတ်အစွန်း အတွက် ၎င်းတို့တွင်ရှိသည့်အရာတိုင်းကို ပေးဆပ်ကြ သကဲ့သို့၊ ကျော်ကြားမှုနှင့် အမြတ်အစွန်းတို့အတွက် မည်သို့သော အကဲဖြတ်မှု၊ ဆုံးဖြတ်မှုကိုမဆို ၎င်းတို့က ပြုလုပ်ကြလိမ့်မည်။ ဤနည်းလမ်းဖြင့် စာတန်သည် လူသားအား မမြင်နိုင်သော အချုပ်အနှောင်တို့နှင့် ချည်နှောင်လေသည်၊ ထို့အပြင် လူတို့သည် ဤအရာတို့ကို တွန်းလှန်ရန် အင်အားမရှိသလို သတ္တိလည်းမရှိကြပေ။ ထို့ကြောင့် လူတို့သည် ဤအချုပ်အနှောင်တို့အား သတိမမူမိဘဲ သယ်ဆောင်ကြပြီး ကြီးစွာသော အခက်အခဲဖြင့် ရှေ့သို့ဆက်ကာသာ ရုန်းကန်ကြရ၏။ ဤကျော်ကြားမှုနှင့် အမြတ်အစွန်း အတွက်အလို့ငှာ၊ လူသားမျိုးနွယ်သည် ဘုရားသခင်ကို ရှောင်ကြဉ်၍၊ ကိုယ်တော်အား သစ္စာဖောက်ပြီး၊ ၎င်းတို့သည် တိုး၍ ကောက်ကျစ် လာကြသည်။ ထို့ကြောင့် ဤနည်းဖြင့် မျိုးဆက်တို့ တစ်ခုပြီးတစ်ခုသည် စာတန်၏ ကျော်ကြားခြင်းနှင့် အမြတ်အစွန်း အကြားတွင် ဖျက်ဆီးခံကြရ၏။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အတုမရှိ ဘုရားသခင်ကိုယ်တော်တိုင် (၆)”) ဘုရားနှုတ်ကပတ်တော်တွေက ဒီလို ထုတ်ဖော်ပြလိုက်တော့၊ လူတွေကို ပျက်စီးစေဖို့အတွက် ကျော်ကြားမှုနဲ့ အကျိုးအမြတ်ကို အသုံးချတဲ့ စာတန်ရဲ့ စက်ဆုပ်စရာ ပရိယာယ်နဲ့ ယုတ်မာတဲ့ ရည်ရွယ်ချက်ကို သိနားလည်မှုတချို့ ကျွန်တော် ရခဲ့ပါတယ်။ စာတန်က လူတွေကို ဒီနည်းအတိုင်း ဒုက္ခပေး ချည်နှောင်ပြီး၊ ဘုရားကို သစ္စာဖောက်လာစေသလို၊ ဘုရားဆီကနေ ဝေးကွာစေတာဖြစ်ပါတယ်။ နာမည်ကောင်းနဲ့ ဂုဏ်ဒြပ်ဆိုတာ လူတွေကို ဖျက်ဆီးဖို့ စာတန် အသုံးပြုတဲ့ လက်နက်တွေပါပဲ။ ကျွန်တော် ငယ်ငယ်ကတည်းက စာတန်ရဲ့ လွှမ်းမိုးမှု၊ သင်ကြားမှုတွေကို ခံခဲ့ရပြီး စာတန် အတွေးအခေါ်တွေရဲ့ လှည့်စားမှုကို ခံခဲ့ရပါတယ် “မိမိကိုယ်သာ ကိုးကွယ်ရာဖြစ်၏”၊ “ထင်ရှားကျော်ကြားမှုရရှိခြင်း သည် သူ၏ဘိုးဘေးများအတွက် ဂုဏ်အသရေ ယူဆောင်လာသည်”၊ ပြီးတော့ “လူသားသည် အထက်သို့ ရုန်းကန်ဆန်တက်သည်၊ ရေသည်နိမ့်ရာသို့ စီးဆင်း၏” ဆိုတာမျိုးတွေပေါ့။ ကျွန်တော်က အဲဒါတွေကို ကျွန်တော့်ကိုယ်ပိုင် ဆောင်ပုဒ်တွေအဖြစ် အသုံးချခဲ့တာလေ။ ကျွန်တော်က ပိုပိုပြီးတော့ မာနထောင်လွှားလာခဲ့တယ်။ ဘယ်အဖွဲ့ကို ရောက်ရောက်၊ ကျွန်တော့်ကို တခြားသူတွေ လေးစားအောင်ဆိုပြီး၊ အဆင့်အတန်းအတွက် အမြဲတမ်း ပြိုင်တယ်။ ယုံကြည်သူတစ်ယောက် ဖြစ်လာပြီးတာတောင်၊ ကျွန်တော်က သမ္မာတရားကို လိုက်စားခဲ့တာမဟုတ်တော့၊ နာမည်ကောင်းနဲ့ ဂုဏ်ဒြပ်နောက်ကိုပဲ အမြဲလိုက်ခဲ့တယ်။ ဒီအရာတွေအတွက် ကိုယ့်အရည်အသွေးတွေ တိုးတက်အောင် ကြိုးစားအားထုတ်ရင်း၊ ကျွန်တော့်အလုပ်မှာ ဒုက္ခရောက်ခဲ့သလို၊ အဖိုးအခလည်း ပေးခဲ့ရတယ်။ ကျွန်တော်က သူများတွေနဲ့ပဲ လိုက်ပြိုင်ခဲ့တာလေ။ တစ်ခုခု အောင်မြင်လိုက်တိုင်း ကျွန်တော့်ကိုယ်ကျွန်တော် တကယ့်လူပဲဆိုပြီး ထင်မိတယ်။ ညီအစ်ကိုမောင်နှမတွေကို မောက်မောက်မာမာ ဆူပူမိခဲ့တယ်။ ကျွန်တော်က တကယ်ကို လွန်လွန်းအောင် မာနထောင်လွှားပြီး၊ စိတ်ကြီးဝင်ခဲ့တာပါ။ ကျွန်တော် ရှင်သန်ခဲ့ပုံက လူသားပုံသဏ္ဌာန်ဆိုလို့ ဘာမှကို မရှိခဲ့ဘူး။ နာမည်ကောင်းနဲ့ ဂုဏ်ဒြပ် ရဖို့ကိုပဲ ခေါင်းမဖော်နိုင်အောင် ကြိုးစားရင်း၊ ဆိုးယုတ်တဲ့ အတွေးအခေါ်တွေနဲ့ ရှင်သန်နေခဲ့တာပါ။ ကျွန်တော်က တခြားသူတွေကို နာကျင်စေရုံမကဘူး၊ ဘုရားအတွက် စက်ဆုပ်စရာကောင်းတဲ့အရာတွေ အများကြီးကိုလည်း လုပ်ခဲ့ပါတယ်။ ကျွန်တော့်ရဲ့ မကောင်းတဲ့လုပ်ရပ်တွေ၊ ပြစ်မှားတာတွေကြောင့် အသင်းတော်ရဲ့အလုပ်ကိုလည်း ထိခိုက်စေခဲ့တယ်။ နာမည်ကောင်းနဲ့ ဂုဏ်ဒြပ်ကြောင့် ကျွန်တော် အများကြီး ဒုက္ခရောက်ခဲ့တာပါ။ ဆိုးယုတ်တဲ့ အတွေးအခေါ်တွေ ဖြစ်တဲ့ “ထင်ရှားကျော်ကြားမှု ရရှိခြင်း”၊ “တခြားသူတွေထက် သာလွန်ခြင်း” ဆိုတာတွေအားလုံးက အတွေးမှားတွေ ဖြစ်တယ်။ ပြီးတော့ ဒီအလိမ်အညာတွေနဲ့ ရှင်သန်ခြင်းအားဖြင့် နောက်တစ်ဆင့် ဖောက်ပြန်ပျက်စီးခြင်းနဲ့ မကောင်းမှုဆီကိုပဲ ဦးတည်စေပြီးတော့၊ ဘုရားကို ဆန့်ကျင်ပုန်ကန်မိစေတယ်။ နောက်ဆုံးမှာ ဘုရားရဲ့ အပြစ်ဒဏ်ပေးခြင်း ခံရတဲ့အထိ ဖြစ်စေတယ်ဆိုတာတွေကို အဲဒီတော့မှ ကျွန်တော် မြင်ခဲ့မိတယ်။ ဒါတွေအားလုံးကို နားလည်မိတော့မှ၊ ကျွန်တော်က နာမည်ကောင်းနဲ့ ဂုဏ်ဒြပ်ကို ဘဝမှာ ဘာဖြစ်ဖြစ် ဖက်တွယ်ထားရမယ့် အသက်သွေးကြောတွေအဖြစ် သဘောထားခဲ့တာပဲဆိုတာကို တွေးမိတယ်။ တကယ်ကို ဘာမှမမြင်ဘဲ၊ မသိနားမလည်ခဲ့တာပါ။ အဲဒါတွေက ဘုရားနဲ့ ဆန့်ကျင်ရာကို သွားတဲ့ လမ်းတစ်ခု ဖြစ်မှန်းလည်း ကျွန်တော် မြင်ခဲ့ပါတယ်။ ကျွန်တော်လည်း ဘုရားရှေ့မှောက် ဆုတောင်းပြီး၊ နောင်တရမိတယ်။ နောက်ပိုင်းတော့ ကျွန်တော့်အလုပ်မှာ အဲဒီအရာတွေနောက် လိုက်ဖို့ စဉ်းစားမိပြီဆိုတာနဲ့၊ ကျွန်တော် တကယ်ကို ကြောက်မိတယ်။ ဒါနဲ့ ဘုရားသခင်ဆီ ဆုတောင်းပြီး၊ ဇာတိပကတိကို စွန့်လွှတ်ခဲ့ပါတယ်။ အဲဒါအပြင် ကျွန်တော့်ဖောက်ပြန်ပျက်စီးမှုကို ညီအစ်ကိုမောင်နှမတွေဆီ ပွင့်ပွင့်လင်းလင်း ဖော်ထုတ်ပြပါတယ်။ အချိန်နည်းနည်း ကြာလာတော့၊ ကျွန်တော့်မှာ နာမည်ကောင်းနဲ့ ဂုဏ်ဒြပ်နောက် လိုက်လိုစိတ်က တော်တော်ကြီး နည်းသွားမှန်း ခံစားရတဲ့အပြင်၊ အတွင်းပိုင်းငြိမ်သက်ခြင်း အရသာကိုလည်း စပြီး ရလာတယ်။

နောက်ပိုင်းမှာ အသင်းတော်က ခေါင်းဆောင်တစ်ယောက် ရွေးနေပြီဆိုရင်၊ နာမည်ကောင်းနဲ့ ဂုဏ်ဒြပ်ကို လိုချင်စိတ်က မဲပေးနေတဲ့အချိန်မှာ ပြန်ပြီး ခေါင်းထောင်လာသေးတယ်။ စိတ်ထဲမှာ တိုက်ပွဲ ဖြစ်တော့တာပဲ၊ “ညီအစ်ကိုလီအတွက် မဲပေးသင့်လား၊ ငါ့ကိုယ်ငါ မဲပေးသင့်လား။ ငါ့ကိုယ်ငါ မဲပေးမယ်ဆိုရင်၊ ငါက ပြဿနာတွေကို သမ္မာတရားနဲ့ မိတ်သဟာယပြု ဖြေရှင်းပေးတာမျိုး သိပ်မကျွမ်းကျင်ဘူး။ သူ့ကို မဲပေးမယ်ဆိုရင်တော့၊ တကယ်လို့ သူ အရွေးခံလိုက်ရရင်၊ တခြားလူတွေက ငါ့ကို ဘယ်လိုမြင်ကြမလဲ” ဆိုတာမျိုးပေါ့။ နာမည်ကောင်းနဲ့ ဂုဏ်ဒြပ်ကို ကျွန်တော် ထပ်ပြီး ရှာနေမိမှန်း သဘောပေါက်သွားတယ်။ အဲဒီလို တွေးပုံမျိုးက တကယ်ကို ကြောက်စရာကောင်းတယ်လို့လည်း ခံစားမိတယ်။ ကျွန်တော်လည်း အဲဒီအတွေးတွေကို စွန့်ပစ်ကျိန်ဆဲပြီး၊ ဘုရားဆီ ဆုတောင်းတော့တာပဲ။ နောက်တော့မှ ဘုရားနှုတ်ကပတ်တော်တွေရဲ့ နောက်ထပ် ကျမ်းပိုဒ်တစ်ခုက ခေါင်းထဲ ရောက်လာတယ်၊ “သင်၏စိတ်နှလုံးသည် ပိုမိုမြင့်မားသောအဆင့်ကို မည်သို့ရရှိရမည် သို့မဟုတ် သင့်ကို အခြားသူများက သဘောကျစေရန် သူတို့ရှေ့၌ မည်သည့်အရာ ပြုလုပ်ရမည်ဟူသည့် အတွေးများနှင့် ပြည့်နှက်နေပါက၊ သင်သည် လမ်းမှားပေါ် ရောက်နေသည်။ ယင်းက သင်သည် စာတန်အတွက် အမှုအရာများ လုပ်ဆောင်နေသည်၊ သင်သည် အစေခံနေသည်ကို ဆိုလိုသည်။ အကယ်၍ သင်၏ စိတ်နှလုံးက သင်သည် လူသားတစ်ဦး၏ပုံသဏ္ဌာန်ကို ပို၍ပို၍ရရှိရန် မည်သို့ပြောင်းလဲရမည်ဟူသည့် အတွေးများနှင့် ပြည့်နှက်နေပါက၊ ဘုရားသခင်၏ ရည်ရွယ်ချက်များနှင့် ကိုက်ညီပါက၊ သူ့ကို နာခံနိုင်ပါက၊ သူ့ကို ကြောက်ရွံ့နိုင်စွမ်းရှိပါက၊ သင်ပြုလုပ်သမျှ အရာတိုင်း၌ ထိန်းချုပ်မှုကို ပြသပြီးလျှင် သူ၏ စိစစ်ခြင်းကို လုံးလုံးလျားလျား လက်ခံနိုင်ပါက၊ သင်၏အခြေအနေများမှာ ပို၍ပို၍ ကောင်းမွန်လာမည် ဖြစ်သည်။ ဤသည်မှာ ဘုရားသခင်၏ရှေ့မှောက်တွင် အသက်ရှင်သောသူတစ်ဦးဖြစ်ခြင်း၏ အဓိပ္ပာယ်ဖြစ်သည်။ ဤသို့ဖြစ်သဖြင့် လမ်းကြောင်းနှစ်ခုရှိလေသည်- တစ်ခုက လူတစ်ဦးကိုယ်တိုင်၏ ရည်မှန်းချက်များ၊ လိုအင်ဆန္ဒများ၊ ရည်ရွယ်ချက်များနှင့် အစီအစဉ်များကို ဖြည့်ဆည်းလျက် အပြုအမူကိုသာ အသားပေးသည်၊ ဤသည်မှာ စာတန်၏ရှေ့မှောက်တွင် အသက်ရှင်ခြင်းနှင့် ၎င်း၏အုပ်စိုးမှုအောက်တွင် အသက်ရှင်ခြင်းဖြစ်သည်။ အခြားသောလမ်းကြောင်းက ဘုရားသခင်အား ကြောက်ရွံ့မှုကို ရရှိရန်နှင့် လူတစ်ဦး၏တာဝန်ကို ကောင်းစွာထမ်းဆောင်ရန်အတွက်သာလျှင် ဘုရားသခင်၏အလိုတော်ကို မည်သို့ ဖြည့်ဆည်းရမည်၊ သမ္မာတရား၏ စစ်မှန်မှုထဲသို့ မည်သို့ဝင်ရောက်ရမည်၊ သူ့အပေါ် နားလည်မှုလွဲမှားခြင်းများ သို့မဟုတ် မနာခံမှု မည်သို့မထားရှိရမည်ကို အလေးထားသည်။ ဤသည်မှာ ဘုရားသခင်၏ ရှေ့မှောက်တွင် အသက်ရှင်ခြင်း၏ အဓိပ္ပာယ်ဖြစ်သည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “သမ္မာတရားကို လက်တွေ့လုပ်ဆောင်မှသာ သာမန်လူသားသဘာဝကို ပိုင်ဆိုင်နိုင်သည်”) ဘုရားရဲ့နှုတ်ကပတ်တော်တွေကို အချိန်ယူ စဉ်းစားကြည့်ရင်း၊ ကျွန်တော် နားလည်သွားတယ်။ ကိုယ်တော် ကြည့်ရှုတယ်ဆိုတာ လူတွေရဲ့လုပ်ရပ်တွေထဲက ရည်ရွယ်ချက်တွေနဲ့ ရှုထောင့်တွေကိုပဲ။ ဒါတွေက တကယ် အရေးကြီးပါတယ်။ ကျွန်တော့်အတွက် တွန်းအားက နာမည်ကောင်းနဲ့ ဂုဏ်ဒြပ်ပဲ။ ကျွန်တော့်ကို တခြားလူတွေ အထင်ကြီးအောင်လုပ်ဖို့ ဆန္ဒပဲဆိုရင်တော့ အဲဒါက ဘုရားကို ဆန့်ကျင်တဲ့လမ်းတစ်ခုပဲ ဖြစ်လိမ့်မယ်။ ပြီးတော့ ကျွန်တော့်ကို သမ္မာတရားဆီ ဘယ်တော့မှ လမ်းပြမှာမဟုတ်သလို၊ ဘုရားရဲ့ စုံလင်စေခြင်းကိုလည်း ဘယ်တော့မှ ခံရမှာမဟုတ်ဘူး။ ကျွန်တော်လည်း ကျွန်တော့်ရည်ရွယ်ချက်တွေကို ပြုပြင်ချင်စိတ် ဖြစ်လာတယ်။ အသင်းတော်ခေါင်းဆောင်အဖြစ် အရွေးခံရတာဖြစ်ဖြစ်၊ အရွေးမခံရတာဖြစ်ဖြစ်၊ ဘုရားရဲ့အစီအစဉ်တွေကို နာခံဖို့နဲ့ ကျွန်တော့်တာဝန်ကို ကောင်းအောင် လုပ်ဖို့ အသင့်ဖြစ်သွားပါတယ်။ နောက်ပိုင်း မဲပေးရွေးချယ်တဲ့အချိန် ရောက်လာတော့၊ ကျွန်တော်လည်း စည်းမျဉ်းတွေနဲ့ ချိန်ဆပြီး၊ ညီအစ်ကိုလီကိုပဲ မဲပေးဖြစ်ပါတယ်။ နောက်ဆုံး သူလည်း အသင်းတော်ခေါင်းဆောင်အဖြစ် အမှုထမ်းဖို့ အရွေးခံရတယ်။ အဲဒါကို ကျွန်တော် ကျေနပ်ပါတယ်။ ကျွန်တော် အရွေးမခံရပေမဲ့၊ ဘယ်လို နောင်တတွေမှ မရခဲ့ပါဘူး။ ဘာလို့လဲဆိုတော့ ကျွန်တော်က သမ္မာတရားကို နောက်ဆုံးမှာ လက်တွေ့လုပ်ဆောင်လိုက်တဲ့အတွက်၊ နာမည်ကောင်းနဲ့ ဂုဏ်ဒြပ်ဆိုတဲ့ အချုပ်အနှောင်တွေကို စွန့်ပစ်လိုက်တာကြောင့်ပါ။ သမ္မာတရားကို လက်တွေ့လုပ်ဆောင်တာ၊ ဘုရားကို ကျေနပ်စေတာတွေကြောင့် အတွင်းပိုင်း ငြိမ်သက်ခြင်းနဲ့ တည်ငြိမ်ခြင်းကိုလည်း ခံစားမိခဲ့ပါတယ်။ ပြီးတော့ ဘုရားရဲ့ တရားစီရင်မှုနဲ့ ပြစ်တင်ဆုံးမမှုဟာ တကယ်ကို ကျွန်တော့်အတွက် ကယ်တင်ခြင်းဖြစ်တယ်ဆိုတာကို တွေ့ကြုံခဲ့ရပါတယ်။

ယခင်က:၃၃။ မုသားတို့ သုံးမိပြီးသည့်နောက်...

နောက်တစ်ခုသို့:၄၀။ နှုတ်ဆက်လိုက်ပါတယ်၊ လူမုန်းမခံချင်သူကြီးရေ

သင်နှစ်သက်နိုင်သည့် အရာများ

နှုတ်ကပတ်တော်သည် လူ့ဇာတိ၌ ပေါ်လာ၏ နောက်ဆုံးသောကာလ ခရစ်တော်၏ မိန့်မြွက်ချက်များ (လက်ရွေးစင်များ) နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှ စံနမူနာ နှုတ်ကပတ်တော်များ အနန္တတန်ခိုးရှင် ဘုရားသခင်၏ နှုတ်ကပတ်တော် လက်ရွေးစင်များ နောက်ဆုံးသောကာလ၏ ခရစ်တော်အတွက် သက်သေများ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ ဘုရားသခင်၏ အသံကို နားထောင်လော့ ဘုရားသခင်၏ ပေါ်လာခြင်းကို ရှုမြင်ကြလော့ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ အောင်မြင်သောသူများ၏ သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ ဘုရားသခင်၏ နေ့စဉ် နှုတ်ကပတ်တော်များ