မော့ဝူဝမ်၊ တရုတ်ပြည်

၂၀၂၂ ခုနှစ် နှစ်ကုန်ပိုင်းလောက်က နေ့တစ်နေ့မှာ၊ အသင်းတော်ခေါင်းဆောင် လင်းဟွေ အဖမ်းခံရပြီးတဲ့နောက် ဘုရားသခင်ကို သစ္စာဖောက်ပြီး ယုဒတစ်ယောက် ဖြစ်သွားတယ်ဆိုတာ သိလိုက်ရတယ်။ စစ်ဆေးမေးမြန်းနေတုန်းမှာ၊ ရဲတွေက လင်းဟွေကို အသင်းတော်ရဲ့ ဘဏ္ဍာရေးနဲ့ ညီအစ်ကိုမောင်နှမတွေရဲ့ သတင်းအချက်အလက်တွေကို ထုတ်ပြောဖို့ ခြိမ်းခြောက်ခဲ့ကြတယ်။ ဝန်မခံရင် ထောင်ကျမယ်လို့ပြောတဲ့အပြင် သူ့သမီးရဲ့ အနာဂတ်ကိုသုံးပြီး အကျပ်ကိုင်ခဲ့ကြတယ်။ ထောင်ထဲမှာ ဒုက္ခခံရမှာကို ကြောက်တာရယ်၊ သူ့သမီးရဲ့ အနာဂတ် ပျောက်ဆုံးသွားမှာကို စိုးရိမ်တာရယ်ကြောင့် သူဟာ စီစီပီရဲ့ ကြံရာပါ ဖြစ်သွားခဲ့တယ်။ ဘုရားနှုတ်ကပတ်တော် စာအုပ်တွေ သိမ်းထားတဲ့အိမ်ကို ရဲတွေသိအောင် သူလမ်းပြဖော်ထုတ်ပေးခဲ့ပြီး၊ အဖမ်းခံထားရတဲ့ ညီအစ်ကိုမောင်နှမတွေကို ဦးနှောက်ဆေးဖို့တောင် ရဲတွေကို ကူညီပေးခဲ့တယ်။ လင်းဟွေက ယုဒတစ်ယောက်အနေနဲ့ ဖော်ထုတ်ခံရပြီး အသင်းတော်ကနေ နှင်ထုတ်ခံလိုက်ရတာကို မြင်တော့၊ ကျွန်မ အတွေးနယ်ချဲ့မိသွားတယ်၊ “လင်းဟွေက ခေါင်းဆောင်တစ်ယောက်အနေနဲ့ သူ့တာဝန်ထမ်းဆောင်လာတာ နှစ်တွေအတော်ကြာပြီလေ။ ညီအစ်ကိုမောင်နှမတွေကို သူ မိတ်သဟာယဖွဲ့ပေးတဲ့အခါ များသောအားဖြင့် တော်တော်လေး ရှင်းလင်းတာပဲ။ ယုတ္တိရှိရှိ ပြောရရင် သူ့လို တက်တက်ကြွကြွ လိုက်စားတဲ့သူတစ်ယောက်မှာ ဝိညာဉ်ရင့်ကျက်မှုနည်းနည်းတော့ ရှိသင့်တာပေါ့။ အဖမ်းခံရပြီးတဲ့နောက် ဘယ်လိုလုပ် ယုဒတစ်ယောက် ဖြစ်သွားနိုင်တာလဲ။ ဒီလိုလိုက်စားခဲ့တဲ့ လင်းဟွေတောင်မှ သူ့ရဲ့ သက်သေခံချက်မှာ ခိုင်ခိုင်မာမာ မရပ်တည်နိုင်ခဲ့ဘူး။ ငါက ခေါင်းဆောင်လည်း မလုပ်ဖူးဘူး၊ သမ္မာတရားကိုလည်း သိပ်နားမလည်ဘူးဆိုတော့၊ တစ်နေ့ ငါသာ အဖမ်းခံရရင် ဘယ်လိုလုပ်မလဲ။ ရဲတွေက ငါ့ကို ထောင်ဒဏ်ချမှတ်ရင်၊ ဒါမှမဟုတ် မိသားစုရဲ့ အနာဂတ်ကိုသုံးပြီး ခြိမ်းခြောက်ရင်၊ ငါ့ရဲ့ သက်သေခံချက်မှာ ခိုင်ခိုင်မာမာ ရပ်တည်နိုင်ပါ့မလား။ ခိုင်ခိုင်မာမာ မရပ်တည်နိုင်ဘဲ ယုဒတစ်ယောက် ဖြစ်သွားရင်၊ ထာဝရ ပြစ်ဒဏ်ခံရတော့မှာပဲ။ ဒါဆိုရင် ကောင်းမွန်တဲ့ အနာဂတ် ဒါမှမဟုတ် ပန်းတိုင် မရှိတော့ဘူးပေါ့။ ဘယ်လိုလုပ် ကယ်တင်ခြင်းခံရပြီး နိုင်ငံတော်ကို ဝင်ရောက်နိုင်ပါတော့မလဲ” လို့ပေါ့။ တွေးလေလေ၊ ပိုပြီး စိတ်မချမ်းမသာဖြစ်လေလေပဲ၊ ပြီးတော့ ကိုယ့်တာဝန်ထမ်းဆောင်ဖို့ စိတ်အားထက်သန်မှုလည်း ပျောက်ဆုံးသွားတယ်။ တချို့အသင်းတော်တွေက ညီအစ်ကိုမောင်နှမတွေ အဖမ်းခံရတယ်လို့ ကြားလိုက်တိုင်း အရမ်းကြောက်သွားပြီး၊ တစ်နေ့ ငါလည်း ရဲအဖမ်းခံရပြီး ခိုင်ခိုင်မာမာ ရပ်တည်ဖို့ ပျက်ကွက်မလားဆိုပြီး အမြဲတမ်း စိုးရိမ်နေခဲ့တယ်။ အဲဒီအချိန်တုန်းက ဖယ်ရှားခြင်းအလုပ်ကို တာဝန်ယူထားတဲ့ ညီအစ်မတချို့က အခြေအနေမကောင်းလို့ သူတို့ပြဿနာတွေကို ဖြေရှင်းဖို့ မိတ်သဟာယဖွဲ့ပေးဖို့ လိုအပ်နေခဲ့တယ်။ သူတို့နဲ့တွေ့ဖို့ အချိန်နဲ့ နေရာကို စီစဉ်ထားခဲ့တယ်။ ဒါပေမဲ့ နောက်ပိုင်း အဲဒီနယ်မြေမှာ လုံခြုံရေး အန္တရာယ်တွေရှိတယ်လို့ ကြားရတော့ မသွားချင်တော့ဘူး။ “ငါသာ အဖမ်းခံရရင် ဘယ်လိုလုပ်မလဲ” လို့ပေါ့။ နောက်တော့ ညီအစ်မတစ်ယောက်က ကျွန်မနဲ့ မိတ်သဟာယဖွဲ့ပေးခဲ့လို့ နောက်ဆုံးတော့ သွားဖြစ်ခဲ့ပြီး ကိစ္စတွေကို မနှောင့်နှေးစေခဲ့ဘူး။

အဲဒီနောက်မှာ လင်းဟွေ အဖမ်းခံရပြီးတဲ့နောက် ဘုရားသခင်ကို သစ္စာဖောက်သွားတာကို ဘယ်လို နားလည်သင့်တယ်ဆိုတာကို ရှာဖွေခဲ့တယ်။ ဘုရားနှုတ်ကပတ်တော်တွေကို ဖတ်လိုက်ရတယ် “နိုင်ငံတော်ခေတ်တွင် လူသားသည် စုံလင်စေခြင်း အပြည့်အဝ ခံရလိမ့်မည်။ သိမ်းပိုက်ခြင်း အမှုနောက်တွင်၊ လူသားသည် စစ်ဆေးခြင်းနှင့် အတိဒုက္ခကို ခံရလိမ့်မည်။ ဤဒုက္ခဆင်းရဲခြင်း အတောအတွင်းတွင် အောင်မြင်ကျော်လွှားနိုင်ပြီး မိမိတို့၏သက်သေတွင် ခိုင်မာစွာ ရပ်တည်နိုင်သူတို့သည်၊ နောက်ဆုံးတွင် စုံလင်စေခြင်း ခံရမည့်သူများ ဖြစ်သည်။ ၎င်းတို့သည် အောင်မြင်သောသူများ ဖြစ်ကြသည်။ ဤဒုက္ခဆင်းရဲခြင်းအတောအတွင်းတွင်၊ လူသားသည် ဤစစ်ဆေးခြင်းကို လက်ခံရန်လိုအပ်ပြီး၊ ဤစစ်ဆေးခြင်းသည် ဘုရားသခင် အမှု၏ နောက်ဆုံး ဖြစ်စဉ်ဖြစ်သည်။ ဘုရားသခင်၏ စီမံခန့်ခွဲခြင်း အမှုအားလုံး အဆုံးမသတ်မီတွင် လူသားက စစ်ဆေးခြင်း ခံရလိမ့်မည်မှာ နောက်ဆုံးအကြိမ်ဖြစ်ပြီး၊ ဘုရားသခင်နောက် လိုက်သည့်သူအားလုံးသည် ဤနောက်ဆုံးစမ်းသပ်ခြင်းနှင့် စစ်ဆေးခြင်းကို လက်ခံရမည်ဖြစ်သည်။ ဒုက္ခဆင်းရဲ၏ ပတ်ချာ ဝိုင်းခံရသော သူများသည်၊ သန့်ရှင်းသော ဝိညာဉ်တော်၏ အလုပ်နှင့် ဘုရားသခင်၏ လမ်းပြခြင်း မရှိသူများ ဖြစ်ကြသည်၊ သို့သော် အမှန်တကယ် သိမ်းပိုက်ခံရပြီးဖြစ်ကာ ဘုရားသခင်ကို အမှန်တကယ် ရှာဖွေသူတို့သည် နောက်ဆုံးတွင် မားမားမတ်မတ် ရပ်တည်နိုင်ကြလိမ့်မည်။ ၎င်းတို့သည် လူ့သဘာဝကို ပိုင်ဆိုင်သူများနှင့် ဘုရားသခင်ကို အမှန်တကယ် ချစ်မြတ်နိုးသူများ ဖြစ်ကြသည်။ ဘုရားသခင် မည်သည့်အရာကိုပင် လုပ်ဆောင်သည်ဖြစ်စေ၊ ဤအောင်နိုင်သူတို့သည် ရူပါရုံများ ကင်းမဲ့လိမ့်မည် မဟုတ်သကဲ့သို့၊ ၎င်းတို့၏ သက်သေခံချက်များတွင် ကျရှုံးခြင်းမရှိဘဲ သမ္မာတရားကို လက်တွေ့လုပ်ဆောင်ဆဲ ဖြစ်လိမ့်မည်။ ၎င်းတို့သည် နောက်ဆုံးတွင် ဒုက္ခဆင်းရဲမှ ထွက်ပေါ်လာမည့်သူများ ဖြစ်သည်။ ဒုက္ခပင်လယ်တွင် ငါးဖမ်းသူများသည် ယနေ့တွင် ကပ်ပါးရပ်ပါးလုပ်နိုင်ကြသေးသော်လည်း၊ မည်သူမျှ နောက်ဆုံးသော ဒုက္ခဆင်းရဲကို မလွှတ်မြောက်နိုင်သကဲ့သို့၊ မည်သူကမျှ နောက်ဆုံးသော စမ်းသပ်ခြင်းကို မလွှတ်မြောက်နိုင်ပေ။ အောင်နိုင်သည့် သူများအတွက် ထိုသို့သော ဆင်းရဲဒုက္ခသည် ကြီးမားသည့် စစ်ဆေးခြင်း ဖြစ်သည်။ သို့သော်လည်း ဒုက္ခပင်လယ်တွင် ငါးဖမ်းသူများအတွက်၊ ယင်းသည် လုံးဝ ဖယ်ရှားရှင်းလင်းခြင်း အလုပ် ဖြစ်သည်။ ၎င်းတို့မည်မျှ စစ်ကြောခံရစေကာမူ စိတ်နှလုံးထဲတွင် ဘုရားသခင်ရှိထားသူများ၏ သစ္စာခံခြင်းသည် မပြောင်းမလဲ ရှိနေသည်။ သို့သော် ၎င်းတို့၏ စိတ်နှလုံးထဲတွင် ဘုရားသခင်မရှိသော သူများအတွက်၊ ဘုရားသခင်၏ အမှုသည် ၎င်းတို့ဇာတိပကတိအတွက် အကျိုးမပြုသည်နှင့်တစ်ပြိုင်နက် ဘုရားသခင်နှင့်ဆိုင်သည့် ၎င်းတို့၏အမြင်ကို ၎င်းတို့ ပြောင်းလဲကြပြီး၊ ဘုရားသခင်ထံမှပင် စွန့်ခွာကြလေသည်။ ထိုသို့သောသူများသည် အဆုံးတွင် မြဲမြံစွာ မရပ်တည်မည့်သူများ၊ ဘုရားသခင်၏ ကောင်းချီးမင်္ဂလာများကိုသာ ရှာဖွေပြီး မိမိတို့ကိုယ်ကို ဘုရားသခင်အတွက် အသုံးခံရန်နှင့် မိမိတို့ကိုယ်ကို သူ့အဖို့ ဆက်ကပ်ရန် ဆန္ဒမရှိကြသူများ ဖြစ်သည်။ ထိုသို့သော ယုတ်ညံ့သည့်လူများအားလုံးသည် ဘုရားသခင်၏အမှု အဆုံးသတ်သို့ ရောက်လာသည့်အချိန်တွင် နှင်ထုတ်ခံရလိမ့်မည်ဖြစ်ပြီး၊ မည်သည့် စာနာထောက်ထားခြင်းနှင့်မျှ မထိုက်တန်ကြချေ။ လူ့သဘာဝ မရှိသူများသည် ဘုရားသခင်ကို အမှန်တကယ် ချစ်နိုင်စွမ်း မရှိကြချေ။ ပတ်ဝန်းကျင်က လုံခြုံပြီး စိတ်ချရသောအခါ၊ သို့မဟုတ် အကျိုးအမြတ်များ ရှိသည့်အခါတွင်၊ ၎င်းတို့သည် ဘုရားသခင်ကို လုံးဝ နာခံကြသော်လည်း၊ ၎င်းတို့ ဆန္ဒရှိသည့်အရာသည် အထိခိုက် ခံရသည့်အခါ သို့မဟုတ် နောက်ဆုံးတွင် ငြင်းဆန်ခြင်းခံရသည့်အခါတွင်၊ ချက်ချင်း ပုန်ကန်ကြလေသည်။ တစ်ညတာ အချိန်လေးတွင်ပင်၊ ၎င်းတို့သည် ယုတ္တိယုတ္တာ သို့မဟုတ် အကြောင်းပြချက် မရှိဘဲ၊ ယမန်နေ့က ၎င်းတို့၏ ကျေးဇူးရှင်ကို ၎င်းတို့ အသေအကြေတိုက်မည့် ရန်သူအဖြစ် ရုတ်တရက် ဆက်ဆံရင်း၊ ပြုံးရွှင်နေသည့်၊ ‘စိတ်နှလုံးကောင်း’ ရှိသည့် ပုဂ္ဂိုလ်အဖြစ်မှ ကြည့်ရဆိုးပြီး ရက်စက်ကြမ်းကြုတ်သည့် လူသတ်သမားအဖြစ်သို့ ပြောင်းလဲ သွားနိုင်လေသည်။ မျက်တောင်ပင်မခတ်ဘဲ သတ်ဖြတ်မည့် ဤမကောင်းဆိုးဝါးများကို မနှင်ထုတ်လျှင်၊ ၎င်းတို့သည် ကွယ်ဝှက်သော အန္တရာယ်ဖြစ်လာမည် မဟုတ်လော။ သိမ်းပိုက်ခြင်း အမှု ပြီးပြည့်စုံခြင်းနောက်တွင် လူသားကို ကယ်တင်ခြင်း အမှုအား စွမ်းဆောင်ရရှိခြင်း မဟုတ်ပေ။ သိမ်းပိုက်ခြင်း အမှုသည် အဆုံးသတ်သို့ ရောက်လာပြီးဖြစ်သော်လည်း၊ လူသားကို သန့်စင်စေခြင်း အမှုက အဆုံးမသတ်သေးပေ။ ထိုသို့သောအမှုသည် လူသားက အပြည့်အဝ သန့်စင်ခြင်း ခံရပြီးသည်နှင့်တစ်ပြိုင်နက်၊ ဘုရားသခင်ကို အမှန်တကယ် ကျိုးနွံနာခံသူများက စုံလင်စေခြင်း ခံရပြီးသည်နှင့်တစ်ပြိုင်နက်၊ ပြီးလျှင် စိတ်နှလုံးထဲတွင် ဘုရားသခင် မရှိသည့် အယောင်ဆောင်များ ရှင်းလင်းပစ်ခြင်း ခံရပြီးသည်နှင့်တစ်ပြိုင်နက်တွင်သာ ပြီးစီးလိမ့်မည် ဖြစ်သည်။ ဘုရားသခင်ကို သူ၏ အမှု နောက်ဆုံးအဆင့်တွင် စိတ်မကျေနပ်စေနိုင် သူများသည် လုံးဝ ဖယ်ရှားရှင်းလင်းခြင်း ခံရလိမ့်မည်ဖြစ်ပြီး၊ ဖယ်ရှားရှင်းလင်းခြင်း ခံရသူများသည် နတ်ဆိုးများနှင့် သက်ဆိုင်ကြပေသည်။ ၎င်းတို့သည် ဘုရားသခင်ကို စိတ်ကျေနပ်စေနိုင်စွမ်း မရှိကြသည်နှင့်အမျှ၊ ၎င်းတို့သည် ဘုရားသခင်ကို ပုန်ကန်တတ်ကြပြီး၊ ဤလူတို့သည် ယနေ့တွင် ဘုရားသခင်နောက် လိုက်ကြသော်လည်း၊ ဤအရာက ၎င်းတို့သည် နောက်ဆုံးတွင် ကျန်ရှိကြလိမ့်မည်ဟု သက်သေမပြပေ။ ‘ဘုရားသခင်နောက်သို့ အဆုံးတိုင် လိုက်သောသူသည် ကယ်တင်ခြင်းကို ရရှိလိမ့်မည်။’ ဟူသော နှုတ်ကပတ်တော်များတွင်၊ ‘နောက်သို့လိုက်ခြင်း’ ၏ အဓိပ္ပာယ်မှာ ဒုက္ခဆင်းရဲ အလယ်တွင် မားမားမတ်မတ် ရပ်တည်ခြင်း ဖြစ်သည်။ ယနေ့တွင် လူများစွာတို့သည် ဘုရားသခင်နောက်သို့ လိုက်ခြင်းက လွယ်ကူသည်ဟု ထင်ကြသည်၊ သို့ရာတွင် ဘုရားသခင်၏ အမှု အဆုံးသတ်ခါနီးတွင်၊ ‘နောက်တော်သို့လိုက်ခြင်း’ ၏ အဓိပ္ပာယ်အမှန်ကို သင်သိလိမ့်မည်။ သင်သည် သိမ်းပိုက်ခြင်း ခံရပြီးနောက် ယနေ့ ဘုရားသခင်နောက်သို့ လိုက်နိုင်သေးရုံမျှဖြင့်၊ ဤအရာက သင်သည် စုံလင်အောင် ပြုလုပ်ခြင်းခံရမည့် လူအများထဲမှ တစ်ဦးဖြစ်သည်ဟု သက်သေမပြပေ။ စမ်းသပ်မှုများကို မခံနိုင်သည့် သူများ၊ ဒုက္ခဆင်းရဲ၏ အလယ်တွင် အောင်နိုင်ခြင်း မရှိသူများသည် နောက်ဆုံးတွင် မားမားမတ်မတ် ရပ်တည်မနေနိုင်ဘဲ၊ ဘုရားသခင်နောက်သို့ အဆုံးတိုင်အောင် လိုက်လျှောက်နိုင်မည် မဟုတ်ပေ။ ဘုရားသခင်နောက်သို့ အမှန်တကယ် လိုက်လျှောက် သူများသည် ၎င်းတို့အလုပ်ကို စမ်းသပ်ခြင်းအား ခံနိုင်ရည် ရှိကြသည်၊ သို့ရာတွင် ဘုရားသခင်နောက်သို့ အမှန်တကယ် မလိုက်လျှောက်သူများမှာ ဘုရားသခင်၏ မည်သည့်စစ်ဆေးမှုကိုမျှ ခံရပ်နိုင်စွမ်းမရှိကြပေ။ အနှေးနှင့်အမြန် ၎င်းတို့သည် နှင်ထုတ်ခံရကြလိမ့်မည်ဖြစ်သော်လည်း၊ အောင်နိုင်သူများသည် နိုင်ငံတော်တွင် ကျန်ရှိကြလိမ့်မည်။ လူသားက ဘုရားသခင်ကို အမှန်တကယ် ရှာဖွေသည်၊ မရှာဖွေသည်ကို သူ၏အလုပ်ကို စမ်းသပ်ခြင်းအားဖြင့်၊ ဆိုလိုသည်မှာ ဘုရားသခင်၏ စမ်းသပ်မှုများအားဖြင့်၊ ဆုံးဖြတ်ခြင်းဖြစ်ကာ လူကိုယ်တိုင် ကောက်ချက်ချသည့်အရာနှင့် လားလားမျှ မသက်ဆိုင်ပေ။ ဘုရားသခင်သည် မည်သည့်လူကိုမျှ ပေါ့ပေါ့တန်တန် မငြင်းပယ်ပေ။ သူလုပ်ဆောင်သမျှသည် လူသားကို လုံးဝ လက်ခံယုံကြည်စေနိုင်သည်။ သူသည် လူသားက မမြင်နိုင်သည့် မည်သည့်အရာကိုမျှ၊ သို့မဟုတ် လူသားကို လက်ခံမယုံကြည်စေနိုင်သည့် မည်သည့်အမှုကိုမျှ မလုပ်ဆောင်ပေ။ လူသား၏ ယုံကြည်ခြင်းက မှန်သည်၊ မှားသည်ဆိုသည်ကို အမှန်တရားများအားဖြင့် သက်သေပြခြင်း ဖြစ်ပြီး၊ လူသားက ကောက်ချက်ချ၍ မရနိုင်ပေ။ ‘ဂျုံစပါးပင်ကို တောပင်များအဖြစ်သို့ မပြုလုပ်နိုင်သကဲ့သို့၊ တောပင်များကိုလည်း ဂျုံစပါးပင်အဖြစ်သို့ မပြုလုပ်နိုင်ပါ’ ဆိုသည်မှာ ယုံမှားဖွယ်ရာ မရှိပေ။ ဘုရားသခင်ကို အမှန်တကယ် ချစ်မြတ်နိုးသူများအားလုံးသည် နောက်ဆုံးတွင် နိုင်ငံတော်ထဲ ကျန်ရှိကြလိမ့်မည် ဖြစ်ပြီး၊ သူ့ကို အမှန်တကယ် ချစ်မြတ်နိုးသည့် မည်သူကိုမဆို ဘုရားသခင်က ညံ့ဖျင်းစွာ ဆက်ဆံမည် မဟုတ်ပေ။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ ဘုရားသခင်၏ အမှုနှင့် လူ၏လက်တွေ့လုပ်ဆောင်မှု) ဘုရားနှုတ်ကပတ်တော်တွေကို တွေးတောဆင်ခြင်ရင်း၊ နောက်ဆုံးသော ကာလမှာ ဘုရားသခင်က အရာအားလုံးကို အမျိုးအစားနဲ့အညီ ခွဲခြားသတ်မှတ်တဲ့ အလုပ်ကို လုပ်ဆောင်နေတယ်ဆိုတာ နားလည်သွားတယ်။ တောပင်နဲ့ စပါး၊ ကောင်းတဲ့အစေခံနဲ့ ဆိုးယုတ်တဲ့အစေခံ၊ သိုးနဲ့ ဆိတ်တွေကို စမ်းသပ်မှုတွေနဲ့ ဆင်းရဲဒုက္ခတွေကနေတစ်ဆင့်သာ ထုတ်ဖော်နိုင်တာလေ။ ညှဉ်းပန်းနှိပ်စက်မှုနဲ့ ဆင်းရဲဒုက္ခတွေ ကျွန်မတို့ဆီ ကျရောက်ဖို့ ဘုရားသခင် ခွင့်ပြုတာမှာ အဓိပ္ပာယ်ရှိပါတယ်။ ဘုရားသခင်ကို ရိုးရိုးသားသား ယုံကြည်တဲ့သူတွေအတွက် ဒါက စုံလင်အောင် ပြုလုပ်ပေးခြင်းဖြစ်ပြီး၊ အချောင်လိုက်ပြီး ကောင်းချီးတွေကိုရှာဖွေတဲ့သူတွေ၊ ဝတ်ကျေတမ်းကျေ လုပ်တဲ့သူတွေအတွက်တော့ ဒါက ထုတ်ဖော်ခြင်းနဲ့ ဖယ်ရှားရှင်းလင်းခြင်းပါပဲ။ ဘုရားသခင်ကို တကယ်လိုချင်တဲ့သူတွေဟာ ဘယ်လို ညှဉ်းပန်းနှိပ်စက်မှု ဒါမှမဟုတ် ဆင်းရဲဒုက္ခမျိုးနဲ့ပဲ ကြုံရပါစေ၊ ဘုရားသခင်ကို မငြင်းပယ်ဘူး၊ သစ္စာမဖောက်ဘူး၊ ပြီးတော့ သမ္မာတရားကို ရှာဖွေပြီး သူတို့ရဲ့ သက်သေခံချက်မှာ ခိုင်ခိုင်မာမာ ရပ်တည်နိုင်ကြတယ်။ ဒါပေမဲ့ ဘုရားသခင်နောက်ကို ရိုးရိုးသားသား မလိုက်တဲ့သူတွေကျတော့၊ အပေါ်ယံအားဖြင့် တစ်ချိန်တစ်ခါ စွန့်လွှတ်ပြီး အသုံးခံနိုင်ရင်တောင်၊ ဘုရားအိမ်တော်က ယုံကြည်သူတစ်ယောက်အနေနဲ့ ဟန်ဆောင်ထားရင်တောင်၊ ဘုရားသခင် စီစဉ်တဲ့ ပတ်ဝန်းကျင်က သူတို့ရဲ့ ဇာတိပကတိအတွက် အဆင်မပြေဖြစ်လာပြီး ကောင်းချီးအတွက် သူတို့ရဲ့ လိုအင်ဆန္ဒ ပျက်စီးသွားတာနဲ့ တစ်ပြိုင်နက် ဘုရားသခင်ကို ချက်ချင်း ငြင်းပယ်ပြီး သစ္စာဖောက်နိုင်ကြတယ်။ စမ်းသပ်မှုတွေကြားမှာ သမ္မာတရားကို လက်တွေ့လုပ်ဆောင်ပြီး သူတို့ရဲ့ သက်သေခံချက်မှာ ခိုင်ခိုင်မာမာ ရပ်တည်နိုင်တဲ့သူတွေဟာ ဘုရားသခင် ကယ်တင်ပြီး စုံလင်အောင်ပြုချင်တဲ့ သူတွေပါပဲ။ သူတို့ရဲ့ သက်သေခံချက်မှာ ခိုင်ခိုင်မာမာ မရပ်တည်နိုင်တဲ့သူတွေကတော့ ထုတ်ဖော်ခံရတဲ့ တောပင်တွေပါပဲ။ ဘုရားသခင်ရဲ့ အမှုတော်က တကယ်ကို ဉာဏ်ပညာကြီးမားလိုက်တာ။ အသင်းတော်ရဲ့ ရုပ်ရှင်ဖြစ်တဲ့ “ကျွန်တော့်လူငယ်ဘဝ အမှတ်တရများ” ထဲက အသက် ၂၀ ပဲရှိသေးတဲ့ ညီအစ်ကိုကို သတိရမိတယ်။ ဘုရားသခင်ကို ယုံကြည်တဲ့အတွက် စီစီပီရဲ့ ဖမ်းဆီးတာနဲ့ ညှဉ်းပန်းနှိပ်စက်တာကို သူ ခံခဲ့ရတယ်။ ဘုရားသခင်ကို ငြင်းပယ်ပြီး သစ္စာဖောက်ဖို့ သူ့ကို အတင်းအကျပ်ခိုင်းတဲ့အနေနဲ့ ရဲတွေက ဆူပွက်နေတဲ့ ရေနွေးခွက်တွေကို သူ့ခန္ဓာကိုယ်ပေါ် ရက်ရက်စက်စက် လောင်းချခဲ့တယ်။ ဒါပေမဲ့ ဒီညီအစ်ကိုက ဒါဟာ မှန်တဲ့ လမ်းခရီးဖြစ်တယ်ဆိုတာကို သေချာယုံကြည်ထားလို့၊ ညှဉ်းဆဲမှု အမျိုးမျိုးကို ခါးစည်းခံရပေမဲ့လည်း ဘုရားသခင်ကို မငြင်းပယ်ခဲ့ဘူး၊ သစ္စာမဖောက်ခဲ့ဘူးလေ။ “ငွေစစ်သောသူ၏ မီး” ဆိုတဲ့ ရုပ်ရှင်ထဲမှာ ဘုရားသခင်ကို သစ္စာဖောက်အောင် အတင်းအကျပ်ခိုင်းဖို့အတွက် ရဲတွေက ညီအစ်မကို အရှက်မရှိ အဝတ်အစားတွေ ချွတ်ပြီး ဓာတ်လိုက်အောင်တို့ဖို့ လျှပ်စစ်တုတ်တွေ သုံးခဲ့ကြတယ်။ အဲဒီညီအစ်မဟာ ကြီးမားလှတဲ့ အရှက်ခွဲခံရမှုနဲ့ ညှဉ်းပန်းမှုကို ခါးစည်းခံခဲ့ရတယ်။ နာကျင်မှုတွေကြားမှာ သူက ဘုရားသခင်ဆီ ဆုတောင်းခဲ့တယ်၊ စာတန်ကို ကျိုးနွံနာခံမယ့်အစား သေဖို့ကိုပဲ သစ္စာဆိုခဲ့တယ်၊ ဘုရားသခင်ကို မငြင်းပယ်ဘဲ၊ သစ္စာမဖောက်ဘဲ၊ လှပပြီး အားကောင်းတဲ့ သက်သေခံချက်ကို ခံခဲ့ပြီး စာတန်ကို အရှက်ရစေခဲ့တယ်။ ဘုရားသခင်ကို တကယ်ယုံကြည်တဲ့ ညီအစ်ကိုမောင်နှမတွေဟာ ဘယ်လောက်ပဲ အန္တရာယ်တွေ ဒါမှမဟုတ် ဆင်းရဲဒုက္ခတွေနဲ့ ကြုံရပါစေ၊ ဘုရားသခင်ကို မငြင်းပယ်ဘူး၊ သစ္စာမဖောက်ဘူးဆိုတာကို ကျွန်မ မြင်ခဲ့ရတယ်။ ဒါပေမဲ့ အသင်းတော်မှာ အချိန်အကြာကြီး ခေါင်းဆောင်ဖြစ်ခဲ့တဲ့ လင်းဟွေကတော့၊ အဖမ်းခံရပြီးနောက် ယုဒတစ်ယောက်ဖြစ်သွားပြီး အသင်းတော်ရဲ့ အကျိုးစီးပွားတွေကို သစ္စာဖောက်ခဲ့တယ်၊ ရက်စက်တဲ့ ညှဉ်းဆဲမှုကနေ ရှောင်လွှဲဖို့၊ သူ့သမီးရဲ့ အနာဂတ်ကို လုံခြုံစိတ်ချရဖို့နဲ့ ကြိုးစားပြီး ကိုယ်လွတ်ရုန်းဖို့အတွက် အဆင်းနီသော နဂါးကြီးရဲ့ ကြံရာပါနဲ့ လက်ပါးစေ ဖြစ်သွားခဲ့တယ်။ သူ ဘုရားသခင်ကို ယုံကြည်လာတာ နှစ်တွေအများကြီးရှိပြီ၊ ပြီးတော့ ညီအစ်ကိုမောင်နှမတွေနဲ့လည်း မိတ်သဟာယ အများကြီး ခဏခဏ ဖွဲ့ခဲ့ပေမဲ့၊ လူတွေရဲ့ ကံကြမ္မာဟာ ဘုရားသခင်ရဲ့ လက်ထဲမှာ ရှိတယ်ဆိုတာကို သူ မယုံကြည်ခဲ့ဘူး။ အရေးကြီးတဲ့ အချိန်ရောက်လာတော့၊ သူက ဘုရားသခင်ကို ငြင်းပယ်ပြီး သစ္စာဖောက်နိုင်ခဲ့တယ်။ ဒါဆိုရင်၊ သူတခြားသူတွေကို ပေးခဲ့တဲ့ မိတ်သဟာယတွေ အားလုံးက စကားလုံးတွေနဲ့ အယူဝါဒတွေ သက်သက်ပဲ မဟုတ်ဘူးလား။ အချက်အလက်တွေက သူ့မှာ သမ္မာတရား လက်တွေ့ကျမှု လုံးဝမရှိဘူးဆိုတာကို ထုတ်ဖော်လိုက်တယ်။ သူဟာ အချောင်လိုက်ပြီး ကောင်းချီးရဖို့ အချည်းနှီး မျှော်လင့်ချက်နဲ့ ဘုရားအိမ်တော်ထဲ ခိုးဝင်လာတဲ့ မယုံကြည်သူ တစ်ယောက်သာ ဖြစ်တယ်။ အရင်တုန်းက သူ့ရဲ့ အပေါ်ယံ အပြုအမူကိုပဲ ကျွန်မ ကြည့်ခဲ့မိတာ။ သူက ခေါင်းဆောင်တစ်ယောက် ဖြစ်ခဲ့ပြီး စကားပြောကောင်းလို့ သူ့မှာ သမ္မာတရား လက်တွေ့ကျမှု ရှိတယ်လို့ ကျွန်မ ထင်ခဲ့တာ။ ဘုရားသခင်ရဲ့ ဖော်ထုတ်ချက်ကြောင့်သာ ကျွန်မမှာ ပိုင်းခြားသိမြင်နိုင်စွမ်း တိုးလာခဲ့တာပါ။ တစ်ချိန်တည်းမှာပဲ၊ ကျွန်မရဲ့ စစ်မှန်တဲ့ ဝိညာဉ်ရင့်ကျက်မှုကိုလည်း ကျွန်မ မြင်လိုက်ရတယ်။ ခဏခဏဆိုသလို ကိုယ့်ဆီ အန္တရာယ်ရှိတဲ့ အခြေအနေတွေ ကျရောက်လာခဲ့ရင် ကိုယ့်မှာ ယုံကြည်ခြင်းတချို့ ရှိတယ်လို့တောင် ထင်ခဲ့ပေမဲ့၊ တစ်ယောက်ယောက် ညှဉ်းပန်းခံရပြီး ဘုရားသခင်ကို သစ္စာဖောက်သွားတယ်လို့ သိလိုက်ရတဲ့အခါမှာတော့ ကြောက်ရွံ့မှု၊ သတ္တိနည်းမှုတွေနဲ့ အသက်ရှင်နေခဲ့တယ်။ သင်ခန်းစာယူဖို့ သမ္မာတရားကို ကျွန်မ မရှာဖွေခဲ့သလို၊ ကိုယ့်တာဝန်ကို ဘယ်လိုထိန်းသိမ်းရမယ်ဆိုတာကိုလည်း မတွေးခဲ့ဘူး။ ကိုယ့်ဆီမှာ သမ္မာတရား လက်တွေ့ကျမှု ဘာမှမရှိဘူးဆိုတာ မြင်လိုက်ရတယ်။ အခုက လူတွေရဲ့ အလုပ်ကို ဘုရားသခင် စမ်းသပ်စစ်ဆေးတဲ့ အချိန်ပဲ။ စမ်းသပ်မှုတွေနဲ့ ဆင်းရဲဒုက္ခတွေထဲမှာ ခိုင်ခိုင်မာမာ ရပ်တည်နိုင်ဖို့အတွက် ကိုယ့်ကိုယ်ကိုယ် သမ္မာတရားတွေနဲ့ ပိုပြီး ပြင်ဆင်ထားဖို့ လိုအပ်တယ်။

နောက်ပိုင်းမှာ ကိုယ့်အပျက်သဘောဆောင်ခြင်းရဲ့ ဇာစ်မြစ်ကိုလည်း ဆင်ခြင်သုံးသပ်ခဲ့တယ်။ ဘုရားနှုတ်ကပတ်တော်တွေကို ဖတ်လိုက်ရတယ်။ “ထို့ကြောင့် လူတို့ စိတ်နှလုံးများ၏ အတွင်းနက်နက် နေရာများတွင် မည်သည့်အရာများ တည်သည်ကို သင်တို့ သိကြသလော။ (ကောင်းချီးများ ရရှိရန်အလို့ငှာ ဘုရားသခင်ကို ယုံကြည်ခြင်းဖြစ်သည်။ ဤသည်မှာ လူတို့ စိတ်နှလုံးများအတွင်း တည်သောအရာတစ်ခု ဖြစ်ပါသည်။) မှန်ပေ၏။ လူတို့သည် ကောင်းချီးခံစားရရန်၊ ဆုလာဘ်ချီးမြှင့်ခြင်းခံရရန်၊ ဆုသရဖူရရှိရန်အတွက် ဘုရားသခင်ကို ယုံကြည်ကြသည်။ လူတိုင်း၏ စိတ်နှလုံးတွင် ဤအရာ တည်ရှိသည်မဟုတ်လော။ ဤအရာတည်ရှိသည်မှာ အမှန်တရားဖြစ်သည်။ ထိုအကြောင်းကို လူတို့က မကြာခဏ မပြောကြသော်လည်း၊ ကောင်းချီးများရရန် ၎င်းတို့၏ ရည်ရွယ်ချက်နှင့် ဆန္ဒကိုပင် ဖုံးကွယ်သော်လည်း လူတို့၏ စိတ်နှလုံးအတွင်းတွင်ရှိသော ဤဆန္ဒနှင့် ရည်ရွယ်ချက်သည် အစဉ် ပြောင်းလဲ၍ မရနိုင်ပေ။ လူတို့သည် ဝိညာဉ်ရေးရာ သဘောတရားများကို မည်မျှ နားလည်သည်ဖြစ်စေ၊ အတွေ့အကြုံဆိုင်ရာ အသိပညာ မည်မျှရှိသည်ဖြစ်စေ၊ မည်သည့်တာဝန်ကို ထမ်းဆောင်နိုင်သည်ဖြစ်စေ၊ မည်မျှ ဒုက္ခခံနိုင်သည်ဖြစ်စေ၊ သို့မဟုတ် မည်မျှ အဖိုးအခ ပေးဆပ်နိုင်သည်ဖြစ်စေ၊ ၎င်းတို့စိတ်နှလုံး အတွင်းနက်နက်ထဲတွင် ကွယ်ဝှက်နေသော ကောင်းချီးရလိုသည့် စိတ်ဓာတ်လှုံ့ဆော်မှုကို မည်သည့်အခါမျှ လက်မလွှတ်နိုင်ဘဲ အစေခံရာတွင် အစဉ်သဖြင့် တိတ်ဆိတ်စွာ အားသွန်ခွန်စိုက်လုပ်ဆောင်သည်။ ဤသည်မှာ လူတို့၏ စိတ်နှလုံးအတွင်းထဲရှိ အနက်ဆုံးနေရာတွင် မြုပ်နှံထားသောအရာ မဟုတ်လော။ ကောင်းချီးမင်္ဂလာများ ရရှိဖို့ဖြစ်သည့် ဤလှုံ့ဆော်မှုမရှိလျှင် သင်တို့သည် မည်သို့ခံစားရမည်နည်း။ မည်သည့်သဘောထားနှင့် တာဝန်ကို ထမ်းဆောင်ပြီး ဘုရားသခင်နောက် လိုက်မည်နည်း။ ၎င်းတို့၏ စိတ်နှလုံးထဲတွင် ဖုံးကွယ်နေသော ကောင်းချီးရရှိဖို့ဖြစ်သည့် ဤစိတ်ဓာတ်လှုံ့ဆော်မှုကို ဖယ်ရှားပစ်လိုက်လျှင် လူတို့သည် မည်သည့်အရာ ဖြစ်လာမည်နည်း။ လူများစွာက အပျက်သဘောဆောင်လာခြင်း ဖြစ်နိုင်သည်။ အချို့မှာ မိမိတို့၏တာဝန်များတွင် စိတ်အားလျော့လာမည်။ ၎င်းတို့၏ ဝိညာဉ်က ပျောက်ကွယ်သွားခဲ့ပြီးဖြစ်သည့်အလား ဘုရားသခင်အပေါ် ၎င်းတို့၏ ယုံကြည်မှုတွင် စိတ်ဝင်စားမှု ပျောက်သွားပေမည်။ ၎င်းတို့၏ စိတ်နှလုံးက ဆွဲယူခံခဲ့ရပြီးသည့် ပုံပေါ်နေမည်။ ဤအတွက်ကြောင့် ကောင်းချီးရရန် စိတ်ဓာတ်လှုံ့ဆော်မှုသည် လူတို့၏ စိတ်နှလုံးတွင် နက်နက်ရှိုင်းရှိုင်း ကွယ်ဝှက်နေသည့်အရာ ဖြစ်သည်ဟု ငါပြောရခြင်းဖြစ်သည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ အသက်တာ ကြီးထွားတိုးတက်ခြင်း၏ အညွှန်းခြောက်ခု) ဘုရားနှုတ်ကပတ်တော်တွေနဲ့ ကိုယ့်ကိုယ်ကိုယ် သုံးသပ်ကြည့်တော့ ကိုယ့်ရဲ့ အပျက်သဘောဆောင်တာနဲ့ စိတ်အားထက်သန်မှု မရှိတာတွေဟာ အဓိကအားဖြင့် ကောင်းချီးရဖို့ ကိုယ့်ရည်ရွယ်ချက်က တွန်းအားပေးလို့ဆိုတာ နောက်ဆုံးတော့ သဘောပေါက်သွားတယ်။ အရင်တုန်းက ပတ်ဝန်းကျင်က သက်သောင့်သက်သာရှိချိန်မှာ၊ ကိုယ့်လိုက်စားမှုမှာ စိတ်အားထက်သန်ခဲ့ပြီး ကိုယ့်တာဝန်ကိုလည်း တက်တက်ကြွကြွ ထမ်းဆောင်ခဲ့တယ်။ ဒါပေမဲ့ ပြန်တွေးကြည့်တော့၊ ကိုယ့်တာဝန်ကို ကောင်းကောင်းထမ်းဆောင်မှသာ ကောင်းမွန်တဲ့ အနာဂတ်နဲ့ ပန်းတိုင် ရနိုင်မယ်ဆိုတဲ့ အတွေးကနေ အဓိက စိတ်အားထက်သန်မှုတွေ ရခဲ့တာ။ အခု လင်းဟွေ ယုဒတစ်ယောက်ဖြစ်သွားပြီး ဘုရားသခင်ကို သစ္စာဖောက်တာကို မြင်တော့၊ ငါသာ အဖမ်းခံရရင် လင်းဟွေလိုဖြစ်ပြီး သက်သေခံချက်မှာ ခိုင်ခိုင်မာမာ ရပ်တည်ဖို့ ပျက်ကွက်ရင် ကောင်းတဲ့ အဆုံးသတ် ဒါမှမဟုတ် ပန်းတိုင် ရမှာမဟုတ်ဘူးဆိုပြီး စိုးရိမ်ခဲ့လို့ နောက်ဆုတ်စပြုလာတာပေါ့။ ကိုယ့်တာဝန်ကို ထမ်းဆောင်နေတဲ့အချိန်မှာတောင် ဝတ်ကျေတမ်းကျေလောက်ပဲ လုပ်နေခဲ့ပြီး အန္တရာယ် တစ်ခုခုရှိရင် အိမ်ကို အမြန်ပြေးပုန်းတတ်တယ်၊ ဘေးကင်းလုံခြုံနေသရွေ့ ကိုယ့်တာဝန်ကို ဘယ်လောက် ကောင်းကောင်း လုပ်ခဲ့လဲဆိုတာ ဂရုမစိုက်တော့ဘူး။ ဘုရားသခင်ကို ကျွန်မ ယုံကြည်တာက ကောင်းချီးတွေနဲ့ ကောင်းမွန်တဲ့ ပန်းတိုင်ကို ရဖို့အတွက်သက်သက်ပဲ၊ ပြီးတော့ ဘယ်အန္တရာယ်၊ ဆင်းရဲဒုက္ခကိုမှ မရင်ဆိုင်ချင်ခဲ့ဘူး။ ဘုရားသခင် စီစဉ်ပေးတဲ့ အခြေအနေတွေမှာ သင်ခန်းစာယူဖို့ သမ္မာတရားကို မရှာဖွေခဲ့ဘူး။ ဘုရားသခင်ကို ကျွန်မရဲ့ယုံကြည်ခြင်းက ဘုရားအိမ်တော်ထဲ ခိုးဝင်ပြီး သမ္မာတရားကို မလိုက်စားဘဲ ကောင်းချီးတွေကို အချည်းနှီး မျှော်လင့်နေတဲ့ မယုံကြည်သူတွေရဲ့ ယုံကြည်ခြင်းနဲ့ ဘာကွာခြားလို့လဲ။ ဒီအခြေအနေကို ဖြေရှင်းဖို့ သမ္မာတရားကိုသာ မရှာဖွေရင်၊ စမ်းသပ်မှုတွေ ကိုယ့်အပေါ် ကျရောက်လာတဲ့အခါ ကျိန်းသေ လဲကျသွားမှာပဲ။ ဒီတစ်ခါတော့ ဘုရားသခင်က ဒီလိုအခြေအနေမျိုးကနေတစ်ဆင့် ထုတ်ဖော်ခဲ့တာ၊ ဒါဟာ ငါ့အတွက် သူ့ရဲ့ ကယ်တင်ခြင်းပါပဲ။ ဘုရားသခင်ကို ရင်ထဲကနေ ကျေးဇူးတင်လိုက်ပါတယ်။

နောက်ပိုင်းမှာ ဆင်ခြင်တွေးတောမိတယ်၊ ခေါင်းဆောင်တစ်ယောက်က အဖမ်းခံရပြီး ယုဒဖြစ်သွားတာကို ကျွန်မ မြင်တော့ ဘာလို့ ဒီလောက်တောင် ပြင်းပြင်းထန်ထန် တုံ့ပြန်မိရတာလဲ လို့ပေါ့။ ခေါင်းဆောင်တွေဆိုတာ သမ္မာတရားကို တော်တော်လေး နားလည်ပြီး လက်တွေ့ကျမှုရှိတဲ့ သူတွေလို့ ထင်ခဲ့တာ။ ပြီးတော့ အဖမ်းခံရရင်တောင် သူတို့ရဲ့ သက်သေခံချက်မှာ ခိုင်ခိုင်မာမာ ရပ်တည်နိုင်လောက်တယ်လို့ ထင်ခဲ့တာလေ။ ဒါပေမဲ့ ငါ့အမြင်တွေက သမ္မာတရားနဲ့ ကိုက်ညီရဲ့လား။ ရှာဖွေနေရင်းနဲ့ ဘုရားနှုတ်ကပတ်တော်တွေကို ဖတ်လိုက်ရတယ်။ “တစ်စုံတစ်ယောက်ကို ညီအစ်ကိုမောင်နှမများက ခေါင်းဆောင်အဖြစ် ရွေးကောက်သောအခါ၊ သို့မဟုတ် အလုပ်တစ်ခုခု လုပ်ဆောင်ရန်ဖြစ်စေ၊ တာဝန်တစ်ခုခု ထမ်းဆောင်ရန်ဖြစ်စေ ဘုရားသခင်၏အိမ်တော်က မြှင့်တင်ပေးသောအခါတွင် ဤသူသည် ဘုရားသခင်အပေါ် ကျိုးနွံနာခံနိုင်ပြီး ဘုရားသခင်ကို သစ္စာဖောက်မည်မဟုတ်ဟု အဓိပ္ပာယ်သက်ရောက်ရန် မဆိုထားနှင့်၊ ထိုသူ၌ ထူးခြားသော ဂုဏ်အဆင့်အတန်းသော်လည်းကောင်း၊ ရာထူးနေရာသော်လည်းကောင်း ရှိသည်၊ သို့မဟုတ် ထိုသူနားလည်သည့် သမ္မာတရားများက အခြားလူများနားလည်သည့် သမ္မာတရားများထက် ပို၍နက်နဲပြီး ပို၍များပြားသည်ဟုပင် အဓိပ္ပာယ်သက်ရောက်ခြင်း မရှိပေ။ အသေအချာပင် ထိုသူသည် ဘုရားသခင်ကို သိပြီး ဘုရားသခင်ကို ကြောက်ရွံ့သောသူဖြစ်သည်ဟူ၍လည်း မဆိုလိုပေ။ အမှန်တကယ်တွင် ဤထဲမှ တစ်ခုကိုမျှ ၎င်းတို့မရရှိထားပေ။ မြှင့်တင်ပေးခြင်းနှင့် ပျိုးထောင်ခြင်းသည် ရိုးရှင်းသော အဓိပ္ပာယ်ဖြင့် မြှင့်တင်ပေးခြင်းနှင့် ပျိုးထောင်ခြင်းမျှသာဖြစ်ပြီး ၎င်းတို့ ဘုရားသခင်၏ ကြိုတင်ပြဋ္ဌာန်းခြင်း၊ ဘုရားသခင်က ထိုက်တန်သည်ဟု အမြင်ခံရခြင်းနှင့် မညီမျှချေ။ ထိုသူ၏ မြှင့်တင်ပေးခြင်းနှင့် ပျိုးထောင်ခြင်းမှာ ထိုသူသည် မြှင့်တင်ပေးခြင်းခံရပြီး ပျိုးထောင်မှုကို စောင့်ဆိုင်းနေသည်ဟူ၍ ဆိုလိုခြင်း သက်သက်သာဖြစ်သည်။ ပြီးလျှင် ဤပျိုးထောင်ခြင်း၏ အဆုံးသတ်ရလဒ်က ဤလူသည် သမ္မာတရားကို လိုက်စားခြင်း ရှိမရှိနှင့် ၎င်းသည် သမ္မာတရား လိုက်စားခြင်း လမ်းကြောင်းကို ရွေးချယ်နိုင်စွမ်း ရှိမရှိတို့အပေါ်တွင် မူတည်လေသည်။” (နှုတ်ကပတ်တော်၊ အတွဲ (၅)၊ ခေါင်းဆောင်များနှင့် အမှုဆောင်များ၏ တာဝန်များ၊ ခေါင်းဆောင်များနှင့် အမှုဆောင်များ၏ တာဝန်များ (၅)) “ဘုရားသခင်၏ နှုတ်ကပတ်တော်များကို ကိုင်စွဲပြီး အတင့်ရဲစွာ ရှင်းပြနိုင်ခြင်းသည် သင် လက်တွေ့ကျမှု ပိုင်ဆိုင်သည်ဟု မဆိုလိုပေ။ အမှုအရာများသည် သင် စိတ်ကူးသလောက် မရိုးရှင်းပေ။ လက်တွေ့ကျမှု ပိုင်ဆိုင်ခြင်းသည် သင် ပြောဆိုသည့်အရာတစ်ခု မဟုတ်ဘဲ သင် အသက်ရှင်နေထိုင်သည့်အရာတစ်ခု ဖြစ်သည်။ ဘုရားသခင်၏ နှုတ်ကပတ်တော်များသည် သင်၏အသက်နှင့် သင်၏ သဘာဝကျသော ထုတ်ဖော်ခြင်း ဖြစ်လာသည့်အခါမှသာ သင် လက်တွေ့ကျမှု ရှိသည်ဟု ဆိုနိုင်ပြီး ထိုအခါမှသာ သင်သည် စစ်မှန်သော နားလည်မှုနှင့် အမှန်တကယ်ဖြစ်သော ဝိညာဉ်ရင့်ကျက်မှုကို ရရှိပြီးဖြစ်သည်ဟု မှတ်ယူနိုင်ပေသည်။ အချိန်ကာလကြာရှည်စွာ စမ်းသပ်မှုများကို ကြံ့ကြံ့ခံနိုင်ခြင်းနှင့် ဟန်ဆောင်ခြင်းမဟုတ်ဘဲ သဘာဝကျကျ ထုတ်ဖော်လျက် ဘုရားသခင်၏ တောင်းဆိုချက်များနှင့် ကိုက်ညီသော ပုံသဏ္ဌာန်ကို အသက်ရှင်နေထိုင်ခြင်းသာလျှင် လက်တွေ့ကျမှုကို အမှန်တကယ် ပိုင်ဆိုင်ခြင်းနှင့် အသက်ရှိခြင်းဟု မှတ်ယူသည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ သမ္မာတရားအား လက်တွေ့လုပ်ဆောင်ခြင်းသည်သာလျှင် လက်တွေ့ကျမှု ပိုင်ဆိုင်ခြင်းဖြစ်သည်) ဘုရားနှုတ်ကပတ်တော်တွေကနေတစ်ဆင့် နားလည်သွားတာက၊ ဘုရားအိမ်တော်ဟာ အသင်းတော်အလုပ်ရဲ့ လိုအပ်ချက်တွေနဲ့အညီ လူတွေကို ရာထူးတိုးပေးပြီး ပျိုးထောင်ပေးတယ်ဆိုတာပါပဲ။ ခေါင်းဆောင်တွေ ဒါမှမဟုတ် အမှုဆောင်တွေဖြစ်ဖို့ အစွမ်းအစနဲ့ လိုအပ်ချက်တွေရှိတဲ့ သူတချို့ကို ခေါင်းဆောင် ဒါမှမဟုတ် အမှုဆောင်တွေအဖြစ် ရွေးကောက်တင်မြှောက်တာ၊ ဒါမှမဟုတ် အလုပ်တစ်ခုခုလုပ်ဖို့ ရာထူးတိုးပေးတာခံရတယ်။ ဒါက သူတို့ကို လေ့ကျင့်ဖို့ အခွင့်အရေးပေးတာပါ။ ဒါပေမဲ့ ဒါက သူတို့မှာ သမ္မာတရား လက်တွေ့ကျမှုတွေ ရှိတယ်လို့ ဆိုလိုတာ မဟုတ်တဲ့အပြင် သူတို့ရဲ့ ဝိညာဉ်ရင့်ကျက်မှုက တခြား ညီအစ်ကိုမောင်နှမတွေထက် ပိုကြီးမားတယ်လို့လည်း မဆိုလိုပါဘူး။ သူတို့ထမ်းဆောင်တဲ့ တာဝန်တွေနဲ့ အစေခံရတဲ့ အလုပ်တာဝန်တွေ မတူညီတာလောက်ပါပဲ။ ဘုရားနှုတ်ကပတ်တော်တွေနဲ့ ကိုယ့်ကိုယ်ကိုယ် သုံးသပ်ကြည့်တော့ ခေါင်းဆောင်တွေနဲ့ အမှုဆောင်တွေအပေါ် ထားရှိတဲ့ ကိုယ့်အမြင်က မှားနေတယ်ဆိုတာ ကျွန်မ မြင်လိုက်ရတယ်။ ဥပမာ၊ လင်းဟွေ အဖမ်းခံရတာကို မြင်တော့၊ သူက ခေါင်းဆောင်တစ်ယောက်ဖြစ်ပြီး သူ မိတ်သဟာယဖွဲ့တာကလည်း တော်တော်လေး ရှင်းလင်းလို့၊ သူဟာ သမ္မာတရားကို သေချာပေါက် လိုက်စားပြီး လက်တွေ့ကျမှုတွေ ရှိရမယ်၊ ပြီးတော့ အဖမ်းခံရရင်တောင် သက်သေခံချက်မှာ ခိုင်ခိုင်မာမာ ရပ်တည်နိုင်လောက်တယ်လို့ ထင်ခဲ့တာ။ သူ ယုဒတစ်ယောက် လုံးလုံး ဖြစ်သွားတာကို မြင်လိုက်ရတော့၊ နားမလည်နိုင်အောင် ဖြစ်ခဲ့ရတယ်။ ငါက ခေါင်းဆောင် ဒါမှမဟုတ် အမှုဆောင် မဖြစ်ခဲ့ဖူးလို့ အဖမ်းခံရရင် ခိုင်ခိုင်မာမာ ရပ်တည်နိုင်မှာ မဟုတ်ဘူးလို့တောင် စိုးရိမ်ခဲ့တာလေ။ အခုတော့ လူတစ်ယောက်မှာ သမ္မာတရား လက်တွေ့ကျမှု ရှိမရှိဆိုတာဟာ သူတို့ ဘာတာဝန် ထမ်းဆောင်ခဲ့ဖူးလဲ ဒါမှမဟုတ် အယူဝါဒတွေ ဘယ်လောက်ပြောနိုင်သလဲဆိုတာပေါ် ဆုံးဖြတ်တာ မဟုတ်ဘဲ ကိစ္စရပ်တွေနဲ့ ကြုံလာရတဲ့အခါ သမ္မာတရားကို လက်တွေ့လုပ်ဆောင်နိုင်သလား ဆိုတာပေါ်မှာ အဓိက ဆုံးဖြတ်တယ်ဆိုတာ ကျွန်မ နားလည်သွားပြီ။ ပူဇော်သက္ကာတွေကို သိမ်းဆည်းစောင့်ရှောက်ဖို့ တာဝန်ယူထားတဲ့ အသင်းတော်က အသက်ကြီးတဲ့ ညီအစ်မတစ်ယောက်ကို ကျွန်မ သတိရမိတယ်။ ယုဒတစ်ယောက်က သူ့အိမ်ကို ရဲတွေခေါ်လာပြီး ရှာဖွေတဲ့အခါ ရဲတွေက သူ့ကို ခြိမ်းခြောက်ပြီး ပူဇော်သက္ကာတွေကို ပေးခိုင်းဖို့ ကြိုးစားပေမဲ့ အဲဒီညီအစ်မက စာတန်ရဲ့ ဆိုးယုတ်တဲ့ အင်အားစုတွေကို မကြောက်ခဲ့ဘူး။ ပူဇော်သက္ကာတွေကို ကာကွယ်ဖို့ အသက်စွန့်ခဲ့ပြီး ရဲတွေကို ဉာဏ်ပညာရှိရှိ တုံ့ပြန်ဖို့ ဘုရားသခင်ကို အားကိုးခဲ့တယ်။ ပြီးတော့ ရဲတွေ ထွက်သွားတဲ့အခါ ပူဇော်သက္ကာတွေကို လုံခြုံတဲ့နေရာဆီ ချက်ချင်း ရွှေ့ပြောင်းပေးခဲ့တယ်။ လူတွေအမြင်မှာတော့ အဲဒီ အသက်ကြီးတဲ့ညီအစ်မဟာ ခေါင်းဆောင် မဟုတ်ခဲ့တဲ့အပြင် မိတ်သဟာယမဖွဲ့တတ်၊ တရားဒေသနာ မဟောတတ်ပေမဲ့ ပြဿနာတွေနဲ့ ကြုံလာရတဲ့အခါ ကိုယ့်လုံခြုံရေးကို ဂရုမစိုက်ဘဲ ပူဇော်သက္ကာတွေကို ကာကွယ်ပြီး ဘုရားအိမ်တော်ရဲ့ အကျိုးစီးပွားတွေကို စောင့်ရှောက်နိုင်ခဲ့တယ်။ အဲဒီလိုလူမျိုးကသာ သက်သေခံတာပေါ့။

လင်းဟွေ ကျရှုံးရတဲ့ အကြောင်းရင်းတစ်ခုကတော့ ထောင်ထဲမှာ ဆင်းရဲဒုက္ခခံရမှာကို ကြောက်လို့ပဲ။ နောက်အကြောင်းရင်းတစ်ခုကတော့ အဆင်းနီသော နဂါးကြီးက သူ့သမီးရဲ့ အနာဂတ်ကိုသုံးပြီး ခြိမ်းခြောက်တဲ့အခါ၊ လူတွေရဲ့ ကံကြမ္မာဟာ ဘုရားသခင်ရဲ့ လက်ထဲမှာ ရှိတယ်ဆိုတာကို သူ မယုံကြည်ခဲ့တာပဲ။ အလားတူပဲဖြစ်နေတဲ့ ကိုယ့်အခြေအနေကို တွေးမိတော့၊ ဒီအခြေအနေရဲ့ ရှုထောင့်နဲ့ပတ်သက်တဲ့ ဘုရားနှုတ်ကပတ်တော်တွေကို ရှာဖွေခဲ့တယ်။ ဘုရားနှုတ်ကပတ်တော်တွေကို ဖတ်လိုက်ရတယ်။ “လူ၏ကံကြမ္မာကို ဘုရားသခင်၏လက်များက ထိန်းချုပ်ထား၏။ သင်သည် မိမိကိုယ်ကို ထိန်းချုပ်နိုင်စွမ်း မရှိပေ။ လူသည် မိမိအရေးအတွက် အစဉ်အမြဲ အလုပ်ရှုပ်ကာ လှုပ်ရှားသွားလာနေလျှင်ပင် သူသည် မိမိကိုယ်မိမိ ထိန်းချုပ်နိုင်စွမ်း မရှိဆဲသာဖြစ်ပေသည်။ သင်သည် မိမိ၏ ကိုယ်ပိုင်အလားအလာများကို သိနိုင်လျှင်၊ မိမိ၏ ကံကြမ္မာကို ထိန်းချုပ်နိုင်လျှင် သင့်ကို ဖန်ဆင်းခံတစ်ဦးဟု ခေါ်ဆိုခြင်း ခံရဦးမည်လော။...လူ၏ ပန်းတိုင်သည် ဖန်ဆင်းရှင်၏ လက်ထဲတွင်ရှိ၏၊ ထို့ကြောင့် လူသည် မိမိကိုယ်ကို မည်သို့ ထိန်းချုပ်နိုင်မည်နည်း။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ လူ၏ပုံမှန်ဘဝကို နဂိုအတိုင်း ပြန်ဖြစ်လာစေခြင်းနှင့် သူ့ကို အံ့သြဖွယ်ကောင်းသော ခရီးပန်းတိုင်သို့ ခေါ်ဆောင်သွားခြင်း) ဘုရားနှုတ်ကပတ်တော်တွေကို တွေးတောဆင်ခြင်ရင်း၊ ဘုရားသခင်ဟာ ဖန်ဆင်းရှင်ဖြစ်ပြီး လူဟာ ဖန်ဆင်းခံတစ်ယောက်ဖြစ်တယ်၊ ပြီးတော့ လူတွေရဲ့ ကံကြမ္မာဟာ ဘုရားသခင်ရဲ့ လက်ထဲမှာ ရှိတယ်ဆိုတာကို ကျွန်မ နားလည်သွားတယ်။ လူတစ်ယောက်ရဲ့ ကံကြမ္မာက ဘယ်လိုဖြစ်မယ်ဆိုတာကို ဘုရားသခင်က အချိန်အကြာကြီးကတည်းက အမိန့်နဲ့ပြဋ္ဌာန်းပြီး စီစဉ်ထားပြီးသားပါ။ လူတွေက ကိုယ့်အတွက်ကိုယ် အစီအစဉ်ဆွဲပြီး အကြံအစည်တွေ လုပ်နေရင်တောင် သူတို့ရဲ့ ကံကြမ္မာကို သူတို့ မထိန်းချုပ်နိုင်ပါဘူး။ စီစီပီ ရဲတပ်ဖွဲ့က ကျွန်မမိသားစုရဲ့ အနာဂတ်ကိုသုံးပြီး ခြိမ်းခြောက်မှာကို စိုးရိမ်နေတာဟာ အဓိကကတော့ ဘုရားသခင်ရဲ့ အချုပ်အခြာအာဏာကို စစ်မှန်တဲ့ နားလည်သဘောပေါက်မှု ကင်းမဲ့နေရာက လာတာပါ။ တစ်နေ့ တကယ် အဖမ်းခံရပြီး ထောင်ကျခဲ့ရင်၊ မိသားစု အမှုပတ်မလား မပတ်ဘူးလားဆိုတာ အားလုံး ဘုရားသခင်ရဲ့ လက်ထဲမှာပဲ ရှိတယ်ဆိုတာကို ကျွန်မ နားလည်သွားတယ်။ ကျွန်မဟာ ဖန်ဆင်းခံတစ်ယောက်ဖြစ်ပြီး ကိုယ့်ကံကြမ္မာကိုတောင် မထိန်းချုပ်နိုင်ဘဲနဲ့ မိသားစုရဲ့ အနာဂတ်ကို စိုးရိမ်နေခဲ့တာ။ ငါ တော်တော် မိုက်မဲခဲ့တာပဲ။ အဖမ်းမခံရခင်မှာတောင် ယုဒတစ်ယောက်အနေနဲ့ ထုတ်ဖော်ခံရမှာ စိုးရိမ်လို့ ကိုယ်လုပ်သင့်လုပ်ထိုက်တဲ့ တာဝန်တွေကိုတောင် မထမ်းဆောင်ဘဲ ကိုယ့်တာဝန်အပေါ် သစ္စာစောင့်သိမှု လုံးဝကင်းမဲ့ပြီး အိမ်မှာပုန်းရင်း ကိုယ်လွတ်ရုန်းဖို့ ကြိုးစားနေခဲ့တယ်။ အပေါ်ယံကြည့်ရင် ယုဒတစ်ယောက်ဖြစ်တဲ့ လင်းဟွေလို ဘုရားသခင်ကို တိုက်ရိုက် သစ္စာမဖောက်ခဲ့ပေမဲ့၊ ကိုယ့်တာဝန်ကို ကောင်းကောင်း မထမ်းဆောင်တာဟာ စာတန်ရဲ့ လှည့်ကွက်ထဲ ကျသွားပြီး ကိုယ့်သက်သေခံချက် ဆုံးရှုံးသွားတာ မဟုတ်ဘူးလား။ ဒါနဲ့ ဘုရားသခင်ဆီ ဆုတောင်းခဲ့တယ်၊ “အို ဘုရားသခင်၊ လင်းဟွေက ယုဒတစ်ယောက်အနေနဲ့ ထုတ်ဖော်ခံရပါတယ်။ သမီးကလည်း မှားယွင်းတဲ့ အမြင်တွေ အများကြီးကို ထုတ်ဖော်ခဲ့ပြီး ကြောက်ရွံ့တုန်လှုပ်နေခဲ့ပေမဲ့၊ ဒီဖော်ထုတ်ချက်ကနေတစ်ဆင့် သမီးရဲ့ စစ်မှန်တဲ့ ဝိညာဉ်ရင့်ကျက်မှုကို ရှင်းရှင်းလင်းလင်း မြင်တွေ့ရပြီး သမီးရဲ့ ယုံကြည်ခြင်းက ဘယ်လောက်တောင် နည်းပါးတယ်ဆိုတာကို မြင်တွေ့ရပါတယ်။ အို ဘုရားသခင်၊ နောင် တာဝန်ထမ်းဆောင်တဲ့အခါ သမီးရဲ့ သက်သေခံချက်မှာ ခိုင်ခိုင်မာမာ ရပ်တည်ဖို့အတွက် ကျေးဇူးပြုပြီး လမ်းပြပါ။” လို့ပေါ့။ အဲဒီနောက်၊ အခြေအနေမကောင်းဖြစ်နေတဲ့ ဖယ်ရှားခြင်းအလုပ်ကို တာဝန်ယူထားတဲ့ ညီအစ်မတွေကို သတိရမိပြီး၊ သူတို့နဲ့ ဆွေးနွေးဖို့ လိုအပ်နေသေးတဲ့ အလုပ်တွေ ရှိတယ်ဆိုတာကို ကျွန်မ တွေးမိတယ်။ ဒါနဲ့ သူတို့နဲ့တွေ့ဖို့ အချိန်သတ်မှတ်လိုက်ပြီး၊ ကျွန်မတို့ရဲ့ စုဝေးပွဲက ရလဒ်တချို့ ရရှိခဲ့ပါတယ်။

ဒီတစ်ခါ၊ ယုဒတစ်ယောက်ရဲ့ ထုတ်ဖော်ခံရမှုက ကိုယ့်ရဲ့ စစ်မှန်တဲ့ ဝိညာဉ်ရင့်ကျက်မှုကို သတိပြုမိစေပြီး ကောင်းချီးတွေအတွက် ကျွန်မရဲ့လိုအင်ဆန္ဒ ဘယ်လောက် ပြင်းထန်တယ်ဆိုတာကို ကျွန်မကို မြင်တွေ့စေခဲ့တယ်။ ပြီးတော့ တစ်ကိုယ်ကောင်းဆန်ပြီး စက်ဆုပ်စရာကောင်းတဲ့ စာတန်ဆန်တဲ့ စိတ်သဘောထားနဲ့ ပတ်သက်ပြီးလည်း ကျွန်မ နားလည်မှုတချို့ ရရှိခဲ့တယ်။ တစ်ချိန်တည်းမှာပဲ၊ စီစီပီ အုပ်ချုပ်နေတဲ့ နိုင်ငံမှာ သမ္မာတရားကို ရဖို့အတွက် ဘုရားသခင်ကို ယုံကြည်တာက မလွယ်ကူတဲ့ ကိစ္စဆိုတာကိုလည်း ကျွန်မကို ပိုပြီး ရှင်းရှင်းလင်းလင်း မြင်တွေ့စေခဲ့တယ်။ လူတစ်ယောက်က တကယ်ကို ကိုယ့်အသက်ကို စတေးရမှာပါလား။ ကျွန်မရဲ့ ဝိညာဉ်ရင့်ကျက်မှုက သေးငယ်နေသေးပေမဲ့၊ ဒီလိုပတ်ဝန်းကျင်မျိုးမှာ ဘုရားသခင်ရဲ့ နှုတ်ကပတ်တော်တွေနဲ့ အလုပ်ကို ကျိုးနွံနာခံပြီး တွေ့ကြုံခံစားဖို့ ကျွန်မ လိုလားပါတယ်။ ဘုရားသခင်ကို ကျေးဇူးတင်ပါတယ်။