ကျင်းရှင်း၊ တရုတ်နိုင်ငံ

၂၀၂၂ ခုနှစ်၊ ဩဂုတ်လမှာ ကျွန်မက လျူရွှမ်၊ ကျန်းချီတို့နဲ့ ဗီဒီယိုတွေဖန်တီးဖို့ ပူးပေါင်းလုပ်ဆောင်ခဲ့ပါတယ်။ ကျွန်မက ဗီဒီယိုလုပ်တဲ့နေရာမှာ လူသစ်ဖြစ်ပြီး စည်းမျဉ်းတချို့ကို သဘောမပေါက်သေးတဲ့အတွက် အဖွဲ့ခေါင်းဆောင် လျူရွှမ်က ကျွန်မကို ခဏခဏ ကူညီခဲ့ပါတယ်။ ကျွန်မတို့က အသက်လည်းတူ၊ စိတ်ဝင်စားတာတွေလည်း တူကြတော့ တစ်ယောက်နဲ့တစ်ယောက် အမြန် ရင်းနှီးကျွမ်းဝင်သွားပြီး ဆက်ဆံရေးလည်း ကောင်းခဲ့ကြပါတယ်။

တစ်ခါတော့ ကျန်းချီက ဗီဒီယိုတစ်ခုလုပ်နေတုန်း ရှုပ်ထွေးတဲ့ပြဿနာတချို့ ကြုံရလို့ လျူရွှမ်ကို အကူအညီတောင်းခဲ့တယ်။ လျူရွှမ်က သူနဲ့အတူ ပြဿနာတွေကို လေ့လာဆန်းစစ်ပြီး ဆွေးနွေးခဲ့ပေမဲ့ ကျန်းချီလုပ်ပြီးသွားတဲ့ ဗီဒီယိုမှာ ပြဿနာတချို့ ရှိနေတုန်းပါပဲ။ အဲဒီမှာ လျူရွှမ်က မထီမဲ့မြင်ပြုတဲ့လေသံနဲ့ ပြောတယ်။ “ငါတို့ မနေ့က ဒါကို ဆွေးနွေးပြီးသားပဲ၊ နင်က ဒီလိုဗီဒီယိုမျိုးကို လုပ်တုန်းပဲ” လို့ပေါ့။ ကျန်းချီက နည်းနည်း ဘောင်ခတ်ခံရသလိုဖြစ်ပြီး ဘာမှမပြောဘဲ ခေါင်းငုံ့ထားတာကို မြင်တော့ ကျွန်မ တွေးမိတယ်။ “လျူရွှမ်ရဲ့ ချဉ်းကပ်ပုံက ကျန်းချီကို နာကျင်စေလိမ့်မယ်။ ပြဿနာတွေကြုံရတဲ့အခါ အေးအေးဆေးဆေး ဆက်သွယ်ပြောဆိုသင့်တယ်၊ အဲဒါက နောင်မှာ တိုးတက်မှုတွေအတွက် ပိုအထောက်အကူပြုမှာ” လို့ပေါ့။ ကျွန်မက ဒီအကြောင်း လျူရွှမ်ကို ထုတ်ပြောဖို့ တွေးမိပေမဲ့ ကျွန်မ တွန့်ဆုတ်ပြီးတော့ တွေးလိုက်တယ်။ “လျူရွှမ်က လက်ခံရင်တော့ ကောင်းပါတယ်။ ဒါပေမဲ့ သူက လက်မခံဘဲ ပြန်ပြောပြီး ငါ့ကို အနေရခက်အောင် လုပ်ရင် ငါ့အတွက် အရမ်းရှက်စရာကောင်းမှာပဲ။ လျူရွှမ်က ငါ ကျန်းချီဘက်က လိုက်တယ်လို့ထင်ပြီး ငါ့ကို မကြိုက်ဖြစ်သွားရင် ဘယ်လိုလုပ်မလဲ။ နောင်မှာ ငါ သူနဲ့ ဘယ်လို အဆင်ပြေပြေ ဆက်ဆံနိုင်ပါ့မလဲ။ ထားလိုက်ပါတော့။ ဘာမှ မပြောတာ ပိုကောင်းမယ်ထင်တယ်” လို့ပေါ့။ နောက်တော့ လျူရွှမ်ကလည်း သူမာနထောင်လွှားတဲ့ စိတ်သဘောထားကို ထုတ်ဖော်ခဲ့တာ သဘောပေါက်ခဲ့ပေမဲ့ သူ့ကိုယ်သူ တကယ်နားလည်မှုမရှိဘဲ ရိုးရိုးလေး ဝန်ခံရုံပဲ ဝန်ခံခဲ့တယ်။ ကျွန်မက သူနဲ့ မိတ်သဟာယဖွဲ့ဖို့ တွေးမိပေမဲ့ စကားတွေက ထွက်တော့မဲ့ဆဲဆဲမှာ နောက်တစ်ခါ ထပ်တွန့်ဆုတ်မိတယ်။ “သူက မာနထောင်လွှားတယ်လို့ ဝန်ခံပြီးသားပဲ။ ငါက ထပ်ပြီး ထောက်ပြပြီး သူနဲ့ မိတ်သဟာယဖွဲ့ရင် သူက သူ့အပေါ်ထားတဲ့ ငါ့တောင်းဆိုချက်တွေက အရမ်းကြီးတယ်လို့ ထင်မလား။ သူက ငါ့အပေါ် အမြင်စောင်းသွားရင် ဘယ်လိုလုပ်မလဲ။ ထားလိုက်တာ ပိုကောင်းမယ်” လို့ပေါ့။ ဒီလိုနဲ့ အဲဒီကိစ္စက အဲဒီလိုပဲ ပြီးသွားခဲ့တယ်။ နောက်တစ်ခါကျတော့ ကျွန်မတို့အဖွဲ့လုပ်တဲ့ ဗီဒီယိုတစ်ခုက စံမမီခဲ့ဘူး။ အဖွဲ့ခေါင်းဆောင်အနေနဲ့ လျူရွှမ်က အကြောင်းရင်းရှာဖို့ ကျွန်မတို့ကို ဦးဆောင်မပေးခဲ့ဘူး။ ရက်နည်းနည်းကြာတော့ တခြားညီအစ်ကိုမောင်နှမတွေက စည်းမျဉ်းတွေအပေါ် အခြေခံပြီး ကျွန်မတို့နဲ့ လေ့လာဆန်းစစ် ဆက်သွယ်ပြောဆိုခဲ့ကြတယ်။ အဲဒီအချိန်ကျမှပဲ ပြဿနာက ဘယ်နေရာမှာလဲဆိုတာ ကျွန်မ သဘောပေါက်ခဲ့တယ်။ ဒီနည်းပညာပိုင်း ကျွမ်းကျင်မှု ကဏ္ဍကို အမြန်သင်ယူဖို့ ကျွန်မ အကြံပြုခဲ့တယ်။ ဒါပေမဲ့ လျူရွှမ်က ဒါကို အလေးအနက်မထားဘဲ ဒီနည်းပညာပိုင်း ကျွမ်းကျင်မှု ကဏ္ဍကို အရင်က သူလေ့လာခဲ့ပြီး သိပြီးသားလို့ ပြောတယ်။ အဲဒါနဲ့ ကျွန်မတို့ သင်ယူဖို့ သူ စီစဉ်မပေးခဲ့ဘူး။ နည်းပညာပိုင်း လေ့လာမှုအပေါ် လျူရွှမ်ရဲ့ ပေါ့ပေါ့ဆဆ သဘောထားကို ကျွန်မ သတိထားမိခဲ့တယ်။ သူက ရှင်းရှင်းလင်းလင်းကို မကျွမ်းကျင်ပေမဲ့ ကိုယ့်ကိုယ်ကိုယ် ကျေနပ်ရောင့်ရဲပြီး သင်ယူချင်စိတ်မရှိဘူး။ အဖွဲ့ခေါင်းဆောင်အနေနဲ့လည်း လမ်းလွဲမှုတွေကို အနှစ်မချုပ်ခဲ့ဘူး။ ကျွန်မက သူ့ပြဿနာတွေအကြောင်း သူနဲ့ စကားပြောချင်ခဲ့ပေမဲ့ နောက်တော့ ကျွန်မ တွေးမိတယ်။ “ငါ ဒီလိုပြောရင် လျူရွှမ် ရှက်နေမလား။ ငါက သူ့မာနကို ထိခိုက်မိပြီး သူက ငါ့အပေါ် အမြင်စောင်းသွားရင် ဘယ်လိုလုပ်မလဲ” လို့ပေါ့။ အဲဒါနဲ့ ကျွန်မ သူ့ကို ဘာမှမပြောခဲ့ဘဲ နောက်တစ်ခါ ထပ်ပြီး တိတ်တိတ်နေခဲ့တယ်။ နောက်ပိုင်းမှာ ကျွန်မတို့ ကြီးကြပ်ရေးမှူးက ကျွန်မအခြေအနေကို မေးတဲ့အခါ ဒီအကြောင်းတွေကို သူ့ဆီ ကျွန်မ ရေးချင်ခဲ့တယ်။ ဒါပေမဲ့ ကျွန်မ စိုးရိမ်မိတယ်။ “လျူရွှမ်က ဒါကိုမြင်ရင် ငါ သူ့ပြဿနာတွေကို သူ့ဆီတိုက်ရိုက်ထောက်မပြဘဲ သူ့ကို နောက်ကျောဓားနဲ့ထိုးတယ်၊ သူ့ပြဿနာတွေကို တိုင်ဖို့အတွက် ငါ့ရဲ့ အခြေအနေကို ရေးတာကို အခွင့်ကောင်းယူတယ်လို့ ပြောမလား။ လျူရွှမ်က ငါ့အပေါ် မကောင်းတဲ့ အမြင်တွေရှိရင် နောင်မှာ ငါ သူနဲ့ ဘယ်လို အဆင်ပြေပြေ ဆက်ဆံနိုင်ပါ့မလဲ” လို့ပေါ့။ ဒီစိုးရိမ်မှုတွေနဲ့ လျူရွှမ်ရဲ့ ပြဿနာတွေကို ကျွန်မ လုံးဝ မပြောခဲ့ဘူး။ အပေါ်ယံမှာတော့ လျူရွှမ်နဲ့ ကျွန်မက အတူတူ စကားပြောပြီး ရယ်ကြပေမဲ့ သူ့ပြဿနာတွေကို ကျွန်မ ထောက်ပြဖို့ လိုတဲ့အခါတိုင်းမှာ သူ့ရဲ့ တုံ့ပြန်မှုကို အမြဲတမ်း ကြိုပြီး ခန့်မှန်းနေခဲ့မိတယ်။ သူ့ပြဿနာတွေကို ကျွန်မ ရှင်းရှင်းလင်းလင်း မြင်တဲ့အခါမှာတောင် ရိုးရိုးသားသား မပြောရဲခဲ့ဘူး။ အရမ်းကို စိတ်ဆင်းရဲပြီး အသက်ရှူကျပ်စရာပဲ။ အဲဒီအချိန်အတောအတွင်းမှာ ဘုရားသခင်ဆီ ကျွန်မ ခဏခဏ ဆုတောင်းပြီး ကျွန်မကိုယ်ကျွန်မ နားလည်ဖို့၊ ကျွန်မရဲ့ ဖောက်ပြန်ပျက်စီးတဲ့ စိတ်သဘောထားရဲ့ ချည်နှောင်မှုတွေကနေ လွတ်မြောက်ဖို့ ကိုယ်တော်ရဲ့ ဉာဏ်အလင်းပေးခြင်းနဲ့ လမ်းပြခြင်းကို တောင်းလျှောက်ခဲ့တယ်။

တစ်နေ့ ကျွန်မတို့ရဲ့ အခြေအနေတွေအကြောင်း ဆက်သွယ်ပြောဆိုကြတုန်းမှာ ကျွန်မတို့ကြားမှာ စစ်မှန်တဲ့ မိတ်သဟာယဖွဲ့ခြင်းမရှိတာကို လျူရွှမ်က ပြောခဲ့တယ်။ ကျွန်မက လူ့အကြိုက်လိုက်သူဖြစ်တတ်တယ်လို့ သူက ထောက်ပြပြီး ကျွန်မက သူ့ပြဿနာတွေကို မြင်ရင်တောင် ထုတ်ပြောတာ မရှိသလောက်ဘဲလို့ ပြောတယ်။ သူလည်း တခြားလူတွေရဲ့ ပြုပြင်ပေးတာ၊ ကူညီပေးတာကို လိုအပ်တယ်လို့ သူပြောတယ်။ သူပြောရင်းနဲ့ ဝမ်းနည်းပြီး ငိုခဲ့တယ်။ လျူရွှမ်ရဲ့ စကားတွေကို ကြားတော့ ကျွန်မ အရမ်း ကိုယ့်ကိုယ်ကိုယ်အပြစ်တင်ပြီး နာကျင်မိတယ်။ သူ့အမြင်မှာ ကျွန်မက ဒီလို လူ့အကြိုက်လိုက်သူဖြစ်နေတာကိုး။ သူက ကျွန်မ ထင်ခဲ့သလိုမျိုး သမ္မာတရားကို အတိုက်အခံလုပ်နေတာ မဟုတ်ဘူးပဲ။ သူ့ပြဿနာတွေကို ထောက်ပြဖို့၊ ဖော်ထုတ်ဖို့ ကျွန်မက ဘာလို့ စကားတစ်ခွန်းမှ ထုတ်မပြောနိုင်ခဲ့တာလဲ။ ဒီပြဿနာကို ဦးတည်တဲ့ ဘုရားနှုတ်ကပတ်တော်တွေကို ကျွန်မ စားသောက်ခဲ့တယ်။ ဘုရားနှုတ်ကပတ်တော်တစ်ပိုဒ်ကို ကျွန်မ ဖတ်ခဲ့တယ်။ “ညီအစ်ကို မောင်နှမများနှင့် ပေါင်းသင်းဆက်ဆံသောအခါ သူတို့အပေါ် သင်၏စိတ်နှလုံးကို ဖော်ထုတ်ပြပြီး ယင်းက သင့်အတွက် အကျိုးရှိဖို့အလို့ငှာ သူတို့အပေါ် အတွင်းစကား ပြောရမည် ဖြစ်သည်။ တာဝန်ထမ်းဆောင်ရာတွင် သင်၏စိတ်ရင်းအတိုင်း ဆက်ဆံပြီး လူတို့အပေါ် အတွင်းစကားပြောရန် ပို၍ပင် အရေးကြီးသည်။ သို့မှသာ သင် အလုပ်ကို အတူတူကောင်းစွာ လုပ်ဆောင်မည်ဖြစ်သည်။...တစ်ခါတစ်ရံ လူနှစ်ဦး ပေါင်းသင်းဆက်ဆံသောအခါ သူတို့၏ ပင်ကိုစရိုက်ချင်းက ပဋိပက္ခဖြစ်သည်၊ သို့မဟုတ် သူတို့၏ မိသားစုပတ်ဝန်းကျင်များ၊ နောက်ခံအခြေအနေများ သို့မဟုတ် စီးပွားရေးအခြေအနေများက တန်းတူမရှိပေ။ သို့တစေ ထိုလူနှစ်ဦးက အချင်းချင်း မိမိတို့၏ စိတ်ရင်းများအတိုင်း ဆက်ဆံနိုင်ပြီး မိမိတို့၏ အရေးကိစ္စများနှင့်ပတ်သက်၍ လုံးလုံးလျားလျား ပွင့်လင်းနိုင်ကာ မည်သည့်မုသား သို့မဟုတ် လိမ်လည်လှည့်ဖြားမှုမျှ မပါဘဲ ပြောဆိုနိုင်သည့်အပြင် အချင်းချင်း မိမိတို့၏ စိတ်ရင်းအတိုင်း ဆက်ဆံနိုင်သည်ဆိုပါက ဤနည်းဖြင့် သူတို့သည် စစ်မှန်သော မိတ်ဆွေများဖြစ်လာနိုင်မည် ဖြစ်သည်။ ယင်းမှာ သိကျွမ်းရင်းနှီးသော မိတ်ဆွေများ ဖြစ်လာခြင်းကို ဆိုလိုသည်။ တစ်ဖက်လူ၌ အခက်အခဲတစ်ခု ရှိသောအခါ သူတို့က သင့်ကို လိုက်ရှာပြီး အခြားမည်သူမျှ လိုက်ရှာမည် မဟုတ်သည့်အပြင် သူတို့ကို ကူညီရန်အတွက် သင့်ကိုသာ ယုံကြည်စိတ်ချမည် ဖြစ်သည်။ အကယ်၍ သင်သည် သူတို့အား အပြစ်ဖော်ဆုံးမလျှင်ပင် သူတို့က ပြန်၍ခံပြောမည်မဟုတ်ပေ။ အဘယ့်ကြောင့်ဆိုသော် သင်သည် ရိုးသားမှန်ကန်သော စိတ်နှလုံးရှိသည့် ရိုးသားသော လူတစ်ဦးဖြစ်မှန်း သူတို့သိကြ၍ဖြစ်၏။ သင့်ကို သူတို့ ယုံကြည်စိတ်ချသောကြောင့် သင် မည်သည့်အရာ ပြောသည်ဖြစ်စေ၊ သူတို့ကို မည်သို့ဆက်ဆံသည်ဖြစ်စေ သူတို့ နားလည်နိုင်မည်ဖြစ်သည်။ သင်တို့သည် ထိုသို့သောလူများ ဖြစ်နိုင်သလော။ သင်တို့သည် ထိုသို့သောလူများ ဟုတ်သလော။ မဟုတ်လျှင် သင်သည် ရိုးသားသောလူ မဟုတ်ပေ။ အခြားသူများနှင့် ပေါင်းသင်းဆက်ဆံသောအခါ ပထမဦးစွာ သူတို့အား သင်၏ စစ်မှန်သော စိတ်နှလုံးနှင့် ရိုးသားမှန်ကန်မှုကို သတိပြုမိစေရမည်။ အတူတကွ စကားပြောဆိုခြင်းနှင့် အလုပ်လုပ်ခြင်းအပြင် အခြားသူများနှင့် ထိတွေ့ဆက်ဆံရာတွင် အကယ်၍ လူတစ်ဦး၏ စကားများက ဝတ်ကျေတမ်းကျေ ဖြစ်သည်၊ စကားကြီးစကားကျယ် သုံးသည်၊ အာလာပသလ္လာပများ ဖြစ်သည်၊ မြှောက်လုံးပင့်လုံးဖြစ်သည်၊ စိတ်ချယုံကြည်၍မရသည့်အပြင် စိတ်ကူးသက်သက်ဖြစ်သည် ဆိုပါက၊ သို့မဟုတ် သူသည် အခြားသူများ၏ အကူအညီကိုသာ ရှာဖွေဖို့ ပြောဆိုသည် ဆိုပါက သူတို့၏ စကားများအားလုံး၌ ခိုင်လုံမှုကင်းမဲ့ပြီး ရိုးသားမှန်ကန်မှု နည်းနည်းလေးမျှပင် မရှိပေ။ ဤသည်မှာ အခြားသူများက မည်သူပင်ဖြစ်စေ၊ ထိုအခြားသူများနှင့် သူတို့၏ ပေါင်းသင်းဆက်ဆံသည့် နည်းလမ်းဖြစ်သည်။ ဤသည်မှာ ရိုးသားသောလူ မဟုတ်ပေ။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ရိုးသားသောသူလူတစ်ဦးကသာ စစ်မှန်သော လူသားပုံသဏ္ဌာန်အတိုင်း အသက်ရှင်နေထိုင်နိုင်သည်) ဘုရားနှုတ်ကပတ်တော်တွေကနေ ကျွန်မ နားလည်သွားတာက လျူရွှမ်က မာနထောင်လွှားတဲ့ စိတ်သဘောထားနဲ့ သူများတွေကို ဘောင်ခတ်တာ၊ နည်းပညာပိုင်း လေ့လာမှုကို ပေါ့ပေါ့ဆဆ သဘောထားတာတွေကို ကျွန်မ မြင်ခဲ့ပေမဲ့ သူ့ကို ပြုပြင်ပေးဖို့၊ ကူညီပေးဖို့ ဘာမှ မပြောခဲ့ဘူး။ အဲဒါက ကျွန်မရဲ့ လှည့်ဖြားတတ်တဲ့ သဘာဝနဲ့ သူများတွေအပေါ် အလွန်အကျွံ သတိထားမှုကြောင့်ပဲ။ လျူရွှမ်က ကျွန်မရဲ့ အကြံပြုချက်တွေကို လက်မခံဘဲ ကျွန်မအပေါ် အမြင်စောင်းသွားမှာကို ကျွန်မ စိုးရိမ်ခဲ့တယ်။ အဲဒါဆိုရင် ကျွန်မတို့ကြားက ဆက်ဆံရေး ပျက်သွားမှာပေါ့။ ပြန်တွေးကြည့်တော့ ပုံမှန်ဆိုရင် လျူရွှမ်က ကျွန်မပြဿနာတွေကို မြင်တဲ့အခါ တိုက်ရိုက်ပဲ ထောက်ပြခဲ့ပြီး အဲဒါက ကျွန်မအတွက် တကယ့်အကူအညီဖြစ်ခဲ့တယ်။ ဒါပေမဲ့ ကျွန်မက သူ့အပေါ် သိပ်သတိထားနေခဲ့တယ်။ သူ့ပြဿနာတွေကို ကျွန်မ သတိထားမိရင်တောင် ကျွန်မက မိတ်သဟာယဖွဲ့တာ၊ ထောက်ပြတာ လုံးဝ မလုပ်ခဲ့ဘူး။ ဘာရိုးသားမှုမှ မပါဘဲ အယောင်ဆောင်မျက်နှာစာကိုပဲ ပြခဲ့တယ်။ ကျွန်မ တကယ်ကို လှည့်ဖြားခဲ့တာပဲ။ သူများတွေရဲ့ ပြဿနာတွေကို ထောက်ပြတာက စော်ကားတာပဲ၊ သူတို့ကို နာကျင်စေမှာပဲလို့ ကျွန်မ ထင်ခဲ့တယ်။ ဒါပေမဲ့ ဒီအမြင်က မှားပါတယ်။ တကယ်တော့ တခြားလူတွေ သူတို့ရဲ့ ဖောက်ပြန်ပျက်စီးမှုတွေကို ထုတ်ဖော်တာ ကျွန်မတို့မြင်တဲ့အခါ ကျွန်မတို့က ရိုးရိုးသားသားနဲ့ပဲ သူတို့အပေါ် ကိုယ့်စိတ်နှလုံးကို ဖွင့်ဟသင့်တယ်။ သူတို့ပြဿနာတွေကို ချက်ချင်း ထောက်ပြသင့်တယ်။ ဒါဆိုရင် သူတို့ကိုယ်သူတို့ ပြန်သုံးသပ်ပြီး လမ်းလွဲတာတွေကို ပြုပြင်ဖို့ ကူညီပေးမှာဖြစ်သလို အသင်းတော်အလုပ်ကို ဆုံးရှုံးမှုတွေမဖြစ်အောင်လည်း တားဆီးပေးပါတယ်။ ဒါဟာ သူများတွေကို ကူညီတဲ့ နည်းလမ်းတစ်ခုပါ။ ကိစ္စတွေအပေါ် ကျွန်မအမြင်တွေက လုံးဝ လွဲချော်နေပြီး သမ္မာတရားနဲ့ လုံးဝ မကိုက်ညီဘူးဆိုတာကို ကျွန်မ သဘောပေါက်ခဲ့တယ်။ နောက်ပိုင်းမှာ ကျွန်မက လျူရွှမ်ကို ကျွန်မ မြင်ခဲ့တဲ့ သူ့ပြဿနာတွေ မျှဝေခဲ့တယ်။ ကြီးကြပ်ရေးမှူးကလည်း လျူရွှမ်ကို ကူညီဖို့အတွက် မိတ်သဟာယပြုဖို့ စာရေးခဲ့တယ်။

အချိန်နည်းနည်းကြာတော့ လျူရွှမ်က သူ့ရဲ့ မာနထောင်လွှားတဲ့ စိတ်သဘောထားအပေါ် နားလည်မှုတချို့ရှိလာပြီး နည်းပညာပိုင်း ကျွမ်းကျင်မှုတွေကို သင်ယူဖို့အတွက် ကျွန်မတို့ကို ဦးဆောင်မှုပေးခဲ့တယ်။ ကျွန်မတို့ တာဝန်တွေရဲ့ ထိရောက်မှုကလည်း တိုးလာခဲ့တယ်။ ဒီရလဒ်တွေကို မြင်တော့ ကျွန်မ အရမ်းရှက်ပြီး ကိုယ့်ကိုယ်ကိုယ် အပြစ်တင်မိတယ်။ ကျွန်မသာ စောစောစီးစီး ပြောခဲ့ရင် လျူရွှမ်က သူ့ပြဿနာတွေကို ပိုစောပြီး သိမြင်နိုင်ခဲ့မှာပဲ။ ဒါဆိုရင် ကျွန်မတို့ရဲ့ သဟဇာတရှိတဲ့ ပူးပေါင်းလုပ်ဆောင်မှုရော၊ နည်းပညာပိုင်း ကျွမ်းကျင်မှုတွေကို ဆက်သွယ်ပြောဆိုတာရော နှစ်ခုလုံးအတွက် အကျိုးရှိမှာ။ နောင်တရပြီး ကျွန်မ ပြန်သုံးသပ်ရင်း တွေးမိတယ်။ သူများတွေရဲ့ ပြဿနာတွေကို မြင်တဲ့အခါတိုင်းမှာ စကားတွေက ထွက်တော့မဲ့ဆဲဆဲဖြစ်နေပေမဲ့ ဘာလို့ ထုတ်မပြောနိုင်ခဲ့ရတာလဲ။ နောက်ကွယ်မှာ ဘယ်လို ဖောက်ပြန်ပျက်စီးတဲ့ စိတ်သဘောထားက ကျွန်မကို ထိန်းချုပ်နေတာလဲ။ တစ်နေ့တော့ ဘုရားနှုတ်ကပတ်တော် အပိုဒ်နှစ်ပိုဒ်ကို ကျွန်မ ဖတ်ခဲ့တယ်။ “လူတို့သည် ၎င်းတို့၏တာဝန်များအပေါ် တာဝန်ယူမှုမရှိသောအခါ၊ ဝတ်ကျေတမ်းကျေပုံစံဖြင့် လုပ်ဆောင်သောအခါ၊ လူ့အကြိုက်လိုက်သူများအဖြစ် ပြုမူပြီး ဘုရားအိမ်တော်၏ အကျိုးစီးပွားများကို မကာကွယ်သောအခါတွင် ဤသည်မှာ မည်သည့်စိတ်သဘောထား ဖြစ်သနည်း။ ဤသည်မှာ ဉာဏ်နီဉာဏ်နက်များခြင်းဖြစ်သည်။ စာတန်၏ စိတ်သဘောထား ဖြစ်သည်။ လူသား၏ လောကီဆိုင်ရာ ဆက်ဆံရေးများအတွက် အတွေးအခေါ်များထဲတွင် အပေါ်လွင်ဆုံးဖြစ်သော သွင်ပြင်လက္ခဏာသည် ဉာဏ်နီဉာဏ်နက်များခြင်းပင် ဖြစ်၏။ လူတို့သည် ၎င်းတို့ ဉာဏ်နီဉာဏ်နက်မများလျှင် အခြားသူများအား စိတ်အနှောင့်အယှက် ပေးသောသူ ဖြစ်လာဖွယ်ရှိပြီး မိမိတို့ကိုယ်ကို ကာကွယ်နိုင်မည်မဟုတ်ဟု တွေးထင်ကြ၏။ ၎င်းတို့သည် မည်သူ့ကိုမျှ မနာကျင်စေအောင် သို့မဟုတ် စိတ်အနှောင့်အယှက် မပေးမိအောင် အတော်အသင့် ဉာဏ်နီဉာဏ်နက်များရမည်၊ ထိုသို့အားဖြင့် သူတို့ကိုယ်သူတို့ ဘေးကင်းအောင် ထိန်းသိမ်းကြကာ သူတို့၏ အသက်မွေးမှုအား ကာကွယ်ကြပြီး အခြားလူများကြားတွင် ခိုင်ခံ့သောအခြေကုပ် ရရှိနိုင်ကြသည်ဟု သူတို့ထင်မှတ်ကြ၏။ ဘာသာတရားမရှိသူများအားလုံးက စာတန်၏ အတွေးအခေါ်များဖြင့် အသက်ရှင်ကြသည်။ ၎င်းတို့အားလုံးသည် လူ့အကြိုက်လိုက်သူများဖြစ်ပြီး မည်သူ့ကိုမျှ စိတ်ဆိုးအောင် မပြုလုပ်ကြပေ။ သင်သည် ဘုရားအိမ်တော်သို့ လာပြီးဖြစ်သည်။ ဘုရားနှုတ်ကပတ်တော်ကို ဖတ်ပြီးဖြစ်ကာ ဘုရားအိမ်တော်၏ တရားဒေသနာများကို ကြားနာပြီးဖြစ်သည်။ ဤသို့ဆိုလျှင် သင်သည် အဘယ်ကြောင့် သမ္မာတရားကို မလိုက်စားနိုင်ဘဲ၊ စိတ်နှလုံးမှ စကားမပြောနိုင်ဘဲ ရိုးသားသူတစ်ဦးမဖြစ်နိုင်ဘဲ ရှိရသနည်း။ သင်သည် အဘယ်ကြောင့် အစဉ်သဖြင့် လူ့အကြိုက်လိုက်သူဖြစ်နေရသနည်း။ လူ့အကြိုက်လိုက်သူများသည် ၎င်းတို့၏ အကျိုးစီးပွားကိုသာ ကာကွယ်သည်။ အသင်းတော်၏ အကျိုးစီးပွားကို မကာကွယ်ပေ။ တစ်ယောက်ယောက်က မကောင်းမှုပြုလုပ်ပြီး အသင်းတော်၏ အကျိုးစီးပွားအား ထိခိုက်နစ်နာစေသည်ကို ၎င်းတို့မြင်သောအခါ လျစ်လျူရှုကြသည်။ ၎င်းတို့သည် လူ့အကြိုက်လိုက်သူများ ဖြစ်လိုကြသည်။ ပြီးလျှင် မည်သူ့ကိုမျှ စိတ်ဆိုးအောင်မပြုပေ။ ဤသည်မှာ တာဝန်မသိတတ်ခြင်းဖြစ်သည်။ ဤသို့သော လူစားမျိုးသည် ဉာဏ်များလွန်းပြီး မယုံကြည်ထိုက်ပေ။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ အပိုင်း သုံး) “ပုံပန်းသဏ္ဌာန်အားလုံးတွင် အန္တိခရစ်၏ စကားတို့သည် အထူးသဖြင့် ကြင်နာသည့်၊ ယဉ်ကျေးမှုရှိသည့်၊ ဂုဏ်ရှိသည့်ပုံပေါ်သည်။ မည်သူက စည်းမျဉ်းများကို ချိုးဖောက်သည်ဖြစ်စေ၊ အသင်းတော်အလုပ်ကို အနှောင့်အယှက်များနှင့် အဖျက်အမှောင့်လုပ်ခြင်းများ ဖြစ်စေသည်ဖြစ်စေ အန္တိခရစ်တို့သည် ဤလူများကို ဖော်ထုတ်ခြင်း သို့မဟုတ် ဝေဖန်သုံးသပ်ခြင်း မရှိပေ။ ၎င်းတို့က ကိစ္စအားလုံးတွင် သဘောထားကြီးသည်ဟု လူတို့အား ထင်မြင်စေလျက် မျက်ကွယ်ပြုကြသည်။ လူတို့က မည်သည့် ဖောက်ပြန်ပျက်စီးခြင်းကို ထုတ်ဖော်ပြသည်ဖြစ်စေ၊ ပြီးလျှင် ထိုသူတို့က မည်သည့် ဒုစရိုက်အမှုအား ပြုသည်ဖြစ်စေ အန္တိခရစ်တို့သည် နားလည်မှုရှိပြီး သည်းခံကြသည်။ ၎င်းတို့သည် ပို၍စိတ်မဆိုးပေ၊ သို့မဟုတ် ဒေါသအမျက်မထွက်ပေ။ ၎င်းတို့ အမှားတစ်စုံတစ်ခု လုပ်ပြီး ဘုရားအိမ်တော်၏ အကျိုးစီးပွားကို ထိခိုက်သည့်အခါ စိတ်တိုကြလိမ့်မည်မဟုတ်သကဲ့သို့ လူတို့ကို အပြစ်တင်ကြလိမ့်မည် မဟုတ်ပေ။ မည်သူက မကောင်းမှု ကျူးလွန်ပြီး အသင်းတော်၏ အလုပ်ကို နှောင့်ယှက်ပါစေ၊ ဤအရာသည် ၎င်းတို့နှင့် မည်သို့မျှ မသက်ဆိုင်သည့်အလား ၎င်းတို့က အလေးမထားပေ၊ ပြီးလျှင် ယင်းကြောင့် လူများကို ၎င်းတို့ မည်သည့်အခါမျှ စိတ်ဆိုးအောင် လုပ်မည် မဟုတ်ပေ။ အန္တိခရစ်တို့သည် မည်သည့်အရာကို စိတ်အဝင်စားဆုံး ဖြစ်သနည်း။ လူများစွာက ၎င်းတို့ကို အထင်ကြီးလေးစားသည်ကိုလည်းကောင်း၊ ၎င်းတို့ ဆင်းရဲဒုက္ခ ခံသည့်အခါတွင် လူမည်မျှ မြင်တွေ့ပြီး ယင်းအတွက် ၎င်းတို့ကို ချီးမွမ်းသည်ကိုလည်းကောင်း ၎င်းတို့ စိတ်ဝင်စားကြသည်။ ဆင်းရဲဒုက္ခခံခြင်းသည် မည်သည့်အခါမျှ အချည်းနှီးမဟုတ်ဟု အန္တိခရစ်တို့က ယုံကြည်ကြသည်။ မည်သည့် ဆင်းရဲဒုက္ခကို ၎င်းတို့ခံရပါစေ၊ မည်သည့်အဖိုးအခကို ၎င်းတို့ ပေးရပါစေ၊ ၎င်းတို့ မည်သည့်ကောင်းမှုကို လုပ်ပါစေ၊ အခြားသူများအပေါ် ၎င်းတို့ မည်မျှ ဂရုစိုက်ပြီး၊ အလေးထားကာ၊ ချစ်ခင်ပါစေ ဤအရာအားလုံးကို အခြားသူများရှေ့တွင် လုပ်ဆောင်ရမည်ဖြစ်ပြီး ဤသို့ဖြင့် ပို၍များသော လူများက ယင်းကို တွေ့မြင်နိုင်မည် ဖြစ်သည်။ ပြီးလျှင် ထိုသို့ လုပ်ဆောင်ခြင်း၌ ၎င်းတို့၏ ရည်မှန်းချက်က အဘယ်နည်း။ လူများ၏ အကူအညီကို ဝယ်ယူရန်၊ ပို၍များသော လူများက ၎င်းတို့၏ လုပ်ရပ်များအား၊ ၎င်းတို့၏ ကျင့်ကြံပြုမူမှုနှင့် ၎င်းတို့၏စိတ်နှလုံးထဲမှ ၎င်းတို့၏ အကျင့်စရိုက်တို့အား အသိအမှတ်ပြုလာအောင် လုပ်ရန်၊ ၎င်းတို့ကို ထောက်ခံအားပေးရန်တို့ ဖြစ်သည်။ ပို၍များသော လူများက အကူအညီတောင်းရန် ၎င်းတို့ထံသို့ လာစေဖို့အလို့ငှာ မိမိတို့၏ အပြင်ပန်း အပြုအမူမှတစ်ဆင့် မိမိတို့ကိုယ်ကို ‘လူကောင်း တစ်ယောက်’ အနေဖြင့် ပုံရိပ်တစ်ခု တည်ထောင်ဖို့ ကြိုးစားသည့် အန္တိခရစ်များလည်း ရှိသည်။” (နှုတ်ကပတ်တော်၊ အတွဲ (၄)၊ အန္တိခရစ်တို့ကို ဖော်ထုတ်ခြင်း၊ အချက် ၉ (အပိုင်း ၁၀)) ဘုရားနှုတ်ကပတ်တော်တွေက အမှန်တရားကို ရှင်းရှင်းလင်းလင်း ဖော်ထုတ်ပြတာပဲ။ လှည့်ဖြားတတ်ပြီး ကောက်ကျစ်တဲ့ စိတ်သဘောထားရှိတဲ့လူတွေအတွက်ကတော့ သူများတွေက ဖောက်ပြန်ပျက်စီးတာတွေ ထုတ်ဖော်တာ၊ အသင်းတော်အလုပ်ကို နှောင့်ယှက်တာတွေမြင်တဲ့အခါမှာ သူတို့က ဘယ်တော့မှ ထောက်မပြဘဲ ဖော်ထုတ်မပေးဘူး။ အပြင်ပန်းမှာ သူတို့က သည်းခံပြီး စိတ်ရှည်တဲ့ပုံ ပေါက်ပေမဲ့ သူတို့ရဲ့ တကယ့်ရည်ရွယ်ချက်က အပေါ်ယံ ကြင်နာမှုကို သုံးပြီးတော့ သူတို့က ချစ်ခင်ပြီး ထောက်ထားစာနာတယ်လို့ တခြားလူတွေကို ထင်အောင်လုပ်ဖို့၊ ဒီလိုနဲ့ လူတွေကို စည်းရုံးပြီး သူတို့ မျက်နှာသာပေးအောင်လုပ်ဖို့ပါပဲ။ သူတို့သဘာဝက အရမ်းကို ဆိုးယုတ်တာပဲ။ ကျွန်မလိုပေါ့၊ လျူရွှမ်က ကျန်းချီကို မထီမဲ့မြင်ပြုပြီး ဘောင်ခတ်တာကို ကျွန်မ မြင်တဲ့အခါ၊ အဖွဲ့ခေါင်းဆောင်ဖြစ်တဲ့ လျူရွှမ်က နည်းပညာပိုင်း လေ့လာဖို့ စီစဉ်ပေးဖို့ ပျက်ကွက်ပြီး အလုပ်ကို နှောင့်နှေးစေတာကို မြင်တဲ့အခါ၊ ကျွန်မက သူ့ပြဿနာတွေကို ထောက်ပြချင်ခဲ့တယ်။ ဒါပေမဲ့ စကားတွေက ထွက်တော့မဲ့ဆဲဆဲမှာ ပြန်မျိုချလိုက်ပြီး လျူရွှမ်က လက်မခံဘဲ ကျွန်မအပေါ် အမြင်စောင်းသွားမှာ၊ အဲဒါဆို နောင်မှာ ကျွန်မတို့ ဆက်ဆံရေး ခက်ခဲသွားမှာကို စိုးရိမ်မိခဲ့တယ်။ ဒါကြောင့် ကျွန်မ အမြဲ တိတ်တိတ်နေခဲ့တယ်။ ကျွန်မအခြေအနေကို ရေးတဲ့အခါမှာတောင် လျူရွှမ်က ဒါကိုမြင်တဲ့အခါ ကျွန်မက သူ့နောက်ကွယ်မှာ သူ့ပြဿနာတွေကို တိုင်နေတာလို့ ထင်မှာကို ကြောက်မိလို့ သူ့အကြောင်း မပြောဘဲ ရှောင်ခဲ့တယ်။ အပေါ်ယံမှာ ကျွန်မက ဘယ်သူ့ကိုမှ မစော်ကားဘဲ တော်တော်လေး ရင်းနှီးဖော်ရွေပုံပေါက်ပေမဲ့ ကျွန်မရဲ့ တကယ့်ရည်ရွယ်ချက်က လျူရွှမ်နဲ့ ကောင်းတဲ့ဆက်ဆံရေး ထိန်းသိမ်းဖို့ပဲ။ သူ့စိတ်ထဲမှာ အကောင်းမြင်တဲ့ ပုံရိပ်တစ်ခုရှိနေဖို့အတွက် တကယ်ကို ရိုးသားတာ၊ ဒါမှမဟုတ် အကျိုးရှိတာတစ်ခုခုကို ကျွန်မ ပြောလို့မရနိုင်ခဲ့ဘူး။ ညီအစ်ကိုမောင်နှမတွေရဲ့ အသက်ဝင်ရောက်မှုက ဒုက္ခခံစားရမှာလား၊ ဒါမှမဟုတ် အသင်းတော်အလုပ်က ဒါကြောင့် နှောင့်နှေးသွားမှာလားဆိုတာကို မစဉ်းစားခဲ့ဘူး။ ကျွန်မ အရမ်းကို တစ်ကိုယ်ကောင်းဆန်တယ်၊ စက်ဆုပ်စရာကောင်းတယ်၊ ပရိယာယ်များပြီး လှည့်ဖြားတတ်ခဲ့တာပဲ။ ကျွန်မက တကယ့်ကို အပြည့်အဝ လူ့အကြိုက်လိုက်သူပါပဲ။ ဘုရားက ကျွန်မကို ဘယ်လိုလုပ် ရွံရှာ၊ မုန်းတီးမနေဘဲ ရှိနိုင်ပါ့မလဲ။

နောက်တော့ နောက်ထပ် ဘုရားနှုတ်ကပတ်တော်တွေကို ကျွန်မ ဖတ်ခဲ့တယ်။ “‘မိတ်ဆွေကောင်းများ၏ အပြစ်များအပေါ် နှုတ်ဆိတ်နေပေးခြင်းသည် ကြာရှည်၍ ကောင်းမွန်သော ခင်မင်မှုကို ဖြစ်စေ၏’ ဆိုသော လောကီဆိုင်ရာ ဆက်ဆံမှုများအတွက် အတွေးအခေါ်တွင် ယုံကြည်မှုတစ်ခုရှိသည်။ ဤသည်မှာ ခင်မင်ရင်းနှီးသော ဆက်ဆံရေးကို ထိန်းသိမ်းရန်အတွက် မိမိတို့မိတ်ဆွေ၏ ပြဿနာများကို ရှင်းရှင်းလင်းလင်း မြင်လျှင်ပင် နှုတ်ဆိတ်နေရမည်ဟု ဆိုလိုသည်။ သူတစ်ပါးတို့၏ မျက်နှာကို မရိုက်ခြင်း သို့မဟုတ် သူတစ်ပါးတို့၏အားနည်းချက်များကို မဖော်ခြင်းဟူသော စည်းမျဉ်းများအတိုင်း လိုက်နာသင့်သည်ဟု ဆိုလိုသည်။ ၎င်းတို့သည် အချင်းချင်း လှည့်စားရမည်ဖြစ်သည်။ အချင်းချင်း ဖုံးကွယ်ရမည်ဖြစ်သည်။ အချင်းချင်း လျှို့ဝှက်ကြံစည်မှု ပြုလုပ်ရမည်ဖြစ်သည်။ အခြားလူမှာ မည်သို့သောသူမျိုး ဖြစ်သည်ကို အလွန်ပင် ရှင်းလင်းစွာ သိသော်လည်း တဲ့တိုးမပြောကြဘဲ မိမိတို့၏ ခင်မင်ရင်းနှီးသော ဆက်ဆံရေးကို ထိန်းသိမ်းရန် ဉာဏ်များသော နည်းလမ်းများကို အသုံးချကြသည်။ ဤသို့သော ဆက်ဆံရေးများကို အဘယ်ကြောင့် ထိန်းသိမ်းချင်သနည်း။ ဤလူ့အဖွဲ့အစည်း၊ မိမိ၏အဖွဲ့အတွင်းတွင် ရန်သူများရှိအောင် မပြုလုပ်လိုခြင်းဖြစ်သည်။ ထိုသို့ပြုလုပ်လျှင် မိမိကိုယ်ကို အန္တရာယ်ရှိသော အခြေအနေများ ကျရောက်စေခြင်း ဖြစ်သည်ဟု ဆိုလိုပေမည်။ တစ်စုံတစ်ဦးကို သူ၏ အားနည်းချက်များအား သင်ဖော်ပြီးနောက်၊ သို့မဟုတ် သူ့ကို နာကျင်အောင် လုပ်ပြီးနောက် ထိုသူသည် သင်၏ ရန်သူဖြစ်လာပြီး သင့်ကို အန္တရာယ်ပြုမည်ကို သိကာ သင်သည် ထိုအခြေအနေသို့ မကျရောက်လိုပါက ‘သင်သည် သူတစ်ပါးတို့ကို ရိုက်နှက်မည်ဆိုလျှင် မျက်နှာကို မရိုက်နှင့်။ သင်သည် သူတစ်ပါးတို့အကြောင်းကို ဖော်မည်ဆိုလျှင် သူတစ်ပါးတို့၏ အားနည်းချက်များကို မဖော်နှင့်’ ဟု ဆိုသည့် လောကီဆိုင်ရာ ဆက်ဆံမှုများအတွက် အတွေးအခေါ် ယုံကြည်မှုကို သင် အသုံးချသည်။ ဤအရာအရ လူနှစ်ယောက်သည် ဤသို့သော ဆက်ဆံရေးတွင်ရှိလျှင် စစ်မှန်သည့်မိတ်ဆွေများအဖြစ် အကျုံးဝင်သလော။ (မဝင်ပါ။) အချင်းချင်း၏ ယုံကြည်ရသူဖြစ်ဖို့မဆိုထားနှင့်၊ စစ်မှန်သော မိတ်ဆွေများမဟုတ်ပေ။ ဤသို့ဆိုလျှင် ဤသည်မှာ အတိအကျ မည်သည့်ဆက်ဆံရေးမျိုးဖြစ်သနည်း။ အခြေခံ လူမှုဆက်ဆံရေးတစ်ခု မဟုတ်သလော။ (ဟုတ်သည်။) ဤသို့သော လူမှုဆက်ဆံရေးများတွင် လူတို့သည် ၎င်းတို့၏ ခံစားချက်များကို မပြနိုင်သကဲ့သို့ လေးနက်သော အပြန်အလှန်ဖလှယ်ခြင်းများလည်း မရှိနိုင်ပေ။ ၎င်းတို့ ဆန္ဒရှိသလို မပြောနိုင်ပေ။ ၎င်းတို့၏ စိတ်နှလုံးတွင်ရှိသောအရာ၊ သို့မဟုတ် သူတစ်ပါးတို့တွင် ၎င်းတို့မြင်သော ပြဿနာများ၊ သို့မဟုတ် သူတစ်ပါးတို့အတွက် အကျိုးဖြစ်မည့်စကားများကို ၎င်းတို့ ထုတ်မပြောနိုင်ပေ။ ထိုအစား အခြားသူများ၏ မျက်နှာသာပေးခြင်းကို ဆက်လက်ထိန်းသိမ်းထားနိုင်ဖို့ ကြားကောင်းသော စကားများကို ရွေးပြောသည်။ အခြားသူများထံတွင် ၎င်းတို့အပေါ် မုန်းတီးစိတ်များ ဖြစ်ပေါ်လာမည်ကို စိုးရိမ်ကြသဖြင့် ၎င်းတို့သည် သမ္မာတရားကို မပြောရဲကြပေ၊ သို့မဟုတ် စည်းမျဉ်းများကို မထိန်းသိမ်းရဲကြပေ။ တစ်စုံတစ်ဦးကို မည်သူကမျှ မခြိမ်းခြောက်နေသောအခါ ထိုသူသည် အတော်အတန် သက်သာ၊ အေးချမ်းစွာဖြင့် အသက်ရှင်ရသည် မဟုတ်လော။ ‘သင်သည် သူတစ်ပါးတို့ကို ရိုက်နှက်မည်ဆိုလျှင် မျက်နှာကို မရိုက်နှင့်။ သင်သည် သူတစ်ပါးတို့အကြောင်းကို ဖော်မည်ဆိုလျှင် သူတစ်ပါးတို့၏ အားနည်းချက်များကို မဖော်နှင့်’ ဆိုသည့်ဆိုရိုးကို အားပေးဖို့မှာ လူတို့၏ ပန်းတိုင်မဟုတ်သလော။ (ဟုတ်သည်။) ဤသည်မှာ မိမိကိုယ်ကို ထိန်းသိမ်းခြင်းသည် ပန်းတိုင်ဖြစ်သော ခုခံကာကွယ်ခြင်း အရိပ်လက္ခဏာဖြင့် ကောက်ကျစ်လှည့်စားသည့် ဖြစ်တည်မှုနည်းလမ်းတစ်ခု ဖြစ်သည်မှာ ရှင်းသည်။ ဤသို့အသက်ရှင်သောသူများသည် ယုံကြည်ရသူ မရှိပေ။ သူတို့နှစ်သက်သည့်အရာ မှန်သမျှကို ပြောနိုင်သည့် ရင်းနှီးသောမိတ်ဆွေများမရှိပေ။ ၎င်းတို့သည် အချင်းချင်း ခုခံကာကွယ်ကြသည်။ အပြန်အလှန် အသုံးချပြီး တစ်ယောက်ကိုတစ်ယောက် ပညာပြကာ တစ်ဦးချင်းက ဤဆက်ဆံရေးမှ လိုအပ်သည့်အရာကို ယူဆောင်ကြသည်။ ဤသို့မဟုတ်သလော။ ဤအရာ၏ အရင်းအမြစ်တွင် ‘သင်သည် သူတစ်ပါးတို့ကို ရိုက်နှက်မည်ဆိုလျှင် မျက်နှာကို မရိုက်နှင့်။ သင်သည် သူတစ်ပါးတို့အကြောင်းကို ဖော်မည်ဆိုလျှင် သူတစ်ပါးတို့၏ အားနည်းချက်များကို မဖော်နှင့်’ ဆိုသည့် ပန်းတိုင်သည် သူတစ်ပါးတို့အား စိတ်ဆိုးအောင်ပြုလုပ်ပြီး ရန်သူများဖြစ်စေခြင်းကို တားဆီးရန်၊ မည်သူ့ကိုမျှ မထိခိုက်စေခြင်းအားဖြင့် မိမိကိုယ်ကို ကာကွယ်ရန်ဖြစ်သည်။ ဤသည်မှာ မိမိကိုယ်ကိုမထိခိုက်အောင် ထိန်းသိမ်းရန် အကြင်သူ ခံယူသည့် နည်းပညာနှင့် နည်းလမ်းဖြစ်သည်။ ယင်း၏အနှစ်သာရနှင့်ပတ်သက်သည့် ရှုထောင့်အချို့ကို ကြည့်သောအခါ ‘သင်သည် သူတစ်ပါးတို့ကို ရိုက်နှက်မည်ဆိုလျှင် မျက်နှာကို မရိုက်နှင့်။ သင်သည် သူတစ်ပါးတို့အကြောင်းကို ဖော်မည်ဆိုလျှင် သူတစ်ပါးတို့၏ အားနည်းချက်များကို မဖော်နှင့်’ ဆိုသည့် လူတို့၏ သူတော်ကောင်းတရားမှ တောင်းဆိုမှုသည် မြင့်မြတ်သောအရာ ဖြစ်သလော။ အပြုသဘောဆောင်သောအရာတစ်ခု ဖြစ်သလော။ (မဟုတ်ပါ။) ဤသို့ဆိုလျှင် ထိုအရာက လူတို့ကို မည်သည့်အရာကို သင်ကြားပေးသနည်း။ မည်သူ့ကိုမျှ စိတ်အနှောင့်အယှက်ဖြစ်အောင် သို့မဟုတ် နာကျင်အောင်မလုပ်ရပေ၊ သို့မဟုတ်လျှင် အဆုံး၌ နာကျင်ရမည်မှာ သင်ဖြစ်သည်ဟု သင်ကြားပေးခြင်းဖြစ်သည်။ ပြီးလျှင် မည်သူ့ကိုမျှ မယုံသင့်ဟု သင်ကြားပေးခြင်းလည်းဖြစ်သည်။ သင်သည် သင်၏ သူငယ်ချင်းကောင်းများထဲမှ တစ်စုံတစ်ယောက်ကို နာကျင်စေလျှင် ခင်မင်ရင်းနှီးမှုက တိတ်ဆိတ်စွာ စတင်ပြောင်းလဲလာမည်။ ၎င်းတို့သည် သင်၏ ကောင်းသော၊ ရင်းနှီးသောသူငယ်ချင်းဖြစ်ရာမှ လူစိမ်းတစ်ယောက်အဖြစ်သို့၊ သို့မဟုတ် ရန်သူတစ်ယောက်အဖြစ်သို့ ပြောင်းသွားလိမ့်မည်။ လူတို့ကို ထိုသို့ပြုမူဆောင်ရွက်ရန် သင်ကြားပေးခြင်းအားဖြင့် မည်သည့်ပြဿနာများကို ဖြေရှင်းပေးနိုင်သနည်း။ သင်သည် ဤသို့ပြုမူလုပ်ဆောင်ခြင်းအားဖြင့် ရန်သူများမရှိဘဲ အချို့ရန်သူများပင် ပပျောက်သွားလျှင် လူတို့က သင့်အား လေးစားပြီး ထောက်ခံမည်လော။ သင့်အား မိတ်ဆွေအဖြစ် အစဉ်ထားရှိမည်လော။ ဤသည်မှာ ကိုယ်ကျင့်တရားဆိုင်ရာ ပြုမူဆောင်ရွက်မှုအတွက် စံနှုန်းကို အပြည့်အဝရရှိသလော။ အများဆုံးအနေဖြင့် ဤသည်မှာ လောကီဆိုင်ရာ ဆက်ဆံမှုများအတွက် အတွေးအခေါ်တစ်ခုထက် မပိုပေ။” (နှုတ်ကပတ်တော်၊ အတွဲ (၆)၊ သမ္မာတရားကို လိုက်စားခြင်းနှင့် စပ်လျဉ်း၍၊ သမ္မာတရား လိုက်စားခြင်းဆိုသည်မှာ (၈)) ဘုရားနှုတ်ကပတ်တော်တွေကနေ ကျွန်မ နားလည်သွားတာက “သင်သည် သူတစ်ပါးတို့ကို ရိုက်နှက်မည်ဆိုလျှင် မျက်နှာကို မရိုက်နှင့်။ သင်သည် သူတစ်ပါးတို့အကြောင်းကို ဖော်မည်ဆိုလျှင် သူတစ်ပါးတို့၏ အားနည်းချက်များကို မဖော်နှင့်” ဆိုတဲ့ စကားမျိုးတွေ၊ “မိတ်ဆွေကောင်းများ၏အပြစ်များအပေါ် နှုတ်ဆိတ်နေပေးခြင်းသည် ကြာရှည်၍ ကောင်းမွန်သော ခင်မင်မှုဖြစ်စေ၏” ဆိုတာတွေ၊ “ပွင့်လင်းခြင်းသည် အခြားသူများကို စိတ်အနှောင့်အယှက်ဖြစ်စေသဖြင့် အခြားသူများ၏ခံစားချက်များ၊ ဆင်ခြင်တုံတရားများနှင့် သဟဇာတဖြစ်ရန် ကောင်းသောစကားများကို ပြောပါ” ဆိုတာတွေ၊ ပြီးတော့ “တစ်စုံတစ်ရာ မှားယွင်းသည်ကို သိသည့်အခါ၊ နည်းနည်းပြောသည်က ပိုကောင်း၏” ဆိုတာတွေက လောကီဆိုင်ရာ ဆက်ဆံမှုတွေအတွက် စာတန်ဆန်သော အတွေးအခေါ်တွေပဲ။ စာတန်က လူသားတွေထဲကို ဒီအတွေးအခေါ်တွေကို ထည့်သွင်းပေးပြီး လူ့အဖွဲ့အစည်းမှာ ခိုင်ခိုင်မာမာ ရပ်တည်ဖို့ဆိုရင် လူတွေနဲ့ ဆက်ဆံရေးကို ထိန်းသိမ်းရမယ်၊ အမြဲတမ်း သူများတွေအတွက် သိက္ခာဆည်ပေးရမယ်၊ ပရိယာယ်များပြီး လူတွေရဲ့အကြိုက်ကို လိုက်ရမယ်လို့ သူတို့ကို ယုံကြည်စေတယ်။ ဒီလိုမှမဟုတ်ရင် သူတို့ ဖယ်ကျဉ်ခံရလိမ့်မယ်။ လူတွေက သူများတွေနဲ့ ဆက်ဆံဖို့ ဒီလို လောကီဆိုင်ရာ ဆက်ဆံမှု အတွေးအခေါ်တွေအပေါ် မှီခိုတဲ့အခါမှာ သူတို့က တစ်ယောက်နဲ့တစ်ယောက် သံသယဝင်ပြီး ကာကွယ်နေကြတယ်။ သူတို့ စကားပြောတဲ့အခါ၊ ဒါမှမဟုတ် အလုပ်လုပ်တဲ့အခါမှာ သူများတွေရဲ့ လေသံနဲ့ အမူအရာကို အမြဲဖတ်တယ်၊ အပေါ်ယံမှာ တစ်မျိုးလုပ်ပြီး အတွင်းစိတ်အမှန်ကို ဖုံးကွယ်ထားတယ်။ သူတို့က ဘယ်တော့မှ ရိုးသားတဲ့ စကား၊ ဒါမှမဟုတ် စိတ်ရင်းမှန်တဲ့ စကားတွေကို မပြောဘဲ ပိုပိုပြီး သူတော်ကောင်းယေင်ဆောင်လာတယ်၊ ဆိုးညစ်လာတယ်၊ ဂုဏ်သိက္ခာ၊ ဒါမှမဟုတ် တည်ကြည်မှု မရှိဘဲ အသက်ရှင်ကြတယ်။ ကျွန်မက လျူရွှမ်ရဲ့ ပြဿနာတွေကို ထောက်ပြဖို့ အမြဲ ကြောက်ခဲ့တယ်။ ဒါက ဒီလို လောကီဆိုင်ရာ ဆက်ဆံမှုတွေအတွက် စာတန်ဆန်သော အတွေးအခေါ်တွေရဲ့ လွှမ်းမိုးမှုကို ကျွန်မ ခံခဲ့ရတာကြောင့် သက်သက်ပဲ။ လူတွေနဲ့ ဆက်ဆံရေးကောင်းတွေကို ထိန်းသိမ်းဖို့၊ သူတို့ကြားမှာ ကိုယ့်နေရာကို ခိုင်မြဲအောင်လုပ်ဖို့ဆိုရင် ကိုယ့်စကားနဲ့ အပြုအမူမှာ သတိထားရမယ်၊ သူများတွေ မကြိုက်တဲ့စကား ဘယ်တော့မှ မပြောရဘူး၊ သူတို့ရဲ့ ချို့ယွင်းချက်တွေနဲ့ အားနည်းချက်တွေကို ထောက်မပြရဘူးလို့ ကျွန်မ ယုံကြည်ခဲ့တယ်။ သူများတွေအတွက် သိက္ခာဆည်ပေးရမယ်လို့ ကျွန်မ ထင်ခဲ့တယ်။ ဒီလိုမှမဟုတ်ရင် သူတို့ကို စော်ကားမိပြီး ရန်သူတွေဖြစ်စေမှာပေါ့။ ဘုရားကို မယုံကြည်ခင်က ကျွန်မက လူတွေနဲ့ ဒီလိုပဲ ဆက်ဆံခဲ့တယ်။ အမြဲတမ်း သတိထားတယ်၊ သူများတွေရဲ့ လေသံနဲ့ အမူအရာတွေကို ဖတ်တယ်၊ ပြီးတော့ သူများတွေအပေါ် သံသယဝင်ပြီး သတိထား ကာကွယ်နေခဲ့တယ်။ ကျွန်မရဲ့ အရင်းနှီးဆုံး မိသားစု၊ ဒါမှမဟုတ် အကောင်းဆုံး မိတ်ဆွေတွေနဲ့ ဆိုရင်တောင် ကိုယ့်ကိုမကြိုက်မှာ၊ တစ်ယောက်တည်း ဖြစ်သွားမှာကို ကြောက်လို့ သူတို့ရဲ့ ပြဿနာတွေကို ကျွန်မ ထောက်မပြခဲ့ဘူး။ လူတွေက ကျွန်မကို ကောင်းတယ်လို့ ပြောခဲ့ပေမဲ့ ကျွန်မက တကယ်တော့ အရမ်းပင်ပန်းတဲ့ ဘဝကို ရှင်သန်နေခဲ့ရတာပါ။ ဘုရားကို ယုံကြည်ပြီးနောက်မှာလည်း ရိုးသားတဲ့ စိတ်နှလုံးမရှိဘဲ ဒီနည်းအတိုင်းပဲ ညီအစ်ကိုမောင်နှမတွေနဲ့ ဆက်ဆံခဲ့တယ်။ လျူရွှမ်ရဲ့ ပြဿနာတွေကို ကျွန်မ ရှင်းရှင်းလင်းလင်း မြင်ခဲ့ပေမဲ့ သူနဲ့ ကျွန်မရဲ့ ဆက်ဆံရေးကို ထိန်းသိမ်းဖို့အတွက် အဲဒါတွေကို သူ့ကို ဘယ်တော့မှ ထောက်မပြခဲ့ဘဲ ကိုယ့်ရဲ့ တကယ့်အတွေးတွေကို ကိုယ့်ဘာသာပဲ သိမ်းထားခဲ့တယ်။ အပေါ်ယံမှာတော့ သူနဲ့ အဆင်ပြေပြေ ဆက်ဆံခဲ့ပြီး ကျွန်မတို့ ပြောလို့မရတဲ့ အကြောင်းအရာ ဘာမှမရှိခဲ့ဘူး။ ဒီလို စာတန်ဆန်သော အတွေးအခေါ်တွေနဲ့ အသက်ရှင်ရင်း ကျွန်မက ဘယ်သူ့ကိုမှ မစော်ကားမိအောင် ကြိုးစားပြီး အလယ်အလတ်လမ်းစဉ်ကို လိုက်ခဲ့တယ်။ သူတို့နဲ့ ဆက်ဆံရာမှာ သူတို့ရဲ့ လေသံနဲ့ အမူအရာတွေကို အမြဲ ဖတ်ခဲ့တယ်။ ဒါက လျူရွှမ်ကို ထိခိုက်စေပြီး အလုပ်ကို နှောင့်နှေးစေခဲ့ရုံသာမက ကျွန်မကိုလည်း မွန်းကျပ်စေပြီး စိတ်ဆင်းရဲစေခဲ့တယ်။ နောက်ဆုံးမှာတော့ ဘုရားက ကျွန်မကို ပစ်ပယ်ပြီး ဖယ်ရှားရှင်းလင်းရုံပဲ ရှိတော့မှာပါ။ ဘုရားက ရိုးသားသောသူတွေကို ကြိုက်တယ်။ ကျွန်မတို့က သူများတွေနဲ့ ပွင့်ပွင့်လင်းလင်း၊ ရိုးရိုးသားသား ဆက်ဆံပြီး စိတ်နှလုံးကို တစ်ယောက်နဲ့တစ်ယောက် မျှဝေနိုင်ကြဖို့ ကိုယ်တော်က မျှော်လင့်တယ်။ သမ္မာတရားကို လိုက်စားသူတွေကလည်း ရိုးသားသောသူတွေနဲ့ ပေါင်းသင်းရတာကို ပိုကြိုက်ကြတယ်။ စာတန်ဆန်သော အတွေးအခေါ်တွေနဲ့ အသက်ရှင်တာက လူတွေနဲ့ ဆက်ဆံရေးကို ခဏတာ ထိန်းသိမ်းဖို့ ကူညီနိုင်ပေမဲ့ လုံးဝ ရေရှည်မခံပါဘူး။ နောက်ဆုံးမှာတော့ အဲဒီလိုလူတွေကို သမ္မာတရားကို လိုက်စားပြီး ချစ်မြတ်နိုးသူတွေက ပိုင်းခြားသိမြင်ပြီး ပယ်ရှားကြလိမ့်မယ်။ ဒီလို လောကီဆိုင်ရာ ဆက်ဆံမှု အတွေးအခေါ်တွေအပေါ် မှီခိုရင်းနဲ့ လျူရွှမ်နဲ့ ကျွန်မရဲ့ ဆက်ဆံရေးကို ထိန်းသိမ်းဖို့ ပျက်ကွက်ခဲ့ရုံသာမက သူ့ရဲ့ယုံကြည်မှုကိုလည်း ဆုံးရှုံးခဲ့တယ်။ သူက နောက်ဆုံးကျတော့ ကျွန်မကို လူ့အကြိုက်လိုက်သူလို့ ခေါ်ခဲ့ပြီး သူများတွေနဲ့ ဆက်ဆံရာမှာ ကျွန်မက ရိုးသားတဲ့ စိတ်နှလုံးမရှိဘူးလို့ ပြောခဲ့တယ်။ ဒါကို ပြန်သုံးသပ်ကြည့်တော့ ဒီလို စာတန်ဆန်သော အတွေးအခေါ်တွေကို လောကနဲ့ဆက်ဆံရာမှာ ကျွန်မရဲ့ နည်းလမ်းအဖြစ် လက်ခံကျင့်သုံးခဲ့တာ ဘယ်လောက် မိုက်မဲခဲ့သလဲဆိုတာ ကျွန်မ သဘောပေါက်ခဲ့တယ်။ ကျွန်မ စာတန်ရဲ့ ဖောက်ပြန်ပျက်စီးမှုကို ဘယ်လောက် နက်နက်ရှိုင်းရှိုင်း ခံခဲ့ရသလဲဆိုတာ မြင်တွေ့ခဲ့ပြီး ဘုရားသခင်ရဲ့ ကယ်တင်ခြင်းကို တကယ်လိုအပ်တယ်ဆိုတာ သဘောပေါက်ခဲ့တယ်။ ဒီလို တစ်ကိုယ်ကောင်းဆန်ပြီး လှည့်ဖြားတတ်တဲ့ ဘဝမျိုးနဲ့ အသက်ရှင်နေတာကို ရပ်ဖို့ ကျွန်မ ဆုံးဖြတ်ခဲ့တယ်။

နောက်ပိုင်းမှာ ကျွန်မ တွေးတောဆင်ခြင်လာတယ်။ သူများတွေနဲ့ ဘယ်လို အဆင်ပြေပြေ ဆက်ဆံသင့်သလဲ။ ဘုရားသခင်ရဲ့ ရည်ရွယ်ချက်နဲ့ ကိုက်ညီဖို့ ဘယ်လို ပြောဆို၊ ပြုမူသင့်သလဲ။ ဘုရားနှုတ်ကပတ်တော်တစ်ပိုဒ်ကို ကျွန်မ ဖတ်ခဲ့တယ်။ “လူတို့စကားနှင့် လုပ်ရပ်များ၏ အခြေခံပြုချက်သည် မည်သည့်အရာ ဖြစ်သင့်သနည်း။ ဘုရားသခင်၏ နှုတ်ကပတ်တော်များ ဖြစ်သည်။ သို့ဆိုလျှင် လူတို့၏ စကားနှင့် လုပ်ရပ်များအတွက် ဘုရားသခင်၏ သတ်မှတ်ချက်များနှင့် စံနှုန်းများမှာ အဘယ်နည်း။ (ထိုစကားနှင့် လုပ်ရပ်များသည် လူတို့အဖို့ အပြုသဘောဆောင်ရမည် ဖြစ်ပါသည်။) မှန်ပေသည်။ အခြေခံအကျဆုံး အချက်အနေဖြင့် သင်သည် အမှန်အတိုင်း ပြောရမည်၊ ရိုးသားစွာ ပြောဆိုရမည်၊ အခြားသူများကို အကျိုးပြုရမည် ဖြစ်သည်။ အနည်းဆုံးအနေဖြင့် သင်၏ စကားသည် လူတို့ကို တည်ဆောက်ပေးရမည်ဖြစ်ပြီး ၎င်းတို့ကို မလိမ်လည်ရ၊ သို့မဟုတ် မလှည့်စားရ၊ သို့မဟုတ် မသရော်ရ၊ သို့မဟုတ် ပြက်ရယ်မပြုရ၊ သို့မဟုတ် ရယ်သွမ်းမသွေးရ၊ သို့မဟုတ် ဘောင်မခတ်ရ၊ သို့မဟုတ် ၎င်းတို့၏ အားနည်းချက်များကို မဖော်ထုတ်ရ၊ သို့မဟုတ် ၎င်းတို့ကို မနာကျင်စေရပေ။ ဤသည်မှာ ပုံမှန် လူ့သဘာဝ၏ ဖော်ပြချက်ဖြစ်သည်။ လူ့သဘာဝ၏ သူတော်ကောင်းတရား ဖြစ်သည်။...အပြုသဘောဆောင်သော စကားကို မည်သို့ထုတ်ပြောသနည်း။ ယင်းမှာ အဓိကအားဖြင့် အားပေးခြင်း၊ ညွှန်ကြားပေးခြင်း၊ လမ်းပြခြင်း၊ တိုက်တွန်းခြင်း၊ သိနားလည်ပေးခြင်း၊ နှစ်သိမ့်ခြင်းတို့ ဖြစ်သည်။ ထို့အပြင် အချို့သော အထူးဖြစ်ရပ်များတွင် အခြားသူများအနေဖြင့် သမ္မာတရားနှင့်ဆိုင်သော အသိကို ရရှိကာ နောင်တရလိုစိတ် ရှိဖို့အလို့ငှာ သူတို့၏ အမှားများကို တိုက်ရိုက်ဖော်ထုတ်ပြီး ကိုင်တွယ်ဖြေရှင်းကာ ပြုပြင်ဖို့ လိုအပ်သည်။ ထိုအခါမှသာ မျှော်လင့်ထားသော အကျိုးကို ရရှိပေသည်။ ဤသို့ လက်တွေ့လုပ်ဆောင်ခြင်းနည်းလမ်းသည် လူတို့အတွက် အလွန်အကျိုးဖြစ်သည်။ ၎င်းတို့အတွက် တကယ့်အကူအညီဖြစ်ပြီး ၎င်းတို့အတွက် အပြုသဘောဆောင်၏၊ ဟုတ်သည် မဟုတ်လော။ ဥပမာအားဖြင့် သင်သည် အထူးပင် တစ်ဇွတ်ထိုးလုပ်တတ်ပြီး မာနထောင်လွှားသည် ဆိုကြပါစို့။ သင့်အနေဖြင့် ဤအရာကို လုံးဝ သတိမထားမိသော်လည်း သင်နှင့် အကျွမ်းဝင်သောသူ တစ်ယောက်သည် ဤပြဿနာကို သင့်အား တည့်တည့်ကြီး ပြောပြသည်။ သင်က ‘ငါတစ်ဇွတ်ထိုးလုပ်တတ်သလော။ မာနထောင်လွှားသလော။ အခြားမည်သူမျှ ငါ့ကို မပြောပြဝံ့ကြ။ သို့သော် သူကမူ ငါ့ကို နားလည်၏။ ဤစကားမျိုးကို သူပြောရက်ခြင်းက ဤအရာ တကယ်မှန်ကြောင်း ပြနေသည်။ ဤအရာကို အချိန်ခဏယူပြီး ငါသုံးသပ်ကြည့်ရမည်’ ဟူ၍ စဉ်းစားသည်။ ထို့နောက်တွင် ထိုသူကို သင်က ‘အခြားလူများသည် ကျွန်ုပ်ကို ကောင်းသည့်အရာများသာ ပြောကြ၏။ ချီးမွမ်းကြ၏။ မည်သူကမျှ ကျွန်ုပ်ကို စိတ်ထဲရှိသည့်အတိုင်း ဘွင်းဘွင်းရှင်းရှင်း မပြောဖူးပါ။ ကျွန်ုပ်၌ရှိသည့် ဤအားနည်းချက်များ၊ ပြဿနာများကို မည်သူမျှ မထောက်ပြဖူးပါ။ သင်တစ်ဦးတည်းကသာ ကျွန်ုပ်ကို ပြောပြနိုင်၏၊ စိတ်ထဲရှိသည့်အတိုင်း ဘွင်းဘွင်းရှင်းရှင်း ပြောနိုင်၏။ ဤသည်မှာ အင်မတန် ကောင်းပါသည်။ ကျွန်ုပ်အတွက် ကြီးကြီးမားမား အထောက်အကူဖြစ်ပါ၏’ ဟုပြောသည်ဆိုပါစို့။ ဤသည်မှာ ရင်းနှီးပွင့်လင်းစွာ ပြောဆိုခြင်းဖြစ်သည် မဟုတ်လော။ တဖြည်းဖြည်းချင်းဖြင့် အခြားလူသည် သူ၏ စိတ်တွင်ရှိသောအရာကို၊ သင်နှင့်ပတ်သက်သည့် သူ၏ အတွေးများကို၊ ဤကိစ္စနှင့်ပတ်သက်ပြီး သူ့တွင် အယူအဆများ၊ စိတ်ကူးများအပြင် အပျက်သဘောဆောင်မှုနှင့် အားနည်းချက်တို့ ရှိခဲ့ပုံနှင့်သက်ဆိုင်သည့် သူ၏ အတွေ့အကြုံများကို သင့်အား သိစေပြီး သမ္မာတရားကို ရှာဖွေခြင်းအားဖြင့် သူလွတ်မြောက်နိုင်သွားသည်။ ဤသည်မှာ ရင်းနှီးပွင့်လင်းစွာ ပြောဆိုခြင်းဖြစ်သည်။ ဤသည်မှာ ဝိညာဉ်ချင်း မိတ်သဟာယဖွဲ့မှု ဖြစ်သည်။ အနှစ်ချုပ်လျှင် စကားပြောဆိုခြင်းနောက်ကွယ်၌ရှိသော စည်းမျဉ်းမှာ အဘယ်နည်း။ ဤအရာဖြစ်သည်။ သင်၏ စိတ်နှလုံးတွင် ရှိသောအရာကို ပြောဆိုလော့။ သင်၏ တကယ့်အတွေ့အကြုံများနှင့် သင်အမှန်တကယ်ထင်မြင်သည့် အရာတို့ကို ပြောဆိုလော့။ ဤစကားများသည် လူတို့အတွက် အကျိုးအရှိဆုံးဖြစ်သည်။ လူတို့ကို ပံ့ပိုးပေးသည်။ လူတို့ကို ကူညီပေးသည်။ အပြုသဘောဆောင်သည်။” (နှုတ်ကပတ်တော်၊ အတွဲ (၆)၊ သမ္မာတရားကို လိုက်စားခြင်းနှင့် စပ်လျဉ်း၍၊ သမ္မာတရား လိုက်စားခြင်းဆိုသည်မှာ (၃)) ဘုရားနှုတ်ကပတ်တော်တွေကနေ ကျွန်မ နားလည်သွားတာက လူတွေနဲ့ ပုံမှန်ဆက်ဆံရေးတစ်ခု ထူထောင်ဖို့ဆိုရင် ဘုရားနှုတ်ကပတ်တော်ရဲ့ စည်းမျဉ်းတွေအတိုင်း သူများတွေကို ကျွန်မ ဆက်ဆံရမယ်။ တစ်စုံတစ်ယောက်က ဖောက်ပြန်ပျက်စီးမှုကို ထုတ်ဖော်တာ၊ အလုပ်ကို နှောင့်နှေးစေတာ၊ ဒါမှမဟုတ် စည်းမျဉ်းတွေကို ဆန့်ကျင်ပြီး လုပ်တာ မြင်တဲ့အခါ ချက်ချင်း ထောက်ပြသင့်တယ်။ ဒါက အလုပ်ရော၊ အဲဒီလူရဲ့ အသက်ဝင်ရောက်မှုအတွက်ပါ အကျိုးရှိစေမယ်။ ဒီနည်းလမ်းနဲ့ ကိုယ့်ကိုယ်ကိုယ် ကျင့်ကြံမှသာ ကျွန်မက စည်းမျဉ်းတွေကို စောင့်ထိန်းနိုင်ပြီး ပွင့်လင်းမှု၊ ရိုးသားမှုနဲ့ အသက်ရှင်နိုင်မယ်။ လူ့သဘာဝနဲ့ တရားမျှတစိတ်ရှိသူလည်း ဖြစ်နိုင်မယ်။ တစ်ခါတလေမှာ လူတွေက ချက်ချင်း လက်မခံနိုင်ပေမဲ့ သူတို့က သမ္မာတရားကို လိုက်စားရင် နောက်ပိုင်းမှာ သမ္မာတရားကို ရှာဖွေပြီး ကိုယ့်ကိုယ်ကိုယ် ပြန်သုံးသပ်ကြလိမ့်မယ်။ သူတို့က ရွံရှာတာ၊ ငြင်းပယ်တာမျိုး မခံစားရဘဲ ကျွန်မရဲ့အကူအညီအတွက် ကျေးဇူးတင်ကြလိမ့်မယ်။ သူတို့က သမ္မာတရားကို မလိုက်စားရင်၊ ဒါမှမဟုတ် သမ္မာတရားကို လက်မခံရင် အဲဒါကလည်း သူတို့ကိုယ်သူတို့ ထုတ်ဖော်မှာဖြစ်ပြီး ကျွန်မကိုလည်း ပိုင်းခြားသိမြင်မှုတချို့ ရှိလာအောင် ကူညီပေးပါလိမ့်မယ်။ ကျွန်မက ကိုယ့်သိက္ခာကို ကိုယ်ဆည်ဖို့အပေါ်မှာပဲ အာရုံစိုက်မနေသင့်ဘူး။ ကျွန်မ ဂရုစိုက်သင့်တာက ကျွန်မအပေါ်ထားတဲ့ ဘုရားရဲ့သဘောထား၊ ကျွန်မရဲ့ အပြုအမူတွေက ဘုရားကို စိတ်ကျေနပ်စေသလား၊ ကျွန်မက စည်းမျဉ်းတွေကို လိုက်နာပြီး ဘုရားနှုတ်ကပတ်တော်ထဲက သမ္မာတရားအတိုင်း လူတွေကို ဆက်ဆံသလားဆိုတာပဲ။ အတိတ်ကို ပြန်သုံးသပ်ကြည့်ရင် ကျွန်မက လောကီဆိုင်ရာ ဆက်ဆံမှု အတွေးအခေါ်တွေအပေါ် အခြေခံပြီး လူတွေနဲ့ အမြဲဆက်ဆံခဲ့တယ်။ ကျွန်မရဲ့ စကားတွေ၊ အပြုအမူတွေက အမြဲတမ်း ဘောင်ခတ်ခံခဲ့ရပြီး သက်သာရာမရဘဲ ဖိနှိပ်ခံနေရတဲ့ အခြေအနေမှာ အသက်ရှင်ခဲ့ရတယ်။ ဒီနည်းလမ်းနဲ့ဆိုရင် ကျွန်မက သမ္မာတရားကို ဘယ်တော့မှ မရရှိနိုင်ဘဲ စာတန်ရဲ့ ချည်နှောင်မှု၊ ကျွန်ပြုမှုကို အမြဲခံနေရတဲ့သူ ဖြစ်လိမ့်မယ်။ ဒီအချိန်မှာ ကျွန်မ နားလည်သွားတာက ဘုရားနှုတ်ကပတ်တော်အတိုင်း လူတွေကို ဆက်ဆံသင့်တယ်၊ လူတွေနဲ့ ပွင့်ပွင့်လင်းလင်း၊ ရိုးရိုးသားသား ဆက်ဆံသင့်တယ်၊ စိတ်ထဲကလာတဲ့ စကားကို ပြောပြီး သူများတွေအတွက် အကျိုးရှိတဲ့ စကားကို ပြောသင့်တယ်ဆိုတာပဲ။ ကျွန်မက သူများကို ပြုပြင်တာ၊ အပြစ်တင်ဆုံးမတာ၊ ဒါမှမဟုတ် သမ္မာတရားကို သူတို့နဲ့ အေးအေးဆေးဆေး မိတ်သဟာယဖွဲ့တာပဲဖြစ်ဖြစ်၊ သူတို့ကို ကျွန်မရဲ့ စိတ်ရင်းမှန်နဲ့ ချဉ်းကပ်သင့်တယ်။ ဒီနည်းနဲ့ဆိုရင် သူများတွေနဲ့ ကျွန်မရဲ့ ဆက်ဆံရေးတွေက ပုံမှန်ဖြစ်ပြီး ကြာရှည်ခံနိုင်မယ်။ ကျွန်မလည်း ဖိနှိပ်မှုကနေ လွတ်မြောက်ပြီး လွတ်လပ်မှု၊ လွတ်မြောက်မှုကို ရရှိနိုင်မယ်။

နောက်ပိုင်းမှာ ကျွန်မတို့ ဗီဒီယိုတွေထဲက ပြဿနာတချို့ကို ဆွေးနွေးကြတဲ့အခါမှာ လျူရွှမ်က သူများတွေရဲ့ ပြဿနာတွေကို ထောက်ပြတိုင်း သူ့အမြင်တွေကိုပဲ ပြောလေ့ရှိတယ်။ သူက စည်းမျဉ်းတွေအကြောင်း မိတ်သဟာယဖွဲ့တာ ရှားတယ်။ စုဝေးပွဲတွေအတွင်းမှာ သူထုတ်ဖော်ပြခဲ့တဲ့ ဖောက်ပြန်ပျက်စီးမှုတွေအကြောင်းကို သူက ဖွင့်ဟပြောပြတာ နည်းတယ်။ သူ့အလုပ်မှာ သူကြုံတွေ့ခဲ့ရတဲ့ ပြဿနာတွေအကြောင်းကိုလည်း ကျွန်မတို့ဆီ ဖွင့်ဟပြောပြတာ နည်းတယ်။ ဒါဟာ သူများတွေက ကိုယ်တိုင်သတိမထားမိလိုက်ဘဲ သူက ဝိညာဉ်ရင့်ကျက်မှုနဲ့ အလုပ်လုပ်နိုင်စွမ်းရှိတယ်လို့ ထင်သွားစေပြီး သူ့ကို အထင်ကြီးလေးစားလာစေတယ်။ ကျွန်မက ဒါက လူတိုင်းအတွက် အန္တရာယ်ရှိတယ်လို့ ခံစားမိပြီး သူ့ကို ထောက်ပြချင်ခဲ့တယ်။ ဒါပေမဲ့ ကျွန်မ ပြောတော့မယ့်အချိန်မှာ တွန့်ဆုတ်ပြီး တွေးမိတယ်။ “ငါ ဒါကို ပြောလိုက်ရင် လျူရွှမ် စိတ်ဆိုးမလား။ ဒါက ငါတို့ကြားက ဆက်ဆံရေးအပေါ် သက်ရောက်မှုရှိရင် နောင်မှာ ငါတို့ ဆက်ဆံရေး ခက်ခဲသွားစေမလား” လို့ပေါ့။ သူများတွေနဲ့ ဆက်ဆံရေးကို ထိန်းသိမ်းဖို့ ကျွန်မက လူ့အကြိုက်လိုက်သူ ပြန်ဖြစ်တော့မယ်ဆိုတာ သဘောပေါက်ခဲ့တယ်။ အဲဒါနဲ့ ဘုရားဆီ ချက်ချင်း ဆုတောင်းပြီး သမ္မာတရားကို လက်တွေ့လုပ်ဆောင်ပြီး ကိုယ့်ကိုယ်ကိုယ် ပုန်ကန်ဖို့ ခွန်အားကို တောင်းလျှောက်ခဲ့တယ်။ ဆုတောင်းပြီးနောက်မှာ ဘုရားနှုတ်ကပတ်တော်တစ်ပိုဒ်ကို ကျွန်မ သတိရခဲ့တယ်။ “လူတိုင်းက အယူဝါဒဆိုင်ရာ၊ သို့မဟုတ် သီအိုရီဆိုင်ရာ အသိအမြင်များကို ပြောကြသော်လည်း တကယ့်အတွေ့အကြုံများမှ ၎င်းတို့ ရရှိသော အသိပညာအကြောင်း လုံးဝ မပြောလျှင်၊ သမ္မာတရားကို မိတ်သဟာယဖွဲ့သောအခါ ၎င်းတို့သည် ၎င်းတို့၏ ကိုယ်ရေးကိုယ်တာ ဘဝများ၊ ၎င်းတို့၏ လက်တွေ့ဘဝ ပြဿနာများနှင့် ၎င်းတို့၏ ကိုယ်ပိုင်အတွင်းရေးများ ပြောခြင်းကို ရှောင်လျှင် စစ်မှန်သော မိတ်သဟာယက မည်သို့ ဖြစ်ပေါ်နိုင်မည်နည်း။ စစ်မှန်သော ယုံကြည်မှု အဘယ်သို့ ရှိနိုင်မည်နည်း။...လူတို့သည် နှုတ်ဖြင့်ဖြစ်စေ၊ ဝိညာဉ်ရေးရာဖြင့်ဖြစ်စေ ပြောဆိုဆက်ဆံခြင်း မရှိပါက၊ ၎င်းတို့ကြားတွင် ရင်းနှီးမှုရဖို့ ဖြစ်နိုင်ချေ မရှိပေ။ ပြီးလျှင် ၎င်းတို့သည် အချင်းချင်းအတွက် မထောက်ပံ့နိုင်သကဲ့သို့ မကူညီနိုင်ပေ။ သင်သည် ဤအရာကို တွေ့ကြုံပြီးဖြစ်သည်မဟုတ်လော။ သင်၏ မိတ်ဆွေက သူတွေးနေသည့်အရာအားလုံးနှင့် သူခံစားနေရသည့် မည်သည့်အရာမဆို သို့မဟုတ် သူထားရှိသည့် မည်သည့်ပျော်ရွှင်မှုကိုမဆို သင့်အား ဖွင့်ဟလျက်၊ အရာအားလုံးကို ယုံကြည်စွာ ရင်ဖွင့်ပြောပြပါက၊ သင်သည် အထူးပင် သူနှင့်ရင်းနှီးသည်ဟု ခံစားရမည်မဟုတ်သလော။ ဤအရာများကို သင့်အား သူပြောဖို့ လိုလားနေသည့်အကြောင်းအရင်းမှာ သင်က သူ့ကိုလည်း သင်၏အတွင်းကျကျ အတွေးများကို ယုံကြည်စွာ ပြောပြထားပြီးဖြစ်သောကြောင့် ဖြစ်သည်။ သင်တို့သည် အထူးပင်ရင်းနှီးပြီး ဤအရာကြောင့် သင်တို့ အချင်းချင်း အလွန်သင့်မြတ်ကာ အချင်းချင်း ကူညီနိုင်ကြလေသည်။ အသင်းတော်ရှိ ညီအစ်ကိုမောင်နှမများအကြား ဤမိတ်သဟာယဖွဲ့ခြင်းမျိုးနှင့် အပြန်အလှန်ပြုခြင်းမျိုး မရှိလျှင် ၎င်းတို့သည် သဟဇာတဖြစ်စွာ အဆင်ပြေနိုင်မည်မဟုတ်သကဲ့သို့၊ ၎င်းတို့၏ တာဝန်များကို ထမ်းဆောင်စဉ်တွင် အတူတကွ ကောင်းစွာ အလုပ်လုပ်ဖို့ မဖြစ်နိုင်သည်ကို တွေ့ရှိရမည် ဖြစ်သည်။ ထို့ကြောင့် သမ္မာတရားကို မိတ်သဟာယဖွဲ့ခြင်းသည် ဝိညာဉ်ရေးရာ ပြောဆိုဆက်ဆံမှုနှင့် ပွင့်လင်းစွာ ပြောဆိုနိုင်သည့် အရည်အချင်း လိုအပ်သည်။ ဤသည်မှာ ရိုးသားသူတစ်ယောက်ဖြစ်ရန် လူတစ်ယောက်တွင်ရှိရမည့် စည်းမျဉ်းတစ်ခုဖြစ်သည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ရိုးသားသောလူတစ်ဦးဖြစ်ခြင်း၏ အခြေခံအကျဆုံး လက်တွေ့လုပ်ဆောင်ချက်) ဘုရားနှုတ်ကပတ်တော်တွေက ကျွန်မကို နိုးထစေခဲ့တယ်။ လောကီဆိုင်ရာ ဆက်ဆံမှု အတွေးအခေါ်တွေအပေါ် အခြေခံပြီး လျူရွှမ်နဲ့ ဆက်ဆံခဲ့ခြင်းအားဖြင့် သူ့အပေါ် ကျွန်မရဲ့ စိတ်နှလုံးကို ဘယ်တော့မှ အမှန်တကယ် မဖွင့်ဟခဲ့တာ၊ သူ့ကို မကူညီခဲ့တာကို ပြန်စဉ်းစားမိတယ်။ သူ့ပြဿနာတွေကို မိတ်သဟာယဖွဲ့တာ၊ ဒါမှမဟုတ် ထောက်ပြတာမျိုး ဘယ်တော့မှ မလုပ်ခဲ့ဘဲ၊ သူ့ဆီ ကျွန်မ ယူဆောင်လာခဲ့တာက လှည့်ဖြားမှုနဲ့ နာကျင်မှုပဲ။ ဒီလိုနဲ့ လူတွေက ကျွန်မကို မနှစ်သက်ဘဲ ဘုရားက ကျွန်မကို စက်ဆုပ်ရွံရှာခဲ့တယ်။ ကျွန်မက တစ်ကိုယ်ကောင်းဆန်ပြီး လှည့်ဖြားတတ်တဲ့ လူ့အကြိုက်လိုက်သူအဖြစ် ဆက်မနေနိုင်တော့ဘူး၊ ဘုရားနှုတ်ကပတ်တော်အတိုင်း ရိုးသားသောသူဖြစ်ရမယ်၊ ကျွန်မ မြင်ခဲ့တဲ့ ပြဿနာတွေအကြောင်းကို ထုတ်ပြောရမယ်ဆိုတာ သဘောပေါက်ခဲ့တယ်။ နောက်တစ်နေ့ ကျွန်မတို့ အခြေအနေတွေကို ဆက်သွယ်ပြောဆိုကြတဲ့အခါ လျူရွှမ်ကို သူ့ရဲ့ ဖောက်ပြန်ပျက်စီးမှုတွေအကြောင်း ဘယ်တော့မှ မဖွင့်ဟခဲ့တာ၊ ကျွန်မတို့ တာဝန်တွေမှာ လူတိုင်းကို စည်းမျဉ်းတွေထဲကို လမ်းညွှန်ပေးဖို့ အာရုံမစိုက်ခဲ့တာ၊ ဒါက သူများတွေကို သူ့ကို အထင်ကြီးလေးစားလာစေဖို့ လွယ်ကူစေနိုင်တာတွေကို ကျွန်မ ထောက်ပြခဲ့တယ်။ တစ်ချိန်တည်းမှာပဲ ဒီလို တာဝန်တွေထမ်းဆောင်တာက လျှောက်လှမ်းဖို့ မှန်ကန်တဲ့လမ်းကြောင်းမဟုတ်ဘူးလို့ သူ့ကို ကျွန်မ သတိပေးခဲ့တယ်။ နားထောင်ပြီးတဲ့အခါ လျူရွှမ်က သူ့ပြဿနာရဲ့ လေးနက်မှုကို သဘောပေါက်ခဲ့ပြီး သမ္မာတရားကို ရှာဖွေပြီး ကိုယ့်ကိုယ်ကိုယ် ပြန်သုံးသပ်ဖို့ စိတ်ဆန္ဒရှိခဲ့တယ်။ နောက်ပိုင်းမှာ လျူရွှမ်က ဒီအတွေ့အကြုံကနေ သင်ခန်းစာရခဲ့တယ်။ သူက ကျွန်မတို့နဲ့ စည်းမျဉ်းတွေကို ဆက်သွယ်ပြောဆိုဖို့ ပိုအာရုံစိုက်လာခဲ့ပြီး သူ့ရဲ့ ဖောက်ပြန်ပျက်စီးမှုတွေအကြောင်း ခဏခဏ ဖွင့်ဟပြောပြခဲ့တယ်။ ကျွန်မတို့ ဆက်ဆံရေးက ဒါကြောင့် မပျက်စီးခဲ့ဘူး။ အဲဒီအစား တစ်ယောက်နဲ့တစ်ယောက် ပိုပြီး ရင်းနှီးလာခဲ့တယ်။ တစ်ခါတလေမှာ ကျွန်မရဲ့ ကိုယ်ပိုင်အခြေအနေကို ထွင်းဖောက် မမြင်နိုင်ခဲ့တဲ့အခါ လျူရွှမ်နဲ့ အဲဒါကို ဆက်သွယ်ပြောဆိုတာက ကိုယ့်ကိုယ်ကိုယ် နားလည်မှုတချို့ ရရှိဖို့ အထောက်အကူဖြစ်ခဲ့တယ်။ ဘုရားနှုတ်ကပတ်တော်အတိုင်း လူတွေနဲ့ အဆင်ပြေပြေ ဆက်ဆံပြီး သူများတွေကို ကိုယ့်စိတ်နှလုံး ဖွင့်ဟတာက သူများတွေကို ကူညီပေးရုံသာမက ကျွန်မကိုလည်း အကျိုးပြုခဲ့တယ်လို့ တကယ်ကို ခံစားမိခဲ့တယ်။ အဲဒီအချိန်အတောအတွင်းမှာ ကျွန်မတို့က အသက်ဝင်ရောက်မှုရော၊ နည်းပညာပိုင်း ကျွမ်းကျင်မှုမှာပါ တိုးတက်မှုတွေ ရှိခဲ့တယ်။ ကျွန်မတို့ တာဝန်တွေရဲ့ ထိရောက်မှုလည်း တိုးတက်ခဲ့ပြီး ဘုရားရဲ့ လမ်းပြမှုကို အမှန်တကယ် ခံစားခဲ့ရတယ်။ အတိတ်ကို ပြန်သုံးသပ်ကြည့်ရင် လောကီဆိုင်ရာ ဆက်ဆံမှု အတွေးအခေါ်တွေအပေါ် အခြေခံပြီး လျူရွှမ်နဲ့ အဆင်ပြေပြေ ဆက်ဆံခဲ့တာက ကျွန်မဘဝကို အရမ်းနာကျင်ပြီး ပင်ပန်းစေခဲ့တယ်။ အသင်းတော်အလုပ်ကို ထိန်းသိမ်းဖို့ ကိုယ့်တာဝန်တွေကိုလည်း ကျွန်မ ဖြည့်ဆည်းမပေးခဲ့ဘူး။ အဲဒါကို အခုအချိန်နဲ့ နှိုင်းယှဉ်ကြည့်ရင် ဘုရားနှုတ်ကပတ်တော်အတိုင်း ရိုးသားသောသူဖြစ်ပြီး ကိုယ့်စိတ်နှလုံးထဲကနေ ပြောတဲ့အခါ ဘုရားရဲ့ လမ်းပြမှုကို ခံစားရပြီး ကိုယ့်စိတ်နှလုံးထဲမှာ စိတ်သက်သာမှုနဲ့ လွတ်မြောက်မှုကို ခံစားရတယ်။ ပြောပြဖို့ခက်တဲ့ ချိုမြိန်မှုနဲ့ ပျော်ရွှင်မှု ရှိတယ်။ ကျွန်မ နောက်ထပ် နားလည်တာကလည်း ညီအစ်ကိုမောင်နှမတွေကြားက ပုံမှန်ဆက်ဆံရေးတွေက သံသယစိတ်တွေ၊ အတားအဆီးတွေ မရှိသင့်ဘူး။ ကျွန်မတို့က ရိုးသားမှုနဲ့ တစ်ယောက်ကိုတစ်ယောက် ဆက်ဆံသင့်ပြီး အသက်ဝင်ရောက်မှုနဲ့ တာဝန်တွေမှာ တစ်ယောက်ကိုတစ်ယောက် ကူညီ၊ ထောက်ပံ့ပေးသင့်တယ်။ ဒါက သူများတွေရော၊ ကျွန်မတို့ရော၊ အသင်းတော်အလုပ်အတွက်ပါ အကျိုးရှိတယ်။ သူများတွေနဲ့ ဘယ်လို အဆင်ပြေပြေ ဆက်ဆံရမလဲဆိုတာ ကျွန်မကို သင်ပေးခဲ့တာက ဘုရားနှုတ်ကပတ်တော်ဖြစ်ပြီး ကျွန်မ စိတ်နှလုံးအတွင်းထဲကနေ ဘုရားကို တကယ် ကျေးဇူးတင်ပါတယ်။